Галина Румянцева: "Дунне бергалоз, адямиос улозы..." Берло дыре адямиос пӧртэм наукаос борды кыстӥськыны кутскизы. Со туж умой, уго наукаос пыр гинэ адями мургес валаны турттэ ассэ но быдэс улонэз. Сыӵе мугъёс ик, вылды, удмурт нылкышноез Галина Павловна Румянцеваез но астрология удысэ вуттӥзы. Туннэ со, мукет адямиос сярысь, золгес "адӟыны" быгатэ ни азьпала улонмес, дунъяны тырше ортчемзэ. - Галина Павловна, тани йылпумъяськиз ни, шуом, Ошлэн арез. Кызьы тӥ малпаськоды: кылем арлэн тодметъёсыз тупазы-а астрологъёслэн верамъёссылы? - Учке асьтэос: мынам малпамея но озьы ик мукетъёсызлэн астрологъёслэн верамъёссыя, Ошлэн араз ӟеч удалтыны кулэ вал будосъёс, бакча сиёнъёс, озьыен, крестьян калыклы таиз ар пайдаен берытскиз. Ошлэн араз озьы ик воштӥськонъёс луыны кулэ вал кун кивалтэтын. Валтӥсь инты басьталзы консервативной адямиос. Мон сямен, зэмзэ ик, кивалтон удысын огыр-бугыр вакытъёс данак гинэ вал. Милям учкеммыя, шурдыт, шимес учыръёс Ошлэн араз луыны кулэ ӧй вал... - Нош соос вал ук. Кӧня самолётъёс пазьгиськизы ни декабрь толэзе гинэ, шахтёръёс, солдатъёс быризы. Та учыръёсты кызьы валэктысалды? - Астрологъёслэн эскеремзыя, та кышкыт учыръёс тупалогес Тигрлэн арезлы, уго Тигрлэсь азьвыл ортчем аръёссэ чаклано ке, соку пӧртэм ожмаськонъёс-нюръяськонъёс дуннеын туж трос вал, шуом, мынӥз ожмаськон Кореяын, воштӥськонъёс - Кубаын, забастовкаос - Англиын. Вуоно 1998 арын но адями гань-гань уз улы, луыны быгатозы олокыӵе но шудтэм учыръёс, висёнъёс, музъем зурканъёс. Зэм, Тигрлэн арез туэ ассэ азьпалтыса кадь вуэ, декабре туж трос шугадӟонъёс вал ини. Малы озьы луэ? Пӧртэм тодосчиослэн валэктонъёссыя, даурысь дауре выжыку, пе, дыр туж чаляк ортче. - Астрология вылэ пыкъяськыса, тӥ адямилэсь азьпала улонзэ вераськоды. Ӵем-а зэмало со веранъёсты? - Одӥг пияшлы быдэс ар понна лэсьтӥ вал гороскопсэ. Солэн анаез уг оскы вал, пизэ армие басьтозы шуыса. Но мон, со пилэсь кизилиоссэ эскерыса, армие кошконзэ но, одӥг висёнзэ но "адӟи". Ваньмыз зэмаз, бӧрысь ини анаез но паймиз. Кылем арын тросэзлы гороскопъёссэс лэсьтӥ, но арзы ӧз на ортчы, соин ик али шуг вераны, быдэсмозы-а, уз-а со веранъёсы. Но тодӥсько аслэсьтым, пиналъёсылэсь азьпала улонзэс. - Галина Павловна, нош ваньзэ азьпала ик тодыса улыны секыт уг йӧты-а? - Адямиез маке урод возьма ке, мон уг вераськы. Ӟечсэ гинэ пусйисько. Возьматӥсько адямилы, кыӵе кулэлыкен со вордӥськемын та дунне вылэ. Но, мон сямен, анайлы пиналъёсыз сярысь ваньзэ тодоно. Со кулэ пиналэз умой сюрес вылэ султытон, секытлэсь утён понна. Мар возьма кыксэ ик нылъёсме, мон тодӥсько. Соин ик шумпотонъёслы но, шуг-секытъёслы но дась. Анайёс мыныны ӵем гинэ вазиськыло, уката но пиналзы школаез ке йылпумъя, кин луыны уг тоды. - Вералэ на вал, кыӵе сямъёсыз луо Тигрлэн араз вордӥськем муртлэн? - Котькуд адямилэн кык пумо сямъёсыз вань: ӟеченыз артэ вамышъяло уродъёсыз. Валамон ини, Тигрлэн сямъёсыз адямилы но пыӵалозы. Та аре вордӥськемъёс ӟырдытэсь, яркытэсь, зэмлык понна нюръяськисесь луо. Соин но, дыр, соос шудоесь, сыӵе адямиен артэ мукетъёсызлы но капчи улыны. Тигр адямиосты озьы ик уте лушкаськонъёслэсь, тылпуослэсь. - Кыӵе мылкыдын выжиськоды тӥ Тигрлэн араз? - Мон весь осконэн улӥсько - сыӵе сямы. Вуоно арын шуг-секытъёс луизы ке но, дунне бергалоз адямиос улозы... Т. Банникова. Тигрлэн арез Дасяське, гажано лыдӟисьёсмы, - шыпытак гинэ матэ вуэ вуоно арлэн кузёез - Тигр! Дыр бен вань на, сое пумитатозь: со луоз 28 январе (толшоре) 9 час но одӥг минут Москваысь дыръя. Со дыре Тигр сэрпалтоз (куштоз) кивалтонысь туала кузёез - Ошез но кузёяськоз 1999 арысь 16 февралёзь. Шунды ӝужан палан Тигр луэ кужмоослэн, мыло-кыдоослэн, кышкасьтэмъёслэн символзы. Та аре вордӥськемъёс луо кивалтӥсьёс, азьветлӥсьёс, жадёнэз валатэк ужасьёс, ӝегатскытэк уж борды кутскисьёс. Соос быгато адями сярысь сюлмаськыны, оскыны, мылкыдзэс пушказы возьыны, йыркурзэс сюлмазы возьытэк улыны. Кышномурт-Тигр туж йӧно, тунсыко. Со одӥг кадь быгатэ лэсьтыны азинлыко ужзэ но, семья сярысь сюлмаськонзэ но. Туж уг яраты мыскыллямез, ултӥямез. Со понна кышномурт-Тигр туж зол пунэмзэ берыктэ. Огъя вераса, Тигръёслэн улоназы пумиськыло трос гурезьёс но, гопъёс но. Умой, оскымон эшъёс Тигръёслы луо Парсь, Пуны, Вал. Даллашонъёс уг пото сыӵе адямиосын, кудъёсыз вордӥськизы Комаклэн, Ыжлэн, Атаслэн, Кыйлэн аразы. Огъя кыл шедьто Ошен, Кыен, Маймылэн (Обезъянэн). Шунды ӝужан палась гороскопъя вить пӧртэмесь Тигръёс пумиськыло: Корт Тигр (1950 ар), Ву (1920, 1980), Пу (1914, 1974), Тыл - (1962, 1986), Музъем Тигр (1938, 1998). 1998 арлэн Тигрез тужгес ик лякыт сямо, йыгмыт, лачмыт, сётэм кылзэ котьку ик быдэстэ, эскериськись но сюлмаськись луэ. Лачмыт ке но, Музъем Тигр яратэ шудыны музъем пушен, вырӟытъя сое, сайкатэ вулканъёсты. Бадӟым пыдъёсыныз кыстӥське ин пала но, шунды пытсаськонъёсты (затмение) вае. Со адямилэн тазалыкезлы кышкытлык кылдытэ. Вуоно аре шунды пытсаськонъёс луозы феврале, мартэ, августэ но сентябре. Гажано нылкышноос, вуоно аре тӥледлы тужгес ик тупалоз вакчи вандэм йырси, горд буяса но со выллем югыт йырси нюжаос кельтыса. Нош дӥськуттэс выльдыны малпады ке, эн вунэтэ Тигр сярысь. Быръе классической амал но солы тупась буёлъёс: сьӧд - ӵуж, тӧдьы - лыз. Выль аре удалтоз сыӵе воргоронъёслы, кудъёсыз будэтыны вуозы "чабей" мыйык. Огъя вераса удалтоз чупрес, мыло-кыдо, кышкасьтэм, улонэз яратӥсь, югдурез ӟеч тодыса-валаса улӥсь адямиослы. Сыӵеосты тужгес ик яратэ угось Тигр. Вуж бирманской выжыкыл маде. Одӥг пол Ош нюръяськонын вормем, пе, Тигрез, вылаз ик, сое мыскыллям. Со дырысен Тигр адӟонтэм каре Ошъёсты ( но Скалъёсты). Соин ик 97-тӥ арез келякуды шӧдтэк эн кыле, эн ушъялэ ортчись арез. Нош Выль арез пумиталэ осконэн, гажаса - Тигр сое яратэ. Дӥськутады мед луоз маиз ке гинэ но сюрсоез. Нош ӝӧк вылэ пуктоно сӥльлэсь пӧртэм пумо сиёнъёс. Тигрлэсь сямзэ но кылдэмзэ чакласа, гарнир лэсьтоно луоз музъемын будӥсь бакча-сиёнъёслэсь (картофка, горд кушман, ӵуж кушман, сяртчы но мукет). Юонъёс мед луозы ӵуж, гордмыт-ӵуж, курень буёло яблок, мандарин, апельсин сок но пӧртэм пумо сюкась. Тодмоосты но, асьтэос но эн гинэ шедьтэ курытсэ мултэс чарка юыны. Маймыллы - Тигрлэн тушмонэзлы - укшаны. Умоен со уз ортчы. Комаклэн араз вордӥськем адямиос кышкытлэсь эскериськыса улоно луозы. Ошлы шып улоно. Но туж эн куректэ. Одӥг арзэ чиданы но луоз. Тигрлы та аре удалтоз. Со быгатоз бадӟым уж борды кышкатэк кутскыны. Та ар Тигрлэн угось. Коӵышлы шыпытак гинэ, улонзэ воштытэк улыны тыршоно. Драконлэн улонэз шулдыр. Со Тигрен одӥг кыл шедьтыны быгатоз. Кый понна ар кема кыстӥськоз, но та ар сое трослы дышетоз. Вал та арез ас понназ меӵак уже кутоз ас улонзэ берыктыны. Кечлы (Ыжлы) мӧзмыт луоз. Маймыл пӧрмоз учкисьлы. Арлэсь ортчемзэ со палэнысен эскерыса улоз, Тигрлэн син азяз мултэс бергатэк. Атаслы ар секыт воштӥськонъёс ваёз, но уродэзлэсь палэнскыны луоз, астэ лачмыт, зӥбыт, эскериськыса возид ке. Нош Пуныос Тигрлэн араз каньыл улозы, соос асьсэды котькыӵе ужын пӧртэм быгатонлыксэс возьматыны быгатозы. Парсь улон ӧре каньылля пыриськоз, та арлэсь пайда басьтыны быгатоз. Табере малпаське, гажано лыдӟисьёсмы, кыӵе пӧйшур возьма асьмеды вуоно аре: лек Шерхан яке бадӟым коӵыш гинэ. Н. Касаткина. "Крестьянка" журналъя. ТОЛ БАБАЕЗ ӦЖЫТ ГИНЭ ӦЗ ПОГЫРТЭ Автозаводлэн "Чайка" клубаз туж шулдыр ортчиз Выль арез пумитан. Отчы люкаськылӥзы котырысь школаосысь удмурт классъёсын дышетскись пиналъёс но соослэн анай-атайёссы. Соос асьсэ кужымен коньдон люкаллям мусо нылпиоссылы кузьымъёс басьтыны. Вож кыз дорын сюосын, дыр, чузъяськизы удмурт но ӟуч кылын мадиськонъёс, кырӟанъёс. Трос вал чебересь эктонъёс, пӧртэм ӵошатсконъёс. Пичиос но, мӧйыос но эктӥзы, кема шулдыръяськизы. Тол Бабаез но воксё жадьытӥзы. Ӝоген узыр пересь, бадӟым-бадӟым мешоксэ пертчылыса, нылпиосты дораз ӧтиз. Гурак люкаськизы соос, ӧжыт гинэ Тол Бабаез ӧз погыртэ! Пересьлы пӧрмытскемын вал угось Ижевск педучилищеын дышетскись нылаш Екатерина Двинских. Озьы ик конкурсын вормем нылашлы кузьым сётӥз "Дэмен" огазеяськонысь ӧтем куно. Анай-атайёс, Выль ар пумитанэз ӟеч радъямзы понна, газет пыр бадӟым тау карыны куро "Чайка" клублэн кивалтӥсезлы В. Ф. Красильниковалы, педучилищеын дышетскисьёслы Катя Двинскихлы, Света Мусиналы, Оля Скобелевалы, Настя Сухихлы но Оля Урсулы. К. ЛОМАГИН. Зоринча Чибориё чилясь шудонъёсын, укоосын чеберъям вож кыз. Лэйка, лэйка кырӟан гур, чагыр чильпырась дэремен нылкышноез мамыкез сямен ӝутэ, ветта, йырзэ поромытэ....Синъёссэ усьтэ - шораз учко гажась, мусоясь синъёс, сьӧд (тӧдьы) костюмен йӧно пиосмурт, картэз.... Шулдыр серекъяса котырто нылъёсыз - балын кадь лобыштӥсь льӧль дэремъёсын, бубылиосын-бантъёсын. Тыро ӝӧк сьӧрын - матысь адямиосыз, эшъёсыз. Шампанской шукыяське, "мӧзмись ныл сюлэм кадь, уг тэры куско чаркае..." Жингыр-жин вазе - вуиз Выль ар! Вань малпанъёс, сюлмаськонъёс выль вакытэ кӧчо, выль осконэн герӟасько. Кыӵе луэ шудлэн тусыз? Юад ке, тазьыгес пуктэ сое син азяз Ольга Зорина, Удмурт национальной театрысь артистка. (Тазьыгес верасалзы, дыр, мукетъёсыз но: кышномуртъёслэн лул пуштроссы одӥг кадь). Маин вунонтэм кылиз со понна ортчем ар? Нырысь ик, кырӟанъёсыныз. Солэн няськыт, сайкыт куараез сюлэмъёсы пыӵаз. Ольга Зорина котькуд корка пыриз. - Туэ нырысьсэ кырӟанъёсыным альбом (касета) потӥз, Иван Григорьевых туж юрттӥз, шуэ со. - Нош ӝутказы-лӧпкытъязы Бекмановъёс. Валентина кӧня пол куаретылӥз: "Оля, малы тон кырӟанъёстэ ватыса возиськод?" Ас дӥсьтонзэ но кузьмаз кадь. Геннадийлэн ӝытаз нырысьсэ кырӟамы ӵош: "Тон но йӧно..." Собере Алевтина Корепановаен дуэтмы кылдӥз, Вавож палъёсы гастролен потакумы. Нылкышно кылбурчиослэсь книгаоссэс кутыса бугыръяськиз, утчаськиз Оля. Ас эрказы кадь куриськизы кырӟанэ таӵе чуръёс: "Шудбуре мынам лыз дыдык сямен ки вылам пуксиз дыртытэк" (Л. Кутянова). "Чагыр ошмес син кадь жильыртэ сюлэм, оло, тон-а, мон-а - кудмы валантэм" (Л. Тихонова). "Сизьымдон сизьым коть сюресэд медло - одӥгзэ шедьто но тон доры лыкто" (та чуръёсыз гожтӥсьлэн). Мылкыдъяз тупазы Яков Майковлэн кылбуръёсыз: "Шур бызе", "Вордӥськем гуртэ", "Кыдёке лобӟыло туриос". "Шур бызе, бызе, бызе, ву шукыяське..." Ва шур, Вало шур. Кыксы но Гурезь- Пудгалы кыдёкын ӧвӧл. Кыӟебай Гердлэн гуртэз - Малиновка пыр мыныса, Вало матынгес ик, но соослэн возьзы - Ва дурын. М. Ляминлэн данъям Ва шурез. Тае соос школаын ик умой тодӥзы, нош К. Герд сярысь кылэмзы ӧй вал на, дышетӥсьсы, Аанатолий Максимович, малы ке ӧз мадьылы. Кылбуръёсыз Оля яратӥз. Кутэ кыӵе ке сборникез но, ас понназ гур малпаса нёжъя. Эшез, Галя Дюпина (али Шушакова), пайме: "Кытысь таӵе кырӟан?" 9-тӥ классын, Вавож школаысен ини, Оля синмаськиз баянэн шудӥсь пилы. Кырӟан тулкымъёсыз соку кужмояса кошкизы, крезьгуръя училищее пырон сярысь малпанэ вуттӥзы. Бере кылеменыз культпросветэ мыноно луиз. Та аре ик отын кылдӥз "Зангари" ансамбль. Отысен пырак сюрес вал ни "Италмасэ" - Ольга Логинова конкурс пыр потӥз. Но со борды кырмиськизы Вавожын: ми, пе, тонэ ыстӥм, дышетӥм. Озьы ке, озьы. Гуртаз но клубын ужаны туж яра ни вал, кӧня концертъёс пуктылӥзы... Но учыр тупаз ӝыны ар ортчыса "пегӟыны": Уфаысь искусствоосъя институтэ дышетскыны ыстон сярысь ялонэз адӟиз. Дышетскиз драмая артистэ. Со аръёсысь сюлмаз жалян мылкыд кылиз: малы отын ик крезьгур ласянь тодонъёссэ ӧз будэты? Ӧз малпа уго, куке кырӟанъёссэ но нотае гожъяно, калык азе поттоно луоз шуыса. 1981 арын Удмурт кун театрын ужаны кутскыса, солы пӧртэм нылкышно рольёсыз оскылӥзы: "Кезьыт ошмес" - Натӥ, "Сюан" - Тюливить, "Насьток но Исьток" - Симочка, "Жингрес сӥзьыл" - Настя Грачева, "Утелэ милемыз, инмаръёс" - Одӥ, "Яратонлэн вужераз" - Маша, "Сюрес вожын" - Света... Выжыкылъёсысь "чагыр" геройёс - Алёнушкаос, Машенькаос... Ӵем дыръя озьы луэ: режиссёръёс Ольгалы сямызъя-тусызъя рольёс сёто. Нош потэ вылэм ассэ вормыса но шудэмез, кылсярысь, туж чырмыт нылкышноез. Шуом, водевильын сыӵе ролез - тылгизьы мед пазьгиськоз бордысьтыз. Яке музыкальной спектакльын, мюзиклын, - крезьгуро ӧрысь медам потылы, трос но чебер мед кырӟалоз. Зэмзэ ке, та ласянь Ольга Зоринаез уг обидё. Героиняосыз кырӟасесь луо. Ачиз но дэмла. Тани берло возьматэмаз - "Кышноме кышно курасько" спектакльын куинь кырӟанэз чузъяське. Соос ӵошен - Сутэр Параска но Коӵо Параска (Г. Владыкина) кырӟало: "Пипу куар кадь дырекъяй вал тон вӧзын со сӥзьылэ..." Шудзы соослэн синпӧет сямен тӧлӟиз. Пиос-воргоронъёс юо но пож синъёсын учко дунне шоры. Кызьы соослэсь син азьзэс сайкытатоно? Параскаос амал шедьто. Дас куать ар куспын ужзэ куспетӥ карон дыръёсыз луылӥзы. Оске тыныд режиссёр кыӵе ке, шуом, валтӥсь ролез, нош тон ӵыжектыса шыпыртӥськод: "Мыным кузь отпуске кошконо луоз..." Куинь нылъёсыз будо Ольга Сергеевналэн: Лиля, Катя, Вероника. Бадӟымез яратэ спортэн вырыны, уяны, мукетъёсыз эктыны дышетско. Зорина фамилиез бырйыса, солы зэмзэ зориз. Оло нош, ин ворекъянэз но та бордысен кутскоз. Зоринча потэ сцена вылэ... Нош малы ӝожесь солэн кырӟанъёсыз? Асьтэос, нылкышно кылбурчиос, сыӵе гожъяськоды, шуэ. Мон малпасько, лул пуштросмы тупа - кырӟасезлэн но, кылбурасезлэн но. Татьяна Чернова. Артистка Ольга Зорина. Выль ар уе - потын Выль арез ас семья пушкад, ӵыжы-выжыосыныд артэ пумитано шуиськом ке но, ваньмызлэн озьы гинэ уг пӧрмы. Калыкез кышкытлыклэсь утёнъя ёзъёсын ужась пиос шутэтскон нуналъёсы но уже потоно луо. Матэктӥсь Выль ар азьын соослэсь мылкыдзэс тодон вылысь вазиськом. Первомай районысь ГАИ-лэн валтӥсь инспекторлы И. Г. Беленькийлы. Илья Григорьевич ас ужзэ пыр-поч тодэ. Татын 27 ар ӵоже ужатозяз котьма вал. Лек сӥльтӧлъёс, ӟырк кезьытъёс, ведра дурен кисьтӥсь зоръёс... Выль арез но уж дурад пумитаны дышиз ни кадь. Кылем арын но, тани туэ но. - Илья Григорьевич, адямиос шулдыръясько-серекъяло. Шампань усьто. Нош тӥледлы уг яра - служба. Ӝож ӧвӧл-а? - Ваньмыз озьы ик луыны кулэ кадь потэ. Выль ар уе ужаны 23 часысен потӥськом - ӵукнаозь. Кылем Выль ар нокыӵе шуг-секытъёстэк ортчиз. Ӵукна ньыль часозь трамвайёс-троллейбусъёс уг ветло. Соин ик урамын "калгисьёс" трос ӧвӧл. Ижысь Первомай районъя одӥг гинэ "пӧсь" учыр вал. Милемлы ивортӥзы Газ-24 "волгалэн" руль сьӧраз пыӵалэн водитель, пе, пукее. Со кышнозэ юн жугем, пиналэзлэн синмаз газ пистолетэн ыбем. Ӝегатэм йыртэмасез ас дораз: машиназэ куштыса, со выльысь берытскиз отчы. Выль ар уйёсы пумиськыло кудӟыса руль сьӧры пуксёнъёс. Но огшоры нуналъёсы но соос ӧжытгес уг луо. - Вань таӵе анекдот: "Егит милиционер гожтэ вазиськон: семьяям секыт югдур кылддэмен валче, йылэтыны куриско окладме. Кивалтӥсь гожтэ таӵе валэктон: рядовой Ивановез одӥг толэзьлы ГАИ-лэн службаяз ужаны выжтоно". Мар шуысалды та пумысен? Кыӵе сямъёсыд луыны кулэ зэмос "гаишниклэн"? Вождэс эн вае. - Туала арын "паллян" коньдон лэсьтыны секыт. Сое милям эскерыса возё. Собере аслэсьтыз ужзэ яратӥсь мурт та борды ноку уз басьтӥськы. Зэмлыко, луон, калыкез гажась - мон малпамъя, тӥни кыӵе луыны кулэ калыкез кышкытлыклэсь утёнъя органъёсын ужасьлы. - Илья Григорьевич, маин вунонтэм кылёз тӥ понна ортчись ар? - Азьло аръёсын ӵошатыса, тросгес шараямын йыртэман учыръёс. Первомай районъя ваньмыз 32 йыруж люкаськиз. Выль пазьгиськонъёс, машина лушканъёс Сюрес вылын тросгес "эрказъясько" егитъёс. - Туннэ улонзэс выль сямен мытыны ӵектысалзы ке, бырйысалды-а асьтэы выль удыс? Йыртэмасьёсын ужан - со сокем ик капчи ӧвӧл. - Ӧй. Уже кельше Армиысь бертэм берам радиозаводэ ужаны мынӥ вал. Отын ӝыны ар гинэ чидай. Валай: мынам интые ГАИ-ын. Собере ми йыртэмасьёсын гинэ ум нюръяськиське, огласянь калыклэн кышкытлыкез сярысь сюлмаськиськом. - Берпуметӥез юанмы. Мар витиськоды вуоно арлэсь? - Мар мон верало. Малпасько, туэ арез ужало на. Собере дыр вуиз интыын бушатыны. Мыным уго 50 арес тырмиз. - Илья Григорьевич, гороскопъя тӥ кин луиськоды? - Кисло-кусло. Мар-о, алама пус-а? - Ӧвӧл. Кызьы тодӥсько, соос юн герӟаськемын ас семьязы борды. Луэ-а тӥ сярысь озьы вераны. - Уг. Мынам аслам семьяе ӧвӧл. - Озьы ке но Тигрлэн арез кисло-куслоослы ӟеч вакыт вайыны кулэ. Гороскопен озьы гожтэмын. Озьыен, вань ӟечсэ гинэ тӥледлы. Выль арен! Тай! Вераськиз Э. Кумачева. УГ ЛУЫ... ЛЫМЫНЫЛТЭК Кыӵе Выль ар, пе, вож кызтэк, Тол Бабайтэк, Лымынылтэк? Кинлэн ӧвӧл соос киысь саламъёс басьтэмез, инӟыё чилясь дӥсьёссы шоры син мальдыса учкемез? Пинал тон яке мӧйы, кунэрес яке шулдыр тусо - араз огпол, Выль ар уе ке но, выжыкыллы осконо луиськод... Уд пегӟы тушо пересьлэсь. Туннэ котькудӥз газетмес басьтӥсь доры "йыгаське" туж тодмо Тол Бабаймы, со ик егитъёслэн эстрадая "Катанчи" театрысьтызы артист Евгений АНДРЕЕВ. - Кӧня арес ни ай та Тол Бабаймылы? - Уфаысь искусствоосъя институтэз йылпумъяме бере, 1981 арысен, лыдъяно. Со дырысен - вис карытэк, котькуд ар Тол Бабай луылӥсько. - Лымынылыд нош ӵем-а вошъяське? - Кӧня тодӥсько, весь Ольга Чужанова (кузпалыз - ред.). Зэм, Уфаын нырысьсэ "туш лэзёно" луыкум, Надя нимо вал. - Лымы нылъёс синмасько-а Тол Бабайзылы? - Синмасько. Тол Бабайёс но, "мӧйыгес" ке но луо (серекъя). - Малы меда? - Тол Бабайлэн "марӟанэз" трос. - Туэ соос узыргес, дыр, луэмын? - Кытын но отын узыргес. "Лымынылъёс" тодо, кин борды "лякиськыны". - Асьме улонэ ум выжтэ тазэ. Тӥ али филармониын котькуд Выль ар азьын шулдыртӥськоды калыкез. Нош азьло аръёсты ке тодэ ваёно? - Азьло шулдыресь ёлкаос луо вал Йӧ дворецын. Самой шораз ик бадӟым машинаен потто милемыз йӧ вылэ... Одӥг аре "Октярбь" кинотеатр азьын пумитам, оркестрен. Вить-куать квартирае собере шулдыртыны пыртылӥзы тодмотэм муртъёс. Ӵукна ини... машинае пуктӥзы но доре келязы. Огнам вал соку. Нош Ольгаен милям егитгес дыръя пыдын урам кузя но адямиосыз ӟечкыласа ветлэммы вань. Ваньмыз соку ӟечбуръясько, шумпото, доразы ӧтё. Али тани умой амал вань: уксёед ке ӧвӧл - дӥсяськы Тол Бабай но куноятозы (серекъя). - Тол Бабай кезьытэз вае, шуо. Туэ но кышкатылӥз ни... - Туэ со кивалтӥсьёсыз сэзъялтэ: коркаосы шуныт сётыны кулэ шуыса медаз вунэтэ. Тодады вае ай, энергетиклэн нуналаз тужгес кезьыт кариськылӥз. Нош милям филармониямы одӥг аре но таӵе кезьыт ӧй вал на. Огъя вераса, Тол Бабай адямиосыз йӧ ӟузыриосын "дурыса" кынтослы пӧрмытон понна ӧвӧл (ву сётӥсь гумыос медаз пилиськылэ). - Удмурт шаеретӥ ортчоно ке, кытчы нырысь ик пырасалыд? - Нырысь ик "лобӟысал" Дэбесэ анае, ӵыжы-выжыосы доры. Одно ик пырасал нылпи юртъёсы, куанер улӥсь семьяосы, ческыт сиёнэз адӟылӥсьтэм пиналъёслы люкылысал саламме. - Пичи нылпиос туж оско-а тыныд? - Бен. Куке Вася агаелэн пиналъёсыз вить-куать аресъемесь вал, кутӥ но шонтӥ Дэбесэ. Театрысь Тол Бабайлэсь чебер дӥсьсэ кутӥ, автобусын ик мынонъям дӥсяськи. Нылпиос сыӵе шумпотӥзы, кожазы, зэмос Дед Мороз лыктэм. Берло но юаса улӥллям на, ку табере вуоз. Туэ Шарканысь тодмое азьвыл ик куриз ни: концерт бере та дӥсеныд ик машинаямы пуктыса нуом. Дима пизы, пе, ёртэ: дядя Женялы жингыртоно, со артист, одно ик вань, дыр, тодмоосыз Тол Бабайёс пӧлын но. - Тол Бабай, мар сӥзьысалыд лыдӟисьёсмылы? - Выль аре шулдыръяське, пӧртмаське - мед уллялоды коркась вань уродзэ. Мед луозы кусыпъёсты шунытэсь. Нылъёс - Лымыныл кадь чебересь, чылкыт сюлэмоесь. Выляз аре уг луы газеттэк. Мон ачим одно ик гожтӥсь... ки ини. Вераськиз Т. ЧЕРНОВА. Ӟеч ивор вуэ 7 январе Рождество - Иисус Христослэн вордскемез. Иисус Христос вордскиз 1998 ар талэсь азьвыл Иудеяын Вифлеем городын. Иудеяен соку кивалтӥз Август император. Август Иудеяысь вань калыкез гожъяны косӥз, котькудӥз гожтӥськыны кулэ вал отын, кытын вордӥськиз. Инмарез гажась Иосиф но Дева Мария - Иисус Христослэн анаез - Вифлеем городэ лыктӥзы. Татын соослы кӧлыны инты ӧз шедьы, соин ик соос город сьӧрысь, гурезе, пещерае интыяськизы. Куазь зорыку, татчы пудоез пыртылӥзы. Пресвятая Дева татын Инмарлэсь пизэ вордӥз. Та сярысь нырысь ик пудо возьмасьёс тодӥзы. Соослы сое ивортӥз ангел. Соку ик пудо возьмасьёс Инмарлэн пиезлы йыбырттыны лыктӥзы. Инмысь кизили шоры учкыса, волхвъёс но (шунды ӝужан палась визьмо муртъёс) Христослэн вордскемез сярысь тодӥзы. Соос дуннеез Утисьлы кузьымъёс ваизы. Озьы пумен быдэс дуннее вӧлмиз Христослэн вордӥськемез сярысь шумпотон ивор. Та нуналэз, 7 январез, бадӟым праздникен лыдъяло дуннеысь данак калыкъёс. Асьме календарьмылы но кутскон сётӥз Иисус Христослэн вордскем нуналыз. Озьы ке но, Россиын улӥсьёс Рождествоез пусъё выльдӥськон кутскон дырысен гинэ. Россилэн Президентэз сое шутэтскон нуналэн ялӥз. Со дырозь черкен, Инмарлы осконэн герӟаськем праздникъёс коммунизм сюрестӥ мынӥсь странаямы лэземын ӧй вал. Соин ик, вылды, али но асьмеос Рождествоез пусъёнлы сокем ик дышемын ӧвӧл на. Но туала егитъёсмы улон шоры, оло, эрикогес мылкыдын учкозы ини. Мар шуод, календарьысь та выль "горд" нуналэз пӧртэм сямен дунъясьёс вань. Озьы ик со луыны но кулэ, дыр. Нимаз адями - нимаз малпан. Нош оскон возе дуннеез, оскон возьматэ азьлане, шудэ- буре сюрес. Вае, гажано эшъёс, та нуналэ вунэтом споръяськонъёсмес, керӟегъяськонъёсмес. Ӟечезлы осконмы мед шунтоз визьмес но сюлэммес. Удмурт Правительствоын ВЫЛЬДӤСЬКОЗ-А АВТОТРАНСПОРТ? Рынокен экономикае выжон вакытэ капчи уг йӧты автотранспортникъёслы но. Калыкез нуллонын тужгес но шуг югдур кылдэмын городъёсын. Автобусъёс вужмо, выльзэ басьтыны удыслэн уксёез ӧвӧл. Вылаз ик, адямиосты нуллон изъян вае. Мугез тодмо. Транспортын данакез дунтэк, служебной удостоверениосын ветлэ. Россиысь Правительствоен сыӵе льготаос сётэмын. Отчы пыро правоосты утись ёзъёс (МВД), прокуратура, судъёс, налог бичась органъёс но мукет эскерись инспекциос. Озьы ик дунтэк ветло депутатъёс но соослэн юрттӥсьёссы. Тӥни кӧня люкасько! Шат та удысъёсын тыршисьёс ичи уждун басьто? Озьы шуыны ым уг усьтӥськы. Мукет ласянь, выльдыны кулэ "Удмуртавтотранс" территориально-производственной огазеяськонэз. Таӵе ужез озьы ик возьмало жилищно-коммунальной хозяйствоя ТПО, "Удмуртавтодор" кун предприятие, Горьковской чугун сюреслэн Иж люкетэз но "Ижавиа" кун предприятие. Та ёзъёс туннэ уг тупало ни Россиын берло дыре кутэм выль законъёслы. Али вералом "Удмуртавтотранс" сярысь. Та ужпум учкемын вал кылем арлэн пумаз Удмурт Правительстволэн паськыт кенешаз. Отын ужпум ӝутэмын льготаосын (дунтэк) ветлӥсьёс но ТПО-ез выльдон сярысь. Правительстволэн Тӧроезлэн воштӥсез Юрий Питкевич тая куинь амал ӵектӥз. Нырысез, кун предприятие карон яке "Удмуртавтотранс" заказчик луэ. Кыкетӥез, нимаз (унитарной) предприятие кылдытон. Соку татчы пыро городъёсысь но районъёсысь ваньмыз автотранспортной предприятиос. Куинетӥез, "Удмуртавтотрансэз" акциосын огазеяськон (АО) пӧрмытон. Солэн 51 процент акциосыз но нимаз (дочерней) предприятиосыз луозы на. Кудзэ быръёзы автотранспортникъёс? - со сярысь берлогес ивортом. Калыкез автобусъёсын нуллон удыс, зэмзэ но, шуг учыре сюремын. Удыс дунтэк ветлӥсьёс чотын гинэ арлы быдэ 50-60 миллиард манет коньдонзэ ыштэ. Али уго 57 пумо льготаос тупатэмын. "Удмуртавтотранс" ТПО-лэн валтӥсь директорез Сергей Минеев кенешын ивортӥз: "Удыслэн 1996 ар понна 12 миллиард манет тыронэз, нош миымлы - 27 миллиард. Ёзлэн оборотной средствоосыз но чик ӧвӧл. Мукет сямен вераса, автопарк чик уг выльдӥськы, шуыны луоз. Кызьы бен со пыд йылаз султоз, куке эстӥськон басьтыны но уксёез ӧвӧл. Миым ар пумын "Удмуртавтотранслы" эстӥськонлы 1 миллиард манет коньдон висъяз "Удмуртнефтепродукт", нош "Удмуртнефть" - 1,5 миллиард. Калыкез нуллонын озьы ик шуг-секытъёс кылдэмын Глазовын, Воткинскын, Сарапулын но куд-ог мукет интыосын. Тани Сарапулысь ПАТО-лэн эстӥськонъя гинэ 400 миллион манет тыронэз люкаськемын, нош солы 180 миллион гинэ юрттэт висъязы. Али одӥгез тодмо: автотранспортэз ас кияз басьтыны кулэ государство. Мукет сямен вераса, кулэ кун эскерон. Соин валче Правительстволэн Тӧроез Павел Вершинин шуиз: - Автотранспортэз выльдонлэсь асьмеос нокытчы ум пегӟе. Котькыӵе уж понна дун тырыны кулэ. Нош та удыслы одно ик чаклано азинскем сюресъёс, кутоно программа. Кин бен пумит луоз кун автотранспортэз выльдонлы-кужмоятонлы? Нокин. Таин ӵош нимаз адямиос но калыкез мед нуллозы кызьы ке городъёсын, озьы ик город сьӧры но районъёсы. Усьтоно коммерческой рейсъёс. Нош Правительстволы ужано луоз льготной билетъёсын ветлӥсьёсын. Малы автотранспорт со быдӟа изъян адӟыны кулэ, верай ни, 50-60 миллиард манет. Ватсан. Материалын ваньмыз лыдпусъёс вуж коньдонэн сётэмын на. Г. РОМАНОВ. Книга ӝажыяды КЫТЫН МЫНАМ ЭЛЬШАЕРЕ? Тодмо тодосчилэн кылтодон наукаосъя докторлэн Михаил Атамановлэн "История Удмуртии в географических названиях" выль книгаез (сое алигес гинэ поттӥз "Удмуртия" издательство) удмуртъёслэсь улон интызэс возьматон удысын зэмос усьтон луэ, шуысал мон. "Удмуртская ономастика" (1988), "Удмурт нимбугор - словарь личных имён удмуртов" (1990) монографиослэн но витьтонлэсь ятыр статьяослэн авторзы, Выль Сӥзёнэз берыктон бордын мыло-кыдо ужам мурт одӥг оскымон но номырин бералтонтэм малпанзэ вера: Волга но Кам котырысь удмуртъёс туж вашкала улӥсьёс но выжыкалыкъёс луо. Оскыса вераны луэ: Ватка, нош озьы ик Кам но Тӧдьы Кам шуръёслэн улӥ бызён котыръёсысьтызы музъемъёс - вашкала удмурт калыклэн огазьын улон но этносэзлэн кылдон интыосыз вал. Татын вал солэн эльшаерез. Тазьы веран уката но дуно соин: тодосчи валэктыны быгатэм удмуртъёслэн туж вашкала дырысь сюлэмшугъяськытӥсь юанзылы: кытысь мон, кытысь мон вуи татчы, кытын вашкала улэм но вылэм интыосы? Сыӵе юан асьсэлы удмуртъёс гинэ уг сёто, Николай Карамзин но таӵе ужпум сярысь малпаськылӥз, дыр. Отын - узыр учыръёс, татын - узыр интынимъёс. Тодосчи эскере бускель улосвылъёсысь но инты нимъёсты. Асьсэлэн вашкала музъемзы вылын но удмуртъёс туннэ, кызетӥ даурлэн берпуметӥ аръёсаз, чылкак куамын процент гинэ кылемын на шуыса верало ке, амалтэк юан кылдэ: мар вите кызь одӥгетӥ даурын вашкала финнъёслэсь шунды ӝужан палась выжыоссэс? Сяськаян? Мукет калыкъёс пӧлын сылмыса бырон? Крашин луон? Яке - быдэсак ӟучомон? Удмуртъёслэсь вашкала улон интызэс карта вылэ суредан понна, Михаил Гавриловичлы пӧсятозяз ужано луэм кылъёс бордын. Ӟеч-ӟеч учкем на тодосчиослэсь-археологъёслэсь кибервылъёссэс. Волга но Кам котырысь угор выжыысь манси, хант, селькуп, ненец кылъёсты бичаса-чакласа, пор, ӟуч, бигер кылъёсты эскерыса, коми кылъёс вылэ пыкиськыса, усто картограф сямен инъям улон интыосмес. Ваньзэ валан понна, Киров улосысь Малмыж, Ватка, Слободск, Орлово, Нолин, Котельнич ёросъёс котырысь удмурт интынимъёсты, Татарстанысь Балтаси, Арск, Кукмор, Мамадыш, Огырчи, Мензелинск но мукет ёросъёсысь, Марий Элысь Мари-Турек, Медведево, Чувашиысь, Башкортостанысь, Пермь улосысь турлы ёросъёс котырысь интынимъёсты, гурт нимъёсты аслыз юрттӥсе курем. Со но тырмымтэ: юрттыны курем на воршуд нимъёсты. Соос устояк гинэ нимысьтыз таблицаен сётэмын: озьы тодыны луэ Михаил Атамановлэн ужъёссэ ӝикыт но зэмос тодосчи сямен радъяны быгатэмез, оскымон малпанзэ калык доры вуттыны тыршемез сярысь. Аслэсьтыз историзэ мур тодыны сюлмаськись, аслэсьтыз лулгажан адямиоссэ но ӵыжы-выжыоссэ зол яратӥсь мурт сюлэмыз шугомытэк лыдӟыны уз быгаты интынимъёс сярысь мадёсъёсты. Михаил Атаманов соослы книгаезлэсь бадӟым люкетсэ висъям. Озьы лыдӟисьлэн син шораз оскымон пуксе удмуртъёслэн вашкала улон-вылонзы. Со люкетэ интыямын экспедициосы потаса гожъямъёс, легендаос но турлы веранъёс. Нимаз гуртъёс но отысь удмурт сямъёс, выжыос сярысь материалъёс лыдӟисьёслэсь визьбуръёссэс паськытатозы. Тани соос: "Ӟучъёслэн Ар ёрос, аръёс но Арск сярысь мадемъёссы", "Бигеръёслэн аръёс но Арск сярысь мадемъёссы", "Ар удмуртъёслэн веранъёссы", "Еврей гожъясьёслэн Арча шаер но арису калык сярысь ивортонъёссы". Та люкетъёсты лыдӟыса, удмурт одно ик валаны быгатоз, макем йӧно вылэм со: лякыт, сабырлы, кибашлы, востэм, чидась, дӥсьтӥсьтэм... Пыдло, туж пыдло ватэм мылкыд но дуннеысь калыкъёс пӧлын туж шер пумиськылӥсь сыӵе шуд-бакель нокин азьын но уг лэзё, вылды, йырез мыкыртыны но астэ ултӥяны. Психологъёслэн кыкетӥ люкаськоназы нош ӝож мылкыдын пусъемын вал: удмуртъёс пӧлын котькинлэсь трос йырзэс быдтӥсьёс. Кызьы пусъё ООН-ысь экспертъёс, со вуттоз быронэ. Оло нош, со "шуд-бакель" озьы люкетэ удмуртъёслы ваче ки кырмиськыны? Сыӵе малпанъёс лыкто, книгаысь сю кызь бамъем люкетэз лыдӟыса. Книгаысь интынимъёсын кылбугор но лыдӟисьлы тунсыко потоз. Нош 87-тӥ бамысь туспуктэмез учыртэ ай - татын возьматэм ныл йӧно адӟиське, озьы-а? Сыӵеесь, дыр, асьмелэн дыдыосмы - мылкыдъёссэс пыдло ватыны быгато. Книгаез кие кутымон карыны быгатэм элькунысьтымы тодмо суредась Кучыран Юри. Быгатӥды ке, басьтэ: тодмо тодосчилэсь выль ужзэ огшокчемен лыдӟоды. Виктор ИВАШКИН, радиожурналист. НЫЛПИ ОГАЗЕЯСЬКОНЛЫ - 75 Удмуртиысь нылпи огазеяськонлы туэ 75 ар тырме. Куд-огез, оло, шуозы но, кыӵе организация вань на туала арын. 1991-тӥ арысен шаерамы кылдӥз "Родники" огазеяськон. Туннэ нуналлы 23 районысь 15 сюрс пала пинал солэн ужрадаз пыриське ни. Гордо-лызо галстукен ветлӥсьёсты городъёсысь но районъёсысь школаосысь адӟыны луэ. "Родина, шудо улон но зэмлык понна" ӧтёнэн уло. Тодон-валанъёс басьто пӧртэм программаосъя: "ЮНПРЕСС", "Туризм", "Древо жизни", "Шудон - зэмос уж", "Мон но тӥ", "Нылпи парламент". Вашкала ӵыжы-выжыоссэс тодэм, эшъёсынызы быгатыса вераськем, шудонъёс кылдытэм сяна, чупрес пиналъёс кылдытӥзы но улонэ вордскытӥзы "Детство" нылпи газет. Шудон-серектон куспын чаклазы-эскеризы кулэ луись ужпумъёсты но. Ортчем толэзьлэн шораз нылпиослэн творчествоя дворецазы люкаськылӥзы нылпи огазеяськонын азьвыл аръёсы ужамъёс (вожатойёс) но туннэ та ужез азьланьтӥсьёс. Шаерысьтымы пионерилэсь вордӥськем нуналзэ пусъён ӟеч радъямын луыны кулэ. Туспуктэмъёсыз В. БЕЛОМОРСКИХЛЭН. "УЛӞИЗ" Юкаменск черкогуртысь базар кема дыр ӵоже куашкан калын улӥз. Али со выльысь "улӟыны" ӧдъяз. Татысь трос пӧртэм вузъёс басьтыны луэ. Юкаменскъёс та понна тау каро базарлэн выль кивалтӥсезлы Александр Южанинлы. В. ЕГОРОВА. УСЬТӤСЬКИЗ КОЛЛЕДЖ Юкаменск черкогуртын ужаны ӧдъяз Восточно-Европейской университетлэн юристъёсты дасянъя колледжез. 20 мурт пуксиз партаос сьӧры. Тодон-валанъёссэс будэтыны мылкыд каро пӧртэм профессиен адямиос. Лекциос тунсыко но пайдаё ортчо. Соосты лыдӟыны ӵемысь вуыло Ижысь преподавательёс. В. ЧУВАШОВА. Удмурт Республикаысь Кун Кенешлэн Президиумезлэн 1998 арын 3 январе кутэм 442-1 номеро Постановлениезлы ватсан Удмурт Республикаын муниципалитет кылдосъёслэсь границаоссэс тупатыку но вошъяку, калыклэсь мылкыдзэ одно ик лыдэ басьтонъя кенешъёс, ӧтчамъёс ортчытонэз радъян сярысь Положение Удмурт Республикалэн "Муниципалитет кылдосъёслэсь границаоссэс тупатыку но вошъяку, калыклэсь мылкыдзэ одно ик лыдэ басьтон сярысь" Законэзъя кенешъёсы, ӧтчамъёсы пырисько быръён правоос но улосвылын улӥсь гржданъёс. Кенешъёс, ӧтчамъёс ортчытонэз радъя ёрослэн администрациез. Гражданъёслэсь кенешсэс, ӧтчамзэс ортчытон дыр но инты, отын эскероно ужпумъёс сярысь калыклы ивортӥське азьвыл ик. Гражданъёслэсь кенешсэс, ӧтчамзэс усьтэ ёросысь администрацияз ужась мурт. Кенешез, ӧтчамез нуыны бырйисько тӧро но секретарь. Кенешын, ӧтчамын нуиське протокол. Отчы пусйиське кенешез, ӧтчамез ортчытон дыр но инты, улосвылын улӥсь бырйисьёслэн огъя лыдзы, кенше, эскероно пыриськемъёслэн лыдзы, эскероно ужпумъёс, адямиослэн верамъёссы, кутэм решение. Протокол гожтӥське чернилаен. Со вылэ гожтӥсько кенешлэн тӧроез но секретарез, пуктӥське гурт администрацилэн печатез. Протокол сётӥське ёросысь быръёнъёсъя комиссие. Кенешлэн, ӧтчамлэн протоколэныз ӵош луыны кулэ кенеше пыриськем гражданъёслэн чернилаен гожтэм списоксы. Со гожтӥське Удмурт Республикаысь Кун Кенешлэн Президиуменыз тупатэм формая. Гражданъёслэсь кенешъёссэс, ӧтчамъёссэс ортчытыны луэ кызьы быдэс гуртын яке посёлокын озьы ик солэн нимаз люкетаз (ульчаын, кварталын). Кенешын, ӧтчамын решение кутӥське, куараез шара сётыса, со ик люкаськемъёс пӧлысь ӝыныезлэсь тросэз соглаш луо ке. Удмурт Республикаысь Кун Кенешын Куинетӥ январе Удмурт Республикаысь Кун Кенеше вуылӥзы Красногорскысь шор ёзо школаысь укмысэтӥ классын дышетскисьёс. Соос тодматскизы Удмуртиысь законодательной кенешлэн ужаменыз. Пиналъёсын пумиськизы но, соосты Выль арен ӟечкыласа, шулдыр мылкыд но дышетсконын азинсконъёс сӥзизы Кун Кенешлэн Тӧроез Александр Волков но Наукая, культурая но егитъёсын ужан политикая ялан ужась комиссилэн тӧроез Алла Еременко. Кун Кенешлэн пресс-службаез. Чеберском, пӧртмаськом... Удмуртъёс вашкала дауръёсы кык пол пӧртмасько вал. Тужгес зол, шулдыр ортчытъязы сӥзьыл пӧртмаськонэз. Солы быдэс толэзь пала дасяськылӥзы. Котькуд аре пӧртмаськон изьы яркыт басмаослэсь, тылыослэсь лэсьтылӥзы. Шыркунлэсь (бубен), арганлэсь, чипчирганлэсь, балалайкалэсь быдэс оркестр люкаськылэ вал. Гуртысь ваньмаз коркаосы пыразы. Самой чебер дӥськутэн ветло, тужгес ческыт сиён-юонэн утялто вал. Чебер пӧртмаськон тросаз районъёсамы уг ортчытъяськы ни. Али со вунэмын ӧвӧл на республикаысьтымы Сюмси, Селта, Ува, Вавож, Якшур-Бодья но бускель Киров улосысь Зуй, Уни, Слобода, Калмез но Малмыж районъёсын. Та праздник калыкез огазея, мылкыдзэ ӝутэ, соин ик ми сое Ижын но ортчытъяны кутским. Берло дыре ми та йылолэз Ымусьтон дыръя ортчытъяськись шуш вожо пӧртмаськонэн огазеям. Котькуд аре шудонамы, удмуртъёс сяна, итӥсько бигеръёс но, ӟучъёс но, доразы пырато. Соизлы паймонэз ӧвӧл: кырӟанъёсмы шулдыресь, арганъёсмы жингресэсь. Туэ но нырысьсэ пӧртмаськыны потӥськом туннэ ньыль часын, собере огазе люкаськом на тямысэтӥ толшоре. Озьыен, шулдыръяськемды потэ ке, дорамы лыктэ. Н. Возисов. Газет ке лыдӟемед потӥз... Свердловск областьысь огаз ёросысь гуртъёсын улӥсьёс "Новая жизнь" ёрос газетсылы бартер амалэн гожтӥськизы, ивортэ "Уральский рабочий" газет. Ёросысь совхозъёс, ужасьёссы та газетлы гожтӥськем понна, редакцилы сӥлен тыризы. Ар кутскыку, газетын ужасьёс уждун интые 500 килограмм сӥль басьтозы. "Вазенгес "Новая жизнь" газетын ужам коньдонзэс пуэн, сахарен, пызен сётъязы ини", - пусъе "Уральский рабочий". Музъемен вузкарозы Россиысь куинь улос, Саратов областьлэсь адӟем карыса, музъемез басьтон-вузан сярысь закон кутыны малпа. Эшшо куамын куинез Саратов областьлэсь кичӧлтэмзэ ас вылаз "мерта" на. Областьлэн губернаторез Дмитрий Аяцков пресс-конференциын ивортӥз, Татарстан, Калининград но Самара областьёс музъемен вузкаронлы пумит ӧвӧл шуыса. Татарстан, кылсярысь, та пумысен законэз январе ик кутыны чакла ини. Саратовысь губернатор оске, пӧртэм улосъёс та выллем законъёсты кутоно луозы шуыса. Малы ке шуоно, таӵе амал пыр ляб ужасьёслэн музъемзы муэз пайдалыко кутон сярысь сюлмаськисьёслы выжоз. Тодматӥзы городлэн бюджетэныз Отын но, татын но коньдон уг тырмы бере, кылдэм югдурен калыкез тодматыса умойгес луоз, дыр. Соку ӧжытгес кылдозы бугыръяськон, юнме шорысь ог-огдэ пыкылон учыръёс. Ижевск городлэн администрациез озьы ик ужа. "Россия" кинотеатрлэн залаз декабрь толэзьлэн пумаз люкаськылӥзы Ижевсклэн бюджетэныз тодматскыны мылкыд карисьёс. 1998 арлы чаклам бюджет сярысь веразы городлэн вице-мэрез Вячеслав Засыпкин, Городской думалэн председателезлэн воштӥсез Валерий Наумов но мукетъёсыз. Удмуртилэн столицаяз улӥсьёсты соос оскытӥзы, калыкез дышетон но эмъян удысын ужасьёслы уждун тырон валтӥсь интыын сылоз шуыса. Озьы ик городлэн кивалтӥсьёсыз ас вылазы басьто пособиосты но компенсациосты тыронэз, лэсьтӥськон удысэн герӟаськем ужпумъёсты но мукетсэ. Валамон, одӥг манет но бюджетэ ужатэк уз лыкты. Со понна вырӟытоно тэк сылӥсь предприятиосты, дыраз налог октоно. С. Рудин. Куӟебай Гердлэн вордскемез дырысен - 100 ар ТУННЭ НО БЕЗДЫМТЭ Ми лыдӟимы Куӟебай Гердлэсь кылбуръёссэ. Мыным соос туж яразы. Уката ик - нылпиослы сӥземъёсыз. Соослэн пуштросазы кылӥське кыӵе ке крезьгур. Уж сярысь ке гожтэмын - ужлэн крезьгурез. Нылпиослэн шудэмзы сярысь ке, кылбур тырме нылпи куараосын. Та чуръёс дышето дэмен улыны но ужаны, кышкасьтэм, сэзь луыны. Котькуд пиналлэн сюлэмаз кылё Гердлэн верамъёсыз. Куӟебай Герд котькытын шӧдскымон пытьы кельтӥз. Со вал переводчик но критик, педагог но учёной, режиссёр но актёр, усто музыкант но фольклорист. Но котьмалэсь но зол яратэ вал нылпиосты. Оло, талы луыса ик кызетӥ аръёсы Кузьма Павлович Максим Прокопьев нимо нылпи юртын директор луыса ужаз? Нылпиосты кужмо, визьмо будэтон сярысь юн сюлмаськиз. Соосты экскурсиосы нуллӥз. Котьку мылкыдзэс ӝутъялляз. Нылпиосты яратэменыз ик Кузьма Павлович покчиослы гожъяны кутскиз. Удмурт нылпи юртысь нылъёс но пиос понна уно кырӟанъёс кылдытӥз. Пиналъёсты Герд котькыӵе ужлы дышетылӥз: нылъёсты- мунё лэсьтыны но соослы дӥськут вурыны, пиосты - пукон я ӝӧк инъяны, чылкыт улыны, ӟеч сямо луыны. Выль газет нырысьсэ потыку, "Дась лу!" ним сётыны дэмлаз Куӟебай Герд. Со туж умой тодэ вал странаысьтымы пионеръёслэсь ужъёссэс. Соин ик, дыр, газетлы ним но пионеръёслэсь ӧтёнзэс ӵектӥз. Озьы тӥни, солэн нырысетӥ номерез усьтӥськиз Гердлэн "Дась лу!" кылбуреныз: Пичи эке! Пичи ныл! Кылзы али! Кылзы! Сыл! Туннэ потэ выль газет, Тон шоры газет вазе: "Дась лу!" Кузьма Павлович ас вакытаз нылпиос понна дасяз вал "Лымок" сборник. Но со потыса ӧз вуы. Отысь произведениоссэ интыяз покчиос понна дасям "Шуныт зор" но "Выль сюрес" хрестоматиосаз. Калык кылосысь чеберлыко амалъёсты пыртыса, поэт кылдытӥз туж капчи, валамон но чебер кылын гожтэм ужъёс. Пиналъёс али но яратыса лыдӟо "Мерттӥськон", "Пудочи", "Тулыс бакчаын", "Дуриськись", "Бакча урон", "Турнасьёс", "Ужлэн крезьгурез" но мукет кылбуръёссэ. Татын возьматэ пиналъёслэсь анай-атайёссылы ӟеч кивоштӥсьёс луыны дасяськемзэс. Куд-ог кылбуръёсаз поэт пыртылэ мадиськонъёсты, визькылъёсты но лэчыт веранъёсты. Озьы гожтэм ужъёс уката сюлме пыро, нылпиослэн йыразы кемалы кылё. Соин ӵош ик Гердлэн нылпиослы сӥзем тросаз кылбуръёсаз инкуазь суредъёс син шоры пуктымон возьматэмын. Сыӵеесь луо солэн "Тулыс", "Пучыос", "Сӥзьыл", "Кызьпу" но трос мукет кылбуръёсыз. Та инкуазь суредъёсты поэт ӵем дыръя быгатыса герӟа пиналъёслэн уженызы но шудонъёсынызы. Озьы кылдӥзы "Нискыланы" но "Йӧ вылын" кылбуръёсыз. "Йӧ вылын" кылбураз со пиналъёслэсь сэзьлыксэс возьматэ. Кезьыт шоры учкытэк, соос нискылало, шудо. Ваньзы огкылысь. Туж тунсыкоесь асьме палась пудо-животъёс, тылобурдоос но нымы-кибыос сярысь кылбуръёсыз. Уката ик умой пӧрмиллям "Коӵыш", "Пися", "Атасъёс", "Ӟазегъёс", "Луд кеч", "Бӧчы", "Куакаос", "Бубылиос", "Бака" но трос мукет кылбуръёсыз. Котькуд пудолэн но тылобурдолэн аспӧртэмлыкез, улон но сиськон манерез суредамын. Соин таӵе кылбуръёс юртто нылпиослы котырысь дуннеез умой тодыны но валаны. Пичиесь кылбуръёсын ӵош ик, нылпиослы сӥзьыса, Куӟебай Герд печатлаз "Гондыръёс" поэмазэ. Со гожтэмын удмурт выжыкылъя, мултэс капыръяны яратӥсь пересь сярысь. Сюжетэзъя кельше Александр Пушкинлэн "Сказка о рыбаке и рыбке" выжыкылэзлы, нош удмурт поэмаын чорыг интыын паймымон беризь пересь кышнолэсь пӧртэм куронъёссэ быдэстэ но берло сое кӧшкемыт гондырлы пӧрмытэ. Озьы ик Кузьма Павлович тунсыкоесь веросъёс кельтӥз. Соос пӧлысь тросэз нылпиослы сӥземын но "Шуныт зор" но "Выль сюрес" дышетскон книгаосы пыртэмын. Нош 1915-тӥ арын гожтэм "Матӥ" повестез 1920-тӥ арын гинэ печатламын вал. Отын автор возьматэ, кызьы туж чебер ныл, ултӥямлы чидатэк, визьтэммон калэ вуэ. Та повестьсэ автор реалистической амалэн гожтэ, нош Матӥлэсь портретсэ романтической амалэн суреда, мукет калыклэсь висъяса, вылэ ӝутыса. Гожтэмын вылэм на "Улонлэн пыртӥз" романэз, но со али но шедьтэмын ӧвӧл. Мар сярысь гинэ ӧз гожъялля кылбурчи, нырысь ик сюлмаськылӥз лыдӟисьёсызлы, тужгес но пиналъёслы, выль улонэ сюрес возьматыны. Со сярысь вера солэн вакчи но яркыт тылын гомаса улэмез. Трос сюлмаськиз, лэсьтӥз Кузьма Павлович нылпиос понна. Солэн тыршеменыз ик Выль Мултанын усьтэмын вал педтехникум. Нош пиналъёслы выль улон лэсьтыны ӧтьыса вазиськонъёсыз туннэ но бездымтэ на. Лариса ЯКУНИНА. Якшур-Бодья ёросысь Мукши школа. Туннэ милицилы. Ӵуказе кинлы? Толон ӝытсэ сиськонэз кышно куспетӥ кариз, воксё изъянтӥз, шуыны луоз. Сельсоветэ, пе, кыкнадылы быдэн 10 сюрс манет тыроно. Мар понна, пӧй, налогмы ваньмыз тыремын, штраф ке шуоно, номыр понна кадь. Пӧрасе шонертӥз: милициез, пе, возьыны, тылпу кысӥсьёслы юрттыны, районысь гуртъёсты шулдыртыны. Эн, эн тыры, шуисько. Тодӥсько угось, ӧвӧл сыче налогъёс, газетъёсты лыдӟисько ук, дуноесь ке но соос. - Мон но пумит кариськи ай но, ӧйтӧд, пунэмен уз берытскы-а, мар-а,- шуэ кышное.- Лида, сельсовет секретарь, кышкатэ: пени, пе, олома быдӟа люкаськоз но собере, пе, суд пыр коньдондэс тырытозы. М-да, котьма кар, ява. Одӥг ласянь учконо ке, 10 сюрс - со коньдон ӧвӧл, уд узырмы соин, 4 сукыри няньлы тырмоз ик ке но. Нош мукет ласянь ке чаклано, малы мон милициез сюдыны кулэ? Налог тырисько ук, мар эшшо на? Ярам коть, со милиционеръёс уен-нуналэн йыртэмасьёсты уйылысалзы ке. Кытын, пе. Куке гинэ эн мыны Завьялэ, весь отделзы азьын тамакаса, гырдалляса но мать-перемать карыса сыло. Туссыя но, выремъёссыя но чылкак ужпиос. Оксиння Яколэсь ӵыж выль мотозэ пырак капка азьысьтыз нуизы вал. Куинь ар ортчиз ини, милиция ялан утча на, утча ик ке. Нош янгыштэм муртэ вӧсь карыны быгато. Эмеспимес, ми доры лыктыны потэм мае ке, автовокзалысен вытрезвителе нуиллям. Соиз, пинал визь, ассэ шонере поттыны кутскем: мон, пе, сазь, сур гинэ юи, прокурорлы чагисько. Мар-о, возьматӥллям грамотейлы прокурор, урдлыоссэ пушказ куасалъяллям. Милиционеръёслэн, пе, кӧтсэс тырымон но уждунзы ӧвӧл, дӥсь но, пе, соослы уг сёто ни. Ма, ми, крестьянъёс вӧй пӧлын погылляськиськом шат? Кин милемлы миллионэн уждун тыре? Ӵукнаысен ӝытозь кыед пӧлын тыбырдэ куасалтӥськод, нош коньдонэд 200-300 сюрс. Дӥсь пумысен но утисьёсмы туж ик уг ёрмо кадь. Микит Васьлей, вал сюдӥсь, тол но, гужем но йырысеныз пыдозяз милица дӥсен ветлэ. Пиез угось милиционер. Ачиз но партизанлы уг укша: кисьтаськись сурон сапегъёсын, чильк-чильк формаен, ӟукыртӥсь еосын, толалтэзэ шубаен. Нялтас вераса, туэ машиназэ выльдӥз. Нош ачиз прапорщик гинэ, офицер но ӧвӧл. Ярам, огдырлы ке но оско ик мон, милиционеръёс сютэм уло, кышъям дӥсен ветло шуыса. Нош кин ӟеч улэ туала дыре, вералэ ай? Больницае выдоно ке, сьӧрад валес котыр ну, эмъюмед, сиёнэд аслад мед луоз. Гуртамы олокудняла кино но, концерт но уг возьматъяло. Мискинь дышетӥсьёс кызьы, маин уло на, паймоно. Табере мар, ваньзэс калыклы сюдоно-вордоно луоз-а? Озьыен, милемды но, калык сюдӥсез, кин ке но сюдыны кулэ ук, ми но начар улӥськом бере. Г. НИКОЛАЕВ. Редакцилэсь. Вылӥ верам ивор вуиз Завьялово районысь. Ум тодӥське, озьы ик бичало-а меда калыклэсь мукет ёросъёс. Уг на ке но, азьланяз быгатозы бичаны. Кызьы ивортӥзы милем Кун Кенешлэн Аппаратэзлэн правовой управленияз, районъёсысь представительной органъёс милицилы, калыкез дышетон удыслы юрттон вылысь, улосвылъёсты умоятон понна но мукет ужъёслы калыклэсь коньдон октыны быгато. Быдӟалаез - 12 самой пичи уждунлэн 3 процентозяз. Озьы чакламын РФ-лэн "Выт тыронъя системалэн инъетэз сярысь" Законаз. Озьыен, Завьялово районын ваньмыз законъя лэсьтэмын. Мукетыз ужпум, туж-а кулэ меда та ёрмон вакытэ адямилэсь берпуметӥ коньдонзэ кыскыны? Вылаз ик, калык туж ик уг гажа утись органъёслэсь али ужамзэс. Умой адямиос ВОРМОН СЮРЕС КУЗЯ Мынам гожтоно герое - Валентин Владимирович Соколов. Кин со? Одӥг кылын гинэ уд вера. Ужа Ижевскысь гурт хозяйствоя академиын. Валентин Владимирович Информатизацияя международной академилэн действительной членэз, Естествознаниея Россия академилэн член-корреспондентэз, гурт хозяйство наукаосъя доктор, профессор, Россия Федерациысь наукаосъя дано ужась. Ойдолэ, лыдӟись эше, таӵе тодмо но дано муртлэн пинал дыръёсаз вуылом. Котькуд пиос сямен ик, пинал муртлэн лётчик луэмез потылӥз. Тужгес но сыӵе вакыт вал войналэсь азьло аръёсы. Армие мынон дырыз вуиз 1942 арын. Валентин Соколов миномётной часте сюриз - пинал дыр льӧль малпанэз ӧз быдэсмы. Чиед, лапег мугоро (161 сантиметр ӝуждалаё) пияшлы озьы тыбыр вылаз нуллоно луиз секыт миномётэз. Солдат оскем ужез умой быдэсъяз. Ӝоген со расчётэн кивалтӥз ини. Али ке но Валентин Соколов валэктыны уг быгаты, малы сое, восьтэт но лапег мугоро муртэ, Кремльысь нимысьтыз полке (полк специального назначения) выжтӥзы. Вань курсантъёс татын сӥльвироесь, ӝужытэсь, кужмоесь вал. Валентин Владимирович со вакытэз тодаз вайыса вера: - Мон самой пичиез вал бере, стройын котьку берпум интыын сылӥ. Стройын вамышъяны мыным секыт йӧтылӥз. Эшъёсы 20-30 сантиметр кеме ке пыдъёссэс ӝуто, мыным 50 сантиметрозь ӝутоно луэ. Кемдыны но кулэ ведь. Трос аръёс ортчыса ини В. В. Соколовлы шуд усиз полклэн соку улэм интыяз вуылыны. СССР-ысь Вылӥ Советлэн депутатэз луыса мынӥз со Москвае. Та полкысь офицеръёсын пумиськон радъямын вал соку. "Летопись Кремлёвского полка" фильмез лэсьтон вакытэ съёмкаосы пыриськиз. Москваысь вылӥ пограничной училище солэн гадь вылаз бырттӥз "Отличный пограничник" медаль. 1943 арын Владимир Соколовез фронтэ - 139-тӥ стрелковой дивизие келязы. Та дивизия сярысь поэт Матусовский "На безымянной высоте" кырӟан но кылдытӥз. 19 аресъем пияш автоматчикъёслэн взводзылэн командирез вал ини. Ӵем поталлязы тушмонъёслы пумит ожмаськыны. Тросэз быризы, сӧсырмытэк кылемъёс ик ӧй вал. Соколов лейтенантэз но пуля "сюдӥз". Йыраз али ке но бервылыз адӟиське. Отӥяз пыдзэ сӧсыртӥзы - контузия. Трос курадӟонъёс пыр потӥз солдат, озьы ке но, луло кылиз. "За отвагу" медален но кӧня ке орденъёсын вормон сюрес кузя вуиз со дораз. Эшшо кӧня ке тодэ ваёнъёс. - Эльба дорозь вуим. Война йылпумъяськиз. Вормон! Озьы ке но, эсэсовецъёс кӧня ке люкетъёслы висъяськыса пумитъяськыны, "пиньзэс шерыны" выризы на. Милям ротамы корпуслэсь штабзэ возьмаз. Гурт палась кесяськемъёс, ыбылӥськемъёс кылӥсько. Роталэн старшинаеныз Саша Шеповаленкоен адӟиськом, кызьы сюрес вамен немецъёс пото. Канаваын кылле полковник (корпуслэн командирезлэн юрттӥсез), сӧсырмемын, ымнырыз кӧдэктэмын, кияз пистолетэз. Ми немецъёсты уиськом. Соос киоссэс ӝутӥзы, нош одӥгез горд йырсиё фашист наганэныз пырак старшиналэн мӧля шораз мертаське. Пуля йӧтэ "За отвагу" медале но чальтчыса киыз пыр потэ. Кыкез пуля палэнэтӥгес шултыса ортчиз. Берлогес Саша юа, кытын, пе, медале. Ойдо, шуэ, мыном, утчалом. Шедьтӥм. Пулялэсь со куасалтӥськем вылэм. Тӥни озьы, Саша эшме Вормон нуналэ - 1945 арын 9 мае - быронлэсь утиз гадяз бырттэм медаль. Нош пленэ кутэмъёсты соку аслаз пистолетэныз одӥгтэм ыбылӥз сӧсырмыны шедем полковник. Армиысь В. Соколов бертӥз 1948 арын. Дышетскыны пыриз вал вордонъя Москваысь зоотехнической институтэ. 1954 арын та дышетскон заведениез выжтӥзы Ижевске но нимаськыны кутскиз гурт хозяйствоя институт шуыса. Валентин Владимирович дышетскыкуз ик мыло-кыдо пыриськиз наука уже, пӧртэм эскеронъёс ортчытъяз. Сюлмо студентлы институтсэ йылпумъямез бере дэмлазы аспирантураын дышетскыны. Кытчы ке палэнэ кошконэз ӧй вал - та институтын ик дышетсконзэ азьланьтӥз. Эскерон ужъёсыз герӟаськемын вал Воткинск районысь "Двигатель" колхозысь ыж вордонэн. Трос сӥль но ыж гон сётӥсь выль выжы пудоос кылдытэмын вал та хозяйствоын. Озьы тодосчи Удмуртиын гинэ ӧвӧл, быдэс Союзын, солэн палэназ но тодмо луиз. Пудо вордонъя огъя российской но союзной семинаръёсы со трос пол но мыло-кыдо пыриськылӥз. В. В. Соколовез али юн сюлэмшугъяськытэ таӵе ужпум: малы миллион пала ыж вордӥсь Удмуртиын вить сюрслэсь но ӧжыт йыр ыж кылемын. Малы та пудоез вордон хозяйстволы ыштонъёсын берытске? Европаысь мукет шаеръёсын ыж вордо ук, уно пайда басьтыны быгато. Оскем потэ вылэм, ыж вордон асьме дорын азьланяз азинскоз, пайдаен берытскоз шуыса. Али В. В. Соколов нимаз хозяйствоын пудо вордонъя кафедраен кивалтэ, кандидатской диссертациосты утёнъя советлэн председателез луэ, студентъёсын ужа, лекциос лыдӟе. Соин чош ик эскерон ужъёссэ но азинтэ, ЭВМ-ез уже кутыса. 200-лэсь уно ужъёслэн авторзы 30 книгаос но брошюраос поттӥз. Соос пӧлын вань таӵе но тодмо ужъёсыз: "Мировое овцеводство", "Рациональное использование кормов", "Кормление молочных коров". Быдэс дуннеын тодмо луэм тодосчилы тырмиз ини 72 арес. Дано конструкторен М. Т. Калашниковен соос 30 арлэсь кема эшъясько ини. Алтай музъем вылысь Курья селоын Михаил Тимофеевичлы бюст усьтонэ но Валентин Владимирович мыло-кыдо пыриськиз. Кыксы но та эшъёс ярато ӵошен пӧйшураны, чорыганы. Эшез сярысь гожтыны дасяське книга. В. В. Соколовлэн малпанэз мед быдэсмоз, лыдӟисьёсты мед шумпоттоз выль уженыз. А. СУТУЛОВ. Калыклэсь мылкыдзэ тодонъя кенешъёс но ӧтчамъёс ортчытон сярысь Удмурт Республикаысь Кун Кенешлэн Постановлениез Удмурт Республикалэн "Муниципалитет кылдосъёслэсь границаоссэс тупатыку но вошъяку калыклэсь мылкыдзэ одно ик лыдэ басьтон сярысь" Законэз вылэ пыкъяськыса но сое быдэсъяса, республикаысь гурт ёросъёсын кун властьлэсь но интыосын аскивалтонлэсь ёзъёссэс выль сямен радъянэн валче калыклэсь мылкыдзэ тодон вылысь, Удмурт Республикаысь Кун Кенешлэн Президиумез пуктэ: 1. 1998 арын 4-9 январе республикаысь гурт ёросъёсын ортчытоно калыклэсь мылкыдзэ лыдэ басьтонъя кенешъёс но ӧтчамъёс. Гражданъёслэн кенешъёсазы но ӧтчамъёсазы эскерыны пуктоно таӵе юанъёс: а) Лыдъяськоды-а Тӥ умоен интыосын аскивалтонъя али ужась ёзъёслэн ужан дырзы йылпумъяськем бере ёросъёсын кун властьлэсь ёзъёссэ кылдытонэз но азьланяз интыосын аскивалтонэз, быдэс ёрос ёзысь васькытыса, калыклы матэгес каронэз? б) Тӥ сямен кыӵе улос вылын умойгес луоз радъяны интыын аскивалтонэз: нимаз гуртын; гурт округын; сельсоветын (поссоветын)? 2. Юнматоно, муниципалитет кылдосъёслэсь границаоссэс тупатыку но вошъяку, калыклэсь мылкыдзэ одно ик лыдэ басьтонъя кенешъёсты, ӧтчамъёсты ортчытонэз радъян сярысь Положениез. 3. Тупатоно, законъя гражданъёслэсь кенешъёссэс, ӧтчамъёссэс Удмурт Республикаысь Правительство дася но ортчытэ, нош калыклэсь мылкыдзэ лыдэ басьтонлы йылпумъянъёс Удмурт Республикаысь быръёнъёсъя комиссия лэсьтэ шуыса. 4. Гурт ёросъёсысь интыосын аскивалтонъя ёзъёслы ӵектоно кенешъёсы но ӧтчамъёсы тросгес калыкез люкан вылысь ужрадъёс кутыны но та уже тодӥсь-валась адямиосты кыскыны; кулэ организационно-технической арбериос но транспорт висъяны. 5. Гурт ёросъёсысь интыосын аскивалтонъя ёзъёслы, кенешъёс, ӧтчамъёс ортчытыку, гражданъёслэсь правооссэс утён ласянь юрттон вылысь, ёросъёсы ыстоно Удмурт Республикаысь Кун Кенешлэсь депутатъёссэ, Правительстволэсь членъёссэ, Кун Кенешлэн но Правительстволэн аппаратъёсысьтызы кыл кутӥсь ужасьёсты. 6. Удмурт АССР-ысь Вылӥ Кенешлэн Президиумезлэсь 1985 арын 25 сентябре поттэм "Удмурт АССР-ын гражданъёслэсь улон интыосъя огъя кенешъёссэс но ӧтчамъёссэс ортчытъянъя Положениез юнматон сярысь" Указзэ кужымзэ ыштэмен лыдъяно. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 3 январе � 442-1. Ижевск но София - эшъёс Болгариен кусыпъёсмы кемалась дырысен юнматэмын ни, нош табере эшшо но матынгес луим кадь: Болгариен но Ижевскен договор гожтэмын. Болгария ласянь сое гожтӥз РФ- ысь Болгарилэн посольствояз ужась господин Маринов. Нимысьтыз ыстэм делегация ноябрьлэн пумаз вуылӥз Ижевскысь промышленной предприятиосы, пумиськылӥз вузкарись но коммерческой фирмаосын ужасьёсын, городлэн кивалтӥсьёсыныз. Удмуртилэн столицаез болгаръёслы кельшиз. Со сярысь тау карон гожтэт Выль арын вуиз Ижевсклэн мэрлы Анатолий Салтыковлы. Отын ик верамын гожтэм договоръя ужаны кутскон сярысь. Озьыен, выль арысен городысь магазинъёсысь но вузкарон центръёсысь тросгес пумиталом Болгариысь вуттэм сиён-юонъёсты но арбериосты. Л. Медведева. ВЫЛӤ ДУНЪЕТ Франциысь Канны городын "Удмуртнефть" ОАО-лы сётэмын инкуазез утьыны тыршемзы понна приз. Таӵе кузьым сётӥське акциосын компаниослы, кудъёсыз инкуазез утён сярысь сюлмасько. Та дырозь Россиысь тямыс компанилэн гинэ экология удысын тыршемез таӵе призэн пусъемын. Г. А. Архипов Берло аръёссэ Георгий Архипович Архипов улӥз вордӥськем гуртаз - Пичи Пурга ёросысь Шорын Юриын. Дораз вуылӥсьёсты со туж мыло-кыдо пумиталляз. Табереяз соин нокинлэн но адӟиськемез уз луы ни. Асьме пӧлысь со, кема висемез бере, весяклы кошкиз. Г. А. Архипов вордӥськемын вал 1929 арын 20 куартолэзе (мае). Со дышетскиз Можга педучилищеын, Удмурт пединститутын но Тарту университетлэн аспирантураяз. Ужаз ас ёросаз школаын, ВЛКСМ-лэн Пычас райкомаз, Глазов пединститутын, Ярысь педучилищеын, райгазетлэн редакцияз, УдНИИ-ын. Нырысетӥ кылбурзэ печатлаз 1948 арын "Советской Удмуртия" газетын. "Вай бур кидэ!" книгаез потӥз 1967 арын. Азинлыко тыршиз ӟуч кылысь берыктон удысын но. Дасоосын лыдъяськись научной ужъёсыз тодмо луизы дуннеысь вань финн-угор тодосчиослы. Ачиз кошкиз ке но, Георгий Архиповлэн нимыз калыкез пӧлын ялан улоз. Таӵе малпан сёто солэн кылбуръёсызъя "Ӵуж италмас но шуисько ке", "Куазед но ӝытмиз но", "Укыр чебер, укыр йӧно" но мукет кырӟанъёс но. Эшъёсыз котьку возёзы сое сюлэмазы. Удмуртиысь Писательёслэн огазеяськонзы. Тодматске: выль кырӟан ВАЗЬЫЛОЗ МЕДА? Кылъёсыз Л. Хрулевалэн Крезьгурез Р. Шкляевалэн Шур сьӧрысь одӥг пиез Пумитай толон. Паймоно кадь куараез - Уӵыпи, оло. Кусоез капчи шудэ Кузь турын пӧлын. Синъёсы мынам шудо Ялан со вылын. Припев: Мылкыдме нош куке Валалоз-а мынэсьтым? Одӥг пол коть маке Вазьылоз меда мыным? Уйвӧтам но малы ке Соин пумиськи. Шур сьӧрысь казакпилы Шат мон синмаськи? Нош кызьы-о вералом Аслэсьтым вӧтме? Кызьы-о пилы усьтом Сюлэм ватосме? Припев. Малы кенжиз яратон Нылмурт сюлэмын? Малы вань та возьдаськон Югыт дуннеын? Мон уг кӧл ни уйёсме - Лушкем лулӟыло. Малпаса яратэмме, Лушкем тунало. Припев. Правительствоын Кенешизы директоръёс Шаерысьтымы бадӟымесь промышленной предприятиослэн, озьы ик ож тӥрлык поттӥсьёсызлэн, валтӥсь кивалтӥсьёссы люкаськылӥзы Правительствое. Директоръёс кенешизы выль арын но азьланьын ужан мылкыдъёссы сярысь. Кенешез усьтыса, Правительстволэн тӧроез Павел Вершинин ватсаз: - Коньдон висъяськоз программаосты быдэсъянэ гинэ. Нош ож тӥрлык поттонлы куронъёс, веранэз ӧвӧл, кулэсмозы. Асьмеос солы дась луыны кулэ. Промышленностез азинтонъя программа 2000 арозь чакламын. Туэ, мукетъёсыз сярысь, умойгес ужазы Глазовысь ЧМЗ, "Аксион" АО, пияла поттӥсьёс но мукетъёсыз. Вуоно 1998 арын промышленной продукция поттонэз 2,5 процентлы йылэтыны учкемын. Кенешын лэчыт вераськон мынӥз палэнысь юрттэт шедьтон сярысь. Но узыр инвесторъёслы умоесь условиос кылдытоно. Тая одӥг закон кутэмен буйгатскыны уг яра. Предприятиослэсь но республикалэсь данзэ ӝутоно. Кунгож сьӧрысь фирмаос озьы ик мылкыд каро, музъем мед вузаськоз но, акциосын эскерон (контрольной) пакет предприятиос киын мед луоз шуыса. Со одӥг ласянь. Нош Сарапулысь электрогенераторной заводлэн валтӥсь директорезлэн Евгений Сторонкинлэн верамезъя, 1994 арын вузам продукцизы понна коньдон вуымтэ на. Вылаз ик, конверсиен герӟаськем программаослы уксё уг висъяськы, соос юнматэмын ке но, "Росвооруженилэсь" кивалтӥсьсэ воштэм бере, 5 странае тупанкыл гожтыны ум быгатӥське. Предприятиын июль-август понна уждун тырымтэ. Данакез директоръёс меӵак шуизы, выль ужан интыос кылдытэм понна, пе, предприятиослы льготаос сётоно. Куд-ог интыосын (регионъёсын) озьы ужало ни. Вераськон мынэ налог бичанэз кулэстон сярысь. Валамон, инвестициос шедьтон вылысь кулэ умоесь проектъёс но, предприятиос инвесторъёс ас бордазы мед кыскозы. Пайдаё ӵектонъёс сётӥз ЧМЗ-лэн валтӥсь директорез Николай Ганза. Соос герӟаськемын Украинае ядерной эстӥськонэз вузанэн, бюджетэ пырисьтэм фондъёслэсь, быдэсъясь органъёслэсь ужзэс умоятонэн, отчётностез юнматонэн но Правительствоын луонлыкъёсты кутонэз чаклась ёз кылдытонэн. Правительствоын кужмоятоно инвестициосты ужанэз, нимаз реестр лэсьтоно но ЦНТИ-лэсь ужзэ выльдоно. Та ужрадэ пыриськиз Кун Кенешлэн Тӧроез Александр Волков. Г. РОМАНОВ. Шӧкыч Выт тырод - вӧттэк кӧлод! Нош выт октӥсьёс асьсэос вӧттэк меда кӧло? Вераны кулэ, выт олокыӵе но луэ. Шуом, улон инты понна, музъем понна яке мукет. Нош одӥгез мукетъёсызлэсь юн висъяське. Вераськон мынэ сюрес понна выт сярысь. Бен, со кык пӧртэм луэ. Одӥгзэ тыре котькин, кинлэн машинаез яке мотоциклэз вань, нош кыкетӥзэ... Капчиен кисыязы коньдон пыртыны малпась пиос аспӧртэмлыко амалэз уже куто: сюрес понна выт окто. Соос кыдёке мынӥсь машинаосты гинэ быръё. Водительёслэсь ӝыт кӧлыны дугдэмзэс возьмало но, собере ини выт октон кутске. Котькуд машина понна быдэн 300 сюрс манет куро. Нош ӧз сётэ ке, питранъёссэс пасяло. Ӵапак сыӵе "выт октӥсьёс" сярысь ивортонъёс вуыны кутскизы Можга ёросысь милицие. Тодмо луиз мукетыз но: пиос "гольык киын" уг ужало, котькудзылэн пистолетсы вань. Можгаысь милиционеръёс шӧртчи "выт октӥсьёсты" асьсэ кужыменызы кутыны малпазы. Уйлы быдэ Ижевскысь Казане нуись сюрес вылын асьсэ ёросазы эскериськыса улӥзы. Толэзь пала ужамзылэн емышез ӧз луы - йыртэмасьёс ӧз ик возьматскылэ. Соку кык етӥз кивалтӥсьёс Р. Г. Хабибуллин но С. Б. Чирков мукет амалэн "выт октӥсьёсты" кутыны ӵектӥзы. Уже кутоно, пе, машина- "капканэз". Озьы асьсэос нимазы сое. Юрттэт курыса, Элькунысь МВД-ысь кивалтӥсьёслы вазиськизы. Татын пумит луись ӧз луы. Министрлэн нырысетӥ воштӥсез полковник В. С. Осипов косэмъя, та ужез радъяны Можга ёросысь милиционеръёслы КамАЗ машина сётэмын вал. - Бырйим сылон инты, кытысен милесьтым коньдон курыны быгатозы, - вера та операциен кивалтӥсь Александр Слегтин, - собере ини ӝыт дас часысен ӵукнаозь возьмаса пуким. Вить уй чалмыт ортчиз, нош куатетӥяз... Уин кык час котырын КамАЗ вӧзы жигули дугдӥз. Отысь ньыль егит воргоронъёс потӥзы. Ӝужыт мугороез КамАзлэн ӧсаз йыгаськыны кутскиз. Дымбыр поттэ, ява. Тодысалзы ке воргоронъёс, мар соосты вите, тодысалзы ке соос, ми берын эшшо омоновецъёсын машина сылэ на шуыса, асьсэдыз сюрес кузёен ӧй лыдъясалзы, вылды. Каллен вераськон коньдон борды но вуиз. "Выт октӥсьёс" 300 сюрс манет куризы. Коньдон соослы сётӥзы. Собере ини трос дыр кулэ ӧз луы. Воргоронъёс ӝог кыремемын вал. Соос Набережные Челны городысь вылэм. Нош арлыдзыя 22-23 арес сяна ӧвӧл. Удмуртиысь сюресъёс вылын кисызэс зӧкатэмзы потэм, шӧдске. Озьы йылпумъяськиз йыртэмасьёслэн туж аспӧртэмлыко карьера шуонзы. Табере сюрес понна "выт октӥсьёс" уйёсты пытсэтын ортчытъяно луозы. Нош отын вӧтъёстэк меда соос кӧлозы? В. Дмитриев. Ваньмон дыръяды ЙЫРТӤЯН Паллянысен буре: 5. Вашкала пӧраськон тӥрлык. 8. Удмурт газетлэн одӥгез бамыз. 9. Инкуазьлэн "пӧртмаськемез". 10. Басма. 11. Ческыт сиён. 14. Сцена вылысь арбери. 18. Сарапул ёросысь гурт. 20. Коркан будӥсь сяська. 21. Россиысь одӥгез областьлэн карез. 22. Агрыз городлэн удмурт нимыз. 26. Тузон бичась. 28. Япониысь олимпийской город. 30. Удмурт писатель. 31. Музыкальной инструмент. 33. Пинал пудо-живот. 34. Удмуртиысь одӥгез телепередача. 35. Удмурт писатель, тодосчи. 36. Кыр тылобурдо. Вылӥысен улӥе: 1. Мынон-ветлон. 2. Адямилэн (пудолэн) пуштӥрлыкез. 3. Бакча сиён. 4. Коркан улӥсь нымы-кибы. 6. Мушсир. 7. Лымшор палась сьӧсь пӧйшур. 12. гурт пудо-живот. 13. Шаркан но Красногорск ёросъёсысь одӥг кадь гурт ним. 15. Музъем шарлэн ог люкетэз. 16. Гырлы. 17. Удобрение. 19. Ву потон инты. 20. Вӧсяськон тӥрлык. 23. Возьдаськон. 24. Конфет. 25. Валэн ӵошатскон инты. 27. Солдат. 29. Воинской звание. 32. Писпуо инты. 33. Бакча сиён. Валэктон Паллянысен буре: 5. Сюлыс. 8. "Наталь". 9. Гудыри. 10. Атлас. 11. Сакыр. 14. Катанчи. 18. Нечкино. 20. Орхидея. 21. Самара. 22. Огырчи. 26. Пылесос. 28. Саппоро. 30. Валишин. 31. Арган. 33. Кечпи. 34. Ковчег. 35. Уваров. 36. Сэдык. Вылӥысен улӥе: 1. Сюрес. 2. Тымус. 3. Картофка. 4. Таракан. 6. Удорсир. 7. Крокодил. 12. Така. 13. Кельдыш. 15. Америка. 16. Чингыли. 17. Селитра. 19. Ошмес. 20. Оброс. 23. Керпотон. 24. Ирис. 25. Ипподром. 27. Ожгарчи. 29. Адмирал. 32. Нюлэс. 33. Кешыр. Дасяз А. АБРАМОВА. Тодмо нимъёс но нуналъёс Январь 14 - Вордскемез дырысен 100 ар тырме Куӟебай Гердлы (Кузьма Павлович Чайниковлы, 1898-1937), тодмо удмурт кылбурчилы, прозаиклы, драматурглы, педагоглы, актёрлы, фольклористлы, этнографлы, лингвистлы. Вордскемын Вятской губерниысь Малмыж районысь Большая Докья (Покчивуко) гуртын (али - Вавож район). Куӟебай Гердлэн потэмын пӧртэм кылбур сборникъёсыз: "Крезьчи" ("Гусляр") - Ижевск, 1922), "Сяськаяськись музъем" ("Цветущая земля" - Казань, 1927), "Лёгетъёс" ("Ступени" - Ижевск, 1931). В. Я. Брюсов нимо Высшей литературно-художественной институтлэн выпускникез, Востокысь калыкъёслэн национальной культурая но этносъя научно-исследовательской институтсылэн аспирантэз, Куӟебай Герд кылдытӥз но поттӥз удмурт калык кырӟанъёсын, пословицаосын но поговоркаосын, мадиськонъёсын сборник. 1991-1992 аръёсы "Кенеш" журналын потӥз адями вордскемлы сӥзем удмурт сямъёсъя но йылолъёсъя дасям гожъямъёсыз. Куӟебай Герд тодмо вордскем калыкезлэсь фольклорзэ люкамен но. Куӟебай Герд 1918-1920 аръёсы кивалтӥз Малмыж уездысь калыкез дышетонъя отделлэн удмурт ёзэныз, 1920-1921 аръёсы - Удмурт комиссариатлэн издательской отделэныз, 1921-1922 аръёсы - Удмуртиысь калыкез дышетонъя областной отделлэн школаосъя ёзэныз. Со ик - "Кенеш" литературной-художественной журнал кылдытӥсьёс пӧлысь огез, Удмурт культураез дышетонъя "Бӧляк" огазеяськонлэн, Удмурт краеведческой музейлэн, удмурт писательёслэн нырысетӥ огазеяськонзылэн председателез - нош ик Герд. 1926 арын май толэзе Куӟебай Гердэз пытсэт сьӧры келяло, 1933 арын янгыш каро "Софин" (финн выжыысь калыкъёслы эрик сётонъя) контрреволюционной шпионско- террористической организацие пыриськемез понна, келяло Соловки шормуӵе. 1937 арын ноябрь толэзе ыбо, чылкыт нимзэ берыкто 1958 арын гинэ. 14 - 75 ар талэсь азьло (1923) Иж заводъёсын потэ миллионэтӥез пӧйшуран пыӵал гумы. 16 - 45 ар талэсь азьло (1953) Глазовын автобусъёс ветлыны кутскизы. 18 - 80 ар талэсь азьло (1918) ужаны кутскиз Вятской губерниысь рабочийёслэн, крестьянъёслэн но солдат депутатъёслэн И съездзы. Отын кутэмын решение губерниез Советъёс ки улэ выжтон сярысь. 21 - 15 ар талэсь азьло (1983) Ижевскысь радиозаводын потӥз 6 миллионэтӥез радиола. 24 - 80 ар талэсь азьло Елабугаын потӥз "Выль синь" удмурт газетлэн нырысетӥ номерез. Солэн редакторез вал Константин Сергеевич Яковлев (1890-1937), тодмо удмурт прозаик но кылбурчи. 1918 арын газет пытсамын вал, "векчи буржуазия" но "эсер шӧмын" шокамез понна. 31 - Вордскемез дырысен 80 ар тырме Василий Максимович Вахрушевлы (1918-1995), кылтодон наукаосъя кандидатлы, УДНИИ-ысь валтӥсь научной ужасьлы, УАССР-ысь наука удысысь дано ужасьлы. Вордскемын Якшур-Бодья районысь Выжоил гуртын. Удмурт кылэз дышетонъя В. М. Вахрушев 70-лэсь ятыр уж гожтӥз. Та толэзе ик: - 130 ар талэсь азьло (1868) Вотка завод, Правительство куремъя басьтӥське 8 паровоз лэсьтон борды. Со понна заводлы висъямын 160 сюрс азвесь манетъёсын пунэм коньдон. Нырысетӥ паровозэз бичаны кутскизы 1869 арын 7 январе. - 80 ар талэсь азьло (1918) Советской власть кылдытэмын вал Воткинскын, Глазовын, Сюгинскын, Камбаркаын, Малмыжын. Нош ик - Карин гурезь йылын Вуж арлэсь "быжзэ" кельтоно ӧвӧл выляз. Тазьыгес малпаса, вылды, Удмуртиысь писательёслэн огазеяськонзы 30 толсуре Мунё театрын ортчытоно кариськиз Федор Пукроковез данъян ӝыт. Со сӥземын вал писательлэн 60 арес тырмонэзлы (нялтас, шуом ни, Выль арез пумитанлы но). Тон ӧвӧл пелляськись, дуриськись но ӧвӧл, Бур кияд - зарниям ручкаед. Визьнодэд нош кытысь - юаме ик ӧвӧл, Бен кытысь со пӧртмась пероед? Ӟечкылан кылъёс трос гинэ кисьтӥськизы. Тол Бабай интыын - Олег Четкарев, писательёслэн тӧрозы. "Бодыеныз" шонтэ ке, саламъёс пыро Федор Пукроковлэн "пуйыаз". Пинал мурт сямен шумпоты вылэм - шугъяськонэз тросгес: пельпум сьӧрын - 60 аръёс. Ньылетӥ классысен кутскыса ӧз сёты ни со пероезлы ныжомыны... Федор Пукроковлэн гожъяськонэз пӧртэм-пӧртэм ӧръёстӥ визыласа кошкиз. Кылбур книгаосыз: "Вылӥысен учкем потэ" (1969), "Думем тӧл" (1973), "Сюресъёс" (1980), "Ошмес син" (1984). Таиз, берлоез, нырысетӥез удмурт литератураын кылбурен роман (роман-малпаськон) луэ. Писательлэн мукет визылэз - драматургия. Ф. Пукроков В. Холинэн ӵош Мунё театр понна гожтӥз куинь пьеса. Со сяна но даслэсь уно пьесаосыз вань. "Корка пырон" нимоез пуктэмын Удмурт театрын. Пумен азьпала потэ публицистика. Писатель уго огшоры гинэ учкыса кошкыны уг быгаты улонысьтымы огыр-бугыр воштӥськонъёс вӧзтӥ, ачиз йырыныз отчы зыме но адӟемзэ-шӧдэмзэ сюлэм пыртӥз "сӥсъя". Соинтэк-а, институтын дышетсконзэ куспетӥ кельтыса, кыдёкысь ёросэ "коммунизм кар" кылдытыны кошке (зэм, та малпанзы соослэн уг удалты), ӟуго-гиӟыё малпанъёссэ сэрттон-пертчон вылысь, Москваын философе дышетске. Огъя вераса, Ф. Пукроков котькыӵе пӧсь тылӝуо интыосы йырзэ месылэ. Соин ик перо улысьтыз потыло пӧсь публицист сюлмын гожтэм чуръёс, критической статьяос, рецензиос, очеркъёс. Зэмос шырыт сямзэ возьматыса (гонорартэк-мартэк, ачиз чотын, шуом ни), 1977 арын со поттэ "Кильмезьысь батыр" очеркен книгазэ. Гожтэ "Выль синмын" повесть. Нош 60 аръем юбилеезлы писатель бадӟым кузьым дасяз: "Удмуртия" издательствоын потӥз солэн проза жанрен нырысез бадӟым произведениез - "Кизили ныл" романэз (ортчем сюресысьтыз пӧртэм малпаськытӥсь югдуръёс). Сое нылпиослы дышетскон программае дэмлазы. Федор Пукрокович лыдӟисьёслы кузьмаз ни вал "Тайна трех иллюзий" книга. Нош табере поттыны дасямын (оло, юрттӥсь шедёз) "Тайна удмуртского народа" книгаез. Кытысь утчано удмурт калыклэсь туж но туж вашкала выжыоссэ? Автор, утчаськись мурт, пырак шуэ: Тибетысь - Китайысь, Индиысь. Ас малпанэзлэсь шонер луэмзэ возьматон понна, со "уно сюрс тонна кыл рудаез" берыкъя но бугыръя: 700 бам (страница) вылын возьматэ, кыӵе но кыӵе кылысь удмурт вераськонамы пыриз соиз яке таиз кыл, ним. Валамон, таӵе секталаез ӝутон туж кужмо муртлы гинэ сётӥське, ачиз автор гинэ тодэ, кӧня словарьёсын-кыллюкамъёсын бугыръяськоно луиз. - Таӵе "ӝуждалаез" нокин, одӥг лингвист но, ӧз басьты на, - шуиз та ӝытэ тодосчи Р. Ш. Насибуллин. - Федор Пукрокович лыдӟыса-эскерыса потӥз 32 калыклэн кылызъя уно пӧртэм научной ужъёсыз. Нош тросэз-а меда тодэ: 1978 арын ик ини со Тартуын поттӥз вал Татышлы удмуртъёслэн вераськон сямзылы сӥзем йӧн-йӧн ужзэ. Критик А. А. Ермолаев шуиз: - Мон нош ик тодам ваи аслэсьтым ик куке верамме тодэ вайытэмзэс: "Башкириын но Татариын удмуртъёс вань дыръя, удмурт литература улоз-вылоз, пушъёз". Ас дор палъёсыз малы ке ӧй вал та ӝытэ Федор Пукроковичлэн. Озьы ке но, малпан кылдӥз: со ӝужыт Карин гурезь йылазы кадь сылэ литературамылэн вырйылаз, зэмзэ но, тылскем-юрттэт сётэ ас калыкезлы. Т. ЧЕРНОВА. Удмурт Республикалэн Конституциезлэн 82-тӥ ёзэтаз воштонъёс пыртон сярысь Удмурт Республикалэн Законэз 1-тӥ ёзэт. Удмурт Республикалэн Конституциезлэн 82-тӥ ёзэтаз воштон пыртоно: 82-тӥ ёзэтысь куштоно 2-тӥ пунктсэ. 