"Удмуртская правда", "Удмурт дунне", "Известия Удмуртской Республики" газетъёслэн редколлегиосазы пырись муртъёс сярысь Удмурт Республикаысь Правительстволэн Постановлениез 1997 ар 15 сентябрь Ижевск город � 846 "Удмуртская правда", "Удмурт дунне", "Известия Удмуртской Республики" газетъёсысь редакциослэн уставъёссыя, кудъёсыз юнматэмын Удмурт Республикаысь Кун Кенешлэн Президиумезлэн но Правительстволэн 1996-тӥ арын 10-тӥ сентябре кутэм 238/616 номеро постановлениенызы, Удмурт Республикаысь Правительство пуктэ: Газетъёслэн редколлегиосазы пыртоно: "Удмурт дунне" М. А. Григорьевез - Удмурт Республикаысь Правительстволэн аппаратэныз кивалтӥсез А. Н. Скобкарёвез - Удмурт Республикаысь Правительстволэн аппаратысьтыз улосвылъёсын но интыысь аскивалтонъя ёзъёсын кусып возёнъя управленилэсь кивалтӥсьсэ "Удмуртская правда" Е. М. Аверьяновез - Удмурт Республикаысь экономикая министрез Л. А. Поповаез - Удмурт Республикаысь Правительстволэн аппаратысьтыз иворъёсъя но йылпумъянъёс лэсьтонъя управленилэн йылпумъянъёс лэсьтонъя отделэныз кивалтӥсез "Известия Удмуртской Республики" В. И. Долговез - Удмурт Республикаысь промышленностья министрез А. В. Хайдаровез - Удмурт Республикаысь Правительстволэн аппаратысьтыз иворъёсъя но йылпумъянъёс лэсьтонъя управленилэн иворъёсты люканъя отделэныз кивалтӥсез. Удмурт Республикаысь Правительстволэн Тӧроез П. Н. ВЕРШИНИН. ОСКОН Инмар кыл кужмо Инмарлы оскись удмуртъёс понна таиз ар паймымон. Но жаляса верано луэ: калык ас историзэ уг тоды. Соин ик азьпалан дунъяно сӥё-дано нуналъёсмы но син шоры йӧтытэк, нокызьы но пусйытэк , оло, кыльысалзы. Вераськон мынэ таӵе учыръёс сярысь: туэ 440 ар тырмиз удмуртъёслэн христиан осконэ потэмзы дырысен (та сярысь "Удмурт дунне" пичияк статья печатлаз 25-тӥ тулыспалтолэзе). 1847-тӥ арын Казаньын потӥзы удмурт кылын нырысетӥ книгаос - евангелиос. Матфейлэн Ӟеч Иворез (Евангелиез) гожтэмын вал Сарапул уездын улӥсь удмуртъёс понна, соослэсь вераськон кылзэс лыдэ басьтыса. Но уноез кылъёс малы ке но тросгес укшало Елабуга уездын улӥсь, лымшор удмуртъёслэн кылъёссылы. Кылсярысь, Шаркан, Завьялово. Якшур-Бодья котырын нокин но уг шуы чукындырыны (крестить карыны). Тазьы шуо Грах, Алнаш палъёс. Берыктон бордын тыршись муртъёс сюлмаськиллям, дыр, мукет уездъёсын улӥсь удмуртъёс но мукет диалектъёсысь но кылъёсты кутылыны мед валалозы шуыса. Глазов уездын улӥсь удмуртъёс понна берыктэмын вал Матфейлэн но Марклэн Ӟеч иворзы. Таяз учыре но берыктӥсьёс уй пал ёросъёсысь удмуртъёслэн вераськетсы вылэ гинэ уг пыкисько, соос паськыт куто шор ёросъёсысь, ӧжытгес лымшор удмуртъёслэсь вераськон кылзэс но. Удмурт кылын книга поттонлэн кутсконаз ик вал ни, шӧдске, быдэс удмурт калыклы валамон гожтэт кылдытон пумысь сюлмаськон. Берыктон - капчи уж ӧвӧл. Уката ик - вӧсяськон книгаосты. Асьме доры Христос Инмарлы оскон ӟучъёс пыр вуиз, нош ӟучъёс доры - грекъёслэсь (эллинъёслэсь). Соос вашкала дауръёсы тужгес азинскем калык вал. Ки улазы возизы Азилэсь но Европалэсь бадӟым люкетсэ. Иисус Христос улон вакытэ вань азинскем дунне, соос пӧлын ик еврейёс но, верасько вал грек (эллин) кылын. Библилэсь Выль Сӥзён люкетсэ но еврей калык пӧлысь потэм апостолъёс грек кылын гожтӥзы. Крашинэ потэмзы бере, славянъёслэн кылазы берыктэмын вал Библилэн бадӟым люкетэз. Озьы ик ачиз вӧсяськон но. Славянъёслэн-язычникъёслэн кылазы ӧй вал тросэз кулэ кылъёс-терминъёс, соин ик соос асэстоно луизы грек кылысь (грек кыл пыр вуэм мукет калыкъёслэсь, уката ик - еврейёслэсь, арамейёслэсь кылъёссэс). Кылсярысь, агапа, ангел, акафист, алавастр, аллилуйя, алфавит, амвон, аминь, анафема, антифон, антихрист, апокриф, апостол, архангел, артос, архиерей, архиескоп но трос-трос мукетъёсыз. Вань та кылъёсты, валанъёсты крашинэ потэм удмуртъёслы но валамон карыны кулэ вал. Та удысысь берыктӥсьёс трос гинэ сюлмаськиллям огшоры калык сярысь. Кылсярысь, ангел кылэз берыкто кылчин (сарапул палъёслы), воршуд (глаз палъёслы) шуыса. Кыказ но евангелиосын юн шӧдӥське ӟуч кыллэн кужымез. Но та ведь кутсконэз вал, нош кутскон котьку но секыт. Берыктон бордын доцентъёс, профессоръёс али кадь ӧз ужалэ. Берыктӥсьёс пӧлын тросгес вал удмурт кылэз тодӥсь ӟуч священникъёс, соослы юрттӥськизы дышетскем удмуртъёс. Кылсярысь, узыр вузчи-купец И. Волков. Со вакытэ удмурт кыллэн научной грамматикаез но гожтэмын ӧй вал. Таос нырысетӥосыз удмурт книгаос вал. Мур-мур учконо ке, та ужез быдэстӥсьёс зэмос подвиг лэсьтӥзы. Угось та книгаос вылэ пыкиськыса, удмурт кылтодон наука азинскыны кутскиз: соос луизы удмурт литература понна зэмос инъет. Нош дышетскымтэ удмурт калык, черкын удмурт кылын чирдыны кутскемзэс кылыса, куараен, пе, бӧрдэ вал. Макем бадӟым, быдӟым уго Инмар кыллэн кужымез. Туэ та книгаослэн потэмзы дырысен 150 ар тырмиз. Нош берыктон, дасян бордын тыршизы ньыльдон арлэсь но кема: азьвыл пӧртэм могӟетъёс вал. Книгаос вылэ пыкиськыса, 1851-тӥ арын эстон академик Ф. И. Видеман немец кылын печатлаз удмурт кыллэсь научной грамматиказэ. Бӧрысь та текстъёсты поттӥзы на Лондонын но Гельсингфорсын (Хельсинкиын). Мар шуод на - вӧсяськон книгаос удмурт калыкез югдытэм сяна, соос пыр удмурт кыл, калык сярысь тодыны кутскизы Европаысь азинскем кунъёсын но. Кызьы Инмарлы тау уд кары асьме калыклы югдытӥсь книгаоссэ сётэмез понна! Та сӥё-дано учырез пусъён вылысь, Удмурт Епархилэн тыршеменыз , 29-тӥ сентябре ӝытазе 7 часын ортчоз удмурт книгаосты сӥлы карон ӝыт. Отчы Инмарлы оскисьёс, священникъёс, учёнойёс, журналистъёс люкаськозы - ваньмыз, кинлы дуно удмурт калыклэн культураез, кылыз, азинскон сюресэз. Эшшо но вань на та сӥё-дано ӝытэз ортчытонлэн мугез: туэ, сентябрь толэзе, удмурт кылын нырысьсэ потӥз Библилэн тужгес дуно, дано, всяськонын ӵем кутӥськись люкетэз - Выль Сӥзён (ӟуч сямен - Новый Завет). Татчы пыро ньыль евангелие, апостолъёслэн ужъёссы, Иаков, Пётр, Иоанн, Павел апостолъёслэн ыстэм гожтэтъёссы но Апокалипсис (Усьтӥськон). Быдӟалаез - 780 страница, кие кутымон, чебер печатламын. Та книгаез удмурт калыклы кузьмало Финляндиысь христианъёс. Вань черкъёс, пӧртэм миссионер огазеяськонъёс люказы коньдон, печатлан понна гинэ сётӥзы 100 миллион манет. Озьы тыршо асьмелэн ӵыжы-выжыосмы, удмурт калыкез Инмар кылэн тодматон вылысь. Та секыт аръёсы, соос ке ӧй юрттысалзы, туж шуг луысал та дуно ужез поттыны. Ӟеч лэсьтӥсьёслы, Инмаре, ӟеч каро. Та празднике лыкто Суоми кунысь, Швециысь куноос. Соос пӧлын ик асьмелэн гажано сузэрмы Марья Картано. Со луэ та ужлэн богословияя редакторез. Куноосты пумитан но асьме шаерен тодматон понна, нимысьтыз программа дасямын. 28-тӥ сентябре, арня нуналэ, лыктэмъёс калыкен пумиськозы Якшур-Бодьялась черкын, солы книгаос кузьмалозы. Отысен Сосновка (Бӧнял), Шаркан пыр вуозы Воткинске. П. И. Чайковскийлэн музеяз пумиськозы "Удмурт кенешлэн" татысь адямиосыныз. 30-тӥ сентябре бадӟым ужрад луоз удмуртлыкез утись, вӧсяськисьёсын узыр Пичи Пургалан. Пумиськонэ ӧтемын луозы та ёросысь ваньмыз мылкыд карисьёс. Куноос озьы ик вуылозы Удмурт кун университетэ, татысь удмурт кылтодонъя факультетын дышетскисьёс доры, краеведениея музее. Национальной библиотека дася удмурт кылын потэм вӧсяськон книгаосты возьматон (выставка). Гажано агай-вынъёс, сузэръёс! Эн вунэтэ 29-тӥ сентябре ӝытазе 7 часын Удмурт госфилармонилэн юртаз вуылыны, асьме калыклэн ортчем сюресэныз, туннэ нуналэныз пумиськыны. Вань мылкыд карисьёслы кузьмамын луоз Выль Сӥзён. Витиськомы. Диакон Михаил АТАМАНОВ, Ижевск - Удмурт епархиысь референт. Люкаськылӥзы нырысьсэ Кылем субботае элькунысьтымы пичи ужбергатӥсьёс нырысьсэ огазе люкаськылӥзы Ижевскысь В. Г. Короленко нимо театре. Та ужрадэз сӥё-дано ортчытӥз "КАПИК" театральной огазеяськон. Отын ортчытэмын "Арлэн пичи ужбергатӥсез" конкурс, лотерея, аукционъёс, пӧртэм шудонъёс но мукет. Пичи ужбергатӥсьёсты ӟечкылазы но конкурсын вормисьёслы дипломъёс но синпель кузьымъёс сётӥзы Кун Кенешлэн Тӧроез Александр Волков, Правительстволэн Тӧроезлэн нырысетӥ воштӥсез Александр Злобин, Россиысь Президентлэн Удмуртиысь адямиез Виктор Балакин но Ижысь мэрлэн воштӥсез Сергей Протозанов. Соос мылкыд каризы таӵе ужрадэз арлы быдэ ортчытъяны. Г. ВАСИЛЬЕВ. Ужбергатӥсь Иван Шутов кужымзэ-быгатэмзэ возьматэ - гираез арбузэз кадь ӝутъя. Конкурсын вормисьёслы кузьымъёс. Фотоосыз Н. ГЛУХОВЛЭН. МЫНЭ ГАЗЕТЪЁСЛЫ ГОЖТӤСЬКОН Журналистъёс - районъёсын Валлян, 23 сентябре, шаерысьтымы кун газетъёсысь ("Удмуртская правда", "Удмурт дунне" но "Известия Удмуртской Республики") журналистъёс но Ппечатья но иворъёсъя министерствоысь кивалтисьёс куинь районъёсы ыстазы. Соос Пичи Пурга, Можга но Кизнер районъёсын пыр-поч тодматскизы вуоно арлы та газетъёслы гожтӥськонлэн мынэменыз. Котькуд раойнын ортчытэмын кенешъёс. Отчы ветлӥзы интоысысь администрациослэн, предприятиослэн, общественной организациослэн кивалтисьёссы но газет вӧлдонын ужасьёс. Кизнер районын таӵӰ пумиськон ортчытӥз печатья но иворъёсъя министрлэн нырысетӥ воштӥсез Владимир Злобин. Пайдаё вераськон вал. Но соин ӵош ик вераны кулэ, районын кун газетъёслы гожтӥськонъёс вань луонлыкъёс уг кутӥсько на. "Удмуртская правда" но "Удмурт дунне" газетъёслы гожтӥстькон урод уг мыны, нош озы шуыны уг луы, "Известия Удмуртской Республики" сярысь. Пумиськонын умоесь дэмланъёс сётэмын вал газетъёслэсь пуштроссэс узырмытон но туала улонэз мургес возьматон ласянь. Кылсярысь, районысь удмурт национальной центрлэн кивалтӥсез Елизавета Петрова "Удмурт дунне" газетлы ӵектӥз, тросгес, пе, сётъялэ вал политикаен но социально-экономической ужпумъёсын герӟаськем материалъёс. Таяз учыре но кизнеръёслэн кемалась сюлэм висёнзы сярысь вераськон ӝутскиз. Люкаськемъёс меӵак шуизы, ку, пе, ми удмурт телевидениысь передачаоссэ учком. Милемлы оло Татарстанэ ыстоно ни. Казаньлэсь передачаоссэ нуналлы быдэ адӟиськом. Кизнеръёслэн куронзы туж шонер. Со сярысь кемалась вераськон мынэ, нош уробо интыысьтыз уг вырӟы. Республика передатчик пуктыны 230 миллион манет уксё уг шедьты. Правительстволэн Тӧроез Павел Вершинин районэ ветлыкуз кыл сётэм юрттыны, та ужпумез син азыз возьыны. Дыр ортче, нош уробо интыяз сылэ, нокыӵе ужъёс кутскымтэ. Г. РОМАНОВ. Утчасез амал шедьтэ Берло дыре Правительстволэн Тӧроез Павел Вершинин но мукет кивалтӥсьёс интыосы ӵем потало. Сыӵе ужан амал кельше районъёсысь, предприятиосысь, хозяйствоосысь кивалтӥсьёслы но калыклы. Адямиосын пумиськылыса, югдурез ӟечгес тодыны-валаны но шонер решение кутыны луэ уго. Тани кылем арня вискын правительстволэн делегациез ужаз Сарапул районын. Павел Вершинин но данак министръёс вуылӥзы "Удмуртское", "Нечкинское" эштосъёсы, парсь вордон комплексэ, ремонтно-технической предприятие (РТП), Сарапул совхоз-техникуме но РОВД-е. Собере бадӟым но пайдаё кенеш ортчиз. Кулэ-а МТС? Правительстволэн делегициезлы но лымшор ёросэ ветлыны куазь чебер вадьсаськиз. Павел Вершинин но соин ӵош лыктэм адямиос вазь ӵукна ик вуизы "Удмуртское" эштослэн (ТОО-лэн) бусыосаз. Тямыс час. Комбайнёръёс, шофёръёс но куро люкась механизаторъёс лудын ни. Быдэс хозяйствоя ю-няньзы трос уг ке но люкаськы, та бусыысь, пе, котькуд гектарез 25 центнерлэсь уно йыды сётэ. Павел Николаевич вань люкаськемъёсты паймытӥз, одӥгезлы комбайнёрлы нимын-тулын вазиськыса. Со Валентин Овчинников вылэм, 70-тӥ аръёсы Можга районысь "Россия" колхозэ ю октыны ветлэм. Павел Николаевич соку колхозэн кивалтӥз. Вершинин сыӵе юрттэтэз вунэтымтэ. Тӥни соин ик, вылды, Правительстволэн Тӧроез кемалась тодмоезлэсь меӵак юаз: - Эштос тӥледлы тырмыт-а нянь сётэ? - Окмымон висъя. Милям уго данакез городын кадь улыно-вылыно но вить этажъем коркаосын улэ. Пудо трос вордыны ум быгатӥське. Соин ик одӥг-кык тоннаен тырме. Валентин Иванович куамын сизьыметӥ гужемзэ юосты ара-кутса ни. Шаерамы таӵе бадӟым опытэн ужась комбайнёръёсмы ичиёмо. Ачиз но Валентин Овчинников хозяйствоязы техникалэн кулэсмемезлы пайме. Азьло, пе, одӥг бусыын 20-30 комбайн ара ке вал, табере эштосамы кабзэ 15 комбайн кылемын. Нош юос 5 сюрс гектарлэсь уно, котькуд агрегатлы 330 гектарлэсь ятыр усе. Чакламлэсь куинь пол трос. Гыроно-кизёно муоссы 12 сюрс гектар, нош тракторъёссы 48 гинэ. Югдур пӧртэм ӧвӧл мукет хозяйствоосын но. Гурт выль техника басьтыны уг быгаты. Ваньмыз туж дуно, нош хозяйствоослэн коньдонзы ӧвӧл. Павел Николаевич эштослэн кивалтӥсезлы, совхозлэн азьло тодмо директорезлы Владимир Гурьевлы вазиськиз, кызьы, пе, таӵе секыт югдурысь потоно, кулэ-а машинно-технологической станциос (МТС-ёс) кылдытъяны? Владимир Александрович сыӵе юанэз возьмаса кадь улэм, чик могатэк валэктӥз: - Куке хозяйствоосын техника кулэсме-вужме, районын одно ик МТС усьтоно. Со туж бадӟым пайда сётысал. Но механизаторъёс гуртысь мед луозы. Соос чылкыт аралозы-гырозы. Район туэ гектарлы быдэ 20 центнерлэсь ятыр ю тысь кутса, нош "Удмуртское" эштосын 16 центнер гинэ усе. Музъемъёссы уродэсь ӧвӧл ке но, жаг турынэн нюръяськемысь дугдӥзы, чылкыт бусыосты уд адӟы: йӧны будэ. Куд-ог интыосын дельтапланэз уже куто (самолёт дуно усе), ядохимикат пазяло, жаг турынъёслы аляны маза уг сёто. Татын землеустройствоез но аналтӥллям ни. Кытын кыӵе луд, уд тоды, юбоос пуктылымтэ. Севооборотъёссы коть вань на. Соиз умой. Тӥни озьы ёросысь огъёсыз хозяйствоос ("Родина", "Новый путь", "Кама", Суворов нимо) котькуд гектарысь 25-26 центнер ю-нянь басьто, нош мукетъёсыз (Фрунзе нимо, "Кигбаевское", "Удмуртское", "Советская Россия", "Красный уралец") - 14-17 центнер. Сыӵе суро- пожо суред мур малпаськонэ вуттэ. Куазь уго ваньмыз понна огкадь улӥз, огмында зориз. Озьыен, музъемен ужамысь дугдӥм. Али минерал сылалъёс, изваска нокыӵе хозяйство но бусые трос уг потты. Дуно усе. Государство гуртлы ляб юрттэ. "Удмуртское" эштос (азьло совхоз) кемалась данэ потэмын пудо вордонъя. Хозяйствоын выль скал выжы кылдытэмез понна валтӥсь зоотехниклы Иван Кузьмич Сосковлы Социалистической Ужысь Герой ним сётэмын. Али со пӧламы ӧвӧл ни, но ӟеч ужез кылемын. Скаллы быдэ татын нуналаз 10 килограмм пала йӧл кыско, нош ар ӵоже быдэс эштосъя 3500-озь вуттыны малпало. Но пудолэн лыдыз синэ, кылем арен ӵошатыса, со 9 процентлы ичи ни. Малы бен пудозэс вандо? Мугез туж огшоры: уждун тырыны, пе, улэп уксё кулэ. Эштосын июль понна уксё сётэмын ни. Шоро-куспо уждунзэс трос уд шуы, 400 сюрс манет усе. Собере малы ке ичи кунян басьто, сю скаллэсь 70 гинэ. Ваньзэ урод сиён, ошъёс вылэ гинэ уд погыльты. Пудоосты бызьылытонэз умоятыны кулэ. Соин ӵош ик скалъёсты умой сюдоно, валаса рацион тупатоно. Петровка фермаен кивалтэ Римма Галичанина. Татын ваньмызлэсь уно йӧл люкало. Нылкышноосты сюлэмшугъяськытэ нылпиоссылы пособие дыраз сётымтэзы. Правительство та ласянь секыт югдурез тодэ. Соин ик Павел Вершинин дояркаослы пособизэс нянен басьтыны ӵектӥз. Куд-ог ёросъёсын, пе, озьы лэсьто. Но нылкышноос огымысь кадь шуизы: - Милемлы эштос тырмыт ю сётэ. Пудомы трос ӧвӧл бере, сахар песокен яке музон вузъёсын басьтысалмы. Премьер-министр валэктӥз, та нуналъёсы гинэ, пе, Удмуртпотребсоюзлэн правлениезлэсь кивалтӥсьсэ Рауф Каримовез дорам ӧтчай но та ласянь ӟечгес ужаны кури. Пудолы - йыды Уральский посёлокысь школа-колледж районын одӥгез усто дышетскон заведение. Со туннэ куронъёслы тупа. Школа дася механизаторъёсты, дояркаосты но пичи ужбергатонъя бухгалтеръёсты. Колледжлэн аслаз автопаркез, тракторъёсыз вань. Умой кусып возе Сарапулысь совхоз-техникумен но Ижысь гурт хозяйствоя академиен. Школаын 500-лэсь уно пиналъёс одӥг но ӝыны сменаен дышетско. Миым 16 выпускникъёс вылӥ дышетскон заведениосы пыризы, нош туэ кык пол ичи - 8 мурт гинэ. Школа ачиз коньдон поттыны быгатэ. Туэ 200 гектар йыды будэтӥз. Но жаляса верано луэ, юзы жаг турынэсь вал. Табере со пудо сюдыны гинэ мыноз. Номыр уд кары. Соин ик Павел Вершинин музъем ужан культуразэс ӝутыны дэмлаз. Нош поттэм уксёзэс туэ школазэс тупатъянэ кутӥзы. Колледж узырме туала техникаен. Усьтэмын компьютеръёсын нимаз класс. Нылпиослы со кельше. Куд-ог семьяосын, пе, пиналъёссылы гуртазы но компьютьеръёс басьто ни. Нош школа уката ӟечъёссэ, выльёссэ утча ни. Со юрттоз эшшо но муресь тодон-валанъёс сётыны. Дышетскись пиналъёс асьсэос будэто бакча сиёнъёс но емышъёс. Но школалэн тыро- пыдо столовоез ӧвӧл: сиён пӧранэн курадӟо. Соин ик школа-колледжлэн директорез Людмила Садовникова Правительстволэн Тӧроезлэсь юрттэт куриз, столовойлы, пе, ватсаса юрт пуктыны коньдон висъяно вал. Озьы ик выль тӥрлык басьтыны кулэ. Павел Николаевич гуртысь дышетӥсьёслэсь сюлэмвисёнзэс валаз но Архитектурая но лэсьтӥськонъя комитетлэсь кивалтӥсьёссэ юрттэт сётыны куриз. Павел Вершинин озьы ик тунсыкъяськиз дышетӥсьёслы уждун тыронэн. Майлы ӝынызэ, пе, басьтӥм ни, нош августлы сётымтэ, валэктӥзы соос. Вордӥське выль удыс Предприятиослэсь, хозяйствоослэсь улон интыоссэс, социально-культурной юртъёссэс интыысь ас коже кивалтонъя ёзъёслы сётон сярысь вераськон кемалась мынэ. Но югдур тыро-пыдо уг воштӥськы, шуыны луоз. Нош дыр ортче. Табере жилищно-коммунальной хозяйствоез выльдон кутскиз. Соин ик районын та уж борды рос-прос басьтӥськизы. Жилищно-коммунальной хозяйствоя вить муниципальной предприятиос (МП-ос) кылдытӥзы. Соос кие сётэмын котельнойёс, водопровод но газ хозяйство. Одӥгеныз сыӵе предприятиен тодматскиз Павел Вершинин. Со усьтэмын Уральский посёлокын. Ужа нимаз ёз луыса. МП-лэн бускель Суворов нимо колхозын куинь котельноез вань. Правительстволэн Тӧроезлы сарапулъёслэн таӵе ужан амалзы яраз. Уральский посёлокын коммунальникъёслэн котельнойзы газэн эстонэ выжтэмын, нош гумыос кыскымтэ на. Соос тямыс километр луозы. Одӥг арскын вуттыны кулэ. Та МП-ын 120 адями ужа. Сое кабзэ выль удыс шуыны луоз, али гинэ пыд йылаз султэ. Но пайдаез шӧдӥське ни: шыръяське эстӥськон, коркаосы дыраз шуныт вуэ но мукет. Жилищно-коммунальной хозяйствоя интыосын предприятиос кылдытон ӝогомытоз улон юртъёсты но социальной объектъёсты вуттонэз. Со сярысь уго 1992-тӥ арысен вераськиськом ни. Но пӧртэм мугъёсъя югдур каллен воштӥське. Куд-ог районъёсын асьсэос хозяйствоос та ужез ӝегато, коммунальщикъёслы уг оско, нош мукетъёсаз - коммунальщикъёс пумитъясько, ас вылазы уг басьто, кышкало, лэся. Та ужпум шоры котькызьы учкы, но республикаямы ужез йылаз-пумаз вуттоно луоз. Соин ик сарапулъёслэсь та опытсэс котькытын пыӵатоно. Сыӵе одӥг малпанэ вуиз правительстволэн делегациез но. "Улэп" коньдонтэк Рынокен экономикае потон нокинлы каньылэн уг сётӥськы: ваньбур поттӥсьёслы но, ремонтникъёслы но. Сое ас вылазы шӧдо ни районысь ремонтно-технической предприятиын ужасьёс но. Секыт югдурез тупатон вылысь, котькыӵе сюресъёс утчало. Асьсэос лэсьто электродъёс, кортӵог, сетка-рабица но мукетсэ.Озьы ке но, колхозъёслэсь, совхозъёслэсь но эштосъёслэсь техниказэс выльдо, нош дунзэ (хозяйствоослэн улэп коньдонзы ӧвӧлэн) ю тысен басьто но асьсэос мукет азе вузало. - Сыӵе амалэн ужан нокинлы уг кельшы ке но,- шуэ предприятилэн директорез Борис Чернов,- нокытчы уд пегӟы. Ялан озьы уз луы шуыса малпаськом. Али хозяйствоос сӥль но ӵекто. Соин ик предприятиямы та ужен вырыны, ваем продукцизэс вузаны нимаз служба кылдытӥм. Туэ тани 20 тонна ю тысь басьтӥм но вузам ни. Со трос ӧвӧл, но та ужмес азьланьтом. Кыкетӥ арзэ тазьы тыршиськом ни. Тани "Удмуртское" эштослэн предприятилы 130 миллион манет тыронэз. РТП тупатъя К-700, С-100 тракторъёсты. Предприятие ачиз лэсьтэ трос воштос ёзъёс. Собере Набережные Челныысь ремонтной заводэн юнэсь кусыпъёс тупатӥз. Ог-огзылы ӟеч юртто. Али ремонтникъёс фермаосты толлы дасянэ мылысь-кыдысь пырисько, отысь механизмъёсты но агрегатъёсты выльдо. Озьы ик умоен пусйыны кулэ, татын кылдытэмын "Удмурт- Волгоградтракторсервис" АО-лэн центрез. х х х Правительстволэн делегациез данак ужпумъёсты сэрттӥз-пертчиз. Пырак вераны кулэ, ёрослы государство юрттэ, бюджетысь, мукет районъёсын ӵошатыса, тросгес уксё вуэ. Йӧллы но тырмыт коньдон (дотация) висъямын. Соин ӵош ик Павел Вершинин нимысьтыз пусйиз: пудо выжыез умоятыны но таза кидыс уськытыны Правительство вис карытэк юрттоз. Мугез тодмо: сотэк асьмеос удалтэм ю-нянь ум будэтэ, трос сӥль-йӧл ум поттэ но экономикамес ум юнматэ. Павел Николаевич районысь кивалтӥсьёслэн кенешазы мукет ужпумъёсты но ӝутӥз. Кылсярысь, вераськон мынӥз промышленностьын сямен ик гурт удысын но структураез выльдон, кивалтон амалъёсты умоятон, кадръёс дасян но музонэз сярысь. Сыӵе дэмланъёсты интыосын умоен лыдъяло. Геннадий РОМАНОВ. Фотоосыз В. КАРМАНОВЛЭН. Татьяна ПАНТЕЛЕЕВА: "Шудэ - зарни шунды" Выль малпанъёсы Лобизы-быризы. Капчи мылкыдъёсы Бус пӧлы ышизы. Кыли мон огнам - графин. Пушкам нош - шузи ӵын. *** Адями - кураськись: Котьку киыз урдэмын. Та дуннеын "кӧтсэ тыре" Визьмын, малпанъёсын. *** Кеськи - Ӧз лу вазись. Ӧти - Ӧз лу учкись. Валай - Ӧвӧл ни мон улӥсь. *** Редакцие вуэм таӵе аспӧртэмлыко кылбур чуръёсыз лыдӟыса паймоно но малпаськонэ выёно: кин меда сое гожъям? Вазенгес Таня Пантелеевалэсь одӥг кылбурзэ газетамы печатламы ни вал. Собере асэныз матэгес тодматсконо кариським. Таня дышетске Пичи Пурга ёросысь Вуж Монья шор ёзо школаысь 11-тӥ классын. Эшъёсызлэсь пичи но уг висъяськы. Огшоры нылаш ас быгатонлыкъёсыныз ваньзэсты паймытъяны яратэ. Гожъяськон мылкыдыз но шӧдтэк шорысь пуромем, лэся. - Кыкетӥ классын дышетскыкум, ма но со гожъяны йӧндырисько вал, - шуэ Таня. - Ёросысь "Пурга кизилиос" литературной объединение но ветлылӥ, нош отӥяз азьтэмъяськи-а, мар-а. Ялан малпалляй суредась луон сярысь. Шаермылэн пӧртэм сэрегъёсысьтыз усточиос тодон-валанъёссэс "Шундыкар" лагерьын муромыто. Мон но куинь арзэ архитектура удысаз ветлӥ, нош туэ эшеным ӵош литература удысэ кариським. Туж кельшиз. Матысь эшъёс луимы Алнаш ёросысь Варзи-Ятчи школаысь кылбур гожъясен Таня Быковаен. Шумпотӥсько кылбурчиен Пётр Захаровен тодматскемелы. Нылашлэн суредась луон сярысь малпанъёсыз шуак воштӥськизы. Табере со кылбура. Нырысетӥ гожтэм кылбурезлэн геройёсыз но туж аспӧртэмлыкоесь вылэм: мушсяська, толэзь но кизили. Таня улонмы сярысь но мур-мур малпаське. Кылсярысь, солэн син шораз ӵемысь пуксе сьӧд буёл. Сьӧд ӵынлэн но вань аслаз кыӵе ке но бордаз кыскись валантэм кужымез. Танялэн кылбуръёсыз но, малпаськон манерез но эшъёссэ паймытъяло: тон, пе, валантэм шуо. Нылашлэн улон шоры учконэз, оло, быдэ вуон вакытэныз но герӟаськемын. Синмаськон, яратон... ачиз ик йыроме кадь валэктонъёсыз пӧлы. - Улон сярысь тазьы гожъямысьтым ваньмыз паймо но юаны выро: "Оло, тон курадӟыса будӥськод?" - веранзэ азьланьтэ нылаш. - Анае Алевтина Анатольевна - бухгалтер- экономист. Атае Николай Дмитриевич - "Вуж Монья" эштослэн кивалтӥсез. Вань на апае. Кылбуръёсме лыдӟыса соос но паймо кадь. Нырысь "пӧрам" чуръёссэ Таня кылъя но литературая дышетӥсьсылы Мария Захаровна Никитиналы возьматъя. Тани ма вераз педагог: - Туж тунсыко но паймымон нылаш. Эшъёсыз пӧлын данэз бадӟым, со азьветлӥсьсы луэ. "Вуж Мултанъя" ӵошатскон радъямы. Кулэ вал суредъёс лэсьтыны но солы валэктонъёс сётыны. Вань дышетӥсьёс Танялэн мудрон суредъёсызлы паймизы. Куддыръя солэсь дуннезэ исаны но кышкаськод. Отчы пырыны но дӥсьтоно ӧвӧл кадь. Сыӵе со - Таня Пантелеева. Школазэ кайта гинэ йылпумъялоз ай, нош кылбур чуръёсыз сюлэмез вырӟыто, малпаськыны косо. Гожъяськыны пуромем мылкыдыд ноку медаз лапка, Таня! В. КУТУЗОВА. Туспуктэмез В. КАМАШЕВЛЭН. *** Кызьы ке уись Уг вала пегӟисез, Кызьы серекъясь Уг вала бӧрдӥсез, Озьы ик мон - Кужмо зорлэн Туж пичи шапыкез - Уг валаськы та Валантэм улонмес. *** Азвесь чыртывесь нылмурт Чыртыяз ошем. Вань чеберез солэн Чилясь пӧлы ышем. *** Уг, уг вера нокинлы, Мар малпасько. Уг, уг вера нокинлы, Мае вӧтасько. Уг, уг вера нокинлы, Мар сярысь уйбыртӥсько, Мар понна вӧсяськисько... Ӧй чида, жади, Быриз кужмы. Сюлэмме усьтӥ тыныд - Нырысь сюремлы. *** Шымырско, пегӟо, Ас пушкам выё. Вимысьтым малпанъёсме Сюлэмам вато. *** Ез бугор. Читыр-чутыр. Тугаськем. Трос пӧртэм Чиньыос сое погаллям. Огез чиньы тугам озьы, Мукет чиньы - тазьы... Ез бугор. Читыр-чутыр Малпанъёс. Сураськиллям соос. *** Утчасько котькытысь: Учкисько пӧртэм сэрегъёсысь, Зымисько вуэ - отын утчаськисько, Чуртнасько нырме котькуд но из улэ. Уг шедьтӥськы. Мае-а утчасько? Сое, кин валалоз монэ. *** Мон пияла, кудзэ секыт ӝог сӧрыны, Кудзэ капчи туж бурдъяны... Но мон - пияла. Секыт туж улонэ - Мар пушкам, ваньмыз вылам пиштэ. *** Сьӧд дуннеысь, Сьӧд кунысь, Сьӧд гуртысь, Сьӧд юртысь, Сьӧд ӝӧк вылын Сылӥсь сьӧд стаканын - Сьӧд ву. Буль! Буль! Кин ке сое юиз. Ой, жаль кин ке: Со сьӧдэктӥз. *** Мынӥсько ульчаетӥ. Кунулам - йыры. Мед зороз куазед, Коть мед ӵашъёз: Мынам йыры кӧсын, Шунытын. Мукетъёсыз - Ӵын пӧлын. *** Кайгу уин гуртэ шыпыт вуиз. ...Пеймыт вал, уг лу номыре тодманы... Кайгу сураськыса мукет ӧсэ пыриз. ...Малпасько, ваньмыз валамон? Таин быре мадён. *** Шудэ - зарни шунды. Кык киыным ик кырмиськи. Пӧсь, сутэ, Ӵушка, мальдытэ - Мон чидасько. Коть жугелэ, уг ни лэзькы. "УДМУРТ ДУННЕ" НО ЕГИТ ДУННЕ КОНКУРСЭ Тау тыныд, Саша Школаын дышетскись удмурт пиналъёс понна "Радистын" туэ нош ик радъямын вал "Шундыкар" лагерь. Соин кивалтыны оскизы егит муртлы Саша Князевлы. Ижевскысь гуманитарной лицейлэсь финн-угор люкетсэ йылпумъяса, Саша дышетскыны пыриз Удмурт кун университетэ. Мон солы вазиськи кӧня ке юанъёсын. - Саша, асьтэлэн пельпум вылады та быдӟа уж басьтыны ӧд кышкалэ-а? - Ӧй, ӧй кышка. Малы ке шуоно, нырысетӥ арзэ уг ужаськы, тодон-валанъёсы вань ини. - Асьтэос кивалтӥсе куриськиды яке пуктӥзы-а? - Пуктӥзы. Ужаны туж кельше. Татын трос умой нылъёс но пиос шутэтско. Мыным соосын ужаны капчи: одӥг кыл шедьтыны быгатӥськом. Бен, котькыӵе дыръёс луо, но мынам вань юрттӥсьёсы. Соослы туж оскисько. - Нош кинъёс соос, уд вералэ-а? - Малы ум вера, верало. Светлана Кибардина, Ирина Дедюхина, шофёр Сергей Возисов но выжы тӧроос (вожатойёс). Вожатойёсын туж лякыт ужаны. - Саша, нош кӧня усточи нылпиос шутэтско лагерьын? - Ваньмыз соос 174 кузя. Шутэтско татын нылпи юртысь (детдомысь) пиналъёс но. куамын куинь выжы тодосчиос (специалистъёс) пӧлысь дас кыкез вожатойлэсь ужзэ быдэсъя. Соос пӧртэм ужрадъёс ортчытъяло. Уже ласянь секыт ке но, тыршиськом кузьымъёс шедьтыны. Озьы ик сюлмаськиськом, пиналъёслы ваньмыз тырмыт мед луоз шуыса. - Азьланяз кивалтӥсе ӵектӥзы ке, мыноды на-а? - Ӵектӥзы ке, мыно одно ик. Мыным кельше пиналъёсын ужаны. Малы бен куштӥськод сыӵе луонлыклэсь? - Саша, мон кылӥ вал, вуоно аре "Шундыкар" лагерь уз луы ни шуыса. Уксё, пе, уг тырмы. Зэм-а со? - Эн оске та верамъёслы. Вань сюлмысьтымы тыршом вуоно гужем но лагерез усьтыны. Возьмалом нылпиосты шутэтскыны: выльёссэ но, туэ ветлэмъёссэ но. Тыршомы соослэсь тодон-валанъёссэс муромытыны. - Татын дышетскись нылпиос ваньзы ик журналистъёс, кылбурчиос, кырӟасьёс, архитекторъёс луозы шуыса оскиськоды-а тӥ? - Одно ик луозы шуыса уг оскиськы. Соос татын асьсэлэсь тодон-валанъёссэс муромыто, эскеро, кыӵе удысын умойгес пӧрме, кудӥз соослы тужгес но кельше. Но оскисько, татын басьтэм тодон- валанъёссы азьланяз юрттозы пиналъёслы. Озьы ик оскеме потэ, одӥгез-кыкез ке но тыршозы асьсэ быръем удысазы. Тодӥ мон, лагерьын шутэтскон шулдыр но пайдаё мед луоз шуыса, кӧня малпаське, сюлмаське солэн кивалтӥсез. Ваньмыз со нылпиос понна. Тау тыныд, Саша! Н. КНЯЗЕВА. Ӟазеген ожмаськон Со вал гужем. Мон соку нырысетӥ классэз йылпумъяй. Анае ӟазегъёс басьтӥз. Соос бадӟымесь луизы. Одӥг пол мон курег пуз утчаны потӥ. Айы ӟазегмы туж чепылляське вал. Со нырысь монэ номыр ӧз кары. Собере берам учки но - туж зол бызьыса, сьӧрам ӟазег уиське. Мон кытчы кариськыны ик ӧй вала ни. Туж зол бызьыса, гидэ пыри. Нош ӟазег - мон сьӧры. Дэремме кыске ук! Пыдме чепылля. Мон гидэ пыдлогес пырисько. Оломар сямен ӟазегъёслэн сиськон интыязы уси. Табере таид бамъёсме чепылля. Мынам номыр но кареме уг луы ни. Мырдэм отысь султӥ но, ӟазегез чыртытӥз кутыса сэрпалтӥ. Ачим бызьыса корка пыри. Ваньзэ анаен атаелы верасько. Соос серекъяны кутскизы ук, собере ачим но. Тӥни озьы, куд-ог дыръя бӧрдод но, серекъялод но, ява. Аня ШИХОВА. Вавож ёросысь Зямбай школа. Верало лыдпусъёс 1996 арын Ижевскысь куд-ог школаосын но СПТУ-осын дышетскисьёс пӧлын ортчытэмын вал вина юонъя но наркоманияя юан-веран. Эскеронэ пыризы городысь витез ик ёросъёс. Ваньмыз юамын вал 5 242 быдэ вуымтэ нылпиос. Соос пӧлын 756-ез - СПТУ-ын дышетскисьёс (219-эз - пиос). Юанъёс ортчытэмын, нимъёсты шараятэк но дышетӥсьёс пыриськытэк. Городысь быдэ вуымтэ нылпиослэн йырез "поромытон" борды кыстӥськемзыя син азе таӵе суред пуксе. Вина юон (процентъёсын) пиос нылъёс 9 кл 10 кл. 11 кл. Ваньмыз 1. Уг юо пиос 36 20 13 31 нылъёс 50 29 38 39 2.Юо пиос 47,7 74,2 84 80,5 нылъёс 49,6 68 58,5 66 3. Туж шер пиос 14,5 20,3 14,6 16,71 (араз 5 полозь) нылъёс 16,3 17 9 14 4. Праздникъёсы пиос 24,5 31 31 29 нылъёс 24,6 32 36 31 5. Толэзяз пиос 7,5 12 16 12 1-2 пол нылъёс 7 10 14 10 6. Арняяз 1 пиос 3,5 4,6 9,3 6 пол но солэсь нылъёс 1,8 4,6 2,2 3 ятыр Наркотикъёсын поромон (процентъёсын) 1. Оскалтылӥзы наркотикъёсты но йырез поромытӥсь пиос 9,4 10,5 8,0 9,7 зынэн шокаллязы нылъёс 4,0 3,5 2,5 5 2. Али но наркотикъёсты оскалтыло но йырез поромытӥсь зынын пиос 1,2 2,6 0,1 1,71 шокало нылъёс 0,4 - 0,2 0,8 Ваньмыз юэ. Мон маин пӧртэм? Юон но тамак кыскон. Мар меда кыске гуртысь пиналъёсты со борды? Та юанэн мон вазиськи кӧня ке тодмоосылы. Таня, 14 арес: - Винаез утчаме гинэ вань. Нош тамакен эшъяськи, куштыны но вуи ини. Тодэме потыса гинэ кыски. Дима, 17 арес: - Туганэлы кельшо тамак кыскись пиос. Соин ик кыскисько. Мон ведь котькуд нунал уг, субботаосы гинэ. Вина юисько. Кызьы сотэк али? Ваньзы юо, мон соос сьӧры ик. Саша, 21 арес: - Мон тамак уг кыскиськы. Нош вина вуэз сямен юисько. Конечно, праздникъёсы гинэ. Пияш, 19 арес: - Вина но юисько, тамак но кыскисько. Ма бен каром на? Монэ армие ӧз басьтэ. Кинлы мон табере кулэ? Леха, 16 арес: - Мон кыскисько. Утчало шуыса гинэ ымам понӥ вал. Нош али - сиськем бере весь мар ке но уг тырмы кадь. Потӥсько ини лушкемен кыскыны. Тамаклэсь дугдытскеме луоз но, уг поты. Олег, 17 арес: - Мон тамак уг кыскиськы, вина но уг юиськы. Вазьгес на мыным. Куке но юо, дыр, нош али уг. Атае юэ, но мынам со кадь луэме уг поты. Мар шуыны луоз, таӵе кылъёсты кылэм бере? Кин соосты вина юыны, тамак кыскыны дышетӥз? Нокин но ӧз. Кинлы со тунсыко, кин кытчы пырыны инты уг шедьты. Шат вина юыса соос шедьтозы? Майя СКВОРЦОВА, Пичи Пурга район, Гожня гурт. Усьтӥсько чагыресь инвисъёс "Шундыкар" лагерьын ми, тележурналистъёс, дышетскимы репортаж, информация, сценарий гожъяны. Дышетскимы киямы нырысьсэ микрофон возьыны. Телевизорысь учкыку, со капчи уж потэ вал, нош озьы вылымтэ. Мон сое валай ас вылам. Тележурналистикаын но, мукет ужъёсын сямен, секыт сётӥське вылэм. Возьыны быгатоно микрофонэз, чылкыт, могатэк вераськоно, вераськись шоры меӵак синмаз учконо, сое кылзыны быгатоно. Трос куронъёсты тодӥмы журналистлэн ужысьтыз. Куамын одӥгетӥ пӧсьтолэзе ми ветлӥмы телевидение. Адӟимы телепрограммаосты дасямзэс, учкимы вань аппаратураез. Асьмеос шумпотыса учкиськомы яратоно передачамес, нош со одӥг ужез дасянын ужа ог куамын адями. Ми асьмеос адӟимы милесьтым дасям ужмес тупатъямзэс. Со ляб пӧрмиз ай, угось тележурналистика удыс туэ нырысьсэ люказ кыксэ самой шудооссэ нылпиосты. Дышетскем сяна, котькуд ӝыт ортчылӥзы пӧртэм ужрадъёс, шудонъёс. Котькуд нунал ми пумиськылӥмы шаерысьтымы тодмо но дано адямиосын. Дорамы ветлӥзы телевидениысь, радиоысь журналистъёс, "Удмурт дунне" но "Ӟечбур!" газетын ужасьёс, кылбурчиос Алла Кузнецова, Галина Романова, Анатолий Уваров. Спектакльёсын шулдыртӥзы Валентина Загуляева, Валентина но Геннадий Бекмановъёс, Кадим Галиханов, Фаина Будина, Геннадий Соловьев, Валентина но Игорь Моисеевъёс, мунё театрын ужасьёс Александр Перевозчиков но Александр Мустаев. Жаляса верано луэ, Шаркан районысьтымы дасо сяна нылпи та лагерьын ӧз шутэтскы, нош Пичи Пурга районысь, кылсярысь, ог куамын нылпи лыктэмын вал. Лагерь мыным кельшиз. Нуналаз милемыз вить пол сюдӥзы, концертъёсын шулдыртӥзы Надежда Уткина, Владимир Мальцев ("Шулдыр ӝытысь"), Иван Григорьевых, Любовь Быкова, Татьяна Ишматова, Марина Галичанина, Геннадий Бекманов. Вал пумиськылонъёс, конкурсъёс, спортъя ужрадъёс, дышетскон, шутэтскон дыр. Котьку мед ужалозы таӵе лагерьёс. Надежда КНЯЗЕВА. Шаркан район, Ляльшур гурт. Куазь Синоптикъёс ивортэмъя, туннэ но ӵуказе шаерамы дырын-дырын зороз. Уин 2-5 градус, нуназе 12-14 градус щуныт возиськоз. Тӧл уйпал но шунды ӝужан палась секундскын 7-8 метре пельтоз. КЫТЫН? КУ? МАР? Шоголь дӥськутлы - Играла Игра.17 сентябре ёросын ортчиз гурт администрациосысь егитъёслэн советазы быръемъёслэн люкаськонзы. Кенешын эскеремын вал "Игра ёросысь егитъёс 1998-2000 аръёсы" комплексной программалэн проектэз. Мукетыз эскероно ужпум: республикаысьтымы Егитъёсын ужанъя кун комитетэн тодматсконъя семинаре мыныны дасяськон. Ёросысь егитъёслэн азьветлӥсьёссы Ижевске потозы октябрь толэзе. Асьсэлэн кенешазы егитъёс чаклазы на матысь дыре быдэстоно ужпумъёсты. Тани 26 сентябре ёросын ортчоз быдэ вуымтэослэн нуналзы. Али ик дасясько ини егитъёслэн модазыя ёрос фестивальлы. Таиз ортчоз 17 октябре. Ёросысьтызы "шоголь-могольёслэн" чебересь дӥськутъёсынызы тодматскон сяна, егитъёсты возьмало пӧртэм шулдыръяськон ужрадъёс, дискотека, рок. Бадӟым ужрад ортчытыны чакламын на ноябрь толэзе. Таиз герӟаськемын котырысь инкуазез но улосэз чылкытатонэн. Нимаське со "экологилэн нуналэз". Выллане вамышъёс Ува. 10 сентябре ёросын кылдӥз "Удмуртиысь егитъёс" огазеяськонлэн ёзэз - "Удмуртиысь егитъёс Ува ёросын". Кенеше люкаськылӥзы пӧртэм общественной организациосы пыриськем егитъёс, "Тюрагай-жаворонок" ансамбле ветлӥсьёс, гурт администрациосысь егитъёслэн азьветлӥсьёссы. Огазеяськон кылдытонлэн мугез - тросгес егитъёсты кысконо быръён ужъёсы, страналэн но республикалэн общественно-поитической улоназ. Егитъёслэн асьсэлэн куаразы мед кылӥськоз. Пӧртэм ужпумъёсты эскеронын. Дышетсконо ини азьлане вамышъяны. Огазеяськонлы азьветлӥсе быръемын Уваысь юрист Александр Тарасов. Амалоесь, кужмоесь, дӥсьтӥсесь? Як.-Бодья. 20-21 сентябре Канифольный котырын ортчизы пыдын ветлон туризмъя егитъёслэн нырысетӥ ёрос ӵошатсконъёссы. Амало луэмзэс возьматыны, кужымзэс но быгатонлыкъёссэс мертаны люкаськизы гуртъёсысь, ёрос организациосысь ужась егитъёс, дышетӥсьёс. Кылын но шаплы луоно вылэм, пӧраськыны но быгатоно. Зоро куазь но ӧз кышкаты ӟырдыт сямоосты. Ӵошатскоёсын нырысетӥ инты басьтӥз Як._Бодьяысь нырысетӥ номеро школаысь команда, кыкетӥе потӥзы Бадӟым Ошворцыысь егитъёс, куинетӥ интыын Я.-Бодьяысь "Фанаты" команда. Турслётэз ортчытыны юрттӥзы ёросысь спорткомитет, комунальной хозяйствоя отдел, ужбергатӥсь Алексей Гырдымов. Та выллем ӵошатсконъёс егитъёслэсь сӥль-вирзэс кыдато, тазалыксэс юнмато. Одӥгъёсызлэн та ужрадэ пыриськемзы, мукетъёсызлы но адӟем карымон луэ, сьӧразы валто. Л. КИМОВА. Эрказмон сюрес Чимошур гуртын улӥз-вылӥз Толя нимо укылтэм пияш. Дышетске вал со тямысэтӥ классын. Ваньмыныз ик керетылӥз: пиосын жугиськиз, нылъёсыз но обидьылӥз, дышетӥсьлы, анай-атаезлы мытылӥз. Пумен Толя тамак кыскыны, аракы юыны кутскиз. Вань эшъёсыз со дорысь палэнскизы... Экзаменъёс кутскизы, нош Толя номырзэ но уг тоды. Эшъёсызлэсь уг поты юамез, вылтӥяське. Толя кылиз тямысэтӥ классэ кыкетӥ арлы... Табере ини со воксё ашкынӥз: урокъёссэ уг дася, урокын уг кылзӥськы, дораз изьыны но сиськыны сяна уг берта. Таиз ар бырем бере, экзаменъёссэ сётытэк, колхозэ ужаны мынӥз. Озьы ортчиз ньыль ар. Толялы армие мыныны дыр вуиз. Нош медосмотрын солы врач шуиз: "Тон, пиёк, туж висиськод. Тыныд йӧнатсконо луоз. Мусъёсыд сьӧдэктэмын, мугорыд лапег, вирыд но чылкыт ӧвӧл..." Толя нош нокыӵе ӧз кариськы. Солэн армие мынэмез но чик уг поты вал. Ӝоген та пияш тюрьмае шедиз. "Зоренька" магазинысь уин укнооссэ пильылыса лушкаськемез понна. Анаез солэн кемалась пурысьтаз ини, пиез понна сюлмаськыса, бамъёсыз пӧсь синвуосын ӵуштаськыса гужазы. Нош азьланяз мар луоз та пияшен? Со сярысь малпаськиз-а Толя, тямысэтӥ классын дышетскыкуз? Света МИХАЙЛОВА. Усо школа. Ашальчи Окилэн вордскемез дырысен - 100 ар СЫӴЕ АДЯМИ ВАЛ... "Мон шудо адями. Пинал дыр малпанэ быдэсмиз. Ёросамы трахома быдтэмын",- озьы шуыны быгатэ ас ужзэ яратыса но вань быгатонлыксэ, кужымзэ сётыса ужам адями. Со - син йӧнатӥсь врач Лина Григорьевна Векшина, кудӥз Алнаш ёросын 6500 муртэ синтэм кылёнлэсь утьыны быгатӥз аслаз дышетэм трахоматозной сестраосыныз. 1932-тӥ арын кузпалъёс Лина Григорьевна Векшина но Иван Иванович Карачев Валерий пиенызы Юкаменскысь Алнаше улыны лыкто. Татын туж трос вал трахомаен висись. Оген нокызьы но со быдӟа ужез вормыны уз луы. Соин ик врач басьтӥське аслыз юрттӥсьёс дасян борды. Солэн мылкыд каремезъя но куремезъя, Н. Д. Фомин тӧдьы басма вылэ син висёнъя наглядной пособиос лэсьтэ. (Ваньмыз соос та вакытэ музейын утисько). Кинэ но ӧз йӧнатэ соос: вож нуныысен кутскыса, чын пересьсэ но. Со понна ик угось кылбурчи Ашальчи Оки литератураез, дышетон ужез яратэм вылысьтыз син эмъясь враче дышетскиз. Та бадӟым но котькинлы юрттыны дась сюлэмо нылкышно синэз гинэ ӧз йӧнаты. Со сярысь верало музеямы пырась, со дорын эмъяськем муртъёс. Соос пӧлысь кӧняеныз ке но газет лыдӟисьёсты но тодматэме потэ. - Малы меда ӧй пыра Лина Григорьевна доры улэп дыръяз?! Кыӵе гинэ вераськысалмы, сюлмысьтым тау карысал йӧнатэмез понна. 1938-тӥ арын милемыз, армие мыноно егитъёсыз, Алнашын инты тырмымтэен, Сизьгуртын кык этажъем коркан синмес йӧнатыса возизы. Милям, гренадер кадь пиослэн, сюлэм уг чида тэк улыны. Маке но карем, лӧпшам потэ. Миндэръёсын но лэзьяськиськом. Нылъёс асьсэос уг лыкто ке ми доры, асьмеос пегӟыса доразы мынӥськом вал. Валамон ни, со понна врачлэсь милемлы йӧтэ вал. Но мар карод, пинал мылкыд - юмал йӧлпыд. - Синмам операция лэсьтэмзы бере, ог куинь толэзь йӧнатскыса улӥ больницаын, -веранзэ азьланьтэ Иван Михайлович Чапаев, 1918-тӥ арын Варзийылын вордскем пенсионер.- Одӥг пол Лина Григорьевна патефонзэ тупатыны курыса вазиськиз Тылоысь Никонов Василиен милемлы. Корказылэсь усьтонзэ сётӥз (соку соос Советской урамын уло вал али). Ми шумпотыса мынӥм, быгатӥм патефонзэс но тупатыны. Пукиськом ини, пластинкаоссэс кылзыса. Малпамтэ шорысь, музыка шудэмъя, эктэмъяськыса пыриз Лина Григорьевна. - Кызьы али тӥледлы тау кароно? - малпаськись тусо луиз корка кузёмы. Пуктӥз со милемыз ӝӧк сьӧры, куно кариз но мынектыса шуиз: "Мынэ чаляк больницае но соку ик изьыны выдэлэ". Туж умой адями вал Лина Григорьевна. Ужзэ но яратэ вал, калыкез но гажа вал. Янгыше кыльыку, кылэз но юаны быгатылӥз. Война бырем бере, ми соин пумиським но, со монэ тодмаз: "Чапай, тон-а со?" Мынам атае куать ар сукыр улӥз. Выныным кенешыса, Лина Григорьевна доры больницае нуим. Катаракталэсь операция лэсьтыса, атае, лябгес ке но, адӟись луиз. Кызьы вунэтод сыӵе ӟеч адямиез?! Ведь со дась вал котькинлы но юрттыны. Мукет кунысь висисьёсты но йӧнатысал. Вераськонзэ йылпумъяса, Иван Михайлович шуиз: "Алнаше вуылэмелы быдэ одно ик музеяды пырало: Лина Григорьевнаен адӟиськем кадь потоз". Верам кылзэ быдэстыса, Чапаев нош но нош пыралляз Первомай урамысь витетӥ корка. Син йӧнатӥсь врач фронтысь усто хирург луыса бертӥз. Ӵем дыръя со акушер-гинекологлэсь но ужзэ быдэсъяз: дежурной врач котькыӵе шуг-секытэн, учырен пумиськылоно луэ угось. Зарни киосыз но бадӟым сюлэмыз понна туннэ ке но тау каре Лина Григорьевналы Алнашысь дышетӥсь-пенсионер Гертруда Михайловна Чернова: - Нырысетӥ нылме вайыкум, врач-гинеколог дораз бертӥз, чаляк уз вордӥськы али шуыса. Но мыным утыр секыт луыны кутскиз. Ярам, больницаын ӵапак Лина Григорьевна Векшина вылэм. Пыдыныз вордӥськись нуныме быгатӥз берыктыны (ярам али, солэн киосыз но пичиесь гинэ вал; эмъюм сюпсьыса, чиньы йылъёсыз но векчиесь кылемын вал ини). Нылы вордӥськиз, но копак лызэктэмын. Нош ик соос ик улӟытӥзы нылме. Кызьы вунэтод ӟеч муртлэсь ӟеч ужзэ? Туж тау карыса тодаз вае Векшинаез Азамат гуртын улӥсь Татьяна Николаевна Зубкова но: - Анаелэн вирыз зол кошкыны кутскиз. Врач-гинеколог Иже ыстэ ни сое, онкология висён ӧвӧл меда шуыса. Иже мынӥсь машиналэсь бере кылимы. Кайгырыса пукиськом вал больницаын. Векшина врач адӟиз но шуэ: "Ойдолэ али, мон но тӥледыз учко". "Эн куректэ, нокыӵе кышкыт висёнды ӧвӧл. Чылкытатӥськон (климакс) дырды вуэм ни",- шуныт ымысьтыз ӵыжтэм вӧй кадь ӟеч кылъёссэ вераса буйгатӥз со милемыз. Али малпасько: кыӵеез син йӧнатӥсь адями нылкышно висёнъёсты но учкоз меда? Оло, вакытэз сыӵе вылэм? Но адямиез сыӵе вал - котьку но котькинлы юрттыны дась луись. Алнашын вордӥськем али Ижевскын улӥсь Ирина Ивановна Кубашева тазьы тодаз вае "улонысьтыз самой дуно адямизэ": - Мон кутски ужаны больницаын, регистратор луыса, 1938 яке 1939 арын. Соку нянь сёто вал паёкен, нокыӵе сиён ӧй вал. Мон туж алама адӟыны кутски. Гожъяськеме но уг луы ни вал. Тылэз но ӵын пыртӥ кадь гинэ адӟисько. Пыри Векшина врач доры. Со монэ соку ик койкае кельтӥз. Со вакытэ больницаын курег вордо вал. Лина Григорьевна мыным котькуд нунал кык кукей сётканы косӥз, собере дорысьтыз йӧлзэ нуллытӥз. Быдэс толэзь кылли койкаын, синмы умойгес луиз. Соку Лина Григорьевна мыным вераз: "Кыӵе куректӥ мон тон понна. Уин сайкакум но весь малпасько: неужто та нылы синтэм кылёз ини?" Со гинэ утиз монэ сукыр кылёнлэсь. Со ик мыным сюрес усьтӥз синтэмъёслэн обществоязы мыныны. Али ке но тау карисько визьмамез понна. - Трахома висёнлэсь синме йӧнатыса кылли больницаын,- вера Ефрем Николаевич Япаров, 1928-тӥ арын Усо гуртын вордӥськем воргорон.- Сюлэм ворттӥсь валлэн кадь шаплы, соин ик коридор кузя мыдлань-азьлань лёгаськиськом вал. Одӥг пол, озьы ветлон сямен, ӵапак адӟыны-кылыны тупай. Бемыжысь лыктэм синмыз висись кышномурт. Борддор борды мырдэм кутӥськыса вамышъя. Милесьтым юалляське: "Татын вань, шуо, синлэсь котькыӵе висёнзэ йӧнатыны быгатӥсь кышномурт. Монэ йӧнатысал ке, скалме но сётысал". Ӵапак та вераськон вискын кабинетысьтыз потэ вал Векшина врач. Кышномуртлэсь верамзэ кылыса, Лина Григорьевна мыньпотыса шуиз: "Ойдо, мыным кеч но тырмоз". Кызьы но мар луиз отӥяз - уг тодӥськы ни. Но та верамез, маскара потыса, али но уг вунэтӥськы. Лина Григорьевна маскаръяськыны но яратэ, быгатэ но вал уго. Л. Г. Векшина дорын йӧнатскем муртъёслэсь верамзэс йылпумъяме потэ тодмо кылбурчимылэн Герман Алексеевич Ходыревлэн чуръёсыныз: Кыжмем ошмес синэз Либыт сузям музэн, Калык синэз трахомалэсь утид. Гуртысь гуртэ ветлӥд Толэн но гужемен, Кӧня муртлы тон шумпотон ваид! ... Врач мылкыдын котьку Либыт вазиськылӥд, Кылбуръёсыд нош луэмын кырӟан. Вань даурлы пырак Калык сюлме кылид, Вань улэмед тынад - зэмос марӟан. Людмила ПОСАДОВА, Ашальчи Окилэн музейысьтыз научной ужась, Удмурт Элькунысь культура удысысь дано ужась. 5579 "Устоез лыдӟись" конкурсэ ВИСЁНМЕ НО БАСЬТЭ КАДЬ 1. "Советской Удмуртиез", али дыре "Удмурт дунне" газетэз лыдӟисько вис карытэк, егит дырысеным. Ас кылыным потӥсь та газет монэ котьку шумпоттэ, озьы ик "Кенеш" журнал но. 2. Газетты мыным туж яра, номырзэ но, мон сямен, воштоно ӧвӧл. Ма сярысь тодэме потэ, газетлэсь пуштроссэ лыдӟыса, ваньзэ тодӥсько. Юн яратӥсько газетлэсь "Твой дом и сад" приложенизэ, мазэ гинэ уд лыдӟы отысь. Туж усто. 3. Газет бамез усьто Правительстволэн ужамез сярысь ивортонъёс. Вакчияк тодматэ вашкала календарья туннэ нуналэн, быдэс элькунысь ӟеч иворъёсын, ёросъёсысь ужъёсын, калыкен. Со мыным ваньмыз интыяз кадь потэ. 4. Газетлэн пуштросэз мыным котьку яра. Туж яратыса лыдӟисько "Берекетэз", "Шӧкычез", "Шундыез", "Тулкымез", "Гердэз" но "Наталез". Соосты ке лыдӟисько, быдэс шаеретэ ортчисько кадь потӥсько. 5. Мон доры вуылӥзы газетчиос но Удмурт радиоын ужасьёс. Соослы мон ваньзэ мади но мадьысал на, кызьы ож вакытэ пиналъёс ужамы, уй но нунал кӧлонэз адӟытэк но сиськытэк. Дӥсь но дӥсяны вылэ ӧй вал. Со секыт дыре ужам калык ик кылиз пичи пенсиен - 252 сюрс манет басьтӥсько. Отысь но кык толэзез понна быдэн вить сюрс манетсэ олокытчы каризы. Кытчы но малы кельтэмзэс уг валэкто. Со понна туж ик кӧт пӧзе. Римма Лаптева но Светлана Семеркина мон сярысь газетэ гожъязы "Удмурт луэменыз данъяське" нимын статья. 6. "Удмурт дунне" газетын ужась эшъёсме мон уг ке но тодмаськы, ӧй ке но адӟылы, соосты туж ӟеч тодӥсько, гожъямъёссэс лыдӟыса. Валтӥсь редакторлэн А. П. Шкляевлэн кивалтэменыз, газет туж умой потэ. Но вунэто кадь курыт эзелез юисьёс сярысь. Азьло ӧз юылэ тазьы. Гожъямъёсызъя тодӥсько Л. Хрулеваез, Л. Малых веросъёсыныз мылкыдэз лӧпкытэ, серемез ик поттэ. Г. Романовалэн чебересь кылбуръёсыз шумпотто. Т. Банникова умой гожъя правительстволэн ужамез сярысь. Ф. Миннигараев серемес учыръёсты возьматыны тырше, туж тунсыко гожъя "Шӧкыч" уром сярысь. Туж ӟеч тодӥсько Кирилл Ломагинэз. 7. Уг ушъяськиськы, зэм ик яратӥсько удмурт кылын потӥсь "Удмурт дуннеез". Соин ик та газетлы мон гожтӥськи ни вуоно ар понна но. Тазалыке ляб ке но, кӧнязэ ке висёнме газет но басьтэ кадь. Сое лыдӟыса, егит дырам вуи кадь потӥсько. Ф. КАЛАШНИКОВА. Кез ёрос, Кабалуд гурт. "КУЗЬЫЛИ КАР" - МОСКВАЫН Архитектор Касим Галиханов ивортӥз: Москваын витетӥзэ ортчем "Зодчество" фестивальын пинал удмурт архитекторъёс кыкетӥ интые потӥзы. Соослы ӵошатсконо луиз Москва, Красноярск, Якутск, Хабаровск, Тюмень, Пермь, Пенза, Саратов, Казань (ваньмыз 23) городъёсысь архитектурая но дизайнъя школаосы, студиосы ветлӥсьёсын. Москваысь гинэ 14 таӵе нылпи творчествоя огазеяськонъёс пыриськизы фестивале. Удмурт пиналъёслэн "Кузьыли кар" огазеяськонэнызы ӵош конкурсэ ас ужъёссэс вуттӥллям Ижевскысь "Пинал архитекторъёслэн школазы" но архитектурно- строительной лицей (таос быдэн кык дипломъёс басьтӥзы). Одӥг мында балл люкаса, нырысетӥ интые потӥзы Москваысь "Старт" но Ереванысь "Архитектура но искусство" студиос. Одӥг баллы гинэ соослэсь кылиз "Кузьыли кар" - "Шундыкар" лагерьлэн бурд улаз вордскем нылпи студия. 11 пиналъёс 14 ужъёсынызы пыриськизы "Зодчество" фестивале, 6-ез соос дипломен пусъемын. Тани со шудо пиналъёс: Наташа Мартынова (14 арес, Можга ёросысь Б. Кибья гурт) - "Калык мадёсысь ош", "Айшонлэн чеберлыкез" ужъёсыз, Наташа Дородова (14 арес, Завьял ёросысь Бабино гурт) - "Визыло крезьгур", Оля Кузнецова (13 арес, Кизнер ёросысь Безменшур гурт) - "Базарысь юбоос", Лена Захарова (15 арес, Завьял ёросысь Пычанки гурт) - "Архитектуралэн пуксетэз". Самой пиналэз - Ижевскысь дас аресъем Толя Галиханов, дипломен пусъемын солэн "Архитектура но цивилизациос" ужез. Та пиналъёс пӧлысь тужгес дунъямын Воткинск ёросысь Болгуры школаын дышетскись Саша Поздеев (12 арес), солы "Удмурт тодмет-пусъёс" ужез понна сётэмын куинетӥ степенё диплом. Удмурт нылпи архитектура нырысь вамышъёссэ лэсьтэ. Озьы ке но, конкурсэ пыриськыса, пиналъёс бадӟым вормонъёс басьтӥзы ни. Соосыз визьнодо инъетъёс вылын малпаськыны дышетэ Касим Галиханов. Солы аслыз но туала удмурт архитектура сярысь статьяосыз понна сётэмын куинетӥ степенё диплом. Т. Петрова. Касим Галихановлэн 1997 арын "Кузьыли карез" ("Шундыкарысь" пинал архитекторъёс). Мыжык ваньзэ интыя Германиысь Берзенбрюк городысь 55 аресъем вузкарись реанимация шедиз, ӟуч ужбергатисен (нимыз ӧвӧл шараямын) кусып возёнъёс сярысь вераськемзы бере. Та городлэн ульчаостӥз калтыртыкузы Россиысь 39 аресъем бизнесмен немецлэн йыраз боды выллем корт арбериен шӧдтэк шорысь шуккем. Табере "ужбергатись" полицилэсь пега. ИТАР-ТАСС. Чубайс: Россилэн Чечняез аслам шуэмез уг луы. Чечняен ожмаськемез бере, Россилэн сое аслам шуэмез уг луы, - лыдъя Игорь Чубайс - публицист, Россиысь нырысетӥ вице-премьерлэн братэз. Москваысь властьёс Чечняез Федерацилэн субъектэныз яло ке но, чеченъёс талы вань кужмысьтызы пумитъяськозы И. Чубайс Ичкериез Россилэсь ӵуказе ик люкыны уг дэмла. "Та ужрад 3-4 ар кыстиськоз", - малпа со. Интерпол амнистилы пуми Интерполлэн Россиысь бюрояз ужась Евгений Малышенко малпанъя, Кун Думаысь депутатъёсын ӵектэм экономической амнистия юрттоз йыружъёсын поттэм но собере кунгож сьӧрысь банк ъёсы понэм коньдонэз Россиын кыкетӥзэ "бергатыны". Е. Малышенко ивортӥз: "Россия мукет кунъёсын гожтысал кке йыружъёсын поттэм но кунсьӧры келям табышез утчан но ӝегатон сярысь одӥг ке но огкыл, уксё государстволы берыктэмын луысал ини". Донецкын анай луыны дасяськись нылкышноослэн хорзы кылдӥз. Соос дан сьӧры уг уисько, асьсэлы кенешемъя гинэ кырӟало. Куамын нылкышноосын кивалтэ азьвыл музыкант но ньыль пиналъёсын атайзы Семён Иванченко. Кырасьёс оско - пичильток анаез пушкын ик крезь гурез вала ини. Крезьгур юрттэ будыны, лякыт сямъёс пыӵатыны, инкуазен куазьмам быгатонлыкъёсты азинтыны. "АРГУМЕНТЫ И ФАКТЫ - НОВОСТИ". ПЫТСЭТЫН Пумиськимы соин Ижысь Киров нимо паркын, ог 45 аресъем, лапеггес мугоро, ӧжытак пурысьтаны кутскем воргоронэн шашкиен шудыкумы. Пукон сяменымы тодматским. Безносов Валерий, валэктӥз со. Пытсэт сьӧрысь потэм пдямиен вераськыны секыт. Уг яраты сыӵе мурт мадьыны ачиз сярысь но, колониын улон сярысь но. Нош Валерий юанъёслы валэктон сётыны пумит ӧз луы. - Кыӵе муген тон пытсэт сьӧры ӝымылӥд? - Мазэ ватонэз, огвакыт тросгес юыны кутскылӥ. Одӥгаз ӝытэ мултэссэ ӟамыртыны шедьтӥ. Соку ик бускелен керетон ӝутӥськиз. Со но шӧмаськемын вал. Та адямиез вандо шуыса кышкатӥ. Бордам пуртэ но, нокыӵе кивалтосэ но ӧй вал. Керетӥмы подъездын. Ӵашеттэммес кылӥсь-адӟись луэм, милицие жингыртэм. Сое ӧй тодылы. Номыр малпатэк изи гуртам. Ӵукна монэ сайкатӥзы милициысь лыктэмъёс, келязы следственной изоляторе. Озьы кутскиз пытсэт сьӧрын улонэ, Отын ик вераськонам чуртнаськизы мукетъёслы валантэм кылъёс. Гадь - со фанера, кровать - школнка, пуньы - полыс, тусьты - шлёмка, ӟус - трамвайчик, ӝӧк - кормила но мукет. - Азьланяз кыӵе югдур кылдӥз? - Изоляторын монэ быдэс толэзь возизы. Та дыр ӵоже адвокатэз но, следователез но дорам ӧтьыны кури. Кылэм-адӟем карись ӧз луы. Нош мынам дорам семьяе, кышное, нылпиосы, мӧйы атае вань. Ужаны но соосты сюдыны кулэ. Камераын тямыс шконка. Улыно-вылыноесь. Татчы 24 муртэ люказы. Тямыс шконка вылын 24 мурт огдыре кӧлыны уг быгаты. Огез ньыль час шутэтскыны вуэ, со интые ньыль часлы мукетыз выдэ. Уин дыр туж секыт ортче. Ярам ай, монэ озьы толэзь гинэ курадӟытӥзы. Одӥгез укмыс толэзь пукем ини. Кыӵе ке квартираез качам. Табере со вылэ куштыны выро мукетъёссэ лушкам квартираосты. Дознавательёс уг кепырало, адямиез, сьӧлыкъёссэ вераны косыса, бодыен но шуккыны. Допросэ нимысьтыз камерае нуо. Отын пукто выж вылэ юнматэм пукон вылэ. Юалляськон сярысь трос аламазэ вераны луоно. Чагиськыны нокинлы. Ӝожтӥськон гожтӥд ке, со матэтӥ ик котыръяське но кинлэн ке ӝӧказ чука. Одӥгезлэн чагиськонэз пумысен кутэм решение ньыль ар бергаз. - Но сиён кыӵе? Ӵукна сёто шыд. Кубистаен ву шуыса нимаськомы сое. Одӥг юдэс нянь, ӝыны кружка чай. Сутка ӵоже басьтод одӥг но ӝыны пуньы песок но ӝук нерге. Ӝыт сиёнмы баланда шуиське. Кӧтэз тырон сярысь малпанэз ик ӧвӧл. Посылка басьясьёслы умойгес. Вань чифирен дарманьтӥсьёс. - Ачид верамъя, йӧнтэмъяськемед 15 суткалы но уг кыскы кадь. Нош тонэ толэзь курадӟыто. Собере но ӧз лэзе-а? - Ӵапак толэзь ортчыса, монэ судэ нуизы. Янгыш каризы уголовной кодексысь 207-тӥ статьяя. Адямиез виыны турттэме понна, пе. Суд вакчи вал. Трос ик юаса-вераса ӧз улэ, сётӥзы ӝыны ар. Колоние нуизы ӟоскыт вагонын. Малпасько вал, мон гинэ татчы юнме шорысь шеди шуыса. Озьы вылымтэ. Сюмси палась воргорон одӥг ведра картошка но кык йыр кубиста лушкам. Пуктэмын кык но ӝыны арлы. Игра палась Коля 150 килограмм сӥль лушкамез понна пытсэт сьӧры шедемын куинь арлы. Та выллем учыръёс сярысь трос вераны луоно. Ренат кышнозэ урод кылъёсын тышкаьскем эрикез кык но ӝыын арлы таламын. Ижысь Вася, мон сямен ик, мукетыныз керетэм. Кузёлы дурбасьтыса, пуныез урдскем музон мурт вылэ. Ӵукна Вася кык бутылка водкаен дыртэ извинение курыны. Нош сое кырмизы но куинь арлы пуктӥзы. - Пытсэтэ шедемъёс ог-огзэс ултӥяло, пе. Юнме супыльтон ӧвӧл-а со? - Одӥг учырез верало. Изоляторамы улӥз аслэсьтыз укмыс аресъем нылзэ эриктэмам мурт. Мар понна адямилэсь татчы вуэмзэ ӝог тодо. Сиськон азьын та воргоронэз сэргы султыто но, котькудӥз кызьы ке но вӧсь карыны кулэ. Кин сое жалялоз, ачиз тыш сиёз. Огез мыжге, мукетыз ӵыже, куинетӥез чабке, мон ымныраз сялӟи. Огпол начальник эриктэмасьлэсь юа: тонэ мыскыллясь ӧвӧл-а? Ӧвӧл шуэ, нокин, пе, монэ уг ултӥя. Адями тодэ: шонерзэ вераз ке, солы улыны уз сётэ ни. Зонаын тон ялан ултӥям адями. Отчы шедеме бере ик йырме ӵышкизы, шуныт дӥськутме но изьыме басьтӥзы. Брюкие кык вал, одӥгзэ гинэ кельтӥзы. Изьы интые донгизы огшоры материаллэсь вурем картуз. - Валерий, мар верамед луоз висёнъёс пумысен? Улоно луиськод ӟоскыт интыын. Висисьёсын одӥг омырен шокаськод. Тӥни малы зэкъёс пӧлын паськыт вӧлмемын туберкулёз. Висёнъёс аляло алама сиён бордысен но. Адями восьме, кылъёслы пумит нюръяськыны кужымез уг тырмы. Пытсэт улэ шедьыкум, мон 70 кило кыскисько вал, отысь потӥ 58 килоем. Ужаса коньдон ке поттысалыд, улыны капчигес луысал. Уж ӧвӧл. Кӧня ке муртэ ысъяло лымы сузяны. Толэзяз соос басьто 15 сюрс манет. Одӥг пачка чай сылэ куать-укмыс сюрс манет, одӥг кило конфет - 18 сюрс манет. Эмъюмъёс уг тырмо. Йырыд ке висе, валидол яке мукетсэ дэмлалозы. Нош со тыныд уг тупа. Пытсэт улэ шедьыкум, тусьтые, пуньые ӧй вал. Сётӥзы шлёмка. Со вужмемын, куасаллямын, сьӧдэктэмын. Мунчо ласянь но туж алама. Шайкаос пуж кадесь. Отчы ву лэзиськод гинэ, ӟус дорозь уд вуиськы на, со буш ни. Ӝыны ар пукыса бертӥ но, уж утчаны кутски. Шедьтӥ. Снабженеце дэмлазы. Ортчы, пе, медкомиссиез. Рентгенэ мынӥ. Шараяськиз туберкулёз. Пукыкум сыӵе кузьым шедьтӥськем. Кӧня дыр ӵоже йӧнатсконо луоз, вераны уг тодо. - Тон сяна но сыӵеос вань-а? - Тямыстон процентэз пукемъёс мон кадесь шуи ке, уг янгыша. Йӧнатскыны лыктӥз кык метр ӝуждалаем егит воргорон. Ӝугиськемез понна куинь арлы пуктӥллям вылэм. Бышкись ез сьӧрын пияш юн восьмем. Туберкулёззэ шедьтӥллям. Пукыны но огдыре йӧнатскыны келяллям 4 номеро колоние. Пияш, эрике потыкуз, 82 кило интые кыске 45. Адямилэн аслаз семьяез но ӧвӧл ай. Мар ке умоез вите на меда сое та дунне вылын? Пытсэт сьӧры шедемъёс сярысь газетъёс уродзэ гинэ гожъяло. Соиз валамон: йыртэмамед понна кыл кутыны тонэ курортэ уз келялэ. Валерий Безносовлэн верамаз, оло, ваньмыз ик зэм но ӧвӧл. Туж ичиез пукисьёс асьсэды асьсэос янгыш каро. Но колониын но кыӵе ке улон вань. Адямиос ужало, шутэтско, посылка яке гожтэт витё. Часэн- минутэн лыдъяло эрике потонзэс. Кин тодэ: колониосты Югдурез утёнъя министерство киысь басьтыса, Юстицияя министерстволы сётон, оло, югдурез воштоз ай. Пукисьёсты шонер сюресэ поттон сярысь сюлмаськон ньӧмыз понна медаз луы. Нош самой кулэез - мукетыз. Йыртэманы дасяськыкуз, котькудӥз мед малпалоз: кинэ со вӧсь кароз но кытчы сюроз таин сэрен. В. Трофимов. Кун Кенешын Кызьы ивортӥмы ни вал, коньдонэз пичиятонэз (деноминациез) республикаямы ортчытонъя нимаз комиссия кылдытэмын. 22 сентябре солэн нырысетӥ кенешез ортчиз. Комиссилы тӧрое быръемын Кун Кенешлэн Тӧроезлэн нырысетӥ воштӥсез Владимир Агашин, воштӥсе - Антонина Лисина, Правительстволэн Тӧроезлэн воштӥсез. Та ужлы дасяськон юнматэм планъя мынэ. Вазиськыны луоз 76-43-22 номеро телефонъя яке Кун Кенешлэн Аппаратысьтыз гожтэтъёсъя но адямиосты кутонъя отделэ. КУН КЕНЕШЫСЬ ПРЕСС-СЛУЖБА. Кун Кенешын Федерацилэн Кенешез 24 сентябре ужзэ азьланьтоз. Солэн заседанияз пыриськоз Удмурт Республикаысь Кун Кенешлэн Тӧроез А. Волков. Россиысь парламентлэн вылӥ палатаяз ужам сяна, А. Волков чакла Коньдонъя министерствоен бюджетысь ссуда басьтон сярысь вераськыны. Удмуртие сентябрь толэзе, 60 миллиард манет интые, 30 миллиард гинэ вуиз ай. Пумиськонъёс ортчозы Нациосын ужанъя министерствоын, Россиысь Правительствоын но Президентлэн администрацияз. Вераськон мыноз Удмуртилэн нырысетӥ паларын социальной удысын но экономикаын азинскемез сярысь. Правительствоын Правительстволэн Президиумез эскериз пытсэт сьӧрын пукисьёслы уж сётонъя программаез кылдытон сярысь ужпумез. Программаез 2000 арозь быдэстыны чакламын. Та выллем план кылем арын но кутэмын вал. Сое улонэ пыӵатон юрттӥз тюрьмаосын сюлэсь уно выль арбериосты лэсьтонэз радъяны, продукция поттонэз 40 процентлы йылэтыны. Кыл кутонэз быдэстонъя управление (Управление исполнения наказания) федерацилэн бюджетысьтыз 15,4 миллиард манет интые 1,2 миллиард манет гинэ басьтӥз ке но, пытсэт сьӧрын пукись 1100 адями ужаны кутскиз. 2,5 сюрс адямилы уж сётыны луонлык ӧвӧл на. Та программаен чаклам ужрадъёс улонэ пыӵазы ке, эшшо сюрс ужан интыос усьтӥськозы на. Правительстволэн Президиумез ӵектӥз городъёсысь но ёросъёсысь кивалтӥсьёслы управленилэсь улон юртъёссэ, соцкультбытъя предприятиоссэ муниципальной асваньбуре выжтон сярысь ужпумез эскерыны. *** "НИТИ "Прогресс" ОАО-лэсь производствоен, кивалтонэн, бытовой юрттэт сётонэн герӟаськем юртъёссэ Удмурт Республикалэн асваньбураз выжтон сярысь постановленилэн инъетэз эскеремын. 9 сюрс квадратной метр бушам интыосын Удмуртиысь вузкаронъя но промышленностья палаталэн выставка-ярмаркаез ужалоз, спортзалъёс ӧсъёссэс вӧлак усьтозы. *** "Удмурт Республикаысь бюджетлэсь нылпиосын гражданъёслы пособиосты тыронъя 1997 арлы пунэмзэ берыктон сярысь" постановленилэн инъетэз эскеремын. Постановление иворъёсты вӧлмытӥсь ёзъёсын печатламын луоз. *** 1998 арын Удмурт Республикаын ИТАР-ТАСС-лэсь корпунктсэ возьыны коньдон висъян сярысь постановление кутэмын. *** Пияла банкалэн залоговой дуныз будэтэмын. *** Воткинскысь мэр Валерий Фридрих "Воткинское автопредприятие" кун предприятилэсь лэсьтыса быдэстымтэ улон юртсэ городлэн администрациезлы сётыны дэмлаз. Президиум та ӵектонэн соглаш луиз. Воткинскын ӟеч сям пыӵаз ини: предприятие улон корка пуктыны огназ уг вормы ке, солы мукет организациос юртто, кужымзэс огазеяса. Котьку сямен - дэмен Ёрос кивалтӥсьлэсь Галина Вишневскаялэсь кенешонэ люкаськемъёс азьын вераськемзэ кылзыса, малпан кылдӥз: эккой, таосыд воксё майбыр уло ук! Дышетӥсьёслы- эмъясьёслы уждун тыремын, администрацилэн коллегияз пыро ёросысь ваньмыз сямен валтӥсь директоръёс, культура но азинске, гурт калык но муш кадь тырше. Журналистъёс гинэ ымзэс ӧз усьтэ, республикамылэн вань сэрегъёсысьтыз лыктэм куноос но абдразы. Мылкыд воштӥськиз, куд-ог предприятиосы вуылыса. Акциосын "Игринский леспромхоз" огазеяськон. Цехъёс уг сыло кадь. Адямиос маин ке но выро, бергало. Тани огаз участокын соос укно рама лэсьто. Тач-тач! йыга молоток кышномурт киын. Клей, вӧлон пурт, кандан бумага - рама дась. Урод ӧвӧл кадь. Но лэсьтэм арбериез матэгес кариськыса чакласькод ке, син шоры соку ик йӧто куд-ог шекъёс. Сю сюрсъёсын коньдон со понна сётыны жаль кадь. Бен, быгато татын ӟечгес но ужаны. Контораысь коридорын олокыӵе но чиль-валь кисьтаськись вузъёс тыремын. Вӧлэм-вандэм пул (калыкын сое вагонка шуо) - кубез миллионлэсь ятыр. Чеберъям ӧс - сомындагес ик. Вань-а басьтӥсьёс? Шедё, лэся. Тани со дуно ӧсъёсты ик нимаз адямиослэн куремзыя туэ 150 пала вузаллям ни. Озьы ке но, озьы ке но... Предприятиен тодматскыны лыктэмъёс (соос пӧлын вал удысэз ӟеч тодӥсьёс но) огымысь кадь шуизы: леспромхозлэн продукциез - толло нунал. Туала вактытэ, куке рунок косэ ас интыдэ гижысь-пиньысь утчаны, сыӵе вузъёсын кыдёке уд вуы ни. Отысь уг пото меда татын тыршисьёслэн шуг-секытъёссы? Фанера лэсьтон цехын ужась нылкышноос элькун кивалтӥсьёсты одӥгаз сэреге чылкак ӝиптӥзы, шуыны луоз. - Вералэ, вералэ тӥ, кызьы улоно? - удмурт кенаклэн Тамара Никитиналэн киосыз гинэ ӧвӧл, быдэс мугорыз зурка, чиданэз копак быремын ни шӧдске. - Кылем арын август толэзьысен уждунэз ум адӟылӥське ни. 50-100 сюрс аванс сётъям каро, нош кытчы соин мынод? Тани юртъер-азбар понна налог тыроно - немаин. Кылем арын костюмме вузай - тыри. Нош туэ марме сётом? Уг тодӥськы. Ай пени, штраф люкаське ук, будто ке ми виноватэсь. - Уждун чотын пызь, селёдка басьтыны дэмлало, - эшез борды итӥське Нина Ефимова, - но со ваньмыз дуно, огшоры магазинысен уд ӵошаты. Тани алигес трикотаж ваизы. 52- тӥ размер. Ма, со кофтаязы ми ӵошен тэром... Нылкышноосты дугдытыны уг луы ни. Соосты валаны луэ. Аръёсын уждунтэк улон лякыт сямо адямиез но лекомытэ уго. Кышномуртъёслэн верамзыя, соос Иже гинэ ӧвӧл, Игра посёлоклэн шораз но толэзьёсын уг вуыло. Мын вал - билетлы коньдон кулэ. Маке басьты вал - нош ик. Тӥни сыӵе югдур. Пӧртэм вылымтэ Факел посёлокын но. Отын ортчиз пичи пумиськон. Со бере администрацилэн юртысьтыз потӥсьёсты гуртын улӥсьёс котыртӥзы. - Кудзы-о ай тӥ Волков? - ӧс кусыптӥ вамыштӥсь котькуд воргоронэз синъёсынызы мертаса сыло пӧртэм арлыдо кышномуртъёс. Соку ик пусъём. Ваньмыз сямен юэмын. Паймиськод куддыр та калыклы, уксёзы ӧвӧл, пе, нош юонлы кытысь ке шедьто. Александр Волковлэн та пумысен пыкылэмезлы кенакъёс соку ик меӵкытӥзы: - Сазь йырын ми татчы лыктыны ик ӧм дӥсьтысалмы... Кин тодэ на? Оло, зэмез но вань верамазы. Озьы ке но, сюлэмшугъяськонъёсты кивалтӥсьёс дорозь вуттон понна, мукет амал но шедьысал. Та суредъёсты газет баме вуттыса, мон уг турттӥськы трос ӟечсэ ватыса кельтыны. Нош со татын ичи ӧвӧл. Ёросысь депутатъёс, администрация ичи уг лэсьто, вань адямиослэсь улонзэс ӧжыт ке но капчиятон понна. Тани Игра леспромхозын югдурез тупатон вылысь но ужрадъёс кутӥсько. Но пайдаез уг адӟиськы на. Семинарын Галина Вишневская нош ӝутӥз та ужпумез: ойдолэ, пе, Играын ортчытом нюлэс хозяйствоын кылдэм шуг-секытъёсты эскеронъя бадӟым кенешон. Ӧтём специалистъёсты, депутатъёсты, банкиръёсты, кыӵе ке но огъя малпанэ вуом. Уго Удмурт шаерез котькугес ик нюлэс сюдӥз. Кулэ меда таӵе секыт вакытэ солэсь палэнскыны, удысэз аналтыны но му вӧй поттӥсьёслы гинэ оскыса улыны? Огазеяськыса котьмае вормыны луоно. Таӵе мылкыд шӧдӥськиз Играын кылем пятницае лумбыт. Со сярысь веразы Александр Волков но, мукет депутатъёс но, ёросысь кивалтӥсьёс но. Власть но ваньбур поттӥсьёс ог-огзэс валаса ужазы ке, ваньмыз пӧрмоз. Быгатӥзы ук тани играос калыклы улон-вылонын юрттонъя центр кылдытыны. Табере со, оло, черклэсь но дуно ни татысь курадӟисьёслы? Центре шутэтскыны- эмъяськыны ветло мӧйыос, ӧлексы нылпиос. Данакез со понна коньдон но уг тыро. Урод шат? Центрлэн кивалтӥсезлэн Галина Олиналэн верамезъя, татчы ветло 300 пала адямиос. Со сяна, центрысь ужасьёс юртто ёрмисьёслы бакчаоссэс гырыны, пу вайыны, куд-ог тупатъян ужъёсты быдэсъяны. Усьтэмын нимысьтыз магазин. Литр йӧл отын 1,5 сюрс манет сылэ, посёлокын сярысь, со 500 манетлы дунтэмгес. Азьланьын улонмы ӝог гинэ тупатскоз шуыса оскон пичи бере, центр отӥяз эшшо но кулэгес луоз, дыр. Котырес ӝӧк сьӧрын пумиськон дыръя уноез отчы пыриськемъёс пусйизы: зэм но, кулэ ӧвӧл висъяськыса улыны-вылыны. Уго котькуд предприятиын, котькуд ёросын вань маиз ке но адӟем карымонэз. Ужпум со опытэз огазеян, вӧлмытон бордын. Нош таиз ини элькун кивалтӥсьёслэн сюлмаськонзы. Быгатӥзы ке соос республикаямы огъя югдурез киязы возьыны, вань ӟеч кужымъёсты бордазы кыскыны, улонмы но пумен шонерскоз. Сыӵе оскон сётӥз Играын пумиськон но. ИВАН ЛЕБЕДЕВ. ТУСПУКТЭМЪЁСЫЗ Н. ГЛУХОВЛЭН. Нуналлэн тодметэз Покчи гужеммы ортчиз, сое воштӥзы акылес пурысь зоръёс. Сӥзьыллэн сыӵе ни сямыз: дэриез-нӧдэз котьку ятыргес луэ. Вашкала календарья 25 числое пусъё Артамонлэсь вордскемзэ. Та нуналэ, пе, кыйёс нюлэскы кошко но отчы толйыны ватско. Ӵуказе - Корнилийлэн праздникез. Сяртчыез сяна, октыны кутско ни вань бакча сиёнэз. Корнилийлэн нуналысеныз, пе, музъеме ватскем выжыос уг будо ни - кынмо но сисьмо. * Нуналмы сутка ӵоже кулэсмиз на эшшо 5 минутлы. Туннэ со кыстӥськоз 12 час 1 минут. Та нуналэ... ар талэсь азьло 1895 арын 26 сентябре Витебск губерниысь Полоцк уездын вордскиз Владимир Азин - граждан ожлэн героез. Солэн дивизиез кык пол мозмытъяз Ижевскез тӧдьыос улысь: 1918 арын 7 ноябре но 1919 арын 7 июне. Геройлыко начдив пусъемын Горд Знамя орденэн. Быриз Тихорецк дорын 1920 арын 20 феврале. 1922 арын 25 сентябре Удмурт облисполкомлэн кутэм постановлениеныз кылдытэмын областной плановой комиссия (облплан). 1935 арын январь толэзьысен со пӧрме УАССР-лэн правительствоезлэн Государственной плановой комиссиезлы, 1978 арысен - УАССР-ысь Госпланлы. Со ужаз республикаысь калык хозяйствоез азинтонъя планъёс дасян но соослэсь быдэсъяськемзэс эскерон бордын. Туала вакытэ Госплан быдтэмын. 26 сентябре вордскемез дырысен 75 ар тырме Советской Союзлэн Героезлы А. П. Пряженниковлы (1922-1945). Вордскемын Глазов районысь Артенки гуртын. 1943 арын 25 сентябре Западной фронтлэн войскоосыз фашистъёс улысь мозмыто Смоленск городэз. Со понна ожмаськонъёсын бырыны шедизы тросэз землякъёсмы, 357-тӥ стрелковой дивизилэн боецъёсыз. Пыӵалэз уд сиы Пыӵал тӥрлык поттон удысын ужасьёс быдэс Россиын бугыръясько. Забастовкае потӥзы Ижевскысь рабочийёс но. Жаль кисьтӥсь кезьыт зор шоры учкытэк, валлян ӵукна соос люкаськылӥзы Ижевскысь администрацилэн юртэз азе. Куронзы одӥг: уждунэз дыраз тырон, квартира, газ, шуныт понна дунъёсты кулэстон. Люкаськемъёсын кенешизы Ижевскысь мэрлэн нырысетӥ воштӥсьёсыз С. Протозанов но В. Засыпкин. Городлэн администрациез но регионъёслэн ыстэм адямиоссы, одӥг ӝӧк сьӧрын пукыса, огъя кылэ вуизы кадь. Вераськон мынӥз нылпи садъёсы шуныт сётон, соосты дыраз тупатон сярысь но квартираосын герӟаськем куд-ог ужпумъёсъя. Л. МЕДВЕДЕВА. Лэчыт ужпум Ой, уроме, юрттомы Уромысь та школалы Школа - кыкетӥ юрт. Озьы юнме уг верало, уго нылпиослэн, дышетӥсьёсты вератэк ини, ӝыныез дырзы школаын ортче. Но Пичи Пурга районысь Уром шор ёзо школаез али нокызьы но уд ӵошаты бордаз кыскись шуныт юртэн. Буямтэ, тупатъямтэ школаез уг шулдырто котыртӥз мерттэм сяськаос но. Уром шор ёзо школа выль дышетскон арлы дась ӧвӧл на. Школалэн вылтусыз сокем урод уг ке но адӟиськы, пушкыз номырлы ярантэм. Вӧлдэтъёс сьӧдэктэмын, борддоръёслэн буёлъёссы лӧптылэмын (учкелэ туспуктэмез). Школаямы кыкетӥ арзэ ини ву вия, валэктэ директорлэн воштӥсез Елена Ивановна Серебрякова. Зоро нуналъёс дыръя нырысетӥ этажетӥ зонтикъёсын ветлӥськом вал. Ми вуылон нуналэ школалэн директорез Альберт Михайлович Сабиров краска утчаны Глазове кошкем. Егит дышетӥсьлы, Глазов пединститутэз быдтэм муртлы, та кык аръёс туж секытэн сётӥськиз - директоре пуктыкузы ӧз но малпалля хозяйствоен вырон ужъёс сое копак выйытозы шуыса. Секыт ныпъетэз вормытэк, со директорлэн ужезлэсь али мозмытскыны мылкыд карем. Уром школа пумысен кылдэм югдурез ӟеч тодо районлэн администрацияз но, роноын но. Уромысь дышетӥсьёсты ялан оскытылӥзы: Ильинскысь школаез тупатъям бере тӥлядэз борды кутскомы шуыса. Бен, школалэн липетэз туннэ нуналлы тупатъямын. Но пиналъёсты школае пыртыны кышкыт - вань тыл езъёс тӥямын. Туала куронъёсъя урокъёсты нуон сярысь вераськонэз ик ӧвӧл. Тыл ӧвӧлэн, пиналъёслы сиён пӧраны но уг луы. Вуылон нуналамы школаын ужа вал Ижысь ПМК. Шонерзэ вераса, городысь вуэмъёс ужамъясько гинэ вал. Соослэн верамзыя, тыл езъёсты воштон понна 30 миллион манет коньдон кулэ. Коньдон шедьтыны кыл сётӥллям администрация но Калыкез дышетонъя министерство. Но коньдон вуытэк, рабочийёс ужзэс азьланьтыны уг малпало. Тазьы милемыз трос пол пӧяллязы ни, шуо соос. Коньдон ке луиз, тупатъян ужъёсты 1 октябрёзь йылпумъяны чакламын. Али лэсьтӥськон ужъёс мыно котельнойын, собере тупатъялозы столовоез. Таӵе мӧзмыт, пеймыт, кезьыт школаын дышетскыны но ужаны вань мылкыд кадь пумитъяське. Сыӵе учыре уд но вала кызьы умойгес: оло пиналъёсты куашкам школаын дышетыса, оло ужанэз куспетӥ карыса. Озьы-а, тазьы-а, но министерствоын ужасьёс котьма понна дышетӥсьёслэсь ик кылзэс юалозы. Кыӵе ке шудтэм учыр луиз ке, милемыз ик янгыше уськытозы, шуэ дышетӥсьёслэн профкоменызы кивалтӥсь Иван Михайлович Ожмегов. Дышетӥсьёсын вераськыса, огкылэ вуим: покчи классъёсты дышетӥськом, бадӟымъёссэ нылпиосты, сӥзьыл каникулъёсы дышетскон вылысь, бусы ужъёсы лэзим. Дышетӥсьёс одӥг нунал но ужтэк ӧз на пуке. Огъя вераса, кык сю нылпиос пӧлысь али школае ветло ӝыныез, тодон-валанъёс басьто дышетскыны ярам кабинетъёсын. Директорын ужаны пумит луымтэ та школаын ик азьвыл ужам дышетӥсь Любовь Николаевна Никитина. Дышетӥсьёс сярысь ке верано, татын котькуд куинетӥез калыкез дышетон удысысь отличник луэ. Удмурт классэз нуись егит дышетӥсьсы татчы горд дипломен вуиз, ужез пӧрме. Дышетӥсьёс пӧлысь директор но бырйыны секыт ӧвӧл кадь. Зэм, та пумысен уно кенешъёс но ортчытъямы, маде Елена Ивановна. Берлояз кенешын директоре ньыль мурт дэмламын вал, тямыс ӵектэмъёс пӧлысь. Но ваньзы пумит кариськизы: я тазалыксы лябен, я мылкыдзы тырмымтэен. Татысь коллективез туэ эшшо одӥг ужпум сюлмаськытэ на. Со герӟаськемын удмурт кылэз дышетонэн. Уром посёлокын 89 процентэз удмуртъёс уло. Озьы ке но удмурт класс усьтыны туж курадӟоно луиз, югдурез валэктэ Елена Ивановна. Калыкез дышетонъя министерствоын ужасьёс оскон пыӵатӥзы: вить нылпи ке но люкаськиз, удмурт класс усьтылэ, ужаны юрттомы. Мумы-бубыос пӧлын валэктон уж нуыса, кык удмурт классъёс кылдытӥм. Табере министерство ик со классъёсты огазеяны косэ. Озьы 2-тӥ но 4-тӥ классъёсын дышетскись 16 удмурт нылпимес туэ огазеяно луим. Паймемын анайёс но, дышетӥсьёс но. Кызьы ужано табере дышетӥсьлы? Дӥсьтозы-а анайёс пиналъёссэс азьланяз удмурт классъёсы сётыны? Сыӵе шудонъёс нырысь ик шӧдӥсько нылпиос вылын. Пӧртэм классъёсысь нылпиос пӧлын олокыӵе но тупамтэос кылдыло. Дышетскон ар али гинэ кутскиз ай, но анайёслэн верамзыя, покчиос доразы ялан бӧрдыса бертыло. Школаын вань психологзы, со туж умой. Но нылпиос куспын тӥяськем кусыпъёсты сэрттон-пертчонэн гинэ солы выроно уз луы меда? Тӥни сыӵе югдур али Уром школаын. Урамын покчи гужем, нош школаын кезьыт. Т. БАННИКОВА. Фотоосыз В. Камашевлэн. Одӥгез куиньзэ воштэ Удмуртиысь эмъюм но поттонъя медициная предприятиослэн ассоциацизы Италиысь "Си- Эс-Си" эмъюм поттонъя концернэн ӵош ужаны кутскиз. Та удысысь нырысетӥ вамышъёсын журналистъёсыз тодматӥз солэн кивалтӥсез С. Б. Шишкин. Вылӥ ӟечлыкен препаратъёс лэсьтонлэсь азьло нырысь ик калык пӧлын валэктон уж нуиськом, шуиз Сергей Борисович. Алигес сыӵе пумиськон радъямы Глазовын. Соку кӧтпушез возьматӥсь "Локтуоза" препаратэз лэсьтонлы куронъёс но кылдӥзы. Угось со огдыре ик куинь препаратэз воштэ. Италиысь вуэм эмъян препаратъёсты но таблеткаосты кулэяськисьёс азьланяз басьтыны быгатозы аптекаосын но. Трамвай эшъяськыны юрттэ Берло дыре Удмуртия но Чехия эшлыко кусыпъёссэс юнматӥзы. Ортчем арня вискын Ижевскын ортчиз Чехиысь трамвайлы но сое лэсьтӥсьёслы сӥзем пумиськон. Выль трамвайёс электрокужымез шыръяло но калык понна ичигес кышкытлык ваё. Та пумиськонын Ижевск городлэн мэрез А. Салтыков но Чешской Республикалэн Россия Федерациын посолэз Л. Добровски ог-огзылы ас малпанъёссэс шара веразы, дэмланъёс сётӥзы но азьланяз эшлыко кусыпъёсты юнматон сярысь кенешизы. Шумпотымон соиз но, Ижевсклэн ульчаостӥз ширтӥсь выль трамвайёслэн лыдзы эшшо дас витьлы йылоз на. В. Андреева. КУАЗЬ Асьме доры, зэмзэ но, покчи гужем вуэ ни кадь. Туннэ куазь пильмаськылоз, тӧл вошъяськылоз, зор-кот трос ик уз усьы. Температура уин дасо градусозь шуныт луоз, нош нуназе 16-21 градус шуныт сылоз. Арня нуналэ куазь сокем уз воштӥськы. "Сюлэмы лобаны кылдэм ке..." Солэн сюлэмыз ӝиптэмын вал пеймытын ӝабырскись гижыос улэ. Соин ик - сюлэм черектэмез, инме лопырскыны дась луись мылкыдыз - котькуд чураз... Марина Цветаеваез Советской власть ӧз нуныя. Кылбуръёсызлы дун возьмаса, трос кураськоно луиз. Дас сизьым арзэ ортчытӥз эмиграциын. Быдӟым ож пуромон азьын гинэ дораз бертӥз. Улон сюресэз сое вуттэ Елабугае, татын ик 1941 арын ас мылкыд каремезъя улонысь кошке. 26-тӥ куарусёнэ Марина Цветаевалэн вордскемез дырысен 105 арес тырмысал. Соин ик та нуналъёсы бигер городэ яратоно кылбурчизылы йыбырттыны, шайгу вылаз сяськаос тырыны лыкто адямиос. Марина Цветаева Сюлэмы лобаны кылдэм ке - Мар солы узырлык, мар солы корка! Мар - Чингисхан, мар солы Орда! Кык тушмонъёс вискын со берга, Кык кыктоос - люконтэм герӟамын ваче: Сютэм но кӧттыр улон - ӵош, уртче. *** Бур ки но паллян ки выллем - Сюлмыд мынамезлы матын вылэм. Герӟаськемын одӥг шуныт гердэ. Бурыз бурдэ паллянэныз бурдэн. Но тӧлпери потэ - мур гу вамен Буре но паллянэ - уг лу мынэм! *** Туж маке но векчиез Чиетӥз пужым пушкын. Сьӧд синмо пичи пиез Мон адӟи та уй куспын. Со озьы горд пужымлэн Пӧсь сирез вия, чиля. Со озьы сюлэм вылэ Пиньёссэ пуктэ пила. БЕРЫКТӤЗ Т. ЧЕРНОВА. КЕДРА МИТРЕЙЛЭН ВОРДСКЕМЕЗ ДЫРЫСЕН - 105 АР Макем яркыт, сокем вӧсь Удмурт литературалэн инбамаз нырысетӥосыз пӧлын тужгес яркыт ӝуатскем кизили жалятэк уськытэмын-лёгамын вал 30-тӥ аръёсы. Но со тылсиос вӧлскыса вуизы но пыраклы пыризы удмурт лул-сюлэме. Кедра Митрей (Дмитрий Иванович Корепанов, 1892-1949) гожтӥз "Дитя больного века" автобиографической повесть (1911), "Эш-Тэрек" трагедия (1915), "Идна-батыр" драматической трилогия (1926), "Юбер-батыр" исторической поэма (1928), "Секыт зӥбет" нырысетӥ удмурт роман (1929), "Зурка Вужгурт" повесть (1936) но трос мукет произведениос. Прозаик, драматург но кылбурчи луэм сяна, со вал литературовед, публицист. Калык пӧлы трос пол экспедицосын поталляз, кылэз, литератураез но крезьгур устолыкез азинтонъя, улонысь пӧртэм сюлэмшуго ужпумъёсъя статьяос гожтӥз. Бугырес пилемо вал улонэз Кедра Митрейлэн. Со сярысь верало Д. И. Корепановлэн личной делоысьтыз документъёс но, кудъёсыз возисько милям фондъёсамы шаермылэн выль историезлы документацияя Центрын. Д. И. Корепановлэн автобиографиысьтыз 1937-тӥ арын 15-тӥ апреле "Мон вордски 1892-тӥ арын 16-тӥ (29) сентябре Вятка губерниысь Глазов уездысь Игра черкогуртын шоро-куспо улӥсь удмурт крестьянлэн семьяяз. Дышетски церковно-приходской школаын, кык классъем земской училищеын но Казаньысь инородческой учительской семинариын. Йылпумъясь экзаменъёс азьын семинариысь уллямын, инмарлы оскымтэе но эркын малпаськеме понна, отметкаостэм свидетельствоен но ыстэмын мумы-бубыосы дӥне Играе. Татын полицилэн син азяз возизы. 1911-тӥ - 1913-тӥ аръёсы ужай пуэз вӧлӥсь но переплётчик луыса частной мастерскойын. 1912-тӥ арын экзамен сётэме бере... 1914-тӥ арын февральысен луи Сарапул уездысь Зюзино волостьысь Кулаково гуртын земской школалэн дышетӥсез. 1914-тӥ арын пӧсьтолэзьлэн пумаз военной службае басьтӥзы... 303 номеро Вятской ополченской дружинаен вуим Амур дурысь Благовещенск городэ. Татын монэ младшой унтер-офицерысь прапорщике выжтӥзы, дружина судлы делопроизводителе пуктӥзы. 1917-тӥ арын февраль революция бере, июне, Иркутске вуи... нош ик унтер-офицер луи. Шеди 7-тӥ ротае, кытын дезертиръёс гинэ вал, соин ик адямиосты шинельтэк но сапегтэк возизы. Улон югдур воштӥськем бере, монэ демобилизовать каризы...* Вуи Вяткае, губерниысь калыкез дышетонъя отделэ. Ыстӥзы Глазов уездэ. 1920-тӥ арын июньысен луи Зура ронолэн кивалтӥсез. 1921-тӥ арын выжтӥзы Дэбес УОНО-е социальной воспитаниея подотделэ кивалтӥсе. 1922-тӥ арын 27-тӥ декабре кутэмын РКП(б)-е кандидатэ. 1923-тӥ арын июне партилэн обкомез ӧтемъя лыктӥ Ижевске. Со дырысен 1928-тӥ аре сентябрёзь ужай "Гудыри" газетлэн редакцияз, нырысь редакторлэн заместителез, собере редактор луыса. 1927-тӥ арын сентябре юнматэмын Глазов УОНО-е кивалтӥсе, 1929-тӥ-30-тӥ аръёсы Глазовысь педагогической техникумен кивалтӥ. 1930-тӥ арын апрельысен 1932-тӥ арын июнёзь дышетски Москваысь научно- исследовательской программно-методической институтын. 1932-тӥ арын июньысен - Удмурт научно- исследовательской институтын, нош 1935-тӥ арын августысен - Удмурт АССР-ысь советской писательёслэн Союззылэн правлениезлэн председателез, со дыре ик дышетӥ удмурт литературалы педагогической институтын. 1925-тӥ арын мартэ ВКП(б)-е кандидатысь членэ выжтэмын. Мон кышнояськи Амур улосысь Благовещенскын 1915-тӥ арын. Мынам тямыс нылпиосы пӧлысь бадӟымез пие 1936-тӥ арын сӥзьылысен ужа Глазов карын автомеханик луыса, мукетъёсыз дышетско. Монэ бырйылӥзы Удмуртиысь Советъёслэн областной съездазы. Облисполкомлэн вить составаз членэз вал, одӥг полаз - ОБик-лэн президиумезлэн членэз. Кык пол бырйылӥзы ВКП(б)-лэн обкомаз - нырысь кандидатэ, собере членэ... 1934-тӥ арын бырйизы советской писательёслэн Всесоюзной съездазы делегатэ. Дм. Корепанов" Таиз сентябрь Кедра Митрейлэн улонысьтыз таӵе сьӧд нуналэз но пусйытэ. 60 ар талэсь азьло, 1937-тӥ арын, Д. И. Корепановез, троссэ соин ӵош тыршемъёсты музэн ик, репрессия улэ кыскизы. Удмурт научно-исследовательской институтысь первичной партийной организацилэн но ВКП(б)-лэн Ижевск горкомезлэн решениосынызы Кедра Митрей партиысь куштэмын вал. Д. И. Корепановез ВКП(б)-лэн радысьтыз куштон сярысь Удмурт научно-исследовательской институтысь первичной партийной организацилэн огъя собраниезлэн постановлениысьтыз 1937-тӥ арын 15 сентябре "Творчествоын но ужын вань тыршытозяз, Д. И. Корепанов вал наӵ-наӵ буржуазной националист. Зэмос ымнырзэ ватыса, нимаз ужъёсын но революционной фразаосын сайяськыса, ялан пыӵатӥз произведениосаз буржуазной националистъёслэсь революцилы пумит луись идеологизэс. Пӧртэм кескич амалъёс шедьтыса пыриз ВКП(б)-лэн радаз, озьы партийной но советской организациослы оскымон кариськыса, идеологической фронтысь ответственной, кивалтон ужъёс борды кырмиськиз... Кылкутӥсь редактор луыса, 4 ар куспын "Гудыри" газетын ялан печатлалляз буржуазной националистъёслэсь Гердлэсь, Баграшовлэсь, Яковлевлэсь но мукетъёсызлэсь антисоветской произведениоссэс. Удмуртиысь советской писательёслэн Союззылэн правлениезлэн председателез луыса, ас бурд улаз возиз али шараям троцкистъёсты Г. Медведевез но Коноваловез... Мукет ласянь, ассэ удмурт литератураын лыдъяз погыртонтэм юбоен, гердовецъёсты но троцкистъёсты пазьгытӥсен, писательёслэн организациязы критикаез ӝокатӥз, писательёслэсь творческой кичӧлтонъёссэс пачкатӥз но егитъёслы, али гожъяны кутскисьёслы будыны люкетӥз, озьы бератаз писательской организациез быдэсак куашкатӥз. Та гинэ ӧз тырмы, со кутскиз пединститутысь студентъёс пӧлын контрреволюционной уж нуыны. Озьы ик юнме шорысь ӧвӧл Корепановлэн "Удмуртская правда" газетын ужасьёс пӧлын вераськемез, кытын со шуиз: "Творческой ужлы луонлыкъёс ӧвӧл"; "Троцкистъёслэн но националистъёслэн блоксы сокем кужмо, донгытыны кужымед уз тырмы"; "Чалмыт улӥ царизм дыръя, чалмыт улӥ 1925-тӥ арын, чалмыт уло али но"; "Вуж вакытэ но пуки каталажкаын, пуко али но"; "Кошко писательской ужысь но пуко макня вылын". Та кылъёс юнме шорысь ӧвӧл, соос ог-огенызы юн герӟаськемын но быдэсак гожъяськон, ужан, улон ӧрысьтыз пото. Со быгатыса ватӥськем тушмонлэн, контрреволюционной буржуазной националистлэн йылолыз. Вылӥ верамъёс вылэ пыкиськыса, УдНИИ-ысь первичной парторганизацилэн огъя ӧтчамез пуктэ: ВКП(б)-лэсь члензэ, 0340461 � п{арт}билет, Д. И. Корепановез ВКП(б)лэн радысьтыз поттоно". 1937-тӥ арлэн лек шиятӥсь шокамез адӟиське Удмурт пединститутысь первичной парторганизацие вуэм Кедра Митреез саптась материалъёсысь но. Корепанов турттэ ассэ утьыны, "калык тушмонъёсын" кусыпъёслэсь танӥськыны, ас сярысьтыз кыл вӧлдонъёс пумысен вожзэ поттэ. Озьы ке но, "Удмуртская правда" газетлэн бамъёсаз печатласько таӵе нимо статьяос: "Писательёслэн Союззылы йыр луэ буржуазной националист", "Буржуазной националист Корепанов поттэмын партиысь", "Буржуазной националистъёсыз пумозяз пазьгоно" но мукет. 17-тӥ сентябре ВКП(б)-лэн Удмурт обкомезлэн бюроезлэн постановлениеныз Д. И. Корепановез УАССР-ысь писательёслэн Союззылэн правлениеныз кивалтонлэсь мозмыто. 21-тӥ сентябре сое арестовать каро, нош 1938-тӥ арын 16-тӥ мае СССР-ысь НКВД-лэн нимысьтыз совещаниезлэн постановлениеныз РСФСР-ысь Уголовной Кодекслэн 58-10 статьяезъя (антисоветской уж нуон но вӧлмытон) 8 арлы келяло исправительно-трудовой лагерьёсы. "Калыклэн тушмонэз", "буржуазной националист" Кедра Митрей озьы ик янгыше уськытэмын вал, тӧдьыосын ӵош ожмаськиз, ас гожъямъёсаз Горд Армия вылэ сьӧд вужер уськытӥз, удмурт крестьянъёс сярысь умойтэм вераськиз шуыса... Корепанов вань аръёссэ пукиз Магаданын, отысь берытскиз Ижевске 1946-тӥ арын. Кузпалызлэн верамезъя, "солы юрттыны кулэен ӧз лыдъялэ но, ас специальностезъя ужано ӧз луы". 1948-тӥ арын Кедра Митрей нош ик репрессировать каремын но Сибире ыстэмын. Та арысь уголовной ужын быдэсак возиськем 1937-тӥ арысь ужлэн материалэз. Д. И. Корепанов кулӥз 1949-тӥ арын ноябре Новосибирск улосысь Михайловской ёросысь Чумаково гуртын. Удмурт АССР-ысь Вылӥ Судлэн Президиумезлэн постановлениеныз Д. И. Корепановез янгыше уськытонъя уж дугдытэмын. Со вал 1956-тӥ арын 17-тӥ сентябре. Писательлэн чылкыт нимыз берыктэмын. Но со вакытысь адямиез пачкатӥсь, паньгатӥсь кун машиналэн сьӧсь ужъёсыз сюлэмез али но юзырак каро. Валаськод: макем яркытгес со кизили, сокем вӧсьгес мертчо тылсиосыз. Е. УШАКОВА, выль историлы документацияя Центрысь иворъёсъя но документъёсты печатланъя отделлэн кивалтӥсез. Дӥнямы пыраз "Секыт зӥбет" роман но "Зурка Вужгурт" повесть милям семьяямы ӝӧквыл книгаосмы луизы. Ӝытъёсы, ваньмы огинэ люкаськем дыръя, соосты шара лыдӟылӥ. Нош огпол... Витьымтэ шорысь гудыртэм-ӵашъем сямен, дорамы шимес ивор ваиз артысь коркан улӥсь Митя. "Тодско: тӥляд Кедра Митрейлэн "Секыт зӥбет" но "Зурка Вужгурт" книгаосыз вань. Кедра Митрей - калык тушмон. Книгаоссэ сутоно," - йӧнтэм пилэн кылъёсыз секыт изэн кадь сюлэм вылэ усизы. "Калык тушмон?!" - сюлэмы оскытэк кесяськиз. Соин, лэся, Митяез пӧяй: "Книгаосыз, зэм, вал, табере луиз "скал". Кузёосыз кие берыктӥм ини..." Шонерзэ ке, "Секыт зӥбетсэ" но "Зурка Вужгуртсэ" Кедра Митрей ачиз кузьмаз вал бубилы, дӥнямы кыкетӥзэ пыракуз. Нырысьсэ адӟеме бере ик, Кедра Митрей вунонтэм кылиз - миськем каляга кадь йырыз, пужыё ымнырыз. Мон синъёсме вошъятэк учки со шоры. Вераськемез вылысь но валай - со огшоры воргорон ӧвӧл. Бубилэсь Дмитрий Данилович Стрелковлэсь трос гинэ ма но со юалляськиз. "Далко Семон. Ссыльной Коновалов..." Таослэн нимъёссы вунонтэм луизы. Бен, ачиз но Кедра Митрей милемды синйылтӥз: кисыысьтыз кырым тыр ландырин (леденцы) поттӥз, мыным но сузэрелы сётӥз. Шабала киыныз йырсиме тугаз на. Ми весь, ӵемысь витьылӥм на Кедра Митреез, но со ӧз вуы ни... Л. Чернова. Берекет Матрон апай ӵектэ ТАБАНЬ Та сиёнэз удмуртъёс пӧртэм сямен дасяло. Ӵемгес сиё зыретэн, яке йӧлвылэ веттылыса. Милям анаймы сое котькугес ик дася вал арня ӵукна. Няньзэ ӝыт ик котыса кельтэ ини. Маин но уг пыжы сое: сӥльын, чорыген, курег пузэн, губиен... Ма, ваньзэ вераса быдтод-а. Анаелэсь адӟем карыса, мон но та сиёнэз пӧртэм сямен пыжисько. Нылы шуэ: "Мама, асьмелэн табаньмы бен ӵапак итальянецъёслэн пиццазылы кельше ук!" Бен, озьы ик вань но, дыр. Удмурт пицца. Гажано лыдӟисьёсмылы но газет пыр та сиёнэз лэсьтыны дэмланъёс сётӥсько озьы, кызьы сое ачим дасясько. Басьтоно быдэн стакан йӧл но ву. 20 грамм маял (дрожжи), 1,5 стакан пужнэм тӧдьы пызь, 2 сиськон пуньы сакыр песок, 1 чечы пуньы сылал. Соосты ваньзэ сурано но уйлы чырсатыны кельтоно. Ӵукна ыльнянез учконо. Напгес ке пӧрмем, кӧня ке, йӧл ватсаса кизертоно на. Пыжоно ӝуась гур шорын. Ыльнянез кӧня ке люкетсэ таба вылэ кисьтоно. Со вылэ ньылетӥ пононо векчи корам сӥлез, кыӵеез вань (кунян, парсь, ыж, ӵӧж, ӟазег, курег). Со сурамын таба вылын пыжем сугонэн, сылалэн, изэм сьӧд пӧсьтурынэн, йӧлын. Пыжемез бере вылтӥз вӧяно нӧкы вӧен. Вандоно ньыль одӥг быдӟаесь люкетъёслы. Сӥль интые яралоз басьтыны пӧртэм чорыгез (векчиезлэсь сузяськом пушсэ, куштӥськом йырзэ, тазазэ лыэзлэсь но сузяськом). Сое уйлы ӧжытак сылалэн пызьнаса кельтоно. Пӧлаз ватсано на таба вылын кӧй-вӧен пыжем сугон, изэм пӧсьтурын. Оскалтэ ыль курег пузэз сугонэн сураса но, губиез но кубистаез векчиятыса, сугон, ыль курег пуз, изэм пӧсьтурын ватсаса но. Одӥг кылын вераса, кинлэн маиз вань пӧраны, сое ик басьтоно. Сиёнды ческыт мед кошкоз! З. Токарева, Ижевскын улӥсь. Берекет Тӥледлы, амалоос Бутылкаосысь 3-4 корт пытсэтъёсты пул борды шуккиды ке, чорыг сузяны усто пурт пӧрмытоды. Ымдур буянды (помада) быриз ке, футлярзэ куштыны эн дыртэ: пушказ поролон понэ но - вень возён пӧрмоз. Кинлы ялан бурен (мелэн) ужано луэ, мел пилетэз помада возёнэ понэ - сумкаын но нуллыны каньыл луоз. Берекет Тӥледлы, нылпиос Гажано пинал эшъёсмы, суред вылын сётэм котькудӥз туспуктэм лэсьтэмын одӥг кутскемен дугдылытэк. Оскалтэ ай оло, тӥляд но пӧрмоз. *** Тодады вайытӥськом Пыдкутчанды кема улоз Нимысьтыз кремен зырам сяна, кулэсь вурем пыдкутчанэз дырын-дырын ӵушылоно бензинэн коттэм ӟустариен, тужгес но - куасалтӥськем интыостӥз. Тросэзлэн пыдкутчанъёслэн пыдберзы чурыт луэ, озьы пыд нярӟе, вӧсь луэ. Мар карыны кулэ? Пушсэ спиртэн зыралэ но, соку но пыдады поныса, кӧня ке ветлэ. Ӧз ке юртты, эшшо тазьы кӧня ке пол лэсьтэ на. Сайкыт тусо пыдкутчанэз буёлтэм крем интые ымныр кремен но зыраны луэ. 30 минут ортчыса, небыт ӟустариен (бархатэн) ӵушылоно. Лакен шобыртэм туфли кисьтаськись туссэ уз ышты, сугон йырлэн ӝыныеныз зырад ке. Эн вунэтэ: лак 4 градус кезьыт азьын пилиськылыны кутске. Пыдкутчанды ӟукыртэ. Уйлы пуктэ кот ӟустыри вылэ - "кырӟамысь" дугдоз. Замшалэсь вурем пыдкутчанэз тазьы сузяло. Нырысь-валысь кӧсато, собере кӧня ке минут быректӥсь ву вадьсын возё но кырсь интыоссэ щёткаен сузяло. Собере зырало нашатырь спиртэ ватсам вуэн (кыксэ но одӥг мында) коттэм ӟустариен. Куасьтыса нош ик щёткаен сузяно на. Л. ВАСИЛЬЕВА. Берекет Тодэмды потэ ке... Туссыя - сямзы Германиысь зоолог Хельмут Хемер трос гинэ выре пудо-животъёсын но бурдоосын. Тужгес но со яратэ коӵышъёсты. Тодосчи чакламъя, соослэсь сямъёссэс буёлзыя но вылтуссыя тодыны луэ. Кылсярысь, куренялэсъёсыз но куреньпыр-тӧдьыосыз востэмесь, шыпытэсь луо, номыр ӧй карысалзы, нокытчы но ӧй ветлысалзы. Сьӧдэн-тӧдьыен куӵоосыз лекесь ке но луо, капчиен дышо кузёослы, тужгес но пиналъёслы. Сьӧд коӵышъёс тунсыкъяськисесь, ваньзэ тодыны тыршисесь, чакласькисесь но керӟегесь луо. Озьы ке но, туж ярато эшъяськыны. Тӧдьыосыз валантэмесьгес луо, номыр но соослы уг яра, чаляк ӝоже усё, ӵемгес висё но куло. Мон ачим но писэйёсты яратӥсько. Угось соосты маялляськод, вешаськод яке огшоры гинэ шудӥськод ке, буйгатсконо, жадем но кытчы ке ыше-быре. Нош куд-ог дыръя куректонъёс но вуныло, ӝож мылкыд но капчигес луэ. Озьы ик мынам но, Хельмут сямен, коӵышъёсты чакламе вань. Песянае но туж яратэ вал писэйёсты. Тужгес но куинь пӧртэм куӵооссэ (буёлооссэ). Песяелэн верамезъя, соос, пе, адямилы шуд ваё, шыр кутылӥсесь но лякытэсь луо. Трос пӧртэм коӵышъёсты вордӥм со дырысен. Ваньзы ик соос ог-огзылэсь сямъёсынызы висъяськылӥзы. Нош куинь буёло писэйёс (тужгес но сьӧдэн, куренен но тӧдьыен) лачмыт сямоесь но шырасесь вал. Оскалтэ ай тӥ но, эшъёс, куинь тусо коӵышъёсты вордыса. Соку юртъерысьтыды шыр- комакъёсты но ӧжытгес луозы, вылаз ик, шудо но луоды. Озьы ке но, эн куштӥське мукет тусо яратоно коӵыштылэсь но. Тӥледлы со вӧзын умой ке, ог-огдэс валаськоды ке, иське, со ик шуд ӧвӧл-а? А. Никитин. Берекет Вашкала сямъёс, йылолъёс Пӧсятэм, кенэм пӧзьтэм но мукетыз Тросэз тунсыкъясько вашкала та удмурт сиён-юонъёсты дасян пумысен. Одӥг материалын гинэ сое ваньзэ уд гожты. "Берекетлэн" азьланяз потӥсь бамаз со сярысь гожто ай. Нош али кӧня ке кыл вераме потэ удмуртъёслэн куд-ог шулдыръяськон сямъёсынызы, йылолъёсынызы, пӧраськемъёсынызы. Кунооссэс утялтон, сюан лэсьтон дыръя одно ик дасялозы вылэм (али но дасясез вань) варсен вина. Милям Шаркан палъёс сое варсен кумышка шуо, лымшор палан улӥсьёс - пӧсятэм. Со дан поттон, данъяськон юон. Куное лыктэмъёсты, сьӧрлооссэ (соос кӧлыны кылё ини), ӵукна сайкакузы ик макмырзэс веськато, валесэ сёто пӧсь варсен вина. Валесысен, султэмзылэсь азьло ик таӵе утялтон возьматэ кузёослэсь лыктэм кунооссэс гажан сямзэс, дуно но матысь каремзэс. Сюанчиослэсь бертэмзэс возьмаса уло ини иськавынъёссы. Сектаны мыно ӟечкыласа, сӥлы карыса. Сектасько вал варсен винаенгес. Валэн лыктэм кунооссылэсь валъёссэс егитъёс (пиос) сюдо-люктало, гужем вал люктаны шуре васько. Куноос асьсэос ик вазисько, ой, пе, пиосмы-мусоосмы, валъёсты люктаны шуре васькытэ ай. Тӥни сыӵе чыры-пырыос но адямиез, ӵыжы-выжыез гажась но кусыпез утись каро. Асьсэды ӟечен возьмато. Куноысь, сюанысь бертӥсьёс ӟеч, умой ветлэмзэс, утялтэмъёссэс семьяоссылы, иськавынъёссылы ушъяса верало ини, сыӵе-сыӵе, пе, сюдӥзы, сектазы, утялтӥзы. Куно ӝӧк вылын котькугес луэ вал кенэм пӧзьтэм. Сое тазьы лэсьто: кенэмез (пыш, конопля) табаын пушмыто, собере пӧзьто варсен ӵош. Со луэ вал ини, туала сямен вераса, варення - ческыт сиён. Варсез угось ӵужъемлэсь лэсьто. Сое дасяло ӟеглэсь, ческыт шӧмо ӵужъем пӧсь вуэн суралтыса юмалӟе. Ӵужъемлэсь ик лэсьто на вал честа. Озьы ик суралто юмал, гуре парыны пукто. Отын со ческыт луэ. Куд-огез палэзь но понэ. Сиё нянь вылэ зырыса, ӝӧк вылэ но пукто. Кунооссэс озьы ик утялтылӥзы сурен но. Сур пукто варсь лэсьтэм бервылэ. Туала арын но вашкалаосмылэсь та ӟеч сямъёссэс куд-огез утьыны тырше, кунооссылы быгатэмзэ возьматэ. Адӟем каро арлыдо ӵыжы-выжыоссылэсь. Тани мынам ӵужмамае Устиния Константиновна Тополева туж яратэ вал кунооссэ нимысьтыз кырӟан гуръёсын утялтыны. Кумышкаен четвертьсэ кияз азькышетэныз кутэ (гольык киын уг куты вал) но ӝӧк котыртӥ ветлыса сектаське. Азьло дыръя ведь али сямен виназэс ӝӧк вылэ уг пукто вал, кузёос кунооссэс асьсэос утялто. Туэзэ бен мар вераса улод на, ум быгатӥське асьмеос куно карыны, туж ӧктэмесь луимы-а, мар-а шуод, нокыӵе радзэ ум валаське, асьмеды но возьыны ум быгатӥське. Ваньзэ тодӥськомы-валаськомы шуэммы потэ кадь, мӧйыослэсь визь-кенеш сётэмзэс санэ ум басьтӥське. Азьло дыре кыӵе вылӥ дунъяло вылэм мӧйыосты, кыӵе сӥлы каро вылэм куное, сюанэ ӧтисез. Сюанэ юаны лыктэм ӵыжы-выжызэс одно ик утялтылӥзы, ӝӧк сьӧры пуктылӥзы. Туж эскерыса-чакласа ӧтьылӥллям. Сюанэ яке кельыны шуг сямозэ, самой матысь ке но луэ, уг ысто, уг юало вал. Возьытэ уськытэмезлэсь курдало вылэм, выль ӵыжы-выжызы азьын калык синмысь медад, пе, усьы. Сюанэ мыныкузы, сюрес вылэ потон азьын, мӧйыос котьку ӝӧк вылэ пукто тыр нянь сукыри, сиён окто, ӟеч кылъёс верало, умой ветлыны ӟеч сюрес сӥзё. Азь кудоез (со сюанын йыр луэ) зол эскерыны косо сюанчиосты: ятыр медаз юэ, медаз укылтэмъяське. "Куинь копейкалы юэ но 3 манетлы асьтэдыс возьматэ", - шуэ вал милям ӵужмамамы. Та удмурт калыклэсь ӟечсэ вераса но уд быдты. Мон али аресъёсме трослы будэтӥ ини, со чыры-пыры ужъёсты али но син азям, тодам возисько, вашкала сямъёс, выросъёс туж дуно пото. Тани басьтом сюанэ, келисе мынэмзэс ик. Валэн-гырлыен, бурдо дӧдьыен, миндэр вылын кошовкаен ворттыса кошко. Кошовка чебер куэм валес шобретэн чеберъямын Кошовка нырын сиён-юонэн тырмытэм пичи шыкыс пуктэмын (сюанлы ӝӧк октыны но утялтыны). Нош дӥськутсы кыӵе узыр луэ вал: чебер юг-юг шортдэремен, кык рад коньдоно весен. Вамышъякузы со весьёс жильк-жильк вазьылӥзы. Шортдэремъёссы мугорзыя тӥч-тӥч вуремын, йыразы чебересь буртчин кышетъёс. Толалтэ - бадӟымесь ыж гон кышетъёс, кудӥзлэн вылаз лыз, пурысь яке тӧдьы кильымо сукман. Мӧйыосызгес тулупъёсын, со ыж кулэсь вуремын. Куное вуо но вань выл дӥсенызы 3 котыр чал-чал котырско, коньдоно весьёссы шильтрак-шильтрак гинэ вазё. Собере сюан гурзэс лэзё ини. Отӥяз кутске шулдыръяськон. Э-э-э, ма, гожтэмея гожтэм потэ ини оломарзэ но. Малпаса-малпаса абдраны но кутскисько, кыӵе улыны но, ужаны но, куно но карыны быгато вылэм асьмелэн вашкалаосмы. Ваньзэ эсэпласа, мӧйыосын тупаса улэмзы ик дэлетсэ но сётэ вал, дыр, улоназы. Али дыре со тросэз пыд улэ лёгамын ини. Соин ик та калэ вуимы асьмеос - чеберлыкмес ыштэменымы. Али сое калыке поттыны, выльысь улӟытыны выриськом ке но, со йӧназ уг пӧрмы на. Будӥсь нылпиосмылы таӵе ӟеч сямъёсыз, йылолъёсыз визьмазы- сюлмазы пыӵатыны тыршоно. Альбина Вахрушева, Воткинскысь "Тюрагай" ансамбльысь кырӟась. Берекет ПЫРЫОС-ВИЗЬЛЮКЪЁС Кулэсь вурем кемагес нуллэм пыдкутчанэз выльдыны луоз скипидарен. Отчы 3-4 шапык йӧл ватсано на. Пеймыт кулэсь вурем сумкаез выльдыны луоз, лимон сокен коттэм ватаен ӵушылыса. Кофелэн кылем- мылеменыз но зыраса, пеймыт ку чилясь луэ. Одӥг яке кык пуньы напез нюрен ик ыж гон яке бумазей (фланель) ӟустарие бинялтэ но соин сумкаез, туфлиез, портфелез но мукет арбериосты зыралэ. Кулэсь чиньыё-пӧлыё пӧзьёсты, курткаез, пальтоез сузяны дэмлало курег пузлэсь тӧдьызэ шуккыса коттэм бумазеен. Замшалэсь вурем арбериез сузяны луоз содаен сурам шуныт йӧлэн (1 стакан йӧлэ 1 чечы пуньы сода кулэ). Мар лэсьтыны луоз, пудкутчанды ёркыт ке? Тани кызьы лэсьтэм одӥг американец. Туфлияз полиэтилен мешокен ву понэм но холодильниклэн кынтон интыяз понэм. Сутка ортчыса, кынмем вулэн быдӟалаез кӧнялы ке паськытам. Озьы со туфлиезлэсь пушсэ бадӟыматэм, пыдкутчанэз пыдызъя луэм. МАЛПАН Сайкатысал кӧлӥсь кылчинъёсты... Улонысьтымы кырсь-пожзэ синйылтыса, матысь адямиослэсь ог-огзэс ултӥямзэс, мыскыллямзэс адӟыса, пичи дыръям анаелэсь юалляй вал: "Малы-о адямиос огкадесь шудо ӧвӧл, малы ваче керетонъёс ӝутско, малы мӧйыос синзэс кыньыртытэк ик покчиосты эрекчаны дӥсьто?" Сокем кузь но трос юанъёсылы анае вакчияк гинэ валэктӥз: "Кылчинъёс кӧло, пие. Нош соос вӧзын ӧвӧл ке, адями олокыӵе но сьӧд уж лэсьтыны дӥсьтэ". Анаелэн та валэктэмез малы ке йырвизьмысьтым уг кошкы. Тодӥсько: анае Инмарлы уггес оскы вал. Черке шер ветлылӥз, гудыръян-чилекъян дыръя гинэ инсьӧр кузёез тодаз ваёз вал, кисьтонъёс ортчытыку, гадяз кирос тырылӥз. Кылчинъёс сярысь верам кылъёссэ но, оло, кинлэсь ке кылӥз вал, дыр. Котьма ке но кылчинъёслэн кӧлэмзы мыным эрик уг сёты. Ӝоггес мед сайкасалзы вылэм, мед юрттысалзы адямиослы улон-вылон, тазалык, азьпалан ӟечезлы оскон ласянь. "Быдэс калыкез эн дунъялэ, кыӵе со али дыре, калыклы дунъет сётэ озьы, кыӵе солэн луэмез, улэмез потэ азьпалан: аслаз ӟеч малпанъёсаз, ас мылкыд каронъёсаз", - куке но гожтӥз вал Фёдор Михайлович Достоевский. Писательлэн та кылъёссэ гожтэмез дырысен маке но воштӥськиз меда асьме улонамы? Зэм, вошъяськылӥзы вылӥ тубатын пукись кивалтӥсьёсмы, вошъяськылӥз улон шоры учконмы, эсьмаса, Инмарлы осконмы гинэ но. Азьвыл аръёсы школаын Инмар ӧвӧл шуыса ке дышетӥзы вал, табереулон мукет пала берытскыса кошке. Осконъёсмы ӝог вошъяськемысь ик, вылды, асьме калыкен ортчо валантэм, паймымон, йыркуръяськымон "синпӧртманъёс". Та пумысен мон огзэ гинэ верало: Россиын улӥсьёслы нокыӵе Инмарлы оскон уз юртты, куке асьмелэн луламы пыӵамын ӧвӧл ӟечезлы оскон. Со дыре ик, асьмелэн матысь адямиез но валаммы уг поты, котькудӥз ас сярысьтыз гинэ сюлмаське, котькудӥз ас понназ ӝожтӥське: "Ой, кыӵе секыт мыным улыны!" Валалэ, асьмелы таяз но учыре нокин уз юртты: инмар но эксэй но, туннэ улонысь герой но. Осконо ас кужымедлы, ас быгатонлыкедлы гинэ. Черк дышетэ асьмеды котькыӵе секытлы чиданы, матысь адямиез гажаны. Со сярысь кылпум поттэм бере, огез сярысь вератэк уг чидаськы. Россиысь уноез калыкъёс православной луо. Со дыре ик Башкортостанын, Татарстанын, Чечняын... - ислам. Мукет осконъёсмы Ымусьтонэз (Рождествоез) шутэтскон, юондыр нунал чотэ вылӥ карыса ӝутӥз. Шутэтскон нуналъёсын ялоно вал, дыр, Йӧпотонэз (Крещение), Акашкаез (Пасха), Семыкез (Троица)... Нош мар малпаны кулэ та сярысь мукет осконэз возисьёс? Та бордысен уг кылдо-а "пӧсь точкаосысь" кыстӥськись ожъёс?! 19-тӥ январь, Киров улосысь Кильмезьысь Свято-Троицкой черк, Ымусьтон. Черк тыр калык. Ваньмыз сямен вӧсям вулы лыктэмын. Сыӵе сям ини: вӧсям вуэз басьтыку, пичи ке но коньдон тыроно. Нош ӧвӧл ке? Бен, бен, пенсизэс дыраз уг басьто бере, ог-огзылэсь пунэмасько пересьёс. Оско: улоназы юрттоз вӧсям ву. Тазалык ласянь но, кӧттыр ласянь но... Тани черке пыро районысь кивалтӥсьёсмылэн кузпалъёссы - кык дамаос. Сюсьтыл басьтыса, оброс азе пукто но, черк лавкаысь юало... зарнилэсь кучъёс (киросъёс). Нош али дыре сыӵе кучъёс 230- 250 сюрс манет сыло. Соосын артэ Порек гуртысь пор кышномурт Инмарлэсь куриськыса вӧсяське: "Юртты, Инмаре! Сёт нылылы тазалык, врачъёс мед утьысалзы секыт висёнэзлэсь!" Солэн куать аресъем Таня нылызлэсь вирысьтыз висёнзэ шедьтӥзы. Али дыре кылле Кировысь больницаын, нош эмъяны коньдонзы ӧвӧл. Малый Кильмезь гуртэ Чечняысь кулэмен ваизы Виктор Шишкинэз. Кылем арын августэ бырем ни солдат. Анаез калыклэсь коньдон люкаса, январь толэзе гинэ пизэ вордскем музъем вылаз вайыны быгатӥз. Август толэзьысен! Нокинлы но кулэлуымтэ ни. Шат со понна вордӥзы вал сое анай- атайёсыз? Ма сярысь малпаське меда асьме правительство, депутатъёсмы, президентмы. Чик но уг кышкало шат "сьӧлык" кыллэсь? Мыддоринскемын асьме улонмы, мыддоринскемын. Михаил Сергеевич Горбачев кивалтыны басьтӥськыкуз ик, Форосэ дача лэсьтон бордысен кутскиз. Сыӵе бадӟым кивалтӥсьлы ӟеч шутэтскыны луонлык мед кылдоз ук! Туэ дышетӥсьёс уждун басьтымтэен, забастовкае потакузы, трос нылпиос доразы пукизы, нош центральной газетъёс иворто, Борис Николаевич Ельцинлэн внукез тодон-валан басьтэ, пе, кунгож сьӧрын. Гурт калык тулыс кизёнлы дасяськыку, эстӥськон вӧй басьтыны коньдон шедьтытэк тэльмырыку, Виктор Степанович Черномырдин вертолётэ пуксьыса кошке пӧйшураны. Кӧня эстӥськон, вӧй быдтӥзы меда вертолёт но сое келясь витьтон машинаос? Со дыре ик пересьме Россиын улӥсь калык, вордскемез сярысь тросгес куло адямиос. Кыӵе жалямы вал Игорь Тальковез, Дима Холодовез, Влад Листьевез, Удмурт Республикаысь Югдурез утёнъя министрлэн воштӥсезлэсь Перевощиковлэсь семьязэ... Виисьёс закон азьын кыл кутозы меда? Шӧдэ меда правительствоын пукисьёс калык азьын ас сьӧлыкъёссэс. Эх, сайкатысал кӧлӥсь кылчинъёсты! Кытын меда соос? Кун Кенешын Удмурт Республикаысь Кун Кенешлэн Тӧроез Александр Волков Москваысь вуиз. Отын со Федерацилэн Кенешаз пыриськиз. Со сяна, пумиськиз коньдонъя министрлэн воштӥсеныз Владимир Петровен, кудӥныз вераськиз уждунъя пунэмез берыктон понна Удмуртилы бюджетысь 60 миллиард манет ссуда, 50 миллиард манет кредит висъян сярысь. Та коньдонысь шаерамы 30 миллиардэз гинэ вуиз ай. Президентлэн администрациеныз кивалтӥсен Александр Казаковен пумиськыкуз, Александр Волков ивортӥз Удмуртиын кунэз радъян удысысь югдур сярысь. Кык пумиськон ортчиз Федерацилэн Кенешезлэн Тӧроез Василий Лихачев дорын но Нациосын ужанъя министерствоын, кытын кунэз радъянэн, правоез азинтонэн, кун властьлэн но интыысь аскивалтонэн кусыпъёсынызы герӟаськем ужпумъёс ӝутэмын вал. Кун Кенешлэн Тӧроез ӧтемъя, Москвалэн мэрез Юрий Лужков 4 октябре Ижевске лыктоз. *** Удмурт Республикаысь Кун Кенешлэн Президиумезлэн заседаниез ортчиз. Дас куинетӥ сессиын эскероно ужпумъёс юнматэмын. Соос пӧлын "Удмурт Республикаын егитъёсын ужанъя кун политика сярысь", "Агропромышленной производствоез кун ласянь радъян сярысь" законъёслэн инъетъёссы, урожаез утялтонлэн но пудо сиёнэз дасянлэн йылпумъянъёссы сярысь, Удмурт Республикалэн Конституцияз воштонъёс но ватсанъёс пыртон сярысь но мукет лэчыт ужпумъёс. Удмуртиысь Правительстволэн "Удмурт Республикаын бюджет чотын ужасьёслы уждун тыронъя Огъя тарифной сеткалэсь тарифъя ставкаоссэ (окладъёссэ) будэтон сярысь" постановлениез эскеремын 1-5 разрядъёслэн тарифъя ставкаоссы 3500 манетысен 30000 манетозь будэтэмын. Президиум умоен лыдъяз Удмурт Республикалэн кун премиосыз сярысь положенилэсь инъетсэ. Кун премиос сярысь ужпумез ӵектэмын Кун Кенешлэн сессияз эскерыны. Чакламын арлы быдэ кык Кун премия сётыны. Премилэн быдӟалаез - 100 пичи уждун. Заседание пумын вераськиз Экономикаез азинтонъя Евроазиатской банклэн президентэз Валерий Богатырев. Россия Федерациысь Коньдонъя министерствоен кутэм огкылъя ЕАБЭР- лы висъямын 50 миллиард манет ссуда. ТАЗЬЫ НО ЛУЭ Картошкаен пуртыяз пӧзиз Уно сюрс гурманъёс (ческыт сиыны яратӥсьёс) воксё паймемын вал, куке тодӥзы Монакоысь тодмо пӧрасьлэн Луис Рамбелэн малпамтэ шорысь картошкаен пуртыяз пӧзьыса быремез сярысь. Витьтон ньыль аресъем шеф-повар дасяське вылэм банкетлы. Отчы лыктыны кулэ, пе, вал 700 мурт. Луис Рамбе малпам куноосты аслаз нимысьтыз пӧрам сиёнэныз - картошка пюреен утялтыны. Картошаз со ватса вылэм чеснок, ыж йллэсь дасям сыр но пӧртэм турын-куар. Та сиёнэз адӟыса но зынзэ кылыса, дыльды ик, пе, шыр-р кошке вал. Картошсэ Рамбе бадӟым пуртыын пӧзтэм. Тубат вылэ тубыса, со туемзэ (пюрезэ) метр кузьда пу пуньыеныз оскалтыны малпам. - Ӵапак соку со огназ кылиз, мон угось ӝӧк вылэ вина тыремзэс чакланы потӥ, - тодаз вае юрттӥсез Адриян Баске. - Уг валаськы, кызьы со тубат вылысь усиз. Но мон берен лыктыкум адӟи Рамбелэн мугорызлэсь пуртыын пӧземзэ гинэ. Адске на вал киыз гинэ. 27 аресъем Адриян Баске номыр карыны ӧз вуы ни. Полиция вуыку, поварлэн мугорыз пӧземын ни вал. - Та учыр милемлы туж бадӟым куректон ваиз, - ӝожомыса вера кузпалыз. - Но ма карод на. Оло, атайзылэсь ужзэ азьланьтозы куинь бадӟымесь пиосыз?.. "Скандалы" газетысь. Берыктӥз Н. МАЛИКОВ. Яратонлэн дуныз ӧвӧл Ашальчи Окилэн Алнашысь музеяз пыракум, отын ужась Н. М. Фадеева Л. Г. Верещагинлэсь но Куӟебай Гердлэсь тусбуйзэс ӝӧк вылэ поныса шуиз: "Соос ог-огзэс гажазы". Наталья Михайловна "Удмурт дунне" газетэ гожъяз ини, кызьы со Ашальчи Окиен ӵош ужаз Алнаш больницаын. А. Степанов но туэ 22-тӥ июле гожъяз нырысетӥ удмурт нылкышно кылбурчи сярысь. Со татын маде Лина Григорьевналэн кузпалэныз Иван Иванович Карачёвен пумиськылэмез сярысь, отын автор пусйиз: кузпалъёслэн улэм- вылэмзы, ӟеч ужъёссы мукетъёслы адӟем карымон, синмаськымон вал. Зэм, кык бадӟым кылбурчиос ог-огзэс гажазы, дыр. "Сюрес дурын" сборниказ поэтесса сярысь туж шонер гожтӥз Куӟебай Герд: "Ашальчи Окилэсь кылбуръёссэ лыдӟыку, олокӧня сюрс удмурт кышноослэсь, удмурт нылъёслэсь малпанъёссэс, мылкыдъёссэс лыдӟиськод кадь. Ашальчи Оки ачиз сярысь гинэ ке но гожъя, солэн кылбуръёсаз туж уно нылкышноослэн шумпотэмзы, куректэмзы пиштэ.... Та дырозь удмурт нылкышноослэсь малпаськемзэс ум тодӥське вал... Ашальчи Оки, ас сюлэмзэ вань калыклы та кылбур книгаяз усьтыса, уно сюрс удмурт нылкышноослэсь но сюлэмзэс асьмелы усьтэ". В. ЧЕРНОВ. "Ми - кыкетӥ классъёс" Геннадий Матвеев Глазовысь пединститутын уно аръёс ужатозяз дасяз покчи классъёсын дышетскисьёсты музыкалы дышетонъя программаос. Марионелла Тукмачеваен ӵош гожтӥзы 1-тӥ класслы хрестоматия. Нош туэ выль дышетскон арлы потӥз соослэн 2-тӥ класслы музыкая хрестоматизы, татын ик - котькуд урокъя пыр-поч валэктонъёс (программа лэсьтэмын, Д. Кабалевскийлэн дышетэмезъя). Авторъёс уже куто Удмуртиысь композиторъёслэсь произведениоссэс, соос пӧлын - Геннадий Корепанов-Камскийлэн "Италмас" балетысьтыз пиццикатоез, кырӟанъёсыз, Юрий Толкачлэн "Зарни сӥзьыл", "Эшъёсын огазьын" сочинениосыз, Герман Корепановлэн "Мынӥськом походэ", Николай Постниковлэн "Сюрес дурын", Геннадий Павловлэн "Поезд" кырӟанъёссы. Куд-огзэ гуръёсты тупатъяз Г. Н. Матвеев. Ачиз Геннадий Николаевич юромо 2-тӥ класслы шуыса гожтэм "Ми - кыкетӥ классьёс", "Ми - нылъёс", "Ми - пиос", "Кин дежурнойёс?" но мукет кырӟанъёссэ. Крезьгурчи улэп ӧвӧл ни, нош солэн дэмланъёсыз нылпиослы юртто чеберлык дуннее вамышъяны. Т. НИКОЛАЕВА. Лыктэ, вань удмуртъёс! Матэктэ куатетӥез удмурт ӧтчам. Солы дасяськыса, Ижысь ёросъёсын но ортчыло пичи кенешъёс. Индустриальной районысь удмуртъёс пумиськозы 8-тӥ октябре. Вуоно ужрадэ люкаськозы калыксылэн ӵуказе нуналыз сярысь сюлмаськись адямиос. Соос оглулысь шараялозы вань кайгуоссэс. Та нуналэ ик быръемын луозы вуоно ӧтчаме делегатъёс, ёрос кенеше адямиос. Лыктэмъёсты мылысь-кыдысь шулдыртозы кырӟась-верасьёс. Кенеш ортчоз шутэтсконэз радъяны "Ударник" юртын (азьвыл кинотеатрын). Кутскоз ӝытазе куать но ӝыны часын. Ужрадэз дасясьёс ӧтё пумиськонэ ёросысь вань удмуртъёсты. Ӝӧквыл книга Тодмо ужбергатӥсь Фёдор Красильников (со ик - Кефин) алигес дасяз но поттӥз выль кылбугор. Отчы пыртэмын тужгес ӵем кутӥськылӥсь кунсьӧр но тужгес шер пумиськылӥсь ӟуч кылъёс. Книгаысь пумитаны луоз наукалэн пӧртэм удысъёсызлы - математикалы, физикалы, химилы, биологилы, историлы, кылтодонлы, геологилы, медициналы - сӥзем кылъёсты. Озьы ик - культураысь но искусствоысь нимкылъёсты. Ваньмыз пӧлысь куинез удмурт: табань, перепеч, зырет. Кылбугоре оглом люкамын тямыс сюрслэсь трос кыл. Выль ужез шедьтыны луоз Ижысь, Сарапулысь, Можгалась, музон интыосысь. Со чакламын журналистъёслы, вузъёсысь дышетӥсьёслы, студентъёслы, школаын дышетскисьёслы, ужбергатӥсьёслы но мукет удысъёсын тыршисьёслы. Котькуд семья понна луоз ӝӧквыл книга. Шӧкыч Кыткы пар валъёстэ, дядие, шонтомы Уддядие! Бен, Кияса ёросысь Уддяди гуртэ мынон понна, валъёс кулэ уз луэ. Ижевскысен отчы автобус ветлэ. Куинь арлэсь трос пӧртэм кабинетъёстӥ бызьылоно луиз Пётр Михайлович Самсонов, таӵе рейсовой автобус гуртазы мед ветлоз шуыса. Воргоронлэн тыршемез-сюлмаськемез юнме ӧз луы. Гуртысеныз табере автобусэн пырак Ижевске лыктыны луэ. Азьло Удмуртилэн шоркараз мынон понна, нырысь одно ик Киясае вуоно вал. Угось татысен гинэ рейсовой автобус ветлӥз. Табере уддядиос гинэ ӧвӧл, бускель гуртъёсысь калык но капчияк шокчиз. Нош Петр Михайловичлэн таин гинэ сюлмаськонэз ӧз быры... Автобус возьманы шуыса, пичи гинэ корт будка пуктӥзы. Зор-котлэсь но кезьытлэсь кытчы ке но пегӟоно уга. Бен, со но кинлы ке люкетӥз. Гужем уин тыл понӥзы, будкалэн выжез ӝуаз, укноосыз пиялатэк кылизы. Уг луы шат сое тупатыны? Тупатэм гинэ ӧвӧл, сое быдэсак воштыны малпазы. Уддяди шорын ик азьвыл вал конюховка шуон. Нокинлы но кулэ ӧвӧл, нош татчы тыпак тупасал. Озьы малпазы гуртоос огазе люкаськемазы-собраниязы но, сое автобус возьман инты выжтон вылысь, ваньзы соглаш луизы. Бен, со дырысен ортчиз ни шулдыр тулыс, пӧсь гужем, вуиз зоро сӥзьыл. Нош уж интыысьтыз но ӧз вырӟы. Уддяди гурт тӧролэн Валентина Ильинична Кожевниковалэн мукет но сюлмаськонъёсыз трос, шӧдске. Мар-о, калык котькыӵе зор-котлы но, ӟырт кезьытлы но дышемын, тазэ толэз но кызьы ке чидалоз ай. Нош Петр Михайлович, зорлэсь ватскыса, урод будкаын билетъёс вузано луэ. Пеймыт дыръя (автобус ӝыт сизьым часын кошке), сюсьтыл кенжытэ. Чылкак вашкала дыръёсы сямен. Соин ик, тодмо вуриськись-куиськись Мазитова Ольга апай доры кунгож сьӧрысь вуэм куноос воксё паймо: оло татын дас тямысэтӥ даур бырымтэ на, оло юри туристъёсты озьы пумитало. Котьма шу, но Венгриысь но Финляндиысь куноослы уддядиослэн сыӵе пумитан сямзы туж кельшем. Туж, пе, аспӧртэмлыко но шулдыр. Бен, гужем оло шулдыр но вал. Нош сӥзьыл яке толалтэ ветлысалзы ке, озьы ӧй ушъясалзы, вылды. Ф. МИННИГАРАЕВ. - Зорымтэ дыръя пуклёкъёс вылэ но интыяськыны луэ, - шуэ Пётр Михайлович Самсонов. - Нош кытчы пегӟом кезьытлэсь толалтэ? Туспуктэмез В. КАМАШЕВЛЭН. Шӧкыч ЯРАТӤСЬКОД КЕ - ТЫШКАСЬКЫ Юмореска - Мусое, туннэ дас часысен тышкаськы монэ,- вазе Рита. - Малы? - пайме Володя. - Малы, пе, - шуэрске нылаш, - уд тодӥськы шат, мынам туннэ экзаменэ. Шуо ук, адямилы шуд сӥзиськод ке, сое тышкаськыны кулэ. - Нош ма понна тонэ тышкаськод? - нош ик пайме пияш. - Яратӥськод ке, муг шедьтод. Яке тон экзаменме сётыны медам быгаты шуиськод-а? - Мар тон, мар тон! Одно ик тышкасько, ма понна гинэ уг тодӥськы. Тон дунне вылысь самой усто адями! - Я, тырмоз. Монэ зэмзэ ик яратӥськод ке, одно ик муг шедьтод. - Малпаськыны кулэ. - Мар отын малпаськонэз, неужто тон монэ уд яратӥськы? - Я, я, эн бӧрд, одно ик тышкасько. Дас часысен. Сюлэмед мед буйгалоз шуыса, али ик кутскыны быгатӥсько. - Нош ма понна тон монэ тышкаськод? - Ну... шуом, табанед понна. - Кыӵе табань? - Ма, вунэтӥд шат, толон пыжид но ваньмыз сямен ӝуазы. - Мусое, мае ке но сураськод кадь? - Номыре но мон уг сураськы. Тынад табаньёсыд туссыя эгырлы кельшо вал, шӧмзыя но. - Мар тон олома но вераськиськод? Тынад ӝуам табанез адӟемед но ӧвӧл, дыр, ай. - Ма, конешно, ӧвӧл. Мынам анайлэн соос ноку но уг ӝуало. - Табере валамон, малы солэн табанез котьку ыль луэ. - Ачид тон ыль! Эшшо пал кыл верад на ке, тани та тусьтыен йырад васькыто! - Ма, кышкай, кожаськод-а? Васькыты! Пунэме уг кыльы! - Пытсалод-а ымдэ, уд-а? Зэмзэ ведь васькыто, жаль но уд поты. - Ма, куке жалямед вань-а, мар-а? Тани туннэ но ӵукна ик тышкаськиськод ни. - Ачид курид но соин ик тышкаськисько. - Нош тыныд со гинэ кулэ. Кызьы тынад кылыд берытскиз монэ кыӵе ке но табань понна "пыжыны". Мынам ведь туннэ экзаменэ. Тон коть буйгаты-а, мар-а вал. - Я, мусое, буйгатскы. Уг ни тышкаськы. Тон ачид тодӥськод ук, кыӵе мон тонэ яратӥсько. - Зэм ик-а? - Ма, конешно. - Туж, туж, туж яратӥськод-а? - Туж зол. - Мон понна котьма лэсьтыны дась? - Котьма, котьма. - Соку тышкаськы монэ. Туннэ дас часысен. - Одно ик. Туж зол тышкасько. Экзамендэ витьлы мед сётод. А. Ханов. Шӧкыч МЫДДОРИНТЭТЪЁС Трос изёд - таза луод! Кин кемагес изе Ма дуннеын луэ Троссэ уг адӟы но уг тоды. Ма луэмез уг тод бере, Сюлмыз уг пирсэкъя токма. Сюлмыз уг вись бере, Тазалыкез юнма. Озьыен: кин трос изе, Таза, сӥлё-виро луэ. Мон сӥзисько, гажанъёсы: Кӧлэ быдэс арняосын! Серекъян - визь люкан Кин укыр трос горе, Солэн кӧтыз висе. Кинлэн кӧтыз висе, Солэн йырыз уг вись. Кинлэн йырыз уг вись, Со ваньзэ чаль вала, Вала бере ваньзэ, Бульыр визьмыз пӧзе. Усто ик малпанэ: Кин укыр трос горе, Со туж визьмо луэ! Президент ке луэмед потэ... Кин ялан керетэ - Лэчыт кылыз луэ. Сыӵе кыл песьтэрен Кема ӧвӧл депутатэ. Депутатэз нош ӵуказе Президентэ быръем кин ке. Пеляд пон, гажано эше, Сётэм визь-кенешме: Президентозь ке тубемед потэ, Тон ялан шер кылдэ! Е. ПАНФИЛОВА. Шӧкыч Лидия Чернова Придирачко Анай кылме забытьтӥ ни, Ӟуч сямен ни мадичко. Половиназэ по-русски, Половиназэ - ӟудко. Малы нош придирачко? - Иж карын ук улӥсько! Серекто - гуртам бертӥ но: Ой, однако, однако, Ӟуч луэмед ук, Санко!... *** Трали, вали, гали... Ой, юмшай, кема юмшай, Серем пырыез бичай. Такмакъёсы кылдӥзы - Кагаз вылэ киськизы... Эн бырйиське ни, нылъёс, Мон бордын - пӧсь тылсиос. Шунтыны тырмоз кужмы, Шунды кадь ик мон ӵыжыт! Гали, Вали, шунтыло мон Ӵужырес пӧсь сюлмыным. Гали, Вали юасько мон: - Кудды бызёды мыным? - Тон ваньзэс ик шунтӥськод кадь, Осконмы ӧвӧл тыныд. Толыктэм Маня лыктэ кадь, Лабырты - соин ик мадь. Я, Серга, Тон берга, берга... Пырамтэ гуртэд но вань: Пересь Марпа, Окыльна но, Вань воксё пиньтэм Малань! - Трали-вали, ой, нылъёс, тӥ! Йыръёсты укыр вылын. Трали-вали, бен, йӧнэсь ми, Тодӥськод, луоз, малы? *** Малы пилиське йыры? Ветлӥ меда, ӧй меда Дусыме доры? Макмырасько, ой, беда! - Пилиське йыры!... Кытын кӧлӥ, ма кари, Чик уг тодӥськы Дурем ӧс сьӧры сюри, Тунгонъёс вискы. Марьюше возьмам вылэм Лыктэмме туж-туж. Табере: "Уг пот кылэм!" Нырулдэ, пе, ӵуш. Охо-хо! Охо-хо! Пыд улысь шудэ гылӟиз. Аракы ук, валасько, Улонме копак быдтӥз! *** Паймод, ява. Ӧз ваньмы - Маке туж шугектӥ, - врач азе пуксиз пересь. - Шокан пасе ӵоктаське. - Туннэ уг ваньмиськы, - пересь шоры ӧз ик учкы эмъясь. - Толон малы ӧд лыктэ?! - Ма, туннэ шугектӥ. - Шуи: уг ваньмиськы! Комиссия лыктоз, гожъяськонэ трос. Уй! акыляк потӥсько та пересьёсын! - ас понназ вуӵыртэ. Висисьлэн ымнырыз юг-юг кӧдэктӥз, мур-мур шока. Пукыны ӟигарыз ӧвӧл ни! - Ой! - сюлэм бордаз кырмиськиз но ӟус вылэ ӟигартэм лэзькиз. Соку гинэ эмъясь интыысьтыз султӥз. Куалектӥз кадь.... - "Алло! Алло!" "Скорой!" Нош "Скорой" кулэ ӧз лу ни. Тӥни озьы. Таӵе но учыръёс луыло уго улонын. Бусы ужъёс утялтэмын (25 сентябрьлы) Районъёс юос кутсамын (процентэн) Яр 81,4 Глазов 77,4 Юкаменск 75,4 Балезино 85,1 Красногорск 78,2 Кез 82,1 Дэбес 85,4 Игра 86,9 Якшур-Бодья 93,6 Шаркан 81,8 Селта 91,3 Сюмси 90,2 Ува 97,5 Вавож 87,2 Кизнер 90,6 Можга 99,3 Грах 90,5 Алнаш 98,9 Пичи Пурга 93,7 Кияса 94,9 Каракулино 89,2 Завьялово 91,2 Вотка 85,6 Сарапул 86,6 Камбарка 89,6 Республикая 88,5 Республикая шорлыдын одӥг гектарысь басьтэмын 17,7 центнер. Азьло сямен ик удалтэм ю-нянен шумпотто Сарапул, Завьялово, Пичи Пурга, Алнаш, Можга, Вавож районъёс. Соос гектарысьтыз кызь центнерлэсь трос ю-нянь кутсало. Нош Камбарка, кез, Сюмси районъёсын дас пала гинэ усе. Н. ВОЗИСОВ. Россиысь устоосыз пӧлын Удмурт Республикаысь Кун Кенешлэн Тӧроез, Россиысь Федерация Кенешлэн членэз Александр Волков пыртэмын странаысь валтӥсь политикъёс пӧлы. Тазьы вераны луэ, "Общественное мнение" всероссийской Фондлэн экспертъёсызлэн эскеронъёссы вылэ пыкиськыса. Августэ соос вазиськизы Россиысь улӥсьёслы, вылӥ ёзъёсын ужаны дась луись политикъёслэсь нимъёссэс вераны курыса. Озьы кылдӥз улос кивалтӥсьёслэн фамилиосынызы 36 муртлэсь список. Отчы пыризы Россель, Тулеев, Наздратенко, Шаймиев, Руцкой, Строев, Аяцков, Стародубцев но мукетъёсыз. Александр Волков соос пӧлын кызь кыкетӥз луэ. Ма бен, кутскон понна урод ӧвӧл. Ӟечкыласьком. О.МАРКОВ. Нуналлэн тодметэз Вашкала календарья туннэ пусъё воздвиженье праздникез. Бакчаын, бусыын кутске кубиста утялтон. Азьвыл вакытъёсы та нуналысен вань ю-нянез интымъёсы люканы кутско вал. Гужем дӥсь нуллон ортчиз, дэрем интые тулуп дӥсян дыр вуиз. Лымшор пала лобись тылобурдоос дорысьтымы кошкизы ни. Туннэысен гондыр но гуэ ватске. Тулысозь чыс-чыс кӧлоз ни. Вашкала ӵыжы-выжыосмы воздвиженье нуналэ выль уж борды кутскемлэсь возисько вылэм: номыр но, пе, уз удалты. Нюлэскы но потаны уг лэзё: лешакъёс, пе, вӧсь карозы. Туннэ соос вань улэпезлы эскеронъёс ортчыто. Ӟеч кузёлэн ӝӧк вылаз туннэ - кубистаен кутэмнянь. 28 числое - Микталэн - ӟазег вордӥсьлэн праздникез. Луд ӟазегъёс тол пала кошко. Гуртъёсын ыж ӵышко, ӟазег сиён каро. Дыр вуиз сяртчыез, кушманэз утялтыны. Микталэн вордскон нуналаз вукузёез утялто вылэм: пудооссэс умой мед возёз шуыса, солы йыртэм ӟазег кушто, йырзэ корка-кузёлы нуо. Та нуналэ... ар талэсь азьло 28 сентябре вордскемез дырысен 105 ар тырме тодмо удмурт писательлы Кедра Митрейлы (Д. М. Корепановлы). 28 сентябре, 130 ар талэсь азьло, Глазовын ужаны кутскиз нырысетӥез калык библиотека. Та нуналэ ик, 70 ар талэсь азьло, Можгаын кылдӥз "Красная звезда" объединение. 1941 арын 28 сентябре 313-тӥ стрелковой дивизилэн частьёсыз Карелилэсь столицазэ фашистъёслэсь утён ожъёсы пыриськизы. Та дивизия кылдытэмын вал Ижевскын. Солэн радъёсаз трос гинэ ожмаськизы Удмуртилэн пиосыз. Соос пӧлын - Селта районысь Иван Воронов но Сюмси районысь Аркадий Чурин. 1904 арын 29 сентябре вордскиз тодмо писатель-боец Николай Островский. Асьмелы со тодмо "Как закалялась сталь" книгаезъя. Та произведение вылын будӥзы но кыдазы трос егитъёс. Николай Островскийлы сӥзем музейёс усьтэмын вордскем Шепетовкаяз, Сочиын. Та городын-курортын ик со кулӥз 1936 арын 22 декабре. Пыӵаллы - 190 ар, автоматлы - 50 Туэ асьме республика пусъе Ижын пыӵал тӥрлык поттыны кутском дырысен 190 ар тырмонэз но автомат поттыны кутскем дырысен 50 ар тырмемез. Соин валче кылдытэмын оргкомитет. Кун Кенешлэн Тӧроез Александр Волков кивалтэм улсын толон ортчиз оргкомитетлэн кенешез. Дано нуналъёсты пусйыны дасяськемзы сярысь ивортӥзы Правительствоысь, "Ижмаш" огазеяськонысь но Иж мэриысь кивалтӥсьёс. А. Петров. Сютэм улон ялӥзы Таӵе югдуре вуиз Уваысь югдурез утёнъя районной отдел. Милициын ужасьёс огпол гинэ ӧз ӝожтӥськылэ ни коньдонтэк пукемзы вылэ. Котькудӥзлэн вань семьяез, пиналъёсыз. Кызьы, маин соосты возёно? Чиданзылы пум вуиз. Нокытысь юрттэт шедьтытэк бырйизы одӥг сюрес: сютэм улон. Ужлэсь огез но милиционер уг алӥськы. Нош трос-а пайдаез кужымтэм, лябӟем муртлэсь? Республикаысь прокуратура али эскере Уваын кылдэм югдурез. Оском, милиционеръёс кема сютэм уз пуке шуыса. Ивормы газет вылэ потыса ӧз вуы, югдур мукет пала воштӥськиз. Уваысь милиционеръёсын та нуналэ ик ӝегатэмын 6 муртлэсь преступной группа. Солэн сьӧлыкъёсызлэн дасолэсь ятыр лыдъясько вал ни. Дыр вуиз закон азьын кыл кутыны. Вералом на, Уваысь РОВД-ын ужасьёслы вуиз уждунзы но. С. ВАСИЛЬЕВ. ЖУРНАЛИСТЪЁСЫН ПУМИСЬКОНЪЁС Такси дунтэмаз Маин пӧртэм но маин огкадь луэ Госавтоинспекция но Россиысь транспортэз эскеронъя инспекция? - Ми ужаськом предприятиослэн но оргнизациослэн кивалтӥсьёсынызы, мукет сямен вераса, должностной лицоосын, ГАИ - мынӥсь-ветлӥсь транспортэн, водительёсын - шуиз Владимир Бекасов, Россиысь транспортъя инспекцилэн Удмуртиысь ёзэзлэн кивалтӥсез. - Тросэз бадӟымесь автопредприятиос берло аръёссэ нимаз филиалъёслы люкиськизы, озьы ужаны капчигес. Мар лэсьтэмын та дыр ӵоже? Транспортэз эскеронъя инспекция, ГАИ сямен ик, быдэсъя одӥг ужпумез: кулэстоно правонарушениосты. Со понна чурыт куронъёс пуктоно транспорт возись предприятиос но организациос азе. Бадӟым уж нуиське лицензиос сётъян пумысен. Берло дыре ялан будэ адямиосты нуонэ-ваёнэ выжисьёслэн лыдзы. Та ужен выро предприятиос но, нимаз машина возисьёс но. Эскеронъёс дыръя шараяськизы трос гинэ законэз тӥян учыръёс: коньдон поттон вылысь, калык нуонэ-ваёнэ мерско вань мылкыд карисьёс. Со ӟече уз вутты. Югдурез тупатон вылысь, транспортной инспекция ӝегатскытэк басьтӥськиз нимысьтыз комиссия кылдытон борды. Матысь дыре водительёс пӧлын ортчытэмын луоз аспӧртэмлыко конкурс. Со ик возьматоз: кинлы сётоно лицензия, кинлы ӧвӧл. Таӵе ик ужрад нуиськоз таксистъёс пӧлын. Пусъём на: автобус сярысь, такси туннэ дунтэмаз. Шуом, Можгае мынон автобусын 20 сюрс ке сылэ, таксист та дунэз сюрслы кулэстэ. Кудзэ быръёз пассажир? Валамон: кыкетӥзэ. Таиз ӝог но вуттоз, уз но зуркаты. 15 августысен кутскыса, 15 сентябрёзь Удмуртиысь сюресъёс вылын ортчиз "Караван- авто" операция. Та дыр ӵоже республикамы пыр мукет регионъёсы потӥзы 29 государствоысь машинаос. Кызьы асьсэды возё руль сьӧрын пукисьёс? - Мынон-ветлон правилоосты тужгес но умой чаклало Европаысь водительёс, тӥяло - асьмелэнъёс, СНГ-е пырисьёсыз, - шуиз Владимир Георгиевич. - Тужгес но та ласянь висъяськизы Грузия, Белоруссия, Украина но Узбекистан. Кыӵе ужрадъёс кутэмын отысь шофёръёслы пумит? Гожтэмын правилоосты тӥян сярысь актъёс, келямын Россиысь транспортъя министерствое. Ми штраф сётыны ум быгатӥське, сыӵе закон юнматымтэ на. Транспортный инспекцилэн кивалтӥсезлы журналистъёс пӧртэм пумо юанъёс сётӥзы. Кылсярысь, кытчы мынэ штрафъёс но лицензиос чотын люкаськем коньдон? - Штрафъёс чотын люкаськемез кыле интыысь бюджетэ, лицензиосын герӟаськемез - Россия Федерацилэн бюджетаз. Туэ ӝыны ар куспын Москвае келямын 2 миллиард 815 миллион манет, отысь 586 миллионэз инспекцилы берыктэмын вал. - Ужасьёсты трос-а? - 104 адями. Республикаын усьтэмын 6 филиалмы но 5 представительствомы. - Кӧня кивалтӥсьёс туэ понна кыскемын штраф улэ? - Ӝыны ар ӵоже та лыдпус 500-эз ортчиз. Штрафлэн быдӟалаез 80 сюрс манетысен 400 сюрсозь. - "Автосервислэн" ужамез понна тӥ кыл кутӥськоды. Ма лэсьтэмын но лэсьтӥське, обслуживаниез ӟечгес карон вылысь? - Соку ик вералом: тырмымтэос отын трос. Араз кӧня ке пол эскерон-чаклан ужрадъёс ортчо, ӝыны ар понна ужамзылы йылпумъянъёс лэсьтӥськом. Одно ик лыдэ басьтӥськом адямиослэсь куронъёссэс но ӝожтӥськонъёссэс. Суп-сап ужасьёсты улляськом. - Ма вераны луоз автозаправочной станциос ласянь? - 28 августысен кутскыса 10 сентябрёзь ми эскерим 29 АЗС-эз. Ваньмаз шараямын пӧртэм пумо тырмымтэос: котькудаз мынэ водительёсты пӧян: бензин чакламлэсь улӥын лэзиське. Ӟечлыкез сярысь ке верано, Россия Федерацияя со - 27 процент. Али кылдытӥськом нимысьтыз лаборатория - со пыр нуом эстӥськон эскеронъя ужъёсты. В. Бекасов валэктон сётӥз мукет юанъёслы но. Л. ПЕРЕВОЗЧИКОВА. Улон - со оскон 1995 арын Удмуртиын 100 сюрс адями пӧлысь 76-ез йырзэ быдтӥз. 1991 арын та лыдпус кык поллы ичигес вал. Гуртын улӥсьёс 103 адями улонысь кошкиз (ньыль ар солэсь азьло - 54 мурт). Глазов ёросын югдур эшшо но шимес: 100 сюрс адями пӧлысь 168-эз улонэн люкиськиз, Шаркан ёросын - 152 адями. Ассэ ачиз быдтэм муртлы быдэ сизьымезлэн сыӵе малпанэз пумозяз уг быдэсмы. Дуннеысь тазалыкез утёнъя организация (ВОЗ) лыдъямъя, 100 сюрс адями пӧлысь кызьлэсь тросэз йырзэ кыӵесэ донге ке, со вера калыклэн секыт, азьланезлы оскытэк улэмез сярысь. Удмуртия суицидъя (улонысь ас мылкыд каремъя кошкон) дуннеын нырысетӥ интые потӥз. Таӵе югдурез валэктон но сое тупатыны амалъёс шедьтон понна, Ижевскын та нуналъёсы ортче Россиысь психиатръёслэн кыкетӥ конференцизы. Солэн ужаз пырисько Германиысь учёнойёс но. Ужрадэз радъязы Удмурт Республикаысь Тазалыкез утёнъя министерство, Москваысь социальной но судебной психиатрияя центр. Конференциез усьтӥзы Удмуртиысь тазалыкез утёнъя министр С. Г. Шадрин, Кун Кенешлэн Тӧроезлэн воштӥсез А. Г. Красильников. Психикаез эскерись учёнойёс, врачъёс одӥг малпанэ вуо: адямилэн визьлулыз экономикаын, политикаын кылдэм югдурен гинэ ӧвӧл герӟаськемын. Психика сӧриськемлэсь мугъёссэ адямилэн кыӵе калык выжыысь, культураысь, интыысь луэмысьтыз утчано. Финн-угор калыкъёсты огъя история огазея. Но мукетсэ но вунэтыны уг яра: котькыӵе кунын, Россиын-а, Финляндиын-а соос мед улозы, ас мылкыдзыя улонысь кошкисьёслэн лыдзы, дуннеысь мукет калык выжыосын ӵошатыса, укыр трос. Коми Республикаын, кылсярысь, йырзэс быдтэмъёслэн лыдзы 4 поллы тросгес вина юыса кулэмъёслэсь. Суицидлэн йылэмез сяна, республикаямы визь сураськемен (кылсярысь, шизофрениен, кулыса усьылонэн-эпилепсиен, олигофрениен) висисьёслэн лыдзы будэ. Азьло аръёсы городын улӥсьёс тросгес висьылӥзы ке, берло дыре гуртоос соосты суто ини. Капчи визьемъёслэн (кылсярысь, олигофрениен висисьёслэн) лыдзы Удмуртиын 1,6 поллы тросгес быдэс Россиынлэсь. Гуртын улисьёс пӧлын соос 2 поллы тросгес пумиськыло, городын улӥсьёсын ӵошатоно ке. Ма кароно, улонысь кошкемен, визь сураськыса висёнъёсын герӟаськем югдурез тупатон понна Экономикаез ӝутоно, политикаез калык пала берыктоно. Ваньзэ тае толэзьскын но, арскын но уд быдэсты. Нош калыклы туннэ юрттоно. Соин ик Удмуртиысь психиатръёс дэмлало котькуд ёрос больницаын усьтыны визьлулэз эмъянъя отделение. Та ужпумез эскеронлы тросгес саклык, озьы бере, коньдон висъяно. Психиатръёслэн гинэ кужыменызы секытъёсты уд вормы. Та уже, Тазалыкез утёнъя министерство сяна, пыриськыны кулэ, калыкез шуг-секытъёслэсь утёнъя ёзъёс, Югдурез утёнъя министерство. 1996-97 аръёсы йырзэс быдтӥсьёслэн лыдзы, ӧжыт ке но, кулэсмыны ӧдъяз. О. ВАХИТОВА. Бадӟым-а сад-бакчамы? Покчи гужем йылпумъяз сад-бакчаосын ужъёсты. Берпуметӥез картошка, кушман, кешыр, улмо но мукет емышъёс бичамын, толалтэлы музъем копаса кельтэмын. Нош тросэз тодо-а меда, кӧня асьме элькунамы сад-бакчаос? Соос 16 сюрс 600 гектарлэсь бадӟым музъемез басьто. Европаысь пичигес кунлэн улосвылэз пасьта. Возе но утялтэ та быдӟа музъемез 205 сюрс мурт. Сад-бакчаосын ужасьёслэн лыдзы туэ кулэсмиз. Угось кӧняез ке ас музъемзылэсь куштӥськизы. Куашказ Завьялово ёросысь Пальники гурт вӧзысь "Росинка" бакча: городын улӥсьёслы Чепаниха доры висъямын вал 220 гектар музъем. Со но жаг турынэн шобырскиз. "Суходол" бакча но ог 40 гектарлы пичияз. Малы бен городын улӥсьёс сад-бакчаоссылэсь куштӥсько? Мугез одӥг - туж кыдёкын. Нош ваньмызлэн ас автомобильёссы ӧвӧл ук. Собере, Советской власть куашкамен (озьы шуыны луэ ке, угось солэн выжыосыз но юнэсь на, сое чуртнась адямиос но кивалтӥсьын ветло на), базаръёс тырмизы емышен, бакча сиёнэн. Соин ик сад-бакчаослэн лыдзы, оло, эшшо но кулэсмоз на. Угось соосты вузасьёслэн лыдзы йылэ, нош басьтыны мылкыд карисьёс трос ик ӧвӧл кадь. В. УКОЛОВ. 1 октябрь - дунтэк ветлон нунал Таӵе ӟеч кузьым дасяз пенсионеръёслы Ижевск городлэн администрациез. Солэн решениеныз ӵуказе, 1 октябре, пригородной маршрутъёсъя автобусъёсын арлыдо адямиос дунтэк ветлыны быгатозы. Л. МЕДВЕДЕВА. Учке азьлане 2 90-тӥ аръёслэн кутсконазы Удмурт культурая общество дасяны кутскиз "Герд" бамъёс. 60-лэсь трос вал ни соос. Берло вакытэ огъя удысэ пыриське "Удмурт кенеш" огазеяськон но. Сое ми ум аналтэ. Но бамъёслэсь шӧмзэс кӧня ке воштӥм но, воштом но. Азьвыл кызьы кошке вал? Ӟырдыт сюлэмо адямиос, ас калыксы сярысь сюлмаськыса, быгатытэк-а, быгатыса-а басьтӥсько кыӵе ке уж борды. Малпамзыя уг пишмы ке, серекъясьёс вӧзазы ни: нодтэмъёс но пӧрмостэмъёс тӥ. Озьы "Герд" баме сюро ог-огместы ултӥясь чуръёс. Бератаз редакция шуиз: ог-огед вылэ урдскылонъёс газетэ медаз сюре. Кенешелэ, ченгешелэ, пӧртэм малпанъёстэс ӵошатэлэ, огкыл утчаны вырелэ, нош ог-огдэс эн мыскыллялэ. Удмуртлыкез ӝутонэ ваньмыз сямен пырисько, сюлэмзы косыса, дун басьтытэк, асьсэлы пайда поттон сярысь малпаськытэк. Со понна-а кокалод сыӵеосты? Вӧсь кароно ӧвӧл - юрттоно. Сыӵе мылкыдын мед тырмозы "Герд" бамъёс. Вуоно арлэн кутсконаз асьмеос данъялом Куӟебай Гердэз но Ашальчи Окиез. Соослы сӥзем тодэ ваёнъёсын шур али но куасьмемын ӧвӧл. *** Гожтэтъёсъя отделлэн аслаз сюлмаськонъёсыз. Со радъя газетмылы гожтӥськонэз, ужа авторъёсын, дася "Шунды", "Наталь" но "Берекет" бамъёс. Отделын ужасьёс трос ӧвӧл, но бордаз юнматэм удысъёсы пыриськыны мылкыд каро мукет корреспондентъёсмы. Туэ тани бадӟым кенешон пуромиз "Сьӧлыкамтэ нылъёс дуноесь" материал пумысен. Нылкышнолэсь - вуоно анайлэсь данзэ утён сярысь отӥяз вераськозы врачъёс, дышетӥсьёс, асьсэос кышномуртъёс. Кин тодэ, оло та кенешонэ кыскыны быгатом воргоронъёсты но. "Дышетскиськом дышетскыны" йыръян улын мынозы школае дасяськисьёслы чаклам визь-кенешъёс. Детдомын улон-вылон, школаез йылпумъясьёсты уже интыян, яратон, пӧртэм выжыосысь адямиослэн семьяязы кусып радъян, люкиськон - ичи-а егитъёсты сюлэмшугъяськытӥсь ужпумъёс? Улонэ сюрес лёгисьёс понна республикаын нимысьтыз газет ӧвӧл бере, сыӵе ныпъетэз аслыз басьтэ "Удмурт дунне". Нимысьтыз саклык висъянын луоз тазалыкез утёнлы. Больницаос дунын эмъяны кутско бере, адями азьланьын мургес малпаськыны кулэ ачиз сярысь. Вашкала дырысен тодмоесь йӧнатскон амалъёс медаз вунэ. Кӧняез ке корреспондентъёсмы эшъясько физкультураен, кезьыт вуэн, лек синазькыль каро аракыез но тамакез. Соос ик дасялозы "Тазалык" бамъёсты, вуылозы нуны ваён юртъёсы, психобольницаосы, санаторийёсы. Олокӧня дасо аръёс ӵоже сётъяськом ни "Гожтэт ӧтиз сюрес вылэ" йыръянэн материалъёс. Куддыръя амалтэк малпалод: Россиын вань на меда одӥг коть сыӵе газет? Редакцие вуись гожтэтъёс шоры данак изданиос чиньы пыртӥзы учко ни. Ми дышем сяммыя соосты весь дунъяськом но газет баме вуттыны тыршиськом. Данак интыосын али кылдытэмын "Оскон" нимаськись ёзъёс (службаос). Соослы юрттыса, "Удмурт дунне" но сюлмаськоз шуге-леке сюрем адямиос сярысь. Озьы ик юрттоз адямиослы кузпал бырйыны. Газетчиос кемалась верасько "Берекетлэсь" пуштроссэ воштон сярысь. Со борды кайта басьтӥськом лулысь-сюлмысь. Кин тодэ, оло, "Натален" огазеялом ай. Одно улӟытом чорыгасьлэсь сэрегзэ. Тросэзлэн корреспондентъёслэн вуылэмзы потэ Удмуртилэн палэназ улӥсь удмуртъёс дӥне. Вазен соос пӧлысь уно сюрсэз лыдӟылӥзы "Удмурт дуннеез". Республикаослэн кусыпъёссы тӥяськемен, ми огвакытэ ваньзэ сыӵе эшъёсмес ыштӥм. Туэысен газетмес басьтэ ни Татариысь но Башкириысь кӧня ке дасо мурт. Вуоно арысен соослэсь лыдзэс будэтон понна, пӧртэм ужрадъёс кутӥськом. Одӥгез таӵе: вуылоно "кунгож сьӧры", пумиськоно палэнысь удмуртъёсын, гожъяно соос сярысь. Татариысь яке Пермь областьысь выжы-кумылэн тодэмез уг поты шат Удмуртиысь удмуртлэсь кызьы улэмзэ? Газетмылэн матысь эшъёсыз тодо: редакция ялӥз тӥляд гожтэтъёстыя аспӧртэм ӵошатсконъёс. Тужгес уноез мылкыд каризы "Устоез лыдӟись" конкурсэ пыриськыны. "Наталь" бамын мынэ тупаса улон арлы сӥзем "Эшъяськон бугор" ӵошатскон. Огазея туж паськыт удысъёсты - пӧртэм калыкъёслэсь, семьяослэсь, анай-атайёслэсь музон ӵыжы-выжыослэсь кусыпъёссэс. "Удмурт дунне" но егит дунне. Сыӵе конкурслэн нимыз ик возьматэ: вераськон мынэ будӥсь кивоштӥсьёслэн улон-вылонзы сярысь. Ӵошатсконъёслы йылпумъянъёс лэсьтом 1998-тӥ арлэн кутсконаз. Соин ик газетмес вуоно арын басьтэмысь дугдэмъёслы ӝож луоз: стартэз адӟизы, нюръяськонын "висизы", нош финишез учкыны кынарзы ӧз окмы. *** Кӧс нуналэ (субботае) потӥсь газетмы пичияз бере, "Шӧкычлэн" но шиез кык пол вакчиёмиз. Жаляса верано луэ: лыдӟисьёс лыдъямъя, со кӧня ке ныжомиз но. Шиез весь шерыны выриськом, но малпамъя котьку ик уг пӧрмы. "Удмурт дуннеын" сямен ик, быдэс Россиын фельетонлэн дуныз кулэсмиз, малы ке шуоно, асьмелэн быдэс улонмы - лек комедия. Но ми ум буйгатскиське. "Шӧкычмес" умоятыны ӧтиськом лыдӟисьёсмес. Тӥлесьтыд витиськом таӵе юанлы валэктэмдэс: мае лыдӟемды потэ отысь? Матысь дыре тӥ пӧлын ялом на эшшо кык ӵошатскон. Нимъёссы лекос аспӧртэмесь: "Малы уг кельшы "Удмурт дунне" газет" но "Устоез курлась". Курыт кылъёс гожтӥды яке верады ке но, соосты газетэ печатлалом. Тӥляд дэмланъёсты редакцилы аспӧртэм компас мактал луозы, милемлы азьлане шонер сюрес возьматозы. *** Асьсэлэн ӟеч малпанъёссы вань секретариатлэн, компьютеръёсъя отделлэн, фотокорреспондентлэн, суредасьлэн, реклама дасясьёслэн, корректоръёслэн но мукетъёсызлэн. Редакциын ньыльдон мурт ужа бере, котькудӥзлэсь чаклам ужъёссэ мадьыны туж трос инты кулэ луысал. Валамон огез: кайта, 80 ар тырмон араз, газетэз эшшо умойгес карон вылысь, ми вань луонозэ лэсьтом. Шоро-куспо арлыдмы но кын корт куртчон вакытэ кадь - 39 арес. АЛЕКСЕЙ ШКЛЯЕВ, "Удмурт дунне" газетлэн валтӥсь редакторез. Гажано ветеранъёс! 1991 арын ООН-лэн Генеральной ассамблеяезлэн 46-тӥ сессиез 1-тӥ октябре Дуннеысь мӧйыослэсь нуналзэс пусйыны дэмлаз. Со дырысен вань кунъёсысь арлыдоос асьсэлэсь праздниксэс пусъё. Асьме вакытэ тросэз пенсионеръёс уно шуг-секытъёсын пумисько, коньдонлы ёрмо. Пенсиосты ӝегатэмен, соослэн улонзы эшшо но шугоме. Республикаын "О ветеранах" законэз быдэсъян тырмыт ужрадъёс уг кутӥсько. Мӧйыослэсь нуналзэс пусйыны дасяськыса, Удмуртиысь ветеранъёслэн кенешсы, городъёсысь но ёросъёсысь организациос уно ужрадъёс ортчытӥзы. Республикаысь ветеранъёслэн кенешсы тужгес ёрмись пенсионеръёслы коньдон висъяз. Кенешлэн президиумез "О ветеранах" законлэн быдэсъяськемез но Удмуртиысь Правительстволэн та законэз быдэсъян сярысь постановлениез пумысен октябрь толэзе пленум ортчытон сярысь постановление кутӥз. Гажано ветеранъёс! Ветеранъёслэн кенешсылэн президиумез сюлмысь ӟечкыла тӥледыз Дуннеысь мӧйыослэн нуналэнызы, сӥзе тӥлед кема аръёслы юн тазалык, капчи мылкыд, умоезлы оскон. ОЖЫСЬ НО УЖЫСЬ ВООРУЖЁННОЙ КУЖЫМЪЁСЫСЬ НО ПРАВОЕЗ УТИСЬ ЁЗЪЁСЫСЬ ВЕТЕРАНЪЁСЛЭН КЕНЕШСЫ. Арлыдоослы сӥзьыса Ветеранъёс понна октябрь толэзе Ижын ортчозы пӧртэм ужрадъёс. Тани куд-огез гинэ. "Ветеранъёслэн клубзы" ӧте: 1 октябре - "Ударник" шутэтскон юртэ; 2 октябре - "Восточный" культурая юртэ; 4 октябре - "Родина" кинотеатре; 7 октябре - "Октябрь" кинотеатре. Курадӟонлэсь утёнъя центръёсын 1-11 октябре ортчозы арлыдоосын пумиськон нуналъёс. Дунтэк кино возьматозы кинотеатръёс: "Аврора" - 8-10 октябре; "Удмуртия" - 8-10 октябре; "Дружба" - 25 сентябре - 1 октябре. "Ударник" шутэтскон юртын 3 октябре ортчоз дышетӥсьёслэн-ветеранъёслэн шутэтскон нуналзы. Т. МИХАЙЛОВА. Кытын возёно коньдонэз: банкын яке банкаын? Коньдонэз воштон 1992 арлэсь азьвыл люкам уксёлэсь дунзэ берыктон ужпумез уката лэчытомытӥз. Соин ик Россилэн Банказ вуись юанъёс пӧлысь 80 процентэз одӥг сярысь: валэктэ, коньдонэз воштонэн валче азьвыл люкам но инфляциен сием коньдонлэсь дунзэ уз-а берыктэ? Реформалэсь азьло банке понэм уксёез берыктыны государстволэн моӵез уз тырмы, шуо вылӥ кивалтӥсьёс, коньдон ӧвӧл, пе. Но кунлэн сыӵе куанер луэмез пумысен ченгешыны луоно. Сбербанк кылем арын 14,5 триллион манет табыш поттӥз. Со ассэ коммерческой банк шуэ но табышезлэсь ог люкетсэ пенсионеръёслы люкыны уг шӧта. Озьы ке но, солэн ӝыныезлэсь тросгес акциосыныз, озьы бере, табышеныз но Центральной банк кузёяське. Мукет кылын вераса, государство. Соин ик кун быгатысал сбербанклэсь табышезлэсь ӝынызэ пенсионеръёслы сётыны. Егитъёслы капчигес. Соос, саесъёссэс пужалляса ужазы ке, асьсэды сюдыны быгатозы. Нош пересьёслы ма кароно? Президентлы но правительстволы осконо ке шат: оло, индексациез ортчытозы ик? 80 арес тырмем пенсионеръёслэсь банке понэм уксёзэс 1000 пол будэтӥзы ук. Нош кӧнялы берло аръёс ӵоже улон дунояз? Госкомстат ивортэм, 1994 арын дунъёс 2011 пол будӥзы, 1990 арен ӵошатыса. Нош экономикаез чакланъя институтлэн лыдпусъёсыз возьмато: 1995 арын дунъёс 3305 пол йылӥзы, 1990 арен ӵошатыса. Берло кык аръёс ӵоже улон эшшо но дунояз на. Соин ик банкысь вкладъёсты 1000 пол гинэ будэтэм улонлы уг тупа. Банке 1992 арлэсь азьло понэм коньдонлэсь дунзэ берыктон сярысь закон кутэмын. Но со котырын трос юанъёс бергало. Сбербанклэн кивалтӥсез Андрей Казьмин верамъя, вуоно арлы бюджетлэн инъетаз вкладъёсты берыктонлы коньдон чакламын. Нош кинлы но кӧня тырозы - тодмо ӧвӧл на. Басьтэмын "АиФ"-ысь. "УСТОЕЗ ЛЫДӞИСЬ" КОНКУРСЭ "УДМУРТ ДУННЕТЭК" улонын йыромод 1. Газетэз басьтӥсько но лыдӟисько котькуд аре. Вуоно арлы но гожтӥськи ини. Вань газетъёс пӧлысь "Удмурт дуннеез" бырйи. Ваньзэ басьтыны секыт. Нош "Удмурт дуннетэк" улонын йыромод. "Удмурт коммуна", "Удмурт правда", "Советской Удмуртия" нимъёсын лыдӟи газетмес. Туала нуналэ нимаське "Удмурт дунне". Котькуд нимын редакциын ужасьёс мылысь-кыдысь тыршизы но тыршо, солэн пуштросэз узыр, лыдӟисез бордаз мед кыскоз шуыса. Улонлэсь вань вирсэръёссэ газет сэрттэ-пертче. 2. Газетмылэн вылтусыз кельше. Удмурт пужы мукетсэ но печатланы луэ: соос угось трос вал. 3. Радиоысь кылӥськом Правительстволэсь пӧртэм ужпумъёсъя ивортонъёссэ. Озьы ке но, газетысь одно лыдӟисько на. Нош политикая удмуртэ берыктэм кылъёсты уг поты тодэме, соос удмурт сямен чебер уг кылӥсько. 4. Газетмы улонэз котыр ласяь суреда, лыдӟись эшъёссэ улонысь трос выленыз тодматэ. "Герд", "Тулкым", "Берекет", "Шунды", "Наталь", "Шӧкыч" бамъёсысь материалъёсты лыдӟисько. Тросэз соос малпаськыто. "Шӧкыч" бам улонысь но нимаз адямиослэн тырмымтэосынызы тодматэ, нюръяськыны ӧте. Улонын чеберез мед вормоз уродзэ, кырсьсэ. Шер пото чеберлыко произведениос, гожъясь ӧвӧл, лэся. 5. Макем трос лэсьтӥзы песянай-песятайёс, нэнэ-дядяос. Вань ужъёссэс киосын быдэсъязы. Секыт улӥзы, нош номырлы но ӧз ӝожтӥськылэ. Али егитъёс пӧлын трос ужлы ёрмисьёс. Макем таза, чебер пиосмы ужатэк солань-талань лёгасько. Нош кудӥзлэн ужаны ик мылкыдзы ӧвӧл, акыльтӥзы "ужаса". Нош сиемзы, юэмзы потэ. Таосыз ини лушкаськыны кутско. Ас гурт егит пи ик оген пересь кышномуртлэсь ваньбурзэ лушкаса кошке. Озьы тӥни номыр лэсьтытэк, кудӟонзэ но, кӧттыронзэ но шедьтэ. Кызьы улыны малпало егитъёс? Ужатэк ваньбур уг кылды, кӧт уг тыры. Соос асьсэлы выль "уж" шедьтӥзы: лушкасько, юо, нылъёсты сантэмало, юрӟым кылъёсын верасько. Та ласянь анай-атайёсты пыкылэме потэ: пичи дырысен ик соослы укыр бадӟым эрик сётэмын, ӧвӧл сюлмаськемын ужлы дышетыны. Нылпи умоезлы но, уродэзлы но семьяын дыше. 6.Поэт-писательёсын, корреспондетъёсын ваньмыныз кенешеме, вераськеме, визь- кенеш куреме вань. Вань гожъямъёссэс лыдӟисько, ваньзылы тазалык, шудбур, сӥзисько. 7. "Удмурт дунне" газетэз лыдӟыса, сюлэм каньыла, азьланяз умоезлы оскон кылдэ, вань вирсэръёс выль кужымен ужаны кутско кадь. Визьнод басьтӥсько газетысь сюлэмъя эшлэсь кадь. К.ЗАГРЕБИНА. Як.-Бодья район, Лысо гурт. Урокъёслы юрттэт ЪЪ даурлэн пумаз асьме вылэ вылысьтыз вылаз погыльске выль тодонъёсын, иворъёсын тулкым. Школа ас дышетон программаоссэ, методикаоссэ тупатэ туннэ нуналлэн куронъёсызъя. Соин валче выльдӥсько учебникъёс, пособиос. Трос методической литература поттэ республикаысьтымы Дышетӥсьёслэсь тодон-валанзэс будэтонъя институт. Ас ужан амалъёссэс, опытсэс вӧлмытыны дэмлало куд-ог азьмынӥсь дышетӥсьёс. Азьлогес потэм методической пособиос пӧлысь дышетӥсьёслы урокъёсын юртто Б. П. Басовлэн, Л. И. Варгинлэн, Р. А. Владимировалэн но мукетъёсызлэн ужъёссы. Выль дышетскон аре книга ӝажыосты узырмытыны луэ берло потэм изданиосын. Пиналэз но, мӧйыез но шумпотыса киязы кутозы И. К. Саушиналэсь "Удмуртия в играх, загадках и кроссвордах" книгазэ. Таӵе дунъет сётэ солы Б. Басов профессор: "Ваньмыз, мае дэмла автор, ас сюлэм пыртӥз потэмын, ас вылаз эскеремын. Соин ик со дуно... Сое уже кутыны быгатозы историкъёс но краеведъёс, филологъёс но географъёс, начальной классъёсын дышетисьёс но классэн кивалтӥсьёс". Та профессор ик гожтэ "Россия в мировом сообществе" книга сярысь": "Та уж гожтэмын дышетӥсьёслэн куремзыя... Учебникъёс уг вуо, туала югдурез возьматыса, соин ик та материал туж пайдаё луоз историяя, общественной дисциплинаосъя, правоя дышетӥсьёслы но политологъёслы". Та дышетӥсьёс понна ик шумпотымон луо Удмуртилэн историеныз герӟаськем ужъёс, кылсярысь, Р. А. Владимировалэн "Примерные планы-конспекты уроков но истории Удмуртии" кык люкетэн книгаез. Автор туала синмын учке Октябрь революция шоры, эскере, кудпала воштӥз со калыкмылэсь улонзэ. Дышетӥсьёс-филологъёс понна поттэмын кык книга. Нырысез - "Текст: закономерности его настроения". Авторез профессор Г. А. Ушаков гожтэ: "Ӟуч кылъя программае али пыртэмын текстэз эскерон амалъёсты дышетон... Та ласянь дышетӥсьёс туж шугъясько вал. Угось куд-ог вузъёсын, шуом, УдГУ-ын ик, текстлэсь теоризэ дышетон борды али но ӧз басьтӥське на". Кыкетӥяз - "Учителю-словеснику" книгае люкамын ӟуч кылъя но литературая научно-методической статьяос, кылсярысь, таӵе темаосъя: классической произведениез выль синмын лыдӟон, литератураысь выль нимъёс, удмурт школаосын фонетикаез дышетон аспӧртэмлыкъёс. Кызьы пичиысен ик нылпиосты чебер вераськыны но астэ умой возьыны дышетоно - солы сӥземын "Культура общения" методической пособие. Авторез М. А. Бочкарева - азьмынӥсь педагог, инновационной проектъёсын но программаосын дышетонъя И фестивальлэн дипломантэз. Естественно-научной дисциплинаосъя пособиос пӧлын но вань вылез - "Химия-ВИИИ" сборник. Татчы пыро задачаосыз лэсьтон алгоритмъёс, нимаз висъям контрольной ужъёс, дышетскисьёслэсь басьтэм тодонъёссэс эскерон. Дасязы пособиез профессор В. В. Сентемов, институтамы ужась Г. А. Багишаева но Ижевскысь 30 номеро школаысь химияя дышетӥсь Л. М. Воронова. Школаосын кӧня ке арзэ нуисько ни улонэз кышкытлыклэсь утёнъя урокъёс. Таӵе учебникъёс - "Основы безопасности жизнедеятельности" - 5-тӥысен 8-тӥ классозь поттэмын ни. Укно дышетӥсьёс куремъя печатламын "Комплексное исследование территории" экологической практикум. Татысь тодыны луэ, кызьы дышетоно нылпиосты инкуазь чылкытлыкез утьыны. "Настольная книга руководителя" (авторез Н. Ю. Ерофеева), школаослэн кивалтӥсьёссылы гинэ ӧвӧл, огшоры дышетӥсьёслы но юрттоз ас ужзэс эскерыны, кулэезъя радъяны. Нырысь ик сётэмын выпускниклэсь модельзэ лэсьтон программа (кыӵе луыны, мар быгатыны кулэ школаез йылпумъясь мурт). Кыкетӥ люкетаз - педсоветэз дасяны но ортчытыны дэмланъёс, куинетӥяз - урокез эскерон методика но дышетӥсьлэн тодон-валанэзлы, быгатонэзлы дунъет сётон. Та юрттэт книгаосыз басьтыны луоз милям институтысьтымы. Соосты дэмласьком дышетӥсьёсын пӧртэм пумиськонъёс дыръя, куддыр ёросъёсы но потаськомы. А. ЛЕКОНЦЕВА, республикаысьтымы Дышетӥсьёслэсь тодон-валанзэс будэтонъя институтын ужась. Ӵуказе - Дуннеысь арлыдоослэн нуналзы. Со пусйиське ини сизьыметӥзэ но ортче "Пӧртэм поколениослэн кусыпъёссы" ӧтён улсын. Туннэ семьяын песянай-песятайёслэсь, анай-атайёслэсь но нылпиослэсь кусыпъёссэс, социальной удысын но экономикаын кусыпъёсты юнматоно. Поколениос куспын валан, ог-огедлы юрттон шоры мукет синмын учкыны кулэ. Нырысь ик мӧйыослы социальной юрттэт сётоно, секыт улонлэсь утьыны тыршоно, семьяын соос сярысь сюлмаськоно. Сыӵе общество азинске, кытын егитъёс анай-атайёссылэн улэмзы вылын дышетско, песянайёссылэсь ӵектэмъёссэс лыдэ басьто. Удмуртиын берло кык аръёс ӵоже пенсионеръёслы тросгес саклык висъяське. Удмурт Республикаысь Кун Кенеш но Правительство ваньзэ лэсьто, пересьёслэсь улонзэс капчиятон понна. Кылсярысь, юрттэи сётӥське котькуд пенсионерлы, кылдытӥсько арлыдоослэн ужпумъёсынызы вырись учреждениос. 1992 арын шаерамы Социальной юрттэт сётонъя центръёс кык гинэ вал ке, туннэ соос куамын куинь ини. Калыкез улон-вылонын утёнъя министерство учреждениосыз пыр 90 сюрс адямилы юрттэ. Министерстволэн 110 ёзэз арлыдоослы гурт котыразы юрттэ, 32 учреждение социальной юрттэт ӝегатскытэк сётэ, 30-ез мӧйыос нуназе шутэтско, кылдытэмын 6 стационар. Ветеранъёс, тросэз арлыдоос пӧртэм шуг-секытъёсын пумисько. Государство со сярысь уг вунэты но, улонзэс капчиятон понна, ваньзэ луонозэ лэсьтэ. Сӥзиськом тӥлед тазалык, улонлы но азьланезлы оскон. Ӵыжы-выжыосмылэн сюлмаськемзы сюлэмдэс мед шунтоз. Тупаса улон но шудбур тӥлед но, нылпиостылы но, соослэн нылпиоссылы но! Праздникен! Удмурт Республикаысь Кун Кенеш Удмурт Республикаысь Правительство. Репортаж Бер сӥзьылэн ке ӵошатӥд... Арлыдоослы но сӧсыръёслы психоневрологической интернатэз Нагорной посёлоке нимысьтыз чакласа усьтӥллям, луоз. Татын шыпыт. Котыр нюлэс куашетэ, шур бызе. Городлы но кыдёкын ӧвӧл. Асьсэ коже поръяны быгатӥсь песянайёс но песятайёс ӵемысь Ижевске вуыло. Пенсиысьтызы кызь вить процентсэ висъям коньдонзэс быдтон вылысь шуыса ке но. Чай юыны конфет басьтозы, сӥль... Интернатын ӟеч сюдо соосты, но асладэз кӧттыргес потэ уго. Доразы куное вуылонмы вакытэ, отын улон юртэз тупатъяло вал - таиз огдырлы гинэ. Сисьмыны ӧдъям укно янакъёс интые ӝоген шальк-шальк мукетъёссэ пуктозы, бездэм ӧсъёс, выж, вӧлдэт нош ик выль кадь луозы. Телевизор татын вань - быдэс интернатлы одӥг ке но. "Модной" луэм телесериалъёсын тунсыкъяськисьтэм песянайёс ӝытъёсы керттӥськыса, чильпаськыса пуко. Песятайёс урамысь пуконъёс вылын тамак пурккето. Ваньзы соос огазьын уло. Комнаталы быдэ куинь-ньыль кузёез. Вань одӥген улӥсьёс но - ӵемысь интернатэ кемалась вуэмъёс. Песятай-песянайёс пӧлын уло асьсэлэн "кизилиоссы". Соос пӧлысь тужгес адӟиськымонэз луэ Василий Иванович Погорелкин. Армиын служить карон дырысен сӧсыр луэменыз валче, егитысен ик ветлэ питранъёс вылын. Интернатын со дас одӥгетӥ арзэ улэ. Та воргорон эшъёссэ ӟеч кырӟаны-вераны быгатэменыз бордаз кыскиз.Интернатын кылдытэм самодеятельной ансамбле ветлӥсьёс пӧлын тужгес адӟиськымонэз шуим ке, ум янгышалэ, дыр. Со ачиз ик кылбуръёс но гожъя - куд-огезлы гуръёс кылдытэмын ни. Нош Василий Ивановичлэсь огшоры адями луымтэзэ возьматэ солэн улон интыез но. Ми шумпотыса кожылӥм дораз: котыр книгаос гожъям кагазъёс. Ӝӧк вылысь лампа кузёлэн уйёссэ кӧлымтэез сярысь вера. Василий Погорелкин уг ӝожтӥськы интернатын улэмезлы. Соин огкылысь луэмзэс веразы эшъёсыз но: синмаськымонэсь татын ужасёс-эмъясьёс. Песяй-песятайёсын соглаш луиы ми но. Уго кузёлэн кыӵе луэмез куно пумитамысь ик шӧдӥське. Тужгес тау кареммы потэ Т. М. Жигаловалы, та вакытэ валтӥсь эмъясьлэсь ужзэ быдэсъясьлы. Татьяна Матвеевна дас вить ар ӵоже аслэсьтыз сюлэм шунытсэ сӥзиз ни интернатлы. Но сюлэмез уд пӧя, шуо. Интернатысь пересьёслэн улонзы "вӧй вылтӥ кошке" нырысь учкыса гинэ - пӧлысьтызы лябӟемъёслэн, сӧсыръёслэн кыкетӥ этаже тубаны быгатымтэзэс лыдэ басьтытэк но. Зэм, таиз но шугъяськытэ соосты. Интернатысь вань ужрадъёс отын ортчыло. Ярано, концерт возьматонэз азьын Василй Погорелкинэз но интыяз вутто ик. Нош концерт йылпумъяськем бере - ӵемысь вунэто. Вӧсь. Вӧсь каре мукетыз но. Интернатын ваньзы огазьын уло. Пӧлазы ик - юыны яратӥсьёс, пытсэт сьӧрысь потэмъёс но. Соослэн эрказмемзы тужгес шӧдӥське ӝытъёсы. Дӥсьтозы шат соослы пумитъяськыны востэмесь Аннапайёс, Катьырнапайёс? Шыпытак ас сэрегазы пуко. Оло, самой таӵе вакытъёсы песянайёслы но песятайёслы тужгес мӧзмыт луэ. Тодэ лыктэ ортчемез... Ватонэз ӧвӧл, вераськонмылэн та палдурыз дӥсьтытэкгес ортчиз. Оло, азэм яра пытьыосты эшшо мургес ӵабыштыны шедьтод, кин тодэ? Мӧзмыт. Шимес. Возьыт. Мӧзме Клавапай вордскем палъёсызлэсь. Вить ар талэсь азьло со интернатэ вуиз. Пичи Пурга палъёсаз кылизы солэн пичи гинэ кык косякен коркаез, укно улысьтыз лабыр-лабыр кызьпуэз. Нош одӥг гинэ пиез ӧвӧл ни. Кулон сое талаз... Шимес 94 аресъем Оринапайлэн сюресэз. Сьӧсь война сураз-пожаз ваньзэ. Яратоно Сергаез оже нырысетӥ нуналъёсаз на кошкиз. Ӧз берытскы ни. Со дырысен кышномурт пал тури выллем огназ кылиз. Пыраклы. Инмар пинал но ӧз кузьма солы. Ортчытэ со аслэсьтыз берпуметӥ нуналъёссэ шыпытэн гинэ. Синкылиос бӧрдыса быремын... Возьыт вордэм анай-атайёссэс аналтӥсь "нылпиосмы" понна. Возьыт асьмеос понна, сыӵе сюлэмтэм адямиос шоры чиньы пыртӥ учкеммылы. Интернатысь тросэзлэн песяй- песянайёслэн кытын ке но вань пиналъёссы, ӵыжы-выжыоссы. Шат Огашапай дырызлэсь вазь уз пурысьта, кисыриосын уз шобырскы, вордэм пиез сое ураме потыса лэзиз ке? Пичи дыръяз нуныям Сашиез шальк-шальк выль корка пуктӥз но, анаез кулэ ӧз луы ни. Тынадэз вуж юрттэз сисьмиз-быриз, пе. Кенэз но ӧз юртты кышномуртлы... Интернатысь кошкыны вырӟеммы бӧрсьы, кема ог-огенымы вераськытэк, чус улӥм. Син шорын - со синъёс... Шорад азьланезлы оскисьтэм, бездэм синъёс тонэ астэ но улон ӧрысь потто кадь. Маин ӵошатод та "шузимем" мылкыдэз? Укно сьӧрысь бер сизьылэн ке... Тани тополь вылысь зарнивуам куаръёс муз вылэз шобыртӥллям. Адямиос соосты жалятэк дэри пӧлы лёгало-комъяло... Э. КУМАЧЕВА. Туспуктэмезъёсыз В. КАМАШЕВЛЭН. Эх, пересьмон! Пересьмон. Кулэтэм пересьмон. Ой, малы мерскиськод сокем вазь? Пумпала кайгырон но мӧзмон, Но уло пиосыз кытын ке... Наталь апаез мон пинал дырысеным тодӥсько. Будэмын гуртын. Ужаз колхозын, пудо вордонын. Усто ужамез понна Быдӟым ож кутскон азьын Москваысь ВДНХ-е но ысъязы сое. Капчизэ ноку ӧз утчалля та кышномурт, пиосмурт интые но кыткиськылӥз. Семья кылдытыны ӧз кылды Натальлы: пиосъёсты тырмостэм гульымаз ньылӥз война. Но сое эрекчась шедиз: войналэсь бронья кылемъёс вал уга. Натальлэн пиез вордскиз. Номырзэ ӧз жаля, ас ымтыр люкетсэ но висъялляз пиезлы. Анай сюлэм сыӵе уго, ачид сярысь сюлмаськон ӵемысь вунэмын луылэ. Тӥни озьы ик ортчо аръёс. Лыктэ пересьмон... - Наталь?!. Ма, неужто тон?!. Питырес ымныро, зорисесь синмо?!. - Кин-о со? - пумитам няркыт куара кылӥськиз. Гур вылысь, оло, улэп шӧез адӟи. Куке но сутэр кадь синъёс бездэмын. Монэ но куарая гинэ тодмаз. "Наталь!.." - пушкы тыриз... - Воксё уг адӟиськы ни, - кийыриен утча монэ. Мон ачим бордаз ӟыгырски ни. Осто, лы но ку. Вылаз сьӧд басма дэрем. Сьӧдэз- курмемез арен но миськытэк уз адскы ойдо, - озьы "сюлмаськем" луоз кенэз. Гур вылын кӧланниез: лошъяськем вуж дӥськут нерге. Миндэрез гинэ но ӧвӧл. Шобыр? Ой, мар веранэз! Синвуме кутэме ӧйлась ни. Корка пуш воксё аналтэмын. Сьӧд буёлэн буямын кожалод выжъёс. - Тёпак синтэм кыли ук! Эх, лулпыжет! Парсь сюдон ведраез но мырдэм поттылӥсько на пыдйыгыриен. Парсьсэс татын возё, сюдонэз-утялтонэз мон вылэ усе, - мур лулӟиз кышномурт. - Кулоно вал ни, - синвуэн гуньдылыса, мырдэм кылӥськиз куараез. - Бен сиён но кин-о дася аслыд? - сумкаысьтым саламме поттӥсько. - Тани си ай. Пыжос ма но со ваи. Варення дорысьтым... - Туннэ, зэм но, ӧй сиськы на вал. Тау, тау. Тазьы, таӵе улонэ вуэмын пересь! Пиез, кенэз, кык внучкаосыз (13-15 аресъемесь) вань вылысь! Неужто та адямиос азьпал улонзы сярысь чик уг малпало? Куке соос доры но лыктоз ук пересьмон! Кылдӥз ик пумиськыны сюлэмтэмъёсын. Кошкыса ӧй вутты на вал: Натальлэн пиез кык нылъёсыныз вуизы. Мунчозы ӧвӧл, лэся, татысь, пе, эстом. "Туннэ сиськид-а ни? Ми сиён ваимы", - ӟеч кылъёссэс, анайзы-песяйзы сярысь сюлмаськемзэс, оло, кыло, малпай, вал. Кытын, пе! Лек кылме верай ик возьыттэмъёслы. Но мынам кылъёсы соос понна борддоре кӧжыен лэзьям кадь. Бускельёссы но ӟеч дунъет ӧз сётэ таослы. Эх, пересьмон! Мар-о монэн дауртӥд тон? Кысӥзы Сьӧд сутэр синъёсы. Секыт аръёсы Воргорон ныпъетэз мон Кудмында пудъёсын Ӝуткалляй? Вань-а лыд? Вань-а лыд? - юасько, - кылӥды-а? О, уг пот кылэмды, тодӥсько! Л. Чернова. Можга ёросысь, Пазял гурт. Светлана Павлова ШУР ВЫЛТӤ УЯСА... Та пеймыт, акылес улонысь Шур вылтӥ уяса кошкысал. Кошкысал - тынэсьтыд, дыр, соку Тусбуйдэ мон ӧй ни адӟысал. Но уг луы, шурмес толалтэ Ӟӧк йӧэн шбыртэм ни уга, Со ворсам азьлане сюресме... Нош вуоз ай вылез вож тулыс - Бен, соку ик тӥни шур дурын Нош кылдоз сюлэмам выль малпан. Бен, соку уз ни лу, дыр, алдан. *** Мон ӧвӧл шудтэм, Но ӧвӧл шудо. Пӧзись шур сямен Улонэ мынам Вамыштэ азьлань. Кылдылэ ялан Трос малпан йырам. Весь мӧзме сюлэм, Ку лыктод дорам? Пыраклы сюлмысь, дыр, Тонэ ӵушоно. Чебер малпанэз, дыр, Йырысь улляно. Тон ӧвӧл мынам, Уд но лу мынам. Выжыкыл ачим Малпасько ялан. *** Кемалась тон ӧй вал ни вӧзам. Кемалась мон ӧй кыл куарадэ. Мон доры тон ыштӥд сюрестэ, Вунэтӥд вань верам кылъёстэ. Нош али выльысен ог ӝытэ Луимы асьмеос ваче син. Ӧд, ӧд вазь, - вазьыны возьдаськи. Пыраклы, дыр, тонэ мон ыштӥ. *** Шкафысьтым книгаме поттыса усьтӥсько, Тынэсьтыд лачатэм тусбуйдэ учкисько. Уг, уг пыры йырам книгаысь гожтэм чур, Матэктэ ни нош уй... Учкиськод кадь шорам, Шуныт кыл вераськод. Лыз сяська кузьмаса, Льӧль бамам чупаськод. Но... ӧвӧл Со - уйвӧт. Тон мукет нылашез келяськод. Андрей Солуянов: "Макетлэн данэз ӝутскоз" 1995 арысен Кун Думаын ужа Удмуртиысь депутат Андрей Владимирович Солуянов. Со депутатъёслэн "Российские регионы" огазеяськонзылэн тӧроезлэн воштӥсез луэ. Со дыре ик Андрей Солуянов пыриське Бюджетъя, налогъёсъя, банкъёсъя но коньдон ужпумъёсъя комитетлэн ужаз. Депутатэн факс пыр герӟаськыса, корреспондент Т. Банникова солы куд-ог юанъёсын вазиськиз. - Андрей Владимирович, "Российские регионы" огазеяськон Кун Думаын огез бадӟымез луэ. Кызьы учко отчы пырись депутатъёс коньдонэз воштон ужрад шоры? Юрттоз-а со экономикаез секыт югдурысь поттыны? - Луоз-а коньдонэз воштон? Со бадӟым ужпум. Деноминация ортчоз шуыса туннэ меӵак вераны уг луы на. Та ужрадэз мон умоен ке но лыдъясько, коньдон воштонлэн одно ик луоз урод палыз но. Куд-ог вузъёс дуноялозы вузкарисьёслэн "тыршеменызы". Со дыре ик "басьяськисьёс туннэ быгато бырйиськыны, данак вузъёс пӧлысь дунтэмзэгес утчаны. Озьы ке но, мон уг малпаськы, вань вузкарисьёс дунъёсты ӝутозы шуыса, соос пӧлын но бырымтэ на ужась адямиос сярысь сюлмаськисьёс. Ӧйтод, луоз-а меда, коньдонэз воштыса, экономикаез тупатыны. Одӥгзэ оскыса вераны луэ: манетлэн данэз ӝутскоз. Озьы гинэ луоз странаысьтымы долларез палэнтыны. Соин ик коньдон воштонлэн тырмымтэосыз луизы ке но, пайдаез золгес шӧдӥськоз. - Республикамылэн кивалтӥсьёсыз Александр Волков но Павел Вершинин туж ӵем вуыло Москвае. Мар сёто сыӵе "ветлонъёс" калыкмы понна? - Удмуртия пыре дотациос чотын возиськись улосвылъёс пӧлы. Соин ик центрен матысь кусыпъёс возьытэк, пӧртэм комитетъёсын пукытэк, арнялы-толэзьлы быдэ Москваысь кужмо кивалтӥсьёсын адӟиськылытэк, аслад республикаедлы, калыкедлы юрттыны туж секыт луоз, дыр. Таӵе учырез гинэ верало. Федеральной чиновникъёслэн таӵе сямзы вань: соос коньдон висъяло кварталлэн кутсконаз яке пумаз. Бадӟым шудэн лыдъяське чаклам коньдонэз кварталлэн кутсконаз басьтыны. Нош куд-ог республикаослэн кивалтӥсьёссы Москвае туж шер ке вуыло, со коньдонэз кварталлэн пумаз но шуген басьтод. Кин нырысь ик курадӟе? Республика, калык. Бан, тазьы гинэ республикаез уд азинты. Соин ик кивалтӥсьёсмылы бадӟымгес саклык висъяно республикамылэн пушказ ватэм луонлыкъёслы. Тазьы учконо ке, "коньдон ӧвӧл - куроно Москвалэсь" кивалтон амалэз нокызьы ӟечен лыдъяны уг яра. Та ласянь асьмелы дышетсконо Башкортостанлэсь но Татарстанлэсь. Шаймиев Москваысь коньдон туж шер курылэ, но быгатэ ужатыны ас калыксэ. - "Российские регионы" огазеяськонысь депутатъёс вуылӥзы Удмуртие. Мар со сётӥз быръем муртъёслы но республикалы? - Пайдаез вань. Нырысь ик, 15 депутатъёс асьсэ понна усьтӥзы выль республикаез, табере чебер но узыр Удмуртиез соос ноку уз вунэтэ. Тодӥсько, соослы удмурт калыклы кыӵе ке ужъёсын юрттон пумысен вазиськи ке, соос уз пумитъяське. Вуылэм депутатъёс пӧлын вал усто специалистъёс - МВД, прокуратура, ож тӥрлык поттон, тазалыкез утён удысъёсын ужасьёс. Ваньмызлы вазиськемын вал меӵак куронъёсын. Соос пӧлысь тросэз быдэстэмын ни. Кылсярысь, 100-лэсь уно ватсанъёс пыртэмыны Уголовной кодексэ. Юрттэт сётэмын луоз П. И. Чайковскийлэн юртэзлы- музейлы. Лыдэ басьтэмын Глазовысь городлэн Думаысьтыз депутатъёслэн куронъёссы но. - Тӥ - Удмуртиысь депутат. Калыклэн сыӵе бадӟым осконэз юрттэ-а тӥледлы Россилэн парламентаз ужаны? - Сыӵе бадӟым осконэз мон одӥг секундлы но уг вунэтӥськы. Со ик мыным ужаны, ужаны, ужаны кужым сётэ. - "Российские регионы" огазеяськон нокыӵе партиосын, фракциосын герӟаськемын ӧвӧл. Капчиен-а сётске сыӵе эрик? - Нырысь туж секыт вал. Огазеяськонмес тыршылӥзы пӧртэм фракциослэн ужъёсазы кыскылыны. Али но сыӵе учыръёс луыло на. Но табере депутатъёсмы йыг-йыггес сыло ни. Но со дыре ик вераны кулэ. Думаын кыӵе ке решениос кутыку, партиослы дурбасьтӥсьёслэн кужымзы, ми сярысь, золгес.Россия Федерацилэн Налогъёсъя кодексаз Андрей Солуянов кылем арня ӵоже 20 пала ватсан пыртӥз, кудъёсыз герӟаськемын Ӧлексыослэн обществозылэн Удмуртиысь ёзэзлэн куронъёсыныз но. 1998 арлэн бюджетэз бордын ужаку, со озьы ик кулэ ӵектонъёсын потӥз таможнялэсь ужъёссэ умойгес радъян пумысен. Кун Думалэсь ужан радлыксэ тупатонъя (регламентъя, комиссилэн ужаз пыриськыса, Пандрей Владимирович депутатъёс азе ӵапак выль проектэн потӥз. Асьме депутатэн матысь кусыпъёс возьыса, Удмурт Республикаысь Югдурез утёнъя министерство уголовно-процессуальной кодексэ 120 пала ватсанъёс ӵектӥз. Соос бордын али ужа Россилэн парламентысьтыз депутат Андрей Владимирович Солуянов. КУАЗЬ Кызьы ивортӥзы шаерысьтымы куазез чакласьёс, туннэ но ӵуказе шундыё шуныт луоз. Уин интыен- интыен пужмертоз, 0-4 градус шуныт луоз, нуназе - 12-160. Куд-ог интыосын зор-кот усёз. Тӧл вошъяськоз, секундскын 8-10 метре пельтоз. Мыжык ваньзэ интыя Германиысь Берзенбрюк городысь 55 аресъем вузкарись реанимация шедиз, ӟуч ужбергатисен (нимыз ӧвӧл шараямын) кусып возёнъёс сярысь вераськемзы бере. Та городлэн ульчаостӥз калтыртыкузы Россиысь 39 аресъем бизнесмен немецлэн йыраз боды выллем корт арбериен шӧдтэк шорысь шуккем. Табере "ужбергатись" полицилэсь пега. ИТАР-ТАСС. Чубайс: Россилэн Чечняез аслам шуэмез уг луы. Чечняен ожмаськемез бере, Россилэн сое аслам шуэмез уг луы, - лыдъя Игорь Чубайс - публицист, Россиысь нырысетӥ вице-премьерлэн братэз. Москваысь властьёс Чечняез Федерацилэн субъектэныз яло ке но, чеченъёс талы вань кужмысьтызы пумитъяськозы И. Чубайс Ичкериез Россилэсь ӵуказе ик люкыны уг дэмла. "Та ужрад 3-4 ар кыстиськоз", - малпа со. Интерпол амнистилы пуми Интерполлэн Россиысь бюрояз ужась Евгений Малышенко малпанъя, Кун Думаысь депутатъёсын ӵектэм экономической амнистия юрттоз йыружъёсын поттэм но собере кунгож сьӧрысь банк ъёсы понэм коньдонэз Россиын кыкетӥзэ "бергатыны". Е. Малышенко ивортӥз: "Россия мукет кунъёсын гожтысал кке йыружъёсын поттэм но кунсьӧры келям табышез утчан но ӝегатон сярысь одӥг ке но огкыл, уксё государстволы берыктэмын луысал ини". Донецкын анай луыны дасяськись нылкышноослэн хорзы кылдӥз. Соос дан сьӧры уг уисько, асьсэлы кенешемъя гинэ кырӟало. Куамын нылкышноосын кивалтэ азьвыл музыкант но ньыль пиналъёсын атайзы Семён Иванченко. Кырасьёс оско - пичильток анаез пушкын ик крезь гурез вала ини. Крезьгур юрттэ будыны, лякыт сямъёс пыӵатыны, инкуазен куазьмам быгатонлыкъёсты азинтыны. "АРГУМЕНТЫ И ФАКТЫ - НОВОСТИ". Удмурт радиолы - 65 УДМУРТЪЁСТЫ ГЕРӞАСЬ Удмурт радиое лыктӥ 1976-тӥ арын, сентябрь толэзе. Гуртысь кошкыса, уж утчаны кутски Ижевскын. "Советской Удмуртия" газетэ пыри, пумиськи Семен Васильевич Шкляевен. Чылкак тодмотэм адями мон сярысь сюлмаськыны ӧдъяз. Вай ай мон Удмурт радиое, пе, жингыртыса утчало. Шедьтӥз Л. П. Емельяновез. Леонид Петрович верам: милемлы берыктӥсь кулэ. Тӥни озьы монэ кутӥзы. Удмурт радио. Мар со мон понна? Нырысь ик, татчы вуыса, кыӵе ке празднике шеди кадь. Сыӵе каньыл мылкыдо адямиосын пумиськи. Син азям пуктӥсько, кыӵе дӥсен вал котькудӥз, нырысьсэ адӟыкум. Тани Галина Николаевна - валтӥсь редактор - сьӧд-сьӧд йырсиё вал ай. Но Леонид Петровичлэн кабинетаз пукыкумы, оскытэкгес кадь учкиз шорам. Берло аръёсы татын трос воштӥськонъёс ортчизы. Кужмо ужасьёс лыктӥзы. Виктор Ивашкин, Василий Андреев вуизы. Али ке но тодӥсько на: Ваня Аркашев нырысьсэ дӥсьтытэкгес, сопала-тапала утчаськыса пыриз летучкае. Огезлэсь огез синмаськымон, ӟеч мылкыдо адямиос соос. Азинсконъёс сярысь верано ке, ас поннам паймисько куддыр. Басьтом крезьгуръя редакциез. Тодам ваисько отын ужам Борис Бакулевез, петр Юриновез. Радиоверанъёсты чеберман вылысь, нылпи кырӟанъёс чик ӧй вал соку: чиньыен гинэ лыдъямон. Р. С. Куликова, редакцие лыктэмез бере, ас котыраз люканы кутскиз крезьгур гожъясьёсты, кылбурасьёсты. Нырысь ортчытӥз удмурт кырӟанлы сӥзем элькун ӵошатскон. Со ӝутскон сыӵе ӟеч, юн вал. Собере радиое вуиз Рита Поздеева. Революция луиз кадь татын. Со лыктэм бере, гожъяськон манер воштӥськиз. Аслам удысэ сярысь верано ке, берыктӥсьлэн ужез шоры учкись ик ӧй вал кадь. Но огпол О. К. Шибановлэн косэмезъя ортчытэмын вал юан-веран. Ӧй но малпа "Россиысь но мукет кунъёсысь иворъёс" куинь тужгес кылзоно веранъёс пӧлы пырозы шуыса. "Оло, янгышазы та калыкъёс", - малпай ачим. Нош ик ортчытӥзы юалляськон. Йылпумъянъёсъя та иворъёс выльысь кыкетӥ инты басьтӥзы: кылзо вылэм. Али мукет радиоверанъёс лэсьтон бордын но ужасько: "Тангыраез" нуисько, пӧртэм сямъёс сярысь мадисько. Кытчы гинэ уг мынӥськы - тӥ-а Плотникова шуыса паймытско. Уно адямиос, дӥсьтӥсьёсызгес удмуртъёс, дорам адӟиськыны пырало. Ачим но уг валаськы, малы озьы луиз. Камтупал удмуртъёс сярысь радиоверанъёс ӧй вал. Соин-а, мар-а асьсэ доры ӧтчало. Нош мон возьдаськеменым, пумит луисько. Куддыр висем улэ но аналскисько. Удмурт радиолэн дуныз со бордын: пӧртэм палан улӥсь удмуртъёсты герӟа. Соиз понна туж-туж шумпотоно. Унозэ радиоверанъёсты пор но бигер шаеръёсы ыстылӥсько. Отысь удмуртъёс соосты туж возьмало, кылзо. Нош мон шумпотӥсько: та уже мынам но пичи ке но кужыме понэмын. Евгения Плотникова, журналист. Трамвай эшъяськыны юрттэ Берло дыре Удмуртия но Чехия эшлыко кусыпъёссэс юнматӥзы. Ортчем арня вискын Ижевскын ортчиз Чехиысь трамвайлы но сое лэсьтӥсьёслы сӥзем пумиськон. Выль трамвайёс электрокужымез шыръяло но калык понна ичигес кышкытлык ваё. Та пумиськонын Ижевск городлэн мэрез А. Салтыков но Чешской Республикалэн Россия Федерациын посолэз Л. Добровски ог-огзылы ас малпанъёссэс шара веразы, дэмланъёс сётӥзы но азьланяз эшлыко кусыпъёсты юнматон сярысь кенешизы. Шумпотымон соиз но, Ижевсклэн ульчаостӥз ширтӥсь выль трамвайёслэн лыдзы эшшо дас витьлы йылоз на. В. АНДРЕЕВА. ӦД КЕ КУЛЫ - УЛОД Операция "ӧд ке кулы - улод" нимаське вал, дыр, - Балтийской батальонысь контрактъя службаез ортчись 22 солдатъёсты косӥзы Сурр-Пакри шормуӵ но Палдиски город вискысь пролив вамен потыны. Гужем отӥ пыдын потыны луэ, 200 метрзэ гинэ уяно. Нош сӥзьыл, куке тӧл шукыръяське, вулэн температураез 12 градус гинэ, та сюрес шулдыръяськонлы уг кельшы. Соос потӥзы - секыт ?, вань пыӵал тӥрлыкен. Нош ву литр но ӝынылы йылэм. Одӥг километр ортчем беразы, пиос валазы: сопал ярдуре но вуыны, берлань шормуӵе но берытскыны ӧз ни ворме. Кыксэ, самой кужмооссэ, ыстӥзы юрттэт курыны - соосты нокин ӧз адӟылы ни. Собере кесяськыны ӧдъязы. Соосты курксе портын кылӥллям. Дассэ солдатъёсты ярдуре поттӥллям. Кыкез понна юрттэт беромыса вуиз - огез выиз, мукетыз ярдурын ини кынмыса кулӥз. Быдэс уй шормуӵ вадьсын бергазы Эстониысь но Финляндиысь вертолётъёс, ӵукна солдатъёс ышем эшъёссэс утчазы. Нокинэ ӧз шедьтэ - ярдуре вещьмешокъёс гинэ кылизы. Табере шонерак вераны луоз ини, дас кыкез ожгарчиос егит дуннеен люкиськизы шуыса. Эстониысь полиция уголовной уж ӝутӥз: взводлэн командирез (кудӥз улэп кылиз) нодтэм приказ сётэмен егит пиос быризы. Газетъёс ивортэмъя. ВАЗИСЬКОН Милям заводамы ужасьёслы тодмо Эстониын луэм учыр. Вакчияк верано ке, ужпум тазьы вал. Вить ар талэсь азьло завод Финляндие лэзиз уно ИЖ-70 пистолет Таллинысь таможня грузэз ӝегатӥз. Туннэ заводлэн коньдонэз но, вузэз но ӧвӧл. Вераськон мынэ 5,5 миллиард манет сярысь. Со ичи ӧвӧл - заводын тыршисьёслэн толэзь ӵоже ужаса поттэм коньдонзы. Кивалтӥсьёсмы трос пол турттӥзы кызьы ке но потыны таӵе секыт югдурысь. Нош азьпалан шунды уг пишты кадь. Соин ик та уж борды басьтӥськиз Кун Думаысь милям депутатмы А. В. Солуянов. Секыт югдурен рос-прос тодматскыса, Ижысь механической заводысь вань ужасьёслэн нимынызы со вазиськоно кариськиз Россия федерацилэн Президентэзлы Б. Н. Ельцинлы, Россия Федерацилэн Правительствоезлэн Тӧроезлы В. С. Черномырдинлы, Россия Федерациысь кунсьӧр ужъёсъя министрлы Е. М. Примаковлы, Эстонилэн Президентэзлы Леннарт Мерилы, Эстониысь Правительстволэн Тӧроезлы Март Сийманнлы. Ми куриськом: "Удмурт Кенеш" огазеяськон Дуннеысь удмуртъёслэн ӧтчамазы мед потоз вылэм Эстон республикалэн Правительствоезлы, интеллигенцилы, егитъёслы та ужпумез выльысь чакланы курыса вазиськонэн. Заводамы 3901 удмуртъёс. Секыт югдур кылдэмен, семьяосмы ёрмыса уло. Берыктыны быгатысалзы ке ужаса поттэм коньдонмес, заводлы капчигес луысал пунэм тыронзэ но быдтыны. Та вазиськон заводысь газетэ печатламын вал, со улэ гожтӥськонъёсты бичан али мынэ. Вазиськонмес ми ыстӥськом на вань удмурт огазеяськонъёсы, вань удмурт газетъёсы. Оскиськом, милемын огъя луозы удмурт егитъёс но, удмурт интеллигенция но. Ижысь механической завод кун предприятиысь удмурт ужасьёс. Россия Федерациысь Кун Думалэн депутатэз А. В. Солуянов. Нуналлэн тодметэз Вашкала календарья туннэ пусъё Софьялэсь, Вералэсь, Надеждалэсь, Любовьлэсь вордскемзэс. Святой мученицаосын ӵош асьсэлэн тазалыксы понна вӧсясько вань нылъёс но нылкышноос. Ӵуказе - 1 октябрь, Ариналэн праздникез, туриослэн кошконзы. Чаклалэ: та нуналозь тури уллёос лымшор пала кошкыса вуизы ке - Покровлы нырысетӥ кезьытъёсты возьма, ӧз ке кошке - 2 ноябрёзь шуныт луоз на. Нюлэскын но нюлэс кушъёсын горд-горд кисьмамын легезьпу мульы. Бича толлы - вань висёнъёсты вормод. Нуналмы пичиен-пичиен кулэсме. Туннэ со кыстӥськоз 11 час 38 минут, ӵуказе - 5 минутлы вакчигес. Инмын выль толэзь кузёяське. Та нуналэ... ар талэсь азьло 30 сентябрэ832 арын, 65 ар талэсь азьло, Ижевскын ужаны кутскиз нырысетӥез водопровод, сое лэсьтон мытэмын вал 1929 арын. 30 сентябре 1972 арын, 25 ар талэсь азьло, ортчиз советской калыклэн революционной, боевой но трудовой сюресъёсызъя Всесоюзной походэ пыриськисьёслэн И республиканской слётсы. 1 октябре вордскемез дырысен 70 арес тырме А. Г. Татаринцевлы (1927), литературоведлы, фольклористлы, Удмуртиысь наука удысысь дано ужасьлы. 1 октябре вордскемез дырысен 60 арес тырме Л. Т. Крекнинлы, технической наукаосъя докторлы, профессорлы. 30 сентябре 1941 арын кутскиз Москва понна ожмаськон. Со кыстӥськиз 200 нунал - 1942 арын 20 апрелёзь. СССР-лэсь столицазэ басьтонэз Гитлер нимаз "Тайфун" шуыса. Та ожъёсын Калининской фронтлэн радъёсаз ожмаськизы Удмуртиын кылдэм 357-тӥ, 49-тӥ стрелковой дивизиос. 1 октябре 1941 арын лек ожъёс бере фашистъёс улэ кельтэмын вал Карелилэн столицаез - Петрозаводск. 1 октябре 1949 арын кылдӥз Китайской Народной Республика. ЛЫДӞИСЬЁСЛЫ ВАЗИСЬКОН "Удмурт дунне" учке азьлане Вуоно ар - "Удмурт дунне" понна дано ар. 31-тӥ октябре тужгес вашкала шуоно удмурт газетлы тырме 80 ар. Кӧня ке выжы удмуртъёс будӥзы, улӥзы но пересьмизы "Гудыриен" - "Удмурт коммунаен" - "Советской Удмуртиен" - "Удмурт дуннеен" ӵош. Адямиос мӧйымизы, нош газетмы весь вамышъяны турттэ туала улонлэн ӧраз. Бен-бен - турттэ. Нош пӧрме-а, уг-а, тазэ вераны быгатэ валтӥсь судья гинэ. Со - лыдӟись. Милесьтым газетмес ог дасо сюрс мурт басьтэ ке, ог 40 сюрсэз нуналмысь лыдӟе, дыр. Дунне вылысь 700 сюрс пала удмуртъёс понна со туж ичи. Кытчы пырод? Казахстанысь но Сибирьысь ыштэм эшъёсмес вератэк ни, берло аръёс соос чутрак кулэсмизы Татариын но Башкириын. Мугез тодмо: макем кузьгес сюресэд, сокем дуногес газетэд. Вылаз ик, 90-тӥ аръёсы тужгес секыт учыре сюриз гурт, нош отын ук милям ваньмыз сямен лыдӟисьёсмы. Ёрмон озьы ик кекатэ наука, культура но искусство удысъёсысь юлтошъёсмес. Газет басьтӥсьёс сокем трос ӧвӧл ке но, соос уло пӧртэм интыосын, пӧртэм сямен, пӧртэм малпанъёсын. Огез коммунизмлы весь дурбасьтэ, мукетыз демократилэсь но ӟеч тодметъёссэ синйылтэ ни. Тӥни малы редакция возьматыны тырше тросгес пӧртэм адямиослэсь сюлэм висёнъёссэс. Редакциын ужасьёс алигес ог-огзылы ивортӥзы вуоно арын кыӵе ужпумъёсты возьматыны мылкыд каремзэс. Трос умоесь ӵектонъёссы вань. Кенешеммы бере вуим таӵе малпанэ. Ӟеч дэмланъёсты кайтаозь ватыса возёно ӧвӧл, луэмезъя туэ ик шараяно. Мукет сямен вераса, 1998-тӥ арын "Удмурт дуннелэн" борддоръёсыз но липетэз чиль-дол мед ворекъялозы шуыса, али ик кисьтоно ӟеч инъет (фундамент). Тӥни малы редакция чаклаз вуоно дыре печатлано материалъёсын туннэ тодматыны. Валамон ни, ваньмыз ик азьло ялэм ужпумъёс газет баме уз вуэ. Улон весь азьлань мынэмъя, котькуд журналистлэн малпанъёсыз вошъясько. Туннэ туж лэчыт сылӥсь ужпум, кылсярысь, пенсиосты ӝегатон, ӵуказеяз тупатске, со понна гуртлы юрттон нуналысь нуналэ уродме. Лыдӟисьёс азьын сюлэммес усьтоно кариським мукет муген но. Тӥ, эшъёс, пусйиськоды милям чуръёсысьтымы ӟечсэ но уродзэ. Тӥ кытӥяз берпуметӥ манетъёстэс нуиськоды почтае - газетмылы гожтӥськыны. Тӥ куддыръя берло копейкаосыныды конверт басьтӥськоды но ас малпанъёстэс гожтыса редакцие ыстӥськоды. Озьыен, тӥ ик быгатӥськоды кулэ дыръя кылмес юаны, янгышакумы шонертыны, курадӟыкумы юрттыны. х х х Котьку сямен ик, газетысь нырысетӥ но кыкетӥ бамъёс сӥземын луозы экономикаысь ужпумъёслы. Асьмеос ваньмы герӟаськемын соосын. Ку пыд йылаз султоз "Ижмаш"? Кызьы быдэсъясько му вӧй (нефть) поттонъя но гурт хозяйствоез азинтонъя программаос? Мар люкетэ кыдёкысь гуртын улон юрт ӝутыны? Кызьы кылдэ республикалэн бюджетэз, кызьы отысь коньдон мынэ нимаз городъёслы, районъёслы, дышетӥсьёслы, эмъясьёслы но мукетъёсызлы? Мар со сыӵе бюджетэ пырисьтэм фонд но кытчы кутӥське? Та выллем юанъёслы "Удмурт дунне" нуналмысь валэктоз. Кизнер ёросысь лыдӟисьёсмы ӝожтӥсько: "Удмурт дунне" шергес возьматъя кун властьлэн ёзъёсызлэсь ужамзэс. Вылаз ик, отын уг адӟо на удмурт телепередачаосты. Тае лыдэ басьтыса чакламын рос-прос мадьыны законъёсты кылдытон ужез. Кызьы лэсьтӥське проект, кытын со эскериське но юнматӥське - ваньтмыз, кызьы шуо, "югдытэмын" луоз. Берло дыре ӵемгес адскыло тае кылъёс - государственной служащий - кун ужась. Улонмылэн уродмемез понна соосты асьмеос нырысь ик янгыше уськытӥськом. Газет вералоз кун ужасьлэн статусэз, данэз, сямыз сярысь. Туала гуртэз гондыр куш шуыны ым уг пыры. Нянь будэтэм но пудо вордэм сяна, отын муш утялто, пӧйшур но чорыг вордо, выль кидыс уськыто, емышо сад тэлеӟыто, пудоез эмъянын туала амалъёс утчало. Нуналмысь улон одно адскыны кулэ нуналмысь потӥсь газетамы. Удмурт газетлэн аспӧртэм сямыз вань. Россиысь бадӟымесь удысъёсты со котьку сямен герӟа огшоры адямиен. Огъя ваньбурез нимаз кузёослы вузан (приватизация) троссэ пӧрмытӥз алдам вкладчикъёслы. МММ но Хопёр-инвест выллемъёс куашказы, ПИК-инвест кадьёс чиптэм-чаптэм ышизы, "Альтернатива" шуонъёс мырдэм-мырдэм векало. Удмуртъёсын герӟаськем фондъёсын югдурез газетмы весь возёз син азяз. Берло толэзьёсы пелямы кылӥсько выль кылъёс: секвестр (бюджетэз пичиятон), деноминация (коньдонысь нульёсты ӵушылон), коммунальной хозяйствоез выльдон. Котькызьы учкы, вылӥ кивалтӥсьёслэсь калык сярысь сюлмаськыса вераськемзэс котькӧня кылзы, нош шунды пуксён палась пельтӥсь котькыӵе "тӧл" огшоры адямиез шуге-леке вуттэ. Валамон ини: адӟонлэсь уд пегӟы. Озьы ке но, луэмезъя тыршоно меӵ тулкымъёсты вандыны но сыӵе шуккетъёсты лябӟытыны. Татын тӥляд эшты луоз "Удмурт дунне". Мукет газетъёсын берло дыре копак ышиз очерк - зэмос адями сярысь веран. Ушъяно муртъёс быриллям шат? Азьло мотозаводэн, али "Аксион" огазеяськонэн усто кивалтэ Китайын вордскем удмурт воргорон Геннадий Кудрявцев. Кизнер ёросын (районын) администрацилы йыр каризы техника наукаосъя докторез Владимир Алексеевез. Данак фирмаосын быгатыса тыршо амало нылкышноос- ужбергатӥсьёс (предпринимательёс) но азьло комсомолын кыдамъёс. Тужгес лэчыт пероосмы дасясько сыӵеос сярысь гожъяны. Политикаез но возьматытэк уг луы. Демократия шуон азинскыку, республикаямы кылдӥзы тачак партиос но движениос. Ог люкетэз чалмизы. Ма каро, кылсярысь, удмуртъёсын герӟаськем аграрно- демократичяеской партия, "Дэмен" огазеяськон, вань на-а удмурт калык партия? Секыт-а ныпъетэз "Удмурт кенеш" огазеяськонлэн? Кызьы шокало коммунистъёс, "Удмуртия" блоке огазеяськемъёс, бигеръёслэн центрзы но мукетъёс? Сак учкелэ газетмес! Асьме республикаын калыклэсь мылкыдзэ эскерон службаос вань, нош куаразы лябгес кылӥське на. Редакциысь политикая но экономикая отдел чакла валтӥсь кивалтӥсьёслэсь адямиос пӧлын данзэс (рейтингзэс) дырын-дырын шара ивортылыны. х х х Азьло аръёсы иворъёсъя отделэз малы ке пыртылӥзы чыры-пырыен вырисьёс пӧлы. Ужасьёс но сыӵеоссэгес висъяллязы - ежъёссэ, курдасьёссэ, тэтэ карисьёссэ. Али иворъёслэн дунзы чутрак будэмын (гонорар шуон ласянь ӧвӧл - дан ласянь). Шонер верамын: кин кузёяське иворен, со кузёяське ваньмыныз. Лыдӟисьёс шӧдытэк ӧз кыле: нырысетӥ бамын печатласьком нуналлэсь тодметсэ, тужгес дано учыръёсты, вылӥ кивалтон ёзъёсысь иворъёсты. Ньылетӥ баме кылё, журналистъёс верамъя, сюлэмез шумпоттӥсь яке бичатӥсь учыръёс. "Сюлэмъёсты бичатонмес" азьланяз но ум вунэтэ. Сэрттом-пертчом таӵе кусыпез: егит пи - военкомат - армия. Ватонэз ӧвӧл ук: солдат дӥсез ӟырдыт мылкыдын дӥсясьёс но ӵемысь сӥялско, армиез карганы ӧдъяло. Мар веранэз на службаен кышкатыса будэтэм пиёкъёс сярысь? Палэнэ уз кыльы правоез утён. Маин выро прокуратураос но отысь следовательёс? Кызьы ужало Вылӥ суд но музон судъёс? Малы соиз яке таиз адями интыяське отысь ӟус вылэ? Тазэ ик ужпумез чаклалом музон ласянь. Мар малпа пытсэт сьӧрын пукись? Жаля-а йыртэмамез понна, яке карга-а быдэс дуннеез? Колониосын али кивалтэ Югдурез утёнъя министерство. Чакламын соосты сётыны Юстицияя министерстволы. Воштӥськоз-а таин валче югдур? Бышкись ез кенер сьӧрын егитъёсты азьвыл дышетӥзы кескичгес амалэн йыртэманы, пытьыосты сураны но кыл кутонлэсь мозмыны. Нош табере колониос сьӧлыкам муртлы, оло, тупатскыны юрттозы? Валэктон утчалэ "Удмурт дуннеысь". Пичи Пурга ёросысь Вуж Монья школаын дышетӥсь Виктор Тарасов редакцилы вераз аслэсьтыз малпанзэ. Газетты, пе, берло дыре спортлэсь палэнскиз. Таӵе верамлэн ог люкетэз шонер. Гуртысь спортсменъёслэсь тол но гужем шудонъёссэс туж паськыт возьматӥськом. Музон ӵошатсконъёс палэнэ кылё. Чик ум "суредаське" тренеръёслэсь но судьяослэсь ужзэс, администрациосысь спортъя комитетъёслэсь но отделъёслэсь маин выремзэс. Вуныло футбол, хоккей, шахмат но музон шудонъёс. Югдурез тупатон вылысь, редакция пусъе куд-ог ужрадъёс. Нырысетӥез таӵе: огзэ корреспондентэз мукет ужпумъёсын ӵош меӵак косоно физкультураез но спортэз син азяз возьыны. Сыӵе амал пайда сётоз шуыса, осконмы вань. х х х Удмурт газетын котьку но бадӟым инты басьто культураысь ужпумъёс. Шудон-серектонъёсты возьматыкумы, куддыръя сьӧраз но ортчиськом кадь. Лыдӟисьёсмы маскаръяськыло: гуртэз, пе, макем юнгес кекато, отысь калык сокем тросгес эктэ-кырӟа кадь. Огез валамон: культура отдел шулдыръяськонэн гинэ уг выры. Туэ, кылсярысь, луэмезъя возьматыны вырим вӧсьёсты но, творчествоен вырись союзъёсты но, литературая кружокъёсты но. Кайта ушъяны малпаськом азьмынӥсь амалэ выжем учреждениосты. Республикаямы вань ни клуб- библиотекаос, клуб-мастерскойёс, творчествоя юртъёс, Ижын - удмурт школа-лицей. Удмурт университетын удмурт дышетӥсьёсты дасян, городъёсын, Татариын, Башкириын, Мари республикаын удмурт кыллы дышетон, егит педагогъёслы улон инты висъян - отделлэн сюлмаськонэз. Тӥ понна, клубын ужасьёс, "Удмурт дунне" нимысьтыз печатлалоз пӧртэм ужрадъёсты радъянъя сценарийёс. Тӥледлы, учкисьёс, ивортылом Удмурт драмая театрлэн но музон коллективъёслэн маин шокамзы сярысь. Тӥледды, лыдӟисьёс, тодматылом книгаосын, соосты гожъясьёсын, печатласьёсын но вузасьёсын. Выль кырӟанъёслэн кылъёссы но нотаен гожъям гуръёссы, азьло музэн ик, тӥ доры нырысь ик вуозы "Удмурт дунне" пыр. 1998-тӥ арын вордскем нуналъёссэс пусъёзы редакциямы кема ужамъёс Василий Михайлов, Михаил Перевозчиков, Семен Шкляев, Евгений Афонин, Кирилл Ломагин, улэпесь ке луысалзы, пусйыны быгатысалзы пересь Шамардан (Усков), Николай Белоногов, Николай Васильев, Макар Волков, Александр Вотяков, Георгий Петухов. Мылкыдмы вань тӥледды тодматыны соослэн улэм-вылэменызы но чуръёсынызы. Отделын вань удмуртлыкез ӝутон сярысь тужгес юн сюлмаськись муртъёслэн списоксы. Со уката кузёмоз, вылды, ноябре вань удмуртъёслэн ӧтчамзы люкаськылэм бере. Корреспондентъёсмы саесъёссэс пужалляса ик дасясько сыӵеос сярысь очеркъёс пӧраны. Писатель доры куное Азьвылгес ивортылэмын вал ини, шаерысьтымы калык писатель Генрих Перевощиков вордскемез дырысен 60 ар тырмон нуналзэ пусйыны дасяське шуыса. Табере тани тодады вайытӥськом: тодмо прозаиклэн сӥё-дано бадӟым ужрадэз кутскоз туннэ 18 часын ӝытазе Удмурт кун национальной театрын. Генрих Перевощиковез ӟечкыласьёс пӧлын луозы Удмурт Элькунмылэн но Иж карлэн кивалтӥсьёсыз, юбилярлэн вордскем палъёсысьтыз дуно куноос, писательёс, кылбурчиос, тодосчиос, ӵош ужам но ужась эшъёсыз, огшоры лыдӟисьёс. Удмурт литератураез яратӥсьёс трос книгаослэн авторзылэсь творчествозэ гажасьёс та ӝытын одӥгез но мурт адямиос уз луэ. Сӥё-дано ӝытэз шулдыртозы тодмо артистъёс Геннадий Ганьков, Валентина Загуляева, Фаина Будина но мукетъёс. Та бадӟым ужрадэ лыктэмъёс юбилярлэн кинюртэменыз (автографеныз) книгаос басьтыны но "Кенеш" журналлы гожтӥськыны быгатозы. П. ВИШУРОВ. Аслаз "ӝутэм выльвылэз" Удмуртиысь калык писательлы Генрих Перевощиковлы - 60 арес Писателез кузь сюрес ортчемезъя уг дунъяло - нырысь ик учко, мар со лэсьтӥз ас вордэм калыкез, литератураез понна. Генрих Перевощиковез мӧйы уд шуы - аресызъя но, сэзь выросэзъя но, нош мамында лэсьтэмезъя сое пуктыны луоз ни литературамылэсь "выльвылзэ" ӝутӥсь бадӟым писательёс радэ. Тодам лыктэ дас ар талэсь азьло "Ижмаш" дворецын ортчем ӝыт. Залын калык тыраз. Сцена вылын ӧвӧл президиум но, пумтэм тубись-вераськисьёс но. Вераське ачиз писатель, республикамылэн кун премиезлэн лауреатэз Генрих Ксенофонтович Перевощиков. Вераське литература но улон, писательлэн выльдӥськон ӧрын интыез сярысь. Вераське ӟырдыт, актёр сямен, но чеберъяськытэк - сюлэмыз пӧсекъяса, улон пӧськыосын-яраосын вӧсь луыса. Таӵе юбилейной ӝытэз мон нырысьсэ адӟи. Писатель понна кулэ ӧй вал, мар сярысь вералозы, кызьы данъялозы-ӝутозы - солэн потӥз калыкен синмысь синме вераськемез, мылкыдзэ шарак, номыре ватытэк кисьтэмез. Улонын но со сыӵе ик: пырак синме учкись, шараясь, ассэ вылтӥясьтэм, но дунзэ тодӥсь, ненег сюлэмо, но чурыт "сьӧмо" (вылласянь юн), мур малпаськись, шар-шар серекъясь... Син азям пуксе солэн студент дырыз. Генрих дышетскиз Удмурт пединститутысь историко - литературной факультетын, группазылэн старостаез вал. Котьку ӝикыт, тӧдьы дэремен но галстукен, сьӧд костюмен, эшъёсыз пӧлын висъяське нодлыко-чылкыт луэменыз, котьку дась юанъёслы валэктыны, трос лыдӟиське, Д. А. Яшинлэн литературно-творческой кружоказ ветлэ... Оло, со луысал дышетӥсь, но берпум курсаз дышетскыкуз дэмлазы радиокомитетын удмурт кылэ берыктӥсь луыса ужаны. Тыршиз, уйёссэ ӧз изьылы, созэ но, тазэ но вуттылӥз. Дышетсконзэ быдтон араз ик потӥз Генрих Перевощиковлэн веросъёсын нырысетӥ книгаез - "Тӧдьы гырлы" (1960). Ӟеч кыл, дунъет сое бурдъяз азьпалан но гожъяськыны, но армие басьтэменызы улон ӧрыз воштӥськиз. Артиллерийской полкын сое соку ик синйылтӥзы, батареялы комсорге бырйизы. Ӝоген со кылдытӥз драмкружок, пуктӥзы Б. Горбатовлэсь "Юность отцов" драмазэ, А. Софроновлэсь "Стряпуха" комедизэ. Тупыттэм шудӥз ачиз пуктӥсез но. Сержант Г. Перевощиков быръемын вал ВЛКСМ-лэн ХИВ съездэзлы делегатэ... Вань тодэмез-адӟемез солы юрттӥз кышкасьтэм, сэзь адямиос, геройёс сярысь книгаос гожтыны. Егитъёслы радиостанциын ужакуз, Генрих Перевощиков ӵем поталляз командировкаосы, пумиськылӥз пӧртэм тунсыко адямиосын. "Огаз сыӵе нуналэ, ку адямиос пусъё Вормон праздникез,- гожъяз "Шур кутске ошмесысен" очерказ журналист Юрий Кедров,- Ижевскысь пинал техникъёслэн станциязы устоосыз пионер дружинаос ӟечкылазы дуно кунооссэс - Советской Союзлэсь Геройёссэ - асьме землякъёсмес. Соос пӧлын вал дано лётчик Василий Афанасьевич Меркушев. Со нуналэ ик ми Генрих Перевощиковен тодматским та кышканэз тодӥсьтэм адямиен..". Нырысь эфире потӥз солы сӥзем радиоповесть, собере егит журналистъёс Героен ӟечгес тодматскыса гожтӥзы "Омырын Меркушев" (1968) книга (кык ар ортчыса потӥз ӟуч кылын). Та бӧрсьы кылдӥз Г. Перевощиковлэн граждан ожысь геройёс сярысь "Кыдазы егитъёс" (1970) книгаез. Эшшо вить ар ортчыса - "Куашетӥз сильтӧл", таиз очеркъёсын книгаез эшшо но юнматӥз солэсь Удмуртиысь комсомоллэн премиезлэн лауреатэз нимзэ. Книгаысь книгае егит писатель муромытӥз мадён ӧрзэ, быгатысагес эскериз гожтоно адямиоссэ пуш ласянь. Озьы со ассэ пумен-пумен дасяз бадӟым произведение - тетралогия кылдытыны. 1976-тӥ арын Генрих Перевощиков Флор Васильев ӧтемъя кутске Писательёслэн союзазы литконсультантын ужаны. Татын со, ужан радэз туж чаклась мурт, ваньзэ ас интыяз пуктыны быгатӥз, гожъяны кутскисьёслэсь рукописьёссэс пыр-поч эскерылӥз, кенешъёс люканы юрттылӥз. Ф. Васильевен ӵош соос нырысьсэ Волга но Урал куспысь поэтъёслэсь совещанизэс асьме дорын ортчытӥзы. Озьы ик 1978-тӥ арын июне Удмуртиын нырысьсэ вал Советской литературалы сӥзем нуналъёс. 1979-тӥ арын феврале (Ф. Васильев улэп ӧй вал ни, Писательёслэн огазеяськонэнызы кивалтон Г. Перевощиковлы выжиз) РСФСР-ысь Писательёслэн союззылэн прозая кенешонэз Ижевскын ортчытэмын вал. Асьме прозаикъёслэсь творчествозэс эскеризы С. Залыгин, В. Личутин, А. Блинов, М. Чернолусский, Я. Мустафин, Н. Почивалин, В. Потанин но мукетъёсыз. 1977-тӥ арын (соку ай СССР-ысь) Писательёслэн огазеяськоназы пыремез дырысен Генрих Перевощиков уно пол пыриськылӥз странаысьтымы писательёслэн бадӟымесь ӧтчамъёсазы. 1979-тӥ- 1984-тӥ аръёсы со вал РСФСР-ысь Писательёслэн союззылэн правлениезлэн членэз. Ачиз верамъя, Г. Перевощиков кызь ар пала ужа "Йыбыртты музъемлы" тетралогиез бордын (соин валче 1981-тӥ арын кошке творческой уже). Музъем ужась вылӥ дунъя та произведенизэ. 1983-тӥ арын писательлы сётӥське Селта районысь Ленин нимо колхозлэн премиез. Бӧрсьысь бӧрсе потылӥзы ньыль книгаос. (Вераны гинэ капчи, нош кӧня лул кужым понэмын!) "Йыбыртты музъемлы" (1977), "Югдонын ӟардэ" (1980), "Тулкымлы пумит" (1981), "Нуназе азьын" (1986). Ӟуч кылын Н. Кралиналэн берыктэменыз 1983-тӥ арын потӥз "Поклонись земле" трилогия, 1987-тӥ арын - "Полдень". Г. Медведевлэн, И. Гавриловлэн, Т. Архиповлэн но Г. Красильниковлэн романъёссы бӧрсьы удмурт литератураын та тужгес бадӟымез эпической произведение (та удысын озьы ик ужа П. Чернов). Ӟуч но Россиысь мукет литератураосын "ӝутэм выльвылэз" азинтыса, Г. Перевощиков асьме гуртъёсын 70-тӥ-80-тӥ аръёсы вылэм югдурез ас синмыныз учкыса сэрттэ-пертче. (Ӟуч кылын потэм книгаосызлэн азькылазы мон дунъет сётӥ ни вал). Странаямы югдур, общественно-политической формация воштӥськизы ке но, роман-тетралогиын ӝутэм ужпумъёс кылизы: крестьянлэн психологиез, музъемен герӟаськемез, гуртын выль интеллигенцилэн кылдэмез, выль кивалтӥсьлэн кыдамез, кивоштӥсьёсты будэтон, егитъёсты ас музъемзэс гажаны, выжыоссэс дунъяны дышетон, анай- атайёслэн но нылпиослэн кусыпъёссы, зэмлык понна сылон, яратонэз утён но мукет - ваньмыз со туала литературалэн сэрттоно-пертчоно гердъёсыз. (Та чуръёсыз гожтӥсь куке юаз вал авторлэсь: улон югдур, умой но урод шоры учкон воштӥськемен валче, кулэен уг лыдъя-а со романысьтыз мазэ ке выльдыны. Генрих Ксенофонтович чутрак шуиз: "Уг! Гожъяй сое, мар вал, мае адӟи но мае адӟеме потӥз котырысьтым, геройёсылэн улонысьтызы"). Г. Перевощиковлэн "Йыбыртты музъемлы" романэз пумысен литературоведениын бадӟым вераськон ӝутскиз. А. Шкляев, Т. Зайцева, Р. Яшина но мукетъёсыз пӧртэм ласянь гожмазы-сӥсъязы та произведениез. Сое эскеронлы тужгес бадӟым саклык висъяз А. Зуева - "Поэтика удмуртского романа" монографияз (1984) но "Удмуртская литература в контексте языческих и христианских традиций" докторской диссертацияз (1996). Литературовед умой шӧдыса-валаса пусйиз романлэсь нравственно-философской визылъёссэ. "Йыбыртты музъемлы" - со писательлэн улонын идеалзэ утчамез, синмаськоно кадь адямизэ адӟыны тыршемез, колхоз улонэз, музъем ужез выльдыны сюлмаськемез, туннэ нунал понна вӧсез. Кызьы кылдо выльзэ гожтыны мылкыдъёс, созэ писатель ачиз тодэ, нош мон малпамъя, сое азьлане нуо быдэстэм произведенияз пусйиськем гожъёс. Озьы луиз, дыр, "Йӧвалег" романэныз но, 1989-тӥ арын со кык люкетэн потӥз, нырысетӥез нимаське "Гужем лымы". Ӟуч кылэ сое берыктӥз В. Емельянов. Со ик беркыл гожтӥз но критикъёслэн роман пумысен тэкшероназы йылпумъян кыл вераз. "Йӧвалег", мон сямен, удмурт литератураын выль вамыш луэ: со усьтэ адямилэсь лул пуш дуннезэ писательёслэн, суредасьёслэн, дышетӥсьёслэн но мукетызлэн улонзы пыр. (Талэсь азьвыл вал ни И. Гавриловлэн "Вордӥськем палъёсын" трилогиез, А. Бутолинлэн "Сюлэмыз ӧз пӧя" повестез, но отын карикатура амал, сьӧд буёлъёс вормо). "Йӧвалегын" нравственно-философской ужпумъёс (ӟеч лэсьтон, шонере потон, жалян, зэмлыкез утчан) сётэмын валтӥсь геройлэн Роман Овчинниковлэн сюлэм мертэтэныз. Писатель улонлэсь адскисьтэм, пыдлось сӥзэ усьтыса возьматэ, кытчы выжыяськемын мулэсь зумытсэ сюпсись жаг турын, отын ӝока, куасьме таза тысь, мукет сямен вераса, астэ ачид мултэс яратон мукетызлы, чылкыт мылкыдлы, уг сёты пушйыны. Роман-дилогиын яратон (Романлэн но Риналэн) огшоры ӧвӧл, со пыр адями ассэ ачиз усьтэ. Огъя вераса, та произведениеныз писатель сюресъёс утча, кызьы лул пушмес чылкытатыса выльдоно улонмес (та ласянь берло гожъямъёссыя соин артэ пуктыны луоз В. Емельяновез, П. Черновез, Ф. Пукроковез). Озьы ик улонысь выль сӥосыз бугыртэ Г. Перевощиков "Тӧдьы куака" романаз (1996). Кыӵе тэшкет-гож сётӥз огсыр советской улонлы дышем адямиослэн сюлэмазы выль улон ӧре кожон, кызьы утёно адямилыкез йыр вадьсысьтыд липет пась но мукетъёсыз тонэ йырйыны дась дыръя - тае автор ас буёлъёсыныз, оскымон суреда. Уг луы сюлэм дырекъятэк лыдӟыны Г. Перевощиковлэсь "Сюлэмтэм дунне" выль повесть-дилогизэ (В. Емельянов берыктыса поттӥз "Луч" журналын). Повесть кык люкетлэсь: "Ыш-ыш-ыш..." но "Ӧб-ӧб-ӧб..." Татын вераськон мынэ Нюра нимо пичи ныллэн семьяез сярысь, кызьы солэн мумиз- бубиз ыштӥзы ужзэс но мар калэ вуттӥз соосты улон. Ваньмыз со возьматэмын кураськисе потэм ныллэн синмыныз. Та произведениын писательлэн зӥбытлыкез ас дуретсэ пезьгытэм кадь: улонлэн "кузёосызлы" пумит йыркурез уртче. Озьы ке но, чылкыт сюлэмогес кылё соос, улонлэн пыдсаз усемъёс. Котькуд произведениын - писательлэн сюлэм шунытэз, шокамез, геройёсыз шоры озьы яке тазьы учкемез. Ваньмыз потэ ачиз бордысь. Сыӵе ик Генрих Перевощиков улонын но: мукетъёссэ жалясь, юрттыны дась луись (уг вунэты, кызьы со мыным кизэ сётӥз К. Гердэз шонере поттон бордын ужакумы, "вылӥос" зӥбон дыръя). Ассэ но сое кайгу зол шымыртылӥз, но солы возиськыны юрттэ пушказ золтэм юн кужымез. Писатель - огшоры адями ӧвӧл. "Писатель ке ӧд луы, солэн пушказ пырыны ӧд ке быгаты, кин со",- Национальной библиотекаын 22-тӥ куарусёнэ Г. Перевощиковлэн "Сюлэмтэм дунне" книгаезъя кенешон дыръя таӵе малпан верамын вал. Зэмзэ ик, мар адӟемын, мар гожтэмын писатель сярысь - со айсберглэн вылӥыз гинэ, дыр. * Трос пол ваче вуылӥзы та калык писательёслэн улон сюресъёссы. Генрих ПЕРЕВОЩИКОВ НО Семен САМСОНОВ Москваын Съездъёслэн Кремльысь дворецазы. А. КУЗНЕЦОВЛЭН туспуктэмез. Зоя БОГОМОЛОВА, филологической наукаосъя кандидат, литературовед. УДМУРТЪЁСЛЭН ӦТЧАМЗЫ АЗЬЫН Али ик малпаськоно Толэзь гинэ кыле на, Быдэс дуннеысь удмуртъёслэн ӧтчамзы ужаны кутскытозь. Ёросъёсын та вакытэ ортчо отчы делегат быръёнлы но ужпумъёсты эскеронлы сӥзем кенешъёс. Газетмылэн редакцияз вазиськиз тодмо адямиослы, кык юанлы валэктон сётыны курыса. 1. Кыӵе мылкыдын тӥ витиськоды удмуртъёслэсь ӧтчамзэс? 2. Кинэ адӟиськоды тӥ Тӧроын? Карл Пономарев, история наукаосъя доктор. 1. Алигес ортчиз шаерысьтымы Ӟуч культурая обществолэн конференциез. Мон но пыриськи солэн ужаз. Малы? Тазьы малпасько: асьмеос, удмуртъёс, огнамы гинэ ум быгатэ трос ужпумъёсты быдэстыны. Ӟуч калыклэн огъя мылкыдыз умой луиз ке, со асьмелы но ӟечен берытскоз. Соин ик валче ужанъя сюресъёс утчано. Съездмылы дасяськон вакытэ котыр ласянь чакласьконо, азьло аръёсы люкам ӟеч опытмес огазеяно, лэсьтэм янгышъёсмес лыдэ басьтоно. Озьы луиз ке, ӧтчаммылэн пайдаез одно ик шӧдӥськоз. 2. Таиз сярысь мон али уг вера на. Малпанэ, валамон ни, вань. Анна Зуева, филологической наукаосъя кандидат, "Многоцветы" огазеяськонлэн кивалтӥсез. 1. Мон малпасько, асьмелы дыр вуиз ни выль вамышъёс лэсьтыны. Кылсярысь, "Удмурт кенеш" юнгес басьтӥськыны кулэ экономика, политика ужпумъёс борды. Солэн куараез котькытын юн мед чузъяськоз. Тани республикаямы кун властез радъян пумысен ужрадъёс кутӥсько. Малы асьмеос палэнэ кылиськом? 2. Тӧрое мон асме ӵекто. Сыӵе правое вань кадь потэ. Удмурт движениез ӧръясьёс пӧлын вал, али но палэнын уг сылӥськы. Тодӥсько "Кенешмылэсь" зол но ляб интыоссэ, шӧдӥсько азьланьзэ. Кышномуртлэн та ласянь адӟонэз, пиосмуртлэн сярысь, оло, юнгес но. Андрес Вальме, журналист. 1-2. Валамон, та юанъёс меӵак монэн герӟаськемын ӧвӧл. Озьы ке но, политика ужпумъёсын выроно луэ бере, тазьы шуысал. "Удмурт Кенешлы" тӧроын адӟисько профессорез Владимир Владыкинэз. Макем визьмо, котьмае валась-чаклась адями! Со быгатысал кадь котыраз ӟеч кужымъёсты огазеяны. Тодӥсько на, азьло съездъёсын тӥ кидэс ӝутъяды асьме парламентэ удмуртъёслэсь нимаз депутатъёс быръён понна. Но резолюцие пыртэм та куронэз улонэ пыӵатон вылысь, номыр ик ӧд лэсьтэ ук. Кулэ вал Вылӥ Советын ужпумез ӝутыны. Озьы ӧз луы. Уно огшоры адямиосты пӧянлы ӧз пӧрмы меда со вераськон? Али ӵашето кӧня ке ар талэсь азьло Эстониын ӝегатэм пистолетъёс пумысен. Кӧня ке миллион долларлы ваньбурмы таламын. Татын но удмуртъёслэн куаразы шӧдӥськыны кулэ кадь. Валентина Иванова, "Удмурт Кенешлэн" Якшур-Бодьяысь ёзэзлэн кивалтӥсез. Вань удмурт ужрадъёсы лыктӥсько маке но выльзэ шедьтод, сое ужад пыртод шуыса осконэн. Озьыгес ик луэ. Но вот куддыр асьме адямиос, визьмо адямиос, шуысал мон, куспазы керетыны кутско. Таиз ини мылкыдэз туж лапкатэ. Бадӟым ӧтчаме олокытысь но куноос ӧтемын бере, кызьы ке но тыршоно вал ымнырмес чеберен гинэ возьматон сярысь. Та нуналъёсы ёросамы ортчоз удмуртъёслэн конференцизы. Отын кенешыны малпаськом Якшур-Бодьяын пӧртэм выжыосысь калыкъёслэсь центрзэс кылдытон сярысь. Азьланьын улонмы - куспамы валаса, ог- огедлы юрттыса ужан бордын. 2. Ми ӧм кенеше на, соин ик вераны шугъяськисько. Валерий Нуриахметов, Дэбесын потӥсь "Байгурезь" газетлэн редакторез. 1-2. Асьме движенимы тужгес но ёрме валтӥсьлы, выль сямен вераса, азьмуртлы. Лидер кулэ. Сотэк весь огинтыын пуком. Та ужпум ваньместы ик шугъяськытэ. Шуд усьылӥз туэ тодмо политикен Рамазан Абдулатиповен пумиськыны. Солы но поттылӥ та сярысь. Рамазан Гаджимурадович шуиз: вань ук, пе, тӥляд азьветлӥсьты - Валентин Тубылов, котыр ласянь тупамон адями. Таӵе малпанэн соглаш луисько. Валентин Кузьмичез тодо городъёс но, гуртоос но, удмуртъёс но, ӟучъёс но. Кун Кенешлэн депутатэз, Президиуме быръемын. Ӧтчаме лыктэмъёс солы дурбасьтӥзы ке, оскисько, калыкмы азьлане сэзьгес вамыштоз. Соин ӵош ик, малпасько, дыр вуиз ни азьланезлы сабырлы, егит азьветлӥсез будэтон бордын ужаны. Сое асьмелы дасяно, ас кожаз гинэ сыӵе адями вылӥе уз ӝутскы. *** Гажано лыдӟись эшъёсмы! Удмурт ӧтчамлэсь кулэлыксэ лыдэ басьтыса, "Удмурт дуннелэн" редакциез дэмла отын эскероно ужпумъёс пумысен вераськонэз газет бамын ӧръяны. Вылӥын пусъем юанъёсъя маке верамды потэ ке, жингыртэ 24-53-69, 24-56-67 телефонъёсъя. Витиськом! И. ЛЕБЕДЕВ. Колониосын али кивалтэ Югдурез утёнъя министерство. Чакламын соосты сётыны Юстицияя министерстволы. Воштӥськоз-а таин валче югдур? Бышкись ез кенер сьӧрын егитъёсты азьвыл дышетӥзы кескичгес амалэн йыртэманы, пытьыосты сураны но кыл кутонлэсь мозмыны. Нош табере колониос сьӧлыкам муртлы, оло, тупатскыны юрттозы? Валэктон утчалэ "Удмурт дуннеысь". Пичи Пурга ёросысь Вуж Монья школаын дышетӥсь Виктор Тарасов редакцилы вераз аслэсьтыз малпанзэ. Газетты, пе, берло дыре спортлэсь палэнскиз. Таӵе верамлэн ог люкетэз шонер. Гуртысь спортсменъёслэсь тол но гужем шудонъёссэс туж паськыт возьматӥськом. Музон ӵошатсконъёс палэнэ кылё. Чик ум "суредаське" тренеръёслэсь но судьяослэсь ужзэс, администрациосысь спортъя комитетъёслэсь но отделъёслэсь маин выремзэс. Вуныло футбол, хоккей, шахмат но музон шудонъёс. Югдурез тупатон вылысь, редакция пусъе куд-ог ужрадъёс. Нырысетӥез таӵе: огзэ корреспондентэз мукет ужпумъёсын ӵош меӵак косоно физкультураез но спортэз син азяз возьыны. Сыӵе амал пайда сётоз шуыса, осконмы вань. х х х Удмурт газетын котьку но бадӟым инты басьто культураысь ужпумъёс. Шудон-серектонъёсты возьматыкумы, куддыръя сьӧраз но ортчиськом кадь. Лыдӟисьёсмы маскаръяськыло: гуртэз, пе, макем юнгес кекато, отысь калык сокем тросгес эктэ-кырӟа кадь. Огез валамон: культура отдел шулдыръяськонэн гинэ уг выры. Туэ, кылсярысь, луэмезъя возьматыны вырим вӧсьёсты но, творчествоен вырись союзъёсты но, литературая кружокъёсты но. Кайта ушъяны малпаськом азьмынӥсь амалэ выжем учреждениосты. Республикаямы вань ни клуб- библиотекаос, клуб-мастерскойёс, творчествоя юртъёс, Ижын - удмурт школа-лицей. Удмурт университетын удмурт дышетӥсьёсты дасян, городъёсын, Татариын, Башкириын, Мари республикаын удмурт кыллы дышетон, егит педагогъёслы улон инты висъян - отделлэн сюлмаськонэз. Тӥ понна, клубын ужасьёс, "Удмурт дунне" нимысьтыз печатлалоз пӧртэм ужрадъёсты радъянъя сценарийёс. Тӥледлы, учкисьёс, ивортылом Удмурт драмая театрлэн но музон коллективъёслэн маин шокамзы сярысь. Тӥледды, лыдӟисьёс, тодматылом книгаосын, соосты гожъясьёсын, печатласьёсын но вузасьёсын. Выль кырӟанъёслэн кылъёссы но нотаен гожъям гуръёссы, азьло музэн ик, тӥ доры нырысь ик вуозы "Удмурт дунне" пыр. 1998-тӥ арын вордскем нуналъёссэс пусъёзы редакциямы кема ужамъёс Василий Михайлов, Михаил Перевозчиков, Семен Шкляев, Евгений Афонин, Кирилл Ломагин, улэпесь ке луысалзы, пусйыны быгатысалзы пересь Шамардан (Усков), Николай Белоногов, Николай Васильев, Макар Волков, Александр Вотяков, Георгий Петухов. Мылкыдмы вань тӥледды тодматыны соослэн улэм-вылэменызы но чуръёсынызы. Отделын вань удмуртлыкез ӝутон сярысь тужгес юн сюлмаськись муртъёслэн списоксы. Со уката кузёмоз, вылды, ноябре вань удмуртъёслэн ӧтчамзы люкаськылэм бере. Корреспондентъёсмы саесъёссэс пужалляса ик дасясько сыӵеос сярысь очеркъёс пӧраны. 90-тӥ аръёслэн кутсконазы Удмурт культурая общество дасяны кутскиз "Герд" бамъёс. 60-лэсь трос вал ни соос. Берло вакытэ огъя удысэ пыриське "Удмурт кенеш" огазеяськон но. Сое ми ум аналтэ. Но бамъёслэсь шӧмзэс кӧня ке воштӥм но, воштом но. Азьвыл кызьы кошке вал? Ӟырдыт сюлэмо адямиос, ас калыксы сярысь сюлмаськыса, быгатытэк-а, быгатыса-а басьтӥсько кыӵе ке уж борды. Малпамзыя уг пишмы ке, серекъясьёс вӧзазы ни: нодтэмъёс но пӧрмостэмъёс тӥ. Озьы "Герд" баме сюро ог-огместы ултӥясь чуръёс. Бератаз редакция шуиз: ог-огед вылэ урдскылонъёс газетэ медаз сюре. Кенешелэ, ченгешелэ, пӧртэм малпанъёстэс ӵошатэлэ, огкыл утчаны вырелэ, нош ог-огдэс эн мыскыллялэ. Удмуртлыкез ӝутонэ ваньмыз сямен пырисько, сюлэмзы косыса, дун басьтытэк, асьсэлы пайда поттон сярысь малпаськытэк. Со понна-а кокалод сыӵеосты? Вӧсь кароно ӧвӧл - юрттоно. Сыӵе мылкыдын мед тырмозы "Герд" бамъёс. Вуоно арлэн кутсконаз асьмеос данъялом Куӟебай Гердэз но Ашальчи Окиез. Соослы сӥзем тодэ ваёнъёсын шур али но куасьмемын ӧвӧл. *** Гожтэтъёсъя отделлэн аслаз сюлмаськонъёсыз. Со радъя газетмылы гожтӥськонэз, ужа авторъёсын, дася "Шунды", "Наталь" но "Берекет" бамъёс. Отделын ужасьёс трос ӧвӧл, но бордаз юнматэм удысъёсы пыриськыны мылкыд каро мукет корреспондентъёсмы. Туэ тани бадӟым кенешон пуромиз "Сьӧлыкамтэ нылъёс дуноесь" материал пумысен. Нылкышнолэсь - вуоно анайлэсь данзэ утён сярысь отӥяз вераськозы врачъёс, дышетӥсьёс, асьсэос кышномуртъёс. Кин тодэ, оло та кенешонэ кыскыны быгатом воргоронъёсты но. "Дышетскиськом дышетскыны" йыръян улын мынозы школае дасяськисьёслы чаклам визь-кенешъёс. Детдомын улон-вылон, школаез йылпумъясьёсты уже интыян, яратон, пӧртэм выжыосысь адямиослэн семьяязы кусып радъян, люкиськон - ичи-а егитъёсты сюлэмшугъяськытӥсь ужпумъёс? Улонэ сюрес лёгисьёс понна республикаын нимысьтыз газет ӧвӧл бере, сыӵе ныпъетэз аслыз басьтэ "Удмурт дунне". Нимысьтыз саклык висъянын луоз тазалыкез утёнлы. Больницаос дунын эмъяны кутско бере, адями азьланьын мургес малпаськыны кулэ ачиз сярысь. Вашкала дырысен тодмоесь йӧнатскон амалъёс медаз вунэ. Кӧняез ке корреспондентъёсмы эшъясько физкультураен, кезьыт вуэн, лек синазькыль каро аракыез но тамакез. Соос ик дасялозы "Тазалык" бамъёсты, вуылозы нуны ваён юртъёсы, психобольницаосы, санаторийёсы. Олокӧня дасо аръёс ӵоже сётъяськом ни "Гожтэт ӧтиз сюрес вылэ" йыръянэн материалъёс. Куддыръя амалтэк малпалод: Россиын вань на меда одӥг коть сыӵе газет? Редакцие вуись гожтэтъёс шоры данак изданиос чиньы пыртӥзы учко ни. Ми дышем сяммыя соосты весь дунъяськом но газет баме вуттыны тыршиськом. Данак интыосын али кылдытэмын "Оскон" нимаськись ёзъёс (службаос). Соослы юрттыса, "Удмурт дунне" но сюлмаськоз шуге-леке сюрем адямиос сярысь. Озьы ик юрттоз адямиослы кузпал бырйыны. Газетчиос кемалась верасько "Берекетлэсь" пуштроссэ воштон сярысь. Со борды кайта басьтӥськом лулысь-сюлмысь. Кин тодэ, оло, "Натален" огазеялом ай. Одно улӟытом чорыгасьлэсь сэрегзэ. Тросэзлэн корреспондентъёслэн вуылэмзы потэ Удмуртилэн палэназ улӥсь удмуртъёс дӥне. Вазен соос пӧлысь уно сюрсэз лыдӟылӥзы "Удмурт дуннеез". Республикаослэн кусыпъёссы тӥяськемен, ми огвакытэ ваньзэ сыӵе эшъёсмес ыштӥм. Туэысен газетмес басьтэ ни Татариысь но Башкириысь кӧня ке дасо мурт. Вуоно арысен соослэсь лыдзэс будэтон понна, пӧртэм ужрадъёс кутӥськом. Одӥгез таӵе: вуылоно "кунгож сьӧры", пумиськоно палэнысь удмуртъёсын, гожъяно соос сярысь. Татариысь яке Пермь областьысь выжы-кумылэн тодэмез уг поты шат Удмуртиысь удмуртлэсь кызьы улэмзэ? Газетмылэн матысь эшъёсыз тодо: редакция ялӥз тӥляд гожтэтъёстыя аспӧртэм ӵошатсконъёс. Тужгес уноез мылкыд каризы "Устоез лыдӟись" конкурсэ пыриськыны. "Наталь" бамын мынэ тупаса улон арлы сӥзем "Эшъяськон бугор" ӵошатскон. Огазея туж паськыт удысъёсты - пӧртэм калыкъёслэсь, семьяослэсь, анай-атайёслэсь музон ӵыжы-выжыослэсь кусыпъёссэс. "Удмурт дунне" но егит дунне. Сыӵе конкурслэн нимыз ик возьматэ: вераськон мынэ будӥсь кивоштӥсьёслэн улон-вылонзы сярысь. Ӵошатсконъёслы йылпумъянъёс лэсьтом 1998-тӥ арлэн кутсконаз. Соин ик газетмес вуоно арын басьтэмысь дугдэмъёслы ӝож луоз: стартэз адӟизы, нюръяськонын "висизы", нош финишез учкыны кынарзы ӧз окмы. *** Кӧс нуналэ (субботае) потӥсь газетмы пичияз бере, "Шӧкычлэн" но шиез кык пол вакчиёмиз. Жаляса верано луэ: лыдӟисьёс лыдъямъя, со кӧня ке ныжомиз но. Шиез весь шерыны выриськом, но малпамъя котьку ик уг пӧрмы. "Удмурт дуннеын" сямен ик, быдэс Россиын фельетонлэн дуныз кулэсмиз, малы ке шуоно, асьмелэн быдэс улонмы - лек комедия. Но ми ум буйгатскиське. "Шӧкычмес" умоятыны ӧтиськом лыдӟисьёсмес. Тӥлесьтыд витиськом таӵе юанлы валэктэмдэс: мае лыдӟемды потэ отысь? Матысь дыре тӥ пӧлын ялом на эшшо кык ӵошатскон. Нимъёссы лекос аспӧртэмесь: "Малы уг кельшы "Удмурт дунне" газет" но "Устоез курлась". Курыт кылъёс гожтӥды яке верады ке но, соосты газетэ печатлалом. Тӥляд дэмланъёсты редакцилы аспӧртэм компас мактал луозы, милемлы азьлане шонер сюрес возьматозы. *** Асьсэлэн ӟеч малпанъёссы вань секретариатлэн, компьютеръёсъя отделлэн, фотокорреспондентлэн, суредасьлэн, реклама дасясьёслэн, корректоръёслэн но мукетъёсызлэн. Редакциын ньыльдон мурт ужа бере, котькудӥзлэсь чаклам ужъёссэ мадьыны туж трос инты кулэ луысал. Валамон огез: кайта, 80 ар тырмон араз, газетэз эшшо умойгес карон вылысь, ми вань луонозэ лэсьтом. Шоро-куспо арлыдмы но кын корт куртчон вакытэ кадь - 39 арес. Алексей ШКЛЯЕВ, "Удмурт дунне" газетлэн валтӥсь редакторез. Сюрес сётске мынӥсьлы Шутэтсконлэн котьку но пумыз вуэ. Куд-огез ялкарон нуналъёсыныз жаляса люкиське, нош политикъёс, каникулъёссы ортчо ке, ог-огзэс выль арлэн кутскеменыз ӟечкылало. Ма ваёз со асьмелы? Уно шуг-секытъёсты. Оскиськом, Кун Кенеш но Правительство быгатозы асьмелэн юртамы, кудӥз нимаське Удмуртия, экономикаез азинтыны. Корка сю арлэсь кема сылыны кулэ шуо калыкын. Та веранэз шонерен лыдъя Александр Волков но. Но со ӟеч вала, государствоез радъян-азинтон - огшоры корка пуктон гинэ ӧвӧл. Татын азьланяз ма луонэз тодон кулэ, вань "улӥсьёслэсь" куронъёссэс лыдэ басьтоно. "Русские Удмуртии" конференциын А. Волков тодматӥз нациосын ужанъя политикалэн куронъёсыныз, улонэ пыӵатон амалъёсыныз. Нош кызьы республикаысьтымы азьветлӥсь нациослэн улоназы пыриське меда, ма каре, калыкъёслэсь ӟеч сямъёссэс утён понна? Александр Волков Удмуртиысь Министръёслэн Кенешенызы кивалтыны ӧдъяз сыӵе вакытэ, куке кунлэн казнаез чылкак буш кылиз. А. Волков Москвае кошкиз. Кык нунал ортчыса, Удмуртие кӧня ке миллиард манет вуиз. 1993 ар. Экономика куашкамын. Озьы ке но Волков, Министръёслэн Кенешенызы кивалтыны кутскемез бере, кык толэзь гинэ ортчыса быгатӥз Ижевскын Александр Невскийлэсь соборзэ пуктонэ 100 миллион манет висъяны. 1994 ар, март. Волков висъя 100 миллион манет "Алангасарлэн вужерез" фильмез пуктонэ. 19 мае тупатъям бере усьтӥськиз Арсеналлэн - вашкала но чебер памятниклэн - огез юртэз, 20 мае Министръёслэн Кенешсы юнматӥз удмурт кылэз но шаерамы улӥсь калыкъёслэсь кылъёссэс азинтонъя программаез, кудӥз нациосын ужанлы, соосын кусып возёнлы право но коньдон висъян ласянь инъет луиз. Программа "Удмурт Республикаын кун кылъёс сярысь" Закон вылэ пыкиськыса лэсьтэмын. Августлэн пумаз Удмуртие ветлӥз Николай Егоров - нациосын ужанъя министр. Со вылӥ дунъяз республикамылэсь нациосын ужаны но пӧртэм культураосты азинтыны тыршемзэ, "Егитъёс но финн-угор дунне" конференциез дасянэ пыриськемзэ. Сое ортчытӥз Егитъёсын ужанъя комитет. Соку ик валамон луиз, Удмуртилы одно ик кулэ нациослэн ужпумъёсынызы вырисьез, кудӥз огазеясал малпанъёсты но соосты улонэ пыӵатысал. Шӧдӥз сое А. Волков но. Соин ик конференция ортчемлэсь азьло ик Правительстволэн постановлениеныз Нациосын ужанъя комитет кылдытэмын вал. Вераны кулэ, та комитет понна выль ставкаос усьтэмын ӧй вал, со мукет министерствоослэн но ведомствоослэн кулэстэм интыоссы чотын кылдӥз. Ваньмыз та возьматэ Александр Волковлэсь национальной ужпумъёслы уно саклык висъямзэ. 1995 арын 11 феврале со нош ик пумиське нациосын ужанъя министрен. Та учыре вераськон мынӥз удмурт кылэз но шаерысьтымы мукет калыкъёслэсь кылъёссэс азинтон сярысь программаез быдэстыны федеральной бюджетысь коньдон висъян сярысь. Со сяна, удмурт кунлыклы 75 ар тырмонэз пусъён сюлмаськытӥз. Табере Волков огназ ӧй вал ини - Москваын ужпумъёсты быдэстыны юрттӥз Нациосын ужанъя комитет но солэн кивалтӥсез Светлана Смирнова. Календарьлэсь бамъёссэ азьлане берыктом. 1996 арын феврале Алевсандр Волков пыриськиз Венгриын Удмурт Республикалэсь нуналъёссэ радъянэ. Март - республикаысь творческой огазеяськонъёсын пумиськон но Кун Кенешлэн но Правительстволэн творческой союзъёслы юрттон сярысь огъя постановленизы. Кун Кенешлэн сессиез соослы нырысьсэ коньдон висъяны чаклаз. Та арын ик июль толэзе мечеть усьтӥськиз. Сое пуктонлы Волков фондысьтыз висъяз 20 миллион манет, эшшо 35 миллион манет - бюджетысь. Августэ финн-угор калыкъёс Венгрие конгрессазы люкаськизы. Шаерысьтымы делегацилы нош ик Кун Кенешлэн Тӧроезлэн фондысьтыз 20 миллион манет висъямын вал. Таӵе учыръёс трос гинэ. Кинэн гинэ Кун Кенешлэн Тӧроез ӧз пумиськылы, кытын гинэ ӧз вераськылы. Тодамы ваём Шахраез, Абдулатиповез, бигеръёслэсь сездзэс. Полномочиосты но быдэсъяно удысъёсты люкон сярысь огкыл. Табере тани Кун Кенеш вуоно сессияз сэкероз кунлэсь национальной политикая концепцизэ. Куд-огез та програмамлы пумит. Озьыен, со пумысен эчешон пӧсь луоз. Александр Волков нюръяськыны дась но концепцилэсь инъетсэ одно ик утёз. Нош азьпалан - выль азинсконъёс но выль законъёс. Соос пӧлын "Удмурт Республикаын кылъёс сярысь" Закон. Александр Волков котьку калыкен артэ. Сӥзём солы вормонъёс. БОРИС КОПЫСОВ. Удмуртъёслэн ӧтчамзы азьын Депутат юрттыны дась Удмуртъёслэсь 6-тӥ ӧтчамзэс ортчыны чакламын туэ Ижевскын 5-6 ноябре Операя но балетъя театрын. Та пумысен юанъёсын вазиськыны луоз "Удмурт кенеш" огазеяськонэ (телефонэз 75-53-29). Куарусёнлэн кутсконаз Ижевске вуылӥз Россия Федерацилэн Кун Думаяз ужась депутатмы Андрей Владимирович Солуянов. Ас бырйисьёсыныз адӟиськем сяна, со озьы ик пумиськылӥз Россиысь наукаосъя академилэн Урал ёзысьтыз историяя, кылъя но литературая Удмурт институтлэн директореныз; история наукаосъя докторен Кузьма Иванович Куликовен. Эскеремын финн-угор калыкъёс азьын сылӥсь ужпумъёс но удмуртъёслэн съедзылы дасяськон. Андрей Солуянов удмуртъёслэн та бадӟым ужрадзылы юрттыны дась луэмзэ вераз. Депутат озьы ик пумиськыны чакла мукет тодмо учёнойёсын но культура удысын ужасьёсын. Кылсярысь, история наукаосъя докторъёсын Владимир Владыкинэн, Маргарита Гришкинаен но Национальной образованиея НИИ-лэн директореныз Зоя Сувороваен. Т. Банникова. Туспуктэм вылын - Шаркан районысь "Победа" колхозлэн кивалтӥсез Сфира Васева. Та мыло-кыдо, ӟырдыт сюлэмо нылкышно вакчи дыр куспын хозяйствоез азьмынӥсьёс радэ поттӥз. Гажало сое гуртоосыз ужзэ ӟеч радъямез, специалистъёсын умоесь кусыпъёс тупатэмез, калыкен вераськыны быгатэмез понна. Туспуктэмез А. ПОЗДЕЕВЛЭН. Тодмо нимъёс но нуналъёс Октябрь 2. - 55 ар талэсь азьло (1942) Кизнер пыртэмын вал рабочий посёлокъёс радэ. 8. - 75 ар талэсь азьло (1922) Можгаын ужаны кутскиз удмурт педтехникум. Со кылдӥз Елабугаысь учительской семинарилэн инъетэз вылын. Аръёс ортчыса, техникум пӧрмиз дышетӥсьёсты дасянъя училищелы. 15. - 80 ар талэсь азьло (1917) Ижевскын ужаны кутскиз Калык юрт (Народный дом). 