2-тӥ ёзэт. Та Закон кужыме пыре, сое газетын печатлам бере. Удмурт Республикаысь Кун Кенешлэн Тӧроез А. А. Волков. Кун кенешлэн дас куатетӥ сессиез Ченгешонъёстэк уг луы 8 январе ужзэ азинтӥз Удмурт Республикаысь Кун Кенешлэн дас куатетӥ сессиез. Ӵукна заседаниез кутскыса, Кун Кенешлэн Тӧроез Александр Волков депутатъёслэн но ӧтемъёслэн нимынызы шуныт ӟечкылаз удмурт парламентлэн промышленностья, инфраструктураез азинтонъя, вузъёсын рынокез радъянъя комиссиезлэсь тӧрозэ Виталий Соловьёвез 65 арес тырмемен но солы "Удмурт Республикаысь промышленностьысь дано ужась" ним сётэмен. Кызьы ивортэмын вал ни, сессия ужаны кутскиз кык арня талэсь азьло. Вис дыръя республикаысьтымы гурт ёросъёсын радъямын вал калыклэсь кун властьлэсь ёросъёсын ёзъёссэ но гуртъёсын аскивалонэз радъян пумысен мылкыдзэ тодонлы сӥзем кенешъёс но ӧтчамъёс. Соин валче ик Кун Кенешлэн Президиумез 6 январе ортчем заседанияз кутӥз сессилэн повесткаяз ватсаса ужпумъёс пыртон сярысь постановление. Депутатъёс куспын ӵектэм ужпумъёсъя ченгешонъёс потӥзы. Соос эскерыны дасесь ӧвӧл шуыса, куд- огез чутрак пумит луизы соосты повесткае пыртыны. Озьы ке но, эскероно ужпумъёс пӧлы эшшо укмысэз ватсаськизы на. Соос пӧлын "Удмурт Республикалэн интыосын аскивалтон сярысь" Законаз воштонъёс но ватсанъёс пыртон сярысь", "Удмурт Республикаысь ёросъёсын кун властьлэн ёзъёсыз сярысь", "Удмурт Республикаысь ёросъёсысь депутатъёслэн Советъёсазы депутатъёсты быръён сярысь" но мукет законъёслы проектъёс сярысь ужпумъёс. Собере ёросъёсын калыклэсь мылкыдзэ тодонъя кенешъёслэн но ӧтчамъёслэн мынэмзы сярысь ивортон лэсьтӥз Удмурт Республикаысь быръёнъёсъя комиссилэн тӧроез Афанасий Тубылов. Та ужпумъя огъя йылпумъянъёс матысь дыре печатламын луозы газетъёсын. Ӵектэм ужпумъёсъя огкылэ вуон вылысь, депутатъёс решение кутӥзы сессиез огдырлы уретыны но комиссиосын но фракциосын ужаны. Нуназе бере ялан ужась комиссиослэн тӧрооссы ивортӥзы повесткае ватсаса пыртэм ужпумъёсты комиссиосын эскеронлы йылпумъянъёс сярысь. Озьы вуэмын вал огъя мылкыдэ: быръёнъёсын герӟаськем законъёслы проектъёсты сессиын экероно но инъет чотын кутоно. Пыр-поч сэрттэм-пертчем но ӟырдыт кеншем бере инъет чотын кутэмын "Удмурт Республикаын интыосын аскивалтон сярысь" Законэз воштонъёс но ватсанъёс пыртон сярысь" Законлы проект. Тужгес ӟырдыт вераськонъёс-ченгешонъёс ӝутскизы "Удмурт Республикаысь ёросъёсын кун властьлэн ёзъёсыз сярысь" Законлы проект пумысен. Куд-огез депутатъёс пумит луизы сое эскерыны но ӵектӥзы азьло Удмурт Республикалэн Конституцияз воштонъёс но ватсанъёс пыртыны. Но таиз но проект инъет чотын ктуэмын вал. Соин сессилэн 8 январе ужез йылпумъяськиз. Нош сессиын ӝутскем ченгешонъёс пумысен верано ке, соос юнме уг пото, дыр. Документъёс депутатъёс кие укыр бер вуо, угось, тыро-пыдо тодматскыны дыр тырмымтэен сэрен уно пӧртэм юанъёс но валантэм учыръёс кылдо. Соин ик, оло, берло дыре асьмелэн уноез законъёсмы "кисьматэк" пото. Но соиз сярысь ини мукет вераськон. Н. КОРЯКИН. Шӧкыч Ойдолэ тунаськоме! Котькуд адями пӧртэм сямен тунаське, нош Шӧкыч уром аслэсьтыз амалъёссэ дэмла. Гын сапегдэс капка вамен сэрпалтэ. Пыдкутанды урам шорын ик костаське ке, улонады номыр воштӥськонъёс уз луэ. Нош гын сапегды нокытын но уг адӟиськы ни ке, озьыен, бускельды лушказ, луоз. Возьмалэ - матысь дыре керетон ӝутоды. *** Уйшоре гидады потыса, одӥг ыжез кутэ. "Бе-е-е" шуиз ке, кузпалды кырӟась луоз, нош "хрю-хрю" яке "ку-ка-ре-ку" шуиз ке, чаклаське: асьтэос ыж сямен бӧксыны эн кутске. *** Та амалэн тужгес но воргоронъёс тунаны ярато. Уйшоре кык сюсьтыл кенжытыса, синучкон доры султэ. Синучконысь егит, чебер нылашлэсь тусбуйзэ адӟиды ке, озьыен, тӥ мултэссэ юыны шедьтӥллямды ни, нош асьтэды тодмады ке - эшшо одӥг ӟенелик бушатын вормоды на. Эн туна тон вуонозэ Коньы Толя Тон эн юа, кыӵе улӥсько-вылӥсько, мар сярысь малпасько, кырӟасько, бӧрдӥсько. Эсьмаса, номыре юатэк, гадь вылам йырдэ пон, кылзы тон, мар мынам сюлэмам. Кылзы тон сюлэмме, кыӵе со жугиське. Соку ӟеч валалод, мар сярысь шугъяське. Мар сярысь сюлмаське, мар сярысь со бӧрдэ, кыӵе со та югыт дуннеез яратэ. Тон эн юа номыр, гадь вылам йырдэ пон, жадемын-а, ӧвӧл-а сюлмы - кылзы тон, Кужымыз сюлмылэн кемалы-а тырмоз... Сюлэм ноку уз пӧя, ваньзэ вералоз. *** Кырӟаме но уг пот, Вераме но уг пот - Эх, улон! Мылкыды пуксемын, Сюлэмысь кошкемын Яратон. Уӵые чалмемын, Арганэ вунэмын Кемалась. Мылкыдъям улэме, Малпанъям лэсьтэме Чик ӧйлась. Мон ӧжыт яратӥ... Ваньмыз ик куспетӥ Уремын. Кӧня крезьгуръёсы, Верамтэ кылъёсы Кылемын. *** Нырысь лымы узьым вылын Адӟиськылэ отын-татын. Куазь тӧлаське. Ин пильмаське. Нош ик лымы усёз, шӧдске. Гурт котырын, узьым вылын, Пудо поръя на ай лудын. Трос пол адӟи мон та лудэз - Номыр ӧвӧл паймымонэз, Нош малы-о соку Котьку Сюлэм тыре ук Адӟыку? ГУРТЫН СӤЗЬЫЛ Уг пот на ай сӥзьыл куазьлэн Ас интызэ тэк сётэмез. Уг пот, уг поты на солэн Толалтэлы сётӥськемез. Напра дэри кариз, быдтӥз Сюресъёсты. Кыдыраса Пумтэм зоре. Тол лыктыны медаз ай быгаты шуыса. *** Лымы, я зор усе. Пурысь, Сьӧдалэс-лыз пилемъёсыз Чалмыт но буш лудъёс сьӧрысь Сӥзьыл вае улос вадьсы. Кезьыт, вандӥсь уй пал тӧлъёс Вис карытэк сямен пельто. Огнын... Мӧзмыт... Сьӧд пилемъёс Лудъёс сьӧрысь лыкто, лыкто... ВИТЁН Пельске но пельске. Уз лу туннэ нокин лыктӥсь. Ачим пукисько Быдэс ӝыт укно дурын весь, - Уз ву-а кин ке? Витисько. КУДӞЫТӤСЬ ТУЛЫС УЙЁС О, тулыс, вунонтэм Но шулдыр вакытыд. Сазькыны луонтэм Кудӟытӥсь уйёсыд. Шукы кадь сяськаен Пурӟемын льӧмпуос. Садъёсын мӧль зынэн Кудӟемын уӵыос. Кырӟалоз, чирдыло - Жингыртэ уй омыр... Егитъёс юмшало Мылкыдо но шулдыр. Кудӟытӥсь сяська зын Омырын лӧсъяське. Пересьмон вунэмын - Нош мылкыд бурдъяське. Егит дыр эшъёсы, Кытын тӥ? Мӧзмисько... Та тулыс уйёсы Нош ик куд луисько. Аслэсьтым кудӟемме Валатэк кылисько, Нош бертон сюресме Шедьтытэк поръясько. О тулыс, вунонтэм, Ӵыдонтэм вакытыд. Сазькыны луонтэм Кудӟытӥсь уйёсыд. *** Мон тодӥ, тон уд луы мынам шуыса... Мон тодӥ: сюлэмме кельтод вӧсь карыса... Нош озьы но, куке сяськаос кузьмакум, мыным пальпотылӥд, мон шудо вал соку! *** Бурдъя мылкыдэз шумпотон - огдырлы. Лыктэ шӧдтэк шорысь кайгу - огдырлы. Инмар шудбурзэ но сётэ огдырлы... Огез сётэмын пыраклы - яратон... *** Уг тодӥськы, уг тодӥськы, кыӵе меда сяськаялоз садысьтымы мак сяськамы; Уг тодӥськы, уг тодӥськы, кыӵе меда емыш сётоз та ӵош мерттэм улмопумы; Уг тодӥськы, уг тодӥськы, уӵы лыктоз на-а меда яратоно кызьпуамы; Уг тодӥськы, уг тодӥськы, жингыртозы меда выльысь ӵош кырӟаллям крезьгуръёсмы; Уг тодӥськы, уг тодӥськы, уг тодӥськы кыӵе луоз но мар вите улонамы; Огзэ гинэ мон тодӥсько но оскисько: Асьмелэн ваньмыз ӟеч луоз, ӧз кысы ке яратонмы, ӧм куштэ ке огмес огмы. *** Эн дыртыты вуонозэ, Эн туна тон луонозэ. Ас вакытаз ваньмыз луоз Вуоноез ачиз лыктоз. Номыр уз ортчы палэнтӥд, Ваньмыз потоз сюлэм пыртӥд. Луоз кайгу но шумпотон... Огпол гинэ уд жаля тон. Ас кайгудэ ке дыртытӥд, Шумпотондэ ке вазь ыштӥд... Эн дыртыты луонозэ, Эн туна тон вуонозэ. Сюгаилэ но газ вуиз! Можга. Шумпоттӥсь иворъёсты али шергес кылоно, соин но, лэся, Удмурт Сюгаилэ чагыр эстӥськонлэн вуэмез быдэс район понна праздник выллем луиз. Документъёс дасям дырысен уго 12 ар ортчиз ни. Гуртоослэсь осконзэс выльысь улӟытӥз "Сюгаильское" эштослэн кивалтӥсез Анатолий Иванович Скобелев. Умой ужазы "Удмуртгазспецстройысь" специалистъёс. Солэн кивалтӥсезлы Д. Г. Гумаровлы трос гинэ бызьылон йӧтӥз. Табере чагыр эстӥськонэз пыртоно котькуд корка. Озьыен, гурт калыклы пу сярысь сюлмаськоно уз луы ни. Туэ ик газопровод кыскыны малпало Ӟуч Сюгаилозь. А. СЕРГЕЕВА. Берекет ЭМЪЯЛОЗ НО, СУЗЯЛОЗ НО Нашатырь спирт ӟеч эмъюм луэ шуыса, котькинлы тодмо, дыр. Шуом, адями усыкмыны шедиз, йырсазьзэ ыштӥз - катьялоз спирт. Та спирт мукет учыръёсы но паськыт кутӥське. Буям выжез, укно рамаез, ӧсъёсты миськыны малпады. Вуэ кӧня ке пуньы нашатырь спирт ватсалэ - ваньмыз кисьтаськыны кутскоз. Тӧдьы бельё, дӥськут миськон пӧлады йылтэ ай та спиртэз (ведра вуэ одӥг сиськон пуньы) - соос пыр-пыр тӧдьы луозы, нокыӵе мукет суретъёс, тӧдьы каронъёс (отбеливательёс) кулэ уз луэ ни. Дӥськут вылэ йод кисьтыны шедьтӥды. Эн сюлмаське. Татын но тӥледлы спирт юрттоз, виштыез чылкытатоз. Нашатырь суретэн (4 люкет вулы мынэ 1 люкет) сузяны умой замшалэсь вурем арбериосты, пыдкутчанэз. Чылкытатэм бере нимысьтыз резина щёткаен яке шакырес (наждачной) бумагаен зырано на. Сынъёсты, расчёскаосты дырын-дырын сузялляны кулэ. Уйлы соосты пононо кӧня ке нашатырь спиртэн но сылалэн сурам вуэ. Нош ӵукна гылтоно. Л. ЯКОВЛЕВА. Тау карон Кун Кенешлэсь Тӧрозэ Александр Волковез вордскем нуналэныз ӟечкыласа, телеграммаос но гожтэтъёс ыстӥзы Россия Федерацилэн Президентэз Б. Ельцин, Правительстволэн Тӧроез В. Черномырдин, Россия Федерациысь но Удмурт Республикаысь Правительствоослэн муртъёссы, Россиысь Кун Думалэн но Удмуртиысь Кун Кенешлэн депутатъёссы, шаерысьтымы министерствоослэн но ведомствоослэн кивалтӥсьёссы, коллективъёс, нимаз адямиос. Александр Волков иворъёсты вӧлмытӥсь ёзъёсы таӵе гожтэт ыстӥз: "Тау карисько, вордскем нуналэным сыӵе шуныт ӟечкыламды понна. Озьыен, тӥ мыным оскиськоды но дурбасьтӥськоды Кун Кенешлэн политикаезлы, угось со тырше Удмуртиысь котькуд адямилы ӟеч улыны но ужаны луонлыкъёс кылдытонын кун властьлэсь кулэлыксэ юнматыны. Сюлмысьтым тау карисько монэ вунэтымтэды понна но выль арын шудбур, ӟеч улон но ваньзэ умойзэ гинэ сӥзисько". Александр Волков, Удмурт Республикаысь Кун Кенешлэн Тӧроез. Спорт ТЕННИС Удмуртилэн столицаяз витетӥ арзэ люкаськизы ни бадӟым теннисэн шудонъя Россиысь спортсменъёс. Аслаз призэз понна та ӵошатсконъёсты радъя но ортчытэ "Ижмаш" АО. Туэ вуизы 170-лэсь ятыр шудӥсьёс 22 республикаысь но областьысь. Ижевскын вормисе потэмъёс феврале нюръяськозы Россия Федерациысь командаос пӧлын призёр луон понна. Куинь нуналлы йылпумъянъёсъя нылъёс пӧлын вормисе потӥзы асьмелэн спортсменкаосмы Ольга Широбокова но Юлия Бородина. Полуфиналэ озьы ик шедизы Удмуртиысь теннисисткаос. Пиос пӧлын келянъёстэк мыно Ижысь Денис Кузнецов но Сергей Чижевский. Тужгес но егитэз - Дмитрий Перевощиков. Кортэ потэмез солэн бадӟым спортэ лёгон сюресэз луоз шуыса оскон кылдытэ. Ӵошатсконъёсты радъясьёслэн огез спонсорзы, "АСПЭК", котькуд теннисистлы Выль ар кузьым дасяз, нош му вӧй поттӥсьёс пинал спортсменъёслы автобус висъязы. Туннэ, 10 часысен кутскыса, ортчозы йылпумъясь ӵошатсконъёс. Н. ТИМОШИН. Шӧкыч СЕРЕМ ПЫР Выль ӟучлы секретаршаезлэн алигес гинэ вордскем пиезлэн атаез, пе, тон луиськод шуыса вераллям. Воргорон шулӟектэмын. Юрттӥсьсэ ӧте но шуэ: - Мын ай нылпи ваён юртэ ветлы, учкы, кинлы со кельше. Юрттӥсез бертэ но вера: - Одӥг кабын кадь! - Уггес валаськы. - Ма, чылкак тӥ кадь! Лапег, пилеш, ваньмыз шоры кесяське. х х х Кык кышномуртъёс урамын верасько: - Кытын пумитад Выль арез? - Котьку сямен ик - валес вылын. - Нош трос-а вал калык? х х х Немецлэн кышноез но дусымез вань ке, со дунъя кышнозэ. Французлэн кышноез но дусымез вань ке, со дунъя дусымзэ. Еврейлэн кышноез но дусымез вань ке, со золгес яратэ анайзэ. Ӟучлэн кышноез но дусымез вань ке, со котьмалэсь юн яратэ юонэз. х х х Кык воргоронъёс верасько яратон сярысь. Одӥгез мукетызлы шуэ: - Сюан бере адями кыӵе зол воштӥське вылэм. Азьвыл мынам дунне вылысь ваньзэ нылкышноосты ӟыгыръяме потэ вал! - Нош табере? - Табере одӥглы ӧжытсэгес. х х х Пиосмурт варманаеныз комнатаын пуке. Варманаез улон сярысь вераськон поттӥз. - Толон гинэ нылмурт вал на, нош туннэ кулыны дыр ини. - Зэм, дыр ини, дыр, меми! х х х Укмыстон аресъем пересьлэсь юало: - Ку-о улыны умойгес вал: Сталин, Хрущев, Брежнев яке Горбачев дыръя? - Сталин дыръя. - Малы? Со вир юись вал ук. - Со вакытэ туала кышномуртъёс егитэсьгес вал. Люказ Г. ВАХРУШЕВ. К. Герд сярысь малпанъёс-герӟетъёс... Алигес Устинов ёросын улӥсь удмуртъёс нош ик люкаськылӥзы 23 номеро библиотекае. Азьлоеныз ӵошатыса, таяз учыре пумиськонэ лыктӥллям кӧня ке выльёсыз но эшъёс. Озьыен, клуб паськыта, бадӟымесь ужпумъёсты дэмен сэрттон-пертчон мылкыдъёс юнмало. Таиз пумиськон быдэсак сӥземын вал Куӟебай Гердлы. Ӝоген быдэс Россиын но, финн- угор дуннеын но, куд-ог музон кунъёсын но пусъёзы удмурт калыклэн дано пиезлэн вордскемез дырысен 100 ар тырмонэз. Библиотекае лыктэмъёс котыр ласянь сэрттӥзы- пертчизы Кузьма Павлович Чайниковлэсь гожъямъёссэ, кылбурет но проза, драматургия, фольклор, калыкез дышетон но мукет удысъёсын бадӟымесь ужъёс лэсьтэмзэ. Литературовед но критик Алексей Ермолаев люкаськемъёслы нырысь ик тодазы вайытӥз К. Гердлэсь поэмаоссэ, валэктӥз куд-ог чуръёссэ, кызьы со, поэт, куд-ог кылбуръёссэ ачиз ик выльдӥз. Юбилеен валче, шуиз критик, кӧня ке бадӟымесь книгаос поттыны чакламын, но К. Герд сярысь меӵак тодэ ваёнъёс отын, шӧдске, трос ик уз луэ ни, малы ке шуоно, тодӥсь муртъёс одӥг-кык сяна ӧвӧл ни, дыр. Кудӥз-огез авторъёс пусъё, К. Гердлэн гожъямъёсыз туала выльдӥськон вакытмылы но тупало шуыса. Со ас вакытсэ данъяз, кырӟаз, возьматӥз ке но. Отӥяз литературовед нимысьтыз пусйиз, Куӟебай Гердлэсь но Ашальчи Окилэсь чылкыт, эшлыко кусыпъёссэс шонер возьматыны кулэ шуыса. Мон сямен, шуиз со, кыӵе ке яратонэн, синмаськонэн чеберъяны уг яра со кусыпъёсты. - Алексей Афанасьевич туж шонер пусйиз, - вераськонэ пыриське журналист Леонид Фёдоров, - К. Гердэз адӟылэм адямиос туж ичи ни шуыса. Соин ик соослэсь тодэ ваёнъёссэс ӝегатскытэк гожтоно. Мынам чакламея, Кузьма Павлович Чайниковез ӟеч тодэ на Анна Ивановна Андреева. Со дышетскем Выль Мултанысь педучилищеын. Пумиськылэм, вераськылэм К. Гердэн. - Куӟебай Гердлэсь нимзэ ке верало, - шуэ мукетыз мӧйы журналист Николай Кондратьев, - йыре лыкто быдэс герӟет малпанъёс. Кыӵеоссэ но уд кылы вераськонъёсты! Тодам лыктэ на шеарысьтымы писательёслэн одӥгез съездзы-ӧтчамзы. 1938 арын вал кадь со. Афанасий Лужанин, доклад лэсьтыкуз, отын тазьыгес шуиз: асьме литератураысь гердовщина, пе, табере весяклы сэрпалтэмын жуг-жаг куян интыосы. Сыӵе кылъёсты тросэз пумитазы кичабонъёсын... Со кышкыт, бугырес аръёсы но, берлогес но ай, - шуэ дышетӥсь-пенсионер Александр Осипов, - олокыӵе но вераськонъёс вӧлмылӥзы, К. Гердэз Можгалась но, Ижевскысь но адӟылӥллям шуыса. Татысь тюрьмаосын но сое курадӟытӥллям, пе. Куд-огез эшъёс пумиськонэ ваиллям Елена Виноградовалэсь "Удмурт дуннеын" печатлам "Узвесь" очерксэ. Со тупен-тупен возьматэ, кытын но ку ыбылэмын но сюе согемын Соловки тюрьмаын курадӟытэм муртъёс. Библиотекае лыктэмъёс ӟеч дунъязы "Удмурт дуннеысь" со бамез. Газет киысь кие кошкиз. Пумиськонын озьы ик вераськиз журналист, писатель Кирилл Ломагин. Со вакчияк ивортӥз, кызьы ог куамын ар талэсь азьло, Москваын дышетскыкуз, партилэн ЦК-ысьтыз но Писательёслэн огазеяськонысьтызы эшъёслэн куремзыя, Куӟебай Гердлэн творчествоез сярысь нимысьтыз статья гожтоно луэм. К. Ломагинлэн та пумысен тодэ ваёнъёсыз потозы "Инвожо" журналлэн толшорлы дасям номераз. Пумиськонын озьы ик ӟырдыт вераськон пуромиз Ижевскысь Думае но азьланяз Кун Кенеше депутатъёсты быръёнэз умой ортчытон сярысь. Али ик малпаськоно ини кандидатъёс пумысен, уката ик егитъёсты ӵектон-быръёнъя. Н. Сундуков. Кизилиос но космонавтъёс... Кизилиос но кылбурчиос... Одӥгъёсыз пырак кораблен лобӟо, киын кутымон матэ карисько соослы, мукетъёсыз... Таосыз уйвӧтазы лобало ке лобало, ӵем дыръя "киын сузёнтэм" кизили сярысь малпасько, лулӟыло... Озьы яке тазьы, но инсьӧр та кык пӧртэм удысчиосты герӟа, матэ каре. Озьы малпаса ик, оло, удмурт литературалы 100 ар тырмонэз 1988 арын Москваын пусйыку, асьме писательёсты нуллӥзы Звездный городоке. Соосын ӵош ветлӥз вал туспуктӥсьмы Александр Кузнецов но. Азьпал радын - писательёс Фёдор Пукроков но Семён Самсонов. Чуръёс, чуръёс Вӧсь сярысь Инмарлы пумит нюръяськон аръёсы лулмы пожаськиз, кырсёмиз. Вунэтӥмы анай кылмес, кулэ ӧм каре одӥгмес огмы, тодамы но ум ваиське улоз-а калыкмы ӵуказе, вуоно арын, вуоно дауръёсын. Озьы улыса, оло, йыр визьмы но сураське ини, тодон-валанмы но куасьме ни, лэся. Тани таӵе гинэ лыдпусъёс верало. 1949 арын Кукмор ёросысь 26 удмурт колхозын 26 удмурт тӧро ужаз. 1997 арын 6 удмурт хозяйствоын кыказ гинэ удмурт кивалтӥсьёс вал. Мугез со: юыны кариським, тӧрое луыны мылкыд карись удмуртэз уд шедьты, озьы ик удмуртэз тӧрое бырйыны малпаськись колхозникез шер пумиталод. Кылем арын Кукморын усьтӥзы черк. Отчы тросгес удмуртъёс ветло. Адӟисько: вӧсен тунсыкъяськисьёс юонлэсь куштӥсько, эшъёссэс сьӧразы кыско, уже мылысь-кыдысь пырисько, асьсэды семьяын, уж интыын лякыт возьыны тыршо. Черкамы пинал нылъёс вуыло ини. Удмурт кылын Библия потэмлы сӥзьыса, Ижын нимысьтыз ужрад ортчиз. Мон уката шумпотӥ тани малы. Президиуме ӧтизы удмурт профессоръёсты - В. Владыкинэз но М. Гришкинаез. Соос веразы, кызьы удмуртъёс вазиськизы Иван Грозныйлы, Христос вӧсе потыны мед лэзёз шуыса. Христианствое потэм бере кулэ луиз вӧсь книгаосты удмурт кылын поттылыны. Озьы вордскизы удмурт азбука, удмурт грамматика, удмурт книгаос. Христослы осконэз вӧлмытон туж шуген мынӥз. Котькуд гурт ас улонэныз улӥз, мукетыныз ӧз герӟаськы. Ваньмыз удмуртъёс ужазы музъем вылын, пудо-живот котырын. Вузкарыны сюрес ӧз лёге. Вал одӥг-одӥг узыр вузкарисьёс. Нош соос, анай кылзэс куштыса, мукет калык выжые потылӥзы. Сьӧразы итӥськизы огшоры удмуртъёс. Озьы тӥни Кукмор котырысь кӧня ке гуртъёс чылкак бигере потӥзы. Е. Степанов. Татарстан. Каникулъёс, каникулъёс... Макем соос шулдыресь, но - вакчиесь. Ижевскысь пиналъёс понна дасямын вал быдэс программа. Пичи классъёсын дышетскисьёс Тол Бабаен но Лымынылэн бергазы пӧръям кыз дорын, бадӟымъёсыз вуылӥзы "Аксионысь" корольлэн балаз. Кызьы шуо, шулдыръяськон шулдыръяськонэн, нош уж ужен. Пинал кибашлыослэн центразы ветлӥсьёс возьматӥзы асьсэлэсь быгатонлыксэс. Каникул нуналъёсы ӵошатскизы авиамоделистъёс, гандболистъёс, биатлонистъёс. Уяны яратӥсьёс пыриськизы "Юный дельфин" спортивной конкурсэ. Умой ортчиз модаослы сӥзем ярмарка-фестиваль: нылъёс гинэ чебер дӥсяськыны уг ярато вылэм, пиос но паймытӥзы щеголь луыны быгатэменызы. Кырӟасьёс-эктӥсьёс шулдыртӥзы "Метелица" тол празднике люкаськемъёсты. Веранэз ӧвӧл ни, кӧня шумпотон кузьмаз Центральной площаде пуктэм Йӧ город. Уйшор бере но отын нискыласьёсыз вань на. Умой ук: анай-атайёслэн но шутэтскон нуналъёссы ӵапак тупазы тол каникулъёсын ӵош. Тросэз пиналъёс та нуналъёсы потазы шаермылэн палэназ, вуылӥзы кунгож сьӧры но. Огъя вераса, мӧзмыса пукыны дырзы ӧй вал. Л. МЕДВЕДЕВА. Туннэ - Печатьлэн нуналэз Кемалась ӧвӧл та нуналэз пусйиськом вал 5 мае ("Правда" газет потыны кутскемез сӥлы карыса). Нош шонерзэ ке, Россиын нырысетӥез печатлам газет потыны кутскиз Петр Первый эксэй кивалтон вакытэ выль 1703 ар азьын. Выль сямъя сое пусйиськом 13 январе. Озьыен, "Ведомости" ӟуч газет потыны кутскем дырысен 295 ар луэ. Та нунал капчи, лымы пырыез кадь тӧлъя лэчкатӥсь мылкыдзэ кузьма шаерысьтымы газет, журнал поттӥсь, чагыр экран, радио бордын ужась уно журналистъёслы. Соос понна туннэ - шуныт ӟечкыланъёс. Нош ваньмыз сярысь туннэ сюлмаськем газетамы азьвыл аръёсы ужам эшмы Алексей Ельцов. "Кизили" журнал, кытын со али ужа, "вунэм". Ми "кизилиосты" ӟечкыласьком - лыдъянтэм мед ӝужалозы. Чебер инбам! Коньдон быгатыса чотамез яратэ Жилищно-коммунальной хозяйствоын реформа ортчон сярысь туннэ ваньмы кылылӥм ни. Но юанъёс трос гинэ кылдо на. Туннэ соос пӧлысь тужгес лэчытъёсызлы валэктон сётэ Ижысь Администрацилэн кивалтӥсезлэн воштӥсез, городысь жилищной управленилэн начальникез Сергей Александрович Трухин. - Одӥгъёсыз оско, жилищной реформа кыӵе ке но пайдаё воштӥськонъёс ваёз ик шуыса, мукетъёсыз малпамъя, со политикъёслэн эшшо одӥгез "эрказъяськонзы" луэ. Нош тӥ кызьы малпаськоды? - Реформа кулэ. Жилищно-коммунальной хозяйство туннэ куашкан калэ вуэмын. Дасо аръёсын улон юртъёсмес "муртъёслы" пуктылӥм, та удыслы кылем-мылем коньдон но тырмылӥз. Туннэ ӝыныез юртъёс тупатъямез кулэ каро. Со понна ӧжытсэ 400 миллиард манет коньдон кулэ луоз. - Алигес вуылӥды Дание, тодматскиды, кызьы отын радъямын жилищно-коммунальной системазы. - Пичи гинэ скандинавской кунын котькуд семья ас доходысьтыз 40 процент палазэ улон интыез понна тыре. Со понна пӧсь вулы, шунытлы ёрмонъёс ноку уг луо. Шунытэз чакласа возён вылысь, квартиралы быдэ нимысьтыз приборъёс юнматэмын: озьы уно коньдон шыръяське. Паймытэ мукетыз но, Даниын улон юртъёсы шунытлэсь 30 процентсэ жуг-жаг сутыса потто. Нимысьтыз вераны кулэ юон вузылэн чылкытэз сярысь. Ву бызён гумыоссы ог кызь ар вошъятэк чидало, сокем ӟечлыкоесь соос. Тупатъяло-эскеро соосты шорлыдын ньыль арлы одӥг пол гинэ. Вералом созэ но, асьмелэн "Удмуртэнерго" выллем предприятиос Даниын муниципалитетъёс кие сётэмын, прибылез ас киязы басьтыны соос уг быгато. - Сергей Александрович, иське, Даниысь тӥ пуромем мылкыдын берытскиды. Оло, 2005 арозь Ижевск кыкетӥ Копенгагенлы пӧрмоз? - Синмаськон синмаськонэн, но запад сьӧры котыр ласянь уиськыны кулэ ӧвӧл, дыр. Али Горжилуправлениысь специалистъёс технической университетысь тодосчиосын ӵош эскеро-чаклало мукет кунъёсын но жилищно-коммунальной системаез радъямзэс. Кылсярысь, "хрущевкаосы" шуныт сётыны тужгес тупасал Германилэн ужан амалэзъя. Но быдэсак йылпумъянъёс туннэ шуг на лэсьтыны. - Иське, юанмес мукет сяменгес пуктом. Мар лэсьтоно, куать ар ортчыса, республикаямы улӥсь квартираяз вуись шуныт, ву, газ понна мед тыроз шуыса. Туннэ уго "нимыз понна" гинэ коньдон кисьтӥськом. - Ӝоггес дасяно но кутоно электрокужымез валаса шыръян сярысь законэз но пӧртэм пумо правовой актъёсты. Кыкетӥез ужрад - "Удмуртэнерго" но мукет шуныт сётӥсь предприятиос ужам ӟечлыксыя коньдон мед басьтозы шуыса, уже кутоно лыдъясь-чотась приборъёсты. Куинетӥез ужрад, шонерзэ вераса ужрадъёс, герӟаськемын шуныт но ву сётонэн. Кезьыт вулэсь ӟечлыксэ тупатон вылысь йылэтоно сӥсъёслэсь лыдзэс, пӧсь ву сётонэз радъяно Даниын сямен. Ньылетӥез ужрад: улон юртъёс пуктӥсь предприятиослы ужзэс возьматыны эрик сётоно. Соосын ӵошатскыны быгатозы частной фирмаос но. Азьланяз заводъёс тросэн поттоно луозы жилищно-коммунальной хозяйствоын кутӥськоно приборъёс. Уката ик шунытэз чотанъя счётчикъёс ӝоген котькуд квартиралы быдэ луозы. - Трос вераськиськом улон интылы тыронъёсты юнматон сярысь. Та пумысен пыр-почгес валэктэ на вал. Кызьы улоно ӧжыт уждун басьтӥсьёслы, ужтэк кылемъёслы, кудъёсыз квартира дунъёсты тырыны уз быгатэ? - Городысь Думалэн берпуметӥ сессияз котькуд улӥсьлы кӧня квадратной метр усемъя дун тырон сярысь решение кутэмын. Пӧртэм пумо льготаос кельтэмын луозы. Ужтэк кылемъёс понна кыл кутозы калыкез уже интыянъя центръёс. Заводъёс "улэп" коньдон интые ас продукциенызы тырыны быгато. Бен, нокыӵе мугъёстэк дун тыронъёс ӝегатэмлы кыл кутоно луоз законъя. Мар карод. Валалэ: витьтон вить сюрс улӥсьёс квартира дунзэс ӝынызэ гинэ тыро, эшшо витьтон сюрсэз дун тыронлэсь быдэсак мозмытэмын. Коньдонэз шыръяны дышетсконо. Умойгес луоз, та ужен дыртӥм ке. Д. МОДЗЕЛЕВСКИЙ. Вандэ - яралоз Туэ 1-тӥ январьысен уже кутӥське вуж но выль коньдон. Магазинын яке мукет азьын лыдъян-чотан дыръя медад сураське шуыса, тӥледлы, гажано лыдӟисьёсмы, сётӥськом вуж но выль коньдонэн лыдпусъёс. Та таблицаез тӥ вандэ но понэ коньдон возён пуйыады. Малпаськом: шугъяськон дыръя со тӥледлы юрттоз. Вуж коньдон Выль коньдон 1 манет - 0,1 копейка 5 манет - 0,5 копейка 10 манет - 1 копейка 20 манет - 2 копейка 50 манет - 5 копейка 100 манет - 10 копейка 500 манет - 50 копейка 1 сюрс манет - 1 манет 5 сюрс манет - 5 манет 10 сюрс манет - 10 манет 50 сюрс манет - 50 манет 100 сюрс манет - 100 манет 500 сюрс манет - 500 манет Куӟебай Гердлэн вордскем дырысен - 100 ар Валамтэос пыкылӥзы 1998-тӥ арын январе, асьме дорын сяна, трос мукет кунъёсын пусъёзы удмурт калыклэн дано эшезлэсь Куӟебай Гердлэсь вордӥськемез дырысен 100 ар тырмонзэ. Маин со сыӵе дано луиз? Нырысь ик, вордэм калыкезлэн фольклорез вылэ пыкиськыса кылдытӥз сюлме пыӵамонэсь, йыре кемалы кылись кылбуръёссэ, асьме котырысь инкуазьлэсь чеберлыксэ данъян, вордэм калыкезлэсь малпаськонъёссэ, шумпотонзэ но куректонзэ усьтӥз, ваньзэ сое ас сюлэмыз но визез пыр поттыса, дунне вылысь калыкъёсты тодматӥз калыкезлэн улон шоры учкеменыз но туж шырыт сямо луэменыз. Революцилэсь азьло гожтэм чуръёсаз ик К. Герд туж жаляса гожъяз калыкезлэн курадӟыса улэмез сярысь: Э, куанер калыке, туж шудтэм калыке, Тынэсьтыд шудтэмез вань меда кытын ке? Изьытэк, дӥськуттэк, гольык пыд ветлӥськод, Ас кӧттэ тырытэк, ляльчиын улӥськод, Ку меда, кужымдэ люкаса, тон султод? Кырӟаса бусыдэ гырыны потылод, Шумпотса кидыстэ пазялод, кизьылод? Уката ик секыт луиз удмурт калыклэн улонэз нырысетӥ мировой война дыръя, соку егит нылъёслэн но карттэм кылем нылкышноослэн кырӟамзы "бӧрдэм кадь ик кылӥське". К. Герд со секыт дыръёсы но ас калыксэ буйгатыны турше, оске: удмурт калыклэн но шудэз-бурез кытын ке но вань али, со луоз, выль шунды вордскемен. Пеймыт уй, секыт даур Тулыс лымы кадь быроз, Шунды ӝутскоз - выль югдур Вань калыкез шунтылоз! Сыӵе выль югдур удмурт калык доры революция пыр вуиз, сое поэт лыдъя туж дано шундыен: Тон шунды, Выль улонэз, Выль дуннееез Лэсьтӥсь, шунтӥсь шунды! Озьы Герд вера революцилы оскемзэ, ас калыкезлы но со шудбур ваёз шуэ кадь. Уката солэн мылкыдыз бурдъяськиз, удмурт калыклы но автономия сётэм сярысь тодыса. Таӵе учырез данъян вылысь, К. Герд нимысьтыз гожтӥз "Удмурт гимн": Тазалыко мед луоз Республикамы, Туж ӟеч мед улоз яратон музъеммы! Тэльёс, паськыт бусыос эрказ луизы, Чебер шунды ӝужаз - калыкъёс султӥзы. Тазалыко мед улоз Республикамы, Туж ӟеч мед улоз яратон музъеммы! Эй, султэ чаляк, удмуртъёс, вырӟе, эн изе! Кутске ваньды ужаны, ужан дыр вуэ... Тӥни озьы поэт революциез шундыен ӵошатэ но вордскем калыксэ ӟечгес ужаны ӧте. Соин ӵош ик татын со данъя "Республикаез", нош удмуртъёслы "автономной область" гинэ сётэмын вал, соин К. Гердлы "Республикаез" "область" кылын воштыны дэмлало, но поэт сыӵе дэмланлы пумит луэ: удмуртъёслэн но республиказы луоз али. Зэмзэ ик, 14 ар ортчыса, 1934-тӥ арын, Удмурт область интые, Удмурт Республика кылдӥз. Озьы поэт азьпала учкиз но, верамез солэн зэмаз. Со сяна, К. Гердлэн сюлэмаз уг тэры вал ас калыксэ "вотяк" кылын ултӥяса верамзы. Талы пумит со гожтӥз "Вотяк" бадӟым кылбурзэ: Кулэ ке вал ӟуч эксэйлы, Поплы, вузкарисьлы Удмурт куанерез сюпсьыны, Солэсь синзэ, кылзэ пытсаны кыӵак, Шукке вал вир урысэн: "Вотяк!"... Бай коркан, Тон ӝӧк сьӧрын - Зын дэри кадь гыаз ляк-ляк "Вотяк!".. Султы, ужась удмурт!.. Султы батыр кадь Быдэс мугорын. Эрик сётылӥз тыныд бурд, Тон ук, тон табере Нырысьсэ: "Удмурт!" Таӵе чуръёс ик юрттӥзы удмурт калыклы ас нимзэ басьтыны, печатлам бере кӧня ке ар ортчыса. К. Герд туж сюлмаськиз удмурт крестьянлэсь ужзэ капчиятон сярысь, пӧртэм кылбуръёсаз но, статьяосаз но дэмлаз музъем ужан машинаосты уже кутыны, та ласянь туж тунсыко луэ "Трактор" кылбурез: Парсьгуртэ выль вал вуиз, Выль нимо - Трактор, Вань пересь калык шуиз: - Учкыны со туж мотор, Нош кутскиз ке ужаны - Каргалод, бӧрдод. Герыен ик гырыны Нош ик, дыр, кутскод... Верамзэс Трактор кылзӥз, Кутскиз ук ургетыны. Зурк! вырӟиз, собере кошкиз Бусые гырны. Сабанъёссэ мертчатӥз Чурыт музъеме, Сапкыса азьлань кошкиз Быдэс иськеме. - Абдралод ук, Истёпан, Вал кадь та вылэм! - Абдра Лукъян, Емеллян, Вань калык сылэ... - Вае, коньдон люкаса, Трактор ваёме, Ог семья кадь улыса, Шудо луоме... Та туж тунсыко гожтэм кылбураз К. Герд огъя ужаны ӧте, машина басьтыса, секыт ужез капчиятыны дэмла. Кылбурлэн пумаз нимысьтыз валэктон сётэ: "Трактор - музъем ужан машина". Со вал 1927-тӥ арын. Нош куке колхозъёсы огыр-бугыр луэм калыкез огазеяны кутско, куке пӧртэм адямиослэсь пудо-животъёссэс, одӥг гидъёсы яке лапас улъёсы люкаса, бырон калэ вутто, соку ини К. Герд сюлмыз вӧсь луыса гожтэ "Гуртын буран" бадӟым кылбурзэ. Отын А. Блоклэсь символической амалзэ кутэ, калыкез ултӥямзэс чидамтэеныз со вера: Лудын - выль тӧл, Выль тӧл пыре, Выль тӧл шере Лэчыт шизэ... Гидэ, корка Выль тӧл йыга. Лымы - пуля. Сӥльтӧл - пыӵал. Пыӵал чиля. Пуля пыӵа Йыре, вире, Йырви - ыме, Вань му - горе, Вань улэме... Колхозэ кышкатыса, пыӵалэн но пуляен "шудыса" пумит султӥз поэт. Со уго адӟиз, ас вордӥськем палаз ог 40 гуртэз коммунае люкаса, туж алама учыре вуэмзэс, трос пудо-животлэсь быремзэ, соин вазиськиз пыӵаллы но пулялы пумит - нош со понна К. Гердэз пыкылыны кутскизы, колхозъёслы пумит мынэ шуыса. Кылбурчи озьы ик данъяз рабочий классэз, со умой адӟиське "Уж" кылбураз, нош "Завод" поэмаез, зэмзэ ик, ужась киослы гимн луиз: Киосмы дугдылытэк Тӥяло, вандыло, Лусйыло, ӟырдато, Тышкало, паньгато, Портыло, вуштыло, Сузяло, тупато, Быдэсто - Выль тӥрлык кылдыто, Калыклы кузьмало... Та поэмаез К. Герд кылдытӥз Заводлэсь нимысьтыз лулъям образзэ: со адями кадь ик улэ, шока, ужаны кутске соку, куке ужасьёс лыкто но солэн "вирсэръёстӥз" ветлыны кутско, сое вырӟыто, ужато, бергато. Нош "Карлы" кылбураз поэт умой тупась кылъёс шедьтэ городэз данъяны: Шумпотон но выль шудбур, Выль кырӟанъёс тон сётӥд. Выль кужым но выль кылбур Мынам сюлмам ӝуатӥд. Шулдыр, бугрес из каре, Тон монэ паймытӥськод: Чебереныд табере Монэ бордад кыскиськод... Заводэз но городэз данъян вакытэ ик К. Герд гожтэ "Чагыр ӵын" поэмазэ. Солэн героез, гуртысь лыктэм пияш, заводын яратон нылзэ но шедьтэ, нош озьы ке но, отын ужаны, улыны солы уг кельшы: Татын, Паврикын, Ӝокыт, шимес... Сяська, Лыз сяська, Татын шуя. Бусы возьёсыд Уг адскыло, Мӧзмись Сюлэмез Уг тодыло... 1920-тӥ арын ик К. Герд адӟе ини, кыӵе секыт омыр заводын, городын, со сярысь асьмеос али, 75-77 ар ортчыса малпаськыны кутским ини: экология шуон сярысь вераськыны ӧдъямы, нош дано поэт, бадӟым сюлэмо но трос малпаськись мурт, соку ик адӟиз ини, кытчы вуттоз заводлэн сьӧд но чагыр ӵынэз, кызьы со сапталоз отын ужасьлэсь улонзэ, быдтоз тазалыксэ. Тӥни озьы, зэмзэ ик гениальной писатель сюлме пыӵамон произведениоссэ кыдёке азьпала учкыса но валан сётыса гожтэ, нош ас вакытаз валамтэос сое пыкылыны кутско, заводлы пумит султэ шуыса. К. Герд трос гожтэмъёсаз шараяз но сэрттӥз-пертчиз азьпала улонлэсь сиоссэ, кыӵе буёлъёсын соос воректозы (яке уз) асьме калык понна. Профессор Ф. Ермаков. Ку луоз Гердлы памятник? "Мон памятник ӝутӥ аслым, киын лэсьтонтэмзэ..." - удмурт кылэ берыктыса, тазьыгес вераны луоз, дыр, Пушкинлэсь кылъёссэ. Кузебай Герд но, удмурт калыклэн бадӟым пиез, улэп дыръя ик аслыз сыӵе памятник "ӝутӥз". Юнме ӧз шуы, дыр, одӥгез тодосчимы (удмуртъёслэн берло ӧтчамазы): "Герд куинь пол секыт кыске, мукет писательёсты валче карыса..." Зэм, со туннэ нуналлы гинэ ӧз ужа, быдэс удмурт калыклы сюрес ӵогиз кыдёке азьпала, но югдытӥсь тылсиоссэ пеймытын ӝокатӥзы... Табере со тылсиос выльысь кыре пото, аръёс ортчемъя, эшшо но эшшо вылынгес адӟом Гердлэсь ӝуждалазэ. Таӵе национальной геройёссэс мукет республикаосын кемалась данъязы ни зэмос памятникъёсын. Тани Чувашиын, кылсярысь, дано классиксылэн М. Сеспельлэн нимыныз нимазы вордӥськем гуртсэ, отчы бадӟым памятник ӝутӥзы, музей усьтӥзы, вордскем корка интыяз мемориальной пул пуктӥзы. Чебоксарыын вань Сеспель нимо кинотеатр, урам, шор площадязы - памятник. Соин ик Чувашие 1994 арлэн пумаз ӵош; ветлэммы бере, кылбурчи Галина Романова таӵе ӝож мылкыдзэ вераз вал "Удмурт дунне" газет пыр: "Малы асьмелэн быдэс дуннелы тодмо классикмылы, учёноймылы Кузебай Гердлы тырмыт сӥ-дан ӧвӧл, малы Вавож районысь Докъя гуртаз коркаезлэсь бервылзэ но шедьтыны уд быгаты ни? 1998 арын Кузебай Гердлэн вордскемез дырысен 100 ар тырмоз. Нош кызьы асьмеос сое пумиталомы? Дорамы куное лыктэмзы потоз кнугож сьӧрысьёслэн, нош кытчы, мае возьматыны нуом асьмеос, дано классикмылэн йӧн-йӧн музеез гинэ но ӧвӧл бере? Дыр трос ӧз кыльы ни, озьы ке но, али ик чырмыт, мылысь-кыдысь басьтӥськимы ке, оло, вуом на быдэстымтэ туж кулэ ужмес лэсьтыны. Тани со дыр вуиз. Мар бен лэсьтӥськиз? Вылӥ кивалтон ёзъёс та дано юбилейлы дасяськон программаосазы ӧз вунэтэ К. Гердлэсь нимзэ синпелетъёсын данъян сярысь. Тани, шуом, Ижевскысь Первомай районын Пионеръёслэн юртсы борды мемориальной пул юнматэмын луоз, Ленин районын Кузебай Герд нимо выль урам кылдоз. Шоркарамы луоз памятник. Кыӵе со луоз, Иж карын Кузебай Гердлы памятник? Али сое нокин вераны уг быгаты на. Нош кытын со луоз? Пель сьӧрам шуккиське К. Гердллэн племянникезлэн Юрий Андреевич Чайниковлэн удмуртъёслэн ВИ Ӧтчамазы сюлэмшуго верамез: "Кузебай Гердлы памятник луыны кулэ Центральной площадьын. Гоголь нимо бульвар - солы инты ӧвӧл. Отын пуныос калго, юэмъёс костасько..." Бен, памятниклы инты нырысь-валысь чакламын вылэм со бульваре, Советской урамлэн вылланяз, кытын К. Чайников (Герд) усьтӥз нырысетӥ нылпи юрт. Юбилейлы дасяськонъя оргкомитет та малпанэз воштӥз, но... Городлэн генеральной планэзъя чакламын ӧвӧл Центральной площаде яке мукет адскымон интые кыӵе ке памятник пуктыны, огъя сӧзнэтэ со уг тупа. Нош мар ке но малпано. Югдурез валэктэ республикаысьтымы Культурая министерствоын ужась (памятникъёс понна кыл кутӥсь) Сергей Иванович Погудин: - Архитекторъёсын ӵош устоезлы проектлы конкурс ортчытон вылысь, программа лэсьтэмын. Конкурс кык этапен ортчоз: архитектурно-скульптурной ужлы инты быръёнъя, планировкая но солы тусбуй кылдытонъя. Та конкурсэз ортчытонлы но премиослы 20 миллион висъяны чакламын. Уж быдэстэмын луыны кулэ 2000 арозь. Али тросэз потэ Ижевскысь мэрилэн решениез бордысь, кытчы со музъем сётоз. Милям ужмы - конкурс ортчытыны, собере из-синпелет ке но интыяны. Нош бадӟым памятник (быдэс мугор тусын) лэсьтон - туж дуно уж, миллиардъёс кулэ... Валамон кадь: таяз даруе Кузебай Герд излэсь (яке, шуом, бронзалэсь-туйлэсь) быдэс мугорын уз ӝутскы на асьме син азе. Сыӵе бадӟым памятник-скульптура лэсьтыны ӧжытсэ кык ар кулэ, - шуэ Удмуртиысь художникъёслэн огазеяськонзылэн ёзчиез Борис Козлов. Со шаерысьтымы тодмо скульптор. Укно дураз - К. Гердлэн памятникезлы эскизъёс. Тани таиз - Кузебай сылэ, мугорыз веськрес, лобӟыны дасяськем кадь, кизэ ӝутэм. Мукетыз - пуке, малпаське... Нош тани басма-шобыр улын ватэмын (таки палэнтыса учкем потэ ни) поэтлэн ӝыны тусбуез - бюстэз. Со, пе, али сюйлэсь ай. Нош ку быдэсмоз? - Нырысь ик, гипслэсь лэсьтоно, собере бронзалэсь кисьтоно. Сыӵе заводъёс Мытищеын но Питерын вань. Постаментлы гранит кулэ. Карелиысь вайысал ке... Памятник котырез утялтыны дыр кулэ на. Скульптор вера Вавож черкогуртын туэ июне усьтоно памятник сярысь. Керӟегъяське - дыр ӧжыт кылемын, нош культурая министерствоен одӥг кыл ӧз шедты на. - Мон ньыль пол смета лэсьтылӥ, кӧня коньдон кулэ луоз. Эскизъёсын проектъёслы. Бюст лэсьтоно кариськи - тазэ коть библиотекае пуктыны луоз. Министерствоен огкыл (договор) лэсьтыны нокызьы уг быгатӥськы. Кулэ ини али ик гранит, бронза, литейка вылэ потыны, нош со понна решение кутыны, коньдон висъяны. Культурая министерстволэн дыртымтэезлы паймисько, - киоссэ вӧлъя Борис Михайлович. Солэн верамезъя, правительстволэн висъям 50 миллионэз тырме ни проектной ужъёс, бюст лэсьтон но сое туйлэсь кисьтон понна тырыны. Нош вань на ук гранит пыдул тупатон, памятник котырез чеберъян, архитекторъёслэн лэсьтӥськисьёслэн ужзы... Вавожын кема гинэ барйизы памятниклы инты. Огъя кенешыса вераськизы пуктыны нылпи библиотека азе, кытын вить ар талэсь азьвыл понэмын ни вал буре ваён из. Нош улэм корка бервылаз стела (мрамор плита) ӝутыны трос дыр но кужым кулэ ӧвӧл. Тазьы малпало та ужез быдэстыны оскем адямиос. Ву шапык пася изэз. Озьы ик художник-скульптор но. Лэсьтӥз-лэсьтӥз, портӥз-портӥз ке, Борис Козловлэн одно ик пӧрмоз. Пор калыклэн шаплы но кибашлы пиез удмурт калыклэн дано пиезлы "киын лэсьтонозэ" памятникез одно ик ӝутоз. Валамон, архитекторъёсын уртче. Кивалтӥсь ёзъёс дыртӥзы ке. ТАТЬЯНА ЧЕРНОВА. Вуж Выль арен-выльмись шудбурен! Элькунысьтымы иворъёс вӧлмытон удысын ужасьёслы эшлыко чуръёс: "Удмурт дуннелы" Ӟечкыласа, Вуж Выль арен, "Берекет", дуно эшъёс! Медаз берытске берен Ортчем арысь секытъёс. Тазалык, бадӟым шудбур. Дано лу, "Удмурт дунне"! Юимы ке но мусур, "Шӧкычмы" зӥбыт туннэ. "Ӟечбурлы" Ӟеч но бур, эше "Ӟечбур!" Сӥзисько тыныд шудбур: Верос, мадёс но кылбур, Чибориё суредъёс, Чебер-визьмо шудонъёс, Дасо сюрсъёсын тираж - Выль ар медаз лу мираж! "Кенешлы" Выль арлэсь вуэмзэ пусйыны "Кенеше" ми туннэ люкаським. Ми дышим ини лыдӟиськыны - Ваньмы-ваньмы солы гожтӥським. Арлыдын тон ини песятай, Нош мылкыд ай тынад экелэн. Кужымед но ошлэн кадь, ай-ай! Петыркар куашкалоз шат тӧлэн!? "Инвожолы" Ожо вожо, ожо вожо - Ожолэсь но чебер "Инвожо". Яблок гордо, яблок гордо - Яблоклэсь но, оло, тӥ гордо. Вуюись ворпо, вуись ворпо - Вуюись кадь гожъямъёс пӧрмо, Сутэр сьӧдо, сутэр сьӧдо - Улонмы нош Мед луоз шудо! "Вордскем кыллы" Пель но, син но солэн сак, Чик уз пукы со чусак. Кытын ке вордскиз выль кыл, "Вордскем кыл/ бере уз кыль. Валэктыса гожъялоз, Радэн-радэн сӧзналоз, Чеберъялоз, буялоз, Зӧкосак печатлалоз... Удмурт радиолы Тулкымъёс вылын кырӟало-экто. Я либыт кылын изьыны выдто... Шудэ-верал уката но зол. Удмурт му вылэ Васькемын выль тӧл. Чагыр экранлы Чибориё-чибори Мед пиштоз чагыр экран. Сяськаос трос ӟыгыри Тол куазен кузьма "Питран". Шуд но бур, ӟеч эшъёсмы! Мед луоз Выль ар бусьтыр, Сюлмаськиз ке муш мумы, Ӝӧк вылыд но луоз тыр. Гажаса - Алексей Ельцов. Малпаськытӥсь югдур Куашкам выж дурын... Ылё-кырсё мылкыдын 1998-тӥ арез пумитазы Селта ёросысь Головизнин Язок посёлокын улӥсьёс. Татын азьло нюлэс дасясьёслэн посёлоксы вал, ужазы Игралась леспромхоз понна. Выль арез соос, оло, воксё вож кызтэк но пумитазы. Головизнин Язок посёлокез Инмарен вунэтэм сэрег шуыны луоз. Улӥсьёс асьсэдыз сандалэн молотэн вискын кадь лыдъяло. Кӧня нюлэс поттэмын? Туннэ сое зӧк йӧ ултӥ кошкись Кильмезь шур гинэ тодэ на. Ваньбур поттыкузы, Игралась кивалтӥсьёс но гуртоос сярысь сюлмаськизы. Посёлок арысь аре чеберскиз, калык бурдъяськем мылкыдын улӥз. Ёрос центрын улӥсьёс соос шоры вожъяськыса кадь учкылӥзы. Ваньмыз ас ӧртӥз радъяськиз ни вал, шӧдтэк шорысь Головизнин Язок вадьсын куаратэк чилектӥз - нюлэс быриз, ужан удыс ӵакмиз. Пурысь ӵын вӧлмиз кадь быдэс посёлоке. Пытсаськиз нянь пыжонни, мырдэм шока медпункт, ньӧмыз понна гинэ сылэ начальной школа; кылемын одӥг шумпотонзы - магазин. Посёлокысь ваньбур Играысь леспромхозлэн лыдъяське, нош медпунктын, школаын, магазинын ужасьёслы коньдон тыре Селталась администрация. Одӥг интыын кык мурт кузёяське ке, тод: улонлэн радлыкез уз сюры. Выжыкылын выллем ик луиз. Селтаос шуо, со, пе, играослэн коркаоссы. Играос коньдон ӧвӧлтэмзы вылэ чӧлско, калыкты, пе, тӥляд музъем вылады улэ, тӥ ик соослы юрттэ. Огшоры адямиос солань-талань кыстаськоно луо. Вылӥ кивалтӥсьёс одӥг кыл шедьтытозь, посёлок дорысь выжез тулыс тудву нуиз. Головизнин Язокын улӥсьёс аспӧртэмлыко шормуӵе кылизы, нош бадӟым музъем вылэ потэмзы уг луы. Огласянь котыртэ корам бере, пушъетм нюлэс, мукет ласянь - шур. Ярано коть ньӧмыз понна ке но, омырын лэйкась выжзы вань на, кудӥз ӟеч кыл вылын возиське. Тол куазен тросгес лымы усиз ке, со но куашкалоз, вылды. Головизнин Язок посёлоке ветлӥзы Ижевскысь но Селталась кивалтӥсьёс. Вераськон мынӥз Кильмезь шур вамен потан выжез лэсьтон пумысен, 238 адямиез югыт дуннелэсь четлыкаса уд возьы ук. Куинь пӧртэм амалзы вал: лэсьтоно коръёслэсь выж; пуктоно понтон выж яке бетонлэсь чылкак выльзэ ӝутоно. Нырысетӥ ӵектонэз соку ик палэнтӥзы. Арлы быдэ пуктыны коньдон но, коръёс но уз окме, тудву сое уз юа, ваньзэ "ньылоз". Понтон выжез возён понна, нимысьтыз чаклась адями кулэ луоз. Солы нош ик манетъёс жильдӥськозы. Мукетыз но сюлэмшугъяськытэ: Кильмезь шурлэн мурдалаез ялан шудэ. Угось, гужем со вамен ӟазегъёс но вамышъяса потыны быгато. Кивалтӥсьёслэн лыдъямзыя, бетонлэсь выж 3 миллиард манет пала усёз, шорлыдын котькуд семьялы быдэн 150 миллион манетэн луэ (деноминация дорозь коньдонэн вераса). Куд-огез малпаськонэ усиз, оло, та коньдонэз котькуд семьялы висъяса, быдэс посёлокез мукет интые выжтоно? Соку нокыӵе но выж кулэ уз луы ни. Нош кытысь сомында коньдон? Инмар гинэ медам кыл: шӧдтэк шорысь тылпу потӥз ке, татчы нокыӵе тылпу кысон машина уз ву, нош пу коркаос минут куспын пеньлы пӧрмозы. Ма, Кильмезь шур эрказъяськыса тудӟыны кутскиз ке, ваньзэ гылтоз, сьӧраз нуоз, дыр. Нош со ялан жильыртэ. Огвакытэ лесоучастокысь кивалтӥсьёс солэсь ӧрзэ шонертыны малпаллям, кожъёсын пуръёс медам дэмӟылэ шуыса. Корт пинё кобыосын тракторъёс выль сюрес копазы. Кильмезь шур отӥ куинь ар бызиз, собере чиданэз быриз но выльысь ас ӧраз кожиз. Ягдуръёс паськытало. Ӝоген гуртоослэн пудо гидъёссы но мунчозы, корен-корен питыраса, Кильмезь шуре уяны пырозы. Играысь леспромхозлэн кивалтӥсез Михаил Лошаков малпаське меда со сярысь куке? Ялан вуо, эскеро, ужпумез сэртто-пертчо шуэм кылъёсын калыклэн кемалась кӧтыз тыриз ни. Ма, юнме уг шуо, лэся, верам кыллэсь быдэсмемзэ куинь ар, пе, возьмано. Валантэм мылкыдын, шур дурын пилиськем тусь, шонергес вераса, куашкам выж дурын, Выль арез пумитазы Селта ёросысь Головизнин Язок посёлокысь азьвыл нюлэс дасясьёс, али нокинлы но кулэтэм 238 адями. Георгий Грязев, Удмурт телевидениысь журналист. Выжыос, пушъетъёс, тылсиос Кузебай Гердлэн вордскемез дырысен ӵуказе 100 ар тырме Удмурт калыклэн, шаермылэн историяз ӧй вал на таӵеез. Асьме выжыысь адямилэн вордскем нуналыз пуйиське ЮНЕСКО калык куспо организация ас бурд улаз басьтэм улсын. 1998 ар ялэмын удмурт калыклэн быдӟым пиезлэн Кузебай Гердлэн ареныз. Кузебай Герд - поэт но переводчик, драматург но прозаик, этнограф но фольклорист, актёр но педагог, публицист но общественной деятель. Кыӵе выжыос, пушъетъёс но тылсиос сётӥз со асьме улонэ - тае адӟытон вылысь, Национальной библиотекаын усьтӥськиз "Кузебай Герд но туала дыр" выставка. Выставка усьтӥське "Выжыос" люкетэн. Отысь адӟиськом, мар бордысен кутскиз Кузьма Павлович Чайниковлэн (Кузебай Гердлэн) творческой сюресэз. Тани финн-угор калыкъёслэсь культуразэс эскерисьёслэн сборниказы (1929) К. Герд вера, кызьы солы анаез юрттӥз фольклор борды кыстӥськыны, кылзэ, тематиказэ узырмытыны. Пичи дыръяз ик визьмаз пыӵазы Гавриловлэн, Первухинлэн, Верещагинлэн, Мункачилэн люкам ужъёсазы пумиськылӥсь лэчыт веранъёс. Вавож школаысен со паймыса лыдӟылӥз Горькийлэсь веросъёссэ. Вылӥе пуктылӥз Пушкинлэсь но Лермонтовлэсь поэзизэс, мар ке но ласянь дышетскиз Маяковскийлэсь, Есенинлэсь, Блоклэсь. В. Брюсов нимо литературно-художественной институт К. Гердэз матэ кариз пӧртэм калыкъёслэн дано пиосызлы. Выставкаын соос адӟытӥсько: Педер Хузангай, Йыван Кырля, Муса Джалиль, Антал Педаш, Анри Барбюс, Надым Хикмет, Иоганнес Бехер... Таӵе адямиосын тодматскемез но эшъяськемез визьмо удмурт пилэсь азьпала учконзэ паськытатӥз, быгатонзэ пушйытӥз. 34 арес вал Гердлы, арестовать карыкузы. Со дырозь гожтыса вуиз: - 500 пала кылбурен произведениос; - куать пьеса; - кык повесть; - роман; - 150 котырын статьяос но научной ужъёс. Ваньмыз со - дунъянтэм узыр лул пушъетъёс. К. Герд удмурт литературалэн но наукалэн трос удысазы азьветлӥсь вал. Со удмурт театрез кылдытӥсьёс пӧлысь огез. Тани (выставкаын) "Люгыт сюрес вылэ" (1919, Елабуга) пьесаез. Тани "Матӥ" (1920, Сарапул) повестез - нырысетӥез нимаз книгаен поттэм удмурт произведение. К. Герд - удмурт поэзилы кужмо бурдъёс сётӥсь. Нылпи кылбуретэз но со инъяз, нырысьсэ нылпи журнал ("Муш", 1920) кылдытӥз. 13 аръёс ӵоже гожъяськытозяз, куинь кылбур сборник поттӥз: "Крезьчи" (1922), "Сяськаяськись музъем" (1927), "Лёгетъёс" (1931). Вуж книгаосыныз артэ выльёссэ но адӟиськом (26 ар ортчыса гинэ поэтлэн дано нимыз берыктэмын): "Кылбуръёс но поэмаос" (1963), "Лирика" (1965) - татын ваньмыз сямен Гердлэн аслаз ӟуч кылэ берыктэмъёсыз, "Гажан эше" (1978), "Ступени" (1985), "В полете к Солнцу" (1989). Кие кутымон луэ, люкам сочинениосын нырысетӥ томлы ӵоша 1994 арын потэм "Та кырӟанъёсы, турагайёсы" сборник. Нош тани ӵыж вылесь кык книгаос: "Зарни кыл чуръёсы" но "Золотые мои строки" - али гинэ "Удмуртия" издательствоысь вуизы. "Вотская литература" но "Вотяцкая художественная литература" статьяос возьмато, Герд литературовед, критик но вал шуыса. Сарапулын, Мускоын но Ижын поттэмын люкам удмурт кырӟанъёсыз. Нылпиос понна Герд дасяз кык хрестоматиос: "Шуныт зор" (1924) но "Выль сюрес" (1929). Наука понна тужгес дуно луэ К. Гердлэн "Адями но солэн вордӥськемез" ужез. Трос профессоръёс-этнографъёс лыдъяло, татын удмурт калыклэн улон-вылон сямъёсыз яркыт возьматэмын шуыса. Кузебай Герд - нырысетӥ журналистъёс радысь солэн публицистической статьяосыз яркыт но валамон кылын калык сюлэме вуттылӥзы туннэ нуналлэсь ужпумъёссэ. 1919 арын К. Гердлэн ки улаз сюриз "Сборник финляндской литературы", кудзэ 1917 арын поттӥзы яратоно дышетӥсьёсыз М. Горький но В. Брюсов. Со бугыртӥз удмурт кылбурчилэсь мылкыдзэ. "Калевалаез" лыдӟыса, со малпаз удмурт калыклэсь эпоссэ утчан но кылдытон борды кутскыны. Озьы, 1922 арын со Суомие ыстэ нырысетӥ гожтэтсэ - Финн-угор обществое пырыны куриськонзэ (со озьы ик выставкаын вань). Та дырысен Кузьма Павлович Чайников Финляндие ыстэм адями кадь луиз: ивортылӥз удмурт калыкез дышетонын, культураын, литератураын вылез сярысь, котькудзэ Мускоын, Кузонын, Ижын потэм выль книгаез Суомие ыстылӥз, Европаын но мед тодозы шуыса сюлмаськиз. Озьы со аслэсьтыз финн архивзэ люказ. Та выставкаысьтымы адӟыны луэ Гердлэн 1932 арын Финляндиын дасям но поттэм библиографиезлэсь ксерокопизэ но. Озьыен, 20-тӥ аръёсы Кузебай Гердлэн нимыз удмуртъёс пӧлын нырысьсэ тодмо луиз кунгож сьӧр лыдӟисьёслы. Финн но венгер кылын печатламын вал солэн калык национальной театрлы сӥзем статьяез, немец кылын - удмуртъёслэн мадиськон ӝытъёссы сярысь гожтэмез. Нош 1927 арын Венгриысь коммунистъёслэн лушкем потӥсь "100%" журналазы Антал Педаш берыктыса сётэм Гердлэсь кылбуръёссэ. Удмурт кылбурчилэсь, тодосчилэсь ужъёссэ чидатэк возьманы кутскизы. 1929 арын, йыр вадьсазы пилемъёс бугыръяськыны кутскемез шӧдыса, К. Герд Финляндие ыстэ сюлэмызлэн ог люкетэз кадь луэм ужзэ - "Адями но солэн вордӥськемез" диссертациезлэсь нырысетӥ люкетсэ. Со шӧдӥз, вынлыко шаерын рукописьсэ утёзы, оло, куке печатлалозы но, удмурт калыкезлы но берыктозы. Зэмзэ ик, К. Гердлэн та туж дуно ужез утемын, 1993 арын сое Финляндиын печатлазы, табере та книга асьме дорын, котькудӥз ас синмыныз адӟыны быгатэ. Нош кӧня ужез Гердлэн чиптэм-чаптэм ышемын (выставкаын со список но вань): роман, куд-ог пьесоас, кылбуръёс, научной ужъёс... Нош оскон уг ышы - оло, куке сюрозы на та лул "марӟанъёс"... Гердлэн улэменыз но творчествоеныз тунсыкъяськисьёслэн лыдзы арысь аре будэ - асьме дорын но, кунгож сьӧрын но. Нырысетӥ "гердовед" шуыны луоз Фома Кузьмич Ермаковез. Асьме литературоведъёс пӧлын со нырысьсэ печатлаз К. Гердлы сӥзем ужъёссэ: "Удмуртский поэт и учёной", "Удмуртская поэма". Кылем арын май толэзе библиотекаямы вал "Кузебай Герд. Жизнь и творчество" монографиезлы презентация. Ф. Ермаков ик дано классикмылэсь куать томъем люкам сочинениоссэ дасяз (пусйим ни, огез потӥз). Выставкае ватсаськыны кулэ на Зоя Богомоловалэн Герд сярысь тодэ ваёнъёсын, статьяосын "Как молния в ночи" бадӟымос книгаез (печатласа ӧз вуттэ). Гердлэсь творчествозэ эскеро тодосчиос- писательёс Александр Шкляев, Василий Ванюшев, мукетъёсыз. Со сярысь гожъяло кунгож сьӧрын. Огъя вераса, туала улонмы Кузебай Гердтэк ӧвӧл. Дуннелы со кулэ. Таӵе бадӟым адями понна со туж бадӟым дунъет. Озьы ик сое вордӥсь удмурт калыкмы понна но. Надежда Лимонова, Национальной библиотекаысь финн-угор литературая но шаертодонъя люкетэн кивалтӥсь. КЫСКОЗЫ МУ ВӦЙ Красногорск. Татысь Зотово, Потапово но Нефедово гуртъёс котырын му вӧйлэн ванез вазенгес ик тодмо луиз. Но татчыозь сое ӧз поттылэ вал. Али та интыосысь му вӧез кыскон пумысен кагазъёс дасясько. Жаль, та ваньбур нош ик палэнэ кошкоз, уго му вӧй кысконэн кивалтоз Москваысь одӥгез межрегиональной огазеяськон. Н. ЛЕСОВА. Ялэмын конкурс Ижевскысь Молодёжной-Союзной урамъёсын, Калашниковлэн проспектысеныз Южной урамозь уно музъем буш кылле. Соосты пайдаё но валаса уже кутон вылысь, Ижысь администрация, Удмурт Республикаысь Архитекторъёслэн союззы, "Метеор" завод ӟеч эскиз-идеялы конкурс яло. Проектын чакламын луыны кулэ шутэтскон юрт, вузъёсты тросэн вузанъя базар, гаражъёс, лыктэм куноослы чаклам автостоянка но мукет. Конкурсэ пыриськыны быгатэ котькуд мылкыд карись, кин сюлмаське городмылэн чеберез сярысь, кин тунсыкъяське архитектураен. Вормисьёс пусъемын луозы коньдон премиосын. Конкурс сярысь пыр-поч тодон вылысь вазиське 22-81-78 номеро телефонъя. Э. Васильева. Налог тырисьёсты лыдъянэз радъянъя ужрадъёс сярысь Удмурт Республикалэн Законэз Та Закон кутэмын, Удмурт Республикаысь вань бюджетъёсы налогъёсты тырыны луонлыкъёс кылдытон понна, налогъёсъя законодательстволэсь нормаоссэ быдэстон вылысь но, Россия Федерацилэн Конституциезлэн 72-тӥ ёзэтэз вылэ пыкиськыса, Россия Федерацилэсь законодательствозэ йылтон понна. 1-тӥ ёзэт. Юридической лицоосты но нимаз адямиосты - нимаз ужбергатӥсьёсты кун ласянь пусйись ёзъёс арня куспын ивортыны кулэ ас улосысьтызы налогъёсъя ёзъёсы юридической лицоосты пусъемзы (выльысь пусъемзы), соослэн ужамысь дугдэмзы (выльдӥськемзы) но учредительной документъёсазы воштонъёс пыртэмзэс пусъемзы сярысь, озьы ик нимаз адямиослэн нимаз ужбергатӥсь луыса пусйиськемзы сярысь магнит носительёс пыр яке телекоммуникацилэсь амалъёссэ кутыса Удмурт Республикаысь Правительствоен юнматэм Положениея (отӥяз - Положение). Куд-ог ужъёсты нуон понна лицензия (лэзён) сётъяны оскем ёзъёс таӵе радлыкъя ик ивортыны кулэ сыӵе адямиос сярысь, кудъёсызлы верам документъёс сётэмын, Положение вылэ пыкиськыса. 2-тӥ ёзэт. Нимаз ужбергатӥсь луэмзэс пусъем нимаз адямиос кун ласянь пусйиськемзы, улон интызэс, фамилизэс, нимзэс, атай нимзэс воштэмзы сярысь иворто налогъёя инспекцие, законодательствоен налогъёсъя учётэ султон пумысен юнматэм радлыкъя, кун ласянь пусйиськемзы, улон интызэс, фамилизэс, нимзэс, атай нимзэс воштэмзы бере 10 нунал куспын. 3-тӥ ёзэт. Юридической лицоос, соослэн филиалъёссы, представительствооссы но ас кожазы ужась мукет ёзъёссы, озьы ик кун сьӧрысь юридической лицоос, Удмурт Республикаын ужасьёсыз, (отӥяз - налог тырисьёс) Россия Федерациысь законодательствоен налогъёсъя учётэ султон пумысен юнматэм радлыкъя ивортыны кулэ кун ласянь пусйиськемзы но ужан интызэс (юридической адрессэс) воштэмзы сярысь ужан интыысьтызы налогъёсъя инспекцие 10 нунал куспын. Налог тырисьёс организацилэн печатяз одно ик пыртыны кулэ налог тырисьлэсь идентификационной номерзэ (отӥяз - ИНН). 4-тӥ ёзэт. Налог тырисьёс, кудъёсыз нимаз адямиослы табыш тыро, налогъёсъя инспекцие законодательствоен юнматэм радлыкъя пӧятэк ивортыны кулэ нимаз адямиослы тырем табышлэсь быдӟалазэ. 5-тӥ ёзэт. Недвижимой ваньбурез но транспортэз но (яке) соос вылэ правоез но соос пумысен кутэм огкылъёсты пусйись ёзъёс ИНН-эз пыртыны кулэ налогъёсъя ёзъёслы сётӥськись иворъёс пӧлы но пусйыны кулэ ведомствоязы кутӥськись реестръёсазы но регистръёсазы, ватсаса реквизит карыса. Та ёзъёс арлы быдэ, нырысетӥ мартозь, интыяськемзыя налогъёсъя ёзъёсы пӧятэк ивортыны кулэ недвижимой ваньбур но транспорт сярысь, кудъёссэ та ёзъёс ар ӵоже чаклало, соос вылэ пусъем правоос но соос пумысен кутэм огкылъёс, соослэн кузёоссы сярысь магнит носительёс яке телекоммуникацилэн амалъёсыз пыр, Положениез лыдэ басьтыса. 6-тӥ ёзэт. Нотариальной ужъёсты нуыны оскем ёзъёс но ас понназы ужась нотариусъёс арлы быдэ, нырысетӥ мартозь, ивортыны кулэ ужан интыысьтызы налогъёсъя ёзъёслы недвижимой ваньбур но транспорт пумысен огкылъёсты нотариус ласянь юнматэмзы сярысь, Положениез лыдэ басьтыса. 7-тӥ ёзэт. Налог тырисьёслэсь - должностен муртъёслэсь но нимаз ужбергатӥсь луыса пусйиськем нимаз адямиослэсь, соос та Законлэсь куронъёссэ сӧро ке, басьтӥське административной штраф, солэн быдӟалаез 2 пичи уждунысен 5 пичи уждунозь. 8-тӥ ёзэт. Административной правоез тӥян учыръёс сярысь, кудъёсыз та Законэн чакламын, гожто протоколэ налогъёсъя инспекциысь, налогъёсъя полициысь должностен муртъёс но та ужез быдэсъяны законэн оскем мукет кун ёзъёс. Кун ёз, та Законэз тӥян учырез шарая ке, та сярысь ивортыны быгатэ налогъёсъя полицилэн ёзъёсаз яке прокуратурае, алыса гожтэт ыстон понна яке прокурор ужрадъёс мед кутоз шуыса. Административной правоез тӥян учыръёсты, кудъёсыз та Законэн чакламын, сэртто-пертчо, РСФСР- лэн Административной правоез тӥянъёс сярысь Кодексэз вылэ пыкиськыса. 9-тӥ ёзэт. Та Законъя басьтэм штрафъёс мыно Удмурт Республикаысь городъёслэн но ёросъёслэн бюджетъёсазы. Интыысь аскивалтонъя ёзъёслы ӵектоно та Законъя басьтӥськись штрафъёслэсь 10 процентсэ налогъёсъя ёзлы, кудӥз закон тӥян учырез шараяз, ыстон сярысь ужпумез эскерыны. 10-тӥ ёзээт. Та Закон кужыме пыре, сое печатлам дырысен 10 нунал ортчыса. Удмурт Республикаысь Правительстволы куинь толэзь куспын кутоно правовоя актъёсты, кудъёсыз та Заьконэз быдэсъяны луонлыкъёс кылдытозы. Удмурт Республикаысь Кун Кенешлэн Тӧроез А. А. ВОЛКОВ. Ижевск город, 1997 арын 23 декабре. � 539 - И. Тырмыт-а герӟа асьмеды "Герд" бам? Алигес "Дэмен" огазеяськонэ люкаськем эшъёс рос-прос, дэмен эскеризы "Гердэ" берло поттэм материалъёсты, вань удмуртъёслэн ВИ Ӧтчамзылэсь решениоссэ ӟечгес быдэсъян но та бамез уката ӟырдытгес, лыдӟымонгес карон вылысь, данак дэмланъёссэс веразы, (куд-огез - телефон пыр). А. А. Ермолаев, литературовед, ӧтчамлэн делегатэз. - "Герд" бамын, мон сямен, али паськытгем возьматоно "Удмурт кенешлэн" гуртъёсысь ёзъёсызлэсь кызьы ужамзэс. Отын, калык пӧлын, асьмелэн кужыммы. Пичиесь ужрадъёс сярысь но ивортылонъёс сётъяно. "Герд" пыр асьме калыкез тодматоно вылэм бигеръёслэн но ужан амалъёсынызы. Огзэ гинэ уг валаськы: малы "Герд" бамлэсь нимзэ латынь кылын но поттӥськоды? Л. П. Фёдоров, журналист, ӧтчамлэн делегатэз. -Та бам асьмеды герӟа, шуысал, Куӟебай Гердлэн бадӟымесь малпанъёсыныз но, асьмеды ӝутэ со малпанъёсты улонэ пыӵатон понна огъя нюръяськонэ. Тросэз лыдӟо та бамез. Ӵектонэ одӥг: "Удмурт дуннеын" та страницаез поттыны кыӵе ке нимысьтыз одӥг нунал тупатоно, дыр, шуом, котькуд толэзьлэн пумаз. Лыдӟисьёс азьло ик мед тодозы, ку сое газетысь утчаны. С. З. Зиятов, Иж карысь культурая училищеысь дышетӥсь, суредась. - Мыным яра "Герд" бам. Асьмелэн ужмы сярысь гожъяло отчы. Кытӥяз сюлэм ик нясь-нясь луэ, та полосаез лыдӟыса. Кӧня адямиос, удмуртлыкмес ӝутон понна, чик дунтэк тыршо ас калыкмес огазеян, кузё луон мылкыдмес ӧжытлы ке но кужмоятон, муромытон вылысь! В. Н. Зиятова, дышетӥсь, Устинов ёросысь делегат. - Таӵе ӵектонъёсме вераме потэ. Куд-ог номеръёсын чик уг луыло туспуктэмъёс. Озьы "Герд" бам мӧзмытгес адске. Берлосяз, 63-тӥяз бамын, трос вал чебересь фотооос. Отын ик печатламын съездлэсь пуктэмъёссэ ӟечгес, ӝоггес быдэсъянъя муресь ӵектонъёс, сётэмын "Удмурт кенешлэн" исполкомаз но мукет интыосы быръем эшъёслэн фамилиоссы, нимъёссы. Мон сямен, "Дэменлэн" кивалтоназ быръем адямиослэсь но списоксэс печатлано - мед тодозы, кинлы вазиськыны. Озьы ик огазеяськонмылэн ужъёссы сярысь ӵемгес статьяос, репортажъёс сётъяно "Удмуртская правда", "Известия Удмуртской Республики" но мукет газетъёсы. Ӟучъёс туж ичиез тодо "Удмурт кенешез", "Дэменэз"... Бен, асьмеос шормуӵын ум улӥське. Герӟаськемын финн-угор дуннеен уно нюжаосын. "Герд" бам пӧртэм вакытъёсы лыдӟисез тодматӥз коми калыклэсь эрикрадъёссэ утисен Надежда Митюшоваен, Эстониысь депутатэн Андрес Хейнапууэн, Будапештысь Национальной музейын ужасен Агнеш Кережиен, Финляндиысь Анна Леена Сиккалаен, Голландиысь парламентарийёсын но журналистъёсын, мукет делегациосын. Трос материалъёс печатламын вал удмуртъёслэн финн-угор дуннее но музон кунъёсы вуылэмзы сярысь. Озьы, "Герд" асьмеды герӟа кадь пӧртэм-пӧртэм калыкъёсын. В. А. Осипов, "Дэменлэн" тӧроез. - Ичи лыдъем калыкъёслэсь правооссэс Россиын тырмыт санэ уг басьто, уг утё на. Соослэн асьсэ музъем вылазы зэмос кузё луэмзы юн-юн уг шӧдӥськы на. "Герд" бам кытӥяз мед сётъясал выжы калыкъёслэсь правооссэс утёнлы сӥзем катъёсты но. Тани финн-угор калыкъёслэн иворъёсты вӧлмытонъя Центрзы поттэ "Уральские контакты" бюллетень. 1997 арын мае печатлам 3-тӥ номераз сётэмын Ичи лыдъем калыкъёсты утёнъя Рамочной Конвенция. Сое кутӥллям Европалэн Кенешезлэн членъёсыз - государствоос но мукет странаос. Озьы ик кутэмын музон решениос но. Мон сямен, куд-огзэ соослы вакчиятыса, валэктыса, кытӥяз меӵак ӟуч кылын но печатлано, дыр, азьланяз. Таӵе вамыш юрттоз эрикрадъёсмес паськытатыны, мукет калыкъёсын уката золгес огазеяськыны... М. В. Гаврилова-Решитько, Удмурт Республикаысь культура удысысь сӥё-дано ужась. - Шӧдӥське: К. Ломагин "Герд" баме "уг тэры". Музон бамъёсын, номеръёсын но материалъёсыз ӵем пото. Улонмы асьмелэн узыр угось, "Удмурт кенеш", "Дэмен" трос ужпумъёсты эскерыло. Соин ик ӧй луысал-а меда, "Удмурт дуннелэсь" толэзьлэн пумаз кудзэ ке быдэс номерзэ та огазеяськонлы сётыса? Зэм, коньдон ӧвӧл шуыны быгатозы. Нош ӟучъёс, бигеръёс шедьто ук. "Удмуртская правда" тани арняяз ньыль пол потыны кутскиз. "Удмурт кенешлэн" выль тӧроез В. К. Тубылов но "Удмурт дунне" газетлэн валтӥсь редакторез А. П. Шкляев та пумысен одӥг кыл шедьтозы, вылды... Р. И. Яшина, Тӧро кенеше быръем мурт. - "Удмурт кенеш" но "Дэмен" одӥг липет улын, одӥг кыткетын улыны, ужаны кулэ. Шумпотӥсько: берлосьёсыз кӧняез ке "Герд" бамъёс та огазеяськонлэн огъя куаразы шуыса поттэмын. Нялтас дэмламе потэ: лэчытэсь статьяосты сокем медам кулэстылэ, "вандылэ" вылэм. Р. А. Разин, тодосчи, ӧтчамлэн делегатэз. - "Герд" бам асьмелы трос ласянь огазеяськыны юрттэ. Чечняын юнме шорысь вир кисьтонэз дугдытыны курыса "Дэменлэн" вазиськонэз но отын печатламын вал. Куд-ог катъёсты эскерыку, туж ӟечесь ӵектонъёс но печатлаллям. "Герд", озьыен, ноку но медаз пертчиськы, медаз пашмы. Мон кӧня ке талэсь азьло ветлӥ Венгрие. Со сярысь гожъямъёсме но одно ик "Гердэ" сётыны малпасько. М. Я. Кузьмина, "Дэмен" огазеяськонлэн кивалтоназ быръем мурт. - "Гердын" азьло кылбуръёс но, куд-ог кырӟанъёс но потыло вал. Та удысэз, мон сямен, азинтоно. Удмуртлыкмес ӝутӥсьёс ӝоген пыриськоно луозы Ижысь Думае быръёнъёсы. Собере вуозы Кун Кенеше быръёнъёс. Азьвылъёссэ янгышъёсмес санэ басьтозы, вылды, тӧроосмы, кивалтӥсьёсмы. Мон сямен, капчиен узырмемъёс, асьме калыкмылэсь куронъёссэ, сюлэмшугъяськонъёссэ чакласьтэм муртъёс огез но медам шеде ни депутатэ. Оскисько: "Герд" бамын но быръёнъёслы сӥзем гожтэтъёс ӝоген потылозы ни. "Герд" пумысен асьсэлэсь малпанъёссэс верамзы понна, ваньзылы эшъёслы бадӟым тау! Толон гинэ одӥг лыдӟись таӵе дэмланзэ вераз на. Ӟуч газетъёсын ӵем гинэ потыло, шуэ со, "Удмурт кенешез", быдэс удмурт огазеяськонэз кызьы ке но паньсаны турттыса гожъямъёс. Удмуртия, пе, государство но ӧвӧл, солы Конституция но кулэ ӧвӧл шуо сьӧразгес ортчемъёс. Нош асьмеос шып пукиськом. "Герд" бамын но пезьдэт сётъясь ӧвӧл... Соин валче "Удмурт кенешлы" таӵе дэмланэ вань. Таяз ӧтчам бере исполкоме быръемын туж ӟырдыт мылкыдо, визьмо тодосчи В. М. Ванюшев. Ас вакытаз со Мултан ужез "асэстӥсьёслы" но туж шонересь, лэчытэсь валэктонъёс печатлаз вал. Сьӧд мылкыдын гожъямъёсты- "пӧрамъёсты" син азяз возёнэз но соосъя пезьдытэсь валэктонъёс сётъянэз Василий Михайлович ас вылаз ӧй басьтысал меда? Юнме шорысь вӧсь каремзылэсь кытӥяз чиданы уг луы угось. Кирилл ЛОМАГИН. БУСКЕЛЬЁСМЫ ДОРЫН Ёросмы визьмо адямиосын узыр Озьы шуэ Башкортостанысь калыкез дышетон удысын дано ужась Клара Байгазина. Кызь ар талэсь азьло та шӧртчи кышномурт Татышлы ёросысь пинал гожъяськисьёсты огазе люказ. Озьы кылдӥз "Бригантина" клуб. Кызь ар ужатозяз, та клубысь пиналъёс республикаын ортчись конкурсъёсын 18 пол вормисе потылӥзы. Нош Таташлыысь одӥг номеро школаын дышетскись Алла Муратшина СНГ-ысь юнкоръёслэн слётазы тямысэтӥ инты басьтӥз. Уг вунэты Клара Мияссаровна Татышлы палъёсын вордӥськем но будэм тодмо адямиос сярысь но. Мукетъёс но соосын мед данъяськозы шуыса музей кылдытӥз. Отчы люкамын ёросысь тодмо адямиос сярысь книгаос, статьяос, пӧртэм арбериос но озьы ик асьсэлэн ужъёссы. Нош кинъёс со, Татышлы палъёсын вордӥськем но будэм дано адямиос? Вералом кӧнязэ ке гинэ: удмурт писательёс Андрей Гильмаев, Фёдор Пукроков, бигеръёс пӧлысь Татарстанысь калык поэт Ангам Атнабаев, тодмо кырӟась Зинира Атнабаева но трос мукетъёсыз. Нош Россиысь дано суредасьлэн Менсадык Гариповлэн татын нимаз висъетын картинаосын галереяез люкамын. - Вуоноын тодмо адямиосмы эшшо но тросгес луозы шуыса осконэ юнгес но юнгес луэ, - шуэ нылпи творчествоя юртысь шаерчи Клара Байгазина, - малы ке шуоно, Татышлы ёросын визьмо калык улэ. Ф. МИННИГАРАЕВ. К. М. Байгазина тодматэ музеен. Туспуктэмез В. КАМАШЕВЛЭН. Сэзь-сэзь Кылем арын, тулыс, элькунысьтымы "Тодон" огазеяськонлы ӝыны даур тырмиз. Ортчем сюресэз сяськаяськонэз но, куашкан вакытъёсыз но вал. Тужгес но секыт югдуре шедиз 1991-тӥ арын, август толэзе ортчем учыръёс бере. Властез демократия ас кияз киултэмез но, реформа шуонэз лыдӟонлэсь алэмын вал. Соин валче унояз республикаосын, крайёсын но областьёсын "Тодон" огазеяськонлэн ёзъёсыз но ужамысь дугдӥзы. Асьме элькунамы но ёросъёсысь ёзъёсыз быризы, нош Иж карысез ужзэ азьланьтӥз. Рынок шуон вакытэ выжемен валче, "Тодон" огазеяськонлы но аслэсьтыз ужан амалъёссэ воштоно луиз. Сое валась адямиос быгатӥзы ужзэ азинтыны. Ӵапак сыӵеос пӧлы пыре Лидия Андреевна Безносова. Та удысын ужан адями вапумез валаз но кулэ ужрадъёс кутӥз. Кызь вить ар талэсь азьло, 1973-тӥ арын, Удмурт кун университетэз йылпумъямез бере, "Тодон" огазеяськонэ референтлэсь ужзэ быдэсъяны басьтӥзы Лидия Безносоваез. Сюлмо но визьмо нылаш ӝог быгатӥз азяз пуктэм ужпумъёсыз радъяны. Ӟеч сямъёсыз юрттӥзы пӧртэм удысъёсысь кивалтӥсьёсын, специалистъёсын но тодосчиосын умоесь кусыпъёс тупатыны. Выль адямиосты кыскылӥз лекциос лыдӟонэ. Лидия Андреевна ачиз но мылысь-кыдысь пыриськиз та уже. Тужгес но пӧрмо но егитъёслэн сюлмазы пыӵало "Кузпалъяськон но усто семья кылдытон", "Яратон-семьяез юнматон" ужпумъёслы сӥземъёсыз. Та удысъёсты, тодэм сяна, туж усто валэкытыны кулэ луылӥз пӧртэм сямо но мылкыдзэс кылзӥсьёслы. Устоесь лекциос лыдӟеменыз ӵош ик Лидия Андреевна быгатылӥз пӧртэм ужрадъёсты радъяны. Иж карысь "Тодон" огазеяськонлэн кивалтӥсез луэмез бере быдэс городысь лекторъёслэсь ужзэс азинтӥз. Вакчи дыр куспын огазеяськонэз туала вакытлы тупась кариз но правленияз та удысын ужаны быгатӥсь адямиосты кыскиз. Валамон ини: туала вакытэ коньдонтэк нокин номыр уг лэсьты. Соин ик Лидия Андреевна коммерция амалъёсты но быгатыса кутыны ӧдъяз. Туала вакытлы тупась специалистъёсты дасян вылысь кылдытэмын вал дышетон центр. Рынок шуонэ выжон кулэ кариз экономикаез, юристпруденциез, бухгалтерлэсь ужзэ, мукет удысъёсты ӟечгес валан. "Тодон" огазеяськонлэ н элькун ёзэз юнматэ Л. И. Безносоваез исполнительной директоре. Соин ӵош ик элькунамы кылдытэмын специалистъёсты дасянъя центр. Татчы но кивалтӥсе дэмламын Лидия Андреевна. Со быгатӥз "Тодон" улосвылъёсысь правлениосыныз кусыпъёс радъяны. Али Л. А. Безносова сьӧр но кунъёсын но герӟаськыны тырше. Лидия Андреевналэсь ӟеч ужъёссэ данъяса но элькунысьтымы "Тодон" огазеяськонлы ӝыны даур тырмемен валче,, солы сётэмын "За заслуги перед Отечеством" орденэн ИИ-тӥ степенё медалез. Та нуналъёсы Лидия Андреевналы аслыз но 50 арес тырмиз. Ми сюлмысьтымы ик ӟечкыласьком сое юбилееныз. Ӟеч ужъёсыз понна бадӟым тау кариськом, сӥзиськом шудбур но тазалык. К. ПОНОМАРЕВ, "Тодон" огазеяськонлэн тӧроез профессор. Егитъёс ужало ӵоше Туннэ "Дзержинец" пионер лагере люкаськизы республикаысьтымы лицейёсын дышетскись егитъёс. Нылъёс но пиос шутэтскозы, куспазы юнгес эшъяськозы. Лицейёс алигес улонэ пыӵаны ӧдъязы, соин ик ог-огзылэн ужан но дышетскон амалъёсынызы тодматскон пайдаё луоз. Слётэ лыктозы вузъёслэн деканъёссы, преподавательёс. Тужгес визь-нодо, шаплы егитъёс синйылтытэк соос уз кельтэ - оло, доразы дышетскыны вступительной экзаменъёстэк кутозы. Н. ЛИПИНА. А. Д. Нигматуллинэз Удмурт Республикаысь Кун Кенешлэн Данъян грамотаеныз пусъён сярысь Удмурт Республикаысь Кун Кенешлэн Тӧроезлэн Постановлениез Уно аръёс ӵоже сюлмысь ужамез понна но 60 арес тырмеменыз валче Удмурт Республикаысь Кун Кенешлэн Данъян грамотаеныз пусъёно Нигматуллин Альберт Давлятгалеевичез - Кизнерысь хлебоприёмной предприятиысь валтӥсь бухгалтерез. Удмурт Республикаысь Кун Кенешлэн Тӧроез А. А. Волков. Ижевск город, 1997 арын 30 декабре. � 476-И. Удмурт Республикалэсь данъян нимъёссэ сётон сярысь Удмурт Республикаысь Кун Кенешлэн Тӧроезлэн Постановлениез Данъян нимъёсты сётоно: промышленность удысын вормонъёсыз но трос аръёс ӵоже сюлмысь ужамез понна "Удмурт Республикаысь промышленностьын дано ужась" Соловьёв Виталий Александровичлы - Удмурт Республикаысь Кун Кенешлэн промышленностья, инфраструктураез азинтонъя, вузъёсын но юрттэтъёсын рынокез кылдытонъя ялан ужась комиссиезлэн тӧроезлы; вузкарон но юрттэтъёс сётон удысын вормонъёсыз но трос аръёс ӵоже сюлмысь ужамез понна "Удмурт Республикаысь юрттэтъёс сётон удысын дано ужась" Жильцова Раиса Васильевналы - Ижевскысь администрацилэн Потребительёслэсь правооссэс утёнъя комитетысьтыз тӧролэн воштӥсезлы. Удмурт Республикаысь Кун Кенешлэн Тӧроез А. А. Волков. Ижевск город, 1997 арын 30 декабре. � 477-И. Спорт АЛЕКСЕЙ КОБЕЛЕВЛЫ - НЫРЫСЬ ИНТЫ Спорт удысэз возьматӥсь журналистъёслэн клубзы декабрь понна йылпумъянъёс лэсьтӥз. Удмуртиысь спортсменъёс пӧлын нырысетӥ инты сётэмын дуннелэн чемпионэзлы иатлонистлы Алексей Кобелевлы. Устоосыз пӧлы озьы ик шедизы эстафетаен бызьылонъя эшъёсыз Владимир Псарев, Сергей Чучалин но Валерий Медведцев. Кыкетӥ интыын верамын Игорь Яковлевлэн нимыз (спидвей), куинетӥ луиз пуляен ыбылӥськонъя спортсменка Мария Феклистова. Вормисе потэмъёс пӧлын - Светлана Быданова (капчи атлетика), Мария Новожилова но Анна Слободских (уян), Владимир Маслов (хоккей), Сергей Абрамов (тренер) но мукетъёсыз. Спортивной командаос пӧлысь пусъемын "Ижсталь" (хоккей) но "Аксионысь" волейболисткаос. Та выллем йылпумъянъёс лэсьтӥсько толэзьлы быдэ. Л. ДМИТРИЕВА. ӞЕЧКЫЛАН Алнаш районысь Ӧркагуртын улӥсь Лидия Ефимовна ПЕТРОВАЛЭН 16 толшоре вордскем нуналыз. Мусо мамамы, нэнэмы, кузпалы, сӥзиськом тыныд тазалык, бадӟым-бадӟым шуд. Яраты милемыз, кызьы ми тонэ яратӥськом. Ымнырысьтыд ноку но медаз ышылы шумпотонэд, вунэты кайгырондэ. Та бадӟым нуналад мед басьтод трос-трос кузьым но милесьтым яратонмес. Яратыса кузпалыд Миша, нылпиосыд Юра, Лена, Люда, Коля, Лариса, Наташа но нылпиосыдлэн нылпиоссы Марина, Ваня, Саша. АЧИЗ - ШУНДЫ Та чуръёс кылдӥзы, "Шимес пеймытысь" книгаез лыдӟем бере. Анна Сапожникова. Сю ар ини ортчиз... Лул-сюлэмзэ выльысь Мыным усьтӥз ачиз Герд шим пеймытысь. Ыштон бӧрсьы ыштон... Шундытэм яратон - Сяськаяны ӧз лэзь, Ӧз утьы эзельлэсь. Сьӧдман аръёс ӵоже Со усьылӥз ӝоже. Макем лек ултӥян... Кытысь шедьтӥз чидан? Сайкыт удмурт туссэ, Вирӟем лул яразэ Ӧз миськы сьӧд ужен, Вузаллян вамышен. Ас калыкез понна Улӥз со, сюлмаськиз, Тыршиз но нюръяськиз, Вань улонзэ сётӥз. Вуиз сыӵе дырмы Шӧдӥськомы ваньмы: Бен, Куӟебай Гердмы - Ӝужась яркыт шунды. Кинлэн пероез зарнигес? Удмурт Республикаысь Егитъёсын ужанъя кун комитет но "Луч" литературно- художественной журнал гожъяськыны кутскись егитъёс пӧлын тужгес но ӟеч произведенилы конкурс яло. Ужъёсты конкурсэ ыстоно туэ 1-тӥ февралёзь таӵе адресъя: Ижевск город, М. Горький урам, 73 номеро юрт, "Луч" журналлэн редакцияз яке Егитъёсын ужанъя кун комитетэ. Вормисе потэм егит кылбурчиос но прозаикъёс пусъемын луозы дуно кузьымъёсын, быдэс арлы "Луч" журналлы гожтӥськонэн но Удмурт Республикаысь Егитъёсын ужанъя кун комитетлэн коньдон премиосыныз. Ужъёсты ыстоно ӟуч кылын. Юанъёсын вазиськыны луоз таӵе телефонъёсъя: 51-18-61; 51-35-61. Л. Кимова. Степан Иванович Воронцов - газетмылэн огез ялан гожъяськись авторез. Туала улонмылы сётэм дунъетэз сокем паймымон ӧвӧл кадь, озьы малпасько тросэз, тужгес но арлыдоосыз адямиос, угось соослэн улонзы ӵапак тупаз Совето Союзын улон вакытлы. Нош ортчемзэ жалян мылкыд котькуд адями пушкын кема возиське на. Умой соиз: Степан Иванович асьме улонмес курланэн гинэ уг буйгатскы, секыт югдурысь потон амалъёс но ӵектэ. Но Россилэн историез пумысен кылдэм малпанъёсыныз ваньмыз соглаш, оло, уз но кариське, кылсярысь, П. Столыпин сярысь гожъямъёсыныз. Соин ик лыдӟисьёсмес тодматоно кариським, кызьы дунъяло Столыпинэз туала историкъёс. Огез соос пӧлысь история наукаосъя доктор, Москваысь профессор В. Сироткин. "Реформатор" - таӵе нимын статьяез потӥз вал солэн "Учительской газетын" 1989 арын. Лыдӟисьёсмылы Гажано эшъёс, вождэс эн вае редакциен герӟаськымтэ мугъёсъя газетмылэн таиз номерез тӥ доры одӥг нуналлы ӝегаса вуиз. Газетлэн редакциез. Поталозы меӵак эфире Иж администрациысь валтӥсь специалистъёс улон-вылонэн герӟаськем ужпумъёсъя меӵак эфире поталозы. 23 январе 15 часысен 17 часозь 22-45-94 номеро телефонъя валэктонъёс сётоз мэрлэн воштӥсез Галина Ахророва. Азьланяз таӵе пумиськонъёс ортчытъяны чакламын вторниклы быдэ 16 часысен 18 часозь. 27 январе меӵак эфире потыны дасясько Калыкез шугадӟонлэсь утёнъя но анаез но нылпиез утёнъя комитетъёслэн кивалтӥсьёссы Виктор Бондаренко но Галина Шамшурина. Телефон номер уз воштӥськы: 22-45-94. Н. ЛИПИНА. Пыӵал но пересьмон Та нуналъёсы республикаямы вуылӥз Эстониысь экономикая министрлэн юрттӥсез Антс Паю. Ижысь механической заводын со вераськиз предприятилэсь Эстониын "ышем" пистолетъёссэ утчан но дунзэс берыктон сярысь. Удмуртъёслэн улон-вылонэнызы тодматскон вылысь, куно ветлӥз Дэрие (Завьяловое). Ачиз верамъя, солы тужгес кельшиз удмурт пересьмон (перепеч). А. ПЕТРОВ. Постановление Государственного Совета Удмуртской Республики О результатах учета мнения населения по вопросу об установлении и изменении границ муниципальных образований Государственный Совет Удмуртской Республики постановляет: Утвердить представленные Избирательной комиссией Удмуртской Республики общие итоги собраний, сходов граждан по учету мнения населения по установлению и изменению границ муниципальных образований (прилагаются 1, 2). Председатель Государственного Совета Удмуртской Республики А. А. Волков. Г. Ижевск, 14 января 1998 года. � 569-И Дауръёс пыр ортчыса кыдам сюресмы Берло дасо аръёс куспын "Удмуртия" книга поттонни асьме калыкез кие кутымон книгаосыныз трос пол шумпоттылӥз ини. Чебер бумага вылын печатламен, суредасьёслэн чеберлыкез валаса тыршеменызы, янгышъёсты эскерись-тупатъясьёслэн сюлэмзэс поныса ужаменызы, зэмзэ ик, та ужъёс лыдӟисез бордазы кыско. Кунгож сьӧрысь эшъёслы но соосты возьдаськытэк кузьманы луэ ини. Та дыр куспын мур пуштросъемесь кӧня ке книгаос поттӥз ини ваньмызлы тодмо гажано учёноймы, история наукаосъя доктор М. В. Гришкина. Удмурт калыклэсь берло сюрс ар ӵоже азинскон сюрессэ котыр ласянь пыр-поч эскерись специалист со. "Удмурты. Этюды по истории ИЪ-ЪИЪ вв." книгаезлы уката но удалтӥз, шуыны луоз - трос шумпотон кылъёс верамын ни та пумысен. Сюро пыкылӥсьёсыз но, уго ваньмызлы ик уг кельшы, куке историез тодӥсьтэм калыклэсь синзэ усьтыны кутско - учкы ук, гажано эше, удмурт калыклэн но вань, вал, луоз пӧртэм событиосын узыр историмы. Удмурт калык но пеймыт нюлэскы ватӥськыса, инме ӝутскись кыз улын курбон сётыса, сюлэмез позыртӥсь ӝож гуръёссэ кырӟаса гинэ ӧз улы. Тушмонъёслэсь утиськон понна бадӟым шуръёс дурысь гурезь йылъёсы со каръёс лэсьтылӥз, кыдёкысь шаеръёсы вузкарыны вуылӥз, кулэ дыръяз аслэсьтыз, ас выжы- кумыосызлэсь, калыкезлэсь данзэ, эриксэ утьыны но ӝутскылӥз. Удмурт учёнойёс пӧлысь М. В. Гришкина луэ нырысез, кин печатланы кутскиз араб вузчиослэсь, ислам осконэз тодытӥсьёслэсь Камдор улос но отысь калыкъёслэн, уката ик аръёслэн (удмуртъёслэн), улэм-вылэмзы сярысь гожтэтъёссэс. Кызё ар пала ини мон тодӥсько Маргарита Владимировнаез. Лякыт сямо, адямиез гажась-жалясь адями. Котьку но паймисько солэн литератураез, искусствоез, историез мур тодон-валанэзлы, удмурт но, ӟуч но кылын чебер, вольыт вераськемезлы. Котькуд статьязэ, книгазэ шумпотыса киям кутӥсько но огкутскемен пумозяз лыдӟытэк дугдыны уг ни быгатӥськы. Трос-трос городъёсысь архивъёсын ужаса, пумтэм-йылтэм кагазъёс пӧлын бугыръяськыса, отысь со асьме калыклэн историез понна туж кулэ луись зарни пырыоссэ бича, шедьтэ. Берпуметӥзэ бадӟым ужзэ М. В. Гришкина мылкыд кариз удмурт историкен-археологен К. И. Корепановен ӵош гожтыны. Со нимаське "Дауръёс пыр. Вашкала-вашкала удмуртъёс сярысь очеркъёс" (Ижевск, "Удмуртия", 1997) шуыса. Пусйыны кулэ созэ но: асьмеос удмурт кылэз утьыны, азинтыны кулэ шуиськомы, нош ужъёсмес ӟуч кылын гожъяськомы. Соин ик таиз научной уж асьме кылын гожтэменыз но туж шумпоттэ: историяя но ужъёсты удмурт кылын гожтыны луэ ук вылэм. Удмурт кылын лыдӟымон кариллям удмурт кылэз гажась, мур тодӥсь писательёсмы П. Н. Кубашев но П. К. Поздеев. Кронид Иванович Корепановез та ужез бере, малпасько, трос удмуртъёс тодыны кутскозы. Ӟоскыт сюрестӥ мыноно луэ та учёнойлы. Ми соин огвакытэ дышетскимы университетын, тодӥсько, кызьы со арлы быдэ пота вал экспедициосы удмурт калыклэсь вашкала-вашкала дауръёсы улэм бервылъёссэ - каръёссэ, шайёссэ, гуӵинъёссэ - утчаны. Малпаськомы вал, та эшмылэн синмаськымон азьпал научной карьераз луоз шуыса. Кронид Ивановичлэн янгышезтэк, улонэз чукин-бекин кошкиз: УдНИИ-е (удмуртъёс пӧлы), университетэ но (ӟуч археологъёс пӧлы) сое ӧз кутэ. Кошконо луиз палэнэ, Камчаткаын но кӧня ке ар улоно луиз. Ас калыкезлэсь вашкала историзэ тодон, гажан мылкыдыз озьы но (кӧтӝож пӧлын улыса) ӧз сӥя: паськыт Россей музъем вылтӥ поръям бераз малпаз дор музъемаз берытскыны. Удмуртиын удмурт учёнойлы инты ӧз сюры. Соку со дугдоно луиз Удмурт Элькунлэн кунгож дураз интыяськем Елабуга каре, удмурт музъем шоры кунгож дурысен ке но учкыны мед быгатоз шуыса. Ялан возьмаз, оло кин ке удмурт эшъёсыз пӧлысь вазиськоз, ӧтёз, уж ӵектоз. Ӧз. Чус вал. Соку со кошкиз удмурт гуртэ школае дышетыны (та дыре со история наукаосъя кандидат вал ини). Али кӧня ке арзэ ини со тырше Дышетӥсьёслэсь тодон-валанзэс будэтонъя институтын. Гожъя докторской диссертацизэ. Вань сюлмыным курисько: нокин но медаз люкеты вал та ужзэ быдэстыны. Отын асьме калыклэн тужгес вашкала историезлы сӥзем чуръёс, кудзэ та дырозь асьмеос ляб, яке чик но ум тодӥське. К. И. Корепанов та книгае гожтэ ог-огенызы герӟаськем кык люкетъёсты-очеркъёсты: "Финно- пермяк огъялыклэн сяськаяськон вакытэз" но "Асьме вапум кутсконысь финн-пермь выжыкылъёс". Синмаськымон вал туала удмурт но коми калыкъёслэн огъя ӵыжы-выжыоссылэн люкиськытэк, одӥг кылын вераськыса улон вакытсы. Со вал ананьино шуон вапуме - ог 2800-2300 аръёс талэсь азьло. Шунды ӝужан Европалэн быдэс нюлэсо люкетэз соос ки улын вал. Макем азинскем культура кылдытыны соос быгатӥзы! Та сярысь тӥ вакчияк тодыны быгатоды К. И. Корепановлэн гожтэм очеркысьтыз. Ананьино огъялыке пырись пермь выжыос асьме эралэсь ог 200-300 аръёс азьвыл люкисько но кутско асьсэ понна азинскыны. Кам, Тӧдьы Кам, Ватка кам дуре кылем выжыос бордысь азинскыны кутске удмурт калыклэн историез. Нош Кам шурлэн вылланяз, Вычегда, Сысола, Печора шуръёс дуре пыраклы интыясько туала комиослэн ӵыжы-выжыоссы. Калыклэсь гожтымтэ историзэ эскеро археологъёс, нош кыӵе ке иворъёс, веранъёс, гожъямъёс вань ке, соосты ӵемысь эскеро ини историкъёс, мукет тодосчиос но. Асьме калык сярысь нырысь ик гожъязы Камдор улосэ, ислам осконэ потэм булгаръёс доры вуылэм араб миссионеръёс, вузчиос. Книгалэсь та бадӟым люкетсэ сэрттэ-пертче М. В. Гришкина. Ӟуч, булгар источникъёсты, арабъёслэсь гожъямъёссэс лыдэ басьтыса, со кылдытэ калыкмылэсь ИЪ-ЪИЪ дауръёсы - 1000 ар улэм историзэ. Мар но ӧй вал та вискын? Ӝутскон но усён, нош ик султон, азьлане вамыштон, нош ик усён, нош ик султон... Вал дыръёс, куке чагыр инбам ӵоксаськылӥз удмурт музъем вылысь ӝутскись ӵынэн, эриксэ утьыны ӝутскем калыклэн вирыныз орсмиз Камдор музъем. Уката но секыт аръёс вал монгол, бигер выжыослэн ӟуч кун вылэ, Волгаен Урал вискысь калыкъёс вылэ урдсконзы; Иван Грозныйлэн Кузон кунлыкен Арча (Удмурт) элез пазьгон, киултон вакытэ; ЪИИ-ЪИИИ дауръёсы Ватка улосысь удмурт выжыосты донгытон. Та секыт зӥбетъёс удмурт калыклэсь йырзэ музъем пала някыртӥзы, эриксэ утён мылкыдзэ чигтӥзы. Кузон кунэз пазьгыса, ӟучъёслэн Волга-Урал вискын кузёяськыны кутскемзы бере, удмурт калыклэн улонэз огсыр мынӥз, вылӥе ӝутскыны солы ноку но эрик ӧз ни сётэ. (Эксэез воштӥзы коммунистъёс, коммунистъёсты демократъёс, но одӥгзы удмурт музъем вылын пырак дауръёс ӵоже улэм калыклы ас кылзэ кун кыл карыны эрик ӧз сётэ). Нош оскон вань, калык тодэ ке историзэ, гажа ке кылзэ, со одно ик быгатоз дауръёс пыр кыдам анай кылзэ кун кыл карыны. Книгалэсь пуштроссэ пыр-поч усьтон понна трос дыр но инты кулэ. Гажано лыдӟись эше, гажаськод ке ас калыкедлэсь историзэ, вашкала культуразэ, одно ик лыдӟы та книгаез, ныпиосыдлы, нылпиосыдлэн нылпиосызлы но кельты асьме удмурт кылын гожтэм та бадӟым ужез. Нош книгалэн авторъёсызлы тау карыса азьпал ужазы азинлык сӥзем потэ, "Удмуртия" книга поттони арлы быдэ выль ужъёстэс мед печатлалоз. Гажаса МИХАИЛ АТАМАНОВ, филологи наукаосъя доктор. Эшъёсмы йылӥзы "Удмурт дуннелэн" эшъёсыз таяз арын Завьялово районын но шӧдскымон йылӥзы: мимала лыдӟисьёсмы борды ог 150 семья ватсаськиз. Котьку сямен, газетмес яратыса басьто Изгуртын но со котырысь гуртъёсын. Та почтовой отделение 102 экземпляр вуэ, кылем арен ӵошатыса, кык поллы трос. Со понна тау карон кылъёс вераны кулэ юрттӥсьёсмылы-почтальонъёслы Валентина Анатольевна Патраковалы, Ирина Егоровна Егоровалы, Екатерина Ивановна Пестеровалы. Умой ужало Ожмос палан но. Маргарита Афанасьевна Камашева вутске кык гуртэ: Конькие но Ожмос-Пургае. Мукет газетъёсын- журналъёсын ӵош татын 41 коркан лыдӟо "Удмурт дуннеез". Кин тодэ, ар ӵоже, оло, почтальонлы котькуд семьяе пыроно луоз: газетмылы гожтӥськыны туннэ но луэ ук. Л. ПЕРЕВОЗЧИКОВА. Анна Ивановна Третьякова - синмаськымон адями, ӟеч кивалтӥсь, ас удыссэ тодӥсь- валась специалист. Кез элеваторлэн директорезлэн нырысетӥ воштӥсезлы, солы, трос пол предприятие понна кыл кутоно луылэ. Быгатонлыкез тырмыт. Мордва шаерын будэм нылмурт дасо арлэсь ятыр Кезын улэ ни. Татын бызиз, нылпиосыз будо. Удмурт сямен ас кылыныз кадь вераськыны дышиз. - Гуртэлэсь нырысь-валысь туж мӧзмисько вал, табере араз огпол бертылӥське ке, ярам ни, - шуэ Анна Ивановна. - Яратоно коллективед, ужед, семьяед ке вань, мурт шаере сюлмыныд бурмоно вылэм. Кезын со - огез гажано адями. Улонын озьы луэ ни: кыӵе синмын калык шоры учкиськод, со но шорад озьы ик учке. Суредэз Леонид ПРОЗОРОВЛЭН. Закон Удмуртской Республики О внесении изменений и дополнений в Закон Удмуртской Республики "О гарантияз учета мнения населения при установлении и изменении границ муниципалных образований" Статья 1. Внести в Закон Удмуртской Республики "О гарантиях учета мнения населения при установлении и изменении границ муниципальных образований" следующие изменения и дополнения: 1. В части 3 статьи 4 цифру "10" заменить на цифру "25". 2. Дополнить Закон статьей 4, изложив ее в следующей редакции: "Статья 4. Рассмотрение общих итогов сходов, собраний граждан 1. Общие итоги сходов, собраний, проведенных для учета мнения населения при установлении или изменении границ муниципальных образований, подлежат учету Государственным Советом Удмуртской Республики при принятии им решения об установлении или изменении границ муниципальных образований. 2. Государственный Совет Удмуртской Республики обязан рассмотреть общие итоги сходов, собраний на своем заседании не позднее чем через 7 дней после получения из Избирательной комиссии Удмуртской Республики общих итогов сходов, собраний граждан. 3. Установление или изменение границ муниципальных образований осуществляется законом Удмуртской Республики. 4. Государственный Совет Удмуртской Республики публикует отчет о рассмотрении на своем заседании результатов учета мнения населения по вопросу об установлении или изменении границ муниципальных образований не позднее 7 дней после проведения данного заседания. 5. Жалобы и заявления по вопросам проведения собраний, сходов, подведения итогов собраний, сходов рассматриваются Избирательной комиссией Удмуртской Республики". Законъёсты тӥян законлы пӧрмиз ни, лэся Туала улонмы пумысен кылдэм малпанъёсы, оло, куд-огезлы уз но кельше. Озьы ке но, политика, экономика шоры историклэн синмыныз учкыса гожтэме потӥз. Мон сямен, туала антикоммунистъёс, Россилэсь историзэ юри мыдланьтыны туртто, шуо, революцилэсь азьло, пе. Россия огез кужмоез империя вал, ялан ушъяло Столыпинэз. Но 1905-тӥ- 1907-тӥ аръёсы, нырысетӥез удалтымтэ революция бере, кӧня адямиос ошылэмын вал Столыпинлэн косэмезъя - соку солэн кыӵесъёсыз вань калыкез кышкатыса возьылӥзы. Нош зэмзэ-а зол азинске вал Россия? Экономикая ке учконо, 1914 арын Россия дуннеын 5-тӥ интыын сылэ вал, нош куд-ог удысъёсъя, кылсярысь, электрокужым поттонъя - 10-14-тӥ интыын, калыкез дышетонъя - берпуметӥ интыын. Котькуд визьмо политик но учёной валэктыны быгатоз, кыӵе пӧртэмлыксы огшоры переворотлэн но революцилэн. Россия котьку но узыр вал переворотъёсын, уката но ЪВИИИ даурын. Сыӵе амалэз уже кутыса куштылӥзы огъёссэ эксэйёсты но пуктылӥзы мукетъёссэ. Озьы дворцовой переворотъёс йырин Россиен кивалтӥзы Анна Ивановна, Елизавета Петровна, Екатерина ИИ, Александр И. Таӵе ужъёсы, валамон, калык ӧз пыриськылы. Социализмез курласьёс али Быдӟым Октябрь революциез но переворотэн гинэ ӵошатыны выро. Сое, пе, кӧня ке большевикъёс но немец шпионъёс гинэ лэсьтӥзы. Та революция шоры озьы ке учконо, соку малы меда сое кутскемезлэсь азьло ик кекатыны ӧз быгатэ, малы граждан ож пуромиз, малы империалистической государствоос солы пумит нюръяськыны ӧдъязы? Революция бере калык азьланезлы осконъёсын улӥз. Ӟеч улонэз матэктон понна, вань кужымзэ сётылӥз. Озьы пумен ӝутскиз Россилэн экономикаез, со понна 3-4 ар гинэ кулэ луиз. 1920 арын Россиын сомында корт потто ни вал, кӧня поттылӥзы Петр И дыръя. Странамылэсь экономиказэ ӵошатыны луэ ни вал та удысын 1913 арын басьтэм азинсконъёсын. Но мар каризы 3-4 ар куспын туала политикъёс? Быдтӥзы Союзэз, куашкатӥзы огъя экономикаез, армиез, наукаез, культураез, дунтэк дышетонэз, эмъяськон удысэз. Данак луизы йыртэмасьёс, ужтэк кылемъёс, мумы-бубытэк кылем нылпиос. Котькызьы али сьӧдманы мед вырозы Ленинэз, но со странаез секыт югдурысь поттон понна, кыӵе ке но амалъёс шедьтылӥз. Тодады вае "военной коммунизмез" но НЭП-ез. Капиталист странаослэсь юрттэтсэс курытэк кылдылӥзы заводъёс, колхозъёс, школаос но институтъёс. Социализмлы оскытэк, сыӵе азинсконъёс ӧй луысалзы. Сотэк Атай музъеммес но фашизмлэсь утьыны, быгатысалмы-а меда? Бен, Быдӟым ож котькуд семьяе уно синкылиос ваиз. Куашкатэмын вал 1710 городъёс, 70 сюрс пала гуртъёс. Мар бен одӥг ожмаськон но ыштонъёстэк уг ортчы. Но кызьы, маин меда валэктод туала реформаторъёслэсь странамес война бере вакытлы вуттэмзэс? Быдӟым Отечественной война дыръя асьме правительство, США-лы киулаз сюремлэсь кышкаса, "Маршаллэн планэзлэсь" палэнскиз. Но малы меда алиосыз кивалтӥсьёсмы кунгож сьӧрысь юрттэтлы гинэ оскыса уло, Международной валютной фондлэсь ялан кредитъёс куро? Война бере вакчи дыр куспын странамы ӝутӥз экономиказэ, вамыштӥз космосэ. Дунне азьын сылӥсь бадӟым ужпумъёс СССР-тэк ноку ӧз эскериськылэ. 1956 арын КПСС-лэн ЪЪ съездэз шараяз социализмлэсь тырмымтэоссэ, курлаз адямиез вылӥ ӝутонэз (культэз). Сталинлэсь сьӧд ужъёссэ мон но туж умойтэмен лыдъясько. Но табере адӟисько ке, мар лэсьто демократъёс, Сталинлэн ужъёсыз шоры но мукетгес мылкыдын учкисько. Законъёсты тӥян законлы пӧрмиз ни, лэся. Адямиос азьло сямен ик юнме шорысь тросэн быро. Тани Удмуртиын кылем арын сизьым толэзь ӵоже 8.065 нылпи вордӥськиз, нош кулӥз 10.456. Озьыен, кулэмъёслэн лыдзы, вордӥськемъёс сярысь, 30 процентлы тросгес. СССР-ын сыӵе югдур вал Быдӟым Отечественной война дыръя гинэ, ожын быремъёсты лыдэ басьтыса. Туж кулэсмиз воргоронъёслэн улон даурзы. Тае лыдэ басьтоно ке, Россия дуннеысь странаос пӧлын туннэ 135-тӥ интыын сылэ. Озьы луыса кошке кадь: асьме политикъёс адямилэсь самой дунозэ - улонзэ вакчиято. Луэ-а странамес таӵе секыт югдурысь поттыны? Амалъёс вань. Нырысь ик дугдытоно калыклы пумит чаклам реформаосты. Сыӵе сюрестӥ мыныса, капиталистической государствоос странамес пумозяз кекатозы. Россимы али мырдэм-мырдэм уте ини аслэсьтыз эриксэ, кунгожъёссэ - со но лэсьтӥське СССР вакытэ кылдытэм ож тӥрлык (вооружениез) чотын. Сое выльдыны но озьы ик армиез возьыны демократъёслэн коньдонзы ӧвӧл. Али трос верасько армиын воштӥськонъёс ортчытон сярысь, но кин солы оскоз? Вытъёс бичаса гинэ ӝутод шат военно-промышленной комплексэз? Огъя экономикаез ӝутон вылысь берытсконо социалистической производствоез радъян борды. Валтӥсь саклык висъяно агропромышленной комплекслы, гурт хозяйствоез ӝутытэк, кыдёке уд вамышты. Туннэ вань магазинъёс тырмытэмын кунгож сьӧрысь ваем сиён-юонъёсын. Азьланяз мар луоз? Бен, кылем арын инкуазьлэн юрттэменыз, умой урожай басьтӥм. Но кыӵе секыт йӧтӥз воштос ёзъёсын, эстӥськонэн, техникаен, уждунэн. Та удыс но возиське ай совето аръёсы дасям техника чотын. Кызьы ушъяськизы Россилэн кузёосыз, туэ нырысьсэ, пе, луонлыкъёс кылдӥзы ю-нянез миллион тоннаосын кунгож сьӧры вузаны. Озьыен, ми соослы нянь келялом, нош асьмеос со интые Франциысь колбаса, Германиысь "Рама" вӧй, Америкаысь "Бушлэсь пыдъёссэ" ваёмы. Тӥни озьы лякытэн быдтыны луэ вылэм пудо вордон гидъёсмес. Таӵе лыдпусъёсты вераме потэ на: выльдӥськон кутскытозь, асьме странаын, США-ын сярысь, 17 пол тросгес потто вал тракторъёс, 14 пол тросгес комбайнъёс. Социализмен нюръяськиськомы шуыса, табере вань ӟечез быдтэмын. Вань верам тырмымтэосты быдтыны луэ калык пала берытскыса гинэ, но жаляса верано, туала политикъёс ужало ӧжыт лыдъем узыръёс понна гинэ. Мар карыны кулэ на лякытэн югдурысь потон понна? Нырысь ик государство ас кияз возьыны кулэ бадӟым предприятиосты, банкъёсты, мукет государствоосын вузкаронэз. Выльысь берытсконо планъёсъя ужан борды, чаклано дунъёслэсь вошъяськемзэс, но лэзёно ӧвӧл музъем вузанэз. Секыт югдурысь одӥг гуртэн, городэн, предприятиен яке районэн гинэ уд поты - потоно огинэ кариськыса, быдэс государствоен. Куд-ог политикъёслэсь кылоно луэ, государство, пе, юрттоз зол хозяйствоослы гинэ. Нош мар кароно соку ляб хозяйствооын улӥсь адямиосын: пиналъёсын, пересьёсын? С. ВОРОНЦОВ. Асан совхоз-техникум. Кун Кенешлэн дас куатетӥ сессиез Кивалтон радъяськоз выль сямен Кылем арня куспын депутатъёс инъет чотын кутӥзы республикаысьтымы ёросъёын кун властьлэн ёзъёсаз но муниципалитет кылдосъёсы быръёнъёсын герӟаськем куать законлы проектъёсты. Озьы ик эскеремын вал Удмурт Республикалэн Конституциысьтыз 82-тӥ ёзэтаз воштон пыртон сярысь ужпум. Кутэм законъя верам ёзэтлэн кыкетӥ люкетэз воштэмын. Вылӥ Кенешен кутэм законъёс но мукет документъёс азьвыл газетъёсын печатлам бере дас нунал ортчыса кужыме пырылӥзы ке, табере - печатлам нуналысен. 13-14 январе сессия ужзэ азьланьтӥз. Повесткае ватсаса пыртэмын вал Удмурт Республикаысь Кун Кенешлэн Регламентэзлэн 105-тӥ ёзэтаз ватсан пыртон сярысь ужпум. Выльдэм ёзэтъя Кун Кенеш табере законопроектъёслэсь воштыны яке выльдыны ӵектымтэ ёзъёссэс соку ик быдэсак кутон понна голосовать карыны быгатэ. Со юрттоз законъёслы проектъёсты эскеронэз ӝогомытыны. Ӵектонъёсты но дэмланъёсты пыр-поч сэрттыса-пертчыса, кык нунал куспын депутатъёс быдэсак кутӥзы "Удмурт Республикаысь ёросъёсысь депутатъёслэн Советъёсазы депутатъёсты быръён сярысь", "Удмурт Республикаысь ёросъёсын кун властьлэн ёзъёсыз сярысь", "Удмурт Республикаын интыосын аскивалтон сярысь" Законэ воштонъёс но ватсанъёс сярысь", "Удмурт Республикаын интыосын аскивалтонъя быръем ёзъёсы депутатъёсты быръён сярысь" но "Удмурт Республикаын муниципалитет кылдосъёслы кивалтӥсьёсты но интыосын аскивалтонъя мукет должностной муртъёсты быръён сярысь" законъёс. Прокурорлэсь ӵектонзэ лыдэ басьтыса, депутатъёс воштонъёс но ватсанъёс пыртӥзы Удмурт Республикалэн "Муниципалитет кылдосъёслэсь границаоссэс тупатыку но вошъяку калыклэсь мылкыдзэ одно ик лыдэ басьтон сярысь" Законаз. Сессилэн повесткаяз ватсаса пыртэмын но быдэсак кутэмын "Удмурт Республикаысь ёросъёсын муниципалитет кылдосъёсты быдтон но гуртъёсын, гурт округъёсын, сельсоветъёсын муниципалитет кылдосъёсты радъян сярысь" Закон. Та законъя гуртъёсын аскивалтонъя выль кылдытоно органъёсы депутатъёсты быръёнъёсты ортчытыны чакламын 1998 арын 9 августэ. Туэ 4-9 январе гурт ёросъёсын ортчем кенешъёс но ӧтчамъёс пумысен ивортон лэсьтӥз Удмурт Республикаысь быръёнъёсъя комиссилэн тӧроез Афанасий Тубылов. Калыклэсь мылкыдзэ лыдэ басьтонъя кенешъёсы но ӧтчамъёсы ваньмыз 107944 мурт пыриськиз яке гуртысь бырйисьёс пӧлысь 26,8 процентэз. Кенешъёсы пыриськемъёс пӧлысь 87 процентэз куаразэс сётӥзы ёросъёсын кун властьлэсь ёзъёссэ кылдытон понна. Озьыен, Кун кенешлэн кутэм законъёсызъя но калыклэн мылкыд каремезъя гурт ёросъёсын азьланяз кылдытэмын луозы кун властьлэн ёзъёсыз, нош аскивалтонъя ёзъёсты калыклы матэгес карыны чакламын. Сессия ужзэ азинтӥз 16 январе. Н. Корякин. 01 ивортэ Вожвылъяськон Тушмондэ вормемед потэ ке, ваньбурзэ пеньлы пӧрмыты. Таӵе Законъя уло асьмелэн туала купецъёсмы. Ымусьтон ӝытэ но сьӧлыкамлэсь ӧз кышкалэ: сьӧд ӵын огкутскемен шобыртӥз Ижевскысь 9 Январь ульчаысь огзэ коммерческой ларёкез. Кинлэн меда сокем йырыз кур Наталья Григорьевалы, али гинэ вузчи луыны дышетскись егит кышномуртлы? Кинлы ке но туж люкетӥз, вылды, солэн нянен но йӧлын вузкаронэз. Таӵе малпанэ вуоно, тыл понэм бервылэз адӟыса. Ларёклэсь укнозэ сӧрыса, куинь егит пиос отчы бензинэн бутылка кушто, асьсэос пегӟо. Ваньбурез быдэсак сутскемлэсь утизы мынӥсь-ветлӥсьёс. Тылпу кысӥсьёс вуытозь, ӝуась интые лымы пазязы. Сиён-юон 300 сюрс манетлы изъянтэмын, бордаз ватсаськиз на миллионъёсын сылӥсь ларёк дун. Сое берыктон сярысь йырыз мед висёз ни медоос пыр ужась "кузёлэн". Та учыръя ӝутэмын уголовной уж. А. ЕМЕЛЬЯНОВ. Кыл дунне Вылез асьмеды медаз усыкмыты Лыдӟисьёсын пумиськонъёс дыръя трос юанъёс кылдыло вордскем кылмес азинтон ласянь. Алнаш ёросысь дышетӥсьёс тунсыкъясько: малы, пе, "Удмурт дунне" уг печатла выль кылъёсты? Тодады вайытӥськом выль кылъёсты малпанэн но пыӵатонэн герӟаськем сюресмес. 1995 арын 13 ноябре Кун Кенеш но Правительство кутӥзы "Удмурт нимкылъёсъя республикаысьтымы но шонер гожъяськонъя элькун комиссия сярысь" постановление. Сое "Удмурт дунне" сётӥз 7 декабре. Комиссия сярысь положениын (валатонын) пусъемын: удмурт кылын нимкылъёс (терминъёс) кылдытонын со луэ вылӥ ёз, печатла нимысьтыз бюллетеньёс, решениоссэ но йылпумъянъёссэ озьы ик поттэ "Удмурт дунне" газетын но ивор вӧлмытонъя мукет ёзъёсын. Та комиссилэн йылпумъянъёсыз кужыме пыро но вошъянтэм луо, соосты печатлам бере. Жаляса вераны кулэ: 1996-1997 аръёсы со одӥг бюллетень но ӧз потты. Комиссилэн кыл кутӥсь секретарез Александр Овчинников оскытэ: нырысетӥ бюллетень дась, тани-тани вуыны кулэ асьме кие. Бюллетень печатламтэ ке, отчы пыртыны чаклам кылъёсты малы дырызлэсь вазь вера Удмурт радио, нош куддыръя - телевидение? Таӵе юанлы Александр Овчинников валэктӥз: - Комиссиын кенешемын: выль малпам кылъёсты, соослы калык каньылля мед дышоз шуыса, радио пыр сётъяно. Оглом сыӵе амал умойтэм ӧвӧл, дыр. Зэм, куддыръя валантэм югдур кылдылэ ик. Комиссиын трос куараен умоен лыдъямын вал асваньбур (собственность). Нош Удмурт радиоын но "Кенеш" журналын со кызьы ке луэ асъет. Мае возьматэ таиз? Кызьы вордскиз ӧри (комиссия) кыл? Нокызьы уд ятвылты. Лыдӟисьёссэ сыӵе кылъёсын сурантэм понна, "Удмурт дунне" соосты уз куты бюллетене печатламлэсь азьвыл. Кылъёс валантэм дыръя адями быгатэ телевизорзэ яке радиозэ кысыны. Нош газетсэ сэрпалтӥз ке огез, кыкетӥез, куинетӥез... Сокем шуген люкам 13 сюрс экземпляр тиражез ыштыны но кема ӧвӧл ук. Туж чакласькиськом ке но, редакцимес пыкылыны выро, куд-ог гожъямдэс ум валаське шуыса. Вылӥ верам комиссия озьы ик ужа гожъяськон правилоосты умоятон бордын. Таиз но туж кулэ. Малы, шуом, огзэ деепричастной оборотэз висъяськом, мукетсэ ум? Малы гожъяськом кык пӧртэм - кӧс нунал но кӧснунал? Юнматыны дасям выль правилоосты учкыку, амалтэк вуоно таӵе малпанэ: соос сокем ик умоятэмын ӧвӧл. Тодосчиос (учёнойёс) ваньзэ рос-прос валэкто: таиз кыл кутэмын меӵак пуштросэн (черко гурт - черкен гурт), таиз - переносноен (черкогурт - село). Нош армиысен гуртаз ивор гожтӥсь пияш та сярысь малпаськыны дышымтэ. Школаысен йырзэ пӧртэм примечаниосын но исключениосын копак усыкмытӥзы бере, со табере эркынак выже ӟуче: здрафствуй мама! Озьы медаз луы шуыса, ас кылзэс дышетэм муртъёс удмурт сямен ик гожъяськыны мед пишмытозы шуыса, удмурт газетъёслэн но журналъёслэн кивалтӥсьёссы ас куспазы кык-куинь кузя но, ваньзы ӵош но олокӧня пол кенешылӥзы ни. Дэмен утчазы гожъяськон правилоосты огшорыгес карон амалъёс. Кема ченгешемзы бере, огкылэ вуизы таӵе ужпумъёсъя: 1. Огшоры кылкузъёслэсь (словосочетаниослэсь) пӧртэм, чылкак выль пуштрос сётӥсь валчекылъёсты ӵош гожтылоно. Шуом: кӧснунал - суббота (но кӧс нунал - сухой, солнечный день); огкыл - договор (но: ог кыл - одно слово); Та радын озьы ик: пельпум - плечо (но: пель пум - кончик уха); шырбыж - подорожник (но: шыр быж - мышиный хвост). 2. Бере, дыръя, понна, вылысь, йырин, сэрен, валче кылъёсын отглагольной оборотъёсты, -(э)мен, -(э)мъя, -мтэен, -мтэысь, -(э)мысь суффиксъёсын пӧрмем кылъёсын отглагольной оборотъёсты, деепричастной оборотъёсты, веранлэн пуштросэз соин валче уг ке мыдланьскы, глаголэн верам действилы пумит луись действиез уг ке возьматӥськы, запятой пуктоно ӧвӧл. Шуом: Льӧмпу сяська тӧлӟем бере куазь пӧсь луиз. Литературной кружокын произведениосты эскерон дыръя юн ченгешылӥзы. Нош мон ветлӥ пыдъёсы ик котмытозь. 3. Толэзь но нунал нимъёсты ӵош гожъяно: толшор, тулыспал, южтолэзь, оштолэзь, куартолэзь, инвожо, пӧсьтолэзь, гудырикошкон, куарусён, коньывуон, шуркынмон, толсур; вордӥськон, пуксён, вирнунал, покчиарня, удмуртарня, кӧснунал. Со сяна, валтӥсь редакторъёс И. М. Байметов ("Вордскем кыл"), В. Б. Возняков ("Ӟечбур!"), Е. Е. Загребин ("Инвожо"), П. В. Куликов ("Кенеш"), У. Ш. Бадретдинов ("Кизили") но А. П. Шкляев ("Удмурт дунне") нимкылъёсъя но шонер гожъяськонъя комиссие вазиськизы ӵектонэн: улонын эскерон вылысь, вылӥ верам правилоосты газет-журналъёсын матысь дыре ик кутоно ни. Соку ас малпанъёссэс вераны быгатозы данакез лыдӟисьёс. Комиссилэн секретарез Александр Овчинников оскытӥз: валтӥсь редакторъёслэн ӵектонзы ӝоген эскеремын луоз комиссиын, соосты но отчы ӧтьыса. Ог люкетэз лыдӟисьёсмы озьы ик куро законъёсты ӟуч сямен печатланы. Удмурт кылэ берыктэмъёссэ, пе, умгес валаське. Таӵе ӵектонэн редакция туж ик соглаш ӧвӧл. Удмуртъёслы чаклам газетэз асьмеос ум валаське ке, кулэ-а сыӵе газет? Паськытгес учкыса - кулэ-а сыӵе кыл? Курон вань бере, "Удмурт дунне" сое санэ басьтытэк уз кельты. Одӥг ласянь, законъёсты вольытгес берыктыны тыршоз. Нялтас пусйыны кулэ: ӟуч сямен но соос сокем чебересь ӧвӧл, куд- огзэ кык-куинь пол лыдӟыса но валаны шуг. Мукет ласянь, тужгес секыт пуштросо законъёсты, вылаз ик, соосты калык доры чалякгес вуттоно ке, печатласьком ӟуч сямен. Газет лэсьтӥське лыдӟисьёс понна. Туэ соос милям йылӥзы кӧня ке сюрслы. Соин ик тӥледлы олокӧняетӥзэ вазиськиськом ни: сётэлэ "Удмурт дуннеез" умоятонъя ӵектонъёстэс. Ми соосты рос- прос учком но луэмезъя быдэсъяны тыршом. Алексей Шкляев, "Удмурт дунне" газетлэн валтӥсь редакторез. Нош ик нульёсты куштон сярысь Та нуналъёсы Кун Кенешлэн юртаз нош ик ортчиз журналистъёсын пресс-конференция. Люкаськемъёс азьын вераськиз Россиысь Центральной банкысь одӥгез эксперт, Плеханов нимо академиысь доцент Дмитрий Зайцев. (Нялтас вераса, со асьмелэн бӧлякмы. Йылпумъямын Ижевскысь механической институтэз, али улэ но ужа Москваын). Нош Москваысен, Центробанклэн юртысеныз селектор пыр вераськиз Калыкен кусып возёнъя департаментлэн кивалтӥсез Ирина Ясина. Пумиськон сӥземын вал деноминацилы. Газетмы та ужрад сярысь тырмыт гинэ гожъяз вал ини. Соин ик таяз учыре тыршом мар ке но выльзэ гинэ ивортыны. -Юан: Малы кулэ луиз деноминация но одно ик туэ? Д. З.: Та ужрад сярысь вераськон нырысьсэ потӥз 1993 арын. Малпамын вал ортчытыны сое 1995 арын. Но соку ӧз пӧрмы. Малы ке шуоно, экономика куашка вал, дунъёс арнялы быдэ сямен будӥзы. Шуг вераны, кыӵе тупатонтэм изъян вайысал сыӵе вакытэ ортчытэм деноминация. Али югдур мукет. Дунъёс эсэпезъя будо. Экономика куашкамысь дугдӥз... Залысь Талэсь улӥе куашканы нокытчы ини угось! Д. З.: Соиз но зэм, дыр. Луысал улыны деноминацитэк. Но чаклалэ ай асьтэос: странаын поттэм огъя ваньбурез квадриллионъёсын лыдъяно луиськом, уждунэз но дунъёсты - миллионъёсын. Мултэс нульёс лыдӟон-пертчонэз гинэ шугомыто. Юан: Валамон, деноминация - со одӥг нуналлы пусъем ужрад ӧвӧл. Кызьы со ортчоз? Д. З.: Оглом учконо ке, деноминация чакламын 2002 арозь. Татын мон пусйысал солэсь сизьым гердзэ шуод-а, мар-а. Миым 4 августэ потӥз Президентлэн деноминация сярысь Указэз. Миым ик 1 декабре вань вузъёслы вужзэ но выльзэ дунъёсты гожъяны кутскизы. Туэ тани 1 январьысен кутскиз коньдон воштон. 1 июльысен одӥг банк но вуж коньдон уз сётъя ни. 31 декабре вузъёслы вуж дунъёсты возьматэмысь дугдозы. 1999 арын 31 декабрьысен вуж уксё "ветлэмысь" дугдоз. Нош 2002 арлэн пумаз банкъёс но вуж манетъёсты вошъямысь дугдозы. Юан: Деноминация дыръя вужез но, вылез но манетъёс "ветлозы" бере, вузкаронын но, калык киын но мултэс коньдон люкаськоз. Мукет сямен вераса, эмиссия луоз. Озьыен, ӝутскоз инфляция, будозы дунъёс? Д. З.: Алдаськем уг поты, меӵак верало. Эмиссия пумысен юанэз мон ӵошатысал инмар вань-а, ӧвӧл-а шуыса юанэн. Со кызьы ке луоз но, озьы ик уз но шуыны яралоз. Со сяна, мон тани мае пусйысал. Туэ нырысетӥ паларе ик 80 процентэз вуж манетъёс бергамысь дугдозы, банкъёсы кылёзы. Озьыен, кык пӧртэм коньдон "ветлэмен" герӟаськем шугъяськонъёс кылдӥзы ке но, кемалы ик уз. И. Я.: Москва итӥське. Дмитрий Александровичлэн верамез борды мон ватсасал на дунъёс пумысен. Азьвыл аръёсы вузъёс тырмымтэен сэрен, соослы дунъёсты будэтыны туж капчи вал. Вуз котькыӵе дуно мед луоз но, туж кулэяськид ке, одно ик басьтод, мукет дунын уд шедьты угось. Табере вузъёс тырмыт бере, басьяскись бырйиське ини. Валамон, мултэс дунозэ вузэз нокин но уз басьты. Соин ик дунъёсты тупатоз ачиз басьяськись, шуыны луоз. Со муген ик инфляция но будыны кулэ ӧвӧл. Экономистъёслэн чакламзыя, туэ инфляция 5-8 процент луоз, миым со вал шорлыдын 13 процент. Пусъё на мукетсэ но. Веранэз ӧвӧл, вузкарисьёс яке вуз поттӥсьёс огкылысь кариськыса огкадь бадӟым дунъёс тупатыны быгатозы. Но таӵе учыръёсты алон понна антимонопольной законъёс вань. Юан: Котькуд государствоын коньдонлэсь кужымзэ мертало зарни запасэн. Российской манетлэн сыӵе зарни пыкъетэз али вань-а меда? Д. З.: Специалистъёслэн верамзыя, вань. Собере коньдонлэн кужымез экономикалэн азинскемез, юнмамез бордысь потэ ук. Малы сое одно ик зарниен мерталод? Юан: Малы соку зарни запас кулэ? Д. З.: "Сьӧд" нуналлы. Юан: Малы коньдонысь одно ик куинь нульзэ куштӥзы, кыксэ но, ньыльзэ но ӧз? И. Я.: Валэктонэз огшоры гинэ, нокыӵе лушкем малпан ӧвӧл татын. Коньдонэз сюрс пол "восьтэмгес" карыса, сое капчи лыдъяны, уже кутыны. Тани 1000 манет вал ке, кылиз 1 манет. Каньыл ук? Юан: Коньдон воштон туж-а дуно усиз? Д. З.: Сое котькинлэсь ӟеч тодэ Арнольд Войлуков гинэ, Центробанклэн Председателезлэн нырысетӥ воштӥсез, со ик деноминацилэн "киросатаез". Но журналистъёс - шӧртчи калык, ваньзэ тодо. Тани "Деньги" журнал гожтэ, деноминацилы 500 миллиард манет кутэмын шуыса. И. Я.: Мон уг малпаськы, деноминация сокем ик дуно усёз шуыса. Государство угось ялан коньдонэз выльдэ, со уж чакламъя мынэ. Манетъёс угось вужмо, посӥсько, кесисько. Нялтас вераса, деноминация та ласянь пайда ваёз. Бумага манетъёс интые угось тросгес корт коньдон поттэмын луоз. Нош со 30 ар пала чида. Вуж бумага манетъёсты но тӧлъя-буръя уз лэзе: соосты юдыса- вандылыса, лэсьтӥськон материалъёс дасянэ кутозы. Юан: Редакцие вуэм гожтэтъёсысь тодмо, куд-ог вузкарисьёс выль манетъёсты кутыны пумит луо шуыса. И. Я.: Сыӵе право нокинлы но сётэмын ӧвӧл. Котькуд сыӵе выллем учыр пумысен вазиськоно вузкаронъя инспекцие яке властьлэн мукетъёзъёсаз. Юан: Выль манетъёсты "кибашлыос" асьсэос суреданы уз быгатэ-а? Оло, мукет но йыртэман- пӧяськон учыръёс луозы? И. Я.: Выль коньдонэз суреданы туж но туж шуг луоз. Специалистъёс верамъя, матысь кык-куинь ар ӵоже сыӵе ужлы "кибашлыос" уз луэ ай. Асьмелэн выль манетлы дуннеын али тужгес но "кескичез". Таин соглаш луо мукет странаос но. Йыртэмасьёс сярысь ке огъя верано, соос котьку но, котькытын но вал. Басьтом али дырез. Шуом, кыӵе ке етӥз пияшъёс вуозы пыдлось гуртэ но ӵектозы: "Песяйёс, ми тӥледлы выль коньдон ваимы, сое городын но туж шедьтыны. Нош вужзэ манетэз туннэ-ӵуказе басьтэмысь дугдозы. Ми тӥледлы воштом сое, но вуж сюрс манет понна сётомы 70 копейка". Туж ик трос тодӥсьтэм-валасьтэм песяйёс оскозы но. Но МВД-ын ужасьёс таӵе учыръёслы дась, азьвыл ик алэмын. Юан: Деноминацилы дасяськон кема гинэ мынӥз, дыр. Но котькыӵе бадӟым ужрадын вань чыры- пырыез лыдэ басьтыны шуг. Али кыӵе ке тырмымтэос, янгышъёс уг-а шараясько? И. Я.: Син медам усьы, ваньмыз огсыр, азьвыл чакламъя ортче. Нульёсты куштон кык арня мынэ ини ке, сюлэмшугъяськыны мугъёс ӧвӧл. Юан: Мар луоз Сбербанке 1992 арозь понэн коньдонэн? И. Я.: Деноминациез ӧвӧл сурано ыштэм вкладъёсты берыктонэн (компенсациен). Законын меӵак верамын, со государстволэн пунэмез шуыса. Закон быдэстэмын луоз. Но вань вкладъёсты огполскын берыктӥд ке, калык киын коньдон вераны луонтэм йылоз. Озьыен, дунъёс но чутрак будозы. Соин ик компенсация кӧня ке дыр ӵоже кыстӥськоз. Кӧня коньдон та ужрадын государство бюджетысь арлы быдэ висъяны быгатоз, соиз ини экономикаын югдур бордысь потоз. Г. ТИХОНОВ. ЛЭЧЫТ УЖПУМ Кыӵеслэсь коӵыш но уте Ивортылӥм ни: Ижын ортчиз Россиысь психиатръёслэн конференцизы. Та ужрадын эскерем ужпумъёс пӧлын - Россиын суицидэн герӟаськем югдур. Москваысь социальной но судебной психиатрияя центрысь огез профессор пусйиз, удмуртъёс асьсэды асьсэос быдтӥсьёслэн лыдзыя нырысетӥ инты басьто шуыса. Талэн мугъёсыз но валэктэмын вал: удмуртъёс, пе, уг быгато улонлэн воштӥськемезлы нялтас кариськыны, ас кужымзылы оскыны, малы ке шуоно, коллективен улыны дышемын, нош туала улон нимаз улэмез кулэ каре. Одӥг кылын вераса, янгыш луэменталитет - визь- луллэн, улонэз валамлэн аспӧртэмлыкъёсыз. Нош шаерысьтымы психотерапевтъёс, психологъёс югдурез кызьы дунъяло, йыр быдтӥсьёслэсь йылэмзэс маин валэкто? Васильев Валерий Витальевич, республикаысьтымы валтӥсь суицидолог: - Психиатръёслэн конференцизы огъя югдурез гинэ возьматӥз. Удмуртъёслэсь улонысь ас мылкыд каремзыя кошкемзэс валэктӥсь мугъёс, кудъёсыз та ужрадын чузъяськизы, пыр-поч эскеремез, юнматэмез витё на. Адямилэсь ассэ ачиз быдтэмезлэсь мугъёссэ дуннеын кема утчало ини. Но али ке но валантэм, малы, шуом, венгръёс пӧлын улонысь ас мылкыд каремъя кошкон паськыт вӧлмемын, Норвегиын но Даниын, югдур чылкак пӧртэм. Россиын, озьы ик Удмуртиын но, социализм вакытэ астэ ачид быдтон учыръёс "ӧй вал". Берло аръёсы гинэ луонлык кылдӥз суицидологилы - адямилэсь улонысь кошкыны тыршемезлэсь мугъёссэ валэктӥсь наукалы - кылдыны но азинскыны. Соин ик ум быгатӥське на ӝот-ӝот валэктыны, малы удмурт калык пӧлын йырзэс быдтӥсьёслэн лыдзы уно. Медициналэн азинскон сюресэз возьматэ: висёнэз эмъяны луэ, мугъёссэ валатэк но. Кылем даурын, кылсярысь, паласькись висёнъёслэсь кызьы вӧлмемзэс уг ке но тодо вал, соосын нюръяськыны дышизы. Озьы ик ми но оскиськом: секыт югдуре шедем адямиослы юрттыны быгатом. Берло дыре быдэс дуннеын улонысь кошкон учыръёс йылӥзы. Азинскем кунъёсын - тужгес. Та герӟаськемын общество вашкала йылолъёссэ ыштэмен. Адями коллективлэсь висъяське, ас понназ улыны, ас сяменыз малпаськыны тырше. Нош улонлэн кӧшкемыт вуберганаз шеде ке, отысь потыны кужымез уг тырмы. Со сяна, бӧлякен улӥсь адями улон но кулон сярысь ичигес малпаське. Калыкен кусыпъёс тэшкаса, улэмезлэсь пайдазэ ӵемгес утчаны кутске. Улонэз бездыт, нокинлы кулэ луисьтэм потыны кутске ке, й ыраз олокыӵе но малпанъёс лыкто... Нылпиос пӧлын улонысь кошкон учыръёс шер пумиськыло. Аръёс ортчемъя, адями ассэ быдтон сярысь ӵемгес малпаське. Шоро-куспо арлыдоос малпанъёссэс ӵемгес быдэсто. Улонысь вазьгес кошкыны дырто пересьёс но: арлыдо нылкышноос - ӵемгес, мӧйы воргоронъёсын ӵошатоно ке. Быдэ вуымтэос пӧлын суицид учыръёс сыӵе ик ӵем уг пумиськыло. Но соослэн лыдзы йылэ. Югдур ӧз воштӥськы ке, улонысь кошкись быдэ вуымтэослэн но мӧйыослэн лыдзы ӵошалоз. Оглом учконо ке, йырез кыӵесэ донгемлэн мугез одӥг - адями югдурез шонер дунъяны уг быгаты, шуг-секытысь потыны амал ӧвӧл, малпа. Со герӟаськемын адямилэн сямыныз, генетикаеныз но, оло. Лекомцев Владислав Тимофеевич, Ижевскысь Медициная кун академиысь психиатрияя но медицинской психологияя кафедраен кивалтӥсь, доцент: - Суицидъя Удмуртия дуннеын нырысетӥ интыын сылэ шуэмен соглаш кариськыны уг луы. Кылсярысь, 1993 арын Пермь областьын 100 сюрс адями пӧлысь 92-ез йырзэ быдтӥз, Удмуртиын 1996 арын - 71-ез, Кемерововоын та арын ик - 150-эз. Кызьы адӟиськом, Удмуртиын гинэ ӧвӧл, мукет улосъёсын но югдур секыт. Быдэс дуннеын городъёсын улӥсьёс улонэнызы капчигес люкисько. Асьмеос гинэ пӧртэмесь: йырзэс быдтӥсьёслэн лыдзы гуртъёсын уногес. Со понна экономикаын кылдэм секыт югдур янгыш. Россиын улӥсьёс пӧлысь 1 процентэз ужтэк кыле ке, суицид учыръёс 4 пол йыло. Адями азьланезлы осконзэ ыштэ ке, выль улонлы уг дышы, со азе пуктэм куронъёсты быдэстыны уг быгаты, экономикаен, политикаен герӟаськем югдур понна котырысьтыз муртъёсты янгыше уг уськыты, урод каре ассэ гинэ. Малы озьы луэ? Шуг вераны. Адямилэсь кызьы но малы ассэ ачиз быдтон калозь вуэмзэ валэктыны ми ум быгатӥське на. Хотинец Вера Юрьевна, психология наукаосъя кандидат, Удмурт кун университетысь доцент: - Суицид удмурт калыклэн, озьы ик мукет финн-угор калыкъёслэн, аспӧртэмлыко сямзылы пӧрмиз. Та сям соосты мукет калык выжыослэсь висъя. Солэсь мугъёссэ удмуртъёслэн историысьтызы шедьтыны луоз, малпасько. Котькуд адямилэн улон сюресэз аслаз. Но со юн герӟаськемын калыкезлэн материальной но духовной культураеныз. Та герӟет лябӟе яке чылкак ыше ке, адямилэн котырысьтыз муртъёсын, ӵыжы-выжыосыныз кусыпъёсыз тэшкало, солэн сояз яке таяз учыре ассэ воземез воштӥське. Со воштӥськонъёс шуак уг кылдо - дауръёсын "кисьмало". Кылсярысь, Иисус Христослы оскон удмуртъёс пӧлын 16-тӥ даурысен вӧлмыны ӧдъяз. Озьы ке но, туннэ но со пумозяз валамтэ, солы дышымтэ. Нош язычествоен герӟаськем йылолъёс вире пыӵамын, соос али ке но быдэсъясько на, тужгес но гуртъёсын, адямилэн, гуртлэн, быдэс калыклэн улоназы "кузёясько". Та ласянь нимысьтыз пусъёно инмаръёслы курбон сётон сямез. Азьвыл но, куд-ог дыръя али но кыкез пӧлысь огзэ быръёно луэ ке, секыт учыре шеде ке, удмурт гажано инмарезлы ассэ ачиз курбон сётэ, аслэсьтыз данзэ утён понна яке вашкалазэ данъян, ӵыжы-выжыосызлэсь улонзэс умой пала берыктон понна. Озьыен, удмуртлэсь ассэ ачиз быдтэмзэ аспӧртэмлыко культураен герӟаськем но выжыысь выжые пыӵась сям шуыны луоз. Палэнэ кельтыны уг яра удмуртъёслэсь лул-визен герӟаськем аспӧртэмлыкъёссэс но. Гурт калыклэсь ужзэ, шутэтсконзэ дауръёсын-дауръёсын радъялляз кенеш. Озьы удмурт дышиз коллективлэн визьмыныз улыны. Туала вакытэ калыкен герӟетъёс пумен лябӟо, адями огназ кыле. Дышем сямъёслэсь куштӥськыны, астэ ачид чакласа возьыны секыт йӧтэ. Адями ачиз но уг тоды, ма кароз туннэ, ӵуказе, кызьы шуг-секытъёсты вормоз. Одӥг кылын вераса, ас визьмыныз улон солы секытэн сётӥське. Со сяна, психологъёслэн шаерамы ортчытэм эскеронъёссы возьмато, удмурт калык ваньзэ сюлэмыз пыр поттэ шуыса. Обществоын ортчись воштӥськонъёсты, шуг-секытъёсты со юнгес шӧдэ, соос пумысен тросгес сюлэмшугъяське, мукет калыкъёсын ӵошатоно ке. х х х Озьыен, учёнойёс но врачъёс суицид вӧлмемлы пӧртэм валэктонъёс сёто. Кин ке мугъёссэ утчатэк но яралоз шуэ, мукетыз туала улонлэн шуг-секытъёсыныз валэктэ, куинетӥез удмуртъёслэсь йылолъёссэс янгыше уськытэ. Та сяна но малпанъёс вань на, вылды. Котьма ке но, югдурез тупатыны сюресъёс утчано. Ма лэсьтӥське та ласянь? В. Т. Лекомцев: - Улонысь кошкемзылэсь азьвыл 30 процентэз пӧртэм врачъёслы вазиськылэ. Та лыдпус косэ кадь: врачъёс шонер валаны кулэ висёнлэсь мугъёссэ, висисьлэсь мылкыдзэ. Соин ик Ижевскысь Медициная кун академиын кык ар ӵоже ини суицид ужпумъёсъя лекциос лыдӟо. Россиысь мукет институтъёсын таӵеез ӧвӧл на. Со сяна, академиысь учёнойёс Дышетӥсьёслэсь тодон-валанъёссэс будэтонъя институтын дышетӥсьёсты нылпи психологилэн аспӧртэмлыкъёсыныз тодмато. Мар ватонэз, тросэзлэсь быдэ вуымтэослэсь улонзэс утьыны луысал, дышетӥсь ассэ шонер возьысал, югдурез кулэезъя дунъясал ке. Врачъёслэсь, адями лул-сюлэмез валаны быгатонлыкъёссэс муромытэм сяна, калыклэсь огъя культуразэ ӝутоно. Валэктоно, кызьы, малы адямилэн ассэ ачиз быдтыны малпанъёсыз кылдо, кыӵе амалэн соослэсь мозмытсконо, матысь муртъёсты озьы дауртэмлэсь утёно. Огзэ нимысьтыз пусйысал: йырзэс кыӵесэ донгисьёс пӧлысь 70 процентэз азьвыл аракы юо. Кызьы сое валэктоно? Депрессие шедем курадӟонъёссэ юыса вунэтыны тырше. Алкоголь огвакытлы юрттэ, улонзэ шулдыр буёлъёсын чеберма. Юэмъя аракылэн сыӵе "быгатонлыкъёсыз" чылкак воштӥсько. Со секыт мылкыдэз эшшо муромытэ но улонысь кошкон сярысь малпанъёсы вуттэ. Адямилы ассэ ачиз валаны юрттон ужпумъёсын котькудӥз ас понназы выро - "Знание" общество, Егитъёсын ужанъя комитет, Удмурт кун университетысь Адямилыкъя институт, медициная академиысь психиатрияя но медицинской психологияя кафедра... Но кужымзы кир-пазь луэмын бере, ужамзылэн пайдаез уг шӧдӥськы. Сарапулын, Воткинскын, Глазовын чакламын улонысь кошкыны малпанэн улӥсь адямиослы стационаръёс усьтыны. Та выллем центръёсты быдэ вуымтэос понна но усьтоно. Одӥг кылын вераса, ужпумъёс трос. Соосты быдэстон понна коньдон кулэ, кунлэн юрттэмез, калык понна сюлмаськемез. В. В. Васильев: - Россиысь куд-ог городъёсын психиатрической службаос кылдытэмын ини. Отын юрттэт сёто, ачиз адями мылкыд каремъя, солэсь нимзэ-тулзэ юатэк. Ижевскын но та ласянь маке-маке лэсьтэмын ини. Кылсярысь, улонысь кошкыны турттӥсь адямиос понна усьтэмын суицидологияя кабинет. Депрессие шедемъёслы юртто психиатрической диспансерысь врачъёс. Сыӵе адямиос вазиськыны быгато психологической юрттэт сётӥсь "Белая зебра" выллем центръёсы. Нош гуртын улӥсьёс понна номыр лэсьтэмын ӧвӧл на. Адӟем карыны но нокинлэсь, угось нокытын но, Удмуртиын сяна, гуртоос пӧлын йырзэс быдтӥсьёслэн лыдзы сомында ӧвӧл. Соин ик дуннеысь одӥг кунын но гуртъёсын улӥсьёс понна нимысьтыз психиатрической службаос кылдытэмын ӧвӧл. Асьмелы та бордын ужано, чылкак ӵошкыт интыысен кутскыса. Нош али гуртын улӥсьёс вазиськыны быгато ёрос больницаосысь психиатръёслы гинэ. Адямиез шуг-секытысь поттон, улыны кужым сётон ужпумез врачъёс огназы быдэстыны уз ворме. Мукет удысъёсысь специалистъёсты кыскыса психиатрической служба кылдытон сярысь приказлэн проектэз но дасямын вал ини. Но со кылиз кагаз вылэ.Тазалыкез утёнъя министерство валэктӥз: Россиын, пе, та выллем приказ гожтымтэ на, ас кожын ужан асьмелы кулэ ӧвӧл. Мугез валамон: таӵе бадӟым ужез вормыны трос коньдон кулэ. Нош асьмеос сое ум шедьтӥське, ёросъёсысь психиатръёслэсь тодон-валанъёссэс будэтон понна гинэ но. Удмурт Республикаысь Тазалыкез утёнъя министерстволэн коллегиезлэн решениысьтыз: "Улонысь ас мылкыд каремзыя кошкисьёслэн лыдзы дас ар куспын нырысьсэ кулэсмиз (1995 арын - 100 сюрс адями пӧлысь 77-ез йырзэ быдтӥз, 1996 арын - 72-ез). 1994-тӥ-1996-тӥ аръёсы психиатрической учреждениослы коньдон 2 поллы ичигес висъямын вал, Удмуртиысь мукет больницаосын ӵошатыса. Огаз ёросын но психотерапевтической кабинетъёс, палатаос, суицидологияя кабинетъёс усьтон понна ужрадъёс кутэмын ӧвӧл". Озьыен, палэнысь юрттэмез возьмано ӧвӧл. Аслад кужымедлы, аслыд ачид яке матысь муртэдлы юрттыны быгатэмедлы осконо. Валамон, шуге-леке шедем адямилы югдурез, аслэсьтыз тазалыксэ, малпанъёссэ шонер дунъяны шуг, кужмыз но, мылкыдыз но уз тырмы. Умой, сыӵе муртлэн кузпалыз, эшез, анай-атаез юрттыны быгатӥзы ке. Кондаков Владимир Семенович, Ижевскысь Медициная кун академиысь психиатрияя но медицинской психологияя кафедраысь ассистент: - Йырзэс быдтыны малпасьёсты яке озьы дауртэмзы бере улэп кылем адямиосты огазея огкадь мылкыд - соос умоезлы осконзэс ышто, "мон нокинлы но кулэ ӧвӧл, монэ огнаме кельтӥзы", малпало. Асьсэды асьсэос быдтӥсьёс пӧлысь 80 процентэз азьвыл ик ивортэ малпанэз сярысь. Озьы вераськись адями шоры киын шонтыны уг яра, серекъя гинэ, дыр, шуыса. Озьы ик уг яра коллективын (семьяын, классын) мылкыдыз сярысь юалляськыны. Сыӵе "допрос" адямиез ӧрысьтыз чылкак поттоз. Матысь муртэз гинэ ваче син мед вераськоз. "Мар синвуостэ кисьтӥськод, тӥни кӧня ужед люкаськемын" выллем пыкылонъёс, книга лыдӟыны, кино учкыны ӵектонъёс адямиез пыд йылысьтыз погыртозы: озьыен, сое самой матысь эшез гинэ но уг вала, уг шӧды, макем солы секыт. Соин ик нырысетӥез дэмлан: улонэн кулон вискын сылӥсь адямиез кылзоно. Тон куректы, кайгыры, ӝожтӥськы, нош мон вӧзад луо, мон тонэ валало, уг алы, уг тышкаськы, шуоно кадь. (Со туж шуг: мукет адямиез валаны быгатонлык ваньмызлы сётэмын ӧвӧл.) Ог-огдэ валаса вераськонъёс пыр адямилэн мугорыз чылкыта, сюлэмыз капчия, йырыз кырсь малпанъёслэсь мозме. Сюлэм вӧсез ӧжыт буйгам бере, со ачиз быгатоз ини визьмыныз малпаськыны, югдурез сэрттыны-пертчыны: оло, кулон бордын ужпум ӧвӧл, мон йыроми гинэ, мынам улонме гинэ воштэме потэ. Та дырысен кыкетӥ вамыш лэсьтыны кулэ: озьы ик вераськонъёс пыр, огъя кужымен улонзэ воштыны, аслыз воштӥськыны амалъёс утчано. Та вакытэ ик солэн йыраз таӵе малпан пыӵатыны тыршоно: секыт югдурысь потыны специалистъёс ӟечгес юрттозы, ойдо, психотерапевт (психолог) доры ветлом. Психологъёс валэктэмъя, астэ ачид валаны, мылкыддэ кисьтыны вань на мукет амалъёс: тетраде яке магнитофон лента вылэ гожты кӧтӝождэ, вӧзад пукись коӵышедлы сюлэм вӧсьтэ вера... Кайгыремдэ, вожпотондэ, вӧсь луэмдэ пушкад возьыны уг яра. Сюлэм сое уг чида... "Уг яратӥськы" шуэмез кадь ик... О. ВАХИТОВА. Та нуналъёсы акциосын "Ижмолоко" огазеяськон кылдэмез дырысен 25 арзэ пусйиз. Али татын 50- лэсь уно пӧртэм сиён-юон потто. Сое шумпотыса басьто бускель улосвылъёсын улӥсьёс но. Коллективлэн данэз герӟаськемын адямиосын, тужгес но ужысь ветеранъёсын. Соослэн уй-нунал тыршеменызы-сюлмаськеменызы паськытаз татысь производство, вылӥе ӝутскиз йӧл-вӧй продукцилэн ӟечлыкез но. Анна Митрофановна Лещинская предприятиын 30 арзэ ужа ни. Со продукциез келян-вузанэз радъя. Зоя Яковлевна Иванова 20 арзэ пенсиын ни. Но таӵе чырмыт, быгатыса ужась адямиез коллективын шутэтскыын келямзы уг пот на. Туспуктэмъёсыз Г. Юсаевлэн. Удмурт Республикаысь ёросъёсын интыысь аскивалтонъя ёзъёсты быръён сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: 1. Удмурт Республикаысь Кун Кенешлэн 1998 арын 16 январе кутэм "Удмурт Республикаысь ёросъёсын Депутатъёслэн кенешъёсазы депутатъёсты быръёнэз ортчытон но интыысь аскивалтонлэн быръем ёзъёсаз депутатъёсты, муниципальной образованиослэсь йыръёссэс быръён сярысь" 574-И номеро постановлениезлэн 1-тӥ но 3-тӥ люкетъёсыз кужымзэс ышто Удмурт Республикаысь ёросъёсын Депутатъёслэн кенешъёсазы депутатъёсты быръёнэз ортчытонъя но со понна луонлыкъёс кылдытонъя. 2. Удмурт Республикаысь ёросъёслэн интыысь аскивалтонъя ёзъёссылы дэмлано: интыысь аскивалтонъя ёзъёсы быръёнъёсты ортчытоно 1998 арын 5 июле; интыысь аскивалтонлэн быръем ёзаз депутатъёсты бырйыку депутатъёслэн но быръёнъёсъя одномандантной округъёслэн лыдзы: Алнаш ёрос 28 Балезино ёрос 35 Вавож ёрос 33 Воткинск ёрос 25 Глазов ёрос 25 Грах ёрос 30 Дэбес ёрос 30 Завьял ёрос 35 Игра ёрос 30 Камбарка ёрос 30 Каракулино ёрос 35 Кез ёрос 35 Кизнер ёрос 35 Кияса ёрос 35 Красногорск ёрос 25 Пичи Пурга ёрос 30 Можга ёрос 28 Сарапул ёрос 31 Селта ёрос 31 Сюмси ёрос 25 Ува ёрос 33 Шаркан ёрос 33 Юкаменск ёрос 29 Якшур-Бодья ёрос 30 Яр ёрос 30 3. Та постановление кужыме пыре сое печатлам нуналысен. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 8 апреле. � Журналистъёсын пумиськонъёс Чакламез мед быдэсмоз Берлояз пресс-конференциын Кун Кенешысь Агропромышленность удысъя, музъем кусыпъёсъя но инкуазь узырлыкъёсты кутонъя ялан ужась комиссилэн кивалтӥсез Аркадий Трофимович Малков гурт хозяйстволэн кылем арын ужамезлы куд-ог йылпумъянъёс лэсьтӥз. Депутатлэн верамезъя, гурт хозяйство туж курадӟыса ке но возиське, кылем аръя вераны луэ шумпотымон лыдпусъёсты но. Азьло арен ӵошатыса, тросгес вузамын вал курег пуз, кыскемын йӧл, шорлыдын вераса, гектарысьтыз 18 центнер ю тысь басьтэмын. Нош куд-ог азьмынӥсь хозяйствоосын ю-нянь уката но удалтӥз - гектарысьтыз 40 центнер пала усиз. Но коньдонлэн тырмымтэез гурт хозяйство вылын туж зол шӧдӥськиз, шуиз А. Малков. Синӥз таза сюро пудолэн лыдыз, соин ик сӥлья план 82,8 процентлы гинэ быдэстэмын. Арлы быдэ йылэ ляб хозяйствоослэн лыдзы. 1997 арын асьсэлы барыш поттыса ужаны быгатӥзы 5 процентэз гинэ хозяйствоос. Аркадий Малковлэн верамезъя, гурт хозяйство азьын сылӥсь ужпумъёсты комиссия ялан экерыса возьылӥз. Ар ӵоже 44 пумо ужпум сэрттэмын-пертчемын. Комиссия понна ортчем арын огез бадӟымез уж луиз агропромышленной комплексэз кун ласянь радъян сярысь Законэз дасян. Со кутэмын. Но быдэстон понна нюръяськытэк уз луы. Уката ик али, 1998 арлы бюджетлэсь проектсэ дасяку. Законын чакламын АПК-ез азинтонлы бюджетысь 10 процент коньдон висъяны, нош бюджетлэн проектаз солы 5-6 процент гинэ чакламын. Кызьы вераз Аркадий Малков, гурт хозяйство туннэ нуналлы пайдатэм (убыточной) луэ. Соин ик законъя чурытэсь закупочной дунъёс тупатэмын, продукцилэсь асдунзэ чакласа но гурт калыклэсь куронъёссэ лыдэ басьтыса. Быдэс гурт хозяйство куашкамын бере, солэсь пайдалыксэ ӝутыны луоз кыӵе ке одӥг удыс борды йыг-йыг басьтӥськыса. Малпамын йӧл поттон бордысен. Кылем арын правительство одӥг литр йӧл кыскемлы 100 манет ватсаса коньдон тырылӥз. Туэ йӧл кысконэз азинтон понна кык поллы коть тросгес тыроно. Озьы ке но, таяз арлы бюджетын вуж нормаос ик тупатэмын. Депутат пусйиз мукет сюлэмшугъяськонъёсты но. Нимысьтыз ужано, шуиз со, пудо сиён, ю тысь дасян программаосты кутон бордын. Ю-нянез туж курадӟыса будэтӥськом ке но, солэн бадӟым люкетэз пудо сюдонлы кошке. Вылӥ классъем ю тысь басьтон понна выль технология вылэ выжоно. Секыт югдур кылдэмын техникаез выльдон ласянь. Лизингъя выль машинаос басьтыны республикамылэн бюджетысьтыз 1997 арын нимысьтызконьдон висъямын вал. Но та луонлыкез уже кутӥзы кӧняез ке хозяйствоос гинэ, уго троссэ кышкатэ нырысетӥ взнослэн бадӟым тырон дуныз. Соин ик лизинглэсь куронъёссэ лякытгес кароно, шуиз А. Малков. Ялан кылдыло юанъёс Сиён-юонъя удмурт корпорацилэн ужамез пумысен. Прокуратура йылпумъянъёс ӧз лэсьты на. Но вераны кулэ, корпорацилэн гуртъёслы тыронъёсыз 12 миллиард манет люкаськемын. Туж урод быдэсъяське "Етӥн" программа. Сое депутат тазьы валэктӥз. Программа дасямын вал Россиысь Правительствоен ӵош. Сое быдэстон понна федеральной бюджетысь асьме республикалы арлы быдэ 10 миллиард манет коньдон висъяськыны кулэ вал. Но 1996 арын но, 1997 арын но республикамы со коньдонэз ӧз адӟылы. Кулэ-а бен соку сыӵе программа? Быдэстыны луонтэмез кулэ ӧвӧл. Но одно ик дасяно асьме шаермылы тупасьсэ, асьме кужыммы вылэ пыкъяськыса. Таӵе малпанэ вуэмын али Удмурт Республикалэн вылӥ кивалтӥсьёсыз но. Зэм, асьме етӥн заводъёс али пайдатэм ужало, со дыре ик етӥн сӥньыслы кулэяськисьёс вань. Етӥн басма поттонэз радъян понна нош ик 100 миллиард манет пала коньдон кулэ. Трос вераськонъёс ветло музъемез вузан пумысен. Удмуртилэн Конституциезъя музъемез вузаны лэземын ӧвӧл. Нош мар кароно гырытэк-кизьытэк сылӥсь аналтэм музъемъёсын? Бадӟым уж нуоно вань музъемъёсты пайдаё кутон сярысь, музъемез вузанлэсь али возиськоно, шуиз Аркадий Трофимович. Куд-ог интыосын, шуом, Кизнер, Селта, Сюмси районъёсын трос луо музъемъёс. Соосты умойгес кизьытэк возьыны, соку ӟеч-ӟеч малпаськоно соосты мукет сямен уже кутон сярысь. Аналтэм музъемъёссы вань куд-ог фермеръёслэн, но законъя соослэсь музъемзэс таланы луэ, куинь ар ӵоже музъемзэс уже кутытэк воземзы бере гинэ . Мар бордын ужа али агропромышленность удысъя комиссия. Азьпалан тулыс бусы ужъёс, соослы дасяськыны али ик кулэ, шуиз депутат. Бусы ужъёслы дасяськон сярысь постановленизэ правительство ортчысал феврале ик кутыны мед быгатысал. Соку кысык вакыт но музъем ужасьёс понна, оло, лякытэнгес потысалзы. Т. БАННИКОВА. Герд Та ӝыт тужгес тылсиё вал: Удмурт шаерысь вань удмурт калык лулысь-сюлмысь сӥлаз-бурлаз тужгес дано муртсэ. Со быдӟым адями - Куӟебай Герд. Трос дуно кылъёс чузъяськизы та ӝытэ. Чылкыт сюлэмъёсысь кисьтӥськизы чылкак дунвуо шапыкъёс. Сӥё-дано ужрадэз усьтӥз Кун Кенешлэн Тӧроез Александр Волков. Удмурт Кивалтэтлэсь Тӧрозэ воштӥсь Антонина Лисина эшшо огпол ӟеч-ӟеч возьматӥз: макем яркыт вал Герд. Россиысь нациослэн ужъёссыя министр Вячеслав Михайлов огак шумпотыса пусйиз: - Таӵе адямиеныды данъяськыны кулэ! Ачиз Кузьма Павлович али улэп луысал ке, вордӥськемез дырысен сю арессэ пусъемдылы туж шумпотысал, дыр. Куӟебай Гердлэн вынмуртэз, солэн Ондрей вынызлэн пиез, Юрий Чайников, нош ик тодаз ваиз пичи дырзэ: - Атаелэн агаез укыр шӧртчи вал. Котькыӵе киужен выриз: вуриськылӥз, куиськылӥз, пужыятӥськылӥз, музон ужъёсты быдэсъяз. Ай ӟеч тодӥсько таӵе учырез. Огпол Кузьма агае выль велосипед вылэ пуксьылыны шедьтӥз. Соин валче штанэзлэн вурысэз ӟезиськиз. Анаез, Огафья апай, пӧсекъя: - Мар луиз, мар луиз, Кузьма? Коркамылэн мукет сэрегаз интыяськыса, агае штанзэ ачиз ик вурӟиз. Сыӵе кибашлы ужаз одӥг вурысэз уг адӟиськы. Туж шаплы вал Куӟебай: ӧсэз шыльк-шальк ворса - дӥсезлэн мышкыз гинэ на адӟиське. Вавож ёросысь Гурезь-Пудга школалэн директорез Анатолий Егоров та быдӟым адямилэсь лулчеберлык ваньбурзэ уно аръёс ӵоже уте ини. Гурезь-Пудгала ваемын Куӟебай Гердлэн улэм но ужам юртэз. Анатолий Максимовичлэн верамезъя, солэн выжпулъёсыз тодо на та адямилэсь лёгам пытьыоссэ. Ӧс кутонъёсы но кылемын Куӟебайлэн кибервылыз. Анатолий Максимовичлэн ивортэмезъя, Герд тодэ вал тямыс кыл. Удмурт Кивалтэтлэн Тӧроез Павел Вершинин ӵапак дышетскиз Кузьма Павлович Чайниковлэн ужам юртаз, Можга ёросысь Бадӟым Уча школаын. Павел Николаевич паймыса но со дыре ик сюлэмшугъяськыса тодаз ваиз: - Кӧня ар дышетски - нокин но ӧз вералля Куӟебай Герд сярысь. Школаямы ужазы сое ӟеч тодӥсь адямиос но. Соос пӧлысь одӥгез - дышетӥсь Иван Павлович Пушкин. Куӟебай Гердлэн улэм-вылэм но ужам сюресэз сярысь трос мадизы кылтодон наукаосъя доктор Фома Ермаков, история наукаосъя доктор Кузьма Куликов, мукет адямиос. *** Ӝытлэн кыкетӥ люкетэз быдэсак ортчиз одӥг шокчемен. Тани сцена вылэ потӥз тӧдьы дэремен дӥсяськем пияш (шудӥз Драмая удмурт кун театрысь егит актёр Андрей Карпов). Чиль-сьӧд йырсиез вальк-вальк сынамын. Чебер синъёсыз тылтэк ӝуало. Таӵе вылэм со, пинал Куӟебай Герд. Тани егит пияш люкаськем калыклы вазиське: Тодскоды-а, удмуртъёсы, кин-о мон, тӥ тодскоды-а? Адями-а, турагай-а, ӵуж сяська-а, Кам шашы-а? Инмын ӝуась кизили-а, тӧлпери-а, куректон-а? Ву тулкым-а, чебер вӧт-а, бубыли-а, шумпотон-а?.. Со куспын егит Куӟебаез котырто гуртоосыз (кырӟазы-веразы Вавожысь "Гуждор" ансамбльысь усточиос, егитъёслэн "Катанчи" театрысьтызы артистъёс): - Кузьмае кылбурдэ лыдӟы вал?! - Лыдӟо. Тани али гожтӥ вал, - небыт вазиське Герд. Гуртоосыз ушъяло, быгатэмезлы шумпото, мылкыдзэ эшшо лӧпкыто. Нош тани егит пилэн сюрес вылаз шуак пумисько чиганъёс. Кырӟаса-вераса ортчо вадестӥз. Одӥгез, егит нылкышно (Удмурт Элькунысь калык артистка Августа Лазарева), бур кипыдэссэ кутыса вера: - Тон, пиёк, али туж шудо. Эрикез яратӥсь тылобурдо кадь. Чиган кышно шуак кутэ паллян кипыдэссэ: - Секыт кайгу вите тонэ эше... Шӧртчи апок со куспын шуак сьӧрланьтӥське: - Ӧвӧл, ӧвӧл, пияш, янгышай мон, янгышай. Ай пинал на: дышо. Зэм, адӟон возьма вылэм ни Кузьмаез. Нош кылбурчи со сярысь уг малпаськы. Тани егит Герд шумпотыса пумиське быдӟым ӟуч гожъясен Алексей Максимович Горькиен (шудӥз Россия Федерациысь дано артист Леонид Романов). Алексей Максимович лулысь-сюлмысь юа удмурт литература, солэн туннэ но ӵуказе нуналыз сярысь. Кузьма Павлович шумпотыса маде. Со вие ик эркынласа мытэ "Ӟеч лу! шуид но тон кошкид..." кырӟанэз. Горькийлы яра та крезьгур. Выльысь но выльысь кырӟаны куре егит удмурт кылбурчиез. Нош секыт адӟон пиньзэ шере вылэм ни. Вылаз урттылӥськеменызы сэрен, Куӟебай Герд вадьсы люкасько сьӧд пилемъёс. Ньыль толэзь кортнаса возё сое Нижний Новгородысь изоляторлэн оген муртлы чаклам камераяз. Татысен вите виръюисьёслэсь берпум кылзэс. Но уг, уг чигиськы кужмо удмурт. Аслаз кайгуэз сярысь ивортэ быдӟым ӟуч эшезлы. Алексей Максимович Горький соку ик пумиське "вань калыкъёслэн атаенызы" - Иосиф Сталинэн (шудӥз Россия Федерациысь дано артист Геннадий Соловьёв): - Удмурт поэт Куӟебай Герд шедемын секыт шугадӟонэ! Та адями огшоры ӧвӧл - быдӟым кылбурчи! Мозмытоно вал сое сыӵе синазькыль сьӧлтэтысь... Иосиф Сталинлы тодмо та ним. Солэн тодэмезъя, Герд - "СОФИН" огазеяськемлэн йырыз. Горькийлэн сюлмаськемез пайдатэм ӧз луы. Куӟебай Гердэз, югыт дуннелэсь соку ик люкемлэсь азьын, дас арлы келяло кыдёкысь шаеръёсы. Нош сюлэмаз весь удмуртъёс... Тани кӧтпушез ик позыртэ удмурт калык кырӟан (кырӟаз Удмурт Элькунысь калык артистка Валентина Пудова): Ӵукна ӵук султӥ, азбаре потӥ, Уӵыпилэсь куаразэ кылӥ. Кезьыт лысвуос пыдъёсме котто, Синкылие бам кузя ваське... Тани Куӟебай ортче ини эшъёсыз но тушмонъёсыз вадестӥ. Уг, со уг оскы быронэзлы! Оске одӥгезлы: зарни шунды удмуртъёс понна одно ик ӝужалоз! Быдэс театр бӧрдэ, ӧтьымтэ синвуоссэ шыпытак ӵушылэ... *** Укыр вазь чигтӥзы удмуртъёслы югыт вайыны турттӥсь льӧль сяськаез. Кузьма Павловичлэн кыдёкысь шаеръёсы кылемез уг поты вал. Нош витьымтэ адӟонэз ӧз юа солэсь - удмурт калыкезлэсь пыраклы люкиз. Эх, Куӟебай, Куӟебай... Герд! ЕЛЕНА ВИНОГРАДОВА. Милицилэн ужысьтыз: арлы йылпумъянъёс Кӧня сылэ адямиез быдтон? Дуныз пӧртэм: миллионысен миллиардозь. Котькудӥз кузё медоосызлы ас быгатонлыкезъя тыре. Кызьы пусйиз журналистъёсын пумиськонысен Удмурт Республикаысь югдурез утёнъя министр Алекандр Никитин, адямиосты юри косыса виён кылем арын асьме доры 11,6 процентлы будӥз. Кинъёс шедё киллеръёс ки улэ? Ваньбурез лушкем бергатӥсьёс, коммерциен вырисьёс, огазеяськем бандаослэн йыръёссы но юрттӥсьёссы. Жаляса верано, та ожмаськонын быро обществоез кышкытлыклэсь утёнъя органъёсын ужасьёс но. Коньдонлэн кужымез вормонтэм: сое котькуд пала берыкты - ас ужзэ лэсьтоз. Кӧня мурт быдтэмын, нош огез но "кузё" туннэ нуналозь закон азьын кыл ӧз куты на. Суд улэ шедё "векчи шальыос". Куд-огез соос но вием мурсы бӧрсьы ик сояз дуннее кошко, шонерзэ вераса, "мултэс син, мултэс пель" шуыса, юлтошъёссы дырызлэсь вазь улонысь келяло. Ужзы понна сӥзем коньдонзылэсь шильыртэмзэ но кылыса уг вуо. Кемыз, шуо удмуртъёс таӵе дыръя. Удмуртиын гинэ ӧвӧл, музон интыосын но преступной огазеяськонъёс куспын инты но власть понна вир кисьтон мынэ. Кылем тулыс та муген быдтэмын вал йыруж лэсьтӥсьёслэн "авторитетсы" Касимов, вить банда пазьгемын, шараямын лушкем пыӵал тӥрлык поттӥсь цехъёс. Огъя вераса, криминальной милиция урод ӧз ужа. Быдэсак югдур сярысь ке верано, ар ӵоже лэсьтэм преступлениослэн лыдзы мималаеныз ӵошатыса, 14,7 процентлы кулэсмемын. Чалмытгес луиз городысь но райцентръёсысь ульчаосын. Кызьы пусйиз министр, ваньмыз со правоез утёнъя удысэз нуисьёслэн - огкылысь ужамзылэн бервылыз. Озьы ик ӧжытгес пусъемын ваньбурез талан, калыкез пӧян учыръёс. Со дыре ик йылӥз экономика удысысь преступность, транспортэз лушкан-талан. Сюресъёс вылын тросгес адями быриз. Уката но та ласянь висъяськиз Сарапул тракт ( 10 июле быризы автобусысь 6 пассажир, 15 октябре - кык дышетскись пинал). Арлэн эшшо одӥг секыт тодметэз кылиз на улонамы - йылӥз семья куспын, гуртын ог-огдэ быдтон. Ваньмыз потэ юон, ужатэк пукон, вожан, жугиськон бордысь. Сантэманлы чидатэк, пиеныз но анаеныз виё но сюе сого нокытын ужасьтэм, юись бубызэс. Вордэм пизэ ас киосыныз быдтэ мӧйы кышномурт. Кытысь со ваньмыз потэ, шузимытӥсь юонъёс бордысь сяна? Котькӧня чидатскы - куке но соку пумыз вуэ. Жаляса верано, та ялымтэ граждан ож быдэсак усемын милиция вылэ. Быдтэмын товарищеской судъёс, административной комиссиос, веранэз ӧвӧл ни мукет общественной организациос сярысь - эрказмемъёслы туж бадӟым эрик сётэмын. Валамон, участковой милиционер, котькыӵе чупрес, ужаны быгатӥсь мед луоз, котькудӥз доры уз вутскы. Ар ӵоже республикая пусъемын 24 сюрс 754 преступление, шараямын со пӧлысь 16 сюрс 426-ез. Юри малпаса но дасяськыса виемын 374 мурт, тая чаклано-эскероно ужъёс пумаз-йылаз вуттэмын 332-ез. Нылъёсты, нылкышноосты эриктэмамын (виён вылысь) 200 учырын, ваньмыз шараямын. Удмуртиысь испытательно-трудовой колониосын та дыре пуко 16 сюрслэсь ятыр заключённойёс. Ар ӵоже уже интыямын ог сюрсэз. Эшшо одӥг лыдпус. Суд улэ шедёнлэсь ар ӵоже пегӟемын но розыск ялэмын вал 1,5 сюрс муртлы. Таин ӵош милициен но ФСБ-ен шедьтэмын чиптэм-чаптэм ышем адямиос пӧлысь 660-эз. Веранэз ӧвӧл: ма быдӟа уж уен-нуналэн нуэмын оперативной но мукет службаосын. Преступлениосты шараян но соосты эскеронэз йылаз-пумаз вуттон ласянь министр пусйиз Яр, Юкаменск, Селта, Кез, Дэбес районъёсты. Дас йыруж пӧлысь татын огез гинэ шараятэк кылемын. Тазьы шуыны уг луы Ижевск городъя (58, 6 процент), Воткинск (67,3), Глазов (60,5), Сарапул (63,2). Гурт районъёсъя бере кылё Завьялово (67,6), Ува (70,6), Алнаш (73,2). Ижевскез ке верано, кылем арын нош ик йылэмын транспортэз лушкан, мурт ваньбурез талан-вузан, пӧяськыса коньдон бичан. Со дыре ик, милицилэн но тылпу кысӥсьёслэн быгатыса ужрад кутэменызы, 76 процентлы кулэсмиз коркаосты, квартираосты юри сутон. Ӧжытаклы югдур умой пала воштӥськиз быдэ вуымтэос ласянь. Йыртэман, йыруж лэсьтон учыръёс кулэсмизы 8 процентлы, со дыре ик йылӥзы огазеяськыса лэсьтэм йыружъёс, наркотикен вырисьёс. Вина юон сярысь ке верано, ӟечен пусйыны номырзэ. 1996 арын милициен ульчаосысь но общественной интыосысь утялтэмын ке вал 117 сюрс 970 мурт, кылем ар ӵоже - 121 сюрс 276, будэмын 2,8 процентлы. Юиськом гуртын, ужан но шутэтскон интыосын, ульчаын. Кинлэн кӧня мылыз потэ. Егитсэ но, мӧйызэ но алӥсез ӧвӧл. Калыкез, нациосты сектаса возён казна понна бадӟым барышен берытске бере, кинлэн йырыз висёз на асьмелэн но нылпиосмылэн тазалыксы сярысь? Вань мукетыз но. Макмырен курадӟись муртлэн куронъёсыз пичиесь - мед луоз зын вуэн тырмытэм сюмык - отӥяз коть дунне бергамысь мед дугдоз. Озьы ик улӥськом: туннэяз юиськом, ӵуказеяз макмырмес веськатӥськом. Малы-о паймод на, адямиез юри малпаса быдтон куд-огез понна асьме доры но самой вылӥ квалификациен ужлы пӧрмиз шуыса? Историез азьпалтӥськом Кызьы гожтэ "Аргументы и факты" газет, Россиын самой секыт граждан ож бере но, фашистской Германиен ожмаськон аръёсы но тамында йыружъёс пусъемын ӧвӧл. Али одӥг статистика но уз вера, кӧня пыӵал тӥрлык, кӧня боеприпасъёс шедемын калык кие. Соосты потто заводъёсысь, лушкало складъёсысь, воинской частьёсысь, басьто рынокысь, лэсьто лушкем ужась мастерскойёсын. Огъя вераса, криминальной милиция кемалась пӧрмиз ни ож тӥрлыкез таланъя-утчанъя (пумен ӵемгес но ӵемгес - боевой действиосты нуонъя) ёзлы. Самой секыт но кышкыт йыружъёсты эскерон но шараян - солы оскемын. Ватонэз табере ӧвӧл, малы быдтӥзы милициысь полковникез Николай Александрович Перевощиковез но семьязэ. Берпуметӥ ужез солэн ӵапак герӟаськемын вал пыӵал тӥрлык вузасьёсты ӝегатонэн, солэсь азьвылэз - Чепецкой заводысь уран лушкасьёсты кырмонэн. Удмуртиез шыпыт регионъёс пӧлы уд пырты. Нош кыӵе югдур бускельёсмы дорын? Учке, ӵошатэ асьтэос. Регионъёс Йыружъёс (1997 ар) Шараямын (процентэн вераса) Россия 2.397.311 72,2 Татарстан 49.322 82,7 Башкортостан 36.004 83,8 Киров область 23.891 72,7 Курган область 26.397 67,4 Пермь область 69.047 66.1 Свердловск область 91.808 66,1 Удмурт Республика 24.754 67,7 Мукетъёсыныз артэ пуктыса, республикамы сокем урод уг адскы кадь, но быдӟалаезъя но областьёсын уд ӵошаты. 