18. - Вордскемез дырысен 70 ар тырме Л. М. Васевлы (1927-1972), УАССР-ысь калык художниклы, тодмо оружейниклы-гравёрлы, ювелирлы, графиклы. Солэн "Ижевская инкрустация" ужез пӧйшуран пыӵалэз чеберъянын вылӥ дунъет басьтӥз. 20. - 85 ар талэсь азьло (1912) усьтӥськиз Сарапулысь педучилище. 20. - 25 ар талэсь азьло (1972) Удмурт педагогической институт интые Ижевскын кылдӥз Удмурт государственной университет. 22.- 120 ар талэсь азьло (1877) Ижевскысь андан поттон заводын ужаны кутскиз нырысетӥез мартен гур. - 90 ар талэсь азьло (1907) Ижевскын усьтӥськиз 22 номеро школа. - 85 ар талэсь азьло (1912) Сарапулын ужаны кутскиз дышетӥсьёсты дасянъя нылкышно семинария. 1919 арысен со пӧрме 3 аръем ялан ужась курсъёслы, 1921 арысен - педтехникумлы, 1936 арысен - педучилищелы. - 60 ар талэсь азьло (1937) ВЦИК-лэн постановлениеныз Воткинск, Каракулино, Киясово, Сарапул районъёс, Киров областьысь выжтэмын Удмурт АССР-е. 23. - 75 ар талэсь азьло (1922) кылдӥз Удмурт областной прокуратура, со азьын сылӥсь ужпумъёс пӧлысь нырысетӥез - преступностен нюръяськон. 1935 арын луиз Удмурт АССР-ысь Прокуратура, али - Удмурт Республикаысь Прокуратура. - Вордскемез дырысен 65 ар тырме Герман Алексеевич Ходыревлы (1932-1995), тодмо удмурт кылбурчилы, журналистлы, РСФСР-ысь калыкез дышетонъя отличниклы, УАССР-ысь культура удысысь дано ужасьлы, Удмуртиысь комсомоллэн премиезлэн лауреатэзлы. Вордскемын Алнаш селоын. 26. - 20 ар талэсь азьло (1977) Ижевскысь автозаводлэн конвейерысьтыз потӥз миллионэтӥез "Москвич". 27. - 90 ар талэсь азьло (1907) Воткинскын усьтӥськиз средней механико-технической училище, бӧрысьгес со интые кылдӥз машиностроительной техникум. - 80 ар талэсь азьло (1917) Ижысь рабочийёслэн, солдатъёслэн но крестьян депутатъёслэн Советазы кутэмын резолюция городысь властез Советъёслы сётон сярысь. Солэн исполкомезлы быръемын выль кивалтӥсь - большевик В. С. Жечев. 28. - 75 ар талэсь азьло (1922) кылдӥз "Удкнига" кооперативной товарищество. Солы учредитель луизы облисполком, "Гудыри" газетлэн редакциез, Можга уисполком но мукет областной организациос. 30. - Вордскемез дырысен 50 арес тырме Вениамин Никонорович Ившинлы, тодмо удмурт кылбурчилы но прозаиклы. Вордскемын Кез районысь Ванялуд гуртын. Та толэзе ик - 130 ар талэсь азьло (1867) Глазовын ужаны кутскиз калык библиотека. - 70 ар талэсь азьло (1927) Ижевскын усьтӥськиз 600 интыем нырысетӥез областной больница. - 55 ар талэсь азьло (1942) Ижевск районысь "Осовобожденный труд" сельхозартельысь ужасьёс республикаысьтымы вань калык азе пото "Колхозник Удмуртии" танковой колонналы коньдон люкан сярысь вазиськонэн. Ар бырытозь 41 миллион манет октэмын ни вал. - 35 ар талэсь азьло (1962) ужаны кутскиз Ижевскысь дӥськут керттонъя фабрика, туала нимыз - "Сактон". - 30 ар талэсь азьло (1967) Удмуртилэн Правительствоез юнматэ литература но искусство удысысь тужгес но усто произведенилы Удмурт АССР-лэсь Государственной премизэ. Солэн нырысетӥ лауреатэз луиз композитор Г. А. Корепанов, пусъемын "Наталь" операез. Валъёс - синмаськымон пудо Чебер но сюлэмез вырӟытӥсь ужрад ортчиз Ижысь ипподромын. Республикаысьтымы вал вылын ворттылӥсьёслэн ӵошатсконъёссы выль вормонъёс, выль нимъёс ваизы. Люкаськемъёс синмаськыса учкизы ӟуч выжыысь потэм Раперист шоры. Можга районысь "Россия" колхозысь ваем секыт нуллыны чаклам вал та нуналэ ваньмызлэсь йӧноен лыдъямын. Со сьӧрысь ӧз кыле ӟуч выжыысь ик потэм Жингая но Печенга. Таосыз ӝог бызьылӥсь выжыослэсь данзэс утизы. Вераны кулэ, Жингая аслаз чебереныз сяна, ӝог бызьылыны быгатэменыз, шумприч луэменыз но висъяськиз. Со аслаз кузёеныз кыкетӥ категориен спортсменэн Л. Критиковаен ӵош Удмурт кун гидлэсь данзэ эшшо будэтӥз. Вормисьёс пӧлы шедизы на: Гичка (Можга район "Россия" колхоз), Набат (Грахово район), Топаз (Люкшудья лесничество) но мукетъёсыз. Пусйытэк кельтэм уг поты мукетсэ но. Асьме палан выжыятэм но будэтэм валъёс та нуналэ мукетызлы ӧз сётске. Ӝог быземенызы висъяськизы Любезная (Дэбесс район, кузёез - Н. Первушин), Ягодка (Игра район, кузёез - Д. Леконцев). Нош Игра районысь ваем Сбор породаосты возьматон выставкаын аслэсьтыз выжызэ витетӥ интые поттӥз. Со шумпотымон. Н. ЛИПИНА. Лэчыт ужпум Парсь омырен уг куайы Таӵе огыр-бугыр улонамы кыӵе но шуг-секытъёс но ужпумъёс уг пото. Куддыръя чик уд малпа. Тани умойгес улон вакытамы, элькунамы вакчи дыр куспын ӝутэмын вал парсь вордон комплексъёс. Промышленной амалэн пудо вордон выжы лэзиз Кияса (Ленин нимо совхоз), Можга ("Пычасский" совхоз) но Сарапул ("Кигбаевский" совхоз) районъёсын. Котькудаз отын чакламын вал 24 сюрс парсьёсты куайытыны. Берлогес Ижевск вӧзы пуктэмын 4 пол бадӟымгес "Восточный" парсь вордон комплекс. Нырысь-валысь соос урод ӧз ужалэ. Государство комплексъёслы тырмыт пудо сиён сётъяз. Нош берло дыре югдур чылкак воштӥськиз. Таӵе амалэн ужась фермаос нокинлы кулэ ӧвӧл ни. Туннэ пыр-поч мадём Сарапул районысь Кигбаево парсь куайытон комплекс сярысь. Хозяйство трос сӥль будэтэ бере, совхозын колбаса лэсьтон цех пуктӥзы. Озьы переработка вордӥськиз. Туж умой малпамын. Продукцизэс кыдёке нуллытэк, пудозэс доразы ик вандо но пӧртэм колбаса поттыны ӧдъязы. Басьтӥсьёс но шедё вал. Но табере комплексын пудо куайытон уродмемен, цехсэс кызьы ужатыны уг тодо ни. Оло оскоды, оло уд, но кигбаевоослэн парсьёссы нуналаз 100-200 грамм гинэ будо. Вылаз ик, пудоослы ӝог тэлеӟыны юрттӥсь минеральной ватсэтъёс сёто на. Но со уг юртты. Тӥни соин ик колбаса поттон ёззэс пытсантэм вылысь, 50-60 килограммъем парсьёссэс сӥльлы вандо (самой ӝог будон вакытазы - Г. Р.). Цехез коть огдыре ворсано ке, 42 ужасьёс мар карозы, ужтэк кылё. Комплекс но та вие 6,5 сюрс гинэ парсь куайытэ. Туж ичи со. Ӝыныез фермаоссы бушесь. Но парсьёссы чаляк куайысалзы, 500-700 грамм привес басьтысалзы ке, колбаса лэсьтон улӟысал. Али отын "Липецкая" ӵынатэм, "Любительская" пӧзьтэм но сылалтэм кӧй потто. Дунъёссы бадӟымесь ӧвӧл, ческыт лэсьто. Асьсэлэн магазинзы ӧвӧл ке но, басьтӥсьёссы шедё вылэм. Июле тани колбаса лэсьтыны 20 процент гинэ асьсэ сӥльзы шедиз, кылемзэ гурт калыклэсь басьтӥзы. Огласянь учконо ке, переработка улэп коньдон но пайда вайыны кулэ. Со понна ик со переработка. Нош кигбаевоослэн озьы уг луы. Югдур меӵак герӟаськемын комплекслэн ужаменыз... Кылсярысь, мумы парсьёссы ичи парсьпи сёто, араз 12,3 гинэ. Нош вордо ӟеч выжы пудо - ландрас но бадӟым тӧдьы парсь. Нырысезлэн сӥен-сӥен кӧйыз но, сӥльыз но луэ, колбаса лэсьтыны туж умой мынэ. Но соосты куайытонэз быгатыса радъяно, нуналаз 6-7 кормовой единица сиён сётыса (кулэ кык пол трос), бадӟым привес уд басьты, омырен парсез уд куайыты. Сарапулысь "Дрожжепивзавод" огазеяськон юрттэ, сурмаял (барда) сётэ ке но, пайдаез сокем уг шӧдӥськы. Комплексын али 130 мурт ужа. Соос огдыре 12-15 сюрс парсь куайытыны быгатысалзы, интызы вань. Но племенной ужзэс аналтэмен, айы парсьёссэс вошъямтэен, парсьпи но ичи басьто. 1992 арысен парсьёссэс уг выльдо ни. Бен, комплекслэн директорез выль, алигес ужаны кутскиз. Кулэ вылэм солы "Восточный" совхозэ ветлыны, отысь ужъёсын тодматскыны. Алигес татчы вуылӥз Правительстволэн Тӧроез Павел Вершинин. Со но шаерысьтымы мукет кивалтӥсьёс рос-прос тодматскизы комплекслэн ужаменыз. Солэн али 15 миллиард манет тыронъёсыз люкаськемын. Одӥг толэзьлы электротыл сутэм понна 70 миллион манет люкаське. Югдурез валаса, Павел Николаевич, Сиён-юон корпорация пыр, 2 миллиард манет тыронзэс пытсаны кыл сётӥз. Но солы ӵош ик Правительстволэн Тӧроез егит директорлы дэмлаз структуразэс выльдыны, сотэк калык радэ уд потэ, пыд йылады уд султэ. Нош парсь выжыдэс умоятыны бюджетын коньдон чаклалом. Та ужез умоятыны мукет хозяйствоослы но юрттом. Племенной (пудо выжыез умоятытэк) ужез радъятэк кыдёке уд вамышты, уно продукция уд потты. Г. Романов. ТУГОКО Бускелед чотын уд узырмы Ижын ортчиз "Удмуртиысь ӟучъёс" научно-практической конференция. Сое ортчытӥзы Удмурт Республикалэн Правительствоысьтыз Нациосын ужанъя комитет но Ӟуч культурая общество. Кенешонэ пыриськизы вань ёросъёсысь лыктэмъёс, тодосчиос, депутатъёс, кивалтӥсьёс. Конференциын ӝутэм ужпумъя ӟырдыт вераськиз Кун Кенешлэн Тӧроез Александр Волков. Шаерамы улӥсь калыкъёслэсь кусыпъёссэс утён но азинтон понна, ӧжыт уг лэсьтӥськы. Асьме дорын та ласянь кыӵе ке но бадӟымесь валамтэос ӧз кылдылэ на. Правительство быгатэмезъя юрттэ калыкъёслэн общественной огазеяськонъёссылы, син азяз возе культура ужпумъёсты. Озьы ке но, национальной политикаез азинтон бордын ужан али гинэ кутске ай, шуыны луоз. Конференциын та сярысь пыр-поч вераз комитетлэн кивалтӥсез Светлана Смирнова. Солэн докладэз котыр ласянь чакласа дасямын вал. Озьы шуыны уг луы Ӟуч культурая обществолэн кивалтӥсезлэн, Кун Кенешлэн депутатэзлэн Михаил Кокоринлэн вераськемез сярысь. Солэн малпамезъя, ӟуч калык али тужгес но секыт югдуре шедемын, ӟучъёс зӥбемын, пе, соос кураськыса ветлоно луо. Михаил Константинович таӵе мылкыдзэ нырысетӥзэ гинэ уг шарая ни. Озьы ке но, солэн конференциын верамъёсыз трос адямиосты паймытӥзы. Малы кулэ вал югдурез мыдланьтыса возьматыны? Кин ке зӥбе шат Удмуртиын улӥсь ӟучъёсты? Мынам малпамея, куд-ог эшъёс та амалэн асьсэлэсь политикаын кулэяськонъёссэс быдэсъяло кадь. Ӟучъёс трос бере, соослы дурбасьтыса ӵемгес вераськылӥд ке, быръёнъёс дыръя уногес куара люканы быгатод. Озьы малпало, лэся, сыӵе адямиос. Но соос чик но уг чаклало, шӧдске, мултэс куасалтыса верамъёс огъя юртмылэн инъетаз пиртэшъёс кылдыто шуыса. Конференция огъя документ чотын дэмланъёс юнматӥз. Ӟуч культурая обществолэн правлениезлэн ӵектэмезъя, соос пӧлын вань таӵеез но. Юри ӟуч кылын сётӥськом сое: "Не допускать в республике дискриминации по языковому и национальному признакам, в том числе при подготовке и расстановке кадров". Тӥ малпаськоды, та чуръёс сьӧры удмурт но мукет ичи лыдъем калыкъёс сярысь сюлмаськон ватэмын-а? Ӧвӧл. Ӟучъёслэсь кивалтыны правооссэс, пе, кызьы ке но тӥяны медаз шедьтэ вал. Тӥни озьы, ява. Одӥгез оратор (Василий Камаев) тазьы но шуиз: Нациосын ужанъя комитетэн удмурт кивалтэ бере, культурая министр ӟуч луыны кулэ. Удмуртъёс кивалтон удысын сотэк но чиньыен лыдъямон ке но, соосты весь пыкылыны выро на. Тани ки улам статистика. Кылем арын 1 октябрьлы лыдпусъёсъя Культурая министерствоын 20 ужасьёс пӧлысь 13-ез - ӟучъёс, Нюлэс хозяйствоя министерствоын 33 ужасьёс пӧлысь 4-ез гинэ удмурт. Вузкаронъя министерствоын одӥг но удмурт специалистсы ӧвӧл. Озьы ик данак мукет ведомствоосын. Кытысь, кин адӟем-шараям ӟучъёсты кивалтон ласянь пачкатон учыръёсты? Амалтэк паймод ук куд-ог юлтошъёслэн верамъёссылы. Кин тодэ, оло, сыӵеослэсь мылкыдъёссэс санэ ик басьтыны кулэ ӧвӧл. Озьы, дыр, сыӵе вераськонъёс тамак кыскон интыын чузъяськысалзы ке. Нош куке нимо-дано адямиос республиканской кенешлэн трибуна сьӧрысеныз озьы даурто ке... Я, таиз сярысь гожтыны, зэмзэ но, тырмоз. Уго уноез ӟуч эшъёсмы туж вылӥ дунъяло удмуртъёсын эшъяськонзэс. Конференциын умой вераськизы исторической наукаосъя доктор Р. Голдина, Россиысь писательёслэн огазеяськоназы пыртэм мурт З. Богомолова, филологической наукаосъя кандидат В. Чулков но мукетъёсыз. Удмуртъёслэн нимынызы кенеше люкаськемъёсты ӟечкылаз профессор К. Пономарев. - Ӟучъёс бырон калэ вуэмын шуо бере, ма кыле на милемлы, удмуртъёслы? - пусйиз Карл Александрович.- Удмуртъёс Россиын улӥсьёс пӧлын ӝыны процент но уг луо ук. Уртче гинэ асьмеос быгатом та шуг вакытэ возиськыны. Визьмо удмуртъёсты 30-тӥ аръёсы выжыенызы быдтонын яке ӟеч ӟуч сямъёсты вунэтонын янгыш уг луо калыкъёс. Янгыш отын система. Соин ик кулэ ӧвӧл ог- огмылэсь тырмымтэосмес утчаны. Улон возьматэ: бускеледлэсь мазэ ке таласа уд узырмы. Ог-огедлы юрттыны тыршон утёз асьмемыз секыт учыръёслэсь. Ӟуч культурая общество шаерамы ӟуч калыклэсь йылолъёссэ улӟытон, культураез утён понна ичи ӧз лэсьты ни. Та ласянь пусйымон ужало солэн ёросъёсысь ёзъёсыз но. Кылсярысь, Алнаш районын. Редакцияз азьланьын кызьы ке но тыршоз ай отысь эшъёслэсь ужзэс паськытгес возьматыны. Ми озьы ик чакласьком тӥледыз матысь дыре та конференциын А. Волковлэн вераменыз тодматыны. Огъя вераса, пумиськон пайдаё луиз. Отчы пыриськемъёс уно ужпумъёсты эскерыны вуизы, азьланезлы сюресъёс пусйизы.Нош паллянэ кыскыны турттӥсьёс сярысь верано на ке, сыӵеос котькытын но вань, вылды. Шумпоттэ соиз, соослэн пазям кидысъёссы небыт муэ уг усё, пушъет уг сёто, уго Удмуртиын улӥсьёс пӧлын 99 процентэз вӧзысьтыз бускелез шоры ӟеч мылкыдын учке. И. ЛЕБЕДЕВ. СЮЛЭМ ВӦСЬ Сюмыкме ӝутӥсько яратон понна! Котькуд калыклэн пӧртэм вакытэ аслаз дано нылъёсыз но пиосыз. Со адямиос асьсэ даурзэс, улоссэс, калыксэс дано каризы, бырыны ӧз сётэ, азьланезлы оскон кылдытылӥзы. Ф. Достоевский, А. Пушкин, М. Каримов, П. Чайковский, Г. Красильников, Ф. Васильев, М. Джалиль, Н. Бакишева... Тани мон али ӝужыт-ӝужыт корка йылэ тубысал но кеськысал: "Уз быр удмурт улос! Уз быр удмурт калык! Уз быр удмурт кылмы!" Малы мон сыӵе кесяськисько шуиськоды-а? Малы ке шуоно, удмуртлыкмес ӝутыны вордӥськем пиналъёс али будӥзы. Соос трос но трос луо. Ми ваньмы соосты адӟиськом чагыр экран вылысь, лыдӟиськом газетъёсысь но журналъёсысь. Макем шумпотыса учконо Светлана Кибардина, Татьяна Денисова шоры. Нош кӧня пинал кырӟасьёсмы? Чебересь, нош кыӵе куараоссы! Мӧйы удмурт гожъясьёсмес воштӥзы ни пиналъёсыз. Адямилэсь психологизэ макем мур усьтыны быгато асьсэлэн произведениосазы. 85-тӥ аръёсы мон кие вуиз Ар-Сергилэн сборникез, отын пичияк гинэ авторлэн биографиез гожтэмын вал. Ма, быдӟым биография гожтыны кузь улонэз ортчоно, нош таиз автормы вордӥськем 1962-тӥ арын. Кыӵе мон соку пайми: мынэсьтым одӥг ареслы бадӟым, нош книга поттыны вуэм ини. Мон солы вожъяськи (ӧй, сьӧд вожъяськонэн ӧй. Мон со понна туж шумпотӥ). Нош собере та авторлэн произведениезъя кино лэсьтӥзы - "Тень Алангасара". Со-а бадӟым уж ӧвӧл удмурт калыкез ӝутон понна? Малы ке но асьме калык пушкын туж бадӟым сьӧд вожъяськон сям вань. Асьсэос уг лэсьто, нош кин ке адӟиськымон уж пӧрмытэ ке, туж визьмо туссэс пуктыса, киосынызы шонаса, дыльдыенызы пазяськыса, чеберысьтыз но умойысьтыз адӟыны тыршозы одӥг уродзэ но кырсьсэ гинэ. Тӥни котьку но асьмеос озьы: адямилы кимес сётэм интые, сое пыд уламы лёгиськом. Гажано удмуртъёсы! Асьмелы юн-юн кутӥськыса огмес огмы валаса улыны дышетсконо. Али ке ӧм, бере ум кыле меда? Эн возьдаське удмурт акценттылэсь. Тон чылк-чылк удмурт ке, малы одно ик ӟуч кадь луыны кулэ? Малы сыӵе дано актёръёс Джигарханян но Софико Чиаруэли бадӟым кивалтӥсьёс Шеварнадзе яке бигер Шалимов асьсэ акцентэнызы кырӟало но верало, пичи но уг возьдасько вераськемзылэсь, данъясько калыкенызы, анай кылынызы. Нош асьме дорын тросэзлэн тышкаськон кылыз, адӟемпотостэм карон кылыз - "вотяк". Тӥледыз кин ке та кылын ӵушканы турттӥз ке, вождэс эн поттэ со адямилы сое жаляны гинэ кулэ, историез тодэмтэысьтыз, дышетскемез но валанэз ӧжытысь яке со воксё но керӟег, висись адями. Ӟучъёс сыӵе муртэ "псих" шуо. Асьмелы кемалась куштоно ни кышкан но возьдаськон сяммес. Ӝоген ЪЪИ дауре выжомы ини. Нош ик берытско Ар-Серги доры. Мыным соин тодматскыны кылдӥз. Кыӵе узыр адями со: Слава тодэ удмурт (таиз солэн анай кылыз), бигер, пор (мари) кылэз, англизэ но, ӟучсэ но тодэ. Нош асьмеос (вождэс эн поттэ, лыдӟись эшъёсы, мон ваньды сярысь озьы уг шуиськы) не удмуртсэ рос- прос ум тодӥське, не ӟученыз шенгыль-пенгыль гинэ вераськиськом. Таӵе муртъёс ик ярато тышкаськон кыл пушказы "вотяк" кылэз пыртыны. Тӥни озьы Сергеевлэн сомында кыл тодэмез чик но нянь уг куры. Соин ик солэн котькытын эшъёсыз, соин ик со котькуд калыкен шедьтэ кыл, соин визьмо, соин ик сыӵе произведениос гожъя, соин ик солэн гожъяськон кылыз вольыт, лэчыт: прозаен но, поэзиен но туж зол сюлэме пырыны быгатэ. Тани мон лыдӟисько Михаил Федотовез, Владимир Романовез, Вячеслав Сергеевез, Владимир Котковез. Малы ке но ньыльназэс одӥг гож пыртӥ лэземе потэ. Макем мур философиез, психологиез соослэн кылбуръёсазы. Вань асьмелэн нылкышно кылбурчиосмы но, прозаен гожъясьёсмы но: Татьяна Чернова, Алла Кузнецова, Галина Романова, Серафима Благинина-Пушина но мукетъёсыз. Мон вератэк но ваньды тодӥськоды, туж кужмоесь али вакытысь та кышномуртъёсмы. Малы меда котькуд калык пӧлын пӧртэм дауръёс ӵоже, пиосмуртъёс философъёс, кылбурчиос, прозаикъёс кышномуртъёслэсь тросгес? Ведь нылкышноос визьтэмесь ӧвӧл. Оло, соин но: кышномурт ас понназ кырӟаса ветлэ, вань куректонзэ пушкысьтыз кырӟаса поттэ, кыла-бура. Сое со нокытчы но уг гожты, солэн со, ваньмыз солэн гинэ. Яке вань малпанзэ, куректонзэ кышномурт кинлы ке но вералоз. Нош пиосмурт - со ӧжыт вераськись, соин ик вань пуш "висёнзэ" поттэ, кагаз вылэ гожтыса. Оло нош Инмарлэн озьы сётэмез... В. Сергеевлэн та выллем кылбуръёсыз трос. Валэктон утча. Эх, кудпала меда берга улон питранмы? Малы асьмеос, адямиос, огмылы огмы шумпотыса улыны ум быгатӥське? Нош али мон сюмыкам шампанской лэзё но вань удмурт калык понна таӵе кылъёс вераса юо: "Та сюмыкме ӝутисько тӥ понна, удмуртъёсы! Умоесь сӥзён кылъёс туж трос, нош али сӥзё - Яратон. Кытын яратон - отын ӧвӧл кесяськон, жугиськон, виылон, висён, ог-огдэ курлан... Ма бен, яратон понна!" В. БИКУЗИНА, Ижевскын улӥсь. ВАНЬ УДМУРТЪЁСЛЭН ӦТЧАМЗЫ АЗЬЫН Сюлэмме вырӟытӥзы Алигес городысьтымы дэменчиос но "Удмурт Кенеш" огазеяськонэ пыриськисьёс асьсэлэсь кызьы ужамзэс эскерыны люкаськылӥзы администрацилэн пичи залаз. Милям Сарапуламы кадь ӟучомем городъёсын, сэрегъёсын удмуртлыкез ӝутыны туж но туж секыт. Зэм, азьвылъёсыз съездъёс азьын тросэз дэменчиос бурдъяськизы вал ини. Кам дурын удмурт вӧсь но ортчытъям, уно калыкез огазе люкаса. Ӟеч сямъёсмес выльысь улӟытонъя пӧртэм ӝытъёсы, пумиськонъёсы ветлӥмы. Та ужрадъёсмес радъяны мылысь-кыдысь юрттылӥзы, тодосчиос Альберт но Рево Разинъёс, ужбергатӥсь Владислав Якупов, журналист Кирилл Ломагин но мукетъёсыз. Ма, съездъёсын но милям делегациын ассэ зол, чебер возьматылӥз, шуысал. Таяз учыре кенешонмы сокем ик трос адями ӧз лыкты. Милямез сяна но пӧртэм ужрадъёс ортчизы угось люкаськылон нуналамы. Озьы ке но, пичи заламы ӟырдыт вераськон ӝутскиз. Сарапулысь удмуртъёс но, "Дэменысь", "Удмурт Кенешысь" лыктэм эшъёс но быдӟымесь ужпумъёс ӝутӥзы, огъя ужысьтымы юн висьытӥсь тырмымтэосмес шараязы, кужымъёсмес азьланяз кызьы огазеянъя ӟечесь ӵектонъёс сётӥзы. Мон тӧро луисько бере, аслам удысъёсысьтым трос шекъёсме адӟисько. Кытӥяз соосты огпол кутскыса гинэ уд палэнты. Котыр ласянь юрттэт кулэ. Нырысь ик ӝабыр-ӝабыр басьтӥськоно асьсэлы удмуртъёслы. Тырмоз ини шымырскыса, кепыраса улыны. Дэмен вазиськылоно кивалтӥсьёслы но. Милям, эсьмаса, люкаськылон интымы но ӧвӧл. Ӵем дыръя трос калыкен ортчытъяно ужрадъёслы коньдон но висъямзы уг поты. Ӧвӧл шуо но, сюлмаськонзы соин быре. Сарапулын туэ тулыс тани ортчизы Удмуртиысь прессалэн 100 ар тырмонэзлы сӥзем фестиваль. Отын ми асьме кылын гожъяськись журналистъёсын пумиськон-кенешон ортчытыны медӥськом вал. "Радиотехникаын" одӥг комнатазэс чылкак одӥг часлы висъязы но мылкыды сӧриськиз. Кытӥяз воксё паймоно: асьмелэн городамы ми шоры учко, палэнысьёс шоры кадь. Ярам коть, пӧртэм калыкъёслэн огазеяськонъёссылы культура, литература, вордскем кыл но ӟеч сямъёсмы пумысен кенешылыны нимысьтыз инты висъяны медо ини. Но городамы пӧртэм-пӧртэм обществоос вань бере, одӥг сэреге ваньмы тэромы меда? Кытӥяз ведь, шуак-дуак пумиськонъёс но, пичигес концертъёс но ортчытъяно луылэ. Люкаськем эшъёс но куноос мылкыдме ӝуатӥзы. Вань удмуртъёслэн вуоно ИИИ-тӥ (ВИ- тӥ) съездазы ми устоесь адямиосты делегатъёсты ӵектӥм. Районысь гуртъёсъя кенеш нимаз ортчоз на. Суйёсы-пыдъёсы юскисько вал кадь ини но, выльысь бурдъяськи дэмен ужмес вырӟытонэ. Кенешонамы туж ӟырдыт, кытӥяз жаляса но, кытӥяз пушнераса выллем но вераськизы "Удмурт Кенеш" огазеяськонлэн тӧроезлэсь ужзэ быдэсъясь Василий Андреевич Осипов, вице-президент Илья Михайлович Байметов. "Удмурт вӧсь" огазеяськонлэн тӧроез Владислав Аксямович Якупов. "Герд" бамез дасясь-нуись журналист Кирилл Егорович Ломагин но мукетъёсыз. Эшлыко мылкыдын ӧръяськиз администрациысь эшъёслэн но вераськемзы. Ӟечгес юрттом, шуо кадь. Озьыен, мыным аслым но, кивалтонамы, оргкомитетамы быръем эшъёслы но юнэсьгес кусыпъёс возёно кивалтэтысьтымы пӧртэм общественной но религиозной огазеяськонъёслэсь ужзэс радъясь специалистэнымы Ольга Игоревна Скобелеваен. Азьланяз кызьы ужанъя нимысьтыз план кутӥм. Матысь дыре ортчытыны ӧдъяськом бусыосысь но бакчаосысь шырыт ваньбурлы сӥзем пумиськон. Валамон ини: отын кырӟанъёс-эктонъёс гинэ уз улэ, (малы ке со понна весь пыкыло милемды), луозы музъемлы йыбырттон, уката шырытгес урожай басьтыны дышетскон, азьмынӥсьёсты данъян но мукетыз. Выльысь вераськом сюлэмшугмес кенжытъясь тырмымтэосмы пумысен но. Дэмен пусъём ужъёсмес азьланяз золгес ӧръянъя сюресъёс. Е. СПИРИДОНОВА, "Дэмен" но "Удмурт кенеш" огазеяськонэ пыриськемъёслэн тӧрозы. ЖУРНАЛИСТЪЁСЫН ПУМИСЬКОНЪЁС Тырмымтэос лачак Кыл кутӥсез ӧвӧл Озьы шуыны луоз республикаямы кылдэм югдур сярысь. Уксё отчы но, татчы но уг тырмы, со дыре ик, сӥс пыртӥ кадь, ныр ултӥмы миллиардъёсын кошке. Кытчы со пыре? Кун Кенешлэн Эскерон палатаезлэн кивалтӥсез М. И. Шишкин журналистъёс азьын туэ ужамзылы вакчияк йылпумъянъёс лэсьтӥз. - Кытчы гинэ эн йӧтскы, - котькытын - тырмымтэос, уката но коньдонэз уже кутонын, - пусйиз Михаил Иванович. - Малы озьы луэ? Малы Коньдонъя министерствомы пӧрмиз огъя бадӟым кассалы, уксё люкисьлы? Малы со уг эскеры финансъёслэсь кызьы но кытчы кутӥськемзэс? Ас интызэ татчыозь ӧз шедьты на, шуыны луоз, Экономикая министерстволы но. Республикалэн хозяйствоез нуналмысь нуналэ куашка, нош со понна кыл кутӥсь ёз чалмыт улэ. Эскерон палатае быръем депутатъёс кыксэ но та удысъёсты учкизы, тырмымтэосты тупатон вылысь, решение кутӥзы. Озьы ик вераны луоз Правительствоысь Нациосын ужанъя комитет сярысь. Татын но пӧртэм общественной организациосы трос гинэ коньдон висъяло, нош кытчы со мынэ, пайдаез вань-а - нокин чакласез ӧвӧл. Матысь дыре эскером Ваньбуръя комитетэз, республикаын приватизация ортчытонэз но солы йылпумъянъёсты. Пусйыны кулэ, Эскеронъя палата, со сярысь огпол гинэ ӧм гожъялэ ни газетамы но, бюджетэ но бюджетэ пырисьтэм коньдонлэсь кутӥськемзэ чакланъя бадӟым уж лэсьтӥз ни. Вань-а солэн пайдаез? Тӥни ужпум ма бордын. Жаляса верано, республикаысь прокуратурае ыстэм материалъёс толэзьёсын кыллё, пумаз-йылаз вуттӥсь соосты ӧвӧл. Калык ваньбурез суп-сап карисьёслы пумит ӝутоно уголовной ужъёс пытсасько, отын "янгышез" тырмыт ӧвӧл шуыса. - Эскерон палаталэн членъёсыныз та нуналъёсы гинэ пумиськылӥм Удмурт Республикалэн прокурореныз. Солы меӵак юан сётӥм: кин кыл кутоз шараям тырмымтэос понна? Кин юрттоз ас улон юртъерамы порядок тупатыны? Юанмы валэктонтэк кылиз. Прокурор чӧлскиз Россиын кылдэм огъя югдур но законъёслэн воштӥськемзы вылэ. Шонер пусйиз, дыр, депутат М. И. Шишкин: республикаысь югдурез тупатон понна, нырысь ик сюлмаськыны кулэ Правительство. Эскерон палата мылысь-кыдысь басьтӥськиз тырмымтэосты шараян борды, но таӵе зэмлык, огшоры калыклы сяна, нокинлы но кулэ вылымтэ. Оскон вань на, Правительство, отчы быръем муртъёс, дыр шедьтыса, одно ик та ужпум борды умой-умой кутскозы на шуыса. Эскерон палатаын кутэмын мукет но решение: Удмурт прокуратуралэн дӥсьтонлыкез уг ке но тырмы, куд-ог ужпумъёсъя вазиськыны дыр вуэмын ни Россиысь Генеральной прокуратурае. Таӵе вамыш малпаськытэк лэсьтэмын ӧвӧл. Зэмен но, сьӧраз ортчем валлы кортнэт мултэс уз луы. Л. ПЕРЕВОЗЧИКОВА. Азьпалан - "Удмуртская правда" Та нуналъёсы ваньмаз почтовой отделениосын мынэ на вуоно арлы газетъёслы но журналъёслы гожтӥськон. Кыӵе югдур Завьялово районын? Интыысь газетъёс пӧлысь нырысетӥ интыын мынэ "Удмуртская правда", кыкетӥ - "Удмурт дунне", собере - "Известия Удмуртской Республики". Лыдӟисьёс тросгес басьто радио- но телепрограммаен потӥсь номеръёсты. Л. ДМИТРИЕВА. Куазь Синоптикъёс верамъя, туннэ но ӵуказе шаермыя 12-15 градус шуныт луоз, уин - 2-60. Пильмаськоз, интыен-интыен зороз. Тӧл вошъяськоз, секундскын 7-8 метре пельтоз. Югытлэн пиез "Инвожо" - ымдуръёс вераса уг вутто на, нош шунытэз шокче ини. Соку ик бордамы ненег гужем бинялтӥське: пыдпыдэсэ юзмытак лякиськись возьёс, вайёс вылын капчияса, секытаса улӥсь тӧлъёс, куаръёс, бубылиос, сяськаос - котькуд паласен бордад лякиськыло кадь яратӥсь ымдуръёс. Со дыре ик олокытысь пурӟыса пото вегинъёс, кесяськыны ӧдъяло палэсмуртэн шурали, уйсы вазьылэ, уез таркаса, шунды аслэсьтыз котырзэ котыртэ, Медуза потэ аслаз уйпалысьтыз - шорад учкоз но йӧлы берытскоз. Заратустра вамыштэ тыл пушкысьтыз. "Мон, - шуэ со, - Югытлэн пиез, дорады Югыт но Шуныт вайыса лыктӥ..." Зэмзэ но, пыдэстэм ик та "Инвожо", со бордысен быдэс дуннее югыт сямен вӧлдӥськыса кошкыны луэ. Ӧвӧл, юнме тазьы уг нимаськы удмурт егитъёслэн иллюстрациосын литературно-художественной журналзы. "Инвожо" ӧз дугды на аслэсьтыз дуннезэ паськытатэмысь но муратэмысь... Со ялан утчаське, ялан выль но выль бусыосты гыре. Валамон ини, котькуд ар марзэ ке но аслэсьтыззэ возьматыны куре. Вуоно аре, ми малпамъя, "Инвожолы" эшшо но ӟырдытгес йӧтоз. Социологилэн берло эскеронъёсызъя, туала улонын туж но туж лэчытомыны кутскизы егитъёсын герӟаськем югдуръёс. Зэмзэ но, пионер но комсомол куашкамен, асьме обществомы егит адямилы саклыксэ ӧзгес висъялля ни. Ваньмы тодӥськомы, кызьы уло туала студентъёс, кызьы улонэ вамышто школаоссэс йылпумъясь пиналъёс, кызьы курадӟо егит семьяос, кызьы йыло йыружъёс, кызьы азэ наркомания, тамак кыскон, юон кызьы шурдыт будэ ужтэк кылён но уно пӧртэм мукетыз."Инвожо" уг малпа та шимес югдуръёсты гинэ возьматъяны, солэн азяз мукет ужпум сылэ: потон сюресъёсты утчаны. Котькуд номерамы ми возьматыны тыршомы та улонын йыромымтэ егитъёсты, пыромы соослэн малпанъёсазы, эскеромы соослэсь пуш дуннезэс, дунне шоры учконзэс. Соин валче 1998-тӥ арысен журнал бамъёсамы ӵемгес пумиськылыны кутскозы социологъёслэн, психологъёслэн, экономистъёслэн ужъёссы, азинскозы философилы сӥзем статьяос, мургес но мургес эскериськоз калыкмылэн историез, печатласькозы дунне вылысь калыкъёслэн мифъёсынызы, религиосынызы тодматӥсь материалъёс. Со сяна, журналлэн котькуд номерысьтыз лыдӟемды луоз быдэс дуннелы туж но туж тодмо луэм адямиосын герӟаськем супыльтонъёсты, керетонъёсты, озьы ик шонерзэ но. Бадӟым саклык висъямын луоз туала улонын "сюдӥсь" профессиослы. Со сярысь вералозы экономистъёс, юристъёс но асьсэос профессионалъёс. Нимысьтыз бамъёс басьтоз юрт котырын кулэ луись техника: компьютеръёс, автомобильёс, телевизоръёс но мукетыз. Культураез, искусствоез, литератураез яратӥсьёслы "Инвожо" кемалась усьтӥз ини аслэсьтыз бамъёссэ. Таяз аре но печатлаломы удмурт гожъяськисьёслэсь выль ужъёссэс. Азьвыл сямен ик лыдӟисьёсмы тодматскозы егит кылбурчиосын, егит прозаикъёсын, егит крезьгурчиосын но егит художникъёсын. Со сяна, литератураез гажасьёслы "Инвожо" туэ дэмлалоз "выль амалэн" гожъяськисьёслы сӥзем бамъёссэ. Татын печатласькозы этнофутуристъёслэн, авангардистъёслэн произведениоссы, экспериментъёссы но дунне шоры, литература шоры выль сямен учкылонъёссы. Оглом, "Инвожо" улэ на ай. Ялан тырше со лыдӟисеныз ӟечгес кусыпъёс тупатыны. Гожтӥське, эшъёс, яратоно юлтоштылы. Журналмылэн индексэз: 73973. Адресэз: 426051, Иж кар, Советской ульча, 1-тӥ юрт. Дуныз быдэс арлы - 38900 манет. Пётр ЗАХАРОВ, "Инвожо" журналлэн тӧроезлэн кивоштӥсез. Выль книга "Русская книга" издательство поттӥз В. М. Ковалевлэсь но П. П. Могильныйлэсь "Традиции, обычаи и блюда русской кухни" книгазэз. Татысь шедьтыны луоз ӟуч пӧраськонлэсь аспӧртэмлыкъёссэ, кудъёсыз кемалась вунэмын. Мар сиизы та выжыос Александр Пушкин, Александр Невский но Петр И улон вакытэ? Книга валэктоз. Ӟуч пельнянь туннэ быдэс дуннеын данъяське. Нош кытысь со потӥз, кӧня пӧртэм сое пӧраны луоно? Тазэ но книга валэктоз. Ф. КРАВЦОВ. Ялӥське радиоконкурс Шаермылэн улон-вылонэзлы сӥзьыса, озьы ик 1997-тӥ арез Россилэн президентэзлэн Б. Н. Ельцинлэн указэзъя Тупаса улонлы сӥзем арен лыдъяса, но Удмуртилэн автономия басьтэмез дырысен 77 ар тырмонэн валче Удмурт Республикаысь Печатья но иворъёсты вӧлмытонъя министерство но Журналистъёслэн союззы яло "Удмуртия - тонэныд улӥсько!" нимаськись радиоконкурс. Конкурслэн условиосыз: татчы пыриськыны быгато Удмуртиысь вань радиокомпаниос, районъёсысь, городъёсысь радиовещаниослэн редакциоссы. Конкурсэ лэзёно ужъёслэн, Удмуртия сярысь передачаослэн дырзы 15 минутлэсь кема медаз кыстӥське но туэ 10 ноябрёзь эфирын чузъяськемын мед луозы ни. Дась материалъёсты (аудиозаписез) ыстоно туэ 20 ноябрёзь таӵе адресъя: 426057, Ижевск, Пастухов ульча, 13, 205 кабинет. Печатья но иворъёсты вӧлмытонъя министерствое. Вормисъёс понна пусъемын коньдон премиос: Удмурт Республикаысь радиокомпаниос интыосысь радиовещаниос И инты 1,0 млн. манет 0,6 млн. манет ИИ инты 0,7 млн. манет 0,4 млн. манет ИИИ инты 0,5 млн. манет 0,3 млн. манет поощрительной премиос 0,2 млн. манет 0,1 млн. манет Со сяна, нимысьтыз кузьымъёс дасяны быгатозы республикаысь предприятиос, учреждениос но общественной организациос. Премиосты сётонэз чаклалоз конкурслэн республиканской жюриез. Юанъёсын вазиськыны луоз 78-73-34, 78-28-79 телефонъёсъя. Удмурт книгалы - 150 Вашкала удмурт калык легендаослы но преданиослы осконо ке, удмуртъёслэн асьсэ кылын книгазы Камдор шаере ӟучъёс лыктэмлэсь азьло ик вылэм ини, пе. Озьы-а со, ӧвӧл-а - али ӝотак номыре вераны уг луы ни. Та пуымсен уго археологъёс но шугъясько ай. Вуж-вуж гуӵин бервылъёсысь но шайёсысь гожмам макеос трос гинэ шедьтэмын ке но, туй яке мукет сыӵеос вылэ гожмамъёс-гожъямъёс соослэн син шоразы ӧз йӧтылэ на, пе. Та дыре янгышаны кепыратэк вераны луэ асьмелы матысь вакыт пумысен гинэ: туала удмурт куара пусъёс - букваос-нырысетӥзэ тодмо луизы Казаньысь ӟуч тодосчилэн- миссионерлэн Вениамин Пуцек-Григоровичлэн 1775 арын Санкт-Петербургын печатлам "Сочинения, принадлежащия к грамматике вотского языка" книгаез пыр. Отын 1300- лэсь трос удмурт кыл печатламын ке но, сое нырысетӥез удмурт книга шуыны уг луы. Малы ке шуоно, со быдэсак гожтэмын ӟуч кылын но ӟуч кылэз тодӥсь-валасьёс понна. Удмурт кылын нимаз книгаос вордӥськизы данаклы берлогес - 1847 арын. Соку огдыре поттэмын вал кык удмурт книга. Кыксылы ик ӟуч ним сётэмын. Тани тазьы: "Господа нашего Иисуса Христа евангелие от св. евангелиста Матфея на русском и вотякском языках, Сарапульского наречия" но "Господа нашего Иисуса Христа евангелия от св. евангелистов Матфея и Марка на русском и вотякском языках, Глазовского наречия". Та книгаос кие шумпотыса кутымон чебер печатламын. Нырысетӥез - 234 бамъем, кыкетӥез - 369 бамъем. Поттэм соосты Казаньысь Императорской университетлэн типографиез. Адлександр Шутовлэн но мукет тодосчиослэн гожъямъёссыя, евангелиосты удмурт кылын поттыны берыктӥллям Иван Анисимов (Елабуга уездысь) но Афанасий Шкляев (Глазов уездысь). Соосты быдэ вуттонэ (коньдон ласянь но, оло) пыриськем на Иван Волков - ас вакытаз туж сӥё-дано, визьбуро но выжы-кумызэ вань лулыныз-сюлэмыныз зэмзэ ик гажась, яратӥсь но тодмолэсь тодмо удмурт купец, Глазов карлэн со дыре тӧроез. Ӵапак со, кин дорын, Екатеринбург пала 1837 арын мыныкузы, одӥг уй но нунал кунокуаськизы вуоно император Александр ИИ но ӟуч кылбурчи Василий Жуковский. 1847 арын Казаньын удмурт кылэ берыктыса поттэм евангелиос асьме калыклэн улоназ ӵыжак выль удыс мытӥзы. Удмурт книга поттонын кичӧлтон луэмен ӵош соос луонлык кылдытӥзы удмуртъёслэсь вераськетъёссэс одӥг ӧре валчеяса огазеяны. Соосъя уго валаны луэ ни вал: удмурт вераськетъёс, комиослэн, поръёслэн яке мордваослэн кадь, ог-огзылэсь укыр висъяськемын ӧвӧл. Асьме даурлэн кызетӥ аръёсаз таӵе малпанэ зэмзэ ик вуизы тросэз удмурт писательёс, журналистъёс, дышетон удысын ужасьёс но удмурт кылъя тодосчиос. Гожъяськон кылъя удмурт калыкез кык люкетъем карыса пилёнлы пумит соку нимысьтыз трос но кужмо нюръяськиз "Гудыри" газетлэн редакторез Дмитрий Корепанов (Кедра Митрей). 1847 арын удмурт кылын поттэм евангелиос Россиысь Наукаосъя академиысь академиклы Фердинанд Видеманлы луонлык сётӥзы удмурт кылъя зэмос-зэмос научной грамматика кылдытыны. Солэн та ужез нимаз изданиен немец кылын печатламын вал Ревельын (али Таллинн) 1851 арын. Ӟечлыкезъя сое Вениамин Пуцек-Григоровичлэн грамматикаеныз ӵошатыны ик уг луы ни. Нош асьмеос - удмуртъёс - малы йӧнала тодытэк улӥмы удмурт кылын та сӥё-дано изданиос сярысь? Вылӥысен юри сыӵе югдур кылдытэмен. Ӵапак вылӥ кивалтӥсьёсмы сэрен ик соос ог 70-80 арлы ӵушемын-куштэмын вал удмурт культуралэн но, удмурт литературной кыллэн но историиысьтызы. Соосын сэрен ик Бадӟым советской энциклопедие но удмуртъёслэн Октябрь революция дорозь асьсэ кылын гожъяськонзы ӧй вал шуыса гожтэмын. Соосын сэрен ик чеберлыко литературамы но кема-кема ӵожелы пыртэмын вал "пичи арлыдо" ("младописьменной") литератураос пӧлы. Али тани, кызьызэ умой-умой тодысагес чакласа-малпаса ини, ӝож мылкыдын но, шумпотыса но шуиськомы: нырысетӥ удмурт книгаос потэмлы туэ 150 ар тарме. Удмурт письменностьлэсь 200 арессэ кадь ик сое но яра вылэм быдэс элькунамы йӧн-йӧн пусйыны. Ум вунэтэ: книгаосты дасялэ но калык пӧлы вӧлмытонэ асьсэос но удмуртъёс меӵак пыриськизы ини. Ӵапак та арын Казаньын ик удмуртъёс понна печатламын вал на эшшо кык книга: "Азбука, составленная из российских церковной и гражданской печати букв для обучения вотских детей чтению на их наречии" но "Азбука, составленная из российских церковной и гражданской печати букв для обучения на их наречии (по глазовскому и сарапульскому)". Нырысетӥзэ дасям Григорий Решетников, кыкетӥзэ - Иван Анисимов. Татын верам ньыль книга туж-туж ӧжыт экземплярен гинэ кылемын на. Ваньмыз адӟыны мылкыд карисьёс соосты киязы кутыса учкыны табере уз ни быгатэ. Соин ик соослэсь тусъёссэс та гожтэменым ӵош газет бамын печатланы ӵектэме потӥз. Тазьы малпамме Иж карысь Мударис Менладшинлы верай но, со мынэсьтым куронме шумпотыса йылаз-пумаз вуттӥз. Петр ПОЗДЕЕВ, Удмуртиысь Писательёслэн союзысьтызы правленилэн членэз. Тазалыклы - зарезь доры Туала улонлэн вань умой палыз но: та дырозь Удмуртиысь сомында пиналъёс ноку но лымшор палан ӧз шутэтскылэ. Али гужемлы быдэ вагонэн-вагонэн келяськом соосты Сьӧд зарезь дорысь пансионатъёсы но санаторийёсы, ужан но шутэтскон лагерьёсы. Огъёсыз мыно путёвкалэн дунызлэсь ог люкетсэ тырыса, мукетъёсыз - анай-атайтэк кылемъёс, секыт висёнъёсын курадӟисьёс - дунтэк. Сыӵе луонлык кылдӥз Удмурт Республикаысь правительстволэн, калыкез дышетонъя но Эмъянъя министерствоослэн сюлмаськеменызы. Нимысьтыз вераны кулэ дышетскись пиналъёсын ужанъя республиканской центр (РЦУМ) сярысь. Солэн кивалтӥсез Любовь Михайловна Ракова - жадёнэз валасьтэм адями. Кӧня лэсьтэмын но лэсьтэ та кышномурт, нылпиосмылэсь тазалыксэс юнматон но ваньмон дырзэс радъян понна! Краснодар крае, Сьӧд зарезь дуре сюрес лёгон но - Любовь Михайловналэн ужез, шутэтсконэз адӟытэк бызьылэмез. Туэ гужем ӵоже гинэ Удмуртиысь нылъёс но пиос понна ӧсъёссэс усьтӥзы Анапаысь "Надежда", "Мечта", "Ракета" санаторийёс, "Турист" лагерь но мукетъёсыз. "Мечта" санаторий сярысь "Удмурт дунне" газет гожъяз ни 5 августэ потэм номераз. Зэмен но, татчы шедьылӥзы, дыр, шудоосыз пӧлысь шудоосыз пиналъёсмы: ваньмыз лэсьтэмын вал, соосты ӟечгес йӧнатон вылысь. Туннэ вераме потэ "Турист" лагерь сярысь: соин кусып тупатэмын 1993 арысен. Али гужемлы быдэ татын шутэтско 400-лэсь ятыр Удмуртиысь дышетскисьёс. Котькудӥз смена кыстӥське 18 нунал. Интыяськемын 74 номеро профтехучилищелэн юртаз, Анапа городлэн шораз. Зарезь дорозь пыдын мынон-ветлонэз - 10 минут. Дисциплиназы - зэмос лагерьын кадь. Капкаетӥ пырон дорын пумитало "часовойёс" - дежурнойёс. Лыктэм муртлэсь одно ик нимтулзэ гожтыса, нуо лагерьлэн кивалтӥсез доры. Лариса Вячесавовна Дегтярь - РЦУМ-ын ужась, "Туристлэн" начальникез, зарезь дорын воксё воштӥськем: егитомем. Соку ик тодматӥз вожатойёсын но воспитательёсын, улон-вылонэнызы. Пиналъёс вожмаськыса верало экскурсиосы ветлэмзы, нуналлы быдэ пыласькемзы, ческыт сюдэмзы сярысь. Тросэз соос - Ижевскысь. Вань гуртъёсысь но: Елена Лебедева но Инга Нуриева - Завьялово районысь, Павел Лекомцев - Уваысь, Татьяна Красильникова но Вячеслав Храмов - Пичи Пургаысь... Шунды шорын пыжыса, чеберскыса но вуиллям ни. Мылкыдзы - лӧптэмын! Вал, пе, пӧламы туж мӧзмисьёсыз но. "Огез пимы уйёсы ялан бӧрдэ, мумы-бубыосызлэсь палэнэ потамтэ мурт, арня пала курадӟиз. Али дышиз ни, котьма борды мыло-кыдо басьтӥське", - шумпотэмзэ вера Ирина Юрьевна Дымова, пиналъёслэсь шутэтсконзэс радъясь дышетӥсь. - Ӝытлы быдэ 22 часын милям "политбюромы" ортче, - ивортэ Ижевскысь муспотон нылаш Марина Полевая. - Отын нунал ӵоже ужаммылы йылпумъян лэсьтӥськом. Котькудӥз "советник" вера отрядэзлэсь мылкыдзэ: маиз кельшиз, маиз урод вал. Асьмеос ик дэмланъёс сётӥськом. Лагерь кӧлыны бер выдэ: 22 час 30 минутэ. Воспитательёс - уйшор котырын гинэ. Соослэн - асьсэлэн "политбюрозы". Куд-ог дыръя кенешонзы часлэсь но ятыр кыстӥське: вань ма сярысь вераськыны, уката но экскурсиосы потам бере. Сюресъёссы - трос. Пианлъёслы тужгес но яра дельфинарий, нюлэс-заповедник. Пичиослэн отысь бертэмзы но уг поты. Плевако, Шуго вулканъёс, Азовской море, Новороссийск..., Водопадэз ас синъёсыныд адӟон, солэн огазеяськыса васькись юг-юг тӧдьы шукы пӧлаз пыласькон вань улытозядлы - вунонтэм! Бадӟым классъёсын дышетскисьёслы яра Тамане вуылон. Самой татын, инмарен вунэтэм но куштэм интыын, вордскизы тодмо ӟуч поэтлэн Михаил Лермонтовлэн чуръёсыз, тросэз литературной геройёсыз. Лагерьлэсь мылкыдзэ ялан "бугыръяса" возе Ирина Юрьевна Дымова: вулканлэсь но вулкан! Ма но уз малпа, кытчы но ӝыт куспын уз вутты "туристъёсты". Дас ар ӵоже "Орлёнок" Всероссийской пионерской лагерьын вожатойын ужамез соку ик шӧдӥське. Туннэ - КВН, ӵуказе "Дуннеез котыръян", "Журналистлэн клубез", "Талантъёсты утчан"... Одӥг нунал но, одӥг ӝыт но тэк пукыны маза уз сёты. Кызьы татын мӧзмод на? Ноку но сцена вылэ потамтэ пиос экто-кырӟало, кылбурамтэ муртъёс ас гожтэм чуръёсынызы паймыто. Лагерьлэн кивалтӥсез юнме шорысь уг данъяськы ужасьёсыныз. Зэмен но, дышетӥсьёс бордысь тросэз потэ: кытын ӟеч мылкыд - отын тазалык. Улон интызы "Туристын" ӟоскыт, санаториен уд ӵошаты. Кӧлан кроватьёссы пуктылэмын дышетскон классъёсы - 10-14, куд-огаз солэсь но ятыр. Пӧсь ву ӧвӧл, мисьтаськыны городысь мунчое ветло. Со понна котькудӥзлы тыроно 5 сюрс манет (путёвка дунэз уг пыры). Огъя вераса, таиз ласянь югдур ушъяськымон ӧвӧл. Матысь дыре тупатыны луоз-а? Юанэным вазиськи училищелэн дректорезлы В. Д. Морозовлы. Владимир Дмитриевич уг ваты: Ижевскен огъя кыл шедьтэмзы коллективзылы кельше, со чотын люкаське коньдон, юнма материальной базазы. "Турист" пыр гужем ӵоже гинэ училищелэн кассаез трос миллионлы узырме. Озьы ке но, душ пуктон яке ки миськонъёсты, туалетэз шуныт азе воштон сярысь вераськон ӧвӧл. Коньдон, пе, трос кулэ. Пиналъёс та тырмымтэосты, оло, уг но шӧдо - зарезь доры вуэмзы, лӧптэм мылкыдзы ваньзэ соге. Озьы ке но, соос мед шутэтскозы вылэм калык радъя. Дыр воштӥськемъя, куронъёс но уго азьвылэзлэсь пӧртэмгес луо. "Турист" ужаны быгатэ. Нылъёсмы, пиосмы татысь выль кужымен, выль тодон- валанъёсын берто. Сюдо умой, ческыт. Менюын нуналлы быдэ - сокъёс, емышъёс но пӧртэм пумо ческыт сиёнъёс. Анапае вуылыса, одно ик пыраме потӥз на "Надежда" санаторие. Республикаысьтымы Калыкез дышетонъя министерствоын солы вылӥ дунъет сётӥзы. Кылем арын отын шутэтскем пиналъёсмы но туж ӟеч мылкыдын бертӥзы, умой-умой эмъяськыса, чеберскыса. Вераськиськомы санаторийысь медициная службалэн кивалтӥсеныз М. А. Бадалянэн. - Пиналъёс но анайёс понна санаториймы ужа 1973 арысен. Отчыозь, 1938 арысен кутскыса, со эмъяз калыкез дышетон удысын ужасьёсты. Усьтэмын вал, Надежда Константиновна Крупская кичӧлтэмен. Дорамы али шутэтско Челябинск, Калуга, Курск, Брянск палась нылъёс но пиос - радиация улэ шедемъёс. Соослы путёвка дунтэк висъяське. Тазалыксы туж ляб. Умой-умой бурмон понна, ичизэ арысь аре куинь пол эмъяськыны кулэ, куд-огезлы - талэсь но ятыр. Маин висё, кыӵе тазалыкен вуо Анапае Удмуртиысь нылпиос? Магда Араратовна нырысьёсыз пӧлын вераз кӧтпуш висёнъёсты, соос бере мыно ку, лы висёнъёс, шокан органъёс. Ялан йыло диабетэн курадӟисьёс. - Ижевскысь вуэм пиналъёсъя умой адске: кыӵе вуэз соос юо, кыӵе омырен шокало. Вылӥ верам областьёсысь лыктэмъёсыныз ӵошатэме уг ке но поты, пӧртэмлыкез сокем ик ӧвӧл: нылпиостылэн, уката но городысь лыктӥсьёсызлэн, висёнъёссы трос. Умой-умой эмъяны кулэ. "Надежда" санаторий интыяськемын городлэн шораз, зарезьлэсь кыдёкын ик ӧвӧл. Ужа быдэс ар ӵоже. Гужем одӥг инты но буш уг кылы. Толалтэ ӝыныез гинэ тырме, путёвкалэн дуныз 6 миллионысь 3 миллионозь усе ке но. Эмъяло туала куронъёсъя. Пайдаез вань. Огез жаль: коньдонлы ёрмыса, таӵе интыос 7-8 толэзьзэ тэк сыло. Анапаын ог 200 здравницаос но пансионатъёс. Азьвыл аръёсы куамынэз тол но гужем, вис карытэк, калыкез эмъяз. Али - ньыль-витез гинэ. ...Нош лымшор пала вуылэм пиналъёсмы гуртазы берто воксё мукет мылкыдын: выль кужымен, йӧнатскыса, чеберскыса. Веранме но йылпумъяло соослэн гожтэм чуръёсынызы. "Турист" лагерь сярысь малпанэ отчы мынытозям таӵе вал: пумитало выль эшъёсме, туж трос пыласько, шунды шорын кыллё. Озьы ик луиз. Ваньмыз татын умой: шуныт зарезь, пӧсь нуналъёс, емышъёс. Дышетӥсьёсмы кыӵе сюлмасько ми понна! Маиз уг кельшы? Ӵукна вазь сайкато, нош нуназе шорын кӧлыны косо. Марина Полевая, 15 арес. Ижевск. "Кыӵе чебер, кыӵе шулдыр вылэм Анапа! Адямиосыз но ӟеч сямоесь. Пыласькон интымы утялтэмын, котьку ӝикыт. "Туристын" нокинлы но мӧзмыны уз сётэ. Мыным но 5-тӥ отрядысь пиналъёслы тужгес но кельшо конкурсъёс. Кӧня серекъям, рекордсменъёслы сӥзем шоуэз учкыса! Отчы пыриськись мурт ас сямъёссэ мыддорин берыктыса возьматыны выриз. Тумошо ик пӧрме вылэм. Анапаен, лагерен люкиськеме уг поты. Мон соослэсь табере быдэс ар мӧзмо. Вуоно арын нош ик татчы лыктысал. Полина Суздальцева, 14 арес. Ижевск. Людмила Перевозчикова. Зарезь дорын усто! Барханъёс-пляжъёс нылпиостэк мӧзмыт кылизы ни. Армянъёс, ӟучъёс, белоруссъёс, огазеяське? Армениысь "Народная инициатива" люказ 1 миллион 22 сюрс подписьёс, республиказэс Россия но Белоруссия куспын огазеянэ пыртон понна. Та ужрадэ пыриськизы Армениысь вань партиос но движениос. Шариат суд Чечняын янгыш адямиез калык азьын виён (публичная казнь) улонэ пыӵаз. Таӵе сям паськыт вӧлмемын исламез гажась кунъёсын. Россиысь огез спецслужба ивортэмъя, таяз арын Саудовской Аравиын, кылсярысь, наркотикен 80-лэсь уно вузкарисьёс таӵе амалэн улонысь кошкизы. Алигес Эр- Рияд городын 300 грамм героин ваемез понна пакистанецлэсь йырзэ коралтӥзы. 1995 арын Чечняысь нырысетӥ шариат судъёслэсь тыршемзэс адӟем араб журналистъёс шуэрскизы вал, угось судъёс быгатытэк, янгышъёсын ужазы. Тюрьмаын яратон Бишкекысь 29 аресъем Михаил Якушев 12 арлы пытсэт сьӧры келямын вал уно лушкаськемез понна. Киргизиысь Кышкытлыклэсь утиськонъя министерстволэн СИЗО-яз но эрикен ӧз люкиськы. Газет ялонъёс пыр туганзэ тюрьмае пумиськылонъёсы ӧтьылӥз. Амало воргорон кышномуртлы "мон зэк ӧвӧл, мон Морис Лунгреш следователь" шуиз. "Яратонзы" кыстӥськытозь, со юрттӥз туганэзлэн тодмоосыз вылэ ӝутэм уголовной ужез пытсаны. Тыршемез понна 10 сюрс доллар куриз. Министерствоын ужасьлэсь "мерседес" басьтӥз. Камеразэ аудиовидеотехникаен тырмытӥз, СИЗО-ысь поталляса, город кузя выль машинаеныз ворттылӥз. Та учыр алигес гинэ судын шараямын. Якушевлы эшшо дас ар сётэмын. Министерствоын ужасьёслэн янгыш луэмзы пумысен эскерон ортчытэмын луоз. "Аргументы и факты - новости". Кино Туэ вань удысъёс чуто. Солэн мугъёсыз данак. Одӥг ласянь, улон-вылонмы шуак уродмиз. Мукет ласянь, шугадӟонъёсты туж ичиез ворме. Кино - чибор уйвӧт. Сыӵе ик-а выжыкыл солэн туннэ нуналыз? Редакциямы вуылыкуз, та удыслэн шумпотонъёсыз но кайгуосыз сярысь мадиз Удмурт кинофондлэн валтӥсь тӧроез Александр Васяев. Огъя суред кылдытыса, кузё пусйиз: - Кино учкись шуак кулэсмиз. 1990-тӥ арын выль фильмъёсын тодматскыны быгатӥз ай дас укмыс миллион адями. Городын улӥсь пиналъёс пӧлысь - кык сю кызь тямыс сюрсэз, гуртысь нылпиос пӧлысь - сю тямыстон куать сюрсэз. Туэ таӵе шумпотон басьтӥз ваньмыз пӧлысь куать дасмосэз гинэ. Солы паймонэз ӧвӧл: калык огак куанермиз, ужазинлык усиз. Со сяна, вань музон шутэтскон амалъёс: видео, телевизор, эшшо маке. Азьвыл кинотеатръёс гинэ вал ук. Чутрак воштӥськиз учкисьмылэн арлыдыз. Шоро-куспо аресъемъёс доразы пуко. Егитъёс кожало кузпалъяськыкузы гинэ. Покчи нунокъёссэс кутыса, али ми доры тросгес лыкто мӧйыос. Дун соослэсь весь ум басьтӥське. Кино ӟеч азинске Пичи Пурга, Можга, Сарапул, Яр, Глазов ёросъёсын. Уродгес - гондыр кушын - Дэбесын, Эгра (Игра), Камбарка районъёсын. Городъёс пӧлысь тужгес курадӟе Сарапул. Огласянь, шумпотоно: вашкала вузчиослэн каразы, Алексей Коромысловлэн цирказ, 1897-тӥ арын 4-тӥ июне нырысьсэ возьматэмын кино. Кылдытэмын "Сарапул но со котырысь интыос" нырысетӥ удмурт фильм. 1990-тӥ арын март толэзе адӟимы сое. 2090-тӥ арын сю ар тырмоз. Удмурт фильм кельтэмын городысь синпель юртэ. Мукет ласянь, абдрано: городын куинь кинотеатр - куинез ик пытсамын. Азьвыл лыдпусъёс таӵеесь вал: выль фильмъёс пӧлысь одӥгез дасямын дорамы, кыкез - кун сьӧрын. Россиын кинематография азинскыны ӧдъямен, туэ югдур ӵошкалоз: выль ужъёс пӧлысь кыкез луоз дорамы дасямез, кыкез - кун сьӧрысь. Та удыс сярысь дырын-дырын сюлмаськылэ Удмурт Кивалтэт но. Калык жадиз ни Америкаысь фильмъёслэсь. Мыным тросгес яра классика, калык кино. Выльёсыз пӧлысь данакез сӥземын яратонлы, гурт улон-вылонлы, осконлы. "Не валяй дурака" - ӵапак сыӵе. Маде музъем ужасьлэн сюлмаськонъёсыз сярысь. Ӟеч учырлы коньдонме ӧй жаля - дас миллион сётӥ. "Колечко золотое", "Букет алых роз" кылдытэмын Антон Чеховлэн ужъёсызъя. Ум вунэтӥське покчиосты но: кунмы пиналъёс сярысь тросгес сюлмаське. Шугадӟонъёстэк уг луы. Туэ милям вань кулэяськонъёсмы сыло одӥг миллиард сизьым сю манет. Нош басьтэмын ай толэзьлы быдэ чаклам куатьтон процентэз гинэ. Соин валче ичи выль фильмъёс, ӝега уждун. Со трос ик ӧвӧл. Плёнкаез эскерись-тупатъясь толэзяз басьтэ кык сю - куинь сю сюрс манет, киномеханик - кык сю витьтон - куинь сю витьтон сюрс. Видеофильмъёс пӧлысь басьтӥськом классикалы сӥземъёссэ. Та амал дуногес. Вузчиос одӥг кассетазэ ӵекто кызь вить - куамын сюрсэн. Ми басьтӥськомы ньыльдон вить - витьтон сюрсэн: дун тыриськомы на лицензия понна. Выль ёзмы кылдӥз кык ар талэсь азьвыл. Азьвыл со киновидеообъединение нимаськиз. Таиз чидаз сизьым ар: шаерысьтымы кинокомитет отӥяз герӟаськиз кинопрокатъя Удмурт контораен. Киновидеообъединение огазеялляз киносетьлэсь кивалтӥсьёссэ, кинотеатръёсты, киноез бергатонъя ёзъёсты. Али кинофондэ пыро кинопрокатлэн Можгалась, Глазовысь люкетъёсыз, ачиз огазеяськон. Вань кинотеатръёсын, киносетьлэн дирекциеныз, гуртысь киночиосын кивалто городъёслэн но ёросъёслэн тӧрооссы. Ми быгатӥськомы соослы котьмаин юрттыны. Коньдон ужпумъёсъя министерство пыр - уксёен но. Оглом та удыс бадӟым ыштонъёс вае. Луиз ке коньдон, луоз кино. Луиз ке кино, луоз учкись. Мукет улысвылъёсын секытгес. Марий Элын уже куинетӥ арзэ куто вужзэ гинэ. Но учкись уг кулэсмы. Шоканы сётӥзы на ке, ми кык-куинь арзэ чидалом ай. Мылысь-кыдысь сюлмаськиськомы музъем ужась сярысь: гуртын улӥсь уг бырйиськы - ваньзэ басьтэ. Городын улӥсь ӧжытак йӧнъяськисьгес. - Ижысь кинотеатръёсы калык ветлэ-а? - Улон-вылон мыддоринскемен, соос пӧрмизы шутэтскон интыослы. "Удмуртия" кинотеатр али тросгес выре семья ужпумъёсын, "Аврора" луиз киновидеоцентр, "Спартак" - бигеръёслэн, "Италмас" чылкак ворсаськиз, "Колоссэз" черк басьтӥз. Одӥг кылын вераса, кузёос трос луизы. Ӟечгес югдур Ижлы матысь Дэригуртын (Завьяловоын). Татысь кинотеатр быдэсак сётэмын ёрос кивалтэтысь лулчеберлыкъя ёз кие. Зэм, кино татын весь уг возьмато. Коньдон ӧвӧлэн, гужем вис луиз. Арлэн та вакытаз музъем ужъёс вадьсаськемен, тазьы ик уло-выло эграос, камбаркаос, дэбесъёс. - Дуно-а туэ билетъёс? - Удмурт Кивалтэт сюлмаськемен, городын со ласянь эрик. Гуртын дунъёс таӵеесь: дышетскисьтэм пиналъёс понна - кык сю манет, дышетскись нылпиос понна - вить сю манет, арлыдоос понна - сюрс. - Городысь кинотеатръёс асьсэлы асьсэос быдэсак кузё ук? - Шонер пусйиськоды. Тужгес узыръёсыз - "Россия", "Октябрь", "Дружба" - ӵукнаосы возьматъяло пичиятэм дунын фильмъёс. Яке - чылкак дунтэк. - Кыӵе югдур школаын дышетскисьёс понна чаклам ужъёсын? - Вакыт воштӥськемен, соос но вужмизы. Вылаз ик, Калыкез дышетонъя министерстволэн фильмотекаосыз аслаз: кулэзэ ачиз басьтэ. Дышетон удысэн герӟаськем фильмъёс дорамы уг ик вуо: туж дуноесь. Сое уг возьматы шат таӵе учыр? Удмурт Элькунлы, солэн ортчем сюресэзлы сӥзем кинолэн одӥг люкетэз сылэ миллион манет. - Кытын дышето киномеханике? - Ижысь дас сизьыметӥ училищеын. Туэ мылкыд карись ичи. Тужгес - сьӧрлось: ёросъёсын киномеханикъёс тырмыт. - Видеоамал вӧлме-а? - Та чеберлыкез тужгес ярато Можгалась "Спутник", Глазовысь "Свобода", Ижысь - "Аврора", "Дружба", музонъёсыз. Ичи кутӥськемезлэн мугез со бордын: табышлэн сизьымдон процентэз кошке выт тыронэ. Оглом кино дуноялоз. Райцентръёс, городъёс уз куанерме. Секытгес луоз гуртъёслы. Улӥсез сюрслэсь трос ке, кино кылёз. Солэсь ичи ке - видео шумпоттоз. - Ма вите азьпалан? - Али быдэс дунне лэсьтэ трос висэто театръёс. Отын вань витьтон, кык сю сюрс муртлы чаклам кинозал, ресторан, буфет, нылпиослы сэрег. Одӥг кылын - мультиплекс. Москваын сыӵе юрт лэсьтӥзы ни. Ӵук билетлэн дуныз - куамын сюрс, ӝыт билетлэн - тямыстон сюрс. Октябрь толэзе таӵе ик кинодворец кылдоз Санкт-Петербургын. Матысь дыре - Новосибирскын, Екатеринбургын. Оглом - городын, улӥсез миллионлэсь трос ке. Ижын улӥсьёсты таӵе шумпотон уг вить ай. Но татын кылдытыны малпаськом Россиысь кинематографилэсь юртсэ. Сое валче дасялозы Россия Федерациысь Кинематографияя комитет, городысь кузёос, Удмурткинофонд но кинотеатръёс. - Удмурт кылэ берыктэм фильмъёс уло-а? Кыӵе шока "Алангасарлэн вужерез"? - "Алангасарлэсь вужерзэ" учкись оглом ӟеч пумитаз (фондамы удмурт кылын но, ӟуч кылын но гожтэмез вань). Усто кузьым луиз Москваын улӥсьёслы. Возьматъяз телевидение. Удмурт кылэ берыктэм фильмъёсты ичи басьто. Тужгес кулэясько удмурт ёросъёс. Туэ мылысь- кыдысь учко пургаос. Азьвыл тунсыкъяськылӥзы дэбесъёс, юкаменскъёс. - Азьвыл озьы вал: экранэ вуттон азьын котькуд киноужез нырысь ик эскерылӥзы нимысьтыз адямиос. Али кин ке алэ-а? - Туэ котьмалы эрик. Зэм, вал сыӵе вакыт: партилэн обкомысьтыз адями ваньзэ син улаз возиз. Пичи гинэ янгышед понна но мултэс пӧсятъязы. Куд-огезлэн нокыӵе изъянэз ӧй вал. Тодӥсько на: кун сьӧрысь нырысьсэ вуиз сыӵе фильм. "Рояль сярысь мадёс" ӟеч кино вал, но экранлэсь нырысь-валысь алӥзы. Нош та уж вормиз вал ай Канн фестивальын но. - Быдэс дуннелы тодмо фильмъёсты учкись уг вала. Москваысен пумиськылыны кылдӥз таӵе учырен: экранын ворекъя быдӟым итальян актёр Федерико Феллини, нош калык малы ке кошке?.. - Учкись театре нырысь ик шутэтскыны лыктэ. Одӥгезлы яра яратон, мукетызлы - жугиськон, куинетӥезлы - сьӧрлось дунне. Нош Феллини адями кусыпъёсты бугыръя ук. Егитъёслэн но ужась калыклэн малпаськемзы уг поты. Соослы мед луоз чупаськон, ыбылӥськон, лушкаськон... Кира Муратоваез но, Александр Сокуровез но валаны шуг. Соослэн ужъёссы чакламын киноез дунъясьёс, пресса, йырын-визьмын ужасьёс понна. х х х Секыт туннэ кинолы. Секыт учкисьлы. Но суй-пыдмес юскыны уг яра. Шугадӟонъёсты палэнтоно, саесъёсмес пужалтыса. Елена ВИНОГРАДОВА. Тодӥськоды-а тӥ? Кӧня арес Макумилы? Соломонов шормуӵъёс пӧлысь огаз (Илоан шормуӵын) улэ кадь дунне вылысь самой пересь адями. Кӧня арес Макумилы - та сярысь бускельёсыз но уг тодо. Ачиз но вераны уг быгаты. Солэн мадемезъя - сю витьтон арес котыр, лэся. Илоан музъем вылэ тӧдьы куо адями нырысьсэ вуэм 1838 арын. Нош шормуӵе тӧдьы калык тросгес люкаськем кылем даурлэн сизьымдонэтӥ аръёсаз. Макумилэн верамезъя, соку со воргорон вал ини. Французъёс эскериллям Макумилэсь тазалыксэ, нош номыр но умой-умой вераны уг дӥсьто. - Мон туж ик уг оскиськы, - вера Жан-Пьер Растье доктор, - Макумилы 150 ареслэсь тросгес ини шуыса. Но со сю ареслэсь мӧйыгес. Асьмеос тӧдьы куо адямилэн арлыдыз сярысь вераны быгатӥськом, нош Макуми Европаын улӥсьлэсь воксё пӧртэм улэ ук, сиён- юонэз но мукет. Собере мӧйымемезъя адями воштӥське. Солэсь арлыдзэ но шонер тодыны шуггес. Куамын ареслы но янгышан учыръёс вал ини. Умой-умой тодон понна, Макумилэсь тазалыксэ кема эскерыны кулэ, вылаз ик, усто оборудованиен больницаын. Нош Макуми гуртысьтыз нокытчы уг пота, больницае но мыныны пумит. Макуми пересь ке но ини, йырсазьыз егит муртлэн кадь ик. Куддыръя со зарезьын чорыга но. Тӧдьы адямиосын кенешыны яратэ, ӵемысь мадьылэ егит дырыз сярысь. Вашкалаослэн дӥськутсы, корабльёссы, пыӵал тӥрлыксы сярысь рос-прос вера. Шумпотыса маде, кызьы Илоанысь улӥсьёс (со но отын ик, пе, вал) огпол тӧдьыослы война ялӥллям. Со вылэм 1879 ар котырын. Мын но вера табере, кӧня арес Макумилы? "Скандалы" газетысь Берыктӥз Н. МАЛИКОВ. Кун Кенешын Валлян, 30 сентябре, Кун Кенешын ортчиз Дышетӥсьлэн нуналэзлы сӥзем ужрад. Кун Кенешлэн Тӧроез Александр Волков отын сётъяз дышетӥсьёслы наградаос но шуныт ӟечкылаз. Дышетӥсьёсты данъяса вераськиз Кун Кенешысь ялан ужась комиссилэн кивалтӥсез Алла Еременко. Кун Кенешысь пресс-служба. Кужым ужын кыда Балезино районысь "Путь к коммунизму" колхоз мукетъёсызлы котыр ласянь адӟем карымон луэ. Соослэн толлы пудо сиёнзы тырмыт дасямын, фермаосазы лэсьтӥськон ужъёс но йылаз-пумаз вуттэмын. Гужем ӵоже Каменное Заделье бригадаосысь дояркаос скаллы быдэ ог 11 килограмм йӧл кыскизы. Азьмынӥсьёс пӧлын ветлэ Надежда Николаевна Тютина но. Огназ котькыӵе шуг-секытъёсыз ворме, куинь пинал будэтэ. Сюлмаськонъёсыз трос ке но, калык пӧлын ноку ӝожтӥськыса ветлэмез ӧвӧл. Ӵош ужась эшъёсыз но, гурт калыкез но паймо юн сюлэмезлы, возиськыны быгатэмезлы. Нош со лякытак шуоз: "Кужым ужын кыда". Каменное Заделье фермаын ужасьёслэн бадӟым осконзы слесарьлы Александр Анатольевич Николаевлы. Со котьку сак эскероз лэсьтӥськон-тупатъян ужъёсты. Кенешыса ужамзы азинсконъёс басьтыны юрттэ. Н. Тютина но А. Николаев. В. КУТУЗОВА. Суредъёсыз Л. ПРОЗОРОВЛЭН. Кызьы улозы нылпиосмы? Кылем пятницае ортчиз Иж карысь Думалэн 30-тӥ сессиез. Сое нуиз администрацилэн тӧроез, Ижлэн мэрез Анатолий Салтыков. Сэрттэмын-пертчемын дас тямыслэсь уно ужпум. Ваньмыз герӟаськемын городын улӥсьёслэсь туала секыт вакытэ улон-вылонзэс умоятонэн, предприятиослы юрттонэн, налог бичанэз выльдонэн но мукет. Депутатъёс нырысь ик эскеризы "Городысь нылпиос" программаез. Туала улонмы куре пиналъёс сярысь уката тросгес сюлмаськемез. Мугез тодмо. Соос утьымтэ. Депутатъёс огкылэ вуизы: покчиослэсь тазалыксэс юнматон нырысь интыын луыны кулэ. Нош али жаляса верано луэ, шуиз депутат Галина Репина, программаез дасянэ тазалыкез утён удысын ужась учёнойёс тыро-пыдо ӧз пыриське. Ватонэз ӧвӧл, нуналмысь йыло паласькись висёнъёс. Озьы ик пумен тросгес висё нылпи витись анайёс. Та ласянь эмъясьёс кыл кутыны кулэ. Соос ваньзэ уг лэсьто на. Программаез учкыку, данак умоесь ӵектонъёс сётэмын. Кылсярысь, трамвайно-троллейбусной управленилэн кивалтӥсез Владимир Беселев ватсаз: чутрак умоятоно, пе, нылпи учреждениослэсь ужзэс но школаосын пиналъёсты сюдонэз. Программаын со малы ке чакламтэ. Тая но куд-ог мукет ужпумъёсъя эшшо пичи программаос кутоно луоз на, шуизы депутатъёс. Туннэ улон асьме азе чурытэсь куронъёс пуктэ. Тани нылпи кылиз анай-атайтэк, сое интыязы интернатэ. Быдэ вуэмез бере, со бертэ вордскем городаз, нош улон интызэ (анай-атаезлэсь) интыысь органъёс арендае сётӥзы яке отчы кинэ ке пыртӥзы. Пиналлэн отчы интыяськыны законъя правоез вань. Сое одно ик программае пыртоно, анай-атайтэк кылем пиналъёслы юрттоно. - Программаын ми ваньзэ чакланы ӧм быгатэ,- пусйиз вице-мэр Вячеслав Засыпкин.- Соин ик та документъя, сое улонэ пыӵатонъя нимаз попечительской совет кылдытӥм. Со эскероз, мар кылемын, лыдэ басьтоз но ужрадъёс кутоз. Сессия программаез юнматӥз но соя решение кутӥз. Кызьы быдэсъяське Ижлэн бюджетэз? Депутатъёс рос-прос учкизы нырысетӥ паларе ужамзэс. Доход люкетэз 40,3 процентлы тырмытэмын, нош расходэз - 37,3 процентлы. Городлэн бюджетаз предприятиослэн тыронъёссы 200 миллиардлэсь уно люкаськизы ни. Соос пӧлын азьпалан мыно "Ижмаш", "Аксион", Горьковской чугун сюреслэн Ижысь люкетэз, "Ижнефтемаш", ЭМЗ. Туннэ нимысьтыз пусйыны кулэ: бюджетэ улэп коньдон уг вуы, 74 процентэз ог-огедлы пунэм тыронэн берыктэмын. Тани жилищно-коммунальной хозяйстволы ӝыны арскын 77 процент гинэ уксё вуттэмын, нош юртъёсты ӟеч-ӟеч выльдонэ - 30 процент. Куашкан калэ вуэм коркаосын улӥсьёсты выльёсаз поттыны одӥг манет но коньдон висъямтэ. Улон интыосты но социально-культурной юртъёсты городлы сётонъя кун бюджетысь 10 процент яке 43 миллиард уксё вуыны кулэ. Со пӧлысь 13 миллиардэз - нылпи учреждениосты басьтонэ. Республика тае умой быдэсъя, паларе 26 миллиард манет сётӥз ни. Отысь 7 миллиардэз висъямын "Ижстальлы", "Буммашлы" - 2,6 миллиард. Озьы ик уксё келямын ЭМЗ-лы, 17 номеро лэсьтӥськон управленилы но мукет предприятиослы. Нылпиослы пособие сётонъя югдур пумен умоя. 1994 арлы ваньмыз басьтӥзы ни. Валля ар понна эшшо 12 миллиард манет кулэ на. Туэ нылпи пособиослы 110 миллиард манет учкемын. 25 миллиардэз висъямын ни. Та уж ляб мынэ бадӟымесь промышленной предприятиосын. Соос бартерез, ог-огедлы пунэм тыронэз берыктон амалэз но урод куто. Та ласянь умоен пусйыны кулэ "Ижнефтемаш" АО-ез, ЭМЗ ГП-ез, Горьковской чугун сюреслэсь Иж люкетсэ но мукетъёссэ. Та ужпумъёсын ӵош, сессия музонъёссэ но эскериз. Кылсярысь, "Буммаш" ОАО-лы но "Ижевский электромеханический завод" ГП-лы налог тыронзы кӧня ке пичиятэмын. Нырысяз предприятиын висъям коньдонзэс кутозы андан ӵыжатон цехсэс выльдонэ, нош кыкетӥяз - лазерен установкаос поттонэз но тросэн бичанэз радъянэ. Депутатъёс озьы ик учкизы адямиосты ватонэн герӟаськем ужпумез. Ижын усьтӥське туж бадӟым, 80 гектар шайвыл. Со луоз карлэн шунды пуксён палаз. Сессия дэмлаз: умоятоно "Ритуал" муниципальной предприятилэсь ужзэ. Гордума эскериз налог тыронъя льготаос сётон, общественной амалэн ас коже кивалтон органъёс кылдытонъя конференциос ортчытъян, быръёнъёсын, ваньбурез вузанэн но жилищно-коммунальной услугаослы калыклэсь нимаз-нимаз дун басьтонэн герӟаськем ужпумъёсты. Г. РОМАНОВ. Нуналлэн тодметэз Куарусёнэз воштӥз коньывуон толэзь. Чаклалэ: октябре кыӵе нуналъёсы куазь чебер сылоз, сыӵе ик луоз апреле но. Туннэ, 2 октябре, вашкала календарья пусъё Зосимлэсь праздниксэ. Сое муш вордӥсен-утялтӥсен лыдъяло, сӥлы каро. Мушъёсты омшанике пыртыны дасяло ни.Умортоосысь окто мултэс чечыез, сузяло. Бызьыны дасяськем нылмуртъёс ӝыт шудонъёсы потало, асьсэлы вуоно кузпал быръё. Ӵуказе - Астафийлэн вордскем нуналэз. Калык верамъя, тӧл лымшор палась ке пельтӥз - вуоно арын ӟег удалтоз. * Югыт нунал туннэ кыстӥське 11 час 29 минут, ӵуказе - 5 минутлы ӧжытгес. Та нуналэ... ар талэсь азьло Вордскемез дырысен туннэ 65 арес тырме Г. И. Павловлы, шаерысьтымы тодмо самодеятельной композиторлы. 2 октябре 1942 арын Кизнер пыриз рабочей посёлокъёс пӧлы. 2 октябре 1920 арын ортчиз комсомоллэн ИИИ съездэз. Историе со пыриз В. И. Ленинлэн егитъёсты дышетскыны ӧтён программаеныз. 3 октябре 1918 арын В. И. Ленин ВЦИК-лы вазиське 3 миллионъем Горд Армия кылдытон сярысь. Правительствоын Правительстволэн Президиумез эскериз "Удмурт Республикаысь гражданъёслэсь тазалыксэс утёнъя" законлэсь инъетсэ. Закон бадӟым саклык висъя республикаысь калыклэсь тазалыксэ утёнэн кивалтонлы, республикаысь властьлэн ёзъёсыз но интыысь аскивалтонъя ёзъёс куспын та удысын полномочиоссэс люконлы. Тазалыкез утёнэ кытысь но кызьы коньдон висъяны рад тупатэмын, одӥгез люкетэз сӥземын гражданъёслэн эмъяськыны но эмъюм басьтыны правозылы. Та законэз улонэ пыӵатонэ 32 миллиард манет кошкоз. *** "Удмуртиысь сиён-юонъя корпорациез выльдон сярысь" постановленизэ эскерыку, кунлэн сиён- юонъя рынокез кылдытонэ пыриськемез сярысь ужпум ӝутэмын вал. Чакламын ю тысья, етӥнъя, пудоя но тылобурдоя, йӧлъя, чорыгъя но мукет сиёнъёсъя кун заказэз утьыны, сиён-юонэз кун сьӧры вузан-басьтонэз радъяны. Удмуртиысь сиён-юонъя корпорациен кивалтоз Гурт хозяйствоя но сиён- юонъя министерство. *** Кылем арняе Федерацилэн Кенешез ужаку, Павел Вершинин пумиськиз Удмуртиысь студентъёсын - Москваысь вузъёсын дышетскисьёсын. Республикаысь егитъёс мылкыд каризы юнгес кусып возьыны Удмурт Республикаысь Правительстволы Наукая, профессиосъя вылӥ но шоро-куспо тодон-валанъёс сётонъя комитетэныз, Нациосын ужанъя комитетэныз, Егитъёсын ужанъя кун комитетэн, Калыкез дышетонъя министерствоен . Ижевске бертэмез бере, Правительстволэн Тӧроез та ёзъёслы ӵектӥз сюлэсь трос студентъёс пӧлысь котькудӥныз кусып тупатыны но дышетскемзэс быдтэм беразы уже интыян сярысь сюлмаськыны. *** 1995 ар понна нылпи пособиосты тырон, бюджетлэсь доходъя люкетсэ быдэстон валтӥсь ужпумъёс пӧлы пыро. Правительстволэн Тӧроез пусйиз, ёросъёс, асьсэ кужымен поттэм табышсылэсь 50 процентсэ уждун тыронэ ӧз висъялэ ке, республикалэн бюджетысьтыз дотациос уз басьтэ. Аппаратной кенешын кылзэмын "Лукойл" компанилэн президентэз Вагит Алекперов Удмуртие ветлэм сярысь, Удмуртъёслэсь съездзэс дасян, "Ижмашын" пыӵал тӥрлыкез поттыны кутскем дырысен 190 ар тырмонэз пусйыны, Куӟебай Гердлэн вордскемез дырысен 100 ар тырмонэз пусйыны дасяськем сярысь ивортонъёсты. *** 29 сентябре Павел Вершинин пумиськиз Библиез Берыктонъя Институтлэн финн-угор отделениысьтыз делегатъёсын, Библиез Финляндиысь гажасьёслэн огазеяськонысьтызы но "Авайнсанома" христиан издательствоысь муртъёсын, кудъёсыз лыктӥзы удмуртъёслэсь христианствое выжемзы дырысен 440 ар тырмонэз но "Выль Сӥзён" ("Новый Завет") книгалэсь потэмзэ пусъёнэ. Правительстволэн Тӧроез филологической наукаосъя докторлэсь, священниклэсь Михаил Атамановлэсь Выль Заветэз удмурт кылэ берыктон ужзэ вылӥ дунъяз, удмурт культураез азинтонын бадӟым инты басьтэмзэ пусйиз. Оскиськом, шуиз Павел Вершинин, Иисус Христослы оскисьёслэсь валтӥсь книгазэс вӧлмытӥсь организациос Россиысь калыкъёслы ӟеч сямъёссэс утьыны юртто шуыса. *** Правительстволэн Президиумез эскериз 1997 арын республикаысь хозяйствоосын урожаез утялтон но пудо сиёнэз дасян сярысь ужпумез. Та пумысен вераськиз гурт хозяйствоя но сиён-юонъя министр Василий Жуйков. Правительстволэн Тӧроезлэн воштӥсез Владимир Гусев Кун Кенешлэн сессияз ивортоз уборкалэн йылпумъянъёсыз сярысь. Пӧсь-а вал гужем? Республикаысьтымы Егитъёсын ужанъя кун комитетын ортчиз ёросъёсысь егитъёсын ужанъя отделъёслэн кивалтӥсьёссылэн семинарзы. Отын соос нылпиослэсь гужем шутэтскемзэс эскеризы, берлось кык ар ӵоже ужаменызы ӵошатыса. Л. ЯКОВЛЕВА. Огназы кылемъёслы улон-вылон инты та нуналъёсы усьтӥськиз Красногорское черкогуртын. Отчы выжыны мылкыд каризы 24 пересьёс, нылпитэк, ӵыжы-выжытэк калемъёс. Юртлэн кузёез Г. Р. Гончарова вань быгатонозэ лэсьтӥз, арлыдо адямиос кыкетӥ юртазы асьсэ коркан кадь мед улозы шуыса. Укно улазы вань мерттӥськон интыез но. Отчы сьӧд сюй ворттэмын. Тулыс убоос лэсьтыны му дасямын. О. ПОТОРОЧИНА. Гажано дышетӥсьёс! 5 октябрь асьме странамы понна бадӟым праздник - Дышетӥсьлэн нуналыз. Озьы асьмеос дышетӥсез, солэсь ужзэ гажаммес возьматӥськом. Асьмеос ваньмы улонэ школаысь, дышетӥсьлэн шуныт киосыз улысь потӥм. Солы оскиськом нылпиосмес - туннэ нуналысь узырлыкмес. Дышетон удысын шуг-секытъёс уно ке но, огшоры нуналъёсы но, праздникъёсы но ваньмылы тодын возёно: Дышетӥсьлы - гажан, саклык. Таӵе нимын асьмеос вазиськиськом нылпи садъёсысь воспитательёслы, школаосысь дышетсьёслы, училищеосысь дышетӥсьёслы но производстволы дышетӥсь мастеръёслы, вузъёсысь преподавательёслы. Туннэ дышетон удысын уно шуг-секытъёс: уждунэз, пособиосты ӝегатон, учебникъёс, оборудование, пӧртэм приборъёс уг тырмо. Озьы ке но, та удыс пайда вае, ялан азинске. Ми оскиськом, дышетӥсьёс быгатозы туала югдурез шонер валаны-дунъяны, дышетонлэсь ужпумъёссэ быдэстыны, вылӥ быгатонлыкъёссэс, визьзэс, улонэз тодэмзэс кутыса. Ми оскиськом тӥлед, гажано дышетӥсьёс, тӥ азьланяз но дышетскисьёстылы ӟеч сямъёс - адямиез валан, астэ гажан, сётэм кылэз быдэстон, кышкасьтэм луон - пыӵатоды шуыса, классэ, пиналъёс доры пырыны, выльзэ утчаны, шедьтыны но улонэ пыӵатыны мылкыдды уз кысы шуыса. Матысь аръёсы Россиын но, Удмуртиын но дышетон выльдэмын луоз. Али та удысын реформаос ортчытонъя программа эскериське. Республикаысь дышетӥсьёслэн коллектиъёссы реформалэсь кудпала мынон сюресъёссэ асьсэос быръёзы, та программаез эскеронэ пыриськыса, ӵектонъёс сётъяса. Со понна асьмелэн луонлыкъёсмы вань, угось котькудӥз дышетӥсь удыссэ азинтыны тырше. Уно аръёс ӵоже школаын ужам, бадӟым опытэн ветеранъёсмы юрттозы. Егит дышетӥсьёс задор мылкыд ватсалозы. Гажано дышетӥсьёс, вань сюлмысьтымы ӟечкыласьком праздникеныды. Та нуналэ тау карон кылъёсмес вераськом, асьтэды жалятэк ужамды понна музъемозь йыбырттӥськом. Сӥзиськом юн тазалык, шудбур, ужады вормонъёс, шумпотонъёс, семьяостылы шуныт мылкыд. Удмурт Республикаысь Калыкез дышетонъя министерство. "Россия кышкыт югдуре вуэмын!" Озьы шуэ Россиысь Кун Думалэн Обороная комитетэзлэн тӧроез генерал Л. Я. Рохлин. Со кичӧлтӥсь луиз огъя Россияя выль огазеяськон кылдытыны. Со тазьы нимаське: "Армилы, обороная промышленностьлы но ожмаськонъя наукалы дурбасьтӥсь но юрттӥсь движение".20 сентябре Москваын ортчем учредительной съездын та движение асьме законъёсъя юнматэмын но солы кивалтӥсь органъёс быръемын. Солэн тӧроез, валамон ини, луиз Л. Я. Рохлин. Съездлэн ужаз пыриськизы Россилэн 68 улосвылъёсысьтыз делегатъёс. Туж лэчыт вераськон мынӥз Россиысь армиез куашканлэсь утён, кунмылэсь обороная кужымзэ юнматон, ожмаськонъя наукалы юрттон сярысь. Вераськисьёс малпанэ вуизы: туала президент но солэн котырысьтыз чиновникъёс уг тыршо та ужпумъёсты быдэсъяны, котькызьы куашкатыны гинэ выро. Съездэ ветлӥзы, делегатъёс сяна, уно партиослэн но движениослэн ыстэмъёссы, быдэс дуннеысь уно кунъёсысь корреспондентъёс - ваньмыз 2 сюрслэсь ятыр адямиос. Съездлэсь ужамзэ кылзӥзы Президентлэн ыстэм муртъёсыз но. Асьме элькунысь съездэ делегат луыса ветлӥзы та движенилэн Удмурт люкетэзлэн тӧроез запасысь полковник В. В. Ходырев, солэн воштӥсьёсыз Э. Ф. Челомбитько но Н. В. Сухиташвили. Ваньзы ик Москваысь бадӟымесь малпанъёсын бертӥзы но солэсь решениоссэ калыклы валэктыны кутскизы. Л. ФЕДОРОВ, Д. НОЧКА. Лыктэ, вань удмуртъёс! Матэктэ куатетӥез удмут ӧтчам. Солы дасяськыса, Ижысь ёросъёсын но ортчыло пичи кенешъёс. Индустриальной районысь удмуртъёс пумиськозы 8-тӥ октябре. Вуоно ужрадэ люкаськозы калыксылэн ӵуказе нуналыз сярысь сюлмаськись адямиос. Соос оглулысь шараялозы вань кайгуоссэс. Та нуналэ ик быръемын луозы вуоно ӧтчаме делегатъёс, ёрос кенеше адямиос. Лыктэмъёсты мылысь-кыдысь шулдыртозы кырӟась-верасьёс. Кенеш ортчоз шутэтсконэз радъянъя "Ударник" юртын (азьвыл кинотеатрын). Кутскоз ӝытазе куать но ӝыны часын. Ужрадэз дасясьёс ӧтё пумиськонэ ёросысь вань удмуртъёсты. Пужыято азьлань сюресмес Республикаысьтымы устоосыз дышетӥсьёс люкаськылӥзы "Металлург" культура двореце. Татын ӟечкылан ужрад радъямын вал. Трос шуныт, тау карон кылъёс веразы соослы вылӥ кивалтӥсьёсмы Александр Волков, Павел Вершинин, Анатолий Салтыков. Дышетӥсьёс, таос бордысь потэ азьланьын улонмылэн чеберез. Шумпотыса верано, оскем данзэс соос йӧно утё, вань сильтӧлъёслы пумит йыгмыт сыло. Дырыз дыръя уждун басьтымтэзы шоры учкытэк, школаосын книга-пособиос тырмымтэ шоры учкытэк, арлы быдэ йылэ республикаысьтымы дано дышетсьёслэн лыдзы. Туэ 303 мурт борды эшшо дас витез итӥськизы на. Туннэ нуналлы асьмелэн 24 кузя Россиысь калыкез дышетон удысысь отличникъёсмы, школаосамы 4 сюрс пала вылӥ категориен дышетӥсьёс ужало. Та лыдпусъёс тросэз сярысь верало. Э. КУМАЧЕВА. Удмурт ӧтчамлы дасяськыса, данаказ ёросъёсын ортчизы ни пичи кенешъёс. Куд-огаз ӧз на. Таин валче ивортӥськом вуоно ужрадъёс сярысь: Завьял - 7-тӥ октябре Воткинск (городын) - 5-тӥ октябре (1-тӥ школаын) Селта - 9-тӥ октябре Каракулино - 8-тӥ октябре Грах - 7-тӥ октябре Алнаш - 9-тӥ октябре Игра - 7-тӥ октябре Пичи Пурга - 6-тӥ октябре Яр - 7-тӥ октябре Ёросъёсын кенешъёс ортчо райцентръёсысь культура юртъёсын. Кутско 10,11 часъёсын. Ижын: Индустриальной районын - 8-тӥ октябре (шутэтсконъя "Ударник" юртын - азьвыл кинотеатрын) Ленин районын - 11-тӥ октябре (исполкомлэн юртаз). Берекет Зарни сӥзьыл И. Левитанлэн "Зарни сӥзьыл" суредэз ӵапак али вакытэз возьматэ. Октябрь толэзьлэн удмурт нимыз - коньывуон, нош вашкала ӟуч нимыз куар усёнэн герӟаськемын. Мукет нимыз но вылэм - грязень, нӧд улэмез возьматэ. Озьыен, огласянь, инкуазь та вакытэ вань чебер буёлъёсыныз люкиське, ӵуж, горд, гордмыт-ӵуж дӥськутсэ кыле, мукет ласянь, сӥзьыл зор-котъёс сюресъёсты уродмыто, та вакытэ нӧд, дэри кузёяське, сюлэме мӧзмыт мылкыд каръяське. Озьы сӥзьыл куазь пумен матэ но матэ каре тол куазез. Будосъёс гинэ уг, пӧйшуръёс но, тылобурдоос но кезьыт вакытлы дасясько. Шуныт пала лобисьёсыз - луд ӟазегъёс, ӵӧжъёс, нурканъёс (вальдшнеп), сьӧд куакаос - уллёен-уллёен лымшор шаеръёсы дырто. Нош лобась шыръёс, ӵушъялъёс, нардыос (барсук), енот выллем пуныос, куд-ог чорыгъёс кезьыт вакытъёсты изьыса ортчыто, толлы сиён дасянэз ӧвӧл. Коньыос ӵуштыр гинэ асьсэлы пӧртэм мульыос, губиос дасяло. Губиез та пӧйшур писпуосысь вылӥ вайёсы бырттэ. Мыйёс (вучайы, бобр) вуэ лэсьтэм каразы толъё. Соос али ик асьсэлы толлы сиён - бадь но пипу вайёсты, быдэс писпуосты но - вуэ выйыто. Гужем ӵоже кӧй люкам гондыр аслыз толйыны инты утча. Бакчаын бер вуись кубистаез октон нуналэн вашкалаосмы лыдъяло вылэм 7-тӥ октябрез. Сентябре яблок зын ке лӧсъяське, коньывуон толэзь кубиста зынэн, пе, данъяське. 14 октябре - Покров. Калык чакламъя, Пукролы лымы усе ни. Кыӵе, пе, та нунал, сыӵе ик тол луэ. Пукро нуналэ нуназеёзь - сӥзьыл, нуназе бере - тол. Кудпалась тӧл пельтэ, сопалась быдэс толэз тӧласькоз, шуо. Шунды ӝужан палась ке, тол кезьыт луоз. Та нуналэ берлозэ емыш, губи окто на. Сад-бакча возисьёслэн ужзы та вакытэ уг чалмы. Сутэр, крыжовник но мукет писпуысь мултэс вайёсты вандылоно, эмезьпуэз кынмемлэсь музъем валлин выдтыса керттылоно, сюез бугыртоно. Умойгес луоз музъемез вилкаен копаны, бадӟымесь люкъёсын берыкъяны. Музъемын толйись изъянтӥсь нымы-кибыос озьы тросгес кынмо-быро. Эн вунэтэ асьме палан толйись тылобурдоослы кар но лэсьтыны, сиськон инты но дасяны. А. Сутулов. Берекет КАЛЫК ВЕРАНЪЁС-ОСКОНЪЁС Нылпиез, ньыльдон нунал тырмытэк, огназэ кельтыны уг яра - сое шайтан, пе, воштэ. Ныр йыл лыдэ - вина юыны. Одӥг гуртысь кык нылъёс ӵош бызё ке, огез шудтэм луэ. Ӧс лёгонэ эн пуксьы - анаед кулоз. Ӧс лёгонын эн сылы - муш пегӟоз. Пуныез сиёназ тӥр яке бычкы тырыса сюдӥд ке, урод (лек) луоз. Пыддэ ӧсэ пачкатӥд - кин ке лыктоз. Пӧзьдэ ӝӧк вылэ эн пон - пытсэт сьӧры шедёд. Пурт ке усе, пиосмурт куное лыктэ, пуньы ке - нылкышно. Сьӧд коӵыш мынон азез "вандӥз" - сюрес уз удалты. Сюрес вылын буш ведраё муртэн пумиськид - сюресэд уз удалты. Синкашъёсыдлэн кусыпсы паськыт ке, кыдёкысь вылькенак (выль кен) басьтод. Туганлэсь нимзэ нылпилы сётыны уг яра, со шудтэм, пе, луэ. Тыл вылэ сялӟид ке, кыл йылад пӧськы потоз. Укное тылобурдо пуксиз - иворлы. Люказ Андрей Гильмаев. Берекет Вашкала сямъёс, йылолъёс Зэмос удмурт выжы. Кыӵе со? Вашкала удмуртъёс туж чакласа улӥллям кыӵе воршудысь кен ваемзэс. Тыршо вылэм кыдёкысь басьтыны яке лушканы. Кудо-туклячиослэн муръёысьтызы потӥсь ӵынзы нылзылэн бызем интыысьтыз ӵынэн медаз сураськы, пе. Мукет сямен вераса, егитъёслэн воршуд нимзы огкадь медаз луы. Кылсярысь, Салья выжы Салья шур котырынгес ик пуксемын луоз вылэм, Поска выжы - Поска шур котырын. Нош кен вайыны кулэ мукет эльысь. Вашкалаосмы, бигеръёс, ӟучъёс но мукет выжы калыкъёс элен-элен уло вылэм. Отӥяз соос пӧртэм мугъёсын сураськиллям. Сыӵеос пӧлы али учёнойёс пырто Можга но Пурга. Эгра но Бигра воршудэ пырись удмуртъёсыз. Шудӟа выжыосыз но кыӵе ке чудьёсын сураськемъёс шуо. Туж валантэм Луд выжыослэн кызьы кылдэмзы. Удмуртъёсыз улон сокем зол сураз - али дыре чик но кадь ӧвӧл ни одӥг воршудэ гинэ пырись гуртъёс. Тани мынам вордскем Шоринь Юриямы ик куинь выжыос улӥллям. Салья, Поска луд, берлогес ӟучъёс вуиллям. Кенъёссы но туж кыдёкысь уг луо ни вылэм. Сыӵеесь ик воршудъёсы ке но пыро, Улӥнь Юриысь но Эдэйгуртысь вазен кен ӧвӧлгес басьтӥллям, нылзэс но уггес сёто, пе, вал. Пурга яке Бигра воршудъёсысь кенъёсты но гуртамы ӧвӧл вайылӥллям. Таяз дауре воштӥськонъёс шӧдӥсько милям выжыямы но. Пересь атаелэн мумиз вылэм Вуж Мӧньялась - Кона Мӧнья. Пересь анайме, Лобань (Калмез шурлэн чальдыез) котырысь вуэм мае ке. Поска кенак шуо вылэм (сьӧраз ваем нылыз Кибья пиен). Тӥни озьы Урдо Коналэн Салья вирыз сураськем Поска но Кибья вирын, солэсь азьло - Мӧнья вирын. Мынам аслам вань (али тодэммыя) Поска но Кибья виры. Вирыя ӧвӧл, удмурт сямья, мон Салья выжые пырисько. Малы ке шуоно, Урдо бӧляк Салья выжые пыре вылэм (ӟучъёс ноку но озьы ӧй лыдъясалзы!). Аслам вордэм мумилэн но пересь анаелэн Поска но Кибья вирзы мынам мугорам кылемын ке но, сое мынам воршуд выжыям пыртэме уг луы ни. Озьы лыдъяло вылэм вашкала дыръя. Озьыен, одӥг анай-атайлэсь агай-вынъёс но, пыртосэ ке кошко, уг ни быгато вылэм асьсэдыз одӥг воршудысь шуыса лыдъяны. Ӟуч законъёсъя со чылкак валантэм луэ. Фамилизы одӥг, нош бӧляксы но воршудзы - пӧртэм. Г. Архипов, шаерчи. БЕРЕКЕТ Инкуазьлэн пӧртмоосыз Тани таӵеесь, паймымонэсь, уно чиньыё-пӧлыё, ӵуж кушманъёс будӥзы туэ милям кешыр убоямы. "Берекетэз" лыдӟисьёсты но тодматэм потӥз соосын. Инкуазьлэн пӧртмоосыз. Тазьы нимасал мон та йӧспӧртэмесь бакча сиёнъёсыз. А. АБРАМОВА. Пичи Пурга район Пугачево посёлок, Туспуктэмез В. КАМАШЕВЛЭН. БЕРЕКЕТ МАТРОН АПАЙ ӴЕКТЭ Кутэмняньлы пушкес Кутэмнянь (пирог) пыжыны, сӥль но чорыг сяна, пӧртэм бакча сиёнъёс мыно. Кызьы дасяно созэ яке тазэ пушкесэз? Матрон апай лыдӟисьёсмес кӧняеныз ке газет бамын тодматэ. 1 кг выль кубисталы кулэ 3 пӧзьтэм курег пуз, 70 г шунтэм вӧй, мылкыддыя сылал. Кубистаез корано, 5-7 минутлы пӧзись вуэ тыроно. Пасё кобые кисьтыса сӥсъяно, сӥятоно, ватсано сылал, векчиятэм курег пуз, вӧй. 1 кг сылалтэм кубисталы кулэ 3 пӧзьтэм курег пуз, 100 г кӧс вӧй, 2-3 йыр сугон, сылал, изэм сьӧд пӧсьтурын. Кубистаез пӧсьвуано, векчи корано. Табае кӧс вӧй ватсано но, отчы кубистаез поныса, пытсэт улын небыт луытозяз пыжоно (тушить кароно). Сугонэз векчиятыса табаын нимаз пыжоно но кубистаен огазеяно, ватсано на сылал, пӧсьтурын но векчиятэм курег пуз. 10 шоро-куспо картофкалы кулэ 3 йыр сугон, 4 сиськон пуньы шунтэм вӧй, 2 ыль курег пуз, сылал, изэм пӧсьтурын. Пӧзьтэм картофкаез нельконо, ватсано курег пуз, вӧй, сылал, пӧсьтурын. 1 кг сылалтэм губилы кулэ 200 г кӧс вӧй, 4 йыр сугон, изэм пӧсьтурын. Губиез миськоно кезьыт вуэн, корано, кӧс вӧй ватсаса пыжоно табаын. Нимаз юдоно сугон но пыжоно вӧен, сурано губиен но ватсано пӧсьтурын. 1 кг ӵуж кушманлы кулэ 3-4 пӧзьтэм курег пуз, 3 сиськон пуньы маргарин, сылал но сакыр песок - мылкыд каремдыя. Сузям ӵуж кушманэз зӧк вуштон пыр поттоно, табае маргарин, кӧня ке ву пононо но ляб тыл вылын пароно. Сӥялтэмез бере ватсано сылал, сакыр песок, векчиятэм курег пуз. Кин яратэ ческытэз, курег пуз интые 100 г изюм но тросгес сакыр песок поныны яралоз. 1 кг чырстурынлы (кузькылак, щавель) кулэ 1 стакан сакыр песок, 2 сиськон пуньы картофка крахмал. Чырстурынлэсь зӧк модоссэ висъяно, ӝыны час возёно вуын, миськоно но векчиятоно. Ватсано сакыр песок, крахмал, сурано. 1 кг яблоклы кулэ 300 г сакыр песок, 3 г корица, 100 г нӧкы вӧй. Яблокез миськоно, вылзэ но пушсэ сузяно, векчи юдэсъёслы вандылоно. Эмален шобыртэм кастрюляе поныса ватсано сакыр песок, вӧй, кӧня ке ву но ляб тыл вылын пытсэт улын парыса возёно, сӥятоно. Пырыос-визьлюкъёс Вужмем ку перчаткиостэс эн куштэ. Со ӟеч кышъет луоз ыж гонлэсь пась луэм пӧзьёсты кышъяны. Ку юдэсъёс костюм яке пальто бирды вурыку но ярало, соосты урдсэт палаз поныса, бирды улысь материал уг золтӥськы, уг уродмы. Вужмем Капрон чулкаосты юдыса диван вылын возён миндэр пушкы тыре - гон кадь ик небыт луэ. Гажано дышетӥсьёс! Зарни сӥзьыллэн нырысетӥ арня нуналаз тӥ пусйиськоды профессиональной праздниктэс. Тӥ егитъёслы кузьмаськоды азьвыл поколениосын люкам тодон-валанъёсты, быгатонлыкъёсты. Сӥзьыл емышъёсты гинэ ум октӥське, выль урожай басьтыны инъет кылдытӥськом. Тазьы ик вераны луысал дышетӥсьлэн ужез сярысь но. Тӥ профессиеныды герӟаськем ӟеч йылолъёстэс, сямъёстэс утиськоды но ялан азьланьтӥськоды. Нуналысь нуналэ, соослы луыса, тӥ нылпиосты кузь улон сюрес вылэ потыны дасяськоды, соослы визь люканы юрттӥськоды. Тӥ обществомылэсь инъетсэ кылдытӥськоды. Дышетӥсьтэк азьланез ӧвӧл. Удмурт Республикаысь Кун Кенеш но Правительство ӟеч валало, дышетонлы улонзэс сӥзем 42 сюрс адями - Удмуртилэн самой дуно узырлыкез. Государство вылӥ дунъя асьтэды жалятэк тыршемдэс ми валаськом, туала вакытэ тӥлед уката но секыт шуыса. Озьы ке но, тӥ быръем удыстылэсь уд куштӥськиське но республикамылэн улоназ бадӟым инты басьтэмдэс валаськоды. Гажано дышетӥсьёс, музъемозь йыбырттӥськом тӥлед жадёнэз валатэк тыршемды, нылпиос сярысь сюлмаськемды понна. Асьтэлы но, семьяостылы но сӥзиськом шудбур, тазалык, ог-огдэ валан, гажан. УДМУРТ РЕСПУБЛИКАЫСЬ КУН КЕНЕШ. УДМУРТ РЕСПУБЛИКАЫСЬ ПРАВИТЕЛЬСТВО. Наталь ОЛО СЕРЕКЪЯЛОД, ОЛО... Ӵош мынӥсько-а? Служанкалэсь корка кузё юа: - Кышное туннэ ӝыт кытчы ке дасяське-а? - Бен, со киное мыныны малпа. - Нош тон ӧд кылы-а, мон соин ӵош мынӥсько-а, пе? Ву ватсаськоды Гур азь палан вылӥ этажысь виям вуын бӧрдыса сылӥсь нылкышнолы водопроводчик вера: - Сокем эн бӧрдэ, озьы тӥ эшшо но тросгес ву ватсаськоды. Ваньзэ лэсьтӥсько, мар косоз - Вить ар кышноеныд улӥськод, одӥг пол но керетэмды ӧвӧл-а, шуиськод? Кызьы сое валэктод? - Кузпалъяськеммы бере нырысь нуналысен ик куспамы кенешимы вал: одӥг нунал со ваньзэ лэсьтэ озьы, кызьы кулэ аслыз. - Нош мукетъят? - Мукет нуналэ мон лэсьтӥсько ваньзэ, мар косоз кузпалы! Йыр ӵукна ӟечгес ужа Картэз лыдӟе книга, кышноез - газет. - Макем шимес,- кеськемзэ ӧз шӧды нылкышно. - Одӥг воргорон нылкышноен нуназе тодматске, ӝытазе кышнояське, нош ӵуказеяз ӵукна сое вие! - Номыр паймымонэз ӧвӧл,- нокыӵе ӧз кариськы картэз.- Йыр ӵукна ӟечгес ужа. ТАЗЬЫ НО ЛУЫЛЭ Дэремез... пуштӥз Вӧйын наштаськем ужан дӥсьсэ Тюменьысь рабочий миськиз тазэ кисьтэм бензинэн, ошиз шунтон батарея вылэ. Ӝыт пал ванное пырыса, тыл ӝуатӥз. Соку ик туж зол пуштӥз. Люкаськем бензин пар соку ик гоманы ӧдъяз. Воргорон интыяз ик быриз. Пуштыны шедиз артысь комнатаын кӧлӥсь аресъем пиналзы но. Ассэ ачиз пытсэт улэ донгиз Ульяновск котырысь фермер Д. Юрий областной центре улыны кошкиз. Гуртэ кельтэм юртъерзэ 60 миллион манетлы страховать кариз, сомындалы ик - ваньбурзэ. Госстрахлэсь ужзэ басьтон понна, 500 сюрс манетлы тылпу понӥсь медъяз. "Операцизылэсь" дырзэ вераны вунэтӥз. Буш кельтэм юртъераз берытскыса паймиз: корка ӧс вӧлак усьтэмын, нокинэз уг адскы. Кема малпаськытэк, фермер участковой доры мынӥз: коркам, пе, лушкаськисьёс пыриллям. Милиционерен ӵош вуыкузы, отысь сьӧд-сьӧд ӵын тубе вал ни. Азбар шорын сылӥсь трактор но ӝуась тылын гома. Соку гинэ фермер валаз югдурлэсь кудпалась пельтэмзэ: Но... бер вал ини. Корказь азьысь участковой шедьтӥз юртъер кузёлэсь кибервылзэ. "Вовка, гидэз эн суты", - гожтэм Д. Юрий. Пудо возён интыез быдэс кылиз, но фермерлы пумит уголовной уж милиция ӝутӥз ик. Мурт кышноосын уд калгы Кышноосты мултэс яратӥсь картсэ Йошкар-Олаысь егит нылкышно тазьы эмъяз. Пиджаксэ сузякуз, картэзлэн кисыысьтыз шӧдтэк шорысь усиз кунгож сьӧрын поттэм презервативъёсын пачка. Ӵашетон ӝутытэк, амало кышномурт картсэ мукет сямен визьмано кариськиз. Бумагазэ дуртӥз пичияк кесьыса, отчы сьӧд пӧсьтурын пызьназ. Мар вал отӥяз, тодэ, дыр, яратонлы бырем воргорон гинэ, гожтэ "Марийская правда" газет. Туж ӟеч реклама Вильнюсын усьтӥськиз дуно джинс дӥсен вузкаронъя магазин. Басьяськисьёсты бордаз кыскон вылысь сёто таӵе ялон: кин 10 минут куспын магазинэ штанитэк пыроз но вылаз тупась джинс шедьтоз, сое дун тырытэк басьтыны быгатоз. Реклама сётӥсьёс асьсэос но ӧз оске вал, магазин азьын собыдӟа черод кылдоз шуыса. Быдэ вуымтэ пиос но нылъёс быдэс уллё люкаськиллям, ваньзы трусикен гинэ сыло. Та дыр ӵоже кӧня муртлы шуд усиз выль дӥсен потыны? 200 пӧлысь - 30-эзлы. Со понна магазинлэн данэз вӧлмиз быдэс Литва пасьтана. Газетъёс гожъямъя. ТОДЭ ВАЁНЪЁС Басьтӥзы монэ армие Пиосты армие келян котьку шумпотон но кайгырон гуръёсын чузъяськылӥз. Шумпотоно, соос калык радэ потыны вуизы ни шуыса, кайгыроно, секыт но кузь сюресэз ортчоно луозы шуыса. Монэ армие басьтонзы сярысь ивор вуиз 1940 арын, сентябрь толэзе. Но со вакыт школаосын дышетӥсьёс тырмымтэен, огдырлы уж дорам ӝегатсконо луи на. Соин валче вуоно солдат пи луыса кема гинэ ветлӥ. Ӵыжы-выжыосы ӝытлы быдэ сямен доразы куное ӧтьылӥзы. Али ке но вань на со вакытэ кузьмам ӵушконъёссы. Син-пельлы возисько. Кошкон нуналам дорамы трос келяськисьёс люкаськизы. Эшъёсы урам кузя монэным артэ кыдёкозь мынӥзы на, армия келян гуръёсты кырӟаса, арганэн шудыса. Келяськон понна нимысьтыз вал но кыткизы соку. Пиос солэн букояз гырлы думиллям, нылъёс сое буртчин лентаосын чебермаллям. Шулдыр вал. Служить карыны сюри Дальний Востоке. Та вискын ик отысь артиллерийской училищеын дышетскыны йӧндыри на. Озьы младший лейтенант луи, мыным быдэс взводэз оскизы. Частьмы сылэ вал Ханка ты дорысь одӥгез пичи гурт вӧзын. Утимы границаез. Та вакытэ шунды пуксён палан лек ожмаськон гомӟиз. Ӝуало Москва, Ленинград, Сталинград городъёс. Со пала кысканы ӧдъязы милемыз но. 1942 арын фронтэ кошкись одӥгез группаен ӵош мон но вуи Горький областьысь Семенов городэ. Отчы мыныкумы, Кизнер станция пыр ортчонмес тодыса, дорам азьвыл ик телеграмма келяй: оло, пумитаны быгатозы шуыса, собере гуртэ бертылыны дыры но вал. Иворме басьтӥллям. Анае Аня сузэреным вуэмме тодыса, нунал лумбыт вокзалын возьмаллям. Нош мон уин гинэ вуи. Татын пумиськонмы ӧз кылды. Сузэре, ужаны кулэ шуыса, доре бертэм, анайме трос калык пӧлысь ӧй шедьты. Котыр тӥрлыкме вокзал вӧзын улӥсь тодмотэм кышномурт доры кельтӥ но, ачим куамын иськемез пыдын бертыны потӥ. Кык ар ӵоже ӵыжы-выжыосылэсь но, эшъёсылэсь но туж мӧзми ни вал. Нош кыӵе пумиськон вал! Али но син азям, кызьы атае монэ юн-юн ӟыгыртӥз но викышъяса бӧрдыны ӧдъяз. Пумиськи яратоно нылыным но, Надяен. Кожылӥ школае - дышетэм пиналъёссы доры. Будӥллям соос. Нош мар но ӧз юалляське соку мынэсьтым... Но таӵе шумпотон кема ӧз кыстӥськы. Выльысь сюрес вылэ потоно вал. Озьы, кык арлы шуыса, армие кошкем муртлы, дорпалъёсыным кемалы люкиськоно луиз. Семенов городын куинь толэзь ӵоже дышетскеммы бере, пӧлысьтымы кӧнязэ ке бырйыса, Коломна город дорысь Дедовичи гуртэ келязы. Соос радэ сюри мон но. Татын Сталинград понна ӟырдыт ожмаськем бере, тушмонлэсь танкъёссэ быдтыны чаклам 1186-тӥ полк выльдӥськыны кулэ вал. Отысь 4 номеро батареяен кивалтыны оскизы мыным. Соин ӵош ик ортчизы вань ож сюресъёсы. Милемыз собере Северо-Западной фронтэ келязы. Ож бусыын луэм троссэ учыръёсты кемалась мадимы ни нылпиосмылы, нылпиосмылэн пиналъёссылы. Газет бамъёс али но ӵем гинэ тырмытэмын луо ожмаськон вакытлы сӥзем материалъёсын. Но малы ке ялан вунэтӥськом, куд-ог бӧрдонъёсмы асьме бордысь но потылӥзы шуыса. Тани кыксэ гинэ учыръёсты тодам ваё. 1943 арын Старая Русса город понна ожмаськыку, милесьтым батареямес одӥгаз пичи гурт доры "пуксьыны" косӥзы. Но та интыос, ӟеч-ӟеч эскерымтэен, ми ӧм тодэ, со немецъёсын киултэмын шуыса. Соин ик огеныз эшеным Алексей Есиповен ӵош ӧжыт гинэ тушмон ки улэ ӧм шеде. Гурт пала матэктэмъямы, машинаослэн куараоссы кылӥськыны ӧдъязы. Отчы асьмелэнъёс вуиллям малпаса, гурезь уллань ӝоггес вамыштӥм. Ярано, дырыз дыръя мурт кылын вераськем куараосты кылӥмы. Гурт дорозь ог сю витьтон метр пала гинэ кылиз на вал... Тушмонъёс шӧдӥзы, луоз, пыд уламы лымы ӟукыртэмез - шорамы ыбылыны ӧдъязы. Бӧрысь адӟим: Алёшалэн дӥсез шубаез куинь интыетӥ пасяськем, мынам - кыкетӥ. Кыкетӥез кӧшкемыт учыр луиз Латвиын. Соку милемыз сюен ӧжыт гинэ ӧз суралэ асьме "катюшаос". Частьмы нырысетӥ ударной армия бордын ожмаськиз. Тушмон танкъёслэсь сюрессэс ӵоксаллям. Секыт югдур кылдылон вакытэ, милемлы юрттӥзы "катюшаос". Та бордысь ик шугъяськылон кылдылӥз. "Катюшаосын" кивалтӥсьлы ивор вуытозь, дыр ортче - милям частьмы интызэ воштэ. Тазьы луиз со кӧшкемыт нуналэ но. Азьвыл эшеным ик, Алёша Есиповен, котыр интымес эскерыны потӥм. Со куспын шӧдтэк шорысь ми вылэ минаос усьылыны ӧдъязы. Котыр музъем зурка, ӵын но тузон пӧлысь номыре адӟыны уг луы. Канавае ватӥськыса кылим. Кыӵе вӧсь луиз, куке тодӥмы, со вал асьмелэн минаосмы шуыса. Тодэ ваёнъёс секытэсь. Троссэ соосты, тужгес но вылӥын верам учыръёс сярысьёссэ. Син азям пуктыны дӥсьтӥсько ож эшеным-шинеленым огинэ кыльыкум гинэ. Со мынам али но бордам. В. ЕГОРОВ, пенсионер. Ижевск город. УДМУРТЪЁСЛЭН ӦТЧАМЗЫ АЗЬЫН Али ик малпаськоно Ми азьланьтӥськом Удмуртъёслэн ӧтчамзы азьын вераськонэз. Республикаысьтымы тодмо адямиос валэкто редакцилэн юанъёсызлы. 1. Кыӵе мылкыдын тӥ витиськоды удмуртъёслэсь ӧтчамзэс? 2. Кинэ адӟиськоды тӥ Тӧроын? Татьяна Корнилова, тележурналист, Удмурт нылкышноослэн огазеяськонзылэн кивалтӥсез. 1. Монэ шугъяськытэ тани ма. Калыкмы пӧлын вӧлмемын манетшатъяськон мылкыд. Равнодушие шуон - тужгес но кышкыт "висён". Адямиос пӧртэм мугъёсъя ышто азьланезлы осконзэс. Туж калленэн мынӥськом, ма но со лэсьтэмын ке но, зэмос ужъёсын со вамышъёсты лыдъяны уг луы. Кылмы государственной шуыса ялэмын ке но, уж вылын номыр ик уг воштӥськы. 2. Тӧролэн интыысьтыз адӟисько Валентин Кузьмич Тубыловез. Йыг-йыг адями, улонэз тодэ, югдурез вала. Кызьы шуо, мудрон маке. Быгатӥз ук шаермес ас вакытаз кышкыт "тӧлъёслэсь" утьыны, али но быгатоз сьӧраз мукетъёссэ валтыны. Ватсаса верасал на. Асьмелы люкетэ огъя луымтэмы. Одӥгез буре, мукетыз паллянэ кыске. Соин ик возмы но интыысьтыз уг вырӟы. Оппозиция кулэ, но со медам люкеты огъя ужпумъёсты быдэсъяны. Галина Ахророва, Ижысь администрацилэн кивалтӥсезлэн воштӥсез. 1. Шоркарлэн администрациез съездлы дасяськонлэсь палэнэ уг кыльы. Ми доры вазиськизы, "Удмурт кенешлэсь" городысь ёззэ кылдытыны юрттэт курыса. Сыӵе луонлык вань. Ёрос люкетъёс одно ик кулэ дэмен ужаны, озьы удысэс ӟечгес радъяны луоз. 2. Мынам малпамея, удмуртъёслэн огазеяськонэнызы рос-прос кивалтыны быгатысал Валентин Тубылов. Пётр Поздеев, писатель. 1. Талэсь азьлоез таӵе кенеш пайдатэм ӧй вал кадь. Алиез но пайдаё луоз. ХХ даурысь ХХИ дауре выжыку ужаны со тужгес кулэ эсэпъёс тупатоз. 2. Туж умой луысалыз, Тӧро луыны пумит ӧй кариськысал ке В. К. Тубылов. Геннадий Бекманов, артист. 1. Таиз съезд мыным малы ке но витьымтэ шорысь кадь потэ. Уг тодӥськы, быгатоз-а со бадӟымесь ужпумъёсты эскерыны. Шӧдӥсько созэ гинэ: пумиськон кулэ, адямиос коть ог-огзэс адӟыса шумпотозы, азьланезлы оскон шедьтозы. 2. Пургалась Василий Ермолаевич Москвинлэсь умой кивалтӥсь пӧрмысал кадь потэ. Серафима Пушина-Благина Кинлы мар кылдэмын Инмар еврей выжыосты визьмо лэсьтэм, Нош удмурт калыкез - шудтэм. Мукет калыкъёслы троссэ сётэм, Удмуртъёсты нош - вунэтэм. Израиль музъеме ветлэм потэ, Кыӵе ке но кужым отчы ӧте. Сопал музъемъёсты мон учкысал, Мертвое зарезьын пыласькысал. Но сьӧлыкъёс уг сёто мынын, Ускё но трос кулэ, дыр, люканы. Озьы ни кылдэмын, дыр, улыны - Мукет зарезьёсын пыласькыны... *** Эх, нэнӥе Дас гинэ мынам чиньые, Со понна - дас вить зундэсэ. Сизьымдон сизьым дусыме, Луысал ке мынам уксёе Сомында ик, кӧня йырсие, Самолет мон соку басьтысал, Куное котькытӥ лобасал. Но быре ни мынам уксёе, Пурысьта ни каллен йырсие. Одӥгназ быдэсме ни пие, Шудтэм ик мон, нэнӥе. *** Руль сьӧрын малпаме Синмы юн адӟе на, Пельы сак кылэ на, Мылы но потэ на - Улӥсько! Пие но будэ на, Уксё но тырме на, Авто но басьтӥм на - Улӥськом! Шунды но пиштэ на, Зор ву но усе на, Емыш но будэ на - Улӥськом! Музъем но берга на, Калык но шока на, Инмар медаз кушты - Уломы! *** Вир но кылбур Алла Кузнецовалэн Вань чиган вирыз, Соин зол пӧрмо солэн Кылыз но бурыз. Мынам бигерез-ӟучез Вань, пе, виръёсы, Соин ӟырдытэсь пӧрмо Вань кылбуръёсы. ШӦКЫЧ Кинэ яратэ куртчанги? - Нош мар со куртчанги? - юалозы куд-огез. Озьы шуо удмуртъёс сифилис висёнэз. Уд ке оскиське, кыллюкамысь учкелэ. Нош яратэ со адямиосты гинэ. Пудо-животъёс но тылобурдоос борды уг нориськы. Удмуртия та черен курадӟисьёслэн лыдзыя Россиын валтӥсь инты басьтэ. Шаерамы ӝыны арскын 3842 адями куртчангилэсь эмъяськиз. Соос пӧлысь 248-эз школаын дышетскисьёс. Таосыз пӧлысь 35-езлы 14 арес но тырмемын ӧвӧл на. Эмъясьёс верамъя, дышетскон ар кутскемен, та черен висисьёслэн лыдзы трослы уноялоз. Сое возьмато ортчем аръёслэн лыдпусъёссы но. Ярам ай, куртчангиез эмъяны луоно. Со понна 60-100 сюрс манет кулэ луоз. Сомында коньдон эмъюмъёс басьтыны быроз. Нош асьсэды шараямды ӧз поты ке, кисыдэс эшшо но куанермытоно луоды. Вераны кулэ мукетсэ но: коньдондэс жаляса, висьыны кутскемды бере, эмъясьёслы ӧд ке вазиське, 2-3 ар ортчыса, тӥ шизофрениклы пӧрмоды. Вылаз ик, ветлыны но уд быгатэ ни. Соин ик чаклаське! Умойгес луоз тодӥсь-валась адямиос дорын эскериськыса. Угось та висён 30-40 нунал ӵоже, куддыр тросгес но, ассэ нокызьы но уг шӧдыты. Нош эскериськыны луоно Иж карын Ленин ульчаысь 100 номеро юртын, 25-тӥ кабинетын. Куртчанги тужгес но егитъёсты яратэ. Озьы ке но, мӧйыослы но буйгатсконо ӧвӧл. Угось шаерысьтымы тужгес но арлыдоезлы висисьлы 65 арес. ф. МИННИГАРАЕВ. Шӧкыч Лидия Чернова Придирачко Анай кылме забытьтӥ ни, Ӟуч сямен ни мадичко. Половиназэ по-русски, Половиназэ - ӟудко. Малы нош придирачко? - Иж карын ук улӥсько! Серекто - гуртам бертӥ но: Ой, однако, однако, Ӟуч луэмед ук, Санко!... *** Трали, вали, гали... Ой, юмшай, кема юмшай, Серем пырыез бичай. Такмакъёсы кылдӥзы - Кагаз вылэ киськизы... Эн бырйиське ни, нылъёс, Мон бордын - пӧсь тылсиос. Шунтыны тырмоз кужмы, Шунды кадь ик мон ӵыжыт! Гали, Вали, шунтыло мон Ӵужырес пӧсь сюлмыным. Гали, Вали юасько мон: - Кудды бызёды мыным? - Тон ваньзэс ик шунтӥськод кадь, Осконмы ӧвӧл тыныд. Толыктэм Маня лыктэ кадь, Лабырты - соин ик мадь. Я, Серга, Тон берга, берга... Пырамтэ гуртэд но вань: Пересь Марпа, Окыльна но, Вань воксё пиньтэм Малань! - Трали-вали, ой, нылъёс, тӥ! Йыръёсты укыр вылын. Трали-вали, бен, йӧнэсь ми, Тодӥськод, луоз, малы? *** Малы пилиське йыры? Ветлӥ меда, ӧй меда Дусыме доры? Макмырасько, ой, беда! - Пилиське йыры!... Кытын кӧлӥ, ма кари, Чик уг тодӥськы Дурем ӧс сьӧры сюри, Тунгонъёс вискы. Марьюше возьмам вылэм Лыктэмме туж-туж. Табере: "Уг пот кылэм!" Нырулдэ, пе, ӵуш. Охо-хо! Охо-хо! Пыд улысь шудэ гылӟиз. Аракы ук, валасько, Улонме копак быдтӥз! *** Паймод, ява. Ӧз ваньмы - Маке туж шугектӥ, - врач азе пуксиз пересь. - Шокан пасе ӵоктаське. - Туннэ уг ваньмиськы, - пересь шоры ӧз ик учкы эмъясь. - Толон малы ӧд лыктэ?! - Ма, туннэ шугектӥ. - Шуи: уг ваньмиськы! Комиссия лыктоз, гожъяськонэ трос. Уй! акыляк потӥсько та пересьёсын! - ас понназ вуӵыртэ. Висисьлэн ымнырыз юг-юг кӧдэктӥз, мур-мур шока. Пукыны ӟигарыз ӧвӧл ни! - Ой! - сюлэм бордаз кырмиськиз но ӟус вылэ ӟигартэм лэзькиз. Соку гинэ эмъясь интыысьтыз султӥз. Куалектӥз кадь.... - "Алло! Алло!" "Скорой!" Нош "Скорой" кулэ ӧз лу ни. Тӥни озьы. Таӵе но учыръёс луыло уго улонын. ШӦКЫЧ Дэмласько... выль удмурткаез! Ӵектӥсько... Мон туж яратӥсько пӧртэм удмурт ужрадъёсы ветлыны: удмурт театре, филармоние, дворецъёсы - съездэ, премьерае, конференциосы. Ог куинь-ньыль ар талэсь азьвыл синйылтӥ одӥг туж аспӧртмлыко удмурт кышномуртэз. Со но вань ужрадъёсы пыриське, котькытын кыл куре. Уг ке сёто - интыысьтыз вера. Бен, вера сыӵе зол но визьмо, кызьы тросэз уз быгаты. "Кин мар та кышномурт?", - мынэсьтым юанме одӥг пол шара веразы артэ пукись бускельёсы. Берлогес тодӥ: кема уй палан но шунды ӝужан палан улэм удмурт журналистка Серафима Пушина-Благинина вылэм со. Али гожъяське ӟуч но удмурт кылын вань Удмуртиысь газетъёсы. Нош ик сыӵе гожъя, кызьы нокин уз быгаты, уз но дӥсьты. Солэн гожъямъёсаз пӧртэм ужпумъёс ӝутэмын - православие, удмурт политика но культура. Котьма сярысь синмаськымон гожъя. Тужгес но сое сюлэмшугъяськытэ удмурт культура, кылёзы-а удмурт кыл но калык. Алигес солэн выль псевдонимез кылдӥз: Серафима Кенская. Малызэ валай: мынам кышноеным одӥг гуртысь соос вылӥллям - Вуж Кенӥысь. Кемалась ик ӧвӧл филармониын артэ пуксьыны кемдӥмы. Кузпалы вазиз: "Мон Кениысь Нюкул Галя". "Ой, мон тӥледыз тодмасько", - пальпотӥз Серафима Петровна. Сое Ижевске нырысетӥ классэ дышетскыны ваиллям 1957 аре, собере, песянаез луло дыръя, каникулъёсы бертылэм на. Озьы ке но, кенӥос али но сое тодо на, туж, пе, етӥз вылэм пичи дыръяз ик. Соку филармониын Серафима Петровна калык артисткаен Валентина Пудоваен кырӟаз аслэсьтыз ӟуч кылысь берыктэм кырӟанзэ "Напилася я пьяной" - "Ой, кудӟи мон, кудӟи мон". Зол чабизы залын соослы. Нош азьвылгес лыдӟиз хулиганско-эротической кылбурзэ "Сю пол быгатод-а?" Сцена вылэ потӥз но юа Анатолий Ушаковлэсь: "Сю пол быгатод-а?" Соиз но шедьтӥз валэктон сётыны, шуэ: "Тонэн быгато". Жаляса верано луисько: С. П. Пушина-Благининалэн творческой ӝытаз ветлыны ӧз кылды. Отын со зол паймытэм вань калыкез, берло лыдӟи ни. Нош аслэсьтыз нырысетӥ книгазэ "Исповедь грешницы, или Я - удмуртка" со кузьмаз милемлы таӵе автографен: "Вуж Кенӥ гуртысь, "бадӟым сьӧлыко" нылкышно та книгазэ кузьма Нюкул Галялы но солэн синмаськымон картэзлы - пинал дырмес тодэ вайыса". Книгаез пыр мон та адямиез пыр-поч тодӥ, сокем, кызьы уд тоды трос аръёс ӵоже артэ улыса но. Угось книгаез солэн автобиографической. Тодӥсько: трос солэн тушмонъёсыз но, вожъяськисьёсыз но. Кылбуръёссэ лыдӟыса, умойгес валай, малы сое куд-огез уг но валало, уггес но ярато, дыр. Асьме удмурт сям со: данъяськон интые, адями визьмо ке, золгес ке асьмелэсь, кыл вӧлдыса ветлӥськом, со сыӵе но таӵе шуыса, шекъёссэ утчаськом. Книгаезлы мон пайми. Таӵе гожъясьёс асьмелэн ӧй вал на. Со книгаез кык-куинь час куспын дугдытэк лыдӟиськод, мозмытскыны уг луы. Мон валамъя (оло, мон янгыш), авторез пуктэм аслыз таӵе ужпум: возьматыны, кызьы кулэ кылбуръёс гожъяны (ӟуч но удмурт кылын), кызьы кулэ очеркъёс, пьеса но повесть гожтыны. Мон ӧвӧл ни пинал адями, дышемын ӧвӧл яратон сярысь сыӵеез лыдӟыны (милемыз мукет сямен будэтӥзы), но Серафималэн образъёсыз, кырӟан но кылбур чуръёсыз пиналэз но пересез, пиосмуртэз но кышномуртэз уз кельтэ йӧтытэк, сюлэмзэ позыртытэк. Паймымон на соиз: удмурт кылмес со ноку но дыешетэмын ӧвӧл, улэмын трос аръёс ӵоже Салехардын, Владивостокын, Магаданын. Нош удмурт кылэз тодэ но, гожъяське но, кызьы нокин но уг быгаты. Мон шуысал: "Зэмос батыр визьмо адями та". Таӵе удмурт кышномурт ӧй вал на, дыр. Мыным туж яразы удмурт культура удысысь адямиос, писательёс, артистъёс сярысь очеркъёсыз. Пьесаяз Серафима Петровна шараям аслэсьтыз мылкыдзэ: солэн асьме Удмурт Элькунмылэн президентэз луэмез потэ вылэм. Нош асьмеос пумит луимы, ӧвӧл кулэ президент шуим. Оло, ӧм тодэ, асьме пӧлын таӵе дӥсьтӥсь но быгатӥсь нылкышноос вань шуыса, оло, дырыз ӧз вуы на вал... Кин тодэ. Али вераськонъёс мыно - Госсоветысь ӟучъёс, бигеръёс но украинецъёс ик Удмуртиын президент мед луозы шуо, пе. Асьсэлэн президентэ пуксемзы потэ, удмуртэз уз лэзе. Нош асьмеос озьы ик ог- огмылы ум юрттэ, оскымон адямиосмес ум но дэмлалэ, ум но быръе. Таӵе мылкыдмес шӧдыса, Серафима Петровна шуэ: "Удмуртъёсын ӝук уд пӧзьты, уг поты ни президент но луэме, бырйысалзы ке но..." Асьме "Удмурт Кенешмы" но удмурт калык понна дур уг басьты, ужез уг ик шӧдӥськы. Та кужмо но синмаськымон кышномурт кадь басьтӥськысал ке удмуртъёслэсь но Удмуртилэсь улонзэ воштон борды кин ке, оло, асьмеос но йырмес ӝутысалмы. Мон дэмласько та йӧно удмурт кышномуртэз вылӥе ӝутыны, со трос быгатоз удмуртъёслы юрттыны. Визьмыз но, дӥсьтонэз но тырмоз. Ойдолэ кенешомы, удмуртъёс, асьмелэн вуоно съездозямы дыр вань на. АФАНАСИЙ СТЕПАНОВ. Туспуктэмъёс веразы Удмурт Шаеръюртын (Национальной музейын) ортчиз Куӟебай Гердлэн вордӥськемез дырысен сю ар тырмонлы сӥзем ӝыт. Татын ужасьёсын ӵош сое дасязы Геннадий Красильниковлэн музей-юртаз тыршисьёс. Ижевск педучилищеысь но Удмурт кун университетысь студентъёс азьын быдӟым удмурт сярысь трос тодмотэмзэ ивортӥзы Кузьма Павловичлэн вынмуртэз (вынызлэн пиез) Юрий Чайников, критик литературовед Зоя Богомолова, кылдытон наукаосъя кандидат Анна Зуева. Веранъёс пӧлысь тужгес паймымон вал таиз. Та адями Москвае лыктылыку, быдэс перрон тыр сюлмысь ивортылӥллям: - Та поездын бертэ быдӟым удмурт кылбурчи Куӟебай Герд. Пумиськон дыръя ик тодмасткыны луиз Кузьма Павловичлэн ортчем сюресэзлы сӥзем туспуктэмъёсын. Та выллем ужрадъёс азьланяз луозы на. Нуналлэн тодметэз Вашкала календарья туннэ пусъё Кондратлэсь вордскемзэ. Калык верамъя, кыӵе луоз куазь та нуналэ, сыӵе сылоз быдэс толэзьзэ. Ӵуказе - Фокалэн но Ионалэн праздниксы. Чаклалэ: кызьпулэн куарез ӧз ке усьы на - лымы бер усёз; Та нуналэ чорыганы уг лэзё вылэм - Ион пророк, пе, китлэн кӧтысьтыз потэм. Фокалы вӧсясько, тылпулэсь но вуэ выемлэсь мед утёз шуыса. Югыт нуналмы туннэ кыстӥськоз 11 час 19 минут, ӵуказеозь кулэсмоз 4 минутлы. Чаклалэ: кыӵе нуналъёсы октябре куазь чебер сылоз, сыӵе ик луоз апреле но. Толэзь та толэзе эгес пушкын ке - вуоно гужемед кӧс луоз. Октябре гудыртӥз ке - толэзт лымытэк, ӝог но кезьытъёстэк ортчоз. Кызьпулэн, тыпылэн куарез одӥгтэм усиз ке - кезьыт толлы дасяськы. Куар музъем вылэ мыддорин палыныз ке выдэ - вуоно арын урожай удалтоз. Пушмульы удалтэмын, нош губи ӧвӧл ке - толэз лымыё но кезьыт луоз. Та нуналэ... ар талэсь азьло 5 октябре 1918 арын Василий Чуйковлэн стрелковой полкез тӧдьыос улысь мозмытэ Сарапулэз. Бӧрысьгес аръёсы со луэ тодмо полководец, Советской Союзлэн кык пол Героез, Советской Союзлэн Маршалэз. 4 октябре 1919 арын Горд Армия Деникин улысь мозмытӥз Воронеж городэз. 5 октябре 1952 арын усьтӥськиз ВКП(б)-лэн ХИХ съездэз. Отын берлозэ вераськиз на М. В. Сталин. Та съездысен ик ВКП(б) нимамын вал КПСС шуыса. КПСС быдтэмын 1991 арын август толэзьлэн пумаз. 4 октябре 1957 арын СССР-ын поттэмын Музъемлы дуннеын нырысетӥез искусственной спутник. 5 октябре - Дышетӥсьлэн нуналэз. КУН КЕНЕШЛЭН СЕССИЯЗ Огезлэн кисыез буш, нош мукетызлэн... Валлян, 2 октябре, ужаны кутскиз Кун Кенешлэн дас куинетӥ сессиез. Соин ик, вылды, Кун Кенешлэн юртэз азьын огыр-бугыр вал. Ож тӥрлык поттӥсьёс парламентлы сюлэмшугъяськонъёссэс, сюлэмвисёнъёссэс вераны лыктӥзы. Пӧртэм лозунгъёс мар но уг верало. Калыклэн чиданэз, шӧдске, быре ни. Люкаськемъёс азе потӥз Александр Волков. Лек мылкыдо, сэпсы пӧсьтыны вуэм нылкышноос Кун Кенешлэн Тӧроезлы кыл но вераны уг сёто. Озьы ке но, калыкен кенешон пӧрмиз. Люкаськемъёс оскизы, соослэн куронъёссы сессиын учкемын луозы. Ватсаса ужпумъёс пыртэм бере, нырысь ик кыл сётэмын вал ож тӥрлык поттон удысын ужасьёслэн профсоюззылэн обкомезлэн кивалтӥсезлы Валерий Коротковлы. Со шуиз: - Ож тӥрлык поттон промышленностез быдто ни, 2-7 толэзь ӵоже адямиослы уждун уг сётъяло. Югдур тужгес но секыт "Ижмашын". Татын миым февраль понна но уксё ӧз тыре на. Матэ вуэ юбилеймы. Кызьы сое, маин пусъём? Сыӵегес ик суред Ижысь механической заводын, "Аксионын", Сарапулысь электрогенераторной но радиозаводын. Му вӧй - автомобиль программа куашказ. Нылпиослы пособие сётон уг умоя. Чидантэм ляб мынэ ож тӥрлык поттӥсь предприятиослэсь улон коркаоссэс, нылпи учреждениоссэс но мукетсэ городлы сётон. Таин сэрен гинэ "Ижмаш" 266 миллиард манет изъян адӟиз ни. Парламент ож тӥрлык поттӥсьёслэсь куронъёссэс умоен лыдъяз. Республикаысьтымы нырысетӥ кивалтӥсьёс вуоно арняе пумиськылозы предприятиослэн кивалтӥсьёсынызы, профсоюзной ужасьёсын. Собере сессия басьтӥськиз депутатъёслэсь азьвыл сётэм куронъёссэс учкон борды. Кылсярысь, Борис Волковлэн куронэз герӟаськемын тылобурдо вордон фабрикаослэсь ужзэс умоятонэн. Тая вераськиз гурт хозяйствоя но сиён-юонъя министр Василий Жуйков. Нош парламентысь "Удмуртиысь коммунистъёс" фракция сюлмаське элькунысьтымы рынокъёс сярысь. Тая со депутат курон сётэм. Ужпумъя рос-прос ивортӥз Правительстволэн Тӧроезлэн воштӥсез Владимир Гусев. Та сессия потӥз валтӥсь рынокын умойтэм учыр луэм бере. Отын югдур тупатэмын. Кивалтӥсез воштэмын. Нош шаерамы 21 рынок. Выльёсыз пуктэмын Игра, Кез, Ува, Як.- Бодья, Пичи Пурга но мукет районъёсын. Правительство рынокъёслэсь ужамзэс син азяз возе. Санитарилэсь куронъёссэ чаклало, ужало холодильникъёс, лабораториос но мукет. Вань рынокъёсын 75 сюрс квадратной метр вузкарон интыез 4 сюрс вузкарисьлы. Данакез рынокъёс пыро Удмуртпотребсоюзэ. Рынокъёсты азинтонэ со 17 миллиард манет коньдон висъяз ни. Али рынок ӝутӥське Алнашын, Можгаын но музон интыосын. Трос на тырмымтэос авторыноклэн ужаз. Али солы выль инты дасяло. Озьы ик умоятоно вузкарон инты понна уксё бичанэз. Кӧняез со кассае вуэ - нокин уг тоды. Соин ӵош ик рынокын рэкет быдтымтэ, вузкарисьёслэсь юнме шорысь уксёзэс куро. Парламентын ӟырдыт но лэчыт вераськон потӥз, "Удмурт Телеком" АО-ез эскерыку. Со ассэ монополист кадь возе. Коммунистъёс-депутатъёс тая но курон сётӥзы вал. Трибуна сьӧры ӝутскиз Правительстволэн Тӧроезлэн нырысетӥ воштӥсез Юрий Питкевич. Меӵак пусйыса, связистъёсты со утьыны тыршиз. Тарифъёс, пе, лыдъяса басьтэмын но трослы будэтымтэ. Учком бен со лыдпусъёсты. Азьло телефон пуктыны 600 сюрс манет кулэ вал, табере 1 миллион каремын. Нош толэзьлы быдэ, 15 сюрс манет интые, 20 сюрс манет тыроно луоз. Сыӵе дунъёс тупатэмын туэ 8 августысен. Юрий Степанович нялтас ватсаз на, "Удмурт Телеком", пе, 1200 сюрс но 30 сюрс манет пуктыны куре вал. Правительство тӥни кӧнялы кулэстӥз. Связистъёсты кызьы бен монополистъёс уд шуы. Предприятиослэсь, организациослэсь но учреждениослэсь телефонзэс кысо, нош дун озьы ик басьто. АО-лэн кивалтӥсез Сергей Фомичев шуэ, милемлы, пе, 82 миллиард манет тыронъёссы. Вераськисьтэм телефон понна дун басьтӥд ке, веранэз ӧвӧл, тыронъёс уката йылозы. Я бен, Сергей Мироновичлэн ивортэмезъя ик республикаямы электросвязь умой азинске, Уралын нырысетӥ инты басьтӥськом. Городъёсын 100 семьялы быдэ 63 телефон пуктэмын (Москваын 73), нош гуртъёсын - 23. "Удмурт Телекомлэн" кивалтӥсез сессиын чеберъяськыны выриз ке но, ваньмыз шарае потӥз. Республикаямы шоро-куспо уждун 700 сюрс манет усе ке, связистъёс 1700 сюрслэсь уно "лӧдо". Вылаз ик, туэ ӝыны арскын котькудӥз 1200 сюрс манет дивидендъёс басьтӥз. Тӥни кыӵе "начар" уло вылэм связистъёсмы. Но татын самой уродэз тани мар. Связистъёслэн ваньбурзы республикалэн ӧвӧл, со федеральной ваньбуре пыре, нош акциоссы "Связьинвест" киын. Та ужпумъя Правительстволэсь постановленизэ депутатъёс ӧз кутэ, инъетлы юнматӥзы коммунистъёслэсь. Но кыкетӥ пунктсэ (Правительстволэсь связьлы тарифъёсты будэтонъя постановленизэ дугдытон сярысь) берло учкозы. Азьло, пе, юристъёс кылзэс мед вералозы. Та нуналэ ик сессия бадӟым инты висъяз Сиён-юон корпорациен герӟаськем ужпумез учконлы. Нуназе бере депутатъёс соин гинэ выризы. Со сярысь вуоно номеръёсын ивортом. Толон сессия ужзэ азьланьтӥз. Г. РОМАНОВ. Удмурт Республикаысь Кун Кенешлэн дас куинетӥ сессияз А. А. Волковлэн вераськемезз Гажано эшъёс! Туннэ нунал нош ик возьматӥз ваньзэ сое, ма герӟаськемын мынам нимыным, мае кин кызьы валэктэ. Озьы ке но, ойдолэ радызъя. Нырысь ик корпорация сярысь. Дасьсэ капыръяны капчи, муртлэсь ужам ужзэ "аслам" шуыны лякыт. Тодады вайыто, Эскеронъя палата кылдытэмез бере ик ас азяз пуктӥз ужпум: эскероно сиён-юонъя корпорацилэсь ужамзэ, вань документъёсты келяно Прокуратурае, Правительствоен валче ужано, кивалтӥсьёсты воштоно но мукет. Та уж нуиськиз Кун кенеш, Эскеронъя палата но Кун Кенешлэн Тӧроез кичӧлтэмъя. Кун Кенешлэн Тӧроез та комиссиез кылдытонлы дурбасьтӥз. Нош маин ваньмыз берытскиз? Кокорин депутатэн гожтӥськем материалъёсты лыдӟыса, мон ваньзэ валай. Соку ик комиссия люкаськиз, та ужпумез эскериз. Михаил Константиновичлы мон ӵектӥ вал: зэмлык, бюджетлэн коньдонэз понна нюръяськиськоды бере, басьтӥське мэрилэн мазутъя 20 миллион манетэз борды но эскере. Со мыным шуиз, семьяме судоно, пе. Нош татын "мон сэртто-пертчо" шуиз. Берло Президиумын мон ӵектӥ правоез утись ёзъёслэсь ужамзэс эскерыны. Малы ке шуоно, уголовной ужъёслэн нуиськемзы мыным уг кельшы. Уг валаськы, кызьы озьы сэрттыны кулэ ньыль уголовной ужъёсты, кудъёсыз Эскеронъя ревизионной управленилэн актъёсызъя ӝутэмын вал. Соос огзэс огзы вошто гинэ. Следствие шарая 6,5 миллиард манет недоимка, нош янгыш муртъёс эрике лэземын. Маин та ваньмыз быроз... Лушкаськисьёс, законъёсты тӥясьёс, кыл кутэмлэсь мозмисьёс сярысь ужпумез ӝутоно. Сиён-юонъя корпорация пумысен ужез гинэ ӧвӧл, мукет уголовной ужъёсты но йылаз-пумаз вуттоно. Кин янгыш, сое кыл кутытоно, фамилиез, должностез шоры учкытэк. Паймымон, корпорация пумысен нырысь ик Министръёслэн Кенешсылэн Тӧроез Волков янгыш луиз. Аслэсьтым ачим юасько: ужаз Волков Министръёслэн Кенешазы - котыр ласянь янгыш вал, нош Вылӥ Кенеш сярысь кылпум ӧз поттылэ. Волков Кун Кенеше выжиз - нош ик Волков котьмалы янгыш. Та учырен герӟаса, иворъёсты вӧлмытӥсь эрико шуон ёзъёс сярысь но вераме потэ. Министръёслэн Кенешсылэн Тӧроезлэн, Правительстволэн, вылӥ должностен муртлэн ужпумез - кылдэм шуг-секытъёсты палэнтон. П. Н. Вершининлэсь ивортэмзэ ваньды кылзӥды луоз. Отын со валэктӥз, кызьы асьмеос бюджетысь ссуда басьтыны быгатӥм, куке Россия Федерациысь уно улосъёс сое ӧз ворме басьтыны. Нош ми быгатӥм, малы ке шуоно, ми ужам, ветлӥм, гожъям, курим, угось республикамылы нянь кулэ вал. Ми ужпуммес соку быдэстӥм. Нош кыл кутыны кулэ со, кин ваньмыз понна сюлмаське. Оглом басьтон ке, янгыш, валамон ини, Министръёслэн Кенешсылэн Тӧроез яке Правительстволэн Тӧроез, Кун Кенешлэн Тӧроез, Россия Федеарциысь Президент.Одӥг кылын вераса, кин кивалтэ, со ик янгыш. Кызьы иворъёсты вӧлмытонъя эрико ёзъёс Кун Кенешлэсь Тӧрозэ возьмато? Басьтом нырысетӥ сессимес Тодӥськоды на луоз, кыӵе нюръяськон мынӥз, кыӵе вераськонъёс чузъяськизы, куд-огез "Волков республикаен медаз кивалты" шуылӥз. Угось соос тодӥзы, Волков лыктӥз ке, "Ижмашлэн" генеральной директорез соку ик ужезлэсь куштӥськоз шуыса. Та дырозь, уго, шыпыт улӥзы, нокинлэсь кылзэ ӧз юалэ. Волковлэн Министръёслэн Кенешазы ужамезъя тросэз валазы: таиз юалоз. Нырысетӥ толэзьёсы ужакум ик валамзы-шӧдэмзы зэмаз. Милем капчи ӧй вал, малы ке шуоно, со "генералъёс" Центральной комитетэн юнматэмын вал. Соин ик соосты "обидьыны" правоез нокинлэн ӧй вал, обкомлэн секретарезлэн гинэ но. Нош ми та сямез тӥям, малы ке шуоно, "Ижмаш" чылкак куашкамын вал, кивалтӥсьёс производство сярысь ӧз сюлмаське, 20 сюрс адями ужлэсь мозмытэмын вал. Табере али асьмеос шӧдӥськом со югдурлэсь бервылъёссэ. "Ишмашын шуг-секытъёсты вормон понна уно кужым сётэмын ке но, югдур татын али ке но чутрак ӧз воштӥськы на. Соос тодо вал, Электромеханической заводысь кивалтӥсьёс воштэмын луозы шуыса. Малы ке шуоно, Волков уг лэзьы ужтэк пукыны, юыны но ужась калык сярысь вунэтыны. Соослэн али ик сюлэмъёссы висё ини, Волков выльысь кивалтӥсе медам пуксьы вал шуыса. Соин ик миллионъёсын гинэ ӧвӧл, миллиардъёсын коньдонзэс уг жаляло, нимме сьӧдман понна. басьтыны Эшшо огпол верало на: пӧсь сюлэмын но чылкыт киосын вуи мон татчы, озьы ик азьланяз но ужало. Та улонысь озьы ик кошко: пӧсь сюлмын но чылкыт киосын. Туннэ Кокоринэз шедьтӥзы, со быгатэ котькинэ янгыше уськытыны. Сое ӟеч тодӥсьёс монэным соглаш кариськозы. Вкладчикъёсын со ваньзэ "радъяз" ини. "Утиз". Соослэсь табере номырзэс басьтыны. "Сюриз" корпорация. Табере уте ӟучъёсты. Соосты куанер, янгыше уськытэм муртъёсын возьматыны турттэ. Но ӟуч калык котьку вал но луэ обществолэн инъетэз. Политикаын очкоос басьтон понна, али со выль "ужъёс" малпа ини. Табере мыным ваньмыз валамон, соин ик номырлы уг паймиськы. Уг паймиськы, малы огаз газетын гожтэмын вал, Волковлэн кышноез банкысь 2 миллиард манет басьтӥз шуыса! Адямиез сьӧдмаса котькызьы гожтыны луэ. Гожтӥзы, Волков самой узыр адями шуыса. Гарнитур, пе, басьтӥз 19,5 сюрс долларен. Кызьы возьыт ӧвӧл! Туж возьыттэм, кырсь адямиос гинэ озьы гожтыны быгатозы: адямиос кышкалэ Волковлэсь! Волков калыкез котьку утьыны выре шуыса тодо ке но, ваньзэ лэсьто, сое сьӧдман понна. Тӥ но, Михаил Константинович, соослэн радъёсазы султӥды! Волков, Федерацияя Кенешлэн членэз но Кун Кенешлэн депутатэзлуэ ке но, Прокурорлы допросын показаниос сётӥз, мыным адямиослэсь номыр ватыны. Азьланяз но мон порядок понна нюръясько но республикаын улӥсьёсты утьыны тыршо. Утё банклэсь вкладчикъёссэ, кудӥз али куашкан калэ вуэмын. Директоръёсты уждун басьтыны косо ужамзы понна гинэ. Малпаськоды, полномочиосы-а ӧжытгес? Бен, ӧжытгес. Куронъёс-а туэ лябесь? Бен, лябесь. Туннэ луэ, тэк пукыса, миллион манетъёсын уждун басьтыны, производстволэсь куашкамзэ адӟытэк кыльыны. Соин ик, гажано эшъёсы, мон тӥледыз курисько тысез дыжезлэсь люкыны. Тӥлесьтыд мыным юрттэт кулэ, куд-ог дыръя мынам но дурбасьтӥсьёсылэсь куаразэс кылэме потэ. Малы ке шуоно, ачид сярысь вань гожтэмъёсты лыдӟыны но куректыны капчи ӧвӧл. Производствоын но мон тыршыса ужай, Министръёслэн Кенешазы но кызьы кулэ ужай, али быдэсъяно удысам но республикамы понна уй но нунал тыршо. Кинлэсь кылзэ юано, юалом. Мар лэсьтэммы сярысь калыклы ивортом, вуоно сессиын ик арлы йылпумъянъёс лэсьтом. Ваньмыз сярысь меӵак вералом, кинлы ке со ӧз ке но яра. Толон дышетӥсьёсты праздникенызы ӟечкыламы, таӵе ивор сётӥмы: тодон-валанъёсъя асьмеос 34-тӥ интыын сылӥськомы вал, нош туннэ ини 29-тӥ интыын. Республикамы социально-экономической азинсконъя 30-40 интыос вискын вал, туннэ 20-30 интыос вискын. Та лыдпусъёс ик возьмато асьмелэсь ужаммес. Правительстволэсь, предприятиослэн кивалтӥсьёссылэсь ужамзэс, ваньмылэсь, кин секыт югдурвылэ чӧлскытэк, ужа но ужа. Сыӵе предприятиосын уждун но дыраз тыриське, производствозы но ялан будэ. Сыӵе кивалтӥсьёс ас понназы гинэ уг уло! Мон курисько, решениос кутыку, туннэ верамъёсме лыдэ басьтыны. Криминальной власть кылдытӥсьёслэн ужзы уз пӧрмы. Адямиос оско асьмелы. Озьы ке ӧй луысал, соос туннэ татчы но ӧй лыктысалзы. Ойдолэ ӵошатом, кӧня адямиос люкаськыло мэрия, Правительство но Кун Кенеш азе. Кун Кенеш азе котьку лыкто. Пӧям вкладчикъёс но туннэ меӵак шуо: "Ми тӥлед оскиськом". Мон оскисько, Кун Кенеш адямиослэсь малпанъёссэс быдэстоз. Тау. Ёросъёс специалистъёслы уз ёрме "Гуртысь абитуриент" - озьы нимаське "МДС-тур" ("Егитъёслы, нылпиослы, студентъёслы туризм") кун учреждение азьын сылӥсь одӥгез ужпум. Ёросысь нылпиос каникулъёссы дыръя Ижевскын нимысьтыз семинаръёс, вылӥ дышетскон заведениосы пырыны малпасьёс ватсаса тодон- валанъёс люкало, асьсэлэсь быгатонлыкъёссэс чаклало, городэн тодматско. Таяз дышетскон арлы "МДС-тур" очно-заочно амалэн дышетон курсъёс усьтэ Удмурт кун университетысь психолого-педагогической факультетэ пырыны мылкыд карисьёслы. Азьланяз соос луозы социальной ужасьёс но психологъёс-педагогъёс. Курсъёс чакламын шор ёзо школаосысь, лицейёсысь, гимназиосысь 11-тӥ классын дышетскисьёслы. Котькуд ёрослы висъямын луоз быдэн одӥг-кык инты. Дышетскыны мылкыд карисьёс вазиськыны кулэ ёросысьтызы егитъёсын ужанъя отделъёсы. Юан-веранэз пыр потэмъёс ар ӵоже ветлозы сессиосы. Одӥг муртэ дышетон сылоз кык миллион: 680 сюрс манетэз - дышетскись мурт чотын (сессилы быдэ тыроно 170 сюрс манет), кылемез коньдон кутӥськоз республикалэн бюджетысьтыз. Курсъёсын дышетозы Удмурт кун университетысь преподавательёс, нимысьтыз дасям программая. Дышетскыны мылкыд карисьёслы висъялозы улон инты, сюдозы, радъямын луозы пӧртэм ужрадъёс, экскурсиос. Л. МАЛЫХ. Цӥзьыл "йӧ" вырӟон Туннэ редакцие люкаськем эшъёсмы азьын ас малпанъёссэ усьтэ Удмурт кун филармонилэн художественной кивалтӥсез, республикаысьтымы Кун премилэн лауреатэз, культура удысын сӥё-дано ужась Валерий Яковлевич МИТРОФАНОВ. - Валерий Яковлевич, нырысь ик, дышем сямъя, юалом, мар бордысен кутске тазэ сезонэз Удмурт кун филармония. - Куинь-ньыль арзэ ни сезонмес кутскиськом 1-тӥ октябре. Туэ 23-тӥ арзэ ни, ООН-лэн пуктэмезъя, та нунал луэ Музыкалэн калык куспо нуналэз, кичӧлтӥсез Д. Шостакович. 1990-тӥ аръёсы сӥзьыл ми ортчытъям крезьгурлы сӥзем фестивальёс, кылсярысь, "П. И. Чайковскийлэн родинаяз - зарни сӥзьыл". Туэ ӧз пӧрмы - коньдон ӧвӧл. Берло аръёссэ филармония ужъёслы нокыӵе коньдон уг висъяськы. Азьвыл, дотация сёто ке, билетъёсыз дунтэмгес кариськом, гуртъёсы потаськом вал. Куанер улэммес уката ик шӧдӥм, Москвалэн 850 ар тырмонэзлы сӥзем празднике ветлыса. 19 процентлэсь ятырез Россиысь коньдон Москваын берга. Татын чыры-пырыен уг выро, эстрадаысь но мукет кизилиослэсь концертъёссэс зӧк янчикъёсын гинэ ортчытъяло. Москвае ветлэммы пайдаё луиз соин: солэн пӧртэм сэрегъёсаз ортчем 19 праздник пӧлысь троссэ адӟыны кылдӥз милемлы, семинаре лыктэм режиссёръёслы. 15-тӥ октябре благотворительной концерт сётомы, пыриськозы вань коллективъёс. Таяз сезонысен милям бурд уламы сюриз "Удмуртия" кун симфонической оркестр. Солы кивалтӥсь бырйыны конкурс ялӥмы. Музыкальной лекториймы дасяз кык абонемент, со быдэс арлы чакламын. "Шулдыр ӝыт" ансамбльмы ноябре 20 аръем юбилейзэ пусъе ( со сярысь тӥ гожъяды ни). 1-тӥ ноябре калык артисткамылы Нина Варачевалы 50 арес тырмемен валче луоз творческой ӝыт. 26-тӥ ноябре озьы ик гажано калык артистмылы Николай Семенович Зубковлы 70 арес. Озьы ик ми концертъёсын шулдыртом удмуртъёслэсь куатетӥ ӧтчамзэс (5-тӥ-6-тӥ ноябре). "Катанчи" коллективмы пыриськоз финн-угор театръёслэн 18-тӥ - 23-тӥ октябре Йошкар-Олаын ортчоно фестивалязы. Милемлы ужаны юртто палэнысь гастрольёсын лыктэмъёс. Сентябре Москваысь симфонической оркестр вуылӥз. Матысь дыре лыктоз Б. Певзнерлэн камерной хоровой театрез, собере - солистъёслэн "Франс Лефорт" ансамбльзы. Ноябре ми доры вуозы Россиысь калык артист домрист В. Круглов но дано артист скрипач С. Стадлер. Нимысьтыз концерт сётозы асьмелэн егитъёсмы Москваысь консерваториын дышетскись Ольга Дедюхина но Гнесинъёс нимо училищеын дышетскись Михаил Шиляев. - Огкутскемен вералоды ни, дыр, кызьы пуктэмын удмурт нылпиосты крезьгурлы дышетон. 16-тӥ августэ газетамы Ольга Васильевна Ивановалэн статьяез потӥз вал, берло дыре "крезьгуро инӟыосмы" пашмыны кутскизы шуыса... - Со статья югдурез умой-умой тодытэк гожтэмын. Усточиослэн школа-интернатазы ужасьёслэсь сюлэмзэс туж вӧсь кариз. Зэм, Ольга Васильевна трос лэсьтӥз, школа-интернатэз кылдытон понна, но мукетъёссэ но вунэтыны уг яра. Школа-интернатмылы туэ тырме ни дас ар. Выль интые выжим, но корпусъёс быдэсак дасесь ӧвӧл на. Весь коньдон бордын ужпум... Мар но со азинсконъёс вань ини, шуэммы луэ. Калык инструментъёсъя оркестрмы адскымон. Одӥгез выпускникмы ужа ни дорамы. Вуоно суредасьёсты дасян умой пуктэмын. Теоретической отделение ӟеч тодонъёс сётэ. Туэ куинез пиосмы, крезьгуръя училищее пырыкузы, дышетӥсьёсты паймытӥзы: сольфеджиоен вылӥ балл - "дас" басьтӥзы. Оскон сётэ ни ньыль ар талэсь азьло городысь удмурт нылпиослэсь люкам класс. Туэ гуртысь бичамы нырысетӥ классэ. Секыт, мар веранэз, туж мӧзмо. Но милемлы татчы, йыг-йыг класс карон понна, кулэ на вылэм куинь-ньыль пичи пи. Гуртысь нылпиосты школа-интернатын вить ар дышетон - со туж ичи. Крезьгуръя училищее пырон понна, куд-огез эшшо кык-куинь ар дышетсконо луо на. Школа-лицей усьтыса, нылпиосты дас ар дышетыса, татысь ик соос пырыны мед быгатозы консерваториосы (нош училищеын асьсэды "тӥяно" луо). Азьпалан асьмелы удмурт музыкальной колледж усьтыны сюлмаськоно. Нош та школа- интернатмылэн пайдаез вить-куать ар улыса гинэ умойгес шӧдӥськоз ай. Зэмос музыкантэз уго 15- 17 ар дышетоно. - Али асьмелэн куаш поттыса мынэ вань удмуртъёслэн куатетӥ ӧтчамзылы дасяськон. Кызьы малпаськоды, зол-а йӧ вырӟемын ни асьмелэн? - Асьмелэн вырӟонмы (будонмы) вож, пинал дыраз ай. Тани нырысетӥ (куинетӥ) ӧтчам бере кыӵе зол бурдъяськон вал, нош кыӵе документъёс кутэмын. Кыкетӥез ӧтчаммы лябгес ортчиз ни. Солэн материалъёсыз но ӧз печатлаське. Удмурт движение вить ар ӵоже лябӟыны кутскиз. Вылаз тубӥз "шукы". Кин визь, кужым сётыны быгатысал, кылиз палэнэ. Соосты палэнтӥзы. Куд-огзэ монъяськисьёсты матэ но лэзёно ӧй вал удмуртъёсты ӝуткан-вырӟытон котыре. "Удмурт кенешлы" кивалтӥсе пуктоно сыӵезэ, кин кусып шедьтыны быгатысал ӟучъёсын, бигеръёсын, поръёсын но мукетыныз. Мед луозы законъёсыз кутонъя кичӧлтонъёсыз. Удмуртъёслэн вырӟонзы культураез ӝутон бордысь гинэ медаз луы вал. Кызьы асьмелэн али? Кырӟан-эктон ужрадъёс но властез люкыны вырон. Нош общественно-политической уже кутскиськом - йырмес мыкыртыны выро. Яке асьсэ пала куасалтыны. Адӟом ни, мае возьматозы Ижысь мэрие быръёнъёс. Оло нош, ваньзэ интыяз пуктоз ай куатетӥ ӧтчам. Крезьгуро инбам воректоз Туэ 12-13 декабре ортчоз шаерысьтымы удмурт егитъёслэн нырысетӥез фестивальзы. Радъяло сое Культурая министерство, Калык творчествоя республикаысь центр, удмурт егитъёслэн "Шунды" дэменлыксы Калыкез дышетонъя министерстволэн, Удмурт Республикалэн Правительсвоысьтыз Нациосын ужанъя комитетлэн но Егитъёсын ужанъя кун комитетлэн юрттэмзы улсын. Соин валче шаерамы ялэмын эстрадая удмурт кырӟанъёсты быдэсъясь егитъёс пӧлын "Ӝужась кизилиос - 97" конкурс. Отчы пыриськыны быгатозы 15 аресысен 30 аресозь нылъёс но пиос. Конкурс кыстӥськоз октябрьысен декабрь толэзёзь. Усточи кырӟасьёс нырысь ӵошатскозы асьсэ ёросъёсын, городъёсын, отын вормиче потэмъёс пыриськозы зонаосъя ӵошатсконъёсы. Нош тужгес но устоосыз егит кырӟасьёс быгатэмзэс возьматозы ини декабрь толэзе ортчоно фестивальын. Мар бен, возьмалом ни шаермылэн крезьгуро инбамаз выль ӝужась кизилиослэсь воректэмзэс. Л. КИМОВА. Юрий Лужков: "Ӵуказе нуналэз адӟытэк, кыдёке ум вуэ..." Сӥзьыл куазь нунал ӵоже трос пол вошъяське. Озьы ик вал 4 октябре но. Вазь ӵукна шунды потӥз, собере сьӧд пилемъёс быдэс инмез басьтӥзы. Соин ик, вылды, Юрий Лужковлэн самолётэз Ижевске кӧня ке ӝегаса пуксиз. Бадӟым куноез пумитазы Кун Кенешлэн, Правительстволэн тӧрооссы Александр Волков, Павел Вершинин, Ижлэн мэрез Анатолий Салтыков, Россиысь Президентлэн Удмуртиын оскем муртэз Виктор Балакин, министръёс но мукет кивалтӥсьёс. Москваысь бадӟым делегация та нуналэ вуылӥз акциосын "Ижмаш-авто" огазеяськонэ, промышленной вузъёсты но ож тӥрлыкез возьматонэ (выставкае) биатлонъя комплексэ, Александр Невский Соборе, Удмуртиысь Национальной музее но мукет интыосы. Собере Кун Кенешын Удмурт Республикаысь но Москва городысь Правительствоос куспын гожтэмын вузкарон, экономика, наука, техника но культура удысъёсын кусыпъёс тупатонъя Огкыл но Тупан кыл. Татын ик Юрий Лужков республикаысьтымы активен пайдаё кенеш ортчытӥз. Отчы ветлӥзы законодательной но исполнительной органъёслэн, городъёсысь но районъёсысь администрациослэн но предприятиослэн кивалтӥсьёссы. Кин со Юрий Лужков? Нырысь ик, усто визьмо хозяйственник. Вакчи дыр куспын бадӟым кивалтӥсь. Мэр луиз: со зэмос азьветлӥсь, Кремльлэн синмаз уг учкы. Аслаз ваньбур вузан (приватизация) амалэз, социальной но внешней политикаез. Москва - со нимаз государство, трос лэсьтӥське. Аппаратэз туж пайдаё ужа, котькудӥз ас интыяз. Юрий Михайлович ваньзэ кыскиз футболэн шудонэ. Со адямиосты огазея, ог-огзэсты матэгес каре. Мэр ужасьёсыз азе юнэсь куронъёс пуктэ но соосты юн уте. Одӥгзэ но вӧсь уз кары, уз "вуза". Яратэ спортэз, толалтэ пылаське. Трос юрттэ кышноез Елена Николаевна. Аэропорт. Чебер авиалайнер пумен матэктэ. Вылаз "Россия" гожтэмын. Тубат сётэмын. Юрий Лужков бызьыса кадь отӥ васькиз но буй-юуй пыжем нянен пумитасьёс доры вуиз. Москваысь куноос элькунысь кивалтӥсьёсын ӟечъяськемзы бере, "Волгаос" ширтӥзы автозаводэ. Чаклам программая Юрий Лужков но делегация татын тодматскыны кулэ элькунамы поттэм промышленной вузъёсын. Зэмзэ но, Москвалэсь мэрзэ но отысь делегациез предприятиосмы паймытӥзы но шумпоттӥзы таӵе усто но ӟеч продукция поттыны быгатэменызы. Соин ик выставкаез учкон одӥг но ӝыны час чакламын ке вал, со кык поллы тросгес кыстӥськиз. Юрий Михайлович котькуд предприятилэн вузэныз рос-прос тодматске, юанъёс сётъя, Москвалы кулэ луись продукциез басьтонъя куд-ог ӵектонъёс сётэ. Солы кельшо Сарапулысь электрогенераторной заводлэн теплосчётчикъёсыз, интыысь интые вошъяно гумы ӵыжатон агрегатъёсыз. Та хозяйствоя управленилэн кивалтӥсезлы Михаил Лапирлы дэмла кусыпъёс тупатыны. Гумы ӵыжатон агрегатъёс, пе, али Англиысь басьтӥськом. Нош Удмуртиын уката ӟечгес потто вылэм, солэн секталаез тямыс пол ичи. Двигалетез Челябинскын лэсьтэмын. Юрий Лужков, дырзэ жалятэк, пыр-поч учке пӧйшуран пыӵалъёсты, кияз кутэ-бергатэ, чеберезлы но ӟечезлы пайме. Ачим, пе, туж яратӥсько пӧйшураны. Выставкаын мар но ӧвӧл: калыклы нуналмысь кулэ луись вузъёс, пӧйшур куос, сиён-юон, му вӧй поттон оборудование, пистолетъёс, "Бизон" автоматъёс, мотоциклъёс, автомашинаос, космос связьлы приборъёс, электромобильёс, ву шунтон котёлъёс, паровозъёс, "Банкир" спутниковой связья система но мукетыз. Ваньзэ вераса но уд быдты. Тани Глазовысь "Инвис" машзавод автозаправочной станциослы музъем пушкын возьыны бадӟымесь бекчеос поттэ. Нош "Сактон" АО-лэн валтӥсь директорез Зоя Степанова Москваысь куноослы тупен-тупен маде столицае кыӵе вузъёс келя, кӧня сётыны быгатоз но музон. Татчы озьы ик мынэ Можгаысь "Свет" огазеяськонлэн "Сарова" ческыт минерал вуэз. Москвичъёслы яраз мебельмы но, винаосмы но. Юрий Лужков но Александр Волков гожтӥськизы Москва но Удмуртия куспын эшъяськонъя но валче ужанъя огкыл улэ. Ма со сётоз асьмелы? Та сярысь вераз Юрий Михайлович, республикаысьтымы кивалтӥсьёсын пумиськыкуз. - Асьмеос туннэ нырысетӥ вамыш гинэ лэсьтӥм ай, азьпалан соос трос луыны быгатозы, - пусйиз Москвалэн мэрез. - Мон татчы лыктӥ, столица азьын сылӥсь ужпумъёсты быдэсъян сярысь сюлмаськыса. Политикаен соос герӟаськемын ӧвӧл. Странамы асьмелэн туж узыр. Уг тырмы ӵуказе нуналэз адӟыны тыршеммы, ужез радъян. Секыт югдурысь потон понна, одно ик улӟытоно улосъёслэсь кусыпъёссэс. Уго оген номыр лэсьтыны уг луы. Тани ми ар но ӝыны ӵоже ужаськом ни Мордовиен. Азьло та республикалэн Москваен кусыпъёсыз туж лябӟизы ни вал. Договор гожтыса, югдур воштӥськиз. Али Мордовилэн вузкарон удысаз Москвалэн люкетэз ӝыныез котыр. Ваче вузкаронлэн быдӟалаез триллион манетозь вуиз ни. Урод шат? Таӵе ик луонлыкез вань Удмуртилэн но. Тӥляд туж трос пусйымонэз: визьмо но быгатӥсь адямиос, наука, предприятиос но лябӟемын ӧвӧл на. Асьмелэн огкадь шуг-секытъёсмы - автозаводъёс. Ӵош ужам ке, пӧрмытом. Юрий Лужков оскытӥз, Москваын асьме предприятиослэн вузъёсынызы адӟытон усьтэмын луоз шуыса. Со одно ик юрттоз кык шоркаръёс куспын пичи выжъёс тупатыны. Москваын озьы ик усьтыны чакламын Удмуртилэсь вузкарон юртсэ. Со сяна, нимысьтыз магазинысь басьтыны луоз Ижын поттэм пыӵал тӥрлыкез (валамон ни, вераськон мынэ пӧйшураны но спортлы чаклам оружие сярысь). Лужков сое усьтыны лэзем ни. Москва али туж сюлмаське отын умойтэм кудӟытӥсь юонъёслы сюресэз пытсан сярысь. Соин ик азьланьын, оло, москвичъёс асьме республикаын поттэм аракыез юыны кутскозы. Шаермылэн куноосыз ӧз ватэ му вӧен тунсыкъяськемзэс но. Москваын кылдытэмын эстӥськонъя центральной компания. Ӵапак со ик быгатоз асьме нефтез басьтыны, дыраз коньдон тырыны. Удмуртия понна но таӵе ӵектон урод ӧвӧл. Уго уно аръёс ӵоже ни республика шугъяське та ужен. Асьмемыз я пӧяло, я эшшо маке но шеде. Москваын улӥсьёслы (ма, озьы ик асьмелы но) акыльтэм ни, шӧдске, Западысь вуись сиён-юон. Соин ик лыктэм куноос сюлмаськизы та ласянь но кусыпъёсты юнматыны. Кылсярысь, кенешемын ни келяны асьме дорысь 5,4 сюрс тонна картофка. "Удмурт дунне" гожъяз ни, Юрий Лужковлэн анаезъя выжыосыз асьме палъёсын герӟаськемын шуыса (мумиз вордскемын али Башкирие пырись Калтаси ёросысь Калегино гуртын). - Туж вуылэме потэ Сарапулэ, - шуиз Юрий Михайлович. - Анае отчы 11-12 арес дыръяз вуиз. Озьы луиз, аслэсьтыз анайзэ вазь ыштэмен валче. Интыяськиз чугун сюрес вылын ужась инженерлэн семьяяз, прислугае. Озьы дасо ар пала улӥз. Сарапулэз, отысь адямиосты анае туж шуныт кылъёсын тодаз вайылӥз. Юрий Лужков кыл сётӥз, ар ортчыса, выльысь пумиськыны. Учком, пе, ог-огмылэн синъёсамы, эскером, ма лэсьтэмын, вераськеммы-кенешеммы юнме медаз луы. Москва мэрлэн данэз асьме дорын но бадӟым вылэм. Со шӧдӥськиз котьма ласянь. Тужгес но - Александро-Невской собор дорын калыкен пумиськон дыръя. Ижын улӥсьёс туж оскыса кенешизы Лужков эшен. Пӧртэм юанъёс сётъязы. Ӟеч мылкыдэз возьматэ мукетыз но. Ректор Анатолий Журавлев Кун Кенешын совещание ортчон дыръя ялӥз: Юрий Лужковлы сётэмын Удмурт кун университетлэн дано (почётной) профессорез ним. ... Пумиськон бере Кун Кенешысь потӥсь адямиос вожъяськыса ог-огзылы шуылӥзы: "Таӵе адямиез быдэс Россилы кузёе быръёно вал..." Кин тодэ, оло, куке озьы но луоз ай. Г. РОМАНОВ. И. ЛЕБЕДЕВ. Витьтон ар нылпиосын ӵош Сарапулысь мӧйы дышетӥсь Лия Михайловна Кенская туэ кык юбилейёссэ пусъе: вордскемез дырысен солы тырме 70 ар, нош школаын ужамезлы - 50 ар. Со пӧлысь витетӥ арзэ дышетэ 8-тӥ номеро школаын. Лия Михайловнаез татын ваньмыз гажа, егит дышетӥсьёслы но, нылпиослы но со анай кадь, соослы котьма ласянь юрттыны тырше. Пичиысен ик со дышетӥсь луыны малпам. Сарапулысь педучилищеез 1947 арын йылпумъяса, татысь ик 3 номеро школаын дышетыны кутскем. Татын Лия Михайловна нылпи хор кылдытэм, кырӟасьёсты эктыны но дышетэм. Шаплы егит дышетӥсь комсомоллэн горкомаз но ужам... Но татысь уж ярамтэ, со нош ик пиналъёс доры 12-тӥ школае мынэм. Пичиосты дышетон удысын со котьку выль амалъёс кутэ. Али соос англи кылэз дышето, кырӟало, экто. Лия Михайловналэн уроказ быдэс республикаысь но Сарапулысь дышетӥсьёс ветло, пиналъёсын ужаны дышетско. Ас ужан амалъёсыз сярысь со ӵем гожъя "Красное Прикамье" газетэ, пыриськылэ "Учитель года" конкурсэ. Лия Михайловналэн пиналъёсыз туж шер "кык" басьтыло, школаез умоесь тодон-валанъёсын йылпумъяло, тодмо адямиос луо. Сарапулысь связьлэн герӟетаз валтӥсь инженер луыса ужа Владимир Говорливых, Ижевскысь технической университетлэн Сарапулысь филиалэныз кивалтэ Владимир Кулёмин, Сарапулысь педучилищеен кивалтэ Нина Андриянова. Ваньмыз соос Лия Михайловналэн дышетскисьёсыз вал. Солэн быгатыса ужамез пусъемын 30 почёт грамотаен, "За доблестный труд в ознаменование 100 летия В. И. Ленина" медален, Пӧртэм почёт знакъёсын. Со сяна Лия Михайловналы "Отличник народного образования", "Заслуженный учитель Удмуртской Республики", "Старший учитель" дано нимъёс сётэмын. Туэ со дышетоз куинетӥ классысь пиналъёсты. Бадӟым азинсконъёс тыныд дышетон удысын но шудо улон, Лия Михайловна. В. Лагунов. Музейлы - даур Ижевскысь арсеналын сю ар талэсь азьло усьтэмын вал пыӵал тӥрлык поттонъя Россиын мастеръёсты дасянъя нырысетӥез школа. Татын ик возьматӥзы заводлэсь пыӵал тӥрлыкъёссэ но инструментъёссэ. Музеез эскериз Коллежской советник А. А. Цедельман. 1887 арын 21 июне музейысь экспонатъёсты ваизы заводлэн главной корпусаз. Арсеналын но кӧня ке пыӵалъёс кельтэмын вал. Выль музее нырысь ик пыразы империлэн вылӥ адямиосыз. "Ижмашлэн" музеез али ужа машина лэсьтӥсьёслэн культура дворецазы нимысьтыз висъям интыын. Заводлэн кылдэмезлы 190 ар но Калашниковлэсь автоматэз поттыны кутскемлы 50 ар тырмемен валче, музее ветлӥсьёслэн лыдзы йылӥз. Татын тодматскыны луэ андан ӵыжатон заводлэн но историеныз.Пыӵал тӥрлык татын трос. Нимысьтыз сэрег висъямын дано конструкторлы Михаил Тимофеевич Калашниковлы. В. ЧЕРНОВ. ЖУРНАЛИСТЪЁСЫН ПУМИСЬКОНЪЁС Москва кыдёкын Кылем вторнике, 30 сентябре, Удмурт Правительствоын журналистъёс пумиськизы калыкез улон- вылонын утёнъя министрлэн нырысетӥ воштӥсеныз Наталья КУЗНЕЦОВАЕН. Люкаськемъёслы со мадиз пенсиос, пособиос тыронэз выльдон но куд-ог мукет ужпумъёс сярысь. Пумиськон арлыдо адямиослы сӥзем нуналэ ортчиз бере, Наталья Федоровна шуиз, та нуналэз, пе, куатетӥ арзэ пусйиськом ни. Туэ та ужрадэз ортчытыны Пенсиосъя фонд быдэс республикая 300 миллион манет пала коньдон висъяз. Шаерамы али 385 сюрс пенсионеръёс. Ӝыныезлэсь уноез (60 процентэз) шорлыдын 252 сюрс манет гинэ пенсия басьтэ. Одӥг октябрьысен 16,5 сюрслы будэ, нош декабре - 21 сюрслы яке 11 процентлы. Министерство пересьёслы котькызьы юрттэ. Элькунамы 12 интернатъёсын 3,5 сюрс мурт улэ. Соосты возьыны 33 процент гинэ уксё висъяло ке но, отын улӥсьёсты умой сюдо. Соос асьсэос бакча сиёнъёс но емышъёс будэтыны быгато на. Нош эмъюмъёс басьтыны, жаляса верано луэ, коньдон уг тырмы. Пенсионеръёслы социальной юрттэт сётонъя шаерамы 105 ёзъёс кылдытэмын. Соослы улэп коньдон уг шедьы, но ог-огедлы пунэм тыронъёсын вошъяськон мынэ. Та ёзын асьсэды ужасьёсты утён вылысь, али нимаз постановление дасяське. Сое умоен лыдъяз Юстицияя министерство. Правительство документ бордын ужа на. Нош социальной ужась али толэзяз 300 сюрс манет пала уждун басьтэ. Постановлениын нимысьтыз льготаос учкемын. Кызьы сое Кун Кенеш дунъялоз - туннэ шуг вераны. Арлыдоос пӧлысь одӥг витьмосэз инвалидъёс луо.Соин ик министерствоын ужа ВТЭК (врачебно- трудовой экспертизая комиссия). Солэн эшшо 9 пичи комиссиосыз вань на. Но алигес солэн нимыз воштэмын. ВТЭК луиз Медико-социальной экспертизая служба. Табере со (кин быгатэ) уже интыяны но юрттоз. Али ужа ни "Инвалидъёслы социальной гарантиос сярысь" Закон. Кун Дума пенсиос сярысь выль закон кутӥз ке, огдыре вужез но ужалоз. Выляз каньылля потом. Котькудӥз пенсионер ачиз чаклалоз: солы ужано яке пенсия басьтоно. Малы ке шуоно, ужасьтэм пенсионерлы тросгес пенсия сётӥськоз. Кин война аръёсы ужаз но медален пусъемын, со ужысь фронтэ ветлэм адямиен лыдъямын. Соослэн пенсизы 30 процентлы йылэтэмын. Но со сётӥське, кинлы 12 арес вал, нош 10-11 аресъемъёс ужазы ке, соос отчы уг шедё. Азьланьын, оло, та ужпум быдэстэмын луоз. Асьме республикая сыӵе документ дасямын. Но со вылэ Кун Кенешлэн Тӧроез Александр Волков ӧз гожтӥськы на. Мугез тодмо: улонэ пыӵатон понна ичизэ 45 миллиард манет уксё кулэ. Туэ 1 январе кутэмын котькуд адямилэсь Пенсиосъя фондэ кӧня коньдон тыремзэ лыдъян но сое страховать карон сярысь закон. Озьы тодмо луоз, фондэ кин кӧня взнос вуттоз но соя ик азьланьын пенсия тупатӥськоз. Та ужлы республика дась ни. Куинь районъёслы сяна, калыкез улон- вылонын утёнъя отделъёслы компьютеръёс сётэмын. Нош кызьы мынэ нылпиослы пособиос сётон? Урод уг. Россиын 5-тӥ инты басьтӥськом но та ужез калыкез улон-вылонын утёнъя удысэ выжтон ласянь эскеронэ (экспериментэ) сюрим. Али та ужен выро предприятиос, организациос но учреждениос. Азьланьын вань нылпиослы пособие вуоз Калыкез улон-вылонын утёнъя министерство пыр. - Дас куинь районъёсын ми та ужез рос-прос учким,- ивортӥз Наталья Федоровна.- Озьы 10 сюрс мултэс нылпиос шедизы, нош 138-эз семьяос кык интыын (анаез но атаез) пособие басьто вылэм. Али 19-аз районъёсын милям отделъёсмы пыр пособие тыриське, нош Россия 1998 арын 1 январьысен потэ. Татын тани мар верам потэ на. Вань районъёсты учким-эскерим ке, ӧжытсэ 70 сюрс мултэс нылпиос потозы. Туэ 2-3 толэзьлы пособие сётыны ум быгатэ, дыр. Тодмо луиз, Москва тырмыт коньдон уг висъя, милемды пӧяса возе, ватэ, нош 60 процентэз ог-огедлы пунэм тыронэз берыктон амалэн вуэ. Тӥни сыӵе югдур. Экспериментэ шедеммылэн пайдаез бадӟым. Элькунмылы дунтэк 100 компьютеръёс висъямын. Со 1,5 миллиард манет тыр луэ. - Кызьы учкиськоды Ижын калыкез улон-вылонын утёнъя комитет кылдытон шоры? - Умоен. Сыӵе ёз кулэ. Малы ке шуоно, татын тужгес но трос тырмымтэос кызьы ке нылпиослы пособиос тыронын, озьы ик пенсиос сётъянын. Г. РОМАНОВ. "Асьмеды огазея Удмуртия" "Удмуртиысь ӟучъёс" конференциын А. Волковлэн верамез Ӟечбуресь, гажано эшъёс! Ужея мон пӧртэм калыкъёслэн, бигеръёслэн но, удмуртъёслэн но, ужрадъёсазы пыриськисько. Нош туннэ асьмеос люкаським "Удмуртиысь ӟучъёс" конференцие. Татчы лыктэмелэсь азьло тодматски "Русская газета в Удмуртии" газетлэн берло номереныз. Тужгес сак лыдӟи "Ӟуч! Лыдӟы но пыриськы!" статьязэ. Синвуэ ик потӥз, ява. 45 ар ӵоже ӟуч луыса улӥсько, нош туннэ гинэ та статьяысь тодӥ, секыт югдуре шеди но юрттэт куроно шуыса. Мынам нацие, пе, Россиысь мукет калыкъёсын ӵошатыса, сокем ултӥямын, чиданлы ик пум вуэ ини. Михаил Константинович, Ӟуч культурая огазеяськонлэн тӧроез, газет пыр но, туннэ вераськыса но тодматӥз ӟучъёслэн Удмуртиын но Россиын улэменызы, ас малпанъёсыныз герӟаса. Мон, Кун Кенешлэн Тӧроез, та ужпум шоры мукет синмын учкисько. Берло аръёс ӵоже улон чутрак воштӥськиз, улыны секытгес луиз. Уждун кемалы ӝега, нош куд- огезлэн нянь басьтыны коньдонэз ӧвӧл. Общество секыт югдуре шеде ке, лэчытомо сыӵе ужпумъёс, кудъёсыз малпанын ик ӧй вал. Соос пӧлы пыро нациослэн кусыпъёсынызы герӟаськем ужпумъёс но. Мон ноку но соглаш уг кариськы ӟуч адями, мукет нациос сярысь, тросгес курадӟытэмын, ултӥямын, Удмуртиысь но Россиысь куд-ог калыкъёс ӟучъёс чотын уло шуыса верамен. Кин ке озьы малпа ке, ачиз тодэ. Нош мыным кельшизгес вылӥ верам газетлэн кыкетӥ люкетэз, кытын мадемын ӟуч история но солэн батырез Александр Невский сярысь. Мыным ӟуч адями Александр Невскийлы, былинаосысь батырлы кельше кадь потэ. Малы Россия котыре биниськизы Белоруссия, Украина, Волга котырысь, Уралысь, Сибирьысь калыкъёс? Малы ке шуоно, ӟуч калыклэн ваньзылы сюлэмыз, яратонэз, сюлмаськонэз тырмылӥз. Таӵе малпан вылэ пыкиськыса, мон, Кун Кенешлэн Тӧроез, ужме быдэсъясько. Министръёслэн Кенешсылэн Тӧроез луыса ужакум, экономикалэн куашкамез нациослэн кусыпъёсазы шӧдӥськоз шуыса валаса, мон Нациосын ужанъя комитет кылдытыны ӵектӥ. Та комитетлэн ужпумъёсыз: нациосты азинтон но нациослэсь кусыпъёссэс юнматон удысын, калыкъёслэн огазеяськонъёсынызы ужан, Правительство но нациослэн огазеяськонъёссы куспын огкылысь ужанэз пайдаё радъян. Жаляса верано луисько, куд-ог дыръя соос кужымзэс ӧръяны уг быгато. Солы Правительство но комитет гинэ янгыш ӧвӧл. Туннэ калыкез дышетонъя министр возьматӥз бускельёсмылэсь "Как правильно употреблять заморские слова" книгазэс. Ӟеч, пайда ваись книга. Но асьмелы азьлань мыноно но ваньзэ лэсьтоно, жоб кылын книгаос медам потэ шуыса, телевидение но радио улонэз медам сьӧдмалэ шуыса. Мон дурбасьтӥсько иворъёслэн ӟечлыксы пумысен вазиськонлы. Асьмелы кылмес, культурамес, сямъёсмес-йылолъёсмес утён бордын ужано. Республикаын таин герӟаськем уно ужрадъёс ортчо. Ӟуч культурая огазеяськонлы но та бордын тыршоно вылэм. Куанер улӥськом ке но, вань удысъёслы коньдон уг тырмы ке но, берло аръёсы сю миллион манетъёсын черкъёсты пуктонэ висъяськом, тупатӥм кафедральной соборез, кылдытэмын Свято- Михайловской соборез улӟытонъя комитет. Татчы миллиардъёсын коньдон кулэ луоз. Шаерамы куатьтон пала фольклор коллективъёс. Асьмеос самой кыдёкысь гуртысь одӥг библиотекаез но, культурая одӥг учреждениез но ӧм пытсалэ. Палэнысен тае валаны шуг, малы ке шуоно, котькудӥз аслаз сюлмаськонъёсыныз улэ. Но мон малпасько, асьмеос шӧдыны кулэ, макем бадӟым кышкытлык ваё нациослэсь кусыпъёссэс сӧрыны тыршись муртъёс. Мынам, ӟуч адямилэн, удмуртъёсын, бигеръёсын, мукет нациосын огкылысь, тупаса улэме потэ, нациос куспын эшлыко мылкыдэз юнматыны сюлмаськыса, мукет калыкъёслэсь куректонзэс но шумпотонзэс сюлмам пыртыса. Оскисько, таӵе ик мылкыдын Удмуртиысь но, Россиысь но уно ӟучъёс уло шуыса. Угось нациос куспын эчешонъёс умое ӧз вуттылэ. Асьмелэн сюлэмъёсамы, визьмамы Западлэсь улон сямъёссэ пыӵатыны туртто, телевидение но радио пыр олома сярысь кылыны-адӟыны луэ, лякыт сямо, ужаны яратӥсь, зэмлык понна нюръяськись адямиос, юн семьяос палэнэ кылё. Ӟуч культурая огазеяськонлы талы саклык висъяно, оло. Кужыммес огазеям ке, та удысын уно лэсьтыны быгатысалмы. Нош кинэ ке ужатыны, ачид кыл кутонлэсь палэнскыса, бюджетэз нациос куспын люкыны, Ӟучъёслэсь республиказэс кылдытыны курыны... Ваньмыз со серекъяса, шудыса вераськонъёс гинэ. Туннэ экономикаез ӝутоно, ӟеч сямъёсты утёно, котькуд ужасьлы уждун тыроно, адямиос ӵемгес мед пальпотозы шуыса. Предприятие вуыса, нылкышноослэсь уждунмес гинэ ӧвӧл, 100 сюрс манет аванс но басьтэммы уг луы шуыса ӝожтӥськонъёссэс кылӥськод, соослэсь нылпиоссэс национальностьсыя люкыны луэ шат? Нош асьмеды оскытыны тыршо, сыӵе югдуре ӟучъёс гинэ шедемын шуыса, малы ке шуоно, соосты ултӥяло, пе. Со озьы ӧвӧл, мугез но мукет. Асьмелэсь тупаса, ог-огмес валаса улэммес эшшо но юнматоно на, сӧроно ӧвӧл. Со юн герӟаськемын республикаын коньдон ласянь югдурен, промышленностен но гурт хозяйствоен. Со сярысь ми вераськиськом Кун Кенешлэн котькуд сессияз, Правительстволэн заседаниосаз, та бордын городъёсын но ёросъёсын ужало. Соос сярысь сюлмаськонэ Россия Федерацилэсь кивалтӥсьёссэ но кысконо. Ужамы ке, коньдонмы луиз ке, соку бигеръёслы, удмуртъёслы выль школаос лэсьтом. Асьмеос 70 пала калыкъёсын валче улӥськом. Калыкъёс пичи яке бадӟым уг луо, малы ке шуоно, Инмар азьын ваньмыз огкадь. Котькудӥз быгатэ вордскем кылыныз вераськыны. Кужмысь карыны уг яра, анай кылэз дышетыны, удмурт яке бигер дэрем вурыны, радио пыр ас кылын кырӟан кылзыны луонлыкъёс кылдытоно. Малпасько, та бордын ужано. Нош югдурез "Русская газета в Удмуртии" сямен берыктыны, ӟучъёс быро ини шуыса кесяськыны туж ик умой ӧвӧл, дыр. Мон оскисько, та залын сюосын адямиос пӧлын тросгес сыӵе ӟучъёс, кудъёсыз историез уг вунэто, утё сое. Огъя верано ке, туннэ вераськонъёс югдурез шонер возьмато, куд-огъёсызлы докладъёс уг кельшо ке но. Ма карод? Калыкез дышетонъя министрлэн но культурая министрлэн воштӥсезлэн ужез сыӵе - кызьы тыршемзы сярысь мадёно. Соин ик, гажано эшъёс, гажано землякъёс, курисько тӥледыз: огпалась огпала эн шонаське, уз юртты со асьмелы. Ойдолэ ум вунэтэ ӟуч калыклэсь верамъёссэ: "Плохой мир лучше доброй ссоры", "Где лад, там и клад". Ог-огмес гажан юрттоз асьмелы тросгес черкъёсты тупатыны, культурая юртъёс лэсьтыны, выль библиотекаосты усьтыны, отчы республикаысьтымы самой пичи лыдъем калыкъёслэн но кылъёсынызы гожтэм книгаосты люканы. Мон дурбасьтӥсько резолюцие пыртэм ӵектонлы: Правительствоын яке Кун Кенешын Удмуртиысь калыкъёслэсь ассамблеязэс кылдытоно. Туннэ вераськон вуттӥз таӵе малпанэ: та конференция бере, удмуртъёслэн но бигеръёслэн съездъёссы бере асьмелы талэсь бадӟымгес залын люкаськоно. Вань нациосысь адямиослы люкаськоно но одӥг кылэ вуоно: пӧртэм шуг-секытъёс, Россия Федерациысь куашкам экономика шоры учкытэк, асьмелэсь огазьын улонмес, тужгес но бадӟым узырлыкез - мукет калыкъёсты гажанэз - утёно. Мон та пумиськонэз радъясьёс пӧлын луо. Улон кузя ог-огмес валаса мыныны быгатӥм ке, соку вань шуг-секытъёсты вормом. Тае ӟуч калык самой секыт вакытъёсы возьматылӥз. Нош туала аръёсты историлэн тужгес но секыт вакытэз шуыны уг луы. Мон ӟуч адями, республикалэн кивалтӥсез, соин озьы шуыны быгатӥсько но оскисько, асьмелэн, ӟучъёслэн, Россиын улӥсьёслэн визьмы тырмоз, асьмеды ултӥяны тыршисьёслы, Россия Европаез но быдэс дуннеез ноку но уз суты шуисьёслы пумит султыны. Сыӵе выжыкылъёсты асьмеды гажасьтэм муртъёс вӧлдо. Кунгож сьӧры вуылыкум, мон сое тужгес но ӟеч шӧдӥсько, малы ке шуоно, Америкаын промышленностен кивалтӥсьёс пӧлысь 60 процентэз - Россиысь потэмъёс, Франциын 2 миллионлэсь уно ӟучъёс, Россиысь 1917 ар бере кошкемъёс, соос та страналэсь экономиказэ азинто. Асьме доры вуылӥсь ужбергатӥсьёс, узыръёс пӧлысь ӝыныезлэн выжыосыз Россиын. Асьмеос кужмо, усто нация, соин ик вань шуг-секытъёсты вормом. Вормом, огазьын луим ке. Конференцилэн ужез пайда мед ваёз. Солэн валтӥсь ужпумез - Удмуртиын улӥсь ӟуч но мукет калыкъёслэсь азинскон сюресъёссэс пусъён, малы ке шуоно, асьмеды ваньмес огазея Удмурт Республика - Быдӟым Россилэн ог люкетэз. Пересьёслы - кияр но сӥль Музъем бордын ужась адями валаса-быгатыса тырше ке, ноку сютэм уз кыльы. Сое валась кивалтӥсьёс музъем возё, бакча сиён, емышо сад мертто-будэто. Тани Завьялово ёросысь Нагорный посёлокын пересьёслэн интернатазы но вань подсобной хозяйствозы. Мар гинэ азьло аръёсы татын ӧз будэтэ! Нош табере котыразы сад-бакчаос кылдыса, куамын кык гектаръем лудазы уногес будэ трос аръем турын (костёр, клевер). Ма карод на, бусыын будӥсь картофкаез но бакча сиёнэз сад-бакча возисьёс лушканы кутскизы. Хозяйство возе кык вал, ньыль скал, куатьтон куинь мумы парсь. Лудысь турын ваньмыз мынэ пудоослы. Со сяна, парсьёсты куайыто столовойысь кылем-мылем сиёнэн. Озьы сюдыса, парсьпиос нуналаз 350-400 граммлы будо. Подсобной хозяйстволэн кивалтӥсезлы Григорий Дубовцевлы юртто интернатын улӥсьёс но. Соос пӧлын вань парсь сюдӥсь но, возьмаськись но, механизатор но. Соос бадӟым уж лэсьто, пересьёслэсь ӝӧксэс узырмытон понна. Нимаз верам потэ Григорий Максимович сярысь. Вавож ёросын вордӥськем воргорон, трос аръёссэ кивалтэм Гурезь-Пудга сельсоветэн. Тӥни озьы Вало дорын будэм-улэм адями табере сюлэм шунытсэ Игерман шур вӧзын улӥсь пересьёслы сётыны тырше. Н. ВОЗИСОВ. "Устоез лыдӟись" конкурсэ Ваньмыз яра Та удмурт газетэз ми вис карытэк кемаласен басьтӥськом ини. Улонлэн котькыӵе вакытаз со милемлы туж матысь эш кадь луэ. Нош солэн кулэлыкез тужгес но юн шӧдӥське пенсие потэм бере. Возьмаса гинэ улӥськом, ку гинэ, пӧй, вуоз ини та гажано "Удмурт дунне". Газетэ потэм материал котькудӥз милемлы яра, озьы ик "Твой дом и сад" приложениды но. Со удмурт сямен потысал ке, эшшо но умой луысал. Ужакум (ферамын ортчиз улонэ) жадеменым лыдӟыны ик уг вуиськы вал. Али картэным ӵошен улӥськом. Пиналъёсмы юрттӥськыны вуыло. Картэ юн висемен (операция лэсьтӥзы), татӥяз секытгес йӧтэ. Ми шур сьӧрын 6 корка гинэ кылемын. Дорамы почтаез уг вайыло. Кык иськеме асьмеос райцентре ветлӥськом. Соин ик ялан отчы ветлыны дыр но уг шедьы. Газетэз басьтӥсько ке, соку ик учкисько нырысетӥ бамез, тодматскисько нуналлэн тодметэныз. Отын гожтэмын луэ угось, кыӵе нуналэ мар кароно. Собере - Правительстволэн пуктэм ужпумъёсыныз. Улонын кылдэм шуг-секытъёсты сэрттэмын- пертчемын отын, азьпала вамышъёсмес чаклало. Али вакытэ сыӵе ужпумъёс ваньмес сямен шугъяськыто. Озьы котькуд материалэз басьты, мар ке но выльзэ, умойзэ тодоно. Шӧдӥське, газет бордын визьмо, тодӥсь- валась адямиос ужало. Озьы ик азьланяз но лыдӟисьёсты сярысь сюлмаське. Ваньмыз- ваньмыз ужды яра. ЗОЯ ВОЛКОВА, Селта районысь Уметьгуртысь пенсионерка. "ИЖМАШЫСЬ" ИВОРЪЁС Завод тазьы кылдӥз Россиез кышкытлыклэсь утён понна, туж кулэ луиз пыӵал тӥрлык поттонъя выль завод. Тулаысь но Сестрорецкысь предприятиос армилы тырмыт пыӵал тӥрлык сётыны ӧз быгатэ. 1807-тӥ арын 20-тӥ феврале пыӵал поттонъя выль заводъёс лэсьтон сярысь указ потӥз. Военной коллегия косӥз инженерлы А. Ф. Дерябинлы Кам шур палан завод кылдытыны. Андрей Федоровичлы кельшиз Иж шур доры интыяськем корт поттон завод. Со вӧзы выль предприятие лэсьтыны мылкыд кариз. 1807-тӥ арын 10-тӥ июне пыӵал тӥрлыкъя контора усьтонэз лыдъяло заводлэн вордскем нуналэныз. Та производствоез азинтон понна, Уралысь заводъёсысь усто рабочийёсыз ваизы. Кӧня ке специалистъёс кунгож сьӧрысь но лыктӥзы. 1808-тӥ арлэн пумаз ог 3500 рабочийёс лыдъясько вал ини. Россиысь тодмо пыӵал поттӥсь Н. Чагин верамъя, Иж заводысь мастеръёс стволъёсты шектэк лэсьто. Кремневой пыӵалъёс сяна, завод дасяз сизьым стволэн "сорока" батарея. 1839-тӥ арын лэсьтэм таӵе батареяез ваизы Петербургысь военно-исторической музее. Та "сорока" кельше "катюшаослы". 1877 арын Ижын ог 300 сюрс гумыос поттӥзы. Соослы кунгож сьӧрысь заготовкаос ваемысь дугдӥзы. Ижысь винтовкаос ӝыны даурлэсь кема ӟуч солдатъёслэн киязы вал, нош кунгож сьӧрын винтовкаослэсь модельзэс та дыр ӵоже 3-5 пол вошъязы. Станок поттӥсьёс дорын Нырысетӥ пятилетка аръёсы автомобильёсты, тракторъёсты но мукет машинаосты поттонэз азинтон понна, тросгес станокъёс кулэ луизы. ВСНХ-лэн куремезъя, Ижевскысь машиностроительной заводын кортэз вӧлон станокъёс поттонъя 1930-тӥ арын 28-тӥ июле нимысьтыз отдел кылдытонъя приказ потӥз. 1930-тӥ арлэн пумаз 200 станок лэсьтэмын вал. Но промышленностьлэсь куронъёссэ пумозяз быдэстыны ӧз быгаты. Соин ик заводысь специалистъёс ужаны ӧдъязы, устогес "Удмурт" токарно- винторезной станок поттон бордын. Нырысетӥез вить таӵе станок лэсьтэмын вал 1931-тӥ арын 1-тӥ маёзь. Али татысь 252 номеро механосборочной цехын токарной станокъёсты лэсьтонын шуг-секытъёс кылдэмен поттыны кутскизы заводлы кулэ оборудование. "Иж-2126" автомобильлы детальёс дасянъя нимысьтыз лэсьтэм одӥг станок куинь агрегатъёсты воштӥз. Но ужын ӝеганъёс кылдо, кулэ заготовкаос но литьё дыраз сётымтэен. Электрокужым тырмымтэен, цех ужано луэ калыклы кельшисьтэм дыръёсы. Акциоссэс вузалозы Россиысь Госкомимущество ӵектэ "Ижмаш" заводлэсь Федерацилы сётэм 25,5 процент акцизэ вуоно арын ньылетӥ кварталэ вузаны. Федерация акциен огазеяськем "Связьинвест" но Норильскысь "Никельлэсь" акциоссэс вузамзы сярысь куашетон ӧз чусомы на, нош ваньбурез киултыны яратӥсьёс выль интыос утчало ини. Егит выльдӥсьлэн Максим Бойколэн командаысьтыз реформаторъёс кылдытӥзы предприятиослэсь акциоссэс конкурсъя вузанъя список. Со 1998-тӥ арлы федеральной бюджетлэн проектаз пайда басьтон понна пыртэмын. Списоке сюриз Удмуртиысь одӥгез бадӟымез пыӵал поттӥсь завод - "Ижмаш". Али та предприятилэн кык кузёез: республикаямы кельтэмын 34,5 процент акциосыз, нош федерация киултӥз 25,5 процентсэ. Удмуртиысь кивалтӥсьёс трос пол веразы, та секыт югдуре машина поттӥсь заводъёслэсь акциоссэс исано ӧвӧл шуыса. Соос пӧлы "Ижмаш" но пыре. Акциос нимаз узыр адямиос киулэ сюризы ке, завод уз ӝутскы. В. ЧЕРНОВ. Ми дорын куноын - "Кизили" нылпи журнал Матысь эш но юрттӥсь Гажано нылъёс но пиос, мумы-бубыос, песянайёс но песятайёс, дышетӥсьёс но нылпи садын ужасьёс! Ум но шӧдылэ - дорамы йыгаськоз Выль ар. Озьыен, нош ик малпаськонэ усёмы кузьымъёс утчан- быръён ласянь. Ческыт сиён-юон ке басьтоно, со одӥг нуналскын быроз. Шудон яке мунё ке кузьмано, таосыз но ӝог акыльтозы. Нош "Кизили" журналлы ке гожтӥськиды, со тӥ доры быдэс ар ӵоже котькуд толэзе вуоз. Чик но уз акыльты. Лыдӟемдыя лыдӟемды потоз. "Кизили" тӥледлы матысь эш но, шудон но луоз. Угось журнал пӧртэм буёлъёсын чеберъяса печатлаське. Тросэз пиналъёс отчы асьсэос веросъёс, выжыкылъёс, кылбуръёс гожъяло, суредъёссэс ысъяло. Уноез лыдӟисьёсмы мылысь-кыдысь пырисько конкурсъёсамы. Отчы ысъям ужъёсты синпель но дуно кузьымъёсын пусйылӥськом. Кыӵе бадӟым шумпотон но данъяськон со нылпи понна. Туэ но тани "Мынам эше - инкуазь" конкурс ортчытӥм. Отчы пыриськиз кызьлэсь трос пинал. Тужгес но устоесь ужъёссэс ыстӥзы но конкурсын вормизы Вавож ёросысь Выль Бия школаысь Алёна Родионова, Пичи Пурга ёросысь Вуж Монья гуртысь Оля Никитина, Балезино ёросысь Люк школаысь Марина Наговицына. Ваньзы ик соос пусъемын луозы дуно кузьымъёсын. Нош та ужрадэ мукетъёсыз пыриськемъёс басьтозы удмурт писательёслэсь книгаоссэс. "Кышкыт тылпу" конкурсмы азьланьтӥське на. Отын вормисьёс озьы ик дуно кузьымъёсын пусъемын луозы. Нош устоосызлэн нимъёссы "Кизилиын" печатласькозы вуоно арлэн кутсконаз. Кылем арын гожтӥськисьёсмы пӧлын лотерея ортчытӥм. Дасэз пиналъёс туж устоесь кузьымъёс басьтӥзы. Та ужрадэз "Чуляби" телепередачаын но возьматӥзы. Пиналъёс сярысь сюлмаськыса, туэ "Кизилилэн" 7-тӥ номерез быдэсак шудонъёслэсь дасямын. Маиз но ӧвӧл отын: финн-угор калыкъёслэн дӥськутъёсынызы мунёос, автомобильёс, танк, батыр но мукет. "Кизилиез" басьтӥсьёс доры со почта пыр вуиз. Нош кин ӧз гожтӥськы вал та арлы, соос басьтыны быгатозы пырак редакциысь. Дуныз 4 сюрс манет. Тӥни сыӵе со "Кизили": тӥ понна мар но уг малпа! Соин ик журналэн эшъяськон сярысь али ик сюлмаськоно ни. Почта пыр эш шедьтэмды потэ ке, тыроно луоз 24 сюрс 500 манет, нош редакцие асьтэос пыраса басьяны луонлыкты вань ке - эшъяськон 12 сюрс манет тыр усёз. Таиныз амалэн тӥ быгатоды гожтӥськыны быдэс классэн (группаен), школаен (садикен), ёросэн... Ӵапак озьы лэсьто Пичи Пурга ёросысь школаос. Соос 200 экземпляр пала басьто почта пыр но 130 экземпляр - пырак редакциысь! Та ласянь пусйымон ужало озьы ик якшур-бодьяос но глазъёс. Озьыен, адӟем карыны луэ. Тани Башкортостанысь но Татарстанысь ӵыжы-выжыосмы "Кизилиез" ог 600 экземпляр басьто. Отысь котькуд 80 удмуртлы, шорлыдын вераса, одӥг журнал усе ке, Удмуртиын - котькуд 400 муртлы! Озьы ке но, Кам со палан но, Вало, Кильмезь, Чупчи палъёсын улӥсьёс но журналлэсь кылзэ валало, умой шӧдо солэсь туж кулэ луэмзэ. Соин ик редакциын ужасьёс юн оско, "Кизили" журнал тӥ понна матысь эш но юрттӥсь луоз шуыса. Журналлы гожтӥськыны быгатӥськоды почталэн котькуд ёзэсаз но, редакция пыр но. Солэн индексэз - 73972. Адресмы таӵе: 426051, Иж кар, М. Горький урам, 73-тӥ юрт. Телефонъёсмы: 78- 07-55, 78-08-70. Алексей ЕЛЬЦОВ, "Кизили" журналлэн валтӥсь редакторезлэн воштӥсез. Удмурт Республикаысь бюджетлэсь нылпиосын гражданъёслы пособиос тыронъя 1997 ар понна пунэмзэ берыктон сярысь Удмурт Республикаысь Правительстволэн Постановлениез 1997 ар 22 сентябрь Ижевск город � 871 Удмурт Республикаысь Правительство пуктэ: 1. Нылпиос понна пособие басьтӥсьёслы 1997 ар понна пособиосты тыроно вузъёсын, юрттэтъёсын но сельхозпродукциен, тамакен, аракыен но сурен сяна. 2. Удмурт Республикаысь Коньдон ужпумъёсъя министерстволы, Удмурт Республикаысь коньдон ужпумъёсын выроись ёзъёслы; нылпиосын гражданъёслы пособиез вузъёсын но юрттэтъёсын сётӥсь предприятиослы но организациослы тыроно Удмурт Республикаысь Коньдон ужпумъёсъя министерстволэн вексельёсыныз; организациослэсь вексельёссэс кутоно республикалэн бюджетаз налог тырон чотын, лыдэ басьтыса Удмурт Республикаысь Правительстволэсь 1997 арын 5 январе кутэм "Удмурт Республикаын вексельёслэсь бергамзэс ӟечомытон сярысь" 2 номеро постановленизэ но Удмурт Республикаысь Коньдон ужпумъёсъя министерстволэсь вексельёссэ басьтон-вузан радэз, кудӥз юнматэмын Удмурт Республикаысь Правительстволэн 1997 арын 17 феврале кутэм "Удмурт Республикаысь бюджетлэсь нылпиосын гражданъёслы пособиос тыронъя 1994 ар понна пунэмзэ берыктон сярысь" 151 номеро постановлениеныз. 3. Нылпиосын гражданъёслы пособиос тыронъя 1997 ар понна пунэмез берыктыны но чотаны радэз юнматоно. 4. Удмурт Республикаысь городъёслэн но ёросъёслэн администрациоссылы ӵектоно: интыысь бюджетъёсы налогъёсъя тыронъёс чотын кутыны Удмурт Республикаысь Коньдон ужпумъёсъя министерстволэсь вексельёссэ; пособиос тырон чотын вузъёс но юрттэтъёс сётӥсь предприятиослы но организациослы маин но кызьы тырыны рад тупатоно 1997 арын 1 октябрёзь. 5. Сиён-юон поттӥсь промышленностьысь, суменак (оптовой) вузкаронысь, потребительской кооперациысь, энергетикаысь но коммунальной хозяйствоысь предприятиослы, "Удмурт Телекомлы" ӵектоно нылпиослы пособиосъя пунэмез берыктӥсь организациослэсь тыронъёс чотын сётӥськись вексельёссэс басьтыны вексельын пусъем (номинальной) дунъя. 6. Удмурт Республикаысь Вузкаронъя министерстволы (Пономарев П. П.), Удмурт Республикаысь Экономикая министерстволы (Аверьянов Е. М.), Удмурт Республикаысь Госторгинспекцилэн управлениезлы (Горюнова А. Д.), Госсанэпиднадзоръя центрлы (Забродин Н. А.) ӵектэм вузъёслэсь ӟечлыксэс но пӧртэмлыксэс эскероно. 7. Та постановленилэсь быдэсъяськемзэ эскероз Удмурт Республикаысь Правительстволэн Аппаратысьтыз Социальной азинсконъя управленилэн семья ужпумъёсъя, социальной юрттэтъя но калыклэсь тазалыксэ утёнъя отделэз. Удмурт Республикаысь Правительстволэн Тӧроезлэн нырысетӥ воштӥсез Ю. С. ПИТКЕВИЧ Галина СУСЛОВА Школаысь мон бертӥсько Школаысь мон бертӥсько, Портфельме мон нуисько. Портфельме мон нуисько, Ым кеськымон кырӟасько - Асме ачим данъясько. Юалэ ай малызэ, Тӥлед одно тодоно, Малы мон сыӵе шудо. Школаысь мон бертӥсько, Портфельме мон нуисько. Портфельме мон нуисько, Пыдме мырдэм кыскасько - Синкылиме ӵушисько. Эн люкетэ юанэн, Мар меда со манерды - Ваньзэ потэ тодэмды. Школаысь мон бертӥсько, Портфельме мон нуисько... Иосиф ИВАНОВ Бусы сюрес Бусы сюрес Бызе-бызе но - Пӧрме вож нюлэслы. Нюлэс чатрес Ӝутске-ӝутске но - Пӧрме пилемъёслы. Нош пилемъёс Лобо-лобо но - Кисьто ни зор вузэс. Со зор сюрес вылэ Усе но - Нӧдэ вые сюрес. Владимир КОТКОВ Сӥзьыл Пилемед инмын уя, Уя. Инбамысь зор ву вия, Вия. Инкуазед зарни тусо - Мусо. Бергаса куаръёс усё, Усё. Андрей ГИЛЬМАЕВ Ошмес Верос Гуртэ пырон азям сирпу выжыын ведра жингыртэм куара кылӥськиз. Отчы кожи. Сетык песянай ву омыртыны дасяськем вылэм. - Юэмед потӥз-а, пие? - вазиз со. - Ю, ю, али гинэ гылъяй ведраосме. Пересьлэсь сётэм вузэ юисько. - Ю, пие, Чылкыт ошмесысь вуэз,- мылкыдзэ усьтэмез потӥз, лэся, солэн.- Татысь кадьзэ нокытысь уд шедьты... Мон егит дырысеным кӧня ву нуллӥ ни отысь! - Бон,- тодам лыктӥз мынам, - кылем арын тӥ вадьсады ик ураме гудӟем гудӥзы вал ук? - Гудӥзы. Отысь но пыртӥсько ву - дӥськут миськыны, пудо люктаны. - Юыны уг яра, оло? - Яра. Быдэс гуртмы гудӟемъёсысь ву юэ ук. Выллапалась тани мон гинэ татчы ветлӥсько. - Малы озьы? - Валалоды-а меда тӥ сое, пиналъёс?.. Тазьы мон уйласько: инкуазь аслэсьтыз байлыксэ адямилы сётэ кутӥськон-пайдаяськон понна. Нош асьмеос кызьы учкиськом со шоры? Кӧня ошмес ини турын- куарен шобыртӥськиз?! Кӧняезлэсь синзэ нӧд ӵоктаз?! Котьмар но угось уже кутыку гинэ уг сыномы. Тани та ошмесэд дун ву сётэ асьмелы. Вузэ нокин но ӧз омыръя ке, со ӵакмоз-быроз. Нимыз но бон кыӵе - Чылкыт! Тодыса озьы нималлям сое, пие, тодыса. Та интыын сю ар талэсь азьло но, пе, улӥллям ини, со дырысен ик лыктэ, шуо, ошмеслэн нимыз но. Тани татысь вуэн чай юисько ке, висёнэ но быре кадь... Тыро ведраоссэ карнанэн пельпумаз ӝутыса, дыртытэк гинэ гурт пала вамыштӥз Сетык песянай, Чылкыт нимо ошмесэз утись пересь кышномурт. Алла КУЗНЕЦОВА Синзэ миськымтэ Шунды шунтэ, Тудву бызе... Му пылаське - Коли изе. Султы, Коли, Садике мын - Отын ини Ӝук вуэмын. Коли султэ, Бамзэ миське, Нош синъёссэ Сьӧд-сьӧд кельтэм. - Ой-ой, Коли,- Горе Машук, - Тон синъёстэ Ӧд миськы ук! Коли кияз Майтал кутэ... Зыра синзэ - Зар-зар бӧрдэ... "КЫШКЫТ ТЫЛПУ" КОНКУРСЭ Юн чакласьконо Выль конкурс ялэмдэс тодыса, мон но пыриськыны малпай. Угось тылпуэн йырин, зэмзэ но, трос адями быре, кӧня ваньбур, инкуазь изъянме. Мынам атае но ужа тылпу кысон командаын. Бен, кудӥз вожъяське солэн ужезлы: ӧжыт тырше но, пе, трос шутэтске. Нош валало-а меда куд-огез, кыӵе кышкыт уж со? Валасалзы ке, ӧй но вожъяськысалзы, дыр. Угось кыӵе секыт гумыосты кыскано луэ. Чик ӝегатскытэк, одӥг минутэз но ыштытэк, тылпуэз кысыны вуоно. Нош ӧжыт янгышгес кылид ке, ачид но кышкыт "горд атас" улэ сюремдэ но уд вала. Ортчыт трос чакласькыны кулэ. Милям семьямы но ас вылаз сыӵе кайгуэз адӟиз ни. Тылпуэн йырин быриз анаелэн сузэрез нылпиосыныз. Куинь кузя мискиньёс улонэз но валаса ӧз вуттэ. Кӧня куректон, кӧня пӧсь но курыт синкыли ваиз со кӧшкемыт тыл. Ваньзэ бумага вылэ гожтыны луоз шат? Сюлэме гинэ кылёз яра. Трос аръёслы, улытозядлы. Та учыр дыръя ик атае ӵапак ужаны тупаз. Соос вуыку, отын сылэ вылэм ни тылпу кысон машина. Нош нокин но, пе, ваньбурзэс уг потта. Уг но, пе, тодо, кин ке вань-а, ӧвӧл-а юртазы. Соку тӥни атае пырем ӝуась корка. Но бер вылэм ини. Ваньзы ӵынэн ӵоксузиллям. Кин тодэ, эшшо но кыӵе кӧшкемытэсьгес учыръёс луыло. Ноку но синкылитэк, яратэк уг ортчы тылпу бервыл. Гужем тужгес но кышкыт луэ турын дасян вакытэ. Пӧсь куазь, куасьмыса ӵаштыртӥсь турын тылпулы ӵапак умой эшъёс луо. Синдэ но кыньыртыса уд вутты, нюлыштоз пичи гинэ шырпуысь тыл тэчкы. Ма, толалтэ но пӧртэм ик ӧвӧл ук. Улон интыосты чакласькытэк ӟырдатъянъязы, кӧня ваньбурез изъянтыло!? Соин ик дугдылытэк чакласьконо. Пичиослы адӟытъяно ик ӧвӧл тылпоттонэз, лэзёно ӧвӧл эстӥськон газ котыре. Али тросэзлэн коркаосазы пыртылэмын ини со. Газ эшшо но уно кышкытлык вае. Вань куронъёсты-чакласьконъёсты бадӟымъёс но уг тодо. Умой луысал, школаын но ӵемгес вераськылысалзы ке тылпулэсь утиськон сярысь. Жана РЫБАКОВА. Куреггурт, Пичи Пурга ёрос. Дас куинь аресъем дышетӥсь Та учыр вылэм 1915-тӥ арын. Бисарпи гуртэ выль дышетӥсь, пе, лыктэм. Со иворез кылыса, гуртысь воргоронъёс тодматскыны школа доры люкаськиллям. Юндаысь дышетӥсез Дмитрий Васильевичез куд-огез соку ик синйылтэм. Вӧзысьтыз пичи пияшез аслаз пиез кожаллям. Нош мар та таӵе? Дмитрий Васильевич вӧзысьтыз чиед пиез калык азе поттэ но вера: "Тани та адями тӥляд гуртады дышетӥсь луоз. Сое Семён Иванович шуоды. Пичиезлы эн пайме: Семён Иванович куать ар дышетскемын ни. Ачиз со удмурт выжыысь, ёросысьтыды ик Пичи Ягошурын вордскемын". - Учке али, сыӵе пичи маке дышетӥсь луэм ни. - Ку дышетскыны вуэм? - Кӧня арессэ тырмытӥз ни меда? - паймыса но гажаса, оло нош, оскытэкгес учко воргоронъёс пияш шоры. Дас куинь аресъем Семи луиз Семён Иванович. Гуртысь мӧйыос но, нылпиос но сое туж гажазы. Ваньмыз атай нимыныз гинэ вазиськылӥзы. Пиналъёс школае солэсь вазь вуылыны тыршылӥзы. Укноетӥ учкыса улӥзы дышетӥсьсылэсь лыктэмзэ. Адӟо ке, лыктэ ни, лыктэ шуыса, пырыкузлы партаос сьӧры султыса дасясько. Бисарпиын одӥг ар ужамез бере, Семён Иванович кошкиз Глаз каре. Отын дышетӥсьёсты дасясь семинария вал. Отчы со азьвыл но пырыны турттӥз - пичи на шуыса ӧз кутэ. Таяз учыре - кутӥзы. Озьы кутскиз Семён Иванович Ворончихинлэн улон сюресэз. Туэ солы 95 арес тырмысал. Семён Ворончихин ӟеч дышетскиз. Семинариез йылпумъяз 1920-тӥ арын. Сое вордскем палъёсаз, Балезино ёросэ, ужаны ыстӥзы. Ново-Волково гуртын математикалы дышетӥз. Выль кылдытэм Удмурт Элькунлы трос визьмо муртъёс кулэ луизы. Нош бадӟым дышетскон интыос - институтъёс, университетъёс - дорамы ӧй вал на. Егитъёсты палэнэ ыстылӥзы. Озьы С. И. Ворончихин нырысь Ярославле, собере кыдёкысь Сибирьысь Томске мыноно луиз. Сое враче дышетскыны келязы. Егит пи соку трос шуг-секытъёсын пумиськылӥз. Сютэм улонлэсь лябӟыса, дышетсконзэ куштыны ик дась вал ни. Озьы ке но, чидатскиз. 1926-тӥ арын со, врач луыса, Иже вуиз. Семён Иванович хирург луиз. Ужез туж кельшиз. Улытозяз олокыӵе но эмъян амалъёс малпаз, кылдытӥз. Тужгес но - Быдӟым тылож дыръя. Соку трос сӧсырмем солдатъёслы олокыӵе но операциос лэсьтылоно луиз. Удмуртиын трос дасо военной госпитальёс ужазы угось. Семён Ивановичез вань ожгар госпитальёслы валтӥсь хирург каризы. Тужгес но шуг операциосты Ворончихин ачиз лэсьтылӥз. Выль амалъёсыз сярысь газетъёсы, журналъёсы но гожъяз. Семён Иванович, тямыстон ар улытозяз, туж трос адямиосты кулонлэсь утиз. Со сяна, Ижысь мединститутын ужаса, уно егитъёсты хирурге дышетӥз. Вить ар ӵоже та институтэн кивалтӥз. Озьы Бисарпиысь пичи дышетӥсь дано адями - наукаосъя доктор, профессор - луиз. Солэн нимыз удмурт калыклэн, медициналэн историяз пыраклы кылёз. Людмила ХРИСТОЛЮБОВА, тодосчи. КУАЗЬ Шаерысьтымы куазез эскерисьёслэн ивортэмзыя, туннэ но ӵуказе зоро-кото луоз. Уин 2-50 нуназе 9-13 градус шуныт луоз. Тӧл шунды ӝужан но лымшор палась секунсдкын 8-9 метре пельтоз. 7 октябре самой чебер, шулдыр, шундыё нунал сылӥз 1974 арын - 20,4 градус, нош 1938 арын та нуналэ ик 9,3 градус кезьыт вал. Шуныт кыл небӟытэ Тырмыт-а со? Зинаида Яковлевна Боткина Удмуртиын улӥсьёслы тодмо адями. Огвакыт со ужаз республикаысьтымы Министръёслэн Кенешсылэн тӧроезлэн воштӥсез луыса. Историлэсь памятникъёссэ но культуразэ утёнъя огазеяськонлэн (ВООПиКГ-лэн) Удмуртиысь ёзэныз кивалтэм сяна, Зинаида Яковлевна берло аръёсы ужа на республикаысь ветеранъёслэн кенешазы, со тӧролэн воштӥсез. Арлыдоослэн толэзьзы азьын газетмылэн корреспондентэз Т. Банникова солы куд-ог юанъёсын вазиськиз. - Таӵе толэзьлы мӧйыос дышо ни, лэся. Мар вылез чакламын туэ соос понна? - Вань районъёсын эскеремын пересьёслэн улонзы. Лыдэ басьтэмын юрттэтлы тужгес но кулэяськисьёс, висисьёс, начаръёс. Соин ик юрттэт сётэмын луоз коньдонэн, эмъюмъёсын, куд- огезлы пу ваёзы, юртсэс тупатъялозы. Озьы ик ортчозы пӧртэм пумиськонъёс, концертъёс, шутэтскон ӝытъёс, чай юонъёс. Арлыдоос доры вуылозы администрациослэн кивалтӥсьёссы, депутатъёс. Ожысь но ужысь ветеранъёсты ӧтьылозы школаосы. Районъёсысь ветеранъёслэн кенешъёссы азе бадӟымесь куронъёс пуктэмын: одӥг пересь адямиез но вунэтоно ӧвӧл. - Вераны луэ-а, кыӵе районъёсын тросгес курадӟись ветеранъёс уло? - Соос котькуд районын вань. Берло дыре туж трос луизы пересьёслэн юртазы улыны куриськисьёс. Отчы черод возьма 400 пала адями. Сыӵе юртъёс уг тырмо, ваньёсаз но йырсазьзы сураськем пересьёсгес уло. Сыӵе висись пересьёс трос люкаськемын Сюмсиысь, Якшур-Бодьяысь интернатъёсын. Пересьёслы интернат пуктыны чакламын Ижевскын, но, коньдон ӧвӧлэн, ужъёс ӝегало. Шуныт кылъёсын гинэ пересьёсты туала вакытэ уд ни буйгаты. Туж кулэ коньдонэн юрттэт. - Коньдон сярысь ке верано, кин юрттэ республикаысь ветеранъёслэн кенешсылы? - Пичильтык коньдон висъяське бюджетысь. Куд-ог дыръя юртто Пенсиосъя фондзы, Калыкез шугадӟонлэсь утёнъя министерство. Дырын-дырын юрттэт сётылэ правительство. Тани арлыдоослэсь нуналзэс пусъён понна со 10 миллион манет висъяз. Но вань кулэяськись пересьёсты лыдэ басьтоно ке, со туж ӧжыт. Соин ик бадӟым республиканской праздник туэ ӧм радъялэ. Туж кулэ дыръя утчаськом спонсоръёсты, ужбергатӥсьёсты. - Мар лэсьтӥське ветеранъёс сярысь законэз улонэ пыӵатон понна? - Сое чакласа возиськом. Кенешмылэн президиумаз но эскериськом. Куд-ог куронъёсын правительствое но вазиськылоно луэ. Но ялан одӥг валэктон кылӥськом: коньдон ӧвӧл. Туж шуг квартираос висъян, телефонъёс пыртон ласянь. Ожысь ветеранъёслы кӧня ке квартираос сётэмын вал Быдӟым Вормонлы 50 ар тырмон азьын гинэ. - Малы соку ветеранъёс сокем дурбасьто "Удмуртия" огазеяськонлы? Кызьы тодмо, отчы власть возисьёс но ужбергатӥсьёс пыро. - Ветеранъёс ас мылкыдзыя пӧртэм партиосы но огазеяськонъёсы пыриськыны быгато. Но республикаысь ветеранъёслэн кенешсы, зэмзэ ик, дурбасьтэ "Удмуртия" огазеяськонлы. Малы? Кин бен туэ адӟоз-кылоз пичи но мырдэм пыд йылазы сылӥсь огазеяськонъёсты но партиосты. Кӧня соос, нош пайдазы ӧжыт. Собере "Удмуртилы" ке дурбасьтӥм, оло, со пересьёсты но уз вунэты. - Нош ӧвӧл-а со герӟаськемын вуоно быръёнъёсын? Тодмо ук, быръёнъёсы пересьёс туж мыло-кыдо пырисько. Куараос басьтон понна, кивалтӥсьёслы сыӵе "юрттэт" ик кулэ, дыр, соин ик "Удмуртия" арлыдоосты ас бордаз кыске? - Сотэк но, дыр, уг луы. - Алигес люкаськылӥз кенештылэн иворъёсты вӧлмытӥсь ёзъёсын ужанъя комиссиез. Кыӵе ужпумъёс отын эскеремын вал. - Кызьы тодӥськоды, газетъёсын ветеранъёс сярысь гожъямъёслы ялэмын вал конкурс. Али солы йылпумъянъёс лэсьтӥм. Нырысетӥ инты сётэмын луоз, дыр, "Долг" газетлы. Озьы ик учкемын 10 авторлы синпель кузьымъёс висъяны. - Удмуртъёс дасясько съездзылы. Республикаысь ветеранъёслэн кенешсы отчы кызьы ке пыриськоз-а? - Уз. "Удмурт кенешлэсь" ужамзэ мон, меӵак вераса, уг валаськы. Мон сямен, со луыны кулэ идеяос сётӥсь, бадӟым ужъёсы ӝутӥсь кужым. Калык азьын сылӥсь ужпумъёсты съездъёсын гинэ уд быдэсты.. Нуналлы быдэ ужано удмуртъёслэсь кулэяськонъёссэс Кун Кенеш но Правительство доры вуттоно валтӥсь ужпумъёс пӧлы пыртон понна. Ӧйтӧд, но малы ке мон, удмурт нылкышно, шаермес яратӥсь адями, удмуртъёслэн огазеяськонзылы сокем осконэ ӧжыт. Удмурт кылэз, культураез ӝутон сярысь гинэ вераськоно ӧвӧл, дыр, республикаямы улӥсь калыкъёс шоры паськытгес учконо. Соку "Удмурт кенеш" борды вань визьмо адямиос кыстӥськозы. Шофёръёсты ньӧрало Огазеям Араб Эмиратъёсын мынон-ветлон правилоосты тӥясьёсын нюръяськыны асьпӧртэмлыко амал шедьтӥзы. ОАЭ - узыр кун, соин ик бадӟымесь штрафъёсын нокинэ но уд кышкаты. Пери кадь ӝог ворттылыны яратӥсьёсты динарен уг дышето - визьмало ньӧрен. Кемалась ик ӧвӧл мечеть дорын уно калык азьын огзэ шофёрез сюрес вылын укылтэмъяськемез понна ньӧразы. Та учыр бере шудтэм учыръёслэн лыдзы 20 процентлы сӥнӥз. Малпалэ ай: етэк ворттылэм понна - 5 пол шукконо, ӝоглыкез 20 километрлы йылтэм понна - 20 пол, 30 километрлы ке - 30 пол... Россиысь водительёсты, та амал асьме дорын кутӥськысал ке, одӥг юан сюлмаськытысал, дыр: гаишникез сюлворыны луоз-а, небытгес, калыктэм азьын но квитанцитэк мед ньӧралоз шуыса. ИТАР-ТАСС. ТАЗЬЫ НО ЛУЫЛЭ Дэремез... пуштӥз Вӧйын наштаськем ужан дӥсьсэ Тюменьысь рабочий миськиз тазэ кисьтэм бензинэн, ошиз шунтон батарея вылэ. Ӝыт пал ванное пырыса, тыл ӝуатӥз. Соку ик туж зол пуштӥз. Люкаськем бензин пар соку ик гоманы ӧдъяз. Воргорон интыяз ик быриз. Пуштыны шедиз артысь комнатаын кӧлӥсь аресъем пиналзы но. Ассэ ачиз пытсэт улэ донгиз Ульяновск котырысь фермер Д. Юрий областной центре улыны кошкиз. Гуртэ кельтэм юртъерзэ 60 миллион манетлы страховать кариз, сомындалы ик - ваньбурзэ. Госстрахлэсь ужзэ басьтон понна, 500 сюрс манетлы тылпу понӥсь медъяз. "Операцизылэсь" дырзэ вераны вунэтӥз. Буш кельтэм юртъераз берытскыса паймиз: корка ӧс вӧлак усьтэмын, нокинэз уг адскы. Кема малпаськытэк, фермер участковой доры мынӥз: коркам, пе, лушкаськисьёс пыриллям. Милиционерен ӵош вуыкузы, отысь сьӧд-сьӧд ӵын тубе вал ни. Азбар шорын сылӥсь трактор но ӝуась тылын гома. Соку гинэ фермер валаз югдурлэсь кудпалась пельтэмзэ: Но... бер вал ини. Корказь азьысь участковой шедьтӥз юртъер кузёлэсь кибервылзэ. "Вовка, гидэз эн суты", - гожтэм Д. Юрий. Пудо возён интыез быдэс кылиз, но фермерлы пумит уголовной уж милиция ӝутӥз ик. Мурт кышноосын уд калгы Кышноосты мултэс яратӥсь картсэ Йошкар-Олаысь егит нылкышно тазьы эмъяз. Пиджаксэ сузякуз, картэзлэн кисыысьтыз шӧдтэк шорысь усиз кунгож сьӧрын поттэм презервативъёсын пачка. Ӵашетон ӝутытэк, амало кышномурт картсэ мукет сямен визьмано кариськиз. Бумагазэ дуртӥз пичияк кесьыса, отчы сьӧд пӧсьтурын пызьназ. Мар вал отӥяз, тодэ, дыр, яратонлы бырем воргорон гинэ, гожтэ "Марийская правда" газет. Туж ӟеч реклама Вильнюсын усьтӥськиз дуно джинс дӥсен вузкаронъя магазин. Басьяськисьёсты бордаз кыскон вылысь сёто таӵе ялон: кин 10 минут куспын магазинэ штанитэк пыроз но вылаз тупась джинс шедьтоз, сое дун тырытэк басьтыны быгатоз. Реклама сётӥсьёс асьсэос но ӧз оске вал, магазин азьын собыдӟа черод кылдоз шуыса. Быдэ вуымтэ пиос но нылъёс быдэс уллё люкаськиллям, ваньзы трусикен гинэ сыло. Та дыр ӵоже кӧня муртлы шуд усиз выль дӥсен потыны? 200 пӧлысь - 30-эзлы. Со понна магазинлэн данэз вӧлмиз быдэс Литва пасьтана. Газетъёс гожъямъя. Калашниковен ӵош чай юи "Ижмаш" огазеяськон ӝоген пусъёз предприятилы 190 ар но Калашниковлэн автоматэзлы 50 ар тырмонэз. Та нуналъёсты сӥё-дано пусъён вылысь, дасяськон мынэ ни. Москваын чакламын устооосызлы пыӵал тӥрлык поттӥсьёслы кузьымъёс сётыны чакламын. Иже лыктозы учёнойёс, Россиысь но кунгож сьӧрысь пыӵал лэсьтонъя тодмо конструкторъёс. Та ужрадъёсы пыриськозы быдэс дуннеысь журналистъёс. ... Воинской частьёсын автоматсэ эскеремзы бере, Михаил Калашниковез командировкае Ижевске келязы. Война бырем бере Михаил Тимофеевич татчы ветлӥз ни. Со тодӥз, Ижын андан пӧзьтон но машина поттон заводъёс артэ ужало шуыса. Нырысьсэ кӧня ке автоматъёсты мотозаводын бичазы. Собере машзаводын поттыны ӧдъязы. Тросэн бичаны кутскемлэсь азьло шекъёсты палэнтоно вал. Шумпотымон ивор вуиз 1949 арын. Конструкторъёсын Дегтяревен, Симоновен ӵош Калашниковлы нырысетӥ степенё Сталинской премия сётӥзы. Озьы Правительство нырысьсэ дунъяз "Ижмаш" заводын пыӵал поттӥсьёсты. "Ижмашлэн" музеяз нимысьтыз стендъёсын возьматэмын пӧртэм автоматъёс но пулемётъёс. Кӧня уйёссэс ӧз кӧлэ меда сое кылдытӥсьёс? Михаил Тимофеевичлэсь ӵем дыръя юало: быръем сюресэз сярысь уг жаля-а? Малы со жалялоз, вань улонзэ калыклы но армилы сётӥз бере. Военной издательствоын 1992 арын поттэм "Записки конструктора-оружейника" книгаяз Социалистической Ужысь кык пол Герой, Ленинской но Государственной премиослэн лауреатсы, технической наукаосъя доктор Калашников ортчем сюресэз сярысь маде. Михаил Тимофеевич кунгож сьӧрысь даслэсь уно кунъёсы ветлӥз. Али но сое ӧтё. М. Т. Калашников аслаз бюроеныз ӵош сюлэсь трос пӧртэм автоматъёс но пулемётъёс кылдытӥз. Солэн кабинетаз чай юыса вераськыкумы, ӧсэ йыгаськытэк ик егит воргорон пыриз. - Тодматске, мынам пие, Виктор, - вераз Калашников. Ижевскысь механической институтэз быдтыса, 1966 арысен Виктор ужаны татчы ик вуэ. Ачиз кадь ик куать егит инженеръёслэсь, Виктор Михайлович пыӵалъёс поттонъя группа кылдытӥз. Отчы пыризы азьвыл дано конструкторлэн Е. Ф. Драгуновлэн пиез Алексей, И. Г. Рябова но мукетъёс. Ваньзы соос одӥг эшлыко семья кадь уло, кулэ дыръя ог-огзылы юртто. Виктор атаезлы Москваысь журнал ваиз. Отын возьматэмын соослэн выль пистолет-пулемётъёссы. - Куд-ог журналистъёс дырто выль пыӵалъёсмес возьматыны, - пиез кабинетысь потэм бере шуиз Михаил Тимофеевич. - Тани та журналысь пистолетъёсты ми тирын тыро-пыдо ыбылыса ӧм эскере на. Кин тодэ, оло, татчы воштонъёс пыртомы на, нош журналэ поттӥллям ини. Автомат поттэмзэс калыклы кема ӧз возьматъялэ. 1993 арлэн кутсконаз Александр Тихомиров "Вагон-03" передачаяз гинэ телевизор пыр нырысьсэ возьматӥз автомат лэсьтонъя одӥг цехез. Конструкторен часлэсь кема кенешон дыръя, Калашников ӝожтӥськиз пыӵал тӥрлык поттон предприятиосты конверсие выжонъя зӥбон калэ вуттэм сярысь. Табере оборудованиосты отчы-татчы кыскало, усто кадръёс кошко. Уноез малпало, лэся, пыӵал лэсьтыны капчи шуыса. Куд-ог удысын ужаку, котькуд микронэз лыдъяно луэ. Со понна кык-куинь ар дышетсконо. - Нош маин пӧртэмесь луо кунгож сьӧрысь пыӵалъёс? - юасько Михаил Тимофеевичлэсь. - Америкаысь М-16 винтовкаен зорыку ыбылӥськыны шуг. Нош Израильысь "Узи" автомат матысен гинэ ыбылӥськыны чакламын. Асьме автомат кыдёке но зол кужымен ыбылэ. Соин ик быдэс дуннее вӧлмиз. Вераськонмес куспетӥ карыса, кабинетэ пыриз Калашниковлэн шоферез, тып-тып мугоро удмурт воргорон А. С. Перевощиков. Дас арлэсь кема нуллэ ини со конструкторез. Та дыр куспын Калашников солэн семьяеныз ӟеч тодматскиз. Юнме шат пальпотыса Михаил Тимофеевич шуэ: - Анатолийлэн кык етӥз пиез будэ - Руслан но Андрей. Нош солэн кышноез Вера артысь "Ижсталь" огазеяськонын ОТК-лэн чакласез луыса ужа. Калашниковлэн сямаз огшоры адямиосты гажан мылкыд мур пыӵамын шуыса, мон валай. Кытӥяз асьсэлэсь куронзэс кивалтӥсьёслы но вераны куро. Солэн нимыз азьвыл сямен ик юрттэ куд-ог ужпумъёсты йылаз-пумаз вуттыны. Конструкторлы, Россиысь сяна, кунгож сьӧрысь но трос гожтэтъёс вуо. Михаил Тимофеевич соосты канаяз синпель кадь возе. Ачиз ик машинкаеныз кык экземплярен печатла. Кин тодэ, оло, азьланяз соос яралозы ортчем сюрессэ тодаз вайыны. Тани книгаяз но куд- ог ватсанъёс пыртоно ни. Улон азинске. - Эрикмес, шаермес утён понна, мон автомат кылдытӥ, - шуэ Михаил Тимофеевич. - Сюлэм ик вӧсь луэ, сое сьӧд ужъёсты быдэсъян понна киязы ке куто. Мынам пыӵалэ сыӵеослы лэсьтэмын ӧвӧл. Автомат армиын гинэ кулэ, нимаз адямиос сое законъя возьыны уг быгато. Соин ик кинлы сюрем вузаны уг яра. Калашниковлэн автоматэз сярысь Америкаын книга потэм бере гинэ, асьме дорын но солэсь нимзэ ватыса воземысь дугдӥзы. Со сярысь центральной газетъёс но журналъёс гожъяны кутскизы. Но куд- огез корреспондентъёс янгышъёс лэсьтӥллям. Тани запасысь полковник Калашников дырызлэсь вазь "генерал" шуыса гожтэмын 1993 арын потэм "Семья" газетлэн 32-тӥ номераз. Отын печатламын конструкторлэн нылызлэн Еленалэн корреспондентэн вераськемез. Зэмзэ но, Калашниковлэн семьяез сярысь туж шер гожъяло. Соин ик та вераськон лыдӟисьёслы кельшиз, дыр. Михаил Тимофеевич, кышноез кулэм бере, ньыль комнатаем квартираяз огназ улэ. Солэн отысь номыре воштэмез уг поты. Корка пушкын сылэ азьвыл премиосыныз басьтэм тӥрлык, туспуктэмъёс. Дырызлэсь вазь бырем яратоно Наташа нылызлэн лыдӟем книгаосыз но утемын. Калашниковлэн улонэз капчиен ӧз мыны. Заводын уен-нуналэн тыршиз. Пичи дыръязы сётытэк кельтэм шунытсэ Михаил Тимофеевич нылпиосызлы али берыктыны турттэ. Связья управлениысь программистэн, Елена нылыныз, Америкае ветлӥз, нош Викторен Китае вуылӥз. Викторлэн пиез, Михаил, механической институтэз быдтэм сярысь дипломзэ басьтэм бере туж шумпотӥзы. Песятаезлы ӧз кылды уго институтэз йылпумъяны. 1971 арын технической наукаосъя доктор ним басьтон пумысен но Ижевскысь ӵош ужась эшъёсыз ӧз сюлмаське, куронэн вазиськизы Тулаысь конструкторъёс. Наукаосъя доктор ним соку ик сётӥзы. Арлыдыз шоры учкытэк, Михаил Тимофеевич куать часын султэ но зарядка лэсьтэ. Яратэ чорыганы, дачаяз ужаны, нюлэскытӥ калгыны. Пӧйшураны ветлыкуз, со уногес инкуазен тодматске. Сыӵе паймымон, быдэс дуннелы тодмо адями улэ асьмелэн городамы. Ӝоген ӝутскоз солэн ужезлы сӥзем бадӟым музей-выставка. Отчы ветлӥсьёс уз бырылэ. В. ЧЕРНОВ. Удмурт радиолы - 65 Паймытъясь шыкыс Пуктэ син азяды таӵе суредэз: тол, акшан вакыт, коркан сокем югыт но ӧвӧл ни, тыл ӝуатыны но вазьгес на кадь. Шыпытак гинэ, акшанаса пукем потэ. Нокин но медаз люкеты кадь. Чалмытак диван вылэ интыяськиськод. Кытын ке кылӥське радиолэн куараез. Тани пель сак но сак кылзыны кутске. Радиоспектакль мынэ кадь. Ӟукы-ырак! вазе ӧс куара, собере кылӥсько тубатэтӥ лёгаськем пыд куараос. Кытӥ ке ӧвӧл, кин ке ведра борды канжаське. Соиз дымбыртыса ик усе, кылӥське тышкаськем куара... Тынад син азяд ни аслыд тодмо суредъёс: вуж корка, ӟукыртӥсь тубатъёс, пеймыт корказь, мар ке но шоры мырӟиськиз бере, та одно ик тодмотэм мурт пыре, дыр. Тӥни озьы, асьме азе огшоры куараослэсь но суред пуксьыны быгатэ. Радио - паймымон шыкыс. Иворъёсын, пӧртэм ужпумъёс, мылкыдъёс сярысь веранъёсын тырмытэм макелэн усьтонэз - куинь пумо куараос. Нырысез - вераськем куара, кыкетӥез - крезьгур, куинетӥез - асьме котырысь уно сюрс мукет куараос. Соос малпанъёсын- веранъёсын пӧлэстӥсько, огазеясько но улонмылэсь вань буёлъёссэ син азямы пуктыны быгато. Тӥни ӵапак со куараослэн, радиоусьтонъёслэн огез кузёзы луэ режиссёр. Микрофон азе пуксем мурт шыпыт-а, кеськыса-а, ненег-а, пальпотыса-а вераське - ваньмыз со кылӥське, ваньзы соос радиоверанъёсмылэн пуштроссылы, визь-малпанзылы тусбуй кылдыто. Мар ватонэз, куддыръя радио пыр сюлмамы пырисьтэм, пельмылы тупасьтэм вераськемъёс луо ке, радиомес кысӥськом яке чылкак мукет тулкымъёс вылэ выжиськом. Озьыен, радиожурналист но режиссёр шонер "усьтон" шедьтӥллямтэ, та адямилэсь сюлэмзэ радиокылзӥсьёс доры вуттон вылысь. Егит дыръям ноку ӧй малпалля, улон сюресэ радиое вуттоз шуыса. Пичи дыръям гуртын телевизоръёс ӧй вал на, кино гинэ но туж шер луылӥз, соин ик кылзӥськод вал радиоез. Ӧжыт быдэгес вуэме, Алнашын улыны кутскеме бере ни радио зэмос эше луиз. Тодманы кутски отысь дикторъёсты но. Угось мӧйыос шуо вал: тани Борис Саушкин вераське. Со - Котныр починка пи. Таиз Михаил Покчи-Петров - туж шаплы мурт. Али кадь ик пель сьӧрам на Гай Сабитовлэн лякыт куараез. Таӵе ик кылӥсько на кадь тазьы но шуэмез: "Иворъёсты лыдӟизы Милитина Гаврилова но Пимен Касаткин". Ноку ӧй малпалля, со тодмо адямиосын мыным но тодматскыны кылдоз, соосын артэ ужаны шуд усёз шуыса. 0Удмурт радиое вуӥ975-тӥ арын. Тазьы вал со. Москваысь Б. В. Щукин нимо театральной училищеез йылпумъяса бертэммы бере, милемлы одӥг ар театрын ужаны луонлык сётӥзы но армие басьтӥзы. Армия бере пыды театре малы ке ӧз ни кыскы. Пыри Герман Алексеевич Ходырев доры, соку со ужа вал "Дась лу!" газетын. "Уд-а шедьтэ, - шуисько, - кельшисьгес уж?" Удмурт радиое, пе, берыктӥсь кулэ вал шуизы кадь, али ик жингырто Леонид Петрович Емельяновлы. Тӥни со бордысен ик кутски. Нырысь берыктӥсь вал, собере кӧня ке дыр ӵоже нылпи редакциын корреспондент луыса ужай, бӧрысь ни - режиссёр. Табере, улонме радиоен кызь арлэсь кема герӟаса, эфирлэсь шӧгзэ-кузьытсэ но ческытсэ шӧдыса, асме палэнын син азям ик пуктыны уг быгатӥськы кадь. Тодам на тэтэ кареме. Со вакытэ "Тулкымлы пумит" трилогизэ йылпумъяз Генрих Перевощиков. Радиоын азьвыл ужам мурт, со, романъёсызлэсь люкетъёссэс радиопьеса карыса, литературно-драматической редакцие ваиз. Куинь бадӟым люкетлэсь вал. Мыным оскизы та ужез. Пыр-поч лыдӟи нырысь ик сценариез, собере - книгаоссэ. Валаны тырши: мар вераны турттэ вал автор, мар шорсюлэмыз, маизлы тужгес но бадӟым саклык висъяно. Малпаны кутски: Удмурт театрысь кудъёсыз артистъёс тупалозыгес? Люкылыса- лыдъяса потӥ но, артистъёсы но уг тырмо кадь. Озьыен, палэнысь, театрысь кошкем но мукет интыосын ужась актёръёсыз но ӧтчатэк уз луы. Олокӧня нуналъёс ӵоже ӵош лыдӟыса, произведенилэсь пуштроссэ сэрттыса-пертчыса, люкетэн-люкетэн гожъямы магнит лента вылэ. Артистъёс куддыръя ваньзы ӵош лыктыны уг быгато, сыӵе дыръя нырысь кутсконысьтыз, собере пумысьтыз, бӧрысь шорысьтыз люкетъёссэ но гожъяно луэ. Огдыре крезьгур но утчасько, фонотекаын бугыръяськисько, огзэ, мукетсэ плёнкаосты кылзӥсько, пусйисько, кудӥз кытчыяз тупалоз, кудӥз юрттоз произведенилэсь пуштроссэ юнгес усьтыны, геройлэсь мылкыдъёссэ шонер возьматыны. Но тани ваньмыз гожтэмын, куарая операторенымы Людмила Лекомцеваен ӵош ваньзэ одӥг плёнка вылэ радъямы. Пукси но дась ужме нырысь ик огнам кылзӥ. Ваньмыз умой кадь. Нош ма шуозы кивалтӥсьёс, автор? Кыӵе мылкыдын пумиталозы кылзӥсьёс? Сюлмаськонъёсы юнме вылӥллям шуод-а, мар-а. Нош туннэ выльысь кылзӥсько ке со нырысетӥ ужме, валасько, трос на отын янгышъёсыз но. Кытӥяз геройёслэн куспазы вераськемзы но лыдӟемлыгес кельше. Ма бен, нырысетӥ уж - со нырысетӥ уж. Нош берло ини, арлы быдэ сямен, выль но выль радиоспектакльёс поттӥськом вал. Ар куспын ик театрын пуктэм ог кык-куинь ужез магнит лента вылэ гожтӥськом. Театрлэсь дась спектакльзэ но плёнка вылэ выжытон огшоры уж ӧвӧл. Спектаклез учкыкумы, асьме азьын вань артистъёс, декорация, соин ик отын ортчись учыръёсты мылкыдамы одӥг сямен пыӵатӥськом, нош радио пыр кылзыку, воксё мукет суредъёс пуксё син азе. Театрын мынӥсь спектальёсын кытӥяз вань мултэс висъёсыз (паузаосыз) но. Радиое ке ваньзэ сое выжытӥд, кылзӥсь малпаны кутскоз: мар луиз ай та приёмникын, ӧз сӧриськы-а? Тани нош ик тодэ ваёнъёс. Пётр Чернов ваиз нылпиослы гожтэм "Кузьыт шеп" трилогизэ. Куинь люкетэн - "Кузьыт шеп", "Вылга палъёсын сӥзьыл", "Бектыш нюлэс буйга". Повестьлэн но, радиоспектакльлэн но куиняз ик люкетъёсазы валтӥсь герой луэ пичи пияш, Матӥ. Бадӟым ож вылтӥ будэм нылпиослэн улонзы, соослэн сюлэмшугъяськонъёссы возьматэмын та повестьын. Матӥлэсь рользэ быгатыса шудӥз Удмурт Элькунысьтымы калык артистка Ольга Чужанова. Театрысь спектакльёсын но пичи пиосты возьматъя вал бере, микрофон азьын солы туж ик секыт ӧй вал кадь. Нош кӧня та радиоспектакль понна, кыре-буре потаса, нимысьтыз куараос люкаса ветлоно луиз. Фонотекаямы ӵапак татчы тупась куараос ӧвӧл. Соин ик аслыд малпано луэ. Тани пичи пияшъёс, пересь кышномуртлы юрттӥськыса, солэсь пузэ вандоно-пилёно карисько. Ведь студие тӥр но, бычкы но, пу но уд вайы, пичи пияшъёслэсь рользэс шудӥсь артисткаос ӝутыса-ӝутыса ик пу вандӥськом каризы, вандэм пузэс пильылӥзы но, артанае но тыризы. Нош мон магнитофон кутӥ но кошки гуртэ. Бычкыен пу вандэм куара но, пильылэм куара но гожтӥсько. Тани маиз но вань ай отын. Пуэз но огшоры гинэ пильылоно ӧвӧл: Воргорон сое одӥг сямен люкоз, нош быдэ вуымтэ пияш тӥрен чылкак мукет сямен ужалоз. Соин ик куара гожтыку шуиськод ни юрттӥськись муртэдлы: нылпи кадь пильылы. Туж тодам Россия Федерациысь дано артистлэн Василий Яковлевич Перевощиковлэн, огзэ радиоспектакльмес гожтыса йылпумъяммы бере, тазьы шуэмез: "Усто роль сётӥд тон мыным, тау. Кытӥяз театрын уг кылды ваньзэ шудыны, нош радио сыӵе луонлык кылдытэ. Сюлмам ик кельшиз таиз образ. Вань мылкыдме сётыса ужай". Нош со вал Роман Валишинлэн "Тӧл гурезь" повестезъя Милитина Гавриловаен гожтэм "Ӵыжы- выжыослэсь но матынгес" радиоспектакль. Тодмо артистмы татын шудӥз пересь Очикеез. Яке тани мукет учыр. Алигес магнит лента вылэ гожтӥм Генрих Перевощиковлэн "Ыш- ыш-ыш" но "Ӧб-ӧб-ӧб" повестьёсызъя радиоспектакльёс. Пичи нылашлэсь, Нюралэсь, рользэ шудэ элькунысьтымы калык артистка Алевтина Степанова. Вань быгатэмзэ понэ ни кадь, нош маиз ке уг пишмы. Аслыз артисткалы но, мыным но, пересь песянайлэсь рользэ шудӥсь Нина Петровна Бакишевалы но уггес яра шудэмез. Алялэн сюлмыз уггес оскы, туала вакытэ школае но ветлӥсьтэм нылаш кураськыны ураме потэм шуыса. Соин ик куараез но уг тупа, пумозяз уг но оскы аслаз верамезлы. Нош но нош дугдытӥськом. Соку Россия Федерациысь дано артистка Нина Петровна Бакишева шуэ: "Алюке, мон ведь собыдӟа дыръям ачим но кураськыса ветлӥ. Кулаке поттӥзы но, сиёнмы чик но ӧй вал. Кытчы пырод, пыд йылын ветлоно луиз. Нош кыӵе возьыт вал киез мычыны, кинлэсь ке юдэс нянь курыны". Ачиз вера но пумен синвуаське. Нош ик гожъяны кутскиськом. Озьы тӥни каньылэн гинэ ваньмыз интыяз луиз. Артистъёс радиоын гожтӥськонлы котьку дасяськыса лыкто. Та ласянь тужгес но адӟем карымон вал шуод-а, мар-а мӧйыос - В. Я. Перевощиков, Н. П. Бакишева, А. В. Шкляева, В. А. Садаева, И. И. Кудрявцев. Нимысьтыз ик верам потэ Иван Иванович Кудрявцев сярысь. Кыӵе яратэ вал со удмурт кылэз! Текстысь тодмотэм кыл шедьтыкуз, ми но валэктыны ум тодӥське ке, утча кыллюкамъёсысь, юалляське тодӥсь адямиослэсь, соосты удмурт кылэ берыктоз, чылкыт кароз. Тани мынам киям Пётр Блиновлэн "Улэм потэ" книгаез. Иван Иванович быдэсаксэ сямен сое плёнка вылэ гожтӥз. Учкисько, кызьы артист ужам кыл бордын. Ӟуч кылъёс ваньмыз удмурт каремын. Пӧртэм гожъёс, стрелкаос, аслыз артистлы гинэ валамон пусъёс. Соос аспӧртэм нотаос выллем. Лыдӟыны кутскиськод но, куара но интыяз пуксе, мае вераны турттэмдэ но валаськод. Тазьы луэ вань передачаосъя. Радиолы режиссёръёсты нокытын но нимысьтыз уг дасяло. Уж ачиз дышетэ. Мыным кутскыкум но, али но туж бадӟым юрттэт сётӥзы но сёто ӵош ужась эшъёсы, куарая операторъёс Людмила Воробьёва, Юлия Чиркова, Людмила Лекомцева. Соос кема аръёс ӵоже радиоын тыршыса шӧдо солэсь лулсэретсэ, пуштроссэ. Ужлы дышыны юрттӥзы Удмурт радиоысь азьвыл режиссёръёс но - Б. Е. Саушкин, А. А. Митрофанов. Трос выльзэ сётӥзы радиоспектакльёсъя Москваын ортчылэм фествальёс. Мукетъёсыныз ӵош мон но отын аслэсьтым быгатэмме возьматылӥ, палэнысь тодӥсь-валась специалистъёслэсь дунъетсэс басьтӥ. Улон воштӥське, азьлань мынэ, нуналлы быдэ выль но выль куронъёс пуктэ. Тани берло кык-куинь ар куспын гинэ унолы пӧртэм луизы ужан амалъёсмы, вуыны кутскизы компьютеръёс, лазерен ужась проигрывательёс, мукет выль техника. Ваньзэ сое тодоно, дышетоно, соин ужаны быгатоно. Мон татын верай радиоспектакльёс сярысь гинэ, нош кӧня тунсыко но пӧртэм пумо веранъёсмы вань на эфирамы: репортажъёс, очеркъёс, пумиськонъёс... Ваньмыз соос одно ик ортчо режиссёрлэн киыз, пельыз, йырвизьмыз, сюлмыз пыр. Азьвыл аръёсы Удмурт радиоын чылкак одӥг гинэ режиссёр вал, табере ми вить кузя ни. Тани пыд йылаз йыг-йыг сылэ ни егит ужасьмы Татьяна Егорова, со сьӧры уисько та удысэз алигес мытэмъёс - Михаил Апрельский, Светлана Журавлёва. Эшъёсы алигес гинэ кутскизы бере, соослы но ас ужедлэсь "усьтонъёссэ" возьматытэк уг луы. Огшоры гинэ уг усьтӥськы уго паймымон но пыраклы бордаз кыскись шыкыс. Солэн нимыз - РАДИО. Леонид Гусев, Удмурт радиоысь режиссёр Удмурт Элькунысь культура удысысь дано ужась. Кыӵе ним сётоно октябре вордскемъёслы? ПИОСЛЫ НИМ СЁТО ФЁДОР, НЫЛЪЁСЛЫ - ВЕРОНИКА Адямилэн куинь нимыз: фамилиез, нимыз но атай нимыз. Котькудӥз ик пыраклы сётӥське. Угось нимез воштыны туж бадӟым мугъёсъя гинэ луэ. Сое лыдэ басьтӥллям асьмелэн вашкала ӵыжы-выжыосмы. Соос ним сёто вылэм святойёслэн вордӥськем нуналзыя. Табере сое сокем уг чаклало ни. Озьы ке но, нылпизылы ним сётон сярысь анай-атайёс куспазы, ӵыжы-выжыосынызы кенешо. Ним чебер ке, адямилы тупа ке, со вань улонзэ шумпоттэ. Нокинлэн но ас сямызлы, тусбуезлы тупасьтэм ним нуллэмез уг поты. Али ӵектӥськом октябре вордскемъёслы таӵе нимъёс сётыны. Соос тросэз вашклаослэн ним сётъян календаренызы но чакламын вал. 1 октябре - Ирина, Софья. 2 октябре - Давид, Константин, Трофим, Фёдор. 3 октябре - Даниил, Михаил, Олег. 4 октябре - Андрей, Дмитрий. 5 октябре - Пётр, Фёдор. 6 октябре - Иннокентий, Иван, Пётр. 7 октябре - Владислав. 8 октябре - Герман, Сергей. 9 октябре - Ефрем, Иван. 10 октябре - Аристарх, Вячеслав, Игнатий, Марк. 11 октябре - Анатолий, Василий, Ефрем, Марк, Нифонт, Пимен, Сергей, Фёдор. 12 октябре - Александр. 13 октябре - Григорий. 14 октябре - Михаил, Роман. 15 октябре - Андрей, Анна, Давид, Константин. 17 октябре - Вероника, Владимир, Гурий, Павел. 18 октябре - Алексей, Пётр, Филипп. 20 октябре - Иван, Юлиан, Сергей. 21 октябре - Трофим. 22 октябре - Авраам, Максим, Пётр. 23 октябре - Андрей. 24 октябре - Зинаида. 25 октябре - Иван. 26 октябре - Вениамин, Злата, Зоя. 27 октябре - Никита. 28 октябре - Иван. 30 октябре - Андрей, Лазарь, Леонтий. 31 октябре - Иосиф, Юлиан. Н. Маликов. Покчи вынъёсмы Ожмасько ке но... Пичи левпи (нимыз Тулыс) но гондырпи Ксюша Белградысь зоопаркын уло. Соос татысь пиналъёслэн самой яратонооссы. Та зоопаркын кылдытэмын пӧртэм выжы пӧйшур пиосты возьматон инты. Тӥни отчы ик ярато ветлыны пиналъёс. Кызьы макакаос висьыны ӧдъязы? Техаслэн лымшор палысьтыз обезьянъёсты возён питомниклэн кивалтэтэз Филиппины кунысь басьтӥз макака выжыысь кык пичи обезьянъёсты. Техасын макакаослэн кӧня ке улэмзы бере, тупамын ни вал Филиппиныысь кӧня ке сю обезьянъёсты басьтыны, нош витьымтэ шорысь нырысьёсыз кыкез Эбола нимо туж шимес кезегъянлэсь кулӥзы. Вот шайтан басьтон! Техасысь властьёс питомникын юн карантин ялӥзы, азьвыл вераськон кагаз вылэ ик кылиз. Нош филиппинъёс асьсэ вылын сыло: милям обезьянъёсмы тазаесь. Каламбеысь зоологияя институтысь ветеринар Рауль Гарсия ваньмызлы ялӥз: милям обезьянъёсмы дуннеын самой таза луо. Берта асьмеды утёз? Та кызь ньыль аресъем Берта нимо писпу эбекез возё Австралиысь Аделанда университетлэн лабораторияз. Татын кӧня ке ар ини Британиысь тодосчиос писпу эбекъёсты чакласа уло. Соос туж паймымон усьтэтъёс лэсьтӥзы: та пичи макеослэн мугоразы дурыстэм трос вируслы но микроблы пумит туала эмъюмъёс. Озьыен, та эбекъёс (соос писпуос вылын уло), оло, вуоно дауре асьмеды уно висёнъёслэсь утьыны быгатозы. Н. Маликов. Кун Кенешлэн сессияз Куинетӥ октябре, кызьы ивортӥм вал, Кун Кенешлэн дас куинетӥ сессиез ужзэ азьланьтӥз. Депутатъёс кӧня ке ужпумъёсты учкизы на. Но, мон сямен, мултэс дырзэс быдтӥзы Сиён-юонъя корпорациен герӟаськемезлы. Сессиын ӵукна ик (нырысь нуналаз со ивортэмын вал пӧртэм ужпумъёс люкетын) Можгаысь жилищно-коммунальной хозяйствоя муниципальной предприятилэн директорез депутат Игорь Семенов элькунысь удысын ужасьёслэсь вазиськонзэс депутат курон карыны ӵектӥз. Со понна 62 куара сётэмын. Зэм, удысын но югдур пумен уродме, уката ик "Агропромпроектын". Собере парламент кутӥз "Удмурт Республикаын егитъёсын ужан кун политика сярысь", "Ваньбурез вузанлэн пӧртэмлыкъёсыз сярысь" Законъёсты. Учкемын "Удмурт Республикаямы инвестициосын ужанэз умоятон сярысь" Удмурт Республикалэн законэзлы инъет, воштэмын Завьял но Вотка районъёслэн гожъёссы. Воштонъёс но ватсанъёс пыртэмын "Сарапул городлэсь музъемзэ тупатон сярысь" Удмурт Републикаысь Вылӥ Кенешлэн 1992 арын 13 мартэ кутэм постановленияз. Депутатъёс озьы ик учкизы Удмурт Республикаысь прокурорлэсь кӧня ке протестъёссэ. Одӥгез герӟаськемын вал "Удмурт Республикаысь кун эскерон комитет сярысь" Удмурт Республикалэн Законаз воштонъёс но ватсанъёс пыртонэн. Бер ӝытазе депутатъёс кутӥзы на Удмурт Республикалэн кун премиосыз сярысь Кун Кенешлэсь постановленизэ. Та быдэсъямез эскероз Кун Кенешлэн Тӧроезлэн воштӥсез Алексей Красильников. Кун Кенешлэн дас куинетӥ сессиез таин ужзэ вис кариз. Выльысь усьтӥськоз туэ 16 октябре. Г. РОМАНОВ. Туспуктэмъёсыз В. КАМАШЕВЛЭН. Ньылез - витьлы гинэ Вирнуналэ (средае) Драмая удмурт кун театрын бадӟым учыр вал - театрысь актёръёс, мукет калык пумиськизы пинал артистъёсын. Михаил Щепкин нимо Вылӥ театр училищеын ньыль ар ӵоже дышетскыса, туэ нылъёс но пиос берытскизы вордскем шаеразы. Егитъёсты ӟечкыласа вераськизы театрлэн директорез Анатолий Митрофанов, культурая министрлэн воштӥсез Аверьян Христофоров, Кун Кенешысь Наукая, культурая, дышетонъя, егитъёсын ужанъя комиссиысь референт Анетта Сидорова, Россия Федерациысь искусствоосъя дано ужась Геннадий Веретенников, театрысь актёръёс Леонид Романов, Вероника Садаева, Геннадий Соловьев, литература люкетэн кивалтӥсь Анна Евсеева, мукет адямиос. Нылъёслэн но пиослэн нимынызы тау каризы Вячеслав Красноперов, Андрей Сергеев. Пинал артистъёс азинлыкъёсынызы али ик шумпотто ни. Ньылез егитъёс - Оксана Гаврилова, Светлана Лекомцева, Светлана Вахрушева, Вячеслав Красноперов - дышетсконзэс йылпумъязы витьлы гинэ. Иван Селюгин но Вячеслав Красноперов Россиысь тодмо актёрен Сергей Никоненкоен ӵош пыриськизы "Гармонист Суворов" кинофильмез дасянэ. Учкись доры со вуоз, кӧня ке ар ортчыса. Та нуналъёсы ик егитъёс ужало ни тодмо кылбурчилэн драматурглэн Петр Захаровлэн "Гондыр сюан" комедиезъя спектакль бордын. Шуркынмонэ (ноябре) актёръёсын ӟеч-ӟеч тодматскон луоз. Учкисьлы соос кузьмалозы Москваын дышетскыкузы дасям спектакльёсысьтызы люкетъёссэ. Егитъёсты ӟечкыланы лыктозы училищеысь дышетӥсьёссы но. Е. ВИНОГРАДОВА. Лыдӟисьёс гожто Маин буйгатоз Президент? Одӥгаз радио пыр вераськемаз Россилэн Президентэз Б. Ельцин ивортӥз туэ, азьло сярысь, трос ю-нянь будэтэммы сярысь. Кунгож сьӧрын туж ик уг возьмало асьмелэсь ю тысьмес, но азьланяз оло нош отчы вузаны кутском, шуиз Президент. Мар бен, вашкала аръёсы но Россия ю-нянез кунгож сьӧры вузалляз. Но со дыре ик ас калыкмы нянез кӧттырымон ӧз сиылы. Озьы медаз луы вылэм та дыре но. Республикамылэн кивалтӥсьёсыз берло дыре калык пӧлы потаны ӧдъязы. Ас синмынызы адӟо гурт калыклэсь улонзэ. Но ӵемысь гожъяно вылэм, мар лэсьтэмын, соослэн калыке поталлямзы бере. Тани музъем ужасьёсты сюлэмшугъяськытэ будэтэм юзэс вузан. Каракулино районын ю-няньзы туж удалтэмын. Но берытскоз-а солэн асдуныз, нянез дунтэмен басьто бере? Уваысь корреспондент Парамон Иванов гожтэ Ермаково гурт сярысь - отын пересьёсгес уло. Та пичи гурт пыртӥ электролиния ортче, нош адямиос тылтэк уло. Радиозы но ӧвӧл. Кулэ, пе, нимысьтыз электротрансформатор. Соин йырин пересьёс курадӟыса уло. Таиз толэзь ялэмын арлыдоослэн толэзенызы. Тодэм потэ вылэм, малы быдэс ар ӵоже ини пенсиосты уг будэто. Малы та дырозь уг быдэсъяськы "Ветеранъёс сярысь" Закон? Малы ӧлексыос сярысь закон но ньӧмыз понна гинэ кутэмын? Вань та юанъёслы валэктонъёс кылэм потэ вылэм аслэсьтыз Президентлэсь. В. ВОЛОДИН. Нуналлэн тодметэз Вашкала календарья туннэ пусъё Феклалэсь вордскемзэ. Та нуналэ тужгес но сӥлы каро вылэм кутсаськисьёсты. Итымын ужасьёс уйшорозь шулдыръяськизы, кырӟазы-эктӥзы. Уйшорысен, тылъёсты ӝуатыса, ужзэс мытылӥзы. Соин ик Феклалэсь нимзэ герӟало югыт, ӟардон ваисен. Уйёс та вакытэ пеймытэсь, нунал туж ӝог синэ. Феклалэн праздникысеныз горд кушманэз окто. Ӵуказе пусъё Сергий Радонежскийлэсь вордскемзэ. Та нуналысен шуныт нуналъёсты эн возьма ни, пересьёс верамъя, Сергий сьӧраз кезьытэз вае, нош Матрон - толэз (22 ноябрь). Сергийлэн праздниказ тӧдьы кеньыр ке усиз, Михайлов нуналлы, 21 ноябре, возьма толэз. Сергий Радонежский, пе, тылобурдоез быремлэсь, висёнъёслэсь уте. Та нуналысен кубистаез ӵого ни. Югыт нунал туннэ кыстӥське 11 час 6 минут, ӵуказе - 5 минутлы вакчигес. Кулэсмиз ни 6 час 27 минутлы. Та нуналэ... ар талэсь азьло Вордскемез дырысен 80 ар тырме И. П. Репинлы, Советской Союзлэн Героезлы. Вордскемын Селта районысь Лыстем гуртын. 8 октябре 1918 арын Азинлэн дивизиез дасяське Ижевскез тӧдьыослэсь мозмытонлы. Город тушмон улэ шедиз вал та арын 7-8 августэ. 8 октябре 1922 арын Можга городын ужаны кутскиз удмурт педтехникум, со кылдӥз Елабугаысь учительской семинарилэн инъетэз вылын. 7 октябре 1941 арын Г. К. Жуков юнматэмын Западной фронтлы командующие. 7 октябре 1977 арын Верховной Совет кутэ СССР-лэсь ньылетӥ Конституцизэ (Основной Законзэ). Нырысетӥез кутэмын вал 1918 арын, кыкетӥез - 1924 арын, куинетӥез - 1936 арын. "Уйпал ӟардон" пушйыны кулэ Кез. Республикаямы удмуртъёслэн ӧтчамзылы дасяськон мынэ. Таин валче Кезын ортчиз районысь удмуртъёслэн кенешсы. Трос ужрадъёс эскеремын-чакламын. Одӥшез соос пӧлысь "Уйпал ӟардон" культурая огазеяськонлэн но солэн кивалтӥсезлэн куинь ар ӵоже ужамзылы йылпумъянъёс лэсьтон луэ. Ужзы уродэн лыдъямын ӧвӧл. Но оскон вань, азьланяз та огазеяськон эшшо чупресгес луоз. Кенеш дыръя удмурт национальной центр кылдытон сярысь кылпум поттылэмын, Удмуртъёслэн съездазы 13 делегат быръемын. Н. ЛИПИНА. Аксариноос дышето ужаны Киясово. Районысь скал кыскисьёс куспын радъям гужем ӵошатсконъёслы йылпумъянъёс лэсьтэмын. Куинь толэзь куспын ваньмызлэсь трос йӧл кыскиз Аксарино фермаысь Е. И. Быкова - скаллы быдэ 1588 килограмм люказ. Сентябрь толэзе но Екатерина Ивановна аслэсьтыз кужымзэ-мылкыдзэ ӧз куашкаты. Али со йырлы быдэ 12 килограмм пала йӧл кыске. Пусйыны кулэ, Аксарино фермаысь кылемъёсыз но скал кыскисьёс азьветлӥсьсылэсь трослы бере уг кылё. Ужаны быгато. В. БОЛОТОВА. Вань удмуртъёслэн съездзы азьын малпанъёс Съездэ мед лыктозы зэмос удмуртъёс Азьвыл ортчылэмъёсыз съездъёс сярысь мур-мур малпаськиськод ке, йыре пӧртэм малпанъёс лыктыло. Нырысь ик, соослэн кызьы кутскылэмзы сярысь. Удмурт вӧсясьёс (артистъёс), куриськонъёс... Та учыр ваньзэ ик паймытэ: умой но кадь, чебер но кадь... Нош куд-огзэ кышкатэ: та удмуртъёсыз йырзэс ӝуто ук! Нош залын вань ӟучез но, бигерез но... Картано но, мерекан но,.. Эшез но, тушмонэз но... Куштоно та люкетэз. Огъя удмурт вӧсяськон ноку но ӧй вал, уз но луы. Мед вераськоз ас радаз одӥг ке но вӧсясь. Ас дӥсеныз, ас осконэныз, ас малпанэныз. Нош вӧсяськемъяськись артистъёс ас воршуд нимзэс но, оло, уг тодо али. Малы кулэ сыӵе спектакль? Эшъёсмес но тушмон карыны гинэ. Воршуд - со инмар ӧвӧл ук, со геноним гинэ. Ас выжы нимзэ тодыны кулэ котькудӥз удмурт но, котькудӥз башкир но, котькудӥз финн но. Соин ик регистрация дыръя ик котькуд делегатлэсь но, кунолэсь но выжы нимзэ гожтоно. Со умой возьматоз, кин но кин ветлӥз таяз съездэ. Собере вань ужпумъёсыз эскерыны луоз ни. Съездэ пырись-лыктӥсь, черке лыктӥсь мурт сямен ик, "любез" мед тыроз. Кин кӧня быгатэ. Таяз съездын ик кылпум ӝутоно членской взнос тырон сярысь. Билет удмурт паспорт кадь мед луоз: нимтул но адрес бордын возьматэмын мед луоз, адямилэн национальностез сяна, кыӵе воршудэ, кыӵе осконэ пыремез. Тани тазьы: Луд, христьянской; Пельга, языческой; Салья, христианской: бигер, крашин; бигер, мусульман; ӟуч, христиан; удмурт, оскисьтэм (крашине пыртымтэ, воршуд нимзэ уз тоды); Поска, оскисьтэм. Удмурт кылэз тодӥсь но удмуртъёс понна сюлмаськись съездын но, улонын но удмуртъёс понна гажано адями луыны кулэ! Табере взносъёс сярысь. Малы мон ас дышетскисьёсы понна, нош соин ӵош ик вань удмурт калыке понна но, толэзьлы быдэ уг жаляськы сю сюрслэсь но трос уксёме быдтыса книга-газет октыны? Малы кыӵе ке профессор яке бизнесмен уз быгаты меда ог дас сюрс манетсэ взнос сётылыны? Зэмос удмурт, ас калыкез сярысь сюлмаськись удмурт, солэсь но уногес взнос тырыны быгатоз. Малы одно ик государстволэсь яке кыӵе ке инмарлэсь возьмаса улод? Вот мар сярысь вераськон ӝутыны кулэ таяз съездын!Г. АРХИПОВ, шаерчи. "Удмурт калык султэмын!.." Удмуртъёслэн куинетӥ (куатетӥ) съездзы азьын али ёросъёсын конференциос ортчыло. Отчы пырисько котькуд гуртысь сямен удмуртъёс. Соос огазе люкаськыса кенешо, верасько, сюлэмшугзэс кисьто, пӧлысьтызы чырмытъёссэ, дӥсьтӥсьёссэгес съездэ лэзьыны делегатъёс быръё. Ортчем нуналъёсы мыным ветлыны кылдӥз Юкаменскын но Можгаын ортчем люкаськемъёсы. Та уй пал но лымшор пал ёросъёсысь удмуртъёс улэм-вылэмзыя но, мылкыдзыя но висъяськогес. Мон кема аръёс ӵоже газет-журнал поттонын ужасько бере ини, тодӥсько, Юкаменск палан удмурт кылын лыдӟиськыны уг ярато шуыса. Элькунамы ортчись пӧртэм ужрадъёсы но та палъёс уггес пыриськыло вал. Малпан кылдылӥз, Юкаменск ёросын удмуртъёс туж ӧжыт шуыса. Нош Можга ёрос данъяське писательёсыныз, артистъёсыныз, тодосчиосынызы. Удмурт газет-журнал но, мукетъёсыныз ӵошатыса, тросгес басьто. Та кык ёросъёсын уло удмуртъёс, бигеръёс, ӟучъёс. Юкаменскын эшшо вань на бесермянъёс. Но мон состы сокем ик уг висъяськы, удмуртъёс кадь ик матынэсь но дуноесь пото. Кызьы ке ог дасо ар талэсь азьло Петр Кубашевен но Владимир Котковен ӵош мыным Юкаменске ветлыны кылдӥз. Пайми но шумпотӥ вал соку татын улӥсь удмуртъёслы. Асьсэлэн кырӟась-верась ансамбльзы но вылэм, удмурт кылын но чебер верасько. Нош ёрос тӧрозы Николай Сергеевич Бушмелев, ӟуч маке, удмурт кылын но вольыт вераське, кык кылын кылбуръёс но, кырӟанъёс но гожъя, фольклор коллекивзы умой-умой мед ужалоз шуыса сюлмаське. Соку татысь ӝутскем мылкыдын, оскыса кошким: иське, Юкаменскысь удмурт калык ассэ гажа, кылзэ но уз вунэты. Мар бен шараяськиз та кык конференциын? Трос вераськон мынӥз нылпиосты анай кылзылы дышетон пумысен. Удмурт классъёсты, пе, дышетскисьёс ӧжыт шуыса, ворсалляло, нош куд-ог гуртъёсын али но усьтэмын ӧвӧл на. Кивалтӥсьёс, коньдон ӧвӧл шуыса, муг шедьто. Али ке но умой-умой радъямын ӧвӧл "нылпи сад - школа" ужан амал. Пиналъёс нылпи садын удмурт кылэз дышето ке, школаын сыӵе урокъёс ӧвӧл, яке школаын усьтэмын, нош нылпи садын ваньмыз ӟуч сямен мынэ. Озьы пинал дыго- мого будэ, одӥгзэ но кылэз тыро-пыдо тодыса-валаса уг вутты. Тужгес но бадӟым сюлэмшугзэс веразы Юкаменскысь удмурт кыллы дышетӥсьёс. Соос та ёросысь кивалтӥсьёслы пырак синмазы шуизы: удмурт кыллы азьвыл сямен ик саклык уг висъяло, кырӟан-эктон удмурт фольклор коллективъёслы юрттэмен ужзы быре. Соин ӵош ик пыкылӥзы анай-атайёсты. Соослы, пе, али воля сётэмын нылпизэс кыӵе кылын дышетыны. Куд-ог анай-атайёс, вордэм нунызылы капчигес мед луоз шуыса, школае куриськон гожто: нылпиелы удмурт кыл кулэ ӧвӧл, медаз дышеты. Нош математикая, физикая яке ӟуч кылъя урокъёслэсь тазьы уг мозмыто ук. Удмурт кыл шоры тазьы учкон асьме анай кылмес мултэс, мылес карем луэ ук. Туж ӧжыт лыдӟиськиськоды удмурт кылын шуыса пыкылэмлы юкаменскъёс шуо: литературной кылэз ум валаське. Но отысь огшоры калыкен вераськыса шӧдӥськод, кылмы сокем ик уг висъяськы, ваньзэ валаны луэ. Асьмелэн мылкыдтэммы, азьтэммы бордысь потэ, вылды, таӵе вераськон. Тужгес но кӧтэз ӝож кариз Юкаменскысь "Ладушки" нылпи садэн кивалтӥсьлэн вераськемез. Ачиз удмурт, люкаськемъёс солэсь витизы анай кылын вераськемзэ, нош со ӟуч сямен мадиськиз. Паймиськом, пе, нылпиосты кызьы удмурт кыллы дышетыны. Кылсярысь, литературной кылын анай, атай шуо, нош милям пӧртэм сямен. Паймоно кадь, ма, уг луы шат нылпиосты асьсэ вераськон сяменгес ик дышетыны. Отӥяз соослы капчигес луысал ини мукет удмурт диалектъёсты но валаны. Юкаменскысь сцена вылын пукись кивалтӥсьёс шенгыль-пенгыль ке но, удмурт кылын вераськизы, нош огшоры калык чал-чалгес пукиз. Дышетӥсьёс чылкак одӥг-кыкез гинэ пыриськизы. Мае бен соос пусйизы? Та бадӟым сцена вылысен, пе, алигес гинэ удмурт кылмес шара поттылыны кутским. Кытӥяз кышкыт но потэ, пе: нош ик уз шуэ меда, малы со кулэтэм, бырем шузи кылыныд вераськиськод. Огез шумпоттӥз: дышетӥсьёс но, куд-ог мукетъёсыз но, пӧртэм ӵошатонъёсты, лэчыт кылъёсты пыртылыса, туж чебер вераськизы. Конференция бере дышетӥсьёс монэ котыртӥзы. Огез но кыкез школаязы пумиськонэ ӧтё. А то татын, пе, пиналъёс уг адӟыло улэп писательёсты. Вӧзамы сылӥз Юкаменск тӧро Николай Сергеевич Бушмелев но. Ветлоно вал дорады, шуисько, ӟечгес тодматсконо. Вераськем поннам мон коньдон но уг куры. Но тӧро чал-чал сылӥз. Озьы ке но, дышетӥсьёсыз оскытӥ, тол куспын доразы одно вуылыны тыршо шуыса. Можгаын сюлэмы ырак луыса кылзӥськи чылк-чылк удмурт кылын вераськемез. Татын, кылсярысь, сюлэмшугзэс веразы удмурт учебникъёс пумысен. Соос вужмемын, выль куронъёслы уг тупало ни, пе. Дыр вуэмын мукет предметъёсты но, шуом, математикаез, удмурт кылын нуыны. Бигеръёс та ласянь трослы азьпалан мыно. Газетъёсын, пе, выль кылъёсты укыр тросэн пыртылыны сюлмаськоно ӧвӧл на, лыдӟисьёс дышысагес мед вуозы. Можгаос озьы ик трос вераськизы ӟучъёсын, бигеръёсын ӵош пӧртэм пумиськонъёс, праздникъёс ортчытъямзы сярысь. Соку тодам лыктӥз Юкаменскын одӥг дышетӥсьлэн верамез: милям, пе, бигеръёс но ӟучомо ини, ас сям-йылолъёссэс но, кылзэс но уг тодо ни. Та конференциос ӝож мылкыдэн ӵош сюлэмам шумпотон но пыртӥзы. Туж умой, табере куинь арлы одӥг пол ке но удмуртъёс ваче син пумиськыло, вераськыло. Юкаменскысь кадь дӥсьтӥсьтэм удмуртъёс но табере, оло, ас кужымзэс пумен шӧдозы ини, уж борды кутскозы. 