1996 арен ӵошатыса, преступность Россия Федерацияя оглом кулэсмиз 8,7, шаермыя - 14,7 процентлы. Удмуртия бере та ласянь мыно Свердловск но Киров областьёс. Кызьы пусъемын вал журналистъёсын пумиськонын, вань преступлениос пӧлын шӧдскымон будэмын рецидив (суд улэ шедьылэмъёс ласянь выльысь лэсьтэм йыружъёс). Тужгес но со шӧдӥськиз Татарстанын (24,2%), Челябинск но Курган областьёсын. Киров область но Удмуртия таос радэ ӧз шеде. Порядокез тупатонын бадӟым юрттэт вуиз "Вихрь-2" операцилэн ортчемез. Югдурез утёнын ужасьёс суткаяз 12-14 час кӧлонэз, жадёнэз валатэк тыршизы, асьмеды пӧтэм гыжкалъёслэсь утён понна. Та выллем ужрадъёс ортчозы азьланяз но. Озьы ик ваньмаз районъёсын выльысь кылдозы (куд- ог интыосын ужало ни) калык дружинаос. Кызьы шуиз А. М. Никитин, кинлэн мылкыдыз вань дораз порядок тупатыны - тупатоз. Луонлыкъёс тырмыт. Л. ПЕРЕВОЗЧИКОВА. Кема витем эмъюм Берло дыре трос вераськонъёсты кылоно Караваевлэн бальзамъёсыз но соослэн пайдазы сярысь. Арлэн пумаз выль эмъюмъёслы сӥзем выставка ортчиз, усьтэмын "Доктор" фирма. Соин кивалтэ медицина наукаосъя доктор В. С. Федоров. Владимир Станиславовичез ик курим паймымон эмъюмъёсын тодматыны: - Газет лыдӟисьёс пӧлын бальзамлэсь кужымзэ ас вылазы эскеремъёс вань, дыр, ини - Москваын но мукет бадӟым городъёсын аптекаосы со вазьгес вуиз. Академик В. В. Караваев 70-тӥ аръёсы, пӧртэм турын-куарез уже кутыса, висёнъёслы пумит ӟеч эмъюмъёс кылдытӥз, но соос улонэ пыӵаны ӧдъязы 20 ар ортчыса гинэ. Жаляса верано, ачиз академик улонысь кошкиз ни. Нош дасям бальзамъёсыз пумен тросгес но тросгес адямиослы пыд вылазы султыны юртто. Ижевскысь больницаосын ваньмаз сямен кутӥсько ни, тужгес но - нылпи ваён юртъёсын. Пайдазы шӧдскымон. Бальзам лэсьтонэ мынӥсь турын- куаръёс адямилэсь пушсэ чылкытато, вир ветлонэз-воштӥськонэз кужмоято, ӟечгес ужато сюлэмез, пекляосты, капчиен вормо кынмам висёнъёсты. Россиысь тросаз городъёсын Караваевлэн бальзамъёсыз калыкез эмъянын валтӥсь инты басьто ни. - Котькудӥз сярысь вакчияк вераны луоз-а? - Соос куинь пӧртэм: "Витаон", "Соматон", "Аурон". "Витаон" дасямын 12 пумо турын- куарлэсь, данакез будо Удмуртиын но. Таиз бальзам туж умой юрттэ ку висёнъёсын курадӟисьёслы, стоматология, хирургия но гинекология удысын, физиотерапиын но неврологиын. Сое куто радиация улэ шедьылэмъёс, кынмаса висисьёс. Ӝог бурмытэ сутскем яраосты, операция лэсьтэм бервылэз, витаонлэсь дасям крем ымныр куэз кисыри басьтэмлэсь уте. Нимысьтыз дэмласал та эмъюмез егит анайёслы. Пиналзэс нонтыку, тросэз соос пӧлысь бӧрдон калэ вуо ноны бирдыоссы тэшкамен. Та муген ик нонтэмысь дырызлэсь вазь дугдо. Солэсь но кышкытэз - пичигес гинэ кылдэм яра азэ, кышкыт висён, мастит, кутске. Со операция лэсьтытэк уг ортчы ни. Роддомъёсын али быгатыса куто "Витаонэз". Та бальзамен ик пиналлэсь ыльӟектыны кутскем интыоссэ зырало. Мастит дыръя висись интыяз, пыктос бырытозь, компресс лэсьтылоно. - Дорады трос гинэ тау карон гожтэтъёс вуэмын... - Нуналлы быдэ кин ке но жингыртэ, кин ке гожтэт ыстэ, вань дорамы пырасьёс но. Кузьмина пенсионерка тани ма гожтэ: "Пичи внуке туж ӵем курадӟылӥз ньылон висёнэн: пичияк кезьыт шеде ке, соку ик пыктэ. "Витаон" басьтэммы бере, 2-3 арня куспын бурмытыны быгатӥм. Быдэс арзэ умой ортчытӥз". "Пӧзись вуэз пыд вылам пальккыны шедьтыса, кема курадӟи. "Витаон" бальзам бурмытӥз 5 нуналскын", - тау каре Ижевскын улӥсь П. П. Шкляев. Вакчияк тодмато "Аурон" бальзамен. Таиз дасямын 9 пумо турын-куаръёслэсь. Кутӥскье йыр висьыку, йырсазь лябӟыку, йырси усён дыръя, кӧлыны курадӟыку. Таиз эмъюм озьы ик юрттэ ужаса яке висьыса ыштэм кужымез выльысь берыктыны, мугорез юнматыны. Мунчое яке душе мынэмлэсь 10-15 минут азьло йыр куэз ӧжытак гинэ бальзамен зырано, пыласькем бере соку ик шӧдоно лулсэрлэсь буйгамзэ, быдэс мугор выльдӥскье кадь, гань-гань шутэтске. Куинетӥез бальзам - "Соматон". Караваевлэн таиз эмъюмез дасямын 12 пӧртэм турынлэсь. Медицинаын кутӥське шуккиськем, пульдэм интыосты эмъянын, остехондрозэн, артритэн, радикулитэн курадӟыку, тӧрнаку, сӥльвир кынмаса яке жадьыса висьыку. Котькуд нылкышнолы мон дэмласал на "Витаон" крем басьтыны. Кӧс куо адямиослы со туж умой юрттэ. 40-эз ортчемъёслы ӵектысал алоэ вуэн но "Витаон" бальзамен ӵош сурет лэсьтыса, ымныр куэз миськыны, собере 10-15 минут ортчыса, "Витаон" кремен зыраны. Пайдазэ асьтэос шӧдоды. - Владимир Станиславович, вылӥ верам эмъюмъёсты кытысь басьтыны луоз? - "Доктор" фирмалэн аптекаосыз Ижевскын интыяскьемын таӵе адресъёсъя: Воровский урам, 130-тӥ юрт ("Старый Юпитер" магазинын, Вормонлы 30 ар урам, 28-тӥ юрт ("4-тӥ Подлесной"). Меӵак лыктэ фирмаямы - Удмуртская, 231 (черк вадьсын). Татын гинэ пенсионеръёс понна бальзамъёслэн дунзы 10 процентлы кулэстэмын. Эшшо одӥг куронэ вань на: эн басьтэ ульчаын вузкарисьёслэсь, тодмотэм адямиослэсь. Зэмос бальзамлэн этикеткаосыз лыз, горд но тӧдьы буёлэн суредамын, гожтэмын "Бальзам Караваева" шуыса. - Сьӧрлось гуртъёсын, районъёсын улӥсьёс кытчы вазиськыны кулэ? - Куд-ог райцентръёсын кусып тупатэмын ни. Оскисько, мукетъёсыз но быгатэмзыя дорамы вазиськозы шуыса. Вераськиз Л. ПЕРЕВОЗЧИКОВА. Кысконлэсь нуналскын куштӥськоно Тамак кысконлэсь куштӥськыны туж ӟеч амал вань - огаз нуналэ аслыд ачид ӝот-ӝот вераськод: туннэысен кутскыса никотинэз пыраклы вунэтӥсько. ДПА агентство ивортэмъя, Германиысь медикъёс но психологъёс валэкто, та урод сямлэсь нуналскын пыраклы уд ке куштӥськиськы, нокыӵе мукет амалъёс уг юртто ни. Пӧртэм таблеткаос, пластырьёс одӥг яке кык толэзьлы гинэ юртто, нош собере адями нош ик кыскыны ӧдъя, соин сэрен тазалыкезлы пайдалэсь уногес изъян вае. Ярам, бомбаос ӧз пуштэ Италиысь фермерлэн Томазо Гланниколэн коркаез вылэ Англилэн истребителез ӝыны тоннаем кык бомба куштӥз, ивортэ "Таймс" газет. Фермер бусыысеныз тае адӟем, чылкак шулӟектэм но полицие жингыртэм. Полициын нырысь-валысь паймиллям, малпаллям, юыса визьзэ ыштэм адями жингыртӥз шуыса. Бӧрысь тодмо луиз, Великобританиысь ВВС-лэн лётчикез янгышаса бомбаосты куяз шуыса. Нош фермерлэн шудэз вылэм ик: бомбаос учебноесь вылӥллям но пуштӥллямтэ. Мар возьмано на дунтэм-дантэм государстволэсь? Улон-вылонлэн сураськемез-пожаськемез али котькинлы тодмо ини. Та сьӧд уж борды гижысь-пиньысь кутскизы трос дышетскем, вылӥ образованиен, вылӥ власть котырын бергась политикъёс, чиновникъёс, йыромем коммунистъёс. Кунгож сьӧрысь политикъёслэн кемалась сюлэмзы висе вал ини Кызьы куашкатоно-пазяно Россилэсь улон-вылонзэ. Россиысь асьсэлэн малпанъёссылы кельшись но кылзӥськись адямиос шедьтыса, соос кырсь малпанъёссэс уж вылын быдэсъяны кутскизы. Озьы шӧдтэк шорысь быдтэмын дано Советской союз но компартия. Кылдӥз дунтэм государство но дунтэм демократия. Сӥзьыл зор бере губилэн алямез кадь ӝужазы кас сямо политикъёс, коммерческой банкиръёс, реформаторъёс. Соос ик тунаськизы депутатэ но вылӥ власть котыре. Выль кивалтӥсьёс, вань законъёсты сураса-пожаса пӧразы асьсэлы гинэ тупась законъёс. Нырысь ик сюлмаськизы куашкатыны ваньбур поттон удысъёсыз, заводъёсыз, колхозъёсыз. Собере киултӥзы инкуазьлэсь сётэм узырлыкъёссэ, тужгес ик кырмиськизы газ, музъем вӧй, музъем эгыр, тэль борды. Озьы вакчи дыр куспын Россилэн азьлань нуись питранъёсыз шальтразы. Ваньбурен воз пазьгиськиз. Ужъюгдур пӧртэм ӧвӧл асьме Удмурт кунамы но. Вуз, ваньбур поттон дугдэмын, колхозъёс куашкатэмын, коньдон ӧвӧл, нылпи садъёс ворсамын, ужтэк кылемъёслэн лыдзы будэ. Кивалтӥсьёслэн валэктонзы одӥг: ӧвӧл коньдон. Ваньбур поттонзэ, сое вузанэз радъясь ӧвӧл бере, кытысь-о луоз бен коньдон. Нош бускель Татарстан кунын югдур синмаськымон, вожъяськымон. Ваньбур поттӥсь организациос, колхозъёс йыг-йыг пыд вылазы сыло. Удмурт кунэн ӵошатыса, уждун дырыз дыръя тыро. Отын угось ӧз дыртэ нокинлы ярасьтэм реформаосты быдэсъяны. Чеберъяськыса ӧз йыбырттэ Президент азьын но. Мур малпаськыса ужазы калыксы, азьланяз улон-вылонзы сярысь. Тани кинлэсь адӟем кароно вал асьме Удмурт кунысь вылӥ кивалтӥсьёслы. Музъем ужын, сиён-юон поттон удысын ӝыныезлэсь тросэз ужало удмуртъёс. Та сьӧлыктэм калык вылтӥ дауръёсын олокыӵе но секыт реформаослэн питранзы погыльске. Христианствое кужмысь пыртон, музъемен алдан, выт тырон, колхозэ кужмысь кыскон, "кулакъёсыз" уллян, уждун тырытэк ужан, колхозъёсыз кужмысь огазеян, пичи гуртъёсыз быдтон, колхозъёсыз юри кутэм законъёсын куашкатон но мукет трос зӥбыса возён амалъёс. Тани али но государство гурт калыклэсь ваньбур туж дунтэмен басьтэ, со дыре ик промышленной вузъёс трослы дуноесь. Политикъёслэн кемалась йырзы висе ини музъемез тус-тас карыса вузаны. Малпанзы быдэсмиз ке, удмуртъёс нош ик медочие кылёзы. Гурт калык чурыт кылзэ правительстволы вераны уг дӥсьты, ӧвӧл валтӥсь адямиосмы. Тужгес ик коньдонэн юрттэтлы кулэясько Алнаш ёрос кадь дотационной районъёс, кудъёсызлэн чик ӧвӧл, шуыны луоз, ваньбур поттӥсь предприятиоссы. Таӵе секыт югдурез кӧня ке но тупатон вылысь, сюлмысь ужаны кулэ, дыр, "Удмурт кенеш" огазеяськонлы. Калыкез туж сюлэмшугъяськытэ вылӥ чиновникъёслэн кескич амалэн шудон политиказы. Дунъёслэсь пумтэм будэтэмзэс тазьы валэктыны тыршо: инкуазь ваньбурлэн (газ, нефть, эгыр, тэль) асдуныз, пе, вылӥын. Таӵе вераськонлы оскыны уг луы, малы ке шуоно, та удысъёслэн 80%-эз лэсьтэмын Совето власть аръёсы. Соиз но тодмо: ваньбур поттӥсь дорысен вуз басьтӥсь дорозь кузь сюресэз ортче. Соослэн висказы кылдытъямын ог дасо мында коммерческой организациос. Таосыз чик ужатэк, пӧсятэк вожмаськыса сямен вузлэсь дунзэ будэто но будэто. Со муген ик ужась калык куанерме, кураськисе потэ. Коньылэн коньдон жильдӥсьёсын кивалто правительствоын но президент котырын бергась чиновникъёс. Тани али нош ик кужмысь пыӵатӥське коммунальной реформа но коньдонэз воштон. Али ик тодмо ини, со реформаос ужась калыклэн кисыысьтыз нош ик берпум коньдонзэ поттозы. Тани мон ноябрь толэзьлы пенсиме кызь сюрс манетлы тросгес басьтӥ, но со дыре ик ноябрь толэзьлы коммунальщикъёс мынэсьтым ньыльдон сюрслы тросгес коньдонме капыртӥзы. Озьы "сюлмасько" асьме сярысь федеральной чиновникъёс но асьмелэн быръем депутатъёсмы. Кызьы улоно ужась калыклы, пенсионерлы? С. САВЕЛЬЕВ. Тае тодыны кулэ Кырсез татын, зарние отын Кылем арлэн пумаз "Сиданко" ОАО (Сибирско-Дальневосточной нефть компания) Москваын кенеш ортчытӥз. Отчы ветлӥзы нимаз (дочерней шуон) предприятиослэн ужан интыосысьтызы (регионъёсысь) иворъёс вӧлмытӥсь ёзъёслэн кивалтӥсьёссы. Соос пӧлын вал та чуръёсты гожтӥсь. Вераны кулэ, "Сиданкое" пыре "Удмуртнефть" огазеяськон но. Туннэ мадёмы "Сиданко", ОНЭКСИМ Банк но "Удмуртнефть" сярысь. Кыӵе герд соосты огазея- азинтэ, кин пайдазэ люке-басьтэ? Ӵапак со юанъёсын люконтэм герӟаськемын куд-ог мукет лэчытэсь ужпумъёс но. "Сиданко" "Сиданко" - Россиын нефть, газ утчась, поттӥсь, но вузась одӥгез егит но кужмо компания. Кылдытэмын 1994 арын 5 мае, нош валля арын 28 июне акционеръёслэн кенешазы "Сибирско- Дальневосточная нефтяная компания" АООТ-лэсь пӧрмиз "Сиданко" ОАО. Учредителез луэ Россия Федерациысь Правительство. Ужа 19 интыын, огазея 28 нимаз предприятиез. Со пӧлысь 7-ез нефть но газ поттэ, 3-ез переработкаен выре, 14-ез вуза (отчы пыро 700-лэсь уно автозаправочной станциос). "Сиданко" арлы быдэ 25 миллион тонналэсь уно му вӧй но 2 миллиард кубической метр газ поттэ, переработать каре 17,5 миллион тонна нефть, кунгож сьӧры вуза 5,6 миллион тонна нефть но 4,9 миллион тонна нефтепродуктъёс, озьы пайда басьтэ 2000 миллиард манет пала (дунъёс сётэмын вуж сямен). ОАО мылысь-кыдысь пыриське федеральной программаосты быдэсъянэ. Кылсярысь, сиён-юон поттӥсьёслы миым пунэм чотын 764 сюрс тонна нефтепродуктъёс висъяз (1353 миллиард манетлы), Россиысь Обороная министерстволы но мукет удысъёслы - 936 сюрс тонна, нош уй палась регионъёсы - 1,1 миллион тонна яке 1,8 триллион манетлы. "Норильский комбинат" АО-лы 186 сюрс тонна сётӥз (420 миллиард манет тыр). Кунгож сьӧры вуза одӥг куиньмоссэ кыскем нефтьсэ но солэсь продуктъёссэ. Со кошке СНГ-е, Западной Европае, Юго-Восточной Азие, Японие но Монголие. "Сиданко" пыре дуннеысь 50 бадӟымесь му вӧй поттӥсь компаниос пӧлы, нош валля арын продукция поттэмезъя 23-тӥ инты басьтӥз, Россиын - 5-тӥ. ОАО-ен кивалтэ Зия Бажаев (чечен). Солы 37 арес, йылпумъяз Краснодарысь политехнической институтэз, технической наукаосъя кандидат. Ужаны кутскиз Грозныйысь биохимической комбинатын валтӥсь инженер луыса. Собере вал Германиысь "Лиа Ойл" фирмалэн адямиез, солэн ик Женеваысь компаниезлэн президентэз, "ЮНКО" ("Южная нефтяная компания") кун предприятилэн но Санкт-Петербургысь эстӥськон компанилэн кивалтӥсез, нош валля арын "Сиданколэн" вице-президентэз луиз, миым апреле - президентэз. Зия Бажаев миым шаерамы ветлӥз. Пыр-поч тодматскиз республикаямы му вӧй поттонэн, вераськонъёс нуиз Удмурт Правительствоын. Солы кельшиз "Удмуртнефтьлэн", экономикаын шуг-секытъёсты вормыса, али но огсыр, пайдаё ужамез. Огазеяськон берло дыре нефть кысконэ трос выль амалъёсты пыӵатэ. Соос герӟаськемын музъем валлин портонэн, озьы ик выль, кема чидась оборудованиез уже кутонэн. Сое умоен пусйыса, Зия Бажаев оскытӥз вал, ми, пе, интыослэсь ум палэнске, соос нокыӵе ыштонъёс уз адӟе, ож тӥрлык поттӥсь предприятиосты выльдыны но юрттом. Но туннэ жаляса верано луэ, ОАО-лэн президентэз сётэм кылзэ пумен вунэтэ ни. Со нырысь ик шӧдӥськиз шаерысьтымы му вӧй поттӥсь районъёсын. Соослы кун бюджетысь юрттэт (дотация) уг сётӥськы. Тани Шаркан ёрос сыӵе районъёс пӧлы пыре. Выль ар азьын, нефтяникъёслэн налог (выт) тырымтэенызы, отын туж секыт югдур кылдӥз бюджетникъёслы, дышетӥсьёслы но тазалыкез утён удысын ужасьёслы уждун сётонэн. Нош "Сиданколы" пӧсь но, кезьыт но уг йӧты. Миым со нимысьтыз решение кутӥз интыосысь предприятиосын поттэм коньдонэз азьло Москвае люканы, собере пичиен-пичиен висъяны ваньбур поттӥсьёсызлы. Зия Бажаевлэн верамезъя, ми, пе, толэзь куспын интыысь предприятиосмылы уксёзэс келяськом. Но кызьы солы оскод, кин сое чакла-эскере? Озьы тӥни элькунамы му вӧй поттӥське, нош пайдаез шеде вылӥысь кивалтон ёзэ ("Сиданкое"). Куд-огез кивалтӥсьёс умоен лыдъяло предприятиосын вылӥысен улӥозь кивалтонэз. Со, пе, пайдаё но туннэ нуналлэн куронэз луэ. Рынокен экономикаын, пе, зэмос, кужмо холдинг кулэ, нош интыосысь предприятиос производствоен гинэ мед вырозы. Ваньзэ сое радъялоз-бергатоз, рынокез тодоз-дышетоз, вылӥ кивалтӥсьёс но валтӥсь специалистъёс дасялоз вылӥ ёз, яке "Сиданко" ОАО. Зия Бажаев таӵе ужан амалэз улонэ пыӵатэ ни. Тани Игра НГДУ-лэсь кивалтӥсьсэ Олег Поповез басьтӥзы "Кондпетролеум" нефть поттӥсь огазеяськонэ валтӥсь директоре. Со "Удмуртнефтьлэсь" 2-3 пол бадӟым. Миым Удмурт Республика огкылысь ужан вылысь "Сиданкоен" тупанкыл гожтӥз. Отын шуэмын, кун бюджетэ му вӧй поттӥсьёс улэп коньдон гинэ пыртозы, республикалы кыскем нефть пӧлысь 10 процентэз висъяськоз. Му вӧймы сокем ӟеч ӧвӧл ке но, сое кунгож сьӧры вузанэз будэтыны чакламын. "Сиданколэн" ӵуказе нуналэз кызьы адӟиське? Матысь 5-6 ар ӵоже му вӧй поттонэз 2 пол йылэтыны малпа. Солэн нефть поттон интыосыз Западной, Восточной Сибирьын но Волга котырын интыяськемын. Му вӧй 2,3 миллиард тонна лыдъяське но ӧжытсэ 100 ар кыскыны тырмоз. Россиысь 200 нефть компаниос пӧлысь "Сиданко" му вӧй вузанъя 4-тӥ инты басьтэ. Солэн дуныз 6 миллиард доллар лыдъяське. "Сиданко" дуннеын нефть вузанъя нырысетӥ интыосы потыны тырше. Озьы ик йылоз газ кысконэз. Со 1,5 триллион кубической метр шедьтэмын. Компания миым ноябре Китайысь национальной нефть корпорациен но Россиысь Эстӥськонъя но энергетикая министерствоен Пекинын протокол гожтӥзы. Соя Китае гумы кыскемын луоз. Та ужез быдэстонэ озьы ик пыриськозы Монголия, Южной Корея но Япония. Таӵе амалэн ужан асьмелы но, соослы но пайдаё луоз, лыдъя Зия Бажаев. Кылем арын "Сиданко" быдэсак луиз кузёослы сётэм компания. Солэсь контрольной (эскерон) пакетсэ возе ОНЭКСИМ Банк. ОНЭКСИМ Банк Та банклэн нимыз тазьы берыктӥське: Огазеяськем Экспортно-Импортной Банк. 1993 арын 20 апреле Россиысь Центральной банк солы валтӥсь лицензия сётэ, одӥг ар ортчыса, Россиысь но Москваысь Правительстволэн банк-агентсы луэ, нош миым РФ-ысь ЦБ дуно металлъёсын ужаны лицензия сётэ. Банк-агентлы бадӟымесь луонлыкъёс сётэмын федеральной бюджетысь но дуннеысь кредит сётӥсь организациосысь коньдонэн ужаны, Президентлэсь но Правительстволэсь решениоссэс быдэсъяны. ОНЭКСИМ Банк услугаос сётэ валютаен но манетэн. Миым 1 июлёзь уставной капиталэз вал 1002 миллиард манет, 400 миллион доллар (США). Аслаз ваньбурез 3 триллион манет тыр люкаське, пайдаез (прибылез) - 73,8 миллиард манет. Со коньдон висъя буёло (цветной) металлургиез, нефть поттонэз, нефтепеработкаез, машиностроениез, химической промышленностез, судоходствоез азинтонэ но мукет удысъёслы. Учредительёсыз но акционеръёсыз луо бадӟымесь внешнеэкономической огазеяськонъёс но вылӥ верам удысъёсысь компаниос, огазеяськонъёс но предприятиос. Валтӥсь клиентъёсыз пӧлысь нимысьтыз инты басьтэ "Сиданко" НК, "Норильский никель" РАО, Новолипецкысь металлургической комбинат, "Алмазы России-Саха", "Зарубежнефть" ГВК, "Росвооружение" ГК, "Росхлебопродукт" но мукетъёсыз. Миым 1 январёзь Россиын, СНГ-ын но Балтиын усьтэмын вал 300 счётъёсыз, нош банк-корреспондентъёсыз - 522. Соос ужало Япониын, Германиын, Испаниын, Даниын, Великобританиын, Бельгиын, Голландиын, Италиын но музон интыосын. 1995 арын со Женеваын (Швейцариын) усьтэ нимаз (дочерней) банк. Центральной но Восточной Европаысь банкъёс пӧлын 10-тӥ инты басьтэ, нош дуннеысь 1000 валтӥсь банкъёс пӧлын - 504. ОНЭКСИМ Банк возе Россиысь уно банкъёслэсь, нефть компаниослэсь, бадӟымесь АО-ослэсь но предприятиослэсь акциосын эскерон пакетъёссэс. Отчы пыре "Сиданко" но. Банклэн президентэз - Владимир Потанин, правлениезлэн тӧроез - Михаил Прохоров. Миым 18 ноябре ОНЭКСИМ Банк, "Сиданко" но "Бритши Петролеум" компания тупанкыл гожтӥзы. Тӥни озьы Великобританиысь компания нефть но газ поттонэ трос коньдон висъялоз.Малы бен та банк сярысь тупен-тупен мади? Мугез тодмо. ОНЭКСИМ Банк киын "Сиданколэн" акциосын эскерон пакетэз, нош "Сиданко" асьме "Удмуртнефть" ОАО-лэсь пакетсэ возе. Тӥни кыӵе герд кылдытэмын. "Удмуртнефть" "Сиданкоын" шаерысьтымы "Удмуртнефть" одӥгез кужмоез, огсыр ужасез но пайда сётӥсез огазеяськон луэ. Солэн уставной капиталэз 3562 миллион манет лыдъяське, активъёсыз - 7237 миллиард, нош пайдаез - 408 миллиард манет. Со басьтэмын миым 9 толэзь ӵоже. Уставной капиталэз аслаз "Удмуртнефтьлэн" 38 процент люкетэз, "Сиданко" 50,67 процент басьтэ, нош ОНЭКСИМ Банк - 7,84 процент. Огазеяськонмылэн 25 му вӧй кыскон интыосыз, нош скважинаосыз - 4460. Со пӧлысь 200 палаез уг ужало. Шаермы нефтен узыр. Сое поттон уно дасо аръёслы тырмоз ай (шедьтэмез гинэ), му вӧй утчан, берло дыре лябгес ке но, али но мынэ. "Удмуртнефть" ортчем арез умой йылпумъяз, чакламлэсь трос му вӧй кыскиз, нош газ поттӥз 50 миллион кубометрлэсь ятыр. "Удмуртнефть" ОАО-ын миым кивалтон выльдэмын. Огазеяськонлэн валтӥсь тӧроез луэ Евгений Богомольный, нош директоръёслэн советсылэн тӧроез - Валентин Кудинов. Татын 17 сюрс пала адями тырше. *** Йылпумъян азьын юан кылдэ: "Малы "Удмуртнефть" "Сиданко" компание шедиз?" 3-4 ар талэсь азьло му вӧй поттӥсьёс акциосын огазеяськонэ (АО) огазеяськизы. Ӵапак соку "Удмуртнефтьлэн" валтӥсь директорез вал Валентин Кудинов. Со уно пол вазиськылӥз Вылӥ Кенеше но Министръёслэн Советазы (али Правительствое) одӥг юанэн, кытчы, пе, каром акциосын эскерон пакетэз? Соиз но, таиз но вылӥ кун орган ымаз ву ӟузем кадь улӥз. Вераськонъёс мынӥзы, дыр ортчиз, нош республикалэн кивалтӥсьёсыз нокыӵе решение ӧз кутэ. Собере Москваысь телеграмма вуиз, куинь нунал, пе, дыр сётӥськом акциосын эскерон пакеттэс шоркаре вуттыны. Тӥни сыӵе югдур сярысь берло ивортӥз Кун Кенешлэн сессияз Валентин Кудинов. Поезд кошкиз, гырпумез уд куртчы ни. Озьыгес ик луэмын "Удмурт Телеком" но "Удмуртнефтепродукт" АО-ослэн акциосынызы. Туннэ пырак вераны быгатӥськом: республика, татын улӥсь калык бадӟым ыштон адӟизы но адӟозы. Куд-огез юалоз: малы? Табере асьмеос инкуазь узырлыкмылы (самой дуноезлы - Г. В.) кузё ум луиське ни. Шаерамы сое арлы быдэ миллион тоннаосын кыском, инкуазез, бусыосмес, возьёсмес, шуръёсмес, тыметъёсмес, нюлэсъёсмес но мукетсэ кырсьмытом, нош емышсэ басьтозы "Сиданко" но ОНЭКСИМ Банк. Соос Москваын, Женеваын, Лондонын но дуннеысь мукет городъёсын 5 кизилиен гостиницаос пуктозы, офисъёс лэсьтозы но асьме чотын кисыоссэс пульдытозы. Ваньзылэсь нимъёссэс но фамилиоссэс вератэк но тӥ соосты ӟеч тодӥськоды, "Сиданко" Москваын "Тверская" гостиница ӝутӥз ни. Тӥни озьы асьме шаерамы поттэм продукция чотын но Россилэн шоркарез син азьын выльдӥське, чеберске но воштӥське. Тӥни малы "Сиданко" сярысь сыӵе "кушаса" кадь гожтӥ. Котькин мед тодоз, кыӵе со нефть компания луэ. Но ужпум со бордын гинэ ӧвӧл. Самой бадӟымез кузё - ОНЭКСИМ Банк. Со киын уго "Сиданколэн" эскерон пакетэз. Нош со люконтэм герӟаськемын кунгож сьӧрысь фирмаосын, банкъёсын но мукет кун ёзъёс луисьтэм организациосын. Валамонгес пусйыса, республикаямы поттэм нефтьмы, газмы отчы но кошке, пӧсяса-нюласа поттэм продукцимылэн емышез ыше-быре. Нефть - со политика. Тӥни малы "Сиданко", ОНЭКСИМ Банк но мукетъёсыз асьме удмурт му вӧй бордамы кырмисько, асьме чотын майбыр улэмзы но узырмемзы потэ. Юнме уг шуо, нефть - со "сьӧд зарни". Кунгожлы кулэ алмаз но, зэмос ӵуж зарни но, сьӧдэз но. Табере шаермы Москвалы гинэ ӧвӧл, "Бритиш Петролеум" но музон бадӟым фирмаос понна ужалоз, нош му вӧй поттонлэн вань кырсез республикаямы кылёз. Оло, юнме вераськонъёс но уг кылдо, Россия, пе, кунгож сьӧрысь странаослы вузамын ни. Но азьланьын умоезлы оскем потэ. Ведь адями улэ бере, солэн осконэз ноку уз быры. Геннадий Романов, "Удмурт дунне" газетысь политикая но экономикая отделлэн редакторез. Вакчияк Нырысетӥ интыын - политика 15-тӥ толшоре "Удмурт кенеш" огазеяськонлэн Ижысь ёзэзлэн правлениезлэн кенешонэз ортчиз. Юнматэмын куинь арлы ужан план. Нырысетӥ интые пуктэмын политика удыс. Нимысьтыз висъямын городысь Думае но Кун Кенеше быръёнъёсы пыриськонъя ужрадъёс. Эскеремын городысь Думае депутатэ ӵектоно адямиослэн списоксы. Соослы юрттон вылысь кылдытэмын луоз бырйисьёс пӧлын валэктон но ӝуткан ужез нуись штаб. Нош бырйисьёслэсь "Элькун" огазеяськонзэс кылдытэм бере, "Удмурт кенешлэн" городысь ёзэз мылысь-кыдысь пыриськоз солэн ужрадъёсаз. Иж карысь кенешчиос озьы ик малпало калыклы юридической тодон-валан сётонэз радъяны. Шуге-леке шедем удмуртъёслы валэктонъёс сётъялозы но документъёс дасялозы асьме пӧлысь адвокат но нотариус. Экономика удысын малпамын мукет финн-угор калыкъёсын коммерция пыр кусыпъёс тупатыны. Пайда поттыны луиз ке, трос нылпиё семьяослы, сӧсыръёслы, пересьёслы юрттыны луоз дунтэмгес сиён-юонэн, калыкысь бичам дӥськутэн но мукет амалъёсын. В. МИХАЙЛОВ. Ужгур пӧзе Ижевскысь Ключевой посёлокысь 41 номеро юртэз тросэз уг тодо на, вылды. Отчы интыяськемын "ИРИСС" ("Ищем работу и, созидая, создаем") фирмалэн учебно- производственной предприятиез. Кун ласянь юрттэтлы кулэяськись муртъёс: трос нылпиё анайёс, туэ гинэ школаез йылпумъям но ляб тазалыко егитъёс пӧртэм киужъёслы дышетско. Со сяна, та фирмалэн ёзъёсыз ужало 15, 39, 75 номеро школаосын. Отын дышетско пельтэм яке ляб йырсазё нылпиос. 20 ар пала "Ижмаш" Дворецын хореограф луыса ужам мурт, "ИРИСС" фирмалэн кивалтӥсез Людмила Николаевна Бочкарёва выжиз чылкак мукет удысэ - калык творчествое. Сое сюлмысьтыз шӧдэ-вала, котькуд киужаз удмурт шӧмез пыӵатыны тырше. Солэн дышетэмез улсын куинь сю пала дышетскисьёс тодон-валан басьто. Шаермылэн пӧртэм сэрегъёсысьтыз лыктэм нылъёс но пиос бӧрысь быгатонлыкъёссэс шараялозы вордскем палъёсазы. Уноез соос дор палъёсазы вазьынгес ужаны кутскизы ни. Кылсярысь, Якшур-Бодьяын, Сюмсиын, Селтаын, Вавожын, Балезиноын, Граховоын, Можгаын но мукет районъёсын. Вань ни ас кожазы ужасьёс но. Ортчем толэзе татын радъямын вал аспӧртэмлыко адӟытон. Пичигес кабинетын ӝикытак тыремын ас киосынызы керттэм, чильпам, куэм макеос. Киужъёс шоры учкыса, мылкыд ик бурдъяське. "ИРИСС" предприятиын ужгурзы пӧзе. Выставка дыръя. Керттӥськонъя но борддоръёсы панноос лэсьтонъя кабинетъёсын. Туспуктэмъёсыз В. КАМАШЕВЛЭН. Тугоко Сю пол мертаса но вандыны эн дырты Лыдӟисьёсмы тодо ни, кылем арняе Ижын бадӟым ужрад ортчиз шуыса. Россилэн пӧртэм сэрегъёсаз улӥсьёс люкаськылӥзы татчы калыкъёслэн кусыпъёссы пумысен кенешыны. Научно-практической конференциез усьтыса вераськиз Удмурт Элькунысь Кун Кенешлэн Тӧроез Александр Волков. Россия Федерациын национальной кун политикая концепциез быдэсъян амалъёс пумысен доклад лэсьтӥз странаысьтымы нациослэн ужъёссыя но федеративной кусыпъёсъя министр Вячеслав Михайлов. Озьы ик та ужпумъя вераськизы Москваысь, мукет интыосысь вуэм куноос, асьме тодосчиос. Кык нунал ӵоже трос выльзэ тодыны луиз. Малпасько, конференцилэн материалъёсыныз азьланьын но тодматом на. Туннэ дэмласьком нырысетӥ гожтэммес. ... Бер ӝыт бертэмме адӟыса, пумитам шедем бускеле мынектӥз: - Ну, мар-о, радъяды-а бен калык кусыпъёсты? Серекъяны тыршон сямзэ тодӥсько ке но, таяз учыре ӝот-ӝот шуисько: - Конференция зол ортчиз, пайдаез луоз. Мӧйы юлтоше но йыг-йыг кариськиз: - Уг, уг валаськы мон югдурез. Малы, кинлы кулэ со национальной шуон ужпумъёсты ӝутон? Асьтэос бугыртӥськоды, собере бӧрдӥськоды. Улӥм ук партия дыръя, нокинлы ик кулэ ӧй вал адямилэсь кин луэмзэ тодон. Нош табере кутскизы: вот милемыз зӥбо, эрик ӧвӧл. Тьфу... Тӥни адӟиськод-а азбарысь пипуэз? Макем чебер гӧртэмын со, - бускеле чиньызэ урдэ укно пала. - Писпу борды али йӧтскид ке, чеберез тӧлӟоз... - Ма, кенешын ӵапак со чеберез утён сярысь вераськизы ук, - ас мылкыдме вераны турттӥсько эшелы. Споръяськонмы кема гинэ кыстӥськиз ке но, огкылэ ӧм вуэ. Бускелелы дэмлай Шупаш карысь писательлэн Миша Юхмалэн кузьыменыз тодматскыны. Со чуваш кылын нимаз книгаен поттэм Куӟебай Гердлэсь кылбуръёссэ. Чуваш выжыысь потэм бускеле бискылиме, мылпотытэк ке но, кутӥз ик но ас квартираяз вамыштӥз. Зэм но, оло, кулэ ӧй вал Ижын бадӟым кенешон? Котькудӥз та пумысен ас сяменыз малпа, вылды, мон оскисько, страус музэн, асьмеос йырмес миндэр улэ ватӥм но "ваньмыз умой, ваньмыз умой" шуыса асьмемыз буйгатыны вырим ке, улонмы ас кожаз гинэ уз тупатскы. Бен, соглаш кариськоно огеныз. Нациослэн кусыпъёссы - туж аспӧртэмлыко удыс. Татын шуч-шач ужаны уг яра, котькуд кыллэн, котькуд вырослэн дуныз туж бадӟым. Кызьы шуиз конференциын одӥгез вераськись, калык кусыпъёсъя решение кутыку, сизьым пол, дас пол гинэ мертано ӧвӧл, сю пол но учкыны, ай озьы но вандыны дыртоно ӧвӧл. Толлы пумит номыр уд вера - шонер пусъемын. Кенешын уно гинэ визьмо адямиос мылкыдзэс шараязы. Пӧлазы вал олокызьы но вераськисьёсыз. Тросэзлы кельшиз министрлэн докладэз. Малпасько, вылӥ должностьын луэмысьтыз гинэ ӧвӧл, наукаосъя доктор берло аръёссэ пӧсь таба вылын кадь пуконо луэ. Я Чечня, я Осетия, я эшшо маке шеде. Сыӵе секыт югдур ик адямиез визьма, вылды. Кызььы шуиз вис дыръя тодмо критикмы Александр Шкляев, таӵе йӧно доклад ӧй луысал, Россия война пыр ӧй потысал ке... Тӥни сыӵе дуныз виро ожлэн. Ма бен вераз министр? Президент аслаз Указэныз валля гужем юнматӥз национальной политикая концепциез. Удысэз радъямын со инъетлы пӧрмиз. Калыкъёслэсь кусыпъёссэс юнматон понна кулэ кужмо государство. Россия умой азинскыны быгатоз федерация луыса гинэ. Со понна одно ик лыдэ басьтоно вань калыкъёслэсь интересъёссэс, кулэяськонъёссэс. Куинетӥез ужпум герӟаськемын интыосын аскивалтонэз азинтонэн. Озьы Россия пыд йылаз султоз. Федерация - со огазеяськон гинэ ӧвӧл, отын луыны кулэ огъя закон, огъя порядок. Асьмеос таиз сярысь ӵем дыръя вунэтӥськом, пусйиз министр. Вячеслав Михайлов ӝутӥз представительство сярысь ужпумез но. Куд-ог улосъёсын таӵе курон конституциосы но пыртэмын ни. Котькуд калыклы парламентын, кивалтэтын, мукет ёзъёсын кӧня ке инты сётӥське. Тодӥськоды на, вылды, Удмуртиын конституциез выльдон бордын ужаку, асьме дорын но вераськонъёс потозы удмуртъёслы законэн тупатэм мында инты висъям яке нимысьтыз палата кылдытон сярысь. Та ужпум шоры пӧртэм сямен учкыны луоно. Кин сое лыдъя одӥгзэ нациез мукетыз чотын зӥбонэн, кин - кулэтэм ӵектонэн. Озьы ке но, азьланьын малпаськыны мугез вань. Учке ай тани Федеральной Собраниын (Россиысь парламентын) вить асьме адямиос пӧлын одӥгез гинэ (Павел Вершинин) выжыысьтымы потэмын. Кун Думаын 28 выжыысь адямиос. Но 21 республикаысь калыкъёс пӧлысь 13-ез гинэ асьсэ эшъёссылы мандат сётыны быгатӥзы. Кун Кенешын но удмуртъёс чиньыен лыдъямон. Элькунмылы йыр быръёно луиз ке, отчы но палэнысьёс чуртнаськыны тыршозы. Дыр вуэмын мукет республикаосын, округъёсын та ласянь люкам опытэз пыр-поч эскерыны но асьме вылэ мертаны. Уго мукет калыкъёсысь потэм кивалтӥсьёс удмуртъёс сярысь сокем уз сюлмаське. Озьы шуисько ке но, улонын вань мукет учыръёс но. Тани матысь выжыосмылэн - комиослэн - йырзы Юрий Спиридонов ӟуч. Сое главае кыкетӥ дырлы бырйизы ни. Юнме шорысь ӧз. Уго Коми Элькунын трос лэсьтӥське, выжы калыклэсь улонзэ умоятон понна. Коньдон но, инты но, дыр но шедьто. Коми кыл школа программаосы пыртэмын. Республикаын уно аръёс ӵоже ужа ни кылъёс сярысь закон. Тӥни сыӵе югдур, отын выжы калык асьмелэсь но ичи ке но (ог 20 процент). Комиослэсь котыр ласянь сюлмаськыса ужамзэс умоен пусйиз докладаз министр но. Валля арлэн пумаз, Удмуртиысь Нациосын ужанъя комитетлэн кичӧлтэмезъя, Ижын ортчиз вал таиз выллем ик конференция. Солэн решенияз пыриз комитетлэсь статуссэ ӝутыны курон но. Арлэсь трос дыр ортчиз - дэмлан санэ басьтэмын ӧй вал. Таяз кенешын Москваысь министр ӵектӥз республикаосын нациосын ужанъя министертсвоос кылдытыны, уго сыӵе ёзъёс куд-ог областьёсын но, кылсярысь, Оренбургын усьтыны малпало ни. Воштӥськоз меда Удмуртиын югдур? Вераны шуг. Кыл, культура, дышетон, ивор вӧлмытон - тани та удысъёсты азинтӥз ке, нациос куспын валамтэос уз луэ. Котькудӥзъя нимаз программа дасяно, коньдон висъяно. Министр тодаз ваиз 1990 арын мари школае вуылэмзэ. Пор нылпиос шуиллям, ми, пе, ас кылынымы вераськыны кепыраськом. Пиналъёс анай кылзылэсь возьдасько ке, государствоын югдур туж урод, меӵак пусйиз Вячеслав Михайлов но ӟеч верамез понна кузьым чотын залын пукисьёслэсь юн кичабонъёсын басьтӥз. Министрлэн мукет малпанэз но кельшиз люкаськемъёслы. Калыклэсь лулчеберзэ (духовностьсэ) утёнэ-умоятонэ уногес коньдон висъяно. Озьы лэсьтӥм ке, уз луэ ченгешоньёс, уз луэ ожмаськонъёс, озьыен, гомась тылэз кысонэ миллиард манетъёсын коньдон но уз кутӥськы, пусйиз Михайлов. Кун Думаысь Нациосын ужанъя комитетлэн кивалтӥсез Владимир Зорин мадиз законъёс бордын ужамзы сярысь. Калыкъёсын герӟаськем политикаез азинтон юнме, Россиын инъет вань ини. Юнматэмын концепция, кутэмын национально-культурной автономия сярысь закон, интыысь аскивалтон сярысь закон. Вуоно юртлэн инъетаз кулэ на ньылетӥ из - Россия Федерацилэсь бюджетсэ дасян сярысь законэ воштон, отчы национальной политикаез радъян понна коньдон висъян сярысь нимысьтыз люкет пыртон. Та ласянь куд-ог улосъёс Федерацилэсь центрзэ азьпалтыса ужало. Нациосын герӟаськем политикаез быдэсъянэ бюджетысь коньдон нимысьтыз чурен висъяло. Калыкъёслэсь кусыпъёссэс юнматон но ичи лыдъем нациосты утён вылысь, пӧртэм законъёс куто. Тани Якутиын, кылсярысь, ужа ни альтернативной службая закон. Со юрттэ ичи лыдын калыкъёслэсь пиоссэс армие мынонлэсь мозмытыны. Кызьы пусйиз Валентин Зорин, кудаз ке улосын воргоронъёслэн кышнооссылэн кӧня луэмзы уз шӧдӥськы Россилэн быдэслыкез вылын. Нациослэсь огъя улонзэс умоятон понна пӧртэм амалъёсты кутыны луоно, но та ужын кыӵе ке кампания ялыса ужаны уг яра, ваньзэ малпаськыса лэсьтоно. Лыдӟисьёслэн тодэмзы потэ, дыр, малы Всероссийской конференция Ижын ортчытэмын вал шуыса. Кылем гужем Оренбургын совещание ортчытыку, отчы люкаськемъёс пусйиллям, министерство улосъёслэн сюлмаськонъёссылы ичи саклык висъя шуыса. Сое но Удмуртиысь кивалтӥсьёслэсь кичӧлтэмзэс лыдэ басьтыса ик решение кутэмын вал асьме шор каре люкаськыны. Министрлэн верамезъя, Уралын но Волга котырын али возиське "обстановка напряженного равновесия". Асьме кылэ кызьы берыктыны ик уд вала, ява. Шонер верамын кадь. Уго ог ласянь асьме дорын калыкъёс куспын ваче пумит сылон учыръёс ӧвӧл, мукет ласянь учконо ке, кызьы ке ӟучъёс пӧлын, озьы ик удмуртъёс пушкын пумиськыло огъя шобретэз ас палазыгес кыскыны турттӥсьёс. Котьма ке но, шуг ужпумъёсты дэмен, дыртытэк эскерон асьмелы уродзэ уз вайы, дыр. Со юрттоз ог-огмылы матэгес луыны. Нош ик чӧлскем потэ министрлэн верамез вылэ. Ми умой, ог-огмес валаса ужам, соин ик, вылды, журналимстъёс, тужгес но Москваысьёсыз, уз дыртэ та конференция сярысь мадьыны, пусйиз Вячеслав Михайлов. Вот татын кыӵе ке керетон ӝутскысал ке, соку ини со сярысь быдэс дунне тыр куашетысалзы. Таӵе дунъет журналистъёсты вӧсь каре ке но, министрлэн вераменыз соглаш кариськытэк нокызьы но уг луы. Зэмзэ вера ук со. ... Ӵуказеяз нош пумиськи бускеленым. Мар бен, лыдӟид-а вордскем кылыныд гожтэм книгаез, юасько солэсь. А-а-а, вунэтӥськем ни мон ас кылме. Кулэез но ӧвӧл, лулӟысагес но ӧпкельытэк вазиз юлтоше. Кыкетӥ юан сётыны мылкыды ӧз ӝутскы. Котькудӥзлэн аслаз сюресэз. Иван Лебедев. Конференция ортчон дыръя. Туспуктэмъёсыз В. Камашевлэн. Выжызы егитоме Колхозъёс кылдыку, Каракулино районысь пор гуртъёс нимаз ужазы, али но озьы ик, Ныргында гуртын - "Дружба", нош Быргындаын - "Рассвет" нимо колхоз. Нош куатьтонэтӥ аръёсы соос бадӟым "Кама" колхозэ пыро вал. Та хозяйствоысь 70 коммунистъёсын кивалтӥсз Быргында гуртын вордӥськем пиосмурт Василий Митрофанович Кибардин. Со пичиысен секыт гурт ужъёслы дышемын. Чылкыт сюлэмо, зэмлык понна пумозяз сылӥсь адямиез гурт калык зол гажаз Василий Митрофановичез берпум сюресаз вань гурт калык келяз. Василий Кибардин дас сизьым ар школаын пиналъёсты дышетӥз, кема сельсоветлэн председателез но вал. Василий Митрофановичлэн кузпалыз Зинаида Петровна вань улонзэ дышетӥсьын ужаз, тыршиз мыло- кыдо, сюлэмзэ сётыса. Пиналъёс сое туж ярато вал. Зинаида Петровна йылпумъяз Башкортостанысь Николо-Берёзовка черкогуртысь дышетӥсьёсты дасянъя (педагогической) училищеез. Соку отысь коллективен кивалтӥз Гарри Харитонович Ишмурзин. Со Быдӟым Отечественной войнаез пыр ортчыса подполковник луиз. Отысь ветеран уно орденъёсын но медальёсын пусъемын. Тӥни сыӵе адями дорын тодон-валан басьтӥзы Зинаида Петровна но солэн эшъёсыз. Кибардинъёслэн куинь пиоссы пӧлысь кыкез вылӥ образованиен специалистъёс луизы, али асьсэ колхозазы ик пудо эмъясь но инженер луыса тыршо. Табере Зинаида Петровналэн но Василий Митрофановичлэн вить внукъёссы будо. Озьы Кам дурысь Быргында гуртэ лэзем выжы ялан пушъе, егитоме. Р. ТОКМУРЗИН. Берекет ЮРТТЭ АСЬТЭЛЫ АСЬТЭОС Нырды уз кынмы Кезьыт куазен ӵем дыръя ымныр кынме, тужгес но - ныр. Мар карыны кулэ, кезьытлэсь утиськон вылысь? Нырез (бамъёсты но) кезьыт нуналъёсы зыраны кулэ кӧё-вӧё кремен но вылтӥз пудраен шобыртоно. Дырын-дырын чиньыосын маялляны кулэ, ныре (бамъёсы) вир умойгес мед лыктоз шуыса. Ныр (бам) вылысь ку тӧдьы ке луэм ини, со интыез калленэн гинэ кезьыт вуэн зырано - тӧдьы ку мед гордэктоз. Собере, кӧня ке дыр ӵоже пӧсь но кезьыт вуосыз вошъяса, компресс лэсьтоно. Кынмылэм интыез зырано чорыг вӧен яке кӧё-вӧё кремен. Л. ЯКОВЛЕВА. Берекет ТӤ ЮАДЫ ВАЛ Лэсьтэ асьтэос зефир Гажано "Берекет"! Нылылы городысь одӥг пол зефир басьтылӥ. Солы туж кельшиз. Ялан палэнэ та сиён дуре уд ветлы ук. Уз луы-а сое аслыд пыжыны? Оло, газет бамады валэктон сётоды. Мон "Удмурт дуннеез" ог дасо ар басьясько ини. Туж кельше со мыным. Оскисько, куронме быдэстоды шуыса. А. ИВАНОВА. Воткинск район. Куинь чечы пуньы желатинэз суралэ стакан (яралоз тросгес но) тыр кезьыт вуэн. 6 час ӵоже пукетэ. Кык но ӝыны стакан сакыр песокез пӧзьтэ ӝыны стакан вуэн. Со луоз сироп. Та пӧсь сиропе, пумен сураса но шуккыса, пукетэм желатинэз ватсалэ. Суретэз сиськон пуньыен нимаз- нимаз тыре чильпырась векчи бумага (калька) вылэ. Ӧвӧл ке, корт лист вылэ но тырыны яралоз. Собере куасьтыны пуктэ сӥялэсгес гур пушкы яке духовкае. Л. ВАСИЛЬЕВА. УЛОНЗЭ УРЕТӤЗ СНАЙПЕРЛЭН ПУЛЯЕЗ Одӥг гуртысь Карпа Коньылы векчи коньдон интые лотерейной билет сётӥллям. 30 копейказэ жаляз ке но, вузкарисез номыр ӧз куареты. Юнме шорысь шедем билетэз шудо вылэм - мотоцикл утӥз. Пичи мугоро воргорон шумпотэменыз ог интыяз тэтча, эктэ, серекъя. Коньы агайлэн вань улытозяз велосипедэз гинэ но ӧй вал бере, мотоцикл солы шудэн пачылмем мылкыд кузьмаз. Шуд сярысь трос гинэ вераны луоно. Огез семьяяз пумита, мукетыз - уж дураз, куинетӥезлы, кызьы шуо калыкын, инмысь но усе вылэм. Зэм, берло дыре шуд, шумпотон сярысь вераськонэз шергес кылод. Уждун дыраз уг тыро, пенсия сиён-юон гинэ но басьяны уг тырмы. Вылаз ик, пӧртэм интыосын вир кисьтон-ожмаськон ортче. Нылгаысь Раиса Баеваез, егит дыръяз гуртоосыз шудо адямиен лыдъяллязы. Яратоно муртэзлы бызиз, дышетскемез но тырмыт вал, кык нылъёссы но пизы будӥз. Та семья мукетъёслэсь номырин ӧз висъяськы. Нош аръёс ортчемъя, семья куашканы кутскиз. Воргорон "вож кыен" эшъяськиз. Раиса Платоновналэн чиданэз быриз. Пичиесь нылпиоссэ сьӧраз кутыса, кыре-буре кошконо луиз. Ужаны интыяськиз нылпи юртэ. Анай-атайтэк кылем нылпиосын капчи ӧвӧл огъя кыл шедьтыны. Вылаз ик, уждунэз но пичи ке. Юрттэт курыса, нокытчы ӧз вазиськылы. Картэз кытӥ ке калге бере, юрттэт сётӥсь но уз шедьы, дыр, шуыса малпалляз. Вера Нылга нылпи юртлэн азьвыл директорез, али отын ик воспитательын ужась Л. Г. Денисова: - Кышномурт ужезлы сюлэмзэ сётыса ужа. Куректэмзэ, курадӟемзэ адӟытэк ӧм улэ. Сельсоветлэн исполкомезлэн кенешаз но со сярысь ужпум трос пол ӝутылӥм. Малпаським, Валера пизэ нылпи юртын нуналаз огпол дунтэк сюдомы. Лек сюлэмо адямиос пумит луизы. Кышномуртэз пож вуэн пылатӥзы кадь соку. Малы меда адямиос ог-огзылы юрттӥськыны гинэ но пумит луо?! Раиса Баева шуг-секытъёсыз огназ ик вормыны тыршиз. Нылпиосыз сое умой дышетскеменызы шумпоттӥзы. Огез нылыз дышетӥсе потӥз, мукетыз вуриськись луиз, нош Валера, школазэ йылпумъяса, армие дасяськиз. Пияшез нылга калык гажаз вазиськись, лачмыт, ужез яратӥсь луэм поннаё. Оло, соин ик армие келяны но быдэс гуртэн люкаськизы. Шулдыръяськон сямен, тросэз воргоронъёс армия сярысь ас мылкыдзэс веразы. Армие ветлэм мурт, пе, зӥбыт, визьмо, таза, йыг-йыг, оскымон воргорон луэ. Вал сыӵеосыз но, кудъёсыз Чечня сярысь поттылӥзы. Отчы шедёнлэсь палэнскыны дэмлазы. Валерийлэн службаез мукетъёслэн сямен ик радъяськиз. Кавказэ вуиз ке но, Чечняе соку ик ӧз шедьы. Анаезлы вакчиесь гожтэтъёс ысъяз. Мынам, пе, ваньмыз умой, мон сярысь эн сюлмаськы. Малпамтэ шорысь одӥгез нунал Раиса Платоновнаез шимес иворен ланьырак музъем вылэ уськытӥз. Баев Валерий Леонидович Чечня ожын бырыны шедем. Малы ке но та ивор нырысь Вавож районэ ыстэмын вылэм, Ува райвоенкомат ке но армие келяз. Анай сюлэм бӧрдэ. Бырем пиез ватэмын ӧвӧл, нош дыр трос огинтыяз уг сылы. Поездэ пуксьыса мын вал пидэ вайыны, коньдон ӧвӧл. Кызьы но озьы нылгаос кышномуртлы юрттыны быгатӥзы. Чечняе вуэм анаен нокин рос-прос уг вераськы. Бырыны шедем пизэ утчаса, трос интые вазиськоно луиз солы. Одӥгез офицер Раиса Платоновналы Ростове мыныны дэмла. Пидэс, пе, бырем солдатъёсын сылӥсь вагонъёсысь тодмалоды, дыр. Отын солы ӝуаны шедем шӧез возьмато но Валерий Баев, шуо. Нош анай сюлэмез уд пӧя. Пиезлэн одӥгез пиньыз пиртэш луэмын, аппендицит бервылыз но вал. Нош та солдатлэн сыӵе тодметъёсыз ӧвӧл. Отӥяз нылкышноен трос ӧз вераське ни, мукет быремъёсты но ӧз возьматэ. Ветлэмез юнме луиз. Анай сюлэме мукет малпан каръяськиз. Сьӧлыктэм пиме юнме уз вие. Со улэп луыны кулэ. Куректонэн-бӧрдонэн тымиськем сюлэм уйёсты но изьыны ӧз сётылы. Пизэ утчаны, шедьтыны курыса, Раиса Баева пӧртэм интыосы вазиськиз. Бӧрысьгес Валерийлэн службазэ нуэм частьысьтыз ивор вуиз. Пидылэсь кытынзэ тодӥськом, лыктэ. Нылга калык нош ик бырем солдатлэн анаезлы сюрес дун люканы быгатӥз. Тужгес но ӟеч юрттӥзы школаын но нылпи юртын ужасьёс. Нош ик кузь сюрес, синкылиос, утчаськон. Таяз лыктэмаз Баева пумитаз Валерийлэсь ӵош ожмаськем эшсэ. Со ик вераз эшезлэн кызьы быремез сярысь. Снайперлэн пуляез Валерийлэсь улонзэ талам. Солдатэз Нылгае цинк коросэн (гробен) ваизы. Берпум сюресэ келяны но туж трос калык люкаськиз. Калыкын юнме шуиллямтэ: "Куректон огназ уг ветлы". Курадӟыса будэм пияш улонлэсь ӟечсэ адӟыса ӧз вуы. Солдат долгез быдэстонъяз шулдыр улонэн люкиськоно луиз. П. ИВАНОВ. Шунды Школа но улон Удмурт шаер, ми тонэ данъяськом! Якшур-Бодья ёросысь Мукши школаын кылем арын ортчиз шаерчиослэн нырысетӥ слётсы. Отчы пыриськизы ёросысь пӧртэм школаосысь пиналъёс. Соос веразы-возьматӥзы асьсэ улоссыллэсь, ёроссылэсь но шаермылэсь историзэс, географизэс. Мукши школаысь нылъёс но пиос кырӟанэн, буй-буй нянь сукыриен но вӧйын пумитазы кунооссэс. Лариса Якунина но Дима Абросимов шудэмъя зыл-зыл чузъяськиз арган куара. Трос сюлмаськонъёс вал та ужрадэз ортчытонэн валче. Кӧня бызьылоно луизы удмурт кылъя дышетӥсьёс Надежда Кирилловна Гильманшина но Алевтина Ивановна Тарасова, но тужгес сюлмаськоно луиз Эмма Глебовна Перевозчикова. Та куинь дышетӥсьёсмы шаермес тодон бордын сюлмысь, огкылысь тыршо. Слётын нырысь ик кыл сётэмын вал школаослы. Старые Зятцы шор ёзо школаысь пиналъёс, кылсярысь, дэремъёс возьматӥзы, веразы, кыӵе арын соосты нуллӥзы, кин соосты вуриз. Котькуд школа туж умой дасяськем. Нокинэ но нимысьтыз висъяны уг луы. Куноос, асьсэды возьматэмзы бере, ваньзы ик пӧрамъёсын чай юыны пуксизы. Вератэк уз луы, соос сьӧразы пӧртэм сиёнъёс ваиллям. Нош школаысьтымы пӧрасьёс буй-буй шаньги пыжиллям. Ми но, нылпиос но дышетӥсьёс, куноосмес асьме пӧрамъёсын утялтӥмы. Мар гинэ ӝӧк вылын ӧй вал: шаньги, пельнянь, пересьмон, шекера, эмезен кутэмнянь, сяртчынянь, куарнянен шаньги... Удмуртъёс шуо: "Валэз шуласа люктало, нош куноез кырӟаса пумитало". Фольклор кружоке ветлӥсь пиналъёс кырӟаса-вераса лэзизы. Куноосынымы ӵош "Кызьы меда лыктӥды" куно пумитан кырӟан кырӟамы. Наташа Мальчикова шулдыр куараеныз такмакъёссэ кырӟаз. Ӧжытак куртчемзы бере, куноос кыклы люкиськизы. Одӥгъёссэ Эмма Глебовна школа музеймес возьматыны нуиз, нош кыкетӥоссэ Мукши пиналъёс вашкала шудонъёсын тодматӥзы. Крезьгурлы дышетӥсьмы Елена Ивановна Корепанова эктонъя кружоке ветлӥсь пиналъёсын куноосмылы возьматыны дасяллям удмурт эктон. Туж шуныт мылкыдын пумитазы учкисьёс эктыны быгатӥсьёсмес. Лена Абросимова но Костя Гильманшин серем чуръёсын но тодматӥзы. Собере группаос воштӥськизы. Удмурт кырӟанъёсъя "Тодма крезьгурез" шудон ортчиз. Тодоно вал кырӟасез яке кырӟанлэсь авторзэ. Мукшиос уногес тодо вылэм удмурт кырӟанъёсты. Соос ик вормизы. Тазэ шудонэз быгатыса нуиз дышетӥсьмы Елена Ивановна Корепанова. Со школаямы кема уг ке но ужа ай, аслэсьтыз быгатонлыкъёссэ котьма ласянь возьматӥз ини. Ми туж шумпотӥськом, школамес йылпумъям нылаш, усто специалист луыса, дорамы ик берытскиз. Пиналъёс та нуналэ кема шулдыръяськизы на, шудӥзы, кырӟазы. Нош ӵуказеяз нылпи творчествоя центрын ужасьёс "Истоки" нимо шудон-лото ортчытӥзы. Дышетӥсьёсмы но туж бадӟым пайда басьтӥзы та шудонлэсь. Таяз ужрадэ пӧртэм школаосысь пиналъёс суро-пожо командаос кылдытыса пыриськизы ини. Тужгес ӟеч тодон-валанъёссэс возьматӥзы Мукши, Старые Зятцы школаосысь но нылпи творчествоя юртысь кружокъёсы ветлӥсьёс. Ужрадлы кичӧлтон сётӥз но сое радъяз нылпи творчествоя центр. Кузьымъёслы коньдон висъяз ёросысь егитъёсын ужанъя отдел. Оскем потэ, азьланяз но таӵе ужрадъёс ортчылозы шуыса. Асьмелэсь шаермес тодыны кулэ, удмуртлыкмес вунэтыны уг яра. Кылмылэсь керпотоно ӧвӧл. Сое вылэ ӝутоно, данъяськоно. Лариса Якунина. Як.-Бодья ёрос, Мукши школа. Удмурт Правительствоын Министръёслэн кабинетсы ялан син азяз возе предприятиослэсь тыронъёссэс (кредитъёссэс) берыктэмез. Ссудаос висъямын вал Правительстволэн кыл сётэмез улсын. Со сярысь нимысьтыз пусйиз Правительстволэн Тӧроез Павел Вершинин. Предприятиос тыронъёссэс ӧз ке берыктэ, чурытэсь ужрадъёс кутэмын луозы - ваньбурзэс талалозы но собере вузалозы. Собере Правительство азьланьын сыӵе предприятиосты бурд улаз уз басьты ни. Тыронъёссы тужгес но трос Ижысь радиозаводлэн, "Ижмашлэн", Воткинскысь тылобурдо вордон фабрикалэн но мукетъёсызлэн. *** Таяз арняе ортчоз Правительстволэн Президиумезлэн кенешез. Со учкоз гурт хозяйствоез азинтонэн герӟаськем ужпумъёсты. Нырысь ик вераськон мынэ АПК-ез выльдон сярысь. Тани 25 ляб хозяйствоос юнматэмын луозы золъёсыз борды. Куд-огез банкрот луоз. Кылсярысь, со амал юрттӥз Можга районысь "Родники" эштослы пыд вылаз султыны. Азьланьын кун юрттэт сётӥськоз нимаз-нимаз хозяйствоослы гинэ. Кредит басьтозы ӟеч ужась хозяйствоос. Озьы луиз Можга районысь "Заря" колхозэн. Со рынокен экономикаын ас интызэ шедьтӥз ни. *** Правительство озьы ик син азяз возе бюджетникъёслы уждун тыронэз. Кун учреждениосын декабрь понна уждун сётэмын ни. Со дыре ик куд-ог удысъёсын но районъёсын уждунлы висъям коньдон мукет азе кутэмын. Со сярысь Правительствоын чурыт вераськон луоз. Югдурез чакласа, Ужъя комитет уждун тыронъя отчёт сётонъя амалъёс утчаны кулэ. Сыӵе курон пуктӥз Павел Вершини. Отчы пырыны кулэ 100 пала учреждениос но организациос. Кинлэн тыронъёсыз пытсамтэ луозы, соосты толэзьлы быдэ газетъёсын возьматозы. *** Правительстволэн Президиумезлэн кенешаз рос-прос учкемын "Ижевский механический завод" кун предприятие (ГП). Котькуд предприятие коллективен кутэм огкылзэ быдэсъяны кулэ, пусйиз Павел Вершинин. Нырысь ик вераськон мынэ дыраз уждун сётон сярысь. Предприятиын 12 сюрслэсь уно ужасьёс. Соослы берло дыре секыт йӧтэ. 1997 арысен производство 47 процентлы кулэсмиз, нош ужасьёслэн лыдзы - 42 процентлы. Куашканлэн мугъёсыз пӧлысь одӥгез луэ нимаз продукция (ож тӥрлык), автомобильёслы но мотоциклъёслы ёзъёс поттонэз синэтон. Со дыр куспын калыклы вузъёс поттон 47 процентлы йылӥз ке но, предприятиын югдурез тупатыны со уг юртты. Малы ке шуоно, продукция поттыны ваньбур быре, нош рентабельностез уг буды. Тани миым 11 толэзь ӵоже поттэм продукция пӧлысь 40 процентэз пайда ӧз вайы. Предприятилэн тыронъёсыз ялан йыло, озьы ик бюджетэ но. Мукет ласянь солы но тыронъёссы вань. Кенешын ас малпанъёссэс веразы но умоесь ӵектонъёс сётӥзы предприятилэн директорез Василий Чугуевский, промышленностья министр Виктор Долгов, мукет кунъёсын кусыпъёсъя министр Виктор Викулов, налог бичанъя кун инспекцилэн кивалтӥсез Владимир Орехов, Правительстволэн Тӧроезлэн нырысетӥ воштӥсез Александр Злобин но мукетъёсыз. Куинь толэзь ортчыса, Правительство та ужпум борды выльысь берытскоз. *** Министръёслэн кабинетсы постановление кутӥз нимысьтыз пытсам школа усьтон сярысь. Отын тодон- валанъёс басьтозы быдэ вуымтэос, кудъёсыз кышкыт йыружъёс лэсьтӥзы. Правоосты утись органъёсын али 1200 мурт сыӵе адямиос лыдъясько. Соослы 14 арес тырмымтэ на. *** Юнматэмын кышкыт учыръёс дыръя калыкез мукет азе интыян порядок сярысь положение. *** Городъёслы но районъёслы нюлэс коранъя интыос висъямын. Огъя вераса, туэ 524,8 сюрс кубометр нюлэс кораны висъямын. Удмурт Республикаысь Правительстволэн Тӧроезлэн секретариатысьтыз пресс-центр. Берекет Бурдо эшъёсмы Ӵужйыръёс (чукойыръёс, свиристели) асьме пала вуо уй палась. Чидантэм кезьыт но сютэм улон соосты та палъёсы вуттэ. Сӥзьылзэ но толзэ асьме нюлэсъёсын куноясько. Коркамы нюлэслы матын. Палэзьпу ас дораз ӧтьыса кадь чебер пӧрмытскем, мукетъёсыз пӧлын аслаз горд емышеныз кыдёкысен адӟиське. Ӵужйыръёс быдэс уллёен со вылэ пуксизы. Кезьыт омырын соослэн туж ненег гинэ кырӟамзы, азвесь езэз кыскам кадь шуламзы, котырак шуккиське. Кылзӥськод соослэсь кырӟамзэс, учкиськод пуштрес гоно вылтырзы шоры - макем каньыл луэ сюлэмын. Горд палэзь - соослэн самой яратоно сиёнзы. Уг мылето шуэз но, лэгезьпу мульыез но, льӧмез но... Мон кема учкыса улӥ соослэсь палэзьпуын кунояськемзэс. Емышез ишкалто но ньыло. Быдэсаксэ. Кудӥз емыш лымы вылэ усе. Яке ӝынызэ гинэ кукчалто но выль емыш борды кутско, весь дырто, дырто, ныр улысьтызы палэзьзэс ишкалтозы, лэся, кожало. Кӧтсы тырем бере, уллё ӝужытгес писпу вылэ лобӟиз. Пукизы, шутэтскизы но азьлане лобизы. Нюлэс вадьсын нош ик соослэн азвесь крезьгурзы шуккиськиз. Асьсэлэн яркыт- гордэсь бурд йылъёсынызы но чуко йыръёсынызы сюлэме пырись гуръёсынызы уй пал бурдо куноосмы тол куазьмылы кыӵе ке но выль мылкыд кылдыто кадь. Толалтэ та бурдо эшъёсмылы сиёнтэк туж секыт луэ. Эн вунэтэ соослы дырын-дырын сиён сётъяны. Мон квартираысьтым пиялаен пытсамтэ интые тылобурдо сюдон лэсьтӥ. Отчы нянь пыры, пӧртэм тысь кисьтӥ. Малпасько вал, та чебер тылобурдоос, оло, лыктозы, кунояськозы. Ӧй шӧдылы на. Пислэгъёс кышкасьтэмесьгес, ӵем вуыло. Зэм, таосыз кӧй юдэсэзгес ярато. А. Сутулов. Быдто пӧйшуръёсты Шаермы пӧйшуръёсын узыр. Соосты кутылыны Правительствоысь Пӧйшуран хозяйствоя управление пӧйшурасьёслы арлы быдэ лицензиос сётъя. Со лэсьтӥське, пӧйшуръёслэсь лыдзэс чакласа. Но туннэ жаляса верано луэ, сук адямиос, инкуазь узырлыкъёсты жалятэк, лицензия басьтытэк пӧйшуръёсты быдто, изъянто, шуыны луоз. Тани миым 512 сыӵе учыр шараямын. Виемын 90 койык, 20 кыр парсь но мукетъёсыз. Нош кырмемын койыкъя 20 браконьер, кыр парсья - 9. Со туж ичи. Малы? Куд-ог интыосын охотинспекторъёс но охотхозяйствоос ляб ужало. Озьы шуыны луоз Юкаменск, Дэбес, Киясово но музон районъёс сярысь. Бен, браконьерез кырмон капчиен уг сётӥськы. Ӵем дыръя охотинспекторъёс нюлэскысь шедьто койыклэсь йырзэ, пыдъёссэ но кузэ. Кылем арын кык койык вылэ (петляе) сюрыса быремын. Кытын бен пӧйшуръёсты умойгес утё? Та ласянь азьпал радын мыно Каракулино но Кез ёросъёс. Нырысяз 51 учыр шараямын, кыкетӥяз - 30, Ува, Вавож но Игра районъёсын - быдэн 23-26, нош Завьялово, Воткинск но Селта ёросъёсын - быдэн 20 учыр. Лицензиосъя миым 650 койык кутэмын, кыр парсь - 219, кион - 90, гондыр - 42. Азьло аръёсын ӵошатыса, ваньмыз со 2-3 пол ичи. Кылсярысь, 1990 арын койык кутыны 1700-1800 лицензия сётэмын вал, гондыръёсты 70-90-зэ ыбылӥзы, нош кионъёсты - 130-160-зэ; Тӥни озьы шаерамы пӧйшуран кулэсме ке но, пойшуръёсты быдтон учыръёс йыло. Г. РОМАНОВ. Лыдӟись гожтэ Жингырты, "Айкай"! Ошмесо удмурт шаерамы трос гинэ кырӟась-верась коллективъёс. Ваньзы соос вылтуссыя но быгатонлыксыя пӧртэмесь. Котькудӥз калыкез маин ке но бордаз кыскыны быгатэ. Нош мыным тужгес но дуно потэ фольклор "Айкай" театр. Калыклы кӧня ӟеч мылкыд но шумпотон кузьмало усточиос. Кыӵе гурт уг возьма татысь артистъёсты, кудӥз семья уг данъяськы соосын! Та коллектив гурт калыклы матын луэ кырӟаны-вераны но солэсь йылолъёссэ возьматыны быгатэменыз, гуртоослэсь аръёсын кырӟам гуръёссэс тӥятэк, суратэк-пожатэк учкисьёс пӧлы вӧлмытэменыз. "Айкаез" адӟыкум яке кылзыкум, амалтэк тодам ваисько война бере ортчем пинал аръёсме. Укыр сабыр кырӟалозы-вералозы, вал анай-атайёсмы. Телевизор, радио ӧй вал бере, сьӧрлось ӧтем куноос шоры - кыӵе гурен кырӟамзэс вунэтонтэм вылысь - синмес вошъятэк учкиськом но кылзӥськом вал. Пичиысен кылэм гуръёсты али троссэ айкайёслэсь кылӥсько ини. Со туж шумпотымон. Туж жалясько, мӧйы калык, сопал дуннее кошкыса, уно тодэм-валамзэ сьӧраз нуэ шуыса. Утчаны бен ӧд аналскы ке, гуртъёсысь "мытымтэ" куараез, оло, али но шедьтыны луоз. Мед узырмоз улонмы азьло кырӟам шулдыресь гуръёсын. Айкайёслэн кырӟанъёссылэсь вуёмись но акыльтӥсь ӧвӧл кадь али. Со ик возьматэ, луоз, соослэсь калыклы сокем матын луэмзэс. Соослэн лыдзы но гуртысь клубъёсысь сцена вылэ тэрымон. Туала вакытэ, йӧнала культура юртъёс, клубъёс, транспорт ӧвӧлэн, трос калыкез интыяны,но нуыны-вайыны но ёрмоно угось. В. ВАСИЛЬЕВА. Пичи Пурга село. Берекет Тазьы но луэ ПӦРТМАСЬКИМ КЕ ПӦРТМАСЬКИМ Ымусьтон (Рождество) бере, пӧртмаськон вакытэ, вал та учыр. Анаен атай бускельёсмы доры куное кошкизы. Мон гуртэ огнам кыли. Шимес ик вылэм оген. Керттӥськыны но мылкыд ӧвӧл, лыдӟиськем но уг поты. Мар карыны ёрмыса, эшъёсылэн ӵектэмзыя, тунаатскыны ӧдъяй. Гидысь атасмес пыртӥ, ӝӧк вылэ синучкон пуктӥ. Синучконлэн кык пал дураз ик сюсьтыл ӝуатӥ. Тылме кысӥ но, атасме кунулам кутыса, жӧк сьӧры пукси. Кызьы ке эшъёсы дышетӥзы, озьы ик пукисько но возьмасько: ку вуоно картэлэн вужерез синучконын кылдоз. Веразы: адӟид ке, пе, вужерзэ, атастэ соку ик бордад золгес ӝипты, мед чоръяны кутскоз. Пӧртэм шайтанъёсты но ведӥнъёсты улляны, пе, юрттоз чоръям куара. Дас минут но пукыса вуттӥ, оло, ӧй, ӧс куара кылӥськиз. Кӧшкемаса мынам сюлмы ик пыдтышкам вуиз кадь, куалекъяса пукисько. Синучконэ умойгес учки но верантэм кӧшкемыт адямиез адӟи. Пал пыдаз кут кутчамын, мукетаз маке быдӟа гын сапег. Дӥськут интые, вылаз мешокез кесяса ошемын, ымнырыз ворсамын, йыр вылаз - куды, кудыяз - курег пузъёс, соос вылын атас пуке. Кӧшкемаменым атасме сыӵе зол ӟыгыртӥ - соид, вӧсь луэмезлы чидатэк, вань кужмыныз корка тыр чортӥз, киысьтым мозмиз. Озьы ке озьы, синучконысь вужер ӧз ышы. Шуак берытски но, со вужер берам вылэм. Мон мар турттэмме ӧй вала ни, ӝӧк улэ пыри но визьтэммем мурт сямен кесяськыны кутски. Вужерлы но оломар йӧтӥз: корка кузя дымбыр-шалтыр борддоръёсты йыгаса бызьылыны ӧдъяз. Озьы дауртон сяменыз кудыез усиз - курег пузъёсыз тач-тач гинэ пилиськылӥзы, кык атасъёс ваче пумит жугиськыны кутскизы. Собере мар луиз, уг тодӥськы ни. Валатски мон ӵуказеяз ӵукна гинэ валес вылысен. "Мар тон толон дауртӥд, Тоня, малы ӝӧк улын изид? Курег пузъёсты малы ке муз вылэ нелькемед. Ӧсэд но пась кельтэмын вал",- юаз анае. Уйвӧтам ветлыны кутски, дыр, шуисько. Зэмзэ верай ке, уз оскы, малпай. Чаляк дӥсяськи но школае дыртӥ. Толло учыр син азьысьтым нокызьы уг кошкы, ӝытазе нош ик со вужер вуоз кадь потэ. Малпаса ик кӧшкемаса куалекъяны кутскисько. Классэ пырыса гинэ вуттӥ, сьӧрам ик Сергей вуиз. Ми соин одӥг парта сьӧрын ӵош пукиськом. Пукси гинэ, Сергей мыным маде: - Толон ӝыт пӧртмаськыса ветлыны малпай. Нырысь ик тӥ доры пыри, нош тӥляд тылды кысэмын, нокинды ӧвӧл. Шӧдтэк шорысь атас туж зол чортӥз, асламез нош интыяз пуке кадь. Коркады пӧртмаськыны кутскиз. Оло адями, оло шайтан маке быдӟа куараен кесяськыны кутскиз. Мон кӧшкемай, чалякгес кошконо, шуисько. Нош озьы гинэ ӧз луы: коркан пеймыт, ӧсэз уг шедьтӥськы. Борддоръёсты йыгаса бызьылыны кутски. Ачим куалекъясько, улэп уг кыльы ни, дыр, малпасько. Ӧсэз мырдэм-мырдэм шедьтӥ но - кызьы гуртам вуэмме но ӧй вала ни. Курег пузъёсме но изъянтӥ, атасме но вунэтыса кельтӥ. Мон, сереме потыса, мырдэм но кызьы Сергейлы верай аслэсьтым но учырме. Собере, та "пӧртмаськем" сярысь нокинлы вератэк, ми куспамы туж кема гор! гинэ серекъяса пуким на. Вероника ЧЕРНОВА. 01 ивортэ Сутскиз быдэс гурт Озьы шуыны луоз, ар ӵоже потам тылпуослы йылпумъян лэсьтыса. Котькуд 100 учырын 72-аз сутскемын улон корка, квартира, быдэс хозяйство (1996 арын - 69). Коньдонэн вераса - 14 миллиард манет пурысь пеньлы пӧрмиз. Ӝуаса быриз 187 корка, 473-ез изъянмиз. Ӧжытсэ вераса, 187 семья кылем арын пыд йылаз потӥз - быдэс гурт! Улон интыяз быриз 106 мурт, 105-ез сутскыны но шуккиськыны шедиз. Эскеронъё-чакланъёс возьмато: тылпу ӵемгес потэ уйшор бере 4 часозь ӵукна, самой ӟеч кӧлон вакытэ. Та дыре ик быремын 49 адями, 20 часысен 24 часозь потэмаз - 22 мурт. Шудтэм учыръёс тросгес вадьсасько шутэтскон нуналъёсы. Ар ӵоже басьтыса, субботаосы сутскыны шедиз 19, арня нуналъёсы - 26 мурт. Мугез сярысь ке верано, ваньмаз та учыръёсын янгышез усе адями вылэ. Дугдонэз валатэк юон, шузимон ӟече ноку но нокинэ но ӧз вуттэ на. 384-ез тылпу потон учыр - кудӟемъёслэн ужзы (82- ез асьсэос но отын ӝуаса быризы). Тупатымтэ гуръёсын сэрен 295 пол тылӝу гомаз (сутскиз 10 мурт), 172 учырын шимес адӟон потӥз электроприборъёс бордысь (быриз 11 мурт). Республикамыя ар ӵоже 2 сюрс 470 пол тылпу потон учыр пусъемын, 1996 арлэсь кӧнялы ке ӧжытгес. Быремын 122 мурт (1996 арын - 170). Статистика возьматэ: тылпуослэн лыдзы будыны кутскиз 80-тӥ аръёс пумын. Тужгес но бадӟым лыдпус - 3100 - пусъемын 1993 арын, 1995 арын - 2900. 1993 арын тылпуын быриз 111 мурт, 1994 арын - 147. Лыдпусъёс борды ватсаны номыр. Соос пыр умой адске кышкыт адӟонлэн сьӧд вужерез. Ю. БАЙБЕКОВ. Пенсиосты тырон ӝега 20 январе Россиысь Пенсиосъя фондлэн Правлениезлэн кенешез ортчиз. Правленилэн тӧроез В. Барчук нимысьтыз пусйиз, арысь аре январь толэзе пенсиосты бере кыльыса тыриськом шуыса. Россиысь ваньмаз сямен улосъёсы пенсиослы кулэ луись коньдонлэн 60 процентэз гинэ вуиз, Удмуртие - 69 процентэз. Талэн мугез - страховой взносъёсты тыремлэн ӝегамез. Январе ваньзэ пенсиосты тырон понна 45 миллион манет кулэ на. Россиысь Пенсиосъя фондлэн Удмурт Республикая ёзэз 9 миллион манет дотация куриз. Та уксё вуоз, бадӟымесь предприятиос взносъёссэс тыризы ке, пенсионеръёс пенсизэс январе ик басьтозы. Россиысь Пенсиосъя фондлэн Удмурт ёзысьтыз пресс-служба. Шунды Правоя урокъёс Сьӧлыклэсь уд ортчы, адӟонлэсь уд пегӟы Егитъёс улон шоры ӵемысь бус пыр учко. Синмаськонэз яратон кожаса, соку ик кузпалъяськыны дырто, озьы ик капчиен люкисько. Ярам, таосыз семья кылдытыны туртто, юрттоно соослы, шуиськом, кузпалъяськон арлыдлэсь гожзэ улӥе лэзиськом. Но сюлмаськыны кулэ мукетъёсыз пумысь но. Загсэ сюрес лёгон сярысь малпаськытэк, нылъёс но пиос ог-огенызы матысь кусыпъёс тупато. Кытчы со вуттэ, кыӵе шуг-секытъёс кылдо? Лул-сюлэмлы гинэ со изъян уг вай. Россия Федерацилэн Уголовной кодексэзъя закон азьын но кыл кутоно луэ. Кылсярысь, быдэ вуымтэосты матысь кусып тупатонэ кыскон, быдэ вуымтэос ласянь интэмась (развратной) ужъёс лэсьтон, "яратон" (венерической) висёнъёсты вӧлмытон. Тужгес но зол кылзэс юало нылъёсты, нылкышноосты эриктэман понна. Кузпалъяськемлэсь азьло матысь кусып тупатонлэн яке кузпалъяськытэк кусып возёнлэн мугъёсыз одӥг выллемесьгес, отысь ик пото тросэз вылӥ верам йыружъёс но: юыса, юэмъёс, тодмотэм адямиос пӧлы шедьыса, асьсэды эрико, гольтрес возё ке. Куд-ог дыръя уд но вала, зэмзэ ик-а эриктэман учыр вал яке ачиз нылмурт гольтырес сямыныз сыӵе вамыше вуттӥз. Вераны кулэ, асьсэды шонере поттон понна, тросэз янгыше уськытэмъёс нылмуртлэн пумит луымтэез вылэ пыкъясько. Верало одӥг учырез. Гужем нуналэ Вероника Валя эшеныз магазинъёстӥ ортчоно кариськиз. Сюрес вылысен Валя тодмо пияшез пумитаз. - О, ӟ ечбур, Валя! Кытчы мынӥськоды? - Эшеным басма басьтыны потӥм. Тодматскы - Вероника. - Мон Всеволод. Тырмоз тӥледлы юнме дыр быдтыса ветлыны. Ӝоген пиос вуыны кулэ. Гордзэ басьтыса, ӵошен пуком. Валя пумитъяськиз, мон, пе, уг быгатӥськы. Нош Вероника посӥське, мыноно оло ӧвӧл. Со куспын Севалэн эшъёсыз вуизы. - Мар, мынӥськом-а, нылъёс? - юаз на Сева. - Мон уг, - чутрак пумит луиз Валя. - Нош тон? - Музыка луоз-а? Соку мыно. Вероника Севаен кызь минут пала гинэ тодмо вал (со шараяськоз судын), но нокыӵе ик ӧз кариськы. Мынӥзы Борис доры, гордзэ гинэ ӧз юэ, мукетыз но шедиз. Собере нылъёс вуизы на, Вероника соослэсь нимъёссэс но уг ни тоды. Нылъёс но пиос кыкен-кыкен ышылӥзы мукетаз комнатае. Нош Сева Вероника вӧзын пукиз, киосыз солэн пумен дӥсьтӥсесь луизы. Нылашлэн но йырыз поромиз кадь юонлэсь, ӧз дырты палэнтӥськыны. Юонзы бырыса, егитъёслы мӧзмытгес луиз. - Ойдолэ мон доры, - ӧтиз ваньзэс Сева. Нош ик юизы, гитара шудэм улсын кырӟазы. Кӧня ке озьы пукемзы бере Сева шуиз: - Эшъёс, уд ветлэ-а арбузлы, кыдёке мынонэз ӧвӧл, татын гинэ. - Мон но сьӧразы потало, -ӝутӥськиз вал Вероника. - Уд, тон татчы кылёд, - пумит луиз Сева. ... Ӝыны час ортчыса, нылъёс но пиос вуизы. Арбуз, вина басьтӥллям. Нош ик юизы. Вероника гинэ палэнэ кариськыса пукиз, кышкатскемын, номыр уг вазьылы. Юэмез но тӧлӟем. - Вероника, лык ай татчы, - ӧтиз сое Сева. Коридорын пеймыт, нылаш кудпала кариськыны ик ӧз вала. Со куспын Сева сое китӥз кутӥз но мукет комнатае валтӥз. Вероникалэн син шораз йӧтӥз ӝӧк, шкаф сьӧрысь диван, усьтэм укно... - Ну... - Эн йӧтылы ни бордам! Эн матэкты шуисько! - Да кин тон кожаськод астэ? - Эн йӧтылы! - Ох со кыӵе! Эй, Витька, лык ай татчы... Вероника кышказ, нош ик эриктэмалозы шуыса, укноысь тэтчиз. Пырак асфальт вылэ. Собере вал суд. Сева мӧзмыса но оскыса учке зал шоры: "Оло, адӟисьёс юрттозы? Кызьы меда оскытоно ваньзэс, Вероника ачиз ӧз пумитъяськы шуыса". Ярам коть, Вероника луло кылиз, но быдэс улытозязлы сӧсырмиз. Эриктэмасьлэсь кылзэ зол юазы, пытсэт сьӧры шедиз. Озьы ик кулэ, шуоды. Но нылаш ачиз но ассэ чеберен ӧз возьматы. Малы кулэ вал солы тодмотэм адямиос сьӧры мыныны? Аслыз ачиз йыр висён утчаз. Кузпалъяськытэк матысь кусып тупатонлэн мукет но бервылъёсыз вань. Нылаш секытэн луэ. тазалыкезлы бадӟым изъян вайыса, нылпизэ куштэ. Нош нылпиез вордӥське ке? Татын ини кужыме пыре Россия Федерацилэн Семьяя кодексэз. Отын пусъемын нылпилэн анаезлэн но атаезлэн правооссы но мар понна кыл кутонзы. Егитъёс кузпалъяськымтэ ке но, нылпилэн анаезлэн но солы дурбасьтӥсьёслэн судэ вазиськемзыя, атай шуон нылпизэ аслазэн лыдъяно луоз. Матысь кусып тупатонын пимурт валтӥсь интыын сылэ, но шуг-секытъёсыз нылмурт вылэ усё. Озьы ке но, кыл кутонлэсь воргорон палэнтэмын ӧвӧл. Вордӥськиз нылпи. Мар кароно? Кузпалъяськоно яке та сермет солы кулэ ӧвӧл? Кыӵе огкылэ вуозы ни асьсэос егитъёс, закон нокинэ кужмысь кышнояськытыны уг быгаты. Уг алы кузпалъяськытэк матысь кусып тупатонлэсь но, со вакытэ ик уте быдэ вуымтэосты, кыл кутытэ эриктэман учыръёсы. Л. ФАЗЛИЕВА. Ижевскысь Устинов ёросысь "Семья" центрысь юрист. Гожтӥськон - 98 Аазьпалан нош ик алнашъёс Гажано эшъёсмы, ваньдылы ик сюлмысьтымы тау кариськом, таяз арын но милемын ӵош луэмды понна. Шумпотӥськом, кылем арен ӵошатыса, лыдӟисьёслэн лыдзы, йылӥз. Коньдонэн кылдэм шуг-секытъёс шоры учкытэк "Удмурт дунне" газетлы эшъяськон кизэс мычиды. Ми но шуиськом, вань быгатонлыкъёсмес но кужыммес сётомы, тӥляд коркаосады ӟеч иворъёсын, сюлэмез бугыртӥсь мылкыдэз лӧптӥсь гожъямъёсын пырон понна. Шаерысьтымы тодмо но дано адямиос луозы тӥляд но милям куноосмы. Эшъёсты, тодмоосты, ӵыжы-выжыосты газетэнымы эшъяськыны мылкыд каро ке, мед вазиськозы почтаосы. Шуом, 20 февралёзь гожтӥськыса вуизы ке, газет доразы вуоз ни март толэзьысен. Озьы котькуд толэзе. Гожтӥськон дун 66 сюрс манет, выль дуныз - 66 манет. Оло дӥсьтоды ик алнашъёс ӵошатскыны. Улӥын сётэм таблица возьматэ, котькуд ёросъя кӧня мурт гожтӥськиз газетмылы 1998 арын 1 январьлы, 1997 арен ӵошатыса. � Ёросъёс 1998 ар 1997 ар 1. Алнаш 1798 1422 2. Пичи Пурга 1551 1016 3. Шаркан 1465 1302 4. Можга 1252 1011 5. Игра 767 590 6. Балезино 634 461 7. Завьялово 539 495 8. Дэбес 455 250 9. Кияса 433 304 10. Кез 366 254 11. Вавож 350 292 12. Як.-Бодья 326 225 13. Кизнер 304 211 14. Ува 261 172 15. Ижевск 254 176 16. Грахово 196 162 17. Глазов 193 130 18. Селта 176 154 19. Кунгож сьӧр 163 135 20. Яр 95 43 21. Воткинск 94 47 22. Юкаменск 91 55 23. Сарапул 50 39 24. Сюмси 39 15 25. Красногорск 24 17 26. Камбарка 6 2 27. Каракулино 4 3 Ижевскын газетлы гожтӥськон радъямын на вал "Информпечатьлэн" киоскъёсыз пыр но меӵак редакцие вазиськыса. Та амалъёсъя гожтӥськыны озьы ик быдэс ар ӵоже луэ. Эшшо одӥг ӟеч ивор. Удмурт телевидение пыр 30 январе ортчоз лотереяен шудон. Ошез утисьлэсь нимзэ отын ум тодэ на, но кыӵе ёросэ но кудаз почта ёзэ со кошкоз, соиз тодмо луоз ни. "Удмурт дунне" газетлэн историяз таӵеез ӧй вал на. Учкытэк эн кыле, эшъёс. Л. МАЛЫХ. Кин маин узыр? Арлы быдэ ортчылӥсь ярмаркаын котькудӥз регион тырше огъя рыноке шедьыны но дораз поттэм продукцизэ тросэнгес вузаны. Кызьы гожтэ "Крестьянские ведомости" газет, кылем ар понна тужгес но умой югдур вал скал сӥль будэтонъя. Сое вузан ньыль поллы йылӥз, тылобурдо сӥль - кык поллы. Азьвыл аръёслэсь ятыр регионъёс дэмлазы йӧллэсь дасям сиён-юон, курег пуз, ю тысь, картофка, бакча сиён. Таин ӵош пусъемын, Ставропольский край гинэ сьӧрло тросэн вузаны быгатӥз така сӥль, кукуруза но шундыберган кидыс, Пермь область - маргарин, кӧй. Тула но Тюмень областьёс - парсь сӥль, Калуга но Ставрополье - кӧжы. Нош ма келяз Удмуртия? Аграрной рыноке со потӥз мертчанэн но казеинэн. Л. ДМИТРИЕВА. Шунды Визьнодо песьтэр Визьлы, пе, базаре уг ветло. Озьы ке но... Апае монэ сьӧраз Иже басьтӥз. Макем шумпотӥ. Уго нырысьсэ. Вуэммы бере ик пайми: кыӵе бадӟым та город. Котыр учкисько, чиньыеным возьматӥсько. Озьы уг яра вылэм, апае чиньыям чабкиз. Нырысь нуналаз ик лек пуны вылам омырскиз. Чи-ир! кесяськисько. Апае нош ик куаретӥз. Сумкаысьтыз сиёнзэ поттӥз но пунылы сётӥз, соиз палэнскиз. Тани пыримы автобусэ. Калыкез нош!.. Веньлы нокытчы усьыны. Шӧдтэк шорысь пересь кышномурт монэ донгиз но, кыӵе ке пинал нылмуртлэсь кузь дэремзэ лёгыны шедьтӥ. (Кызьы сыӵе дэремен ветлыны быгатэ?!) - Во что мое платье превратили?! - урмиз со. Мыным возьыт луиз - берытски. Я, кызьы но озьы автобусысь потӥмы но, апае шуэ: "Сыӵе дыръя вождэс эн вае шуоно вал, соку керетон ӧй потысал". Эх, ма, куазь кыӵе сӧриськиз. Кисьтэ ук зорзэ. Бызьыса магазинэ кожимы. Тани тёп! лёгиськи вуэ. Вӧзтӥмы ортчись ныллэсь чулказэ нёпоен пазьги. Со ӝожмыт куараен кеськиз: - Невоспитанные! Ой, нош ик мар дарманьтӥ... Апае монэ ӵыжы-выжыосы доры нуиз. Пук, пе, огнам ветло. Тӥни сыӵе учыръёсы но шедьылод вылэм, нокытчы потатэк ке улӥд. Надя МИТРОФАНОВА. Вавож ёрос, Зямбай гурт. Берекет ВОРГОРОН ӴЕКТЭ Сӥлен пӧрам сиёнъёс акыльтӥзы, дыр, ини. Шутэтскон нуналъёсы воргоронъёс ас киынызы ма но со пӧраса шумпоттыны быгатысалзы семьязэс, тодмооссэс. Лыдӟисьёсмылы аслэсьтым пӧран амалъёсме ӵектӥсько. Курыт кушманлэсь пельнянь Кушманэз сӥль коран машина пыр лэзёно. Нӧкы вӧен сураса, таба вылын пуштытоно (пыжоно), собере пӧлаз ыль курег пуз сурано, сугон юдоно, сылал ватсано. Куарняньзэ сӥлен пӧрам пельняньлы сямен ик дасяно. Кушманлэн зыныз быре. Ческыт сиён пӧрме, ява. Сиёно вӧйын яке йӧлвылэ веттылыса. Эскере ай. Тау карыса, кышноосты чупалозы. Кубисталэсь котлет Кубистаез векчи корано, мискае пононо. Отчы ик йӧл ватсано. Тыл вылэ 30-40 минутлы пӧзьтыны пуктоно. Небӟем кубиста пӧлы манной кеньыр пононо. Люкъёс медаз кылдэ шуыса, ялан сурано. Эшшо 5-10 минут пӧсятоно на. Собере кубиста пӧлы курег пузлэсь ӵужзэ будэтоно, сылал ватсано, ӟеч суралтоно но сӥятоно. Сӥям фаршлэсь котлет лэсьтоно. Соосты зырано курег пузлэн тӧдьыеныз. Пызь яке сухари пӧлын погылляса пыжоно. Йӧлэн но, йӧлвылэн но туж ческыт кошке. 1 кило кубисталы кулэ: ӝыны стакан кеньыр, сомында ик йӧл но пызь, 3 пуньы вӧй, 3 курег пуз. Г. СЕЛТИН. Берекет ВАЕ СЕРЕКЪЯЛОМ Егит пара киноын пуке. Сеанс бырытозь, пияш нылэз мусояса-ӟыгыръяса улӥз. Мышказы пукись мӧйы нылкышно куаретытэк ӧз чида: - Кылзӥське ай, ӧй быгатысалды-а та ужен гуртады вырыны? - Конечно, быгатысал, но дорын кышное вань. х х х Картэз корка пыре но, ӧсэз юн ворсаса, кузпалэз шоры йыркурен кеське: - Мон ваньзэ тодӥсько! - Туж умой, мусое, соку вера, ку ӟучъёсын кивалтӥз Иван Грозный, а то асьмелэн пимы уроклы дась ӧвӧл. х х х - Мае тон валаськод! - вера одӥгез композитор мукетызлы.- Ведь та гур - вуоно крезьгур! - Собере малы соку та гурез али кылзыны кулэ? х х х Одӥгез пенсионер мукетызлы вера: - Тон но гожтӥськы милям хорамы. Ми отын доминоен шудӥськом, анекдотъёс мадиськом, векчи виятэмзэ юиськом... - Нош ку тӥ кырӟаськоды? - Куке дорамы бертӥськом. Ижевскын - Сарапуллэн нуналъёсыз 26-31 январе Ижевскын ортчозы Сарапуллэн нуналъёсыз. Столицаын улӥсьёс но куноос тодматскыны быгатозы вашкала купец городлэн историеныз, сямъёсыныз но йылолъёсыныз, туала улонэныз. Отысь предприятиослэн вузъёсынызы выставка арня ӵоже ужалоз "Метеор" центрын. Со сяна, Сарапулысь музыкальной школаын дышетскись пиналъёс, художественной самодеятельносте ветлӥсьёс концерт возьматозы, кык городъёсысь спортсменъёс куспазы ӵошатскон радъялозы. Н. ЛИПИНА. Газет вӧлдӥсьёслы - премия Балезиноын потӥсь "Вперед" газетлы гожтӥськонъя йылпумъянъёс лэсьтэмын. Огъя тиражез - 4,5 сюрс экземпляр, кылем арен ӵошатыса, ӧжытаклы уллань лэзькемын. Газетэз вӧлмытӥсьёс пӧлын тужгес но ӟеч ужаз Н. Касаткина, центральной районной больницаысь секретарь-машинистка редакцилы "вуттӥз" 75 семьяез. Пусъемын 100 (выль сямен) манетэн. Быдэн 50 манет премия сётэмын "Балезинский" АКХ-ысь Р. Волковалы но Балезино РТП-ысь Р. Касимовалы. П. ВОЛОДИН. Профсоюзъёслэн кивалтӥсьёсынызы пумиськон Правительстволэн Тӧроез Павел Вершинин пумиськиз Удмуртиысь профсоюзъёслэн федерациенызы кивалтӥсьёсын. Пумиськонын эскеремын предприятиосын уждун тыронэз чакласа возёнэн, нылпиос понна пособиосты тыронэн, дунъёсты но тарифъёсты радъянэн герӟаськем ужпумъёс. Правительстволэн пресс-центрез. Шӧкыч Тазалыкез дунэн уд басьты Кыӵе гинэ чебер арбериос али уг лэсьто. Синъёсыз мальдыто, сюлэмез буйгато. Нош котьку меда чеберлык сьӧрын умоез гинэ ватскемын? Котьку ӧвӧл. Со сярысь верало элькунысь санэпидемнадзорлэн эскеронъёсыз но. Али лэсьтӥськонын 60 процент кунгож сьӧрысь материалъёс уже кутӥсько. Элькунысь валтӥсь санитарной врачлэн воштӥсез Г. Н. Сулеменов верамъя, эскерем материалъёс пӧлысь 19 процентэз куронъёслы уг тупало. Отын трос фенолформальдегидъёсыз. Эмъян удысын ужасьёс пусъемъя, та вещество адямилэсь тазалыксэ юн лябӟытыны быгатэ. Кылсярысь, пытсасько шокан сюресъёс, йырсазь лябӟе, аламагес адӟыны кутско синъёс. Соин ик, мебель яке мукет маке басьтыны дасяськыкуды, умой-умой малпаське. Угось тазалыкез дунэн уд басьты. М. ЛИХАНОВ. Кин со вал? Актёр? Поэт? Кырӟась? Соиз но, тазьы но - огазьын, со Ачиз - нокинэн сурантэм. Мукетыз сыӵеез ӧвӧл. Туж уно кинофильмъёслы, спектакльёслы гожтэм кырӟанъёсыз тросэз калыке вӧлмизы. Ачиз но киноын шудӥз кызь витьлэсь уно рольёсыз. Таин кырӟанэз - "Ож лудысь со ӧз берты" ("Он не вернулся из боя") - гожтэмын "Сыновья уходят в бой" кинофильмлы. КУАРАЕЗ ШУККИСЬКЕ ВОЛГА НО УРАЛ ДОРОЗЬ Субботалы быдэ Удмурт радиолэн тулкымъёсыз вылын асьме доры вуэ "Между Волгой и Уралом" нимаськись радиожурнал. Эфире потэмез дырысен солы тырме 40 ар. Та юбилеен валче дорамы люкаськылӥзы Татарстанысь, Башкортостанысь, Чувашиысь, Мордовиысь, Коми но Марий Эл республикаосысь телерадиокомпаниосын ужась журналистъёс, соосын ӵош кенешизы "Финно-угорский мир" телепрограммаез нуись эшъёссы. Вераськон мынӥз азьланяз ужан сярысь. Умоен пусъемын: радиожурналлэн дырыз кыке поллы йылӥз. Озьыен, бускель регионъёсысь иворъёсты тросгес кылом, ог-огмылы эшшо но матынгес луом. Чакламын финн-угор дуннее пырись республикаосъя но радиопередачаос дасяны. "Между Волгой и Уралом" радиожурнал аслэсьтыз 40 ар тырмонзэ пусъёз туэ гужем Казаньын. Та город юнме шорысь быръемын ӧвӧл: Татарстанлэн столицаысьтыз кутске со ужан ӧрзэ, тулкымъёссэ пазьге Волга но Урал дорозь. Л. ДМИТРИЕВА. Курегез воштоз эму Чылкак выль удыс борды басьтӥсько Америкаысь фермеръёс - аспӧртэмлыко тылобурдо матысь дыре бадӟым барыш вайыны кутскоз. Вылтусызъя эму тупа африканской страуслы, улон интыез - Австралия, берло аръёссэ США-е но выжы лэзиз ни. Маин та тылобурдо умой? Нырысь ик висъяське ӟеч, быгыт сӥльыныз. Шӧмызъя кунян сӥль кадь, калориезъя ортче курегез но, куркаез но, протеинъя - скал сӥлез. Холестеринэз ӧжыт. Дунзэ ке верано, ресторанын эмулэсь дасям отбивной сылэ 15 доллар. Матысь дыре та тылобурдолэн сӥльыз вуоз вань магазинъёсы, рынокъёсы: берло ньыль ар куспын гинэ эму вордӥсьёслэн лыдзы США-ын ньыль пол будӥз. Специалистъёс верамъя, кылем сӥзьыл 8 сюрс фермеръёс миллионлэсь ятыр эму вордӥзы ни. Пудо вордонысь мукет удысъёсын ӵошатыса, со ӧжыт ай. Соединённой Штатъёсын скал фермаос - миллионлэсь трос, 235 сюрс - парсь вордӥсьёсыз. Эму тылобурдоез будэтон но ӝоген валтӥсь интые потоз, со рынокын шӧдӥське ни. Дышетозы немецъёс Чабей будэтыны Орловской областьысь крестьянъёсты табере дышетозы немецъёс. Областьысь администрация но "Даймлер-Бенц" немецкой фирма 7 арлы "Пшеница-2000" проект кутӥзы. Ӵош ужан сярысь программаез быдэстонэ ФРГ-лэн канцлерез аслаз кредит фондысьтыз висъяз 114,5 миллион марка, нош Россилэсь рыноке выжонъя экономиказэ юнматон вылысь, Германия сётэ 1 миллиард марка. Со чотын странаямы вуоз техника, будосъёсты утялтӥсь но утись оборудование, немецъёс юрттэт сётозы будэтэм урожаез вузанын-интыянын но. Чакламын 100 сюрс гектар вылын толйись чабей будэтыны, гектарезлы быдэ 40 центнер ю тысь кутсаны. Проектэз улонэ пыӵатон бордын ужа "Орелагроинвест" компания. Германилэн "киыз" вуоз областьысь 80 сельхозпредприятиосы. Зор понна - судэ Сыӵе улонэ кылем сӥзьыл вуизы Ревда город вӧзысь (Урал) сад-бакча возисьёс. Судэ искен вазиськоно луизы, ыргон ӵыжатӥсь заводэн сэрен. Омыре шедем химической суретъёс, зорен ӵош му вылэ васькыса, будэтэм урожаез изъянтӥзы. Калык куремъя, городлэн администрациез ӝегатскытэк комиссия кылдытӥз. Эскеронъёс возьматӥзы: 10-15 процентэз емыш номырлы ярантэм каремын, кислотаен сэрен ӵужектӥз матысь нюлэс но. Янгышсэ тупатон вылысь, предприятилэн кивалтӥсьёсыз сад-бакча возисьёслы соку ик удобрениос, изваска висъязы, вылазы басьтӥзы изъянмем писпуосты питомникысь ваем модосъёсын воштонэз но. Озьы ке но, судэ сётэм искез берлань басьтӥсь ӧз луы. Адямиосты вӧсь каремез понна, предприятие тыроз на компенсация. Фестиваль ке фестиваль... ортчиз ар пумын Челябинск музъем вылын. Со сӥземын вал Уралын потӥсь кабак виналы. Та ужрадэз ортчытӥсьёс возьматыны выризы, асьме дорын пӧзьтэмезлэн шӧмыз но, ӟечлыкез но трослы вылӥынгес шуыса. "Казак уральский" спирткомбинат вань предприятиосаз фестивале лыктэмъёсты дунтэк сектаз. Турынъёсын, ю тысен дасям водка кунгож сьӧрын поттэмезлэсь небыт, зыныз но ческыт. Куноос шӧмъязы пӧртэм пумо юонъёсты. Кудӟемлэсь алӥсез ӧй вал, шулдыръяськонэз но радъясьёс шедизы. Огкылын вераса, праздник удалтӥз. Пусъём на, та комбинат ӧжытак гинэ пыдйылчиос пӧлы сюремлэсь утиськиз - дыраз юрттӥзы областьлэн кивалтӥсьёсыз. Али огез кужмоез, узырез луиз. Фестиваль бере "Казак уральский" эшшо но вылӥе ӝутскоз шуыса малпан кылдэ. (ИТАР-ТАСС). Шӧкыч МАР ТӤЛЕДЫН? Бер ӝыт кышномурт чалмыт ураметӥ мынэ. Малпамтэ шорысь кин ке мышказ кеськиз: - Сыл! Кышномурт кышкаса дугдӥз. - Выд! Куалектэм кышномурт выдӥз. - Нюжтӥськы! Кинлы верасько, нюжтӥськы! Кышномурт каллен гинэ нюжтӥськиз. - Тӥледын мар ке урод луиз шат, апай? - вӧзаз воргорон дугдӥз.- Мон татын пуныме, Шарикез, дышетӥсько но адӟисько - тӥ нюжтӥськиськоды. Шеф Воргорон базарын попугайёс вуза. Басьяськись солэсь юа: - Та попугаед кӧня сылэ? - Одӥг но ӝыны миллион. - Малы сокем дуно? - Со англи, швед но араб кылъёсын вераське, компьютерен ужа. - Нош таиз понна кӧня куриськоды? - Кык миллион. Со дас кылъёсты тодэ, юристлэн дипломез вань. - Нош таиз кӧня сылэ? - Куать миллион. - Осто инмаре, мар карыны быгатэ со? - Уг тодӥськы, но нырысетӥосыз кык попугайёс сое шеф шуо. Уг оскы ни Кык эшъёс куспазы верасько: - Мон малы ке кышноелы оскемысь дугдӥсько. - Малы меда? - Татын, та городын, дорамы ветлэ самой со сантехник, кудӥз вуылӥз вал Пермьын улыкумы но. Шузи, пе Иван водительлэсь правозэ басьтон понна экзамен сётэ. Солэсь юало: - Тани тон мынӥськод гурезьысь туж сюбег сюрес вылтӥ. Паллян палаз из гурезь, бур палаз зарезь. Пумитад лыкто кык нылкышноос: одӥгез егит, чебер, мукетыз пересь, губырскемын. Кудзэс- о лёгалод? - Пересьсэ, конечно. - Шузи тон, шузи! Тормозэз лёгыны кулэ, тормозэз! Берыктоз Банклэн кузёезлэсь юало: - Зэм-а верасько, тӥляд бухгалтерды вань коньдондэс но нылдэс лушкаса пегӟем шуыса? - Зэм. Но со гожтыса кельтэм, ваньзэ ӝоген берыкто, пе. Нылы берытскиз ини. Люказ Г. ВАХРУШЕВ. Шудэн но кайгуэн артэ Та адями - паймымон. Юрий Андреевич Чайников - Куӟебай Гердлэн вынызлэн пиез - тӧлъя ноку ӧз вамышъя. Нош тӧллы пумит мыным котьку дась. Музон ӵыжы-выжыосыз сямен ик та адями но чидаз секыт шугадӟонэз. Чайниковъёс вадьсы люкаськылэм сьӧд пилемъёс озьы гинэ ӧз сэрттӥськылэ - куд-ог вакытъёсы туж зол гудыртылӥз. Шудзэс утчаса, кема ветлӥзы Сибиретӥ. Курыт синкыли трос гинэ кисьтӥзы. Удмурт пединститутын дышетскыса, Юрий Чайников луиз историк. Куамын куать ар ужаз школаын. Туж яратӥз нылпиосты. Со сяна, та адями - усто суредась. Юрий Андреевичлэн киужъёсыз сӥземын тужгес дано адямиослы. Нырысетӥ интыын - атаезлэн Куӟебай Герд. Та туспуктэм но огшоры ӧвӧл. Фотожурналист Георгий Юсаев быдӟым удмуртлэсь ӵыжы-выжызэ син йылтэм трос калык пӧлысь. Та дуно адямилэсь тусбуйзэ пырак ӵожелы тодэ кельтыны сюлмаськем. Печать юртын алигес радъямын вал Георгий Юсаевлэн ужъёсыныз адӟытон. Тазэ туспуктэмез котькудӥз синйылтӥз. Фотожурналистлэн ужезлы вылӥ дунъет сётӥз. Куӟбай Гердлэн вынызлэн пиез Юрий Чайников. Георгий Юсаевлэн туспуктэмез. БЫДТЭМЫН ЭШШО ОГЕЗ "АВТОРИТЕТ" 20 январе 13 час котырын Ижевскысь кардиологияя центрын виемын йыруж лэсьтӥсьёслэн эшшо огез кивалтӥсьсы - Матвиенко Игорь, преступникъёс пӧлын кушем нимыз - "Сирота". 36 аресъем бандитлэсь улонзэ нуиз мугораз но йыраз мертчем 10 пуля. Больницае со лыктэм вылэм тазалыксэ эскерыны. Аслэсьтыз "данзэ" будэтӥз, Гороховлэн огазеяськоназ быгатыса ужаменыз. "Сиротаез" кык ар талэсь азьло но быдтыны выризы - пегӟиз. Таяз учыре пуляослэсь ватскыны ӧз кылды. Мукет нуналаз нуназе шорын ыбылэмын вал ВАЗ-21099 машина, "Сироталэн" отын пукись юлтошъёсыз. Огез но ӧз сӧсырмы. Виисьёсыз, ыбылӥсьёсыз кутэмын ӧвӧл. Мыно эскероно-чаклано ужъёс. Удмурт Республикаысь МВД-лэн пресс-службаез. Правительствоын Ӝоген тулыс вуоз Кысык вакытлы дасяськыса, Правительстволэн Президиумез та нуналъёсы пусйымтэ кенеш ортчытӥз. Со быдэсак сӥземын вал гурт хозяйствоез азинтонэн герӟаськем ужпумъёслы. Рос-прос вераськон мынӥз тулыс бусы ужъёсты нуон-радъян сярысь. Чакламын минерал сылалъёслы 10 миллион манет коньдон висъяны, нош ӟеч кидыс уськытыны - 6 миллион манет. - Туэлы бюджет сярысь уно вераськонъёс но, керетонъёс но пото, - пусйиз Павел Вершинин. - Но бюджетысь коньдон ваньмызлы ноку уз тырмы. Озьы ке но, ваньбур поттонэз туэ 5-10 процентлы будэтоно. Сотэк азьлане выль вамышъёс уд лэсьты. Зэм, гуртын югдур капчи ӧвӧл. Гурт удыслы зэмос юрттэт кулэ. Тани тулыс бусы ужъёсты быдэстыны 20 миллион манет висъяны учкемын ке но, со матын но уз тырмы. Соин ик азьланьын чаклаське ляб хозяйствоосты выльдыны. Али 25-30 сыӵе колхозъёс но эштосъёс люкасько. Огъя верано ке, туэ тулыс бусы ужъёсты ортчытыны ичизэ 32 миллион манет коньдон кулэ луоз. Выльдоно 12 сюрс тракторез. "Удмуртнефтепродукт" гурт удыслы эстӥськондыраз сётэ. Сое умоен пусйыны кулэ. Мукетыз ужпум герӟаськемын йӧл но сӥль поттэм понна юрттэт (дотация) сётонэз выльдонэн. Со табере ваньмызлы уз висъяськы. Шуом, кин котькуд скаллэсь 2000 килограммлэсь ичи йӧл кыскиз, со юрттэт уз басьты, нош 4000 килограмм люкасьёсызлы кык пол трос вуоз. Эшшо ватсаны кулэ на: кыӵе хозяйствоос палэнэ, Татарстанэ, киров, Пермь областьёсы йӧл яке сӥль вузалозы, соос но юрттэт уз басьтэ. Кенешын озьы ик учкемын мукет лэчыт ужпумъёс, кылсярысь, мясокомбинатъёсын югдур. Али тыро- пыдо тыршо Играысь но Сарапулысь предприятиос гинэ. Мырдэм шокало Глазовысь, Воткинскысь, Ижысь но Можгаысь мясокомбинатъёс. Г. РОМАНОВ. Малпаськытӥсь югдур Гурезь лыктӥз адями доры Жаляса верано луэ: редакция сокем ӟеч уг тоды, кызьы дунъяло лыдӟисьёс созэ яке тазэ гожъяммес. Нош сыӵе дунъет милемлы укыр кулэ. Соя ми мертасалмы ас ужмес, выльдысалмы азинскон сюресъёсмес. Тужгес ик дуноесь луысалзы курлась кылъёс. Арлы одӥг пол чорыг но ыме тэтче шуэм музэн, алигес ми тодӥм одӥг лыдӟисьмылэсь мылкыдзэ. Шонергес вераса - лыдӟисьлэсь гожъясь сярысь малпанзэ. Сое редакцие вуттӥз милям автормы, Удмурт кун университетлэн журналистика люкетаз дышетскись Галина Савина. Али, экзаменъёс вискын, гуртам бертылӥ. Коркан пукыны сюлэм уг чида, уката куазь ке чебер. Мон но нуназе пал эше доры вамыштоно кариськи. Лена ӵапак дораз огназ вылэм. Чай юим, ма но со вераським. Озьы пукыкумы, гуртысьтымы ик воргорон пыриз. Шӧмыз вань. Ма паймонэз, гуртамы сыӵеос ӧжыт ӧвӧл. - Лена, анаед кытын? - юаз Витя. - Татын ӧвӧл. - Бон, иське, вай чарка аракыдэ, - ас гозызэ пунӥз пиосмурт. - Аракымы чик ӧвӧл, толон быриз, - шуиз нылаш. - Эшшо маке вера, я вай ини сю граммдэ. - Уд ке оскиськы, эн оскы, мынам верамын медло, - меӵак учкиз Лена. - Зэм но тырмоз туннэ понна, - итӥськи мон. Витя кӧня ке мон шоры учкиз-учкиз но вазиз: - А тон вообще мар озьы юон сярысь но егитъёслэн алама кусыпъёссы сярысь гинэ гожъяськод? Мон бакоми, нош пиосмурт азьланьтэ: - Малы олома но умойтэмзэ адӟиськод? Мукет ужпумъёсты уд шедьтӥськы шат? Гожъя инкуазь сярысь, нылпиос сярысь. Маке шумпотымонзэ, шулдырзэ, чеберзэ возьматы. Нош тынад, только юон, только юон. Ми эшеным ог-огмы шоры учким но, мон, пумитаз вазёно ни ай шуыса, ымме усьтӥ: - Мае мылы потэ, сое ик гожъясько. Собере юон али огез лэчыт ужпум луэ. - Валаськод мае ке! Мон чик дугдылытэк ӟистӥсько шат? Тынад гожъямъёсад пиосмурт гинэ весь тордэ, семьязэ курадӟытэ. Нош кышноез - зарни адями, урод картэз вӧзын мырдэм улэ, озьы-а? Вала ук: мон ужам бере юисько, бертӥсько ке кышное вылэ киме уг ӝутъяскы. Со ачиз арлан сямен кутске шоре кесяськыны. Эшшо ке суйзэ кузь лэзья. Нош мон солэн чабкем пумитаз чабки ке? Шонер-а мон верасько? Ми эшеным пумит луим: - Тон ик кудӟыса берт но кидэ урдыны дӥсьты на. Кин-о юэм муртэ яратэ? - Мон огнам юисько шат? Собере кышнолы ма уг тырмы? Коркаез бадӟым но шуныт. Нылпиос сюдэмын-дӥсямын. Тодэмед потэ ке, вань уж берга аракы котырын. Ас поннам малпай: соглаш кариськы коть эн, оглом зэм вера та адями. Шуом, нюлэскы пулы мыноно ке, трактористлы ӟенелик пуктоно. Пудо сиён ваёно, пызь изоно - сьӧрад чильпырасез медло. Ужын жадем вылэ кызьы уд юы? Яке эшъёсын, ӵош пукыкуд, чаркалэсь тон вӧзтӥ лобамзэ адӟыса, кызьы сое кияд уд куты? Даурез сыӵе. Тон яке кызьы ке берганы вырод но улод, яке... Зэмен ик кызьы ке улэп кылёно ук гурт калыклы но. Колхозын ужасьёслэсь уждунзэс чипы-курегъёс но серем карозы. Ярам, басьтысалзы ке ай. Вуисьсэ но дыраз уг люкыло, яке 20-50 процентсэ сёткало. Кышноос касса доры уг ке кемдо, картъёссы, копейкаоссэс кутыса, магазинэ шупчо. Маин улоно гуртысь адямилы? Солэсь ю-няньзэ, сӥль-йӧлзэ туж пичи дунын басьто. Пудо вордэм чотын сокем уд узырмы. Соин вырыны быгатэм сяна кулэ на пызь, турын, комбикорм. Амалоез узырме, куанерез эшшо начарме, колхоз куашка. Кин тодэ, оло, азьло вакыт берытскоз ай. Улон, пе, весь одӥг сюрестӥз ветлэ. Пыдйыл кылем семья мыноз ляльчие узыр дӥне. Тани деноминация шуон сярысь верасько. Номыр кышкытэз ӧвӧл, мултэс нольёссэ гинэ ӵушозы но тӥни, оскыто огъёсыз. Мукетъёсыз курдато: сыӵе ужрад, пе, нош ик ӝутоз дунъёсты. Озьы малпанъям, Витя шуак кожиз мукет ӧре: - Галя, тодӥськод-а: тон туж визьмо гожъяны кутскид ке, тонэ нокин но кышно уз басьты. - Туж визьмо гожъяны ӧжъятозям, трос дышетсконо ай. Отчыозь аслым карт но шедьто, эн сюлмаськы. - Уд, тон кузпал уд шедьты. Гожъямъёстэ лыдӟыса, мыным тазьы йӧтэ: тон аслыд утчалод чик юисьтэм, кыскисьтэм, алама кылъёсын вераськисьтэм воргоронэз. Нош сыӵеос туала арын ӧвӧл. - Вала ук, Витя: утчась мурт шедьтэ, шуо. Собере мыным кулэ ӧвӧл чик юисьтэм кузпал. Праздникъёс дыръя, вордскем нунал понна, эшъёсын ӵош одӥг-кык чарка мед веръялоз, номыр уг шуы. Нугыли кадь адями мыным кулэ ӧвӧл. Мынэсьтым пегаса, лушкем но мултэс гинэ медаз торды. Выжыкылын гинэ тӥр ачиз кора. Зэмос сикын ужаку, мугор жаде, пӧсям вылэ кынме. Воргоронлы, чечыен сураса, витьтон грамм шуныт аракы сётӥд ке, висьыны уз усьы ни. Но котьмарлэн эсэпез вань. Вӧзысьтым воргорон, пумит луыса, кизэ ик ӝутӥз: - Эн вераськы. Мон шуисько: кузпал уд шедьты. Да тонэ воксё заложнике басьтозы! - Мар понна? - Улонысь кырсьсэ-пожзэ пероен бугыръямед понна! Али бер ӧвӧл на. Гожъя мар ке но шулдырез сярысь. - Нош мон сое уг ке адӟиськы? Соку мар гожъялом? Косӥськод: возьматы чебер инкуазез. Мар отысь шумпотымонзэ адӟиськод? Тэльёсты кораса быдто ини. Чылкыт шуръёсмы ӧвӧл. Писпу ум мерттӥське. Гырон быдтон дыръя быдэс гуртмы возь вылэ мынэ. Ӝук пӧзьто, нош бервылмы кыӵе кыле - учкыны шимес. Отын но татын кагаз-газет куямын, пилиськем ӟенеликъёс чиляло, тӥям вайёс, жуг-жаг... - Эй, тонэн вераськытозь, - киыныз шонтӥз воргорон, собере дугдыса ватсаз: - Малпаськы кылъёсы пумысен, гожъя умоез сярысь... Гожъян муг утчаса, отӥ-татӥ бызьылӥсько вал. Али материал ачиз дорам вуиз. Гожтыса утчано ай, оло, маке пӧрмоз. Лымшор палан шуысалзы: адями уг ке мын гурезь доры, гурезь лыктэ адями доры. Журналистъёсын пумиськонъёс МАР БЫГАТО ЛЭСЬТЫНЫ КУН ЭСКЕРИСЬЁС? Англиысь парламентын нырысетӥ эскерись (контролёр) ужаны кутскем 1314 арын, нош асьме парламентын (Кун Кенешын) Эскеронъя комитет ар талэсь азьло гинэ кылдытэмын вал. Солэн ужамезлы йылпумъянъёс лэсьтыса, кивалтӥсез Александр Владимирович КУЗНЕЦОВ пусйиз: - Комитетлэн ужаз валтӥсь интыын луо законъёслэсь, нормативной документъёслэсь быдэсъяськемзэс эскерон но государстволэсь асваньбурзэ, коньдонзэ тус-тас каремлэсь утён. Законъёсты тӥян учыръёс лачак. Алигес гинэ эскерим ужбергатӥсьёсты. Ужбергатонэн вырыны лэзьымтэослэсь законъя кылзэс юано - кык ар ӵоже соос вылэ ӝожтӥськонъёс судъёсын 150 пала кыллё. Туннэ нуналлы эскеремын 116 учыр. Кун Кеенешлэн куремезъя, кылем арын эскеремын вал уждунлы, нылпи пособиослы, нылпиослы келям коньдонлэн уже кутӥськемез. Тырмымтэос шараямын вал Яр, Кез, Сюмси районъёсын, шуиз А. Кузнецов. Янгышам муртъёс кыл кутоно луизы, куд-огез вылэ уголовной ужъёс ӝутэмын, туннэ нуналлы та районъёсын коньдон государстволы берыктэмын. Комитетлы ужаны юртто нимаз адямиослэн вуэм ӝожтӥськонъёссы но. Кылем арлэн кыкетӥ палараз 32 сыӵе ӝожтӥськон вуиз, со пӧлысь 11-зэ али прокуратура эскере. Александр Кузнецовлэн верамезъя, соосты эскерон понна куд-ог дыръя туж трос нуналъёс быдтоно луэ. Кылсярысь, арня ӵоже ужано луиз Балезино районын, лесобазаысь вуэм ӝожтӥськонэз эскерон вылысь. Адямиос ялан юанъёс сётъяло токма ышем ваучеръёссы пумысен. Тодыны тыршо, кызьы эскерисько чекъёсын ужась фондъёс, кылсярысь, республикаысьтымы Центральной чековой фонд? Солэсь ужамзэ асьме Правительствоын эскерыны кутскизы ни, шуиз Александр Кузнецов. Милям комитетмы но сое чакласа возе. Но, мынам малпамея, фондлэн ужаз бадӟым тырмымтэос уз шараяське, малы ке шуоно, чекъёсъя со выллем фондъёс "узырмыны" кулэ вал предприятиослэн акциоссы чотын. Но тросэз предприятиос ужатэк сыло бере, соос пайда поттыны уг быгато, соин ик адямиос но ваучеръёссылы дивидендъёс басьтыны уг быгато. Берло дыре Эскеронъя комитет кусыпъёс тупатӥз Россия Федерациысь Лыдъян палатаен. Мар со сётэ? Нырысь ик, эскерыны юрттэ сыӵе ёзъёсты, кудъёсызлэн ужазы ми та дырозь пыриськыны ум быгатӥське вал, шуиз Александр Владимирович, кылсярысь, банкъёслэн ужазы. Эскеронъя комитетлэн коллегияз 10 адями лыдъяське. Лэсьтэм эскеронъёс пумысен комитет ивортэ Кун Кенешлы, депутатъёслы но вазиськыны быгатэ прокуратурае. Ас ужаз кутэ на эшшо одӥг амалэз: вазиське иворъёсты вӧлмытӥсь ёзъёсы. Александр Кузнецовлэн верамезъя, янгышам муртъёс та амаллэсь уката но зол кышкало. Т. БАННИКОВА. Журналистъёсын пумиськонъёс МАР БЫГАТО ЛЭСЬТЫНЫ КУН ЭСКЕРИСЬЁС? Англиысь парламентын нырысетӥ эскерись (контролёр) ужаны кутскем 1314 арын, нош асьме парламентын (Кун Кенешын) Эскеронъя комитет ар талэсь азьло гинэ кылдытэмын вал. Солэн ужамезлы йылпумъянъёс лэсьтыса, кивалтӥсез Александр Владимирович КУЗНЕЦОВ пусйиз: - Комитетлэн ужаз валтӥсь интыын луо законъёслэсь, нормативной документъёслэсь быдэсъяськемзэс эскерон но государстволэсь асваньбурзэ, коньдонзэ тус-тас каремлэсь утён. Законъёсты тӥян учыръёс лачак. Алигес гинэ эскерим ужбергатӥсьёсты. Ужбергатонэн вырыны лэзьымтэослэсь законъя кылзэс юано - кык ар ӵоже соос вылэ ӝожтӥськонъёс судъёсын 150 пала кыллё. Туннэ нуналлы эскеремын 116 учыр. Кун Кеенешлэн куремезъя, кылем арын эскеремын вал уждунлы, нылпи пособиослы, нылпиослы келям коньдонлэн уже кутӥськемез. Тырмымтэос шараямын вал Яр, Кез, Сюмси районъёсын, шуиз А. Кузнецов. Янгышам муртъёс кыл кутоно луизы, куд-огез вылэ уголовной ужъёс ӝутэмын, туннэ нуналлы та районъёсын коньдон государстволы берыктэмын. Комитетлы ужаны юртто нимаз адямиослэн вуэм ӝожтӥськонъёссы но. Кылем арлэн кыкетӥ палараз 32 сыӵе ӝожтӥськон вуиз, со пӧлысь 11-зэ али прокуратура эскере. Александр Кузнецовлэн верамезъя, соосты эскерон понна куд-ог дыръя туж трос нуналъёс быдтоно луэ. Кылсярысь, арня ӵоже ужано луиз Балезино районын, лесобазаысь вуэм ӝожтӥськонэз эскерон вылысь. Адямиос ялан юанъёс сётъяло токма ышем ваучеръёссы пумысен. Тодыны тыршо, кызьы эскерисько чекъёсын ужась фондъёс, кылсярысь, республикаысьтымы Центральной чековой фонд? Солэсь ужамзэ асьме Правительствоын эскерыны кутскизы ни, шуиз Александр Кузнецов. Милям комитетмы но сое чакласа возе. Но, мынам малпамея, фондлэн ужаз бадӟым тырмымтэос уз шараяське, малы ке шуоно, чекъёсъя со выллем фондъёс "узырмыны" кулэ вал предприятиослэн акциоссы чотын. Но тросэз предприятиос ужатэк сыло бере, соос пайда поттыны уг быгато, соин ик адямиос но ваучеръёссылы дивидендъёс басьтыны уг быгато. Берло дыре Эскеронъя комитет кусыпъёс тупатӥз Россия Федерациысь Лыдъян палатаен. Мар со сётэ? Нырысь ик, эскерыны юрттэ сыӵе ёзъёсты, кудъёсызлэн ужазы ми та дырозь пыриськыны ум быгатӥське вал, шуиз Александр Владимирович, кылсярысь, банкъёслэн ужазы. Эскеронъя комитетлэн коллегияз 10 адями лыдъяське. Лэсьтэм эскеронъёс пумысен комитет ивортэ Кун Кенешлы, депутатъёслы но вазиськыны быгатэ прокуратурае. Ас ужаз кутэ на эшшо одӥг амалэз: вазиське иворъёсты вӧлмытӥсь ёзъёсы. Александр Кузнецовлэн верамезъя, янгышам муртъёс та амаллэсь уката но зол кышкало. Т. БАННИКОВА. УЖДУН СЁТЭМЫН Шаерысьтымы Коньдонъя министерстволэн ивортэмезъя, туэ 19 январёзь уждун сётонъя тыронъёс быдэсак пытсамын, нош бюджетэ пырисьтэм фондъёсы 265 миллион кылемын на. Лыдпусэн вераса, уждунлы 612 миллион манет висъямын. Со пӧлысь одӥг куиньмосэз кун бюджетысь сётэмын, федеральной бюджетысь - 200 миллион, нош трансферт чотын - 160 миллион манет. Федеральной бюджет элькунлы чаклам мында уксё вуттӥз. Кылем арын кыкетӥ паларе федеральной бюджет шаерлы 303,5 миллион манет трансферт сётыны кулэ вал, висъямын 227,5 миллион яке 76 миллионлы ичи. Тӥни соин сэрен бюджетникъёс декабрь понна дыраз уждун ӧз басьтэ. Уждун тыронэз ӝогомытон вылысь, Удмурт Правительство городъёсысь но районъёсысь администрациосын куспазы тупанкылъёс гожтӥзы. Отын чакламын вал уждун тыронъёсты кызьы пытсан амалъёс. Шаерысьтымы бюджет чотын ужась учреждениослы кылем ар понна уждун быдэсак тыремын. Декабрьлы али коньдон сётъяло районъёсын но городъёсын. Со понна кун бюджетысь 3936 миллион манет уксё келямын. Г. РОМАНОВ. Прокуратураын "Узырмизы" Удмурт Республикаысь прокурор В. М. Походин журналистъёсын пумиськылӥз. Вераськон мынӥз Ижевскысь Ленинской районысь прокуратураын кылдэм югдуръя. Татысь ужасьёс ваньмыз сямен воштэмын. Сыӵе решение кутӥз республикаысь прокуроръёслэн коллегизы. Правоез, законностез утёнын ужасьёслэсь данзэс саптамзы понна, кык мурт арестовать каремын, огезлы городысь потаны алэмын. Соос "ӝуазы" адямиослэсь коньдон басьтэменызы. Сейфысьтызы шедьтэмын 60 миллион манет. Та учыръя прокуратураысь дисциплинарной ответственность улэ кыскемын куать кивалтӥсь. Соос янгыше уськытӥсько кадръёсын ляб ужамзы понна. Республикаысь прокуроръёслэн коллегизы огкылысь решение кутӥз Ленинской районысь прокурорез В. П. Калининэз должностьысьтыз мозмытон сярысь. Таӵе куриськон сётӥз Ижевск городлэн прокурорез А. Н. Марданшин но. Ленинской районын луэм учыръя мынэ следствие. Л. МЕДВЕДЕВА. Бадӟым тау кареммес вераськом Завьялово районысь Якшур гуртысь администрацилы, "Путь Ильича" колхозлы, Якшур средней школалы милесьтым самой матысь но дуно адямиосмес Татаркинъёсты: Зоя Тимофеевнаез, Татьяна Макаровнаез, Андреез но Гришаез ватыны юрттэмзы понна Ӵыжы-выжыоссы. Ӝутскомы меда? Тани "Ижмаш" огазеяськон кылем арын сӥё-дано пусйиз заводлы 190 ар но Калашниковлэсь автоматсэ поттэмлы 50 ар тырмонэз. Но татысь ужасьёс шуг-секытысь потыны уг быгато. Элькунамы шоро-куспо уждун 737 сюрс манетозь вуиз ни. Нош огшоры рабочийёс 200-300 сюрс манет уждун басьто, цехъёсысь кивалтӥсьёс - 2-3 миллион. Сыӵегес ик югдур гурт удысын. Хозяйствоос удалтэм ю-нянь будэтӥзы ке но, гурт калыклэн улонэз уг умоя. Бусы ужъёсты ортчытыны хозяйствоослэн тыронзы сизьым сю миллиард манетлэсь трос люкаськиз. Гуртоослы сю миллиард манет пала уждун тырымтэ на. Техника куашка, шуг-секытъёс кылдыло, электрокужым кысылэмен. Пудолэн лыдыз синэ, аляло висёнъёс. Улонмес выльдӥсьёс Анатолий Чубайс, Борис Немцов но Олег Сысуев огкылысь кадь верало. Россия, пе, начар улэ льготаос басьтӥсьёс тросэн. Та пумысен юан кылдэ, малы бен Советской власть дыръя льготаос басьтӥсьёс ӧжыт ӧй вал ке но, чугун сюрес вылын поездэн ветлыны но омыретӥ самолётэн лобӟыны мултэс коньдон тырытэк странамылэн пӧртэм сэрегъёсаз арлы быдэ огпол ке но ветлӥм. Нош табере ӧжыт пенсия басьтӥсь мурт аслаз улон интыысьтыз нокытчы мыныны уз быгаты ни. Солэн пенсиез толэзь ӵоже тырмыт сиён-юон басьтыны уг тырмы. Со ӵемгес ветлоно луэ сюлэмез но мукет интыез висемен поликлиникае. Отысен мынэ аптекае. Но эмъюмъёслы дунъёс бадӟымен, со отысь буш кошке. Собере берпум коньдонзэ лыдъяса, пенсионер магазинэ уг пыра, мынэ базаре. Отын утча дунтэмгес сиён-юон. Али байёслы гинэ ваньмыз вань. Кун Дума кема эскеремез бере арлы быдэ бюджетэз кутэ ке но, берло трос воштонъёс пырто. Сое быдэстыны номырин. Зарни но алмаз поттон кулэсмиз. Нефтез, газэз, нюлэсэз но мукет ваньбурез кунгож сьӧры дунтэмен келяськом. Узыръёс ӧжыт сюлмасько производствоез выльдон но ужасьёслэсь улонзэс умоятон сярысь. Реформаторъёс табере шедьтӥзы квартира понна улӥсьёслэсь тросгес коньдон басьтон амал. Вуж но выль юртъёсты ӟеч-ӟеч тупатыны, пе, уксё кулэ. Кивалтӥсьёс адямиосты буйгатыны выро, улон инты понна тырон 2003 арозь кыстӥськоз шуыса. Соос огзэ вунэто, кызьы ӧжыт пенсия басьтӥсьёс квартира понна али дун тырыны быгатозы. Странамес Быдӟым Отечественной войнаын утисьёслэсь льготаоссэс кулэстыны кутскыса, реформаторъёс бадӟым сьӧлык лэсьто. Демократъёс али ик чик ӝегатскытэк государствоен кивалтӥсь мултэс аппаратсэс кулэстысалзы но отысь ужаьёслэсь уждунзэс ӧжытгес карысалзы ке, бадӟым пайда сётысалзы бюджетэз будэтон ласянь. Ведь война бере аръёсы асьме республикаысь кивалтӥсьёс Советской ульчалэн одӥг номеро корказ гинэ интыяськемын вал. Нош табере соос куинь юртъёсын мырдэм тэро кадь. Калык оске выль арын шудо улонлы. Кивалтӥсьёс калыклэсь кулэяськонъёссэс быдэсъясалзы ке, улонмы воштӥськысал. В. ЧЕРНОВ, Ужысь ветеран. Вакчияк ДАНО БӦЛЯКМЫЛЫ СӤЗЬЫСА "Удмурт кенеш" огазеяськонлэн исполкомаз быръем эшъёс кылем пятницае вераськизы туэ 13 феврале Пичи кенешлэсь нимысьтыз заседанизэ люканы. Со сӥземын луоз дано удмуртлэн Куӟебай Гердлэн юбилеезлы. Кенеше ӧтьыны чакламын удмурт движение мыло- кыдо пыриськисьёсты, шаерамы улӥсь мукет калыкъёслэн огазеяськонъёссылэсь кивалтӥсьёссэс, писательёсты, артистъёсты. Исполкомлэн заседанияз озьы ик эскеремын гурт кенешъёслэсь ужзэс радъян, писательлэсь но тодосчилэсь Георгий Архиповлэсь архивзэ утён, "Удмурт кенешлэсь" ужамзэ ивор вӧлмытонъя ёзъёс пыр возьматон сярысь но мукет ужпумъёс. О. МАРКОВ. Удмурт Республикаысь Правительстволэн Ужъя комитетаз ужасьёс мур кайгыремзэс верало Фефилов Сергей Самоновичлы, солэн ӵыжы-выжыосызлы но матысь муртъёсызлы анаез улонысь кошкемен валче. Удмурт Республикаысь Кун Кенеш, Правительство мур куректыса иворто интыысь аскивалтонлэн йырызлэн - Ижевскысь мэрлэн, Удмурт Республикалэн Кун Кенешысьтыз депутатлэн Салтыков Анатолий Ивановичлэн атаез Быдӟым Отечественной ожысь ветеран Салтыков Иван Арсеньевич улонысь кошкем сярысь но ӵыжы-выжыосызлы но матысь муртъёсызлы кайгыремзэс верало. Удмурт Республикаысь Кун Кенеш, Правительство мур куректыса иворто Удмурт Республикаысь Правительстволэн Ужъя комитетэныз кивалтӥсьлэн Фефилов Сергей Самоновичлэн анаез Фефилова Евдокия Минеевна улонысь кошкем сярысь но ӵыжы-выжыосызлы но матысь муртъёсызлы кайгыремзэс верало. Англи кылын Тодмо журналист Николай Кузнецов дасяз выль книга. Со но сӥземын Куӟебай Гердлэн вордскемез дырысен сю ар тырмонлы. Печатламын англи кылын. Выль уж быдэсак вера Кузьма Павлович Чайников но солэн вынъёсыз-эшъёсыз сярысь. Соос лыдӟисьлы кемалась тодмо. Трофим Борисов, Михаил Тимашев, Ашальчи Оки, Константин Яковлев, Иван Бурдюков, Александр Наговицын, Пётр Баграшов, Иван Векшин но данак мукетъёсыз выльысь тодамы вайыто синкылиё но кайгуо аръёсты. Куӟебай Гердлы вылӥ дунъет сётыса, асьсэлэсь малпанъёссэс иворто Фома Ермаков, Пётр Поздеев, Зоя Богомолова, Анатолий Уваров, Анна Зуева, Алексей Красильников, тодмо мадьяр тодосчи Петер Домокош, мукет адямиос. Татын ик - Кузьма Павловичлэн дышетӥсьёсызлэн - быдӟым ӟуч гожъясьлэн Максим Горькийлэн, нылпи кылбурчилэн Корней Чуковскийлэн, академикъёслэн Юрий Соколовлэн, Бернард Мункачилэн, тодмо тодосчиослэн Дмитрий Бубрихлэн, Михаил Худяковлэн, Антал Гидашлэн тодэ ваёнъёссы. Книгае интыямын Куӟебай Гердлэн кылбуръёсыз но. Куд-огзэ берыктӥз ачиз Николай Кузнецов. Сборник узыр турлы туспуктэмъёсын, гожтэтъёсын. Та дуно ужез поттыны юрттӥзы данак шӧртчи адямиос. Соос пӧлын удмуртъёс но - "Крезь" но "Вильдон" покчи предприятиосысь ужбергатӥсьёс. Книгаоссэ кузьмаз Шаерамы азинтӥсько Куӟебай Гердлы сӥзем ужрадъёс. Иж карысь тямысэтӥ школаын дышетскись пиналъёс доры вуылӥзы тодмо критик литературовед кылтодон наукаосъя доктор Фома Ермаков, писатель журналист Леонид Емельянов но мӧйы дышетӥсь ожысь но ужысь ветеран Мария Каргашина. Тодосчи Фома Ермаков школаысь музейлы Куӟебай Гердлэн улон-вылонэзлы но ужъёсызлы сӥзем книгаоссэ кузьмаз. Герд сярысь Телеэкранъёс вылэ ӝоген вуоз выль телефильм. Со сӥземын Куӟебай Гердлы. Дасямын Удмурт Кивалтэтысь Нациосын ужанъя комитетлэн куремезъя. Выль телефильм огломак шарая Кузьма Павлович Чайниковлэсь секыт адӟонзэ. Экран вылысь учыръёс лулысь-сюлмысь мадё та быдӟым адямилэн аспӧртэмлыко вакытэз но ортчыт кайгуо шугадӟонъёсыз сярысь. Фильмлы сценарий гожтӥз Удмурт кун университетысь дышетӥсь егит тодосчи Вера Пантелеева. Драмая удмурт кун театрысь пинал актёр Игорь Люкин, Россия Федерациысь дано артистка Вероника Садаева, Удмурт Элькунысь калык артист Александр Мустаев синмаськымон возьмато та дано удмуртлэсь синкылиё даурзэ. Фильмез дасяку, бадӟым юрттэт сётӥз Кылъя, литературая но историяя Удмурт институтлэн директорез история наукаосъя доктор Кузьма Куликов. Вылӥ ӟечлыко суредъёсыныз таяз учыре но шумпоттэ телеоператор Владимир Шибанов. Фильмез экран вылэ вуттон сярысь трос сюлмаськиз Удмурт телевидениысь режиссёр Лев Вахитов. Куӟебай Гердлы сӥзем выль уж матысь дыре ик вуоз школаын дышетскись пиналъёс доры. Вормизы визьмоосыз Куӟебай Гердлы но Ашальчи Окилы сӥзьыса, Удмурт кун университетын ортчиз олимпиада. Аслэсьтыз тодэм-валамзэ возьматӥз шаерысьтымы школаосысь сю куамын сизьым удмурт пинал. Укмысэтӥ классын дышетскисьёс пӧлын нырысетӥ интыез утӥз Пичи Пурга ёросысь Гожня школаысь Алёна Михайлова, кыкетӥ интыез - Алнаш шор ёзо школаысь Татьяна Огурцова, куинетӥ интыез - Игра ёросысь Шор Шадбег школаысь Людмила Тронина. Дасэтӥ классын дышетскись нылпиос пӧлын нырысетӥ интые потӥзы Пичи Пурга ёросысь Кечол школаысь Марина Каргашина, Ува ёросысь Ӝужгес школаысь Елена Морозова, кыкетӥ интые - Алнаш ёросысь Вуж Утчан школаысь Лариса Бусыгина, Можга ёросысь Кватчи школаысь Валерий Марков, куинетӥ интые - Дэбес шор ёзо школаысь Евгения Сундукова. Дас одӥгетӥ классын дышетскисьёс пӧлын нырысетӥ луиз Шаркан ёросысь Зюзино шор ёзо школаысь Екатерина Ложкина, кыкетӥ - Завьял ёросысь Совхозной школаысь Андрей Иванов, Иж карысь 56-тӥ школа-гимназиысь Ирина Николаева, куинетӥ - Якшур-Бодья школа-гимназиысь Светлана Широбокова, Алнаш ёросысь Варзи-Ятчи школаысь Ольга Гаранькина. Олимпиадае ветлэм пиналъёс кылъя но, литературая но визьмо валэктонъёс сётӥзы. Вормисе потэмъёс шаерысьтымы педучилищеосы, Удмурт кун университетэ, Глазов пединституэ нокыӵе могӟетъёстэк дышетскыны пырыны быгатозы. Конкурслы йылпумъянъёс Кин тросгес вӧлмытоз? "Удмурт дуннеез" лыдӟисьёслэсь лыдзэс будэтон вылысь, республикаысьтымы почтальонъёс куспын газетлэн редакциез ялӥз вал ӵошатскон (печатламын 18 сентябре потэм номерын). Отын шуэмын, йылпумъянъёс лэсьтыку учкемын луоз почтальонлэн газетмес 1998 арлы макем трос гожтӥськытыны быгатэмез, ичизэ 25 муртэ гожтӥськытыны кулэ вал. Йылпумъянъёс лэсьтон понна, ми вазиськимы ёросъёсысь почта кусыпъёсъя узелъёсы, котькудӥзъя куримы почта ёзъёсысьтызы газетмес тужгес но трос вӧлмытэм куинь муртлэсь нимзэ вераны. Ваньзэ та эшъёсты милям нимынымы туннэ пусъеммы потэ газет пыр. Лыдпус возьматэ, кӧня мурт гожтӥськиз "Удмурт дуннелы". Алнаш ёрос Ираида Трофимовна Кулакова (Удмурт Тоймобаш) - 113. Татьяна Вячеславовна Михайлова (Ӧркагурт) - 86 Антонида Александровна Пантюхина (Улӥ Асангурт) - 86 Балезино ёрос Геннадий Леонидович Русских (Эркешево) - 61 Светлана Николаевна Наговицына (Бадӟым Варыж) - 45 Людмила Аркадьевна Жукова (Ушур) - 37 Ольга Васильевна Волкова (Ягошур) - 37 Грах ёрос Алевтина Анатольевна Рупова (Вуж Игра) - 48 Дэбес ёрос Евгения Ивановна Федорова (Уйвай) - 44 Татьяна Рудольфовна Перевозчикова (Зар. Медла) - 42 Татьяна Ивановна Малых (Такагурт) - 34 Завьялово ёрос Маргарита Афанасьевна Камашева (Изгурт) - 41 Валентина Анатольевна Патракова (Изгурт) - 35 Ирина Егоровна Егорова (Ожмос) - 29 Игра ёрос Валентина Матвеевна Ложкина (Кабачигурт) - 47 Валентина Петровна Русских (Игра-5) - 33 Розалия Кашафовна Снитко (Игра-5) - 32 Кез ёрос Надежда Анатольевна Патракова (Пужмезь) - 43 Надежда Юрьевна Тихонова (Бадӟым Алып) - 29 Наталья Евгеньевна Иванова (Чепца) - 26 Николай Геннадьевич Ефремов (Стеньгурт) - 26 Кизнер ёрос Галина Павловна Оконникова (Безменшур) - 54 Галина Анатольевна Мухина (Вуж Кармыж) - 46 Нина Петровна Тихонова (Вуж Бодья) - 44 Кияса ёрос Алевтина Александровна Иванова (Салья) - 87 Надежда Федоровна Никитина (Ермолаево) - 57 Елена Алексеевна Камашева (Лутоха) - 43 Пичи Пурга ёрос Екатерина Васильевна Овчинникова (Вуж Монья) - 90 Ольга Ивановна Тарасова (Уром) - 83 Юлия Николаевна Леонтьева (Вуж Монья) - 75 Можга ёрос Елена Георгиевна Марзина (Вылын Юри) - 55 Антонида Алексеевна Григорьева (Трактор) - 46 Валентина Михайловна Нестерова (Пазял) - 38 Ува ёрос Иван Ефремов (Булай) - 41 Шаркан Маргарита Васильевна Нетелева (Сосновка) - 100 Людмила Васильевна Майорова (Ляльшур) - 62 Елена Витальевна Сутягина (Карсашур) - 52 Як.-Бодья ёрос Елизавета Федоровна Вахрушева (Як.-Бодья-6) - 130 Вань ёросъёсты огъя басьтоно ке, "кин тросгес вӧлмытоз" конкурсын вормисе потӥзы: Нырысетӥ интыын - Е. Ф. Вахрушева (Як.Бодья ёрос); Кыкетӥ интыын - И. Г. Кулакова (Алнаш ёрос), М. В. Нетелева (Шаркан ёрос), Е. В. Овчинникова (Пичи Пурга ёрос); Куинетӥ интыын - А. А. Иванова (Кияса ёрос), Т. В. Михайлова (Алнаш ёрос), А. А. Пантюхина (Алнаш ёрос), О. И. Тарасова (Пичи Пурга ёрос), Ю. Н. Леонтьева (Пичи Пурга ёрос). Кызьы ивортӥмы вал, конкурсын вормисе потэм та почтальонъёсты редакция пусъе дуно кузьымъёсын. Ёросъёсын вормисе потэмъёс озьы ик пусъемын луозы синпель кузьымъёсын. Л. МАЛЫХ. Кинлэн кисыез зӧкгес? Статистика верамъя, республикаын ужасьёс пӧлысь коньдон басьтонъя нырысетӥ интые потӥзы кредитъёсын, страхование но социальной юрттэт сётонъя удысын ужасьёс. Шорлыдын вераса, толэзьем уждунзы соослэн 1 млн. 368 сюрс манет. Кыкетӥ интыын - транспортын ужасьёс - 1 млн. 355 манет, таосызлэсь 30 сюрслы гинэ кылё связистъёс (1 млн. 325 сюрс). Самой ӧжыт басьто дышетӥсьёс (529 сюрс) но гурт хозяйствоын ужасьёс (367 сюрс манет). Быдэс республикая вераса, уждунлэн быдӟалаез вуиз 794 сюрсозь. Бускельёсмы пӧлысь Удмуртилэсь улӥе та ласянь кылемын Пермь область гинэ. Н. АНТОНОВ. Капчиен уд пӧя ни Ӵемысь асьмеос дунтэм маке утчаса вамыштӥськом рыноке. Нош татын котьку ик ӟечлыкезъя умой вуз уг шедьы. Кызьы шуо калыкын: "Дунтэм - гонтэм". Куддыр рынокысь маке басьтӥськом ке, шуом пыдкутчан яке пальто; адӟиськом - маиз ке но уг кельшы кадь, маиз ке но урод. Нош воштыны яке берен басьтыны вузкариьёс соглаш уг луо ни. Ӝоген таӵе шуг-секытъёс уз кылдэ ни. Озьы шуо басьяськисьёслэсь правооссэс утёнъя комитетын ужасьёс. Матысь дыре Ижевскыь рынокъёсын вузкариьёс басьяськисьёссылы сётъяно луозы чек. Отын, огшоры пичи кагаз юдэсын, гожтэмын луоз, кыӵе вуз басьтэмын, кыӵе нуналэ, озьы ик одно ик луыны кулэ вузкарисьлэн кинюртэмез. Таӵе ӵектонэн вазиськиз городысь Думае Басьяськисьёслэсь правооссэс утёнъя комитет. Пумит луисьёс ӧвӧл кадь. Матысь дыре Ижевскысь Дума та ӵектонэз эскерыны кулэ. Россиысь куд-ог городъёсын таӵе амалэз кемалась уже куто ни. Кылсярысь, Костромаын, та законэз юнматэм бере, басьяськисьёслэн ӝожтӥськонъёссы кык поллы кулэсмизы. Ф. МИННИГАРАЕВ. Нылпиос но город Кураськоно-а, дышетсконо-а? Нянь магазинын пальто саестӥм кин ке кыскась луиз. Кык пиос, 11-12 аресъемъёс, жальмыт синъёсын шорам учкыса, огымысь нёжтӥзы: - Вае, пожалуйста, кӧня ке уксё, сиеммы потэ... Дӥсьсыя но, ымныр туссыя но сютэм улӥсьёслы уг тупало. Озьы ке но, сумкаям понэм булкаме киязы мычисько. Соос паймысагес вазизы: ми, пе, кӧня ке манет курим вал, булка кулэ ӧвӧл. Ӝогак вамыштӥзы мукет кышномурт доры. Таяз учыре удалтӥз-а, ӧз-а - уг тодӥськы. Но МВД-лэн сводкаосызъя тодмо мукетыз: кылем арын Ижевскысь школаосын трослы йылӥз наркотикъёсын асьсэды шузимытӥсь пиналъёслэн лыдзы. Коньдон потто кураськыса, лушкаськыса, мугорзэс вузаса, вузчиослы медъяськыса. Таӵе нылъёс но пиос Ижевскын ӧжыт ӧвӧл. Кызьы вераз городысь калыкез дышетонъя управленилэн кивалтӥсез А. И. Копинов, городын туннэ 80-лэсь ятыр нылпиос дышетсконлэсь пегало, куатезлы милициен ялэмын розыск. Сентябрьлэн кутсконаз парта сьӧры пуксьытэк кылемын вал 63 пинал. Малы? Кыӵе муген? Валэктонэз одӥг: дышетскыны мылзы уг поты. Медико-педагогической комиссия пыр кӧняез ке парта сьӧры берыктэмын ик. Ар ӵоже 1-тӥ-9-тӥ классъёсын дышетскисьёс пӧлысь школаосысь кошкемын 323 нылъёс но пиос, та ласянь тужгес но висъясько Индустриальной но Устиновской районъёс. Югдурез тупатыны ӧжытак юртто на ӝытазе ужась школаос. Соос усьтэмын городысь ваньмаз районъёсын. Кылдытэмын егитъёсты дышетонъя центръёс. Таосаз, средней образование басьтэмен ӵош, мылкыд карисез дышетске быръем специальностья. Нылпиосты будэтон ноку но капчиен ӧз сётскы. Улонлэн радыз воштӥськемен, та ужпум али уката но лэчытомиз. Ижевсклэн администрациез кылем арын кутӥз "Дети города" нимысьтыз программа, со меӵак герӟаськемын школаослэн но внешкольной учреждениослэн уженызы. Нылпиос пӧлын йыртэман но йыруж лэсьтон учыръёсты кулэстон вылысь, пӧртэм ужрадъёс чакламын. Соослэсь быдэсъяськемзэс эскерыса возе городысь быдэ вуымтэосын ужанъя комиссия (кивалтӥсез Г. А. Ахророва, мэрлэн воштӥсез). Берло заседанияз пыр-поч учкемын вал дышетскисьёслэн школаысь пегамзы но калгемзы. Нимысьтыз вераськон ӝутскиз вспомогательной школаосъя. Берло аръёссэ ляб визьем пиналъёслэн лыдзы ялан йылэ, нош выль юрт пуктыны номырин. Троссэ гуртазы дышетоно луэ. Осконтэм кадь, но пумен ӵемгес но ӵемгес пумиталод грамотаез чылкак тодӥсьтэм егитъёсты. Тани 18 аресъем пилэн 3 класс дышетскемез. Ижевскын сыӵеос одӥг гинэ ӧвӧл. Кин татын янгыш? Нырысь ик - мумы-бубыос. Юыса, наркотикъёсын усыкмыса кыллись муртъёслы пиналъёссы сярысь сюлмаськыны ноку. Комиссилэн заседанияз ӟырдыт вераськиз Ижевскысь прокурорлэн воштӥсез Т. Е. Кузьмина: - Нимысьтыз комиссия люкаськылэ, сыӵе анай-атайёс бордысь нылпиоссэс люкон сярысь решение кутэ. 7-9 толэзь ӵоже та бумагаос вуныса кыллё, со вакытэ ик пиналъёс город кузя сютэм калго яке воксё кытчы ке ышо-быро. Меӵак вераса, егитъёсты дышетонъя кутэм закон городын йӧскадь уг быдэсъяськы. Пионерской но комсомольской организациос быремен, школа пӧрмиз тодон-валанъёс сётонъя удыслы гинэ, воспитательной ужлэсь быдэсак палэнскиз. Пиналъёслэсь гуртазы кызьы улэмзэс эскерись-чаклась ӧвӧл ни. Нош со дыре ик кӧнязэ жугыса, сантэмаса, кышкатыса возё асьсэлэн ик мумы-бубыоссы. Вань виён учыръёс но. Паймымон, но Ижевскысь 1-тӥ классэ мыноно нылпиос пӧлысь 13-ез таяз дышетскон арын парта сьӧры пуксьытэк кылиз, анай-атайёсы "бабемен" ӧз шеде списокъёсы. Мар луоз азьланяз? Дышетон удысэз нуисьёс оско ӝытазе ужась школалы, нуназе дыштскисьтэм егитъёс отын тодон-валан люкалозы шуыса. Озьы вал азьвыл аръёсы. Али егитъёс мукетэсь. Тросэз-а меда валалозы на дышетсконлэсь кулэлыксэ, государство вылӥ образованиен адямиоссэ но улонлэн самой улӥ тубатаз пуктэ ке? Л. ПЕРЕВОЗЧИКОВА. Кылдэ вылез Лэсьтозы фанера - Пыргытэм пулэсь но шелеплэсь лэсьтэм плитаосмес (ДСП) басьтӥсь уг быры, - шуэ "Увадрев" ОАО-ысь одӥгез станочник Владимир Савин. - Нуналлы быдэ вагонъёсын со кошке Россилэн но СНГ-е пырись странаослэн пӧртэм сэрегъёсазы. Ужмы секыт. Вылаз ик, котькуд сменаяд шокано луиськод смолаосысь вӧлмись формальдегид ядэн. Уждун ӧжыт тыро. Алигес премиен валче басьтӥ 800 сюрс манет, солэсь азьвыл толэзьлы - 500 сюрс. Зэм но, Германиысь оборудование (линия) пуктэмзы бере, Уваысь предприятие вылӥ ӟечлыкен плитаос поттыны кутскиз. Огазеяськонлэн директорезлэн воштӥсезлэн Н. Н. Корнеевлэн верамезъя, али та плитаос СНГ-ын самой умойёсыз луо. Комбинатлэн азбарысьтыз та вузэн машинаос нуналлы быдэ кошко Башкортостанэ но Татарстанэ. Данакез плита татын ик вузаське. "Увадрев" (азьвыл лесокомбинат) ОАО - бадӟым предприятие. Но азьвыл татын 2 сюрс ёрос адями ке ужа вал, берло сизьым ар ӵоже, та лыдпус ог 300 муртлы кулэсмиз. ДСП сяна, дасяло паркет, укно но ӧс блокъёс, пӧртэм пумо пиломатериал но куд-ог мукет вузъёс. Плитаослы кулэяськисьёс трос, мукет вузъёс комбинатлэн складъёсаз но азбараз кыллё. "Увадрев" ОАО-лэн директорез В. В. Перепёлкин шуэ, предприятиез, пе, секыт югдуре вуттэ трос улон инты возён но соцкультбыт. Акциосын огазеяськон интыысь ваньбурлы пӧрмытыны уг быгаты 60 сюрс квадратной метр улон юртъёссэ, 50 интылы огдыре мисьтӥськыны чаклам мунчозэ, бадӟым прачечнойзэ, 15 иськем водопроводзэ, ньыль иськем кыстӥськись канализационной но шуныт сётӥсь гумыоссэ, сутка ӵоже 1100 кубометр вуэз чылкытатӥсь сооруженизэ но куд-ог мукет объектъёссэ. Та удысэ АО-лэн кассаысьтыз ар ӵоже 3 миллиард манет кошке. Тӥни малы трос ужаса но, рабочийлэн уждуныз сокем ик бадӟым уг луы. Азьвыл аръёсы элькунамы ужазы бадӟымесь, кужмоесь леспромхозъёс. Али соос начармизы, поттэм вузъёссэс угось вузаны уг ни быгато. Тани валче "Увадрев" шаерамы самой трос нюлэс корась предприятилы пӧрмиз. Ас удысаз предприятие кутэ 200 сюрс кубометр нюлэс, со пӧлысь ар ӵоже 110 сюрс кубометрзэ ас кужыменыз дася. Азьвыл аръёсы пул гинэ комбинат 100 сюрс кубометр вуза ке вал, али та лыдпус 30 сюрс кубометрозь вуиз. Пусъёмы на, татын пуктэмын кужмоесь, туала куронъёслы тупась пул пилён рамаос, пуллэсь вагонка но мукет со выллем материал дасян оборудование. Вылӥ верам ужъёсты быдэсъянын азьвыл но 150 мурт ужа вал, вуз поттон куинь-ньыль пол кулэсмыса но, али но со мында ик. "Увадревлэн" кивалтӥсьёсыз та лыдпусэз кулэстыны уг дырто, югдурлэн умой пала воштӥськемезлы оско. Али данакез пуллы кулэяськисьёс сое дасяло гуртъёсысь пилорамаосын, отын дасям пул угось кӧня ке поллы дунтэмгес усе. Валантэм соиз, малы нюлэс дасянын, сое ворттонын кужмо туала техникаез кутыса, туннэ нуналлы тупась пилорамаосты, пулэз вӧлон, волятон станокъёсты ужатыса но, пуллэн ас дуныз трослы вылӥын луэ. Рабочийёс таӵе югдурез валэкто мултэс инженерно- технической ужасьёсты воземен. Шуркынмонэ (ноябре) кылем арын ортчиз райсоветлэн сессиез. Отын эскеремын Ува районысь нюлэсэн ужась хозяйствоосын кылдэм югдур. Сессилэн ужаз пыриськиз Кун Кенешысь комиссилэн тӧроез Виталий Соловьев. Ёросысь депутатъёс Виталий Александрович пыр вазиськизы Правительстволы но Кун Кенешлы. Отын таӵе ужпум пуктэмын: Увае пуктоно арлы быдэ 50 сюрс кубометрозь фанера поттонъя цех. Та удысэз быдэстыны юрттэт куроно. Зэм, Ува палан тросэн кораны вуэмын ни пипу но кызьпу. Нош та писпуослэсь лэсьтыны луэ дуннеысь стандартъёслы тупась фанера. "Увадрев" таӵе вуз поттыны проект дася ни. Удмурт Правительство юрттыны быгатӥз ке, фанера лэсьтон Ува ёрослы бадӟым пайдаен берытскоз. Та вуз кунгож сьӧры но мыноз. Соку данаклы кулэсмоз ужтэк кылемъёслэн лыдзы. Кык ар талэсь азьло В. В. Перепелкин вуылӥз Италие. Отын фанера лэсьтон паськыт удысэн мынэ. Дасяло сое топольлэсь. Та писпу небыт бере, фанералэн ӟечлыкез вылӥын уг луы. Валерий Владимирович чакла вал фанера лэсьтон оборудование басьтыны. Ӧз пӧрмы. Туж бадӟым дун куризы. Кылем арлэн пумаз Перепелкинлы жингыртӥзы Италиысь. Мукет фирмаысь. Директор нош ик отчы вуылӥз. Таяз учыре солы удалтӥз. Шедиз дунтэмгес завод. Со быгатэ ар ӵоже 30 сюрс кубометр ёрос бадӟымесь фанера листъёс поттыны. Гожтэмын тупанкыл. Та ужез быдэстыны кулэ 6 миллион доллар. Ваньмыз радызъя ке пӧрмиз, туэ ик кутскоз фанера поттон оборудование пуктон. П. ИВАНОВ. ВЫЖИЗ ВЫЛЬ ЮРТЭ Пушкинской урамысь травматологической поликлиника кема дыр ӵоже ӟоскыт сэрегын "шымырскыса" улӥз. Коридоръёсыз кык кузя ортчыны луонтэм сюбегесь вал. Табере со выль интые выжтэмын. Краев урамысь азьвыл нылпи ваён юрт, ӟеч-ӟеч тупатъяса-выльдыса, синмаськымон поликлиникалы пӧрмиз. Шумпото эмъясьёс: табере котькудӥзлэн аслаз кабинетэз вань. Висисьёс но сокем ик ӝожомем мылкыдын уз вамыштэ ни эмъяськон юртэ. Ма карод, шуккиськыны шедид ке, отчы одно ик мыноно луоз. Н. ЛИПИНА. Наталь СЯСЬКА ПӦЛЫН СЯСЬКА ВАНЬ Удмурт нылкышно!.. Макем тон кужмо, визьмо, йӧно, яратыны быгатӥсь но ужась, уг шуонэз валасьтэм. Музъемозь йыбырттэм потэ тыныд. Вань таӵе адямиос котькуд гуртын, улосын. Нош мынам вераме потэ эше сярысь. Улэ со Люк черкогуртын (удмуртъёс Дядьпи шуо). 1967 арын Дядьпи школае вуиз чырткем, сэзь, муспотон егит нылаш, ачиз со Яр ёросысь. Со дырысен куамын ар ӵоже Галина Леонтьевна Васильева дышетэ ини пиналъёсты чеберез валаны. Ижевскысь педагогической институтысь художественно- графической факультетэз ӵош йылпумъям эшъёсыз ӧтё вал городэ художественной школаын яке училищеын ужаны, нош Галя ӧз кошкы. Вань лулыныз-сюлмыныз бурмиз со татчы, яратӥз гуртэз, гурт калыкез, Дядьпи котырысь лудъёсты, возьёсты, быръем ужзэ, солэсь но зол - дышетскись нылпиосты. Бен, Галялэн улоназ вал мукетыз но яратон. Лул-гажанэныз ӵош куке но чебересь малпанъёс пӧлын уязы. Но ӧз кылды соослы улонзэс ӵошен герӟаны, сюресъёссы мыд-мыд пала кожизы. Галя аслэсьтыз нырысетӥ но берпуметӥ яратонзэ туннэ ке но сюлмаз возе, уг вунэты. Трос синмаськисьёсыз вал солы, но ӧз поты Галялэн аслэсьтыз сюлэмзэ пӧямез. Мынэ улонэтӥ огназ, йырзэ йӧно возьыса. Капчи бен ӧвӧл гуртын улӥсь нылкышнолы огназ. Но пичиысен ужаны дышем адями лекос уг ӝожтӥськы. Шораз учкыса паймоно та кышномуртлы. Ма гинэ уг лэсьто солэн киосыз! Пу дасяно - тӥрен ужа, воргоронъёслэсь бере уг кыльы; юрт котырын кенер-а лэсьтоно, чулан-а висъяно калыклы йыбыртъяса уг улы - кутске но лэсьтэ; гур-а тупатоно - кияз мастерок кутэ. Бакча сиён будэтэ, кунооссэ ӝӧк выл тыр ческыт сиёнэн-юонэн утялтэ. Вань улонэз Галина Леонтьевналэн школаен герӟаськемын. Огназ улэ шуи ке, сьӧлыкало. Со котьку пиналъёс пӧлын. Вань сюлэм шунытсэ, сайкыт визьзэ, быгатонзэ сётэ гурт нылпиослы. Мед валалозы соос чеберез, мед быгатозы сое дунъяны но данъяны. Та нылкышно озьы ик ноку уз палэнскы калыклэсь, шуге-леке сюрем адямилы котьку дась кизэ сётыны. Егит дыръяз ӵош улэм но ужам эшъёсыз тодазы ваё, соин, пе, капчи вал улыны, анай музэн сюлмаськылӥз, юрттылӥз, лӥятылӥз, бурдъялляз. Та школаын ик ӟуч кыллы но литературалы дышетӥсь Дина Зосимовна Волкова шуэ: - Галина Леонтьевна монэ дышетӥз суреданы но плакат пероен гожъяськыны. Та быгатэме туннэ но мыным туж юрттэ ужам. Адӟиз со мынэсьтым инмарен сётэм быгатонлыкме, шарае поттӥз, юнматӥз. Тау шуисько мон солы со понна. Солэсь но бадӟым тау карисько нылы понна. Валаз пиналлэсь мылкыдзэ, быгатонлыксэ, чеберлыко дуннее сюрес усьтӥз. Али Оляе дышетске Нижний Тагилысь пединститутлэн художественно-графической факультетаз. Дышетӥсь туж яратэ ас шаерзэ, гажа удмурт калыксэ, солэсь йылолъёссэ но сямъёссэ, тунсыкъяське вашкалаеныз, историеныз. Урокъёсаз трос саклык висъя удмурт калык искусстволы, удмурт суредасьёслэн ужъёсынызы тодматэ. Пиналъёсын ӵош чебересь киужъёс лэсьтэ кызьпу туйлэсь. Суреданъя кабинет котьку тырмемын пиналъёсын. Нош ачиз ваньмон дыръяз кияз мольберт кутэ но суреданы кыре потэ. Син азьын улӟо паськытэсь лудъёс, чебересь возьёс, батыр нюлэс, гуртмы, юртъёс, тодмо тусбуйёс. Котькуд ар школаямы ортчытэ аслаз суредъёсыныз выставка. Пиналъёс но дышетӥсьёс синмаськыса учко ужъёсыз шоры. Макем быгатыса но валаса лэсьтэмын соос. Со гинэ ма? Галина Леонтьевналэн суредъёсыз ёросамы ортчытъяськись выставкаосты но шулдырто. Куд-огез ужъёсыз быръемын элькун выставкаосы. Дышетэм нылпиосыз но котькуд ар пырисько шаерысьтымы выставкаосы, соослы вылӥ дунъет сёто. Та сярысь верало данъян грамотаос, гожтэтъёс, медальёс. Дышетӥсьлэн быгатӥсь киосыз озьы ик арлы быдэ чебермало школалэсь кордиоръёссэ но залъёссэ. Кабинетъёсысь дышетон стендъёс-планшетъёс но лэсьтӥсько солэн кивалтэмез улсын. Ачиз сярысь трос уг сюлмаськы та нылкышно. Матысь адямиосызлы ӟеч карыса, берпум юдэссэ шори люкыны дась. Галина Леонтьевна будэтӥз сирота пиез (Сашалы соку тямыс арес вал). Табере со быдэ вуэмын, йылпумъяз Москваысь авиацияя институтэз, али ужа Пермь городын. Усто но гажамон специалист уг вунэты апайзэ, котькуд гужем дораз бертылэ. Сюлмо нылкышно сузэрезлэн огназ кылем внукъёсызлы но пыд йылазы султыны юрттэ. Тӥни сыӵе со, огшоры удмурт нылкышно. Туэ 8 мартэ Галина Леонтьевналы тырме 55 арес. Но сюлэм уг лэзьы яратоно уженыз люкиськыны. Ми, ӵош ужась эшъёсыз но дышетэм но дышетскись нылпиосыз, данъяськиськомы соин. Аръёс ортчо... Котькудӥз ымныре кельтэ гож, йырси пӧлы- тӧдьы нюжа, сюлэме - ортчем аръёс сярысь малпан, оло, жалян но. Ваньмыз со вань. Но милям Галямы (ми понна со озьы ик кылиз), азьло кадь ик сэзь, капчи мылкыдо. Инмар сое кема аръёс ӵоже мед утёз. Т. АЛЕКСЕЕВА. Балезино ёросысь Люк черкогуртысь дышетӥсь. Герд ВАЛЕРИЙ МИТРОФАНОВ: "ЧАЛМЫТ УЛЭМЕ УГ ЛУЫ НИ..." - Валерий Яковлевич, берлояз Бадӟым Ӧтчамын удмурт движение нырысьсэ зымиз политика шуре. Татчыозь со отын ӧй вал на, политика ужпумъёсын ӧз выры, шуыны луоз. "Удмурт кенешен" кивалтӥзы асьсэ удысазы тодмо луэм тодосчиос. Нош таяз учыре асьмеос тӧрое бырйимы политикез - Валентин Кузьмич Тубыловез. Табере тани тӥледыз солы воштӥсе юнматӥзы. Кызьы асьтэос учкиськоды югдурлэн тазьы берытскемез шоры? - Огкылысь бырйизы бере, мон малпасько, калык оскиз Валентин Кузьмичлэн ӵектэм адямиезлы. Берло Ӧтчамын юнматэмын вал выльдэм устав. Отын нимысьтыз пусъемын, тӧро аслыз воштӥсьёс ачиз ӵектэ шуыса. Валентин Кузьмич озьы ик лэсьтӥз. Кыкез ик солэн воштӥсьёсыз быръемын солэн дэмламезъя: мон но, Нина Игнатьевна Малых но. Исполкоме но ваньмыз тӧроен дэмламъёс быръемын. Малпасько, таӵе югдур возьматэ Пичи кенеше быръемъёслэсь Валентин Кузьмичлы оскемзэс. Соос валазы, тӧролы аслаз командаез, котыраз оскымон адямиос кулэ шуыса. Озьы кылдӥз бере, ужано, калыклэсь оскемзэ быдэсъяно. Тӥ шуиськоды: "Удмурт кенеш" политикае нырысьсэ куатетӥ Ӧтчамын пыриськиз. Мон малпасько, азьлогес ик пыриськыны кутскиз ини шуыса. Милемды весь "индыло" вал: эн пыриське политика ужпуме. Тӥляд ужды культура удысын, калыкез дышетонын - отын ик ужалэ. Нош куке ми ыстӥмы Валентин Кузьмичез асьме шаерамы Россиысь Президентлэн ужоскето адямие карон пумысен вазиськонмес, ваньмыз кивалтӥсьёс пурӟизы. Уката ик - Кун Кенешын ужасьёс. Со куронэз берыктытӥзы. Соку тӥни шӧдӥськиз: политика ужпуме пыриськись "Удмурт кенеш" кивалтӥсьёслы кулэ ӧвӧл. Соин ик таиз съезд та ласянь пусйымон луиз. Асьмелэн огазеяськонмы общественно-политической пуштроссэ берыктӥз. - Мукет сямен вераса, кин но со вите вал, "Удмурт кенешын" ялан перепечен но пӧсятэмен шулдыръяськонъёс гинэ луозы шуыса... - Озьы. Тани "Удмурт кенеше" пыриськисьёс но тросысьтыз ёросъёсысь лыкто но шуо: вот ми ӝук пӧзьтӥм, созэ-тазэ сиим, эктӥм-кырӟам, мылкыдмес ӝутӥм. Уг валало вал, таӵе шулдыръяськон, оло, юри вылӥысен дэмламын шуыса. Но табере "Удмурт кенешлэсь" кужымзэ тросэз шӧдо ини. Со дыре ик кудӥз-огез Пичи кенеше быръемъёс али но уггес валало, малы ми мургес пыриськыны кутскиськом политика ужпуме. "Удмурт кенешез" кылдытыку ик валано вал, со политика ужпуме пыриськыны кулэ шуыса. Асьмелэн вань улонмы герӟаськемын соосын, кинъёс асьмемын кивалто гуртъёсын, ёросъёсын, каръёсын но элькунын. Тӥни соин валэктыны луоно "Удмурт кенешлэсь" политика ужпуме пыриськемзэ. Тани матэкто интыосысь кивалтон ёзъёсы быръёнъёс. Отын асьмелы кужыммес, быгатонлыкмес одно ик эскероно. 1999 арын Кун Кенеше быръёнъёс вуозы. Соку "Удмурт кенешлэсь" зэмос кужымзэ возьматоно ини. Ар но ӝыны ӵоже пыд йыламы ӟеч-ӟеч, йӧн-йӧн султыны ӧм быгатэ ке, "Удмурт кенешез", оло, быдтоно но луоз. Культурая "Дэмен", егитъёслэн "Шунды" но удмурт нылкышноослэн огазеяськонъёссы асьсэ удысъёсазы пӧртэм ужрадъёс ортчытъяло. "Удмурт кенеш" соосты, одӥг липет улэ люкаса, бадӟым ужрадъёсы ӝутыны кулэ. Озьы адске мыным удмурт движенилэн ӵуказе нуналаз. - Мон тодӥсько, тӥ кемалась ини - быдэ вуэм политик. Но малпанъёстэс тазьы шара усьтыса ӧд вераллялэ на вал. Мар усьтытэ ватыса возем малпанъёстэс? - Мон кема пуки чидаса-а, мар-а, шуод. Али чиданэ чигиз. Куатетӥ Ӧтчамын, адӟисько, асьме удмурт движениен кивалтыны туртто кун структураос. Асьсэлэсь адямиоссэс пуктыны малпало вал. Учки-учки, кылзӥ-кылзӥ но, чиданэ пӧсьтӥз. Малпай, аслэсьтым но лек сямме возьматоно. Мон ведь сокем капчи мылкыдо адями ӧвӧл. Культураын, искусствоын ужасько бере, кудӥз-огез малпа, лэся, о-о-о, Валерий Яковлевич кырӟа но эктэ гинэ: ӵукна султэ - кырӟа, ӝытазе - нош ик, ӵуказеяз но озьы. Но асьмеос кырӟаса-эктыса гинэ пайдазэ ум шедьтэ. Улон интыяз уг сылы. Политика кошке ас ӧретӥз, культура - ас сюрестӥз. Нош мон ноку но политикалэсь палэнэ ӧй кыльылы. Кудӥз-огез шуизы: Митрофанов но асьме движение рос-прос пыриськиз ини. Нош мон кемалась отын. Тямыстонэтӥ аръёс бырон азьын, куке кылдӥз удмурт культурая общество, мон котькуд кенешонэ но соосты дасянэ пыриськылӥ. Но куке соин кивалтыны кутскизы зэмос политик луисьтэмъёс, мон вужер улэ шедем кадь луи. Али тани выль югдур кылдӥз. Со мыным луонлык сётӥз политической мылкыдме но быгатонлыкме возьматыны. Юнме ӧз луы, дыр, партилэн органъёсаз но ужаме. Кудӥз-огез, оло, шуоз: КПСС-лэн ЦК-езлэсь академизэ йылпумъяд. Мед, со политикалы дышетсконъя школа вал. Нырысетӥ профессие - хорлэн дирижёрез, кыкетӥез - политолог. Дипломам озьы ик гожтэмын. Ужаны быгато котькудаз выли дышетонниын. Но али вуиз сыӵе дыр, ку улонын возьматоно политикая быгатонлыкез. - Пичи кенеше быръемъёс ваньзы валазы кадь, кыӵе тулкым васькоз движенилэн улӥ сӥосаз, калыке "Удмурт кенешлэн" кивалтэтэз бордысь. Нош тӥ кыӵе тулкымез витиськоды улӥысь? Кыӵе мылкыд вуыны кулэ огшоры удмуртъёс дорысь, гуртысь, ёросысь? - Мон ӧтчамын верай, Удмурт движенилэн зэмос инъетэз ӧвӧл на шуыса. Татчыозь солэн ёзъёсыз ваньмаз гуртъёсын ӧвӧл на. Озьы ик - городъёсысь предприятиосын но. Удмурт кужым пазьгиськемын, удмурт шӧм котькытын уг шӧдӥськы на. Малпасько, таиз Ӧтчам бере калыкмылэн мылкыдыз ӝутскыны кулэ. Делегатъёс татчы вераськыны гинэ ӧз вуылэ. Кутэмын нимысьтыз ужрадъёс. Пичи кенеш соосъя ужалоз. Отчы быръемъёс ужпумъёсты быдэстонэн ас кожазы гинэ уз выре. Соос пыр гуртоос, быдэсыз удмурт калык юрттоз "Удмурт кенешлы", нош со - калыкезлы. - Али аскивалтон ёзъёсы быръёнъёс ортчытонлы дасяськон мынэ ни. Ма ӵектысалды тӥ аскивалтон ёзъёсы тӧроосты но депутатъёсты бырйыны дасяськись адямиослы? - Мон тазьы вазиськысал удмуртъёслы. Малпаськоно удмуртлык сярысь. Кӧня ке но кескич но луоно. Озьы ведь луэ: удмурт кандидатъёслэн уг луы коньдонзы но, кузьымъёссы но, кудъёсыныз соос чай сектаса но кузьмаськыса ветлыны быгатысалзы. Мукетъёсызлэн вань. Соин ик малпаськоно. Басьты ӵектэм кузьымзэс, тау шу, нош куарадэ сёт удмурт понна. Тани Кун Кенешлы Тӧро быръён дыръя, мон тодӥсько, кудӥз-огез удмуртъёс куаразэс Валентин Кузьмич понна ӧз сётэ. Соослы ӵектэмын вал министр портфель яке мукет инты. Но сыӵеосты троссэ пӧяса кельтӥзы. Тӥни сое чакласа улоно вылэм. Тӥледлы созэ-тазэ ӵектозы, нош вормизы ке, вунэтозы-куштозы. Соин ик етӥз, йӧно удмуртъёсты шедьтыса, соос понна ужано. Одӥг округъя ньыль-вить удмурт куспазы медам вожвылъяськы, депутат яке ёрос тӧро луон понна. Мед кылёз одӥгез удмурт, со ик мед вормоз. Солы юрттыса, асьмелы ваньмылы ӟеч, мур но пайдалыко ужано. Вераськонэз нуиз Вяч. МИХАЙЛОВ. "Наталь" утча "Микалез" Кужмо, визьмо, чебер воргорон - кин тон? Газетмылэн 3 январе потэм номераз таӵе юанэн вазиським вал нылъёслы, нылкышноослы. Нош юанмы юанэн ик кылёз ни, лэся? Удмурт апайёсмы, кенакъёсмы уг адӟо яке вераны уг дӥсьто шаерысьтымы данъямон, синмаськымон воргоронъёсты. Яке, трос нимъёс пӧлы йыромыса, та дырозь кин вылэ дугдыны уг валало? Малпаське, 23 февралёзь дыр вань на. Кин понна куарадэс сётоды - ӟуч, бигер яке удмурт воргоронлы, кивалтӥсьлы яке ужбергатӥсьлы, артистлы яке гожъясьлы. Тодады вайытӥськом, данъямон воргоронлэсь нимзэ ивортыны луоз гожтэтын яке телефон пыр (21-37- 14), дасялэ солы кыӵе ке но одӥг юан. Эн вунэтэ пусйыны асьтэлэсь нимдэс, кытын улэмдэс. Тужгес но трос куара басьтэм воргоронэз ӧтём редакцилэн тӧр шораз, тодматом юанъёсын. Кинлэн юанэз солы тужгес но кельшоз, со куномылэсь афтографен туспуктэмзэ басьтоз. Со шудо муртэ возьма на редакцилэсь синпель кузьым. Юанъёслы валэктонъёсын тодматом газет лыдӟисьёсты но. Наталь Кузпалъяськонэз сӥлы гожтон Можга ёросын кӧня ке аръёс ӵоже ини кузпалъяськонэз сӥлы гожтон удмурт кылын мынэ. Та ласянь адӟем карымон ужало Вуж Какси но Бадӟым Сибы сельсоветъёсын. Вуж Каксиын кузпалъёсты сӥлы гожтӥськонэз ортчытэ Валентина Сергеевна Морозова, нош Бадӟым Сибыын - Нина Александровна Спиридонова. Удмурт кылын сӥлы гожтӥськон радэз газет бамын печатласа оскиськомы, анай кыллы дурбасьтӥсьёслэн лыдзы эшшо йылоз. Та сценарий вылэ пыкъяськыса, сельсоветъёсын, культура юртъёсын ужасьёс кузпалъёсты гожтонэз асьсэ сямен радъяны быгатозы. Умой луысал вылэм, удмуртъёслэн вашкала йылолъёссы, сямъёссы но отчы пыӵасалзы ке. Культура удысын ужасьёс егитъёсты пумитало нянен но вӧйын. Собере ваньзэс ӧтё пырыны. - Куноос, сюанчиос! Кырӟасьёс, арганчиос! Ваньдэс куриськом татчы! -Кышно басьтон, ныл сётон Туннэ малпам уж ӧвӧл. Нылэз бызе, пиез басьтэ! Озьы дуннеын уло. Кыстӥське лэйкыт, каллен гинэ чузъяськись гур. Ваньзы дась луэм бере, гожтӥськонэз ортчытӥсьлэн юрттӥсез ӧте: - Гажано егитъёс (кузпалъяськисьёслэн нимзы), гажано куноос, ваньдэс ӧтиськом залэ. Чузъяське кырӟан. Ковёр сюрес вылтӥ залэ пыро егитъёс, адӟисьёс, анай-атайёс но ӧтем куноос. Гожтӥськонэз ортчытӥсь: - Гажано егитъёс! Тӥледыз татчы вуттӥз улон сюресъёстэс огазеяны турттон мылкыд. Нош сыӵе мылкыд инмысь уг усьы. Уӵыё ӝытъёсы, толэзё уйёсы тӥ одӥг пужые каньылля чильпады, луоз, азьланьын улонды сярысь чебересь малпанъёстэс. Син азяды пуктэм суредъёстэс ӵошен улӟытыны кенешиды. Чузъяське кырӟан - Сибы палась вож тэльын Туж кема уӵы чирдӥз. Одӥг пол со куак вӧзын Егит пи сое кылзӥз. Одӥг пол, одӥг пол Со куак вӧзын Егит пи, егит пи Сое кылзӥз. Соку, лэся, синйылтӥз Лыз синмо ӵуж уӵыез, Оло, соку яратӥз Чылкыт, веськрес Машаез. Дыр вуиз вал кыткыны, Мыном кышно юаны. Чалмиз лудын ужан гур, Мед чузъяськоз сюан гур. - Гажано, (кузпалъяськисьёслэн нимзы)! - Туннэ тӥ понна, тӥляд эшъёсты, анай-атайёсты, ӵыжы-выжыосты понна самой шудо, пыраклы вунонтэм нунал. Туннэ тӥ выль семья кылдытӥськоды, ог-огдэс яратыса, куспады тупаса но эшлыко мылкыдын улон понна. Но эн малпалэ, ваньмыз ас эрказ мыноз шуыса. Шудды асьтэ киын. Та нуналэ ӵошен ӝуатэм кизилидэс тыршелэ вань улонэтӥ нуыны. Со понна котьку мед луоз ог-огдэс валан. Тодады возе, астэ гинэ гажан, астэ гинэ тодон, ачидъя гинэ лэсьтон куашкатэ ӟеч мылкыдэз, ог- огдэ гажанэз, тэшкатэ семья кусыпез. (Кузпалъяськисьёслэн нимзы). Тӥляд семьядылэн мед луоз аслаз шундыез. Со шунды - али кылдэм яратондылэн ӟырдытэз. Утелэ сое сӥямлэсь. Семья - со ӵошен гинэ будэтоно сяська. Кудды ке одӥгды вунэтӥды ке со вылэ шуныт ву кисьтаны, семья кусыпты сӥяны кутскоз. Нош мар со "шуныт ву кисьтан"? Вакчияк вераса, со ог-огедлы маке но ялан ӟеч карыны турттон, маин ке умоеныз паймытон, шумпотонъёс кузьман. Ой, медаз луы, медаз Сюреслэн пумыз. Ой, медаз ортчы, медаз Сяськаясь тулыс. Котьку медло пальышан Кысӥсьтэм синмын. Котьку медло ӵыж кисьман Ӟырдыт сюлэмын. Гажано егитъёс! Улонын луоз тулыс но, гужем но, сӥзьыл но. Вуэ кезьыт тол но. Дась-а тӥ (кузпалъёслэн нимзы) вань шуг-секытъёсыз чиданы? Дась-а тӥ эшлыко, юн семья кылдытыны, ог-огды сярысь сюлмаськыны но вуоно пиналъёстэс будэтыны? Вераны куриськом эмеспиез. - Тӥледлы кыл, выль кен. - Нош али вуоно эмеспилэсь юасько: Дась-а тон яратоно нылыдлы оскымон карт луыны? - Нош табере выль кенлэсь юанэ: Дась-а тон яратоно пимуртэдлы ӟеч кышно луыны? - Оскиськом, али тӥ сюлмады кема нуллэм кылъёстэс верады шуыса. Гажано (кузпалъяськисьёслэн нимзы), али ӧтиськом тӥледыз гожтӥськон ӝӧк доры. Валче улон но одӥг фамилия нуллон мылкыддэс кидэс нюртыса юнматэ. Нырысь ик гожтӥське выль кен. - Гажано адӟисьёс! Тӥледлы бадӟым оскон егит кузпалъёслэсь семья кылдытонзэс данъяны. Ми ваньмы юн оскиськом, тӥ котьку соослэн матысь эшъёссы луоды шуыса. Куриськом тӥледыз выль семьялэсь кылдонзэ гожтӥськыса юнматыны. - Нош табере куриськом егитъёсты зундэсъёсын воштӥськыны. Эн вунэтэ, зарни зундэсъёс возьмато тӥлесьтыд куспады люконтэм луондэс. - Гажано егитъёс! Ӟечкылалэ ог-огдэс семья кылдытэменыды. Али семьядылэсь нырысетӥ документсэ, кузпалъяськем сярысь свидетельствоез, сётоз сельсоветлэн тӧроез (нимыз). Тӧролэн ӟечкыланэз. Гожтӥськонэз ортчытӥсь: - Гажано егит кузпалъёс! Али тӥ понна чузъяське нырысетӥез семья вальс. Егитъёс вальс экто. - Гажано (кузпалъёслэн нимзы)! Семья кылдытыса, огдырлы но эн вунэтэ: котькудӥз адями вань улытозяз пунэме кыле анай-атаез азьын. Эн вунэтэ: анай-атайёсты понна тӥ котьку нылпи. Вунэтӥды ке, соосты эмъяны луонтэм вӧсь кароды. Асьтэлэн сабыр улэменыды, умоесь ужъёсыныды гинэ утьыны быгатоды соослэсь сӥлы нимзэс. Нош али куриськом тӥледыз анай-атайёстылы йыбырттыны, утем- вордэмзы, сюлмаськемзы, дышетэмзы, улон сюрес вылэ поттэмзы понна. Гажано (эмеспилэн анай-атайёсызлэн нимзы), выль кендэс нылдэс кадь яратэ, шуг-секытъёс дыръя юрттэлэ солы лякыт кылын, визь-кенешен. Гажано (кенлэн анай-атайёсызлэн нимзы), нош тӥ эмеспидэс гажалэ, со тӥляд семьяяды асьтэлэн пиды кадь мед луоз. Одӥг адями но улытозяз вань малпанзэ быдэстыны уг вуы, дыр. Соин ик, (кузпалъёслэн нимзы), тӥледлы азинтоно мед луоз анай-атайёстылэсь вуттымтэ ужъёссэс. Соос данъяськыса вераны мед быгатозы: "Нылпи уте выжымес, соос бордын улон инъетмы". (Кузпалъёслэн нимзы)! Туннэ нуналысен тӥ карт но кышно. Ортчозы нуналъёс, аръёс, будозы, быдэ вуозы пиналъёсты, нош тӥ котьку луэ егит мылкыдо, эн ыштэ шедьтэм шуддэс. Бадӟым улон сюрес вылтӥ котьку ӵошен вамыштэ. Паськыт но югыт сюрес медло тӥледлы, егит кузпалъёс! - Гажано адӟисьёс, анай-атайёс, куноос! Ӟечкылалэ егит кузпалъёсыз семья кылдытэменызы. Куӟебай Гердлы сӥзьыса Москва, (телефон пыр) 28 январе, вазь ӵукна, Удмуртиысь делегация вуиз Москвае. Отын 80-лэсь ятыр адями. Пӧлазы Петр Елкин, Зоя Богомолова, Олег Поскребышев, Кузьма Куликов но мукет тодмо адямиос. Нуназе вакыт Нациосын ужанъя но федеративной кусыпъёсъя министерствоын пресс-конференция вал. Ӝытазе Куӟебай Гердэз буре ваён ӝыт ортчиз. Со йылпумъяськиз бадӟым концертэн. Отчы пыриськизы Валентина Пудова, Удмурт драмая но "Айкай" театръёсысь артистъёс но мукет усточиос. 