1920-тӥ аръёсы Куӟебай Гердлэн гожтэм кылъёсыз али но туж ас интыязы кылӥсько: Эн вера мыным, удмурт калык изе шуыса, Удмурт калык султэмын! Эн вера мыным, котырмы пеймыт шуыса, Шунды кемалась ӝужамын! ГАЛИНА РОМАНОВА, кылбурчи. Сайкатоно изись тулкымез Нокинлы валэктонэз ӧвӧл, дыр: егитъёс - улонмылэн азьланез, егитъёс - улонмылэн кужымез. Но со изись тулкымез сайкатыны, вырӟытыны кулэ. Со понна ик удмурт шаерамы кылдытэмын Егитъёсын ужанъя кун комитет, нош ёросъёсысь администрациосын ужало солэн ёзъёсыз - егитъёсын ужанъя отделъёс. Жаляса верано луэ, ёрос кивалтӥсьёс ласянь но, егитъёсын ужась специалистъёс ласянь но куд-ог интыосын уг шӧдӥськы на огъясь кужым, ог-огедлы киез сётыса ужан. Ёросъёсысь егитъёсын ужанъя отделъёс сюрпи интые но шедемын. Котьма ке но, алнашъёс сярысь озьы шуыны уз луы. Ёрос администрациялэн тӧроез В. И. Городилов ӧз палэнскы егитъёслэсь, валаз соослэсь ужпумъёссэс, куронъёссэс. Одӥгаз сессиын ӝутэмын вал егитъёслы ёрос бюджетысь коньдон висъян сярысь ужпум. Кылем арын коньдонэн юрттэт 2 миллион но ӧй вал ке, туэлы бюджетысь висъяны чакламын 20 миллион манет. Со сяна, депутатъёс умоен лыдъязы котькуд гурт адяминистрацие егитъёсын ужась муртэ пуктыны. Милям внештатной корреспондентмы Надежда Прокопьева пумиськылӥз Алнаш ёросысь егитъёсын ужанъя отделлэн кивалтӥсеныз Владимир Соловьевен но вазиськиз солы кӧня ке юанъёсын. - Мар бордысь потӥз егитъёсын ужан отделлэсь ужзэ выль сямен ӧръян? - Со потӥз, дыр, улонмы бордысь, егитъёс пӧлын ужтэк кылён будэмен но. Тани асьмелэн куамын аресозь егитъёсмы, школаез йылпумъямзы бере, тросэз гуртъёсазы кылемын. Асьсэды кытчы карыны уг тодо: юо, жугисько... Азьло аръёсы соосын коть кыӵе ке но уж нуиське вал, комсомол огазеяськонъёс пыр. Нош табере мар кылиз? Районын кылдытэмын бере егитъёсын ужанъя отдел, со сюлмаськыны кулэ ваньмыз егитъёс сярысь, котькудӥз доры вуттӥськыны тыршоно. Со ласянь милемлы табере капчи луиз. Егит специалистъёслы гуртысь администрациосын кызь одӥг ужан инты усьтӥськиз. Гурт администрациослэн кивалтӥсьёссылы со бадӟым юрттэт. Пӧртэм ужпумъёсын вырыса, егитъёслы дыр но трос уг кыльы ни угось. Табере, кыӵе ке но ужрад ортчытоно ке, вань кинлы вазиськыны, кинлэсь юаны. Жаляса верано, куиняз гурт администрациын егитъёсын ужась муртэ ӧз шедьтэ на. Пусйыны кулэ созэ но. Туала вакытэ адямиез дунтэк уд ужаты, кӧс кыллэсь кӧттыро уг луо угось. Ёрос бюджетын чакламын гурт администрациосын егитъёсын ужасьёслы одӥг пичи уждун мында уксё тырыны. Тросэз соос тыршо на мукет удысын. Котькудӥз аслыз юрттӥсе быръе кык-куинь муртэ. Нокинэ но кыӵе ке нимысьтыз быръем ужпумен вырыны ум косӥське. Кин гуртысь егитъёсты спорт котыре огазея, кинлэн кырӟан-веран удысын ӟечгес пӧрме. Куд-огез юрттӥсьёсмы асьсэды ӟеч ужъёсынызы возьматӥзы ни, кылсярысь, Вячеслав Плотников, Надежда Бальзина, Татьяна Михайлова. - Владимир Михайлович, кемалась ик ӧвӧл, тӥ вал егитъёсын ужанъя "Ошмес" центрлэн директорез. Кыӵегес ужъёс али мыно отын? - Ӟуч сямен вераса, со милям "университет здоровья и культуры" выллем луоз. Тани, шуом, городысь егит нылъёс, нылкышноос асьсэды котьку дыре чакланы, утялтыны быгато чеберлыкъя салонъёсын, парикмахерскойёсын. Нош гуртын улӥсьлы потыны кулэ ай сокеме, солы шуыса юри уд но мыны. Тае чакласа, милям но ужалозы косметологъёс, маникюр-педикюр лэсьтонъя специалистъёс, озьы ик тазалыксы пумысен вазиськыны быгатозы пӧртэм специалистъёслы. Асьмелэн егитъёсмы уг тодо законъёсты, соин ик кулэен лыдъямы юридической консультациос ортчытъяны. Ужа ни психотерапевтической отделмы. Егитъёслэсь сӥль-вирзэс кыдатон понна милемлы кулэ на спортъя, каратэя но аэробикая инструкторъёс. Та ужпумез йылаз-пумаз вуттыны малпаськом уже интыянъя бюроен ӵош. - Выль удысын куинь толэзьлэсь ятыр ужаськоды ни. Маиз тужгес но пусйымонэз вал та дыр куспын? Азьланезлы кыӵеесь малпанъёсты? - Нырысь ик пусйымонэз со, дыр. Ёросысьтымы егитъёсын ужанъя отделын ми табере кык кузя ужаськом, Нелли Будринаен ӵош. Куд-ог ужъёсмы адӟисько ни. Шаерысьтымы усточи нылпиос понна ужаз "Лира-97" лагерь, дас нунал ӵоже отын 50 нылпи шутэтскиз. Соосын ужазы ёросысьтымы специалистъёс, ньыль ёзъёслы люкиськыса. Литературно-творческой секциез нуиз И. З. Иванов, эктонлы дышетӥз В. И. Постникова, театрез гажасъёсын ужаз В. М. Булдаков, хорен кивалтӥз В. И. Петрова. Вакчи дыр куспын нылпиос куинь концерт возьматӥзы. Со сяна, дышетскисьёс пумиськылӥзы шаерысьтымы тодмо адямиосын. Ёрос газетын усьтӥмы "Егит дыр" бам. Со потоз толэзьлы быдэ одӥг пол. Отын печатлаломы егитъёслэн ужпумъёссылы сӥзем материалъёс, ум вунэтэ творчество сярысь но. Нош азьланез сярысь ке верано, ужпумъёсмы пумтэм. Егитъёс пӧлын выльысь улӟытыны турттӥськом ӵошатскон мылкыдэз. Азьвыл аръёсы со азьлане валтӥсь луэ вал. Нош али нокинлэсь адӟем карыны, кин ке сьӧры кыстӥськыны. Соин ик адӟем карымон нылъёслэн но пиослэн туспуктэмъёссы возьматэмын луозы "Ёросысьтымы егитъёс" данъян пул вылын. Туэлы тани гурт хозяйствоя управлениен ӵош егит комбайнеръёс пӧлын ӵошатскон ялэмын вал. Вормисе потӥз "Прогресс" колхозысь Эдуард Печников. Мукет удысъёсъя но трос гинэ данъяськымон егитъёсмы, ми соосты синйылтыса возём. Матысь дыре ортчытыны малпаськом егитъёслэсь кенешъёссэс, кӧня ке гуртъёсты огазеяса. Отын нош ик быръёмы асьмелы юрттӥсьёс. Огъя ужпумъёсты эскерем сяна, ог-огенымы тодматском, азьлань улонмы сярысь вераськом. Со ужрадъёсамы ӧтьылом колхозъёслэсь но гурт администрациослэсь кивалтӥсьёссэс. Ог-огмес валаса, кенешыса ужамы ке, ваньмыз асьмелэн пӧрмоз. Солы юрттоз на "Удмурт Республикаын егитъёсын ужан кун плитика сярысь" Закон, шаермылэн улоназ со ӝоггес мед пыӵалоз вылэм. КУН КЕНЕШЫН Люкетӥсез трос Кун Кенешысь Промышленностья, соин герӟаськем удысъёсты азинтонъя, вузъёс поттонъя но услугаос сётонъя комиссилэн тӧроез Виталий СОЛОВЬЕВ алигес пумиськиз журналистъёсын. Ӵуказе нуналэз адӟыны быгатӥсь туала политик люкаськемъёслы мадиз удысъёслэн туннэ ужъёссы но азязы сылӥсь лэчыт ужпумъёссы сярысь. Виталий Александровичлэн ивортэмезъя, газетъёс, радио но телевидение солэсь комиссизэ лябгес возьмато. Промышленностез шуг-секытысь поттонъя Кун Кенешын уно законодательной документъёс, программаос но ужрадъёс кутэмын. Нош кызьы соос улонэ пыӵало - соиз мукет ужпум. Туала рынокен экономикае потонын оломар но люкетӥсез шеде. Тани басьтом "Ижмашез". Сое пыд йылаз вуттон вылысь, мар но уг лэсьтӥськы. Воштэмын кивалтӥсьёссы, выльдэмын структураез, кылдытъямын нимаз пичи предприятиос. Но ваньзэ соосты огазея "Ижмаш". Озьы ке но, тужгес но шуг на югдур "Ижмаш-авто" ДОАО-ын. Отын сюосын гинэ автомашинос бичало. Огъя вераса, промышленность экономикаын валтӥсь инты басьтэ. Бюджетлэн доход люкетаз отысь самой трос коньдон вуэ, нош сое азинтыны уксё уг висъяськы. Соин ик вуоно 1998 арлы экономикаез азинтонъя бюджет дасяно. Со али сямен векаса улӥсь бюджет медаз луы. Му вӧй поттӥсьёслэсь казнае 60 процент ёрос коньдон вуэ. Сое кутоно лэсьтӥськонэ, калыклэсь улон- вылонзэ умоятонэ но социальной удысъёсты азинтонэ. Комиссилэн ӵектэмезъя, кык-куинь толэзь талэсь азьло, Кун Кенеш ичи пайда сётӥсь нефть поттон скважинаосты улӟытыны льготаос тупатӥз вал. Ужрад туж умоен берытскиз. Сыӵе интыосысь 50 миллиард манет тыр му вӧй кыскемын, нош кун бюджетэ 20 миллиард уксё вуиз, районъёсысь бюджетъёсы - 5 миллиард. "Белкамнефть" элькунлы кыӵе пайда сётэ - али шуг вераны. Кинлы ке со кулэ, но республикаямы кылдытоно нимаз национальной компания. Со огазеялоз "Удмуртторф", "Удмуртгеология" ёзъёсты но конкурсэ пыриськись нефть поттон скважинаосты. Бюджетэ компания ичизэ 100 миллиард манет сётыны быгатысал. Шаерамы ялан чутэ машиностроение. Ляб азинско станокъёс поттон, металлообработка но автомашинаос бичан. Умойгес югдур пияла поттон промышленностьын. Автозаводэз лэзьысалмы ке, со котырын дасоосын-сюосын предприятиос улӟысалзы. Со понна ӧжытсэ 200 миллиард манет пала коньдон кулэ. Кытысь шедьтоно? Быдэн 40-50 миллиард мед висъясалзы Россиысь но Удмуртиысь Правительствоос, Обороная министерство но ачиз завод. Со юрттысал автомашина бичанэз вырӟытыны. Таин ӵош вунэтыны уг яра капчи промышленностез. Та удысэ висъям уксё чаляк пайдаен берытске. Озьы ик азинске пичи ужбергатон. Соослы юрттэт сётонъя нимысьтыз закон кутэмын. Улонэ пыӵало ни вузкарон но музъем узырлык сярысь законъёс. Бюджетэз узырмытон ласянь комиссия 15 ӵектонъёс сётъяз. Соос пӧлысь куинез уже кутэмын, кылсярысь, кудӟытӥсь юонъёслы дун (акцизъёс) басьтонъя. Со бюджетэ ватсаса 50 миллиард манет сётӥз, нош арлэн пумаз кык пол йылоз, 100 миллиард луоз. Кыкетӥез, му вӧй вузаны квота тупатон. Республикалы 650-700 сюрс тонна нефть сётӥське. Сое переработать карыны одно ик завод пуктоно вылэм. Пайдаез умой луысал. Одно ик урод ӧй луысал коньдон, автомашина, мотоцикл но мукет утонъёсъя лотерея ортчытыны. Люкам коньдон пӧлысь бюджетэ 40 процентэз вуысал. Журналистъёс Виталий Александровичлы кӧня ке юанъёс сётӥзы. - Кызьы учкиськоды "Белкамнефть" шоры? - Мон котьку пумит вал таӵе ёз кылдытонлы. Куд-огез сое уг вала на. Асьмелы кулэ удмурт му вӧй компания. Сое одно ик кылдытоно. Башкирилы нефть кулэ, заводъёсыз вань. Альметьевскын одӥг ар ӵоже сыӵе завод пуктӥзы. Шӧдӥське, асьмелы но юрттыны мылкыд каро. Но одӥгез валантэм. Республика отчы 1 миллион 800 сюрс тонна нефть келя, нош Уфа асьме машинаосмылы двигательёссэ уг сёты. Кызьы сое валано? Асьмеос бускельёслы - му вӧй, соос - двигатель - сыӵе амалэн ужаны кулэ. - Автозаводлы юрттӥсьёс шедёзы-а? - Уз. Асьмелэн ужан интыосмы укыр бадӟымесь. Западысь фирмаослы со уг кельшы. Соос дорамы лыктӥзы ке но, азьло заводмес кесялозы, музъемен ӵошкатозы но выльзэ пуктозы. Асьме машинаосмес кредит амалэн вузано ни. Али "Волга" но озьы кошке. Ватсам потэ. Палэнысь юрттэт возьмаса улоно ӧвӧл. Асьмелэн вань конструкторъёсмы но специалистъёсмы. Соос ӟеч машина но, двигатель но лэсьтыны быгатозы. Кулэ коньдон но оскон. Г. РОМАНОВ. "УДМУРТСКАЯ ПРАВДА" ГАЗЕТЛЫ - 80 Гожъяськон - со висён выллем. Кыӵе сюлмаськонъёсын улэ но ужа меда бадӟым газетлэн нырысетӥ арзэ гинэ ай кивалтӥсь редакторез. Таӵе юанъёс котыртӥ бергаз вераськонмы "Удмуртская правда" газетлэн редактореныз Николай Иванович Нестеренкоен. - Мынам тодэмея, та газетэ тӥ ужаны лыктӥды странамылэн огаз шукырес вакытаз? - Зэм, со вал 1991 арын путч шуон дыръя. Соку вань газетъёслы секыт йӧтӥз. Вылӥ Совет газетмес кулэтэм кариз, юрттэмысь дугдӥз. Тау Министръёслэн Советсылы, рессофпрофлы - милесьтым ӧз палэнске. Коллективмы но возиськиз, ӧз пазяськы. Оло, со вакытэ куд-огез, ӧсэз шарк пытсаса, ужысь кошкыны но быгатэ вал, уго редакциын пӧртэм осконъёсын (убеждениосын) адямиос ужазы. Но нокин ӧз кошкы, кылдэм югдурез дунъяны валанзы тырмиз. Газетэ вуэмелэсь азьло мон ужай Сарапулысь огаз заводын экономист луыса, бӧрысьгес - партилэн обкомезлэн пресс-центраз. - Кин радъя но чакла газетлэсь валтӥсь ӧрзэ (позицизэ)? Коллектив, редактор яке улон? - Ӵем кылӥсько, газетмы коммунистъёслы дурбасьтэ шуыса. Озьы лыдъяны уг луы. Соизлы яке таизлы партилы меӵак дурбасьтӥсь газетъёс али ӧвӧл ни. ("Трибунаез" гинэ вераса шат). Компартиез выльысь уд ни улӟыты. Улонэз газет шонер возьматыны кулэ - озьы, кыӵе со вань. Уродзэ яке ӟечсэ гинэ гожъяд ке, кин оскоз. Лыдӟисьёс оско сыӵе журналистлы, кин быгатыса, улонэз валаса гожъяське - сыӵе материалъёс ик ӵемгес газет бамъёсы но сюро. Котькуд журналистлэн аслаз улон шоры учконэз. Милям газетмы, "Удмурт дунне" сямен ик, государственной лыдъяське. Редактор сое лыдэ басьтыны кулэ. Соин ик мылпотон шоры учкытэк возьматыны кулэ власть возисьёслэсь политиказэс но калыклэсь со политика шоры учконзэс, мылкыдзэс. Ярам, газетмес возисьёс (Кун Кенеш но Правительство) пӧртэм мылкыдъёсты возьматыны эрик сёто, пыд пуктылонъёс уг луыло. - Николай Иванович, ӟуч газетлы кадрьёс ласянь лякытгес, дыр? - Озьы вал азьло аръёсы. Журналистъёсты дасяллямы Казаньысь, Екатеринбургысь университетъёсын. Али секытгес, дышетон понна коньдон но кулэ. Но нокинэ эскерытэк, меӵак урамысь, ум кутӥське. - Кыӵе отделлы тӥ тужгес но бадӟым саклык висъяськоды? - Иворъёсъя отделлы. Та удыс азьло аналтэмынгес вал. Собкоръёсмы вань Сарапулын, Глазовын, Воткинскын, Можгаын. Соосты возьытэк районъёсы потан али дуногес усьысал. Ас ужзэс соос ӟеч быдэсъяло. - Кызьы тӥ учкиськоды туала нылкышно журналистъёс шоры? - Улонъя ке соос вамышъяло, мон соослы пумит ӧвӧл. Шонерзэ вераса, газетамы соос котьку тырмыт вал. - Мае лыдэ басьтӥськоды, журналистъёсты одӥг отделэ пуктыку, тодон-валанъёссэс, осконъёссэс, сямъёссэс, гороскопъёссэс? - Кыӵе отделъёсты кылдытон, кинэ кинэн пуктон - огез секытэз уж, дыр. Ваньмыз малпамъя уг пӧрмы, кабинетъёс но уг тырмо. Адямиос ӵемгес ог-огенызы эшъяськыса пуксё. Но уг ке тупало сямъёссыя, со ужлы люкетыны кулэ ӧвӧл, мынам малпамея - визьмо адями ас кусыпъёссэ керетонозь ноку уз вутты. - Куд-огез шуэ: ужысь потыса, уж сярысь ум ни малпаськиське. Озьы улыны быгатэ-а журналист? - Журналистлы сыӵе улон уггес тупа. Солэн йырыз ялан ужа: эшъёсыныз вераськыкуз но, сюрес вылэ потыкуз но. Йыре лыктэм малпанъёс ӵем дыръя кӧлыны но люкето. Куд-ог дыръя дорын но гожъяськоно луэ. - Семьяяды кык журналистъёс. Кузпалдэс Любовь Нестеренкоез рыдиокылзӥсьёс ӟеч тодо. Кызьы тӥляд ужды шоры учко нылпиосты? - Гажаса но оскыса. Оско, журналист кинлы ке но юрттыны быгатоз шуыса. Озьы ик со луыны но кулэ, дыр. Ӟеч улонлы осконмес кузпалэным ӧм ыштэ на ай. Нош куке солы оско анай-атайёс, оско нылпиос но. Пимы историяя факультетын дышетске. Кин тодэ, оло, журналист но луоз. Историклы журналист луыны секыт ӧвӧл. - Газеттылэсь азьпала улонзэ адӟиськоды-а? - Кыдёке учкыны туала дыре секыт. Али умой ортчытоно вал газетлы гожтӥськонэз. Газетмы ялан мед сюлмаськоз вылэм адямиос сярысь. Туала секыт улонэ адямилы оскон пыӵатыны, солэсь мылкыдзэ ӝутыны - со бадӟым уж ини. - Соглаш-а тӥ таӵе веранэн: газет улэ одӥг нунал? - Быдэсак ӧвӧл. Иворъёслы гинэ, дыр, со тупагес. Но газетэ пото пӧртэм статьяос. Соосты лыдӟись выльысь но вылььсь учкыны быгатэ, газетэ гожтэт ыстыса кыӵе ке ужпумез ӝутэ. Тодӥсько, кельшем материалъёсты тросэз вандыса возьыло. Огъя вераса, газет лыдӟисез мапаськыны ӧте, озьыен, со адямиослэн лул-сюлэмазы ялан улэ. - Огдыре тӥ кивалтӥды Кун Кенешлэн пресс-центреныз. Уд-а жаляське газетэ выльысь берытскиды шуыса? - Газетмылэн учредительёсыз монэ редакторе ӵектӥзы. Редакциын ужасьёс пумит ӧз луэ, мон понна куараоссэс сётӥзы. Тӥни сыӵе вал югдур. Журналистлэн ужез - со висён, дыр, солэсь мозмытскыны секыт. - Николай Иванович, мар сӥзьысалды тӥ "Удмурт дунне" газетын ужасьёслы? - Удмурт кыллы мон озьы ик ӧй ни дышы. Озьы ке но, туж гажасько ужасьёстэс, троссэ туж умой тодӥсько, ваньдылы умойзэ гинэ сӥзисько. Тӥляд но, милям но тросгес мед луозы лыдӟисьёсмы. Огвакыт асьме газетъёсмы куд-ог семьяосы ӵош вуылӥзы. Коньдон тырмымтэен, али озьы уггес пӧрмы ни. Но лыдӟисьёсмы ӟуч но удмурт газетъёсмес вошъяськыса но мед лыдӟозы вылэм. Лыдӟисьёс понна газетты котьку эш но дышетӥсь мед луоз. - Тау вераськемды но ӟеч кылъёсты понна. Татьяна БАННИКОВА. Туспуктэмез Владимир КАРМАНОВЛЭН. БУСКЕЛЬЁСМЫ ДОРЫН Кубаньлэсь уг кылё Татарстан. Балтась районысь музъем ужасьёс арысь аре ӟеч урожай басьто. Муоссы татын узыресь, вылаз ик, кыед, минерал сылал потто на, жаг турынзэ дыраз утялто. Бускель республикалэн ӝикыт бусыосызлы синмаськисез трос. Кыӵе ю-нянь будэтӥзы балтасьёс таяз арын? Районъя, шорлыдын вераса, гектарезлы быдэ кутсамын 38,6 центнер. Данакез хозяйствоос 40-эз ортчизы. Тужгес но ӟеч ю тысь будэтӥзы "Игенче" колхозын - 47,3 центнер. Соослэсь 4-5 центнерлы гинэ кылизы "Ударник", "Бурбаш", "Тюнтер", "Атня", "Кызыл юл" но мукетъёсыз. Бере кылисьёс пӧлы туэ шедизы "Смаиль", "Активист", Тукай нимо колхозъёс. Таосызлэн урожайзы районлэсь улӥын. Котькудӥзлы 25 хозяйстволы государстволы ю тысь вузанъя план сётэмын. Та ласянь азьпалан мыно "Атня" колхоз, "Бурбаш" но "Алан" совхозъёс. Картофка будэтонын "Бурбаш" синмаськымон ужаз, гектарезлы быдэ 240 центнер урожай басьтӥз. Озьы ик пусйыны кулэ "Татарстан", Ленин нимо колхозъёсты. Районъя картофкалэн удалтонлыкез вуиз 130 центнерозь. А. МИХАЙЛОВ. Ӧвӧл ке - ёрмоно, трос ке - паймоно Таӵе дышетскон заведениосмы элькунамы трос ӧвӧл. Озьы но соос секыт зӥбет улэ сюремын. Рынокен экономика коньдон поттыны, выль ужан амалъёс утчаны дышетэ ке но, Сарапулысь совхоз-техникум азе уката лэчытэсь ужпумъёс султо. Дышетскон заведение пумен пересьме-вужме. Со 1975 арын ӝутэмын, ӟеч-ӟеч выльдэмез кулэ каре. Маин? Юрттӥсь ӧвӧл, нош тупатъяны ичизэ 1.400 миллион манет уксё шедьтоно. Татын дасяло агрономъёсты, бухгалтеръёсты но ужбергатонлы специалистъёсты. Туэ одӥг группа дун тырыса дышетске, котькудӥз ар ӵоже 2,5 миллион манет сётыны кулэ. Техникумлэн хозяйствоез но бадӟым: 860 гектар удалтэм ю-нянь будэтӥзы, котькудысьтыз 30 центнерлэсь уно люкаськиз. Бакча сиёнъёсцы уката чебер пушйизы. Шумпоттэ кубиста, горд но ӵуж кушман. Ӵуж кушманзы гектарлы быдэ 300 центнер шедиз, нош гордэз - 700 центнер. Нош кубиста удзэс туэ нырысьсэ шуныт сётытэк будэтӥзы. Теплицазэс тулыс лек сильтӧл куашкатӥз, 860 миллион манетлы изъян ваиз. Шуг-секытысь кызьы но озьы потӥзы. 20 гектар кубистазы усто йыръяськиз. Нош сое но кушманъёссэс кытчы карыны-вузаны уг тодо, басьтӥсь ӧвӧл. Гурт калык, дышетскисьёс курадӟыса продукция потто, нош тыршемзы ӝӧк вылэ уг вуы, изъянтыны но кема ик ӧвӧл. Паймод но бырод. Малы меда та ужен уг выры сиён-юонъя корпорация? Тае син азяз возьыны но юрттыны кулэ Гурт хозяйствоя но Сиён-юонъя министерство. Ведь совхоз-техникум та удысэ пыре, хозяйствоослы специалистъёс дася. Пудо уллёзэ но пичи уд шуы. Скалъёсыз гинэ 400. Туэ тырмыт дасямын турын, жалем сиёнъёс но фураж. Азьло аръёсы пудо йырзы синэ ке вал, туэ ӧз кулэстэ. Кызьы бен туннэ возиське, улэ-вылэ совхоз-техникум? Капчиен уд шуы. Пӧртэм амалъёсын коньдон поттон сярысь сюлмаське. Берло дыре дунын дышетэ шофёръёсты но страховой агентъёсты. Та ужез нуыны условиосыз умоесь: 112 дышетӥсьёссы но 730 дышетскисьёссы. - Дорамы лыктыны мылкыд карисьёс уг сино, - шуэ егит директор Александр Кропачев. - Туэ конкурс пичи ӧй вал: 1 мурт интые - 5. Дышетскыны лыкто бускель республикаосысь но. Александр Георгиевич ар но уг ужа ай. Но совхоз-техникумлэн ужъёсаз пыр-поч пыриське ни, палэнысь, инмысь маке усемез возьмаса уг улы. Но солы туала вакытэ юрттэт но кулэ. Егит директорез мед валасалзы шаерысь кивалтӥсьёс но. Табере кӧня ке лыдпусъёс верало. Совхоз-техникум макем тросгес сӥль поттэ-вуза, сокем уногес (2 поллэсь ятыр) изъян адӟе. Нош йӧл пайда но, изъян но уг вайы, шуыны луоз. Соин ик дышетскон заведенилы юрттыны кулэ район но, министерство но. Ачиз но уксё поттыны мед быгатоз. Соку со пыд йылаз йыг-йыг султоз. Али хозяйстволэн 1.700 миллион манет тыронэз. Со пӧлысь бадӟым люкетэз электротыл но телефон понна. Нялтас пусйыны кулэ, Россиысь уноез таӵе техникумъёс ворсаськемын ни, асьмелэн ужало на. Совхозлы азьланьын уката тросгес будэтоно вылэм ӟеч кидыс. Со понна кун бюджетысь ватсаса коньдон сётӥське. Сарапулъёслэн луонлыкъёссы вань кубиста, кушман кидысъёс басьтыны. Басьтӥсьёс луозы, палэнысь ваёно но уз луы. Г. РОМАНОВ. Ми - тӥледлы, тӥ - милемлы Тазьы ваче ужало Играысь кивалтӥсьёс но ваньбур поттӥсьёс Озьы тыршемлэн пайдаез син азьын. Ёросысь администрация интыысь предприятиосын но организациосын валче ужаса быгатэ калыклэсь улонзэ ӟечгес радъяны, умоесь воштӥськонъёс ортчытыны. Лыдӟисьёсмес азьмынӥсь опытэн тодматон вылысь, ми курим Игра ёросысь администрацилэсь кивалтӥсьсэ Галина ВИШНЕВСКАЯЕЗ та пумысен пыр-почгес вераны. - Галина Сергеевна, кыӵе амалъёсын радъяськоды ваньбур поттӥсьёсын кусыпъёстэс? - 90-тӥ аръёслэн кутсконазы предприятиослэн кивалтӥсьёссы малпазы вал, государство соослэн ужазы чик но уз пыриськы ни, озьы вань ужпумъёсты ас кожазы ӝог гинэ быдэсъяны быгатозы шуыса. Дыр возьматӥз: бадӟым зарезьын уяны шуг вылэм. Соин ик огдырлы палэнскем коллективъёс выльысь дорамы сюресъёс утчаны ӧдъязы. Валамон ни, ми но тыршим соослы матэгес кариськыны. Вакыт косӥз выль ужан амалъёс утчаны, со дыре ик - вужъёссэ но тодэ вайыны. Игра ёросын кварталлы быдэ люкаськылэ актив. Огъя пумиськонъёс дыръя кенешиськом пӧртэм ужпумъёсъя, тодматӥськом ӟеченыз, пусйиськом сюбег интыосты. Таӵе ужрадъёс ми понна гинэ ӧвӧл, пӧртэм ваньбурен ужась предприятиос понна но пайдаё. Уго соос луонлык сёто югдурез син азьын возьыны, кужымез тужгес но кулэ удысэ ӧръяны. 1994 арын кылдытэмын вал директоръёслэн кенешсы. Кылем арын со пумен пӧрмиз администрацилэн коллегиезлы. Та ёзлэн заседаниосаз туэ гинэ ини эскерим автотранспортэн, калыклы бытовой юрттэт сётонэн, нюлэс дасянэн герӟаськем но мукет ужпумъёсты. Ӵем чакласьком гурт хозяйствоын югдурез но. Туала вакытэ азьло сямен гинэ косъяськыса кивалтыны уг луы ни. Кусыпъёсты радъян понна кулэ пӧртэм документъёс. Со понна ик милям кутэмын интыысь аскивалтонъя устав, администрацилэн огъя программаез но нимаз удысъёсъя (пичи ужбергатонэз азинтонъя, законэз тӥясьёсын нюръяськонъя но мукет) программаос. Мукетыз сюлмаськонмы герӟаськемын ивор вӧлмытонэн. Депутатъёслэн советсылэн, администрацилэн решениоссы одно ик вуыны кулэ ёросын улӥсьёс дорозь. Макем ӟечгес тодозы адямиос милесьтым вамышъёсмес, сокем каньылгес ужаны. Со понна уже паськыт кутыны тыршиськом ивор вӧлмытонъя интыысь ёзъёсты - газетъёсты но радиоез. Озьы ик радъяськом валэктон ужез. Толэзьлы быдэ потаськом коллективъёсы, гуртъёсы. Администрацилэсь нуналъёссэ ортчытъянэ пырисько калыкез уже интыянъя центрын, жилкомхозын, милициын, выт тыронъя инспекциын но мукет учреждениосын ужасьёс. Удысэз тазьы радъян юрттэ адямиосын кусыпъёсты юнматыны, сыӵе пумиськонъёс дыръя уго калык быгатэ милемлы сюлэмвисёнъёссэ вераны, кыӵе ке но ужпумъёсты ӝутыны. - Ужан амалъёс, оло, мукет интыосын но вань, нош коньдон ӧз луы ке, шуг-секытъёсты палэнтыны уд быгаты ук. Та ласянь кызьы ужа меда администрациды? - Шонер пусйиськоды, кисыед буш луиз ке, ӟеч малпанъёс ноку но уз быдэсме. Нош коньдон потэ экономикаез азинтон бордысь. Странаын ортчытӥськись реформаос юн шуккизы ёросмес но. Ваньбур поттон тужгес но кулэсмиз 1994 арын. Югдурез тупатон вылысь, администрация ёросысь 40 предприятиослэсь выт тырон кыӵессэс лябӟытӥз, шуыны луоз. Соослы льготаос тупатӥм, прибыльлы, музъемлы, милициез возёнлы но куд-ог мукет налогъёслэсь мозмытӥм. Куд-ог коллективъёслэсь тыронъёссэс берлогес басьтыны кенешим. Котькуд сыӵе предприятиен нимаз договор гожтӥм, отын ик пусйим, кытчы кутыны луэ тырымтэ выт чотын шыръяськем коньдонэз. Уго районъя озьы 700 миллион манет люкаськиз. 1995 арын ужаммес бӧрысь пыр-поч эскерим. Ма сётӥз администрацилэн таӵе вамышез? Пайдаез вань. Нянь пыжон завод, сӥль комбинат со чотын быгатӥзы ваньбур поттонэз йылэтыны. Мукетъёсаз предприятиосын луонлык кылдӥз быронлэсь утиськыны, кызьы шуо, пыд йылын кыльыны, куд-ог пунэм тыронъёсты берыктыны. Берло дыре администрация выт тыронъя льгота мукет сяменгес сётъя ни. Ми лэзиськом интыысь бюджетэ коньдонэз ӝегаса сётыны. Пичи ке но - юрттэт. Тӥни озьы тыршиськом ог-огмес валаны, ёрослэн бюджетаз огдыре ичигес коньдон люкаське ке но, бӧрысь сыӵе ужрадъёс бадӟымгес пайдаен берытско. - Тӥляд одӥгез йыр висёнды - социальной удысэз предприятиос киысь интыысь кивалтон ёзъёслы выжтон. Кызьы радъяське таиз уж? - Ёросысьтымы организациос кылем арын улон юртъёсты, нылпи садъёсты, больницаосты возьыны 11 миллиард манетлэсь ятыр коньдон быдтӥзы. Ичи ӧвӧл со. Пумен та объектъёсты ми кие выжто. Берло куинь ар ӵоже сётэмын 1335 муртлы нылпи садъёс, 62 сюрс квадратной метр улон инты, 28 сюрс метрлэсь ятыр ву гумыос, кӧня ке клубъёс, магазинъёс, библиотекаос... Валамон, ваньзэ соку ик киямы кутыны ум быгатӥське - уг тырмы коньдон. Но предприятиослэсь та ласянь ныпъетсэс капчиятон понна, социальной нормативъёссэс воштӥськом, кызьы ке но юрттыны тыршиськом. Шуг югдур кыдёкысь посёлокъёсын, кытын вазен выро вал нюлэс дасянэн. Тэль корамын, уж быриз, нош адямиос кылизы ук. Соин ик али дасяськом сыӵе гуртъёсты, посёлокъёсты улӟытонъя нимысьтыз программа. Оскисько, уж вырӟоз шуыса. Социальной ужпумъёсты быдэсъянэ ваньмызлэсь ик луонлыкъёссэс уже кутӥськом. Озьы огъя кужымен тупатъям Пионерский посёлоке сюресэз но тыл сётон линиез, Играысь коллекторез, Кушьяын выльдӥм ву кыскон гумыосты. - Галина Сергеевна, тӥ дорын ортчем семинар дыръя палэнысь лыктэм куноос синмаськизы калыклы пуэн юрттонэз радъямдылы? - Администрация, зэм но, та бордын рос-прос ужа. Ми юнматӥм пу сётыны-висъяны быгатӥсь предприятиослэсь списоксэс, кенешим соосын расчёт лэсьтон амалъёсты. Гуртысь администрациос но та уже меӵак пырисько, пу ворттонэз ялан син азязы возё. Котькуд семьялы, хозяйстволы сётэмын топливной книжка. Отын пусъемын льготаос, дыръёс. Со юрттэ ужез чакласа но ӝегатсконъёстэк, янгышъёстэк радъяны. - Асьмеос чик но ӧм поттылэ гурт хозяйство сярысь. Та удысын но вылез вань, дыр, ук? - Эштосъёс, колхозъёс но совхозъёс уно шуг-секытъёс адӟо, вузам сиён-юонзы понна коньдон дыраз басьтымтэен. Пӧтэм амалъёс утчаськом. Кылсярысь, переработкалы кредит басьтыны гарантиос сётъяськом. Гуртоослы эстӥськонэн, котельнойёсты тупатъяны юрттӥськом. Куинь ар ӵоже администрация хозяйствоослы бюджетысь 3099 миллион манет сётӥз. Гурт хозяйствоын структура ласянь но воштӥськонъёс мыно. Тани "Игринское" эштос шуге-леке вуэмын. Али ужаськом сое "Россия" кужмо колхозэн огазеян бордын. Кизён-аран вакытъёсы но огъя кужымез чакласа кутыны тыршиськом. Та ласянь промышленной предприятиослэсь но быгатонлыкъёссэс уже кутӥськом. - Нош кызьы ёросысь администрация ужа интыосысь кивалтӥсьёсын? - Ми соослы шуиськом: интыосысь администрация кыл кутэ ваньмыз понна, ма вань солэн улосвылаз, соос пӧлын ик предприятиослэн азинсконъёссы понна. Котькуд толэзь та пумысен кылзэс юаськом. Сыӵе куронъёс шӧдскымон умоятӥзы администрациослэсь ужзэс. Табере интыосысь кивалтӥсьёс производствоен герӟаськем ужпумъёсты но валало ни, чыры-пыры ужъёсты тыршо ас кожазы быдэсъяны. Озьы вераны луоз Чутырь, Факел, Игра, Кушья администрациос сярысь. Ужаськом кадръёсын но. Кулэ дыръя куивалтӥсьёсты воштоно но луэ. Игра райпоын, "Комета" огазеяськонын, "Нива" эштосын сыӵе ужрадъёс ӟечен берытскизы. Вераны луысал на трос мукетсэ но. Валамон огез: котькыӵе секыт вакытэ югдурез тупатыны юрттэ огкылысь луон, ог-огдэ валаны тыршон. Администрация кизе мыче предприятиослы, соосыз - милемлы. Нош пайдазэ адӟе ёросын улӥсь калык. И. ЛЕБЕДЕВ. * Играысь одӥгаз магазинын. Фотоез И. ГЛУХОВЛЭН. Удмурт Республикае ваем тысьлэсь но солэсь лэсьтэм продукцилэсь ӟечлыксэ чакланэз юнматонъя ужрадъёс сярысь Удмурт Республикаысь Правительстволэн ПОСТАНОВЛЕНИЕЗ 1997 ар 29 сентябрь Ижевск город � 883 Потребительёсты улӥ ӟечлыкен продукцилэсь утён понна, вуз поттӥсьёслы юрттон, республикае кун стандартъёслэн куронъёсызлы тупасьтэм ю тысез, кеньырез, пызез, комбикормез но тысьлэсь лэсьтэм мукет продукциез ваемлэсь утиськон вылысь, Удмурт Республикаысь Правительство пуктэ: 1. Россия Федерацилэн улосвылъёсысьтыз но мукет кунъёсысь республикае ваем ю тысез но солэсь поттэм продукциез вузано, Удмурт Республикаысь Нянья кун инспекцилэн управлениез ӟечлыкъя сертификат сётэмъя. 2. Республикалэн палэнысьтыз но мукет кунъёсысь ю тысез но солэсь поттэм продукциез басьтӥсь но ваись организациослы но нимаз ужбергатсьёслы ӵектоно Удмурт Республикаысь Нянья кун инспекциын вуоно контрактъёслы экспертиза ортчытъяны, басьтыны чаклам продукцилэсь ӟечлыксэ эскерон понна. 3. Ивортоно, организациосын но нимаз ужбергатӥсьёсын республикае ваем ю тысьлэсь но солэсь лэсьтэм продукцилэсь ӟечлыксэ эскере. Удмурт Республикаысь Нянья кун инспекцилэн управлениез, Нянья кун инспекция сярысь положение но норма тупатӥсь мукет актъёс вылэ пыкиськыса. 4. Госторгинспекциез, метрологиез но сертификациез радъянъя центрез, Госсанэпиднадзорез косоно республикаын поттэм няньлэсь, пыжосъёслэсь но макарон-лапшаослэсь ӟечлыксэс эскеронъя график но маршрут тупатыны. Удмурт Республикаысь Правительстволэн Тӧроез - П. Н. ВЕРШИНИН. МИХАИЛ КАЗОВСКИЙ Эмеспи быръён Сценка Шудӥсь муртъёс: Программистка Филистратова Чебер музыка кылӥське. Ӝӧк вылын ЭВМ, со вӧзын пичигес ялон: "Бюро брачных знакомств". Ӝӧк сьӧрын зол буяськем кышномурт пуке. Со программистка. Программистка (акыльтыса). Эшшо кин вань на? Пырелэ! (Ӧс сьӧрын вырем, шыпыртэм куараос кылӥсько, но нокин уг пыры.) Мар-о отын? Пырелэ! (Ӧс пичияк усьтӥське но, адӟиське Филистратова.) Тӥ-а, мар-а пырыны кулэ? Филистратова. Озьы кадь... Программистка. Мар сыӵе куалекъяськоды? Карт кулэ ке тӥледлы - пырелэ, ӧвӧл ке, ӟеч луэ. Мынам ужан дыры быре. Филистратова. Валаськоды-а, кышнояськон-бызён - со сыӵе вамыш... Программистка. Кылэм но уг пот со вамышъёс сярысь! Тӥ кадьёсын нокыӵе но нерваос уз тырме! Мар кадь калык туэ! Эшшо шуо на милемлы: клиентъёсын, пе, эн керетэ, озьы, пе, пайдаез уз луы. Кызьы пайдаез луоз, куке асьсэос но уг валало, мар кулэ соослы! Ну! Тӥ ӧд пырелэ на-а? Филистратова (дыртыса). Пыри, пыри. (Матэгес лыктэ.) Кылзэ али... вералэ вал... со... умой луоз-а? Программистка. Кин? Филистратова. Мынам... вуоно картэ... Программистка. Кин тодэ... Али кварталлэн пумыз, эмеспиос чиндыр-вандырез гинэ кылемын на. Филистратова. Кылзэ али... Кыӵе эмеспиос кылемын? Программистка. Кылзэме но уг поты, перфокартаез гожъяны кулэ. Мынам ужан дыры быре ини... Фамилиды? Нимды? Атай нимды? Филистратова. Филистратова Генриетта Ивановна. Программистка. Кӧня арес? Филистратова. Куамын ньыль. Программистка. Тӥледлы - куамын ньыль?! Филистратова. Куамын ньыль. Мар-о нош? Программистка. Мон тӥледлы витьтонлэсь ӧжыт ӧй сётысал. Филистратова. Эн но сётэ, мон курисько-а, мар-а? Программистка. Но-но! Мултэс вераськемды потэ ке, дорады вераське, нош татын кун учреждение! Визьтэм муртэ шедьтӥ кожа-а, мар-а - куамын ньыль арес, пе, солы. Бызьыны вуэм ныл! Филистратова. Оло, гожъяндэс азьланьтоды? Программистка. Мон ачим тодӥсько, мар карыны. Куинетӥез юан: кышномурт-а, пиосмурт-а? Филистратова. Кин? Программистка. Тӥ. Филистратова. Бен тӥ асьтэос адӟиськоды ук, кышномурт-а мон яке пиосмурт. Программистка. Мон номыре но уг адӟиськы. Туэ, пиос шоры учкыса, нылъёс кожалод, нош нылъёсыз пиосын суралод. Филистратова. Мон нылкышно. Программистка. Быземын-а, ӧвӧл-а? Филистратова. Кызьы тӥ малпаськоды, быземын ке луысал, мон татчы лыктысал меда? Программистка. Мон номыре уг малпаськы, мон уж дорын. Оло, тӥ, карттэс куштыса, мукетыэзлы бызьыны турттӥськоды? Филистратова. Мон тӥледыз туж курисько... Программистка. Мон но туж курисько! Кыӵе карт кулэ? Филистратова. Мар шуиды? Программистка. Кӧез-а кулэ, начарез-а, лапегез-а, ӝужытэз-а, визьмоез-а, визьтэмезгес-а? Филистратова (малпаськыса). Мынам картэ... Мынам картэ... Со ваньмызлэсь умой мед луоз. Программистка. Шонергес вералэ ай, Ферапонтова. Филистратова. Филистратова. Шонергес ке верано... Ярам... Нырысь ик, трос тодӥсь, дышетскемын, собере лякыт сямо, кышкасьтэм, шулдыр мылкыдо, чебер, востэм мед луоз... Нылпиосты мед яратоз. Вань-а тӥляд сыӵе пиосты? Программистка. Сыӵеосыз ӧвӧл. Филистратова. Кызьы ӧвӧл? Программистка. Ӧвӧл но тӥни. Сыӵеосыз асьсэос кышноясько, милям бюроямы пыраса уг уло. Милям эмеспиосмы куинетӥ сортъем гинэ. Дунзы усем маръёс ке, кылем-мылемъёс. Филистратова. Малы мыным кылем-мылемез? Программистка. Уг ке кельшо - эн басьтэ, ум ёртӥське. Филистратова. Мар бен мыным кароно? Программистка. Мар кароно? Возьмано. Перфокарта мон тӥледлы лэсьтӥ, черодэ пуктӥ. Тӥляд номерды - 8529. Нимтулдэс электронно-вычислительной машинае сётомы, тӥледлы тупась мурт сюриз ке, повестка лэзём. Филистратова. Кема-а возьмано? Программистка. Кызьы пӧрмоз, кыӵе шудды. Оло, ар, оло, куинь. Милям тани одӥг пересь дас ар возьмаз. Возьмаз-возьмаз но кышнояськытэк ик кулӥз. Филистратова. Ой, инмаре! Мон та малпанэлэсь куштӥсько, дыр. Программистка. Асьтэос тодӥськоды. Перфокартадэс кесяно-а, мар-а? Филистратова. Кесялэ! (Викышъя.) Ӟеч луэ. Программистка. Кылзэ али! Филистратова. Мар-о? Программистка. Юаны турттӥсько... Тани тӥ бӧрдӥськоды, нош буям синды уг саптаськы... Кызьы озьы? Филистратова. Со японской буёл. Программистка (вожъяськыса). Кытысь шедьтӥды? Филистратова. Уж дорам мынам вань со. Мон адямиез чеберман институтын ужасько, врачын. Программистка. Бен малы азьло ик ӧд вералэ? Инмаре-кылчинэ! Мон тӥледыз огшоры пырасьёсын сурай ук. Али ик ваньзэ лэсьтом. Кӧня ке возьмалэ... Учке али та телевизорлэн экранэз шоры... Тани! Филистратова. Мар со? Программистка. Милям эмеспиосмы... Самой умойёсыз. Кыӵеез кулэ - быръелэ. Ми таӵеоссэ пыдлон возиськом. Туж умой адямиос понна гинэ. Учке али, тани таосыз дышетскемын, институтэз, аспирантураез быдтэмын, туж визьмо пиос. Таосыз кышноосынызы люкиськемъёс, нылпиоссы ӧвӧл. Ваньзылэн характеристикаоссы туж умоесь. Юри тӥледлы бырйыны кельтэмын кадь. Филистратова. Тау. Кулэ ӧвӧл. Ӟеч луэ. (Кошке.) Программистка. Эх, шайтан! Сыӵе муртэ лэзиськиз! Адямиез чеберъян институтысь врач! Шораз учкыса уд но малпа. Ой, йыры пилиськиське ини. Уж бырытозь но быдэс ӝыны час на! Кушто мон та ужез. Берытско ай посуда вузан магазинам ик. Кин отын вань на? Пырелэ! Ӟуч кылысь берыктӥз М. ИВАНОВА. Вазь уретэм кырӟан Та веранэ мынам Римма Дьяконова сярысь. Улонэз солэн туж вазь кысӥз. Ӝог ӝуась сюсьтыл сямен. Вордскид со 1950-тӥ арын Шаркан ёросысь Мукшур гуртын. Шор ёзо школаез быдэстыса, одӥг ар пионервожатойын ужаз. Угось туж етӥз но мыло-кыдо, шӧртчи вал, котькуд уже пыриське, вань лулзэ-сюлэмзэ сётэ котырысь адямиослы но ужлы. Пиналъёсты но ас сьӧраз валтыны быгатэ, мылкыдзэс лӧпкытэ... Тани таӵе яркыт нылмуртэн мон пумиськи 1968-тӥ арын филологической факультетын (соку ай пединститутын). Ми соку ик ог-огмес синйылтӥм, ӵош но огвадес общественной уже пыриським. Римма факультетын культура удысэз радъясь вал, нош мон комсомол секретарь. Со вань ужрадэз ас котыраз бинялтӥз мыным ӟеч юрттӥсь луиз. Ортчытъямы КВН-ёс, пуктылӥм концертъёс, гуртъёсы лекциосын поталлям. Ужъёсмы пӧзизы. Милям группамы быдэс университетын ӵошатсконын нырысетӥ интые потӥз. 1970-тӥ арын ми дунтэм дунын Ульяновске ветлӥм, нош 1971-тӥ арын - Ленинградэ. Римма туж сюлмо дышетскиз, вань занятиосын мае ке но выльзэ тодыны тыршиз. Котьку но юанъёслы валэктыны дась вал. Дырыз тырме вал спортлы но. Куасэн бызьылонъя нырысетӥ разряд басьтӥз. Со сяна, Римма кылбуръёс гожъяз. Нырысетӥ курсысен ик литературно-творческой кружоклэн ужаз пыриськиз, бӧрысьгес солэн старостаез луиз. Даниил Яшинэн соос ог-огзэс туж ӟеч валазы но гажазы. Римма чебер кыланы-бураны ӧдъяз, журналистикаен эшласькиз, ӵем печатлаське вал "Советской Удмуртия" газетлэн но "Молот" журналлэн бамъёсазы. Солэн пичи гинэ "Шуръёс" нимо кылбурез али ке но пельсьӧрам чузъяське: Тани кытын чагыр шуръёс: Бызё эркын, жильдо гуръёс. Кышкасьтэмесь пичи шуръёс, Туж чебересь кылдо чуръёс! Ялан дырто улон шуръёс, Кытысь вутто Шулдыр крезьёс? Ӝоген со Римма Дьяконова студентъёс пӧлын валтӥсь кылбурчи луиз, Семен Самсоновен, Флор Васильевен эшъяськиз. Та тодмо писательёс ӵем гинэ вуылӥзы Удмурт университетэ, дышетӥзы вуоно аторъёсты кылэз валаны-дунъяны. Нимысьтыз кылбуръёсын книгазэ дасяны ӧз вуы. Оло пӧртэм удысъёсын тунсыкъяськыса кужымзэ пазяменыз, оло улоназ сьӧд вакытъёс вуэмен. 1970-тӥ арын кулӥз солэн анаез. Соберегес Римма туж кужмо пыраклы яратӥз Георгий Петуховез - "Советской Удмуртия" газетын ужась сатирикез. Соос ог-огзылы туж тупаллязы, ог-огзы понна вордскемын кожалод. Нош кыӵе ке но мугъёсын 1972-тӥ арын Петухов улонысь ас мылкыд каремезъя кошкиз. Солэн семьяез вал ни со вакытэ. Римма туж секытэн потӥз та сьӧд гож вамен. Потӥз ик-а меда? Оло, сюлэмыз озьы ик гыбдаса улӥз? Берло курсын дышетскыкумы (1973-тӥ арын) Римма Шаркан ёросысь ик Ивановлы бызиз. Со вал военной. Картэз сьӧры Германие кошкиз эше.Отысен со мыным трос гожтэтъёс ысъялляз Муское - мон соку отын аспирантураын дышетски. Мискинь, кыӵе солэн но дышетсконзэ азьланьтэмез потэ на вал! Кыӵе кылбур чуръёс сэразы лулаз-визьмаз! Жаляса верано, мон гожтэтъёсты ноку но уг возиськы. Соин ик Риммалэн но гожтэтъёсыз тӧлъя быризы. Тодӥсько одӥгзэ гинэ: воинской частьын женсоветэн кивалтӥз, библиотекаын ужаз, ӧз вунэтылы гажано удмурт писательёссэ но эшъёссэ... 1977-тӥ арын, диссертациме утьыса, мон Иж каре бертӥ. Пумитай вуж, тодмо эшъёсме. Римма гинэ ышиз. Со вакытэ ик со бырыны шедем. Гуртаз, Шаркан ёросаз, кык пиналъёсыныз бертыкуз, эше машина поглян улэ шедем... Уретэм кырӟанлы тупа солэн улэмез. Удмурт литератураын солэсь интызэ нокин но уз басьты. Инмарен сётэм улонзэ нокин уз азьланьты. Со вордскемын вал аслыз гинэ тупась куараеныз Удмуртлык дуннеын жингыртыны. АННА ЗУЕВА, филология наукаосъя кандидат, критик-литературовед. "Ми ваньмы Яшинлэн кружокысьтыз потэмын", - тазьы вераны быгато тросэз, кин 60-тӥ-80-тӥ аръёсы дышетскиз Удмурт кун пединститутын (1972-тӥ арысен - университетын). Даниил Александровичлэн бурд улаз будэмъёс табере пӧртэм палъёсы пазьгиськемын: кудӥз луиз журналист, писатель, кудӥз школаосын ужало, табере асьсэос но нылпи сюлэмъёсы гожъяськон гизьы кенжыто. Нош Римма Дьяконовалэн, шулдыр, шара мылкыдо, бадӟым, чебер синмо нылмуртлэн, улон гожез вакчи вылэм... Та туспуктэм лэсьтэмын 1972-тӥ арын тулыс республикаысьтымы творческой егитъёслэн совещанизы дыръя. Римма Дьяконова - паллян палан кыкетӥез (пуке). РИММА ДЬЯКОНОВА Выжыкыл Пукоз вал анае кубоеныз, Каллен гинэ черссэ берыктоз, Нош собере... кутскоз ни вераны Пӧртэм пумо, пӧртэм выжыкылъёс: Нылаш кылем огназ, ышем выныз - Сое, пе, лушкаллям луд ӟазегъёс. Уг шокаськы - кыӵе меда пумыз?- Котьку ӟечен быро выжыкылъёс. Малы меда, малы ваньмыз пӧлысь Огез мадён мынам сюлмам кылиз? Со выжыкыл ӝужыт гурезь сярысь - Шудо луоз, кин ке отчы тубиз. Аръёс ортчо. Али вань улонэ - Изо гурезь баме тубон выллем. Со выжыкыл туннэ бурдъя монэ, - Анай сое юнме ӧвӧл мадем. Бен, юнме мыдьымтэ сое анай: Ӵемтылыкум я кин монэ ӝутэ? Соиз озьы - мон табере валай: Секыт дыре анай кизэ сётэ. ЧУВАШ ПИСАТЕЛЬЁС УГ КӦЛО Вуоно арын Чуваш писательёслэн огазеяськонзылы 75 ар тырмоз ни. Со кылдытэмын 1923-тӥ арын 30-тӥ июне Чуваш книгапоттонниын но "Канаш" газетын ужасьёслэн кенешазы. 1991-тӥ арын, странаямы огъя югдур воштӥськемен, Россиысь писательёслэн Союззы кыклы люкиськемен валче, Чувашиын но писательёслэн огазеяськонзы кык ёзлы тэшказ: Чуваш Республикаысь писательёслэн огазеяськонзылы но Чуваш писательёслэн огазеяськонзылы. Кыкетӥеныз, СЧП-ен, кивалтэ Чувашиысь калык писатель Михаил Николаевич Юхма - Мишши Юхма. Туэ куарпотон толэзе писательёслэн ӧтчамазы со кыкетӥзэ быръемын ни тӧрое. Али та огазеяськонэ 64 писательёс пыро. 90-лэсь трос егит гожъясьёс биниськемын А. Талвир нимо литобъединение котыре. СЧП-ын ужа пинал кылбурасьёслэн школазы, соин кивалтэ тодмо писатель но педагог Роза Шевлеби. Чуваш писательёслэн огазеяськоназы литературалэн пӧртэм удысъёсызъя сизьым секциос ужало, со сяна - ӟуч, мари секциос. Та огазеяськон пушъетъёссэ сётэ пӧртэм ёросъёсын. Толэзьлы быдэ отын я татын ортчытъясько литературалы, чеберлыклы сӥзем нуналъёс, арняос. СЧП эшлыко республикаосысь литераторъёсын кусыпъёссэ арысь аре юнматэ. Озьы соосты, чуваш писательёсты, бордазы кыске Украина, кытын берло аръёссэ улӥз М. Сеспель (чуваш поэзиез кылдытӥсьёс пӧлысь тужгес яркытэз кизили). Вашкала выжыоссэс соос адӟо Болгариысь, Кабардино- Балкариысь, Якутиысь... Чувашъёс агай-вынзэс кадь адӟо удмуртъёсыз но. (Вашкала выжыосмы уго кема аръёссэ улӥллям Булгар кунын, соин ик чуваш но удмурт сямын, тусын-буйын, йылолъёсын трос огкадез). Писательёсыз эшъяськон выжен герӟаны сюлмаськем ни вылэм Куӟебай Герд, чувашъёс ласянь - Педер Хузангай. Берло аръёсы ог-огмы доры сюресъёс волятэмын, шуыны луоз. Но чувашъёс чырткемгес выро, чалякгес кизэс сёто. Чуваш культуралы сӥзем нуналъёс огпол гинэ ӧз ортчылэ ни асьме музъем вылын. Грах ёросысь Благодатное гуртэз ас выжыоссы весь син азязы возё, юртто. Тросэз потэ Чуваш общественно-культурной центрлэн удмурт ёзэныз кивалтӥсь Леонид Иголкин тыршем бордысь. Эшъяськон ас сюрессэ шедьтэ книгаос, берыктэмъёс пыр но. Чуваш кылын поттэмын удмурт литературалэн антологиез - "Ошмесо шаерын", дасяз сое тодосчи но писатель Роза Петрова (чувашъёслэсь антологизэс поттыны чакламын удмурт кылын но). Мишши Юхма Куӟебай Гердлэн вордскемез дырысен 100 ар тырмонлы дасяз солэсь чуваш кылын "Зарни шунды ӝужалоз" книгазэ. Чувашъёс шырыт сямзэс потто премиос, дано нимъёс сётъян ласянь но. Удмурт тодосчилы, писательлы Василий Ванюшевлы калыкъёсмы куспын эшъяськонэз юнматыны юрттэмез понна сётэмын И. Яковлев нимо национальной премия, дано артисткамылы Анна Прокопьевалы - нырысетӥ чуваш нылкышно кылбурчи Элине нимо премия (таос ӵошен кылдытӥзы Чувашилы сӥзем телефильм). Писатель Вячеслав Ар-Серги басьтӥз Чувашиысь культура удысын дано ужась ним. Со быгатыса берыктӥз удмурт кылэ М. Юхмалэсь "Чагыр ньӧл" исторической романзэ. Творчество удысын таӵе кусыпъёс сярысь эшшо но эшшо вераны луысал. Ваньмыз со буш интыысь уг кылды - калыкъёсмылэн огъя шунды улын ӵыжы-выжыяськемзы бордысь потэ. Та кусыпъёс ик возьмато: чуваш эшъёсмы ӟырдыт сямзылы луыса, азьпалангес вамышто. Чуваш писательёслэн огазеяськонзы уг кӧлы. "ВУЧАХ" - УДМУРТЪЁС СЯРЫСЬ Чуваш общественно-культурной центр (ЧОКЦ), кудӥныз кивалтэ калык писатель, академик Мишши Юхма, поттэ аслэсьтыз "Вучах" ("Очаг") газетсэ. Солэн нырысетӥ номерез печатласькиз 1991-тӥ арын толшоре, со дырысен 230 котыре вуиз ни. "Вучах" - тужгес дӥсьтӥсь, эрико газет, соин сюрессэ пытсаны вырылӥзы (кылем арын солэн одӥг номерез гинэ потӥз). Та газетлэн одӥгез берло номерез быдэсак сӥземын удмуртъёсын эшъяськонлы. Татын но Чувашиысь быдӟым писательлэн валтӥсь киыз туж юн шӧдӥське. "Удмуртилэн чалмисьтэм гырлыез" статьяын Мишши Юхма вылӥ дунъет сётэ Николай Кузнецовлэн "Из мрака..." (1994) книгаезлы. "Мон сюлэмы вӧсь луыса лыдӟи та книгаез,- гожтэ со.- Та туж кулэ издание, пуш ласянь усьтэ удмурт интеллигенцилэсь 30-тӥ аръёсы кӧшкемыт адӟонзэ. Нацилэн сяськаё пушъетъёсыз выжытӥз ик корамын. Зэмзэ ик, шор дауръёслэн шимес пеймытсы вотэсаз кадь соку асьме странаысь калыкъёсты". Таӵе издание, кыӵе луэ Н. Кузнецовлэн "Из мрака..." книгаез, Чувашиын но, быдэс Поволжьеын но ӧвӧл на, пусъе Мишши Юхма, соин ик авторезлы нимысьтыз ик бадӟым тау карыны кулэ. Чуваш писательёс Николай Кузнецовлэсь ужзэ подвиген лыдъяло но оско, та выллем книга асьсэ дорын но куке потоз шуыса. "Вучахын" паськыт возьматэмын Удмуртиысь чувашъёслэн улэмзы, ЧОКЗ-лэн Удмурт ёзэзлэн ужамез. Грах ёросысь Благодатное чуваш гуртын улэ крезьчи Леонид Цыпленков, солэн трос аслаз кырӟанъёсыз. Куд-огез соос пӧлысь печатламын газетын. Кылем арын удмурт прозаиклэсь Римма Игнатьевалэсь "Вучахын" потэм веросъёссэ синйылтыса, солы сётэмын вал Талвир нимо премия. Шӧдске, нылкышно гожъясьмы чувашъёслы ярам: таяз номерын печатламын солэн "Ческыт зыно сяськаос" веросэз. Асьме доры эшъяськон выжъёс тупатэмез понна удмуртъёс Мишши Юхмаез данъязы К. Герд нимо национальной премиен. Собере Михаил Николаевич, мылкыдыз ӝутскыса, уно кылбуръёс сӥзиз тодмо адямиосмылы, кудъёсыныз эшъяськиз. "Вучахлэн" бамаз со 14 кылбуръёс бадӟым сузьет кылдыто. Отын Куӟебай Гердлы, Михаил Федотовлы, Иван Григорьевич но Маргарита Владимировна Гришкинъёслы, Касим Галихановлы, Анна Прокопьевалы, Татьяна Черновалы но мукетъёсызлы сӥзем чуръёс. Озьы калык писатель Мишши Юхма, лулбурдъёсыныз лопыръяса, котыраз люка пӧртэм выжыосысь эшъёссэ. Т. ПЕТРОВА. * Удмуртъёс дорын куноын - Чувашиысь калык писатель Мишши ЮХМА. Г. ЮСАЕВЛЭН туспуктэмез. СПОРТ "Газовик" ӵемтылэ Миым вылӥ лигаозь сузьтӥськыны тырмымтэеныз, "Газовик" та дано уж борды туэ басьтӥськиз вал. Тренеръёс но та пумысен мылкыдзэс шара вераллязы. Нош кыл веран но зэмос нюръяськон ваче уг лякисько на. Кузь сюрес вылэ "Газовик" умой вырӟиз вал кадь. Тодӥсь-валасьёс но буйгатъяллязы: кылем арын кадь ик, пе, "вамышъя". Нош собере кутскиз тӧлъя шонаськон: огполаз команда ворме, мукетаз келя. Тӥни озьы пумен"Газовик" ньылетӥ интыысь дас одӥгозь васькиз. Нижнекамскысь "Нефтехимикен" пумиськон дыръя но футбол яратӥсьёслэн мылкыдзы чусомиз ни вал. Шудонлэн берпуметӥ минутаз Анзор Коблев штрафнойысен тупез бигер шаерысь командалэн капкаяз ӵыже. Одӥг гол "Газовиклы" куинь очко йылэтӥз но кӧнялы ке вылӥе ӝутӥз. Чемпионат бырытозь, нырысетӥ лигаысь мандаос ог огенызы 7 пол пумиськозы на. Ӵуказе "Газовик" ас дораз Димитровградысь "Ладаен" шудэ. "Ижсталь" бурдъёссэ вӧлъя Хоккеез яратӥсьёс "Ижстальлэсь" мӧзмизы ни вал. Кӧня ке арзэ уго команда куноссэ палэнын пумиталляз. Туэ Йӧ Дворец выльысь "улӟемен", хоккеистъёсмы но "висисьёссэс" шумпоттыны тыршо. Валлян асьме командамы пазьгиз шуыны луоз Новоуральскысь "Кедрез". Шудон 6:1 лыдын йылпумъяськиз. Нунал азьвыл "Ижсталь" "Кедрез" 2:1 лыдын вормиз ни вал. Усть-Каменогорскын "Торпедолэсь" но ас дораз Кирово-Чепецкысь "Олимпиялэсь" быдэн 3 очкозэ таласа "Ижсталь" 10 очкоен азьпала потӥз. Вылӥ лигаысь "Восток" дивизионын, кытчы пыре "Ижсталь" но, 9 команда шудэ. Куноын но ас доразы быдэн кык пол пумиськылыса, кык кужмоез команда нюръяськоз азьланяз мукет дивизионысь устоосыныз. Г. ЮСАЕВ. СПОРТ Испание ӧз мынэ Велосипедэн ӵошатсконъя Удмуртиысь нылъёслэн командазы огез кужмоез луэ. Дуннелэн чемпионатысьтыз но кузьымтэк бертылэмзы ӧвӧл. Соин ик, жаляса верано, та нуналъёсы Испаниын ортчись ӵошатсконъёсысь Ижевскысь тодмо нимъёсты адӟыны уз кылды. Огез валтӥсь спортсменкамы Александра Колясьева та вакытэ Павлик нимо пичи пиеныз пуке, улэ Италиын. Мукетыз - Светлана Бубенкова, дуннелэн кык пол чемпионкаез, Атлантаын ортчем Олимпийской шудонъёсы пыриськем мурт, Испание мынонлэсь ачиз алӥськиз. Таиз ар Светлана понна мултэс секыт вал, тазалыксэ юнматон, шуккиськем бервылъёссэ бурмытон понна, дыр кулэ. Но бадӟым спортысь кошкон сярысь малпанэз ӧвӧл. Л. МЕДВЕДЕВА. Кыдёкысь шаеръёсын СЮРЕС ВОЖЫН "Планетаысь сюресъёслэн вожзы", "Дуннелэн сюлэмыз" - озьы нимало Панама Республикалэсь столицазэ татын улӥсьёс. Зэм но, город интыяськемын кык континентъёслэн но кык океанъёслэн герӟаськем интыязы, му вылтӥ но зарезьёс вамен, берло ини омыретӥ ортчись сюресъёслэн вожазы. Сыӵе шукырес интыын пукеменыз, аспӧртэмлыко луэ Панамалэн вить даур пала историез. ... Авенида Бальбоа - Панамалэн столицаезлэн ярдурез. Чурен-чурен будо тропической пальмаос, инме ӝутско пияла но бетон юртъёс. Жалятэк сутэ пӧсь тропической шунды, зарезьысь пельтӥсь ыркыт тӧл но уг быгаты юзматыны. Пумтэм-йылтэм транспорт калленгес ширтэ пичигес арама вадьсытӥ. Отчы пуктэмын Тихой океанэз адӟем нырысетӥ европеецлы Васко Нуньес де Бальбоалы памятник. Со дырысен кутске Панама городлэн историез. 1513-тӥ арын 25-тӥ сентябре Испаниысь конкистадоръёслэн отрядзы ортчиз материклэн самой сюбег интыез пыр но вуиз Тихой океан дуре. Испанецъёс интыяськизы индеецъёслэн Панама гуртсы доры. Кияз шпагаен вуэ пырыса, Васко Нуньес де Бальбоа океанэз ялӥз, испан корона киын луэ шуыса. Ӵапак сыӵе тусын со пуктэмын музъем шар кадь котырес инъет вылэ. Берлогес ини, 1519-тӥ арын 15-тӥ августэ индеецъёслэн сылон интыязы инъет пуктэмын вал та регионын нырысетӥезлы испанской городлы. Но страналэн главной городэз Панама луиз 1903-тӥ арын 3-тӥ ноябре гинэ, "независимость сярысь акт" кутэм но Колумбия бордысь республикаез люкем бере. Страналэн сыӵе умой интыын сылэмез бордысь ик пото но солэн вань шуг-секытъёсыз. Странаез суверенной государствоен ялэм бере, ӝоген США егит республикалы чуртназ канал лэсьтон сярысь секыт договор. Кык океанъёсты герӟась сюресэз 1914-тӥ арын усьтӥз "Анкон" пароход. Каналэз лэсьтон йылпумъяськем бере, Панама солэсь нокыӵе пайда ӧз басьты. Столицаен артэ кылдӥзы США- лэн военной базаосыз. "Планетаысь сюресъёслэсь вожзэс" киултӥзы Огазеяськем Штатъёс. Канал котырын али но интыямын США-лэн 14 военной базаосыз. Отын уло 10 сюрсысен 20 сюрсозь американской военнослужащийёс. 1977-тӥ арын гожтэмын Панамской канал сярысь панамо-американской договор. Законной кузёезлы - панамской калыклы канал сётэмын луыны кулэ 2000-тӥ арын 31-тӥ декабре ӵапак нуназе. Панамалы али сётэмын каналлэн зонаысьтыз ог люкетэз гинэ. Панамалэн историысьтыз котькуд вакыт кельтӥз аслэсьтыз пытьызэ. Городысь огдыре адӟод вашкала дырез но, колониальной вакытэз но, туалазэ но. Панамалэн вашкала люкетаз кылемын куке но вылэм крепостьлэн, кварталъёслэн куашкам бервылъёссы. Колониальной вакытысь Панама - чылкак мукет город. Татын ульчаос сюбегесь, пу коркаос одӥг- кык этажъемесь. Но татын вань со вакытысь ик бадӟымесь площадьёс. Сыӵе луэ Независимость площадь но. Отын сыло муниципальной дворец но кафедральной собор, соин артэ - президент дворец "Лас гарсас" - Панамаын одӥгез чебер юрт. Историен герӟаськемын Боливар площадь но институт. Солы сётэмын Латин Америкаез мозмытон понна тодмо нюръяськисьлэн нимыз. 1926-тӥ арын институтлэн юртаз ортчиз латиноамериканской государствоослэн учредительной конгрессы. Отын нырысьсэ эскеремын вал независимость понна нюръяськонын континентлэн огкылысь луонэз сярысь ужпум. Туалаез Панама чылкак пӧртэм луэ латиноамериканской яке карибской городлэсь. Татын - американской, японской, западноевропейской фирмаослэн ӝужытэсь юртъёсын банкъёссы, пӧртэм рекламаоссы, пумтэм ресторанъёс. Соос возьмато кадь шулдыр, узыр, тыр улонэз. Но панамецъёс татын сьӧрлось бизнеслэн медоосыз гинэ луо. Николай СТОЛБОВ. Панама. Историысь чуръёс ВОЛГА ДУРЫН Леонид Романович Баграшов ожмаськиз самой секыт интыосын - Сталинградын но Курск вӧзын. Пичи Пурга ёросысь Баграш-Бигра гуртысь мӧйыос воргорон, та нуналъёсы пумиськыкумы, ӝожмыт мылкыдзэ кисьтытэк ӧз чида: "Малы ке но шаерчиос но, историкъёс но Сталинград дорын ожмаськон сярысь ӧжытгес поттылыны ӧдъязы. Нош ведь самой татысен кутскиз Берлинозь вормон сюресмы". Зэм но, фронтовикъёс сярысь уногес гожъяло февраль но май толэзьёсы. Нош война 1418 нунал кыстӥськиз ук. Котькудӥз ик со асьме понна секыт йӧтӥз. Оло, тужгес но секытэз вал 1942-тӥ ар. Юго-Западной фронтысь войскоос (кивалтӥсьсы маршал Константин Тимошенко) май толэзе тушмон вылэ омырскизы, Харьковез мозмытыны малпаса. Но асьсэос сюризы котыртэме. Отысь мырдэм гинэ потӥз старшой лейтенант Е. В. Касаткин. Тросэз ож бусые ик кылизы. Тушмон Дон но Волга шуръёс пала мыр-мыр мерскиз. Сталинград понна ожмаськем старшиналы А. С. Шамаевлы со нуналъёс вунонтэм кылизы нап ӵынэн возъям инбамен, нефтен баржаослэн ӝуаменызы но фашист самолётъёслэн вистэм-вожтэм лобаменызы, бомбаослэн пелез урмытымон жиетэменызы. Соку Александр Степанович уно эшъёссэ ыштӥз. Мылкыд секыт вал. Асьме войскоос кельтоно луизы Дон шур вылысь Ростовез. Ӵапак соку потӥз И. Сталинлэн 227 номеро приказэз: "Одӥг вамыш но чигнаны уг луы!" Москва дорысь но шунды ӝужан палась выль но выль эшелонъёс вуыны ӧдъязы Волга дуре. Сержант Никифор Павлов ожмаськонэ нырысьсэ шедиз Сталинградлэн лымшор палысьтыз Абганерово станция вӧзын. Связист азе, валамон ини, ужпум пуктэмын командованиен вис карытэк кусып возьыны. Нош Казмаска гуртысь воргоронлы ӵем гинэ ожмаськыны но кылдылӥз. "В боях за Родину" книгаысь одӥгез очерк озьы ик нимамын: "Линия Никифора Павлова". Со сӥземын Советской Союзлэн Героезлы Никифор Савельевичлы. Сталинград понна бадӟым ожмаськон азьын ӝамдэлы но ӧз изьылэ Донской фронтлэн кивалтӥсез К. К. Рокоссовский, Сталинградской фронтлэн кивалтӥсезлэн воштӥсез Ф. И. Голиков но 62-тӥ батыр армилэн командирез В. И. Чуйков. Ваньзы ик соос граждан ож вакытэ асьме шаермы пыр потэмын. Василий Чуйковлэн полкез пыре вал Азинлэн дивизияз. 1918-тӥ арын 5-тӥ октябре ӵапак та полк тӧдьыослэсь мозмытӥз Сарапулэз, кудӥзлэсь Сталинград 1676 иськемын. Генералъёс Константин Рокоссовский, Филипп Голиков но Василий Чуйков бӧрысь луизы Советской Союзлэн Маршалъёсыз. Одӥгаз ожмаськонын чиньыостэк кылиз Орджоникидзеысь пехотной училищеысь курсант Всеволод Широбоков. Бен, Волга дурын ожмаськонъёсысь иворъёсты советской адямиос чидатэк витьылӥзы. Мон соку 12 номеро школалэн нырысетӥ классаз дышетски. Ижевскын улӥсьёс укнооссэс сьӧд басмаен возъяллязы. Угось фашист самолётъёслэн военной заводъёс вадьсы мерскемзы котькинлы тодмо вал. Вуылӥллям но, шуо. Ижевск котырын кылдытӥсько вал выль воинской формированиос, нош Александрово шайвылын сылӥзы зениткаос. Дышетскон нуналъёсы милемлы сётъязы быдэн 50 грамм нянь но стакан чай. "Линейкаос" дыръя ялан кылӥськылӥзы "Сталинград" кылъёс. Нош урамъёстӥ строен вамышъязы изьыосазы горд кизилиосын солдатъёс. Соос шоры ми туж вожъяськыса жальмаллямы. Огпол школамылэн кивалтӥсез Августа Васильевна шумпотыса ивортӥз: "19-тӥ ноябре Горд Армия наступление выжиз. 330 сюрс тушмон солдат но офицер котыртэмын Сталинград но Калач вискын". Калач городлэсь нимзэ кылыса, эшъёсы Анатолий Кочуров но Аркадий Логинов серекъяны кутскизы. Ми угось ум тодӥське на вал, та ожмаськонын танковой батальонлэн командирез Степан Гусев но танкысь экипажлэн командирез Николай Коробейников данэ потӥзы шуыса. Бӧрысь мон соос сярысь "По следам подвига" книгаям гожтӥ. Ф. Паулюслэн котыртэм группировкаезлы юрттыны танкъёсыныз басьтӥськиз вал фельдмаршал Манштейн. Нош Роман Малиновскийлэн гвардеецъёсыз тушмонлэсь малпанъёссэ тарказы но солы шунды ӝужан пала мыныны маза ӧз сётэ. Та сярысь "Горячий снег" романаз яркыт маде офицер- артиллерист бӧрысь тодмо гожъясь Юрий Бондарев. 1943-тӥ арын 2-тӥ феврале фронтын чалмыт луиз. Орудиос гудыръямысь дугдӥзы. 200 нунал кыстӥськем ожмаськон йылпумъяськиз. Фельдмаршал Паулюс, солэн 24 генералэз, 91 сюрс солдатэз но офицерез пленэ шедизы. Тӥни озьы, Сталинградын Гитлерлэн армиезлэн сюрлыез чигтэмын вал. Со дырысен уно гинэ аръёс ортчизы. Куамын куинь ар талэсь азьло, 1964-тӥ арын май толэзе, Вотка шурлэн ярдуръёсаз сяськая льӧмпу, солэн ческыт зыныз кыдёке вӧлме. Ӵапак со вакытэ Кыква школаысьтымы дышетӥсьёс пумиськизы Игра ронолэн кивалтӥсеныз Е. В. Касаткинэн. Емельян Васильевич педсоветын вераськиз, нош собере чай юыкумы мадьыны ӧдъяз Сталинградын ожмаськисьёс сярысь. Горд Кизили орденэн пусъем Александр Степанович Шамаев войнаез йылпумъяз Эльба шур дурын. Пиналъёсты дышетонын ӟеч ужамез понна солы сётэмын Удмурт АССР-ысь школалэн дано дышетӥсез ним. Емельян Васильевич Касаткинэз ож сюресъёсыз вуттӥзы Кёнигсбергозь но Маньчжуриозь. Касаткин майорлэн мӧля вылаз чиля нырысетӥ степенё Отечественной война куинь орден. - Госпитальысь мон бертӥ 1943-тӥ ар азьын,- тодаз вае школалэн завучез Всеволод Никитич Широбоков.- Нош кык толэзь ортчыса, фронтэ выльысь мынӥ.Таяз учыре Ленинград вӧзы сюри. Кыкетӥзэ сӧсырми 1944-тӥ арын май толэзе. Ф. И. Голиков маршалэн пумиськылыны кылдӥз 1964-тӥ арын 3-тӥ июле Москваысь Союзъёслэн юртысьтызы Колоннаосын залын но 1965-тӥ арын 7-тӥ июле республикаысьтымы военкоматын. Волгоградысь Мамаев вырйылын ватэмын Советской Союзлэн кык пол Героез В. И. Чуйков маршал. Быдӟым Вормонлы 50 ар тырмон азьын тодмо журналист Леонид Федоров но мон рос-прос вераськимы Советской Союзлэн Героеныз Никифор Савельевич Павловен. Милям гожъяммы Никифор Савельевичез буре ваёнлы пӧрмиз. Соин лыдӟисьёс тодматскизы 1995-тӥ арын июле. Фронтовикъёс пумен кошко улонысь, нош егитъёс тодыны кулэ асьме батыръёслэсь нимъёссэс. Виктор ПОЗДЕЕВ, запасысь капитан. * Леонид Романович БАГРАШОВ. * Всеволод Никитич ШИРОБОКОВ. Бур нуналэн Та вадесэ шунды Алнашын яркытгес пиштӥз - вашкала черкогуртын усьтӥськиз дано удмурт пилэн тодмо суредасьлэн Удмурт Элькунлэн Кун премиезлэн лауреатэзлэн Юрий Лобановлэн-Кучыран Юрилэн - выль ужъёсыныз адӟытонэз. Удмурт арня ӝытазелы таӵе кузьым дасязы учкисьёслы ачиз суредась но "Удмурт кенеш" огазеяськемлэн Алнаш ёросысь ёзэз. Тани люкаськем калык азе потэ гын шляпаен, куэм удмурт дэремен-штанэн, кусказ чибор путоен, вылтырызъя вурем дукесэн, кияз кубочукен егит воргорон. Ог-огенызы кемалась адӟиськымтэ адямиос соку ик шыпытак карисько. Чузъяське чебер удмурт гур. Со кужмояку яке лябӟыку, кырӟась но выросъёссэ вошъя. Тани кырӟан чалмиз. Но весяклы ӧз. Кӧня ке вис бере нош ик ӧръяськоз ай со. Таяз учыре - кужмогес... Адӟытонысь суредъёсъя валано: егит адями уг ужа огдышем кабъёсын. ... Чагыр инбамын лопыръяське ӟазег уллё. Со вылӥе кыстӥське. Сюрес вылысьтыз сэрпалля вань кырсьсэ. Отын, шунды дорын, югыт но яркыт. Отын ӝужа чебер улон. Суредась синъёссэ уг кыньы - соку ик сактэ пожзэ но. Тани егит воргорон кыжмем омырен чылкак воньдэм ни - ымнырзэ амалтэк синпӧётэн шобыртэм. Нош солэн урдэсаз - сыӵе ик вотсаськем дунне. Яке - кызьпу но нылаш. Улон-вылон сярысь малпаськись пиёк. Таиз тужгес дырекъятэ - суред вылын чебер нылмурт. Огшоры гинэ ӧвӧл со - вольыт вӧлэм мугоро. Котькуд ортчись йыбырттоз, выжыкылысь выллем вылтырлы паймыса. Таосыз - кельыт валъёс. Сокем етӥзэсь - чаляк гинэ уд сермета. Суредась трос пол чебермаз ни гожъясьёслэсь книга вылъёссэс. Татын но соос син шоры йӧто. Котькуд кибервыл ӵошатымон но вылӥ дунъямон. Адӟытонэ ваем ужъёс пӧлысь кызьы уд синйылты Удмурт шаерлэсь кунтодметъёссэ? Мылысь-кыдысь быдэстӥз соосты Юрий Николаевич. Вормон доры вуиз шугадӟонъёстэк, ӵемтылытэк. Таосыныз артэ ик - Анлашлэн (Алнашлэн) пусэз. Паймыто, синмаськыто, вожомыто, синвуаськыто суредасьлэн ужъёсыз. Соослэсь пуштроссэс валан понна, трос пуд сылал сиёно. *** Та нуналэ дуно эшсэс ӟечкыланы ветлӥзы художниклэн матысь адямиосыз. Владимир Соловьёв но Юрий Лобанов армиын ӵош вылӥллям. Ортчем аръёсты тодаз вайыса, Владимир Михайлович вераз: - Ми ӵош учырамы Даурие. Удмурт луэммес огпол но ӧм вунэтылэ. Весь кырӟамы удмурт кырӟанъёсты. Тужгес яразы "Ой, тӥ, чебер нылъёс!" Милемын ӵош мукет удмурт пиос но вал. Анай кылмылэсь одӥг но кепыратэк, ог-огмылы кыдёкысен ик удмурт сямен кеськылӥмы. Кивалтӥсьёсмы куддыр ӟудылӥзы: - Та удмуртъёс ваньзэ киултӥзы ни. Юра быдэсак удмурт. Али но, Ижысен жингыртылыкуз, ноку уз вазьы нимын-тулын. Мусо гинэ юалоз: - Пачей Володь, кыӵе улӥськод? Атаез, Николай Кузьмич, шуныт кылъёссэ ӧз жаля: - Пичи дыръяз ик сюлмо вал пие. Соку ик шӧдӥ: талэсь ӟеч адями пӧрмоз. Тужгес ярато вал сое покчиос: сьӧраз дэмен ветлӥзы пыласькыны, возь вылэ. Котькыӵе аресъем адямиен огкыл шедьтэ. Со понна но сое гажало. Иван Григорьевич Багратионов, суредасьлэн дышетӥсез, тодаз ваиз пинал дырзэ: - Юра ӟеч дышетскиз. Азьпал сюресэз азьвыл ик тодмо вал. Эшъёсыз пӧлын но тужгес чырткемез луылӥз. Котькуд ужез быдэсъяз сюлмысь но яратыса. Байтэрек школалэн азьвыл директорез биологилы дышетӥсь Леонид Данилович Белоусов вунэтымтэ таӵе учырез: - Огпол чеберманы кулэ вал школамылэсь сиськон юртсэ. Пиёклэн дышетӥсез, ачиз интые, таяз учыре ыстӥз дышетскисьсэ. Дэмлам ужез быдэстыны Юралы кулэ луиз чылкак куинь гинэ нунал. Али но шулдыртэ на ай борддорез пӧртэм калыкъёслы сӥзем суредэз. Сьӧрлось муртъёслэсь огпол юасько: - Тодӥськоды-а, кин тае быдэстӥз? - Дышетӥсь, - огымысь вазё соос. - Ӧвӧл, - шуисько. - Огшоры дышетскись. Туала директор Вера Евдокимовна Григорьевна шумпотыса ивортӥз: - Юра дышетӥз дышетӥсь луыны. Доразы лыктэмлы быдэ одно ик кыӵе ке тунсыко юан дася вал. Тодытэк возьыт луылӥз. Егит тодосчилы Андрей Прокопьевлы но удмуртлык тужгес дуно. Эшез сярысь веракуз но пияш пусйиз: - Та адямиез уте удмурт быдэслыкез. Со бордын ик солэн кужымез. Алнаш ёросысь кивалтэтлэн тӧроезлэн воштӥсез Нина Андреевна Образцова котькудӥзлы шедьтэ ӟеч кыл: - Тросэз суредасьёс таӵе ужрадъёссэс огвыллем ортчытъяло. Та адями сыӵе ӧвӧл. Таиз ужез но берпуметӥез ӧвӧл, дыр. Чын бадӟымез, чын устоез азьпалан, дыр, ай. Юртэ люкаськем калыклэсь сюлэмзэ вырӟытӥзы "Чипчирган" ансамбльын азьвыл кырӟамъёс. Соосын ӵош мылысь-кыдысь кырӟаз ачиз но Кучыран Юри. Отӥяз но трос пол чузъяськизы на юртын удмурт гуръёс. ...Та адями шоры учкыса, чылкак паймиськод: сомында визьмыз, сомында кужымез. Сыӵе ик луыны кулэ зэмос удмурт. Кучыран Юри - Кучыран выжыысь. ... Ӝӧк вылысь телефонэ нош ик жингыртӥз. Пумитам мусо вазиз чебер куара: - Бур нуналэн, гыдыке. - Бур нуналэн! Михаил Егоровлэн туспуктэмъёсыз. Кивалтэтын пумиськон Гурт хозяйстволы висъям кредитъёсты берыктон, нылпи пособиосты сётъянэз радъян, пиналъёслэн гужем шутэтскемзылы йылпумъянъёс лэсьтон - таӵе но мукет ужпумъёсты эскеризы валлян Правительствоын городъёсысь но ёросъёсысь администрациослэн кивалтӥсьёссы. Укмыс толэзь ӵоже республикаысь экономикалэсь ужамзэ эскерыны чакламын 21 октябре бадӟым совещаниын. О. МАРКОВ. Граждан обороналы - 65 Шаерамы кышкыт учыръёслэсь утиськонъя ёз кылдытэм дырысен ортчиз 65 ар. Правительствоын ортчиз та юбилейлы сӥзем сӥё-дано ӧтчам. Отын доклад лэсьтӥз Граждан обороная но кышкыт учыръёсъя комитетлэн кивалтӥсез Тамази Габричидзе. Данак эшъёслы сётэмын грамотаос но кузьымъёс. Куд-огезлы - выль воинской званиос. И. КРИЧЕВ. Нуналлэн тодметэз Инкуазь ас вакытсэ шӧдэ: зоръёс бере дорамы сулепсэ но вуттэ ни. Калык тодметлы осконо ке, Михайлов нуналлы, 21 ноябрьлы, толмоз. Вашкала календарья туннэ пусйиськомы Иоанн Богословлэсь вордскемзэ. Иоанн Богословлэн нимыз герӟаськемын мудоръёсты лэсьтонэн. Чаклалэ на: та нуналэ сульпаськиз ке, Михайлов праздниклы одно ик тол вуоз. Ӵуказе - Савватийлэн-муш утисьлэн вордскемез. Мушъёсты омшанине пырто ни. Вашкала ӵыжы-выжыосмы та нуналэ нылпиоссэс вӧсяськыто вылэм, Савватий пророк мушъёссэс ӟеч мед толйытоз но вуоно арын трос чечы мед сётоз шуыса. Мушъёс, пе, ярато чылкыт сямо, небыт сюлэмо адямиосты. Сьӧлыкась, лек, кас муртъёслэн соос быро. Пиналъёс 12 аресозь сьӧлыктэм лыдъясько на. Югыт нунал туннэ кыстӥськоз 10 час 57 минут, сутка ӵоже кулэсмиз 6 минутлы, ӵуказеозь кулэсмоз на эшшо 5 минутлы. Та нуналэ... ар талэсь азьло 9 октябре 1922 арын Горд Армилэн войскоосыз Дальний Востокысь Спасский город дорын пазьго тӧдьыослэсь берпуметӥ осконзэс но кужымзэс. Та нуналэ ик 1943 арын Советской Армия фашистъёс улысь мозмытэ Кавказэз. Со понна ожмаськон кутскиз вал 1942 арын 25 июле. 10 октябре 1943 арын СССР-ысь Верховной Советлэн Президиумез поттэ Указ Богдан Хмельницкийлэсь И, ИИ но ИИИ степенё орденъёссэ юнматон сярысь Указ поттэ. Та наградаен пусъемын вал асьмелэн но землякмы Советской Союзлэн Героез Александр Сабуров. Куазь Кыӵе луоз куазь та нуналъёсы? Синоптикъёс верамъя, интыен-интыен зороз, сульпаськоз. Республикая уин 0-30, нуназе 4-6 градус шуныт луоз. Тӧл вошъяськоз, секундскын 6-7 метре пельтоз. Та нуналэ шаермыя тужгес но пӧсь куазь пусъемын 1974 арын. Соку нуназе шорын 20 градус шуныт вал. Тужгес но кезьытэз уй - 1940 арын, термометрлэн пусэз соку 5 градусозь улӥе лэзькылӥз. Луозы мукет "кузёос" Кизнер. Секыт югдур кылдэмын татысь "Бытсервис" АО-ын. Шунытсы кысэмын, тылзы вандэмын. Уно люкаськем тыронъёссэ пытсаны акциосын огазеяськонлэн кужмыз ӧз тырмы ни. Кылиз на одӥг гинэ сюрес: юртэз вузано. Али та "ужен" герӟаськем кулэ луись кагазъёс дасясько. Малпан кылдэ: кизнеръёс вуриськон юрттэк уз кыле. Та ужез мукет "кузёос" азьланьтозы. Л. ЛЕСОВА. ЕГИТ ВАКЫТ "Мынам липет улам" Таяз пятница нуналэ Ижевскысь "Дружба" кинотеатр ӧсъёссэ усьтэ "Под крышей дома моего" нимын республиканской конкурслы. Отчы пыриськозы семья улонлы, яратонлы, шутэтсконлы, ужлы, семьяен герӟаськем трос пумо мукет ужпумъёслы сӥзем видеофильмъёссэс возьматыны мылкыд карись егит семьяос. Конкурслэн нырысетӥ люкетэз ортчиз ни август-сентябрь толэзе. Видеофильм дасян бордын ужаны мылкыд карисьёслы пӧртэм дэмланъёс, юрттэт сётэмын вал. Конкурсэ пыриськыны дас тямыс куриськон вуиз. Шаерысьтымы городъёсысь но ёросъёсысь сяна, отчы пыриськыны мылкыд каризы Москваысь, Татарстанысь но Башкортостанысь семья улонлы сӥзем видеофильмъёслэн авторъёссы. Вормисе потэмъёсты возьмало дуно кузьымъёс, озьы ик нимысьтыз пусъемын луозы мукетъёсыз но ужъёс. Видеофильмъёсын тодматскон кутскоз 10-тӥ октябре куать часын ӝытазе, нош йылпумъяськоз та ужрад 12-тӥ октябре. Конкурсэз ортчытонэ но радъянэ пыриськизы Удмурт Республикаысь Егитъёсын ужанъя кун комитет, Культурая министерство, "Егит семья" но Калык творчествоя республиканской центръёс. Таӵеез ӧй на вал! Шаерысьтымы студентъёслэн урамазы но праздник вуиз. Удмурт Республикаысь Егитъёсын ужанъя кун комитет кылдэмез дырсеныз куать ар тырмонзэ пусйыны малпаз, вылӥ дышетскон заведениосын дышетскись студентъёслэсь нырысетӥ республиканской фестивальзэс радъяса. Нимаське со "Дождались! 97". Фестивале пыриськозы шаерысьтымы тямыс вузъёсысь но соослэн филиалъёсазы дышетскись студентъёс. 25-30 сентябре котькудаз отын ортчизы делегатъёсты быръёнъёс. Фестивале пыриськемъёс куинь нунал ӵоже (10-12 октябре) шутэтскозы, шулдыръяськозы, эктозы-кырӟалозы, ог-огенызы тодматскозы, йырвизьзэс тӥялозы "Дзержинец" шутэтскон лагерьын. Л. МАЛЫХ. Бере эн кыль, гуртысь суредась Таиз ивортон шумпоттоз искусство удысэ кыстӥськись егит пиосты но нылъёсты. Кин эшъяське живописен, скульптураен, графикаен, прикладной искусствоен, луонлыкъёс вань республикаысьтымы Художникъёслэн союзэнызы радъям выставкае пыриськыны. Отын возьматэмын луозы гуртын но городын улӥсь куамын вить аресозь егитъёслэн ужъёссы. 13 октябре 15 часын Ижевскысь Пушкинской урамысь выставкаос ортчытъян залын устооссэ ужъёсты адӟытонлы быръёзы. Бере эн кыль, гуртысь суредась. Л. КИМОВА. БУСЫ УЖЪЁС (6 октябрьлы) Районъёс юос кутсамын (процентэн) Яр 89,5 Глазов 77,4 Юкаменск 94,3 Балезино 88,8 Красногорск 82,8 Кез 86,9 Дэбес 92,1 Игра 85,9 Якшур-Бодья 96,9 Шаркан 93,5 Селта 96,7 Сюмси 91,6 Ува 100,5 Вавож 97,1 Кизнер 97,5 Можга 99,5 Грах 99,4 Алнаш 99,1 Пичи Пурга 95,5 Кияса 98,5 Каракулино 95,0 Завьялово 99,9 Вотка 98,7 Сарапул 93,6 Камбарка 92,9 Республикая 94,1 Сизьым сюрс гектар пала юос пудо сиёнлы турнамын, кӧняез ке ӧз удалтэ, быризы. Туж секытэн туэ республикаысь ю-нянь кеносэ пыре. Озьы ке но, кӧня ке хозяйствоосын гинэ со возьма на утялтэмез. Республикая шорлыдын одӥг гектарысь басьтэмын 17,9 центнер, нош ваньмыз одӥг миллион тонна пала люкаськиз. Картофка утялтэмын 87,8 процентэз, етӥн - 89,2 процентэз. Озьыен, куазь тупаз ке, та нуналъёсы ваньмыз будосъёсын лудъёс бушатӥськозы. Н. Возисов. Правительствоысь иворъёс Правительстволэн Тӧроез Павел Вершинин косӥз нимысьтыз группа кылдытыны, кудӥз Москвалэн мэрез Ю. Лужков Удмуртие ветлэмен валче кылдэм ӵектонъёсты улонэ пыӵатонъя ужрадъёсын вырысал. Экономикаын кусыпъёсмы азинскозы шуыса кутэм огкылъёсысь ик адӟиське ини. Матысь дыре Москваын Удмуртилэсь вузкаронъя юртсэ усьтонъя ужпумъёсты быдэстоно. Эстӥськонъя центральной компаниен кутэм огкыл но умой мылкыд кельтӥз. Солэн президентэз Юрий Шафраник верамъя, компания республикаын му вӧез утчанлы 1998 арын 100 миллиард манет висъяны дась, куинь ар ӵоже инвестициослэн лыдзы 1 миллиард долларозь вуыны быгатоз. Промышленной вузъёсъя но сиён-юонъя выставкаен тодматсконлы йылпумъян лэсьтыса, Павел Вершинин пусйиз, Москвалэн рыноказ конкуренциын вормыны быгатӥсь вузъёсты гинэ келяно шуыса. Экономика сярысь вераськыкуз, со ивортӥз, тямыс толэзь куспын югдур эшшо но шугомиз шуыса. Удмуртиын поттэм продукцилэн огъя лыдыз синӥз, вузкарон ляб ужаз, промышленность но пуктӥськон удыс бере кылё. Та ужпумъёс эскериськозы Правительстволэн Кенешаз октябрьлэн пумаз. Озьы ик октябре министерствоослэн но ведомствоослэн 1998 арлы бюджетлы куронъёссы эскеремын луозы. Пусйыны кулэ, экономикаын югдурез лыдэ басьтыса, вуоно арлы бюджетлэсь доходъя инъетсэ 1997 арын мында ик кельтыны чакламын. Социальной программаосты быдэстонлы Правительство азьло сямен ик бадӟым саклык висъялоз. *** Правительстволэн Президиумез эскериз "Налог тырисьёсты чакланэз радъянъя ужрадъёс сярысь" Законлэсь инъетсэ. Та документ юрттоз налогъёсъя законодательстволэсь быдэсъяськемзэ ӟечгес эскерыны, налог тыронлэсь пегасьёсты дыраз шараяны, гражданъёслэсь табыш басьтэмзэс чакланы. Башкортостанын таӵе закон кутэмын ини, татын со бадӟым пайда ваиз. Эскеремын "Удмурт Республикаысь калыклы инкуазез утён удысъя тодон-валанъёс сётонын кунлэн политикаез сярысь" постановленилэн инъетэз, мукет ужпумъёс. "Удмуртская правда" газетлы - 80 Гажано эшъёс! Уно аръёс ӵоже асьмеос агай-вынъёс кадь вал. Тӥ кӧня ке мӧйыгес, визьмогес, амалогес, но ми котьку ик интыяськылӥм вылӥгес этаже. Табере асьмелэн мугоръёсмы пӧртэм юртъёсын, нош лулъёсмы, праздникъёсы но, огшоры нуналъёсы но ялан огазьын. Шерез нунал ортче ог-огенымы пумиськонъёстэк, кенешонъёстэк, чай юонъёстэк. Туннэ ми пӧсятэмен чашамес ӝутӥськом тӥ понна: кема улэ, творчествоын выль азинсконъёс басьтэлэ. Ас поннамы осконэн улӥськом: "Удмурт дунне" газетлэсь 80 ар тырмон нуналзэ 1998 арын 31 октябре одӥг липет улын пусъём. Тазалык но шуд тӥледлы! "Удмурт дунне" газетлэн редакциез. Буре ваён нунал Туннэ - кулэмъёслэн праздниксы, сӥзьыл кисьтон (поминка). Соослэн шайгуоссы доры люкаськозы самой матысь ӵыжы-выжыоссы, сьӧразы ваёзы самой чебер сяськаоссэс, пыжиськемъёссэс, вераны вуымтэ кылъёссэс... Кулон - со кайгу. Адями доры вазь-а, бер-а вуэ - одно ик улонзэ куспетӥ уретэ, куректон, бӧрдон, ноку берыктыны луонтэм ыштон вае. Сопал дуннее дырызлэсь вазь кошкем мумы-бубыосмес, сузэр-вынъёсмес, кузпалъёсмес, яратоно нылпиосмес коть гурезь быдӟа зарниен лулъяны выр на - уг луы. Улонлэсь та кышкыт, жалясьтэм сямзэ вормыны быгатӥсь кужым дунне вылэ вордскымтэ на уго. Шайвыл - святой инты. Татысь ноку но уд кылы шудэм-серектэм куараез. Котыр чал- чал. Писпуос гинэ, тӧл выретэмъя, одӥген-одӥген куашкато куажмыны кутскись куаръёссэс. Горд, ӵуж, вож ковёрен шобырско радэн-радэн кыстӥськись шайгуос. Котькуд плита улын адями ватэмын. Шайгулэн ӝикытлыкезъя дунъет сёто асьмелы, улэпъёсызлы. Таин ӵош тодэ лыкто тодмо педагоглэн Василий Александрович Сухомлинскийлэн гожтыса кельтэм чуръёсыз: "Олеглэн но Наташалэн песятайзы кулӥз. Ватӥзы сое гурт сьӧрысь шайвылэ. Кенэз- пиез субботалы быдэ дораз ветло, пиналъёссэс но сьӧразы куто. Пӧсь нуналъёсы ньыльназы ведраен ву тубыто, шайгу вылэ мерттыса кельтэм сяськаосты киськало, сюйзэ бугырто. Песятаенызы артэ ик - кинлэн ке аналтэм, жуг-жаген басьтэм шайгуэз. Сторож верамъя, отчы ватэмын огназ кылем пересь кышномурт. Утялтӥсез, буре ваисез нокин ӧвӧл. Тае кылыса, атайзы дэмлаз: "Ойдолэ асьмеос утялтом, сяська кизём". Мерттӥзы роза пуд. Таиз вылэ но арнялы быдэ ву киськазы, сюйзэ небӟытӥзы. Одӥг пол Олег ӧз чида ни, юаз: - Малы-о мурт шайгуэз сокем утялтыны выриськом? Кин со понна асьмелы тау кароз? - Мурт шайгуос дунне вылын ӧвӧл, пие, - вазиз бубиз. - Тодад возь: котькудаз отын Адями ватэмын. Со ик асьмелы тау карон кылъёссэ вералоз". Та чуръёс борды ма ватсалод на? Ойдолэ асьмеос но буре ваём улонысь кошкем матысь ӵыжы-выжыосмес, ӵо ужам но улэм эшъёсмес, бускельёсмес. Сояз дуннеын умой мед улозы, кӧлоно валессы мамык кадь небыт мед луоз. Л.ПЕРЕВОЗЧИКОВА. Фотоосыз В. КАМАШЕВЛЭН. Футбол Паймытӥзы! Валлян Ижысь "Газовик" пумиськылӥз Димитровградысь "Ладаен". Та ӝытэ асьме футболистъёсмы зол нюръяськизы. Шудон кутскем бере ик куноосты капказы азе пачкатӥзы. Пайдаез-емышез луиз. "Газовик" туэ нырысьсэ бадӟым лыдын вормиз. Куноослэн ӟезьыязы туп ньыль пол пыраз, асьмелэнэз нош "кӧс" кылиз. Чемпионат йылпумъяськытозь командаос быдэн куать пол шудозы на. Г. ИВАНОВ. УЖПУМ Вашкала шыкысысь ватос Удмуртъёслэн ужрадъёсазы мынӥськод ке, куд-огез нылкышноос паймытско, малы, пе, удмурт дэрем уд дӥсяське. Ачим Шаркан палась бере, вашкала шыкысъёсысь поттэм шортдэрем шат дӥсялом? Бен милям асьмелэн семьяямы со утиськемын но ӧвӧл ни. Собере, мон сцена вылын кырӟаны-вераны уг дасяськиськы ук. Ултӥяны турттыса уг вераськы, но монэ уг синмаськыто атласлэсь вурем туала удмурт дэремъёс но, кудъёссэ сокем яратыса нулло пурга но алнаш нылкышноос, озьы ик мукет ёросъёсын. Бен, чебер пужыятэм айшет со вылтӥ керттэмын, мӧляын коньдоновесь кисьтаське, йырысь кышет но сяськая. Озьы ке но, уг кыскы та дӥськут сюлэмме бордаз. Ярам, сцена вылын эктыны- кырӟаны, сюанын шулдыръяськыны пиналъёсыз но дӥсялозы сое. Но тросэзлэн егитъёслэн уз пот со дӥськутэз огшоры нуналъёсы нуллэмез. Пурга урамъёстӥ, Ижевскетӥ йӧнъяськыса ортчон мылкыдзы уз кылды соослэн. Сыӵе дӥськутэн пӧръяськыса ветлӥсь муртэ мукет выжы калыкъёс паймыса учкозы ик, дыр, но уз вожъяське, малпасько. Нош макем потэ вылэм адӟем шаермылэн урамъёсысьтыз туала вакытлы тупась удмурт шӧмын вурем дӥськутъёсын пӧрмытскыса ветлэмзэс. Куд-огеныз тодмоосыным споръяськонозь но вуылӥ. Шуо, песянайёсмы сыӵе дӥськутэн ветлӥзы бере, гажаны кулэ соослэсь сямъёссэс. Вашкала сямъёсты утьыса возёнлы мон одӥг но пумит ӧвӧл. Мукетыз ӝож, малы удмуртъёсмылэн азьлане мынэмзы уг поты, буйгатско лэсьтэменыз, нош туалазэ кылдытон сярысь сюлэмзы уг бӧрды. Песянайёсмы озьы ветлӥллям шуыса, табере мон но, мынам нылы но со дӥськутэз дӥсяны кулэ-а? Яке Алнаш, Пурга палась ик ӵош ужась эшъёсы? Собере, со песянайёсмылэн песянайёссылэн песянайёссы... но асьсэ вакытсылы тупась дӥськутэн ветлӥзы ук. Уг луы шат вашкалаезлэсь вань адӟем карымонзэ басьтыса, туала модалы тупась дӥськут кылдытыны? Та юан монэ кемалась дырысен сюлэмшугъяськытэ ни. Бен монэ гинэ шат? Удмурт шӧмын туала дӥськутъёс кылдытон бордын ужась куд-ог муртъёс сярысь кылылэме вал. Ушъяса вераллязы Пичи Пурга ёросысь Курчум Норья школаысь нылпиослэсь туала дӥськутъёс вырон бордын тыршемзэс, кивалтӥсьсы Татьяна Маштакова. Ижевскын одӥгаз дӥсь керттон ательеын ужа модельер Татьяна Волконская. Ӟуч адями удмурт шӧмын туала нуллон дӥськутъёслы эскизъёс кылдытъя. Ижевскысь 28 номеро СПТУ-ын дасяло вылӥ быгатонлыкъёсын вуриськисьёсты-модельеръёсты. Одӥг-кык ар талэсь азьло Ижевскын ортчиз модалы сӥзем бадӟым ужрад. Та училищеысь модая театре ветлӥсь нылъёслэн дӥськутъёсысьтызы мон озьы ик синйылтӥ удмурт шӧмез. Нош "Тень Алангасара" фильмез пуктэмзы бере, макем синмаськи радиожурналистлэн Галина Кондратьевалэн вашкала шӧмъя аслаз вурем удмурт дӥськутэзлы. Бен, бен, синмаськи но вожъяськи. Аслэсьтым ачим юай: "Нош тынад малы ӧвӧл удмурт дӥськутэд?" Собере асме ачим ик буйгатӥ: "Куке но одно вуро". Алигес Надя сузэре уже жингыртӥз но юа, уг-а: пе, поты тодматскемед удмурт дӥськутъёслы эскизъёсын - вашкалаосыныз но, туалаосыныз но. Собере валэктӥз на: - Аслым удмурт шӧмын дэрем вурыны малпай, вазиськи ӵош дышетскем эшелы Людмила Молчановалы, удмурт дӥськут суредъёсын книгазэ курыса. Паймытӥз, потымтэ на, пе. Кызьы ке но юрттыны кулэ вал солы, оло, газетты мар ке карыны быгатоз? Газетмы коньдонэн узыр ӧвӧл, асьмеос но ӵемысь кураськисьёс чотын улӥськом. Но ӟеч адямилы дурбасьтыны, асьмелэсь кылмес вераны ноку пумит ум луэ. Озьы Удмурт кун университетысь искусствоосъя факультетын ужась Людмила Анатольевна Молчанова ӵуказеяз ик редакциямы вал ни. Уг алдаськы, нылкышноосты но, воргоронъёсты но - ваньмес ик синмаськытӥз но паймытыса кельтӥз со. Ижевскын будэм ӟуч адями сокем трос тодэ удмурт калыклэсь этнографизэ, историзэ, культуразэ, сокем быгатыса но чебер мадиське, сюлмыныз висе асьме удмурт калык понна. Ваньмыз со усьтэмын но суредамын удмурт дӥськутъя книга поттыны дасям эскизъёсаз. Я, уг жадьыты ни тӥледды, гажано лыдӟись эшъёсы, аслам малпанъёсыным, кыл сёто суредасьлы но наука удысын ужасьлы Людмила Молчановалы. - Ваньмыз кутскиз "Тень Алангасара" фильмлы дӥськутъёс дасян бордысен. Со вакытэ мон мур-мур уг тодӥськы на вал удмуртъёслэсь улэм-вылэмзэс, культуразэс. Мон историк ӧвӧл, мон художник, дышетски Удмурт кун университетын. Уж борды басьтӥськеме бере, удмурт дӥськутъя вань литератураез ӝутоно луи. Но со трос ик ӧвӧл вылэм. Монэ уката ик тунсыкъяськытӥз тужгес вашкала удмуртъёслэн дӥськутсы. Литература ӧжытысь, со но огшоры лыдӟисьёслы чакламын ӧвӧл, трос ужано луиз археологъёслэн шедьтосъёссыя. Нырысь-валысь со фильмлы дӥськутъёсы малпасагес лэсьтэмын вал, йылзэ-пумзэ шедьтытэк. Мар кельшиз вашкала удмуртъёслэн чеберъяськон амалъёсысьтызы, сое ик басьтӥ. ХИХ дауре кутӥськись чыртывесез ик. Но пыдлогес пыроно ке, вашкала удмуртъёслэн чеберъяськоназы кортлэсь лэсьтэм валъёс, ӵожъёс кутӥськылӥзы, кортлэсь ик чеберъяса лэсьтэм е, кинжал, жильы... Пыдкутчанзы кулэсь вал, кортлэсь чеберъянъёсын ик. Вашкала удмурт дӥськут ХИХ дауре нуллоно дӥськутлэсь трослы пӧртэм вал. Ваньзэ сое валаса ик лэсьтӥ ни фильмлы дӥськутъёс. Кельшиз. Собере малпаськонэ но уси, малы нокыӵе литература ӧвӧл вашкала удмурт дӥськутъя. ХИХ дауръя 1974 арын потӥз ке Семен Виноградовлэн книгаез, мар вал солэсь азьло - тодмо ӧвӧл. Тӥни соку ик йырам малпан кылдӥз: поттоно "Удмурт дӥськут" книга. Басьтӥ вань вакытъёсты, ананьинскойысен кутскыса (асьме эралэсь азьло ВИИИ даурысен), туала вакытозь. Удмуртъёслэн, комиослэн, поръёслэн вашкала ӵыжы-выжыоссы соку кусып возизы скифъёсын, арматъёсын. Соин ик дӥськутазы шӧдӥське со калыкъёслэн дӥськут шӧмзы. Лэсьтӥ куинь суред. Шор дауръёсысь дӥськутэз суредай ни Маргарита Ивановалэн, Владимир Семеновлэн шедьтосъёссыя. Озьы сизьым суред лэсьтӥ ХИХ даурлэсь азьло дӥськутъя нош укмысэз ХИХ даурез возьмато. Суредай уй пал, лымшор, бесермян, Кам уллапал ёросъёслы люкыса. Дась ужъёсме возьматӥ Семеновлы. Со вылӥ дунъет сётӥз, ӵектӥз Кузьма Куликов доры мыныны. Кузьма Иванович ачиз рецензия гожтӥз. Табере ини мон мынӥ Культурая Министерствое, Аверян Трофимович Христофоров доры. Шумпотыса пумитаз, ойдолэ, пе, лэсьтом. Ӵектӥзы на суредъёс борды валэктӥсь материал гожтыны. Отчы, татчы вазиськи. Ваньмыз ӟечен пумитало, юрттом шуо. Но гожтонзэ но ас вылам басьтоно луиз, калленэн мынэ ни удмурт но англи кылэ берыктон. Ветлӥ "Удмуртия" издателсьтвое. Юра Лобанов книгаелэсь макетсэ лэсьтыны басьтӥськиз. Но коньдон ӧвӧлэн, ужмы огинтыяз пуксиз. Буёло суредъёсын книга поттон туж дуно усе. Удмурт Республикаысь Кун Кенешлэн тӧроезлэн воштӥсез Алексей Геннадьевич Красильников доры вазиськеммы но ӧз юртты. Собере, удмурт дӥськутъёслы сӥзем книгаез кык томен поттыны вераським. Нырысетӥ люкетэз мынам луоз, кыкетӥез Серафима Лебедевалэн. Солэн ужез сӥземын ХИХ даурысь дӥськутлы, музейысь материалъя, аслаз гуртъёсы потамъёсызъя. Таяз книгаын луозы слайдъёс. Ӧйтӧд ку книгае потоз, шедёз-а солы коньдон. Но мар бордын ужамме тодыса, мыным вазиськисьёс одӥг-ог вань. "Айкай" ансамбльлы шор даурысь удмурт дӥськутъёсъя эскизъёс дасяй. Ваньмыз со лэсьтэмын зэмос материалъёс вылэ пыкиськыса. Басьтэ ай тани "Италмас" ансамблез. Соослэн дӥськутъёссы - удмурт дӥськутъёс ӧвӧл, ваньмыз ушъяло, данъяло ке но. Историысь материалэз тодытэк лэсьтэмын со, яркыт буёлэз кутыса, син шоры йӧтымон карыса. Удмурт дӥськутэз сураса, мыдланьтыса возьматэмын. Сюлэм вӧсь луэ сыӵе "пӧрам" шоры учкыса, но со нокинэ уг сюлмаськыты лэся. Тодӥсьтэмъёс озьы ик малпало, удмурт дӥськутэз адӟиськом шуыса. Вашкала удмуртъёс ноку ӧз кутылэ яркыт буёлъёсты, соослэн дӥськутсы вал тӧдьы, гордэн суро. Аслам ужъёсам мон тырши удмурт дӥськутэз котыр ласянь возьматыны. Этнографиен, историен герӟаськем дӥськутъёс сяна, лэсьтӥ сцена вылын возьматонозэ. Таоссэ соку ик синйылтӥз пинал принцессаослэн "Ирида" школазы. Вань Инвулы но Тунолы выжыкыл дӥськутъёсы, суредай Музъем мумыез но Шунды мумыез. Туала удмурт дӥськут сярысь ке верано, кӧня ке модель соя мон лэсьтӥ ни. Китайысь, Турциысь ваем дӥськутъёсты базарысь басьтэм интые, асьмелэсьсэ ик улонэ пыӵатоно вылэм. Малпасько, вашкалаезлы но, туалаезлы но удмурт дӥськутлы сӥзем ужъёсы пиналъёслы, егитъёслы, арлыдоослыгес но юрттысалзы асьсэлы тупамонзэ шедьтыны. Со дышетскон пособие выллем луысал. Людмила Анатольевналэн верамез вӧзы мон йылтысал на, солэн удмурт дӥськутъёсын книгаез асьмеды но, шаермес но мукет калыкъёслэн син азязы трослы вылӥе ӝутысал. Ки йыламы нуллыны кулэ сыӵе адямиез, юрттыны, сюрес усьтыны. Солэн данэз азьланьын на. Секыт, туж секыт оген вамышъяны. Кин ке, оло, кылоз ик, басьтӥськоз солы юрттӥськыны. Мон оскисько удмурт дӥськутлэн улӟонэзлы. Кызьы али вашкалаез шоры синмаськыса но паймыса учкиськом, озьы ик туалаез но номырин бере уз кыльы. Вашкала шыкысэз усьтыны Людмила Молчанова усьтон шедьтӥз, асьмелы табере валаса кутоно со узырлыкез. Нош усточи быгатӥсь нылпиосмы трос гинэ. Соос пӧлысь ик будозы удмурт модельеръёсмы - Юдашкинъёсмы но Зайцевъёсмы. ЛИЯ МАЛЫХ. Людмила Анатольевна Молчанова тодматэ "Удмурт дӥськут" книгаезлы эскизъёсын. Вашкала даурысь но туала вакытысь дӥськутъёс. Фотоосыз В7 БЕЛОМОРСКИХЛЭН. БЕРЕКЕТ Тӥледлы, нылпиос Суред вылын сётэмын кык висись пуныослэн тусъёссы. Нош тыныд, лыдӟись пинал эшмы, лэсьтыны кулэ ньыль гож озьы: та пуныос мед бурмозы но бызьыса мед кошкозы. Берекет Тӥледлы, нылпиос Гажано пинал эшъёсмы, суред вылын сётэм котькудӥз туспуктэм лэсьтэмын одӥг кутскемен дугдылытэк. Оскалтэ ай оло, тӥляд но пӧрмоз. *** Тодады вайытӥськом Пыдкутчанды кема улоз Нимысьтыз кремен зырам сяна, кулэсь вурем пыдкутчанэз дырын-дырын ӵушылоно бензинэн коттэм ӟустариен, тужгес но - куасалтӥськем интыостӥз. Тросэзлэн пыдкутчанъёслэн пыдберзы чурыт луэ, озьы пыд нярӟе, вӧсь луэ. Мар карыны кулэ? Пушсэ спиртэн зыралэ но, соку но пыдады поныса, кӧня ке ветлэ. Ӧз ке юртты, эшшо тазьы кӧня ке пол лэсьтэ на. Сайкыт тусо пыдкутчанэз буёлтэм крем интые ымныр кремен но зыраны луэ. 30 минут ортчыса, небыт ӟустариен (бархатэн) ӵушылоно. Лакен шобыртэм туфли кисьтаськись туссэ уз ышты, сугон йырлэн ӝыныеныз зырад ке. Эн вунэтэ: лак 4 градус кезьыт азьын пилиськылыны кутске. Пыдкутчанды ӟукыртэ. Уйлы пуктэ кот ӟустыри вылэ - "кырӟамысь" дугдоз. Замшалэсь вурем пыдкутчанэз тазьы сузяло. Нырысь-валысь кӧсато, собере кӧня ке минут быректӥсь ву вадьсын возё но кырсь интыоссэ щёткаен сузяло. Собере зырало нашатырь спиртэ ватсам вуэн (кыксэ но одӥг мында) коттэм ӟустариен. Куасьтыса нош ик щёткаен сузяно на. Л. ВАСИЛЬЕВА. БЕРЕКЕТ МАТРОН АПАЙ ӴЕКТЭ "Тугоко" салат 5 кг кубисталы мынэ ваньмыз быдэн 1 кг ӵуж кушман, сугон, ческыт пӧсьтурын. Соосты векчи юдоно но бадӟым тазэ пононо.Салатэ ватсано 350 г сакыр песок, 4 сиськон пуньы сылал, быдэн ӝыны литр 9 процентъем уксус но кӧс вӧй. Ваньзэ сое чакласа сурано, кубиста зол медаз посӥськы, дырызлэсь вазь вуэз медаз поты шуыса. Тазьы дасям бере, салатэз чылкытэсь 3 литръем банкаосы юн зӥбыса тыроно. Куинь нунал ортчыса, капрон пытсэтъёсын пытсано но салкым азе (холодильнике, гулбече) пуктоно. "Тугоко" салат кема дыр ӵоже возиське, шӧмыз ческыт кыле. "Тол" салат 3 кг горд помидорлы мынэ быдэн 1,5 кг ӵуж кушман но сугон, 100 г сылал, ваньмыз быдэн 300 г кӧс вӧй, 9 процентъем уксус, сакыр песок. Бакча сиёнъёсты зӧкесьгес юдэсъёслы вандылоно, сылал ватсаса сурано но 12 час пукетоно. Потэм вузэ мукет посудае ӟизатоно, отчы ватсано кӧс вӧй, уксус, сакыр песок но 30 минут ӵоже быректытоно, кӧня ке лавр куар ватсаса. Тыроно чылкыт банкаосы, лач пытсано. Берекет Лэсьтэ асьтэос Варсь но сур - ческыт юонъёс Варсь пӧзьтон понна, одно ик ӟегез удато, собере сое куасьто но изо. Озьы пӧрме ӵужъем. Ӵукна ик гур эсто. Со куспын ӵужъемлэсь юмал суралто, пӧлаз ӟег пызь но ватсало на. Гур ӝуатозь, сурет юмалӟе. Соку ик дасяло корчага (горд сюйлэсь бадӟым горшок). Солэн пыдэсызлэсь 2-3 чиньы вылӥынгес вань пичияк портэм пасез, со пытсаське зол пулэсь лэсьтэм ӵоген (пытсэтэн). Пӧсьвуано на ӟег куроез (озьы со небӟе но, чылкыт но луэ). Пась вадьсы пушласянь кечат-вамат пононо 3-4 чаг, чагъёс вылэ небӟытэм куроез позыртыса, лач-лач керттыса юнматоно: суралтэм юмалмы пыртӥз медаз тюак вия, куро пуж интые но луэ, со пыр варсь сӥсъяське. Корчага пыдэсы тюрышак (ӧжытак гинэ) ву пононо, варсь медаз ӵуштаськы шуыса но отчы тыраз ик юмалэз кисьтоно. Напезъя суралтэт мед луоз нап йӧлвыл кадь, суралтон боды медам усьы, мед сылоз. Табере посудаез вуттэм гуре пуктоно. Пӧземезъя ялан йылтылоно ву: медаз ичиёмы, медаз пӧзьыса быры, озьы ик тыраз мед улоз. Ӵуказеяз вазь ӵукна эскероно, пасьсэ усьтыса. Дась ке, виятоно нимысьтыз лэсьтэм дырды кузя. Куд-ог дыръя бадӟым куно каронлы яке сюанлы ке дасясько, вашкалаосмы одӥг гуре кык но корчага пукто вылэм. Ӟеч ке удалтэ, варсь вияса бырем бере, вылаз эшшо быректэм ву ватсало но, кӧня ке пытсаса воземзы бере, эшшо виято на варсь вылэ ик. Берлозэ кык пол озьы быректэм ву ватсалляса виято на сур пуктыны. Варсь бервылэн угось туж удалтэ сур. Сур лэсьтон понна, выльысь юмал суралтыса дасяло. Кудӥз отчы ик ватса на туг но. Со сурлэсь кужымзэ эшшо но золгес каре. Озьы чырсато, собере быдэсме-вуэ ке, гуӵӵа (нап) вылысьтыз сӥсъяло ини, чырс медаз ванды, юн медаз чырса шуыса. Тӥни озьы вашкалаосмылэн та юонъёссы туж ческыт но пайдаё луо. Варсен кумышка (пӧсятэм), пӧртэм сиёнъёс дасяны луэ. Нош кин меда ас лэсьтэм сурлэсь пыкиськоз? Утчалэ лэсьтыса, оло, тӥляд но пӧрмоз. Альбина Вахрушева, Воткинскын улӥсь. Берекет ЮРТТЫ АСЛЫД АЧИД Йогъёс дэмлало Кус вырӟонэз (радикулитэз) эмъяны туж огшоры амал вань. Куске бинёно луд кеч куэз. Озьы ветлоно 4 нунал, уйлы но куятэк. Ку посымтэ но миськымтэ мед луоз. Бинёно куске гонтэм палыныз паськыт шарфен. Изьыны курадӟись муртлы дэмлало чечыен быректымтэ ву юыны. Стакан вуэ пичи пуньыен чечы ватсано, сурано но сиськемлэсь азьло нуналаз 3 пол юылоно. Сиськем бере ке, юыны кулэ кык час ортчем бере гинэ. Эсэпсэ валано. Кылсярысь, чечы сиськон пуньыен ке понӥды, буйгам интые, сюлэмшугъяськыны кутскоды, изьыны уд быгатэ ни. Мукетыз амал - писэйтурынлэсь (валерианалэсь) парос (настойка). Нуналлы быдэ кӧлыны выдэмлэсь азьло солэсь парзэ огпол - кык пол ныр пыр пушке кысконо. Кӧлонды радъяськоз. Мугор мед шутэтскоз шуыса, пайдаё изён кулэ. Кӧлоно 7-8 час, нылкышноослы - одӥг часлы ятыргес но. Самой ӧжытсэ изьыны дэмлало 5-6 час. Но соку юн быдэсъяно режимез: выдоно 21.30 часэ, султоно ӵукна 4 часын. Вазь ӵукна угось омырын пранаез (кужым сётӥсез), флюидэз, ионэз уногес. Мукет ласянь, тужгес но пайдаё кӧлыны уйшорозь (24 часозь). Уйшорлэсь азьло одӥг час кӧлон пайдаезъя ӵоша уйшор бере кык час кӧлонлы. Со сяна, тодады возе: сиськытэк кӧлыны выдон мултэс секталалэсь мозмытскыны юрттэ. Кызьы но ма вылын изёно? Валес мед луоз ӵошкыт, чурыт. Озьы шоканы каньыл, кӧлыны умой. Кулэ-а миндэр? Кӧт вылады изиськоды ке, сотэк но луэ. Нош мукет дыре со кулэ, но мед луоз чурытгес, валик выллем. Векчи миндэрез шори куасалтӥськод ке, туж усто йыролтэс пӧрме. Урдэс вылын кӧлыку, йыр но чырты мугорын одӥг линия мед кылдытоз, сюрлы шонер луыны кулэ. Тыбыр вылын кӧлон сямдылэсь куштӥськыны кулэ: мугорлы, пуш органъёслы секыт. Соку угось ымын мур шокано, тыослы мултэс вентиляция луэ. Куд-огез лыдъя, паллян пал урдэс вылын изьыны уг яра, сюлэм вылэ, пе, зӥбиськод. Нош сюлэм меӵак паллян урдэсын ӧвӧл ук. Собере, бур пала ке берытскиськод, сюлэмыд ошиськем кадь улэ. Соин ик одӥг урдэс вылын гинэ кӧлоно ӧвӧл, берыкъяськылоно. Ӟырдэктон, кызон но кизьнылон дыръя эмъюм юыны эн дыртэ. Озьы ачиз мугор висёнъёсын нюръяське. Кизьнылыку шокан пасьёс усьтӥсько, ты изьян ваись веществоослэсь но аллергенъёслэсь сузяське, нош кызон мугорлы бактериослэсь но вирусъёслэсь мозмытскыны юрттэ. Кӧс кызыку гинэ эмъясь сироп юоно. Мугор ӟырдэктон но организмлы висёнэн нюръяськыны юрттэ. Соин уг яра ӟырдамез эмъюмен сӥятыны, со 39,6 градуслэсь вылӥын ӧвӧл ке. Озьы висён ӝоггес ортче, вирусъёсты но бактериосты ӟырдэктэм мугор ачиз быдтыны юрттэ. Дасямын "Очаг" журналъя. Берекет Тодэмды ке потэ... Кӧня йӧл сётэ одӥг скал? Нуналаз 20-25 килограмм йӧл сётӥсь скалэз асьмеос ушъяськом, соин данъяськиськом. Нош мар шуоды, одӥг скаллэсь нуналаз 82 килограммлэсь но уно йӧл ке кыскиды?! Сыӵе рекорд лэсьтэмын вал 1941-тӥ арын Волгоградской областьысь "Домшинское" колхозын. Ярославской выжыысь Вена нимо скал озьы та палъёсты быдэс дуннее данэ поттӥз. Нош ар куспын самой трос йӧл кыскемын голландской выжы скаллэсь - кызь сюрс килограмм! Костромской выжы скал данэ потӥз 13 ар ӵоже самой уно йӧл сётэменыз. Кыскемын 120 тонна 247 килограмм. Л. Яковлева. БЕРЕКЕТ ТӤЛЯД КУРЕМДЫЯ Бен вал ук Кылъёсыз но крезьгурез Ю. Кузьминалэн А. Шкляевлэн "Дор" пьесаезъя пуктэм спектакльысь. Шунытэсь кылъёсын Сюлэмме уд лӥяты. Шулдыресь гуръёсын Тусбуйы уг серекты. Припев: Бен вал ук, бен вал ук Задоресь кырӟанъёс, Бен вал ук, бен вал ук Эктонъёс, шудонъёс. Яркытэсь лентаос Йырсиме уз чебертэ. Ческытэсь винаос Мылкыдме уз небӟытэ. Яратӥсь синъёстэ Шӧдыку-адӟылыку, Винаез юытэк Кудӟисько ук вал соку. Лобӟизы дыръёсы Писпулэн куаръёсыз кадь. Вордскизы, будӥзы Нылъёсы ини мон кадь. Соос шоры учкыкум, Йырсизэс пунылыкум Буйга ни сюлэмы. Вал мынам чебер дыры. Тодо, гажало Евдокия Михайловна пичиысен ик гуртсэ яратӥз, ас калыкезлы синмаськиз. Вордӥськем Тукан гуртысьтыз кемалы ноку ӧз кошкылы. Огдыре ёросын удмуртлыклы саклык ӧз висъялэ. Нош Евдокия Ильиных соку но ӝытъёсы ас котыраз гурт калыксэ люкалляз. Пӧртэм киужъёсын нылкышноос кырӟаса- вераса пукылӥзы. Али но соос ӵем пумиськыло. Тукан гуртысь фольклор ансамбль туэ Воткинск районэ Гербер празднике лыктэмъёсты вашкала удмурт кырӟанъёсын-эктонъёсын паймытӥз. Татысь артистъёс шулдыр концертъёсын ӵемысь шумпоттыло Сюмси палан улӥсьёсты. Районын улӥсь удмуртъёс ӟеч тодо но гажало Евдокия Михайловнаез. Алигес ортчем конференциын сое нош ик бырйизы "Удмурт кенешлэн" Сюмсиысь ёзэзлы кивалтӥсе. Удмуртъёслэн ВИ-тӥ съездазы районысь куать делегат быръемын. "Удмурт дунне" газетэз таяз аре Сюмси палан 16 семья гинэ басьтэ. Оскем потэ, Евдокия Ильиныхлэн но солэн эшъёсызлэн сюлмаськеменызы вуоно арлы та лыдпус будоз шуыса. Н. ВОЗИСОВ. Шӧкыч Антон Чехов Кышноеным керетӥ ай... - Шайтан басьтон! Ужысь пуны кадь сием потыса бертӥськод, нош соос чёрт тодэ маин сюдо! Эшшо ке адӟымтэ улсы кариськоно но ческыт потыса сиёно на. Пумит мар ке вераны шедьтӥд ке, соку ик вузозы, синкылизэс кисьтозы! Кышнояськеме понна куинь полэс асме каргасько. Озьы шуыса воргорон пуньызэ тусьты борды тэрс! шуккиз но ӟырдам табаысь выллем ӝӧк сьӧрысь тэтчиз. Сьӧраз ӧс йыг! вазиз. Кышноез бӧрдыны ӧдъяз, ныркышетсэ бам бордыз ӝиптӥз но ӝӧк сьӧрысь потӥз. Нуназеян быриз. Пиосмурт аслаз висъетаз пыриз, диван вылэ ланьырскиз, ымнырзэ миндэр пушкы ватӥз. "Шайтан тонэ кышнояськыны косӥз, - малпаз со. - Номыр ик веранэз, ӟеч улон! Кышноен улыса ӧй вутты на, ыбиськем потэ ни!" Кӧня ке улыса ӧс сьӧрын каллен вамышъясь пыд куара кылӥськиз... - Ма, кызьы, пе... Ултӥяз, мыскылляз, табере ачиз ик ӧс котыртӥм гожеръя, кӧты берытскоз кожа... Хе, мыняк потыса гаӵоло усёз! Кӧты берытскытозь ошисько. Ӧс каллен ӟукыртыса усьтӥськиз но берен ӧз ворсаськы ни. Кин ке пыриз но дӥсьтытэкгес гинэ вамышъяса диван доры матэктӥз. - Ма, бен ярам! Простить кар шу, бӧрд, тэльмыры... Пӧлы пумын вӧй тыныд! Шедьтэм шузиез! Одӥг ӟеч кылме но уг потты, коть татчыяд ик кул... Изисько тани, вераськеме но уг пот! Воргорон ымнырзэ мургес миндэр пушкы донгиз но каллен соргетыны ӧдъяз. Но пиосмуртъёс но вань нылкышноос кадь лябесь. Соосты шунтыны, чырсатыны капчи. Тыбыр сьӧрысьтыз шуныт мугорез шӧдыса воргорон диван бордыгес ӝиптӥськиз, керӟегъяськыса пыдзэ кыскиз. - Да... Табере тани нуныяськом ни, ӟыгыръяськыны кутскиськом, нюлӥськиськом... Тани пельпумез чупаны кутском, пыдесъяськыны... Адӟем уг пот нуныяськемез!... Ма, озьы бере, простить кароно ке шат. Солы угось али керӟегъяськыны уг яра. Ярам, час пала мед курадӟоз на. Азьланезлы визь пыроз... Пель дораз ик мур лулӟем кылӥськиз. Собере эшшо одӥг пол, эшшо... Воргорон пичи киослэсь пельпум бордаз йӧтскемзэс шӧдӥз. - Я, ӵок ини-а, мар-а. Инмар тонэн. Берпуметӥзэ простить каро на. Тырмоз, дыр, мискинез курадӟытыны. Ма, собере ачим ик янгыш ук! Кыӵе ке чыры-пыры ӧвӧлтэмлэсь быдэс ож ӝутӥ. - Ну, ярам, пичие мынам! Чаль вӧзам, - воргорон киоссэ тыбыр сьӧраз кыскиз но шуныт мугорез ӟыгыртӥз. - Тьфу! Вӧзаз бадӟым Дианка пуныез кылле. Берыктыны выриз Елена Панфилова. Шӧкыч Ялонъёс Вузасько ош. Кык ар ортчыса, Ыжгуртысь Паньтэм Чырсамовлы вазиськоно. Оше али ӧз на вордӥськы. *** Воштӥсько кышноме. Кышное уг тоды на. *** Шӧкычлы жингыръяло... - Алло! Берлрез "Шӧкычты" мыным туж кельшиз. - Нош маиз тужгес но сюлмады биниськиз? - Шумпотыса лыдӟи Петровлэсь гожтэмзэ. Туж яраз, ява. Малы ке шуоно, Петров - со мон ачим. Шӧкычлэн телетайп лентаысьтыз Туннэ "Ю тысь тю-тю" колхозын бадӟым праздник - хозяйствоысь вань скалъёсты вузаса, выль трактор басьтӥзы. Таин валче колхозын шутэтскон нунал ялэмын. *** Туж аспӧртэмлыко кунян вордӥськиз "40 ар йӧлтэк" колхозлэн Скалгурт фермаяз. Солэн - кык кылыз. Соин, лэся, татысь скал утисьёслэн верамзыя, али гинэ вордӥськем кунян удмурт сямен но, ӟуч сямен но бӧксыны быгатэ. ШӦКЫЧ Шаньга - куртчид ке, паньга! Бен, али гинэ гурысь поттэм шаньга куртчид ке, зэмзэ но паньгалоз. Со бордын шат ужпум? Паньгалоз ке, мед ойдо. Со понна, кыӵе ческыт! Удмурт пӧрамъёсты городысь сиськонниосын шедьтыны шуггес. Вузкаронын но соос шер адскыло. Угось али тросэз вузъёс кунгож сьӧрысь вуэмын. Зарезь сьӧрысь озьы ик асьме доры сиён-юон но вуэ. Ӟечлыкез гинэ солэн уг шумпотты. Угось куддыр кунгож сьӧрысь эшъёсмы-юлтошъёсмы дунтэмгес шуыса, сиыны ярантэм сиён-юонзэс но вузаны уг кепырало. Нош ӵемгес зарезь сьӧрысь ваем вузлэн ӟуч сямен ивортонэз уг луы. Мын но тод собере, кинлы та банкаысь сиён: пунылы яке адямилы. Бен, куддыр тыршо ик ӟуч сямен маке "ӵабъяны", валаны гинэ уг луы, мар отын гожтэмын. Яке воксё ваньзэ сурало-пожало. Оло, соин но, дыр, "Индустриальная" фирмалэн Ижевскысь 28 номеро магазиназ вишнялэсь компотлэн банкаяз кияр но кешыр сярысь гожтэмын вал. Вузкаронъя кун инспекциысь ужасьёс быдэс Удмуртиез котыртӥзы ни кадь. Берло ветлӥзы Ижевскысь вузкаронъя предприятиосы, озьы ик вуылӥзы Воткинске, Сарапулэ но Кизнер, Кияса, Игра, Каракулино, Юкаменск ёросъёсы. 68 предприятиосын ӟуч сямен валэктонтэк кунгож сьӧрысь вуэм сиён-юон калыклы ӵекто вылэм, 17 магазинъёсын мукет но тырмымтэос шараяськизы. Ваньзэ- ӧвӧлзэ 76 мурт янгыше уськытэмын. Соос штраф чотын кисыысьтызы, огазе карыса, 52,8 миллион манетсэс государстволы "кузьмано" луозы. Соин ик лавкае сиён-юонлы мыныны дасяськиды ке, эн вунэтэ - котьма шу но, асьме шаньга ческытгес ик! Ф. МИННИГАРАЕВ. КУАЗЬ Синоптикъёс верамъя, туннэ но ӵуказе шаерамы улӥсьёсты витё зоро-кото нуналъёс. Ӵукнаосы бус вӧлскоз. Уин 0-3 градус шуныт луоз, интыен-интыен пужмер усёз. Нуназе -5-8 градус шуныт. Тӧл секундскын 6-8 метре пельтоз. Кун Кенешын Кун Кенешлэн Президиумез заседанияз куать ужпумез эскериз. Республикаысь Коньдон ужпумъёсъя министерство ивортӥз Кун Кенешлэсь 1994-95 аръёсы, нылпиос понна пособиосты тыронъя пунэмез берыктон пумысен постановленизэ быдэсъямез сярысь. "Удмурт Республикалэн 1997 арлы бюджетэз сярысь" Законлэн кунлэсь пунэмзэ берыктонъя люкетэз эскеремын. Пусъемын вал, нылпиос понна пособиосты тырон секытэн ортче шуыса. Республикаын та пособиез тыронъя пунэм берло кык аръёс ӵоже 53 миллиард манет люкаськиз ини, городъёслэн но ёросъёслэн бюджетъёссы 226 миллиард манет ӝегатӥзы. Ижевск, кылсярысь, 1996 арын 345 миллиард манетлы пунэме кылиз. "Югдур нуналлы быдэ вошъяське", - пусйиз та ужпумъя комиссилэн тӧроез Светлана Андреева, - но воштӥське умой пала" Удмурт Республикаысь Правительстволэсь "Удмурт Респубюликалэн 1997 арлы бюджетэз сярысь" Законлэсь та пумысен статьяоссэ ляб быдэсъямзэ пусйыса, Кун Кенешлэн Президиумез Правительстволы ӵектӥз 1995-96 аръёс понна но 1997 арлэн 9 толэзез понна пособиосты 1998 арын 1 январёзь тырыса, ёросъёсысь но городъёсысь администрациослэсь пособиосты тыронъя но вексельёсты кысонъя ужамзэ сак эскерыны. 1997 арын 4 октябре ортчоз Республикалэн нуналэз. Сое радъян понна, Президиум озьы ик юнматӥз Удмурт Республикалэн Кун премиосызъя комиссия сярысь положениез, Кун премилэн лауреатэзлы сётӥськись дипломлэсь значоклэсь вылтусъёссэс. Адямилэн правоосызъя комиссия кылдытыны чакламын. Заседаниез нуиз Кун Кенешлэн Тӧроез А. Волков. Кун Кенешлэн пресс-центрез. Нуналлэн тодметэз Пумен юнгес шӧдӥське ни толлэн вуэмез. Берпуметӥ куаръёссэ кушто писпуос. Чаклалэ кызьпуосты но тыпыосты. Калык чакламъя, соослэн куаръёссы быдэсак ӧз ке усе - вуись толмы кезьыт луоз. Вашкала календарья 13 октябре пусъё Григорийлэсь вордскемзэ. Азьвыл вакытъёсы та нуналэ суто вылэм валесысь вуж куроез, интыяз выльзэ тыро. Григорий пророк, пе, вож пиналъёсты син усемлэсь, тушмон улэ сюремлэсь уте. Та нуналэ нылпиосты мисько вылэм ӧс кусып вадьсын, пуж пыр ву киськаса. Югыт нунал туннэ кыстӥське 10 час 52 минут, ӵуказе - 4 минутлы вакчигес. Та нуналэ... ар талэсь азьло 11 октябре 1919 арын Орёл город дорын Горд Армия потэ бадӟым наступление. Деникинлэн солдатъёсыз та нуналысен чигнаса вуизы Новороссийскозь, отысь уллямын вал март толэзе 1920 арын. 12 октябре вордскемез дырысен 90 ар тырме М. В. Карачевлы (1907-1958), Советской Союзлэн Героезлы. Вордскемын Селта районысь Уметьгуртын. 12 октябре 1929 арын Василий Блюхерлэн армиез юн шуккет сётӥз китайско-маньчжурской милитаристъёслы пумит. Ожмаськон гомӟемын вал СССР-лэн Китайско-Восточной чугун сюресэз понна. Та нуналэ ик 1964 арын КПСС-лэн ЦК-лэн Пленумез ужысьтыз мозмытэ Никита Сергеевич Хрущевез, партилэсь Генеральной секретарьзэ. Со интые юнмато Леонид Ильич Брежневез. Пусъемын "Золотой орёл" призэн Му вӧй поттӥсьёслэн данзы ӝог будэ: "Удмуртнефть" огазеяськонлэн нимыз тодмо ни Парижын но. Та нуналъёсы гинэ Франциысь но Голландиысь вуиз кык телеграмма "Удмуртнефтез" "Партнерство ради прогресса" международной программае пыртон но "Золотой орёл" но "Золотой Меркурий" призъёсын пусъён сярысь. Со сяна, му вӧй поттӥсьёсмес вормисьёс пӧлы пырто инкуазез саптамтэзы понна но. Таиз понна сётэмын нимысьтыз кузьым. Ужзы сярысь ке верано, туэ 9 толэзь ӵоже кыскемын 4253730 тонна му вӧй, чакламлэсь 5,6 процентлы ятыр. Та дыр куспын ужаны кутскиз 77 выль скважина. Т. НИКОЛАЕВ. Кулэмъёсты буре вайыса Кисьтон вуон азьын юалляськон ортчытӥм. Тунсыко потӥз: ваньзы-а меда тодо на та нуналэз, кызьы сое пусъё Зина, 42 арес Шедьтӥллямды кинлэсь юаны. Уг тодӥськы вал. Ма, табере шаньги, перепеч одно пӧрало ни. Кулэмъёсты буре ваёно. Володя, 37 арес Ку та нунал - тодам уг возиськы. Калыклэсь, кышноелэсь кылыса гинэ "бугырскисько". Черке уг ветлӥськы. Но та нуналэ пӧраськем сиыны, пичияк курытсэ веръяны яратӥсько. Петро, 32 арес Басьтӥськом водка - юиськом, сое кӧйын куртчиськом на. Серекъясько. Мон ачим молдаван. Милям но та нуналъёсты пусйытэк уг кельто. Озьы ик черке ветло. Но мон Пасха нуналэз сяна тодам уг возиськы. Катьырна апай, 68 арес Кисьтон. Сое пусйытэк ум кельтӥське. Одно пӧраськиськом. Городэ улыны лыктэммы бере, ӧжыт "азьтэмским" кадь. Мон ачим Кезысь. Ми палъёс та нуналэ одно сӥльын шыд пӧзьтыны тыршо. Кузпалы Пичи Пургалась. Отын та нуналэ куясько. Ӝыт яке ӵуказеяз ӵукна ӝӧк сьӧры пуксьыкузы, сиёнзэс нимаз тусьтые висъяса кельто, собере ӵуказеяз азбаре потто. Пуныос, пе, мед сиёзы. Кулэмъёслэн азязы мед усёз. Елизавета Ивановна, 51 арес Кызьы тодытэк - кисьтон. Мон инмарлы туж оскись адями. Та нуналэ одно шайвылэ ветлӥсько. Шайгуос вылэ кеньыр пызьнасько - тылобурдоослы. Черке туж ӵем ветлӥсько. Огвакыт ачим но отын ужай. Петров нунал азьын (пятницае) куать часын ӝыт вӧсяськон кутскоз. Лыктэлэ, туж трос калык люкаськоз. Бӧрсе пичияк ке но салам одно ваёно - отын бадӟым ӝӧк пуктэмын луоз. Та ласянь одӥг учыр тодам лыктэ. Черкын ужакум ай, кисьтонлэн ӵуказеяз дорам кышномурт лыктӥз. Валантэм вӧт адӟи, пе - кулэм анайме. Син азям буш ӵашаосын ӝӧк пуксиз, анае вить чиньыоссэ ик мыным возьматэ: ми трос кузя ук, шуэ. Та кышномурт черке вӧсяськыны саламтэк ветлэм вылэм. Озьыен, анаез ӝожомем луоз. Мынам пиналъёсы но, соослэн нылпиоссы но вӧсямын. Нылпиосылэн пиналъёссы университетын дышетско. Бадӟымез ньылетӥ курсэ вуиз ни. Соос котьку экзамензы азьын черке свеча пуктыны ветло. Инмар юрттэ. Ӟеч дышетско, огдыре ик ужаны но вуттӥсько на. Анна Николаевна, 59 арес Тодӥсько, кулэмъёсты буре ваён нунал. Кызьы шайвылэ ветлытэк? Пие мынам кызь ньыль аресын кулӥз. Тани витетӥ арзэ толэзьлы быдэ сямен дораз вуылӥсько. Татчыозь ӧй буйга на. Бӧрсям одно сяська кутӥсько, сиён-юон. Шайгу вылаз кельтӥсько. Валай: нянез векчи пырыосын кельтоно ӧвӧл. Тодӥськоды-а кӧня сютэм, улон интытэк кылем муртъёс отчы ветло? Юромо, куяськем сиёнэз бичаны. Жалесь. Ойдо соос но кӧтсэс мед тырозы. Оля, 21 арес Калыклэсь кылӥ ни - кулэмъёсты буре ваён нунал, пе. Та нуналэз сокем паськыт ум пусйиське. Анай ма но со пӧра. Куд-ог дыръя быдэс семьяен шайвылэ потаськом - песяй-песятайёсмы доры. Валя, 26 арес Али городын улӥсько. Соин ик та кисьтонэз нимаз уг пусйиськы. Но тодӥсько: макем бадӟым нуналэн лыдъяло сое мынам анай-атайёсы, Можга палъёс. Одно инмарлы вӧсясько. Кулэмъёс понна юромо ӝӧк пуктылозы. Нунал куспын со бушалляны уг яра. Ӵуказеяз ӵукна люкам сиён-юонэз бакчае поттыса кисьто - куясько озьы. Азьло аръёсы котьку сямен шайвылэ ветло вал, берло дыре уггес. Пересесь ни, жадё. Лена, 18 арес Та нуналэ дорамы трос-трос пӧрасько, ӝӧк вылэ чаркаен вина пукто, сюкась. Собере песянае вӧсяськыны кутскоз. Ой, ог вить минут пала ас понназ маке сипыртэ. Гуртысьтымы, оло, вань кулэмъёслэсь нимтулъёссэс тодаз вае. Собере гинэ милемыз ӝӧк сьӧры пуксьыны ӧте. *** Пӧртэм адямиос, пӧртэм сямъёс. Но ваньзы соос та нуналэз сӥлы каро. Вӧсясько. Мыным тунсыко соиз гинэ. Кызьы меда та юанъёслы валэктон сётысал школа аръёсам кылем кепырась нылаш. Соку, ог дас вить ар талэсь азьло, сое быдэс школа азьын возьытэ уськытӥзы. Кирос нуллэмез понна... Вордӥськемез дырысен куамын ар тырмонлы сӥзьыса, Россиысь тодмо артист Филипп Киркоров ортчем толэзь ӵоже выль кырӟанъёсыныз шумпоттӥз кунысьтымы трос калыкез. Та нуналъёсы вуылӥз Иже но. Городамы улӥсьёс егит адямиез кужмо кичабонъёсын пумитазы. МИАХАИЛ ЕГОРОВЛЭН туспуктэмез. СЕКЫТ ЮГДУР Мар луиз "Ладабанкен"? Кызьы тодӥськоды, огдыре шуныт зор бере губиос кадь вордскизы пӧртэм банкъёс. Табере пумен соос огез бӧрсьы мукетыз кысо-пытсасько. Озьы ик со луыны кулэ вал. Рынокен экономикае выжон вакытэ, производство куашкамен но экономика лябӟемен, предприятиос банкъёслэсь басьтэм коньдонзэс берыктыны уг быгато. Нош нимаз адямиос (вкладчикъёс) малпало, сётэм уксёзы берга но процентъёс вае шуыса. Тани туэ февраль толэзьысен югдур уродмиз "Ладабанклэн" Ижысь но мукет городъёсысь ёзъёсаз. Соин ик банклэн выль кивальтӥсьёсыз алигес журналистъёсын пумиськылӥзы но кылдэм югдурзы сярысь мадизы. Кун Кенешлэн дас куинетӥ сессияз Центробанклэн Удмурт Республикаысь Национальной банкезлэн кивалтӥсез Равиль Каримов депутатъёслы ивортӥз "Ладабанкын" кылдэм югдур сярысь. Со зэмзэ но капчи ӧвӧл. Азьло банк огсыр ужаз, нош миым но туэ югдур уродмыны ӧдъяз. Соин ик Национальной банк январе эскерон ортчытӥз но шекъёсты палэнтыны ужрадъёс кутӥз. Нош июле калыклэсь коньдон басьтыны ӧз лэзьы ни. Банклэн советэзлы гожтэтэн ньыль алон сётэмын но отчы кӧня ке экспертъёс ыстэмын вал. Национальной банклэсь куронъёссэ "Ладабанкын" лыдэ ӧз басьтэ но югдур уката лэчытомиз. Озьы 28 сентябре кивалтӥсьёсыз воштэмын вал. "Ладабанклы" президент луиз Дмитрий Якушев, нош директоръёслэн советсылы тӧро - Евгений Богомольный. Кинъёс бен со выль кивалтӥсьёс? Дмитрий Олегович 1994-95 аръёсы Москваысь банкен кивалтэм, собере аудитор ужын вал, али "Азвесь" банк оскемын. Евгений Исаакович луэ "Сиданко" АО-лэн "Удмуртнефть" ОАО-езлэн валтӥсь тӧроез. Малы бен со директоръёслэн советсылы кузёе быръемын? Мугез тодмо. "Удмуртнефть" "Ладабанклэн" учредителез но самой трос коньдон сётӥсез (кредиторез) луэ. - Банклэн азьвыл кивалтӥсез Сергей Бобогло мылысь-кыдысь пыриськиз Россилы Президент быръёнэ, - шуиз Евгений Исаакович. - Но берло со ас ужзэс урод быдэсъяз. Озьы интыяз выль адями быръемын. Со лэсьтэмын, Национальной банкен кенешыса. Ми "Ладабанкез" куашкатыны ум сётэ. Али коньдон утчаськом уждун но налогъёс тырыны. Улэп уксёен сётъялом пенсиос но адямиослэсь вкладъёссэс. Огъя вераса, банклэн коньдонэз тырмыт, но вылӥ ликвидной активъёсыз азьлолэсь ӧжытгес ни. Али ичизэ 50 миллиард манет тыр сыӵе активъёс кулэ. Банк ужаны кулэ. - Ку со ужаны кутскоз? - 8 октябре банк ӧсъёссэ усьтӥз. Но адямиослы уксё ӧз сётъялэ на... Ужа пӧсь телефон: 23-91- 16. Соя адями пӧртэм валэктонъёс басьтыны быгатоз. Нырысь ик уксё сётъялозы социально утьымтэ семьяослы. - Банклы кинлэн тыронъёсыз тросгес? - Москваысь но Санкт-Петербургысь банкъёслэн. Одӥг лыдпусэн вераса 60 миллиард пала. "Елаз- банк" но отчы пыре. Толсур (выль ар азьын) вкладъёс бичан но банкез ӧз юнматы, югдурез ӧз тупаты. - Банклэн кӧня учредительёсыз? - Ичи ӧвӧл. Но бадӟымесь предприятиос пӧлысь - ИНИТИ "Прогресс", "Удмуртэнерго", механической завод, "Ижевскгаз" "Вторчермет" но мукетъёсыз. - Гужем уставной коньдонзэс будэтыны чакласькоды вал. Шонер-а со? - Директоръёслэн кенешсылэн сыӵе малпанэз вордскылӥз. Но уставной коньдон луыны кулэ сомында, кӧня калыклэн вкладъёсыз (уксёез сётэмын). Со банкъёслэн ужазы юн курон. Али "Ладабанкын" сыӵе курон уг быдэсъяськы. Юанъёслы валэктӥз Евгений Богомольный. Г. РОМАНОВ. ЕТӤН ИНТЫЯЗ СИСЬМЕМ Кизнер.Татысь етӥн шукконъя заводын секыт югдур кылдэмын сырьё ӧвӧлэн. Районысь етӥн будэтӥсь колхозъёс туэ дырыз дыръя бусыоссэс бушатыны ӧз быгатэ. Ӝыныез зор улэ ик кылизы. Мугез: чагыр эстӥськон, бензин тырмымтэен. Колхозъёслэн уно люкаськемын тыронъёссы, ужасьёс уждунзэс "улэпен" басьтыны уг быгато. Н.Липина. Удмуртъёслэн ӧтчамзы азьын Трос ик дыр уг кыльы ни, Быдэс дуннеысь удмуртъёслэн куатетӥ съездзы ужаны кутскытозь. Сое лыдэ басьтыса, Удмурт Правительствоын журналистъёсын пумиськизы съездэз дасянъя комитетэ пырись эшъёс Алексей Красильников, Светлана Смирнова, Василий Осипов, Валентин Тубылов но Карл Пономарев. Соос тодматӥзы вуоно ӧтчам азьын сылӥсь ужпумъёсын. Отчы лыктозы вить сю пала делегатъёс но 300 куноос. Ваньмаз сямен ёросъёсын ортчизы ни конференциос. Делегат быръё Удмуртилэн палэназ улӥсь бӧлякъёсмы но. - Удмуртъёс азьын сылӥсь ужпумъёс мукетъёсызлэсь пӧртэмесь ӧвӧл,- пусйиз Кун Кенешлэн Тӧроезлэн воштӥсез Алексей Красильников.- Даур воштӥськон вакытэ соос уката но лэчытомизы. Асьмелэн ужпуммы - ваньзэ шуг-секытъёсты валаса но дыртытэк эскерон, азьланезлы сюресъёс чаклан. Котьмалэсь кулэез та ужын луэ эсэпез валан. Сыӵе ик курон пуктӥське журналистъёс азе но. Удмуртиын улӥсь калыкъёс ас ужпумъёссэс ог-огзылэсь висъяськыса эскеро. Югдурез тупатон вылысь, республикаямы чакламын вань калыкъёслэсь ассамблеязэс ортчытыны. Та арлэн пумаз яке вуоноезлэн кутсконаз ортчытыны пусъемын огъя бадӟым кенеш. Отын ик луонлык кылдоз нациослэн кусыпъёсынызы герӟаськем юанъёсты пыр-поч эскерыны но ужез выль сямен радъяны. Пумиськон дыръя вераськон ӧз поты "Удмурт кенешлэн" вуоно президентэз сярысь. Озьы ке но, та ужпум сюлмаськытэ. Туж оскем потэ, калыкмылэн туннэ азьветлӥсьёсыз куспазы огкыл шедьтозы но тӧрое оскымон адямиез ӵектозы шуыса. Уго со бордысь потоз быдэс огазеськонлэн азьланьын улонэз. "Удмурт дуннелэн" редакциез нош ик вазиське лыдӟисьёсызлы, вуоно ӧтчам пумысен кенешонэ мыло-кыдо пыриськыны ӧтёнэн. Витиськом гожтэтъёстэс. И. ЛЕБЕДЕВ. ГАЗЕТЭ ГОЖТЭТ "Юрттэ правозэ таланы" "Ми, Можга районысь Карашур гуртын улӥсьёс, сюлэмшугъяськеммес вераськом. Юрий Федотович Филипповлэсь, юэм йырыныз руль сьӧры пуксемез понна, 1997 арын тулыс куинь арлы таламын вал водитель луон правозэ, нош толэзь ортчыса, солы правозэ выльысь берыкто. Кызьы меда озьы луэ? Нош милям правоосмес талам куать муртлэн, номыр кареммы уг луы..." Тӥни таӵе гожтэт вуиз редакцие. Улӥяз пуктэмын куать муртлэн фамиллиоссы. Югдурез эскерыны курыса, редакция вазиськиз Можгаысь ГОВД-е. Можга ГОВД-ысь ГАИ-лэн кивалтӥсез С. С. Тарасенко юанмылы пыр-поч валэктон ыстӥз. Зэмзэ но, Юрий Федотович Филиппов, юэм йырыныз руль сьӧры пуксемез понна, 1996 арын 10 сентябре ӝегатэмын вал Можга ГОВД-ысь ГАИ-ен. Янгышамез понна, водитель луон правозэ солэсь 12 толэзьлы талазы. Но Можга районысь "Совет" колхозлэн правлениезлэн куремезъя, со дыр куать толэзьлы вакчиёмытэмын. 1997 арын 15 мартэ, мынон-ветлон правилоосъя экзаменъёсты сётэмез бере, Ю. Ф. Филипповлы выльысь берыктэмын вал водитель луон удостоверениез. Гожтэтъя отделлэн редакторез Л. МАЛЫХ. Визь люкан дуннее тубатъёс кузя Нагорный посёлокысь пиналъёс азьло аръёсы Игерман но Ягул гуртэ дышетскыны ветлӥзы. Ньыль ар талэсь азьло татын усьтӥськиз выль школа. Кӧня шумпотон гуртын улӥсьёслы, уката ик нылпиослы, ваиз та нунал! Зэм ик, кызьы уд шумпоты - школа чебер, чылкыт, югыт. Школа пичи, отын дышетско дас сизьым пиналъёс. Но коллектив пыд йылаз йыг-йыг сылэ, шуыны луоз. Марина Широбокова куинетӥ классэз нуэ, Ижевскысь педучилищеез йылпумъяса. Татын школа усьтӥськем дырысен дышетэ. Марина Михайловнаез пиналъёс котькудаз урокын сак кылзо, уката ик соослы яра дышетӥсьсылэн вордӥськем шаерзы сярысь веранъёсыз. Гульнара Сабитова но йылпумъяз Ижевскысь педучилищеез, со нырысетӥ нуналъёссэ дышетэ. Гульнара Рифатовналы татын котьма яра: школа но, пиналъёс но. Татысь школаез йылпумъяса, пиналъёс дышетсконзэс азьланьто Ижевскысь 70-тӥ номеро школаын. Начальной школа - со визь люкан дуннее нырысетӥ тубат выллем. Отын пыӵало ӟеч сямъёс, дышетскыны мылкыд. Егит, шаплы, визьмо дышетӥсьёс та ужпумез умой валало. Сюлмысь тыршыны луонлык но вань. Н. ВОЗИСОВ. Гульнара Сабитова пиналъёсын. Туспуктэмез В. КАМАШЕВЛЭН. ПАЛЭНЫСЬ УДМУРТЪЁС ДОРЫН Куноын умой, но дорын... Сьӧд зарезь дуре нырысьсэ вуылыны шуд усиз вал, школаын дышетскыкум. Шуныт палан улӥсьёслы кыӵе вожъяськи. Соослэн вож-вож улоссы, чылкыт омырзы, кӧттыр емышсы. Чылкыт но паськыт зарезьысь коть эн ик поталля. Пионер лагерьын улэм нуналъёсы ӝог ортчизы. Люкиськон дыр вуэмъя эшъёсы зарезе копейкаос куязы, эшшо но эшшо лыктоно, пе, мед луомы. Мукетъёсызлэсь адӟем карыса, мон но кисыысьтым кӧня ке шальтыртӥсьсэ вуэ куштӥ. Зарезь пала вуо на шуыса ӧй оскы ни ке но. Со дырысен уно аръёс, бадӟымесь воштӥськонъёс ортчизы. Ма, Крым но нимаз шаерен лыдъяське ни. Гужемлэн берпуметӥ нуналаз матысь кунгож сьӧры потано кариськи. Нош кунояй мон Алнаш палась кошкем удмуртъёс, ӵыжы-выжыосмы дорын. Тодымтэ сюрестӥ йыромыса ветлонтэм вылысь мынэме сярысь ивор сётӥ. Ачим малы ке быдэс сюресме сюлмаськысагес мынӥ: пумиталозы-а, ог-огмес тодмаломы-а? Угось берло адскеммы дырысен дас арлэсь уно ортчиз ни. Музон шаере выжыкумы, вань документъёсмес пыр-поч эскеризы. Кунгож шуонэз ортчем бере, сюлмаськонъёсы кулэсмизыгес кадь. Вагонысь васькыкум ик аслым укшась кышномурт пальпотыса пумитаз. Ӟыгырскеммы, ӟечъяськеммы бере машинае пуксим. Гурт пала вырӟим гинэ но мынэсьтым юазы: "Валя, удмурт кырӟанъёсын кассета сьӧрад ӧд басьты вал, дыр". Отӥяз вераськонмы азьланьтӥськиз ини Новая Жизнь селоын улӥсь Григорьевъёс дорын. Вазенгес та селоын тямыс удмурт семья улэ вал ини, нош али чылкак огназ кылемын. Ольга Николаевна но Василий Петрович шуныт палъёсын кызь арлэсь кема уло ни. - Удмуртъёслэсь палэнын улом шуыса ноку ӧм малпаллялэ вал, - шуэ семьялэн кузёез. - Сизьымдонэтӥ аръёсы гуртысьтымы ик воргорон Крыме улыны ӧтиз. Эшъёс но луом, ог-огмылы юрттом но, пе. Семьямы бадӟымен (анай-атайлэн ми сизьым кузя ке вал) кема лӧпкытъяно ӧз луы. Озьы кызь витетӥ арзэ Удмурт шаерлэн палэназ улӥськом ни. Улонлэн ӵуказе нуналыз сярысь нокин чутрак вераны уг тоды. Советской Союз дыръя котькытын ик улон огвыллем вал кадь, дунъёс но. Нош али? Асьмелэн манетъёс, соослэн гривеньёс. Соин ик, палэнысь лыктэмъёс нырысь, дунъёсты учкыса, манетъёслы берыктыса чаклано луыло. Пичигес селоосысь, районъёсысь магазинъёсын но базаръёсын дунъёс пӧртэмесь ӧвӧл асьмелэнъёслэсь. Бадӟымесь городъёсын, кытын зарезь дуре шутэтскыны лыктэмъёсыз трос бере, куноослэсь кисыоссэс зол гинэ "сюпсё". Кылсярысь, мороженнойзы 1 гривень 50 копейка. Асьме коньдонэ берыктыса 4 500 манет. Со дыре ик пичи селоын дуныз куинь поллы ичи. Нош кыӵе уло меда асьме ӵыжы-выжыосмы палэнын? Пӧртэмесь-а соослэн гуртъёссы? Арня ӵоже улытозям Крым шаерез, оло, быдэссэ котыртӥ. Озьы ке но, номыр пӧртэмзэ ӧй адӟы. Бакча емышъёссы но колхоз бусыоссы узыресьгес шат. - Лыктэммы берегес одӥг-кык семья гинэ пудо вордэ вал, - шуэ Ольга Николаевна. -Али котькудӥзлэн парсез но скалэз вань, шуыны луоз. Куд-огез кык-куинен вордэ ни. Коньдон уг тырмы, нош семьяез сюдоно, дӥсяно. Со сяна, бакча емышмес вузаськомы на. Тросгес будэто перец, баклажан, картошка ваньмызгес ик ӧжыт мерттэ, утялтонэз, берганэз акылес, пе. Нуналлы быдэ бӧчыоссэ эскероно, озьытэк емышсэ но уд адӟы, дыр. Со гинэ луысал ке, ярам вылэм. Эшшо одӥг изъянтӥсьмы вань на - медведка. Музъем вылын будӥсь емышлэсь пушсэ сие но мукетаз кошке. Огъя вераса, пушмульыен (грецкой орехен), шуныт куазен (зоръёс ке уг луо) но зарезен чылкыт шуыны луоз на ке гинэ данъяськыны луоно. Музон шаер шуиськом ке но, улонзы мудрон ик ӧвӧл. Тросаз гуртъёсын мынон-ветлон сюрессы, чагыр эстӥськонзы ву вылын саникен гинэ гожтэмын. Толэзьёсын уждунзэс уг адӟо. Уноез мумы-бубыос пиналъёссэс нылпи садъёсы уг нулло. Соин но, дыр, куд-огез та юртъёс бадӟым тунгонэн пытсамын. Вань адӟем карымонэз но. Чагыр эстӥськон котькуд юртэ счётчик пыр вуэ, кулэезъя сое шыръяло. Со сяна, мукетыз но паймытӥз на. Нуналлы быдэ кӧня ке час ӵожелы электротылзэс кысыло. Нош толалтэзэ чаклам графикъя гинэ, пе, сётъяло. Татын дунтэм усе вылэм междугородней телефонэн вераськон. Кылсярысь, Крымысен Удмуртие жингыртэм одӥг минутэз 40 копейка (асьмелэнъя 1 200 манет) тыр луэ. Нош татысен Крыме жингыртэммы та палан кадь ик о-го-го! Минутэз - 15 сюрс манет! Кунгож сьӧрын паймытэ мукетыз но. Соослэн уждунзы, пенсизы асьмелэнэн ӵошатыса, ичигес. Сиён- юонлэн дуныз, куд-ог интыосын бадӟымесь городъёсын, оло, дуногес но. Ӵошатон вылысь: Джанкой городын базар дунъёс таӵеесь (сётэмын асьме дунэ берыктыса, манетэн). - тӧдьы нянь (булка) - 2100-2200 одӥг килограммез: - картошка. Украинаысь вуттэмез - 1300 - картошка Джанкойысь - 1500-2100 - скал сӥль - 11000-14000 - парсь сӥль - 15000-18000 - нӧкы вӧй - 13500 - сакыр-песок - 4350 - тӧдьы пызь - 1800-2100 - колбаса - 24000-48000 - окорочка - 14400 - помидор - 1800-2400 - яблок - 750 - арбуз - 300 - вина, водка - 9000; горд вина - 5400 Дӥськутъёслэн дунзы чылкак асьмелэн выллем. Вузъёс но татын кадь ик. Дунъёс, дунъёс. Крымысь статистъёслэн ӝыны арез чакламзыя, толэзьлы шоро-куспо уждунзы семьяысь одӥг адямилы 66 гривень 32 копейка (198 сюрс 960 манет) луэ. Нош толэзьлы улыны шорлыдын 65 гривень 40 копейка (196 сюрс 200 манет) кулэ. Кыле на 92 копейкаез (2760 манет). Трос-а со ӧжыт-а - созэ валады ни, вылды. Кошкон азям кунокуаосылэсь юай на, бертыны мылкыдзы ӧвӧл-а шуыса. - Одӥгнамы кылем бере мӧзмытгес ик но. Бертыса но кин милемды вите. Выльысь юрт пуктыны кынармы уз ни тырмы. Ма, собере татчы выжыяськимы ни, лэся. Емышсэ но кӧня сиемед потэ - си. Арбузэн пудомес но сюдӥськом, виноградэн вина пуктӥськом. Нош дор палан куд-ог гуртысь пиналлы арбуз, персик гужемлы огпол ке но йӧтэ меда? Озьы-а, тазьы-а но доредлэсь палэнын улон мӧзмытгес ик, дыр. Сое вераськемъя но шӧдыны луоно. Нош мон шуысал на: "Куноын умой, дорын эшшо но умойгес". В. КУТУЗОВА. Михаил Шишкин: "Мынам удысэ - наука" Политикъёс политикаен гинэ уг выро, вань мукет но ужъёссы. Михаил Иванович Шишкинэз республикаямы но солэн столицаяз ӟеч тодо. Пӧртэм аръёсы ужаз партийной но хозяйственной кивалтӥсь луыса. Дэбесысь райсоветлэн исполкомезлэн председателез, партилэн Дэбес райкомезлэн нырысетӥ секретарез, партилэн Удмурт обкомезлэн кыкетӥ секретарез, УАССР-ысь Госпланлэн кивалтӥсез, УАССР-ысь Министръёслэн Советсылэн председателезлэн воштӥсез. Бырйылэмын РСФСР-ысь Верховной Советэ но УАССР-ысь Верховной Советэ депутатэ. Котькуд адямилы та быдӟа дан уг лыкты. Дан сьӧры - секыт но бадӟым уж, дугдылытэк дышетскон. Михаил Иванович басьтӥз куинь вылӥ образование. Экономической наукаосъя доктор, профессор, Информацияя международной академиысь академик, Удмурт Республикаысь Кун Кенешлэн депутаэз, Кун Кенешлэн Президиумезлэн членэз, Эскерон палаталэн кивалтӥсез. - Михаил Иванович, нуоно ныпъетты туж бадӟым, ужды ялан калык син шорын. Кудӥз та удысъёсты пӧлысь улонады валтӥсь инты басьтэ? Кызьы ваньмызлы дырды тырме? - Дыры ноку но уг тырмы, мон понна со - самой дуно арбери. Нош наука но политика сярысь ке верано, соос ог-огзылы уг люкето, юртто гинэ. Мон ужасько на гурт улонъя академиын. Лекциос пыр, мукет преподавательёсын ӵошатыса, вазьгес но трос тодматыны быгатӥсько шаермылэн огъя экономической но политической югдуреныз, выль законъёсын. Со мынам уже. Дыр туж ӝог ортче. Туннэ быдэстонэз ӵуказелы кельтыса, котькӧня уиськы - уд сутылы. Соин ик арнялэн кутсконаз котькуд нуналме минутэн-минутэн пусъёно луэ. Эскерон палатаын трос дыр басьтэ документъёсын ужан. Вазиськонъёс нуналлы быдэ вуо. Соосты, огзэ но палэнтытэк, пумаз- йылаз вуттоно. Тросэз ӝожтӥськонъёс герӟаськемын бюджетэ но бюджетэ пырисьтэм коньдонэз умойтэм кутонэн, калык ваньбурез суп-сап каронэн. Таӵе гожтэтъёс вуизы Якшур-Бодьяысь, Завьяловоысь но куд-ог мукет районъёсысь. Законэз тӥям понна, валамон, котькудӥз кыл кутыны кулэ. Умойтэм ужъёссы понна вань ни пытсэт сьӧрын пукисьёсыз но штраф улэ кыскемъёс. Пусъеме потэ тани мае: котькудӥз эскерон кыӵе ке но пайда вае, пытьытэк уг ортчы. Нош ма луысал меда, Эскерон палата ке ӧй кылдысал? Ми ведь шарае поттӥськом ай азьвыл аръёсы лэсьтэм янгышъёсты, туалаоссэ умой- умой копалтытэк. Толэзьлы быдэ кылзӥськом кудзэ ке но министрез. - Эскерон палатаез ӵемысь пыкыло, кутэм решениоссэ пумозяз уг быдэсты шуыса... - Мон таин соглаш ӧвӧл. Тани малы. Котькуд вазиськонъя ӝегатскытэк кылдытӥськом рабочей группа. Люкам материалэз палатаын сэрттэм-пертчем бере келяськомы правительствое яке прокуратурае. Соос верало берпуметӥ кылзэс. Эскерон палата ваньзэ син шораз возе, кулэ дыръяз выльысь кутскыса ӝутэ но бугыртэ та ужпумез. Озьы, кылсярысь, луиз "Плодоовощ" огазеяськонэн. - Михаил Иванович, вераськонмес туннэ мукетгес ӧре выжтэм потэ вал. Эскерон палаталэн уженыз газет лыдӟисьёсмес тодматъяськом. Соослэн тодэмзы потэ асьсэ сярысь но. Удмуртъёс пӧлын академикъёсмы сокем трос ӧвӧл уга. - Вордски Можга районысь Сибы-Можга вашкала удмурт гуртын. Йылпумъяй Можга селоысь средней школаез. Гуртысьтымы отчы куинь мурт гинэ соку ветлӥм. Дырыз сыӵе вал: ёрмон, курадӟон. Одӥг манет кисыяд шеде ке - тон узыр ини. Будӥ атайтэк. 1941 арын 8 июне сое армие басьто, ӵуказеяз мон вордскиськем. Тӥни озьы, ог-огмес адӟыны ӧз кылды. Атае нырысь нуналъёсаз ик шунды пуксён палан бырыны шедиз: одӥг гожтэт но, одӥг ивор но ыстыны вуытэк. Анае монэ огназ будэтӥз. Курадӟыса ке но улӥм, ялан дышетыны сюлмаськиз. Ачиз гинэ улонысь вазь кошкиз. - Асьтэлэн семьяды бадӟым-а? Пиналъёсты кыӵе сюрес бырйизы? - Улӥськом ньыль кузя, будо кык нылъёсмы. Ваньмы - бухгалтеръёс но экономистъёс. Кузпалы ужа аптекаын, валтӥсь бухгалтер луыса, нылъёсы - пичи предприятиосын. Туэ ватӥм кышноелэсь анайзэ Чернышева Мария Ивановнаез. Семьямы понна со - бадӟым ыштон. Республикаямы но тодмо адями вал - Удмурт АССР-ысь Верховной Советлэн нырысетӥ созывезлэн депутатэз, азьветлӥсь трактористка, стахановской движенилэн валтӥсь муртэз. Паймымон визьмо но чупрес кышномурт! Берпуметӥ сюресаз вань гурт калыкез келяз. Туж яратыса лыдӟылӥз "Удмурт дунне" газетэз: одӥг чурзэ но, одӥг кылзэ но кельтытэк... - Кыӵе газетъёс, передачаос тӥледды бордазы кыско? - Одӥг ар но кельтытэк басьтӥсько "Удмурт дунне", "Удмуртская правда" газетъёсты, лыдӟисько "Неделя Удмуртии", "Аргументы и факты", экономической газетъёсты "Советской Россиез". Телепередачаос пӧлысь туж яра "Играй, гармонь!", "Зеркало", "Вести", "Время" - выньмыз политикаен герӟаськемъёсыз. Соосты учкыса, улонэз котыр ласянь чакласькод: кинлы осконо, кинлы ӧвӧл туала вакытын. - Кызьы ортче ваньмон дырды? - Яратӥсько бакчаын ужаны. Шудья гуртын 20 сотка музъеммы, пичияк юртъермы вань. Отын асьмелы тырмымон бакча сиён но сӥль будэтӥськом. Варманае вань дыръя курег пузлы но, сӥльлы но магазинэ ветлэммы ӧй вал. Ваньмон дыр ке шеде, яратӥсько баянэн шудыны, кырӟаны. Студент дыръя трос гинэ концертъёсын ветлӥм вал. Бадӟым инты басьтэ егит учёнойёсты дасян. Соос мынам 12 мурт. Огез туэ наукаосъя кандидат ним басьтӥз ни. Мон понна со шумпотымон. Ушъяськем кадь медам луы, но арлы быдэ книгаосы пото. Али ужаськом студентъёслы "Мировая экономика" дышетон пособие дасян бордын. Со меӵак герӟаськемын туала экономикаен но рыноке выжоно амалъёсын. - Михаил Иванович, политикаен вырыса, наукалы дырды тырме на-а? - Тырме, котькуд минуттэ нуналлы быдэ шыръяса кутӥськод ке. Кыксы но та удысъёс ог-огенызы люконтэм герӟаськемын,соин ик эшшо огпол пусъё на: улонме соос узырмыто гинэ. - Кыӵе аръёс тӥ понна вунонтэм кылизы? - 1980-1981-тӥ аръёс, Афганистан, Кандагар. Отын ужаны кылдӥз партилэн ЦК-езлэн ыстэмезъя. Трос пол улонэн но кулонэн вискы шедьылӥ - улэп кыли. Ужамы ми калык пӧлын, властьлэсь кивалтон органъёссэ кылдытон но юнматон бордын. Ноку но уг вунэты таӵе учырез. Комсомоллэн представителеныз, егит пиен, огпол шедьтӥм куштыса кельтэм складэз, отысь - манной кеньырен мешокез. Ми понна со инмысь усем кузьым кадь потӥз. Афганистанын вал на уго эшшо огез кышкыт тушмон - сютэм улон. Нунал ортче, кык, куинь... быдэс арня - ыме поныны одӥг пыры но нянь ӧвӧл. Шедьтэм кеньырмес соку ик ӝук суралтыса сиим. Кӧтмы тыриз. Мешокез шунды шоры поттыса учкиськом но - гень-гень векчи нумыръёс. Сузям. Сюмаку юрдонэн мар ӧвӧл ни. Базаре сиён-юонлы потаны уг луы. Милемыз, ООН пыр ыстэм муртъёсты, возизы город сьӧрысь пичигес гинэ интыын. Война кутсыктозь, отын строительёс улӥллям. Самой шумпотон нуналэ - Афганистанысь потон, гуртэ бертон. Та вакыт сярысь тодэ ваёнъёсме одно ик гожтыны малпасько, али дыры уггес тырмы на, лэся. - Улонады ма лэсьтыса ӧд кадь вуэ на? Кудӥз малпанды быдэсмытэк кылле? - Вакчияк йылпумъянъёс лэсьтоно ке, ӝожтӥськыны номырлы. Котырам - оскымон семьяе, оскымон эшъёсы. Басьтӥ куинь вылӥ образование. Быдэс улонме сӥзи но сӥзисько яратоно удысэлы - наукалы. Депутат луыса, калыкен пумиськылӥсько, маин быгатӥсько - юрттӥсько. Шугъяськытэ тани ма: Удмуртиын экономической югдур уг тупатскы, уж уг мыны. Нош кӧня луонлыкъёс! Мон асме но татын янгышен лыдъясько. Эскерон палатаен кивалтӥсько бере, тырмымтэосты шараян бордын эшшо золгес ужано, дыр, солэн пайдаез быдэс республика вылын мед шӧдӥськоз. Вераськиз ЛЮДМИЛА ПЕРВОЗЧИКОВА. Фотоез ВЛАДИМИР КАМАШЕВЛЭН. ТАЕ ТОДЫНЫ КУЛЭ Умой улэмед потэ ке... Рынокен экономикае потон каньылэн уг мыны. Сизьым-тямыс ар талэсь азьло, данакез оске вал государстволэн, предприятиослэн юрттэмзылы. Но берло дыре югдур воштӥськиз. Адямилы табере ачиз сярысь пумен тросгес сюлмаськоно луэ, нош властьёс калыклэсь палэнско. Сое яркыт возьматэ пенсия тырон. Со туж пичи, адямилы шоро-куспо улыны но уг тырмы. Тӥни соин ик 1995 арын августэ Россиысь Правительство пенсиос тыронэз выльдонъя (реформа ортчытонъя) концепция кутӥз. Отын, кылсярысь, чакламын вал государствое пырисьтэм (негосударственной) пенсиосъя фондъёс кылдытъяны. Асьме республикаямы сыӵе фондъёс ужало ни. Вань со Удмурт Сбербанкын но. Соин ик газетлэн корреспондентэз Геннадий РОМАНОВ туннэ кенеше Россиысь Сбербанклэн Удмурт банкысьтыз валтӥсь специалистэн Елизавета ПЕРЕВОЩИКОВАЕН. - Елизавета Павловна, нырысь ик таӵе юанэ. Ваньмызлы рос-прос валэктэ вал тӥляд но мукет фондъёс сярысь? - Кызьы тодӥськоды, шаерамы ужа Россиысь Пенсиосъя фондлэн Удмурт ёзэз. Со кун ёз луэ. Нош милям кун (государственной) фонд уг луы. Малы со фонд кылдытэмын? Туала пенсия шоро-куспо уждунлэн одӥг куиньмос люкетэз гинэ луэ, яке куинь пичи уждун быдӟа. Отын кабзэ чакламтэ котькуд адямилэн азьвыл кӧня басьтэм доходэз. Нош пересьмем бере, умой улон вылысь, пенсия луыны кулэ шоро-куспо уждунысь 80-85 процентэз. Таӵе югдурез тупатон понна, кун пенсионной фондэн ӵош вордскизы кун фонд луисьтэмъёсыз. Озьы котькуд адямилы луонлык кылдытӥське ӵуказе нуналэз сярысь сюлмаськыны. Шуом, государство аслаз пенсиосъя фондэз пыр адямилы 30-40 процент (шоро-куспо уждунлэсь) сётэ, нош кылемзэ будэтыны быгато предприятиос но ачиз адями, негосударственной пенсионной фондэ пыриськыса. - Кызьы бен со лэсьтӥське? - Кун луисьтэм пенсиосъя фондэ коньдон висъяло асьсэлэн ужасьёссылы предприятиос, организациос, учреждениос но асьсэос адямиос. Берло сое котькудӥз басьтыны быгатэ (пенсие потэмез бере но дыр ортчемъя). Мукет сямен вераса, со лыдъяське ватсаса пенсия люкан (основноез вӧзы). Милям фондмы кылдытэмын 1995 арын, сётэмын кун лицензия. Кызьы верай ни, ужаськом нимаз адямиосын но предприятиосын. Фонд коммерческой ёз уг луы, аслыз пайда басьтыны уг тыршы - адямиос сярысь сюлмаське. Вань басьтэм доходэз мынэ калыклэсь пенсиоссэ будэтонэ. Быдэсъяське со кык амалэн. Нырысетӥез, адями ас мылкыд каремезъя, кварталлы быдэ фондэ 10 условной лыдпус мында коньдон сётэ. Одӥг условной лыдпус кутэмын США-лэн 1 долларез. Тырыны кутсконо, пенсие потон арлыдыд вуон азьын но собере. Льготноез но озьы ик кутске. Кык ар дыр ортчыса, солэсь вазь уг луы, вкладчиклэсь лыдъяло кӧня люкаськиз ватсаса пенсиез (отчы пыро адямилэн коньдон тыремез но фондлэн инвестициос чотын поттэм уксёез). Соя вкладчиклы пенсия тупатӥське, кӧня дырлы (5, 10, 15 ар) быръемзэ чакласа. Тӥни озьы, кӧня уксё люкамедъя, толэзьлы быдэ ватсаса пенсия вуоз. Кыкетӥез, вкладчик огкыл (договор) гожтыкуз ик тодэ ни, кӧня луоз солэн ватсаса пенсиез.Соя ик тупатӥське тыронэзлэн быдӟалаез, кӧня дыр сётонэз но басьтонэз. Соку адями сётэм кылзэ дыраз быдэсъяны кулэ. - Вкладчиклэн кыӵе правоосыз вань? - Фондэ уксё тырон вакытаз адями быгатэ пенсия люкан амалзэ воштыны, взнослэсь быдӟалазэ кулэстыны, вазьгес тырыны, огкылэзлэсь куштӥськыны но сётэм коньдонзэ басьтыны. Нош куке со огкылын чакламъя коньдон тырыны уг быгаты, соку пенсизэ кулэсто яке уксё сётонзэ берлолы кельто. - Нош пенсие потэм адямиос фондады кызьы пырисько? - Соос огпол коньдон сётэмзы бере, толэзь ортчыса, пенсия басьто ни. Сыӵе амал тупатэмын. Со сяна, огкылын адями быгатэ ассэ 1 но 2 группаен инвалид луэмзэ страховать карыны. Коньдон тырон вакытаз адями инвалид луэ ке, солы пенсия сётыны кутско но уксё тыремысь дугдэ (кылемзэ). Кин инвалид уг луы, солы страховой дунзэ сёто нырысетӥ пенсия басьтыкуз яке взнос пӧлаз пырто но берло пенсиез будэ. Адями тыронзэ быдтэ, пенсия басьтыны ӧдъя ке, солэн фондысь коньдонэз вылэ ватсаське инвестициос чотын поттэм уксё. Озьы солэн пенсиез арлы быдэ йылэ. Взносъёс инфляцилэсь утемын, со долларен лыдъяське. Адямилэн ватсаса пенсиез огкылын учкемлэсь ноку ичи уз луы. Малы ке шуоно, фонд коньдонзэ ялан будэтэ. - Фондды сярысь вакчияк вералэ ай? - Кык ар ужаськом ни. Туэ 1 январёзь фонд 13,0 миллиард манет коньдон люказ. 21000 адями пыриське, 96 предприятиосын, организациосын но учреждениосын огкыл кутэмын. - Елизавета Павловна, фондды адямиосты маин бордаз кыске? - Фондмы юн оскымон. Ведь учредителез луэ Россиысь Сбербанк, странаысь бадӟымез банк. Взносъёсты утён ласянь кыл кутэ но инвестициосын коньдон поттэ. Фонд арлыдо адямиослы, умойгес улон понна, уксё люканы юрттэ, предприятиослэсь данзэс ӝутэ, ужасьёссэ социально уте но специалистъёссэ юнматэ. Фондлэн ужан амалъёсыз уг ке ярало, асьтэлэсь ӵектонъёстэс но малпанъёстэс сётэ таӵе адресъя: Ижевск, Свобода урам, 139 номеро корка, 13-тӥ комната. Тел. 78-56-17. УДМУРТЪЁСЛЭН ӦТЧАМЗЫ АЗЬЫН Гырдалляно гинэ ӧвӧл - гыроно Бугырес ӝутскем мылкыдын ортчиз Можга городысь но ёросысь удмуртъёслэн огазеяськонзылэн ӧтчамез. Та ёзэн берло кык аръёссэ кивалтэ ни Александрово шор ёзо школаысь дышетӥсь Анатолий Анатольевич Комаров. Вераськыкуз со пусйиз, ёросысь удмуртъёслэн азьлань мыноназы вамышъёс шӧдскымонэсь шуыса (ачиз со кылем арын гужем Венгрие Дуннеысь финн-угор калыкъёслэн ИИ конгрессазы ветлӥз). Правление ас ужзэ пӧртэм ӧретӥ нуиз: национальной ужпумъёсъя, кадръёсты дасянъя, калык культураез азинтонъя, егитъёсын но школаен ужанъя. Выль кичӧлтонъёс но вал, кылсярысь, кылем арын толсур толэзе городысь удмурт нылкышноослэн клубзы ужаны кутскиз (кивалтэ педучилищеысь дышетӥсь Т. С. Иванова). Котькытын сямен ик, Можга ёросын но удмуртъёслэн огазеяськонзы куать ар талэсь азьвыл кылдытэмын вал, Удмурт культурая обществолэн ёзэз шуыса. Нош улон возьматэ: асьмеос мургес пыриськыны кулэ общественно-политической улонэ. Огинтыын тэтчан, кырӟан-эктон ужрадъёс гинэ ке, луизы, кыдёке азьпала учкыны ум быгатэ. "Гырдалляно гинэ ӧвӧл - гыроно", - тазьы яркыт вераз Можга ёзлэн кивалтӥсез. Политика ужпумен герӟаськем гердъёсты пыр-поч, валамон сэрттӥзы- пертчизы "Удмурт кенешлэн" валтӥсь адямиосыз В. А. Осипов но Л. Д. Загребин. - Асьмеос ӵем дыръя политической ужпумъёсы пыриськиськом культура пыр, - шуиз Леонид Дмитриевич. - Али бадӟым вераськон мынэ кыл сярысь Закон котырын. Со али но кутэмын ӧвӧл на. Та асьмелэн бадӟым ужпуммы.. Тани асьмелэн 200 пала выль удмурт кылъёс кутыны дэмламын вал. Удмурт Республикалэсь Конституцизэ выль кылъёсын гожтӥм. Туж секыт вал валаны. Озьы пумен 40 выль кыл кельтӥм, нырысь ик - "элькун" кылэз. Со бордысен кутскиз Кун Кенешын кыл ласянь нюръяськонмы. Можга ӧтчамын озьы ик огез но мукетыз вераськизы, Удмурт дунне" газет "валантэм кылын" гожъяське шуыса. - Та "висён" удмурт радио бордысен кутскиз, - шуиз А. А. Комаров, - "Удмурт дуннелы" но палаз. Но... вал вылэ пуксьыку чаклано, кызьы пуксёд, собере - кызьы васькод. Эсэпсэ валаны кулэ. Удмуртъёс одӥг писпуэз но чакласькытэк уг ӵого вылэм. Тыршелэ, ужалэ, но калыклы пумит эн мынэ. Та ласянь, зэмзэ но, вераны кулэ: оло, куддыр мултэссэ ӵогиськом. Удмуртысь ӟуче укыр тыршыса берыктэм кылъёс шугомыто ик, дыр, валанэз. Словарьысь утчаськыны, йырвизьзэ бергатыны котькудӥз уз тыршы. Школаысен, пиналъёс бордысен, пумен-пумен кутсконо, дыр, вунэм, вужмем но выль кылъёсты улонэ пыӵатыны. Можга ёросын удмурт кыл пыриз ни ӟучомем школаосы но. Гороноын со понна нимысьтыз адями пуктэмын. 1 но 10 номеро школаосын анай кыллы дышетон радъямын, мукетъёсаз факультативъёс нуисько. Удмурт кыллэсь палэнскемын на. Можгаысь медучилище, ветеринарной колледж но мукетыз. (Соин ик татысь егитъёс "Шундылэн" ужрадъёсаз но туж уг пырисько.) Удмурт сямъёсыз котькуд предметэ пыӵатон, озьы ик удмурт кивалтӥсьёсты будэтон сярысь тужгес сюлмасько педучилищеын. Удмурт огазеяськонлэн зол юрттӥсез луэ "Можга иворъёс" газет. Ёросысь 30 сюрслэсь трос удмуртъёс пӧлысь, туж жаль, 180 мурт гинэ солы гожтӥськемын. Нош "Удмурт кенешлэн" Можга ёзэз коньдонэн юрттэмен, та издание вуэ котькуд национальной школае. (Озьы ик та газет утемын вал быремлэсь.) Ӧтчамын пыкылӥзы центральной изданиосыз, телевидениез, вылӥ кивалтӥсьёс понна гинэ ужало шуыса. "Уката ик быръёнъёс азьын, - шуиз 3 номеро школалэн азьвыл директорез М. А. Алексеев, - кутске ини котькудӥз ас палзэ гинэ мактаса вераны. Нош огшоры адями, гуртын улӥсь - солэн али тужгес секыт улонэз - со сярысь сюлмаськон ӧвӧл. Соин ик политика - али самой кулэ уж. Можга удмуртъёс зэмзэ ик туж сюлмасько удмурт кивалтӥсьёсты будэтон сярысь, верасько асьсэ дорын усточиослэсь школа-интернатсэс усьтон пумысен. Бадӟым юрттэт (нырысь ик - видеокамера, автобус) кулэ луоз Бадӟым Сибыын усьтӥськись национально-культурной центрлы. Таӵе малпанэ вуизы: удмуртлыкез азинтон понна, юн герӟаськыса ужано интыысь кивалтӥсь органъёсын, котькуд гурт кенешын мед луоз оскымон, юрттыны дась адями. Т. ПЕТРОВА. Асьмеос кылём Россие Россие улыны мукет кунъёсысь (СНГ-е пырисьёссэ вератэк) нокин уг лыкты. Отпуске, ужъя ке шат, нош Россиысь... Посольствоос ивортэмъя, берло 15 ар ӵоже Россиез 2 миллион адями кельтӥз. Нош официальной статистика мукет лыдпус сётэ - 500 сюрс гинэ. Туннэ Россиысь ньыль кунъёсы кошко: Германие - 72 процент, Израиле - 14 процент, Америкае - 10 процент, Грецие - 7 процент. Немецъёс кык ӧрен кошко: Россиысь Германие но Казахстанысь но Средней Азиысь Россие. Еврейёс 1 миллион адями кошкизы (700 сюрсэз - Израиле). Уноез соос пӧлысь Москваын, Санкт- Петербургын улӥзы. Немецъёс Сибирьысь, Кавказысь, Волга котырысь улосъёсысь кошко. Вылӥ верам калыкъёс семьяосынызы вырӟо, нош ӟучъёс пӧлысь ӝыныез огназы кошко. Кыӵе мугъёс сюрес вылэ потто? Нылпиоссы сярысь сюлмаське 48 процентэз, Россиын улыны но ужаны шугъяське 42 процентэз, нацизэс ултӥямлы чидатэк 19 процентэз Россиен люкиське. "АиФ". Америка бере кылиз Ньыльдон кунысь дышетонлэсь ӟечлыксэ эскерон возьматӥз, асьмелэн пиналъёсмы математикаез но, литератураез но, географиез но ӟечгес тодо шуыса, Америкаысь но Европаысь дышетскисьёсын ӵошатоно ке. Солэн мугез герӟаськемын лыдӟиськыны яратэменымы, угось Россия азьло сямен ик самой лыдӟиськись страна. 50 процентэз нылпиослэн гуртазы пичи библиотекаоссы вань. Со сяна, соослэн мумы-бубыоссы но дышетскемын. 34 процент школьникъёслэн анайзы яке атайзы вылӥ образование басьтэмын. Таӵезэ пумитаны луэ Канадаын, Израильын, Литваын но Америкаын гинэ. Одӥг кылын вераса, сыӵе странаосын, кытын Россиысь кошкем ӟучъёс уло. Россиысь дышетӥсьёс уроклы дасяськыны, дышетскисьёслы но анай-атайёслы саклык висъянлы, быгатонлыкъёссэс будэтыны, лыдӟиськыны уно дыр быдто - 18,5 час арняскын, Япониын, кылсярысь, - 15 часгинэ. Озьы ке но, Азиын улӥсьёс пыр-поч дышетско. Дышетонлэн ӟечлыкезъя нырысетӥ интыын - Сингапур, Южной Корея но Япония. Кыкетӥ интыын 14 кун. Соос пӧлын Швейцария, Болгария, Россия, Франция, Таиланд, Израиль, Швеция. Америка куинетӥ интыын. Тунсыко соиз но: Азиысь нылпиос дышето ваньзэ, мае косо, ушъямез уг витё. Нош Западысь кунъёсын нылпиос бырйисько: кельше ке, дышето, уг ке, азьтэмъясько. Но асьсэос котьку но оско, ӟеч дышетско шуыса. "АиФ". УДМУРТЪЁСЛЭН ӦТЧАМЗЫ АЗЬЫН Ас кылыдлэн шунытэз 185 удмуртъёс, 25 ӟучъёс, кӧня ке бигеръёс, поръёс, мордваос но узбекъёс люкаськылӥзы "Удмурт кенешлэн" Як.-Бодья ёросысь ёзэзлэн ӧтчамаз. Та ёзлэн кивалтӥсез Валентина Никоноровна Иванова докладаз пусйиз, удмурт кыллэн данэз пумен-пумен будэ шуыса. Гуртъёсысь тросэнгес пото ни дышетскем адямиос - ӧнерчиос (специалистъёс) кивалтӥсьёс. Выльдӥсько вашкала калык киужъёс, йылолъёс, калыклэсь ӟеч сямъёссэ утьыны но азинтыны юртто музейёс. Ёросын кылдытэмын выль фольклор коллективъёс - "Кикы" но "Кизили". Умой ужаны луонлыкъёс вань ини: выль культура юртъёс ужаны кутскизы райцентрын но Чур посёлокын. Жаляса верамын вал, куддыръя ужам ужлэн емышез уг адскы шуыса. Тани куд-ог садикъёсын анай кылын дышето, нош нылпиос школае мыно но - мукет омыре кадь шедё: удмурт кылын дышетӥсь ӧвӧл ни. Ӧтчамын вераськон ӝутэмын вал пӧртэм выжыос огазеяськыса кылдэм семьяос пумысен но. Тани, шуом, удмурт семьяын ӟуч кен яке ӟуч эмеспи. Кызьы таӵе дыръя радъяно кусыпъёсыз, ог-огдэ умойгес валан понна? Та сярысь огъя кенешыны кышканэз ӧвӧл, малы ке шуоно, адямилэн ужазинлыкез потэ семьяын шудэз бордысь но. Мылкыд каремын вал: Удмурт культурая огазеяськонлэн Як.-Бодьяысь ёзэз ас котыраз тросгес калыкез люканы, ас шунытэныз огазеяны мед быгатоз. Ӟучомем нылпиослэн сюлэмъёсазы но со небыт тулкымъёс мед йӧтӥськозы. Л. КНЯЗЕВА. СПОРТ Велосипед Кылем арня вискын велосипедэн ворттылонъя Пермь областьлэн чемпионатэз ортчиз. Отчы ӧтемын вал Удмуртиысь спортсменъёс но. Бускельёсмы дорын валтӥсь интыосты басьтыса бертӥзы Юрий Трофимов, Алексей Медведев но Александр Стрелков. Шутэтскон нуналъёсы та выллем ик нюръяськон ортчиз Ижевскын. Ӵошатсконъёсы пыриськизы ог 200 велосипедистъёс. Удмуртиысь сяна, ӧтемын вал Пермьысь куноос. 10-11 аресъем пиос пӧлын финише котькинлэсь вазь вуиз Сергей Холмогоров, Ижевскысь 9 номеро нылпи спортивной школаын дышетскись. 13-14 аресъемъёс пӧлын вормиз Пермьысь Евгений Печенин, Играысь Юрий Трофимов кылиз кыкетӥ интые. 1982-1983 арын вордскемъёс пӧлын Ижевскысь Алексей Медведевлэсь кужмоез ӧй вал. Играысь Алексей Корепанов но Удмуртиысь командалы ӟеч очко ваиз - 16-17 аресъем пиос пӧлын со нырысь ик финише вуиз. Кужмоосыз пӧлысь кужмоосыз спортсменъёсмы та нуналъёсы мынозы Чебоксары городын ортчоно ӵошатсконъёсы. Нош отӥяз сюрес усьтӥське ни Москвае - велосипедэн ворттылонъя Россилэн чемпионатаз пыриськыны. Л. МЕДВЕДЕВА. УДМУРТЪЁСЛЭН ӦТЧАМЗЫ АЗЬЫН Кызьы улоно? Мар кароно? Улонмылэн ӧрыз чутрак воштӥськемен валче, уноезлэн таӵеесь юанъёссы кылдо, дыр. Куд-огез пырак мыным вазиське: яке пумиськыку, яке газетэ, телевидение гожтэт лэзьыса. Куро валэктон сётыны. Азьлань, пе, вамыштоно Асьмемыз пыкыло, уен-нуналэн индыло: "Бере кылиськоды. Тӥляд азьветлӥсьёсты, дышетӥсьёсты, вашкала пересьёсты калыкез кырыж сюресэ кожытӥзы. Адӟем кароно Шунды пуксён палан улӥсьёслэсь, цивилизованно улоно". Ма бен, асьмеос верамзэс пелямы понӥськом, лэся: пычкиськыса ик азинскыны выриськом. Тани, бере кылеммылэсь кышкаса, "вужезлэсь" куштӥськиськом, вылезлы дышиськом. Западын выллем ик кураськисьёсмы, куарулчиосмы, ужтэк кылемъёсмы, сютэм улӥсьёсмы вань ини. Будэ наркоманъёслэн но СПИД-эн висисьёслэн лыдзы. Покчиосыз город ураме огназэс лэзьыны дӥсьтоно ӧвӧл ни: оло быдэс бертозы, оло уз. Телевизорысь яке ульчаысь кышномуртэ интэмамзэс, адямиез жугемзэс нокыӵе кариськытэк учкиськом. Ум паймиське, дас ньыль аресъем нылъёс пинал ваё ке, быдэ вуымтэ кильтроберъёс, мугорзэс вузаса, кӧтсэс тыро ке. Ма, котькытын уксё кузёяське. Вожъяськиськом коньдоно адямилы. Йӧнолыклэн дуныз ышиз. Табере коньдонэн, котькыӵе амалэн ке но со поттэмын, басьтыны луэ диплом но, дан но, власть но. Палэнысь, тужгес но лымшор палась, лыктэмъёс олокытын но кузё луо. Крестьянэд соосын йырин будэтэм картофказэ, сӥльзэ но базарын вузаны уг ни быгаты - отчы пырыны ик уг лэзё. Коньдонтэк депутатэ но уд ни поты. Цивилизация, пе Дыртӥськомы Западлы укшаны. Соин тани, олокытӥзэ но возьматъяса, гольтыръяськись, удмуртлыкез быдтӥсь кырӟасьлы Удмурт мадонна ним сётӥзы (ма, гуртысь "бере кылем" йӧно нылэз уд данъя ини). Режиссёр кинояз, спектакляз артисткаез уг кылиськыты яке кышномуртэн пиосмуртлэсь лушкем кусыпсэс уг возьматы ке, аслыз бере кылем мурт кадь потэ, лэся. Ӝоген тани квартира понна тыронмы но азинскем кунъёсын кадь ик бадӟым луоз. Книга лыдӟисьёслэн, театре ветлӥсьёслэн лыдзы пумен кулэсме. Кунгож сьӧрын сямен ик, транспортэ билетъёс табере дуноесь ни - адямиос ог-огзы доры шергес но шергес ветло, корт ӧсъёс сьӧрын, тюрьмаын кадь, пунняськыса пуко. Эсьмаса, телефон пыр но кусып возён шероме. Вемеос быро. Котькудӥз ассэ гинэ тодэ, ас понназ гинэ улэ. Кудпала берга дунне колёсамы? Туннэ улонмы воксё лэсянтэм луэмын. Мясокомбинатъёс но йӧл заводъёс гурт калыклы 50,1 миллиард манет тырыны кулэ ни, нош уждун тыронъя пунэме пырон вуиз 88 миллиардозь. Колхозъёслэн но фермеръёслэн кужымзы уг тырмы ни будэтэм ю-няньзэс утялтыны. Ӵем дыръя соос продукцизэс но кытчы вузаны ӟудо. Государство, дуно дунын ке но, сиён-юон палэнысь басьтэ, аслэсьтыз ужась калыксэ уг утьы. Гуртъёсын техника вужме, ӝынызэ коть али ик кушты. Начарме музъемлэн ӟечлыкез. 1991 арен ӵошатыса, минерал сылалъёсты бусыосы поттон 86 процентлы синӥз, кыед поттон - 72 процентлы, чырс музъемъёсы изваска поттон - 94 процентлы, фосфор - 76 процентлы. 1992 арен ӵошатыса, сюро таза пудолэн лыдыз 24 процентлы кулэсмиз, парсьёслэн - 25 процентлы, ыжъёслэн - 99 (!) процентлы. Гуртэз азинтонлы республика бюджетысь 1997 арын висъямын 5,5 процентэз. Кытчы луиз Россилэн коньдонэз? Шымыртэмын крестьянэд. Государство уг утьы сое. Ваньбур поттӥсез но интеллигенциез сӥлы карем интые, данэ потто мурт кужымен улӥсьёсыз. Дугдыло ни заводъёс но. Ваньзэ куашкатыны дасясько. Куашкатыны угось секыт ӧвӧл. Тани огез туж капчи амал: оборотысь коньдонэз быдтӥськод. Визьмын ужало. Асьме экономикаямы берга кулэезлэсь 7 процентэз коньдон. Коньдон - со экономика удыслэн вирсэрез ук. Тани адямилэн мугорысьтыз вирызлэн куинетӥ люкетэз быре ке, со кулэ ук. Экономикалэн но организмез озьы ик ужамысь дугдэ. Асьмемыз куарето: "Тӥ ужаны уд быгатӥське, соин куанер улӥськоды". Алдаськыса веран та. Асьмелэсь кужыммес Москва кача налогъёс пыр, улӥ закупочной дунъёс пыр. Али Москваын берга Россиысь коньдонлэн 70 процентэз. Отын воротилаос узырмо но коньдонзэс кунгож сьӧрысь банкъёсы келяло. Зарниен басьтӥськом кунгож сьӧрысь курег макесъёс, шоколадъёс, кинофильмъёс, аракы, минерал ву, нылпи шудонъёс. Москваын али вузам сиён-юон пӧлысь воксё 6 процентэз гинэ Россиын поттэмын, нош 94 процентэз - палэнысь. Оло, асьмелэн шоколадъёсмы кӧшесьгес, водкамы лябгес, сылало вумы шӧггес, мультфильмъёсмы ӟеч сямъёслы уг дышето-а? Ваньмыз асьмелэн умойгес. Уг тырмы патриотизммы, ум быгатӥське данъяськыны, ум тодӥське дунмес. Асьмелэсь зарнимес лёгаса, муртлэн ыргонэныз мальдӥськомы. Кинъёс но кызьы узырмо Россиын? Та вакытэ ас кужыменызы ванё-буро луэмъёс 1 процент но уг люкасько. Пыд йылазы сыло на азьвыл юнмам колхозъёс но выль сямен ужась кӧня ке предприятиос. Россиын луонлык кылдытэмын мурт чотын узырмыны. Молокозаводъёс, мясокомбинатъёс, хлебозаводъёс уло, крестьянлэсь продукцизэ дунтэмен басьтыса; газовикъёс, нефтяникъёс, энергетикъёс узыресь инкуазьлэн ваньбуреныз; вузкарисьёс табыш басьто, калыкез алдаса, налоглэсь пегаса. Куд-огез заводъёсыз капыртӥз. Мурт чотын узырмо банкиръёс. Рыноке потӥськом шуыса алдало. Россиын рынок шуонлэн шӧмыз но ӧвӧл - татын эрик сётэмын кунэз, калыкез качаны, уждун тыршемъя уг тыро, квалификациез, быгатэмез, визез кулэезъя уг дунъяло. Кулэ-а Россилы кредитъёс? Ӧвӧл. Кунгож сьӧрысь кредит басьян йырдэ кыӵесэ туйнамлы укша. Кредит - странаез кескич амалэн качан. МВФ но мукет фондъёс, пӧртэм банкъёс кредит сёто но асьсэос кивалто сое кытчы кутонэн: верало, кыӵе фирмалэсь кыӵе дунын басьтоно вуззэ, кыӵе удыстэ азинтоно, кыӵе государствоен кусып тупатоно. Нош пунэмдэ дыраз ӧд берыкты ке, бадӟым штраф тыроно луиськод. Тӥни кыӵе шимес югдуре сюро пунэмаськисьёс. Польша пунэмаз вал 26 миллиард доллар. Процентъёсын, штрафъёсын валче пунэмез йылӥз. Со пӧлысь 40 миллиардзэ тыремез бере, эшшо 52 миллиард доллар кылиз на. Латин Америка кредитъёссэ тямыс пол берыктӥз ни. Нош тыриськонэз ӧз быры - со весь будэ. Али 400 миллиард долларлэсь уногес ини. Та кыӵесысь ноку уз ни потэ, дыр, Чили но, Колумбия но, Бразилия но. Нош кредиторъёслэн коньдон пуйызы чик ужатэк но арысь аре зӧка. Москваысь кивалтӥсьёслэн тае "тодэмзы уг поты". Мукет кунъёслы пунэм тыронэзъя Россия потэмын нырысетӥ интые. Али асьмеос тыриськом ВНП-лэсь 20 процентсэ. 1995 арын кредитмылэн быдӟалаез вал валовой национальной продуктлэн ньылетӥ люкетэз мында. Нош кылем арын - 50 процент пала. Шимес югдуре вуэмын Россиед. Асьмеос МВФ-ысь кредит басьяськом. Нош "новые русские" шуонъёс Швейцарилэн но мукет кунъёслэн банкъёсазы 300 миллиард доллар ёрос коньдонзэс тыриллям ни. Отысь соослы 6 процентъем табыш лыктэ. Россия инвестициос понна 8 процентэн ке но тыре, асьмелэн узырмемъёсмы асьсэ шаерзылэсь производствозэ улӟытон сярысь уг сюлмасько. Малыез валамон: капыръяса байкемын соос. Нош вор ноку но патриот уз луы. Россия араз 120 тонна пала зарни поттэ ке, чиновник воръёслэн тыршеменызы валче, со ваньмыз сямен кунгож сьӧры кошке. Алмазэз келяло ЮАР-ысь нимаз фирмае (дуннеысь алмаз ваньбурлэн 25 процентэз Россиын ук: кыӵе бадӟым узырлык со!) Озьыен, Россилы кураськыса ветлоно ӧвӧл - коньдондэ палэнэ келямысь дугдоно. Пырак шуэме потэ: "Туннэ нокинлэн кунмес улӟытон программаез ӧвӧл". Нош улӥськомы асьмеос Америкалэн куамын ар талэсь азьвыл дасям программаезъя. Россиез куашкатон программа со. Асьме странаысь производствоез чутрак кулэстыса, котькыӵе вуззэ асьмелы зарниен вузаса, США ворме экономической кризиссэ, соослэн калыксы но перестройка шуонмы кутскем дырысен Россия чотын ванёгес улыны кутскиз. Улонмылэн куашкамезлэн мугъёсыз сярысь Дунне вылын котьмарлэн сямен ик, мерлэн но (обществолэн) аслаз азинскон катъёсыз (законъёсыз) вань. Соосыз тодытэк, улонэз радъяны уг луы. Нош Россилы, В. И. Ленин сяна, тодӥсь-валась кивалтӥсь ӧз йӧты. Огез но йӧнала ӧз ятвылты дунне-колёсалэсь кудпала бергамзэ. Огез но санэ ӧз басьты Россилэсь историзэ но аспӧртэмлыксэ. Огезлэн но валамез ӧз поты крестьянъёслэсь но ичи лыдъем калыкъёслэсь кулэяськонъёссэс, мылкыдзэс, культуразэс, лул- сюлэмъёссэс. Соин улонмес кужен-вамен карылӥзы но карыло. Соин Россиын, эксэй дыръя сямен ик, адямиез адямилыкезъя но визьмызъя ӧз дунъялэ - дунъязы сюрлыез куасалъяськемъя, йыбыртъяны быгатэмезъя, ассэ но аслэсьтыз калыксэ вузаны быгатэмезъя. Азьлане мынӥськом кожаса быдтӥмы пичи гуртъёсыз; кивалтыны капчи мед луоз шуыса, одӥг колхозэ люкамы уно гуртъёсыз; центральной усадьбаосы пуктылӥм городын выллем коркаос; "культурной возь" лэсьтон понна сайкимы шур дуръёсысь арамаосыз; демократия шуыса куашкатӥм мӧйыослэсь но дышетӥсьёслэсь авторитетсэс... Ма, туж уно "визьмоесь" вамышъёс лэсьтӥмы... Улонмылэн куашканэз кутскиз Сталин эш бордысен. Сыӵеосыз философъёс "вульгарной материалист" шуо. Диалектикаез валамтэеныз, со улонлэсь огпалзэ гинэ чаклаз, крестьян сямен, котыр ласянь ӧз эсэпла, ӧз эскериськы. Соин ик Совето власть но ӧз кылдыты, социализм но ӧз лэсьты (сельсоветлэн коньдонэз но, властез но ӧй вал - ваньмыныз кивалтӥз партилэн райкомез; государство но райком быдэсак колхозэн кивалтӥзы; постановление кутылӥзы, ку, мае но кӧня кизёно: продукцидэ кӧняен вузаны, техника басьтыны дун пуктылӥзы; колхозникез музъем кузё ӧз каре -медо интые кельтӥзы; ваньмызлы раб психология пыӵатӥзы, со али тужгес но адӟиське ни). Ленин азьвыл ик куректылӥз, котырысьтыз эшъёсыз пӧлысь огез но диалектикаез уг ятвылты шуыса. Со угось ӟеч тодэ вал Платонлэсь верамзэ: "Кивалтӥсь одно ик философ луыны кулэ". Газетмес лыдӟисьёс пӧлысь куд-огез, оло, малпалоз: "Ма, перестройка шуонэз учёнойёс кутскизы кадь ук". Зэм, улонмес "выльдонлэн" прораб нергеосыз вал академикъёс Шаталин, Аганбегян, Заславская, член-корреспондентъёс Яковлев, Шмелев, Бунич, профессоръёс Гайдар, Попов, Собчак но мукет со выллемъёс. Зэм, соослэн дипломъёссы вань. Озьы ке но, Ленин соосыз философъёс пӧлы ӧй пыртысал. Таосыз но диалектикъёс ӧвӧл. Гурт калык сыӵеос сярысь тазьы шуэ: "Тодонэз трос, нош валанэз уг тырмы". Зэм но, школаын тодонлык гинэ сёто, дышетскисез улонмес котыр ласянь чакланы, валаны уг дышето. Соин ик, Дунне кутӥсь адями луон понна, диплом уг тырмы на. Гуртлэн цивилизациез аслаз Адямилыкез будэтон но диалектикаез ятвылтон понна, парта сьӧрын пукем сяна, одно ик калыкен ӵош улыны кулэ на. Тани гуртоос пӧлын дышетскытэк но Дунне адями луыло вал. Соослы угось калыклэн сюрс аръёс ӵоже люкам визез пыӵалляз, нодзэс волятӥз ужаса будон, быдэс гуртлэн улоназ пыриськон но бускельёслэсь верамзэс пелязы понон. Сталин 1929 арын общинаосыз, гурт кенешез быдтӥз но, калык пумен сӧриськыны ӧдъяз. Удмуртлыкмы но соку ик бырыны шӧтаз. Угось крестьянэн кивалтыны, солы визь тырыны кутскизы балтийской матрос Давыдов выллемъёс, палэнысь лыктэмъёс, щукарьёс. Соос ваньзэ "тодо" вал, соин гурт калыкен ӧз кенешылэ. Валамон ини, колхозникед малпаськемысь дугдӥз, одӥг нуналэн улыны кутскиз. Отысен колхоз ваньбур шоры мурт синмын учкон сям кылдӥз, вина юон вӧлмиз, йӧнолыклэн дуныз синӥз. Калык кусыпысь вашкала йӧно сям пумен тӧлӟиз - культураез, пе, клуб утёз. Мар карыны медо гуртъёсынымы? Быдэс дуннеын крестьянэз кыкетӥ сортъем муртэн лыдъяло, адями луэмзэ санэ уг басьто, адямилыксэ будэтон сярысь уг сюлмасько. Со, пе, городлы сиён-юон мед будэтоз, кӧтыз тыр мед луоз, мукетыз солы номыр кулэ ӧвӧл. Зэм но, озьы ик луэ. Тани Голландиын музъем ужзы ӟеч радъямын. Отын няньзы, картофказы но удалтэ, йӧл-вӧйзы но трос люкаське. Нош кыӵе уло фермеръёссы? Арняяз, техниказы вань ке но, соос 90 час ёрос ужало, вить армысь огпол отпуске потало. Ужзэс сяна, номыре уг тодо. Россиын но крестьян шоры вылласянь учко. Солэн культураез ӧвӧл, пе, городэз ке но сюдыны мед яралоз. Фермеръёс шымыртэмын. Колхозэз быдтыны чакламын. Москва музъемез вузаны дасяське. Дунтэм дунын сое басьялозы коньдоно лымшор палъёс, "новые русские" шуонъёс, кунгож сьӧрысь инвесторъёс. Бӧрысь музъем туж дуно луоз - юртъер пуктымон инты но басьтыны уд ни быгаты. Кельшымтэ адямиосыз "кузё" ужысь но, гуртысь но уллялоз, Кавказ палась яке кунгож сьӧрысь ас выжы калыксэ ваёз, аслэсьтыз катъёссэ (законъёссэ) пуктоз. Удмуртэд ас музъем вылаз кузё луэмысь дугдоз, ляльчие кылёз. Тани Кияса ёросысь Уддяди гуртысь предзы, таджик пи, ассэ музъем кузё, пе, кожа ни. Пенсие потэм Ӝакы апай, Ольга Соловьева, шуэ: "Предмы мыным колхозысь турын но, нянь но уг висъя. Мон тынэсьтыд ужамдэ ӧй адӟы, шуэ, война дыръя, Сталин дыръя сютэм ужаса улэмме, ӟеч ужаме понна орденъёс но медальёс басьтэмме санэ уг поны". Нош республикаысьтымы кивалтӥсьёс МТС-э берыктӥськыны малпало. Банкрот шуон колхозъёслэсь музъемзэс государство аслыз капыртоз, МТС-лэн техникаеныз ю-нянез утялтоз, нош урожаез быдэсак аслыз кароз. Крестьянэд музъемен но, поттэм ваньбуреныз но кузёяськыны уз ни быгаты. Сталин дыръя озьы вал - колхозлэсь 90 процент ю-няньзэ государство, трактор, комбайн сётэмез понна, аслыз каре вал. Озьыен, возьмано ӧвӧл пумаз вуэммес - гурт кенешъёс кылдытъяно, ӧтчам мед кузёяськоз музъемен но, гурт улонэн но. Гурт кенеш сярысь Гурт кенеш кылдытӥмы ке, со луоз зэмос граждан общество шуон. Соку кенеш луоз юридической лицо. Со быдэсак вань музъемен кузёяськоз: ачиз люкылоз сое кооперативъёслы, эштосъёслы, фермеръёслы, дышетӥсьёслы, врачъёслы, клубын но мукет удысъёсын ужасьёслы. Музъем понна налогез, ваньмызлэсь бичаса, государстволы тыре кенеш. Граждан обществоын государство дэменлыкъёслэн но, гурт кенешъёслэн но ужъёсазы уг пыриськы. Кенеш гурт улонлэсь котькуд удыссэ ачиз радъялоз: дыр тупатоз праздникъёслы но, пушмульы, шу бичанлы но; радъялоз вемеослэсь ужзэс; юрттоз шуге-леке вуэмъёслы, анай-атайтэк кылемъёслы; укылтэмъёслэсь, йӧнтэмъёслэсь, лушкаськисьёслэсь кылзэс юалоз. Кылзӥськисьтэмъёсыз, музъемзэс таласа, гуртысь но улляны быгатоз. Озьы каро вылэм азьло. Туннэ гурт улонэз кенеш гинэ тупатыны быгатоз. Кенеш гинэ дугдытыны быгатоз алама сямъёсыз, лушкаськонэз, аракы пушкы выёнэз. Азьвыл тани вань бусыосыз кенерало вылэм, пудоез пастухъёстэк гужембыт кырын возиллям. Нокин соосыз исамтэ. Адямиос туж кышкало вылэм мурт синмысь усемзылэсь, соин данзэс утиллям. Возьытлыкез, йӧнолыкез черк ӧз утьы, утиз ӧтчам - гурт кенеш. Старостазэс гуртоос асьсэос быръёзы. Со коньдон басьтыса ужалоз, кенешлэсь решенизэ быдэсъялоз, улонэ пыӵатоз. Огдыре ик со луоз сельсоветлэн депутатэз но пыроз ёрос кенеше. Выльдӥськонлэн кыӵе ке ӟечез вань-а? Вань. Тани куд-ог малпанэз газетын, митингын шара вераны дӥсьтоно ни. Президентлэсь "лысьӧмзэ миськыны" лэзё. Котькыӵе книгаосыз лыдӟыны быгатӥськомы ни. Луонлык кылдэмын демократиез азинтыны, граждан общество лэсьтыны. Выльдӥськон ӧй луысал ке, удмуртъёслэсь историзэс шараяны ӧй лэзьысалзы, М. В. Гришкиналэсь "Удмурты. Этюды из истории ИЪ-ЪИЪ вв." книгазэ поттыны ӧй лэзьысалзы, город школаосын удмурт кылэз ӧй дышетысалзы, удмурт съездъёс ӧй ортчытъясалмы, урамын но бадӟымесь юртъёсын удмурт кылын ӧй вераськысалмы - данъяськысалмы "интернационалист" луэменымы. Выльдӥськон кутскытэк, гурт калык али кадь бадӟымесь йыг-йыг коркаос пуктылыны ӧй быгатысал - солы ӧй донгиськысал кирпич но, шифер но, цемент но... Мар-о бен кароно меда? Огазеяськоно пичиесь но бадӟымесь дэменлыкъёсы. Тани али немецъёс но, еврейёс но, казакъёс но, вӧсяськисьёс но, огзэс-огзы утён понна, общинаос кылдытъязы. Ма, быдэс дунне озьы улэ: партиос, профсоюзъёс со понна ик радъясько ук. Асьмелы городын одӥг коркан яке артэ коркан улӥсьёсыз бускель кенешъёсы огазеяно. Ваньзэс бӧрысь зэмос "Удмурт кенеше" ӧтёно, кужымдэ возьматоно - Россиын бадӟым мыжыко дэменлыкез гинэ сӥлы каро, лябзэ уг утё. Вашкала улонысь, вуж шуыса, ваньзэ ик куштыны уг яра. Консерватор луоно, эволюция амалэн азинсконо. Кышномуртъёслэсь адӟем кароно: соос вашкала удмурт культурамес но утё, пумен выльзэ но вӧлмытыны ёрто, пиосмуртэ юскиськемезлэсь но куто. Асьмелы обезьян выллем вырыны уг яра - Запад цивилизациысь быдэсак ваньзэ басьтоно ӧвӧл - умойзэ гинэ: науказэ, технологизэ, ужан амалъёссэ. Улонмылэн шорсюлмыз радъямын мед луоз, крестьян цивилизацилэсь адӟем карыса. Нырысь ик валаны кулэ: адямилэн самой бадӟым тушмонэз - ачиз. Озьыен, асьмелэсь йырмес, улонэз валанмес умоятыны кулэ. Тани анае, зэмос Дунне адями, ушъяськем интые, шуылоз вал: "Визь тырме, нод уг тырмы". Со вань улонзэ ортчытӥз ужаса, муртъёслы юрттыса, олокин сярысь но сюлмаськыса, бускельёсын гурт калыкен умой кусып тупатыса, мурт синмысь усёнтэм вылысь тыршыса. Котькудмылы ик тыршоно астэ вормыны. Но таиз самой секыт удыс. Асьмеды угось Запад менталитетъя улыны дышетӥзы: инкуазен нюръяськыны, котырысь адямиослы визь тырыны, муртэ вормеменыд ушъяськыны... Астэ гинэ тодыса, адямилык уг буды - улӟытоно гурт кенешез, огазеяськыса улоно. Запад, общиназэ быдтыса, янгыш лэсьтӥз. Соин ик отын адямилыксы уг буды. Но асьсэды шонере поттыны выро - адями пушкын, пе, умоятыны луонтэм изьвер пуке. Мар кароно экономика но политика удысын? Быдӟым Отечественной война йылпумъяськем бере, Францилэн президентэз Де Голль луиз. Экономиказэс ӝутон понна, со тани кызьы лэсьтӥз. Люказ странаысьтызы ваньзэ кагаз долларзэс но США-лы сётӥз, куриз зарниен берыктыны (вань сыӵе международной право). Ну бен Дядя Сэм шуонэд пуштӥз ук. Нош кытчы пырод -кылзӥськытэк ӧйлась. Туннэ США-лэн долларъёсыз зарни ваньбурезлэсь куинь пол уногес ни. Америкаед быдэс дуннеын кузёяськыны кутскиз, кагаз доллареныз котькытысь котьмае басьтыны быгатэ. Али асьмелы но Де Голльлэсь адӟем кароно вылэм. Быдэс Россия кунысь долларъёсыз люкаса, Америкалы сётоно но зарниен берыктыны куроно. Казнамы соку ик пачылмысал, манетлэн дуныз долларлэсь вылӥегес ӝутскысал. Валамон, Дядя Сэмед туж кескич - сое гольык киын уд кырмы, солэн ӵыжаськон амалъёсыз трос. Нырысь ик, со сиён-юонзэ вузамысь дугдоз. Собере, мукет кунъёслэсь "суйзэс бералляса", Россиен вузкаронлэсь алоз. Ма бен, кивалтӥсьёсмы кышкалозы: угось соку лавкаосмы бушесь кылёзы. Нош малпаськыса ужад ке, та чакламез быдэстыны луоно. Котькызьы ке но, Россия пыдесъяськыса улыны кулэ ӧвӧл. Асьмелы кулэ парламенто республика. Ёртыса Конституциямы пыртоно кык палатаен парламент сярысь статья. Огаз палатаын удмурт депутатъёс гинэ мед луозы. Соку асьмеды утись законъёс кутыны капчигес луоз. Соку му вӧймылы, нюлэсмылы - музъеммылэн ваньбурезлы - асьмеос кузё луомы. Нош люкаськем коньдонэн заводъёсыз выльысь государстволы берыктоно, отын кузё кароно коллективез. Крестьянъёслы дотация лэсьтоно - быдэс дунне вылын озьы каро. Кулэ-а асьмелы президент? Ӧвӧл. Пастух яке вожак кулэ пудо уллёлы, нош адямиослэн асьсэлэн йырзы вань ке, соослы кивалтӥсь йыр кулэ ӧвӧл. Эксэй, генсек но президент кыдёке ик кошкемын ӧвӧл пастухлэсь но, вожаклэсь но. Соослы демократия кулэ ӧвӧл. Соосын ӧд нюръяськы ке, асьсэос эрик ноку уз сётэ. Соосыз чакласа ӧд улы ке, мыдлань кивалтозы, янгышалозы, лушкаськозы, йыртэмалозы. Западын демократиез нокин поднос вылын ӧз вайы - калык уно вирзэ кисьтыса басьтӥз сое. Али но ужаса улӥсьёс, забастовкаос, митингъёс, пикетъёс лэсьтылыса, асьсэды утё. Ужтэк кылид ке, тазалыктэ утьыны коньдонэд быриз ке, тонэ кунлэн президентэз но, нокин но уз утьы. Индиын, Австралиын, Япониын, Канадаын, Англиын - уно кунъёсын президентсы ӧвӧл. Нош соос уг куашкало. Альберт РАЗИН, Удмурт кун университетысь Адямилыкез эскеронъя институтлэн директорез. 16286 УЛОН ПЫРЫОС "Мын но ошиськы..." Нокызьы но йырысьтым уг поты туэ гужем луэм учыр. Спортъя ӵошатсконъёсын вал со. Пӧртэм интыосысь вуэм командаос умой интыяськемзэс "миськоно" кожазы нырысетӥ ӝытаз ик. Палэнэ ӧз кыле шофёръёс но. Соос пӧлысь одӥгзэ ӵуказеяз милиционеръёс ӝегатӥзы. Зынзэ шӧдыса, бадӟым штраф тырыны косӥзы. Нош соизлэн уксёез вылымтэ. Ма кароно? Юрттэт курыса вазиськиз бӧлякъёсызлы. Командаысь эшъёсыз лек пумиталлям. Ачид юид, ачид ик малпаськы, шуиллям. Собере ватсаллям на: коньдонэн юрттэм интые, ми тыныд премия но ум сётэ, квартира черодын но интыдэ воштом. Нош соиз азьпалан сылэ вылэм ни. Йырзэ ошыса, егит воргорон вамыштэм правоез утисьёс доры. Уг шедьтӥськы коньдон, ма карыны уг тодӥськы, киоссэ вӧлъям янгышам мурт. Нош соосыз серекъяса кадь индылӥллям: "Мын но ошиськы". Лек кылъёсын тырмем сюлэм ма карыны ёрмиз. Юрттэт интые но уродос кылъёс кылӥз бере, ма кароно? Малпаз, лэся, кинлы со кулэ на шуыса. Автобусаз потӥз но... кошкиз, шонерзэ вераса, ошкиз. Номыр уд шуы, кӧшкемыт учыр. Кин татын янгыш? Шуг вераны. Огез тодмо: вӧзысьтымы адямиосты гажамтэмы, асьмемыз киямы кутыны быгатымтэмы куддыр тӥни кызьы берытскыса кошке. В. АНДРЕЕВА. УДМУРТЪЁСЛЭН ВИ ӦТЧАМЗЫ АЗЬЫН Дышетӥсьёс бырйизы дышетӥсез Ёросысь Удмурт кенешлэн ёзэныз кивалтӥсь Иван Колесников пусйиз туала улонлэсь виштыоссэ. Уката ик шуге-леке вуэмын асьме калык, шуиз со. Та дырозь ум быгатӥське удмуртлэсь асваланзэ (самосознанизэ) вылӥе ӝутыны. Быръёнъёс дыръя туж ӧжытэз удмуртъёс депутатэ пото, тросэз удмуртъёс куаразэс "уксё пуйыос" понна сёто. "Удмурт кенешлэн" ужамез сярысь ӟырдыт вераськизы дышетӥсьёс Валентина Зиятова, Валентина Шмыкова, Роза Кириллова, автозаводын ужась Валентина Петрова, нылпи садын ужась Елизавета Ишматова, писатель Кирилл Ломагин, "Чайка" клублэн директорез Вера Красильникова. Республикаысь "Удмурт кенеш" огазеяськонлэсь кивалтӥсьсэ Василий Осиповез но сюлэмшугъяськытэ удмуртъёслэн депутатэ ӧжыт шедемзы. Удмуртъёс пӧлын туж трос ужтэк кылемъёс. Инкуазьмылэн узырлыкез (му вӧй, нюлэс) калыкмылы ӧжыт пайда вае. Тодосчи Леонид Загребин пусйиз: ёросысь "Удмурт кенешлэсь" отчётэз пӧрмиз "Дэмен" культура обществолэн ужамез сярысь веранлы, мукет удысъёсъя номыр лэсьтэмын ӧвӧл. Шаплыгес пыроно политикае. "Удмурт кенешын" вань партиосысь адямиос мед луозы, соосты мед огазеялозы национальной ужпумъёс. Удмуртъёслэн ВИ съездазы рос-прос делегатъёсты быръёно. "Удмурт кенешлэн" Устинов ёросысь ёзэзлэн ужамез умоен лыдъямын. Ёросысь "Удмурт кенеш" огазеяськонлэн председателез луиз Евгений Егоров, Дышетӥсьёслэсь тодон-валанзэс будэтонъя институтын ужась. Н. ВОЗИСОВ. ОСКОН Валало ке - кайгу но кайгу ӧвӧл Республикаысьтымы инвалидъёслэн огазеяськонзылэн берлояз президиумаз кылзэмын Глазов городысь ёзэзлэн ужамез сярысь. Кивалтэ соин Артем Владимирович Савицкий. Егит муртлэсь кивалтон уж борды ӝабыр-ӝабыр басьтӥськемзэ одӥг пол гинэ ӧз пусйылэ ни. Глазовысь инвалидъёслэн огазеяськонзы кураськисьёс радын ноку ик ӧз ветлы. Ваньмыз со потэ городысь администрациен, валтӥсь предприятиосын,, ужбергатӥсьёсын одӥг кыл шедьтэм бордысь. Глазовысь инвалидъёслэн обществозылэн вань аслаз куинь предприятиосыз. "Башмачок" пыдкутчанъёс тупатъя-вуре, вань "Нептун" зоомагазинзы но лэсьтӥськон материалъёс дасясь предприятизы. Ӝоген басьтӥськозы ыж гон тугон уж борды. Та предприятиосын ӝыныез пала инвалидъёс ужало. Тыршемзы пайдаен берытске обществолы но. Инвалидъёс пӧлын ортчытъяло пӧртэм ужрадъёс, тужгес кулэяськисьёсызлы коньдонэн юрттэт висъяло, эмъюмъёсын юртто но мукет. Но глазовъёс понна тужгес но пусйымонэз - ӝоген усьтозы тазалыкез юнматонъя но шутэтсконъя инвалидъёслы центр. Республикаямы сыӵе центр нырысетӥез луоз. Городысь администрация, депутатъёс татын но валамзэс возьматӥзы. Центрлы шуыса висъямын 2 номеро нылпи садлэн кык этажьем юртэз, котырысьтыз 0,5 гектар музъемен ӵош. Та вакытэ отын мыно на лэсьтӥськон ужъёс. Нырысетӥ этажаз чакламын усьтыны аптека, магазин. Дунъёс отын трослы ӧжытгес луозы. Нош кыкетӥ этажаз инвалидъёс шутэтскозы, сӥль-вирзэс юнматозы. Ужалоз физиотерапияя сэрег, вазиськыны луоз психотерапевт доры. Центрез возьыны юрттоз коммерция амалэн поттэм коньдон. Нош производствозэс паськытатыны глазовъёс эшшо но выль амалъёс утчалозы но шедьтозы. Л. МАЛЫХ. Асьмелэн Надежда Дуровамы Асьме историын трос ожъёс вал ини. Соос пӧлын бадӟым инты басьтэ 1812 арын Отечественной война. Та ожмаськонъёсын ӟуч армия но Россиысь калык аслэсьтыз яратоно шаерзэ утён понна нюръяськыса вормиз Наполеонлэсь кужмо армизэ. Юнме шат Москвалы 850 ар тырмонзэ пусйыку, Бородино дорын ожмаськонлы 185 ар тырмемен валче, уно сюрс адями ветлӥз та ож бусые. Бородино черкогурт интыяськемын Москвалэн шунды пуксён палаз 124 иськемын. Ӟучъёслэн войскоязы 120 сюрс мурт вал, нош французъёслэн - 135 сюрс. Та ожмаськонэз умой возьматэ Москваысь Кутузов проспектысь 1962 арын 18 октябре усьтэм "Бородино ож" музей-панорама. Мыным но шуд усиз татчы пыраны.. Музей сылэ вашкала Фили гурт интыын. Отын 1812 арын сентябре крестьянлэн А. Фроловлэн юртаз ӟуч армиен кивалтӥсь М. И. Кутузов кӧня ке дырлы Москваез ожмаськытэк кельтыны косэ. "Москваез кельтыса, Россия уз быры, - шуиз Михаил Илларионович. - Нош армиез ӧм ке уте, быроз Москва но Россия". Та коркаез калык берло "Кутузовлэн юртэз" шуыса нимаз. Та оже пыриськиз Сарапулын вордскем Надя Дурова но. 1807 арын сӥзьыл эксэйлы Александр И-лы куриськон вуиз. Отын верамын вал, Сарапулын улись коллежской советник аслэсьтыз Надя нылзэ, пе, утча. Со дорысьтызы пегӟыса, Конопольской рядовой Александр Васильевич Соколов нимын тушмонъёслы пумит нюръяське. Таӵе гожтэтэз басьтэмез бере, эксэй косӥз Саша Соколовез Петербурге вайыны. 1807 арын 31 декабре Надяез эксэй доры вуттӥзы. "Мон кылӥ, - шуиз Александр И, - тӥ пиосмурт ӧвӧл. Зэм-а со?" Дурова ӧз танӥськы. Но со быгатӥз эксэез оскытыны, странамес утён понна вань, быгатонлыксэ сётоз шуыса. Солэсь фамилизэ эксэйлэн нимыныз воштӥзы. Французъёсын ожмаськон дыръя, Смоленск дорын пичи эскадронэн умой кивалтэмез понна Александр Александровичез генерал Раевский ушъяз. Корнет Александровлэн эскадронэз Бородино дорын но тушмонлы пумит атакае трос пол поталяз. Одӥгаз атакаын сӧсырмыны шедиз ке но, ож бырем бере гинэ, лазаретэ мыныны мылкыд кариз. Ӟырдыт ожмаськемез понна корнетэз поручике выжтӥзы. Йӧнамез бере Дурова мынӥз Кутузов фельдмаршаллэн штабаз но солы ординареце куриськиз. Михаил Илларионович паймиз тодмотэм поручиклэн таӵе куронэзлы, но со дорын Александровлэн сылэмез сярысь тодэмез бере, сое ӟыгыртыса вераз: - Мон шумпотӥ тӥледын пумиськемелы. Трос пол кылӥ тӥляд подвигъёсты сярысь. Тӥ мыным весяклы ординарец луоды. Но кык толэзь ортчыса, Надялэн ожын сӧсырмемез выльысь шӧдӥськиз, пыдыз висьыны ӧдъяз. Ординарецезлэсь курадӟемзэ адӟыса, Кутузов сое Сарапулэ отпуске лэзиз. Нылзэ шумпотыса пумитаз огназ кылем атаез. Йӧнатскемез бере. Дурова 1813 арын тулыс выльысь Кутузов доры кошкиз. Но Москвае вуэмез бере тодӥз Михаил Илларионовичлэн кулэмез сярысь. 1816 арын апреле Дуроваез, штабс-ротмистр ним сётыса, дораз келязы. Со сярысь кызь ар ортчыса, тодмо луиз, Пушкинлэн "Современник" журналаз "1812 ар сярысь запискаос" тодэ ваёнъёс потэм бере. Ӝоген Дуровалэсь "Девица-кавалерист. Происшествие в России" книгазэ поттӥзы. Пушкин геройлэсь гожъямзэ вылӥ дунъяз. Зэмзэ вераса, быдэс Россиен ӵош асьме Удмурт шаермы зол пыриськиз нырысетӥ Отечественной войнаын вормонлы юрттонэ. 1812 арын гужем Вятской губерниын калык ополчение люказы. Губернаторлэн куремезъя, сю пиосмурт пӧлысь куать мурт ополчение мыныны кулэ ке вал, крестьянъёс быдэс гуртъёсын отчы куриськизы. Соос пӧлы ик пыриськизы черкысь ужасьёс, азьвыл офицеръёс, солдатъёс но мукетъёс. Вяткаысь ог сюрс ополченец плысь кык сюлэсь уноез вал Сарапул но Глазов уездъёсысь. Отын вал Иж посёлокын улисьёс но. Сарапулысь дворянин немец Гельмгольц аслаз ужасьёсызлэсь пичи отряд люказ. Соослы пыӵалъёс сётӥз, дӥсяз но ачиз командир луиз. 1812 арын сӥзьыл Вяткаысь калык ополчение, Казаньысь но Поводьеысь ополчениосын ӵош шунды пуксён пала мыныса, Наполеонлэсь Россиысь пегӟись армизэ жугыны кутскиз. 1813 арын тулыс соос французъёсын зол ожмаськизы Эльба шур дурын но немецъёслэсь Дрезден, Магдебург, Битенбург но мукет городъёссэс мозмытыны юрттӥзы. Вяткаысь ополчение дораз бертӥз 1813 арлэн пумаз. Ополчениен кивалтӥсь Толстой, тау карем сяна, аслаз приказаз пусйиз Вяткаысь улӥсьёслэсь Эльба шур дурын кышкатэк ожмаськемзэс. Тушмонъёслэн Сен-Сир маршалзы но аслаз тодэ ваёнъёсаз гожтӥз Эльба дорын ополченецъёслэн ӟырдыт нюръяськемзы сярысь. Улэп кужымен сяна, калык быгатэмезъя юрттӥз аслаз ваньбуреныз но. Кылсярысь, Сарапул уездын улӥсьёс люказы ог сизьым но ӝыны сюрс манет коньдон, куать сюрс аршин басма но сюрс пудлэсь уно пызь. Глазов палъёс сётӥзы 3 сюрс манет коньдон но пызь. Пыӵал лэсьтэмен ӵош ик, Ижевскысь рабочийёс но коньдон ыстӥзы. Армилы но ополченилы юрттэм понна адямиослы кузьмазы нимысьтыз кылдытэм медальёс. В. Чернов. Арсеналын усьтӥськиз сюсь мугоръёслэсь адӟытон - выль возьматон быдэсак сӥземын кунысьтымы тодмо политикъёслы, артистъёслы, суредасьёслы, гожъясьёслы. Соос пӧлын - художник Илья Глазунов, кырӟасьёс Валерий Леонтьев, Лев Лещенко, Виктор Цой, Россия Федерацилэн Президентэз Борис Ельцин. Таос вӧзын ик - туж аспӧртэмлыко адямиос Иван Грозный, Малют Скуратов, Нестор Махно, Владимир Ленин, наполеон Бонапарт, Михаил Кутузов, Александр Пушкин ас калыксы понна весяклы луизы яркыт кизилиос. Выставка ваемын Москваысь, татысь сюсь мугоръёсъя театрысь. Отын ужасьлэн Вера Вячеславовна Беловалэн ивортэмезъя, сыӵе ик луло адямиез кыдытыны туж секыт. Со понна уно ӟигар кулэ. Вӧзаз ик - тодон-валан. Вуылэ Арсеналэ. Москваысь театр тӥледлы кузьмалоз трос паймымонзэ. Адӟытонысь суредъёс. Владимир Камашевлэн туспуктэмез. Кино Ван Дамм Та нимтулэз кино учкисьёс ӟеч тодо. Кытын Ван Дамм - отын учкымон фильм. Асьмеос вераськом "Шварценеггер - тодамы ваиськом Сталлонеез. Вераськом "Сталлоне" - син азямы пуктӥськом Ван Даммез. Бельгиын вордскем пияш зэмзэ но кино удысын синмаськымон артист луиз. Солэн вирсэръёстӥз ветлэ сьӧд куо адямилэн вирыз. Но со ӧжыт гинэ. Африкаын улэмез шӧдӥське мычиськем ангесаз но синъёсаз гинэ. Киноын соин артэ сыло Брюс Ли, Чак Норрис, Джеки Чан. Нош ваньмызлы тодмо луись Сталлоне но Шварценеггер соин ӵошатскыны уг быгато. Угось шпагат шуонэз но малпамтэ шорысь лэсьтыны уг дӥсьто. Ван Дамм дышемын аслаз сӥльвирыныз "шудыны", кужымзэ, быгатонлыксэ со фильмысь фильмын возьматъя. Тани "Патруль времени" фильмын шудэмез понна со 50 миллион доллар коньдон басьтӥз. Бен, критикъёс сое сокем уг ушъяло. "Патруль времени" фильмлэн режиссёрез Питер Хайамс сое кыкетӥ "Стив Маккуинэн" нимаз ке но. Отӥяз Ван Дамм шудӥз "Двойной удар", "Некуда бежать" фильмъёсын. Розанна Аркед, кылсярысь, Ван Дамм сярысь тазьы вераз: "Со быгатэ кикбоксинген вырыны, соиз зэмзэ но усто, нош сцена вылын вырон - созэ ини инмар солы сётымтэ". Соин ик, вылды, берло фильмъёсаз Ван Дамм режиссёрлэсь ужзэ но быдэсъя. Солэн "Дознание" фильмез алигес Голливудын возьматэмын вал. Калык трос гинэ люкаськылӥз. Ван Дамм туж яратэ боксэз. Татын со зэмзэ но усточи. Одӥгзэ но бадӟым ӵошатсконэз адӟытэк уг кельты. Кыкетӥез солэн яратоно ужез - шиш-кабаб (шашлык выллем маке) сиён пӧрам. Вылаз ик, солэн улон интыез нюлэсо-садо нёжалын - Голливудлы матысь Беверли Хиллзын. Валамон ини, солэн корказ вань уян бассейнэз но спортзалэз. Ван Дамм кык машина возе: Мерседесэныз" нуналлы быдэ ворттылэ, нош "Ролдс- Ройс" автомобильзэ праздникъёсы гинэ кутылэ. Солэн яратоно кырӟасьёсыз: Джонни Холидей, Джеймс Браун, Жак Брель; яратоно крезьгурчиез - Моцарт. Сталлоне сямен ик, Ван Дамм яратэ итальян сиёнэз, тужгес но соусэн спагеттиез (асьме сямен - макарон). Мултэс уг юы, усто виналы (бордо) ачиз ветлэ Францие но Бельгие. Эшшо одӥг сямыз сярысь вералом на. Ван Дамм чакласькыса улэ. Ог кызь процентсэ коньдонзэ вуоно дырлы кельтэ: мар но, пе, уз луы. Кышноеныз Дарсиен но Кристофер пиеныз тупаса уло. Бельгиын будэм пияш табере Америкаысь Огазеяськем Штатъёсын улӥсьёслэн гажано артистсы луиз. Солэн данэз быдэс дуннее вӧлмиз ини, тужгес но видеофильмъёсты учкисьёслэн лыдзы будэменыз. Тӥни озьы, али экранъёс вылын кузёясько Австриысь Шварценеггер. Италиысь Сталлоне но Бельгиысь Ван Дамм. Н. Маликов. Выльзэ яке вужзэ? Выль арысен вань мылкыд карисьёс пенсизэс выль сямен лыдъяса басьтыны быгатозы. Котькуд пенсионерлэн аслаз коэффициентэз луоз. Солэн быдӟалаез герӟаськемын шоро-куспо уждунэн, кӧня ар ӵоже ужамен. Нош лыдъян понна, нырысь ик ужам стажез тодоно (дышетскем аръёс стаже уг пыро). 1. Отӥяз - номыр воштӥськымтэ. Воргоронъёс, стажзы 25 ар ке, но нылкышноос, стажзы 20 ар ке, шоро-куспо уждунзылэсь 55 процентсэ басьто. Нормалэсь кемагес ке ужамын, соку котькуд "мултэс" арлы быдэ эшшо одӥг процент ватсаське на (75 процентозь). Кылсярысь, 30 ар ужам кышномурт уждунэзлэсь 65 процентсэ басьтоз. Та берло лыдпусэз люконо 100-лы. 0,65 - коэффициентлэн нырысетӥ люкетэз. 2. Басьтӥськоды берло кык яке котькуд бӧрсьысь вить ар ӵоже шоро-куспо уждундэс, кудӥзлэсь котьку но пенсидэс лыдъяськоды. Шуом, берло кык ар ӵоже басьтӥды 300 сюрс манет. Та лыдпусэз люконо Россиысь со вакытысь уждунлы (1995 ар - 472 сюрс, 1996 - 806 сюрс манет, шоро-куспо уждун - ог 640 сюрс манет). Асьме учыре 0,5 пала потэ. Табере та лыдпусэз ӵошатоно пенсиосъя выль "потолокен" - 0,7. Тӥляд 0,7-лэсь ичигес потӥз ке, басьтэлэ асьтэлэсь лыдпустэс (0,5), нош уногес ке - басьтэлэ 0,7. 3. Нырысетӥ пунктысь лыдпусэз (0,65) уноятоно кыкетӥ пунктысь лыдпуслы (0,5) = 0,325, Та лыдпус - тӥляд коэффициентты. 4. Та коэффициентэз уноятоно Россиысь берло кварталъя шор уждунлы. Пенсиосты выль сямен чотаны 1-тӥ январьысен кутскозы. Озьыен, уноятоно 1997 арлэн 4-тӥ кварталысьтыз шоро-куспо уждунлы. Специалистъёс малпамъя, Россиын солэн быдӟалаез 1 миллион манет луоз. Лыдъяськом: 0,325 х 1000000 = 390 сюрс манет. Сомында выль пенсиды. Нокыӵе компенсациос уз луэ. Пенсиосты будэтозы 3 толэзьлы быдэ, котькуд пенсионерлэсь коэффициентсэ Россиысь воштӥськем шор уждунлы уноятыса. Выль пенсия вужезлэсь куиньмослы уногес луоз. Пенсизылэсь будэмзэ нырысь ик шӧдозы соос, кинлэн ужам стажез бадӟым. Кинлы ке выль амал ӧз кельшы ке, со быгатоз пенсизэ азьвыл сямен - компенсациосын но индексациосын басьтыны. Соин ик асьтэос лыдъялэ, кудӥз пенсиды бадӟымгес луоз. Ужаськоды на ке, выль радлыкъя пенсия басьтон понна, ужысьтыды кошконо луоды. Госкомстатлэн страная шоро-куспо уждунэз возьматӥсь лыдпусъёсыз: 1980 ар - 169 манет, 81 ар - 172, 82 ар - 177, 83 ар - 180, 84 ар - 185, 85 ар - 190, 86 ар - 196, 87 ар - 203, 88 ар - 220, 89 ар - 240, 90 ар - 270, 91 ар - 548, 92 ар - 6 сюрс, 93 ар - 59 сюрс, 94 ар - 220 сюрс, 95 ар - 472 сюрс, 96 ар - 806 сюрс манет. Газетъёсысь. ТОДӤСЬКОДЫ-А? Дырыз уг тырмы синмаськыны но... 1988-тӥ арын асьме странаын нырысьсэ ортчиз "Чеберина" ним басьтон понна нылъёс пӧлын ӵошатскон. "Московская красавица=88" нимез соку басьтӥз Маша Калинина. Нырысь со сярысь уно гожъязы, телевизор пыр возьматъязы. Нош берло дыре сое вунэтӥзы кадь, со интые угось мукет "чеберинаос" кылдӥзы. Кытын бен со али, ма каре? Маша Калинина улэ Америкалэн Огазеяськем Штатъёсысьтыз (США) Лос-Анджелес городын. Голливудын йылпумъяз драматической искусствоя школаез, табере малпа кинофильмын шудыны. Отын сое мурт уг каро. Маша угось шалтыр гинэ вераське англи кылын. Америкаын улӥсьёслэн лыдъямзыя, Маша шоро-куспо улэ. Но со понна пӧсяно луэ: вис карытэк ушъяно кыӵе ке но парфюмериез, косметикаез, дӥськутэз, ӵемгес поталляно журналъёсын-газетъёсын. Америкаын Машалэн дырыз уг тырмы кинлы ке зэмос синмаськыны но. Со нокинлы но бызьымтэ на. Но Маша уг ӝожтӥськы улон-вылонэзлы. Солэн нуналыз ужен пачылмемын, соин ик малпа сыӵе ик ужась, аслэсьтыз улон сюрессэ ачиз лэсьтэм адямиен пумиськыны. Н. МАЛИКОВ. Туала улонлэн ымнырыз Тямыс толэзь куспын Сюмси районын 92 нуны вордскиз. Кык поллэсь трос, шонерак вераса, 191 адями сопал дуннее кошкиз. Быдэс страная лыдпусъёс возьмато: тросгес куло пиосмуртъёс, нош Сюмси районын та ласянь воргоронъёсты кышномуртъёс азьпалто. Уноез анай-апайёс пересьмыса куло, воргоронъёс - аракы юыса но шуккиськыса. Загсэ кузпалъяськонзэс гожтыны 37 егит семья ветлӥз, нош люкиськыны - 14. Лыдпусъёсты пырак шонер шуыны уз луы. Куд-ог семьяос кылдо яке быро, загсэ вуылытэк. Ваньмыз та туала улонлэн ымнырыз. Н. ВОЗИСОВ. Кытын тон, етӥн? Та дыре но Сюмси ёросын ю-нянь туж ӧжыт люкаське. Шорлыдын вераса, одӥг гектарысь туэ 11,3 центнер басьтэмын. Дас центнерлэсь трос люкаськиз "Заря", "Борец", ХХ партсъезд нимо, "Правда", "Нива", "Прогресс", "Луч" колхозъёсын гинэ. Хозяйствоос пӧлысь нимаз пусйыны кулэ "Нива" (председателез Валерий Никифоров, агрономез Спиридон Аитов) но "Правда" (председателез Михаил Мальцев, агрономез Любовь Кузьминых) колхозъёсты. "Ниваын" одӥг гектарысь люкаськиз 26,4 центнер, "Правдаын" - 16 пала. Та колхозысь кивалтӥсьёс бусыоссылэсь "сямзэс" умой тодо, дыраз соосты кыедало, гыро-кизё, котькуд аре ӟеч ю тысь дасяло, соин ик сӥзьыл кеносъёсы ю-нянь трос люкаське, гуртын улӥсьёслы но люкыны, пудо но сюдыны тырме. Та районысь ик Парин нимо, "Дружба", "Кенеш", "Заречное" хозяйствоос одӥг гектарысьтыз ог вить центнер сяна тысь ӧз басьтэ. Зэмзэ вераса та палась гуртъёслэн музъемъёссы начаргес, пырак луо гинэ, озьы ке но умой кыедаса, дыраз ӟеч кидысэн кизьыса бусыос кужымзэс "возьмато", тырмыт ю-нянь сёто. Берло аръёсы татысь лудъёс кыедэз уг "адӟо" ни. Сюмси районын пырак дугдӥзы етӥн, кенэм, сьӧдчабей, кӧжы киземысь, нош азьло аръёсы та культураос тырмыт урожай сёто вал. Картофка бусызы но "Победа", ХХ партсъезд нимо, "Заречное", "Правда", "Нива" колхозъёслэн гинэ вань на. Та лудъёссэс соос бушатыны уг дырто. Октябрь толэзьлэн кутсконаз 56 процентэз гинэ утялтэмын. Республикаын Сюмси район тужгес но ӧжыт ю-нянь кутсасьёс пӧлы пыре, кезъёсын, камбаркаосын артэ. Озьы ке но, матысь аръёсын ӵошатыса, туэ лудъёс тросгес пайда ваизы. Куазьлы "тау" кароно. Н. ВОЗИСОВ. УЧКЕМЫН ПАРЛАМЕНТ Кулэ-а Сиён-юонын корпорация яке берыктозы-а миллиардъёсты? Та ужпум туннэ ӧз поты. Газет кӧня ке пол гожъяз элькунысь Сиён-юонъя корпорацилэн берло куинь ар ӵоже бюджетысь коньдонэз тус-тас каремез но умойтэм кутэмез сярысь. Соин ик туэ Кун Кенеш та ужпумез сэрттон-пертчон но йылаз-пумаз вуттон вылысь, нимысьтыз комиссия кылдытӥз. Солэн ужамез сярысь дас куинетӥ сессиын ивортӥз комиссилэн кивалтӥсез Михаил Кокорин. Кызьы бен депутатъёс та ужпум шоры учкизы, кызьы эскерон ортчиз но кыӵе ужрадъёс кутэмын? Берыктозы-а ыштэм уксёез? Я бен, радызъя мадём. Депутат уно лыдпусъёс но учыръёс вераз. Куд-огез, оло, соос шонересь но ӧвӧл: яке кулэстэмын, яке будэтэмын. Но сессиын ваньмызлы шара ивортэмын бере, мон но гожто озьы ик. Нош талэсь пумзэ-йылзэ шедьтозы правоосты утись ёзъёс, нырысь ик прокуратура. Зэм, комиссия бадӟым уж нуиз. Кылзэмын министръёс, Правительствоысь адямиос но мукетъёсыз. Озьы тодмо луиз. 1994-1995 аръёсы огкылъёс кутэмъя коньдон сётъязы. Ю тысь утчанъя конкурс ӧз ортчытъялэ. Министръёслэн Кенешазы поставщикъёс (нянь сётӥсьёс) юнматымтэ. Коньдонъя министерство корпорацилы висъям уксёзэ кызьы кутэмез, нянь вуэмез ӧз чакла. Нош кулэ вал. Контрольно-ревизионной управленилэн (КРУ-лэн) ивортэмезъя, республикалы 27 миллиард манет тыр изъян лэсьтэмын, со пӧлысь 1 миллиардэз - Ижысь 1 номеро нянь комбинатлы. Кытчы бен уксё кошкиз? Коммерческой фирмаослы: Москвае, Махачкалае, Краснодаре, Ставрополе, Дагестанэ но мукет интыосы. Бюджетысь коньдон озьы тус-тас каремын. Та ужпумез учкемын ни Кун Кенешысь Эскерон палатаын, Правительстволэн кенешаз но мукет органъёсын. Кылсярысь, палата материалъёссэ келяз прокуратурае. Корпорацияя уголовной уж ӝутэмын. Но парламентын тодмо луиз, со каллен вырӟе, нош Россиысь Генеральной прокурор элькунлы юрттыны пумит луиз. Со сярысь депутатъёслы ивортӥз прокурор Виктор Походин. Нош М. Кокорин меӵак шуиз, мон уг оскиськы, прокуратура бюджетэ одӥг миллионзэ коть берыктоз. Депутатъёс докладчиклы уно юанъёс сётъязы. Но валтӥсез - кин отын янгыш? Сое бен вераны кулэ правоосты утись органъёс, следствие но суд. Озьы ке но, Михаил Кокорин тани ватсаз, "Ижевск" вузкарон юрт куашкамын, тыбыр вылаз кылле ни шуыса тодмо вал. Но сиён-юон корпорация солы 800 миллион коньдон висъя. ТД соин тыронъёссэ пытсаз, нош шаере нянь ӧз вуы. Корпорация ужаз Правительстволэн Тӧроезлэн воштӥсезлэн Владимир Гусевлэн кивалтэмез улсын. Нош со та ёзэз чакланы вунэтӥз, лэся, асэрказ лэзиз. Та ужпумъя сессиын ӟырдыт вераськон ӝутскиз. Юнме шорысь со ӧвӧл. Элькунамы улон-вылон уродме, югдур шугоме "Удмуртнефтез" кузьмам "Сиданко" нефть компанилы. Озьы ик ыштӥм "Удмурт Телеком" ОАО-ез. Кылемын на удмурт нимзы гинэ. Быдтыны дасясько ни 17 но 18 номеро кужмо лэсьтӥськон управлениосты. Пумен лябӟе промышленность, гурт хозяйство но мукет удысъёс. 40 процент коньдон висъяське (финансирование) Выжы лэзе кузьмаськон но мукет сыӵе выллем умойтэм ужъёс. ЯК-42 самолёт 32 миллиардэн басьтӥм но ыштӥм "АСПЭК" предприятиосты, хозяйствоосты пӧя, дуно дунын эстӥськон, пу но мукетсэ вуза. Тӥни соин ик, вылды, одӥгез депутат пырак шуиз: "Асьмелы калык уг оскы ни". Парламентын югдурез пыр-поч валэктӥз Правительстволэн Тӧроез Павел Вершинин, со шуиз: "Правительство "Удмуртхлебопродукты" управлениез утьыны быгатӥз. Нош соку, 1992-93-тӥ аръёсы Россиын нянь фондъёсты быдтӥзы. Удмуртилы арлы быдэ ичизэ 540-500 сюрс тонна ю-нянь кулэ вал. Ю тысьлы кун заказ быдтэмын. Кылдытоно вал ю тысья интыысь фонд. Нош кытысь коньдон? Шедьтоно бюджет ссуда. Сыӵе ужпум быдэстэмын. Шаер няньтэк ӧз кыльы. Вордскиз Сиён-юонъя корпорация, Кулэ-а туннэ асьмелы таӵе ёз? Одно ик. Но со мед ужалоз Гурт хозяйствоя но сиён-юонъя министерствоын, солэн син азяз. Соку сыӵе тырмымтэос но уз потэ. Нош янгыш муртъёс кыл кутыны кулэ". Уголовной уж ӝутэмын бере, следовательёс ужало. Соос вуылозы, прокурорлэн ивортэмезъя, Краснодаре, Ставрополе, Москвае, Казахстанэ, Дагестанэ но мукет азе. Кыл кутозы кин огкылъёс вылэ гожтӥськылӥз. Республикалы бадӟым изъян сётэмын. Но озьы ик лыдэ басьтэмын луоз, кыӵе условиосын, малы сыӵе огкылъёс кутэмын вал. Но шонерзэ вераса, сессиын таӵе но веран вал: куинь ар ӵоже нокыӵе ужрадъёс кутэмын ӧй вал. Меӵак озьы шуыны, оло, уг луы. Но бюджетысь ыштэм коньдонэз берыктон но югдурез тупатон вылысь, Правительстволы, правоосты утись но эскерись органъёслы тырмыт ужрадъёс кутоно. Со бордын ужпум. ГЕННАДИЙ РОМАНОВ. КОНСТРУКТОР ЯНГЫШ ӦВӦЛ пыӵалэз виркисьтонын кутӥськем понна Тазьы вераз Михаил Тимофеевич Калашников Ижысь мэриын радъям пресс-конференция дыръя. Туннэ солэн пыӵалэз ваньмаз сямен кунъёсы вӧлмемын. Витьтонлэсь ятыраз государственной луись пыӵал тӥрлыкен лыдъяське. "Ижмаш" сяна, сое бичаны кемалась дышизы выль "кузёос" но. Жаляса верано, быдэс дуннеын тодмо луись конструкторлы сӥзем музей-комлексэз юбилеёзь пуктыса ӧз вуттэ. Шуг-секытъёс кылдӥзы коньдон шедьтонэн. Но та мытэм ужез одно йылаз-пумаз вуттыны кулэ. Вуоно музей Михаил Калашниковен ӵош ужам эшъёсызлэсь нимтулъёссэс но возьматоз. Соос ӧжыт ӧй вал. Конструкторлы удалтылӥз юрттӥсьёсын. Калашниковлэн автоматэзлы 50 ар тырмонэз но Ижысь пыӵал тӥрлык поттонъя заводлы 190 ар тырмонэз шаерамы паськыт пусйыны дасясько 30 октябрьысен 3 ноябрёзь. Ортчозы пӧртэм ужрадъёс. Дорамы вуозы трос куноос, пӧлазы - кунсьӧръёсыз но. Э.КУМАЧЁВА. ЯЛАН УЖАСЬ АДӞЫТОНЫСЬ Ческытамды потэ - "Метеоре" ӝог лыктэ Шаерамы нырысьсэ усьтӥськиз ялан ужась адӟытон. Отысь учкыны луэ элькунамы поттэм вань сиён- юонъёсты. Асьсэлэсь продукцизэс возьмато пӧртэм ваньбурен предприятиос, но кун ваньбуре пырисьёсыз тросгес, акциосын огазеяськонъёс (АО-ос) ичигес на. Кӧня ке инты висъямын бускельёсмылы - Пермь областьлы но Татарстан Республикалы. Кылем пятницае, 10 октябре, "Метеорысь" адӟытонэ ветлӥз Кун Кенешлэн Тӧроез Александр Волков. Удмурт парламентлэн кивалтӥсез рос-прос тодматскиз Глазовысь но Сарапулысь кондитеръёслэн ческыт сиёнъёсынызы но кудӟытӥсь юонъёсынызы. Асьме продукцилы вылӥ дунъет сётыса, со шуиз: - Сиён-юонъёсмы ческытэсь, кунгож сьӧрысь ваемъёсыныз уд ӵошаты. Продукцимы рынокын ас интызэ паськытгес шедьтыны кулэ. Солы котькыӵе условиос кылдытоно. Соин ӵош ик ялан ужано продукцилэсь ӟечлыксэ ӝутон бордын. Сотэк вузъёсмес басьтӥсь уз луы. Адӟытонын шӧдскымон инты басьтэ Ижысь минерально-фруктовой вуос поттӥсь завод. Солэн продукциез калыклы кельше, тужгес но пластик бутылкаосын. Адямиос яратыса басьто "Боржоми", "Нарзан" но мукет вуоссэ. Адӟытон ӧсъёссэ усьтэ ӵукна 10 часэ. Ижын улӥсьёс но куноосмы татчы пумен тросгес лыкто. Адямиос веръяны-оскалтыны быгато пӧртэм пумо колбасаосты, минерал вуосты, конфетъёсты но мукетсэ. Г. РОМАНОВ. Нуналлэн тодметэз Вашкала календарья туннэ пусъё Покровез, та нуналысен, пе, шӧдӥське ни толлэн шокамез. Калык верамъя, кыӵе куазь луоз Пукрое, сыӵе ик сылоз быдэс толэз. Туриос лымшор пала ваньмыз кошкемын ке, вазь толмоз, кезьытъёс кузёяськозы. Покров нуналэ нуназеозь - сӥзьыл, нуназе бере - тол. Чаклалэ: тӧл туннэ шунды ӝужан палась ке пельтӥз - толэз лек луоз. Покров бере кутско сюанъёс, кылдо егит семьяос. Та нуналэ лымыяз ке - трос сюанлы. Бызьыны дасяськем нылъёс, Покровлэн кужымезлы оскыса, туж вазь султыса черке мыно, сюсьтыл пукто вылэм. Кин, пе, азьпалскиз - ӝоггес бызёз. Ӵуказе - Киприянлэн но Устиньялэн праздниксы. Вашкала ӵыжы-выжыосмы та святойёслы туж вӧсясько вылэм, вегинъёслэсь, тушмон синлэсь мед утёзы шуыса. Ӝытъёс пумен пеймытэсь, кузесь луо. Егит нылъёс но пиос шутэтскон нуналъёсы шулдыръяськыны потало, асьсэлы кузпал быръё, пукон ӝытъёс ортчыло. Отчы одно ик киужен лыкто, пумен кырӟало- верало. Югыт нунал туннэ кыстӥське 10 час 34 минут, ӵуказе - 4 минутлы вакчигес. Та нуналэ... ар талэсь азьло 15 октябре 1917 арын Ижевскын усьтэмын калык юрт. 14 октябре 1944 арын асьмелэн войскоосмы фашистъёс улысь мозмыто Украинаез. Соос пӧлын трос вал асьмелэн землякъёсмы но. 15 октябре 1970 арын быриз Надежда Курченко, АН-24 самолётысь бортпроводница. Кулэмез бере кышкасьтэм комсомолка пусъемын Горд Знамя орденэн. Глазов районысь Понино школа-интернатын, Надялэн дышетскем интыяз, усьтэмын музей. МЫРДЭМ, МЫРДЭМ Шаерысьтымы вузъёсын дышетскись егитъёс асьсэлэсь куаразэс возьматӥзы. Кылем шутэтскон нуналъёсы Республикаысьтымы студентъёслэн нырысетӥ фестивальзы ортчиз. Фестивальлэн азяз пуктэм ужпум - егитъёс куспын эшлыко кусыпъёс тупатон - быдэстэмын. Со адӟиськиз егитъёслэн пуромем мылкыдзыя но. Нош огинын котькыӵе шуг- секытъёсты капчиенгес вормоно, уго студентъёсмылэн сюлмаськонъёссы туннэ ӧжыт ӧвӧл. Оскиськом, кыкетӥез таӵе фестиваль эшшо паськытгес ортчоз. Ортчем ужрадэн пыр-почгес тодматом вуоно "Шунды" бамамы. Э.КУМАЧЁВА. ВИСЬЫСА БУРМЫТСКОН Кызьы тодмо, Кун Кенеш сессизэ выльысь усьтон нуналэ парламентлэн юртэз азе трос калык люкаськиз. Пикетэ потэмъёс вазиськизы депутатъёслы уждун тыронэз радъян пумысен юанэн. Сессиын кенешемын вал, республикамылэн кивалтӥсьёсыз пумиськыны кулэ обороналы ужась предприятиослэн ыстэм муртъёсынызы. Та решениез быдэсъяса, кылем понедельнике профсоюзъёслэн юртазы ортчиз бадӟым кенешон. Отчы ветлӥзы Кун Кенешлэн Тӧроез Александр Волков, Правительстволэн Тӧроез Павел Вершинин, Ижевсклэн вице- мэрез Вячеслав Засыпкин. предприятиослэн кивалтӥсьёссы но отысь ужасьёс. Пумиськонэз нуиз республикаысьтымы профсоюзъёслэн советсылэн председательзы Евгений Орлов. Эскерем ужпумъёс пӧлысь валтӥсьёсыз луизы уждун тыронэз радъян, нылпи пособиосты сётъян но улон юртъёсты интыысь органъёс кие выжтон. - Озьы тупаз, Москваын ӵапак туннэ эскеро оборонаен герӟаськем промышленностез азинтонъя концепциез, - шуиз Павел Вершинин. - Отчы мынэмын асьмелэн министрмы Виктор Долгов но Ижысь механической заводлэн директорез Василий Чугуевский. Бӧрысь та документэз ми учком Федерацилэн Кенешаз. Асьмелы дась луоно ужаны котькыӵе югдурын. Предприятиосты улӟытонъя план быдэсъяське, но шӧдскымон азинсконъёс ӧвӧл на. Правительство луэмезъя юрттэ кредитъёсын, соосты предприятиос дыраз берыктыны уг быгато ке но. Сояз яке таяз коллективын югдур понна кыл кутэ соэн кивалтӥсез. Директоръёслы ик сюлмаськоно люкаськем ужпумъёсты быдэсъян сярысь. Басьтом механической заводэз. Вань ук отын пайда ваись удысъёс, малы соосты уг луы паськытатыны но соос чотын мукетъёссэ азинтыны? Яке возьмалом-а Москваысь эшъёсты? Соос ӝог гинэ выльдозы. Но республикалэсь кулэяськонъёссэ лыдэ уз басьтэ. Асьмелэн тужгес но бадӟымез сюлмаськонмы герӟаськемын акциосын "Ижмаш" огазеяськонэн. Уго отын югдур нокызьы но уг тупатскы. Ужасьёслэн лыдзы толэзьысь толэзе кулэсме, уждун тырон ӝыны арлы ӝега ни. - Кылем арын уждун тырон фондмы 7 миллиард манет вал, - пусйиз пумиськонын "Ижмашлэн" кивалтӥсез Владимир Гродецкий. - Туэ - 16 миллиард. Бен, ми ӝутӥм уждунэз. Уго валаськом, уждун ӧз луы ке, адямиос но уз луэ. Ӝеганъёсты кулэстон вылысь, пӧртэм амалъёс утчаськом. Уждун чотын туэ 9 миллиард манетлы акциосмес люкылӥм. Соослэн дунзы син азьын будэ. Куд-ог эшъёс акциоссэс соку ик кык полэс дунын вузазы но коньдонлы пӧрмытӥзы, мукетъёсыз бӧрысьлы кельтӥзы. Правительство милемлы, зэмзэ но, юрттэ. Но монополистъёсты кияз кутыны со уг быгаты. Эстӥськонлэн, связьлэн люкетсы продукцилэн асдуназ 28 процент басьтэ, нош азьло со 6-8 процент гинэ вал. Та лыдпусъёс уг возьмато шат милемыз шымыртэмез? Энергетикъёс дунъёсты 63 сюрс пол йылэтӥзы, ми - 6 сюрс пол. Кызьы сыӵе условиосын ӟеч ужалод? "Аксион" огазеяськонлэн валтӥсь директорез Геннадий Кудрявцев веранзэ сӥзиз соцкультбытъя объектъёсты город кие сётонлы: - Улон юртъёсты ми ас бордысьтымы 1994 арын ик выжтыны кулэ ни вал. Уго та удысэ туж трос коньдон кошке. Государство чаклам мында компенсация уг сёты. Улон юртъёсты возён понна быдтэм коньдонэз берыктӥзы ке, ми тунэ ик сётъясалмы ужасьёсмылы уждунэз. Туэ понна но, вуоно арын нырысетӥ квартал понна но. Со сяна, Правительство мед юрттысал предприятимылы продукция понна коньдонэз дорамы вуттыны. Ваньбур келямын, нош уксёез ӧвӧл. 150 миллиард манет пала тыронъёс люкаськемын ни. Залысь юанъёслы валэктыкуз, Павел Вершинин пусйиз, электротыллы дунъёсты нимысьтыз комиссия тупатэ шуыса. Республикаямы 30 процентэз гинэ энергия асьмелы вуэ, кылемзэ палэнысь басьтӥськом. Соин ик дунъёс но бадӟымесь. Али Россия ӵектэ калыклы электротыл понна дунэз будэтыны. Асьме Правительство сыӵе малпанэн соглаш уг кариськы, пумитъяське. Но кемалы-а тырмоз солэн чиданэз? Сарапулысь предприятиос улон юртъёссэс город кие выжтӥзы ни. Но соослэн улонзы ӧз капчия ук. Озьыен, мукет амалъёсты но утчано. Люкаськемъёс азьын ӟырдыт вераськиз но рабочийёслэн уно юанъёссылы пыр-поч валэктонъёс сётӥз Александр Волков. - Асьмелы таӵе пумиськонъёс одно ик кулэ. Дэмен кенешоно сюлэмшугъяськытӥсь ужпумъёс пумысен. Ми кылзэс юалом кивалтӥсьёслэсь, тӥ - милесьтым. Сотэк экономикамес азинтыны уз луы. Асьмелэн нырысетӥез ужпуммы - ваньбур поттонэз 1991 арын мындаозь вуттон. Озьы луиз ке, каньылгес шокчом. Адӟытэк кельтыны уг яра азьлане пичи ке но вамышъёсмес. Куинь ар талэсь азьло республикамы Россиысь улосъёс пӧлын 40-тӥ-50-тӥ интыын вал ке, табере ог дасо пунктлы вылынгес, - шуиз Кун Кенешлэн Тӧроез. Механической заводысь одӥгез ужась интыысеныз вераз: - Милям югдур паймоно кадь. Цехлэн кивалтӥсез уг быгаты шедьыны заводлэн директорез доры. Мар веранэз на огшоры рабочийёс сярысь? Предприятие вӧзын дасоосын коммерческой фирмаос кылдытэмын, соос сяськаяло, нош ми тани таӵе пумиськонэ лыктыны трамвай билетлы сюрс манет шедьтыны шугъяськиськом. Кенешонэ пыриськемъёс отысь сокем ик ӟеч мылкыдын ӧз кошке. Огез тодмо: Адямиос, кызьы шуо, парзэс лэзизы, ӧжыт ке но буйгатскизы. Мынам йырам кылизы Владимир Гродецкийлэн кылъёсыз: - Бен, ми висём на, но висеммыя пумен бурмиськом... Ӵапак со ик оскон сётэ, обороналы ужась предприятиосын кылдэм секыт югдурез огъя кужымен тупатыны луоз ай шуыса. И.ЛЕБЕДЕВ. "Эш-Тэрек" - Йошкар-Олаын Удмурт кун национальной театрысь 32 артистъёслы шуд усиз Е. Загребинлэсь "Эш-Тэрек" трагедизэ Йошкар-Олаын возьматыны. Татын, Мари Эллэн шоркараз, 17-тӥ - 23-тӥ коньывуонэ ортче Финн-угор театръёслэн куинетӥез фестивальзы. Таӵе фестивальёсы асьме театр пыриськиз ни вал "Сирпу улын яратон" но "Эбга" спектакльёсын, нырысез ортчиз Ижевскын 1992 арын, кыкетӥез - Финляндиын 1994 арын. Таиз, "Эш-Тэрек" трагедия, буёлъёсызъя тужгес яркыт, шуыны луоз. Темаезъя но туж тупа: удмуртъёслэсь вашкала ӵыжы-выжыосынымы кусыпъёссэс возьматэ. Рольёсты шудо Россиысь дано артистъёс В. Загуляева, Г. Соловьев, П. Романов, Удмуртиысь калык артистъёс А. Лазарева, Ф. Будина, В. Байков, дано артистмы Г. Бекманов но мукетъёсыз. Т. НИКОЛАЕВА. Удмуртъёслэм ӧтчамзы азьын Али ик малпаськоно "Удмурт дуннелэн" куд-ог эшъёслы юанъёсыз: 1. Кыӵе мылкыдын тӥ витиськоды Удмуртъёслэсь ӧтчамзэс? 2. Кинэ адӟиськоды тӥ Тӧроын? Альберт Разин, Удмурт университетысь Адямилыкез эскеронъя институтлэн директорез, философской наукаосъя кандидат: 1. Шумпоттэ соиз: удмуртлыкез азинтонын берло аръёсы кӧня ке вамыш лэсьтэмын ик. Со шӧдӥське ёросъёсын конференциос ортчытъянын но. Администрациослэн кивалтӥсьёссы валасагес учко ни асьме ужпумъёс шоры, быгатэмзыя юртто. Соин ик вуоно съездмес оскыса витисько. Ӧтчаммылэн тулкымъёсыз вуозы кыдёкысь гуртъёсы, удмурт семьяосы. Мон уг вераськы ни отчы пыриськисьёслэн мылкыдзы сярысь - таосызлэн шумпотонзы пумтэм луоз, дыр. Со дыре ик кышкан вань, резолюциосамы пусъем ужпумъёс нош кагаз вылэ кылёзы шуыса. 2. Тӧро мед луысал Василий Андреевич Осипов. Солэн трос гинэ ӟеч сямъёсыз вань: пӧртэм адямиосты огазеяны тыршон мылкыдыз, удмуртлык понна сюлмысьтыз висемез, мукетъёсызлы юрттыны турттэмез. Со сяна, Осипов эшмы ӟеч тодэ калык куспо документъёсты, ветлэмын Швейцарие, эшъяське музон интыосысь калыкъёслэн азьветлӥсьёсынызы. Леонид Загребин, тодосчи, "Удмурт кенешлэн" исполкомаз быръем мурт: 1. Мон ветлӥ куать ёросъёслэн конференциосазы, шӧдӥ калыклэсь мылкыдзэ, валай, асьме калык берло аръёсы шӧдскымон будӥз шуыса. Соос ӝуто туж кулэ ужпумъёсты. Соин ик малпасько: ӧтчам ортчоз умой, солэн пайдаез одно ик луоз. 2. Валентин Кузьмич Тубыловез. Петр Люкин, Уваысь газетлэн редакторез: 1-2. Ёеросамы ортчем конференция оскон сётӥз, съезд но умой радъяськоз шуыса. Тӧрое дэмласал Василий Осиповез. "Удмурт кенеше" со лыктэм бере, уж вырӟиз. Кылсярысь, ёрос ёзъёсын кусыпъёс тупатскизы, ми доры кулэ документъёс, ӧтёнъёс вуылыны ӧдъязы. Таӵе мылкыдын ик Василий Андреевич азьланьтысал ке мытэм ужзэ, движенимылэн кужымез юнмасалыз. Ижевскысь нылаш - "вуюисез утись" "Гринпислэн кенешез" организацилэн Россиысь ёзэз ивортӥз Сочиын луэм учыр сярысь. Вуюисез утисьёс" огазеяськонысь экологъёс омырез кырсёмытонлы пумит ужрад ортчытӥзы. Тямыс нылъёс но пиос, жильыен думиськыса, ульча вамен султӥзы. Машинаос дугдӥзы, водительёс инкуазез яратӥсьёсты шӧтэм кылъёсын тышкаськизы. Ӵапак соку огезлэн грузовиклэн тормозэз сӧриськиз. Экологъёслы пегӟыны жильы люкетӥз. Корт арбери юн золтӥськиз но огзэ пияшез ӧжыт ӧз ванды, нош Ижевскысь 22 аресъем Аня Гошиковалэсь кизэ ишкалтӥз. Нылашез больницае нуизы. "Гринпислэн" пресс-секретарез Евгений Усов ивортӥз, "Вуюисез утисьёс" таӵе "шудонъёслэсь" уно пол алэмын ини шуыса. Соос адямиоссэс чик уг жаляло: августэ, кылсярысь, Ростовысь АЭС-ын жугиськон ӝутӥзы, но атомщикъёс соосты тышказы. "Комсомольская правда" Латвия нацистъёсты сӥлы каре Латвиысь обороная министр ӟечкылаз Арнольд Менцисэз - фашистъёс палан ожмаськем лейтенантэз, лётчикез, кудӥз война аръёсы латышъёслэсь эскадрилья кылдытӥз,- Латвилэсь вылӥ наградазэ, Куинь кизилиё орденэз, басьтэменыз. Ветеранэз-нацистэз но солэсь СС-ысь но СД-ысь эшъёссэ туала Латвиын вылэ ӝуто. Берло аръёсы историез татын выль сямен адӟо уго. Латвиез фашимстъёслэсь мозмытӥсьёслы отын инты ӧвӧл. Озьы ик соосты буре ваись памятникъёслы но. "КП" Футболлэсь бырон Иранысь Баболь городысь Мохаммед Фолади кулӥз сюлмыз путыса, Иранысь но Кувейтысь командаослэсь футболэн шудэмзэс учкыса пукыкуз. Со "скорой помощь" машинаын водитель луыса ужам. Та шудонэз адӟон понна, эшсэ ас интыяз ужаны косэм вылэм. Адямилэн эрикъёсыз понна! Буэнос-Айрес провинциысь судебной палата полициез кудӟемъёсты ульчаосын ӝегатэмлэсь алӥз, малы ке шуоно, со адямилэн улоназ пыриськем, пе. Авторадарлэсь уд пегӟы Цюрихысь властьёс США-ысь 280 сюрс долларен авторадар басьтӥзы. Техника юрттэ омырез кырсёмытӥсьёсты ӝегатскытэк шараяны. Авторадарлэн фотоаппаратэз синйылтэ укыр ӵындытӥсь машинаосты. Мандела маза уг сёты ЮАР-ысь президентлэн Нельсон Манделалэн 32 аресъем секретаршаез Лилиан Арисон выжтэмын огшоры уже - парламентлэн аппаратаз. Малы ке шуоно, солэн фотографиосыз потӥзы порнографической журналын. ИТАР-ТАСС. АРСЕНИЙ ЗАГРЕБИНЛЫ - 80 Яркыт кизили Тазалыкез утён удысын удмурт учёнойёсмы котькытынлэсь трос. Данакез соос шаерамы но, Россиын гинэ ӧвӧл, быдэс дуннеын тодмо. Сыӵе нимъёс пӧлы пыро Семен Ворончихин, Михаил Муравьев, Фома Сысоев, Арсений Загребин, Маргарита Зайкова но трос мукетъёсыз. Алигес Арсений Михайловичлы 80 арес тырмиз. Ижевскысь кун медициная академиын тодмо профессорлы медициная докторлы сӥзем сӥё- дано ужрад ортчиз. Сое ӟечкыланы лыктӥллям Москваысь академикъёс, элькунысьтымы кивалтӥсьёс но студентъёс. Кун Кенешлэн Тӧроез Александр Волков шуныт кылъёс вераз Арсений Загребин сярысь, быдэстэм ужъёссэ вылӥ дунъяз но Кун Кенешлэсь Почёт грамотазэ сётӥз. Дано учёноез озьы ик лулысь-сюлмысь ӟечкылазы академилэн ректорез Николай Стрелков, республикаысьтымы тазалыкез утёнъя министрлэн воштӥсез Владимир Гаврилов, Правительствоысь Нациосын ужанъя комитетлэн тӧроез Светлана Смирнова но трос мукетъёсыз. - Таӵе тодосчиосты мон ӧжыт тодӥсько,- ватсаз Россиысь та удысъя академик Лев Колесников.- Арсений Загребин усто анатомолог-морфолог луэменыз данак кунъёсын тодмо учёной луиз. Соин ик Россиысь 48 медицинской вузъёс пӧлысь тӥляд академиды валтӥсь инты басьтэ. Дорады Москваын, Санкт-Петербургын сямен ик, кунгож сьӧрысь егитъёс дышетско. Туж умой со. Кӧня ке коньдон поттӥськоды. Арсений Михайлович гожтӥз "Гиппократлэн сётэм кылыз" ("Клятва Гиппократа") книга. Со котькуд врачлэн, тодосчилэн ӝӧк вылаз улэ. Арсений Михайлович сярысь газетмы трос пол гожъяз ни. Таяз учыре но интымес ум жалялэ. Со ачиз но газетлы трос юрттэ, кылбуръёссэ но печатлам ни. Но Арсений Загребин калыклы тодмо зэмос тодосчи, учёной-анатомолог луэменыз. Сое тодо кызьы ке Канадаын но Аргентинаын, озьы ик США-ын но Германиын. Арсений Михайлович адямилэн анатомиезъя быдэс школа кылдытӥз. Юнме шат, ар ортчыса, асьме шаерамы, Ижевскысь медакадемиын ортчоз 4-тӥ международной конгресс. Дорамы лыктозы дуннеысь устоосыз пӧлысь устоосыз учёнойёс-анатомологъёс-гистологъёс. Нош Арсений Михайлович та удысын - самой яркыт пиштӥсь кизили. Куд-ог научной ужъёссэ солэсь асьмеос али но ум тодӥське на. Соос герӟаськемын космос наукаен но шара верамтэ на. Арсений Михайловичлэн дышетэм студентъёсыз-врачъёс кытын но уг ужало, элькунамы, конечно, тросгес. Нош куд-огез дышетӥсьсылэсь адӟем кариз, солэсь сюрессэ бырйиз. Тани Арсений Загребинлэн Кизнерысь дышетскисез Виктор Чучков солэн кафедраеныз кивалтэ ни: наукая доктор, профессор луиз, нош гуртоосыз-кизнеръёс Кун Кенеше депутатэ бырйизы. Удмурт парламентын мылысь-кыдысь ужа. Тани туж шуныт ӟечкылан ыстэм Москваысь эшез, бадӟым учёной Василий Куприянов. Та ужрадын пукиськод но малпаськод, ма, зэм ик меда Якшур-Бодьяысь удмурт пияш сомында, кылын верантэм трос ӟеч ужъёс лэсьтӥз ни. Сюлэсь уно научной ужъёсыз печатламын. Нош кӧня тодосчиос дасяз ни! Али но Арсений Михайлович ужа на, егит учёнойёслы, студентъёслы тодон- валанзэ сётэ. Академилэн коридоръёстӥз йыгмыт вамышъя, нокин солы 80 арес уз сёты. Берло аръёсы со кылбуръёсын сборник дасяз. Лякыт, зӥбыт сямо, зарни сюлэмо учёной сярысь шуизы, ӧвӧл, дыр, пе, солэн нокин шоры лек кылын ваземез, адямиез вӧсь каремез. Я бен, вакчияк ортчем сюрессэ но вералом. Егитъёслы но, арлыдоослы но со адӟем карымон. Арсений Михайлович вордскиз 1917 арын Як.-Бодья районысь Пичи Бодья гуртын нимаз ужась крестьянлэн (единоличниклэн) семьяяз. Михаил Загребинлэн куинетӥ пиез туж яратэ вал инкуазез. Дышетӥсьёсты дасянъя одӥг аръем курсъёсты быдтэмез бере, сое ужаны басьто районысь калыкез дышетонъя отделэ. Собере мединститутэ пыре но удмурт пилы юн удалтэ: пумиське академикен Василий Николаевич Паринэн. Со наукае сюрес возьматӥз. Институтэз 1940 арын витьлы гинэ (отлдичиен) быдтӥз но соку ик Горд Армие басьтӥзы. Быдэс войнаез ортчиз Военно-воздушной кужымъёсын (ВВС-ын), хирург луыса. Вал Испаниысь авиаполкын но. Кӧня, пе, кӧлымтэ уйёс вал, тодаз вае учёной. 1946 арын армиысь Ярослав областе лэзё, ЦРБ-лэн валтӥсь врачез луэ. Собере Новосибирске келяло. 1958 арын гинэ вордскем палъёсаз, Удмуртие бертӥз. Ужаны ыстӥзы Кизнерысь ЦРБ-е, валтӥсь врачлы воштӥсе пуктӥзы. Кык ар ортчыса, кандидат диссертация гожтӥз. Арсений Михайлович ужаз, тазалыкез утёнъя министрлэн воштӥсез но мединститутлэн ректорез луыса. Нош 1973 арын наукаосъя доктор луиз, диссертацизэ туж чебер утиз, но ар ортчыса, профессор луэ. Арсений Михайлович бадӟым общественной уж нуиз. КПСС-лэн ХХ съездэзлэн делегатэз но Россиысь Вылӥ Кенешлэн депутатэз вал. Кивалтӥз парламентын тазалыкез утёнъя комиссиен, 20 ар - анатомологъёслэн-гистологъёслэн огазеяськонэнызы. Солы сётэмын Удмурт Республикаысь дано деятель ним. Г. РОМАНОВ. Фотоез М. МЕНЛАДШИНЛЭН. Ньыльдонэтӥез крезьгуро сӥзьыл Удмурт Республикаысь Операя но балетъя кун театр 40-тӥ, юбилейной сезонзэ кутске Д. Пуччинилэн "Тоска" операеныз (афишаын со "Флория Тоска"). Быдӟым итальян композитор быдэс творчествозэ сӥзиз нылкышно сюлэмез сцена вылын усьтонлы, соин ик та музыкальной драмаын но нылкышно образъёс бӧрсьысь бӧрсе пуксё. Кырӟась Флория Тоска тырше ас яратонзэ - суредасез Марио Каварадоссиез утьыны. Но быре. "Тоска" опера удмурт сцена вылын нырысьсэ мыноз итальян кылын. Премьерае ӧтемын Москваысь Бадӟым театрысь но Санкт-Петербургысь артистъёс. Театрлэн балет труппаез туэ бадӟымаз. Выль солистъёс-вокалистъёс но вуизы. Валтӥсь режиссёре кутэмын В. Гончаренко, Ленинград консерваториез быдтэм адями, со странамылэн пӧртэм сценаосаз 80-лэсь уно крезьгуро спектакльёс пуктӥз. Али со дася "Дамских дел мастер" комедиез. Музыкалэн авторез - украин композитор И. Лукашенко. Учкисьёс та спектакльын пумиськозы тодмо артистъёсынымы Г. Городиловен но Л. Виноградоваен. Премьера луоз 22-тӥ ноябре. Азьпалан театр кутскыны малпа С. Рахманиновлэн "Алеко" но П. Чайковскийлэн "Евгений Онегин" операоссы борды. Выль балет спектакльёс бордын но ужало. Учкисьёс чидатэк возьмалозы, вылды, "Эсмеральда" балетэз, со гожтэмын В. Гюголэн "Собор Парижской богоматери" романэзъя. 15-тӥ ноябрьлы театр возьма бадӟым кунозэ. Балетлы сӥзем ӝытын эктоз быдэс дуннелы тодмо балерина, яркыт ӝуась кизили, СССР-ысь калык артистка Майя Плисецкая. В. ЛАГУНОВ. Усьтӥськиз удмурт школа Бигер шаерысь Менделеевск ёросысь удмурт гуртын, Тэремшурын, усьтӥськиз выль школа. Сое ӝутӥсьёсты данъяны ветлӥзы шаерысьтымы адямиос но - Удмурт Республикаысь Кун Кенешлэсь Тӧрозэ воштӥсь Алексей Красильников, Правительстволэн Нациосын ужанъя комитетэзлэн кивалтӥсез Светлана Смирнова, мукет адямиос. Пумиськонэз усьтыса, Менделеевск ёрослэн йырыз Васим Вахитов сюлмысьтыз ӟечкылаз дышетскон юртэз усьтонэ люкаськемъёсты. Вераськонзэ мытыса, Васим Хузаянович пусйиз: дунне вылын ӧвӧл пичи калык, котькудӥз ас понназ быдӟым. Ӟеч мылкыд каронъёссэс ивортӥзы Бигер Республикалэн премьер-министрезлэн воштӥсез Ильгиз Хайруллин, Кун Кенешысь калык кусыпъёсъя комиссилэн кивалтӥсез кылбурчи Роберт Минуллин, Удмурт Республикаысь Кун Кенешлэсь Тӧрозэ воштӥсь Алексей Красильников, калыкез дышетонъя министр Владимир Пушкин, Алнаш ёрос кивалтэтлэн тӧроез Виталий Городилов, мукет адямиос. Дышетскись пиналъёслы трос ӟечсэ сӥзизы школа юртэз лэсьтӥсьёс - Набережные Челны городысь "Экспро" фирма, "Асан тыпы" огазеяськемлэн йырыз Борис Меркушев, "Маяк" кооперативлэн председателез Илья Угольников, школаысь дышетӥсь Нина Кормильцева. Люкаськемъёсты мылысь-кыдысь шулдыртӥз Татарстан Республикалэн калык артисткаез Вафира Гизатуллина. Пусйымон соиз: школа пушкысь вань кабинетъёс нимамын удмурт сямен. Дышетскон юрт чакламын кык сю куатьтон ньыль интылы. Е. ВИНОГРАДОВА. "Устоез лыдӟись" конкурсэ Газетэз лыдӟыны быгатӥ ини "Гудыри" нимын потыкуз ик. Нош 1939-тӥ - 40-тӥ аръёсы, "Удмурт коммунна" нимыз дыръя, аслым но солэн редакцияз ужаны шуд усиз. "Советской Удмуртиен" ноку ӧй люкиськылы. Котькуд аре басьтылӥ на "Дась лу!", "Егит большевик", "Комсомольская правда" газетъёсты, "Молот", "Крестьянка" журналъёсты. Али сыӵе шырыт улон ӧвӧл ни, мырдэм но кызьы коньдон шедьтӥсько на "Удмурт дуннелы", "Природные вести" райгазетлмылы но "Кенеш" журналлы гинэ. Солы но ӝыны-ӝыны арен гинэ гожтӥськисько. Азьло потэм газетъёсын ӵошатоно ке, "Удмурт дуннелэн" али туж бадӟым пӧртэмлыкез. Азьло аръёсы нырысетӥ бамын передовицаос, ТАСС-лэн материалъёсыз, Союзмес, Коммунистической партиез данъян статьяос пото вал. "Удмурт дунне" газетысь нырысь ик тунсыкъяськыса лыдӟисько осконтэм улонмы сярысь гожъям ужъёсты, выль ӟучъёсты лек ӵушкась статьяосты. Соос угось тросэз возьыттэк узырмизы милям поколениосмылэн странамес утем но ӝутэм-лэсьтэм ваньбуреныз. Синмаськыса лыдӟисько туала колхозъёслэн, эштосъёслэн быгатыса ужамзы, татысь кивалтӥсьёслэн калыксы понна сюлмаськемзы сярысь. Ёрмыса улон вакытэ но соос хозяйствооссэс куашканы уг сёто, калыксылэсь ужан мылкыдзэ котькыӵе амалъёсын ӝутыны тыршо. Та ласянь гожъямъёссы лэчытэсь луо И. Лебедевлэн, Г. Романовлэн, Л. Перевозчиковалэн. Бадӟым тунсыкен лыдӟисько интыысь корреспондентъёслэсь - Пургалась В. Васильевалэсь, Бодьялась К. Загребиналэсь гожъямъёссэс. Мукет изданиосты басьяменым-а, мар-а, "Советской Удмуртиез" быдэсак лыдӟыса уг вуттӥськы кадь вал, нош али "Удмурт дуннеез", нырысь бамысеныз кутскыса пумозяз лыдӟисько. Ярало "Наталь", "Берекет", "Шӧкыч", "Герд" бамъёс. Нош "Шунды" нимын потӥсьсэ "Ӟечбур" газетлы сётоно вылэм. Шумпотылӥ дышетэм пиелэн Лёня Фёдоровлэн газетэ быгатыса гожъямезлы. Туж ӟечкыласа лыдӟыны кутски вал удмурт кылмес узырмытонын туж куасалтэммы сярысь Алексей Шкляевлэсь гожъямъёссэ. Зэмзэ ик, малы сокем кулэ на М. Петров, Г. Красильников кадь удмурт классикъёсмылэсь котькуд удмуртлы валамон литературной кылын гожъямзэс выльысь кыӵе ке чылкак вужмем, вунэм архаизмъёсын, яке -чи, -ет суффиксъёсын пӧрмытэм выль кылъёсын, яке бигер кылъёсын узырмытыны? Удмурт кылтодосчиослэн пӧртэм амалъёсын пӧрмытэм выль кылъёссы вордскем кылмес чик но уг узырмыто, валантэм гинэ каро мӧйыослы но. Нош пиналъёсты дышетонын шуге- леке вутто. Гуртазы мумы-бубыоссы, кылсярысь, толэзь, нунал нимъёсты ас дышем сяменызы нимало, нош пиналъёсты одно ик куро вордӥськон, пуксён, вирнунал, покчи арня но мукет со выллем кылъёсын вераськыны. Ӟучъёсын артэ улӥськомы бере, толэзьёслэн но нуналъёслэн ӟуч нимъёссы удмурт кылэ кемалась пыремын ини. Пӧртэм суффиксъёсын пӧрмытэм выль кылъёсты, вунэм архаизмъёсты пыртыса, удмурт кылэ пычкиськыса ик берыктэм официальной документъёс али лыдӟисьёслы чик валантэм кылё, ӟучсэ лыдӟытэк уг луы. Законэз - кат, документэз - кагаз, правительствоез - кивалтэт, договорез - огкыл, государствоез - кун, культураез - лулчеберет, гербез - кунпус, флагез - куншет, госсоветэз - Кун Кенеш, комиссиез - ӧри, председателез - тӧро но мукет та выллем веранъёс. Мон сямен кыллэсь кулэлыксэ сюбегато. Тани перестройкаез но выльдӥськон шуыса берыктӥзы. Нош со шонер ӧвӧл кадь. Выльдӥськон - со обновление ук. Нимкылъёссъя но шонер гожъяськонъя ӧрие туж визьмо, дано удмурт учёнойёс, дышетӥсьёс ке но пыртэмын, мон уг оскиськы, соос асьсэос но та пӧрмытэм выль кылъёсты вераськоназы пырто ни шуыса. Соос, Вотской область кылдэм бере, Куӟебай Гердлэн удмурт кылэз выльдон бордын ужамез вылэ чӧлско. 1920-тӥ аръёслэн кутсконазы К. Герд, С. Жуйков, К. Митрей но мукетъёсыз визьмо удмурт пиосмылэн осконзы но вал, Вотобластямы удмурт делопроизводство но луоз шуыса. Угось областьмылэн вылӥ кивалтӥсьёсыз но соку удмуртъёс вал - Наговицын, Барышников но мукетъёсыз. Нош али Правительствоын чиньыен лыдъямон гинэ удмуртъёс лыдъясько. Удмурт кылмылы государственной статус сётэмын ке но, вань делопроизводство удмурт луоз шуыса, осконэз ик ӧвӧл ни. Тырмоз, вылды, соин но: ӟуч калык пӧлын улыса но, асьмелэсь вашкала кылдэм удмурт культурамес, сямъёсмес, йылолъёсмес утьыны, азьланьтыны, выльдыны быгатӥмы ке, аслаз удмурт калыклэн асваланэз юнмаз, будӥз ке, ӟучомыны ӧз сётскы ке. Нимкылъёсъя комиссилы кусып возёно вылэм лыдӟисьёсын, калыкен. Газетлэн нимыз сярысь ке верано, ӟучъёслэсь дунне кылэз дуннэ шуэмзэс кылыса, кепыр потоно. Кызьы куро мукет лыдӟисьёс но, суббота нуналэ потӥсь газетлэсь быдӟалазэ бадӟыматоно ик, дыр, вылэм. Телепрограмма сётэмен валче, лыдӟымон мукет материалъёслы туж ӧжыт инты кыле. Уката ик отын гожтэмын луэ ке данэ потэм адямиосмы, артистъёсмы но мукетъёсыз сярысь. Со сяна, таӵе ӵектонэ но вань: кулэ вылэм выльысь тодамы вайыны улонысь вазь кошкем нырысетӥ артистъёсмес, кылсярысь. Ефремоваез, Чубуковаез, Саттароваез, соку гинэ ӝужась композиторъёсмес Михаил но Николай Бывальцевъёсты, кудъёсыз вал театрально-художественной техникумлэн нырысетӥ выпускникъёсыз. Анастасия Евсеева, Завьялово районысь Лудорвай селоысь 79 аресъем пенсионерка. Билетъёс 3 сюрсэн гинэ Бадӟымесь шуг-секытъёсын пумита выль сезонэз Удмурт кун мунё театр. Артистъёслы кема уг сёто уждун. Электрокужым понна коньдон тырон люкаськемын. - Асьмеды асьмеос, пе, ми утьыны-возьыны кулэ. Нош кызьы озьы улод, куке милям театрамы самой дунтэмесь билетъёс - 3 сюрсэн гинэ. Озьы но, сыӵе дунын но, анай-атайёс уг быгато нылпиоссылы билет басьтыны,- шуэ театрлэн директорез О. О. Никитин. Номыр шоры учкытэк, артистъёс ужало, пиналъёсыз шумпотто спектакльёсынызы. 16 сентябрьысен соос гастрольёсы потазы: Грах, Алнаш, Селта, Сюмси ёросъёсын 30 пала спектакльёс пуктӥзы. 18-тӥ октябре мунё театр покчи эшъёссэ ӧте учкыны выль ужзэ - Андерсенлэн "Дюймовочка" выжыкылэзъя спектаклез. Отын шудозы Удмуртилэн дано артисткаез Нина Тарасова, артистъёс Александр Кравченко, Сергей Чирцев, Татьяна Перевощикова. Ноябре пинал учкисьёс нош ик пумиськозы выль выжыкылэн - "Прыгающая принцесса". Таяз премьераын шудозы республикаысьтымы калык артист Александр Перевощиков но дано артистка Алевтина Степанова. В. ЛАГУНОВ. Журналистъёсын пумиськонъёс Ужасьтэм закон - закон ӧвӧл Котькуд странаын законъёс кылдытӥсько, отын улӥсьёсты утён понна. Чылкыт, умой радъям обществоын соос быдэсъясько, нош сураськем-пожаськемаз - ӵемысь адямилы пумит но ужало. Ватонэз ӧвӧл, асьмеос та вакытэ ӵапак кыкетӥосыз пӧлы шедим ни кадь. Калыкез кин кызьы быгатэ - озьы пӧя. Нош кытчы учко правоез утёнъя органъёс? - Кылем ар ӵоже пӧртэм ӝожтӥськонъёсын дорамы 332 мурт вазиськиз,- шуиз журналистъёсын пумиськонысен Кун Кенешысь Законностья, обществоез кышкытлыклэсь утёнъя но адямиослэн правооссыя комиссилэн кивалтӥсез А. С. Борзенков.- Туэ - 77. Данакез соос вуэмын пӧям вкладчикъёслэсь. Берпуметӥосыз герӟаськемын "Ижладабанклэн" уженыз. Отысь югдурез эскеронъя ӝегатскытэк комиссия кылдытэмын вал. Банклэсь калыклы коньдон берыктэмзэ син азямы возём. Александр Семенович вакчияк тодматӥз законъёсты выльдон-воштон бордын ужаменызы. Кылсярысь, ватсэтъёс но тупатъянъёс пыртэмын ни "Об административных нарушениях" Законэ. Куд-ог дэмланъёс сётэмын но ыстэмын Россия Федерациысь Уголовно-процессуальной кодекслэн выль редакциез бордын ужасьёслы. - Отын шӧдскымон инты басьтэ депутатлэн статусэз сярысь веран. Прокуратуралэсь ужамзэ эскерыса, Россиын кылдэм югдурез чакласа, депутатлэн но обществоын интыез сярысь малпан куд-ог дыръя воштӥське. Зэмен но, шонер-а лэсьтӥськом, солэсь статуссэ неприкосновенной ялыса? Адямилэсь правооссэ утён. Тӥни кытын асьмелэн пумтэм-йылтэм янгышъёсмы. Туж тросэз герӟаськемын улон инты басьтонэн, сое умойтэм люкылонэн. Котькудӥз таӵе учыр судэн эскериськыны кулэ,- пусйиз А. С. Борзенков. - Верало Яр районын луэм одӥг учыр сярысь гинэ. Служебной помещениысь нылпиё семьяез ульчае потто, нокыӵе улон интытэк кельто. Таӵе учыръёс луыны кулэ ӧвӧл. Трос юанъёс кылдо ваньбурез калыклы люкылонъя. Кызьы пусйиз А. С. Борзенков, Удмурт Республикалэн музъемез, ваньбурез но шаермы борды юнматымтэ на, ваньмыз со - Россия Федерацилэн. - Законъёсты улонэ пыӵатон бордын трос ужаськом, азьланяз но ваньзэ лэсьтом, обществоез кышкытлыклэсь утён но адямиослэсь улонзэс умоятон понна, - йылпумъяса вераз депутат. Озьы ик журналистъёслэн юанъёссылы валэктонъёс сётӥз. Л. ПЕРЕВОЗЧИКОВА. МЫНЭ ГАЗЕТЪЁСЛЫ НО ЖУРНАЛЪЁСЛЫ ГОЖТӤСЬКОН "Ӵуж" газетъёс гочато, но зэмлык дуногес Кызьы мынэ газетъёслы но журналъёслы гожтӥськон? Та ужпумез эскерон вылысь, уй пал районъёсы поталлязы Печатья но иворъёсты вӧлмытонъя министерствоысь но "Удмурт дунне", "Удмуртская правда", "Известия Удмуртской Республики" газетъёсысь ужасьёс. Нянен гинэ кӧтэз уд тырмыты, адямиослы кулэ лул-пушез, йырвимез тырмытӥсь "сиён" но. Со уката но шӧдӥськыны кутске берло дыре - лыдӟиськыны, зэмлыкез тодыны туртто арлыдоос но, егитъёс но. Но яратоно газетъёсты, журналъёсты басьтыны уг луы. Малы? Тани ма веразы со сярысь пумиськонэ лыктэмъёс. Анатолий Панфилович Шарипов, Балезиноысь ронолэн кивалтӥсез: - Малы ке арысь аре озьы луэ: газетъёслы гожтӥськон вакытэ бюджет чотын коньдон басьтӥсьёс ёрмо уждунлы. Журналъёслы, пособиослы гожтӥськон понна, дышетӥсьёслы 1993 арысен ини коньдон тырыны ум быгатӥське. Ярам, туэ кызьы но озьы дышетонъя 15 пумо изданиослы гожтӥськыны школаослы коньдон висъямы. Но шаерамы потӥсь журналъёс пӧлысь дышетӥсьёс гожтӥськыны быгатозы "Вордскем кыллы" гинэ. Вуоно арлы газетъёслы гожтӥськыны юрттон ласянь номыре малпаны ӧм быгатэ на ай. Со пумысен вераськемын ке но районысь почталэн кивалтӥсьёсыныз, почтая управлениысь валтӥсь бухгалтерен. Удмурт изданиосты вӧлмытонъя валэктон уж нуиськом удмурт кылъя но литературая дышетӥсьёс пӧлын. Со понна нимаз адямиос но быръемын. Ия Николаевна Касаткина, Балезино районысь почта ёзлэн кивалтӥсезлэн воштӥсез: - Республиканской газетъёслы гожтӥськонэз туэ ӝегатэ "ӵуж" пресса но. Сыӵе газетъёсты лыдӟисьёс лякытэн басьтыны быгато бере, соос мукет газетъёсты ӵем дыръя кулэ уг ни каро. Соин ик валтӥсь газетъёслы "Удмурт дуннелы", "Удмуртская правдалы" чырмытгес ужано асьсэлэсь рекламазэс вӧлмытон бордын. Почтае лыктыса, адямиослэн тодэмзы потэ газетъёслэсь пуштроссэс. Почтальонъёс та юанъёслы котьку ик валэктонъёс сётыны уг быгато. Гожтӥськыны адямиослэн коньдонзы уг тырмы. Кылем арын лесобазаын ужасьёсты газетъёслы гожтӥськытӥм кредит амалэн. Но та дырозь коньдонзэс ӧм басьтэ на. Соин ик туэ та амаллэсь куштӥським. Ӵем дыръя кылоно луэ, газетэз нуллон дуно усе шуыса. Зэм, одӥг газетлэн нуллон дуныз али 340 манет усе, соин йырин йылэ газетлэн огъя гожтӥськон дуныз но. Но ойдолэ син азе пуктом табере таӵе суредъёсты. Тани Сергино гуртэ почтальонъёс туж курадӟыса ветло - сюресъёс уродэсь. Соин ик татчы газетъёсты вторнике но пятницае гинэ вуттӥськом. Но Сергино сьӧрын но ай лыдӟисьёс уло на ук. Одӥг лыдӟись доры "Удмурт дуннеез" нуон понна, почтальонлы 15 иськемез мыноно луэ. Сыӵе гуртъёс уй палъёсын данак на ай. Соин ик газетлэсь нуллон дунзэ кулэстыса, почтальонъёслэн ужамзы уз поты. Почтальонъёслэн уждунзы туж ӧжыт, соин ик куд-огзэ ужзылэсь но мозмытоно луим. Кылемъёсыз ужаны туртто, пенсиос сётон нуналэ коркась корка ветло, газетъёслы гожтӥськыны ӵекто. Соос азе меӵак ужпум пуктэмын: яке тросгес газетлы гожтӥськисьёсты шедьтӥськод, яке уждэ ыштӥськод. Балезиноысь администрацилэн юртаз пумиськон ортчыку, вераськон ӝутскиз газетъёслэн дыраз вуымтэзы сярысь но. Кин отын янгыш - почтальонъёс-а, нӧдо сюресъёс-а? Солэн огез мугез герӟаськемын шутэтскон нуналъёсын но. Тодмо: тросэз ужасьёс шутэтско субботае но арняе.Нош почтальонъёслы шутэтскон нуналъёс малы ке тупатӥллям арняе но понедельнике. Соин ик субботае потӥсь газетъёс лыдӟисьёс доры вуо вторнике гинэ. Мукетыз югдур герӟаськемын вылэм чугун сюреслэн ужаменыз. Газетъёсты Балезиное вутто 933 номеро поездэн. Но со нуналлы быдэ уг ветлы. Соин ик сыӵе нуналъёсы Ижевскысь но Екатеринбургысь вуись газетъёсты Балезиное келяло мукетыныз 903 номеро поездэн. Но Балезиное вуыса, со станциын 15 минут ке но сылэ, вагонъёсызлэсь ӧсъёссэ уг усьты, газетъёсты басьтыны уг луы. Сыӵе расписание тупатэмын Москваен. Тӥни озьы газетъёс пырак Кирове кошко, отысен 2-3 нунал ортчыса гинэ мукет поездэн нош ик Балезиное вуо. Таӵе ик югдур кылдэмын Ярын но. Та сярысь мон пыр-поч валэктыны турттӥсько, уго газетъёслэн ӝегаса вуэмзы пумысен лыдӟисьёс ялан юанъёс сётъяло. Кызьы валэктӥз Балезино администрацилэн тӧроезлэн воштӥсез Рафиз Зигнатулович Касимов, та пумысен вераськонъёс нуоно Москваен гинэ. Сыӵе ик югдур кылдэмын куд- ог электричкаосын но. Оло, та ужпумез сэрттыны быгатысалзы Кун Думаын ужась асьме депутатъёсмы. Тӥни сыӵе югдур Балезино районын. Шумпотоно соизлы, татын "ӵуж" газетъёсты дырын-дырын лыдӟыло ке но, адямиос зэмлыкез утчало республиканской газетъёсысь. Яр районын "Удмурт дуннеез", Балезиноос сярысь, ӧжытгес лыдӟо. Ӟучомем удмуртъёслы выльдэм кылъёс валантэмгес пото, лэся. Татын умой гожтӥсько районын потӥсь "Сельская правда" газетсылы (редакторез А. А. Митрошина). Газетсылы гожтӥськытон понна, редакция пӧртэм амалъёс утча. Татын пӧрме кредит, "бартер" амалъёсын ужан. Кылсярысь, кыӵе ке колхозын (хозяйствоын) гожтӥськыны мылкыд карисьёс вань ке, адямиосты колхоз чотын гожтӥськыто, редакцилы со понна кыедэн, вӧйын яке мукет вузэн, сиён-юонэн тыро. Уй пал районъёсын пумиськонъёс ортчон дыръя, лыдӟисьёс уно куронъёсын вазиськизы Печатья но иворъёсты вӧлмытонъя министерствоын ужасьёслы. Та выллем пумиськонъёс лыдӟисьёслы но, газет поттӥсьёслы но пайдаен мед берытскозы вылэм. Татьяна БАННИКОВА. Куазь Туннэ интыен-интыен зороз. Республикая уин 3-8, нуназе 8-13 градус шуныт луоз. Тӧл лымшор но шунды пуксён палась секундскын 7-12 метре пельтоз. Сӥзьыл куазед шунытэныз шумпоттэ на. Туэ 16 октябрьлы сётэм лыдпусъёс, азьвыл аръёсын ӵошатыса, та вакытэ самой шуныт нуналэн ӧжыт гинэ ӧз оградъяське. 1947 арын термометр 13,9 градус шуныт возьматӥз. Нош тужгес кезьыт - 11 градус вал 1976 арын. Дас миллионлэсь трос 1887-тӥ арын, 110 ар талэсь азьло, Варшаваысь эмъясь Людвиг Заментоф ӟуч кылын печатлаз калык куспо (международной) кыллэсь проектсэ. Калык доры сое вуттӥз Эсперанто доктор кушем нимын. Берло тазьы ик нимазы кылэз но. Сое дышетонлы сӥзем нырысетӥ огазеяськонъёс кылдӥзы Россиын. Отӥяз вӧлмизы быдэс дуннее. Эсперантоез уже кутэ сюлэсь трос кунысь дас миллионлэсь трос адями. Та кылын печатласько книгаос, чузъясько радиоверанъёс, ортчыло конгрессъёс. Ижысь эсперантистъёс огазеяськизы "Вож слон" клубе. Диплом сётэмын "Экология-96" конкурсын нырысетӥ инты басьтэмез понна, "Удмуртская правда" газетлэн редакциез пусъемын дипломен. Со вылэ гожтӥськизы Удмурт Республикаысь инкуазь узырлыкъёсъя но инкуазез утёнъя министр Владимир Катков но Журналистъёслэн союззылэн правлениезлэн председателез Людмила Прокашева. В. РОГАЛЕВ. Берекет ТОДӤСЬКОДЫ-А ТӤ? Кин самой вылӥетӥ но кыдёке тэтче? Оло, малпалоды, кыӵе ке но пӧйшур шуыса. Ӧвӧл, со - вал. Бен, бен. Чилиысь Лариагибель 15 аресъем Хауз вылын 1949-тӥ арын 2 метр 47 сантиметр кеме вылӥе тэтчыны быгатӥз. Та паймымон вормон лэсьтэмын вылаз адямиен ӵош. Нош огназ дыръя вал эшшо но вылэ ӝутскыны быгатэ. Кузьдалае тэтчонын но вал азьпала потӥз: 11 метр 28 сантиметр кеме тэтчиз. Нош та лыдпус 1975-тӥ арын гужем кык поллы бадӟыматэмын вал. Соку Европаысь самой устоосыз вал вылын ворттылӥсьёс Майзенлаймлэсь приззэ басьтон вылысь ӵошатскизы. Вормисе потӥз ФРГ-ысь К. Бергман. Свингер вал вылын ӝужыт кенер но паськыт канава вамен соку тэтчемын 22 метр 16 сантиметр кеме. Л. ВАСИЛЬЕВА. КОТЬ ОСКЫ, КОТЬ ЭН Инмарен эктон Та учыр луиз Куйбышевын. Яратоно пиезлэн дораз вуымтэезлы вожзэ поттыса, нылмурт эктыны потӥз... кияз мудорез (обросэз) кутыса. Корка шоры вуыса, шӧдтэк шорысь интыяз кынмиз, мугорыз измиз. Озьы сылӥз 128 уй но нунал ӵоже. Куйбышевын но со котырын улӥсьёс та учыр сярысь али но, 40 арлэсь ятыр ортчыса, лушкем, кышкаса кадь верало. *** 1956 арын 14 январе, ӵапак Вуж выль аре, заводын ужась егит нылмурт дораз эшъёссэ ӧтиз. Парен- парен люкиськыса, соос эктыны потӥзы. Зоялэн вуоно карт луонэз, Николай, малы ке но та ӝытэ ӧз вуы. Бӧрдон мылкыдзэ ватон вылысь вожпотонэн тырмем нылмурт шӧдтэк шорысь вамыштӥз мудоръёс доры. "Мынамез Колие ӧз лыкты бере, мукет Николаен экто!" - шуиз со эшъёсызлы. Ма дауртэмзэ адӟыса, Зояез алыны выризы: мудорен шудыса, ӟече уд вуы. Эн шузияськы, берен интыяз пукты. Пумитазы нылмурт гор-гор серектӥз: "Дунне вылын Инмар вань ик ке, мед монэ наказать кароз". Озьы шуыса, бордаз золгес ӝиптӥз Николай Чудотворецлэсь тусбуйзэ, шатыр поттыса, эктыны кутскиз. Корка пушкын маке но туж зол чилектӥз, пуштӥз, собере тём-тём пеймыт луиз. Кышкатскем егитъёс ури-бери кин кытчы пазьгиськизы. Ӧжытак валатскыса адӟизы: корка шорын ик измем мугоро Зоязы сылэ. Вуэм врачъёс столбнякен висёнлы пумит укол пуктыны выризы - ӧз быгатэ: веньёссы куасалско, нош нылмуртлэн мугораз уг мертчо. Ачиз улэп - сюлмыз ужа, вирыз ветлэ. Юрттыны уг луы. Ӵапак со вакытэ дораз бертэм анаез, кынмем нылзэ адӟыса, йырсазьзэ ыштӥз, ӧжытак гинэ ӧз шузимы. Зояен луэм учыр сярысь ивор городэ ӝог вӧлмиз. Корка доразы соку ик калык люкаськыны ӧдъяз. Ӧтёно луиз милиционеръёсты. Зояез утиз иеромонах Серафим. Нылмурт дорын вӧсяськиз, молитваос лыдӟиз, корка пушсэс святой вуэн пазяз. Собере гинэ Зоялэн киысьтыз мудорез басьтыны быгатӥз. Люкаськем адямиослы вераз нуналзэ, числозэ но: соку, пе, инмар та нылмуртэ простить кароз. Тодӥсьёс-адӟисьёс верамъя, 128 нунал ортчыса, Зоялэн измем мугорыз небӟиз. Сое валес вылэ выдтӥзы. Инмарлэсь прощение курыса, Зоя весяклы умме усиз. *** 1956 арын 20 январе ортчем партилэн Куйбышевысь 13-тӥ областной конференциезлэн стенограммаысьтыз. Делегатъёслэн юанъёссылы валэктон сётӥз КПСС-лэн Куйбышев обкомезлэн нырысетӥ секретарез Ефремов: "Мыным ог 20 записка вуиз. Уг ваты: коммунистъёс понна та учыр номыр ӟечсэ ӧз сёты. Кыӵе ке пересь кышномурт ульчаысен кинлы ке верам: та коркан, пе, егитъёс шулдыръясько вылэм. Огез, огпала ортчем нылаш, мудорен эктыны потэм но - излы пӧрмем. Нош калык отчы люкаськиз, милицилэн янгышеныз. Соин ик возьмаськисьёсты пуктоно луим. Бордазы ватсам на конной милициез. Валамон ини: калык, тае адӟыса, эшшо но тросгес люкаськиз. Куд-ог эшъёсмылэн йыразы шуккем попъёсты но отчы ыстыны. Обкомлэн бюроез горкомлэн бюроезлы дэмлаз луэм учыръя умой-умой эскеронъёс ортчытыны но янгыш муртъёсты наказать карыны, нош Страхов эшлы ("Волжская коммуна" областной газетлэн редакторезлы), газетын фельетон сётоно". Обкомлы та нуналъёсы, зэмен но, пӧсь йӧтӥз. Зояен луэм учыр бере, черкъёс калыкен пачылмизы. Ваньмызлы сётыны киросъёс уг тырмо вал. *** Калык верамъя, Николай Болонкин, Зоялэн гажанэз, юон вылэ чӧлскиз. Олокӧня пол пытсэт сьӧры шедьылӥз, пегӟылӥз, нош ик милиция кырмылӥз. Рецидивистэз сямен, вордскем городысьтыз палэнэ келяло. Отын ик со улэ. *** 40 ар ортчыса, та учырез эскерон борды басьтӥськем "Комсомолкаысь" корреспондент пумиськылэ пӧртэм адямиосын. ФСБ-лэн областной управлениысьтыз пресс-служба юрттэмен шедьтэ со вакытэ КГБ-ын ужам муртэ, Михаил Егорович Бакановез. "Соку мон ужай КГБ-лэн старшой уполномоченноез луыса. Кивалтӥсьёсы ыстӥзы самой со Чкалов ульчае, югдурез сэрттыны-пертчыны косыса. Отын монэ пумитазы кыӵе ке осконтэм адямиос. Червонец, пе, сётӥд ке, корка пыртом, измем нылэз возьматом. Мон пыри, соос юрттытэк но. Ачим но трос муртэ пыртӥ на, огез но номыре но корка пушкысь ӧз адӟе. Озьы ке но, люкаськемъёс вераммылы ӧз оске. Сылӥзы быдэс арня ӵоже. Али уг тодӥськы ни: вераськи-а мон Зояен, ӧй-а. Сомында аръёс ортчыса, ваньзэ йырад но уд возьы ни". Мукетыз кылӥсь-адӟись Валерий Борисович Котляров ваньзэ погыльтэ черкын ужасьёс вылэ: "Соку мон пичи вал ай. Милемыз корка пушкы ӧз лэзе. Нош бадӟымъёсты быдэн 10 муртэн милиция пыртылӥз. Отысь потэмъёс паймыса вераллязы: "Нокинэз но вылымтэ". Ульча тыр тымиськем калык озьы но ӧз пазьгиськы. Одӥг нуналэ люкаськемъёс пӧлтӥ ик корт трубаосын тырмытэм машина ортчиз, трос адями шуккиськыны шедиз. Инмарлы оскисьёс тае ас сяменызы валэктӥзы: "Сьӧлыкъёсмы понна инмар асьмеды дышетэ, дыр". Тодэ ваёнъёссэ вера Вознесенской соборлэн старостаез Андрей Андреевич Савин: "Соку мон епархилэн управленияз секретарь луыса ужай. Епископмылы жингыртӥз Инмарлы оскисьёсын ужанъя партилэн обкомезлэн уполномоченноез Алексеев. Шуиз: -"Черке ветлӥсьёслы верано, Чкалов ульчаын номыр но ӧз луы шуыса. Епископ обкомын ужасьлэсь куриз, со корка Покров соборысь священникез пыраны мед лэзёзы шуыса. Уполномоченной талы пумит вазиз: "Кык час ортчыса жингырто на". Жингыртӥз, кык нунал ортчыса, тӥляд юрттэтты кулэ ӧвӧл ни, пе. Тӥни озьы, черкын ужасьёс пӧлысь огзэ но отчы пыраны ӧз лэзе. Иеромонах Серафим Зоя доры ветлӥз шуэмзы зэм ӧвӧл. Нош калыклы возьматъязы мукетсэ - пичи буш комнатаез: "Адӟиськоды ук, нокин но татын ӧвӧл". Адямиос курылӥзы коркалэсь бадӟым палзэ усьтыны. "Отын котырзы люкамын, учкыны номыре". Самараын улӥсьёс пӧлысь тросэзлы тодмо арлыдо кышномурт Анна Ивановна Федотова. "Со нуналъёсы Зояослэн корказы доры мон кык пол вуылӥ, - тодаз вае Анна Ивановна, - но пыраны ӧй быгаты - котырак милиция сылэ вал. Кыдёкысь лыктыса, озьы гинэ кошкеме ӧз поты. Юано-верано кариськи огезлэсь егит милиционерлэсь. "Тон ӵапак мынам кышное кадь тэбиниськод. Номыр но уг вера, тани, ачид учкы". Озьы шуыса, йырысьтыз фуражказэ басьтӥз но возьматӥз пурысьтам йырсиоссэ. "Адӟиды-а?! Та - измем нылмуртлэн бервылыз. Вераны правомы ӧвӧл, подписка сётӥм". Самараысь Софийской черкысь священник Виталий Калашников: "Анна Павловна Калашникова, анаезлэн апаез, 1956 арын ужаз Куйбышевысь "Скорая помощь" службаын, врач луыса. Со нуналэ дорамы лыктыса шуиз: "Тӥ татын гань-гань кӧлӥськоды, уд но тодӥське, ма лэсьтӥське городын!" Дыртыса, шокпотыса вераз измем мугоро Зоя сярысь. Берлогес ватсаз на: али самой со корка ветлыны кылдӥз. Адӟи, пе, Николай Чудотворецез но нылмурт киысь. Укол пуктыны выри - ӧй быгаты: вань веньёсме тӥяса быдтӥ. Верамзэ кылзыса, йырсиосмы пежыр султӥзы..." Анна Павловна Калашникова "Скоройын" трос аръёс ужаз на. Кулӥз кылем арын. Но врачлэсь адӟемзэ-верамзэ кылэмъёс вань на. "Волжский комсомолец" газетын 1989 арын печатламын вал журналистлэн Антон Жоголевлэн "Чудо о Зое" нимо статьяез. Кӧня ке нунал ортчыса, авторез доры пыриз арлыдо воргорон, вераз, 50-тӥ аръёслэн пумазы, пе, ужай ӵапак со корка вадьсы пуктэм синучкон поттонъя цехын. Ӵош ужась эшъёсыз, егитъёслэсь кесяськемзэс кылыса, милицие вуытозь ик Зояос доры пыризы. Соос верамъя, нылмуртлэн сюсьтыл кадь ӟаректэм ымныр тусыз шимес вал... Кӧня ке улыса, Жоголевлы жингыртӥз Зоялэн матысь ӵыжы-выжыез, кышномурт, ивортӥз: Зоя туннэ но улэп. Трос аръёс ӵоже кыллиз психбольницаын. Отысь доразы басьтӥз Кинельын улӥсь роднязы, туннэ но доразы возё. Со кӧшкемыт нуналъёсты тодаз вайыны Зоя уг яраты, туж кышка. Ӵыжы- выжыосыз но трос вераськыны, калык пӧлы потаны уг лэзё: тазалыксэ утё. "Мон ӝегатскытэк Кинеле потӥ, - шуэ Жоголев. - Но Зояез утисьёс-вордӥсьёс тушмонэз кадь пумитазы. Соос веразы, 1956 арын Зоя, зэмен но, психбольницае келямын вал. Куйбышевын луэм учыр сярысь пал кыл но поттылытэк, монэ ӧс сьӧры келязы. Пырыны ӧз лэзе ни. Соин ик туннэ но уг тодӥськы: кыӵе Зоя улэ Кинельын. Оло, воксё мукетыз", - веранзэ йылпумъя Антон Евгеньевич. Куйбышевын 40 ар талэсь азьло луэм учыр сярысь берпуметӥ кылзэ ӧз вера отчы ветлэм "Комсомольская правда" газетлэн корреспондентэз Андрей Полынский но. Солэн статьяез потӥз "Комсомольская правда" газетлэн туэ 12 сентябре потэм номераз. Дасяз Л. ПЕРЕВОЗЧИКОВА. МИЛИЦИЛЭН УЖЫСЬТЫЗ Никандрыч Армиын службазэ связист луыса ортчытэм Леонид Хохряков азьлань улонзэ но син азяз пуктылӥз, та удысэн герӟаса. Но луиз мукет сямен. Вуж Кычын ужась участковой инспекторен Александр Главатскихен пумиськон вань мылкыдъёссэ сураз. Эшезлэсь вордскем нуналзэ пусъён ӝытазе вал со. Огез гуртазы соку мултэссэ юыны шедьтэм. Сыӵе ӵашетон ӝутӥз: кышноос участковой доры но вутскиллям ини. Ӵапак со ӝытын милиционер дӥсен адямилэн син шораз йӧтӥз зӥб-зӥб сямо Леонид Хохряков. - Кызьы огкылэ вуэммес верад ке, оло, уд но оскы, яке серемед потоз,- пальпотыса тодаз вае ёрос отделысь валтӥсь участковой инспектор милициысь капитан Л.Н. Хохряков.- Ӵашетӥсез зӥбломытыны участковой "Урал" мотоеныз лыктэм вылэм. Шӧдӥз, оло, шай куинь питрано валэз шоры вожъяськыса учкемме. Шонерзэ вераса, зэм но, сыӵе мылкыдъёс вал. Главатских ӵапак та сьӧлтэтэ ик монэ кутӥз. Сое, пе, воштӥсь адями туж кулэ. Басьтӥськы. Соглаш ке, туннэ ик сётӥсько "Урал" мотоциклме. Тӥни озьы мон милицие вуи. Со дырысен ортчиз ни 18 ар. Быръем удысэз сярысь Леонид Никандрович уг жаля. Зэм, котькыӵе но дыръёс вал, тужгес но секыт йӧтӥз кутсконэз. Со сярысь тодэ вайыса, капитан юзыр-кезьыр луыса кошке. Вуж Кычын но котыр гуртъёсын улӥсьёс егит участковойзы шоры нырысь озьыгес учкылӥзы: "Лёнька - асьме пи, мар со кароз?" Но ӝоген шӧдӥзы: таид маза уз сёты. Участковоез "тупатон", ас интыяз пуктон муген мар но ӧз лэсьтылэ. Тужгес но - азьвыл пытсэт улын пукылэмъёс, тордосъёс, ужлэсь пегасьёс, аракы пӧзьтӥсьёс. Шораз тӥрен-пуртэн, кусоен шоналляськисьёс но вал. Леонид Хохряков, котькыӵе пӧсь югдурын но, ассэ возьыны быгатылӥз. Котыр гуртъёсын со понна ик гажало валтӥсь участковойзэс, Никандрычсэс. Йыружъёсын нюръяськонэ итӥсько ни асьсэос гуртоос. Ог ӵукна жингыртӥзы Вылӥ Четкерысь. Магазиназы, пе, пыраллям. Югдурез эскерыны Л. Хохряков ӝегатскытэк вуиз. Пытьы ӝог сюриз. Юрттӥз калык. Кин мае адӟиз, шӧдӥз, кылӥз - милиционерлы веразы. Йыртэмасьёс гуртооссы ик вылӥллям. Огез али гинэ пытсэт улысь потэм адями, магазинэ пырамез понна ик пукем маке. Эрикын 10 нунал ветлӥз но выльысь четлыке сюриз. Солэн эшез - быдэ вуымтэ пияш. Бадӟымезлы ящик водка кулэ луэм, юрттӥсезлы - "киндер". Магазинысь лушкаськонэн герӟаськем йыружен валче Вуж Четкерын мукет учыръёс но шараяськизы. Отын но асьсэос гуртоос трос юрттӥзы. Берло аръёссэ Л. Н. Хохряковлэн чаклано участоказ "Колос", "Ита", "Звезда" но Чапаев нимо колхозъёсы пырись гуртъёсын секыт йыружъёс уг пумиськыло ни. Мукет службаосын ӵош милиционеръёс но бадӟым уж нуо ю-нянез, бакча сиёнъёсты утёнын. Бусыосын, итымъёсын бер ӝытозь ортчытъясько рейдъёс. "Урожай-97" ужрадэ пыриськыса, огъя ёросъя юосты лушкамен 6 адямиосты ӝегатэмын ни. Соос пӧлысь кыксэ шараяз Л. Хохряков. - Награда, кузьым понна уг ужаськы,- шуэ Леонид Никандрович.- Тыршисько, йыружъёс медаз луэ шуыса. Уйзэ-нуналзэ уг шутэтскы, сиён-юонтэк улыны чидало, но йыруж лэсьтӥсьёслы кузёяськыны маза уг сёты. А. ВАСЕВ. Дэбес район. Кыдёкысь шаеръёсын БУБЫЛИОСТЫ ВУЗАЛО Венесуэлалэн уй палысьтыз Маракай городысь асфальтэн шобыртэм сюбег сюрес нырысь саваннаетӥ вуттэ Кариб зарезь дурысь пичигес Чорони посёлоке. Собере меӵ гурезьёсы тубе но вож тоннельлы пӧрме. Витьтон метръем ӝуждалаысь бадӟымесь писпуосты аслаз вуосынызы люкталоз гурезьёсысь уно сю ошмесъёс. Соослэн улвайёссы, лианаосын пунӥськыса, нап шобрет кылдыто. Синмез вӧсь карись тропик шундылэн сиосыз со пыр одӥг-ог гинэ пишто. Тӧлӟись бусъёс ӵынлы укшало но мае ке ватыса возё кадь. Сюрес вылын трос выжъёс пумиськыло, соос улысь изъёс пӧлын вуос шукыръясько. Пазяськись ву пырыос шунды тылсиос улын бриллиантъёслы укшало. Асфальт ялан выллане кыстӥське, бӧрысь гинэ ини меӵ зарезь доры ваське. Венесуэлалэн тужгес чебер интыетӥз автомашинаен ортчыны одӥг но ӝыны час гинэ дыр кулэ. Сое правительство заповедникен ялӥз. Со сяна, та чебер интыез тодмо ботаниклэн, котырысь инкуазез утён понна нюръяськисьлэн Генри Питьелэн национальной паркеныз нимало. Татын бубылиосты будэтонъя аспӧртэмлыко питомник кылдытэмын. Соосты басьто питомникъёс, музейёс но куд-ог адямиос, кудъёсыз люкало тропикъёсын улӥсь шер пумиськылӥсь бубылиосты. Нюлэслэн пичигес люкетэз котыртэмын векчи пужен, вылласянь но сыӵе ик пуж вань. Отчы писпуос но куакъёс мерттэмын. Соослэн ческыт зыно сяськаосынызы, емышъёсынызы но куаръёсынызы кӧтсэс тыро бубылиос но соослэн гоно нумыръёссы. Сюрсъёсын яркыт буёло бадӟымесь но пичиесь бубылиос омырын поръяло, сяськаос но куакъёс вылын пуко. Пӧртэм буёлъёс синмез мальдыто, ческыт зынъёс йырез поромыто. Монэ келяса ветлэ 16 аресъем Каролина, со бубылиосты вордон бордын ужа. Со кадь нокин уг тод бубылиослэн улэмзы сярысь. Мынам ужан нуналэ питомник дорысь нюлэскы ветлон бордысен кутске, вера со, эскерисько пӧртэм пумо писпуосты, куакъёсты. Бубылиос соослэн куаръёссы вылэ пузъёссэс лэзё, кытӥяз кӧня ке сюрс пала. Ужпум со бордын: куаръёсын ӵош со пузъёсты питомнике выжтоно но сыӵе ик будос вылэ лэзёно. Со дырысен соосты эскерыса возёно. Кышкыт ӧвӧл ни тылобурдоос но, чонариос но, мукет нымы-кибыос но. Ӝоген пузъёсысь сютэмесь нумыръёс пото, соосты ялан выль но выль куакъёс вылэ интыяно луэ. Таиз уж оскемын сад будэтӥсьлы Крусе Ахмандолы. Бӧрысь нумыръёс выремысь дугдо но куколкаослы пӧрмо. Озьы кылдыны кутско бадӟым бурдоесь чебересь бубылиос. Соос питомникын али ог кызь пумо. Но коллекцимы ялан будэ, паськыта. Со понна вань лаборатория. Бубылиос мукет странаосы келясько. Посылкаосты ысто самолётъёсын. Куколка бубылилы пӧрме ини басьтӥсь дорын. Одӥг куколка ньыльысен кӧня ке сю долларозь сылэ. Борис Щербаков. Куронъёсын вазиськизы Агропромышленной комплексын ужасьёслэн профсоюззылэн комитетсылэн, Удмуртиысь Агропромышленной союзлэн но Россиысь аграрной партилэн Удмуртиысь ёзэзлэн огъя президиумзылэн кенешез ортчиз. Люкаськемъёс сюлмаськемзэс веразы гурт хозяйстволэн куашкан калэ вуэмез пумысен. Со сярысь трос пол вазиськылэмын ни Кун Кенеше но Правительствое. Но югдур уг тупатскы, куронъёс уг быдэсмо. Соин ик та кенеше люкаськемъёс Кун Кенеш но Правительство азе ас куронъёсынызы вазиськизы. Соос куро туэ декабрь толэзёзь АПК-лы 1997 арлы бюджетысь висъям коньдонэз пумозяз тырыны. Нош вуоно арлы АПК-ез азинтон понна, бюджетысь 15 процент тупатыны. Сиён-юон поттӥсь предприятиослы но Удмуртиысь сиён-юонъя корпорацилы гурт калыклы озьы ик ӝегатскытэк вань тыронъёссэс берыктоно. Дугдоно ни, шуэмын вал кенешын, электрокужымлы ялан дунъёсты ӝутыны. Агропромышленной комплексын ужасьёслэн профсоюззылэн комитетсылэн В пленумез, кылдэм югдурез лыдэ басьтыса, постановление кутӥз 1997 арын 15 октябре Россиысь мукет регионъёсын ӵош пумитъяськон ужрад ортчытыны. Та нуналэ Удмурт Республикалэн Кун Кенешез азьын пикет ортчытӥз. Кун Кенеш ивортэ Кун Кенешлэн Тӧроез Александр Волков Москвае кошкиз, Федерацилэн Кенешезлэн ужаз пыриськон понна. Кык нунал куспын Россиысь парламентлэн вылӥ палатаез 12 ужпумез эскерыны чакла. Соос пӧлын "РСФСР-лэн Уголовно-процессуальной кодексаз воштонъёс но ватсанъёс пыртон сярысь", "Байкал тыэз утён сярысь" Законъёс но Россия Федерацилэн Музъем кодексэз. Пыӵал тӥрлык поттӥсь промышленностьын югдур сэрттэмын-пертчемын луоз но Россиысь Правительстволэн армилы ож тӥрлык но техника поттонэз радъянъя ужамез эскериськоз. Удмурт Республикаысь Кун Кенешлэн пресс-службаез. КЫДЁКЫСЬ УЙ ПАЛ ШАЕРЪЁСЫН Акциосын "Спецгазавтотранс" огазеяськон - шаерысьтымы одӥгез кужмо но пыд йылаз ӟеч сылӥсь предприятие. Соин 1985 арысен кивалтэ Удмурт Республикаысь Кун Кенешлэн депутатэз Владимир Алексеевич Тумаев. Коллективлэн бадӟым люкетэз тырше шаермылэн палэназ кыдёкысь уй пал шаеръёсын. Вахта амалэн ужан - предприятилэн одӥгез яркыт тодметэз. Уй пал куазь адямилэсь чидан кужымзэ юн эскере. Таӵе дыръя оскымон техника - коллективлэн бур киыз, шуыны луоз. Водитель Геннадий Васильевич Писарев (туспуктэм вылын) аслэсьтыз автомобильзэ эш чотын адӟе. Ма, кызьы сотэк, уно иськемез ӵош ортчизы ни угось. Туспуктэмъёсыз Н.СЮВАЕВЛЭН. Министерствоослэн, комитетъёслэн, ведомствоослэн, предприятиослэн, организациослэн, учреждениослэн, акционер огазеяськонъёслэн кивалтӥсьёссылы ивортон 15 октябрьысен 15 ноябрёзь Федерацилэн почта кусыпъёсъя управлениез "Удмурт дунне", "Удмуртская правда", "Известия Удмуртской Республики" газетъёслы гожтӥськонэз льготаосын ортчытэ. Республикаысьтымы вань предприятиос, учреждениос, отын ужасьёс та газетъёслы гожтӥськыны быгатозы. Витьтонлэсь тросгес экземплярлы гожтӥськем предприятиослы дунъёс кулэстэмын луозы. Юанъёсын вазиськоно таӵе телефонъёсъя: 22-44-54, 25-81-11. Нуналлэн тодметэз Вашкала календарья туннэ пусйиськом Денислэсь праздниксэ. Тодӥсь-валасьёс та нуналэ син усемлэсь бурмытыны быгато. 17 октябрьлы - Ерофейлэн нуналэзлы - кезьытъёс лекомыны ӧдъяло ни. Та вакыт нюлэс муртъёс асьсэ сярысь тодэ вайыто. Кесясько, серекъяло, киоссэс чабо, писпуосты тӥяло, пӧйшуръёсты уйыло. Та нуналэ нюлэскы ветлыны кышкыт. Та нуналэ... ар талэсь азьло 16 октябре 1971 арын Ижын ортчиз Суворов ордено 357-тӥ стрелковой дивизилэн ветеранъёсызлэн слётсы. Со сӥземын вал огазеяськонлы 30 ар тырмонлы. Люкаськемъёс азьын вераськизы генерал- майор Александр Кроник, Удмуртиысь калык писатель Михаил Лямин, Социалистической Ужысь Герой Михаил Калашников. 17 октябре 1961 арын ужаны кутскиз КПСС-лэн ХХИИ съездэз. Соку КПСС_лэн ЦК-езлэн Нырысетӥ секретарез Н. С. Хрущев коммунизм сюрес вылэ йыгмыт султон сярысь вераськиз вал. Правительствоын 20 октябре Правительстволэн Президиумез эскероз нылпи пособиосты тыронъя ужпумез. Сыӵе ӵектон сётӥз Правительстволэн Тӧроез Павел Вершинин. Та ужпум трос пол ӝутъямын вал ини, нош та учыре сое сэрттозы-пертчозы, Кун Кенешлэн Президиумезлэсь решенизэ лыдэ басьтыса. *** Удмуртиысь Профсоюзъёслэн федерацизылэн кенешаз ортчиз обороная промышленностьын тыршӥсьёслэсь куронъёссэс быдэстон бордын ужась группалэн пумиськонэз. Правительстволэсь Президиумзэ та ужрадлэн йылпумъянъёсыныз тодматыса, Павел Вершинин косӥз пыӵал тӥрлык поттӥсь предприятиослэсь налог басьтонын кылдэм югдурез эскерыны но соослэсь бюджет азьын пунэмзэс предприятиослэсь социальной удыссэс азинтонэ ыстыны. *** Калыкез дышетонъя министерствоысь, Культурая министерствоысь, Печатья но иворъёсъя министерствоысь, Удмуртиысь Правительстволэн Нациосын ужанъя комитетысьтыз кивалтӥсьёс Москвае, Россия Федерациысь Нациосын ужанъя но федеративной кусыпъёсъя министерствое, кошкизы. Татын соос Куӟебай Гердлэн вордскемез дырысен 100 ар тырмонлы сӥзем ужрадъёс пусъёзы. *** Удмурт Республикаысь газ сётӥсь предприятиослэн ужамзы понна калыклэсь коньдон басьтон сярысь ужпум берлолы кельтэмын. Чакламын та юанэз Правительстволэн Тӧроезлэн нырысетӥ воштӥсезлэн кенешаз эскерыны. *** Россия Федерациысь Ужъя но социальной азинсконъя министерстволэн Кун луисьтэм пенсионной фондъёсъя инспекуциез но Удмурт Республикаысь Правительство куспын ӵош ужанъя огкыл пумысен постановленилэсь инъетсэ эскерыны чакламын. Удмуртиын 18 пенсионной фонд пӧлысь кыкез гинэ лицензия басьтыса ужа. *** Нюлэс хозяйствоя министерство гужем ужамезлы йылпумъянъёс лэсьтӥз. Туэ нырысетӥез тылпу 30 апреле потӥз. 84 тылпуосын 36 гектар нюлэс ӝуаз. Тылпу потэмлы, азьло сямен ик, адями янгыш. Куиняз гинэ учыръёсы "горд атаслы" эрике потыны инкуазь "юрттӥз". Удмурт Республикаысь Правительстволэн пресс-центрез. Пунэмзэ тырон Удмурт Республикаысь Калыкез улон-вылонын утёнъя министерство ивортэ: Россия Федерацилэн Правительствоысьтыз Ог-огдэ валанъя но тупанъя фонд азьланьтэ нацистъёс ки улэ сюрылэм гражданъёслы - Германие но солы союзник луись государствоослэн музъем вылазы ужаны кужмысь поттэмъёслы, фашистъёслэн концлагерьёсазы, тюрьмаосазы но геттоосазы пытсэт сьӧрын пукемъёслы компенсациос тыронзэ. Кин та дырозь ӧз басьты на кулэ документъёс, фонд куре вазиськыны улон интыосысьтызы калыкез улон-вылонын утёнъя отделъёсы. Л. МЕШКОВА. БЕРЕКЕТ Сад пушъе мыло-кыдоосын Тросэз гуртъёс будо но чеберско. Син куспын кылдо выль урамъёс. Гуртоосын ӵош городысь вуэмъёс но уен-нуналэн тыршо. Шудон чача выллем коркаос котырын ӝужало яркыт буёло сяськаос, тэлеӟо ненег писпуос. Городысь вуэм адями кузьыли кадь ужа аслаз 5-6 сотка музъем вылаз: толлы сиён-юон дася, чылкыт омырын аслыз тазалык люка. Тани Пичи Пурга ёросысь Пуро-Можга гуртын но даслэсь уно ни сад-бакча возисьёс. Кыӵе мылкыдын уло, мар сюлэмшугъяськытэ соосты? Вазиськоно кариськи Истомин кузпалъёслы. Виктор Семенович но Ольга Александровна кемалась ӧз лыктэ ай гуртэ. - Вералэ вал, кытысь тӥ ми палъёсы вуиды? - Ньыль ар талэсь азьло бертӥм уй палась. Отын кӧня ке уксё люканы быгатӥм. Ужаны интыяським нефть поттӥсьёс доры. Кивалтӥсьмылэн Яган-Докъяын сад-бакчаез вань (Пуро-Можга но Яган-Докъя одӥг совхозэ пыро). Со ик вераз, та палъёсын буш музъемзы, пе, трос. Собере Ижевскозь но туж кыдёкын ӧвӧл. Дэмлазы кема аръёс ӵоже нокинлы кулэ луисьтэм музъемез. Вӧзаз мунчолы бугро вузазы на. Тӥни со татчы выжыяськеммы луиз. - Ольга Александровна, нош коркадэс кин пуктыны юрттӥз, туж мыло-кыдо пуктэмын ук? - Асьмеос вань улонмес городын улэмын бере, корка пуктонэз умгес йӧндыриське. Тау Федор Иванович Кузьминлы, ӟеч мед улоз сопал дуннеяз. Со висъяз милемлы корка коръёс, со ик юрттӥз фундамент но кисьтыны. Нош корка мугорзэ пуктӥзы калымен ужасьёс. Пушсэ но соос ик векчи пулъёсын шуккылӥзы. Кызьы но озьы котыртӥм бакчамес. - Музъем бордын ужамтэослы секыт-а вал кутсконэз? - Нырысьсэ музъем бордын ужаны кутскемме тодам ваисько ке, сереме потэ. Ӝытъёсы, туж зол жадьылэменым, корказетӥ ньыльпыдъяськыса пырисько вал.Пыдъёсме пӧсь вуэн тазэ понӥсько но пукисько. Ярам коть, сиён нуназе ик дасясько вал. Пуксиськом кузпалэным ваче но огзэ-кыксэ векчи виямзэ но лэзиськом, жадеммы мед быроз шуыса (кит-кит серекъя). - Нош лушкаськемзылэсь уд-а кышкаське? - Ма, марзэ татысь лушкалод? Собере мон оскисько гурт калыклы. Ми соослы номыр уродзэ ум кариське бере, соос но милемлы уз лэсьтэ, дыр. Витяе тани юромо трос-трос улмопу мерттӥз. Дырыз вуиз ке, пиналъёс дорамы лушкем медаз пыралэ шуыса, соослы ведраен ик улмо кузьмалом. Милям тани киярмы но трос луэ ке, эшъёсмылы дунтэк но сётъяськом. Жаль ӧвӧл, мае сётыны гинэ мед луоз. - Кылды нош ӝог-а тупаз бускельёсыныды? - Милемлы бадӟым шуд усиз, дыр, сокем умоесь бускельёсмы. Сооос милемлы йӧл но, курег пуз но сётъяло. Нош мон пунэмзэ кидысъёсын я удъёсын берыктӥсько. Тужгес но бадӟым тау шуэме потэ Катя апайлы. Ми солы анаймылы сямен вазиськиськом. Мунчомы сяна ӧй вал но ай. Соку ик ми вань бускельёсын огазе люкаськылӥмы ини. Я вордӥськем нуналмес пусйиськом, я маке эшшо мукет муг сюре. Тӥни озьы шулдыр, калыкен ӵош ортчытъяськом ӝытъёсмес. - Нюлэскы потаськоды-а? - Поръян сямен ветлӥськом. Кытӥ-отӥ губи бичаськом, куддыр кӧня ке узы-боры сюре. Сьӧрамы пунымы но ветлэ. Чылкыт омыре потам со вылын но шӧдӥське, гонэз ик пуштырске. Одӥг пол коӵышмес но нюлэскы нуллӥм. Со милям туж визьмо, сьӧрамы пуны сямен ветлӥз, вамышлы но ӧз кыльы. - Ужам бервылдэс адӟыса, сюлэмды шумпотэ, дыр? - Кызьы, пе, сотэк. Быдэс толэз асьме сиёнмес сииськом ук. Георгин сяськаосме туспуктэме лэсьтӥ вал. Эшъёсы адӟизы но шуо: "Ой, Ольга, кыӵе чебересь розаосыд!" Садмы пушйиз ке, эшшо но шулдыр луоз. Соку уката ик сюлэм уз ӵыд ни. - Кыӵе малпанъёсты азьланезлы? - Огсямен улысалмы ке, бакчаямы кельтэм буш интыяз пичи сарай лэсьтысалмы. Курег-ӟазег вордэм потэ уго. Соку пичияк асьмелэн сӥльмы но луысал. Одӥг умойтэмез вань та гуртын улэммылэн: кыкмы но удмурт кылэз ум тодӥське. Оскисько: азьланяз одно ик дышом. - Малпанъёсты мед быдэсмозы. С. ДОЛГАНОВА, Удмурт кун университетын дышетскись. Кылзэлэ, вераське "Ингур" радио Газет лыдӟисьёсмылы ивортылӥмы ни вал: удмурт кылын дасям передачаосты кылзыны луэ УКВ каналъя, туж вакчи тулкымъёс вылын. Толэзьлэсь ятыр ини, Удмурт радиолэн выль кылдэм студиез ужзэ выль сямен ӧръяз. Табере со нимаське Удмурт кун радиокомпанилэн удмурт радиоезлэн "Ингур" творческой огазеяськонэз. Россиысь "Ностальжи" радиоен огкыл тупатэм бере, удмурт кылын дасям передачаосты кылзэмды луоз ни электроприёмниклэн куинетӥ кнопкаяз, "Маяк" интые. Котькуд нунал ӵукна 8 час 10 минутысен кутскыса 11 часозь, нуназе бере 15 часысен 17 часозь. Та каналын ик толэзяз ньыль пол мынэ бигер кылын передача, толэзяз одӥг пол - пор кылын. Выль каналэ ужаны выжеменыз валче, "Ингурлэн" радиоверанъёсыз эшшо но узырмизы. Тазалыкез утёнлы сӥземын "Тазалык" радиожурнал. Котькул кӧс нуналэ (субботаосы) 15 час 5 минутысен 15 час 50 минутозь кылзэмды луоз "Тӥляд куремдыя ӟечкыланъёс" передачаез. Со мынэ меӵак эфирын, дорады пукыса жингыртыны быгатоды "Ингур" студие, кинэ ке тодмодэс шулдыр кырӟанэн ӟечкыланы курыса (телефон номерез - 51-25-12). Котькуд арня нуналэ нылпиос кылзыны быгатозы "Чингыли" передачаез. Иворъёсын но крезьгурен "Арня ӵоже" радиоверан озьы ик кылзӥсьёслы трос шулдыр мылкыд кузьмалоз. Удмурт спектакльёсты яратӥсьёс радиозы азе пуксьыны быгатозы арня нуналэ 16 часын. Огкылын вераса, "Ингур" гурзэ шудэ тӥ понна но, лыдӟись эшъёсмы. Л. МАЛЫХ. * Меӵак эфире потон азьын кенешо Валериан Исламгареев - меӵак эфирын радиоверанъёсты нуись, Марина Ходырева - крезьгуръя редактор, Людмила Вахрушева - корреспондент. * Надежда Терокова - меӵак радиоверанъёсты нуись но Дмитрий Михайлов - куарая оператор. В. КАМАШЕВЛЭН туспуктэмъёсыз. Шӧкыч Ялонъёс Вузасько ош. Кык ар ортчыса, Ыжгуртысь Паньтэм Чырсамовлы вазиськоно. Оше али ӧз на вордӥськы. *** Воштӥсько кышноме. Кышное уг тоды на. *** Шӧкычлы жингыръяло... - Алло! Берлрез "Шӧкычты" мыным туж кельшиз. - Нош маиз тужгес но сюлмады биниськиз? - Шумпотыса лыдӟи Петровлэсь гожтэмзэ. Туж яраз, ява. Малы ке шуоно, Петров - со мон ачим. Шӧкычлэн телетайп лентаысьтыз Туннэ "Ю тысь тю-тю" колхозын бадӟым праздник - хозяйствоысь вань скалъёсты вузаса, выль трактор басьтӥзы. Таин валче колхозын шутэтскон нунал ялэмын. *** Туж аспӧртэмлыко кунян вордӥськиз "40 ар йӧлтэк" колхозлэн Скалгурт фермаяз. Солэн - кык кылыз. Соин, лэся, татысь скал утисьёслэн верамзыя, али гинэ вордӥськем кунян удмурт сямен но, ӟуч сямен но бӧксыны быгатэ. Нуналлэн тодметэз вашкала календаръя туннэ пусъё Харитинлэсь нуналзэ. Вуиз куиськон, гын сапег шуккон вакыт. Ӵуказе - Денислэн но Фомалэн праздниксы. Та нуналэ ӵемысь тӧлаське. 20 октябрь - Сергейлэн нуналэз. Туннэ лымыяськиз ке, Матрёналэн нуналозяз (22 ноябрёзь) тол вуыны кулэ. Та нуналэ... ар талэсь азьло 18 октябре вордскемез дырысен 70 ар тырме Удмуртиысь калык художниклы Л. М. Васевлы (1927- 1972). 19 октябре 1941 арын Обороная кун комитет Москвалэн секыт югдуре вуэмез сярысь ивортӥз. 19 октябре 1941 арын Глазовын кылдӥз 49-тӥ стрелковой бригада. Отысь одӥгеныз взодэн кивалтӥз писатель Михаил Петров, "Вуж Мултан" романлэн авторез 1945 арын бригада 208-тӥ Кенигсбергской Краснознаменной стрелковой дивизия луиз. 18 октябре 1947 арын Советской Союзын балистической ракетаос лэземын. 20 октябре 1944 арын Куинетӥ Украинской фронтлэн войскоосыз тушмонлэсь мозмытӥзы Югославилэсь столицазэ Белград городэз. ЮАЛЭ - ВАЛЭКТОМ Нош ик пенсиос сярысь Лыдӟись эшъёсмылэсь редакцие трос гинэ юанъёс вуо пенсиос тырон ласянь, льготаос, нылпи пособиос сярысь, калыклы улон-вылонын юрттонъя но мукет. Газет пыр азьланяз но чакласькомы со юанъёслы валэктонъёс сётылыны. Нош туннэ пенсиос пумысь валэктонъёс сётэ Калыклы улон-вылонын юрттонъя министерствоысь валтӥсь специалист Т. И. ТОЛЧИНА. Картэ понна номыр уг басьтӥськы Мынам картэ ожысь бертӥз сӧсырмыса. Вань улытозяз курадӟиз пыдыныз. Кулӥз 1989 арын, пери (паралич) шуккыса, вить ар курадӟиз. Мон ужамын колхозын, пенсие 257 сюрс манет. Картэ понна номыр уг басьтӥськы. Со кулэмен валче луэ-а мынэсьтым пенсиме йылэтыны, Быдӟым Отечественной войнаын ожмаськем муртлэн кузпалэзлы шуыса. Районысьтымы райсобесэ вазиськылӥ, но пайдаез ӧвӧл, гуртэ кулэмын, шуо. Е. МОСОВА. Игра ёрос, Шор Шадбег гурт. Райсобесын ужасьёслэн валэктонзы шонер. Оже ветлэмъёслэн кузпалъёссылы пенсия тыриське ожын бырем картсы понна гинэ, мукетызлы уг ни бызё ке. Но тӥледлы, Евдокия Егоровна, ожысь сӧсырмыса бертэм картты понна эстӥськон пулы, тыллы ӧжытгес дун тырыны льготаос чакламын. Пие шудтэм учыре сюриз 1997 арын 9 сентябре мыным 50 арес тырмиз. Кылылэме вань, вить нылпи будэтэм кышномуртъёс дырызлэсь вазь пенсие потыны быгато. Мон дас куинь ар ужасько ини колхоз заправкаын, ваньмыз ужаме куамын кык ар люкаське. Кузпалэным вить пи будэтӥм, но нырысетӥез куать арескын шудтэм учыре шедьыса быриз. Макем бадӟым куректон со анайлы. Тазалыке но уродмиз, висьыса ужаны туж секыт. Луэ-а мынам витьтон арескын пенсие потэме? Р. ПРОТОПОПОВА. Дэбес район, Такагурт. Жаляса верано луэ, Протопопова эш, но законлэн куронъёсызъя, та арлыдын пенсие потыны тӥ уд быгатӥське. Россия Федерациысь кун (государственной) пенсиос сярысь законлэн 11-тӥ статьяяз шуэмын (кутэмын 1990-тӥ арын 20 ноябре), вить но солэсь трос нылпи ваем но соосты тямыс аресозь будэтэм нылкышноос пенсие потыны быгато 50 арескысен. Ужад - коньдон но тросгес басьты 30 сентябре телевизор пыр возьматӥзы но валэктӥзы арлыдоослы пенсиос тырон радэз но мукетсэ. Отын шуизы, вуоно арын 1-тӥ февральысен пенсиосты выльысь лыдӟозы.Пенсионер ужам аръёссэ ас тодэмезъя басьтыны быгатэ, пе. Табере юан кылдэ, кытысь но кыӵе ужам аръёссэ басьтыны быгатоз война дыръя трудоденен ужам адями, пенсие кошкыкуз но уждунэз пичи вал ке? Азьло ужамтэ адямиос, война мышкын ужам, курадӟемъёсын одӥг кадьгес пенсия басьто ини. Мыным 65 арес, ужаме 48 ар люкаське, нош пенсия 270 сюрс сяна уг басьтӥськы. Кышноелэн нош пенсиез 250 сюрс манет, Ижевск - Балезино чугун сюрес лэсьтонын ужаз ке но. Ужамез солэн 40 ар люкаське. Мукетыз юанэ. Уг-а малпало война мышкын ужын данэ потэмъёсты оже ветлэмъёсын одӥг радэ пуктыны? Н. АЛЕКСЕЕВ. Пичи Пурга район, Пуро-Можга гурт. 1998 арын 1 февральысен улонэ пыӵалоз "Кун пенсиосты лыдъян но будэтон сярысь" Россия Федерацилэн Федеральной Законэз. Та Законлэн 7-тӥ статьяысьтыз "б" пунктъя ужам аръёсы (стаже) календарья лыдэ басьтӥськозы ужам, военной но солы ӵошатэм службаез ортчем вакытъёс, озьы ик Россия Федерациысь "Россия Федерациын кун пенсиос сярысь" Законэзлэн 92-тӥ статьяысьтыз "а", "е", "ж" пунктъёсын верам вакытъёс (ужтэк кыльыса пособие басьтон; ужез выльысь эскерем бере, пытсэт сьӧрын мултэс пукем дыр; ужась муртлэн огдырлы ужаны быгатымтэез; ужын яке ужен герӟаськем висёнэн И яке ИИ группаысь инвалид луон). Ужен герӟаськымтэ нокыӵе мукет вакыт стаже уг пыры. Николай Игнатьевич, пенсие потэм документъёстыя, тӥляд ужам стажды 49 ар 9 толэзь но 9 нунал. Пенсидэс лыдъяны басьтэмын кык берлоез ужам аръёсты - 1990 арын июнь толэзьысен 1992 арын май толэзёзь. Та дыре шоро-куспо уждунды люкаськиз 9567 манет 33 копейка. 1998 арын 1 феврале выль сямен басьтоно пенсидылэн быдӟалаез тазьы лыдъяськоз: 1. Со кык аръёсы басьтэм шоро-куспо уждундэс - 9567 манет 33 копейкаез люкиськом 24 толэзьлы, луэ 398 манет 64 копейка. Та поттэм лыдпусэз табере люкиськом со кык басьтэм аръёсты вакытэ ик кӧня шоро-куспо уждун вал Россиын. Солэн быдӟалаез - 537 манет 29 копейка. Люкыса поттӥськом 0,74 коэффициент. Законлэн 4-тӥ статьяезъя сое 0,7-озь вуттӥськом. 2. Табере шедьтыны кулэ асьтэлэсь коэффициенттэс, со потоз ужам стаждылэн процентъёсыз бордысь, тӥляд со 75 процент 49 ар ужам понна (25 ар ужам стажды борды котькуд берло аре быдэн 1 процент ватсаськиз). Озьыен, 0,7 коэффициентэз уноятӥськом 75 процентлы (0,7х75), луэ 0,525. 3. Табере лыдъялом, кыӵе луоз пенсидылэн быдӟалаез 1998 арын 1 февральысен. Чакламъёсъя, 1997 арын 4-тӥ кварталэ шоро-куспо уждунлэн быдӟалаез Россиын луыны кулэ 1 миллион манет. Уноятӥськом сое тӥляд коэффициенттылы (0,525һ000000 = 525).Озьыен, пенсидылэн быдӟалаез луоз 525 сюрс манет. Та лыдпусты вӧзы будэтыны кулэ на Россия Федерацилэн кун пенсиосыз сярысь законын чаклам ватсэтъёсты. Фронт мышкын ужамды понна, пенсиды вӧзы будэтӥське на 42093 манет. Выль законъя солэн быдӟалаез азьло кадь ик кыле - арлыд вуыса сётӥськись тужгес пичи пенсилэн 50 процентэз. Озьыен, огъя пенсидылэн быдӟалаез луоз 567093 манет. Та пенси вӧзы уг сётӥськы ни Президентлэн Указэныз (1996 ар, 14 апрель) чаклам компенсация. Пенсиосты лыдъян но будэтон сярысь та выль закон кутӥськоз ужасьтэм пенсионеръёс понна гинэ, ужасьёсызлэн пенсизылэн быдӟалаез азьло кадь ик кыле, компенсациез но вераса. Кинлэн ужам стажез ӧвӧл но кин басьтэ социальной пенсия, та закон соос понна уз кутӥськы. Мукетызлы юандылы валэктон. Фронт мышкын ужаса данэ потэм адямиос оже ветлэмъёсын одӥг радэ пуктэмын уз луэ, законъя со чакламтэ. Берекет ЛЭСЬТЭ АСЬТЭОС Шунтэм сыр 1 кг сыр дасяны кулэ 8,5 стакан кузятэм йӧл (творог), 2,5 сиськон пуньы нӧкы яке шунтэм вӧй, 4 чечы пуньы сиён сода но 3 чечы пуньы сылал. Вузэ ӟеч пызьыртэм кузятэм йӧлэз сӥс пыр яке сӥль коран пыр поттоно. Ваньзэ сое посудае пононо, содалэсь ӝыны люкетсэ вылаз пызьнано но, ляб тыл вылэ пуктыса, дугдылытэк сямен пу пуньыен сурано. Ву потыны кутскиз ке, посудаез 5-10 минутлы тыл вылысь басьтылоно, вузэ кисьтоно. Кылемзэ содаез ватсаса, эшшо тыл вылэ пуктылоно на. Кузятэм йӧл умой-умой пӧзьыса напчыны кутскиз ке, вӧй ватсано. Сылал но мукет ватсэтъёсты (тмин, анис, укроп но мукет) дась луон азязгес пӧзьтэмысь дугдэмлэсь 15-20 минут азьло пононо. Соку сыр нуйтӥськись, нап чечы кадь луэ ини. Пӧзьтэм сырез вӧен зырам тэркые ӝогак гинэ кисьто но кезьыт интые пукто. Посудаысь сырез лякытэн висъяны луэ, сое пӧсь вуэн пар вылын пукетыса. Гурт сыр Тазэ но сырез лэсьтыку, кисьтэм йӧлэз сӥс пыр яке сӥль коран пыр поттоно, вузэ пызьыртоно. 4 кг сыӵе творогез 100-150 г сылалэн сурано но эмален шобыртэм яке пулэсь лэсьтэм посудае пононо. Вылтӥз шобыртоно 2-3 полэс марляен яке дэраен, пызьнано на сылал. Табере вылаз котырес пул интыяно но секыт зӥбет пононо. Посудаез лач шобыртоно. Эн вунэтэ посудаез но вань шобыръёсты быректэм пӧсь вуэн миськыны-гылтыны. Озьытэк сыр пурысьтаны, уродмыны кутскоз. Сырен посудаез салкым интые пукто но чакласа уло, медаз уродмы шуыса. Вуэз ке потэм, сое кисьто, шобретсэ вошто, выльысь вылтӥз сылал пызьнало. Посудаез нош ик лач пытсано. Толэзь ортчиз ке, сыр сиыны дась луоз. Картофка сыр Та сыр туж ческыт. Саксониын улӥсьёс сое тазьы дасяло. Картофкаез палатэк гинэ пӧзьто. Сӥямез бере палало но ыльнянь кадь луытозяз нелько. Нелькем картофкалэн 5 люкетэзлы басьто 1 люкет чырсам йӧл, ӟеч-ӟеч сурало, посудае поныса, ӟеч ӵоктало но 3-4 нунал пукето. Собере выльысь нелько, пичиесь колӟоос лэсьто но салкым азьын куасьто. Сыр ческытгес пӧрме, соосты бадӟымесь горшокъёсын яке бекчеосын возё ке. 15 нунал ортчыса, со дась луэ. Дасяз А. НИКОЛАЕВ. Мылкыдзэс лӧпкытӥз "Айкай" Арлыдоослы сӥзем толэзь котькуд районын ас сяменыз ортче. Завьялово районысь Лудорвай но Шудья гуртъёсын улӥсь мӧйыосты но сӥлы каризы. Та нуналэ соос возь вылысь турлы буёло сяськаос кадь адскизы. Букваез тодмасьтэм пересь кышноос но шыкысысьтызы поттӥзы, луоз, самой чебер дӥсьсэс. Арлыдоосты праздникен ӟечкылазы гурт администрациын ужасьёс, районысь куд-ог кивалтӥсьёс. Соос сюлэмшугъяськытӥсь юанъёслы валэктонъёс сётӥзы, кенешизы. Нош мылкыдзэс эшшо но золгес лӧпкытӥз кырӟанъя но эктонъя "Айкай" фольклор ансамбль. М. СЕМЕНОВА. БЕРЕКЕТ ТӤЛЕДЛЫ АМАЛООС Ӵашетэм уз кылӥськы Укноосты ураме учко. Отӥ машинаос мыно-ветло, ӵашетэм, мотор куараос корка пушкады юн шуккисько. Мар кароно, улон интыяды чалмытгес мед луоз шуыса? Куинетӥ укно син пуктоно? Нош со туж дуно усёз. Рамаос вискы вата тырон но уз юртты. Оскалтэ, пӧртэм зӧкталае укно синъёсты пуктыса.Ульча пала учкись рамае зӧкгес ке син пуктӥды, соку корка палась пияла векчигес мед луоз. Озьы кырысь лыктӥсь ӵашетэм куара кык пӧртэм зӧкталаё укно синъёс вискын зӥбломе, уггес кылӥськы ни. Замок сыномиз ке... Ӧс борды вандыса юнматэм замок (тунгон) сыномем, усьтыны-пытсаны уг луы. Одно ик-а сое интыысьтыз басьтыса сузяно? Кызьы сое выльысь ужатоно? Усьтонэз машина вӧен зыралэ но кӧня ке пол замокез усьтэ-ворсалэ - шӧдоды, кызьы со тӥлесьтыд "кылзӥськыны" кутскиз. Эшшо но ӟечгес мед ужалоз шуыса, огшоры карандаш сюлэмез (графитэз) туж векчи пыргытэм но, бумагалэсь векчи гумы лэсьтыса, огпал пумзэ замок пушкы донге, со пыр графитэз пельтэ: замок выль дыръяз кадь ужаны кутскоз. Тазьы ик "эмъяны" луоз сыномыны сюрем мукет замокъёсты но. Л. ВАСИЛЬЕВА. БЕРЕКЕТ Тӥледлы, нылпиос Луло вужеръёс Суред вылын сётэмын пӧртэм пӧйшуръёс, соослэн йыръёссы (сьӧдэн возьматэмын). Кызьы адӟиськоды, соос киослэсь, чиньыослэсь кылдэм вужеръёс луо. Тон но, пинал эше, дышетскы борддоре луло вужеръёс пуктыны. Со понна кулэ луоз ӝӧк вылэ пуктэм лампа (светильник). Мукет туспуктэмъёсты азьланяз потӥсь номеръёсын но сётъяломы на. Л. ВАСИЛЬЕВА. Быризы пиналъёс Эшшо одӥг кӧшкемыт учыр: Киясово - Сарапул тракт вылысь одӥгаз кожонын 15 октябре ГАЗ-53-12 грузопассажирской автобус сюрес урдсы пограз, водитель руль сьӧры кудӟыса пуксемен сэрен. Пиналъёс сӧсырмизы. 14 аресъем нылаш но 16 аресъем пияш интыязы ик быризы. Эшшо 12-17 аресъем дас одӥг пинал, секыт шуккиськыса, больницае нуэмын. Ваньзы соос Юрино шор ёзо школаысь дышетскыса берто вал. Али та учыръя эскерон уж нуиське. Э. КУМАЧЕВА. Правительствоысь иворъёс Санитарно-противоэпидемической комиссилэн Правительствоын ортчем кенешез республикаын толлы дасяськонэз но улон юртъёсы шуныт сётонэз эскериз. Югдур секыт. 15 октябёзь социальной удысысь 100-лэсь ятыр объектъёсы шуныт но пӧсь ву ӧз вуы. Котельнойёссы дась ӧвӧлэн, уг шунтӥсько 61 школа но 6 больница. Татчыозь шуныт сётэмын ӧвӧл Сарапулын. Улон юртъёсын кезьыт улэмен, туэ сентябрь толэзе гинэ 33 сюрс пала адямиос кынмаса висизы. Кылем арын та толэзен ӵошатыса, со 13 сюрслы ятыргес. Кылдэм югдурен валче, комиссия министерствоослэн но ведомствоослэн, ёрос администрациослэн кивалтӥсьёссылы ӵектӥз вить нунал куспын ужпумез эскерыны. *** Та нуналэ ик Правительстволэн Тӧроезлэн воштӥсез Антонина Лисина кивалтэм улсын ортчиз Республикалэсь нуналзэ но Удмуртъёслэсь куатетӥ ӧтчамзэс ортчытонъя оргкомитетлэн заседаниез. Правительстволэн Аппаратысьтыз пресс-центр. Шӧкыч Сяртчы Вуж выжыкыл выль сямен Улӥллям-вылӥллям кык пересьёс-пенсионеръёс. Пересь сяртчы мерттэм. Сяртчыез верантэм бадӟым будэм. Пересь кыска, кыска, ишкалтэмез уг луы. Кышнозэ ӧтем. Ойдо, пе, Матрон, юртты. - Уг быгатӥськы, базаре сема вузаны мынӥсько. Бере кыли ке, интыме басьтозы. Ачид ик потты ни,- вазиз Матрон но ӟукыртӥсь ӧсэз шлач карыса, вузкарыны лобатӥз. Соку Пересь внучказэ ӧтиз. Ойдо, пе, Ирочка, юртты. - Ох, песятай, чик но кӧлыны уд сётӥськы! Ма, быдэс уйзэ дискотекаын вал, лэся, ук, чылкак катьтэмми... Ачид ик потты ни,- вушйылыса вазиз Ира но шобрет улаз мургес пыриз. Соку Пересь пунызэ ӧтиз. Ойдо, пе, Жучка, юртты. - Ав, ав, неку татын сяртчы кыскаса ветлыны. Улонмы уродме, колхозъёс куашкало, ужаны азьтэмъясько... Сяртчы кыскан понна монэ депутатэ ӧз быръе. Сессие мынӥсько тани,- ыргетӥз Жучка но, мышкысьтыз зӧк папказэ поттыса, "Орбита" машинаяз пуксиз. Бӧрсяз тузон гинэ пурӟыса кылиз на... Соку Пересь шыр доры вамыштӥз. Ойдо, пе, Ёрги, юртты. "Байлык" АО-лэн кивалтӥсез Егор Егорыч кыӵе ке кагазъёсын выре вал. - Ой, уг быгатӥськы, уг быгатӥськы,- векчи куараеныз нёръяз со.- Тазалыке урод ни. Ялан ужаса тани туж-туж висисько. Йӧнатскыны Италие лобисько,- синъёссэ питыръяса ик кӧен сыръясь гадь бордаз кутӥськиз шыр Ёрги. Пересь йырзэ ошиз но дор палаз лашкинтӥз. Озьы ветлытозяз, сяртчыез му вылаз ик сисьмиз. - Охо-хо,- лулӟиз Пересь... Выжыкыл мадиз Елена ПАНФИЛОВА. Суредаз Леонид ПРОЗОРОВ. Шӧкыч Пук дорын, пие, эн ветлы школае! Секыт югдур кылдэмын Ижысь 9 номеро школаын. Солэн юртэз туннэ яке ӵуказе куашканы дась. Фундаментэз вужмемен но лябӟемен, борддоръёсыз отӥ но татӥ пилиськемын ини. Ярам ай, нылпиосты мукет школаосы дышетскыны интыязы. Угось котькуд урок шудтэм учырен йылпумъяськыны быгатысал. Дас одӥг ар талэсь азьло та юртын куинь мурт бырыны шедиз ини. Сыӵе шудтэм учыре соку шедизы строительёс. Юртэз тупатыны выро вал, спортзалын ужакузы, вылазы бетон плита усиз. Школалэн юртэз 1963-тӥ арын ӝутэмын. Проектъя 850 дышетскисьёслы чакламын. Озьы ке но, арлы быдэ татын 500-лы тросгес нылпиос дышетскизы. Та дыре школаын 1306 нылъёс но пиос дышетскыны кулэ. Ваньзы соос табере мукет школаосы ветлоно луо. Нош 9 номеро школаязы кематэк уз берытске ни, дыр. Тупатъян ужъёс 2-3 ар кыстӥськозы. Озьы малпало та школаысь дышетскисьёслэн анай- атайёссы. Кин нош тодэ, оло, уг янгышало? Угось бускельёссы дорын но, 5 номеро школаын, тупатъян ужъёсты пӧртэм мугъёсъя туж кема нуйтӥзы. Нош маин пӧртэм 9 номеро школа? Татын но озьы ик каллен тяпайтозы, дыр. Авторлэсь. Материалэз дасяку, редакцие "Удмуртгражданпроектысь" ужасьёс жингыртӥзы. Школалэн юртэз, пе, нокыӵе кышкытлык уг кылдыты. Сыӵе малпанэ вуэм кыкетӥез эскерон комиссия. Озьы ке но, 9 номеро школа ужаны кутскыны уг на малпа. "Удмуртгражданпроектэн" куинетӥ эскерон комиссия кылдытыны чакламын. Ф. МИННИГАРАЕВ. Берекет Пумитамтэ яратонэ Кылъёсыз Людмила Хрулевалэн Крезьгурез Римма Шкляевалэн Пумитамтэ яратонэ, Пумиськомы меда куке? Нош пумитай ке мон тонэ, Луоз меда яратэме? Припев: Яратон, ой, яратон Кыӵе меда, кыӵе тон? Шуд-а тон, яра-а тон, Шедьто-а тыныд усьтон? Пӧрмоз меда ваче синмысь Вераськыны мылысь-кыдысь? Кык лулъёсысь-сюлэмъёсысь Пӧлэстыны гердтэм сӥньыс? Припев. Я, тон кытӥ-о ветлӥськод? Кинлэсь сюлэмзэ шунтӥськод? Кыӵе сяськаез бичаськод? Кинлы сое тон кузьмаськод? Припев. Яратыны кылдэм шудэ, Мон витисько пумитамдэ. Ӧз на быры та осконэ, Тырмоз кужыме, чиданэ. Припев. Шӧкыч Подпись - Мон кужмо, тон кужмо, Кудмы меда кужмогес? Мон тӧдьы, тон нош сьӧд, Кудмы меда чебергес? Мон визьмо кеч, тон - козёл! Сюрдэ тӥямлэсь азьло, Чальтчы татысь, ну-ко, пшол! Туспуктэмез А. Зыряновлэн. Россилэн бурмыны валасьтэм яраез - сюресъёс. Ноку но соос шонересь, вольытэсь уз луэ, дыр. Вылаз ик, трос интыосын дэри кузёяське. Со сяна, асьме сюресъёс вылысь шер пумиталод пусъёсты- гожтэмъёсты. Сыӵе дыръя воксё паймоно: кудпала мыноно? Йыромод но, ява! (Редакцие вуэм гожтэтысь). Суредэз В. ПАХОМОВЛЭН. Оло, водительёс шӧртчиесь? Ижевк - Шаркан автобусъёслэн рейсъёссы ӝынылы уретэмын. Вторник - четверг нуналъёсы соос уг ветло. Мугез: калык ӧвӧл. Но шарканъёслэн паймемзы чакласькытэ: оло, водительёс шӧртчи ужало. Кин тодэ... Уго берло дыре соос но ас палазы ужаны дышизы. Дасяз Э. КУМАЧЕВА. Финн-угоръёслэн нуналзы Асьме республикаямы финн-угор калыкъёслэсь нуналзэс нырысьсэ 1991 арын пусйим. Нош вашкала выжыосмы венгръёс, финнъёс но эстонъёс талы инъет 1918 арын ик сётӥзы ни вал. Озьыен, вуоно ар - юбилейной, 80 ар тырмоз. Туэ со пусйиськоз 18 октябре (октябрьлэн куинетӥ субботаяз). В. РОГАЛЕВ. ШӦКЫЧ Николай Никифоров Гуртысь укноос Юмореска Книга-газетъёсты киязы шер-шер кутылыса учкисьёс гинэ но тодо: котькыӵе выжыысь калыкъёслэн яратоно сиёнзылы - пельняньлы - ода гожтэмын, ньыль пыдо эшъёсмылы - пуныослы - лыдтэм кылбуръёс сӥземын. Нош малы данъятэк кельтэмын меда гуртысь укноос? Та юан мыным валес вылын назьылляськыса кылльыны маза ӧз сёты ни. Кузпалэ вӧзаз кыске ке но вал, кизэ лекак палэнтыса султӥ но гожъяськон ӝӧк сьӧрам пукси... Гуртысь укноос! Вань меда дунне вылын тӥлесьтыд тунсыкоез, тӥлесьтыд тузӥез, тӥ кадь ас кузёоссы сярысь шара верасез? Городысь укноос лултэмесь кадь пото мыным. Уката ик вылӥ этажъёсысез, кыкетӥысен кутскыса. Янгышен но адӟыны уд быгаты, ма даурто кузёосыз, ваньзэ возъяло дуноесь, зӧкесь возъетъёс. Нош гуртъёсын та ласянь майбыр. Гурт калык уги яраты на люкиськыса, сайяськыса улыны-вылыны. Соин ик ӵемысь укнооссэ но уг возъя, Сыӵе укноос монэ магнит сямен бордазы кыско. Жаль, азьвыл ӧй вала соослэсь дунзэс. Ньыльдон арес тырмем берам гинэ хобби шедьтӥ: гурт укноосты эскерон. Но... ваньмыз радызъя медло ни. Акшан дыре быдэс ёрос пеймыт гуэ лэзиське, кожалод. Огез гинэ оскон кузьма: оло нылпиос тросгес вордӥськыны кутскозы. Азьвыл, керосин лампаен пукыкузы, котькуд семьяын трос нылпиос вордскылӥзы, шуо кема улэм адямиос. Туннэ ӝыт пал ульчае потӥ. Эмчиос кӧлон азьын чылкыт омырен шоканы косо ук. Ветлӥсько чусомем урамтӥ. Тылъёс ӝуатскемын ни вал. Пиштӥсь укноос шоры учкылӥсько. Ӵап соку синйылтӥ: Тропинь Петырен Маланьёс ваче гадьяськиллям. Люр-яр кесясько, ог-огзылэсь йырсиоссэс лӧдо. Воргорон, Маланьзэ вожаса, тышканы басьтӥськем, вылды. Нош кужымзэ чакламтэ, мискинь. Малань табере ужтэк кыльыса, дораз пуке, мугораз кӧй люка. Ма, со азьвыл но чиндыр-чондыр мугоро ӧй вал. Парсьсэ вандыкузы, ачиз картэзлы погыртыса сётылӥз. Та семейной драмаез учкыса ӧй пукы ни, сюресме азинтӥ. Пыдъёсы амалтэк Кулуш Олялэн укноосыз улэ дугдӥзы. Отысь сабырлы крезьгур жингыра. Ольга оген кышномурт, кузпалзэ юэмысьтыз туздырыса лэзиз вал. Нош тэк уг улы, ас кулэзэ шедьтэ. Тани али но Зюзя Микален кильтыръяськыса пуко. Микальлэн кузпалыз больницаын кылле. Воргорон кышномуртлэн гольык мугорызлэсь мӧзмем, луоз. Уть-ай, уть, Ольга дэрем бирдыоссэ поттылэ ни. Воргорон дусымезлэсь йырсиоссэ маялля, быгылес гадьёссэ веша... Мон укнолы матэгес вамыштӥ. Тани ук кутскоз эротика, секс... Эсэпсэ ыштӥ, лэся, янгышен льӧмпу вай борды йӧтскыны шедьтӥ. Нош соиз йыгак! укно борды шуккиськиз. Ольгаен Микальёс валес вылысь лӧбак султӥзы но гур сьӧры ватскизы. Бертыкум ни Писар Пантилэн укноез шоры учкыны шедьтӥ. Ёк-мотылёк! Воксё американской детективын кадь: бускеленыз Семи Педорен жугисько. Кыксы ик кудӟемын. Пуконъёс, тусьтыос лобало гинэ. Аракызы ичигес луэм, лэся, лешак басьтонъёслэн! Огшап учкыса сылӥ но, Педор кысмыляк усем бере, бызьыса кошки. Адӟись карозы, я шай... Тунсыкоесь ик та гурптысь возъямтэ укноос. Оломае но адӟод, ява. Ӵуказе нош-а, мар-а кӧлыны выдон азьын гуртэз котыртоно? А? Кивалтэт азьын - гурт калык Туннэ улонлэн тодметэз куд-огезлы, оло, чик валантэм. Шаерысьтымы гурт хозяйствоос туэ удалтэм ю-нянь, картофка но бакча сиёнъёс будэтӥзы. Урод уг мыны сӥль-йӧл поттон. Малы бен соку музъем ужасьёс но пудо утисьёс алигес люкаськылӥзы Удмурт Республикаысь Кивалтэт азе? Быдэс Россиын сыӵе ужрад 15 октябре ортчытыны чакламын вал. Гурт хозяйствоя но сиён-юонъя министрлэн ивортэмезъя, ӝыныез гурт хозяйствоос куашкамын, тыронъёсын ӝокатэмын. Со гинэ ке луысал. Колхозъёс, совхозъёс, эштосъёс, крестьян хозяйствоос но фермеръёс техниказэс выльдыны уг быгато. Гурт хозяйствоос али йӧлзэс, сӥльзэс вузало йӧл но сӥль комбинатъёсы, нош соос дунзэ дыраз уг сёто, коньдонзэс, оло, банкъёсын бергато? Амалтэк сыӵе юан пуксе. Кивалтэт азе люкаськемъёслэсь куронъёссэс ваньмыз умоен лыдъязы. Кыӵеесь бен соос? - Вуоно арлы бюджетын АПК-лы ичизэ 15 процент висъяно. - Утёно асьмелэсь сиён-юон поттӥсьёсмес! - Гурт калыклы тырмыт музъем сётоно. - Предприятиослэсь-монополистъёслэсь ужамзэс юн чаклано! - Правительство сӥль но сельхозтехника понна юрттэтсэ дыраз мед висъялоз. Бен ваньзэ куронъёсты уд но гожты. Туж жаль. Та ужрад ньӧмыз понна ортчиз. Рессовпроф (кивалтӥсез Евгений Орлов) но АПК-ын ужасьёслэн профсоюззылэн комитетэз (кивалтӥсе Юрий Гребенкин) та ужез тыро-пыдо радъяны ӧз быгатэ. Асьсэлэсь секыт улонзэс, чиданзылэсь быремзэ вераны лыктӥзы кӧня ке районъёсын гинэ улӥсьёс. Гурт калыклэсь мылкыдзэ тужгес но умой вераз Вавож районысь "Луч" колхозлэн тӧроез Иван Перевощиков. Со шуиз: - Туннэ ми берло парсьмес вандӥм но вузам, быдэс парсь вордонэз быдтӥм. Гурт калык куштэмын. Со улэ на аслаз бакчаез но пудоез чотын гинэ. Тани хозяйствоямы шоро-куспо семья вордэ куинь скал, кык ветыл, кунянъёс, ыжъёс, парсьёс но тылобурдо. Аслам но пудое ичи ӧвӧл. Гурт калык 5 часэ ӵукна султэ, 11 часэ ӝытазе корказ пыре. Мар со? Кыӵе зӥбет улын улӥськом! Крестьян калыкез ялан пачкато. Ми куриськом гуртысь котькуд корка 3 фазаен электрокужым кыскыны. Со юртэз шунтон понна ӧвӧл, гуртысь ужъёсты быдэсъян вылысь. Со одӥгез валтӥсь куронмы. Мукетыз, ку милемды адямиен лыдъялозы ни монополистъёс - энергетикъёс но связистъёс. Кытын асьмелэн Правительствомы, малы соослэн кузязы ветлэ, тарифъёсты будэтэ но будэтэ, соосыз куаё но куаё, нош калык мар карыны, кызьы тыронъёссэ ӵоксаны уг тоды. Кыӵе государствоын улӥськом! Шонерзэ верано ке, люкаськемъёс Россиысь Президентэз но тышкаськизы, буржуазной демократия, таӵе рынок, пе, кулэ ӧвӧл. Рабочийёс но крестьянъёс огазеяськыны кулэ. Гурт удыс азьын сылӥсь ужпумъёс сярысь веразы но калыклэн юанъёсызлы валэктӥзы министр Василий Жуйков но Кун Кенешысь комиссилэн тӧроез Аркадий Малков. Г. РОМАНОВ. Куараосыз улӟытӥсь Франциысь Безансона городын туэ ортчиз Дирижёръёслэн 45-тӥез калык куспо конкурссы. 43 странаысь 179 дирижёр пыриськиз отчы. 22-ез конкурсантъёс сюризы финалэ. Йылпумъян турын кыкетӥ интые потӥз Николай Роготнев. 45 ар куспын нырысьсэ таӵе конкурслэн лауреатэз луиз Россиысь дирижёр. Кӧкыез солэн - удмурт музъем. Вордскиз но будӥз Як.-Бодья черкогуртын удмурт семьяын. Егит дирижёрен Николай Серафимович Роготневен мон тодматски 1993 арын толалтэ симфонической оркестрлэн репетициез дыръя. Со дырысен трос пол ке но пумиськылӥм ни, та адями котьку нырысь адӟыкум кадь ик: ӟеч мылкыдо, лякыт, пуш ласянь пиштӥсь. Со шӧдӥське крезьгур тулкымъёс погыльскыку но: асьмеос уго котьку шудӥськом асьмеды, асьме пыртӥ поттыса - Чайковскиез но, Бетховенэз но. Куд-ог али кутскем дирижёръёс, данэ потыса вуо оло уг - кутско ни асьсэды мукет музыкантъёслэсь вылэ пуктыны, оло, пульт сьӧрын ке, асьсэды сокем вылӥын кожало. Н. Роготнев сыӵе ӧвӧл. Соин луэ огъя кыл шедьтыны, капчи вераськыны, крезьгурчилы - шудыны. Капчи тӧл пельтэмез но кадь со шӧдэ, шудӥсь муртлэн мылкыдыз аслыз но пыӵа. Амалтэк тодэ ваиськод А. Чеховлэсь кылъёссэ: визьмо адямиос ярато дышетскыны, нош визьтэмъёс - дышетыны. Огъя вераса, Н. Роготневлэн крезьгурамез улсын бурдъяськоно. Мыным шуд усиз кылемаз Чайковскийлы сӥзем фестиваль дыръя симфонической оркестрен ӵош (милемын вал на Франциысь пинал скрипачка Эрика Велен) Удмуртиысь городъёсы концертъёсын вуылыны. Берлояз ӝытэ Ижевскысь Операя но балетъя кун театрын чузъяськизы Чайковский ("Ромео но Джульетта" увертюра), Сен- Санс (оркестрен скрипкалы куинетӥ концерт) но Шостакович ("Барышня но хулиган" балет-сюита). Кызьы ке огаз зоро ӝытэ мон Николай Серафимовичлэн квартираяз ветлӥ, семьяеныз, асэныз умойгес тодматскон вылысь. Татын ог-огзэс валаса, гажаса уло - шӧдӥське. Монэ пумитаз пальпотӥсь тусо, синме пырисьтэм чебер, мусо кузпалыз Марина Николаевна, музыкальной училищеысь дышетӥсь, калык хорлэн кивалтӥсез.Со Николай Серафимовичлэн нырысь дунъясез но, визь-кенеш сётӥсез но. Семьяязы будо кык нылпиоссы: вить аресъем Даша но укмыс аресъем Максим. Юалляськон куспам дыды возьматыны вуиз гимнастикаен но, фортепианоен но быгатэмзэ. Пичигес комнатаын уно книгаос, пластинкаос, инструмент вылын - усьтэм партитура. Кузёлэн верамезъя, ваньмон дырыз ӧвӧл, вань улонэз - крезьгур, произведениос бордын ужан. Яратэ Чайковскиез, Гайднэз, Брамсэз, Шостаковичез, но быдэс творчествозэс уг - соослэсь куд-ог произведениоссэс. Солэн малпамезъя, котьмалэн аслаз дырыз, соизлэн яке таизлэн композиторлэн крезьгуро дуннеязы пырыны аслыз дыр сётӥське. Потэ быдэстэмез Гайднлэсь Лондонской симфонизэ, Шостаковичлэсь нырысетӥ, витетӥ но укмысэтӥ симфониоссэ. Кыӵе визылъёс бен вуттӥзы сое крезьгуро пачылась ӧре? Як.-Бодья черкогуртын 1965 аре вордскем пияш яратэ вал эшъёсыныз "урамез волятыны", музыка солэн йыраз ик ӧй вал кадь. Анаез бухгалтерын ужаз, но крезьгурез шӧдэ, гитараен шудыны быгатэ вал. Малпазы фортепиано басьтыны. Со понна Коля кутскиз куинь литръем банкае векчи уксё люканы. Но - фортепиано интые корказы скрипка кылдӥз. Кемалы вылымтэ. Ар ортчыса, скрипкаен дышетӥсез кошкиз, пияш лэзиськем киосын кылиз. Музыкальной школае Коля Роготнев мынӥз вал, классысьтызы ныл чортэмен, нош табере бордаз анаез рос-прос кутскиз: Чайковскийлэсь бадӟым туспуктэмзэ басьтӥз, пинал музыкантъёслэсь люкиськонтэм арберизэс - гозы кутонэн папка кузьмаз. Одӥг пол анаез адӟиз: Коля концертэ мынымтэ - азбарын шудэ. Бӧрдыны ӧдъяз. Колялэн сюлэмыз вырӟиз, со валаз: крезьгурлы дышетскон - со огшоры маке ӧвӧл. Домра пияшлы мылкыдъяз ӧз тупа - баян басьтоно кариськизы. Таиз иназ луиз. Крезьгуръя школазэ йылпумъян аре Николай Роготнев луиз элькунамы Чайковскийлы сӥзем нырысетӥ нылпи фестивальлэн лауреатэз. Ижевскысь крезьгуръя училищеез, баянъя классэз, со отличиен быдтӥз. Со вакытэ ик шӧдӥськиз ни дирижёр луон мылкыдыз. Свердловскын Мусоргский нимо Урал консерваториын Николай озьы ик баянъя классын дышетскиз но калык инструментъёсъя оркестрлы дирижёр луыны басьтӥськиз. Та мылкыдзэ юнматӥз, луоз, Свердловскысь музыкальной комедияя театрлэн дирижёрез В. А. Вишневский дорын дышетскемез, солэн симфонической репертуарез. Вить ар куспын бадӟым школа ортчемын, уно симфонической произведениос лыдӟемын-быдэстэмын. Операос бордын ужаны малпась вуоно дирижёрлы удалтӥз со ласянь но: 80-тӥ аръёслэн кутсконазы Свердловскысь симфонической оркестрлэн валтӥсь дирижёрез вал пӧсь тылгизьыё музыкант Андрей Борейко, К. Кондрашин нимо нырысетӥ конкурслэн лауреатэз (гастрольёсыз вал Австриын, Польшаын, Голландиын, али со Познань городын симфони оркестрлэн валтӥсь дирижёрез луэ). Та маэстро дорын Н. Роготневлэн куинь ар дышетскемез но ас емышъёссэ сётӥз. Выпускной экзаменъёссэ со "витьлы" (плюсэн) сётӥз. Юромо одӥг студентлы - Н. Роготневлы шуыса, консерваториын усьтӥзы оперно- симфонической дирижированиея аспирантура. Отын дышетскон куспаз егит дирижёр ужа элькунысьтымы Операя но балетъя театрын. Шудо дырез кадь тодаз вае табере со кык-куинь толэзьёсты, ку огназ нуиз быдэс репертуарез (отын тросэз оперетта вал). Но асьмелэн сыӵе сям кутэмын: валтӥсь дирижёръёсты ваёно палэнысь. Соин ик, огинтыяз лёгаськонтэм вылысь, Н. Роготнев "омырске" конкурсъёс пӧлы. 1993 ар - Ленинградын С. Прокофьев нимо конкурс. (Россиын быгато меда шонер дунъет сётыны?) 1995 ар - Даниын (Копенгагенын) Малько нимо конкурс. Таӵеез луылэ куинь арлы огпол. Даниысь Национальной симфонической оркестр - вылӥ крезьгур чеберлыко, татысь музыкантъёс пичи гинэ шонтэмез-ыртэмез но шӧдо. Н. Роготневлы, мукетъёсызлы кык турез ортчемъёслы сямен ик, дирижировать кароно вал туж шугесь произведениосты: Шубертлэн витетӥ симфониезлэсь нырысетӥ люкетсэ, Гайднлэн 104-тӥ Лондонской симфониезлэсь финалзэ, Берлиозлэн Фантастической симфониезлэсь пумзэ, Чайковскийлэн Витетӥ симфониезлэсь кыкетӥ люкетсэ. Ижевскысь музыкантлы синмаськемзы понна нимысьтыз приз - коньдон премия сётӥзы (соин быдэс ар ужатэк улыны луысал). Та бӧрсьы йӧн-йӧн уж шедьтон ласянь оскон вал кадь ни, но "няньзэ" кыскылӥзы. Нош ик юрттӥзы калык куспо конкурсъёс. 1996 ар - дирижёръёслэн Италиын конкурссы. Нырысетӥ инты! Таиз конкурс радъямын вал Рихард Шумахер - Швейцариысь музыкая академилэн президентэз тыршемен. Музыкантъёс ӵошатскизы гурезьёс йылэ интыяськем черкын. Татысь ӵыдонтэм инкуазь, архитектура, пальпотӥсь калык, итальян кыллэн чеберез - ваньмыз со удмурт крезьгурчилэн сюлэмаз шуныт тылсиосын пыӵаз. Со дас куать нуналъёс шаермы вадьсы выль яркыт кизилиез ӝуатскытӥзы. Туэ тулыс Николай Роготнев умой пуктыны быгатӥз Масканьилэсь "Сельская честь" операзэ (концерт вариантэн). Премьера вал 22-тӥ мартэ. Нош 7-тӥ апреле музыкантлы ассэ возьматоно вал ни Францилэн лымшор палаз Безансона городын. Та конкурсын кыкетӥ тур бере тросэз пазьгисько, куинетӥ туре сюро туж шудоосыз гинэ. Жюри синйылтӥз Николай Роготневез, кӧня ке юанъёсын вазиськиз... Толэзь ортчыса, удмурт музыкантлы вуиз куинетӥ туре ӧтён... - Берло дыре европейской конкурсъёсын славян музыкаез сӥ-бур каро,- шуиз Николай Серафимович.- Тани учке ай, куинетӥ турлэн кыӵе программаез: Чайковский - "Франческа да Римини" симфонической фантазия, Стравинский - "Жар-птица" сюита, Дворжак - Сизьыметӥ симфония, Прокофьев - "Александр Невский" кантата... Со сяна, Моцартлэн "Волшебная флейта" операезлы увертюра, Вердилэн "Аида" операысьтыз люкетъёсыз, Бетховенлэн Витетӥ симфониез, Штрауслэн Кайзер-вальсэз. Таӵе бадӟым программаез ньыль нунал куспын быдэстоз эркын, паськыт бурдъёсын вылӥетӥ лобась, кужмо дирижёр гинэ. Николай Роготневлэн сыӵе кужымез вылэм, со потӥз кыкетӥ интые. Котькуд музыкантлы дирижёр луыны кылдымтэ. Кырӟасьлэн сямен ик, дирижёрлэн но луыны кулэ аслаз "куараез". Роготневлэн сыӵе куараез шӧдӥське валтыны быгатэмысьтыз но, артистлэн кадь ӝуась мылкыдысьтыз но, киосызлэн-чиньыосызлэн шӧдонысьтызы но. Чакламды вань-а, кызьы со потэ эстрадае? Дирижёрлэн (артистлэн) потэмезъя адӟиське, мар со ас сярысьтыз малпа но кыӵеен ассэ адӟытэмез потэ, малпа-а со нырысь ик музыка сярысь яке мукет. Н. Роготнев ассэ олокин уг кожа, вылтӥ кариськыса уг геройяськы. Подиум доры со лыктэ ӝог но капчи, дыртыса, йӧно тус пуктон сярысь малпатэк - та ужлы чик ӧз дышетскы кадь. Пушказ пачылмемзэ пальккаськемлэсь утьыса выллем: нырысь ик инты сётоно аслыз композиторлы - солэсь крезьгуро тулкымъёссэ ӧръяськытоно. Соин ик, оло, ассэ шыпыт, адсконтэм каремез потэ. Сыӵеесь луо зэмос талантэн адямиос. Елена КРАСНОВСКАЯ, искусствовед. БЕРЕКЕТ ВИЗЬМО ПЫРЫ Куаръёслэсь тугоко Пӧртэм писпуосысь ӵужектэм яке гордэктэм куаръёсын вайёсты ӝикытак вандэ но пуктэ глицеринэн но вуэн суретэ (2 люкет вулы 1 люкет глицерин мынэ). Вайлэн пумыз 5 сантиметр палаез та суретын мед сылоз. Озьы глицерин вай кузя куаръёс пушкы вуэ но, куаръёслэн асьсэ туссы быдэс ар пала возиське. Л. ЯКОВЛЕВА. КУН КЕНЕШЛЭН СЕССИЯЗ Кулэ на-а вошъяны? Парламент нош ик ужаны кутскиз. Кӧня ке вазиськонъёсты депутат куронэн лыдъяса, сессия выльысь басьтӥськиз бюджет сярысь законэ воштонъёс пыртон борды. Со герӟаськемын туэлы бюджетэз пичиятонэн-кулэстонэн. Та уж кутскиз федеральной бюджетэз вандонэн, секвестр ортчытонэн. Мукет сямен, Россия шаермылы 289 миллиард манетлы ӧжыт коньдон висъяз. Озьыен, кун бюджетлэн доход люкетэз сомындалы пичиёме. Тӥни соин ик Коньдон ужпумъёсъя министерство бюджетэ ӵектӥз воштонъёс пыртыны яке уно удысъёслы уксё висъянэз кулэстыны. Сессиын тодмо луиз, Россия 36 улосвылъёслы гинэ (89 пӧлысь) ӧжытгес коньдон сётэ. Удмуртия но отчы шедиз. Малы? Таӵе юанлы нокин тыро-пыдо ӧз валэкты. Но одӥгез тодмо, ар йылпумъяськытозь, кык но ӝыны толэзь кылемын. Кулэ на-а бюджет сярысь законэз вошъяны, отчы ватсанъёс пыртыны? Та ужен вырем интые, умойгес, дыр, луысал бюджетэ тросгес уксё пыртон, выт (налог) бичанэз умоятон сярысь сюлмаськыны. Соин ик куд-огез депутатъёс бюджетэз тазьы ик кельтыны куризы. Трибуна сьӧры потӥз Кун Кенешысь комиссилэн тӧроез Виталий Соловьев. Депутат умоесь ӵектонъёс сётыса шуиз: - Мон пумит луисько туэлы бюджетэ воштонъёс пыртонлы. Коньдон уг тырмы бере, сое шыръяно: ӧжытгес басьтоно машинаос. кулэстоно тупатъян ужъёсты, ӟеч кабинетъёс (офисъёс) лэсьтонэз но мукетсэ. Бюджетэ промышленностьлэсь уно коньдон вуэ бере, сое азинтонъя фонд кылдытоно. Луонлыкъёс вань, соосты утчано-шедьтоно. Тани Юрий Лужковлэн дорамы ветлэмезлоэсь азьло вераськемын вал Москваын вузкарон представительство усьтыны. Со пайда сётысал. Табере вузкарон юрт пуктыны малпаськом. Кулэ-а со? Умойгес, дыр, луоз представительство. Туннэ ужъёсмы возьмато: ар ӵоже кун бюджетэ 250 миллиард уксё уз вуы. Малы ке шуоно, пайдаё ужась предприятиосмы син азьын кулэсмо, гурт хозяйствоос ваньмыз сямен изъян адӟо, промышленностьын - ӝыныез. Вылӥ верам лыдпус борды эшшо ватсано на 431 но 289 миллиард манет. Нырысез, бюджет сыӵе дефицитэне кутэмын, кыкетӥез, Москва сомындалы юрттэтсэ пичиятӥз. Тӥни озьы одӥг триллион манет ёрос бюджетэ уксё уз пыры. Малы бен куд-огез бюджетэз воштыны выре? Соослэн валэктонзы одӥг - будэтэмын пичи уждун. Соин валче бюджет сярысь законын уноез ёзэтъёс воштӥсько, будо нылпиослы пособиос но музон. Та ужпумез учкыку, вераськон потылӥз вуоно арлы бюджет сярысь. Асьмелы, пе, сое кутоно Россия бере гинэ, куке тодмо луоз, федеральной бюджетысь кӧня уксё вуоз. Толон, 17 октябре, Кун Кенешлэн дас куинетӥ сессиез ужаз на. Г. РОМАНОВ. Малпаськон бугор Кужым яке визь - кудӥз кулэгес? Удмурт кун университетысь валтӥсь преподавательлэн Вера Григорьевна Пантелевалэн урокъёсаз ноку мӧзмыт уг луы. Тодматскиськом удмурт литературалэн кылдэменыз, азинскеменыз, эскериськом Г. Е. Верещагинлэсь ужъёссэ, Н. И. Ильминискийлэсь калыкез дышетон методиказэ но трос мукет дано адямиослэсь улон но творчество удысысь сюрессэс. Нош одӥгаз урокын вераськон потӥз уж сярысь. Кыӵе пӧртэмлыкез кужымен (физической) но визен (умственной) герӟаськем ужлэн? Малы кужымен герӟаськем ужез гуртын улӥсьёс гажалогес, уката ик удмуртъёс? Визьнодо, творчество удысэн вырись адями пыраклы историе кыле, нош музъем ужасез кулэмез бере тодазы уг ваё ни, со сярысь вунэто. Таӵе ужпум монэ малпаськонэ уськытӥз. Урокъёс бере Вера Григорьевнаен пыр-почгес вераськоно кариськи. - Мар муген тросэз адямиос кужымен герӟаськем ужез секытэн лыдъяло, нош визен герӟаськемзэ ужен ик уг лыдъяло? - Таӵе малпан удмуртъёс пӧлын уката ик вӧлскемын кадь потэ. Со герӟаськемын улон-вылонэн, историен. Удмуртъёс котьку но музъем ужен, гурт хозяйствоен герӟаськемын вал. Татын валтӥсь инты сётӥське ки но мугор кужымлы, нош йырвизез будэтон - огшоры дыр быдтон. Удмуртъёслэн учкемзыя, кышномуртлэн данлыкез но солэн ужаны быгатэмез бордын, кыӵе солэн ужам емышез. Мынам песянае но ялан шуэ вал: "Егит дыръям ужаны батыр вал, пиосмуртъёслы ӧй сётскылы". Ужамез понна ик кышномуртэ яратылӥзы пиос но, асьсэос но нылкышноос. Туннэ но удмурт кышномурт ӵемысь улэ ай ассэ жалятэк, ассэ кышномуртэн но, оло, лыдъятэк: со кылдэмын мукетыз понна. Ӧжыт сыӵе калыкъёс, кудъёсызлэн кышномуртъёссы вал сямен ужало. - Гурт калык кужымен герӟаськем ужез данъя ке но, удмурт писательёсмы потэмын гуртысь. - Татын трос мугез - социальной, политической но огъя творчествоен герӟаськем ужпумъёс. Тани Куӟебай Герд 1926-тӥ арын "Удмурт литературалэн сяськаяськон сюресэз" статьяяз гожтӥз вал, удмурт литература - со крестьян литература шуыса. Таӵе ик югдур туннэ нуналэ но. Шуом, литературае лыктэм кыкетӥ тулкым нош ик гуртысь потэмын (Г. Красильников, Ф. Васильев, Р. Валишин), озьы ик куинетӥез но (В. Сергеев, О. Четкарев, кылбурчиос). Инкуазьлэн, дыр, со ужез. Нош со ноку уг янгыша. Со тодэ, кудзэ адямиез музъемен герӟано, нош кудӥзлы гожъяськон, суредан, кырӟан мылкыд сётоно. Соослэн асьсэлэн малпанъёссы. Ведь дунне вылын адямиос туссыя но огкадесь ӧвӧл: огъёсыз гордэсь, мукетъёсыз тӧдьыесь, огъёсыз лыз синмоесь, мукетъёсыз - курень. - Тодӥськоды, луоз, Куӟебай Гердлэн улонысьтыз учырез: со мынӥз кышно кураны, но кышно луонэзлэн ӵужмуртъёсыз сое кулэ ӧз каре. Малы? - Бен, кулэ ӧз каре. Нылмуртлэн ӵужмуртъёсыз учкизы Гердлэсь киоссэ но шуизы: "Кызьы тон хозяйствоез нуод? Тон кырӟаны но вераны гинэ быгатӥськод". Азьвыл утчало вал ужась адямиез, юртъер котырез умой мед возёз, семьязэ утьыны мед быгатоз... - Кыӵе шуг-секытъёссэ адӟиськоды туала удмурт литературалэсь? - Трос шуг-секытъёсыз. Умой, дыр, луысал, удмурт кылын гожъяськысалзы ке городысь потэм адямиос, малы ке шуоно, соослэн культуразы кӧня ке мукетгес. Со выль тулкым одно узырмытысал гурт культураез но, огъя литератураез но. Городын будэмъёс медам вунэтэ вылэм асьсэлэсь удмурт кылзэс. Туала вакытэ книга но туж ичи лыдӟо. Татын озьы ик трос мугез. Одӥгез - ХХ даурлэн пумаз тужгес но вӧлмиз экран (телевидение, видео) культура. *** Кытчы асьмеос мынӥськом? Визьнодэн герӟаськем ужлэн данэз, ӝужаны вуытэк ик усе шат? Ӧйтӧд ини. Туэ та сярысь трос ик уг малпасько ни кадь. Кинлэсь эн юа, ма сярысь малпаськод шуыса, ваньзы вералозы: - Умой улон сярысь. - Нош ма со умой улон? Тросэз малпаськытэк вералозы: - Коньдон! Таиз уго удмуртъёсты но, ӟучъёсты но, бигеръёсты но - ваньзэсты малпаськонэ уськытэ, уйёсы кӧлыны уг сёты. Коньдонлэн данэз бадӟым. Вера Григорьевна шуэм сямен, туэ калык коньдонэз кулэенгес лыдъя. Оксана Москова, Удмурт кун университетысь студентка. Шӧкыч Шӧкыч ялэ конкурс! Кытысь-о тон, кин-о тон, устоез курлась? Огыр-бугыр луэ улон. Нуналысь нуналэ воштӥське. Со сьӧры уиське "Удмурт дунне" газетмы но. Нош кызьы меда солэн ужез пӧрме? "Устоез лыдӟись" конкурсэ пыриськыса, тросэз асьсэлэсь мылкыдзэс веразы ни. Уноез отын газетмес ушъяло. Нош Шӧкыч уромлэн кылэмез потэ вылэм пыкылӥсь кылъёсты но. Соин ик со туннэ ялэ "Устоез курлась" конкурс. Татчы пыриськыны быгатэ котькудӥз, кин лыдӟиськыны но гожъяськыны йӧндыре. Со понна тӥледлы валэктоно луоз кык юанмылы: 1. "Удмурт дуннелэн" маиз тӥледлы уг кельшы? 2. Кыӵе сямъёссэ курласалды Шӧкыч уромлэсь? Мар сярысь но кин сярысь лыдӟемды потэ та бамысь? Та юанъёслы валэктон понна, тӥледлы кулэ луоз на кагаз, ручка но гожъяськыны быгатонлыкъёсты сяна, лыдъяськон устолыкты. Малы ке шуоно, одӥгез куронмы - котькуд юанлы валэктонды дас предложенилэсь трос медаз луы. Нош вормисьёсты кузьым одно ик мед шедьтоз шуыса, эн вунэтэ нимтулдэс но кытын улэмдэс гожтыны. Малпасько, тӥ ури-бери ручка но кагаз утчаськоды ни. Озьыен, кышкатэк азьлань, эшъёс! Тужгес но тунсыкоосыныз гожтэтъёсын Шӧкыч уром газет пыр одно ик вань лыдӟисьёсмес тодматоз. Чидатэк витиськом гожтэтъёстэс! Экономика Сюрессы шонер мед луоз Ортчем аре акционеръёслэн кенешазы "Редуктор" АО-лэн кивалтӥсьёсыз воштэмын вал. Отын ик нимысьтыз верамын, 1997 арын июль толэзёзь заводын югдур ӧз ке тупатскы, со банкротэн ялэмын луоз шуыса. Та дыр куспын арбитражъя кивалтӥсь (арбитражной управляющий) Сергей Молчанов но генеральной директор Валерий Мишунин пӧртэм амалъёс утчазы предприятилэсь куашканзэ дугдытон понна. Али огазеяськонысь кивалтӥсьёслэн но ужасьёслэн верамзыя, сыӵе кышкытлык кулэсмиз ни. Тани шуом, июнь толэзьын редакторъёсты поттон план быдэстэмын 103,24 процентлы, шӧдскымон будӥз му вӧй поттон тӥрлык но цилиндрен редукторъёсты дасян. Вузъёс складын юнме медаз кылле шуыса, ваньбур лэсьтӥське басьтӥсьёслэн куремзыя гинэ. Куд-ог толэзьёсы продукция ӧжытгес поттӥське. Январе но мартэ, корт тырмымтэен, трос сылоно луиз. Ужасьёс юнме шутэтскизы, уждунзы но кулэсмиз. Али предприятиын 1579 адями ужа, станок сьӧрын - 1161 мурт. Уждун сизьым толэзьскын шорлыдын 560 сюрс манет усиз, 613 сюрс манет - инженерно-технической ужасьёслэн, 516 сюрс - станок сьӧрын тыршисьёслэн. Заводлэн выль кивалтӥсьёсыз азьланез понна но сюлмасько. Кылем арын кутскизы вужмем троллейбусъёсты тупатон борды. Трамвай но троллейбус управленилэн (ТТУ) куремезъя, нырысь толэзьлы быдэ одӥг гинэ троллейбус выльдылӥськиз. Та ужлэсь пайдазэ заводын валазы, соин ик табере татын луонлык кылдытэмын котькуд толэзе куинь машинаез сюрес вылэ дасяны. Ужъёс умойгес мед мынозы шуыса, "Реванш" ООО кылдытэмын. Отын заводлэн паез 52 процент луэ. Со сярысь "Реванш" ООО-ен огкыл гожтэмын, кудӥзъя завод огазеяськонлы пӧртэм тӥрлыкен но кортъёсын юрттоз. "Реванш" ООО-лэн кивалтӥсезлэн Вадим Гапишкинлэн верамезъя, али татын дасямын ини умоесь специалистъёс, соос быгато пӧртэм ужъёсты быдэсъяны. Троллейбус тупатон сяна, ТТУ курылэ мукет ужъёсты но быдэстыны, "Реванш" ноку пумит уг луы. Озьы та ёз "улэп" коньдон понна туж уг ёрмы, соин ик али уждун тыронэн но капчигес луиз. "Реванш" ООО матысь дыре "Редуктор" АО-лэсь люкиськыны уг ик малпа, солэн "бурд" улаз та дыре капчигес ужаны. Берло аръёсы Ижевскысь троллейбусъёс туж зол вужмизы, ӵем тӥясько, соин ик татын матысь аръёсы выль машинаос дасяны чаклало. Со сярысь вераськон мынэ Польшаысь автозаводэн. Отысь вуозы кузовъёс но кӧня ке пӧртэм ёзъёс (узелъёс), бӧрысьгес соос но Ижевскын ик дасяськозы. Нош та нуналъёсы мытэм ужез азьланьтыны уксё уг тырмы. Оскем потэ: сю ар талэсь азьло вашкала удмурт Карлуд шур дуре ӝутскем завод, кыкетӥ даураз выжыса, калыкмылы тросгес пайда ваёз. Предприятиын умой валало, одӥг редукторъёсын гинэ азьлань шуг вамыштыны. Заводын ужасьёслэн "выль сюресъёссы" шонергес мед луоз вылэм. Н. ВОЗИСОВ. Нуналлэн тодметэз Вашкала календарья туннэ пусъё Петрлэсь но Павеллэсь нуналзэс. Та нуналэ палэзь бичано. Вунэтоно ӧвӧл тылобурдоос сярысь но, кӧня ке вуэм емышез интыяз ик кельтоно. Палэзь удалтэмын ке, сӥзьылэд зор-кото улоз. 24 октябрь - Федоралэн нуналэз. Ӵемгес зор-кот усе ни. Та нуналэ... ар талэсь азьло 23 октябре 1922 арын кылдытэмын Удмурт областной прокуратура, 1935 арын со пӧрмытэмын Удмурт АССР-ысь Прокуратуралы, али - Удмурт Республикаысь Прокуратура. 23 октябре вордскемез дырысен 65 ар тырме Г. А. Ходыревлы (1932-1995), тодмо удмурт нылпи писательлы, журналистлы, РСФСР-ысь калыкез дышетонъя отличниклы, УАССР-ысь культура удысын сӥё-дано ужасьлы, Удмуртиысь Комсомоллэн премиезлэн лауреатэзлы. Вордскиз Алнаш черкогуртын. 23 октябре 1944 арын Глазовысь 49-тӥ стрелковой дивизия борды кылдытэм 208-тӥ стрелковой дивизия нырысьсэ Восточной Пруссиын ожмаськонъёсы пыриськиз. Удмуртъёслэн ӧтчамзы азьын Луоз-а Ижевскын удмурт корка-кунокуа? Удмурт нылкышно огазеяськонлэн пичи кенешез (исполкомез) таяз люкаськемаз эскериз удмуртъёслэн вуоно ӧтчамзылы дасяськонэз, чаклаз 1998 арлы ортчытоно ужрадъёсты. Исполкомлэн адямиосыз съездын ӵектонэн потыны малпало, "Удмурт кенешлы" тӧрое Валентин Кузьмич Тубыловез быръён пумысен. Удмурт нылкышноослэн пичи кенешсы пумит луэмзэ вераз Ижевск городын "Удмурт кенешлэсь" нимаз ёззэ кылдытонлы. Сыӵе ёз кылдытон сярысь ужпум ӝутылэмын вал удмуртъёслэн Ижевскын ортчылэм конференциосазы. Вуоно арлы нылкышноослэн пичи кенешсы валтӥсь быдэстоно ужпумъёсты чаклаз. Коньдонтэк соосты улонэ пыӵатыны уз луы, соин ик со ужпумъёс эскеремын вал 1998 арлы бюджетэз дасян азьын. Вералом одӥгзэ гинэ чаклам ужез. Со герӟаськемын Ижевскын удмурт корка-кунокуа пуктонэн. Сое лэсьтыны луонлыкъёс татын вань. Кылсярысь, Ижевскысь 7 номеро училищелэн юртэз пырак куашкан калэ вуэмын, нош отын удмурт киужъёслы гуртъёсысь вуэм нылъёс дышетско. Быгатӥсь специалистъёс соосты куиськыны, чильпаськыны дышето - паймымон удмурт ковёръёсты, шобретъёсты, кускерттонъёсты али ик вузаны поттӥд ке - басьтозы. Но сыӵе киужъёслы дышетэм нылъёсты туж шуг уже интыяны. Выль удмурт корка пуктэмын луысал ке, нылъёс ик сое азьланяз утялтыса-чебермаса возьысалзы. Лыктэм куноослы ас киужъёссэс но вузаны быгатысалзы. 7 номеро училищелэсь юртсэ тупатъяны кивалтӥсьёслэн коньдон сётэмзы уг поты - укыр дуно усёз, шуо, лякытгес, пе, та училищеез воксё пытсаны. Но та училищеын сяна, нокытын но сыӵе специалистъёсты уг дасяло. Асьмелы, удмуртъёслы, соосты кызьы ке но утьыны быгатоно вылэм. Т. БАННИКОВА. Ужлы ёрмисьёс Кулэсме-а, будэ-а соослэн лыдзы? Можгаысь уже интыянъя центрысь валтӥсь специалистлэн Т. Павловалэн верамезъя, ужлы ёрмисьёслэн лыдзы кулэсмыны ӧдъяз. Милям центрамы, шуиз со, али лыдэ басьтэмын кык сюрс мурт. Валамон ини, нырысь ик со герӟаськемын бусы ужъёсын. Ужлы ёрмисьёс пӧлын кулэсмизы ужысь ас мылкыдзыя кышкемъёс, ужан радлыкез тӥямзы понна мозмытэмъёс, школаосты быдтэмъёс. Но азьло сямен ик уно на штатсэс кулэстыса, ужысьтызы мозмытэм адямиос но удысазы кема дыр ӵоже ужасьтэмъёс. Угось уноез предприятиос тыро-пыдо уг ужало. Соослэн кивалтӥсьёссы рынок амалэн ужан вакытлы дышымтэ, уноезлэн дышетскемзы но уг поты. Соослы тодазы вайытэм потэ: кивалтӥсьёслы капчи улон уз берытскы ни. Ваньмызлы берганы дышоно. Н. Маликов. Удмуртъёслэн ӧтчамзы азьын "Тӧллы пумит вамышъяны секыт" Шаерысьтымы котькуд район ас сяменыз аспӧртэмлыко луэ шуи ке, уг янгыша, вылды. Пурга, Можга, Алнаш, Шаркан палъёсын, оло музъемзы небытгес, оло калыксы чупресгес. Соос шаерамы ортчись ужрадъёсы котьку сямен мылысь-кыдысь пырисько, азьветлӥсьёс луо. Нош мукетъёсыз? Шат ӧвӧл соослэн сыӵе быгатонлыкъёссы? Жаляса верано, куд-ог дыръя мукет районъёс шаерамы ортчись ужрадъёсты тодытэк но кылё вылэм. Озьы шуыны луысал Грахово районын улӥсьёс сярысь но. Ортчем арня вискын Граховоысь удмуртъёслэн конференцизы ортчиз. Та ужрадэ мылысь-кыдысь пыриськизы лыктэм куноос но. Куинь ар ужамзылы йылпумъянъёс лэсьтӥзы "Удмурт кенеш" огазеяськонлэн ёросысь ёзэзлэн кивалтӥсьёсыз. Лымшор район одӥгез аспӧртэмлыкоез луэ, дыр. Угось татын вить пӧртэм калык улэ, вить пӧртэм кылын верасько. Оло, соин но ёрос администрациысь куд-ог кивалтӥсьёс нимаз нациос шоры чиньы пыртӥзы кадь учко. Шуэмзы потэ, лэся: "Мар удмуртъёсыз олокытчы но лэзьялод, сотэк но коньдон уг тырмы". Юрашъёслэн фольклор коллективзы ас быгатонлыкъёссэ Ижевскын возьматысал ке, ваньмы паймысалмы но, дыр, нош соос тодытэк ик кылиллям. Удмурт кивалтӥсьёслэн сюлэмзы висе ӟучомем удмуртъёс понна. Одӥг куиньмосэз угось анай кылзэс вунэтэмын. Районъя учконо ке, удмуртъёс 36 процент гинэ люкасько. Соос огазе люкаськемын Вылӥ Эгра, Вожой но Ятчи гуртъёсы. Татын улӥсьёс ик котькыӵе ужрадын - азьветлӥсьёс, школаосын но удмурт кыл улэ, шока, шуыны луоз. Тӧллы пумит вамышъяны котьку секыт. Лэсьто, тыршо кадь грахъёс, нош выльёсыз сюлмаськонъёс кылдо. Вожойысь дышетӥсьёс быдэс школаенызы удмурт ужпумъёс бордын тыршо. Ортчытъяло валче пумиськонъёс, ӵош пукон ӝытъёс. Пӧртэм ужрадъёс пыр кусыпъёссэс юнмато эграосын. Нош выль дышетскон ар вуыса, 10-тӥ - 11-тӥ классын дышетскисьёс понна удмурт урокъёс интые, факультатив гинэ кельтэмын вылэм. Ивор вӧлмиз Ижевскозь. Калыкез дышетонъя министерствоын ужасьёс вуылэм бере, югдурзы тупатскиз кадь. Грахысь удмуртъёс быремын ӧй вал но, уз но быре. Дӥсьтонтэм сямзэс гинэ палэнтоно вылэм. Уно зэмос кибашлыос. Ваньмон дырзэс но быгатыса ортчытъяло: пужыятӥсько, керттӥсько, чильпасько. Малпамъя гинэ улыны уг луы. Мылкыдзы вань ӵемгес Ижевске вуылыны - кыдёкынгес. Ярано коть: "Родина" колхоззы вань на. Солы луыса, кыре-буре, калыке потаны быгато. Транспорт ласянь кылдэм шуг-секытъёс палэнтэмын луо. Шумпотымон: мукет районъёсын грахъёс кусыпъёссэс уг ышто. Тау карон кылъёссэс веразы алнашъёслы. Азьланяз но медам, пе, вунэтэ вылэм ог-огмес. Озьы ик адӟем каро можгаослэсь. Котькуд куинетӥ субботае соос огазе люкаськыса кенешо. Грахъёс но быгатэмзыя вуо. Нырысьсэ лымшор районэ вуылыкум, со ӟуч кадь потӥз вал, нош аръёс ортчемъя, райцентрын удмуртъёслэн но куаразы кылӥськыны ӧдъяз. Альбина Владимировна Тарасова данъяськыса кадь шуэ: "Удмуртъёсмы милям но вань". Конференция ортчиз ӟырдыт мылкыдын. Вераськонэ пыриськизы но ӵош кенешыса ужаны мылкыдзэс веразы чуваш, ӟуч огазеяськонъёслэн кивалтӥсьёссы. Быръемын ёрос кенеш. Кивалтӥсе кылиз азьвылэз ик, Юрий Константинович Рожин. Озьы ик бырйизы на ӧтчаме делегатъёс но куноос. Соос пӧлын: Ю. К. Рожин, А. В. Тарасова, А. Г. Красильников но В. М. Иванова, Л. М. Красильникова, В. С. Крестьянинов, А. В. Аблаев, Л. Л. Айпалова. Малпасько: удмуртъёс азьланяз но мылысь-кыдысь пыриськозы районын ортчись ужрадъёсы. Палэнысь вуэм артистъёсты но тыро залъёс пумиталозы. Шумпотымон соиз но, та конференциез ортчытыны юрттӥзы районысь куд-ог эштосъёс, ужбергатӥсьёс. В. КУТУЗОВА. Удмурт радиолы - 65 Котькуд адямилэне вӧзаз аслаз дышетӥсез луыны кулэ. Гожъяськон удысын нырысетӥ вамышъёс лэсьтыкум, мыным удалтӥз: Удмурт радиоын Афанасий Васильевич Лужанинэн артэ ужаны шуд усиз. Зӥбыт но лачмыт адями, мон шоры сайкыт но визьмо учкыса, соку ик уж сётӥз - ӟуч кылысь удмурт кылэ берыктон. Сое ӝог гинэ быдэстӥ - туж капчи потӥз мыным. Афанасий Васильевич лэсьтэмме соку ик эскериз но чуръёсме мылысь-кыдысь тупатъяз. Собере берен сётӥз киям: ме, пе, учкы, оло, тазьы валамонгес луоз радиоез кылзӥсьёслы. Мон ӝогак синйылтӥ ки йӧтылэм интыоссэ но ӵыжектӥ. Кӧня пусъетъёсыз люкаськиллям - ваньмыз шонересь! Озьы со вӧзын кутски радиожурналистикалэн "секретъёсызлы" дышетскыны, кыллэсь кужымзэ валаны. Афанасий Васильевич кивалтӥз общественно-политической ужпумъёсъя редакциен. Соин ӵош мыным ужано луиз тямыс ар. Нырысь - берыктон удысын, собере - корреспондент луыса. Берыктон удысме азьпала поттыкум, ӝутылӥз: "Я, мын "улон пушкы". Аслаз юн манереныз, котькуд кылзэ зол зӥбыса, тазьы индылэ вал: "Тон пиналысен заводын ужамын, ветлы отчы, вуылы лэсьтӥськонъёсы, гуртъёсы, гожъя отысь тыршисьёслэн азинсконъёссы сярысь, шуг-секытъёссэс возьматы, адӟы ӟечсэ но, уродзэ но. Только ваньмыз шонер мед луоз. Тодыса ул: тыршись адями зэмлыкез гажа". А. В. Лужанинлэн гожъян манерез йыг-йыг вал. Адямилы меӵак синмаз вералляз солэсь тырмымтэоссэ. Тросэзлы пальпотон пыр, нош укыргес вылтӥяськисезлы но сьӧрпалаз ортчемезлы - ирониен но сарказмен. Таӵеосыз трос уг луо вал: зэмлыко критикалы йыркуръяськисьёс куд-ог дыре гинэ вуылӥзы кабинетамы. "Мон тӥледлы юрттыны уг быгаты. Ӧйтӧд, кин ӵектӥськоз Ижевскын яке Москваын? Соин ик тӥледлы вазиськыны кулэ ООН-э",- озьы меӵкытъяз со азьлане мыныны люкетӥсьёслы. Лужанин, усто журналист сяна, мон понна вал на адӟем карымон кылбурчи. Котькуд ӵукна, выль кылбурез вуэмын ке, поэт лыдӟылӥз сое ӝутскем мылкыдын. Радиоын ужакуз, кылдылӥзы трос чуръёсыз - Родинамылы, калыклы сӥземъёсыз, озьы ик - улонысь уродзэ ӵушкась фельетонъёсыз, басняосыз. Нуналыз кутскылӥз поэзия бордысен. Советской ураметӥ вазь ӵукна ик ортчыку, огез квартира укно яркыт пиштоз вал. Юнме шорысь-а со сярысь таӵе чуръёс ветлӥзы: "Калык изе на, нош Лужанин Кылбуръёсыз бордын ужа ни". Нуназе ёросын радиое пыраллязы тодмо писательёс, композиторъёс - Степан но Василий Широбоковъёс, Михаил Покчи-Петров, Геннадий Корепанов-Камский но мукетъёсыз. Вуылӥзы районъёсысь гожъяськисьёс. Афанасий Васильевич, магнит сямен, бордаз кыскыны быгатылӥз калыкез. Ачиз но со трос тодэ вал, шумпотыса кылзылӥз мукетъёсызлэсь но верамъёссэс. Тодэ лыктэ огез учыр. Огпол кабинетамы вуиз Алнашын пичи дыръям ӵош дышетскем эше Петр Кубашев. А. В. Лужанинэн огкыл ӝог гинэ шедьтӥз. Огпумысь ивортӥз Алнаш палась серемес но шенгыль вераськись кузпалъёслэн ваче тупаса улэмзы, соослэн огпӧртэм яратоно кылъёссы сярысь: "Озьы-а, Насьток? - Озьытэк-а, Исьток!" Тае Афанасий Васильевич туж сак кылзӥз но малпаськись луиз. Собере, номыр но вератэк, шыпак дӥсяськиз, сиськыны бертӥз. Лымшорамысь ӧжыт ӝегасагес вуиз, нош мылкыдыз макем капчи вал! "Толя! - гудыртыса ик вазиз мон шоры,- таӵе кылбурез кылэмед вань-а? Насьток но Исьток Уло тупаса, огкылысь, Уд шедьты ни тон Сыӵе семьяез нокытысь..." Афанасий Васильевич лыдӟе но лыдӟе, нош мон малпасько: кыӵе зол быгатэм огшоры маскара учырез кылбурлы пӧрмытыны! "Та кырӟанлы тупасал, дыр",- шуисько. Нош со куспын, юри тупатэм кадь, пыре Геннадий Корепанов-Камский. Солы но туж яраз кылбур. Соку ик шедьтӥз кырӟанэзлэсь темазэ. Кошкиз но ӝытазе куать час ёросын вуиз выль нотаосы ӧръям "Насьток но Исьток" кырӟанэн. Со туж ӝог вӧлмиз: луиз калык кырӟан. Калык асэстӥз, сюжетэз но крезьгурез маскара луэмен. Зэм но, аслаз пуштросэзъя со тумошо верослы яке комедилы кельше. Котькудӥз куплет возьматэ азинскись югдурлэсь одӥг люкетсэ. Майбыр Насьтоклэсь, Исьтоклэсь улэм-вылэмзэс автор шонер йылпумъя. Озьы ке но, тужгес кулэез мукетыз бордын: композитор кылбур чуръёсты уката но пезьгыт каре, пародиез но ирониез кутыса, котькуд рефренын-диалогын ушъяськыса кесяськонъёс пыр. 60-тӥ аръёслэн кутсконазы Афанасий Васильевич синйылтӥз "Лашман Петыр", "Педор но Помидор" выллем кӧня ке кылбуръёсме. Геннадий Михайловичлы соосъя кырӟанъёс гожтыны ӵектӥз. Соку ик вераз, "кивоштӥсь луиськод ни" шуыса. Афанасий Васильевич кема вераськиз удмурт сатираез будэтон сюресъёс сярысь, гожъяськон амалъёс пумысен но. Тани кырӟан-сатира кулэ каре сюжет быгатыса лэсьтэмез но усто рефрен кылдытэмез, нош басня - вуж сюжетэз выль сямен берыктэмез, лэчыт йылпумъямез. Юнме шорысь вылымтэ Афанасий Васильевичлэн кивоштӥсь сярысь вераськемез. Ӝоген солэн висёнэз кужмояз, йырсиез азвесь кадь луиз. Нош мыным мыноно вал кык арлы Ленинградэ дышетскыны. Кошкон азямгес Геннадий Михайлович Корепанов-Камскиен ӵош Афанасий Васильевичлы сӥзим "Тон эн усьы ӝоже" кырӟанмес: Льӧль ӵыжыт бам вылад Кисыри ке кылдӥз, Бабылес йырсияд Тӧдьыез ке адскиз, - Тон эн усьы ӝоже, Мур эн лулскы, эше. Гош лулскылонъёсыз, зэм но, вал: юнме ӧз луылэ соос. Берло нуналлы быдэ сямен кивалтӥсьёс доразы ӧтьылӥзы. Малыез отӥяз тодмо луиз: одӥг ужысь поттэм кивалтӥсьлы инты кулэ луэм. Нош В. Юшкова но В. Ложкин обком азьын кыл сётӥллям со адямиез кутыны. Озьы, "трос висеменыз сэрен" шуыса, сое, 52 аресъем муртэ, пенсие келязы. Мынам сыӵе юн возиськисез, пенсие дырызлэсь вазь кошкись адямиез, адӟеме ӧй вал на. Берло но ӧй адӟы. Кивалтӥсьёс ӧз яратэ сое. Угось Афанасий Васильевич туж ӵемысь пӧсятылӥз кузёосты лябесь творческой ужасьёсты кутэмзы но соос пала дурбасьтэмзы понна. Али но озьы ик луиз: со интые лыктэм адями но удмурт кылэз йӧн-йӧн ӧз тоды, со интые гожъяно, тупатъяно луылӥз. Мукетыз тодмо кылбурчи, туж лякыт но умой адями, Гай Сабитов но, дырын-дырын пуштылӥз. Огаз партсобраниын со вераз: "Юшкова эш, кивалтӥсьмы туж яратэ писательёсмылэсь ужъёссэс тупатъяны. Огпол мон солы удмурт кылэ берыктэм Лев Толстоез сётӥ. Сое но сокем вакчиятэм. Мон курисько: партсобрание мед дугдытоз сыӵе эрказъяськемысь". Кык ар ортчыса, А. В. Лужанинэз адӟыны ӧз кылды ни. Секыт ыштон вал со мон понна: кӧня юанъёсы кылизы, кӧня дышетэмзэ витисько на вал. Озьы но вань улэмез, вань гожъямъёсыз, "Тулыс зор" книгаез бордысен кутскыса, "Салют", "Зырдась сюлэм", "Кылбуръёс но басняос", "Зускиос" но мукетъёсыз, "Осотовецъёс" поэмаез, басняосыз мыным котьку вайылӥзы шумпотон, улон азьмылы оскон. Солэн юн сюлэмо луэмез милемыз, егитъёсыз, дышетылӥз уродлы пумит нюръяськыны. Анатолий УВАРОВ. УДМУРТЪЁСЛЭН ӦТЧАМЗЫ АЗЬЫН Шаймиевез тодо, нош Волковез... - Ку адӟыны быгатомы удмурт телепередачаосты? Тани туннэ но (10 октябре) Кизнер районмылэсь дано адямиоссэ, чебересь интыоссэ телевизор пыр возьматозы, нош ми учкытэк кылиськомы. Минерал вуэз, нюлэс узырлыкез уже кутыны малпаса, ӧдъямы вал районамы курорт пуктыны, нылпиос понна пу шудонъёс лэсьтыны. Ӧз пӧрмы. Чебересь малпанъёсмы тӧлъя-буръя кошкизы. Бен ми янгыш шат районамы химической завод ваньысь?.. Таӵе юанъёс бордысен кутскиз Кизнер районысь удмуртъёслэн огазеяськонзылэн ӧтчамзы. Быдэсак со ӟырдам мылкыдын ортчиз, соинтэк-а кизнеръёслэн ужамзылы вылӥ дунъет сётӥзы люкаськемъёс но Ижевскысь вуэм куноос. Районын кылдэм огъя югдурен нырысь ик тодматӥз Кизнер администрацилэн тӧроез Владимир Александрович Алексеев. Со шара вераз сюлэмшугъяськонъёссэ, азьланезлы малпанъёссэ. Кыл сётӥз удмурт кылэз но дышетыны. Районысь удмурт национальной центрлэн кивалтӥсез Елизавета Владимировна Петрова "Ӧтчамысен ӧтчамозь" докладэныз тодматыса, залын пукисьёслэсь мылкыдзэс эшшо но пуромытӥз кадь.Ӟырдыт сямо кышномурт тупен-тупен мадиз районысь "Удмурт кенешлэн" ёзэзлэн ужамез сярысь. Котькуд районын сямен ик, кизнеръёс сюлмасько пиналъёс, будӥсь кивоштӥсьёс сярысь. Малпаське ай асьтэос: 115 егит пиос пӧлысь армие мыныны дась туннэ 52 процентэз гинэ. Соослэн уг тырмы вессы, ляб тазалыксы. Нош ма бордын солэн мугез? Тросэз анай-атайёс аракы бекчее выемын. Куд- огез асьсэ вордэм нылпизэс виналы вузаса ветло, пе. Арысь аре йылэ паласькись висёнъёсын курадӟисьёслэн, асьсэды быдтӥсьёслэн но ужтэк кылемъёслэн лыдзы. Лымшор районын удмуртлыкез ӝутон ужрад секытэн сётске. Озьы ке но, нырысетӥ вамышъёс лэсьтэмын. 1989-тӥ арын ортчытэм переписья, районын улӥсьёс пӧлысь 46 процентэз удмуртъёс лыдъясько. Нош зэмос удмуртъёсыз ӝыныез но вань меда? Будӥсь нылпиос ӟучомыны вуо. Районысь куд-ог школаосын радъямын ӧвӧл на удмурт кылэз дышетон. Безменшур школаысь удмурт кылъя но литературая дышетӥсь Валентина Николаевна Кузнецова меӵак шуиз: "16 школаын анай кылмес дышетэмъясько ик. Со пӧлысь дасаз факультатив чотын гинэ. Озьы-а уз ӟучоме пиналъёс? Тросэз та предметэз мултэсэн лыдъяло. Вераськыны быгатэмъясько ке, дышетоно ӧвӧл ни, кожало, лэся. Кыдёкын улэменызы, оло, кизнеръёс шергес вуыло шаермылэн шорсюлмаз, ма, собере Ижевскысь кивалтӥсьёс но ӵем уг вуыло Кизнере. Можгаос сямен ик, кизнеръёс но газетъёсты пыкылӥзы вылӥ кивалтӥсьёс понна гинэ ужаны выремзэс. "Удмурт дунне" кырӟась-эктӥсьёсты тросгес возьматэ, пе, нош политикаен но социально-экономической ужпумъёсын герӟаськем материалъёс ӧжыт пото. Та пала командировкаосы но шергес, пе, вуыло. Одӥг полаз пумиськон ортчиз Правительстволэн Тӧроеныз. Калык лачак гинэ люкаськем. Кивалтӥсез адӟыны, пе, юри лыктӥм. Шаймиевез котькуд ӝыт адӟиськом, нош асьме кивалтӥсьёслэсь тусбуйзэс но ум тодӥське, шуо пумиськонэ лыктэмъёс. Оло, лымшор удмуртъёсмы кунгож сьӧрын уло ни? Удмуртиын улыса, бигеръёсыз ӟечгес тодо бере. Трос пӧртэм ужпумъёсты ӝутӥзы на ӧтчамын. Вераськисьёсты кылзыса, куд-огезлэн синкылиез но потӥз. Кизнерысь "Удмурт кенешлэн" ёзэныз кивалтӥсьёсыз азьланяз но гижысь-пиньысь ужаны мылкыдзэс веразы. Районысь вань удмуртъёслэн нимынызы тау карон кылъёссэс верало Удмурт Правительстволэн Тӧроезлы П. Н. Вершининлы но солэн юрттӥсезлы А. М. Лисиналы, Кун Кенешлэн Агропромышленной удысъя музъем кусыпъёсъя но инкуазь узырлыкъёсты кутонъя комиссилэн тӧроезлы А. Т. Малковлы но Кун Кенешысь депутатлы В. М. Чучковлы. Соослэн юрттэмзы улсын шокало на районысь дышетскон но эмъяськон юртъёс. Удмуртъёслэн куатетӥ ӧтчамазы мынӥсь тямыс делегатлы ӵектонъё сётӥзы. Мылкыд каремын вал, "Кизнер районысь нылпиос" программа кутыны, зэмос удмурт кивалтӥсьёсты будэтыны но мукет. В. КУТУЗОВА. "Удмуртия" общественно-политической огазеяськон кылдӥз 1997 арын 20 мартэ. Сое кылдытӥсьёс пӧлын - шаерысьтымы Ожысь но ужысь ветеранъёслэн кенешсы, Интеллигентъёслэн союззы, "Удмуртиысь егитъёс" огазеяськон, Эрико профсоюзъёслэн федерацизы но Нылкышноослэн союззы. "Удмуртия" огазеяськонлэн нырысетӥ конференцияз 118 адями лыктӥз - пӧртэм партиосысь но огазеяськонъёсысь, культурая но искусствоя учреждениосысь, городъёсысь но ёросъёсысь быръем ёзъёсысь, Кун Кенешлэн "Удмуртия" фракциысьтыз, Кун Кенешлэн Президиумысьтыз но Правительствоысь. Делегатъёс "Удмуртия" огазеяськонлэсь программазэ эскеризы но кивалтӥсьёссэ бырйизы. Координационной комитетэ пыризы: А.А.Волков - Кун Кенешлэн Тӧроез, В.И.Агашин - Кун Кенешлэн Тӧроезлэн воштӥсез, В.А.Журавлёв - Удмурт кун университетлэн ректорез, В.Ф.Загайнов - "Удмуртия" фракциен кивалтӥсьлэн воштӥсез, М.Е.Зыков - Ожысь но ужысь ветеранъёслэн кенешенызы кивалтӥсь, С.А.Коваленко - "Удмуртиысь егитъёс" огазеяськонлэн Координационной кенешезлэн тӧроез, В.Я.Коняшин - Кун Кенешысь "Удмуртия" фракциен кивалтӥсь, Камбарка ёросысь интыысь аскивалтонлэн тӧроез, Г.А.Кулакова - Удмуртилэн сӥё-дано гражданинэз, СССР-ысь спортъя дано мастер, Е.Н.Орлов - Удмуртиысь профсоюъёслэн федерацизылэн тӧроез, С.К.Смирнова - Правительстволэн Нациосын ужанъя комитетэзлэн тӧроез, З.И.Степнова - Удмурт Республикаысь Нылкышноослэн Союззылэн тӧроез, "Сактон" АО-лэн директорез, В.С.Тарасов - Удмуртиысь сӥё-дано гражданин, А.А.Ушаков - Кун Кенешысь депутат, В.Г.Коротков - Профсоюзъёслэн федерациысьтызы. КАЛЫК НО ВЛАСТЬ ОГКЫЛЫСЬ КЕ... "Удмуртия" ЪЪИ дауре ӧте Та вакытэ "Удмуртия" общественно-политической огазеяськон ужа программазэ дасян бордын, матысь дыре солэн кыкетӥ конференциез ортчоз. Выль огазеяськонлэн программаез, ужпумъёсыз сярысь вера А.А.Волков - "Удмуртия" движенилэн Координационной комитетэзлэн кивалтӥсез, Удмурт Республикаысь Кун Кенешлэн Тӧроез. Юалляське Николай Фёдоров. - Александр Александрович, республикаын 14 политической партия но 260-лэсь уно калык огазеяськон ужа. Выль огазеяськонэз кылдытонлэн кыӵе мугъёсыз? Мае выльзэ со асьмелы сётоз? - Республикалы но, Россия Федерацилы но кулэ ог-огедлы юрттон, тупан, чидан мылкыд, аслэсьтыд эшъёстэ гинэ вылэ ӝутонлэсь куштӥськон но Удмуртиысь, быдэс Россиысь улӥсьёслэн дэлетсы понна ужаны дась луон. Самой та бордын ужа выль огазеяськон. Россиысь политикалэн валтӥсь ужпумез - калыклэн но властьлэн кусыпсы. Жаляса верано, асьме кун но калык пӧртэм планетаосын кадь уло, котькудӥзлэн аслаз куронъёсыз, малпанъёсыз. Калык юрттэмъя гинэ власть кунлэсь политиказэ улонэ пыӵатыны быгатоз, нош калык тужгес но секыт вакытъёсы кунлэсь кужымзэ кулэ каре. "Удмуртия" огазеяськон оске, калыклэсь но властьлэсь кусыпъёссэс юнматыны, ог-огзэс валаны, юрттыны тыршемзэс азинтыны быгатоз шуыса. Та удысын вормонъёс басьтӥм ке, Россиысь мукет улосъёс но адӟем карозы. Малпасько, озьы асьмеос зэмос демократие нуись сюрес вылэ султом. - Кызьы та малпанъёсты быдэстоно? - Калык сярысь сюлмаськись государство кылдытыса. Соин ик огазеяськон бадӟым саклык висъялоз социальной политикалы: калыклы сётэм правоосты быдэсянэз, талы коньдон висъянэз чаклалоз, ужтэк кылемлэсь утьыны, выль ужан интыос кылдытыны тыршоз. Мон малпамъя, ужасьёслы но уж сётӥсьёслы огкыл шедьтыны государство юрттыны кулэ. - Социальной политика ужтэк кылисьёслы юрттонэн гинэ уг быры. Татчы пыро дышетон, эмъян, культура... - Тазалыкез утён удысын одно ик медициная страхование вылэ выжоно, калык дун тырытэк эмъяськыны мед быгатоз шуыса. Дышетон удыс сярысь ке верано, огазеяськон котькудӥзлы тодон-валанъёс басьтыны огкадь луонлыкъёс кылдытон понна. Кунлэсь дышетон заведениоссэ утёно но юнматоно, угось соос дун басьтытэк дышето. Мон малпасько, трос нылпиё семьяослы юрттоно, анай-атайтэк кылем нылпиос, висись, вылӥ быгатонлыкъёсын пиналъёс сярысь нырысь ик сюлмаськоно. Дышетӥсьёслэсь но улонзэс капчиятоно. "Удмуртия" огазеяськон культураын воштонъёс ортчытон понна. Ми культураен герӟаськем программаослы бюджетысь тросгес коньдон висъяны малпаськом. Та удысын политикалэн валтӥсь ужпумез - будэтоно сыӵе адямиез, кудӥз тодон-валанъёссэ, быгатонлыкъёссэ калык азьын кыл кутэменыз герӟа. Жаляса верано, туннэ асьмелы мурт культуралэн куронъёсызъя улыны ӵекто. Эрик но зэмлык вуно. Но история возьматэ: соос адямилэн улоназ бадӟым инты басьтӥзы, азьланяз но озьы ик луоз шуыса оскисько. - "Удмуртия" огазеяськон кыӵе экономической политикалы дурбасьтоз? - Ми кунлэн экономикае пыриськемез понна. Но кун экономикаен меӵак кивалтыны кулэ ӧвӧл. Солэн ужпумез - ужан мылкыдэз юнматыны луонлыкъёс кылдытон. История озьы тупатэм: республикалэн экономикаез одӥг герӟетын пыӵал тӥрлык поттӥсь предприятиосын, кудъёсыз кун заказъя ужаны дышемын. Туннэ сыӵе предприятиосын конверсия мынэ. Ми малпаськом, продукцизэс вузаны быгатӥсьтэм заводъёс гинэ конверсия улэ шедьыны кулэ. Нош ВПК-ысь азьмынӥсь предприятиослэсь продукцизэс Россиысь но дуннеысь рынокъёсы поттоно. "Удмуртия" огазеяськон приватизациез малпаськытэк ортчытонлы пумит. Ӧвӧл дыртоно обороналы ужась предприятиосты, эмъянлэсь, дышетонлэсь но культуралэсь юртъёссэс нимаз адямиослы вузаны. - Удмуртилэн экономикаяз, промышленность сяна, мукет удысъёс но пыро... - Гурт хозяйствоез но ми ум вунэтӥське. "Удмуртия" огазеяськон быгатэмезъя юрттоз гуртын ужасьёслы. Странаын музъемез басьтон-вузан шоры учкыса, ми валам: та ужез чакласькыса, дыртытэк ортчытоно. Музъем басьтонэз но вузанэз кун мед радъялоз, соку сое кызьы кутэмез эскерыны капчигес луоз. Кунлэсь юрттэмзэ витё крестьян хозяйствоос, нимаз кузёос, фермеръёс. Али соос огазеясько, огъя кужымен сиён-юон поттон, продукцизэс вузан понна. Бадӟым саклык висъяно кредитно-финансовой учреждениослы, страховой компаниослы, кредитъя союзъёслы, банкъёслы, фондъёслы - ваньмызлы, кин гурт хозяйствоез азинтонэ коньдон висъяны быгатоз. - Кызьы малпаськоды, кыӵе сюресъёстӥ Удмуртилэсь экономиказэ азинтоно? - Республикалэн экономикаез, инкуазь узырлыкъёс (кылсярысь, нефть) вылэ но азьвыл люкам кужымез вылэ гинэ пыкиськиз ке, пыд йылаз йыг-йыг ноку но уз султы. Кызь одӥгетӥ даур азьмынӥсь технологиосты кулэ каре. Улосмы конкуренциын вормыны мед быгатоз шуыса, экономикаез азинтонъя выль программа кутоно, кудӥз ужбергатонлэсь кужымзэ юнматоз. Тае улонэ пыӵатыны кужмо кун власть гинэ быгатоз, тужгес ик котькудӥз политик, чиновник ужамез понна кыл кутӥз ке. Одӥг улослэсь экономиказэ ӝутыны быдэс Россиысь югдурез тупатытэк уз луы. Соин ик "Удмуртия" огазеяськон Москвалэсь политиказэ выльдон понна. Ми малпаськом, производствоез ӝутыны ужрадъёс ӝегатскытэк кутоно но социальной но коньдон ужпумъёсъя политикаез быдэсъян амалъёсты воштоно. - "Удмуртия" огазеяськон аслаз радъёсаз кинэ ӧте? - Удмуртиысь улӥсьёсты - воргоронъёсты но нылкышноосты, егитъёсты но арлыдоосты, демократъёсты но коммунистъёсты, нацизы но кыӵе инмарлы оскемзы шоры учкытэк. Ми дурваиськом пӧртэм политической партиослэн азьмынӥсь малпанъёссылы, визьмо ӵектонъёссылы. Калыкез тӧдьыослы но гордъёслы ум люкиське. Радъёсамы ӧтиськом соосты, кинъёслэн улон шоры учкемзы милям малпанъёсмылы матын. Со малпанъёсты быдэстыса, асьмеос калыкмес огазеяны быгатом, Удмурт Республикалэн дэлетэз понна огкылысь тыршом. Асьмеды огазея одӥг валтӥсь малпан - Удмуртиез, Россилэсь улоссэ, сяськаясь шаерлы пӧрмытоно. Мон оскисько, асьме котыре бинялскозы Родинамес яратӥсь адямиос. Огъя кужымен шаермес кужмо улослы пӧрмытом, экономикаез калыклэсь куронъёссэ быдэстон пала берыктом, ваньбуро улыны но культураез азинтыны луонлыкъёс кылдытом. Удмуртиысь лидер - тодмо политик Удмурт Республикаысь Кун Кенешлэн Тӧроез, Россия Федерациысь Федерацилэн Кенешысьтыз мурт Александр Волков Россиысь тодмо политикъёс пӧлы пыре. Со сярысь ивортӥз "Общественное мнение" фонд. Август толэзе со ӵектӥз куинь- сизьым улосысь тодмо политикъёслэсь нимъёссэс вераны. Куамын куать фамилия люкаськиз: Россель, Тулеев, Наздратенко, Шаймиев, Руцкой, Строев, Галазов, Аушев... Александр Волков Россиысь азьветлӥсьёслэн "зарни тугокоязы" кызь кыкетӥ интыын сылэ. КУН КЕНЕШЛЭН СЕССИЯЗ Депутат ӵектӥз куштыны Кык нунал ужаз удмурт парламент. Элькунлэн улоназ со шӧдӥськоз-а, уз-а - туннэ шуг вераны. Малы ке шуоно, депутатъёс вольыт сюрес вылын ӵектылӥзы, чыры-пыры ужъёслы уно дырзэс быдтӥзы. Соин ик Кун Кенешлэн Президиумез дас куинетӥ сессиын учкыны пусъем ужпумъёсты 17 октябре эскерыса быдтыны малпа ке вал, озьы ӧз луы. Табере сессия эшшо 22 октябре ужалоз на. Та дыр ӵоже депутатъёс кыӵе ужпумъёсты бен сэрттӥзы-пертчизы? Верамонэз трос ӧвӧл. Одӥгез герӟаськемын гурт хозяйствоез азинтонэн но сиён-юон поттонэн. Нош ужпум пуктэмын вал огшоры - пудо сиён дасянлы но аранлы йылпумъянъёс сярысь ивортэ Правительство. Кызьы бен со эскерон ортчиз? Ваньзэ радызъя мадём. Нырысь-валысь, вылтӥз гинэ учкыса, та удысын ваньмыз умой кадь. Кылем арен ӵошатыса, туэ данаклы уно люкамын ю тысь, картофка, бакча сиёнъёс но пудо сиён. Быдэс республикая котькуд гектарысь шорлыдын 18 центнерлэсь ятыр ю-нянь басьтэмын. Берло дыре таӵе урожай кемалась ӧм бичаллялэ ни. Ведь куд-огез хозяйствоос, эштосъёс Кубаньын мында ю-нянь кутсазы. Но... Кин меда солы шумпотэ? Нянь, картофка, бакча сиёнъёс нокинлы кулэ ӧвӧл. Котькудӥз тырше юн дунтэмен басьтыны. Озьы музъем ужасьлэн, пудо утисьлэн тыршемез юнме кадь, пайдатэм луэ. Гурт удысын одӥг хозяйство но табыш (прибыль) басьтыны уг быгаты но азьлане вамыштон сюрессэ ыштэ. Бен, ӟеч улон шорысь ужась адями ульчае уг поты, Кун Кенеш, Кивалтэт азе чурытэсь куронъёс уг пукты. Гурт калыклэн но чиданэз быре ни. Туэ солы куазь ӧз люкеты, шуыны луоз. Нош юосты октоно, картофка копан али ке но йылпумъямтэ. Мар люкетӥз? Мугъёсыз тодмо: нырысь ик, эстӥськон, воштос ёзъёс ӧвӧл, шулдыр куазен техника сылӥз, кыкетӥез, куд-ог хозяйствоос, ю куасьтэонэн ӝегаменызы, аранзэс кӧня ке вис карылӥзы но мукет. Кивалтэтлэн Тӧроезлэн воштӥсез Владимир Гусев югдурез кӧяса-вӧяса кадь возьматӥз. Сыӵе ивортонъёс-отчётъёс лэсьтылӥзы дасо ар талэсь азьло. Тодӥсьтэм-валасьтэм адями, сое кылзыса, зэмзэ но малпалоз, гурт хозяйстволы кӧня юрттэт, кредит сётэмын дасо миллиардъёсын. Нош мукетсэ малы ке нокин уг вера, гурт хозяйствоослы переработчикъёс, вузкарисьёс но мукетъёсыз басьтэм продукцизы понна дасо миллиардъёсын дунзэ уг берыкто. Кызьы сое валано? Крестьянин сиён-юонзэ вуза, нош дунзэ уг басьты. Табере малпаське, кызьы со улыны, азинскыны кулэ? Колхозъёс, совхозъёс но мукет хозяйствоос асьсэлэн ужасьёссылы аръёсын улэп коньдонэн уждун уг тыро ни. Иворъёс вуо, уждун интые, кыед сёто. Но ведь крестьянин ачиз пудо вордэ ук. Гурт хозяйство тып-тып пуксемын. Удалтэм ю-нянь будэтыса но, солэн вузам ю тысез одӥг комбайн басьтыны уг тырмы. Нош государство сӥль-йӧл поттыны, техника басьтыны синпӧет выллем юрттэт сётэ. Тӥни соин ик, вылды, югдурез валаса, сессиын ӟырдыт, пайдаё вераськон мынӥз. Ас мылкыдзэс, малпанъёссэс шара веразы даслэсь уно депутатъёс, та удысын ужасьтэмъёсыз но. Гурт хозяйство зэмен но куашка. Азьло аръёсын ӵошатыса, комбайнъёслэн лыдзы куинь пол синэмын. Табере одӥг агрегатлы быдэ 400 гектар юос усё ни. Эстӥськон тырмымтэен ик, туэ кын улэ гырон ӝегаз. Вуоно тулыс нянь будэтӥсьлы нош ик секыт йӧтоз. Огъя вераса, одӥг куиньмос пала хозяйствоослы кредит, юрттэт ӧз вуы, басьтыны ӧз быгатэ. Кызьы сое умоен лыдъялод? Якшур-Бодьяысь депутат Валентин Комлев сюлэм висёнзэ ватыны ӧз чида ни. Со шуиз: - Гурт хозяйство мырдэм возиське на. Аран кык толэзь мынэ ни. Ю тысьмес одӥг килограммзэ 550 манетэн но вузаны ум быгатӥське. Озьыен, магазинын одӥг сукыри нянь (700 грамм) 1000 манетэн гинэ луыны кулэ. Нош асьмелэн мар даурто, кык пол дуноен вузало. Кин сое чакланы кулэ? Милям усто механизаторъёсмы му вӧй поттонэ кошко. Колхозын соос толэзьлы быдэ 200-300 сюрс уждун потто ке вал, табере отын 2-3 миллион манет басьто. Дыр вуэмын ни уждун тыронэз котькытын радъяны. Озьы ик дугдоно ни сиён-юонъёслы но промышленной вузъёслы дунъёсын шудэмысь. Гурт хозяйствоослэн энергетикъёслы, связистъёслы но коммунальникъёслы тыронъёссы нуналмысь будо. Ӝоген милемлы электрокужым сётэмысь дугдозы, телефонъёсмес кысозы но мукет. Нош ик керосин лампа ӝуатоно луоз, дыр. Гуртъёсын пумен пытсасько нылпи учреждениос, мырдэм шокало школаос, больницаос, клубъёс, библиотекаос но мукетыз. Удыслэсь оло лябзэ шӧдыса, оло юри куашкатыны турттыса, "Агроснаб" дунъёссэ нош 30 процентлы будэтэм, кыӵе ке посредникъёс шедьтэм. Но тужгес уродэз, крестьянин будэтэм няньзэ, поттэм продукцизэ вузаны уг быгаты. Сое жаляса верано луэ. Тӥни соин ик депутат Виктор Тарасенко парламентлы ӵектӥз Владимир Гусевез ужысьтыз мозмытыны. Шаерын, пе, аран, ӟырдыт ужъёс мыно, нош со лымшорын тыбырзэ шунтэ. Та удыслэн лябӟемезлы паймонэз ӧвӧл.1990-тӥ аръёсы солы кун бюджетысь 15-18 процент коньдон висъяло ке вал, табере со лыдпус кык-куинь пол кулэсмиз. Татын зэмос пайдаё уж уг нуиськы, Гурт хозяйствоя но сиён-юонъя министерстволэн дэмланъёсыз бумага вылэ кылё. Кун Кенешлы но Кивалтэтлы удыс пала берытскыса, шӧдскымон юрттэт сётоно. Парламент озьы ик учкиз ож тӥрлык поттӥсь предприятиосын ужасьёслэсь куронъёссэс но Россиысь вылӥ кивалтӥсьёслы Вазиськон кутӥз. Геннадий РОМАНОВ. * Гурт хозяйствоослэн кивалтӥсьёссы депутатъёс Анатолий Ешкеев (Пичи Пурга) но Юрий Добряков (Шаркан). Туспуктэмъёсыз Владимир КАМАШЕВЛЭН. Вазиськон Элькунысьтымы ож тӥрлык поттӥсь предприятиосын секыт югдур кылдэмын. Кун Кенешлэн дас куинетӥ сессиез сое рос-прос учкиз но, производствоез улӟытон вылысь, ужрадъёс кутӥз. Нош со люконтэм герӟаськемын электрокужымлы, газлы дунъёсты ялан будэтэмен но предприятиослэн- монополистъёслэн асэрказъяськеменызы. Соин ӵош ик республикамы мукет улосвылъёслэсь чидантэм бере кылиз промышленной предприятиослэсь улон коркаоссэс но мукет социально-культурной юртъёссэс интыослы сётонэн. Ож тӥрлык поттӥсьёслы со туж зол люкетэ азинлыко ужаны, ӟеч продукция поттыны. Ож тӥрлык поттӥсьёслы государство юрттыны кулэ. Сотэк оборона лябӟоз. Нош асьмелэн данакез предприятиосмы та удысэ пыро, федеральной ваньбур луо. Тӥни ваньзэ сое лыдэ басьтыса, югдурез тупатыны сюлмаськыса, Удмурт парламент Россиысь вылӥ кивалтӥсьёслы - Борис Ельцинлы, Виктор Черномырдинлы, Егор Строевлы но Геннадий Селезневлы Вазиськон кутӥз. Отын шуэмын: - Удмурт Республика - промышленной удысын азинскем шаер. Россиысь военно-промышленной комплекслэн (ВПК-лэн) предприятиосыз татын тужгес но трос. Но производство лябӟемен, военной заказъёс кулэсмемен но ож тӥрлык продукцилы дунъёсты тырымтэен, предприятиос секыт югдуре шедемын. Тыронъёссы ялан будо кызьы ке бюджетъёсы, озьы ик уждунъя; - бадӟымесь оборонной предприятиослэн асьсэлэн трос улон юртъёссы, жилищно-коммунальной хозяйствозы. Но федеральной бюджетысь уксё висъямтэен, сое интыослы сётыны уг быгато но бадӟымесь ыштонъёс адӟо. Али, кылсярысь, предприятиослэн (котькыӵе ваньбурен) 10,6 миллион квадратной метр улон коркаоссы. Соосты городъёслы сётон вылысь, ичизэ 2,5 триллион манет (1996 арлы дунъёсын лыдъяса) коньдон кулэ; - Удмурт Республикалэн Правительствоез 1994-97 аръёсы, Россилэн Президентэзлэн но Россиысь Правительстволэн постановлениосызъя, муниципальной ваньбуре выжтэмын 1624 миллиард манетлы улон коркаос но соцкультбыт. Вуоно 1998 арлы Удмурт Республикалы федеральной бюджетысь 92,5 миллиард манет гинэ юрттэт чаклаське, яке туэ арын сярысь, 697,8 миллиардлы ӧжыт. Малы ке шуоно, трансфертъёсты лыдъяку, чакламтэ вал интыослы азьвыл висъям улон юртъёсты, коммунальной но социальной удысъёсты возьыны расходъёс. Таӵе пичи юрттэтэн, 1998 арын элькунын социально- экономической югдур уката уродмоз но предприятиос азинскыны уз быгатэ; - Кун Кенешлэн сессиез куре Россилэсь 1998 арлы бюджетсэ эскерыку, Удмуртилэсь аспӧртэмлыксэ но юн секыт югдурез чакласа, вуоно аре улон юртъёсты, коммунальной хозяйствоез но социальной удысэз интыослы выжтонлы 2,5 триллион манет коньдон висъяны. Вазиськон понна 62 депутат куаразэ сётӥз. Г. РОМАНОВ. Россилэсь РоссиРоссилэсь Россилэсь ВАНЬМЫЗ "ИНТЫЕЗЪЯ" Пичи Пурга. Районысь "1 Май" колхозын ужасьёс уждунзэс доразы будэтэм кубистаен басьто. Одӥг килограммзэ 600 манетэн. Татысь чупресъёсыз понна со пайдаен берытске. Уго матысь Огырчи базаре нуыса, соос килограммзэ 800 манетэн вузало. Со сяна, асьсэос кубиста утялтӥсьёс 200 килограмм кубиста йыръёсты дунтэк басьто. Коньдон люканы луоно. Пусйыны кулэ. Колхозысь бусыын мыло-кыдо ужано: лушкаськисьёс ӧвӧлэн. Бусыос ӟеч-ӟеч возьмасько. Озьыен, ваньмыз "интыезъя". Н.ГРИГОРЬЕВА. Куазь Синоптикъёслэн ивортэмзыя, матысь дыре пильмаськылоз, но зор-кот трос уз усьы. Тӧл лымшор но шунды пуксён вискысь секундскын 7-12 метре пельтоз. Уин 0-3, нуназе 4-9 градус шуныт луоз. Та нуналэ тужгес шуныт улӥз 1934 арын. Термометръёс соку 16,7 градус возьматӥзы. Кезьыт вал 1977 арын (-8,6 градус). КЫЕД ИНТЫЕ - КУРО Вавож. Берло аръёсы та районысь хозяйствоос выль амаллы дышизы. Музъемзэс кыедэн выльдон интые, сое лымы улэ куроен суро гырыса кельто. Пайдаез вань. Со адӟиське районысь валтӥсь "Колосс" хозяйство вылын но. Арлы быдэ таос 1000 гектар вылысь музъемез выль амалэн ӟечомыто ке вал, туэ 1500 гектарозь будэтӥзы. Быдэн 700 гектар вылысь музъемзэс куроен суро гыризы на "Луч", "Удмуртия", "Рассвет" хозяйствоос, Мичурин нимо колхоз - 725 гектар вылысь. Пусйыны кулэ, агрономъёслэн верамзыя, котькуд тонна куро куинь тонна кыедэз воштэ. Н.ЛИПИНА. Удмуртъёслэн ВИ ӧтчамзы азьын Кыӵе луыны кулэ "Гурт кенеш" Ужмылэн тырмымтэез со бордын: туж ӧжыт пыриськиськом политикае. Кылсярысь, Кун Думае, Кун Кенеше депутатъёсты быръёнэ. Емышез син азьын: асьме удмурт калыклэн пиосыз но нылъёсыз Кун Кенеше ӧжыт сюремын. "Удмурт кенеш" юрттӥз Элькунлэсь Конституцизэ кутыны, удмурт но ӟуч кылъёсты кун кылъёс карыны. Нош кылъёсъя законмы ӧвӧл на. Соин ик ӧтчамын та ужпумез ӝот-ӝот ӝутоно. "Пичи кенеш" 1996-тӥ арын 26-тӥ апреле кутэм решенияз вазиське Элькун Кивалтэтэ вылӥ но шор ёзо профессиональной дышетсконниосын гуртъёсысь егитъёслы 30 процент инты (квота) висъяны. Правительство ӟечен вазиськиз талы, туэ 10-тӥ феврале та ужпумъя 133 номеро постановление кутэ. Дышетсконниосы ыстэ 30 процент инты висъян сярысь косон. Но та курон улонэ рос-прос ӧз пыӵа. Мугез одӥг - коньдон ӧвӧл. Азьланяз ёрос администрациослы, "Ёрос кенешъёслы", пӧртэм организациослы, ужреждениослы золгес пыриськоно удмурт кадръёс дасянэ. Правительстволэсь постановленизэ быдэсъяно, ӧвӧл чӧлсконо коньдонтэм улон вылэ - утчано, шедьтоно. Куашкатыны уг яра улосмес. Гуртын али пушъе ваньмыз уродэз: кырсь висёнъёс, наркотикен вырон, кышкыт йыружъёс, лушкаськон, вина юон. Ваньмыз та асьме син азьын ортче. Тросэз егитъёс выё со "нюре". Кулэсме пинал ваён. Лябӟе выжымы. Асьмеос та вакытэ огазеяськыны кулэ. Кутсконо гуртъёсысен. Котькуд гуртын мед луоз огазеяськон. Кызьы соос нимаськозы - соиз мукет ужпум. Но соос быдэсъяны кулэ калыклэсь куронзэ, утьыны ӟеч мылкыдзэ, малпанъёссэ. Таӵе уж кутскемын ни вал ёросамы куать-сизьым ар талэсь азьло, Василий Ермолаевич Москвинлэн ӵектэмезъя, но рос-прос улонэ ӧз пыӵа. Сое выльысь ӝутоно. Партилэсь но комсомоллэсь калыкен азьвыл ӟеч ужан амалъёссэ кутоно, валэктон уж нуоно. Матысь дыре ик ёрос газет но радио пыр тодматоно "Гурт кенешлэн" уставезлэн инъетэныз. Мон малпамъя, "Гурт кенешлэн" бурд улаз луыны кулэ егитъёсын ужанъя, культурая ёзъёс но нылкышноослэн огазеяськонзы. Собере "Гурт кенеш" одно ик огазеяськемын мед луоз на вылэм "Совет старейшин" ёзэн, таиз товарищеской суд выллем мед луоз кадь. "Ёрос кенешлэн" но та выллем ик пуштросэз луыны кулэ. Но солэн одно ик мед луоз на "Тодон" ("Знание") ёзэз: калык пӧлын валэктон уж мед нуоз право, экономика но политика ласянь. Кышкатэ тани ма: асьме кивалтӥсьёс (вылӥысен улӥёзь) вунэтыны кутскизы гурт калыкез. Ӧтчам азьын куд-ӧг ӵектонъёс сётэме потэ: - "Удмурт кенешлы" президентэ ӵектоно В. К. Тубыловез; - съездын кутоно кыллы проектэз; - сётоно ӧвӧл музъемез вузаны; - "Удмурт кенеш" бадӟым уж мед нуоз гуртъёсын аслэсьтыз кужымзэ юнматон понна. Удмурт калык улэ гуртын. В. БАЙСАРОВ, Пичи Пурга ёросысь Буран школаысь дышетӥсь. Тазалык Оло оскод, оло уд Мае возьматэ ымныр? Ымныр тусъя но синъёсъя валаны луэ вылэм адямилэсь пуштроссэ. Синкашъёс. Шонересь ке, возьмато визьмо луэмез, кышкасьтэм сямез но аслыд ачид оскемез, нош карнан кадь куасалскемын ке - мур малпаськисьтэм, куд-ог дыръя эрекчи сямез но. Ныр. Выллань урдӥськемын - малпаськытэк, капчи улыны яратӥсь. Куасалскемын - лябыт сямо, нуныямез кулэ карись. Зӧк, сӥльвиро ныр - кӧттырмосъяськон, юыны яратон, соин сэрен ныр горд улэ. Ымдуръёс. Пачкатэм ымдуръёс - ваньзэ радызъя, дырыз дыръя лэсьтӥсь, нош туж юн ке пачкатэмын - ассэ ачиз яратӥсь. Шонересь, номырин висъяськисьтэм ымдуръёс - пӧяськисьтэм, малпаськыса ужась, зэмлыкез гажась. Зӧкесь ымдуръёс - сиськыны яратӥсь, пачылась мылкыдо, азьтэмъяськон. Висъяськись (зӧк) улӥ ымдур - лякыт сямо. Ангес. Небыт, сӥльвиро, кык полэс ангесо - пачылась мылкыдо, пичи ангес - дӥсьтӥсьтэм, керпотӥсь. Ӵошкыт ангес - кезьыт мылкыдо, нош йылсо ке - ваньзэ пыр-поч малпась, мукетъёссэ валась, кыл вылаз сылӥсь. Ангес эшшо но зол висъяське ке, та сямъёс адямилы уката зол пыӵамын. Бамъёс. Векчи, сюбег бамъёс лябытэз возьмато, сӥльвиро ке - пачылась мылкыдо. Ӧжыт мычиськем бам, лыо ымныр - кезьыт мылкыдо, зол ке мычиськемын - лек сямо, ассэ ачиз яратӥсь. Маин узыр Россия? Кызетӥ даурлэн кутсконаз Россия ю тысез кунгож сьӧры вузанъя дуннеын нырысетӥ интыын сылӥз. США соку ньылетӥ интыын гинэ "пукиз"! Странамы вузаз нюлэс, етӥн, сахар, му вӧй, пӧйшур куосты. Вузкариз куамынлэсь уно кунъёсын, Германиен тужгес но юн кусыпъёсыз вал. Быдэс дуннеын вузкаронын Россиялэн люкетэз 3,6 процент вал. Нош туала Россилэн огъя экспортын люкетэз - 1,6 процент. Но югдур каллен тупатскыны шӧта. Малы ке шуоно, кунгож сьӧрен вузкарыса, Россия рынокен экономиказэ кылдытэ но производствоез азинтыны но социальной ужпумъёсты быдэстыны коньдон поттэ. Берло дыре мукет кунъёссы вузъёсты келян ӝог йылӥз но 88 миллиард долларозь вуиз. - Вузаськом эстӥськон, нюлэс, удобрение, алюминий, ыргон, фанера, газетлы кагаз, калык усточиосын лэсьтэм арбериосты. Экспортлэн дасэтӥ люкетэз гинэ машинаос но оборудование вылэ усе. Кылем арын Россиысь кунгож сьӧры поттэмын котькудӥз куатетӥез автомобиль, куинетӥез телевизор, кызетӥез холодильник. Кунгож сьӧрен вузкаронлэн ньыльмос люкетэз СНГ-ысь кунъёс вылэ усе, татын нырысетӥ инты Украина басьтэ (10 процент), ӝыныез - Европаысь странаос вылэ. "КП" ЕТӤН, СЬӦДЧАБЕЙ ВУНЭТЭМЫН Сюмси районысь Вылынгуртлэн но со котырысь Ӵашка, Пумса но Кӧйлуд гуртъёслэн данак гутъёслэн сямен ик вал узырмон но куанермон аръёссы. Соос куашкан калэ вуылӥзы, "Новый путь" колхозэн огазеяськылыкузы. Со дыре вань лэсьтӥськон, выль техника Сюмсиын возиськылӥз. Парин нимо колхоз нимаз кариськыку, выль хозяйстволы бадӟым колхозлэн ваньбурысьтыз кылем-мылемез гинэ шедиз. Озьы техникатэк кылем гуртъёсын дугдӥзы лудъёссэс но кыедамысь, кыдёкысь бусыоссэс но киземысь. Нош кӧны кивалтӥсьёс берло дыре колхозын вошъяськизы! Угось тросэз соос палэнысь лыктылӥзы. Туэ председательын ужаны кутскиз Ӵашкагуртысь Валерий Степанов нош валтӥсь бухгалтерын Вылынгуртысь Лидия Возисова. Оло, соос асьсэ гуртъёссэс ӝутыны быгатозы, золгес колхоз сярысь сюлмаськозы. Али татыь гуртъёсын выль корка лэсьтӥсьёс но кулэсмизы. Тани Вылынгутын 70 корка сяна ӧвӧл ни, Ӵашкаын - 60, Пумсаын но Кӧйлудын - быдэн ызьёс пала гинэ. Лудъёсын ӟег но сезьы кизё на, мукет культураос вунэтэмын. Таоссэ но одӥг гектарысь вить центнерлэсь трос уг басьто. Уно аръёс ӵоже татысь бусыосын удалтэм етӥн, сьӧдчабей будэтылӥзы, Москвае сельхозвыставкае но ветлӥзы, умой ужасьёс пӧртэм грамотаос орденъёс, медальёс басьязы. Озьы ке но, Парин нимо колхоз возиське на кужымзэс жалятэк ужасьёс бордын. Механизаторъёс Виктор Мурин, Владимир но Валерий Ивановъёс пӧртэм ужъёсты быдэсъяло: тулыс кизё, сӥзьыл арало. Соослы гурт калык тау каре. Табере колхозлэн ю-нянез ваньмыз кеносъёсын ини. Мыло-кыдо адямиос ас хозяйствозэс но ӝуто. Уно муш вордо но чечы басьто Вениамин Ильиных но Михаил Возисов. Туэ ваньмызлэн сямен удалтӥз картофка, кияр, помидор, сугон, кубиста. Озьыен, калык сиёнлы уз ёрмы. Оскем потэ, та гуртъёс но выльысь ӝутскозы шуыса. Угось пуксемын но соос умой интыын, Сибире нуись паськыт тракт но вӧл-вӧл бызись Калмез шур вискын, Сюмсиозь но кыдёкын ӧвӧл, инкуазь но шулдыр. Н.ВОЗИСОВ. Россилэн выль паспортэз Борис Ельцинлэн туэ 13 мартэ потэм Указэзъя, Российской Федерацилэн кунмуртъёсыз кин луэмзэс возьматӥсь документ 14 арес тырмем бере басьтыны кулэ. Паспорт ӟуч кылын лэсьтӥськоз. Паспортэз кӧня дырлы сётонъя воштӥськонъёс вань. Выль куронъёсъя, паспортысь фотокарточкаос уз выльдӥське, табере 20 но 45 арес тырмем кунмуртъёслы быдэсак выль паспорт сётӥськоз. Выль образецен паспортэ пусйиськоз кунмуртлэн фамилиез, нимыз, атай нимыз, пиосмурт яке кышномурт луэмез, вордскем дырыз. Азьвыл сямен одно ик пусйиськозы улон интыез, воинской обязанностез, кузпалъяськемез но нылпиосыз. Выль образецен паспорт басьтон вылысь, заявлениен ӵош одно луыны кулэ вордскем сярысь свидетельство, 35х45 мм быдӟа кык фотокарточка, кун мурт луэмез возьматӥсь но куд-ог мукет документъёс. Выль паспортъёс нырысь ик 14 но 16 арес тырмем егитъёс, военнослужащийёс но МВД-лэн органъёсаз ужасьёс басьтозы. Кунмурт паспортсэ ӝикыт возьыны кулэ. Паспорт ышыны сюриз ке, со сярысь ӝегатскытэк ивортоно югдурез утёнъя ёзэ. Но матысь дыре, выль образецен паспортъёс дась луымтэен сэрен, вужзэ ик возёно луомы. Вунэтоно ӧвӧл, 25 но 45 арес тырмем бере, фотокарточкаосты одно выльдоно. Ф. ПЕТРОВА, Ижевскысь Первомайской РОВД-ысь паспортно-визовой службалэн кивалтӥсез. Кыкетӥ юртсы луоз Берло дыре огез бӧрсьы мукетыз нылпи садъёс ворсасько. Нырысетӥ мугез - пиналъёс ӧжыт вордско, кыкетӥез - пичиосты возем понна бадӟым дун басьто. Тани Можга городын но одӥгез нылпи сад пытсан калэ вуиз. Сое рос-прос тупатӥзы, мукет удыслы ярамон мед луоз шуыса. Табере та юрт мумы-бубытэк кылем но нокин чаклатэк будӥсь пиналъёс понна ужалоз. Ноябрь толэзе ньыль аресысен дас куать аресозь пичиос татчы улыны выжозы. Быдэ вуымтэ пиналъёс озьы ик ветлозы огшоры нылпи садъёсы но школаосы. Бӧрысь соосты сётозы нылпи юртэ, яке юэмысь дугдэм, висёнлэсь йӧнам мумы-бубыоссы доры. Н. ВОЗИСОВ. ШУНДЫ "УДМУРТ ДУННЕ" НО ЕГИТ ДУННЕ" конкурсэ Сазьтӥськон Лобӟыса кадь ортчизы гужем нуналъёс, котькудӥз ас сярысьтыз кыӵе ке малпан кельтыса. Мон нош мар лэсьтӥ? - ӵемысь аслэсьтыз юалляз Коля. Гужем номыр ӧз ужа. Ма, бригадир но уж ӧвӧл ай, шуылӥз. Ужасал ке, оло, тазьы но ӧй луысал, малпа Коля. Выльысь но выльысь ваньмыз син азяз пуксе. - Ӝоген Людалэн вордӥськем нуналыз,- шурдыръяськон сяменызы тодаз ваиз Витя. - Уксё поттом шат? - итӥськиз мукетыз. - Мон тодӥсько кытчы мыныны,- пумитазы вазиз шӧмъяськем Коля,- ми вӧзысь Миша агайёс выль мотоцикл басьтӥзы, пунызы монэ тодма, уз уты. Таӵе иворез кылыса, пиос шумпотӥзы. Соку ик кӧня тӧдьы йырозэ басьтыны но кенешизы. Верамын - лэсьтэмын. Пуны, зэмзэ но, чик ӧз уты, тодмаз. Мотоцикл дорын но кема выроно ӧз луы. Лушкам аккумуляторзэ Коля сьӧраз ик нуиз, ватӥз бакчаысь картофка пуд пушкы, нош ачиз лушкемак кенсы выдӥз. Гужемзэ со татын кӧла, юри койка но пуктӥз. Ӵукна сое сайкатӥзы азбарын вераськем куараос. - Пунымы но гараж дорын думемын, чик ӧз уты. Та егитъёс чылкак сьӧраз ортчизы ведь. Али гинэ Онтонлэсь валтӥзы, нош табере? - Осто шу, - итӥськиз анайзы,- лушкаськон, вина юон гинэ мед луоз туала егитъёслы. Кыӵе дунне кутӥсьёс луозы на соос. "Дорам гинэ медаз пыре вал,- малпа Коля.- Ма, ымныр но шимес, дыр. Тани йыр пилиськыны турттэ. Сомында юоно вал шат?" Мукет нуналаз, коркась корка пыраса, милиция лумбыт гуртэтӥ ветлӥз. Коляос доры гинэ ӧз пыралэ. Милям пимы, пе, нокытчы уг пота, шуэм анаез. Пияш куалекъяз ке но, милиция озьы ик ышем мае ке шедьтытэк кошкиз. Нош со, анай-атай адӟоз шуыса, аккумуляторез эшшо но пыдло ватӥз. Табере ялан дырекъяса улэ: ма кароно? Ваньзэ шонерзэ верано шат? Эшъёсызлы шуиз, юэм йырыным олокытчы понӥськем, уг шедьтӥськы ни. Пӧяз. Кема малпаськиз Коля, мар карыны паймыса. Собере югдурысь потон амал шедьтэмезлы ачиз ик паймиз, шумпотӥз. Аккумулятор сюрем сярысь ивор но ӝог гинэ гуртэ вӧлмиз. - Кемагес ик возьматытӥд, пие,- вазиз анаез,- соослэн пунызы тонэ гинэ тодма, мукетъёссэ одно ик утысал. Оскисько, таӵе "ужед" берпуметӥез луоз. Оля НИКИТИНА. Пичи Пурга ёрос, Вуж Монья гурт. УДМУРТЪЁСЛЭН ӦТЧАМЗЫ АЗЬЫН Малы мултэс удмурт кылмы? Удмуртъёслэн куинетӥ (куатетӥ) ӧтчамзылы сӥзем конференциос йылпумъяськизы. Мон тросаз вуылӥ. Анай кылмы сярысь тужгес лэчыт вераськон ӝутскылӥз уй пал ёросъёсын. Тани, кылсярысь, Кез районысь 30 сюрс адями пӧлысь 22 сюрсэз удмурт, нош Яр ёросын - сизьымдон процентэз. Озьы ке но, нылпи садъёсын но школаосын удмурт кылэз дышетон умой-умой радъямын ӧвӧл на. Со пумысь сюлмыз ик вӧсь луыса, чурт-чурт вераськиз Кезысь 1 номеро школаысь удмурт кылъя дышетӥсь Надежда Александровна Максимова: - Кызь ар ужай Гыя школаын. Отын одӥг семья но чылк-чылк ӟуч ӧвӧл. Нош кӧня куриськонъёс вал, нылпизы удмурт кылэз медаз дышеты шуыса. Секыт, пе, со. Нош кунсьӧр кыллы дышетыны соос пумит ӧвӧл. Асьме дорын кытысь кылӥды ини англи кылын вераськемез? Ӧд но кылэ, уд но кылэ. Азьланяз но со туж ичиезлы кулэ луоз. Мон уг шуиськы, сое дышетоно ӧвӧл. Но малы курлано меда удмурт кылэз, англи кыллэсь со маин урод луиз? Вылӥысь кивалтӥсьёс удмурт кунын улӥсьёс азе чурытэсь куронъёс пуктысалзы ке, югдур но воштӥськысал. Тани али нырысетӥ арзэ Кезысь школаын ужасько. Татын 5-тӥ классъёсын "Удмурт кылъя вераськон" урок нуисько. Нылпиос пӧлын вань удмурт кылэз тодӥсьёсыз но, валасьтэмъёсыз но. Пӧлазы ик - пӧртэм выжыосысь калыкъёслэн пиналъёссы. Паймоно кадь: соос ваньзы мыло-кыдо басьтӥсько удмурт кылэз дышетон борды. - Республикаямы вылӥ кивалтӥсьёсмы котьку но ӟучесь вал бере, соос кулэтэмен лыдъязы удмурт кылэз,- шуэ Кезысь удмурт культурая огазеяськонлэн тӧроез Ангелина Серапионовна Дерендяева.- Соин калыклы но таӵе мылкыд пыӵатэмын вал: удмурт кыл ӟезьы сьӧры потытозь гинэ кулэ. Асьмелэн али нырысь быдэстоно ужмы - будӥсь пиналъёсты удмурт кылэн тодматон, удмуртлыклэсь чеберзэ усьтон, вашкалазэ тодэ ваён но сое калык пӧлы вӧлмытон. - Асьмелы тросгес ужано анай-атайёсын,- вераськонэз азинтӥз Гыяысь Нина Арсентьевна Максимова.- Огшоры калыклы, валамон ни, дышем сямлэсь мозмытскыны секыт. Кутсконо, дыр, вашкала праздникъёс бордысен. Кыӵе чебересь вал соос: Шорт миськон, Пинал пыртон... Нина Арсентьевналэсь малпанъёссэ азьланьтыса кадь, "Удмурт кенеш" огазеяськонлэн Яр ёросысь тӧроез Анатолий Петрович Владыкин шуиз: - Школаосын но клубъёсын тросгес кылдытъяно культурамылэсь ӟечсэ, чеберзэ возьматӥсь кружокъёс... - Школаосын данаксэ урокъёсты ӟучъёс нуо,- шуиз Пудем библиотекаын ужась Галина Николаевна Наймушина.- Со дышетӥсьёс удмурт кылэз тодон сярысь уг сюлмасько. Кытын ини соослы нылпиослы удмурт культураез пыӵатон? Пинал возьдаськыны кутске, пумен анай кылызлэсь но палэнске. Яр педучилищеын дышетскись Дмитрий Поздеев сюлэмшугзэ вераз, ёросын газетсы но, радиозы но ӟуч гинэ шуыса. Дыр вуэмын ни, пе, егитъёслэсь удмурт ансамбльёс но кылдытъяны. Вань та вераськонъёс нош ик пыкиськизы удмурт кылъя закон вылэ. Яръёс но, кезъёс но огымысь кадь шуизы: закон ужаны кулэ. Со асьме кылмес утьыны но азинтыны юрттысал. Соку ёрос кивалтӥсьёс но удмурт культура шоры чиньы пыртӥзы гинэ ӧй учкысалзы, дыр. Галина РОМАНОВА. * Н. А. Максимова но А. С. Дерендяева Кез ёросын трос уж нуо, удмуртъёс асьсэ сямъёссэс, кылзэс медаз вунэтэ шуыса. * Яр районысь Кычино гуртысь нылкышноос возьматӥзы "Пирданка сётон" вашкала йылолэз. * Трос калык азьын сюлэмшугзэс, малпанъёссэс кисьтӥзы Кез больницалэн тӧроезлэн воштӥсез Г. П. Ончукова но Гыяысь пенсионерка Н. А. Ммаксимова. * Съездэ Яр ёрослэсь быръем делегатъёс (паллянысен буре): А. В. Иванов, О. А. Барышникова, Г. В. Лекомцева, Р. Д. Наговицына, А. П. Владыкин. Владимир БЕЛОМОРСКИХЛЭН туспуктэмъёсыз. Нуналлэн тодметэз Вашкала календарья туннэ пусъё Петрлэсь но Павеллэсь нуналзэс. Та нуналэ палэзь бичано. Вунэтоно ӧвӧл тылобурдоос сярысь но, кӧня ке вуэм емышез интыяз ик кельтоно. Палэзь удалтэмын ке, сӥзьылэд зор-кото улоз. 24 октябрь - Федоралэн нуналэз. Ӵемгес зор-кот усе ни. Та нуналэ... ар талэсь азьло 23 октябре 1922 арын кылдытэмын Удмурт областной прокуратура, 1935 арын со пӧрмытэмын Удмурт АССР-ысь Прокуратуралы, али - Удмурт Республикаысь Прокуратура. 23 октябре вордскемез дырысен 65 ар тырме Г. А. Ходыревлы (1932-1995), тодмо удмурт нылпи писательлы, журналистлы, РСФСР-ысь калыкез дышетонъя отличниклы, УАССР-ысь культура удысын сӥё-дано ужасьлы, Удмуртиысь Комсомоллэн премиезлэн лауреатэзлы. Вордскиз Алнаш черкогуртын. 23 октябре 1944 арын Глазовысь 49-тӥ стрелковой дивизия борды кылдытэм 208-тӥ стрелковой дивизия нырысьсэ Восточной Пруссиын ожмаськонъёсы пыриськиз. Мӧйыослы юрттэт Котькуд аре Сюмси районын сюлмасько мӧйыослэсь улонзэс пичияк ке нго капчи карон понна. Калыкез улон-вылонын утёнъя центрын ужасьёс пересьёслэсь сюлэмшугъяськонъёссэс умой валало: тулыс бакчазэс гырыны, картофка мерттыны юртто, гужем турнаны потало. Мӧйыос тужгес но ёрмо сӥзьыл, угось, бакчаысь картофкаез утялтоно, пу ваёно, сое вандоно-пильылоно. 22-тӥ сентябрьысен кутскыса но быдэс октябрь толэзе юрттэт дунтэк сётӥське. Тужгес начар улӥсь витьтон пенсионеръёслы сиён-юон но коньдонтэк сётэмын, таиз но соослы ӧжыт ке но шумпотон ваиз. Н. ВОЗИСОВ. "Шунды" "Удмурт дунне" но егит дунне" конкурсэ Мон куке но вал пионер яке малы алдаськыны уг пот возьыт Иж карысь Октябрьлы 10 ар ульча. Одӥгаз огъяулонниын вераськон. - Нылъёс, вуоно толэзьлы дунтэм дунын проездной кулэ ӧвӧл-а? - Кызьы дунтэм дунын? - 15 сюрсэн гинэ. Асьмеос лэсьтӥськом, зэмосэзлэсь уг висъяськы. Нылъёс билет шуон бумагаосты киосазы бергато: - Зэм но, уг висъяськы. - Басьтэ, басьтэ. Студентъёслы транспортын мынон-ветлон билет 35 сюрс манет сылэ, милям дунтэм. - Нош контролёръёс, кондукторъёс мар ке умойтэмзэ шӧдӥзы ке? - посӥськизы нылъёс. Озьы ке но, кыштыр гинэ уксёзэс поттӥзы: - Басьтом... Та учыр выль ӧвӧл ни. Берло дыре студентъёс, зэм но, лушкемен лэсьтэм проездноез дунтэм дунын басьтыны быгато. Бен, кыштырак "пӧрам" билетъёслэн ӟечлыксы сокем умой ӧвӧл: ву шеде ке, буёлэз вияны ӧдъя. Но амал шедьтыны луэ вылэм: проездноез клеёнкаен шобыртэ но вылтӥз пӧсь утюген ортче. Мын но эскеры собере, гажано контролёр, вия-а, уг-а буёлэз. Лушкем бизнесэн вырись адямиос асьсэ басьямъёссэс шедьто. Кемалась ик ӧвӧл, алдаса лэсьтэм билетъёсын вузкарись кык егит пиосын тодматски. Соос асьсэос но одӥгысьтыз вылӥ дышетсконниысь студентъёс вылӥллям. Юасько: - Трос-а барыш поттӥськоды? - Стипендия вӧзы ватсаськоды ке, тырме. Вузаса поттэм уксёмы одӥг куиньмосэз сяна асьмелы уг кыльы. "Выламы сылӥсь" адямилы мынэ. Со буёл басьтэ, лазер принтерен мынон-ветлон билетъёс лэсьтэ. Нош ми вузчиос гинэ. Тӥляд общежитияды куамын пала вузам ни. Медакадемиын эшшо но золгес басьто. Соослы ӵемысь сопала-тапала пӧртэм эмъяськонниостӥ ветлоно луэ. - Тӥ законэз тӥяськоды. Куддыръя, оло, возьыт но луэ? Уд-а кышкаське милиция кие сюрыны? - Одӥг ласянь адямиослы, студентъёслы, ми ӟеч лэсьтӥськом. Стипендия туж ӧжыт. Кызьы но озьы няньлы тырме, нош мынон-ветлон билет басьтыны уг кыль ни. Зэм, кышкытлык вань, билетэз чиньыен коттыса, соку ик валано, алдаса лэсьтэм мар ке шуыса. Озьы ке но, басьтыны мылкыд карисьёс вань. Нош милиция ласянь ке, туж тунсыко учыр тодэ лыктэ. Тазьы ик общежитие кузя ветлӥськом вал. Одӥг кышномурт дунтэм дунын билет вузаммес тодӥзы но дорамы лыктӥз. Мон но, пе, басьто. Студентъёслы гинэ лэсьтӥськом шуыса тодэмез бере ӝожомиз. Тӥ, пе, ми кадьёслы но лэсьтэ вал. Собере та кышномуртэн ӟечгес тодматским. Милициын ужа вылэм. Куалектӥм. Юаз кинъёс луэммес. Студентъёс, шуиськом. Я, пе, иське, вузалэ, только чакласькыса. ... Нош куке но ми пионеръёс вал. Йыртэмасьёсын нюръяськылӥм. Туала вакытэ сыӵе луод на шат? Астэ ик серекъялозы... - Тӥ кадь "эрекчи" билетъёсын вырисьёс трос-а? - Азьло трос вал. Тулысысен пластик проезднойёс поттӥзы. Соосты огшоры лазер принтерен уд лэсьты ни. Соин валче бизнес шуонмы но огдырлы чалмиз. Но кемалы ик ӧз. "Пластикъёс" государствомылы дуногес йӧтӥзы, лэся. Нош ик азьлоосыз вылэ выжизы. Но "мурӝолъёсын пукисьёс" тросэз буёл, печатлан машина шедьтыса ӧз вуэ на. Паймымон югдур. Та пиос законлы пумит мыно. Вылӥ дышетсконниын тодон-валан басьтыса вылысь, алдаськыса барыш поттыны уг возьдасько. Студентъёс туж ӟеч тодо: басьтоно билетъёссы зэмосэсь ӧвӧл. Но ӟечлыко проезднойлы ларёкъёсы уг дырто. Ки йылын дунтэмгес. Нош контролёръёс... шудэд луиз ке, уз но шӧдэ ай. Воштӥсько аръёс, воштӥське улон шоры учкон. Уродэзлы туж ӝог дышоно вылэм. Ваньмыз шоры киынымы шонтӥмы. Котькудӥз ас быгатэмезъя выре, берга, кӧттыр утча. Котыр ог-огдэ пӧян... Озьы ке но, та егит пиосты уг курласькы! Мынам коты гинэ ӝож соос понна но, улонмы понна но... ЕЛЕНА ПАНФИЛОВА. Лыдӟиськисьёслэн лыдзы йылэ Яр. Туэ татысь районной библиотекалы 60 ар, нош нылпи библиотекалы 45 ар тырме. Юбилейёсты пусйыны дасясько ог 5 сюрс пала лыдӟисьёс. Библиотекае ветлӥсьёслэн лыдзы ялан будэ. Сое валэктыны луэ семьяын книга-газет басьтыны быгатымтэен. "Устоез семья" конкурс Юкаменск. Районын туэ но азьланьтӥське "Устоез семья" конкурс. Кылем арын гужем татын туристъёслэн слётсы ортчиз вал - эскеризы туризмен тунсыкъяськись семьяосты. Туэ жюрие быръемъёс районын улӥсьёслэн гурт котыртӥзы ортчизы. Тужгес узырен, чылкытэн лыдъямын Пышкетысь Сысоевъёслэн но Сунсовъёслэн, Камкиысь Максимовъёслэн бакчаоссы. Э. ВАСИЛЬЕВА. ШУНДЫ КЫТЫН? КУ? МА? Уллялом мӧзмонэз Алнаш. Комсомол огазеяськонъёс куашкам бере, Ӧрка гуртысь егитъёс, нимысьтыз кенеше люкаськыса, нырысьсэ бадӟым вераськон ӝутӥзы азязы сылӥсь ужпумъёс сярысь. Пумиськонэ ветлӥзы ёросысь егитъёсын ужанъя но культурая отделысь специалистъёс, "Кизили" колхозлэн кивалтӥсез Владимир Балашов но гурт администрацилэн тӧроез Виктор Сорокин. Берло дыре егитъёслэн куаразы чалмизгес ке вал, ӧркагуртъёс сярысь озьы уд шуы, уг пот ни соослэн котькуд нуналэз мӧзмыса пумитамзы. Ӝытъёсы дискотекаос, пе, ортчытъяно вал, но ӧвӧл кулэ аппаратура, коньдон. Ӧжыт-а мукет тунсыко ужрадъёс? Колхозлэн кивалтӥсез но гурт администрацилэн тӧроез егитъёслэсь куронъёссэс, мылкыд каронъёссэс умоен лыдъязы, ужрадъёссэс ортчытъяны коньдонэн юрттом шуизы. Огъя кыл шедьтэмын, асьсэлэн гинэ егитъёслэн задор мылкыдзы медаз кысы. Усточи луэмед потэ-а? Шаркан. Усточи нылпиослэн лыдзы ёросын пумен йылэ. Сое лыдэ басьтыса, егитъёсын ужанъя центр усточи но быгатӥсь пиналъёсты , егитъёсты нимаз клубъёсы огазеяны малпа. Суредасьёс, вуриськыны яратӥсьёс, кылбур "пӧрасьёс" ог-огенызы кенешозы, ужъёсынызы тодматскозы, быгатонлыкъёссэс юнматозы. Нош мар пӧрмоз солэсь - тазэ ини возьматозы центрлэн кыкетӥ этажаз радъям адӟытонъёс-выставкаос. Пал эн кыльы, пал тури Юкаменск. Егитъёсын ужанъя отделлэн юрттэмез улсын, 1997 арын март толэзьысен ёросын ужа ини "Я + я" тодматскон служба, кивалтэ соин Любовь Бельтюкова. Асьсэлэсь кыкетӥ ӝынызэс шедьтыны оскыса, та службае туннэ нуналлы 600 мурт вазиськиз ини. Арлыдзыя - 16-ысен 75 аресозь, но вазиськонъёс тросгес вуо 25-ысен 45 аресозь нылкышноослэсь но воргоронъёслэсь. Вазисько дышетскисьёс, студентъёс, курсантъёс, военнослужащийёс, рабочийёс, колхозникъёс, интеллигенция. Кудӥз кышнояськыса, бызьылыса люкиськыны вуиз ни, мукетъёсыз кузпалзэс ыштӥзы, вань огназы нылпи будэтӥсь анайёс, тросэз семья кылдытыны нырысьсэ малпало. Юкаменск ёросысь сяна, та службае уно гожтэтъёс вуо Удмуртиысь, кусып тупатӥзы ни Россиысь 100 городъёсын, Украинаен, Беларусен, Эстониен, Казахстанэн. Юкаменскъёс малпало, матысь ёросъёсы потаса, тодматскон ӝытъёс но ортчытъяны. Красногорск ёросысь егитъёсын пумиськизы ни, ар пумын малпало соосты асьсэды ӧтьыны. Юкаменскысь тодматскон служба кусыпъёс тупатӥз Ижевскысь но Глазовысь таӵе ик службаосын, огкыл шедьтӥз шаерысьтымы кӧня ке газетъёсын, эшъяськыны пумит ӧз луы "Удмурт дуннеен" но. Та службае вуэм куд-ог ялонъёсты чакласьком газетамы печатланы. Нош "Я + я" службае вазиськыны луоз таӵе адресъя: 427630, Юкаменск село, а/я 10 "ОМ". Дун тыроно ӧвӧл, гожтэтэныды ӵош келялэ чылкыт конверт. Л. КИМОВА. Удмурт батырлы синмаськизы Йошкар-Ола городын туннэ йылпумъяське дуннеысь финн-угор театръёслэн фестивальзы. Ас ужъёсынызы тодматӥзы Удмуртиысь, Карелиысь, Мордовиысь, Коми Республикаысь, Коми-Пермяцкой национальной округысь, Марий Элысь, Финляндиысь, Эстониысь артистъёс. Фестивалез усьтӥз Удмурт национальной театр Егор Загребинлэн "Эш-Тэрек" трагедиеныз. Учкисьёс артистъёсмылэсь шудэмзэс туж вылӥ дунъязы, сцена вылысь келязы кужмо кичабонъёсын. Трос шуныт кылъёс верамын вал быдэс коллективлы. Артистъёсмес чылк-чылк удмурт кылын ӟечкылазы Мари-Турек районысь Карлыганын улӥсьёс. Мукет нуналаз сцена вылэ потӥзы Карелиысь артистъёс. Соос пуктӥзы Р. Мустоненлэсь "Где твой дом, ангел?" спектакльзэ. Та нуналэ ик учкисьёсты шумпоттӥз Финляндиысь актриса Кайя Кангас. Быдэс выжыкылэз со огназ шудӥз. Вералом на, сцена вылын шудэм сяна, фестивале лыктэмъёс пыриськизы на финн-угор театрлы сӥзем научно-практической конференцилэн ужаз. Таиз ортчиз 20-23 октябре. Куноос пӧлын - тодмо критикъёс, режиссёръёс, драматургъёс: Олег Пивоваров ("Театральная жизнь"), Ирина Мягкова (Театральной искусствоя Российской академия), Майя Романова (Россия радио), Нинель Сорокина ("Культура"), Валентина Федорова ("Экран и сцена"), Кирсика Моринг (Финляндия, "Хельсинки синомаг" газет) но мукетъёсыз. Фестивальлэн ортчеменыз но солы йылпумъянъёсын "Удмурт дунне" тӥледыз тодматоз вуоно арня вискын. Л. ПЕРЕВОЗЧИКОВА. ШУНДЫ ЕГИТЪЁСЫН УЖАНЪЯ КУН КОМИТЕТЫН Ӵошен вамышъяны капчи Шаерысьтымы Егитъёсын ужанъя кун комитетлэн ужаменыз тодматскыны сояз арня вискын Ижевске вуылӥз Глазов ёросысь егитъёсын ужанъя отделлэн активез - гурт администрациосысь юрттӥсе быръемъёс.Таӵе пумиськон комитетын нырысьсэ ӧз ортчы ни. Талэсь азьло Ижевске вуылӥзы Алнаш, Можга, Ува, Сюмси, Грах, Завьялово, Дэбес ёросъёсысь егитъёслэн азьветлӥсьёссы, но таӵе пумиськонъёс орчытыны чакламын ваньмысьтыз ик ёросъёсысь активен. Егитъёсын ужанъя кун комитет комсомолэз воштӥз шуыса, гуртысь егитъёс тодо ик, дыр. Нош ма бордын со ужа, кыӵе ужпумъёс азяз сыло, кинъёс ужало отын, тазэ тросэз тодытэк ик кылё. Одӥг нунал куспын комитетлэн вань ужаменыз ёросысь егитъёс тодматскыса уг ке но вутто, асьсэжлэсь ужзэс кудласянь ӧръяны мар но со син шоразы пуксе ни. Та пумиськонъёсын егитъёс тодматско "Шунды", "Долг", "Родники", "Иман" огазеяськонъёсын, "МДС-тур", "Молодая семья" центръёсын, "Теприс" кдублэн ужаменыз, Республикаысьтымы егитъёсты уже интыянъя биржаен. Татын психолог валэктонъёс сётэ пӧртэм шуг-секытъёсты вормонъя. Егитъёсын ужанъя кун комитетлэн кивалтӥсез Андрей Гальцин, солэн воштӥсьёсыз, валтӥсь специалистъёсм пумиськонэ лыктэмъёсты тодмато комитетлэн ужаменыз, ужан программаеныз, 1997-2000 аръёслы чаклам "Удмуртиысь егитъёс" республиканской целевой программаен. Гуртъёсысь егитъёслэн азьветлӥсьёссылы комитетэн но солэн ёзъёсыныз тодматскон - дышетскон школа выллем. Ваньмыз ик ӟеч кылъёсын пусъё та выль кичӧлтонэз, солэсь бадӟым кулэлыксэ, тау каро выль тодон-валанъёс басьтэмзылы, выль адямиосын тодматскемзылы, калыке потыны луонлык кылдэмлы. Мылкыд каронъёссы но трос гинэ. Шуом, пыр-почгес тодматскемзы потэ соизлэн яке таизлэн огазеяськонлэн, клублэн ужаменыз. Гуртысь егитъёс озьы ик кулэясько пайдаё дэмланъёслы, ужан амалъёссэс выльдонлы, шулдыръяськон ӝытъёс, дискотекаос ортчытъянын ик. Бен, ваньмыз со кулэ, но одӥг нунал куспын копаксэ басьтыса нокызьы уд вуы. Соиз умой, ужпумъёс пуктэмын, сюрес возьматэмын - вазиськы, тодматскы, кусып тупаты, утчаськы. Гуртысь егитъёс табере асьсэос кылзэс вераны кулэ. Л. МАЛЫХ. Шоркарысь бӧлякъёс, огазеяське! Пусйымон кичӧлтон кылдӥз асьме Правительствоын. Солэн кивалтӥсьёсызлэн ӵектэмзыя, туэ 12 ноябре Москваын огазе люканы кенешмын Россилэн шоркараз улӥсь бӧлякъёсмес. Удмуртиын вордскем- будэмъёс яке огдыре ужамъёс столицаын ичи ӧвӧл. Кин табере кивалтэ министерствоен, кин мукет валтӥсь ёзын ужа, кин шутэтске ни... Та секыт вапуме котькудӥз быгатоз, дыр, луэмезъя асьме шаерлы юрттыны. Ӵапак сыӵе мылкыд бордысь ик потэ кичӧлтон но. Вераны кулэ: та выллем огазеяськонъёс (землячествоос) Москваын ужало ни. Оскон вань, асьмелэн но пӧрмоз шуыса. Уката ик лыдэ басьтоно ке созэ: Удмуртия но бӧлякъёсызлы пунэмзэ берыктыны тыршоз. Озьыен, огазеяське, эшъёс! Ӟеч кусыпъёс нокинлы но мултэс уз луэ. И. ЛЕБЕДЕВ. Правительствоын Правительстволэн Президиумез эскериз бюджетлэсь 1994-95 аръёсы нылпиос понна пособиосты тыронъя пунэмзэ берыктон пумысен ужпумез. 1994 ар понна пособиос быдэсак тыремын. 1995 ар понна пособиосъя пунэм 10 миллиард манет люкаськиз. Со пӧлысь 6 миллиардэз - Ижевсклэн. Россия Федерациысь Коньдон ужпумъёсъя министерстволэн Контрольно-ревизионной управлениез Удмуртиын эскеронъёс ортчытӥз но Кизнер, Кияса, Пичи Пурга ёросъёсын вексельёсын ужан радэз сӧрон учыръёсты шараяз. Куд-ог интыосын дун пуктон но вузъёслэн но сиён-юонлэн ӟечлыксы ӧз эскериськы, предприятиослэн но организациослэн кивалтӥсьёссы вексельёсты кутыны пумит луизы. Правительстволэн Тӧроез та учыръёсты эскерыны косӥз. Правительстволэн нимаз адямиослы улон юрт басьтыны яке лэсьтыны льготаен кредит сётон сярысь постановленияз воштонъёс но ватсанъёс пыртэмын. Нырысетӥез постановлениея кредитэз бюджет чотын ужасьёс но гуртоос гинэ басьтыны быгато вал, нош табере сыӵе луонлык семьяосысьтызы муртъёслы но сётэмын. Туала вакытэ тужгес секыт югдуре уй пал ёросъёс шедемын. Соин валче Красногорск ёросысь кивалтӥсьёс таӵе ӵектонэн потӥзы: "Чепецкое НГДУ" ЗАО-лы сётоно куд-ог интыосын нефть кысконэз радъяны лицензия. Президиум та малпанэн соглаш кариськиз но сое нимысьтыз комиссиын эскерон сярысь решение кутӥз. Республикалэн экономикаяз пичи ужбергатон бадӟым гинэ инты басьтэ ини. Соин валче Правительстволэн Президиумез эскериз Удмуртиын пичи ужбергатонлэн азинскемез но солы кун ласянь юрттэт сётон сярысь ужпумез. *** Валлян люкаськылӥз Правительстволэн кенешез. Отчы ӧтемын вал ведомствоослэн но интыысь администрациослэн кивалтӥсьёссы. Туэ укмыс толэзь ӵоже ужамлы йылпумъянъёс лэсьтӥз экономикая министр Евгений Аверьянов. Правительстволэн Тӧроез нимын-тулын вераса ӝутъяз но кылзэс юаз секыт югдуре шедем удысъёсысь кузёослэсь. Асьсэ малпанъёссэс ивортӥзы "Удмуртэнерго" акциосын огазеяськонысь валтӥсь инженер Николай Скворцов, Кизнер ёросысь администрацилэн йырыз Владимир Алексеев, "Ижмаш" акциосын огазеяськонлэн валтӥсь директорез Владимир Гродецкий, вузкаронъя но улон- вылонын юрттэт сётонъя министр Петр Пономарев но мукетъёсыз. Пумиськонлэн пумаз вераськизы Кун Кенешлэн но Правительстволэн Тӧрооссы Александр Волков но Павел Вершинин. Бере кылись удысъёсын югдурез тупатон вылысь кутэмын постановление. Правительстволэн Аппаратысьтыз пресс-центр. ГОЛЛАНДИЫСЬ АМАЛ Пудо ӝог будэ Сиён-юон поттонын, бакча сиён будэтонын, пудо вордонын Европаысь странаос пӧлын Голландия шӧдскымон инты басьтэ. Удмуртия но трос адӟем карымонзэ басьтӥз ни. Хозяйствоосын ӝог выжы лэзиз соослэн амалзыя картофка будэтон, опытной хозяйствоосын - ю тысь бордын ужан. Туэ февраль толэзьысен кунгож сьӧрысь амалъя парсьёссэс будэтыны кутскизы "Киясовское" эштосын но. Со сярысь пичи но уг жаляло. Выль технология луонлык сётӥз вакчи дыр куспын парсьёсты куайытыны, тросгес продукция поттыны. Та вамыш ик юрттэ азинскыны. Веранэз ӧвӧл, кыӵе адӟонэ вуэмын парсь вордонъя комплексъёс, кылсярысь, Подгорнойысь ферма ик. Пайда ваись удысысь сюриз ыштон ваисьёсыз пӧлы. Малы озьы луыса кошке? Ваньмыз потэ, дыр, сиён бордысь. Кытын тырмыт картофка, чабей, пуртэсо культураосты - отын парсьёс син шорын тэлеӟо, хозяйство понна бадӟым коньдонэн берытско. Ӵапак таӵе хозяйствоос ик ялан ужало пудо выжызэс умоятон бордын. "Киясовское" эштосын селекционной уж умой, котыр ласянь радъямын. Фермаен кивалтэ Иван Егорович Баяндин, зоотехнической службаен - Татьяна Аркадьевна Лузина, пудоослэсь тазалыксэс чакласа возё но эмъяло Алевтина Захаровна Кукаева но Людмила Ивановна Абашева. Ваньзы - бадӟым опытэн специалистъёс. Голландиысь амалъя ужаны кутскыса, парсь будэтонъя комплекс кусып тупатӥз Тольятти городысь одӥг фирмаен. Отын нимысьтыз технологияя парсь но тылобурдо сюдыны концентрат дасяло. Йыды пызь пӧлы ватсало пудоослэсь будонзэс ӝогомытӥсь препарат, витаминъёс, антибиотикъёс но трос мукетсэ. Фирмаын поттэм сиёнэн сюдыса, парсьёс сутка ӵоже 650-700, тылобурдоос - 60-70 граммлы будыны кулэ. Кызьы вераз комплекслэн валтӥсь зоотехникез Анатолий Иванович Рыболовлев, выль сиён борды парсьёсты пичиен-пичиен дышето. Дыр ортчемъя, йылпумъянъёс но лэсьтыны луэ ни. Апрельлэн нырысетӥ декадаяз эскероно пудоослэн секталазы 500 граммлы будӥз, кыкетӥ декадаяз - 570-лы, куинетӥяз - сутка ӵоже 600 граммлы. Пусйыны кулэ суперконцентратлэсь дунзэ: одӥг килограммез понна хозяйство 4 сюрс манетлэсь ятыр тыре. Дунтэм со ӧвӧл, но пайдаез тросэнгес берытскоз. Та выль сиён вань пудолы уг шедьы на - уг тырмы коньдон. Озьы ке но, азьвыл аръёсын ӵошатыса, комплекслэн юнмамез шӧдӥське. 7 толэзь куспын фермая пудолэн привесэз сутка ӵоже оглом 280 граммлы ӝутскиз, откормын - 363 граммлы. Амалтэк малпаськод: малы меда выль амалъя ужаны ӧм кутске 6-7 ар талэсь азьло? Соку, оло, куашкась хозяйствоос районамы ӧжытгес луысалзы? "Киясовское" эштосын та секыт вакытэ но вань ни азьмынӥсьёссы. Соос пӧлын Надежда Павловна Селиверстова но Екатерина Алексеевна Овчинникова, Светлана Юрьевна Богданова но Лидия Геннадьевна Поторочина, Мария Абрамовна Жуйкова. Нылкышно киосын будэтэм сӥль пайдаен берытскоз хозяйстволы но, районлы но. Г. ПАРФЕНОВ. Киясово район. Подпись Паймымон, синмаськымон адямиос вань котькуд гуртын. Селта районысь Зямайын улӥсьёс озьы шуо бригадирзы Тамара Аркадьевна Двинянинова сярысь. Та зӥб-зӥб сямо, пичиысен котькыӵе ужлы дышем кышномурт воргоронлэсь удыссэ быгатыса нуэ. Малы воргоронлэсь шуиськом? Секталаезъя сое нокызьы но нылкышно пельпумъёс вылэ понэм уг поты уго. Бригадир, фермаен кивалтӥсь, кладовщик - ваньмыз та оскемын Аркадьевналы (озьы вазисько солы гуртоосыз). Семьяез но бадӟым гинэ - вить кузя пиналъёсыз. Чупрес кышномуртлэн ваньмыз кияз "пӧзе", кылыз калыкен тупа, быгатонлыкез тырмыт. Гуртын солэсь вазь султӥсез вань меда? Атасъёс ке шат? * Т. А. Двинянинова, Селта районысь Ленин нимо колхозысь бригадир. * Фермаын ужгур уг чалмылы. Суредъёсыз Леонид ПРОЗОРОВЛЭН. КУН КЕНЕШЫН Кун Кенешлэн Президиумез юнматӥз Кун Кенешлэсь дас ньылетӥ сессиезлэсь эскероно ужпумъёссэ. Со усьтӥськоз 1997 арын 25 ноябре. Депутатъёс эскерозы кун служба, инвестициосын герӟаськем ужез нуон, обороная предприятиослэсь улон юртъёссэс муниципальной асваньбуре выжтон сярысь ужпумъёсты. Удмурт Республикаысь обороная предприятиосын ужасьёслэн Кун Кенешлы, Правительстволы, Ижевсклэн администрациезлы, обороная предприятиосысь кивалтӥсьёслы куронъёссэс быдэсъянъя ужрадъёс сярысь постановленилэн инъетэз бордын ужаны чакламын на. Президиумлэн постановлениеныз Калыкез кышкытлыклэсь утёнъя кенеш сярысь положение ватсанъёс но воштонъёс пыртэмын. Кун Кенешлэн пресс-службаез "Устоез лыдӟись" конкурсэ ДЫШЕТӤЗ УЛОНЭЗ ВАЛАНЫ 1. Газетэз басьтӥсько но лыдӟисько ни 40 арлэсь ятыр. Тӥни со дырысен кусыпме ӧй ыштылы на. 2. Берло дыре газетлэн тусыз чылкак воштӥськиз, сое уд ӵошаты ни ог дасо ар талэсь азьло потэмъёсыныз. Редакциысь журналистъёс вань сюлэм шунытсэс но быгатонлыксэс сётыса тыршо гожъямъёсты лыдӟисьёслы матэгес, тупамонгес карон бордын. Мон сямен, газетэз басьто арлыдо адямиос, уноез материалъёс но соослы ик сӥземын луыны кулэ, дыр. Туала егитъёс та газет шоры мукет сямен учко ни. 3. Котькуд номерзэ кутӥськод ке, син шоры йӧто республикамылэн улонысьтыз вакчиесь иворъёс. Одӥгез но сое лыдӟытэк уг кельты, малпасько. Мон ноку уг вунэты И.Лебедевлэсь но Ю.Александровалэсь "Лыткаысен Ваткаозь" экспедицие потаса гожтэмъёссэс. Туж кельшиз со мыным. Вунонтэм кылиз май толэзе Играысь ожысь но ужысь ветеранлэн К.Кондратьевлэн "Дуннеын Пежвай одӥг" корреспонденциез. Малпасько, сыӵе материалъёсты калык шумпотыса лыдӟе. Собере, ӧвӧл вунэтоно ветеранъёс сярысь но. 4. Газетлэн пуштросэз мыным кельше. Сое одӥг весын уд мерта ук: одӥгъёсызлы со яра, мукетъёсызлы - уг. Вань ужпумъёсты но огкутскемен уд ӝуты. Нош лыдӟисьёслэсь куронъёссэс лыдэ басьтыса, умойгес луысал. Котькудӥзлэн ӵектонэз аслаз. Тани кӧня ке кыл "Шӧкыч" сярысь. Берло дыре солэн шиез ныжомиз ни. Отчы сюро мукет баме куриськись материалъёс. Корреспонденциос но бадӟымесь, озьы со бам син шоры уг йӧты, адямилэн лыдӟемез но уз поты. 6. Улон огинтыяз уг сылы, ялан воштӥське. Озьы ик редакциысь журналистъёс но. Арлыдоос шутэтскыны кошко, соосты вошто егитъёс. Бен, унозэ мон соосты тодӥсько. Куд-ог корреспонденциосты лыдӟыса, авторзэ учкытэк ик валасько, кин сое гожтӥз. Кельшо материалъёссы Г.Романовлэн, И.Лебедевлэн, Л7Перевозчиковалэн, Ю.Александровалэн. Быгатэ гожъяськыны Е.Виноградова но. Нош куд-ог статьяосысьтыз кылъёсыз лымшор палагес кыско (ачиз угось отын вордскемын). 7. Газет - мынам матысь эше. Дышетӥз монэ улонэз валаны. Сюрес возьматӥз журналистикае йыгмыт султыны. Мукетсэ но пусйытэк кельтэме уг поты. Газетлэн кылыз ӧз воштӥськы. Со туж умой. Нош радиоез кылзӥськод ке, трос кылъёссэ валаны уг луы. М.МОСОВ. Дэбес село. СЮМСИЕ МЫНЫНЫ УГ БЫГАТО Сюмси районын улӥсьёс алигес пумиськизы Кун Кенешысь депутатэн Фёдор Казьминэн. Та палась калык сое отчы бырйиз вал кык ар талэсь азьло. Кун Кенешын Фёдор Геннадьевич Социльной ужпумъёсъя, ужъя, тазалыкез но инкуазез утёнъя комиссилэн тӧроезлэн воштӥсез луэ. Та комиссия пӧртэм законъёсты дасянэ пыриське. Тани туэ дасямын закон, кудӥзъя посёлокъёсын тыршись дышетӥсьёс, врачъёс, гуртъёсысь интеллигенция сямен ик, пӧртэм льготаос басьтозы. Комиссилы трос ужано луэ пиналъёслы пособие тырон но школаосты дышетскон арлы дасян бордын. Фёдор Геннадьевич бырйисьёссэ уг вунэты, соос сярысь сюлмаське. Сюмсиысь больницалы ваемын луоз выль рентгеновской оборудование. Татын улӥсь пенсионеръёс понна висъямын трактор. Табере соослы бакчазэс гырыны но пу вайыны капчигес луоз ини. Районын улӥсьёс куро чалякгес "Кильмезь - Ижевск" поездлэсь ветлонзэ усьтыны, озьы ик райцентрысь библиотекаез но Кильмезь посёлокысь школаез тупатыны. Трос ужъёс кылемын на Пижил станциозь сюресэз лэсьтон ласянь. Татын улӥсьёс Сюмсие мыныны али уг быгато, интыен-интыен сюрес пырак потонтэм. Чаклам ужъёсты быдэстыны трос уксё кулэ. Фёдор Казьмин бырйисьёслэсь куронъёссэс быдэстон понна вань быгатонлыкме-кужымме сёто шуиз. Зэм, кыдёкысь районлы юрттэт кулэ, татысь гуртъёслэн Сюмсие нуись сюресъёссы уродэсь, тулыс но зоро куазьёсын соос ветлонтэм луо. Н.ВОЗИСОВ. Удмуртъёслэн куатетӥ ӧтчамзы азьын ТЫЛ КАДЬ "Удмурт кенеш" огазеяськонлэн Алнашысь ёзэз тазэ люкаськонзэ быдэсак сӥзиз удмуртлыклы. Пумиськонэз усьтыса, ёрос кивалтэтлэн тӧроезлэн воштӥсез Нина Андреевна Образцова лыктэмъёсты ӟечкылаз вуоно ӧтчамен. Отӥяз шуак пальккиськиз тымиськем кайгу. Кенеше лыктэмъёс ымазы ву ӟузьыса ӧз пуке - сюлэмшугъёсын пачылмем дунне асэрказ кыриськиз. Леонид Макарович Большаков Алнаше вуиз Вавож палась. Кемаласен тодӥсько: та адямилэн яраез но, яратонэз но - удмурт кыл. Таяз учыре но воргорон ӧз чида: - Асьмеос кема тузонӟыса кыллиськом ни выж лёгет улын - йырмес ӝутыны ум дӥсьтӥське. Нош адӟонмы чыртыямы тани-тани кырмиськоз. Малы ялан ыштӥськомы выжыосмес? Оскон быре - быре калык. Малы Иван Грозный азьветлӥсьёсмес черке пыртылӥз? Тӥялтон понна. Мон нылпиосыным ӟуч кылын вераськоно луисько. Мынэсьтым юало: малы озьы? Валэктӥсько тазьы: анай кылзэс пиналъёсы уг тодо. Тамара Михайловна Колесникова - Туймыйыл школаысь дышетӥсь.. Кӧт кайгуэз тачак: - Ӟатча гуртын будӥз тодмо кылбурчимы Николай Семенович Байтеряков. Алигес шедьтэмын солэн ошмесэз. Вера Ивановна Кононова, горд сюйзэ поттаса, ошмес синэз чылкытатӥз. Со сярысь уг но тоды Удмурт лулчеберлыкъя дэменлыклэн Алнашысь ёзэз. Черкогуртысьтымы но чылкак уд синйылты удмур сямен нимам юртъёсты. Хлеб интые гожтыны луэ, дыр, нянь, радуга интые - вуюись. Ижысь вокзалысен огпол пумитай удмурт вузкарисез. Соин асьме сямен вераськыны кутски. Со вискын ик отчы вуизы улон юртъёсты чебермасьёс. Ӟуч сямен сыӵе усто мадисько - чылкак абдрай. Удмурт кылэз кылыса, штукатуръёс дорамы матэктӥзы. Собере асьсэос но ми сямен вераськыны ӧдъязы. Синмаськисько бигеръёслы: улыны быгато. Нош асьмеос ку дышомы? Удмурт гуртэ вуиськод но паймиськод жуг-жаген тырмем ульчаосмылы. Бигеръёслэн котьку чылкыт. Вожъяськисько котькыӵе кылын вольыт вераськыны быгатӥсь азьветлӥсьёсмылы. Туэ гужем Варзи-Ятчи курортысен Кузьма Куликовлэн устолыкезлы анае чылкак паймем. Абдраллям бигеръёс но, ӟучъёс но. Соин валче ик ӝуалтӥсько: вылӥ кивалтон удысэ сюрыса, куд-ог визьмо удмуртъёсмы йӧнъяськыны ӧдъяло. Киязы пичи гинэ янчик кутӥзы ке, шоразы эн ик вазьылы ни. Удмурт адями кайгузэ пыдло ватэ. Луо сыӵе вакытъёс - дунне вылын улэм уг пот ни. Соку котькудӥзлэн дораз лыкто, дыр, пурт но, гозы но, тӥр но. Таӵе учыръёс ичигес мед луозы шуыса, гуртъёсын кылдытоно нимысьтыз кенешъёс. Шугадӟись мурт отчы вазиськыны мед быгатоз. Тыло школаысь удмурт кыллы но литературалы дышетӥсез Елена Герасимовна Смирноваез но сюлмаськытэ калыкмылэн ӵуказе нуналыз: - Пиналъёсыз алигес тодматӥ "Пиез дорын куноын" веросэн. Солэн огъя пуштросэз таӵе: удмурт дэремен дӥсяськем кышномурт пиез доры городэ кунолыкес мынэ. Таиз возьдаське анаезлэсь. Нылпиослэсь юасько: - Тӥ но асьтэды озьы ик-а возьысалды? -Возьдаськысалмы, - шуо соос. Тӥни кытчы вуттэ ни асьмемыз сокем кепырась луэм Туэ нылме Алнаш школае интыяй вал. Кӧня ке дышетскиз но шуэ: - Анай, мон татысь берто: вань эшъёсы - удмуртъёс, нош верасько ӟуч кылын. Вожъяськисько но, синмаськисько но "Пурга гуръёслы". Асьмелы но сьӧразы уиськоно вал. Удмурт телевидениын шуак кулэсмизы удмурт веранъёс. Ванез но сыӵе: экран дуре пуксиськод гинэ - суред быре. Берло вадес чутрак аляз юон. Пенси басьтӥсь арлыдо нылкышноос кунултӥськыса ульча кузя юмшало. Ӟатчалан улӥсь Илья Васильевич Китов котькуд веранзэ тыро-пыдо дася. Таяз учыре но люкаськемъёсты сайкатӥз: - Мынам пие воргорон луиз ни - ӟечезлы ӧжыт дышетӥськем. Огпол таӵе учыр вал. "Лысву сямен уг тӧлӟы синкыли" драмаез дасяськом. Пиелы шуисько: "Ойдо кырӟалом "Анае гурзэ эстэм, дыр, но" кырӟанэз. Уг тодӥськы, шуэ. Вазиськисько мукет ӵыжы-выжыелы - таиз но йырыныз шона. Соку ик чабкиськи: кытчы вуомы ай тазьы?! Йыбырттӥсько дышетӥселы Ольга Васильевна Леврановалы: букваосыз ум тодмаське вал ай - милемыз удмурт гуръёслы дышетӥз ни. Солэн юрттэменыз валче ик нырысьсэ кылӥмы "Укно но дуръёсад..." кырӟанэз. Вазиськисько ёросэнымы кивалтӥсьёслы: берло дыре гуртэ шер вуиськоды. Калыклэсь люкиськиды. Азьвыл библиотекарез Вера Ивановна Кононоваез урӟектэм яраосмы золгес пӧсекъято: - Николай Семенович Байтеряковлэн ошмесэз доры егитъёсты ӧтисько - уг мыно. Чутрак ваментӥсько: - Со шаере кызьы вуод? Пиналъёс удмуртлыклэсь чылкак палэнскизы ни. Соослы туэ дискотека гинэ кулэ. Сое ик уг возьматы шат Любовь Быкова? Эстрада удысын ассэ аспӧртэмлыко адями кожаса, сцена вылын укыр йӧспӧртэм выре: пыдъёссэ огпалась огпала ӵыжаса сылэ. Соин валче ик эшъёсыз но озьы даурто. Сыӵе адямиосты зэмос удмуртъёс шуод шат? Кузёбай школаысь дышетӥсьёслэн Лидия Ивановна Прокопьевалэн но Елена Дмитриевна Лаврентьевалэн но кӧткайгузы одӥг - удмуртлык: - Куд-огез весь пумитъясько выль нимкылъёслы. Милям чакламмыя, сокем керӟегъяськоно ӧвӧл: тужгес кулэез кылёз, тужгес кулэтэмез кошкоз. Ми доры ӵем вуыло кунгож сьӧрысь ӵыжы-выжыосмы. Милемыз серекъяны уг - кылмес дышетыны. Туэ гужем но гуртамы улӥз Ондрей агай - Канадаысь мадьяр Андре Бенце Бруклер. Кылынымы сокем тунсыкъяське вал - ӵукна ик султэ но, корка пуштӥ лёгаськыса, ым пушказ удмурт веранъёсты сипыртэ. Бигеръёс ӟуч сямен сокем вольыт уг пӧрмыто - кин ке серекъя шат? Асьмемыз соку ик унь-мань карыны ӧдъяло. Ми басьтӥськимы вал покчиосмес математикалы удмурт сямен дышетыны - нокин ӧз дурбасьты. Ӟуч кыллы ай соос дыг-мог ук. Туэ нылы висиз (Елена Дмитриевна Лаврентьевалэн верамысьтыз). Эмъяськон юртысен адӟисько: одӥгез анай нунызэ туж яратэ, нош ӟуч сямен мусояны кыл уг шедьты. Нылпиез дораз но уг лыкты ни. Алнаш школаысь удмурт кыллы но литературалы дышетӥсь Мария Владимировна Митрошина малпа тазьы: - Черкогуртысьтымы туж ичиез удмурт пиналъёс дышето анай кылзэс. Малы? Тодам лыктэ одӥг учыр. Нылме интыяй удмурт классэ. Огпол адӟисько: ужаны дышетонъя урокын удмуртъёс бакчаын гудӥсько, ӟучъёс вурисько. Жаляй мусокаме - ӟуч классэ пуктӥ. Нылпиосы удмурт кылзэс уг тодо шуыса, Удмурт радио пыр но ивортӥзы ни. Туэ кыксэ ик пиосме удмурт классэ сётӥ: анай кылзэс мед дышетозы. Капитон Николаевич Бобров, музъем ужась: - Удмурт калыклэн выжыосыз гуртын. Кивоштӥсьёсмы сярысь али ик ӧм сюлмаське ке, уз луэ асьмелэн нокыӵе гожъясьёсмы но, суредасьёсмы но, тодосчиосмы но. Малы меда ог-огмылы кӧтмы пӧсь? Йыркуръяськыса ӝук уд пӧзьты. Зоя Сидоровна Шишова, Выль Утчан школалэн директорез: - Удмуртлэсь сюлмаськонзэ валалоз шат ӟуч, бигер яке украин? Мон кемалась синмаськыса учкисько Валентин Тубылов шоры. Со ик мед луысал "Удмурт кенешлы" тӧро. Удмурт кылын сяна, ӟуч кылын но вольыт вераськыны дышоно ни. Мед быгатомы кайгумес кепыратэк шараяны. Данъяськисько удмурт нылкышноосын: соос котьмалы устоесь. Родион Семенович Лесников, Тыло школаысь дышетӥсь: -Туэ "Ува" санаторийын шутэтскыны кылдӥз. Котырам ваньмыз асьме выжыысь адямиос кадь, нош верасько ӟуч сямен. Санаторийын ужасьёслэсь юасько: - Удмуртъёсты вань-а? - Ӝыныезлэсь тросэз, - шуо. - Нош анай кылзэс малы уг поттыло? - выльысь тэбинисько. - Ӟуч сямен дышизы ни, лэся, - одӥг но кепыратэк верало соос. Конференцие лыктэмъёсты "Удмурт кенеш" огазеяськонлэн малпанъёсыныз тодматӥз исполкомысь адями тодосчи Леонид Загребин. Та нуналэ ик быръемын удмуртъёслэн куатетӥ ӧтчамазы делегатъёс. Соос пӧлын - дышетӥсьёс, музъем ужасьёс, егитъёсты валтӥсьёс, музон удысъёсын тыршисьёс. Огазеяськонлэн ёзэзлы тӧрое выльысь быръемын солэн азьвыл кивалтӥсез Вячеслав Михайлович Булдаков. *** Чебер малпанъёс кельтӥз, одӥг шокчемен ортчиз кенеш. Татын вераськисьёс тыл кадесь вал - возьыт ӧй луысал соосты быдӟым ӧтчамын но кылзыны. Одӥгез весь сюлэмшугъяськытэ: кин кивалтоз ни ай "Удмурт кенешен"? Выль адями кужмо биньгозызэ кияз ӝикыт мед возьысал. Е.ВИНОГРАДОВА. Гуртоослы юрттэ банк "СБС-АГРО" огазеяськонэ пырись Агропромбанклэн Удмурт люкетэз ӟеч юрттэ шаерысьтымы гуртоослы. Сӥзьыл бусы ужъёсты радъяны со куамын миллиард пала коньдон висъяз. Пичи процентэн кредит сётэмын колхозъёслы, эштосъёслы, сиён-юон поттӥсь предприятиослы, ёрос администрациослы. Пусйыны кулэ: коньдон сётӥське пыд йылазы юн сылӥсь коллективъёслы гинэ. Соин ик банке коньдон тупатэм дыре берытске. Вуоно аре "СБС-АГРО" гурт хозяйствоез азинтонэ 12 триллион манетлэсь ятыр висъяны чакла. Со пӧлысь ӝыныез пала - банклэн аслаз люкам уксёез. Тазьы ог-огдэ валаса ужан ваньмызлы пайдаен берытске. Н. ИВАНОВ. "Асьмелэн юртмы - Россия" Удмуртиын та огазеяськонэ пырисьёслэн лыдзы, КПРФ-ен ӵошатыса, трослы уногес. Коммунистъёслэн партиязы кыстӥське ке мӧйыгес калык, "Асьмелэн юртмы - Россия" огазеяськонлэн ужаз пыриськыны ӵемгес мылкыд каро егитъёс. Кыӵе сюлмаськонъёсын меда улэ та огазеяськон? Бен, котькинлэн сямен, быдэстымтэ ужпумъёс трос. Юрттоно экономикаез азинтыны, вунэтоно ӧвӧл пенсионеръёс, ветеранъёс сярысь, уже кысконо егитъёсты... Вань сюлмаськонъёсты сэрттон-пертчон понна, умой луысал Удмурт Республикаысь Кун Кенешын фракция кылдытыны. Озьы малпало "Асьмелэн юртмы - Россия" огазеяськонлэн ужаз пыриськисьёс. Нош со понна али луонлык ӧвӧл на. Соин ик вуоно быръёнъёсы асьсэ депутатъёсты дасяно. Нош малы одно ик фракция кулэ? Али Удмуртиын законъёслы проектъёс бордын ӵемгес ужа Кун Кенешлэн Аппаратэз. Пӧртэм огазеяськонъёс та уж борды мылысь-кыдысь уг басьтӥсько. Нош "Асьмелэн юртмы - Россия" тырше пӧртэм законъёслы проектъёс дасянын. Соосты улонэ пыӵатыны юрттысал Кун Кенешысь фракция. Арысь аре "Асьмелэн юртмы - Россия" огазеяськон паськыта. Солэн ужаз пыриськыны мылкыд каро нимаз адямиос но, озьы ик пӧртэм огазеяськонъёс но. Берло дыре татын кусып тупатыны малпало "Удмурт кенешен", бигеръёслэн огазеяськонэнызы но озьы ик мукет та выллем организациосын. Озьыен, "Асьмелэн юртмы - Россия" пумен паськыталоз но будоз. Ф. МИННИГАРАЕВ. Калыклэсь дуно калык гинэ Гажано Александр Александрович! Ми котьку кылӟиськомы но газетысь лыдӟиськомы тӥлесьтыд вераськемдэс. Адямиослы оскон но, чидан но пыӵатӥськоды кадь потэ. Али но берлояз 13-тӥ сессиын вераськемдэс кылзыса но "Удмурт дунне" газетысь лыдӟыса, ми быдэсак дурбасьтӥськомы тӥледлы, Александр Александрович, но Правительстволэн кивалтӥсезлы Павел Николаевич Вершининлы. Тӥлесьтыд ӵош ужамдэс адӟыса но шӧдыса, оскыны кутскиськомы кадь та улонлэн воштӥськонэзлы. Со озьы ик мед луоз вылэм. Нош котькытын чылкытэныз ӵош ик кырсез но луэ. Калыкен быръем куд-огез депутатъёс асьсэдыз асьсэос уг ни валало. Улонэз умой пала берыктон интые, соос кутско калыкъёсты ваче пумит узатыны, ӟеч но чылкыт адямиос вылэ пож ву кисьтаны. Мон тани кемалась валасько но шӧдӥсько ини кин кыӵе. Дышетскеме но трос ӧвӧл, нош улон шоры учкытэк уг луы. Кызьы со берга, кыӵе муртъёс асьмемын кивалто, кытчы соос нуо. Михаил Кокорин сярысь лыдӟыса но кылзӥськыса, умойзэ-ӟечсэ ӧм тодэ на. Вань солэн кышкыт сямыз - калыкъёсты ваче узатон. Удмурт калыкез сантэмаса вераськемзэ но кылыны луэ вал ини. Нош али ӟуч калыкез, пе, утисько. Кыӵе со утён?! Нош ик узатон! Вань калыкъёсын ӟуч кылын вераськыса, ог-огмес валаськомы ук - ӟуч калыкен ӵош улӥськомы трос дауръёсын. Кокоринлы верам потэ на: Михаил Константинович, дугдэлэ кулэтэм ужен выремысь, ужалэ калыкен ӵош. Юнме кыл вӧлдонэн депутатлы вырыны уг яра. Гажано Александр Александрович, вожвылъяськонъёслы эн сётскелэ. Тыршелэ ужась калык понна, солэсь дуноез номыр ӧвӧл. Шуд но тазалык, бадӟымесь азинсконъёс тӥледлы. Гажаса Анна АБРАМОВА, Пичи Пурга районысь Пугачёво посёлокын улӥсь. ӴУКАЗЕ - АВТОТРАНСПОРТЫН УЖАСЬЁСЛЭН ПРАЗДНИКСЫ Бускельёссылы но юртто Шаерысьтымы автотранспорт удысын Играысь АТП одӥгез устоез лыдъяське. Берло дыре, Валерий Прохоровлэн кивалтэмез улсын, со тодмантэм воштӥськиз, тужгес но умоязы водительёслэн но ремонтникъёслэн ужан условиоссы. Соин ик, вылды, Играетӥ но мукет районъёсы, Ижевске ветлӥсь автобусъёслэн ужамзылы нокыӵе ӝожтӥськонъёс ӧвӧл. Сыӵе азинсконъёс бен инмысь уг усё. Со люконтэм герӟаськемын автотранспортной предприятилэн директорезлэн эксплуатацияя воштӥсезлэн Алексей Калашниковлэн сюлмаськеменыз. Алексей Владимирович ваньзэ лэсьтэ: автобусъёс но, грузовой машинаос но нуналлы быдэ рейсэ мед потозы. Туала вакытэ со капчиен уг сётӥськы, куддыръя воштос ёзъёсын но шуге-леке шедёно. Озьы ке но, Играысь автотранспортникъёс уг ӝожтӥсько, утчасько, шедьто но шуг-секытысь пото. Автотранспортникъёслэн праздниксы азьын шумпотыса верам потэ, соос бускель Татарстан Республикаын но Пермь областьын ужало, сюрес лэсьтыны юртто, кӧльы, луо, из но мукет лэсьтӥськон материалъёс нуо-ваё. Отысь сюрес лэсьтӥсьёсын соослэн кусыпъёссы кемалась умоесь. Ог-огзылы арысь аре юртто. Туннэ Играысь АТП-ысь вань ужасьёсты, шофёръёсты но, ремонтникъёсты но сюлмысьтымы ӟечкыласьком профессиональной праздникенызы, сӥзиськом бадӟым шуд но юн тазалык. Г. РОМАНОВ. КОТЬМА СЯРЫСЬ Кӧня манет сылэ чиновник? Англиысь чиновниклэсь ужамзэ, шорлыдын вераса, ар ӵоже 400 сюрс долларлы дунъяло, США-ын - ог 550 сюрслы. Россиын самой вылӥ "тубатысь" чиновник сылэ 7-8 сюрс доллар. Кызьы адӟиськом, дунъёс пӧртэмесь. Озьы ик луыны но кулэ, дыр. Шуом, Нью-Йоркысь юртъер сылэ ке 100 миллион доллар пала, Москваысезлэн дуныз музонгес луоз ни. Озьы ик чиновникъёсты но одӥг мертэт улэ уд кыскы. Вылаз ик, дунзэс возьматӥсь лыдпусэ пыртэмын ӧвӧл на служебной машинаен ворттылон, командировкаос, телефонэн вераськон. Кызьы гожтэ "Финансовая Россия" газет, ӟеч ужась чиновник уждун но ужезъя басьтыны кулэ. Мед соос лыдзыя ӧжытгес луозы, но - визьмоесь, быгатонлыкоесь. Америкаын, кылсярысь, Пруденс городлэн мэрез ар ӵоже 67 сюрс доллар басьтэ, со сяна, вань улытозязлы чакламын ни пенсиезлэн быдӟалаез - уждунэзлэн 75 процентэз. Но одӥг пол коть кинлэсь ке дуно кузьым яке коньдон басьтыны шедьтӥз ке - огкутскемен ваньзэ ыштоз: пенсизэ но, ваньбурзэ но. Законэз татын юн эскеро. Солэсь пересез ӧвӧл Музъем вылын улӥсьёс пӧлысь тужгес но пересь адями - 135 аресъем Али Мухаммед Хуссейн, Ливанысь воргорон. Та страналэн представителез документъёс пыр возьматыны быгатӥз солэсь вордскем арзэ но, Али Мухаммед вордскем 1862 арын. Егит дырысен со ужам писпу эгыр сутонын, берло ог дасо аръёс талэсь азьло гинэ шутэтскыны потэм. Алилэн 93 нылпиосыз. Ваньмыз улэпесь. Ма бордын воргоронлэн кема улон кужымез? Журналистъёслэн юанзылы Хуссейнлэн 80 аресъем кышноез (картэзлэсь со 58 ареслы егит!) валэктӥз: "Али туж чакласькыса сиське. Йӧл, бакча сиёнъёс но турын-куаръёс ӝӧк вылысьтыз уг бырыло. Зэм, кыске но - нуналаз 3-5 пачка тамак быдтэ, соин тазалыксэ куашкатэ". Гожтэ "Коммерсант" газет. Дасяз Л. МЕДВЕДЕВА. БЕРЕКЕТ ВУРЕ АСЬТЭОС "Коӵышпиос" тапочки Таӵе пыдкутчан нылпиостылы туж кельшоз. Соос шунытэсь, небытэсь, нош макем муспотонэсь но аспӧртэмесь адӟисько. Нимысьтыз номыре ик басьтонэз но ӧвӧл, кылем-мылем ыж гон юдэсъёс, нуллыны ярантэм гоно воротникъёс котькуд юртын шедёзы. Пыдэсаз клеёнка юдэс но поныны яралоз. Суред вылын сётэм туспуктэмъёсъя (басьтэмын ӟуч литератураысь) та тапочкиосты вурыны номыр шугез ӧвӧл. Синъёс интые бирдыос дэмӟытоно, нырез но ымез пужыятоно. Тапочкиез котырак дурсано буёло векчи басмаен яке сюлэг лентаен. Л. ВАСИЛЬЕВА. ЧУРЪЁС, ЧУРЪЁС Кытчы быриз азьло улон? Та учыр гырон-кизён вакытэгес вал. Асьтеос тодӥськоды, гуртын улӥсьёс техникалы ёрмо. Ярам али, сое воштӥсьёс вань. Бен, мон валъёс сярысь верасько. Картофка гожъян вакыт куинь-ньыль семьялы одӥг вал шедиз Ужмы куспетӥ луиз но ченгешон пуромиз: - Тӥ колхозникъёс ӧвӧл. - Кызьы озьы, улытозямы колхозын ужамы ук. - Азьло озьы вал со, али тӥляд нокинды но колхозын уг ужа... Гуртоос паймемын. Ма, та дырозь колхозысь школаын ужамы. Отын пиналъёсыз колхозникъёслэн но "интеллигентной" семьяысь шуыса ӧз висъялэ. Азьланяз но уд люке, сыӵе дыръёс кемалась ортчизы ни. Кизнер ёросысь одӥгаз колхозын луэм учырез тросэз, оло, вунэтӥзы но ни. Пересьёслэн гинэ сюлэмзы ялан бӧрдэ: "Кытчы быриз азьло улонмы?" А. КУЗНЕЦОВА. КЫТЫН КЫДАЛО ТОДОСЧИОС? Туэ Л. С. Христолюбовалэн удмурт тодосчиос сярысь книгаез лыдӟисьёс кие вуиз. Соя тодыны луэ, кыӵе районысь, городысь тросгес удмурт тодосчиос потэмын. Ӵошатон понна басьтом Ижевск городэз но Алнаш районэз (кытын тужгес но трос тодосчиос вордскемын). Нырысяз 110 сюрслэсь тросгес удмуртъёс уло, нош кыктэтӥяз - 18 сюрс. Ижевскысь потӥз 41 тодосчи, нош Алнаш районысь - 39 (со пӧлысь витез наукая доктор). Озьы ик тросэз журналистъёс, писательёс, артистъёс но творчество удысысь мукет ужасьёс - Алнашысь. Ижевскын умой тодон-валан басьтыны луонлыкъёс вань вылысь, тодмо адямиос ичи потэмын. Шуоды, ма бордын мугез? Ваньмыз со кылдэ анай кылмес ӟеч-ӟеч тодымтэысьтымы. Вордскем кыл пиналлы юрттэ визьмо, вылӥ быгатонлыко луыны. Юнме озьы шуиллямтэ, дыр, кунгож сьӧрысь тодосчиос но. Алнаш пиналъёс удмурт кылзэс тодо. Нылпи садын, школаын, гуртазы ас сямынызы верасько. Со ик юрттэ, луоз, соослы вылӥегес ӝутскыны. Нош Ижевскысь пиналъёс ӟучомемынэсь. Ӵошатон понна басьтом на Глазов районэз но городзэ. Районысь потэмын 25 тодосчи, нош городысь - 8. Сыӵегес ик югдурзы можгаослэн но. Шаермыя учконо ке, 40 процентэз удмуртъёс городын уло. Отысь потэмын 64 тодосчи гинэ, нош шаермыя ваньмыз 428 мурт. Кыӵе меда югдур Удмуртилэн палэназ. Басьтом Башкортостан но Пермь областьын улӥсь удмуртъёсты. Та кык улосвылъёс артэ луо. Нырысетӥяз 23 сюрс удмуртъёс 8 тодосчизы. Кыктэтӥяз 33 сюрс удмуртъёс, тодосчизы 2 гинэ. Та лыдпусъёсты синйылтыса мед малпаськысалзы удмуртъёс. Визьмо, вылӥ быгатонлыко луон понна тодыны кулэ на анай кылэз. Нош сое азинтон вылысь, удмурт кылмес законэн юнматоно ВИ ӧтчамын та ужпумез, малпасько, одно ик ӝутоды, эскерозы. Б. БЛИНОВ. Глазов район, Куреггурт. Кызьы "Удмурт кенешлэн" кивалтӥсьёсыз Удмуртиез "вузазы" Та учыр нокинлэн син шораз ик ӧз йӧты кадь. Газетъёс но, телевидение но со сярысь ӧз ивортэ. Ма ваёз со азьланяз удмурт огазеяськонлы, тодмо ӧвӧл на. Вераськон мынэ Б. Н. Ельцинлы вазиськон сярысь. Гожтӥзы сое "Удмурт кенешлэн" кивалтӥсьёсыз, Удмуртиын Президентлэсь ыстэм муртсэ юнматыны курыса. Та учыр сярысь радызъя вераны кулэ. Лушкем вамыш 1997 арын 10 апреле "Удмурт кенешлэн" исполкомез люкаськиз. Со юнматӥз вазиськонлэсь пуштроссэ. 13 адями соин соглаш кариськиз, одӥгез пумит луиз. Та ӝытэ ик вазиськонэз факсэн Президентлэн администрацияз келязы. Страна геройёссэ тодыны кулэ, шуо. Вазиськонэз кутон понна куаразэс сётӥзы И. М. Байметов - "Вордскем кыл" журналлэн валтӥсь редакторез, Л. Д. Загребин - ИжГТУ-ысь докторант, В. М. Ившина - Калыкез дышетонъя министерствоысь отделэн кивалтӥсь, В. А. Якупов - ужбергатӥсь, С. М. Смирнов - врач, Н. И. Малых - дышетӥсьёслэсь тодонлыксэс будэтонъя институтын ужась, З. В. Суворова - Калыкез дышетонъя министерстволэн национальной дышетонъя институтлэн директорез, В. А. Ныров - МВД-лэн юридической институтэзлэн Ижевскысь факультетысьтыз кафедраен кивалтӥсь, А. Вахрушева - лаборант, Е. К. Ботникова - Ижевскысь медициная академиысь преподаватель, П. К. Чернов - Писательёслэн союззылэн членэз но В. К. Тубылов - Кун Кенешлэн Президиумезлэн членэз. Профессор И. Г. Гришкин возиськиз куара сётэмлэсь. УдГУ-ысь доцент А. А. Разин пумит луиз. "Удмурт кенешлэн" президентэзлэсь ужъёссэ быдэсъясь В. А. Осипов куаразэ сётӥз, уноезлэн малпанэзъя кариськоно шуыса. Адӟисьёс верамъя, ваньмыз Кун Кенешлэсь но Правительстволэсь лушкемен лэсьтэмын вал. Нациосын ужанъя комитетлэн кивалтӥсезлы гинэ но ивортӥллямтэ. Озьы ке но, бер ӝытазе Правительстволы та сярысь тодмо луэ. 11 апреле 10 часын ӵукна "Удмурт кенешлэн" исполкомез люкаське. Лыкто Кун Кенешлэн Тӧроезлэн воштӥсез А. Г. Красильников, Правительстволэн Аппаратэныз кивалтӥсь М. А. Григорьев, Нациосын ужанъя комитетлэн кивалтӥсезлэн воштӥсез С. Ф. Васильев, Удмуртиысь историяя, кылъя но литературая иниститутлэн директорез К. И. Куликов, В. А. Осипов, И. М. Байметов, П. К. Чернов, А. А. Разин но эшшо кӧня ке мурт. Калык ичи люкаськемен, 18.30 часын пумиськыны кенешизы. Ваньмыз огыр-бугыр луиз. Кыре потӥз вазиськонэз гожтон сярысь малпан. И. М. Байметовлэн йыраз лыктэм, собере ачиз ик гожтэм, нош факслэсь номерзэ, кудӥзъя вазиськон Москвае кошкиз, ивортыны пумит луиз. К. И. Куликов тужгес лэчыт вераськиз. Со шуиз: Удмуртилэн Конституцияз Президентлэн ыстэм муртэз сярысь поттылэмын ӧвӧл; удмуртъёс кунлыксэс кемалась басьтӥзы ини, нош табере асьсэ киын сое берлань сёто; В. К. Тубыловез ыстэм муртэн уз юнматэ, А. Б. Чубайслэсь адямизэ пуктозы; соин валче, оло, музъемез но вузаны кутскуозы ини. С. Ф. Васильев пусйиз: Удмуртие Президентлэсь ыстэм муртсэ юнматон нациослэсь кусыпъёссэс сӧроз. Исполкомлэн ӝыт кенешаз М. Ф. Григорьев, А. Г. Красильников, Р. И. Яшина "Удмурт кенешысь" кивалтӥсьёслэн ужамзылы таӵе дунъет сётӥзы: - исполком та документэз кутыны уг быгаты, малы ке шуоно, солы сыӵе уж оскемын ӧвӧл. А. Г. Красильников вазенгес валэктӥз вал ини исполкоме быръемъёслы, "Удмурт кенешлэн" политикае пыриськемез умое уз вутты. Кун Кенеш но Ижевскысь мэрия куспын тэкшеронъёсты политика ласянь дунъямлэсь вужез исполком возиськиз вал. Нош та выллем вазиськонэз кутон понна, "Пичи кенешен" ке но огкыл шедьтоно; - Удмуртилэн Конституциез уг чакла ыстэм муртэ юнматонэз. Куд-ог интыосын (кылсярысь, Мордовиын, Марий Элын) таӵе муртэ юнматон учыръёс политикаен герӟаськем югдурез шугомытӥзы; - Президент В. К. Тубыловез отчы уг пукты, малы ке шуоно, со Кун Кенешлэн депутатэз, соин ик одӥгъёсыз пала гинэ дурбасьтоз. Тӥни малы Президент палэнысь муртэз быръёз; - Ижевскын Москваысь комиссия ужаз, со Кун Кенешлэсь, мукет ёзъёслэсь документъёссэс чаклаз, макем соос тупало Конституцияя Судлэсь решениоссэс быдэсъянлы. Комиссилэн йылпумъянъёсыз Б. Н. Ельцинлы апрельлэн пумаз сётэмын луозы. Комиссия пусйиз, Кун Кенеш Конституцияя Судлэсь решениоссэ быдэсъя шуыса. Нош "Удмурт кенеш" аслаз вазиськоназ ӝутӥз тэкшеронъёс, Кун Кенешлэн умойтэм ужамез сярысь ужпумез; - "Удмурт кенешлэн" кивалтӥсьёсыз полдитика ласянь бадӟым янгыш лэсьтӥзы. Кызьы янгышез тупатоно? Та юанлы валэктон одӥг гинэ - вазиськонэз берыктоно. Нош кызьы сое лэсьтод, пе, пятница ӝытазе? Вуоз-а сыӵе курон кулэ адями доры понедельникозь? Кыӵе мугъёсын та вазиськон кылдӥз? Нырысь-валысь таӵе малпан лыктэ: республикалэн данэз сярысь сюлмаськизы, кун властьлэсь лябзэ возьматыны тыршизы. Но ма люкетӥз соослы Конституцияя Суд пыриськемлэсь азьвыл вераны мылкыдзэс? Озьыен исполком малпаз дыр ортчем бере ужпумез выльысь улӟытыны. Таин валче юан кылдэ: кинлы со кулэ? Данэз вузан "Удмурт кенешлэн" кивалтӥсьёсыз куспазы ӵем эчешылӥзы. Пӧртэм аръёсы ваче вуылӥзы демократъёс но коммунистъёс, вуж улонэ ӧтисьёс но Западлэсь вожъяськисьёс. Туннэ югдур уката но лэчытомиз. Малы ке шуоно, "Удмурт кенешлэн" куд-ог кивалтӥсьёсыз (И. М. Байметов, Л. Д. Загребин но соослы дурбасьтӥсьёс) тыршо 1995 арын Кун Кенеше быръёнъёсын куашкамзы понна пунэмзэ берыктыны. Соос Ижевсклэн мэриеныз герӟаськизы. Нош мэрия удмуртъёслэн огазеяськонэнызы кусып тупатыны муг кемалась утча вал ини. Угось Ижевсклэн кивалтӥсьёсыз удмуртъёсын эшъяськизы ке, нокин но соосты национальной ужпумъёсты палэнэ кельтэмзы понна янгыше уз уськыты ни. Ижевскысь мэриын удмуртъёс пӧлысь Галина Ахророва гинэ. Соин ик со "Удмурт кенеш" понна нюръяськонэ пыриськиз. Л. Д. Загребинэз, В. К. Тубыловез, И. М. Байметовез герӟаны малпаз. В. К. Тубылов котькыӵе ужын мед луоз, со мэрилы кельше. Солэн тыбыр сьӧраз котькыӵе ужъёсты бергатыны луоно. Со кивалтон вакытэ, 90-тӥ аръёс кутскыку, Удмуртиын нефтен герӟаськем югдур шугомиз, Министръёслэн Кенешенызы кивалтӥсьёс вошъяськизы, йыружъёслэн лыдзы йылыны, производство куашканы шӧтазы. Кыл кутонлэсь палэнскыса но мукетъёсыз сьӧры ватскыса, В. К. Тубылов, шонергес вераса, солэн юрттӥсьёсыз Министръёслэсь Кенешсэс ваньмыз понна янгыше уськытӥзы. 1995 арын быръёнъёсын депутатэ ортчымтэос пӧлысь уноез мэриен юн кусып возизы. Соин ик Ижевсклэн кивалтӥсьёсыз малпазы "националъёс" пыр Кун Кенешен нюръяськыны. Мугез но вань: Конституцияя Суд, "республикалэсь улонзэ радъян", "нациослэн ужпумъёссы но культураез азинтон" но мукет. Мэриын валазы: Президент В. К. Тубыловез ыстэм муртэ уз юнматы, кунлы дурбасьтӥсьёсты Москва уг данъя. Со сяна, вазиськонэз ыстон вакытэ Москва та должносте ӵектоно муртэ тодэ вал ини. Но Президентлэн ыстэм муртыз мэрилы сокем кулэ ӧй вал, макем кулэ вал "Удмурт кенеш" пыр удмурт кунлыкез лябӟытон. Ваньмыз та сокем уг паймыты, абдрано "Удмурт кенешысь кивалтӥсьёслэн, В. К. Тубыловлэн улонлэсь кудпала бергамзэ шӧдымтэзылы. Шуг оскыны, В. К. Тубыловез вазиськонлэн пуштросэныз яке сое Президентлэн ыстэм муртэз карыны ӵектонэн ӧз тодматэ шуыса. Озьы ке но, ваньмыз шараяськем бере, В. К. Тубылов вазиськонэз кылдытонэ ӧй пыриськы шуэ, куаразэ со понна сётӥ ке но. Соку кинлы яке малы осконо? Тодмо луиз, "Удмурт кенешлэн" вазиськонэз мэриын "кисьмаз" шуыса. Али но тодмо ӧвӧл Москвае вазиськон келям факслэн номерез. Кун Кенешлэн но Правительстволэн факсъёсысьтызы сое ӧз келялэ, почтаысен ас кисыед чотын ыстыны укыр дуно усёз. Кыле одӥг гинэ амал - мэрилэн факсэз. Сюрес вожын Удмурт движенилы азинскыны капчи ӧвӧл. Огазеяськон кемалась кылдӥз ини, солэн ёзъёсыз вань, кивалтӥсьёсыз вошъясько. Но али ке но "Удмурт кенеш" республикалэн политикаяз но культураяз ляб пыриське на, уноез удмурт калык, интеллигенция, егитъёс сое уг гажало, мукет калыкъёс со сярысь уг ик тодо, кивалтӥсь ёзъёс соин уг кенешо. Соин ик, вылды, 1995 арын быръёнъёсын "Удмурт кенешен" ӵектэм кандидатъёсты калык ӧз бырйы. "Удмурт кенешлэсь" президентэзлэсь ужзэ В. А. Осипов быдэсъяку, югдур воштӥськыны кутскиз. Нациосын ужанъя комитет пусъе: ассоциация азяз ужпумъёс пуктэ но соосты быдэсъяны тырше, "Удмурт кенешлэн" ёросъёсысь ёзъёсыз ӟечгес но тросгес ужаны кутскизы. Нош азьпалан - вань удмуртъёслэн съездзы. Со дунъет сётыны кулэ апреле гожтэм вазиськонлы, исполкомлэн ужамезлы, бырйыны кулэ кивалтӥсь. Кинэ - В. А. Осиповез яке С. К. Смирноваез, А. Г. Красильниковез яке Н. К. Золотареваез, яке мукетсэ - одӥг Инмар гинэ тодэ. Съезд возьматоз, удмурт огазеяськон политикае вамыштоз-а, уз-а, солы выль кужым шедьтоз-а яке историлэн вунэтэм сэрегъсаз сьӧлтаськоз-а. Дыр вуиз бырйыны, ужпумъёс пуктыны но ужаны - удмурт кунлыклэн данэз понна. А. СТЕПАНОВ. Насьтокен Исьток но мукетъёсыз Драматурглэн кылдытэм дуннеысьтыз адямиос, сцена вылэ вуо ке, калык пӧлы но вамышто, солэн яратоно геройёсыз луо. Озьы шуыны луэ вал Егор Загребинлэн комедиысьтыз Насьток но Исьток сярысь. Соос но, Туганаен Шушы но, Эш-Тэрекен Алсу но, Дауровен Марина но, мукетъёсыз но Удмурт кун национальной театре лыктэм калык пӧлын "поръялозы" вуоно пуксёнэ. Учкисьёс доры соосты вуттозы тодмо артистъёсмы Вероника Садаева но Леонид Романов, Петр Романов но Раиса Нефедова, Геннадий Бекманов но Августа Лазарева, мукетъёсыз. Ӝытэз нуоз Фаина Будина. Тодады вайытӥськом: туэ пӧсьтолэзе драматургмылы Егор Загребинлы тырмиз 60 арес. Творчествоезлы сӥзем ӝытэ со ӧте 28-тӥ октябре 18 часлы. Т. НИКОЛАЕВА. Университетлы 3 ар Восточно-Европейской калык куспо университет 3 ар тырмонзэ пусйиз. Та вакчи дыр ӵоже государственной луисьтэм вуз аслэсьтыз ӧрзэ шедьтӥз ни кадь. Юн кусыпъёс тупатӥз со кун сьӧрысь университетъёсын. Татын тодон-валанъёссэс будэтыны мылкыд карись студентъёс трос. Университетысь куд-ог колледжъёслэн нырысетӥ выпусксы но вал. Праздник нуналаз университетэ трос куноос люкаськизы, пӧлазы вал Москваысь вуэмъёс но. Э. КУМАЧЕВА. Книга ӝажыяды Энциклопедия-эмъюм Кӧня ке ар талэсь азьло гинэ умой книгаез шедьтыны туж шуг вал. Нош али коньдонэд гинэ мед луоз. Синэз тужгес но мальдыто кунгож сьӧрысь писательёслэн произведениоссы. Котькудӥз мединститутэз чик йылпумъятэк но врач луыны быгатоз - сомында литература. Со валэктэ, кызьы эмъяно созэ яке тазэ висёнэз турын-куарен, массажен, горд сюен... Котькуд сэрегын вузало "Сьӧд магия" книга. Кинэ ке веднамед потӥз ке, кинлы ке урод каремед потӥз ке, кинлы ке синмаськид ке (сое аслыд карон понна) - басьты, пожалуйста. Ведӥн луыны чик но секыт вылымтэ. Нош мон тӥледлы дэмласал: эн дышетске веднаськыны, дышетске ческыт пӧраны, шуныт кофтаос керттыны, толалтэ кузь ӝытъёсы пиналъёстылы яркытэсь шудонъёс лэсьтыны. Нош дуноесь турецкой ковёръёс интые асьтэос быгатоды удмурт пужыен чебермамъёссэ но выжлёгетъёс куыны, асьтэлэсь культурадэс котыр ласянь будэтыны, удмурт йылолъёсын тодматскыны но соосты мургес тодыны. Анай луыны дасяськисьёсты но дышетоз та книга. Кин бен сыӵе бадӟым, узыр пуштросо уж поттэм меда? Со - Ираида Леонидовна Самсонова, Алнаш ёросысь Байтэрек школаысь ужъя урокъёсты нуись дышетӥсь. Пособизэ поттӥз Дышетӥсьёслэсь тодонлыксэс будэтонъя удмурт институт. "Ужъя дышетӥсь луыны мар секытэз кадь",- шуо таӵе ужез "веръямтэ" адямиос. Пиналъёстэ ульчае потты но азбарез ӵужыты, соосын ӵош сад-бакчаын ужа. Пластилин сёт но, эсьма, асьсэос, урок бырытозь, соин вырозы, выжыкылысь геройёссэс лэсьтыса. Нош мон пособиез кутӥ но пайми - ма, та удмурт энциклопедия ук! Ма, мон гинэ пайми меда? Финляндиысь Сара Хянникяйненлы но туж яраз та книга. Сара туж яратэ удмурт сиёнъёсты. Табере ачиз но тодоз ни, кызьы пӧрано виртырем, вандос шыд, табань, кукей табань, кӧмеч но мукетъёссэ (та пособиын удмурт калыклэн олокыӵе но сиён пӧран амалъёсыз вань). Тӥни озьы, книга Финляндие но вуиз ни. Нош тӥ тодӥськоды-а, кызьы узырмыны луоно? Уд ке, тододы, та пособиез ик лыдӟыса. Ираида Леонидовналы ужъя урокъёсты нуись дышетӥсьёс гинэ тау уз каре, дыр, малпасько. Книга поттэмын ӟуч кылын, соин шаермес тодонлы сӥзем урокъёсты нуисьёслы но туж кулэ со. Кыӵе шугъясько дышетӥсьёс та ласянь! Нош пиналъёсын валэктон уж нуисьёслы, классъёсын кивалтӥсьёслы, школаосысь музейёсын ужасьёслы, анай-атайёслы кузьым ӧвӧл шат та? Ваньмызлэн нимыныз туж бадӟым тау тӥледлы, Ираида Леонидовна. Вера БИКУЗИНА, Дышетӥсьёслэсь тодонлыксэс будэтонъя институтын ужась. БЕРЕКЕТ ТӤЛЕДЛЫ АМАЛООС Ӵашетэм уз кылӥськы Укноосты ураме учко. Отӥ машинаос мыно-ветло, ӵашетэм, мотор куараос корка пушкады юн шуккисько. Мар кароно, улон интыяды чалмытгес мед луоз шуыса? Куинетӥ укно син пуктоно? Нош со туж дуно усёз. Рамаос вискы вата тырон но уз юртты. Оскалтэ, пӧртэм зӧкталае укно синъёсты пуктыса.Ульча пала учкись рамае зӧкгес ке син пуктӥды, соку корка палась пияла векчигес мед луоз. Озьы кырысь лыктӥсь ӵашетэм куара кык пӧртэм зӧкталаё укно синъёс вискын зӥбломе, уггес кылӥськы ни. Замок сыномиз ке... Ӧс борды вандыса юнматэм замок (тунгон) сыномем, усьтыны-пытсаны уг луы. Одно ик-а сое интыысьтыз басьтыса сузяно? Кызьы сое выльысь ужатоно? Усьтонэз машина вӧен зыралэ но кӧня ке пол замокез усьтэ-ворсалэ - шӧдоды, кызьы со тӥлесьтыд "кылзӥськыны" кутскиз. Эшшо но ӟечгес мед ужалоз шуыса, огшоры карандаш сюлэмез (графитэз) туж векчи пыргытэм но, бумагалэсь векчи гумы лэсьтыса, огпал пумзэ замок пушкы донге, со пыр графитэз пельтэ: замок выль дыръяз кадь ужаны кутскоз. Тазьы ик "эмъяны" луоз сыномыны сюрем мукет замокъёсты но. Л. ВАСИЛЬЕВА. Сюресты мед удалтоз! Автотранспорт удысын но сюрес лэсьтонын ужасьёс, вань сюлмысьтымы ӟечкыласьком тӥледыз праздникеныды. Сюрес ке вань, улон но азинске. Сюресъёс - со вирсэръёс, кудъёсызъя пӧртэм нуон-ваён ужъёс ортчо, сюресъёс - со иворъёсты вӧлмытон но. Удысты туннэ секыт югдуре шедемын. Озьы ке но, мынӥсь-ветлӥсьёслэн лыдзы ялан будэ. Республикаысь сюрес лэсьтӥсьёс но бадӟымесь вормонъёсын пумитало праздниксэс. Тӥляд зарни киосыныды лэсьтэмын Воткинскез котыртӥсь сюрес, Можга - Вавож - Большая Пудга трасса. Нош тужгес но бадӟым кузьым - Казань - Малмыж - Пермь - Екатеринбург сюреслэн Удмуртиысь люкетэз усьтэмын. Ваньмыз со возьматэ, сюрес лэсьтӥсьёс кылем арынлэсь ӟечгес ужазы шуыса. Гажано эшъёс, сӥзиськом тӥлед юн тазалык, семьяостылы - тупан но ог-огдэ гажан мылкыд. Удмурт Республикаысь Правительство. Шӧкыч Шӧкыч сюлэмшугъяське Сюресъёс, сюресъёс... Туэ укмыс толэзь куспын Удмуртиысь сюресъёс вылын 1280 шудтэм учыр луиз, котькуд куинетӥез - Ижевскын. Пӧртэм шуккиськонъёсын 197 адями дырызлэсь вазь улонысь кошкиз, соос пӧлысь 20-ез - нылпиос, 1439 адями сӧсырмиз, таосыз пӧлысь 225-ез - пинал нылъёс но пиос. Та лыдпусъёс вӧзы ватсанъёс пыртӥз на дасэтӥез толэзь. Октябрьлэн кутсконаз сюресъёс вылын ӵемгес шудтэм учыре сюрылӥзы нылпиос. Сизьыметӥ октябре Можга городын ГАЗ-31029 машиналэн шофёрез Сюгинской ульчаетӥ мыныкуз, дас вить аресъем пияшез шуккиз. Соиз юн сӧсырмиз. Дасэтӥ октябре ӵукна пал Ижевскысь Первомайской ёросын "Пирожковая" остановка вӧзын ВАЗ- 21013 машиналэн руль бергатӥсез сюрес вылысь укмыс аресъем нылашез адӟыса ӧз вутты. Школаын дышетскись ныл али больницаын эмъяське. Со нуналэ ик Октябрьской ёросын Фруктовой ульчаын Иж-21251 машиналэн питранъёсыз улэ тямыс аресъем ныл шедиз. Али со больницаын йӧнатске. Нош тужгес но кышкытэз, кызьы тӥ тодӥськоды ни, дас витетӥ октябре вал. Та нуналэ Киясово - Сарапул тракт вылысь одӥгаз кожонын ГАЗ-5312 автобус сюрес урдсы пограз. Дас ньыль аресъем нылаш но дас куать аресъем пияш интыязы ик быризы. Эшшо 12-17 аресъем дас одӥг пинал секыт шуккиськиз. Шудтэм учырлэн мугез - юэм водитель. Укмыс толэзьскын Удмуртиысь сюресъёс вылын 269 шуккиськон учыръёс кудӟем водительёслэн янгышенызы сэрен луизы. Та лыдпусъёс вӧзы нокыӵе валэктон но кулэ ӧвӧл ни кадь. Ваньмыз валамон. Озьы ке но, азьланьын сюрес вылын шудтэм учыръёс кулэсмозы шуыса, оскон уг кылды. А. КРЕМОВ. Ышиз адями Шарканысь милиция утча Галкина Мария Дмитриевнаез, 1931 арын вордскем муртэ, 30 августэ со дорысьтыз кошкем. Ляб визьем. Вылаз векчи лыз но ӵуж сяськаосын зӧк кофтаос, сьӧд юбка но сьӧд колготки дӥсямын, пыдъёсаз сьӧд туфлиос кутчамын. Та адями сярысь тодӥсьёсты куриськом жингыртыны Шарканысь РОВД-е таӵе телефонъёсъя: 2-12-36, 55-74-67 яке милицилэн отделаз "01" телефонъя. Берекет Такмакъёс Тулыс италмас ӝужаку, Уӵы гурез кылзӥсько. Мылкыд пачыл ӧръяськыку, Выль чуръёсме гожтӥсько. *** Лек зор лыктӥз Буэ * сьӧрысь, Дугдоз на меда туннэ? Калык кусып тупан сярысь Ивортэ "Удмурт дунне". *** Тол но гужем мон выжисько Буэысь чильпам выжез. Нунал пӧрат весь возьмасько "Удмурт дунне" газетэз. *** Ошмесэз но утялтыны Кулэ вылэм асьмелы. Эн вунэтэ гожтӥськыны Эшлык "Удмурт дуннелы". --------------------------- * Буэ - шурлэн нимыз. Ш. МЕНШАРАПОВ. Пермь улос, Бадӟым Гондыр гурт. СПИД матэктэ 20 октябре Играын ортчиз СПИД-эн нюръяськонлы но та висёнэз алонлы сӥзем конференция. Кенеше ветлӥзы Игра, Кез, Дэбес, Красногорск ёросъёсысь эмъясьёс. 24 сентябре та ужпумлы сӥзем конференция Як.-Бодья ёросын но ортчиз. Таяз ужрадэ, ёрос больницаысь тазалыкез утисьёс сяна, пыриськизы гуртъёсысь фельдшеръёс, "Селычка" санаторийысь но Чурысь туберкулёзэн висисьёсты эмъянъя больницаысь врачъёс но кивалтӥсьёс. Вуоно арын та выллем ужрадъёс ортчозы Ижевскын но Можгаын. Али шаерамы ортче СПИД-лэсь быремъёсты буре ваён нуналлы сӥзем санбюллетеньёсъя конкурс. Удмуртиын ВИЧ-инфекцилы вӧлмыны луонлыкъёс вань. Кылсярысь, адямиос улон интызэс ӵем вошъяло, асьме доры мукет улосъёсысь лыкто, наркоманъёслэн, калгись нылкышноослэн но пиосмуртъёслэн лыдзы йылэ. ВИЧ-инфекциез нуллӥсь муртлэн улонэз 6-12 толэзь куспын кысэ, нош солэсь тазалыксэ чакласа возьыны луонлыкъёс вань ке, со сярысь ӵыжы-выжыосыз сюлмасько ке, соку 2-3 ар улэ на. Тодад возёно созэ но: СПИД-эн висись наркоман арскын 100 адямилы черзэ "кузьманы" быгатэ. Россиын дас ар куспын 5760 муртлы ВИЧ-инфекция паласькемын, соос пӧлысь 2986-ез - наркоманъёс, кудъёсыз "усыкмытӥсь вуэз" вирсэре лэзё. 1997 арын тямыс толэзь куспын шараямын 2719 висись адями. Соос пӧлысь 1796-ез - наркоманъёс-ВИЧ-инрфекциез нуллӥсьёс, 264-ез - СПИД- эн висё ини. 337 нылпилы ВИЧ-инфекция паласькемын. Ньыльдонэз вордӥськемын висись анайлэсь. Со сяна, пытсэт сьӧрын 1615 черлам адями пуке. СПИД радэн висёнлы (эпидемилы) пӧрмиз ини Калининградын - 1780, Краснодарын - 900, Тверьын - 350, Саратовын - 302 адями висе. Тюмень областьын, наркомания паськыт вӧлмемен, ВИЧ-инфекциез нуллӥсьёслэн лыдзы ӝог будэ. Кыӵе югдур бускель шаеръёсын? Екатеринбургын пусъемын 47 черлам адями, Татарстанын но Башкортостанын - быдэн 19, Пермь областьын - 15 адями, Киров котырын - 11 мурт. СПИД вуиз Удмуртилэн ӧс куспаз, ӧс сьӧрын кылӥське ини солэн шокамез. Кулон ваись черлэсь утиськыны асьмеос быгатом, котькудӥз аслаз тазалыкез сярысь ачиз сюлмаськиз ке. Г. ВОРОНИНА. СПИД-эз алонъя но соин нюръяськонъя центр. Тазалык Нуналлы быдэ асьмелы верало, жвачка умой эшмы шуыса. Котькудӥз та верамен соглаш уг луы. Озьы бере, ойдолэ умойгес учкоме, ма со Сыскон. Эш яке тушмон? Сысконын сахарез вань ке, со пиньёсты лябӟытэ. Озьы лыдъяло дуннеысь ваньмыз сямен пинь эмъясьёс. Соин но, дыр, табере сысконэз сахартэк лэсьтыны кутскизы. Шонергес вераса, сахар интые сое воштӥсь макеос ватсало. Таӵеосыз жвачкаос, стоматологъёслэн верамзыя, кариеслэсь но мукет пинь висёнъёслэсь утьыны быгато. Озьы ке но, сыскон котьку адямилэсь пиньзэ уг йӧнаты. Нош ым пушкады пломбаосты трос ке, тӥ сыскиськон сярысь воксё вунэтыны кулэ. Малы ке шуоно, жвачка пломба борды лякиське но, сое интыысьтыз вырӟытыны быгатэ. Соин ик сыскиськись адямилэн пинь кышъетъёсыз усьыны быгато. Жвачка тушмонлы медаз пӧрмы шуыса, кӧня ке визь-кенешъёс: - Ноку но сысконэз эн ньылэ. - Эн сыске жвачкаез мукет сиён-юонэн ӵош. - Сютэм дыръяды эн сыскиське. Угось со ик луоз трос висёнъёстылэн кутскемзы, тужгес сыӵе дыръя чаляк аля язва висён. - Уг яра огӵош сыскиськыны но тамак кыскыны. Малы ке шуоно, тамакысь канцерогенной веществоос жвачкае шедё но, дыльды пыр ӝуше вуо. Берекет МАТРОН АПАЙ ӴЕКТЭ Сырен ческыт пӧсьтурын Пӧсьтурынэз миськоно, пушсэ сузяно. Сырез векчи вуштон пыр поттоно, сурано нӧкы вӧен но векчи вуттэм чеснокен. Та суретэн тырмытоно пӧсьтурынлэсь пушсэ. Ӝӧк вылэ пуктоно котыресьлэсь вандылыса. 100 г сырлы мынэ 3-4 пӧсьтурын, 50 г нӧкы вӧй, 2 пилет чеснок. Киренен яблок Вакчиятэм кирень выжыез (луоз сӥль коран пыр поттыны) сурано векчи юдэм-корам банкаосы но вылтӥз пӧсь маринад кисьтоно. Банкаосты, 25-30 минут 90 градус пӧсь вуын возем бере, лач пытсано. 1 кг киреньлы кулэ луоз 2 кг яблок. Маринад дасяны 400 г вуэ мынэ 200 г сакыр песок, 100 г уксус, мылкыд каремдыя сылал. Та сиён усто ватсэт луэ сӥлен дасям блюдолы. Кӧс вӧен дасям петрушка Векчи вандылэм вож петрушкаез пичиесь банкаосы тыроно но чылкытатэм (рафинировать карем) кӧс вӧй ватсано. Тазьы петрушка 3-4 толэзь выль дыръяз кадь улэ. Салатэ усто ватсэт пӧрме. Тазьы ик дасяны луэ укропез но. КИНЪЁС, КИНЪЁС ЛЫКТӤЛЛЯМ? Кинъёс вуиллям шуоды 56 номеро школа-гимназиын дышетскисьёс доры. Чылк-чылк удмурт дэремъёсын дӥсяськем изгуртъёс но якшуръёс, соос бӧрсьы ик - американецъёс. Татын 10 нунал ӵоже мынӥзы Удмурт шаерлы нимысьтыз сӥзем нуналъёс. Историяя, этнографияя урокъёсын пиналъёс куноосынызы ӵош возьматозы пӧртэм йылолъёсты: корка пыронэз, ӧтчаськонэз, калык выжыкыл но пӧрмиз туж аспӧртэмлыко эшъяськон ӝытлы. Кӧня кырӟанъёс кырӟамын, кӧня эктонъёс эктэмын - таизэ веранэз ӧвӧл ни. Нылпиос вуылозы калык дӥськутэз возьматонъя театре но. Музейын ужасьёс пыр-поч веразы удмурт, бигер, ӟуч дэремъёс но пӧръяськон арбериос сярысь. Калыкмылэн такем узыр культураезлы синмаськизы зарезь сьӧрысь куноос но. Л. МЕДВЕДЕВА. Кун Думаын Кызьы ивортӥз Кун Думаын ужась депутатмы Андрей Солуянов, Президент Борис Ельцин та нуналъёсы пумиськылӥз Кун Думалэн тӧроеныз Геннадий Селезнёвен но депутатъёслэн фракциоссылэн кивалтӥсьёсынызы. Вераськон мынӥз Кун Дума но Правительство куспын кылдэм тупамтэсоты радъян сярысь. Со понна Президент куд-ог ужрадъёс ӵектӥз. Кылсярысь, парламентлэсь ужамзэ пыр-поч возьматон понна со ӵектэ телевизор пыр арняяз кык час ("Парламетарий час") передача но "Маяк" пыр арнялы быдэ нимысьтыз программа нуыны. Парламентлэн ужамез сярысь нимысьтыз газет поттыны. Со озьы ик куре выльысь эскерыны жилищно-коммунальной реформалэсь программазэ. Президентлэн малпамезъя, деноминация ортчыку, адямиослы берыктыны турттоно 1992 арысен ыштэм вкладъёссэс, соос понна коньдон воштонэз выль сямен радъяно. Та понна ик али нюръяське Думаысь депутатъёслэн "Российские регионы" огазеяськонзы (кивалтӥсез Олег Морозов). Депутатъёс ӵекто пенсионеръёслэсь вкладъёссэс ӝегатскытэк берыктыны. Т. БАННИКОВА. Вае серекъялом Кушем нимъёс акыльтӥзы Анаез - пиезлы: - Тон, экее, урокъёслы ӟечгес дасяськыны кулэ. Уг куриськы тонэ "витьёс" гинэ басьяны, но мон пумам вуи ини анай-атайёслэн кенешъёсазы пӧртэм кушем нимъёсын ветлыны. Бирдылы уксё жаль ӧвӧл - Ӟечоке, вуж пальтоысьтым ваньмыз бирдыосыз палдылӥзы. Возьыт соин ветлыны! - Эн сюлмаськы, мусоке, мон ӵуказе ик басьто. - Пальто-а?! - Бирдыос. Удмурт театр ӧсъёссэ усьтэ Дуно учкисьёсмы! Удмурт кун национальной театр туэ сӥзьыл сезонзэ беромыса ке но кутске, шумпоттыны малпа трос выленыз. Нырысь ик, ми доры Москваысь Щепкин нимо вылӥ театральной училищеын ньыль ар дышетскемзы бере вуизы 17 егит артистъёс: куать нылъёс но дас одӥг пиос. Соос сьӧразы ваизы "Свои люди - сочтемся", "Женихи" но "Мымрёнок" спектакльёссэс. Россиысь сӥё-дано артистка луиз Валентина Загуляева. Сое сӥлы карон ӝыт ортчытыны малпало вордскем Чумолё гуртаз (Алнаш ёрос). Нош 6-тӥ шуркынмонэ (ноябре) таӵе ӝыт луоз Удмурт театрамы. Валентина Александровна отын шудоз но, кырӟалоз но, возьматэмын луозы спектакльысь люкетъёс. Туэ азьланьтыны малпаськом кылем сезонэ быдэстэм ужъёсмес: 11-тӥ ноябре пуктомы "Юсьёс кошко ке..." мелодрамаез, 14-тӥ ноябре - "Кышноме кышно курасько" но 18-тӥ ноябре "Бызьыны вуэм песяйёс" комедиосыз. Кин ке ӧз адӟы М. Петровлэн поэмаезъя "Италмас" спектакльмес, лыктэ ми доры 26-тӥ ноябре. Вань постановкаосмы кутско 18 часэ. Озьы ик выль ужъёс борды но басьтӥським ни. Куд-ог гожъясьёс конкурсэ пыриськыса, дэмлало Гердлы сӥзем пьесаоссэс. Режиссёр Василий Ушаков дасяны ӧдъя П. Захаровлэсь "Гондыр сюан" комедизэ. Пиналъёслы чакламын кык ёзэн выжыкыл "Сказ о скоморохе и царе Горохе". Артистъёслэн мылкыдзы капчи. Йошкар-Олае театръёслэн фестивалязы ветлэмзы бере, соос туэ сезонэз усьтозы отын возьматэм уженызы - "Эш-Тэрек" трагедиен (авторез Е. Загребин). Та спектакле ӧтиськом тӥледыз 31-тӥ октябре, 5-тӥ но 20-тӥ ноябре. А. ЕВСЕЕВА, Удмурт кун национальной театрысь литературая люкетэн кивалтӥсь. Мугор борды выль йыр Сенсация: Франкенштейн улэп! Улонын солэн нимыз - профессор Роберт Уайт, Кливлендысь (Огайо штат) эмъянъя центрын ужась. Нейрохирургияя отделенилэн 71 аресъем кивалтӥсез ивортӥз, матысь дыре врачъёс йырез выль мугор борды вурыны дышозы шуыса. Пекляос, мус, сюлэм мурт мугорын ужало ини, озьыен, дыр вуиз адямилэн самой визьмо ёзэз борды басьтӥськыны. Профессор ивортӥз таӵе опытъёсты обезьянъёс вылын ортчытэмез сярысь. Огаз учыре мугорызлэсь люкем йыр мукетыз мугор борды "юнматэм" бере улӟиз. Америкаысь врач таӵе амалэн малпа сыӵе адямиосты утьыны, кудъёсызлэн "йыр кобызы" таза, нош мугорзы номырлы ярантэм. Авариосы шедем муртъёслэсь операциосызлы кулэ луись ёзъёсты шедьтом, пе. Америкаын, Германиын Уайтлэн малпанъёсызлы чутрак пумит луизы. Но профессор уг сётскы. Огаз интервьюын со оскытӥз, эскеронъёссэ йылаз-пумаз вуттоз шуыса. "США-ын опытъёс ортчытъяны ӧз лэзе ке, Украинае-а, кытчы ке-а кошкыса, малпанме быдэсто",- шуиз Уайт. "КП" Лыдӟись вера малпанъёссэ Лукашенко законъёсты ӧз тӥя Демократъёс калыклы ялан валэктыны выро, газетъёс но иворъёсты вӧлмытӥсь ёзъёс нокинэн басьтэмын ӧвӧл шуыса. Адямиос озьы ик малпало, телевизор, радио пыр чузъяськись иворъёслы оско. Но шонерзэ верано ке, тросэз верамъёс мыдланьтыса сётӥсько. Со сярысь, мон сямен, яркыт верало Беларусьлэн Президентэзлы пумит нуиськись ужрадъёс. Соин валче ик телевидение юн утьыны выриз ОРТ-лэсь журналистсэ Павел Шереметэз. Малы сокем утьыны кулэ вал Беларусьлэсь гражданинзэ? Александр Лукашенкоез сьӧдман понна. Мургес учконо ке, ваньмыз со политикаен герӟаськем провокациос. Туала демократъёс но Беларусьысь националистъёс-сепаратистъёс туж пумитъясько Россия но Беларусь республикаослэн огазеяськонзылы. Беларусьлэн Президентэз соос понна ньылоназы гуньдэм лы кадь луиз. Уго со нюръяське казнаез лушкасьёсын, кузьымъёс (взятка) сётъясьёсын, мафия шуонэн, уг лэзьы тус-тас карыны республиказылэсь узырлыксэ. Лукашенколэн кужымез кышкатэ Россиысь кивалтӥсьёсты но. Кык республикаос огазеяськизы ке, оло, сое адямиос Президентэ но бырйыны шедьтозы. Чырмыт, егит, солы 43 арес гинэ ай. Юн уте республикаезлэсь асэриксэ (суверенитетсэ). Тележурналистэн П. Шереметэн луэм учырез ке верано, Лукашенко нокыӵе законъёсты ӧз тӥя. Дуннеысь тросэз государствоос, чурытэсь законъёс кутыса, асьсэды кышкытлыклэсь утьыны выро. Басьтом США-ез ик. Кылем арын Кубаын ортчиз дуннеысь егитъёслэн фестивальзы. Со сӥземын вал империализмлы пумит нюръяськонлы. Отчы ветлӥзы США-ысь но 300 пала егитъёс. Но доразы бертэм бере, США-ысь кивалтӥсьёс коммунистъёслэн ужрадазы ветлэмъёсты штрафъёс улэ кыскизы, котькудӥзлы быдэн 50 сюрс доллар тупатӥзы. Куд-огез суд улэ но кыскемын вал. Тӥни озьы татысь кивалтӥсьёс утё страназылэсь данзэ но пумитъясько мукет идеологилы. Тазьы ке учконо, малы меда Беларусь ас законъёсызъя утьыны уг быгаты аслэсьтыз данзэ, ас эриксэ? Шеремет Беларусьлэн гражданинэз луыса тӥяз ук республикалэсь законъёссэ. Лукашенколэн политикаез уг кельшы Западысь кивалтӥсьёслы но. Уго со пумитъяське НАТО-лэн Восток пала паськытамезлы. США сярысь ке верано, со "сюлмаськыса" учке Беларусьлэн юн-юн пыд йылаз султэмез шоры. Азьвыл совето республикаос огазеяськизы ке, юнмалоз Россия но. Со ик кышкатэ Америкаез. Тӥни малы Александр Лукашенколы пумит ваче кариськыса нюръясько асьме демократъёс но, коньдонэн басьтэм журналистъёс но, Америкаысь, Западысь кивалтӥсьёс но. С. ВОРОНЦОВ. УДМУРТЪЁСЛЭН ӦТЧАМЗЫ АЗЬЫН Ӵектӥсько Кузьма Куликовез "Удмурт кенешлэн" кивалтӥсез мед быгатысал вылэм удмуртъёслэсь асваланзэс, данлыксэс ӝутыны. Со капчи уж ӧвӧл. Сыӵе бадӟым ужез вырӟытыны быгатоз ас кужымезлы, ас калыкезлы юн оскись адями гинэ. Ас данзы, карьеразы сярысь сюлмаськисьёсты "Удмурт кенешен" кивалтыны матэ но ӧвӧл лэзёно. Удмуртъёсыз ас сьӧраз нуоз вылӥ культураен, мур тодон-валанъёсын адями гинэ. Удмурт калык азьын сылӥсь ужпумъёс данак. Соосты быдэстыны Удмуртиын улӥсь мукет калыкъёстэк - ӟучъёстэк, бигеръёстэк уз луы. Озьы ик удмуртъёслэн тӧрозылы быгатыса но матысь кусыпъёс тупатыса ужано луоз вань кивалтон ёзъёсын. Удмурт кылэз быронлэсь утён, кадръёсты дасян но будэтон - удмурт калык азьын сылӥсь ужпумъёс пӧлысь тужгес но валтӥсьёсыз луо. Соосты улонэ одно ик пыӵатыны тыршоно. Мон мукет калыкъёслы пумит уг сылӥськы, Озьы ке но, лыдъясько: республикамы удмурт нимаське бере, куд-ог удысъёсын, кылсярысь, калыкез дышетонъя, культурая, тазалыкез утёнъя кивалтыны пуктоно визьмо, калыксылэсь сямъёссэ-йылолъёссэ тодӥсь удмуртъёсты. Но озьы луон понна, асьмелы но, удмуртъёслы, тыршоно, быръёнъёс дыръя куараосмес удмуртъёс понна сётыны. Али кылдытэмын "Удмуртия" огазеяськон. Мынам малпамея, ужась калыклэн кулэяськонъёсызлэсь со туж кыдёкын сылэ, дурбасьтэ кивалтӥсьёслы но Б. Ельцинлы. Но кызьы адӟиськом, туала Президентлэн политикаез быдэсак калыклы пумит нуиське. Соин ик "Удмурт кенешен" кивалтыны кулэ туала политикаез но югдурез валась мурт. Сыӵе адямиен мон адӟисько Кузьма Иванович Куликовез. Бен, солэн но вань тырмымтэосыз, уггес быгаты адямиосын ваче кыл шедьтыны. Но со юн сылэ удмуртъёслэсь интересъёссэс утён понна. С. ВОРОНЦОВ. Алнаш районысь Асан совхоз-техникум. Ӵуказе усьтӥськоз Ӵуказе, 29 октябре, "Удмуртнефть" ОАО-лэн юртаз конференция усьтӥськоз. Со сӥземын музъем валлин му вӧй поттонлы но вуж скважинаосты умойгес ужатонлы. Конференцие пыриськозы "Сиданко" АО-ысь нефть но газ поттӥсь специалистъёс, буровикъёс, куд-ог компаниос, Россиысь но кунгож сьӧрысь учёнойёс но мукетъёсыз. Н. КЛЕЙМЕНОВ. ЖУРНАЛИСТЪЁСЫН ПУМИСЬКОНЪЁС Поттом выль машина, шуиз Владимир Гродецкий Правительствоын "Ижмаш" ОАО-лэн валтӥсь кивалтӥсеныз Владимир ГРОДЕЦКИЕН пумиськонэ трос журналистъёс лыктӥзы. Юнме шорысь со ӧвӧл. Элькунамы "Ижмаш" - одӥгез бадӟым предприятие. Мукет ож тӥрлык дурись заводъёсын ӵош Ижысь машина лэсьтӥсьёс но мырдэм возисько. Нимаз ёзъёслы (заводъёслы) люкиськыса но, югдур каллен тупатске. Но Владимир Павлович азьланезлы осконэн улэ. Ож тӥрлык поттонэз вераса, берло дыре обороналэн куронъёсыз вуо. Туэ солэн заказъёсыз миым мында ик луозы. Со урод ӧвӧл. Озьы нимаз продукция потто уз кулэсмы. Музонгес суред мотоциклъёс поттон заводын. Туэ 4-5 сюрс бичаны чаклало. Ваньмыз сямен со кунгож сьӧры кошке. Азьланьын калыклы кредит амалэн вузалозы. Али заводын кабзэ выль мотоцикл бичамын ни. Со возьматэмын луоз 30-31 октябре "Ижмашлы" сӥзем праздникын. Мотоциклъёсмес басьто Египет, Сирия но Латинской Америкаысь странаос. Быдэс Россиын асьмеос гинэ мотоциклъёс поттӥськом на. Ковровын дугдӥзы, нош Миас мырдэм шока, 1-2 сюрс гинэ бича. Валтӥсь директорлэн ивортэмезъя, завод ӝоген мотоцикл поттонзэ 4 пол будэтоз. - Туэ 62 сюрс автомашина вузаны малпаськом вал,- шуиз Владимир Павлович.