29 январе Россиысь Писательёслэн союззы, солэн секретариатэз ортчытоз сӥё-дано кенешсэ. Возьматэмын луоз нылпи киужъёсъя адӟытон но. Та ужрадъёсы озьы ик пырисько Кун Кенешлэн но Правительстволэн кивалтӥсьёссы. А. Шкляев, газетлэн валтӥсь редакторез. Куӟебай Гердлэн вордскемез дырысен - 100 ар Куӟебай Гердлэн вынызлэн пиез, Юрий Чайников, агайзэ адӟылӥз тужгес покчи дыръяз. Со дырысен ӧз вунэты Кузьма Павловичез. Туннэ Юрий Андреевич лыдӟисьёсмес тодматэ тодэ ваёнъёсыныз. КУЗЬМА БЕРТЭ! Та учыр вал 1931-тӥ арын, гужем. Атае вӧлэм куко бадӟым ӝӧк вадьсын сылэ но гожтэт лыдӟе. Со вие шуак пальыштӥз: - Кузьма бертэ! Ӝоген быдэс гурт тодӥз Куӟебай Гердлэн бертэмез сярысь. ... Со арня нунал яркыт шундыё вал. Атае туж тузӥ кельыт валмес выль тарантасэ кыткиз. Сьӧд уробо ныр вадьсын чиляло ыргон питыриос. Уробо черсъёссэ выль тэкитэн зыраз но Вавоже шонтӥз. Вазь ӵукнаысен куашетэ ини трос калыкъем базар. Одӥгъёсыз сӥльын вузкаро, мукетъёсыз - йӧлын, куинетӥосыз ӵекто пулэсь, кулэсь арбериоссэс... Калык нош дыртэ аслыз кулэ вуз бырйыны. Ӟабыль! гинэ верасько удмурт, бигер, чуваш, пор, ӟуч кылъёсын. Вавож базар сярысь со вакытэ удмурт шаерлэн сьӧраз но ӟеч тодо вал. Гуртлэн шораз ик сылӥз куинь этажъем чебер черк. Арня нуналъёсы татчы пырыны ик ӧз луылы. Адямиос вӧсяськылӥзы кенер пушкын ик. Анае-атае ӵап гырлы жугыку вуизы. Нош базар муш палэп кадь гужгетэ ни. Буби валзэ юри тупатэм юбо борды думиз, сезьы сётӥз. Кузпалызлы шуиз: - Пук ай татын, Дарья: мон Кузьмаез утчало. Вераны гинэ капчи: сомында адями пӧлысь шедьтод меда агайдэ? Турын зуродысь венез музэн утчалод ук. Мырдэм вуиз Андрей Павлович вадесаз. Со вие ӵапак кылӥз кесяськем куараосты: - Куӟебай! Куӟебай! Герд! Люкаськем калык сётӥськиз сиськон юрт пала. Сомында мурт пушкын туж люкыт луиз: котькуд паласен шымырто. Соку атае кужмо пельпумъёсыныз но гырпумъёсыныз "ужаны кутскиз". Утыр ачиз но вазьылыны ӧдъяз: - Кузьма, Кузьма, Кузьма агае! Бубилэн тазьы дауртэмез куд-огзлы ӧз яра: - Кыӵе агай? Ваньмы асьмеос агаен-вын. - Кыӵе Кузьма? Куӟебай Герд! Визьлюк ук со! Сое но уд тодӥськы шат?! - Пельдӥняз одӥген сёт ай, Ванька! Соку тодоз. - Шедьтэм Кузьмаез! Кутэлэ сое! Со куспын дэремезлэн паллян саесэз борды кин ке кырмиськиз но кесиз. Ярам ай, вурысэз гинэ ӟезиськиз. - Эх, тӥ, лэсянтэмъёс, выль дэремме арам кариды ук,- лулӟылэ атае. Люкаськем калык со вие кинэ ке ӝутъя ини. Нош ик кесясько: - Куӟебай! Куӟебай! Ки вылазы ик ӝутыса пыртӥзы сиськон юртэ. - Калленгес, калленгес, эшъёс! Куӟебай Герд уг ваньмы. Андрей Павлович люкаськем калык пӧлысь чылкак катьтэммыса, нюласа, кесиськем саессэ кутыса потӥз. Ярам ай: вань Чайниковъёс кужмоесь - ӧз лябӟы. Огназ лыктӥсь атайме адӟыса, анае чылкак чабкиськиз: - Ӧд шедьты шат Кузьмаез? - Ассэ адӟыны ӧз кылды - ботинкаосыз гинэ син азьтӥм чилектӥзы. Витьыса ум пуке ни - бертом. Огназ уз лу агае - эшъёсыныз вуоз. - Бертом, иське. Маке но дасяно луоз: пельнянь кутоно-а, мар-а... Тани капчи тарантас "гылӟе" ини Эмезьгуртлэн вож ульчаетӥз. Кесиськем саесо дэремен атае уробо нырын пуке. Гуртысь воргоронъёс сое капка азьысен ик пумитало: - Кинэн ке жугиськид шат, Ондрей? Кышномуртъёс мычиськизы усьтэм укноосазы: - Кузьма ӧз вуы шат? - Бертоз ай, бертоз,- вазьылэ буби. Ӝыт пал, зэмзэ ик, Куӟебай Герд кузпалэныз, Надежда Антоновнаен, но этнографияя экспедицие потэм эшъёсыныз ӵош вуиз. Бер ӝытозь ӧз чалмылы коркамы вадьсын. Котькин шумпотӥз Куӟебайлэн вуэмезлы. Солэн Эмезьгуртэ котькуд бертэмез бӧлякъёсыз понна бадӟым учыр луэ вал. Берпуметӥзэ... Та палась удмуртъёслэсь улэм-вылэмзэс тодыны-валаны лыктэмъёс ӝоген кошкизы. Куӟебай Герд берпуметӥ нуналъёсаз ас семьяез пушкын шутэтскыны, люкиськонэз азьын дуно адямиосызлы кӧня ке визь-кенеш сётыны малпаз. Одӥгаз шундыё нуналэ васькимы Вало шур дурысь возь вылэ. Турнан вакыт быремын ни вал. Котькытын зуродъёс сыло. Табере, иське, котькытӥ тузон поттыса бызьылыны луоз - нокин уз алы. Турнаны кутскемлэсь азьвыл кужен сюресъёс кузя гинэ ветлыны яра вал. Тулыс тудву улэ шедьылӥсь Вало возьёс ӟеч пудо сиён сётылӥзы. Куд-ог аръёсы нош турын кускин ӵож яке солэсь но кузь луылӥз. Гурт калык туж шумпотылӥз. Нош турнаны потон вакытэз котькудӥз витьылӥз. Соку угось тужгес ӟеч дӥсьсэс дӥсяллязы. Ми но, покчиос, мӧйыос сьӧры калъяськылӥмы. Валоын пыласькылӥмы. Одӥг пуртыысь сиськылӥмы. Ӝытлань доре ӧм берталэ ни - тылысъёсын кӧлаллямы. Котькудӥз ужзэ тодылӥз. Дас - дас кык аресъем пиналъёс, вал вылэ пуксьыса, турын бӧмъёсты нуллылӥзы. Арлыдо воргоронъёс беризь саюлын мажесъёсты, кусоосты тупатъяллязы. Мӧйы кенакъёс бадӟым пуртыосын сиён пӧзьтылӥзы. Та учыр пӧсьтолэзе вал. Огпол Вало дуре васькимы но дугдӥмы ву омыръян вадьсы. Таиз инты тужгес мурез но тужгес ӟечез. Дас вамыш азьлань, дас вамыш берлань лэсьтӥмы. Соку ик одӥг кылэ вуимы: вань тӥрлыкъёсмес огинэ тыриськом но тылскемлы пу люканы кутскиськом. Ваньмы дас кузя вал: Кузьма агае, анае-атае, Марк агае но мон, Иван Семенович (Кузьма Павловичлэн бадӟым агаезлэн пиез), солэн кузпалыз, Мария Никитична, кияз Витя нимо вожнуныеныз, Дуня но Тамара нылъёссы. Эшшо Нерон пунымы (Роза сузэрмес песятаймы доры кельтӥмы: солы ай чылкак кык арес гинэ вал). Атае кык ӵог жугиз но, тылскыны кутским. - Ву пуктоно ни,- ӵектӥз Иван Семёнович. Нош ачиз Марк агаеным, сьӧразы бадӟым котомка но визнан ньӧръёс кутыса, чорыганы кошкизы. Со вие тылскизы, ву пуктӥзы. Картошка, сугон тазатӥзы. Мон Неронэн шудыны кошки. Бодыосме куясько но, пуны соосыз выльысь мыным вае. Огпол шальыме вуэ сэрпалтӥ. Нерон тае адӟиз но меӵ ярдурысен пырак шуре тэтчиз. Кӧня ке дыр ортчыса, чорыгасьёс но бертӥзы. - Маке укыр чаляк? Нош кытын чорыгды? - юа Кузьма агае. - Чорыг ӧвӧл: али шутэтске со. Курике шедемез уг поты,- пальпотыса маскаръяське Иван Семенович. Ачиз со куспын котомкаысьтыз кӧня ке чипей но юш поттӥз. Чипейёс бадӟым ымъёссэс усьязы но адямиос шоры вожпотыса ӵуж синъёссэс берыкъяса учкылӥзы. Марк агаелэн верамъёсызъя, Иван Семенович визнан ньӧреныз куриксэ вуэ туж капчиен куштылӥз но быгатыса нуллӥз соосты пӧртэм турын-куаръёс но кыпыос пӧлтӥ. Тани пукы шуак вые. Визнан ньӧр буко выллем куасалтӥське но, бадӟым чипей, мозмытскыны турттыса, я сопала, я та пала шоналтӥське. - Таӵе бадӟым шедьтостэ келяны уг яра,- алэ Иван Семенович. Ачиз со вие лесказэ ялан золтыса возе. Визнан ньӧр кузя каллен лыктыса, леска доры вуэ но чипеез ярдуре кыске. Тани адӟисько ини чорыглэн бадӟым ымыз, лэчыт пиньёсыз но ӵуж синъёсыз. Нош чипей берпум кужымзэ люкаса мозмытскыны турттэ. Кылиз на эшшо кӧня ке гинэ чиданы. Тани Иван Семенович берпуметӥзэ зуркак кыске но - чорыг ини ярдурын. - Вай ай котомкамес, Марк,- вазиське агаелы. Чипей со куспын ик мешок пушкы зыме. Эшшо кӧня ке юш но чипейпиосты кутэмез бере, Иван Семенович шуиз: - Чорыг лымлы тырмоз. Чорыг лым, зэм но, туж ӟеч, кылдэ ньылымон пӧрмиз. Ваньмыз ушъяса сиизы. Куӟебай одӥг пол но ӧз пальпоты: мӧйыос утыр ик юртъер сярысь но кенешыны вуиллям ини. - Вань тӥрлыктэс - кутсаськон машинадэс, аран машинадэс, турнан машинадэс, тӧлӥськондэс, тарантастэс, вал дӧдьыдэс, кошовкадэс - колхозэ сётэ! - шуиз Кузьма агае. - Эн жалялэ: сотэк но талалозы. Ондрушлы но, Николайлы но школаын ужано луоз. Коркадэс уз йӧтылэ. Мед сылоз ай. Отӥяз тодмо луоз. Мӧйыослэн вераськемзы мыным чылкак валантэм вал. Кызьы озьы ваньзэ талалозы? Ма со колхоз?.. ... Возь вылын ми соку быдэс нунал, бер ӝытозь вал. Куӟебай паймылӥз солэн чеберезлы. Лулӟылыса кылаз-бураз: - Такем усто интыос нокытын но ӧвӧл ни, дыр. Тани сылӥськом ми туж ӝужыт, кужмо сирпу вӧзын. Бур палан, беризь нюлэс вадьсын, турнан машинаос. Вало соку трос вуо, пачыл бызись шур вал. Кузяз - ӵыпетъёс, вукоос. Вуэз чылкыт, чильпырась. Луоё ярдуръёсаз эзылало чорыгпиос. Пиналъёс соосты киынызы кутылӥзы. Яке ярдур вадьсы пичиесь гуос гудӟылӥзы но, чорыгпиос отчы асьсэос вуэн ӵош уяса лыктылӥзы. Али Вало лазег. Вуэз но ӝог кошке. Вукоос куашкатэмын. Чорыгез но ӧвӧл ни. Кыӵак быдтэмын тулыс тудву улэ шедьылӥсь возьёс. Писпуос корамын. Вань чеберлык огшокчемен ышиз кадь. Возь вылысь бер бертӥмы. Тэльын но пеймыт ни вал. Мон кӧшкеманы кутски. Соку атае китӥм кутӥз. Доре жадьыса вуим. Нош кӧня тодэ ваён кылиз!.. Куӟебаен ӵукна люкиським. Агаймес келян вылысь, ӵужатае тарантасэн вуиз. Гурт калык нош кусып дорозь мынӥз. Ӵыжы-выжыосыз пыдын вамыштӥзы Эмезьгуртмылы ӝыны иськемын сылӥсь ӝужыт кыз дорозь. Та инты огшоры ӧй вал: ӝужыт кыз дорысен люкиськылӥзы куноосынызы, армие кошкись егитъёсын. Кузьма агай ваньзэс ӟыгыртӥз, чуп кариз, синвуаськыса шуд но ӟеч мылкыд сӥзиз. Ваньмыз викышъязы... Тани агае тарантасэ пуксиз ни. Ӵужатае, Лукоян Афиногенович, валэзлы вазиз: - Но-о!.. Кошким... Куӟебай кема шоназ тӧдьы кышетэн. - Малы бӧрдэ со? - юаз анае.- Азьвыл люкиськылыкуз ноку ӧз синвуаськылы ук. Кыӵе адӟон вите меда тонэ, мусокае?... Берпуметӥ уйзэ Ондрей но Кузьма корказьын кӧлӥзы. Зэмзэ вераса, ӧз изе, дыр. Ӵукнаозь кенешизы, луоз. Атае ортчем учыръёсты тодаз вайыны ӧз яратылы. Нош берпуметӥ уй сярысь вераз: - Кузьма шуиз: вуоз сыӵе дыр - удмурт калык сое уз вунэты. Таяз учыре Герд дор палъёсаз берпуметӥзэ вуылӥз. Секыт адӟон Чайниковъёс кылдытӥзы музъем ужъёсты валче быдэсъянъя нырысетӥ эштос. Семенлэн, Николайлэн но Ондрейлэн юртъёссы Эмезьгуртлэн бур палаз интыяськемын вал. Герд юрттӥз агайёсызлы но вынызлы котькыӵе ужан тӥрлык - тӧлӥськон, аран машина, турнан машина, кутсаськон машина - басьтыны. Агайёсыз но выныз лулысь-сюлмысь басьтӥськизы уж борды. Герд сэрттылӥз-пертчылӥз вань сюлэмшуго ужпумъёсты. Агайёсыз но выныз чик пумитъяськытэк кылзӥськылӥзы солэсь. Кузьма агае тужгес яратылӥз покчи вынзэ, Ондреез. Валче пуктӥзы юрт. Кузьма Павлович ик атаелы тодон-валан басьтыны, дышетскыны юрттӥз... ... Куамынэтӥ аръёслэн пумазы колхозъёс кылдылыны кутскизы. Берпуметӥзэ бертылыкуз, агае весь вань тӥрлыкмес колхозэ сётыны дэмлаз. Нош соиз, "тау карыса", бакча сиёнлы шуыса, пичи гинэ музъем висъяз. Атаелэн бадӟым агаезлэсь пизэ, Иван Семенович Чайниковез, пытсамзы бере, семьяез Эмезьгуртэ улыны выжиз. Со кесэгез анае кык куаэслы люкиз. Ачиз Семен Павлович кулаке поттэмын вал. Атае эшшо дышетӥсьын ужаны турттылӥз: арзэ дышетӥз Рябовоысь сизьым аръем школаын, арзэ - Ӝыжолгуртын, арзэ - Ӝужгесын. Собере ик Иван Семенович но пытсэт улысь мозмиз. Отӥяз удмурт шаерамы улыны ӧз ни кылды: ялан эскерыса возизы. Дорамы ӵем вуылӥз Гурезь-Пудгалась адями Даниил Тарасович Щёткин. Берпуметӥзэ кожаз 1-тӥ Май пумын. Атаеным кема кенешизы бакчаямы, льӧмпумы улын. Кошкемез бере буби но Иван Семенович дыртыса дасяськыны кутскизы кузь сюрес вылэ. Соку ик тодӥ: Даниил Тарасович вордӥськонозь быдэсмыны косэм. Эшшо ивортэм: - Вордӥськонозь кошкыса ӧд вуэ ке, куиньнамес ик пуктозы. Пичи но ӧд ӝегалэ ке, мон дорады уг ветлы ни. Кӧня ке коньдон люкаса, дасям тӥрлыкъёссэс кутӥзы но Кыдёкысь Ӵук пала вырӟизы. Иван Семенович Зея шур дурын чорыгаса улӥз, атае чорыген вузкарылӥз. Собере шур кузя зарни утчасьёс дӥне но тубазы. Кема курадӟемзы но кынмаса секыт висемзы бере, школае ужаны интыяськизы: буби - Зея шур дуре, Иван Семенович - Серышевск ёросысь Ново-Охочье гуртэ. 1936-тӥ арын, июнь толэзе, кошкимы ми но. Милемын ӵош - киязы вож нуныосын нылкышноос. Шудмес утчаса кема ветлӥмы Сибиретӥ, Зея но Обь шуръёс кузя. Быдӟым тылож бере гинэ атае удмурт шаере берытскиз. Иван Семеновичлэн семьяез Ӵук пала ик кылиз. Евдокия нылыз, Виталий но Юрий пиосыз уло Комсомольск-на-Амуре городын. Тамара анаеныз выжиз Анжеро-Судженске. Иван Семенович ватэмын Амур улосысь Ново-Охочье гуртын. Николай Павлович - Красноярск крайын, Семен Павлович - Вавожын, Андрей Павлович - Ижевскын. ... Секыт адӟон вань Чайниковъёсыз турказ, оглом быдэс Россие пазяз... ... Нош Куӟебай Герд уз вуны... Журналистъёсын пумиськонъёс КЫӴЕ ЛУОЗ ВЫЛЬ БЮДЖЕТ? Туэлы бюджет вуттэмын но Кун Кенеше сётэмын. Али сое депутатъёс эскеро. Кыӵе бен со луоз, кызьы улом туэ, ялан-а бюджетын коньдон уз тырмы? Со но мукет ужпумъёс сярысь пресс-конференциын журналистъёслы ивортӥз республикаысьтымы коньдон ужпумъёсъя министр Владимир БЕЛЬТЮКОВ. - Быдэс элькунъя миымлы бюджет, валля арен ӵошатыса, 112,5 процентлы тырмытэмын,- шуиз Владимир Васильевич.- Отчы пыртэмын районъёслэн но городъёслэн бюджетъёссы. Со консолидированной шуыса нимаське. Ортчем арын бюджет кутэмын вал бадӟым дефицитэн. Озьы ке но, кредитъя тыронъёсмы ӧз будэ. Секыт вал, но вексельёсты но уже кутӥм. Нылпиос понна 1994-тӥ - 1995-тӥ аръёслы тыронъёсмы быдтэмын, нош Иж карлэн валля арлы 11 миллион манет кылемын. Сое шори люкыны кенешим: ӝынызэ элькун сётоз, кылемзэ - город. Умойтэмез тани мар: ӝыныез пала бюджет быдэстэмын пунэм тыронъёсты пытсам чотын, яке улэп коньдонэз адӟылытэк. Туэ но та амалэз кутытэк ум быгатэ. Озьы ӝог азинтоно удысъёслы уксё висъяны луонлыкъёс сюбегало. Тани Россия миым республикалы сётыны кулэ вал 790 миллион манет (трансфертъёс), нош вуиз 450 миллион манет. Республикая чаклам мында доход басьтэмын ке, федеральной бюджетысь улон юртъёсты но соцкультбытэз интыослы сётыны 90 миллион манет коньдон ӧз вуы. Тӥни озьы огез вылэ огез ватсаське но, шуг-секытъёс кылдо. Нош мукет ласянь, вань районъёс но городъёс доход басьтонъя планъёссэс уг быдэсъяло. Со люкетэ интыосын бюджетникъёслы дыраз уждун тырыны. Али бюджетэ ичи уксё вуэ. Мугез тодмо: предприятиос 12 январе гинэ ужаны кутскизы. Туэлы бюджет кылем арынэзлэсь маин ке висъяське-а? Одно ик. Миым сярысь продукция поттон будыны но бюджетэ 20 процентлы уногес уксё пырыны кулэ.Нош Москва ласянь юрттэт туж ӧжыт чаклаське. Кылсярысь, трансфертъёс - 142 миллион, нош улон юртъёсты но соцкультбытэз интыослы сётонъя - 627 миллион манет гинэ. Туэ юрттэт (дотация) басьтӥсьтэм районъёслы но городъёслы (Иж кар, Глазов, Як.- Бодья, Игра, Каракулино, Сарапул, Шаркан районъёс) нормативъёс воштэмын. Со лэсьтэмын, туэ му вӧй поттон уз кулэсмы шуыса. Озьы ик чаклаське тросгес дуно бумагаос но вексельёс поттон. Министерство кыл сётэ республикае заёмъя облигациосты вуттыны. Бюджетэ акцизъёс чотын уногес уксё пыртыны кулэ "Ижмаш-Авто". Со сяна, вань на умоесь проектъёс, кудъёслы кунгож сьӧрысь фирмаослэсь уксё (инвестициос) вуыны кулэ. Огъя вераса, бюджетлы инъетын али 600 миллион манет ёрос коньдон уг тырмы. Со быдӟа дефицит учкемын. Кун Кенешын эскерем бере кӧня со кылёз - али шуг вераны. Ведь депутатъёс доход люкетсэ будэтыны амалъёс уг ӵекто, нош расходзэ ялан йылэтыны выро. Соослэсь вань куронъёссэс лыдэ басьтысал ке, куинь сыӵе бюджет дасяно луысал. Коньдон уг ке но тырмы, Правительство туэ но пусъе улон интылы льготной кредит сётъяны. Люкаськемъёс министрлы трос юанъёс сётъязы. Соос герӟаськемын вал кызьы ке уждунлы висъям коньдонэз интыяз кутонэн, озьы ик малы ОНЭКСИМ Банклэсь кредит басьтонэн но мукет ужпумъёсын. Бен, юнме шорысь сыӵе вераськон уг ӝутскы. Тани районъёслы но городъёслы уждунлы ыстэм уксё пӧлысь кӧняез ке мукет азе кутэмын вал. Со трос ӧвӧл ке но, сыӵе учыръёс пумиськыло ай. Бюджетлы инъет Кун Кенешлэн сессияз эскеремын луоз феврале гинэ. Г. РОМАНОВ. Журналистъёсын пумиськонъёс Ӟеч ужъёс сюрес уг шедьто Дышем сямзыя ини Кун Кенешысь депутатъёслэн-коммунистъёслэн фракцизы котькуд сессия ортчем бере журналистъёсын пумиськылэ. Таяз учыре депутатъёс А. Бегунов, А. Горохов но Ю. Семенов валэктыны тыршизы, мар лэсьтӥське коммунистъёслэн кужыменызы калыклэсь кулэяськонъёссэ быдэстон понна. Кун Кенешысь вань депутатъёс валало: калыклэн улонэз начарме. Но малы ке огез фракция но калыклы дурбасьтон понна сессия дыръямеӵак куронъёсын уг потылы, шуиз Ю. Семенов. Дас куатетӥ сессия азе депутатъёс- коммунистъёс куинь куронъёсын вазиськылӥзы. Соос герӟаськемын эмъюмъёслы льготаос тупатонэн, эстӥськонлы, электротыллы тарифъёсты кулэстонэн но жилищно-коммунальной хозяйствоын чаклам реформаосты дугдытонэн. Вань та ужпумъёсты коммунистъёслэн фракцизы быдэс ар ӵоже чакласа- эскерыса возе ини. Нош вань-а кыӵе ке пайдаез? Тазьы учконо ке, зэмзэ но, эмъюмъёс озьы ик ваньмызлы азьвыл тупатэм дунъёсын вузасько, эстӥськонлэн но дунъёсыз воштӥськымтэ. Но мукет ласянь ке учконо, та ужпумъёс кызьы но озьы сэрттӥськыны кутскизы. Кылсярысь, эмъюм вузан удыс али сак эскериське, куд-ог тырмымтэос но шараямын ни. Жилищно-коммунальной удысын ортчытоно реформаос сярысь ке верано, депутатъёс-коммунистъёс куро солэсь пуштроссэ газетъёсын печатланы, ЖКХ-ын воштӥськонъёсты кӧня ке дырлы коть ӝегатыны Кун Кенеш та куронэз умоен лыдъяз но со сярысь нимысьтыз решение кутӥз. Президентлы вазиськон ыстэмын. Но кызьы шуиз А. Бегунов, асьме Правительство та куронъёсты кулэен уг лыдъя, лэся. Республикамылэн Правительствоез уг тыршы быдэстыны мукет куронъёсты но, шуиз мукетыз депутат- коммунист А. Горохов. Промышленностьмес секыт югдурысь поттонъя олокыӵе но ӟеч ӵектонъёс вал, кылсярысь, "Ижмашъя" малпамын вал автомобильёсты вузанэз кредит амалэн радъяны. Та уж ӧз пӧрмы. Али тани Ижевскысь автозаводын Южной Кореяысь "Хёндэ" фирма ас машинаоссэ бичаны кутскиз. Та пумысен юанъёс данак. Озьы ужаса, республикамы уз-а ышты аслэсьтыз тусбуйзэ? "Орбита" машинамес со рынокысь уз палэнты-а? Шедёзы-а дуно "Хёндэ" автомобилез (12-13 сюрс даллар) басьтӥсьёс? Коммунистъёслэн фракциязы пырись депутатъёс малпанъёссэс веразы Удмуртилэн Конституцияз ватсанъёс пыртон пумысен но. Соос кулэ республикаямы Президентлэсь постсэ юнматон понна гинэ, шуиз Ю. Семенов. Нош калыклэн улонэз соин сэрен гинэ уз воштӥськы. Правительствомылэн 1997 арын ужамезлы депутатъёс-коммунистъёс "урод" дунъетсёто. Тае дунъетмес пыр-поч валэктыны быгатомы Правительстволэн данак быдэстымтэ ужпумъёсыз вылын, шуизы соос. Озьы бере, паймоно шат малы депутатъёслы ӟеч кутсконъёссэс улонэ пыӵатон понна, ар ӵоже нюръяськоно луэ. Т. БАННИКОВА. Наталь НЕБЫТ ВАЗЕМ НО ЮРТТЭ Шуге-леке сюрем семьяосты, песянайёсты но песятайёсты, сӧсыръёсты сюлэм висёнъёссы ӵемысь вутто ёросъёсысьтызы Калыкез улон-вылонын утёнъя центръёсы. Кыӵе ке но юрттэт сётэм сяна, макем кулэ та адямиослы шуныт кыл, соосты валам. Галина Рябова ужа Ижевскысь Устинов ёросысь центрын, со калыкез шугадӟонлэсь утёнъя отделлэн кивалтӥсезлэн юрттӥсез. Кыӵе гинэ юанъёсын уг вазисько, егит специалист ваньзэс кылзоз, визь-кенеш сётоз, небыт кылын буйгатоз. Туспуктэмез В. КАМАШЕВЛЭН. Наталь Лэчыт ужпум НЫЛПИОСМЕ СЮРАТАЙЛЫ УГ ОСКЫ Маша уг тоды атайзэ, анаез соин нылаш вордӥськем бере ик люкиськем. Кӧня ке улыса, нош ик бызиз. Озьы Машалэн сюратаез луиз. Нылаш ӧз яраты сое, палэнтӥськылӥз. - Пиослы, оло, капчигес та ласянь,- шуэ Маша,- нош нылъёслы... Туж ӵемысь озьы луэ, ныл быдэ вуыны кутске но, "атаез" кышномурт шоры кадь учкыны кутске, бордаз мерске, ултӥя. Монэн но озьы ик вал. Кӧня пол дорысь пегай, мае но ӧй чида. Та сярысь анаелы вералляй, но со ӧз оскылы, асме ик уродэ уськытъялляз. Тон, пе, ачид янгыш, астэ озьы возиськод, дыр. Уг валаськы, кызьы анай нылыз сярысь сыӵе алама малпаны быгатоз. Оскисько, мынам но азьланяз вордӥськозы нылпиосы. Но луоз-а соослэн атайзы, уз-а? Нош ӧз ке, мон одӥгнам будэто нылпиосме, уг сёты сюратайлы ултӥяны. Машаез валаны луэ. Но солэн верамезъя гинэ ваньзэ ик сюратайёсты сьӧдманы кулэ ӧвӧл, дыр. Ӧжыт-а сыӵе воргоронъёс, кудъёсыз мурт нылпилы зэмос атайзэс воштыны быгатӥзы. Соос сярысь тросгес вераны но, гожъяны но кулэ. Нош кин берыктоз воргоронъёслы осконзэ Машалы? Ассэ шараяны нылаш ӧз лэзьы. Л. БАКАЕВА, Удмурт кун университетысь студентка. Редакцилэсь. Та гожтэт лыдӟисьёсмылэсь сюлэмзэс бугыртытэк уз кельшы, малпаськом. Оло, кин ке но Машалы шуныт кылзэ вералоз, визь-кенеш сётоз, аслаз шуг-секытъёсыз сярысь вералоз. Нош ӧжыт-а, вылды, вӧзамы ик мурт нылпилы зэмос анай яке атай луэм нылкышноос но воргоронъёс? Л. Бакаевалэсь гожтэтсэ печатласа, "Наталь" лыдӟисьёссэ ӧте сюранайёс но сюратайёс сярысь вераськонэ пыриськыны. Тӥляд гожтэтъёсты, оло, кинэ ке но кырсь вамышъёслэсь алозы, анайёслы сакгес кариськыны но нылпиоссылы матэгес луыны юрттозы, сюранайлэсь но сюратайлэсь ӟеч нимзэс утёзы. Медаз кысы вылэм нылпиосмылэн умоезлы осконзы. Удмуртитэк ӧвӧл Россия но Толшор толэзьлэн шораз Ижевскамы ортчизы туж бадӟымесь ужрадъёс. Пӧртэм улосъёсысь эшъёсмес люкаса, дэмен пусйимы удмурт калыклэн дано пиезлэн Куӟебай Гердлэн вордскемез дырысен 100 ар тырмонэз. Собере Россиысь но данак улосъёсысь тодосчиос, кивалтӥсьёс, министръёс, депутатъёс кык нунал ӵоже котыр ласянь, рос-прос эскеризы Россия Федерациын национальной политикая концепциез быдэсъянэн герӟаськем ужпумъёсты, та ласянь интыосын люкам опытэз. Конференциез радъязы Россия Федерациысь Пӧртэм калыкъёслэн ужъёссыя но федерациын кусыпъёсъя министерство, Удмурт Республикаысь Кун Кенеш но Кивалтэт. Тон герӟад милемыз Огломак ке басьтоно, кыкез ик та ужрадъёс ӟеч ортчизы, пайдаё вал. Юбилей но, конференция но выльысь возьматӥзы, макем мур но кужмо асьмелэн удмуртлыкмы, макем уно эшъёсмы. Жаль, финн-угор выжыысь калыкъёслэн нылпиоссы малы ке праздникамы ӧй вал, шуыны луоз. Мон малпасько вал, Куӟебай Гердлэсь сю арессэ пусйыны Финляндиысь но, Эстониысь но, музон кунъёсысь но вылӥ куноос лыктозы шуыса. Юбилей нуналъёс, меӵак верасько, асьмелы К. Герд котыре огазеяськыны выль кужым сётӥзы. Ивортонъёс но, концерт но мур пуштросъемесь пӧрмиллям. Сцена вылэ, калык азе потазы К. Гердэз, ас вакытаз уно азьмынӥсьёсмес быдтӥсь И. Сталинэз шудӥсь артистъёс. Быдэс мугор юзыр- кезьыр луиз, залэ пыронлэн паллян палысьтыз бышкись езэз, кечат-вамат кортъёсын дурем укноез адӟыса. Отын ик - ыбыны дасям камераын, гу кадь пеймыт, кезьыт комнатаын пурысьтаны ӧдъям, жуммем, ас калыкезлэсь, чебер шаерезлэсь мӧзмись Куӟебай Гердлэн тусбуез. Дано пимес суредам Семен Виноградов. Мынам туж но туж тодэме потэ, кыӵе малпанъёсын, кыӵе кылъёсын К. Герд вамыштӥз меда пуля пумитэ? Чигиськытэк, йырзэ вылэ ӝутыса учкиз, дыр, со палачлэн синъёсаз. Оло, нош ас понназ ӧпкелиз но, пыкылӥз но удмурт калыксэ сое утьымтэмы, дурбасьтымтэмы понна. Юбилеен валче асьме драматургъёс кылдытӥзы, лэся, кӧня ке выль пьесаос. Уго нимысьтыз конкурс ялэмын вал. Кудӥзлы ке но авторлы шуд усёз, дыр ай, писательлэсь, дышетӥсьлэсь, фольклористлэсь, гожъямъёсты удмурт кылэ берыктӥсьлэсь тусбуйзэ, сюлэмзэ, бугыръяськись пӧсь мылкыдзэ сцена вылысен возьматыны. Мур оскисько. Витисько. Нош 14 январе Операя но балетъя театрын возьматэм ӝытлэн, мон сямен, кык пичи шекез вал ик. Малы ке отын воксё ӧз чузъяське кадь удмурт кылын Куӟебай Гердлэн аслаз кылбуръёсыз. Шонерзэ вераса, ӝожомымон ичи чузъяськизы. Малы? Кудъёссэ бырйыны ёрмизы-а, оло, вужмемын потӥзы-а? Докладчикъёс ӧз поттылэ Гердлэн семьяез - кузпалыз, нылыз но музон матысь ӵыжы-выжыосыз сярысь, ӧз ивортэ, макем курадӟоно луиз соослы. Куӟебай Герд. Кӧня муртъёслэн тонэ ӟечгес тодэмзы потэ али но! Улэп ке луысалыд, мар верасал тон ас калыкедлы? Кыӵе кылъёсын вазиськысал? Удмуртлыкмес утьыны, уката кужмоятыны, муромытыны ӧтьысалыд, дыр, одно ик. Соин но, вылды, театрын та нуналэ туж трос вал пӧртэм ёросъёсысь удмуртъёслэн огазеяськонъёсазы пыриськемъёс. Соослы тон котькудӥзлы бадӟым кужым шокчид, зэмос герд сямен, ваньзэс юн герӟад, зарни шундыеныд югдытӥд, ӵуказе нуналмылы оскон пыӵатӥд. Коньдонтэк номыр уз пӧрмы Ӵапак Куӟебай Герд ик, мон сямен, луонлык усьтӥз асьме дорын быдэс Россиысь пӧртэм калыкъёслэсь улон-вылонзэс, кусыпъёссэс ӟечгес радъянъя бадӟым конференция ортчытыны. Отын нырысь ик доклад лэсьтӥз Россия Федерациын пӧртэм калыкъёслэн ужъёссыя но кусыпъёссыя министр В. А. Михайлов. Умой вераськиз со. Ас удысъёссэ ӟеч тодэ, шуысал, сюлэмшугъяськонъёсмес, секыт югдурын улэммес вала кадь, санэ басьтыны тырше. Ведомствозэс юн пыкылон учыръёсыз но Вячеслав Александрович шонерен лыдъя. Коньдон тырмымтэен, кытӥяз уго министерстволэн усто чаклам ужрадъёсыз но быдэсмытэк кыльыло. Люкаськемъёсты министр шумпоттӥз вал, Россиын национальной политикалэсь инъетсэ быдэсъяны табере бюджетысь нимысьтыз коньдон висъяны чакламын шуыса. Кун Дума, пе, куинь ар ӵоже нюръяськем бере, алигес огкылысь юнматӥз со лыдпусэз. Бадӟым странаямы улӥсь пӧртэм калыкъёслэсь нырысетӥ кулэяськонъёссэс быдэсъяны коньдон висъян государстволы шӧдскымон дунтэмгес усьысал, пусйиз министр, соку угось ыбылӥськонъёс, бомбаос пуштылонъёс чалмысалзы... Но... шумпотыны вазь на вылэм. Мукетыз докладчик ивортӥз, Федерацилэн Советэз Думалэсь пуктэмзэ юнматыны соглаш ӧз луы шуыса. Москва тӥни нош ик "юн мылкыдзэ" возьматӥз. Но кызьы, мар сямен чик дунтэк, коньдонтэк быдэсъялод национальной политикаез? Паймоно. Абдрано. Вячеслав Александрович трос улосъёсысь ӟеч опытэз усьтӥз. 25 республикаосын, улосъёсын та министерство огкылъёс гожтэм ни. Пумен кужмояло пӧртэм калыкъёслэн культуразыя огазеяськонъёс, ичи лыдъем калыкъёслэн культурной автономиоссы. Министр сюлэмшугъёссэ, малпанъёссэ вераз ичи лыдъем калыкъёслэсь нылпиоссэс ас кылынызы дышетонэз, книгаос, газетъёс, журналъёс поттонэз умоятон, кадръёс дасянэз кужмоятон сярысь. Трибуна сьӧры потамъёсты тодэ ваёно ке, тужгес но кема, кытӥяз воксё кизертыса вераськиз Россиысь наукаосъя академилэн Этнологияя но антропологияя институтэзлэн кивалтӥсез, история наукая доктор, профессор В. А. Тишков. Пӧртэм ужпумъёсты сэрттэм-пертчемен нялтас со Куӟебай Гердмылэсь но нимзэ поттылӥз. Учёнойлы малы ке сюлмаз туж лякиськымтэ, лэся, писательмылэн удмурт кыл сярысь одӥг ужез. Со статья, пе, - кызь куинь аресъем егит адямилэн йыромылонъёсыз. Трос пумо кылъёсты тодӥсь мурт гинэ, пе, зэмос адями луэ, уката ик туала вакытэ. Ма, кин ке пумит шат сыӵе веранлы, валанлы. Куӟебай Герд ачиз но сизьым-а, мар-а кылъёсты ӟеч тодэ вал. Нош анай кылзэ котьку вылӥ дунъялляз, мур сюлмаз возиз. Нырысь ӟеч тод анай кылдэ, собере дышетскы мукетъёсызлы. К. Герд анай кылызлэсь ке куштӥськысал, быгатысал-а сомында повестьёс, пьесаос, кылбуръёс но музонзэ гожтыны? Ӝутскысал-а сокем вылӥе? Ушъям интые, озьы тӥни В. А. Тишков чик юнме шорысь сантэмам, быдтэм муртлы нош ик "йӧттӥз" на. Ярам коть, кунокуаослэсь мылкыдзэс чакласьтэм, санэ басьтыны вунэтэм муртлы туж каньылэн гинэ пезьдыт сётӥз тодосчимы Ангелина Крылова. Музонъёсыныз ӵошатыса, мыным тужгес но яраз Татарстанысь Президентлэн государственной советникезлэн Р. С. Хакимовлэн вераськемез. Со валэктӥз, кызьы Россилэн интересъёсыз ньӧм улсын бадӟым кунамы кузёясько 8-10 тужгес кужмоесь банкъёс. Соос узырлыкъёсмес качало но ӝоггес келяны туртто кунгож сьӧры. Президентлэн визь-кенеш сётӥсез политика удысысь но тырмымтэосты шараяз. Улӥынъёс шоры Москва котьку вылӥысен учкылэ, пусйиз со. Али но империя амалъёсын кивалтыны выре на. Россилэн законъёсызлы тупасьтэм но интыослэсь интересъёссэс утись законопроектъёсыз котьку палэнтэ. Аслэсьтыз законъёссэ пӧртэм улосъёслэн, республикаослэн куремзыя ноку но ӧз тупатъя на... Кенешонын туж лэчытэсь, кулэесь ужпумъёсты ӝутӥзы "Удмурт кенеш" огазеяськонлэн тӧроез В. К. Тубылов, Наукаосъя Академилэн историяя, кылъя но литературая удмурт институтэзлэн кивалтӥсез К. И. Куликов, профессор К. А. Пономарев но мукетъёсыз. КИРИЛЛ ЛОМАГИН. 02 Сутка ӵоже МВД-лэн оперативной сводкаосызъя, республикая сутка ӵоже 40-100 йыруж лэсьтон но йыртэман учыръёс пумиськыло. 02 телефон тужгес но зол ӟырда шутэтскон нуналъёсы. Басьтом кылем субботаез, арняез гинэ. Шаермыя пусъемын 100 преступление. Со пӧлысь 66-сэ милиция шараяз "пӧсь дыръяз" ик. Ульчаосысь октэмын-калтэмын 437 юэмъёс, 190-эз келямын вытрезвительёсы. 162 муртлы штраф сётэмын, 89 пол милиция потаз жугиськись семьяосы. Сюресъёс вылын 5 шудтэм учыр луиз, быремъёс ӧвӧл. 13 пол тылпу потаз, сутскиз 3 адями, сомындаез ик шуккиськиз но тылъяраос басьтӥз. Субботае вылысьтыз вылаз лушкаськон сярысь иворъёс вуэмын: 17.00. Воткинскысь "Товары для мужчин" магазинысь пырак кассовой аппаратысь быдэ вуымтэ пи 410 манет коньдон лушказ. Пегӟыны ӧз кылды - кырмизы. Милициын тодмо луиз шырмачлэн нимыз но, кытысь луэмез но: Чайковский городысь 16 аресъём Н. Денис. 19.00. Ижевскысь Т. Барамзина ульчаысь 44-тӥ корка вӧзысен тодмотэм мурт вӧзтӥз кошкись воргоронэз жугыса, 110 манетсэ талаз. Милиция тазэ но лушкаськисез пытьыосызъя ӝог шедьтӥз. Суд улэ сюрылэм 33 аресъем В. Сергейлы уйёссэ нош ик чурыт нар вылын ортчытъяно луоз. Уйшор бере 1 час котырын "Родина" кинотеатр дорын тодмотэм воргоронъёс ортчись муртлэсь йырысьтыз дуно изьызэ кыскизы. Ӝегатэмын ӟеч дӥськутлы синмаськем суд улэ шедьылэм 26 аресъем А. Олег. Изьы кузёезлы берыктэмын. Та вакытэгес ик Киров ульчаысь 17 номеро школа вӧзын пиосмурт вылысь шубазэ кылизы. Аслыз шуныт дӥсь сярысь озьы сюлмаськем вылэм 43 аресъем Б. Алексей, суд улэ азьвыл но сюрылэм маке. Та ӝытэ аслаз хозяйствояз ӵынэн усыкмыса быриз Завьялово районысь Изгуртысь 30 аресъем предприниматель А. Сергей. Тылпу потыса изъянмиз ваньбурез но. Мугзэ валэкто юэм йырын электроприборъёс борды ужаны кутскеменыз. Уйшор бере 2 час котырын Сарапул тракт вӧзысь землянкаысь шедьтэмын кык шӧй: 47 аресъем Ч. Раиса но 40 аресъем С. Сергей, кыксы но - пыдйылчиос. Кулэмын, ӵынэн усыкмыса. Арня нунал азьвылэзлэсь "пӧсьгес" вал: Милициен но ГАИ-ен ӵош ӝегатэмын 28 аресъем Х. Светлана но 22 аресъем В. Дмитрий. Соос киысь таламын наркотикъёс. Та нуналэ озьы ик кутэмын марихуанаен вузкарись 27 аресъем нокытын ужасьтэм Ч. Олег. 2 часэ ӵукна 2 номеро медсанчасте вуттыса кулӥз на трос интыетӥ пуртэн бышкам 49 аресъем С. Валентин. Милициен ӝегатэмын нокытын ужасьтэм 22 аресъем К. Константин, 25 но 26 аресъем У. Юрий но А. Ильдус. Уин 1 час котырын Ракетной ульчаысен (нош ик пуртэн кышкатыса) воргорон вылысь дӥськутсэ но чассэ талало. ГАИ юрттэмен, "пӧсь дыръяз" ик милицие вуттэмын 17-23 аресъем нокытын ужасьтэмъёс: Н. Сергей, А. Владимир, А. Сергей, П. Алексей. Ма шуод на - ӧз удалты мискиньёслы. Та уе ассэ пӧръяны малпам вылэм Казаньысь Ижевске вуэм 18 аресъем А. Тимур но. Судэн азьвыл но тодмо луыса вылысь, пурт улын кылиськытэ 16 аресъем пияшез. Соиз пумитъяськытэк сётэ сьӧрлось "кунолы" - дублёнказэ, изьызэ, шуныт кофтазэ. Выль сямен вераса, 1050 манетлы ваньбурзэ "кузьмаз". Но бускель республикаысь вуэм шӧртчи воргоронлы ӧз удалты - милиция тӧлпери кадь вуиз но "трофейзэ" талаз. Та уе ӝегатэмын мукет но лушкаськисьёс. Соослэсь утиськон амал одӥг: ӝыт вуыса яке коркад ӵогаськыса пуконо, яке ӟустарилы пӧрмем дӥсен ульчае потоно. Порядокез утисьёс мукет дэмлан сёто: шудтэм учыре шедемъёслы ӝегатскытэк жингыртоно 02 телефонъя, верано шырмачъёслэсь тусбуйзэс, ульчаез но мукет тодметъёсты. Соку милиция ӝегатскытэк ужрадъёс кутоз но дыраз юрттоз. Л. ПЕРЕВОЗЧИКОВА. (Дасямын Удмурт Республикаысь МВД-лэн оперативной сводкаосызъя). Уроболэн питранэз ньыль, огез но бере медаз кыль Та нуналъёсы республикаямы уно политической партиос но общественной огазеяськонъёс ужало. "Удмуртия" общественно-политической движение соос пӧлын шӧдскымон инты басьтэ. Пусйыны кулэ, та движение егит на. Сое кылдытонъя ӧтчам ортчиз 1997 арын 20 мартэ. Нош огазе люкаськыны кичӧлтӥсьёс пӧлын вал Удмурт Республикаысь Ожысь но ужысь ветеранъёслэн кенешсы, Интеллигенцилэн огазеяськонэз, быръёнъёсъя "Удмуртиысь егитъёс" движение, Эрико профсоюзъёслэн огазеяськонзы. Милям корреспондентмы кенеше Интеллигенцилэн огазеяськонэныз кивалтӥсен Геннадий Петрович Овчинниковен. - Геннадий Петрович, социализм вакытэ асьмеды дышетылӥзы: интеллигенция - со "прослойка". Туала синмын учкыса, кызьы дунъяськоды та веранэз? - Со аръёсы интеллигенция кулэезъя дунъямын ӧй вал. Тодӥськоды, луоз, кин пыриз Ленинэн кылдытэм Правительствое. Уноез дышетскем, лул-чеберетэз тодӥсь-валась адямиос быдтэмын яке кунгож сьӧры келямын вал. Коммунистъёслэн партиязы пырыны нимысьтыз ценз юнматӥзы: отын сомында-сомында рабочийёс но крестьянъёс луыны кулэ, сомында-сомында - интеллигентъёс. Валамон ини, берлоосызлы инты ӧжытгес шедьылӥз. Паймонэз ӧвӧл, кытысь потӥз но малы кылдӥз "прослойка" кыл. - Нош туннэ нокызьы но уд шуы ни, интеллигенция зӥбемын-пачкатэмын шуыса. Общественной но политической улонэ пыриськыны котькуд адями понна ӟечесь луонлыкъёс кылдытэмын. - Шонер. Шаерысьтымы Интеллигенцилэн огазеяськонэз сярысь верано ке, со кылдытэмын вал 1993 арын пӧртэм учреждениосысь, ёзъёсысь специалистъёслэн но тодосчиослэн кичӧлтэмзыя. Пусйыны кулэ, ми огинэ люкаським одӥг муген гинэ - быръёнъёсы рос-прос пыриськон понна. Нокыӵе мукет ужпумъёс, шуом, политика, экономика ласянь, ум ӝутӥське, огазеяськонэ пырем муртъёслэн ужазы, профсоюзэн герӟаськем, мукет удысъёсазы ум пыриськиське. Мар шуод, "интеллигенция" валан туж паськыт, котыр ласянь, философия, социология, политика, огшоры улон ласянь учкыса но. Кин ке сое герӟа лул-сюлэмен, кин ке - специальностен, кин ке - маин ке мукетэныз. Соин ик уставамы ми пусйимы: интеллигенция - со дышетскем, вылӥ квалификациен ужасьёс: дышетӥсьёс, врачъёс, пӧртэм дышетскон учреждениосысь преподавательёс но тодосчиос, культура, искусство удысын тыршисьёс. Ваньзэсты сямен ик герӟа одӥг тодмет: соос уло, кӧтсэс тыро бюджет чотын, озьы бере шонерак герӟаськемын государствоен, солэн кужмыныз. Странаысь политической югдур шоры пӧртэм сямен учко, кужымзы одӥг ӧре люкамын ӧвӧл. Соин ик, огазеяськыса, ми ужпум пуктӥськом: быръёнъёс дыръя депутатэ кандидатэ ӵектоно визьмо, чылкыт сюлэмо адямиосты. Соос мед нюръяськозы бырйисьёссылэсь ужпумъёссэс быдэстон понна. - Туннэ нуналлы кыӵе ке йылпумъянъёс сярысь вераны быгатӥськоды-а ни? - Ми пыриським куиняз быръёнъёсы: интыысь ёзъёсы, Кун Кенеше депутатъёсты но Россия Федерацилэсь Президентсэ быръён ужрадъёсы. Котькуд удысъя кандидатъёсмес ӵектылӥм. "Удмуртие" огазеяськыса, кужыммы будӥз, шуыны луоз. Юнме уг шуо ук, оген муртлэн кужмыз ӧжыт. Нош одӥг движение люкаськыса, ми шаерысьтымы ваньзэ сямен ёзъёсты омыртӥм. "Удмуртие" пыро ук ветеранъёслэн, егитъёслэн, нылкышноослэн но мукет огазеяськонъёслэн адямиоссы. Огназы соос лябесь, валче кариськыса - кужым. Та ласянь мон уг валаськы "Удмурт кенеш" огазеяськонлэсь кивалтӥсьёсызлэсь мылкыдзэс. Куд-огеныз нимысьтыз вераськеме но вань. Ӧйтӧд, кызьы, мар малпало соос, но нимазъяськон, уката ик национальность ласянь, ӟече уз вутты, дыр. "Удмуртия" движение луонлык сётэ республикаысьтымы уноезлы ужаса улӥсьёслы политической улонэ пыриськыны. Со туж кулэ. Тани интеллигенция - лул-чеберетэз тодӥсь-валась адямиос. Кивалтӥсьёсмы пӧлын макем ӧжыт сыӵе муртъёс. Мукетсэ но лыдэ басьтытэк уг луы: Россия - туж бадӟым страна, соин ик улосвыллэн, республикалэн улэм-вылэмез шонерак герӟаськемын отысь югдурен. Удмурт Республика но шуг- секытысь потыны ачиз кужым шедьтыны кулэ. Соин ик движенимы ас азяз бадӟым ужпум пуктэ - Удмуртилы ӟеч-ӟеч азинскыны луонлыкъёс кылдытоно, мукет улосвылъёс пӧлын солэсь кужымзэ но интызэ будэтоно, озьы экономикаез ӝутоно но калыклэсь улонзэ умоятоно. "Удмуртия" движенилы бырйим Координационной комитет. Солы кивалтӥсь юнматон сярысь пӧртэм малпанъёс но ӵектонъёс вал. Озьы Кун Кенешлэн Тӧроез Александр Волков азьветлӥсь луиз. Малы ӵапак та адями? Александр Александровичлэн республикаямы но, Россиын но авторитетэз бадӟым, шаермес секыт югдурысь поттон сярысь ялан сюлмаське. Ма ватонэз, куддыръя янгышъёс но луо. Бен соослэсь нокин но утемын ӧвӧл, уката ик кыӵе ке ужепумез ӝог но вакчи дыр куспын быдэстоно луэ бере. - Берло дыре пумен паськыт вераськон мынэ республикамылы йыр быръён сярысь. Кызьы тӥ учкиськоды та ужпум шоры? - Удмуртилы президент одно ик кулэ. Кин ке но шаерамы мынӥсь ужъёс понна кыл кутыны кулэ ук. Мед луоз кинлэсь юаны. Нош али, шонерзэ вераса, республикаямы сыӵе адями ӧвӧл. Президент ик кун кивалтонлэсь пӧртэм ёзъёссэ рос-прос радъяны быгатысал. Уроболэн ведь питранэз ньыль, соос пӧлысь одӥгез но бере кыльыны кулэ ӧвӧл, озьытэк уробо шальтралоз. Котькудӥз ёз, шуом, законъёс кылдытъясь, соосты быдэсъясь но судебной власть, ас удыссэс радъяны-нуыны кулэ. Туж жаль, асьмелэн озьы уг пӧрмы на тодады вае ай интыысь аскивалтонэн герӟаськем югдурез ик. Кыӵе ке мукет ужпумъёсты быдэсъяськом, нош со дыре ик вунэтӥськом сыӵеоссэ, кудъёсыз понна кыл кутыны кулэ. Ӟеч-а ужа Ижевск городлэн администрациез, мэрез Анатолий Салтыков? Мон, огшоры адями, ӟеч ик дунъет сётыны уг быгатӥськы, куке адӟисько, кызьы урамъёсысь гинэ но лымыез уг утялто бере. Александр Волков сярысь верано ке, со тырше, сюлмаське. Буйгаса огинтыяз уг пукы, ялан утчаське, Москваысь вылӥ кивалтӥсьёслы вазиськыны уг кышка, соин ӵош огшоры калыкен пумиськонъёслэсь но уг кепыра. Со егит, ӵапак кын куртчон вакытэз. - Кивалтӥсьёс сярысь вераськон потӥз бере, Россиысь но Удмуртиысь азьветлӥсьёс пӧлысь кин тӥледлы тужгес но кельше? - Та юанлы валэктыны шугъяськисько. Россиез басьтоно ке, кивалтӥсьёслы дунъет сётыны быгатӥськом пӧтэм телеканалъёслэн ивортонъёссыя. Нош одӥг учырез ик котькудӥз пӧртэм сямен возьматэ. Зэм-а, ӧвӧл-а - уд вала, ява. Но таӵе мылкыдме усьто ик: мӧйы кивалтӥсьёслэн дӥсьтонзы ӧжыт. Соослы вуж малпанъёссылэсь куштӥськыны секыт йӧтэ. Ваньзы угось социализм вакытэ будэмын-ужамын. Та ласянь егитъёслы капчигес. Мыным тужгес но кельше нырысетӥ вице-премьер Борис Немцов, сое синйылтӥ вал ини Нижний Новгородын ужакуз. Бен, ляб интыосыз но солэн вань, шуом, куд-ог пумиськонъёсыз дыръя уг эскериськы, шӧдтэк шорысь кулэтэмзэ но вераны шедьтэ. Мар шуод, егитъёс, мӧйыосын ӵошатыса воштӥськонъёслэсь уггес кышкало. Республикамес басьтоно ке, ужаны быгатэменыз мыным кельше Юрий Питкевич. Александр Волковлэн воштӥсьёсыз но визьмоесь, мыло-кыдоесь. - Матэкто интыысь аскивалтон ёзъёсы быръёнъёс. Кызьы отчы пыриськыны малпа "Удмуртия" движение? - Жаляса верано, Россия Федерацилэн законодательствоезъя, "Удмуртия" кадь огазеяськонъёс быръёнъёсы пыриськыны быгато соосты пусъем дырысен ар ортчыса гинэ. "Удмуртиез" пусъем дырысен ар тырмоз мае гинэ. Соин ик апреле быръёнъёсы котькуд огазеяськон нимаз пыриськоз, аслэсьтыз кандидатъёссэ ӵектоз. Юлия Александрова. Герд ГЕРД "Удмурт кенеш" огазеяськонлэн куараез 1 (64) номер Гажано лыдӟись эшъёс! "Удмурт кенешлэн" кивалтэтэз решение кутӥз асьме калыкмылэн та валтӥсь огазеяськонэз сярысь гожъямъёсты туэ но нимысьтыз бамын поттылыны. Со понна юнматэмын ӝыны арлы план. "Удмурт дунне" тыршоз ассоциацилэсь пӧртэм удысъёсын ужамзэ, шуг-секытъёсты, та движение пырись адямиосты котыр ласянь возьматыны. Но со понна кулэ тӥляд юрттэмды. Кыӵе мылкыдын улэ удмурт калык? Ма сое тужгес но сюлмаськытэ? Кыӵе сюрестӥ азьлане мыныны кулэ "Удмурт кенеш"? Та пумысен но мукет ужпумъёсъя малпанъёстэс, ӵектонъёстэс, корреспонденциостэс ыстэ газетлэн редакцияз. Мылкыдъёстэс, куронъёстэс вакчияк ивортыны быгатоды 24-53-69, 24-56-67, 21-00-49 номеро телефонъёсъя. Верам потэ на тани ма сярысь. Кызьы тодӥськоды, "Удмурт дунне" газетын "Герд" бам потыны кутскиз, культурая "Дэмен" обществолэн куараез луыса. Кылем арын со вордскылӥз "Удмурт кенешлэн" но "Дэменлэн" нимынызы. Пӧртэм адямиосын кенешыса, ми таӵе малпанэ вуим: "Удмурт кенеш" вань мукет огазеяськонъёсты герӟась ёз луэ бере, азьланьын та бамез солэн нимыныз поттылоно. Но полосалэсь радзэ но (номеръёссэ), нимзэ но азьло кадь ик кельтоно. Оскиськом, лыдӟисьёс таӵе вамышмес валалозы шуыса. И. ЛЕБЕДЕВ, "Удмурт дунне" газетлэн валтӥсь редакторезлэн воштӥсез. Дасясько юбилейлы Республикаысьтымы му вӧй поттӥсьёс дасясько юбилейзылы. Туэ 25 ар тырме "Удмуртнефтьлы" но 30 ар - му вӧй поттыны кутскем дырысен. Праздникез ортчытонъя кылдытэмын нимысьтыз комиссия, соин кивалтэ "Удмуртнефть" АО-лэн генеральнй управляющиез Е. И. Богомольный. Та нуналъёсы юбилейлы дасяськонъя ортчиз кенеш. Усьтэмын луоз предприятилэн музеез, кылдытэмын телесюжетъёс но видеофильмъёс, ортчоз профессиональной мастерствоез возьматонъя конкурс но мукетыз. Огъя вераса, му вӧй поттӥсьёс понна 25 аръем юбилейзы зэмос праздниклы пӧрмоз. Ужзыя данэз но. А. ДАНИЛОВА. Герд Туспуктэмысь та кык воргоронъёсты удмуртъёс пӧлын тодӥсьтэмъёс трос меда? Овӧл, дыр. Альберт Алексеевич РАЗИН но Семен Андреевич ИЛЬИН "Удмурт кенешлэн" ужаз уно аръёс ӵоже ни мыло-кыдо пырисько. Пӧламы сыӵе адямиос тросгес луизы ке, калыкмы шуг-секытъёслы уг сётскы. Туспуктэмез В. КАМАШЕВЛЭН. Героез дунъяса В. Г. Садовников, Воткинскысь машиностроительной заводлэн директорез, Социалистической Ужысь кык пол Герой луиз. Жаль, улонысь вазь кошкиз, 70 арессэ но пусйыса ӧз вутты. Со понна улэм но ужам городэз дано адямизэ уг вунэты. Табере Воткинскын вань ни Садовниковлэн ульчаез, кыкетӥ шуккемын Геройлы сӥзем мемориал пул, солэсь нимзэ нуллоз машиностроительной техникум. Ватэм интыяз, Южной шайвылын, пуктэмын памятник. В. Г. Садовников сярысь котьку тодэ вайытозы со кивалтон вакытэ пуктэм улон коркаос, кинотеатръёс, культурая юртъёс но спортъя комплексъёс. Бадӟым заводлэн директорез луыса, ялан сюлмаськылӥз ужась калык понна. Ӟечез ӟечен берытскыны кулэ. Л. МЕДВЕДЕВА. ГЕРД - МОСКВАЫН ДУНО КУНО Москваын 20 толшоре ортчиз Куӟебай Гердэз данъян нырысез бадӟым ужрад. Наукая но культурая Венгер центре люкаськизы финн-угор выжыысь адямиос, озьы ик мукетъёсыз но, кин понна дуно удмурт калыклэн быдӟым пиез. Нырысь ик та центре пыремъёслэн син шоразы йӧтӥзы Москваын улӥсь удмурт суредасьлэн Михаил Шаклеинлэн ужъёсыз, соос пӧлын ик - К. Гердлэн тусбуез. Литературовед З. А. Богомолова мадиз кылбурчилэн, этнографлэн, фольклористлэн улэмез но творчествоез сярысь. Москваысь литературно-художественной институтын, собере аспирантураын дышетскыкуз, К. Герд эшъяськиз трос калыкъёслэн визьмо пиосынызы. Одӥгез соос пӧлысь - коми учёной В. И. Лыткин. Кузпалыз сярысь тодэ ваёнъёссэ вераз филология наукаосъя кандидат Т. И. Тепляшина. Мукетыз удмурт нылкышно тодосчи педагогика наукаосъя доктор Г. Н. Никольская быгатыса нуиз быдэс та ӝытэз. Москваысь "Герд" национально-культурной огазеяськонысь удмуртъёслэн нылпиоссы дасяллям анай кылынызы кылбуръёс, кырӟанъёс. Аспал калыкезлы сюлмысь потэм кырӟанъёссэ кузьмаз Удмуртиысь дано артистка, Саха (Якут) Республикаысь калык артистка Маргарита Суворова. Татын ик вал "Масторава" мордва ансамбльлэн, поръёслэн, чувашъёслэн ӟечкыланъёссы. Т. НИКОЛАЕВА. Музъем но рынок Павел Вершинин: "Гуртлы кулэ усто специалистъёс" Та удыслы котьку бадӟым саклык висъяллязы. Государство уно коньдон сётъяз. Но, туннэ жаляса тодамы ваёно луиськом, данакез со юрттэт ваньбур поттӥсьёслы ӧз вуылы. Музъем ужасьёс но пудо утисьёс ялан секыт условиосын кужымзэс жалятэк тыршизы. Нош али гуртын кыӵе югдур? Одӥг кылын уд валэкты. Тани 1991-тӥ-1994-тӥ аръёсы хозяйствоос возиськизы азьвыл лэсьтэмез но басьтэмез чотын, табере югдур арысь аре уродме. Миым шаерамы кыкетӥзэ (нырысез 1986 арын вал) ю-нянь удалтӥз, котькуд гектарысь шорлыдын 18,2 центнер басьтэмын, нош хозяйствоослэн шуг улонзы ӧз капчия, музъем ужан пайда ӧз вайы. Крестьянин азьло сямен ик данак интыосын дыраз уждун уг басьты, гуртъёсын лэсьтӥськон гуньдэмын, шуыны луоз. Куд-ог районъёсын гинэ нимаз адямиос асьсэлы улон коркаос ӝуто на. Со но пумен сюбега. Табере гурт калык туж кышкаса вите тулыслэсь- сӥзьыллэсь вуэмзэ. Музъем ужась малпаське валэс юосты, пе, кызьы но озьы, мырдэм кизём на, нош маин аралом-кутсалом? 70 процентэз техника (тракторъёс, комбайнъёс, автомашинаос но мукетыз) куашкан калэ вуэмын. Гурт улонэз ӟеч вала Правительстволэн Тӧроез Павел Вершинин. Ачиз со инженер-механик но удыслы юрттыны тырше. Алигес Правительстволэн Президиумаз рос-прос учкизы гурт хозяйствоен герӟаськем уно лэчытэсь ужпумъёсты. Отын ӟырдыт вераськон мынӥз кизёнэз ортчытон, йӧл, сӥль, нянь понна юрттэт сётон, лябӟем хозяйствоосын ужан но мукетыз сярысь. Нош собере Павел Николаевич вуылӥз гурт хозяйствоя кун академие. Отын со пумиськиз студентъёсын, учёнойёсын но 1971-тӥ арын сельхозинституэз быдтэмъёсын. Павел Вершинин но со аре ик йылпумъям. Тунсыко но пайдаё вераськон пӧрмиз. Берло дыре вылӥ дышетскон заведениослы но капчи ӧвӧл. Озьы ке но, Правительстволэн Тӧроез нимысьтыз пусйыса шуиз: - Гуртлы кулэ усто специалистъёс. Со академиысь кык дипломен мед потоз. Сыӵе луонлыкъёс вань. Котькуд специалистэз нимаз дышетоно, муресь тодон-валанъёс сётоно. Гурт хозяйствоя специалист луэмез сяна, выпускник мед тодоз экономикаез, законъёсты, кивалтон ужез но туала рыноклэсь куронъёссэ. Бен, академия огинтыяз уг сылы, ялан азинске, юнма-будэ. Али татын 3280 студент дышетске, заочной отделениын - 1 600. 700-лэсь уно тодосчиос но преподавательёс ужало, 50 аспирантсы. Али академия 9 специальностья кадръёс дася. Берло усьтӥськизы нюлэс хозяйствоя, ветеринарияя но переработкая факультетъёс. Улон куре ни инкуазез утёнъя (экологияя) специалистъёсты дышетэмез. Туннэ одӥгез бадӟым ужпум луэ ни банкрот луэм хозяйствоослы кивалтӥсьёс дасян. Миым ортчытэм аттестация возьматӥз: гуртысь хозяйствоослэн кивалтӥсьёссылэн одӥг куиньмосэзлэн вылӥ образованизы ӧвӧл, уг тырмо валтӥсь специалистъёс. Та ласянь тужгес но секыт югдур Кез, Шаркан но куд-ог музон районъёсын. Пумиськонын озьы ик вераськон ӝутскиз академиысь тодосчиослы, дышетӥсьёслы квартираос лэсьтон, улон интылы кредит сётонэз радъян, выпускникъёсты уже интыян, ватсаса уждун тырон но мукет ужпумъёс сярысь. Г. РОМАНОВ. Туспуктӥз А. ПОЗДЕЕВ. Экономика но политика Зарниен зороз-а Шунды пуксён палась вуэм коньдон? Кылем арлэн пумаз Удмурт Республикаысь Кун Кенеш инвестициосын пайдаёгес ужан пумысен закон кутӥз. Отын пусъемын: асьме дорын улӥсьёс сяна, инвестор луыны быгато кунгож сьӧрысь гражданъёс, государствоос, международной организациос. Законлэн 8-тӥ статьяезъя соослы нырысетӥ ньыль арзэ налог ласянь куд-ог льготаос чакламын, но со понна усьтоно удыслэн паез уставной капиталъя 30 процентэз тыремын мед луоз, коньдонэн вераса, ог 30 сюрс долларез. Зэмен но, рынокен экономикае выжон понна, улонысь троссэ воштоно. Нырысь ик, чылкак мукет сямен радъяно производствоез, соин ӵош - адямиослэсь улон-вылонзэс, кылдытоно выль но выль ужан интыос. Жаляса верано, таиз ласянь Удмуртия Россиысь вань регионъёс пӧлын берпуметӥосыз радэ шеде. Ужатэк пукисьёслэн лыдзы будэ. Тӥни малы республика тужгес но кулэяське палэнысь ыстэм коньдонлы - иностранной инвестициослы. Инвесторъёсты ӝегатскытэк кулэ каре промышленность, уката но машина лэсьтон, нюлэсэн ужан удысъёс. Коньдон понытэк, соос интыысьтызы уз вырӟе. Та материалэз печате дасяку, Ижевскысь автозавод Южной Кореяысь "Хёндэ мотор" корпорациен ӵош поттыны кутскиз выль маркаё автомобиль. Россилэн экономикаез сярысь ке оглом верано, кунгож сьӧрысь вуэм инвестициослэн быдӟалазы 2,7 миллиард долларозь вуиз ни. Республикаысьтымы Экономикая министерство лыдъямъя-чотамъя, соосты кутонъя Удмуртия мынэ куатетӥ интыын. Инвестициосын быгатыса ужало Ижевскысь, Глазовысь, Сарапулысь прдприятиос. Кунгож сьӧрысь вуэм коньдон чотын экономиказэ юнматӥз но шуг-секытысь капчиенгес потӥз Чепецкой механической завод. Мон малпамъя, та предприятие кадь Россиысь огез но завод иностранной инвестициосты производствое меӵак ӧз куты на. Ма шуод: Запад асьме понна коньдонзэ уг жаля. Мировой банклэн лыдпусъёсызъя, Россиын выльдӥськон кутскем дырысен ваньзэ-ӧвӧлзэ келямын ни 130 миллиард доллар. Но та коньдонлэсь ӝынызэ, 65-70 миллиардзэ, туж быгатыса капыртӥзы "выль ӟучъёс" - Россилэн элитаез. Г. Явлинский верамъя, лушкам уксёез соос берен келязы Западэ, интыязы асьсэ понна усьтэм счётъёсы, странамы понна нокыӵе пайда вайытэк. Кунгож сьӧрысь инвестициосты экономикаез азинтонэ валаса кутон оглом умоен берытскыны кулэ. Но та дыре ик чакласьконо: Запад азьын ӧсъёсмес вӧлак усьтыса, бадӟым ыштонъёс медам адӟе вал. Со сярысь вунэтыны уг яра. Ӵош пуксьыса, ойдолэ малпаськом, сэрттом-пертчом куд-ог юанъёсты. Кылсярысь, малы кунгож сьӧрысь кузё ас коньдонзэ асьмелы сётэ, сокем юрттэмез потэ-а? Мон малпамъя, мугъёсыз татын трос гинэ. Нырысь ик, бордаз кыске Россилэн государственной политиказэ воштэмез; кыкетӥез - инкуазь узырлыкмы, география ласянь интыяськемез; куинетӥез - ӧжыт коньдон поныса, бадӟым барыш поттонлы оскон; ньылетӥез - одӥг странаысь мукет странае производствоез выжтон но вузъёсты вис карытэк вузан; витеӥез - технической, технологической, кивалтон удысъёсын ортчись воштӥськонъёсы меӵак пыриськон, вузкаронын ас маркадэ, пустэ возён но мукет; куатетӥез - коньдон сётыса, научно-исследовательской но научной ужъёсы пыриськон; сизьыметӥез - инвестициосын ужан луонлык сётэ транспортлы расходъёсты кулэстыны но таможнялы выт тыронлэсь палэнскыны; тямысэтӥез - та амал паськыт сюрес усьтэ государстволэн капиталэз вылэ потыны: ичи коньдон поныса, узырлыктэ будэтыны; укмысэтӥез - хозяйственной конъюнктуралэн пӧртэмлыкез вылын шудыса, пӧртэм удысъёсын прибыль люканы. Тӥни малы азьпала учкыны дышем муртъёс люкам коньдонзэс кышкатэк потто кунгож сьӧры, вожмаськыса сёто али гинэ радъяськыны вырись рыноке. Дуннеысь но асьме дорысь пӧртэм пумо иностранной инвесторъёслэсь ужамзэс чакласа, соосты 6 группалы люкыны луоз. Нырысетӥосыз - стратегической инвесторъёс. Данакез соос пӧлын - транснациональной корпорациос. Таосыз мургес сузьтӥськыны выро Россилэн инкуазь узырлыкъёсыз доры. Кунгож сьӧры келяса, барыш люкало; Россилэн регионъёсаз производство усьто, государственной органъёсын одӥг кыл шедьтыса, музъем пушкысь узырлыкез утчанъя но поттонъя кӧня ке арлы договор гожто. Огсыр ужан понна, соослы мар кулэ? Умой политической югдур, ас полномочиоссэс тодон, интыысь кивалтӥсьёсын кусып тупатон, ог-огдэ валаса ужан. Таӵе инвесторъёс Россилы туж тупало, безопасность ласянь нокыӵе кышкытлык уг кылдыто. Кыкетӥ группае пыро фондовой инвесторъёс. Соос меӵак герӟаськемын пӧртэм пумо фондъёсын но огазеяськонъёсын. Кылсярысь, тросэзлы тодмо Сорослэн, Фулбрайтлэн но куд-ог мукет фондъёс. Кинлы но малы кулэ соосты кылдытон? Западэз туж шугъяськытэ Россиысь зэмос наукалэн быронэз но обществомылэн кыромыны кутскемез, мафиозной кужымлэн вань удысъёсты киултэмез. Таӵе бускель нокинлы но кулэ ӧвӧл. Европаез шугъяськытэ асьме физикъёслэн-ядерщикъёслэн, электронщикъёслэн, генетикъёслэн дунне пасьтана пазьгиськемзы. Ватонэз ӧвӧл, берло аръёссэ гинэ Россиысь кунгож сьӧры улыны кошкизы 15 сюрслэсь ятыр учёнойёсмы. Соос дась пичи уждун понна но наука удысын ужаны, тодон-валанъёссэс, научно- технической информациез котькинлы вузаны. Соин ик, странамес, наукамес быронлэсь утён вылысь, кунгож сьӧрысь вуись коньдонэз одно ик уже кутоно, озьы гинэ визьмо адямиосмес палэнэ кошконлэсь возём. Куинетӥ группае пырись инвесторъёс Россиын, Удмуртиын тужгес но вӧлмемын. Соос герӟаськемын интыысь сырьёез, ужась кужымез кутыса, производство кылдытонэн но калыклы кулэ луись вузъёсты поттонэн. Таӵеос чотын дорамы вуэ выль технология, ужъюгдурез азинтонъя выль амалъёс, ӟеч опыт. Инвесторъёс тужгес но висъясько предприятиосмылы выль инъет кылдытэменызы, технологической линиос усьтэменызы, материал, кулэ луись ёзъёс вуттэменызы, огкылын вераса, ваньмыныз, мае басьтоно луысал кунгож сьӧрысь. Тазьы ужан сюрес усьтэ экспортэз паськытатыны. Инвесторъёс асьсэос сюлмасько чаклам ужез дыраз но ӟечлыко быдэстыны. Кыӵе ке муген ӝеганъёс ке кылдо, югдурез тупатон вылысь, судэ, законодательлы вазисько. Кылсярысь, Удмурт Республикалэн Президиумезлэн декабре ортчем огаз кенешаз кыл куриз Яр районлэн администрациезлэн кивалтӥсез. Та посёлоке Америкалэн гражданинэз господин Харви пуктӥз нюлэс переработкая предприятие. Сое лэсьтонэ, озьы ик районэз, райцентрез азинтонэ трос коньдонзэ понӥз. Но ужез ӧз пӧрмы. Нырысь нуналъёсаз ик Харвилы пӧртэм шуг-секытъёсын пумиськоно луиз. Куд-ог кивалтӥсьёсын огъя кылэ вуытэк, предприятизэ выжтӥз бускель Киров областе. Мон малпамъя, самой таӵеоссэ инвесторъёсты государство налог тырон ласянь утьыны кулэ льгота сётыса, луонлык кылдытоно госимуществоез но музъемез дунъяны. Берло со асьме понна ик ваньбурен берытскоз. Ньылетӥ группае пыро "экспансионистъёс" но "сырьевикъёс". Таосыз шаерамы вутто дась продукция но пӧртэм пумо вуз, Удмуртиысь келяло сырьё но полуфабрикат. Огласянь учкыса, соос рынокмес узырмыто, мукет ласянь пӧрмыто "сырьевой придатоклы". Витетӥ группа - "постсоциалистической" инвесторъёс яке - асьмелэн азьвыл эшъёсмы - Восточной Европаысь но СНГ-е пырись республикаосысь предпринимательёс. Соослы оскыны луэ, выль экономикае выжыса но. Улон возьматэ: Западысь рыноке потон понна, продукцимылэн ӟечлыкез туж вылӥын луыны кулэ, конкуренциез мед вормоз. Асьмеос таӵе нюръяськонлы дась ӧвӧл на. Соин ик дасо аръёсын быгатыса возем кусыпъёсмес, экономической кризисэ шедеммы уг ке поты, нокызьы но ыштыны уг яра. Куатетӥез группа огазея "авантюристической" но "криминальной" инвесторъёсты. Нырысетӥосыз радэ шедё уй куспын байлык люканы вырись муртъёс - "выль ӟучъёслэсь" адӟем карыны турттӥсьёс. Но улон - выжыкыл ӧвӧл. Чебер малпанъёссы быдэсмытэк ик тӧлӟо. Таӵе "кузёослы", валамон ини, кунгож сьӧрысь инвестор уксёзэ сётыны уз дӥсьты. "Криминальнойёс" пӧлын - наркотикъёсын, пыӵал тӥрлыкен вузкарисьёс, юри косыса, адями виисьёс но мукет сьӧд ужъёсын вырисьёс. Поттэм коньдонзэс соос туж дыртыса кыӵе ке но удысэ интыяны тыршо, барыш поттон сярысь малпанэн йырин ӧвӧл ни. Самой та пырултэм манетъёс но долларъёс мыно государственной аппаратэз вузанэ-басьтонэ, калык ваньбурез лушканэ, страналэсь политиказэ нуонэ, национальной суверенитетэз ыштонэ. Иностранной инвесторъёс пӧлысь тужгес но сак эскероно-чаклано валтӥсь удысъёсын герӟаськемъёссэ. Соос пӧлы пыро экономика но энергетика, топливной индустрия, транспорт, машиностроение. Валамон, инвесторъёсты вылӥ верам группаослы люкон шоры пӧртэм сямен учкыны луоз. Но соослэн азязы пуктэм ужпумъёссы, коньдонзэс Россие келям мугъёссы - таӵеесь. Соос вылэ пыкиськыса ик тодыны луоз: ма сётоз соиз яке таиз предприяниматель калык хозяйстволы но республикалы, страналы оглом. Юрттӥсьёслы капкамес усьтыса ӧвӧл вунэтоно мукетыз сярысь но: котькудӥз-а ӟеч малпан ӟечен берытске меда? Экономикамылэсь висёнъёссэ, Западлы гинэ оскиськыса, пумозяз йӧнатом-а? Дунне бергамез чакласа, отысь умойзэ басьтыса, вунэтыны уг яра асьмелэсь но люкам опытмес. Япониын, кылсярысь, банкъёсы тырем капиталысь 70 процентэз - странаын улӥсь калыклэн коньдонэз, со ик кутӥське инвестициос интые. Жаляса верано, Россилэн банкъёсаз тӧл шула. Кивалтӥсьёслэн пӧяськеменызы сэрен, адямиос отчы мыныны кышкало, мултэс уксёзэс инвалютае берыкто. Но югдурез тупатыны луоз: чаклам реформаосты калык пала берыктыса но со понна ужатыса. И. ОБРАЗЦОВ, Можга педучилищелэн директорезлэн наукая воштӥсе з, история наукаосъя кандидат, доцент, запасысь полковник. Фотоез В. Камашевлэн. КИН УТОЗ ОШПИЕЗ? Тӥледлы, гажано лыдӟисьёс, иворьылӥм вал: газетлэн редакциез одӥгезлы шудо лыдӟисьлы ӟеч кузьым дасяз. Удмурт телевидение пыр ӵуказе, 30 январе, "Улон- вылон" передача луоз. Со быдэсак сӥземын "Удмурт дунне" газетлы. Соку ик ортчоз лотерея. Ошез утӥсьлэсь нимзэ отын ум тодэ на, но кыӵе ёросэ но кудаз почта ёзэ кошкоз, тодмо луоз. Озьыен, учке "Улон-вылон" передачаез, со кутске 19 часын 40 минутэ. Кӧня ке чурен гинэ "Удмурт кенеш" огазеяськонлэн Ленин ёросысь юрттӥсьёсыз куинетӥзэ дэмен пусйизы ни Ымусьтонэз. "Спартак" кинотеатре, вож кыз котыре, трос удмуртъёс люкаськизы. Асьсэос пӧлысь ик шедьтӥллям усто Тол Бабаез, Лымы нылэз, Тол Бабаез сураны турттӥсь муртэ, вегинэз но музонъёссэ. Нылкышноос, кӧс возем бере, турлы пӧрамъёссэс ваиллям сьӧразы. Ӝытэз шулдыртӥзы асьсэ палась ик кык арганчиос но яратоно артистъёсмы Александр Баймурзин, Андрей Ураськин но Геннадий Ганьков. *** Автозаводлэн "Чайка" клубезлэн кивалтӥсезлы Вера Федотовна Красильниковалы алигес тырмиз 55 арес. Калыкез дышетонысь отличникез, ӟырдыт мылкыдо кивалтӥсез, удмуртлыкмес муромытыны юрттӥсез мылысь-кыдысь ӟечкылазы автозаводысь но исполкомысь эшъёс, калыкез дышетонысь кивалтӥсьёс. "Удмурт кенеш" огазеяськонлэн тӧроезлэн В. К. Тубыловлэн нимыныз сое сюлмысь ӟечкылаз "Дэменлэн" тӧроез В. А. Осипов. Клубын ӝытбыт чузъяськизы кырӟанъёс, эктонъёс. Ас палысьтызы усто кивалтӥсьлы трос шуныт кылъёс веразы Алнаш ёросысь Кузебай школаысь дышетӥсьёс, Россиысь дано артист Анатолий Ушаков. *** Выль арез вуж сямен пусйыны Устинов ёросысь 73 номеро школае 13 толшоре люкаськылӥзы 340 пала нылпиос. Соос асьсэ кужымен радъязы пӧртэм ӵошатсконъёс, конкурсъёс, тунаськонъёс. Пиналъёс возьматӥзы удмурт эктонъёсты но. Дышетӥсь В. Н. Зиятова нылпиослы сётъяз уно кузьымъёс, дышетскон котыръёс, ческытатонъёс. Коньдонэн пичильтык юрттӥз администрацилэн тӧроез Г. М. Останин. Берекет Такмакъёс Солдат келян гур Атай юрт но паськыт тымет, Милям вордскем дор (гой) со. Пеймыт уй но бус нуналэд, Мынам кошкон дыр ук со. Милям валъёс ялан сьӧдэсь, Сьӧдэсь ке но, нуэ гой. Пинал дыръя лёгам сюрес, Шулдыр ке но, кыле гой. Буэ* кузя ветлӥды ке, Уӵы гурэз кылзэлэ. Мон кошкисько туж кыдёке, Выль иворме возьмалэ. - Оскиськомы: гожтэт вуоз, Ми но тыныд гожтомы. Кык аред бон ӝоген ортчоз, Нош ик валче уломы. Буэ* - шурлэн нимыз Ш. Меншарапов. Пермь область , Куеда ёрос. "Недвижимой ваньбурлы правоосты но со ваньбур пумысен огкылъёсты кун ласянь пусъён сярысь" Федеральной законзэ Удмурт Республикаын быдэсъянъя ужрадъёс сярысь Удмурт Республикаысь Правительстволэн Постановлениез 1998 арын 26 январе Ижевск город �54 "Недвижимой ваньбурлы правоосты но со ваньбур пумысен огкылъёсты кун ласянь пусъён сярысь 122-ФЗ номеро Федеральной законзэ, кудӥз юнматэмын 1997 арын 21 июле, но Россия Федерациысь Правительстволэсь "Недвижимой ваньбурлы правоосты но со ваньбур пумысен огкылъёсты кун ласянь пусъён сярысь" "Федеральной законэз быдэсъянъя ужрадъёс сярысь" постановленизэ, кудӥз юнматэмын 1997 арын 1 ноябре, быдэстон понна Удмурт Республикаысь Правительство пуктэ: 1. Недвижимой ваньбурлы правоосты но со ваньбур пумысен огкылъёсты кун ласянь пусйись юстицилэсь учреждениоссэ Удмурт Республикаын кылдытытозь недвижимой ваньбурлы правоосты но со ваньбур пумысен огкылъёсты кун ласянь пусйыны огдырлы осконо ёзъёслы, кудъёсызлэн таӵе правозы вань, "Недвижимой ваньбурлы правоосты но со ваньбур пумысен огкылъёсты кун ласянь пусъён сярысь" Федеральной закон кужыме пырон вакытозь. 2. Удмурт Республикаын асваньбурлы правоосты но недвижимой ваньбурен кузёяськонъя мукет правоосты кун ласянь пусъёзы таӵе ёзъёс кӧня ке дыр ӵоже: асваньбурлы правоосты но юртъёсын, сооружениосын, помещениосын кузёяськыны мукет правоосты пусъён удысын - городъёсысь но ёросъёсысь технической инвентаризациез ортчытӥсь ёзъёс, соос ӧвӧл дыръя - гурт администрациосысь ёзъёс; асваньбурлы правоосты но музъемен кузёяськыны мукет правоосты,озьы ик сервитутъёсты но пусъён удысын - музъем узырлыкъёсъя но му кутонэз радъянъя комитетъёс; арендалы (субарендалы) правоосты но кунлэн но интыослэн недвижимой ваньбуренызы кузёяськыны мукет правоосты, озьы ик оперативной кивалтонъя, хозяйствоез нуонъя правоез пусъён удысын - кунлэн но интыослэн ваньбуренызы кивалтонъя ёзъёс. 3. Недвижимой ваньбурлы правоосты но со ваньбур пумысен огкылъёсты кун ласянь пусйись ёзъёслы: недвижимой ваньбурлы правоосты но со ваньбур пумысен огкылъёсты кун ласянь пусъён ужез радъяно но эскероно, "Недвижимой ваньбурлы правоосты но со ваньбур пумысен огкылъёсты кун ласянь пусъён сярысь" Федеральной законэз лыдэ басьтыса. Россия Федерациысь Правительство Недвижимой ваньбурлы правоосъя но со ваньбур пумысен огкылъёсъя огъя кун реестрез нуон правилоосты юнматытозь пусъён ужез ортчытоно юнматэм нормативно-правовой актъёсъя, соос тупало ке Россия Федерацилэн Гражданской кодексэзлы но "Недвижимой ваньбурлы правоосты но со ваньбур пумысен огкылъёсты кун ласянь пусъён сярысь" Федеральной Законлы. Уже кутоно пусъёнэн вырись ёзъёслэсь пусъем правоос сярысь гожтон радзэс но кун ласянь пусъёнэз ортчемез юнматон амалъёссэс; Удмурт Республикаысь Правительство недвижимой ваньбурлы правоосты но со ваньбурен огкылъёсты кун ласянь пусъем понна дунъёсты юнматытозь, пусъем правоос сярысь ивортэм понна дун басьтоно пусъёнъя ёзъёсын кутӥськись расценкаосъя но тарифъёсъя; арбериосын кузёяськыны правоосты кун ласянь пусъем понна но со сярысь ивортэм понна (со правоос азьвыл уг пусйисько вал ке), дун басьтоно тазьы: нимаз адямиослэсь - кык пичи уждун мында; юридической лицоослэсь - дас пичи уждун мында, пичи уждунлэсь быдӟалазэ юнматэ Россия Федерациысь законодательство. 4. Удмурт Республикаын недвижимой ваньбурлы правоосты но со ваньбурен огкылъёсты кун ласянь пусъёнъя юстицилэсь учреждениоссэ кылдытон но солэсь ужзэ радъян понна межведомственной комиссия кылдытоно но отчы пырись муртъёсты юнматоно. 5. Межведомственной комиссиез косоно Удмурт Республикаын недвижимой ваньбурлы правоосты но со ваньбур пумысен огкылъёсты кун ласянь пусъён радлыкез азинтонъя программаез кылдытыны но юнматыны сётыны, та программалы коньдон висъян понна луонлыкъёс шедьтыны. 6. Недвижимой ваньбурлэн объектъёсыз пумысен огкылъёсты гожтӥсьёслы дэмлано пусъёнэ сётыны нотариусэн Россия Федерациысь Гражданской кодексъя юнматэм огкылъёсты. 7. Та постановленилэсь быдэсъяськемзэ эскерозы Удмурт Республикаысь Асваньбуръя кун комитет (Касихин С. П.) но Удмурт Республикаысь Юстицияя министерство (Волков В. А.). 8. Та постановление кужыме пыре сое печатлам нуналысен. Удмурт Республикаысь Правительстволэн Тӧроезлэн нырысетӥ воштӥсез Ю. С. Питкевич. Шӧкыч Ульчаысен кылэм чуръёс Мӧйы нылкышно телефон автомат пыр жингыртэ: - Анна, лыкты дорам. Чай юом, артэ пуксьыса вераськом, бӧрдом. Оген бӧрдыны но мӧзмыт. *** Трамвай дугдылон интыын небӟем воргорон эшезлы вера: - Ужысь мозмытӥзы, коньдон ӧвӧл, йыр висе, улэм ик уг поты. Сыӵе мылкыдын ошиськыны малпай. Ӝӧк вылэ султыса гозы керттыкум, кышноелэсь ватоссэ адӟи. Кана вылын кабакен ӟенелик сылэ. Чаркае лэзьыса, огзэ кымай но, мылкыд капчиёмиз, кыкетӥзэ лэзи но воксё лӧпшай. Гозыме сэрпалтыса эктыны кутски. Отысь но татысь кылыса гожтӥз Г. Селтин. Берекет Чеберезлы синмаськод Ма но уг малпало та амалоос. Кин ке пӧртэм сӥньысъёслэсь ковёр куэ, чибориё пыдвылъёс но пӧзьыос керттэ, кин ке куролэсь улэп суред пӧрмытэ. Нош Ижевскысь "ИРИСС" фирмалэн учебно- производственной предприятияз векчи весьлэсь (бисерлэсь) салфеткаос, сяськаос керттыны дышиллям. Эшшо но амалоезгес спичкалэсь черк пуктэм. Кызьы уд синмаськы таӵе киужъёслы! Чеберзылы чидатэк, аслад но лэсьтэмед потыны кутскоз. Оло, пӧрмытоды? Туспуктэмъёсыз В. КАМАШЕВЛЭН. Шӧкыч ШУНЯЛТЫ НО МЕКАЛТЫ Юмореска Одӥг гуртын улӥзы но вылӥзы кык эшъёс - Шунялты Педор но Мекалты Сидор. Огез ке вазе мекалты шуыса, мукетызлэн ым усьтэмын ини: "Шунялты". Соин но, вылды, кушем нимъёссы укыр вылӥын. Асьсэос но дышемын, лэся. Гижы улысь кырсь мында но лексэс уг ваё. Озьы ик кулэ кожало, дыр. Юмшан дыр ортчытыку, ог-огзэс ческыт сиёнэз кадь уз вунэтэ. Кильтро дӥсяськыса но укыр йӧно кариськыса, тыро ӝӧк сьӧрын дан потто. Нырысь сюмыксэс ӝутыкузы, азьло ик дасям мылкыд сётӥсь кылъёссэс жильдозы: - Ойдо, иськавын, вань умоез но ӟечез понна: ветылэд ош кадь таза мед луоз, парсед араз куинь пол мед пиялоз, шунялты. Озьы ке вазе Мекалты, Шунялты пунэме уг кыльы: - Шонер лякид, иськавын, скалэд арлы кык пол кунян мед ваёз, курегъёсыд уин но мед пузалозы, мекалты. Сюмыкъёс но, эсьма, жингыр-р! куаразэс сёто. Кызьы, пе, уз: ӟеч кыл - луллы сиён. Ваньмыз умой мынэ вал кадь. Вот тазалык сӥземзы иназ ӧз мыны. Ог-огзылы вожъяськизы-а, мар- а? Мекалтылэн скалэз муры кылиз. Курегъёсыз, нуназе гинэ ӧвӧл, воксё пузамысь дугдӥзы. Шунялтылы но ӧз удалты: черлам парсьсэ амалтэк вандоно луиз, шыр висён йӧтыса, ветылзэ но пуртъятэк ӧйлась. Вот кызьы та дуннеын! Ымъёссы шонер ке но усьяськизы, верамзэс пудо-живот кылымтэ, шӧдске. Виталий АГБАЕВ. Берекет Пӧрасьёслы ӝог мертэт 1 чечы пуньые тэре (граммен вераса): сакыр песок - 5 сылал - 5 пызь - 3 рис - 4 манной кеньыр - 4 йӧл - 5 кӧй-вӧй - 5 ву - 5 1 сиськон пуньые тэре: сакыр песок - 25 пызь - 15 рис - 20 манной кеньыр - 20 пушмульы - 12 кӧй-вӧй - 20 йӧл - 20 ву - 18 1 стаканэ тэре: сакыр песок - 220 сылал - 220 пызь - 150 рис - 210 манной кеньыр - 200 пушмульы - 140 кӧй-вӧй - 245 йӧл - 250 Пумиськонъёс пайдаё ортчизы Кун Кенешлэн Тӧроез Александр Волков Федерацилэн Кенешезлэн но экономической политикая комитетлэн заседаниосазы пыриськиз. Соос Санкт-Петербургын ортчизы. Эскеремын промышленностен кивалтонлы, Россиын экономикаез ӝутонлы сӥзем ужпумъёс. Промышленностез азинтыны уно амалъёс ӵектэмын вал. Ваньзэ соосты лыдэ басьтыса, кенеше пыриськемъёс решение кутӥзы. Удмуртия но та документэ кӧня ке дэмланъёс пыртыны ӵектӥз. Соос пӧлысь огез герӟаськемын Россия Федерациысь Правительстволэсь ужамзэ дунъянэн: промышленностьын ваньбур поттон 5 процентлы мед йылоз, нош Россиын ваньбур поттон - 3 процентлы. Со сяна, Удмуртиысь Кун Кенешлэн Тӧроез ӵектӥз заседанилэн решенияз улон юртъёс пуктонлы кредит висъян сярысь ёзэт пыртыны. Федерацилэн Кенешезлэн ужаз пыриськем сяна, Александр Волков Москваын кӧня ке пумиськонъёс ортчытӥз. Пенсиосъя фондлэн кивалтӥсеныз Василий Барчукен Удмуртиын пенсиосты дыраз тырон сярысь вераськиз. Василий Барчук феврале республикаямы лыктыны мылкыд кариз. Кышкыт учыръёслэсь утиськонъя министрен Сергей Шойгуэн ӵош Удмуртиысь предприятиосын специальной техника поттонъя азьланяз валче ужан ужпумъёс эскеремын. Озьы ик Росспецстройлэн кивалтӥсеныз Николай Кошманэн пумиськон ортчиз. Со тулыспал толэзьлэн шораз Удмурт Республикае вуылыны чакла. Соку ик ӝутэмын луозы бадӟым ужпумъёс: химической пыӵал тӥрлыкез быдтонъя программаез быдэстыны вань кужымез быгатыса радъян понна валче ужрадъёсты чаклан, Росспецстрое пырись 17 но 18 номеро СУ-ослы тырмыт заказъёс сётон. Москваысь берпуметӥез пумиськон ортчиз Италилэн посольствояз. Отын эскеремын Италилэн но Удмуртилэн валче ужанъя кусыпъёссы. Соос пӧлын - Ижевскысь "Орбиталы" "Фиат" компанилэсь двигательёссэ басьтон, бытовой техника но кондиционеръёс ӵош поттонэз радъянъя Электромеханической заводлэн Италиысь "Мерлони" но "Олимпия" фирмаосын ужез. Италилэн посольствояз ужасьёс Кизнерысь химической оружиез быдтонъя проектэз быдэстонэ пыриськыны мылкыдзэс веразы. Ваньмызъя ик ужпумъёсъя ӵош ужаны чакламын. Солэсь кулэлыксэ возьматэ Россия Федерацилэн Президентэзлэн Борис Ельцинлэн Италие визитэн мыныны дасяськемез. Кун Кенешлэн пресс-службаез. Пытсэт Татчы келяло туберкулёзэн висисьёсты, Удмуртиысь гинэ уг, быдэс Поволжьеысь, Урал котырысь. Ижевсклы матын сыӵе ик колония вань Пермьын, Нижний Новгородын. Пытсэт улэ сюрем секыт черен курадӟисьёс пумен эмъясько. Соин ик "Буммаш" заводэн артэ интыяськем 4 номеро ИТК тросгес тупа кечат-вамат кыскам езъёс сьӧры ватскем больницалы. Колониез усьтэм дырысен туэ 10 ар тырмоз ни. Буммашын улӥсьёс выль бускельзылы пумит кема нюръяськизы. Ӧз ворме. Вань инстанциосысь вуиз огвыллем валэктон: туберкулёз палочкаос омыретӥ уг лобало, озьыен, матысь юртъёсын улӥсьёслы кышкытлык уг кылдыто. Воткинске нуись сюрес дурын улӥсьёслы кык полэс "удалтӥз": солэн кутсконаз пуксиз республиканской тубдиспансер, пумаз - туберкулёзэн висисьёслы тюрьма. Городлэн кудпалаз та чер тросгес паласькемын нокин но уз вера, малы ке шуоно, гуртъёсын улӥсьёс нота ласянь туэ бере уг кылё. *** Режимен ужась учреждение озьы гинэ уд шедьы: ортчоно куинь-ньыль полэс корт ӧсъёсты, эскеронъёсты. Зона - ас понназ улӥсь государство. Вӧл-вӧл азбар люкылэмын трос клеткаослы - прогулкае потан интыослы. Радэн-радэн сыло столовой, клуб, дӥсь миськон, общежитие, эмъяськон, ужан юртъёс. Котькытын чылкыт. Лымы ӵужыса кадь утялтэмын. Куноосты татын, уката но журналистъёсты (соос туж шер пырало), сӥё-дано пумитало: ӟечсэ но, уродзэ но огкутскемен возьматыны дась. Зонаен тодматсконмы кутске больница бордысен. Врач, югдурез утён удысысь майор Ирина Анатольевна Богданова, татын кемалась ужа ни. Пытсэт улэ сюремъёс понна тӧдьы халатэн адями - инмар кадь. Врачлэн верамез - закон. - Дорамы келяло туберкулёзэн тужгес но секыт висисьёсты. Ог 1600 мурт пӧлысь стационарын 200- эз кылле. Эшшо сомындазэ интыяны кулэ на - нокытчы, палатаосын туж ӟоскыт. Кылемзэ эмъяськом амбулаторной амалэн. Ар ӵоже асьме колониосысь гинэ 4 номеро ИТК-е вуттэмын 400 мурт. Та лыдпус ялан йылэ. Пумозяз эмъяло 94 процентсэ, 6 процентэз эрике потэ туберкулёзлэн открытой формаеныз. Кылем арын 1070 мурт пӧлысь секыт висёнэн лэземын 66-ез - пукон дырзы йылпумъяськемен. Кытчы соос мынӥзы? Кӧняез ке - Ульяновск областе, Чувашие, куд-ог музон регионъёсы, но данакез кылиз асьме доры, городлэн ульчаосаз. Тубдиспансере вазиськоз, врач верамъя, дас пӧлысь - кыкез-куинез. Кылемъёсыз шедёзы пыдйылчиос, кураськисьёс радэ, сю сюрс адямиослы черзэс вӧлмытыса. - Ӝоггес эмъян вылысь кулэ ӟеч препаратъёс, - шуэ Ирина Анатольевна. - Соос ӧжыт. Миым 2 миллиард 400 миллион манет курим вал, висъязы 505 миллион яке 21 процентсэ. Тамында висисьёсты соин нокызьы уд йӧнаты. Диагноз пуктонъя, рентген снимок сяна, нокыӵе аппаратура ӧвӧл. Рентген плёнкалы араз кулэ 70 миллион манет, басьтӥм 27 миллион, 39,5 процентсэ. Юртто Ижевскысь, Можгаысь, Воткинскысь, Глазовысь тубдиспансеръёс. Соостэк секыт йӧтысал. Туберкулёз тужгес но "лӧптэ" тулыс но сӥзьыл. Кылем арын ми дорын кулӥз 11 мурт, 1996 арын - 13. Россиен ӵошатыса, та лыдпус бадӟым ӧвӧл. Центральной газетъёс ялан гожъяло, пытсэт улэ шедемъёс урод уло шуыса. 4 номеро колоние вуылыса, сыӵе малпан уг кылды. Больницаысь палатаос эмъяськисьёсын ик чеберъямын, вань чорыг будэтӥсьёс, тылобурдо вордӥсьёсыз, чебер сяськаосты яратӥсьёсыз. Киужен вырисез ӧжыт ӧвӧл. Огез 38-40 арлыдъем воргорон тани туж шаплы керттӥське. Пырисьёсты адӟыса, быдэстымтэ носкизэ ӝогак миндэр улэ ватӥз. - Вордскемын но будэмын гуртын, соин но ужтэк пукыны мӧзмыт. Трос муртлы пыдвыл керттыса сётӥ ни. Татчы вуэмелэсь азьло пуки Азиноын. Отысь ик висён шедьтӥ. Воргоронлы эмъямзы яра. Гуртаз бурмыса бертэмез потэ. Колоние ӵапак нуназе шорын кемдӥм бере, столовойзэс но учкеммы потӥз. Кузь ӝӧкъёс сьӧрын шальк-шальк егит пиос, воргоронъёс пуко, ваньмыз огкадь фуфайкаосын, гадязы пуктэм пусъёсын. Сюдо ческыт. Бадӟым сӥль юдэсъёсын шыд, сӥлен суро лапша, компот, куинь шорем тӧдьы нянь. (Тросаз семьяосын туала вакытэ таӵе сиёнэз уд адӟы ай). Но заключённойёслэн мылкыдзы музон. Юанэлы меӵак вазизы. - Урод сюдо. Ми висисьёс ук! Тросгес витамин кулэ. Адямилэн мугорызлы, зэмен но, витамин кулэ. Нош мукет сямен: калык радъя улэмед ке потэ, малы 6-8 арлы бышкись ез сьӧры сюрид? Пӧлазы вань гинэ 50-еэз, 60-ез ортчем арлыдоос, быдэс улонзэс тюрьмаысь тюрьмае костаськемъёс. Меӵак вераса, сыӵеослы туриж нянь но сётыны жаль. Борддоре ошем менюэз амалтэк ӵошатӥ 7-тӥ медсанчастьысь нылпи отделениен. Отысь шыд пӧлысь сӥль зынэз уд шӧды. Пожалэс кизер лымын одӥг-ог кубиста куар пырыос уяло. Кыкетӥ блюдо - вуэн кизертыса пӧзьтэм ӝук, сӥлен нянен суро котлет; куинетӥез - шӧг компот яке чай. Вӧй, сыр, емышъёс сярысь поттылонэз ӧвӧл. *** Тюрьма - санаторий ӧвӧл. Заключённойёсын ӵош висё асьсэос эмъясьёс но. 1996 арын сотрудникъёс пӧлысь туберкулёз паласькиз 6 муртлы, тубдиспансере шедиз 4 врач. 1997 арын таосыз борды эшшо кыкез ватсаськиз. 4 номеро ИТК-ын ужасьёс, соослэн семьяоссы кышкыт чер азьын пӧрмизы зэмос заложникъёслы. Кызьы вераз И. А. Богданова, ортчытэм эскеронъёсъя пиналъёссылэн но тазалыксы вылын со шӧдӥське ни. Паймоно кадь, но республикаысьтымы Калыклэсь тазалыксэ утёнъя министерство кужмысь оскытыны выре, туберкулёз инфекционной висёнъёс пӧлы уг пыры шуыса. Та муген ик уждун борды 25 процент ватсаса тыронэз ИТК-ын ужасьлы кулэстӥзы 15 процентозь. Кызьы пусйиз колонилэн начальникез подполковник А. А. Дедюхин, МВД-лэн учреждениосаз вуиз сыӵе официальной валэктон. Шонерен тае нокызьы но уд лыдъя. Туберкулёз уг ке паласькы, врачъёс юри кутскыса шат висем улэ аналско но аръёсын тубдиспанерын кыллё? Соосты утён вылысь, ӝегатскытэк лэсьтоно санпропускник, висисьёс пӧлын ужась мурт гуртаз мед бертоз чылкыт дӥсен, чылкыт вылтырын, туберкулёз палочкаосты, али сямен, бордаз медаз нуы. Котькудӥз врач - офицер. Адямиез, котькыӵе со преступник медло - эмъялозы пумозяз. Озьы шуыны луоз Михаил Васильевич Михайлов, Андрей Рудольфович Барышников но мукетъёсыз сярысь. Таосыз ужзэс куштыса уз кошке. - Ми нокинэ но кужмысь ум возиське, кин кышка, кинлы колониын уг яра - ӧс котьку усьтэмын, - шуэ подполковник Дедюхин. - Татчы ми ваньмы лыктэмын ас мылкыдмыя. Тодӥськом: ма возьма азьланьын, но калыкен ужаса, уродэз сярысь вунэтӥськод. Зэмен но, кадръёс татын ӵем вошъясько, кылё тужгес но чидасьёсыз, кышкасьтэмъёсыз. Арлэн пумаз 10 мурт пенсие кошкиз. Интыязы вуо егитъёс. Дышозы-а соос висисьёсын ужаны - улон возьматоз. Нокин но туннэ уз оскыты, асьсэос но кышкыт черен уз курадӟе шуыса. Статистикалы осконо ке, матысь аръёсы туберкулёзэн висисьёслэн лыдзы дуннеын 10 миллионлы йылоз, та диагнозэн кулоз ог 3 миллионэз. 70 процентэз усёз Россия вылэ. Чахоткаен висись мурт ар ӵоже 20 но солэсь ятыр адямиослы висёнзэ пала. Ватсалом на: Россилэн Госдумаеныз амнистия ялон сярысь кутэм Постановлениын пусъемын И но ИИ группае шедись туберкулёзэн висисьёс но. Кытчы соос мынозы, пытсэт улысь потыса? Сюрессы одӥг: калык пӧлы, асьме доры, выль но выль адямиослы туберкулёз кизьыса. *** Колониын ужасьёслэн чиданзылы огласянь паймоно, мукет ласянь - вожъяськоно. Татын сямдэ "дурыны" быгатоно: нуналмысь нуналэ преступникъёслэн дуннеязы бергаса, адямилыктэ утёно. Кин но пытсэт улэ шедемын ӧвӧл! Уд тоды, мар солэн йыраз, мар ватэмын пушказ. Вань, дыр, пӧлазы ас туссэс ыштымтэосыз но. Учкем "делоос" пӧлысь, жаляса верано, сыӵеосыз ӧз пумиське. 15 арлы пуктэмъёс пӧлысь огез - Чувашиысь 69 аресъем рецидивист Иосифов М. И. Та воргорон 1956 арысен кутскыса тюрьма наръёс вылын кӧла. Пумозяз чидаз ке, огъя "стажез" 45 ар люкаськоз. Нылкышноосты эриктэмамез понна, куинь пол быдэн 15 ар срок басьтӥз ни. Адямилы мумы йӧлыныз йыраз визь пырымтэ бере, колониысь ӝукен-а пыроз на? 58 арескын эрике потыса, семьяяд ул вал - ӧз чида. Кышноез вань вылысь, вордэм нылыныз кӧланы кутске. Отӥяз - нылызлэн нылпиосыныз: 8 аресъем внучкаеныз но 10 аресъем внучкаеныз. Шарае медаз поттэ шуыса, соослы шудонъёс, ческыт сиён басьялля. Кышкатъяз: кинлы ке верады ке - кыктэсты быдто! Быдтыны ӧз вуы - судлэн решениеныз Иосифов нош ик пытсэт сьӧры шеде. Чахоткаен висись пересез Ижевске келяло. Эрике потон дырыз - 4 ар ортчыса, соку ӵапак 73 арессэ тырмытоз. Талэсь пӧртэм улон сюресэз уз, дыр, луы Воткинскысь Пухаревлэн, 1980 арын вордскем пилэн. Пуктэмын 8 арлы, 10 аресъем нылэз эриктэмамез но виыны выремез понна. Талэсь азьвыл со лушкаськылӥз, вина юылӥз, собере дышиз наркотикъёс борды. 13 аресысен нылъёсын кӧланы кутскиз. Судлэн решениеныз Пухарев келямын вал Можгаысь колоние. Висёнзэ шедьтэмзы бере выжто 4 номеро ИТК-е. Солэн огъёзоосыз татын трос гинэ. Тюрьмае шедемзылэсь пичи но уг кӧберало. Ижевскысь 19 аресъем Алексей озьы ик шуиз: - Армие мынэмлэсь татын пукыны умойгес. Соиз шонер. Дыраз сюдо, эмъяло. Ӵыжы-выжыоссылы но сюрес усьтэмын, гожтэтъёс, посылкаос басьтыны лэземын. Огез гинэ люкетэ: чонари вотэс кадь кыскам бышкись ез. Со люке быдэс дуннелэсь. ЛЮДМИЛА ПЕРЕВОЗЧИКОВА. Туспуктэмъёсыз Владимир Камашевлэн. Шӧкыч "Устоез курлась" конкурсэ Эн вунэтэ уй палъёсты! Визьмо но ужын синмаськымон адямиос Иж кар котырын гинэ шат уло? Малы туж ӧжыт гожъяськоды уй пал ёросъёс сярысь? Кез палъёсын но тунсыко адямиос вань, дыр. Тодэм потэ вылэм, вань-а Удмуртиын "теневой экономика" шуонэн вырисьёс. Шӧкыч уромлы Элькунысь Кивалтэтэз но курлано вылэм. Уждун но пенсия дыраз мед сётъялозы. Озьы ик ёросъёсысь кивалтӥсьёсты но куддыр пӧсекъятыны кулэ. Тырмымтэоссы соослэн но трос. Петр Верещагин. Кез ёрос, Озон гурт. ЭСКЕРОН ПАЛАТАЫН ПУМИСЬКОН Валлян ортчиз Кун Кенешысь Эскерон палаталэн заседаниез. Таяз учыре отчы ӧтизы шаерысьтымы ивор вӧлмытонъя кун ёзъёслэсь кивалтӥсьёссэс. Вераськон мынӥз огъя ужез умоятон сярысь. Пусъемын вал, Эскерон палатаын сэрттэм-пертчем учыръёсты прессаын паськытгес но мургес возьматоно шуыса. Удысэз озьы радъян юрттоз улонамы пумиськылӥсь шуг-секытъёсты палэнтыны, бюджетысь коньдонэз пайдаёгес кутыны. Эскерон палата озьы ик учкиз мукет ужпумъёсты. Заседаниез нуиз депутат Михаил Шишкин. О. МАРКОВ. Шӧкыч Конкурс азьланьтӥське ТЫШКАСЬКЫ МОНЭ, МОН ШУМПОТО ГИНЭ! Ортчем арлэн пумаз Шӧкыч уром ялӥз вал "Устоез курлась" конкурс. Тросэз милемды курланы вуттӥзы ни. Нош туэ лыдӟисьёсмы куинь сюрслы тросгес луизы. Соин ик, малпасько, ушъясьёсмы сяна, курласьёсмы но тросгес луозы, дыр. Нош Шӧкыч уромлэн сямыз сыӵе, сое тышкасько ке, сюлэмыз нясь-нясь буйга. Соин ик ми но шумпотыса ивортӥськом: "Устоез курлась" конкурс азьланьтӥське. Тодады вайытӥськом, татчы пыриськыны быгатэ котькудӥз, кин лыдӟиськыны но гожъяськыны йӧндыре. Со понна тӥледлы валэктоно луоз кык юанмылы: 1. "Удмурт дуннелэн" маиз тӥледлы уг кельшы? 2. Кыӵе сямъёссэ курласалды Шӧкыч уромлэсь? Мар сярысь но кин сярысь лыдӟемды потэ та бамысь? Та юанъёслы валэктон понна, тӥледлы кулэ луоз на кагаз, ручка но гожъяськыны быгатонлыкъёсты сяна, лыдъяськон устолыкты. Малы ке шуоно, одӥгез куронмы - котькуд юанлы валэктонды дас предложенилэсь трос медаз луы. Нош вормисьёсты кузьым одно ик мед шедьтоз шуыса, эн вунэтэ нимтулдэс но кытын улэмдэс гожтыны. Тужгес но тунсыкоосыныз гожтэтъёсын Шӧкыч уром газет пыр одно ик вань лыдӟисьёсмес тодматоз. Йылпумъянъёс лэсьтэмын луозы южтолэзе. Кӧтты тырымон тышкаське, эшъёс! Генерал Барсков: "СЫНОМЕМ ПЫӴАЛ ТӤРЛЫКЕН НОМЫР УД ЛЭСЬТЫ" Генерал-майор Геннадий Васильевич БАРСКОВ - Удмурт Элькунлэн военной комиссарез. Со вордскемын 1947 арын Татариын, будэмын гуртысь дышетӥсьлэн семьяяз. Ульяновскысь танковой училищеез йылпумъямез бере вал взводлэн, роталэн командирез, вуиз дивизилэн командирозяз. Службазэ ортчытӥз СССР-лэн пӧртэм сэрегъёсаз, озьы ик Германиын но. 1989 арын луиз республикамылэн военкомез. Вить ар талэсь азьло солы сётӥзы генерал-майор звание. Службазэ синмаськымон нуэмез понна пусъемын пӧртэм наградаосын. Туннэ со маде, кыӵе сюлмаськонъёсын уло, кыӵе ужпумъёсты быдэсъяло республикаысьтымы военной адямиос. - Та вакытэ котькуд командирлэн, дыр, нырысетӥ йырвисёнэз герӟаськемын армиез кулэстонэн. Тӥ понна но-а озьы ик? - Сюлмаськонъёстэк улыны уг луы. Нырысь ик юан армиез кулэстон сярысь сётӥды бере, вераськом со пумысен. Бен, та ужпум частьёсысь командиръёс понна гинэ ӧвӧл, военкоматъёс понна но секыт йырвисён. Армиысь кошкем офицеръёс ми доры вуо ук, кытчы ке уг. Нырысетӥез ик куронзы - улон инты кулэ. Нош военкомат юртъёс уг лэсьты, соиз ваньмызлы валамон. Вазиськиськом асьме Правительствое, Москвае. Ярам коть, алигес 92 квартиралы коньдон висъязы. Нош милям учётамы 670 адями сылэ ук. Лыдъялэ, кӧняез соос пӧлысь улон интытэк кылёзы на. Со сяна, милемды туэ косӥзы военкоматъёсысьтымы 70 ужасьмес кулэстыны. Ньыльдонэз со пӧлысь улон интытэк... - Геннадий Васильевич, мон валасько быдэс армейской частьёсты но кулэстэмзэс. Зэм но, со быдӟа Вооружённой Кужымъёс страналы кулэ но ӧвӧл, дыр. Нош военкоматъёслэн ужзы азьвыл мында ик кыле ук, егитъёсты армие дасян-келян уг кулэсмы бере. - Соиз озьы, мар веранэз. Но ми военной адямиос: приказ сётэмын ке, сое одно ик быдэстоно. Нялтас вераса, ми егитъёсты армие келянэн гинэ ум выриське, сотэк но уж лачак. - Тӥ мынэсьтым вуонозэ юанме ӵапак азьпалтӥды. Азьвыл вакытэ военкомат арлы быдэ сямен пӧртэм дышетсконъёсы, сборъёсы, учениосы кыска вал армиысь бертэмъёсты. Тани мон но, запасысь офицер, кытӥяз акыляк луылӥ со ӧтчанъёсын. Нош али улон гань-гань луиз та ласянь. - Вот таиз ужпум монэ туж но туж сюлэмшугъяськытэ. Запасысь воинъёс армиын басьтэм быгатонлыксэс, тодон-валанъёссэс вунэтыны нокызьы но кулэ ӧвӧл. Соос котьку дась мед луозы музъеммес утьыны. Нош али, туж жаляса верано луэ, югдур нокытчы ярантэм. Пыӵал тӥрлык, техника ялан воштӥське. Валамон, "запасникъёс" сое уг тодо, ма, вужзэ но ялан золгес вунэто. Соос табере асьсэос вужмем пыӵал тӥрлыклы укшало. Нош кызьы ожмаськод сыномем пыӵалэн? Эриктэк тодэ лыктэ запас сюрес вылын сылӥсь бронепоездмы сярысь кырӟан. - Кызьы мон валасько, ужпум нош ик герӟаськемын коньдонэн? - Маин луоз, соин сяна. Сборъёс, учениос - дуно маке ужрад. Отчы кыскем калыкез сюдон-дӥсян сярысь мон уг вераськы ни. Кин соослы уждун тыроз "войнаен шудонын" дыръязы, ужамзы понна но уг ке тыро. Кивалтӥсьёс шуо: пожалуйста, нуэ, пе, воргоронъёсмес учениосы, но уждун тырыны соослы ми ум быгатӥське. Обороная министерстволэн но та ужрадъёслы коньдонэз ӧвӧл. Ма, туала солдатъёсты но калык радъя дӥсяны-кутчаны ум быгатӥське но. Адӟиськоды, луоз, бушлатэн, "камуфляжен" дӥсяськем офицеръёсты. Та дӥсь полигонлы чакламын, нош милям командиръёсмы соин город урамъёсын "кильтыръясько". - Озьыен, егитъёсты срочной службае дасянэн но югдур туж ик ушъямон ӧвӧл? - Пӧртэм-а луоз? Азьвыл ДОСААФ-лэн организациосыз кинэ гинэ ӧз дышетылэ: парашютистъёсты, водительёсты, радистъёсты, вертолётчикъёсты, радиомеханикъёсты но мукетсэ. Табере соос дасяны быгато на парашютистъёсты но электромеханикъёсты гинэ. Призывник шофёр луыны мылкыд кариз ке, дышетскем дунэзлэсь ог люкетсэ ачиз тыроно луоз. Та удысын но ваньмыз коньдонэн сураськемын-пожаськемын. Тӥни сыӵе мӧзмыт югдур, гажано корреспондент эш. - Призывникъёс пумысен ик юало на. Тодам лыктэ, милям гуртысьтымы кыксэ пияшез кыӵе ке нимысьтыз лагере тазалыксэс юнматыны келяллязы вал: армиын служить карон понна, пе, секталазы-а, ӝуждалазы-а уг тырмы вылэм. Али таӵе ужрадъёс ортчытъясько на-а? - Военкомат чотын уг. Тани туэ, милям чакламмыя, республикаямы 12 сюрс пияш приписной комиссиез ортчоз. Малпасько, соос пӧлысь ог сюрссэ медикъёс служить карыны ярантэмен лыдъялозы. Куинь сюрссэ выльысь, пыр-поч эскерыса йӧнатыны интыяно луоз. Та ужен вырозы районъёсысь больницаос. Кызьы пӧрмытозы, вераны шуг ай. Нош огъя верано ке, туала егитъёслэн тазалыксы вожъяськымон ӧвӧл. Я, таиз ваньмызлы тодмо ини, озьы ик мугъёсыз но. - Нош службае мыныны пумит луисьёс вань-а? - Вань. Вылаз ик, арысь аре йыло. Тани миым но 31 адями призывной пунктэ ӧз вуы. Соослы пумит уголовной ужъёс ӝутэмын. Служить карыны тросгес пумит луо городын улӥсьёс. Нош гурт пияшъёс ӝутскем мылкыдын армие мыно. Со гинэ ма?! Одӥгаз районын таӵе учыр вал. Одӥг семьяысь пияш армиысен алякъяськонъяз бырыны шедиз. Солэсь вынзэ туала законъя армие басьтыны уг яра. Нош анаез-атаез тэльмыро: басьтэ, пе, одно ик басьтэ, кыӵе синмын ми но, пимы но гуртоосмы шоры учком. Уг быгатӥськы, шуисько, законэз тӥяны. Военкомат азьын бӧрдыса пуко, ява, уг кошко. Эх, малпасько, марысь мар ке, ачим кыл куто, басьтом пияшез. Ӧйтӧд, солэн-а, мынам-а шудмы бадӟымгес вылэм: пияш службазэ туж ӟеч ортчытыса, дораз таза вуиз. - Берлоез юанэ туннэ вераськонмылы туж ик матын ӧвӧл ке но, тодэм потэ вал: шаерамы будэмъёс пӧлын вань-а бадӟым кизилиосын ветлӥсьёс? - Ма, маин удмурт музъем мукетызлэсь начаргес? Бӧлякъёсыз данъяськыны кулэ Сергей Александрович Маевен, Обороная министерстволэн Главной Автомобильно-бронетанковой управлениезлэн начальникеныз, генерал-полковникен. Со будэмын Грах ёросын. Шаркан ёросын вордскемын полковник Е. Л. Галасеев, Индустриальной районлэн военкомез. Полковник М. Г. Калмыков - Завьял музъемлэн пиез. Вань, вань данъяськымон пиосмы. Г. ТИХОНОВ. Анай кылзэс мед яратозы Тазьы малпаса, Удмурт Элькунысь Калыкез дышетонъя министерство, Дышетӥсьёслэсь тодон-валанзэс будэтонъя институт но Удмурт кун университет туэ нош ик пиналъёс понна олимпиада ортчытӥзы. Нырысь со школаосын но ёросъёсын вал. Отын вормисе потэмъёс Ижевске вуизы. Оргкомитет та ужпум бордын трос гинэ ужаз: юанъёс дасяз, положениез радъяз, жюриез юнматӥз, кӧлон инты, сюдон сярысь сюлмаськиз. Соин ик меӵак вераны луоно: олимпиада пайдалыко ортчиз. Таиз визь сынан ӵапак сӥземын вал Куӟебай Гердлы но Ашальчи Окилы. Куӟебай Гердлэн вордскемез дырысен 100 арес тырмысал туэ. Но матын но ӧз кылды солы сомында улыны. Куд-ог дыръя тазьы но луылэ: кыӵе ке бадӟым ужрадэз туж тодмо адямилы сӥзё, нош пуштросэз солы чик но уг тупа. Таяз учыре озьы ӧй вал. Сыӵе мылкыд кылдӥз: Куӟебай Герд но, Ашальчи Оки но олимпиадаын весь вал кадь. Юнме шорысь ӧй вал со. Таӵе мылкыд люкаськемъёслы уката ик пыӵатӥз нырысь ӝытаз ортчем праздник. Со быдэсак Куӟебай Гердлы но Ашальчи Окилы сӥземын вал. Праздникез усьтыса, шуныт вераськиз калыкез дышетонъя министрлэн нырысетӥ воштӥсез Г. Н. Васильева. Удмурт калыклэн дано пиез сярысь мадиз тодмо тодосчи Ф. К. Ермаков. Меӵак вераны луоно: трос курытсэ но кузьытсэ адӟиз со Куӟебай Гердлы шонер дунъет сётыны тыршемез понна. Номырлэсь но ӧз кышка, ялан но ялан выль материалъёс утчаз, соосын калыкез тодматӥз. Табере сыӵе ваменэс луэмез тани кыӵе емыш сётӥз: Герд шонере поттэмын, ЮНЕСКО тазэ арез солы сӥзиз. Палэнэ ӧз кыльы праздникын Ашальчи Окилэн тусбуйыз но. Солэн кылбуръёсыз но нырысетӥ поэтессалэн сюрестӥз вамыштӥсь егитъёс сярысь мадиз кылбурчи Людмила Кутянова. Олимпиадае лыктэмъёс шуныт пумитазы Куӟебай Гердлэсь вынызлэсь пизэ Ю. А. Чайниковез. Со туж оскымон вераз поэтлэн пиналъёсты яратэмез, соослы ӟеч мылкыд пыӵатыны тыршемез сярысь. Гуртаз одно ик пиналъёслы кузьымъёсын берталоз вылэм. Кузьымзэ сётъямезлэсь азьло дӥськутсэс чылкытатыны, пе, косэ вал. Тодмо поэт О. А. Поскрёбышев Герд сярысь ӟырдыт мылкыдын гожтэм кылбурзэ лыдӟиз. Удмурт калыклэн дано пиезлы паймымон шонер дунъет сётӥз З. А. Богомолова. Вакчияк тодэ ваёно ке, тазьыгес шуиз со: - Котькуд калыклэн аслаз вашкала но дано героез вань. Куӟебай Герд солэсь но вылӥын. Удмурт калыклэн культура, литература, искусство удысъёсын азинсконъёсыз - со Гердлэн туала улонэ пыӵам азьло малпанъёсыз. Герд удмурт калыклэн легендаез луиз, со вылӥе, инме лобӟиз кадь. Зэмзэ но, озьы кадь со. Празднике лыктэмъёсты шулдыртӥзы тодмо артистлэн Геннадий Бекмановлэн гуръёсыз. Шуныт пумитазы алнашъёслэсь кырӟамзэс но. Асьсэос пиналъёс но празднике пыриськизы: кылбуръёссэс лыдӟизы, кырӟанъёс кырӟазы. Зэм, дышетскисьёс сцена вылэ шергес потазы. Азьланяз та выллем праздникъёсын соослы асьсэдыз возьматыны тросгес луонлык сётоно вылэм. Олимпиада азьын эшшо одӥг тунсыко ужрад ортчиз на. Котькуд районысь командалы косэмын вал Куӟебай Гердлы но Ашальчи Окилы сӥзем бордгазетъёс дасяны. Та ужез соос туж мыло-кыдо быдэстӥллям. Олимпиадае куамын кык бордгазет ваемын вал. Котькуд ёрос, вань школаосты огазеяса, одӥг бордгазет дасяны кулэ. Тросэз командаос тазьы ик лэсьтӥллям. Куд-ог районъёс бордгазетъёссэс школаен-школаен дасяллям. Соин ик Якшур-Бодья - ньыль, Пичи Пурга - куинь, Алнаш - кык бордгазет возьматӥзы. Пиналъёслэсь ужъёссэс дунъяны нимысьтыз жюри кылдытэмын вал. Шумпотыса верасько: соин кивалтыны мыным оскизы. Соин ик куд-ог малпанъёсме вераме потэ. Пичи Пурга районысь баграш-биграос но, кечолъёс но, гожняос но умоесь кылбуръёс, веросъёс гожтӥллям. Грах ёросысь Вылӥ Эгра школаысь пиналъёслы дышетӥсьёссы но юрттӥллям: соос бордгазетэ асьсэос но маке-маке гожтӥллям. Тросэз пиналъёс усто суреданы быгатэмзэс возьматӥллям. Зэм, огвыллемесьгес суредъёссы. Пиналъёс уже куто кыӵе ке кылбурез, солы иллюстрация выллем кылбур гожто. Нош Алнаш ёросысь тунсыко пӧрмем суредзы Варзи-Ятчи школаысь пиналъёслэн. Быдэс бордгазет тыр шунды тылсиос пӧлын - Куӟебай Гердлэн тусбуез. Йыръянэз но туж шонер быръемын - "Зарни шунды ӝужалоз". Та кылъёс угось поэтлэн вань кылбуръёсызлы эпиграф выллем луо. Балезино районысь Исаково школаысь дышетскисьёс Куӟебай Гердлы шара гожтэт дасяллям. Отын соос поэтлы кыл сётӥллям визьмоесь, кибашлыесь луыны но улонмес умойгес карыны. Алнаш школаысь пиналъёс но паймымон суред малпаллям. Соос бордгазетазы Куӟебай Гердэз но Ашальчи Окиез суредаллям. Поэт но поэтесса ваче ки кутскыса вамышто. Ма, улонын но, зэмзэ ик, озьыгес вал угось со. Бордгазетэнызы уката но паймытӥзы Игралась одӥг номеро школаысь пиналъёс. Соослэн ужзы туж узыр пуштросъем. Куд-ог материалъёссы зэмос исследованилы кельшо. Шедьтӥллям Куӟебай Герд нимо премиен пусъем вань дано адямиосты. Таиз ини ваньмызлы пайдалыко материал. Кызьы тодмо, Ф. К. Ермаков вань тодосчиос пӧлын Куӟебай Гердлэсь улэмзэ но ужамзэ эскеронъя валтӥсь инты басьтэ. Сое дунъяса, пиналъёс Ф. К. Ермаковлы кылбур но сӥзиллям. Олимпиада сярысь верано ке, пиналъёс жюриез шумпоттӥзы. Азьло аръёсын ӵошатоно ке, соослэн тодон-валанъёссы ӟечесьгес луиллям. Котькуд олимпиадаын азьвыл одно ик пусйиськом вал: дышетскисьёс, предложениез грамматика ласянь эскерыкузы, тужгес шугъясько шуыса. Зэм, янгышъёссы туэ но вал. Нош оглом басьтоно ке, предложениосты но, нимаз кылъёсты но туэ сэрттыны-пертчыны быгатӥллям. Син шоры соиз но йӧтӥз на: пиналъёс чылкытгес но чебергес гожъяськыны кутскиллям. Шараяськизы куд-ог сюлмаськытӥсь шекъёс но. Ваньмыз юанъёс но ужъёс программа вылэ чӧлскыса дасямын вал. Пӧртэмез гинэ: я соос мукет сяменгес верамын, я кӧня ке огвыллем материал огъяса сётэмын. Шуом, котькуд вераськон люкетлэн аслаз тодметъёсыз вань. Куд-огез пӧртэм вераськон люкетъёслы тупало. Тае чакласа, огез юан тазьы пуктэмын вал: вералэ, кыӵе вераськон люкетъёслы лыд тодмет тупа? Тросэз пиналъёс тае валэктыны ӧз быгатэ. Озьыен, грамматикаез сӥен-сӥен гинэ тодо, нош огъяны уг быгато. Та уката но умой возьматӥз, макем кулэ вылэм 10-тӥ-11-тӥ классъёслы арняяз одӥг час ке но удмурт кылъя урокъёс пыртыны. Отын вань материалэз огъяса сётыны луысал. Нош оглом вераса, пиналъёс, зэмзэ но, умой тодон-валанъёссэс возьматӥзы. Соин оргкомитет шонер лэсьтӥз, дыр, туж тунсыко одӥг дэмлан сётыса: вормисе потэмъёсты экзаменъёстэк педучилищеосы, университетэ кутоно. Олимпиада пайдалыко луиз дышетӥсьёслы но: соосын министерствоын ужасьёс пумиськизы, тодмо тодосчиос лекциос лыдӟизы. Г. Ушаков, жюрилэн членэз, профессор. Шӧкыч "ВИЁ ТОНЭ... ВӦСЬ КАРЫТЭК" Эн малпалэ, Шӧкыч уром котьку серекъя но маскаръяське гинэ шуыса. Солы но куддыр ӝожмыт луэ. Туннэ со тӥледлы мадёз кемалась ӧвӧл луэм учыр сярысь... Ӝыт пал дас куинь аресъем Галина туж зол анаеныз керетӥз. Вожпотэменыз ӧсэз йыг! ворсаз но город ульчае потӥз. Ижын пеймыт, кезьыт. Тол куазь ассэ шӧдытэ. Буммашысь трамвай кульчоын Галина тодматске кык пиосын: Сергеен но Вадимен. Соослы вань сюлмаськонъёссэ вера. Пиос нылэз жалямъясько, Октябрьлы 10 ар ульчаысь огаз коркалэн мурӝолаз огдырлы улыны ӵекто. Отын егит Галинаез водкаен сектало. Нылаш кудӟе но аслэсьтыз мар каремзэ уг вала ни... Кык арня ортчыса, Сергей тодэ: нылашез, анаез сяна, милиция но утча. Кызь куинь аресъем пияш соку ик кышкатске. Угось пытсэт сьӧры выльысь шедемез уг пот ни. Аракы юэмзы бере (нош ӟенеликчиос табере тросгес луизы), Сергей Галинаез виыны малпасько шуыса вера. Эшъёссэ огдырлы мукет висъетэ потыны куре. Отын, пе, ныллы шайгу гудыса дасялэ. Юлтошъёсыз пумит уг луо, соку ик уж борды басьтӥсько. Галинаез водкаен сектамез бере, Сергей нокыӵе кариськытэк ик шуэ: - Тон татысь улэпкын уд кошкы ни. Мон виё тонэ... вӧсь карытэк. Собере кышкатскем нылашез кекатэ... Йыруж лэсьтӥсьёсты кутӥзы. Суд вал. Сергеез дас кык арлы пытсэт сьӧры келязы, нош Вадимез - тямыс арлы. Мукет эшъёссы но палэнэ ӧз кыле - ваньзылэн сюрессы одӥг. Та учырез мылкыддэс ӝожмыт карон понна гинэ вераме ӧз поты. Ужпум мукетыз бордын. Учке али, ма бордысен ваньмыз кутскиз. Галина керетӥз анаеныз... Егит эшъёсылы вераме потэ: улонын котьма луэ, мар ке лэсьтон азяды умой-умой малпаське. Шӧкычен ӵош куректӥз Ф. МИННИГАРАЕВ. Коверысь удмурт шорт Кылем средае Москва сӥё-дано пусйиз К. Гердлэн вордскемез дырысен 100 ар тырмемез. Россиысь Нациосын ужанъя но федерациысь кусыпъёсъя министерствоын вал дано удмурт пиез буре ваёнъя ӝыт, пресс-конференция, Гердлэн улэм вакытэзлы сӥзем возьматон (выставка) но фильм. Отчы пыриськизы министр Вячеслав Михайлов, Удмурт Республикаысь Кун Кенешлэн Тӧроезлэн воштӥсез Алексей Красильников, Правительстволэн Тӧроезлэн воштӥсез Антонина Лисина, Венгрилэн Россиысь посолэз Дьёрдь Наковски, Финляндиысь профессор Алпо Юнтунен, удмурт но ӟуч тодосчи (учёнойёс), писательёс, суредасьёс, артистъёс, журналистъёс. Огъя культуралэн бадӟым коверез удмурт шорт чебер ворекъяз. Четверге, 29 январе, Россиысь Писательёслэн союззылэн секретариатэз ортчытӥз Гердлы сӥзем сӥё- дано кенеш. Одӥгаз галереяын усьтӥськиз киужъёсын возьматон. Кенешемын март толэзе Москваысь валтӥсь библиотекаын радъяны Гердлы сӥзем ужрад. Москваын ортчем пумиськонъёс сярысь "Удмурт дунне" азьланьын рос-прос ивортоз. Алексей Шкляев (телефонэн). Берекет ВАШКАЛАЗЭ ТОДЭ ВАЙЫСА Кутсаськон Одӥгаз "Берекет" бамын гожъяй вал вашкалаосмылэн арамзы, кабан сюремзы сярысь. Лыдӟисьёсмы пӧлын азьло улэм-вылэмен тунсыкъяськисьёс вань. Гожъямъёстэ, пе, лыдӟиськом, возьмаськом. Мӧйыос бен сое ваньзэ асьсэ вылын чидазы-адӟизы. Нош пинал калык троссэ уг тоды. Тӥни соин таяз гожтэтам лыдӟисьёсмес тодматэ потэ кутсаськонэн. Анай-атайёслы гинэ ӧвӧл, мыным аслым но вашкалаосмылэсь та ужзэс киын быдэстыны кылдӥз на. Кутсаськон машинаос чик ӧй вал ай, соин кутсаськизы кутэсэн. Ӟег культоез ньыль яке вить мурт кутсалляз. Сӥзьылысен тулысозь ужзы тырмылӥз. Культоосыз лапас улысь музъем вылэ тыро кык чурен тысё палынызы ваче (шундыё куазен азбарын но кутсаськылӥзы). Тырем культоосыз кутэсэн кокаса, одӥг пол ортчо, собере берыкъяло но нош ик кокало. Керттэтъёсты сюрлоен вандыса ортчо но нош ик кутэсэн тышкаса ортчо на. Курозэ мажесэн мажсало но культое кертто. Культоос кузесь ке, керттэтэз уг вандыло, озьы ик кельто, кайталы сезьы, йыды яке чабей культо керттыны, пе, яралоз. Лумбыт кутсаса, тачак гинэ ю тысь люкаське. Ӵуказеяз сое сузяло ини киын бергатоно тӧлӥськонэн. Юэз пу вышкыен - пудовкаен - мертаса, ларъёсы киськазы. Вышкы кутонэн лэсьтэмын, отчы ӵапак одӥг пуд ю тэре. Сезьыез но мукет валэс юосыз мукет сяменгес кутсазы. Кутсаськонэ пырисько нылкышноос но, воргоронъёс но. Одно ик кулэ вить мурт. Соос пӧлысь одӥгез луэ культо ӵыжись пиосмурт. Солэн кутэсэз но мукетъёсызлэн сярысь кузьгес. Ӟег культоез сямен ик, нырысь кык пол тышкаса кошко, собере керттэтъёсты вандылыса кутсаны кутско. Культо ӵыжись культоез палэнэгес ӵыжыса лэзе но, сое тыпыр-тапыр гинэ тышкало. Культо ӵыжись эшшо урдсӥн шуккыса лэзе на сое. Кылсярысь, куро бордысьтыз сезьы туж шуген усе, трос тышкано-шукконо луэ вал. Кутсаськыны мынӥсь муртлэсь одно ик юалозы вал, вить муртэн кутсаськыны быгатэ-а шуыса. Уг ке быгаты, культо керттэт вандӥсе яке берыкъясе пукто вал. Угось вить кузя кутсаськон дыръя кышкытгес, кутэсэн йырад-а, пыдад-а уз-а сюры шуыса. Куинь-ньыль кузя уж каньылэнгес ортче. Кутсам бере сезьыез но тӧло, окто-калто. Кутсаськон вакытэ туж шулдыр луэ вал лапас котырын. Пиналъёс куро пушкын погыллясько, шудо, бызьыло. Зарнивуам кадь сезьы куро ӵуж-ӵуж но ческыт зыно. Пудо сое туж яратыса, ческыт но небыт потыса сие. Ми палъёсын (Пичи Пурга) колхоз кылдэм бере но кутэсэн кутсаськылӥзы ай. Берлогес кутсаськон машинаос кылдӥзы. Куинь валэн бергато вал машинаез. Нош кидыслы кельтоно тысез азьло сямен ик кутэсэн кокаллязы, машинаен кутсаса, тросэз, пе, тысь паньга яке пилиське. Тӥни озьы, пичиен- пичиен нуналысь нуналэ кутсаса, вашкалаосмы тырмытъязы ю-нянен ларъёссэс, кеносъёссэс. Государстволы но тырмытъязы, асьсэлы но окмылӥз. Ализэ бен мазэ веранэз на. Ваньмыз кадь вал ини музъем ужасьлэсь улон-вылонзэ умой карон понна. Техника тырмымон гинэ люкаськиз. Нош улонмы выльысь йырин-чукин луэ кадь. Кин тодэ, оло, нош кутэсъёсты но тодэ ваёд, уже кутоно луод. Али бен соосты адӟылыны уг луы ни. Оло, кинлэн ке лапас улаз костаське ик на, музейёсысь но шедьтыны быгатоды. Кутэс пумысен калык веранъёсты но кӧнязэ ке тодам ваисько. Кылсярысь, кутэс зол ке но шукке, соин уг жугисько. Кутэс вамен вамыштыса уг пото. Муртлэсь кутэссэ эн куты - янгышалод яке кинэ ке шуккод. Кутсаськон бырем бере, кутэсэз пыдло вато. Кутэсэз валатэк кутӥд ке, аслад йырад шуккод. Бодылэн пумыз кык, нош кутэслэн - одӥг. Р. ЯКОВЛЕВ. Берекет ТОДЭМДЫ ПОТЭ КЕ... Мае возьмато? Куд-ог нылкышно нимъёс: Александра - (греч.) кышкасьтэм Анастасия - (греч.) выльысь улӟон Анна - (евр.) ваньмыз умой, ӟеч Ариадна - (греч.) картсэ юн яратӥсь, мукетыныз ноку "сьӧлыкамтэ" мурт Валентина - (лат.) кужмо Галина - (греч.) чалмыт, лачмыт улон Дария - (перс.) кужмо, вормись Евгения - (греч.) мукетызлы ӟечсэ лэсьтӥсь Екатерина - (греч.) котьку чылкыт Елена - (греч.) тыл (факел) Зинаида - (греч.) Инмарен ӵошатымон умой мурт Ирина - (греч.) тупан, тупаса улон Ксения - (греч.) улон интытэм пыдын калгись мурт Лариса - (греч.) камкоӵо (чайка) Воргорон нимъёс: Александр - (греч.) адямиосты утись Алексий - (греч.) утись Анатолий - (греч.) шунды ӝужан палась Андрей - (греч.) кышкасьтэм Валентин - (лат.) кужмо Валерий - (лат.) сӥльвиро, сэзь мылкыдо Василий - (греч.) эксэйлы тупась Георгий (Юрий) - (греч.) музъем ужась Евгений - (греч.) мукетыз сярысь сюлмаськись Иннокентий - (лат.) сьӧлыктэм Иоан - (евр.) - Инмарлэн ӟечез Иосиф - (евр.) трослы будэтэм (ватсам) Константин - (лат.) юн сямо, ас кыл вылаз сылӥсь Максим - (лат.) бадӟымлэсь бадӟым Михаил - (евр.) Инмар кадь адями Никита - (греч.) вормись Николай - (греч.) вормись калык Павел - (греч.) из Тимофей - (греч) Инмарез гажась, солы дурбасьтӥсь Фёдор - (греч.) Инмарлэн сётэмез. Маскарчи Тямысэтӥ классын дышетскись Миток доры эшез вуиз. - Мар-о кариськод? - юа. - Кроссвордысь юанъёслы валэктыны вырисько. - Кызьыгес ужъёс? Пӧрме-а? - Ма, одӥг юан гинэ кылиз на, - шуэ Миток. - Нокызьы но ӧй тоды. - Кыӵе? - Кызетӥ даурысь дано ӟуч маскарчи. Дас одӥг букваез, нырысетӥез - "ч", витетӥез - "0", сизьыметӥез "ы". - Гм... - йырберзэ корма Митоклэн эшез. Собере шуак-дуак кеськиз: - Черномырдин! Учкы ай, тупа-а? - Бен, тупа, - шумпотӥз Миток но кроссвордэ берпуметӥ кылэз гожтӥз. Г. Жуковская. ПЕНСИЯ МЕДАЗ ӜЕГА ШУЫСА Январе пенсиосты тырыны коньдон тырмыт люкамын. Берло нуналъёсы Алнаш, Балезино, Вавож, Дэбес, Як.-Бодья но куд-ог мукет ёросъёсы 8 миллион манет келямын. Юрттӥз Россиысь Пенсиосъя фонд: Удмуртие 19 миллион манет дотация ыстӥз, со сяна, республикаысьмы му вӧй поттӥсьёс, "Буммаш", "Ижсталь" АО-ос, "Воткинский машзавод" предприятие но мукетъёсыз Пенсиосъя фондлы пунэмъёссэс берыктӥзы. Сюлмаськытэ соиз но: шаераысьтымы городъёс но ёросъёс (Глазов город, Игра, Сарапул но Юкаменск ёросъёс сяна) страховой взносъёсты октонъя планъёссэс уг быдэсъяло. Таин валче февраль толэзе пенсиосты тыронын шуг-секытъёс кылдозы. Соин ик Удмуртиысь Пенсиосъя фонд вань предприятиосты, учреждениосты но организациосты куре вань тыронъёссэс дыраз тырыны но пунэмъёссэс берыктыны. Кӧня кечез кутозы? Ӧтчам бере малпанъёс Вань удмуртъёслэн ВИ Ӧтчамазы делегатъёс туж кулэен лыдъязы таӵе ватсан пыртонэз: "Ӧтчам лыдъя: выль паспортын одно мед луоз Россия Федерацилэн гражданинэзлэсь национальностьсэ возьматӥсь нимысьтыз чур". Малы сыӵе ватсан кулэ луиз? Делегатъёс ӧтчамын та сярысь туж ӟырдыт вераськизы. Выжымес юри вунэтон ӟече уз вутты. Огкылысь кариськыны луоз-а сыӵе югдурен? Кин малпаз сыӵе "визьмолэсь но визьмо" ужрадэз? Россиысь Кун Думалэн депутатэз Н. И. Сапожников Ижевскын дыръяз берлоез юан пумысен огшоры гинэ валэктӥз: "Паспортысь национальностез возьматӥсь чурез ӵушыны ӵектӥз Россилэн Президентэз". Чакласькоды, луоз: со Россиын улӥсьёслы вазиськыны яратэ россиянин кылын. Солы, шӧдске, та кыл туж яра. Вань нациосты, пудо уллёез сямен, одӥг радэ пуктэ. Озьы бере, тон удмурт но, ӟуч но, бигер но, еврей но, мукетыз но уд луы ни. Малы кулэ на национальностед? Вунэтыны, пӧйшур уллё сямен улыны косо ук. Кулэ уз луэ ни аслад литература кылыд но (сураськоз сьӧрлось кылъёсын), калыкедлэн огъя историез но, культурая пӧртэмлыкъёсыд но, выжыеныд данъяськон мылкыдыд но. Кемалась ӧвӧл Россиысь радио пыр та ужпумъёсъя вераськизы. Кыл сётӥзы Карелиысь тодосчилы, Петрозаводск университетысь деканлы. Со шуиз: "Национальностеныд данъяськыны возьыт луыны кулэ. Со понна тынад нокыӵе ужед ӧвӧл". Тӥни кызьы! Сыӵе "визьмоослэн" супыльтэмзыя, кулэ ӧвӧл ни тыныд аслад улосвылэд, вордскем-будэм интыед. Мар пӧртэмез, пе, кытын улӥськод? "Демократъёс" котькуд калыклы асэриклык сётон сярысь шоккетӥллям гинэ. Нош шоккетытэк, рос-прос вераськоно ке, тодады вае ай, кызьы революцилы пумит луись "демократъёс", шунды пуксён палась юлтошъёссылэн косэмзыя, индылэмзыя, трос нациё Советской Союзэз куашкатӥзы. Табере, оло, Россиез но кесэген-кесэген люкылозы. Адямиез шузимытон вылысь, нырысь ик кутӥзы сьӧрлось ӧтёнъёсты. Нюръяськоно пе, центрен, ас эрикедъя улоно. Собере нюръяськоно суверенитет понна. Визьёсты суран-пожан вылысь, туж кескич война нуизы. Котькуд нация аслэсьтыз улосвылзэ, интызэ мед шедьтоз шуо вал. Нация вань бере, со эрико мед луоз. Советской Союзэз национальной юртъёслы-квартираослы люкиськом шуылӥзы. Нош мар луиз собере? Мукет улосвылъёсы кылизы пӧртэм калыкъёс, соос пӧлын - удмуртъёс но (али данакез уло Казахстанын, Украинаын, Узбекистанын, Ростовын, мукет интыосын). Россилэн кунгож сьӧраз кылизы вал 25 миллион ёрос ӟучъёс. Соос пала дурбасьтӥсь сокем ӧвӧл ни. Улӥськод ке - ул, быриськод ке - быр. Ваньмы ӵош СССР-ын улыкумы, ӟучъёс, удмуртъёс, бигеръёс, армянъёс, грузинъёс, украинецъёс, мукетъёсыз - ваньзы СССР-лэн кунмуртъёсыз вал. Ваньзы ӵош асьсэлэн огъя музъемзы понна сылӥзы, сое утьыны тыршизы, фашизмлэн туж шимес кужымезлы но ӧз сётске. Нациез быдтон, саптан вылысь, мукет амалъёс но вылӥллям. Сыӵе луэ, кылсярысь, ӟуч кылэз ӧвӧлтэмак карон. Огласянь, сое сьӧрлось ваем кылъёсын, жуг-жаген тырмыто, огшоры кылъёслэсь но пуштроссэс вошто. Кылсярысь, миллион кыл интые лимон шуо. Нош вераськоназы кӧня жаргон, жоб кыл, ораськон кыл пырто. Куд-огез, асьсэды тодосчи шуыны дӥсьтӥсь шакшы муртъёс, ораськон кылъёсты нимаз книгае люкаса поттыло но соин вузкаро ни (алигес со сярысь газетъёсын гожъязы). Ӟучъёс ӧпкелё: ӝоген, оло, куспамы чебер вераськем интые, пуны сямен утомы, коӵыш сямен мяугетомы ни. Яке мукет пӧйшуръёслэсь адӟем каром. Адямилэн кыӵе выжыысь луэмез тодмо ӧз луы ни ке, нация быроз. Нация быриз ке, асэриклык но уз луы. Асэриклык ӧз луы ке, нацилэн аслаз улосвылэз но уз луы. Кин кузё луоз улон интыямы? Музъем кинлэн луоз? Нокинлэн! Кин киын власть, соос ик музъемен ас мылкыдзыя кузёяськозы. Вузкарозы. Бусыосты нюлэсэн, ошмесъёсын, шуръёсын, мукет музъем узырлыкъёсын ӵош вузалозы "выль ӟучъёслы" яке воксё сьӧрлось кузёослы, кинлы асьмелэн туала йыръёсмы-чиновникъёсмы - йыбыртъяны дышизы ини. Кӧня меда "кечез ыбыны" медо, паспортысь одӥг гинэ чурез ӵушыса?! *** Та ужме гожтӥ ни вал Выль ар вуэмлэсь азьло. Нош со лыктӥз но, кыкетӥ толшоре кӧтӝожме выльысь туж яркыт тодэ вайытӥзы "выль армянъёс". Кинъёс со сыӵе шуиськоды-а? 1997-тӥ арысь КВН-лэн финалаз лыктэмъёс. Чагыр экран вылысен та команда но вань россиянъёсты, озьы ик СНГ-ын улӥсьёсты ӧтиз асьсэлэсь выжызэс юн утьыны, кин луэмзэс вунэтытэк улыны, вань ӟечсэ гинэ азинтыны. Нош армянъёс калыкенызы данъясько, соос пӧлын трос визьмо адямиос. ЛЕОНИД ФЕДОРОВ. Берекет Инкуазь но асьмеос КАЙСЫ Та тылобурдо туж паймымон маке. Кемалась дырысен уно странаосын со сярысь пӧртэм легендаос кылдытъямын. Святой тылобурдоос пӧлы но пырто кайсыез. Учке ай солэн нырыз шоры. Шонерак кирослы тупа со. Кайсылэн выллем ныръёсты нокытысь уд пумита ни. Со гинэ-а? Вань пӧйшуръёслэн, тылобурдоослэн шӧйзы уродме, нош кайсыос кема дыр ӵоже огкадь уло. Эшшо вераноез вань на. Кайсы пи поттэ толалтэ - кырын "порпиос ыбылӥськон" вакытэ но. Шыр гольыкесь кайсыпиос уг кынмо. Паймем вылэ паймоно кадь. Но татын номыр сыӵе-таӵеез ӧвӧл. Кутском нырыз бордысен ик. Кирослы тупась со котьку ӧвӧл. Тютюпиос вордӥсько шонересь ныръёсын, кечат-вамат луо асьсэ понна сиськыны кутскемзы бере гинэ: нырлэн вылӥ люкетэз куасалтӥське уллань, улӥыз - выллань. Ӵыжинэз кокчаны, отысь кидысъёссэ поттылыны озьы кайсыослы умой. Малы соос толалтэ вуо но кызьы пиоссы уг кынмо? Таизлы но юанлы валэктыны луоз. Кызьы тодӥськомы, вань тылобурдоос пи потто тулыс но гужем. Соку угось сиёнэн соослы каньылгес, кыдёке лобоно уг луо, котырысьтызы ик мар но со шедьто. Нош кайсыослэн сиёнзы - ӵыжинысь кидыс. Кидысъёс вуыны кутско сӥзьылысен март толэзёзь. Мартысен кутскыса, ӵыжинъёс усьтӥськыны ӧдъяло, соку отысь кидысъёсты но поттылыны каньылгес. Тӥни самой со вакытэ кайсыпиос карысьтызы лобӟо, асьсэос сиён утчаны кутско. Озьыен, декабрь но январь толэзьёс пи поттыны самой умой дыр луэ. Нош уг кынмо тютюос соин: карзы мур гырке туж шуныт лэсьтэмын. Самой кезьыт вакытэ но тютюослы отын шуныт. Пузъёс улын шуныт гон, борддоръёс куинь сантиметр зӧкталаё. Нош кар вылын сюлмо анай вырӟылытэк пуке отчыозь, ку тютюпиос лобыса кошкозы. Та дыр ӵоже мумы кайсыез но пичиоссэс айы кайсы сюдэ-вордэ. Маин герӟаськемын кулэм кайсыослэн шӧйзы кема дыр ӵоже уродмымтэзы? Кыз но пужым кидысъёсын трос юрсирез. Тылобурдолэн мугорыз быдэсакез сямен та юрсирен пыӵамын. Кайсылы со номыр уродзэ уг лэсьты. Озьы со луло дыръяз ик аспӧртэм мумилы кельше. Юрсираськем мугор 15-20 ар ӵоже сисьмыны уг сётскы ни. Кайсыос туж капчиесь, шулдыресь тылобурдоос. Соослэсь вай вылын йыринуллань ошиськыса улэмзэс, бергамзэс туж маскара потыса учконо. Соосты уй пал попугай но шуыло. Айы кайсыос гордмытэсь луо. Макем со мӧйы, сокем яркыт "дӥськутэз". Мумы тылобурдоос вожмыт-пурысесь. Нош тютюпиос пурысьмыт-куренесь. Нюлэс тылобурдоос пӧлысь сизь но кайсы гуртлэсь самой палэнэсэсь луо. Нокыӵе сютэм улон соосты адями котыре уз вутты. А. СУТУЛОВ. 29-тӥ ёзэт. Кун службалэсь кун должностьсэ быдэсъяны кужымез эскерон 1. Кун службалэн кун должностяз нырысьсэ кутэм гражданин, конкурс ортчытыса кутэмез но, яке кун службалэн мукет группаысьтыз яке специализациысьтыз кун должносте выжтэм кун ужась куинь- куать толэзь ӵоже кужымзэ эскере. Кужымез эскерон дыре уг пыро висьыса ужамтэ вакытъёс, озьы ик сыӵе вакытъёс, куке кун ужась уважительной мугъёсын службаез ӧй вал. 2. Кужымзэ эскерон вакытэ кун ужась пумысен та Закон кутӥське. Кужымзэ эскерон дырыз ортчемлэсь азьвыл кун ужасьлы квалификацияя мукетыз разряд уг сётӥськы. 3. Кужымзэ эскерон дырыз ортчем бере кун ужась службазэ азьланьтэ ке, со эскерон пыр потэмын лыдъяське, сое юнматон сярысь ватсаса решениос уг кутӥсько. Собере кун службалэн та кун должностьысьтыз мозмытыны луэ законэн чаклам мугъёсъя гинэ. Кужымез эскерон вакыт кун службая стаже пыре. 4. Эскерон возьматэ ке, кун ужасьлэн быгатонлыкъёсыз тырмыт ӧвӧл шуыса, сое, ачиз соглаш луэмъя, кун службалэн азьвыл яке мукет должностяз выжтыны, нош выжыны пумит луыкуз - ужезлэсь мозмытыны луэ. 30-тӥ ёзэт. Квалификацияя кун экзамен 1. Квалификацияя кун экзамен ортчытӥське, кун ужасьлы квалификацияя разряд сётон понна. Квалификацияя кун экзаменэз ортчытыны луэ кун ужась дэмламъя, та экзаменъя солы квалификацияя мукет разряд сётон понна, бӧрысь сое кун службалэн мукет кун должностяз выжытытэк. 2. Квалификацияя кун экзаменъёсты ортчытыны рад юнматэмын Россия Федерацилэн но Удмурт Республикалэн законъёсынызы но норма тупатӥсь мукет правовой актъёсынызы. 31-тӥ ёзэт. Кун ужасьлы аттестация 1. Кун ужасьлэсь профессиезъя тодон-валанъёссэ, должностьсэ быдэсъяны быгатэмзэ шараян, солы квалификацияя разряд сётон сярысь ужпумез эскерон понна ортчытӥське аттестация. 2. Аттестациез ортчытон кык арлы одӥг поллэсь ӵемгес но ньыль арлы одӥг поллэсь шергес медаз луы. 3. Аттестациосты ортчытъян понна кун властьлэн ёзъёсаз аттестацияя комиссиос кылдытӥсько. Аттестациосты ортчытыны рад, амалъёс, луонлыкъёс юнматэмын Удмурт Республикаысь Кун ужасьёслы аттестация сярысь положениен. 4. Аттестацияя комиссиослэн решениоссы дунъет, ӵектонъёс сётэм выллем луо но кужыме пыро кун властьлэн таин вырись ёзэз яке таин вырись должностен мурт аттестациез ортчем кун ужась пумысен правовой акт кутэмзы бере гинэ. 5. Аттестацилэсь мозмытэмын таӵе арлыдо кун ужасьёс: нылкышноос - 55 ареслэсь бадӟымгес, пиосмуртъёс - 60 ареслэсь бадӟымгес, но мукет кун ужасьёс законодательство косэмъя. 32-тӥ ёзэт. Кун службаын стажировка 1. Куд-ог учыръёсы кун службае пыремлэсь, кун службалэн валтӥсь кун должностяз выжемлэсь азьвыл куинь яке ӧжытгес толэзь ӵоже стажировкаез ортчыны кулэ. 2. Кун ужасьлэн стажировкаез сярысь решениез кутэ кун властьлэн ёзэз яке та ужен вырись должностен мурт аттестацияя комиссилэн дэмламезъя но кун ужась соглаш луэмъя. Кун службалэн котькуд кун должностезъя стажировкалы дыр, рад но программа юнматэмын Кун ужасьёслэн стажировказы сярысь положениен. 33-тӥ ёзэт. Квалификацияя разряд сётон 1. Квалификацияя кун экзаменлэн яке аттестацилэн йылпумъянъёсызъя кун ужасьёслы квалификацияя разряд сётӥське. 2. Квалификацияя разрядъёсты сётон рад но соосты кун службалэн мукет кун должностьёсаз выжыку утён рад юнматӥсько Федерацилэн законъёсыныз. 34-тӥ ёзэт. Кун службая вылэ тубон 1. Кун службая вылэ тубон ортче кун службалэсь вылӥгес кун должностьсэ басьтыса конкурсъёс пыр яке должносте юнматэмъя. 2. Кун службазыя вылэгес тубыны быгато кун ужасьёс, должностьсэс 3 ар ӵоже кулэезъя быдэсъяло ке, вылӥгес должность буш ке, выль ужлы дышетскемзэс, квалификацизэс будэтэмзэс, стажировказэс, аттестацияя комиссилэсь дэмланъёссэ лыдэ басьтыса. Кадръёсъя резерве пыртэм кун ужасьёслэн кун службая вылэ тубыны правозы бадӟымгес. 3. Кун службая вылэ тубемез пырто личной уже, кун ужасьлэн ужъя книжкаяз но кун ужасьёслэн реестразы. 35-тӥ ёзэт. Кун службалэн кадръёсъя резервез 1. Кун службалэн кадръёсъя резервез кылдытӥське юнматэм критериосъя кун ужасьёсты бырйыса, кудъёсызлэн кун службалэсь вылӥ кун должностьёссэ быдэсъяны тодон-валанъёссы но быгатонлыкъёссы тырмыт. 2. Кун службалэн кадръёсъя резерваз пырто аттестацияя комиссиослэн, кун власть ёзъёслэн кивалтӥсьёссылэн дэмламзыя. Кун службалэн кадръёсъя резерваз пыртэмез юнматэ кун властьлэн таин вырись ёзэзлэн яке таин вырись должностен муртлэн правовой актэз. 3. Кадръёсъя резервлэн структураез, сое кылдытон но соин ужан рад юнматӥсько Удмурт Республикаын Кун службалэн кадръёсъя резервез сярысь положениен. 36-тӥ ёзэт. Кун службаез уретон 1. Кун служба уретӥське, кун ужась ужысьтыз кошке ке яке пенсие потэ ке. 2. Россия Федерацилэн но Удмурт Республикалэн закондательствоенызы чаклам мугъёсын сяна, кун ужасез ужысьтыз мозмытыны луэ кун власть ёзлэн кивалтӥсез дэмламъя таӵе учыръёсы: а) кун ужась Россия Федерацилэн гражданинэз луэмысь дугдэ ке; б) та законэн кун ужасьёс понна юнматэм ужъёсты но сюбегатонъёсты уг быдэсъя ке; в) кунлэсь лушкем иворъёссэ но законэн утиськись мукет лушкем иворъёс шарая ке; г) аттестацияя комиссилэн решениезъя, службазэ нуыны уг быгатэ ке; д) кун службалэсь кун должностьсэ быдэсъяны юнматэм арлыдлэсь ортче ке; е) та Законлэн 24-тӥ ёзэтэзлэн 3-тӥ люкетаз чаклам учыръёс кылдо ке. 3) Кун ужась пенсие потэ законэн юнматэм радлыкъя. Кун службаез быдэсъяны луэ 60 арес тырмытозь. Кун властьлэн ёзэныз кивалтӥсьлэн решениезъя кун ужасьёслэсь кун службаез ортчон дырзэс азьланьтыны луэ, соос кун службалэсь вылӥ, азьвалтӥсь но валтӥсь кун должностьёссэ быдэсъяло ке но арлыдзыя кун службаез нуыны юнматэм арлыдлы уг ке но тупало. Кун ужасьлэсь кун службаез нуон дырзэ азьланьтыны одӥгполскын одӥг арлэсь кемалы уг луы. 65 арессэ тырмытэм кун ужасьлэсь кун службаез нуон дырзэ азьланьтыны уг луы. Та арлыдзэ тырмытэмез бере, кун ужась ужзэ азьланьтыны быгатэ, ужъя огкыл огвакытлы кутыса. 4. Пенсие потыса ужысьтыз кошкыкуз кун ужасьлы сётӥське коньдонэн кузьым службаезлэн котькуд кык арезлы быдэ должностья окладэз. Солэн быдӟалаез должностья куать окладлэсь ятыргес луыны уг быгаты, сётӥське со огпол гинэ но солэсь налог уг басьтӥськы. 37-тӥ ёзэт. Та Законлэн кужыме пыремез 1. Та Закон кужыме пыре сое печатлам нуналысен. 2. Удмурт Республикаысь Правительство, кун властьлэн но кивалтонлэн ёзъёссы 1998 арын 1 январёзь асьсэлэсь норма тупатӥсь правовой актъёссэс та Законъя тупатыны кулэ. 3. Удмурт Республикаысь Правительство толэзь куспын Удмурт Республикаысь Кун Кенешлэн Президиумаз сётыны кулэ Удмурт Республикаысь Кун должностьёсъя реестрез но Удмурт Республикаын Кун службалэн кун должностьёсызъя реестрез. Удмурт Республикаысь Кун Кенешлэн Тӧроез А. А. Волков. Ижевск город, 1997 арын 26 ноябре. � 523-И Удмурт Республикалэн кун службаез сярысь Удмурт Республикалэн Законэз Та Закон юнматэ Удмурт Республикаысь кун службалэсь (отӥяз - кун служба) радъяськемезлэсь правоя инъетъёссэ но Удмурт Республикаысь кун ужасьёслэсь (отӥяз - кун ужасьёс) правоя положенизэс. И йырет. Огъя валатонъёс 1-тӥ ёзэт. Кун должность 1. Кун должность - Удмурт Республикаысь кун властьлэн ёзъёсысьтыз должность. Со ёзъёс кылдытӥсько Удмурт Республикалэн Конституциезъя, Удмурт Республикалэн законодательствоезъя. Должностьлы юнматэмын быдэсъяно удысъёс, ёзэзлэсь полномочиоссэ быдэсъян но со понна луонлыкъёс кылдытон вылысь, уждун но удысэз нуэм понна кыл кутон. 2. Кун должностьёс та Законын тазьы люкемын: а) должностьёс, кудъёсыз Удмурт Республикалэн Конституциеныз юнматэмын, кун властьлэн ёзъёсызлэсь полномочиоссэс быдэсъян понна (кун властьлэн ёзъёсыныз кивалтӥсьёс, депутатъёс, министръёс, судьяос) - "А" категориысь кун должностьёс. "А" категориысь кун должностен муртъёслы ужаны луонлык кылдытӥсь гарантиос юнматэмын Удмурт Республикалэн законъёсыныз но правоя мукет нормативной актъёсыныз; б) должностьёс, кудъёсыз кылдытӥсько законъя, "А" категориысь кун должностен муртъёслы полномочиоссэс быдэсъяны луонлыкъёс кылдытон понна, - "Б" категориысь кун должностьёс; в) должностьёс, кудъёссэ кун властьлэн ёзъёсыз кылдыто, соослэсь полномочиоссэс быдэсъян понна, - "В" категориысь кун должностьёс; "А", "Б", "В" категориосысь кун должностьёс сётэмын Удмурт Республикаысь кун должностьёсъя реестрын. Кун властьлэн ёзъёсызлы ужаны луонлыкъёс кылдытон понна, соослэн штатъёсъя расписаниосазы пыртэмын луыны быгато должностьёс, кудъёсыз кун должность уг луо но та Законэн уг чакласько. "Б" но "В" категориосысь кун должностьёс Удмурт Республикаысь кун службалэн должностьёсыз пӧлы пыро, соос сётэмын Удмурт Республикаысь кун службалэн кун должностьёсызъя реестрын, группаослы люкыса. Удмурт Республикаысь кун службалэн кун должностьёсызъя реестр Удмурт Республикаысь кун должностьёсъя реестрлэн ог люкетэз луэ. Та Реестр борды сётӥсько кун службалэн кун должностьёсызъя специализациос но та должностьёсты быдэсъясь муртъёслы ужзыя куронъёс. Удмурт Республикаысь кун службалэн кун должностьёсызъя реестрез юнматэ Удмурт Республикаысь Кун Кенешлэн Президиумез. 2-тӥ ёзэт. Кун служба 1. Та Законъя кун служба - со Удмурт Республикаысь кун властьлэн ёзъёсызлы полномочиоссэс быдэсъяны луонлыкъёс кылдытон бордын ужанн. Кун служба - "Б" но "В" категориосысь кун должностьёсты быдэсъясь муртъёслэн должностьсэс быдэсъямзы. 2. "Б" категориысь кун должностез быдэсъянъя кун служба кыстӥське сыӵе дыр ӵоже, кӧнялы быръемын яке юнматэмын "А" категориысь кун должностез быдэсъясь муртъёс. 3. Удмурт Республикаысь кун службае пыро: а) Удмурт Республикаысь кун властьлэн ёзъёсысьтыз кун служба; б) Удмурт Республикалэн административно-территориальной единицаосысьтыз кун властьлэн ёзъёсысьтыз кун служба. 3-тӥ ёзэт. Кун ужась 1. Кун ужась - Россия Федерацилэн гражданинэз, кудӥз быдэсъя кун должностья кун службалэсь обязанностьёссэ Федерацилэн законэныз, Удмурт Республикалэн законэныз юнматэм радлыкъя, Удмурт Республикалэн бюджетэз чотын коньдон басьтыса. 2. Федерацилэн законодательствоезъя Удмурт Республикалэн кун ужасьёсыз Россия Федерацилэн кун ужасьёсыныз лыдъясько. 3. Кун ужасьёслы уждунлэн, компенсациослэн, социальной юрттэт сётонъя коньдонлэн быдӟалазы юнматэмын Удмурт Республикалэн бюджетэныз. 4-тӥ ёзэт. Удмурт Республикалэн кун служба сярысь законъёсыз 1. Удмурт Республикаысь кун служба право ласянь радъяське Россия Федерацилэн Конституциезъя но Удмурт Республикалэн Конституциезъя, Федерацилэн "Россия Федерациысь кун службалэн инъетъёсыз сярысь" законэзъя, "Удмурт Республикаын кун властьлэн ёзъёсызлэн радлыксы сярысь" Удмурт Республикалэн Законэзъя, та Законъя, Россия Федерациысь но Удмурт Республикаысь мукет законъёсъя но норма тупатӥсь правовой актъёсъя. 2. Кун властьлэн куд-ог ёзъёсаз кун службалэн аспӧртэмлыкъёсыз юнматӥсько норма тупатӥсь актъёсын, та Законэз лыдэ басьтыса. 3. Кун ужасьёс пумысен кутӥсько Россия Федерацилэн уж сярысь законъёсыз, аспӧртэмлыкъёсты, кудъёсыз Федерацилэн "Россия Федерациысь кун службалэн инъетъёсыз сярысь" Законэныз юнматэм лыдэ басьтыса. "Б" категориысь кун должностьёсты быдэсъясь кун ужасьёс пумысен та Закон кутӥське сюбегатонъёсты лыдэ басьтыса, кудъёсыз та Законлэн 2-тӥ ёзэтэзлэн 2-тӥ люкетаз чакламын. ИИ йырет. Кун службаез радъян 5-тӥ ёзэт. Кун службалэн принципъёсыз 1. Кун службалэн принципъёсыз: а) Россия Федерацилэн Конституциезлэн, Удмурт Республикалэн Конституциезлэн, Федерацилэн законъёсызлэн, Удмурт Республикалэн законъёсызлэн норма тупатӥсь мукет правовой актъёслэсь, должностной инструкциослэсь вылынгес луэмзы кун ужасьёс должностенызы герӟаськем обязанностьёссэс быдэсъяку но соослэсь правооссэс быдэсъяку; б) адямилэн но гражданинлэн правоосызлэн но эрикъёсызлэн, соосты быдэсъямлэн котьмалэсь вылын луэмзы, кун ужасьёслэн адямилэсь но гражданинлэсь правооссэ но эрикъёссэ тодонъя, быдэсъянъя но утёнъя обязанностьёссы; в) кун власть радлыклэн огъя луэмез, Россия Федерация но Удмурт Республика куспын быдэсъяно удысъёсты люкон; г) законъёсты кылдытӥсь, быдэсъясь но судебной властез люкон; д) вань гражданъёслэн кун службаез нуыны быгатэмзы, соослэсь быгатонлыкъёссэс но профессональной тодон-валанъёссэс лыдэ басьтыса; е) кун ужасьёс одно ик быдэсъяны кулэ кун властьлэн вылӥ ёзэныз но кивалтӥсьёсын юнматэм решениосты, соос полномочиоссы сьӧры потытэк но законодательство вылэ пыкиськыса кутэмын ке; ж) кун служба пумысен валтӥсь куронъёслэн огъя луэмзы; з) кун ужасьёслэн ужзэс быгатыса но валаса быдэсъямзы; и) кун службаез шара нуон; к) кун ужасьёслэн решениосты дасямзы но кутэмзы, должностен герӟаськем обязанностьёссэс быдэсъямтэ яке урод быдэсъям понна кыл кутэмзы; л) кун ужасьёсты улон-вылонын но право ласянь утён; м) кун властьлэн ёзъёсаз кун ужасьёслэн кадръёссылэн юн вазиськемзы; н) кун службалэн - партиослэсь, кунлэн вӧсьлы огазеяськонъёслэсь люкиськемзы. 6-тӥ ёзэт. Кун службалэсь кун должностьёссэ люкон 1. Кун службалэн кун должностьёсыз таӵе группаослы люкисько: кун службалэн вылӥ кун должностьёсыз (5 группа); кун службалэн азьвалтӥсь кун должностьёсыз (4 группа); кун службалэн валтӥсь кун должностьёсыз (3 группа); кун службалэн бадӟым кун должностьёсыз (2 группа); кун службалэн пичи кун должностьёсыз (1 группа). 2. Кун службалэн кун должностьёсыз специализациослы люкисько. Кун службалэсь кун должностьсэ быдэсъян понна, кун ужасьлэн профессиональной тодон-валанъёсызъя специализациез луыны кулэ. Кун службалэн кун должностьёсызлэн специализациосыз юнматӥсько, кун службалэн кун должностезлэн ужъя аспӧртэмлыкъёсыз но кун властьлэн ёзъёсызлэн быдэсъяно удысъёссылэн аспӧртэмлыкъёссы вылэ пыкиськыса. 7-тӥ ёзэт. Кун ужасьёслы квалификацияя куронъёс 1. Кун службалэсь кун должностьсэ быдэсъясь муртлы квалификацияя куронъёс пӧлы пыро: - профессиен герӟаськем тодон-валанъёс, кун службалэн кун должностьёсызлэсь группазэс но специализацизэс лыдэ басьтыса; - специальностья ужам аръёс но быгатонлыкъёс; - Россия Федерацилэсь Конституцизэ, Удмурт Республикалэсь Конституцизэ, Россия Федерацилэсь но Удмурт Республикалэсь законъёссэс но нормая актъёссэс тодон, должностез быдэсъяны кулэ луэмзыя. 2. Кун службалэсь кун должностьсэ быдэсъяны мылкыд карись гражданъёслы куронъёс: а) кун службалэн вылӥ но азьвалтӥсь кун должностьёсыз (5 но 4 группа) кулэ каро кун службалэн кун должностезлэн специализациезъя вылӥ профессиональной образованиез яке со выллем образованиез - кун службалэн кун должностьёсызлэн специализацизыя ватсаса вылӥ профессиональной тодон-валанъёсын; б) кун службалэн валтӥсь но бадӟым кун должностьёсыз (3 но 2 группа) кулэ каро "кунэн кивалтон" специальностья яке кун службалэн кун должностезлэн специализациезъя вылӥ профессиональной образованиез яке та выллем ик образованиез; в) кун службалэн пичи кун должностьёсыз (1 группа) кулэ каро кун службалэн кун должностьёсызлэн специализацизыя шор ёзо профессиональной образованиез яке та выллем ик образованиез. Одӥг образованилэн мукет образованиен огвыллем луэмез сярысь решение кутӥське законэн тупатэм радлыкъя. 3. Кун службалэн кун должностьёсызлы мукетъёсыз куронъёс, кудъёсыз кун властьлэн ёзъёсызлэн аспӧртэмлыкъёсыныз герӟаськемын, юнматэмын луыны быгато Федерацилэн но Удмурт Республикалэн законъёсынызы, озьы ик кун властьлэн ёзъёссылэн та ёзъёсысь кун ужасьёс пумысен нормативной актъёсынызы. 8-тӥ ёзэт. Кун ужасьёслэн квалификацияя разрядъёссы 1. Кун ужасьёслэн квалификацияя разрядъёссы возьмато кун ужасьёслэн профессиональной тодон- валанъёссылэсь квалифакацияя куронъёслы тупамзэс. Со куронъёс кун службалэн кун должностьёсызлэн группаосызлы нимаз тупатэмын. 2. Кун ужасьёслы квалификацияя таӵе разрядъёс сётӥсько: - Россия Федерациысь 1, 2 но 3 классъем действительной кун советниик - кун службалэсь вылӥ кун должностьёссэ быдэсъясь кун ужасьёслы; - Россия Федерациысь 1, 2 но 3 классъем кун советник - кун службалэсь азьвалтӥсь кун должностьёссэ быдэсъясь кун ужасьёслы; - Россия Федерациысь 1, 2 но 3 классъем советник - кун службалэсь валтӥсь кун должностьёссэ быдэсъясь кун ужасьёслы; - кун службалэн 1, 2 но 3 классъем советникез - кун службалэсь бадӟым кун должностьёссэ быдэсъясь кун ужасьёслы; - кун службалэн 1, 2 но 3 классъем референтэз - кун службалэсь пичи кун должностьёссэ быдэсъясь кун ужасьёслы. 3. Федерацилэн законъёсызъя но Удмурт Республикалэн законъёсызъя кун службалэн куд-ог удысъёсаз квалификацияя мукет разрядъёс но званиос юнматэмын луыны быгато. 9-тӥ ёзэт. Кун ужасьлэн личной ужез, кун ужасьёслэн реестрзы 1. Кун ужасьлэн кун службаез нуэмез возьматӥське личной ужын. Кун ужасьлэсь личной ужзэ нуэ кун властьлэн ёзэзлэн кадръёсъя службаез. Кун ужасез кун службая выль интые выжтыку, солэн личной ужез выль ужан интыяз сётӥське. 2. Кун ужасьёс сярысь, озьы ик кун службалэн вылӥ кун должностьёсаз азьланяз дэмланы чаклам кун ужасьёс сярысь иворъёс кун ужасьёслэн реестразы пыро. 3. Личной ужъёсты но кун ужасьёслэсь реестрзэс нуон рад юнматэмын Удмурт Республикалэн законаз но норма тупатӥсь мукет правовой актъёсаз. Кун ужасьёслэсь политика но вӧсьлык пумысен малпанъёссэс, кызьы улэмзэс эскерыны но кун ужасьёслэн реестразы пыртыны уг яра. 10-тӥ ёзэт. Кун службалэн ужпумъёсызъя республикаысь ёзъёс 1. Та Законэн пуктэм ужпумъёсты быдэстонэн кивалтэ Удмурт Республикаысь вылӥ должностен муртлэн кадровой политикая кенешез (отӥяз - Кадровой политикая кенеш). Кадровой политикая кенеш ужа Удмурт Республикаысь Кун Кенешлэн Президиуменыз юнматэм Положениея. Кадровой политикая кенеш Удмурт Республикаын кадръёсъя политикалэсь ужпумъёссэ юнматэ но быдэсъя, кун службалэсь мынэмзэ но пайда ваемзэ эскере, кун службалэн ужпумъёсызъя законъёслы но норма тупатӥсь правовой актъёслы инъетъёс дася. 2. Кун службаез радъя, право но методика ласянь юрттэт сётэ Удмурт Республикаысь быдэсъясь властьлэн кун службалэн ужпумъёсызъя ёзэз. 3. Удмурт Республикаысь быдэсъясь властьлэн кун службая ёзэзлэн ужпумъёсыз: - кун власть ёзъёслы кадръёсты дасянэз азьланяз кызьы азинтон но та пумысен план дасян ужез радъян но соин кивалтон; - кун ужасьёслэсь реестрзэс нуон; - кун ужасьёсты дышетонэз, выльысь дышетонэз но соослэсь тодон-валанъёссэс будэтонэз радъян но методика ласянь юрттэт сётон; - кун службалэн вылӥ кун должностьёсаз дэмлано муртъёсты лыдэ басьтон но соослэсь резерв кылдытэ; - кун властьлэн ёзъёсыныз ӵош конкурсъёс, аттестациос, стажировкаос но квалификацияя экзаменъёс ортчытон; - кун власть ёзъёслэн кадръёсъя службаоссылы кун службаен, ужасьёсын кивалтон пумысен методикаен юрттон. - кун службалы право ласянь юрттэт сётонэн, кун служба удысын научной исследованиосты нуонэн кивалтон; - кун ужасьёслэсь ӝожтӥськонъёссэс но дэмланъёссэс эскерон; - уж пумысен кылдэм эчешонъёсты эскерон; - гражданъёслэсь кун ужасьёс вылэ ӝожтӥськонъёссэс но вазиськонъёссэс эскере. 11-тӥ ёзэт. Кун властьлэн ёзэзлэн кадръёсъя службаез 1. кун власть ёзлэн кадръёсъя службаез: а) кун службалэсь кун должностьёссэ быдэсъян понна конкурсъёсты, аттестациосты, кун ужасьёслэсь кун службалэсь кун должностьёссэ быдэсъяны быгатонлыкъёссэс эскерыны, стажировкаосты ортчытыны луонлыкъёс кылдытэ; б) гожтэ кун власть ёзъёслэсь яке та удысэз нуыны оскем должностен муртлэсь решениоссэс, кудъёсыз герӟаськемын кун ужасьёслэн кун службаез нуэменызы, кун ужасьёслэсь личной ужъёссэс нуэ, кун ужасьёслэн ужъя книжкаосазы кулэ луись гожтэмъёсты пырто; в) кун ужасьёслы правоя положенизы, кун службаен герӟаськем сюбегатонъёсты быдэсъян пумысен визь-кенеш сётэ; г) кун ужасьёслэсь профессиональной тодон-валанъёссэс дунъя, кун ужасьёсты выль ужлы дышетонэз но соослэсь тодон-валанъёссэс будэтонэз радъя. ИИИ йырет. Кун ужасьлэн правоя положениез 12-тӥ ёзэт. Кун ужасьлэн правоосыз 1. Кун ужась быгатэ: а) тодматскыны документъёсын, кудъёсыз солэсь кун службалэн кун должностезлэсь правооссэ но обязанностьёссэ, ужамезлэсь ӟечлыксэ дунъяны критериосты но бадӟымгес должность басьтыны куронъёсты юнмато, озьы ик должностьсэ быдэсъяны кулэ луись организационно-технической условиос пумысен документъёсын тодматскыны; б) должностьсэ быдэсъяны кулэ луись иворъёсты но материалъёсты курыны но басьтыны юнматэм радлыкъя; в) должностьсэ быдэсъян понна предприятиосы, учреждениосы но организациосы юнматэм радлыкъя вуылыны, со предприятиослэн, учреждениослэн но организациослэн право ласянь кызьы радъяськемзы но асваньбурез кызьы кутэмзы шоры учкытэк; г) решениосты кутыны но соосты дасянэ пыриськыны, должностьсы кулэ каре ке; д) кун службалэсь кун должностьсэ быдэсъян понна конкурсэ пыриськыны ас мылкыд каремзыя; е) бадӟымгес должность, тросгес уждун басьтыны, ужамезлэсь пайдалыксэ, ужан стажзэ но тодон- валанъёссэ лыдэ басьтыса; ж) личной ужысьтыз вань материалъёсын, ужамез сярысь малпанъёсын но мукет документъёсын тодматскыны, соосты личной ужаз пыртэмлэсь азьвыл, личной ужаз аслэсьтыз валэктонъёссэ пыртыны; з) выль ужлы дышетскыны, квалификацизэ воштыны но тодон-валанъёссэ будэтыны Удмурт Республикалэн бюджетэз чотын; и) данзэ но адямилыксэ саптась сведениосты палэнтон-тупатон понна, служебной эскерон ортчытыны курыны; к) кун службаез умоятон пумысен ӵектонъёссэ котькудаз инстанцие сётыны; л) профессиосъя союзъёсы (ассоциациосы) пырыны, правооссэ, социальной удысын, экономикаын но профессиеныз герӟаськем куронъёссэ утён понна; м) пенсия басьтыны, кун службаез нуэм аръёссэ лыдэ басьтыса; н) мылкыд каремезъя ужысьтыз кошкыны законодательствоен юнматэм радлыкъя. 2. Кун ужась быгатэ кун властьлэн ёзъёсаз вазиськыны, кун службаен герӟаськем споръяськон учыръёсты эскерыны курыса, кылсярысь, тодон-валанъёсты шараясь экзаменэз, аттестациез ортчытон пумысен, сётэм характеристикаослэн пуштроссы, кун службае кутэм, сое ортчем, кун ужасьлэсь правооссэ быдэсъян, кун службалэн мукет кун должностяз выжтон, дисциплинарной кыл кутон, кун ужасьлэсь право но социальной удыс ласянь гарантиоссэ тӥян, кун службаысь мозмытон пумысен. 13-тӥ ёзэт. Кун ужасьлэн валтӥсь обязанностьёсыз 1. Кун ужась: а) конституцияя стройлы дурбасьтыны но Россия Федерацилэсь Конституцизэ но Удмурт Респуликалэсь Конституцизэ, Федерацилэсь законъёссэ но Удмурт Республикалэсь законъёссэ быдэсъяны луонлык кылдытыны кулэ; б) должностьсэ кулэезъя быдэсъяны кулэ; в) гражданъёслэсь правооссэс но законэн сётэм куронъёссэс быдэсъяны но утьыны луонлык кылдытыны кулэ; г) вылынгес сылӥсь кун властьлэн ёзъёсызлэсь но кивалтӥсьёслэсь косонъёссэс, куронъёссэс но указаниоссэс быдэсъяны кулэ, соос полномочиос сьӧры потытэк сётэмын ке но законлы тупало ке; д) гражданъёслэсь, предприятиослэсь, учреждениослэсь но организациослэсь вазиськонъёссэс дыраз эскерыны, кулэ, полномочиосыз сьӧры потытэк; е) должностьсэ быдэсъян понна тырмыт тодон-валанъёс люканы кулэ; ж) кун властьлэн ёзаз юнматэм ужан радэз, должностья инструкциосты, службая иворъёсты кутыны радлыкез быдэсъяны кулэ; з) кун властьлэн ёзъёсызлы ужаны люкетыны, соослэсь данзэс саптаны кулэ ӧвӧл; и) кунлэсь, службаезлэсь но законэн утиськись мукет тайнаез лушкемен возьыны кулэ, должностьсэ быдэсъякуз тодэм иворъёсты, кудъёсыз гражданъёслэн частной улонэнызы, данэнызы но адямилыкенызы герӟаськемын, шараяны кулэ ӧвӧл; к) кун службалэсь мозмытскемез бере службаеныз герӟаськем документъёсты берыктыны кулэ. 14-тӥ ёзэт. Кун службаен герӟаськем сюбегатонъёс 1. Кун ужась уг быгаты: а) мукет ужын ужаны уждун басьтыса, дышетонэн, наукаен, творчествоен вырем сяна; б) Россия Федерациысь, Удмурт Республикаысь законъёс кылдытӥсь (быръем) ёзын, городысь, ёросысь кун властьлэн быръем ёзаз, интыысь аскивалтонлэн быръем ёзаз депутат луыны; в) ачиз яке оскем муртъёсыз пыр ужбергатонэн вырыны; г) коммерческой организациен кивалтӥсь ёзэ пырыны, законэн мукетыз рад юнматэмын ӧвӧл ке яке законэн юнматэм радлыкъя сое та организациен кивалтонэ пыриськыны косэмын ӧвӧл ке; д) кун властьлэн ёзаз мукет муртъёслэсь ужъёссэс, куронъёссэс быдэсъяны, оскем адямиенызы луыса, со ёзын кун службаез нуэ ке, яке со ёзэн кивалтэ, яке ужзэ эскере ке; е) ужезлэсь палэнын материально-технической средствоосты, коньдонэз, иворъёсты, кунлэсь мукет ваньбурзэ но службаезъя иворъёсты кутыны; ж) кун ужась луыса печатламын материалъёсыз но вераськемъёсыз понна гонорар басьтыны; з) нимаз адямиослэсь но юридической лицоослэсь кузьымъёс басьтыны (кузьымъёс, ссудаос, юрттэтъёс, коньдон, шутэтскем но шулдыръяськем понна тыронъёс, транспортэн ветлэм понна тыронъёс но мукет), кудъёсыз герӟаськемын должностез быдэсъянэн, пенсие потэм беразы но; и) кунгож сьӧры ужъя командировкаосы потаны нимаз адямиос но юридической лицоос чотын, ужъя командировкаосы сяна, кудъёсыз ортчо Россия Федерацилэн но Удмурт Республикалэн мукет кунъёсын огкылъёссыя яке Федерациысь кун властьлэн ёзъёсыз но Удмурт Республикаысь кун властьлэн ёзъёсыз мукет кунъёсысь кун ёзъёсын вераськемъя, яке Удмурт Республикаысь Кун Кенешлэн Президиумезлэн яке Удмурт Республикаысь Правительстволэн решениоссыя; к) забастовкаосы пыриськыны; е) служебной положениез политической партиос, калык огазеяськонъёс, вӧсьлык огазеяськонъёс пала дурбасьтыса кутыны. Кун властьлэн ёзъёсаз политической партиослэсь, вӧсьлык огазеяськонъёслэсь но мукет огазеяськонъёслэсь ёзъёссэс кылдытыны лэземын ӧвӧл, профессиосъя союзъёсты сяна. 2. Кун ужась коммерческой организациослэн уставъя капиталысьтызы люкетсэ (акциосын пакетъёссэ), кудӥз солэн асваньбураз пыре, выжтыны кулэ кунлэн гарантиосъя оскыса кивалтонэ кун службаез нуытозяз, Федерацилэн законэныз юнматэм радлыкъя. 15-тӥ ёзэт. Кун ужасьёслэн табышез но асваньбур луись ваньбурез сярысь ивортон 1. Закон куремъя, гражданин, кун службаез быдэсъяны кутскыкуз, озьы ик кун ужась арлы быдэ налогъёсъя кун службалэн ёзъёсызлы басьтэм табышесь но асваньбур луись ваньбурзы сярысь ивортылыны кулэ, соослэсь налог басьтӥське ке. 2. Налогъёсъя кун службалэн ёзъёсаз вуэм иворъёсты, кудъёсыз та статьяын чакламын, шараяны лэземын ӧвӧл. 16-тӥ ёзэт. Кун ужасез умой ужамез понна пусъён Должностьсэ мылысь-кыдысь но пайдалыко быдэсъямез, кема аръёс ӵоже ӟеч ужамез, секыт заданиосты быдэстэмез понна, кун ужасез тазьы пусйыны луэ: тау карон ялыса, коньдон тырыса, дуно кузьым сётыса, данъян ним сётыса, кун наградаосын пусйыса но мукет. Соосты кутон рад юнматэмын Россия Федерацилэн но Удмурт Республикалэн законодательствоенызы. 17-тӥ ёзэт. Кун ужасьлэн кыл кутонэз 1. Обязанностьёссэ быдэсъямтэез яке кулэезъя быдэсъямтэез, полномочиосыз сьӧры потэмез, правоез тӥямез, кун службаен герӟаськем но та Законэн юнматэм сюбегатонъёсты быдэсъямтэез (должностной проступок) понна, кун ужась дисциплинарной, административной, уголовной кыл кутон улэ сюрыны быгатэ, Россия Федерациысь но Удмурт Республикаысь законодательствоя но соин юнматэм радлыкъя. 2. Должностен мурт яке кун ужасез кун службалэн кун должностяз юнматыны быгатӥсь ёз кун ужасьлы таӵе дисциплинарной взысканиос сётыны быгато: замечание, куаретон, юн куаретон, службалы тупамтэез сярысь алон, ужысь мозмытон. 3. Должностезъя янгышам кун ужасез огдырлы (толэзьлэсь трослы уг яра), дисциплинарной кыл кутэмез сярысь ужпумез эскерытозь, должностьсэ быдэсъямлэсь палэнтыны луэ, уждунзэ тырыса. Та учыре кун ужась должностьсэ быдэсъямлэсь палэнтӥське должностен муртлэн яке ёзлэн, кудӥз кун ужасез должносте юнматӥз, распоряжениезъя. Кун Думаын Нош ик мыно керетонъёс "Народовластие" огазеяськонысь депутатлэн Бабуринлэн КПРФ-лэн кивалтӥсезлы пумит лэчыт вераськемез бере, депутатъёс куспын нош ик керетонъёс кылдӥзы. Бабуринлэн верамезъя, КПРФ турттэ "Народовластие" огазеяськонысь коммунист луисьтэм муртъёсты вань кивалтоно интыосысь мозмытыны но соос интые КПРФ-лэсь адямиоссэ пуктыны. Но та уж ӧз пӧрмы. Табере малпан кылдэ, огазеяськон кыклы люкиськоз шуыса. Огеныз кивалтоз Рыжков, мукетыныз - Бабаурин. Е. ПОСАДОВА. Некролог Удмурт Республикаысь Кун Кенеш но Правительство мур куректыса иворто Кун Кенешысь Наукая, дышетонъя, культурая но егитъёсын ужан политикая ялан ужась комиссилэн тӧроезлэн Еременко Алла Васильевналэн атез Шимченко Василий Феофанович кулэм сярысь но ӵыжы-выжыосызлы но матысь муртъёсызлы кайгыремзэс верало. Инкуазез уте "Медаз ыше пичи эшъёсмы" Асьме шаермы узырлыкеныз котьку мукет калыкъёсты паймытылӥз. Пӧртэм пӧйшуръёс, тылобурдоос, чорыгъёс уллёен-уллёен улӥзы тэльёсын, шуръёсын, тыосын. Пӧйшуро шаермы сярысь 10-тӥ дауре ик араб тодосчи но путешественник Ибын-Хаукаль синмаськыса гожъяз. Соку асьме шаерамы сьӧд гоно ӟичыос но низьёс (собольёс) уло на вылэм. Коньылы гинэ секытгес, пе, вал. Та пичи мусо пӧйшурлэн куэз уксё интые мынылӥз. Али но тросэз удмуртъёс вузаськон манетэз коньы, яке коньдон шуо. Вашкала калык тэльысь улӥсьёсын эш кадь улӥз, соин ик пӧйшуръёс, тылобурдоос адямилэсь кышкатэк, гурт котыртӥ ветлӥзы-лобазы. Шаерамы заводъёс пуктылыны кутскем бере, трос тэльёс корамын вал. Эстӥськонэ, цехъёсты ужатонэ соку уго пу гинэ мынӥз. Со дыръя ик удмурт музъеме палэнысь трос калык вуиз. Озьы пӧйшуръёслэн улон интызы сюбегомиз, соос кышкасесь луизы, куд-огез пырак быриз, яке мукет шаеръёсы-тэльёсы кошкизы, тани, пужей, низь (соболь), муй (бобр) трос аръёс ӵоже уг адӟисько ни вал шаерамы. Али муйёс шуръёс но тыос котыре каръясько ини, табере пужейёсты но куд-ог азьын пумитаны луоно. "Пичи вынъёсмылэн та вакытэ улон-вылонзы сярысь мон вераськи Светлана Украинцевен. Со республикаысьтымы Пӧйшуран хозяйстволэн (управленияз) валтӥсь охотовед луыса ужа. Йылпумъямын Кировысь Гурт хозяйствоя институтысь охотоведениеяя факультетэз. Специалист верамъя али республикаямы кутыны-ыбыны лэземын куамын кык пӧртэм пӧйшурез но куамын кык выжы тылобурдоез. Берло дауре тросэзлэн лыдзы зол кулэсмиз, соин соосты быдтыны ӧвӧл лэземын. Та пӧйшуръёсты но тылобурдоосты али туж шер адӟоно ни, соослэн удмурт нимзы но пумен вунэ. Шуг али пумитаны юсез, туриез, сьӧд аистэз, вить пумо ӧрӟиосты (кречет, беркут, скоп, сапсан, орлан-белохвост). Нимысьтыз пусъем кагазъя гинэ лэзё кутыны пелё кучыранэз, лобась шырез, луд ӟазегез, луд курегез (куропатка), чарланэз (чайы), туливитез, сизез, кикыез, кырӟась тылобурдоосты, юрмегез, пужеез, сурокез. Та пӧйшуръёс но тылобурдоос пӧлысь тросэз Россия Федерацилэн Горд книгаяз пыртэмын. Соосты нимысьтыз утёно-чаклано. Тани вучайы (выхуколь) кылемын на Кияса ёросысь Кырыкмас но Шихостанка шуръёс дурын гинэ. Сурокъёс ваемын вал Ульяновск областьысь Каракулино ёросэ, соослэн лыдзы вить сю пала гинэ. Отчы кулэ, дыр, заказник лэсьтыны но эшшо одӥг пол сурок уллёез вайыны, сотэк соос бырозы но. Тылобурдоос пӧлысь нимаз утёно сьӧд аистэз, пӧртэм ӧрӟиосты. Соос бадӟым шуръёсмы но тэльёсмы дорын гинэ адскыло на. Туж утеммес "витё" пумен бырись лусьтро сёръёс (россомахаос) соос кылемын на Балезино но Игра ёросын, чучаръёс ( колонокъёс) пумиськыло Камбарка, Сарапул, Кияса районъёсын гинэ. Нош норкаос но мувыр чайыос (хорёк) лымшор ёросъёсын, Селта но Сюмси палан гинэ вань. Соослэн лыдзы арысь аре кулэсме. Гордалэс бызара (суслик) пырак одӥг Камбарка районын гинэ адӟылӥське. Косуляос шаерамы котькуд аре "куное" ветло. Табере соос понна Якшур-Бодья ёросын юри заказник усьтэмын. Отчы мукет улосъёсысь быдэс уллё косуляос ваемын вал, табере соос пияло ини. Озьыен, соослы удмурт музъем яраз, дышизы асьме доры. Балян, урдо (бурундук). ӵӧжмер (горностай), лобась коньы (летяга) удмурт музъем вылын вашкала дырысен котьку улӥзы. Соос пумиськыло республикаысь тросаз ёросъёсын, но берпуметӥ дауре пумен кулэсмыны кутскизы. Тани, ортчемаз тулысэ юсьёс Калмез шур дорын каръяськон инты утчаллям. Нырысь пуксьылӥллям Сюмсиысь тыметэ, нош калык соослы гань-гань улыны сётымтэ. Соиз валамон, тымет пырак бадӟым черкогурт пушкын, котькинлэн адӟемез потэ чебер уясь тылобурдоез. Юсьёс лобиллям мукет интые, синмаськиллям вашкала выжыоссылэн вордӥськем дорзылы Юсь тылы. Отын угось трос дауръёс ӵоже та тылобурдоос пи поттылӥллям, соин ик али но чебер интыысь бадӟым вуэз кин Юсь, кин Юсько ты шуэ. Тӧдьы юсьёслы татын но удалтымтэ. Каръяськыны кутскем тылобурдоосты тулыс пӧйшураны яратӥсьёс кышкатӥллям. Соку угось яра айы ӵӧжез но куд-ог мукет тылобурдоез ыбылыны. Нош тросэз пыӵал возисьёс пӧйшуран законъёсты уг чаклало. Егерьёс котькытчы уг вутско, адӟытэк но кылё. Кин тодэ, оло, юсьёс но браконьер кие шедизы? Ку табере чебер бурдоос вуозы на? Мон сямен, тылобурдоос но пӧйшуръёс каръяськыны кутскыку, егерьёслы юрттӥсьёс висъяно. Нош тужгес умой луысал таӵе аспӧртэмлыко, узыр инкуазё интыосы ӝегатскытэк заповедникъёс усьтыны. Отын пыӵал ыбем куара медаз кылӥськылы. Нюлэскын туж мӧзмыт луысал адямилы пӧйшуръёстэк но тылобурдоостэк. Соин ик сюлэм бӧрдэ отысь тужгес тунсыко, чебер "пичи эшъёсмы" ышо ке. Н. ВОЗИСОВ. Профсоюзъёс ЧИДАН НО ЧИГЕ Туннэ Россиысь Профсоюзъёслэн Эрико (Независимой) Федерациез (ФНПР) странаын пумитъяськон ужрад ортчытэ. Азьвылгес со сярысь пресс-конференциын ивортӥз вал Удмуртиысь профсоюзъёслэн кивалтӥсьсы Евгений Орлов. Али уг утисько калыкмылы Конституциен сётэм тросэз правоос, шуиз со. Азьло аръёсы заводъёсын, фабрикаосын тыршемъёс данакез туннэ ужтэк кылемын, нош али ужасьёслы дыраз уждун уг сёто. Со уксё уг окмы сиён-юон но дӥськут басьтыны. Правительстволэн ивортэмезъя, экономикаын уллань лэзиськон дугдытэмын, ваньбур поттон будыны кутскиз, нош со нокытын уг шӧдскы, вераз Евгений Николаевич. Уждун уг буды, инфляция дугдытэмын ӧвӧл, соин ик ужась калык курадӟе. Алигес Удмуртиысь Профсоюзъёслэн Федерацизы республикаысь Правительствоен тупанкыл гожтӥз. Правительство кыл сётэ: уждун тырон туэ 1-тӥ июльысен дыраз луоз. Республикаысь Профсоюзъёслэн Кенешсылэн сюлмаськеменыз, трослы ӧз буды улон инты, телефон но электрокужым понна дун тырон. Ортчем арысен унояз районъёсын нылпиослы пособиосты Калыкез улон-вылонын утёнъя отделъёс сётъяло. Туэ ваньмыз уксё соос пыртӥ мыноз, озьы со тус-тас уз луы. Урод соиз, али нылпи пособиосты тырон бюджетын чакламтэ. Удмуртиысь профсоюзъёсты та ужпум туж сюлмаськытэ. Азьвыл аръёсы профсоюзъёслы ужаны капчигес вал. Соосын кенешытэк нокыӵе законъёс ӧз кутылӥськылэ. Туэ та сярысь вераськон но ӧвӧл ни, лэся. Евгений Орлов тодматӥз ФНПР-лэн Эрико профсоюзъёслэн калык куспо конфедерациенызы ӵош Россилэн Президентэзлы но Кун Думалэн Председателезлы ыстэм гожтэтэныз. Отын ФНПР но МКСП Россия Федерациысь промышленность удысын ужасьёслы уждунзэс ӝегатэм сярысь мур сюлмаськонзэс веразы. МКСП быдэс дуннеысь аслыз матысь организациосты сыӵе ик гожтэтъёсын Россиысь кивалтӥсьёслы вазиськыны куриз. Али странаямы сыӵе гожтэтъёс вуо ини. Таӵеесь ик ивортонъёс лэземын Валютая калык куспо фондэ (Международный валютный фонд) но Быдэс дуннеысь банке (Всемирный банк). Н. ВОЗИСОВ. Удмурт Республикаысь Кун Кенеш, Правительство мур куректыса иворто гурт хозяйствоя азьвыл министр, Удмурт АССР-ысь Калык контролья комитетлэн азьвыл тӧроез Чичилов Алексей Михайлович улонысь кошкем сярысь но ӵыжы-выжыосызлы, матысь муртъёсызлы кайгыремзэс верало. Чичилов Алексей Михайлович 1998 арын 2 феврале куатьтон тямыс аресаз мыныкуз, улонысь кошкиз Алексей Михайлович Чичилов. А. М. Чичилов вордскиз 1930 арын 20 феврале Волгоград областьысь Ветютенев хуторын крестьян семьяын. Школазэ быдтыса, дышетскыны пыриз Москваысь зоотехнической институтэ. 