- Но ми двигательёстэк кылим. Соин ик одӥг куиньмос гинэ лэсьтом, дыр. Асьме заводмы гинэ автомобильной промышленностья министерствое уг пыры. Соин ик валтӥсь ёзъёссэ мукет интыосын бичало: Омскын - передачая коробкаос, Уфаын - моторъёс, механической заводын (Иж) - мостъёс. ВАЗ, ЗИЛ асьсэос бичало двигательёс но мукет ёзъёс. Соослы капчигес. Завод шуг-секытысь потыны пӧртэм амалъёс утча. Вераськизы ни 300 моторъёс басьтыны Тольяттиысь. Одӥг кыл шедьто ни "Фиат" фирмалэн Турциысь заводэныз. Солы 60 сюрс двигатель басьтыны заказ сётэмын. Кенешонъёс мыно кунгож сьӧрысь 4 фирмаосын-инвесторъёсын. Кызьы ивортылӥм ни, "Ижмаш" 2-4 толэзь вераськонъёс нуэ ни "Форд" фирмаен но Япониысь корпорациен. Кык проектъёслэн пумзы адӟиське ни. Автозаводын ӵош предприятие (СП) усьтӥськоз. Со герӟаськемын выль модель машина бичанэн, нош Япониысь ӟеч буёл вуоз 2000 арын гинэ. Ведь машинаез кышномуртэн ӵошато, со чебер буямын мед луоз. Шумпотымонэз тани мар. Завод Южнокорейской "Хундей" фирмаен огкыл гожтӥз ни. Али 12 мурт отын ужа. Со 5 сюрс автомобиль бичалоз. Дуныз но пичи ӧвӧл, 12 сюрс доллар. Озьы ке но, Владимир Павловичлэн верамезъя, 1800 поттымтэ машинаез басьтыны мылкыд карисьёс коньдон сётӥзы ни, вузамын, шуыны луоз. Нош 18 сюрссэ поттыны тупанкыл гожтымтэ на. Кызьы бен "Ижмаш" дасяське юбилеезлы? Урод уд шуы. Вуттэмын ни И. Ф. Белобородовлы памятник. Заводэн со 25 ар кивалтӥз. Автозаводын луоз ож тӥрлыкез возьматон. М. Т. Калашников выль книга гожтӥз. Сое учкон ортчоз. Ож тӥрлыклы сӥзем семинар, пӧртэм пумо мотоциклъёсын ворттылон но мукет ужрадъёс луозы. Собере Операя но балетъя кун театрын ортчоз сӥё-дано кенеш но бадӟым концерт. - Мар сётоз юбилей АО-лы? - Федеральной бюджетысь 100 миллиард коньдон висъяны учкемын. Со нырысь ик кутӥськоз уждун, нылпи пособиос тырыны но улон юртъёсты возьыны. - Россилэн кун премиезлы кандидатъёс сярысь вералэ вал. Кинъёс соос? - Стрелковой ож тӥрлыкез чеберъясьёс (дизайнеръёс). Быдэс группа. - Тыронъёсты кин вылэ куштэмын? - "Ижмаш" ОАО ваньзэ ас вылаз басьтӥз, нимаз предприятиослы ӧм люкылэ. Малы ке шуоно, со предприятиос пыд йылазы султӥзы, дивидендъёс басьтыны ӧдъязы ке, быдэс АО-лы умой луоз. Али акциосмылэн дунзы будэ ни, азьланьын 4 поллы ӝутскоз. Соос зэмос дуно бумага луозы. "Ижмаш" корпорацилы пӧрмоз, холдинглэсь со вылӥынгес. Тани "Лукойл" но корпорация луэ. - Стрелковой ож тӥрлыкез вузан кыӵе мынэ? - Каньылэн уд шуы. Та аспӧртэмлыко рынок. Отчы шедьыны капчи ӧвӧл. Но ми али уката ӟеч оружие поттыны кутскиськом. Сое Россиын но, кунгож сьӧрын но вузалом. Выль ож тӥрлык туж шонер ыбылэ, высокоточной оружие шуыса нимаське. Пыӵал тӥрлык поттӥсьёс огинтыязы уг сыло. - Огдыре вераськон потылӥз, "Ижмаш", пе, банкрот луэм. Шонер-а со? - Ӧвӧл, конечно. Аслам куриськемея (В. Гродецкий), Россиысь балансовой комиссиын огазеяськонэз учкизы. Кенешон мынӥз, штрафъёс но пени тыронтэм вылысь. Али АО-лэн 1 триллион манет тыронъёсыз. Со пӧлысь 88 процентэз улон коркаос, соцкультбытэз возем понна. Та ке ӧй луысал, милям 1 триллион манет пайдамы луысал. Нош акциосмы сярысь ке верано, 75 процентэз государство киын. - Малы Башкортостан асьмелы двигательёссэ уг вуза, со удмурт му вӧез кыске ук ("Башнефть")? - Шонер юан. Кӧня манетлы со Удмуртиысь нефть поттэ, сомындалы ик моторъёс сётыны кулэ вал. Но со сярысь куспазы кык правительствоос кенешыны кулэ (Удмуртия но Башкортостан). Г. РОМАНОВ. Кун Кенешлэн сессияз Одӥгзэ куто, мукетсэ палэнто, уд вала та депутатъёсты Кун Кенешлэн дас куинетӥ сессиез кема кыстӥськиз. Оло, зэмзэ но 13 лыдпус сыӵе. Куинь пол люкаськылыса но, ваньзэ ужпумъёсты йылаз-пумаз вуттыны ӧз быгатэ. Озьы ке но, 22 октябре сессия пытсаськиз, нош вылез, 14-тӥ сессия усьтӥськоз 25 ноябре. Берло нуналаз уно ужпумъёс учкемын, данакез законопроектъёс кутэмын. Шаерысьтымы городъёсысь но районъёсысь кӧня ке судъёслы судьяос быръем бере, депутатъёс рос- прос учкизы "Евразия" банклы бюджетной ссуда сётонэз. Кызьы тодӥськоды, со луэ Удмурт Правительстволэн уполномоченной банкез. Банклы 50 миллиард кредит висъян инмысь ӧз усьы. Сое висъяз Россиысь Коньдон ужпумъёсъя министерство, Б. Ельцинэн но В. Черномырдинэн кенешыса. Та ужпумъя нимысьтыз документъёс кутэмын. Со сярысь парламентлы ивортӥз Правительстволэн Тӧроез Павел Вершинин. Озьы ке но, та ужпумез эскерон туж ӟырдыт кутскиз. Одӥгъёсыз депутатъёс омырскизы (Сергей Протозанов, Николай Нагорных, Сергей Бобогло) малы, пе, та банклы сыӵе юрттэт сётӥське, мукетъёсыз ватсазы, банклэн кӧня тыронъёсыз, мар со сётоз но музон. Пусйыны кулэ, та ужпум азьло учкемын вал Кун Кенешлэн Президиумаз но ссуда сётон умоен лыдъямын. Соку амалтэк юан кылдӥз, малы, пе, "Ижладабанклы" асьмеос ум юрттӥське, отын секыт югдур кылдэмын. Правительство банкъёслэсь ужамзэс син азяз возе, но ваньмызлы огдыре ссуда сётыны уг быгаты. Россия ласянь та нырысез ужрад, коммерческой банклы проценттэк сомында уксё висъямын. Но со вакчи дырлы сётэмын, вуоно арын 1 январёзь ваньзэ берыктоно. Сыӵе условие тупатэмын, мукет сямен, куинь толэзь ӵоже выльысь Москвае вуттоно. Зэм, банк-агентлы таӵе юрттэт туж кулэ. Республикаямы со одӥгез бадӟым банк. Выль арозь банкын югдур тупатскоз. Национальной банклэн кивалтӥсезлэн Равиль Каримовлэн верамезъя, мукетъёсызлы но юрттоно. Отчы пыре "Ижладабанк" но. Нош одӥгез депутат Кун Кенешлы но Правительстволы банкъёсын ужанъя нимаз программа кутыны ӵектӥз. Та ужпумъя тросэз депутатъёс мылкыдзэс веразы но одӥг кылэ вуизы, ссуда сётонэз умоен лыдъяса, сое кызьы, кытчы кутэмез чаклано но со сярысь сессиын ивортоно выль арын нырысетӥ кварталэ. Нош Александр Волков ватсаз: - Банкъёслы но та вакытэ капчи уг йӧты. Соослы юрттэт кулэ. Ведь котькуд банклэн вань аслаз вкладчикъёсыз, соос азьын кыл кутэ. "Ижладабанк" но вкладчикъёссэ пӧяны кулэ ӧвӧл. Адями банклы оскиз, коньдонзэ сётӥз ук. Табере солы уксёзэ берыктоно процентъёсын будэтыса. Та ужпумъя постановление кутэмын. Со понна 52 депутат куаразэ сётӥз. Парламент та нуналэ озьы ик йылаз-пумаз вуттӥз "Удмурт Республикаын егитъёсын ужанъя кун политика сярысь", "Агропромышленной производствоын кун радлыкез тупатон сярысь" Законъёсты но мукетсэ. Отчы уно ватсанъёс но воштонъёс пыртэмын. Нош "Удмуртиысь коммунистъёс" фракцилэн депутат куронъёсызъя, юнматэмын Кун Кенешлэн постановлениосыз. Кылсярысь, "Удмурт Телекомъя" Правительстволы косэмын ИВ кварталэ электросвязья услугаослы тарифъёсты учкыны но пичиятыны. Вераськон мынэ телефон пуктонлы но сое возёнлы дунъёсты кулэстон сярысь. Кыкетӥез курон герӟаськемын вал элькунысь рынокъёслэсь ужзэс умоятонэн. Тая но решение кутэмын. Нош "Праворядок" бюджетэ пырисьтэм фонд кылдытонэз депутатъёс палэнтӥзы. Тӥни озьы одӥгзэ юнмато, мукетсэ умойтэмен лыдъяло. Калыкен быръем та адямиосты соку ик уд вала: кин кытчы кыске, мар дауртэ. Нош огъя верано ке, асьсэос тодо ни, кин пала дурбасьтыны, кинэ выйытыны. Сыӵе со парламентарийёслэн, закон вордӥсьёслэн ужзы. Тани Экономикая но бюджетъя комиссилэн тӧроез Олег Кузьменко ужысь мозмытыны курыса, бумага (заявление) гожтэм. Одӥгъёсыз лэзёно, шуизы, нош мукетъёсыз - мед, пе, ужалоз на, уката ик вуоно арлы бюджет дасян бордын. Солэн пӧрме, сессиосын мылысь-кыдысь ужа, ымаз ву ӟузьыса уг пукы. Со ужаз кельтэмын. Сессия музон ужпумъёсты но эскериз. Одӥгез вал прокурорлэн протестэзъя интыын ас коже кивалтонэн герӟаськемын, мукетыз - Глазовысь "Удмуртская" тылобурдо фабрикаез выльдонэн. "Глазовысь тылобурдо" огазеяськонэ пыриз на татысь ик комбикорм поттон завод. "Удмурт Республикалэн туэлы бюджетэз сярысь" Законэ воштонъёс но ватсанъёс пыртэмын. Озьы Правительстволы ватсаса полномочиос сётэмын нимаз лэсьтӥськонэз паськытатонъя, Алнашын но Балезиноын спирт поттон заводъёслы юрттэт сётонъя но куд-ог мукет ужпумъёсъя. Кун Кенешлэн дас куинетӥ сессиез таин ужзэ йылпумъяз. Г. РОМАНОВ. Лыдӟись гожтэ Сазь йырын Вордӥськем палъёсаз куатьтон арессэ пусйиз тодмо писатель, драматург, артист но "Инвожо" журналлэн валтӥсь редакторез Егор Егорович Загребин. Ӝытаз мыныны дасяськыкум, таӵе малпанэ кылдӥз: Мукши клубын гинэ данъязы ке, юртын лёгиськон интыез но уз луы. Машинае пуксьыса, сьӧрло потӥм. Анайлэн но Егор Егоровичез адӟемез туж потэ вал (гужем Загребин вуылӥз гуртамы: егитъёсын ӵош маскаръяськыса, серекъяса улӥз). Нош писательлы куатьтон арес тырме ини шуыса кылэмез бере паймиз: сыӵе арлыдо пиосмурт но кыӵе серекъятыны быгатэ! Мукши культура юртэ вуыса, пуксён инты кема утчано ӧз луы. Мон чылкак пайми: гурт пичи ӧвӧл ке но, татын буш. Лыктӥллям Егор Егоровичлэн эшъёсыз но тодмоосыз. Ӝытэз валтӥсьёс трос сюлмаськиллям. Бадӟым кунозэс пумитазы сукыриен, сылалэн. Возьматӥзы видеоплёнка вылысь учыръёсты. Отын Егор Егоровичлэн эшъёсыз верало огъёззылэн пичи дырыз, быдэ вуэм аръёсыз сярысь. Тодазы ваё улонысьтыз тужгес вунонтэм учыръёссэ. Егор Егорович куное огназ лыктымтэ. Сьӧраз ваем тодмо кизилиосты - Геннадий Ганьковез, Геннадий Бекмановез, Анатолий Григорьевез, Анна Плотниковаез но Ольга Зоринаез. Ох, шулдыртӥзы соос! Ваньмыз умой вал. Ӝыт кема кыстӥськиз. Гуртэ уйшор бере вуим. Одӥгез гинэ сюлэмез шуг каре: егитъёс та пумиськонын туж ӧжыт вал. Тунсыко ӧвӧл шат соослы писательлэн улэм сюресэз? Ӧвӧл ни шат ми палъёсын удмурт литератураез, культураез яратӥсьёс? Али туж ичи бадӟым арлыдэ вуэм тодмо адямиос. Музъем соосты малы ке но басьтэ кужмо вакытазы ик. Озьы кошкиз дорысьтымы куамын куать аресъем Михаил Федотов. Солэсь ӧжыт гинэ азьло - Владимир Романов. Кӧня йылпумъямтэ ужъёссы кылизы! Кӧня малпанзэс ноку но ум тодэ ни! Мон али валаны кутски кадь: малы ми палан, Алнаш но Пурга ёросъёсын сярысь, ӧжыт сыӵе адямиос. Татысь калык ӧз дышы на ог-огзэ гажаны, соизлэсь яке таизлэсь ужзэ дунъяны. Пумиськон дыръя таӵе учыр вал. Ӝытлэн пумаз, артистъёс сцена вылэ потэм бере, залэ пыризы егит пиос но нылаш: Анна Плотниковалэсь кырӟамзэ кылыса, шӧдске, матэктӥллям. Пиос шӧмаськемын. Соос пӧлысь огез интыяз сылыны ӧз чида. Таманлы гинэ потаз но кырым тыраз сяськаен пыриз. Анна кырӟанзэ йылпумъям бере, сяськаоссэ солы кузьмаз. Шӧмыз ӧй луысал ке, казакпи со сярысь ӧй ик малпаськысал, дыр. Ойдолэ, егитъёс, сазь йырын но гажалом котырысьтымы визьмо калыкмес, вылӥ дунъяны дышетском солэсь ужъёссэ. Надежда Козырь. Якшур-Бодья ёрос. Синвуос огкадесь - курытэсь! 1956 арын октябре Венгриын ортчиз калык восстание - озьы табере шуыны луэ мадьяръёслэсь со вакытэ социализмлэсь куштӥськыны но сталинизм шуонлэсь мозмытскыны турттонзэс. Малы бен татын сыӵе югдур кылдӥз? Венгер коммунистъёслэн кивалтӥсьсы Матьяш Ракоши ваньзэ лэсьтылӥз, Сталинлэсь адӟем карыса. Со сямен ик нюръяськиз "калык тушмонъёсын". Странаысь котькуд укмысэтӥез адями янгыше уськытэмын вал. Калыклэн яратоно пиез, тодмо коммунист Янош Кадар но кема аръёслы пытсэт сьӧры шедиз. Кыӵе ке тылгизьы гинэ кулэ вал, сыӵе политикалы пумит ӝутскон понна. Калыклэн мылкыдыз пуштӥз Сталинлэн кулэмез бере. Венгер коммунистъёслэн партиязы шара нюръяськон кутскиз. Имре Надь - реформистъёслэн кичӧлтӥсьсы - КГБ-лэсь вань ёзъёссэ улонысь палэнтӥз. Отысь ужасьёсты судтэк мар быдтылыны кутскизы. 23 октябре котыртэмын вал партилэн Будапештысь горкомезлэн юртэз, сое утьыны вырисьёсты жалятэк ыбылӥзы. Имре Надьлэн сьӧраз ортчем политикаез калыклы ӧз кельшы, солэсь палэнскизы азьвыл эшъёсыз но. СССР-лэн кивалтӥсез Никита Хрущев советской войскоосты Венгрие пыртон сярысь ужпум ӝутэ. Солы дурбасьто Восточной Европаысь странаослэн лидеръёссы но. Социализмез утён вир кисьтонтэк ӧз ортчы - табере мукет страналэн ужъёсаз пыриськизы СССР-ысь спецслужбаос. Власть сётэмын вал Янош Кадарлы, Имре Надь казнить каремын, Сталинлэн эшез Матьяш Ракоши берпуметӥ нуналозяз СССР-ын улӥз. Тӥни сыӵе югдур вал Венгриын 1956-тӥ арын. Та ожмаськонэ пыриськоно луизы асьме землякъёсмы но. Удмурт шаерамы соос али 300 пала лыдъясько. Венгриын ожъёс сярысь тодазы ваё Евгений Васильевич Межуев но Семен Андреевич Ильин. Армиын служить карыкузы, кыкназы ик взводъёсысь командиръёссылэн юрттӥсьёссы вал. Нош доразы бертэмзы бере ужазы Ижысь заводъёсын. Евгений Васильевич - механической заводын валтӥсь механик луыса, Семен Андреевич - мотозаводын инженер-конструктор вал. Евгений Межуев: - Венгриын мынӥсь ожъёсы нырысь ик пыриськиз Советской Армилэн нимысьтыз кылдытэм 18 номеро корпусэз. 24 октябре Будапештэ пыртэмын на вал эшшо кык дивизия. Нырысь часъёсы ик данак солдатъёс быризы. Арня ортчыса, Имре Надьлэн правительствоез советской войскоосты берлань чигнаны куриз. Солэсь ке кылзӥськысалзы, вир кисьтонэз дугдытыны луысал на. Но озьы ӧз луы. Европа шорын ӝуась тылпуэз кысон понна, СССР-лэн кивалтӥсьёсыз татчы эшшо кык армия келязы на. "Мятежникъёслы" пумит огъя штурм уин 4 ноябре кутскиз И. С. Конев маршаллэн приказэзъя. 7 ноябре ужаны ӧдъяз Янош Кадарлэн выль правительствоез. Калык восстаниез дугдытэм бере но "тырмымтэосын" нюръяськон, порядокез юнматон кема кыстӥськиз на ай. Ялан ивортылӥзы военно- полевой судъёслэн ужамзы сярысь... Семен Ильин: - Армие басьтэмзы бере службаме нуисько вал Западной Украинаын, зенитно-артеллерийской полкын. 1956 арын октябрьлэн пумаз шӧдтэк шорысь боевой тревога ӝутӥзы. Тӥни соку нырысьсэ каскаос, ожмаськон пыӵалъёс сётӥзы. Номыр сыӵе-таӵе валэктытэк, Венгрия пала нуизы. Границаез потэммылэсь азьло, замполитмы нодъяз: тӥ шоры мадьяръёс мыжыкъёссэс ке возьматъязы - мыняса учке, сялазы, изэн зӥръязы ке - палэнтӥське. Зэмзэ ик, гуртъёстӥ ортчыкумы, мыжыкъёссэс возьматъязы. Ноябрь - декабрь - январь толэзьёсы улӥм бусыын, палаткаосын. Та дыре куазь татын зоро-кото улэ, уйёсы туж кезьыт кариське. Ӵукнаосы кынмылэменымы пиньёсмы ваче йыгасько вал. Полкмы ожмаськыны ӧз вуы. Но малы милемыз татчы ваизы - ӧз валэктэ. Американской агрессоръёс вылэ чӧлскылӥзы. Бен, табере гинэ мон валасько, малы мадьяръёс милемыз "оккупантъёс" шуыса, ас странаысьтызы кужмысь поттыны выризы, малы советской офицеръёслэн семьяоссы татысь уллямын вал, малы мадьяр офицеръёс асьсэ формазылэсь, кизили бырттэм пилотказылэсь куштӥськыны тыршизы. Полкмы пыриськиз мадьяр армилэсь пыӵал тӥрлыксэ таланэ. Али но тодам ваисько, кызьы солдатъёслэсь валес улысьтызы ватэм ож тӥрлыкъёссэс поттылӥм. Бӧрысьгес соослэн казармаосазы милемыз пыртӥзы. Син азям пуксё на таӵе суредъёс. Гужем асьме солдатмы мадьяр нылашлэсь велосипедзэ лушкам. Йыртэмасез кутон понна, милемыз засадае пуктӥзы. Венгриын нырысьсэ адӟи пиослэсь беретэн ветлэмзэс. Армиысь пегӟон учыръёс соку но вал. Милям но одӥг солдатмы пегӟиз, бӧрысь сое кутӥзы, судить каризы. Озьы ик Венгриын нырысьсэ адӟи нылъёслэсь "вашкала ужен" выремзэс. Асьсэ мугорзэс вузаса, соослы коть сиён, майтал сюрылӥз, малы ке шуоно, Венгриын соку туж начар уло вал. Евгений Межуев: - Али котькызьы мед дунъялозы Венгриын со вакыт ортчем югдурез, но бырем солдатъёсты уд ни берыкты. СССР-ын, Венгриын улӥсьёс понна со кайгуэн-куректонэн берытскиз. Котькыӵе выжыысь потэмын медло адями, синвуос огкадесь - курытэсь. Политикъёс ке сьӧраз ортчо, котьмар луыны быгатэ. Венгриын ортчем ожъёсы пыриськемъёс бадӟым тау каремзэс верало "Книга памятилэсь" 8-тӥ томзэ дасясьёслы, Венгриын быремъёсты буре вайыса пыртэмзы понна. Т. БАННИКОВА. Туспуктэмез Г. ЮСАЕВЛЭН. Гожтӥськиды-а ни "Удмурт дуннелы"? Кызьыгес мынэ газетъёслы, журналъёслы гожтӥськон шуыса юамелы, Фания Аскадуллиновна Николаева мылысь-кыдысь валэктыны тыршиз. - Капчи шуыны уз луы,- шуиз Башкортостанысь Татышлы ёросысь Выльгурт почталэн кивалтӥсез,- секыт но уд шуы, дыр. Али угось гурт калыклэн коньдонэз ӧвӧл. Ярам ай, колхоз юрттэ: удмурт изданиослы вуоно уждун чотын гожтӥськыны луэ. Котьма шу но, лыдӟиськись адямиос, яратоно газетсылы, журналзылы гожтӥськыны коньдон шедьтоз ик. Шонер, дыр, вера Фания апай - утчась мурт шедьтэ. Тани Выльгурт школаысь удмурт кылъя дышетӥсь Фидалия Рахимова вуоно арлы трос изданиослы гожтӥськем. Соос пӧлын "Удмурт дунне", "Инвожо", "Кенеш", "Кизили", "Вордскем кыл" но "Ӟечбур". "Удмурт дуннелэн" ӝыны арлы гожтӥськон дуныз татын 48 сюрс манет. Сое туж ик дуно шуыны уг луы. Ӵошатон понна: республиканской газетъёслэн ӝыны арлы гожтӥськон дунзы 45 сюрс манет котырын берга. Нош ёросазы удмурт кылын потӥсь "Азьлань" газетсэс татышлыос 36 сюрс тырыса, быдэс ар лыдӟыны быгатозы. Малпаськом, Кам сьӧрын вуоно арын "Удмурт дуннелэн" эшъёсыз тросгес луозы. Нош тӥ гожтӥськиды-а ни газетмылы? Ф. МИННИГАРАЕВ. * Выльгурт почталэн кивалтӥсез Фания Николаева. Туспуктэмез В. КАМАШЕВЛЭН. Иза Васильевна Мамеева ужа Селта районысь Копки шор ёзо школаын, бадӟым классъёсысь нылпиосты дышетэ кыллы но литературалы. Ӟырдыт мылкыдо нылкышно быръемын вал "Удмурт кенеш" огазеяськонлэн Селта ёзэзлэн конференцияз делегатэ. Суредэз Леонид ПРОЗОРОВЛЭН. Вазиське - юрттозы Ижевскын, профсоюзъёслэн элькун федерацизылэн юртаз интыяськемын Ужъя кун инспекция. Та учреждение егит на ай, шуыны луоз: кылдытэмын 1995 арын. Азьвыл солэсь ужъёссэ быдэсъязы профсоюзъёс, нош соос лябӟемен, ужась калык понна дурбасьтыны нокинлы луиз. Инспекцилэн одӥгез ёзэз - гурт калыклэсь но нюлэс удысын ужасьёслэсь правооссэс чаклан-утён. Кивалтэ соин Николай Леонидович Миловидов, валтӥсь кун инспектор. Кыӵе ужпумъёсын выре солэн отделэз? - Жаляса верано луэ, тросэз удямиос, ужан интыязы шуге-леке вуо ке, кытчы вазиськыны уг валало. Ӵем дыръя асьсэлэсь правооссэс но уг тодо. Шуом, адямиез юнме шорысь ужысьтыз уллязы яке нокыӵе мугтэк но уже уг куто. Яке уж дурын сӧсырмем муртлы юрттэт уг сёто. Таӵе выллем югдур ӵем гинэ кылдылэ. Ӵапак сыӵе дыръя ми юрттыны кулэ. - Кыӵе амалъёсын? - Котькудӥз инспектор толэзяз 3-4 пол районъёсы, возёсъёсы пота. Тупатэм графикъя но нимаз ӝожтӥськонъёсъя. Озьы шараяськом ужась адямиослэсь правозэ тӥян учыръёсты. Огпалаз ортчем кивалтӥсез визьман понна ӵем дыръя огшоры алэм но тырме. Мар бен, ӟечен уг ке вала, штраф но сётӥськом. Быгатӥськомы самой пичи уждунлэсь 100 пол будэтэм коньдон лыдпусэн кисызэ "кизертыны". Таиз но ужрад уг ке юртты, ваменъяськись кивалтӥсез судэ кыскиськом. Ми ик, инспекторъёс, солэсь азьвыл ваньзэ кулэ луись документъёсты дасяськом, тыриськонъёслэсь быдӟалазэ лыдъяськом. Судын ми ик дурбасьтӥсьёс но луиськом. Та уж понна ми одӥг манет но ум басьтӥське. - Кыӵегес ӝожтӥськонъёсын тӥледлы выроно луэ? - Тужгес но ӵем сэрттоно-пертчоно луэ ужысь нокыӵе мугтэк уллям адямиен герӟаськем учыръёсты. Тани туэ эскеримы Кияса ёросысь "Яжбахтинское" эштосын кылдэм югдурез. Пудо утись, шутэтскон нуналъёсы ужаса, куриськон гожтытэк, меӵак кивалтӥсезлы гинэ верам: матысь нуналъёсы, пе, уже уг поты. Тазьы азьвыл но лэсьтылӥллям. Нош эштослэн кивалтӥсьёсыз, пудо утисьлы мар ке понна йыркуръяськыса, сое улляло: ужаз, пе, ӧз пота. Мар бен, ми юрттӥмы. Адямиез азьвыл интыяз но кутӥзы, амалтэк кельтэм уждунзэ но тыризы. Яке мукетыз учыр. Якшур-Бодья районысь Фрунзе нимо эштосысь комбайнёр М. И. Максимов уж дураз сӧсырмыны шедем. Законъя солы юрттэт сётыны кулэ эштос. Нош солэн тӧроез пумитъяське, одӥг манет но уг тыры. Вазиськимы ёросысь судэ. Пайдаез ӧйлась. Вылӥ суд но эштосэз косӥз юрттэт сётыны. Озьы но югдур уг воштӥськы. Эштослэн М. Максимовлы тыриськонэз та дырозь 17 миллион манетозь вуиз ини. Соин ик ми элькунысь прокуратурае вазиськоно луим. Оскисько, закон одно ик вормоз шуыса. Кулэ луиз ке, прокуратура эштослэсь ваньбурзэ но таланы быгатоз. - Малы бен ужась адямиез сокем вӧсь карон учыръёс луыло? - Азьвыл аръёсы соосын шергес ик пумиськылӥськод вал. Котькуд ёросын угось пӧртэм эскерись- чаклась органъёс ужазы. Соос быремен, куд-огез кивалтӥсьёс воксё азгынмизы, асьсэды бадӟым инмар выллем возьыны ӧдъязы. Ужась адями аслаз правоосыз понна нюръяськыны кутске ке, солы ӧс шоры возьмато: уг ке яра, али ик кошкы, интыяд, пе, ӵуказе ик коть дас адями шедьтом. Зэм, шедьтозы но, ужлы сокем ёрмон вакытэ. Озьы адямиез ӝож мылкыдын кельто. Пусъеме потэ мукетсэ но. Асьме калык туж ляб тодэ законъёсты, аслэсьтыз правооссэ. Тани Вавож районысь одӥгез колхозник ужын сӧсырмемез бере 1957 (!) арысен пособие басьтыны кулэ вал. Но ачиз со сярысь тодытэк улэм. Али гинэ та учыр шараяськиз. Ми юрттӥмы воргоронлы. Но законъя со берло куинь ар понна гинэ юрттэт басьтыны быгатэ. Ярам ини соиз но, 9 миллион но сюрес вылын уг лошъяськы угось. Нош кӧнязэ ыштӥз адями ортчем дыр ӵоже? Огъя учконо ке, огшоры ужасьёс гинэ ӧвӧл, уноез кивалтӥсьёс но тыро-пыдо уг тодо законъёсты. Отысь ик пото законэз тӥян учыръёс. Соин ик, ми ёросъёсы потакумы, котькуд учырез шара эскериськом, паськыт валэктон уж нуиськом. Со сяна, тросэз уг тодо на милесьтым инспекцимес. Соин ик ваньмызлы вазиськисько: шуге-леке шедиды ке, лыктэ яке гожтэ ми доры. Быгатэммыя одно ик юрттом. Вераськиз Г. ТИХОНОВ. Иж пыӵал тӥрлыклы - 190 ар Калашниковлэн автоматэзлы - 50 ар ТУННЭ-ТОЛОН-ӴУКАЗЕ "Ижмаш" акциосын огазеяськон та нуналъёсы Ижын пыӵал тӥрлык поттонлы 190 ар, Калашниковлэн автоматэзлы 50 ар тырмонэз пусйыны дасяське. Республикаысьтымы одӥгез вашкала преприятие кузь но яркыт сюресэз ортчиз ни. Табере со, ӟеч пыӵал тӥрлык поттэменыз сяна, быдэс дуннеын тодмо луиз аслаз автомобильёсыныз, мотоциклъёсыныз но. Туннэ "Ижмаш" акциосын огазеяськон туала бадӟым предприятилы пӧрмиз. Солэн бордаз кылдэм заводъёсыз тросэз ас кожазы ужало. Ижмаш ужа Южной Кореяен ӵош "Ижмаш" акциосын огазеяськон но Южной Коряе кузпазы "Хюндай акцент" автомобильёсты ӵошен поттон сярысь контракт гожтӥзы. Автомбильёсты бичалозы "Ижмашын", дась вуззэс вузано луозы асьсэос ик. Барышез кык компаниослы но шӧдӥськыны кулэ. Но гожтэм контракт "Ижмашлы" мукет пайда но сётоз. Со татысь ужасьёсты выль, туала автомобиль бичанэн тодматоз, собере паськыт рыноке но поттоз. Автомбильёс улонэ ӝог "пыӵазы" ке, азьланяз "Ижмашен" ӵош ужаны мылкыд карисьёслэн лыдзы йылыны кулэ. Выль "Чопперъёс" потозы Ӝоген мотозаводын чылкак выль тусбуен "Чоппер" мотоциклъёс поттыны кутскозы. Вужъёсыныз ӵошатыса, таизлэн рульёсыз ӝужытэсь, пуксёнэз кык ӝуждала, бензин тырон бакез ву шапык выллем. Нырысетӥ мотоциклъёс бичамын ни, али соос "эскерисько" на. Вань оскон, выль "Чопперъёс" Ижевсклэсь данзэ эшшо вылэ ӝутозы. Котькытын рынок кузёяське Ижысь пыӵал тӥрлык поттон завод вылын юн шӧдӥське рыноклэн кузёяськемез. Кылсярысь, татысь пыӵалъёслы патронъёс тырон "магазинъёс" лэсьтонъя 106 номеро цех ялан чакласьконо луэ: ма кулэгес туннэ нуналэ. Алигес Японилы кык патрон тэрымон "магазинъёс" лэсьтӥз. Табере цех азьланяз пайда сётыны быгатӥсь корт поттыны дышетскон бордын ужа. Рыноке выжем шӧдӥське ужасьёслэн мылкыдзы вылын но. Азьвыл котькудӥз ас понназ ужаз ке, табере поттэм вуз понна быдэс бригада кыл кутэ. Котькуд ужась ас интыез понна сюлмаськоно луэ, уго выльзэ шедьтылыны шуг. Таин валче уже потытэк кылемъёслы лыдзы быриз. Усьтӥзы школа Ижысь пыӵал тӥрлык поттон заводын туэ усьтэмын оружейникъёсты дасянъя школа. Егитъёс, 3 ар но 2 толэзьысен 4 арозь дышетскыса, отысь гравёр-оружейник яке пыӵал-тӥрлык бичанъя мастер луыса потозы. Муромытыса дышетозы соос англи но немец кылъёсты, информатикаез. Выль усьтӥськем школа юн кусыпъёс тупатӥз Удмурт кун университетысь инскусствоосъя но дезайнъя факультетэн. Со сяна, дышетскисьёс тодон- валанъёссэс бутэтыны быгатозы кунгож сьӧрысь та выллем школаосын но. Пусйыны кулэ, та выллем дышетскон заведениос быдэс Россиын ӧй вал на. Ижысь механической завод бордын кылдытэм школа, тодон-валан сётыны быгатонлыкъёсызъя туж матын луэ профессионально-технической училищелы. Кин тодэ, азьланяз, оло, со зэмос училищелы пӧрмоз. Михаил Калашников машина бичасал Михаил Тимофеевич Калашников егит дырысен тунсыкъяськиз техникаен. Войналэн нырысетӥ нуналъёсысеныз ик со механик-водитель луыса пуксиз танк сьӧры. Секыт сӧсырмыса госпитале сюремез бере, пыӵал бичан борды басьтӥськиз, АК-47 автоматэз сяна, мукет пыӵал тӥрлыкъёсыз но, оскымон, секталазыя капчи, чебер вылтусо луэменызы сэрен, туннэ вань кунъёсын сямен вӧлмемын. Кин тодэ, кышкытлыклэсь утиськон сярысь сюлмаськонъёс ӧй луысалзы ке, Михаил Калашников, автоматэз интые, оло, нянь будэтон машинаос бичасал. Ачиз конструктор но малпанэн соглаш луэ. Дасяз Э. Кумачева. ПРАВИТЕЛЬСТВОЫН Котырес эгес Адӟиське ни арлэн пумыз. Кызьы бен сое йылпумъялом, туннэ нокин уз вера. Но 9 толэзь ужаммы син азьын. Ӵапак со сярысь Удмурт Правительствоын алигес бадӟым кенеш ортчиз. Отчы ветлӥзы Кун Кенешысь но Правительствоысь, городъёсысь но районъёсысь, министерствоосысь но ведомствоосысь, предприятиосысь но организациосысь кивалтӥсьёс, озьы ик журналистъёс. Укмыс толэзь ужаммылы йылпумъянъёс лэсьтӥз экономикая министр Евгений Аверьянов. Чутӥсь предприятиослэн но бере кылись районъёслэн кивалтӥсьёссы аспӧртэмлыко кыл кутӥзы, шуыны луоз. Кенешез нуиз Правительстволэн Тӧроез Павел ВЕРШИНИН. Таӵе ужрадъёс, кенешонъёс берло дыре улонамы бадӟым инты басьто, шӧдскымон пайда ваё, шуыны уг луы. Озьы ке но, вылӥ законодательной но исполнительной органъёс та амаллэсь уг куштӥсько, калыкез люкало, кенешыны выро. Но кызьы со пӧрме, туннэ юн секыт вераны. Малы? Пӧртэм мугъёсын. Нырысь ик, вань удысъёс, предприятиос ог-огзылы пунэм тыронъёсын пачкатэмын. Промышленной предприятиос поттэм продукцизылы (ож тӥрлык но мукет) дунзэ басьтыны уг быгато. Сыӵе ик югдур гурт удысын. Крестьянин удалтэм ю-нянь будэтэ, уно сӥль-йӧл поттэ, нош пайдаез ӧвӧл, вузам сиён-юонэзлы но переработчикъёс дунзэ уг тыро. Котырес эгесын кадь. Я бен, кыӵе вераськон мынӥз Правительстволэн паськыт кенешаз? Вал тунсыкоез но, умоесь ӵектонъёс но.Тани вань предприятиослэн кун бюджетэ 300 миллиардлэсь уно тыронъёссы люкаськемын. Сое недоимка шуо. Бюджетэ 400 миллиард манет коньдон пыртэмен лыдъяське, ог- огедлы пунэм тыронъёсты берыктэм чотын (37 процентэз) . Нош бюджетэ одӥг манет но ӧз вуы, со бумага вылын гинэ лэсьтэмын. Промышленной предприятиос пӧлысь тужгес но секыт югдур кылдэмын Сарапулысь электрогенераторной заводын, Ижысь подшипник лэсьтон заводын но мукет предприятиосын. Берло дыре уно шуг-секытъёс адӟе "Ижнефтемаш". Со трос поттэ му вӧй кыскон насосъёс (вань продукциез пӧлысь 33 процентэз). Ужа складэ, шуыны лоуз. Предприятиез юмоке вутто "Лукойл", "Удмуртнефть" но "Башнефть" огазеяськонъёс. Кылсярысь, кыкетӥез 500 миллионлы гинэ вуз басьтӥз, нош кулэ вал 2,5 миллиардлы. "Башнефть" удмурт музъем вылысь арлы быдэ 2 миллион тонна пала "сьӧд зарни" кыске, нош насосъёс но мукет оборудование 1,5 миллиард манетлы палэнысь басьтэ. Кызьы сое валано? Капчи ӧвӧл югдур гурт удысын. Пудолэн лыдыз тужгес но зол кулэстэмын Як.-Бодья, Сюмси, Кизнер но куд-ог музон районъёсын. Берлоез ёрос сярысь верано ке, сое берлань кыско 3-4 хозяйствоос. Савин нимо колхоз пудо вордыны уг быгаты ни. Валамон, бере кылись хозяйствоосты выльдыны кулэ. Кенешын паймымон но тумошо вераськиз "Удимуртэнерго" АО-лэн валтӥсь инженерез Николай Скворцов. Монополист-кивалтӥсь ӝожтӥське, кулэсмиз, пе, электрокужым но шуныт кутон. Нош соослэн асьсэлэн но тыронъёссы (эстӥськон басьтэмзы понна) одӥг триллион манет ёрос вуэ ни. Со дыре энергетикъёс промышленной предприятиослы ("Ижсталь", "Ижмаш", ЭМЗ, механической завод) электрокужым сётонзэс кулэсто. Озьы производство гуньдэ, продукция поттон синэ. Соку предприятиос кытысь уксё шедьтозы энергетикъёслы тырыны? Чик валантэм. Соин ик Правительстволэн Тӧроезлы Павел Вершининлы монополистэз интыяз пуктоно, югдурез валэктоно луиз. Татын мукет тырмымтэос но шарае потӥзы. Кылсярысь, шаерысьтымы ликёро-водочной заводъёс (ЛВЗ-ёс) 9 толэзь ӵоже 1.800 сюрс декалитр аракы поттӥзы, нош со пӧлысь вузамын 1300 сюрс декалитрез. Кылемез кытын? Нокин уг тоды. Озьы ивортӥз вузкаронъя но бытовой услугаосъя министр Петр Пономарев. Со озьы ик вераз гуртын вузкаронлэн (Удмуртпотребсоюзлэн) сюбегамез сярысь. Азьвыл, солэн люкетэз 33 процент ке вал, али 6,6 процент гинэ кылиз на. Кыӵе югдур лэсьтӥськон удысын? Та удыслы бюджетысь туж ӧжыт коньдон висъяське. 1994 арен ӵошатыса, коньдонэн юрттэт куинь поллы синэмын. Та ласянь уката но секыт Юкаменск районын - лэсьтӥськонлы копейка но висъямтэ, заказъёс но ӧвӧл. Со интые ик ӟечгес мынэ нимаз адямиослы корка лэсьтон. Калык улонэзлы ӝожтӥське ке но, корка пуктыны луонлыкъёс шедьтэ. Кутэмын "Улон инты" программа. Сое дасян понна, лэсьтӥськон удысэн кивалтӥсьёс дасо пала регионъёсы вуылӥллям. Та ужпумез котыр ласянь эскеремзы бере, таӵе малпанэ вуиллям: данаказ улосвылъёсын лэсьтӥськон ужъёс мыно бюджетысь коньдон чотын. Нош асьмеос лэсьтӥськонлы висъям коньдонэз но могӟетъёстэк уже кутыны ум быгатӥське. Тани туэ Правительство 50 миллиард манет тыр жилищной кредит висъяз, ваньмыз со люкылыса, районъёсы келямын.Но со коньдон 3 миллиардэз сяна адямиослы сётэмын ӧвӧл на. Кызьы выризы валэктыны, со кредитэз басьтон понна, адямиослы, пе, уно бызьылоно луэ, пӧртэм бумагаосты бичаса. Вань татын янгышъёссы сбербанкын ужасьёслэн но, администрациосын кивалтӥсьёслэн но. Югдурез утёнъя министерствоын ужасьёсты сюлмаськытэ лымшор палась ваем наркотикъёслэн лыдзы. Укмыс толэзь ӵоже гинэ 400 килограмм пала наркотикъёс таламын. Соин йырин али больницаосын эмъясько 600-лэсь уно адямиос, данакез - быдэ вуымтэос. Правоез утись ёзъёсын но берло дыре шараямын уно тырмымтэос. Вань сыӵе учыръёс МВД-ын, Юстицияя министерствоын ужасьёс пӧлын но. Правительствое ӝожтӥськонъёс вуыло судьяос вылэ, шуиз Павел Вершинин. Кенешын ӝутэмын вал таӵе ужпум но: малы туж каллен мынэ кынартэм заводъёслэсь нылпи садъёссэс городлэн асваньбурез пӧлы кутон уж? Городлэн кивалтӥсьёсыз валэктыны выризы, со нылпи садъёс туж куашкамонэсь шуыса. Тани "Ижмашлэн" 46 нылпи садъёсыз воксё тупатъятэк сыло - кӧня коньдон кулэ луоз со понна. Но, кызьы шуиз Павел Вершинин, та ужлы уксё тырмыт висъямын. Озьыен, ужпум, оло, мукетыз бордын. Городлэн кивалтӥсьёсыз, оло, юри могӟетъёс кылдыто. Туннэ нуналлы городлэн асваньбураз пыртыны чаклам 104 нылпи садъёс пӧлысь кутэмын 36- ез гинэ. Бен, кыӵе гинэ ужпумъёс ӝутэмын ӧй вал та бадӟым кенешын, котькытын шӧдӥсько йылаз-пумаз вуттымтэ ужъёс. Соос секыт мылкыд кылдыто. "Эх, ужаны ум быгатӥське!" - трибуна сьӧрысен юн куараен шуэ Глазов районысь "Путь к коммунизму" хозяйстволэн кивалтӥсез. Но тани люкаськемъёс азе потэ Каракулино районысь Вормонлы 40 ар нимо эштослэн кивалтӥсез Александр Белослудцев. Кичабонъёсын пумитазы. Юнме ӧз. Туэ со республикаямы нырысетӥосыз пӧлын быдэстэм ю-нянь утялтонэз. Лизингъя одӥг миллиард манетлы техника басьтэм. Но тужгес но паймымонэз - татын чабейлэсь изыны кутскиллям вылӥ сортъем но вылӥ клейковинаен (28-32 процент) пызь. Мукет хозяйствоос сярысь, электрокужымлы но со 10 поллы ӧжытгес коньдон тыре - ас эштосаз счётчикъёс пуктылэм. Кӧня аръёс ӵоже вераськиськом ни счётчикъёс пуктылон сярысь - нокин уг басьтӥськы. Озьы ик асьме тодосчиос вераны туртто, асьме чабейлэсь вылӥ сортъем пызь изыны уг луы шуыса. Александр Белослудцев ваньзэ уж вылын эскерыса возьматӥз: ӟеч ужаны луэ. Кенешез йылпумъяса вераськизы Александр Волков но Павел Вершинин. Павел Николаевичлэн верамезъя, вуоно арын бадӟым саклык висъяськоз ӟеч пудо выжы вордонлы, вылӥ сортъем кидысъёс будэтонлы, основной фондъёсты (техникаез) выльдонлы. Агропромышленной комплекслы бюджетъёсысь кредитэн юрттэт уз луы, меӵак шуиз Правительстволэн Тӧроез. Туэ тулыс бусы ужъёслы висъямын вал 27 миллиард манет, берыктэмын 3 миллиардэз гинэ. Республикамылэн укмыс толэзь ӵоже ужамезлы йылпумъянъёс лэсьтыса, нимысьтыз постановление кутэмын. Г. РОМАНОВ. Т. БАННИКОВА. Кыдаз шугадӟыса Алнаш районысь Юмьяшур гуртысь бадӟым семьяын вордӥиськиз Афанасий Афанасьевич Кадырманов. 1942-тӥ арын егит пиез Советской Армие басьто. Удмуртъёслэн йылолзы сыӵе: армие кошкись мурт коркась одно ик мумыкоре йӧттӥськыса мед потоз. Афанасий Афанасьевичлэн мугорыз пичи вал бере, ки вылазы ӝутыса сузьтӥськытӥзы. Озьы со дореныз люкиськиз. Юмьяшурысь вань калык келяз гурт пумозь. Кӧня ке нунал ортчыса, егитъёсыз нуизы шунды ӝужан пала. Мынӥзы толэзь ӵоже. Вуттӥзы Амур улосысь Свободный городэ. Собере келязы Завитая станцие. Таиз артэ Маньчжуриен, Амур шурлэн мукет палаз. Татын Афанасий службазэ нуиз гуртысьтызы эшеныз Трофим Петрович Кучугановен ӵош. Япониен ожмаськон кутскем бере келяло Владивосток городэ. Отысен - Южный Сахалинэ. Арня ортчыса, нош ик ысто Курил шормуӵъёсы. Отын улэ 1950-тӥ арысь август толэзёзь. Усто ожмаськемез пусъемын орденэн но тямыс юбилей медален. Дын-дын юнмаса, армиысь бертэ 1950-тӥ арын сентябрь толэзе. Гуртын улон секыт, семья бадӟым, корка пичи. Атаез, Афанасий Никитич, сӧсырмыса вуэмын вал герман ожысь. Пиезлы шуиз: "Асьмеос тамында адями пӧлын ӵош улыны ум быгатэ, кытчы ке кошкытэк уд луы". ... Со гужеме Юмьяшур гуртэ лыктӥзы му вӧй утчасьёс. Арня ортчыса, Афанасий дӥнязы уже интыяськиз. Собере музъемез поръяса ветлӥз кык ар. 1951-тӥ арын кузпалъяськиз. 1952-тӥ арын келяло Пермь улосэ. Отын улӥз но ужаз куинь ар. Татын ик вордӥськизы нылъёсыз. 1955-тӥ арын нош ик бертӥзы Алнаш районэ. Кыӵе гинэ гуртэ ӧз вуылэ - Ивае, Блатгуртэ, Кузёбае, Сьӧд Ошмесэ. Собере ветлӥзы Грах, Кияса, Вотка ёросъёстӥ. 1963-тӥ арын лэзё Можга городэ. Отын сёто улон инты. Нош гуртъёстӥ но районъёстӥ семьяеныз, чиган сямен, дас куинь ар ветлӥз. Чылкак паймоно чидамзылы. Ӵем дыръя, пе, патере пичиесь нылпиосын уг но пырто вал. 1980-тӥ арын, витьтон вить арес тырмем бере, пенсие потэ. Но ужамысь уг дугды. Вань ӟеч тыршемзэ лыдэ басьтыса, улон инты отӥяз сёто Иже. Городэ вуыса, удысэз капчия. 1996-тӥ арозь, сизьымдон одӥг аресозь, экспедитор вал. Ужысьтыз кошкемез ӧз поты, но амалыз ӧйлась. Ваньзэ- ӧвӧлзэ ньыльдон куать ар сюлмысь тыршиз. Весь кырын, кезьыт но дэри, кот пӧлын ужаз. Ӟеч азинсконъёсыз пусъемын трос тау каронъёсын но. Афанасий Афанасьевич шоры учкыса сётод ог витьтон арес. Кӧня ке гинэ пурысьтам йырсиосыз. Арганэн шудэ, эктэ, кырӟа. Кышноез но, Лидия Михайловна, туж пинал адӟиське. Озьы ик, картэз сямен, шулдыръяськыны быгатэ. Вазь тулысысен бер сӥзьылозь уло соос бакчаязы. Нош толалтэ воргорон нуналлы быдэ котькыӵе куазен ог кык часлы куас вылэ султылэ. Ӵукнаосы мугорзэ посэ. Анатолий ПОЛЯКОВ, Ижын улӥсь гуртоез. Иж пыӵал тӥрлыклы - 190 Калашниковлэн автоматэзлы - 50 Юбилейёсты ортчытонъя программа Праздник кутскоз 30 октябре 10 часын ӵукна. Александр Невскийлэн соборез азе люкаськозы Удмурт Республикалэн, Ижевсклэн, "Ижмашлэн" кивалтӥсьёссы. Город вадьсын чузъяськоз соборысь гырлы куара, кырӟалоз черкысь хор. Отысен куноос выжозы завод управленилэн юртэз доры. Татын Ижысь машиностроительной заводлэн азьвыл генеральной директорезлы, Социалистической Ужысь кык пол Геройлы И. Ф. Белобородовлы мемориальной пул усьтэмын луоз. Та нуналэ ик чакламын бадӟым культурной программа, со ортчоз Ижысь пыӵал тӥрлык поттон заводэз кылдытӥсьлэн Н. Ф. Дерябинлэн памятникез дорын. Праздникез пусъёнэ паськыт пыриськозы Удмурт кун филармония но республикаысьтымы театръёс. Филармониысь артистъёс люкаськемъёсты шулдыртозы 30 октябре 18 часын ӝытазе, нош 1 ноябре татын ортчоз Удмурт Республикаысь калык артисткалэн Нина Варачевалэн творческой ӝытэз. В. Г. Короленко нимо театр возьматоз Г. Горинъя пуктэм "Легенда о Тиле" спектакльзэ, нош Национальной кун театр учкисьёсты шумпоттоз Е. Загребинлэн "Эш-Тэрек"" спектакленыз. Ӟеч программаез Операя но балетъя театрлэн но. Кыкетӥ нуналаз тодматскыны луоз выль спортивной но пӧйшуран пыӵал тӥрлыкен. Тросэзлы кельшоз "Ижмашлэн" азьвыл но туала аръёсы лэсьтэм машинаоссэ но мотоциклъёссэ возьматонъя выставка. Куинь нунал ӵоже ужалоз "Ижмаш" АО-лэн музеез, "Ижмаш-Авто" ДОНО-лэн выставочной залэз. Таос куноосты Ижысь тужгес бадӟым предприятилэн ортчем но туннэ нуналэныз тодматозы. Ижысь пыӵал тӥрлык поттонлэн историезлы сӥземын луоз Национальной кун музейысь одӥгез выставка. Юбилейёсты пусъён нуналъёсы мылысь-кыдысь пыриськыны мылкыд каремзэс веразы Ува но Игра районъёсысь кибашлыос. Асьсэлэсь быгатонлыкъёссэс соос возьматозы декоративно-прикладной искусствоосъя центрлэн адӟытон залаз. "Конструктор луэмелы уг ӧпкелиськы"... Михаил Тимофеевич Калашниковен пумиськон ортчиз шыпыт интыын. Синмысь синме кельтэмын вал ачиз конструктор но журналистъёс... - Михаил Тимофеевич, туннэ тӥляд нимды быдэс дуннеын тодмо. Кызьы тӥ сое ас вылады шӧдӥськоды? - Нокызьы но. Со ласянь гинэ ке шат, берло дыре дорам трос изобретательёс, конструкторъёс визь-кенеш курыса, ас вамышъёсынызы тодматыны шуыса вазиськыло. Уно гожтэтъёс басьясько, Россиысь сяна, кунгож сьӧрысь но соос туж трос вуо. Одӥгзэ но синйылтытэк уг кельтӥськы. - Автоматты котырын трос вераськонъёс бергало. Со, пе, вир кисьтонэ, лушкаськонэ кутӥське. - Тӥ валаськоды, дыр, мон политик ӧвӧл, мон конструктор. Нош конструктор янгыш ӧвӧл, пыӵал тӥрлык вир кисьтонын кутӥськем понна. Лек "шудонъёсты" йырвандӥсьёс кие сюремлэсь утьыны кулэ вылэм, соосты бадӟым пытсэт улын возёно. Пыӵал тӥрлыкез возён но вузан сярысь ӟеч-ӟеч закон ӧвӧл. - Михаил Тимофеевич, уд-а жаляське пыӵал тӥрлык бичанъя конструктор луиды шуыса? - Одӥг но уг. Война аръёсы ачим ожмаськи, ас синмыным адӟи, макем кулэ вал соку ӟеч пыӵал тӥрлык. Сӧсырмыса госпитале сюрем бӧрсям, малпай: вуоно автоматэ тушмонэз ӝог пазьгыны юрттоз. Но ӧй вуы. Ӧз тырмы, вылды, опытэ. Автоматме война бере гинэ бичай. Но мон эшшо верасько, пыӵал тӥрлыкме тупаса улонэз утён вылысь кылдытӥ. Шат урод, куд-ог кунъёс, киязы та автоматэз кутыса, раб улонлэсь мозмытскизы шуыса? Шат урод, та автомат тросэзлэн кунъёслэн куншетазы суредамын шуыса? - Кинэн ӵош ужано луиз автомат кылдытон бордын? - Удалтӥз мыным эшъёсын-юрттӥсьёсын. Нырысетӥосыз пӧлын вал Владимир Крупин, соку воксё егит конструктор. Соин ми семьяосынымы но эшъяськылӥм. Кема аръёс ӵоже ужай Виталий Пушинэн, Алексей Крекушинэн. Вал на Александр Зайцев, Павел Бухарин, Галей Габдурахметов... Трос соос, ваньзы сярысь ӟечсэ гинэ верало. Кызьы конструктор юрттӥсьёстэк ужаны быгатоз? Трос кужым сётӥзы вожвылчиосы но. Кылсярысь, ялан ӵошатсконо луиз Тулаысь конструкторъёсын.Со понна 1971 арын мыным технической наукаосъя доктор дано ним сётон сярысь ӵектонэн азьвыл ик потӥзы соос. Вань та тодэ ваёнъёсы сярысь гожтӥ выль потоно "От чужого порога до Спасских ворот" книгаям. - Михаил Тимофеевич, кыӵе мылкыдын пумитаськоды юбилеез? - Данъяськисько ас предприятиеным, солэн ужасьёсыныз. Котькудӥз мед шӧдоз вылаз та праздникез. Угось юбилей - асьмелэн огъя вормонмы. НАТАЛЬ "Ньыль уй ӧй берта доре" Пятницае ӝытазе, Ижысь вуэм берам, мон эше доры мыноно кариськи. Зор бере куазь шуныт, омыр чылкыт. Урамын ӧжыт ӝомал луэмын ини. Клуб палтӥ ортчыкум, син азям пичи пияш пуксиз. Кияз тамак пумыз ӵындэ. Ас поннам малпай: "Малы паймонэз, туала арын пичиысен ик ӵын поттыны кутско". Но пияшлэн учкемез-а, тодмотэм ымнырыз-а монэ дугдытӥз: - Ӟечбур, мар огнад татын кариськод? - Номыр ик уг,- вазиз пумитам пияш, кысконзэ куштыса. - Нош кытысь тон, кызьы нимыд, мынам тонэн пумиськылэме ӧвӧл кадь? - Саша мон, сьӧр гуртысь, 5-тӥ классэ потӥ. - Саша, нош малы тон гуртад ӧвӧл, ӝоген пеймыт луоз, дорозяд но сюресэд кузь. - Дорысьтым пегӟи, ньыль уй ӧй берта ни. - ... Тодыны луоз-а, малы? - Анае, кыскисько шуыса тодӥз но жугиз, вообще-то со мыным сюранай луэ. Атае кыкетӥзэ кышно басьтӥз. Собере, мон нырысетӥзэ тазьы уг пегаськы ини. - Тонэ уг утчало шат соос? - Азьло утчало вал. Табере уг ни, тодо: куке но берто. Верасько ук, кӧня ке пол гуртысьтым кошкылӥ ини. - Саша, нош кытын тон кӧласькод? Уин урамын изьыны али салкым луэ ук. - Мынам кыдёкысь ӵыжы-выжые татын улэ, куинь уй отын кӧлӥ. Толон валъёсын возьман юртын возьмаськисен изи. - Бадӟым-а тӥляд семьяды? - Туж ӧвӧл. Сюранае, солэн нылыз, атае но ми сузэреным. - Саша, тынад гуртад бертэмед уг поты шат? Собере, дышетсконэд но кыле ук? - Бертэме уг поты ай, кышкаськогес но кадь. Дышетскеме но уг поты, ӵок, кылёз ке. Озьы вераськон сяменымы, дорамы гуртысьтымы пияш матэктӥз. - О-о, Саша, тон татын шат? - Татын... - Нош мар кыскиськод, вай мыным но. - Аслам тани та берпуметӥез. Пиослы люкетыса ӧй сыл ни, ӟеч луэ шуыса, сюресме азьланьтӥ. Ӵуказеяз, кӧс нуналэ, клубе потыса,нош ик Сашаез адӟи: - Саша, тон али но дорад ӧд берты шат? - Ӧй на,- кысконзэ кенжытыса, учкиз со шорам. Егит пиос пӧлын Саша ассэ муртэн чик ӧз лыдъя кадь. Шораз учкыса, мон малпай: "Кыӵе адями луоз со будэм бераз? Кин янггыш пияшлэн таӵе улонэзлы: анай-атаез, ачиз яке улон? Утемын-а мукет нылпиос таӵе адӟонлэсь? Сюлэмъёсмы измемынэсь ни, лэся, шуге-леке вуэм, йыромем пиналлы кимес сётыны ум турттӥське бере. Яке ум быгатӥське? Оло, туала вакытэ анай-атайёс но нылпиос ог-огенызы пӧртэм кылын верасько? Вӧзад ик мед луоз вылэм оскымон эшед, юрттӥсед, тонэ валасед. Галя САВИНА, Удмурт кун университетысь студентка. Лыдпусъёс 50-лэсь ятыраз кунъёсын Калашниковлэн автоматэз государственной луись пыӵал тӥрлыкен лыдъяське. "Ижмаш" сяна, сое бичаны кемалась дышизы выль кузёос но. * * * 50 ар ӵоже Калашниковлэн автоматэз 100-150 миллион пала поттэмын. * * * Ӝыны даур куспын 11 миллион пала спортивной но пӧйшуран пыӵал тӥрлык бичамын Ижысь механической заводын. "Ижмашын" мында пыӵал тӥрлык поттӥсь предприятиос быдэс дуннеын туннэ ӧвӧл. "Удмуртнефть" - Россиын устоосыз пӧлын Россиысь промышленникъёслэн но ужбергатӥсьёслэн огазеяськонзы, Вузкаронъя палата но "Эксперт" журнал "Россиысь устоосыз предприятиос" конкурслы йылпумъянъёс лэсьтӥзы. Учкемын промышленностья куать удысъёсъя вормисьёс. Котькуд удысын - эстӥськон комплекс, металлургия, машиностроение, капчи но сиён-юон промышленность, химической но нефтехимической промышленность, нюлэс промышленность но лэсьтӥськон материалъёсъя - 10 предприятие верамын вал. "Удмуртнефть" ОАО эстӥськон комплекс люкетъя витетӥ инты басьтӥз. Асьмеды азьпалтӥзы "Башнефть", "Сургутнефтегаз", "Башкирэнерго" но "Челябэнерго". Н. КЛЕЙМЕНОВ, "Удмуртнефть" ОАО-лэн валтӥсь кивалтӥсезлэн юрттӥсез. Чебер апок Ульяна Шаталова Ижысь медициная кун академиын дышетске, врач-невролог луыны дасяське. Та кызь кык аресъем нылашлэн туспуктэмез алигес шедиз Россиысь чеберайёслэн конкурсазы. Сое отчы Улялэн сузэрез ыстэм. Ульяна одӥг пол малпаз ни вал чеберинаослэн конкурсазы пыриськыны - ӝуждалаез ӧз тырмы. Но сое тодӥсьёс таин ӧз чалмытске, муг сюрыку, нылашлы синмаськемзэс одно вералозы. Уго Улялэсь муспотон серектэмзэ синйылтытэк кельтыны уг луы. Солэн синъёсыз синучконын кадь верало нылашлэн лулчеберез сярысь. Таӵе апокъёс шоры учкыса, мылкыд бурдъяське. Паймиськод инкуазьлэн "чебер пӧртмаськонъёсызлы". Ф. КРАВЦОВ. НАТАЛЬ "ЭШЪЯСЬКОН БУГОР" КОНКУРСЭ "Анайдэ кышно басьтӥсько" Пичи Зоя нокыӵе ик ӧз кариськы анаезлэн тодмотэм муртъёс сьӧры олокытчы кошкемезлы. Синъёссэ гинэ бадӟым карыса кылзӥськиз азьвыл ноку адӟылымтэ воргоронэз: - Тон, Зои, эн куректы, анайдэ кышно басьтӥсько шуыса. Ничего, песяед вань ай, со воштоз... анайдэ. Мон но озьы ик будӥ, номыр ӧз луы кадь. Трос нуналъёс ортчыса но, анаез нылзэ тодаз ӧз вайы. Но Зоя мӧзмонлы ӧз сётскы, уго песяез вӧзаз, мар кулэ на. Куке-соку анаез пичи нуныеныз кунояны дораз бертӥз ик. Бадӟымез нылызлы мусоесь кылъёсын ке но вазьылӥз, пичизэ кадь ӧз нуныя. Зоя покчи сузэрез котырын бергаз-бергаз но бордаз йӧтскыны таки кышказ - ма, со Катя мунёез быдӟа гинэ ук. Ӝытазе нылаш анаез вӧзы изьыны выдӥз, нош ӵукна шӧдыкуз, вӧзаз буш вал. Анаез пичи нуныен диван вылын ӵош изе. Соку Зоялэн нырысьсэ, дыр, кӧтыз ӝож луиз. Школае мынэм бераз ни Зоялэсь трос пол юаллязы, анаедлэсь мӧзмиськод-а, пе. Мар бен шуыны быгатоз нылаш, вань улонзэ песяез вӧзын будэ ни бере? Анаез солы бадӟым сузэр кадь потылӥз, ӧз но малпаськылы, малы со пересь муртэн улэ. Но одӥг учыр сое малпаськонэ уськытӥз. Кызьы ке урокын дышетӥсь пиналъёсты кырыж пукемысьтызы тышкаськиз. Ваньзэ чаклась Зоя вазьытэк ӧз чида, классысьтымы Андрейлэн анаез кадь ик-а, пе, горбач, луом. Пинал визь бере, пинал визь ик вань. Номыр уродзэ малпаса ӧз вазь ук, мае синмыз адӟе, сое гинэ вераз. Нош тӥни мар луиз. Андрейлэн анаез, та кылъёсты тодыса, магазин тыр люкаськем калык азьын Зояез тышкаськиз. Ма гинэ ӧз шуы, пичи нылаш гуньдыса гинэ сылӥз. Соку ик со тодӥз мукет пиналъёслэсь висъяськемзэ - Зоя, пе, мирошка. Эшъёсыз но озьы исаны кутскизы нылашез. Ма, со гинэ ке луысал. 8-тӥ Мартэн ӟечкыласа, дышетӥсьсы пиналъёслэн анайёссылы открыткаос кузьмаз. Классысьтызы Зоя но Оля гинэ палэнэ кылизы. Зоя, пе, мирошка, вылаз ик, анаез нылзэ куштыса кельтӥз, нош песяез ваньмыныз керетыса ветлэ, кыӵе ӟечкылан луоз солы. Оля эшезлы нош шуизы, умой дышетскыны кутскид ке, тынэсьтыд но анайдэ ум вунэтэ. Ненег сюлэм туннэ гинэ валаз: адямиос люкисько вылэм мирошкалы но анай-атаен улӥсьёслы. Кӧтыз ӝожен учкылӥз нылаш эшъёсыз шоры. Соосыз школае ваё атайёсынызы лэсьтэм шырчик умортоос. Зоялэн нош бадӟым агаез гинэ но ӧвӧл, лапассэс но песянаез Люба апаеныз лэсьтӥзы. Озьы ке но, Зоя оскиз, солэн но атаез кытын ке вань, со одно утчалоз, шедьтоз нылзэ. Та малпанэзлэсь Зоялы ӧжытак капчигес луылӥз. Школаын Зоялы толэзьлы быдэ уксё висъяллязы. Эшъёсыз талы сьӧд вожъяськонэн вожъяськизы. Но кытчы гинэ тырмытод со 30 манетэз, пу вандон-пилён понна но муртлы йыбырттоно ке. Тодысалзы ке нылашлэн эшъёсыз, кыӵе секыт солы анай-атайтэк, ай эшшо котькуд вамышын пыкылыны, "куртчыны" туртто. Зоялэн сюлэмаз пумен-пумен каръяськиз анаезлы вожпотон: карт понна нылзэ пересь мумиз доры куштыса кельтӥз. Малпаськиз меда со Зояез сярысь? Нылыз быдэ вуытозь, одӥг пальто басьтыса сётӥз, огпол-кык пол тыбыраз вешаз, кык-куинь арлы одӥг пол вить минутлы куное вуылӥз. Шат озьы кароз нылзэ яратӥсь анай? Озьы ке но, анайзэ шонере поттон сюресъёс утчаз ик. "Картсэ яратэ, дыр,- малпалляз со,- тӥни ук ачид но сюлмад нуллӥськод гажанэдлэсь тусбуйзэ". Огзэ гинэ ӧз вала со, Зоялэсь атайзэ сокем яратыса вылысь, малы анаез сое мукет муртэн воштэ. Песяезлэсь но анаезлэн сузэръёсызлэсь Зоя кылылӥз вал со яратон сярысь. Нылаш одӥг пол гинэ ӧз вазиськылы анаезлы но, атаез сярысь юалляськыса, нош соиз кылымтэ улэ аналскылӥз. Сокем тодыны турттэмзэ адӟыса, Люба апаез вераз ни, атаедлы, пе, кельшиськод, фотографизэ адӟылӥ вал. Соку ик Зоя тодӥз, атаез ӧвӧл ни шуыса, бырыны шедем. Йыркурен пачылмем но ӝожомем сюлэмыз Зоялэн соку ӧз чида ни, бам вылтӥз пытьы кельтыса питырскизы синкылиосыз. Я, малы озьы луиз? Кинлы урод лэсьтӥз со али гинэ пушйыны кутскись улоназ? Малы анаез сое кулэтэм кариз? Малпаса-малпаса йылаз-пумаз уг вуы, малпан бугорез гинэ эшшо но тугаське. Куддыр жаль но потылӥз Зоялы анаез, нош куддыр сьӧд йыркур каръяськылӥз сюлэмаз, вордэм мумиз кулысал ке но, ӧй кайгырысал, вылды... *** Зоя туннэ шудолэсь но шудо. Уин ужаса бертэм картэз ныс-ныс изе, мусо выретэ пук-пукесь ымуръёсыныз. Анай луыны дасяськись егит нылкышно син азяз пуктӥз вуоно пиналзэс: со но картэз кадь ик сьӧд-сьӧд луоз, дыр. Сыӵе ик сэзь но ерпечка будоз, тӥни ук, анаез пушкын ик ӵыжаське ни. Мон сярысь эн вунэтэ, шуэмез потэ кадь. Анаезлэн, песянай луоз ни шуыса тодэмез бере, синкылиосыз потӥзы. Нокызьы но оскыны уг быгаты, Зоя нылыз собыдӟа ни шуыса. - Али гинэ кадь вордӥськид, нош тани табере ачид анай луод,- собере будэтӥз. - Вождэ эн вай, нылы, монэ сотэк но Инмар каргаз ни, дыр. Атаед... атаед тонэ яратӥз, вордскымтэ дыръяд ик ай. Только кема ӧз кылды яратыны, виизы сое. - Эх, анай, анай. Мон кемалась вунэтӥ ни вожпотонъёсме. Валасько ук, кияд пичи пиналэн бызьытэк кыльыны туж бадӟым шуд ӧвӧл. Пушкам выль улон улӟем бере гинэ валай, макем секыт нуллыны пиналлэсь каргамзэ. Кин тодэ, азьланяз кыӵе луоз мынам улонэ. Курисько, анай, ачид но вождэ эн вай ӵушкась малпанъёсы понна, кӧт ӝожме вормытэк, куд-ог дыръя уродэн тодам вайылӥ шуыса. С. ДОЛГАНОВА, Удмурт кун университетысь студентка. ЛЭЧЫТ УЖПУМ Кранэтӥ ву гинэ уг бызьы... Бен, бен, кранэтӥ вуэн ӵош шупче калык ваньбур но. Сое эшшо но ӟеч шӧдӥськод-валаськод, Удмурт Республикаысь жилищно-коммунальной хозяйствоысь кивалтӥсьёсын пумиськылыса, соослэн берло аръёсы кылдэм "йыр висёнъёсынызы" тодматскыса. Лыдъян-чотан, шыръян ужъёсты кулэезъя радъямтэенымы, урамъёстӥ пӧсь вуэн шуръёс бызё, кранъёсмы ноку уг пытсаськыло, ялан тёп-тёп вияло, укно янак висъёстӥ тӧл шула. Со вуэз ик шунтон, чылкытатон, гумы кузя котькуд корка, квартирае вуттон понна, кӧня уксё кулэ. Ваньмызлы тодмо, музъем ултӥ кошкись трубаосты выльдон-воштон ужъёслэн йылзы-пумзы уг адӟиськы, одӥг интыетӥ кышъяло, мукет азетӥ пасяське... Та чидантэм югдурысь потыны вань-а амалъёс? Вань. Со понна жилищно-коммунальной хозяйствоын реформа кулэ. Россиысь Правительствое егит кивалтӥсьёс вуэм бере, та ужпум борды государство рос-прос басьтӥськиз. Выльдӥськон тӧлъёс Ватонэз ӧвӧл, странаямы югдур туж секыт, экономикамы чутэ. Адямиос толэзьёсын уждун уг басьто. Тросэз заводъёс, фабрикаос куашкамын, продукция поттыны уг быгато, гуртъёс аналтэмын. Со герӟаськемын трос мугъёсын, нош ваньмызлэсь бадӟымез, син шоры йӧтӥсез - энергоресурсъёслы дунъёсты асэрказы лэзён. Соин валче хозяйствоос, предприятиос коммунальной тыронъёсысь уг потало. Тӥни соин жилищно-коммунальной хозяйствоын реформа ортчытонэн ӝеганы уг яра. Зэмзэ вераса, та ужез кутсконо вал ини азьлогес ик, ку шаермы рынокен ужан амалъёсы выжиз. Соиз умой, бергес ке но, та ужрадэз ортчытон борды странаямы кутскизы. Берло ньыль ар куспын дасямын но кутэмын вал 40-лэсь ятыр законодательной но нормативной актъёс, кудъёсыз чакламын жилищно-коммунальной хозяйствоын реформа ортчытыны. Государстволы трос ыштонъёс ваись хозяйство азьланяз пайда ваись мед луоз. Тани туэ сентябрь толэзёзь, кылсярысь, асьмеос одӥг квадратной метр улон инты понна 566 манет тыримы, нош солэн асдуныз - 1047 манет. Адӟиськоды, макем бадӟым та лыдпусъёслэн пӧртэмлыксы, кӧня коньдон кошке улон-вылон интыез возён понна гинэ. Нош тупатъян-выльдон ужъёсы ик уно миллиардъёсын уксё кулэ. Со ӧвӧл. Коркаос вужмо, выльёссэ пуктыны моӵмы уг тырмы. Тӥни озьы та кульчоысь потон инты нокызьы ум шедьтӥське. Россия Федерацилэн Правительствоез котькуд улослы дыр сётӥз 1 августозь та пумысен ужрадъёс чакланы. Август толэзьлэн кутсконаз журналистъёсын пумиськон дыръя Удмурт Республикаысь жилищно-коммунальной хозяйстволэн кивалтӥсез Валерий Загайнов ивортӥз: - Асьме понна выльдӥськон кутскиз ини 1991 арысен. Дунъёс ялан будо, уждун гинэ интыысьтыз уг вырӟы. Президентлэн указэзъя вуоно арысен квартира понна тырон 100 процентэз ик усьыны кулэ вал ини отын улӥсь мурт вылэ. Али дырзэ воштэмын 2003-тӥ арозь. Мугез валамон: данакез адямиос тырыны уз ворме. Удмуртия но котькудӥз улос квартира понна дун тыронэз ас дораз ачиз тупатэ. Жилищно- коммунальной удысын воштӥськонъёс ортчытонъя нимысьтыз комиссия кылдытэмын. Та хозяйствоын реформалэсь кутскемзэ улон-вылон инты понна дун тырись мурт сентябрь толэзьысен ас вылаз шӧдӥз, луоз, ини. Кылсярысь, ньыль комнатаен квартираын ньыль муртэн улӥсь семья, тыл понна дунэз вератэк, 190 сюрс манет пала тыроно луэ, нош кык комнатаен квартираен куинь муртлэсь семья - 118 сюрс. Одӥг кылын вераса, асдунызлэсь 30 процентсэ тыре квартираын улӥсь мурт, нош кылемзэ государство ас вылаз басьтэ. Тӥни озьы: макем бадӟым улон сэрегед, сокем тросгес ас кисыысьтыд тыроно луиськод. Государстволэсь дотация сыӵе квартира кузёослы азьло бадӟымгес вуэ вал. Нимысьтыз чаклам программая улон-вылон инты понна (коммунальной услугаосты лыдэ басьтыса) таяз арын асьмеос тырыны кулэ 35 процентозь, 1998 арын - 50-озь, 1999 арын - 60, 2000 арын - 70, 2003-тӥ арын - быдэсак, 100 процентсэ. Озьыен, 21-тӥ даурысен жилищно-коммунальной хозяйство ужаны кулэ дотациостэк, государстволэн кисыяз пыратэк. Туэ арлы социальной стандарт кутэмын. Соя котькуд адямилы висъяськыны кулэ 15 квадратной метр улон инты. 1 метрлэн дуныз Удмурт Республикаын сылэ 7 сюрс 100 манет. Та лыдпус котькуд районын но гуртын пӧртэм луыны быгатоз. Тани Алнашын, кылсярысь, со 5.600 манет усе, нош Якшур-Бодьяын - 12.200. - Улон инты понна тыронын азьланяз ӟечлыкез но, этажез но, кыӵе районын интыяськемез но чакламын луоз,- шуэ жилищно-коммунальной хозяйстволэн кивалтӥсезлэн воштӥсез Владимир Тюриков. - Басьтом тани Ижевскысь Зарекаез ик. Со пала мыныны турттӥсьёс ӧвӧлгес. Озьыен, соослы дун но ӧжытгес тупатэмын луоз. Кызьы ивортӥз В. Ф. Загайнов, льготаос но трослы кулэсмозы. Нырысьёсыз пӧлын реформа улэ шедёзы МВД-ын, судын, прокуратураын, таможняын но куд-ог мукет удысъёсын ужасьёс. Инвалидъёсты-пенсионеръёсты, войнае ветлэмъёсын оградэ пуктэм муртъёсты нимаз-нимаз эскерозы калыклы улон-вылонын юрттэт сётонъя органъёс. Программаын чакламын квартира дун тырисьтэмъёсын нюръяськон но. Сыӵеос люкасько гинэ. Нош суд улэ кыскемъёс та дырозь ӧвӧл на вылэм. Зэм, законъя одӥг суд но сыӵеосты улон интытэк уз кельты. Ужпум мукетыз бордын: 2-3 комнатаен квартираысь выжтозы пичигес улон интые. Туж умой луысал, жилищно-коммунальной хозяйствоен герӟаськем ужъёсты зэмос специалистъёс ке быдэсъясалзы, подрядчикез конкурс амалэн ке уже кутыны луысал. Мон малпамъя, вуозы ай сыӵеесь но дыръёс. Соку усьтыр-табыр ужасьёслы уждунзы вӧзы "ӟеч ужамзы" понна векчи виятэмзэ но мычыны кимы уз ӝутскы. Устоез пӧлысь устоезлы оскыны луоз. Лыдъялод-чоталод - коньдондэ шыръялод Нош самой тунсыкоез улон инты понна тыронын луоз соиз: котькудӥз улӥсь ву, шуныт, газ понна дун тыроз сомында, кӧня возьматоз котькудӥз понна нимаз-нимаз пуктэм счётчик. Кызьы, кылсярысь, али тыриськом электрокужымлы. - Квартиралэн кузёезлы со пайдаен гинэ берытскоз,- шуэ Владимир Васильевич.- Али кызьы луыса кошке: огъя дун пуктэмын пӧсь, кезьыт ву, газ, шуныт сётэм понна, сое ик тыриськом. Нош адями, оло, арняосын дораз уг луы, со кытчы ке командировкае кошкемын яке арняосын сад-бакчаяз ужа. Нимаз счётчикъёс инъязы ке, соку мултэссэ тыроно уз луы ни. Кранъёсысь ву но уен-нуналэн уз бызьы. Али асьмелэн котькуд адямилы сутка куспын 320 литр ву быдтыны чакламын, нош Европаын шорлыдын та лыдпус 120, Германиын - 160 литр. Тамында вуэн нуналаз 2 пол душе пыраны вуо соос. Мултэссэ ву уг быдто, котькытын счётчикъёс юнматэмын уго. - Ӝоген-а со асьме дорын пыӵалоз? Вань ини-а сыӵе приборъёсмы? - юасько Владимир Васильевичлэсь. - Шунытэз чаклась приборъёс али шаерысьтымы 98 юртъёсы юнматэмын.Чакламъя соос 15 процентлы шунытэз шыръяны быгатозы. Счётчиклэн дуныз берыктӥськыны кулэ, кык арлэсь ӧжыт гинэ ятыргес дыр ортчыса. Алигес тани ветлӥ Германие. Кезьыт но шуныт ву мынӥсь гумыосы быдэн 1000 счётчикъёс басьтыны договор гожтӥмы. Мукет интыосын сярысь, татын дунтэмгес но, оскымонэсьгес но. Вумы чылкыт ӧвӧл бере, кулэ на вылэм сое чылкытатӥсь приборез но счётчикен артэ ик пуктыны. Со сярысь но Германиысь эшъёсынымы одӥг кыл шедьтыны малпаськом. Сюлмаськонъёс, малпаськонъёс уно гинэ, йыр вылтӥ пачыл потымонэсь. Угось вань система асьмелэн вуж сямен радъямын. Коркаосмы шунытэз утьыны чакламын ӧвӧл. Германиын ик, пе, юртъёс нимысьтыз утеплителен шобыртэмын. Асьмелы Европаысь стандартъя ке учконо, корка борддоръёс 2 метр 20 сантиметр зӧктаесь, пе, луыны кулэ. Шуныт сётӥсь система но музъем ултӥ городэз огъя герӟа. Зэм, тазьы, пе, шуныт сёто Даниын но. Соос лыдъямъя, озьы дунтэмгес усе. Нош Германиын улӥсьёслы нимаз-нимаз юртъёсын шунтӥськон амалъёс кельшогес, кызьы, шуом, газэн ужась пуртыос (котёлъёс) шунто нимаз коркаосты, коттеджъёсты. Тани 100 квартираен коркаез шунтыны ик Ижевскамы таӵе пуртыез пуктоно ке, газ мынӥсь гумылэн кужымез уз тырмы, со кухняын пӧраськыны гинэ чакламын. Собере шунытэз чаклась прибор сярысь ик ке верано, 100 квартираен одӥг юртлы со 30 миллион пала усе. Отчы пыре счётчиклэн дуныз но, пуктэм понна дун но. Эшшо кулэ на ук пӧсь вуэз, кезьыт вуэз,газэз чаклась приборъёс. Ваньмыз понна квартира кузёлы тыроно луоз. Та ужпумъёс али эскерисько, кызьы умойгес луоз тырон ласянь. Башкириын, кылсярысь, сое кредит амалэн пыӵатыны малпало, квартира понна дун тырыкузы, пичиен-пичиен счётчикъёс понна но дун кельтозы. Озьы со улӥсьёс понна туж юн уз шӧдӥськы. Одӥг кылын вераса, реформа ортчытонлэсь кышканэз ӧвӧл. Ваньмыз со лэсьтӥське асьме понна, адямилэсь улон-вылонзэ умоятон вылысь. Эскериським-чаклаським ке, шыръяны дышимы ке, ваньбурмы тӧлъя-буръя уз тӧлӟы. Шапыклэсь дунзэ лыдъяны дышим ке, кисыямы но тросгес кылёз. Людмила ХРУЛЕВА. Инбам-липет улын куала "... Буран гуртысь крестьян Моисей Степанов, язычество пала дурбасьтыса, мыным тазьы вераз: "Милесьтым вӧсяськеммес Инмар адӟе. Учкы ай: удмуртъёс бусыын вӧсясько ке, зор лыктэ. Куд-ог ӟучъёс но чидатэк возьмало вӧсяськеммес, мед гинэ зороз. Милям нянен вӧсясько ке, тӥляд но ук черкын вӧсяськыкуды просфора куто. Соиз пӧртэм: ми сьӧд нянез вӧсяськом... Тӥляд - ӵындон (кадилоен - авт.), милям вӧсям пудолэн оглюкетэз сутӥське, нош бусыысь яке нюлэскысь ӵын пырак тубе Инмар доры.Тани тӥ шуиськоды, милям инмаръёсмы трос, нош тӥляд но ук святойёсты ӧжыт ӧвӧл, шонерзэ ке, милям но одӥг гинэ быдӟым Инмармы. Милесьтым вӧсясьёсмесмес Инмар ачиз пуктэ..." Сыӵе-сыӵе малпанъёсыз вань дыръя, вотякез язычестволэсь куштӥськытыны туж секыт. Мон шӧдӥ: ас вӧсезлэсь куштӥськем вотяклы трос тыш йӧтэ огвыжыосыз ласянь: мар ке канжаськыны сюре ке яке семьяяз шудтэм учыр луэ - солы соку ик синмаз верало-мыргето: Инмарез, пе, вунэтӥд, соин... Вотякъёс тани мар шуо: "Котькӧня выр, ӟуч уд луы, вотяк ик кылёд"... (Иоанн Васильев священник. "Обозрение обрядов, суеверий и верований вотяков Вятской губернии". Казань. Император Университетлэн типографиез, 1906.) Сектаос аляло Тодӥськоды-а, кӧня али Удмуртиын сектант группаос но религиозной общинаос? 180-лэсь трос! Котькудӥз соос пӧлысь, валамон, ас осконзэ туж шонерен лыдъя, ми гинэ, пе, кусып возиськом Инмарен - котькызьы со медло: бадӟым стадионын киостэ инме ӝутыса, ымнырдэ шӧтэм тус карыса, еретик сямен черекъялод-а яке, шыпыт крезьгур шудэмъя, астэ лэчкатод-а... Ваньмыз со сектаос - пичиез но, бадӟымез но - кемалась асьсэды шараязы, пукон-вӧсяськонъёссэс кыӵе ке лушкем сэрегъёсын уг ортчытъяло. Тани Ижевскын ӧвӧл одӥг но искусствоосъя нылпи школа, кытчы уг люкаськыло "асэныз Инмарен вераськись" лачмыт адямиос. Котькытчы лякылэмын соослэн вукпотымон ӧтёнъёссы. Соос понна вылӥысь косон-куронъёс ӧвӧл, уставзы юнматымтэ. Ленин ёросын "Родина" магазин дорынгес вань пинал натуралистъёслэн станцизы. Отчы ялан люкаськыло сыӵе "юнматымтэ" адямиос. Озьы ке но, та "сузэръёс-агайёс" поттэм коньдонзылэсь дасмос люкетсэ висъяло "ӟеч карисьёссылы" - проповедникъёслы. ГТРК-ысь (телевидениысь) огез машинистка, сектаын йырыз поромем маке, монэ алигес визьманы выриз: кыӵе умойтэмесь но шонертэмесь асьмелэн православной черк но священникъёс. Ваньмыз со алдам адямиос (ляб лулъёс - таӵеосыз гинэ сюро сектаосы) малпало, соос калык доры ӟечез но югытэз, Инмарлэсь кылзэ ваё шуыса. Озьы ке, малы Ижевскын, Удмуртиын вамыштэмлы быдэ сомында куректон но курадӟон? Мон сямен, ӵапак соин: ваньмыз со 180 сектаос ик вӧлмыто урод, быдтыса куштӥсь кужымез (энергиез). Нош котьма ке но, Мария Дэви Христос ним улсын "мессия" куашкам бере но, Аум Синрикёлэсь сьӧсь ужзэ тодыса вылысь но, калык мынэ "выль утисьёс" доры, соослэн ӧтчамазы: та дуннеын уго мукет сюрес ӧвӧл ни, Инмарез утчан сяна. Мон кемалась ас поннам малпаськылӥ, кыӵегес меда выжы калыкъёс люкаськыло со сектаосы. Магаданысен ик аслым пусйи: проповедникъёс малы ке но ӵемгес украинецъёс луо. Тае мон ас поннам валэктыны быгатӥсько (Чернобыльын шимес адӟонэз но соин герӟасько). Асьме Удмуртиын со сектаосы сюро удмуртъёс но, кудъёсыз номыре уг тодо яке тодыны уг туртто асьсэлэн историзы, религизы, осконзы сярысь. Завьял ёросысь Изгуртын лэсьтӥськисьёслэн тулыс ик дасям дас кык коросъёссы ӧз тырме, эшшо кулэ луизы. Кӧня ке мурт ассэ ачиз быдтӥз. Гуртоос мылкыд каризы православной священникез ӧтьыны но гуртсэс вӧсяны. Сыӵе вӧсяськон-ӧпкелён (покаяние) мултэс ӧй луысал Удмуртиысь вань улӥсьёс понна но. Удмуртъёслэн-язычникъёслэн письменностьсы но кылдӥз ук, кужмысь черке пыртэм бере. Огшоры тупан учыр гинэ ӧвӧл со. Берло аръёсы удмурт языческой общиналэн кивалтӥсьёсыз Удмурт Вӧсь -инмаръёслы вӧсяськон инты лэсьтон сярысь малпанэн уло (вашкала куалаослэсь) адӟем карыса). Со инты чакламын ни кадь: Культбазаысь "Козий парк" шуон. Табере умой-умой кенешоно на калыкен, кыӵе луыны кулэ солэн вылтусыз но пуштросэз: удмуртъёслэн кемалась дырысь Инмарен герӟаськем малпанъёссылы мед тупалоз. Нош та дырозь вань ини Первомай судлэн решениеныз воштэм закон гинэ - Удмурт Элькунысь Кун Кенешлэн кылем арын 28-тӥ августэ кутэм "О миссионерской деятельности на территории Удмуртской Республики" законэз тӥямын. Законъя лэземын ӧй вал асьме улосвылын пропискатэм адямиослы (сыӵеос ӧжыт ӧвӧл) миссионер уж нуыны, озьы ик общественной интыосын но калыкез дышетонъя, спортъя, искусствоя, культурая юртъёсын кагаз вылэ юнматытэк вӧсяськонъёс ортчытъяны. "Филадельфия", "Дело веры", "Воскресение", "Голос надежды", "Церковь полного евангелия", "Ижевская христианская община" но "Церковь божья" общинаосысь судэ вазиськем муртъёс веразы, та закон "чылкыт мылкыдлы но осконъёслы эрикез пачкатэ шуыса, солэн положениосыз уг тупало Россилэн ас кужымаз пырем Конституциезлы но ООН-лэн "О ликвидации всех форм дискриминации и нетерпимости" Огъя Декларациезлы". Судья, законэз воштыса, осконъёс ласянь номыре тодымтэзэ-валамтэзэ возьматӥз. Кызьы мон валай, со вӧсяськисьёслы эрик сётон понна дурбасьтэ но соослы юрттӥ кожа. Кызьы сое ӧз паймыты Инмарлы йыбыртъясь группаослэн сокем трос луэмзы но? Удмуртъёс понна ке - шаерамы номыр ӧвӧл на, соин ик шонтӥсько куанеръёсмы, язычникъёс (черкын пылатэмез но, пылатымтэез но), я сояз, я таяз тунсыко дыр ортчытӥсьёс доры (уг юо, уг кыско, лякытэсь). Озьы бере, мед луоз удмуртъёслэн (соос Ижевскын сю сюрслэсь уно, котькуд сизьыметӥез улӥсь - удмурт) асьсэлэн яратон но жалянлык юртсы - "куалазы", мед луозы отын сям-нергеосыз, сэбедъёсыз ортчытъяны, сюлмысь ваче вераськыны, Гырон быдтонэ яке Гербере вӧсям кунян сӥлен йыды ӝукез оскалтыны, фольклор кенакъёслэсь кырӟамзэс-верамзэс учкыны... Инмарен ваче кусып возьыны! Та веранме кутсконэныз герӟаса ивортӥсько: алигес Кун Дума закон кутӥз: улонмылы азьлань мыныны люкетӥсь пӧртэм религиозной сектаослэсь ужзэс быдэс Россиын дугдытоно. "Инмар" - ин со мар? "Инмар" со "Бог", шуиськом. Но ваньмыз ик удмуртъёс таин соглаш ӧвӧл. Соос шуо: бен, ӟучъёс тодо, кин со Бог. Нош удмуртъёс уг быгато валэктыны. Ин со мар? Мар со ин? Удмурт малпаське. В. Е. Владыкинлэн "Религиозно-мифологическая картина мира удмуртов" книгаяз язычество тазьы валэктэмын: "Удмуртъёслэн языческой оскон йылолъёссы трос пӧртэм сӥё-буё но кемалась дырысен азинскемын. Со сярысь верало пӧртэм инмаръёсты сӥлы карон-йыбырттон, вӧсь нерге ортчытъян, нимысьтыз вӧсяськон интыос, курбон сётонэн герӟаськем сям-йылолъёс - ваньмыз со чакламын кадь адями - общество - инкуазь сӧзнэтэз (системаез) возён понна, мукет сямен вераса, татын син азе пуксе традиционной удмурт обществолэн дуннеез адӟон-валан сӧзнэтэзлэн кызьы кылдэмез". "... Пичи куала - котькуд семьялэн аслаз, со луэ вал котькудаз сямен удмурт юртъерын, нош выжы куала огазея вал огвыжыысь адямиосты. Соос сылӥзы вӧсясьлэн азбараз яке гурт дорысь тэльын. Со корлэсь ӝутэмын, кыкнапала нялмыт липетъёсын. Пулъёс ваче уг вуо, соос вискытӥ пасетӥ ӵын потыны быгатэ. Лапег ӧсэз пушпала усьтӥське. Выжез сюйлэсь. Шораз тылскем. Борддоръёс валлин ӟусъёс лэсьтэмын. Азьпал сэрегын - ӝӧк но пукон. Куаын тужгес сӥлы луэ тылскон инты, вӧсь нерге ортчытъян тусьты-пуньыен куды, кудӥз возиське мудор ӝажыын. Куа сяна, котькуд гуртын вал вӧсяськон арама - Луд, Кереметь". Та малпанамы гинэ ай. Ӝоген, оло, та выллем мае ке адӟом Ижевскысь. Со луысал инбам-липет улын аспӧртэм музей, отчы пырыны быгатысал котькуд мылкыд карисез - ӟучез но, бигерез но соку умойгес валасал сюрс аръёсын ӵош, артэ улэм калыклэсь улон-вылон сямъёссэ. Мон тодӥсько на Вуж Кенӥ гуртысь пересь нэнэелэсь 50-тӥ аръёсы куалазэ. Солэн пыдлось люкетаз вал пыдсаз изэн вӧлдэм мур гу. Отчы, холодильнике сямен, пуктыло вал толлы дасям-пӧзьтэмъёссэс, йӧлзэс, вӧйзэс, сӥльзэс. Нош пырон палаз пересь нэнэ пӧзьтэ вал кумышка. Табере сёто пичияк кӧшкемыт суред - кызьы сотэк язычникъёс сярысь гожтод, пе. Учкод ке, оло, удмуртъёсыз юнгес гажаны кутскозы. Собере, оло ке нош, урод сямъёслэсь утиськыны дышод. Киям выльысь кутӥсько Иоанн Васильевлэсь книгазэ. "Ведӥнъёс адямиосыз сӧро ас лекенызы. Со понна тросэз ведӥнъёс великой четверг уе пото, пӧртэм пудо-животлы пӧрмытскыса, я парсьлы, я коӵышлы, я пунылы; соос анайёслэн кӧтысьтызы вордскемзылэсь азьло ик нуныосты басьто но сиё - туж ческыт, пе. Нош дышетско ведӥнъёс тазьы: уйшор уе мылкыд карись мурт нянь сукыриен мынэ мунчое, эстымтэ мунчоын пуксе лапча вылэ, пыдыныз лёгиське сукыри вылэ, собере чыртыысьтыз басьтэ кироссэ, понэ мукет пыд улаз, шуэ: "Мон Инмарлы уг оскиськы". Собере мунчое шайтанъёс пыро но кутско сое дышетыны, кызьы сӧроно адямиосыз. Ведӥнъёс кулэмзы бере но бертыло. Сыӵе дыръя, соос доразы медаз бертылэ шуыса, лэсьто тазьы: мыно шайвылэ, эскеро, зэмзэ ик-а верам адямизы гуысьтыз пота. Шайгу вылын вань ке кыӵе ке пасез, котьма быдӟа со мед луоз, озьыен, со ветлэ; соку пасе шукко пипу майыгез, дораз яке гуртэ со медаз ни бертылы шуыса". Табере удмуртъёслэн эшшо куд-ог сямъёссы сярысь. "Вотякъёс котькызьы тыршо нылпитэк кылемлэсь утиськыны, соин ик ӵем дыръя кен утчало секытэн луэм нылъёс пӧлысь, со, пе, возьматэ вордыны быгатонлыксэ. Нылъёссылэн калгемзы анай-атайёсты уг ултӥя, куд-ог дыръя соос данъясько но, нылъёссэс егит пиос яратыны кутскизы ни шуыса. Христиан нравственностьлэсь чылкытлыксэ туж ик чакламтэзы удмуртъёслэн котькытын шӧдӥське, соин ик законэз вамыштыса нылпи ваён учыръёссы соослэн ӧжыт ӧвӧл.Ултӥян соос понна луэ, куке нылпизэс сантэм каро. Кык тушмонасьёс куспын тужгес лек юриськон луэ, инмар нылпи медам сёты яке соос кулэмен мед вордскозы шуыса." Нош табере - язычникъёслэн-удмуртъёслэн куриськонзы, кудӥз юрттэ, юрттылӥз но калыкмылы секыт вакытъёсы - будэтэм бакча емышъёссэ бичаны, пудо вордыны, куректонэз-чигиськонэз вормыны. "Остэ, Инмаре-Кылдысинэ, кизем-паккем юэз ожо сяен ожматсалыд ке, бадьпу сяен пушмытсал ке, кызьпу сяен тэлеӟытсал ке, коньы бызьымон, сёр бызьымон нюпырчкыса сётсал ке; октон-калтон дыръя культо вӧзы культо ке пуктысал, чумолё вӧзы чумолё ке пуктысал, пыртэме ваён дыръя дас кык йыло кабан ке люкаськысал, обиньысь ваён дыръя коскиен вайса быронтэм тыр дэлеттэ- берекеттэ Тон ке сётсал; сусекъёс улласянь пуньырӟымон, вылласянь тудӟымон, будӟын эксейлы выт-корс тырымон ваньбурдэ Тон сётсал ке, сюмысо урысэзлэсь утьса вордысал ке, жильыё кортэзлэсь утьсал ке; пыдын ӵемтэмлэсь , кылын янгышамлэсь утьсал ке. Тулыс вапумен пудодэ-животтэ бусые поттон дыръя выжылэсь, нюк-гоп дэрилэсь, сьӧсьлэсь- каблэсь, лул ке - пӧськылэсь, черлэсь-чурлэсь, лыктэм кыльлэсь-дэйлэсь утьсал ке; гид тыр, луд тыр карысал ке. Гужем нуналэн шуныт-лэськыт нуналъёстэ ке сётсал, небыт зоръёстэ сётсал ке, сильтӧл, лек зоръёсыдлэсь утьсал ке. Оло азьло вераноез сюриз, оло берло вераноез сюриз, милесьтым мулятымтэмес ачид ӵошкаты". Оло, ӵапак таӵе молитва-куриськон ик юрттыны быгатоз на асьме удмурт калыкмылы? Удмурт вӧсь но куала пумысен йырады-визьмады бергась малпанъёстэс, ӵектонъёстэс ивортыны куриськом таӵе телефонъя: 22-64-47. Тӥледын вераськоз Владислав Аксямович Якупов. Серафима ПУШИНА-БЛАГИНИНА. Кун Кенеш ивортэ Кун Кенешлэн Тӧроез Александр Волков Москваын пумиськиз Россиысь Правительстволэн Тӧроеныз Виктор Черномырдинэн. Солы сётэмын Воткинскысь машина лэсьтон заводлы, Ижевскысь электромеханической заводлы юрттыны куронэн гожтэтъёс. Соос эскеремын луозы. Виктор Черномырдин пыриськоз Калашниковлэсь автоматсэ кылдытэм дырысен 50 ар но Ижевскын пыӵал тӥрлык лэсьтыны кутскем дырысен 190 ар тырмонлы сӥзем ужрадъёсы. Нациосын ужанъя но федеративной кусыпъёсъя министрен Вячеслав Михайловен пумиськонын эскеремын Куӟебай Гердлэн юбилееныз герӟаськем ужпумъёс. Солы сӥзем книгаосты, статьяосты поттыны Удмуртие 150 миллион манет вуиз ини. Куӟебай Гердлэн нимыныз герӟаськем программаез быдэстонэ ватсаса 500 миллион манет висъян сярысь ужпум ӝутэмын. Кун Кенешлэн пресс-службаез. "Ижмашысь" коллективлы Туннэ тӥ пусйиськоды Ижевскын пыӵал тӥрлык поттыны кутскем дырысен 190 ар но АК- 47 автоматлы 50 ар тырмонэз. Заводлэн кык даур ӵоже историез данъяськымон. 1807 ар июнь. Уралысь заводъёсын кивалтӥсь А. Ф. Дерябин нырысетӥ корпуслы инты быръем бере, кӧня ке толэзь гинэ ортчиз ай, нош завод пыӵал поттыны кутскиз ини. Татын производство йылэмъя Россиялэн но кужмыз юнмаз. 1812 арын Отечественной война вакытэ ӟуч армие Ижевскысь 6 сюрс пыӵал но сюрс пала тӥр келямын вал. Заводысь пыӵал поттӥсьёслэн быгатэменызы, Ижевск Россиын гинэ ӧвӧл, быдэс дуннеын тодмо. Солэн ож тӥрлыкез мукет кунъёсын но вылӥ дунъяське. Кылсярысь, тодмо конструкторлэн Михаил Тимофеевич Калашниковлэн АК-47 автоматэз армиын али но кутӥське на, малы ке шуоно, солэсь ӟечгес автомат малпамтэ на. Зарни киос - озьы шуыны луоз. Ижевскысь пыӵал дурисьёс сярысь. Быдӟым Отечественной война вакытэ соос, Россиялэсь ож кужымзэ будэтон понна, уно лэсьтӥзы. 1941 арын Ижевскысь завод нуналскын 10 сюрс винтовка лэсьтылӥз. Дуннеысь одӥг предприятие но сомында ноку но ӧз поттылы. Ӟечкыласьком тӥледыз заводады пыӵал тӥрлык поттыны кутскем дырысен 190 ар но Калашниковлэн автоматэзлы ӝыны даур тырмемен. Сӥзиськом тӥлед но ӵыжы-выжыостылы шудбур, тупан но ваньзэ ӟечсэ гинэ! Праздникен! Удмурт Республикаысь Кун Кенеш Удмурт Республикаысь Правительство "Ижысь пыӵал тӥрлык: толлоез но туннэез" Юбилейлы сӥзьыса, Национальной кун музейын выставка усьтӥськиз. Отын ХИХ даурысен туала вакытозь "Ижмашен" поттэм пыӵал тӥрлык но сое бичан бордын ужам адямиос возьматэмын. Выставкае сюризы 1812-1814 аръёсы Наполеонэн жугиськонын, 1877-1878 аръёсы ӟучъёс но турокъёс куспын пуромем ожмаськонын кутӥськем пыӵал тӥрлыкъёс, Быдӟым Отечественной война аръёсы тодмо луэм "трёхлинейка". Конструкторъёсын М. Т. Калашниковен но Е. Ф. Драгуновен бичам пыӵал тӥрлык тужгес бадӟым инты басьтэ. Аслаз историез пӧйшуранын кутӥськись тӥрлыклэн но. Сое Октябрь революцилэсь азьвыл ик бичаны ӧдъязы, заводын но, нимаз адямиослэн фабрикаосазы но. Туннэ со быдэс выльдэмын. Спортивной пыӵал тӥрлык кемалась уг потто на. Выставкаын валтӥсь инты висъямын биатлонын кутӥськись винтовкаослы - нырысетӥ БИ-59-ысен кутскыса, туала БИ-7-2-озь. Выставка тунсыко луыны кулэ Ижын улӥсьёслы но, куноослы но. Россия Федерацилэн Президентэзлы Б. Н. Ельцинлы, Россия Федерациысь Правительстволэн Тӧроезлы В. С. Черномырдинлы, Россия Федерациысь Федеральной Собранилэн Федерацияя Кенешезлэн Тӧроезлы Е. С. Строевлы, Россия Федерациысь Федеральной Собранилэн Кун Думаезлэн Тӧроезлы Г. Н. Селезневлы Вазиськон сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Кутоно Удмурт Республикаысь Кун Кенешлэсь Россия Федерацилэн Президентэзлы Б. Н. Ельцинлы, Россия Федерациысь Правительстволэн Тӧроезлы В. С. Черномырдинлы, Россия Федерациысь Федеральной Собранилэн Федерацияя Кенешезлэн Тӧроезлы Е. С. Строевлы, Россия Федерациысь Федеральной Собранилэн Кун Думаезлэн Тӧроезлы Г. Н. Селезневлы Вазиськонзэ, Удмурт Республикалы 1998 арын улон юртъёсты, жилищно-коммунальной хозяйствоез, социальной удысысь юртъёсты выжтон но возён понна коньдон висъяны курыса. Удмурт Республикаысь Кун Кенешлэн Тӧроез А. А. Волков. Ижевск город, 1997 арын 17 октябре. � 489-1 Сандормох бӧрдӥз... Та нуналъёсы трос синву кисьтӥськиз карел музъем вылын - Медвежьегорск но Повенец вискысь Сандормох тэльын ортчиз куамынэтӥ аръёслэн пумазы янгыштэк бырем адямиосты буре ваён. Соос пӧлын быдӟым удмуртъёс но - Куӟебай Герд, Константин Яковлев, Иван Бурдюков. Соловки шормуӵысь лагере пытсамъёсты ыбылэм дырысен куатьтон ар тырмонлы сӥзьыса, Сандормох тэльын усьтэмын мемориал. Быремъёсты буре вайыса вераськизы Медвежьегорск ёрослэн йырыз Гурген Гулиев, Карел Республикалэн Кивалтэтэзлэн Тӧроезлэн воштӥсез Сергей Яскунов, Кун Думалэн депутатэз Сергей Ковалев, Россия Федерацилэн Президентэзлэн Борис Ельцинлэн визь-кенеш сётӥсез Алексей Новиков, янгыштэк быдтэмъёслэн ӵыжы-выжыоссы, мукет адямиос. Ортчем шимес учыръёсты эшшо золгес тодэ вайыто гуос вадьсы пуктылэм пу киросъёс. Мемориал выжые выдӥзы льӧль сяськаос. Е. ВИНОГРАДОВА. Нуналлэн тодметэз Вашкалаосмылэн чакламзыя лымы кот музъем вылэ усиз ке, тулыссэ уно кечсинъёс сяськаялозы. Лымы кынтэм музъем вылэ усиз - вуоно арын ю-нянь удалтоз. Ноябре чибиньёс потӥзы - толэд шуныт луоз. Ӵуказе - Садок Артемийлэн нуналэз. Садоклы юнме адями быронлэсь утьыны курыса вазисько. Дэй висёнъёсты эмъяны куро. Та нуналэ... ар талэсь азьло 1939 арын 1 ноябре Украиналэн но Белоруссилэн шунды пуксён палъёссы СССР-е пыртэмын. Львов, Брест, Гродно городъёс 1939 арын сӥзьылозь буржуазной Польша ки улын вал. 1941 арын 3 ноябре котыртэм Ленинградысь Ладожской ты пыр телефон связь кыскемын. 1942 арын 2 ноябре СССР-ысь Верховной Советлэн Президиумезлэн Указэзъя кылдытэмын немецко- фашистской захватчикъёслэн асьме странамылы ыштон ваемзэс эскеронъя комиссия. "Удмурт дуннеын" - Александр Волков "Удмурт дунне" газетлэн вордскем нуналыз азьын, 30 октябре, редакциямы вуылӥз Удмурт Республикаысь Кун Кенешлэн Тӧроез Александр Волков. Газетын ужасьёсты со тодматӥз шаерамы кылдэм югдурен, вераз та нуналъёсы ортчоно ужрадъёс сярысь, валэктӥз журналистъёслэн уно юанъёссылы. Асьме ваньбур поттӥсьёслы умой-умой юрттытэк, улонмы уз тупатскы, пусйиз республикалэн кивалтӥсез. Со озьы ик оскемзэ вераз, Удмуртъёслэн ВИ ӧтчамзы ӟеч ортчоз шуыса. И. КРИЧЕВ. Туспуктэмез Г. ЮСАЕВЛЭН. Чуръёс, чуръёс... Ижын потӥсь газетысь "Жизнь - решето..." или одиннадцать вопросов для Валентина Тубылова" статьяез лыдӟыса, олокӧня уй умме усьыны ӧй быгаты. Кинлэн визьмыз тырмем сыӵе йӧн-йӧн удмурт воргоронэз ултӥяны? Лыдӟыса-лыдӟыса паймисько. Мон адӟисько та материалысь вань удмурт калыкез шузи каремзэс. Вылтыр ик юзыр-кезьыр луэ. "Удмурт кенешлы" кивалтӥсе бырйизы ке, Валентин Кузьмичлэн кужымез но, визьмыз но тырмоз удмурт калыкез понна ужаны. Удмуртлык понна лулыныз- сюлмыныз тыршоз. Ваньмыз кивалтӥсьёс Валентин Кузьмич кадь луысалзы ке, улонмы ӧраз пырысалыз ини. Мон гинэ озьы уг малпаськы, тросэз озьы шуо. Валентин Кузьмичлэн улон даурез кузь медло. Тазьы ултӥян кылъёслы ноку но медаз сётскы. Чиданэз мед тырмоз. Ас калыкез понна сюлмаськись муртлэн та дуннеын нокыӵе сьӧлыкез уз луы. Валентин Кузьмич ноку но коркась корка ӧз ветлы, уз ветлы, ассэ кытчы ке бырйыны ӵектыса. Сыӵе ӧвӧл со. Берло дырозь асьме республикаын калык тупаса улӥз. Та материал нациос куспын ог-огдэ адӟонтэм карыны, керетыса улонэ, вир кисьтонэ ӝутэ. Со, мон сямен, быръёнъёс азьын юри косыса гожтэмын. Шонер валалэ монэ, огшоры удмурт нылкышноез. Гажаса но яратыса - Пичи Пургалась АЛЕКСАНДРОВА Галина Яковлевна. Шӧкыч ПОКУС-МОКУС, яке кызьы пӧртмасько Киясаысь сюрес лэсьтӥсьёс Ярато ик пӧртмаськыны Кияса палъёсын. Тужгес но сюрес лэсьтӥсьёс. Бен, сюресъёсты соос чебер но вольыт лэсьтыны тыршо, дыр, но... Пӧртэм гожъямъёсты гинэ куддыр мыдлань "суреданы" шедьто. Оло юри озьы лэсьто, оло янгышен. Яке соослэн быгылес йыразы валлэн йырвиымез интыяськемын, яке воксё асьсэос но валлы пӧрмытскемын. Иське, кызьы валэктод соослэсь пӧртэм пӧртмаськонъёссэс. Тани басьтом Шихостанка шурез. Мудрон лэсьтӥськисьёслэн сюлмаськеменызы, со пӧрме "р. Шехиетанка" гожтэмлы. Ӵапак сыӵе пул интыямын Первомайское но Яжбахтино гуртъёс куспын. Бен, татын пичи ке но валамонэз вань - букваос гинэ сураськемын. Нош мукетыз учыр воксё валантэм. Сальинка шур (удмуртъёс сое Тайвади шуо на), табере нимаське, пе, Кырымлинка. Сыӵе пул интыяллям сюрес выльдӥсьёс выль лэсьтэм выж вӧзы. Вуж Салья гурт Крыме интыяськемын, кожалод. Тӥни сыӵе покус-мокусъёс возьматыны быгато Кияса палась сюрес тупатӥсьёс. Ярам ай, Кырыкмас шурлэсь нимзэ воштӥллямтэ. Нош али Ермолаевое мынӥсь сюрес вылэ асфальт кисьто. Та гуртын улӥсьёсты но, вуж сальяосты сямен, Крым пала медаз вуттэ вылэм. Кин тодэ, оло, Ермолаево интые, гожтозы "Юрмала". Вот таиз усто покус-мокус луысал. Собере, оло, Кияса сюрес лэсьтӥсьёслэн тыршеменызы, быдэс Россиысь кырӟасьёслэн "Юрмала-98" фестивальзы Удмуртиын ортчысал. Соку удмурт шаермылэн данэз но ӝутскысал. Нош ваньмыз со сюрес урдсысь гожъямъёсын сэрен. Озьы бере, дано мед луозы Кияса ёросысь сюрес выльдӥсьёс! Г. ВАСИЛЬЕВ. Фотосуредэз Д. ПОЛУХИНЛЭН. Удмурт Республикалэн Данъян пулаз пыртон сярысь Удмурт Республикаысь Кун Кенешлэн Президиумезлэн но Правительстволэн Постановленизы 1997 арын ужазы вылӥ азинсконъёссы понна но Республикалэсь нуналзэ пусйыса, Удмурт Республикаысь Кун Кенешлэн Президиумез но Правительство пукто: Удмурт Республикалэн Данъян пулаз пыртоно: Ижевскысь пассажирской автотранспортъя производственной объединенилэн 2 номеро предприятиысьтыз автобусъёсын 3 номеро колоннаысь коллективез, колонналэн кивалтӥсез - В. С. Гладышев; Удмурт кун университетысь уголовной правоя но процессъя кафедраысь коллективез, кивалтӥсез - З. З. Зинатуллин; Акциосын "Ижсталь" огазеяськонысь коллективез, валтӥсь директорез В. В. Моисеев; Гыбед поттонъя "Удмуртторф" производственной объединениысь коллективез, валтӥсь директорез - А. В. Марченко; Глазовысь нылпи юртысь-интернатысь коллективез, директорез - Е. Л. Скиба; Глазовысь сиён-юонъя комбинатлэн "Апрель" магазинысьтыз коллективез, кивалтӥсез - Р. Р. Ситникова; Акциосын "Можгинское строительное объединение" огазеяськонысь коллективез, валтӥсь директорез - Р. Р. Муфтахов; "Радиотехника" ПО-ысь коллективез, Сарапул город, валтӥсь директорез - Г. Е. Абросимов; Алнашысь райполэн сиён-юонъя комбинатысьтыз коллективез, директорез В. Н. Левранов; Вавож ёросысь "Колос" эштосысь коллективез, тӧроез - В. А. Красильников; Грах ёросысь почта кусыпъёсъя гердысь коллективез, кивалтӥсез - В. В. Гладков; Гурт хозяйствоя Уральской школа-колледжысь коллективез, Сарапул ёрос, директорез - Л. Л. Садовников; Уваысь жилищно-коммунальной хозяйствоя производственной предприятиысь коллективез, кивалтӥсез - К. А. Коняров; Абашева Хазяр Салихутдиновнаез - Сентегысь психоневрологической интернатлэсь директорзэ, Завьял ёрос; Алабужев Сергей Алексеевичез - акциосын "Порт "Камбарка" огазеяськонысь кранлэсь электромеханиксэ; Алексеев Юрий Петровичез - "Рассвет" эштослэсь тӧрозэ, Пичи Пурга ёрос; Алексеева Надежда Аркадьевнаез - Выль Казмасысь фельдшерско-акушерской пунктэн кивалтӥсез, Завьял ёрос; Антонова Екатерина Леонидовнаез - Бобья-Учаысь культурая юртысь нылкышно арганчиослэн калык ансамбленызы кивалтӥсез, Пичи Пурга ёрос; Бабинцева Светлана Анфирьевнаез - Глазовысь райполэн Чура гуртысь магазинысьтыз вузкарисез; Беленький Илья Григорьевичез - Ижевскысь УВД-лэн ГАИ-езлэн ОБДПС-ысьтыз сюресъёсты чакланъя службаысь валтӥсь инспекторез; Беляева Любовь Алексеевнаез - Ижевскысь 22 номеро промышленно-финансовой лицейысь производстволы дышетӥсь мастерез; Березнев Геннадий Михайловичез - акциосын "Сарапульский мясокомбинат" огазеяськонлэсь директорзэ, Сарапул город; Бледных Светлана Васильевнаез - Нылпи творчествоя юртысь шаерез валтӥсь методистэз, Дэбес ёрос; Вавилов Владимир Ивановичез - акциосын "Камбарский завод газового оборудования" огазеяськонлэсь валтӥсь директорзэ; Вахрушев Василий Петровичез - Якшур-Бодья ёросысь Ожысь но ужысь ветеранъёслэн кенешенызы кивалтӥсез; Вечтомова Надежда Вениаминовнаез - Шор Прикамьелэн историезъя но культураезъя музейлэсь директорзэ, Сарапул город; Витвинов Николай Александровичез - "Россия" колхозысь трактористэз-машинистэз, Можга ёрос; Грахов Валерий Павловичез - акциосын "Камский завод железобетонных изделий и конструкций" огазеяськонлэсь валтӥсь директорзэ, Воткинск ёрос; Гусева Таисия Петровнаез - Ижевскысь гурт хозяйствоя кун академилэн "Июльское" учебно- производственной хозяйствоысьтыз зоотехникез-селекционерез, Воткинск ёрос; Загуляева Валентина Александровнаез - Удмурт Республикаысь Национальной кун театрысь актрисаез; Зенин Владимир Николаевичез - "Вараксино" тылобурдо фабрикалэсь директорзэ, Завьял ёрос; Иванова Глафира Гавриловнаез - Ижевскысь медико-социальной экспертизая бюроысь невропатологез-экспертэз; Калинина Роза Ивановнаез - Воткинскысь пинал натуралистъёслэн станцизылэсь директорзэ; Касимова Людмила Васильевнаез - Кезысь райполэн правлениеныз кивалтӥсез; Квитницкая Людмила Ивановнаез - "Ижевск - Москва" 25 номеро поездысь проводникез; Кишкан Петр Михайловичез - акциосын "Ижмебель" огазеяськонлэсь валтӥсь директорзэ; Коновалов Валерий Николаевичез - акциосын "Умуртнефть" огазеяськонысь буровой мастерез; Копылов Василий Спиридоновичез - Сарапулысь автотранспортъя производственной объединениысь автомобильлэсь водительзэ; Коробейникова Людмила Николаевнаез - Киясаысь шор ёзо школаысь дышетӥсез; Кутявин Владимир Алексеевичез - "Ижавиа" предприятиысь ТУ-134 самолётлэсь командирзэ; Лубнин Николай Ивановичез - акциосын "Чепецкий механический завод" огазеяськонлэн 42 номеро ремонтно-механической цехысьтыз 8-тӥ разрядэн котельщикез, Глазов город; Максимов Валерий Геннадьевичез - "Зуринское" сельхозпредприятиысь техникез-осеменаторез, Игра ёрос; Мушин Виктор Андреевичез - Шаркан ёросысь почта кусыпъя гердэн кивалтӥсез; Останин Николай Петровичез - "Рыбовод" крестьян хозяйствоен кивалтӥсез, Селта ёрос; Перминов Алексей Аркадьевичез - Лэсьтӥськонъя 17 номеро управленилэн 8 номеро СУ-ысьтыз электросварщикез; Печищева Эльвира Васильевнаез - Ижевскысь чеберлыклы дышетонъя 83 номеро школалэсь директорзэ; Плетнев Виктор Петровичез - Госрезервлэн базаеныз кивалтӥсез, Балезино ёрос; Пономарева Любовь Григорьевнаез - "Родина" колхозысь дояркаез, Сарапул ёрос; Попков Александр Романовичез - Сюмсиысь сюрес лэсьтонъя участокысь автогрейдерлэсь машинистсэ; Саламатов Владимир Александровичез - "Удмуртавтодор" кун предприятилэн Юкаменскысь сюрес лэсьтонъя управлениезлэсь кивалтӥсьсэ; Свалов Петр Анатольевичез - "Красногорскагропромснаб" предприятилэсь директорзэ, Красногорск ёрос; Созонова Галина Николаевнаез - Кизнер хлебокомбинатысь нянь пыжисьёслэн сменаенызы кивалтӥсез; Созыкина Нина Ивановнаез - акциосын "Ижмолоко" огазеяськонлэн мороженой поттонъя фабрикаысьтыз мастерез, Ижевск город; Степнова Зоя Ивановнаез - акциосын "Сактон" огазеяськонлэсь валтӥсь директорзэ, Ижевск город; Столов Евгений Вадимовичез - Ижевскысь егитъёслэн "Молодой человек" театрзылэсь валтӥсь режиссёрзэ; Субботин Сергей Петровичез - "Санаторий "Ува" огазеяськонлэсь директорзэ, Ува ёрос; Фокин Валентин Васильевичез - Ижевскысь гурт хозяйствоя кун академилэсь ректорзэ; Харина Наталья Алексеевнаез - Нырысетӥ республиканской клинической больницаысь валтӥсь врачлэсь акушерствоя но гинекологияя воштӥсьсэ; Червяков Виталий Герасимовичез - акциосын "Удмуртэнерго" огазеяськонлэн Сарапул ТЭЦ-ысьтыз директорез; Чирков Александр Николаевичез - Глазов лесхозлэн Яр лесничествоысьтыз лесникез; Шаклеин Александр Юрьевичез - Удмурт Республикаысь МВД-лэн криминальной милициысьтыз уголовной розыскъя управлениен кивалтӥсьлэсь воштӥсьсэ; Шилько Сергей Алексеевичез - Удмурт Республикаысь Чорыгъёсты утёнъя, будэтонъя но чорыганэз радъянъя инспекциысь кун инспекторез; Щепина Зинаида Анатольевнаез - Лэсьтӥськонъя 18 номеро управленилэн Ижевскысь производственной предприятиосъя комбинатысьтыз станочникез. Удмурт Республикаысь Кун Кенешлэн Тӧроез А. А. Волков Удмурт Республикаысь Правительстволэн Тӧроез П. Н. Вершинин Ижевск город, 1997 арын 21 октябре. � 406/ 944. Берекет ТӤЛЕДЛЫ, НЫЛПИОС Алигес потэм газетамы (18-тӥ октябре) киослэсь, чиньыослэсь борддоре пуктэм луло вужеръёсын туспуктэмъёс сётӥмы. Таяз "Берекетын" тодматӥськом мукет тусбуйёсын. Малпаськомы, тӥляд но, пинал лыдӟисьёсмы, одно ик пӧрмоз шуыса. Л.ВАСИЛЬЕВА. Берекет Тӥляд куремдыя Гажано редакция! Гожтэт пыр тӥледлы куронэн вазиське Пичи Пурга ёросысь Ильинск черкогуртын улӥсь Евдокия Андреевна Николаева. Гажаса лыдӟисько "Берекет", "Наталь" бамъёсты, тужгес но удмурт кырӟанъёсты. Печатлалэ вал газет бамады Пантелей Кузнецовлэсь кырӟанзэ, кудзэ быдэстэ Людмила Ахтариева. Жаляса верано, кырӟанлэсь нимзэ уг тодӥськы, нош таӵе кылъёссэ: "Шуозы монэ озьы но, я тазьы но шуозы. Нокыӵе куректонэз но чик ӧвӧл кожалозы..." ялан ас поннам кырӟаса ветлӥсько. Куронме быдэстоды, дыр, соин азьавыл ик тау карисько. Улӥськод ке кырӟанэн Кылъёсыз А. Белоноговлэн Крезьгурез П. Кузнецовлэн Мон озьы но гурлало но, Мон тазьы но гурлало. Мӧзмонме но, ӝожъёсме но Кырӟанэн ӵош ӧръяло. Припев: Шуозы монэ озьы но, Я тазьы но шуозы. Нокыӵе куректонэ но Чик ӧвӧл, кожалозы. Кин ке но шудо вордске, дыр, Кырӟась мурт, шуо, шудтэм. Улонын эшшо секыт нош, Кырӟанэн эшъяськытэк. Припев: Сюлэме пыре мӧзмон но, Куректон но лыктылэ. Нош кырӟан матысь эшед кадь Юрттылэ-буйгатылэ. Нырысетӥ куплетсэ припевеныз ӵош выльысь кырӟано. Берекет Милям дэмланъёсмы Ӟеч скаллэн сюрыз - котырес, быжыз - пуштырес Матэкто кезьытъёс. Ӝоген гуртын улӥсьёс пудооссэс одӥгъёссэ сӥльлы вандыны кутскозы, нош выжы уськытыны кельтонооссэ - толйытозы. Макем ӟеч пудо выжы, сокем трос йӧл, сӥль, курег пуз но мукет басьтод. Тужгес но скалэз валаны кулэ. Сое угось уно аръёс ӵоже вордоно луэ. Соин валче кӧня ке дэмланъёс сётэме потэ: ӟеч, таза, уно йӧл сётӥсь скалдэс сӥльлы вандыны медад шедьтэ. Али пӧртэм скал выжы уськытэмын ини. Вань соос пӧлын йӧл сётӥсьёсыз но, юри сӥльлы вордоноосыз но. Соосты висъяны луэ мугорзыя. Йӧл сётӥсь скалъёсты урдэстӥзы учконо ке, соослэн мугорзы вандэм конуслы (усеченной конуслы) кельше, (учке 1-тӥ суред вылысь), нош сӥль сётӥсьёсызлэн - ньыль сэрего (2-тӥ суред). Озьы ик быръёно скалдылэн сарвылыз (таз) шонер но паськыт мед луоз. Сыӵе пудоос кунянзэс капчиен ваё. Таза скаллэн гонэз шунды шорын чильк-вальк ворекъя, нош висисезлэн бездыт луэ. Висись пудолэн тыбыр шораз мыжыкен зӥбиськод ке, карнан кадь някырске. Йӧлоезлэн йырыз но пичи луыны кулэ. Нош бадӟым, ошлы кельшись йыроез трос йӧл уз сёты. Сюръёсыз пушпала котырскемын, нош кукъёсыз шонересь луыны кулэ. Вераез, вылласянь учкыса, ӵашалы яке ванналы мед кельшоз, ноныосыз огбыдӟаесь но ог-огзылэсь одӥг кемын интыяськемын медло. Кыскем бере ӟеч скаллэсь веразэ сьӧртӥз учконо ке, туж трос кисыриосыз луо, нош ӧжыт йӧло пудолэн соос одӥг яке кык, яке воксё но уг луо. Йӧллэсь кизерзэ яке напсэ валаны луэ кыскемъя: кизерез ведра кузя ӝог ваське, напез - каллен. Скаллэн йӧлыз куатетӥ кунян вайытозяз (куд-огезлэн дасэтӥ но) ялан будэ но будэ, отӥяз синыны кутске. Йӧло скалэз тодыны луэ на йӧл гогылэн (молочный колодец) быдӟалаезъя но. Со интыяськемын пудолэн кӧт улаз вераезлэсь 3-4 вись кемын. Трос йӧл сётӥсезлэн со куинь чиньы тэрымон, солэсь но бадӟымгес луэ, шоро-куспоезлэн - кык, нош ӧжыт сётӥсезлэн туж пичи. Скаллы одӥг килограмм йӧл сётон понна, вераетӥз 400-500 литр вир ортче. Ӵапак отчы мынӥсь вирсэръёс йӧл гогы пыр ортчо. Соин ик со бадӟым ке, йӧл но верае трос люкаське. Ӟеч скалэз тодыны луэ на сизьыметӥ но тямысэтӥ урдлы висъёсъя но. Тыбырысен одӥг но ӝыны вись кельтыса, со инты кык чиньы тэрымонлэсь но паськытгес ке, иське, скал йӧло. Скалэз озьы ик быжызъя но чаклало. Быжызлэн йылыз огшоры шонер гоно ке, со йӧлтэмгес луэ, гонэз кульчояськем, пуштырес ке - йӧло. Нош луэ-а скаллэсь арессэ тодыны? Луэ. Сюрызъя. Кунян ваемезлы быдэ пудолэн сюраз кульчо кылдэ. Муры ке кылемын, со аре кульчолэн вискыз, мукетъёсыныз ӵошатыса, кык поллы паськыт луэ. А. НИКИТИН, зоотехник. Калыклы - усто мебель Берло дыре лэсьтӥськон ужъёс сюбегамен, та удысысь 17 номеро управление шуг-секытысь потыны пӧртэм амалъёс утча. Производственно-технологической комплектацияя управлениез кылдытӥз хозрасчёт амалэн ужась мебель поттонъя участок. Со лэсьтэ пӧртэм мебель, но тужгес но басьяськисьёслы кельше "Услада-1", "Услада-М" но "Орхидея" диванъёсыз, кӧлан койкаосыз, кухняе но ӧс дорысь висъетэ мебель. Г. ВАСИЛЬЕВ. Вунэтод шат со аръёсты 1941 арын Ижысь машина поттон завод шуг-секытъёсын пумиськиз. Фронтлы кулэ вал винтовкаос но карабинъёс. Уго пыӵал тӥрлык поттӥсь Тулаез куашкатӥзы, Сестрорецкысь заводэз Уралэ келязы. Ижысь завод вань кужымзэ пыӵал поттонлы люкано луиз. Нош татысь 40 номеро цехын ӝегаз ложаос лэсьтон. Удмуртие соку Подольск заводысь инженер Николай Иванович Палладин вуиз. Солэн ӵектэмезъя ик ужез ӝегатӥсь цех уен-нуналэн ужаны ӧдъяз. Вакчи дыр куспын лэсьтэмын вал шелепъёсты келян конвейер, ложаосты йылаз-пумаз вуттыны автоматъёс. 12 час ӵоже ужамзы бере, калык цех доры сюрес лэсьтыны потаз на. Войналэн нырысь нуналъёсаз ик тодмо луиз, тушмонлэсь танкъёссэ быдтон пыӵалъёс ӧвӧл шуыса. "Ижмашысь" конструкторской отделэз та ужез быдэстыны куризы. Инженеръёс Б. Ф. Файзулин, В. П. Камзолов, А. А. Рябов но мукетъёс пуктэм дыр куспын выль пыӵалъёс кылдытӥзы. В. ЧЕРНОВ. Ижевск вадьсын жингырто гырлыос Юбилеез сӥё-дано пусъён усьтэмын Невской собор дорын. Ижевск вадьсын жингырто гырлыос, чирдэ черкысь хор - озьы Удмуртиысь гинэ ӧвӧл, быдэс Россиысь одӥгез бадӟым предприятилы "Ижмашлы" инмарлэсь бур улон куро. 190 ар ортчиз Императорлэн Уралын пыӵал тӥрлык поттонэз паськытатыны курыса Указэз потэм бере. Та ужрад вакчи дыр куспын радъямын вал. Уралысь заводъёсын кивалтӥсь А. Ф. Дерябин Иж дуре пуктоно нырысетӥ корпуслы инты быръем бере кӧня ке толэзь гинэ ортчиз ай, нош завод пыӵал поттыны кутскиз ни. Со дырысен трос вуос кошкизы, заводын трос ужась киос воштӥськизы. Соосты тодэ вайытэк кельтыны уг луы. "Ижмашен" 24 ар ӵоже кивалтӥз Социалистической Ужысь Герой И. Ф. Белобородов. Туннэ солы заводлэн юртэз борды мемориальной пул шуккемын. Люкаськемъёс пӧлын ачиз Михаил Тимофеевич Калашников но. Солэсь АК-47 автоматсэ кылдытэмлы 50 ар тырме. Та нуналэ ик бадӟым культурной программа ортчиз Ижысь пыӵал тӥрлык поттон заводэз кылдытӥсьлэн А. Ф. Дерябинлэн памятникез дорын. ШӦКЫЧ Вот тыныд юача! Юмореска Мунчолэсь, шуо, пӧсьсэ ӵынызъя уд тоды, адямилэсь визьзэ, пе, юамезъя уд вала. Одӥг корреспондент пыдлось гуртын пумиськиз лапег но ӝужыт воргоронъёсын. Соос кык ӵошен гинэ капка азьысь коръёс вылын кылзэс лӧдыса пуко вал. Укыр трос "супыльтон" эмъюм вераллям, лэся. Ог-огзэс куспетӥ карыса, малпанъёссэс жильдо но вӧло ук. Кырӟаны дасяськись мурт сямен, ньылонзэс волято, кожалод. Со но та юанъёс бере корреспонт валатскиз: таос, пӧй, тӧлэз ӵыжаса ветлӥсьёс. Тунсыко потӥз, лэся, соосын вераськыны, сётӥз музон юан: "Кызьы аракы пӧрме яке кытысь суралтэм, брага лэсьто?" Таиз пумысен пичи но могӟет ӧй вал: кушаса кадь сётӥзы. Нош ӝожомемзэс ӧз ватэ. Мани-мани, шуо, уг тырмы. Ужтэмъёслэн радазы сылӥськом, пе, отысь но коньдонзэ кема возьмано луэ. Лӧптэм мылкыдзэс эркынак усьтоно кожазы, дыр. Сьӧрлось мурт уго соосты валалоз, жалялоз, эшшо курытэныз утялтоз, малпазы. Эх, бен выро ук! Берпалазы пычей каръяськем, кожалод. Кӧй веръям бере кадь ымдуръёссэс нюло, ӵушыло. Синъёссы нош, синъёссы! Йӧлвыл утчась коӵышлэн музэн чиляло. Родняоссы но таӵеен ӧз адзылэ на, дыр. Воргоронъёслэсь куректэмзэс шӧдыса выллем, корреспондент пыдлось лулӟиз но йырвизьзэс сынаны ӧдъяз. - Кин со Александр Сергеевич Пушкин? - Пушкин? - ӝужытэз малпаськыса синзэ кыньыртӥз. - Ах, Пушкин? - Ма,- куспетӥ кариз лапегез,- Санко Пушкаез юа. Со милям закадычной эш. Букваосыз ӵош дышетӥм, одӥг парта сьӧрын пукимы. Нош сямыз? Чабкид ке но со тонэ вешалоз. Во! Только пӧламы ӧз пыриськы туннэ, изьвер пыдчиньы. Сьӧлыкез вань уго. Кыкетӥ кышноез быжзэ позыръя, дыр. Толон изъянтӥз, маял кадь супырӟемын вал. Корреспондент пумитазы номыр ӧз вазьы. Блокнотсэ ӟепаз интыяса, эшшо мыр-мыр учкиз на. Куртчоно ке, малпаз лэся, куаӵак куртчоно. - Нош кин со Иван Андреевич Крылов? - О-о, Кырыл Васяез юа ук. Тодӥськод-а, мар-а? - лӧптэмзэ ӧз ваты ӝужытэз.- Куке, оло, одӥг ӝӧк сьӧрын но пукиды? - Ӧз кылдылы,- пальышаз сьӧрлось мурт. - Нимтулзэ, милой, эн сура,- гырдалтӥсь вал сямен кутскиз лапегез.- Милям сое Васьлей Семоныч шуо. Зол воргорон, тузӥ пиосмурт! Сазь дыръяз кузьыли кадь ужа. Шораз вазьыны уд дӥсьты. Вот ымаз йӧтэ ке, "кайфует", паршивой. - Нош кин вал Красильников? - Вал, пе,- ашык ӝуждаез лобыны дасяськем тури сямен киоссэ вӧлъяз.- Милой, али но вань со. Туннэ ӵукна пумиськылӥ. Катар айбат, ужась. Кылзэ но шерыны вуоз, кутскем могӟетсэ но уз вунэты. - Э-э, Буёл Олёшез вера вылэм ук, - итӥськиз каланча ӝуждаез воргорон.- Кадырлы пиосмурт, адӟем карымон. Только паллянэ кысконэз вань, лешойлэн. Ми кадьёсын уг кушласькы. Ялан юртъер котыраз мар ке йыггетэ, йыринтэ. Кожалод, юртысьтыз тараканъёссэ улля. Демократично улыны дауртэ-а, мар-а? Нош ачиз со - шабаш! - Газет-журнал лыдӟиськоды-а? - меӵак юаз корреспондент. - Как-жо, лыдӟылӥм,- мылыз потытэк нёртӥз айы ӵӧж кадь лапегез. - Али ваньмыз коньдон вылэ пыкъяське. Кисыосамы тӧл шула. Вуоно ар понна туклячиен кенешим ай: парсьмес вузамы ке, шори вылэ кариськыса, одно газет-журналлы гожтӥськомы. Как-жо, ато улонлэсь бере кылёд. - Ӟеч малпамын,- пальышаз корреспондент.- Лыдӟиськемды ке но вунэмын, гурт калыктэс коть фамилиенызы тодӥськоды на. Со но ушъямон. Сьӧрлось муртэн воргоронъёс киоссэс сёткаса ик люкиськизы. Нош малпанзы пилем шоры пус пуктэм кадь луиз: курытэз ӧз донгиськы. Дыл-дыл сыло: мылкыдзы куашкамын, синъёссы сюбегамын, пыдъёссы шальтрамын. Ӝужытэз учке лапегез шоры, нош лапегез долка ӝужытэз шоры: "Вот тыныд чача, вот тыныд юача!" Виталий АГБАЕВ. Берекет Тӥ юады вал Кызьы дасяно кетчуп? Гажано редакция! Матрон апайды оломае но тодэ. Оло, кетчупез дасян сярысь но "Берекетты" пыр валэктоз. Магазинысь ялан басьтыны дуно, нош вуэм горд помидормы трос на ай. Э. ШИРОБОКОВА, Шаркан ёросын улӥсь. 5 кг помидорлы кулэ луоз стакан тыр векчи юдэм сугон, 160-200 г сакыр песок, 30 г сылал, 1 стакан 9 процентъем уксус, ческытатӥсь, аспӧртэм шӧм сётӥсь будосъёс - корица юдэс, ӝыны чечы пуньы сельдерей кидыс, ваньзэ быдэн 1 чечы пуньы изэм сьӧд пӧсьтурын, гвоздика, горчица кидыс. Помидорез юдоно но векчиятэм сугонэн ӵош пуктоно ляб тыл вылэ парыны, тушить карыны. Собере пуж пыр поттоно но ӝыныез бырытозь, пумен сураса пӧзьтоно. Ческытатӥсь будосъёсты, марляе керттыса, та пӧзись суретэ пононо. Йылтоно на сылал, сакыр песок, уксус но эшшо 5-7 минут пӧзьтоно. Табере будосъёсты марляеныз валче басьтоно, нош дась кетчупез чылкытатэм, пӧсятэм бутылкаосы кисьтоно но соку ик лач ворсано. Л. ВАСИЛЬЕВА. Удмуртъёслэн ВИ Ӧтчамзылы Гажано делегатъёс! Удмурт кунлыклэн кылдэмез но азинскемез, удмуртлыкез ӝутон удмуртъёслэн нырысетӥ съездъёсазы сюрессэс мытӥзы. Со вакытысен соос люконтэм герӟаськемын удмурт калыклэн тупаса, огкылысь улыны тыршеменыз, улонэ ваньзэ умойзэ гинэ пыӵатыны амалъёс утчаменыз. Соин ик удмурт ӧтчамъёс пӧрмизы сыӵе ужрадъёслы, куке огдырлы дугдоно но ортчем сюресэз тодэ ваёно, азьланез сярысь малпаськоно, шонер йылпумъянъёсы вуоно. Пӧртэм калыкъёслэн ужрадъёссы пӧлын удмуртъёслэн ВИ Ӧтчамзы нимысьтыз инты басьтэ. Со ортче выль даур азьын. Кыӵе тодон-валанъёсын, быгатонлыкъёсын отчы выжом, маин финн-угор но дуннеысь культураез узырмытом, кудпала историмес берыктом - таӵе малпанъёс асьмеды туннэ ик сюлмаськыто ини. Гажано делегатъёс! Ужды пайдалыко, ог-огдэс валаса, шонер решениос кутыны тыршыса мед ортчоз. Удмуртъёслэн ВИ ӧтчамазы ӝутэм ужпумъёс вань калыкъёслы тунсыко мед луозы, удмуртъёсты но ӟучъёсты, бигеръёсты но бесермянъёсты, поръёсты но чувашъёсты, быдэс Удмуртиез мед огазеялозы. Вольыт сюрес тӥлед! Удмурт Республикаысь Кун Кенеш Удмурт Республикаысь Правительство Финляндиын поттэм чылкытэсь но чебересь буёлъёс но лакъёс Панссаримаали - корт липетъёсты буян полуглянцевой алкидной эмаль. Ремонти-Ясся - котмемлы сётскисьтэм полуматовой акрилатной буёл. Эко-Джокер - матовой буёл. Нокыӵе зыныз уг шӧдӥськы. Миронол - пу но корт арбериосты буян синт. эмаль. Луя - полуматовой яке полуглянцевой акрилатной буёл. Улӥ этажъёсысь но подвалъёсысь висъетъёсты буяны мынэ. Пиртти - вӧлдэтъёсты но борддоръёсты буян водоэмульсия. Эмпире - мебелез, ӧсъёсты но укно рамаосты буян тиксотропной полуматовой аксидной эмаль. Бетолюкс - выжъёсты буян глянцевой уратано-алкидной эмаль. Валти колор экстра - пул буян антисептик. Кири - выжъёсты буян алкидной глянцевой лак. Техо - пу коркаосты чеберман буёл. Мааларин валколакка - ӧсъёсты но укно рамаосты буян полуматовой глянцевой синт. эмаль. Финляндиын поттэм вылӥ ӟечлыкен буёлъёс. Одӥг литрез окме 10-14 квадратной метр быдӟа интыез буяны. Магазинъёслэн адресъёссы: Ижевск, Ворошилов ульча, 25 номеро юрт. Тел. 26-29-13. Ижевск, Удмуртской ульча, 210 номеро юрт. Тел. 75-54-83. Воткинск, Ленин ульча, 16 номеро юрт. Глазов, Энгельс ульча, 18 номеро юрт. Офис: Ижевск, 9-тӥ Январь ульча, 245-а номеро юрт. Тел. 24-45-27. Вылӥ ӟечлыкен малярной ужъёсты быдэсъян инструментъёс. Лэсьтӥськонэ кутӥськись клейёс, плиткаосты юнматон арбериос но мукет. "Суоми" вузкарон юрт - Финляндиысь официальной представитель. Тае чиданы уг луы! РЕСПУБЛИКАМЫТЭК УМ КЫЛЕ-А? Куд-ог дядяйёслэн та улонмылэсь огсыр югдурзэ, ӧрзэ воштон пумысен олокыӵе но малпанъёс лыкто йыразы. Сюлмаськонъёссы шаермес, Удмуртимес кызьы ке но кужмоятон, вылӥе ӝутон, данзэ юнматон сярысь ӧвӧл, соос тыршо, лэся, республикамес маин ке но уллане уськытыны, лябӟытыны яке воксё быдтыны. Бен, бен! Бадӟымгес кенешъёсын но куд-огез дӥсьто таӵегес ӵектонъёс сётыны: Удмурт Республикалэсь, пе, нимзэ, статуссэ воштоно, сое улослы пӧрмытоно. Визьзы пачылась эшъёслэн одӥгезлэсь коть выжы адямилэсь, татын вордскем но будэм удмуртлэсь яке мукетызлэсь юаны тодазы лыктэ меда, та пумысен дэмлан нергеоссэс шара веракузы? Соглаш-а удмуртъёс но татын вордскем, будэм, та музъемез яратыны вуэмъёс республиказэс сокем-сокем ултӥяны? Соглаш-а Кун Кенешысь депутатъёс вылӥ верам ӵектонъёсын? Улонмы озьы но нуналмысь начарме, калыклэн мылкыдыз бугыръяське. Сыӵе вакытэ но кинъёс меда гомась сюлме эшшо юнгес кенӝись тылгизьы пазяны дӥсьто на? А. КУЛАКОВ. Ижевск город. Азьветлӥсез уг дуро кебитын Удмурт Республикаысь Егитъёсын ужанъя кун комитетлэн одӥгез чаклано удысэз - быдэ вуымтэослэн но егитъёслэн общественной огазеяськонъёссы. Соос пӧлы пыре удмурт егитъёслэн "Шунды" дэменлыксы но. Али соин кивалтэ Надежда Уткина. Тросэз лыдӟисьёсмы понна солэн нимыз герӟаськемын кырӟанэн. Но туннэ Надежда Уткина доръёсады уз пыры кырӟась луыса, солэн сюлэмшугъяськонэз - удмурт егитъёсты шаермылэн улоназ кыскон, соосты будэтон, улоназы оскон пыӵатон. Нош со понна кулэ зэмос азьветлӥсь. - Кӧня ке аръёс ӵоже удмурт егитъёслэн "Шунды" дэменлыксылэн азьветлӥсез луыса, кызьы учкиськод удмурт движение шоры? Кин сое валтыны кулэ? - Вань удмуртъёстлэн ВИ ӧтчамзылы сӥзьыса, Удмурт телевидениысь "Эзь" программа егитъёсын меӵак эфир ортчытӥз. Куд-огезлэн пырак юамез потӥз, кинэ, пе, адӟиськоды Удмуртилэн президентэз но "Удмурт кенешлэн" президентэз интыын. "Шунды" дэменлыклэн нимыныз вань егитъёс понна мон вераны уг быгатӥськы. Кулэ-а, ӧвӧл-а Удмурт Республикалы президент, соиз сярысь калык аслэсьтыз кылзэ вераны кулэ, референдум ортчытыса. Нош "Удмурт кенешлы" президентэ мон ачим нылкышноез но бырйыны пумит ӧй луысал. Шонер пусйиз со телепередачаын Андрей Прокопьев, Удмурт кун университетысь аспирант, "Удмурт кенеш" ассоциациен кивалтыны кулэ та движениын кема бергамтэ мурт, мед со луоз выль адями. Милесьтым ӵем дыръя юало, малы, пе, "Шунды" уг ужа "Удмурт кенешен" ӵош. Ужаськом исполкоме быръем нимаз адямиосын, но ваньмыныз кусыпмы ӧвӧл. Шонерзэ верано ке, "Удмурт кенешлэн" исполкомаз ветлыса, сюлэм висьыны кутске, куд-ог адямиос понна возьыт но луэ: уг тырмы культурамы, асьмеды возьыны быгатон сяммы. Кусып тупатонын шӧдӥське на арлыдъёслэн пӧртэмлыксы. Куд-ог дыръя милемды пыкыло, кун политикалы вузаськемын шуыса. Сыӵе дыръя мон шуисько, егитъёслэн вань асьсэлэн куронъёссы, улон шоры учконзы. Кин соосты Удмурт Республикаысь Кун Кенеш, Правительство азе поттыны кулэ? Одӥг бадӟым ёзлэн пичильтык люкетэз луыса, ми быгатӥськом удмурт егитъёсты кыӵе ке но ужрадэ огазеяны, куронэн вазиськыны. Шуом, гуртысь клубазы кыӵе ке ужрад ортчытон понна, егит адями уз вазиськы ук меӵак Правительствое - "Шунды" герӟет выллем луэ. "Удмурт кенеш" сямен со ӧвӧл общественно-политической огазеяськон. Малы кулэ кык-куинь сыӵе огазеяськонъёс? "Дэмен" аслэсьтыз ужзэ мед быдэсъялоз, "Шунды" - аслэсьтыз. Но ваньзы соос асьсэ удысазы удмурт калык понна тыршыны кулэ, ог-огедлы юрттыса но ог-огеныд кенешыса. "Удмурт кенеш" валтӥсь луыны кулэ, со вылӥ орган. Гуртысь егитъёс кыӵе ке но куронъёсын, вазиськонъёсын потысалзы ке "Шундые", огазеяськыны мылкыд карысалзы ке, ми со ужпум борды одно ик басьтӥськысалмы. Но егитъёс чалмыт уло, политика соослы кулэ ӧвӧл. Соин ик ми ум быгатӥське соосты трослы азьпалтыны. Мукетыз ужпум, егитъёсты дышетоно но кысконо шаермылэн улоназ пыриськыны. "Шунды" медаз пӧрмы школаын дышетскись пиналъёсын гинэ ужасьлы. - Надя, быгатӥськод-а астэ азьветлӥсь шуыны яке едмурт егитъёс пӧлын вань-а али сьӧраз валтыны быгатӥсь мукет мурт? Кыӵе со луыны кулэ? - Кырӟаны ӧй ке быгатысал, мон азьланяз но кивалтысал, вылды, "Шундыен". Али мон шӧдӥсько ни, та удысын трос пайдаёзэ но кулэзэ лэсьтыны быгатысал. Но кык пӧлысь котьку но кудзэ ке одӥгзэ быръёно луэ. Политикатэк улыны быгато, нош кырӟантэк - уг.Соосты кыксэ но ӵош герӟаны туж секыт, уз но луы. Жаляса верано луэ, удмурт егитъёс пӧлысь мон али уг адӟиськы ваньзэс сьӧраз валтыны быгатӥсь муртэ. Ёросъёсын вань соос, но асьсэ улоссылэсь вылӥе ӝутскемын ӧвӧл. Мынам курламе уг поты егитъёсмес. Трос соос пӧлын визьмоосыз, наукае кыстӥськисьёсыз, асьсэ удысазы адӟем карымонъёсыз. Но асьмелы будэтыны кулэ азьветлӥсьёсты - лидеръёсты. Америкаысь нылкышноос Ижевскын ортчытӥзы вал нылкышно движениез азинтонъя семинар. Со амалъёсты кутыны луоз егитъёслэсь кужымзэс огазеянэ но. Та ужпумъя мынам вань пӧртэм методикае, малпан вань сое "Шунды" дэменлыклэн ужаз пыӵатыны. Удмурт Республикаысь Егитъёсын ужанъя кун комитетын но азьветлӥсьёсты будэтонъя 1997-2000 арозьлы чаклам "Удмуртиысь егитъёс" программаын но та ужпум нимысьтыз пусъемын. Малпасько, удмурт егитъёс пӧлын но шедёзы дышетскыны мылкыд карисьёс. Но татын нырысь интые медаз пуктӥськы вылэм инкуазен сётэм быгатонлык гинэ, егит мурт азьветлӥсе кыстӥськыны кулэ осконъёсызъя но дышетскемезъя. Мед луоз со котыр ласянь адӟем карымон. Вераськемезъя но, малпанъёссэ усьтыны быгатэмезъя но. Куд-ог дыръя ӝож луэ, гуртысь адямиос шоры учкыса: сюлэмзы но висе ужзы понна, нош кулэзэ пусйыны, валамон кылын вераны уг быгато. Кыӵе ке но бадӟым ужпумез ӝутӥськод ке, сое быдэстыны курыса кесяськыны, ӝӧк вылэ мыжганы кулэ шат? Тырмоз ни, дыр, мылкыдъёс вылын гинэ азьлане вамышъёс утчаны, кулэ наукалэн синмыныз учкыны, ваньзэ лад-лад интыяны, социологияя эскеронъёс ортчытъяны но мукет. - Надя, политикае вамышъёсыд, азьло аръёсын ӵошатыса, трослы юнмазы. Кызьы астэ будэтӥськод? Тросэзлы егитъёслы со азьланезлы малпаськон выллем, оло, луоз. - Дырын-дырын телевизор учконо, газетъёс лыдӟоно. Азьло дыре кыӵе ке конференциосын мӧзмыса пукисько ке вал, табере ваньзэ валаны турттӥсько. Яратӥсько мукет огазеяськонъёсысь адямиосын пумиськылыны, споръяськыны, аслэсьтым малпанъёсме шара вераны. Котькытын верасько: "Мон удмурт". Ушъяськыса но данъяськыса мадисько калыкмылэн узыр культураез, историез, вашкала сямъёссэ утьыны быгатэмез сярысь. Дасяз Л. МАЛЫХ. История берытске Удмуртъёслэн нырысетӥез всероссийской национальной съездзы калык азе уно ужпумъёс пуктӥз. 80 ар ӵоже соос быдэсмизы-а? Нырысетӥ ӧтчамлэн протоколысьтыз куд-ог люкетъёс тае но валаны, люкаськемъёслэсь мылкыдзэс но шӧдыны юрттозы. Дышетон сярысь "Та дырозь школа ӟуч луыны дышетӥз, ваньзэ ӟуч луисьтэмзэ быдтыны тыршиз. Анай кылын вераськыны ӧз лэзьылэ, нылпиослэсь ӟуч кылэз тодымтэзэс лыдэ ӧз басьтылэ. Соин ик паймонэз ӧвӧл, инородецъёс ляб дышетско шуыса... Та вакытэ Поволжьеысь вань калыкъёслэн шор ёзо дышетон заведениоссы ужало ини. Вотякъёслэн гинэ уг. Нырысь ик усьтоно дышетӥсьёсты дасясь семинарийёсты но гурт ужлы дышетӥсь школаосты... Вятской губерниын инородецъёсты дышетон понна, кыл кутӥсь отец Павел Глезденев шуиз, ... вуж школа асьмеды ултӥяз, соин ик асьмеос кылмылэсь, сямъёсмылэсь- йылолъёсмылэсь, удмурт луэммылэсь возьдаськылӥм. Вуж сисьмем самодержавия мед шумпотоз, ӟучомытыны быгатэмезлы. Калыклэн узырлыкез - кылыз, вӧсьлыкез но аспӧртэмлыко дӥськутэз бордын". "Кӧлӥськом..." "Кужмо калыкъёс вотякъёсты зӥбет улын возё. Соин ик асьмеос мукет калыкъёслэсь бере кылим котыр ласянь: политикаын но, дышетонын но, общественной улонын но. Асьмеос верам кадь: ми - ляб калык, ... (ӟучъёслэн) асьсэлэн законъёссы, кудъёссэ асьмеос ум валаське, соин ик мед кивалтозы соос миленымы, кызьы мылзы потэ, ... озьы атайёсмы улӥзы, озьы ик асьмеос но улом. Одӥг кылын вераса, данмес сэрпалтӥм но нюжтӥськись-гызмыльтӥсь пудо сямен улӥськомы. Асьмеос кӧлӥськом - кема-а изём на? Вуиз эрик, вуиз федерация, аслад визьмыныд улон но аскивалтон. Зӥбыса улэм калыкъёс, султэ! Быдӟым адямиослэн визьмо малпанъёссы асьмеды но азьлане ӧтё, нош асьмеос со малпанъёсты улонэ пыӵатыны кулэ". Вӧсьлык сярысь "И. Яковлев эш, вотякъёслэн вӧсьлык ласянь мылкыдъёссы сярысь веракуз пусйиз, начальной школаын Инмарлэсь Законзэ (Закон Божий) дышетоно шуыса, та ужпумез школаын дышетон сярысь вераськыку, сое эскерыны дэмлаз. Отец Павел Глезденёв эш куре висъяны черке пырем, язычник луись но аллахлы оскись вотякъёсты. Горохов эш шуэ: черке пырем но язычник кылем вотякъёслэн нокыӵе пӧртэмлыксы ӧвӧл, малы ке шуоно, соос одӥг нация кылдыто..." Материалэз дасяны юрттӥз Удмурт Республикалэн кун архивысьтыз валтӥсь археограф Н. Красильникова. Куинетӥез-а, куатетӥез-а? Али, калыкмылэн бадӟым ӧтчамезлы дасяськон вакытэ, отысь но татысь юан кылӥське: малы та ӧтчамез нырысь куинетӥез шуо вал, табере куатетӥез шуыны кутскизы? Талы валэктонэз Россилэн но удмурт калыклэн историысьтызы шедьтыны луоз. Удмуртъёслэн нырысетӥ ӧтчамзы люкаськиз 1918 арын 26-27 инвожое (июне) Елабугаын. Солэн ужаз 78 делегат пыриськиз. Кыкетӥез ӧтчам 1919 арын 31 южтолэзьысен (мартысен) ньыль нунал ӵоже ортчиз. Делегатъёс Сарапулэ лыктӥзы, но граждан ож матэктэмен йырин, Максим Прокопьевлэн гуртаз, али Татарстанэ пырись Норьяе, выжизы но отын кенешизы. Ожъёсын сэрен ик делегатъёслэн ваньмызлэн лыктэмзы луымтэ, соин куд-ог ужпумъёс эскерытэк кылизы. Ӧтчам ӝыныё-урдсо луиз. Шаерамы граждан ож ортчем бере, 1919 арын 25-29 куарусёнэ (сентябре) Сарапулын удмуртъёслэн куинетӥез ӧтчамзы люкаськиз. Вить губерниысь 102 делегат удмуртлыкез утёнэн но азинтонэн герӟаськем ужпумъёс сярысь кенешиз. Собере 70 ар ӵоже кенешъёс ӧз ортчылэ ни: национальной республикаос но областьёс кылдытъям бере, Совето Союзын национальной ужпумъёсты быдэстэмен ялӥзы угось. Нош 1985 арын кутскем перестройкалэн выльдӥськон тӧлъёсыз удмуртъёс доры но вуизы. Кема дыр ӵоже гыбдаса улэм лэчыт юанъёс шара потӥзы.1989 арын 9 толсуре (декабре) Иж карын 400-лэсь ятыр удмурт люкаськыса кенешиз но Удмурт культурая общество кылдытӥз. Та ӧтчамысен Удмурт культурая обществолэн (берлогес со "Дэмен" нимо луиз) конференциосыз лыдзэс нуо, соин ик со съездъёслэн лыдазы пыртэмын ӧвӧл. Удмурт культурая общество вань удмуртъёслэсь ӧтчамзэс дасяз. Со ортчиз Иж карын 1991 арын 22-23 шуркынмонэ (ноябре). 1918-1919 аръёсы ортчем съездъёс Всероссийской нимамын вал ке, табере асьмеос Совето Союзын улӥськом шуыса, тазэ ӧтчамез нырысетӥез Всесоюзной съезд шуыса тупатӥзы. Отын "Удмурт кенеш" огазеяськон кылдӥз. Нош Совето Союз со арын ик куашказ, кылиз Россия Федерация. Соин ик 1994 арын ортчоно съезд азьын ӧтчамъёслэсь лыдзэс 1918 арысен кутскыса радъяны ӵектонъёс вал. Нош "Удмурт кенешлэн" исполкомез та дэмланэз малы ке кылэм ӧз кары, ужрад кыкетӥ съезд нимын ортчиз. Алиез ӧтчамлы дасяськон вакытэ со ӵектон нош ик потӥз. Та пумысен огкылэ вуоно шуыса, А. М. Лисина гужем нимысьтыз кенешон ортчытӥз. Отчы дасолэсь ятыргес мурт пыриськиз: "Дэменлэн" азьвыл но али тӧроосыз К. А. Пономарев, А. А. Разин, "Удмурт кенешлэн" тӧроезлэсь ужзэ быдэсъясь В. А. Осипов, Р. Ш. Насибуллин, М. В. Гришкина, В. М. Ванюшев, К. И. Куликов но мукетъёсыз, али ваньзэ тодам уг ваиськы ни. Тӥни соку огкылэ вуим: удмурт калыклэсь азьвыл ӧтчамъёссэ лыдэ басьтыса (1918 арын - нырысетӥез, 1919 арын - кыкетӥез но куинетӥез, 1991 арын - ньылетӥез, 1994 арын - витетӥез, туэзэ куатетӥез шуоно но азьланяз та лыдэз азьланьтоно. Л. ХРИСТОЛЮБОВА, исторической наукаосъя кандидат. СПОРТ Шахмат Игралась Петр Тронин шахматэн ӵошатсконъёсын шаерысьтымы спортсменъёс пӧлын трос пол чемпион луылӥз ни, спортъя мастере кандидат ним басьтӥз. Ачиз со кема аръёс ӵоже ужамын Игралась шахматно-шашечной клублэн кивалтӥсез луыса. Та аръёсаз ик Петр Григорьевич "синмаськиз" гожтэт пыр шахматэн шудонлы. Али со кивалтэ Россилэн полуфиналаз шудӥсь Удмуртилэн командаеныз. Всероссийской шахматной клублэн кык ар ӵоже кыстӥськем турнираз Петр Тронин 16 очко пӧлысь 10,5-сэ люкаса, куинетӥ-ньылетӥ инты басьтӥз. * * * Шахматэн гожтэт пыр шудонлы "синмаськиз" Ижысь механической заводлэн эмъяськоннияз ужась Сергей Хлусевич но. Со ог 30 аръёс ӵоже ни пӧртэм турниръёсы пыриськылэ, шахматэн шудонъя Россилэн чемпионэз но луылӥз. Али со СНГ-е пырись кунъёслэн ӵошатсконъёсазы нюръяськыса, нырысь интыын мынэ но огдыре ик Европалэн первенствояз Россилэсь командазэ "юнматэ". Кемалась ӧвӧл, тодмо советской гроссмейстерез Александр Константинопольскиез буре ваёнлы сӥзем гожтэт пыр шахматэн шудонъя калык куспо турнире пыриськыса, 14 очко пӧлысь 11-зэ люказ. Озьы со кыкетӥ инты басьтӥз но шахматэн гожтэт пыр шудонъя калык куспо гроссмейстерлэсь нимзэ басьтӥз. И. Вельтмандер, спортъя мастер. "Герд" Дэмен кужым ватсаське "Дэмен" но "Удмурт кенеш" огазеяськонъёсты ӵемысь пыкыло, соос тросгес шулдыръяськонэн, кырӟан-эктонъёсынгес выро шуыса. Мон озьы уг лыдъяськы. Ваньмыз политикае ноку но уз пыриське. Кулэ но ӧвӧл озьы лэсьтыны. Мыным туж ярало, кельшо культурамес азинтонэн, вуныны ӧдъям сямъёсмес выльысь улӟытонэн герӟаськем пумиськонъёс. Туэ 2-тӥ августэ, кылсярысь, Игерман шур сьӧрын, "Черёмушки" нылпи лагерь дорын, пусйимы Виль нуналэз. Сое радъян понна уно бызьылӥз Октябрь ёросысь тӧромы С. А. Ильин. Макем усто пӧрмиз та пумиськон! Кыӵе пайдаё вал со. Уно выль сиёнъёсты, пӧрамъёсты, салатъёсты веръям отын. Бакчаосын тыршем калык шумпотэмзэ возьматӥз выль урожайлы, ас киосыныз будэтэм сиён-юонъёслы. Котьмалэсь но дуно вал эшъёсын уртче шутэтскон. Кӧня дано адямиосмы люкаськылӥзы Виле! Мон тужгес но шумпотӥ тодосчиосмылы. Пайми Валентин Кельмаковлы, Иван Таракановлы но мукетъёсызлы. Валентин Кельмакович, оло, сю удмурт кырӟанъёсты, вашкалаоссэ но кырӟаз. Вӧлак усьтӥз узыр сюлэмзэ, талантэзлэсь мыным тодмотэмгес палзэ. Бадӟым тау! "Герберез" но, Вилез но дэмен пусйыса, мылкыд воксё бурдъяське. Кужым но ватсаське. Курыт лулӟылонъёс но огдырлы вуно. Нош туала секыт улонамы кужым но, чидан но туж кулэ. Малы ке шуоно, уждун но дыраз уг сётъяло, ньыль-вить толэзьёс ӵоже ӝегатыло. Уж но йӧскадь уг мыны, удмуртъёс пӧлын, мынам чакламея, тросгес кадь ужтэк кылемъёс. Ятыргес кадь секыт улонлы ӝожтӥськонъёс, азьланезлы осконзэс ыштэмъёс, ӟеч-ӟеч улон интылы ёрмисьёс. Тӥни сыӵеос сярысь но сюлмаськыны кулэ. Улонмес умоятон сярысь ӵектонъёсты, куронъёсты удмуртъёслэн съездазы рос-прос эскерозы, вылды. Р. ТУЙМАТОВА, Ижевскысь мотозаводын ужась. Сӥё-дано кенеш Валлян Операя но балетъя театрын ортчиз Удмуртилэн кунлык басьтэмез дырысен 77 ар тырмонлы сӥзем сӥё-дано кенеш. Отчы люкаськизы пӧртэм предприятиосысь но организациосысь ыстэм муртъёс, ужысь азьмынӥсьёс. Республикалэн ортчем сюресэз но туннэ нуналэз сярысь доклад лэсьтӥз Кун Кенешлэн Тӧроез Александр Волков. Собере вал бадӟым концерт. "Союз-1" - вузкарисьёслы Таӵе продукциез шаерамы шер пумиталод. Сое поттэ "Союз-1" научно-производственной огазеяськон. Нимаське "АРКА" - вузкарисьёслы оборудование. Со котькуд магазинэз чеберма, туссэ ик воштэ. "Союз-1" "Брюгман" немец фирмаен ӵош лэсьтэ туала укноос но ӧсъёс. Со поттӥське импортной оборудованиен ПВХ (поливинилхлорид) пластиклэсь. Та продукция туж юн, шунытэз умой возе, тӧл уг шуккы, мускыт уг возиськы. Урамысь ӵашетэм куара но ичигес кылӥське. Г. РОМАНОВ. Азьлане сюрес - наука Тодон-валантэк азьлане йыгмыт уд вамышты. Сое котькудӥз ӟеч вала. Наука удысын ужасьёс сярысь веранэз ик ӧвӧл ни. Алигес шаерысьтымы тодосчиослэн ассоциацизылэн кенешез ортчиз. Огазеяськонлы выль кивалтӥсь быръемын. Со гурт хозяйствоя академиысь доцент В. П. Беркутов. Г. ПАВЛОВ. Кузьма Куликовлы - 60 арес ВАКЫТЛЭН НЫПЪЕТЭЗ История ас понназ уг кылдытӥськы, сое лэсьто адямиос. К. Куликов. Адями пельпум вылаз ӝутэ но нуэ вакытэзлэсь сюлмаськонъёссэ. Ӝутэ но нуэ вормемзэ, куддыръя - вормымтэзэ но. Ӟырдась-пуштӥсь кужыменыз со пезьгытэ люкетыса ӝабырскемзэ, мынэ азьлань, пельпум вылаз выль но выль ныпъет ӝутыса. Тазьыгес вераны луоз Кузьма Иванович Куликов - тодосчи-историк, общественной деятель, публицист, институтлэн директорез сярысь. Туннэ со калыклэн син азяз, адскымон, валтӥсь интыын. Та музъем ас пушказ возе, лэся, тужгес чебер, дэлето тысьёсты-кидысъёсты улӟытыны быгатӥсь тылсиосыз. Татын, Алнаш музъем вылысь Елкибаево (Актэмыр) гуртын, вордскиз Кузьма Куликов но. Дышетскиз со гурт хозяйствоя академиен ӵошатымон Асан совхоз-техникумын. Собере - сельхозинститут, 1962-тӥ арын сое йылпумъяз. Ужаз Профсоюзъёслэн обкомзылэн культурая отделаз. Партилэн обкомаз лектор вал, собере татысь пропагандая отделэн кивалтӥз. Мыным, пединститутысь огшоры дышетӥсьлы, витьымтэ шорысь луиз одӥг пумиськон. Кузьма Иванович ӧтиз монэ ужан интыяз, обкоме, юаз-вераз улон-вылон сярысь, собере лыдӟиз кык веросъёссэ. Соос монэ паймытӥзы: пӧйшуранлы сӥземын, серем пырыё, адями тусбуйёс улэпесь. Мукет дыръя мон со доры дӥсьтысагес пыри ни, пусъем ужпумен: ӵапак быдэстӥ вал "Песни над Чепцой и Камой" книгае бордын ужанме. Нырысьсэ соку кылпум поттылӥ Куӟебай Герд сярысь. Кузьма Иванович гожтэмме лыдӟиз, умоен лыдъяз. Нош со вакытэ К. Гердлэсь нимзэ чеберъян-ӝутон сярысь вераськонъёс ӧй вал на, шуыны луоз. 1975-тӥ арын К. Куликов дышетскыны пыриз Общественной наукаосъя академилэн аспирантураяз. История наукаосъя кандидат луыса ини, со кивалтыны ӧдъяз историяя, кылъя, литературая Удмурт научно-исследовательской институтэн (1978-тӥ арысен). Татын ас котыраз кужмо научной коллектив люказ (зэм, вал ваче тупатэк кошкисьёсыз но, улонын сотэк уг луы). Институт научной малпаськонлэн шорсюлмыз луиз. Удмуртилэн историезъя, культурая тужгес адскымон ужъёсты дасяло татысь учёнойёс. Тани Л. Христолюбовалэн "Учёные-удмурты" йӧно, зӧк книгаез ик. Ӟеч малпанэн кутскем ужъёслы та борддоръёс но, дыр, юртто. Бадӟым, вылэ ӝутскыны бурдъясь мылкыдын лэсьтэмын уго "наукалэн храмез" - Ломоносов ульчаысь институтлэн юртэз зэмзэ ик вожъяськымон пӧрмиз, К. Куликов тыршемен. Литературовед луыса, мон нырысь ик синйылтӥсько солэсь чеберлыко прозазэ. Кузьма Куликов веросъёс гожъяны кутскиз 50-тӥ аръёслэн пумазы. 1977-тӥ арын потӥз солэн "Белые тропы" нырысетӥ книгаез. Татын со вера гуртысь адямиос, соосын пумиськылэмъёсыз сярысь, инкуазь но адями кусыпъёсыз эскере, пӧйшурасьлэн синмыныз но учке, нюлэс усьтэ солы "ватосъёссэ". Кузьма Куликов аслэсьтыз ӧрзэ шедьтӥз документально-художественной произведениос кылдытонын. Очерк гожтэ ке, со адямилэн биографиез, улонысьтыз учыръёс вылтӥ гинэ уг чальтчы, нырысь ик эскере адямилэсь пуштроссэ, лулчеберез бордысь потэм ужъёссэ, улонмылэсь висьытӥсь яраоссэ бурмытон сярысь сюлмаськемзэ. Куликовлэн геройёсыз - шаермылэсь историзэ кылдытӥсьёс, выль кунлыкмес "дурисьёс". Соос пӧлы пыро Иван Пастухов, Трофим Борисов, озьы ик Куӟебай Герд, кудӥзлы К. Куликов берло дыре уно "вирзэ" сётӥз. Тани туэ октябре со кӧня ке эшъёсыныз ӵош ветлӥз Карелиысь Сандормох шайвылэ, кытчы ватэмын янгыштэк бырем адямиос, соос пӧлын ик К. Герд. Чебер кылын лулъятэк-пӧръятэк, улонэз ӧз адӟысал Н. В. Воробьевлэн "Жизнь в науке" книгаез. К. Куликов уен-нуналэн, арняосын тыршиз, Россилэсь данзэ ӝутӥсь учёной, эскалаторез кылдытӥсь син азе улэпен мед пуксёз шуыса. Николай Васильевич Бауман нимо МВТУ-ын преподаватель вал, война дыръя та училищеез Ижевске выжтылӥзы, со бордысь ик палдыса кылдӥз механической институтмы. Кузьма Ивановичлэн капчи киыныз гожтэмын калыкез эмъян удысысь профессоръёсмылэн С. И. Ворончихинлэн, А. И. Перевощиковалэн но А. М. Загребинлэн тодэ ваёнъёссы. Макем мур пыриськыны кулэ та удысэ, кӧня пукыны-вераськыны геройёсын, оскымон, зэмлыко произведениос кылдытон понна. Озьы ик паймытӥз монэ нейрохирургъёс сярысь статьяез: кӧня меда бугыръяськоно луиз гожтӥсьлы, сое дасякуз. Статьяез печатламын "Судьба республики - судьба народа" книгаын, кудзэ лул шокчемзэ сётыса люказ К. Куликов. 1982-тӥ арын потӥз солэн "В боях за Советскую Удмуртию" монографиез - шаерамы революция, граждан ож сярысь зэмлыко мадён. Куд-огезлэн со синмазы жаг сямен пыриз, партилэн обкомаз но эскеризы. Авторлы тыш йӧтӥз: тӧдьы движенилэн валтӥсьёсыз шоры кызьы ке гажаса, дурбасьтӥсь синмын, пе, учке. Котьма ке но, историлэсь виро сюрессэ уд ӵушы: Колчаклэн Урал, Сибирь сюрес вылаз кӧня со сильтӧлъя ӝутскем-пазьгиськемъёс... "Ож" кыллэн кӧшкемытэз-курытэз шӧдытӥз ассэ но авторез: ньыль арес дыръяз ик ёзвиосаз пыриз калыклэн курадӟон-ёрмонэныз. Сое адӟиськом "Ликуя и скорбя" статьяысьтыз. Нош быдэсак со тыло аръёс син азе пуксё "Вёрсты мужества" очеркъёсын книгаяз - нимаз адямиослэн улонзы- адӟонзы пыр. Тужгес чеберлыко но зэмлыко луэ К. Куликовлэн "Трокай" повестез (нимаз книгаен потӥз 1991- тӥ арын). Со сӥземын Трофим Борисовлэн вордскемез дырысен 100 ар тырмонлы. Документъёс, гожтэтъёс, тодӥсь муртъёслэн верамзы авторлэн мадёназ пӧлэстӥськыса кылдытӥзы удмуртъёслэн кунлык радъясьсылэсь сайкыт тусбуйзэ. Аслаз докторской диссертациеныз но К. Куликов паськытатӥз, муромытӥз ас ӧрзэ: шунды ӝужан палась финн выжы калыкъёслэсь 1917-тӥ - 1937-тӥ аръёсы кунлык лэсьтэмзэс эскериз. Пӧртэм- пӧртэм городъёсын печатласькизы та темая сю пала статьяосыз, 1993-тӥ арын монографиез потӥз. Со дыре ик Кузьма Куликов ужаз "Дело Софин" бадӟымос книгаез бордын. Вань ёзви сӧнъёсыз кыстӥськизы, шуыны луоз, сое К. Гердлэн 100 аръем юбилеезлы быдэстонэ. Кузьма Иванович удмурт калыклэн дано пиез понна вӧсь луыса гожъя, вань тодэмзэ сётэ "Софин ужез" эскеронлы. Кузьма Куликовлэн кужымез, дырыз тырме вузысь преподавательёс понна "Удмуртия - Россия" ужзэ вуттыны. Ӝоген, "Удмуртия кык сюрсэтӥ аре выжыку" конференциын со лыдӟоз асьме республикалэн но Татарстанлэн суверенитетсылы сӥзем докладзэ. П. Елкинлэн суредысьтыз мон сое кельшытӥ Пушкинлы. Маиз ке но вань Гердлэсь: оло, улонэ омырскеменыз, дыась-ӟырдась кужыменыз. Тӧллы нялтас мынон, нялмыт гинэ гылӟон - соя ӧвӧл. Чидасьтэм - созэ но тазэ аслыз пумит пештырскытэ. Ӟырдаса ас кыл вылаз сылэ... Колжалод, со пӧсь кужым быронтэм... Но асьмеос ӧвӧл кулэ "кожаны" - ог-огмес жаляны, утьыны тыршоно. Ачиз Кузьма Иванович юрттыны дыртэ ёрмем муртлы. Кылдытӥз культурая фонд. Репрессие сюремъёслы нырысетӥ памятник пуктонэ коньдон висъяз. Книга поттӥсьёслы но шырытэз усе. Мон тау карисько нылкышно федерацимылы юрттэмез понна. Кузьма Куликов телевидениын "Государство и мы" рубрика усьтӥз. Вакытлэсь сюлмаськонъёссэ пельпум вылаз ӝутӥз. Со историез лэсьтӥсьёс пӧлысь - соин солы оскиськом. Зоя БОГОМОЛОВА, литературовед. Виктор Черномырдин: "Удмуртилы оскон бадӟым" Одӥгетӥ шуркынмонэ, куазь ӧз ке но тупа, Ижысь аэропортэ вазь ӵукна ик огез бӧрсьы мукетыз ИЛ, ТУ, ЯК самолётъёс пуксё. Бур палан сыло ни Э. Россельлэн, М. Рахимовлэн но мукет бускель областьёслэн кивалтӥсьёссылэн самолётъёссы. Одӥгезлэн вылаз чебер букваосын гожтэмын "Башкортостан". Тани вокзал доры шӧдтэк шорысь вуиз ЯК-40. Самолёт дугдыса но кадь ӧз вуы, отысь бызьыса сямен васькиз М. Шаймиев. Татарстан Республикалэсь Президентсэ сылалэн-нянен, сяськаен пумитазы. Мылкыдыз капчи, шаерысьтымы кивалтӥсьёсын ӟечъяськыкуз, со серем пыр шуиз, ми, пе, сахар кушманмес ӧм октэ на, нош тӥляд лымы усе, тол вуэ ни. Собере журналистъёслы вазиськиз: "Кусыпъёсмы уката юнмало. Дорады шумпотыса лыктӥм. Ведь стрелковой ож тӥрлык поттыны кутскемды дырысен 190 но Калашниковлэн АК-47 автоматэзлы 50 ар тырмиз. Берло дыре ми но нимысьтыз инты висъяськом Россилы, республикалы туж кулэ удысъёсты азинтонлы". Интыысь дыр 11 час 15 минут. Шунды пуксён палась мычиськиз юг-юг тӧдьы лайнер. Удмуртие нырысьсэ лыктӥз Россия Федерацилэн Правительствоезлэн Тӧроез Виктор Черномырдин. Сое пумитазы Михаил Калашников, Александр Волков, Павел Вершинин, Виктор Балакин, Анатолий Салтыков но бускель республикаослэн кивалтӥсьёссы. Премьер-министр но соин ӵош лыктэм кивалтӥсьёс чик ӝегатскытэк ширтӥзы "Ижевский автозавод" нимаз предприятие. Виктор Степанович азьло учкиз кузов бичан выль цехез. Таӵе бадӟым ужан интыын чал-чал. Виктор Степановичез со паймытӥз но, сюлэмзэ но вырӟытӥз. Одно ик, пе, юрттӥсьёс (инвесторъёс) шедьтоно. Россиысь но Удмуртиысь калыклы кулэ ӟеч машина. Предприятиды сыӵе ужпумез быдэстыны быгатоз. Берло дыре утчаськемды, кунгож сьӧрысь фирмаосын кусыпъёс тупатэмды мыным кельше, пусйиз Премьер-министр. Кутскем уждэс азинтыны кулэ, ӝыны сюрес вылэ эн дугдэ. Собере Виктор Черномырдин, солэн воштӥсез Яков Уринсон, Обороная министерствоысь кивалтӥсьёс-генералъёс бадӟым саклык висъязы шаерамы поттэм ож тӥрлыкез но музон продукцимес учконлы. Михаил Калашников пыр-поч тодматӥз пӧртэм пумо автоматъёсыныз. Тани АК-74М. Солэн прикладэз берыкъяське, уин ыбылӥськыны оптической прицел пуктэмын. Артэ тыремын АК-101, 102, 103, 104 но 105 автоматъёс. Ваньмыз со кутӥське Россиысь армиын но правопорядокез утёнын. Виктор Степанович куд-огзэ автоматэз кияз кутэ-бергатэ. Но Премьер-министрлы уката ик кельшиз, лэся, "Бызись кыр парсь" ("Бегущий кабан") оптической прицелэн винтовка, мертаськыса ик утчаз. Карабинъёсын, винтовкаосын но автоматъёсын артэ ӝӧк вылэ тыремын 30 миллиметръем авиационной пушка, вӧзаз 23 миллиметръем 6 гумыен пушка но пӧртэм пумо пичиесь ракетаос. Ваньзэ сое поттэ "Ижевский оружейный завод" нимаз предприятие (ДОАО). Премьер-министрлы таӵе ож тӥрлык сярысь рос-прос мадиз "Ижмашлэн" валтӥсь директорез Владимир Гродецкий. Виктор Черномырдин озьы ик тодматскиз Ижысь радиозавод, "Буммаш", Ижысь электромеханической завод, Сарапулысь радиозавод, "Элеконд", "Ижсталь", Ижысь "Аксион- холдинг" огазеяськонъёслэн поттэм продукциенызы. Кылсярысь, Премьер-министр кема юалляськиз ТОР-М1 зенитно-ракетной комплекс но ОСА сярысь. Солы яразы Ижысь механической заводлэн пыӵалъёсыз. Юнме шат отысь уно конструкторъёс-инженеръёс Россия Правительстволэн Кун премиезлэн лауреатъёсыз луизы. Соос пӧлын Кирилл Ломагинлэн Олег пиез но. Виктор Степанович котькудӥзлэн мӧляяз ачиз бырттӥз кун премилэсь знаксэ. Огъя вераса, Премьер-министр одӥг часлэсь кема выставкаын улӥз. Нош "Строитель" ыбылӥськонын выль ож тӥрлыклэсь ӟечлыксэ эскериз, "Абакан" пистолет-пулемётэн ыбылӥськиз. Кун Кенешын Виктор Степанович вакчияк кенеш ортчытӥз. Отчы ветлӥзы Удмуртиысь, Уралысь но куд-ог мукет интыосысь кивалтӥсьёс. Вераськон мынӥз ож тӥрлык поттӥсь предприятиосын кылдэм югдурез умоятон сярысь. Та удыслы (ВПК-лы) кулэ кун заказ. Сое котькин вала, сотэк оборонаез уд юнматы. Кенеш бере Виктор Степанович журналистъёсын пумиськиз. Премьер-министр шуиз: - Ужмы умой мынэ, но ӧз йылпумъяськы на. Мае мон адӟи, дунъяны кыл уг шедьтӥськы. Татын поттӥське туж ӟеч, вылӥ классэн ож тӥрлык. Таӵеез дуннеын ӧвӧл на. Соин ик Удмуртиын ож тӥрлыкъя федеральной научной центр кылдытӥм, та уждпумъя постановление кутӥм. Озьы ик луоз Михаил Калашниковлы сӥзем музей. Со - быдэс Россилэн данэз, зэмос бриллиант кадь дуно. Быдэс дуннеын данэ потэм конструктор ужа на. Кызьы солы уд шумпоты. Ижын вордӥськем ӟеч сямъёс азинско. Отӥяз Виктор Степанович ватсаз, Россия котьку вал СНГ-ысь кунъёсын огазеяськон, ӵош ужан понна. Декабре правительствоослэн кивалтӥсьёссы люкаськозы. Со сярысь вераськон луоз. Азьло асьмелэн ваньмыз вал: огкылысь ужам, но кусыпъёсмес туж чаляк куашкатӥм. Нош ож тӥрлык поттӥсь предприятиосты выльдон, конверсия ортчытон сярысь вераса, Виктор Черномырдин шуиз: "ВПК ужалоз, куд-огез шуг-секытысь потэ ни. Шумпотымон со. Но конверсиез нуон капчиен уг сётӥськы. Удмуртиысь калыклы тау карисько, татын берло дыре предприятиостэс выльдонъя трос лэсьтэмын ни. Пайдаез адӟиське". Нуназе бере Операя но балетъя кун театрын ортчиз "Ижмашлы" 190 но Михаил Калашниковлэн автоматэзлы 50 ар тырмонэзлы сӥзем сӥё-дано ужрад. Отын вераськиз Виктор Черномырдин. Премьер- министр, Александр Волков но бускель республикаослэн кивалтӥсьёссы шуныт ӟечкылазы Михаил Тимофеевичез но солы сётӥзы синпель кузьымъёс. Геннадий РОМАНОВ. Фотоосыз Николай ГЛУХОВЛЭН. Кун Кенешын Кун Кенешлэн Тӧроез Александр Волков но Правительстволэн Тӧроез Павел Вершинин пыриськизы республикаысь Ожысь, ужысь ветеранъёслэн кенешсылэн Пленумезлэн ужаз. Эскеремын "Ветеранъёс сярысь" законлэн быдэсъяськемез. Александр Волков ветеранъёс азьын вераськиз. Со пусйиз: "Туала поколение арлыдоос сярысь одно ик сюлмаськыны кулэ. Соин ик вуоно арлы бюджетын чакламын Кун Кенешлэсь вань законъёссэ быдэстонэ тырмыт коньдон висъяны". Кун Кенешлэн пресс-службаез. Вуж сямъя - выльысь Пичи Пурга. Удмурт калыкмылэсь сямъёссэ но йылолъёссэ выльысь улӟытонлы татын трос саклык висъяло. Табере соос егит кузпалъёсты чылкак удмурт сямъя гожтӥськытыны ӧдъяллям. Ваньмыз вашкала аръёсы кадь. Егитъёсты пыдесъяськыто но, сюсьтыл но ӝуато. "Зарни шеп" ансамбль вань ужрадэз ас вылаз басьтӥз. Нош нырысетӥ кузпалъяськемъёс луизы Кечёлысь Миша но Ольга Шаньгинъёс. П. ЛИПИНА. Берекет Кибашлыос Паймымон дуннеын Туспуктэм вылысь адӟиськоды Надежда Васильевна Кутявинаез. Со Яр посёлокысь чеберлыкъя юртын буёлъёсын пужыос пуктонъя (художественной роспись) мастер-методист. Татын ужа ини ньыль ар ӵоже. Чеберез кылдытӥсьлэн кыӵеез но пужыез борддорын ӧвӧл! Кӧнязэ ке тӥ, гажано лыдӟисьёсмы, туспуктэм вылысь но адӟиськоды. Тэркыос но, вӧшъёс но, пу мунёос но быдэстэмын, уй палась удмуртъёслэсь сямъёссэс, йылолъёссэс, дӥськутсэс возьматонэн герӟаса. Та ужлы кибашлы мурт уг жаля дырзэ но, кужымзэ но. Со сярысь ик верало Надежда Васильевналэн нимаз папкае люкам материалъёсыз. Отын та палась удмуртъёслэн вашкала дэремъёсынызы, чеберъяськон, корка пушкын кутӥськись арбериосынызы суредъёс, эскизъёс. Соосты кибашлы мурт гуртъёсы потаса лэсьтэ. Мӧйыослэн сандык пыдэсысьтызы поттэм арбериоссы Надежда Кутявина понна зэмос узырлык, паймымон дунне луэ. Тани, кылсярысь, басьтом ӵушконэз ик (учке туспуктэм вылысь). Кызьы адӟиськоды, отын "свастика" пужыез вань. Нош та арбери фашистъёс асьме вылэ урдскемлэсь кемала дырысен азьло быдэстэмын. Ӵушконлэн кузёезлы кема аръёс ӵоже та чеберез мурт синъёс адӟемлэсь пыдло ватыса возёно луиз. Кин тодэ, чагиськисьёс я мар шедёзы, калык тушмон но луыны кема ӧвӧл. Туспуктэмъёсыз В. БЕЛОМОРСКИХЛЭН. Сюлэм бӧрдэ Аналтэм лудъёсын кузёясько пот, арыкман... Гажано редакция! Мон газеттэс котькуд аре басьясько. Туэ ӧй на гожтӥськы, но одно ик почтае ветло, яратоно газетме лыдӟытэк уг кыльы. Мыным со котыр ласянь кельше. Гожтэме потӥз аслэсьтым сюлэм шугме. Мон вордӥськи Тыловай районысь (куке но сыӵе ёрос но вал) Чемошур гуртын. Али со гуртмы ӧвӧл ни. Улӥсько Дэбес районысь Тыловай селоын. Алигес вордӥськем палъёсам бертылыны кылдӥз. Адӟи аналтэм лудъёсмес возьёсмес. Кыӵе соос мӧзмыса уло. Куштэм коӵышъёс кадесь ик ук. Нокинлы но соос кулэ ӧвӧл: уг гыро, уг кизё. Буш кылем интыосын кузёясько сьӧд пот (чернобыльник), курытпот (полынь), арыкман (люгы)... Азьло аръёсы, пичи колхоз дыръя, отысь кыӵе ӟеч урожай басьто, кӧня пудо сиён дасяло вал. Соку али сямен техника но ӧй вал, озьы ке но ваньзэ гырыны-кизьыны, утялтыны тыршылӥзы. Кыӵе со лудъёс мыным жаль потӥзы! Татысь "Красная нива" колхозэз огазеязы "Планета" борды. Табере та палъёс чылкак аналтэмын, видимо, хозяйстволы соос чик кулэ ӧвӧл ни. Тани Усково но Богданово гуртъёсын улӥсьёсыз ик кӧня ке гинэ кылемын на. Вань техника Зюзиное нуэмын. Сюресъёс но номырлы лэсянтэмесь. Паймиськод вордӥськем палъёсам улӥсь калыклэн чидамезла. Е. ГАЛИЧАНИНА. Калашниковен пумиськон ДУННЕЕЗ ЯЛАН ПАЙМЫТЭ Михаил Калашниковез быдэс дунне тодэ. Сыӵе дан инмысь ӧз усьы. АК-47 автоматэзлы 50 ар тырмиз но солэсь ӟеч ож тӥрлык одӥг конструктор но ӧз малпа на. Тани Болгариысь "Арсенал" огазеяськон таӵе ож тӥрлыкез 30 ар поттэ ни. Соин ик, вылды, валтӥсь директорез дано конструктормес ӟечкыланы, шуныт кылъёс вераны Ижевске лыктэм. Калашниковлэсь автоматъёссэ озьы ик бичало Китайын но мукет кунъёсын. Алигес Михаил Тимофеевичлэсь кыкетӥ книгазэ поттӥз Москваысь "Парад" военной издательство. Нимаське со "От чужого порога до Спасских ворот". Отын возьматэмын дано конструкторлэн ортчем сюресэз, будэмез, улэм-вылэмез, уно шуг-секытъёсын пумиськылэмъёсыз но мукетыз. Та нуналъёсы Ижевск, республикамы сӥё-дано пусйиз "Ижмашын" ож тӥрлык поттонлы 190 ар но Калашниковлэн автоматэзлы 50 ар тырмонэз. Ӵапак соку Ижысь автозаводын ортчиз бадӟым выставка. Отын шӧдскымон инты висъямын вал Калашниковлэсь уно пумо автоматъёссэ адӟытонлы. Собере выжыкылысь кадь конструктормы пумиськиз кунгож сьӧрысь, Россиысь но Удмуртиысь журналистъёсын но тодматӥз выль книгаеныз. - Быдэс улонам удалтэ мыным ӟеч адямиосын ужаны,- трос пол но шумпотыса пусйиз Михаил Тимофеевич. - Сыӵе муртъёс юрттӥзы но юртто. Тани 1942 арын монэ кык пол кутӥз округлэн главкомез Георгий Жуков. Куд-огез, оло, уз но оскы, но со азьын солдат дӥсен сылӥ. Георгий Константинович пиеныз кадь вераськиз, умоесь ӵектонъёс сётӥз. Таиз книгае, "Записки конструктора-оружейника" сярысь, мукетгес, зэмос фактъёс вылын художественной амалэн гожтэмын, одӥг учырез но малпамтэ. Материалъёс но документъёс люканы кутски 1939 арын. Соку курсант вал. Но книга гожтон борды басьтӥськыны кышкасько вал. Журналистъёс азьын Михаил Тимофеевич сярысь шуныт кылъёс вераз эшез, отставкаысь полковник Николай Шкляев. Нош "Росвооружениысь" Владимир Никитин меӵак шуиз: "Калашников историе кылёз. Солэн автоматэз 50-лэсь уно странаосысь армиосын кутӥсько ни. Михаил Тимофеевичлы инмар быгатонлык-талант сётэм. Дуннеын таӵе адями ӧвӧл ни. Пиез но атаезлэсь адӟем кариз, конструктор луиз ни". Михаил Тимофеевичлы номыр каньылэн ӧз сётӥськылы. Крестьян пи шугезлэсь ӧз кышка. Самаркандын со пумиське генерал-лейтенантэн Анатолий Благонравовен. Со Калашниковлы трос юрттэ. Егит солдат автоматсэ лэсьтэ чугун сюрес депоын. Отысен кутске АК-ёслэн вордсконзы. Дыр ортче, Михаил Тимофеевич ож тӥрлыксэ ялан умоятэ-выльдэ. Сое туж ӟеч валало кунгож сьӧрысь тушмонъёсмы. Калашников - со Россилэн визитной карточкаез. Но туннэ мукетсэ но верано луэ, Калашников, пе, Бельгилэсь автоматсэ лушкам. Сыӵе супыльтон поттэм Западысь пресса. Мугез тодмо, ӟуч конструкторлэсь данзэ саптано. Но малпанзы ӧз быдэсмы. Малы ке шуоно, Михаил Тимофеевич нокинлэсь номыр ӧз лушка, ваньзэ аслаз визьмыныз лэсьтӥз. Сое возьматэ улон. Калашниковлэн автоматэз уката умойгес, ӟечгес но оскымонгес луэ. Сое возьматэ дуннеысь уно кунъёсысь адямиослэн та автоматэз кутэмзы. Со одӥгез, нош США-ысь тодмо конструктор Стоуер (Калашников кадь - Г. Р.) курем кулэм бераз Калашниковлэн автоматысьтыз салют сётыны. Озьы ик лэсьтӥллям. Михаил Тимофеевич конструкторез котькин тодэ, нош кылбуръёс гожъямзэ ватыса возиз. Куке солы кыкетӥ герой Кизили сётӥзы, Калашников малпаськыны кутскиз, кытчы, пе, солы бюст пуктозы. Ӵапак соку конструктор кылбур гожтӥз: "Дерябин, ӧжыт гинэ палэнскы, вӧзад мон пуксё..." Аръёс ӝог ортчо. Табере куд-огез, шумпотыса-а, вожъяськыса-а, шуэмзы потэ, кӧня, пе, возиськоз на Калашниковлэн автоматэз. Таӵе юанлы Михаил Тимофеевич туж визьмо валэктӥз. Малы ке шуоно, со вал кунгож сьӧрысь журналистлэн юанэз. - Кызьы тодӥськоды, автоматэлы ӝыны даур тырмиз. Кӧня со улоз - секыт вераны. США-ысь историк ик гинэ шуиз, Калашниковлэн автоматэз, пе, 2025 арозь улоз. - Калашниковлэн фондэз вань-а? - Ӧвӧл. Музей лэсьтонъя комитет вань. Асьмеос ортчемзэ тодыны кулэ, уката ик егитъёс. Сотэк туннэ улон уг лэсьтӥськы. Вуоно арын Вормон нуналлы музей усьтӥськоз. Та ужлы юртто предприятиос, ужбергатӥсьёс но адямиос. Г. РОМАНОВ. Мутант пунэмзэ берыктӥз заводлы Челябинск областьысь "Маяк" предприятие Нажмутдиновъёслэн семьязылы 50 миллион манет тыриз. Таӵеез Россиын ӧй вал на. 1957 арын обороналы ужась "Маяк" предприятиын 80 тонна радиоактивной арбериен цистерна пуштӥз. Туала экологъёс та авариез Чернобылен ӵошато. Нош 1992 арын "Маяк" котырысь Муслюмово гуртысь Земфира но Эльдар Нажмутдиновъёслэн пизы вордскиз. Пичи Денислэн ӧвӧл бур пыдыз, палллян киыз ӧлексы, сюлмыз, кӧт пушкыз висё. Пизылы куинь арес тырмем бере, Нажмутдиновъёс "Маяк" вылэ судэ сётӥзы. Судья кема малпаськиз, нош ӝӧк вылысь пичи протезэз адӟыса, соку ик Денислы дурбасьтӥз но заводэз семьялы изъян ваемез понна, коньдон тырыны косӥз. Муслюмово радиациен тужгес но кырсёмытэм интыос пӧлы пыре. Та гурт Теча шур дурын сылэ. Шур дурысь луо часкын 500-600 микрорентген сётэ. Туала нормаосъя, часкын 130 микрорентген сётӥсь музъем вылын адямиослы улыны лэземын ӧвӧл. Муслюмовоысь калык 45 арескысен ик улонысь кошке. "Комсомольская правда" Му вӧй - шаермылэн одӥгез бадӟым узырлыкез. Ньыльдон ар ӵоже республикаямы та удыс азинске ни. Вакытъёсын арскын музъемысь дас миллион тонна нефть кыскылэмын. Дыр ортчыса, та узырлык кулэсме, сое шедьтыны-поттыны но шуггес луэ. Ужез умой азьланьтон понна, му вӧй поттӥсьёс выль амалъёс утчало, пӧртэм улосъёсысь та удысын тыршисьёс ог-огзылэсь дышетско. Тани алигес но республикамылэн шоркараз, Ижевскын, странаысь му вӧй поттӥсьёслэн конференцизы ортчиз. Татчы озьы ик США-ысь, Канадаысь но мукет странаосысь куноос лыктэмын вал. Малы му вӧй поттӥсьёс одно ик асьме шаере люкаськизы? Валамон ини, юнме ӧз. Берло аръёсы удмурт нефтяникъёс ужазы трос выль амалъёс куто. Конференция но сӥземын вал музъем валлин портыса му вӧй поттонлы но вуж скважинаосты умойгес ужатонлы. Туэ гинэ асьме му вӧй поттӥсьёс "Зарни ӧрӟи", "Зарни Меркурий" международной призъёсын пусъемын. Конференциын доклад лэсьтӥз "Удмуртнефть" ОАО-лэн директоръёссылэн кенешсылэн тӧроез Валентин Иванович Кудинов. Со пусйиз, Ижевскын таӵе кенешон кыкетӥзэ ортче ини. Та ужрадъёс куспын му вӧй поттонын уно выль амалъёс кутэмын. Туэ 1 октябрьысен кутскыса, вань скважинаос музъем валлин портэмын луозы. Асьме республикаын нефть туж нап, отын трос парафинэз но сераез. Нефть нуись "шуръёслэн" мурдалазы но 15-20 метр гинэ. Соин ик уж туж секыт, дуно усе. "Сьӧд зарнилэсь" дунзэ кулэстон понна, пӧртэм амалъёс утчано луэ. Берло аръёсы сое кутскизы му валлин пӧртэм скважинаостӥ кыскыны. Озьы му вӧй капчигес ӝутске, музъем пушкы но ӧжытгес кыле. Тросысьтыз скважинаосысь нефть кызь ар пала поттӥське ини. Сыӵе интыосын му вӧй ӝыныез кыскемын. Кылемзэ но поттон понна отчы пӧртэм шуныт нуись суретъёс (растворъёс) лэзё. Али паськыт кутӥське теплополимер. Со му вӧез зол шунтэ, озьы нефть капчиен ӝутске. Азьло му вӧй нуись гумыосты бинялто вал стекловолокноен, табере ӵемгес - базальтэн, озьы гумыосын шуныт умойгес возиське. Выль амалъёс тросгес кутэмын Мишкино но Гремихино месторождениосын. Азьтло США-ысь но Канадаысь му вӧй поттӥсьёслэсь адӟем кариськом вал ке, табере соос но асьмелэсь дышетско ини. Ваньмыз сямен 70 нефть поттон интыосмы пайдаен ужало. Данакез ужан тӥрлык республикаямы лэсьтӥське. Мукет азьысь ваемъёсызлэсь умойгес, вылаз ик дунтэмгес усе. Азьланяз республикаямы музъем валлин портыса му вӧй поттонлэн центрез луоз. Та амалэн вуж скважинаосысь но нефть поттӥськоз, соос нош "улӟозы". Витьтон кыкез али нош ик му вӧй поттыны кутскизы ини. Конференцие пыриськизы "Сиданко" АО-ысь специалистъёс. Огазеяськонлэн кивалтӥсезлэн воштӥсез Виктор Лещенко верамъя, та му вӧй поттон компанилэн луонлыкъёсыз бадӟымесь. Ӵуказе нуналывз оскымон. "Сиданко" АО му вӧй поттонъя дуннеын 23-тӥ инты басьтэ, рош Россиын - 6-тӥ. Нуналлы быдэ 20 сюрс тонна му вӧй кыске.Али кадь ик ужез мынӥз ке, матысь дыре нефть поттонъчя Россиын 4-тӥ интые потоз. "Сиданко" АО удмурт нефтяникъёсын огкылысь, ӵош ужа. Озьы шуг-секытъёсты но капчигес вормыны. Конференцие витьтонлэсь ятыр интыосысь куноос пыриськизы. Кык нунал ужамзы бере, соос Удмуртиысь му вӧй месторождениосы но музейёсы ветлӥзы. Н. ВОЗИСОВ. Пичи ужбергатон УКСЁ - ВУЗ - УКСЁ Рыноклэн аслаз законъёсыз. Бадӟым предприятиос мырдэм шокало. Тросэз банкротлы матын ни. Ужасьёссылы юн беромыса уждун вуэ. Соин адями вузкаронэ кыстӥське. Озьы "челнокъёс" но кылдӥзы. Соос пӧлысь уноез ужбергатӥсьёс луизы. Берлоосыз данак шуг-секытъёсын пумиськыло. Нош государство юрттэ-а ужбергатӥсьёслы? Та но музон юанъёслы валэктэ Правительствоысь пичи ужбергатонлы юрттонъя но сое азинтонъя комитетлэн тӧроезлэн воштӥсез Сергей ВЕПРЕВ. - Сергей Николаевич, кинэ пичи ужбергатӥсьёс пӧлы пыртыны луоз? - Рынок со сыӵе маке, куке котькудӥз адями ачиз сярысь сюлмаське. Соин ик пичи ужбергатонысь адямиос рынокын шӧдскымон инты басьто ни. Соослы юрттонъя 1995 арын нимаз ёз кылдытэмын. Собере республикаямы пичи ужбергатонлы кун ласянь юрттэт сётон сярысь нимаз закон но кутэмын. Соя пичи ужбергатӥсьёс луо промышленностьын, лэсьтӥськонын но транспортын 100 мурт ужа ке, гурт хозяйствоын но научно-технической удысын - 60, вузкаронын - 50. - Кызьы бен радъяське пичи ужбергатон? - Туннэ та удысын ваньмыз кылдытэмын шуыны уз луы на. Азинскем кунъёслы сое радъяны дасо аръёс кулэ луиз. Али интыысь администрациос но пичи ужбергатонэн выро ни. Кылем арлэн пумаз элькунамы куать сюрслэсь уно пичи ужбергатонъя предприятиос ужало ни вал. Нош азьланьын соослэн лыдзы 30-40 сюрс пала луыны кулэ. Со рыноклэн куронъёсызъя. Озьы ватсаса ужан интыос усьтӥськозы. Асьмеос бен бадӟым лыдпус сьӧры ум уиськиське. Предприятиос ужаны мед быгатозы. Туэ ужбергатӥсьёс одӥг триллион манетлэсь уно продукция поттӥзы ни. Но, жаляса верано луэ, ваньмыз пайдаё ужаны уг быгато на. Тани 1345 предприятие изъян адӟиз. - Кыӵе юрттэт сётӥськоды? - Удмурт Правительство пичи ужбергатӥсьёсты син азяз возе. Кутэмын нимаз программа. Соя ужбергатӥсьёслы 20 миллиард манет тыр юрттэт висъяны чакламын. Али 27 предприятие юрттэт вите. Со пӧлысь 19-эз фермер луэ. Ми котькызьы юрттӥськом юридической юанъёссыя но, продукцизэс вузанъя но. Но та удысын вань луонлыкъёс уг кутӥсько на. Озьы ышо-быро ужан интыос но. Туэ умойгес тыршо вузкарон удысысь ужбергатӥсьёс. Соос 7 сюрслэсь уно лыдъясько ни. - Таиз ар ма ваёз? - Программа улонэ пыӵа. Озьы кылдытэмын луозы 600-лэсь ятыр пичи предприятиос но кӧня ке сюрс выль ужан интыос. Паськыта ужбергатӥсьёслы юрттэт. Уксё - вуз - уксё ужан амал выжы лэзе. А. АНДРИЯНОВ. Журналистъёсын пумиськонъёс Улон берга коньдон бергамъя Кун Кенешысь Экономикаын политикая но бюджетъя ялан ужась комиссилэн тӧроез Олег Кузьменко но солэн воштӥсез Софья Широбокова журналистъёсын пумиськон ортчытӥзы. Вераськон мынӥз комиссилэн та дырлы мар бордын ужамез сярысь, 1998 арлы республикамылэсь бюджетсэ кылдытон но матэктӥсь деноминация сярысь. Кызьы ивортӥз Олег Кузьменко, 1997 арлы бюджетъя законэ воштонъёс пыртэмын. Комиссия али ужа вуоно сессиослы материалъёс дасян бордын. Эскероно луоз куинь выль законопроектъёсты: Удмурт Республикалэн аслыз ачиз пунэм тыронъёсыз сярысь; быдэсъясь (исполнительной) органъёслэн пунэм сётыны луонлыксы сярысь; республикамылэн бюджетэ пырисьтэм фондъёсыз сярысь. Вуоно арлы бюджет кылдытыку, ваньмыз чакламын, йылаз-пумаз вуттэмын медло: кытчы мынэ бюджетысь коньдон, кызьы со люкаське, кин эскере коньдонлэсь бергамзэ. Кун Кенешлэн 15-тӥ сессияз Удмурт Республикалэн бюджетэз эскеремын луыны кулэ ни. Но та бадӟым ужпумын лыдэ басьтытэк уг луы Россия Федерацилэсь бюджетсэ, кызьы со юрттыны басьтӥськоз асьме республикамылы. Регионъёслы коньдонэн юрттон 13 процентозь ке вуттэмын вал, берло кутэм ужпумъя асьме шаермылы со 14 процент луоз. Софья Широбокова журналистъёслы вакчияк мадиз Россия Федерацилэн Кун Думаысьтыз бюджетъя подкомиссилэн мар бордын ужамез сярысь. Россия Федерацилэн бюджетаз 1998 арлы тупатонъёс пыртыны кулэ. Отысь усемын ветеранъёс, социальной пособиос но улон интыос сярысь законъёс. Россиын эскерытэк, та ужпумъёсты республикалэн бюджетаз но пыртыны уг луы. Кызьы со тупатонъёс пырозы Россилэн бюджетэз сярысь законаз, соиз бордын тыршыны кулэ ини Кун Думае быръем депутатъёс. Удмурт Республикалэсь экономика удысын азинсконъёссэ будэтонъя закон бордын ужано луоз на. Инвестициосъя кыӵе осконъёс вань, налог тыронын льготаос чакласько-а? Шаермылэсь бюджетсэ кылдытыку, ваньзэ сое чаклано луоз. Выль коньдонлэн кутӥськемез сярысь ке верано, та ласянь ужъёс чакламъя азинско. Калык пӧлын паськыт мыноз валэктон уж. Шаерысьтьмы банкъёсы выль коньдон ваён уж мынэ ни. 1 январьысен кун банкъёс уждунлы висъялозы ни выль дуно бумага, магазинъёсын но со кутӥськоз. Коммерческой банкъёсын вужзэ коньдонэз выленыз воштон ӧжытак кемагес кыстӥськоз. Шуг-секытъёс медаз кылдэ шуыса, бумагалэн вылтусыз трослы уз воштӥськы. Инфляциез алонъя нуиськоз бадӟым эскерон уж. Россилэн бюджетэз, озьы ик республикамылэн но кутэмын луоз, коньдонлэсь воштӥськемзэ чакласа. Л. МАЛЫХ. Удмурт Республикаысь Правительстволэсь ужын вормонъёс басьтэм понна премиоссэ сётон сярысь Удмурт Республикаысь Правительстволэн Постановлениез 1997 арын 1 ноябре Ижевск город � 965 Удмурт Республикаысь Правительстволэн ужын вормонъёс басьтэм понна премиосызъя кенешезлэсь, кудӥз кылдытэмын Удмурт Республикаысь Правительстволэн 1997 арын 27 октябре кутэм 946 номеро постановлениезъя, ӵектонъёссэ эскерыса, Удмурт Республикаысь Правительство пуктэ: 1. Удмурт Республикаысь Правительстволэсь ужын вормонъёс басьтэм понна премиоссэ 1997 арын сётоно: Глазовысь 3 номеро нылпи юртысь коллективлы, нылпиосты дышетонын но будэтонын вормонъёс басьтэмзы понна; Удмурт кун университетысь ужасьёслы (А. К. Барсуков, А. Н. Панин, О. Ю. Нестерова, С. А. Ушнурцева, К. А. Лапин, А. И. Кузнецов, В. А. Обухов), Удмурт Республикаысь Пудоез эмъянъя валтӥсь управлениысь (Г. Н. Бурдов), Ижевскысь гурт хозяйствоя кун академиысь (Е. И. Марасинская), Завьял ёросысь "Восточный" совхозысь (И. М. Гараев) ужасьёслы "Выль иммуноглобулиновой препаратъёсты поттонэз кылдытон но радъян" ужзы понна; "Удмуртнефть" ОАО-ысь ужасьёслы: В. И. Кудиновлы, Е. И. Богомольныйлы, Р. Т. Шайхутдиновлы, М. И. Дациклы, В. А. Шмелевлы, Б. М. Сучковлы, В. А. Савельевлы, Г. И. Пьянзинлы (кулэмын), И. А. Галикеевлы, С. В. Афанасьевлы, "Удмурт Республикаын нефтез кыскон понна му валлин портон амалэз кылдытон но промышленносте пыӵатон" ужзы понна. 2. Удмурт Республикаысь Правительстволэн Аппаратэзлы республикалэн бюджетысьтыз висъяно 21,7 миллион манет, Удмурт Республикаысь Правительстволэсь премиоссэ сётонэз радъян понна. Удмурт Республикаысь Правительстволэн Тӧроез П. Н. Вершинин Шаермы вамышъя азьлане Умой сямлы пӧрмиз ини Республикамылэн нуналэз азьын шаермылэн азинскемезлы куд-ог йылпумъянъёс лэсьтыны. Мар меда ӟечез лэсьтэмын туэ укмыс толэзь ӵоже? Огъя поттэм вузъёслэн быдӟалазы кылем арын кадь ик возиське. Поттэмын соос 12,2 триллион манет тыр. Ӟеч ужась предприятиос пӧлын туннэ - "Электромеханический завод" предприятие, "Чепецкий механический завод", "Удмуртнефть" но "Удмуртторф" огазеяськонъёс. Удалтӥзы нянь, картофка, бакча сиёнъёс. Ортчем арен ӵошатыса, одӥг гектарысь 3,6 центнерлы тросгес ю тысь басьтэмын. Промышленностьын азьпалан мынэ куинь удыс: машина поттон, цветной металлургия но сиён-юон поттон. "Глазов-молоко" кун предприятиын но акциосын "Ува-молоко" огазеяськонын чурыт сыр дасяны кутскизы. Республикамы басьтыны быгатӥз выль автобусъёс, троллейбусъёс. Кылдэмын ужбергатӥсьёслэн 7,5 сюрс пала пичи предприятиоссы. Отын ужа 100 сюрс пала адями. Соослэн тыршеменызы 800 миллиард манетлы пӧртэм вузъёс поттэмын. Ӝыны ар куспын ужбергатӥсьёс республикалэн бюджетаз 183,1 миллиард манет коньдон пыртӥзы. Республикамылэн экономикаяз инвестициос чотын США-ысь 5,2 миллион доллар кыскемын. Уждунлэн быдӟалаез, шорлыдын вераса, республикаямы 737 сюрс манетозь вуиз. Ужтэк кылемъёслэн лыдзы 28 процентлы кулэсмиз. Усьтэмын куинь выль школа но одӥг нылпи сад. Дасяз Т. БАННИКОВА. Данлэн дуныз бадӟым Коньывуон толэзьлэн пумаз азьло Советской Союзысь калык арлы быдэ пусъёно луэ политической репрессиос улэ сюрылэмъёслэсь нуналзэс. Историмылэсь шимес учыръёссэ та нуналэ тодэ ваёно мур куректыса но сюлэм висьыса: Сталин кивалтон вакытэ макем бадӟым изъян лэсьтэмын вал вань страналы, советской калыклы, озьы ик удмурт калыклы. Сюрсъёсын, миллионъёсын чик янгыштэм адямиослэн улонзы юнме шорысь уретэмын, семьяоссы куашкатэмын, ваньбурзы таламын, нылпиоссы сирота кылизы яке мумы-бубыоссы сямен ик вань сьӧд адӟонъёсты чидазы. Трос учыръёсы соосты судтэк но виылыны приговор кутылӥзы, следствие нуылӥзы жугыса но курадӟытыса, чик ӧвӧлтэм йыружъёссы сярысь кужмысь показаниос басьтылӥзы. Удмуртиын тужгес но бадӟым изъян лэсьтэмын ужась интеллигенцилы, удмурт калыклы. 30-тӥ аръёсы Удмурт писательёслэн союззы быдэсак сямен, 18 мурт, быдтэмын вал. Соос пӧлын нырысетӥез - удмурт калыклэн дано пиез, соку пушйыны ӧдъясь культурамылэн яркыт кизилиез Кузьма Павлович Чайников - Куӟебай Герд, кинлэн вордскемез дырысен вуоно арын 100 ар тырме. Быдтэмын яке спецпоселениосы келямын но ӧз берытске ни туж уноез кулаке поттэм крестьянъёс, озьы ик визьмоосыз ожгарчиос (воинъёс). Властьёслэн трос аръёс ӵоже ватыса возем Сталинэз мултэс данъян вакытлэн пуштросэз сярысь ватытэк вераськон кутскиз 1956 арын, КПСС-лэн ХХ съездаз. Нош политической репрессиос улэ сюремъёсты шонере поттон уж паськыт ӧръяськиз берло аръёсы гинэ, та бадӟым ужрад али ке но пумаз-йылаз вуттэмын ӧвӧл на. Шимес адӟонъёс пыр потэм но ваньзэ чидам адямиос асьме шаерамы туннэ нуналлы трос ӧз кыле ни. Удмуртиын соос ог 4 сюрс мурт лыдъясько, кык сюрслэсь ятырез уло Ижевскын. Котькытын сямен ик, дорамы но янгыштэм муртъёсты шонере поттон ялан мынэ. Ижевскын Культбаза шуыса нимаськись микрорайонын, кытын ыбылэмын вал 426 арестовать карем муртъёс, буре ваён (мемориальной) пул шуккемын. Уй пал шайвылын быремъёслы сӥзем памятник усьтэмын. Со шимес аръёсты ас вылазы адӟемъёсын алигес ортчем пумиськонын политической репрессиос улэ шедьылэмъёсты шонере поттон вылысь, трос но сюлмо ужамзы понна Иж мэрилэн Почёт грамотаосыныз пусъемын ассоциациысь азьветлӥсь муртъёс: Р. А. Жуйкова, Г. А. Вознесенских, Н. В. Колесова, И. П. Сергиенко но А. А. Муравьева. Нош люкаськемъёслы концерт возьматӥзы асьсэос ик лыктэмъёс - ветеранъёс, соослэн хорзы, устоосыз самодеятельной артистъёс. Сюлме мур пыӵамон чузъяськизы ӟуч кылбурчилэн Владимир Тяптинлэн Куӟебай Гердлы, Ашальчи Окилы, фронтысь бертэмез бере, трос аръёс ӵоже ГУЛАГ-ын курадӟем Георгий Модзалевскийлы сӥзем чуръёсыз. Таиз азьвыл узник ачиз но татын вал, шимес адӟонъёсызлы сӥзем кырӟанзэ кырӟаз. Со сяна, возьматэмын вал Удмурт национальной театрлэн Алексей Шкляевлэн гожтэмезъя "Дор" спектакльысьтыз люкетэз. Валтӥсь рольёсты шудӥзы дано артистъёс Геннадий Соловьев но Валентина Загуляева. Анаезлы сӥзем поэмаысьтыз люкетсэ лыдӟиз репрессиос улэ шедьылэм Юрий Кузьмин но. Концерт возьматонэ пыриськизы Ижевскысь музыкальной школаосысь коллективъёс, нылпиослэн хорзы, крезьгурчи Виктор Шацкий, кырӟась но арганчи Василий Глушков... Со сяна, пумиськонэ лыктэмъёс дунтэк учкизы Россиын поттэм выль кинофильмез. Л. ФЕДОРОВ. Сюдӥсь-вордӥсьлы тау карон Валлян, 11 ноябре, Ижысь "Металлург" культура дворецын сӥё-дано ужрад ортчиз. Со сӥземын вал гурт хозяйствоын но сиён-юон поттон удысын ужасьёслэн праздниксылы. Татчы люкаськизы быдэс республикаысь устоосыз музъем ужасьёс, пудо утисьёс, хозяйствоослэн, ёросъёслэн кивалтӥсьёссы, гуртысь специалистъёс но мукетъёсыз. Празднике лыктэмъёсты нырысь ик ӟечкылаз гурт хозяйствоя но сиён-юон поттонъя министр Василий Жуйков. Собере микрофон азе потӥз Кун Кенешлэн Тӧроез Александр Волков. Гуртоослы шуныт кылъёс вераса, со шуиз: - Куазь урод ке но улӥз, тӥ котькулэсь уно ю тысь кутсады, гектарысьтыз шорлыдын 18,5 центнер, нош ваньзэ - 1 миллион тонналэсь ятыр. Удалтэм ю-нянь будэтӥзы Алнаш, Вавож, Пичи Пурга, Можга районъёсысь музъем ужасьёс. Шаерысьтымы данакез хозяйствоос Кубаньын кадь ю тысь люказы, гектарлы быдэ - 35-38 центнер. 80 сюрс тонна картофка октэмын. Будэ йӧл, сӥль, курег пуз поттон. Но умоеныз ӵош шуг-секытъёс уг быро. Вузкарыны кутскиськом Москваен, интыысьтыз вырӟе ни "Етӥн" программа. Россия сое улонэ пыӵатыны юрттоз. Сыӵе оскон вань. - Гуртэз валан вылысь отын вордӥськоно,- ватсаз Правительстволэн Тӧроез Павел Вершинин. - Берло дыре удыслэн инъетэз, материальной базаез син азьын лябӟе. Озьы ке но, гурт калык туэ ӟырдыт сямзэ возьматӥз, лулысь-сюлмысь тыршиз. Шаерамы поттэм сиён-юонмес калык шумпотыса басьтэ. Кунгож сьӧрысь ваеменыз уд ӵошаты, асьмелэн ческытгес. Нош лэчытэсь ужпумъёс кылё. Выль арозь хозяйствоослы нянь вузамзы понна уксё сётоно. Россия кредит висъялоз, но процентсэ 28-озь вуттӥз ни. Выль арын но гурт калыклы юрттэт вуоз. Президентлэн Удмуртиысь адямиез Виктор Балакин мылкыд кариз толэз умой ортчытыны. Собере данак усто ужасьёслы, специалистъёслы, хозяйствоослэн кивалтӥсьёссылы, удысысь тодосчиослы сётъязы Кун Кенешлэсь дано нимъёссэ но Почёт грамотаоссэ. Люкаськемъёс учкизы шулдыр концерт. Г. РОМАНОВ. Ӟечкыласьком! 60 арес - трос-а со, ӧжыт-а? Котькызьы шу но, ӵапак сомында тырмиз ноябрь толэзе Андрей Васильевич Гильмаевлы. Арессэ возьматӥсь лыдпус бадӟым ке но, Башкортостанысь воргорон егит пияш кадь етӥз ай. Ужа со Татышлы ёросысь "Азьлань" газетлэн редакторез луыса. Бен, пенсие потон дырыз ке но вуэмын ни, матысь дыре ужысь кошкыны уг на малпа. Малы ке шуоно, пыд йылаз султытоно выль газетэз - Кам сьӧрысь вань удмуртъёслэсь газетсэс. Вуоно арысен со лыдӟисьёс доры вуоз ни. "Удмуртия" издательствоын Андрей Васильевичлэн пичи веросъёсын куинь книгаез потэмын: 1982-тӥ арын - "Кема пиштӥсь укноос", 1989-тӥ арын - "Улонлэн пушъетъёсыз", 1994-тӥ арын - "Вакытъёслэн гердзы". Али черодзэ возьма ньылетӥез - "Мон, Тальёна но мукетъёс". А. В. Гильмаев 1977-тӥ арысен ни "Азьлань" газетын ужа. 1985-тӥ арын журналистика удысын азинсконъёсыз понна, Башкортостан Республикаысь культура удысын дано ужась сӥлы карон ним сётэмын. Юбилеез азьын Андрей Васильевич но кузпалыз Марзия Шартдиновна 35 ар ӵош улэмзэс пусйизы - инӟы сюан. Кыкназы но соос вордӥськемын Вукогуртын. (Документъёсын со Уразгильды шуыса гожтӥське). Куинь нылпи будэтӥзы. Самой бадӟымез - пи. Со Башкортостанысь Баймак городын валтӥсь геолог луыса ужа. Нош кыкез - нылъёс. Таосыз школаын дышето. Аслаз аресэзлы учкытэк, Андрей Васильевич азьпалан трос ужъёсты быдэстыны малпа на. Кылсярысь, пичи веросъёсын бигер, башкир но ӟуч кылъёсын нимаз книгаос поттыны но мукет. Бен, кызьы сюлмаськонъёсыз ӧжыт луозы журналистлэн, писательлэн, краеведлэн но удмуртлыкез утьыны тыршись адямилэн. Воргоронлэн сюлмыз ужтэк пукыны нокызьы но уг чида. А. В. Гильмаев газетмылэн матысь эшез. Кызьы со ачиз вераз, "Удмурт дуннеез" 1963-тӥ арысен, пе, лыдӟисько ини. Ми сюлмысьтымы ӟечкыласьком тӥледыз, Андрей Васильевич, юбилееныды. Вань ӟеч малпанъёсты мед быдэсмозы! Туспуктэмез В. КАМАШЕВЛЭН. Крезьгур дуннее нырысетӥ вамышъёс Элькунысьтымы искусствоя школа-интернатын крезьгур дуннее пырем пиналъёслэн нош ик лыдзы будӥз. Гуртъёсысь пиналъёс бадӟым конкурс пыр ортчыса ке но дышетскыны лыктэмын, соосты выльысь эскеризы на, ӧвӧл-а пӧлазы янгышен сюремъёс. Шулдыр ӝытын пиналъёс данзэс ӧз ыштэ - быгатӥзы вань эскерон-чакланъёс пыртӥ ортчыны, возьматӥзы кин малы дышем ини кык толэзь куспын. Та ӝыт эшшо но золгес бурдъяз пиналъёсты умой дышетскыны, крезьгур удысын выль тодон- валан басьтыны. В. ГОЛОВКИНА, школа-интернатын ужась. * Пинал арганчилэн Валера Голубевлэн шудэмез улсын кырӟамъя кырӟам потэ, шуо Надя Шудегова но Лариса Тимофеева. * Галя Иванова но Таня Кузнецова бырйизы асьсэлы фортепиано удысэз. * Шулдыр кырӟамлы золгес чабем потэ. Туспуктэмъёсыз В. КАМАШЕВЛЭН. Вордскиз но кыдаз ож тылӝуын Ноябрьлэн кутсконэз пӧртэм ужрадъёсын узыр вал. Ортчиз удмурт калыклэн съездэз, Октябрь революцилэн юбилеез. Милиция та нуналъёсы ик пусйиз 80 ар тырмонзэ. Ӟеч сямъя асьмеос котькуд праздник азьын вакчияк йылпумъянъёс лэсьтӥськом. Республикаысь югдурез утисьёслы но вань ма сярысь вераны. Юбилейлы сӥзем сӥё-дано ӝытын, ортчиз со 10 ноябре Операя но балетъя театрлэн юртаз, трос гинэ ӟеч кылъёс чузъяськизы милицилэсь формазэ нуллӥсьёс сярысь. Бадӟым уж нуэмын криминальной милициен, патрульно-постовой службаен но югдурез утёнъя музон ёзъёсын. Кылем арен ӵошатыса, шаермыя преступность 19 процентлы кулэсмиз. Огшоры лыдпус гинэ со ӧвӧл. Уен-нуналэн тушмонэн нюръяськон, шорад мертам пыӵал пумитэ вамыштон, лушкам ваньбурез кузёезлы берыктон... - Милям одӥг малпанмы - ужмы ӧжытгес мед луоз,- таӵе кылъёсын йылпумъяз ӟечкыланзэ Удмурт Республикаысь югдурез утёнъя министрлэн нырысетӥ воштӥсез милициысь полковник В. С. Осипов. Курсант-а тон, рядовой яке офицер, дӥсяд ке вылад милицилэсь погонъёссэ - пумозяз сыл, но сётэм кылдэ пыд улад эн лёга, вазиськизы егит эшъёссылы вань улонзэс калыкез кышкытлыклэсь утёнлы сӥзем ветеранъёс. Соос троссэ эшъёссэс, зэмос коммунистъёсты но комсомолецъёсты, ыштӥзы ож тылӝуын. Быремъёсты буре вайыса, зал одӥг минутлы чалмиз. Милицилэн радъёсыз арлы быдэ егитомо: вуо дышетскем, вылӥ быгатонлыко боецъёс. Сыӵе курон пуктэ ачиз улон. Кескич, визьмо преступниклы пумит кулэ зол кужым, туала техника. Соку югдурез утёнъя министрмы вань калык азьын вераны быгатоз: "Удмуртиын шараямтэ йыруж ӧвӧл". Россиысь милицилы 80 ар тырмон юбилейлы сӥзем ӝытэ пыриськизы Кун Кенешлэн но Правительстволэн кивалтӥсьёсыз, Россиысь Президентлэн республикаямы юнматэм представителез. Люкаськемъёс понна концерт возьматӥзы Операя но балетъя театрысь артистъёс. Л. ПЕРЕВОЗЧИКОВА. Журналистъёсын пумиськонъёс УЛЭП КЫЛЁЗЫ ИК Радиотелецентрлэн 1,5 миллиард манет тыронэз люкаськиз Кылем вторнике Удмурт Кивалтэтын журналистъёсын пумиськиз шаерысьтымы Радиотелецентрлэн кивалтӥсез Дмитрий МАКАРЕНКО. Со мадиз элькунамы радиолэн но телевиденилэн кылдэмзы но та удыс азьын сылӥсь лэчытэсь ужпумъёс сярысь. Алигес Удмурт радио пусйиз 65 ар тырмонзэ, нош телевидение вордӥськиз 1956 арын. Та ласянь асьмеос азьпалтӥм бадӟымесь Пермь но Казань городъёсты. Ведь со вакытэ нимысьтыз черод тупатэмын вал, кытын ку телевидение ужаны кутскоз. Со арын нуналаз куинь час ӵоже передачаос мынӥзы. 1962 арын вуттэмын вал радиорелейной станция, нош ретрансляторъёс - Воткинскын, Сарапулын, Камбаркаын, Каракулиноын но Дэбесын. Балезиноын пуктэмын кужмо туала выль станция. Дыр ортчемъя, куронъёс будӥзы. Ижевскын ӝутэмын самой кужмо станция (Песочной, 13), собере Вараксино дорын - телевышка. Со луонлык сётӥз 5-6 каналэн ужаны: 1990 арын 5-тӥ канал (Санкт-Петербург) усьтӥськиз, вить ар ортчыса - "Новый регион". Со вакытэ кылдытӥське ни вал 34-тӥ канал. Кызьы тодӥськоды, Санкт-Петербургысь канал кысӥз (коньдон тырыны ӧм быгатэ). Радиотелецентр араз 4 миллиард манет доход басьтэ ке, расходъёсыз 6 миллиард манет люкасько. Озьы 1994 арын центр 180 миллион изъян адӟиз, 1995 арын - 900, миым - 1,5 миллиард. Туэ но сомында люкаськемын ни. ОРТ канал (Москва) асьмелы 1,5 миллиард манет сётыны кулэ, нош пениез 40 процент люкаськемын. Сое 2001 арозь берыктыны кенешемын. Мукет но амалъёс кутӥсько. ОРТ-ен огкыл кутэмын Удмуртиысь реклама сётъяны. Со кӧня ке юрттоз тыронзэ кулэстыны. Дырын вераса, 6 минут ӵоже реклама сётӥське. Отчы пыре чурен гожтэмез но (бегущая строка). Радиотелецентрлэн тужгес но трос тыронъёсыз энергетикъёслы. Шуныт сётӥсьёслы центр 18 вагон музъем эгыр сётӥз ни. Озьы пунэм тырон берыктӥське, нош бюджетэ коньдон уг вуы. - Федеральной бюджетын милям удыслы туэ 2,1 триллион манет коньдон висъямын ке вал, вуоно арын 1,4 триллион гинэ чакламын,- шуэ Дмитрий Викторович.- Милемды оло туннэ яке ӵуказе кысозы. Электрокужым сётӥсьёс кемалась кышкатыса возё ни. Соин ӵош ик Россиысь радиолэн но "Маяклэн" милемлы 1 миллиард манет пала тыронъёсыз. - Кизнер районын улӥсьёс ку Удмуртиысь телепередачаосты учкозы? - Та ласянь ужаськом. 1995 арын передатчик пуктӥм ни. Кулэ на эшшо одӥг. Сое ӝоген вуттом, но коньдон уг тырмы. Та ужпумъя Правительствоын но кенешонъёс вал ни. Г. РОМАНОВ. Ӵуказе - Гурт хозяйствоын но сиён-юон поттон удысын ужасьёслэн нуналзы Шуг-секытъёсты вормыса Гуртын тыршисьёс понна йылпумъяське эшшо огез ар. Шонерзэ вераса, со номырин уг висъяськы мукетъёсызлэсь. Колхозъёсын улон пумен секытгес луэ. Азьло техникаез тупатъян, солы эстӥськон дасян умойгес ке вал, туэ та ужъёс кизьыны потытозь кыстӥськизы. Ваньмыз со потэ коньдон тырмымтэ бордысь. Озьы ке но, механизаторъёс, кивалтӥсьёс но специалистъёс сюлмысь тыршемен, тулыс бусы ужъёслы техникаез дыраз вуттӥм. Озьы ёросмы кизёнзэ быдтӥз азьмынӥсьёс пӧлын но трослы умойгес но тулыс куазь алама улэмен, со кемагес кыстӥськиз. Озьы ик дыраз вуттэмын вал пудо сиён октон машинаос но умой утялтэмын турынъёс но мукет пудо сиён. Валамон ни, кизён - со вуоно ю-няньлэн инъетъёсыз пӧлысь одӥгез юн бадӟымез но кулэез. Калыкын юнме шуиллямтэ: мар кизид, сое ик аралод, но вань на мукет веран но: кеносэ пырымтэ нянь - со нянь ӧвӧл на. Соин ик тулыс кизёнэз быдтыса, механизаторъёс рос-прос басьтӥськизы комбайнъёсты дасян борды. Коньдон тырмымтэен, та уж кыстӥськизгес ик. Вераны кулэ, таӵе учыръёс районын ӧй вал на - араны потоно ини, нош вань комбайнъёс тупатъямтэ. Ӵош мынӥзы ю-нянез аран но комбайнъёсыз выльдон. Но туннэ верам потэ: гуртын улӥсьёс мар быгатӥзы, ваньзэ лэсьтӥзы, ю-нянез октыса-калтыса быдтон вылысь. Ёросмы быдэс элькунъя нырысетӥосыз пӧлын йылпумъяз юосты октонзэ. Басьтэмын узыр ю-нянь, - котькуд гектарысь 24 центнер. Кысык ужъёссы уката но умой радъямын вал. "Молодая гвардия" но "Родина" колхозъёсын. Кивалтӥсьёссы Крылов М. А. но Максимов В. М. Та хозяйствоосын комбайнъёссэс дыраз дасязы. Нош ёросъя удалтэм ю-нянь басьтӥзы "Мир" колхозын но Асан совхоз- техникумын - гектарлы быдэ - 33,3 центнер. 28 центнерлэсь уногес ю тысь люказы "Казаково", "Колос", "Правда" нимо колхозъёс, "Кизили" крестьян хозяйство. Одӥг кылын вераса, 21 хозяйствоос пушкысь 19-аз басьтэмын быдэн 20 центнерлэсь ятыр ю-нянь. Ӟеч ужазы комбайнёръёс но ю тысь шертон-куасьтон агрегатъёслэн опреаторъёссы. Ёросын самой трос ю кутсаз "Колос" колхозысь комбайнёр Иван Яковлевич Тарасов. Со СК-5 "Нива" комбайнэзлэн бункерысьтыз 9439 центнер ю тысь ӝоктӥз. Умой тыршизы Суворов нимо колхозысь Александр Антонович Замятин, "Мир" колхозысь Геннадий Шакирович Кудрявцев но трос мукетъёсыз. Сюлмысьтыз тыршиз "Правда" колхозысь КЗС-лэн операторез Борис Александрович Владимиров. Пусъем потэ кык агай-вынъёсты - агрономъёсты Лебедевъёсты. Одӥгез - Виктор Николаевич ужа "Прогресс" колхозын валтӥсь агроном, нош Петр Николаевич - Азин нимо колхозын валтӥсь агроном. Вань сюлэмзэс сёто соос яратоно ужзылы. Ю октон кутскем бере, кидыс дасянэз но радъяло. Соин ик соослэн туэ но вань кидыссы нырысетӥ но кыкетӥ классозь вуттэмын ини. Озьы ик туж ӟеч кылъёс верам потэ "Нива" колхозлэн валтӥсь агрономезлы Григорий Анатольевич Бусыгинлы. Ёросын вань выль агротехнической амалъёсыз со нырысь ик кутэ. Соин ик та колхоз берло аръёсы умой ю-нянь басьтэ. Быгатыса ужало озьы ик "Молодая Гвардия" колхозлэн кивалтӥсез Михаил Александрович Крылов но валтӥсь специалистъёс инженер Игорь Витальевич Бобров, агроном Николай Геннадьевич Николаев, зоотехник Валентина Васильевна Марданова. Пусйытэк кельтыны уг луы колхоз кивалтӥсьёсты "Родинаысь" - Максимов Вячеслав Михайловичез, "Ниваысь" - Малышев Владимир Анатольевичез, Ильич нимо колхозысь егит кивалтӥсез Двоеглазов Вениамин Васильевичез. Вакчияк верам потэ пудо вордон удысын ужъёс сярысь но. Жаляса верано луэ, пудоослэн лыдзы ялан кулэсме. Сюро таза пудоос, кылем арын 1 октябрен ӵошатыса кулэсмизы 245 йырлы, скалъёс - 36. Кӧня ке будӥз йӧл поттон, туэ укмыс толэзь куспын скаллы быдэ кыскемын шорлыдын 2091 килограмм яке миым сярысь 203 килограммлы тросгес. Та удысын умой ужа "Нива" колхоз: укмыс толэзьскын скаллы быдэ 2823 килограмм йӧл басьтӥз ни. Кылем арен ӵошатыса, со будэмын 661 килограммлы. Дроздовка фермаын (кивалтӥсез Терентьев Виктор Николаевич) кыскемын котькуд скаллэсь 3150 килограмм. Татысь доярка Малышева В. М. скалэзлы быдэ уськытӥз 3420. Озьы ик усто ужало "Кизили" крестьян хозяйствоысь дояркаос. Соос укмыс толэзьскын котькуд скаллэсь шорлыдын поттӥзы 2525 килограмм. Но колхозъёсын коньдонэн югдур туж секыт. Промышленной вузъёслы но техникалы дунъёс туж бадӟымесь, нош колхозъёслэн поттэм ваньбурзы дунтэмен кошке, соин ик колхозъёс уг быгато асьсэлэсь расходъёссэс гинэ но берыктыны, ужало бадӟымесь ыштонъёс адӟыса. Соиз умой, туэ государство льготной кредитэн коть юрттӥз: Удмуртиысь Кун Кенеш, Кивалтэт но Гурт хозяйствоя но сиён-юон поттонъя министерство тулыс кизёнэз ортчытыны сётӥзы авансэн 50 процент ссуда вуоно ю-нянез вузам чотын. Огъя вераса, миллиард кызь вить миллион манет, 10 процентэн. Умойтэмез: со уксёез берыктоно 1998 арын южтолэзе. Кредит уго "улэп" уксёен сётэмын ӧй вал, колхозъёс сое басьтӥзы эстӥськон- вӧяськон материалэн. Озьы ик ёрос бюджетысь сётэмын вал нокыӵе проценттэм кык сю миллион манет, комбайнъёсты дыраз дасян понна. Ваньмыз юрттӥз колхозъёслы вань бусы ужъёсты дыраз ортчытыны. Али дасяськоно вуоно арлы. Угось кызьы дасяськод, озьы ик ортчытод вуоно кысык ужъёсты. Вераны кулэ, та ужъёс ёросын алама ик уг мыно. Пудоослы дасямын тырмыт сиён - котькуд йырлы быдэ 24 центнер кормовой единица. Йылпумъямын кын улэ гырон, но со кӧня ке кылиз, "Искра", "Решительный", "Кама" колхозъёсын. Тырмыт кисьтэмын вуоно арлы кидыс: 65 процентэз нырысетӥ но кыкетӥ класслы тупа. Нош вить "Прогресс", "Родина", "1-ый Май", Азино нимо но "Решительный" колхозъёсын - ваньмыз кидыссы нырысетӥ но кыкетӥ классозь вуттэмын. Куд-ог колхозъёсын кутскизы ни сельхозмашинаоссэс вуоно бусы ужъёслы дасяны. ВИТАЛИЙ ГОРОДИЛОВ, Алнаш ёрослэн тӧроез, Кун Кенешлэн депутатэз. Берекет ТОДМАТӤСЬКОМ ВЫЛЬ ЧУРЪЁСЫН Вордӥськем гуртэ Шаерам гуртъёс уно: Чур, Юбер, Эгра, Дэри... Нош мыным укыр дуно Ас гуртэ - Улын Юри. Туж шулдыр, чебер азе Пуксемын мынам доре. Меӵ гурезь но выжые, Куашетӥсь нюлэс дуре. Тани куинь даур ӵоже, Секытлы сётӥськытэк, Сяськая но выльдӥське Вордӥськем мусо гуртэ. Син азям котькуд корка, Песьтэр нюк, Уча сэрег, Гозы возь, Семон капка, Поӵыш пал, дуно шуре. Сэрего но сэрего Гуртэлэн бусыосыз. Уй тӧлъя весь куашето Вож лысо нюлэсъёсыз. Аръёсы но ортчемъя, Кадыре но быремъя, Вордӥськем гуртэ, тонэ Малпасько мон ӵем гинэ! Али но син азям Кап-кап гинэ вия Липет пумысь зор ву. Чиль-дол гинэ чиля Ымныр вылам синву. Кема гинэ возьмай, Дас ар,.. кызь ар ортчиз. Выльысь бертод, малпай - Тани куамын тырмиз. Будӥз вордэм пимы, Атай со кемалась. Асьме выжы озьы Улӟе, пушъе выльысь. Ӧй вуы валаса, Кызьы даур ортчиз. Кызьы пужмераса, Сьӧд йырсие гужмиз. Улон бызе, дыртэ, Ас ужъёссэ лэсьтэ. Мӧзмись мӧйы сюлэм Ӵемгес ӝожомылэ. Чагыр инмысь лулыд Поръя, дыр, йыр вадьсам. Тынад тусыд-буйыд Али но син азям. Васса ВАСИЛЬЕВА. Пичи Пурга село. Выль книга Мадьяр литература - удмурт кылын Удмурт кун университетлэн типографияз "Дунай тулкымъёс - Кам ярдурын" выль книга потӥз. Дасязы сое Вячеслав Ар-Серги но мадьяр учёной Иштван Козмач. Та антологиын возьматэмын мадьяр литературалэн вордскем дырысеныз али нуналозь сюресэз. Бадӟым инты висъямын мадьяр кылосысь но кылбуретысь туала лирикалы. Тросэз соос пӧлысь удмурт кылэ берыктэмын ӟуч кыл пыр. Венгер кылысь удмуртэ ичи берыктэмын драмая ужъёс, соин ик книгае пыртэмын на шер пумиськылӥсь "сьӧд комедия" жанръя уж. Татчы ик шедиз удмурт шаерлы тодмо луись Петӧфилэн одӥгез веросэз. Бен, книгае ӧз шеде на мадьяр литератураысь уно тунсыко ужъёс. Оскем потэ, та сузьет берпуметӥез уз луы шуыса. Н. ЛИПИНА. Берекет ПЫРЫОС-ВИЗЬЛЮКЪЁС * Лимонысь соксэ пызьыртоно. Мар лэсьтоно, со тросгес мед люкаськоз шуыса? Лимонэз 5 минут ӵоже пӧсь вуын возе. Озьы емышысь сок кык поллы трос пызьыралоз. * Чырс емышъёслэсь компотэ сакыр песок тросгес мынэ. Отчы чепыльтэт сылал ватсаса оскалтэ ай - компот эшшо но ческытгес луоз. * Курег сӥль (чипы) ческытгес шӧмо луоз, пӧзьтыкуды пушказ петрушка яке йырын сугон ке понӥды. * Куасьтэм губиез пытсэто посудаын возёно, озьытэк солэн аспӧртэм ческыт зыныз тӧлӟе. * Сӥлез пыжыкуды вилкаен яке пуртэн эн бышкалтэ - пушкысьтыз сокез виялоз. * Куасьтэм губиосты сылал ватсам йӧл пушкын возиды ке, соос выль дыръязы кадь луозы. Ортчемез уг вуны Сарапулысь Башенинлэн дачаяз усьтӥськиз татысь суредасьлэн Василий Иванович Тихоновскийлэн выставкаез. Сӥземын со Республикамылэн нуналэзлы. Сюлэсь ятыр этюдъёс, черк вылтусъёс, пӧртэм аръёсы гожтэм автопортретъёс, инкуазь суредъёс но авторлэн мукет ужъёсыз шедизы татчы. Ваньмыз соос возьмато шаермылэсь толон нуналзэ. Василий Тихоновский тужгес трос гожъяськиз 20-30-тӥ аръёсы. Но инмарлы мур оскемез трос шуг- секытъёс кылдытӥз солэн сюрес вылаз. 1937 арын пытсэт улэ пуктэмзылэн одӥгез мугез но та ик луиз. 1938 арын Василий Иванович кулӥз Новосибирск областьысь одӥгаз лагерьын. В. И. Тихоновскийлэн суредъёсыз кема дыр ӵоже улӥзы солэн Иван пиез киын. 80-тӥ аръёсы атаезлэсь ужъёссэ Иван музее сётӥз. Бӧрысь со суредъёс трос выставкаосын возьматэмын вал, вуылӥзы Венгрие но. В. РОГАЛЕВ. Покчи вынъёсмы Ожмасько ке но... Пичи левпи (нимыз Тулыс) но гондырпи Ксюша Белградысь зоопаркын уло. Соос татысь пиналъёслэн самой яратонооссы. Та зоопаркын кылдытэмын пӧртэм выжы пӧйшур пиосты возьматон инты. Тӥни отчы ик ярато ветлыны пиналъёс. Кызьы макакаос висьыны ӧдъязы? Техаслэн лымшор палысьтыз обезьянъёсты возён питомниклэн кивалтэтэз Филиппины кунысь басьтӥз макака выжыысь кык пичи обезьянъёсты. Техасын макакаослэн кӧня ке улэмзы бере, тупамын ни вал Филиппиныысь кӧня ке сю обезьянъёсты басьтыны, нош витьымтэ шорысь нырысьёсыз кыкез Эбола нимо туж шимес кезегъянлэсь кулӥзы. Вот шайтан басьтон! Техасысь властьёс питомникын юн карантин ялӥзы, азьвыл вераськон кагаз вылэ ик кылиз. Нош филиппинъёс асьсэ вылын сыло: милям обезьянъёсмы тазаесь. Каламбеысь зоологияя институтысь ветеринар Рауль Гарсия ваньмызлы ялӥз: милям обезьянъёсмы дуннеын самой таза луо. Берта асьмеды утёз? Та кызь ньыль аресъем Берта нимо писпу эбекез возё Австралиысь Аделанда университетлэн лабораторияз. Татын кӧня ке ар ини Британиысь тодосчиос писпу эбекъёсты чакласа уло. Соос туж паймымон усьтэтъёс лэсьтӥзы: та пичи макеослэн мугоразы дурыстэм трос вируслы но микроблы пумит туала эмъюмъёс. Озьыен, та эбекъёс (соос писпуос вылын уло), оло, вуоно дауре асьмеды уно висёнъёслэсь утьыны быгатозы. Н. Маликов. Топольёс но завод Ижысь Дерегин проезд кузя чурен будӥсь топольёс ӟеч тодо татысь заводлэсь ортчем сюрессэ. Уго соос заводэз пуктон дыръя ик, 1760 арын мерттэмын вал. Табере писпуос зӧкталазыя ньыль метръемесь луизы ни. Заводлэн но сюресэз - кузь но узыр. Р. ВАСИЛЬЕВ. Вуре асьтэос Апокъёслы - туала дэрем Газетмылэн одӥгаз номераз лыдӟисьёсты тодматӥмы ни вал Людмила Молчановалэн "Удмурт калыклэн дӥськутэз" книга дасян бордын ужамез сярысь, возьматӥмы вашкала но туала дӥськутлы сӥзем кӧня ке эскизъёссэ. Удмуртлыкез гажасьёслы, вуриськыны быгатӥсьёслы туннэ ми дэмласькомы Людмила Молчановалэн одӥгез эскизэзъя туала дэрем вурыны. Выкройказэ дасяз но суредаз Надежда Касаткина. Дэрем чебер адӟиськоз пинал нылъёс но егитъёс вылын. Кулэ луоз тӧдьы, тӧдьыалэс огшоры басма (бязь) яке етӥн басма (кык но ӝыны метр); огшоры горд басма яке сатин (одӥг метр но ӝыны); гордалэс пужыен яркыт буёло туго кышет - павловской (бадӟым ке - одӥг, пичи ке - кык); 1 копейкаем вуж коньдон яке магазинын вузаськись коньдон весьлы (монисто) тупась тесьма; пӧртэм буёло - горд, вож, сьӧд, зарниалэс-ӵуж - басма юдэсъёс; сьӧд тесьма; "молния" замок. Тыбыр палызлы тӧдьы басмалэсь кык люкет вандоно (учке суредъя), азьпалызлы - одӥг люкет. Горд басмалэсь нимаз ватсэтъёс вандоно на чырты палзэ котыртыны (суред вылын векчи гожен возьматэмын) но мӧляяз вурыны. Саесыз нимаз куинь люкетъёслэсь вандэмын, дуръёсаз тӧдьы, нош шораз горд басма. Дэремлэн вылӥ люкетэзлэсь мышкысьтыз выточкаоссэ но азьпалысьтыз кильмамъёссэ вурем бере кутсконо пельпум но урдэс вурысъёс борды. Азьпал люкетэзлэн шораз горд басмалэсь ватсэт вурӟоно. Собере кутсконо чырты котырысь горд ватсэт (кокетка) борды. Мыш люкетъёссэ но азьпал люкетсэ пельпум вурысъёстӥз огазе вурӟыса, та ватсэтэз юнматоно чырты сирес борды - горд басмалэсь ватсэтлэн азьдорин палыз дэремлэн мыддорин палаз мед луоз. Вурысэз утюген волятэм бере, горд басмалэсь ватсэтэз дэремлэн азьдорин палаз берыктоно. Улӥтӥз кӧня ке миллиметр куасалтыса вурӟоно дэрем борды. Юбкалэн кузьдалаез 50 сантиметр, 1 метр 50 сантиметр пасьталаен басмалэсь (басмалэн пасьталаез 80 сантиметр ке, кык вандэтэз огазеяно луоз). Юбка борды вуроно куинь ёзо шал. Нырысетӥ ёзэзлы кулэ луоз: 7 сантиметр пасьталаен но 1 метр 50 сантиметр кузьдалаен тӧдьы басмалэсь вандэт, 8 сантиметр пасьталаен но 1 метр 70 сантиметр кузьдалаен горд басмалэсь вандэт. Горд басмалэсь вандэтэз тӧдьыез вылэ карыса, кыксэ но ӵош вурӟоно юбка борды. Кыкетӥ шалэзлы тӧдьы басмазэ басьтоно ни 1 метр но 80 сантиметр, нош гордзэ - 2 метр 20 сантиметр. Кыксэ но ӵош вурӟоно тӧдьы шал борды. Куинетӥ шалэзлы кулэ луоз: 5 сантиметр пасьталаен 2 метр но 40 сантиметр кузьда горд басмалэсь вандэт; 8 сантиметр пасьталаен но 2 метр 50 сантиметр кузьдалаен кышетлэсь вандэт (вандоно кеӵевыл - по косой линии). Горд басмазэ вылӥе карыса, тазэ но шалэз вуроно тӧдьы басма борды. Шаллэсь вылӥ люкетъёссэ (горд басмаез) ӧжытак кильымано. Вурӟем интыосты сьӧд тесьмаен котыртоно. Та шало юбкаез дэремлэн вылӥ люкетэз борды кильымаса вурӟоно. Со вурыс вылтӥ юнматоно сьӧд тесьмалэсь е. Саесэзлы манжетъёс кышетлэсь ик вуроно: 6 сантиметр пасьталаез, 30 сантиметр кузьдалаез. Саеслэсь люкетъёссэ огазе вурӟыса, манжет ултӥз кильымано, фонарик выллем мед луоз, собере огазеяно дэрем борды. Тугзэ чеберъянлы кутыны луоз пичиен-пичиен люкъяса, отчы-татчы вурӟоно. Горд басма вылтӥ аппликация лэсьтыны кутоно пӧртэм буёло басма юдэсъёсты, ньыль но куинь сэрего вандылыса, буёлъёссы ог-огзылы, мед тупалозы. Чырты котырысьтыз, мӧляысьтыз горд басма вылтӥ куинь ӵуж коньдон яке тесьма вурӟоно. Коньдонэн яке тесьмаен озьы ик чебертыны луоз елэсь калъёссэ, юбка борды нырысетӥ шал огазеям вурысэз. Дэремлэн тыбыр вылаз вуроно "молния" замок, солэн кузьдалаез юбка дорозь но луыны быгатоз. Выкройка сётэмын 46 быдӟалалы, но асьтэлы тупатыса, сое 1 сантиметрлы пичигес но, бадӟымгес но карыны луоз. Эн вунэтэ 1 сантиметрзэ вурыслы кельтыны. Дэрем медаз безды шуыса, миськыло сылал вуын. Йыре керттыны мыноз кышетлэн кылем ӝыныез (бадӟымезлэн). Крезьгурчи ӧте дораз Уваос дасясько дано крезьгурчизылэсь юбилейзэ пусйыны. Таяз аре Пантелей Николаевич Кузнецовлэн куатьтонэтӥ вордскем нуналыз луоз. Удмурт Республикаысь культура удысысь дано ужась, быдэс элькунлы тодмо композитор, кырӟась, крезьгуръя школаен кивалтӥсь бадӟым уж нуэ быдэс культура удысэз азинтонын. Вань мылкыд карисьёсты ӧтиськом Пантелей Николаевичлэн творчествоезлы сӥзем ӝытэ. Со ортчоз Уваысь "Юность" культура юртын 22 ноябре. Кутскоз 15 часын. Та ужрадэ лыктыны дасясько Кузнецовлэн эшъёсыз - тодмо писательёс, артистъёс, журналистъёс. П. ЛЮКИН, "Удмурт кенеш" огазеяськонлэн Уваысь ёзэзлэн кивалтӥсез. Берекет ТОДӤСЬКОДЫ-А ТӤ? Кин самой вылӥетӥ но кыдёке тэтче? Оло, малпалоды, кыӵе ке но пӧйшур шуыса. Ӧвӧл, со - вал. Бен, бен. Чилиысь Лариагибель 15 аресъем Хауз вылын 1949-тӥ арын 2 метр 47 сантиметр кеме вылӥе тэтчыны быгатӥз. Та паймымон вормон лэсьтэмын вылаз адямиен ӵош. Нош огназ дыръя вал эшшо но вылэ ӝутскыны быгатэ. Кузьдалае тэтчонын но вал азьпала потӥз: 11 метр 28 сантиметр кеме тэтчиз. Нош та лыдпус 1975-тӥ арын гужем кык поллы бадӟыматэмын вал. Соку Европаысь самой устоосыз вал вылын ворттылӥсьёс Майзенлаймлэсь приззэ басьтон вылысь ӵошатскизы. Вормисе потӥз ФРГ-ысь К. Бергман. Свингер вал вылын ӝужыт кенер но паськыт канава вамен соку тэтчемын 22 метр 16 сантиметр кеме. Л. ВАСИЛЬЕВА. "Эшъяськон бугор" конкурсэ КУРЫТ ЗОР Улӥз-вылӥз шудо егит семья. Малпалод, нокин но, номыр но уз люкеты кусыпсэс сӧрыны. Но сыӵе "сьӧд кужым" шедиз. Курыт вуэн эшъяськон семьялэсь кузёзэ быронэ вуттӥз. Пал кылем егит кышномуртлы бускельёсыз дэмлало кайгузэ юонэн буйгатыны. Но та вамыш ӧжыт гинэ мукет кайгуэ уг вутты. Нылыз анайзэ уте пыдэстэм бекчее выемлэсь. Кытчы но уг вутто та сюресъёс, кинэн но уд пумиськиськы, мае но уд адӟиськы. Тани туннэ но автостанциын юр! вазе. Тыраз ик калык. Кин кошке, кин пумита... Котькудӥзлэн та югыт дуннеын аслаз сюресэз, улон шоры учконэз, мертэтэз. Одӥгез малпаськон дуннеяз выйыса пуке, нырулысез но вань, шумпотӥсез, куректӥсез... Тани вадьсам пукись кышномурт но туж ик шумпотыса уг улы, шӧдске, ымныраз кисыриос пыраклы, оло, каръяськиллям. Палэнысен туж жаль адӟиське, синъёс ялан со шоры нуо. Тӥни киысьтыз гожтэтсэ кӧня пол лыдӟиз ини, оло, учкытэк вераны тодоз котькуд кылзэ. Ассэ вормыны тыршыса пальпотыны турттэ - уг пӧрмы. Учкылэмме шӧдӥз. Аслым но умой ӧз поты ни. Янгыше усем мурт сямен синъёсме скамья улын пукись кучапи шоры воштӥ. Мискинь, одӥг пыдыз ӧвӧл. Кузётэм, вылды. Я соиз, я таиз доры мыныса мӧзмыт нискетэ, юрттэт куре, эш утча. Ачим но ӧй шӧды, кызьы синъёсы выльысь со кышномурт шоры могӟизы. Пӧртэм муген паймем синъёсмы пумиськизы. Вӧзам пукисе пумитам могаса вазиз. - Эн пайме, ваньмыз со нылылы. Соку гинэ син шорам йӧтӥз шоколадъёсын тырмытэм пыр адӟиськись пакет. - Сомында?! - ачим но мар юамме ӧй вала ни шуак луэмысьтым. - Бен, бен, ваньмыз солы, амалы ке луысал... Гуньдӥз, веранэз куспетӥ луиз, секытэсь сӥзьыл зор шапыкъёс музэн ымныртӥз питырскизы курыт синкылиос. Кышномуртлэн, зэмзэ но, бӧрдонэз ымдураз вылэм... Ойдо бӧрд, улонэд сыӵе, дыр. Эсьмаса, сюлэмыд каньыл луоз. Кема бӧрдӥз, кышет пумъёсыныз ымнырзэ ворсаса, котырысьтыз нокинэ адӟытэк, ас улон дуннеяз, куректон-кайгуаз выйыса. Собере шара вераз: - Эх, берыкты вал ортчемзэ. Улонам одӥг янгыш но ӧй лэсьтысал ни. Ортчиз улон дауре. Ортчемез сярысь малпаме но уг поты. - Я, сокем эн чигиське, улонын мар но уг луы,- буйгатыны вырисько,- азьланезлы, ӟечезлы оскыса улэ. Дунне вылын бырымтэ на, дыр, валась адямиос. Та кылъёсме гинэ возьмаса кадь, матысь тодмоезлы сямен вераны кутскиз улон сюрессэ. - Эх, умой адямиос бырымтэ на, шуиськоды. Кин тодэ? Нош уйадӟон, ӟечезлы йыркуръяськон? Ми но кузпалэным тупаса, дыдыкъёс сямен ог-огмес яратыса улӥмы. Ноку нокинлы урод лэсьтэммы ӧй вал. Со шофёр. Я турын, я пу ваёз кинлы ке - ялан винаен тау карылӥзы. Нырысь ӧз ик юы, нош бӧрысь... Ваньмыз со бордысь ик потӥз. Сузмем кортэз лэсьтыны быгатӥзы, машинаез ворттылэ, нош ачиз пыраклы югыт дуннеен но милемын люкиськиз. Тӥни озьы кыли вить аресъем нылыным. Аслам но улэме уг поты ни вал. Нылы сое шӧдӥз. Одӥг пол корка трос кеськыса бӧрдэ: - Меми, тон уд кулы ук! Кулӥд ке, мон но огнам уг улы. Эн кельты монэ. Нош мон, шузи, чик сое жаляны ӧй вала - синтэм но сюлэмтэм мурт. Со гинэ ке луысал ай. Эскерыны шуыса, дорамы вуылӥзы гуртоос. Курытэныз. Сюлэмыд, пе, небӟоз. Небӟылӥз меда? Кошкем беразы кеськыса бӧрдылӥ, нош нылы, ма карыны паймыса, лушкемен бӧрдыса но ымдурзэ куртчыса, азям сылылӥз. Тӥни озьы, ачим но ӧй шӧды дунне вылысь самой синазькыль кароно маин ке эшъяськемме. Нырысь гурт калык эскериз, ветлӥз, нош бӧрысь - вунэтӥз. Ачим ялан сюлэмме буйгатыны выри курытэныз. Кӧня пол меда нылы сиемез потыса изьыны выдылӥз. Гуртоос нырысь- валысь ӧз валалэ юэмме. Медпунктын ужай бере, больничное потылӥ. Я пневмония, я остеохондроз... Валатскемзы бере ужысьтым ик кошки: кыӵе ужась мон табере, асме но эмъяны ӧй быгаты бере? Юылӥ ке но, номыре уг вунэтӥськы вал. Озьы ик кулэ, оло. Котькуд янгышез сярысь мед малпаськоз, шуылӥз, дыр, вылӥысь Инмаре. Одӥг пол, ма но со дӥськут басьтомы шуыса, городэ мынӥмы. Татысен но юытэк ӧй чида. Нылме, шоколадлы но няньлы шуыса, автостанцие люкаськем калыклэсь уксёзэ курыны косӥ. Кошкиз, пичи киоссэ мычыса, котькуд адями доры вуылӥз. Кин сётэ, кин - уг. Кыӵе шумпотыса вуиз нылы - быдэс кырым уксёен. Нош мон... буфетэ пыри, курытсэ басьтӥ, берпум гучыкме юыкум адӟи азям паймыса сылӥсь нылме. Бам вылтӥз питырскизы синкылиос. Уг тодӥськы, кызьы доре вуи. Шӧдӥ уин. Кыллисько койка вылын, трос полэс шобыръямын. Корка кезьыт, нош нылы аслаз ӟызы пальто улаз диван вылэ конгырскем. Ӝӧк вылын - небыт шаньга, со пичи гинэ куртчемын. Валатски: Анна апай вуылэм. Нылы со шаньгиез но сиымтэ, мыным кельтэм. Сокем уго кышка вал кулэмелэсь. Уралтыса куло, малпаз, дыр. Нош мон нокызьы ӧй буйгатылы со пичи но кышкась сюлэмез, нуналысь нуналэ вӧсь гинэ карылӥ. Эх! Кыӵе, кыӵе мон анай на солы? Кышномуртэ нош ик бӧрдыны кутскиз. Кема, кема, нокин шоры учкытэк, йырзэ улӥе мыкыртыса. - Тау Анна апаелы,- ӧжыт буйгамез бере азьланьтӥз со веранзэ. - Эстэм гурме одӥг пол вазь ворсаськем. Ачим выж вылэ пограса изиськем. Нылы йыраз йӧтыса уродмем. Ярам, Анна апай лул вылаз вуэм, улэп кельтэм. "Скороез" ӧтчам, нош мон - выж вылын. Вераны возьыт. Анай, шат мон, анай? Тӥни та учыр бере ик Анна апай бӧрдыса ик йӧнатӥськыны монэ косӥз. Нылдэ но, пе, ачим утялто, нылпиосылы эш луоз. Шӧдӥ: ас кужмыным йӧнатӥськыны уг быгаты ни. Юнме уг шуо вылэм: кышномуртэ туж секыт юонлэсь дугдытыны. Тӥни сыӵе улон сюресэ. Кызь тямыс арес гинэ ай, нош аслэсьтым улонме ачим быдтӥ, куректон- кайгулы сётски. Табере со курыт вулэсь зынзэ но медам кылы ни. Мынам нылы будэ ук, огнам ӧвӧл. Тани нырысь гожтэтэз. Кыӵе шуныт со. Люкиськыса улон тросэзлы синме усьтӥз. Кыӵе анай мон, кыӵе? Вераны возьыт. - Нош нылды тодэ-а туннэ бертондэс? - юатэк ӧй чида. - Тодэ... Оло, уг но возьма... Шӧдтэк шорысь выль тодмое синъёссэ бадӟым пияла ӧс борды воштӥз. Ымнырыз кӧсэктӥз, киысьтыз гожтэтсэ уськытӥз. - Анай! - кылӥськиз автостанция тыр. Нылыз, оло, лобӟыса вуиз дораз.- Кыӵе мон тынэсьтыд мӧзми! Ӟыгырскизы кык мӧзмем сюлэмъёс. Нылашен ӵош пырем кышномуртлэн ымныртӥз синкылиос питырскизы. Анна апайзы, дыр, малпай. Кема ӟыгыртыса сылӥз анаез нылзэ. Оло шумпотыса, оло возьдаськыса. Автостанциын ик шуныт, шыпыт луиз кадь. Люкаськем калык шумпотыса учке соос шоры. Зэмзэ но, со тодмотэм кышномурт Анна апаез вылэм, нылзэ юри анайзэ пумитаны ваем. Ма но уг луы та улонын. Югыт дуннеын улӥсезлы улоно. Возьыт гинэ медаз луы ортчемез понна. Мед луоз котькуд ымнырын пальпотон, шумпотон. Соку улыны но мылкыд бурдъяське. Тани та шудо пумиськонлы но ваньмыз шумпотӥзы кадь, вӧзтӥзы ортчись шӧмаськем кышномурт гинэ номыре ӧз кылы, номыре ӧз адӟы. М. НИКИТИНА, Пичи Пурга ёросысь Вуж Монья школаысь дышетӥсь. Куазь Синоптикъёслэн ивортэмзыя, матысь дыре куазь нош ик тупатскоз. Нуназе котырын термометръёс 0 градус возьматозы. Уин 2-7 градус кезьыт луоз. Тӧл лымшор палась секундскын 5-10 метре пельтоз. Интыен-интыен лымы-зор усёз. Кужмо кариське! Ми туж шумпотӥськом, Удмуртъёслэн куатетӥ ӧтчамзы "Удмурт кенешлы" тӧрое Валентин Кузьмич Тубыловез бырйиз шуыса. Валентин Кузьмич, сӥзиськом тӥледлы юн тазалык, асьме калык понна кужымдэс эн жалялэ, оскиськом, Тӥляд кивалтэмды улсын удмурт калык султоз но азьлане вамыштоз шуыса. Ижысь Алексеевъёслэн семьязы (потэмын Пичи Пурга ёросысь Гужношур гуртысь). Сиёд оло уд... Берло дыре кунгож сьӧрын но, Россиын но пудоос пӧлын пӧртэм паласькись висёнъёс вӧлмизы. Соин валче Удмуртиын но югдур шугомиз. Фирмаос, ужбергатӥсьёс, Казахстанысь вуэмъёс шаерамы бруцеллёзэн но туберкулёзэн висись пудоез ваё. Сюмси ёросын скалъёслы туберкулёз паласькиз, Юкаменск но Сарапул ёросъёсын бруцеллёз аляз. Со вакытэ ик Ижевскын огаз азбарын шараямын пудоез вандылонъя цех. Пудо-животэз татчы Удмуртилэсь палэнысь вайылӥзы, ветеринаръёс лэзьытэк. Скаллэсь-ыжлэсь таза яке висись луэмзэ нокин эскерымтэ. Бускельёсмы дорын "ДЭМЕНЫН" УЖАЛО ДЭМЕН Башкортостанысь Татышлы ёросысь "Дэмен" колхозэз нокызьы но куашкась хозяйствоос пӧлы уд пырты. Улон капчи ӧвӧл ке но, колхоз пыд вылаз йӧн-йӧн сылыны тырше. Уждунэн но татын, колхоз тӧро Ренат Биктимирович Галямшин верамъя, туж ик бере уг кылё. Туннэ нуналэ ужасьёслы пунэмзы 190 миллион манетлы ӵоша. Ӵошатон понна вералом, одӥг толэзьлы уждун тырыны 75-80 миллион манет кулэ, кысык дыръёсы - 120 миллион. Колхозэн умойгес тодматскон понна, учком лыдпусъёсты но берло аръёсы лэсьтэм ужъёсты. "Дэменэ" огазеяське ньыль удмурт гурт: Выльгурт, Вукогурт, Майск но Бальзюга. 1995-тӥ арын колхозлэн шорсюлмаз, Выльгуртын, школалы выль юрт ӝутон йылпумъямын. Та шор ёзо школа 162 дышетскисьлы чакламын. Та аре ик ужаны кутскизы выль лавка, гостиница но сиськонни. Ваньзы соос Выльгуртын одӥг юртэ интыяськемын. Али колхоз райцентре выль магазин ӝутэ. Кылем арын колхоз куинь ДТ трактор но одӥг "Дон" комбайн басьтӥз, нош туэ - кык ДТ трактор но одӥг "Волга" машина. Гуртъёсын колхозлэн 64 квартираез вань. Отын специалистъёс, механизаторъёс но пудо утисьёс уло. Выльгуртын Центральной ураме асфальт вӧлдон йылпумъяськз. Солэн огъя кузьдалаез 1,5 иськемлы матэ вуэ. Али дыре гуртын улӥ давлениен газопроводэз эскерон мынэ. Кема ик дыр уз ортчы, татын "чагыр эстӥськонэн" пайдаяськыны кутскозы. Матысь дыре газопровод Вукогуртэ но Бальзюгае вуоз. Со понна гумыос но тырмыт дасямын ини. Туэ колхозын "кыкетӥ нянез" 30 гектар вылын будэтӥзы. Котькуд гектарысь 100 центнер картош октыса, ваньмыз 3000 центнерлэсь ортчиз. Картошка октыны Выльгурт, Вукогурт но Вылысь Татышлыысь одӥг номеро школаосысь дышетскисьёс юрттӥзы. Колхоз арлы быдэ сахар кушман будэтэ. Туэ 500 тонналэсь тросэз песок лэсьтыны келямын ни. Озьыен, ӝоген колхоз магазинын асьсэлэсь сахарзэс вузалозы. Арлы быдэ "Дэменын" 15-16 сюрс центнер йӧл кыско. Тужгес но та ласянь Вукогурт ферма висъяське. Татын, колхозысь валтӥсь зоотехниклэн Ильдар Булатовлэн верамезъя, котькуд скаллэсь нуналлы быдэ 10 килограммлэсь ятыр йӧл кыско. Берло аръёсы парсь вордонлы но бадӟым саклык висъяны кутскизы. Туэ парсьёслэн лыдзы 250-лы йылӥз. Арлэн пумозяз фермаын нурскетӥсь пудоослэсь огъя лыдзэс 1600-лы вуттыны малпало. Таӵе лыдпусъёсын веранэз азьланьтыны но луысал. Угось колхоз кузё Ренат Биктимирович Галямшин ужзэ валаса радъя. Солэсь адямиосты огазеяны, ужез ӟеч радъяны быгатонлыкъёссэ Башкириысь удмуртъёс шӧдӥзы но асьсэлэн огазеяськоназы тӧрое бырйизы. Татын но Ренат Биктимирович тэк уг пукы - ялан ужаны, утчалляськыны тырше. Колхозын удмурт изданиослы вуоно уждун чотын гожтӥськыны луэ. Али удмуртъёслэн ӧтчамазы дасясько. - Вунэто милемыз Удмуртиысь удмуртъёс,- шуэ Р. Б. Галямшин.- Немецъёс, кылсярысь, Россиын улыса, Германиен кусып тупато, нош удмуртлэн ваньмыз йырчукин. Чик ӧвӧл кусыпмы, шуыны луоз, "Удмурт кенешен". Нош "Шундыез" ушъяны луысал ик, солэн ужез шӧдӥське. Башкортостанын матысь дыре удмурт кылын республиканской газет потыны кутскоз. Ним но солы шедьтӥллям ни - "Ошмес". Коньдон ужпумъёс но ваньмыз учкемын, радъямын ни. Газетлэн нырысетӥ номерез январь толэзе лыдӟисьёс доры вуыны кулэ. Татын но Ренат Биктимировичлэн тыршемез- сюлмаськемез шӧдӥськиз. Нош сыӵе сэзь но визьмо кивалтӥсьёсмы вань бере, йыг-йыг азьпала вамыштыны кулэ. Озьыен, Кам сьӧрын улон пӧзе. Ф. МИННИГАРАЕВ. * Ренат Биктимирович Галямшин. * Та юртэ интыяськемын лавка, гостиница но сиськонни. * Комбайнъёс витё толэз. Туспуктэмъёсыз В. КАМАШЕВЛЭН. Сӥземын Гердлы 1998-тӥ арын быдэс дуннеысь финн-угор калыкъёс пусъё удмурт калыклэн визьмо пиезлэн, писательлэн, учёной-тодосчилэн Куӟебай Гердлэн вордскемез дырысен 100 арес тырмонэз. Кузьма Павлович Чайников чеберлыко удмурт литератураез кылдытӥсьёс пӧлысь луэ. Та адями сылӥз удмурт национальной театрлэн но драматургилэн кӧкызы вӧзын. Куӟебай Гердлэсь юбилейзэ пусйыса, Удмурт Республикаысь Культурая министерство, Правительствоысь Нациосын ужанъя комитет, Удмурт национальной театр но Удмурт Республикаысь Писательёслэн союззы яло нимысьтыз конкурс. Со сӥземын писательлэн улонэзлы но творчествоезлы. Та конкурс ас азяз таӵе ужпумъёс пуктэ: удмурт литератураез кылдытӥсьёс сярысь сцена вылын шудымон произведениос кылдытоно, республикаысь театръёслэсь репертуарзэс вӧлтыр-вӧлтыргес кароно, туала лыдӟисьлы но учкисьлы вуттоно, возьматоно Удмурт Элькунысь сӥё-дано гражданинлэсь нимзэ ужамзэ. Конкурслы йылпумъянъёс лэсьтэ нимысьтыз жюри. Отчы пыриськемын театрен герӟаськем, литератураысь но искусствоысь сӥё-дано муртъёс. Та аспӧртэмлыко ӵошатсконэ пыриськем авторъёслэн тыршемзы пусъемын луоз коньдон премиен: И - 10 млн. манет ИИ - 7 млн. манет ИИИ - 5 млн. манет. Озьы ик вань на 3 миллион манетъем кык данъясь премия. Вормисе потэм произведениос ӵектэмын луозы республикаысь театръёслы. Ӵектоно ужъёсты вуттоно Культурая министерстволэн искусствоя отделаз 1998-тӥ арысь 1-тӥ толшорозь (январёзь). Никвлад САМСОНОВ, писатель, Национальной театрысь режиссёрлэн драматургияя юрттӥсез, жюрилэн членэз. Специалистлэн ужан интыез Таӵе рубрика улын уно материалъёс поттыны чакласьком. Соос ужын выль амалъёслы сӥземын луозы. Котькудӥз бухгалтер тодэ, отчёт лэсьтыку, документъёслэсь копиоссэс пӧртэм учреждениосы келяно шуыса. Озьыен, ки улын мед луозы бланкъёс, инструкциос, ведомостьёс... Та выллем ик кагазъёслы кулэясько специалистъёс, кивалтӥсьёс. Агроном, кылсярысь, нянь будэтон, гырон-кизён, техникаез кутон, удобрениосты поттон пумысен отчёт лэсьтэ, ваньзэ лыдъя, зоотехниклэсь котькуд фермалэн ужамез сярысь лыдпусъёс куро, мастерлэн но бригадирлэн, механиклэн но ветеринарлэн - аслаз лыдъян-чотанэз. гуртъёсысь администрациосын, кооперативъёсын, эштосъёсын, фермеръёслэн хозяйствоосазы документъёслэн копиоссы одно ик кулэ луо. Туала техника соосты оскымон, ӝог но ӟеч лэсьтэ. Тани, кылсярысь, "Канон" - дунтэм ке но, ӟеч ужась копировальной аппарат. Ужатыны но сое капчи. "Канон" ГС 210/230 минутскын ньыль копия поттэ, секыт ӧвӧл - ки вылын нуллоно кадь гинэ. Пӧртэм листъёслэсь, книгаослэсь копизэс поттэ, арберилэсь кузьдалазэ, пасьталазэ, зӧкталазэ возьматыны быгатэ, со арбери 2 килограммлэсь секыт ӧвӧл ке, нош быдӟалаез Ә форматлы (210 х 297мм) тупа ке. Но котькудӥз аппарат шутэтскемез но, утялтэмез но кулэ каре. "Канон" ноку уз сӧриськы, инструкциезлэсь куронъёссэ лыдэ басьтӥды ке. Вазиськоно таӵе адресъя: Ижевск, Красногеройской ульча, 63. Тел. (3412) 75-54-67, мыноно 2 но 5 номеро троллейбусэн, 12 но 24 номеро автобусэн "Университет" дугдылон интыозь, "Копировальная техника" ЗАО. Ӟечкыласьком! "Удмурт кенеш" огазеяськонлэн тӧроез Валентин Тубылов та нуналъёсы пусйиз вордскем нуналзэ. Та арлыд сокем ӝожмытӥсь ӧвӧл ай - ӵапак кын корт куртчон вакыт. Иське, ужа но ужа. Та адями ӵапак сыӵе. Тӧллань ноку уз вамышъя. Нош калгись сильтӧлэз серметалоз. "Удмурт кенеш" огазеяськон но "Удмурт дунне" газетлэн редакциез сюлмысьтыз ӟечкылало Валентин Кузьмич Тубыловез. Вордскем нуналэныз но тӧро луэмен. Та шунды ӝужакуз ик яркыт вал. Ноку ӧй вал со вужер. Иське, азьлань! "Тулкымлы пумит!" Оген улыны секыт Шунытлы, электрокужымлы но квартира понна дунъёс будэмен, калыклэн сюлмаськонэз йылӥз. Тужгес но секыт йӧтоз огназ улӥсь пенсионеръёслы. "Ижсталь" огазеяськонын ньыльдон ар ӵоже ужаз Екатерина Ивановна Перевощикова. Ужысь ветеран али кык комнатаем квартираяз огназ кылиз. Солэн огъя улон интыез 42 квадратной метр лыдъяське. 15 метрезлы гинэ льгота сётэмын, кылемез понна быдэсак тырыны пусйиллям. Ваньзэ вераса, табере солы толэзь ӵоже улэмезлы 84762 манет тырыны кулэ. Азьвыл толэзьёсы тыремезлэсь со ог куамын сюрс манетлэсь уно луэ. Ӧйтӧд, кызьы тыроз огназ улӥсь мурт тамында коньдон. Веть солы сиськыны но чыры-пыры дӥсьлы ке но уксё кулэ луоз на. Та лыдпусъёсты ЖЭК-ын ужасьёслы выльысь эскерыны кулэ. В. ЧЕРНОВ, ужысь ветеран. Финляндилэн нуналъёсыз - Москваын 25-30 ноябре Москваын Финляндилэн нуналъёсыз ортчозы. Татчы лыктыны дасясько ог сюрс финнъёс, кудъёсыз тодматозы ӟучъёсты ас сямъёсынызы но йылолъёсынызы, туала улон сюресэнызы. Москвалы 850 ар тырмонэн валче бӧрсязы ӟечкыланъёс ваёзы. Со сяна, Финляндия понна но ортчись ар юблейной луэ - декабре 80 ар тырме эрик басьтэмез дырысен. Москвичъёс но лыктэм куноос учкыны быгатозы пӧртэм выставкаосты, концертъёсты, фильмъёсты, выль потэм книгаослы презентациос ортчозы. ФинляндилэСЬ нуналъёссэ Россиын пусъён эшъяськон ӝытэн йылпумъяськоз. Татчы Президентлэн Борис Ельцинлэн ӧтемез улсын лыктыны кулэ Финляндия Республикалэн Президентэз Мартти Ахтиссари. Финнъёс асьмелэн вашкала выжыосмы луо. Соин ик та нуналъёслэн ӟеч ортчемзы понна удмуртъёс но кыл кутыны кулэ. Финн-угор выжыысь калыкъёслэн делегациоссы Москвае ӧтемын. А. Злотин. Правительствоын Нюлэс коран кулэсме Валлян, 18 ноябре Удмурт Правительствоын бадӟым кенеш ортчиз. Отчы ветлӥзы министерствооысь но ведомствооысь, городъёсысь но районъёсысь, администрациослэн, нюлэс хозяйствоя предприятиослэн но леспромхозъёслэн кивалтӥсьёссы. Нюлэс корась- дасясь предприятиосын, зэмзэ но, юн секыт югдур кылдэмын. Кызьы бен отысь потоно, кыӵе амалъёс утчано? Со но мукет ужпумъёс сярысь кенешын ивортӥз шаерысьтымы промышленностья министр Виктор Долгов. - Лесопромышленной комплекс шуге-леке шедемын, - шуиз Виктор Иванович. - Та удысын одӥг уждун тырыны гинэ 5 миллиард манет уксё кулэ. Данак интыосын сое сиён- юонэн сётъяло. Пыд йылазы сылӥсь предприятиосмы чиньыен лыдъямон но ӧвӧл. Берло дыре тужгес но лябӟизы Игра, Сюрек, Меньил, Яр но музон леспромхозъёс. Соослэсь продукцизэс басьтӥсь ӧвӧл, ӟечлыкез но улӥын. Кенешын ас малпанъёссэс рос-прос мадизы нюлэс хозяйствоя министр Николай Буераков, Играысь администрацилэн тӧроез Галина Вишневская, "Ижмебель" АО-лэн кивалтӥсез Петр Кишкан, Сарапул городысь администрацилэн тӧроез Эдуард Берг, "Харви-Яр" фирмалэн директорез Константин Филиппишин, Правительстволэн Тӧроезлэн воштӥсез Сергей Касихин но мукетъёсыз. Та ужрадэз нуиз Правительстволэн Тӧроез Павел Вершинин. Кенеш сярысь отчётэз берлогес печатлалом. Г. Романов. Наталь Ижысь механической институтэз йылпумъяса, Галина Вахрушева луиз экономист. Та удысын кема тырше ини. Быръем ужзэ яратэ но гажа. Со сяна, Галина Александровна мылысь-кыдысь пыриське удмуртлыкез утёнэ: та сюлмо но чырмыт кышномурт быръемын "Удмурт кенеш" огазеяськонлэн Ижысь Индусртиальной ёросысь ёзэзлэн кивалтэтаз. Галина Вахрушева. Владимир Камашевлэн туспуктэмез. Нина Степановна Пашкова нуналлы быдэ йӧл-вӧй пӧлын "пылаське", соин но, дыр, мылкыдыз котьку каньыл. Ужа со Граховоысь молокозаводын старшой лаборант луыса. 32 ар ӵоже кӧня тонна йӧлэз эскеризы меда нылкышно киос? Таизэ мертась ӧвӧл: нуналлы быдэ "йӧл шур" тоннаосын доразы бызе. Лаборант бордысен кутске продукцилэн дуныз, чылкытлыкез но ӟечлыкез, адямиослэн тазалыксы. Пашкова пыр кырсь продукция ноку уз ортчы - тае умой тодо фермаослэн, хозяйствоослэн кивалтӥсьёссы. Сиён-юон поттӥсьъёсты туала вакытэ пырто узыр улӥсьёс пӧлы. Озьыен, таослэн радазы "Грахмолоко" но? - Уждун сярысь ке верано , июль понна тыремын, та нуналъёсы август-сентябрь толэзьёсы ужаммылы басьтӥськом ни, - шуэ Нина Степановна. - Поттӥськом нӧкы вӧй, казеин. Райцентрын усьтэмын кык магазинмы. Вӧймес вузаськом 19 сюрс манетэн. Пусъём на: "Грахмолоко" куинь арзэ ас понназ люкиськыса ужа ни. Азьвыл соос юнматэмын вал кизнеръёс борды, бӧрысьгес - Можгала. Яна потэмзылы куд-ог дыръя шум но пото, жаляло но. Жаляло соин - ӧжытгес йӧл вуыны кутскиз. Кусып возё Татарстанысь Менделеево но Елабуга районъёсысь хозяйствоосын, Алнашен. Тыронъёссы соослы ӧвӧл, коньдонзы, кредитъёс чотын, азьвыл ик келямын. Кызьы шуиз Н. С. Пашкова, молокозаводэ вуэм йӧл пӧлысь 80 процентэз - И сортъем. Озьыен, ӝӧк выламы нянь сукыри вӧзын луоз вылӥ ӟечлыко нӧкы вӧй но. Л. МЕДВЕДЕВА. ФОТОЕЗ В. КАМАШЕВЛЭН. Муса Джалиль уг безды Кулэмез дырысен тамында ар ортчыса, Муса Джалильлэн Моабитской тюрьмаын гожтэм кылбуръёсыз (1957 ар) Ленинской премиен пусъемын. Поэт-солдатлэн ужъёсыз татчыозь ӧз бездэ. Соос трос кылэ берыктэмын, вань удмуртын чузъяськисьёсыз но. Казаньысь азьвыл улэм юртаз 1983 арын, Советской Союзлэн Героезлы Ленинской премилэн лауреатэзлы Муса Джалильлы сӥзьыса, мемориальной музей- квартира усьтэмын. В. РОГАЛЕВ. Нылпиос шудо яратонэн Удмуртъёслэн ВИ Ӧтчамазы одӥгезлэн секцилэн ужез сӥземын вал тазалыкез но инкуазез утёнлы, демография но семья ужпумъёслы. Кивалтӥзы соин Медициная академиысь тодосчиос И. Г. Гришкин но В. Н. Савельев. Секцилэн ужаз пыриськизы кык сю пала делегатъёс но ӧтем куноос. Вераськон ӝутэмын вал трос ужпумъёсъя. Но ваньмыз ик со герӟаськемын калыклэн тазалыкеныз. Кызьы тодмо, экономикаын, политикаын, улон-вылонын шуг-секытъёс нырысь ик шуккет лэсьто тазалык вылэ. Калыклэн йылэмез, семьяын кылдэм югдур озьы ик та вылӥ верам мугъёсын герӟаськемын. Палэнысен учкыса гинэ азьлане вамышъёс уд лэсьты. Утчано кыӵе ке но сюресъёс, амалъёс. Кулэ-а удмурт калыклы таза но визьмо нылпиос? Кулэ. Нош кин басьтӥськоз со борды? Асьсэос ик удмуртъёс. Городын будэм муртэ туала вакытэ уд ысты гурт калыкез эмъяны, дышетыны но. Соин ик вылӥ дышетскон заведениосы пырыны гуртысь нылпиослы луонлыкъёс сётоно. Медициная академиын дышетскыны мылкыд карись удмуртъёслэн лыдзы арысь аре ичиёме, конкурс пыр потыны гуртысь нылпиослы трослы секыт угось. Но кызьы шуиз медициная академилэн ректорез Н. С. Стрелков, удмурт врачъёсты будэтон ласянь уж нуиське, озьы ке но, та ужпум борды рос-прос басьтӥськоно. Эмъян удысэ мыныны дасяськись нылпиосты нимысьтыз дышетоно. Усточи нылъёс но пиос понна усьтоно интернат. Академие пырыны мылкыд карисьёс али ик ини экзаменъёссэс сётыны быгато удмурт кылын, но та амалэз кутыны егитъёс малы ке но уг дӥсьто. Трос шуг-секытъёс кылдо удмурт тодосчиос, дышетӥсьёс ласянь - ӧвӧл улон инты. Соин йырин тужгес быгатӥсьёсыз но специалистъёс гуртъёсы кошконо луо. Медицина наукая доктор профессор В. Н. Савельев сюлэмшугзэ вераз пӧртэм висёнъёслэн лыдзы будэм пумысен. Кулэмъёсын ӵошатыса, нылпиос ӧжыт вордӥсько. Пӧртэм ужпумъёсъя шаермы Россиез "азьпалтыса" мынэ, кылсярысь, куртчангиен (сифилисэн), туберкулёзэн висисьёслэн, асьсэды быдтӥсьёслэн лыдзы асьмелэн трослы вылӥын. Медицина ласянь пӧртэм эскеронъёс нуисько ке но, висисьлэн национальностез отын лыдэ уг басьтӥськы. Шаерамы улӥсь удмурт, ӟуч, бигер калыкъёслэн тазалыксыя шонер дунъет сётыны соя уг луы. Соин йырин ӵошатонъёс ӵем дыръя югдурез шонер уг возьмато. Тазалыкез чаклась документъёсы висисьлэсь национальностьсэ гожтонъя нимысьтыз закон кутоно, соку син азе шонер суред пуксёз. Со сяна, техникалэсь луонлыкъёссэ лыдэ басьтыса, нимысьтыз уж нуоно шаерысьтымы калыклэсь тазалыксэ, йылэмзэ, кулэсмемзэ эскеронъя. Шаерамы пумен йыло асьсэды быдтон учыръёс, пӧлазы трос удмуртъёс. Мар бордысь со потэ, кыӵеесь солэн мугъёсыз? Берло дыре та ужпумез эскеронлы бадӟым саклык висъяло, калыклэсь сямъёссэ, улон-вылонзэ, лулпуштроссэ лыдэ басьтыса. Улонлы осконзэс ыштэм адямиосты кышкыт вамышлэсь утён понна чакламын нимысьтыз Федеральной программа. Республикаысьтымы психиатрической больницаысь но медициная академиысь психиатрияя кафедраысь специалистъёс асьсэды быдтонэз алонъя пӧртэм ужрадъёс чаклало. Нылпиос но быдэ вуымтэос понна усьтоно психотерапевтической центръёс, шуге-леке сюремъёс озьы ик азьланяз вазиськыны быгатозы кризисъя станционаре, ужалозы висисьлэсь нимзэ шараясьтэм кабинетъёс. Городъёсын но ёросъёсын юрттэт сётозы суицидологъёс. Тазалыкез утён удысын ужась специалистъёс секциын мукет ужпумъёсты но ӝутӥзы. Шаерамы берло дыре паськыт вӧлмемын кезегъянэн висён (геморрагической лихорадка). Солэн вӧлмонэз герӟаськемын котырысь инкуазез кырсьмытэмен но, уката ик сад-бакчаос котыр. Экономикалэн улӥе лэзиськемез, улон-вылонын шуг-секытъёс, инкуазьлэн кырсёмемез арысь аре будэтэ астмаен висисьёсты, берло дас ар куспын гинэ со кык поллы йылӥз. Та висён мӧйыосты гинэ ӧвӧл, нылпиосты но уг жаля. Шаерамы 246-ез пиналъёс астмаен йырин инвалидъёс луизы. Нош кӧняезлэн та висён шараямтэ? Пыд уламы кыллись узырлыкез но кулэезъя басьтыны ум быгатӥське. Асьме музъем вылын будӥсь эмъюм турынъёсты уже кутытэк, коньдонмес кисьтӥськом кытысь ке кыдёкысь шаеръёсысь ваемъёсызлы. Секцилэн ужаз пукыса тужгес но паймымон суред усьтӥськиз нылпиосмы ласянь, соослэн улон-вылонзылэн улӥе лэзиськемез. Шуо, пиналъёс - улонмылэн синучконэз. Кыӵеен бен со адӟиське али? Городысь но гуртысь кык сюрс быдэ вуымтэ нылпилэсь улон сямзы пумысен юалляськонъёс ортчытэмын. Пӧлысьтызы 60 процентэз вина юэ, 9 процентэз наркотикъёсын эшлаське, 25 процентэз гуртысь дышетскисьёс валче кусыпъёс возё ни, городын та лыдпус вылӥынгес. Шаерысьтымы вань ёросъёсты лыдэ басьтыса, 500-ез быдэ вуымтэос куртчангиен висизы. Ваньмон дырзэз тросэз ортчыто, урамъёстӥ калтыртыса, яратонэн шудыса. Ӧжытэз гинэ книга лыдӟе, тетаръёсы ветлэ. Нош Селталась училищеын дышетскисьёс ваньмон дырзэс ортчытонын нырысетӥ интые пукто яратонэн шудонэз (сексэз). Ӧйтод, кыдёке-а, вылды, мыном, таӵе улон сямъёсты вылӥе пуктыса. Шонер ужпум ӝутэмын секциын: котькуд школаын нылпиосты пичиысен ик дышетоно таза улонлы, валиологияя предмет усьтыса. Сое чаклано шаермылэн бюджетаз на. Таза адямиос гинэ тазалыко общество кылдытозы. Л. Малых. Берекет Та сярысь тодыны кулэ 1. Астмаен курадӟись муртлы врач дэмла тросгес сиыны виноград но инжир. 2. Ньылон висьыку, ангина дыръя, сиыны кулэ чия (вишня). 3. Ӝушты висе, тӥляд гастрит. Колӟотурынлэсь (тысячелистник) паросэн эмъяське. 4. Син дуре потэм йыдыез (ячмень) зарниен зырано (пельугыен, зундэсэн, жильыен но мукет). 5. Пиньды висе. Паллян палысьтыз ке, бур кипыдэстэс чеснокен зыралэ, бур палась ке - паллянзэ. 6. Кызыкуды сяртчы сокез быректэ но чечыен сураса юылэ. Умой юрттэ гоголь-моголь. Курег пузлэсь ӵужзэ сакыр песокен но ромен сурало но юн шукко. 7. Сюлэмды висе, гипертония. Картофка пыжыса, кӧмыныз валче ик сиылыны кулэ. 8. Пыэд кутӥз, нырысьтыды ву кадь кошке. Нырпуштэс чечыен зыраллялэ. 9. Педло потаны курадӟиськоды ке, горд клеверлэсь парем чай юылэ. 10. Пыдъёсысь вирсэръёс тӧрнамлэсь, нуналаз 2 пол зыраллялэ таӵе суретэн: стакан вуэ ватсано яблоклэсь дасям 2 чечы пуньы уксус. Л. ЯКОВЛЕВА. Берекет Лэсьтэ асьтэос БАЛЬЗАМ Бальзамлэн тазалыклы кулэ луэмез, пайда ваемез сярысь котькин но тодэ, дыр. Та дуно эмъюмез басьтыны котькинлэн ик луонлыкез ӧвӧл. Нош солы матын луись гурт бальзам лэсьтыны асьтэос но быгатоды. Сое дасянын номыр шугез ӧвӧл. 1 литр водкалы мынэ: чечы - 50 г, прополис - 10 г, куасьтэм сьӧд слива (чернослив) - 50 г, легезьпу мульы - 25 г, ческытатӥсь, аспӧртэм шӧм сётӥсь будосъёс (пряности) - гвоздика, кориандр - быдэн ӝыны чечы пуньы, ваниль - 1 чечы пуньы, эмъюм турынъёс - беризь сяська, курытпот (полынь), виртурын (зверобой), бутник (мята) - ваньзэ быдэн ӝыны чечы пуньы. Сливаез кӧльыезлэсь висъяло, векчи юдо. Легезьпу мульыез, эмъюм турынъёсты, ческытатӥсь будосъёсты туж векчи юдо (изо), сурало сливаен но стакан водкаен сурало. Лач пытсаса, одӥг толэзьлы шуныт азе пукто. Кылемаз водкае ватсало чечы, прополис, ваниль, сурало но толэзь ӵоже пытсаса возё. Собере турынъёсын пукетэм водкаез, марля пыр сӥсъяса, бадӟым посудаен пукетэм эмъюм пӧлы ватсало. Марляе кылем-мылемез, ӝыны стакан вуэн сураса быректыто, сӥято но сӥсъяса бальзамен посудае ик кисьто. Табере бутылез лач пытсано но салкым интыын эшшо толэзь ӵоже возёно. Гурт бальзам дась, эмъяське. Л. ВАСИЛЬЕВА. Премизэс - мӧйыослы Удмурт Республикаысь 1997 арлэн Кун премилэн лауреатъёсыз, "Ижмолоко" ЗАО-ын ужасьёс С. Д. Анфриева, Н. А. Бондаренко, Л. Н. Булгаков, Р. Г. Зиганшина, Г. Ф. Красноперов, О. Г. Красноперов, М. Г. Мухаматдинов, Т. П. Пьянкова, В. Н. Тимашов, В. Н. Щемелева решение кутӥзы премизэс быдэсак сётыны Нагорной посёлокысь психоневрологической интернатлы. Кун Кенешлэн пресс-службаез. Берекет Пырыос-визьлюкъёс Курыт кушманлэн кӧш зыныз, ортчыт курытэз быроз, сое зӧк вуштон пыр поттыса, кӧня ке пол кезьыт вуэн гылтӥд ке. Выль огреч курыт шӧмо. Мар карыны луоз? Кӧмзэ паласа, кӧня ке дыр ӵоже возёно сакыр песок йылтэм йӧл пушкын. Шуныт куазен но вӧй уг шуна, вӧй возён посудаез сылало вуэн коттэм ӵушконэн ке бинялтӥськод. Пыжиськиськоды. Табаысь кӧй-вӧй пазяське. Отчы кӧня ке сылал ватсалэ - уд курадӟе ни. Духовкаын печення пыжиськоды. Со медаз сутскы шуыса, пыжиськон форма улэ сылал пызьнало. Коркась кузьылиос уг ярато лимон, бур (мел), сылал, тамак зынъёсты. Каръяськем интыязы кудзэ ке одӥгзэ соосты понэ - ури-бери пегӟозы. Берекет Вашкала йылолъёс, сямъёс СОЛДАТЭ КЕЛЯН Асьме кунмес утён оскемын пиос вылэ. Пинал муртлы пичиысен ик анай-атайёс валэкто: ӟеч сиськы, пие, таза буд, солдатэ мыныны мед яралод. Аръёс воштӥськемъя, азьлань мынэммыя, малпанъёс но, мылкыдъёс но воштӥсько. Улонмы шуг луэмен, солдат дӥськутэз шумпотыса дӥсяны мылкыд карисьёслэн лыдзы берло дыре трослы кулэсмиз. Но улон вань улон. Шаермес утьыны кулэ. Одӥгъёсыз пиосмы армиысь берто, мукетъёсыз - кошко. Зэм, азьло аръёсын ӵошатыса, та учыръёс шыпытэнгес ортчо. Нош луэмезъя кытын но отын вашкала кутэм сямъёсты, йылолъёсты утьыны тыршо. Котькуд ёросын со пӧртэм сяменгес ортче, дыр. Милям Кизнер районысь Бызара (Кармыж) палъёсын солдатэ келян гурмы асьмелэн вал. Тани солэн кылъёсыз. Сэрего но сэрего Бызара бусыед. Кудпал сэрегаз кылёз ук мынам гырон удысэ? Кылёз ке но кылёз ук Бемыж пал бусые. (2 пол) Нюко но, паськытэсь но Бызара возьёсыд. Кудпал нюказ кылёз ук жингрес кусо шуккемед? Кылёз ке но кылёз ук Беризё нюклэн бамалаз. (2 пол) Вож садо но туж садо Бызара урамед. Кудпал дураз кылёз ук атыкай коркаед? Кылёз ке но кылёз ук Выллапал ураме. (2 пол) Сэрего но сэрего садо бакчамы. Кудпал сэрегаз кылёз ук аслам гудэм убое? Кылёз ке но кылёз ук бур пал сэрегаз. (2 пол) Сэрего но сэрего аныкай коркаед. Кудпал сэрегаз кылёз ук небыт тушак валесэд? Кылёз ке но кылёз ук бур пал сэрегаз.(2 пол) Армие мыныны повестка вуэ ке, вуоно солдатэз ӵыжы-выжыос, бускельёс, эшъёсыз ӝытлы быдэ сямен доразы кунояны ӧтё. Солы пужыятэм ӵушкон кузьмало, чыртыяз ошо, нош анайлы кышет кертто, пизэ ӟеч, солдатэ мыныны ярамон будэтэмезлы тау карыса (мынам али ке но кӧня ке со кузьмам ӵушконъёс вань на). Кошкон нуналэ корка тыр ик калык люкаське. Ваньзы ӟеч кылъёс верало. Коркась потыкуз вуоно солдат мумыкор борды тэтчыса йӧтӥське. Кытын но отын коньдонэн туг шуккыса кельто, бертэмез бере сое солдат ачиз ик басьтэ ини. Ибырвесь (талисман) интые вашкалаосмы армие мынӥсь муртэ сьӧраз басьтыны косо гур пушкысь пенез, яке эгырез, яке кирпич пырыез. Сое гуртэ бертытозь ик утьыны кулэ паллян кисыын. Мыным, 1940-тӥ арлэн пумаз армие мынэм муртлы, ож тылӝуэн валче 8 аръёс служить кароно луиз. Олокӧня пол шинеле но, шубае но пасяськылӥз, сӧсырмылӥ, нош бертыны шуд усиз: сюлэм вадесам нуллӥ гурысь басьтэм кирпич пырыез-ибырвесез. Солдатэ мынӥсь муртэ гурт пумозь яке бадӟым сюресозь ик пыдын кырӟаса, арганэн шудыса келяло. Корка, гурт палаз солы учкылыны кулэ ӧвӧл ни. Эшъёсыз, ӵыжы-выжыез сюрес вылэ коньдон сёто. Гуртысь самой чебер валэз кытко, пиос буко борды гырлы думо, валлэн чыртыяз чингыли (шыркун) ошо, нылъёс букоез но валлэсь изнэссэ буртчин лентаосын чебермало. Одӥг кылын вераса, солдатэ мынӥсь мурт вань сюлэмыныз шӧдэ, сое татын гажало, солы оско, сое татын витё шуыса. Таӵе ӟеч йылолъёс азьланяз но медаз быре вылэм, вашкалаосмылэн кутэм сямъёссы улонэ мед пыӵасалзы, выльысь мед выжыяськысалзы- улӟысалзы. В.ЕГОРОВ, ужысь но ожысь ветеран. Куашето нюлэс дасясьёс Кылем четверге Ижевскысь Шор площадьын ортчиз шаерысьтымы нюлэс хозяйствоын тыршисьёслэн митингзы. Яр, Балезино, Кез, Игра, Ува ёросъёсысь ыстэм муртъёс пыриськизы отчы. Нош та люкаськонлэн мугез - нюлэс хозяйстволэн предприятиосаз кылдэм туж секыт югдур. Тани ма вераз со пумысен нюлэс дасян удысын тыршисьёслэн профсоюззылэн элькун комитетсылэн тӧроез Валентина Фоменкова: - Нюлэс дасян удыс туннэ быдэсак куашка. Адямиослы сизьым толэзьёсын но солэсь кема уждун уг тыро ни. Нюлэс посёлокъёс куашкало-быро, социальной удыс аналтэмын. Ми трос пол вазиськылӥм ни правительствое, нош куронъёсмес кылӥсь-адӟись ӧвӧл. Соин ик площаде потытэк ӧйлась. Митинге люкаськемъёс нимысьтыз комиссия кылдытӥзы. Быръем муртъёссылы оскизы вань куронъёссэс Удмурт Элькунысь Кун Кенеше но правительствое сётыны. Удмурт шаермылэн одӥгез бадӟымез узырлыкез - куашетӥсь нюлэс. Туннэ кылдэм югдуре соин ӵош куашето нюлэс ваньбур дасясьёс но. Н. Корапин. Берекет Вуриськыса буйгатӥсько сюлэмме Озьы шуэ Башкортостанысь Татышлы ёросысь Вукогуртын улӥсь Муниба Шамтиева. Солы гуртоосыз, юрттыны курыса, ӵемысь вазисько. Магазинын, базарын али ваньмыз дуно угось. Нош Муниба апай дӥсь дунтэмен вуре. Солэн тыршеменыз, вордӥсько чебересь выль дэремъёс, пӧртэм штаниос, шубаос. - Семья сярысь но сюлмаськоно,-сюлмаськонзэ вера нылкышно.- Картэ толэзьёсын уждун уг басьты, нош нылпиосты ваньзэсты сюдоно, дышетоно. Вераны кулэ, та семьяын ньыль студентъёс. Кызьы ачиз Муниба апай шуэ, милям, пе, студентъёслэн семьязы. Соин ик сюлмаськись кышномурт вуриськыса сюлэмзэ гинэ уг буйгаты, семьязэ но сюдэ-вордэ. Туспуктэмез В. КАМАШЕВЛЭН. Кырӟась ӧте ас ӝытаз Россиысь сӥё-дано артист, республикаысьтымы Кун премилэн лауреатэз Николай Семенович Зубков пумита аслэсьтыз 70 аръем юбилейзэ. Нош кырӟан удысэ пыриськемезлы 45 ар тырме ни. Таин валче 26-тӥ ноябре Удмурт кун филармониын ортчоз солэн творческой ӝытэз (кутскоз 18 часэ). Юбилярлы жингрес гуръёсынызы юрттозы "Шулдыр ӝыт" но "Катанчи", Россиысь дано артист Анатолий Ушаков, Удмуртиысь калык артистъёс Валентина Пудова, Валентина Серебренникова, Нина Варачева, Николай Копысов, Вячеслав Фатеев но мукетъёсыз. Та ӝытэз озьы ик шулдыртозы Н. Зубковлэн ас палъёсыз - Можга ёросысь усточиос. Т. НИКОЛАЕВА. Малпамтэ чуръёс Вить аресъем Польып песянаез Иж каре лыктэм. Куноын тужгес кельшем пыласькон интызы. Ну, пальккаське-шупылляське, чылкак ву чайы кожалод, вуысь поттыны уг ни лу. Паймеменыз-шумпотэменыз песяезлы шуэ: - Анай, гуртэ бертӥм ке, мурӝоламы Вала лэсьтом, ява! *** Ӵуказеяз Польыпез кунокаосыз тетаре нуизы. Залын пукись зӧк кӧто воргоронэз адӟыса, пиёк со доры кыстӥськиз. Арбуз выллем кӧт шоры долкаса сылэмез юере юа: - Малы сокем трос сиськод? Кӧтыд пилиськоз ук! *** Польып доры Кечгуртэ городысь ас ёзъем ӟучомем пияшезт кельтӥзы. Мед, пе, огазьын шудозы, мӧзмонзэс уллялозы. Азбарысь утӥсь лусьтроез адӟыса, городысь куно чиньыеныз возьматэ: - Собака! Собака! - Со бака ӧвӧл, шуэ Польып, со пуны! М. Кузьмин. Удмуртиысь делегация - Эстониын Кун Думаысь депутатмылэн А. Солуяновлэн кивалтэмез улсын та нуналъёсы Эстониын ужа Удмуртиысь делегация. 19 ноябре пумиськон ортчиз Эстон парламентлэн спикереныз Томас Савиен. Кызьы шуиз пумиськонын А. Солуянов, со вань кужымзэ сётыса ужалоз, угро-финн калыкъёслэсь кусыпъёссэс юнматон понна. Со дыре ик Эстон парламентлэн тӧроез эскерыны куриз: кыӵе мугъёс сэрен Ижевскысь Механической заводысь келям вузъёс Эстоние шуг-секытэн вуо. Та нуналъёсы ик Эстониын ортче угро-финн егитъёслэн огазеяськонзылэн (МАФУН) ИВ Конгрессы. Удмурт егитъёслэн "Шунды" огазеяськонзылэн кивалтӥсез Надежда Уткина угро-финн дуннеысь егитъёсты ӧтиз бадӟымгес саклык висъяны нациослэн кулэяськонъёссылы. Кылсярысь, со ивортӥз Ижевскысь механической заводын ужась удмуртъёслэсь правооссэс тӥян учыръёс сярысь. Удмуртиысь делегация озьы ик пумиськылӥз Россия Федерацилэн Эстониысь посолэныз А. Глуховен, кудӥз оскытӥз, Удмурт Республикалэн представительствоезлы Эстониын ужан инты висъямын луоз шуыса. Кун Думаысь А. В. Солуянов депутатлэн пресс-службаез. Сессия азьын Кун Кенешлэн Эскерон палатаез эскериз Республикаысь сюресъёсъя фондлэсь финансово-хозяйственной ужъёсызъя лэсьтэм йылпумъянъёсты, выт бичанъя законъёсты чакланзэ но висъям коньдонэз уже кутэмзэ. Берлоез ужпум выльысь эскеремын луоз на, толэзь ортчыса. Озьы ик эскерон палата сэрттӥз-пертчиз бюджетэ пырисьтэм фондъёслэсь укмыс толэзь ӵоже ужамзэс. Со сярысь ивортон лэсьтэмын луоз таяз сессиын. Эскеремын адямиослэн ӝожтӥськонъёсы Ижевскысь но Завьялово районысь нотариальной контораослэн но учреждениослэн урод ужамзы, конституционной правоосты тӥямзы пумысен. Кун Кенешлэн пресс-службаез. Машина возисьёслы Машинаослы корттӥрлык вузан инты матысь дыре усьтӥськоз Гагарина, 81 адресъя. Таӵе векчи базаръёс Ижын трос гинэ люкаськизы ни. Вань малпан соосты огазеяса, Смирновое мынон сюрес вӧзы одӥг бадӟымзэ пуктон сярысь. Но секыт коньдонэн. Кунокуа, тӥрлыкез возён камераос, вузаськон интыос дасян понна 6-8 миллиард манет кулэ луоз. Э. ВАСИЛЬЕВА. Журналистъёсын пумиськонъёс Утён удыс капчи ӧвӧл Удмурт Элькунысь Кун Кенешын журналистъёсын выльысь пумиськылӥз Улон-вылонэз радъян политикая, ужъя, тазалыкез но инкуазез утёнъя ялан ужась комиссилэн тӧроез Светлана Ивановна Андреева. Светлана Ивановна мадиз комиссилэн берло дыре ма бордын ужамез сярысь, тодматӥз эскероно- чаклано удысъёсаз туннэ нуналлы югдурен. Комиссилэн заседаниосаз эскеремын "Калыкез уже интыян сярысь" но "Инкуазьлы изъян ваем понна административной амалэн кыл кутытон сярысь" Законъёслэн кызьы быдэсъяськемзы но мукет ужпумъёс. Комиссилэн кичӧлтэмезъя, Кун Кенешлэн Президиумез эскериз нылпиё семьяослы пособиос тырон ласянь югдурез. Солэсь азьло депутатъёс специалистъёсын ӵош кӧня ке городъёсын но ёросъёсын нимысьтыз эскеронъёс ортчытӥзы. Правительстволы ӵектэмын нылпиослы тыронъёсъя пунэмез 1998 арын 1 январёзь берыктыны. Али Правительство 45 миллиард манет ссуда басьтӥз но Адямиосты шугадӟонлэсь утёнъя министерство пыр пособиос басьтӥсьёс пӧлысь тужгес но шугъяськисьёслы ноябрь толэзёзь тыронъёс сётэмын луозы. Нош комиссиен эскероно-чаклано удысъёсты басьтоно ке, татын ушъяськымонэз ӧжыт ай. Соос герӟаськемын угось экономикаын огъя югдурен. Кылсярысь, ужтэк кылемъёслэн лыдзы ар кутсконысен 6,6 процентысен 4,8 процентозь кулэсмиз ке но, куд-ог ёросъёсын та лыдпус кык пол бадӟым на. Ужтэк кылемъёслы 75 миллиард манет тырымтэ на. Секыт югдур кылдэмын котырысь инкуазез утён ласянь. Со нырысь ик герӟаськемын предприятиосысь оборудованилэн, омырез но вуэз сисъян-чылкытатон арбериослэн вужмеменызы но инкуазез утёнъя ужрадъёс ортчытъяны ӧжыт коньдон висъямен. Пусйыны кулэ: "Экология-2000" программаын пусъем ужрадъёс предприятиослэн коньдонзы чотын быдэсъясько, элькунлэн бюджетысьтыз уксё висъяны чакламын Иж тыметэз тупатъяны-сузяны гинэ. Кызьы пусйиз Светлана Ивановна, али нырысетӥез ужпум - туала югдурез эшшо но уродмемлэсь алон. Со понна кылдытоно инкуазез ялан эскерыса-чакласа возёнъя но калыкын валэктон уж нуонъя система. Комиссия азьын сылӥсь одӥгез бадӟымез ужпум луэ адямиослэсь тазалыксэс утён. Али азьланьтӥсько инкуазьын вӧлмись висёнъёсты алонъя, туберкулёзэн нюръяськонъя но куд-ог мукет программаосын чаклам ужрадъёс. Кун Кенешлэн дас ньылетӥ сессияз эскерыны чакламын "Сахарный диабет" программа. Но тазалыкез утён ласянь югдур озьы ик уг тупатскы ай. Кылсярысь, котькуд 100 сюрс адямилы быдэ 40,6 мурт туберкулёзэн висе. Укмыс толэзь куспын 643 мурт шыр висёнэн висиз, миым та дырен ӵошатыса, со 4,6 пол трос. Татын но тросэз потэ коньдон тырмымтэ бордысь. Тани "Сахарный диабет" программаез быдэсъянэ 2000 арозь государство ласянь 56 миллиард манет тыр юрттэт сётыны чакламын ке, вуоно арлы висъяськоз 5 миллиард гинэ. Комиссия нуналмысь син шораз возе пенсиосты тыронэз. Та ласянь берло дыре укыр ӝеганъёс уг луыло. Но ӵемысь арлыдоос быдэс семьяоссэс сюдӥсь-вордӥсьёс луо. Нылпиослы пособиосты но сиён- юонэн гинэ ӧвӧл, куд-ог интыосын карточкаен но шиферен сётъяло угось. Комиссилэн ужез капчи ӧвӧл. Со герӟаськемын угось адямиослэн нуналмысь улон-вылонэнызы. Депутатъёслы бырйисьёс азе ӵемысь куашкам бервылэз сузясь-куръясьёс чотын потано луэ. Экономикаын огъя югдурез тупатытэк, вылӥ верам ужпумъёсты быдэсъянын но тыршемлэн пайдаез кематэк уз адӟиськы. Н. Корякин. Шаерысьтымы тодмо крезьгурчи но кырӟась Панетелей Кузнецов та толэзе вордскемез дырысен 60 арес тырмонзэ пусйиз. Лыдъянтэм трос ӟечкыланъёс, мылкыд каронъёс но сӥзёнъёс борды итӥськыса, "Кенеш" журналэз лыдӟисьёслэн нимынызы сюлмысьтымы шуиськом: юн тазалык тӥледлы, Пантелей Николаевич, шудбуро улон но эшшо бадӟымесь азинсконъёс! Улонысьтыз самой дуно нуналэныз ӟечкыламенымы ӵош вератэк кельтыны ум быгатӥське соиз сярысь но. Туэ сӥзьыл Пантелей Николаевич редакциямы трос выль кырӟанъёссэ пыртыса кельтӥз. Соос пӧлысь одӥгеныз тани газетэз лыдӟисьёсты тодматиськом. Нош кылемъёсыз дасо пала кырӟанъёсыз "Кенеш" журналлэн таиз ар понна берпуметӥ номераз потозы. "Етӥн" программа Бусылэн шулдырез - зангари сяська Сяськаяськись етӥнлы котькин синмаське. Чебер буёлэн ӝужамез понна али юри лемлет сяськаё етӥн кылдытэмын. Сое адямиос улон юртсы азе кизё. Нош вашкала калыкмес етӥн дӥсяз но, сюдӥз но, корказэ но шунтӥз, шуыны луоз. Та будослэсь угось удмуртъёс, дэра куыса, дэрем, ӝӧк кышет, валес котыр, пыдлёгет ковёр дасяллязы. Етӥн вӧйтэк ноку ӧз сиылэ губиез, киярез, кубистаез. Корка, гидкуа ӝутыку, ӝуен ӵош уже кутылӥзы кужез но. Котькуд семья етӥнэз ачиз кизьылӥз, ишказ, тышказ, вӧлдӥз, тӥяз-сэстӥз, чебер мертчан луытозяз. Собере сӥзьыл но тол ӝытъёсы черсӥз но дэра куиз. Республикаысьтымы етӥн бордын ужасьёслэн туннэ но ӵуказе улонзы, малпанъёссы сярысь мон вераськи "Удмуртлён" ассоциацилэн кивалтӥсеныз Владимир Подзыреен. - Странаысьтымы етӥн кизись ог витьтон улосъёс пӧлысь Удмуртия етӥн лудъёслэн быдӟалазыя куатетӥ интыын луэ. Туэ та культура 4785 гектаре киземын вал. Шаремы тужгес етӥнэн данъяськылӥз 1950-тӥ - 1960-тӥ аръёсы, соку етӥн 55000 гектар вылын будӥз, нош 1993 аре 10000 гектар гинэ киземын вал ини. Со дырысен етӥн лудъёс пумен кулэсмизы. Азьло аръёсы тросэз хозяйствоос одӥг гектарысь ог дасо центнер мертчан но со мында ик тысь люкаллязы, табере солэн ӝыныяз но уг люкаськы ни. Техника вужмемен ужъёс уг мыно, кулэ луись агротехника уг быдэсъяськы. Озьы ке но, мукет регионъёсын ӵошатыса, республикамы возиське на. Туж ӧжыт етӥн будэтыны кутскизы Смоленск, Пермь, Тверь областьёсын, нош Киров областьын 2000 гектар вылын гинэ будэто. Азьло та улосъёсын етӥн лудъёс Удмуртилэсь трослы бадӟымесьгес вал. Али республикаысьтымы дас вить районъёсын етӥн кизё. Тужгес бадӟымесь лудъёссы балезиноослэн - 960 гектар, можгаослэн - 661, уваослэн - 568 гектар. Та ёросъёсысь хозяйствоос пайда но тросгес басьто. Тани Ува районысь Ленин нимо колхозын (председателез Алексей Сырых) етӥн 300 гектарлэсь ӧжыт уг кизьыло, мертчан но, тысь но гектарысьтыз, мукет хозяйствоосын ӵошатыса, шӧдскымон трос люкаське. Можга районын быгатыса арысь аре етӥнэн ужа "Восход" колхоз. Та хозяйствоосын техниказы но котьку тупатэмын, сое ӝикыт возё. Туж пичиесь етӥн лудъёссы Алнаш, Селта районъёсын, нош сюмсиослэн - 60 гектар, якшур-бодьяослэн - 20 гектар гинэ. Куке соку соос жалялозы дыр ай та культураез аналтэмзэс, етӥнлэн угось данэз пумен ӝутскоз, дуннеысь азьветлӥсь странаосын со шӧдӥське ини. Аналтэм удысэз бӧрысь туж шуг ӝутыны. Та дыре республикаямы дас льнозавод ужа, Ярысь но Селтаысь предприятиос пытсан калэ вуэмын, уг тырмы етӥн треста, мертчанлэн но кужлэн асдунзы туж бадӟым луэмын, соин ик поттэм ваньбурлэн пайдаез чик уг луы. Колхозъёс етӥнэз киземысь медаз дугдэ шуыса, заводъёс соослэсь будэтэм "зарни буртчинзэс" дуноенгес басьто, соин ик асьсэос но шуг-секытэ усё. Азьло льнозаводъёс куж но мертчан гинэ дасяло вал ке, табере, тросгес пайда поттон понна, гозы, шпагат, етӥн вата, хлопоклы тупась мертчан поттыны кутскизы. Вуоно аре куд-огез етӥн заводъёс вакчи сӥё мертчанлэсь чурыт дэра куозы, нош Шарканын чеберъян (облицовочной) плитаос поттозы. Тӥни озьы удмурт етӥн бордын ужасьёс котькыӵе амалъёс утчало, колхозъёсын будэтэм етӥн пайда мед ваёз шуыса. *** Владимир Григорьевичлэн верамезъя, республикаямы "Етӥн" программа 1995 аре дасямын вал ини, но сое улонэ шуг пыӵатыны луиз, малы ке шуоно, сыӵе программа Россия Федерациын кутэмын ӧй вал на. Табере Москваын "Етӥн" программа дасязы ини, соин ик матысь дыре Удмурт Республикаын но со кутӥськоз. Етӥнэн герӟаськем ужъёсты азинтыны, заводъёсты рос-прос улӟытыны государство одно ик уксёен юрттыны кулэ, соин ик документ но кутӥськоз, со юрттонэн герӟаськыса. Программая льнозаводъёсын ужалозы пичиесь дэра куон фабрикаос, поттэм ваньбурез соку ик магазинъёсын вузаны луоз. Ваньмыз сямен етӥн кизиськоз Удмурт Республикаын будэтэм кидысэн, со понна шаерысьтымы етӥн кидыс дасясь ньыль станциослы юрттэт сётӥськоз техникаен, отын лэсьтэмын луозы устоесь кидыс куасьтон агрегатъёс (сушилкаос) но сое возён кеносъёс. Хозяйствоос будэтозы тужгес удалтӥсь "Псковский" но "Кром" сортъёсты. Программаез быдэстыны государство юрттӥз ке, удмурт етӥн нош ик зангари сяськаен шулдыртоз шаерысьтымы лудъёсты. Н. Возисов. Будэ, Насьтокъёс! Киясаысь ЗАГС туэ сизьыл кыл одӥг кадь документ дасяз. Райцентрын но Первомайскын вордскем кык пичи Насьтокъёслэн, фамилизы сяна, атай нимзы но тупаз - Коробейникова Анастасия Алексеевна. Таӵеез кемалась ӧй вал ни. Г. Васильев. Быръёнъёс ортчозы. Номыр шоры учкытэк! Ас коже кивалтон ёзъёсы берлоосыз быръёнъёс ортчизы вал 1994 арын апрель толэзе. Озьыен, выль быръёнъёс ортчытозь, сокем ик трос дыр ӧвӧл ни кылемын. Кызьы дасяське солы республикаысьтымы Быръёнъёсъя валтӥсез комиссия? Та пумысен газетмылэн корреспондентэзлы Т. Банниковалы валэктонъёс сётэ та комиссилэн секретарез Георгий Сергеевич Пчельников. - Нырысь ик, ойдолэ, лыдӟисьёсмылы вераломы, ку ортчозы матэктӥсь быръёнъёс. - Ас коже кивалтон ёзъёсы быръем депутатъёслэн ужаны тупатэм дырзы йылпумъяське 1998 арын 10 апреле. Озьыен, законэз ке чаклаго, быръёнъёс луыны кулэ та нунал бере, шуом, 12 апреле (со арня нунал луэ). - Вуоно сессиын депутатъёс эскерыны чаклало Быръёнъёсъя кодекслэсь инъетсэ. Кыӵе солэн кулэлыкез? - Азьло кутэм законъёс туала улонлэн куронъёсызлы уг тупало ни, уката но уг тырмо нормативной документъёс муниципальной быръёнъёс радъян понна. Выльёсыз законъёс но кутымтэ. Матэктӥсь быръёнъёс ортчытон понна депутатъёслы укмыс нимаз законъёс кутоно. Та секыт ужез вакчи дыр куспын нокызьы но быдэстыны уз луы ни. Соин ик нимаз законъёс дасян бордын ужан интые малпамы дасяны Кодекс - законъёсты огазеясь документ. - Россилэн улосвылъёсаз сыӵе Кодексъёс кутэмын-а ни? - Бен, соос кутэмын ни Воронеж, Белгород, Свердловск областьёсын но Башкортостанын. Воронеж но Белгород улосвылъёсын выль Кодексъёссыя быръёнъёс но ортчытӥзы ни. Асьме Кодексмес дасяку, ми но сооосын тодматским. Кун Кенешлэн Тӧроезлэн А. Волковлэн пуктэмезъя, Кодексэз дасяны кылдытэмын вал нимысьтыз ужась комиссия. Солэн ужаз, депутатъёс сяна, кыскемын вал Прокуратураысь, Юстицияя министерствоысь специалистъёс. - Мар умойзэ пусйысалды та Кодекслэсь? - Отын 16 ёзэтъёсыз (главаосыз). Соос пӧлысь 12-сэ кутыны луэ, вань быръёнъёсты, референдумъёсты ортчытъяку но. Озьыен, таӵе бадӟым ужрадъёсты радъян бордын ужаку, нимаз законъёс кутоно уз луы ни. Озьы ик Кодекс яралоз, республикамылы Президент но быръёно ке луиз. Кун органъёслэн кивалтон радлыксы воштӥськыку, азьло аръёсы одно ик законъёс кутоно вал. Табере та кодексэ кулэ луоз ватсанъёс но воштонъёс гинэ пыртылыны. Тӥни со ласянь ужаны лякытгес луоз. - Осконды вань-а, таяз сессиын Кодекслэн инъетэз кутэмын луоз шуыса? - Со понна уж нуэмын. Малпасько, документэз кутон шоры депутатъёс шонер учкозы. Тросэз солэн пуштросэныз тодматскизы ини, куд-огез ӵектонъёссэс но веразы. Кодекслэн инъетэз озьы ик келямын интыосысь администрациосы, дас районъёсысь ӵектонъёс вуизы ини. Тросэзгес соос герӟаськемын нимаз веранъёсын шуонэн, Кодексын сокем шуг, валантэм интыос ӧвӧл кадь. Но Федеральной законлы со пичи но пумит медаз луы. - Озы ке луиз, кыӵе кышкытлык возьма республикамес? - Федеральной законлы тупамтэос кылдыку, озьы но луыны быгатоз: быръёнъёс ортчозы, нош Россия соосты шонертэмен лыдъялоз, выльысь быръёнъёс ортчытоно луомы. Соин ик Кодексын ваньмыз чакламын медло. Нош Кодексэз шӧдтэк шорысь ӧз ке кутэ, республикаямы быръёнъёс одно ик ортчозы - соку ини Федеральной законъя. Но со понна асьме депутатъёслы кык законъёс коть (укмыс пӧлысь) кутоно луоз. - Кызьы малпаськоды, быръёнъёс дыръя ас коже кивалтон но кун кивалтон ёзъёс куспын выльысь керетонъёс уз-а кылдэ? - Малпасько, сыӵе керетонъёс уз луэ. Малы ке шуоно, та дыр ӵоже Конституцие воштонъёс пыртэмын уз на луэ. Азьланяз мар луоз - адӟомы. - Быръёнъёсты радъян уксёен но герӟаськемын. Кыӵе коньдон чотын ортчоз со ужрад? - Кодекслэн проектаз гожтэмын, республикаын ортчись быръёнъёслы но референдумъёслы коньдон висъяськыны кулэ республикамылэн но ёросъёслэн бюджетъёсысьтызы. Но асьмелэн тросэз ёросъёс дотационной луо бере, валамон, вань секытэз усёз республикамылэн бюджетэз вылэ. - Георгий Сергеевич, быръёнъёсын вырись адямиослы тӥляд но Афанасий Ильич Тубыловлэн нимъёссы кемалась тодмо ини. Оло, тӥ пырак та удысэн вырыны вордӥськемын. Асьтэ сярысь кӧня ке вералэ вал. - Мон физикаен дышетӥсь. Йылпумъяй Ижысь пединститутэз. Кыкетӥ дипломея - кивалтон ужъёсъя менеджмент. Общественной улонэ пыриськеме нырысь ик герӟаськемын вал комсомолэн, собере совето органъёсын. Вылӥ Кенешын ужакум, 1985 арысен, быръёнъёсты радъян ужъёсы пыриськылоно луиз. Нош Кун Кенешын Быръёнъёсъя комиссия кылдэм бере, секретариатэ юнматӥзы. Тӥни озьы амалтэк пыриськоно луиз быръёнъёсты радъян но соин герӟаськем пӧртэм бумагаосты, законъёсты дасян ужъёссы. Дас вить пумо быръёнъёсты ортчытоно луиз ни. Зэмзэ ик, выль быръёнъёс дырозь ньыль толэзь сяна кылемын ӧвӧл ни. Быръёнъёсъя комиссия туж кулэ документъёс бордын ужа. Номыр уд шуы - та секыт ужез но кинлы ке нуоно. Но быръёнъёс матэктэмъя, али шӧдӥське ини мукетыз но: куд-ог кескич коньдоно депутатъёс я соослэн интыязы чуртнаськыны турттӥсьёс, калыклы "туж матын" луэмзэс возьматыны турттыса, адямиосыз "кузьымъёсын" басьтыны выро. Сыӵе учыръёс вань ини. Ас коже кивалтон ёзъёсы депутатэ кандидатъёсты утчан-синйылтон кутскиз. Отчы оскымон адямиос мед сюрозы вылэм. Та сярысь али ик сюлмаськыны, кыӵе ке ужан программа кутыны кулэ, дыр, "Удмурт кенеш" но. Удмуртъёслэн берлояз ӧтчамазы но уно гинэ вераськонъёс вал удмуртъёсты киывалтон ёзъёсы кыскон сярысь. Та ужлэсь нош ик бере кылёно ӧвӧл вылэм. Татьяна Банникова. Шыр пичи, изъянэз быдӟым Туэ укмыс толэзь куспын шаерамы 352 сюрс адями висиз. Тужгес но алямын паласькись висёнъёс. Котькудӥз 1000 адями пӧлысь 215-ез больницае вазиськылӥз. Со миым, та вакытэн ӵошатыса, 38-лы уногес. Шӧдскымон трос луизы мукет висёнъёс но. Тани, шыр висёнэн (геморрагической лихорадка) 4,2 поллы уногес висизы, коклюшен - 3,1 поллы, скарлатинаен - 42 процентлы, туберкулёзэн - 17 процентлы, пыэдэн - 8 процентлы. Паласькись висёнъёсын тросгес курадӟо пиналъёс. Сентябре, августэн ӵошатыса, висись нылпиослэн лыдзы 2,2 поллы йылӥз. Валамон ини, со герӟаськемын дышетскон кутскемен. Н. Возисов. Быдэ вуымтэослы сӥзем арня 24-30 ноябре республикаямы ортче быдэ вуымтэослы сӥзем арня. Таин валче трос тунсыко ужрадъёс дасямын. Егитъёс понна ужалозы театръёс, библиотекаос, уноез клубъёс. Бадӟым ныпъет ас вылаз басьтӥз Ижысь Октябрь ёросысь "Семья" центр. 1 номеро нылпи юртын со радъяз та вакытэ вордскем нылъёслэсь но пиослэсь вордскем нуналзэс, "Я и мы" клуб, "Стартин против СПИД-а" шудон дасяз "Ударникын" бадӟым классъёсын дышетскисьёс понна визьнодзэс сынан конкурс, марафон радъямын. Тросэз пиналъёс спортивной ужрадъёсы пыриськозы. Э. КУМАЧЕВА. Пумиськыны ӧте Ижевск городысь ожысь, ужысь, Вооружённой Кужымъёсысь, правоез утёнъя ёзъёсысь ветеранъёслэн кенешсы "Ветеран" клублэсь ужрадзэ ортчытэ. Таяз учыре мӧйыос кенешозы югдурез утёнъя министрен генерал-лейтенантэн А. М. Никитинэн. Пумиськон луоз филармонилэн Бадӟым залаз 27 ноябре 11 часын. Лыктыны быгато вань мылкыд карисьёс. Данакез - Казахстанысь Берло аръёсы палэнысь вуэмъёслэн лыдзы шӧдскымон йылэ. Шаркан районэ гинэ туэ 40 мурт вуиз. 30-эз соос пӧлысь - Казахстанысь. Данакез интыяськизы Сосновка, Мишкино гуртъёсы. Лыктэмъёслэн лыдзы азьланьын эшшо но йылоз. Ма бен, удмуртъёслэн таӵе чырмыт сямзы ӟечен гинэ мед берытскоз вылэм. П. Липина. Йӧл-а, аракы-а юом? Уждун уг йылы ке но, вузъёслэн дунзы весяк будэ. Тани туэ укмыс толэзь ӵоже дунъёс бадӟымазы 8,6 процентлы, сиён-юон 10,5 процентлы дуногес луиз, мукет вузъёс - 3 процентлы. Кылем арен ӵошатыса, сахарлы 49 процентлы уногес уксё тыриськом, будос вӧйлы - 32 процентлы, консервалы, чайлы, кофелы - 14-19 процентлы, сӥльлы, джемлы, повидлолы - 13 процентлы тросгес. 31 поцентлы дунояз столовойын сиськон, нош аракылы табере 25 процентлы тросгес уксё сётоно луэ. Паймоно соизлы но: одӥг кадь сиён-юонлы котькуд ёросын, городын пӧртэм дун тыроно луэ. Тужгес дуно сиён-юон ӵекто Воткинск городын, Кез посёлокын со данаклы дунтэмгес. Я коть соизлы шумпотоно: промышленной вузъёслы дунъёс трослы ӧз будэ, 3-7 процентлы гинэ. Аракы юисьёслы пумен секыт улоно луоз, оло, кудӥз йӧл вылэ но выжоз ай. Мед луоз озьы... Н. ВОЗИСОВ. Одӥг кыл шедьтэмын Удмурт Республикаысь Кун Кенешлэн Тӧроеныз Александр Волковен 20 ноябре Москваын пумиськиз Россия Федерациысь калыкъёсын ужанъя но федеративной кусыпъёсъя министр Вячеслав Михайлов. Со шуиз, министерство, пе, одно ик пыриськоз Куӟебай Гердлэсь юбилейзэ радъянэ, дасянэ но пусъёнэ. Та ужрадэз ортчытыны республикалы коньдон висъямын луоз. Пумиськонын озьы ик одӥг кыл шедьтэмын Удмуртиын Всероссийской конференция люканы. Со луоз вуоно арын январе. Люкаськемъёс сэрттозы-пертчозы калыкъёсын кусыпъёсты умоятонэн герӟаськем ужпумъёсты. Кун Кенешлэн пресс-службаез. Финн-угор дуннеын Кыдёкын ке но туж матын Ог вить ар талэсь азьвыл Карлыганын ортчизы удмурт культуралы сӥзем нуналъёс. Куинь нунал ӵоже отысь калык Удмуртиысь лыктэм кунооссэ ки вылаз кадь нуллӥз. Мыным туж яраз солэн ӟеч, капчи мылкыдыз. Карлыган пал кырӟанъёс Пель сьӧрын весь чузъясько на, Чебересь нылъёс-пиос Котырын весь бергало на. Вискамы трос иськемъёс, Нош сюлэм уг кылзӥськы - Кылдысалзы ке бурдъёс, Лобӟыса вуысалмы. Мар музъем со - Карлыган?! - Вашкала визьмы-бурмы. Соин но, дыр, та палан Ӟырдытгес шока лулмы. Алигес киям сюриз М. Атамановлэн "История Удмуртии в географических названиях" ӵыж выль книгаез. Отысь вордскем палысьтым гурт нимъёсты учки но тодӥ: Булай гурт, пе, кылдэмын Арскысь пегӟем удмуртъёслэсь. Со гожтэмез книгаысь быдэссэ сётэме потэ. Малы ке шуоно, туэ книгаез басьтыны но шедьтыны шуг, нош вордскем палысьтым калыклы со сярысь тодытэме потэ. "Булай Арске нуись сюрес вылын пуке шуыса, нырысьсэ верамын 1710 арын - 15 одворчаем Булай- Юмья гурт. Кылдытэм сое Арск музъем вылысь Ӟумья выжыысь пегӟем калык. Соослэн выжыоссы али Ува районысь 13 гуртъёсын уло. Удмуртъёс татчы вуизы Казань ханствоез пазьгем но Арск музъем вылысь ар-удмуртъёсты, выль кузёослы пумит султэмзы понна уллям бере. Лыктэм калыклэн кӧня ке люкетэз выльысь вордскем палъёсаз берытскиз но Татариысь Кукмор ёросын Студеный Ключ гурт кылдытӥз. Сое калык али но Блай шуэ. Булай - тюрк кыл, гурт кылдытӥсьлэн нимыз: булу - маке но луыны, кинлы ке тупаны шуэм, ай - толэзь. Юмья, Ӟумья - воршуд выжы ним. Озьыен, Ӟумья выжыысь Булаен кылдытэм гурт". Карлыганъёс но, вордэм гуртысьтым калык но одӥг дуннеысь, Арча музъемысь потэмын бере, монэ юнме уг кыско вылэм та палъёс, вашкала-вашкала вир ассэ шӧдытэм. Сюрес вылэ потӥмы быдэс автобусэн, кызь кузя: "Шулдыр ӝыт" ансамбль, культурая училищеысь Виталий Юрьевич Семеновых крезьгуръя кивалтӥсенызы ӵош "Инву- гурысь" куать нылъёс но пиос, Надежда Уткина но Анна Плотникова, "Шундыысь" Ирина Дедюхина но Александр Князев, удмурт радиоын но телевидениын ужасьёс Валерий Тероков но Валерий Сидоров. Сьӧрамы басьтӥмы удмурт книгаос, крезьгурен кассетаос, кузьымъёс. Вуим Йошкар-Олае. Отын ӵапак мынӥз бадӟым праздник: дуннеысь финн-угор калыкъёслэн театръёссылы сӥзем куинетӥ фестиваль. Кузь сюрес ӟигарез быдтӥз, валес вылэ нясь-нясь выдэм но шутэтскем гинэ потэ на вал. Но "Шундыысь" егитъёслэн кыкетӥ шоканзы усьтӥськиз, лэся. Кытӥ-мартӥ дӥсьсэс воштӥзы, чеберъяськизы но пор егитъёсын пумиськонэ дыртӥзы. Соосыз витё ни вылэм. Уйшор берозь пукизы-вераськизы. Одӥг комнатае ӵош интыяськем эшъёсы Надежда Уткина но Анна Плотникова ӝутскем мылкыдын отысь вуизы. Ӵуказеяз нуназе концерт сётӥмы культурая но искусствоя колледжын. Егитъёс туж шуныт пумитазы асьме артистъёсыз. Но ӝытазе Йошкар-Олалэсь ог дасо иськеме интыяськем Старое Крещено пор гуртэ мынӥмы. Азьвыл ик веразы: отын тӧрозы удмурт, пе. Мон малы ке но воргоронэз адӟыны малпасько вал. Но со вылэм Татариысь Лельвыж удмурт гуртын вордскем но будэм кышномурт - Надежда Максимовна Купцова. Кузпалэныз ӵош дышетскыса, бызем бераз солэн вордскем гуртаз улыны лыктӥллям. Етӥз, визьмо удмурт кышномуртэ поръёс асьсэлэн кариллям, колхозэнызы кивалтыны оскиллям. - Табере мон татын удмурт кылме но вунэтоно кадь луисько ини, - ӝожке Надежда Максимовна. - Сюлэмлы маке но уг тырмы. Тани толон Йошкар-Олае "Эш-Тэрек" спектаклез учкыны ветлӥ. Вань пушкы бугырскиз. Мон ньыль кылэз тодӥсько бере, ньыль кылын ик спектакльёсты учкылӥсько. Бигеръёслэн но, поръёслэн но яра. Но удмурт артистъёслэн шудэмзы мукетгес. Соос улонэз зэмосгес возьматыны быгато, уг адӟиськы нимысьтыз чеберъяськемзы. Табере тани тӥлесьтыд концерттэс нырысьсэ адӟи. Нош пушкы бугырскиз. Кыӵе талантъёс вань асьме калык пӧлын! Мылкыд ик ӝутске, йырез вылынгес нуллэм потыны кутске. Надежда Максимовна ачиз но шулдыр кырӟа вылэм. Концерт бере дуно куноосты сямен утялтӥз, ӝӧк сьӧрын "Вало но возь вылын", "Возь кузя но васькыса но..." калык кырӟанъёсты кырӟаны куриз, ачиз но кылъёссэ вунэтымтэ на, чебер, зӧк куараен милемын ӵош кырӟаз. Удмурт калыклэсь мӧзмем кышномуртлэн нокызьы но люкиськемез уг поты ни. Но мар карод: сюрес вае но, сюрес люке но - милемыз мукет интыосын витё. Кӧня ке кыл вераме потэ Йошкар-Ола город сярысь. Мукет интыосы вуылыку, амалтэк ӵошатӥськод сое ас палъёсыныд. Али но син шоры соку ик йӧтӥз городлэн аспӧртэмлыкез. Куазь кот, кезьыт, тӧло вал. Соин но, лэся, ветлон тротуаръёсын ву, дэри тросгес потӥз. Нош котырак чакласа, Марий Эл Республикалэн столицаез садъёс, ӝужыт мӧйы писпуос пӧлы выемын. Фестивале пӧртэм шаеръёсысь трос калык лыктэмын ке но вал, урамъёсын ӧз адӟиськылэ аьмелэн кадь дыртыса ортчись трос адямиос, машинаос. Котырак шыпыт, соин но, лэся, гольык писпуослэн тӧл шорын ӵашетэмзы тужгес зол кылӥське. Город пыртӥ вуоссэ дыртытэк нуэ Кокшага шур. Йошкар-Ола шорын тӧдьы колоннаосыныз йӧно сылэ М. Шкетан нимо пор национальной театр. Отын ортчиз финн-угор театръёслэн фестивальзы. Нош национальной библиотеказылы С. Чавайн писательзылэн нимыз сётэмын. Амалтэк мылкыд сӧриське: асьмелэн нош ӧвӧл шат сыӵе юртъёслы ним сётымон дано, быдӟым адямиосмы?! Ветлӥмы поръёслэн краеведческой музеязы но. Отын тужгес шӧдӥське асьмелыэн ӵыжы-выжы луэммы. Гурт котырын ужан вашкала арбериослэн нимъёссы тросэзлэн асьмемын огкадесьгес, шортдэремъёссы но уй пал удмуртъёслэнлы тупало. Но поръёслэн трос интыосын кылемын на вашкала вӧсяськон манерзы. Вань нимысьтыз огазеяськонзы но, картсы но - быдӟым вӧсясьсы. Соос котькуд ар люкаськыло, кенешъёс ортчытъяло, пӧлазы егитъёсты но кыско. Музейын ужасьлэсь юай нылпиослэн но егитъёслэн пор кылэз дышетэмзы, вераськемзы сярысь. Милям, шуисько, тросаз райцентръёсын но уй пал гуртъёсын нылпиослэсь удмурт сямен вераскьемзэс кылыны уг луы ни. Со паймиз. Городын, пе, милям но сыӵе сюлэмшугъяськон кылдэмын, нош гуртъёсын югдур умой. Егитъёс али тужгес но анай кылзы борды кыстӥсько. Ӝытазе дорамы вуиз пор пи Владислав Николаев. Уйшор берозь гитараен шудыса кырӟаз туала но вашкала пор кырӟанъёсты. Солэн инвожо толэзе куар жильыртэм кадь небыт, нюлэскытӥ чылкыт вуосс энуись шурлэн кадь жильырес куараез кема-кема пель сьӧрын чузъяськоз на. Татчыозь умой-умой кылыны ӧз кылды на вал пор кырӟанъёсты. Соос монэ паймытӥзы, кылымтэ-адӟымтэ шаере вуттӥзы. Нош йырмы чылкак берытскиз Родо Шакиров пор кырӟасьлэсь кырӟанъёссэ кассета вылысь кылзэммы бере. Соя, пор эктонъёсты эктӥм. Озьы пор кырӟась милемыз эшшо но матэгес кариз. Йошкар-Олаысь Карлыганэ вырӟимы. Сюлэм уг чида: отын кӧня тодмоос, ваньзэс адӟем потэ ини. Ӟеч тодмоссэс сямен, пумитазы татысь "Ӟардон" ансамбльысь нылъёс-пиос, администрацилэн тӧроез Юрий Алексеевич Осинов. Шуныт кылын но, кырӟан-веранэн но, вӧйын нянен но, пӧраськемъёсын но, пӧсь чаен но утялтӥзы. Мылкыд ӝутскиз, жадеммы веськаз. Азьпалан уж вите. Нырысь ик концертэн мынӥм Карлыганысен вить иськеме интыяськем Киселево удмурт гуртэ, нош ӝытазе Карлыганын пуктӥм. Та палъёсы удмурт артистъёс ӵем гинэ вуыло ке но, калык котькудзэ туж дуно кунооссэ кадь пумита. Люкиськемзы потытэк, концерт бере но кошкыны уг ӵыдо, кыдёкысь удмуртъёсын ваче син вераськемзы потэ на. Концерт бере карлыганъёс ӝыт пукон ортчытӥзы. Та вашкала гуртын ньыль пумо калык улэ: удмурт, пор, бигер но ӟуч. - Ми тӥледыз котьку туж витиськом, - шуиз татысь удмурт культуралэн кивалтӥсез Мария Аркадьевна Главатских. - Куспамы тупаса, ог-огмес валаса улӥськом-ужаськом ке но, мылкыдмы, сюлэммы удмуртъёс борды биниськемын. Карлыган школаын но нылпиосты дышетыны тыршо ньыль кылын. Нылпиос куспазы ӟуч кылын верасько. Школалэн директорезлэсь Юрий Леонидович Андреевалэсь юай, кызьы пумитаны малпаськоды татын удмурт школа кылдытӥсьлэсь Кузьма Андреевич Андреевлэсь 140 ар но школалы 115 ар тырмонэз? Шугъяськонзэ ӧз ваты: кытысь,пе, коньдон шедьтоно. Кулэ юрттӥсьёс. - Тани ноябрьысен К. Андреевлы сӥзем лыдӟиськонъёс ортчозы. Праздник сокем бадӟым ӧз ке но пӧрмы, нылпиос но калык пӧлын уж ортчытыны тыршом. Ваунэтыны кулэ ӧвӧл Кузьма Андреевич кадь визьмо адямиосты, асьме интеллигенцилы инъет сётӥсь, сое кылдытӥсь-будэтӥсь школаез. Карлыган школалэн туала данъяськонэз - нылпиослэн оркестрзы. Сое кылдытӥз но нуэ Валентина Арсентьевна Камышева. Та чырмыт, етӥз кышномурт пиналъёслы яратон мылкыд пыӵатэ удмурт, пор, бигер, ӟуч гуртъёслы. Нылпиос соосты быгатыса шудо, кылзэмъя кылзэм потэ. Пор музъеме вуылыкуз, "Шундыын" ужась Александр Князев эшъяськем вылэм Мари Арбор пор гуртысь егитъёсын. Соин ик ми но отчы дыртӥм. Сюрес дэри, автобусэн отчы но татчы гушъяса мырдэм вуим. Школаысь нылпиос тӧдьы дэра вылын горд синьысэн пужыятэм дэремъёсын, ворекъясь корт весьёсын но йыркерттонъёсын, пор кырӟанэн пумитазы. Син шорам пуктӥ таӵе дэремъёсын сылӥсь асьме уй пал удмуртъёсты. Малы ке шуоно, соос туж тупало уй пал удмурт дэремъёслы. Нош отысь праздникъёсы но уд адӟы ни таӵе дӥсьёсты. Малы меда? Арбор школалэн директорез гурт нимзылэсь кылдэмзэ вераны ӧз тоды. Бор, пе, пор кыллэсь кылдэмын, нош ар мар со, уг тодо. Ми валэктӥм, ар - со удмуртъёслэн вашкала нимзы шуыса. Иське, пе, гурт ниммы удмуртэн но порен юнме шорысь сураськемын ӧвӧл: Школалэн директорезлэсь верамзэ юнматыса, клубын концертын Надежда Уткина кырӟаз "Кече лектеш ончалеш" ("Шунды потоз, шунтоз, дыр") пор кырӟанэз. Со эшъяськон нюжаез эшшо но зол герӟаз. Пор калык артистъёсмес кужмо кичабонъёсын пумитаз, лэземзы потытэк, эшшо но эшшо сцена вылэ курылӥзы на. Но сюрес вите. Табере - бигер удмуртъёс доры. Бигер удмуртъёс шуиськом ке но, соос но, пор удмуртъёс сямен ик, ваньзы потэмын арча музъем вылысь. Кусыпсы но кыдёкын ӧвӧл - автобусэн одӥг час мынымон. Вуимы Шор Кушкетэ. Делегацимес пумитаз школалэн директорез Иван Васильевич Ермаков. - Милемыз палэнысь удмуртъёс эн шуэ, - валэктӥз со. - Ми асьме вашкала музъемамы улӥськом. Тӥляд выжыосты тросэз татысь потэмын. Зэмзэ но, Арча пал музъем куке но асьмелэн шоркармы вылэм, татын удмурт эксэймы улэм. Со доры кыстськиллям туала удмурт музъемысь трос сюресъёс. Бигер удмуртъёс дорын ньыль концерт сётӥмы: одӥг - Лызиын, куинь - Шор Кушкетын. Шор Кушкетын ортчиз удмуртъёслэн куатетӥ съездзы азьын конференция. Отчы люкаськизы Балтач палась вань удмурт гуртъёсысь делегациос. Асьсэ ужпумъёссэс, сюлэмшугзэ кисьтыса ӟырдыт вераськизы. Доклад лэсьтӥз "Азьлане" ёрос газетлэн редакторез Александр Михайлович Кунаев. Балтач ёросысь конференция бере доре бертыны потӥм. Куазь ӝытмиз, зор кыдыра. Син азям пуктӥ вашкала-вашкла удмуртъёслэсь пеймыт-сьӧд тэльёс пыртӥ ортчись сюрессэс. Маин, кызьы меда соос та кемысь кошкылӥзы, трос сюрс иськемъёсты ортчылӥзы? Кин кужым сётылӥз ваньзэ чиданы но выль интыын выль кидыс уськытыны? Нош ми тани шутэтскыса мынӥськом. Шуныт автобус пушкын вань ортчем нуналъёсыз, пумиськонъёсыз выльысь но выльысь сюлэм пыртӥмы поттӥськом. Котькуд концертын, пумиськонъёсын кӧня меда егит пиослэсь сюлэмзэс вырӟытӥзы Надежда Уткина но Анна Плотникова, нош "Шулдыр ӝытысь" Геннадий Ганьков, Игорь Перевощиков но Владимир Мальцев яратон тылгизьы пазьгизы, луоз, егит нылъёслы. Синмаськизы Анатолий Ушаковлы но, мылкыдэз ӝутыны, серекъятыны быгатэмез понна. Котькуд пумиськонын, вашкала шортдэрем дӥсяса, калык кырӟан-эктонъёсын концертэз усьтылӥзы культурая училищеысь нылъёс но пиос. Нациосын ужанъя комитет но "Шунды" дэменлык таӵе пумиськонъёсты нырысьсэ уг радъяло ини. Туала секыт вакытэ соос эшшо но юнгес сюлмасько калыкен кусып тупатыны, азьланезлы осконзэс юнматыны. ГАЛИНА РОМАНОВА, Марий Эл-Татарстан-Удмуртия. Борис Козловлы - 50 арес Кыдёкысен адске Пор(мари) калыклэн одӥг гинэ таӵе пиез: лултэм-тустэм мае ке киыныз-йыгыриеныз улӟытӥсь, скульптор, суредась, Россиысь Художникъёслэн огазеяськонзылэн членэз, ужъёсыныз-синпелетъёсын историе ас нимзэ гожтӥсь... Солэн ужъёсыз кыдёкысен син шоры йӧто: Ижевскысь Ӟуч драмтеатр азьын В. Короленколэн гранитлэсь бюстэз, Глазов пединститут азьын та писательлы ик тӧдьы мраморлэсь памятник, шоркарысьтымы Совето ульчаын удмурт кунлыкмес радъясьёслы Иосиф Наговицинлы туйлэсь (бронзалэсь) лэсьтэм монумент... Таӵе бадӟымесь ужъёс но мукет "чыры-пырыос", корка борддоръёсыз вылласянь чебермась суредъёс-панноос кылдыто городлэсь ас тусбуйзэ. Ижевскын уло кык сюрс пала поръёс (быдэс республикаын - дас сюрс ёрос). Одӥгез соос пӧлысь Борис Михайлович Козлов - удмурт музъемлэсь сяськаё лулпушъетсэ азинтыны кылдэм адями. Вордскиз со Татарстанысь Менделеевск ёросысь Памашэнер гуртын. Ож гудыри чалмем бере но капчи ӧй вал на, тужгес ик трос нылпиё семьяослы. Борис будӥз кык сузэр- апайёс но агай-вынъёс пӧлын. Атаез дышетӥсь вал. Монашевоын (Вандэмоын) тямыс классэз йылпумъяса пыре Лениногорскысь чеберлыкъя но крезьгуръя педучилищее. Татысен юнма зэмос суредась луыны малпанэз. Армия бере ӝабыр-ӝабыр басьтӥське со малпанзэ быдэстыны. Дышетске Ленинградын Художественной академиын В. Б. Пинчуклэн мастерскояз, собере, 1972-тӥ арын, луэ И. Е. Репин нимо институтлэн студентэз. Татысь, 1757-тӥ арын Екатерина ИИ эсксэйлэн кылдытэм академиысьтыз, потӥзы туж уно живописецъёс, скульпторъёс но архитекторъёс. Одӥгез соос пӧлысь - Борис Козлов. Огшоры пу солэн ки улаз кылзӥськись луиз, трос пӧртэм тусбуйёс кылдытӥз. Диплом ужзэ сӥзиз А. П. Чеховлэн образэзлы. Сое вылӥ дунъязы академикъёс Кибальников но Бабурин. 1978-тӥ арын егит скульптор улонзэ пыраклы (шуыны луэ, дыр) герӟа Удмуртилэн шоркареныз. Художественно-производственной мастерскойын тырше. Жадёнэз валасьтэм, ӟырдыт, буйгасьтэм сямызлы луыса, мастерлэн-монументалистлэн данэз арысь аре будэ, кыдёке вӧлме. Пӧртэм интыосысь вуо памятник лэсьтыны куронъёс. Табере со ужа ни алюминиен но, туен но, гранитэн но, мраморен но. Завьял ёросысь Первомайской посёлокын Борис Козлов "улӟытэ" оже быремъёслэн анайзылэсь тусбуйзэ. Ижевскысь 53 номеро школа азе но пуксе солэн кибервылыз - Советской Союзлэн Героезлэн Татьяна Барамзиналэн бюстэз. Ас калыксэ но Борис Михайлович уг вунэты: солэн устолыкез вылын ӝужало пор калык мадёсъёсысь геройёс, кылсярысь, таӵе ужъёсаз: "Онар", "Акпарслэн маршез", "Пересь атайлэн кырӟанэз". Скульпторлэн семьяез сярысь тазьы вераны луоз: кузпалыз Татьяна Петровна Удмурт университетысь живописья кафедраын доцент. Соослэн кык нылъёссы, огез ужа ни дышетӥсьын, мукетыз школаын дышетске на. Ачиз но Борис Михайлович университетын рисунокъя но скульптурая кафедраын ужа. Нош ӝыт берозь со ӝегатскылэ мастерскояз: чидасьтэм киосыз "маялляно" материаллэсь мӧзмо, сюлэмыз пӧзе-пыже быдэстымтэ ужъёс понна. Берло дыре со вань кужымзэ сётэ, 100 аръем юбилейёслы памятникъёсыз дыраз вуттон вылысь - тодмо пор писательлы Илья Ломберскийлы но быдӟым удмуртлы Куӟебай Гердлы. Р. Токмурзин, Каракулино ёросысь Ныргында гурт. Удмурт радиолы - 65 Я, лыке! Удмурт радиое лыктӥ нылпи газетысь. Озьыен, нырысь газетчи вал. Али ке но тодам вайылӥсько "газет пыр потэм журналист котькыӵе изданиын ужаны быгатоз" шуэмзэс. Угось со кулэ каре кыл бордын туж сак ужамез, малпанъёсты радызъя вакчияк но чебер гожтыны быгатэмез. Малпасько, радиое вуыса, со юрттӥз мыным. Озьы ке но, микрофонлы дышыны кемагес выри (куд-ог нырысь лэсьтэм но фондэ кельтэм радиоверанъёсме кылзӥсько ке, сереме потыса кадь, аслым ачим шуисько: сое гинэ но вераны быгатӥськымтэ ук). Собере - татын чылкак выль удыс. Азьвыл уго кусып ӵемгес возёно луылӥз нылпиосын, дышетӥсьёсын, анай-атайёсын, роноосын, Калыкез дышетонъя министерствоен. Нош табере тодматсконо артистъёсын, крезьгурчиосын, Культурая министерствоен, филармониен но крезьгур удысэз валтӥсьёсын: ужаны угось ӵектӥзы крезьгуръя редакциын. Озьы бӧрсьысь бӧрсе лэсьтоно луиз "Тӥледлы кузьым - кырӟан" радиоверанъёс, ӵукна концертъёс, пӧртэм ансамбльёс, кырӟасьёс, крезьгурчиос сярысь концертъёс-очеркъёс. Тунсыко вал Россилэн дано артистэныз Михаил Ворончихинэн пумиськон (соку со "Арганчиын" кырӟа вал ай). П. И. Чайковскийлы сӥзем фестиваль дыръя дӥсьтытэкгес мынӥ Москваысь симфонической оркестрлэн кивалтӥсез тодмо дирижёр Вероника Дударова доры. Соку солы сизьымдонлэсь трос вал ке но ини, сэзь, котькытчы вутскыны тыршись, со вакыт ик лек кадь потӥз мыным. Азьло ик вераськыса, гостиницае дораз лыктэме бере, зэм но, мылыз потытэк кадь пумитаз. Одӥг юан, кык, куинь... Пумен креслое рос-прос интыяськиз но, тусыз ик воштӥськиз, лякытгес луиз. Тодаз ваиз таӵе фестивале азьло аръёсы но вуылэмзэ, тодмо удмурт крезьгурчиен Герман Корепановен ӵош ужамзэс (солэсь куд-ог произведениоссэ оркестреныз шудӥз - фонотекаямы но гожтыса кельтэмын). Туж пайдаё но тунсыко вал, радиожурналист луыса, командировкае нырысьсэ ветлэме. Крезьгуръя Ижысь училищеысь дышетӥсен Р. А. Чураковаен ӵош кӧня кырӟан гожтӥм Кизнер ёросысь Вичурка но Вуж Бодья гуртъёсын - сюан, бӧрысь, солдатэ келян, ӟег сюан, ӟечыран, акашка, пукро гуръёсты но огшоры егит дыр кырӟанъёссэс тодазы ваизы отысь нылкышноос. Со ветлэммы бере мон Москваысь радиое но веран ыстӥ вал. Кылӥллям мукет интыосын улӥсь тодмоосы но - бӧрысь ивортӥзы. Кыдёкысь Салехардысь гожтэт басьтӥ: татын улӥсь финн-угор выжыысь калыкъёс синмаськиллям удмурт нылкышноослэн кырӟамзылы. Ваньмыз со умой. Кырӟаны-вераны усточиос, шаерысьтымы тодмо артистъёс, крезьгурчиос, пӧртэм коллективъёс сярысь радиоверанъёс огез бӧрсьы мукетыз вордӥськыны ӧдъязы. Но ваньмыз сярысь быдэс куамын-ньыльдон минут ӵоже вераны уг лу, кулэез но ӧвӧл. Павел Григорьевен ӵош малпамы (валче ужаськом крезьгуръя редакциын): крезьгур удысысь пӧртэм иворъёс, выль нимъёс, выль кырӟанъёс, концертъёсысь, фестивальёсысь пичиесь репортажъёс палэнэ кылё кадь. Одӥг кылын, выль иворъёсын, кырӟанъёсын, пичиесь интервьюосын крезьгуро улонлы сӥзем радиожурнал выллем дасялляны вераськимы. Нош кызьы нимано сое? Трос кенешылыса, газет-журналъёсын бугыръяськыса, син шорам йӧтӥз Т. Г. Владыкиналэн калык творчестволы сӥзем пичи гинэ "Ялыке!" нимо книгаез. "Ялыке!"? Малы та радиоверанъёсмес но "Ялыке!" шуонтэм? Собере со либытак гинэ ӧтемез возьматэ - я, лыке, кылзэ милесьтым веранъёсмес... Озьы, 1992-тӥ арын, шуркынмонлэн 14-тӥ нуналаз, кӧснуналэ, эфире нырысьсэ потӥз крезьгуро улонлы сӥзем "Ялыке!" радиожурналмы. Трос-а, ӧжыт-а дыр ортчиз ини - Удмурт радиолэсь веранъёссэ али "Ялыке!"-тэк син азе пуктыны ик уг лу ни кадь. Кылзӥсьёс но дышизы ини. Жингырто: "Ялыке!" -ады вералэ ай со яке та сярысь, ӵекто кырӟанъёссэс. Зэм но, мар сярысь гинэ ӧз мадьы ни та радиожурналмы! Тужгес ӵем пумиськылӥсь рубрикаоссэ гинэ вералом: вордӥське кырӟан (сое уго котькуд крезьгурчи, кылбурчи, кырӟась ас сяменыз вала, возьматэ, "улӟытэ"); кин будэтэ, вордэ артистъёсты, крезьгурчиосты (соослэн анай-атайёссы сярысь); артистлэн улонысьтыз маскара яке вунонтэм учыръёс (ма гинэ уг луы концертъёс дыръя, тужгес но - гастрольёсын). Нош кӧня выль нимъёс нырысьсэ чузъяськизы радиожурналын... Соос пӧлын - Сава Сергей (Чирков), Любовь Быкова, Виктор Никифоров... "Кырӟасько ас поннам" - озьы нимаськиз одӥгез веранмы. Зэм но, озьы луэ: удмурт калык ӵем дыръя уг но малпаськы, со крезьгурез яратэ шуыса. Берга гурт котыраз, маке лэсьтэ, нош ас понназ ялан нёжъя... Озьы ик кыӵе ке гур кылдэ, кылъёс пӧрмо - кырӟан вордӥське... Кытӥ-отӥ паймымон учыръёсын но пумиськоно луэ - удмурт крезьгурчиос пӧлын трос вылӥллям Генаос (та ним сокем ик паськыт вӧлмемын ӧвӧл ке но): Геннадий Ганьков, Геннадий Матвеев, Геннадий Бекманов, Геннадий Павлов, Геннадий Корепанов-Камский... Нош кырӟасьёс пӧлын ӵем пумиськыло Валяос: Валентина Пудова, Валентина Шабалина, Валентина Ягодина, Валентина Серебренникова, Валентина Загуляева... Соосты огинэ люкаса, "Ялыке!" радиожурналъёсмы тунсыко пӧрмизы, калыклэн сюлэмаз пыӵазы. Тӥни озьы, олокыӵе но учыръёсын пумиськоно луэ. Шумпоттэ но паймытэ огез: кытысь асьмелэн сомында крезьгурасьёсмы, кырӟаны мыло-кыдоосмы! Кытысь сомында мылкыд кырӟаны-вераны, эктыны, дорысь ужъёстэ ӝыт ӝоггес быдэстыса, ансамбльысь эшъёсыд доры дыртыны... Вань удмурт калык кырӟа кадь потэ кытӥяз. Зэм ик со: удмурт калык - кырӟась калык. Нош солэсь та мылкыдзэ радиокылзисьёс доры пичи ке но вуттыса, мукетъёслэсь но мылкыдзэс ӝутыны быгатӥськом ке - озьыен, ужаммылэн пайдаез вань. Анастасия Гребина. Калык творчество Яг вадьсын крезьгур медам чалмы Егит, йыг-йыг удмурт дышетӥсь Юрий Фомин, Завьял районысь Ягул шор ёзо школае лыктыку, татысь удмурт пиналъёс ӟучомыны кутскемын вал ини, урамын но, школаын но ас кылзэс ӧз поттылэ. Со ӧз яра ас калыксэ яратӥсь адямилы. Нош кыӵе чебер, ужась калык татын, кыӵе шулдыресь гуртоослэн кырӟанъёссы, шаплыесь эктонъёссы! Ярам коть, соосты мӧйыос вунэтӥллямтэ на. Эктонъёсты-кырӟанъёсты Юрий Александрович адӟиз гуртын праздникъёс дыръя. Соослы синмаськыса фольклор ансамбль кылдытон мылкыдыз ӝутскиз. Нырысь мӧйыосын ужаса, чебер концертъёс пуктылӥз, бӧрысь дышетскись пиналъёсын но репетициос ортчытъяны кутскиз. Пиналъёс, удмурт кылын кырӟаны кутскыса, пумен асьме кылын но вераськыны ӧз керпотэ ни. Юрий Фоминлэн кузпалыз но туж мылысь-кыдысь тыршиз та удысын. Со угось быгатӥсь музыкант - шудэ арганэн но, баянэн но. Ягулысь удмурт кыллы дышетӥсь ас ансамбльёсыныз вуылӥз Завьял районысь унояз гуртъёсы, кӧня пол соос концерт возьматӥзы Ижын но. Бадӟым луонлык но визьмо дышетӥсез синйылтӥзы республикаысь Калыкез дышетонъя министерствоын. Озьы сое ӧтизы ужаны Ижевске, ас амалзэ быдэс шаерамы мед вӧлмытоз шуыса. Со кошкем бере, Ягулысь удмуртлыкез яратӥсьёс куинь-ньыль ар сирота кадь улӥзы, пиналъёсты но, мӧйыосты но нокин кырӟаны ӧз люкалля ни. "Инвожо" ансамблен ми одӥг пол гинэ ӧм вуылэ ни вал Ягул гуртэ. Соосын кемалась тодмо бере, отысь эшъёсы монэ ӧтизы ансамблез улӟытыны. Со дырысен вить ар ортчиз ни. Вис карем бераз "Ягдор" ансамбль та дыр ӵоже тодмо луиз. Нырысь интыос басьяз Завьяловоын. Ӵем пыриськылэ со Гербер но Гуждор праздникъёсы. "Ягдор" ансамбль сцена вылын возьматъя Араны потон, Гуждор, Корка пырон, Гурт ӝыт удмурт йылолъёсты. "Ягдор" сяна, ми татын кылдытӥм дышетскись пиналъёслэсь "Гуждор" ансамбльзэс. Али та коллективъёсын ужа Ягул клубын ужась баянист Вячеслав Галичанин. Кемалась ансамбле ветло ини Евгения но Маргарита Набокихъёс, Мария Егорова, Галина Константинова но мукетъёсыз. "Гуждорын" жингрес куараен кырӟало сузэръёс Марина но Лариса Корепановаос. Марина Дорофеева, Лена Касаткина, Аня Стародубцева, Аня Ившина, Лена Максимова. Тау соослы! Медам чалме вал, яг вадьсын удмурт крезьгуръёс. Н. Возисов. Мэриысь иворъёс Кылем пятницае мэриын ортчем пресс-конференциын трос юанъёс эскеремын. Нырысетӥез: нылпи пособиос тырон сярысь. Ижысь администрацилэн кивалтӥсезлэн воштӥсез В. Н. Кузьмин верамъя, берло толэзьёсы анай-атайёслы тыронъёслэн люкаськемзы кӧнялы ке кулэсмиз. Туэ 1 январьлы та лыдпус 14 миллиард 1,8 миллион манет борды могӟемын ке вал, али 11 миллиард 804 миллионозь кулэсмиз. Ар йылпумъяськытозь, эшшо 3,5 миллиард манетъёсты "кысыны" чакламын. Валамон, ваньмыз со тыриськоз магазинъёс пыр, вузъёсын басьтыса. Городысь администрациез сюлмаськытэ 1 январьысен коньдонэз воштон. Со секыт ортчоз, пӧртэм валантэмъёс кылдытоз. Вуоно арын уждун, нылпи пособиос, пенсия выль коньдон бумагаосын тыриськозы, но вужъёссэ соку ик быдтыны луонлыкъёс ӧвӧл. Соин валче 1 июлёзь коньдон кык пӧртэм чотъя лыдъяськоз. Сое лыдъянын нырысь ик сураськозы-пожаськозы вузаськон удысын, связьын, калыклы бытовой юрттэт сётон бордын ужась организациос. Таин валче вераськон могаз городын телефонэз, вераськон понна карточкаос тупатон борды. Связьын ужасьёслэн сотэк но али трос ыштонъёссы. Ярано, берло дыре телефонъёсты сӧрылон учыръёс ӧжытгес луизы. Но вуоно арын выльысь копейкаос доры берытскон карточкаосты уз быдты, дыр. Калыкез дышетонъя управленилэн кивалтӥсезлэн нырысетӥ воштӥсез Т. И. Андреева нылпи юртъёсты городлы выжтон ужрадэз сэрттӥз-пертчиз. Туннэ нуналлы 129 пӧлысь 50-эз "кузёоссэс" воштӥзы ни. Ужрад ӝега, нылпи юртъёсын лэсьтӥськон-тупатъян ужъёс йылпумъямтэен. Озьы ик вакчияк эскеремын город улэ музъемез люкон, автозаправкаослэн вужмемзы но кузёослэн квартираоссэс ас сяменызы тупатъямзы сярысь юанъёс. Туэ 1 январьлы городын улӥсьёс киын 113 сюрс пала автомашина лыдъяськиз. Та лыдпус ӝог йылэ. Соин валче гаражъёс улэ чаклам музъем уг тырмы. Нош кузёослэн квартираоссэс ас сяменызы тупатъямзы ӵемысь кышкыт учыръёсы вуттэ, борддоръёсты куяса, быдэс коркаез куашкатыны луоз. *** Кылем арын мартэ Ижысь администрация но Болгарилэн Москваын посольствоез куспын эшлыко кусыпъёс тупатэмын вал. Таин валче 25 ноябре дорамы Болгариысь делегация вуоз. Со предприятиосмылэн, валтӥсь фирмаослэн ужаменызы тодматскон. Берло дыре Болгариен вузаськон- басьтон кусыпъёсмы бездӥзы - сое выльысь улӟытон сярысь вераськон мыноз. Э. Кумачева. Егитъёс будэто радъёсты Сарапулысь драмая театр туэ 87-тӥ сэзонзэ усьтӥз. Калык шумпотыса лыктэ солэн дасям спектакльёсаз. Уго ужало татын устоесь артистъёс: Удмурт Республикаысь дано артистъёс М. Мартынова, И. Синькевич, Е. Потапов, И. Афремов, В. Мелоник но мукетъёсыз. Театрлэн кивалтӥсезлэн Т. Кулаковалэн верамезъя, выль лыктэм артистъёс но туж чупресэсь. Со - С. Шляпина, Л. Бурская, В. Ардашев, З. Ланина, С. Дубовиков. 3 артист туэ пыриз Екатеринбургысь театральной институтлэн актёрской факультетаз. В. ЛАГУНОВ. Удмурт Республикаын Егитъёсъя кун политика сярысь Удмурт Республикалэн Законэз Та Закон тупатэ Удмурт Республикаын егитъёслэсь улон-вылонзэс радъянъя кун политикаез быдэсъяны право, экономика но социальной удысъёсын инъетъёс, юнматэ 30 аресозь гржданъёслэсь, егит семьяослэсь, егитъёслэн но пиналъёслэн дэменлыкъёссылэсь правооссэс но эрикъёссэс, озьы ик луонлыкъёс кылдытэ егит гржданъёслы котыр ласянь ӝутскыны-азинскыны но калыклэн улоназ рос-прос пыриськыны, соослэсь выльзэ кылдытонын быгатонлыкъёссэс адями но общество понна уже пайдаё кутыны. И йырет. Огъя валэктонъёс 1-тӥ ёзэт. Радъяно удыс Та Закон радъя Удмурт Республикаын егитъёсъя кун политикаез быдэсъяку обществоын кылдылӥсь кусыпъёсты. 2-тӥ ёзэт. Инъето валэктонъёс Та Законэ пыртэм валатонъёс: егитъёсъя кун политика - егит гражданъёслы калыклэн улон-вылоназ рос-прос пыриськыны, будыны-азинскыны но асьсэлэсь быгатонлыкъёссэс обществолы пайдаё уже тырмытгес кутыны юрттон вылысь, экономика но социальной, политика но право удысъёсын, ужъёсты радъянын кун ласянь быдэсъяно ужрадъёс; егитъёс (егит гражданъёс) - 14-ысен 30 аресозь гражданъёс; быдэ вуымтэ мурт - 18 аресэз тырмымтэ гражданин, тупатэм радлыкъя со лыдъямын ӧвӧл ке вань правооссэ быдэсъяны но ачиз понна быдэсак кыл кутыны быгатӥсен; пиналъёс - 14 аресозь вуымтэ нылпиос; егитъёслэн дэменлыксы - 14-ысен 30 аресозь гражданъёслэн ас мылкыдзыя но кичӧлтэмзыя кылдытэм общественной огазеяськонзы. Со ужъёссэ ас кожаз радъя, табыш поттонэн уг выры. Огъя мылкыдъёсын но тыршонъёсын улӥсь егитъёс отчы огазеясько, валче ужан, асьсэлэсь лул-сюлэм но ваньбурен герӟаськымтэ мукет кулэяськонъёссэс быдэсъян, калыклэн улон-вылоназ рос-прос пыриськон но асьсэлэн будон-азинскон, озьы ик правооссэс но эрикъёссэс утён понна; пиналъёслэн дэменлыксы - 8-ысен 18 аресозь гражданъёслэн ас мылкыдзыя но кичӧлтэмзыя кылдытэм общественной огазеяськонзы. Со ужъёссэ ас кожаз радъя, табыш поттонэн уг выры. Пиналъёс отчы огазеясько, валче ужан, огъя кулэяськонъёссэс быдэсъян, визьнодзэс но быгатонлыкъёссэс азинтон, бадӟым улон вылэ султон, озьы ик асьсэлэсь правооссэс но эрикъёссэс утён понна; егит семья - кузпалъяськемез гожтэм бере нырысетӥ 3 ар ӵоже улӥсь семья (пинал вордскиз ке - со дырез лыдэ басьтытэк), кыкезлы ик кузпалъёслы 30 арес тырмымтэ на ке, озьы ик нылпиосын пал семья, анайлы яке атайлы 30 арес тырмымтэ на ке. 3-тӥ ёзэт. Егитъёсъя кун политикаез улонэ пыӵатон принципъёс Удмурт Республикаын егитъёсъя кун политика тазьы быдэсъяське: кун властья но интыын аскивалтонъя органъёслэн егитъёслы огъя улон-вылонэ пыриськыны, будыны-азинскыны но обществолэн улоназ асьсэлэсь быгатонлыкъёссэс уже кутыны юрттон ужазы адямилэсь правооссэ, со сярысь сюлмаськонэз но шаермес яратон мылкыд пыӵатонэз нырысь интые пуктыса; егитъёслэсь правооссэс законъёсын юнматыса но со правоосты юридической но социальной удысъёсын утёнэз лябомытыны лэзьытэк; егит гражданъёс, егитъёслэн но пиналъёслэн дэменлыкъёссы егитъёсъя кун политикаез кылдытонэ но быдэсъянэ меӵак пыриськыса; егитъёс общество азьын кыл кутыса, егитъёслэсь кулэяськонъёссэс государстволэн но обществолэн, калыкысь мукет социальной ёзъёслэн кулэяськонъёсынызы герӟаса; егитъёслы улыны но ужаны, быгатонлыкъёссэс усьтыны-ӧръяны нырысь-валысь огкадесь луонлыкъёс кылдытыса, егит гражданъёслэсь но соослэн огазеяськонъёссылэсь обществолы пайдаё кичӧлтонъёссэс улонэ пыӵатыны юрттыса; сыӵе предприятиос, учреждениос, организациос, гражданъёс понна умоесьгес луонлыкъёс кылдытыса, кудъёсыз юрттэт сёто егитъёслы но пиналъёслы, егитъёслэн но пиналъёслэн дэменлыкъёссылы, егитъёсын но пиналъёсын ужась учреждениослы; егитъёслэсь правоооссэс тӥям но соослэсь законъёсын утиськись кулэяськонъёссэс быдэсъямтэ понна кыл кутытыса. 4-тӥ ёзэт. Егитъёсъя кун политикаез быдэсъян амалъёс Удмурт Республикаын егитъёсъя кун политика быдэсъяське таӵе амалъёсын: егитъёсъя кун политика удысын Удмурт Республикалэсь законъёссэ но правоя норма луись музон актъёссэ кутон; Федерацилэсь, республикалэсь но интыослэсь егитъёсъя программаоссэс дасян но быдэсъян, озьы ик экономика но улон-вылон удысъёсъя Удмурт Республикаын быдэсъяськись программаосы егитъёсын герӟаськем ужпумъёсъя люкетъёсты пыртон; егит гражданъёслы, егит семьяослы, егитъёслэн но пиналъёслэн дэменлыкъёссылы асьсэлэсь правооссэс улонын кутыны, законъёсын чаклам гарантиос но льготаос басьтыны луонлыкъёс кылдытон. 5-тӥ ёзэт. Егитъёсъя кун политикаын быдэсъяно ужпумъёсты кун властья органъёс куспын люкылон радлык Егитъёсъя кун политикаын быдэсъяно ужпумъёс Россия Федерациысь кун властья органъёс но Удмурт Республикаысь кун властья органъёс куспын люкылӥсько Россия Федерацилэн Конститутцияз, Удмурт Республикалэн Конституцияз но Быдэсъяно удысъёсты но полномочиосты Россия Федерациысь кун властья органъёс но Удмурт Республикаысь кун властья органъёс куспын люкылон сярысь огкылын,озьы ик соосъя гожтэм кылтупанъёсын чакламъя. 6-тӥ ёзэт. Удмурт Республикалэн егитъёсъя кун политика сярысь закондательствоез 1. Удмурт Республикалэн егитъёсъя кун политика сярысь законодательствоез инъяське Россия Федерацилэн Конституциез, Удмурт Республикалэн Конституциез, Россия Федерацилэн но Удмурт Республикалэн законъёссы но правоя норма луись музон актъёссы вылэ. Отчы пыро та Закон но Удмурт Республикалэн правоя норма луись музон актъёсыз. 2. Егитъёсъя кун политика удысын Россия Федерациен но Удмурт Республикаен валче быдэсъяно ужпумъёсъя поттӥсько федеральной законъёс но соосъя кутӥсько Удмурт Республикалэн законъёсыз но правоя норма луись музон актъёсыз. Егитъёсъя политика удысын общественной кусыпъёсты радъясь федеральной закон потытозь, Удмурт Республика соосты право ласянь ас кожаз радъя, Россия Федерацилэсь законодательствозэ чакласа. 3. Удмурт Республикаысь кун властья органъёс егитъёсъя кун политика сярысь законодательствоез выльдо, Удмурт Республикаын экономика но улон-вылон удысъёслэсь азинскемзэс но Россия Федерацилэсь та удысъя кутэм выль законъёссэ лыдэ басьтыса, егитъёслэсь правооссэс паськытатон но соосты быдэсъяны луонлыкъёсты юнматон вылысь. 7-тӥ ёзэт. Удмурт Республикаын егитъёслэн улэм-вылэмзы сярысь кун доклад Удмурт Республикаысь Правительство арлы быдэ Удмурт Республикаысь Кун Кенешлы сётэ но Удмурт Республикаысь интыосын аскивалтонъя органъёслы ыстэ Удмурт Республикаын егитъёслэн улэм-вылэмзы сярысь кун доклад. Удмурт Республикаын егитъёслэн улэм-вылэмзы сярысь кун докладэз Удмурт Республикаысь Кун Кенеш эскере, со пумысен решениос кутон понна. ИИ йырет. Егитъёсъя кун политикалэн валтӥсь удысъёсыз 8-тӥ ёзэт. Егитъёсъя кун политикаез быдэсъянын валтӥсь удысъёс 1. Удмурт Республикаын егитъёсъя кун политика быдэсъяське таӵе удысъёсъя: егитъёслэсь правооссэс улонын быдэсъян; егитъёслэсь ужын но уже интыяськонын правооссэс но гарантиосты улонын быдэсъян; егитъёслэсь улон-вылонын юрттэт басьтон правооссэс быдэсъян но утён; егитъёслы экономика ласянь эрико луыны юрттон; егит семьялы юрттэт сётон; тужгес визьнодо но быгатонлыкъёсын егитъёслы юрттон; пиналъёслы но егитъёслы юн тазалыко, визьмо но ӟеч сямо будыны луонлыкъёс кылдытон; егитъёслэсь мукет кунъёсысь огъёзъёсынызы кусыпъёссэс азинтыны юрттон; улон коркаос лэсьтонын егитъёслы юрттэт сётон; егитъёсты граждан но патриот мылкыдын будэтон; быдэ вуымтэосты чаклась-утисьёстэк кылёнлэсь но йыртэмасьёслэсь алон ужрадъёс ортчытъяны юрттон; егитъёслэн но пиналъёслэн дэменлыкъёссылэн ужъёссылы юрттон. 2. Та ёзэтын верам котькуд удысэз быдэсъян понна дасяське правоя норма луись инъет, кутӥсько паськыт ужрадъёс но нимысьтыз программаос, кылдытӥсько ужъёсты радъянъя ёзъёс. 9-тӥ ёзэт. Егитъёслэсь правооссэс утёнэз радъян 1. Кун властья но интыын аскивалтонъя органъёс радъяло егит гражданъёслэсь социальной, экономика удысъёсын но асьсэ улоназы Россия Федерацилэн Конституциеныз, Удмурт Республикалэн Конституциеныз, Федерацилэн туала законодательствоеныз но Удмурт Республикалэн законодательствоеныз юнматэм правооссэс но эрикъёссэс улонэ кутонэз. 2. Егит гражданъёс право ласянь утисько Россия Федерацилэн, Удмурт Республикалэн туала законодательствооссыя, озьы ик егитъёслэсь правооссэс утёнъя дуннеын тупатэм правоя актъёсты чакласа. 10-тӥ ёзэт. Егитъёслэсь ужын но уже интыяськонын правооссэс но со пумысен гарантиоссэс быдэсъян 1. Кун властья но интыын аскивалтонъя органъёс, уже интыян политикаез быдэсъяса, уже интыянъя кун службаен, коммерцие выжымтэ но коммерцияя ужась организациосын ӵош кылдыто егит гражданъёслэсь правооссэс быдэсъян, выль ужан интыос усьтон, профессия бырйыны юрттон но профессиослы дышетон, квалификациез ӝутон но ужасьёслэсь тодон- валанъёсссэс будэтон, егит гражданъёс пӧлын ужтэк кылёнэз кулэстонъя мукет ужрадъёс ортчытъяны луонлыкъёс. 2. Кун властья но интыын аскивалтонъя органъёс, коммерцие выжымтэ но коммерцияя ужась организациос быгато егит гражданъёслы ужан интыосъя биржаос, профессия бырйыны юрттонъя, кадръёсты дасянъя но соослэсь тодон-валанъёссэс будэтонъя службаос кылдытъяны. 3. Кун властья но интыын аскивалтонъя органъёс уже интыяськымтэ егит гражданъёслы, озьы ик дышетскисьёслы но студентъёслы луонлыкъёс сёто дышетсконзылэсь ваньмон дыръязы огдыре ужаны (ульчаосты, азбаръёсты утялтон- умоятон, будосъёс мерттон, тыметъёсты, шуръёсты сузян но мукет со выллем ужъёсты быдэсъяны), со понна нимысьтыз висъям коньдон чотын уждун тырыса. 4. Котькыӵе амалэн асваньбур возись предприятиос, учреждениос но организациос луонлыкъёс кылдыто, егитъёслы вис карылытэк дышетскон, профессизыя тодон- валанъёссэс будэтон понна. Коллективъёсын гожтэм огкылъёслэн, предприятиосын, учреждениосын но организациосын быдэсъяно ёзъёслэн нимаз люкетъёсазы пусйыны кулэ егит гражданъёслэн ужазы кылдылӥсь шуг-секытъёсты палэнтонъя ужрадъёс. 11-тӥ ёзэт. Егитъёслэсь улон-вылонын юрттэт басьтон правооссэс быдэсъян но утён 1. Удмурт Республикаын кылдытӥсько егитъёслы улон-вылонын кулэяськонъёссэс быдэсъянъя службаос. Соос егитъёслы сёто социальной удысъёсын пӧртэм пумо юрттэт: нуналмысь улон-вылонын, тазалыкез утёнын, психология но педагогика, право ужпумъёсъя, секыт югдуре вуэм егитъёсты калык пӧлын умой улыны дышетонъя но выльысь шонер сюрес вылэ поттонъя. 2. Егитъёслы улон-вылонын юрттэт сётонъя службаос пӧлы пыро кун кивалтэм улсын ужась но сыӵе луисьтэм учреждениос, лул-сюлэмез юнматыны юрттэт сётон центръёс, усыкмытӥсь макеослэсь эмъян службаос, ас эрказы кельтэм нылпиосты утьыны басьтон интыос, шуге-леке вуэм пиналъёсты но егитъёсты выльысь шонер сюрес вылэ поттон службаос, юридической ужпумъёсъя юрттэт но валэктонъёс сётон центръёс, егит семьялы юрттон службаос, шутэтскон дырез ортчытъян центръёс, пытсэт сьӧрысь потэм егитъёсты калык пӧлын умой улонэ берыктон центръёс но улон-вылонын юрттэт сётонъя мукет службаос. Егитъёслы улон-вылонын юрттэт сётонъя учреждениосты кылдытон но соослы коньдон висъян радлык тупатӥське Россия Федерацилэн, Удмурт Республикалэн закондательствоенызы, озьы ик егитъёсъя кун политика удысын нимысьтыз но огъя программаосын. 3. Кун властья но интыын аскивалтонъя органъёс быгато асьсэ бюджетъёсысьтызы коньдон чотын егитъёслы улон-вылонын юрттэт басьтоназы умоесьгес луонлыкъёс туаптыны. 12-тӥ ёзэт. Егитъёслы экономика ласянь эрико луыны юрттон 1. Удмурт Республикаын чакламын, егит граданъёслы экономика удысын эрико луон понна, правоя, ужъёсты радъянъя, улон-вылон но экономика удысъёсын юрттэт сётонъя пӧртэм ужрадъёс, егитъёслы экономика удысын ас кожазы ужаны юрттонъя программаос пуктыса но соосты быдэсъяса. 2. Та ёзэтлэн 1-тӥ пунктаз чаклам юрттэт басьтыны правозы вань хозяйство нуонъя пичи ужбергатон эштосъёслэн но огазеяськонъёслэн, кытын вань ужасьёс пӧлысь ӧжытсэ 75 процентэз луо егит гражданъёс яке уставъя (дэмен люкам) коньдонлэн 50 процентлэсь ятырез луэ егит гражданъёслэн но (яке) егитъёслэн но пиналъёслэн дэменлыкъёссылэн аслюкетсы (тыремзы). 3. Нимазы ужбергатӥсь муртъёс со программаосын чаклам льготаослы но гарантиослы право басьто, соос егит гражданъёс луо ке. 4. Егитъёслы экономика ласянь эрико луыны юрттонъя программаын чакланы луэ таӵе ужрадъёс: регистрация дыръя коньдон тыронъя но пошлинаосъя льготаос; налогъёс тырон но кредитъёс сётъян пумысен льготаос; коммерцияя уже кутэм коньдонлы страхование пумысен льготаос; иворъёс но валэктонъёс сётъян; юридической но экспертной валэктонъёс сётъян; ужан инты, музъем, тӥрлыкъёс висъяса юрттон; профессиос бырйыны юрттон, кадръёсты дышетон но дасян. 13-тӥ ёзэт. Егит семьялы юрттон Удмурт Республикаын кун властья но интыын аскивалтонъя органъёс юрттэт сёто егит семьялы, нимысьтыз программаосты быдэсъяса. Со программаосын егит семьяос понна чакланы луэ: нимаз корка пуктон, крестьян (фермер) хозяйство возён, сад но бакча мерттон понна, музъем сярысь законодательствоын тупатэмъя, музъем висъяку но сое уже кутыку льготаоос; улон инты лэсьтон но басьтон, дор хозяйство кылдытон, корка пуш но котыр арбериос-тӥрлыкъёс басьтон, мукет ӝегатскытэк куляськонъёсты быдэстон понна, кема дырлы пунэмен коньдон бюджетысь сётон; пиналъёсты школалэсь азьло нылпи учреждениосын возем, нылпиосты школаосысь сиськонниосын сюдэм понна тыронъёсты быдэсак яке ог люкетсэ берыктон; егит семьялы валэктонъёс-дэмланъёс сётъянъя пунктъёс кылдытон; егитъёслэсь семьяосынызы ӵош шутэтсконзэс, нылпиослэсь гужем шутэтсконзэс радъяны юрттон. 14-тӥ ёзэт. Тужгес визьнодо но бадӟымесь быгатонлыкъёсын егитъёслы юрттэт сётон 1. Обществолэсь интеллектуальной но творческой кужымзэ утён но йылэтон вылысь, Удмурт Республикаын ортчытъясько тужгес визьнодо но бадӟымесь быгатонлыкъёсын егитъёслы юрттонъя, соослы выльзэ утчаса ужаны луонлыкъёс кылдытонъя пӧртэм ужрадъёс. 2. Тужгес визьнодо но бадӟымесь быгатонлыкъёсын егитъёслы юрттонъя ужрадъёс ортчытъясько, егитъёслэн но пиналъёслэн дэменлыкъёссы, творчествоя союзъёс, ӟеч мылкыдын юрттонъя но мукет фондъёс, дышетонъя но наукая, культурая но искусствоя учреждениос, мукетъёсыз мылкыд карись организациос пыриськыса. 15-тӥ ёзэт. Егитъёслы мугорез кыдатыны но визь-сюлэм узырлыксэс будэтыны луонлыкъёс кылдытон 1. Дышетон, тазалыкез утён, культура, экология, физической культура но спорт удысъёсъя, егитъёсъя политикая Удмурт Республикалэсь, районъёслэсь но городъёслэсь программаоссэс дасяку но кутыку пусйисько егитъёслэсь мугорзэс кыдатонъя но визь- сюлэм узырлыксэс будэтонъя ужрадъёс. Кун властья но интыын аскивалтонъя органъёс со ужрадъёсты быдэсъяло егитъёсын ужанъя органъёсын ӵош. 2. Дышетон, тазалыкез утён, экология, физической культура но спорт удысъёсъя, егитъёсъя политикая программаосын чакланы кулэ таӵе ужпумъёсты: егитъёсты граждан но патриот мылкыдын будэтон; егитъёслэсь наука но техника , чеберлык удысъёсын творчествозэс азинтон; пиналъёс но егитъёс пӧлын физической культураез но спортэз паськыт вӧлмытон; егитъёслэсь тазалыксэс утёнъя, соос пӧлын тазалыко улон сямез пыӵатонъя ужрадъёс; егитъёслы но семьяослы шутэтскон интыосты азинтон; быдэ вуымтэосты чаклась-утисьтэк кылёнлэсь но калгон калэ вуонлэсь, астэ быдтон учыръёслэсь алонъя ужрадъёс; котырысь инкуазез умоятон, егитъёслы экологияя тодон-валанъёс сётон но мылкыдъёс пыӵатон; пиналъёслэсь но егитъёслэсь ваньмон дырзэс шонер радъян, соослы шутэтскон интыосты умоятон-йылэтон; егитъёслэсь политика но право удысъёсын культуразэс ӝутон. 16-тӥ ёзэт. Егитъёслэсь мукет кунъёсысь огъёзоосынызы кусыпъёссэс азинтыны юрттон Кун властья но интыын аскивалтонъя органъёс юртто егитъёслэсь мукет кунъёсысь огъёзъёсынызы кусыпъёс возёнзэс азинтыны, соослэсь ваче пумиськылонъёссы сярысь кылтупанъёсты гожтыса но быдэсъяса, сьӧр кунъёсысь егитъёслэн но пиналъёслэн дэменлыкъёсынызы, организациосынызы ваче кусыпъёс тупатонын но соосты азинтонын, валче нимаз-нимаз проектъёсты быдэсъянын, пиналъёс понна туризмез но спортэз радъянын юрттэт сётыса. 17-тӥ ёзэт. Егитъёслэн улон коркаос лэсьтон ужзылы юрттон Кун властья но интыын аскивалтонъя органъёс егитъёслы юртто улон коркаос лэсьтонын, со понна экономика, но право ласянь умоесь луонлыкъёс кылдытыса радъяса ужъёсты. Республикалэн программаосыз пӧлы пыртыса, егитъёслы улон коркаос лэсьтонъя нимысьтыз программаез быдэсъян луэ кун ласянь юрттэт. Со программаын чакланы луэ таӵе ужрадъёсты: выль корка пуктон, дунэн басьтон, улон интыез тупатъян-выльдон понна, егит гражданъёслы но егит семьяослы берыктонтэм ссудаос но (яке) кредитъёс сётон; улон корка пуктон понна, егит гражданъёслы но егит семьяослы дун басьтытэк яке льготаосын музъем висъян; егит гражданъёслы, егит семьяослы Кун яке муниципальной асваньбуре пырись юртъёсын улон интыос льготаосъя висъян; егитъёслэсь улон коркаос лэсьтонъя комплексъёссэс, улон интылы кулэяськонъёссэс быдэсъян вылысь мукет пумо огазеяськонъёссэс кылдытъяны юрттон; кун но интыысь коньдон чотын улон коркаос лэсьтон, трос нылпиосын егит семьяослы, сӧсыр луэм егитъёслы, кун ласянь юрттэт басьтыны кулэяськись мукет егитъёслы улон инты висъян вылысь. ИИИ йырет. Егитъёслэн но пиналъёслэн дэменлыкъёссылы кун юрттэт сётон 18-тӥ ёзэт. Егитъёслэн но пиналъёслэн дэменлыкъёссылэн правоя статуссы 1. Егитъёслэн но пиналъёслэн дэменлыкъёссылэн правоя статуссы тупатӥське Россия Федерацилэн но Удмурт Республикалэн али уже кутӥськись законодательствоенызы. Пиналъёслэн но егитъёслэн вӧсьлыкъя огазеяськонъёссылэн, вӧсяськонъя группаослэн но вӧсьлыкъя организациослэн правоя статуссы радъяське Россия Федерацилэн Законодательствоеныз. 2. Удмурт Республикаын кун юрттэт басьтыны быгато: егитъёслэн но пианлъёслэн республикаысь огъя дэменлыкъёссы, дуннеысь, Россиысь но улосъёсысь егитъёслэн но пиналъёслэн дэменлыкъёссылэн республикаысь ёзъёссы, кудъёсыз тупатэм радлыкъя санэ басьтыса гожтэмын, озьы гожтэм бере, ичизэ ар ӵоже ужамын ни, кытчы огазеяськемын ӧжытсэ 1500 мурт яке кытысь ичизэ 1500 пиналъёслы но (яке) егит гражданъёслы улон- вылонын юрттэт сётыны чакламын. 3. Интыысь аскивалтонъя органъёслэн правозы вань егитъёслэн но пиналъёслэн со улосвылын ужась дэменлыкъёссылы асьсэ чакламзыя юрттэт сётыны. 19-тӥ ёзэт. Егитъёслэн но пиналъёслэн дэменлыкъёссылэн кун но общественной ужъёсын кивалтонэ пыриськонзы 1. Егитъёслэн но пиналъёслэн огазеяськонъёссы луо егит гражданъёслэн кун но общественной ужъёсын кивалтонэ пыриськон амалзы. Егитъёслэн но пиналъёслэн дэменлыкъёссы асьсэлэсь ужпумъёссэс чакласа пырисько Удмурт Республикаын улон- вылонысь но экономикаысь ужпумъёсты быдэсъянэ. 2. Кун властья но интыын аскивалтонъя органъёс, егитъёслэн но пиналъёслэн дэменлыкъёссылы юрттонъя ужрадъёс пусйыкузы лыдэ басьто соослэсь ӵектонъёссэс. 3. Кун властья но интыын аскивалтонъя органъёс кулэ дыръяз егитъёслэн но пиналъёслэн дэменлыкъёссылы ивортыло егитъёс пумысен кун политика удысын азьланезлы чаклам но али быдэсъяськись ужрадъёссы сярысь. 4. Егитъёслэн но пиналъёслэн дэменлыкъёсысьтызы адямиосты пыртыны луэ кун но интыын кивалтонъя дэмен ужась органъёсазы, соослэсь ужзэс егитъёслэн но пиналъёслэн огазеяськонъёсынызы юнгес герӟан понна. 20-тӥ ёзэт. Егитъёслэн но пиналъёслэн дэменлыкъёссылы тупатэм льготаос 1. Егитъёслэн но пиналъёслэн дэменлыкъёссы быгато дышетонъя но школалэн палэнысьтыз учреждениослэн юртъёсазы, клубъёсын, культурая дворецъёсын но юртъёсын, спортъя но Кулэ таза, визьмо пиос Та нуналъёсы шаерамы мынэ пиосты армие келян. Нырысьёсыз радын кошкизы кунгожъёсмес утисьёс, соос бере - морякъёс. Мылкыдзы умой. Тазалыксы сярысь ке верано, призывникъёс эскерись комиссилэн ужез тырме. Егитъёс пӧлын котькыӵеез вань: кудӥз, армилэсь палэнскон вылысь, олокыӵе но висёнъёс аслыз малпа. Вань пӧлазы (десантэ, морфлотэ куриськисьёс пӧлын уката ик) асьсэлэсь ляб интыоссэс ватыны вырисьёс. Врачъёс сак ужало. Соослэн янгышсы армия понна ыштонъёсын бертыскыны кулэ ӧвӧл. Л. Медведева. "Ижъёс" - Турцие Вуоно арын "Ижмаш-мото" ДОАО Турцие 8 сюрс мотоциклъёссэ келяны чакла. Берло дыре отысь фирма тужгес оскымонэз луэ. Вузлэсь дунзэ со ӝегатскытэк берыктэ. Йылэ келяно мотоциклъёслэн лыдзы но. 1996 арын 2,4 сюрс, 1997 - 5,5 сюрс мотоциклъёс Турцие кошкизы. С. МАЛЫШЕВ. Корка пырон Ёросъёсысь социальной юрттэт сётонъя центръёс (райсобесъёс) пыр котьку но трос адями ортче. Ижевскысь Устинов районын гинэ 28 сюрс пала пенсия басьтӥсьёс, табере та лыдпус йылоз на нылпи пособие басьтӥсьёс чотын. Барамзина ураме интыяськем вужаз юртын пырись-потӥсьёслы но, асьсэлы ужасьёслы но туж ӟоскыт вал. Социальной юрттэт сётонъя центре лыктэмъёс зор-кезьыт куазен урамын но сылоно луизы. Ёросысь администрацилэн сюлмаськеменыз, югдур трослы воштӥськиз. Центрлы инты шедьтӥзы Труд урамысь 90 номеро юртлэн одӥгетӥ но кыкетӥ этажъёсаз. Тупатъян-выльдон ужъёс пумаз- йылаз вуттымтэ на ке но, центрын ужасьёс корка пырем лэсьтӥзы ни. Буш киын ӧз пыре соос та юртэ. Таяз арын Устинов ёрослы вить ар тырмонэн валче, социальной юрттэт сётонъя центр узырмиз компьютеръёсын. Черодзэс возьмаса, пенсионеръёс табере часъёсын уз пуке ни ӧсъёс дорын. Алфавитэз чакласа, котькудӥзлэн нимыз компьютере пыртэмын луоз. Калыкен ужась инспекторъёс, валтӥсь специалистъёс али йырынызы выемын та уж пӧлы. Вакчи дыр куспын котькуд пенсионерлэн ужез (делоез) компьютерлэн визьмаз пыртэмын луыны кулэ. Дыртытэк нокызьы уг луы, пенсиосъя выль закон кутэмен валче, трос валамтэос, юан-веранъёс кылдозы. Озьы бере, калык нырысь ик вамыштоз социальной юрттэт сётонъя центре. Но кызьы оскытӥзы корка пыремлы сӥзем пумиськонын Устинов ёросысь администрацилэн кивалтӥсьёсыз но центрын ужасьёс, пенсионеръёсты но нылпи пособиосъя вазиськисьёсты пымитаны матысь нуналъёсы татын ваньмыз дась луоз. Удмуртъёслэн, ӟучъёслэн, озьы ик мукет калыкъёслэн ӟеч сямзы вань - корка пыреме буш киын уг лыкто. Эшъёссэс синпель кузьымъёсын ӟечкылазы Ижевскысь мукет ёросъёсысь социальной юрттэт сётонъя центръёсын ужасьёс. Выль интыын азинсконъёс но ӟеч мылкыд ужасьёслы сӥзизы Удмурт Республикаысь калыкез улон-вылонын утёнъя министр Н. М. Бессогонов но солэн воштӥсез Н. Ф. Кузнецова, Ижевск городлэн мэрез А. И. Салтыков, Устинов ёросысь администрацилэн кивалтӥсьёсыз. Ӟечкылан кылъёс вӧзы ватсаськиз на центрысь устооссэ ужасьёсты данъян. Устинов ёросысь калыкез улон- вылонын утёнъя отделлэн кивалтӥсезлы Р. Ф. Мансуровалы сётэмын Удмурт Республикаысь Калыкез улон-вылонын утён удысысь дано ужась ним. Данъян грамотаосын пусъемын Н. П. Овечкина. С. Б. Султанова, Т. М. Овсянникова но А. В. Лебедева. Малпаськом, ӟечкыланъёс вӧзы итӥськозы ёросысь пенсионеръёс но. Вань на сюлмаськонъёс соос сярысь но угось. Л. Малых. Р. Ф. Мансурова - Устинов ёросысь калыкез улон-вылонын утёнъя отделлэн кивалтӥсез. Кивалтӥсьёс тодматско центрлэн ужан интыосыныз. Калыкез улон-вылонын утёнъя отделысь валтӥсь специалист Г. С. Рябкова пенсионеръёслэсь ужъёссэс компьютерлэн визьмаз пыртэ. Туспуктэмъёсыз В. Камашевлэн. Кылбуро-крезьгуро ӝытэ Таяз учыре ас эшъёссэ люка Вениамин Ившин. Кылбурчилы уго алигес тырмиз 50 арес. Солэн кылъёсызъя крезьгурчиос гожтӥллям выль гуръёс, нырысьсэ чузъяськозы Геннадий Корепанов-Камскийлэн но Пантелей Кузнецовлэн кырӟанъёссы, соосты быдэстозы Ольга Зорина но Геннадий Бекманов. Озьы ик кырӟан-эктонэн шумпоттозы 77 номеро нылпи садысь школа-комплексысь удмурт нылпиос. Юбилярез ӟечкылалозы ас палъёсыз но, кезъёс. Ӝытэз нуоз Василий Ванюшев. Озьыен, лыктэлэ, эшъёс, Удмурт кун театре 28-тӥ ноябре 18 часлы. Кылбурчи ӧте вань мылкыд карисьёсты. Н. Николаева. Люкаськизы Глазове Туннэ Глазовын усьтӥське шаерысьтымы быръем органъёслэн но администрациослэн кивалтӥсьёссылэн кенешсы. Семинарын эскерыны чакламын кивалтӥсь ёзъёслэн но ваньбур поттӥсьёслэсь кусыпъёссэс юнматонъя ужпумъёс. Люкаськемъёсты та пумысен малпанъёсынызы тодматозы Кун Кенешысь ялан ужась комиссилэн тӧроез Олег Кузьменко, Правительстволэн кивалтӥсезлэн воштӥсез Александр Злобин, Правительстволэн Аппаратысьтыз экономикая но промышленностья отделлэн начальникез Сергей Писарев, мукет эшъёс. Ӵуказе ортчоз "котырес ӝӧк сьӧрын" вераськон. Куноос озьы ик тодматскозы Глазовысь предприятиосын но организациосын. И. Кричев. Мынам Карсашуре Кема аръёс талэсь азьло гуртмы интыын сылэ вылэм сьӧд-сьӧд нюлэс. Нош со нюлэс пыртӥ, музъемез гылтыса, жильыртыса ваське вылэм паськыт шур. Со шурлы бызьыны нокин но, номыр но уг люкеты, пе, вал. Нош тани одӥг пол шур дуре шӧдтэк шорысь вуиллям сьӧд куакаос но каръяськиллям татчы. Кема соос улӥллям татын, кесяськыса, лобаса паськыт шур вылтӥ. Татын ик пиоссэс вордӥллям, утялтӥллям. Нош сӥзьыл вуэмъя, оген-оген палэнско, шуныт палъёсы кошко вылэм. Дышиллям вылэм ини бызись шур но, нюлэс но ӵукна сьӧд куакаослэн кесяськемзыя сайканы. Выль нунал вуэмлы шумпотыны... Со нюлэс интые гурт кылдэм бере, сое нимазы Карсашур. Кар - куака кесяськем, яке куака кар. Шур - бызись шур. Нош са кыл люкет герӟетлы гинэ йылтэмын, лякыт вераны мед луоз шуыса. Тӥни озьы пӧрмем гуртэлэн нимыз. Куд-ог дыръя милесьтым гуртмес Сьӧд Карса но шуыло, малы ке шуоно, солэн нимыз герӟаськемын сьӧд куакаосын. Али но ми доры вуыло соос, но ичи. Сӥзьылозь уло ми палан, пи потто, нош кезьытъёс вуэмъя кошко. Мон туж яратӥсько асьлэсьтым гуртме. Шуныт но небыт кылъёсын верасько со сярысь. Чебер потэ мыным гуртэ, Кытын мон татчыозь будӥ. Дуно потэ мыным юртэ, Кытын мон татчыозь шунски. Паськыт пото мыным лудъёс, Кытысь мон трос сяська бичай. Шулдыр потэ мыным ошмес, Кытысь ческыт ву ӟузялляй. Юля Зиновьева. Шаркан ёросысь Карсашур школа. Тау каронэн Глазов ёросысь Понино школа-интернатысь пиналъёс но дышетӥсьёс тау карон гожтэт ыстӥзы акциосын "Удмуртнефть" огазеяськонысь ужась коллективлы. Со туэ Удмурт Республикаысь Правительстволэн премиеныз пусъемын. Басьтэм коньдонзэ быдэсак школа- интернатлы сётӥз. Пичиос туж шумпотӥзы со коньдонэн басьтэм пӧртэм шудонъёслы, шашки-шахматъёслы, магнитофонлы, палаткалы. Акциосын "Удмуртнефть" огазеяськонлэн таӵе вамышез адӟем карымон луэ мукет организациослы но. Н. Липина. Улон интымес талало Валлян, 25 ноябре, Кун Кенеш азе люкаськизы арлыдо адямиос. Соослэн одӥг мылкыдзы - жилищно-коммунальной хозяйствоосын реформа кулэ ӧвӧл. Одӥгаз плакатын тазьы гожтэмын: "Социализм милемлы квартира сётӥз, нош Ельцин но Чубайс сое талало". Нош мукетаз шуэмын: "Нылпиослы - пособиос", куинетӥяз - Улон интыя реформа - со секыт зӥбет. Адямиос тӥни озьы мылкыдзэс возьмато странаысь но республикаысь кивалтӥсьёслэн берло ужрадъёссы ласянь. Калыклы соос уг кельшо. Мугъёсыз тодмо: улонмы ялан уродме, куанер улӥсьёслэн лыдзы толэзьысь толэзе йылэ. Г. Романов. Шунды Алнаш палась иворъёс "Шунды-Мумылы" диплом Кемалась ик ӧвӧл Екатеринбурын ортчиз художественной промыселъёсъя но ремеслоосъя "Данилушка" ИИИ Всероссийской нылпи фестиваль. Та празднике пыриськизы Россилэн 18 регионъёсысьтыз пинал усточиос. Удмуртиысь но вить кузя ветлӥзы. Соос пӧлын вал Алнаш шор ёзо школа-колледжысь дасэтӥ классын дышетскись Руслан Исаков. Руслан мылысь-кыдысь ветлэ декоративно-прикладной искусствоя центрысь пуэз чеберманъя кружоке, кудӥныз быгатыса кивалтэ Юрий Конюхов. Шумпотымон, алнашысь усточилэн "Шунды-Мумы" мифической темая лэсьтэм ужез дипломен пусъемын вал. Дышетскыны- Москвае Ёрос администрациысь егитъёсын ужанъя отделлэн кивалтӥсез Владимир Соловьёв арня ӵоже тодон-валанъёссэ будэтӥз Москваысь Егитъёслэн институтазы. Вакчи дыр куспын трос тунсыкоезлы дышиз, тодмо адямиосын пумиськылӥз, нош ваньмон дыръяз театръёсын мынӥсь куд-ог спектакльёсын тодматскиз. Сӥзьыл призыв Егит пиосты армие келянъя сӥзьыл призыв азьланьтӥське. Таяз учыре алнашъёс военной службалы ярась 56 пиосты келяны кулэ. Искусствоосъя нылпи школалэн юртаз туэ но "Призывниклэсь нуналзэ" ортчытӥзы. Вуоно солдатъёсын пумиськизы районысь военной комиссар Г. Г. Краснов, призывной комиссилэн кивалтӥсез Н. А. Образцова, ожысь ветеран А. А. Печенкин. Люкаськемъёслэсь мылкыдзэс шулдыртӥзы культура юртын ужасьёс. В. КУТУЗОВА. Будэм уждун пайда ӧз вай Миым укмыс толэзен ӵошатыса, туэ уждун шорлыдын будэмын ке но, калыклэн улон-вылоназ со ӧз шӧдӥськы, малы ке шуоно, сиён-юонъёслэн но пӧртэм вузъёслэн озьы ик дунзы ӝутскиз. Вылаз ик, калыклэн одӥг кадь уждунэз ӧвӧл, одӥгез сю сюрс манет сяна уг басьты, нош мукетыз, дас миллионъёсын. Али ремпубликаямы адямилы быдэ, шорлыдын вераса, толэзяз 627 сюрс манет усе. Та дыре пӧртэм удысъёсын тыршисьёслы уждун 562,5 миллиард манет тырымтэ. Шаерысьтымы заводъёсын но фабрикаосын 573 сюрс адями тырше, кылем арынлэсь та лыдпус 10 сюрслы ичигес. Уже интыян центръёсы 63 сюрс адями вазиськиз, соос пӧлысь 45 сюрсэз ужало ни. Статистикая комитет ивортэмъя, шаерамы 42,7 сюрс адями ужтэк кылемын. Уноез предприятиос ужасьёссэс быдэс толэзьёсын административной отпуске келяло, со вакытэ туж ӧжыт уксё тыро. Куд-огез заводъёс ужаны кутскизы ке но, калыклэн улоназ со уг шӧдскы на. Н. Возисов. "Сӧсыр ке но, мон котькинлэсь кужмо" "Улӥсько, улӥсько, нош малы?" Ӵемысь гинэ сыӵе юан чилектэ мынам йырам. Ваньмыз шимес потэ сыӵе дыре. Нош куддыр малпасько: "Аслэсьтыд улондэ ачид ик лэсьтыны кулэ, дыр. Улоно быгатыса. Аслад мылкыдыдтэк яратоно дышетӥсед но, уж дорысьтыд кивалтӥсед но уз юртты". Нош али тросэз мон кадь пиналъёс улон радзэс уг шедьто. Тужгес ик гуртысь нылъёс но пиос. Анай бурд улын соос улонэз уг валало на, нош быдэ вуэмзы бере палэнэ кошко но, кудӥз кыӵе улон ӧре сюре. Кудӥз вина юыса, тамак кыскыса, шулдыръяськыса улоно кожа, кудӥз дышетске, улонын маке но ӟечсэ лэсьтыны тырше. Жаляса верано луэ, тросэз пиналъёс урод сюресэ ӝимо. Соин но, дыр, туала вакытэ куд-ог егитъёс туж вазь кошко улонысь. Соос уг вуо валаса улонэз. Нош сое, валам сяна, юн яратэм кулэ на. Огпол мон таӵе учыре сюри. Автобусэз возьмаса сылӥсько. Мылкыд кытӥ ке палэнэтӥ лоба. Озьы сылонъям, сюрес сопалась пияшез синйылтӥ. Тусызъя 14-15 ареслэсь трос уд сёты. Ӧлексы со, кыкез ик пыдъёсыз умой уг ужало. Кырыж-конгыль лёгаське, соин ик кияз бодыен. Машинаослэсь ортчемзэс возьмаса сылэ. Нош соос, ӧчкарыса кадь, пумтэм-йылтэм, весь кытчы ке но дырто. Шӧдӥсько, пияш уг чида ни, интыяз тэтча, берга, машинаослы вожез потэ, лэся. Тани вис сюриз ик. Соку со вань кужыменыз дӧлатӥськиз но, сюрес вамен шонтӥз. Сюлмыз нёркак луэ кадь, тани- тани машина вуоз. Соин ик кузь тэтчыны тырше. Но ӧлексы пыдъёсыз уг кылзӥсько. Кузь бодыез омырын сэзъяське. Синъёсаз кышкан но, кайгырон но пыӵамын. Тани сюрес дурозь вуиз но - оло шумпотэменыз, оло пыдъёсыз ӧз нуэлэ ни - лаӵак кӧт вылаз усиз. Вӧсь луэмзэ но ӧз шӧды кадь. Лушкем котыр учкиз. Милям синъёсмы пумиськизы. Мусо ымныраз пальпотон пиштэ, нош ненег синъёсыз синвуэн пачылмемын. Огшап кыллемез бере, пияш султӥз но шиньыль-шаньыль тэтчаса кошкиз. Нош ас понназ бӧтьыртэ: "Сӧсыр ке но, мон котькинлэсь кужмо". Тӥни кызьы пинал сюлэм ассэ буйгатэ вылэм. "Улод, пияш, тон кема но шудо улод. Котькинлэсь кужмо, чебер луод. Мылкыдыд гинэ осконэн мед пӧзёз",- вазьытэк ӧй чида мон солэн мышказ. Нош со монэ ӧз кылы ни. Асьмеос кадь ик пинал мурт со. Но улонын солы трос шуг-секытъёсын пумиськылоно луэ, дыр. Озьы ке но, кыӵе та пинал сюлэмлэн улэмез потэ, со яратэ улонэз. Пияшлэн потэ таза пиналъёс кадь ик капчи бызьылэмез, ашкынэм чуньы кадь тэтчамез, нош инмар солы сыӵе шуд сётымтэ. Озьы но со шудо: яратэ улонэз, оске азьланезлы. Таза адями таӵе чиданэз адӟемын ӧвӧл. Соин ик солы туала улон секытэн сётске. Бен, улонмы капчи ӧвӧл, но киыд-пыдыд вань дыръя ӝожтӥськыны сьӧлык. Чидано, осконо, умоез понна нюръяськоно. Соку капчигес луоз аслыд но, анай-атаедлы но, котыр калыкедлы но. Ирина КОНЬКИНА, Удмурт университетын дышетскись. Шунды Тодматске Кызьы ивортылӥмы вал ини, ёросъёсысь егитъёсын ужанъя отделъёслэн гурт администрациосысь юрттӥсьёссы, ӟырдыт сямо нылъёс но пиос берло дыре тодматско Удмурт Республикаысь Егитъёсын ужанъя кун комитетлэн ужъёсыныз, пӧртэм огазеяськонъёсын. Одӥгаз сыӵе пумиськонын гуртысь лыктэмъёс мылкыд каронзэс веразы, городлэн палэназ улыса, ми, пе, ум тодӥське егитъёслэн ужпумъёсынызы вырись муртъёсты, матэгес тодматскеммы потэ соосын. Таӵе ӵектонэз лыдэ басьтыса, ми но газет бамын "Тодматске" сэрег усьтоно кариським. Туннэ тодматӥськом Егитъёсын ужанъя кун комитетысь одӥгеныз валтӥсь специалистэн. Пиналъёс пиналмыто Владимир Ашихмин йылпумъяз Удмурт кун университетысь филология факультетэз, вить ар ужаз школаын. Студент дыръяз ик пӧртэм ужрадъёсы, фестивальёсы мыло-кыдо пыриськылэмез дышетӥсьын ужакуз но тэк пукыны маза ӧз сёты. Нылпиослэн, егитъёслэн ужпумъёссы борды кыстӥськемез сое вуттӥз Егитъёсын ужанъя кун комитетэ. Владимир Ашихминэз али сюлмаськыто быдэ вуымтэослэн но егитъёслэн ваньмон дырзэс пайдаё ортчытэмзы, улон интыосъя нылпи клубъёслэн ужамзы, быдэ вуымтэосты йыружъёслэсь алон ужпумъёс. Иворъёс вӧлмытӥсь удысъёсын кусып тупатон но калыкен герӟаськон озьы ик со пыр лэсьтӥське. Озьыен, та вылӥ верам ужпумъёсъя ӵектонъёсты, дэмланъёсты кылдӥзы ке, кинэн кенешоно вылэм шуыса тунаса эн улэ. Володялэн верамезъя, быдэ вуымтэос пӧлын бергаса, ачид но пиналмиськод кадь. Выльзэ утчан мылкыдыз ик сое парашютэн тэтчан спортэ но кыскиз. Республикаысьтымы секыт сямо быдэ вуымтэ пиос ньылетӥ арзэ ини гужем каникулъёсы Ижевск котырысь Пирог гуртысь аэроклубын радъям лагерьын шутэтскизы, кужымзэс кыдатӥзы, парашютэн тэтчазы. Соослэсь бере кылёд шат? Владимир Ашихмин ачиз но 69 пол тэтчиз ни парашютэн. Адӟем карымон вамыш ӧвӧл шат? Собере, йыртэман сюрес вылэ шӧтам пиосын огъя кыл но шедьтыны озьы капчигес. Нош туала пиналъёс сярысь ке верано, Ашихмин соослы оске. - Котькыӵе вакытъёсы егитъёс азьлане оскыса учкылӥзы, сыӵеесь ик соос кылёзы. Л. МАЛЫХ. Гуртысь егитъёсын пумиськон дыръя. Туспуктэмез В. КАМАШЕВЛЭН. Адӟиське-а серекъянлэн кужымез? Лыдӟись кие нош ик вуиз Ульфат Бадретдиновлэн выль книгаез - "Серекъян - адскисьтэм кужым". Талэсь азьвыл авторез тодӥськомы вал покчиослы, быдэ вуымтэослы но егитъёслы гожъям ужъёсызъя, нош таяз учыре со выжем бадӟымъёслэсь улон-вылон югдуръёссэс серекъянэ. Нырысетӥез, 1988-тӥ арын потэм книгаез, нимаськиз "Сяська сюлэмын но ӝужа". Отысь веросъёс но новеллаос быдэсак сӥземын егитъёслы. Нош "Мар луоз ӵуказе?" книгаез гожтэмын пиналъёслы, отысь "Мар со Кадик?" веросэз воксё покчиослы. Ульфат Бадретдинов быгатыса возьматэ пичиослэсь улэм- вылэмзэс. Со ачиз но уго школаын дышетскон аръёсаз инкуазез утисьёслэн "Нимысьтыз патруль" бордгазетсылэн редакторез вал, отчы трос гожъялляз. Со ужъёсыз ик кужым но сётӥзы, дыр, гожъяськон ӧре пырыны, покчиосты ӟечгес валаны. Берло потэм книгаезъя учконо ке, шӧдӥське авторлэн адямилэсь ӟеч мылкыдзэ шӧдэмез. Ваньмыз учыръёс улонысь басьтэмын. Со учыръёсысь серекъян адямиез вӧсь уг кары, небыт но мылкыдэз ӝутӥсь гинэ луэ. Озьы ик пӧртэм ласянь возьматыны турттэ серекъянлэсь адскисьтэм кужымзэ. Егитъёслы потӥсь "Инвожо" журналын ужакуз, Ульфат ачиз ик малпаз вал "САК" (серекъян - адскисьтэм кужым) рубрикаез. Озьыен, малпам ужезлэсь со ӧз куштӥськы. Серекъян котыртӥ ик со лыдӟисьсэ паймымон дуннее вуттыны тырше, мӧйыослы пичи дырзэс тодазы вайытэ, пиналъёслэсь соосын кусыпсэс возьматэ. Озьы ик нылэн, пиен куспын синмаськон но ог-огдэ валан, гажан мылкыд пыӵатыны тырше. Серекъян пушкы выем сяна, лыдӟемъя авторлэсь шӧдоно пӧртэм ужпумъёсты ӝутэмзэ, политикалэсь но палэнэтӥ уг кошкы, шарае поттэ кескич адямиосты. Книгае, веросъёс сяна, пыртэмын юморескаос но пичиесь сценкаос, соос но пальпотон кузьмало. Куд-ог серем пыр веранъёсты вакчиесь анекдотъёсын ӵошатыны луоно. У. Бадретдинов умой возьматыны быгатэ адямилэсь сямзэ. Тани "Вай" нимо веросаз автор юнме уг гожты: "Котькытын аслыд сяськаян-пушъён вай шедьтыны луэ", - улонын угось уд но шӧдӥськы, со ваез ӵемысь чигто, пукон сяменыд ик ӵогыса кушто. Озьы ик тросаз веросъёсаз пӧйшуръёс но бурдоос пыр автор возьматыны турттэ адями сямъёсты, серем пыр но сюлэмыз вӧсь луыса син азе пуктэ юисьёсты, ас сямэныз суреда огыр-бугыр, валантэм пуртыын пӧзись улонмес. "Шукыяськись... малпан" веросаз со гожтэ: горисполкомлэн решениезъя, пе, 8 часын пӧсь ву виян кранэтӥ вить минут ӵоже шампанской лэзёзы..." Огъя вераса, котькудаз веросын шӧдӥське серекъянлэн адскисьтэм кужымез. Л. Тихонова. Шунды Ӧтчамлэн пинал делегатъёсыз Верано ваньмызлы кылымон Пинал арлыдыз шоры учкытэк, Дима Поздеев пыриськиз удмуртъёслэн ВИ Ӧтчамазы. Со Яр педучилищеысь ужлы дышетонъя люкетысьтыз кыкетӥ курсысь студент. Ӧтчаме ёросысьтызы делегатъёсты быръён конференциын егитъёс ӵектонэн потӥзы, та бадӟым ужрадлэсь соосты но палэнэ медам кельтэ шуыса. Димаез бырйизы делегатэ. Ӧтчаме люкаськемъёсты сямен ик, Яр ёросысь Тум гуртын вордӥськем пияшез сюлэмшугъяськытэ егитъёслэн, озьы ик мӧйыослэн но удмуртлыксэс ыштэмзы: - Ярын удмуртъёс трос ке но, асьсэды городынгес кадь возё, ӟуч кылын верасько. Нош гуртысь лыктэмъёс уг возьдасько ас кылынызы вераськыны. Мукетыз ужпум, кудӥз Димаез малпаськытэ, дышетскисьёслэн, егитъёслэн улон- вылонзы: - Студентъёс дышетско шоро-куспо, вань ик бен пӧлазы зэмос тодон-валанъёс басьтыны турттӥсьёс. Егитъёс пӧлын вӧлме юон, наркотикъёслэсь но уг палэнско. Пиослэсь бере кылемзы уг поты нылъёслэн. Кызьы бен юрттоно егитъёслы - шонер сюрес вылтӥ вамышъяны? Та юанлы Дима тазьы валэктӥз: - Егитъёс пӧлын, егитъёс понна тросгес ужрадъёс ортчытъяно. Али соос асьсэ понна кельтэмын, нимаз группировкаослы люкиськылэмын. Егитъёслы дискотекаос ортчытыло ке но, отын юо. Нылъёсты но пиосты люкано огазе, мед соослэн асьсэлэн отчы лыктэмзы потоз. Со огшоры огазеяськон гинэ медаз луы, зэмос ужъёс вылын возьматоно сюлмаськемез. Егитъёс но мед быгатозы асьсэды возьматыны. Дасьсэ гинэ возьмаса, чалмыт ӧвӧл улоно, дэмланъёс, ӵектонъёс сётоно. Егитъёс куаразэс мед поттозы. Озьы ик, ӧвӧл возьдаськоно удмурт луэмысь. Кутсконо удмуртлыкмес ӝутон борды. Куронъёсыз, ӵектонъёсыз но малпанъёсыз Дима Поздеевлэн быдэстонтэмесь ӧвӧл. Но соиз пумысен асьсэлэсь кылзэс вераны кулэ асьсэос егитъёс. Л. Кимова. Шунды Вакчи быж Выжыкыл Вашкала дыръёсы, куке куакаос тӧдьы вылӥллям ай, улӥллям луд кеч но кион. Луд кечлэн быжыз кионлэн кузьда ик, пе, вылэм. Туж тупаса улӥллям. Мар шедьто, ваньзэ ог-огзылы люко. Одӥг пол ӟичы соосты куное ӧтем. Сиён-юонэз ӝӧк выл тросаз, пе, нош пыжем курегез одӥг гинэ. Кионэн луд кеч вожмаськыны кутскиллям. Луд кеч шуэм: "Мон сое нырысь адӟи!" Кион пумит вазе: "Ӧд, тон курег сӥль уд сииськы!" Луд кечлэн вожез потэм но курег сӥлез киултыса пегӟем. Нош кион - со сьӧры. Озьы бызёнъязы луд кечлэн быжыз улвайёс вискы дэмӟем, сӥльзэ но уськытэм. Тӥни со дырысен луд кечлэн быжыз но, пе, вакчи, сӥль но, пе, уг сиы. Кион нош ялан со сьӧры бызьылэ на. Таня Калаева. Алнаш ёрос, Туймыйыл гурт. *** Юсь нылаш Выжыкыл Вашкала удмурт Шунды гуртын улӥзы кык пересьёс. Соослэн нылзы но, пизы но ӧй вал. Соин ик пересь Дыдык куректыны, кайгырыны кутскиз: "Эк-эк-эк, кин ке ву пыртыны, выж миськыны ке но юрттӥсе мед луоз вал. Кыӵе мон сое яратысал, нуныясал". Педорез, сӥзьыл пал чорыганы ветлыкуз, пинал юсез шедьтӥз. Со туж чебер, али усем мамык лымы выллем, юг-юг тӧдьы вал. Ӝоген юсь будӥз, ураме но потаны дышиз. Песянай сьӧрысь одӥг вамышлы но уг кыльылы. Бурдыныз выж но азбар ӵуже, бакчаязы уриськыны но быгатэ. Дыдыклэн шумпотэмезлы пумыз ӧвӧл, юсеныз адямиен сямен вераське, нош Педорлэн вожез потыны кутскиз, кышноез шораз ик уг учкы ни кадь. Собере ӝож но потӥз, мон ке, пе, воргорон ужез огнам быдэсъясько: "Вузано ке шат та тылобурдоез?" Одӥг пол Педор вазь ӵукна ик султӥз, кутсэ кутчаз, гын шляпазэ йыраз понӥз но, юсез мешокез донгыса, базаре кошкиз. Адӟиз тае инмысь Шунды. Жаль потӥз Юсь, юсь, юрттоно кариськиз. Педор базаре вуэм бере, пӧртмочи кариськыса, дораз васькиз. Базарын калык ӟабыль поттэ. Олокинъёсыз но вань: кырӟасьёсыз, маскарчиосыз... Пӧртмочи Педор доры лыктӥз но шуэ: "Юсьтэ ныллы пӧрмытом-а?" Пересь оскытэк серектӥз гинэ: "Пӧрмыты...". Нош мар та? Ас синъёсызлы уг оскы воргорон. Юсез зэмзэ но ныллы пӧрмиз. Педор паймиз. Нырысь-валысь кышказ ик таӵе пӧртмаськонлэсь, собере шумпотӥз. "Табере. - малпаз со, - Юсь нылмы бызёз но, мынам эмеспие луоз. Нылмы - Дыдыклы, эмеспие мыным юрттозы, пиналъёссы эшшо вордскозы на..." Капчи луиз Педорлэн сюлэмез. Кузпалзэ шумпоттыны шуыса, - нылашез дораз ӝогак валтӥз. Дыдык, Педорзэ тышкаськыса, юсез утча вылэм ни. Куараез кылыса берытскиз но - азяз туж чебер, чагыр инбам кадь синмо, веськрес мугоро ныл сылэ. Песятай кузпалызлы ваньзэ валэктӥз, аслэсьтыз янгышсэ но валаз: "Юнме йыркуръяськиськем сыӵе тупаса ужамдылы. Кыӵе шудтэмесь луысалмы асьмеос, та Юсьмес вузасалмы ке". Ӝоген Юсь ныл бызиз. Ваньмыз Педорлэн малпамезъя ик луиз. Соос дэмен, шулдыр улыны кутскизы. Эльвира Овчинникова. Пичи Пурга ёрос, Вуж Монья гурт. Усьтӥськиз Кун Кенешлэн сессиез Вамыш бӧрсьы вамыш лэсьтоно, шуо депутатъёс Нокин ӧз малпа вал, та ужпумъя таӵе ӟырдыт вераськон ӝутскоз шуыса. Нош со герӟаськемын Удмурт Республикалэн Конституцияз воштонъёс но ватсанъёс пыртонэн. Та ужез дасяны азьвылаз, дас куинетӥ сессиын нимысьтыз комиссия кылдытэмын вал. Солэн мар лэсьтэмез сярысь ивортонэз кылзэмзы бере, трибуна сьӧры потӥз огез бӧрсьы мукетыз депутат. Тая котькудӥзлэн аслаз малпанэз. Трос-а, ӧжыт-а шуод, но 16 мурт мылкыдзэ шара вератэк ӧз чида. Мар сярысь бен, Конституцилэсь кыӵе ёзэтъёссэ (статьяоссэ) выльдон пумысен кенешон мынӥз? Депутатъёс ас малпанъёссыя шори люкиськизы. Одӥгъёсыз дурбасьтӥзы, умоен лыдъязы Кун Кенешлэн комиссиезлэсь постановленизэ, нош мукетъёсыз чылкак выль постановление дасяллям. Музон ӵектонъёс но вал. Депутат Алла Чишковская дэмлаз, та ужпумез, пе, кабзэ учконо ӧвӧл. Но со пала 21 депутат гинэ кариськиз. Тужгес но пӧртэмесь мылкыдъёс вал Конституцилэн 116-тӥ ёзэтэз пумысен. Нош отын вераськон мынэ республикалы йыр яке президент быръён сярысь. Ӵапак та ужпумъя но депутатъёс кыклы люкисько: одӥгъёсызлы президент (самой вылӥ кивалтӥсь) но сыӵе ёз кулэ, нош мукетъёсыз шуо, та ужен, пе, дыртоно ӧвӧл, азьло калыкен юалляськон (референдум) ортчытоно но возьмано Россилэсь огъя кивалтон ёзъёс кылдытон сярысь законэз кутэмзэ. Соосыз но, таосыз но шонер верало кадь. Малы, пе, дыртыны кулэ, асьмеос соин сэрен кӧня янгышъёс лэсьтӥм ни. Куд-огез депутатъёс ялан поттыло кун властьлэн радлыкез сярысь законэз кутэмзэс, Россиысь Конституция судын эскеремез но прокурорлэсь протестъёссэ. Мукетъёсызлэн шуэмзы потэ: одӥг Удмурт Элькун гинэ, пе, (Дагестанэз вератэк) парламент амалэн кивалтӥсь республика кыле на. Нош азьпала учкись, мур малпаськись депутатъёс шуо, лэсьтоно вамыш бӧрсьы вамыш, дыртэмлэсь кылдэм, пе, ортче. Поттылӥ вал кык постановление сярысь. Маин соос висъясько: маиз уг кельшы яке маиз яра? Нырысяз, Кун Кенешлэн Законностья, обществоез кышкытлыклэсь утёнъя но адямиослэн правооссыя комиссиезлэн решенияз шуэмын, комиссилэн ужамез сярысь ивортонэз лыдэ басьтоно, комиссия ужзэ мед азинтоз но вуоно сессиын эскероно Конституция кыӵе воштонъёс но ватсанъёс пыртонэз. Нош кӧня ке депутатъёслэн постановленизылы инъетын чылкак мукет куронъёс пуктэмын. Отын верамын: огдырлы кылдытэм комиссилы "Удмурт Республикалэн Конституцияз воштонъёс но ватсанъёс пыртон сярысь" Удмурт Республикалэн законэзлы инъет дасяно. Кыкетӥез, "Удмурт Республикалэн вылӥ кивалтӥсез сярысь" Удмурт Элькунлэсь Законзэ дасяно "Россия Федерациысь субъектъёсын кун властьлэсь законодательной (калыкен быръем) но быдэсъясь органъёссэ радъянъя огъя амалъёсыз сярысь" Федеральной Законэз кутэм но кужыме пыремез бере гинэ. Куинетӥез, Удмурт Республикаямы президент сярысь ужпумез быдэс шаерамы калыклэсь юалляськон (референдум) ортчытоно. Тӥни сыӵе решениос. Но туннэ жаляса оло жалятэк верано луэ, инъетлы но быдэсак кутэмын, кӧня ке выльдонъёс пыртыса, нырысетӥез, Законнностья, обществоез кышкытлыклэсь утёнъя но адямиослэн правооссыя комиссилэн постановлениез. Кызьы бен та ужпумез учкон мынӥз? Ваньмызлэсь депутатъёслэсь мар верамзэс уд гожты. Но куд- огезлэсь возьматэм потэ. Тани Сарапулысь депутат Людмила Верховцева шуиз: "Конституцилэсь 2-тӥ главазэ воштыны уг яра, нош 37-тӥ ёзэтэз уг ужа. Соин ӵош ик выльдоно 1-тӥ главаез но 116-тӥ ёзэтэз. Асьмеос ваньмы пӧртэмесь, котькуд сессие 20-30 мурт уг ветлы. Нош ӟечезлы пумит луисьёс котьку шедё". Ватонэз ӧвӧл, сессиын нош ик вераськон ӝутскиз кун властьлэн но интыосысь ас коже кивалтон ёзъёс куспын полномочиосты люкылон, быръем но быдэсъясь органъёсты юнматон, законопроектъёсты ӟечгес эскерон-дасян но мукетыз сярысь. Ведь нокинлэн но куспаз керетыса, огкыл шедьтытэк улэмез уг поты. Со юн люкетэ азинлыко, пайдаё ужаны. Нош "Трудовая Удмуртия" фракцилэн кивалтӥсез депутат Александр Горошников меӵак ватсаз: - Ми пумит луом республикаямы президент ёз кылдытонлы. Со понна куарамес ум сётэ. - Асьмеос уно янгышъёс лэсьтӥм ни, - пусйиз Валентин Тубылов. - Та комиссиын одӥг удмурт депутат но ӧвӧл. Ми пумит луим, 116-тӥ ёзэтэз лыдэ басьтымтэзы понна. Табере кин оскоз, Конституциысь 9-тӥ ёзэтэз но уз выльдэ, удмурт кылэз кун кыл уз каре шуыса. Тӥни сыӵе югдур. Соин ик Валтӥсь Законэ воштонъёс пыртонэн дыртыны уг яра. Собере трибуна сьӧры потӥз Александр Волков. Со шуиз: - Таӵе учкон луоз шуыса малпанэ ӧй вал. Законодательствоез выльдонъя асьмеос трос лэсьтӥм ни. Куддыръя Россиез но азьпалтӥськом, Москва Удмуртилэсь адӟем каре. Но Удмурт Республикалэсь Конституцизэ кутэм бере 3 ар ортчиз ни. Со дыре бадӟымесь воштӥськонъёс луизы. Россиысь улосвылъёсын быръё губернатонъёс, мэръёс. Асьмелы но вылӥ кивалтон ёзъёсты выльдоно. Вуоно арын интыысь органъёсы быръёнъёс нуналэ президент яке вылӥ тӧро кылдытон сярысь калыклэсь юалляськон ортчытоно. Дас ньылетӥ сессия 17 ужпумез сэрттоз-пертчоз. Нырысь чакламын вал 15. Пыртӥзы на кык выльзэ. Одӥгез герӟаськемын республикалы газ сётонэн, мукетыз - правительстволэн составаз выльдон пыртонэн (инвестициосъя министр кыдытонэн). Парламент нырысь ик юнматӥз Вылӥ судэ, районъёсысь но городъёсысь судъёсы судьяос. Пусъем потэ, интыысь 6 судья пӧлысь одӥг удмурт но ӧй вал. Юстицияя министерстволы сое лыдэ басьтоно, ведь судьяос удмурт кылэз тодыны кулэ. Собере сессия кутӥз воштонъёс пыртэм бере "Удмурт Элькунын инвестициосъя ужез умоятон сярысь" Удмурт Республикалэсь Законзэ. Депутатъёс озьы ик инъетлы юнматӥзы кун бюджетысь коньдон висъян порядок, республикалэн кун тыронэз, бюджетэ пырисьтэм фондъёс но налог тырисьёсты лыдъянэз умоятон ужрадъёс но 1998 арлы бюджетлэн положенияз кызьы воштонъёс но ватсанъёс пыртон сярысь законъёсты. Толон Кун Кенешлэн сессиез ужаз на. ГЕННАДИЙ РОМАНОВ. "Шунды" "Удмурт дунне" но егит дунне" конкурсэ Кизилиос доры сюрес Шаерамы уно гинэ сӥё-дано кырӟасьёс. Соослэсь адӟем каро егитъёс но. Одӥгез усточимы улэ но ужа Пичи Пурга районысь Иваново-Самарское гуртын. Со - Люба Григорьева. Аслаз быгатонлыкъёсыныз троссэ паймытъяз ни, нош кыӵе малпанъёсын, мылкыдъёсын улэ будӥсь кырӟасьмы. Любовь Григорьеваен тодматэ Гожня школаын дышетскись Алена Ионина. - Люба, ку калык азьын нырысьсэ кырӟад-верад? - Школаын дышетскыкум, гуртысьтымы клубамы пӧртэм конкурсъёс ортчытъязы. Туннэ кадь ик тодам возисько на со нуналэз. "Соловушек" кырӟанэз соку кырӟай. Отӥяз агитбригадаен фермаосы, нылпи садъёсы ветлылӥм, сьӧр гуртъёсы но поталлям. Клубын ужась нылпи коллективын но кырӟаны-эктыны яратылӥ. Зина эшеным котькуд концертын ваньмызлэсь трос номеръёс пуктылӥськом вал. Хорысен ик удмурт кырӟанъёсын эшъяськи. Со аръёсы ялан сюлэмам уло. - Крезьгурлы кытын ке дышетскид-а? - Ноку но ӧй малпалля, кырӟась луо шуыса. Потэ вал вуриськисе дышетскеме. Но... Нылпи коллективмылэн кивалтӥсез асме но, анай-атайме но ӝутказ, культурая училищее мед мыно шуыса. Мылкыды лӧптӥз. Вань экзаменъёсме витьёслы сётӥ. Ваньмыз радъяськиз ни вал кадь. Жаляса верано, ялан висьылэменым училищеез йылпумъяны ӧз кылды. Со кабен ас поннам трос гинэ дышетсконо луисько. - Кинлэсь ке адӟем кариськод-а? - Кызьы сотэк. Котькуд кырӟасьлэн тодмо луэмез потэ, дыр. Мынам но адӟем карымон адямиосы вань. Соос Валентина Пудова но Надежда Уткина. Валентина Пудовалэн калылкы матын луэмез кельше, ачиз арганэн шудэ, кырӟа. Мон но со кадь арганэн шудыны йӧндырисько. Нош эстрадной кырӟасьёс пӧлысь матын луэ Надежда Уткина. Надялэн вань кырӟанъёсыз кельшо. Кырӟанъёсыз солы гинэ тупало кадь. Котькытчы вуттӥське, синмаськымон зэмос кышномурт. - Кырӟан уж секыт-а? - Кырӟан - капчи но, секыт но уж ӧвӧл кадь. Пӧрме ке шумпотоно гинэ. Юнме шуиллямтэ, дыр, кырӟано ке, кырӟано, вань лулэз поныса. - Мар сӥзьысалыд пинал кырӟасьёслы? - Ӵемгес мед пыриськылозы пӧртэм конкурсъёсын. Пичиысен ик дышетске кырӟаны но возьдаськон сямдэс кытчы ке пыдлогес ватыны. Сессия йылпумъяськиз Кун Кенешлэн дас ньылетӥ сессиез ужзэ йылпумъяз. Парламент кык нунал ӵоже ваньзэ сямен чаклам ужпумъёсты учкиз. Нош Правительство депутатъёслэн куронъёссыя ивортонъёс лэсьтоз ни дас витетӥ сессиын. Со усьтӥськоз туэ 23 декабре. Г. Романов. Улэп на-а тон 2 Нош дунъёссы ӵуказе нуналэз но бере кельто ини. Озьыен, выль модель поттоно. Нош кин сое дасялоз, кин сое производствое пыӵатоз? Та ужлы угось дасо, сю миллиардъёсын коньдон кулэ. Нош ик ваментэм сюрес? "Запад асьмелы юрттоз..." Бен, арысь аре вераськонъёс потало, автозавод кунгож сьӧрысь кыӵе ке компаниен кусып тупатэ шуыса. Я "Рорд", я "Вольво", я "Шкода" асьме дорын машина поттыны ӧдъяло шуыса кылӥське. Дыр ортче, нош автозаводысь озьы ик "москвичъёс" гинэ пото. Вераськонъёс пумен чаломо. Али соос нош, пуромизы: автозаводэз, пе, Кореяысь "Хьюндай" фирма аслаз кыткетаз кутоз. Жаляса верано луэ, али юнме супыльтон гинэ ай. Бен, кореецъёслэн вань сыӵе малпанзы. Асьмелэнъёс но пумит ӧвӧл. Но та пумысен одӥг огкыл но ӧвӧл на ай гожтэмын. Мукет компаниосын сямен ик югдур берытскоз, дыр, шуыса малпан кылдэ. Уг оско угось "фирмачъёс" асьмемын ӵош кыӵе ке пайда поттыны луоз шуыса. Оло, соин ик федерация но асьме автозаводэ коньдонзэ поныны уг дӥсьты. Осконтэк улыны уг луы, соиз зэм. Нош автозаводын марлы оскыса уло? Западлы? Москвалы? Яке инмысь шудлы? Николай Дорош туж ӟырдыт вераське экономикалэн огъя законъёсыз сярысь, машиностроенилэн калык хозяйствоын тупа бадӟым интыез сярысь, солы государстволэн юрттэтэз сярысь. Мар бен, шумпотыны гинэ луоз гажано Николай Григорьевичлэн экономика удысъя мур тодон- валанъёсыз пумысен, но солэн визьнодо лекциез мӧзмыт пальпотон гинэ поттэ. А. Головизнин улон шоры сазьгес ик учке. Солэн верамезъя, али одӥг гинэ оскон - кореецъёслы. Аслаз кужыменыз завод уз ӝутскы. Озьыен, предприятие ачиз номыр но лэсьтыны уг быгаты? Кивалтӥсьёс, шӧдске, воксё дышизы ини таӵе малпанлы. Соин ик югдурез воштыны уг ик туртто. - Малы соослы мултэс сюлмаськон кулэ? Кивалтӥсьёс сотэк но урод уг уло, - вера заводысь одӥгез специалист (нимзэ вератэк кельтыны куриз). - Кызьы озьы? - Ма, озьы ик. Конвейер ужаку, кивалтӥсьёс пӧсь таба вылын кадь бергано луо. Нош али гань-гань уло. - Нош уждун? - Генеральной директорлэн косэмезъя, вылӥ ёзысь кивалтӥсьёс нуналлы быдэ уже потаны кулэ. Завод уг ужа бере, валамон, соос но нюлам вуэн уг пыласько. Нош уждун мынэ. Соиз зэм, соослэсь но коньдонзэс ӝегато. Но ӵошатэ асьтэос: кӧня дырлы тырмытоз 200-300 сюрс манетъем уждунзэ огшоры рабочий но кӧнялы 2-3 миллионзэ цехлэн кивалтӥсез. Вань-а пӧртэмез? Пумит вазьыны номыр. Ужын но мултэс луо нырысь ик рабочийёс. Тани али заводын дасясько нош ик 2 сюрслэсь ятыр (!) ужасьёсты кулэстыны. Кытчы соос кариськозы, кызьы улозы, нокин уг тоды. Бакчая бускеле картофказэ огназ бугыръя. Малы, пӧй, огнад выриськод, кытын кузпалыд. - Уждун уг сётъяло, воксё коньдонтэк кылимы. Соин кышно базаре кошкиз. Надя базарын буёлэн вузкаре. Нош ужа автозаводын, машинаосты буян цехын... Г. ТИХОНОВ. Лэчыт ужпум Улэп на-а тон, автозавод? ...Проходнойын чал-чал. Калгись пуныос гинэ сэргысь сэргы поръяло, бетереяос вӧзын шунско. Турникет сьӧрын егит вахтёр нырулыса пуке. Нош кемалась-а та проходной вазь ӵукнаысен бер уинозь кузьыли муӵлы укша вал? Али со сярысь номыр но тодэ уг вайыты. Завод угось уг ужа. Шонергес вераса, арняяз кык нуналзэ ужа. Азьвыл аръёсы татын нуналлы быдэ, кык смена ӵоже ужгур пӧзе вал. Со гинэ ӧвӧл, рабочийёс ялан ӟуризы, шутэтскон нуналъёссы но уже потыны косо шуыса. Зэм, со понна уждун ӝожтӥськыны сьӧлык луысал. Эх, берыкты вылэм со ортчем вакытэз!.. Табере шутэтскон нуналъёсы но, бӧрсьысь кык сена но ужаны пумит нокин ӧй луысал. Кызьы но малы аналмыны кутскиз маинаосты поттон - мугъёссэ нимысьтыз валэктыны кулэ ӧвӧл, дыр: соос котькытын огвыллемесь. Малы али тыро-пыдо уг ужа - соиз но сэрттонэз-пертчонэз кулэ уг кары. Малы машинаостэ завод уг лэсьты? Ужаны коньдон ӧвӧл. Малы? Продукция уг поты бере, коньдон но овӧл. Кызьы тӥялод та веднам эгесэз, нокин уг тоды. Шонергес вераса, кызьыез тодмо: коньдон гинэ кулэ со понна. Ӵапак со коньдон ошмесэз ик нокин но уг тоды. Ачиз завод коньдон поттыны али уг быгаты. Азьвыл аръёсы конвейерысь суткаяз 800 машина кошке ке вал, али толэзьлы план - 1000 машина. Со но ӵем дыръя уг быдэсъяськы. Завод ар ӵоже 6 сюрслэсь ӧжыт автомобиль поттӥз ке, ыштонъёс гинэ адӟоз. Соин ик туэлы лыдпус тупатэмын - 7 сюрс. Луоз-а сомында, шуг вераны. Воштос ёзъёс басьтыны коньдон угось омыр кадь уг тырмы. Зэм, куд-огзэ машина гердъёсты завод ачиз лэсьтэ ини. Шуом, бермостъёсты, подвескаосты но мукетсэ. Озьы ке но, унозэ палэнысь ваёно. Тужгес но секыт югдур моторъёс ласянь. Ижъёслэн коньдонзы шедьто ке но, двигаптельёс басьтыны уг быгато: Уфаысь завод но автозавод сямен ик векаса улэ. Ялан йыр висён - сцепление но передачаосын коровкаос. Мон заводэ ветлон нуналэ но котьку сямен ик, ортчиз диспетчерской совещание. Селектор пыр ӵем гинэ чузъяське: "...Подшипникъёс туннэ нуназе бере луозы... Коньдон туннэ ӵукна гинэ шедьтӥмы, машина грузлы потӥз ини, ог кык ортчыса вуоз... Коврикъёс одӥгтэмак выризы. ... Машинаос Вожскийын ини груз витё, понедельнике вуозы... Тӥни озьы, детальёс пырак питрыан вылысь конвейере кошко. Кыӵе ке запас возён сярысь вераськонэз ик ӧвӧл. Шонер, ваньмыз пыкиське коньдон борды. Заводлэн тыриськонъёсыз тачак. Кӧня миллиард тодыны ӧз удалты. Директорлэн юрттӥсез Николай Дорош шонертыны пумит луиз: секрет, пе. Производственной отделлэн кивалтӥсез Александр Головизнин одӥгзэ "секретсэс", шӧдытэк-а, мар-а, шараяз: одӥгез гинэ снабжения отдел поставщикъёслы 40 миллиард манет тыр пунэме кылем. Сыӵе отделъёс куинь... Со сяна, лыдэ басьтоно на электрокужым, шуныт, ву, эстӥськон понна тыриськонъёсты, налогъёсты. Уждун али тырыны курадӟо апрель понна. Нош мар чотын улэ на автозавод, маин шока на? Таизлы юанлы валэктон шедьтыны капчи ӧвӧл. Вылӥ верам кенеш дыръя тодмо луиз: толлояз, пе, завод 46 миллион манет тыр продукцизэ вузам. Мар бен, соиз но ярам ини, номыртэмлэсь мар ке коть. Со коньдон поттэмын воштос ёзъёс чотын. Но сое поттыны коньдон кулэ ук, машинаос сярысь вератэук ини. Коммерческой фирмаос юртто вылэм. Таяз ттолэзе гинэ соос заводлы 10 миллиард манет сётӥллям. Та коньдон мынэ меӵак производствое, электрокужым, шуныт но эстӥськон понна дун тырыны. Нош завод пунэмзэ берыктэ машинаосын но воштос ёзъёсын. Валамон ини, фирмаос та ваньбурез асьсэды ӝоже уськытыса уг вузало. Котьма ке но, соос ӧй ке лдуысалзы, автозавод интыын кудӥз вань Республикалэн трос аръёс ӵоже данэз, али, оло адӟысалмы ини гӧртэм цехъёсты сьӧдэктэм борддоръёсты, пиялатэм укноосты, кесям станокъёсты, пограм заборъёсты... Грждан ож бере кадь. Валамон, коммерсантъёслэн коньдонэнызы туж ик уд бурдъяськы.Ярам, заводлэсь берпум лулзэ утьыны тырме на. Государство номырин но уг юртты, Удмуртия та быдӟа предприятиез ӝутыны матысь ик уз вормы. "Ижмаш", кытчы пыре автозавод, ачиз мырдэм шока. Огкылын вераса, юрттэт витьыны нокытысь. Туэ автозаводын чаклало вал 90 сюрс машина поттыны. Со понна кулэ 360 миллиард манет. Валамон, нокин но ӧз висъя тат коньдонэз. Нош шедьысал ке, пайдаез луысал-а меда? Меӵак верано ке, ӧй, дыр. Александр Головизнин меӵак вера: - Нуналаз 200 машиналэсь трос поттӥмы ке, соосты вузанэн шуг-секытъёс кылдозы, басьтӥсь уз шедьы. Милям, медальёсмы угось котыр ласянь вужмемын, туала куронъёслы уг тупало. "Удмурт Кенешын" Толон Иж карын удмуртъёслэн огазеяськонзылэн Пичи Кенешаз Валентин Тубыловлы быръемын воштӥсьёс. Вице-президентъёс луизы Валерий Митрофанов, Удмурт кун филармониысь чеберлыкъя кивалтӥсь но Нина Малых, Дышетӥсьёслэсь тодон-валанзэс будэтонъя институтысь ужась. Кенешын озьы ик быръемын исполкоме адямиос. Чуръёс, чуръёс... Редакциын ужасьёс! Умоесь-а? Туж бадӟым мылкыдын умоесь малпанъёсын, пӧсь саламен тӥледлы вазиське Ижын улӥсь Батуева Августа Семеновна. Уг тодӥськы, кызьы монэ валалоз калык, но мынам туж вераме-гожтэме потэ аслэсьтым шумпотонъёсме. Пересьмемъя, лэся, анай кыл эшшо но туж мусо но дуно потыны кутске. Соин ик мон мыло-кыдо ветлӥсько вань удмурт ужрадъёсы. Анай кылме но кырӟанъёсмес номырин но уг вошты. Туж шумпотӥсько удмурт калыклэн будэмезлы. Весь возисько йырам туэ 29 сентябре ортчем пумиськонэз. Со нуналэ филармониын вал удмурт кылэ берыктэм Библиен тодматскон ӝыт. Гожтэтэн уд вера, уд валэкты, кыӵе со шумпотон, куке асьме адямиос, ас анай кылынызы чирдо- кырӟало. Кыӵе чебересь, мусоесь вал соос, доразы мыныса, тау карыса ӟыгыртэме потэ вал мынам ваньзэс. Ма, кызьы шум уд поты асьмелэн Николай Вазрушевмылы? Кыӵе со яратэ, данъя ас анай кылзэ. Черкын-а, концертын-а, автобусын-а, сомында калык пушкын, пумиталод сое, со котьку ик керпотытэк-йӧнъяськытэк калыкеныз удмурт сямен вераське, вазиське. Музъемозь йыбырттыса тау карисько отец Михаиллы. Инмарлы тау карисько, удмурт калыклэн сыӵе пиез вань шуыса. Тани со презентация шуонэз ортчытон понна ик кӧня бызьылӥз-ветлӥз, пӧсяз, уйёссэ ӧз изьы, дыр, милемлы умой лэсьтон понна. Михаил Гаврилович ас калыкез понна туж сюлмаське, черке ветлыны ӧте, адямиос юыса гинэ медам улэ, шуэ. Ассэ жалятэк, быдӟым книгаосты удмурт кылэ берыктыны тырше. Ма, со шуд ӧвӧл шат, куке тон понна озьы ӟеч лэсьто? Малпасько, мон гинэ уг шумпотӥськы. Туж трос эшъёс черке кыстӥсько, четвергъёсы Михаил вераське, чирдэ- кырӟа, сыӵе дыръя мон бӧрдытэк уг чидаськы. Улон шоры воксё мукет сямен учкисько, адямиос но ваньмыз умоесь пото. Шунды но мукет сямен пиштэ кадь. Инбам шоры учкисько но, улэм потэ шуыса кеськыны мылкыд ӝутске. Тау тӥледлы, Михаил Гаврилович, Марья апай (та финн кышномурт но мыло-кыдо ужа Библиез берыктон бордын)! Тау ваньдылы, кин юрттэ ми кадьёслы вуоноезлы оскыса улыны! Эстониын луоз-а Удмуртилэн ёзэз? Уноез газетъёс, телевидение но радио ивортӥзы: Россилэн Эстониын посолэз Алексей Глухов дась, пе, Таллинын Удмуртилэсь ёззэ (представительствозэ) кылдытыны. Сыӵе оскытон сокем ик зэм ӧвӧл. Шонергес вераса, туннэ со понна ӧвӧл кулэлык но, луонлык но. Эстониын кӧня ке дасо удмурт студент дышетске ке но, отын кӧня ке сю удмурт адями улэ ке но, Таллин но Иж куспын экономика но культура удысын герӟетъёс туж лябесь на. Озьы бере, маин выроз Удмуртилэн ёзэз? Алексей Глухов та пумысен мукет сяменгес вераз. Удмуртия, пе, Эстониын ёззэ усьтыны мылкыд кариз ке, посол та ужен юрттэт сётоз. Тае ас пельыныз кылӥз Удмуртилэн делегацияз пыртэм мурт, "Удмурт дунне" газетлэн валтӥсь редакторез Алексей Шкляев. Журналист Эстониысь ваиз кык диктофон кассета тыр но одӥг фотокассета тыр материалъёс. Соосын тодматскоды вуоно номеръёсын. Таӵе юртын ужа Эстониысь парламент - риигикогу. Берекет Юртты аслыд ачид Эмъялозы турын-куар, чечы, сугон но мукетыз Векчиятэм 500 г сугонэз, 50 г чечыез, 400 г сакыр песокез 1 л вуэн сурано, ляб тыл вылын 3 час ӵоже пӧзьтоно. Сӥятоно но бутылкае кисьтоно, пытсано. Юоно нуналаз 4-5 пол сиськон пуньыен зол кызон дыръя. 1 кг сугонлэсь соксэ поттоно. Ватсано 1 кг сакыр песок. 2 арня ӵоже пукетоно шунды шорын. Юоно сиськемлэсь азьло 1 сиськон пуньыен нуналаз 3 пол ты висьыку (бронхиальной астма дыръя). 1 сиськон пуньы куасьтэм унябей (одуванчик) выжыез сурано 1 стакан пӧсь вуэн, быректытоно. Сӥятозяз пытсаса возёно. Сӥсъяно, юоно нуналаз 3 пол сиськон азьын, пиналъёслы сётоно 1 чечы пуньы тыр, бадӟымъёслы - сиськон пуньы мында но яралоз. Юрттэ вирын сакырез трос дыръя (сахарной диабет), кызь, сэп пуйыос висьыку. Сьӧд курыт кушман сокез сурано чечыен. Юоно 2 сиськон пуньы мында сиськон азьын но изён азьын кынман, кызон дыръя. Выль вуштэм курыт кушман но солэн сокез юртто урӟектэм яраосты бурмытыны, соин эмъяло мусэз но пекляосты. Курыт кушманэз компресс интые но куто. Кус висьыку (остеохондроз, радикулит дыръя) юрттэ чечыен лэсьтэм массаж. В. Кузнецова. Можга район, Бальзяшур гурт. Берекет Такмакъёс Ӵуж но, горд но писпу куаред Бергаса музэ ваське. Тынад гырлы кадь куараед Пель сьӧрам весь чузъяське. *** Вырйыл бусы тӧло вылэм, Пуктӥллям отчы вуко. Егит сюлэм мӧзмись вылэм - Гажанме весь возьмасько. *** Кылем арын туган кутӥ, Туэ ваи вал дорам. Куинь уй кӧлӥз - султӥз, кошкиз, Ӧз но учкы ни шорам. *** Сьӧд нюлэскысь веськрес кызэд Ас понназ погра вылэм. Шуд ӧвӧл ке, куректонэд Ас понназ лыктэ вылэм. *** Тодӥсько мон, адӟисько мон: Легезьпу сяська чебер. Тодӥсько мон, шӧдӥсько мон: Кайгуо мурт туж сабыр. *** Вож-вож садам кисьмам сутэр Сьӧд чиля емышеныз. Вордскем гуртэ котьку чебер Калыклэн тыршеменыз. *** Ву дур кузя бадьёс пӧлын Уӵыпи чирдэ кожай. Кам шур кузя садъёс пӧлын Кырӟалоз вылэм гажан. *** Гурезь уллань васькон капчи, Ай кулэ на тубыны. Туган кылэз веран капчи, Быгато-а гажаны? Т. КУЗЬМИН. Алнаш район, Кузебай гурт. Тодмо нимъёс но нуналъёс Декабрь 4. - 75 ар талэсь азьлот (1922) ужаны кутскиз Ижевскысь чугун кисьтон завод ("Редуктор" АО) 5. - Вордскемез дырысен 60 арес тырме В. И. Гнездинлы, живописецлы, Художникъёслэн союззылэн членэзлы. 6. - Вордскемез дырысен 105 ар тырме И. В. Гольдфарблы, калыкез эмъян удысысь докторлы, УАССР-ысь наукая сӥё-дано ужасьлы. 25 ар ӵоже со кивалтӥз Ижевскысь мединститутлэн кафедраеныз, секыт висёнъёсты эмъянъя выль амалъёс пыӵатӥз. 12. - Вордскемез дырысен 75 арес тырме В. К. Семакинлы, Удмуртиысь ӟуч поэтлы но переводчиклы. Вордскемын Глазовын. 13. - Вордскемез дырысен 60 ар тырме Р. Г. Валишинлы (1937-1979) тодмо удмурт писательлы. Солэн "Тӧл гурезь" повестез 1980 арын пусъемын Удмурт АССР-лэн Государственной премиеныз. 15. - Вордскемез дырысен 90 ар тырме Г. П. Овечкинлы (1907-1974), УАССР-ысь тодмо артистлы. Сцена вылын быгатыса шудэмез понна 1938 арын Удмурт драмая театрысь артистъёс пӧлын солы нырысьсэ сётэмын УАССР-ысь дано артист ним. 1950 арын Г. П. Овечкин луиз Удмуртиысь калык артист. 18. - Вордскемез дырысен 85 ар тырме С. П. Широбоковлы (1912-1983), Удмуртиысь калык поэтлы, Быдӟым Отечественной войналэн ветеранэзлы. Вордскемын Шаркан районысь Вортча Починка гуртын. 20.- 25 ар талэсь азьло (1972) СССР-ысь Верховной Советлэн Президиумезлэн Указэныз Удмуртия пусъемын Калыкъёслэн эшъяськон орденэнызы. 23. - 20 ар талэсь азьло (1977) Воткинске вуиз чагыр эстӥськон. 28. - Вордскемез дырысен 90 ар тырме С. А. Ефремовлы (1907-1994), сельскохозяйственной наукаосъя кандидатлы, Удмуртиысь государственной но общественной деятельлы. 1956-1959 аръёсы со кивалтӥз УАССР-ысь гурт хозяйствоен, 1959-1967 аръёсы ужаз УАССР-ысь Министръёслэн Советсылэн Председателез луыса. Та толэзе ик: - 75 ар талэсь азьло (1922) РКСМ-лэн 5-тӥ съездэзлэсь решениоссэ быдэсъяса, Удмуртиысь комсомол Военно-Морской Флотлэн радъёсаз 20 пиосты келя. - 30 ар талэсь азьло (1967) Ижевскысь тодмо граверъёс Л. М. Васевлэн, В. М. Белобородовлэн, А. П. Куршинлэн, А. А. Лекомцевлэн ужъёссы келямын Всемирной выставкае - Канадае (Монреаль). Дасяз Е. Никонова. Глазовын пумиськон Глазовын кык нунал ӵоже мынӥз элькунысьтымы ёросъёсысь но городъёсысь быръем органъёслэн но администрациослэн кивалтӥсьёсынызы семинар-совещание. Солэн ужаз пыриськизы Удмурт Элькунысь Кун Кенешлэн но Правительстволэн тӧроослы Александр Волков, Павел Вершинин, Кун Кенешлэн комиссиосаз но министерствоосын ужасьёс, предприятиослэн кивалтӥсьёссы. Нырысетӥ нуналаз пыр-поч кенешон мынӥз Удмурт Элькунын промышленностез азинтон политикая концепция но туннэ нуналлы кылдэм югдур сярысь. Толон семинаре люкаськемъёс "котырес ӝӧк" сьӧрын кенешизы кун властьлэн но интыосын аскивалтонлэн органъёсссылэсь кусыпъёссэс радъян сюресъёс сярысь. Собере Глазовлэн куноосыз тодматскизы городысь но ёросысь предприятиосын, учреждениосын. Н. Корякин. КОНКУРС АЗЬЛАНЬТӤСЬКЕ Ау! Устоез курлась! Ох, яратӥськом ик вылэм асьмеос ог-огмес курланы. Юнме шуиллямтэ, дыр: кыллэн лыэз ӧвӧл. Озьы ке но, мон туж шумпотыса лыдӟи конкурсэ вуэм гожтэтъёсыз. Маиз гинэ ӧвӧл отын! Тышкаськыны асьмеос быгатӥськом угось. Тани Ижын улӥсь Р. Булычев быдэс поэма гожтэм. Отын со верам, газетлэн одӥг сэрегаз, пе, мед луысал выль кылъёсын нимысьтыз люкам ӝажы. Озьы ик Булычев эш лымшор иворъёсты тросгес поттӥськоды шуыса пусъе, нош уй пал шаерез, пе, вунэтӥськоды. Нош мукетыз автор (жаляса верано, адрессэ гожтымтэ) удмурт кырӟасьёс сярысь, пе, туж ӧжыт гожъяськоды. Ижын улӥсь Геннадий Наговицын туспуктэмъёс туж уродэсь пото шуэ. Кыӵеесь, пе, вал соос ог 40-50 ар талэсь азьло, али но сыӵе ик. Ижысь воргорон туж тышкаське: нырысетӥ бамысь Удмуртилэсь кункышетсэ (флагзэ) чеберманы 2-3 вишты горд буёл гинэ но уд шедьтӥське. Озьы ик Наговицын эш юисьёс сярысь ӧжыт гожъяськоды шуэ. Юисьёс сярысь вераськон ӝутӥм бере, пусйыны кулэ: конкурсэ одӥг тордос но гожтэм. Ачиз, бен, та нимен туж ик соглаш ӧвӧл, нош кышноез мукет сямен шораз уг ик вазьылы, пе. Со ик "Удмурт дуннелы" но кужмысь гожтӥськытэм. Махорка кыскыны кагазэд, пе, коть луоз. Тодосчиос верамъя, тышкаськись кылъёс мылкыдэз, пе, сӧро. Нош мон мыдланьгес вордӥськиськем, лэся. Тӥлесьтыд гожтэтъёстэс лыдӟыса, сюлэмы буйгаз, мылкыды бурдъяськиз. Соин ик шумпотыса ивортӥсько: конкурс азьланьтӥське. Отчы пыриськон понна тӥледлы валэктоно кык юанлы. Тани соос: 1. "Удмурт дуннелэн" маиз тӥледлы уг кельшы? 2. Кыӵе сямъёссэ курласалды Шӧкыч уромлэсь? Мар сярысь но кин сярысь лыдӟемды потэ та бамысь? Тодады вайытӥськом, котькуд юанлы валэктонды дас предложенилэсь трос медаз луы. Нош кузьым кузёзэ одно ик мед шедьтоз шуыса, эн вунэтэ гожтыны адрестэс. Озьыен, чырткем кариське, эшъёс. Чидатэк витисько гожтэтъёстэс! Шӧкыч. 1 декабре - Дуннеын СПИД-эн нюръяськонъя нунал Адӟонлэсь нокин утемын ӧвӧл Туж секыт югдур кылдӥз странаямы: ВИЧ-инфекция кӧшкемыт выжыоссэ пумен мургес но мургес лэзе. Нырысь ик со герӟаськемын улонмылэн мукетыныз кышкыт тодметэныз - наркотикъёслэн вӧлмеменызы. Наркотик бышкан дыръя висён паласькон учыр нырысьсэ шараямын вал 1995 арлэн пумаз. 1996 арын наркоманъёс ВИЧ-инфекциез нуллӥсьёс пӧлын 72 процентэз люкаськизы. Туннэ нуналлы Россиын ваньмыз куать сюрслэсь ятыр висисьёс лыдъясько. Пусйыны кулэ, миым шараямын сомында мурт, кудмында люкаськемын укмыс ар ӵоже 1987 арысен кутскыса. Арлы быдэ Дуннеын СПИД-эн нюръяськонъя нунал, 1-тӥ декабре, кыӵе кеӧтён-тема улсын ортче. Туэ ООН-лэн СПИД-ъя программаяз нимысьтыз саклык висъяны чакламын пиналъёслы, ӵуказе нуналмылы. Озьыен, та нуналлэн ӧтёнэз-темаез - "Нылпиос уло сыӵе дуннеын, кытын вань СПИД". Висён вӧлмыны кутскыку, нырысетӥ аръёсы таӵе малпан юнмамын вал: СПИД ӵемгес палаське асьсэды урод возись арлыдо муртъёслы: наркоманъёслы, гомо-,бисексуалъёслы но мукет. "Наркотик эн бышка", "Кинэн сюрем кусып эн возьы", "Воргоронэн кышномуртэн сямен ик эн улы" - соку таза улод. Астэ кияд кырмыны уд быгатӥськы, кужмыд ӧвӧл, висён шедьтӥд - ачид янгыш... Нош нылпиос? ВИЧ-инфекциез нуллӥсь покчиос - соос мар понна кыл кутыны кулэ? Пиналъёс сярысь асьмеос вунэтӥм. Нош ужпум ӟырдыт сылэ, со ас понназ нокызьы уз быдэсмы. Верам ини, та вакытэ туж трос висисьёс наркоманъёс пӧлын, кылем ар куспын гинэ лыдзы дас пол будӥз. Со шараям учыръёс гинэ. Нош пӧлазы уно ук егитъёс, быдэ вуымтэос. Тодамы ваёмы, нылпиос нырысетӥзэосыз тазалыкез утён удысын ужасьёслэн "суп-сап тыршеменызы" курадӟонэ усизы. Ярам коть, та "кышкыт тулкымез" зӥбломытӥм. Одӥг пол кутӥськись шприцъёсты уже пыӵатыса, эмъюмъёсты-препаратъёсты эскерыса... Инфекциез нуллӥсь нылпиосын "кыкетӥ тулкым" уката кышкытгес луоз. Покчиос ӵемысь висён куто анай-атайёссылэсь, наркоманъёслэсь. Вань сыӵеосыз но быдэ вуымтэос, кудъёсыз асьсэос бышкалляськыны ӧдъяло. Соослы ӟеч педагог гинэ валэктыны быгатоз, шулдыр улон понна висьыса дун тыроно луоз шуыса. Россиын туэ 12 ноябрьлы таӵе лыдпусъёс верамын: ВИЧ-инфекциен 350 нылпи шараямын, пӧлысьтызы 45-езлэн анайёссы - инфекциез нуллӥсь наркоманъёс, 84 пинал кулӥз ни. Россия Федерациысь Тазалыкез утёнъя министерстволэн научно-исследовательской институтэзлэн эскеронъёсызъя, Россиын ӝыныезлэсь тросэз наркоманъёс - 14-ысен 30 аресозь егитъёс. Ваньмыз пӧлысь 15,5 процентэз - быдэ вуымтэос Иммунодефицитлэн вирусэз ӝог уг шараяськы. Сое нуллӥсь мурт толэзьёсын, аръёсын висемзэ шӧдытэк ветлэ. ВИЧ паласькем бере висён шараяськытозь дас ар но ортчыны быгатэ. Соку мугорлэн пумитъяськон кужмыз (иммунитетэз) лябӟе. Аляло пӧртэм черъёс: ку, ты висёнъёс, туберкулёз, цитомегаловирусной инфекция но мукет. Пиналъёс ВИЧ-инфекциен висьыны ӧдъяло ини анайлэн кӧт пушказ ик яке, вордскемзы бере мукет (висись) муртлэсь вирзэ лэзьыку. Нылпи мугоре тросгес вирус сюре. Соин валче ВИЧ-инфекцизя соослэн ӝоггес шараяське. Соин но, вылды, секытэнгес ортчыто СПИД-эз. Ӵем дыръя йырвизьзы сураськыны ӧдъя, ёзъёсынызы ӵошатыса, соослэн пичи, восьтэт мугорзы луэ, мылкыдзы уродме. Со сяна, троссэ висись пиналъёсты нокыӵе ӟеч препаратъёсын но йӧнатыны уг луы. Тросэз СПИД-эн висись пиналъёс ӝоггес куло. Американецъёслэн чотамзыя, висисьёс пӧлысь ар ӵоже быдӟымъёс, быдэ вуэмъёс 50 процентэз улонысь кошко, нош висьыны кутскем пиналъёс пӧлысь - 60 процентэз. Та вие шаерамы усьтэмын но ужа СПИД-эз тодманъя 11 лаборатория, кытын эскеро но йӧнато ВИЧ инфекция нуллӥсь адямиосты. Висёнлэсь палэнскыны луонлык одӥг - вакцина. СПИД-эн нюръяськись тодосчиос висёнлы пумит кылдытэм вакцинаослы юн оско. Кылсярысь, профилактической, кудӥз укша антирабической но терапевтической вакциналы. Озьы ке но, ӟечлыксэ эскерон понна трос адямиослы (тужгес но висисьёслы) вакцина пуктоно но кӧня ке аръёс эскерыса возёно. Кышкыт висёнэн ялан нюръяськоно, инфекция паласькемлэсь утиськыны быгатоно. Нырысь ик, воргоронъёсын но нылкышноосын кусыпъёсты эскериськыса тупатоно, нош осконтэм муртэн тупады ке, кисыяды презерватив одно ик дась мед луоз; кыкетӥез, калык пӧлын, тужгес ик школаосын, училищеосын, вузъёсын, валэктон уж нуоно, СПИД- лэн кышкытлыкез но солэсь, пӧртэм венерической висёнъёслэсь утиськон амалъёс сярысь верано; куинетӥез, наркоманъёсын но наркотикъёсты вӧлмытӥсьёсын нюръяськоно. Туннэ нуналлы шаермы та кышкыт висёнэз уг тоды на. Озьы ке но, сюлмаськонъёс трос, СПИД вамышъя асьмемын артэ. Дэмен нюръяськыса гинэ быгатомы улонэн кулон вискысь потыны. Котькудӥз адями аслаз тазалыкез, ӵыжы-выжыосызлэн тазалыксы понна ачиз кыл кутэ. Адӟонлэсь нокин утемын ӧвӧл. Л. Кузелин, республикаысь СПИД-эн но паласькись висёнъёсын нюръяськонъя центрысь клинической эпидемиологияя отделенилэн кивалтӥсез. Кызь ар - даур шат? Кызь кык ар талэсь азьло Удмурт филармониын кылдӥз "Зангари" ансамбль (со ик берло "Шулдыр ӝыт луиз). Трос шуган-моганъёс пумиськизы кыдан сюрес вылын. Та дыр ӵоже коллектив чылкак воштӥськиз. Туннэозь чидазы кыкез гинэ - Анатолий Ушаков но Галина Платонова. Та нуналъёсы "Шулдыр ӝыт" ансамбльлы кызь ар тырме. Учкисьёсты выльысь сюлмысь шулдыртозы яратоно усточиосмы - Удмурт Элькунысь но Россия Федерациысь дано артист Анатолий Ушаков, Удмурт Элькунысь калык артистка Галина Платонова, дано артист Геннадий Ганьков, кырӟасьёс Владимир Мальцев но Игорь Перевощиков. Ортчем сюрес сокем ик кузь ӧвӧл ай. Кызь ар - со даур шат? Мед шулдыртозы на усточиос эшшо кызь ар! Газетлэн корреспондентэз кенеше коллективлэн кивалтӥсеныз Анатолий Ушаковен. - Трос-а, ӧжыт-а та лыдпус эстрада ансамбль понна? - Тросэз бадӟым ик ӧвӧл шуозы. Нош мон верасал: эстрада понна со - ньыльдон ар. Бадӟым маскарчи Аркадий Райкин куке шуиз: "Эстрадаын ужась артистлэсь котькуд арзэ кык арен ӵошатоно". Мон но соин соглаш. Чаклалэ ай асьтэос: трос коллективъёс, рос-прос ужаса, асьсэды сцена вылын сокем возьматыны уг вутто - куашкало. Югдур быдэс дуннеын огвыллем. Кылизы на "Машина времени", "Песняры", "Шулдыр ӝыт". Эстрадаын ужаны туж секыт. Ансамбльлы ялан выльзэ, паймымонзэ утчано. Огинтыямы лёгаськимы ке, ум быгатэ ни учкисьмес котырамы люканы. - Та дыр ӵоже кайгу-а, шумпотон-а тросгес пумиськылӥз? - Тырмыт вал ваньмыз. Удмурт эстрада ӝутскылӥз но, уллань но усьылӥз. Огвакыт быдэс Союзэтӥ концерт пуктылыса ветлыны луонлыкъёсмы вал, нош туэ удмурт шаертӥмы гинэ но ортчыны ум быгатӥське. Азьвыл кивалтӥсьёс мон сьӧры ветлыло ке вал, табере аслым йыбыртъяса кадь, кураськыса сямен улоно луэ. Кызь ар ӵоже уно гинэ чидано, адӟоно луиз. Нош кӧня артистъёс кошкизы?! Ваньмыз-ӧвӧлэз куатьтон вить пала люкаськоз, дыр. Котькуд таӵе учыр мон понна кайгуэн берытске. Пӧрмыны гинэ кутске кадь, нош артист бурдъяське ни. Шумпотӥсько: тросэз бадӟым сцена вылэ потӥзы. Юнме уг шуо, дыр: "Чорыг мур вуэз яратэ". Озьы ик искусство удысын но; коньдон ворме. Секытгес нылъёсын ужаны. Сцена вылэз соос туж чебер каро, нош ялан кузь сюресъёс семьяоссылэсь люко. Со сяна, нылъёс азьын сьӧлыке но вань. Куд-огез егит дырзэс ми дорын ортчытӥзы, нош семья ӧз кылдытэ. - Кызьы улэ-вылэ туала ансамбль? - Каллен. Туннэ нуналлэсь бере кыльытэк но ӵуказеез сярысь малпаськыса. Одӥг нуналлы бере кылид ке, со эстрада уз луы ни. Асьмелэн рос-прос удмурт эстрадамы, эстрадной коллективмы ӧвӧл на. Кулэ вылэм нимысьтыз специалистъёс, туала инструментэн шудыны быгатӥсьёс, режиссёръёс, аранжировщикъёс. Ӧвӧл туала эстрада кырӟанъёсты быдэсъясьёсмы. Юнме ӧз шуэ, дыр, Марий Элэ концертэн потакумы: "Удмурт калык арган яке баян сьӧры гинэ кырӟаны быгатэ, нош эктыны ритмичностез ӧвӧл". Ансамбльысь артистъёсын сяна, ужаны тыршисько на гуртъёсысь маскарчиосын, кырӟасьёсын. Соосты калык пӧлы, бадӟым сцена вылэ поттыны вырисько. Калык тодэ ини Леонид Душниковлэсь но Сергей Сосновлэсь, Анна Плотниковалэсь кырӟанъёссэс, Вячеслав Ивановлэсь юморескаоссэ. - Малы шумпотӥськоды туннэ? - Учкисьёсмылы, нимысьтыз гажась, данъясь адямиосмылы. Соос концертъёсамы, оло, нуналлы быдэ но ветлысалзы. Соос ик юртто кырӟаны-вераны, дӥсь вурыны. Кемалась ик ӧвӧл милемлы инмысь шуд усиз кадь. Ижевскын улӥсь егит анай Ольга Белова дорамы лыктыса юа: "Пумит уд луэ-а, тӥледлы дӥсь вури ке?" Мынам сыӵе ӝикыт, эстрада шӧмез валась вуриськисез нокыӵе ательеысь но адӟеме ӧй вал на. Праздник ӝытамы но солэн дӥсеныз луомы. - "Шулдыр ӝытады" выль егитъёсыз кутыны уд малпаське-а? - Улон секыт бере, коллективез будэтыны уг лэзё. Лыктыны мылкыд карисьёс трос гинэ, гожтэтъёс но гожъяло. Котькудӥзлэн милемын пумиськемез, адӟиськемез потэ. Егитъёслэн быгатонлыкъёссы но вань, дыр. Нош кытын дышетскемзы сярысь юаськод ке, кӧт ӝож луэ: тросэз дас классэз гинэ йылпумъямын. Крезьгуръя яке культурая училищеын коть мед дышетскысалзы вылэм. Профессиональной артист луон понна, трос гинэ тыршоно. Учкись номыр сярысь медам сюлмаськы, ас понназ мед малпалоз: "Эх, кыӵе капчиен кырӟа-вера. Мон но озьы гинэ ӧй быгатысал меда?" - Шудо-а тӥ, коллективды? - Учкисьёсы трос гинэ люкасько бере, коллективез но, асме но шудоен лыдъясько. Со сяна, пичи дырысен артист луон но эстрадной коллектив кылдытон сярысь чебер малпанъёсы уж вылын быдэсмизы. Синмаськымон но данъяськымон кузпалы ("Шулдыр ӝытын" кызь ар ужаськомы ни) но визьмо нылы бордам бере, котькинлэсь шудо, дыр, мон. Вераськиз ВАЛЕНТИНА КУТУЗОВА. Анатолий Ушаков: "Шулдыр ӝытэз" кылзыса, улэмды-вылэмды, кырӟамды-верамды, шудэмды- серектэмды, яратэмды мед потоз. Галина Платонова: "Шулдыр ӝыт" - мынам шумпотонэ, кырӟанэ, сюлмаськонэ, висёнэ - быдэс улонэ. Владимир Мальцев: Я, ӟеч улэлэ тӥ, Узыр луэлэ тӥ... Игорь Перевощиков: Бусьтыр но берекето мед луоз улонды. Геннадий Ганьков: Милемын ӵош тӥледыз но вылысь Инмар мед утёз. В. КАМАШЕВЛЭН туспуктэмъёсыз. Берекет МАР СЯРЫСЬ ВЕРАЛО ВӦТЪЁС? Одӥг тодмо муртлэн верамезъя, вӧтъёсын адями аслэсьтыз улонзэ эскере, соин валче аслэсьтыз дуннезэ воштэмез, выльдэмез но луэ, пе. Мон шуысал, вӧтъёс - со ивор ваись тылобурдоос. Соос адямилы туж кулэ. Уйвӧтын угось юанъёсмылы валэктонъёс но шедьтыны быгатӥськом, кайгыронмес но валаськомы кадь. Адӟиськомы асьмелэсь тусбуймес, выросъёсмес, быдэсак улонмылы дунъет но сётэммы луэ. Зэмос вӧтъёс син азе кыӵе ке яркыт , чылкыт пуксё, со кема дырлы йырамы кыле. Паймытэ, куке огзэ ик вӧтэз трос пол адӟыны кылдэ. Куддыр шимес уйвӧтъёс адямиез нерад каро, соку "лул интыяз ӧвӧл". Озьыен, адямилы аслэсьтыз улонзэ эскерыны , мазэ ке, оло, воштыны но кулэ. Висёнэн валче но сыӵе вӧтъёс луыло. Куд-огез шуэ, кӧлыкум нокыӵе вӧтъёсты, пе, уг адӟиськы. Но со зэм ӧвӧл. Адями со сярысь вунэтэ, йыраз уг возьы. Ческыт уммен ке изиды, шумпоттытӥсь вӧт ке адӟиды, со сярысь мукетызлы вераны эн дыртэ. Нош вӧтты кышкыт ке, таиз сярысь одно ик вераны кулэ луоз. Оло, буйгалоды, мылкыдды капчиялоз, вӧтты уз зэма. Мар сярысь бен верало вӧтъёс? Кинэ яке мае адӟиськом? Вӧтъёс нылпи вордӥськонэн ке герӟаськемын, со вера: тӥ умой сюрес вылын сылӥськоды, азьланьын ӟечесь воштӥськонъёс возьмало, малпанъёсты быдэсмозы (оло, кинэн ке пумиськоды но). Уйвӧтын адӟем шур, ты но ву мылкыдэнгес герӟаськемын. Чаклано вулэсь ӟечлыксэ: со чылкыт ке - бадӟым пайдалы, умоезлы осконлы. Пеймыт, кырсь ке - ӝож, урод мылкыдлы, висёнлы. Кӧлыкуды асьтэды куанерен ке адӟиды, иське, ӝоген ванё-буро луоды. Гольык пыдын ветлон изьыку но пайдаен берытске. Со - ужын азинсконъёс басьтонлы, узырлыклы. Кулэ вылэм огречез но адӟыны, таӵе вӧт выль улонэ выжонэн герӟаськемын, шуо. Шампанской юон но ӟечлы - умой, пайдаё ужез вае. Уйвӧтын горчица сиён - умойтэмлы: яратоно муртты куштоз, люкиськоно луоды, яке кин ке но пӧялоз, шуо. Нош кин меда уйвӧтаз лобатэк кылиз ини. Тае герӟало будэмен. Эшшо одӥг валэктон вань на: малпанъёсты одно ик быдэсмозы, тӥледыз возьмало ужады азинсконъёс но чебер, шудо яратон. Уйвӧтын чорыг сиён - шудлы но узырлыклы. Сое улэпен ке адӟоно, юнме дыр быдтонлы, шуо. Нянез адӟон юн тазалык, пе, вае.Чебер пуктэм сиёнэн ӝӧк вылэз адӟем куноосты вуттоз, шуо, яке асьтэос куное мыноды, мынон сюресты удалтоз. Уйвӧтын пиньёс усьылон, висён - урод мылкыдлы, пуныез адӟон - эшен пумиськонлы. Нумыръёс, нымы-кибыос - адямилы секыт мылкыд кылдыто, гурезь йылэ тубон - чылкытлыклы, шулдыр мылкыдлы, вылэ ӝутсконлы. Тылобурдо ке уйвӧтэ пыре - эрико улонлы, туж кулэ но ӟеч иворлы. Нош кыӵе нуналэ меда соосыз адӟиды? Средае но пятницае ке - ӟечезлы, четверге ке - уг быдэсмо, арня уе ке - быдэсмо нуназеозь яке ар ортчыса. Котькуд толэзьлэн нырысетӥ нуналаз адӟем вӧтъёс озьы ик быдэсмозы, ӟечсэ гинэ верало соос, кыкетӥ нуналаз - бушесь, быдэсмисьтэмесь, дас тямысэтӥ уе ке - табышлы но воштӥськонъёслы, кызь укмысэтӥ уе адӟемъёсыз уг быдэсмо. Тазьы трос мар но со гожтыны луысал вӧтъёс пумысен. Ӟечесь, шулдыресь, чебересь вӧтъёсты адӟыса, адями бурдъяське, улыны мылкыдыз эшшо но зол ӝутӥське. Вӧтъёс но улонэз азьлань нуо ук. Соин валче мынам вераме потэ: эн ыштэ улонлы оскондэс. Дыр шедьтӥды ке, ӧжыт ке но малпаське: шонер-а улӥсько, ярато-а монэ котырысь адямиос. Эн вунэтэ мукетъёсызлы ӟечсэ лэсьтыны, шунытэсь, лякытэсь кылъёс вераны, кыӵе кулэ ук соос уката но али дыре, секыт улон вакытэ. Улонын тыршиськод ке ӟечсэ лэсьтыны, мылкыдды но котьку каньыл луоз, асьтэды асьтэос яратоды, мукетъёсыз но гажалозы. Л.ОРЕХОВА, Удмурт кун университетын дышетскись. Берекет Кибашлыос Мылкыд ке вань... Ижевскысь чеберлыкъя юртын пӧртэм ёросъёсысь кибашлыослэсь ужъёссэс адӟытонъёс ортчыло. Мар но отчы вуттэмын уг луы. Асьсэлэсь быгатонлыксэс возьмато керттӥськисьёс, куиськисьёс, пужыятскисьёс, суредаськисьёс, инкуазь узырлыклэсь турлы-турлы арбери лэсьтыны быгатӥсьёс. Ма, ваньзэ вераса быдтод-а, кыӵе паймымон, синмаськымон калык улэ асьме шаерын. Тани туспуктэмъёс вылын бадьпу ньӧръёслэсь лэсьтэм арбериос. Ваньмыз соос - Красногорскысь Борис Поторочинлэн киужъёсыз. Учке ай, макем соос быгатыса лэсьтэмын. Соку ик малпан кылдэ, мынам но таӵе чебересь арбериосы корка пушкам мед луысалзы вылэм шуыса. Кӧня дыр, кужым, быгатонлык кулэ, вылды, самоварез яке таӵе чебер пуконэз ик лэсьтыны. Нош тужгес но кулэез, дыр, мылкыд. Борис Витальевичлэн со тырмыт. Лесничествоын ужась егит нюлэсчилэн ваньмон дырыз юнме уг ортчы. Быгатӥсь киос оломар но пӧрмыто, чеберенызы адямиосыз паймыто. Трос вераськыны яратӥсьтэм воргорон вань быгатэмзэ бадь ньӧръёслэсь турлы арбериос кутанлы сётэ. Туспуктэм вылысь учкыса, йӧндырись, мыло-кыдо мурт но Борис Поторочинлэсь, оло, адӟем кароз, та выллемесь но мукет аспӧртэм арбериос лэсьтоз. Оло нош, такем кибашлы адямилы умой луысал котырысьтыз мыло-кыдоосты ас котыраз люкаса, кооператив усьтыны. Мон малпамъя, та выллем ужъёсты басьтӥсьёс сюрозы, кинлы ке, кинлы ке кузьманы но возьыт уз луы. Л. ХРУЛЕВА. Калашниковез данъяса "Ижмашлэн юбилеез азьын шумпотымон ивор вуиз. Россиысь экономикая министерство "Конструктор стрелкового оружия М. Т. Калашников" нимо пус (знак) тупатӥз. Та нуналъёсы сое "Ижмашысь" но мукет предприятиосысь 14 ужасьёслы бырттозы луоз. Россилэн Президентэзлэн администрациез ВПК-ын (военно-промышленной комплекс) данак тыршисьёсты правительственной наградаосын пусйыны дасяське. Со герӟаськемын Калашниковлэн автоматэзлы ӝыны даур тырмеменыз. Туэ 31 октябре Ижевскын "Ижмаш" АО но "Смит и Вессон" (США) компания куспын тупанкыл гожтэмын. Соя США-ысь правоосты утись ёзъёслы вузамын луоз Иж пыӵал тӥрлык, нош "Смит и Вессон" Россиысь сыӵе органъёслы продукция сётоз. Г. Васильев. Кун Кенешлэн дас ньылетӥ сессияз Мыноно-а одӥг ӧретӥ? Удмурт парламент кык нунал ужаз. Ас азяз пуктэм ужпумъёсты ваньзэ-а со учкиз? Ӧз. Люкетӥзы пӧртэм мугъёс: куд-ог ужпумъёсты эскеронын депутатъёс юнме шорысь ӵемтылӥзы но мултэс дырзэс быдтӥзы. Оглом вераса, азьлоосыныз ӵошатыса, таяз сессия урод ӧз ужа. Парламент ӵукна ик рос-прос учкиз депутатъёслэсь куронъёссэс. Трибуна сьӧры нырысь ик потӥз Анатолий Михальков. Депутат ивортӥз нюлэс коран-дасян удысын шуг-секытъёс сярысь. Депутат куронъёс озьы ик сётэмын Дэбесын: дышетӥсьёслы, медикъёслы уждун тырон, "Удмуртия" ГТРК-ын, гурт хозяйствоосын, "Агропромпроект" интститутын югдур но Сарапулын автотранспортлэн ужамез но пӧям вкладчикъёс пумысен. Собере сессия учкиз Удмурт Республикаын быръёнъёс но калыклэсь юалляськон (референдум) ортчытон, депутатъёсты куштон но кивалтӥсьёсты быръён сярысь кодексэз. Со инъетлы кутэмын но, 5 декабрёзь депутатъёс воштонъёс но ватсанъёс сётыны быгато. Таӵе кодексъёс вань ни Воронеж, Екатеринбург но музон областьёсын. Со уно законъёсты огазея. Таин валче депутатъёс кык ӵектон сётӥзы: быръён округын бырйисьёслэсь кенеш (совет) кылдытон но депутатъёсты куштон люкетсэ палэнтон сярысь. Нуназе бере депутатъёс бадӟым инты висъязы республикалы, городъёслы но районъёслы пачкатэм но пачкатымтэ газ сётонлы. Та ужпумъя ивортон лэсьтӥз Правительстволэн Тӧроезлэн нырысетӥ воштӥсез Юрий Питкевич. Со шуиз: - Шаерамы газ сётонэн туж шуг луиз. Али элькунамы нуналлы быдэ 70 тонна гинэ (2 вагон) газ вуэ. Со юн ичи. Газовикъёслы тыронъёсмы уно миллиардъёс люкаськемын. Россиын пачкатымтэ газ поттон ялан кулэсме. Азьланьын кыӵе югдур луоз - секыт вераны. Нош выль аре "чагыр эстӥськон" сётон 5 процентлы синоз. Нош али кыӵе суред? Ӟеч ӧвӧл. Тани "Ижевскгаз" кизер эстӥськон басьтэмез понна одӥг витьмос но дунзэ уг тыры. Кызьы сое валано? Мукет предприятиос но газ сутэмзы понна дун уг сёто. Соин сэрен шуг-секытъёс кылдо нимаз адямиослы газ висъянэн. Газ гумыос нимаз люкымтэ. Азьло, оло, таӵе одӥз ёз кулэ вал, нош али? - шуг валэктыны. Берло дыре элькунлы "чагыр эстӥськон" сёто "Пермьтрансгаз" но "Межрегионгаз". Соослэн куронзы одӥг - газ понна тыроно. Та пумысен депутат Виктор Тарасенко шуиз: - Ижысь Ленин районын 700 нимаз улӥсь семьяос газ возьмало. Коньдон тыризы 1994 арын. Ватонэз ӧвӧл, "Удмуртгаз" ёзэз куашкатӥм. Сое ум адӟиське, синмес кыниськом. "Газпром" РАО республикалы юрттыны дась, озьы ик шуыны луоз "Газспецавтотранс" сярысь. Огъя вераса, газ одӥг кузё киын мед луоз, со газ гумыос но мед кыскоз, газ кутэмез но мед чаклалоз. Тӥни сыӵе улонмы. - Куке газ сётон кулэсме, соку сое ӟеч шӧдо предприятиос но, нимаз семьяос но, - ватсаз Анатолий Салтыков. - Кутоно огшкылъёс. "Пермьтрансгазлы" городлэн 154 миллиард манет тыронэз. Та ужпумез учкыку, Сарапул город ялан син азязы улӥз. Малы ке шуоно, лымшор городлы газ сётонэз пумен кулэсто. Малы? "Чагыр эстӥськон" понна, пе, коньдон уг тыры. Озьы-а со, ӧвӧл-а? Но улон азинске. Соин ик, вылды, Сарапуллэн кивалтӥсез Роберт Берг пырак юаз, газ сутэм понна, пе, кытысь улэп уксё шедьтоно? "Удмуртэнерго" АО-лы пунэм тырон амалэн 3 миллиард берыктӥм, нош 2 миллиард манетсэ кытысь утчано? Ми предприятиослэсь улон коркаоссэс но соцкультбытсэс выламы басьтӥм ни, нош возьыны ум быгатӥське. Иж карын югдур мукетгес. Татын та ужен ӧз дыртэ, шонер лэсьтӥзы, дыр. - Газ понна бюджетын юрттэт сётыны (дотация) 6 миллиард манет учкемын. Но со уг быдэсъяськы, - пусйиз Воткинскысь депутат Валерий Фридрих. - Калык чотын газэз шуръяськом. Татын янгыш луо Кун Кенеш но Правительство. Ми палэнысь кык пол дунтэм газ басьтӥськом. Со юн юрттэ. Городмы быдэсак сямен газэн эстӥське ни. Та ужпумъя сессия постановление кутӥз. Нуназе бере депутатъёс уно ужпумъёсты учкизы на. Кылсярысь, инъетлы кутэмын "Удмурт Республикаямы кун служба сярысь" Закон, юнматэмын музъем кадастрез нуонэз выльдонъя но 1998-2000 аръёслы "Сахарный диабет" нимаз кун программаос, быдтэмын калыкез улон-вылонын утёнъя кун фонд, учкемын республикаямы кун национальной политикая ужан амалъёс. Тая постановление инъетлы каремын но, депутатъёс отчы 5 декабрёзь ватсанъёссэс сётыны кулэ. Парламент ужысьтыз мозмытӥз аслаз куриськемезъя Правительстволэн Тӧроезлэсь воштӥсьсэ Владимир Гусевез. Сессиез нуиз Александр Волков. Г. Романов. Туспутэмез В. Камашевлэн. Гожтӥськон-98 Лыдӟисьёслы вазиськон Республикаямы потӥсь газет-журналъёсты 1998 арлэн нырысетӥ нуналъёсаз ик басьтэмды потэ ке, дыртэлэ, эшъёс, почтаосы. Дыр трос ӧз кыльы ни, вуом на ай шуыса киын шонтыны. "Удмурт дуннеез" лыдӟыны мылкыд карисьёс но гожтӥськонзэс 20 декабрь берелы эн кельтэ, газетмес одӥг толэзьлы ӝегаса басьтоды. Январьлэн пумаз ке вазиськиды почтае, эшшо одӥг толэзьлы ӝегалоды на... Валаськом, гуртын улӥсьлэн кисыяз коньдон берло дыре трос уг шальтырты, соин ик котькуд копейкаез лыдъяно-чотано луэ. Озьы ке но, кӧттыр сяна, лул-сюлэмез но дырын-дырын лӥятоно. Собере, "Удмурт дунне" вань удмуртъёсты герӟась, огазеясь выллем луэ. Лыдӟисьёс сярысь сюлмаськыса, вуоно арлы газетмылэн дуныз туэлэсь пичигес тупатэмын. Тодады вайытӥськом, 1996 арын 15 августыен туэлы гожтӥськыны луэ вал 69 сюрс 740 манетэн, нош 1 ноябрьысен со будӥз 77 сюрс 40 манетозь. Вуоно арын "Удмурт дуннеез" быдэс ар ӵоже лыдӟон понна тыроно 66 сюрс манет, пенсионеръёслы, инвалидъёслы, студентъёслы гожтӥськон дун эшшо но пичигес - 57 сюрс 120 манет. Та берлоез лыдпус ваньмыз сямен почталэн кулэяськонъёсызлы кошке. Дыр ортчемъя со дун эшшо но будэ, озьы ке но, газетын ужасьёс амалъёс утчазы гожтӥськонэз ар пумозь воштытэк кельтыны. Малпаськом, та сюлмаськонъёсмес лыдӟисьёс но синйылтытэк уз кельтэ. "Удмурт дунне" газетлэн эшъёсыз эшшо но будозы. Но таӵе пичильтык курон вань тӥледлы: кельше ке газетмы, яратӥськоды ке сое, эшъёсты, бускельёсты, ӵыжы-выжыосты азьын кыл вералэ. Одӥг вӧзы одӥг йылтӥськод ке, кык луэ ни, нош таиз вӧзы эшшо мукетыз ватсаськоз на. Тӥлесьтыд ӟечгес юрттӥсьёсмы милям уз луэ ни. Со ик луоз ужмы понна ӟеч карон. Нош шекъёсмы ке вань, вералэ, гожтэ, ми соосты палэнтыны тыршом. Л. МАЛЫХ Гожтэтъёсъя отделлэн редакторез. П. И. Чайковскийлэн куараез - улэп 1890 арлэн кутсконаз Россие вуылӥз немец ужбергатӥсь Юлий Блок. Со яратоно композиторезлэсь, ӟуч курезьгуръя огазеяськонэз но Петербургысь консерваториез кылдытӥсьлэсь А. Г. Рубинштейнлэсь куаразэ магнитофон лента вылэ гожтыса, пыраклы кельтыны малпаз. Со дырысен даурлэсь ятыр дыр ортчиз ни. Фонограммаен валикъёс пӧртэм архивъёсы сюризы. Ю. Блоклэсь ужъёссэ утчанъя туэ гужем Клин городысь Чайковскийлэн музей-юртысьтыз япониысь специалистъёс шедьтӥзы но тодмазы П. И. Чайковскийлэсь куаразэ, кудӥз лента вылэ гожтэмын вал январь толэзе 1890 арын. Шаерчи В. РОГАЛЕВ. Шараяны лэземын ӧй вал Атом "губи" али но син азяз Дунне понна одӥг гуртлэн улонэз-вылонэз ма меда? Син шоры адскисьтэм тузон пыры ке шат? Озьы малпано, Ныргында шоры но учкыса. Нош мукет мертэтэн мертаса, туж пичи гуртлэн но сюресэз люкиськонтэм герӟаськемын дуннелэн бергаменыз. Армие мынӥсь пиосмы кыӵе но шаеръёсы уг вуо, кыӵе но зарезьёсты уг ортчо - таизэ асьсэос гинэ тодо. Война аръёсы но со бере Ныргындаын будэм воргоронъёс но утизы ӝыны Европаез, воинской долгзэс нуизы Китайын, Северной Кореяын, Монголиын, Кубаын, лёгаськем пытьызы кылиз Афганистанэ, Чечняе. Туннэ нимысьтыз вераме потэ огез гуртомы сярысь. Со - Владимир Михайлович Сундуков. Странамылэн ож сюресэз герӟаськемын Ныргында гуртысь пор воргоронэн но. 1954 арын 19 сентябре Тоцкая станция дорын СССР-ын нырысьсэ музъем вылын пуштытэмын вал атомной бомба. Сое ас синмыныз адӟиз землякмы но, Белорусиысь миномётно-ракетной частьын служить карись солдат. Тоцкой станцие Могилев областьысь соосты вутто нимысьтыз эшелонэн, сентябрёзь уен-нуналэн дышето атомной бомба пуштэм бервылысь утиськон амалъёслы. Владимир Михайлович верамъя, станция котырысь гуртъёсын одӥг мурт но улӥсез ӧй вал ни, соосты эвакуировать каризы мукет районъёсы. Сундуковлэн частез бомба пуштытон дорысь 9 искьемын сылӥз. Пушкаосты интыязы землянкаосы, шобыртӥзы маскировочной сеткаен. Солдатъёс улӥзы ӟеч лэсьтэм блиндажъёсын. - Ядерной испытание ортчытон нуналэ милемлы сётэмын вал куинь пӧртэм сигнал, кыксэ вунэтӥ ни, - тодаз вае В. М. Сундуков. - Берпуметӥезлэн нимыз - "Радуга". Соя, бомба пуштэм бере, артиллеристъёс 40 пол гаубицаосысь ыбыны кулэ вал. Ваньмы сьӧд пиялаен противогаз дӥсям. Со ик утиз синтэм кылёнлэсь. Ядерной зарядлэсь пуштэмзэ мон ӧй адӟы, нош инбамозь ӝутскем "губилэн" тусыз али но син азям. Сьӧраз вань улэпсэ ӝутӥз. Ялан будыса, тӧл пельтэмъя каллен гинэ музъем валлин кошкиз. Кыкетӥ нуналаз кыкетӥ батареяез (отын служить кари мон но) тревогая ӝуто но машинаосы пуктыса келяло пуштэм интые, улэп кылем адямиослы юрттон понна. Потӥ куинь гурт пыр. Коркаос ӝыныезлэсь ятырез сутскемын, коръёс кир-пазь луэмын. Калыкез, валамон ини, азьвыл ик отысь ваньмыз келямын вал. Эскерон вылысь, юри пуктылэм вуж техника: танкъёс, самолётъёс, пушкаос, автомашинаос но мукетыз пӧрмизы ӵыжатэм кортлы. Сундуков татысен нырысьсэ улэпкын адӟе Советской Союзлэсь Маршалзэ Советской Союзлэсь куинь пол Геройзэ Георгий Константинович Жуковез. - Со кошкиз легковой машинаен. Бордаз возьмасьёсыз вал. Милесьтым колоннамес дугдытӥзы, маршаллэсь машиназэ лэзён вылысь. Ядерной полигонысь ми кошким, кык нунал ортчыса. Берытским службамес нуоно интыямы ик. Сюрес вылэ потэмлэсь азьло асьмеды но, техникамес но радиация тузонлэсь миськизы "ӵужизы", химической "мунчо" пыр поттӥзы. Армиысь бертыса, Владимир Михайлович ужаз вордскем гуртаз. Радист но, диспетчер но, завхоз но вал, собере - сельсоветлэн бухгалтерез. Али витетӥ арзэ шутэтске ни. Кузпалэныз Нина Ананьевнаен ӵош вить пинал будэтӥзы, пыд вылазы султытӥзы. Ваньзы соос ужало ни. Верало на, Сундуковъёс туж ярато кырӟаны. Владимир Михайлович но Нина Ананьевна мылысь- кыдысь ветло "Ныргындыш сем" фолькор ансамбле. Шумпотоно солдатлэн тазалыкезлы: сыӵе кышкыт интые шедьылыса но, ассэ ачиз утьыны быгатӥз. Соку Сундуков но, мукетыз но ӧз тод на атом "губилэсь" шукырес, шимес луэмзэ. Шарае потӥз алигес гинэ, "секретъёсты" утьыны лэземзы бере. Р. ТОКМУРЗИН. Каракулино район, Ныргында гурт. Удмурт радиолы - 65 Бурдъясе но, буйгатӥсе но... 1954 арысен радио возисько. Али но коркам тужгес кулэ арбери со. Кыӵе ке муген вераськемысь дугдэ ке, соку ик ас корка пушкам но йыромисько. Вань ужме куштыса, Пургала жингыртӥсько: "Радио чалмиз. Тупатоно вал". Монтёръёс вуо, тупато, улонэ нош ик ас ӧраз пыре. Удмурт радиолы 65 ар тырмемен валче, отын ужасьёсты ӟечкыласьёс трос, дыр. Со озьы ик луыны но кулэ. Озьы ке но, тужгес вылӥ дунъясь - радиокылзӥсь. Кемаласен ай, ӵукналы быдэ, радио пыр нырысь ик кылыны луэ вал Пимен Касаткинэз но Милитина Гавриловаез. Капчи, йыгмыт, либыт но оскымон куараенызы соос адямиослы ас нуналзэс лад-лад радъяны мылкыд сётъяллязы. Али но радио со ужзэ чот-чот нуэ. Котькуд адямилэн ас улоназ, шумпотон но вормон сяна, кайгу но, ёрмон но лыктэ. Нош радио адямилы котьку юн-юн вамышъяны юрттылӥз, шонеръяз, сайкатылӥз, буйгатъяз, бурдъялляз. Турлы радиоверанъёс, арня нуналъёслы дасям нимысьтыз программаос - "Шӧкыч", "Арня ӵукна" - пель сьӧрын туннэ кадь ик кылӥсько. Кудӥз серекъятэ, кудӥз паймытэ яке мур малпаськонэ уськытэ. Секыт улон пумысь веракузы синвуаськиськом. Милитина Гаврилова туж мыло-кыдо мадьылӥз шаерысьтымы сӥё-дано но визьмо адямиос сярысь, тодматылӥз писательёслэн выль произведениосынызы. Берло ачиз ик книга но поттӥз - "Ӵыдонтэм пумиськонъёс". Улон азьлань мынэмъя, пӧртэм техника вуэмен, радио ужзэ туж узырмытӥз но тунсыко кариз ини. Быгатыса дасям веранъёс вутто корреспондентъёс шаермылэн котькуд сэрегысьтыз. Кылзыны милемлы капчи, нош сюлэмез но визез пызьыртӥсез отын кӧня. Радиоверанъёс огшоры гинэ радъямын ӧвӧл, пӧлат-пӧлат кырӟанъёсын чебермамын. Узыр, чебер но визьмо пуштросъем адямиосты утчаны-шедьтыны быгатэмзылы ту-у-ж шумпотӥсько. Дасо ар талэсь азьлогес егитъёс вуизы, нош ужазы шекъёс чик уг шӧдско. Кылзӥськод но, малпан кылдэ: ма, таос вордскыкузы ик-а, мар-а радиоын ужаны кылдэмын? Кӧня сьӧрло ветлон, адямиосын пумиськон, тыршон, нош соослэн семьяоссы но вань, дыр, ук? Пимен Касаткинэз мон радиоатай шуи ке, янгыш уз луы. Уть ай, кӧня пиос будэтӥз ни ас вӧзаз. Кыӵе быгатыса ужало Виктор Ивашкин, Владимир Михайлов, Иван Аркашев, Валерий Тероков, Виктор Занчаров, Борис Петров, Юрий Кузнецов. Та егит воргоронъёс олокытчы но вуо. Котырысь улонэз адӟыса, мылкыд ӵемысь куашка. Нош "Визыл" программаез кылзӥськод но - я отысь, я татысь умойзэ, адӟем каронозэ, саессэс пужалляса ужасьёсты кылӥськод но малпаськод: ма, укыр ваньмыз ик сьӧд ӧвӧл ай... Милитина Гаврилова - нылкышно корреспондентъёслэн анайзы. Егитъёс сыӵе эш бордын ӟеч ужаны дышытэк кылёзы шат? Нылкышно корреспондентъёслы кызьы тау карыны кыл уг шедьтӥськы. Раиса Куликова "Ибырвесь" радиоверан мытӥз но со удысэз лад-лад нуэ, удмурт нылкышноосты сабыр нылкышноосын тодматэ, сӥё-дано писательёсын, тодосчиосын куноын ӵош пукетэ. Поездэ но, автобусэ но пуксьылытэк, визьмо адямиосын пумиськон ас коркад ик ортче. Кызьы шум уд поты?! Нош Ольга Ведрова, Галина Кондратьева, Анастасия Гребина, Елена Тимошкина - ваньзы дасяло яркытэсь передачаос. Кылзыны пуксид ке, азбаре ужаны потонэд кылёз. Ӵыдыны уг лу. Радиоверанъёс кема уг кыстӥсько. Озьы ке но, али вордскемезлы но, пересезлы но чакламын соос. Корреспондентъёс ивортыло пӧртэм удысъёс сярысь. Мон дышетӥсь но трос нылпиё анай. Соин ик туж сӥлы карисько семья улонъя радиоверанысь нылпи утёнлы сӥзем люкетсэ. (Нуэ сое Надежда Степанова). Тыбырзэ топ-топ вешасько. Туж шудоесь туала егит анайёс "Чагыр, чагыр, дыдыке" радиоверанэн. Мон туж вылӥ дунъет сётӥсько та тунсыко ужзылы. Ас ёзъёсме жалясько, ми егит дыръя таӵе веран ӧй вал шуыса. Соку улон сыӵе вал уго. Пенсионеръёс понна но ӟеч передачаос вань. Тужгес но шумпоттӥськом, корка пушкамы чирдэмез, вӧсяськемез кылзыны луэ ке. Дэмласал тани мае: арня нуналэ ужась школаос кылдытоно, отын ӟеч сямъёслы дышетоно. Со туж кулэ уго егит калыклы таяз дуннеын шонер, валаса улыны. Сыӵе наукаез милесьтым ватыса, алыса возизы. Экономикая но политикая веранъёс радызъя мыно. Милемлы, огшоры адямиослы, солэсь ятырез кулэ но ӧвӧл. Ӟуч передачаосты но яратӥськом но. кылзӥськом но, Галина Лузина ас сярысьтыз ӟеч малпан кельтэ. Куарая, техникая ужасьёс но быгатыса, сюлмо тыршо. Вольытэсь веранъёс, чылкытэсь куараос, крезьгуро ужъёс... Дэмланъёсы таӵеесь: нылкышно поэтессаосмес Алла Кузнецоваез, Галина Романоваез, Людмила Кутяноваез, Татьяна Черноваез эфире поттоз, дыр, Раиса Куликова аслаз "Ибырвесяз". Туж бадӟым тау тӥледлы, радиоын ужасьёс! В. И. КОЛЕСНИКОВА, дышетӥсь. Пичи Пурга ёрос. 01 ивортэ Песятайзы бырон вае вал... Ӵукнаысен ӝытозь огпӧртэм юон кинэ меда шудо кариз ини? Ижевскысь Восточной посёлокын улӥсь 45 аресъем токарь Валентин Лысов омырин ик данэ ӧз поты. "Редуктор" заводын ужам сяна, коньдонэз вань дыръя юылӥз. Таяз шутэтскон нуналэ но ӵукна ик магазинэ дыртӥз. Кышноез но, Вера Васильевна, ужтэк кылем мурт, картэзлы пумит ӧз луы: солы но шедёз уга. Вылаз ик, доразы куноос ӵапак пыризы. Лысовлэн кык тодмоосыз, ужасьтэм воргоронъёс, огез но уз алӥське дась сиёнлэсь- юонлэсь. Огзэ бутылкаез бушатӥзы, кыкетӥзэ... Тамак ӵын пӧлысь бусмем синъёссы ог- огзэс ӧз адӟе ни, лэся. Кин ма дауртэ - валась ӧвӧл. Лысовъёслэн юэмъёслы дышыны вуэм куинь внукъёссы: 4 аресъем Алёша, 2 аресъем Даша но 7 толэзьем Наташа ас понназы шудо, шоразы учкылымтэзэс шӧдыса, ма лэсьтэмзы потэ сое лэсьто. Юонэн усыкмем мӧйыос умме усизы, огез кунозы но пӧлазы аналскиз. Лысовлэн кысымтэ тамак пумыз ас ужзэ лэсьтӥз: кенжем бумага йӧтӥз валес борды, отысен - укно шторае. Тыллэсь лопыръяськемзэ нырысь ик валаз Алеша. Кесяськыны кутскиз. Умой коть, тыл газ плита дорозь ӧз вуы. Секыт вераны, маин юондырзы йылпумъяськысал. Тау шуыны кулэ бускель кышномуртсылы. Со быремлэсь утиз нылпиосты но, мӧйыосты но. Сизьым толэзьем Наташа сутскем яраосын больницае келямын вал. Врачъёс вань луонозэ лэьтӥзы, пичи нылашез йӧнатон понна. Со улэп кылиз. Нош волялозы-а яраосыз? Аръёс ортчыса, оло, ваньмыз ортчоз. Нош валалоз меда аслэсьтыз янгышсэ Лысов? Тылпулэсь потон мугзэ эскерыку тодмо луиз мукетыз но: та улыно-вылыно пу корка кемалась пыртэмын ни куашкамъёсыз радэ. Сыӵе решение кутӥллям вылэм Индустриальной районысь депутатъёс, берло быръёнъёс матэктыку. Бумага ойдо ваньзэ чида. Ас даурзэ чида сисьмем корка но. Кызьы адӟиськом, юэм муртэн куштэм тыл но сое ӧз вормы. Ярам коть, дыраз адӟисьёс шедизы. А. Емельянов, тылпу кысонъя 19-тӥ частьысь инспектор. Данъялозы земляксэс Можгаос дасясько Александр Белоноговлэсь ӝытсэ ортчытыны. Татысь центральной библиотекае та пумысен калык люкаськоз 3 декабре. Дасямын тунсыко программа. В. Лесникова. Егит дырлэн праздникез Гимнастикаез котьку ӵошатӥськом егит дырен, чеберен. Спортысь та удысын ӵошатсконъёс бадӟым праздниклы пӧрмо. Ижевскын соос одӥг пол гинэ ӧз ортчылэ ни. Кылем арня вискын дорамы нош ик быдэс Россиысь 10-14 аресъем егит гимнастъёс люкаськылӥзы. Выль вормонъёс, выль осконъёс ваизы. Синмаськымон номеръёс бӧрсязы ваиллям Москва котырысь нылъёс. Татысь Аня Павлова нырысетӥ разряд басьтон понна нюръяськиз, Саша Лиханова - мастере кандидатъёс пӧлын. Кыксы ик нылъёс вормисе потӥзы. Пиос пӧлын нырысетӥ интыосты басьтӥзы Волгоград областьысь Володя Чепель но Омскысь Егор Мартышков. Бере ӧз кыле Удмуртиысь егит спортсменъёс но. Йылпумъясь ӵошатсконъёсын Катя Кузьмина кыкетӥ интые потӥз. Бадӟым тау карем потэ Сережа Ляяинлы. "Ижпланета" клубысь егит спортсмен висьыны усьыса но, ӵошатсконъёслэсь ӧз палэнтӥськы. Вылаз ик нырысетӥ интые потӥз. Молодец! Денис Сухих куинетӥ луиз. Йылпумъясь ӵошатсконъёсын нырысетӥ куать интыосы озьы ик шедизы асьмелэн Катя Запольских, Света Шмигировская, Нина Соловьева. Э. ВАСИЛЬЕВА. Одӥг пол быръем сюрес Кыӵе луыны кулэ мурт нылпиосын ужась адями? "Нырысь ик туж яратоно пиналэз, собере ачид но мар ке карыны мед быгатод, вераськыса-алыса гинэ покчиосыз ужаны уг яра", - шуэ Можга нылпи юртысь воспитатель Зинаида Васильевна Васильева. Одӥг пол 25 ар талэсь азьло, татчы вуэмез бере, нокытчы мукет интые кошкыны ӧз быгаты ини. Озьы аналтэм нылпиос понна со зэмос анай луиз. Аслэсьтыз вань быгатонлыкъёссэ пиналъёслы сётэ - соосын ӵош ик керттӥське, вуриське, эктэ-кырӟа. Сыӵе вылэм, лэся, адӟонэз та нылкышнолэн - бӧрысь татын ик пумиськиз вуоно картэныз Юрий Ясоновичен. Со но татын воспитатель луыса ужа. Татчы шӧдтэк шорысьгес вуи, маде воргорон. Одӥг тол гинэ ужаны малпасько вал... табере тани 11-тӥ арзэ ини татын, зарни бугоръёсын. Кузпалъёслэн Васильевъёслэн куинь нылпизы. Ваньмон дыръёсазы соос анай-атайзы доры нылпи юртэ дырто. Озьы ик ачиз но Зинаида Васильевна пичи дыръяз шумпотыса татчы анаез доры бызьыса лыктылӥз - мумиз нылпи юртын вуриськись луыса ужаз. Тӥни озьы та семьялэн быдэс улонэз, шумпотонэз-куректонэз нылпиосын герӟаськемын. Мурт нылпиос шоры но соос асьсэлэн нылпиоссы шоры кадь учко: лӥято-вешало, ваньмызлы ненег кылъёс шедьто. Бен, кулэ дыръяз чурыт кылъёстэк но уг луы. Юад ке та кузпалъёслэсь, мар бордын соослэн шудзы, шуозы - нылпиос бордын, узырлыксы - озьы ик нылпиос бордын. Т. Банникова. Туспуктэмез Г. Юсаевлэн. АНАТОЛИЙ ЖУРАВЛЕВ Сьӧд нуналъёс Одӥгаз южтолэзь кӧс нуналэ, Шундыё но чебер, тылсиё нуналэ, Кытысь ке сьӧд пилем бугырскиз, Пальпотӥсь шундыё инбамез но согиз. Сьӧд кырныж йыр вадьсам лопыръя, Ныж пуртэн сюлэмез бугыръя. Ваем со мыным туж бадӟым куректон - Уд, уд вала, эше, сое тон. Секыт зӥбетэн шобыртӥз гадь вылам, Уг тырмы омыр, уг лу ни шокам. Лэчыт гижыос пыризы сюлэме, Кесьыса басьтӥзы ог люкет мугорме. Кыли табере мон сӧсыр но шудтэм, Тӥяськем корт выллем, нокинлы кулэтэм. Пушкы тыремын, уг лу ни верам, Югытэсь малпанъёс уг лыкто йырам. Кошкизы шундыё но чебер нуналъёс, Ноку вунонтэм капчи мылкыдъёс. Ортчозы, дыр, озьы ик толэзьёс но аръёс, Кельтозы сюлэмам сьӧд гожмо виштыос. Тужгес йӧнлыкоез Россиысь дано артистлы Н. С. Зубковлы - 70 арес Николай Зубков... Та нимез кылыса, пель сьӧрамы жильыртыса ӧръяськыны кутске тодмо кырӟан гур: Тани нош люкаським огазе, Нэнӥе, вордӥськем нуналад... Та кырӟан пичиысен мумы йӧлэн кадь пыӵамын луламы-вирамы, люконтэм герӟаськемын нэнэлэн, мемилэн, анайлэн тусэнызы. Сыӵе та кырӟамлы дышим - мукетыз сое быдэстыны но кадь уз быгаты... Нош кызьы кылдӥз та "Нэнӥелы" кырӟан? Со сярысь Н. С. Зубков тазьы вера: - Ог куамын ар талэсь азьло тодмо крезьгурчи Николай Шкляев филармоние дорам лыктӥз но сётӥз выль кырӟанзэ. Гурез кельшиз, нош кылъёсыз сюлэмез оломар кадь каризы. Тани со кылъёс: Ву дуртӥ, возь вылтӥ юмшаса, Ой, кӧня сяськаез мон лёгай. Та егит вунонтэм аръёсам Кӧня ныл сюлэмез ултӥяй... Мон соку Н. Шкляевлы шуи: "Кырӟанэдлэн гурез котькыӵе чебер, усто мед луоз, та кылъёсын мон сое ноку но уг кырӟа". Озьы со кема гинэ кыллиз - Александр Вотяков выль кылъёс гожтытозь. Таизлэсь кык- куинь кылзэ гинэ воштӥм, "кырӟась" карим. Гитараен шудӥсен В. Атнажевен ми сое кӧня ке пол ӵош кырӟаса утчамы. Собере радиоысь куарая режиссёр П. Коробейников та кырӟанмес плёнка вылэ гожтӥз. "Нэнӥелы" кырӟан Е. Загребинлэн пьесаезъя "Тӧдьы юсь" спектакльлы тупаз. Сое кырӟаз РСФСР-ысь дано артист Борис Безумов. Инмарен сётэм куараез ӧй ке луысал, Николай Зубков, оло, кыльысал гуртэ, луысал тракторист яке, шуом, гурт тӧро... "Тутайгуртлэсь вань бусызэ гыри, - шуэ со, - гыри, кизи, усыяй, турнай, арай, жаткаен валъёсын но, аран машинаен но ужай. (Амалтэк тодэ лыкто кырӟан кылъёс: "Нош аран машинаен араны кылё колхозады ужаны". - Т. Ч. ) Соин ик Быдӟым ож кутскытозь, 6-тӥ классэз йылпумъятозяз, со басьтыны вуиз "Отличник социалистического земледелия" знак. Соин ӵош ик вормисе потылӥз кырӟанъя, школаос куспын самодеятельностья ӵошатсконъёсын-олимпиадаосын: 1936-тӥ арын - Алнашын, 1940-тӥ арын - Пычас ёросын, собере - республиканскояз. Ож куспетӥ кариз Н. Зубковлэсь дышетсконзэ. 1944-тӥ арын Нижний Тагилэ танковой школае ыстӥзы. Отын но запевала вал. Куать ар но тямыс толэзь служить кароно луиз Николай Зубковлы, вить арлэсь кема Германиын вал. Сӧсырмем ож бервыл уг ышы син азьысьтыз... 1951-тӥ арын гинэ бертӥз Иже. Крезьгуръя училищеын дышетскиз, со сямен радио хорын но ужаз. Татысен ик визылась-жильыртӥсь гуръёссэ шедьтӥз солэн чебер баритон куараез. Нырысь ик Зубковлы тупась сюлэме пыӵамон гуръёс гожтӥз Герман Корепанов. 1953-тӥ арын кылдӥз "Тонэ возьмасько мон" (кылъёсыз А. Лужанинлэн), 1957-тӥ арын - "Кыӵе умой яратыны" (Г. Сабитовлэн), собере - "Мон тодам ваисько" (Ашальчи Окилэн), "Уй пеймыт вал соку" (И. Гавриловлэн, "Анноклэн кырӟанэз"), "Укмысо кутъёс" (А. Клабуковлэн)... 1958-тӥ арын, шаерысьтымы кырӟасьёслэн конкурсазы вормемез но Удмуртиысь дано артист луэмез бере ини, Н. Зубков дышетскыны пыре Казаньысь консерваторие. Отличиен диплом басьтэ. Собере - Ижевскысь крезьгуръя училищеын вокалъя педагог, со дыре ик Удмурт филармонилэн концертъёсаз кырӟась. 1965-тӥ арысен Николай Семенович йырыныз-пыдыныз вые кун филармонилэн ужаз, солэн художественной кивалтӥсез луэ - 1991-тӥ арозь. Пенсие потэ ке но, яратоно ужысьтыз кошкыны уг дырты - концерт программаосыз пуктӥсь режиссёр луэ. Нош пинал талантъёсыз утчанъя сое кинэн ке ӵошатыны луоз меда? Кӧня пол со нылъёсыз но пиосыз ас дораз мыр-мыр ӧтьылӥз куаразэс эскерыны (огшоры гинэ, урамысь кутыса но). 1957-тӥ арысен кутскыса, Н. Зубковлэн лэчыт учкемезтэк ӧз ортчылы огез но художественной самодеятельностья смотр, фестиваль, котьку сямен луылӥз жюриын тӧро. *** Та чырткем, сэзь-пезь бызьылӥсь, вазиськись, юрттӥсь, визькенеш сётӥсь, кулэ интыяз серекъясь-мактась адямитэк Удмурт филармониез син азе пуктыны шуг. Али гинэ, шуом, артистъёслэн гримёрноязы вал, нош син куспын учкисьёслэн кылиськон-дӥсяськон интыязы вуэм ни. Тодмоеныз но, тодмотэменыз но ӟечбуръяське, пумита, шуныт мылкыдзэ кузьма. Туннэ со - тылси но, кизили но, шунды но. Со ик пуксеттэм, озьы ик шыпыт тӧл. Туж йӧнлыко, но чеберъяськисьтэм, калыкысь потэм, калыклы матын, туж гажано, сӥё-дано артист. Н. С. Зубковлы - сизьымдон. Удмурт кун филармониын - солы сӥзем ӝыт-концерт. Вань шуныт мылкыдзэс кисьто Николай Семеновичлы дышетскисьёсыз: Галина Мурашова (Роман пиеныз), Валентина Серебренникова (кузпалэныз Евгений Серебренниковен), Галина Платонова, Вячеслав Фатеев... "Милемлы, гуртысь лыктэм нылъёслы-пиослы, музыкальной училищеын со атай кадь вал. Ваньмыз дышетскисьёсыз кадырлы адямиос луизы" (В. Серебренникова). "Куке со вераське, сыӵе быгатэ оскытыны - амалтэк соя кариськиськод. Озьы Фатеевез "Италмасысь" кыскиз музыкальной лекторие" (Евгения Копысова), ӝытэз нуись. "Со котырын - шуныт омыр, соин артэ мукетъёсызлы капчи" (Олег Поскрёбышев). "Ми солы вазиськиськом секыт куректон, лулскылон дыръя но" (Анатолий Ушаков). "Мед гинэ луоз милям бускельлы дэмен юрттон, туж бадӟым, пӧсь яратон" ("Катанчиос"). "Со мон понна - Коля агай, дышетӥз монэ шахматэн шудыны" (Александр Корепанов, композитор). "Милям ужан нуналмы кутске спорт сярысь вераськонэн... Николай Семенович улоназ пичияк янгыш лэсьтӥз: солы трос, трос, трос кырӟано вал" (Анатолий Мамонтов). "Удмурт пиосмуртъёс пӧлысь тужгес йӧнлыкоез... Туж уно тодӥсь, крезьгур дуннелэн "энциклопедиез"" (Антонина Лисина). "Книга кулэ со сярысь гожъяны. Со югдытӥсь (просветитель) гинэ ӧвӧл - бадӟым, вылӥ лулчеберлыко адями. Таӵе чебер куара Удмуртиын, оло, Россиын но, ӧвӧл ни (Людмила Ивановна Кузнецова, ӵош ужам эшез). Та кӧня ке верамъёс вӧзы ватсаны кулэ Н. Зубковлэсь эшшо одӥг, гурезь ӝужда адскымон ужзэ. Со кутскон сётӥз, сюрес усьтӥз республикаямы П. И. Чайковскийлы сӥзем музыкальной фестивальлы. 1966-тӥ арысен кутскыса, со арлы быдэ луылэ, туэ тулыс 40-тӥез вал ни. Дыр вуэмын, кызьы шуэ ачиз Николай Семенович, Гиннесслэн рекордъёсъя книгаяз сюрыны: дунне вылын одӥг фестиваль но тамында пол ӧз ортчытъяськы на. Кулэ вылэм нимысьтыз антология но поттыны. Кыӵе но бадӟымесь музыкантъёс ӧз вуылэ ни асьме шаере, соос пӧлын - тужгес устоосыз дирижёръёс: Е. Светланов, В. Федосеев, К. Кондрашин, В. Дударова... (Светланов вить пол вуылӥз!) Кытын меда, Удмуртиын сяна, такем дано симфонической оркестръёс быдэсъязы интыысь (национальной) композиторъёслэсь крезьгуръёссэс? Та "изэз" вырӟытыны туж секыт вал. Ньыль арлы огпол гинэ ке... мар со луоз. Арлы быдэ ке... туж дуно усе (бадӟымесь коллективъёс: хор, оркестр). Озьы ке но, Николай Семеновичез уд дугдыты - пужалскыса мынэ кузёос доры, министръёсын "ожмаське". 1967-тӥ ар, Быдӟым Октябрь революцилы 50 ар тырме. Г. Свиридовлэн "Патетической ораториез", кудӥз Ленинской премиен пусъемын, мед чузъяськоз! Удмурт музъем вылын. Озьы ик луиз. Со вакытэ Удмуртиысь культурая министр Аркадий Федорович Завойских сётскиз: мед луоз Зубковъя. Ачиз но Николай Семенович лыдъя: вылӥ кивалтӥсьёс ваче вамыш ӧй ке лэсьтысалзы, номыр ӧй пӧрмысал. Бен, ачизтэк но. Солы луыса бадӟым искусство ас пужыосыныз узырмытӥз удмурт калык лулчеберетэз. Со Удмурт дуннелэн оглюкетэз луиз. Нош кызьы вал? Нырысьёсаз фестиваль концертъёсы калык ӧжыт лыктылӥз. Николай Семенович, ураме потаса, ортчисьёсыз ӧтьылӥз музыкантъёсты кылзыны... Тутайгурт (Б. Кибья пал) музъем вылын ошмесъёс уг куасьмо. Дано пизэс ӟечкыланы лыктӥллям "ӝужась кизили" Светлана Кононова, уӵыос-нылкышноос Любовь Лебедева но Людмила Бимакова, крезьгурчи Александр Андреев, тӧрозы Валерий Пчельников... Сцена вылэ потӥзы вылӥ кивалтӥсьёс но: Кун Кенешлэн Тӧроез Александр Волков эшъёсыныз 14-тӥ сессия йылпумъяськем бере вуиллям. Удмурт Республикалэсь кун политикая концепцизэ кутэммы юбилярлы кузьым выллем медло, шуизы. УАССР-ысь Верховной Советлэн Президиумезлэн Председателезлэн 1971-тӥ-1975-тӥ аръёсы воштӥсезлы Н. С. Зубковлы ӟеч мылкыд каронъёссэс веразы, Культура сярысь законэ дэмланъёсыз понна тау каризы. Ӧм вералэ на, Н. С. Зубков республикаысьтымы Вылӥ Кенешлэн депутатэз но, Президиуме быръем адями но вал шуыса. Солэн тусбуез пуксьылӥз шаермылэн Данъян пул вылаз. Кун премилэн лауреатэз. Солы сётэмын Трудовой Горд Знамя орден, "За трудовую доблесть", "Ветеран труда" медальёс, данъян грамотаос... Та кылъёс, оло, кинлы ке кӧсыт потозы. Но соос сьӧрын - бадӟым улон, яркыт ӝуан. Т. ЧЕРНОВА. Н. С. Зубков. Крезьгуръя училищеез йылпумъяса, туспуктон. Н. Зубковен артэ - ӵош дышетскем эшез Р. Кутявина, пуко: педагогез М. Лифшиц но концертмейстер Т. Малых. 1972-тӥ ар. П. Чайковскийлы сӥзем фестивале лыктэмъёс Воткинскын композиторлэн музей-юртэз азьын. Ӟеч кидыслэсь гинэ ӟеч ю-нянь будэ Кидыслэн ӟечлыкез бордысь потэ ю-няньлэн удалтонэз. "Мае кизид, сое ик аралод" шуо калыкын. Соин гурт хозяйство удысын ужась кивалтӥсьёс, агрономъёс умой кидыс сярысь сюлмасько ини араны кутскем бере ик. Тужгес ӟеч бусыосысь юосты кутсало но нимаз кеносын возё. Кидысэз эскеронъя (опытной) станциос но кидыс быдэтӥсь хозяйствоос уг быгато сое быдэс республикамылы дасяны, вылаз ик, отысь ваем кидыс дуно усе. Соин ик ю- няньлэсь асдунзэ кулэстон сярысь сюлмаськись кивалтӥсьёс но агрономъёс ас гуртазы кидыс дасяло. Ортчем аре республикаысь хозяйствоосын куд-ог быдосъёслэн кидысъёссы выль арозь ик дась вал ини. Туэ юос бер вуэмен, аран ӝегатскемен, кидыс дасян шуггес мынэ. Республикаын та удысысь югдур сярысь валэктэ Гурт хозяйствоя но сиён-юон поттонъя министерствоысь валтӥсь агроном Мария Чиркова. 15 ноябрьлы 99 процентэз кидыс эскеремын вал. Со пӧлысь 75 процентэз кизьыны ярамон. 44 процентэз 1-тӥ - 2-тӥ классъем. Озьыен, гуртысь агрономъёслэн трос сюлмаськонзы кылемын на. Кин кидыс дасян понна вазьгес сюлмаськыны кутскиз ужзы но умой мынэ. Тани Красногорск районын (валтӥсь агрономзы Александра Сигова) ваньмыз ю тысь эскеремын, со пӧлысь 96 процентэз кизьыны ярамон, 47 процентэз 1-тӥ - 2-тӥ классъем. Можга районын (валтӥсь агрономзы Петр Васильев) озьы ик ваньмыз эскеремын: 96 процентэз кизьыны ярамон, 82 процентэз 1-тӥ - 2-тӥ классъем. Пичи Пурга районын (валтӥсь агрономзы Серафима Михайлова) но ваньмыз эскеремын: со пӧлысь 95 процентэз кизёно кадь, 64 процентэз 1-тӥ - 2-тӥ классъем. Та районъёсын котькуд аре кидыс вазь но умой ӟечлыкен дасяло, сыӵе кидысэн кизем юоссы арысь аре удалто. Котьку сямен ю тысь дасяны уг дырто Юкаменск районын (валтӥсь агрономзы Мария Трясина), отын 47 процент гинэ кизьыны ярамон, нош 1-тӥ - 2-тӥ классъемез 24 процент, Завьял районын (валтӥсь агроном Надежда Четкарева) 55 процентэз кизьыны ярамон, 1-тӥ - 2-тӥ классъемез 39 процент, Шаркан районын (валтӥсь агрономзы Анна Наговицына) 59 процентэз кизьыны ярамон, 1-тӥ - 2-тӥ классъемез 38 процент. Кызьы адӟиськом: берло верам районъёсын лыдпусъёс уродгес, нош Завьял но Шаркан районъёсын кидыссы но ваньмыз эскеремын ӧвӧл на. Нош толалтэ ю тысез чылкытатын но куасьтыны уката шуг, соин ик берло верам районъёслэн вуоно арын сюлмаськонзы трослы будоз. Тросэз хозяйствоос ваньзэ ӟег лудъёссэс но ӧз кизе, кын улэ гыронзэс но ӧз йылпумъялэ. Арлэн пумаз куазь туж кезьыт уг улы на, соин выль арозь кулэ вань кидысэз кизьыны ярамон карыны. Н. Возисов. Куасъёсты вунэто Можгалась физкультурая но спортъя отдел туэ 29 ужрад ортчытӥз. Пӧртэм секциосы ветлӥсьёслэн лыдзы 25 сюрс пала люкаське. Но коньдонэн шуг-секытъёс кылдэмен валче, куд-ог школаос капчи атлетикаез, куасъёсты вунэтыны ӧдъязы, нош волейбол, басктебол сярысь веранэз ик ӧвӧл. Таӵе югдурез лыдэ басьтыса, районысь администрацилэн коллегиез предприятиослы, организациослы, дышетскон учреждениослы вазиськиз, ӵошатсконъёс, кроссъёс, спортивной спартакиадаос радъялляны курыса. Выльысь "Тазалыклэсь нуналъёссэ ортчытъяны кутсконо. Н. Липина. Идна батырлэн пушъетэз Туж вашкала выжыоссэ утчаса, Августа Васильевна таӵе малпанэ вуэ: соос, Будинъёс, Идна батырлэн пушъетъёсыз луо. Солдыр гуртысь (Глаз ёрос) бадӟым шур выллане тубыса, Лемлэн Чупчие усён вожаз интыяськиллям Андрей Будин но солэн ньыль батыр пиосыз. Со вылэм 1725-тӥ-1726-тӥ аръёсы. Малпалэ ай, макем пасьтана вӧлскиз ни со дырысен та выжы. Августа Васильевналэн правнукъёсыз но вить кузя ини. Туэ со шуркынмонлэн 24-тӥ нуналаз 86 арессэ тырмытэ. Шудо адями, шуозы кудӥз. Бен, Августа Васильевна улытозяз весь бадӟым шуд, югыт пала кыстӥськыса улӥз, нош трос ик вал пилешо нуналъёсыз: бубызэ кулак каремен, артистэ дышетсконзэ азьланьтыны ӧз быгаты, туж уно ыштонъёсты адӟиз, тужгес секытэз - 18 аресъем Юра пизэ ыштэмез (ассэ быдтӥз), Светлана нылызлэсь но улонзэ висён чигтӥз-уретӥз. Августа Васильевна юн, куасалтыны луонтэм сямыныз ваньзэ вормиз. Нылпиоссэ будэтэм сяна, журналистика, книга поттон, калыкез дышетон удыслы нокыӵе кужымзэ ӧз жаля, кивалтон ужъёсын но ӟырдыт вал. Августа Васильевнаез егит дыръяз тодӥсь муртъёс верало, кыӵе со синмальдымон чебер, зорись синмо вылэм. Али но шораз учкыса паймиськод тылсиясь синъёсызлы, сюлэм ӟырдытэзлы, сайкыт визьмызлы. Солэн сыӵе кужымез, улонэз яратэмез зэмзэ но, дыр, юн выжыосыз бордысь потэ. Музъем сое уте. Берло кык гужемзэ (южтолэзьысен коньывуонозь) Августа Васильевна Москва вӧзысь Черусти дорын пиезлэн Валерий Петровичлэн дачаяз ортчытӥз (пиезлы 64 арес ини, подполковник, авиациысь инженер). Туэ со Юра внукезлэн сюаназ шулдыръяськиз, правнучказэ, Таняез, эркияз. Тазалыксэ но эскеризы, вылӥ кивалтӥсьёсты эмъян больницае нуллӥз отын ужась кенэз. Но "бабуля Гутя" ас эмъяськон амалъёсызлы, оло, золгес оске: радикулитэн курадӟыкуз, мокрицаез (нюртурынэз) кус вадьсаз шуныт биняса возиз. Огвакыт огназ утиз но утялтӥз сад-бакчазэс (куать сотка, вӧзаз ик - нюлэс) - ваньмыз кошкемын вал. - Кылем арын, - шуэ со, - ачим сайки со бакчаез, выжыосыз порылӥ. Картофка юн удалтӥз. Туэ но ма гинэ ӧй вал: морковь, горд кушман, тыква, кабачки, помидор, перец, туж таза кубиста, уно яблок, эшшо - вишня, слива, сутэр, крыжовник, эмезь, узы, боры. Нош розаос кыӵеез но ӧвӧл! Озьы ке но... Ас вордскем шаерзэ, Уд-Лем палъёссэ, Иж карзэ Августа Васильевналэн нокыӵе шуныт вож сэреген воштэмез уг поты. Солэн вань аслаз чебер "дачаез" - Кильмезь дурын, Сюрекын, пичи гинэ коркаез, бакчаез. Отын со яратэ копаськыны (соиз жаль, поездэн мыныны уг луы ни - рельсаосыз таркаса быдттӥллям). Отын со гожтӥз ас улонэз, выжыосыз, ортчем сюресэз сярысь "Шудтэм шуд" книгазэ. Лыдӟисьёслы та книгаысь дэмласьком одӥг люкетсэ, кытысь адӟыны луэ Удмурт театрлэсь "тэтэ карись" вамышъёссэ. Отын валтӥсь инты басьтӥз Александр Васильевич Сугатов, кудӥзлы туэ тырме 100 арес (вордскем толэзез но ку кулэмез тодмо ӧвӧл). Татысь ик адӟиськом улэпен Куӟебай Гердэз... Т. ЧЕРНОВА. Артистка луэме потэ Милемды, педтехникумысь сцена вылын шудыны, кырӟаны, эктыны быгатӥсь усточиосты - Малых Катяез, Саратов Анатомиез, Титов Пантелеез но монэ, - 1928-тӥ арын Ижын ик усьтӥськем театральной курсэ дышетскыны ыстӥзы. Мон почтаын ужась Коля братэным ӵош квартираын улӥсько вал. Театральной курсын дышетско шуыса верай но, солэн вожез потӥз ук! - Артиска луыны турттӥськод ке, кошкы мон дорысь! Мон тынад братэд ӧвӧл ни. Пыддэ но эн лёга ни дорам! Озьы ке но, мон театральной курсын дышетски ик. Туж артистка луэме потэ вал уго. Шудэмме, кырӟамме но бен ушъяллязы. Техникумлэн директорез но Федотов Гаврил Федотович шудбуро сюрес сӥзьыса келяз. Коля братэ дорысь кошки. Нырысь патерын улӥ, собере общежитие мынӥ. Театральной курсын дыръям тодматски Куӟебай Гердэн, Михаил Тимашевен. Матысь эшъёсы луизы Игнатий Гаврилов, Клава Фанталова (Гаврилова), Михаил Петров, Афанасий Лужанин. 1930-тӥ арын Удмуртиысь писательёслэн съездзы люкаськиз. Ми, театральной курсын дышетскисьёс, съездлы концерт дасямы. Отын, котьку сямен ик, Малых Катяен ӵош кырӟамы. Куӟебай Герд но кык- куинь удмурт кырӟанъёсты кырӟаз. Куараез векчи, нылкышноослэн кадьгес шуод-а, мар-а, туж чылкыт, чебер, кужмо. Арганэн солы Коробов Миша шудӥз кадь. Герд сцена вылын зэмос артист - веськыт, капчи, сэзь. Вылаз пурысь костюм, тӧдьы дэрем, сьӧд галстук. Чилясь сьӧд йырсиез "подпольку" ӵышкемын но, паллян пала висатыса, вольыт сынамын. Ымнырыз капчи мылкыдо, пальышась. Солэсь кырӟамзэ ми сцена вылысь занавесъёс сьӧрын сылыса кылзӥм-учким. Концерт бере Герд сцена сьӧры - ми доры вуиз. Катяен монэ матаз ӧтиз, киосмес кутылӥз, кырӟаммес ушъяз но шуиз: - Мон, мусоосы, юри тӥ понна кырӟан гожтӥ. Сое тӥ гинэ кырӟалэ, ява! Нырысь гурзэ возьматӥз, собере ини сое кылъёсын герӟаса кырӟаз. Гурез но, кылъёсыз но аслаз вал, дыр. Кылъёссэ кагаз вылэ гожтыса сётӥз. Кӧня ке чурзэ но гурзэ али но тодӥсько на: Басьто, басьто мон Марья, Ой, ляльчи Марьяез... Котькуд куплетэз огкадь йылпумъяське вал: "Ой, визьтэм удмурт пи". Кылъёссэ дышетыны но, кырӟаны но мыным ӧз кылды. Монэ, кулак ныл шуыса, театральной курсысь уллязы. Со сяна, Куӟебай Гердэн ноку но ӧй пумиськылы ни. Тятямес кулаке поттэмен, мылкыдме бурдъясь малпанъёсы, будон сюресэ чылкак куашказы, пытсаськизы. Кулакын сое арен ӝыныен гинэ возизы ке но, улонам секыт югдур кылдӥз. 1929-тӥ арлэн пумаз "Удмурт коммуна" газет тазьы гожтӥз: "Удмурт театрлаьной курсын кулак ныл Будина Августа дышетске. Улляно кулак нылэз отысь. Сюрес ӧвӧл сётоно кулак гыжкалъёслы!" Та статьяез гуртысьтымы Филипп гожтӥз, кожасько, ватэм юзэ шараяммы понна мыным вожпотонзэ берыктыса. Театральной курслэн директорез (со ик Удмурт клублэн кивалтӥсез но режиссёрез) Сугатов Александр Васильевич вал, завучез - Тимашев Михаил Николаевич. Тимашев ялан "ас пушказ" улӥз. Сое кыӵе ке секыт малпанъёс, адӟонъёс курадӟытӥзы кадь. Милемын, урокъёсын сяна, ӧз пумиськылы, ӧз вераськылы. Нош Сугатов котьку милемын ӵош, ми пӧлын вал: концерт-а дасяськом, пьеса бордын-а выриськом яке сцена вылын шудӥськом-а, радио пыр передача ортчытӥськом-а. Ӵем гинэ общежитиямы но вуылӥз. Со вуоно артистъёсты туж сюлмаськыса будэтыны тыршиз. Ми но бен клубысь кӧлыны гинэ кошкылӥм, шуыны луэ вал. Ми Малых Катяен маин ке но висъяськылӥм бере (кырӟам, эктӥм, пьесаосын валтӥсь нылкышно рольёсты шудылӥм), Сугатов милемлы тросгес дырзэ висъялляз кадь. Сое эшъёсмы но, оло, шӧдылӥллям. Соин, кожасько, мон кулак ныл шуыса газетэ гожъямзы бере, Сугатов вылэ но пож ву киськаны кутскизы. "Кулак нылпиос" мон сяна но дышетскизы ке но, соос сярысь газетэ ӧз гожтылэ ук! Тужгес но жоб выризы, атасъяськизы Широбоков Захар, Ложкин Вячеслав кадь азьтэм, пӧрмостэм дышетскисьёс, берло лушкаськон, йыруж лэсьтон сюрес вылэ вуэм адямиос. Ӧвӧлзэ но вань карыса, саптаса, сыӵеос газетъёсы гожъязы, ОГПУ-э, партилэн обкомаз, горкомаз, РКИ-е чагиськылӥзы, комсомоллэн Ижысь горкомаз, Дэбесысь райкомаз ивортылӥзы: театральной курсын кулак ныл Будина Августа дышетске; Сугатов театральной курслэсь, Удмурт клублэсь ужзэс куашкатэ; кулак нылпиосты бурд улаз возе, ужасьёслэсь, куанеръёслэсь нылпиоссэс ултӥя, сюрессэс ворса; Будинаен кузпалъяськыны малпа; Тимашев кулакъёслы дурбасьтӥсь произведениоссэ лыдӟыны дэмла; Будина Августа, Малых Лидия, Гаврилов Игнатий, Данилова Степанида - кулак нылпиос, Малых Катя - спекулянтлэн нылыз, Павлова - поп ныл, Саратов но Козлов - правоуклонистъёс. Пумтэм-йылтэм чагиськонъёс. Дэбесысь райкомол ивортэ: Будина сярысь чагиськонъёс - юнме супыльтон, кыл вӧлдон гинэ. Солэн семьяез коммунаръёс. Сугатов 1929-тӥ арын партчисткаез умой ортче. Выль но выль чагиськонъёс вуэмен, сое выльысь но выльысь партилэн обкомаз эскеро, курсамы комиссия лэзё. Бератаз ини, 1930-тӥ арын, Сугатовез партиысь уллян, ужысьтыз куштон сярысь верасько. Сугатовен ӵош мон Москвае но ветлӥ зэмлыкез утчаны, но пайдатэм. Пинал визьмыным соку мон номырзэ но ӧй валалля, ӧй тодылы. Сугатов ӟеч дышетскисьёсыз- усточиосыз понна, озьы ик мон понна но сюлмаське, курсэ кельтыны сюлмаське шуыса малпалляй. Мон сярысь лушкем малпанъёссэ но ӧй шӧдылы. Солэн кышноеныз ялан пумиськылӥм, эшлыко кусыпъёс возим. Пичи пиеныз но шудылӥ. Ваньзэ та супыльтонъёсты мон берло аръёсы архивъёсысь гинэ тодӥ ини. Вакчияк Мае лыдӟо уваос? Йылпумъяськиз Москваын потӥсь газетъёслы гожтӥськон. Ма бен лыдӟозы вуоно аре, кылсярысь, уваос? Соос тужгес но ярато вылэм "Спид-инфо" газетэз. Сое басьтоз 273 мурт. Мукет изданиос Ува районэ туж ичиен вуозы. "Известия", "Советская Россия", "Сельская жизнь" но куке но дано луись мукет газетъёс - чиньыен лыдъямон гинэ. Калык яратэгес шаерамы потӥсь изданиосты. "Удмуртская правдалы" сюрс но ӝынылэсь уно адямиос гожтӥськизы ни. Вань гинэ лыдӟисьёссы асьме "Известиослэн" но "Удмурт дуннелэн". Оло матынгес луэменыз, оло дунтэменыз, но ваньзэ азьпалтэ ёрос газет. Сое ог кык сюрс семья но организация басьтоз. Таизлы гожтӥськон толэзь пумозь мыноз на, озьыен, "Увинская газеталэн" лыдыз эшшо но будоз. П. ЛЮКИН. "Пиртэш юбилей гинэ" Тазьы лыдъя Александр Белоногов 65 арес тырмонзэ. Озьы ке но, кылбурчи таӵе дыръя уг быгаты, мышсэ учкылытэк ("сюлэмме чепыльтыса, ваньмыз-ваньмыз тодам лыктэ пумтэк"), озьы ик азьпалзэ малпа ("потэ на азьланьтэм пумъяськымтэ егит дыр кырӟанме"). Сыӵе со, кылбурась сюлэм: туннэ нунал югыт шумпотонзэ уг ке кузьма, шудэн тылсияськись азьпал нуналъёслы оске, нош сюресэз бусэн ке ӵоктаське, ортчем вамышысьтыз ворпо-ворпо адӟемъёссэ тодаз вае. Александр Егоровичлэн сыӵе тодэ ваёнъёсыз кылемын Алнаш музъемлэсь, куке со гожъяськон удысэ нырысь вамышъёссэ лэсьтӥз берлогес тодмо луэм писательёсын ӵош. Макем ӟырдытэсь чузъясько вал соку кылбуръёс! Александр Белоноговлэсь кылбурамзэ кылзо Геннадий Красильников, Герман Ходырев но Семен Шихарев. Запасысь полкъёс Подвигъёслэн пытьыостӥзы Сталинградэз утись Всеволод Никитич Широбоков мур вӧсь луыса тодаз вае таӵе учырез. "1943 арын март толэзе Пичи Пургалан пумиськи Кыква гуртын ӵош улэм Г. В. Вахрушевен. Григорий Васильевич, ожын пыдыз сӧсырмемен, кияз бодыен ветлэ вал. Но ӵуказеяз ӵукна ик сое выльысь фронтэ басьтӥзы". Всеволод Никитич мон доры куронэн вазиськиз, ӧй, пе, басьтӥськысал-а запасысь 18- тӥ стрелковой бригадаысь азьвыл офицеръёсты утчан борды. Уго соос пыр Удмуртиысь пиос фронтэ кошкизы. Запасысь подразделениосын тунсыкъяськемзэс веразы мукетъёсыз но тодмоосы. "Мынам атае Филипп Григорьевич Вахрушев войналэсь азьвыл колхозэн кивалтӥз. Но лек ожмаськонлэн нырысетӥ нуналъёсаз ик армие басьтэмын вал, шедиз Юськие интыяськем запасысь полке. Со фронтэ келяно пиосты дасяз. Быриз Ф. Г. Вахрушев лейтенант 1944 арын Юрьев (Тарту) город понна секыт ожмаськонын", - маде Кыкваысь Дмитрий Филиппович Вахрушев, "Знак Почёта" орденлэн кавалерез. "Мынам атае Михаил Михайлович Прозоров 357-тӥ стрелковой дивизиен ӵош 4 ноябре 1941 арын келямын вал фронтэ, нош 1942 арын толалтэ быриз Смоленск котырын. Смоленск котырын ик 1943 арын быриз мынам агае Николай Михайлович Прозоров но. Службазэ со ортчиз Пичи Пурга районэ интыяськем запасысь полкын", - тодаз вае Шаркан районысь Сосновка гуртын улӥсь Руфим Михайлович Прозоров. Атайзэ но агайзэ ыштэм сяна, солэн Геннадий агаез но 1944 арын Прибалтика музъем вылэ кылиз. Ваньмыз уг тодо, Ижевсклэн уй палаз запасысь 23-тӥ полк интыяськемын вал. Отын война аръёсы ожгарчиосты дасязы. Соку гудэм окопъёслэн бервылъёссы "Машиностроитель" шутэтскон юрт дорын туннэ но адӟисько на. Самой отын службазэ ортчиз Селта районысь лейтенант Петр Владимирович Еманов но, отысь ик со келямын вал Сталинград фронтэ. "Мынам атае быриз Сталинград дорын 1942 арын сӥзьыл", - вера Петр Владимировичлэн пиез Алексей. Одӥг пол Шарканын пумиськылӥ Григорий Алексеевич Князевен. Тодӥ: со 1941 арын августысен 1942 арын ноябрёзь запасысь 36-тӥ полклэн 18-тӥ бригадаезлэн политрукез вал. Та бригада соку Пичи Пургалась Юськи станцие интыяськиз. 1943 арын гужем- сӥзьыл офицер Г. А. Князев Воронеж фронтысь 8-тӥ гвардейской воздушно-десантной дивизиен ӵош ожмаськиз. Тодаз вае таӵе учырез. Полклэн командирез Григорий Алексеевичез разведка ортчытыны косӥз. Г. А. Князевлэн ротаез матэктӥз тушмон доры, но гитлеровецъёс сое синйылтӥзы, котыртыны ӧдъязы. Кутскиз секыт ожмаськон. Асьмелэнъёслэн патронъёссы бырыны кутскемен, уже кутыны ӧдъязы гранатаез. Одӥгез граната вӧсь кариз Г. А. Князевез но. Лейтенант йырвизьзэ ыштыса пограз. Но ваньмыз ортчиз. Азьвыл фронтовик-гвардеец дораз Отечественной войналэн орденэныз берытскиз. Быдӟым Отечественной войналэн ветеранэз Г. А. Князев ӵемысь тодаз вайылэ запасысь 36-тӥ полкын ӵош служитьтэм эшсэ, полклэсь политруксэ И. Д. Малыхез. Иван Дмитриевич Якшур-Бодьяын вордскемын. Ваньмыз та адямиос атай музъеммес утён понна улонзэс ӧз жалялэ. В. Поздеев, запасысь капитан. Дышето пумиськонъёс Тунсыко ортчо Удмурт кун университетын дышетскись студентъёслэн занятиоссы. Пӧртэм ужрадъёсын но пумиськонъёсын тырмемын соос. Тани филология факультетысь журналистика люкетысь 2-тӥ курсысь студентъёс одӥгзэ уроксэс сӥзизы "Новый регион" телекомпанилэн директореныз Андрей Вахрушевен пумиськонлы. Студентъёсты со тодматӥз ужан амалъёсынызы, юанъёслы валэктонъёс сётӥз. Андрей Вахрушевен пумиськылыса, дышетскисьёслэн иворъёс вӧлмытон удысэ мынон сюрессы трослы узырмиз. Мукет но сыӵе пумиськонъёс студентъёсты матэ каро быръем ужзылы. Р. Танасева. В. В. Гусев сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Владимир Васильевич Гусевез мозмытоно Удмурт Республикаысь Правительстволэн Тӧроезлэн воштӥсез должностьлэсь ачиз куремъя. Удмурт Республикаысь Кун Кенешлэн Тӧроез А. А. Волков. Ижевск город, 1997 арын 26 ноябре � 528-И. Аспал артистъёссэс данъялозы Куарусён толэзе Россия Федерациысь дано артисткалы, Удмурт шаерысь калык артисткалы Валентина Александровна Загуляевалы тырмиз 60 арес. Алнаш районысь Усо школаез йылпумъяса, дышетсконзэ азьланьтӥз Ленинградысь театръя училищеын. Отӥяз пырак улонзэ Удмурт кун театрын ортчытэ. Кӧня рольёс шудэмын, кӧня образъёс кылдытэмын! Артисткаен данъясько вордскем палъёсыз. Сое сӥлы карыса ортчытъяло пумиськонъёс. 6 декабре В. А. Загуляевалэн творчествоезлы сӥзем ӝыт радъямын луоз Чумолё гуртын. Куное ӧтемын драмтеатрын ужась мукет эшъёсыз но. Ӵуказеяз, 7 декабре, соосыз витё Кузёбай культура юртын. Буре ваёзы ӵош ужам эшсэс, Россия Федерациысь дано артистэз Сергей Марковез. Угось туэ солы 50 арес тырмысал. Озьы ик пумиськонэ ӧтемын на артистлэн кузпалыз но ӵыжы-выжыосыз. Н. ПРОКОПЬЕВА. Ӟеч мылкыдын Гужем шутэтскемзы бере, дышетскон борды ӟеч мылкыдын басьтӥськизы пинал усточиослэн школа-интернатысьтызы нылпиос. Куарусён (сентябрь) толэзе пиналъёс пумиськизы культура удысысь дано ужасьёсын Валерий Митрофановен, Василий Морозовен. Куӟебай Гердлэн улэмез но ужамез сярысь вераз тодмо тодосчи Фома Ермаков. Ваньмыз та кенешъёс удмурт кылын вал. Туэ дышетскыны лыктэм покчиос тодматскизы городэнымы. Тямысэтӥ классын дышетскисьёс Ирина Михайловна Вахрушевалэн кивалтэмез улсын пуктӥзы шундылы сӥзем крезьгуро выжыкыл. Возьматӥзы сое интернатамы но кык номеро школа-интернатын дышетскись нылъёс но пиос азьын. Кемалась ик ӧвӧл ортчиз крезьгурлэн дуннеысь нуналэзлы сӥзем концерт. Отчы мылысь-кыдысь пыриськизы дышетӥсьёс Марианна Макаровна Камитова, Татьяна Николаевна Шамшурина, Лия Васильевна Сеняшина но школа-интернатысь дышетскисьёс. Вуылӥзы пиналъёс симфонической оркестрлэн концертаз. Операя но балетъя кун театрын учкизы "Терем-теремок" крезьгуро выжыкыл. Ужзэ выльдӥз редколлегия (кивалтэ воспитательница Евгения Фёдоровна Иванова). Нырысетӥ газетсэ сӥзиз со гужем шутэтскон нуналъёслы. Пинал суредасьёс но музыкантъёс удысэнызы герӟаськем котькыӵе ужез быдэстыны дась. А. Замараева. Журналистъёсын пумиськонъёс Бусыын кузёяське... йӧны Кылем вторнике Правительствоын журналистъёсын пумиськиз Музъемъя но сое кутонэз радъянъя кун комитетлэн тӧроез Юрий Зайнаков. Люкаськемъёслы со мадиз удысын тунсыко югдур сярысь. Татын но асьмеос Россиез азьпалтӥськом. Удмуртия валля арын ик Музъем кодекс кутӥз, нош странаямы али ке но со ӧвӧл на. Но кодексмы уг тупа Президентлэн Указэзлы. Берлоезъя музъемен кызьы мылыд потэ озьы кузёяськыны право сётэмын: вузаны, кузьманы но мукет. Нош Удмурт Конституциын но кодексын музъемез вузан чакламтэ, со кыле пыраклы ӵыжы-выжыосызлы яке арендае сётыны быгатӥськод. Юрий Семеновичлэн ивортэмезъя, ми, пе, кодексын нырысь учким вал коллектив пушкын (колхоз, совхоз, эштос но мукет) музъемез вузан эрик сётыны. Но депутатъёс сое палэнтӥзы. Собере комитетлэн тӧроез ватсаз: - Мон Францие ветлӥ. Отын музъем ваньбур (собственность) луэ, но сое кутэмез туж зол эскере государство. Музъем понна налог тырон но умой радъямын, асьмелэн кадь ӧвӧл. Али городъёсын 20 процент гинэ музъемлы коньдон тыро яке корка интылы. Одӥг квадратной метрез 1400 манет дунъямын, нош гуртын 78 коньы. Берло дыре музъемен ужан чидантэм уродме. Туэ 67 сюрс гектар музъем гырытэк- кизьытэк кельтэмын вал. Отын йӧны, жаг турын пушйиз. Куинь-ньыль арскын со кабзэ пашмоз. 1991 арен ӵошатыса, минеральной сылалъёс, кыед, торф поттон 10 пол кулэсмиз, фосфорит пызь пыртон - 7, нош извеска пазян - 100 пол. Музъемез умоятон (мелиорация) быдтэмын, шуыны луоз. Гурт хозяйствоосын техника вужмемын, 6-7 ар ӵоже со выльдымтэ. Азьло сыӵе тракторен, комбайнэн ужась уг луы ни вал. Гуртысь визьмо кивалтӥсьёс, специалистъёс кошко. Фермеръёс, крестьян хозяйствоос, эштосъёс пыд йылазы мырдэм сыло. Соин ик гурт наука ас кылзэ вераны кулэ, кӧня асьмелы музъем возёно, кӧнязэ гыроно но музон. Кун Кенешлэн дас ньылетӥ сессияз юнматэмын музъем кадастрез нуонэз выльдонъя программа. Но солы уно миллиард коньдон кулэ. Туэ, 30 интые, 12 миллиард гинэ висъямын. Солы сюлэсь уно компьютеръёс басьтэмын. Соос котькуд комитетын 2-3 вань ни, нош Ижын - уката трос. Комитет али бадӟым уж нуэ музъемез лыдэ басьтонъя, сое компьютере пыртонъя. Городъёсын, посёлокъёсын но райцентръёсын та уж одӥг куиньмос палаез быдэстэмын, нош Глазовын - ӝыныез, Воткинскын - 24, Ижын - 26, Можгаын - 15 но Сарапулын - 9 процентэз. Та ужен Россиын асьмеос азьпал радын мынӥм, Татарстан кельтэ ни. Агрыз, Арск но мукет районъёсын вань музъемзы чакламын но компьютере пыртэмын ни. "Уралаэрогеодезия" республикаямы самолётэн музъемъёсты берлозэ учкиз на Яр, Пудем, Факел, Камское черкогуртъёсысь. Та ужлы уно уксё кулэ. Соин ик герӟаськемын инвентаризация ортчытон. Малы бен со ваньмыз лэсьтӥське? Нырысь ик, музъем понна, тросгес налог бичано, кыкетӥез, музъемез пайдаё кутоно, со буш медаз кылльы. Али тани таӵе югдур: городъёсысь уно этажъем коркаос котырын кӧня музъем висъямын, нош со понна нокин коньдон уг тыры. Одӥг сюрс гектар музъем озьы ик уже уг кутӥськы сад-бакчаосын. Чаклало, вузаны юртто Ньыль ар талэсь азьло, 1993 арын 25 мае шаерамы но усьтӥськиз Торгово- промышленной палата (ТПП). Россиын сюлэсь уно таӵе ёзъёс кылдытэмын. Соосты огазея "Внешэкономсервис". Та бен выль маке ӧвӧл. Вузкаронъя палатаос вал ни 30-тӥ аръёсы. ТПП выре внешнеэкономической ужен, юрттэ кунгож сьӧрын вузъёсмес возьматыны, продукцимес эскере, экспертиза ортчытэ но мукет. "Внешэкономсервис" пыремын дуннеысь "Союзэкспертиза" огазеяськонэ. Сыӵе ёз вань Россиын но. Со радъя вань экспертъёслэсь ужзэс. Удмуртиысь ТПП-лэн но 4-5 экспертъёсыз асьсэды умоен возьмато, мукетъёсызлэсь бере уг кылё. Палата озьы ик дорамы радъя вузъёсты возьматонэз, ярмаркаос ортчытъянэз. ИНИТИ "Прогрессын" ялан ужась выставка (адӟытон) усьтон сярысь постановление келямын ни Кун Кенеше. Но отын куд-огез комиссиос та ужез ӝегато, таӵе решение кутонлы пумитъясько. ТПП умоесь кусыпъёс тупатӥз ни Болгариысь сыӵе палатаен, куспазы тупанкыл гожтӥзы ни. Соя Ижын усьтыны чакламын оптовой склад яке магазин. Отын луозы Болгариысь гинэ вузъёс (винаос, емышъёс, консерваос но мукетыз). Соос асьмелэсь куро, басьтэмзы потэ нюлэс, лэсьтӥськон материал, му вӧй, металл но мукетсэ. ТПП-лэн куинетӥ ужпумез герӟаськемын кунгож сьӧрысь фирмаослэсь оскымон луэмзэс учкон-эскерон. Ватонэз ӧвӧл, куд-огез асьмеды пӧяны туртто. Та нуналъёсы палата промышленной вузъёсын Ижын ярмарка ортчытэ, нош 4-5 декабре луоз сиён-юонъёсын. Отчы ӧтемын Башкортостанысь, Кировысь, Пермьысь, Татарстанысь вуз поттӥсьёс. Татын меӵак кутэмын луозы огкылъёс но тупанкылъёс. Нош 19 декабре автозаводлэн "Мир" культура дворецаз поттэм продукцизэс возьматозы элькунысьтымы пичи ужбергатӥсьёс. Выставкаос-ярмаркаос озьы ик ортчытъяло бускельёсмы (Казань, Пермь но Киров). Али ТПП дасяське съездлы. Со луоз вуоно арын мартэ. Азьланез сярысь вераса, палаталэн "Прогрессын" адӟытонэз 4 сюрс квадратной метр инты басьтоз но одӥг квадратной метрезлы 138 сюрс манет тыроз (отчы пыре НДС налог но). Ӵошатон вылысь, "Метеорын" адӟытонлэн интыез 4 пол пичи, одӥг сюрс квадратной метр. ТПП "Метеорлэн" ужаз уг пыриськы. "Прогресс" адӟытонын ужез трос на, уката ик выльдонэз. Россия 500 миллион манет коньдон висъяны чакла. Со люкетэн-люкетэн, вуттэмзыя ужаны кутскоз. ТПП юнэсь кусыпъёс возе Ижысь таможняен но Мукет кунъёсын кусыпъёсъя министерствоен. Правительствоын таӵе вераськон нуиз Элькунысьтымы торгово-промышленной палаталэн кивалтӥсез Евгений Вылегжанин. Г. Романов. Берекет Меӵак но могак Огез улвай чиге ке, мукетыз пушъе. Одӥг валлы кык сиес уг поно. Ош вылэ зу уг поты. Ошмес пожамлэсь уг кышка. Ошместэк шур чаляк куасьме. Ош лекаськыны ке кутскиз, сӥльлы вандозы. Одӥг такалэсь кык кузэ уг басьто. Огпол кыӵесысь мозмем ӟичы отчы уз сюры ни. Одӥг йырад кык изьы уд нуллы. Ошмес син из ултӥ но сюрес шедьтэ. Москваын пумиськонъёс 3 декабре Кун Кенешлэн Тӧроез Александр Волков пумиськиз Россиысь Правительстволэн Тӧроеныз Виктор Черномырдинэн. Сэрттэмын-пертчемын Удмуртилэн экономикаез, социальной удысэз азьын сылӥсь ужпумъёс, эскеремын, кызьы быдэсъясько Виктор Черномырдинлэн Ижевске ветлыкуз сётэм косон-дэмланъёсыз. Нош 4 декабре Александр Волков пумиськиз Москвалэн мэреныз Юрий Лужковен. Соос кенешизы Удмуртия но Москва куспын кутэм огкылэз улонэ пыӵатон сярысь. Пазялъёсыз палёмытӥзы Можга ёрос данъяськыны быгатэ крезьгурчиосыныз. Сое нош ик возьматӥз Пазял гуртысь культура юртын ортчем конкурс. Тямыс мурт пыриськиз отчы. Нырысетӥ интыосы потӥзы Нынекысь Иван Смолин но Бадӟым Сибыысь Елена Павлова. Учкисьёслэн синпельзы сётэмын Нынекысь ик Сергей Созоновлы. Озьы ик умоен пусъемын Александровоысь Надежда Сергеевалэн но Удмурт Сюгаилысь Валентина Колесниковалэн кырӟанъёссы. Можга городысь но ёросысь администрация, озьы ик удмурт дэменлык туэ нырысьсэ крезьгурчи Геннадий Павлов нимо приз ӵектӥзы. Лауреат луиз Иван Смолин - Людмила Хрулёвалэн кылъёсызъя "Пумитамтэ яратонэ" кырӟанэз понна. Та ӝытэ ик трос адямиос кие вуиз можга крезьгурчиослэн сборниксы - "Звени, лети, мелодия души" (татчы пыремын 43 кырӟан). Огъя вераса, та ӝытэ пазялъёс палёмемын вал. Т. НИКОЛАЕВА. Берекет Вае серекъялом - Тодӥськоды-а, тани алигес мон лыдӟи, дас кузпалъяськемъёс пӧлысь одӥгез гинэ, пе, шудо луэ. Мар шуоды со пумысен? - Номыре но уг. Мон ай куинетӥзэ гинэ быземын. *** Одессаысь ресторанын. Официант шок-пуль пыре сиён дасян интые: - Мынам клиентэлы (сиськыны пырем муртлы) ӵӧж сӥль, пе, кулэ. - Жора, - вера солы егит повар, - бен милям татын ӵӧж сӥльмы ӧвӧл ук, ӟазег гинэ. - Соку самой со ӟазеглэсь ик одӥг порция ӵӧж сӥль ванды но вай! *** - Тодысал ке тон, макем яра мыным Москва! Самой ӟеч тодэ ваёнъёсы соин герӟаськемын... - Кылзы ай, нош тон со городын ноку ӧй вал ук! - Бен, но отчы ӵем вуылэ мынам кышное... *** - Мар луиз, малы ачид машинкаен печатласькод? Секретаред-а, мар-а висьыны усиз? - юа картэзлэсь егит кузпалыз. - Ӧз, со бызиз. - Тодэме луоз-а, кинлы? - Мыным... Гурт тӧроос Та кык эшъёс тодматскизы удмуртъёслэн ВИ ӧтчамазы. Кылзы тупаз, кыксылэн ик уго сюлмаськонъёссы одӥг выллемесь: гурт калыклэсь улон-вылонзэ умоятоно, аскивалтонэз юнматоно, пиналъёсыз пичиысен ик чеберлык борды кыстӥськыны дышетоно. - Гурт кенешъёс кылдытыны кулэ, - шуэ Пичи Пурга ёросысь Аксакшур администрацилэн кивалтӥсез Валерий Иванович Тихонов. - Соос кыл мед кутозы пиналъёсыз умой сямо будэтон понна. Таяз съездын юонэз алон пумысь вераськон ӧжыт вал. Тани асьмелэн "Шунды" дэменлык вань, но отын ужасьёс кырӟан-веранэн гинэ потало гуртэ. Мукет ужпумъёсыз но мед лыдӟозы вылэм. Та вӧзы итӥське Пермь улосысь Куеда ёросысь Кирга гурт тӧро Станислав Идиятович Гадиятов. Со нырысьсэ ӧвӧл ни таӵе ӧтчамын, Сыктывкаре финн-угор калыкъёслэн И конгрессазы но ветлӥз. Дышетон ужпумъёс солы матынгес, азьвыл ачиз но школаын ужаз. - Милям школаямы пиналъёс дышетско на вал 1982-тӥ арын потэм удмурт учебникъёсъя, - шуэ Станислав Идиятович. - Вазиським Ижевске Нациосын ужанъя кун комитетлэн кивалтӥсезлы Светлана Константиновна Смирновалы, собере Калыкез дышетонъя министерствоын ужасьлы Антонида Спиридоновна Березиналы. Юрттӥзы. Эшшо художественной литература сётыны малпало. Милям гуртамы (160 хозяйство) мӧзмытгес, арганчимы но али ӧвӧл. Вӧзамы ик башкир удмуртъёс котьмар ласянь умойгес уло, - тазьы вераз Станислав Идиятович. Т. Петрова. Валерий Тихонов (паллянысез) но Станислав Гадиятов. В. Камашевлэн туспуктэмез. Берекет Визьмо пыры Кема вож улоз Ӝоген вуоз Выль ар. Сое кудӥз пумиталоз нюлэскысь ваем пичи вож кызэн, кудӥз магазинысь дась лэсьтэменыз, кудӥзлы кызлэн ваез гинэ но тырмоз. Мар карыны луоз, нюлэскысь ваем будос кема мед чидалоз, нылпиосты уно нуналъёс ӵоже аслаз чебереныз мед шумпоттоз шуыса. Со понна кызэз пуктоно нимысьтыз лэсьтэм суретэн посудае. 3 л вуэ ватсано 5 г лимон кислота, 6 г желатин но 16 г бур(мел). Суретэ пуктэмлэсь азьло, кызлэсь (вайлэсь) дӥньзэ лэчыт пуртэн шырӟе на: озьы будос аслыз тросгес "сиён" кыскыны быгатоз. Л. Яковлева. Вашкалаез яратӥсьёс (оло вал, оло ӧй вал) - Ӟечбуресь, Петр Иванович. Луоз-а пырыны? - ӧсэз усьтыса кивалтӥсьлэн кабинетаз йырзэ мычиз Абдрамов. - Пыр, пуксьы! - боз-боз куараен вазиз Петр Иванович. - Мар вералод? - Мон туж но туж лэчыт ужпумен тӥ доры, Петр Иванович. - Бен мон кылзӥсько ук. - Асьме предприятимылэн территорияз, музъемаз шуод-а удмурт сямен вераса, вань черк, Святой Петрлэн соборез. Та куашканы кутскемын ини. Тупатоно вал, Петр Иванович. - Дугды, дугды Абдрамов. Туннэ ӵукна сьӧд коӵыш азьтӥм вамен выжиз. Мон соку ик малпай - умойтэмлы. Озьы ик вань. Малы тыныд, Абдрамов, черк. Со сисьмемын ук ни. Нокин но отчы уг ветлы ни. - Петр Иванович, со дас сизьыметӥ даурын ӝутэмын ук. - Тӥни ачид ик шуиськод - вашкала. Озьыен, сисьмемын. - Петр Иванович, тӥ историез уд гажаське шат? - Кыӵе история, Абдрамов? Куштӥськем черк - со история шат? - Сое тупатыны кулэ ук. - Эн шузимы, Абдрамов. Малы сое тупатод? - Кызьы малы? Со асьме шаермы сярысь верась вашкала зарни пыры. Ӟуч сямен вераса, культурной наследие. - Тон мыным татын лекция эн лыдӟы. Со "культурной наследие" шуонэд ваньмыз краеведческой музейын. Пияла улын. Пӧртэм чебер изъёс, вашкала ужан тӥрлыкъёс, тусьты-пуньыос но мукет. Тон, Абдрамов, ческыт шыдэз чырсам курег пузэн эн ӵошаты. Уг яра озьы ваньзэ сураны. - Мон уг сураськы. Черкез тупатыны кулэ, Петр Иванович. Отын угось тӥляд нимды но историе пыртэмын. - Ним?! Кыӵе ним?! - Ма, кыӵе, пе, Святой Петр нимаське ук. - Ним шуиськод, иське... Бен, мар-о тон, Абдрамов, татын пукиськод на? Мын люка калыкез. Тынад син азяд вашкала черк куашка, нош тон каньыл мылкыдын татын пукиськод! Уд валаськы тон историез, Абдрамов, уд валаськы. Черкез одно ик тупатоно. Со юлтош, ӟуч сямен вераса, культурной наследие. Вашкалаез яратыны-гажаны кулэ. Бен мар-о пукиськод на? Ӝоггес уж борды. Ӵуказелы черк ӵыж-выль мед чилялоз. Ачим эскеро! Ф. Миннигараев. Возьматэ пичи ужбергатон Москваын та нуналъёсы пичи ужбергатонлы сӥзем адӟытон ортче. Мынэ со художникъёслэн бадӟым юртазы. Юртлэн ньыль залаз возьматэмын, кин радъя та ужез Москваын, кин юрттэ, ас товарзэ кин возьматэ. Калугаос тани ӝӧкъёс но каминъёс ваиллям, Томск палъёс - эмъюм. Москваос дӥськут но сиён-юон поттӥллям, нош Удмуртиысь велосипедъёс нуиллям. Озьы ик, адӟытонын ас ужъёсынызы тодмато Удмурт университетысь "Технопарк", Ижевскысь "ОРТ" полиграфической предприятие. Маин данъясько асьмелэн ужбергатӥсьёсмы? "Технопарк" калык лулчеберетэз азинтэ. "ОРТ" конфет коробкаос суреда. "Джет" предприятие оборудование лэсьтэ, нош ФМС акциосын огазеяськон лэстӥськон удысын выре. Оскон кылдэ, та пичи предприятиос ужан удысын удыссэс азьланьтозы, Москваысь пӧртэм фирмаосын кусып юнматозы. Маргарита Сельченкова. Кыл дунне Кызьы гожъяно Гердлэсь нимзэ? Матэктэ ни дано кылбурчимылэн Кузебай Гердлэн вордскемез дырысен сю ар тырмон нунал. Та бадӟым юбилейлы дасясько ни шаерысьтымы уно тодосчиос но культура удысын ужасьёс. Соос гинэ ӧвӧл - Удмуртилэн, удмурт калыклэн кунгож сьӧрысь тросэз эшъёсыз но. Нош асьмеос али но ӟеч-ӟеч ум тодӥське, кызьы шонер гожъяно Гердлэсь нимзэ. Одӥгез шуэ: Гердлэн нимыз Куӟебай вал, мукетыз - Кузебай. Нош куд-огез Кузёбай формаез уже кутэ. Зэмзэ но, паймод: журналъёсын гожъяло озьы, газетъёсын - тазьы, нош Удмурт радиоын чылкак мукет сямен верало. Та выллем югдуре сюризы удмурт топонимъёс но, нимкылъёс но. Оглом, быдэс удмурт кыл. Соин ик мынам но аслэсьтым малпанъёсме вераме потэ. Кызьы тодмо, Кузёбай формаез уже нырысьсэ кутӥз тодмо этнограф но кылбурчи Владимир Владыкин, "Йыбырскон" книгаезлы Герд сярысь вакчияк буре ваёнзэ гожтыкуз. Владимир Емельянович пусъемъя, Герд ним кушето кыл луэ. Кузё но бай (узыр) кылъёслэсь кылдытэмын со. Мукет малпанэз но кылылӥ: Гердлэн нимыз, пе, Кузёбай удмурт гуртлэн ним бордысьтыз потэ. Алнаш ёросын вань Кузёбай гурт. Отын улӥсь удмуртъёс али но Быдӟым куалазэс утьыса возё. Грах ёросын но Кузёбай нимо гурт вал. Со - Ашальчи Окилэн вордскем интыез. Кызетӥ-куамынэтӥ аръёсы печатлам газет-журналъёсты яке аслэсьтыз Гердлэсь материалъёссэ эскерим ке, адӟом: та вие ужам авторъёс Гердлэсь нимзэ котьку е букваен гожъяллям. Озьыен, солэн но лымшор палась гуртъёслэн нимъёссы огкадесь ӧвӧл. Кузё кылын но Гердлэн нимыз озьы ик герӟаськемын ӧй вал. Кызьы верамы ни, куд-огез журналистъёс Гердэз Куӟебай шуыса ниманы кутскизы. Та формаез улӟытӥз удмурт литератураез эскерисьмы Фома Ермаков. Фома Кузьмич малпа: Герд аслэсьтыз нимзэ Куӟебай шуыса гожъяз бере, озьыен, ми но озьы ик лэсьтыны кулэ. Со сярысь тодосчилэн Гердлы сӥзем выль монографияз но гожтэмын. Нош Пётр Поздеев верамъя, Гердлэн, ӟуч сямен вераса, авторской правоез вал - аслэсьтыз нимзэ со котькыӵе манерен гожъяны быгатэ вал, пе. Фома Ермаковез но Пётр Поздеевез мон туж сӥлы карисько ке но, валэктонъёсынызы огкылысь луыны секыт. Чаклалэ ай асьтэос: Куӟебай кыл, Кузёбайлэсь шонергес ке но, чеберлыко удмурт кыллэн куронъёсызлы уг тупа. Чеберлыко удмурт кылын ӟ, куара ӝ куара кадь ик, гласнойёс бере ноку но уг пумиськылы. Гласнойёс вискы пуктэм но ӟ аффрикатаос (ӟаӟег, ӝаӝы, кеӟыт) диалектъёслэн тодметъёссы луо. Соин сэрен, кылсярысь, Дэри ёросын Байкузино ӟуч гуртэз тапалась удмуртъёс, Байкузё интые, Байкуӟё шуо. Логика ласянь учконо ке, Куӟебай формаез кельтыса, Гердлэсь кылбуръёссэ но статьяоссэ тупатъятэк, диалектъёсын сямен ик печатлано луомы. Но таӵе уж удмурт кыллэсь огъялыксэ тӥялоз, куашкан калэ вуттоз: кызетӥ-куамынэтӥ аръёсы вань удмурт писательёс асьсэлэн диалектъёссы вылэ пыкиськыса ужазы уго. Огъя литература кыл соку ӧй вал на. Соослэсь гожъямъёссэс табере туала удмурт кыллэн правилоосызъя тупатъяса печатлало (учкелэ, Гердлэсь "Гажан эше!.." книгазэ но Ашальчи Окилэсь "Пинал нылмурт туж яратэ" кылбур бичетсэ (сборниксэ). Ачиз но Герд удмуртъёслэсь огъя кылзэс кылдытӥсьёс пӧлысь одӥгез вал. Гердлэн вордӥськем гуртаз, оло, зэмзэ но, Куӟебай яке Куӟма шуылӥзы (литература кыл куремъя, Кузебай, Кузьма формаосты гинэ уже кутылыны быгатӥськом). Ваньзэ тае лыдэ басьтыса, Гердлэсь нимзэ букваос йылын нокыӵе точкаостэк, Кузебай шуыса гожъяны ӵектӥсько. Удмурт литературалэн историяз та форма Кенешо власть дыръя пыӵаз ке но, со - тужгес шонерез. Монэн тросэз удмуртъёс огкылысь луо. Тӥ шуоды, дыр, гажано лыдӟисьёсы: точкаос пуктон - чыры-пыры гинэ. Коть Кузёбай гожты, коть Куӟебай - дунне уз берытскы. Со зэм. Но та ужпум вылысь адӟиське удмурт кылэз гажаммы яке гажамтэмы, удмурт наука но культура удысын ужаммылэн ӟечлыкез но. Денис Сахарных, Удмурт кун университетын дышетскись. Удмурт радиолы - 65 "Театр - микрофон азьын" Та кылъёслы шаерысьтымы радиокылзӥсьёс дышемын ини. Арнялы быдэ вордӥськон ӝытэ дикторъёс асьмемыз ӧтё репродукторъёслы матэгес кариськыны. Соку асьмеос, коркась потатэк ик,. "театр омыре" сюриськом кадь. Кинлы кызьы, нош мыным зэмен но туж кельшо та передачаос. Таӵе дыре монэ кыӵе ке чыры-пыры ужъёсын эн ӝегаты ни - быдэсак йырыным-пыдыным пыриськемын кадь радиоверанэ-спектакле. Та передачаосъя асьмеос шӧдӥськом вордскем кылмылэсь узырлыксэ, тодматскиськом драматургъёсмылэн произведениосынызы, гожъяськон манеренызы. Огъя вераса, та радиоверанъёс ошмес кадь луо - отысь омыръя но омыръя аслыд кельшонозэ, сюлмад пыӵамонзэ. Макем чылкытгес жильыртоз со ошмес, сокем узыргес луоз асьмелэн лулчеберетмы, сокем муромоз улонэз валанмы. Радио пыр чузъяськись спектакльёс дасян амалъёссыя пӧртэмесь луо. Одӥгез огшорыез амал - пырак театрысь эфире сётон. Соку радио пыр театрлэн омырез шӧдӥське. Спектаклез тон дорад кылзӥськод ке но, зал тыр люкаськем учкисьёслэсь шокамзэс, артистъёслэн шудэмзылы я серемен, я чабонэн, я синву пыр ныр кысканэн вазиськемзэс кылӥськод кадь. Кыкетӥез амал - театрлэсь дась спектакльзэ радиостудиын плёнка вылэ гожтыса сётон. Со спектаклез ӝикытгес карыны луонлык сётэ. Кылзӥсь уг шӧды ни театрлэсь омырзэ, шокамзэ. Со понна, куараё мизансценаосты уже кутыны луэ. Луыло на радиоын дасям спектакльёс. Басьтӥське соиз яке таиз пьеса - артистъёсын ужаса, татын ик плёнка вылэ гожтӥське. Тужгес вылез амал - радиопьесая дасям спектакль. Автор театрен чик герӟаськытэк, ас малпамезъя, лобась мылкыдызлы эрик сётыса "пӧра" зэмос радиоспектакль. Та жанрлэн вордӥськемез сокем кемалась ӧвӧл на. Радиопьесаын лыдэ басьтыны кулэ пӧртэм луонлыкъёсты: улэп вераськонэз, улонысь пӧртэм куараосты, крезьгурез. Таӵе луонлыкъёс уката но паськыт кутӥсько туала вакытэ, электроинструментъёс, синтезаторъёс кылдэмен. Удмурт театрлэн нырысьсэ плёнка вылэ гожтэм спектаклез луэ П. Блиновлэн "Улэм потэ" романэзъя Лазарь Перевощиковлэн инсценировкаез. Театрын та спектакль С. Гляттер режиссёрен пуктэмын вал 1949-тӥ арын. Нош сое плёнка вылэ гожтыса, радио пыр чузъяськытӥллям ини 1952-тӥ арын. Тросэз та спектакльын шудэм артистъёс туннэ асьме пӧлын ӧвӧл ни. Кылсярысь, Демилэсь рользэ шудэм вылэм республикаысьтымы дано артист Василий Гаврилов, Омелез - калык артист Григорий Овечкин, йыртэмасьёслэсь йырзэс Олёшкаез - дано артист Василий Садовников, Осипез - дано артист Вячеслав Волков. Пӧламы ӧвӧл ни пересь чорыгасез шудэм артист Яков Перевощиков, валэктон кылъёссэ лыдӟись - РСФСР-ысь дано артист Василий Перевощиков но мукетъёсыз. Нош соос улэп кадесь пуксё син азямы. Удмурт радиоын ужасьёс та исторической спектакльзэс синчеберзэс кадь утьыса возё. Азьланяз, 1955-тӥ арын, плёнка вылэ гожтэмын Лазарь Перевощиковлэн "Дуно саламез". Сое Удмурт театрын пуктӥз РСФСР-ысь дано артист Кузьма Ложкин. Татын валтӥсь геройёсты быгатыса шудӥзы дано артистъёсмы Иван Кудрявцев, Василий Перевощиков, Аполос Перевощиков, тушмонъёсты - Демьян Федотов, Яков Вахрушев, озьы ик РСФСР-ысь искусствоосъя дано ужась Геннадий Веретенников. Радиоысь литературно-драматической редакциен кивалтӥсь Гай Сабитович Сабитов та спектаклен усьтӥз но кузь улон сётӥз "Театр микрофон азьын" циклысь туж тунсыко передачаослы. Радиокылзӥсьёслы соос туж яразы, гожтэтъёсазы пӧртэм спектакльёсты радио пыр сётыны курыса вазиськылӥзы. Озьы дасямын вал Степан Широбоковлэн "Чукдор" пьесаезъя спектакль, со бордын ужаз Удмурт театрысь режиссёр Михаил Покчи-Петров. Плёнка вылэ гожтэмын Игнатий Гавриловлэн "Аннокез", "Азинэз", Иннокентий Поповлэн "Семьяез", Всеволод Ивановлэн "Бронепоезд-14- 69" драмаез. 50-тӥ аръёсы "Ижмаш" культура дворецысь пырак радиостудие кыскемын вал микрофон кабель. Со луонлык сётӥз спектакльёсты сцена вылысь меӵак эфире сётыны яке плёнка вылэ гожтыны. Таӵе луонлык лӧпкытӥз милемыз, радиоын ужасьёсыз: табереяз ми но быгатом Всесоюзной радиоын сямен ужаны. (Удмурт театр соку огдырлы "Ижмаш" двореце выжылӥз.) Та вакытэ драмая Удмурт театр ужасьёссэ данаклы будэтыса пӧрмытэмын вал ини Удмурт музыкально-драматической театрлы. Драматической труппаез сяна, солэн вал кырӟасьёсыз- солистъёсыз, хорез, балетэз, симфонической оркестрез. Таӵе огазеям кужымен 1959-тӥ арын пуктэмын Михаил Петровлэн "Вуж Мултан" музыкальной драмаез, режиссёрез УАССР-ысь искусствоосъя дано ужась Михаил Покчи-Петров (со ик татын В. Короленколэсь рользэ шудӥз). Декорациоссэ дасяз театрлэн валтӥсь художникез Георгий Векшин. Спектакльын кутэмын Николай Голубевлэн но Николай Греховодовлэн крезьгуръёссы. Оркестрен дирижировать кариз Борис Пинский, эктонъёссэ пуктӥз Анатолий Бондарев. Театрлэн историяз таиз куиньметӥзэ пуктэм "Вуж Мултан" спектакль вал ини, азьвылъёсаз тамында творческой кужым ӧз пыриськылы. Спектакль яркыт, мур социальной пуштросъем но ӟырдыт кужымо пӧрмиз. Ӵапак та спектакль вылэ учыраз нырысьсэ театрысен гожтон но радио пыр сётон. Котьмар ке но, ми, радиоын ужасьёс, спектаклез пырак эфире сётыны ӧм дӥсьтэ. Удмурт радио соку ӝытазезэ ужа вал час но ӝыны гинэ. Нош спектакль антрактъёсын, суредъёсты вошъянэн-маин куинь час пала мынӥз. Спектаклез плёнка вылэ гожтӥм. Техникъёс-операторъёс дышемын ӧвӧл на таӵе передачаослы. Интыен-интыен плёнка вылэ гожтӥськем чик кулэтэм дыбыр-колтыр каремъёс, кытӥ-отӥ артистъёс микрофонлэсь палэнтӥськыса шудо, кылъёссы йӧназ уг кылӥськы. Таӵе тырмымтэосты бӧрысь (гожтэм плёнкаез сузяку) палэнтыны луиз. Спектаклез вакчиятӥм, валэктон кылъёс пыртылӥм. Таяз аре ик сӥзьыл 13-тӥ шуркынмонэ театрын выль премьера вал: Г. Корепанов-Камскийлэн "Любушка" опереттаез. Удмурт театральной искусствоямы та выль жанр, выль пушъет луиз. Оперетта нырысь ӟуч кылын мынӥз, бӧрысь сое удмурт кылын но шудӥзы. Либреттозэ гожтӥзы удмурт драматург Лазарь Перевощиков но Москваысь автор Кирилл Поляков. Режиссёрез Александр Асанин, декорациосызлы эскизъёс дасяз Георгий Векшин, оркестрен кивалтӥз Удмурт Республикаысь искусствоосъя дано ужась Глеб Бехтерев, эктонъёссэ пуктӥз балетмейстер Иван Сергеев. Та спектакльын валтӥсь геройёслэсь тунсыко образъёссэс кылдытӥзы РСФСР-ысь дано артистка Евгения Пахомова (Любушка) но Геннадий Корепанов-Камский (Гриша). Таиз но спектакль плёнка вылэ гожтэмын пырак театрын, сцена вылын мыныкуз, 1960 арын. Озьыен, выль амал ӧнертэмын. 50-тӥ аръёслэн кутсконазы ик вордӥськизы но бератаз паськыт вӧлмизы удмурт писательёслэсь произведениоссэс инсценировать карыса дасям радиоспектакльёс. Та ужын кичӧлтӥсь луиз Удмурт радиоысь общественно-политической редакциын ужась Михаил Андреевич Лямин.Та дыре солэн потэмын вал ини "Шудбур понна" повестезлэн нырысетӥ книгаез. Писатель, радиоын ужаса, пыр-поч валаз солэсь аспӧртэмлыксэ, луонлыкъёссэ, учкисьёслэсь мылкыдзэс. Солэн сюлмаз ялан улӥзы книгаезлэн геройёсыз, соослэн сямъёссы, ужъёссы. Соос маза ӧз сётэ авторлы буйгатскыны, улӟытыны куриськыса улӥзы куадь. Книгаезъя радиоспектакль дасян - со вал туж иназ луэм кичӧлтон. Инсценировказэ ачиз ик дасям бере, Михаил Андреевич пуктыны мыным ӵектӥз. Шурдысагес ке но, басьтӥськи. Таӵе ужен азьвыл выреме ӧй вал уго, радиоын диктор луыса ужасько вал. Ӵошен бырйимы спектакльын шудыны артистъёсты. Бератаз, репетициос кутскем бере, бордам пукыса, котькуд интыяз юрттыны дась вал. Ужмес быдэстӥм Удмурт автономилы 32 ар тырмон азелы. Нош рольёсты та радиопостановкаямы шудӥзы Удмурт АССР-ысь дано артистъёс Иван Кудрявцев (Азин), Демьян Федотов (Петр Бадяров), РСФСР-ысь дано артистка Анастасия Шкляева (Бадяровлэн анаез), шаерысьтымы калык артистка Васса Виноградова (Лели), дано артист Вячеслав Волков (Кион Оле) но мукетъёсыз. "Шудбур понналэн" кыкетӥ люкетэз радио пыр сётэмын вал, Советской власть кылдэм дырысен 50 ар тырмыку. Таиз ужмы Удмуртиысь журналистъёслэн премиенызы пусъемын. Спектаклямы Иосиф Наговицынлэсь рользэ шудӥз Россиысь искусствоосъя дано ужась Леонид Романов, Бадяровез - республикаысьтымы дано артист Сергей Марков, Даниил Майоровез - калык артист Юрий Яковлев. Кыкетӥез удмурт литературалэн зарни шыкысысьтыз поттыса дасям радиоспектакль луиз Филипп Кедровлэн "Катя" повестезъя передача. Сое мыным пуктыны ӵектӥз Михаил Покчи-Петров. Катяез но Койыкез шудыны ӧтимы РСФСР-ысь дано артистъёсыз Нина Бакишеваез но Василий Перевощиковез. Таиз радиоспектакль дасямын 1955-тӥ арын. Ӟырдыт мылкыдын басьтӥськи мон школаын ӵош дышетскем, одӥг парта сьӧрын пукем эшелэсь Геннадий Красильниковлэсь "Вуж юрт" повестьсэ радио пыр сётон борды. Со вал 1957-тӥ арын. Ужмы пӧрмиз кадь. Ӵапак та радиоспектаклез дасяме бере, мон дикторысь режиссёре выжи. Мыным кылдӥз на Геннадий Дмитриевичлэсь "Тонэн кылисько" повестьсэ но радиоын пуктыны. Таиз вал 1961-тӥ арын. Радиокылзӥсьёс витизы выль но выль постановкаосты. Таин сэрен кичӧлтон лэсьтэмын вал ӟуч кылын дасям радиопостановкаосыз удмурт кылэ берыктыса пуктылыны. Сценарийёс басьтылӥмы Всесоюзной радиоысь. Озьы мыным пуктыны кылдӥз "Бал бере" (1954), "Куке лыктэ яратон" (1955) но мукет спектакльёсты. 1964-тӥ арын Гай Сабитов удмурт кылэ берыктӥз "Зӥбем данэн улӥсь" драматической этюдэз. Со сӥземын вал тодмо ӟуч поэтлэн М. Лермонтовлэн улэм-вылэмезлы. Валтӥсь ролез та спектакльын шудӥз Василий Перевощиков. Туж тунсыко потыса ужай мон киргиз писательлэн Чингиз Айтматовлэн "Нырысетӥ дышетӥсь" повестезъя радиопостановка бордын. Москваысь ыстэм инсценировкаез удмурт кылэ берыктӥз Анатолий Уваров. Нырысетӥ дышетӥсьлэсь Алтынайлэсь образзэ туж мур усьтыны быгатӥз Нина Бакишева, солэсь яратонзэ, утисьсэ Дюйшенэз усто шудӥз Леонид Романов. Тодады на ке, повестьын автор маде Киргизиын Советской власть кылдэм бере школаос усьтонлы, нылпиоссэс дышетонлы пумит луэмзы сярысь. Мынам али ке но син азям на ӝамдэлы гинэ потась Сьӧд кышномурт, кудзэ шудӥз Васса Виноградова. Макем зол, вань сюлэм ӟырдытсэ но мугор кужымзэ валчеяса, куараез пыр возьматыны быгатӥз со образэзлэсь пуштроссэ. Та постановка дасямын вал 1964-тӥ арын, радио пыр али ке но чузъяськылэ на. 60-тӥ аръёслэн кутсконазы радиое кык пьесаоссэ сётӥз Удмуртиысь калык писатель Степан Широбоков: "Яратэ - уг яраты" лирической комедизэ но "Точка" сатирической пьесазэ. Соберегес пуктэмын Николай Васильевлэн "Чагыр сяська" выжыкылэз, "Азвесь портсигар" повестез но мукетъёсыз. Соос бордын ужаз режиссёр Анатолий Митрофанов. Радиожурналист, писатель Петр Чернов нылпиослы трилогиезъя дасяз куинь радиоспектакль: "Кузьыт шеп", "Вылга палъёсын" но "Бектыш нюлэс буйга". Со вал 80-тӥ аръёслэн кутсконазы. Бӧрысь, 1986-тӥ арын, дася "Дор" повестезъя инсценировка. Ваньзэ та радиоспектакльёсты пуктӥз Леонид Гусев. Пӧртэм аръёсы быдэн одӥг спектакль пуктэмын Петр Поздеевлэн "Дора" веросэзъя, Григорий Даниловлэн "Кыдёкысь куара матын" произведениезъя, Александр Вотяковлэн "Нюлэс кушын" выжыкылэзъя, Галина Романовалэн "Сьӧд ты но Улэп турын" выжыкыл-легендаезъя, Роман Валишинлэн "Тӧл гурезь" романэзъя, Милитина Гавриловалэн "Ӵыжы-выжыослэсь но матынгес" инсценировкаезъя. Со аръёсы та уже пыриськыны ӧдъяз писатель Леонид Емельянов. Солэн гожъямъёсызъя ог дасо постановка дасямын ни. Нырысез гожтэмын 1979-тӥ арын - "В строю крылатых", сӥземын землякмылы авиациысь маршаллы Федор Яковлевич Фалалеевлы. Автор сое радиофильм шуиз. Озьыен, нош ик выль жанр кылдӥз. Кылзӥсьёс ӧз вунэтэ на, дыр, "Бармашурысь батыр" нимо радиопостановкаосты но. Автор озьы ик инсценировать кариз "Мурт нимын" повестьсэ но "Зина Зорина" документальной вероссэ. "Театр микрофон азьын" циклысь передачаосын нимысьтыз инты басьтэ калык писатель Генрих Перевощиков. Радиоын кема аръёс ӵоже ужаз бере, умой тодэ солэсь пӧртэм луонлыкъёссэ но куронъёссэ. Нырысь ик соос Юрий Кедровен ӵош "Омырын - Меркушев" документальной радиоповесть кылдытӥзы. Писательлэн ваньмыз сямен ик произведениосыз инсценировать карыса плёнка вылэ гожтэмын: куд-огез - постановочной лыдӟонэн (лыдӟон вискы инсценировать карыса пыртэм люкетъёсын), куд-огез - воксё радиопьесаослы матэ карыса ("Ыш-ыш-ыш" но "Ӧб-ӧб-ӧб"). Радиоын куараез плёнка вылэ гожтыса ужан амал пыӵам бере, литдрамая редакция ялан синйылтыса улӥз Удмурт театрлэсь выль постановкаоссэ. Соос пӧлысь данакез туннэ фонотекаын вань ни, кылсярысь, Игнатий Гавриловлэн, Михаил Петровлэн, Василий Садовниковлэн, Лазарь Перевощиковлэн, Степан Широбоковлэн, Геннадий Красильниковлэн, Егор Загребинлэн, Петр Кубашевлэн, Федор Пукроковлэн, Семен Самсоновлэн, Никвлад Самсоновлэн, Герман Ходыревлэн но мукетъёсызлэн. Та передачаосты дасян бордын пӧртэм аръёсы ужазы радиорежиссёръёс Михаил Покчи- Петров, Анатолий Митрофанов, Леонид Гусев но та статьяез гожтӥсь. Радиоысь фонотекае шедьылэмын ни шаерысьтымы калык театръёслэн спектакльёссы но. Берло дыре Удмурт радиоысь журналистъёс сузьтӥсько ни радиодраматургия жанре но. Тани Виктор Ивашкин 80-тӥ аръёслэн кутсконазы гожтэ "Кайван но Завьял" выжыкыл-легендазэ, нош 1987-тӥ арын - "Курисько кельтыны" радиопьесазэ. Нырысь гожтэмез вашкала улонмес суреда ке, кыкетӥяз вераськон мынэ бырыны кутскем гуртэз выльысь улӟытон сярысь. Асьме шаерамы бырем гуртъёс уно сюосын лыдъясько. Гурт ведь со адямилэн выжыез, котькудмы сямен асьмеос - гуртысь потэмъёс, гогыосмы отчы бурмемын. Соос ке быризы, асьмеос пыдйылчи чотын ум ветлэ-а? Лэчыт ужпумъёсыз ӝутэменыз, дыр, та радиоспектакль ас кужымзэ туннэ ке но ӧз ышты на. Сое пуктӥз ас удысаз кема ужась усто ӧнерчи Леонид Гусев. 1992-тӥ ар кылзӥсьёс доры кык радиопостановкаос ваиз. Нырысез Вячеслав Ар-Сергилэн "Кирень" сатирической комедиез, кыкетӥез - Виктор Занчаровлэн "Сьӧлыкъёсы сьӧлтась" радиопьесаез (пуктӥз Леонид Гусев). Радиожурналист пьесазэ гожтэм, радиолэсь луонлыкъёссэ уже кутыса. Кулэ ӧвӧл солы действиез валэктӥсь, сое куспетӥ карылӥсь ведущий. Со интые крезьгурен герӟетъёс, пӧртэм куараос, шуланъёс, шальккетэмъёс туж умой валаны юртто действилэсь азинскемзэ, звуковой мизансценаосты. Мылкыд карем потэ: автор та удысын азьланяз но кужымзэ мед эскероз. Радиопьеса жанрын 1959-тӥ арын кичӧлтон сётӥсь вал соку дыръя егит журналист Евгений Николаев. Со гожтӥз "Ӟардон аръёс" - 20-тӥ аръёсы гуртын классовой нюръяськон сярысь пичияк радиопьеса. Жаляса верано луэ,автор азьланяз кутскем ужзэ ӧз азинты ни. Татын пусъёно луэ созэ но: радиопьеса жанр литература чотын, оло, уг но лыдъяськы. Радио пыр сёто ке, соин тырме ни. Нош котькуд авторлэн, дыр, ас ужзэ адӟемез потэ печатламен но. Оло, соин но та жанр борды басьтӥськись ичи? Мон ӵектысал радиопьесаосты журналъёсын-газетъёсын печатланы, радиодраматургилэсь данзэ ӝутыны. Туала вакытэ, книгаос поттонэн шугъяськыса улон эсэпе, соосты басьтыны библиотекаослы но коньдон шедьтымтэ дыре, радио пыр выль произведениосты вӧлмытон котькулэсь но дуно. Борис САУШКИН, республикаысьтымы искусствоосъя дано ужась. Кусыпъёсмы юнмало Кызьы ивортӥм ни "Удмурт Элькунысь Кун Кенешлэн Тӧроез Александр Волков но Пермь областьлэн губернаторез Геннадий Игумнов Москваын кутӥзы Удмуртия но Пермь область куспын эшъяськон но валче ужан сярысь огкыл. Матысь бускельёслэсь экономика но культура удысъёсын кусыпъёссэс азьланяз уката юнматыны луонлыкъёс сётоз со. Озьы ик гожтэмын Удмурт Элькунысь Правительство но Пермь областьысь Администрация куспын нырысетӥез тупанкыл. Сӥземын со котырись инкуазез утён удысын огъя кужымен ужанлы. Матысь дыре дасямын луоз ини Удмуртия но Пермь область куспын коньдон бергатонэз радъян сярысь документ. Азьланяз но гожтэмын луозы но пӧртэм удысъёсъя тупанкылъёс. Удмуртия но Пермь область куспын огкыл кутон дыръя. Туспуктэмез Удмурт Элькунысь Кун Кенешлэн пресс-службаезлэн. Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Кун азьын вормонъёссы понна, агропромышленной удысэз азинтыны 1997 арын тросгес ю-тысь но мукет продукция поттыны сюлмаськемзы понна пусъёно: Почёт орденэн Юшков Аркадий Семеновичез - Вавож ёросысь "Удмуртия" сельхозкооперативлэсь тӧрозэ, "За услуги перед Отечеством" ИИ степене орденлэн медаленыз Кудрявцев Геннадий Николаевичез - Алнаш ёросысь "Мир" колхозысь тракторист-машинистэз, Самарин Павел Васильевичез - Каракулино ёросысь КПСС-лэн ЪЪИИ съездэз нимо колхозысь тракторист-машинистэз. Москва, Кремль 1997 арын 14 ноябре. � 1222 Физической культураез но спортэз азинтонын вормонъёссы понна "Россия Федерациысь физической культура удысын дано ужась" Гущин Николай Алексеевичлы - Сарапул колледж - совхозысь физической культуралы дышетонэн кивалтӥсьлы, Докучаев Валерий Васильевичлы - Ижевскысь спортъя но педагогикая 82 номеро колледжысь директорлэн воштӥсезлы. Москва, Кремль 1997 арын 19 ноябре � 1240 Россия Федерацилэн Президентэз Б. Ельцин. Журналистъёсын пумиськонъёс Воштонъёс но ватсанъёс Медаз луэ вал янгышъёс Кылем четверге Удмурт Элькунысь Кун Кенешын журналистъёсын пумиськылӥз Кун Кенешлэн законъёсты быдэсъямез чакланъя, калыкез кышкытлыклэсь утёнъя но гражданъёслэн правооссыя ялан ужась комиссиезлэн тӧроез Александр Семёнович Борзенков. Со вакчияк тодматӥз комиссилэн берло дыре ма бордын ужаменыз. Мар бен пусйымонэз вал комиссилэн ужаз? Нырысетӥез. Кызьы ивортэмын ни вал, Удмурт Элькунысь Кун Кенешлэн Тӧроез вӧзын кылдытэмын адямилэн правоосызъя комиссия. Со азьын сылӥсь нырысетӥез ужпум - адямилэсь правооссэ утён. Йылпумъяське 1997 ар. Кызьы тодӥськом, со сӥземын вал ог-огеныд тупанлы но огкыл шедьтонлы. Нош вуонозэ арез Россилэн Президентэз ялӥз адямилэн правоосызъя арен. Соин валче кылдыны кулэ адямилэсь правооссэ улонын уже кутонъя амалъёсын радлык. Ӵапак со понна ик кылдытэмын комиссия. Кызьы ивортӥз Александр Семёнович, комиссие вуо ни нырысетӥосыз вазиськонъёс. Герӟаськемын соос адямиослэсь улон интылы правооссэс утёнэн. Кылсярысь, Ижевскысь механической заводлэсь Гольян посёлокысь 112 номеро юртсэ пыр-поч сэзъяны кулэ. Та ужъёс туэ арлы чакламын вал. Нош отын улӥсьёсты огдырлы мукет интые выжтыны завод но, городысь администрация но амал уг шедьто. Тупатъян ужъёс йылпумъяськытозь, адямиослы улон инты висъяны кулэ. Со понна соослэн вань конституциен сётэм правозы. Та выллем учыръёсты но трос адямиослэсь вазиськонъёссэс сяна, комиссия озьы ик эскерылоз нимаз адямиослэсь но куронъёссэс. Кылсярысь, уголовно-процессуальной но уголовной законодательствоя ужпумъёсты. Кыкетӥез бадӟым ужпум - Удмурт Элькунлэн Конституцияз воштонъёс но ватсанъёс пыртон. Со бордын ужа депутатъёслэн нимысьтыз кылдытэм комиссизы. Та пумысен трос ченгешонъёс мынӥзы: яке конституцилы выль текст дасяно, яке алияз воштонъёс но ватсанъёс пыртоно. Кун Кенешлэн ортчем сессиез кылдэмын вал та комиссилэн ужамез сярысь ивортон. Кутэм постановлениын пусъемын, солэсь ужзэ азинтоно но вуоно сессилы "Удмурт Элькунлэн Конституцияз воштонъёс но ватсанъёс пыртон сярысь" Законлы проект дасяно шуыса. Та документ депутатъёслы тодматскыны сётэмын ини. Матысь нуналъёсы комиссия йылаз-пумаз вуттоз ни Конституцилэн нырысетӥ главаез бордын ужзэ. Со печатламын луоз газетъёсын. Озьы ик печатласькозы кылемъёсыз но главаос. Элькунамы улӥсьёс конституцие пыртэм воштонъёсын но ватсанъёсын тодматскыны но асьсэлэсь ӵектонъёссэс сётыны быгатозы. Собере Конституцилэн выльдэм текстэз нимысьтыз эскерыны келямын луоз Россиысь валтӥсь институтъёсы, адямилэн правоосызъя комиссие но Россия Федерациысь международной правоя ассоциацие, Кун Думае но Федеральной собрание. Татын янгышъёс лэсьтыны уг яра. Отӥяз Александр Семёнович журналистъёслэн юанъёссылы валэктыса пусйиз, Конституцие воштонъёс но ватсанъёс пыртыны одно ик кулэ шуыса, со улонлэн куронэз, кинлэн ке мылкыдызъя гинэ малпамын ӧвӧл. Мар бен, воштонъёс но ватсанъёс калыкмылы ӟечен гинэ мед берытскысалзы. Н. Корякин. Выль арлы синпель кузьым Якшур-Бодья ёросысь одӥгаз школаын дышетӥсь алигес дорамы вуылӥз. Солэн соку верамез осконтэмгес потӥз ке но, газет пыр выльысь валэктоно кариськимы на. "Кенеш" журналлы вуоно ар понна кыӵе ке муген гожтӥськыса вуттымтэ семьяос тае лыдэ мед ик басьтысалзы. Кызьы тодӥськоды, берло дыре ваньмызлы сямен газетъёслы но журналъёслы гожтӥськыны луэ кызьы ке почтаосын, озьы ик редакциосын. Сыӵе амал, валамон ни, узыр улэммы бордысь ӧз пот. Лыдӟисьёс яратоно изданиоссылэсь дуно дунызлы луыса медаз куштӥське шуыса малпамын вал со. Тросэзлы кельшыса вуттэм ӟеч амаллэсь ми но палэнэ кыльыны ӧм быгатэ. Шаерысьтымы куд-ог ёросъёсын но Ижын улӥсьёс валля арысен дорамы сюрес лёгизы ни бере, мукетъёслы но со тодмо кожаськомы вал. Удмурт кылъя но литературая дышетӥсьлы та пумысен милям вераммы ноку кылылымтэ кадь луиз. Вуоно ар понна "Кенешлы" гожтӥськонын кутыны луоно амалъёс сярысь газетъёс, радио но телевидение пыр трос пол ивортылэмын ни ке но. Дышетӥсез куаретон понна мытэмын ӧвӧл та вераськон. Асьмелэн ик тырмыт ужамтэмы бордысь потэ, луоз. Малпанъёстэ улонэ пыӵатэмед потэ ке, асьме вакытысь тужгес но чырткем "ужпи" - реклама борды кыткиськы, шуо. Нош сое, тодӥськоды ук, "турынэн" уд алда. Огкылын вераса, ваньмыз потэ куанер улэммы бордысь. Озьы ке но, "Кенеш" журнал вал, вань но луоз. Лыдӟисьёсмес ыштонтэм вылысь, отӥяз но пӧртэм амалъёсты кутыны тыршомы. Таин валче тодады вайытэммы потэ: гожтӥськыны висъям дыр йылпумъяськонэз пала кошке ни. Азьпалан - Выль ар. Ӵыжы- выжыостылы, матысь эшъёстылы та праздникен валче кыӵе ке кузьым басьтон сярысь малпаськиськоды ни, дыр. Сюлмаськондылэсь ог люкетсэ ас выламы басьтысалмы ке, мар меда шуысалды? Гажано адямиостылы вуоно ар понна "Кенеш" журнал кузьмано ке? Асьтэлы со дунтэм усе, нош соослы быдэс ар понна шумпотонэн берытске. Вуж арез келян ӝытэ сётэм кузьымды толэзьлы быдэ асьтэды тодэ вайытоз. Гажано эшъёс! Кызьы ке почтаын, озьы ик редакциын тӥледыз туж но туж витё. Уждундэс, пенсидэс, нылпиостылы пособидэс дыраз сётымтэенызы шуг-секытъёсты вань ке, кӧня ке толэзьлы гожтӥськыса утчалэ. Чылкыт, чебер удмурт кылын потӥсь "Кенеш" журнал тӥледлы сюлэмдыя луиз ке, гожтӥськондэс азьланьтыны быгатӥськоды. "Кенешлы" гожтӥськыны мылкыд карисьёслэсь почтаын 39 сюрс 380 манет кельтозы, нош журналлэн редакциысьтыз басьтэмды потӥз ке, милемлы тӥ 24 сюрс 500 манет тыроно луоды. Малпаськыны дыр сокем трос кылемын ӧвӧл ни. Соин ик, гажано эшъёс, ойдолэ Выль арлэн матэктэмез сярысь но ум вунэтэ. П. СЕРГЕЕВ. "Кенеш" журналлэн валтӥсь редакторезлэн воштӥсез. Историысь чуръёс Няньтэк вормонъёс ӧй луысалзы Колхозъёс кылдытон вакытэ милям Вуж Кармыж сельсоветмы пыре вал Грах ёросэ. Котькуд хозяйствоен кивалтылӥзы пинал коммунистъёс но комсомолецъёс. Али но тодам ваисько сельсоветэ пырись сизьым колхозъёслэсь нимъёссэс: "Октябрь", "Ӝужась кизили", "Шунды ӝужан", "Свободный труд", "2-ая пятилетка", "8-ое Марта". Али соос куд-огез тумошо кылӥсько, но котькуд нимын вал калыклэн историез но азьпаллы осконэз. 1928 арын Вуж Кармыж гуртын но колхоз кылдытыны кутскизы. Солы кичӧлтон сётӥз пинал коммунист Филипп Иванович Осокин. Но кинэ быръёно тӧрое? Колхозъёс кылдытыку, та ужпум одӥгез секытэз вал. Тросэзлэн начаръёслэн тодон-валанзы ӧз тырмылы. Озьыгес ик вал Вуж Кармыжын но. Тӧро луыны курыса, гуртоос Ф. И. Осокинлы вазиськизы. Соку со Васильевской волостьын музъем ужъёсъя отделэн кивалтэ вал. Тӥни озьы егит воргорон огдыре ик кык секыт удысъёсты нуон борды кутскиз. Аслыз кивоштӥсе басьтӥз Тимофей Сергеевич Сергеевез. Кылдытэм артеле нырысь ик пыризы начаръёслэн комитетысьтызы но гурт активистъёслэн хозяйствооссы - ваньмыз 14 хозяйство. Кык ар куспын вань гурт калык колхозэ пыриз. 1930 арын Ф. И. Осокинэз басьто Грах ёросысь исполкоме, бӧрысь Удмурт областьысь колхозстрое, инструкторе. Гурт хозяйствоя вылӥ школаез йылпумъяз бере сое ужаны ысто Каракулино ёросэ, нырысь музъем ужъя инструкторе, собере со отделэ ик кивалтӥсе пукто. Быдӟым Отечетсвенной война вакытэ служить каре МВД-лэн ёзъёсаз. Собере нош ик берытске Каракулино ёросэ, пенсие потытозяз кивалтэ РОВД-ен. Нош кыӵе вал улон сюресэз Тимофей Сергеевич Сергеевлэн? 1938-тӥ - 1942-тӥ аръёсы со кивалтӥз Вуж Кармыж сельсоветэн. Иван пиез войнаын быремез бере, со ожмаськыны кошке, бырыны шеде 1943 арын. Та арын ик фронтын быре солэн выныз Иван Сергеевич Сергеев. Уз, уз вунэ шудо улон понна геройлыко нюръяськемъёслэн нимъёслы, соос сярысь тодӥсьёс-верасьёс вань на ке. Быдӟым Отечественнй война дыръя колхозъёс ке ӧй луысалзы, заводъёсын ужасьёс но солдатъёс сютэм кулысалзы, асьмеос фашизмез ӧй вормысалмы. Соин ик осконо-а меда сыӵе адямиослы, кудъёсыз ваньзэ йыр-чукин берыкто, калыклэсь вир кисьтэмзэ вунэтыны косо? В. ЕГОРОВ. Нуналлэн тодметэз Вашкала календарья туннэ пусъё Георгий Победоносецлэсь праздниксэ. Та нуналэз калык пӧлын ӵемгес тодо Егорий, Юрьев нуналэн. 8 декабрьысь 9 числое выжон уе колодча доры кылӟиськыны ветло вылэм: вуэз чылкыт ке - толэз, пе, шуныт луоз; жургетэ, куашетэ ке - возьма ӟырт кезьытъёсты, жобаськись, пелляськись куазез. Егорийлы вӧсясько вылэм, атай музъеммес тушмонлэсь мед утёз шуыса. Калык чакламъя, туннэ нуналысен гондыр ас гуаз тулысозь умме усе. Таӵе но тодмет вань: Егорлэн вордсконэзлы буг-буг лымыяз ке, турынъёс ӟеч ӝутскозы. Ӵуказе - Романлэн праздникез. Чорыгасьёс тодо: та нуналэ умой шеде налим. Лосьёс вуж сюрзэс кушто. Югыт нунал туннэ кыстӥськоз 7 час 11 минут, ӵуказе - 7 час 9 минут. Лыктэлэ шулдыръяськыны Ижысь "Инвожо" фольклор ансамбльлы тырме дас ар. Респуликаын сяна, сое бускель улосъёсын но тодо. Юбилеезлы сӥзьыса со Удмурт театрын концерт возьматоз. Эшъёссэс ӟечкыланы мукет районъёсысь но фольклор коллективъёс лыктозы. Концерт но шулдыръяськон кутскоз 11 декабре 18 часэ. Н. Возисов. Удмурт радиолы - 65 "Театр - микрофон азьын" Та кылъёслы шаерысьтымы радиокылзӥсьёс дышемын ини. Арнялы быдэ вордӥськон ӝытэ дикторъёс асьмемыз ӧтё репродукторъёслы матэгес кариськыны. Соку асьмеос, коркась потатэк ик,. "театр омыре" сюриськом кадь. Кинлы кызьы, нош мыным зэмен но туж кельшо та передачаос. Таӵе дыре монэ кыӵе ке чыры-пыры ужъёсын эн ӝегаты ни - быдэсак йырыным-пыдыным пыриськемын кадь радиоверанэ-спектакле. Та передачаосъя асьмеос шӧдӥськом вордскем кылмылэсь узырлыксэ, тодматскиськом драматургъёсмылэн произведениосынызы, гожъяськон манеренызы. Огъя вераса, та радиоверанъёс ошмес кадь луо - отысь омыръя но омыръя аслыд кельшонозэ, сюлмад пыӵамонзэ. Макем чылкытгес жильыртоз со ошмес, сокем узыргес луоз асьмелэн лулчеберетмы, сокем муромоз улонэз валанмы. Радио пыр чузъяськись спектакльёс дасян амалъёссыя пӧртэмесь луо. Одӥгез огшорыез амал - пырак театрысь эфире сётон. Соку радио пыр театрлэн омырез шӧдӥське. Спектаклез тон дорад кылзӥськод ке но, зал тыр люкаськем учкисьёслэсь шокамзэс, артистъёслэн шудэмзылы я серемен, я чабонэн, я синву пыр ныр кысканэн вазиськемзэс кылӥськод кадь. Кыкетӥез амал - театрлэсь дась спектакльзэ радиостудиын плёнка вылэ гожтыса сётон. Со спектаклез ӝикытгес карыны луонлык сётэ. Кылзӥсь уг шӧды ни театрлэсь омырзэ, шокамзэ. Со понна, куараё мизансценаосты уже кутыны луэ. Луыло на радиоын дасям спектакльёс. Басьтӥське соиз яке таиз пьеса - артистъёсын ужаса, татын ик плёнка вылэ гожтӥське. Тужгес вылез амал - радиопьесая дасям спектакль. Автор театрен чик герӟаськытэк, ас малпамезъя, лобась мылкыдызлы эрик сётыса "пӧра" зэмос радиоспектакль. Та жанрлэн вордӥськемез сокем кемалась ӧвӧл на. Радиопьесаын лыдэ басьтыны кулэ пӧртэм луонлыкъёсты: улэп вераськонэз, улонысь пӧртэм куараосты, крезьгурез. Таӵе луонлыкъёс уката но паськыт кутӥсько туала вакытэ, электроинструментъёс, синтезаторъёс кылдэмен. Удмурт театрлэн нырысьсэ плёнка вылэ гожтэм спектаклез луэ П. Блиновлэн "Улэм потэ" романэзъя Лазарь Перевощиковлэн инсценировкаез. Театрын та спектакль С. Гляттер режисшрен пуктэмын вал 1949-тӥ арын. Нош плёнка вылэ гожтыса, радио пыр чузъяськытӥллям ини 1952-тӥ арын. Тросэз та спектакльын шудэм артистъёс туннэ асьме пӧлын ӧвӧл ни. Кылсярысь, Демилэсь рользэ шудэм вылэм республикаысьтымы дано артист Василий Гаврилов, Омелез - калык артист Григорий Овечкин, йыртэмасьёслэсь йырзэс Олёшкаез - дано артист Василий Садовников, Осипез - дано артист Вячеслав Волков. Пӧламы ӧвӧл ни пересь чорыгасез шудэм артист Яков Перевощиков, валэктон кылъёссэ лыдӟись - РСФСР-ысь дано артист Василий Перевощиков но мукетъёсыз. Нош соос улэп кадесь пуксё син азямы. Удмурт радиоын ужасьёс та исторической спектакльзэс синчеберзэс кадь утьыса возё. Азьланяз, 1955 арын, плёнка вылэ гожтэмын Лазарь Перевощиковлэн "Дуно саламез". Сое Удмурт театрын пуктӥз РСФСР-ысь дано артист Кузьма Ложкин. Татын валтӥсь геройёсты быгатыса шудӥзы дано артистъёсмы Иван Кудрявцев, Василий Перевощиков, Аполос Перевощиков, тушмонъёсты - Демьян Федотов, Яков Вахрушев, озьы ик РСФСР-ысь искусствоосъя дано ужась Геннадий Веретенников. Радиоысь литературно-драматической редакциен кивалтӥсь Гай Сабитович Сабитов та спектаклен усьтӥз но кузь улон сётӥз "Театр микрофон азьын" циклысь туж тунсыко передачаослы. Радиокылзӥсьёслы соос туж яразы, гожтэтъёсазы пӧртэм спектакльёсты радио пыр сётыны курыса вазиськылӥзы. Озьы дасямын вал Степан Широбоковлэн "Ӵукдор" пьесаезъя спектакль, со бордын ужаз Удмурт театрысь режиссёр Михаил Покчи-Петров. Плёнка вылэ гожтэмын Игнатий Гавриловлэн "Аннокез", "Азинэз", Иннокентий Поповлэн "Семьяез", Всеволод Ивановлэн "Бронепоезд-14- 69" драмаез. 50-тӥ аръёсы "Ижмаш" культура дворецысь пырак радиостудие кыскемын вал микрофон кабель. Со луонлык сётӥз спектакльёсты пырак сцена вылысь эфире сётыны яке плёнка вылэ гожтыны. Таӵе луонлык лӧпкытӥз милемыз, радиоын ужасьёсыз: табереяз ми но быгатом Всесоюзной радиоын сямен икужаны. (УДмурт театр соку огдырлы "Ижмаш" двореце выжылӥз). Та вакытэ драмая Удмурт театр ужасьёссэ данаклы будэтыса пӧрмытэмын вал ини Удмурт музыкально-драматической театрлы. Драматической труппаез сяна, солэн вал кырӟасьёсыз- солистъёсыз, хорез, балетэз, симфонической оркестрез. Таӵе огазеям кужымен 1959-тӥ арын пуктэмын Михаил Петровлэн "Вуж Мултан" музыкальной драмаез, режиссёрез УАССР-ысь искусствоосъя дано ужась Михаил Покчи-Петров (со ик татын В. Короленколэсь рользэ шудӥз). Декорациоссэ дасяз театрлэн валтӥсь художникез Георгий Векшин. Спектакльын кутэмын Николай Голубевлэн но Николай Греховодовлэн крезьгуръёссы. Оркестрен дирижировать кариз Борис Пинский, эктонъёссэ пуктӥз Анатолий Бондарев. Театрлэн историяз таиз куиньметӥзэ пуктэм "Вуж Мултан" спектакль вал ини, азьвылъёсаз тамында творческой кужым ӧз пыриськылы. Спектакль яркыт, мур социальной пуштросъем но ӟырдыт кужымо пӧрмиз. Ӵапак та спектакль вылэ учыраз нырысьсэ театрысен гожтон но радио пыр сётон. Котьмар ке но, ми, радиоын ужасьёс, спектаклез пырак эфире сётыны ӧм дӥсьтэ. Удмурт радио соку ӝытазезэ ужа вал час но ӝыны гинэ. Нош спектакль антрактъёсын, суредъёсты вошъянэн-маин куинь час пала мынӥз. Спектаклез плёнка вылэ гожтӥм. Техникъёс-операторъёс дышемын ӧвӧл на таӵе передачаослы. Интыен-интыен плёнка вылэ гожтӥськем чик кулэтэм дыбыр-колтыр карем, кылъёссы йӧназ уг кылӥськы. Таӵе тырмымтэосты бӧрысь (гожтэм плёнкаез сузяку) палэнтыны луиз. Спектаклез вакчиятӥм, валэктон кылъёс пыртылӥм. Таяз аре ик сӥзьыл 13-тӥ шуркынмонэ театрын выль премьера вал: Г. Корепанов-Камскийлэн "Любушка" опереттаез. Удмурт театральной искусствоямы та выль жанр, выль пушъет луиз. Оперетта нырысь ӟуч кылын мынӥз, бӧрысь сое удмурт кылын но шудӥзы. Либреттозэ гожтӥзы удмурт драматург Лазарь Перевощиков но Москваысь автор Кирилл Поляков. Режиссёрез Александр Асанин, декорациосызлы эскизъёс дасяз Георгий Векшин, оркестрен кивалтӥз Удмурт Республикаысь искусствоосъя дано ужась Глеб Бехтерев, эктонъёссэ пуктӥз балетмейстер Иван Сергеев. Та спектакльын валтӥсь геройёслэсь тунсыко образъёссэс кылдытӥзы РСФСР-ысь дано артистка Евгения Пахомова (Любушка) но Геннадий Корепанов-Камский (Гриша). Таиз но спектакль плёнка вылэ гожтэмын пырак театрын, сцена вылын мыныкуз, 1960 арын. Озьыен, выль амал ӧнертэмын. 50-тӥ аръёслэн кутсконазы ик вордӥськизы но бератаз паськыт вӧлмизы удмурт писательёслэсь произведениоссэс инсценировать карыса дасям радиоспектакльёс. Та ужын кичӧлтӥсь луиз Удмурт радиоысь общественно-политической редакциын ужась Михаил Андреевич Лямин.Та дыре солэн потэмын вал ини "Шудбур понна" повестезлэн нырысетӥ книгаез. Писатель, радиоын ужаса, пыр-поч валаз солэсь аспӧртэмлыксэ, луонлыкъёссэ, учкисьёслэсь мылкыдзэс. Солэн сюлмаз ялан улӥзы книгаезлэн геройёсыз, соослэн сямъёссы, ужъёссы. Соос маза ӧз сётэ авторлы буйгатскыны, "улӟытыны" куриськыса улӥзы куадь. Книгаезъя радиоспектакль дасян - со вал туж иназ луэм кичӧлтон. Инсценировказэ ачиз ик дасям бере, Михаил Андреевич пуктыны мыным ӵектӥз. Шурдысагес ке но, басьтӥськи. Таӵе ужен азьвыл выреме ӧй вал уго, радиоын диктор луыса ужасько вал. Ӵошен бырйимы спектакльын шудыны артистъёсты. Беретаз, репетициос кутскем бере, бордам пукыса, котькуд интыяз юрттыны дась вал. Ужмес быдэстӥм Удмурт автономилы 32 ар тырмон азелы. Нош рольёсты та радиопостановкаямы шудӥзы Удмурт АССР-ысь дано артистъёс Иван Кудрявцев (Азин), Демья Федотов (Петр Бадяров), РСФСР-ысь дано артистка Анастасия Шкляева (Бадяровлэн анаез), шаерысьтымы калык артистка Васса Виноградова (Лели), дано артист Вячеслав Волков (Кион Оле) но мукетъёсыз. "Шудбур понналэн" кыкетӥ люкетэз радио пыр сётэмын вал Советской власть кылдэм дырысен 50 ар тырмыку. Таиз ужмы Удмуртиысь журналистъёслэн премиенызы пусъемын вал. Спектаклямы Иосиф Наговицынлэсь рользэ шудӥз Россиысь искусствоосъя дано ужась Леонид Романов, Бадяровез - республикаысьтымы дано артист Сергей Марков, Даниил Майоровез - калык артист Юрий Яковлев. Кыкетӥез удмурт литературалэн зарни шыкысысьтыз поттыса дасям радиоспектакль луиз Филипп Кедровлэн "Катя" повестезъя передача. Сое мыным пуктыны ӵектӥз Михаил Покчи-Петров. Катяез но Койыкез шудыны ӧтимы РСФСР-ысь дано артистъёсыз Нина Бакишеваез но Василий Перевощиковез. Таиз радиоспектакль дасямын 1955-тӥ арын. Ӟырдыт мылкыдын басьтӥськи мон школаын ӵош дышетскем, одӥг парта сьӧрын пукем эшелэсь Геннадий Красильниковлэсь "Вуж юрт" повестьсэ радио пыр сётон борды. Со вал 1957-тӥ арын. Ужмы пӧрмиз кадь. Ӵапак та радиоспектаклез дасям бере, мон дикторысь режиссёре выжи. Мыным кылдӥз на Геннадий Дмитриевичлэсь "Тонэн кылисько" повестьсэ но радиоын пуктыны. Таиз вал 1961-тӥ арын. Радиокылзӥсьёс витизы выль но выль постановкаосты. Таин сэрен кичӧлтон лэсьтэмын вал ӟуч кылын дасям радиопостановкаосыз удмурт кылэ берыктыса пуктылыны. Сценарийёс басьтылӥмы Всесоюзной радиоысь. Озьы мыным пуктыны кылдӥз Л. Толстойлэн "Бал бере" веросэзъя (1954), В. Савельевлэн "Куке лыктэ яратон" (1955) но мукет спектакльёсты. 1964-тӥ арын Гай Сабитов удмурт кылэ берыктӥз Апушкинлэсь "Зӥбем данэн улӥсь" драматической этюдзэ. Со сӥземын вал ӟуч поэтлэн М. Лермонтовлэн улэм-вылэмезлы. Валтӥсь ролез та спектакльын шудӥз Василий Перевощиков. Туж тунсыко потыса ужай мон киргиз писательлэн Чингиз Айтматовлэн "Нырысетӥ дышетӥсь" повестезъя радиопостановка бордын. Москваысь ыстэм инсценировкаез удмурт кылэ берыктӥз Анатолий Уваров. Нырысетӥ дышетӥсьлэсь Алтынайлэсь образзэ туж мур усьтыны быгатӥз Нина Бакишева, солэсь яратонзэ, утисьсэ Дюйшенэз усто шудӥз Леонид Романов. Тодады на ке, повестьын автор маде Киргизиын Советской власть кылдэм бере школаос усьтонлы, нылпиоссэс дышетонлы пумит луэмзы сярысь. Мынам али ке но син азям на ӝамдэлы гинэ потась Сьӧд кышномурт, кудзэ шудӥз Васса Виноградова. Макем зол, вань сюлэм ӟырдытсэ но мугор кужымзэ валчеяса, куараез пырп возьматыны быгатӥз со образэзлэсь пуштроссэ. Та постановка дасямын вал 1964-тӥ арын, радио пыр али ке но чузъяськылэ на. 60-тӥ аръёслэн кутсконазы радиое кык пьесаоссэ сётӥз Удмуртиысь калык писатель Степан Широбоков: "Яратэ - уг яраты" лирической комедизэ но "Точка" сатирической пьесазэ. Соберегес пуктэмын Николай Васильевлэн "Чагыр сяська" выжыкылэз, "Азвесь портсигар" повестез но мукетъёсыз. Соос бордын ужаз режиссёр Анатолий Митрофанов. Ужамезлы йылпумъянъёс лэсьтэ Та нуналъёсы Россия Федерацилэн Кун Думаысьтыз депутат Андрей Солуянов Завьял, Воткинск ёросъёсысь, Ижевск городысь бырйисьёсыныз пумиськылэ. Пӧртэм организациосысь коллективъёс, студентъёс, пенсионеръёс азьын Кун Думаын кык ар ӵоже ужамезлы йылпумъянъёс лэсьтэ. Депутат 200 пумиськон ортчытоз, бырйисьёслэсь куронъёссэс быдэсъямез сярысь ивортоз. Удмурт Республикаысь Кун Кенешлэсь дас витетӥ (азьвыл чакламтэ) сессизэ люкан сярысь Удмурт Республикаысь Кун Кенешлэн Президиумезлэн Постановлениез Удмурт Республикаысь Кун Кенешлэн Президиумез пуктэ: 1. 1997 арын 11 декабре 10.00 часын Ижевскын люкано Удмурт Республикаысь нырысетӥзэ ӧтчам Кун Кенешлэсь дас витетӥ (азьвыл чакламтэ) сессизэ. 2. Сессия эскероз "Удмурт Республикаысь Кун властьлэн ёзъёсызлэсь но интыысь аскивалтонъя ёзъёслэсь кусыпъёссэс радъян ужрадъёс сярысь" ужпумез Удмурт Республикаысь Кун Кенешлэн Тӧроез А. А. Волков. Ижевск город, 1997 арын 7 декабре, � 427-И Удмурт Республикаысь Кун Кенеш, Правительство мур куректыса иворто "Удмуртмелиорация" объединенилэн азьвыл начальникез Костенко Михаил Ильич улонысь дырызлэсь вазь кошкем сярысь но ӵыжы-выжыосызлы кайгыремзэс верало. Люкиськон ортчоз 5 декабре 13.00 часын таӵе адресъя: Ижевск, Свобода ульча, 171 номеро юрт, 13-тӥ квартира. Костенко Михаил Ильич 1997 арын 2 декабре куатьтон тямыс аресказ улонысь кошкиз Михаил Ильич Костенко. М. И. Костенко вордскиз 1929 арын 16 ноябре Казахстанысь Кустанай областьын Белояровка селоын. Ужаны кутскиз 1947 арын Челябинск областьын Конейской Энергазуправлениын электромонтер луыса. Ра ортчыса дышетскыны пыриз Челябинскысь гурт хозяйствоя институтэ. Дышетскемзэ быдтэм бераз Михаил Ильичез ыстӥзы Удмуртие, ужаз Гурт хозяйствоя министерстовын валтӥсь инженер луыса. 1954 арысен Михаил Ильич Костенко пӧртэм удысъёсын кивалтӥсь луыса ужаз. Азьло кивалтӥз Удмуртиысь "Мелиоводстрой" строительно-монтажной контораын, собере тыршиз Удмуртиысь Министръёслэн Советысьтызы ву хозяйствоя отделын. 1957-1966 аръёсы кивалтӥз Гурт хзяйствоя министерстволэн ву хозяйствоен герӟаськем управлениеныз но "Мелиоводстрой" СМУ-эн. 1966 арын солы дэмлазы "Удмуртмелиоводстрой" трестэз кылдытыны. 1974 арозь та трестэн кивалтӥз. Собере сое "Удмуртмелиорация" объединенилы начальнике юнматӥзы. 1978 арысен пенсие потытозяз ужаз та объединениен кивалтӥсьёслэн воштӥсез луыса. Костенко Михаил Ильичез гажазы ӵош ужась эшъёсыз, тодмоосыз, быгатыса кивалтэмез, сюлмо луэмез понна. М. И. Костенко трос кужымзэ сётӥз, Удмуртиысь гурт хозяйствоез азинон понна, со пусъемын "Знак почёта" орденъёсынно медальёсын. Михаил Ильич Костенко пыраклы тодэ ваёнъёсамы, сюлэмъёсамы кылёз. Эшъёсыз. "Ӝужась кизилиос - 97" Россия Федерацилэн Конституция нуналаз Республикаысьтымы пӧртэм ёросъёсысь егитъёс пыриськозы удмурт эстрада кырӟанъя йылпумъян конкурсэ. Соос пӧлын вань ни калыклы тодмоосыз но кырӟасьёс. Егитъёслэсь быгатонлыкъёссэс учкыны мылкыд карисьёсты возьмало Удмурт кун национальной театрлэн юртаз 5 часын ӝытазе. И. НИКОЛАЕВА. Тодон шыкысэз узыр Тунсыко адямиен пумиськон ортчиз Малягурт школаямы. Виктор Петрович Поздеев уно сюресъёсты ортчемын, дорамы но нырысьсэ гинэ ӧз вуы. Озьы ке но, солэн мадемъёсыз выль тодонъёс ваё. Аслэсьтыз ужан сюрессэ Виктор Поздеев мыктӥз андан ӵыжатон заводын. Но военной историк луыны малпанзэ ноку ӧз вунэтылы. Йылпумъяз Ейскысь военной училищеез, мынӥз школае дышетӥсь луыса ужаны. Солэн нырысетӥ бадӟым ужез сӥземын Брест крепостез утисьёслы, 30 ар талэсь азьло потӥз "Они защищали Брестскую крепость" книгаез. 15 ар ортчыса потӥз мукетыз, "По следам подвига" ужез. Уно кужымзэ Виктор Петрович сётӥз война аръёсы Сталинград котырын ожмаськонъёсты эскеронлы. Пумиськон дыръя соос сярысь мадиз. Люкаськемъёс тунсыкъяськыса кылзӥзы Удмуртиын кылдэм 357-тӥ дивизилэн Великие Луки дорын лек жугиськонэ пыриськемез сярысь. Историклэн тросэз ужъёсыз потэмын "Удмурт дуннеын". Автор юн кусыпъёс возе ета газетын ужасьёсын, соослы тау карыса, шуныт кылъёс вера. Газетлэсь куд-ог номеръёссэ бӧрсяз но ваем. Соосты школамылы кузьмаз. Л. СОЗОНОВА. КРАСНОГОРСК ЁРОС. Агропромышленной удысын ванбур поттонэз кун ласянь радъян сярысь Удмурт Республикалэн Законэз Та Закон возьматэ, кыӵе амалъёсын экономикалэсь луонлыкъёссэ кутоно, агропромышленной удысын ваньбур поттонэз кун ласянь радъян понна, Удмурт Республикалэн полномочиосыз сьӧры потытэк. Агропромышленной удысын ваньбур поттонэз кун ласянь радъянлэн ужпумъёсыз: гурт хозяйствоын поттэм продукцияя, сырьёя но сиён-юонъя рынокез кылдытыны но юнматыны юрттон; гурт хозяйстволэн экономикаысь мукет удысъёсын огкадь правоосын экономической кусыпъёсызлы дурбасьтон; гурт хозяйствоын поттэм продукцилэсь, сырьёлэсь но сиён-юонлэсь конкуренциын вормыны быгатонлыкъёссэ ӝутон; интыосысь вуз поттӥсьёсты но организациосты - гурт хозяйстволэсь продукцизэ утисьёсты, вузасьёсты, пӧртэм вузъёслы пӧрмытӥсьёсты - кунгож сьӧр конкуренцилэсь утёнъя политикаез нуон; гурт калыклэсь улонзэ капчиятон. 1-тӥ ёзэт. Та Законын кутӥськись валтӥсь валатонъёс Агропромышленной удысын ваньбур поттон огазея гурт хозяйствоын ваньбур поттонэз, гурт хозяйстволэсь сырьёзэ пӧртэм продукцилы пӧрмытонэз, дась продукциез вузанэз, озьы ик гурт хозяйствоын продукциез поттонэн, пӧртэм вузъёслы пӧрмытонэн, вузанэн герӟаськем ужез, асваньбурез кызьы кутэм но хозяйствоез кыӵе амалъёсын нуэм шоры учкытэк. Нормая басьтон дун - Удмурт Республикаысь Правительствоен юнматэм дун, кудӥз гурт хозяйствоын вуз поттӥсьёслы луонлык сётэ, кунлэсь мукет юрттэтъёссэ лыдэ басьтыса, паськытатэм воспроизводстволы тырмымон пайда басьтыны. Нормая басьтон дунэз лыдъяло, гурт хозяйствоын поттэм продукцилэн нормая асдунызлэн шор лыдыз но сое поттонлэн пайдалыкез (25 процентлэсь ичи ӧвӧл) вылэ пыкиськыса. Нормая басьтон дунъёс кутӥсько рынокен тупатэм дунъёс борды ватсаса коньдонэз - дотациосты, компенсациосты но налогъёсъя льготаосты, кудъёссэ Удмурт Республикаысь Правительство юнматэ, - лыдъян понна. Суменак басьтон - Удмурт Республикаысь Правительстволэн заказэзъя гурт хозяйствоын вуз поттӥсьёслэсь улосъёслэн кулэяськонъёссылы продукциез, сырьёез но сиён-юонэз нимысьтыз радъяса люкан амал. Залогъя кун операциос - юридической лицоослэн гурт хозяйствоын вуз поттӥсьёслэсь пичи залоговой (гарантия сётӥсь) дунъя продукция, сырьё но сиён-юон басьтэмзы. Юридической лицоос кутэм кредитъёсты берыктыны кунлэсь гарантиоссэ юнматон вылысь залогъя кун операциосты ортчыто, кунлэн оскем муртъёсыз луыса. Пичи залоговой (гарантия сётӥсь) дун - Удмурт Республикаысь Правительствоен юнматэм дун, кудӥз агропромышленной удысын вуз поттӥсьёслы пичи ке но табыш поттыны луонлык сётэ. Сое юнматыку лыдэ басьтӥське Россиысь рынокын гурт хозяйстволэн продукциезлэн, сырьёезлэн, сиён-юонэзлэн рыночной дунзы - шор лыдзылэн 70 процентэзлэсь ичи ӧвӧл. Пичи залоговой (гарантия сётӥсь) дун кутӥське агропромышленной комплексын вуз поттӥсьёслэсь мултэс продукцизэс, сырьёзэс но сиён-юонзэс басьтон понна, соос продукцизэс рыночной дунъёсъя вузаны уг ке быгато. Чаклан дун - гурт хозяйствоын вуз поттӥсьёслы но гурт хозяйстволэсь продукцизэ, сырьёзэ но сиён-юонзэ басьтӥсьёслы дэмлам дун. Кутӥське контрактацияя огкылъёсты кутыку но авансъёсты лыдъяку, лыдэ басьтэ рыноклэн конъюктураезлэсь вошъяськемзэ. Чаклан дунъёс юнматӥсько но рыноклэн субъектъёсызлы кулэяськыкузы ивортӥсько Удмурт Республикаысь Правительствоен юнматэм радлыкъя. Гурт хозяйствоын вуз поттӥсь - нимаз адями яке юридической лицо, адямилэсь ас хозяйствозэ пыртыса, гурт хозяйствоын продукция поттӥсь, продукцизэ вузамлэсь табыш огъя вузам продукцилэсь 50 яке тросгес процент луэ ке. 2-тӥ ёзэт. Агропромышленной удысын ваньбур поттонэз кун ласянь радъян амалъёс 1. Агропромышленной удысын ваньбур поттонэз кун таӵе амалъёсын радъя: улосын кылдэм югдурез но куазен герӟаськем югдурез лыдэ басьтыса, ваньбур поттонэз но гурт хозяйстволэсь куд-ог продукцизэ вузанэз дунъёсын радъян, продукциез нормая но пичи залоговой (гарантия сётӥсь) дунъёсъя басьтон; инвестициосын ужанэз программаосын радъян, гурт хозяйствоын продукция поттон понна техника но оборудование, ӟеч выжы кидыс но пудо басьтонэз пыртыса, целевой программаосты лыдэ басьтыса; агропромышленной удысын ваньбур поттонэз коньдонэн радъян, кунлэн кредитъя, налогъёсъя но страхованиея нимысьтыз политикаез пыр, кунсьӧр инвестициосты кыскыны луонлыкъёс кылдытыса; музъемлэсь ӟечлыксэ будэтонъя, пудоез паласькись висёнъёслэсь утёнъя, будосъёсты изъянтӥсьёсын нюръяськонъя, пудо вордонын племенной ужез, ӟеч выжы кидыс будэтонэз азинтонъя, гурт хозяйствоосын вуз поттӥсьёслэсь социальной инфраструктурая объектъёссэс возёнэ кошкем коньдонэз берыктонъя, дышетонэз азинтонъя ужрадъёсы, агропромышленной удысын ваньбур поттонын научно-исследовательской но опытно- конструкторской ужез нуонэ коньдонэз меӵак висъян; 2. Республикалэн бюджетысьтыз агропромышленной удысын ваньбур поттонэз юнматыны но азинтыны висъям коньдон республикалэн бюджетаз нимысьтыз люкетэн чаклаське, бюджетлэн мукет люкетъёсаз - нимаз чурен. Республикалэн бюджетэзлэн расходъя люкетаз соослэн пайзы 10 процентлэсь ичигес луыны уг быгаты. 3. Удмурт Республикаысь интыысь аскивалтонъя ёзъёс агропромышленной удысын ваньбур поттонлы юртто, та Закон вылэ, норма тупатӥсь мукет правовой актъёс вылэ пыкиськыса. Соослэн решениоссы уг быгато кулэстыны кунлэсь гарантиоссэ, кудъёсыз сётэмын гурт хозяйствоын вуз поттӥсьёслы та Законэн. 3-тӥ ёзэт. Агропромышленной удысын ваньбур поттонэз дунъёсын радъян 1. Дунъёсын радъян - кунлэн одӥгез валтӥсь амалэз, кудӥз гурт хозяйстволы калык хозяйстволэн мукет удысъёсыныз огкадь правоен экономической кусыпъёс возьыны юрттэ. Дунъёсын радъян ортчытӥське: - нормая басьтон дунъёс пыр; - пичи залоговой (гарантия сётӥсь) дунъёс пыр; - чаклан дунъёс пыр; - гурт хозяйстволэн сырьёысьтыз лэсьтэм (сое вузам) дась продукцилэн дуназ со сырьёлэсь дунъя люкетсэ юнматыса. 2. Гурт хозяйстволэн продукциезлы, сырьёезлы но сиён-юонэзлы нормая басьтон дунъёс кутӥсько, та продукцилы, сырьёлы но сиён-юонлы рыночной дунъёс гурт хозяйствоын вуз поттӥсьлы луонлык уг сёто ке огшоры яке паськытатэм воспроизводство понна тырмымон табыш басьтыны. Нормая басьтон дунъёс юнматӥсько, республикаысь ёрослэсь инкуазь, музъем аспӧртэмлыкъёссэ лыдэ басьтыса. Гурт хозяйстволэн кыӵе продукциезлы нормая басьтон дунъёс тупатон, дунъёслэсь быдӟалазэс но кутӥськон дырзэс юнматон сярысь решение кутэ Удмурт Республикаысь Правительство. 3. Гурт хозяйстволэн продукциез, сырьёез но сиён-юонэз, пичи залоговой (гарантия сётӥсь) дунъёсъя басьтэмъёсыз, кошко залогъя кун операциосты ортчытонэ, кутэм кредитъёсты берыктыны кунлэсь гарантиоссэ юнматон понна. Вылӥ верам продукциез но солэсь лэсьтэм продуктъёсты вузаса поттэм табыш кошке соосты возёнэ (утёнэ) быдтэм коньдонэз берыктонлы, озьы ик залог возисьлэсь кредитъёсъя процентъёссэ кысэ. Залогъя кун операциосты ортчыто юридической лицоос. Соосты юнматэ Удмурт Республикаысь Правительство, мылкыд карисьёс пӧлын конкурс ортчытыса. Конкурслэсь радзэ но куронъёссэ юнмато Россия Федерацилэн но Удмурт Республикалэн законодательствозы. Продукциез пичи залоговой (гарантия сётӥсь) дунъёсъя басьтон ортче мылкыд каремъя, одӥг кыл шедьтыса. Басьтӥсь но вузась вераськемъя, продукция понна коньдонэн, дуно кагазъёсын, складской свидительствоосты но вераса, вузъёс тырыны луэ. Гурт хозяйствоын вуз поттӥсьёс продукцизэс вузамзы бере куать толэзь куспын быгато залоговой дунъёсъя вузам продукцизэс дун тырыса берыктыны, залогъёсъя операциез ортчытонлы кошкем коньдонэз берыктыса. 4. Сиён-юон поттӥсь, вузкарись но мукет организациос гурт хозяйстволэн сырьёез понна тыро сомында, кӧня экономической кужым соос сётӥзы дась продукциез лэсьтон но вузан понна. Лыдэ басьтоно поттэм (вузам) продукцилэн дуназ (оптовой, розничной) гурт хозяйстволэн сырьёезлэн дунызлэсь юнматэм люкетсэ, кудзэ тупатэ Удмурт Республикаысь Правительство. Гурт хозяйстволэсь продукцизэ басьтӥсьёс гурт хзяйствоын вуз поттӥсьёсын авансэз лыдъяло чаклан дунъёсъя, нош йылпумъяса лыдъяку лыдэ басьтӥське поттэм (вузам) продукцилэн дуназ (оптовой, розничной) гурт хозяйстволэн сырьёезлэн дунызлэн юнматэм люкетэз. Таӵе лыдъян-чотан радэз кутыку, оптовой но розничной дунъёс воштӥсько ке, сомындалы ик воштӥсько басьтон дунъёс но, кудъёсызъя гурт хозяйстволэсь сырьёезлэсь дунзэ лыдъяло. 4-тӥ ёзэт. Агропромышленной удысын ваньбур поттонэз программаосын радъян Агропромышленной удысын ваньбур поттонэз программаосын радъян ортче "Республикалэн целевой программаосыз сярысь" Удмурт Республикалэн Законэныз юнматэм радлыкъя, со агропромышленной удысын ваньбур поттонын структурной политикаез пыӵатыны юрттэ, улосъёсын, интыосын кун программаосты кылдытыса но кутыса, планъёс тупатыса, АПК-ын вуз поттӥсьёслы сӥзем программаослы но инвестициосын герӟаськем проектъёслы кун ласянь юрттэт сётыса но кунлэн кулэяськонъёсызъя продукция вайыны кун заказъёс сётъяса. 5-тӥ ёзэт. Агропромышленной удысын ваньбур поттонэз коньдонэн радъян 1. Агропромышленной удысын ваньбур поттонлы кредит висъян. 1.1. Удмурт Республикаысь Правительство арлы быдэ юнматэ бюджетын чаклам яке бюджетэ пыртымтэ (коньдон, вузъёс яке асваньбур) коньдон ваньбурлэсь быдӟалазэ, кудӥз мынэ банковской яке мукет заёмъёсты берыктыны кунлэсь гарантиоссэ (поручительствооссэ) юнматонэ; арлэн вакытэныз герӟаськем ужъёслы кредит висъян но агропромышленной удысын ваньбур поттонын тырмымон запас возён понна; юнматэм программаосъя но проектъёсъя агропромышленной удысын ваньбур поттонлы кемалы кредитъёс висъян понна; гурт хозяйствоын вуз поттӥсьёс техника, научно-технической продукция, удобрение, ӟеч выжы пудо, кидыс лизинг пыр басьтыны мед быгатозы шуыса. 1.2. Удмурт Республикаысь Правительство юнматэм радлыкъя кылдытэ нимысьтыз фондъёс но структураос, агропромышленной комплексын кунлэсь кредитъёсъя политиказэ нуон понна. 1.3. Гурт хозяйстволэсь продукцизэ, сырьёзэ но сиён-юонзэ пичи залоговой (гарантия сётӥсь) дунъёсъя басьтыны радэз но куронъёсты юнматэ Удмурт Республикаысь Правительство. Залогъя кун операциосты ортчытыку, кредит котьку сямен висъяське пичи залоговой (гарантия сётӥсь) дунъёсты юнматон понна. 2. Гурт хозяйствоын вуз поттӥсьёслэсь налог басьтон. Гурт хозяйствоын вуз поттӥсьёслэсь налог басьтӥське, Россия Федерацилэн законъёсызъя но мукет нормативной правовой актъёсызъя, Удмурт Республикалэн быдэсъяно ужъёсаз Удмурт Республикалэн законъёсызъя но мукет нормативной правовой актъёсызъя. Ватсаса льготаосты (соослэн быдӟалазы республикалэн бюджетаз но ёросъёслэн но городъёслэн бюджетъёсазы висъяськись налогъёслэсь но тыронъёслэсь трос уг луы) сётыны рад но куронъёс юнматэмын "Удмурт Республикалэн бюджетъёсаз тыронъёсъя льготаос но налогъёсъя льготаос сётон рад сярысь" Удмурт Республикалэн Законэныз. Удмурт Республикаысь Правительство Удмурт Республикалэн бюджетэзлы инъетэныз ӵош дася агропромышленной комплекслэсь социальной удыссэ, экономиказэ азинтон сюресъёс, вуоно арын солы кун ласянь юрттыны амалъёс, луонлыкъёс, соос пӧлын - налогъёс басьтонын льготаос сётон сярысь доклад. 3. Агропромышленной удысын ваньбур поттонэз страховать карон. Удмурт Республикаысь Правительство кулэ дыръя Удмурт Республикаысь Кун Кенешлы страховой фондъёсты но структураосты кылдытон сярысь ӵектон сётэ, агропромышленной удысын ваньбур поттонын кунлэсь страховой политиказэ нуон понна. Гурт хозяйствоын вуз поттӥсьёслэсь страхование кошкем коньдонзэс кӧнязэ ке берыктыны луоз республикалэн бюджетэз чотын. 6-тӥ ёзэт. Агропромышленной удысын ужан Агропромышленной удысын ваньбур поттонлэн куд-ог удысъёсаз ужаны лэземын, лицензия басьтыса. Лицензия улэ сюрись удысын ужанлэн технологилэн, техникаез кутонэн герӟаськем кышкытлыклэсь утиськонлэн, чылкытлыклэн, санитариялэн, кун стандартъёслэн куронъёссылы тупамез пумысен кун экспертиза ортчытэм бере ужаны лэзён сётӥське (разрешение). Агропромышленной комплексысь организациослэн куд-ог удысъёсын ужамзылы лицензия сётӥське Россия Федерацилэн но Удмурт Республикалэн федеральной законъёсынызы но мукет нормативной правовой актъёсынызы юнматон радлыкъя. 7-тӥ ёзэт. Гурт хозяйстволэн продукциезъя, сырьёезъя, сиён-юонэзъя республикалэн фондэз 1. Удмурт Республикалэсь продукцилы, сырьёлы, сиён-юонлы кулэяськонъёссэ быдэстон понна кылдытӥське гурт хозяйстволэн продукциезъя, сырьёезъя но сиён-юонэзъя улосвыл фонд (отӥяз - республикалэн фондэз). Республикалэн фондаз гурт хозяйстволэн продукциез, сырьёез но сиён-юонэз пӧлысь мае но кӧня басьтон но вуттон тупатӥське Удмурт Республикаысь Правительствоен, но кылдытӥське, гурт хозяйствоын вуз поттӥсьёсын огкылъёс вылэ пыкиськыса. Республикалэн фондаз вуэм продукция, сырьё но сиён-юон Удмурт Республикалэн асваньбураз пыро, кытын утиськемзэс лыдэ басьтытэк. 2. Удмурт Республикаысь Правительство, республикалэсь фондзэ кылдытон понна, арлы быдэ кун заказчикъёсты юнматэ, конкурс ортчытыса но. Конкурс ортчытон радэз юнматэ Удмурт Республикаысь Правительство. 3. Республикалэн фондэзлэн кылдэмез но ужамез право ласян радъяське, Россия Федерациысь, Удмурт Республикаысь законодательствоос, та Закон вылэ пыкиськыса. 8-тӥ ёзэт. Агропромышленной удысын ваньбур поттонын дышетонлы, наукалы, исследованиослы, опытно-конструкторской ужъёслы кун ласянь юрттэт сётон амалъёс Агропромышленной удысын ваньбур поттонын дышетонлы, наукалы, исследованиослы опытно-конструкторской ужъёслы кун ласянь юрттэт сётон амалъёс: наукаен, техникаен герӟаськем, мае ке выльзэ сётӥсь программаосты быдэстон; дышетон заведениослы, специалистъёсты дасясь, тодон-валанъёссэс будэтӥсь но мукет специальностьлы дышетӥсь центръёслы юрттон; визь-кенеш но иворъёс сётӥсь кун службаослы коньдон висъян, быдэстэм ужъёссы но юрттэтъёссы понна тыронъёс кошкем коньдонзэс берыктыны уг тырмо ке. 9-тӥ ёзэт. Гуртлэсь социальной но инженерной инфраструктуразэ азинтыны кунлэн юрттэмез Гуртлэсь социальной но инженерной инфраструктуразэ азинтыны кун юрттэ республикалэн бюджетэз чотын, республикалэн целевой программаосыз вылэ пыкиськыса, таӵе амалъёсын: сюресъёсты, связен, тылэз но чагыр эстӥськонэз кысконэн, ву сётонэн герӟаськем объектъёсты лэсьтон; агропромышленной удысын ваньбур поттонлэсь структуразэ выльдыку, рынок кусыпъёс кылдон вакытэ асваньбурлэсь кутӥськон амалзэ воштыку гурт калыклы улон-вылонын юрттэт сётон; специалистъёслы но семьяоссылы юрттон, ужасьёслы кулэяськись ёросъёсысь гуртъёсы ужаны но улыны кошкыкузы; улон коркаос лэсьтыны юрттон. 10-тӥ ёзэт. Йылпумъясь валатонъёс 1. Та Закон кужыме пыре печатлам бере. 2. Та Закон кужыме пырем бере Удмурт Республикаысь Кун Кенешлэн 1996 арын 29 мае кутэм "Гурт хозяйствоын вуз поттӥсьёслэсь басьтэм продукция, сырьё но сиён-юон понна тыронъёсты умоятон сярысь" 235-И номеро постановлениез кужымзэ ыштэ. 3. Удмурт Республикаысь Правительстволы аслэсьтыз нормативной правовой актъёссэ та Законъя тупатоно. Удмурт Республикаысь Кун Кенешлэн Тӧроез А. А. Волков. Ижевск город, 1997 арын 22 октябре. � 494-И. Чаклан дун - ориентировочная цена Коньдон ваньбур - ресурс Ужзы мынэ - улонзы мӧзмыт Мичурин нимо колхозысь Леонид Алексеевич Башкиров вераны но шугъяське ини, кӧня солэн почёт грамотаосыз люкаськемын механизаторын ужатозяз. Кызь ар куспын тракторзэ кык пол гинэ воштылӥз. Тани туэ но республикамылэн нуналыз азьын сое сӥлы карыны ӧз вунэтэ, нош ик грамотаен но пусйизы. Зэм, воргоронэз уг вунэто. Ачиз но со номырлы уг ӝожтӥськы, калык рад улӥсько шуэ, пудо вордӥсько, нылпиосмес будэтӥсько... Гуртын улӥсьлэн синмыныз учкыса, оло, со озьы но, вылды. Но мургес малпаськоно ке, гуртъёсын улӥсьёслы тырмыт-а меда саклык висъяське? Кужымзэс, тазалыксэс жалятэк ужало - уждунзэс уг адӟыло. Тани та колхозын но уждун июль толэзьлы гинэ басьтэмын ай. Вожъяськымон ӧвӧл улонзы егит семьяослэн но. Петр Дмитриев - егит механизатор, колхозын сизьым ар гинэ тырше ай. Толалтэ тракторен ужа, гужем - комбайнэн. Со сярысь эшъёсыз шуизы: усто ужась, арлыдо механизаторъёслэсь бере уг кыльы. Кузпалыз но та колхозын ик скал кыскись луыса ужа. Озьы ке но, егит семьялы пыд йылаз султыны коньдон ласянь секытгес йӧтэ. Пенсионеръёсмы чотынгес улӥськомы, шуэ Пётр. Уртче-валче кариськыса, кемалась ӧвӧл телевизор басьтӥзы. Ӝытъёсы сотэк гуртын уката но мӧзмыт. Механизаторъёс Л. Башкиров но П. Дмитриев. Т. Банникова. Туспуктэмез Г. Юсаевлэн. Черк выльысь улӟоз Вавож. Татысь Свято-Никольской храм берло аръёсы искусствоосъя школалы сётэмын вал. Азьло вылтусыз солэн вужмиз-куашказ. Но сое выльысь улӟытон сярысь вераськонъёс вазенгес ик поталлязы. Районысь кенешлэн берпуметӥ ортчем сессияз та юан юнматэмын: вавожъёслэн нош ик черксы луоз. Сое вуттыны чакламын Быдӟым Нуналлы (Пасхалы). Но тупатъян-лэсьтонэз татын трос гинэ, Соин ик та уже кыскемын луозы районысь тросэз организациос, предприятиос. Н. ЛИПИНА. Николай НИКИФОРОВ Шугадӟон пус Верос Гольык мугорзэ шакырес киын маяллямлэсь сайказ со. Егит пилэн быдэс мугорыз золскиз кадь, бордаз валантэм кужым лыктыса омырскиз. Мылпотытэк музэн гинэ ымдуръёссэ кунэрес вӧлъяз. - Сульдэр, киостэ бордад возь, - куаразэ будэтӥз со. - Эшъёс шӧдозы, адӟозы ук. - Иське, монэ сульдэрен нимаськод ни? - ӟазыртӥз нылкышно куара. - Нош толон ӝыт гинэ "мусое" шуылӥд, ымдуръёсме лычсузьымон чупалляд, гольык мугорме яратӥд... Эх, Мишка, Микаль. Тыныд мон ӟеч дунъет сётӥ вал. Секс, лушкем яратон, интим сярысь мадёсъёсыдлы оски. Таӵе кылъёсты кылыса, егит пилэн мугорыз ик пӧсьвуаськиз, оло. Со ассэ ялан Можга колониын ик шуыса малпа на вал. Кожаз: валче пукись эшез, Стас-Сульдэр, солэсь мугорзэ "яратыны", огдырлы асэстыны турттэ. Сыӵе учыръёс вал гинэ уго. Егит пи, ортчемзэ тодаз вайыса, секытак лулскиз но вӧзаз мынчыръяськись кышномуртлэсь тугаськем йырсиоссэ маялтӥз. - Вождэ эн вай, Зоя. Мон колониысь эше кожай вал. Отын адӟем кӧшкемыт суредъёс йырвизьмысьтым али но уг тӧлӟо. - Стасэныд кузпалъёс выллем улӥды-а? - Луылӥз. Егитэсь на ук ми. Яратэм, гольык мугорез мусоям потэ. - Валасько, Миша, - ӵоксузиз кышномурт. Ӧжытак вис лэсьтэмез бере, сюлворись куараен куриськиз: - Мусоя монэ, Миши. Толон укыр лычсузьытӥд вал. Егит пи ненегъяськыны, кышномуртлэсь куронзэ быдэстыны ӧз дырты. Вераськон ӧрзэс чылкак палэнтыса юаз: - Зоя, кузпаллы быземын-а вал тон? - Куинь пол дят* доры поталляй, - нокыӵе кариськытэк ивортӥз кышномурт. - Чугун сюрес вокзалысь ресторанын официантка луыса ужакум, тросэз синмаськылӥзы мыным. Мазэ веранэз: тусын-буйын но Инмарен обидемын ӧй вал, коньдон но бусьтыр шедьылӥз. Бератаз ни, ачим курыт вуэн эшъяськеме бере, кулэ карисьёс ӧз шедьылэ. Кузпалъёсы но, пуась коньыос сямен, ватскизы. Ярам ай, йыр йылам липет кельтыса пегӟизы. Кытын-о улысал? - Нош нылпиосыд? - Кык кузя. Гуртын, анае дорын, уло. Со быдэ вуттӥз соосты. - Иське, ализэ нокытын уд ужаськы? - Вокзал котырын тыршисько, - мылпотытэк серектӥз кышномурт. - Тӥ кадь йыромемъёсты мусоясько, кӧлыны инты шедьтымтэосты дорам ӧтисько. - Трос-а тыро? - Кин кызьы. Кудӥз, тон сямен, витьтон сюрс манет. Кудӥз тросгес, воксё буш кельтӥсез но шеде. - Да-а.____________________ * Дят - мурт - Миши, ул мон дорын. Ӵошен кӧттырон шедьтыны но каньылгес, валче кӧласалмы но. - Эх-хе, эске* мыным кузпал кариськыны малпад? Вот, сюрприз! - Ӧвӧл, ӧвӧл, Миша. Янгыш эн вала. Мыным ньыльдон вить арес ни угось. Тон мынам пиеным огъёз луод. Кӧня тыныд? - Дас укмыс тырмиз тулыс, Зоя. - Нош мынам нырысетӥ пиелы ӝоген кызь кык тырмоз. - Ого-о! - Миша, кылёд-а мон доры? - Кытчы-о мыном мон, Зоя? Уката ик пропискае ӧвӧл, улон интые но. Куазь но сӥзьыл пала палдурске ни. Так что, ализэ ӵошен мусояськом... Нош ик пытсэт сьӧры келятозязы. - Осто, Боже! Нош ик отчы келямзэс возьмаськод, оло? - Ма карыны кыле на ми кадь мылесъёслы? Кыӵесэ пыроно ке шат? Асьме законъёсмы сыӵе мыддоринэсь ук. Пытсэтысь потэм адями понна, улонлэн чылкыт ӧраз пырон вылысь, номыр уг лэсьтӥськы. Отысь мозмыса но бырем адями тон: уже уг куто ни, улон интыед ӧвӧл. Ма кыле на? Бен, лушкаськон, законэз выльысь тӥяса, кӧттыр шедьтон. Нош пумыз тодмо: нош ик тюрьма капкаос усьтӥсько тон азьын. Котькуд бурдолэн аслаз яратоно ваез луэ, шуо. Бӧдёно гинэ, пе, писпу йылын уг пукы. Бӧдёнолэн сямен ик милям но эрик нимаськись писпу вай вылэ интыяськыны луонлыкмы ӧвӧл. Тӥни озьы, мыным, мон кадьёслы, сюрес одӥг - пытсэт сьӧры. Корт кенер сьӧрын ик уж но, кӧттыр но, адямилыкез ыштыса, пудо-сьӧсьёс музэн, яратон но... Кышномурт пумитаз вазьыны кыл ӧз шедьты кадь. Егит пилэн верамысьтыз кӧтӝожзэ но, улонзэ умой пала берыктыны луонтэмзэ но ӟеч валаз. Ма, ачиз но озьы ик йыромемын уго та сьӧлыко дунне вылын. Бен, курытсэ яратэменыз, ас улонзэ пожаз-тарказ. "Нош маин янгыш югыт дунне азьын Миша-Пончик, солэн эшез Стас-Сульдэр? Егит дыръязы огпол янгышамзы понна шат быдэс гумырзэс тэльмырыны, курадӟыны кулэ? - секытак лулске кышномурт. - Эх, улон - му ньылон!" Миша валес вылысьтыз султыса пыласькыны ветлӥз, пукон вылысь дӥськутъёссэ басьтыса дӥсяськемез бере, укно вӧзы лыктыса, ульчае учкиз. Куазь векчи кыдыраса зоре. Котыр ёросэ вӧлскемын ӵынтусъем бус. Тӧллэн жиетэмез укно пиялаос пыртӥ но кылӥське. Ортчись машинаослэн питыранъёссы улын акылес куараен шачыртэ асфальт. Миша укно вӧзысь ӝогак палэнскиз но борддорысь синучконэз синйылтӥз. Шораз учкиз туслы чебер пияш. Кузялэс ымныро, лызпыръем синъёсыз мӧзмытэсь. Тыр мугораз но бам чокчороосаз егит дыр кужымез шӧдӥське. Алигес лэзем мыйыкез пыш выллем ӵужалэс. Сьӧд синлысъёсыз-синкашъёсыз юри буямын, кожалод; синме сокем йӧтымон. Отчы-татчы утчалляськись, кышкатскем шырпиос музэн бызьылӥсь синъёссэ ватыны уг тыршо соос: шарак кельтэмын - котьмае дыраз мед синйылтозы кожало, лэся. Ныр йылысьтыз менез* чылкыт бумага вылысь чернила вишты музэн висъяськыса улэ. ______________________ * Эске - озьыен. Егит пи синучкон азьысь палэнскиз но, костюм кисыысьтыз картаосын колодазэ поттыса, соосты оген-оген ӝӧк вылэ зӥръяны кутскиз. Вожомыса музэн куя картаосты. Сураса огазе люкамез бере, нош ик ньыль люкетлы люкылӥз на. Огшап малпаськемез бере кужмо гинэ пельтӥз но суред йылэ берытскем картаез кияз басьтӥз. - От, сука! - пинь пыртӥз сялӟиз. - Тунаськиськод, оло? - вӧзаз лыктыса султӥз Зоя. - Кызьы-о тунаськытэк уже потод? Мынам сямам пыӵамын ни: одно ик картаен тунано, азьпалзэ тодыны тыршоно. Нырысьсэ лушкаськыны потыкум, озьы дышетӥз вал Сульдэр. - Нош али кыӵе карта усьтӥськиз? Мае возьматэ со? - Тямыс бубиез пельтыны шедьтӥ, Инмар ӵашъён люкет. - Урод лыдпус шат? - Мон понна туж уродос. Шугъяськытӥсь иворъёс но воштӥськонъёс, азьпалэз сярысь сюлмаськон... Тӥни маосты сӥзе со карта. Огкылын вераса, шугадӟон пус. - Вераны но йӧндыриськод, Микаль. - Зэм, Зоя, зэмзэ верасько. Мынам быдэс улонэ шугадӟон пусъёслэсь гинэ юнматэмын, лэся, - сигаретсэ кенжытыса, пукон вылэ лэзиськиз со. - Басьтом ныр йылысьтым меньме гинэ. Со но шугадӟон пус. Инмарен быдэс гумырелы кузьмамын. Нош лушкаськись муртлэн, адями син шоры шарак йӧтымон, нокыӵе пус-тодметъёсыз луыны кулэ ӧвӧл.Тани, колониын пукыкумы, эшъёсы, киосазы, мугоразы венен бышкалляса, пӧртэм суредъёс лэсьтылӥзы. Мынам но мылкыды ӝутскиз вал, нош асме дыраз серметаны быгатӥ. Мултэс шугадӟон пусъёс басьтэме ӧз поты ни. Миша интыысьтыз турак султӥз но ӵогысь сурон куртказэ басьтыса дӥсяськыны кутскиз. - Кытчы-о таӵе йӧнтэм куазен? Пук вал шуныт коркан, - ӵектӥз кышномурт. - Кионэз пыдъёсыз сюдо, Зоя. Нош Пончикез - шаплы киосыз. - Нимыд маке туж мудрон. Ачид-а сыӵезэ бырйид? - Эшъёсы кузьмазы, - ӧсэз лач ворсаса, дыртыса кошкиз егит пи. Кышномурт укноетӥ кема учкыса сылӥз ке но, Мишалэсь ульчае потэмзэ ӧз синйылты. "Кыӵе чебер пи, но лушкаськись, - секытак лулскиз со. - Ма шуод, чебер мугорлэн но урод выросъёсыз луо. Эх, милиция кие гинэ медаз ӝимы вал", - жаляса музэн, гадяз кирос тырыны кутскиз кышномурт. Пончик, ульчае потыса азьзэ-сьӧрзэ синйылтӥз но дыртыса троллейбус дугдылонние шонтӥз. Отын, трос калык пӧлын солэн "ужан" удысэз. Дырыз но тодмо: ӵукна - калык уже дыртыку, ӝытлань - доразы бертыку. Сюресчиос сыӵе дыре саклыксэс воксё ышто кадь. Секыт ик ӧвӧл сумказэс я кисызэс бритваен шырӟыны, аслэсьтыд синйылтэм узырлыктэ капыртыны. ____________________________________________ * Мень - мугорысь тодмет пус, родинка Егит пи, кыкетӥ дугдылонние вуытозяз ик егит ныллэсь, сумказэ вандыса, коньдонэн бумажниксэ капыртыны вутскиз. Мукет маршрутэ пуксьыса, нырулыса мынӥсь воргоронлэсь кисызэ ӟезиз на. Таяз учыре но удалтӥз: кык пол "калтэмаз" - сю витьтон сюрс манет. Трамвайысь потыкуз, пуксён вылысь кузётэм полиэтилен сумкаез басьтыны но ӧз вунэты на. Нош таиз шумпотон ӧз кузьма - уж гинэ. Кыӵе ке пенсионерлэн узырлыкез шедем: одӥг банка консерва, одӥг булка но паспорт пушказ - вить сюрс манет. "Мискиньлэн берпуметӥ коньдонэз, луоз, - ас анайзэ тодаз уськытыса лулскиз Миша- Пончик. - Берыктыны кулэ. Оло, солэн тау карыса вӧсяськемез мыным пичильтык шуд кузьмалоз, шугадӟонлэсь утёз". Почтае пырыса, конверт басьтӥз. Паспортысьтыз учкыса, ӟеч-ӟеч, дыртытэк гожтӥз адрессэ. Паспортэныз но вить сюрс манетлыкеныз конвертсэ почта ящике куштӥз но, ӟеч уж лэсьтэм адями музэн, шулдыр крезьгурез шуласа, азьлань вамыштӥз. Магазинэ пырыса, сиён-юон, аракыос басьтӥз. Кылем коньдонзэ лыдъяса мыньпотӥз: "Туннэлы тырмоз. Ӧжыт малпаськыса трос лэсьтэмед куке но уродэ вуттоз, шуылоз вал Стас-Сульдэр. Дышетӥселэсь кылзӥськытэк уз луы". Стасэз тодаз ваеменыз ӵош ик син азяз пуксиз нырысетӥ лушкаськемез. Укмысэтӥ классэ йылпумъяса, Ижысь ПТУ-э дышетскыны пыриз вал Миша Денисов. Гуртысь вуэм пиез малы ке кур карылӥзы ӵош дышетскись эшъёсыз. Ма, дӥськут ласянь но, дӥсьтонлык ласянь но висъяськылӥз со. Оген, висьыса улӥсь анаез сое чебер дӥсяны но, коньдонэн юрттыны но ӧз быгаты. Соин ик Стас эшезлэсь лушкаськон сярысь ӵектонзэ кӧбератэк музэн пумитаз вал. Оскиз ӟечезлы: кӧня лушкаськисьёс пытсэт сьӧры уг шедьыло. Ассэ ачиз юн сюлэмо, кышкасьтэм луыны косыса вамыштӥз вал базаре. Сак эскериськыса, дӥсьтыса-дӥсьтытэк кырмиз со прилавок вылэ кинэн ке понэм сумкаез. Кутӥз но ури-бери бызиз. Берло ни, Стасэз пумитаса, ас быгатэменыз ушъяськыны малпаз. Нош ушъяськемез кышъяськыны но ӧз окмы. Сумкаын вал алигес пыжем шунытэсь, небытэсь булкаос-пончикъёс. Эх, кӧня гориз соку Стас! Соку ик эшезлы кушем ним но лякиз: Пончик. Бератаз Миша, эшез музэн ик, бритваез уже кутылыны кутскиз вал. Озьы каньылгес но, кузёез но шӧдытэк ик кыле. Огӝытэ, магазинэ пырыса, ас ёзо нылашез синйылтӥз. Нылмурт трос басьяськиз, бумажниказ шалтыртӥсь кагазъёсыз но трос кылизы на. Миша сое дорозяз келяны малпаз. Нылмурт магазинысь потӥз но тротуар вылтӥ дыртыса вамышъя. Сьӧрысьтыз уг кыльы Миша но. Пичигес проулкае кожыса, азьзэ-берзэ ӝогак учкиз. Ветлӥсьёс чылкак ӧвӧл. Нылмуртэ бызьыса сутӥз но киысьтыз тыро сумказэ выжак! кыскыса талаз. Нош егит ныл курдасьёс пӧлысь вылымтэ. Юрттэт курыса кесяськыны кутскеменыз ӵош, Мишаез китӥз кырмиз но, кыӵе ке аспӧртэмлыко вырос лэсьтыса, егит пиез музъем вылэ сализ. Киоссэ, сьӧрлань позыртыса, юн-юн кырмиз. Лулӟыны-шокчыны ик секыт луиз Денисовлы. Пегӟон сярысь малпан ӧй вал ни. Созэ гинэ йӧндыриз на: шунды ӝужан палась калыкъёслэн нюръяськонзыя кыӵе ке секцие ветлэ вылэм, дыр, албасты. Кучыранэн ӝабыртэм курег сямен кылльыкуз ик доразы милиционер вуиз. Бератаз суд, колония. Отын пукыкуз, Миша ӵемысь малпаськылӥз: "Эрике потӥ ке, та кырсь ужелэсь куштӥсько". Нош малпамезъя ӧз пӧрмы, гуртаз анаез доры, берытскыса но йӧнзэ уг шедьты, малпаз. Куинетӥ толэзьзэ тазьы калтыртэ ни со. Кытын шедем отын кӧла вал. Толон чугун сюрес вокзалысен Зояен пумиськыса тодматскиз но огъя кыл ӝог шедьтӥз. "Азьпалан кызьы-о улоно? - малпаське со, тодмо кышномуртлэн квартираяз вамышъяса. - Кӧня нунал кылиз на меда эрикын калгонэ? Туннэ ке ӧз кырме, ӵуказе, мукетсэ улыса, одно ик кутозы ук. Шедёзы кышкасьтэм нылмурт кадь адямиос. - Вуид-а, Микаль? - пальпотыса пумитаз Зоя. - Тон сярысь сюлмаськыса, укно вӧзысь кошкыны ик уг дӥсьтӥськы. - Туннэ понна удалтӥз, Зоя. Нош ӵуказе мар луоз - ачиз Инмар гинэ тодэ, дыр. Ойдо, кунояськом, - саламъёссэ ӝӧк вылэ тыронъяз ӵектӥз со. Кема пукизы соос тыр ӝӧк сьӧрын. Эсьмаса, кырӟаны нёжъяса ик утчазы. Берло Миша ӧз чида ни: интыысьтыз султыса, выл дӥсьсэ кыльыны кутскиз. - Шутэтском, Зоя, мусояськом. Оло, бӧрысь нылкышно мугорез яратыны но уз кылды ни?.. Валес вылысен кышномуртлэн пеляз шыпыртӥз на: - Тон, Зоечка, мынам нырысетӥ нылмуртэ. Сыӵеос гумыр ӵоже уг вуно, шуо. Зоя пумитаз ӧз вазьы. Миша-Пончиклэсь егит, тыр мугорзэ кый музэн ӟыгыртӥзы кышномуртлэн тӧлам, шадра куо киосыз... Шуд но куректон одӥг ӧсэ йыгаськы Россия Федерациысь загс удыслэн кылдэмез дырысен матысь нуналъёсы тырмоз 80 ар. Удыс ог интыяз уг сылы, улон воштӥськемъя, со азез но выль ужпумъёс пуксё, уката ик берло аръёсы. Трос аръёс талэсь азьло кутэм законъёс туала вакытлэн куронъёсызлы уг тупало ни, соос выль синмын учкемез кулэ каризы. Озьы 1996 арын кутэмын вал Россия Федерацилэн Семьяя кодексэз. Нош туэ ноябре улонэ пыӵаз Гражданской состоянилэн актъёсыз сярысь выль закон. Загсын ужасьёс сое кема гинэ возьмазы, куинь ар пала кыстӥськиз законэз выльдон бордын ужаны кутскем дырысен. Но кызьы пусйиз та удысын ужасьёслэн берлояз кенешазы Удмурт Правительствоысь загс ужпумъёсъя комитетлэн кивалтӥсез Лариса Лукинская, выль законын куд-ог ужпумъёс чакламтэ, кылдо валамтэос. 17-20 декабре Москваын ортчоз загс удысын ужасьёслэн научно-практической конференцизы, отын вераськон тупатэмын луоз законлэн тырмымтэосыз сярысь но. Гражданской состоянилэсь актъёссэ гожтон - со государство азьын сылӥсь бадӟым ужпум, герӟаськемын калыклэсь улонвылонзэ радъянэн. Вордӥськон но кулон, кузпалъяськон но люкиськон, нимез, фамилиез, атай нимез воштон но мурт нылпилы анай-атай луон - ваньмыз со юнматэмын но нимаз гожтэмын медло. Кулэ дыръяз адями утчаськыса уг ветлы ни тодэ кытчы вазиськыны. Та бордын ик тыршо загсын ужасьёс. Гражданской состоянилэн актъёсыз чярысь законэ но та ужпумъёс нимаз-нимаз ёзъёсын пыртэмын. Трос аръёс талэсь азьло кутэм закон выльысь вордӥськиз кадь, отын вань выль ужпумъёс но куронъёс. Куд-огзэ гинэ пусъё. Быдэ вуымтэ пинал аслэсьтыз нимзэ, фамилизэ но атай нимзэ табере воштыны быгатоз ни 16 арес тырмытэк но, 14 арескысен но, кулэ анай-атаезлэн соглаш луэмзы. Чаклалэ, вордскем сярысь свидетельствоын печатяз мед возьматэмын луоз Россилэн гербез, Удмурт Республикалэн гербеныз печать тырмыт ӧвӧл. Выль законъя нылпилэн вордскем интыез гожтэмын луыны кулэ анаеныз вордэм инты. Шуом, нылкышно улэ Завьяловоын, нош нылпизэ ваиз Ижевскын. Озьыен, вордскем сярысь свидетельствоын пусъемын луыны кулэ Ижевск. Но та амалъя мыноно ке, нылпиос гуртъёсын "вордӥськемысь" ик дугдозы, улӥсьсэ лыдэ басьтытэк, гурт калык ӧжытэ усёз. Лариса Лукинскаялэн верамезъя, та ужпумез нимысьтыз эскероно луоз на. Семья кылдытыны дасяськись кузпалъёс асьсэос бырйыны быгатозы гожтӥськон инты, кызьы ортчытоно сое. Загсын ужасьёслы вань мар сярысь сюлмаськыны, сӥё-дано гожтӥськонлы синмаськыса, егитъёс бускельёссы доры медаз "пегӟе" шуыса. Нылкышнолэн кык фамилия нуллэмез потэ ке, татын но сюрес усьтэмын. Но нырысь ик гожтоно картлэсь фамилизэ, собере ини аслэсьтыззэ будэтоно. Выль закон чакла нылкышнолэсь воргорон луыны мылкыд каронзэ, воргоронлэсь - нылкышно. Со понна вайыны кулэ нимаз куронъёслы тупась справка. Удмуртъёсты, озьы ик мукет калыкъёсты сюлэмшугъяськытэ национальностез гожтон. Вордӥськем сярысь свидетельствое, анай-атайёслэн мылкыд каремзыя, табере национальностез гожтытэк но луоз. Но будӥз ке, кызьы та шоры учкоз ачиз пинал?! Таиз сярысь анай-атайёс асьсэос сюлмаськыны кулэ. Таин валче свидетельствоын пусъемын луоз гражданство кыл. Шаерысьтымы загсын ужасьёс тазэ арез йылпумъяны малпазы вуж амалъя ик, гражданствоез пусйытэк. Но вуоно арлы азязы пуксиз бадӟым йыртӥян. Выль свидетельствоосты дасян бюджетысь трос коньдонэз кыскоз, берлояз таӵе ужрадэ 300 миллион манет кошкиз. Трослы йылоз ужзы ёросъёсысь загсъёслэн. Кыӵе ке но справка понна яке ыштэм документэз выльдон вылысь, адямиослы Ижевскысь архивъёстӥ ветлоно уз лу ни. Тросгес ужано луозгожтэтъёс пыр, ужасьёслы таӵе луонлыкъёс но сётэмын. Вань мукет но выльдӥськонъёс, но али тунаса ум улэ ни. Мар умоез но мар уродэз выль законын, улон ачиз тупатонъёс лэсьтоз ни. Л. Малых. Пусъемын-а адямилэн адӟонэз? "Кенеш" журнал уно номеръёсаз печатлаз Пётр Черновлэсь "Егит дыр кырӟанъёс" повестьсэ. Котькуд люкетсэ мылысь-кыдысь лыдӟи. Угось гожтэмын литератураысь но искусствоысь тодмо адямиос, гуртъёсысь но ёросъёсысь кивалтӥсьёс, специалистъёс сярысь, газетъёсын, радиоын но телевидениын ӵош ужам эшъёсыз но асэныз огвакыт тыршем муртъёс сярысь. Унозэ тодӥсько, куд-огеныз али но пумиськылӥськом. Верамын шара, ӟечсэ но уордзэ ватытэк. Таӵе гожъямъёс книга-газет бамъёсын трос ик уг пумисько. Ваньмыз шонер-а возьматэмын, ӧвӧл-а - сое автор ачиз ӟечгес тодэ, дыр. Озьыез озьы ке но, одӥг интызэ мукет сяменгес вераме потэ. Со пумысь ик гожтоно кариськи. Журналлэн 1995-тӥ аре потэм 8-тӥ номераз (47-тӥ бам) таӵе чуръёс вань: "Мынам мур оскемея, Флор Ивановичлэн быронэз но адӟонысьтыз ӧз поты - калыклэсь, укыргес но начальстволэсь кылзӥськон сямысьтыз... 1978-тӥ арын гужем асьме шаерамы советской литературалы сӥзем нуналъёслэн берпуметӥ ӝытазы ини, Смирнова (обкомлэн секретарез - Г. Ш. ) сое Красногорск районын улӥсьёсын пумиськыны ыстӥз. Уг луы вал шат со интые кинэ ке мукет муртэ лэзьыны? Васильев отчыозь арнялэсь кема уен- нуналэн бызьылӥз-ворттылӥз ни ук. Уг луы вал шат солэн аслаз но пыкиськемез? Луысал, кожасько. Но сое кемалась кутэм сямыз-йылолыз Красногорске нуиз, вылды: "Тазэ лэсьты, созэ лэсьты. Лэсьтӥсько. Мон талэсь но, мон солэсь но кылзӥсько..." Пётр Константинович Флор Ивановичен кема ӵош ужамын бере, солэсь сямъёссэ ӟеч тодылӥз, дыр. Но со шимес учыр сярысь гожтэмзэ шонертоно луисько. Угось ваньмыз син азямы ортчиз. Советской литературалы сӥзем нуналъёслы йылпумъянъёс лэсьтыса, палэнысь лыктэм куноосты Ижысь келяса, Флор Иванович нуназе бере партилэн Удмурт обкомезлэн пропагандая но агитацияя отделаз лыктӥз. Мон соку отделэн кивалтӥсько вал. Кабинетэ пыриз капчи, каньыл мылкыдын, киоссэ посыса: - Ну, всё, - шуиз, - йылпумъян лэсьтӥм, ваньзэ куноосты келямы. Ачим отпуске потыны дась. Билетъёсы кисыям. Ӵуказе гуртам кошкисько. Ӟеч уж быдэстэмын бере, мылкыд майбыр. Смирнова Н. И. та вакытэ обкомын ӧй вал. (Уг, Смирновалы дурбасьтыса уг гожтӥськы. Солэн, зэм ик, косъяськон сямыз мултэсгес вал). Но таяз учыре Флор Иванович соин ӧз пумиськылы, Красногорске мынон сярысь ӧз вераськы. Отчы В. А. Лётчикова мыныны дасяськемын вал. Флор Иванович веранзэ азьланьтӥз: - Писательёс пӧлысь районэ Зоя Алексеевна Богомолова, Павел Фёдорович Куляшов мынэмын. Отын ужало на Геннадий Михайлович Корепанов-Камский, Николай Семёнович Зубков, кӧня ке мукет артистъёс но художник Александр Егорович Ложкин. Пумиськонъёс умой ортчыны кулэ. Озьы ке но, ветлоно-а, мар-а? Кивалтӥсь луыса ӧвӧл, кылбурчи нимын гинэ калык азе потасал. Лётчиковалэн но сыӵе мылкыдыз вань (Та нылкышно кӧня ке толэзь гинэ обкомын ужа вал ай. Со И. М. Васильевез, "Удмуртия" издательстволэсь али кивалтӥсьсэ, соку воштӥз). Мон Лётчиковаез дорам ӧти. Со шуэ: - Конечно, умой луысал Флор Ивановичен ӵош ветлыны, пумиськон ӝытэз со узыргес карысал. Но мыноз-а, уз-а, ачиз мед тодоз: со отпуске потэм адями. Ӝыны час пала вераськыса пуким. Собере гараже жингыртӥ. Шофёрез ӧти. Ӝоген Вася кабинетэ пыриз. Флор Васильевен Валентина Александровнаен кылзы тупаз: кӧня часын потыны пусйизы, шофёрез дась луыны куризы. Озьыен, Флор Иванович Красногорске мыныны ачиз мылкыд кариз. Отӥяз мар луиз, трос гожъямын ини. Районысь бертыкузы, уин куинь часын, Ижевск пала вуыкузы, сюрес шорын машинаен ваче донгиськыса, куиньназы ик сӧсырмыса быризы. Нырысь Завьяловоысь шайвылэ ватӥм шофёрез, ӵуказеяз Лымшор шайвылэ - Лётчиковаез, нунал ортчыса, Хохряки шайвылэ - Флор Васильевез. Асьмеос ваньмы витьымтэ шорысь кылдылӥсь учыръёс пӧлын улӥськомы. Кин тодэ: потысалзы ке соос Красногорскысь дас минутлы вазьгес, яке бергес, таӵе ваче шуккиськон но ӧй луысал. Адямилэн адӟонэз вордскыкуз ик пусъемын шуэмлы азьло ӧй оскылы вал. Со сьӧд учырен герӟаськем суредъёсты, али 20 ар ортчыса, син азям пуктӥсько но мукет малпанэ вуисько. Тани со суредъёс. 1978-тӥ арын инвожо толэзе мыным уно пол кылдӥз Флор Ивановичен ӵош ужаны, одӥг липет улын кӧланы. Асьме дорынлэсь вазьгес советской литературалы сӥзем нуналъёс ортчизы бускельёсмы дорын - Пермь улосын. Отчы Флор Васильев но ӧтемын вал. Мынэмезлэсь азьло, обкоме пырыса, мылкыдзэ вераз: - Умой луысал, Перме обкомысь кин ке ветлысал ке, соослэн ужан амалъёссылэсь адӟем карыны но асьме дорын уже кутыны шуыса. Смирновалэн кабинетаз кенешеммы бере, мыным ветлыны ӵектӥзы. Васильевен Кезозь машинаен мынӥм, отысен, "Кама" поездэ пуксьыса, ӝог гинэ Перме вуим. Гостиницае интыяськыса,сиськыны ваським. Москваысь но мукет интыосысь лыктэм писательёс вазьгес вуиллям. Тросэз ресторанын пуко вал ини. Ӧсэз усьтыса, отчы вамыштӥм гинэ, уноез пукисьёс султӥзы: - О-о, Флор Иванович, привет, салам, - пумитаз вамыштӥзы, ӟечъясько. Мынам чакламея, землякмы адямиосты ас бордыз магнит выллем кыске вал. Трос-а туала воргоронъёс пӧлын сыӵе адямиос? Пыкылод меда чебер сюлэмо муртэ, "соизлэсь но, таизлэсь но кылзӥське" шуыса? Перме лыктэм писательёсын нимысьтыз пумиськылӥм, дорамы, Удмуртие ӧтим. Кема вераським Пётр Проскуринэн. Со отчы кузпалэныз лыктэм вылэм. - Уллёен, калык пӧлын дорады мынэме уг пот, - шуиз, - кузпалэным ӵошен гинэ лыктысалмы. Война дыръя кышноелэн песянаез Ижевске эвакуацие келямын вылэм, отын ик кулэм. Одӥг лыктэмен шайгузэ утчаломы. Соосын вераськыны берло малы ке ӧз кылды ни. Кема пуким, Украинаысь Иван Драчен, Свердловскысь Валентин Сорокинэн вераськыса. Ӵуказеяз, пусйылэм ужрадъёсынызы тодматскеме бере, мон Ижевске бертӥ. Флор Васильев лыдӟисьёсын пумиськонъёсы кылиз на. Удмуртие лыктэм писательёс группаослы люкиськыса, Можгала, Воткинске, Сарапулэ, озьы ик, Ижевскысь заводъёсы мынӥзы, гуртъёсы но потазы. Соосын ӵош обкомысь но правительствоысь ужасьёс ветлӥзы. Флор Ивановичен ми нош ик ӵош тупамы - Глазове мынӥм. Соку отчы асфальт сюрес ӧй вал на, пичи самолётэн лобӟим. Глазовын писательёс заводъёсы, лэсьтӥськисьёс, студентъёс, гуртын улӥсьёс доры вуылӥзы. Флор Ивановичез, та карын дышетскем но ужам муртэ, Москваысь лыктэм куноослэсь шунытгес пумитазы кадь, потӥз мыным. Но Флор Васильевлэсь Пермьысен но, татысен но Красногорске мынон нуналэ кадь шулдыр, капчи, бурдъяськем но лӧптэм мылкыдо дырзэ адӟеме ӧй вал. Эшшо одӥг чакламме вераме потэ. Флор Васильев Красногорске мыныны ӝуткаськон нуналэ ик шофёре, чебер егит удмурт воргорон Вася Иванов, Ижевск ульчаетӥ ортчыкумы, шуак тазьы вазиз: - Дунне вылын шудбур вань меда? Вань ке, али мынэсьтым шудоез ӧвӧл, дыр. - Мар луиз, Вася? - юасько. - Та нуналъёсы нимаз патер басьтӥ, телефонэз но вань. Алигес гинэ нылы вордскиз. Та арняе ӵыж выль машинае пуктӥзы. Ваньмыз огвакыт, одӥг муртлы бадӟым кузьым кадь сётэмын. - Нылыд таза мед будоз, Вася, - шуисько. Дас укмыс арес тырмиз ини нылызлы. Со нуналэ ик вазь ӵукна Лётчиковаен пумиським вал. Со шуиз: - Обкомын ужаны быгатысал ке, улонам ваньмыз тупасал. Картэ выль уже выжемын ("Редуктор" заводэ директоре юнматэмын вал соку). Азьвыл интыяз секыт мылкыдын ветлӥз. Пимы кышнояськиз, кенмы умой сямо, куспазы тупаса уло кадь. Шумпотӥсько. Тани-тани пиналзы луыны кулэ, оло, туннэ вордскоз. Красногорскысь одно ик берто, отын уг кӧлы, мусо кенме огназэ кельтэме уг поты. Та шурдыт учырын бырем адямиос куиньназы ик шумпотон мылкыдзэс ватытэк, сюлэмзэс вӧл-вӧл усьтыса, мыным веразы. Отчыозь огзылэсь но адӟылэме ӧй вал лул сюлэмзэс сыӵе шара усьтэмзэс. Та пумысен аслэсьтым юасько но валэктон уг шедьтӥськы. Оло, зэм но, эзелез адямилы вордскыкуз ик сётӥське? Паймымон ӧвӧл шат: Красногорскысен, Ижевске бертӥсьёсын ӵош машинае пуксьыса вылысь, Н. С. Зубков васькем но кӧлыны кылем. Г. М. Корепанов, - Камский ӧтьыса но пуксьымтэ. Нош З. А. Богомолова сюлворыса сямен сьӧразы куриськем. Сое басьтӥллямтэ... Оло, зэм ик адямилэн лулыз быронзэ вазенгес ик шӧдэ?.. Оло, зэм ик адями бырон азяз ӝуткем мылкыдо луэ?.. Ым уг пыры Флор Ивановичез "сюрлытэм" шуыны, муртлэсь косъяськемзэ гинэ быдэсъясь адямиен лыдъяны. Мон сямен, солэн сямыз вожъяськымон ӟеч вал, лякыт сюлмыныз котырысьтыз адямиосты шунтылӥз. Флор Васильев егитъёсын но, мӧйыосын но, гуртын но, городын но тупа вал, огшоры муртэн но, кивалтӥсен но вераськыны огъя кыл шедьтылӥз. Ӝог вазиськылӥз адямиослы, котьку дась вал соослы юрттыны. Геннадий Шишов. Ваньзэ коньдонэн уд мерта Кызьы, малы кутскиз Геннадий Кабанов пулэсь чеберлыко арбериос лэсьтыны, али ачиз но валэктыны уг быгаты. Пельпумъёссэ гинэ шымыръя: - Кутски но кутски кадь. Нырысь радиотехника борды басьтӥськи вал. Мылкыды ӝоген сӥяз. Выжи пулэсь вандылӥськон вылэ: вот таиз монъя вылэм. Данакезлэн адямиослэн, коньдон понна ужзы сяна, вань на яратоно, сюлэмез кыскись но улонэз яркытгес, пачылгес карись ужзы. Одӥгез суреда, мукетыз пӧйшура, куинетӥез картаен шудэ яке юон вылэ чӧлске. Геннадий Семёнович тани пулэсь син вормонтэм чебер арбериос лэсьтэ. Корка пушказ шифоньер но телевизор гинэ магазинысь вуэмын, дыр. Кылемез ваньмыз - шкафъёс, шыкысъёс, ӝӧкъёс, пуконъёс, диванъёс - воргоронлэн киосыныз кылдытэмын. Лэсьтэмын шуыны кыл ик уг бертытскы, сокем чебересь соос. Нырысь учкыса ик валаськод: кибашлы аслаз ужаз быгатонлыксэ гинэ ӧвӧл, вань сюлэмзэ, лулзэ, котырысь дуннеез валамзэ-адӟемзэ возьматэм. Макем чылкыт волятэмын котькудӥз пул, макем ӝикыт соос ог-огзы борды тупатэмын - соиз сярысь веранэз ик ӧвӧл. Нош кыӵе суредъёс соос вылын вандылэмын но буямын! Озьыен, Геннадий Семёнович суредась но? - Ӧвӧл, суреданы мон туж ик мастак ӧвӧл. Тазэ данэз пӧрасе мед басьтоз. Со угось суредъёсты малпа но, буя но. Нош мон тӥрен шонаськись гинэ, - юромо востэмъяське кузё. - Тӥр шуэмысьтыд, Геннадий Семёнович: тани шкатулка кадь ненег арбериосты лэсьтыны яке синучкон рамаосты чеберъяны туж мудрон тӥрлык кулэ ук, дыр? Кытысь шедьтӥскод, басьтӥськод? - Магазин тӥрлык пӧлысь маи вань? Тӥр, ножовка, струг... мукетыз ваньмыз аслам лэсьтэме. Аслам лэсьтэменыз ужаны но каньылгес, дунтэм но усе. Ужаны пичильтык мастерской нерге лэсьтӥ. - Тӥляд коркады ваньмыз вань кадь ини. Табере кинлы мар лэсьтӥськод? - Ма, вань ке, выльзэ, чебергес лэсьтэм потэ на ук. Тани ӝоген выль шкафме корка пырто. - Нош вужзэ? - А, шедёз инты кытчы ке... Уг-а вузкары меда Кабанов киужъёсыныз шуыса меӵак юаны ым ӧз пыры но озьы котыръяса юай вал. Ачиз ӧз вала, шӧдске, кузпалыз, Алевтина Тарасовна, юрттӥз. - Кузьмалоз ай кинлы ке. Тани эшъёсызлы - трактористъёслы шкаф но ӝӧк кузьмаз. Троссэ лэсьтӥськемъёссэ школае нуи (Алевтина Тарасовна дышетӥсь). Вузаны ки уг пыры-а, мар-а шуод, коньдонлы ёрмон дыр но луылэ ке но. Я, вань коньдонэз басьтыса уд быдты, нош адямилы ӟеч лэсьтӥськод ке, аслыд но шумпотон. Геннадий Кабанов бульдозерист, тол но, гужем но уж шеде. Вылаз ик, тракторез ялан утялтэмез-тупатъямез кулэ каре, солы 13 арес ини. Со сяна, гуртын улӥсьлэн аслаз гидкуазяз но сюлмаськонэз тырмыт. Кытысь бен дыр шедьтэ та кибашлы воргорон "сюлэм висёнэзлы"? - Тулысысен сӥзьылозь мастерскоям шер пырасько. Нош толзэ ини лулме лэзисько. Со сяна, лыдэ басьтэ: мон чик уг юиськы. Нош сазь улон, коньдонэз гинэ уг, дырез но шыръя. - Тани пиды али гинэ школае кошкиз. Со уг кыстӥськы на-а атаезлэн ужез борды? - А-а, тӥрлыкез кыска ини, ерпечка, - данъяськемзэ ватыны тыршыса, киыныз шонтэ корка кузё. Нош укмыс аресъем Максимлэн анаезлэн зэмлыкез ватэмез уг поты: - Йӧндыртэ ини Максиммы но. Нош бадӟымъёсыз, Володя (со армиын) но Сергей (шофёре дышетске) атайзылэсь трослы бере уз кыле. Корка тыр кибашлыос, зарни киос, кытчы пырод. ...Кузё кышно милемды келяса потэ. Кузпалыз ӧвӧлтэм дыръя, солэсь одӥг "секретсэ" шарае поттэ: - Шудон кадь чебер кубо лэсьтӥз но соиныз черсӥськыны но дышиз ик. Бускель пересь кышно чабкиське: тон, пе, Гена, мынэсьтым но ортчыт быгатӥськод ук. Соин гинэ ӧз тырмы: керттӥськыны но кутскиз, ява. Аслыз пӧзь, перчаткиос керттӥз ини. Я, мед ойдо. Сюлмызъя ужез вань бере, киыз мынэ бере, урод шат со, озьы ведь? Озьы, Алевтина Тихоновна, озьы. Удалтэм тӥледлы кузпалэн. Эшъёссы соосын данъясько Та кык воргоронъёсты ӟеч тодо Ижысь автотранспорт предприятиын ужасьёс. Владимир Леонидович Усачев дасо арлэсь кема ужа ни 16-тӥ маршрутъя автобуслэн водителез луыса. Быръем сюресэз сярысь уг жаля. Озьытэк-а сомында кужымзэ, чиданзэ сётӥз со яратоно ужезлы? Ӟырт кезьытэн-а, лек сӥльтӧлэн-а - со вазь ӵукна ик пуксе руль сьӧры. Владимир Леонидовичлэн сюлмо тыршемез син шоры йӧтытэк уг кыльы - со трос пол данъян грамотаосын пусйылэмын. Нош Владимир Иванович Панов малпалляз меда, аслэсьтыз улон ӧрзэ Ижын шедьтоз шуыса? Вавож районысь Тыловыл-Пельга черкогуртын будэм удмурт пияш табере ИПОПАТ- ысь одӥгез ӟеч электрогазосварщик луиз. 17 ар ужа ни. Киосыз зарни, шуо калыкын таӵе адямиос сярысь. Автоусъёсты тупатъян-выльдон ужъёсты ӝ ӝегатскытэк быдэстэ. Водительёс котьку оскыса вазисько Владимир Ивановичлы. Но воргоронлэн гуртын будэмез мылкыдаз ялан шӧдӥське. Яратэ со ваньмон дыръяз сад-бакчаын ужаны, ӵемысь адӟылод чорыгаса пукемзэ. Водитель В. Л. Усачев, электрогазосварщик В. М. Панов. Туспуктэмъёсыз В. Камашевлэн. Куазь Синоптикъёс ивортэмъя, та нуналъёсы куазь сайкыт сылоз, интыен-интыен ӧжытак лымы усёз. Тӧл лымшор но шунды ӝужан палась секундскын 5-10 метре пельтоз. Туннэ нуназе котырын шаермыя 4-90 кезьыт, уин - 10-140, интыен-интыен 190 кезьытозь вуоз. Ӵуказе нуназе котырын - 8-110, уин - 14-170, куд-ог интыосын 22 градусозь кезьыт луоз. Кун Кенешын Удмурт Республикаысь Кун Кенешлэн Президиумез Кун Кенешлэн дас куатетӥ сессиезлы повестка юнматӥз. Депутатъёс 14 ужпумез эскерозы. Кун Кенешлэн 1997 арын законъёс кылдытон бордын дасямез сярысь ивортэмын вал Кун Кенешлэн дас куатетӥ сессиез эскероз выль законъёсты кылдытонъя 1999 арозь планэз. Мукет ужпумъёс но ӝутэмын вал. Президиумлэсь заседанизэ нуиз Кун Кенешлэн Тӧроез А. Волков. Кун Кенешлэн пресс-службаез. Иж анданлы - 125 ар Ижевскысь кибашлыос быдэс Россиын нырысьсэ радъязы кисьтӥськись андан ӵыжатонэз. Со вал 1872-тӥ арын. Нош вить ар ортчыса, 1877-тӥ арын Иж заводын ӝутэмын вал мартен гур. Озьы шаерысьтымы андан пӧзьтӥсьёс пыӵал тӥрлык поттӥсьёслы ӟеч кузьым лэсьтӥзы: вылӥ ӟечлыкен андан дасяны ӧдъязы, нош азьвыл сое кунгож сбӧрысь вутто вал. Бен, дас укмысэтӥ даурлэн шораз промышленность удысын азьпала шӧдскымон вамышъёс лэсьтэмын вал. Со сярысь вера таӵе учыр гинэ но. 1894 арын Иж заводысь ёзъёс куспазы телефонэн герӟаськизы, нош сю ар талэсь азьло 1897 арын мастерскойёсты но завод азбарез электротыл югдытӥз. В. Рогалёв. Журналистъёсын пумиськонъёс Выльдӥськоно калыклэсь кисызэ начармытэк шуо депутатъёс-коммунистъёс Удмурт Элькунысь Кун Кенешлэн котькуд сессиез бере "Удмуртиысь коммунистъёс" фракцие пырись депутатъёс пресс-конференциос ортчытъяло. Таяз учыре но соос сямзылэсь ӧз куштӥське. Дас ньылетӥ сессилэн повесткаяз пыртэм ужпумъёс пумысен журналистъёс азьын ивортон лэьтӥзы фракцилэн кивалтӥсез А. Г. Бегунов, фракцилэн советэзлэн членъёсыз Ю. В. Семенов, Н. Ф. Чувашов но А. И. Горохов. Ортчемез сессия оглом урод ӧз ужа, пусйиз А. Г. Бегунов. Но жаляса верано луэ, эскерытэк кылизы депутатъёслэн наказъёссы, со пӧлын милямез но. Ми ӵектӥм вал жилищно-коммунальной хозяйствоын реформа ортчытонъя программаез быдэсъянэз огдырлы дугдытон сярысь ужпумез эскерыны. Маин герӟаськемын со? Нырысь ик, адямиос ульчаосты шунтэм понна дун тырыны кулэ ӧвӧл, корка вуэм шуныт понна гинэ. Семьялэн огъя доходысьтыз вань тыронъёсты куштыса, улыны-вылыны уксё мед кылёз на. Ми сямен, канер улӥсьёслы та ласянь юрттон сярысь нимысьтыз закон кутоно. Ми быдэс программаез палэнтыны ум куриське, ми пумит тарифъёсты будэтонлы. Коммунистъёслэн фракцизылэн мукетыз куронэз "Удмуртагропромпроект" интститут пумысен. Туннэ та институт бырон калэ вуэмын, пусйиз Александр Григорьевич. Правительство ӝот-ӝот мед вералоз, кулэ-а, ӧвӧл-а та институт гурт хозяйство понна. Кулэ ке, одно ик юрттоно солы. Жилищно-коммунальной хозяйствоын реформа пумысен вераськонэз азинтӥз А. И. Горохов. Калык пӧлын юалляськон ортчытыса тодмо луиз, пусйиз со, 1100 мурт пӧлысь 973-ез та программаез быдэсак улонэ пыӵатонлы пумит луиз. Ужъёсты выль сямен радъяны, техникаез выльдыны одно ик кулэ, улон инты, шуныт понна тыронъёсты будэтытэк. Кылсярысь, куд-ог ужасьёслы али толэзяз 50 сюрс манетэн гинэ уждун туро, нош улон инты понна 130-150 сюрс куро. Программаез дасясьёслэсь ми юамы вал, огъя тыронъёс пӧлысь кыӵе люкетэз калык вылэ усе шуыса, нокин но верась ӧвӧл. Нош 2003 арозьлы программаосын тыронъёсты арлы быдэ 10 процентлы будэтыны чакламын, уждунэз йылтон пумысен кыл верась ӧвӧл. Ю. В. Семенов вакчияк ивортӥз Удмурт Элькунын национальной политикая Концепция сярысь. Сессиын нырысь лыдӟыса со кутэмын вал. Сое дасяку, ваньмаз сямен ёросъёсы вуылӥм, шуиз Юрий Валерьянович, лыдэ басьтыны тыршим элькунын улӥсь вань калыкъёслэсь мылкыдъёссэс лыдэ басьтыны. Концепциез дасян бордын ужаз но ужа нимысьтыз группа. Солы юртто специалистъёс, учёнойёс, Нациосын ужанъя министерствоын ужасьёс. Кызьы пусйиз Ю. В. Семенов, общественной организациослэсь но национальной движениослэсь пыкылонъёс ӧвӧл. Но концепциез кыкетӥзэ лыдӟытозь, ӵектонъёс- дэмланъёс вуыны кулэ на. Татын ваньзэ чаклано, лыдэ басьтоно. Тани, кылсярысь, тросэз мылкыд каро паспортэ национальностез одно ик пусйыны. Ортчем сессиын депутатъёс озьы ик ӝутӥзы гурт хозяйствоын кылдэм югдур сярысь ужпумез. Туэ урожай начар ӧй вал, шуиз К. Ф. Чувашов, ваньмыз сямен будэтэмез утялтэмын. Но музъем ужась озьы ик куанере кылиз. Бусы ужъёсты ортчытонын юрттэт понна хозяйствоослэн тыронъёссы сизьым сю миллиард манетлэсь трос люкаськизы. Гуртоослы сю миллиард манет тыр пала уждун тырымтэ на. Техника куашка, шуг-секытъёс кылдыло, электрокужымез кысылэмен. Пудолэн лыдыз синэ, аляло висёнъёс. Ветеринарной службаез азинтон пумысен закон но кутэмын. Чакламын та удыслы пырись ик коньдон висъяны. Нош туэ, кылсярысь, та удыслы сётэмын чакламезлэсь 22 процентэз гинэ. Арлы быдэ ик социальной удысэз но экономикаез азинтонъя планъёс дасяськом, но сое быдэсъяны вунэтӥськом. Таӵе югдурен валче депутатъёс гурт ужпумез одно ик сессиын эскерыны ӵекто. Н. Корякин. Мӧзмизы ни вал Глазов. Районысь Дондыкар гуртын улӥсьёс шумпотӥзы: 1 декабре вазь ӵукна ик соосты радио сайкатӥз. Мӧзмизы ни вал "Визыллэсь" но, "Ладилэн азбарезлэсь" но... Уго "вераськись кудызы" шып улӥз: электролиниез тупатонзы февральысен татчыозь кыстӥськиз. Э. ВАСИЛЬЕВА. Уллань лэзиськон дугдытэмын Промышленностьлэн туэ дас толэзь ӵоже ужамезлы йылпумъянъёс Туэ январе-октябре элькунамы огъя ваньбур поттэмын но дунын юрттэт сётэмын 14.2 триллион манет тыр (туала дунъёсъя). Миым та вакытэн ӵошатскыса, со 0,6 процентлы ӧжытгес. Вузъёс поттон кулэсмиз 0,5 процентлы, дунын юрттэт сётон - 0,9 процентлы. Промышленностьын ваньбур поттон йылӥз 2 процентлы. 1997 арын 10 толэзь куспын промышленностьын ваньбур поттэмын предприятиослэн дунъёссыя (НДС-тэк но акциостэк) 12 триллион 264 миллиард манет тыр. 1996 арын та вакытэн ӵошатыса, 102 процент луэ со, нош 1991 арен ӵошатыса - 38 процент. Октябрь толэзе дась продукциез потребительёслы келян выль ваньбур поттонлэсь 4,5 процентлы (49 миллиард манетлы) ортчиз. Озьы предприятиослэн складъёсазы кыллись ваньбур толэзь пумозь 5,3 процентлы кулэсмиз. Дас толэзь куспын элькунысьтымы быдӟымесь но шоро-куспо предприятиосын поттэмын 10991 миллиард манет тыр ваньбур. Пӧртэм удысъёслэсь кызьы ужамзэс возьмато таӵе лыдпусъёс: Промышленностьлэн удысъёсыз 1997 арын 10 толэзь ӵоже ваньбур поттэмын 1996 арын та дырлы процентэн 1991 арын та дырлы процентэн Огъя промышленностьын 102 38 электрокужым поттон 91 89 эстӥськон поттон 98 77 сьӧд металлургия 99 30 цветной металлургия 115 - химической промышленность (медицинскоезтэк) 91 36 машинаос лэсьтон но металлообработка 105 38 лэсьтӥськон материалъёс поттон 86 58 капчи промышленность 94 16 Сиён-юон промышленность 105 56 Пызь-кеньыр но комбикорм изон 76 31 Нюлэс дасян но нюлэс ваньбур поттон 93 44 Пияла поттон 95 96 Январе-октябре электрокужым поттон но сое промышленной предприятиосын уже кутон, миым та дырен ӵошатыса, быдэн 7,7 но 2,4 процентлы кулэсмизы, шуныт сётон (промышленной предприятиослэсь котельнойёссэс но пыртыса) 9,3 процентлы синӥз, 1,7 процентлы ӧжытгес кыскемын му вӧй. Туэ октябрь толэзе, миыменыз ӵошатыса, 15 процентлы ӧжыт нюлэс дасямын, но ар кутсконысен - 16 процентлы. Пулэсь арбериос дасян промышленностьын 19 процентлы йылӥз технологической шелеп поттон, 11 процентлы - шелеплэсь плитаос но 3,8 процентлы - мебель (ӝӧкъёс, шкафъёс, пу кроватьёс) поттон. Кортлэсь но бетонлэсь лэсьтӥськон конструкциос, миым та вакытэ сярысь, 19 процентлы ӧжыт дасямын, борддор ӝутон материалъёс - 9 процентлы. Капчи промышленностьын 1,5 пол трос поттэмын гын сапег, 35 процентлы - чулкаос но носкиос, 24 процентлы - ковёръёс, 19 процентлы етӥн мертчан. Нош пыдкутчан вурон но кулэсь арбериос поттон синӥзы быдэн 7,2 но 37 процентлы. Туэ январе-октябре шӧдскымон тросгес (15 пол) поттэмын йӧллэсь консерваос, водка но мукет кудӟытӥсь юонъёс (2,3 пол), минеральной юонъёс но будос вӧй (1,9 пол), вина но кудӟытӥсьтэм юонъёс (быдэн 1,5 но 1,4 пол). Кылем арын сярысь ӧжытгес поттэмын сӥльлэсь консерваос но макарон (19 процентлы), сӥль но нырысетӥ категориен пудо пуштрос (18 процентлы), пызь (12 процентлы), нянь но пыжиськемъёс (10 процентлы), кеньыр (9,1 процентлы). Дас толэзь куспын калыклы вузъёс поттэмын 2635 миллиард манет тыр, миым та дырен ӵошатыса, 1,2 процентлы трос со. Машина лэсьтон удыслы ож тӥрлык поттонэ кутӥськись арбериос дасян 64 процентлы йылӥз. Гражданской продукцилэн люкетэз 83 процентозь вуиз. Россия Федерациысь Обороная министерстволэн, "Росвооруженилэн", атомной энергетикая министерстволэн но МВД-лэн элькунысьтымы оборонной комплексэ пырись предприятиослы кутэм тыронъёссы туэ 28 октябрьлы 267 миллиард манет тыр люкаськизы, со пӧлысь 39,5 миллиардэз 1996 ар понна, 3,7 миллиардэз 1995 ар понна. Соин валче ик предприятиос уг быгато ужасьёссылы уждун тырыны, будо соослэн шуныт но электрокужым понна тыронъёссы. Озьы огъя промышленностья туэ 1 ноябрьлы 281,2 миллиард манет тыр уждун тырымтэ, со пӧлысь 202,3 миллиардэз ВПК-лэн предприятиосаз ужасьёслы. 1997 арын октябре промышленной предприятиослэн прибыльзы 14 процентлы кулэсмиз. 54 процентлы йылӥз изъян адӟыса ужась предприятиослэн лыдзы (туэ 5 толэзьлы йылпумъянъёсъя та лыдпус 51,6 процент вал). Ваньмыз 283 миллиард манет тыр изъян адӟемын. Удмуртиысь промышленной предприятиос 1329 миллиард манет чылкыт прибыль басьтӥзы, миым та дыре сярысь, со 40 процентлы трос. Промышленностьын басьтэм прибыль пӧлысь 49 процентэз усе эстӥськон, шуныт но электрокужым поттон удыслы. Металлургической комплекс элькунмылы сётӥз 447 миллиард манет яке промышленностьын басьтэмезлэсь 34 процентсэ. Берло куать но ӝыны ар куспын промышленностьын ваньбур поттон, 1991 арен ӵошатыса, тужгес но кулэсмиз 1996 арын. 1997 арын нырысетӥ кварталлы йылпумъянъёсъя промышленностьын огъя ваньбур поттон, 1996 арын та дыре сярысь, 1 процентлы йылӥз ке, нырысетӥ палар куспын та лыдпус 2 процентозь вуиз. Озьыен, промышленностьын ваньбур поттонэз кулэстон дугдытэмын. Дасямын Удмурт Элькунысь Кун Кенешлэн иворъёс люканъя но югудрез эскерон-чакланъя управлениезлэн материалъёсызъя. Берекет Чеберъям кыз котырын Кылъёсыз но крезьгурез Юлия Кузьминалэн Эктыса музъем вылэ Выль лымы усе. Пумиталом ӝытазе Выль арез туннэ. Припев: Лыкты, лыкты ми доры, Тӧдьы тушо Тол Бабай. Кырӟа, экты милемын, Лымылэсь чебер апай. Чеберъям кыз котырын Котькинлы шулдыр. Уг ни кышкаты гондыр, Эшъяськем татын. Припев. Анайёс но атайёс, Султэ вӧзамы. Кырӟаломе кырӟанъёс - Вуиз Выль армы! Припев. Чибориё ансамбль Иж вӧзысь Ягул гуртын улӥсь пиналъёс ас кылынызы ӧжыт ке но верасько, удмурт выжы луэмзэс уг вунэто. Ас калыктэ, йылолъёсты, сямъёсты, гажан мылкыд соослы мӧйыос пыӵато. Тросэз пиналъёс ветло "Гуждор" фольклор ансамбле. Котькуд празднике концерт возьматъяло. Туэ татысь нылпиослэн удмурт дӥськутъя фольклор театрзы кылдӥз. Гуртысь "Ягдор" ансамбльлы дас ар тырмонлы сӥзем ӝытэ пиналъёс вашкала гуръёс чузъяськем улсын пӧртэм удмурт дӥськутъёсты возьматӥзы. Музыка шудэмъя, пиналъёс синмаськымон сцена вылтӥ ветлӥзы. Ог дас вить пумо дэремъёссэс соос дасяллям дышетӥсенызы Галина Филипповнаен ӵош. Та егит кышномурт пиналъёсын вань сюлэмзэ сётыса ужа. Соосын аэробикая урокъёс но нуэ. Нырысетӥ концертсэс, Ягулъёс сяна, паймыса но шумпотыса учкизы, Казмаска гуртысь лыктэм куноос но, соослэн угось таӵе ансамбльзы ӧвӧл. Казмаскаысь фольклор ансамбле тросгес мӧйыос ке но ветло, пиналъёсты учкемзы бере "лӧптӥзы" кадь. Задор мылкыдзэс возьматӥзы жингрес кырӟаса, шаплы эктыса. Концерт бере вераськон ӝутӥзы таӵе ик нылпи ансамбль Казмаскаын но кылдытон сярысь. Озьы ог-огед доры ветлон адямилы выль малпан вае, сое тодон-валанъёсын узырмытэ. Выль коллективе куд-ог пиналъёс "Гуждор" ансамбльысь но ветло. Озьы отын но татын но соос удмуртлыкез валаны тыршо. Ягул гуртысь удмурт ансамбльёслэн ужамзы понна Любовь Пенькинлы но тау кароно. Татысь клубен со кема кивалтэ ини. Солэн сюлмаськеменыз фольклор ансамбльлы дас ар тырмон юбилей но туж тунсыко но шулдыр ортчиз. Валентина но Юрий Фоминъёслы, кинъёс нырысь кылдытӥзы татын удмурт коллектив, но мыным, соослэсь ужзэс азьланьтӥсьлы, сётэмын вал дуно кузьымъёс, нош ваньмызлы ансамбле ветлӥсьёслы сяська тугокоос. Табере оскон кылдэ: Ягул черкогуртысь удмурт ансамбльёс ужзэс азьланьтозы, удмуртлыкез утёзы. Н. Возисов. Писательлы сӥзьыса Грахово. Кӧс нуналэ тодмо удмурт прозаиклы Роман Валишинлы 60 арес тырмысал. Туннэ Бадӟым Вожой (Лолошур-Возжи) гуртысь культура юртын ортче писательлэн творчествоезлы сӥзем пумиськон. Ӧтемын сое тодӥсь муртъёс, писательёс но журналистъёс: Алексей Ермолаев, Кирилл Ломагин, Анатолий Комаров, Татьяна Чернова, Семен Карпов, Владимир Михайлов но мукетъёсыз. В. ИСТОМИНА. Дасяське выль арлы бюджет ПРАВИТЕЛЬСТВО УТЧА КОНЬДОН Укмыс декабре ӵукна укмыс часэ ик ужаны кутскиз Правительстволэн кенешез. Отчы ӧтемын вал городъёсысь но районъёсысь администрациослэн кивалтӥсьёссы. Люкаськемъёс тупен-тупен эскеризы вуоно арлы чаклам бюджетэз. Солэн инъетэз сярысь ивортон лэсьтӥз коньдонъя министр Владимир Бельтюков. Со шуиз: - Выль арлы бюджетлэн инъетэз, сое лэсьтон, коньдон люкан амалъёс рос-прос учкемын министерствоосын но ведомствоосын, городъёсысь но районъёсысь администрациосын. Озьы ке но, бюджетын 72,2 миллиард манет уксё уг тырмы. Нош сотэк социальной удысэз возьыны ум быгатэ. Озьы ик секыт луоз данак законъёсты но нимаз программаосты быдэсъяны. Правительстволэсь кенешсэ нуиз Павел Вершинин. Нош мукет нуналаз, 10 декабре, Правительстволэн Тӧроез пумиськиз журналистъёсын. Павел Николаевичлэн мылкыдыз одӥг - вуоно арлы дефициттэк бюджет лэсьтыны. Правительство али котькыӵе амалъёс утча бюджетлэсь доход люкетсэ будэтон, яке 72,2 миллиард манет коньдон шедьтон вылысь. Г. РОМАНОВ. Шӧкыч Серемес чуръёс Кышка - Эх, Зӥнӥ, мон тонэ кышно басьтысал но... - Бен мар-о люкетэ, мусое? - Кышкасько. - Малэсь? - Кызьы малэсь? Кышноеным сямдыя уд тупалэ. Тумошо кино - Мусое, кыс телевизорез, - синъёссэ ӵушылыса вушйылэ воргорон. - Уг быгатӥськы, - шуэ кышноез, - асьмеос кинотеатрын. Ӧз тоды - Тон, возьыттэм! - картсэ индылэ Матрон. - Кызьы тынад ымыд пыриз куноос азьын монэ шузи шуыны?! - Вождэ эн вай, мусое, - мар вераны ик ӟудӥз воргорон. - Шузи луэмдэ ватыса возиськод шуыса, мон ӧй тоды ук. Вай коньдон! Кык воргоронъёс куспазы верасько. - Мынам кышное ӵукнаысен ӝытозь ӟудыса улэ: "Вай коньдон! Вай коньдон! Вай коньдон!" - Осто инмаре, малы солы сомында коньдон? - Кин нош тодэ. Одӥг пол но ӧй на сёты. Шудо улон Ми кышноеным вить ар шудо улӥм. - Нош собере? - Нош собере кышнояським. Магазинын - Кӧня сылэ та кульчо? - зарни зундэс шоры возьматэ Миквор. - Дас вить миллион. - Вот ша-а-а-айтан! - йыр бордаз кырмиське воргорон. Нош таиз? - Таиз кык шайтан. Базарын - Дядяй, та скалды кӧня литр йӧл сётэ? - Одӥг но ук. - Соку малы сюдӥды-вордӥды? - Ми сое вордӥм, малы ке шуоно со ош. Глаз ёросысь Гылёгурт уно куноосты пумитаз та нуналэ - сюрес дуре интыяськем одӥгаз удмурт гуртын усьтӥськиз шутэтскон-шулдыръяськон юрт. Кунсьӧр кылын вераса, кемпинг. Солэн кылдытӥсез - шӧртчи ужбергатӥсь Николай Волков. Та удмурт воргорон кема утчаз сюлмаськонъёссэ валась муртэ - ӝогак гинэ ӧз шедьты. Юрттӥз аспал адямиез - Глаз ёросысь "Луч" колхозлэн тӧроез Пётр Манашев (Пётр Николаевич но Николай Юрьевич вордӥськемын одӥг интыын - Бигер шаерысь Балтаси ёросысь Лӧзя гуртын). Ӝабыр-ӝабыр басьтськизы уж борды, жадёнэз тодӥсьтэм адямиос. Ужзы каллен вырӟиз. Николай Юрьевичлы аслыз утчано луиз корка лэсьтыны мынӥсь арбериос но, лэсьтӥськисьёсты но. Таосыз но муш сямен, жадёнэз валатэк ужазы. Константин Волков, Евгшений Манашев. Евгений Касаткин, Александр Веретенников, Николай Иванов вань сюлэмчеберлыксэс сётӥзы выль юртлы. Сое усьтон нуналэ Галейгуртэ люкаськылӥзы журналистъёс, тодосчиос, суредасьёс, писательёс, кунэн кивалтонын, мукет удысъёсын ужасьёс. Юрт пушкын ваньмыз чебер. Нырысетӥ этажын - бар, кылиськон-дӥсяськон инты. Татын ик - гур но йӧллэсь сиён-юон дасясь завод. Кыкетӥ этаж чакламын куноосты пумиталляны. Куинетӥ этажын - шутэтскон интыос. Кузь сюрес бере ӟеч ялкарыны мед быгатод шуыса, ваньмыз вань. Та чебер юртэз усьтонэ люкаськемъёсты лулысь-сюлмысь шулдыртӥзы "Иднакар" ансамбльысь кырӟасьёс. Ӝытбыт чузъяськизы ӟеч мылкыд кузьмась жингрес гуръёс, юртэз лэсьтӥсьёслы ӟырдыт веранъёс. Та усто корка сюрес дуре ик пуктэмын бен, отчы ӵемгес пыралозы, дыр, мынӥсь-ветлӥсьёс. Юртлэн нимыз но сыӵе ук - кемпинг. Нош со - автотуристъёс понна юри чаклам шутэтскон инты. Огез гинэ ӝожомытэ: юртлэн удмурт шӧмыз ӧвӧл. Котькытын шӧдӥське кунсьӧр. Нош удмуртлык бӧрдоз золгес кыскысал, дыр... Юртэ пыронлы сӥзем сӥё-дано интыез вандо Удмурт Правительствоысь Нациосын ужанъя комитетлэн тӧроез Светлаан Смирнова но Глаз ёрослэн кивалтӥсез Геннадий Чеченин. Выль корка нырысь ик лэзёно коӵышез. Таӵе со - кемпинг. "Луч" колхозлэн тӧроез Пётр Манашев возьматэ йӧллэсь сиён-юон дасясь заводэз. Владимир Камашевлэн туспуктэмъёсыз. Берекет Кезьыт! - Ыш-ыш-ыш...Кезьыт! - шуиськом асьмеос тол нуналъёсы. Выламы шунытгес дӥськут дӥсяськом, коркаосмес юнгес эстӥськом. Нош пӧйшуръёслы, тылобурдоослы, мукет луло макеослы кызьы пырпотоно та тол кезьытъёсыз? Котькудӥз кызьы ке но ассэ утьыны, шунтӥськон амалъёс шедьтыны тырше. Коӵоос, пурысь куакаос, ӟольгыриос, пислэгъёс, дыдыкъёс асьме юртъёс котырынгес возисько. Куд-огез толлы умме усе, кылсярысь, гондыр, сурок, енот вылллем пуны, ӵушъял, нарды (барсук). Кезьытлэсь соосты утё гуоссы-каръёссы. Ву но кезьытлэсь ватскон инты. Вад (выдра), ву комак (ондатра), мый (бобр) нокыӵе сюлмаськонъёстэк вуын толъё, шур но тымет пыдэсозь ик медаз гинэ кынме, собере толлы люкам сиёнзы тырмыт мед луоз. Соиз ини озьы, сиён тросэзлы пӧйшуръёслы азьло ик дасяно луэ. Тани бызара (суслик), коньы, кылсярысь, ас вакытаз туж чупрес бызьыло, соин ик толэз умой пырпото. Кезьытэн тросэзлэн пӧйшуръёслэн выросъёссы но воштӥсько. Койык тани, сиён утчаса, пипуо нюлэскысь пужым сике кошке. Юрмег (ласка) кезьыт нуналъёсы лымы улысь уг ик пота, шыръёсты лымы пушкытӥ ветлыса ик кутылэ, шыр карын ик пумен шутэтске. Векчи тылобурдоос уллёосы люкасько. Тужгес секытэсь соослы кезьыт уйёс. Гыркъёсы пырыса, карниз улъёсы, укно наличникъёсы пуксьыса, соос ог-огзы бордын шунско. Кинлы отчы инты уг сюры, уйзэс кырын ортчыто. Пуксё артысь артэ писпуысь одӥг вай вылэ но ог-огзы борды ӝиптӥсько. Пумаз пукисьёсыз кынмыны ке ӧдъяло, шоразы интыясько. Лымы тол вакытэ ваньмызлы сямен луло макеослы но будосъёслы кезьытлэсь утись луэ. Огъя лымы шобырез басьтоно ке, музъемлы матын кыллись лымылэн температураез, вылӥ лымы сӥлэсь, 20 градуслы шунытгес луэ. Лымы пушкы уйлы шунскыны пыро туръёс, дукъяос, сялаос. Лымы ӧжыт ке, толалтэ секыт йӧтэ толлы умме усем ӵушъяллы но, кенӟалилы но, будосъёслы но. Адямиос но сюлмаськыны кутско, кызьы, пе, бусыын толъе ини узьым (ӟег уд), ӧвӧл-а кезьыт картофка гуын, уз-а кынме садысь емышо писпуос. Тыпы, кылсярысь, асьме палась кезьытъёслы сокем ик дышемын ӧвӧл, со лымшорысь вуэмын. Нош кызьпу, пипу, пужым - уй пал будосъёс. Ческыт уммен изё соос та вакытэ, вуоно тулыслы кужым люкало. А. Сутулов. Берекет Выль ар ӝӧк вылады Учке ай та туспуктэмъёс шоры. Макем соос аспӧртэмесь адӟисько. Ӝӧк вылэз тазьы чебертыны котькуддылэн пӧрмоз, мылкыдды гинэ медло. Соосты лэсьтыны номыр шугез ӧвӧл, нош макем "шулдыр тазьы" куноостсэс, асьтэлэн но мылкыдды ӝутӥськоз. "Гномикез" лэсьто пӧзьтэм курег пузэн. Нырыз но ымыз суредамын томат пастаен йыраз изьыямын помидорлэн (редислэн) ӝыныез. Синъёс интые изымтэ сьӧд пӧсьтурынъёс мынозы (емышъёс но тупалозы). "Бубыли" но пӧрмытэмын пӧзьтэм курег пузлэсь. Сое пуктоно салат вылэ яке бутерброд лэсьтоно. Бубыли бурдъёс колбасалэсь яке сырлэсь лэсьтоно, курег пузэз урдсытӥз кыкетӥ лэсьтоно куаръёслэсь (петрушкалэсь, сугон чальдылэсь, кин мае шедьтоз), йӧлвылэн яке майонезэн зырано. Синъёс - вож кӧжыос яке изымтэ сьӧд пӧсьтурын. Бубыли мугорлэсь шорзэ чебермало томат пастаен яке ческыт перецен (горд помидорен, огречен). Куинетӥ туспуктэмын - "огречлэсь рулетъёс". Огречез векчи люкетъёслы кузяла вандылоно но кыӵе ке но бакча сиёнлэсь (ӵуж кушманлэсь, горд кушманлэсь, кубиста куарлэсь...) чебермаса вандылэм юбка "дӥсяно". Л. ВАСИЛЬЕВА. Газет гожъям бере Нуназе куазен лушкаськон 4 декабре потэм газетысь лыдӟи Г. Тихоновлэсь "Чуньыен но яралоз, пе" гожтэмзэ. Можга районысь Бадӟым Сибыын улӥсь Анна Игнатьеваез кӧтӝоже уськытӥллям. 500 килограммъем муры скал понна колхоз Игнатьевалы сётэм 278 килограммъем толэс вал. Котькин тодэ луоз, скал сӥль, вал сӥль сярысь, кӧня ке пол дуногес сылэ. Нош хозяйстволэн кивалтӥсез С. К. Петров скаллэсь мултэс дунзэ солэн кузёезлы берыктыны уг ик малпа. Нуназе куазен лушкаськем кадь луэ ук со. Та пумысен Петровлы вазиськем потэ таӵе кылъёсын: эн сапта гуртлэсь нимзэ. Нылкышноез алдаса, колхоздэ уд узырмыты. Статьяез лыдӟыса тодам лыктӥз 1952 ар. Налогъя агент азбарысьтымы берпум ыжмес нюж кыскыса поттыны кутскиз. Кык пичи ыжпиос огназы кыльысалзы. Соосты жаляменым, мон, пичи пияш, ыжлэн чыртыяз ӟыгырски. Бӧрдӥсько. Воргорон ыжен валче монэ кӧня ке кыскиз на, собере гинэ ыжлэн сюръёсысь бордыз лэзиськиз. Та ӵошатон скалэз толэсэн воштэмлы уг ке но тупа, огвыллемез вань, шуысал. Со - аслэсьтыд властьтэ кутыса адямилэсь ваньбурзэ талан. Йырез йырын воштон сярысь вераськон мынэ бере, таӵе но югдур кылдыны быгатоз. Шуом, кудӟем шофёр Петровлэсь ӟазегъёссэ машинаен лёгалоз, интыяз котькуд ӟазег понна курег ваёз. Уг кельшы дыр таӵе вошъяськон. В. Трофимов. Ува район. Нуналлэн тодметэз Куазь ас вакытсэ шӧдэ: вашкала календарья, та нуналъёсы одно ик кезьыт луэ. Варваралэн вордсконэз озьы, пе, тупа. Ӵуказе, 17 числое, солэн праздникез. Калык верамъя, та нуналлы Тол Бабай вань сюресъёсты тып-тып вале, шуръёс вамен выж вӧлдэ. Югыт нунал туннэ кыстӥськоз 7 час 2 минут, сутка ӵоже кулэсмоз 1 минутлы гинэ. Вуо самой вакчи нуналъёс. Со понна уйёс юг-югесь: инмын кузёяське тыр толэзь, яркыт пишто кизилиос. Та нуналъёсы вордскем пиналъёслы азьвыл дыръя сёто вылэм Андрей, Афанасий, Иван, Стефан, Савва, Варвара, Ульяна нимъёсты. Кивалтон удыс Луо вылын но етӥн сяськаяське Кивалтӥсь нылкышноосты ӵем уд пумита. Республикаысьтымы ог ӝыны сюрс эштосъёс пӧлысь дасо палаеныз гинэ кышномуртъёс кивалто. Тани Сюмси районын но соос кык кузя гинэ. Ева Промышленникова ноку ӧз малпалля таӵе удысын ужаны. Со угось йылпумъяз Удмурт университетысь филологияя факультетэз. Туж сюлмысь, яратыса пиналъёсты дышетӥз. Нош улон сюресэз гурт хозяйствое ваиз. Нырысь вордскем "Путь Ленина" колхозаз парторг луыса тыршиз. Калыкен быгатыса ужамзэ адӟыса, сое хозяйствоен кивалтыны куризы. Ева Николаевна вить ар "Заречный" колхозлэн тӧроез вал. Али та хозяйство огазеяськиз "Путь Ленина" эштосэн. Ева Промышленниковалэн сюлмаськонэз кык поллы будӥз. Гура, Визыл, Кузлук, Лем, Ӟятча гуртъёсысь калык оскиз удмурт кышномуртлы гурезь быдӟа ужез. Нош председательлэн пуконаз пуксьыны трос пиосмуртъёс но мылкыд каро вал. Калмез шурлэн тупалаз ю-нянь зол уг удалты, татын угось музъем луо гинэ. Озьы ке но, музъем ужасьёс валаса тыршо, котькуд ар дыраз кизё-арало, тырмыт ю-нянь будэто. Сюлмаськиськод ке, луо вылын но етӥн сяськаяське. Ева Николаевна вань бусыослэсь "сямзэс" тодэ. Трос ар будӥсь турынъёс ӝыны лудъёсты басьто. Ӟег, сезьы, картофка вунэтэмын ӧвӧл. Соос калыклы люкыны но, пудо сюдыны но мыно. Колхозлы трос пайда скалъёс ваё. Котькуд аре скаллы быдэ 2000 килограммлэсь трос йӧл кыско. Ева Николаевна сюлмысь пыриське удмуртлыкез утён борды. Вань удмуртъёслэн куатетӥ Ӧтчамзылэн делегатэз вал, экономикая секциын трос ӵектонъёс сётӥз. Та Ӧтчамын мон пумиськи на Сюмси районысь ик лыктэм кышномурт кивалтӥсен. Берло аръёсы гуртын улӥсьёслэн сюлмаськонъёссы будӥзы, уката но секыт вал таяз аре. Тулыс кема кезьыт улэмен, вань бусы но бакча ужъёс ӝегатскизы. Валентина Банщкиова сельсоветэн ке но кивалтэ, солы колхоз ужъёс но туж матын. Нош Сюмси районысь Васькино сельсоветэ пыро кык колхозъёс - "Борец" но "Победа". Куать гуртъёсын 1300 мурт улэ. Шаплы кышномурт колтькудӥзлэсь сюлмаськонъёссэс тодэ, быгатэмезъя котьма ласянь юрттыны турттэ. Уката секыт гуртысь мӧйыослэн улонзы. Пу ваёно, бакча ужъёсты быдэстоно, - транспорттэк номыр уд лэсьты. Валентина Анатольевна ачиз колхозысь кивалтӥсьёс доры мынэ, кулэ луись техника яке вал куре. Трос сюлмаськонъ ёс клубъёслэсь ужзэс радъян бордын, соосты тупатонын но. Блаж- Юсысь, Васькиноысь но Пижилысь клубъёсын вань асьсэлэн артистъёссы, соос ӵем гурт калык азьын кырӟало-экто, Ансамбле велтӥсьёсын дӥськут но, транспорт но кулэ. Татын но Валентина Банщкиова палэнэ уг кариськы. Татысь гуртъёсын удмуртъёс но, ӟучъёс уло, ваньмыз соос кадь гажало егит удмурт кышномуртэз. Шумпотоно, ӟучомыны кутскем районын но таӵе адямимы вань шуыса. Удмуртъёслэн съездазы Валентина Анатльевна э шъяськиз ачиз кадь ик сюлмо кышномуртэн та районысь "Заречное" колхозлэн кивалтӥсеныз Ева Промышленниковаен. Н. ВОЗИСОВ. Туспуктэмез В. КАМАШЕВЛЭН. Мынэ партбилетъёсты воштон Республикаысьтымы партийной организациосын та вакытэ мынэ партбилетъёсты воштон. Соин ӵош выльысь ужаны кутскизы Пичи Пурга но Яр районъёсысь парторганизациос. Документъёссы быдэсак воштэмын ни Ижевскысь Октябрь районысь, Сарапул горкомысь, Ува райкомысь (секретарьёссы Л. П. Боков, Т. П. Кондратьева, Ю. Е. Горячих) коммунистъёслэн. Пусйыны кулэ, Кизнер но Сюмси районъёсысь парторганизациослэн радъёссы ар ӵоже шӧдскымон будӥзы. Республикая вераса, туэ 10 толэзь ӵоже КПРФ-е пыриз 32 мурт, со пӧлысь ӝыныезлэсь ятырез - егитъёс. Л. ДМИТРИЕВА. Удмуртъёслэн огазьын улоно интыосысьтызы - СНГ-ысь кунъёслэн, Россия Федерациысь элькунъёслэн, крайёслэн но областьёслэн йыръёссылы вань удмуртъёслэн ВИ Ӧтчамзылэн ВАЗИСЬКОНЭЗ Ми, удмурт калыклэн полномочиосыныз ыстэм муртъёс, асьмелэн вылӥ кенешамы Удмурт Элькунлэн шоркараз Иж каре люкаськыса эскерим удмурт калыкез азинтонъя лэчыт ужпумъёсты но сюресъёсты. Удмуртъёслэн огазьын улоно интыосысьтызы - СНГ-ысь кунъёслэн, Россия Федерациысь элькунъёслэн, крайёслэн но областьёслэн йыръёссылы вазиськыса, ми мур тау кариськом интыосысь калыклы, кивалтэтъёслы но кивалтӥсьёслы, обществолэн но политикалэн улоназы огкадь правоен пыриськыны, кылзэс, культуразэс, сямъёссэс но йылолъёссэс азинтыны, культурая огазеяськонъёссылы ужаны удмуртъёслы луонлыкъёс кылдытэмзы понна. Удмуртъёс сямзыя законъёслэсь кылзӥськисесь. Соос гажало каръяськем интыосысьтызы кун ёзъёсты, музон калыкъёслэсь сямъёссэс но культураоссэс. Соос дурбасьто каръяськем интыосазы тупаса но огсыр улонлы, Россилэн но СНГ-ысь кунъёслэн сяськаяськонзылы. Ми оскеммес вераськом: удмуртъёслэн огазьын улоно интыосазы - СНГ-ысь кунъёсын, Россия Федерациысь элькунъёсын, крайёсын но областьёсын утиськозы тупан но огсыр югдур, юнмалозы эшъяськон но ӵош ужан кусыпъёс, азинскозы кунъёслэн Удмурт шаерен кусыпъёссы. Ми оскиськом: тӥ азьланяз но юрттоды но дурбасьтоды удмуртъёслэн культурая огазеяськонъёссылы ужаны. Тӥледлы сӥзиськом тупаса но ӟеч улон, сяськаяськон! Удмурт Элькун Иж кар. 1997-тӥ арын 6-тӥ шуркынмонэ. Удмурт калыклы вань удмуртъёслэн ВИ Ӧтчамзылэн вазиськонэз Ми, Россия Федерациысь пӧртэм субъектъёсын но СНГ-ысь пӧртэм кунъёсын улӥсь удмурт калыклэн полномочиосыныз ыстэм муртъёс, люкаським Удмурт шаерлэн шоркараз Иж каре вань удмуртъёслэн ВИ Ӧтчамазы но эскерим удмурт калыкез азинтонысь лэчыт ужпумъёсты но сюресъёсты. Удмурт калыкмес утёнэз, азинтонэз но сяськаяськытонэз асьмелэн туж бадӟым уженымы лыдъяса, асьме калыклэсь вордскем кылзэ, сюрс аръем лулчеберзэ, культуразэ, выжы но история ласянь асваланзэ, сямъёссэ, йылолъёссэ вань дуннелэн туж дуно узырлыкеныз лыдъяса, ми азьлане учкиськом ӟечезлы осконэн. Вань удмуртъёслэн ВИ Ӧтчамазы ми эскеримы удмурт калыкез азинтонысь туж бадӟымесь ужпумъёсты, сюлмаськон ваись шуг-секытъёслэсь мозмытскон сюресъёсты. Шӧдӥське калыклэн сылмемез, удмуртъёс выжыысь выжые весь ышто ас кылзэс, культуразэс, сямъёссэс но йылолъёссэс, удмурт калык пумен ичигес шеде элькунысь кун властьлэн ёзъёсаз но интыысь аскивалтонлэн ёзъёсаз, уродме удмурт калыклэн улоно интыез. Сыӵе ужпумъёс ӵемысь кылдо соин но: асьмеос, удмуртъёс, мылкыдтэк пыриськиськом обществоен но политикаен герӟаськем улонэ, тужгес ик властьлэн ёзъёсаз быръёнъёс вакытэ, палэнскиськом ас кылмес, культурамес но йылолъёсмес утёнлэсь, сӥялэс мылкыдын учкиськом калыклэсь мукет кулэяськонъёссэ утён шоры. Удмурт калыклэн историез сюрс аръем. Асьмелэн огъя ужпуммы - выжыосмылэн музъемзы вылын кылдытоно эрико, сяськаяськись элькун, сюресъёс усьтоно азинтыны калыкез, юнматыны удмурт калыклэсь кунлыксэ, Удмурт Элькунлэсь Россия Федерациын но СНГ-ысь кунъёсын гинэ ӧвӧл, быдэс дуннеын данзэ. Солы оскон сёто удмурт калыклэн ассэ жалятэк тыршемез, инкуазен кузьмам визьмыз но тупаса улон мылкыдыз. Асьме пӧлысь котькудӥз пумен чупресгес мед пыриськоз кунысь но элькунысь обществолэн но политикалэн улоназы, мед нюръяськоз ас калыкезлэсь адямиоссэ Россиысь но Удмурт шаерысь кун властьлэн но интыысь аскивалтонлэн ёзъёсазы быръён понна, мед басьтоз туж бадӟымесь азинсконъёс ужын, дышетсконын, наукаын но выльзэ кылдытонын, мед юнматоз интыын дэмен аскивалтонлэсь ёзъёссэ (гурт, ёрос, бускель кенешъёсты), мед пыриськоз соослэн ужазы. Котькытын мед уломы, асьмелэн нырысетӥ но тужгес бадӟым ужпуммы - калыкез, солэсь кылзэ, культуразэ, сямъёссэ но йылолъёссэ утён. Удмурт калыкез история кылдытӥз но историын со весяк мед луоз. Асьме калыклы кулэ огазеяськон но ог-огедлы дурбасьтон. Удмурт калык возиськоз но азинскоз соку гинэ, куке асьмеос огазеяськыса, эшъяськыса, ог-огмылы юрттыса, пумиськылыса но кенешылыса улӥм. Асьме калык - финн-угор дуннелэн ог люкетэз. Кылъя но культурая матысь адямиосын огъя лулчеберлыкъя дуннеын улон туж усто но кулэ. Асьме калык музон калыкъёсын ӵош эшъяськыса но огкылысь улэ. Со ӧз урдскылы но уз урдскылы мукет музъемъёс но узырлыкъёс вылэ. Музон калыкъёс асьмеды мед тодозы сыӵеен, кыӵеесь асьмеос: лякытэсь, вераськисесь, небыт сюлэмоесь, ужез яратӥсесь но мукет кылъёсты но культураосты гажасесь, тодон-валан пала кыстӥськисесь. Выжыосмылэн вордскем музъемзылы, ас калыкмылы, улоно кунъёсмылы осконмы асьмелы котьку сётоз ноку быронтэм кужым. Общество выжыны дасяське ХХИ дауре. Асьмелэн малпанъёсмы чылкытэсь, сюресмы шонер. Ваньдылы сӥзиськом шуд, тазалык, азинсконъёс. Удмурт Элькун Иж кар. 1997-тӥ арын 6-тӥ шуркынмонэ. Сессия бере Чидан тырмиз ке... Россилэн Конституциезлэн нуналыз азьын, 11 декабре, Ижын ортчиз Кун Кенешлэн дас витетӥ сессиез. Парламент умоен лыдъяз Президентлэн Удмурт Республикаын кун властьлэн ёзъёсызлэсь но интыысь аскивалтонлэн ёзъёсызлэсь кусыпъёссэс радъянъя ужрадъёс сярысь Указэзлы инъетэз. Залын пукись 81 депутат пӧлысь 66-ез со понна куаразэ сётӥз. Алигес таӵе учырез веразы. Гужем асьме доры вуылӥзы Кун Думалэн депутатъёсыз. Шаерамы улӥсьёсын уно пумиськонъёс ортчизы. Одӥгез соос пӧлысь, Удмуртиен тодматсконэзлы йылпумъян лэсьтыса, тазьы шуэм: "Мынам сыӵе малпан кылдӥз, кытчы ке Иж котыре НЛО шуон пуксьысал ке, отысь васькем инсьӧр куноослэсь нырысь ик юасалзы: тӥ Волков понна-а, Салтыков понна-а? Кожалод, татын улӥсьёсты номыр мукетыз уг сюлмаськыты ни..." Ма бен, палэнысь адямиослэн но син шоразы йӧтэм ни бере асьмелэн сюлмаськонмы, пумитъяськыны кулэез ӧвӧл ни, вылды. Озьы ик вань со. Тани кык ар пала ни кыстӥське Удмуртиысь вылӥ кивалтӥсьёс куспын вогъяськон. Асьсэос соос ялан шуо: ӧвӧл, со кык азьветлӥсьёс куспын нюръяськон ӧвӧл, со властез шонер люкон сярысь сюлмаськон. Кин тодэ, кин тодэ. Оло озьы но. Только огшоры адямилы сое валамлэсь капчигес уг луы ук. "Удмурт дунне" гожъяз ни, малы люкано луиз Кун Кенешлэсь азьвыл чакламтэ сессизэ. Кызьы тодмо, дасямын Президентлэн Указэзлы инъет. Сое вань кулэ луись ёзъёс (Россиысь Национальностьёсын ужанъя но Федерациысь кусыпъёсъя министерство, Юстицияя министерство Президентлэн Администрациез, Правительство) умоен лыдъязы. Котыр ласянь учкемын, котыр ласянь чакламын. Паймоно кадь, но палэнэ кылиз асьме элькунысь вылӥ власть гинэ - Кун Кенеш. Депутатъёс пӧлысь куд-огез берло дырозь ӧз но кылылэ, Москваын Удмуртияя нимысьтыз Указ поттыны дасясько шуыса. Таӵе тырмымтэез палэнтон но парламентлэсь дурбасьтэмзэ юнматон вылысь ик люкамын вал сессия. Азьло ик шӧдӥськиз ни, пусъем ужпумез эскерон шуген мыноз шуыса. Ижысь депутатъёс олокызьы но выризы сое отчы яке татчы кыскыны. Я кабинаос пыр лушкем голосование ортчытыны, я куд-ог выль документъёсты вӧмытыны, я эшшо маке лэсьтыны ӵектылӥзы. Соос тыршизы дырез нуйтыны но эшъёссылэсь мылкыдзэс ас палазы берыктыны. Югдурез валэктон вылысь, кыл куриз Кун Кенешлэн Тӧроез Александр Волков. Со шуиз: "Котьмалэсь кулэез - асьмелы кылдытоно уногес пайда ваись власть. Ми Салтыковен та пумысен огкылэ вуим. Со гожтӥськиз документ улэ. Указ асьме шаерын огсыр улонэз радъянлы кутскон сётоз". Собере эскероно ужпумъя доклад лэсьтӥз Кун Кенешысь ялан ужась комиссилэн кивалтӥсез Александр Борзенков. Со пыр-поч мадьыны тыршиз республикаын властьлэн пӧртэм ёзъёсызлэсь кусыпъёссэс умоятон амалъёс но та ласянь быдэстэм ужъёс сярысь. Со дыре ик пусйыны кулэ: куд-ог ужпумъёсъя депутат вылтӥз гинэ ортчиз. Юнме шат докладчиклы куамынлэсь ятыр юан сётэмын вал? Указ юнматэмын луиз ке, азьланяз Удмуртиысь городъёсын но ёросъёсын аскивалтонъя органъёсын ӵош кылдытыны быгатозы кун властьлэсь ёзъёссэ но. Озьыен, государстволэн югдурен кивалтонъя луонлыкъёсыз паськыталозы. Но со дыре ик ватсаса расходъёс но кулэ луозы. Кӧня манет тыр усёз выль кивалтон ёзъёсты возён? Али та юанлы нокин но тыро-пыдо валэктон сётыны уз быгаты на. Валантэм луиз сессиын мукетыз но. Указэз дасясь эшъёс шуо, Президентлэн Администрациезлэн кивалтӥсез Валентин Юмашев проектэз умоен лыдъяз шуыса. Со вакытэ депутатъёс пӧлын вӧлмыто Президентлэн Удмуртиын ас адямиезлэсь (представителезлэсь) Виктор Балакинлэсь гожтэтсэ, кытын ивортэмын, Юмашевлэн воштӥсез Виктория Митина дорын ортчем кенешын Указлэн инъетэз бордын ватсаса ужан ласянь решение кутэмын шуыса. Кылдэм югдур пумысен малпанъёссэ вераз сессие юри ӧтем Вячеслав Туманов, РФ-ысь Национальностьёсын ужанъя министрлэн нырысетӥ воштӥсез. Огъя кужымен асьмелы шедьтоно сыӵе механизм, кудӥз юрттоз властьлэсь вань ёзъёссэ одӥг ӧре кыскыны, озьы калыклэсь улонзэ умоятыны, пусйиз со. Федерацилэн центрез тӥледлы юрттыны гинэ тырше, малы тӥ солэсь палэнскыны турттӥськоды - уг валаськы, паймемзэ вераз Москваысь куно. Нуназе бере депутатъёс фракциосъя люкиськизы. Куд-ог тужгес но кулэ ужпумъёсты эскерыку, уноезлэсь эшъёссэс мылкыдзэс тодон но лыдэ басьтон вылысь, асьме парламентын сыӵе амал кутӥське. Дас вить часын выльысь кутскиз огъя кенешон. Мылкыдъёс пӧртэмесь. "Удмуртия" фракция гинэ огкылысь кариськиз Указлы инъетэз умоен лыдъян понна. Мукетъёсаз депутат огазеяськонъёсын куараос люкиськизы. Шуом, гуртысь быръем эшъёс пӧлысь сизьымез инъетлы дурбасьтонлы мылкыд каризы, ньылез - пумит, сомындаез ик малпанзэс вераны шугъяськизы. Кызьы шуиз кивалтӥсьсы Валентин Тубылов, воштӥськонъёс кулэ, но асьмелэн правомы вань соосты Президентлы вазиськытэк ортчытыны. Депутат Александр Бегунов (коммунистъёслэн фракцилэн кивалтӥсез) пусйиз: ми ум малпаське, Указ потӥз ке, асьме ужпумъёс ас понназы соку ик быдэсмозы шуыса. Озьы уз луы. Асьмелы ик та бордын тыршоно, унозэ законъёсты выльдоно. Нош Указ юрттоз чаклам ужъёсты ӝоггес быдэстыны. Сессилэсь азьло та ужпум эскеремын вал парламентысь ваньмаз ялан ужась комиссиосын но. Соослэн тӧрооссы ивортӥзы кутэм решениоссы сярысь. - Туннэ тужгес но кулэез - ог-огдэ валан, - шуиз промышленностья комиссилэн кивалтӥсез Виталий Соловьев. - Палэнысь юрттэтлы гинэ оскыса улыны уг луы. Ма, учке ай семьяя ик. Маке луиз ке, бускелед но, местком но уз юрттэ. Югдур тупатскоз кузпалъёс куспазы огкыл шедьтыса гинэ. Озьы прениосын дас одӥг мурт вераськиз. 20 депутат эшшо турттэ на вал трибуна сьӧры потыны, мылкыдзэ усьтыны. Ӧз сётэ. Тырмоз, шуизы. Кун Кенешлэн Президиуме дасям проектэ куд-ог воштонъёс но ватсанъёс пыртыса, сессия постановление кутӥз. Со понна луизы ваньмыз сямен депутатъёс. Соос А. Волковлы, П. Вершининлы но А. Салтыковлы поручение сётӥзы: дэмен пыриськыны проектлэсь текстэ дасянэ. Али шуг вераны, ма сётоз Президентэзлэн Указэз (улонэз адӟиз ке) асьме республикалы. Шумпоттэ соиз: уноезлы депутатъёслы вожвылъяськон акыльтӥз ни, шӧдске, соос пумен юнгес но огкылысьгес басьтӥсько шаерамы властез юнматон борды. Кызьы верамын вала сессиын, чиданмы тырмиз ке, асьмеос, депутатъёс, калыклэсь улонзэ умоятон понна трос лэсьтом ай. И. Лебедев. Быриз границаын Эшшо одӥг шайгу ватсаськиз на Ижевск вӧзысь Хохряки шайвылэ: юнме шорысь бырыны шедиз асьмелэн землякмы пограничник Андрей Евтюхин. Читинский областьысь "Солнечная" застава та дырозь Забайкальской военной округъя котьку азьмынӥсьёсыз радын вал. Со сярысь анаезлы шумпотыса гожъяз Андрей но. Ноябрь толэзьлэн нырысетӥ нуналъёсаз доразы вуизы егитъёс, огез М. Чита областьысь пияш. Самой та солдат толэзьлэн пумаз автоматысь ыбылыса быдтэ 5 эшсэ. Соос пӧлын вал А. Евтюхин но. ... 2 часэ уин ваньзы ӵош сылӥзы на постын; М. - ульчаын, кылемез - техникаез чакланъя пичигес комнатаын. 5 муртлы отын ёркыт вал, ватскыны нокытчы. Соин ик шоразы мертам автоматлэсь огез но палэнскыны ӧз быгаты. Евтюхинлэн мугораз тямыс пуля йӧтэм. Пограничный комендатураысь А. Герасин майор верамъя, ваньмыз понна янгыш М. Быдтэм муртъёс пӧлысь огеныз кусыпсы тупамтэен, йыркурзэ вормытэк, со ваньзэ одӥг кутскемен быдтӥз. Сӧсыртӥз на мукет нарядысь постэ мынӥсь пограничникез. Таизлэсь улонзэ, куинь операция лэсьтыса, врачъёс утизы. М.-ез кутӥзы вуоно нуналаз, иземен шедьтыса. Бордаз вылэм на зарядить карем кын автомат, 200 пала патрон. Соосты басьтӥз вием эшъёсыз киысь. Погранзаставаын луэм учырез сэрттоз-пертчоз военной прокуратура. Но со югудрез уз тупаты. Та чуръёсты гожъякум, Читинской областьын огаз заставаын нош ик пиосмы ог- огзы шоры ыбылӥзы. Нош ик кинлэн ке вирыз кисьтӥськиз, кинлэн ке вордэм пиез бырыны шедиз... Л. Медведева. Ортчозы Ижын но Москваын 14-тӥ толшоре 100 ар тырме удмурт азьветлӥсьлы Куӟебай Гердлы. Та юбилеез ӟеч пусъён понна, Россия Правительстволэн косэмезъя, нимысьтыз оргкомитет кылдытэмын. Отчы пыро Россиысь но Удмуртиысь пӧртэм министерствоосын но комитетъёсын ужасьёс. Нош кивалтэ соин Россиысь нациосын ужанъя но федераци кусыпъёсъя министр Вячеслав Михайлов. 5-тӥ толсуре оргкомитетлэн кыкетӥ кенешез ортчиз. Нырысетӥез вал 14-тӥ шуркынмонэ. Оргкомитетлэн ужаз пыриськизы Россиысь Коньдон ужпумъёсъя, Экономикая но Культурая министерствоосын, Россиысь Кун печатья комитетын, Теле- но радиоиворъёсъя федеральной службаын, Дышетонысь наци ужпумъёсъя институтын, Удмурт Элькунлэн Москваысь Постпредствояз ужасьёс. Оргкомитетлэсь кенешсэ усьтӥз Россиысь нациосын ужанъя но федераци кусыпъёсъя министрлэн кивоштӥсез Алексей Томтосов. Со ивортӥз оргкомитетлэн нырысетӥ люкаськемаз чаклам ужпумъёсты быдэстэм сярысь. Удмурт Элькун ласянь кыл сётэмын вал Удмурт Правительствоысь Нациосын ужанъя комитетлэн тӧроезлы Светлана Смирновалы. Люкаськонэ лыктэмъёсты со тодматӥз Куӟебай Гердлы сӥзем бадӟымесь ужрадъёсын. Кылсярысь, Ижевскын 14-тӥ толшоре ортчыны кулэ кылбурчилы сӥзем ӝыт. Отчы ӧтемын луозы Россия Правительстволэн Тӧроезлэн кивоштӥсез Рамазан Абдулатипов но Россиысь нациосын ужанъя но федераци кусыпъёсъя министр Вячеслав Михайлов. 15-тӥ - 16-тӥ толшоре чакламын Россиысь кун наци политикалэсь концепцизэ азьланьтон сярысь, регионъёслэн та удысын ужамзы сярысь конференция ортчытыны. Москваын 20-тӥ толшоре Удмурт Элькунысь Кун Кенешлэн но Правительстволэн, озьы ик наука но культура удысын ужасьёслэн конференцизы ортчоз. Та нуналэ ик Куӟебай Гердлы сӥзем выставка усьтӥськоз. 28-тӥ толшоре Россиысь Нациосын ужанъя но федераци кусыпъёсъя министерствоын удмурт тодосчи сярысь документальной фильм возьматӥськоз. Ӵуказеяз бадӟым ӝыт ортчоз. Нош 4- тӥ-6-тӥ июне удмурт шаер международной конференцие лыктэмъёсты пумиталоз. Та ужрадъёсты ӟечгес ортчытон пумысен аслэсьтыз ӵектонъёссэ дэмлаз Россиысь культурая министрлэн воштӥсез Вадим Дёмин. Тыро-пыдо ужазы оргкомитетэ люкаськемъёс. Та нуналэ ик А. Томтосовлэн кивалтэмез улсын радызъя сэрттэмын-пертчемын Ижевскын толшоре ортчоно конференциен герӟаськем ужпумъёс. Эскеремын ужрадэ пыриськись элькунъёслэн лыдзы, ӝутоно ужпумъёслэн кулэлыксы, вераськисьёслэн нимъёссы. Ваньзэ тае ӟечгес радъян понна, конференциез дасясь группа толсуре удмурт шаере люкаськыны кулэ. Маргарита СЕЛЬЧЕНКОВА, Удмурт Элькунлэн Постпредствояз ужась. Тӧр шорын ТӦДЬЫ КУЖЫМ Туннэ "Удмурт дунне" газетлэн редакциысьтыз тӧр шорын - Удмурт телевидениысь диктор Татьяна Денисова. Азьвыл сое удмуртъёс гинэ ярато ке вал, табере ӟучъёслэн но син шоразы йӧтэ ни. Огез тодмомы юнме шорысь уг паймы, дыр: - Берло аръёсы телевидениын Татьяна кадь нокин ӧз буды. Татьяна Денисова туннэ валэктэ милям юанъёсмылы. - Загуляевъёс - республикаямы дано муртъёс. Тон Москвае дышетскыны кошкид Загуляева фамилляен, бертӥд Денисова луыса. Жаль ӧй вал-а ныл фамилляед? - Туж жаль вал. Мукет ласянь, вуж фамилляелэсь кӧня ке акыльтылӥ ни. Школаын дышетскыкум, уроке яке музон ужрадэ дыраз уг вуиськы ке, дышетӥсьёс пыкыло ни: - Ах, Загуляева, опять загуляла! Атаелы но туж жаль вал сыӵе фамиллямес ыштыны. Куинь ныл будэтӥз. Кык апае но мон вордскем бере, монэ роддомысь но басьтыны уг меды ни вылэм (серекъя). Эмъясьёс тэльмыриллям: туж чебер луоз нылашты, нокинлы но эн сётэлэ! Бен, выжымы тодмо. Песянае, чебер но йӧно кышномурт, атайме ваем но вордэм, Загуляев фамилляен дышетӥсьлы синмаськыса. Ӵыжы-выжыосмы пӧлын - тодмо актриса Валентина Загуляева, режиссёр Фридрих Загуляев, инженер но суредась Илья Загуляев, кырӟась Николай Зубков, СССР-лэн куасэн бызьылонъя чемпионкаез Нина Парамонова, кенмы - тодосчи Бибинур Загуляева. Огез выжы- куммы Уфаысь бадӟым предприятиын директорез воштэ. Атаеным данъяськисько вань улытозям. "Мынам идеалэ" сочинениме но солы сӥзи. Огкадь сюлмаськиз нылпиосыз сярысь но, ужез сярысь но. Михаил Загуляев - Удмурт Республикаысь дано агроном. "Совет" колхозын трос аръёс ӵоже валтӥсь агроном вал. Сюлмыныз туннэ но коммунистъёс палан, нош компартие ӧз пыралля - председателе медаз быръе, пе. Курадӟыса ке но будӥз, ас азяз пуктӥз бадӟымесь ужпумъёс - дышетсконо, йыг-йыг корка инъяно, нылпиоссэ быдэ вуттоно. Ваньместы дышетӥз улонэз яратыны. Валамон ини, сыӵе дано фамиллялэсь люкиськыны капчи ӧвӧл. Телевидениын "Улон-вылон" передача гожтыкузы, титрын адскизы Татьяна Денисова кылъёс. Картэ, режиссёр, абдраз: - Тон малы Денисова кариськид? Атаед но тонэ Загуляева фамиллядэ кельтыны куриз ук. Директор доры бызи. Со шуэрскиз: - Загуляева кариськид ке, мар шуоз кузпалыд? - Со ик монэ озьы косэ. Кивалтӥсь бызьылыны ӧдъяз сэргысь сэргы: - Та творческой адямиосты мын но вала. Передачаез со куспын йылаз-пумаз вуттӥллям Денисова фамилляен ик. Мон ӧй жаля. Кыӵе ке небытак кылӥське со. - Данакез чебер нылъёс ӝыны улонзэс сётыны дась артистка луон понна. Нош тон кутӥд но сцена вылысь кошкид. - Шуак-дуак ӧй кошкы. Мынам улон сюресэ читыр-чутыргес. Экранэ сюресэ туж кузь вал. Пичи классъёсын умой дышетски. Берло курадӟыны ӧдъяй физикаен но химиен. Тросгес кужымме сётылӥ, вылды, эктон-кырӟанлы но яратонлы. Гуртысь калык ӟечгес тодэ кык удысэз - дышетонэз но эмъянэз. Оло, мыным но враче дышетсконо? Ӧвӧл, мынам кадь отметкаосын институтэ уд сюры, вылды. Геометриез гажамме, теоремаосты валэктэмме мединститутын сокем ик кулэ уз каре. Озьы документъёсме нуэм вал Ижысь медучилищее. Юртаз пыри но - борддоръёс монэ пачкатыны ӧдъязы. Валатски: пыдъёсы умойтэм пала вамышъяллям. Кызьы потэмме ӧй шӧды. Бӧрдыса бертӥ доре. Тодмое ыстӥз культурая училищее. Пыри хореографияя люкетаз. Сария Ибрагимовна Сухенькая дышетӥз классика амалэн эктыны. Гуртысь нылашъёслы капчи ӧз йӧты. Ум тодӥське вал станок шуонэз гинэ но. Педагогмылэн тужгес вылӥ дунъетэз - "куинь". Мыным "ньыль" пуктылӥз, ачиз верамъя, ужез яратэме понна. Шӧдылӥз, вылды: мынам бере кылеме уг поты, быгатӥсько-а, уг-а, азьпала кариськыны вырисько. Училище бере ужай Бадӟым Кибьялась клубын но школаын. Ансамбль кылдытӥм, грамотаос басьям. Парткомлэн секретарез Иван Окулов дэмлаз "Совет" колхозысь комсомолецъёсын кивалтыны. Веранэз гинэ капчи. Ньыль гуртын 160 пала комсомолец, котькудзэ син шорын возёно. Та вакытэ ик тодосчи (учёной) Альберт Разин, писатель Федор Пукроков но фотосуредась Георгий Юсаев дасязы атае сярысь книга. Альберт Алексеевич весь пунӥз аслэсьтыз гозызэ: - Тон артистэ дышетскыны кулэ. Дышеты кылбур, проза но мукетсэ. Косӥзы бере - мынӥ конкурс шуоназы. Режиссёръёс Леонид Романов но Василий Ушаков куризы кыӵе ке учырез мадьыны. Ӵапак сокугес Сизяй песянае висьыны усиз вал. Мон сое горд киросо машинаен келяй Можгала. Ӵукнаяз атаелэсь юай, Иже мыноно-а шуыса. Тае ик верай. Леонид Григорьевич туннэ ке но тодаз вае: кызьы озьы синкыли пыр серекъяса мадид? Пыри Москваысь Театр искусствоосъя кун институтэ - ГИТИС-э. Отын улыса, дано профессоръёс дорын дышетскон туж трос сётӥз. Вуи Удмурт драмтеатре. - Удмурт драмтеатрын сяна, тон шудылӥд егитъёслэн "Дарт" театразы но. Мынам "Майбыр- макмыр" пьесаея пуктэм спектакльын возьматӥд коньдон понна ассэ вузась нылмуртэ. Тыныд соку куамын котыр вал, героиняедлы - кызь. Шуг-а суреданы сокем егит муртэ? Возьыт ӧвӧл-а сыӵе роль понна? - Соку возьыт ӧй вал. Туннэ аслэсьтым туала интыме чакласа паймисько: ой-ой-ой, кызьы меда возьматӥ сыӵе мыдланес нылмуртэз? Кышномуртлы сомында арес, кӧня со ассэ шӧдэ. Мон ас аресме адӟисько синучкон азьын гинэ. Пушкам, оло, дас сизьым аресъем нылаш пуке. Туж шудысал яратон сярысь мелодрамаосын. - Театрын но, радиоын но тонэ весь ӟечен верало. Уката ик - кышноос. Ма понна-о тонэ сокем ярато? - Мон инкуазен огазеяськыны турттӥсько. Пыриськеме уг поты керетонъёсы, ог-огед вылэ узатонъёсы. - Тушмонъёсыд но ӧвӧл шат? - Адскисьтэмъёсыз, оло, вань. Нош аслым ваньмыз сямен вазисько небыт. Мон яратӥсько пыкылэмез. Зэм, секыт сое сюлме басьтыны. Куинь-ньыль нунал куректыса ветлӥськод. Шымырскиськод, собере кыӵе ке кужым шедьтыса, как тэтчиськод ук! Собере кылӥськод ни умоен верамъёсыз. Ас поннам малпасько: быгатӥ вормыны асме. - Улон тонэ вуттӥз дикторе... - Соку ик ӧз ай. Сцена вылын рольёслы ӧй ёрмылы. Шуггес вал коньдон ласянь. Монэн ӵош институтын дышетскем эше Лилия Тер-Оганова монэ чортӥз радиое, ас интыяз - режиссёре. Татысен монэ лӧпкытъяны ӧдъязы телевидение. Институт бере ик монэ отчы ӧтё ни вал. Режиссёр, пе, луод. Возьматӥзы пультэз но музон аппаратураез. Кури монэ келяны Москвае - дикторе дышетскыны. Сюлэмы шӧдэ вал уга: мон куке-соку татчы вуыны кулэ. Ӧз ыстэ. Ангелина Крылова кошкем бере, телевидениын ортчытъязы дикторъёсты эскеронъёс. Тодыса вылысь мон отчы ӧй ветлылы. Огпол ӧз басьтэ бере... Но телевиденилэн выль директорез Евгений Осипов юн-юн индылӥз: тон ужаны кулэ телевидениын. Монэ учкизы, кема ик ӧз эскере - кутӥзы. Йырсие пештырске, меӵак эфире потэмме малпаса. Нокыӵе репетиция ӧй вал. Передача кутскытозь кылиз кызь минут. Валтӥсь режиссёрез Леонид Гавриловез шымыртӥ: - Кызьы потом калык азе? - Нырысь ик пальпот, отӥяз радъяськоз. Мукет режиссёр дыгыр-р куалекъя: - Тон вал ни-а эфирын? Дырмы вань на. Ойдо гожтом но, астэ учкод. Гожтӥським. Аслым копак ӧй яра. Нош чигнаны дыр ӧвӧл ни. Потӥ. Кивалтӥсьёсмылы та ӝытэ ик кин ке жингыртэм: - Умой диктор шедьтӥллямды. Та сярысь кылыса, мон но бурдъяськи. Берло тодӥ ни: со вылэм тодмо кылбурчи Михаил Федотов. - Телефон пыр жингыртӥсьёс трос-а? - Вань гинэ. Пиосмуртъёс вазисько кык юанэн. Быземын-а, ӧвӧл-а, ӧвӧл ке, луоз-а киме но сюлэмме тӥледлы сётыны? Сазь йырын озьы тунсыкъясько. - Картэд Петя Денисов соку вожа-а? - Мон Петялы ваньзэ мадисько. Вожан сямыз чик ӧвӧл. Мыным синмаське бере, данъяське шуод-а, мар-а. - Ульчаын тросэз-а вазисько тодмаса? - Тодмало, но чиньыенызы уг возьмато. Куд-огез монэ сурало тодмоосынызы, оломар но юало. Удмуртъёслэн ӧтчамазы огез пересь кышномурт саестӥм ик кысказ: таӵе диктормес кемагес мед возьысалзы на. Пересьёслэн ушъямзы мыным оломалы юн кельше. - Тон пӧртэм калык пӧлын улэмын. Удмуртъёс чебересь-а? - Вылтусъя гинэ шонер дунъет уд сёты. Пушкыд кырсе выемын ӧвӧл ке, тон чебер. Адямилэн синмаз ӧвӧл ке малпаськон, со укша паркысь клеткае ворсам обезьянлы. Та ласянь гуртысь удмурт адямиос , тужгес ик мынам яратоно пересьёсы, чебересь. Удмуртъёсты чеберен уг лыдъяло. Чебер муртэ кытӥяз тазьы дунъяло: удмурт кадь ик ӧвӧл, ӟуч кадь, учкымон, пе. Нош "Опасная зона" передачаез дасясьёс кышкыт сямо йыртэмасез удмурт тусо, шуо. Мынам виры соку пӧзе. Нош мукет йырвандӥсьёсты ӟуч тусо шуимы ке? - Мукет дикторъёс сярысь ма верасалыд? - Туж яратӥсько соосты. Вера Орлова ӵап анае кадь. Александр Кузнецов нырысетӥ пумиськыкум мынэсьтым юаз: - И что, на удмуртском вы можете? Скажите же что-нибудь. Мон вази: - Бадяр ке бадяр, пуппыен уд ӵошаты. Со - удмурт сямен: - Пиштэ ке но, уг шунты, Бадяргуртын вал со. Туж шуныт мылкыдын пыртӥзы пӧлазы. Мон ӟырдась сюлэмо, улон нюжаме чаляк ыштӥсько. Вера Георгиевна, котьку лад-лад валэктыса, монэ пуктэ интыям. Сыӵе бадӟым шуд - Вераен но Сашаен ӵош ужан. Индылонзы но аспӧртэм. Вылтӥяськыса уг уло, лякытак вазё: оло, тазьы умойгес луоз, уд оскалты-а, тазьы карыса? Табере ачим курисько: маке веранды вань ке, ватыса эн возе. - Диктор бордын кӧня мурт ужа? - Мон ужаны кутскисько вахтаысен. Капчи мылкыдын ӟечбуръяськон сётэ ни тыршыны кужым. Тонэ чеберъяло йырси ӵышкись но ымныр буясь. Корреспондентъёс вутто тунсыко материалъёс. Мон соослэсь курисько лэчытгес веранъёссэс. Операторъёс но кузьманы кулэ капчи мылкыд. Телевидениын огнад номыр уд лэсьты. Котькудӥз нуэ ас удыссэ. - Картэн одӥг интыын ужаны капчи-а, шуг-а? - Котькызьы луылэ. Петр Денисове - режиссёр, лэсьтылэ "Питран" но мукет передачаосты. Ужмыя матынэсь бере, весь кенешиськом телевидение сярысь. Вирызъя но паспортэзъя удмурт, сямызъя ӟуч. Мон солы синмаськи сцена вылысен, институтын ӵош дышетскыкумы. Ӟеч актёр пӧрмысал. Москваын олокытӥ но бызьылӥз, "Мосфильмын" шудӥз "Акселератка" но мукет киноосын. Александр Филиппенкоез "вииз" "Гулящие люди" картинаын. Картэлы весь верасько: берытскы тон театре. Кудмында рольёсын паймытысал удмурт калыкез. Мон понна тужгес юн критик - Петя. Туннэ но мон азе туж бадӟымесь куронъёс пуктэ. - Удмурт кылэз кызьы-о дышетӥськод? - Кыкетӥ классын мон Юськи санаториын улӥ но ӟуч луи. Кыӵе умой вал бертэме бере! Удмуртъёс мыно удмурт кылъя уроке, ми, "ӟучъёс", шутэтскиськом. Апайёс но лӧпкытъяло: Таня, удмурт кылэз эн дышеты ни! Удмурт книгаосты усьямысь дугдӥ. Ярам ай, сыӵе "сурыме" чаляк тӧлӟиз. Бадӟым Кибьялан ӧжыт гинэ ӧй люкиськы анай кылылэсь. Со понна Москваын милемды дышетӥзы тодмо учёнойёсмы Татьяна Перевощикова но Татьяна Зайцева. Удмуртэ берыктылӥм пьесаосты. Туж яра отын дышетскеме. Удмурт предложениосты телевидениын аслым тупамон карисько. - Тыныд ӟуч сямен но вераськоно луэ. - Бен. Солэсь уг палэнскиськы. Пельёсме институтын ушъяло вал. Музыкаез дунъян ласянь мон азе туж вылӥ куронъёс пуктылӥзы. Али но, Москва пала вуэмея, поездын ик вераськыны ӧдъясько москваос сямен: Ма-асква. Англи кылэз сокем ӟеч уг валаськы. Но оскисько: тодмо кылъёсты вераме луоз зэмос англичанъёс музэн. - Кин тыныд дӥськут быръе? - Аслым ачим спонсор. Выль кивалтӥсьёс сюлмасько милемды чебергес карыны. Нуналлы быдэ буяса, ымныр ку лябоме. Сое юнматыны ветлӥськом нимысьтыз центре. Дӥськут бордын ужа нимысьтыз модельер. - Кыӵе тодмо дикторлэсь адӟем кариськод? - Москвае дышетскыны ветлыкум, монэ ӵошатылӥзы Татьяна Веденееваен. Солэн сямен ик, тынад но, пе, вань тӧдьы кужымед. Со, пе, туала тележурналистъёс пӧлын туж ӧжыт. Мыным аслым но Веденеева кельше. - Али Удмурт телевидениын огыр-бугыр. Кызьы учкиськод сыӵе югдур шоры? - Туж секыт ужаны али. Эшеным Светлана Кибардинаен кайгыриськом, ми шудтэмесь шуыса. Удмурт драмтеатре пырим - отын керетон бугырскиз. Телевидение вуим - татын вожвылъяськон пуромиз. Телевидениын туннэ выль сямен ужано. "Шаер" потэ телесериал вакытэ. Милемды калык уг адӟы ни. Передачаослэсь дырзэс воштыны уг луы шат? - Дикторысь кошконо луид ке, кытчы кариськод кадь? - Бен, дикторлэн даурез сокем кузь ӧвӧл. Кызьы ай шорад учкозы кивалтӥсьёс. Туннэ мон тодӥсько кадь, кытчы кошкыны луысал. Нош дырызлэсь вазь уг вера ай. "Шаерлэн" данэз али вылӥын ук. - Эшъёсыд кинъёс? - Мадё ай Светлана Кибардина сярысь. Инкуазь солы туж уно быгатонлык сётэм. Быдэс выжызы сыӵе. Кинлы ке секыт дыръя котьку юрттыны дасесь. Светлана мынам берпуметӥ нянь юдэссэ но кузьмалоз. Лилия Исенбаева (Тер-Оганова) улэ Москваын. Монэ улыны дышетӥз. Мон ненег но котькинлы оскись мурт вал. Со весь абдралляз: - Тон дунне шоры учкиськод льӧль очки пыр. - Мыным вань калык лякыт потэ. Лилия улонэз азьлогес вала. Мыным индылэ: - Таня, чакласькы. Адямиослы тынэсьтыд кулэ со, со, со... Нош тыныд верало тае, тае, тае... Сыӵе кылъёсыз одно ик зэмало. Табере мон паймисько: - Кызьы тон ваньзэ азьвыл ик шӧдӥд? Тер-Оганова вордскемын Пичи Пурга районын, будэмын Ижын. Удмурт кылэз олокызьы тодэ. Озьы миленымы ӵош дышетскиз артистэ. Москваын ӝоглыкъёс бадӟымесь ке но, со ассэ отын но шедьтӥз. - Ужысь бер бертыса, пиеныд вырыны дыр шедьтӥськод-а? - Кытчы пырод? Куддыръя телевидениысь уин потӥсько но нялтас машинае куриськисько. Пие умме усьымтэ на ке, ми соин кӧйтыл ӝуатӥськом но чай юиськом. Мон рос-прос мадисько уже сярысь, пие - дышетскемез сярысь. Куать аресъем ай. Садикын пиме удмурт кыллы дышетэ тодмо удмурт учёной Роза Аркадьевна Кузнецова. Сыӵе пӧрмытэ: ӟучъёс но, бигеръёс но мылкыд каро асьме кылэн тодматскыны. Кулэ дыръяз арганэн шудыса возьматэ. Пие ветлэ балетэ. Вераськемезъя клоунлы кельше. Тодон-валанзэ будэтон понна, Москвае нуллӥ. Негрез адӟыса шумпотӥз: шоколадка вамышъя, пе. - Сыӵе серемес учыръёс улонад ӵем-а луыло? - Луыло. Зэм, куддыръя оло серекъялод, оло бӧрдод. Меӵак эфирын передача дыръя камера монэ возьматэмысь дугдӥз кадь но, мон интыысьтым султыса кошки. Нош монэ уно сюрс адямиос адӟо вылэм. Ярам, дышо ай шуыса, вылды, кивалтӥсьёс кылме ӧз юалэ. Улон сыӵе ни, шӧдске: я паськыт пальпотыса ветлӥськод, я синкылидэ ньылӥськод. Диктор огзэ медаз вунэты: урод мылкыдзэ калык медаз синйылты. Кенешиз Алексей ШКЛЯЕВ. 1993-тӥ ар. Татьяна Денисова "Майбыр-макмыр" спектакльын. 1997-тӥ ар. Удмурт телевидениысь дикторъёс Татьяна Денисова, Александр Кузнецов, Вера Орлова. 1998-тӥ арын. Татьяна Денисова "Удмурт дуннеын". Фотосуредъёссы А. Кузнецовлэн, тодмотэм мастерлэн но В. КАМАШЕВЛЭН. Азьланезлы осконэн 10 декабре Ижевскын усьтӥськиз "Удмуртия ИИИ сюрс аръёс азьын" научно- практической конференция. Радъяз но ортчытэ сое "Ижевск" научно-культурно- просветительской объедиенение. Нырысь ик вераны кулэ, дыр, та объединение сярысь. Кылдытӥзы сое пӧртэм удысъёсын ужась учёнойёс. "Ижевск" НКПО азьын сылӥсь нырысетӥез бадӟым ужпум - элькунысьтымы наука но мукет удысъёсын тыршисьёслэсь визь-кужымзэс социально- экономической ужпумъёсты быдэсъянэ но калыкмылэсь культуразэ ӝутонэ ӧръян. Объединенилэн ужан амалъёсыз пӧртэмесь. Учёнойёс мукет специалистъёсын ӵош ужало обществоез азинтонъя концепциос но программаос дасян, научно-исследовательской темаосты быдэсъян бордын, ортчытъяло конференциос, семинаръёс, выставкаос, юртто экономикаен кивалтонъя, экологияя, культурая, дышетонэз радъянъя ужпумъёсты сэрттыны-пертчыны, учебно-методической но научной ужъёсты печатланы. Конференцилэн пленарной заседаниез сӥземын вал куд-ог концепциосты но программаосты эскеронлы. Люкаськемъёсты конференцилэн усьтӥськеменыз ӟечкылазы но элькунамы туала югдурен вакчияк тодматӥзы Удмурт Элькунысь Кун Кенешлэн Тӧроез Александр Волков, Правительстволэн Тӧроез Павел Вершинин, Ижевсклэн мэрез Анатолий Салтыков. Собере кылзэмын вал пӧртэм ужпумъёсъя докладъёс. Пӧртэм ужпумъёсты рос- просгес эскерон вылысь, конфренция ужзэ азинтоз нимысьтыз секциосын. Мынозы соос вуоно арын июнь толэзёзь. Мар бен, сӥзём конференцилы азинлыко ужаны. Улон-вылонмес выльдыны, шуг-секытысь потыны быгатом угось визьмо малпанъёсты уже огъя кужымен пыӵатыса гинэ. Туж оскем потэ, куинетӥ сюрс аръёсты йыгмыт вамышъёсын мытомы шуыса. Н. Корякин. Ӟуч романслы сӥзьыса Грахово. Районын ӟеч ужа нылпиослэн искусствоосъя школазы - Егит дышетӥсьёс Е. П. Ильина но Е. М. Степанова пӧртэм пумо ужрадъёс радъяло. Алигес ортчиз "По страницам русского романса" концерт. Трос нылъёс но пиос люкаськизы татчы. Лыктэмзы соослэн юнме ӧз луы. Ӟуч романсэз берло дыре "туала" удысъёс согыны ӧдъязы. Соин ик таӵе ужрад трос тунсыкозэ сётӥз. Н. ЛИПИНА. Вань удмуртъёслэн "Удмурт кенеш" огазеяськонзылэн 1994-тӥ арын 4-тӥ шуркынмонысен 1997-тӥ арын 5-тӥ шуркынмонозь ужамез сярысь вань удмуртъёслэн ВИ Ӧтчамзылэн РЕЗОЛЮЦИЕЗ Вань удмуртъёслэн 1997-тӥ арын 5-6-тӥ шуркынмонэ Удмурт шаерлэн шоркараз Иж каре люкаськем ВИ Ӧтчамзы йылпумъянъёс лэсьтӥз вань удмуртъёслэн "Удмурт кенеш" огазеяськонзылэн исполкемезлэн ортчем дыр куспын ужамезлы, эскериз туала улонысь туж лэчыт ужпумъёсты, удмуртъёслэсь Россиысь но дуннеысь калыкъёс пӧлын кин луэмзэс но кыӵе инты басьтэмзэс. Вань удмуртъёслэн ИИ (В) Ӧтчамзы (1994-тӥ арын шуркынмонэ) бере ортчем дыр куспын элькунын но Россиын вал бадӟымесь учыръёс, соос шӧдӥськизы удмурт калыклэн улоназ но. Кутэмын Россия Федерацилэн Конституциез, Удмурт Элькунлэн Конституциез, ортчытэмын интыысь аскивалтонлэн ёзъёсаз но Удмурт Элькунысь Кун Кенеше быръёнъёс, юнматэмын Удмурт Элькунлэн кунтодметъёсыз (кунпус, куншет, кункрезь), лэсьтэмын Россия Федерациысь но Удмурт Элькунысь кун властьёслэн ёзъёссы куспын быдэсъяно ужъёсты но полномочиосты люкылон сярысь Огкыл, кутэмын "Калыкез дышетон сярысь", "Культура сярысь", "Егитъёсын ужан политика сярысь" Законъёс , уж нуиське Нациосын ужанъя кун политикая концепция бордын. Пусйымон луэ таиз но: удмурт калыклэн статусэз юнматэмын элькунлэн нимаз но Удмурт Элькунлэн Конституциысьтыз 1-тӥ, 9-тӥ но 116-тӥ ёзэтъёсын. Таӵе ужпумъёсты быдэсъянлы кӧня ке кужымзэ сётӥз вань удмуртъёслэн "Удмурт кенеш" огазеяськонзы, со тыршиз удмурт калыклэсь культуразэ ӝутыны но азинтыны. Огазеяськон ортчем дыр куспын тросгес калыкез герӟаз но ёзъёсэ юнматӥз. Удмурт шаерысь данак ёросъёсын но каръёсын, Удмурт шаерлэн палэназ - удмуртъёслэн огазьын улон интыосазы - кылдытэмын но ужало огазеяськонлэн люкетъёсыз, берло дыре будэ солэн улӥ ёзъёсызлэн лыдзы. Огазеяськонлы право сётэмын законъёслы кичӧлтонэн потыны. "Удмурт кенешлэн" люкетъёсызлэн, солэн исполкомезлэн, Пичи кенешезлэн, аслаз Ӧтчамлэн ужамзы юртто удмурт калыклэсь асваланзэ ӝутыны, калыклы огазеяськыны, солэсь мылкыдзэ ӝутыны, калыкез рос-прос кыскыны обществолэн но политикалэн улоназы, кылзэ, культуразэ, сямъёссэ но йылолъёссэ утёнэ но азинтонэ. Удмуртъёс, ас выжызэс шымыртытэк но мукетъёсызлэсь висъяськытэк, лулысь-сюлмысь азинто музон калыкъёсын эшлыко но ӵыжы-выжы кусыпъёссэс, нюръяськыны туртто калыкез адсконтэм каронлы но сылмытонлы пумит. Соин ӵош ик удмурт калыкез ӝутонъя азьло ӧтчамъёсын кутэм тросэз туж бадӟымесь решениос быдэсъямын ӧвӧл. Дуннеысь праволэсь выжы калыкъёсъя нормаоссэ но инъетъёссэ кутон Россиын но Удмурт шаерын ӝега, нациосын ужан политикаын эсэпез ӧвӧл. Удмурт шаерын улонэ быдэсак уг пыӵало Удмурт Элькунлэн Конституциысьтыз кун кылъёс сярысь 9-тӥ ёзэтлэн валатонъёсыз. Кутымтэ "Удмурт Элькунысь кун кылъёс сярысь", "Вань удмуртъёслэн Ӧтчамзылэн статусэз сярысь" Законъёс, дасямтэ удмурт калыклы кунэн кивалтыны Конституциен сётэм правоосты быдэсъяны луонлык кылдытӥсь амал, ӧвӧл асьме кадръёсты дасянлы кун ласянь юрттон политикая радлык. Ӧтчам жаляса пусъе: азьвыл ӧтчамъёслэн уно решениоссы лэсьтытэк кылизы, косэм ужъёсты исполкоме быръем кӧня ке мурт ляб быдэсъямен, обществолэн улоназ пыриськем куд-ог адямиос куашкатӥсь уж нуэмен. Ваньмыз со лябӟытӥз нация пушкын демократияя движениез. Ӵапак соин сэрен огазеяськон копак куашказ Удмурт Элькунысь Кун Кенеше 1995-тӥ арын быръёнъёс дыръя. ВАНЬ УДМУРТЪЁСЛЭН ВИ ӦТЧАМЗЫ ПУКТЭ: 1. Вань удмуртъёслэн "Удмурт кенеш" огазеяськонзылэн исполкомезлэсь ужзэ шоро- куспо дунъяно. 2. Азьвыл ӧтчамъёсын кутэм но улонэ пыӵатымтэ решениосты лыдъяно "Удмурт кенеш" огазеяськонлэн вань ёзъёсызлэн нырысь ик быдэсъяно ужпумъёсынызы. 3. Вань удмуртъёслэн "Удмурт кенеш" огазеяськонзылы, солэн Пичи кенешезлы но исполкомезлы кужмоятоно удмурт калыклы чупрес берган сям пыӵатонъя ужез, калыкез обществолэн но политикалэн улоназы мылысь-кыдысь кысконо, каръёсысь но ёросъёсысь интыын аскивалтонлэн ёзъёсаз, республикаысь кун властьлэн ёзъёсаз быръёнъёс дыръя отын асьме калыкысь потэм муртъёслэсь лыдзэс будэтон вылысь. Кылдытоно быръёнъёсъя "Элькун" ("Республика") огазеяськон. 4. Удмурт Элькунысь Кун Кенешлы но Кивалтэтлы дэмлано вакчи дыр куспын Удмурт Элькунысь Нациосын ужанъя кун политикая концепциез кутыны, чаклано Удмурт Элькунысь Кивалтэтлэсь Нациосын ужанъя комитетэзлэсь статуссэ министерствоозь вуттыны, Нациосын ужанъя министерстволэсь ёзъёссэ элькунысь каръёсын но ёросъёсын кылдытыны но ужатыны. 5. "Удмурт кенеш" огазеяськонлэсь исполкомзэ косоно законъёслы кичӧлтонэн потыны правоез кутонъя ужзэ кужмоятыны, тыршоно ӝоггес юнматыны "Удмурт Элькунысь кун кылъёс сярысь", "Вань удмуртъёслэн Ӧтчамзылэн статусэз сярысь" Законъёсты. 6. "Удмурт кенеш" огазеяськонлэн исполкомезлы дасяно но Кун Кенеше сётоно "Удмурт калыклы кун ужъёсын кивалтыны Конституциен сётэм правоосты быдэсъяны луонлыкъёс кылдытон сярысь" Законлы проект, тыршоно кык палатаен парламентэз ужатыны, лэзёно ӧвӧл Удмурт Элькунлэн Конституциысьтыз 116-тӥ ёзэтэз воштыны. 7. Ӧтчам лыдъя: выль паспортъёсын одно мед луоз Россия Федерацилэн гражданинэзлэсь национальностьсэ возьматӥсь нимаз чур (ватсэт гинэ ӧвӧл). 8. Элькунын химической ож тӥрлыкен сэрен туж бадӟым кышкытлык кылдэмен, ми куриськом, сое быдтонъя вань ужрадъёсты ортчытыны калык юн чаклам улсын. Улон- вылонэн герӟаськем юртъеръёс лэсьтонэ нырысь коньдон висъяно, сыӵе ож тӥрлык вӧзын улӥсьёслы ватсаса юрттэт сётоно. 9. Нациослэсь ужпумъёссэс быдэсъянын Удмурт шаерысь вань калыкъёслэсь кужымъёссэс огазеян вылысь, элькунын калыкъёслэсь ӵош ужанзэс юнматон понна кулэ уж нуоно Удмурт Элькунысь Кун Кенешын Нациосын ужанъя кенешон палата кылдытон ласянь. 10. Ӧтчамлэсь решениоссэ улонэ ӝоггес пыӵатон вылысь, Ӧтчамын кутоно удмурт калыклы, Россия Федерацилэн Президентэзлы Б. Н. Ельцинлы, удмуртъёслэн огазьын улоно интыосысьтызы - СНГ-ысь кунъёслэн, Россия Федерациысь элькунъёслэн, крайёслэн но областьёслэн йыръёссылы, Удмурт Элькунысь кун властьлэн но интыысь аскивалтонлэн ёзъёссылы вазиськонъёс. Удмурт Элькун Иж кар. 1997-тӥ арын 6-тӥ шуркынмонэ. Выль ар калейдоскоп Вузкаронъя но адӟытонъя "Метеор" центрын 20 декабрьысен, вуись праздниклы сӥзьыса, "Выль ар калейдоскоп" ярмарка усьтӥськоз. Ижевскысь но Удмурт Республикаысь сиён-юон поттонъя но дӥсь вуронъя предприятиослэсь кельшымон вузъёссэс басьтыны но быгатоды. Озьыен, Выль ар ӝӧк вылды эшшо но чебергес, ческытгес луоз. В. ИСТОЛИНА. КЫӴЕ ПЫТЬЫОС КЕЛЬТӤСЬКОД ТОН, АДЯМИ? Алигес Пичи Пургалась национальной библиотекаын пумиськон быдэсакез таӵе юан, малпаськон визылэтӥ ортчиз, шуыны яра. Пургаос отын данъязы огшоры гинэ но со вакытэ ик туж паймымон муртэ. Кин бен со? Нырысь ик, колхозник, собере - колхозлэн председателезлэн воштӥсез, председатель, дышетӥсь, клубен кивалтӥсь, директор. Солэсь азьло, 1943-тӥ арысен, сизьым ар ӵожелы люкемын вал вордскем палъёсызлэсь, пӧртэм частьёстӥ, военной округъёстӥ костаськытӥзы. Пенсие потэмезлэсь азьло - художник-оформитель, нош ик колхозник, бригадир... Ай эшшо ӟырдыт мылкыдын кема кивалтӥз на "Дружба" колхозысь пересьёслэн огазеяськонэнызы. Кытчы гинэ, кыӵе гинэ бусыосы, музъемъёсы, та дуннеысь кузь сюресъёс вылэ кельтымтэ ветеранлэн Дмитрий Иванович Баймурзинлэн пытьыосыз! Нош тужгес муресь соос суредан удысын, яратоно гурт калыксэ, чебер улоссэ, инкуазьмес вунэтонтэм кельтонын. Ачиз но уг вала на, лэся, гуртоосызлы, пургаослы, огшоры адямиослы макем бадӟым уж лэсьтэмзэ. Ӧтизы сое библиотекае ӵапак 72 арес тырмон нуналаз. - Ма, таӵе трос калыкез-а ӝутӥды? - ӵыжектыса, кепыраса юаз Дмитрий Иванович. - Мар мон сокемзэ лэсьтӥ? Возьыт... Пургаос сяна, Ижевскысь но лыктӥллям тани... Пумиськонэ, зэмзэ но, трос адямиос люкаськиллям. Залын егитъёс но, мӧйыос но адӟисько. Дышетскисьёс но тачак. Паймыса учко борддоръёсы ошылэм суредъёсты. Отысь быдэсак пуксе син азе Аксакшур. Вашкалаезгес но улон, туалаез но. Суредась гуртсылэсь быдэс историзэ "пуксьытэм" полотноос вылэ. Умойгес ке учконо, котькудӥзлэн шорсюлмыз вань, эриктэм кыско учкисез бордазы. Тани корка. Со ас бордаз каре кадь вӧзысьтыз бакчаез но, кенерез но, писпуосты но, думетысь кунянэз но, матысь арамаез но, бусыосты но. Музон азьын - историе кылем ХТЗ трактор. Вӧзаз - соин война вакытэ гырем куать егит ныл. Вордскем музъемзы ас бордаз кыске тракторез но, чебер но туж огшоры дӥськутэн - поньтокен, айшетъёсын, кутъёсын - пӧрмытскем нянь будэтӥсьёсты. Батырбамзы но тани турнан вакытэ ас котыраз кӧня калыкез люкам. Татын ик - вунонтэм Кереметсы. Озёлонгес - мукет суредъёс, ужъёс. Эсьмаса, койыклэн но пичи гинэ кунянэз, бер сӥзьыл, сиемез потыса, вылды, мумиз доры сямен кыстӥське тэль кушысь турын кабан котыре. Будоз со лосьпи, бӧрысь ачиз но одно ик кунянъёссэ вордскытоз мусо музъеммы вылын. Сыӵе оскон, малпан кылдэ, суретэз матысен учкыса. Дмитрий Ивановичлэн мукетъёсыз но ужъёсыз мур малпаськонэ уськыто. Тани аналтэм выж, пичи тымет. Чебер сэрег. Татчы, вордскем интыязы, васькиллям вылэм кузон луд ӵӧжъёс. Но ӵыпет кыриськемын, аналтэмын, ву кошкемын - тылобурдоос, бурдъёсынызы мӧзмыт шонаса, весяклы кошко татысь. Медаз, медаз луылы вылэм нокытын озьы! Чебер шаермы, гуртъёсмы ялан ас доразы мед кыскозы адямиез но, кыр пудоез но, луд тылобурдоосты но! Озьы алэ асьмемыз усточи, гуртысь огшоры суредась. Кереметысь жин-жин таза, веськыт, дауръем писпуосты корамзы пумысен но ӟырдыт вераськон пуромиз пумиськонын. Д. И. Баймурзин адямиослэсь но тусбуйёссэс суреда. Тани паллян палась сэргын возьматэмын кык ӧрӟи - Георгийлэн киросъёсыныз пусъем кык вын - Никита но Прокофий Сачковъёс. Кыксы но сӧсырмиллям ожъёсын, Дмитрий Иванович соослэсь тусбуйёссэс лэсьтэм, госпитальын кыллён вакытысьтызы фотографиез учкыса-чакласа. Вераны кулэ: тӧдьыос Аксакшуре вуылыку, Никита соосты алыны быгатэм гурт калыкез гордъёс чотын тросэн ыбылонлэсь-быдтонлэсь. Выставкаез адӟыны люкаськемъёс тужгес но паймизы куинь альбомлы. Дмитрий Иванович соосты весяклы суредам сельсоветысьтызы басьтэм но ожъёсын бырем 168 солдатэз. Соос пӧлысь тросэзлэн фотографиоссы-туспуктэмъёссы но чик ӧвӧл. Улэп кылем ӵыжы-выжыоссылэсь, гурт калыклэсь юалляськыса суредам бырем муртъёсты. Кияса ёросысь гуртъёсы но, Кечол палъёсы но уно пол ветлылэм, пӧртэм военкоматъёсы, частьёсы гожтэтъёс ысъям. Табере ваньмызлэн сямен со батыръёслэн быремзы сярысь ивортонъёс-извещениос артэ лякылэмын. 168 мурт пӧлысь огзэ гинэ верало. Егит пи, 18 аресъем солдат, бырыны сюрем, Эстониын ожъёс мыныку. Ӵыжы-выжыосыз но, фотоез но кылемын ӧвӧл ни. Но адями вень яке сюй пыры ӧвӧл ук. Чиптэм-чаптэм, пытьытэм ышыны кулэ ӧвӧл та улонысь. Д. И. Байиурзин трос муртлэсь, сое тодӥсьёслэсь юалляськыса, каллен- каллен егит адямилэсь туссэ суредам. - Татысь туж тросэз портретъёс озьы лэсьтэмын,- валэктэ суредась. - Ожъёсы ветлэм огез но солдат медаз вуны... Солэсь мадемзэ кылзыса, вис дыръя ини кык воргоронъёс куспазы сипырто: - Вот кыӵе вылэм Аксакысь аксакалмы, пересьмы! Ма быдӟа ужез лэсьтэм пурга калык понна, Аксакшур котырысь калыкез понна!.. Туж вылӥ дунъязы, сюлмысь потэм трос ӟеч кылъёсын данъязы аспал воргоронзэс пургаос. Тылын гомась улэп сяськаос тыризы азьысьтыз ӝӧк вылэ, пумтэм уно кузьымъёс сётъязы. Удмуртиысь Суредасьёслэн огазеяськонзылэн тӧроез П. В. Елкин Дмитрий Ивановичез пуктӥз зэмос бадӟым художникъёсын оградэ. "Нош та куинь альбомез ке басьтоно,- шуиз со,- быдэс Россиын но, оло, таӵе адямимы одӥг гинэ. Бадӟым тау со понна! Азьланяз но выль азинсконъёс, тазалык, шудбур сӥзисько!.." Ветеранлэн ӟеч ужъёсыз понна тау карыса, озьы ик вераськизы Пичи Пургалась суредась, республикаысьтымы культура удысысь сӥё-дано ужась В. Д. Боталов, пенсионер В. С. Зорина, культура отделэн кивалтӥсь А. А. Ефремова, Аксакшурлэн тӧроез В. И. Тихонов, Пичи Пурга ёросысь администрацилэн тӧроезлэн воштӥсез В. И. Панфилова, дышетӥсьёс, Дмитрий Ивановичлэн ӵыжы-выжыосыз но мукетъёсыз. Вераны кулэ: суредась нылпиоссэ но ӟеч сямоесь будэтэм. Александр Баймурзин - шаерысьтымы туж тодмо артист, мукетыз пиез, Валерий, дышетӥсь, инкуазьмес утись. Куинетӥез пиез - подполковник, пограничникъёсын кивалтэ. Кыкез ик нылъёсыз но паймымон устоесь, шудоесь, ужаны яратӥсесь, асьсэ семьяосынызы уло, нылпиоссэс шудо-буро будэто. Суредъёсын тодматскыны лыктэмъёс тау каро, та ужрадэз ӟеч дасямзы понна, Пичи Пургалась библиотекаын тыршисьёслы, татысь культура юртысь артистъёслы. Пумиськонэз туж усто нуиз библиотекалэн кивалтӥсез Н. Н. Вахрушева. Пумиськонэ лыктэмъёс рос-прос тодматскизы на лыдӟон залысь стендэ люкам ужъёсын но. Нош ветлысалзы на ке соос Аксакшурысь клубе, пырасалзы ке отысь коркаосы - Дмитрий Иванович Баймурзинлэсь уката трос ужъёссэ адӟысалзы. "Милям котькуд коркамы кадь вань солэн суредъёсыз,- шуиз гуртысь одӥгез воргорон. - Милям кадь усто чеберъям клуб но нокытын ӧвӧл". Бен, та улонамы, ас калыкез пӧлын дауръёслы быронтэм пытьыос кельтӥз ветеран. Со понна йыбыртто солы гуртоосыз, пургаос! Кирилл ЛОМАГИН. Сьӧсьяськиз... Оренбург областьын Уголовной кодекслэн пудо-животъёсты курадӟытэм пумысен 245-тӥ статьяезъя уголовной уж нырысьсэ ӝутэмын. Гай городын 44 аресъем воргорон нылпиос азьын пуныез вием. Пиналъёс та учыр сярысь нылпи садысь воспитетельлы мадиллям. Таиз, кема малпаськытэк, пуныез виись вылэ судэ сётэм. "Сьӧсьяськемез понна пиосмурт кык сю пичи уждун мында штраф тыроз яке ар ӵоже, суд косэмъя, пӧртэм ужъёсты быдэсъялоз", - ивортӥз "Оренбуржье" газет. Уждунэз-пиялаен "Россилэн пӧртэм сэрегъёсаз уждунтэк улыны дышизы ини", гожтэ "Труд" газет. Заволжск городын дыдыкъёсты но ульча выл пуныосты уд пумита - ваньмыз сиемын. Буёло юртъёсты кутонъя пунктъёс усьтӥськем бере урамъёсысь урнаос ышизы. Русь - Хрустальный городын уждунэз коньдонэн уг сёто - пиялаен гинэ. Вир сётэм понна уксё тырон нуналъёсы вирзэс вузаны мылкыд карисьёслэн черодзы донор пунктъёсты кӧня ке пол котыртэ. Кылзы тупаз Женеваын Северной но Южной Корея куспын тупаса улон сярысь переговоръёс кутскизы, ивортӥз "Ассошиэйтед Пресс" агенство. Одӥг кылэ вуыны соослы юртто США но Китай. 1953 арын Корейской война бырем бере, Корейской мукож (полуостров) кык кунлы люкиськиз. Соос куспын али ке но пыӵал тӥрлык кутыса вожвылъяськонъёс луыло на. Северной Корея бускельёсыз дорын Америкаысь 30 сюрс ожгарчиосты воземезлы пумит, нош Южной Корея кышка Северной Кореяын ядерной ож тӥрлык кылдытэмлэсь. Ваньмыз та югдурез эшшо но шугомытэ. Озьы ке но, та кык кунъёс ӝӧк сьӧры эшлыко мылкыдын пуксьыны быгатӥзы Агенство ивортэмъя, "Быдӟым вождьзы" Ким гер Сен кулэм бере, Северной Корея дуннеен кусып тупатыны шӧтаз, нош куинь ар сютэм улэмзы бере та кунлэн кивалтӥсьёссыз мукет калыкъёслэсь сиёнэн-юонэн юрттэтсэс кулэ каризы. Канадаысь Ванкуверын но Новой Зеландиысь Оклендын улыны но ужаны тужгес ӟеч луонлыкъёс кылдытэмын, ивортӥз "Рейтер" агенство. Швейцариысь "Корпорейт Ресорсез Груп" организация печатлаз дуннеысь городъёслэсь рейтингзэс. Соослы дунъет сётэмын улонлэн ӟечлыкезъя. Лыдэ басьтӥсько городын политика но экономика ласянь югдур, йыружъёслэн лыдзы, инкуазьлэн чылкытлыкез, дышетонлэн но эмъянлэн ӟечлыксы. Список кылдытӥське туристъёс, улоно кунзэс воштыны мылкыд карисьёс, правительственной но международной организациос понна. Ванкувер но Окленд сяна, нырысетӥосыз пӧлын Торонто, Цюрих, Женева, Хельсинки, Вена. Тужгес но секыт улыны Ташкентын, Сараевоын, Багдадын. Москва но Санкт- Петербург берлоосыз пӧлын. ЯТЧИ НО ӞАТЧА Кемалась-кемалась сизьым шур йылысь сизьым гурезь вылын улӥллям-вылӥллям Ятчи ныл но Ӟатча пи. Та егитъёс туж яратӥллям ог-огзэс. Нош Ятчилэн атаезлы кельшымтэ Ӟатча. Со кыкназэс ик уллям гуртысьтызы. Варӟи шуре шелеп куштэм но шуэм: "Кызьы мон уг адӟы ни та шелепез, тӥледыз но озьы ик медам адӟы ни". Нош егитъёс кышкатэк мынӥллям шелеп сьӧры шур кузя. "Кытчы та шелеп дугдӥз, отчы ик улон инты асьмелы лэсьтом", - шуэм Ӟатча. Сизьым ар, сизьым толэзь, сизьым арня но сизьым нунал мынӥллям соос Варӟи кузя. Нош одӥг нуналэ шелеп шулдыр азе бадьпулэн ваяз кугӟаса дугдэм. Егитъёс татчы, шур дуре, корка пуктӥллям, Нош улон интызэс шурзыя но ныллэн нимызъя Варзи-Ятчи шуиллям. Нош удмурт сямен гуртмылэн нимыз Ӟатча. Алёна Китова. Алнаш ёросысь Варзи-Ятчи школа. Шунды Кыл куро егитъёс "Ми улӥськом туннэ, милесьтым ужпумъёсмес быдэстоно туннэ" Россиысь егитъёс азьын трос шуг-секытъёс кылдэмын, басьтом дышетскон удысэз гинэ. Нуналысь нуналэ со дуноя. Но сокем дуноен басьтэм диплом но ӵемысь уг юртты егитъёслы уж шедьтыны. Тугаськем улонлэн выжыосыз Россиысь комсомол огазеяськонъёсты быдтон бордысен но кутско, государство ласянь егитъёсын ужась ӧз луы угось. Али дыре но Россилэн тросаз улосъёсаз администрациосын ӧвӧл егитъёсын ужась нимаз комитетъёс. Та удысэз ас вылазы басьтӥзы культурая, туризмъя но спортъя комитетъёс, но егитъёс сярысь сюлмаськонэз соос выжто ваньмон дырез ортчытонэ гинэ. Шаермы та ласянь шудоосыз пӧлы пыре. Куать арзэ ини Удмурт Республикаын ужа Егитъёсын ужанъя кун комитет. 1997 арын 22 октябре Кун Кенешлэн 13-тӥ сессияз кутэмын "Удмурт Республикаын егитъёсъя кун политика сярысь" Закон. Асьсэос но егитъёс улонлэсь палэнэ уг кылё. Таяз арын феврале кылдытэмын "Удмуртиысь егитъёс" общественной движение. Туннэ вераськонмы солэн азьветлӥсеныз Сергей Коваленкоен. - Кӧня ке толэзь ӵоже мар лэсьтыса вуиз ни "Удмуртиысь егитъёс" огазеяськон? - "Удмуртиысь егитъёс" огазеяськон кылдэмын 1997 арын 13 феврале. Со егитъёслэсь ужпумъёссэс кун кивалтонлэн пӧртэм ёзъёсыз пыр быдэстыны тырше. Тросгес егитъёс мед пыриськозы Удмурт Республикаысь Кун Кенешлэн но Правительстволэн ужъёсазы, интыысь аскивалтонэ. Егитъёслэсь ужпумъёссэс быдэстонын трос пайдаёзэ лэсьтысалзы егит депутатъёс. Нырысь вамышъёсмес трос пайдаёзэ кутскимы шаерысьтымы городъёсын но районъёсын движенилэсь ёзъёссэ кылдытон бордысен. Нош тужгес но пусйымонэз, "Удмуртиысь егитъёс" учредительёс интыын луизы шаерысьтымы одӥгезлы тужгес но бадӟым политической огазеяськонлы, кудаз пыро егитъёс, нылкышноос, ветеранъёс, интеллигенция, профсоюзъёс. Со "Удмуртия" огазеяськон. Туннэ нуналлы солэн программаяз вань ни егитъёслы сӥзем ёзэз. "Удмуртия" политической огазеяськон пыр "Удмуртиысь егитъёс" ас вылазы басьто егитъёсъя политикаез улонэ пыӵатыны. - Удмурт Республикаысь Кун Кенешлэн 13-тӥ сессияз пуктэм уждунъёсты чаклано ке, егитъёс шоры валаса учко республикаысьтымы кун кивалтэтын но?.. - Зэмзэ но, та ласянь Удмурт Республика быдэс Россиияя азьпалан мынэ: кутэмын. Удмурт Республикаын егитъёсъя кун политика сярысь" Закон. Та ужын бадӟым юрттэт сётӥзы "Удмуртия" огазеяськон, солэн радъёсаз пырем депутатъёс. Законопроектэз дасян бордын трос ужаз "Удмуртиысь егитъёс" движение но: егитъёслэн огазеяськонъёссылэн кивалтӥсьёссы пӧлын, вылӥ дышетскон заведениосысь студентъёс но специалистъёс пӧлын ортчылӥзы сое эскеронъёс, пыртэмын вал выльдонъёс но тупатонъёс. Шаерысьтымы егитъёслы зэмос юрттэт сётон понна, законын пусъемын егитъёсъя политикаез азьланьтонын мар борды пыкъяськыны. Документын чакламъя, егитъёслы кун юрттэт сётоно дас одӥг ужпумъя. Соос пӧлын - егитъёсты уже интыян, егит семьяослы юрттон, егитъёслы улон юртъёс лэсьтон но трос мукет. - Тӥ верады егитъёслы улон юртъёс лэсьтон сярысь. Оло, та выль программа тросэзлы егитъёслы юрттоз квартира басьтыны. Но кыӵе амалъёсын со улонэ пыӵалоз? - Вань кык сюрес. Нырысетӥез, корка пуктыны яке басьтыны егитъёслы кредитъёс сётоно, льготаос тупатыса яке процентъёс будэтытэк. Кыкетӥез, выльысь улӟытоно егитъёслы улон юртъёс- кооперативъёс пуктонэз (МЖК), нылпи садъёсын, школаосын, клубъёсыз ӵош. - Малы тӥляд движениды пыриськыны малпаз политикае? - Тросэзлэн туала кивалтӥсьёслэн егит дырзы чебер малпанъёсы кылемын. Мар сюлэмшугъяськытӥз соосты, кыӵе малпанъёсын улӥзы - ваньмыз вунӥз. Шуо: "Егитъёс - Россилэн азьланез". Со зэмзэ но озьы. Но улонын пӧрме: "Егитъёс киын азьланез, соин ик лыктэ ӵуказе". Ӧвӧл! Ми улӥськом ни туннэ, милесьтым ужпумъёсмес быдэстоно туннэ. Политикае пыриськимы - со ужпумъёсмес, кулэяськонъёсмес быдэстон амал. - Удмуртиысь егитъёс дасесь-а туннэ политикае пыриськыны? - Быръёнъя комиссилэн ивортэмезъя, Россия Федерацилы Президент быръёнэ Удмуртиын пыриськизы 54 процентэз. 18 аресысен 30 аресозь егитъёс. Но троссэ соосты дискотекаосын "пӧязы", студентъёслы стипендиез куинь поллы будэтыны оскытӥзы, 2000 арысен армие басьтонэз дугдытом шуизы. Пунэмен егитъёс номыр ик ӧз басьтэ. Туннэ асьсэос нылъёс но пиос шуо, быръёнъёс борды валаса басьтӥськоно, егитъёс пӧлысь кандидатъёсты ӵектоно пӧртэм кивалтон ёзъёсы. Матэктӥсь быръёнъёсы кандидатъёсты ми ӵектомы республикамылэн интыысь аскивалтон ёзъёсаз - городъёсы но районъёсы. - "Удмуртиысь егитъёс" мукет ужпумъёслэсь но уг палэнско... - Бен. Берлоез сыӵе ужрад вал республикаысьтымы студентъёслэн "Дождались! 97" фестивальзы, ортчытӥмы сое Егитъёсын ужанъя кун комитетэн ӵош. Фестивале пыриськизы шаерысьтымы вузъёсысь 200 пала студентъёс. Удмуртиын 30 сюрслэсь ятыр студентъёс. Соос тужгес, утьымтэос пӧлы пыро, соин валче та егитъёс ик уката сюлмоосыз но быгатӥсьёсыз, республикамылэн азьланез. Фестивалез усьтонын Кун Кенешлэн Тӧроез Александр Волков шуиз: "Егитъёсъя кун политика сярысь законэз кутон - республикаысь егитъёслэсь ужпумъёссэс быдэстонын нырысетӥ вамыш гинэ". Азьланезлы чакламын, студентъёслэн ужрадъёссылы коньдонэн юрттоз Егитъёсын ужанъя кун комитет, со ужпум нимысьтыз пусъемын луоз. Фестивальёсты ми азьланяз но ортчытъяны чакласьком но мукет ужрадъёс озьы ик палэнэ уз кыле, кылсярысь, "Егитъёслэн нуналзы", "Студентъёслэн капустникъёссы", "Егитъёслэн ужпумъёссыя котырес ӝӧкъёс", "Политклубъёс" но мукет. "Удмуртиысь егитъёс" огазеяськонэ пыриськон понна кулэ улонэз выльдон но радъян мылкыд, котькыӵе ужрадъёсы мылысь-кыдысь пыриськон. Нокыӵе билетъёсын но взносъёсын ми ум выриське, вераны кулэ огазеяськонлэн ужъёсаз пыриськыны мылкыд каронэз гинэ. Огъя ужмес азинтонэ ӧтиськом вань егитъёсты но егитъёслэсь огазеяськонъёссэс. НУНАЛЛЭН ТОДМЕТЭЗ Туннэ - Саввалэн праздникез. Кезьыт. Уйёсы порпиос ыбыло. Калык верамъя, вал вордӥсь муртлы та нуналэ, пе, нокинэн но даллашоно ӧвӧл: пудоез быроз. Ӵуказе вашкала календарья пусъё Николай Чудотворецлэсь вордскемзэ, тол Миколалэсь, кезьыт ваисьлэсь праздниксэ. Инмар бере, пе, Микола - кыкетӥ утисьмы. Солы вӧсясько, ӟеч улон-вылон курыса: вань киземез мед удалтоз, пудо-живот мед йылоз, куректон-бӧрдон палэнэтӥ мед кошкоз. Микола нуналэ кезьыт ке луиз - ю-нянь удалтоз. Кыӵе, пе, тол Миколэз, сыӵе ик - гужем Миколэз (22 май). Миколалэн сямыз лек, толлы дасяськемез юн эскере: кезьыт вылэ кезьытсэ ыстэ. Ужась калыклы номыр но кышкыт ӧвӧл. Вашкала дыръя Русьын улӥсьёс кӧня ке нунал ӵоже "никольщинаез" пусъё вылэм: туала урожайлэсь сур пӧзьто, брага пукто, быдэс гуртэн юмшало. (Егитъёс отчы уг пырисько вылэм). Куное лыкто матысь ӵыжы-выжыоссы, гажано адямиос. Та шулдыръяськонлэсь палэнэ кылись гуртооссэс быдэс ар ӵоже серекъян-мактан каро вылэм. Микола нуналысен кен утчаны пото, пиос вӧсясько, ӟеч кышно мед шедёз шуыса. * Югыт нунал туннэ кыстӥськоз 7 час 1 минут. 20 декабрёзь со уз воштӥськы ни. Кутско тужгес но вакчи нуналъёс. Уйёсы югдытэ тыр толэзь. * Кыӵе ним сёто вылэм та вакытэ вордскем нылпиослы? Гурий, Савва, Николай. Та нуналэ... ар талэсь азьло Вордскемез дырысен туннэ 85 ар тырме С. П. Широбоковлы (1912-1983), Удмуртиысь калык поэтлы, фронтовиклы. Ворскемын Шаркан районысь Вортча Починка гуртын. 19 декабре 1906 арын вордскиз Л. И. Брежнев, КПСС-лэн ЦК-езлэн Генеральной секретарез. Кулӥз 1982 арын 10 ноябре. "Удмурт дунне" но егит дунне УЛМО БИЧАН ГУР Туэ гудырикошкон толэзе ми вуылӥмы Краснодар шаере. Классэн кивалтӥсьмылы Ольга Ивановна Вахрушевалы трос гинэ бызьылоно, сюлмаськоно луиз, кузь сюрес вылэ потон понна. Нырысь ӧм ик оске кадь вал, но тани вуиз кема витем нунал. Тук... тук... тук... Поезд вырӟиз. Кытчы ке кыдёке кылизы вордскем палъёсмы, ньыльдон нунал ум адӟе ни дормес. Пукиськом но малпаськом: кыӵе со Краснодар шаер? Марзэ выльзэ ми адӟом ини отысь? Ортчимы ни Волгоградэз, Ульяновскез но мукет городъёсты. Адӟимы Волгаез. Кыӵе со бадӟым вылэм! Куинь нунал ортчыса, вазь ӵукна ик вуим Краснодаре. Кынмыса сылӥськом, ку милемлы улон инты висъялозы. Нылъёс шуо: "Та-а, мар-а, юг? Кыӵе кезьыт но!" Йӧназ кӧлымтэ макеосты со нуналэ ик ужаны ыстӥзы. Нырысь нуналъёсы туж секыт йӧтылӥз, куронъёсты ӧм быдэстылэ. Котькуд адями 96 ведра яблок октыны кулэ вал. Ми туж тыршыса ужам, чупрес кариськытэк уг луы угось вуттӥськыны. Куазь но туж пӧсь улӥз. Берло дышим, 130 ведра яблок октылӥськом ини вал. Пӧлысьтымы туж сэзь, чупрес ужазы Дима но Андрей Исаевъёс. Дима одӥг пол 214 ведра тырмытэм. Умой ужамзы понна, та пиослы премия но сётӥзы. Быдэс лагерья Мукшиысь отряд (ми) нырысетӥ интые потӥз. Умой ужаны быгатӥськом вылэм. Пуксиськом яблокпулэн вайёсыз вылэ, пумен улмо бичаськом, пумен кырӟаськом. Тыршеммы юнме ӧз луы, ӟеч ужмес 500 сюрс манет премиен пусйизы, нош Ольга Ивановнамылы тау карон ялӥзы. Ужаськомы вал нуназеозь, собере шутэтскиськом. Дискотекае, киное ветлылӥмы. Куд-огез татын ик волейболэн шудыны дышизы, трос эшъёс шедьтӥзы. Дышоно луиз татысь инкуазьлы но. Пичи гинэ кытӥ ке ӵабъялтӥське ке, соку ик азыны кутске. Инкуазез татын пӧртэм ик асьмелэнлэсь. Асьме палан ялан зоре шуыса гожто, ми шумпотӥськомы, татын сӥзьыл куазен но пӧсь улэ. Зоре ке, огшоры уг, гудыръяса, чилекъяса зоре. Куронъёс милемлы чурытэсь вал. Армиын сямен ик ӝог-ӝог дӥсяськыны но пыласькыны вуоно. Арня нуналэ станциысь базаре ветлылӥм. Ульча кузя вамышъяськод но, котькытын сяськаос, синэз ик воштыны уг луы соос бордысь. Сюрес дурын ик соос будо, нокин но уг ишка. Котырак чылкыт, коркаос бадӟымесь, ӝужытэсь, чебересь. Быдэс посёлок садъёс пӧлы ышемын. Берпум нуналъёсаз, мӧзмим ке но, бертэммы уг поты на вал. Сыӵе милемлы яраз та шаерын. Кошкон азьын бӧрдэм ик потыны кутскиз. Ас поннамы ми шыпыртӥмы: "Я, ӟеч лу, "Зангари". Тау тыныд та нуналъёс понна". Тук... тук... тук.. Поезд милемды дор палъёсамы вуттэ ини. Кызь тямысэтӥ куарусёнэ нуназе вуимы Ижевске. Анай-атайёсмы борды ӟыгырскимы но бӧрдӥськом, сокем мӧзмиськеммы соослэсь. Та кыдёке ветлон дышетӥз милемды огнын улыны, шуг-секытъёсты ас поннамы вормыны. Ми валамы, кыӵе секыт улыны кыдёкын, анайлэсь но атайлэсь палэнын. Но куке но со люкиськон вуоз. Соин ик, котьмалы калленэн дышоно ини. Вань шуг-секытъёс шоры учкытэк, ми туж шумпотӥськом, таӵе шуд усемлы. Туж бадӟым тау кариськом классэн кивалтӥсьмылы Ольга Ивановналы. Со туж чупрес, ми понна вань сюлэмзэ сётыса ужа. Вунонтэм Краснодар палъёс... Ми али ке но мӧзмиськом тынэсьтыд. Куке кылдӥз, одно ик вуылыны тыршом дорад. Лариса БЕЛЫХ. Як.-Бодья ёрос, Мукши школа. Тазалык Улон - со ӧвӧл буйгатскон Улонмы арысь аре секыт луэмен, йылэ пӧртэм висёнъёсын курадӟисьёслэн лыдзы но. Берло дыре паськыт вӧлмиз сахарной диабет. Жаляса верано, та дырозь медицина сое ӧз вормы на. Висись адями вань улонзэ эмъюм вылын ортчытоно луэ. Ярано коть, та югдурез быгатэмъяз эскерыса возе государство. Тодматон вылысь, кӧня ке лыдпус верало. Быдэс дуннеын али та висёнэн 130 миллион пала адями курадӟе, Россиын - ог 2 миллион, Удмуртиын - 17 сюрс адями (лыдъямтэ муртъёсын ӵош 20 сюрс адями пала луоз), со пӧлысь ӝыныез - Ижевскысь. Висё пиналъёс но. Юрттоз школа Шумпотымон, 1993 арын Ижевскысь сахарной диабетэн висисьёслы валэктон, дышетон ужъёс нуон вылысь, автозаводлэн поликлиникаяз усьтӥзы "Диабет" нимо центр. Соин кивалтэ городысь валтӥсь эндокринолог Надежда Евгеньевна Шмыкова. 1994 арын та центрез паськытатӥзы, нимысьтыз эндокринологической отделение кылдытыса. Отын висисьёсты эскеро ас ужзэс ӟеч тодӥсь-валась специалистъёс: окулист, гинеколог но невропатолог. Со сяна, сахарной диабетэн курадӟисьёс тодон-валан басьтыны быгато та центрын ужась нимысьтыз школаын. - Школамы котькуд толэзьлэн пумаз арня ӵоже дышетскон радъя,- шуэ Надежда Евгеньевна.- Сахарной диабетэн висисьёс отчы мылкыд каремзыя ветлыны быгато. Озьы соос мургес тодматско та висёнэн, учко видеокассетаос. Висисез асьме коже йӧнатыны ум быгатэ, солы аслыз но ялан чакласа возёно тазалыксэ, кӧня, мар сиемзэ. Центрмы ужа "Диабет" международной программая. Юн кусып возиськом кунгож сьӧрысь эшъёсынымы но. Ново Нордиск (Дания), Лилли (США), Берлин Хеми (Германия) фирмаос милемлы инсулинэн юртто, нош Сервье (Франция), Берлин Хеми но Берингер Ингельхайм (Германия) - таблеткаосын. Диабет сярысь калыкын валэктон уж нуон капчиенгес но дунтэменгес сётске, нош йӧнатыны кутскыса, висись пӧртэм шуг-секытъёсын пумиськоно луэ. Соин ик ньыльдон ареслэсь бадӟым адями арлы одӥг пол ке но вирзэ эскерыны кулэ: мултэс ӧвӧл-а сахарез? Городысь та центр трос ик уг ужа ай ке но, адӟем карымонэз вань гинэ. Выль приборен, глюкометрен, 45 секунд куспын вирез эскеро. Умой вылэм, таӵе аппарат котькуд висисьлэн дораз ке луысал. Но 670 сюрс манетэн сылэ бере, басьтыны быгатӥсез ӧжыт. Со сяна, "Диабет" центрын ужало ни нимысьтыз чаклам выль шприцъёсын (шприц-ручкаосын). Висись пиналъёслы инсулин та шприцен пуктыло. Шприц-ручкаос тужгес но пайдаё луо синтэмъёслы. Эмъюмлэсь асьсэлы кулэ люкетсэ соос чотало-лыдъяло таӵе шприцъёслэн куара сётэмзыя. Надежда Евгеньевна верамъя, та школалэн ужамез адӟем карымон луэ шаерысьтымы мукет городъёслы но. "Диабет" центрын ужасьёс шумпото кунгожсьӧръёслэн инсулинэн юрттэмзылы . - Эмъюм бырон вакыт шер дыръя луылэ,- шуэ валтӥсь эндокринолог. - Сыӵе дыръя вань ужасьёс кӧлонзэс ик ышто кадь. Бадӟымъёс гинэ ӧвӧл, пиналъёс но улонэн кулон вискы шедё. Эмъяськем сяна, "Диабет" центре ветлӥсьёс ог-огенызы матэгес тодматско, кенешо, висёнзэс палэнтыны тыршо, азьланяз улыны мылкыдзэс ӝуто. "Пересьёслэн" диабетсы Тазьы гожтэмысьтым кинлэн ке, оло, вожез но потоз. Йыркуръяськыны кулэ ӧвӧл, дыр. Лыдпусъёсты эскерыса тодоно, та висёнэн ӵемгес курадӟо арлыдоос, куатьтон арессэс ортчемъёс. Котькуд дас кыкетӥез мӧйы адями диабетэн висе, соин но, дыр, сое "пересьёслэн" диабетсы шуыло. Тазалыкез эскерисьёс верамъя, сахарной диабет кык пумо луэ. Нырысетӥез, куке ӝушул нёред (поджелудочная железа) мугорлы кулэ луись вещество - инсулин - кылдытыны уг быгаты. Кыкетӥез, куке инсулин кылдэ, но мугорлэн пӧртэм люкетъёсаз со уг вуы ни. Тужгес но паськыт вӧлмемын кыкетӥез. Сахарной диабетэн курадӟисьёслэн ӵем дыръя глюкозазы мултэс яке ӧжыт луэ. Гипогликемия дыръя, вирын глюкозаез ичи ке, адями кӧсэктэ, ӟырданы кутске, йырсазьыз сураське, кулыса усе. Сыӵе дыръя солы тросгес ческыт сиёно. Котькыӵе учыре ки улаз мед луоз, кылсярысь, кык пичи пуньы тыр сакыр песокез яке куинь кусок сакырез. Со сяна, юыны луоз на ӝыны стакан газированной напиток яке сок, стакан йӧл. Ваньмыз умой луиз ке, огдырлы кутскем висён 10-15 минут куспын ортчыны кулэ. Гипергликемия луэ на, глюкоза мултэс дыръя. Туж чакласькись, тазалыксы сярысь сюлмаськись висисьёс но гипергликемиен курадӟо, кылсярысь, гриппен висьыкузы, семьяязы но эшъёссы куспын керетонъёс кылдылыку. Тазалыкед сярысь ачид ӧд сюлмаськы ке, муртъёс уз бӧрдэ, дыр, тон понна. Соин висисьёс туж чакласа сиськыны кулэ, со сяна, мултэс таза луоно ӧвӧл на. Ӧжытгес сие кӧё-вӧё сиён, тросгес сиемды луоз нянь, сад-бакча емышъёс, юэ нуналаз кык стакан мындагес йӧл. Тырше сиськыны ӧжытэнгес но ӵемгес. ххх Ваньмылы улон одӥг пол сётӥське, кызьы ортчытом сое, жаляса верано луэ, тодыны шуг. Одӥгзэ гинэ верасал, улонмес шудо-буро ортчытон вылысь, асьмеос ик ӟечгес сюлмаськоно вылэм. В. КУТУЗОВА. * Валтӥсь эндокринолог Н. Шмыкова. * Висисьлэсь вирзэ эскеро глюкометрен. Туспуктэмъёсыз В. КАМАШЕВЛЭН. Швейцарие ӧз вуы "Россиысь спецслужбаос секыт вакытъёсы ӝог, янгышъёстэк ужаны быгато", - пусъе "Независимая газета". Сое возьматӥз алигес луэм учыр но, куке террорист "Шереметьево-1" аэропортысен самолётлэсь экипажзэ Швейцарие лобӟыны кужмысь косӥз. Следствиез нуисьёс малпамъя, террорист огназ вылымтэ, самолётын сое кык эшез возьмам. "Шереметьево-1" та вакытэ ӧз пытсаськы, самолётъёс аэропортэ пуксьылӥзы но лобӟылӥзы ӝегатскытэк. *** Зарезьёсты эскерись, Франциысь тодмо учёной Кусто улонысь кошкем бере, солэсь ужзэ азьланьто кышноез но эшъёсыз. Соос Байкал ты сярысь фильм кылдытӥзы. Матысь дыре Кустолэн ӵош ужам эшъёсыз асьмеды зарезь дуннелэн улэменыз тодматозы, ивортӥз "Труд" газет. Шунды Маша Шихова дышетске Вавож районысь Зямбай школаын. Шаплы, усточи нылаш школалэн улоназ гинэ уг пыриськы, сое бурдъятэ гожъяськон удыс. Та мылкыдыз ик Машалы сюрес усьтӥз усточи но быгатӥсь нылпиослэн "Шундыкар" лагерязы. Трос эшъёс, выль малпанъёс, бурдъяськем мылкыд - лобӟон бурдъёс гинэ уг тырмо на. Туспуктэмез В. КАМАШЕВЛЭН. Будон 1917 арын 18 декабре Калык комиссаръёслэн советсы кутӥз Декрет, гражданской состояниея актъёсты гожтоно кун власть пыр. Та нуналысен Россиын кузпалъёсын лыдъяськизы загс пыр гожтӥськем муртъёс гинэ. Нылпилэсь вордӥськемзэ пусъён яке адямилэсь кулэмзэ гожтон, кузпалъёсты люкон но табере загс пыр лэсьтӥськиз. Аръёс ортчемъя, та удыс азинскиз, выльдӥськиз. Нош туннэ Россиысь загс удыслы тырмиз 80 ар. Загсын ужасьёс азьло аръёсы сямен ик асьмелэсь вордскеммес пумитало но, кузпалъяськыто но, улонысь но келяло. Та удыс пыр потытэк асьмеос Россилэн гражданъёсыз но ум луэ. Соин ик, редакцилэн нимыныз но, вань лыдӟисьёслэн нимынызы но туннэ сюлмысьтымы ӟечкыласьком загсъёсын ужасьёсты. Шаерысьтымы загс удысын ужасьёслэн сӥё-дано праздниксы ортчиз ни 10 декабре. Ижевскысь Егитъёслэн дворецазы уно гинэ калык люкаськиз, палэнэ ӧз кыле гурт администрациосын ужасьёс но. Люкаськемъёсты сӥё-дано нуналэнызы ӟечкылазы Удмурт Республикаысь Кун Кенешлэн Тӧроез Александр Волков но Правительстволэн Тӧроез Павел Вершинин. Устоосыз пӧлысь устооосыз ужасьёс пусъемын Кун Кенешлэн но Правительстволэн Данъян грамотаосынызы, Удмурт Республикаысь Правительстволэн загс ужпумъёсъя комитетэзлэн синпель кузьымъёсыныз. Нош комитетлэн кивалтӥсезлы Лариса Лукинскаялы сётэмын Удмурт Республикаысь социальной удысысь дано ужась ним. 80 ар ӵоже шаерысьтымы загс удысын ужасьёс понна нырысьсэ таӵе сӥё-дано ужрад ортчиз. Артистъёс сцена вылысен возьматӥзы удыслэсь вордӥськон сюрессэ, кыӵе янгышъёс, тырмымтэос вал. Нош Лариса Лукинская аслаз верамаз пусйиз удыссылэсь туннэ нуналзэ, азинсконъёссэ. Нимын-нимын вераз адӟем карымон ужасьёсты. Котькуд районын сямен вань мар ке но адӟем карымонэз, пусйымонэз. Тани Пичи Пурга но Можга районъёсын кузпалъясько вашкала удмурт сямъя. Ижевск городысь загсын ужасьёс котьку сямен доразы вазиськемъёслы мар ке но выльзэ ӵектозы. Нош Та нуналэ вордӥськем нуныез сӥё-дано гожтон ортчиз. Сыӵе шуд усиз Ижевскын улӥсь егит кузпалъёслы Светлана но Андрей Шабутдиновъёслэн Екатерина нылзылы. Нылпиос вордӥсько бере, иське, загсын ужасьёслэн мӧзмыса пукыны дырзы уз луы. Л. МАЛЫХ. Удмурт Республикаысь Кун Кенешлэн Тӧроез А. А. Волков сӥё-дано ним басьтэмен ӟечкыла Загс ужпумъёсъя комитетлэсь кивалтӥсьсэ Л. В. Лукинскаяез. Екатерина Шабутдинова луиз Россилэн гражданинэз. Туспуктэмъёсыз В. КАМАШЕВЛЭН. Нырысьёсыз пӧлысь Калык артист Соку дыре кин ке малпаны быгатысал меда, Селта ёросысь Выль Монья гуртысь куанер улӥсь Овечкин Потаплэн шоретӥ пиез Гирыш улыса-вылыса артист луоз шуыса? Дышетскемез гинэ но ас киыныз гожтэм биографияз "низшой" шуэмын. "Тырмоз, - шуэм атаез. - Дышетскыса кӧттэ уд тыр. Агаед бордын ужано луод". Зэм но, агаез - Семон, юрт котырын но, гуртысьтызы узыр улӥсьёс дорын но, атаезлэсь дышыса, пӧртэм ужъёсты йӧндыре вал ини. Семьяязы, Семон Гирыш сяна, вал на синтэм апайзы, Такъян, но покчи вынзы Серафим, анай-атаенызы валче сиисьёссы байтак гинэ - куать ым. Нош ӵем дыръя анайзылы пӧзьтэм суан шыдэнызы гылтыса сиськыны ӝӧк вылазы няньзы но ӧз луы. Батракъёс радын ветлӥзы Овечкинъёс, коттыр вылэ муртлы ужаса, куссэс позыръязы. Оло, соин но атайзылэн тазалыкез вазь лябӟиз но 1924-тӥ арын улонысь кошкиз. Гирышлы соку дас вить арес гинэ вал ай. Егит агай-вынъёс, соосын ӵош синтэм апайзы, анайзылы сюлмысь юрттоно, юрт кутон уже пыриськоно луизы. Огдыре ик ляльчиос но вал ай соос. Гирыш мугорын лапег ке но, етӥз, сэзь вал. Ульмоль гуртысь школаын дышетскыкуз ик пыриськылэм самодеятельной драмкуржоке. Туж яратэ вылэм маскаръяськыса эшъёссэ серекъятыны. Тазьы дауртэмез адӟыса, эсьма, дышетӥсез но, Матвей Никифорович,шуылоз вылэм: - Тон, Овечкин, театрын кадь ик маскаръяськыны быгатӥськод. Нош мар со сыӵе театр, кытын, пе, али со вакытэ гуртысь начар калыклэн нылпиосызлы тодыны, зэмос артистъёслэсь шудэмзэс адӟыны? Ма, со вадес быдэс шаерамы одӥг профессиональной театр но ӧй вал ук. Бӧрысьгес ини, кызетӥ аръёслэн пумазы, удмурт театр кылдытон сярысь йӧн-йӧн вераськыны кутскизы. Со понна егитъёс пӧлысь куд-огзэ Москвае дышетскыны но лэзизы. Нош та вакытэ Выль Моньяысь Гирыш, арлыдыз будэмъя, ёзъёсыз пӧлын чупрес пияш вал ни, дэраен кыскем шубаен ветлӥз ке но, комсомолэ пырыны но ӧз кепыра. Комсомол соку гуртысь тужгес мыло-кыдо егитъёсыз дышетскыны но дэмла вылэм. Тани Гирышез но Ижевске рабфаке ысто. Мылкыдыз лӧптыса ик, отчы мынӥз вал со. Но татын син шораз йӧтӥз "Удмурт коммуна" газетысь ялон: артист луыны мылкыд карисьёсты "Удмурт клубе", пе, ӧтиськом. Нош ик мылкыдыз ӝуалскиз: уз-а меда кутэ сое но? Мынӥз Удмурт клубе. Мынӥз но, директор доры пырыны возьдаськеменыз берлань потыса кошкиз. Ассэ юнгес карыса, ӵуказеяз нош ик мынӥз. Директорлэн ӧс дораз сылыкуз, лапег гинэ егит пи солэсь юа: - Мар-о кулэ тыныд, пияш? - Директор кулэ вал... Удмурт театр кылдэ, лэся. Артистэ дышетскыны монэ но уз кутэ мда? Егит пияш туж кема шораз учкыса сылӥз, "талэсь маке пӧрмоз-а нош" шуыса малпаз, лэся. Таид уго гуртысь лыктэм куеныз ик: кыскем шубаен, йыраз кион ку изьыен, пыдаз нюретӥ ветлон ӝужыт кунчиё сурон сапеген. - Мар бен, вай куриськондэ, ӵуказе лыктод. Эскером, вералом, мар пӧрмоз тынэсьтыд. Кыӵе ке кылбур но верос дася. Ӵуказеяз быдэс нунал дасяськыса, ӝытазе клубе мынӥз Гирыш. Татын сое ношт ик толло адӟем егит мурт пумитазю - Фамилиед Овечкин шуиськод, лэся. Нимыд нош кызьы? - Гуртын Потап Гирыш шуо вал. - Озьыен, Григорий Потапович луиськод. - Бен, озьы. - Так вот, Овечкин эш, сцена вылэ тубе но вералэ, мар дасяды. Потӥз сцена вылэ но адӟе: залын трос калык пуке. Шораз учкыса, гур серекъяны кутскизы. Возьдаськеменыз Потап Гирыш мар карын паймыса сылэ. Серекъямысь дугдэмзы бере гинэ Кедра Митрейлэн "Эш Тэрек" трагедиысьтыз ог люкетсэ лыдӟиз, собере - Иван Дядюковлэсь кылбурзэ. Кӧбераменыз лыдӟиськонэз суро-пожо пӧрмиз. Нош комиссиын пукись егит режисшр Кузьма Алексеевич Ложкин серемзэ мырдэм возе. - Кырӟаны нош быгатӥськод-а, эше? Гриша, куаразэ кужмо поттыса, тодмо удмурт калык гурез нёжтӥз. - Кинлы кырӟаськод? Кылзӥсед ас вӧзад ук. Я, яратоно нылыдылы сямен кырӟа али. Табереяз ӧжытак ӟечгес пӧрмиз, нош кырӟан чурзэ пумозяз вуттытэк, кытчы ке "гылӟиз". Этюд возьматыны "тылпу" тема сётӥз режиссёр. Олокытысь-марысь тылпу потэмез нырысь ик адӟыса калыклы ивортэмез пӧрмиз ик. Осконтэм мылкыд кельтӥз егит пиялэн возьматскемез. Но... мазэ ке но шӧдӥз ик профессиональной режиссёр. Комиссиын куспазы кенешыса, басьтоно кариськизы: маиз ке синмаськытӥсез, бордаз кыскисез вань та пияшлэн. Шораз учкыса уд вала, бӧрдэ-а, серекъя-а со? Оло, таӵе сямыз ик артистын яралоз? Тодмо лапег пияш дораз лыктӥз но шуэ: - Мон луисько Гави Йыги. Игнатий Гаврилов, значит. Ми тонэ артистэ кутӥськом. Ӵуказе лыктод, документтэ ваёд. Макем шумпотӥз Гриша! Мылкыдыз уртчыса пӧзе. Дораз бертыса, семьязэ но, гуртысь эшъёссэ но паймытӥз. Со вакытэ режиссёр К. Ложкин ужа вал ини И. Гавриловлэсь "Вало ӧр куашетэ" пьесазэ пуктон бордын, нош батрак Семилэсь рользэ шудӥсез ӧй вал. Овечкин ачиз но батрак - та ролез усто шудыны кулэ кадь. Озьы гинэ вылымтэ ай со. Героедлэсь кин луэмзэ возьматон понна, сое ас чиньыостэ кадь тодоно - сямзэ, йылолъёссэ, вераськон, ветлон манеръёссэ. Туж юн шӧдӥське дышетскемез ӧвӧлэз. Ма, театре ужаны кутэм нырысь артистъёс пӧлын таӵеосыз со гинэ ӧй вал. Соин ик соос спектакль дасян бордын ужаменызы ӵош актёрской мастерстволы дышетскизы. Тазьы дышетскыса ужамен, Гришалэн ролез туж усто пӧрмиз. Нош тани М. Петровлэн "Батрак" пьесаезъя кулак Онтонлэсь рользэ дасякуз, режиссёр сое трос пол тышкаськылӥз. Куанер семьяын будэменыз, лэся, Овечкин кепыр потӥз сое шудыны. Выриз-выриз но ролез пӧрмиз ик. Юрттӥзы ас уонысьтыз адӟемъёсыз. Егит задор мылкыдзэ ӧръяса шудӥз со И, Гавриловлэн "Кезьыт ошмес" пьесаезъя спектакльын. Кыӵе ӟырдыт пумитазы учкисьёс солэсь Тугайзэ! Яратоно нылыныз Натӥен артэ чик но Тугай ӧй вал, ачиз артист сое вань сюлмыныз гажаса шудӥз кадь. Нош Тугай кадь рольёс артистлы бӧрсьысь бӧрсе ӧз шедьылэ. Театрын куамын ар ӵоже ужатозяз, солы сю пала рольёсты шудыны кылдӥз. Соос пӧлын вал егитъёсыз но, мӧйыосыз но, огшоры музъем ужасьёсыз но, купечез но, генералэз но, министрез но. Котькудӥзлы шедьтоно аслыз гинэ тупась сям, выросъёс, йылолъёс. Григорий Потапович утчаз, тыршиз, режиссёрлэсь, эшъёсызлэсь дэмланъёссэс санэ басьтылӥз, спектакльысь спектакле сцена вылэ маке но выльзэ поттылӥз... Ма, Овечкин, лэся, ук та, учкы ай макем тунсыко шудэ", - паймылӥзы артистэз кемалась тодэм учкисьёс ик. Нырысь ик лапег мугорыз но инмарен сётэм серекъятон сямыз юрттӥзы тодмо артистсэс. Овечкинлы театрын нырысь аръёсаз ик мур лякиськиз тумошо тус. Таӵе пӧртэмлык - труппаын тужгес дуноез но котькуд спектакльын кулэез. Серемез кутытэк учкыны уг луы вал солэсь "Улэм потэ" спектакльысь пересь Омельлэсь рользэ шудэмзэ. Сцена вылэ потыса кыл вераны уг вуы на ай, учкисьёс пырсйылыса пуко ни. Нош Омель, соослы ӧчкарем кадь, нокинэ адӟем карытэк, дышем сямыныз азинтэ сцена вылын кыл вератэк "улон" сценазэ: пуксёз, уж дуре ваем сиёнзэ пуйысьтыз поттоз, дыртытэк, гочатымон ческыт потыса сиськоз но, мае ке туж бадӟым ужез быдэстэм бере кадь, капчияк лулӟыса султоз, нош ас удысаз вырӟоз. Татын со арлыдо крестьян но, нылпи будэтэм атай но, капчи, лякыт мылкыдо адями но. Учкисьёс та "кынтэм" сценаез кужмо чабонэн йылпумъяло. Таӵе ик син азям кылиз Григорий Потаповичлэн "Дорогой бессмертия" спектакльын фашистъёслэсь гыжкалзэс Мюллер обер-лейтенантэз шудэмез. Ролез пичи гинэ, эпизодической. Тани пыре со дано чех пилэн Юлиус Фучиклэн пытсэтын пукон камераяз. Немец офицер дӥсен, чилясь хром сапеген, кияз урысэн, йӧнъяськись, мугорзэ ӝужытгес возьматон вылысь, йырзэ урдысагес возе, вылӥе кыстӥське, дыртытэк, йӧн-йӧн вамышъя "тушмонэз" азе, синъёсыныз сӥсъя мугорын солэсь ӝужыт, зӥбыт вазиськись Фучикез. Вамыштэмезлы быдэ урдысэныз сурон сапег кунчиез борды шлачкетэ. Та дыре дунне вылын солэсь йӧноез но кужмоез адями ик ӧвӧл кожалод. "Тушмонэз" азе вуыса дугдэ но мытылэмзэ возьма. Соиз, пал кыл но вератэк, та гыжкаллэсь берлань чигнаса, ӧс тубат вылэ ӝутске... Куспазы керетон ӧз кенжы, "тушмон" муг ӧз сёты лыдӥсь киослы эрик сётыны. Мюллерлэн мылкыдыз соку ик воштӥскиз. Сапег кунчияз шлач! шуккиз но лексэ пинь пыртӥз лэзьыса шуиз: "Ялан вылӥе кыстӥськиськод? Ӝоген кыӵес дорозь сузьтӥськод!" Зӥрак берыктӥськиз но, ожгар командаез чибинь нырзэ чуртнантэм быдэстэм сямен, сэзь-сэзь вамышъяса потӥз, кыӵе мур оскытӥз солэн персонажез ӵапак таӵе ик луыны кулэ шуыса. Озьы кылдэмын ни тетарын: одӥгъёсыз артистъёс валтӥсь геройёсызгес шудыло, мукетъёсыз - эпизодической шуонооссэ, уката ик мугорын "калык рад" ӧвӧлгес ке. Пусйимы ни, Овечкинэз Инмар ӝуждалаен обидем шуыса. Нош со понна лэчыт, лек яке маскарчи сямо тусъёс пуктыны быгатонлыксэ жалямтэ. Макем усто пӧрмытӥз вал со В. Садовниковлэн "Пӧртмаськись туш" выжыкыл-пьесаысьтыз Перилэсь рользэ, яке Д. Щегловлэн "Побегысьтыз" Шаманэз. Лек но кескич Перилы серемес выросъёс шедьтылӥз, Шаманэз но огдыре ик кӧшкемыт тусыныз ӵош, серемесэз но вал. В. Садовниковлэн "Сюанысьтыз" Алангачарез, Гольдонилэн "Кык кузёослэн ляльчизы" комедиысьтыз Труффальдиноез шудыны сёто солы. Кыказ ик татын артист учкисьёсты кӧтсэс посымон серекъятыса шудылӥз. Паймымон сэзь, чупрес, со дыре ик лякыт вал Овечкинлэн Исаез - И. Гавриловлэн "Азин" пьесаезъя спектакльын. Партизанъёслэн командирзы кыллы но шырыт, юморез но вань. Азин сярысь пӧртэм мадёсъёс вераны ке кутске, эшъёсызлэн соку ик со пала мылкыдзы берытске. Татын но, социальной героез шудыкуз шӧдӥське артистлэн бордаз кыскись сямыз. Г. П. Овечкинлы 1938-тӥ арын Удмурт театрысь артистъёс пӧлын нырысезлы сётэмын вал УАССР-ысь дано артист ним. Нош театрлэн кылдэмез дырысен 20 ар тырмонэз пусъемен валче, солы нош ик нырысьёсыз пӧлын эшшо но вылӥ - республикаысьтымы калык артист ним сётэмын. Артистлэсь ужзэ сокем вылӥ дунъямзы сое пумтэм шумпоттылӥз. Та пумысен солэн тазьы верамез но вань: "Артистэ ужаны гуртысьтым кошкыкум, монэ гурт калык пӧлын серем карисьёс но вал. "Гриша шуд утчаны кошке" - шуылӥзы соос. Монья гурт кузя пельпумам котомкаен вамышъякум. Бен, шудме мон зэмзэ но шедьтӥ. Тетарын монэ умой пумитазы, мынэсьтым ужме правительствомы вылӥ дунъяз (С. У. 1955 ар, 27 февраль). Арлыдыз вуыса пенсие потэмез бере, Григорий Потапович, семьяезлэсь люкиськыса, вордскем палъёсаз, Селтала улыны выже. Татын со художественной самодеятельностья кружокен кивалтэ, кык гужемзэ ёросысь Ленин нимо колхозын пудозэс возьма, пичиысен ужлы дышем мур тэк пукыны уг чида. Г. Овечкин улонысь кошкиз 1974-тӥ арын коньывуон толэзьлэн нырысь ӝыныяз. Та рае со сӥзьыл кисьтонэ ас вордӥськем гуртаз агай-вынэныз, мукет ӵыжы-выжыосыныз адӟиськыны шуыса бертэм вылэм. Ваньмынызы пумиськылыса, ӵукна вазь ик бертыны потэм. Нош дораз вуымтэ. Пукрол нуналэ сое Выль Монья дорысь пичи шурысь шедьто. Мугор бордаз тракторлэн гусеницаезлэн ёзэз думылэмын. Ымнырыз-йырыз тодмантэм сузмытэмын. Дӥсезъя но кияз именной часэзъя гинэ тодмазы на калык артистэз. Та шимес йыружлэсь йылзэ-пумзэ ӧз шедьтэ ни. Сое Выль Мултан шай вылэ, ӵыжы-выжыосыныз артэ ватӥзы. Солэн шайгу вылаз али дыре сьӧд мраморлэсь памятник пуктэмын. Со тодэ вайытэ, татын Григорий Потапович Овечкин, Удмуртиысь нырысез калык артист "кӧлэ" шуыса. Борис Саушкин. ПЕНСИЯ УЖАМЛЭСЬ ИЧИ МЕДАМ ЛУЫ Пенсия сярысь пересьёс гинэ сюлмасько, егитъёслы та пумысен малпаськыны вазь на, кожаськом. Дыр вуэ ке, кун котькудмылы пенсия тыре. Аспӧртэмлыкез со бордын гинэ: самой бадӟымез пенсия 1,7 поллы тросгес пичиезлэсь. Но рыноклэн законъёсыз пенсилы коньдон егитысен ик люканы, солэсь быдӟалазэ ужам аръёслэн лыдэнызы герӟаны косо. Соин ик 1998 арын 1-тӥ февральысен пенсиос лыдъямын-чотамын луозы, котькуд пенсионерлэсь коэффициентсэ лыдэ басьтыса. Макем со бадӟымгес, сокем уногес пенсия. Коэффициент герӟаськемын ужам стажен, пенсионерлэн уждунэныз но Россиысь уждунэн, шорлыдын вераса. Стаже пыро ужам аръёс гинэ, дышетскем дыр лыдэ уг басьтӥськы. Нылкышноослы 20 ар, пиосмуртъёслы 25 ар тыршоно. Пенсионерлэн уждуныз, кудӥсьтыз пенсиосъя ёзъёсы коньдон висъяське, бадӟым ке, коэффициентэз но пичи уз луы. Нош предприятиын толэзьёсын уждун уг тыро яке вузъёсын, ю тысен тыро ке? Со сяна, куд-ог фирмаос ужасьёссылэсь уждунзэс чик уг лыдъяло, ватыса кельтэм табышысьтызы коньдон висъяло. Банкъёсын тыршисьёслэн уждунзы туж ичи, но соос депозитысь премия басьто. Одӥг кылын вераса, табышез ватыны, страховой тыронъёслэсь пеган понна, луонлыкъёс трос. Нош изъянэ усёз огшоры адями, пенсие потыкуз. Соин ик котькудмылы туннэ ик сюлмаськоно: страховой взносъёс быдэсак но дыраз тырисько-а? Нош уж сётӥсьёслы Пенсиосъя фондэ коньдонэз дыраз висъяно, уждун пӧртэм вузъёсын тыриське ке но. Ужасьёссы пенсие потыкузы шуг-секытъёсын медам пумиське, пенсизы ужамзылэсь ичи медам луы шуыса. Удмуртиысь Пенсиосъя фондлэн пресс-службаез. Журналистъёсын пумиськонъёс Одно ик-а кулэ Указ? Кылем вторнике журналистъёсын нырысетӥ пресс-конференцизэ ортчытӥз Россия Федерацилэн Президентэзлэн Удмурт Республикаысь асмуртэз (представителез) Виктор Васильевич Балакин. Виктор Васильевич вакчияк тодматӥз аппаратэзлэн уженыз. Отчы ваньмыз вить мурт пыре. Асьсэлэн куриськонъёссыя Президентлэн асмуртэз пумиськылэм ни 92 муртэн, ужъёсты радъян пумысен солы вазиськылэм 176 адями. Со сяна, 97 гожтэт вуэм, ваньмызъя ик валэктонъёс сётэмын. Кенешонъёс ортчытэмын ни федеральной службаослэн элькунысьтымы ёзъёссылэн ваньмыныз сямен кивалтӥсьёсынызы. Дасямын ни Президентлэн асмуртэз вӧзын ужась коллегия сярысь положение. Матысь дыре со коллегия ужаны кутскоз. Озьы ик дась ни общественной приёмнойёс кылдытон сярысь документ. Ижевскын сяна, соос кылдытӥськозы мукет городъёсын но ёросъёсын. Огкылын вераса, Президентлэн асмуртэзлэн аппаратзэлэн ужез пумен ӧръяське. Валамон ни, журналистъёслэн нырысь ик тодэмзы потэ вал Президентлэн Удмурт Элькунъя Указэзлы проект пумысен. Ӵапак соин валче ик Виктор Васильевич Москвае ветлӥз угось. Юанъёсты азьпалтыса, со пусйиз, тодысал ке, пе, вазьгес указлы проект дасяське шуыса, элькунамы туннэ кадь югудре ӧй вуысалмы. Вераськон мынэ Президентлэн Удмурт Элькунын кун властьлэн ёзъёсызлэсь но интыысь асивалтонлэн ёзъёссылэсь кусыпъёссэс радъянъя ужпумъёс сярысь Указлы инъет пумысен. Кызьы пусйиз Виктор Васильевич, Указлы проектэз дасясьёс сое та документэн тодматӥллямтэ, со гожтӥськыны дась ни шуыса ивортӥллям Президентлэн Администрациысьтыз гинэ. В. В. Балакинлэн верамезъя, та Указлэн проектэныз соглаш кариськыны уг луы но Президентлы гожтӥськыны сётыны уг яра. Таӵе документ, пе, Удмурт Республикалы номыр ӟечсэ уз сёты, кун властьлэн но интыысь аскивалтонлэн ёзъёссы куспын керӟегъяськонъёсты пуромытоз гинэ. Таӵе ужпумез калыкен кенешыса гинэ сэрттоно-пертчоно. Вылаз ик, Президентлэн Администрациезлэн кивалтӥсезлэн воштӥсез дорын кенешын но решение кутэмын вал, Указлы инъет бордын ватсаса ужано на шуыса. В. В. Балакин пусйиз, депутатъёсын косъяськыны уг быгатӥськы, но Кун Кенешлы та дырозь кулэ ни вал югдурез тупатон ласянь нимысьтыз законодательной инъетъёс дасяны. Соку указ но кулэ ӧй луысал. Кулэ-а, ӧвӧл-а элькунмыя Президентлэн нимысьтыз указэз, озьы ик валантэмгес на. Адӟом ни мар луоз азьланяз. Но одӥг уробоез огдыре куинь пала кыскыса ӟече вуом меда? "Вихрь-2" Таӵе нимын ужрад ортчытэ Россиысь МВД вань регионъёсын, соос пӧлын - Удмуртия но. Правоез утёнъя органъёс возьмато ӝог но быгатыса ужамзэс, преступление лэсьтӥсьёсты "пӧсь дыръяз" ик ӝегатэмзэс, розыск ялэм адямиосты утчан амалъёссэс но мукет. Операцие мыныку, городысь ульчаосын шӧдскымон кужмоятэмын милицилэн кужымез, ужан нуналзы кыстӥське 12 час. Нимысьтыз саклык висъяське вокзалъёслы, аэропортъёслы, рынокъёслы, гостиницаослы, улон интыослы, пыӵал тӥрлык, пуштытӥсь арбериос, наркотикъёс возисьёслы. 10 декабре йылпумъяськиз "Вихрь-2" операцилэн кыкетӥ люкетэз, мынӥз со кык арня. Та дыр ӵоже республикая шараямын 762 йыруж, ӝегатэмын преступление лэсьтэмзы понна пегасьёс пӧлысь 138 мурт, таламын 200 пыӵал тӥрлык, 10 килограммлэсь ятыр наркотической веществоос. 20-30 декабре "Вихрь-2" операция азинскоз, ортчоз солэн куинетӥ люкетэз. Удмурт Республикаысь МВД вазиське ваньмызлы шаерамы улӥсьёслы, городъёслэн, районъёслэн, интыосысь администрациослэн кивалтӥсьёссылы, йыруж лэсьтӥсьёслы пумит нюръяськонын юрттэт сётыны курыса. Удмурт Республикаысь МВД-лэн пресс-службаез. Куазь Синоптикъёс ивортэмъя, куазь та нуналъёсы небӟоз, Атлантика палась вуись циклон лымы ваёз. Туннэ но ӵуказе уин 150-190, нуназе шорын 90-130 кезьыт луоз. Пелляськиз, сюресъёс вылэс букосъёс пуксёзы. Тӧл лымшор но шунды пуксён вискысь секундскын 120- 150 метре пельтоз итыен-интыен - 180-200 метрозь. Та нуналэ тужгес о шуныт куазь (+160) шаермыя пусъемын 1982 арын, тужгес но кезьытэз уй (-32,20) - 1940 арын. "Россия - гажанэ мынам! Кӧня шуныт кылъёс сюлмам уло, тонэ яратыса..." "Байгурезь йылысен учкисько тон шоры, Тӧдьы Кам кадь паськыт Чупчи шур..." Таӵе ик шуккиське пель сьӧрын Степан Широбоковлэн пӧсь тылсиос пазьгыса, сюлэмыз вӧсь луыса вазиськись куараез. Солэн кылбуръёсыз, поэмаосыз, кырӟанъёсыз, пьесаосыз вужмисьтэмесь. Удмурт кун национальной театр азьпал дыре нош ик пуктыны чакла солэсь "Ой, чебер нылъёс!" комедизэ. Удмуртиысь калык кылбурчилы Степан Широбоковлы туннэ тырмысал 85 арес. Возьматӥськом усто предприятиосты Сырзы но, вӧйзы но ческыт Таӵе секыт вакытэ завод выльдӥське-юнма Миым предприятилы 60 ар тырмиз. Соку газет Кезысь сыр-вӧй поттӥсьёслэсь ӟеч ужъёссэс рос-прос возьматӥз. Со дырысен ӵапак быдэс ар ортчиз. Кызьы бен кезъёс туэ ужазы, мар выльзэ, адӟем карымонзэ лэсьтӥзы, кызьы арез йылпумъяло? Алигес акциосын огазеяськонэ вуылӥзы художникмы Леонид Прозоров но корреспондентмы Геннадий Романов. Сыр поттӥсьёслэн интызы ӟоскыт луиз ни, предприяте райцентр шорынгес ик уго интыяськемын. Азьвылэз директорзы Лазарь Емельянович Федосеев заводэз юнматонлы, сое паськытатонлы бадӟым инты висъя вал, но туэ гужем шӧдтэк шорысь улонысь кошкиз.гТабере солэсь ужзэ, кутсконъёссэ но кичӧлтонъёссэ азинтэ егит директор Анатолий Максимов. Кивалтонын со тэтэ карись ӧвӧл, районысь ик "Маяк" эштослэн тӧроез вал. Та интые кык Максимовъёсты ӵектӥзы (кыксы ик татысь, мукетыз "Кулика" эштослэн кивалтӥсез, Кун Кенешлэн депутатэз Владимир Максимов вал), сыр поттӥсьёслы кельшиз Анатолий Юрьевич Максимов, сое ик директоре бырйизы. Тӥни озьы со август тлэзьысен гинэ выль ужезлы, коллективезлы дыше. Анатолий Максимовез арлыдо уд шуы, солы ньыльдон арес но ӧвӧл ай, нош калыкен ужаны быгатэ, огкыл шедьтэ. Кызьы верай ни, Лазарь Федосеевлэсь вань мытэм ужъёссэ азьланьтэ. Туэ вуттӥзы компрессорнойзэс, вӧй цехсэс, пусктӥзы бадӟым 100 тонна тэрымон выль холодильник, йӧл автоматъёс но фасовать карон выль оборудование инъяло на. Со учкемын творогез, нӧкыез но мукет йӧл продуктъёсты чебер бинялтыны. Туэ ӵынатэм сыр лэсьтыны автомат радъязы, нош Кулига черкогуртын йӧл басьтон (приёмной пункт) лэсьто. Тӥни озьы сыр поттӥсьёс огинтыязы уг уло, ӵуказеез сярысь нуналмысь малпасько. Но самой бадӟымез сюлмаськонзы - сыр поттонъя валтӥсь цехсэс выльдон. Со борды басьтӥськизы ни. Тазэ но гурезез басьтозы. Коллективен, специалистъёсын но кивалтӥсьёсын кенешыса, сыӵе юн оскон кылдэ. Куд-огезлэн верамез потэ, таӵе предприятиос, пе, инкуазез но улосэз кырсьмыто. Озьы-а бен меда со? Кезысь сыр поттӥсьёс сярысь сыӵе кылъёс вераны ым уг усьтӥськы. Чылкытатӥсь соружениоссэс юн чакласа возё. Завод ватсаса кык трактор Т-150 но МТЗ- 82 возе. Соосын жуг-жаг куян интые кырсь арбериоссэс вутто. Предприятие 200 тонналэсь уно йӧл вутто, нош али кык но ӝыны пол ичи, яке 75-80 тонна гинэ. Одӥг килограммзэ йӧлэз туэ 1 октябрьысен 1000 манетэн басьто, 2,5 но 3,2 процент напен йӧл лэсьто-ввузало. Али йӧгурт но потто ни. Йӧл кутон интызы вань Красногорскын, нош татын - куинь. Зэмзэ но, элькунамы вань-а меда Кезысь сырзаводын кадь коллективъёс, кытын сомында ужало семьяос? Ӧвӧл, дыр. Тани суредасьмы синйылтэм микробиологез Серафима Ивановаез. Со лабораториын йӧлэз но солэсь сиён-юонъёсты микробъёслэсь чакла- эскере, анализъёс лэсьтылэ. Ужа но, тодон-валанзэ но будэтэ йӧл промышленностья техникумын, Ульяновск областьысь Димитровоградын. Вячеслав картэз но татын ик механик луэ. Кузпалъёс кык ныл будэто. Коллективын - гажано адямиос. Сырзаводын озьы ик синмаськымон тыршо кузпалъёс Светлана но Александр Белослудцевъёс. Александр Григорьевич одӥгез усто слесарь-электрик луэ. Соослэсь адӟем каро Зоя но Владимир Трофимовъёс. Уноез пенсие потыса но ужало, нош данакез сыр поттӥсьёс 20-25 ар тыршо ни. Соос вылын быдэс завод возиське, егитъёслы адӟем карымон луо. Огазеяськонын али вить цех усьтэмын. Самой бадӟымез - сыр лэсьтон, отын 80 мурт ужа. Собере мыно вӧй шукконъя, йӧллэсь сиён-юон дасянъя, сыр куасьтонъя но ӵыжатэм (плавленной) сыр поттонъя цехъёс. Предприятие вуж ке но, отын тыршисьёс ялан выль оборудование басьто, ческыт но дунтэм сиён-юон потто. Ужан итыоссэс но умоято. Азьланезлы, ӵуказе нуналлы осконзы бадӟым. Озьы сырзавод арез умой йылпумъя. Сырзаовдын йӧл куто. Дэбес цехысь мастер Елена Анисимова. Слесарь-электрик Александр Белослудцев. Микробиолог Серафима Иванова. Кызьы улэ "Удмуртия"? Валлян Ижын ортчиз "Удмуртия" общественно-политической движение огазеяськемъёслэн кенешонзы. Вань ёросъёсысь лыктэмъёс, соос ог сизьымдон мурт пала вал, эскеризы Удмурт Республикаын экономикаын но политикаын кылдэм югдурез но движение азьын сылӥсь ужпумъёсты. "Удмуртилэн" азьмуртэз Александр Волков семинарын пусйиз, экономикаын ӟеч пала воштӥськонъёс пумен юнгес шӧдӥсько ни шуыса. Но 1991 арын кадь ужаны кутскытозь кыдёкын на. Куать ар ӵоже уго ваньбур поттон асьме республикаын 62 процентлы кулэсмиз. Правительство вуоно арлы бюджетэз туэлэсь ичигес юнматыны дэмла, но Госсовет сыӵе ӵектонэн соглаш уз кариськы, шуиз А. Волков. Толэзь ортчыса ялоно луоз выль быръёнъёсты. Гуртъёсын, посёлокъёсын, городъёсын кылдытыны чакламын аскивалтонъя ёзъёсты, нош ёросъёсын луозы кун властьлэн ёзъёсыз. Таин валче "Удмуртия" движение азе выль ужпумъёс султо. Уго быръёнъёс ӵош ортчытыны пусъемын асьме конституцие воштонъёс пыртонъя юалляськон. Кин но со Удмуртиез азьланьын но парламентэн респбликаен адӟе, но быдэс Россиын югдур воштӥськиз бере, асьмелы но властез мукет сямен радъяно луоз, элькунлы йыр (глава) бырйыны кулэ вань калык, пусйиз А. Волков. Конституцие воштонъёсъя дэмланъёсты эскерыны дэмлалом ваньмызлы, выльдӥськись ёзэтъёслы проектъёсты печатлам асьме газетъёсын. Мон оскисько, шуиз со, бырйисьёс туала куронъёсты валалозы но шонер решение кутозы. Семинаре люкаськемъёс азьын вераськизы Удмуртиысь ветеранъёслэн, нылкышноослэн, егитъёслэн огазеяськонъёссылэн кивалтӥсьёссы Михаил Зыков, Зоя Степнова, Сергей Коваленко. Котьмалэсь кулэез туала вакытэ секыт югдурысь огъя кужымен потыны тыршон, вань луонлыкъёсты огинэ ӧръяса гинэ луоз республикамылэсь экономиказэ ӝутыны но улонмес умоятыны, пусйизы соос. Движение азьын сылӥсь ужпумъёсъя вазиськизы Кун Кенешлэн депутатэз "Республика" фондлэн кивалтӥсез Александр Лопатин но "Удмуртия" огазеяськонлэсь пресс- центрезлэсь ужзэ радъясь Александр Деньмин. "Удмуртская правда" газетын алигес печатлазы "Удмуртилэн" ужан программаезлы инъетысьтыз валтӥсь люкетъёссэ. Интыосын али соосты эскеро, дэмланъёссэс верало. Январьлэн кутсконаз чакламын движенилэсь кыкетӥ ӧтчамзэ люканы. Соку ик малпало программаез юнматыны но вуоно быръёнъёсъя пыр-почгес вераськыны. Л. Егоров. Шунды Кык пол вордӥськыны уг луы Можга городын но районын улӥсь егитъёслэн сюлэмшугъяськонъёссы - Егитъёсты ялан куаретыны туртто, лякыт но востэм сямо луэмзылы пум поныны косо, нош кызьы? Городэ вуыса, удмурт кылдэ гинэ ӧвӧл, удмурт луэмед сярысь но куд-ог дыръя вунэтоно... - Удмуртлык сярысь кӧня куашетӥськом, нош пайдаез ӧвӧл. Ма, собере, ми кадь егитъёсты тросэз кивалтӥсьёс кылэм-адӟем но уг каро. Соин но, вылды, куашетэмъёсмы "капка" сьӧры уг пото ни, ас интыязы ик кылё... - Городын улыса, куд-ог дыръя малпаськыны но мӧзмыны кутсконо ас пал удмурт эшъёсыдлэсь. Ярано коть, педучилищеямы сыӵе дыръёс уг пумиськыло. Та выллем малпанъёсын уло Можга педагогической училищеын дышетскись егит нылъёс но пиос Валя Петрова, Надя Рязанцева, Зоя Фролова, Сергей Петров но Сергей Семёнов. Соос шоры учкыса синмаськоно етӥз но дӥсьтӥсь луэмзылы, эшъёссэс но сьӧразы валтыны быгатэмзылы. Шаерамы удмурт егитъёслэн "Шунды" дэменлыксы кылдэм бере, можгаос но палэнэ ӧз кыле. Та уж борды басьтӥськиз роноысь егит методист Мария Баграшова, нош берло кык арзэ "Шунды" огазеяськонлэсь ужзэ азьланьтӥзы Татьяна Кибардина но Марина Никифорова. Оло, огсыр азьланяз но ужасалзы на, вань удмуртъёслэн ВИ Ӧтчамзы ке ӧй ортчысал. Ӟырдыт мылкыдын бертӥз соку Можга районысь делегат Татьяна Михайловна Кибардина. Уйзэ но ӧз кӧлы ни, малпаськиз городын но районын улӥсь егитъёсты огазе люкаса конференция ортчытыны но огъя ужась совет кылдытыны. Татьяна Михайловна шуэ: - Уйшорозь пуки. Малпаськи кинэн, кыӵе уж нуэмын луоз, кинэ та конференцие ӧтёно, кӧня коньдон кулэ луоз. Ӧтчамлэн мынэменыз вань егитъёс пыр-поч ӧз тодматске, вылды. Ма, собере, республикаысьтымы егитъёс нокыӵе сюлмаськонъёстэк уло шат? Азьвыл аръёсы ик таӵе конференция ортчытыны малпаськи ни вал, ялан маке люкетылӥз. Малпамын - лэсьтэмын. Нырысь вамыш лэсьтӥз педучилищеысь удмурт кыллы дышетӥсь Т. С. Иванова. Со удмурт отделениын дышетскисьёсын "котырес ӝӧк" ортчытӥз. Студентъёс пӧлысь конференцилы делегатъёс быръемын вал. Нош декабрь толэзьлэн кутсконазгес Можгаысь "Дубитель" культура юртын ортчиз городысь но районысь удмурт егитъёслэн нырысетӥ конференцизы. 14 аресысен 30 аресозь вить сю пала делегат лыктэмын вал: школаын дышетскисьёс, студентъёс, гуртын ужасьёс но интеллигенция. Сое сӥё-дано усьтӥз городысь егитъёсын ужанъя комитетлэн тӧроез В. Б. Корольков. Можгаос киоссэс ал вылазы тырыса уг уло. Выльзэ, пайдаёзэ утчало. Егит дыр огпол сётске, шуо. Соин ик, соослэн сюлмазы но мылкыдазы чылкытэсь, киын сузьыны луонтэм малпанъёс кылдо. Нош дасесь-а удмурт егитъёс ӵуказе нуналлы, мар вите соосты азьланяз, кыӵегес егитъёсты кулэ кароз вуоно дыр? Ӵемысь туала егитъёсмы сярысь уродзэ гинэ кылоно: юо, кыско, пиналысен ик умойтэм ужъёчссы кыстӥсько, мыжыкъёсынызы шонасько, тодон-валанъёссэс азьланьтыны уг дырто. Конференцие люкаськемъёс трос гинэ сюлэмшугъяськытӥсь ужпумъёсты эскеризы. Тани анай кылмы та вие сюрпи интыын. Анай-атайёс асьсэос керпото, лэся, удмурт луэмзылэсь, соин ик пиналзэс, шенгыль-пенгыль ке но, ӟуч сямен бӧтьыртыны дышето. Можга город, Ижевскен ӵошатыса, унолы пичигес. Оло, соин но та городэз бадӟым гуртэн лыдъяло. Озьы ке но, город вань город. Гуртысь лыктэм пиналъёс асьсэ дышетскон но улон интыосазы мукет калык пӧлы "ышо". Озьы ас малпанъёссэс но соос шара вераны уг дӥсьто. Шумпотыны кулэ, Можга городын укмыс школа пӧлысь та дыре витяз удмурт кылэз дышето ни. Пиналъёсын но егитъёсын ужаны кулэ психолог. Но удмурт адямилэсь лул сюлэмзэ ӟечгес валасал удмурт психолог. Нош али, жаляса верано луэ, можгаослэсь сюлэмвисёнъёссэс валась удмурт специалистсы ӧвӧл на. Сюлмаськонъёс, малпанъёс... Кинлэн ӧвӧл меда соос? Егитъёс азьын сылӥсь эшшо одӥгез ужпум - асваланзэс ӝутон. Туннэ соосты Татьяна Михайловна йӧнъяськыны но юнме шорысь "мон удмурт" шуыса данъяськыны уг ӧтьы. Угось данъяськон понна нырысь астэ котыр ласянь ӟечен возьматоно, ас калыктэ гажано но дунъяны быгатоно, ас выжы калыкмылэсь азинскон сюрессэ тодоно, соку, оло, асваланмы но ӝутӥськоз. Можга городын уно гинэ шоро-куспо дышетскон заведениос (медучилище, ветеринарной колледж, педучилище, СПТУ-ос). Татысь студентъёс ӵем дыръя ог-огенызы адскыло, пӧртэм ужрадъёс ортчытъяло. Кылсярысь, городысь удмурт дышетскисьёс понна - "Тодма крезьгурез" шоу-программа, нош вуоно дышетӥсьёс но врачъёс куспын "Яратон, яратон, мар меда сыӵе тон" ӝыт радъямын вал. Но жаляса верано, пӧртэм ужрадъёсы мылысь-кыдысьгес пырисько педагогической училищеысь студентъёс гинэ. Кылем арын татысь ик студентъёс но Асаново совхоз-техникумысь командаен КВН-ын кужымзэс эскеризы. Дышетскисьёс пӧлын ужгур пӧзе кадь, мӧзмысагес уло гуртъёсысь ужась егитъёс. Соос усемын ас дуннеязы. Куд-ог гуртъёсын гинэ (Бадӟым Сибыын, Александровоын, Валожикьяын, Учалан) егитъёсын ужанъя иструкторъёс вань. Можгаос, можгаос шуиськомы, нош маин соос пӧртэмесь мукет егитъёслэсь? Котькуд аре сямен усточи пиналъёс "Шундыкар" лагерьын шутэтско, нош ӧй луысал-а сое Можгалан но радъяны? Вожатойёссы но, дышетӥсьёссы но асьсэлэн ик луысал. Яке, шуом , районысь усточи пиналъёслы интернат усьтыны? Бен, ваньзэ вормыны быгатысалзы, дыр, можгаос, ужпум пыкъяське коньдон вылэ. Ярано коть, пӧртэм гуртъёсысь егитъёсты огазеясь ёз кылдытон сярысь кемалась кылдэм малпанзэс уж вылын быдэстыны быгатӥзы. Оскиськом, ас азязы пуктэм ужпумъёссэс можгаос азьланьтозы. Юнме уг шуо, вылды, кык пол вордӥськыны уг луы дунне вылын. В. Кутузова. Удмурт Республикаысь Кун Кенешлэсь дас куатетӥ сессизэ люкан дырез выжтон сярысь Удмурт Республикаысь Кун Кенешлэн Президиумезлэн Постановлениез Удмурт Республикаысь Кун Кенешлэн Президиумезлэсь 1997 арын 18 ноябре кутэм". Удмурт Республикаысь Кун Кенешлэсь дас витетӥ сессизэ люкан сярысь" 416 - И номеро постановленизэ воштон вылысь, Удмурт Республикаысь Кун Кенешлэн Президиумез пуктэ: Удмурт Республикаысь Кун Кенешлэсь дас куатетӥ сессизэ люкано 1997 арын 24 декабре Ижевскын. Удмурт Республикаысь Кун Кенешлэн Тӧроез А. А. Волков. Ижевск город, 1997 арын 15 декабре, � 436 - И. *** Редакторъёсын кенешон Удмурт Республикаысь Кун Кенешлэн Тӧроез пумиськиз шаерысьтымы газетъёслэн но ёрос радиоослэн редакторъёсынызы. Пумиськон ортчиз Печатья но иворъёсъя министерствоын. Журналистъёс азьын вераськыкуз, А. Волков бадӟым саклак висъяз республикалэсь экономиказэ азинтонъя но городъёсын, ёросъёсын кивалтонэз радъянъя ужпумъёслы. Кун Кенешлэн Тӧроез пусйиз, вуоно арын Правительство азьын промышленностьын производствоез будэтон пумысен ужпум сылоз шуыса. Таяз арын со кык процентлы йылӥз ке, вуонояз кык пол будыны кулэ. Александр Волков удмурт парламентлэн законъёс кылдытон бордын ужамез сярысь ивортӥз. Кылсярысь, Удмурт Республикалэн Конституцияз воштонъёс но ватсанъёс пыртонэн, вуоно тулыс кун властьлэн, интыысь аскивалтонлэн ёзъёсазы быръёнъёс ортчытонэн герӟаськем законъёс кылдытоно. Кун Кенешлэн Тӧроез вазиськиз журналистъёслы, кун властьлэн ужаменыз тодматыку Кун Кенешлэсь огъя дунъетъёссэ лыдэ басьтыны курыса. "Вожвылъяськонъёсты дугдытоно, выльзэ, ӟечсэ кылдытон понна, тупан кулэ", - шуиз Александр Волков, кун властьлэн но интыысь аскивалтонлэн ёзъёссылэн кусыпъёссы сярысь юанлы валэктыса. Ӟечкыланъёс Россия Федерацилэн Президентэз Борис Ельцин ыстӥз Удмурт Республикаысь Кун Кенешлэн Тӧроезлы Александр Волковлы гожтэт, Конституцилэн нуналэныз ӟечкыласа но Россилэсь кунлыксэ юнматонын но демократиез азинтонын вормонъёс сӥзьыса. Ӟечкылан гожтэтъёс озьы ик вуизы Россиысь Правительстволэн Тӧроезлэсь Виктор Черномырдинлэсь, вице-премьерлэсь Анатолий Чубайслэсь но Президентлэн администрациеныз кивалтӥсьлэсь Валентин Юмашевлэсь. Кун Кенешлэн пресс-службаез. *** Удмурт Республикаысь Кун Кенеш но Правительство секыт мылкыдын иворто Удмурт Республикаысь дано юрист, юридической наукаосъя доктор, Удмурт кун университетысь профессор Овсиенко Василий Васильевич дырызлэсь вазь улонысь кошкем сярысь но ӵыжы -выжыосызлы мур кайгыремзэс верало. Овсиенко Василий Васильевич 1997 арын 15 декабре дырызлэсь вазь улонысь кошкиз юридической наукаосъя доктор, профессор Василий Васильевич Овсиенко. Василий Васильевич Овсиенко вордскиз 1925 арын 11 январе. Быдӟым Отечественной ожлэн тылӝуаз шедиз. Сӧсыртэмын вал. Ожмаськемез понна трос орденъёсын но медальёсын пусъемын. Хабаровскысь юридической институтэз быдтӥз. 1952 арын аспирантураез йылпумъяз, юридической наукаосъя кандидат луиз. Уно аръёс ӵоже дышетӥз Донецкысь вузкаронъя институтын. 60-тӥ аръёсы ужаны выжиз УССР-ысь Наукаосъя академилэн Экономикая институтаз. 1972 арын юридической наукаосъя доктор луиз. Та дырысен Василий Васильевич ужаз Удмурт кун университетын. Со экономикая но правоя (бӧрысь - юридической) факультетэз кылдытӥсьёс пӧлы пыре, та факультетлэн нырысетӥ деканэз вал, "Хозяйствоя право" кафедраен кема кивалтӥз. Василий Васильевич тодон-валанъёсыныз, быгатонлыкъёсыныз уно аръёс ӵоже студентъёсты тодматылӥз. Солы "Вылӥ школалэн отличникез", но "Удмурт Республикаысь дано юрист" нимъёс сётэмын. Василий Васильевич Овсиенко сярысь тодэ ваёнъёс сюлэмъёсамы пыраклы кылӥзы. Удмурт кун университетысь ректорат, Правоя, социальной кивалтонъя но кышкытлыклэсь утиськонъя институтысь эшъёсыз. Гажано эшъёс! Вань сюлмысьтымы, шуныт кылъёсын ӟечкыласьком тӥледыз праздникеныды - Кышкытлыклэсь утись ёзъёсын ужасьёслэн нуналэнызы, но Атыкай музъеммес секыт адӟонлэсь утись ёз кылдытэм дырысен 80 ар тырмемын. 1917 арын Калык комиисаръёслэн кенешсылэн постановлениеныз ВЧК кылдытэмын вал. Ворсдкем шаермылэн историез со весяклы кылёз. Сайкыт йырын, пӧсь сюлэмын но чылкыт киосын лэсьтӥзы ас ужзэс кышканэз валасьтэм пиос но нылъёс. Кышкытлыклэсь утиськонъя ёзъёс та дыр ӵоже нимзэс уно пол вошъязы, одӥгъёсыз политикъёс мукетъёсызлы интызэс сётӥзы, нош та ёзъёсысь устоосыз ужасьёс ӟеч сямъёссэс ӧз ыштэ. Ми, быдӟым Россиын улӥсьёс, тӥляд тыршеменыды котьку но оскылӥм, шаермы, асьмеос но, ӵыжы-выжыосмы но секыт адӟонлэсь шудтэм учырлэсь утемын шуыса. Озьыен, огшоры адямиос сярысь, котькуд семьялэн тупаса, шудо-буро улэмез сярысь сюлмаськемды вылӥ дунъяське. Кышкытлыклэсь утиськонъя ёзъёсын ужасьёс, лулысь-сюлмысь сӥзиськом тӥлед но семьяостылы тупан, юн тазалык, ужады быдӟмесь вормонъёс. Удмурт Республикаысь Кун Кенеш . Удмурт Республикаысь Правительство. Ӟечкыласьком! "Удмурт дунне" газетлэн редакцияз ужасьёс сюлмысьтызы ӟечкылало акциосын "Удмуртнефтьпродукт" огазеяськонлэсь валтӥсь директорзэ Удмурт Элькунысь Кун Кенешлэсь дептутатсэ Николай Семенович Сычевез 50 арес тырмеменыз. Шуд но тазалык, ужады азинсконъёс тӥледлы, гажано Николай Семенович! Автономия сярысь вераськон Кылем арын Россиын национально-культурной автономиос сярысь федеральной закон кутэмын вал. Соин валче Москваын кылдыло ини бигер, чиган, армян, латыш, казах национально-культурной автономиос. Москваын улӥсь удмуртъёс но та сярысь кылпум поттыло. Тани 15 толсуре Герд нимо удмурт национально-культурной огазеяськон аслаз пичи кенешаз автономия кылдытон сярысь вераськон ӝутӥз. Люкаськемъёслы удмуртъёслэн тӧрозы Владимир Танаев та ужрадлэсь кулэлыксэ валэктӥз. Юанъёс, споръяськонъёс вал. Маин бен ас бордаз кыске та выль форма? Национально-культурной автономия бадӟымесь луонлыкъёс сётэ вордскем кылэз, калыклэсь культуразэ утьыны но азинтыны. Нимысьтыз газет, журнал кылдытыны, школа усьтыны, нылпиосты вордскем кылын дышетыны луоно, озьы ик пӧртэм калык куспо огазеяськонъёслэн ужазы пыриськыны быгатоно. Та ужез радъянын бадӟым юрттэт сётозы кун властьлэн но интыысь аскивалтонлэн ёзъёссы. Быгатозы-а бен Москваысь удмуртъёс та ныпъетэз ас вылазы нуыны? Соослэн лыдзы, бигеръёсын но армянъёсын ӵошатыса, трослы ӧжыт уго. Ачиз ужпум но умой тодэмез- валамез кулэ каре. Кенешемын вал, вуоно арлэн кутсконаз нош ик люкаськыны но та ужпумез йылаз-пумаз вуттыны. Кенеше люкаськемъёсты шумпоттӥз Удмуртиысь егитъёслэн азьветлӥсьсы Надежда Уткина. Со али Москваысь театральной искусствоя кун институтын дышетске, эстрадая факультетын визь-тодон люка. Та ӝытэ со тодматӥз яратоно кырӟанъёсыныз. Маргарита Сельченкова, Удмурт Элькунлэн Постпредствояз ужась. К. Гердлэн тусбуеныз конверт Гознаклэн Пермьысь печатной фабрикаез поттӥз К. Гердлэн тусбуеныз конверт. Удмурт калыклэн быдӟым пиезлэн, кылбурчилэн но тодосчилэн тусбуез мышкын адӟиське солэн яратоно Валодор палъёсызлы кельшись ӵыдонтэм чебер гужем инкуазь, нош ачиз со улэп кадь, визьмо синъёсын учке шорамы. Туссэ пуктэм суредась Б. Илюхин. Конверт поттэмын К. Гердлэн вордскемез дырысен 100 ар тырмонэн валче. Та дырозь одӥг удмурт писательлэн но тусбуез конверт вылын ӧз печатласькылы на вал. П. Поздеев. КГБ ӧвӧл ни ке но... Праздник нунал азьын милям корреспондентмы пумиськылӥз ФСБ-лэн Удмурт Республикая Управлениысьтыз одӥгеныз кивалтӥсен, В. В. Чирковен. Со подполковник, органъёсын 20 арлэсь кема ини. Дышетскемезъя - филолог. Солы - 45 арес. Кышнояськемын, вань нылыз. - Госбезопасностьын ӧвӧл, дыр, огшоры но капчи ужъёс. Озьы ке но, мае тӥ нимысьтыз пусйысалды? - Мае ми лэсьтӥськом, ваньмыз кулэ государстволы. Озьы ке ӧй луысал, малы милемды возьыны кулэ? Ужаськомы, Закон косэмъя. Азьвыл сямен ик нырысь интыын - шпионаже нюръяськон. Куд-огез серекъяло: кыӵе, пе, шпионъёс туала дыре луозы на, вань государствоосын эшъяськиськом бере. Озьы ке луысал... Кӧня вань государствоос, сомында ик шпионъёс но. Сотэк уг луы. Разведка-а, шпионаж-а шуод но, соос котьку сямен кык ӧртӥ мыно: иностранецъёс, утчаськон - нырысетӥез, асьмелэнъёс соослы юртто - кыкетӥез. Берло дыре уката но бадӟым йыр висён вае терроризм. Уката но сюлэмшугъяськытэ пыӵал тӥрлыкез бергатон. Ижевск трос пӧртэм пыӵал тӥрлык поттэ бере, татчы быдэс Россиысь но, матысь странаосысь но преступникъёс кыстӥсько. Милям кужыменымы берло аръёсы гинэ шараямын вал куинь лушкем ужась мастерскойёс. Отын "кибашлыос" заводъёсысь лушкам ёзъёслэсь ож пыӵал тӥрлык лэсьто вылэм. Одӥгысьтыз гинэ ми таламын 25 Калашников автоматъёсты. МВД-ен та ласянь ӵош ужаммы юрттӥз трослы кулэстыны заводъёсысь детальёсты поттонэз. Озьы ке но, преступникъёс олокыӵе но кескич амалъёс утчало пыӵал тӥрлыкез лушканы. Кемалась ик ӧвӧл ми куспетӥ каримы 3 сюрс Иж-71 пистолетъёсты нуонэз. Документъёсъя учконо ке, соос Кипре вузаны чакламын. Нош зэмзэ ке, соосты "пӧсь" точкаосы нуыны медо вал. Берло аръёсы республикамы, предприятиос но учреждениос паськыт кусыпъёс тупато сьӧрлось государствоосын. Преступникъёс но со кусыпъёсысь пайда поттыны туртто. Оборонной заводъёсысь дуно материалъёсты лушкало но кунгож сьӧры вузаны тыршо. Чепецкой механической заводысь лушкам уранэн герӟаськем учыр быдэс дуннелы тодмо луиз. Ярам коть, та кышкыт ужез ми дыраз куспетӥ карыны быгатӥм. - Со пумысен юан кылдэ, Виктор Васильевич: республикамес иностранецъёс понна "усьтон" урод- а, умой-а? - Веранэз ӧвӧл, туж умой. Тӥ, оло, уд но оске но, ӵапак Удмуртиысь КГБ республикамес "усьтон" сярысь нырысь ик вераськон ӝутӥз. Ас кожаз, пытсаськыса улон ӝегатыны кутскиз экономикалэсь азинсконзэ, ыштонъёс адӟо вал вузкарон, наука, культура удысъёс. Со дыре ик, республикаез усьтон милемлы уно сюлмаськонъёс ваиз. Меӵак вераса, ми дась ӧй вал выль куронъёсъя ужаны. Дугдылытэк дышетсконо луиз, ужан амалъёсты вошъяно. Ваньмыз иностранецъёс сярысь вераны уг ке но луы, но куд-огез мултэс саклык висъяло асьме дорысь секретной объектъёслы. - Виктор Васильевич, кызьы реформаос шӧдӥськизы органъёс вылын? - Туж ик умоен ӧз, уката но 90-тӥ аръёслэн кутсконазы. Вывескаосты, кивалтӥсьёсты вошъян, пумтэм реорганизациос - ваньмыз со секытэн ортчиз ми понна. Одӥг гинэ лыдпус верало: со вакытэ ми дорысь кошкизы 40 процентэз эшъёсмы, тужгес но быгатӥсьёсыз, визьмоосыз. Соин ӵош ик умоез но вань. Табере нимысьтыз Законэн тупатэмын милям статусмы, ужпумъёсмы но правоосмы. Таиз ласянь капчигес луиз ужаны. Вань калыклэн сямен ик, милям но вань сюлэмшугъяськонъёсмы. Туж секыт луиз ужасьёсмылы улон инты сётонэн. Милемлы кемалась уг будэтъяло ни уждун, сое ӵем ӝегатъяло. - Ужасьёсты уг кошко-а, чидало? - Уг, уг кошко, соизлы шумпотоно гинэ. Ми дорын тыршо ас ужзэс вань сюлэменызы гажась адямиос. Сое коньдонэн уд мерта. Реформаос кутскем бере, кызьы верай ини, трос эшъёсмы кошкизы ке но, ми доры котыр ласянь зол егитъёс лыктӥзы. - Кызьы дунъясалды республикаысь властьёсын кусыпъёстэс? - Кызьы тодмо, милям управленимы - федеральной службалэн ёзэз. Но ми Удмуртиын ужаськом ук. Соин ик республикалэсь, татысь предприятиослэсь, организациослэсь но вань калыклэсь кулэяськонъёссэс чакласьком. Республикаосысь но интыосысь органъёсын матысь кусыпъёстэк ми асьмелэсь ужпумъёсмес быдэсъяны ӧм быгатысалмы. Тае умой валало вань кивалтӥсьёс, соиз туж ӟеч. - КГБ-ез ас дыраз вормонтэм кужымен лыдъяло вал. ФСБ но сыӵе ик-а? - Огдышем сямен милемды КГБ шуыло ке но, ми мукетэсь ини. Валамон, тросэз ужан амалъёсмы кылизы, но шӧдскымон воштӥськиз органъёслэн пуштроссы, законодательной но нормативной база. Куштӥським куд-ог кулэтэм удысъёслэсь, кылсярысь, политической сысклэсь, идеологилэсь. "КГБ вормонтэм" шуон потэ вал разведка, контрразведка, охрана, границаосты утён, правительственной связь одӥг липет улын ужамысь. Табере соос ваньмыз нимазы. Бен, ми КГБ ӧвӧл ни. Озьы ке но, асьмелэсь ужпумъёсмес азьвыллэсь урод ум быдэсъяське шуыса оскисько. Бамъёсысь гожтэмъёсты дасяз Геннадий Коряков ФСБ-лэн Управлениысьтыз ужасьёслэн юрттэменызы. Туспуктэмъёсыз Владимир Камашевлэн. В. А. Башкиров, госбезопасностьысь ветеран. Со мозмытӥз "мурӝолын пукись" адямиез. Вакчияк вераса Удмуртиысь, огъя политической но оперативной югдурез чакласа, Кышкытлыклэсь утиськонъя федеральной службалэн Удмурт Республикая управлениез берло аръёсы данак кужымзэ висъя контрразведкалы, государственнй секретъёсты утёнлы, бадӟым кышкыт учыръёсты алонлы но радъям йыружъёсын нюръяськонлы. Политикаен но экономикаен герӟаськем иворъёс, соос пӧлын разведательнойёсыз но, кудъёссэ шедьтӥз управление вылӥ дунъямын вал Россиысь РСБ-ын. Та иворъёс сётэмын вал Президентлэе соосты лыдэ басьтӥзы РФ-лэн Правительствоез, Сьӧрлось калыкъёсын кусыпъёсъя но Обороная министерствоос. Управленилэн берло аръёсы ужамаз вань трос пусйымонэз. Соос пӧлын - Ижевскын улӥсьлэсь иностранецъёсын шпион луон вылысь кусыпъёс тупатыны туршемзэ шараям, ЧМз- ысь 100 кг ранэз лушкемен герӟаськем уж, ожтӥрлыкен лушкем вузкарисьёсты кырмон (соку таламын вал Калашниковлэн 50-лэсь уно автоматъёсыз), Н. А. Перевощиковез но солэсь семьязэ виисьёсты шарян но кутон, Ижевскысь таможняысь взяткаен герӟаськем уж. Преступникъёслэсь таламын 164 килограмм уран, 54 килограмм индий но ниобий, 36 тонна никель, 40 тонна ыргон, 27 тонна бронзы, 20 тонна магний, 1,5 тонна ковальт, 15 тонна алюминий, 1 тонна вольфрам. 1996-1997 аръёсы таламын 58 пыӵал тӥрлык, 14 килограмм радиоактивной арбериос, 2 килограмм наркотикъёс (одӥг килограммез сылэ 77 миллион манет). Куӟебай Гердлэн вордскемез дырысен - 100 ар Вань сюлмысь! Кияса ёросысь Карамас-Пельга школаын ортчем ужрад сӥземын вал Куӟебай Гердлэн вордскемез дырысен 100 ара тырмонлы. Куное вуылӥзы ёросысь Вуж Салья, Юрмалай (Ермолаево), Лутоха но Первомайск школаосысь дышетскисьёс но дышетӥсьёс, роноын, Калыкез дышетонъя министерствоын, гурт кенешын, газетъёслэн редакциосазы ужасьёс. Нянь сукыриен, жингрес кырӟанэн, задор эктонэн пумитазы кузёос кунооссэс. Быдэс школаын капчи мылкыд вал со нуналэ. Ваньмыз - дышетскисьёс но, дышетӥсьёс но, сиён дасясьёс но - сюлмысь дасяськиллям ужрадлы. Нош быдэсак ас вылаз басьтэм удмурт кыллы но литературалы дышетӥсь Светлана Викторовна Макарова: удмурт кылбурчилэсь, тодосчилэсь, югдытӥсьлэсь ортчем сюрессэ азьвыл ик ӟеч-ӟеч эскерем угось. Светлана Викторовналэн но дышетскисьёслэн Алевтина Андрияновалэн, Алексей Рябинлэн, Валентина Артановалэн но верамысьтызы Куӟебай Гердлэн улон-вылон сюресэз сярысь трос тодӥмы. Ассэ Кузьма Павловичез шудӥз культура удысын ужась Григорий Собинов. Палэнж ӧз кыле "Чингыли" нылпи садын ужасьёс но: школаысь дышетӥсьёсын ӵош быдэстӥзы Куӟебай Гердлэн кылбуръёсызъя кырӟанъёсты. Соос пӧлысь огезлы гур гожтэм Карамас-Пельгалась крезьгурчи Николай Уткин. Покчи классъёсын дышетскисьёс дасяллям кылбурчилэсь "Гондыръёс" выжыкылзэ- поэмазэ. Веразы мадиськонъёс, серемс чуръёс, кылбуръёс. Юнме сюлэмшугъяськиз дышетӥсь Ольга Павловна Главатских: зэмос артистъёс будо. Школаысь вань дышетӥсьёс та нуналэ дӥсялляс удмурт дӥсь: макем чебер адскизы. Сыӵе ик яркытэсь вал искусствоосъя школалэн гуртысь ёзаз дышетскисьёс: соос но ужрадэ шулдыртӥзы. Та праздниклы ик дасяськыса радъяллям пинал суредасьёслэн ужъёсынызы адӟытон. Со но сӥземын Куӟебай Гердлэн вордскемез дырысен 100 ар тырмонлы. Лыктэм куноос тодматскизы янгыштэк быръемъёслы сӥзем книгаосын но. Возьматонзэс но озьы ик нималлям - "Ӵашъем нимъёс". Татын ик - Куӟебай Герд сярысь веранъёсын сузьет, тодмо журналистлэн Николай Евсеевлэн "Пеймыт уй гинэ вералоз" книгаез. Со ик маде Карамас-Пельгалась Кадровъёс сярысь. Соосты угось, кулаке поттыса, кыдёкысь шаеръёсы келяллям вылэм. Праздник йылпумъяськем бере, дышетӥсьёс, соослэн ӵош ужась эшъёссы гинэ люкаськизы. Вылӥ дунъямын вал та ужрад: Куӟебай Герд сярысь та дырозь туж ичи тодӥськомы вылэм ук. Ӟеч кылъёс веразы шаерысьтымы Калыкез дышетонъя министерствоын ужасьёс А. С. Березина но Ю. А. Фомин, райсоветысь иворъёсъя центрен кивалтӥсь Т. Е. Васильева, роноысь инспектор Г. П. Михайлова, Светна Викторовна Макаровлэн ӵош ужась эшъёсыз Г. Р. Бигбашев, С. Н. Мазитова, Р. М. Лопатина, Л. М. Печникова, О. П. Главатских но мукетъёсыз. Таӵе ужрадъёс табере толэзьлы быдэ луозы. Вуоноез пумиськон ортчоз ёросысь мукет школаын. Г. Парфёнов. Пумиськонысь суредъёс. Туспуктэмъёсыз Владимир Камашевлэн. Куамын ареслэсь кема... мурӝолын Николай Шкляев мурӝолэ ватскиз 1944 арын. Со аре дас тямыс аресъем пияшез фронтэ басьтӥзы вал. Ожмаськыса ӧз вуы, немецъёс ки улэ сюриз. Пегӟыны быгатӥз но фронт шоры воксё киыныз шонтӥз, дораз, Шаркан палъёсы бертӥз. Татын сое пумитазы семьяез но гажанэз, кудӥз ӝоген луиз Николайлы кышно. Вордскем гуртаз улыны дизертирлы кышкытгес потӥз. Атайзы выль семьялы корка палэнэ басьтӥз, Якшур-Бодья районысь Чур посёлоке. Егитъёс уйёсы отчы выжизы. Николай выль юртъераз мур гу гудӥз - аслыз "патер". Пыран-потанэз мурӝол ласянь тупатӥз, мудэт ултӥ. Мукетсэ лэсьтӥз кыре: марысь мар ке, пегӟыны. Озьы ик кошкиз улонэз нуналысь нуналэ, арысь аре. Зэм, гуаз Николай ӧз улы, шуыны луоз, ватскыны гинэ возиз. Улӥз коркан. Но ӟезьыез котьку ӵогамын, азьпалаз пуны думемын. Кин ке лыктӥсь вань ке, Николай соку ик караз пыре. Уйёсы гидкуазяз мар но со ужа, матысь нюлэскы пота. Туж лушкем, шыпыт ке но ассэ возьыны тыршиз, адӟисез-кылӥсез шедем ик. Ивор кылӥськем, "кытчы кулэ"... КГБ-лэн районъя старшой уполномоченноез Виталий Башкиров вуэм иворлэсь ӧз шоналскы, сак кариськиз. Нылкышно (Шкляевлэн кузпалыз) огназ улэ кадь, нош юртъер котыраз пиосмурт кибервыл, нырысь учкыса ик, син шоры йӧтэ. Трос муш, пудо вордэ, гын сапег лэсьтэ. Огназ кышномуртлы сыӵе юртъер возьыны вормонтэмгес кадь, собере малы солы огназлы сомында ваньбур? Вылаз ик, кузё кышно паймымон тросэн басья сиён-юон? Хм, мар ке но вань татын, малпаз сак чекист. Берпуметӥ шугъяськонъёссэ сайкизы пиосмурт ул штанъёс. Огназ улӥсь кышномуртлэн азбараз куасьтыны ошемын... Кин татын ватскемын? Тушмон разведкалэн резидентэз? Сектант? Йыруж лэсьтэм преступник? Котькин мед луоз, но тодыны одно ик кулэ. Артысь чугун сюрес кузя ЧМЗ-е литерной эшелонъёс ортчо, Чурын кунгож сьӧрысь специалистъёс ужало... Сьӧлыкозь кема ик ӧвӧл. ... Ог нуналэ Шкляева доры (валамон, "бызьымтэ" нылкышно сыӵе фамилиез ӧй вал) куинь кузя шӧмо "пӧйшурасьёс" вуизы. Башкиров кузёослэсь ӟезьы усьтэмзэс витьыса ӧз улы, забор вамен пыриз. Соин ик Николай ватскыны ӧвӧл вуэм. "Пӧйшурась" - оперуполномоченной соин корказьын пумиськиз. Мар карыны малпаськытозяз, соиз кытчы ке ышиз. Воргоронъёс кузё кышноез ваем саламъёсынызы куноятӥзы но нюлэскы кошкизы: гондырез, пе, ӝутомы. Корка мар но со котырзэс кельтӥзы. Нюлэскысен соос кылзо, кызьы корка кельтэм котомка "ивортэ": "Коля, Коля..." Мар бен, ваньмыз валамон. Ӝоген Чуре быдэс уллёен вуо чекистъёс но милиционеръёс. Час но ӝыны ӵоже утчасько, нокинэ но уг шедьто. Зэм, мурӝолысь огпалыз мудэт, кокаськыку, чузъяське кадь. Одӥгез оперативник ӵектэ отчы очередь сётыны. "Эн ыбылэ", - кылӥське мудэтысь. Собере борддор усе но мудэт улысь воргорон потэ. Сьӧд тушез веник быдӟа, ачиз гондыр кадь таза. Со ик вал Николай Шкляев. Ӝоген тодмо луиз: со вылын нокыӵе йыруж но ӧвӧл, йырсазьыз ӧвӧл сураськемын. Малы 32 ар ӵоже ватскыса улэм? Ӧвӧл оскем амнистиослы. Осконтэм мылкыдзэ юнматӥллям эшъёсыз-сектантъёс (ӧвӧл ик янгышам Башкиров). Мар бен, адями аслыз ачиз кыл кутон тупатэм. Шкляевез арест улысь мозмыто, уголовной ужзэ дугдыто, паспорт сёто. Ул, кызьы быгатӥськод. Вот угось, уг пӧрмы ни улыны калык радъя. Шара улыны кутскемез бере, нырысетӥяз ик 9 мае Чурысь фронтовикъёс дезертирлэсь ымнырзэ лыз-вож каро. Кошконо луэ мукет гуртэ. Со али но улэп на, таза. Я, мед улоз адями, муртлэсь няньзэ уг сиы ук. Виталий Александрович Башкиров та виын пенсионер ини, отставкаысь подполковник. Со но таза, чырткем. Чурын луэм учыр сярысь серемпыргес тодаз вае: - Ӧз удалты соку асзгынмем шпионэз кутыны. Дизертирез шараяме понна медаль но, пельпумам кизили но ӧз сётэ. Ярам коть, адямиез пытсэтысь югыт дуннее поттӥ. Нош серемтэк верано ке, соку шедьыло на вал война вылтӥ секыт йыружъёс лэсьтэм преступникъёс! Нокинлы но уг люкето кадь, шып уло, но соосын курадӟытэм адямиосты яра шат вунэтыны? Котькуд сьӧлык понна дунзэ, вазь-а, бер-а, но одно ик тырыны кулэ. ВЫЛӤ НИМЪЁС СЁТЭМЫН Кылемаз покчи арня нуналэ культура удысын ужасьёс пусйизы асьсэлэсь нуналзэс. Соин валче Операя но балетъя кун театрын ӟеч концерт ортчиз. Люкаськемъёсты шулдыртӥзы удмурт егитъёслэн "Катанчи" театрзы, удмурт фольклор кырӟанъя "Айкай" театр, ёросъёсысь но городъёсысь агитбригадаос. пинал усточиос, Драмая удмурт кун театрысь егит актёръёс. Культура удысын ужасьёсты ӟечкыласа вераськиз министр Геннадий Чайников. Та нуналэ ик тужгес устоосызлы сётэмын вылӥ нимъёс. Егитъёслэн "Катанчи" театрысьтызы актёр Александр Баймурзин луиз Удмурт Элькунысь калык артист! Ӟечкыласьком! Вормизы алнашъёс Драмая удмурт кун театрын ортчиз "Ӝужась кизилиос" концерт. Асьсэлэсь устолыксэс возьматӥзы кызьы ке чылкак тодмотэм, озьы ик тужгес тодмоосыз кырӟасьёс. Азьвылгес таӵе ӵошатсконъёс вал ёросъёсын. Йыльпумъясь концертын ӟеч быгатонлыкъёссэс возьматӥзы Воткалась (Воткинскысь) Ольга Вахрушева, Ася Лопатина, Пичи Пурга ёросысь Андрей Смагин, Завьял ёросысь Татьяна Петухова, Можга ёросысь Светлана Кононова, Юкаменск палась Анна Стрелкова. Ӧжытак вӧжоосызгес (арлыдоосызгес) пӧлын - Кияса ёросысь Марина Галичанина, Кизнер ёросысь Николай Белков, Вавож ёросысь Наталья Матвеева, Воткалась Ольга Васильева, Шаркан ёросысь Татьяна Сидорова, Башкириысь Светлана Тимирханова. Со сяна, уно мукетъёсыз. Тужгес вылӥ интыосты утӥзы алнашъёс - Анна Плотникова но Татьяна Ишматова. Концертлэн пумаз учкисьёслы дэмламын вал тужгес яратоно кырӟасьсэс синйылтыны. Вормисе потӥз Селта ёросысь Ангелина Воронова. Е. ВИНОГРАДОВА. Кыӵе нош тол - Юг лымытэк, Бамдэ, нырдэ но Кынтытэк? Берекет Юртты аслыд ачид Ньылонды ке висе Ангинаен курадӟыны кутскиды ке, кӧня ке час ӵоже чечыен валче сюсез сыске. Горд кушманэз стакан тыр вуштоно, отчы одӥг сиськон пуньы уксус ватсано, кӧня ке дыр ӵоже пукетоно. Соксэ виятыса, соин ньылондэс, ым пуштэс гылъялэ. Ангинаез эмъяны юрттэ сиёнэ кутӥськись гвоздика но. Сое ым пушкын сюпсьыса возёно. Йырын сугонэз вуштон пыр поттоно, соксэ пызьыртоно. Юылоно ӵукна но ӝытазе одӥг сиськон пуньыен. Вуштэм сугонэн уйлы чыртыяды компресс лэсьтэ. Ньылонды кемагес ке висе ини, ымпуштэс, ньылондэс часлы быдэ гылъялэ лимон кислоталэн 30 процентъем суретэныз. Умой юрттэ выль кубисталэн куарез. Сое чыртые ляконо но вылтӥз ыж гон шарфен яке кышетэн бинялтоно. 2 час ортчыса, куарез вошъяно. Л. Васильева. Берекет Вашкала сямъёс, йылолъёс Вашкала нюжа уг чигиськы Пӧртэм калыкъёслэн вашкала дырысен асьсэлы гинэ тупась сямъёссы, йылолъёссы вань. Соос выжыысь выжые утисько, мӧйыослэсь адӟем каро егитъёс, озьы арысь аре, даурысь дауре чигиськонтэм нюжа кыстӥське. Зэм, дыр ортчемъя, соос кӧнялы ке воштӥсько, маиз ке но вуныса кыле, яке вакытлы тупась кыӵе ке но выльдӥськонъёс пыро. Соин ик али выжыятыса вераны шугъяськоно, кытысь но кызьы, кылсярысь, кылдэмын маскара дӥськутъёсын пӧрмытсконъёс, чеберъяськонъёс, ымнырез тодмантэм карыса лэсьтэм маскаос, пӧртмаськонъёс, кинлы ке, малы ке ӧпкельыса курон-веранъёс, вазиськонъёс (заклинаниос). Али трослы воштӥськемын ини гуртъёсын ортчытъяськись шутэтскон ӝытъёс, кыӵе ке юбилейлы, бусы ужъёслы сӥзем шулдыръяськонъёс. Вашкала йылолъёс но сямъёс ӟечгес пыӵаса кылемын, кылсярысь, сюанъёсы, Выль ар шулдыръяськонъёсы, Толсур (Рождество), Ымусьтон (Крещение), Вӧй дыр (Масленница) но мукет праздникъёсы. Арлэн вакытэзъя вашкалаосмы дӥськутъёс но пӧртэмесь дасяло вал. Кылсярысь, Толсуре но Вӧй дыр празднике егитъёс песянайёссылэсь шыкыс (сандык) пыдэсъёсысьтызы самой чебер дӥськутъёссэс (шыркунъёсын, чингылиосын) дӥсяло, ымныразы маска поно. Нош шубаосты, тулупъёсты вылазы берыктыса дӥсян сямъёс, воргоронлэн - нылкышно, нош нылкышнолэн воргорон дӥськут дӥсямез кинлы меда тодмо ӧвӧл. Мӧйыослэн верамзыя, секыт крестьян ужез быдэстэм бере, гуртоос быгатылӥзы шулдыръяськыны но. Гырон быдтон-а со, турнаны потон вакыт-а, ю-нянез октонлы йылпумъян-а, котькудӥз праздник ортчытӥське вал кутэм сямъя, вашкала йылолъя. Юн кусыпъёс возьылӥзы асьсэ ӵыжы-выжыосынызы. Озьы гуртын шулдыръяськонъёс нимазы ӧз ортчылэ, артысь гуртъёсысь но мыло-кыдо пыриськылӥзы. Тани, кылсярысь, Селта районысь Халды, Виняшур-Бия, Жайгурт, Якимовцы, Чаня-Бия, Квашур гуртъёсын улӥсьёс ог-огенызы туж тупаса но матысь улӥзы, секыт бусы но гурт ужъёслэсь ваньмытскемзы бере, огинын шулдыръяськылӥзы. Азьлогес аръёсы мыным трос пол шуд усьылӥз маскара дӥськутъёсын, маскаосын дӥсяськем муртъёсын пумиськылыны, соослэсь шулдыръяськемзэс учкыны. Верало Селта, Сюмси ёросъёсысь адӟемъёсме. Тросэз шулдыръяськонэ пыриськемъёс пӧйшуръёслы - гондырлы, ӟичылы, кионлы, луд кечлы, атаслы - пӧрмытскемын вал. Селталась И. Семеновен, Г. Русскихен, Чаня-Бияысь А. Чушкаловаен, Юбериысь Т. Зыкинэн (соослэн туж умой утиськем пӧйшур дӥськутъёссы) пумиськылонъёс-вераськонъёс монэ таӵе малпанэ вуттӥзы: котькудӥз маскара дӥськутэн пӧрмытскем мурт мукетъёсызлы тодмантэм кариськыны вырылӥз. Дӥськутэн гинэ ӧвӧл, ымнырзэ но, куаразэ чылкак воштылӥз. Зэмзэ но, уд тодма, кин луэм "кеч", кин - "гондыр". Тани Юбериысь В. Ильиных, кылсярысь, "акалы" пӧрмытскем. Вылаз така шуба дӥсямын, бордаз такалэн сюръёсын йырыз, гижыосыныз валче кукъёсыз, быжыз юнматэмын. Таӵе маскаръяськонъёс лыктэм калыклы шулдыр, капчи мылкыд кылдыто. Праздник зэмос шутэтскон нуналлы пӧрме. 1948 арын гожъям материалъёсъя но аслам адӟемъёсыя лыдӟисьёслэн син азязы пуктэме потэ гуртын сюан ортчытэмез. Татын зол пыӵамын христианъёслэн йылолъёссы но сямъёссы. Со адӟиське ини маскара дӥськутъёсын пӧрмытскем адямиос вылысь но. Кырӟанъёсын, курон-веранъёсын, вазиськонъёсын егитъёслы шудо-буро улон куро: нылпиоссы тазаесь мед вордӥськозы, егитъёс мӧйыослы мед юрттозы, соослэсь мед кылзӥськозы, ог-огзэс яратыса но тупаса мед улозы, ӟеч ю- нянь басьтыны мед быгатозы, пудо-животсы мед удалтоз. Маскаръяськисьёс нылпи вайыны дасяськем анаез возьматыны тыршылӥзы, дэремзы улэ миндэр, куро тырылӥзы. Сюанлэн кыкетӥ нуналаз шулдыръяськон эшшо но юнгес пуромылӥз. Эктонъёс, пӧртэм шудонъёс, выль кенлэн кияз ӟустариослэсь вурем мунёез лэзян но мукет. Мар но уг малпало лыктэмъёс. Выж вылэ пила пызь пазяло но коньдон куяло. Выль кенлы сое ӵужыны но коньдонэз ӝоггес октыны кулэ. Бервылыз чылкыт мед луоз. Луылэ вал озьы но: шуом, выль кен ӵужыса уг ке вутты, ӵужонзэ куштэ но шуэ: "Кызьы улэме потоз, озьы уло, аслам уже!" Эмеспилы мукет уж сёто. Пу вандо но пуклёкъёсы векчи коньдон шукко. Эмеспи со пуклёкез писъёслы озьы пильылыны кулэ: коньдон медаз уродмы. Маскара дӥськутъёсын дӥсяськемъёс ик шулдыръяськыса, серекъяса-мактаськыса, шуласа вуоно кузпалъёсты ошмесэ вулы васькытъязы, сутылӥзы куро, егитъёслэсь нырысь ӵош ортчытэм уйзэс "возьматыны" тыршылӥзы. Пумен нылъёсты гордэктытӥсь такмакъёс (частушкаос) малпаллязы, эмеспилы, кенлы, анай-атайёслы, мукет ӵыжы-выжыослы серемесэсь курон-веранъёсын вазиськылӥзы. Али ке но сюанъёсын утисько на таӵе йылолъёс но: вуоно кузпалъёс шампанской юэм посудаоссэс, йыр йылтӥзы лэзьыса, музэ кушто, выль кенлэн пыд азяз яке корка азьын горшокъёсты но мукет посудаез сӧрыло. Нош кинлы меда тодмо ӧвӧл Вожо дыръя пӧртмаськыса ветлонъёс. Пырем мурт корка кузёлы ӟеч кылъёс вера, ӝӧк выл тыр сиёнэн-юонэн, гид тыр пудоен мед улоз, ю-нянез мед удалтоз шуыса. Пӧртмолы сёто кузьымъёс, пыжиськемъёс, курег пуз, пушмульы яке мукетсэ. Таӵе йылолъёс гуртоослы юрттылӥзы ог-огзылы матэ луыны, ӵыжы-выжыос кариськыны, тупатэк улӥсь бускельёслы яке ӵыжы- выжыослы кусыпсэс тупатыны. Маскара дӥськутъёс шулдыръяськисьёс пӧлы нылпиос но пыриськылӥзы, тужгес но Выль ар, Быдӟым нунал (Акашка, пасха), Вӧй дыр праздникъёсы. Кырӟамзы, эктэмзы понна нылпиослы кузьымъёс, пыжиськемъёс сётъязы, кампет-пряник басьтыны коньдонэн шумпоттылӥзы. Выль ар шулдыръяськонъёс дыръя нылпиослы кузьмаллязы маскара дӥськутэн Тол Бабаез, мунёосыз, пӧртэм пӧйшуръёсыз, сюйлэсь лэсьтэм шуланъёсыз. Маскарчиосты учкыны, соослэсь мактаськем-вераськемзэс кылзыны, мӧйыослы сяна, нылпиослы но туж кельше. Гур вылысь, сэндраысь (полатьысь), гур азь палась шумпотонэн чилясь синъёс тодманы тыршо доразы пырем кунооссэс. Пӧртмоос мукет корка мыныку, нылпиос бӧрсязы итӥсько, эшшо азьпалтыны туртто: асьсэлы ӝоггес ӟечгес инты шедьтоно ук - мед адӟозы, мед кылозы маскарчиослэсь вераськемзэс. Маскара дӥськутэн дӥсяськемъёсыз котькуд коркан возьмаллязы. Угось соос кузё доры ванё-буро, шудо улон вайылӥзы, семьялы самой ӟечсэ гинэ вераса, праздник нуналэн ӟечкылаллязы. Нош корка кузё куноосызлы уг жаля вал кузьымъёссэ, ӝӧк вылэ пуктэм сиён-юонъёссэ. Кӧня ке воштӥськыса, выльдӥськыса, таӵе ӟеч сямъёс, вашкала йылолъёс асьме дырозь но вуэмын, солы шумпотоно. Умоез котьку аслыз сюрес шедьтэ - сыӵе улонлэн куронэз. В. ЛОГИНОВ, шаерчи. Шӧкыч МАЙБЫР УЛОН ВУИЗ! Ӟуч сямен асьмеос кемалась кырӟаны дышемын: "Без воды - и ни туды, и ни сюды!" Нош удмуртъёс, тужгес но Завьял ёросысь Лудӟи гуртын улӥсьёс, кызьы кырӟало меда? Колонкаоссы котькуд ульчаязы вань, соос пуктылэмын выльдӥськон яке реформаос вакытлэсь азьло, нош ву колонкаос вис карытэк бызё гуртлэн валлапалаз гинэ. Кык ву кыскон башняоссы пӧлысь али ужа одӥгез гинэ, нюк сьӧрысез. Бадӟым ульчазылэн вырйылаз пуктэм башняысь насосъёсыз толэзьлы быдэ тӥяськылӥзы но табере воксё дугдӥзы. Соин ик ортчем кӧс нуналэ иськемлэсь кузь ульчаостӥ адямиос пумтэм-йылтэм солань-талань ветлӥзы, мукет сямен вераса, нискылазы. Кин салазкиосы пуктэм бидонъёсын но ведраосын, кин - асьсэлэн машинаосынызы но мотоциклъёсынызы. Быдэс гурт калык нискыланы потэм, кожасалыд. Салазкиосты кыско пиналъёс но, огназы пересьёс но. Гурезь дурысь колонка дурын бадӟымесь черодъёс но люкаськылӥзы. Нош ву кулэ котькуд семьялы, асьсэлы юыны но, пудо люктаны но, мунчоосазы пыласькыны но. Сыӵе суредъёслы лудӟи калык пӧлысь нокин но шумпотӥсез уз луы. Мар кароно адямиослы, секыт югдуре шедьыса? Дыраз сюлмаськись луысал ке, насосэз воштӥсь но, ву кыскон тӥрлыкез тупатъясь но та дырозь шедьысал ни, дыр: вань ук со понна кивалтӥсьёс, аскивалтон, шуге-леке вуэм муртлы юрттыны дась луись муртъёс кулэ вал, дыр. Лудӟи гурт социализм вакытэ трос аръёс ӵоже "Правда" совхозэ пыре вал, берло аръёсы - акциосын огазеяськонэ. Водопроводэз Рим империысь рабъёс кӧня ке сюрс аръёс талэсь азьло тодо но лэсьто ке вал, табере, рыноке (куд-огез шуэмъя, урмем капитализме) выжем бере, сыӵе цивилизация куд-ог учыръёсы туж шуген сётске ини, шӧдске. Но табере гуртын, возетлэн кивалтӥсьёсыз, сельсовет яке администрация сяна, власть (тӧрлык) мукетыз но вань, нош калыклэн аслаз властез - гурт кенеш. Таиныз кивалтэ асьсэ гуртын ялан ужам Вася агай - Василий Петрович Дмитриев. Ваньзы куанермемын, ваньзы коньдон ӧвӧллы ӝожтӥсько. Соин ик, вылды, ву кыскон насосъёсты выльдон вылысь, котькуд семьялэсь (пичи-а со, бадӟым-а, со шоры учкытэк), 20 сюрс манет коньдон бичало. Кинлы со коньдон номыр но уг сылы, ёрмись муртъёс пунэмаськыса тыроно луизы, уката ик пенсизы басьтымтэ на вал. Я, табере юаны гинэ кылиз на: кудӥз власть гуртын югдурез ӝоггес тупатыны быгатоз, рынокен улонэз ушъясьёслэн-а, яке аслаз-а калыклэн? Башняез тупатъяны зэмос ӧнерчиос лыктозы-а, яке вань гуртэн вашкала сямъёсъя вемее люкаськылозы-а? Кӧня нунал кулэ луоз, вань гурт калыклы тырмыт юон ву сётон вылысь? Созэ асьсэос тодозы, вылды, нош рынокен "узыр" улонлэн чебер тодметэз адӟиське ини. Табере гуртын но, городын но коркаосын улӥсьёс вань услугаос понна коньдон ваньзэ асьсэос тырозы ни, дыр. "Майбыр" улон вуиз! Л. ФЕДОРОВ. Москваын кенешон Алигес "Сиданко" му вӧй компания Москвае люкалляз отчы пырись улосвылъёсысь иворъёсты вӧлмытӥсь ёзъёслэсь (газетъёс, радио но телевидение) кивалтӥсьёссэс. Вераськон мынӥз кызьы умойгес возьматоно нефть поттӥсьёслэсь ужзэс но соос азьын сылӥсь ужпумъёсты. Мугез тодмо. "Сиданкое" пыре асьмелэн одӥгез самой бадӟымез но кужмоез му вӧй кыскись предприятимы - "Удмуртнефть" ОАО. Со берло дыре арлы быдэ шорлыдын 6 миллионлэсь уно нефть поттэ, пайдаё ужа но "Сиданкоын" устоез огазеяськон лыдъяське. "Сиданко" но "Удмуртнефть" АО-ослэн кусыпъёссы но азьланезлы малпанъёссы сярысь материал вуоно номерын печатлалом. Г. РОМАНОВ. МОН ЖАЛЯСЬКО ТӦЛЭЗ... Кылбуро сузьет Эн куаретэ ӵук лысвуэз, пыдэз коттэ шуыса. Уг ке луы сотэк, эн поталэ шуныт коркась. Ачим мон суч-суч котмытозь пыласькысал, льӧль сяськае гинэ медам на куасьмы вал. Льӧль сяськае вылын лысву мед пукысал, лысву шапык... х х х Эн вазь, эн вера, мон шедьтӥсько ымдуръёстэ. Кулэ ӧвӧл кылъёс... Учкемедъя валай, шокамедъя шӧдӥ. Кидэ кутӥ - тодӥ. Мае али верай пӧсь шокам пыр - мукет дыръя, оло, уд кыл... х х х Вӧзам вал тон али гинэ. Кошкид... Кошкид?! Ма тон али но син азямН Небыт, шуныт сяська выллем тон адскиськод бус пыр. Мон мынӥсько дорад. Уг дыртӥськы, уг бызиськы, каллен вамыштӥсько. Тӧлӟоз ке бус - бен ӵок. Потоз шунды - я мед шунтоз. Зориз ке нош? Дӥсьме но куштыны мон дась - мед пылатоз золгес! Утё мон пужмерлэсь тонэ, уй пал тӧллэсь, соку дырто. Кулэ луиз ке туж, лобӟо - уг сёты кезьытлы. Небыт, шуныт сяська. Бус пыр каллен вамыштӥсько дорад: кема возьмам сяська уз тӧлӟы син азям, монэ ке со возьмам. х х х Вордӥськем нуналы. Эшъёсы пыро дорам. Ӟечкылало. Шуныт кылъёс верало. Сяська кузьмало. Но... сюлэмлы маке уг тырмы, гадь тыр шокчыны маке люкетэ. Тон вуид. Кыл но ӧд вазьы. Пальпотӥд синъёсыныд. Мон мур шокчисько сьӧрад ваем омырез. Тулыс омырез... тӧл шорын. х х х Кема лыктӥз тулыс, ӝог ортчиз гужем, туж вазь вуиз сӥзьыл. Зорен суро кезьыт тӧлъёс укно улам будӥсь улмопулэсь куаръёссэ жалятэк тугазы, ишкизы. Табере тани выльысь гужем шорын кадь кариськиз, быдэс нунал шундыё улэ, кесэген ортчись пилемъёс гинэ но уг адӟисько инбамын. Шунды шуныт сиосыныз маялтэ, веша. Пурысь гуждор ненег куаръёссэ мыче. Возь вылын кезьытлэсь утиськем сяськаос усьтӥсько. Лемлет пыръем сяськаоссэ усьтӥз укно улысьтым куартэк кылем улмопуэ но. Тае адӟыса, сюлэмам шумпотон улӟе, сое ворме паймон, собере - жалян. Син азям йыромем выль кен сылэ... ... Уйшоре ӝутӥськем тӧл нырысь лымыез вуттӥз. х х х Пеймыт. Тӧл пыртӥм потэ. Пыд улын лымы ӟукыртэ. Куинь час мынськом ни ӵошен. - Кезьыт. Тон кынмиськод-а? - Уг... - Жади ни. Али мон пыштурынэн куж-куж чай юысал. Нош тон? - Ӧйтӧд... ... Ӟардэ. Нюлэсо инвис сьӧрысь шунды потӥз. Кин ке воштӥз кадь эшме. Чырткемгес вамыштыны ӧдъяз, ымныраз пальпотон улӟиз. - Кема ӧвӧл ни, ӝоген вуомы гуртэ. Пыштурынэн чай шуиськод вал кадь... А вот отчы йӧл ке ватсад на, беризь чечы, соку, ява, вань жадемед но, кынмемед но ортчоз! Вот озьы,- кылыз пертчиськиз эшелэн. х х х Кин тон мыным, уг тодӥськы. Нош кыдёке кошкон дыръяд, ошмес дуре вамыштӥсько. Отын пумиськимы вал нырысьсэ. Тулыс шунды шудӥз соку тыро ведраосам. Туннэ тон нош ик палэнын. Мон сылӥсько ошмес дурын. Уг пальпото тыро ведраосы, уг пыласькы шунды со дун вуын... Я, берт ни вал ӝоггес - ведра дурам кынмо йӧ шапыкъёс... х х х Мыным умой тонэн. Гадь вылад секытомем йырме понысал, куарадэ кылзыса, пичи пинал сямен, умме усьысал. Тон син азям, тон пель сьӧрам, тон пушкам. Но кытчы бен ышиз льӧмпу зынэн тырмем ӝытысь уӵы куара? Малы чалмизы ваче вераськись пипу куаръёс? Малы бус пыр сайка нунал? Малы дугдӥз капчи уясь пилем? Бус пыр кадь адске ваньмыз, тынад гинэ тусыд яркыт. Шурдыт. х х х Ӵужектэм кызьпу куарез кезьыт тӧл ишкалтӥз но, шуак пельтыса, дэрие сализ. Тӧл, оло, ӝутысал на сое, но кызьпу куар урамтӥ ортчисьлэн пыд улаз вал ини... Сыӵе улон... х х х Мон паймисько, вожъяськисько тӧллы. Шурдыт ӧвӧл солы ӝутӥськыны инме. Мон кынисько синме. Поръя ке тӧл уйшор сикетӥ, мон эстӥськем доры матэ кыстӥськисько... Паймод тӧллы: туннэ татын, аскы - зарезь сьӧрын... Мон жалясько тӧлэз - ӧвӧл солэн дорез. Арсентий ПАВЛОВ. Шӧкыч "Устоез курлась" конкурсэ Чуръёс, чуръёс... ... Малы-о Шӧкыч уромез ултӥяло? Мед кузёяськысал со кык бамын. Автор нимтулзэ гожтымтэ. Уг луы шат газетады "Альвалэсь" телепрограммазэ поттыны? Р. Булычев. Ижевск. Малы ке берло дыре трос ялон-реклама шуонъёсты потыны кутскизы. Мар кароз соосын коньдонтэм гурт калык? Уг оскиськы, тодматскон сэрегды - со умой уж шуыса. Азьтэмъёс озьы асьсэлы дась туган витё. Тордос. Шаркан ёрос. "Удмурт шаер" ӧте... Котькуд калыклэн вань аслаз аспӧртэм шудонъёсыз. Соос кылдӥзы вашкала вакытэ. Шудон - со дырез пайдаё ортчытон. Отын адями возьматэ сэзь но чупрес, визьмо но нодлыко луэмзэ. Шудон вылтырез юнматэ, валтӥсь луыны дышетэ. Асьме вакытэ шудонъёс уло на пиналъёс пӧлын гинэ. Соосты вунэтӥм, ыштӥм ни. Али выльысь улӟытоно вал. Соин ик "Удмурт шаер" клуб удмурт шудонъёсты, нылпи фольклорез люкась тодосчиен Лидия Николаевна Долгановаен пумиськон радъяны малпа. Со ортчоз 22-тӥ декабре Национальной библиотекалэн шаермылы сӥзем люкетаз. Кутскоз 17 часын. Ӧтиськом вань мылкыд карисьёсты. Н. БОЧКАРЕВА. Шӧкыч Остап Бендеръёс вань на Кытӥяз мон тазьы малпасько: Илья Ильф но Евгений Петров али улэп луысалзы ке, вылӥ комбинатор Остап Бендер кадь адямиос сярысь туж умоесь произведениос гожтысалзы, дыр. Угось та писательёслэн "двенадцать стульев" но "Золотой теленок" романъёссы асьме литературалэн зарни шыкысаз котькулы кылизы. Та дано адямиос сямен ик серем пыр гожъяны яратӥсьёслы мон ӵектысал Ижевскысь Пушкин ульчае 234 номеро юртэ интыяськем технической инвентаризацияя бюрое ветлыны. Паймымон учыре сюро квартиразэс воштӥсьёс. БТИ-ын ужасьёс туж тунсыко амал шедьтӥллям, кинлэн ӝоггес улон интызэ воштэмез потэ, тыре мултэс коньдон. Адями малпанзэ быдэстон понна, та ужез кема нуйтэмез уг поты но БТИ-лэн кассаяз тыре 175 сюрс манет коньдон. Нош собере ини тужгес но тунсыкоез кутске... Квитанциез басьтыса отын ужасьёс туж шуныт пальпотыса юало: "А тӥ уд быгатэ-а милемыз машинаен квартираяды нуллыны?" Адями мынам машинае ӧвӧл шуэ ке, БТИ-ысь нылъёс матысь нуналэ асьмеос лыктом шуо. Пусъем нуналэ адями ужысьтыз мозмытскыса соосты возьма, нош нокин уг лыкты. Соку мукет нуналаз квартиразэ воштӥсьлы таксиен, яке мукет машинаен БТИ-е лыктоно луэ. БТИ-ысь ужась шумпотыса дась машинаен квартираез учкыны мынэ. Ма бен, ваньмыз интыяз, борддоръёс воштэмын ӧвӧл кадь. Юромо, ужам нерге кариськыса, аслаз метреныз заллэсь пушсэ мерта но та машинаен ик бюрояз дыртэ. Тӥни озьы, паймод но бырод ук! БТИ-ын ужасьёс бадӟым кмбинаторез Остап Бендерез кемалась ортчизы кадь потэ мыным. В. ЧЕРНОВ. ДЫРЕЗ ТОДЭМЕД КЕ ПОТЭ Балезино. Алигес татын дырез ивортылӥсь служба ужаны ӧдъяз. Жингырты 05 номеро телефонъя - тыныд котькуд минутэз-секундэз суратэк вералозы. Кин тодэ, оло, таӵе вамыш зэмзэ но кулэ вал... Э. ВАСИЛЬЕВА. 1981 ар. Сарапул Тупаны но кулэ ук: ӵапак со нуналэ Владимир Ореховез, госбезопасностьысь капитанэз, Сарапулысь Ижевске выжтыны кулэ вал. КГБ-лэн председателез Б. П. Соловьёв Ореховез воштӥсен ӵош Сарапулэ сюрес вылын вал ини. Соку ик Сарапулын, Ижевскын, Москваын КГБ-лэн, МВД-лэн, армилэн, партийной но советской органъёслэн телефонъёссы визьтэммизы кадь. Сарапулын вань заложникъёс... ... Кык солдатъёс, постысьтызы автоматъёсын кошкыса, лыктӥллям Сарапулысь одӥгаз школае. Шедьто дасэтӥ классэз, ӧсэ йыгаськыса, лачмыт гинэ куро дышетӥсез потыны. Солы ик верало условиоссэс: кулэ коньдон, аэропортозь машина, отын мед луоз самолёт, кудӥз лобоз Иранэ. Властьёс пумит ке кариськизы, пиналъёс ыбылэмын луозы. Собере "Родинаез утисьёс" классэ пыро. Арлыдызъя но службаезъя бадӟымез, Ахмет, нош ик лачмыт гинэ ялэ: "Пиналъёс, тӥ заложнике кутэмын. Мон Ахмет, таиз мынам эше, Саша. Тӥ милесьтым кылзӥськыны кулэ. Милесьтым куронъёсмес властьёс ӧз ке быдэстэ, тӥ ыбылэмын луоды". Пиналъёс лӧпто, люр-ляр потто, серекъяло: кино... Соку Ахмет борддор шоры ыбе: ми ум шудӥське! Класс чалме... Иворез рация пыр басьтэмез бере, Б. П. Соловьев, 15 минут ортчыса, Сарапулын вал ини. Соку ик кылдэ оперативной штаб. Тревогая ӝутско КГБ, МВД, армилэн подразделениосыз. Москваысь самолётэн потэ КГБ-лэн "Альфа" группаез. Москва операциен кивалтыны косэ Соловьевез. Террористъёсын меӵак кусып тупатэ капитан Орехов. Со дырозь заложникъёсты басьтон учыръёс СССР-ын туж но туж шер вал. Удмуртия сярысь веранэз ик ӧвӧл. Валамон, татысь чекистъёслэн нокыӵе опытсы но ӧвӧл. Оскизы асьсэлэн визьзылы, быгатэмзылы. Валамон, нырысетӥез ужпум - пиналъёсты быронлэсь утён. Орехов озьы но, тазьы но буйгатыны тыршиз солдатъёсты. Ӧз быгаты. Соосыз пыкиськизы: вае самолёт но тӥни. Соку чекистъёс амалъёссэс воштӥзы: кызьы ке но вуёмытоно, алдано солдатъёсты. Бер ӝыт ини удалтӥз классысь нылъёсты мозмытыны. Кылизы пиос гинэ. Дыр ортче. Пиналъёслэн туалетэ но ветлэмзы, сиемзы но потэ. Орехов классэ пыре. - Пиос, лэзе пиналъёсты туалетэ. Соос ӧз ке берытске, тани мон тӥ киын, ыбоды монэ. "Пиос" соглаш луо. Сиён но Орехов ик пыртылэ. Со дыре ик уг вунэты террористъёслэсь визьзэс сынаны. Дыр ортче... Уй но быре ини. Табере тодмо ӧвӧл ни, кинлэн йыраз лыктӥз загранпаспортъёсын шудон. Солдатъёслы валэктӥзы, самолёт, коньдон но паспортъёс дасяськомы шуыса. Со вискын уйшор уин ӝутӥзы Алевтина Захароваез, МВД-лэн паспортной отделаз ужасез. Паспорт бланкъёсты кутыса, со вуиз Сарапулэ. Шедьтӥзы солдатъёслэсь фотографиоссэс. Одӥгезлэсь правоысьтыз кесизы, мукетызлэсь - группаен снимокысьтыз вандӥзы. Орехов но Захарова (вераны луонтэм кышкасьтэм нылкышно!) классэ пыро: - Пиос, паспортъёсты дась, учке. Соосыз, пичиос сямен, синъёссэс воштытэк учко документъёс шоры. Соос улытозязы ӧз адӟылэ загранпаспортъёсты, нош татын асьсэлэн фотографиосынызы. Оскизы, луоз, кунгож сьӧры потыны пропускъёс киязы ини шуыса, ӧжытак лябӟизы. Со вискын Орехов пиналъёслы лушкемак киосыныз возьматӥз: потэ, пе, татысь ӝоггес. Пиналъёс пото но татын тупатыны луонтэм вамыш ӧжыт гинэ уг лэсьто. Соос пумитэ угось лыкто "Альфаысь" "йыр вандӥсьёс". Йыразы чилясь шлемъёс, пияла маскаос, асьсэос адӟылымтэ комбинезонъёсын, щитъёсын, киязы автоматъёсын. Пияшъёс тыпак луизы, туж зол кышказы но берен классэ чигнаны кутскизы. Ярам коть, чекистъёс соосты кырмыны вуизы. - А-а! У-у! Мать-перемать! Йыг! Йыг! - пуштӥз школа. Классэ пери кадь лобӟиз "Альфа". Саша солдат пыдес вылаз усиз. Ахмет берлань тэтчиз. Ыбыны турттэ вал, но чиньыосыз пуэктӥзы. Син куспын кыкназы зӥбемын, ӵыжамын вал. Син куспын ваньмыз быриз, чалмиз. Озьы одӥг ыбонтэк операция йылпумъяськиз. Сутка пала кыстӥськиз со. Кӧня адями та пумтэм часъёсты пачкатэм пружина кадь улӥз. Владимир Ореховлы сётӥзы "Дано чекист" знак. Со туж бадӟым награда. Кызьы шуо чекистъёс, ми понна, пе, со сыӵе ик дуно, кызьы передовойысь солдатлы "За отвагу" медаль. Али В. В. Орехов кивалтэ республикаысьтымы налоговой инспекциен, запасысь полковник. - Кышкыт-а вал? - юасько Владимир Викторовичлэсь. - Ма, туж ик ӧй вал кадь. Служба сыӵе. Шуг оскыны. Востэм кариське луоз... Таӵе вал кутсконэз 1918 арын гужем Ижевскысь Советын властез большевикъёс властез басьтэмзы бере ик кылдытӥзы нырысетӥ ЧК. Но мятеж ӝутскемен сэрен, со кема ик ужаса ӧз вуы. Тодмо ньылезлэн гинэ чекистъёслэн нимъёссы - А. С. Бабушкин (председатель), И. И. Рогалев. И. И. Чекмарев но Ф. Фокин. Ваньмыз сямен чекистъёс бырыны шедизы. Городэз мозмытэмзы бере, кыкетӥ нуналаз Ижевскын нош ик ЧК кылдэ. Солэн председателез луэ Николай Захаров. Колчаклэн армиез городэз басьтэменыз, ЧК ужамысь дугдэ. Колчаковецъёсты уллям бере, Ижевскын ЧК ӧз кылдытэ, Сарапулын гинэ. Контрреволюциен нюръяськиз ревком. Но 1919 арын 30 декабре Вятской губернской ЧК косэ ваньмаз уездъёсын ВЧК- лэсь ёзъёссэ (Политбюрооссэ) кылдытыны. Ӝыны ар гинэ ортчыса, Ижевскысь Политбюро шарая белогвардеецъёслэсь бадӟым мятеж дасямзэс. Вотской автономной область кылдэм бере, 1921 арын 1 мартэ кутэмын вал областной ЧК кылдытон сярысь постановление. Солы кивалтӥсе юнматэмын вал Н. Ф. Шутов, ЧК-ын вал 130 адями. Ар ортчыса, сое ГПУ шуыса нималозы. 1934 арысен луоз НКВД 145 адями ужасеныз. 1943 арын НКГБ, ужасез 208 мурт. Отӥяз, кызьы тодмо, вал МГБ, КГБ, ФСК, ФСБ. Вошъяськизы нимъёс, вывескаос, соин ӵош ик ужпумъёс но ужан амалъёс. Берекет Тӥ юады вал Гажано редакция! Утюген сутскем бервылэз кызьы ке луоз на меда быдтыны? "Берекетты" пыр, оло, кыӵе ке дэмлан сётоды. Дэремелэн самой адӟиськон интыяз ик вишты пуктӥ. Н. ВАСИЛЬЕВА. Завьялово район. Пӧсь утюген сутскыны шедем виштыез щёткаен сузяны яке посыны уг яра. Мар лэсьтыны луоз? Тӧдьы басма вылысьсэ тазьы быдтоно. Виштыен арбериез пул вылэ вӧлдоно, водородлэн одӥг-куинь процентъем перекисеныз коттэм небыт губкаен зырано, собере шунды шорын яке шуныт азьын куасьтоно. Тазьы сузям вишты бервылэз но котырзэ гылтоно огшоры вуэн, выльысь куасьтыны ошоно. Буёло басма вылысь но тазьыгес ик сузяно. Пӧртэмез со гинэ: водородлэсь перекисьсэ одӥг процентлэсь мултэс сурано ӧвӧл. Сузям бере ӝоггес куасьтыны тыршоно, буёлъёс бездыны медаз вуэ шуыса. Вань на мукет но амал. Сутскем интыез сузяно уксусэн сурам вуэн. Кыксэ но одӥг мында пононо. Таӵе суретэн коттэм бере виштыез сылалэн пызьнано но шунды шоры поттоно. Таӵе амал но ке ӧз юртты, оскалтэ на тазьы но. Куинь йыр сугонэз пӧзьтоно но 125 г вина уксусэн но 10 г майталэн сурано. Ӝуклы кельшись та суретэн сутскем бервылэз зырано. Куасьтоно, сугонзэ куртконо но огшоры вуэн гылтоно. Л. ЯКОВЛЕВА. Берекет Тӥляд куремдыя Гажано редакция, туж курисько "Берекетты" пыр Татьяна Черновалэн кылъёсызъя Ольга Зориналэсь гожтэм кырӟанзэ. Нимаське со. Сизьымдон сизьым коть... шуыса. Кылъёсыз но, гурез но туж огшорыесь, нош сюлэме туж бинисько. Гурзэ умой тодӥсько, нош кылъёссэ ваньзэ радызъя кырӟаны уг валаськы. Нина Санникова. Можга районысь, Бадӟым Уча селоысь библиотекарь. Сизьымдон сизьым коть... Сюлэмы уз буйга, Малпанэ уз ыш, Дуннемы бергаз ке, Шундымы уз кыс. Сизьымдон сизьым коть Сюресъёс медло, Кулэзэ шедьто но - Тон доры лыкто. Только... тон эн кышка - Мон уг пыр дорад. Мӧзмонлы пӧрмо но Йӧтско ымнырад. Нош шуддэ уг тала, Со тонэн артэ. Тон сярысь малпа но Тон понна бӧрдэ. Сизьымдон сизьым коть Сюресэд медло. Эн лыкты - уд тоды, Кытӥ мон ветло. Журналистъёсын пумиськонъёс Туннэез уг буйгаты, ӵуказеез но Таяз учыре Кун Кенешын пресс-конференциын вераськон мынӥз промышленностьын югдур сярысь. Ортчытӥз сое Кун Кенешлэн промышленностья, инфраструктураез азинтонъя, вузъёсын но юрттэтъёсын рынокез радъянъя комиссиезлэн тӧроез Виталий Соловьев. Туннэ нуналлы ортчись аре ужъёслы куд-ог йылпумъянъёс лэсьтыны луэ ни, пусйиз со. Жаляса верано луэ, мылкыдэз буйгатӥсь лыдпусъёс ӧвӧл. Кун Кенешен пусъем ужпумъёсты правительство но предприятиос ваньзэ ик ӧз быдэстэ, секыт адӟонысь потон сюресъёс утчанъя кичӧлтонъёс озьы ик ӧз шӧдӥське. Вуоно арлы но туж ик оскымонэсь малпанъёс ӧвӧл. Правительствоен ӵектэм выль бюджетысь но промышленностьмылэсь валтӥсь удысъёссэ юнматонъя но азинтонъя нимысьтыз пусйымон чаклам ужрадъёсты адӟыны уг луы. Промышленной предприятиосты, соос радын му вӧй поттон удысэз но, "кысконо скал" чотын гинэ адӟиськом, нош дыраз "сюдыны" ум турттӥське. Му вӧй вузам чотын коньдон люкаса, выль производствоос радъян вылысь. Конверсияя фонд кылдытэмын вал. Ар ужаз но коньдон ужпумъёсъя министерствоын сылмиз со. Вуоно ар ик бюджетлы проектэз эскерыку, ми одно ик ӝутом со фондэз улӟытон но сое оборонной предприятиосты азинтонъя фондлы пӧрмытон сярысь ужпумез. Со чотын нырысь ик улӟытыны кулэ автозаводэз. Али со уг ужа, шуыны луоз. Уфаен но Москваен вераськонъёслэн пайдазы уг шӧдӥськы. Тани, шуом, Башкирие 1,5 миллион тонна му вӧй келямын, но отысь машинамылы двигатель ум басьтӥське. Экономика удысын таӵе политикамы ноку ӟече уз вутты. Промышленностьмес шуг адӟонысь поттонъя ужрадъёсын план одӥг куиньмослы гинэ быдэстэмын. Москва ласянь сётэм кылъёс озьы ик быдэстытэк кылизы. Али 51 процентэз предприятиосмы изъян адӟыса ужало. Виталий Соловьевлэн верамезъя, "Удмуртнефтьлэн" нимаз "удмуртэз" ӧз ик кыльы ни. Соин ик "Удмуртторфлэн" инъетэз вылын кылдытоно нефть поттонъя чылкак удмурт компания. Кемалась дыр вуэмын ни нефтеперегонной завод пуктыны. Коньдонэн юрттыны мылкыд карисьёс но вань, нош ужпум ялан берлолы кыле. Нош автозаводмес улӟытон пумысен, Виталий Соловьев валан сётӥз, палэнысь коньдонэн юрттыны мылкыд карисьёсты возьманэз ӧвӧл шуыса. Асьмелы чупресгес кариськоно. Заводэз лэсьтыны быгатӥм ке, ӝыныезлы пала предприятиосмылы уж шедез. Электрокужымлы, шунытлы дунъёс, жилищно-коммунальной хозяйствоез выльдонъя программа пумысен вераса, комиссилэн тӧроез пусйиз "Удмуртиысь коммунистъёс" фракцилэн ӵектонэныз соглаш луэмзэ. Вуоно арез тарифъёсты будэтонысен мытыны уг яра шуиз. Соосты тупатоно адямиослэн уждунзылэсь будэмзэ чотаса гинэ. Виталий Соловьев озьы ик журналистъёслэн юанъёссылы валэктонъёс сётӥз. Н. КОРЯКИН. СООСЛЭН РАДЪЁССЫ Управлениын ужасьёслэн шоро-куспо арлыдзы - 34 арес, 25 процентэз - 30 арлэсь егитэсь. Ваньмыз сямен офицеръёслэн вань нимысьтыз контрразведывательной образованизы, 20 процентэз басьтӥз быдэн кык вылӥ образование. Офицеръёс пӧлын вань МГУ-ын, Уральской юридической академиын, УдГУ-ын, Ижевскысь механической институтын но трос мукет интыосын дышетскемъёс. Управлениын ужало китай, португальской, греческой, японской, фарси, английской, немецкой, французской, итальянской кылъёсты тодӥсьёс. 1996 арын гинэ Удмуртиысь чекистъёслы сётэмын 8 правительственной наградаос. Туэ соос пусъемын Мужество орденэн, "За отвагу" медален, "За заслуги перед Отечеством" кыкетӥ степенё орденлэн медаленыз. Управлениын гажало спортэз. Татын спортъя куать мастеръёс - куасэн бызьылонъя, жугиськонъя но биатлонъя, 10 адями - капчи атлетикая, куасэн бызьылонъя но служебной троеборьея спортъя мастере кандидатъёс. Государственной безопасностья органъёслы - 80 ар Ӵапак та нуналэ, 20 декабре, 80 ар талэсь азьло СНК-лэн Председателез В. И. Ульянов - Ленин гожтӥськиз ВЧК-ез кылдытон сярысь Декрет улэ. Кузь но секыт сюресэз ортчизы та дыр куспын чекистъёс. Вал умоез но, уродэз но, вормонъёс но, ыштонъёс но, янгышъёс но. Оскем потэ, данакез адямиос соглаш луозы, чекистъёс асьме страна понна тросгес ӟечсэ ик лэсьтӥзы шуим ке. Зэм, берло аръёсы соос вылэ тачак пож ву кисьтамын. Уката но репрессиос пумысен. Нош чекистъёс со репрессиосты асьсэос ӧз малпалэ шуыса, йыркуръяськисьёс вунэто. Вунэто мукетсэ но: чекистъёс сыӵе ик солдатъёс вал, мар косӥз партия, сое ик лэсьтӥзы. Адскисьтэм фронтын ожмаськисьёс асьсэды шонере поттыны турттыса гадязы уг мыжгало, уг ӵашето. Чалмыт, кыштыр гинэ ужало, страна понна котькыӵе кышкытлыкез алон, палэнтон вылысь. Соослэн нырысетӥ ужпумзы угось - Родинаез утён. Нокыӵе государство но ӧз быгаты матысь дыре, уз но быгаты разведкатэк но контрразведкатэк улыны. Соин ик Россиялы но кулэ солэсь щитсэ но мечсэ возисьёс. Праздникен тӥледды, гажано эшъёс! Финн-угор дуннеын Москва данъяз эрико кунэз 6-тӥ декабре Финляндилэн эрико луэмез дырысен 80 ар тырмиз. Юбилеенызы но Москвалы 850 ар тырмемен валче финнъёс бадӟым ужрад пусйиллям: ноябрьлэн берпуметӥ арняяз Москваын Финляндилэн нуналъёсыз ортчизы. Политика но экономика удысъёсын кивалтӥсьёс кенешизы вуоноез сярысь. вузкаронлы но туризмлы сӥзьыса, "Финляндия - 97" выставка возьматӥськиз. Арня куспын озьы ик радъямын вал мукет выставкаос, концертъёс, кык кунысь калыкъёслэн пумиськылонъёссы. 29-тӥ ноябре Финляндилэн посольствояз "Россиысь финн-угор калыкъёс толон, туннэ, нош мар луоз ӵуказе?" нимо семинар ортчиз. Татчы пыриськизы Коми, Мордва Республикаосысь, Марий Элысь но мукет элькунъёсысь лыктэмъёс. Удмуртиысь делегация пӧлын вал Кун Кенешлэн Тӧроезлэн воштӥсез Алексей Красильников, Удмурт Кивалтэтысь Нациосын ужанъя комитетлэн тӧроез Светлана Смирнова, М. А. Кастрен обществолэн Удмуртиысь координаторез Людмила Кириллова, Удмурт Культурая "Дэмен" огазеяськонлэн тӧроез Лидия Орехова, Удмурт кун университетысь дышетӥсь Бибинур Загуляева, Удмурт кун университетын дышетскись та чуръёсты гожтӥсь но Ижысь гуманитарной лицейын дышетскисьёс. Семинарез дасязы "Финляндия - Россия" но М. А. Кастрен нимо дэменлыкъёс, Финляндилэн Москваысь посольствоез. Ужрад кутскиз Маркус Люр посоллэн нимыныз нуназе сиськонэн. Собере Хельсинкиысь "Ми - кышномуртъёс" финн-угор ансамбль калык кырӟанъёсты кырӟаз. Уже озьы ик пыриськизы Финляндилэн культурая министрез Клас Андерсон, Россиысь нациосъя но федераци кусыпъёсъя министр Вячеслав Михайлов. Вячеслав Михайлов вераськиз Россия Федерацилэн нациосын ужанъя политикаез но пичи лыдъем калыкъёс сярысь. Пусйиз, Финляндия кужмо экономикаен кунъёс пӧлы пыре шуыса. Финляндилэн но Россилэн кусыпъёссы арысь аре кужмояло. Финнъёс ӟеч тодо асьсэлы матын луись калыкъёсты. Нош Россиын, пичи лыдъям калыкъёсты утён но азинтон понна, пӧртэм программаос дасяло. Финн литературая дэменлыклэн генеральной сектретарез Урпо Венто Фнляндиысь но Россиысь финн-угор калыкъёслэн кусыпъёссы сярысь вераз. Нырысь ик ивортӥз финн тодосчиослэн ӵыжы-выжы луись калыкъёссэс дышетэмзы сярысь. Озьы ик пусйиз: 1994-тӥ арын финнъёслэн Россиысь матысь калыкъёссылы но культуразылы юрттон сярысь программа кутэмын вал. Со понна Финляндия котькуд аре 2,5 миллион финн марка висъя. Нацилэсь культуразэ азинтон сярысь верано ке, национальной кыл кутӥське иворъёсты вӧлмытонын, учреждениосын, улон-вылонын, озьы ик - школаын но семья куспын. Школаын национальной кылэз урод дышетэмзэс коньдон тырмымтэен гинэ герӟано ӧвӧл. Выль дышетскон книгаос но дасясьёс ӧжыт. Кыл уг азинскы, туала литературной кыллы чеберлыкезъя уг тупа. Анай-атайёслэн осконзы но быгатонлыксы ӧвӧл нылпиосынызы доразы асьсэ кылын вераськыны. Нош чиновникъёс, югдурез валаса вылысь, политикаез радъяны уг быгато. Шор Россиысь бырем калыкъёс сярысь ивортӥз Хельсинки университетлэн финн-угор кылъёсъя кафедраысьтыз тодосчи Арья Ахлгвист. Россиысь финн-угор калыкъёслэн туннэ улон-вылонзы сярысь мадиз Коми парламентлэн депутатэз Валерий Марков. "Финляндия толон но туннэ" выль книгаен тодматӥз Марий Элысь книга поттон юртлэн директорез Альбертина Иванова. Финн тодосчиос профессоръёс Кайса Хяккинен но Сеппо Цеттерберг "Финляндия толон но туннэ" научно-популярной книга гожтӥзы. Со берыктыса поттэмын ини пор, мокша, эрзя, коми, удмурт но ӟуч кылъёсын. Татын вераське, кызьы Финляндия куанер кунысь бусьтыр кунлы пӧрмиз но 1995-тӥ арын 1-тӥ толшорысен Европаысь кунъёслэн огазеяськоназы пыриз. Бӧрысь Швеция королевстволэн провинциез луиз. ЪИЪ даурлэн кутсконысеныз сю арлэсь кемагес Россия империлэн Быдӟым княжествоез вал, собере аскивалтоно элькунлы пӧрмиз. Татын верамын ичи лыдъем калыклэн быронлэсь утиськыны быгатэмез но аспӧртэмлыко сямъёссэ, йылолъёссэ возьыны тыршемез сярысь. Удмурт кылэ финн кылысь берыктӥзы Б. Загуляева но В. Халтурин. Озьы ик семинарысен тодматскыны луиз мукет финн тодосчилэн, Сеппо Лаллуккалэн, "Восточно-финские народы России. Анализ этнографических процессов" уженыз. Со поттэмын 1997-тӥ арын, ноябре, "Европейский Дом" издательствоен. Татын тодосчи эскере удмуртъёслэсь, комиослэсь, поръёслэсь но мордваослэсь этнодемография ласянь азинскемзэс. Тужгес но висъямын та калыкъёслэн ӟучъёсын кусып воземзы. Автор паськыт кутэ 1989-тӥ арын ортчытэм адями лыдъянысь азьвыл шараямтэ йылпумъянъёсты. Финляндилэн Россиысь финн-угор калыкъёслы но соослэн культуразылы юрттонъя комиссиез. Кастрен нимо огазеяськонлы 1994-тӥ - 1996-тӥ аръёсы поттэм изданиос понна коньдон премиос висъяз. Со чаклаз: чеберлыко уж Россиысь финн-угор калыкъёслэн кылынызы гожтэмын яке мукет калыкъёслэн чеберлыко литературазы кудаз ке кылэ берыктэмын мед луоз. Премия сётӥське писательлы яке берыктӥсьлы. 10 сюрс финн марка быдӟа премия сётэмын мордва поэтлы, филология наукаосъя кандидатлы Александр Шароновлы "Масторава" книгаез понна. Озьы ик 3 сюрс марка премия сётэмын Коми- пермяк автономной окргуысь Анна Истоминалы дуно кузьым "Белые птицы" кылбур сборникез понна. Ханты-манси окргуысь Мария Волдина басьтӥз кылбуръёсын но выжыкылъёсын "Маленький тундровый человек" книгаезлы. Коми Республикаысь Владимир Тиминлы премия сётӥзы "Красавица-ведьма" кылбур сборникез понна. Семинар бере чугун сюрес вылын ужасьёслэн культура дворецазы эшъяськон ӝыт ортчиз. Алексей Андриянов, Удмурт кун университетын дышетскись. КУАТЬТОН АРЕСЭНЫЗ ВАЛЧЕ Удмурт кун университетын ортчиз улонысь дырызлэсь вазь кошкем тодмо гожъясьлэн Роман Валишинлэн вордскемез дырысен куатьтон ар тырмонлы сӥзем кенеш. Сое дасязы но радъязы удмурт кылтодонъя факультетысь дышетӥсьёс. Педагогика наукаосъя кандидат Светлана Арекеева мадиз писательлэн "Узвесь пыры" веросэзлэн чебер кылтӥрлыкез сярысь. Кыллы дышетӥсь Тамара ивортӥз оглом веросъёсыз пумысь. Кылтодон наукаосъя кандидат университетысь доцент Анна Зуева вераз "Тӧл гурезь" повестезлэн вашкала аспӧртэмлыкъёсыз сярысь. Прозаиклэн ужъёсызлы вылӥ дунъет сётӥз критик литературовед кылтодон наукаосъя кандидат университетысь доцент Александр Шкляев. Асьсэлэсь малпанъёссэс ивортӥзы студентъёс но. Дышетӥсьёссылэн ужъёссы сярысь ӟеч мылкыдъёссэс веразы факультетлэн финн-угор ёзаз дышетскись ёзаз дышетскись егитъёс Татьяна Кузнецова но Людмила Девятова. Факультетысь дышетӥсьёс ӟеч дасяськиллям кенешлы. Шугъяськытэ одӥгез гинэ: вераськон быдэсак ӟуч кылын мынӥз. Уг лу вал шат удмурт сямен?! Е. РОМАШОВА. Россия Федерацилэн кун наградаосыныз пусъен сярысь Россия Федерацилэн Президентэзлэн Указэз Тазалыкез утён удысын вормонъёс басьтӥзы но уно аръёс ӵоже сюлмысь тыршемзы понна "Россия Федерациысь дано врач" сӥлы карон ним сётоно Витер Владислав Ивановичлы - Ижевскысь медициная кун академиысь кафедраен кивалтӥсьлы, Трусов Виктор Васильевичлы - Ижевскысь медициная кун академиысь кафедраен кивалтӥсьлы. Россия Федерацилэн Президентэз Б. Ельцин. Москва, Кремль 1997 арын 17 ноябре. � 1237. Пётр Поздеев Кызетӥ даур Кызетӥ даур, Читырес мур шур, Ӟечед вань ке но, Уродэд уно. Тау, быдӟым Инмар Монэ сьӧр ӧз кар, Кырсьёслэсь утиз, Визылэ поттӥз. Инмаре мыным Сётӥз шуд, кужым, Ужаны трос ар Тазалык но дарт. Кызетӥ даур, Мертантэм мур шур, Пож-шукрес ке но, Тон мыным дуно. *** Акшанысен ӵук ӟардытозь Пуны чугдылыса вузӥз: "Кузё кулоз, кулоз, кулоз... Мон со ванен улӥ тузӥ!" Вузӥз пуны, никсаз, бӧрдӥз, Уйбыт ӧз лу буйгатскемез. Кузё мугор урттэм кылиз, Лусьтро выдӥз караз губрес... Мынам но ук, кылбурчилэн, Дыр-эсэпе али сыӵе: Шугез, вӧсез адӟе сюлэм, Юрттӥськыны ӧвӧл моӵе. Удмурт радиолы - 65 Кыкетӥ доре Чурайгуртам элькунысьтымы мукет гуртъёсы сямен ик радио вуиз куамынэтӥ аръёслэн шоразы. Мыным соку куать-а, сизьым-а арес вал. Тодам ваисько на, кызьы Чурай урамъёс кузя ог кык сю метрлы быдэ юбоос пуктылӥзы но езъёс кыскизы. Котькуд коркалэсь зӧк коръёссэ портылыса, езъёс пыртылӥзы но боддоръёсы наушникъёс ошылӥзы. Ми соосыз пельёсмы борды интыяса кылзӥськом вал. Наушникез ог-огмылэсь жугиськыса сямен таласьком: котькудмылэн радио кылзэммы потэ уго. Ог ар ортчыса, борддоръёсы сьӧд таба кадь макеосты ошылӥзы но, радиоез ваньмы ӵош кылзыны кутским. Кыӵе шумпотон вал со покчиослы но, мӧйыослы но! Выль Юбералась щколаын но Можга педучилищеын дышетскон аръёсам мон кутски "Ленинъя" ёрос газетамы, Иж карын потӥсь "Дась лу!"-э но "Удмурт коммунае" пичиесь заметкаос гожъяны. Бӧрысь ини корреспонденциос но, очерк нергеос но йӧндырылыны ӧдъяй. Пединститутэз йылпумъяме бере малпалляй газетэ ужаны мынон сярысь. Но улон адямилэн чакламезъя гинэ уг радъяськы. Ньыль ар ужано луиськиз кунмес кышкытлыклэсь утёнъя органъёсын. Отысь шумпотыса кошки егитъёслэн "Удмуртиысь комсомолец" газетазы. Партилэн Центральной Комитетэзлэсь Москваысь Вылӥ партийной школазэ йылпумъяме бере, монэ "Удмуртская правда" газетлэн тӧроез М. И.Гнедин дораз ӧтиз. Соин ӵош ик телерадиокомитетлэн тӧроез А. Г. Потапов радиоын ужаны ӵектӥз. Москваын дышетскемелэсь азьло тямыс ар "Удмуртиысь комсомеолец" газетын ужай. Озьы ке но, радиое мыныны мылкыд кари. Али пичи но уг жаляськы, шумпотыса тодам ваисько кызё арлэсь кема тыршем аръёсме, отын ӵош ужам эшъёсме. Радио луиз мынам кыкетӥ доре. Ӝыны даур тырмонзэ пусйыкумы дасямы "Говорит и показывает Ижевск" книга. Тӥни соку мон тодӥ Удмурт радиолэсь сайкыт но кышкыт вакытъёссэ. Асьмеос ваньмы вунэтыны ум быгатӥське Удмурт радиомес кылдытӥсь адямиосмес. Можга ёросын вордскем Пётр Трофимович Березкин со аръёсы ужам обкомлэн тӧроез луыса. Элькунмылэн кивалтэтэз Берёзкинэз ыстэ Москвае радиостанция кылдытон пумысь ужпумъёсты ӝутыны. Березкин столицаямы пумиське но вераське РСФСР-ысь Главполитпросветлэн кивалтӥсеныз Надежда Константиновна Крупскаяен. Со ӟеч мылкыдын кенеше Удмурт улосысь вуэм адямиен, тодаз вае шаерамы, Кам шур кузя "Красная звезда" пароходэн вуылыкуз, калык пӧлын валэктон уж нуэмзэ. Ӵуказеяз пумиськыкузы, Надежда Константиновна Берёзкинлы сётэ почтая но телеграфъя Наркоматысь одӥгезлы кивалтӥсьлы Смидовичлы гожтэт. Отын ӝутэмын Удмурт автономной областьын радиостанция лэсьтон сярысь ужпум. РСФСР-лэн кивалтэтэз 1931 арын 10 феврале кутэм постановлениеяз косэ Наркомпочтелез Иж карын радиостанция лэсьтыны. 1932 арын 5 ноябре со станция ужаны кутскиз но, элькунысьтымы улӥсьёс кылзыны кутскизы удмурт передачаосты. Удмурт радиокомитетлэн кивалтӥсез луиз Ижысь педтехникумез но Кировысь пединститутэз йылпумъям удмурт нылкышно, партилэн обкомаз печать ужпумъёсъя азьвыл инструктор, педагогической рабфаклэн директорез Любовь Прокопьевна Будина. Нырысетӥ редакторъёс пӧлын вал Анастасия Прохорова, Василий но Аркадий Бутаевъёс, Игнатий Курбатов, Михаил Тронин, Михаил Бывальцев, Сергей Мыльников. Бӧрысьгес радиое лыктӥзы Елена Никифорова, Валентина Юшкова но мукетъёсыз. Пичиесь радиоспектакльёс дасяз режиссёр Анатолий Саратов. Литературной редакцилэн ужаз мылысь-кыдысь пыриськизы писательёс Игнатий Гаврилов, МиХаил Петров, Афанасий Лужанин. Нырысь удмурт дикторъёс луизы пединститутысь студент Аркадий Тугбаев но медсестра Мария Степанова. 1933 арын кылдӥз радиолэн хорез. Солэн нырысетӥ кивалтӥсез луиз Елизавета Васильевна Молоткова, музыкальной школаысь дышетӥсь. Хорын кырӟазы Анна но Нина Евсееваос, Васса Виноградова, Анна Григорьева, Матрена Иванова, бӧрысьгес Григорий Титов, Михаил Бывальцев но мукетъёсыз. Вылӥын пусъем адямиос но уно пусйымтэосыз Удмурт радиомес кылдытӥзы но сое паськыт сюрес вылэ поттӥзы. Кызьы верай ини, радиолэн улоназ вал сайкыт но кӧшкемыт аръёсыз но. 1937 арын кунамы паськыт ӧръяськиз калыклэсь тушмонъёссэ "шараян" кампания. Чик янгыштэм трос адямиос келямын вал тюрьмаосы но лагерьёсы. Тросэз отысь ӧз берытске ни. Выризы Удмурт радиоысь но "тушмонъёсты шараяны". "Радиокомитет тушмонъёслы юрттыса ужа" - озьы нимам статья печатлаз "Удмурт коммуна" газет 1937 арын 29 июле. Солэн авторез С. Невоструев пыкылэ радиокомитетлэсь тӧрозэ П. Александровез. Со, пе, азьвыл ужаз партилэн обкомаз инструктор луыса. Троцкистъёсты шараяны быгатымтэысьтыз, ужысьтыз поттӥзы но сыӵе вылӥ политической уже пуктӥзы, пе. Эфире лэзёно материалъёссэ пыр-поч уг эскерылы, ваньзэ оске котыраз люкам эшъёсызлы. Литературной редакциын ужась Стрелкова "Удмурт коммунаысь" уллямын вал, Данилов, Кельдибеков но Макаров националистъёсын герӟаськемез понна. Стрелкова эфире сётыны дасям СССР-ез сантэмась Андрей Жидков писательлэн произведениысьтыз люкетъёссэ. Тодон-валанъя отделын ужась редактор Мыльников Карпинскийлэсь национальной политика сярысь статьязэ, контрреволюционной пуштросъем карыса, удмурт кылэ берыктэм но радио пыр сётэм. Диктор Степанова "Правда" газетлэсь "Навести порядок в радиовещании" передовой статьязэ туж кулэ интыоссэ вакчиятыса лыдӟем. Сыӵе "янгышъёс" понна радиоын ужасьёсты 1937 арын "тушмон" карыны сокем шуг ӧй вал. Со аръёсы Удмурт республикалэн внутренней ужъёсъя наркомез Д. В. Шлёнов удмурт интеллигенция пӧлысь троссэ "тушмон" кариз но лагеръёсы келяз. Соос пӧлын ик партилэн обкомезлэсь нырысетӥ секретарьзэ С. П. Барышниковез но. ...Куатьтонэтӥ аръёсы Удмурт радиоын тыршо ни вал кужмо ужасьёс. Мон отчы лыктӥ сӥзьыл, 1962-тӥ арын. Та ужез чик тодӥсьтэм адямилы валтӥсь редактор луыны шурдытгес вал. Но мыным юрттӥзы, визь-кенешъёс сётъязы мӧйы радиожурналистъёс Валентина Юшкова, Гай Сабитов, Василий Иванов, Николай Надеждинский, Юлия Ворепанова. Филимон Косарев но мукет эшъёс. Мынэсьтым кык арлы гинэ вазьгес радиоын ужаны кутскиз Генрих Перевощиков (али тодмо удмурт писатель). Вакчи дыр куспын луиз азьветлӥсь журналист. Егитъёс пӧлын быгатонлыкеныз озьы ик висъяськылӥз Юрий Кедров но. Соос но мыным юрттӥзы радиожурналистикаез ӟечгес валаны но выль уже мургес пыриськыны. Коллективмы аслэсьтыз быгатонлыксэ тужгес но возьматӥз 1967-тӥ но 1970-тӥ аръёсы. Соку вал бадӟымесь юбилейёс: кунысьтымы Кенешо властьлы но Удмурт автономилы ӝыны даур тырмиз. Та юбилейёслы сӥзьыса, Удмурт радио ортчытӥз городъёслэсь но ёросъёслэсь радиофестивальзэс. Вань ужасьёсмы мылысь-кыдысь пыриськизы та ужрадэ. Вань улосъёсысь передачаос пыраклы кельтэмын Удмурт радиолэн зарни фондаз. Но шонер ӧй луысал, милям ужъёсмы асфальтэн шобыртэм вӧл-вӧл паськыт сюрес вылтӥ машинаослэн ширтэмзы кадь мынӥзы шуысалмы ке. Вал бездытэсь, кылзӥсьёслэсь мылкыдзэс бугыртӥсьтэм передачаосмы, вал янгышъёсмы но. Соослэн мугъёссы кивалтӥсьёс бордысь потылӥзы. Мукетыз но люкетылӥз: Удмурт радио кема курадӟиз, аслаз юртэз ӧвӧлысь. Редакциосмы интыяськемын вал газет поттӥсьёслэн юртазы. Студиосмы но аппаратнойёсмы, техникамы - почталэн юртаз. Ог витё аръёс ужамы Ломоносов нимо урамысь улон юртлэн подвалаз. Тодам ваисько, кызьы канализациысь кырсь вуос уин вань кабинетъёсмес шобыртӥзы. Фонотекаысьтымы фондэ кельтэм плёнкаосмес, брюкиосмес пужалляса, вуэтӥ поттамы но телестудие машинаосын ворттӥмы. Кытын ини сыӵе югдуръёсы творческой уж! 1965 арын ми понна зэмос шумпотон вуиз - Иж карын усьтӥськиз "эфирлэн дворецез". Удмурт радио пыриз Коммунаръёслэн ульчаязы пуктэм юртаз. Кыкетӥ классъем юртэ пуктылэмын вал туала техника, юртамы - Центральной аппаратной, уно студиос, фонотекаямы нимысьтыз температура возиське, хормылы ужаны бадӟым студия. Редакторъёсмы но корреспондентъёсмы пукизы быдэн кык кузя нимаз кабинетъёсын. Библиотекамы интыяськиз вӧл-вӧл кабинетэ. Сыӵе ик бадӟымесь кык комнатае пуксизы бухгалтериын ужасьёс. Автомашинаосмылы азбарамы ик гараж пуктэмын. Огкылын вераса, усто ужаны кылдытэмын вал вань луонлыкъёс. Быгатэммыя тыршим ваньзэ лэсьтыны, ужмы кылзӥсьёсмылы мед кельшоз шуыса. Пайдазэ валан понна, ӵем пумиськылӥм кылзӥсьёсынымы. Быдэс коллективенымы но хоренымы поталлямы кыдёкысь но матысь ёросъёсы, гуртъёсы. Вуылӥмы заводъёсы но фабрикаосы. Сыӵе пумиськонъёс дыръя ӟечгес валаллямы ужысьтымы тырмымтэосмес. ...Удмурт радиоын ужакум ик кутски литература удысэн вырыны. Уно юрттӥз литературно-драматической передачаослэн редакторзы кылбурчи Гай Сабитов. Солэн куремезъя, "Арня ӵукна" журналэ гожъяны кутски юморескаос, сценкаос но пичиесь веросъёс. Соос уно гинэ люкаськизы но пыризы "Удмуртия" издательствоын потэм куинь сборникам. Радиоын ужан аръёсам ик гожъяны кутски сӥё-дано землякъёсмы - авиациысь маршал Ф. Я. Фалалеев но партилэн Удмурт обкомезлэн нырысетӥ секретарез С. П. Барышников сярысь повестьёс. Бӧрысь ини Удмурт радио пыр чузъяськизы дано адямиос сярысь быдэн куинь люкетэн радиофильмъёс. Соос но кельтэмын радиолэн зарни фондаз. Озьы ик "Мурт нимын" повестея аслам дасям сценариея кык люкетэн радиопостановкае уно пол чузъяськиз ини эфирын. Кызь ар ӵоже Удмурт радиолы ма но со лэсьтыны тырши. Со понна бадӟым тау шуэме потэ ӵош ужам эшъёсылы. Соос ке ӧй юрттысалзы, уноез передачаосы малпанам гинэ кыльысалзы. Удмурт радиоын 60-тӥ - 80-тӥ аръёсы ужасьёс асьсэлы воштӥсьёс сярысь сюлмаськыса улӥзы. Туэ ужмес азьланьто уно егитъёс. Ми, ветеранъёс, оскиськом: Удмурт радиолэн кык каналэзъя ик передачаосыз эшшо но кужмоесь, яркытэсь луозы но элькунысьтымы калыкез шумпоттозы, ӧтёзы ӟеч ужъёсы. Леонид Емельянов, Удмурт радиолэн азьвыл кивалтӥсез. Кырӟан-97 Можга районысь крезьгурчиос вазенгес ик малпаськизы ни вал огазеяськыны, нош пӧртэм шуг-секытъёс сое ортчытъяны люкетылӥзы. Дасо ар талэсь азьло кичӧлтон сётӥз вал элькунысь культура удысын сӥё-дано ужась композитор Г. И. Павлов. Жаляса верано, пӧламы ӧвӧл ни Геннадий Иванович. Но солэсь ӟеч кичӧлтонзэ азинтӥз "Удмурт кенешлэн" Можга районысь ёзэз. Устоез крезьгурчилы сётэмын вал Г. И. Павлов нимо коньдон премия. "Кырӟан-97" конкурсэ, кудӥз ортчиз Пазялысь кульутар юртын, пыриськизы Удмурт Сюгаилысь но Бадӟым Сибыысь, Александровоысь но Нынекысь, Нышаысь но Вылын Юриысь крезьгурчиос. Шумпотыса пумитазы сибы нылкышноосыз но нынек пиосыз. Г. И. Павлов нимо коньдон премия (дас пичи уждун) басьтыны шуд усиз Нынекысь крезьгурчилы И. Л. Смолинлы "Пумитамтэ яратонэ" кырӟанэз понна (кылъёсыз Л. Я. Хрулёвалэн). Конкурсэ пыриськемъёслы ваньзылы ик синпель кузьымъёс, сяськаос сётэмын. Тужгес но дуноез луиз, дыр, "Звени, лети, мелодия души" сборник кузьмамзы. Кырӟанъёсын книга выль кужым сётоз эшшо но устогес кырӟанъёс кылдытыны, быгатонлкъёссэс калык пӧлы вӧлмытыны. Со сяна, та толэзе ик "Дубитель" культура юртэ люкаськылӥзы пиналъёс пӧлысь эстрадной кырӟанъёсты яратӥсьёс. Арлы быдэ ортчись "Музыкальный звездопад" конкурсэ туэ пыриськиз 30 нылпи. Пӧлысьтызы сизьым вормисе потэмъёс кужымзэс эскерозы на берпуметӥ тураз, кудӥз ортчоз 18 январе. М. Сергеева. Нынекысь крезьгурчи И. Смолин. ВЫЛЬ СТАНЦИЫН Туэ Уваысь связистъёс посёлокын но районын улӥсьёслы ӟеч кузьым дасязы - ужаны кутскиз выль АТС. Озьыен, телефонэн семьяос данаклы тросгес луозы. Станцие вуттэмын-инъямын кунгож сьӧрысь туала аппаратура. Со юрттоз кусыпъёсты юн герӟетэ думыны. * АТС-ысь электромеханик А. Ф. Шуткин. * Инженеръёс А. К. Мезян но В. А. Сунцов техниказэс ужатыса эскеро. Г. ЮСАЕВЛЭН туспуктэмъёсыз. Лыдӟись вера малпанъёссэ Малы ӝегаса вуэ кизертэм газ? Чагыр эстӥськон сётон удысын данак тырмымтэос вань. Со сярысь куд-ог газетъёс гожъязы ик вал. Уката ик соос пыкылӥзы "Ижевскгаз" ОАО-ын ужасьёсты. Соослэн быгатымтэенызы, пе, ӧз удалты огазеяны столицаысь районъёсысь горгазъёсты. Солы пумитъяськем Ижевскысь Дума но. Та ужпумъя ик малпанъёссэ "Известия Удмуртской Республики" газетын вера Кун Кенешлэн депутатэз "Спецгазвавтотранс" огазеяськонлэн генеральной директорез Владимир Алексеевич Тумаев. Ачиз кивалтэм улсын со выльдытыны ӵектэ выль огазеяськон - "Удмуртгазсервис". Отчы огазеяны луысал вань горгазъёсты, шуэ со. Но солы та ужез мытыны Ижевск Думаысь депутатъёс пумит луиллям. Оло, со шонер но. Кызьы тодмо, В. Тумаевлэн "Спецгазавтотранс" предприятиез али пунэм тыронъёсы выемын, ужасьёслы март понна но уждунзы тырымтэ на. Зэм, кизертэм газэз горгазъёс калыклы туж шуген вутто, малы ке шуоно, сое поттӥсь предприятие Удмуртиын ӧвӧл. Соин ик "Удмуртгазсервис" кылдытон интые, оло, пайдаёгес луысал кизертэм газ поттонъя завод пуктыны? "Газ гумыос Удмуртиын вужмемын, куашкан калэ вуэмын", - гожтэ газетэ В. Тумаев. Та гуртъёсты лыдӟыса, уката но паймиськод, иське, горгазъёсын йыруж лэсьтӥсьёс ужало? Соку нош ик юан кылдэ: малы бен сыӵе куашкам удысэз господин Тумаев асэстыны турттэ? Мар ке но татын валантэм. Бен "Ижевскгазын" ужасьёслы туннэ секыт. Коньдон тырмымтэен, соос дырыз дыръя газ гумыосты выльёсыныз воштыны уг быгато. Но отысь специалистъёс ужало-тыршо. Кизертэм газ уг ке но тырмы - соослэн со янгышсы ӧвӧл, озьы соос сярысь "сюлмаське" "Газпром". Соин ик корреспондентъёс, "Ижевскгаз" ОАО сярысь гожъякузы, югдурез пыр-поч валаны мед турттозы вылэм. Н. ДЕРЕВЯНКИН. НУНАЛЛЭН ТОДМЕТЭЗ Вашкала календарья толон Анналэсь но Стефанлэсь нуналзэ пусйим.. Святой Анналэсь нылпи вайыны дасяськемзэ пусъё кӧто нылкышноос но муш вордӥсьёс. Нылпи вайыны дасяськем нылкышноосты арня ӵоже ужаны ӧз лэзьылэ, соос кӧс возьылӥзы. Калык чакламъя, та нуналэ гӧртӥз - вуоно арын емыш удалтоз. Анналэн нуналэзлы кионъёс тужгес лекомо. Та нуналэ... ар талэсь азьло 24 декабре 1900 арын "Искра" газетлэн нырысетӥ номерез потӥз. Со кылдытэмын вал В. И. Ленинэн. 24 декабре 1943 арын Черноморской Флот но Украинской фронт тушмон ки улысь мозмытыны ӧдъязы Крымез. Лек ожмаськонъёс кыстӥськизы 1944 арын 9 маёзь. Указэз эскерон Кылем арняе Россия Федерацилэн Президентэзлэн администрацияз ортчиз Россиысь Президентлэсь "Удмурт Республикаын кун властьлэн ёзъёсызлэсь но интыысь аскивалтонъя ёзъёслэсь кусыпъёссэс радъянъя ужрадъёс сярысь" Указэзлэсь инъетсэ эскерон. Кенешез нуиз Россия Федерацилэн Президентэзлэн администрациеныз кивалтӥсьлэн воштӥсез Виктория Митина, отчы пыриськизы Президентлэн Конституцияя Судын оскем муртыз Сергей Шахрай, Президентлэн Федерацияя Кенешын оскем муртыз Анатолий Слива, Президентлэн Интыысь аскивалтонъя кенешезлэн кивалтӥсез Борис Минц, Президентлэн администрациезлэн Правоя управлениеныз кивалтӥсьлэн воштӥсез Раиса Брычева, Россия Федерациысь Быръёнъёсъя комиссилэн кивалтӥсез Александр Иванченко но нациосын ужанъя но федеративной кусыпъёсъя министрлэн воштӥсез Александр Воронин. Удмуртиысь лыктӥзы Кун Кенешлэн Тӧроез Александр Волков, солэн воштӥсез Владимир Пономарёв, Президентлэн Удмурт Республикаын оскем муртыз Виктор Балакин но Ижевсклэн мэрез Анатолий Салтыков. Кызьы ивортылӥм вал ини, Президентлэн администрацияз 10 декабре ортчем кенешын Указлэн инъетэз оглом умоен лыдъямын вал. 11 декабре Удмурт Республикаысь Кун Кенешлэн дас витетӥ сессияз депутатъёс соин соглаш луизы. Президентлэн администрациысьтыз муртъёсты Борис Минцез, Раиса Брычеваез но Сергей Шахраез косэмын документ лэсьтонэз йылаз-пумаз вуттыны. Кун Кенешлэн сессияз та группае Удмурт Республикаысь Кун Кенешлэсь муртъёссэ - Кун Кенешлэсь Тӧрозэ Александр Волковез, Правительстволэсь Тӧрозэ Павел Вершининэз но Ижевсклэсь мэрзэ Анатолий Салтыковез - пыртон сярысь решение кутэмын. Москваын ортчем кенешын Президентлэн Указэзлэн инъетэз умоен лыдъямын. Удмурт Республикаысь Кун Кенешлы ӵектэмын куд-ог законъёсты кутыны, кудъёсыз бырйисьёслэсь правооссэс но гарантиоссэс юнматозы. Кун Кенешлэн сессиезлэн решениез быдэстэмын. "Удмурт Республикаын кун властьлэн ёзъёсызлэсь но интыысь аскивалтонъя ёзъёслэсь кусыпъёссэс радъянъя ужрадъёс сярысь" Указлэн инъетэз Борис Ельцинлэн канцелярияз ыстэмын. Кун Кенешлэн пресс-службаез. Удмурт Республикаысь Кун Кенешлэн Тӧроезлэн А. А. Волковлэн Удмурт Республикаысь Кун Кенешлэн дас витетӥ (азьвыл чакламтэ) сессияз верамез Гажано эшъёс, кун властьлэн ёзъёсызлэн радлыксы сярысь законэз кутыса, ми тыршим властез озьы радъяны, со республикаын экономикая ужпумъёсты быдэстыны ӟечгес мед юрттоз шуыса. Законэз кутэмлэсь азьвыл но, бӧрысь но кун властьлы дурбасьтӥсьёс но, интыысь аскивалтонлы дурбасьтӥсьёс трос споръяськизы. Конституцияя Судлэн постановлениез но Президентлэн Указэз Удмурт Республикалэн улоназ пыриськизы. Городъёс но гуртъёс улонзэс интыысь аскивалтонлэн законъёсызъя азинтӥзы. Та властьлэн пайдалыкез уг шӧдӥськы на. Мон малпасько, туннэ дырез ӧвӧл ни быдтоно властьлэн соиз яке таиз рыдлкез пайдаёгес шуыса споръяськонлы, малы ке шуоно, калык радлыкен уг тунсыкъяськы, соослэн юрттыны быгатонлыксы сярысь малпаське. Президентлэн Указэз но Конституцияя Судлэн решениез потэмзы бере, Кун Кенеш бадӟым саклык висъяны кутскиз азьвыл кутэм но али дасяськись законъёслэн ӟечлыксылы. Юрттӥз милем Россия Федерациысь Правительство но, кылсярысь, Нациосын ужанъя но улосвыл политикая министерство, Юстицияя министерство, Россия Федерациысь Прокуратура но мукет ведомствоос. Тодӥськоды на, дыр, асьме доры ветлӥзы Россилэн Правительствоысьтыз муртъёс, соос решениос кутӥзы но Указэз быдэстонъя ужрадъёс чаклазы. Та группаен кивалтӥз нациосын ужанъя министрлэн нырысетӥ воштӥсез В. Н. Туманов. Группа быдэстӥз ужзэ, солэн юрттэменыз, ми комиссилэсь ӵектонъёссэ законодательствоямы пыртӥм. Тужгес кулэ луись законъёсты воштӥм. Россия Федерацилэн Правительствоысьтыз ыстэм муртъёсын валче ужан пайдаё луиз: тросэз законъёс алонъёстэк кутэмын. Соин ик та арын 16 апреле Россия Федерациысь Нациосын ужанъя но федеральной кусыпъёсъя министерство но Удмурт Республикаысь кун властьлэн ёзъёсыз валче ужан сярысь огкыл кутӥзы. Собере Кун Кенеш выль законъёс кылдытон бордын ужакуз та огкыл вылэ пыкиськиз. Милем озьы ик визь-кенешен, юридической ужпумъёсты сэрттыны-пертчыны юрттӥзы. 1998 арын апреле интыысь аскивалтонъя али ёзъёслэн ужан дырзы ортче, соин ик выль быръёнъёсты ортчытон вакытлы тырмымон правовой инъет дасяно. Ми азямы таӵе юан пуктӥм: кыӵе власть туала вакытэ экономикалы бадӟымгес пайда ваёз. Та ужпумез мургес сэрттыны-пертчыны, туала улонлэсь вань аспӧртэмлыкъёссэ лыдэ басьтыны тыршим. Ужась группа кылдытэмлэсь азьвыл ик ми А. И. Салтыковен пумиськылӥм. Сыӵе пумиськонъёс гинэ одӥг кыл шедьтыны юртто. Нюръяськон соку пайда вае, куке со тупанэ вуттэ. Ми но огъя кылэ вуим. Анатолий Иванович гожтӥськеменыз дурбасьтӥз ужась группалэн тупаны дэмлась решениосызлы. Ми возьматӥм, республикамы сярысь сюлмаськиськом шуыса, политикаын вормон сярысь ум. Оло, милемыз тодазы но уз вае, но таӵе вамышмы эскеремын но дунъямын луоз ми бере. Огкылэ вуэммес тазьы валэктыны луысал. Политикаын но экономикаын югдурез лыдэ басьтыса, ми интыысь аскивалтонэз калыклэн улыны интыяськемезъя радъяны малпамы. Кун властьлы дурбасьтӥсьёс соглаш кариськизы городъёсын интыысь аскивалтонэз радъяны, нош интыысь аскивалтонлы дурбасьтӥсьёс - ёросъёсын кун властез радъяны, малы ке шуоно, туннэ ёросъёсын кун, интыысь аскивалтонэн ӵошатыса, тросгес кузёяське. Гырон-кизён, ю-нянез утялтон вакытъёслы эстӥськонэз, техникаез вуттыны, пособиосты, уждунэз тырыны кун юрттэ. Группа дэмламъя, Президентлэн Указэзлэн инъетэз бордын ужан азьланьтэмын. Президентлэн администрациысьтыз, Россия Федерацилэн Правительствоысьтыз тросэз муртъёс малпамъя, та документ йылпумъян лэсьтысал югдурлы, кудӥзлы ачиз Президент Указэныз дунъет сётӥз. Документ республикамылэсь огсыр улыны, Кун Кенешлэсь, Правительстволэсь но интыысь аскивалтонлэн ёзъёсызлэсь ӵош ужаны кутскемзэс возьматысал. Мон но югдурез озьы ик дунъясько. Россия Федерациысь Правительство, Президентлэн администрациез, Удмурт Республикаысь Кун Кенеш но Правительство валче ужамен кылдӥз Указлэн таӵе инъетэз. Та дырозь законъёслэн нимъёссы но, валатонъёссы но, лыдзы но вошъяськизы. Соиз валамон, малы ке шуоно, котькуд документлэн вордӥськемез - солэн ӟечлыкез бордын ужан, куке документэз дасясьёслэн дэмланъёссы лыдэ басьтӥсько. Та Указлэн инъетаз вань ӵектонъёс пыртэмын. Соин ик сое юнматӥзы ини пӧртэм инстанциос: Правительствоысь но Президентлэн администрациысьтыз юристъёс, Президентлэн Правоя управлениез, нациосын ужанъя министр но солэн воштӥсез, Правительстволэн Тӧроезлэн воштӥсез, Россия Федерациысь Правительстволэн Тӧроез, Президентлэн Конституцияя Судын оскем муртыз, Президентлэн администрациеныз кивалтӥсь. Документ улэ ваньмыз гожтӥськизы таяз арын 3 декабрёзь. Нош 4-5 декабре Президентлэн администрацияз вуизы пӧртэм юанъёсын гожтэтъёс. Субботае со гожтэтъёсты басьтыса, арня нуналэ ми Кун Кенешлэсь Президиумзэ люкамы, кылдэм югдурез эскерон понна. Кун Кенешлэсь азьвыл чакламтэ сессизэ ортчытон сярысь решение кутӥм, ваньзэ чаклано но юанъёсты, валамтэосты палэнтоно шуыса. Гажано эшъёс, ваньмы асьмеос - адямиос, куддыр югдурез шонер дунъяны, мукет муртэ кылзыны, солы оскыны, малпанмес воштыны ум быгатӥське. Ойдолэ кенешом но валаны тыршом, малы озьы луэ, кыӵе юанъёсъя малпанъёсмы пӧртэмесь. Тазьы учконо ке, тупамтэосмы трос ик ӧвӧл, солэсь уно огъя малпанъёсмы. Чиданмы тырмиз ке, югдурез шонер дунъяны быгатӥм ке, одӥг кыл шедьтыны мылкыдмы луиз ке, соку одно ик тупаломы. Малы ке шуоно, асьмелэн одӥг сюлмаськонмы - Удмурт Республикалэн сюлмаськонъёсыз, предприятиослэн, отысь ужасьёслэн сюлмаськонъёссы. Туннэ асьмеос одӥг кылэ вуыны быгатом, тупаса улон, пайдаёгес азинскон но выльзэ, ӟечсэ кыдытон понна. Таӵе мылкыдын, Инмар юрттэмъя, сессия но мед ужасал. Дасямын сальяос понна Вордскем гуртэд, ӵыжы-выжыед сярысь мургес тодэмед потэ ке, лыкты краеведениея уроке. Кияса районысь Вуж Салья школаысь дышетӥсь Семен Сергеевич Вахитов та предметъя вань классъёс понна нимысьтыз дышетскон программа дасяз. Пичиос тодматско удмурт калык шудонъёсын, 5-тӥ классысь нылъёс но пиос - ас палысьтызы нюлэс, бусы, гурт нимъёсын, 6-тӥ - 7-тӥ классъёсын дышето удмурт кырӟанъёсты, 8-тӥ классын эскеро удмурт сиён-юонъёсты пӧраны, 9-тӥ классысь пиналъёс утчало асьсэлэсь кыдёкысь ӵыжы- выжыоссэс, Сальялэсь воршудзэ, 10-11-тӥ классъёс пыр-поч тодматско калык календарен, сямъёсын но йылолъёсын. Семен Сергеевичлэн дасям материалэз туж узыр, со ялан выльдӥське гуртооссы чотын. Сальяын уго трос гинэ данъяськымон адямиос, паймымон кибашлыос, серекъяны-вераны быгатӥсьёс. Г. ПАРФЕНОВ. Россия Федерацилэн Семья сярысь кодексаз воштонъёс но ватсанъёс пыртон сярысь Федерацилэн законэз Кун Дума кутӥз 1997 арын 19 июне Федерацилэн Кенешез умоен лыдъяз 1997 арын 5 ноябре. 1-тӥ ёзэт. "Гражданской состоянилэн актъёсыз сярысь" Федерацилэсь законзэ кутэмен валче, Россия Федерацилэн Семья сярысь кодексаз (Россия Федерацилэн законодательствоезъя люкам, 1996, �1, ст. 16) пыртоно таӵе воштонъёс но ватсанъёс: 1. 13-тӥ ёзэтлэн 2-тӥ люкетысьтыз нырысетӥ абзацез гожтоно тазьы: "Санэ басьтоно мугъёс вань дыръя семья кылдытыны мылкыд карисьёслэн улоно интыысьтызы интыысь аскивалтонъя ёзъёс быгато, та муртъёс куремъя, дас куать арес тырмемъёслы семья кылдытыны лэзьыны". 2. 48-тӥ статьяын: 1-тӥ люкетын "гражданской состоянилэсь актъёссэ гожъясь ёзэн" кылъёсты кутоно; 3-тӥ люкетэз куштоно; 4-тӥ но 5-тӥ люкетъёсты 3-тӥ но 4-тӥ люкетъёсын лыдъяно. 3. 59-тӥ ёзэтлэн 1-тӥ люкетысьтыз "дас куать арескысен" кылъёсты воштоно дас ньыль арескысен" кылъёсын. 4. 73-тӥ ёзэтэ ватсано 6-тӥ люкет таӵе пуштросэн: 6. Судлэн анай-атайлэсь правооссэ сюбегатон сярысь решениез кужыме пырем бере куинь нунал куспын судлэн таӵе решениысь выпискаез ыстоно гражданской состоянилэсь актъёссэ гожъясь ёзэ, кудаз нылпилэн вордӥськемез пусъемын". 5. 160-тӥ ёзэтлэсь 3-тӥ люкетсэ тазьы гожтоно: 3. Россия Федерациысь гражданъёсты люкон яке Россия Федерациысь гражданъёсты но мукет кунъёсысь гражданъёсты яке гражданствотэк муртъёсты люкон, Россия Федерацилэн палэназ ортчытэмъёсыз, люкон сярысь решение кутӥсь мукет кунлэсь ёзъёслэн компетенцизы сярысь законодательствозэ чакласа, люкиськон сярысь законодательствоез уже кулэезъя кутыса, Россия Федерациын шонерен лыдъяське. 2-тӥ ёзэт. Федерацилэн та законэз кужыме пыре печатлам бере. Россия Федерацилэн Президентэз Б. Ельцин. Москва, Кремль. 1997 арын 15 ноябре. � 140-ФЗ Эшъёсмы-юлтошъёсмы! Тодӥськоды-а тӥ, газетмылы гожтӥськон дыр ӵуказе йылпумъяське ни шуыса? А-а-а, тӥ гожтӥськиды ини? Туж умой. Нош бускельды? Ӵыжы-выжыосты? Ӧз на ке, мед дыртозы почтае. Кин тодэ, оло, берпуметӥез гожтӥськисьмы ик утоз редакцилэсь кузьымзэ - сӥлё-виро ошез... "Удмурт дунне" котькуд выль эшезлы шумпотэ. Султэ, эшъёс, милям радамы! Кызьы ӟечгес быдэсъяно ӧтчамлэсь ужпумъёссэ? Туж кулэесь, туж лэчытэсь ужпумъёс сэрттэмын-пертчемын вань удмуртъёслэн ВИ Ӧтчамазы. Калык ӟеч мылкыдын пумитаз соосты. Табере съездлэсь пуктэмъёссэ, дэмланъёссэ, ӵуказелы кельтытэк, дэмен быдэсъяно, улонэ пыӵатоно. Удмуртлыкмес ӧръясьёс, "Удмурт кенеш", "Дэмен" но мукет огазеяськонъёсы пыриськисьёс, пӧртэм удысъёсын тыршисьёс тани мар верало таин валче. Куд-огез ас мылкыдъёссэс усьтӥзы пӧртэм пумиськонъёсын, кенешонъёсын, куд-огезлы вазиськылӥзы "Герд" баммес дасясь журналистъёс. Туннэ вакчияк сётӥськом со ӵектонъёсты. Закон кутэмын ке но... Шаерамы кутэмын Культура сярысь закон. Туж кема витимы сое. Малпаськом вал, табере культура учреждениослы ӧжыт коть капчигес луоз шуыса. Законлэн 41-тӥ ёзэтэзъя, республикалэн пӧртэм ужрадъёсты быдэсъяны чаклам бюджетысьтыз 6 процентсэ угось культуралы висъяны учкемын. Нош таӵе курон трос учыръёсы уг быдэсъяськы кадь. Культура удыс, азьло сямен ик, векаса, мырдэм но кызьы улэ. Озьы бере, мар понна кутӥскье закон? Мынам тодэмея, "Удмурт кенеш" табере законлэсь та ласянь быдэсъяськемзэ син азяз возьыны медэ. Туж умой со. Библиотекаосын, клубъёсын, культура учреждениосын пичиесь ужрадъёсты но быдэсъяны коньдон уг тырмы. Тани туж кулэ вал ини компьютеръёс, мукетыз. Мон сямен, культура сярысь законмылэн 41-тӥ статьяезлэсь кызьы быдэсъяськемзэ ӵемгес ивортылоно калыклы, кызьы шуо, выт тырисьёслы. Кун Кенешлэн Эскерись палатаез но та ужпумез уката золгес чаклалоз, вылды, азьланяз. Н. Вахрушева, Пичи Пургаысь национальной библиотекалэн директорез. Мургес тодматыны кулэ Мон мылысь-кыдысь пыриськисько "Дэмен" огазеяськонэ. Талэсь азьвылаз съездамы но вал. Куатетӥ ӧтчаме ветлыны ӧй быгаты. Бадӟым кенеш ужаку, сакгес учкылыны выри телевизорме но, кылзӥ радиоез но. Малы ке огаз но съездлэсь ужамзэ быдэсак ӧз возьматэ. Уг ке янгышаськы, татчыозь али но калыкмы ваньмыныз отын верамъёсын, дэмланъёсын, кутэм документъёсын пыр-поч тодматымтэ на. Газетъёс но кӧня ке статьяос гинэ печатласа буйгатскизы кадь. Нош югдурез ӟеч-ӟеч тодытэк, кызьы-о вань удмуртъёсты ӝутод ӧтчамлэсь решениоссэ быдэсъянэ? Мон сямен, кык пол но-куинь пол но телевидениын но радио пыр возьматоно ӧтчамлэсь быдэсак ужамзэ - кутсконысеныз пумозяз. Дуно ке усе, резолюциосын, решениосын коть тодматоно шаерамы улӥсьёсты. Ӟуч кылын но одно ик верано, дыр, ваньзэ. Е. Петрова, Ижевскысь автозаводын ужась. Нылпиосын уртче "Удмурт кенеш", "Дэмен" огазеяськонъёсты ӵемысь пыкыло, нылпиосын ляб ужало шуыса. Нош ми ноку но ум вунэтылӥське будӥсь кивоштӥсьёсмес. Библиотекаямы трос ужрадъёс ортчытъяськом, соосты ӧтьыса. Нимазы-нимазы но пумиськылӥськом, мӧйыосын ӵош но. Пиналъёсын уртче эскерылӥськом пӧртэм книгаосты, соосты люкалляськом шаерамы улӥсь писательёсын пумиськонъёсы. Покчи суредасьёслэсь но ужъёссэс дырын-дырын дорамы возьматъяськом. Ми доры пумен трос ветло Октябрь ёросысь удмурт пиналъёс. Огазьын ортчытъяськом викторинаос, конкурсъёс, покчиосмес тодматӥськом асьме кырӟанъёсын. ВИ Ӧтчам бере но кӧня ке устоесь ужрадъёсмы вал ини. Алигес тани дорамы ӧтчамы Удмурт радиоын ужасьёсты - "Чагыр, чагыр дыдыке" радиопередачаос понна туэ Кун премиен пусъем эшъёсты. Гажано куноосмы шумпотӥзы зал тыр люкаськем школьникъёслы. Соосты тодматӥзы асьсэлэн ужан амалъёсынызы, Удмурт радиолы 65 ар тырмемен валче поттэм выль книгаенызы. Пумтэм вал татын мадиськонъёс, конкурсъёс, тодматсконъёс, кырӟанъёс. Бадӟым тау карем потэ ёросысьтымы нылпиослэн творчествозыя юртысь, 70 номеро шор ёзо школаысь дышетӥсьёслы, анай-атайёслы. Азьланяз, ВИ Ӧтчамлэсь дэмланъёссэ быдэсъяса, ми уката кужмоятом покчи лыдӟисьёсынымы ужанмес. Т. Лямина, Ижевскысь В. Азин нимо библиотекаын ужась. Оло, нимысьтыз эскерисьёс висъяно? Асьмелэн олокӧня пол озьы луылӥз ни: умоесь решениос кутӥськом но, тросэз соос вуныса кылё, тужгес ик политика удысъя. Тӧроос вошъяськемен но сыӵе югдур кылдэ, дыр. Ярам коть, В. К. Тубылов умой кивалтӥсь кадь. Кун Кенешысь депутатъёс пыр но куд-ог законъёсты кутон понна золгес нюръяськыны луонлыкъёс кылдоз. Но съездлэсь решениоссэ улонэ пыӵатон понна, вань калыкез огазеяно. Нялтас юнгес радъяно кутэм ужпумъёсты улонэ пыӵатонэз. Соосты быдэсъямез синйылтыса возьыны, оло, нимысьтыз пичигес группа кылдытоно? Исполкомен гинэ буйгатсконо ӧвӧл, сыӵе органмы азьло но вал угось, нош стросэз малпанъёс бумага вылэ кылизы. К. Галиханов, архитектор. Куд-ог чуръёссэ выльысь учконо на Берлосез ӧтчаммы, мон сямен, умой ортчиз, удмуртъёслы огазеяськыны котыр ласянь юрттӥз. Огкылысь, огинын гинэ асьмеос бадӟым кужымлы пӧрмом. Табере, оло, вордскем кылмес но зэмос государственной карыны ӧжыт коть каньылгес луоз, ӝоггес кутозы "Удмурт Республикаын кылъёс сярысь" Законэз. Но солэн инъетысьтыз куд-ог ёзъёссэ, чуръёссэ выльысь эскероно на, дыр. Уг ке янгышаськы, отын тазьыгес гожтэмын кадь: нылпиосты кыӵе кылын дышетонэз, пе, быръё анай-атайёс. Ӟуч кылэз асьмеос бырйытэк дышетӥськом ук, нош малы-о удмуртъёс ас кылзэс озьы дышетыны кулэ ӧвӧл? Вордскем кылмес ас нылпиосмылы ӧм ке пыӵатэ, сыӵе югдур номырин тупатонтэм изъян ваёз калыкмылы. Г. Перевощиков, Удмуртиысь калык писатель. "Гербере" - пыдын Та чебер праздникмес Сарапул городын но ёросын улӥсьёс туж ярато. Асьмелы огазеяськыны юрттэ со. Но кылем гужем милям удмуртъёсмы пӧлысь "Гербере" вуылӥз чылкак одӥг мурт гинэ. Со но... пыдын ветлэм. Бен, бен, пыдын! Улонмы уродмемен, ваньмыз дуно луэмен, машина но шедьтыны туж шуг ини угось. Соин ик мон ӵектӥсько: "Герберлы" дасяськон вакытэ "Удмурт кенеш" но "Дэмен" огазеяськонъёс котькуд городысь, ёросысь кивалтӥсьлы мед вазиськысалзы, та празднике ветлыны одӥг коть машина, автобус висъяны курыса. Налог ваньмы тыриськом ук, нош интыосысь кивалтӥсьёс чурытасько, транспорт висъямзы уг поты, озьы ултӥяло, шуысал, асьме калыкмес. Е. СПИРИДОНОВА, Сарапулысь делегат. Бӧлякен-бӧлякен Шаерамы улӥсьёс тодо ни, дыр, вуоно быръёнъёслы дасяськонъя "Удмуртия" огазеяськон кылдытэмын шуыса. "Удмурт кенеш" кылдытэ кадь "Республика" огазеяськон. Кин кудаз пыриськоз - котькинлэн аслаз ужез. Но быръёнъёслы дасяськон, депутатэ кандидатъёс понна кинюртэмъёс люкан табере туж секытэн сётскоз. Асьмеос тросэз улӥськом ни кортэн-анданэн дурем ӧсъёс сьӧрын - реформа ортчытӥсьёс пумен зол люко калыкез. Соин ик ӵектӥсько пичиесь бӧлякъёсы огазеяськыны. Озьы уртче каньылгес луоз кандидатъёсмы понна агитация нуыны, усто адямиос понна огкылысь куараосмес сётыны. Тазьы ужан пумысен ми удмуртъёслэн ВИ Ӧтчамазы Устинов ёросысь ветлэм куд-ог делегатъёсын кенешим ни. Умойгес пыриськоно троссэгес удмуртъёсты, бигеръёсты депутатэ кандидатэ ӵектонэ но. Г. Касимов, Устинов ёросын улӥсь бигер воргорон, крезьгурчи. Вемеосты эн вунэтылэ Ӵем гинэ таӵе ӝожтӥськонъёсты кылылоно: вот, пе, клубез, магазинэз выльды вал - коньдон ӧвӧл. Кытӥяз укно косякъёсты, рамаосты гинэ но бюджетысь уксё висъятэк лэсьтэмзы уг поты. Кураськисьёс сямен ветло кивалтӥсьёс дортӥ. Нош мар-о асьмеос, йӧно, таза удмуртъёс, вунэтӥм-а, мар-а ини вемеосын ужанмес? Та ӟеч сямез выльысь улӟытоно. Кылсярысь, али куд-ог районъёсын лэсьто культурая юртъёс, центръёс. Татын но ӝожтӥсько: вот, пе, ӝоггес та чебер юртмес вутты вал но, коньдон нокин уг сёты. Умой-умой учконо ке, кор кораны но, пул пильыны но, коркалэсь липетсэ липыны но, гурзэ пуктыны но вемеен дунтэмгес усьысал. "Удмурт кенеш" та ӟеч сяммес паськытгес мед вӧлмытысал. Зэм, бадӟым ужъёсты коньдонтэк уд лэсьты, нош чыры-пырыоссэгес, выльдӥськыны юрттӥсьёссэ дэмен, вемеосын быдэсъяны кулэ. Пӧртэм спонсоръёслы но быгатыса вазиськоно, вылды. В. ЛЕБЕДЕВ, "Буммаш" заводын ужась. Армязе вуылозы куноос Улонмы уродме ке но, гуртысьтымы калык йырзэ мыкыртыса уг возьы. Шугадӟонэз шӧдылытэк сямен, кыштыр гинэ ужа аслаз удысъёсаз. Ваньмон дыр ке вуэ, отын но татын кылӥсько кырӟанъёс. Шулдыръяськыны быгато угось милям. Егитъёс но, мӧйыос но кырӟаны-эктыны ярато. Асьсэос но чебересь, йӧноесь, куараоссы но азвесь кадесь. Соин, лэся, гуртысь артистъёсмес ӧтьыло пӧртэм ёросъёсы, гуртъёсы. Шаркан палась Мувыре но, Киясае но, Воткинск ёросысь Куки гуртэ но, мукет интыосы но вуылӥм ни. Сценарийёсмес, пӧртэм ӟеч сямъёсты возьматӥсь номеръёсмес асьмеос гожъяськом, пересьёсмылэсь юалляськыса дасяськом. Котькудӥз усточимы ас бӧлякысьтымы мар ке но ӟечсэ пыртыны тырше шулдыръяськонэ. Такмакъёсмес но гурт калык пӧлысь люкаськом. Озьы кылдӥз "Сяськабей" ансамбльмы. Чебер удмурт фольклорен герӟаськемын со. Огкылын вераса, улэм-вылэммы яра бускель гуртъёсысь ӵыжы-выжыосмылы но. Оло соин но гуртамы усьтыны чаклало быдэс районмы понна удмурт культуралы сӥзем юрт. Адӟем карымон луоз со, трос ӵыжы-выжыосмы люкаськылозы татчы. Исполкомысь культура отделлэн кивалтӥсез В. А. Шадрина ӵем вуылэ юртэз эскерыны. Тупатъян-выльдон ужъёсыз бен тырмыт ай. Юртэз нимысьтыз чебер карем потэ. Гурзэ ӝутӥм ни, котырзэ йӧнгес карим. Клубысь, библиотекаысь эшъёсын уртче дасяськиськом культурая юртэз усьтыны. Кулэ книгаосты вайыло Михайловкаысь но. Асьме дорысь чеберлыко литературамы ӧвӧл ни, шуыны яра: книгаос сузмемын. Удмуртъёсыз туж ичи. Нылпиослы но кӧня ке гинэ экземпляр вань. Туж ӧжыт искусствоя, удмурт калыклэн историезъя, этнографияя литература. Газет-журналъёс пӧлысь "Инвожо" гинэ вуэ. Лыдӟись ӧвӧл шуыса, "Кизилиез" басьтэмысь дугдӥзы. Калыкмес ушъяй ке но, кытӥяз анай-атайёсыз юн пыкылэм потэ. Вордскем кылзылы нылпиоссэс уг дышето доразы. Озьы выжытэк ум быре-а? Зэм. Усточиосмы будо ик садикын но школаын. Туэ кыкез семьяос асьсэлэсь нылъёссэс Ижевске, усточиослэн школаязы-интернатазы, нуллӥзы вал. Ушъямон кырӟало угось кыксы ик нылашъёс. Нош дышетскон дырзы вуиз но, интернатэ ӧз вуэ ни. Асьмелы, гажано удмуртъёсы, азьпалмы сярысь но золгес сюлмаськыны кулэ. Пиналъёсмес ке ӟечлы, чеберлы ӧм дышетэ, кин-о азинтоз культурамес, искусствомес? Кинъёс понна ужалоз удмурт культуралы сӥзем юртмы? Милям кадь ӟучомем интыосын сыӵе югдурез ялан тодын возьыны кулэ. Гильманов, Камбарка ёросысь Улӥ Армязь гуртысь валтӥсь энергетик. "Удмурт кенеш" огазеяськонлэн исполкомаз быръем муртъёс Президент (Тӧро) - Тубылов Валентин Кузьмич, Кун Кенешлэн депутатэз Кун Кенешлэн Президиумаз быръем мурт. Вице-президент - Малых Нина Игнатьевна, Дышетӥсьёслэсь тодон-валанзэс будэтонъя институтысь методической кабинетлэн кивалтӥсез. Вице-президент - Митрофанов Валерий Яковлевич, Кун филармонилэн чеберлыкъя кивалтӥсез. Андриянов Алексей Геннадьевич - Удмурт кун университетын дышетскись. Ахророва Галина Александровна - Ижысь администрацилэн кивалтӥсезлэн воштӥсез. Байметов Илья Михайлович - "Вордскем кыл" журналлэн валтӥсь редакторез. Ванюшев Василий Михайлович - Историяя, кылъя но литературая институтлэн директорезлэн воштӥсез. Емельянов Леонид Петрович - Удмуртиысь ветеранъёслэн огазеяськоназы ужась. Золотарева Надежда Константиновна - "Иднакар" газетлэн редакторез (Глазов город). Ившина Валентина Михайловна - Калыкез дышетонъя министерствоысь национальной школаосъя отделлэн кивалтӥсез. Корнилова Татьяна Лазаревна - Удмурт нылкышноослэн огазеяськонзылэн тӧроез. Лебедев Иван Иванович - "Удмурт дунне" газетлэн валтӥсь редакторезлэн воштӥсез. Лисина Антонина Михайловна - Правительстволэн Тӧроезлэн воштӥсез. Михайлов Вячеслав Дмитриевич - "Удмуртия" ГТРК-ысь спецкорреспондент. Никитин Валерьян Арсентьевич - Завьял ёросысь "Путь Ильича" колхозлэн тӧроез. Образцова Нина Андреевна - Алнаш ёросысь администрацилэн кивалтӥсезлэн воштӥсез. Окулов Иван Вилорьевич - Депутатъёслэн Можга ёрос советсылэн тӧроез. Осипов Василий Андреевич - Удмурт культурая "Дэмен" обществолэн тӧроез. Панфилова Валентина Ильинична - Пичи Пурга ёросысь администрацилэн кивалтӥсезлэн воштӥсез. Разин Альберт Алексеевич - Удмурт кун университетысь Адямилыкъя институтлэн кивалтӥсез. Уткина Надежда Эдуардовна - Егитъёслэн "Шунды" огазеяськонзылэн тӧроез. Якупов Владислав Аксямович - "Крезь" предприятилэн кивалтӥсез. Яшина Роза Ивановна - Удмурт кун университетысь доцент. Финн-угор калыкъёслэн консультативной комитетазы быръем муртъёс Тубылов Валентин Кузьмич, "Удмурт кеншлэн" тӧроез. Смирнова Светлана Константиновна, Правительствоысь Калыкъёсын ужанъя комитетлэн тӧроез. Тӧро кенеше быръем муртъёс Перевощиков Юрий Семенович, Удмурт кун университетысь профессор, экономической наукаосъя доктор. Пономарев Карл Александрович, исторической наукаосъя доктор. Стрелков Николай Сергеевич, Ижысь медициная кун академилэн ректорез. Чернов Петр Константинович, Удмуртиысь калык писатель, Нуриахметов Валерий Михайлович, Дебэсысь "Байгурезь" газетлэн редакторез. УДМУРТ РЕСПУБЛИКАЫН 5-ТӤ ТОЛ НО 7-ТӤ ГУЖЕМ ГУРТ ШУДОНЪЁСТЫ ОРТЧЫТОН СЯРЫСЬ УДМУРТ РЕСПУБЛИКАЫСЬ ПРАВИТЕЛЬСТВОЛЭН ПОСТАНОВЛЕНИЕЗ 1997 арын 15 декабре Ижевск город � 1101 Тазалыкез юнматонъя ужез ӟечгес радъян вылысь, гуртын ужасьёс но соослэн семьяоссы пӧлын гужем гурт ӵошатсконъёсты но "Удмурт дунне" газетлэн призэз понна тол ӵошатсконъёсты ортчытон сямез мур пыӵатон, физической культураез но спортэз вӧлмытон, ёросъёслэсь спортъя инъетсэс юнматон понна, Удмурт Республикаысь Правительство пуктэ: 1. Удмурт Республикаысь Физической культурая но спортъя кун комитетэн, Алнаш но Красногорск ёросъёсысь администрациослэн 1998 арын феврале Алнаш ёросысь Асаново совхоз-техникумын 5-тӥ тол гурт шудонъёсты, 1998 арын июнь толэзе Красногорское черкогуртын 7-тӥ гужем гурт шудонъёсты ортчытон сярысь ӵектонэнызы соглаш кариськоно. Коньдон висъянъя сметаез юнматоно. 2. Удмурт Республикаысь Физической культурая но спортъя кун комитетлэн (А. М. Касихин), Алнаш ёросысь администрациен (В. И. Городилов). Красногорск ёросысь администрациен (М. И. Матушкин), Удмурт Республикаысь Гурт хозяйствоя но сиён-юонъя министерствоен (В. И. Жуйков), Удмурт Республикаысь Калыкез дышетонъя министерствоен (В. У. Пушкин), Удмурт Республикаысь Культурая министерствоен (Г. В. Чайников), Удмурт Республикаысь Егитъёсын ужанъя кун комитетэн (А. И. Гальцин), "Удмуртавтодор" кун предприятиен (А. В. Соловьев), "Удмурт дунне" газетлэн редакциеныз (А. П. Шкляев) ӵош дасяно программаез, проектно-сметной документациез, спортъя сооружениосты, соцкультбытлэсь объектъёссэ, улон но дэмен сиськон интыосты пуктыны но тупатъяны луонлыкъёс кылдытоно. 3. Удмурт Республикаысь Коньдон ужпумъёсъя министерстволэн (В. В. Бельтюков) 1997 арын ИВ кварталын но 1998 арын И кварталын Удмурт Республикаысь Физической культурая но спортъя кун комитетлы, Алнаш ёросысь администрацилы коньдон висъяно министерствоослэн но ведомствоослэн бюджетъёссы чотын, юнматэм сметаосты лыдэ басьтыса, спортъя базаосты, соцкультбытлэсь объектъёссэ лэсьтон но тупатъян, 5-тӥ тол гурт шудонъёсты дасян но ортчытон понна, 1998 арын И-ИИ кварталъёсын - Красногорск ёросысь администрацилы спортъя базаосты, соцкультбытлэсь объектъёссэ лэсьтон но тупатъян, 7-тӥ гужем гурт шудонъёсты дасян но ортчытон понна. 4. 5-тӥ тол но 7-тӥ гужем шудонъёсты дасянэз но ортчытонэз эскероз Удмурт Республикаысь Правительстволэн Тӧроезлэн воштӥсез А. М. Лисина. Удмурт Республикаысь Правительстволэн Тӧроез П. Н. Вершинин. АРЕЗ АЗЬЛАНЬТЫСА Му вӧй поттон шаермылы уно пайда вае. Соин ик "Удмуртнефть" АО-лэн дырызлэсь вазь, 12 декабре, арлы планзэс быдэстэмез шумпотымон. Кыскемын 5300 сюрс тонна му вӧй, 86 выль скважина ужаны кутскиз, эшшо 104-ез матысь дыре музъемлы "йыбыртъяны" кутскоз. 532606 миллион манет уже кутэмын, кылсярысь, 14 иськем сюресъёс асфальтэн шобыртэмын, музъем ултӥ 43 иськем гумыос кыскемын, 13 сюрс квадратной метр мында юртъёс пуктэмын. Ар бырытозь Удмуртиысь нефтяникъёс планлэсь вылтӥ 300 сюрс тонна му вӧй поттозы на. Ветеранъёс пумиськозы Ижевскысь ветеранъёслэн кенешсы ортчытэ "Ветеран" клублэсь заседанизэ. Со сӥземын Россиысь ветеранъёслэн кенешъёссылэн пленумзылэн но Ижевскысь арлыдоослэн организациоссылы. Ортчоз 1997 арын 24 декабре Кун филармонинын (Пушкинской ульча, 245), кутскоз 11 часын. Концерт возьматэмын луоз. Пырыны луэ, дун тырытэк. Караваевлэн бальзамез Солы сӥзем выставка куинь нунал ӵоже мынӥз Ижевскысь "Удмуртия" кинотеатрын. Отчы лыктэмъёсты эмъюмъёслэн аспӧртэмлыкенызы тодматӥз Елена Васильевна Дорофеева - Россия радиоын тазалыклы сӥзем "Домашняя академия" рубрикаез нуись журналист, Москваысь В. В. Караваев нимо фондысь специалист. Люкаськемъёслэн юанъёссылы пыр-поч валэктонъёс сётӥз. Выль эмъюмлэн кужымезлы оскисьёс басьтӥзы Витаон, Соматон, Аурон бальзамъёсты, В. В. Караваевлэсь "Дорога здоровья" книгазэ. Выставкае лыктыны быгатымтэос бальзамъёсты басьтозы аптекаосысь. Пенсионеръёслы дунтэм дунын вуза Ижевскысь Удмуртской ульчаысь 231-тӥ юртэ интыяськем ("Доктор" фирма гинэ). Л. МЕДВЕДЕВА. ВАЛЪЁС КЫТКЕМЫН. ТАБЕРЕ - ГЫРОНО Вань удмуртъёслэн ВИ Ӧтчамзылэсь пусъем ужпумъёссэ быдэсъян понна, табере ваньмыз дась ни, шуыны яра. Пичи кенеш бырйиз тӧролы юрттӥсьёс, исполком, финн-угор выжыысь калыкъёсын уртче ужанъя комитетэ адямиос, Тӧро кенеш. В. К. Тубылов аслыз юрттӥсьёс ачиз ӵектӥз. Одно ик соосты мед быръёзы шуыса, кытӥяз юн мылкыдзэ но возьматӥз. Вольыт ортчиз ваньмыз, шуысал. Бадӟым ӧтчамын кадь ӟырдыт вераськонъёс, нюръяськон сокем ӧй вал. Огез гинэ тумошогес потӥз: кинлэн ке ӵектэмезъя, залэ пуксемъёсты люкизы "паллянъёслы" но "буръёслы". Ӧтем эшъёс, пе, - сыӵеос трос ик ӧй вал, - кизэс ӝуткаса, медаз суралэ быръёнъёсыз. Огшоры валэктоно вал, быръёнъёсы пыриськыны быгато Пичи кенешысь адямиос гинэ, шуыса. Та чыры-пыры сярысь ӧй но поттылысал. Но асьмеды висъяны, люкылыны турттӥсьёс трос ук. Сыӵе "визнанъёсы", "курикъёсы" медам ни шедьылэ вал. Нош Валентин Кузьмич Тубыловлэн юрттӥсьёсыз сярысь ке верано, солэн бур палаз пукоз Валерий Яковлевич Митрофанов, паллян палаз - Нина Игнатьевна Малых. Кыксы ик удмуртлыкмес ӧръясьёс пӧлын выль адямиос ӧвӧл ни. Исполкоме быръемын пӧртэм огазеяськонъёслэн, "Удмурт кенешлэн" куд-ог ёзъёсызлэн тӧрооссы, тодосчиос, писательёс, журналистъёс. Эсьмаса, огез студент но сюриз вылӥ кивалтонэ! Азьло аръёсы сямен, ӧтчам вакытэ ӟырдатэм ӟеч мылкыдъёсты сӥятыны медам сётэ ни вал исполкомысь эшъёс. Ужамъяськыса медам жаде, заседаниосын гинэ медам пуке, нуналмысь калык пӧлын мед луысалзы, "Кенешлэсь" ёзъёссэ котькуд кыдёкысь гуртын но мед кылдытысалзы. Соя табере дунъет сётозы, вылды, котькудӥзлы. Пичи кенешын нимысьтыз эскеремын мукетыз но ужпум. Сокем ик кыдёкын ӧвӧл ни Ижевскысь но республикаысьтымы кивалтон ёзъёсы быръёнъёс. Лыдӟисьёс тодо: али кылдытӥське быръёнъёсъя огазеяськон. Солэсь ужзэ радъялоз законъёсты, правоосты, депутатъёс луон понна нюръяськонэз ӟеч валась-тодӥсь адями Леонид Дмитриевич Загребин. Тӥни озьы, Тӧромылэн ваньмыз валъёсыз кыткемын, юрттӥсьёсыз быръемын. Табере дэмен, ог-огмес валаса, "анаосмес" гырыны кутсконо! Ма, "анаос" - удысъёс но меӵак пусъемын Пичи кенешын. Мыным соиз туж яраз. Бӧрысьлы кельтытэк, пырак татын кылдытӥзы пӧртэм комиссиос. Кенешлэн кыкетӥ люкетаз, Бадӟым ӧтчамын сямен ик, люкаськемъёс со комиссиосын ужазы ни. Вераны кулэ: В. Я. Митрофанов культурая, искусствоя но вӧсьёсъя программалы ӟеч инъет кылдытэм. Отын, мон сямен, тросэзлэн делегатъёслэн съездын верам ӵектонъёссы лыдэ басьтэмын. Озьы ке но, Пичи кенеше ветлэмъёс эшшо чарак дэмланъёссэс веразы на. Дыр тырмымтэен, программаез пумозяз сазнаны ӧз вуэ. Но Н. Н. Бочкарева ваньзэ верамъёсты, мылкыдъёсты пусйиз, огъя ужан планэ соос одно пыртэмын луозы. Комиссилы кивалтӥсе быръемын писатель Петр Константинович Чернов. Бадӟым ныпьетэз эшъёсыныз ӵош вырӟытыны Инмар солы тазалык но кужым мед сётоз. Нош вырӟытоно, зэмзэ но, туж троссэ. Одӥг-кык кылын гинэ вераса, программаын чакламын Удмурт Республикаын культура сярысь законэз юн быдэсъян вылысь нюръяськонэз кужмоятыны, Кун Кенеше пӧртэм законъёслэсь инъетсэс эскерыса келяны, культура но искусство удысъёслы кадръёс дасянэз УдГУ-ын радъяны. Пусъемын "Удмурт вӧсь" огазеяськонлы архитектурной ансамбль лэсьтыны кутсконэз ӝогомытон, шаерысьтымы дано адямиослэсь вордскем нуналъёссэс дэмен пусйылон но мукет. Озьы ик нырысьсэ кылдытэмын экономикая но музон удысъёсъя комиссиос. Соослэсь кызьы ужамъёссэс возьматъялозы, вылды, газетъёс но, телевидение но, радио но. К. ЕГОРОВ. Газетлэсь люкиськем уг поты Куд-ог тодмоосы шуо, мар мылыд потэ на со гожъяськон бордын вырыны? Так но ужлы ёрмыса уд пукиськы кадь ук. Зэм, ужез ноку лэсьтыса уд быдты, ужасезлы со котьку сюроз. Гожъяськон но озьы ик, ваньзэ вераса уд быдты. Соиз но, таиз но мылкыд бордысь потэ. Тани "Удмурт дунне" газетэ мар но со гожтӥсько ке, яратонэлы гожтэт ыстэм кадь потӥсько. Газетэ потоз-а, уз-а, уг чакласькы. Печатламын луэ ик ке, соку эшшо но мылкыды ӝутӥське. Чорыгась но озьы ик: йӧ вылын куддыръя лумбыт пуке ке но, одӥг чорыг но уг куты, буш бертэ. Пӧйшурасьлы но котьку ик уг удалты. Озьы ке но, бератаз ум ни ветлэ уг шуо, сюлэмзы косэмъя, нош ик мыно. Зэм, нуналъёс олокыӵеесь но луо. Куддыръя газетэз ик кадь кулэ ӧвӧл ни, кие ручка но кутэм уг поты. Нош мылкыд ворме, сюлэм уг чида, туж матысь эшедлэсь кадь мӧзмыны кутскиськод. Соиз но вань. Мыло-кыдо, туж умой кадь гожтыны тыршиськод, нош берло маиз ке но уг кельшы, кесяськод но куштӥськод. Куддыръя редакцие лэзьыса но, кыӵе ке но муген газетэ уг поты. Соизлы но дышемын, уг куатаськиськы. Табере мон юасал городын, тужгес но гуртын улӥсь ас калыкелэсь: малы вань удмуртъёс понна одӥг гинэ потӥсь "Удмурт дунне" газетэз ӧжыт басьтӥськомы? Коньдон ӧвӧл шуоно ке, кинлэн со уксёез ӧжыт, со ик та газетлы гожтӥське. Кинлэн коньдонэз трос, со ик чурыта. Гожтӥське ке, ай ӟучсэ басьтыны выре. Гуртын улисьёс озьы ик газетэ но туж шер гожъяло, телевизор азьынгес, лэся, ваньмон дырзэс быдто. Удмурт калыктэ, удмурт кылдэ но вунэтыны уг яра ук. Газетэз лыдӟись, отчы гожъясь ке ӧз луы, кин понна со потоз? Азьланяз воксё асьме газеттэк- а, мар-а кылём? Мон та газетэн куамын арлэсь кема эшъяськисько но басьтӥсько ини. Кыӵе ке муген кык-куинь арлы вис карылӥ. Нырысез гожтэме потӥз 1957 арын. Мӧйы муртлэн кионэз сюрлоен кутэмез сярысь мади вал. Тӥни со дырысен пичи-пичи гожъяськисько. Вордӥськем гуртам (Пичи Пургалась Вуж Моньяла) бертылыкум, одӥг пиосмурт юа (мон сое уг тодмаськы ни, ог 50 аресъем луоз), тон, пе, Беги ӧвӧл-а? - Беги, - вазисько. - Роман Яковлев-а? - выжыятэ. - Шонер вераськод. - Иське, тон ик вылэм, шонер малпаськем, - шуэ воргорон. - Туж кельшо вашкала улэм-вылэм сярысь гожъямъёсыд. Газетэз ке басьтӥсько, "Берекетэз" учкисько. Только сое али пичигес кельтӥзы, туж жаль. Ачиз со Агрызын улэ, нош удмурт газетэн тӥни кыӵе тунсыкъяське. Озьы лыдӟисьёс но мылкыдэз ӝуто. Тау, ӟеч кылыдлы, шуисько, тодмотэм эшелы. Тани нош ик газлы, телефонлы но мукетэзлы дунъёсты будэтӥзы. Нош пенсиез туж ӧжыт ватсало. Кызьы ке но улыны выроно. Кӧт но сюма угось. Нош яратоно газетэлэсь люкиськеме уг поты. Туэ но мон солы кемалась гожтӥськи ини. Роман Яковлев, Ижевскын улӥсь. ЙӦПЕРЕЙ НО МУКЕТЪЁС Пичи нылпиослы выжыкыл-сузьет Фойеын чеберъям кыз сылэ, пӧртэм буёло шаръёс, гирляндаос, борддорын Выль арлы сӥзем суредъёс ошылэмын. Ӝӧк вылын киужъёс, озьы ик шудонъёсыз ортчытъяны кулэ арбериос тырылэмын. Заллэн мукет палаз ӝыныё адӟиське Йӧперейлэн йӧлэсь (мамыклэсь) коркаез. Кык маскарчиос праздникез кутско. Нырысетӥез. Та чебер сэрегамы Выль армы ӝоген вуоз. Нош шулдыр луоз солы, Кин эктоз но кырӟалоз. Кыкетӥез. Серекъян, шудон, эктон, Выжыкыл пыртӥ ортчон, Медам лу вылэм мӧзмон - Шулдыртом ке, шулдыртом! Нырысетӥез. Шулдыртон сярысь вазьгес Вераськод ай тон, эше. Сьӧд пӧртмась, пе, Выль армес Суралоз, кароз шимес! Кыкетӥез. Макем куалекъясь ук тон. Пӧртмасез мон тодӥсько. Шып, тӥни вуэ тушмон. Веднамзэ ӵош кылзӥськом. Сьӧд пӧртмась ас понназ бӧтьыртыса потэ. Солэн дӥсез сьӧд, вылаз шер-тур тӧдьы кизилиос ворекъяло. Йыр вылаз сьӧд колпак выллем изьы, кияз бодыез. Сьӧд пӧртмась. Ӟечбуресь-а, пиналъёс, Кисло-кусло пуклёос! Дуннеез котыръяса, Ӟеч муртъёсты веднаса Вуи пырак дорады! Кин тодоз пӧртман кылме, Кузьмало кылбодыме. Кин лушкем монэ кылзэ, Пӧрмыто йӧлы ваньзэ. Ак-лё, лкаё, каёл, клёа - Ма сыӵе? Буёл, я клей-а? Нылпиос (ӵош). Тодӥмы - со Ёлка! Ура! Кылбоды луоз милям! Кылӥське йыгаськем куара. Сьӧд пӧртмась бодызэ сётыса уг вуы, пыре Тӧдьы пӧртмась. Йӧ корка пала карисько. Тӧдьы пӧртмась. Ӟечбуресь, эшъёсы, Кутэлэ пӧлады - Мон Тӧдьы пӧртмаськись, Тӥледлы юрттӥськись. Сьӧд пӧртмась. Юрттӥськись, шуиськод! Уз пӧрмы тынад. Монэ тодмаськод: Кужмы юн лек, урод! Кык пӧртмасьёс кутско бодыенызы нюръяськыны. Сьӧд пӧртмась Тӧдьы пӧртмасез кыз борды ӝиптэ. Со вакытэ кесяськем куара кылӥське. Ёлка. А-а-а! Юрттэлэ! Со монэ коралоз, Сутоз но быдтоз! Потэ Кащей. Кащей. Ха-ха-ха, кышкаськоды? Учкоды но адӟоды - Чебер кызды пу луоз, Выль арды но сураськоз! Тӧдьы пӧртмась. Э-э, эн кышкаты, пересь, Кужыме - та бодылэсь. Сьӧд пӧртмась. Кылбоды, ведна золгес! Ми вормом Тӧдь пӧртмасез! Кащей (вожомыса). Кара-киро, коро-поро, тэро-таро - пыр-р! Тӧдьы пӧртмась. Юрттӥсе, бодые, Эн сёты сьӧд кужымлы Чебер кызмес тарканы. Сьӧд пӧртмась. Йылсо бодые, Веднась бодые, Юртты, юртты ӝоггес Быдӟым Кащейлы. Ваньзы кыз котыртӥ бергало, огзы бӧрсьы огзы пӧртман кылъёссэс вераса. Со вакытэ ог секундлы тыл кысылэ. Кыз улысь Лымыпог потэ. Лымыпог. Иземысь сайкатӥды. Ма кыштыр выриськоды? Мон уг валаськы, я мар Бергаськоды тури-пар? Тӧдьы пӧртмась. Юртты мыным, Лымыпог, Кудзэ-огзэ погмалод. Тӧдьы пӧртмась бодыеныз шукке но, малпамтэ шорысь Лымыпыры (Снежинка) потэ. Солэн шукрес тӧдьы дӥсез. Ваньзы шуак шып карисько, учко. Лымыпыры. Пилемъёс дорозь вуиз Тӥляд ваче выремды. Зурканы кутски отын, Мон васьки сильтӧл вылын. Кащей (матэгес кариськыса). А-а, чебер Лымыпыры! Тон луод мынам нылы. Яке пӧртмало али, Выльысь ву луод тани! Лымыпыры (кышкатэк). Мон уг кышкаськы, Кащей. Тынад кужымед чигоз! Сое шедьтоз Йӧперей х Вень йылдэ ӝог пыргытоз! Лымыпыры (одӥг лымы тылызэ басьтыса). Лобӟы, лымы тылые, Ву ӝоггес атай доры. Атае - Быдӟым Перей. Тод, ӧвӧл со огшоры! Йӧперей потэ. Йыр вылаз бадӟым изьы, йӧ ӟузыриосын чеберъямын, копак чагыр-тӧдьы чиля. Йӧперей. Ма луиз, мусо нылы, Ма лэзид лымы тылы? Лымыпыры. Чеберъям дуно кызмес Кораны турттэ пересь! Йӧперей. Мон кужмо, юн Йӧперей - Тон валад-а, сьӧд Кащей?! Нош али ӧтё вынме. Йӧбуран тӥни вуэ. Выныз Йӧбуран потэ, Сьӧд пӧртмась но Кащей котыртӥ йӧэн-лымыен пазяське. Тӥледыз ми пурӟытом, Ваньдэс куажыр-р пыргытом! Кылӥськод-а, Сьӧд пӧртмась? Кошке, пыргытын ми дась! Пеллям, шулам кылӥське, котыр лымы пурӟе. Озьы Тӧдьы пӧртмась пӧртма. Сьӧд пӧртмась (кышкаса, усемлэсь кутӥськыса). Я, вормиды ке, вормиды. Мед лыктоз ни Выль арды. Кащей но Сьӧд пӧртмась кошко, берлань чигнаса. Йӧбуран. Табере, Тӧдьы пӧртмась, Шулдыртэ пиналъёсын. Ми но кошкыны ни дась, Ветломы уй палъёсы. (Йӧперей но Йӧбуран кошко). Тӧдьы пӧртмась. Вералэ ай, пиналъёс, Кинэ возьмаськом туннэ? Куараос: Тол Бабаез, Лымынылэз, Выль арез. Тӧдьы пӧртмась бодыеныз шуккылэ, шуккемезлы быдэ кин ке потэ, нырысь ик - Тол Бабай, собере - Лымыныл, собереяз - Выль ар. Тол Бабай. Ӟечбуресь, пиналъёс! Выль арен тӥледыз! Лымыныл. Ӟечбуресь, эшъёсы! Капчи мылкыд тӥледлы! Выль ар. Ӟечбуресь, мусоос, арды шудо мед луоз! Тол Бабай. Кема-а бен возьмады? Ми лыктӥм тӧлъёс вылтӥ. Кизилиос, юг толэзь Югыт каризы уез. Трос салам коньыослэсь - Лэзизы пушмульызэс. Йӧперей но Йӧбуран Веразы, тӥ кудпалан. Тол Бабай сётъя пичиен саламъёссэ. Лымыныл. Я, эшъёс, дэмен эктом, Кырӟалом, кылбуралом. Кырӟало Выль ар сярысь, бергало-поръяло, Лымыныл, Лымыпыры но Лымыпог - шоразы. Выль ар. Мон тӥляд - Выль арды. Саламе - шудо пуйы. Кин монэ юн возьмам, Со басьтоз дуно салам! Пиналъёс дасям кылбуръёссэс, кырӟанъёссэс но эктонъёссэс возьмато; Тол Бабай но Выль ар саламзэс сётъяло. (Та вие пӧртэм конкурсъёс но шудонъёс ортчытъяны луоз.) Тол Бабай. Ӟечкыласа Выль арен Вырӟомы ни ми каллен. Мед луоз шудо арды. Эн вунэтэ милемды. Лымыныл. Вуоно аре выльысь Пумиськомы асьмеос. Дышетскон удысады Ӟечгес тырше, пиналъёс! Ӟеч луэ! Пиналъёс. Ӟеч луэ!.. Валэктон. Ӝытлэн пумаз луоз чебер дӥсь, тунсыко маска понна приз сётыны. Озьы ик кыӵе крезьгуръёс, кырӟанъёс чузъяськизы шуыса юанъёс сётыны яра. Кин тросгес вералоз, солы тужгес дуно кузьым шедёз. Кин ке "король" яке "королева бала" ним басьтоз. Вормисьлы йыр вылаз корона быртто. Юлия КУЗЬМИНА. ________________________ Х - Йӧперей - Ледяной. Кык сюлэсь уно вал "Удмурт кенеш" огазеяськемлэн тӧроез Валентин Тубылов но солэн исполкомаз быръем мурт элькунысьтымы ветеранъёслэн советсылэн президиумезлэн членэз Леонид Емельянов пумиськизы Якшур- Бодья ёросысь ветеранъёсын. Ӟырт кезьыт нуналэ райцентрысь культура юртэ люкаськылӥзы ожыь но ужысь кык сюлэсь уно ветеранъёс. Валентин Кузьмич Тубылов тупен-тупен мадиз удмуртъёслэн куатетӥ ӧтчамзылэн ужамез но бурло дыре ортчытэм ужрадъёс, элькунамы та вакытэ кылдэм югдур сярысь. Со сяна, люкаськемъёслэн трос юанъёссылы валэктӥз. Элькунысьтымы ветеранъёслэн советсылэн ужамез сярысь мадиз Леонид Емельянов. Пумиськонын озьы ик вераськизы Удмурт культурая огазеяскьемлэн Якшур-Бодья ёросэзлэн тӧроез Зоя Нурисламова, ёрослэн кузёез Геннадий Вахрушев, районысь ветеранъёслэн азьветлӥсьсы Василий Вахрушев. Лыктэм калыклы ӟеч мылкыд кузьмаса, бадӟым концерт возьматӥз Пичи Пургаысь "Зарни шеп" ансамбль. Л. ПЕТРОВ. Наталь Мар шуом пиелы? Мон ӧй оскы тыныд, тон кошкод шуыса, Кинэн ке но монэ тон воштод шуыса. Табере ни валай, кыӵе тон вылэмед, Кыӵе жоб малпандэ сюлэмад нуллэмед. Чебересь кылъёсын тон монэ пӧялляд, Зарни пи будэтом шуыса вералляд. Собере нош... кулэ ик ӧд кары монэ, Тон кожид палэнэ... Тон ӧд малпа пиед сярысь чик, Со кызьы-о будоз... Ведь куке юалоз: Атае мынам кин? Мар соку вералом, Мар шуом пиелы? Вералом-а, кошкид шуыса, Милемыз адӟемед но уг пот шуыса? Та кылбур чуръёсысь Тон адӟод-а астэ, Валалод-а лэсьтэм янгыштэ? Оло нош, малпаськод?.. Е. ВЛАДИМИРОВА. Пичи Пурга ёрос, Итэш гурт. Малы нылкышноос зульыны ярато? Ваньмыз тодо, нылкышноос кылзэс воргоронъёслэсь тросгес шеро шуыса. Та дырозь таӵе малпан калык пӧлын гинэ вӧлмемын вал. Нокин ӝот-ӝот валэктыны ӧз быгатылы, оло со зэм, оло даур. Но АПА агентство ивортэмъя, Ирландиысь Королевской университетысь тодосчиос та верамез наука ласянь эскеризы но солэн шонер луэмез сярысь йылпумъян лэсьтӥзы. Тодмо луиз, нылъёс анайёссылэн кӧт пушказы ик ымдуръёсынызы вырето, куара сётыны тыршо ни. Пиос сярысь озьы вераны уг луы. Нош 20 толэзь тырмем бере, пичи апокъёслэн зульыны яратэмзы чылкак шараяське. Соос, пиосын ӵошатыса, кылан-буран быгатонлыкъёссэс волятыны сюлмасько но соин ик "туганъёссылэсь" трос вазьгес шонер вераськыны кутско. Кыл куре депутат Мискинь крестьян. Кинлы тон кулэ? Музъемез вузаны лэзён сярысь вераськонъёс, оло, куд-огезлы акыльтӥзы но ни. Но та ужпум укыр бадӟым, соин герӟаськемын асьмелэн азьланьын улонмы. Россия Федерацилэн Президентэз музъемез вузан понна луэ, Кун Дума - пумит. Тазьы учконо ке, сое нимаз адямиос кие сётон понна карисько музъем вылын ноку тыро-пыдо ужамтэос. Нош асьсэлэсь крестьянъёслэсь туала кивалтӥсьёсмылэн юамзы но уг поты, шӧдске. Дуннеысь одӥгез бадӟым держава Борис Ельцин кивалтон аръёсы копак куашказ, шуыны луоз. Куке но историкъёс та югдурез паймыса эскерозы ай: кызьы озьы, фашистъёс Россиез зӥбыны ӧз быгатэ, нош асьме кивалтӥсьёс асьсэ киынызы сое быдтон калэ вуттӥзы? Мон, оло, янгышасько, но кылдэм югдур понна кыл кутыны кулэ интеллигенция но. Ужаса улӥсьёсын будэтэм интеллигенция (солэн бадӟым люкетэз) вакчи дыр куспын воштӥськиз но "демократия" сюрес вылэ султӥз. Кыӵе ӝутскем мылкыдын со дурбасьтыны ӧдъяз странамес Западъя выльдыны мылкыд карисьёслы! Озьы ачиз но ӧз шӧды кадь кытчы шедемзэ. Кӧня ке ар куспын быриз наука, учёнойёс пегӟизы кунгож сьӧры, туннэ кык миллион пала нылпиос дышетскыны уг быгато, музъемез гырись-утялтӥсь ӧвӧл ни, заводъёс куашкатэмын, эмъяськон интыос пытсамын. Югдурез юнматыны луоз лыдпусъёсын. 1991 арен ӵошатыса, трактор лэсьтон дас пол кулэсмиз, сӥль поттон - куинь пол, нефть кыскон кык пол синӥз. Огъя вераса, вань удысъёсъя бере кылиськом. Со дыре ик йылӥз странаысь сырьё келян. Газ али кык пол трос вузаськом, солэсь но унолы будӥз пӧртэм пумо металл, бумага, фанера келян. Фосфорен минеральной сылал вузан ньыль поллэсь трослы ӝутскиз. Со-а уг возьматы асьме страналэсь сырьё келясь колонилы пӧрмемзэ? Мон доры алигес вуылӥз Ува ёросысь Гай гуртын улӥсь пенсионер В. К. Копылов. Кемаласен сое тодӥсько. Колхозамы мылысь-кыдысь тыршиз. Капчи ӧй вал пинал дырыз. Со адӟиз, кызьы гуртэ вуиз нырысетӥез трактор, кызьы сюрлоез вштӥз комбайн, чаг тылэз - электролампа. Ӟеч тыршемез пусъемын наградаосын, мукетъёсыз сямен быгатылӥз жадемзэ лымшорысь санаторийёсын веськатыны, эмъяськыны. Пинал будэтӥз, дышетӥз. Нош мыным табере вазиськиз Коньдонзэ берыктыны юрттэт куронэн. 1990 арын солэн сберкнижкаяз ог 50 сюрс манет вал. Со уксёен 7-8 автомашина басьтыны луысал. Туннэ куинь ӟенелик аракы но уд басьты ни. Кин со понна янгыша? Тодмое азьло но, али но гуртын улэ. Кузпалыз улонысь кошкиз, аслаз но тазалыкез лябӟемын. Басьты вал бускель гуртысь (аслазаз уго медпунктэз но ӧвӧл) пичигес ке но улон корка - уг быгаты. Тӥни сыӵе вылэм ужась адямилэн адӟонэз. Кӧня верамын ни калыкез кулак карыса ултӥян учыръёс сярысь. Зэм, уно адямиос юнме курадӟон адӟизы. Нош малы синмес кыниськом туалаез шоры? Гуртоосты огкутскемен куанермытон уно миллион адямиез "кулак" кариз ук. Ай собере гурт калык гинэ сыӵе юмоке ӧз шедьы ук. Номыртэк кылизы врачъёс, дышетӥсьёс, заводысь рабочийёс, пенсионеръёс. "Кулакъёсын" кык нюръяськонъёслэн таӵе но пӧртэмлыксы вань. Узырмем крестьянъёслэсь ваньбурзэс 30-тӥ аръёсы огъя хозяйствое выжтӥзы, ваньмызлы люкылӥзы. Нош таяз учыре ужаса улӥсьёслэн капиталзы кунгож сьӧрысь банкъёсы кошке. Берло дыре интеллигентъёс ялан шуыны выро: революцилэсь азьло Россия туж зол, пе, улӥз. Озьы шат? 1861 арын, Россиын крепостной праволэсь куштӥськыку, Лондонын метрозы вал ини. Ма, асьмелэн вашкала дыръёсысен дышемын ни Западлы йыбыртъяны. Дворянъёс возьдасько вал ӟуч кыллэсь. Куспазы француз сяменгес вераськылыны тыршылӥзы, дорамы палэнысь кулэзэ но, кулэтэмзэ но вуттӥзы. Туннэ сыӵе муртъёслэн выжыослы асьсэлы асьсэос князь но граф титул сётъяло, музъеммес киултон малпанэн уло. Ӵапак соослы кулэ, вылды, 70 аръем историмес сьӧдман. Туннэ куд-ог эшъёс дэмлало гурт улонэз тодмо адямилэн П. Столыпинлэн верамъёсызъя радъяны. Но тупало меда соос али дырлы? Вазен крестьян вань ужъёсты ас кожаз быдэсъяз. Табере югдур мукет. Уже кутоно луэ пӧртэм техникаез, пӧртэм технологиосты. Оген ваньбур поттыны амал ӧвӧл ни. Ас удыссэ ӟеч тодӥсь механизатор, шуом, уз быгаты электриклэсь ужзэ быдэсъяны. Визьмо зоотехник уз пӧрмыты туала комбайнэн ужаны. Уго вакыт воштӥськиз. Соин ик азьло мертэтъёсъя улыны уг луы ни. Азинскем государствоос али вамышъяло гурт хозяйствоосты бадӟыматон сюрестӥ. Асьмелы но уг яра дасо аръёс ӵоже люкам опытмес кир-пазь карыны. Уката ик, Россиысь инкуазь луонлыкъёсты чаклано ке. Тани кызьы шуэ, кылсярысь, Америкаысь гурт хозяйствоя специалист Джон Кристал: "Фермеръёс пумысен малпанэз быдэстон понна, тӥ малпаськоды уно коньдон висъяны. Сыӵе малпан вордскиз 200 ар талэсь азьло но табере быриз. Умойгес учке ай: Америкаез нимаз фермер уг сюды, сое сюдэ трос музъем возись кооператив! Ӝыныезлэсь уноез фермеръёс ватсаса ужано луо промышленностьын, уго асьсэ хозяйствозы чотын гинэ соос улыны уг быгато". Дуннеысь тросаз кунъёсын, Голландия, Израиль, Китай но мукетъёсыз) музъем государство киын возиське. США-ын ӝыныезлэсь тросэз музъемзы сыӵе. В. И. Ленин но мукетъёсыз лыдъяло вал, Столыпинлэн реформаез куашказ шуыса. 1916 арозь Россиын огъя хозяйствоосысь потӥз 2,5 миллион адями, куке крестьянъёс ог 80 миллион пала вал. Соку власть коммунистъёс киын ӧй вал, нош реформа ӧз азинскы. Юнме шат? Малы бен туала интеллигентъёс нош ӧтё асьме крестьянъёсыз мыдлань сюрестӥ вамышъяны? Соос сюлмасько выль помещикъёсты кылдытон сярысь. Ойдолэ соглаш луоме: музъеммес вузаны кутским ке, сое басьтозы узыр адямиос гинэ, кудъёсыз пӧлысь уноез кинэ ке пӧяса ванё-буро луизы. Соос асьсэос уз ужалэ, киултэм музъем вылын ужатозы сотэк но мискинь луэм калыкез. "Демократия" кылэз, мукетъёссэ сямен ик, вылды, котькудӥз ас сяменыз вала. Мон малпасько, демократия - нылкышноослы пинал вордыны, соосты будэтыны, дышетыны, котькудӥзлы быгатэмезъя но мылкыд каремезъя ужаны, со понна уждун басьтомы, умой улыны луонлык сётон. Туж оскем потэ, асьме интеллигенция воштӥськоз шуыса. Секыт вакытъёс луыло котькуд странаын. Котьмалэсь кулэез - сыӵе шуг-секытысь ичигес ыштонъёсын потыны тыршон. Зэмос патриотъёс котькыӵе дыре малпаськыны кулэ государстволэн кулэяськонъёсыз сярысь. Умой соиз: сыӵеослэн лыдзы, мон сямен, пумен йылэ. Соин ик оскисько, крестьянэз гажан мылкыд асьме обществоын кылдоз ик ай шуыса. Уго сотэк номыр ӟечез уз луы. Николай Чувашов, Кун Кенешлэн депутатэз. Нуналлэн тодметэз Вашкала календарья - туннэ Спиридонлэн праздникез. Шунды гужем пала берытске. Спиридонлэн нуналэзъя чакланы луэ толлэсь кыӵе луонозэ. Та нуналэ ужаны уг лэзё. Доре пыртоно вишняпулэсь вайёссэ, соосты вуэ пуктыса, коркалэн азьпал сэрегаз интыяно. Вайёс Рождество нуналозь пурӟизы ке, вуоно ар емышо луоз. Ӵуказе - Евстратлэн но Евгенийлэн нуналзы. Та нуналысен 12 сутка ӵоже куазез эскерыса возёно. Котькуд нунал вуоно арын одӥг толэзьлэсь кыӵе луонозэ возьматоз. 26 декабрь тупа январьлы, 27 - февральлы, 28 - мартлы... Рождество нуналэ (выль стилья - 7 январе) куазь возьматоз вуоно арын декабрьлэсь кыӵе луонозэ. Та нуналэ... ар талэсь азьло. 1906 арын 26 декабре вордскиз Удмуртиысь калык писатель М. А. Лямин. Михаил Андреевич 357-тӥ стрелковой дивизия сярысь гожтӥз "Четыре года в шинелях" книгаяз. 1917 арын 25 декабре Украинаын Совето власть ялэмын. Война аръёсы Ижевске выжтэмын вал Харьковысь Ленин нимо машина поттон завод, Воткинске - Киевысь "Арсенал" завод, Глазове - Ворошиловградысь (Луганскысь) патронъёс поттонъя завод. Муниципалитет кылдосъёслэсь границаоссэс тупатыку но вошъяку, калыклэсь мылкыдзэ одно ик лыдэ басьтон сярысь Удмурт Республикалэн ЗАКОНЭЗ Та Закон кутӥське "Россия Федерациын интыосын аскивалтонэз радъянъя огъя принципъёс сярысь" Федеральной законлэн 13-тӥ ёзэтэзлэсь 2-тӥ люкетсэ но Россия Федерацилэн Президентэзлэсь, муниципальной кылдосъёслэсь границаоссэс воштон учыре калыклэсь мылкыдзэ одно ик лыдэ басьтыса, кун властьлэсь но аскивалтонлэсь ёзъёссэс кылдытонъя улосвыл инъетъёсты умоятон пумысен 1997 арын 22 декабре кутэм "Удмурт Республикаын кун властьлэн ёзъёсызлэсь но интыосын аскивалтонлэн ёзъёсызлэсь кусыпъёссэс радъянъя ужрадъёс сярысь" Указзэ улонэ кичӧлтон вылысь. 1-тӥ ёзэт. Муниципалитет кылдосъёслэн границаоссы тупатӥсько но вошъясько исторической но мукет йылолъёсты лыдэ басьтыса но калыклэн, интыосын аскивалтонъя ёзъёслэн, озьы ик Удмурт Республикаысь кун властьлдэн ёзъёсызлэн кичӧлтэмзыя. Та Закон оскон пыӵатэ, улосвылъёслэсь, кудъёсаз кылдытӥське интыын аскивалтон, границаоссэс тупатонъя но воштонъя ужпумъёсты быдэсъяку, калыклэн мылкыдыз лыдэ басьтӥськоз шуыса. 2-тӥ ёзэт. Муниципалитет кылдосъёслэсь границаоссэс тупатыку но воштыку, калык мылкыдзэ вераны быгатэ кенешъёсын но ӧтчамъёсын. 3-тӥ ёзэт. Гражданъёслэсь кенешъёссэс но ӧтчамъёссэс ортчытонъя кичӧлтонэн потыны быгато Удмурт Республикаысь Кун Кенешлэн Президиумез, Правительство, интыын аскивалтонъя ёзъёслэн быръем органъёссы, калык. Кенешъёсы но ӧтчамъёсы пыриськыны быгато Россич Федерацилэн бырйыны правоен гражданъёсыз, кудъёсыз уло Удмурт Республикалэн ужрад ортчытоно улосвылаз. 4-тӥ ёзэт. Кенешъёсты, ӧтчамъёсты дася но ортчытэ Удмурт Элькунысь Правительство. Калыклэсь мылкыдзэ тодонлы йылпумъянъёс лэсьтэ Удмурт Республикаысь Быръёнъёсъя комиссия. Калыклэсь мылкыдзэ лыдэ басьтэмен лыдъяське, кенешъёсы но ӧтчамъёсы Удмурт Республикалэн ужрад ортчытоно улосвылаз улӥсь бырйисьёс пӧлысь ӧжытсэ 10 процентэз пыриськизы ке. Решение кутэмен лыдъяське, со понна кенешъёсы но ӧтчамъёсы пыриськемъёс пӧлысь ӧжытсэ ӝыныез куаразэс сётӥзы ке. 5-тӥ ёзэт. Гражданъёслэн кенешъёсазы, ӧтчамъёсазы эскерыны юанъёс но соосты ортчытонъя радлык тупатэ Удмурт Республикаысь Кун Кенешлэн Президиумез. 6-тӥ ёзэт. Калыклэсь мылкыдзэ лыдэ басьтонъя ужрадъёс ортчытӥсько 1998 арын 9 январёзь Алнаш, Балезино, Вавож, Воткинск, Глазов, Грахово, Дебес, Завьялово, Игра, Камбарка, Каракулино, Кез, Кизнер, Киясово, Красногорск, Пичи Пурга, Можга, Сарапул, Селта, Сюмси, Ува, Шаркан, Юкаменск, Якшур- Бодья, Яр ёросъёслэн улосвылъёсазы. 7-тӥ ёзэт. Та Закон кужыме пыре, газетын печатлам бере 10 нунал ортчыса. Удмурт Республикаысь Кун Кенешлэн Тӧроез А. А. Волков. Ижевск город, 1997 арын 23 декабре. � 545-И. "УЙШОРЕ НО ПИШТЭ" Пастухов урам, 13. Тросэзлэн литературае, журналистикае пыриськем адямиослэн улонзы та юртэн герӟаськемын. 1977 арын сӥзьыл мон но дӥсьтыса-дӥсьтытэк йыгаськи "Советской Удмуртия" газетлэн ӧсаз. Кызьы ке монэ, еж муртэ, пинал нылкышноез, басьтӥзы ик. (Соку уго, зэмзэ ик, журналистэ нылкышноосыз уггес куто вал. "Асьтэос валаськоды: журналистика - ад кадь секыт уж, мукет ужъёсы ӝутсконтэм кыске со кужымез-кынарез". Тазьы шуиз Р. Валишин 1979 арын 21 мартэ писательёслэн ӧтчамазы). Озьы тӥни, редакциысь культурая отделэз литературая но искусствоя ёзлы висъяса, монэ Роман Валишин вӧзы ужаны кутӥзы. Та газетын Роман Григорьевич (Галяскарович) 1970-1978 аръёсы ужаз, улонэзлэн берпум аръёсаз (1979 арын сӥзьыл, 42 арес тырмытэк, со улонысь кошкиз). "Умой-умой гожъяськыны дыр уг сюрылы" шуыса ӝожтӥськылӥз ке но, та аръёсы Р. Валишин, чыры-пыры корреспонденциос, статьяос, веросъёс гожъям сяна, кык повесть кылдытӥз: "Инвожо уйшоре но пиштэ" но "Тӧл гурезь". Соос ӟуч кылын но печатласькизы. Гожъяськон, зэмзэ ик, нюр кадь кыске. Ужаз уйёсы, шутэтскон нуналъёсы, отпускъёсыз дыръя, нимысьтыз творческой отпуск басьтылӥз. "Туэзэ отпускме уг ужа ни, шутэтскыны малпасько, кылдоз ке",- шуиз вал со. Ӧз кылды ни... Ньыльдон арес бере вань, лэся, улонлэн кыӵе ке сьӧд гожез, со вамен ортчыны ӧз быгатэ Г. Красильников, Ф. Васильев, Р. Валишин, В. Романов. Сое шӧдон но, вылды, сюлэме мур пыдло каръяськемын. Син азям таӵе ик пуксё Роман Валишинлэн "сӧсыртэм дыдыкъёс" кадесь синъёсыз... Ачиз уж дурын, чуръёсыз "гыре", нош малпанъёсыз кытын ке отын, геройёсыз пӧлын кадь. Трос уг вазьылы, нош вераське ке - небыт но мусо, пальпотэ. Чагыресь синъёсаз нош - ватыны луонтэм вӧсь луон. Улонлэн тэшкамъёсыз-пиртэшъёсыз ортчо со пыртӥ... Маин ке тодэ вайытэ Миша Федотовез: кыӵе ке но шайтан тӧлпери нуллӥз соосты сэрегысь сэреге, синъёссы вожомон тылсиосын ӝуатскылӥзы... Пастухов урам, 13 - та юртысь тодмо кабинетын соос одӥг выж пулъёс вылтӥ лёгаськылӥзы, огвыллем сюлмаськонъёсын улӥзы: огез - нырысьсэ отын ужакум, мукетыз - берло, издательствоын. х х х "Институтын дышетсконме йылпумъякум, монэ аспирантурае ыстыны медо вал. Мон кошки кыдёкысь Грах ёросэ... Удмурт калыклэсь улэмзэ, сямъёссэ, вераськон кылзэ ӟечгес тодэме потӥз. Эшъёсы но тодмоосы пӧлысь куд-огез соку алӥзы: гуртын, пе, мыным литератураен йырин уз луы, юртъяськемед бере ик парсь вордыны, чипы-куреген вырыны кутскод... Школаын директор, собере районной газетын заместитель но редактор луыса ужакум, мыным зэмзэ ик трос дырме но кужымме быдтоно луиз хозяйственной ужъёсыз, литературалэсь палэнысь ужъёсыз быдэсъянлы". Та верам кылъёс ӧпкелён ӧвӧл. Мае адӟиз, ас вылаз шӧдӥз со аръёсы (1961-1966), чеберлыко мадён кылдытыны инъет луиз. Сотэк ӧй кылдысал "Инвожо уйшоре но пиштэ" повестез. Юнме-а, со печатласькем бере, Р. Валишинэн ӵош Лолошур-Возжи школаын ужам дышетӥсьёс отысь асьсэды тодмазы яке тодманы турттылӥзы, учыръёсыз тодазы вайылӥзы. Куд-огез "кӧтсэс ӝож" карисез но вань, кылсярысь, та школаын соку завучын ужам мурт, Раиса Ивановна Алексеева, шуэ: "Мыным гинэ малы ке повестьын инты шедьымтэ". - Со умой суредаське вал. Олокызьы но пӧртэмъяса, серем пыр лэсьтыса, бордгазетэ поттылоз вал. Огпол 8 Мартлы монэ суредам - шуныт шален биняськемын, улаз гожтэм: "Береги здоровье смолоду". Туж ик ӧз яра тусы. Аслэсьтыз кышнозэ, Екатерина Мефодьевнаез, туж чебер суредам. Со вал химик, биолог, ачиз ӟуч кыллы но литературалы дышетӥз,- тазьы тодаз вае Р. И. Алексеева. - Ми школаын ноку но ас кылынымы ӧм вераське, соку удмурт кылэз татын уг дышето вал... Гуртын соослы начар гинэ улон инты сётӥзы. Нылпиоссы, Таня но Женя, вордскизы. Шаплы вал со, чаляк вамышъя, калык пӧлтӥ юалляськыса ветлэ, собере заман-заман тетрадяз гожъя,- тазэ вера дышетӥсь Ольга Ефимовна Трухина. Тодэ ваён кылъёс кисьтӥсько но кисьтӥсько. "Туж яратэ вал сяськаосыз..." "Кӧня концертъёс пуктылӥм..." "Спектакльёс дасяськом вал. Одӥг пол "Кезьыт ошмесэз" пуктӥм, туж быгатыса шудӥз..." Сцена вылын нош "улӟо" геройёсыз: Анастасия Леонидовна, Нина Кузьминична, Дмитрий Кузьмич (шудо школаысь дышетӥсьёс)... Пумтэм-йылтэм ӧръясько артэ гуртъёсысь - Пуклёысь, Муркемырысь, Юрашысь, Вуж Эграысь, Вожойысь турлы удмурт дэремъёсын нылкышноослэн кырӟан гуръёссы... Сцена вылын - Роман Валишинлэн бадӟыматэм туспуктэмез. Бадӟым Вожойысь (Лолошур-Возжиысь) культура юртын - писательлы сӥзем ӝыт (ӝыт ке шуыны луэ - со ӵукна дасысен нуназе бере ньыль часозь кыстӥськиз). - Мон уг тодӥськы, кыӵе гуртын писателез такем данъяло, татын со улӥз, ужаз шуыса,- пусйиз Алексей Ермолаев, критик. Валишинэз буре вайыса вераськизы мукетъёсыз но сое тодӥсь муртъёс, Ижысь куноос: Кирилл Ломагин, Галина Романова, Анатолий Комаров. "Инвожо" журналын ужась Любовь Тихонова вераз, писательлэн "усьтэм" сяськаез туала егитъёс понна югдытӥсь тыл выллем луэ шуыса. ... Залын шуак куаш вазиз. Кема возьмам куноос пыро! Нырысьсэ та музъем вылэ - трос кузя, бадӟым машинаен, укмыс час ӵоже - лыктӥллям Р. Валишинлэн вордскем палысьтыз - Башкортостанысь Калтасы ёросысь. - Ӟечбуресь, гажано туганъёс! - вазизы соос ас сяменызы. Кам тупал удмуртъёслэсь пӧсь салам вайыса вераськизы Юрис Саитович Саитов, та палась удмуртъёслэн тӧрозылэн воштӥсез, но Аркадий Нуритдинович Миниахметов, Калмияр гурт администрацилэн кивалтӥсез - ӧрӟиос кадесь, ас кужымзылы оскись йӧно удмурт воргоронъёс. Нош тани, соосын артэ - Валишалэн Валиулла пиезлэн Зоя нылыз но Виталий пиез. (Валишалэн мукет пиез - Галяскар, ӵапак солэн огез пиез луэ Роман.) Таос арлыдоесь ини, тусазы маке но башкирлы кельшисез вань - ваче шымырскем кузь синкашсыя, оло (ма, Роман Галяскарович но сыӵе "башкир тусо" ук - та дырозь ӧй чакла вал). - Милям пересь атаймы Валикай вылэм,- веранзэ мытӥз Виталий Валиуллинович,- солэн ньыль нылыз, кык пиез. Галяскарлэн дас одӥг пиналъёсыз вал, али витез улэп на. Романлэн выныз, Ваня, Ижын улэ (жаль, малы ке та пумиськонэ лыктымтэ). Мон Романлэсь ог ареслы бадӟым вал. Вылӥ Тыхтемын, вордскем гуртамы, 4 класс дышетским, собере Краснокамскысь педучилищеын. (Соку, 1950-56 аръёсы, выжыямы 11 дышетӥсь луиз). Роман туж яратэ вал лыдӟиськыны, котьку кисыяз блокнотэн, карандашен ветлӥз... Башкир музъем вылысь лыктэмъёс грахъёслы бадӟым тау каремзэс веразы, асьсэ пал пизэс сокем сӥлы карыса воземзы понна. Выльгуртысь (Выль Татышлыысь) "Шулдыр ӝыт" ансамбльысь нылъёс- пиос, калык куспо конкурслэн лауреатъёсыз, Вожой, Эгра палъёсысь выль эшъёс шедьтӥзы. Ӵукна палозь ӧз чалме гурлам куараос. Зэмзэ, "инвожо уйшоре но пиштэ". Праздниклы зол дасяськиллям грахъёс. Сюлмысь тау карем потэ татысь удмуртлыкез ӝутӥсьёслы Лидия Михайловна Красильниковалы, Альбина Владимировна Тарасовалы, Юрий Константинович Рожинлы, Анатолий Яковлевич Кобелевлы, Леонид Николаевич Кривошеевлы но мукетъёсызлы. Т. ЧЕРНОВА. * Р. Г. ВАЛИШИН. * Тодэ ваёнъёссэ вера Р. И. АЛЕКСЕЕВА. * Сцена вылын - Башкортостанысь куноос. Вераське В. В. ВАЛИУЛЛИН, писательлэн агаез. В. БЕЛОМОРСКИХЛЭН туспуктэмъёсыз. Наталь Улоз семья - луоз кӧттыр Туала улон-вылонын кылдэм югдур синучконын сямен семьялэн улонэз пыр адӟиське. Мар бен со семья Удмурт Республикаын? Берло переписья шаерамы лыдъяське 426 сюрс семья, со пӧлысь 270 - сюрсэзлэн 18 аресозь нылпиоссы вань. 30 сюрс но ӝыныез куинь но солэсь ятыр нылпи будэто. 35 сюрсаз семьяын анайзы яке атайзы гинэ вань. Шаерамы 455 сюрс нылпи лыдъяське. Экономикаын секыт югдур кылдэмен валче, демографияя югдур шаерамы пумен шугоме, кулэсме калыклэн лыдыз. 1996 арозь нылпиос пумен ӧжыт но ӧжыт вордӥськизы. Но туэлы югдур тупатскиз: кылем арен ӵошатыса, таяз арын 10 толэзь куспын шаерамы 480 нылпилы ятыр луиз. Кулэсмизы нылпи кулон учыръёс. Шаерысьтымы 25 процентэз семьяос туала улонын шедьтӥзы асьсэлэсь интызэс, шуг-секытъёс пыр потыны быгатӥзы. Но 75 процентэзлы улон-вылонын кулэ кыӵе ке но юрттэт. Выльдӥськон вакытэн валче тросэз йыромизы, ӧз шедьтэ асьсэлэсь улон радзэс. Шаерысьтымы егит семьяослэн улон-вылонын кылдэм югдурзыя Удмурт Республикаысь Егитъёсын ужанъя кун комитет Удмурт кун университетысь студентъёсын ӵош туэ ортчытӥзы юан-веранъёс. Син азе пуксе таӵе суред. Вань юамъёс пӧлысь семьялы коньдонэн юрттон амалэн 28 процентэз лыдъязы кыкетӥ уждунэз, 60 процентэз пыкъяськизы бакчаосазы поттэм сиён-юонъёс вылэ. 12 процентэз чыры-пырыосын вузкаре, 13 процентэз аслэсьтыз поттэм сиён-юонзэ вуза. 26 процентэз егит семьяос табыш (доход) потто, коньдонзэс дуно бумагаослы берыктыса, 12 процентэз мултэс коньдонзэс куто асьсэлэсь ужбергатон ужзэс азинтонэ. Юамъёс пӧлысь 30 процентэз гинэ егит семьяос анай-атайёссылэн юрттэтсылы уг кулэясько. Улон-вылонын кылдэм шуг-секытъёс мылкыдэз, лул-сюлэмез зӥбо, кылдо ог-огдэ валамтэос, керетонъёс. Ваньмыз со шӧдӥськытэк уг кыльы будӥсь нылпиослэн тазалыксы, сямъёссы вылэ. Вуоно кивоштӥсьёсты будэтонын семья нырысетӥ интыын ке луыны кулэ, али со трослы палэнтӥськемын та ужпумъёслэсь. Шуг-секытъёс кышноен картлэсь кусыпъёссэс но палэнэтӥ уг кельто. Семья кылдытыса, 51 процентэз кузпалъёс люкисько, соос пӧлысь 30 процентэз ӵошен вить ар но улыса уг вутто. Люкиськонын нырысь вамыш лэсьто нылкышноос. Соослэн куронъёссы будо, уката ик егитъёсызлэн, дышетсконын но воргоронъёслэсь бере уг кылё соос. Нылкышноослэн кыкетӥ интыын луэмзы уг поты ни. Кызьы верам ини, арысь аре шаерамы ӧжытгес нылпи вордӥське. 58 процентэз егит семьяос кык нылпи вылэ дугдыны мылкыд каро, 7 процентэзлы куинь нылпи кулэ, 2 процентэз эшшо но тросгес вордысалзы, 23 процентэзлы одӥг нылпиен тырмыт. Мар паймымонэз, тросгес нылпи вордэмзы потэ воргоронъёслэн. Юамъёс пӧлысь 64 процентэз трос нылпи вордыны пумит луо коньдонзы ӧвӧлысь. Мукетъёсыз пусъё улон интылы ёрмемзэс. 40 процентэз егитъёс кузпалъяськоно луизы, нылпизы вордӥськоно луэмысь; 60 процентэз таӵе вамыш лэсьтӥз, куспазы огкылэ вуыса. 13 процентэз нылмуртъёс нылпи ваё бызьытэк, со пӧлысь 20 процентэз 20 ареслэсь пинал нылъёс. Нылпиоссы азьын кыл кутон троссэ егитъёсты уг сюлэмшугъяськыты. Татын шӧдӥське нылъёсты но пиосты семья улонлы дышетымтэмы, пуш улонзылэн но огъя культуразылэн улӥе лэзиськемез. Семья сяна, государство, школа, общественность озьы ик бадӟым саклык висъяны кулэ нылпиосты будэтонлы. Та нуналлы сюлэмшугъськытӥсь югдур - юон но наркотикъёс. Егит семья но та кышкытлыклэсь утемын ӧвӧл. Юамъёс пӧлысь 3 сюрсэз кузпалъёс юонэн эшласько. Семья - со нылкышнолэн тазалыкез но. Нош туэ таин ушъяськеммы уг луы. 87 процентэз нылпи ваёно нылкышноос пӧртэм висёнъёсын курадӟо. Семьяез юнматон, семья улонлы бадӟым саклык висъян но сое утён - государство азьын сылӥсь одӥгез бадӟым ужпум. Кызьы со быдэсъяськоз, отысь ик потоз улон-вылонмылэн огъя азинсконэз но. Семьялы юрттон, нылкышноослэсь тазалыксэс юнматон ужпумъёс пыӵазы Удмурт Республикаысь семья политикая концепцие но, кутэмын 1992 арын. 1994 арын шаерамы кутэмын "Удмуртиысь нылпиос" программа, нимаз ёзъёсын отчы пыризы инвалид нылпиосъя, нылпи сиёнъя, нылкышноослэн тазалыксыя, семья ужпумъёсты радъянъя, семьялэсь но нылпиослэсь шутэтсконзэс радъянъя. Калыкез дышетонъя министерство юнматӥз "Анай-атайтэм нылпиос" программа. Тазалыкез утёнъя министерство - "Анайлэн но нылпилэн тазалыксы" программа, Культурая министерство но Егитъёсын ужанъя кун комитет ужало усточи нылпиослы юрттон бордын. Республикаямы нимысьтыз постановление кутэмын куинь но солэсь трос нылпи будэтӥсь нимаз-нимаз семьяослы юрттонъя. Шаерысьтымы 16 сюрс семья пӧртэм льготаос басьтэ. Анай-атайёслы, пиналъёслы озьы ик трос юртто на семьяослы но нылпиослы юрттэт сётӥсь пӧртэм центръёс, отын ужась специалистъёс. Пӧртэм министерствоослэн но ведомствоослэн огазеяськыса ужамзы семья улонэз юнматонын шӧдскымон азинсконъёс вае. Но со тырмыт ӧвӧл на зӥбись шуг-секытъёсысь потыны. Государство ласянь кулэ законэн юнматэм нимаз ужрадъёс. Материал дасямын Удмурт Республикаысь Правительстволэн Аппаратысьтыз семья но демография ужпумъёсъя отделлэн кивалтӥсезлэн Ирина Галиналэн конференциосын верам докладъёсызъя. Ужало Москваын Удмурт Республикаысь Кун Кенешлэн Тӧроез Александр Волков но Правительстволэн Тӧроез Павел Вершинин 24 декабре Москвае кошкизы. Соос пырисько Федеральной Собранилэн Федерацияя Кенешезлэн ужаз. Чакламын 20 пала ужпумъёсты эскерыны, соос пӧлын бюджетэн, налогъёсты октонэн герӟаськем юанъёс, Россия Федерацилэн Музъем сярысь кодексэз. Кун Кенешлэн пресс-службаез. Наталь Тазалыкез киын уд омыръя Россиысь Нылкышноослэн союззы таяз аре нимысьтыз саклык висъяз гуртысь нылкышноослы, гуртысь семьяослы, гурт улонлы. Та кичӧлтонэз лыдэ басьтыса, Удмуртиысь Нылкышноослэн союззы басьтӥськиз "Гуртысь нылкышноослэн тазалыксы" ужпум борды. Талы сӥзьыса, нырысетӥез бадӟым конференция ноябре ортчиз ни вал Красногорскын, отчы ик люкаськылӥзы Глазов, Яр, Юкаменск районъёсысь нылкышно кенешъёслэн кивалтӥсьёссы но соослэн юрттӥсьёссы. Гуртын улӥсьёсын пумиськылӥзы шаерысьтымы тазалыкез утён удысысь валтӥсь специалистъёс, нылкышно огазеяськонлэсь ужзэ азьлантӥсьёс. Нош 18 декабре та ужпумлы ик сӥзем кыкетӥез бадӟым конференция ортчиз Сюмсиын. Таиз ужрад огазеяз Пичи Пургаысь, Вавожысь, Уваысь, Селтаысь нылкышноосты. Удмурт шаерысь нылкышноослэн ужпумъёсынызы тодматскыны мылкыд кариз Россиысь Нылкышно союзлэн кивалтӥсез А. В. Федулова. Кезьыт, пелляськись куазь шоры учкытэк, со сюлмаськиз конференцилэн ужаз вуттӥськыны. Москваысь бадӟым куноен ӵош ужрадэ пыриськизы Удмурт Республикаысь Правительстволэн Аппаратысьтыз семья но демография ужпумъёсъя отделлэн кивалтӥсез, И. В. Галина, Удмуртиысь Нылкышно союзлэн кивалтӥсез, "Сактон" керттӥськон фабрикалэн директорез З. И. Степнова но нылкышно огазеяськонлэн ужаз пыриськись мукет муртъёс. Конференция сӥземын бере гуртысь нылкышноослэн тазалыксылы, палэнэ кельтэмын ӧй вал нылпиос но. Шаерамы, уката ик та вить районын кылдэм югдурез лыдпусъёс вылын ик возьматӥз Удмурт Республикаысь Тазалыкез утёнъя министерствоысь анаез но нылпиез утёнъя отделлэн кивалтӥсез Т. Л. Черткова. Кызьы ке быдэс шаерамы, озьы ик та вылӥ вить районын но берло куинь ар ӵоже шуак кулэсмиз нылпиослэн лыдзы, уката ик Сюмси районын - татын со 10 процентлы улӥе лэзиськиз. Сюмси, Селта, Вавож, Ува районъёсын, быдэс Удмуртиен ӵошатыса, нылпиос тросгес вордӥсько, но калыклэн лыдыз озьы ик улӥе лэзиське. Берло 10 ар ӵоже быдэс Удмурт Республикая кулэсмизы вож нуныослэн кулон учыръёссы. 1996 арын Россия Федерациын сюрс вордӥськем нылпи пӧлысь кулӥз ке 17, 4- эз, Удмурт Республикаын со ӵошаз 15,8-лы, нош та вакытэ со возиське 14,7 вылын. Быдэс шаеръя вылӥ верам районъёсын нылпиос тросгес куло, 1997 арын ваньзэс азьпалтӥзы селтаос но уваос. Тросэз вож нуныос вордӥськемзылэсь азьло, вордӥськыкузы яке вордӥськемзы бере нырысь 7 нуналъёсаз куло. Ваньмыз со герӟаськемын анайлэн тазалыкеныз. Нуны ваёно нылкышноос тросэз пӧртэм висёнъёсын курадӟо, кӧттыро но ӟечлыко сиёнлы кулэясько. Соин но ваньмыз сямен нылпиос пичи дырысенызы кыӵе ке но висёнэн "эшласько". Селта но Ува районын нылпиос нырысетӥ толэзяз тросгес куло кыӵе ке висёнэн вордӥськемысьтызы, нош Пичи Пурга, Вавож но Сюмси районын - инфекцилэсь. Ваньмаз та районын уг тырмо нылпи врачъёс. Ижевскысь нырысетӥ республиканской больницаысь семья ужпумъёсты радъянъя отделысь врач-гинеколог С. П. Кривилева саклык висъяз нылкышноослэсь тазалыксэс утёнлы но семья ужпумъёсты радъянлы. Вить ар ӵоже шаерамы та ужпумъёсъя бадӟым уж нуиське, кутэмын нимысьтыз программа. Азинсконъёс шӧдскымонэсь. США-ын 1 сюрс нылкышнолы 39 нылпи куштон учыр ке вал, Англиын - 9, Голландиын - 4, Игра, Селта, Сюмси районын 1 сюрс нылкышнолы 264 сюрс нылпи куштон учыр лыдъяськиз. Укмыс толэзь ӵоже эскерыса, 1996 арын со лыдпус Удмуртиын 53-ёзь лэзиськиз, нош 1997 арын - 49-озь. Вавож районын та дыр ӵоже ик нылпи куштон учыр 70-ысен 75-ёзь будӥз, Пичи Пургаын - 30- ысен 41-озь, Селтаын - 128-ысен 114-ёзь лэзиськиз, Сюмсиын - 79-сен 64-ёзь, Уваын - 109-ысен 92-озь. Вань мар сярысь малпаськыны но мар сярысь сюлмаськыны асьсэлы нылкышноослы, озьы ик воргоронъёслы, тазалыкез утён удысын ужасьёслы но кивалтон ёзъёслы. Нылпиосты эмъян, утён пумысен конференциын вераськиз нылпи республиканской больницаысь клинико-экспериментальной отделенилэн кивалтӥсез Н. И. Пенкина. Но люкаськем калыкез тужгес но синмаськытӥз республиканской психиатрической больницаысь психотерапевт И. В. Реверчук. Пӧртэм учыръёс вылын со мадиз семьяын кылдэм шуг-секытъёслэн нылкышно тазалыкез сӧремзы сярысь. Ваньмыз со потэ кышномуртлэн но пиосмуртлэн огзэс огзы валамтэзы бордысь. Нош кытын керетон, отын ик юон, семьялэсь палэнскон. Соин ик, семья улонлы нылпиосты дышетоно школаысен. Нимысьтыз курсъёс усьтоно, озьы ик дасяно тодӥсь-валась специалистъёсты. Зал тыр люкаськем калык сак кылзӥз А. В. Федуловалэсь верамзэ но. Люкаськемъёсты со тодматӥз странаысьтымы гурт нылкышноослэн улонэнызы. Со нокытын но али капчи ӧвӧл. Трос ужпумъёс быдэсмытэк кылемын, соин ик вуоно аре но гуртысь нылкышноослэн улон-вылонзылы бадӟым саклык висъяны чакламын. Но сюлмаськонъёслэсь пайдазэс поттон понна огазеяськоно городысь сузэр-апайёсынызы. Вань луонлыкъёсты кутоно пӧртэм кивалтон ёзъёсы визьмо но ас сьӧразы валтыны быгатӥсь нылкышноосты быръён понна. Со понна огазеяно вань кужымъёсты. Улон-вылонын юрттэт сётон ужпумъёс, нылпиос но тазалык сярысь сюлмаськон, котьмар ке но, тужгес но матын нылкышноослы, соослэн со сюлэм бӧрдонзы. Нылкышноослы кивалтон удыс кулэ туала вакытэ кылдэм улон югдурез тупатыны. Но кызьы шуиз З. И. Степнова, Удмуриысь нылкышноос тэк пукыны уг малпало. Вылӥ кивалтӥсьёс азе соос пӧртэм ужпумъёсын потыны дасясько, ваньмыз со эскеремын луоз "котырес ӝӧк" сьӧры пуксьыса. Гуртысь нылкышноос озьы ик дасьсэ возьмаса пукыны кулэ ӧвӧл. Конференциын шараяськизы ёрос администрациослэн тазалык И ез утён ужпумъёслы тырмыт саклык висъямтэзы. Татын но вань кужымъёслы огазеяськоно, огъя ужпумъёсты ӵош пуксьыса эскероно. Адӟем кароно Красногорскысь депутатъёслэн (пӧлазы тросгес воргоронъёс) тазалыкез утён ужпумъёс шоры валаса басьтӥськемзылы. Неужто, пе, ум шедьтэ кӧня ке миллион манет коньдон нылпи ваёно анайёслы юрттон понна. Утчаськоно ке, пӧрме вылэм. Л. Малых. "Тугоко" "Бигеръёс пӧлын эшъёсы трос..." Татарстан Республикалэн иворъёсъя "Татар-Информ" агентствоез алигес вӧлмытӥз Удмуртиысь Кун Кенешлэн Тӧроеныз Александр Волковен интервьюез. Со печатламын бускель шаерысь ваньмаз сямен валтӥсь газетъёсын. Ми дэмласьком интервьюлэн ог люкетэныз тодматскыны. Дасяз сое журналист Ягсуф Шафиков. - Александр Александрович, Удмуртиын трос бигеръёс уло. Кызьы пырисько соос республикадылэн пӧртэм удысъёсаз? - Бигеръёс - ужез яратӥсь адямиос. Эшъёсы пӧлын соос трос гинэ. Бигеръёс ӟеч быгато ужбергатонэн вырыны, юн хозяйство возьыны. Туннэ Удмуртиын 110 сюрслэсь уно бигеръёс уло. Вань калык пӧлысь со сизьым процент луэ. Берло аръёсы ми трос лэсьтӥськом бигер кылэз, культураез улӟытон но азинтон ласянь. Бигеръёсты пумитаны луэ пӧртэм ёзъёсысь депутатъёс пӧлысь. Вань соос правительствоын но. Тросэз ужало врач, дышетӥсь, инженер луыса. Куд-огез кивалтэ предприятиосын. Кылсярысь, Удмуртиысь национальной банклэн тӧроез луэ бигер воргорон. - Кызьы радъяське тӥ дорын нациос куспын политика? - Республикаямы пӧртэм калыкъёс куспын валамтэос ӧвӧл. Ваньзы соос ӟеч лэсьтон мылкыдын уло. Правительство бордын кылдытэмын нимысьтыз комитет. Ужало уно нациослэн обществоосы, центръёссы. Городъёсысь но ёросъёсысь администрациосын усьтэмын нациосты азинтонъя ёзъёс. Удмуртиын лыдэ басьтэмын бигеръёслэн куинь огазеяськонзы: общественной центр (ТОЦ), егитъёслэн "Иман" союззы, культурая "Йолдыз" центр". ТОЦ-лэн ёзъёсыз вань элькунлэн пӧртэм сэрегъёсаз. - Война бере аръёсы Ижын кык бигер школа вал. Туннэ соос ӧвӧл ни... - Озьы со. Но али ми тыршиськом со школаосты выльысь улӟытыны. Огшоры дышетскон интыосын ужало ни бигер классъёс. Матысь дыре Ленин ёросын (отын уло шоркарысь уноез бигеръёс) чакласьком шор ёзо бигер школа усьтыны. Кулэ луиз на ке, эшшо маке малпалом. Удмурт кун университетын кылдытэмын бигер кыллы но литературалы дышетӥсьёсты дасянъя нимысьтыз отделение. Бигер специалистъёсты озьы ик дышето Ижысь педучилищеын. Городъёсын но ёросъёсын, кытын огинын уло бигеръёс, усьтэмын вордскем кылэз дышетонъя арняосы ужась школаос. Бигеръёс мыло-кыдо пырисько самодеятельносте, ужало уно ӟеч коллективъёс. Со сяна, ми доры куное ӵем вуыло Татарстанысь, Башкортостанысь искусствоосъя кибашлыос. Соос быгатэмзэс возьмато культура дворецъёсын, мукет бадӟым залъёсын. - Нош кыӵе югдур иворъёс вӧлмытонъя бигер ёзъёсын? - Та ласянь верамонэз ичи ӧвӧл. Бигер кылын арнялы быдэ потэ "Янарыш" газет, телевидениын арняяз кык пол мыно нимысьтыз передачаос, радиоын ужасьёс но та ласянь бере уг кылё. Авторлэсь. Мыным тодмасткыны кылдӥз "Янарыш" газетэз лэсьтӥсьёсын. Отын ужало ас ужзэс яратӥсь адямиос. Газет бамъёсын печатласько пӧртэм иворъёс, историлы сӥзем чуръёс, ӟеч адямиос сярысь гожтэтъёс. Пусйымон соиз но: Ижын потӥсь изданиез басьто Агрыз городын но ёросын улӥсьёс но. Газет быдэсак потэ Удмурт Республикалэн бюджетысьтыз коньдон чотын. Али вераськон мынэ солэн учредительёсыз пӧлы Бигеръёслэсь общественной центрзэс пыртон ласянь. Александр Александрович, шаерады уло пӧртэм вӧсьёслы оскисьёс. Кызьы соос ог-огенызы тупало? - Та ласянь ми, республикалэн кивалтӥсьёсыз, мылкыдмес ужен возьматыны тыршиськом. Бюджетысь коньдонэз но мукет интыосысь луонлыкъёсты кутыса, кӧня ке ар ӵоже выльдӥм Ижлэн шораз ик интыяськем кафедральной соборез. Соин огдыре лэсьтэмын куинь этажъем выль мечеть. Солэн нырысетӥ этажез сётэмын медреселы. Пусйыны кулэ, азьлозэ но, пулэсь лэсьтэмзэ, утьыса возиськом. Озьы ик сыло соос артэ. Мечеть вань на табере Сарапулын, мукет ёросъёсын. Юрттӥськом ваньмызлы ик. Адямилэн кинлы ке оскыны мылкыдыз вань ке, мед оскоз. Демонстрациостӥ кинъёслэн ке тусбуйёсынызы ветлытозь яке аракы юытозь, обществолы умойгес луоз, со вӧсяськыса улӥз ке. _ Мар вылез адӟиське Татарстанэн экономика ласянь кусыпъёсты азинтон ласянь? - Тодӥськоды, асьме республикаос куспын огкыл кутэмын. Соя ик ужаськом. Ми ӵем пумиськылӥськом президентэныды Минтимер Шаймиевен. Туж оскисько, кусыпъёсмы азьланьын уката юнмалозы шуыса. Уго асьмеос - пыраклы бускельёс. Редакцилэсь. Туннэ - А. А. Волковлэн вордскем нуналыз. Итӥськом ӟечкыланъёс борды. Шуд но тазалык! Шудо-буро мед луозы Читык-чутык вамышъяса, пумаз вуэ ини вужез армы. Оло лэсьтыны малпам ужъёссэ быдэстыны быгатымтэеныз, оло чебересь малпанъёсызлэсь тӧлъя лобӟемзэс шӧдэменыз, куддыр со айы ӟазег сямен чепылляскье, нош куддыр ӝоже усем нылмурт выооем синвуоссэ пызьыртэ. Котькуд вуись Выль ар азьын угось кӧня чебересь малпанъёсты сюлэмамы возиськомы, нош соос быдэсмо-а, уг-а, дыр уг возьма. Улон питранъёс азьпала погыльско. Котьма ке но, кошкись ар мӧйыослы - ноку берытсконтэм, нош пиналъёслы со - маин ке но вунонтэм. Калык но арлы быдэ возьма, оске улонэзлэсь умой пала берытскемзэ. Нош азьлане вамыштыны ӟигарыз но, визьмыз но уг тырмы ни. Курадӟыса будэтэм пудозэ, пӧсь нюлам васькыса утялтэм ю- няньзэ бератаз кытчы интыяны но уг вала, дунтэм дунын вузано луэ. Ӝыны аръёсын басьтымтэ уждунъёс тужгес но пиналъёсыз курадӟыто. Котькуд семьяын нылпиос, нош соослэн вожъяськонзы туж урод. Секыт война аръёсы вожъяськон ваньмызлэн одӥг кадь вал. Кудӥзлэн нянез вал ке но, соос кепырасагес, эшъёссылэсь ватӥськысагес сиылыны выризы. Туала улонамы одӥгез льӧльыра, мукетыз калтыра. Ма меда умоез лэсьтӥськиз та ар ӵоже? Номыр ик адӟымонэз ӧй вал кадь. Шаерамы ноябрьлэн кутсконаз трос дано нуналъёсты пусйизы. Соос пӧлын самой пусйымонэз вал Удмурт Кенешлэн куатетӥ Ӧтчамез. Оло, та Ӧтчамлэн кужымез вуоно арын гурт калык шоры ымнырыныз берытскоз, соослэсь сюлмаськонъёссэс но куронъёссэс кылэм-адӟем кароз. Солы туж оскем потэ вылэм. Нимысьтыз вазиськеме потэ "Удмурт дуннеын", телевидениын, радиоын, "Инвожо" но "Кенеш" журналъёсын ужась эшъёслы. Тӥ удмурт калык понна туж гажано но матысь адямиос. Кызьы валалод югыт нуналэз, тӥлесьтыд куарадэс кылытэк но лыдӟытэк. Жаляно луэ созэ: секыт улонэн валче газет-журналлы гожтӥськон чутрак кулэсмемын. Озьы бере, радиоын но телевидениын удмурт веранъёс ятыргес мед луозы вылэм. Шӧдӥськом, удмуртъёсты татын но шымырто ини шуыса. Вуоно арын "Удмурт кенеш" та пумысен лэчытэсь куронъёс мед пуктоз вал. Гурт калыклы туж кулэ удысын ужась гажано эшъёс! Мед тырмоз кужымды но чиданды шаерысьтымы котькуд гуртлэсь улон-вылонзэ сэрттыны-пертчыны. Котькудаз гуртын улэ сюлмо ужась Адями. Солы кӧттыр гинэ кулэ ӧвӧл, солы котьмалэсь дуно лул сиён. Тужгес ик таӵе огыр-бугыр улонэ. Гожъянме йылпумъяса, ваньдэс ӟечкыласько Выль арен. Вуоноез ар мед луоз таизлэсь узыргес но пайдаёгес. Тазалыкты, шудбурды но азинлыкты мед луоз дурыстэм пачылэс. Гуртъёсысь лыдӟись эшъёсылы но умойзэ гинэ сӥзисько. Азьланезлы юн осконды но капчи мылкыдды артэ мед вамыштозы. ВАССА ВАСИЛЬЕВА. Пичи Пурга село. Журналистъёсын пумиськонъёс Дорамы но сьӧд чер вуэм Кылем вторнике правительствоын журналистъёсын пумиськылӥзы Удмурт Элькунысь тазалыкез утёнъя министр Сергей Шадрин. Туэ арлы вакчияк йылпумъянъёс лэсьтыса, со пусйиз Правительство но министерство ортчись аре эмъяськон удыслэсь материально-технической инъетсэ выльдонлы- юнматонлы бадӟымгес саклык висъязы шуыса. Коньдон тырмымтэен, берло аръёсы лэсьтӥськон но тупатъян ужъёс шӧдскымон ӝегазы. Соин ик куд- ог эмъяськон учреждениосты ворсатэк но ӧз луы. Югдурез умой валаса, правительство ужрадъёс кутӥз медицинской учреждениос улэ мукет удысын кутӥськись юртъёсты сётон ласянь. Кылсярысь, "Ижмашлэн" "Фестивальный" шутэтскон лагеряз выжоз Селычкаысь нылпи санаторий. Та санаторийлэн юртэз 50-тӥ аръёсы пуктэмын ини но ярантэм луэмын ини вал. Акциосын "Ижмаш" обществолэн ик нылпи садэзлэн юртэз сётэмын син эмъянъя нылпи республиканской центрлы. Вуоно арын нырысетӥ кварталэ со ужаны кутскоз ни. Республиканской больницалы сётэмын озьы ик Кизнерысь локомотивной бригадаослэн шутэтсконни юртсы. Кенешемын наркологической диспансерез 18 номеро трестлэн выль пуктэм административной юртаз выжтыны. Бадӟым уж быдэстэмын Сарданысь но Постолысь психиатрической больницаослэсь котельнойёссэс тупатъян ласянь. 1996 арын ворсамын вал онкологической диспансер. Туэ вань тупатъян ужъёс отын быдэстэмын но туннэ со ужа ни. Озьы ик тупатъян ужъёс йылпумъямын кардиологической диспансерын но 1-тӥ республиканской но куд-ог мукет больницаосын. Вуоно арын вуттэмын луоз ни диагностической центр. Лэсьтӥське онкологической больницалэн выль комплексэз. Ӝоген усьтӥськоз ни солэн 75 интылы чаклам нырысетӥ черодэз. Эмъяськон учреждениослы выль юртъёс озьы ик лэсьтӥсько куд-ог районъёсын но. Министрлэн верамезъя туэ лэсьтӥськон но тупатъян ужъёсы бюджетысь 8 миллиард манет пала коньдон кутэмын луоз. Сергей Шадрин журналистъёслы озьы ивортӥз, кылем арняе республикаямы ВИЧ инфекция кутэм мурт шараямын шуыса. Али сое пыр-поч эскеро-чаклало. Талэсь азьвыл но шараямын вал ни СПИД-эн висись кык мурт. Но соос шаерамы улӥсьёс ӧй вал, келямын асьсэ доры эмъяськыны. Н. КОРЯКИН. Эшшо одӥг вормон Москваын ортчиз Россиысь валтӥсь предприятиослэн вузъёсынызы "Дизайн-92" выставка. Акциосын "Ижмаш" огазеяськон отын спортивной но пӧйшуран пыӵал тӥрлыксэ возьматӥз. Учкисьёс тужгес синмаськизы "Урал 5-1", "Рекорд И - 308" карабинъёслы, "Бегущий кабан бк-5", "Биатлон 7-3" винтовкаослы. Озьы ик ӟеч дунъет сётэмын "Соболь", "Тигр И", "Изюбр", "Сайга - 401" карабинъёслы. "Промышленный дизайн" номинациын Ижысь пыӵал тӥрлык поттӥсьёс тужгес устоосынызы лыдъямын. Выставкалэн валтӥсь призэз "Ижмаш" АОА-лы сётэмын. С. Малышев. Тау карон! Та нуналъёсы ми пусйим зарни сюанмес. Таин валче уно ӟечкылан басьтӥм. Тау кариськом Правительстволэн Тӧроезлы Павел Вершининлы, Кияса ёрослэн кивалтӥсезлы Надежда Шатровалы, "Удмурт дунне" газетын ужасьёслы, ёросысьтымы администрацилэн кивалтӥсезлы Галина Баталовалы, ветеранъёслэн огазеяськонзылы, "Дэмен обществолы, вань эшъёслы! Завьялово черкогуртын улӥсь Камашев кузпалъёс. Наталь ТОДМАТСКОН СЭРЕГ Аб. 212. 20 арес, удмурт, гороскопея Водолей, сьӧд йырсиё. Улӥсько но ужасько гуртын. Тодматскысал 28 аресозь улонэз валась, юрт котырын берганы яратӥсь пиосмуртэн. Вазисько фотоен гожтэтлы (берыктон вылысь). Аб. 213. Лякыт сямо, капчи мылкыдо гуртын улӥсь пиосмурт (23/172) куинь ар утча ини аслыз кузпал. Оске "Удмурт дунне" газет пыр лул-гажанзэ пумитаны. Тодматскысал ужез гажась но лякыт сямо нылмуртэн. (Ялонэз потаз ни - Аб. 110). Аб. 214. Оло, вань сыӵе йыгмыт пиосмурт (35-50 аресъем) кин монэн артэ вамышъясал та музъем вылтӥ. Туж оскем потэ, выляз аре выжыку, осконэ зэмалоз шуыса. Улӥсько Ижевскын (аслам квартираям), яратӥсько гурт чалмытэз. Уже герӟеськемын книгаосын. Дышетскеме вылӥ. Ваньмон дыр ке сюре, театре ветлӥсько, юрт котырам бергасько. Аресы - 42, ӝуждалае 160, веськрес, кык дышетскись пиналъёсы. Редакцилэсь. Лыдӟисьёслэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен чылкыт конвертэ понэ - ыстомы кулэ адресъя. Кун Кенешлэн сессиез КУТСКИЗ ТУЭ, АЗЬЛАНЬТӤСЬКОЗ КАЙТА 23 декабре усьтӥськиз Удмурт Элькунысь Кун Кенешлэн дас куатетӥ сессиез. Отын эскерыны ӵектэмын дас куать ужпум. Сессилэсь зседанизэ усьтыса, Кун Кенешлэн Тӧроез Александр Волков депутатъёслы но ӧтемъёслы ивортӥз, 22 декабре Россилэн Президентэз Борис Ельцин "Удмурт Элькунын кун властьлэн но интыосын аскивалтонлэн ёзъёссылэсь кусыпъёссэс радъянъя ужрадъёс сярысь" Указ вылэ гожтӥськиз шуыса. Александр Волковлэн верамезъя, республикамы понна та туж кулэ документ кун властьлэн но интыосын аскивалтонлэн ёзъёсаз быръёнъёсъя законъёсын инъет дасян бордын огкылысь ужанлы кутскон сётыны кулэ. Кун Кенешлэн Тӧроез депутатъёслы, ӧтемъёслы но журналистъёслы вазиськиз, та уже ог-огдэ валан но азьланяз пайдаё ужан мылкыдын пыриськыны курыса. Повесткае ватсаса эшшо кӧня ке ужпумъёс пыртыны ӵектонъёс но вал. Соос пӧлын бюджетной удысъёсын ужасьёслы уждун тырон, калыклы газэн юрттон но куд-ог мукет ужпумъёс. Депутатъёс соглаш луизы соосты пӧртэм ужпумъёсын ӵош эскерыны. Ӵукна заседанияз Кун Кенеш эскериз Удмурт Элькунлэн "Налог тырисьёсты чотанэз радъянъя ужрадъёс сярысь", "Бюджетысь заёмъёс сётъянэз радъян сярысь", "Бюджетэ пырисьтэм фондъёс сярысь", "Удмурт Элькунлэн кун тыронъёсыз сярысь" законъёсызлы инъетъёсы ватсанъёсты но ӵектонъёсты. Та законъёс кыкетӥзэ лыдӟыса кутэмын вал. Депутатъёс эскеризы Кун Кенешлэсь "Удмуртиысь коммунистъёс" фракцилэн Удмурт Элькунын электрокужым но шуныт понна тыронъёсты будэтон пумысен запросэзъя 1997 арын 26 июне кутэм постановленизэ быдэсъян сярысь ужпумез но соя постановление кутӥзы. Правительстволы косэмын электрокужым но шуныт понна тарифъёсты государство ласянь тупатъян-радъян сярысь положение дасяны. Озьы ик ӵектэмын элькунамы энергетикая ялан ужась комиссия кылдытыны. Со ик азьланяз электрокужым но шуныт сётон удысэз чакланы но тыронъёсты радъяны кулэ. Вис каремзы бере, депутатъёс нырысьсэ лыдӟыса кутӥзы "Россия Федерацилэн адямиослэсь тазалыксэс утёнъя законодательствоезлэсь инъетъёссэ Удмурт Элькунлэн улосвылаз уже кутон сярысь" Законлы проект. Соя дэмланъёс, ӵектонъёс дасяны дыр тупатэмын но берло эскеремын луоз. Ӟырдыт ченгешонъёс бере сессилэн повесткаяз ватсаса пыртэмын вал Удмурт Элькунлэн "Муниципалитет кылдосъёслэсь (муниципальной образованиослэсь) границаоссэс тупатыку но вошъяку калыклэсь мылкыдзэ одно ик лыдэ басьтон сярысь" Законлы инъет сярысь ужпум. Данакез депутатъёс понна со витьымтэ шорысь луиз. Та документэз пырак эскерон азьын гинэ люкылӥзы угось, тыро-пыдо тодматскыны дыр ӧй вал. Ӵектонъёс вал сое берлолы кельтыны. Но законлы проектэз дасясьёс валэктыны быгатӥзы ик, лэся, со Президентлэсь Элькунмыя Указзэ быдэсъянэн герӟаськемын но одно ик кутыны кулэ шуыса. Витьтон укмысэз депутат та законлы дурбасьтӥз но, со кутэмын вал. Тӥни озьы, куддыръя вордско вылэм депутатъёслэн син шоразы нырысьсэ йӧтэм законъёс но. Сессия кутӥз Кун Кенешлэн экономической политикая но бюджетъя ялан ужась комиссиезлэсь председательзэ Олег Кузьменкоез ужысьтыз ас мылкыд каремезъя мозмытон сярысь постановление. Сессия ужзэ азинтоз вуоно арын 8-9 январе. Ф. НИКИТИН. Герд Делегатъёс - калык пӧлын КУЗЬЫМ - КУӞЕБАЙ ГЕРДЛЭН КНИГАЕЗ Бадӟым ӧтчамлэсь пуктэмъёссэ, ужпумъёссэ быдэсъян бордын Устинов ёросын нырысь ик кутскизы асьсэос делегатъёс. "Удмурт кенешез" угось тросэз уг тодо на. Котькуд дас мурт пӧлысь куинез- ньылез гинэ, дыр, валэктыны быгатоз, мар со сыӵе асьмелэн огазеяськонмы, кыӵе ужпумъёсын со выре, ма понна сюлмаське. Озьы луэ, огшоры калыкен ичи ужамен. Таӵе югдурез чакласа, ёросысь кенешчиос ӵемгес потано кариськизы удмуртъёс пӧлы. Журналистлэн Леонид Федоровлэн кичӧлтэмезъя, культура, литература удысысь куд-огез эшъёс ветлӥзы 23 номеро библиотекае. Кызьы шуо, "выльвылэз ӝутыны". Озьы ик вань со. Туннэ нуналозь татчы асьме ӵыжы-выжыосынымы пумиськыны-кенешыны нокин пырамтэ. Калык сокем трос ӧз ке но люкаськы, ачиз ужрад верамон, пусйымон. Одӥгаз шыпыт, югыт залэ люкаськыса, библиотекарьёс, дышетӥсьёс, рабочийёс пыр-поч кенешизы улон-вылонмы сярысь. Литературовед Алексей Ермолаев лыдӟисьёсты тодматӥз Ашальчи Оки сярысь берло гожъямъёсыныз, журналист Леонид Федоров мадиз съездын эскерем ужпумъёс сярысь. Вераны кулэ: та библиотекаын одӥг но удмурт книгазы ӧвӧл. Мар карод, сыӵе асьмелэн улонмы. Соин ик выль эшъёслы кузьмам быдэс дуннелы тодмо удмуртмылэсь Куӟебай Гердлэсь кылбуръёсын книгазэ. Азьланяз малпаськом уногес сыӵе кузьымъёс нуллыны, удмурт литератураен татын нимысьтыз стенд усьтыны. Кызьы ужаны план но пусйим. "Татысь кошкем ик уг поты ни" Со ӝытэ ик делегатъёс мукетсэ "выльвылэз" усьтӥзы. Роза Кирилловалэн сюлмаськеменыз, котырысь удмуртъёсын сюлэме пыӵамон кенешон-пумиськон ортчиз му вӧй поттӥсьёслэн клубазы. Татчы ветлӥзы куатез делегатъёс. Клубе лыктэмъёс нырысь ик эскеризы тазалыкмес утёнэн герӟаськем ужпумез. Ӝытэ ӧтиллям веньёсын эмъясь врачез Евгений Константинович Шкляевез. Со ас удысэзъя усто ӧнерчи. Пӧртэм кунъёсысь врачъёслэн бадӟымесь кенешонъёсазы но пыриськылэ. Солы вазиськыло ни дуннеысь тодмо эмъясьёс. Евгений Константинович клубе лыктэмъёслэн трос юанъёссылы валэктонъёс сётъяз, висёнъёслэсь утиськонъя, эмъяськонъя дэмланъёссэ вераз. Мур-мур сюлмаськонэн но, кытӥяз серем пыр но ӧръяськиз та вераськон. Врачлэн капчи мылкыдыз пыӵаз сюлэме. "Татысь кошкем ик уг поты ни - аслад ӵыжы-выжыосыныд тазьы уртче кенешыны туж умой вылэм",- шуиз Е. К. Шкляев. Пумиськонэ угось ветлӥзы артысь 21 номеро шор ёзо школаысь удмурт пиналъёс но. Соос жин-жин чебер кырӟазы-эктӥзы. Собере калык азе потӥз яратоно артистмы, крезьгурчимы, крезьчимы Геннадий Ганьков. Буш киын лыктымтэ - выль книгаоссэ кузьмаз. Бадӟым тау солы. Люкаськемъёс кылпум ӝутӥзы Ижевскысь Думае вуоно быръёнъёс дыръя троссэгес удмуртъёсты депутатэ кандидатэ ӵектон сярысь но. Али Устинов ёросысь кенешчиос, дэменчиос синйылто ни тужгес етӥз, шаплы но ужаны быгатӥсь адямиосмес. Кин тодэ, оло, Е. К. Шкляев эшез ик ӵектозы ай, яке Геннадий Ганьковмес, Роза Кирилловамес, оло нош дышетӥсез Евгения Никоноваез... "Дэменысь" эшъёс веразы ас малпанъёссэс Ӧтчамлэсь дэмланъёссэ ӟечгес быдэсъян сярысь сюлмаськон ик вуттӥз Удмурт культурая огазеяськонлэн кивалтоназ быръем куд-ог эшъёсты республикаысьтымы кибашлыослэн Ижевскысь В. Сивков урамысь юртазы. Соослэн мургес тодматскемзы потӥз коллективлэн ужъёсыныз. Оглом басьтоно ке, татын трос лэсьто асьме культурамес, ӟеч сямъёсмес азинтон, усточиослэн киужъёсынызы, ческыт пӧрамъёсынызы куноосты тодматон ласянь. Ӵем луыло дуно, чебер арбериосты, суредасьёслэсь ужъёссэс возьматонъёс. Али но татысь эшъёс выльзэ выставкаез дасяло. Улӥяз чебер, ӝикыт залын дырын-дырын луыло кибашлыосын тодматсконъёс, шаерысьтымы сӥё-дано адямиослэсь вордскем нуналъёссэс пусъён ӝытъёс. Тодэ лыктэ на ай Алла Кузнецовалы Ашальчи Оки нимо премиез сётонлы сӥзем шулдыръяськон. Татын ик пусйизы Россиысь усто суредасьлэсь Леонид Прозоровлэсь юбилейзэ. Мукет дыръя та зал чус-чус буш сылэ. Удмурт пӧрамъёс пӧлысь но веръям потэ вылэм вирен перепечез, туем кенэмлэсь лэсьтэм зыретэн табанез. Финн-угор дуннеысь эшъёс пыраку, жиль-жиль кунояты вал варсен. Ӧвӧл со. Корел ӟег пызьлэсь пӧрам сяртчынянез, горд кушманэн кутэмнянез но туж шер пумиталод. Соин ик, вылды, кухнязылэн ужамез пумысен кытӥяз пӧртэм вераськонъёс ӝутскыло. Татын тырмыт уг сюлмасько на угось вунэтэм ӟеч сиёнъёсты выльысь пӧраны кутскон сярысь. "Дэменлэн"" тӧрооссы Л. В. Орехова но В. А. Осипов, шаерысьтымы калык художник профессор С. Н. Виноградов, огазеяськонлэн кивалтоназ быръем усто пӧрась М. Я. Кузьмина но мукетъёсыз трос юанъёс сётъязы, ӵектонъёссэс веразы директорлы Р. М. Каримовлы. Таӵе огкылэ вуэмын: та юртлы ужано Культурая но Вузкаронъя министерствоосын, Удмуртпотребсоюзэн, "Удмурт кенешен" но "Дэменэн", газетъёслэн редакциосынызы, Удмурт телевидениен но радиоен уртче. Шедьтоно усто пӧрасьёсты, усьтоно соослэсь рецептъёссэс, ас амалъёссэс но телевидение пыр возьматоно, ваньзэ рос-прос валэктыса. Таин валче гуртъёсысь удмурт пӧрасьёс-усточиос пӧлын, оло, ортчытоно пичигес конкурс- ӵошатскон? Выльысь мед улӟытозы соос вуныны ӧдъям сиён-юонъёсты. Вералэ вал тӥ но, гажано лыдӟисьёс, асьтэлэсь малпанъёстэс, дэмланъёстэс. Соосты печатланы луысал "Берекет" но "Герд" бамъёсын. Кирилл ЛОМАГИН. Удмурт Республикаын кун властьлэн но интыысь аскивалтонлэн ёзъёссылэсь кусыпъёссэс радъянъя ужрадъёс сярысь Россия Федерацилэн Президентэзлэн Указэз Кун властьлэсь радъяськемзэ умоятон понна, интыысь аскивалтонэз кужмоятыса, Удмурт Республикаын кун властьлэн ёзъёсызлы но интыысь аскивалтонлэн ёзъёсызлы ваче ужаны луонлыкъёс кылдытон, Россия Федерацилэн Президентэзлэсь Федерацилэн Собраниезлы "Властьын порядок - странаын порядок (Странаын югдур но Россия Федерацилэн политикаезлэн валтӥсь ужпумъёсыз сярысь)" Посланизэ быдэстон вылысь, озьы ик Россия Федерациысь Правительстволэсь но Удмурт Республикаысь кун властьлэсь Россия Федерациысь Конституцияя Судлэсь 1997 арын 24 январе кутэм 1-ИИ номеро постановленизэ но Россия Федерацилэн Президентэзлэсь 1997 арын 10 мартэ кутэм "Россия Федерациысь Конституцияя Судлэсь Удмурт Республикалэн 1996 арын 17 апреле кутэм "Удмурт Республикаын кун властьлэн ёзъёсызлэн радлыксы сярысь" Законэзлэсь Конституцилы тупамзэ эскеронлы сӥзем 1994 арын 24 январе кутэм 1-ИИ номеро постановленизэ быдэсъянъя ужрадъёс сярысь" 193 номеро Указзэ быдэстонъя ужамзэс пусйыса пуктӥсько: 1. Соглаш кариськоно Россия Федерациысь Правительстволэн, Удмурт Республикаысь Кун Кенешлэн, Удмурт Республикаысь Правительстволэн Удмурт Республикаын кун властьлэн ёзъёсызлэн но интыысь аскивалтонлэн ёзъёсызлы кусып возьыны амалъёсты но луонлыкъёсты юнматон сярысь ӵектонъёсынызы таӵе ужпумъёсъя: Удмурт Республикаын кун властьлэн ёзъёсызлэсь но интыысь аскивалтонлэсь улосвылъёсъя радъяськемзэс умоятоно, муниципальной кылдосъёслэсь кунгожъёссэс воштыку, калыклэсь мылкыдзэ лыдэ басьтыны луонлыкъёс кылдытыса; Удмурт Республикаын кун властьлэн ёзъёсыз, Республикалэн административно-территориальной единицаосаз кылдэмъёссэ пыртыса, но интыысь аскивалтонлэн ёзъёсыз куспын быдэсъяно удысъёсты люконо. 2. Удмурт Республикаысь Кун Кенешлы дэмлано интыысь аскивалтонлэн ёзъёсаз быръёнъёс ортчытон сярысь но муниципальной кылдосъёсты выльдон яке быдтон радлы сӥзем улосвыл референдум сярысь законодательной актъёсты кутонэз ӝогомытыны. Умоен лыдъяно Удмурт Республикаысь Кун Кенешлэсь, Удмурт Республикаысь Правительстволэсь Удмурт Республикаысь городъёсын, гуртъёсын, гурт округъёсын, сельсоветъёсын интыысь аскивалтонэз радъян но азинтон пумысен кичӧлтэмзэс, интыысь аскивалтонлэсь ёзъёссэ калыклы матэ каронлэсь кулэлыксэ валаса. 3. Россия Федерациысь Правительстволы: Удмурт Республикаысь Кун Кенешлы, Удмурт Республикаысь Правительстволы та Указэз быдэстыны методика, право но радъян ласянь юрттэт сётоно, Удмурт Республикаын кун властьлэн ёзъёсызлэсь, кудъёсыз кылдытӥсько республикалэн административно-территориальной единицаосаз, статуссэс но полномочиоссэс юнматыны юрттонэз но вераса; та Указэз быдэстонэн герӟаськем ужрадъёсты ортчытэм бере, Россия Федерацилэн субъектъёсысьтыз кун властьлэн ёзъёсызлэсь но интыысь аскивалтонлэн ёзъёсызлэсь кусыпъёссэс но ваче ужанзэс радъян сярысь ӵектонъёс сётоно, Федерацилэсь законодательствозэ умоятон сярысь дэмланъёсты но пыртыса. 4. Та Указ кужыме пыре печатлам бере. Россия Федерацилэн Пезидентэз Б. Ельцин. Москва, Кремль 1997 арын 22 декабре. � 1353. ВУЖЗЭ ВЫЛЬЫСЬ УЛӞЫТЫСА Яр. Татысь культура юртын ужасьёс берло дыре трос саклык висъяло калык фольклорлы. Соос юн кусыпъёс тупатӥзы районысь кыло-буро пересьёсын. Песяй-песянайёслэн верамъёссыя тунсыко ужрадъёс пӧрмо. Алигес районын улӥсь калыкъёслэн фольклорзылы сӥзем семинар радъямын вал. Асьсэлэсь сямъёссэс но йылолъёссэс возьматӥзы удмурт, бесерман, ӟуч, бигер калыкъёс. Ворцаын бигеръёслэн выль кылдэм ансамбльзы Ӟазег вандон вемезэс возьматӥзы. Ужрад пайдаё ортчиз. Н. ЛИПИНА. Шӧкыч Сяртчы (Серемес верос) Корка вӧзаз УАЗиклэсь дугдэм куаразэ кылыса, колхоз кузё Анатолий Петрович бфзьфса уоаме потӥз. - Кинэ адӟисько, Николай Иванович! - киоссэ вӧлъяз со. - Коля, кызьы сюрес шедьтӥд ай ми доры? - Толя! - шумпотэмзэ уг ваты куно но. - Ортчисько вал тани гуртты вӧзтӥ, вай ай пырало, малпасько, ӵош дышетскем эше доры. - Я, бен, Коля, кыӵе ини ужъёсыд? Председательлэн ужез кельше-а? - Ма, шуг-секытъёс тырмо но, каллен ужаны луэ кадь, - мыньпотыса вера Толя. - Мар-о асьмеос татын сылӥськомы, ойдо корка пыром. Чай но быректӥз, дыр, ини, - кунозэ саестӥз кыскаса пыртэ ни Коля. Кӧня ке кунояськемез бере, бускель колхозлэн кузёез эшезлэсь юалляськыны кутскиз: - Нош аслад, бен кыӵе ужъёсыд? - Ма, умой кадь, - шуэ Коля. - Ужамы выль амалъёс пыртӥськом. Асьме палан нокин но сяртчы уг будэты. Нош ми малпаськом вуоно аре та уж борды басьтӥськыны. Специалист но шедьтӥм ни. Милям гуртысь Митрей агай. - Так, так, туж тунсыко, - эшезлы матэгес кариськиз Толя. - Районысьтымы начальство ветлыку, - веранзэ азьланьтэ Коля, - Митрей агай соосты тани та быдӟа сятрчыен кунояз, - киосыныз бадӟым бекчеез ӟыгыртӥз кадь воргрон. - Малпасько, колхоз бусыын но со быдӟа будэтыны быгатоз. - Кылзы ай, - ӧз чида ни эшез. - Малы азьло ик ӧд вера? Ойдо ветлом со Митрей агай доры но учком сяртчыоссэ. Кык колхоз кузёос, УАЗике пуксьыса, гурт пуме шонтӥзы. - Тани татын, - урам пумысь корка шоры возьматӥз Толя. Корказь ӧс ваяк усьтэмын. Воргронъёс ӧтемез возьмаса ӧз улэ, корка пыризы. - Ӟечбуресь! - вазиськиз Коля. Нош пумитаз нокин ӧз куареты. Кытын ке соргетэм куара гинэ кылӥськиз. - Ма, тӥни сэрегын, выж вылын изе ук, шайтан, - азьчиньыеныз возьматӥз Толя. Собере ческыт уммен изись воргорон доры мыныса, пельпумтӥз кысканы кутскиз. - Митрей агай, султы! - Мар-о тӥледлы кулэ ӵукна ик. Эн люкетэ изьыны, - мукет пала берытскыса соргетыны ӧдъяз со. - Кыӵне ӵукна, ӝыт матэктэ ни, - нош ик пельпумтӥз кыска Толя. - Сяртчыдэ учкыны лыктӥм. - А-а, Анатолий Петрович, - тодмаз колхоз кузёез Митрей агай, - Сяртчышуиськоды, - макмырен курадӟыса сюбегам синъёссэ ӵушылэ воргорон. - Кӧня ке возьмалэ. Кык пала шонаськыса пӧран висъет пала вамыштӥз. Буш ведра усем куара жингырак вазиз но, Митрей агайлэн шуш кылъёсын тышкаськемез кылӥськиз. Кӧня ке улыса, воргрон борддор борды пукхяськыса потӥз. - Тани, - шуиз со, пичи нунылэн мыжыкез быдӟа сяртчы возьматыса. - Ма, ма! - синъёсыз кымесаз тубизы Колялэн. - Районысьтымы начальство ветлыку, тон соосыз тани та быдӟаеныз кунояд вал ук, - валес вылысь бадӟым миндэр шоры возьматэ колхоз кузё. - А-а, - мырдэм возиське Митрей агай. - Созэ мынам пересе городэ ветлыкуз ваиз вал. Базарысь адӟыса, бадӟымезлы паймем но басьтоно кариськем. - Воргоронлэн пыдъёсыз ӧз чидалэ ни, лоштрак усиз выж вылэ. - Нош тон ачид уд будэтӥськы шат? - мар вераны ӟудэменыз юано кариськиз Коля. Солы нокин вазись ӧз луы ни. Корка тыр нош ик вӧлмиз Митрей агайлэн соргетэм куараез. С. Дуванов. Вормозы кужмоосыз Старт сётэмын биатлонъя "Ижевская винтовка" ӵошатсконъёслы. Россилэн пӧртэм сэрегъёсысьтыз 200 пала кужмоосыз пӧлысь кужмоосыз спортсменъёс люкаськизы дорамы. Соос пӧлын спортысь тодмо кизилиос Сергей Тарасов (Новосибирск), Владимир Драчев (Санкт-Петербург), Виктор Майгуров (Ханты-Мансийск), Галина Куклева (Тюмень), Ольга Ромасько (Красноярск). Удмуртилэн командаезлэсь данзэ утё Валерий Медведцев, Алексей Кобелев но мукетъёсыз. Ӵошатсконъёсы пыриське спортысь международной классъем мастер Юлия Шамшурина но: - Биатлонын мон кыкетӥ арзэ гинэ. Яратӥсько 15-20 номеръёс улын куас сюрес вылэ потыны, но таяз учыре 4 номер шедиз. Ӵошатсконъёсын малы ке узгес удалты кадь потэ. Пыӵаллы уг дышиськы, ялан "кышкасько" солэсь. Валера Медведцев шуиз вал, 15 ар ортчыса гинэ, пе, валай, мар со пыӵал. Удмуртилэн командаез ляб ӧвӧл. Нылъёсмы Оксана Нидпокава, Люба Ермолаева, Инна Касимова - оло, кудзы ке офицеръёс пӧлы но шедизы. Бадӟым осконмы Алексей Кобелевлы. Со Россилэн командаяз одно сюрыны кулэ кадь. Ӵошатсконъёсты дунъяны оскемын СССР-ысь дано тренерлы, международной категориен судьялы Михаил Ткаченколы. - Вормисе потӥсьёслэсь кылдытом луоз Россилэн командазэ, кудӥз Олимпийской шудонъёсын пыриськоз. Соин ик судейской коллегилы пыр-поч ужано луоз. Медам луэ вылэм дыръёсты чакланын сураськонъёс-шугъяськонъёс. Трасса татын ӟеч. Куазен удалтӥз. Шӧдӥське, биатлонъя "Строитель" комплексын ӟырдыт нюръяськон ортче. Вормисе потыны оскисьёс трос. - Удмуртия куинетӥзэ вуи - маде Андрей Пархоненко. Ачим ӵошатсконъёсы уг пыриськы. Арлыды уггес тырмы. Но татын анае, атае, Марина сузэре ӵошатсконъёсы пыриськиськы. Со юниоръёс пӧлын Дуннелэн чемпионкаез луылӥз. Быдэс семьямы спортэн герӟаськемын. Мон берлозэ дорам 2 ноябре вал, лыктӥ татчы пырак Пермын ортчем ӵошатсконъёсысь. Атае, Николай Степанович, Тюмень командалэн тренерез. Ми ваньмы оскиськом: шедём вормисьёс пӧлы. Командаямы нылкышноосмы кужмоесь. Воргоронъёсмы Австриын ортчем Европалэн Кубокез понна ӵошатсконъёсысь пырак татчы вуизы: Павел Вавилов, Андрей Волков, Михаил Журавлев. Михаил Журавлев дорамы Ижевскысь лыктӥз. Со юниоръёс пӧлын Дуннелэн чемпионэз. Ма бен, сӥзём спортсменъёслы вольыт сюресъёс. Ӵошатсконъёс йылпумъяськозы арняе, 28 декабре. Соку ик тодмо луозы вормисьёслэн нимтулъёссы. Вормозы кужмоосыз. Э. КУМАЧЕВА. Конкурслы йылпумъянъёс Нырысь ик, конкурсэ пыриськем вань эшъёслы бадӟым тау карон кылъёсмес вераськом редакцилэн нимыныз, озьы ик лыдӟисьёслэн нимынызы но. Сюлмысьтыды гожтэм чуръёстэс "лыдӟисьёс синйылтытэк ӧз кельтэ, газет бамъёсмес но соос трослы узырмытӥзы. Конкурсэ пыриськемъёслы кузьымъёсын лыдӟисьёсмес азьло ик тодматӥмы ни вал. Кинъёс бен луизы соослэн шудо кузёоссы? Нырысетӥ инты сётэмын Пичи Пурга районысь Вуж Монья гуртысь Мария Захаровна Никитиналы ("Курыт зор", 15 ноябрь), сое возьма сок пызьыртон машина. Кыкетӥ интыын - Завьялово селоысь Раиса Константиновна Моторина ("Вордӥз нылыз интыын", 18 сентябрь). Кузьым - электрочайник. Куинетӥ интыын - Удмурт кун университетысь студентка Галина Савина ("Мынам инмаре - вина", 4 декабрь). Кузьым - электрофен. Таяз конкурслы устоесь материалъёс гожтэмзы понна, озьы ик газетамы ялэм мукет конкурсъёсы пыриськемзы понна кузьымъёсын пусъемын на: Шаркан районысь Зюзино селоысь Алевтина Степановна Никитина ("Дыдыкъёс", 20 ноябрь). Кузьым - утюг. Алнаш районысь Азамат гуртысь Людмила Гирбасова ("Атай", 25 декабрь). Кузьым - электромиксер. Ваньзэ та эшъёсты кузьымъёс возьмало "Удмурт дунне" газетлэн редакцияз. Асьтэос, оло, куке дыр шедьтоды дорамы кожаны яке кин ке сьӧры лэзьыны куроды. Вазиськыны луоз таӵе телефонъёсъя: 21-37-14 (улон-вылонъя отдел): 24-56-67 (приёмной). Берекет Визьмо пыры Кызьы усьтоно шампанской винаез? Ӵем дыръя асьмеос ум валаське, кызьы усьтоно шампанской винаез. Соин йырин уноез юон ӝӧк вылэ кисьтӥське, сиёнъёс но уродмыны шедё. Усьтэмлэсь азьло шампанскоез салкым интыын возёно. Ӝӧк вылэ пуктоно сэзъятэк. Посудаез кӧня ке пол калленэн гинэ котырак пуртэн яке вилкаен йыгано, собере ӝӧк вылысь ӝутытэк ик посудаез дыртытэк усьтоно. Шӧкыч Выль ар лыктэ, Выль ар! Бадӟымесь вамышъёсын матэктэ Выль ар. Ошлэн арез йылпумъяське, вуонояз кузёяськоз ни Тигр. Нош бадӟым сюро пудо-животлэн капчиен гинэ кошкемез уг поты, лэся. Адямиосты кезьыт куазен кышкатыны ӧдъя, зӧк куараеныз но бурсыны выре кадь. Соин но, дыр, нылпиос ошез ӝоггес улляны вырыса, оломаос но пуштытъяло, ыбыло. Ваньмыз сыӵе арбериос нимасько пиротехника шуыса. Куддыр песянайёс пуштытъям куараосты кылыса, гадязы кирос но тыро. Нош нылпиос понна со ваньмыз усто шудон. Таӵе пуштылӥсь арбериосты котькудӥз сямен магазинысь басьтыны луэ. Нош кызьы соосын пайдаяськоно - нокытын но гожтэмын ӧвӧл. Соин но, дыр, куд-ог пуштытъяны яратӥсьёс шуге-леке шедё. Озьы арнялэн кутсконаз Ижевскысь 14 аресъем Алёша, марзэ-созэ валатэк, кияз "Дракон" выллем шудон ракета пуштытӥз. Пияшлэн киыз но ымнырыз сутскизы. Алёша эмъясьёслы вазиськытэк ӧйлась. Нош 84 номеро школаын дышетскись 15 аресъем Сергеез шудо учыр гинэ синтэм кылёнлэсь утиз. Пуштэм арберилэн тылгизьыосыз синмаз ӧз, бамаз гинэ пазьгиськизы. Озьы ик киыз сутскыны шедиз. Та выллем учыръёсты эшшо вераны луысал на. Нош Выль ар ӧз на вуы ук. Соин ик азьланьын соос, оло, йылозы но. Угось Выль ар уе пӧртэм пуштӥсь, пиштӥсь но ӝуась шудонъёсын маскаръяськисьёс трос луозы: пичиосыз но, бадӟымъёсыз но. Соин ик тылпу кысӥсьёс дэмлало: ноку но кыз вӧзын эн кенжытылэ бенгальской тылъёсты, эн пайдаяське пӧртэм пуштӥсь шудонъёсын. Соку матэктӥсь Выль арез но шулдыр пумиталоды, Тол Бабаен Лымы Ныл но зол шумпотозы. Выль арен тӥледды! Выль шудбурен! А. Емельянов, Тылпу кысонъя инспектор. Суредэз В. Шиловлэн. Журналистъёсын пумиськонъёс Огъя уже - огкылысь мылкыдын Кылем четверге журналистъёсын пресс-конференция ортчытӥз Удмурт Республикаысь Кун Кенешлэн Тӧроез Александр Волков. Таяз учыре пумиськонлэн кутсконэз аспӧртэмгес вал. Журналистъёс нырысь ик Александр Александровичез ӟечкылазы вордскем нуналэныз. 25 декабре солы тырмиз 46 арес. Нош вераськон мынӥз Россия Федерацилэн Президентэзлэн туэ 22 декабре поттэм, "Удмурт Республикаын кун властьлэн но интыосын аскивалтонлэн ёзъёссылэсь кусыпъёссэс радъянъя ужрадъёс сярысь" Указэз пумысен. Политика ласянь таиз ар капчи ӧй вал, пусйиз Александр Волков. Но шуг учыръёсысь артэ, тунсыкоез сярысь но вераны луэ. Нош тужгес но пусйымонэз - таиз ар азьлане вамыш луиз. Республикамылэн нимыз нош ик выль сямен чузъяськоз быдэс Россиын. Югдурез пӧртэм сямен дунъясьёс вань ке но, оскыса вераны луэ, Удмуртилэн политикаез быдэс Россилэн политикаез вылын шӧдӥськиз шуыса. Нырысь ик федерализмез, кун властьлэн но аскивалтонлэн ёзъёсызлэсь кусыпъёссэс радъян ласянь. 22 декабре кутэм Указ йылпумъян лэсьтоз, шуыны луоз, Удмуртилэн политика удысаз Конституция суд но Президентлэн мартэ кутэм Указэз бере воштӥськонъёслы но ченгешонъёслы. Туннэ асьмеос, ог-огмес пыкылонъёслэсь куштӥськыса, басьтӥськыны кулэ ни республикамылэн азьлань улонэз понна, огкылысь ужан бордын. 1997 арез йылпумъяса, ваньмылы ик, политика вылысь выжыны но экономика сярысь тросгес вераськыны кулэ. Ваньбур поттонэз будэтон понна,али нырысь ик малпаськоно коньдонэн юрттӥсьёсты асьме пала кыскон сярысь. Ӵапак таӵе мылкыдын ик али ужаськом, берло сессиын но сӥземын та ужпуммы. Дыр вуиз ни котькудӥзлы аслаз удысэныз вырыны. Указын пусъем ужпумъёсты быдэстыны но вуоно быръёнъёслы дасяськыны трос дыр ӧз кылзы ни. Россиысь кивалтон ёзъёслэсь оскемзэс асьмеос уж вылын юнматыны кулэ. Политика удысын югдурез огсыр ӧре пыртыса гинэ огкылысь басьтӥськыны луоз улон-вылонмес умоятон борды. Отӥяз Александр Волков журналистъёслэн юанъёссылы валэктонъёс сётӥз. Таиз пумиськон туж огсыр, ог-огдэ валан мылкыдын ортчиз, шуыны луоз, кыӵе ке пышкылонъёс, керӟегъяськытӥсь юонъёс но веранъёс ӧз чузъяське. Йылпумъяськиз но со аспӧртэмгес. Александр Волков журналистъёсты тупатӥз шампанскоен, вуись Выль арен ӟечкылаз но республикамы азе пуктэм ужпумъёсты быдэсъян бордын огкылысь, ог-огдэ валан мылкыдын ужаны ӧтиз. Критика одно ик кулэ, пусйиз Александр Волков, ӵектонъёс, дыраз верам визь-кенешъёс пайда гинэ сётозы. Нош газет-журналъёс, радио но телевидение кивалтон ёзъёс вылэ " пож ву" гинэ кисьтаны турттӥзы ке, шаермылэн данэз ноку уз буды. Ойдолэ, огкылысь луонлы но ог-огеныд тупанлы сӥзем 1997 арез огъя уж понна сюлмаськон мылкыдын йылпумъялом! Таӵе ӧтёнэн вазиськыса люкиськиз Кун Кенешлэн Тӧроез журналистъёсын. Ф. НИКИТИН. Шӧкыч "Устоез курлась" конкурсэ Малы Шӧкыч уромез ӧжыт сюдо? Газетады куддыр пумиськыло валантэм гожъямъёс, тужгес но офциальной шуыса нимаськись материалъёсын, озьы ик огшоры статьяосын но. Шӧкыч уром сярысь верано ке, солэн шиосыз ныжомизы, шӧдске. Вылаз ик, солэн улон интыез но сюбегаз. Сиён уг тырмы-а, мар-а? Суббота номерез ньыль бамен ик поттыса, "Шӧкычлы" бадӟымгес инты висъяно вылэм. Нош "Берекетэз" мукет нуналэ поттоно. Г. Вахрушев Ижевск. Нуналлэн тодметэз Толшор йылпумъяське. Вашкала календарья ӵуказе пусъё Модестлэсь вордскемзэ. Калык верамъя, Модест пророк, пе, пудоез быронлэсь уте. Та нуналэ воргоронъёс огазе люкасько вылэм, ӵош пуксьыса, сур юо, сӥль сиё. Югыт нуналмы минутэн-минутэн йылэ ни. Туннэ со кыстӥськоз 7 час 6 минут, ӵуказе - 1 минутлы ятыргес. Та нуналъёсы вордскем пиналъёслы черкын сёто вылэм Даниил, Зоя, Михаил, Модест, Семён нимъёсты. Та нуналэ... ар талэсь азьло 30 декабре 1922 арын кылдӥз Советской Социалистической Республикаослэн Союззы (СССР). 30 декабре 1941 арын Западной фронтлэн войскоосыз Г. К. Жуков кивалтэм улсын фашистъёс улысь мозмыто Калыга городэз. Мылкыдзэ вералоз калык Удмурт Республикаысь быръёнъёсъя комиссилэн тӧроез Афанасий Тубылов 25 декабре ортчытӥз ёросъёсысь бюджетъёсъя комиссиослэн кивалтӥсьёсынызы кенеш. Сӥземын вал со Россия Федерацилэн Президентэзлэн 22 декабре указэныз валче калыклэсь мылкыдзэ лыдэ басьтонъя кенешъёсты но ӧтчамъёсты радъянлы. Республикаысьтымы быръёнъёсъя комиссилэн постановлениезъя та уж оскемын угось ёросъёсысь быръёнъёсъя комиссиослы. Кызьы тодмо ни, Удмурт Республикаысь Кун Кенешлэн дас куатетӥ сессияз кутэмын вал "Муниципалитет кылдосъёслэсь границаоссэс тупатыку но вошъяку калыклэсь мылкыдзэ одно ик лыдэ басьтон сярысь" Закон. Сое быдэстон вылысь, аскивалтонъя ёзъёс кылдытыло улосвылъёсын бырйисьёслэсь кенешъёссэс но ӧтчамъёссэс ортчытыны кулэ. Отын эскерыны ӵектӥське Россилэн Президентэзлэн Указэз сярысь ужпум. Нош бырйисьёслы юанъёс вуоно арын 5 январе ортчоно заседанияз ӵектоз Удмурт Республикаысь Кун Кенешлэн Президиумез. Озьыен, ёросъёсын властьлэсь кыӵе ёзъёссэ кылдытон пумысен мылкыдзэ 5 январь бере вералоз калык. Н. Корякин. "Эшъяськон бугор" конкурсэ Чигтӥд ке но - улӟоз Марина семьяязы куатетӥ нылпи вал. Куанер ке но, огкылысь улӥзы. Шаплы, чебер нылашлы вань пиос синмаськылӥзы. Но Мариналэн сюлмаз усиз артэ урамысь пияш, Лёня но сое яратӥз. Озьы кылдӥз выль семья. Нырысь арзэ улӥзы умой. Лёня корка пуктӥз, гурт котырын сюлмысь ужаз, калык пӧлын но умой возиськиз. Собере ачиз но валаса ӧз вутты - юон борды канжаськиз. Юлтошъёс но сюризы солы. Нуналлы быдэ юон дыр гинэ медло на. Кысӥз Мариналэн синмысьтыз югыт тылгизьы. Картэз верамъёссэ кылэм-адӟем но ӧз кары ни, юнме шорысь вожаны кутскиз. Кышноез вылэ кизэ но урдылыны ӧз кепыра. Куинь арзэ Марина чидаз ик вал картэзлэсь жугиськемзэ. Нош одӥг полаз ветлэмез ик ӧз луы ни, сокем вӧсь кариз сое Лёняез. Дэрем коже, лымы вылтӥ гольык пыдын пыдесъяскьыса но мар мырдэм вуиз со бускельёсыз доры. Таосыз милициез ӧтизы ни. Озьы Лёня кӧня ке арлы пытсэт сьӧры сюриз. Секыт но воргорон киостэк, Марина солы дышемын, пичи дыръяз но нокыӵе ужлэсь ӧз палэнскылы. Нылпиосыз мар но со юрттэм каро ни. Озьы ортчиз куинь ар. Собере Марина тодматскиз уж дурысьтыз воргоронэн. Коля умой адями вал, лякыт сямо. Семья кылдытӥзы, шудо кузпалъёслэн пизы вордӥськиз. Коля мурт ӧз кары Мариналэсь бадӟымзэ пизэ но нылзэ, аслэсьтыз кадь ик яратӥз. Но вить ар сяна ӵош улыны ӧз кылды соослы. Коля секыт висьыны усиз, утьыны сое ӧз быгатэ ни. Ватӥз Марина аслэсьтыз яратонзэ. Кӧня ке улыса пытсэт сьӧрысь потӥз нырысетӥ картэз. Вуиз со Марина доры. Пыдес вылаз ветлӥз, вань янгышъёсме, пе, валай, бӧрдӥз но. Жаляз сое кышномурт сюлэм, семьяяз пыртӥз. Но шумпотыны вазь вылэм. Кӧня ке дыр ортчыса, Лёня нош аслэсьтыз сямзэ кортнэтысь лэзиз. Таяз учыре Марина кышкаса ӧз улы ни. Лёняез нош ик пытсазы. Егит нылкышно выльысь огназ кылиз. Аръёс ӧз воштэ солэсь чеберзэ. Сыӵе ик шаплы. Синъёсаз тылгизьыос ӝуало. Трос воргоронъёс юаны ветлӥзы сое. Огез но сюлмызъя ӧз луэ. Нош одӥг пол Маринаез тодматӥзы Володяен, сямызъя ӧжытак Колялы кельше. Ӧз палэнты тазэ кышномурт, улонэз выльысь ӧръяськиз кадь. Вова нылпиосызлы но атай интые луиз, яратӥз соосты. Озьы ик улысалзы, но кайгу Мариналэн сьӧрысьтыз уг кыльылы вылэм. Быдэс семьяенызы шур дуре шутэтскыны мынӥзы. Вова шуэ: "Али та шурез уяса выжо". Алӥз ке но сое кышноез, юэм шӧм пырем воргорон ӧз кылзӥськы верамзэ. Шурлэн шораз вуыса, со ву улэ ышиз. Яр дурын пукисьёс малпазы, зымиз гинэ шуыса, потэмзэ возьмазы. Дыр ортче, нош Вова уг адскы. "Мар ке умойтэм та", - малпаз марина, кесяськыны кутскиз. Ярам, адямиос котыраз вылэм. Кык час ортчыса, Воваез шедьтӥзы сопал ярдурысь. Тазэ но картсэ ватоно луиз нылкышно. Мариналэн синъёсыз ик тӧрназы бӧрдыса. Марлы солэн таӵе улонэз луиз? Ярам коть, нылпиосыз вань. Данъяськылӥз соосын анай сюлэм. Но нылпиосызлэн бурдъяськон дырзы вуиз. Нылыз кыдёкысь шаере бызиз. Бадӟымез пиез институтын дышетскыкуз кышно ваиз вал. Но кензылы семья кулэ вылымтэ, улон инты понна выриз, тамак кыскиз, Марина шоры черекъялляз. Кема ӧз улэ егитъёс, люкиськизы. Нош покчизэ, яратоно пизэ, Марина пыраклы ыштӥз. Тылскем дурын эшъёсыныз пукыкузы, матэ пуктэм бензинэн посудазы пуштыны шедьтӥз (вунэтӥллям со сярысь). Кыкез пиос быризы, одӥгзэ утьыны быгатӥзы ик. Марина шуак пурысьтаз. Ярам вӧзаз буйгатӥсез вал, огназ улыны солы кылдымтэ, лэся. Артэ урамысь воргорон сое кемалась синйылтэм ни вылэм. Витьтон аресказ Марина ньылетӥ картлы бызиз. Витя сое ӧз обидьы, огзэс-огзы валаса улӥзы. Ортчизы аръёс. Пиез выльысь кышнояськиз, нылпиен кышномуртэ басьтӥз. Пичи пияш семьялэсь улонзэ соку ик улӟытӥз кадь. Кензы но туж лякыт сямо, ужась, чылкытлыкез яратӥсь, кибашлы. Выльысь радъяськиз кадь Мариналэн улонэз. Йырсиез пурысьтамын ке но, синъёсыз азьвыл кадь ик чебересь, югыт тылгизьыосын пишто. СВЕТЛАНА АРКОВА. Пичи Пурга район, Карашур гурт. Та сярысь гожъямы вал Быръёнъёс юрттозы шат? Туэ 22 ноябре газетмы гожъяз вал ини пӧям вкладчикъёслэн куректонзы сярысь. Жаляса верано луэ, соку ми номырин но ӧм быгатэ буйгатыны юмоке шедемъёсты. Ортчиз толэзь. Оло, мар ке коть воштӥськиз? Оло, оскон коть кылдӥз, куке-соку адямиос ыштэм коньдонзэс адӟозы шуыса? Югдурез чеберъяса ум улэ, меӵак вералом: номыр но ӧз но воштӥськы, выль осконлы муг но ӧз кылды. Азьвыл гожъякумы ивортӥмы вал, Быдӟым Отечественной войнаысь И группаен инвалидъёслы вкладъёссы берыктэмын луозы шуыса. Туннэ нуналлы соос одӥг копейка но ӧз басьтэ. Тыронэз но трос ик ӧвӧл, 20 адямилы 216 миллион манет. Но одӥг со быдӟа коньдон гинэ но уг шедьы. Мукетъёсыз вкладчикъёс сярысь вераськонэз ик ӧвӧл. Йыртэмам фирмаослэсь кивалтӥсьёс кудзэ следствие улын возё, кудзэ ялан утчало на. Уно гинэ кивалтӥсь ёзъёс - Президентысен кутскыса, элькунысь дуно бумагаосъя но фондъёсын рынокъя комитетозь пыриськемын йыртэмам фирмаослэсь сьӧлыкъёссэс сэрттонэ-пертчонэ. Пумтэм поттэмын указъёс, постановлениос, косонъёс, куронъёс - пайдаез ӧвӧл. Мукетсэ витьыны но шуг: коньдон ӧвӧл бере, кыӵе пайда луоз гурезьёсын бумага гожъямлэсь. Мукет ласянь учконо ке, малы государство ас вылаз басьтыны кулэ пӧяськыса узырмем компаниослэсь сьӧлыкъёссэс? Ярам, государство, луонлыкез вань ке, жалялоз ыштон адӟем гражданъёссэ. Юрттоз соослы. Но со юрттэт бюджет чотын сётэмын луоз ук. Озьыен, мон чотын, тон чотын, куинетӥез чотын. Нош малы мон аслам кисыысьтым коньдон сётыны кулэ ӝоген но капчиен узырмыны турттӥсь бускелелы, сое пӧязы ке? Мон сое сыӵе осконтэм шудонъёсы пыриськыны ӧй косы ук, озьы-а? Котьма ке но, аслаз янгышез понна котькудӥз ачиз дун мед тыроз. Пӧяса баьтэм коньдон кузёосыз кие ноку но уз вуы ни шуыса чутрак вераны уг ик луы ай. Оскон котьмалэсь но берло быре уга. Вкладъёсты берыктыны ньыль пӧртэм луонлыкъёс вань. Нырысетӥез - общественно-государственной фонд пыр, отчы коньдон люкаськиз ке. Кыкетӥез - йыртэмам фирмаослэн бервылазы ужась комиссиос пыр. Куинетӥез - судъёс пыр. Ньылетӥез - куашкам компаниос выльысь улӟозы. Одӥгез коть шумпотымон, сыӵе учыръёс вань ини. Тани "Рязанский торговый дом БАРС" пыд йылаз султӥз ик ук. Табере облигациосызъя коньдон тырыны кутскиз. Облигациос возисьёслы (соос Удмуртиын вань ) со пумысен нялтас ивортӥськом: коньдон басьтон пумысен (0912) 76-97-94 телефонъя Рязане жингыртэ. Витьымтэ шорысь но кӧня ке тумошогес малпанзэ вераз дуно бумагаосъя но Фондъёсын рынокъя комитетлэн председателезлэн воштӥсез Ю. И. Косырев: - Вкладчикъёслы юрттыны быгатозы, оло, матэктӥсь быръёнъёс. Котькудӥз депутатэ кандидат котькуд куара сётӥсь понна нюръяськоз. Кыӵе ке уката но шӧртчиез пӧям бырйисьёслы юрттыны амал шедьтӥз ке, одно ик депутат луоз. 40 сюрс пала вкладчикъёс - шудон шат со? Юрий Ивановичлэн верамез нырысь гинэ тумошогес кадь потэ. Нош умойгес малпаськоно ке, кин тодэм, солэн кылъёсаз, оло, номыр быдэстонтэмез ӧвӧл. Мар гинэ ӧз луылы ни угось асьмелэн политической улонамы, уката но быръёнъёсын валче. Г. ТИХОНОВ. Берекет Выль ар ӝӧк вылады "Тол Бабай" бутерброд Кулэ луоз: булка, куинь пӧзьтэм курег пуз, 100 грамм нӧкы вӧй, 3-4 бадӟым пуньы майонез, пӧзьтэм ӵуж кушман, мариновать карем горд помидор но сугон (умойгес луоз вожез). Булкаез вандылыса, вылтӥз вӧен зырано. Вылаз пононо курег пузлэсь одӥг ньыльмос люкетсэ (ӵуж палыныз улӥе). Вож сугонлэсь лэсьтоно "синъёс", ӵуш кушманлэсь - "ныр", майонезлэсь (вань ке сырды, векчи вуштон пыр лэзьыса) - "тушсэ". Тол Бабайлэсь изьызэ лэсьтоно горд помидорлэсь. Куноостылы дась бутербродэз сётыны луоз пичи тэркыосын. "Лымы комокъёс" Кулэ луоз: кык куиньмос стакан йӧл, куинь курег пуз, одӥг бадӟым пуньы сакыр пызь (песокез векчи пыргытыса), кык куиньмос стакан йӧлвыл, кык пуньы сакыр-песок, ванилин, эмезь яке боры варення, сылал. Курег пузлэсь тӧдьызэ напчытозяз шукконо, кӧня ке сылал но сакыр пызь поныса. Йӧлэз, йӧлвылэз но сакыр-песокез огазеяса быректытоно, ческытэзъя ванилин поныса. Сиськон пуньыен напчытэм курег пуз тӧдьыез басьтӥськом, нош кыкетӥ пуньыен сое вольыт, котырес кариськом но пӧзись йӧл суретэ понӥськом. Пӧзьтоно кык минут. Дась "лымы комокъёсыз" пельнянь ӝутонэн октоно. Ваньзэ лэсьтэм бере йӧл суретэз сӥсъяса кынтоно 50-60 градусозь. Курег пузлэсь ӵужзэ шуккыса, калленэн гинэ кынмыны кутскем йӧл суретэ кисьтоно. Сое ваньзэ выльысь сурано но напчытозязгес шунтоно, пӧзьтыны уг яра. Дась кремез посудае кисьтоно но кезьыт азе пуктоно. Кынмыны кутскемез бере "лымы комокъёсыз" крем вылэ тыроно, нош вареннялэн емышъёсыныз сое чеберъяно. В. Андреева. Берекет Кибашлыос ПУ НО УЛӞЕ, КЫРӞА, ГУРЛА... Туспуктэмъёс вылысь адӟиськоды Анатолий Николаевич Фадеевлэсь киужъёссэ. Ваньмыз соос пулэсь лэсьтэмын. Воргоронлэн зарни киосыз улын огшоры пу улӟе, тылобурдоослы, адямилы, аспӧртэм посудалы пӧрме. Кӧня быгатонлык но чиданлык кулэ таӵе арбериосты быдэстыны. Тани макем йӧно но чебер адӟиське юсь, эшезтэк мӧзмыт, лэся, солы. Дыдыкъёслы но мукет тылобурдоослы укшась посуда ӝӧк вылэз но чебертоз, сиёнэз но отысь ческыт потыса веръялод. Тазьы котькуд ужзэ Анатолий Николаевич мыло-кыдо быдэстэ, йылаз-пумаз вуттэ, чеберъя-вӧлэ, адями азе сюлэмзэ эркынак усьтэ. Пуэз вӧлыса, арбериос лэсьтыны Анатолий Фадеев пичиысен дышиз. Ас понназ. Паллян киыныз быдэстэ. "Ньылетӥ классозь гожъяськи но палляныныз,- серекъя. - Кема курадӟизы монэн йырин дышетӥсьёс но." Пулэсь вӧлӥськыны яратэмез пияшез вуттӥз Семеновск городысь художественной училищее, хохломалэн шорсюлмаз. Отын дышетскыкуз ик пӧртэм адӟытонъёсы пыриськылӥз. Кибашлы муртлы сётэмын "Зарни киосын мастер" диплом. Анатолий Николаевич сярысь гожъязы ини "Сельская жизнь" газетын. Удмуртиын улӥсьёс телевизор пыр но соин тдматскизы ини. Басьтэм тодон-валанъёсыныз Анатолий Фадеев уг буйгатскы. Пумен ужаса йылпумъяз искусствоосъя Москваысь калык университетэз, дышетскиз декоративно-прикладной отделениын. Ижевскысь Октябрь ёросысь чеберлыкъя юртын ужась усточи али мыло-кыдо дасяське киужъёссэ возьматонлы. - Мынам ужам крезьгур юрттэ,- шуэ Анатолий Николаевич. Тӥни озьы. Крезьгурчилэн кылдытэм гурез кибашлы муртлы юрттэ мылкыдзэ ӝутыны, вылесь, паймымонэсь киужъёс кылдытыны, ужъёс пыр аслэсьтыз сюлэмзэ усьтыны. Л. ХРУЛЕВА. Туспуктэмъёсыз В. КАМАШЕВЛЭН. "Эшъяськон бугор" конкурсэ ОРТЧЕМЕНЫЗ ПУМИСЬКОН - Эн оскы тон со книгаослы, туала вакытэ ӧвӧл ни сыӵе яратон. Синъёстэ усьты, учкы, кызьы курадӟо юись картъёсынызы нылкышноос. Пинал дыръязы соос но оскизы яратоно муртсылы, юоз но дугдоз, шуылӥзы. Саша но пӧртэм уз луы. Тодӥськод ук анай-атайзэ. Улмо ас выжыяз ик усе, шуо,- индылӥз ваменэс нылзэ анаез. Ярам ини, анай со анай - оломарлэсь но кышка. Нош эшъёсызлы маин люкетӥз Оли? Сашаез со нокинлэсь ӧз лушка ук. Пияш ачиз эшъяськыны ӵектӥз. Валантэм кадь, егитъёс ӵошен дыръя, нокин пумит ӧз вералля. Оли огназ учыраны кемдэ гинэ, соку эшъёсыз сое "пилё" ини, люкыны туртто, оломар уродзэ супыльто. Оло, вожъяськеменызы озьы? Саша мукет нылъёс шоры ӧз ик учкылы уго, нош соосыз пумит ӧй вал синэз мальдытӥсь пияшен эшласькыны. Люкизы! Выремзы юнме ӧз луы. Кӧня урод кылъёс Саша сярысь кылзоно луиз нылашлы. Толон соизлы кырмышъяз, туннэ таиныз вераськиз. Оли ачиз но пумен оскиз со вераськонъёслы. Одӥгаз ӝытэ юнме шорысь пыкылӥз со Сашаез юись анай-атаез пумысен. Кыл бӧрсьы кыл, пурӟиз керетон. Юнме ӵабыштӥз Сашалэсь сюлэмзэ Оли. Табере со ӝытъёсы клубын огназ пуке. Бен, пуксьыло нылъёс я пиос, верасько мар ке сярысь. Оли вазе ке но пумитазы, малпанъёсыз солэн кытӥ ке палэнэтӥ уяло. Но клубын со кемалы уг ӝега, каллен гинэ вамыштэ дораз. Шыпыт бертэ, кышка, Сашалэсь ваземзэ уз кылы шуыса. Но пияш ӧвӧл, уз но лыкты ни, дыр. Оли ачиз палэнтӥз сое. Та ик луиз егитъёслэн люкиськонзы. Нокинлы номыр вератэк, Саша кошкиз городэ... Оли нош ик вамышъя тодмо сюрестӥ. Дас сизьым арес вал солы соку, самой шудо дырыз. Нюлэс вӧзысь гурезь йылын кылзылӥзы соос Сашаен тылобурдо чирдэмез. Пилемтэм уйёсы кизили усемез чаклазы, паймылӥзы юг толэзь пиштэмлы. Таӵе уйёсы, шур дуртӥ бызьылыкузы, Саша Олиез кияз ӝутылӥз. Собере соос ярдурын пукылӥзы, шурлэсь жильыртэмзэ кылзыса. Ваньмыз та суредъёс вить ар ортчыса но туннэ кадь ик пуксё Олилэн син азяз. Нылаш озьы ик ӧз пумита аслэсьтыз "принцсэ". Вал бен сюлэмзэ вырӟытылӥсьёс. Сыӵе дыръя Оли чиньыяз зарни зундэс но бырттыны дась вал ни кадь, но сюлэмаз маиз ке но бугыртӥськылӥз. Но нылаш нош ик чигналляз, кульчояны турттӥсь муртсэ паймонэ кельтыса. Нош огпол Оли город урамысь пумитаз сое - Сашаез. Зэмос пиосмурт луэм со. Кӧня юан-веран тымиськиз соку нылмуртлэн сюлэмаз, но малэсь ке курдаса, дыртӥсько шуиз но пегӟиз. Сашалэсь кытын улэмзэ ӧз ке но тоды, Оля валатскиз: со кытын ке та палан улэ. Иське, соос адӟиськозы на. Зэмзэ ик, арня но ӧз ортчы, Сашаен Оля выльысь пумиськизы. Табере ини нылмурт ачиз итӥз кыл бугорзэ. Кыксы ик магазинэ потэмын вылэм, нош вераськонтӥязы огзэ но, кыксэ но ортчизы ни. Люкиськыкузы выльысь пумиськон сярысь пал кыл но ӧз поттылэ. Ма, со кулэ но, дыр, ӧй вал. Мукет нуналаз Оля но Саша одӥг дыре, толон сямен ик, магазинэ потӥзы... Зоя КУЗНЕЦОВА, Удмурт кун университетысь студентка. Драмая удмурт кун театр куинь нунал ӵоже муш уморто музэн гужлаз: Михаил Щепкин нимо Вылӥ театр училищеез йылпумъям егитъёс возьматъязы диплом ужъёссэс. Учкисьёслы тужгес яразы "Эмеспиос" но "Серекъялод но, бӧрдод но" спектакльёс. Пинал актёръёс быръем удыссылы ӟеч дасяськиллям: спектакльёс одӥг шокчемен учкисько. "Серекъялод но, бӧрдод но" комедиысь одӥгез суред. Самсон Силантьевич - Андрей Сергеев, Липа, солэн нылыз - Светлана Вахрушева-Ложкина. "Эмеспиос" спектакльысь суред. Калыкез валэн нуллӥсь - Эдуард Шиляев, дьяк - Андрей Карпов, сиён дасясь - Сергей Семёнов, корос лэсьтӥсь - Андрей Сергеев. Туспуктэмъёсыз Владимир Камашевлэн. О. Л. Кузьменко сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Кузьменко Олег Леонидовичез мозмытоно Удмурт Республикаысь Кун Кенешлэн - Экономикаын политикая но бюджетъя ялан ужась комиссиезлэн тӧроез должностьлэсь ачиз куремъя. Удмурт Республикаысь Кун Кенешлэн Тӧроез А. А. Волков. Ижевск город, 1997 арын 23 декабре. � 546 - И. "Известия Удмуртской Республики" газетлэн валтӥсь редакторез сярысь Удмурт Республикаысь Кун Кенешлэн Президиумезлэн Постановлениез Удмурт Республикаысь Печатья но иворъёсъя министерстволэсь "Известия Удмуртской Республики" газетлы валтӥсь редакторе Константин Андреевич Глуховез юнматон сярысь постановленизэ эскерыса, Удмурт Республикаысь Кун Кенешлэн Президиумез пуктэ: 1. "Известия Удмуртской Республики" газетлы валтӥсь редакторе юнматоно Константин Андреевич Глуховез. 2. Удмурт Республикаысь Правительстволы ӵектоно Константин Андреевич Глуховлэсь кандитатуразэ эскерыны, сое "Известия Удмуртской Республики" газетлы валтӥсь редакторе юнматон понна. 3. Удмурт Республикаысь Печатья но иворъёсъя министерстволы "Известия Удмуртской Республики" газетлы валтӥсь редакторе Константин Андреевич Глуховез юнматэм пумысен журналистъёслэн коллективенызы одӥг кылэ вуоно. Удмурт Республикаысь Кун Кенешлэн Тӧроез А. А. Волков. Ижевск город, 1997 арын 15 декабре. � 437- И Берекет Мар но ӧвӧл ТОДЫСАЛ КЕ... Америкаысь Бауйя Виста городын улӥсь эшъёссэ паймытыны малпаз. Кызьы? Со ымаз донгиз шер пумиськылӥсь чорыгез. Тодысал ке мар луонзэ. Чорыг ньылоназ кугӟаз. Интыысь госпитале нуыкузы, 36 аресъем Стивен Эпперсон сюрес вылысен кулӥз. Дас сантиметр кузьда шер пумиськылӥсь "Джек Демпси" чорыг асьме быльккессинлы (ёршлы) кельше. Валамон ини, макем шуге-леке сюриз воргорон. Утизы но.. лёгазы Англиысь пожарникъёс юн курадӟизы писпу йылэ тубем кӧчышез музъем вылэ васькытыны. Нош кошкыкузы машиназылэн колёса улаз шедьыса, утем коӵыш лёгаськыса быриз. Шудэз вылэм Кулэмъёсты ватон службаын ужась адямиез ватыны дасям гуэ усиз. Вылаз ик эшшо кулэм муртэн корос "лобӟиз". Шудэз вылэм на: воргоронлэн одӥг урдлыез гинэ чигем. "Блиц-газета" гожъямъя. Берекет Сямъёс, йылолъёс Гырлыос жуго 108 пол Вашкала кутэм сямъя Выль ар уе Будда храмлэн гырлыосыз 108 пол жуго. Юнме-а та лыдпус? Ӧвӧл. Японецъёслэн лыдъямзыя, адямиослэн куать урод сямъёссы вань: йыркуръяськон, шузи луон, улон шоры капчи мылкыдын учкон, астэ валатэк, мултэс сиськон, лэсьтоно уждэ быдэстом-а, ум-а шуыса кема малпаськон, кӧттырмостэм луон. Ваньмыз та куать тырмымтэос эшшо быдэн дас тямыс пӧртэм урод сямъёсты, пе, возьмато на. Тӥни соин герӟаськемын вылӥ верам та лыдпус: котькуд жугем гырлы адямилэсь одӥг урод сямзэ быдтэ. Араз - кык август Бутан королевствоысь астрологъёс ар йылпумъяськыку вуоно арлы гороскоп кылдыто. Соос адӟо ке, кыӵе ке но нуналлы яке толэзьлы кизилиослэн герӟаськемзы урод мылкыд кылдыто шуыса, корольлэн указэзъя календарьысь со нуналэз яке толэзез кушто, сое мукетыныз вошто. Тӥни соку маскара югдур кылдэ: кылсярысь, араз кык пол август толэзь луыны быгатэ, нош сентябрь толэзь чик но уг луы. Чеберъям кыз вӧзын - кузьымъёс Выль ар азьын ӵыжы-выжыослы, тодмоослы кузьымъёс сётъян туала вакытэ кылдэмын шуыса малпаськоды ке, янгышаськоды. Та сям туж вашкала дырысен кылдэмын ини. Толсуре кузьмаськон герӟаськемын вашкала Римысь языческой осконэн. Та праздникъёслэн нимъёсы соослэн сатурналия но календа шуыса нимасько вал. Вашкала римлянъёс стрения инмарзылэн (богинязылэн) сӥлы карон тэльысьтыз вайёсты но ньӧръёсты окто но тулыс пала нунал берыткемлэсь азьло (21-22 декабре) ог-огзылы кузьмало, ог-огзылы шудбур но тазалык сӥзё вал. Улыса-вылыса дуннеын кузьымъёс сётъян сямъёс воштӥськизы, я инмарлэсь тусбуйзэ, я дуно сылӥсь чеберъяськон, я сюсьтыл, я ческыт сиёнъёс но мукетсэ сётъяллязы. Кылсярысь, Франциысь но Англиысь корольёс котырын ужасьёс пӧлын нимысьтыз тупатэм кузьымъёсын вошъяськылӥзы. Выль ар азьын кузьымъёс сётъян, соосты басьян улонэ пыӵам одӥгез ӟеч сям луэ. Со адӟиське литератураын но, крезьгур кылдытонын но, кинематографиын но. Л. ЯКОВЛЕВА. "Удмурт Республикаын асваньбуртонлэн аспӧртэмлыкъёсыз сярысь" Удмурт Республикалэн Законаз воштонъёс пыртон сярысь Удмурт Республикалэн Законэз 1-тӥ ёзэт. "Удмурт Республикаын асваньбуртонлэн аспӧртэмлыкъёсыз сярысь" Удмурт Республикалэн Законаз таӵе воштонъёс пыртоно: 2-тӥ ёзэтысь нырысетӥ: 2-тӥ люкетъёсты, 3-тӥ ёзэтысь 2-тӥ, 3-тӥ люкетъёсты, 4-тӥ, 5-тӥ, 6- тӥ, 7-тӥ, 9-тӥ, 10-тӥ ёзэтъёсты куштоно. 2-тӥ ёзэт. Та Закон кужыме пыре сое печатлам нуналысен. Удмурт Республикаысь Кун Кенешлэн Тӧроез А. А. Волков. Ижевск город, 1997 арын 17 октябре. � 484-И "Удмурт Республикаын кун асваньбурез люкон сярысь" Удмурт Республикалэн Законаз воштонъёс но ватсанъёс пыртон сярысь Удмурт Республикалэн Законэз 1-тӥ ёзэт. "Удмурт Республикаын кун асваньбурез люкон сярысь" Удмурт Республикалэн Законаз таӵе воштонъёс но ватсанъёс пыртоно: 1. 5-тӥ ёзэтэз тазьы гожтоно: ":5-тӥ ёзэт. "Удмурт Республикалэн кун асваньбурысьтыз объектъёсты муниципальной кылдосъёслэн асваньбуразы выжтон ортчытӥське Россия Федерацилэн но Удмурт Республикалэн законъёссыя". 2. 6-тӥ ёзэтэз, 9-тӥ ёзэтысь 2-тӥ люкетсэ куштоно. 2-тӥ ёзэт. Та Закон кужыме пыре сое печатлам нуналысен. Кун Кенешлэн Тӧроез А. А. Волков. Ижевск город, 1997 арын 17 октябре. � 483-И. Ӟечкыласьком! Вань сюлмысьтымы ӟечкыласьком тӥледыз праздникен - Ижевскын йӧллэсь сиён-юонъёс поттыны кутскем дырысен 70 ар тырмонэн но столицаямы вылезлэн йӧл заводлэн ужаны кутскемез дырысен 25 ар тырмонэн. Та дыр ӵоже предприятиды кужмояз. 30-тӥ аръёсы гужем 15 тонна, толалтэ 3 тонна йӧл завод пыр потылӥз ке, берло вакытэ одӥг смена ӵоже гинэ йӧллэсь 207 тонна пӧртэм сиён-юон лэсьтӥське. Ческыт, тазалыклы пайда ваись продукциды калыкез шумпоттэ "Ижмолоко" АО-ын поттэм сиён- юонэз огпол шӧмъяд ке, со сярысь уд ни вунэты но валалод, кыӵе сюлмоесь адямиос отын ужало, кӧня быгатонлыкъёссэс кужымзэс сёто, ческыт сиён-юон лэсьтон понна. Берло дыре завод тырше выль продукция поттон бордын. Удмурт заводлэсь нимзэ мукет улосъёсын но тодо ини. Со туж шумпотымон. Озьыен, тӥ ӟечгес ужаськоды, Россиысь, кунсьӧрысь предприятиосты азьпалтыны, вормыны быгатӥськоды бере. Туннэ озьы ик ӟечкыласьком скал кыскисьёсты, фермаын ужасьёсты - ваньзэ, кин ӟар кезьытэ, зор ултӥ дыртэ уж дораз. Соос бордысен кутско "Ижмолоко" АО-лэн, сиён-юон поттӥсь мукет предприятиослэн вормонъёссы. "Ижмолоко" огазеяськонын ужасьёс! Сӥзиськом тӥлед шудбур, тазалык, вань малпанъёсты мед быдэсмозы. Удмурт Республикаысь Кун Кенеш Удмурт Республикаысь Правительство Берекет Тодӥськоды-а? Кин кылдытӥз "Ёлка" кырӟанэз? Кыӵе кырӟан нылпиос пӧлын самой яратоно но паськыт вӧлмемын? Огкылысь вералоды: "Тэльын вордскиз пичи вож кыз"... Зэм верамын. Таӵе огшоры кылъёсын гожтэм но нылпиослы туж валамон луись кырӟан сю арлэсь кема улэ ини. Ӝыны даур пала та кырӟанлэн авторез тодмо ӧй вал, калык малпам шуыса улӥзы, крезьгурчи ик кылъёссэ но малпам, дыр, шуисьёс но вал. Али но тросэз асьмеос ум тодӥське "Ёлкалэсь" авторзэ. Нош гожтӥз сое Раиса Адамовна Кудашева (1878-1964). Йылпумъяз со М. Б. Пруссель нимо нылкышно гимназиез. Ужаз гувернантка, дышетӥсь, библиотекарь луыса. Кылбуръёс гожъяз пичиысен. Литература удысын данэ потыны малпанэн улӥз. Кылбурчилэн нырысетӥ ужъёсыз печатласькизы 18 аресысен. Соос потылӥзы нылпи журналъёсын. "А. Э." инициалъёсын (одӥгез псевдонимез) "Ёлка" кылбурез - отчы ик пыро "В лесу родилась ёлочка"... кырӟанлэн кылъёсыз но - Толсур (Рождество) дыръя шулдыръяськыны гожтэмын вал. Отчы нылпиос гинэ ӧвӧл, анай-атайёс но пыриськылӥзы. Крезьгурзэ гожтӥз композитор Л. К. Бекман. Л. ВАСИЛЬЕВА. Куазь Синоптикъёслэн ивортэмзыя, шутэтскон нуналъёс куртчиськись кезьытъёстэк ортчозы. Нуназе термометръёс 5 градусозь, интыен-интыен 10 градусозь лэзиськылозы. Уин - 15 градусозь. тӧл лымшор но шунды мукет палась секундскын 6-14 метре пельтоз. Каньылля лымыяськоз. РОССИЫСЬ ГАЗЕТЪЁС ИВОРТО Заводын "ожмаськон" Волжской автозаводын выль машинаосты вузанэз, мукет улосъёсы келянэз мафия киултэм, ивортэ "Сегодня" газет. Заводын поттэм автомобильёс пӧлысь 90 процентэз Тольяттиын вузасько. Фирмаос, соосты трос пол вузаса, коньдон потто. Собере гинэ машинаос мукет улосъёсы кошко. Берло кык толэзь ӵоже Тольяттиысь автозаводын сюлэсь уно уголовной уж ӝутэмын. "Татын зэмос ожмаськон мынэ: спецслужбаос спецназлэн юрттэменыз, автозаводэ каръяськем бандитъёсты шараяло",- гожтэ газет. Аспӧртэмлыко металлолом "Челябвтормет" предприятиысь нимысьтыз бригада Оренбург котырысь степьёсы кошкоз",- ивортэ "Урал-пресс" агентство. Со аспӧртэмлыко металлолом люкалоз. Та рад Магнитогорскысь металлургической комбинат ракетаос лобӟон шахтаослэсь борддоръёссэс анданлы ӵыжатоз. Соос тужгес кужмо кортлэсь лэсьтэмын но СССР куашкам бере аналтэмын вал. Бускельёсмы но бере уг кылё Башкортостан Республикаысь министръёслэн кабинетсы жилищно-коммунальной реформаез ортчытон амалъёсты юнматӥз, ивортэ "Башинформ" агентство. Программаез 2003 арозь быдэстыны чакламын. Юртъер но коммунальной юрттэтъёс понна дунъёс будозы, калыклэн огъя табышез будэмъя. Со сяна, куанер семьяослы льготаос сётэмын луозы, оскытэ "Башинформ" агентство.