1952 арын егит зоотехник ужаны ӧдъяз Саратов областьысь вал будэтонъя заводын. 1955 арысен Алексей Михайловичлэн улонэз Удмуртиен герӟаськемын. Та арын со Граховоысь вал будэтонъя заводын зоотехник луыса ужаны кутскиз. Ар ортчыса, выжӥз Сарапул ёросысь "Удмуртский" совхозэ. 1958 арысен кивалтон удысын ужаз Нырысь Алексей Михайлович Сарапулысь исполкомлэн гурт хозяйствоя инспекциеныз кивалтӥз, собере сое Сарапулысь райсоветлэн исполкомезлы тӧрое юнматӥзы. 1961 арын А. М. Чичиловез Кезысь райкомлы нырысетӥ секретаре быръё. Нош ар ортчыса, со Играысь колхозно-совхозной управлениен кивалтыны ӧдъ. 1965 арын Алексей Михайлович партийной уже берытске - Якшур-Бодьяысь райкомен кивалтэ. 1970 арын сентябре Алексей Михайлович Чичиловез Удмурт АССР-ысь гурт хозяйствоя министре юнмато. Та должностез быдэсъяз 1980 арозь. Собере со Удмурт АССР-ысь Калык контролья комитетэн дас ар ӵоже, пенсие потытозяз, кивалтӥз. А. М. Чичилов быгатыса кивалтӥз, секыт югдуръёсы кыл кутонлэсь ӧз кышкалля. Соин ик сое гажазы эшъёсыз, тодмоосыз. Со сярысь ик вера тани ма: Алексей Михайлович Чичиловез респубюликамылэн Вылӥ Кенешаз депутатэ куинь пол бырйылӥзы, КПСС-лэн Удмиурт обкомезлэн бюроезлэн членэз вал. 1984 арын кандидатской диссертацизэ утиз. А. М. Чичилов уно лэсьтӥз, республикамылэсь гурт хозяйствозэ но экономиказэ азинтон понна. Со пусъемын Трудовой Горд Знамя орденэн, медален но РСФСР-ысь Вылӥ Кенешлэн Президиумезлэн Данъян грамотаосыныз. ЧУЗЪЯСЬКОЗЫ ЧЕБЕР ГУРЪЁС Удмурт кун филармониын ортчоз тодмо крезьгурчилы Пантелей КУЗНЕЦОВЛЫ сӥзем ӝыт. Отын чузъяськозы композиторлэн тужгес усто гуръёсыз. Ӝытэз шулдыртозы "Удмуртия" кун телерадиокомпанилэн академической хоровой капеллаез, кырӟанъя но эктонъя "Италмас" кун ансамбльысь артистъёс, Уваысь "Купанча" калык ансамбль, Алнашысь но та ёросысь Вуж Шудья гуртысь кырӟасьёс- верасьёс. Крезьгурчилы сӥзем ӝыт луоз кӧснуналэ, 7-тӥ феврале. Кутскоз 16 часын. Москваын К. Гердлы сӥзем нуналъёс Гажа астэ - гажалозы тонэ Кызьы ивортэмын ни вал, Москваын ортчизы К. Гердлэн вордскемез дырысен 100 ар тырмемлы сӥзем сӥё-дано ужрадъёс. Пӧрмизы-а соос? Асьме республикаысьтымы Москвае ветлӥз 80-лэсь уно мурт. Сӥё-дано ужрадъёсты поездысен ас сяменызы кутскизы "Айкай" театрысь артистъёс Геннадий Кузнецов но Петр Данилов. Кыксы ик вордскемын Татариысь Арча (Арск) ёросын. Поезд отӥ мыныку, соос вашкала удмурт музъемез но бӧлякъёссэс ӟечкыласа мытӥзы удмурт кырӟанъёсты. Ныр улазы гинэ ӧз нукыртэ - быдэс вагон тыр нёжъязы. - Кемалась ортчиз милям нукыртон сяммы, - шуиз Россиысь дано артист Геннадий Кузнецов. - Пиналгем дыръям керпотысагес кырӟасько вал. Табере коть нуназе, коть уй медло, Арча дортӥ сэзь- сэзь кырӟаса кошкисько. Дорам бертыны уггес ваньмылӥськы бере, тазьы коть буйгатӥсько сюлэмме. Одӥг сюресчилэн но монэ со понна куаретэмез ӧвӧл. Кин тодэ, оло, кырӟаммы но кельше, ява. Кинъёс соос аръёс-удмуртъёс шуыса юалляськыны ӧдъяло. Мургес малпано ке, та учыр но Гердэн герӟаськемын ук. Кыдёкын ик ӧвӧл Малмыж - Куӟебайлэн егит дыръяз ужам интыез. Мадёсъёс но удмурт дӥськут люкаса, Герд татӥ но ветлӥз. Собере асьмеды огпол гинэ ӧз индылы ук: эн керпотэлэ удмурт луэмдылэсь, гожъяськелэ но вераськелэ вордскем кылыныды, данъялэ ас калыктэс! *** Россилэн шоркараз (столицаяз) удмуртъёсты шуныт пумитазы. "Россия" гостиницае интыяськеммы бере кошкимы Национальностьёсын ужанъя но федерациысь кусыпъёсъя министерствое. Министр но Москваысь ужрадъёсты радъянъя комитетэн кивалтӥсь Вячеслав Михайлов усьтӥз пресс-конференциез: - Куӟебай Герд, трос кылъёсты тодыса, финн-угор калыкъёслэсь аспӧртэмлыкъёссэс эскерыса валаны турттӥз удмурт калыклэсь быдэс дуннелэн азинсконаз кыӵе инты басьтэмзэ. Со вал Россиысь огез усто этнограф. Гердэз нырысь ик сьӧлыке уськытӥзы наукаын "умойтэм" ужамез понна, собере ини выжизы политикае. Удмурт Республикаысь Кун Кенешлэн Тӧроезлэн воштӥсез Алексей Красильников Гердлэсь ужъёссэ ӵошатӥз быдэс дуннеысь культуралэн бадӟым ковёраз куэм удмурт шортэн. Правительстволэн тӧроезлэн воштӥсез Антонина Лисина озьы ик пусйиз Гердлэн данэзлэсь туж кыдёке вӧлмемзэ. Солэсь архивзэ утё Финляндиын. Отысь эшъёсмы удмуртъёсты лэзё документъёсын пыр-поч тодматскыны. Чакламын Гердлы сӥзем лыдӟонъёс ортчытъяны, отчы пӧртэм кунъёсысь адямиосты ӧтьылыса. Москваысь но Ижысь журналистъёсты Гердлэн улонысьтыз пӧтэм учыръёсын тодматӥзы тодосчиос (учёнойёс) Зоя Богомолова, Кузьма Куликов, Алпо Юнтунен (Финляндия), Кузьма Чайниковлэн вынмуртэз (племянникез) Юрий Чайников, "Удмурт кенеш" огазеяськонлэн тӧроез Валентин Тубылов, журналист Николай Кузнецов. Пресс-конференция бере министерстволэн юртаз культурая министрмы Геннадий Чайников усьтӥз возьматонэз (выставкаез). Со сӥземын Гердлэн улэм-вылэмезлы, ужамезлы, вакытэзлы. Отчы берытскыны луонтэм трос калык люкаськиз бере, куд-ог арбериос сярысь мон мадьыны кури республикаысьтымы национальной музейын ужамез Серафима Лебедеваез. - Та выллем выставкаос мон лэсьтылӥ Венгриын, Финляндиын, Эстониын. Таяз учыре Москвае ваим Куӟебай Гердлэсь аслэсьтыз котыръёссэ. Та чалма пумъёсты со шедьтӥз, этнографиен вырыкуз. Таиз печатлан машинкаез. Тани фотоаппаратэз. Зэм, уг ужа ни. Син шоры йӧтэ магнитофонлэн песятаез - фонограф. Соос кытысь вуизы? Серафима Христофоровна валэктэ: - Та фонографен 1927-28-тӥ аръёсы Герд ветлӥз Можга но Глаз палъёсы. Сюсен шобыртэм валикъёс вылэ гожъяз трос кырӟанъёс, выжыкылъёс, мадёнъёс. Арбериосты дораз возиз Гердлэн Москваысь тодмоез Вера Николаевна Незвецкая. Данакез валикъёс али утисько Петербургын. Со вылысь гожъямъёс выжтэмын бумага вылэ. Фонограф ми доры вуиз ар талэсь азьвыл. Люкаськемъёс пыро залэ. Гердлы сӥзем фильмен тодматӥзы режиссёр Лев Вахитов но оператор Владимир Шибанов. Собере кутскиз Гердэз буре ваён ӝыт. Дано удмурт пилэн асьме улонын кыӵе инты басьтэмез сярысь веразы Венгрилэн Россиысь посолэз Дьердь Нановски, Москваысь критик Вадим Дементьев, Россиысь кун библиотекаын (азьвыл В. И. Ленин нимо) ужась Марк Дьячков но мукетъёсыз. Москваысь Некрасов нимо валтӥсь библиотекалэн директорез Светлана Чепурнова ӵектӥз асьсэ дорынь но радъяны Гердлы сӥзем ӝыт. Республикаысьтымы тодмо тодосчи Виктор Чулков сэрттӥз-пертчиз Александр Одинкинэз но Куӟебай Гердэз герӟась уно нюжаосты. Ӝыт йылпумъяськиз усто концертэн. Быгатэмзэс возьматӥзы Зоя Богомолова, "Айкай" театр, Валентина Пудова, республикаысьтымы тодмо артистъёс но кылбурчиос. Ӵуказеяз аслэсьтыз ужрадзэ ортчытӥз Россиысь Писательёслэн союззы. Солэн секретариатэз радъяз сӥё-дано кенешсэ. Отын ӟырдыт кенешон пуромиз Куӟебай Герд вакытэ но али писательлэн улонын интыез сярысь. Пусъемын: туннэ культура туж улӥе усемын, гожъясьёс вунэтэмын, соослэсь верамзэс кылӥсь ӧвӧл. *** Асьмеос тодӥськом: Куӟебай Герд - трос гизьыё дуно из. Сюлэмысьтыз югытсэ сётӥз кылбуранлы но, дышетонлы но, наукаез азинтонлы но, уно музон удысъёслы но. Нош кыӵе ярато вал сое гуртоосыз, ӵыжы-выжыосыз, тодмоосыз, эшъёсыз! Гердлэн тусбуез вылэ Москваын укыр трос сахар песок пызьназы кадь. Нош мынам тунсыкъяскьеме потӥз солэсь семья кусыпъёс шоры кызьы учкемзэ но. Кылылэме вал: Гердлы та ласянь ӧз удалты, Надежда кышноеныз люкиськон калэ вуылӥз. Аслэсьтыз янгышсэ лыдэ басьтыса, мукетъёссэ утьыны выриз. Москваын ӵош дышетскем коми эшезлы Василий Лыткинлы валэктылӥз кызьы кышно бырйыны. Солэсь визь-кенешсэ лыдэ басьтэм-а Лыткин? Таӵе юанэн вазиськи солэн кышноезлы, Москваын улӥсь тодмо удмурт учёнойлы Тамара Тепляшиналы. - Уг тодӥськы, - пальпотӥз Тамара Ивановна. - Картэлэсь улэп дыръяз юаны ӧй вуы. Вераны быгатӥсько мукетсэ. Илля Васе егит дыръяз эшъяськоз Гердэн, музон удмуртъёсын. Шарканысь удмурт нылэз кышно вайыны медэ вылэм. Маке но пӧрмымтэ. Комияз вуэм но, етӥз коми ныл шуэм: та луоз мынам! Бызем. Нош Лыткина Гердэз музэн ик пуктэмзы бере, коми кышно шедьтэм мукет карт. Ми Илля Васеным кузпалъяським 1954 арын. Туж тупаса улӥм. *** Та гожъямелы мон таӵе йыръян малпай вал: Москва чабе Гердлы но удмуртъёслы. Нош озьы гожтыны киы ӧз ӝутскы. Веранэз ӧвӧл, отын ужрадъёс рос-прос радъямын вал. Озьы ке но... Оло, тырмымтэос сярысь чик но поттылонэз ӧвӧл? Укыр пӧртэм сӥосын интыяськемын соос - Куӟебай Герд но удмуртъёслэн туала ӵектонъёссы. Уродзэ утчась уродзэ ик шедьтоз, шуо. Нош ойдолэ асьмелы асьмеос меӵак вераны дӥсьтом: Гердэз Москва аръёсын сюлмаз уз возьы, туала удмуртъёслы нырысь ик дунъет сётоз асьмея. Нош асьмеос? Гердэз пытсам дырез шонертон ньӧмын бӧлякъёс пӧлын сыӵе сурым бугырскиз - коть ӝӧк улэ ватскы. Кудзы шонер, кудзы янгыш? Керӟегъяськонэз газет бамын ум пуромытэ ни. Сцена вылын лябгес адӟиськизы удмурт кылбурчиос. Вераськыны быгато, ӟуч эшъёссылэсь бере уг кылё. Нош чуръёссы лекос вольытэсь, сӥё-даноесь но кӧсытэсь - ӧтёнъёслы матынэсь. Сюлэме уг пыӵало. Озьы ик паймытӥзы делегациысь куд-ог адямиос. Москвае малы ке сюриллямтэ Гердлэсь ужъёсэ трос аръёс ӵоже эскеремъёс. Нош куд-огезлэсь кызьы но малы таӵе ужрадэ шедемзэс валаны таки ӧйлась. Гердлы сӥзем кинокартина нуйтэмынгес - авторъёслы оло соин но, юанъёс ӧз сётэ. Вылаз ик, министерствоысь зал укыр люкыт, отын эркын кенешыны секыт. Москва ласянь та сяна но шек вал. Огез писатель пусйиз: ужрадамы, пе, вераськизы библиотекарьёс гинэ но. Нош библиотекарь шуон - наукаосъя доктор, туж визьмо учёной. Та литератормы ик удмуртъёсты весь сураз якутъёсын. Малы мон шараясько таӵе тырмымтэосты? Кинлэн ке быж улаз сылал пызьнам понна уг. Та выллем ужрадъёс Москваын азьланьын но луылозы, дыр. Асьмелы асьмеды возёно озьы: удмуртъёс столицалэсь номыр ласянь бере уг кылё. Асьмеды мед гажалозы шуыса, асьмеды нырысь ик мед гажалом асьмеос. Алексей Шкляев. Иж-Москва-Иж. Адями но закон Правоосмы трос. Быдэсъясько-а соос? Законъёсты быдэсъямез чакланъя, калыкез кышкытлыклэсь утёнъя но гражданъёслэн правооссыя ялан ужась комиссия, мон сямен, Кун Кенешын огез валтӥсез луыны кулэ, угось улонамы законъёсты тӥян учыръёс туж ӵем пумиськыло. Зэм, кылем арын шӧдскымон секытгес но тросгес ужано луиз, шуиз журналистъёслы комиссилэн тӧроез Александр Семенович Борзенков. Азьло арен ӵошатыса, комиссие кык поллы тросгес, нимаз адямиослэсь 640 пала ӝожтӥськонъёс вуизы. Ваньмыз соос герӟаськемын гражданъёслэсь правооссэс тӥян учыръёсын. Россилэн Президентэзлэн указэзъя таиз ар адямиослэсь правооссэс утёнъя арен ялэмын.ООН-лэн Генеральной ассамблеяез 50 ар талэсь азьло ик кутӥз вал Адямилэсь правооссэ утёнъя декларациез. Нош Россиын азьло но, али но адямиез мыскылляло, шуиз А. Борзенков. Комиссие пырись депутатъёс лыдъяло, адями мар ке пумысен ӝожтӥськонэн вазиське ке, солы толэзь куспын валэктон ыстоно. Азьло аръёсы таӵе курон быдэсъяськылӥз ке, али кивалтӥсьёс сое кулэен уг лыдъяло. Со понна соослэсь кылзэс но юаны уг луы, угось та дырозь асьме республикаын нимысьтыз закон но кутымтэ на. Со дыре ик Россия Федерациын сыӵе закон вань ини. 1997 арын Комиссия бадӟым уж нуиз Удмуртилэн Конституцияз воштонъёс но ватсанъёс дасян бордын. Туннэ кун кенешлэн дас куатетӥ сессиез азьланьтӥськоз, нош 4 феврале депутатъёслэн нуналзы ортчоз. Та ужрадъёс быдэсак сӥземын луозы выльдэм Конституцилэсь инъетсэ эскеронлы, шуиз А. Борзенков. Депутатъёс мылкыдзэс вераны кулэ, Удмуртилы Президент кулэ-а, ӧвӧл-а со пумысен калыклэсь юалляськон (референдум) ортчытоно-а, ӧвӧл-а. Кызьы тодмо ини, кӧня ке ар талэсь азьло тросэз адямиос та юанлы, Президент кулэ ӧвӧл шуизы. Но улон интыяз уг сылы, оло, бырйисьёсмылэн табере но малпанъёссы воштӥськизы. Александр Борзенков тодэ вайытӥз: Удмуртилэн туала Конституциезъя курон пуктэмын, Президент одно ик удмурт кылэз но тодыны кулэ шуыса. Конституцие пыртыны чаклам воштонъёсын табере сыӵе курон пуктэмын ӧвӧл со, пе, адямилэсь правозэ тӥян луэ. Тӥни озьы. Соин ик матэктӥсь быръёнъёс азьын (12 апреле) вань бырйисьёслы но, депутатъёслы но умой-умой малпаськоно луоз. Депутатъёслэн феврале ортчоно сессизы бере выльдэм Конституцилэн инъетэз быдэсак печатламын луоз газетъёсын. Матысь дыре люканы чакламын адямиослэсь правооссэс утёнъя комиссилэсь кенешсэ. Сыӵе комиссия республикаямы кемалась ӧз кылды на. Соин озьы ик кивалтэ Александр Борзенков. Зэм, адямиослэсь правооссэс тӥян, адямиосты мултэс карон меӵак потэ законъёслэн лябзы бордысь. Соин ик адямилэсь правооссэ чакласа возён понна малпамын республикаямы нимысьтыз должность тупатыны.. Туннэ пусйыны но, дыр, шуг, кыӵе удысын ужасьёс шумпотыса вераны быгатысалзы: милемыз уте закон. Ӵем вераськиськом пӧям вкладчикъёс сярысь. Но кылем арын Кун Кенешлэн комиссияз соос туж ӧжыт вазиськылӥллям. Малы? Оло, законъёслы оскымтэысьтызы? Нош кин сюлмаське крестьянъёслэн, рабочийёслэн Коснтитуциын гожтэм валтӥсь правооссы сярысь? Соос толэзьёсын, аръёсын уждун басьтытэк уло, озьы ке но, ужало калыкез сюдон понна. Тодэ лыктэ депутатъёслэн кылем арын одӥг закон бордын ужамзы - со герӟаськемын вал уждунэз чакласа возёнэн. Кӧня комиссиос люкаськылӥзы, кӧня депутатъёс малпанзэс веразы: кивалтӥсь, пе, уг быгаты ас малпамезъя аслыз уждун тупатъяны. Нош уждунзэ будэтэ ке, сомындалы ик будэтыны кулэ вань ужасьёсызлы но. Кӧня выризы куд-ог депутатъёс калыклы кулэ луись законэз кутыны - со ӧз ортчы. Ӵем дыръя озьы но луэ: асьме депутатъёс закон куто, но кӧня ке дыр ортчыса, Россиысь Прокурорлэн протестэз вуэ - Россилэн Конституциезлы пумит, пе, мынӥськоды. Журналистъёсын пумиськонын но А. Борзенков таӵе учырез вераз. Удмуртилэн Конституцияз гожтэмын, республика инкуазь узырлыкъёсыныз ачиз кузёяськыны кулэ шуыса. Но та статьяез табере, оло, воштоно луоз, малы ке шуоно, Россиысь Прокурор нош ик пумит луэмзэ верам: Удмуртилэн узырлыкез Россилэн асваньбурез, пе, луэ, соин ик узырлыкъёсмес уже кутон понна, ялан Москвае вазиськылоно. Александр Борзенковен пумиськон секыт мылкыд кылдытӥз. Эшшо но эшшо таӵе малпанэ вуиськод: туннэ Россиын пумозяз ужа нокытын гожтымтэ-пусйымтэ - адямиез мыскыллян - право гинэ. Т. БАННИКОВА. Спорт ОРТЧЫТӤСЬКЕ СПАРТАКИАДА Вылӥ учебной заведениосысь преподавательёс куспын ортчытӥське спартакиада. Спортысь пӧртэм удысъёсын эскерозы соос кужымзэс. Нырысетӥ ӵошатсконъёс ортчизы 28 январе, волейболэн шудонъя. Тодмо вормисьёс но. Нылкышно командаос пӧлын нырысетӥ луиз медакадемиысь команда, пиос пӧлын вормизы технической университетысь преподавательёс. Спартакиада азьланьтӥськоз 5 февралёзь. Азьланяз соос ӵошатскозы настольной теннистъя, шахматэн но бадминтонэн шудонъя. Нюръяськонъёс йылпумъяськозы Киров паркын, куасэн бызьылонэн. Э. ВАСИЛЬЕВА. ТОДМО НИМЪЁС НО НУНАЛЪЁС Февраль 5. Вордскемез дырысен 75 арес тырме (1923) Зоя Алексеевна Богомоловалы, тодмо литературоведлы, критиклы, филология наукаосъя кандидатлы, УАССР-ысь культура удысысь дано ужасьлы, Флор Васильев нимо литературной премилэн лауреатэзлы, Удмурт Республикаысь Кун премилэн лауреатэзлы. З. А. Богомолова ӟуч но советской литературая 50-лэсь ятыр научной ужъёс гожтӥз: удмурт литературоведениын шӧдскымон инты басьто солэн "Г. Красильниковлэн творчествоез сярысь", "Кедра Митрейлэн творчествоез", "Чупчи но Кам вадьсысь кырӟан", "Удмурт романлэн историез", "Удмуртиысь ӟуч поэтъёс" но мукет книгаосыз. 7. - 165 ар талэсь азьло (1828) Воткинскысь корт поттонъя завод люкиське ас кожаз ужась Камско-Воткинской горной округлы. Солэн кивалтӥсез Д. Лесенко гожъяз: "70 арлыдаз мыныкуз, Благодать гурезьлэн вӧзаз сылӥсь пиез яна потӥз но Урал заводлэн семьяяз нимаз кузё луыса пыриз". 10. - 75 ар талэсь азьло (1923) Ижевскын ужаны кутске Центральной Удмурт (Вотской) клуб. Со люкылэмын вал пичиесь ёзъёслы: удмурт калыклы юридической юрттэт сётонъя ёз, библиотечной, агитационно-театральной (со вӧзын ужаз Крестьянинлэн юртэз), хозяйственной, кылдӥзы пӧртэм кружокъёс. Пӧртэм вакытэ клубен кивалтӥзы Г. Трефилов, П. Марксистский, Т. Иванов. Удмурт клуб ужаз 1930-тӥ арозь. 11. - 125 ар талэсь азьло (1873) Сарапулын усьтӥське пиослы нырысетӥез 4 классъем реальной училище. 13. - 80 ар талэсь азьло (1918) Ижевскысь рабочийёслэн, крестьянъёслэн но солдат депутатъёслэн Советсылэн исполкомез постановление кутэ фабрикаосты, ваньбурез, коньдонэз нимаз кузёос киысь талан сярысь (промышленностез национализировать каронъя декрет кутэмын вал ӝыны арлы бергес, 1918 арын июнь толэзе). 15. - 90 ар талэсь азьло (1908) губерниысь центрын пусъемын Воткинск городын П. Чайковский нимо огазеяськон кылдэм сярысь, отчы пыризы крезьгурез но драмаез яратӥсьёс, соос ик пуктылӥзы спектакльёс, камерной музыкая концерт возьматъязы. 16. - 40 ар талэсь азьло (1958) Ижевскын усьтӥськиз В. И. Ленин нимо республиканской библиотекалэн выль юртэз (туэ - Удмурт Республикаысь Национальной библиотека). 21. - Ижевсклы городлэсь статуссэ сётэм дырысен тырме 80 ар. Ӵапак 80 ар талэсь азьло (1918) Ижевскысь рабочийёслэн, крестьянъёслэн но солдат депутатъёслэн Советсы кутэ постановление Иж заводлэсь посёлоксэ Ижевск город шуыса ниман сярысь. Официальной документъёсъя Иж завод город луиз 1925 арын 6 июле ВЦИК-лэн кутэм постановлениезъя. 25. - Вордскемез дырысен 110 ар тырме Мирон Филиппович Перескоковлы (1888-1929) гурт хозяйство удысысь учёнойлы. Вордскемын Сарапул районысь Чеганда гуртын. М. Ф. Перескоков 1910-1920 аръёсы бадӟым уж лэсьтӥз Средней Азиысь музъемъёсты орошать карон удысын, Среднеазиатской государственной университет кылдытонын. 28. - 50 ар талэсь азьло (1948) Пичи Пурга районысь "Юж-Пурга" колхозысь хор Москваын ортчем Всероссийской сельской художественной самодеятельностья смотре пыриськиз. Та толэзе ик: - 85 ар талэсь азьло (1913) Ижевскысь нылкышно гимназиын пуктэмын вал М. И. Глинкалэн "Жизнь за царя" ("Иван Сусанин") оперной спектаклез. - 80 ар талэсь азьло (1918) Советской власть кылдӥз Ярын, Карсовайын, Улӥ Уканын, Красногорьеын, Селтаын, Уваын, Киясовоын, Граховоын, та арын ик март толэзёзь - быдэс Удмуртиын. - 60 ар талэсь азьло (1938) Удмуртиысь райцентръёсын но городъёсын ортчизы советской музыкалы сӥзем нуналъёс. - 5 ар талэсь азьло (1993) Музыкая УАССР-ысь государственной театр луиз Удмурт Республикаысь Операя но балетъя государственной театр. Дасяз Елена УШАКОВА, Удмурт Республикаысь ЦДНИ-ысь отделлэн кивалтӥсез. Зарниен ӵошатымон узырлык Туэ, 9-тӥ толшоре, 69 аресэз вуыку кулӥз Георгий Архипович Архипов. Паймымон адями вал со. Вордскиз Г. Архипов 1929-тӥ арын 20-тӥ куартолэзе Пичи Пурга ёросысь Шоринь Юри гуртын крестьян семьяын. 1953-тӥ арын "витьёслы" гинэ йылпумъяз Удмурт пединститутэз. Удмурт кылъя но литературая дышетӥсь луиз. Ар ӵоже ужаз "Советской Удмуртия" газетлэн редакцияз. 1954-тӥ-1958- тӥ аръёсы Глазов пединститутлэн удмурт кылъя кафедраяз ассистент вал. 1958-тӥ арын пыриз Пауль Аристэ академиклэн Тарту университетысь аспирантураяз. Сое быдэстэмез бере, кык ар ужаз Глазов пединститутысь ӟуч кылъя кафедраын старшой преподаватель луыса. 1963-тӥ арысен 1965-тӥ арозь дышетӥз Яр педучилищеын, собере дас ар ӵоже Яр ёросысь "Сельская правда" газетлэн редакторезлы воштӥсь вал. 1975-тӥ арын Г. Архипов кутэмын вал УдНИИ-е. Отын пенсие потытозяз ужаз. Жаляса верано луэ: Пауль Аристэ академиклэн аспирантъёсыз пӧлысь Георгий Архипов гинэ диссертацизэ утьыны ӧз быгаты. Вань улытозяз дугдылытэк ужаз ке но, наукаын сокем вылэ тубыны ӧз быгаты. Дано нимъёсыз но ӧй вал. Но зол вал вань мылкыдзэ сётыса ужан сямыз. Кылбуръёс гожъяз. "Ӵуж италмас но шуисько ке" кырӟанзэ калык ноку уз вунэты. Удмурт кылэ берыктылӥз мукет авторъёслэсь усто кылбуръёссэс. Юнме шорысь коросаз поныса ӧз келялэ, луоз, кылбуръёсын "Вай бур кидэ!" книгазэ. Озьы ик Шандор Петефилэсь удмурт кылэ берыктэм кылбуръёссэ. Берпум сюрес вылаз келяны сомында калык люкаськиз - Ижысь гинэ куамын ёрос тодосчиос, журналистъёс, писательёс лыктӥзы, сомындагес ик люкаськизы Пичи Пургалась, Юри вылъёсысь дышетӥсьёс но кивалтӥсьёс. Коросэн мугорзэ поттӥзы вордскем юртысьтыз, ульчаын ымнырыныз ваче азин пуктӥзы книгаосын тырмытэм бадӟым кеноссы пала. Ӵыжы-выжыосыз верамъя, липет улэ но книгаосын тырмытэм трос ящикъёс пуктылэмын. Ватӥзы кылбурчиез но тодосчиез Бадӟым Кибья гуртлэн шулдыр нюлэс кушысь шайвылаз баблес кыз улэ. Отчы ик ватэмын вылӥллям анай-атаез. Георгий Архиповичен люкиськыку, улонысь кошкем мурт сярысь уно шуныт кылъёс веразы наукаосъя докторъёс М. В. Гришкина, В. К. Кельмаков, И. В. Тараканов, ёросысь но гуртысь кивалтӥсьёс, эшъёсыз, юрттӥсьёсыз, ӵыжы-выжыосыз. Вань мылкыдзэ сётыса, Георгий Архипович книгаос люка вал. Та уженыз со паймытылӥз адямиосты. Малпасько, асьмелэн элькунамы мукет сыӵе муртэ уд шедьты. Люкам книгаосыз, вурӟем газетъёс интыямын Улӥнь но Шоринь Юриысь кӧня ке кеносъёсы. Ижысь улон сэрегаз сомында вал - аслыз кӧланы инты но ӧз тырмылы ни. Вань коньдонзэ книгаос басьяны кутылӥз. Сиыны-юыны ӧз тырмылы ни. Тыро-пыдо кӧттыр шедьымтэен, кӧтыз весь висиз. Кулӥз, яраез пӧсьтэмен. Перитонит но вылэм. Аслаз тазалыкез сярысь ӧжыт сюлмаськылӥз, улонэзлэн берпуметӥ нуналъёсаз но весь ужаз на. Висёнэзлэсь шуак кужмоямзэ тодыса но операцилэсь палэнскиз. Сыӵе сямзэ тодыса, ми тямыс ар талэсь азьло куатьтон аресказ костюм кузьмамы вал. Со дӥсьсэ улэп дыръяз нуллымтэ, утем берпум сюрес вылаз. Озьы улӥз со аслаз кылдытэм дуннеяз, книгаос пӧлын. Книгаос ваньзэ воштӥзы: семьязэ но, Инмарзэ но. Калык пӧлын ас кожаз улӥсь вал. Серафим Саровский выллем. Зэм, куд-огез ӧз валаллялэ. Валаны но ӧз быгатэ, кыӵе малпанъёс бугыръязы солэсь сюлэмзэ. Нош ачиз валэктылӥз: "Вуоз сыӵе дыр - трос кужым поныса люкам ваньбурме калыке куке но кулэ кароз". Али нокин но вераны уз тоды на, кӧня узырлык кельтӥз со калыкезлы. Ваньзэ эскерон, радъян вылысь, трос дыр кулэ луоз. Кин басьтӥськоз со уж борды? Нырысь ик сюлмаськоно луоз Удмурт Кивалтэтлы. Кылдытоно комиссия. Отчы мед огазеяськысалзы удмурт кылтодон удысын ужасьёс. Та ужлы коньдон но тырмыт висъяно, собере люкам байлыкен быгатыса кузёяськоно но. Георгий Архипович нырысь ик тыршиз кылтодон удысъя книгаос бичаны. Трос соос пӧлын кунгож сьӧрын поттэмъёсыз. Соосыз школалэн но, ёрослэн но библиотекаосысьтызы юась уз луы, юнме кыллёзы ёрослэн музеяз но. Та книгаослэн интызы - Кылъя, литературая но историяя Удмурт институтын яке - Удмурт кун университетын. Соослэн пуштросэнызы тодматскыны быгатозы студентъёс но тодосчиос. Озьы ке ӧз луы, ваньмыз куштӥськем кагазлы пӧрмоз. КУЗЬМА КУЛИКОВ. Алнаш районысь Ӧркагуртын улӥсь мусо нэнэмылы Балашова Федосья Александровналы 1 феврале тырмиз 65 арес. Сӥзиськом тыныд, нэнэ, бадӟым шуд но тазалык. Ымнырысьтыд ноку но медаз быры небыт пальпотонэд. Ваньзэ умойзэ гинэ тыныд! Ми тонэ туж зол яратӥськом! Ӟечкылало тонэ нылыд Тася, пиед Толя, кенэд Ирина, эмеспиед Толя, нылпиосыдлэн нылпиоссы Таня, Андрей, Настя но Наташа. ЗАВОД СЯРЫСЬ СЮЛМАСЬКЫСА Кун Кенешлэн Тӧроез Александр Волков, Правительствоысь муртъёс пумиськизы Ижевскысь электромеханической заводын ужасьёсын. Предприятилэн директорез Юрий Шестаков тодматӥз заводын поттӥськись продукциен. Таин валче Кун Кенешлэн Тӧроез шуиз: "Та пумиськон азьланяз ужанлы инъет луоз. Предприятие азинскыны мед тыршоз, нош Кун Кенеш но Правительство ваньзэ луонозэ лэсьтозы, солы юрттон, инвестициосты кыскон понна. Та ласянь нырысетӥ вамышъёсмы - Италиысь посолэн кусып тупатон, матысь дыре "Росвооруженилэн" кивалтӥсьёсыныз пумиськыны чакласьком". Собере Кун Кенешлэн Тӧроез заводлэн выль юртъёсыныз тодматскиз, ужасьёс азьын вераськиз. Со пусйиз, "Удмуртиын берло куать арскын нырысьсэ промышленностьын ваньбур поттон ӧз кулэсмы, озьы ке но, рыночной экономикае выжонэн герӟаськем уно ужпумъёс быдэстымтэ. Кун луонлыкъёс ӧз кылдыты, экономикаез ӝутон понна. Шуг- секытъёс уно ке но, Россиын но, Удмуртиын но вань сыӵе предприятиос, кудъёсыз пыд йылазы султӥзы ини. Сыӵе предприятиос пӧлын - Ижевскысь электромеханической завод". Александр Волков пусйиз, заводысь коллектив но кивалтӥсьёс огъя кужымен тыршо шуыса. Соос азьын таӵе ужпум сылэ - производствоез ӝутыны луонлыкъёс шедьтоно. Кылсярысь, оборонаен герӟаськем заказъёсты но паськытатоно, калыклы улонын кулэ луись арбериосты поттонэз но азинтоно, кунгож сьӧрысь ваем продукциез асьме рынокысь палэнтон понна. Талы инвестициос кулэ луозы. Та ужпумез сэрттон- пертчон понна, Москваын Коньдон ужпумъёсъя но Экономикая министерствоосын чакламын пумиськонъёс ортчытыны. "Умой луысал, - шуиз Кун Кенешлэн Тӧроез,- вань предприятиос тазьы ужасалзы ке. Кылсярысь, Ижевскысь радиозавод уно лэсьтӥз ини, рынокын ас интызэ шедьтон понна". Ӟеч тыршизы "Аксион", "Нефтемаш", Воткинскысь но механической заводысь ужасьёс, му вӧй поттӥсьёс. Нош "Ижмашын" югдур ӧз тупатскы на. Со понна янгыш автозаводлэн директорез, угось со коллективлы ужаны луонлыкъёс ӧз кылдыты. Пумиськонлэн пумаз Александр Волков юанъёслы валэктонъёс сётӥз. Кун Кенешлэн пресс-службаез. х х х Завьялово районысь ӝыныяз школаосын толон ӧз дышетске: дышетӥсьёс ялӥзы забастовка. Кӧня нунал со кыстӥськоз - вераны шуг. Дышетӥсьёслэн куронзы одӥг - дыраз мед сётозы уждунзэс, методической литературалы но тыл, пу понна чаклам коньдонэз. Ӟечкылан Удмурт университетысь яратоно дышетӥсьмес Александр Григорьевич Шкляевез ӟечкыласьком вордскем нуналэныз. Сӥзиськом шуд, тыпы кадь юн тазалык, озьы ик лэчыт перо но визьмоесь студентъёсты. Литературая кружоке ветлӥсьёс. АВТОМАТ УЖЗЭ ЛЭСЬТЭ Ижевскын шыпытак гинэ "авторитетъёсты" палэнто. Сиротаез - Матвиенко Игорез виемзы бере, кӧня ке нунал ортчыса, быдто мукетсэ "йырез" - Мерзляков Михаилэз. Кушем нимыз - Змей. Таизэ виисьёсыз шедьтӥзы "Берёзка" оздоровительной комплексысь кылем арня нуналэ. Змей ки улаз возиз Удмуртиысь вань наркорынокез. Пумыз вуиз: сьӧсез сьӧсь сямен, йыраз ыбыса, быдто. Виись муртэз тодмо ӧвӧл на. Машиназэ, дуно изьызэ куштыса, пытьыоссэ ватӥз. Герӟаськемын-а куспазы куинь "авторитетъёсты" виён - таиз сярысь вералозы, дыр, следствиез нуисьёс. Кылдэ мукетыз юан: кудӥз "йыр" шоры табере мертчоз вуоноез автомат черод? Л. МЕДВЕДЕВА. Галина Михайловна Хворенкова пинал дырысеныз ик яратылӥз эшъёссэ эмъялляны - кинлэн ке чиньыез вандӥськылӥз яке азылӥз, соку ик бинялтыны дыртылӥз. Дышетскыны пыриз Можгаысь медучилищее. Кӧня ке ужаз Грахово черкогуртын. Собере улон сюресэз вуттӥз Ижевске. Синъёсты эмъянъя клиника усьтӥськем бере ужаны татчы лыктӥз. Медсестралэн сюлмаськонъёсыз уно: тырмыт мед луозы эмъюмъёс, висисьёс мед чаклалозы врачлэсь куронъёссэ, эмъяськон аппаратъёслэсь ужамзэс но эскероно. Адямилэн улоназ валтӥсь инты басьтэ тазалык. "Тросгес мед луозы вылэм лякыт сямо но небыт сюлэмо адямиос", - шуэ Галина Михайловна. Туспуктэмез В. Камашевлэн. КОНСТИТУЦИЯ ВЫЛЬДӤСЬКОЗ Удмурт Республикалэн Конституцияз воштонъёс но ватсанъёс пыртон бордын ужась группа укмыс толэзь ӵоже республикамылэсь валтӥсь законзэ Россия Федерацилэн Конституциезъя но федеральной законодательствоя тупатъяз. Та группаен дасям документэз эскеризы депутатъёс. Удмуртилэн Конституцияз пыртыны дэмлам воштонъёс но ватсанъёс пумысен вераськиз Александр Борзенков - Кун Кенешысь Законъёсты быдэсъямез чакланъя, калыкез кышкытлыклэсь утёнъя но гражданъёслэн правооссыя ялан ужась комиссилэн тӧроез. Конституцилэсь инъетсэ эскеронэ пыриськыса, Удмурт кун университетысь юридической факультетлэн деканэз Семен Бунтов но Удмуртиысь прокурорлэн воштӥсез Григорий Ахметов Конституцие воштонъёсты но ватсанъёсты пыртонлэсь кулэлыксэ пусйизы. Февральлэн нырысетӥ ӝыныяз чакламын иворъёсты вӧлмытӥсь ёзъёсын Удмуртилэн Конституциезлэсь инъетсэ воштонъёсын но ватсанъёсын печатланы, калык соин мед тодматскоз но мылкыдзэ референдумын мед вералоз шуыса. Кун Кенешлэн пресс-службаез. ИЖЫСЬ ЦИРКЫН ШЫПЫТ ӦВӦЛ Татын уг ортчо концертъёс, татчы уг люкасько учкисьёс, татын кемалась ни ӧвӧл пӧртэм пудо-животъёс. Озьы ке но, Ижысь циркын шыпыт ӧвӧл. Озьы шуо та юрт вӧзын улӥсьёс. Циркын, пе, улон огыр-бугыр "пӧзьыны" кутске... уин. Уйшоре дораз бертыкуз, 43 аресъем Алексей Кельмурзин скал бӧксэм куара кылӥз. Нырысь аслаз пельёсызлы ӧз оскы. "Кыӵе-о скал луоз городын,- малпаз ас понназ,- эшшо ке тол куазен". Нош скаллэн бӧксэмез пумен матынгес но матынгес кылӥськиз. Алексей валаз: куара циркысь потэ. Та юртлэн сыӵе пӧртмаськон сямыз вань шуыса, воргорон азьло кылылӥз вал ни. Муртъёслэн верамзы осконтэмгес потӥз. Нош туннэ ачиз скал куараез кылыса, мар карыны ик дэймиз. Тани нош ик скал бӧксӥз, со бӧрсьы ик сюло шлачкетӥз. Скал вӧзы итӥськиз на атас - ӵукна вуэмез возьматыса сямен, аслэсьтыз кырӟанзэ нёжтӥз. Собере зол кичабонъёс кылӥськизы. - Эй, юлтош! - гудыртӥз Кельмурзинлэн мышказ боз-боз куараен воргорон. Алексейлэн сюлэмыз ик интыысьтыз тэтчиз кадь - сокем зол кышказ. - Тынад-а, мар-а магнитофонэд озьы шудэ? - юаз воргорон. Алексей мар вераны ик паймиз. Собере мырдэм но кызьы валэктӥз, куараос циркысь пото шуыса. Воргорон нырысь ваньзэ серекъяз гинэ. Выльысь атас чоръямез кылыса гинэ пештырскиз. - Тон мар, кемалась кылзӥськод-а ни? - шыпытак юаз со. - Ачим но уг валаськы ни ай,- шуиз Алексей,- кышкаменым ваньмыз сураськиз. - Оло, мыныса учком,- ӵектӥз выль юлтошез. Воргоронъёслэн кышканзы быризгес, шӧдске. Юрт вӧзы матэктоно кариськизы. Нош ик скаллэн бӧксэмез кылӥськиз. Собере ӧжытак чалмыт улӥз но адями куараос кылӥськизы. Воргоронъёслэн сюлэмзы эшшо но золгес йыгаськыны ӧдъяз. Озьы ке но, ӝыны сюрес вылазы ӧз дугдэ. Каллен гинэ азьпала вамыштӥзы. Куараос мур гуысь кадь кылӥсько. Кылъёсты валаны уг луы. Матэгес вуэмзы бере тодмо луиз - верасько немец кылын. Шуак вӧзысьтызы ик укноын тыл ӝуатскиз. Воргоронъёс асьсэос но ӧз валалэ, кызьы отысь лобатӥзы. Кыкназы - кык пала. Алексей ӝоггес бертӥз дораз. Сюлэмыз буйганы ӧз вала. Ялан урмем кадь йыггетӥз. Уйзэ изьытэк потоно луиз - нокызьы но умме усьыны ӧз быгаты. Ӵуказеяз Алексейлэсь верамзэ тросэз серекъязы гинэ. Нош куд-огез оскизы ик кадь. Ачиз Алексей одӥг юанлы гинэ валэктон ӧз шедьты: малы адямиос немец кылын вераськизы? Собере кӧня ке арня ортчыса гинэ ки улаз газет шедиз. Отын гожтэмын: "Ижысь цирк ӝутэмын 1943-тӥ арын пленэ шедем немецъёсын..." Кӧшкемыт суред. Алексейлэн табере цирк вӧзын улэмез уг поты ни. Квартиразэ воштыны малпа. Ф. МИННИГАРАЕВ. Журналистъёсын пумиськонъёс ЛЫСВУТЭК ТУРЫН УГ БУДЫ Таяз арняе Правительствоын журналистъёсын пумиськиз гурт хозяйствоя но сиён-юонъя министр Василий ЖУЙКОВ. Люкаськемъёслы со мадиз удыслэн тулыслы дасяськемез но куашкан калэ вуэм хозяйствоосты юнматонэн герӟаськем ужпумъёс сярысь. Министр озьы ик тупен-тупен вераз йӧл, сӥль но ю тысь поттэм понна юрттэт (дотация) сётон амалъёсты выльдэм сярысь. Зэмзэ но, тулыслэсь вуэмзэ уд но шӧдылы. Соин ик музъем ужасез котьку сюлэмшугъяськытэ эстӥськон, минерал сылалъёс, техника дасян но музон ужпумъёс. Туэ но со пӧртэм уз луы. Кун бюджетын эстӥськон, вӧйёс басьтыны 32 миллиард манет юрттэт сётыны учкемын, нош минерал сылалъёслы - 20 миллиард. Али ӝыныез, 5 сюрс тонна, тукъёс дасямын ни. Со висъямын луоз, музъемлэсь удалтонзэ чакласа. Нош эстӥськон, вӧйёс но техника басьтонэз радъянъя конкурс ортчытэмын. Отын вормисе потӥзы "Удмуртнефтепродукт" АО но "Сайгасавтоматика" ЗАО. - Туэ хозяйствоослы кун ласянь юрттэт выль сямен сётӥськоз,- шуиз Василий Иванович. - Кин скаллы быдэ араз 2000 килограммлэсь ичи йӧл кыскоз, солы юрттэт уз вуы, 2000-3000 килограмм басьтӥсьёсызлы котькуд тоннаезлы 69 манет висъяськоз, нош солэсь но уно кыскисьёсызлы - 210 манет. Али озьы ужало ни Свердловск, Оренбург, Пермь областьёс. Огъя вераса, трос продукция поттӥсьёслы юрттэт но шӧдскымон лыктоз. Туэ озьы ик нырысьсэ юрттэт вуоз сӥль, тылобурдо сӥль но ю тысь поттэм понна. Палэнэ уз кыле ӟеч кидыс но усто выжы пудо будэтӥсь хозяйствоос. Кыкетӥез ужпум герӟаськемын машинно-технологической станциос (МТС-ёс) кылдытъянэн. Котькуд районын со луыны кулэ. Миым 3 МТС ужаз но, таӵе амал ассэ умоен гинэ возьматӥз. Куд-огез хозяйствоос юоссэс октонэн юн шугъясько. Тани миым Завьялово районысь 12 комбайнёр араны юрттӥз Сарапул районысь "Удмуртский" совхозлы но Каракулино районысь "Заря" колхозлы. Туэ кун лизингъя 30 комбайн басьтыны учкемын. Солы 20 миллиард коньдон висъяське. Басьтэмын луозы "Нива", "Дон" но кунгож сьӧрысь комбайнъёс. Кылсярысь, Германиысь одӥг комбайн куинь "Ниваез" воштэ. Сыӵе техниказы вань ни му вӧй поттӥсьёслэн подсобной хозяйствоосазы. Гурт удыслэн бадӟым сюлмаськонэз луэ бере кылись хозяйствоосты юнматон. Нош соос 137-лэсь уно яке ваньмыз пӧлысь одӥг куиньмослэсь трос. Хозяйствоосты выльдонъя, нимысьтыз программа лэсьтэмын. Туэ 25-ез хозяйство выльдэмын луоз. Миым кӧняез ке эштосъёс золэсь хозяйствоос борды юнматэмын вал. Со амал умой луэмзэ возьматӥз, бырон калэ вуэм хозяйствоос пыд йылазы султӥзы. Малы но кызьы бен реформа ортчытӥське? Кун но районысь комиссия котькуд хозяйствоез нимаз учкоз, мар соин кароно: яке кивалтӥсьсэ воштоно, яке ваньбурзэ мукет радэ выжтоно, яке зол хозяйство борды юнматоно. Со озьы ик герӟаськемын социально-экономической азинсконъя 2000 арозь программа дасянэн. Отын чакласько федеральной но кун бюджетысь юрттэт сётон, инвестициос утчан, кадръёс дасян но мукет. Ужаны кутске ни "АПК-ез кун ласянь радъян сярысь" Закон. Но сое быдэсак улонэ пыӵатон вылысь, 22 нормативной акт кутоно на. Правительство али соосты дася. Кылем ар пумын выльдэмын Сиён-юонъя удмурт корпорация. Со луиз "Удмуртпродрынок" но ужез данаклы паськытатэмын. Азьло ю-нянен гинэ ке выриз, табере ужалоз сӥлен, йӧлэн но со продуктъёсты вузанэн. Та ёз али Гурт хозяйствоя но сиён-юонъя министерствое пыре, но ужалоз ас понназ, эрико. Ю тысь басьтыны юрттэт но льготной кредит луоз. Огкылысь вераса, ужано ваньбур поттӥсьёс понна. Удмуртия гурт хозяйствоя Россиын дасэтӥ интыын мынэ ке но, удысын югдур капчи ӧвӧл. Нянь будэтӥсьёс но пудо утисьёс толэзяз шорлыдын 345 сюрс манет уждун басьто. Со но юн беромыса вуэ. Хозяйствоос йӧлзэс одӥг килограммзэ 900 манетэн вузало, нош асдуныз 1400 манет усе. Озьы удыслэн уждунъя 100 миллиард манет тыронэз, электрокужым понна - 120 миллиард манет, нош газлы - 130 миллиард манет. Миым 1087 сюрс тонна ю тысь (кыкетӥез таӵе урожай) кутсамын ке но, гурт калыклэн улонэз уг умоя. Берло дыре сюро таза пудолэн лыдыз 8,5 сюрслы синэмын. Калыклэсь мултэс йӧлзэ октон данак интыосын кулэезъя радъямтэ. Гурт удыс ӧдъя ни Москваен вузкарыны. Миым отчы кӧня ке келямын ӟег но картофка. Со озьы ик чакла Россилэн шоркараз вузкарон юрт усьтыны. Со юрттоз вузкаронэз паськытатыны. Г. РОМАНОВ. КУСЫПЪЁСМЫ МЕД ЮНМАЛОЗЫ Удмурт Республикаысь Правительстволэн Тӧроез Павел Вершинин Дьердю Нановскилы - Венгрилэн Россиысь посолэзлы - Куӟебай Гердлэн вордскемез дырысен 100 ар тырмонэз пусйыны юрттэмез понна тау карон гожтэт ыстӥз. Отын шуэмын: "К. Гердлэсь ужъёссэ нырысь ик Венгриысь учёнойёс синйылтӥзы: профессор Алдар Бан, академик Бернадр Мункачи солэсь ӟеч кылбурчи но педагог луэмзэ пусйизы, нош тодмо учёной-филолог П. Домокош "История удмуртской литературы" книгаяз солы бадӟым инты висъяз". 19 январе Москваын ортчиз Куӟебай Гердлэн вордскемез дырысен 100 ар тырмонлы сӥзем ӝыт. Сое дасянэ но ортчытонэ мылысь-кыдысь пыриськиз Венгрилэн наукая, культурая но иворъёсъя центрез. Тае пусйыса, Павел Вершининлэн гожтэтаз шуэмын: "Тау карон кылъёсмес вераськом Венгриысь Центрлэн коллективезлы, солэн сюлмо кузёезлы - госпожа Р. Майерлы, вылӥ культураен, ӟеч тодон-валанъёсын, ужзэ гижысь-пиньысь быдэсъясь муртлы. Нимысьтыз тау кариськом Тӥледлы, малы ке шуоно, тодӥськом та усто коллектив сярысь сюлмаськемдэс, солы юрттэмдэс. Азьланяз но пайда вайыса валче ужаны дась луомы",- шуэмын Павел Вершининлэн Венгрилэн посолэзлы Дьердю Нановскилы ыстэм гожтэтаз. НИМАЗ КОРКАОСЫ - ГАЗ Куинь ар талэсь азьло "Ижевскмежрайгаз" кун предприятие луиз акциосын "Ижевскгаз" усьтэм огазеяськон (ОАО). Али со 100-лэсь уно промышленной но 256 коммунально-бытовой предприятиослы, Ижысь, Завьялово, Пичи Пурга но Якшур-Бодья районъёсын улӥсьёслы "чагыр эстӥськон" сётэ. 1989 арын кутскиз нимаз юртъёсын улӥсьёслы газ кыскон. Со аре ваньзэ-ӧвӧлзэ 50 корка газ пыртэмын вал. Берло та уж пумен кужмояз. 1995 арын лыдпус 2 сюрсозь вуттэмын, нош валля арын 3,5 сюрс луиз. Газовикъёс умой ужазы 1997 арын. 1281 семья "чагыр эстӥськонлы" шумпотӥзы. Со пӧлысь Ижевскын - 934 семья, Завьялово районын - 131, Пичи Пургалан - 168, Пугачёвоын - 26 но Якшур-Бодья ёросын - 22. ОАО туэ но бадӟымесь малпанъёсын улэ. Со чакла 1500 нимаз юртъёсын улӥсьёслы газ кыскыны. Сётэм кылзы мед быдэсмоз. Г. РОМАНОВ. Никвлад Самсонов Нискылалод, пе... Вакчиесь веросъёс Урамын лымыя. Инмысь кин ке лымыен тырмем мешокез куртке кожалод. Таӵе куазен Лёнчиклы салазкиез номыртэм усто гылӟе. Покчи вынзэ, Яшаез, салазкиен урам кузя солань-талань нуллэ. Эк! Кыӵе усто луысал, али гурезе ке шонтысал: тӧлпери кадь васькысал! Тӥни ук куара-ланга кыӵе кылӥське. Куано адямиос. Нош татын Яшкаез озьы-тазьы нуллыны косо. Секыт мылкыдыз Лёнчиклэн. Эк шу! Урам кузя Лиза апай ваське. Городын уло соос, гужемзэ татчы бертыло. Мӧйы ӧвӧл на ай Лиза апай. Лёнчик котьку но со шоры вазиське: Лиза апайёс муш возё, гужемлы быдэ, чечы кыскыкузы, Лёнчикез утялто. - Кытчы тазьы кошкид ай? - "апай" шуыса уг вазиськы Лёнчик, со ачиз но "арлыдо" ни: эшшо одӥг пол гужем быриз на ке, школае мыноз. - Уллапала васькало ай. Нош тон марлы гурезе уд кошкиськы? - Кошкод тани таосын... - Лёнчик пичи дӧдьыысьтыз биняллям выныз шоры возьматэ. - Э-э, валай, валай... - йырзэ мыкыръя Лиза апай. - Нош тынад мар-о сокем кӧтыд зӧк? - Адӟиське шат? Писэйпиосмы али вордскизы, куштыны жаль, соин ик сопал урамысь Катя апаед доры поттӥсько ай. Мемеенызы валче. Ӵуказе кошкиськом ни... - Воксёлы-а? - Гужемзэ бертом... - Озьы, иське... Нош мон пияно луэмед кожасько вал... - Мон-а? - Собере кин-о? Милям тани тон кадь ик зӧк кӧтын ветлӥз, ветлӥз но - Петя братэ вордскиз на. Сылалтыны малпало-а, мар-а... - Шумпотоно ук: вынъёсыд будозы... - Шумпотонэз но сомында: учкы ай, гурезьын макем куано. Нош мыным таосын вырытэк ӧвӧл... - Лёнчик секыт лулске. - Эн куректы, Лёнчик, вуоно толзэ ӵошен нискылалод - Яшаеныд но, Петяеныд но... - Нискылалод, дыр, ай: тятя шуэ: "до победного конца", сузэр, пе, кулэ тыныд... Вот тӥни озьы... Катаос уг ӟукырто ни Ӝытсэ укыр кезьыт кариськиз: муръёосысь ӵынъёс гын сапегъёс кадь чорк-чорк адӟисько. Сокем выллань урдылӥськемын. Та ӝытэз Лёнчик номыртэм кемалась возьма ни: туннэ куноос лыктыны кулэ, туннэ солы... Ваньзэ радызъя верано ке верано. Сӥзьыл пияшлы выль ботинка басьтӥзы. Асьсэ магазинысь ӧз, Можга базаре ыжъёссэс вузаны ветлӥзы - соку ик шумпоттӥзы пияшез. Бусыысь бертӥсь ыжъёсыз урам пумысен пумитаны ветлэмед понна, пе. Кузьым, пе, та ужамед понна. Микола юондыр вуиз ке, куноос азьын ӵап гинэ чильк-вальк коштанъяськод ни. Озьы шуиз песяйзы. Озьы вераса ик, Огыр апай катаосыз, шнуръёсынызы ваче керттылыса, кӧлан кеносысь сюры борды думиз. Сэргысяз вакчи сюры борды. Лёнчик со Микола юондырлэсь ку луонзэ уг тоды ке но, валатскиз: сӥзьыл куазен выль кузьымез солы кутчаны уз кылды. Нош тани туннэ самой со Микола праздник, пе, вуэм ни - Миколин день, пе, со. Урамын кезьытлэсь но кезьыт, таӵеен гурезе нискыланы мынэм ик уг пот. Корка пушкын ик усто! Уката ик - сомында пӧрасько бере. Корказы Лёнчикъёслэн улыно-вылыно ке но, быдэсказ ик пыжиськем-пӧраськем зынын йыр поромоно кадь луэ. Тӥни ук, мумиз но, ӵукназэ фермаысьтыз бертэм бераз ик вераз ни: азбар тыр ик, шунянь зын, пе, лӧсъяськемын. Ас котырысьтыз силос зыныз воксё но уг бырылы, ачиз уг но шӧдылы ни, лэся. Тани ук фуфайка бордысьтыз кыӵе паке... Нош коркан пыжиськем-пӧраськемлэн пумыз-йылыз но уг адӟиськы: табань бордысен кутскыса олокыӵе но шыдъёс дорозь. Ӝукъёс, плошкаос, векчи корамъёс. Ваньзэ вераса быдтод шат? Пельнянь гинэ кык пумо кутэмын, кенсысь дускоос вылын шатыр-шатыр кынтылэмын. Куноослы шуыса ик нимысьтыз ӟазегъёс, куркаос но бырем гурын пыжизы, соослы луыса ик векчи корам кубистаез ӧжытак чырсатӥзы: табере отчы векчи юдыса пӧзьтэм мус ватсалозы. Лёнчиклэн сяна, коркась вань воргорон калыклэн яратоно сиёнзы луэ та. Бубиз озьы ик шуэ: макмыр веськатон. Лёнчиклы валамон мӧйыослэн та сюлмаськонзы - угось котыр гуртъёсысь ӵыжы-выжыоссы вуозы: троссэ, пе, соосыз Лёнчиклэн адӟылэмез но ӧвӧл. Озьы шуэ песяйзы. Со понна Лёнчик уг вунэты мукетсэ: туннэ куноос азьтӥ выль катаосыныз ӟикыр-ӟук! карыса вамышъялоз! Эк, синмаськозы ке синмаськозы ук... Песяйзылэн верамезъя ик луиз: дӧдьыосын но вуизы, кык "Жигулёнокен", кык "Москвичен", "Окаен" - Лёнчик котькудзэ пумитаны ачиз поталляз. Огшоры гын сапег кутчаса. Бубиз сьӧры. Валамон ни, вуэм куноосыз соку ик чаркаосын, пӧсь пельнянен, чечыен пумитало. Лёнчикез ушъяса тыбыраз топ-топ каро но со сярысь вунэто. Ӟабыль поттыны кутско. Эк, со кенсысь сюры борды ошылэм катаоссэ кутчасал ке... Ӧз чида, песяйзэ, Огыр апаез, Лёнчик, пал кыл но вератэк, кенсы поттӥз. Пал кыл но вератэк, соиз но, тыл ӝуатэмез бере, сэргысь ботинкаос шоры возьматӥз: соосыз шумпотыса ог интыязы зӥрак! бергано кадь кариськизы, оло. Лёнчиклы озьы потӥз. "Э-э, ӧд вунэты, иське, ӧд вунэты, - Огыр апай, ачиз ик сузьтӥськыса, сюры бордысь керттылэм катаосыз пертчылӥз. - Ма, ачим верай вал угось. Ме, кутчалод бере кутчалод ни. Учкы ай, кӧня выжыкумые люкаськиз - ваньмыз аслам виры-сӥльы бордысь потэмын ук. Нош тон самой матысез..." Кенсын ӟырт-ӟырт кезьыт. Кема вераськыса уд даурты. Огыр апай быдэс дуско пельнянь пыртӥз ни, нош Лёнчик уг дырты. Татын ик кутчано кариськиз. Тэремзы уг поты катаослэн: оло кынмиллям, оло нош выль луэмысьтызы. Озьы бере, Лёнчик корка гын сапегъёссэ кияз кутыса пыриз. Куаш вазе, кырӟам, арган нёжъям гур но потылэ ни, пӧсям мугор, аракы зынъёс ваньзэ пыжиськем-пӧраськем зынэз зӥбиллям ни... Лёнчиклэн но пыдысьтыз ботинкаосыз шуназы, пачкатэмысь дугдӥзы, эсьма, азбаре но потаз ни пияш. Инбамысь миськем сяртчы кадь толэзь пиштэмъя, ӟикыр-ӟук шуэмзы номыртэм мусо кылӥське. Гын сапеген ветлэм бӧрсьы пыдъёсыз ик шӧдоно ӧвӧл - сокем капчиесь катаосыз. Укыр мусо пото Лёнчиклы соос. Корка пырыса, Лёгор агаезлы возьматоно шат? Учалась со, гужем вуылыкуз "Жигулёноказ" ворттылӥз вал... Коркан огыр-бугыр. Азьлолэсь но кужмогес куаныны кутскиллям ни куноос. Лёнчиклэсь Лёгор агайзэ мырдэм но кызьы кунултыса поттӥзы ӝӧк сьӧрысь. Жадем, пе, та, мед ныралскоз вылэм. Висъет сьӧрысь валес вылэ выдтӥзы... Ӝоген корка тыр эктон гурен арган куара жинграк вазиз. Эктыны пот вылэм та выль катаосын: одно ик азязы азвесь коньдон жильтрак пазьгысалзы. Оломарлы покчиослы озьы каро Иллягуртын. Ӵок ини, маке пичи но мылкыдыз ӧвӧл Лёнчиклэн. Выль катаосыз вань вылысь. Тани ук ӟукыртэмысь но дугдӥзы: оло азбаре потамысьтыз, оло шунаса небӟемысьтызы, оло мӧйыослэн куаш карыса куанэмысьтызы... НОШ ИК "АЛЬВА" Россиысь Телевидениез но радиовещаниез эскерись служба "Альва" телекомпанилы сётэм лицензилэсь кутӥськемзэ уретӥз. Та службае Авторъёслэн правооссыя агентствоысь документъёс вуизы, отысь тодмо луиз, "Альва" телекомпания "Крёстный отец" фильмез авторской правоосты тӥяса возьматӥз шуыса. 1996 арын 28 июне юнматэм 2027 номеро лицензия выльысь шонерен лыдъямын луоз, "Хуго" ООО-лэн дирекциез но солэн кивалтӥсез Василий Шаталов "Крёстный отец" фильмез законъёсты чакласа возьматэмзэс документъёсын юнматыны быгатӥзы ке. УЛОН - ГЕРД Солэн нимыз - Улон. 75 ар талэсь азьло мумиз-аиз вӧсяськиллям Инмарлы, выль улон герд курыса. Зоя Алексеевна Богомолова. Та кыл-куара герӟет - удмурт омырын веттаськись крезьгур. Оренбург улосысь казак семьяын вордскем нылэз улон сюрес гож пумен матэ кариз Удмурт шаерлы. Ставропольысь пединститутын, собере аспирантураын дышетскиз, филология наукаосъя кандидат луиз, Муромысь педагогической институтын кафедраен кивалтӥз. 1958-1978 аръёсы - Удмурт кун пединститутын (университетын) доцент. Син азяз быдэсмем муртэ Зоя Алексеевна Богомолова уг вунэты, котьку шумпотыса пусъе: "Таиз мынам студентэ..." Тросэз адӟо солэсь президиумын, вылӥ кенешъёсын "эксэй ныл кадь" пукемзэ, чебер вераськемзэ, егитлыко туссэ. Ас адӟемзэс синпӧет-а, вылласянь пиштӥсь чебер суред-а кожало... Тросэз тодо укыр ӟеч луэмзэ, котькудӥзлы ушъян кылъёс гинэ шедьтэмзэ. Литература ӧр кузя тугокоос гинэ керттылыса лэзья, малпало. Нош тросэз-а тодо астэ пытсаса, думыса лумбытэн ӝӧк сьӧрын пуконэз, сьӧд уез улляса, ӵукна кезьыт вуэн сайкытсконэз? Тросэз-а тодо йырын-визьмын малпаськонэз бумагае ӧръян - зырен, нушыен ужанлэсь трослы секыт шуыса? Мыным тодмо Зоя Алексеевналэн со "сьӧд ужез". Нырысь ик, валля арын гужем пумын Эстониын финн-угор писательёслэн ӧтчамазы адӟи, кызьы со уйзэ но чырым ӧз кары: удмурт кылысь ӟуче берыктон сярысь ужзэ пӧръяса пукиз. Олокӧня пол шӧдӥськиз сюлэмшугез: финнъёс-уграос отӥ уз каре-а сое, огназ ук татын ӟуч. Мурт ӧз каре - тау шуизы, асьсэлэн каризы, гожтэмзэ нимысьтыз бичетын (сборникын) поттыны малпало. Ортчись аръёс уг жаляло. Нош инкуазен сётэм чеберлык уг сётӥськы, инмарен шокчем лул-визь-нод лэсьто ас ужзэс. Удмурт музъемлы кӧня ӟечен берыктӥз ни Зоя Алексеевна. Кӧня малпан "тысьёсыз" удаса пушйылӥзы, книгаен берытскылӥзы. Ас матысь адямиоссэ кадь яратыса гожъяз Кедра Митрей, М. Коновалов, Г. Красильников но трос мукет гожъясьёсмы сярысь. Кин кошкиз улонысь, чилектэм кадь, быдэсак усьтӥськыны вуытэк - соос понна сюлэмыз вӧсь та нылкышнолэн. Котькудӥз понна кӧня уйзэ ӧз кӧлы, быдэс улонзэс сӥсъяз-поръяз... Озьы кылдӥзы Г. Красильников, Ф. Васильев, М. Лямин сярысь люкам тодэ ваёнъёсын книгаосыз. Берлоез - "Как молния в ночи". Куӟебай Герд. Арлыдызъя (вордскем арезъя) атаедлы тупа, нош весяклы бӧрдӥсь, "черекъясь" сюлэмыныз пыраклы егит кылемезъя - пиналыдлы. Та книгазэ Зоя Алексеевна куамын вить ар веттаз "кӧкыяз". Лякиё шобретэз кадь бичаса кылдытӥз солы тусбуй. Кесэго-кесэго пазяськем гожтэтъёс, лач пытсамысь поттэм документъёс, ышыса вуымтэ тодэ ваёнъёс, выль но вуж статьяос, кылбуръёс-сӥзёнъёс, туспуктэмъёс - ваньмыз соос, огазе люкаськыса, бадӟымос книга кылдытӥзы. Удмуртъёслэн азьветлӥсьсы - Куӟебай Герд - трос-трос ымныръёс пӧлын, со вакытысь шокан омырын. тӧлпериё-сильтӧло вузэм пыр кылӥське чылкыт но ӟырдыт ӧтись куараез. 90 пала адямиос (авторъёс) кылдыто со портретэз. Нош котькытын, быдэс книга пыр аслаз люкась-бичасьлэн валтӥсь киыз, гожез. Литературовед тыршиз быдӟым удмурт кылбурчи, тодосчи сярысь маке но выльзэ сётыны - ачиз но гожъяз (гожтӥз статьяос), мукетъёссэ но куриз, трос муртлэсь "портӥз" тодэ ваёнъёссэ, малпанъёссэ. З. Богомолова лыдъя, "Как молния в ночи" книга Ф. Ермаковлэн "Кузёбай Герд. Жизнь и творчество" монографиез вӧзы ватсэт луэ, дано пимес яркытгес усьтыны юрттэ шуыса. Озьы ик ас сяменызы югдыто Гердэз, шуэ со, мукет учёнойёсмы - К. Куликов. А. Шкляев, В. Ванюшев, А. Зуева, А. Красильников. "Мон малпасько, Кузьма Павлович кытын ке татын ик бадӟым сюрес дуре ватэмын,- шуэ З. А. Богомолова.- Война дыръя, 1942 арын октябре, НКВД-лэн Ижевскысь тюрьмаяз одӥгез надзиратель, Дмитрий Семенович Кузнецов, сое тодмам. Ачиз но пытсэтын пукись адями тодмаса вазиськем: "Байблатысь Семонлэн пиез ӧвӧл-а тон?" К. Герд уго кырӟанъёс бичаса трос ветлӥз артысь гуртъёстӥ, калыкез нимын-тулын тодма вылэм. Соку Кузнецовлы 14 арес котырын вал... Малы алдаськоз 79 аресъем пересь? Мон солы оскисько". Нылкышно тодосчилэн потэ уга К. Гердэз эшшо но асьмелы матэгес каремез, солэсь куронзэ "быдэстэмез": "Ой, ватэ монэ туж ӝужытэсь вырйылъёсы, шулдыр но паськыт, садо сюрес дуръёсы, кызьпу улъёсы... Вырйылысен мон адӟо котырез - уг мӧзмы ни соку удмуртлэсь". Куӟебай Герд - тужгес ӝужыт гурезьмы йылын. 100 арес тырмонэз дыръя со улэпен вамыштӥз театрлэн сцена вылысьтыз (улон та юбилейлы дасям сыӵе кузьым - Гердлы кельшись артистэз Андрей Карповез). Ӝытэз нуиз Зоя Алексеевна Богомолова... Т. ЧЕРНОВА. * Зоя БОГОМОЛОВА тодмо ӟуч писателен Николай ШУНДИКЕН (паллянысез) но удмурт писательёслэн со вакытэ тӧроенызы Семен САМСОНОВЕН ӵош удмурт литературалэн сю ар тырмонэзлы сӥзем ӝытэ. Ижевск, 1989 ар. Г. ЮСАЕВЛЭН туспуктэмез. Герд ЗАКОН КЕ КУТЭМЫН ЛУЫСАЛ... Паймытӥсь, сюлэмез копыштӥсь лыдпусъёсты мон шедьтӥ, ВИ Ӧтчамлэн материалъёсыныз тодматскыкум. Югдур сыӵегес шуыса бен азьло но тодӥсько вал. Но вӧсь каро, мур малпаськонэ уськыто ялан одӥг интыын лёгаськеммылэн, бускельёсмылэсь бере кылеммылэн мугъёсыз. Удмурт кылэз али 35 сюрс ёрос пинал дышетэ. Усьтӥськыло вордскем кылэз дышетонъя классъёс. Ижевскын соос туннэ 31, Можгалан - 5, Воткаын - 1. Озьы ке но, ваньмыз удмурт нылпиос ас кылзэс али но дышетыны уг быгато: 81 сюрс пӧлысь 35 сюрс палаез гинэ. Озьыен, ӝыныезлэсь но ичиез ук! Тӥни кыӵе суред пуксе син азе. Кун кылъёсъя закон кутэмын луысал ке, югдур ӝоггес воштӥськысал. Кун Кенеш уг дырты кылъёсъя законэз кутыны, малы ке шуоно, отысь тросэзлэн эшъёслэн та документэз эскеремзы но уг поты кадь. Татарстанын, Башкорстостанын, мукет республикаосын вылӥ кивалтӥсьёссы асьсэ выжыысь, вордскем кылынызы вольыт верасько, калыксылэсь сюлмаськонъёссэ ӟеч тодо. Нош асьмелэн кузёоосмы удмурт кылэз ньӧмыз понна гинэ дышетэмъясько. Сояз яке таяз бадӟым кенешын "ӟечбуресь, гажано эшъёс" шуыны быгато ик. Нош музон кылъёсты веракузы, пельёс гордэкто. Мон весь ас понна малпасько: малы меда выжы калыкъёслэсь кылзэс, культуразэс, историзэс, сямъёссэс ӟеч-ӟеч тодӥсьтэмъёс вылӥ кивалтонэ сокем мерско? Республикаысьтымы 15 министръёс пӧлысь но удмуртэз чылкак ньыль гинэ. Кун Кенешлэн Президиумаз но асьмелэнъёс ичи. Озьыен, "Удмурт кенеш", "Дэмен", Нылкышноослэн огазеяськонзы но "Шунды" таяз быръёнъёсы золгес нюръяськыны кулэ троссэгес удмуртъёсты депутатъёсы быръён понна. Но лыд сьӧры уиськоно ӧвӧл, ӵектоно устоосыз пӧлысь устооссэ. Кандидатъёс кулэ-а? Верало. "Удмурт дунне" газет миым 6 ноябре печатлаз "Абдралод" корреспонденция. Со С. К. Смирнова сярысь. Йӧно, визьмо кивалтӥсь. Вот кинэ вылӥ органэ ӵектыны луысал. Вань сыӵеос писательёс, журналистъёс пӧлын. Али ик малпаськоно азьветлӥсьёсмы сярысь. Оскисько: огазеяськонъёсынымы кивалтӥсьёслэн синйылтэм муртъёссы вань ни. Кылем быръёнъёсы вормытэк кылем эшъёс сярысь но выльысь малпаськыны яра, вылды. Куд-огез ведь кӧня ке процентлы гинэ бере кылизы. Ог-кык толэзь ортчыса, кужмо нюръяськоно луом Ижысь Думае депутатъёсты быръён понна. "Удмурт кенешлэн" городысь но ёросъёсысь ёзъёсыз туннэ ик та ужез мытозы, дыр, ини. Дэмен ужам ке, пӧрмоз. Бигеръёсын но мукет эшъёсынымы ӵош кариськыса, али ик рос-прос малпаськоно, асьмелы кулэ законъёсты кутыны но мукет ӟеч вамышъёс лэсьтыны люкетӥсь туала депутатъёсты вуонояз Кун Кенеше медам ни сюре шуыса. В. ЧЕРНОВ, рабочий, пенсионер. Спорт Шахмат Москваын ортчиз Россилэн шахматэн шудонъя кубокез понна ӵошатскон. Ужрадэ пыриськиз Москваысь 190 спортсмен, отчы озьы ик лыктэмын вал Белоруссиысь, Украинаысь, Грузиысь гроссмейстеръёс но спортъя мастеръёс. Палэнэ ӧз кыле Ижевскысь шахматистъёс но. Соос пӧлын - Удмуртилэн чемпионэз, Ижевскысь технической университетысь студент Максим Озолин но "Металлист" спортклубысь Александр Филипенко. Укмыс пумиськон ортчытыса, соос быгатӥзы турнирной таблицалэн вылӥ люкетаз тубыны. Соослэсь но умой ӵошатскиз спортъя 6 номеро школаысь егит спортсмен, мастере кандидат Андрей Митин. 9 очко пӧлысь со 5,5 очко люказ. Пусйыны кулэ, со дышетске Россиысь Коньдон ужпумъёсъя академилэн налоговой полицияя факультетаз. Та ӵошатсконэ нырысьсэ пыриськиз спортъя мастере кандидат Алексей Баранов, 9 очко пӧлысь солы удалтӥз 4 очко люканы. И. ВЕЛЬТМАНДЕР. Умой адямиос Синмаськымон семья Кӧня ке аръёс талэсь азьло Каракулино районысь Усть-Сакла пор гуртын войнае ветлэмъёс дасо пала лыдъясько вал. Нош туннэ нуналлы соос пӧлысь огез гинэ улэп на - со Гаврил Дмитриевич Сайтаев. Алигес со аслэсьтыз 74 арессэ пусйиз. 18 аресъем пияшез армие басьтӥзы 1942 арын, нош гуртаз бертыны кылдӥз 7 ар ортчыса гинэ. Та дыр куспын солдатлы кытчы но вуылыны, кытын но ожмаськыны ӧз кылды. Зенитно-артиллерийской полкын со стрелок вал. Фашист гыжкалъёслы пумит ожмаськиз Великие Луки город дорын но, Латвиын но, Литваын но. 1 Дальневосточной фронтэ сюрыса, Маньчжуриын япон милитаристъёсты жугиз. Службазэ азьланьтӥз на Порт-Артурын (Китай) но Монголилэн шоркараз - Улан-Баторын. Солдатлэн геройлыко но кышкатэк ортчем сюресэз уно медальёсын пусъемын. Гаврил Сайтаевлы кельше вал механизаторлэн ужез. Дораз бертыса, ожысь ветеран 6 толэзь ӵоже та профессилы Сарапул городын дышетскиз. Собере 30 ар ӵоже сюлмо тыршиз колхоз бусыосын, ферма котырын, гудӥськон ужъёсын я трактор, я экскаватор рульёс сьӧрын, я мукет техника бордын. Кыӵе гинэ уж борды ӧз басьтӥськылы, ваньзэ йылаз-пумаз вуттылӥз, мыло-кыдо быдэсъяз. Соин паймонэз ӧвӧл солы ужысь ветеран сӥё-дано ним сётэмзылы. Картэз сямен ик колхозын синмаськымон тыршиз Зоя Семеновна но. Ужысь ветеранлэн вань улонэз пудоос котырын ортчиз: валъёсты но сюдӥз, скал но кыскиз, парсьёсты, кунянъёсты но утялтӥз. Нылкышно котькытын мукетъёсызлы адӟем карымон вал. Сизьым нылпиослэн анайзылы со капчиен ӧз сётӥськы. Нош семьяын ог-огдэ валан, ог-огедлы юрттон ваньзэ вормиз. Кузпалъёс вань нылпиоссэс дышетӥзы, улон сюрес вылэ поттӥзы. Вань соос пӧлын атайзылэсь сюрессэ азьланьтӥсьёс но, анайзы сямен ик пудо утисьёс но, пудо врач, дышетӥсь, санитар, медсестра. Шаермылэн пӧтэм сэрегъёсаз пазьгиськемын соос, нош дор палзэс уг вунэто. Нылпиосынызы ӵош анай-атайзы доры бертыло. Нош соос Сайтаевъёслэн 12 кузя ини. Макем шумпото песянай но песятай пичиос вуэмлы. Быгатэмзыя ческыт пӧрамъёсын утялтыны выро. Нош пиналъёс мӧйыослы юртто корка котырысь ужъёсты быдэстыны. Нош соос гуртын улӥсьлэн котьку тырмыт. Р. ТОКМУРЗИН. ШУДО ЛЫДӞИСЬ - КИН ТОН? Та арлы "Удмурт дуннелы" гожтӥськем тужгес но шудоез лыдӟись тодмо луоз ни 10 феврале. Кызьы ивортылӥмы ни, ошпимы кошкоз Пичи Пурга ёросысь Ильинск почта ёзын гожтӥськем кузёез доры. Вуоно вторнике 6 часын ӝыт Ильинск черкогуртлэн культура юртаз "Удмурт дунне" газетлэн редакциез лыдӟисьёсыныз бадӟым пумиськон ортчытыны чакла. Со ӝытэ пыриськыны ӧтиськом Абдэс-Урдэс, Арлан, Чокал, Шупшади, Сосновка гуртъёсын улӥсьёсты но. Пумиськонэ озьы ик ӧтемын Пичи Пурга администрацилэн, "Удмурт кенеш" ассоциацилэн кивалтӥсьёссы, ёросысь почта кусыпъёсъя узелын ужасьёс, газетмес вӧлмытон конкурсын вормисе потэм почтальонъёс. Люкаськем калыкез аслаз кырӟанъёсыныз шулдыртоз Анна Плотникова. Удмурт телевидениысь "Улон-вылон" передача учкисьёссэ таиныз но ужрадэн тодматоз. Л. МАЛЫХ. НОШ ИК "АЛЬВА" Россиысь Телевидениез но радиовещаниез эскерись служба "Альва" телекомпанилы сётэм лицензилэсь кутӥськемзэ уретӥз. Та службае Авторъёслэн правооссыя агентствоысь документъёс вуизы, отысь тодмо луиз, "Альва" телекомпания "Крёстный отец" фильмез авторской правоосты тӥяса возьматӥз шуыса. 1996 арын 28 июне юнматэм 2027 номеро лицензия выльысь шонерен лыдъямын луоз, "Хуго" ООО-лэн дирекциез но солэн кивалтӥсез Василий Шаталов "Крёстный отец" фильмез законъёсты чакласа возьматэмзэс документъёсын юнматыны быгатӥзы ке. ПӦРТМАСЬАКОН УСТО ОРТЧИЗ Тол праздникъёслы: Выль арлы, Ымусьтонлы, пӧртмаськонлы куазь шуныт, чебер тупаз, соин но, дыр, калык урамын но, культурая юртъёсын но трос вал. "Ожо-вожо" ансамбле ветлӥсьёс тужгес ярато пӧртмаськон йылолэз. Туэ квартираосын сяна, шулдыръяськимы-шудӥмы урамын но, трамвай-автобусын но. Арганчиосмы Юрий Николаев, Александр Ивано, Вячеслав Галичанин жадёэз валатэк калыкез шулдыртӥзы. Уйшор котыре гинэ гуртъёсамы вуимы. Монэ юрт дорам "кузьым" возьма на вылэм: тунаськисьёс лыктӥллям. Тӥни озьы пӧртмаськон-тунаськон бер уёзь кыстӥськиз. Котькуд аре сямен, туэ но пӧртмаськонэ Ижлэн вань ёросъёсысьтыз калык пыриськиз, пӧламы коми но, пор но, бигер но, ӟуч но вал. Ваньмызлы пӧртмаськон, кырӟанъёс, эктонъёс, шудонъёс ярало. Табере азьпалан тулыс праздникъёс: Дӧдьы куштон, Йӧ келян, Гуждор. Соосты но вань мылкыд карисьёсын ӵош ортчытом. Юись Коля. (Н. ВОЗИСОВ). Правительствоысь иворъёс Правительство эскериз экономикаын, социальной удысын кылдэм югдурез. Отын нимысьтыз кенешон мынӥз бюджет чотын ужасьёслы уждун сётон сярысь. Коньдон ужпумъёсъя министр Владимир Бельтюков ивортӥз декабрь но ноябрь понна уждунэз тырем сярысь. Павел Вершинин верамъя, Правительство таяз арын бюджет чотын но ваньбур поттӥсь удысъёсын ужасьёслы уждун тыронэз одӥг ӧрын эскероз. Таин валче эскеремын луоз ужасьёссылы уждунзэс ӝегатӥсь вань предприятиос. Люкаськем пунэмъёс таиз ар куспын берыктэмын луыны кулэ. Та ужпумъя югдурез газетъёсын возьматыны чакламын. Правительстволэн мукет кунъёсын кусып воземез эскеремын, кылсярысь, му вӧй поттонъя Удмурт компания кылдытыны чакламын. Арнялэн пумаз шаерамы "Хёндэ" фирмалэн кивалтӥсьёсыз вуозы. Нош та нуналъёсы Удмуртиын гражданской обороная но кышкыт учыръёслэсь утиськонъя дышетсконъёс ортчо. Отчы Россиысь 14 улос пыриське. *** Правительстволэн Президиумез эскериз электрокужымез шыръян но эстӥськонэз пайдаёгес кутон сярысь законлэсь инъетсэ. Прмышленностьын ваньбур поттон кулэсме, нош электрокужымез кутон кык пол йылӥз. Нимысьтыз ужрадъёс ортчытыса гинэ, электрокужымез, эстӥськонэз кутон 110 процентлы синоз. *** Чеберлыкъя но калык киужъёсъя кенеш кылдытэмын. Со кибашлыосын ужалоз, калыклэсь киужен вырыны мылкыдзэ улӟытоз. Кенешен кивалтоз Правительстволэн Тӧроезлэн нырысетӥ воштӥсез Александр Злобин. *** Коньдон ужпумъёсъя министерстволэн контрольно-ревизионной управлениез но федеральной казначействолэн управлениез эскеризы бюджетысь уждунлы висъям коньдонлэсь кутӥськемзэ. Тодмо луиз, 389 сюрс манет палэнэ кутэмын шуыса. Со понна янгыш Тазалыкез утёнъя, Культурая, Дышетонъя, Калыкез улонын шуг-секытъёслэсь утёнъя, Печатья но иворъёсъя министерствоосысь учреждениос, Дэбес, Завьял, Камбарка, Красногорск, Сарапул, Ува, Юкаменск ёросъёсысь но Воткинск городысь администрациос. Та эскеронлэн йылпумъянъёсызъя нимысьтыз постановление кутэмын. *** Правительстволэн Тӧроез Павел Вершинин пумиськиз Россия Федерациысь Президентлэн Эскеронъя валтӥсь управлениысьтыз муртъёсын - Валентин Питерскихен но Николай Кондрашкинэн. Соос эскерозы, кызьы интыосын Россия Федерациысь Президентлэн указъёсыз но интыысь аскивалтонэз радъян пумысен федеральной законъёс быдэсъясько. Удмурт Республикаысь Правительсвтолэн пресс-центрез. Ожмаськем интые, тушмонэз данъяз Мынам син азям огшоры картон папка. Нош пуштросэз воксё но огшоры ӧвӧл. Ма, вылаз гожтэмъёс но аспӧртэмесь: "Дело � 2345, кутскемын 1948 арын 20 декабре, йылпумъямын 1949 арын 20 апреле". Та папкаын Данилов Геннадий Константиновичлэн уголовной ужез. Следствие бырем бере, военной трибунал сое 25 арлы пуктэ. Пукиз Данилов 1957 арозь. Ма понна? Пытсэтэ сюресэз солэн кутскиз 1942 арын июне. Ижевскын вордскем но быдэсмем адями, Данилов 1933 арысен Крымын улэ вал. Та шаерез немецъёс басьтэм бере, со фашистъёслэн "Голос Крыма" газетазы ужаны кутскиз. Гожъяз пӧртэм заметкаос, очеркъёс, статьяос. Котькудаз курлаз Советской властез, ушъяз "немецкой порядокез". Гожъямъёсызлэн йыръянъёссы гинэ верало соослэн пуштроссы сярысь: "Музъем тӥледлы весяклы", "Бусыын шулдыр ужгур", "Бадӟым праздник", "Синвуосын пачылмем ты", "Кемалась малпанзы быдэсмиз" но трос мукетъёсыз. Тушмонлы вузаськем журналист тужгес но яратэ вылэм гуртъёсысь общинаос сярысь гожъяны, яркыт буёлъёсын соослэсь азинсконъёссэс суреданы. 1943 арын декабре Данилов, советской войскоослэсь кышкаса, Одессае пегӟе. Отын со интыяське "Молва" газетэ. Татын но жадёнэз тодытэк ушъя кузёоссэ. Нош Горд Армия ялан азьлань но азьлань мынэ, соин ӵош ик предательлы кыл кутон матэктэ. 1944 арын апреле Данилов Германие пегӟе. Ар ортчыса, со шеде англичанъёс доры. Соосыз Даниловез советской войскоос кие сёто. 1945 арын октябре сое лэзё фильтрационной лагерьысь. Кызьы со пӧяны быгатӥз эскерисьёсты, тодмо ӧвӧл. Валамон ини, Данилов одӥг кылын но ӧз ушъяськы немецъёс вылэ ужаменыз. Война бере Крымын но Тамбов областьын улыса, 1948 арын гужем Данилов Можгае вуэ. Ужаны кутске струнной кружоклэн кивалтӥсез луыса. Улэ аслаз вордӥськем палъёсаз, нош вань сюлэмыз, малпанъёсыз тушмон палан. Табере "яратон" мылкыдзэ воштӥз: вӧсяське Америкалы но Англилы. Оске, соос Советской Союз вылэ войнаен урдскозы но сое пачкатозы шуыса. Мылкыдъёссэ котырысьтыз адямиослэсь уг но ваты. Ялан ушъя Западэз, отысь улонэз. Ушъян висказ пож ву кисьта государство вылэ, уката но солэн кивалтӥсьёсыз вылэ. Йыркуръяськонъяз, эсэпсэ ыштэм, шӧдске. Тодмоосыз солэн вераськонъёсыз сярысь иворто "кытчы кулэ"... "Кинлы кулэ", соос Даниловез пытсало 1948 арын 20 декабре (тупаны но кулэ ук: ВЧК-лэн вордӥськон нуналаз). Сое янгыш карыны туртто РСФСР-лэн Уголовной Кодексэзлэн 58-10 но 58-И "а" статьяосызъя: Советской властьлы пумит валэктон уж нуэмез понна но Родинаез вузамез понна. Следствие кыстӥськиз 20 апрелёзь (нош ик тумошо тупаз: Гитлерлэн вордскем нуналаз). Следствие мыныку но, военной трибунал азьын но Данилов вань янгышсэ вылаз басьтӥз. (Мын ай, эн басьты со вакытэ!) Сётӥзы солы 25 ар. 1957 аре сое дырызлэсь вазь мозмыто. Кутскиз угось Хрущевлэн "шуныт даурез"... 1992 арын Удмурт Республикаысь прокуратура выльысь эскериз Г. К. Даниловлэсь ужзэ. РСФСР-лэн УК-езлэн 58-10 статьяезъя янгышез со вылысь куштэмын. Нош Родинаез вузамез понна сое шонере поттыны уг луы. Выльдӥськон вакытэ быдэс странаын ортчиз политической репрессиос улэ шедемъёслэсь ужъёссэс выльысь эскерон. Тросэз юнме курадӟемъёс шонере поттэмын, соослы ӟеч нимзы берыктэмын. Со аръёсы но, али но куд-огез адямиос государственной безопасностья органъёсты дэриен сурало, кыӵе ке изьверен возьматыны туртто. Но котьку-а сьӧсьяськизы чекистъёс? Ӧз. Тани басьтом Г. К. Даниловез. Кызьы тодмо, со, Можгаын улыкуз, трос но лек вераськылӥз асьме государстволэн политикаез сярысь, пож вуэн пылатъяз солэсь кивалтӥсьёссэ. Мылкыддэ шара веран али йыружен уг ни лыдъяськы. Соин ик Даниловез шонере поттӥзы, янгышен ӧз ни лыдъялэ. Нош кызьы сое шонере поттод, оккупантъёслы юрттэмез понна? Котькыӵе дыръёсы, котькыӵе калык пӧлын тушмонэн огкылысь луисьёсты каргазы. Зэм, Данилов каратель но, полицай но ӧй вал, калыкен ӧз сьӧсьяськы, нокинэ ӧз ыбылы. Нош быгатыса верам кыл ӧжытгес изъян вае шат? Кӧня адямиослэсь йырвизьзэс, мылкыдъёссэс сураз-пожаз меда вузаськем журналист? Даниловез нокин но кужмысь ӧз косы фашистъёслэн газетазы ужаны. Со ачиз, аслаз верамезъя ик, трос пол куриськыса гинэ интыяськыны быгатӥз кырсь уже. Озьыен, вузаськон мылкыд солэн сюлэмаз-вираз пыӵамын. Малы ке шат со следствие дыръя но немецъёс вылэ ӵош ужам гыжкалъёссэ капчиен гинэ вузаз. Трос-а, ӧжыт-а, но Даниловлэн мадиськемез бере, 17 преступник шараямын вал. Кытын али Г. К. Данилов, тодмо ӧвӧл. Оло, улэп но ӧвӧл ни. Али солы угось 89 арес луысал ини. Г. ТИХОНОВ. Сюлэм висён Дэмен султом анай музъеммы понна Туж троссэ ыштӥз ини асьме калык демократия шуонэн сэрен. Но вань на ай берпуметӥ сюдӥсь- вордӥсьмы - музъеммы-анаймы. Быдӟым Отечественной война дыръя 20 миллион адями улонзэ сётӥз сое утён понна. Нош али демократъёс-реформаторъёс туртто ини сое но таланы. Нимаз ваньбур шуэм улсын, вань калыкез ӝуткало музъемез вузан-басьтон понна. Ельцин шуиз ук: мон, пе, уг жадьы весь вераны, музъем вузамын луоз шуыса. Тазьы ик шыпыт улӥмы ке, вань гурт калык дыраз ӧз ке ӝутскы реформаослы пумит, асьмеос одно ик ляльчие кылёмы. Отын ик быронмы но вуоз. Тодӥськом ини угось, кытчы вуттӥз приватизация но акционере огазеян. Данакез заводъёс, колхозъёс но совхозъёс куашкамын, калык ужтэк кылемын. Табере тани асьмеды музъем ласянь но алданы туртто ини. Кин кие со шедёз? Валамон, туала узыръёслы гинэ. Соос возьматӥзы ини ваньбур понна сьӧсьяськон сямзэс. Басьтозы музъеммес, котыртозы сое бышкась езэн, пуныосын возьмаськисьёсты пуктозы. Уз ни луы нюлэскы но, шур дуре но, возь вылэ но потэммы. Со дыре ик туала кузёос вылэ губырскымон ужаломы. Юнме шорысь уг вера ук В. Новодворская: реформалэн тужгес но секытэз, кышкытэз, пе, азьпалан ай. Кыӵе бен секытэз луоз на, гуртын али ик чидантэм югдур бере. Реформаторъёслэн "сюлмаськеменызы", басьтыны вормонтэм дуно луиз техника, эстӥськон, минеральной сылалъёс, электрокужым но ваньмыз, ваньмыз мукетыз. Нош сокем секытэн поттэм нянь, сӥль, йӧл-вӧй, бакча сиён воксё эрказ кадь кошке. Кылдӥзы вал нимаз крестьян хозяйствоос. Соос но тросэз кушказы ини, кылемез но туннэ-ӵуказе бырозы. Мискиньёс, кинлы бен оскыса тӥ люкиськиды, палэнскиды вал, сокем зол хозяйствоос но пашмизы бере. Ӧд тодэ угось, ӧд валалэ, мар луоз азьланяз. Асьмеос чик чакласькытэк кутӥм Конституциез. Тодӥсь-валась адямиос кӧня пумитъяськизы сое кутонлы. Асьмеос ӧм кылзӥське соослэсь, оскимы Ельцинлы, Гайдарлы, Чубайслы. Кытчы соос вуттӥзы калыкез, табере ас выламы шӧдӥськомы. Неужто сётомы музъеммес но вузаны, асьмеды нош ик пӧяны? Оскисько, мон гинэ ӧвӧл, котькудӥз ас калыксэ сюлмысьтыз гажась адями ӝутскоз музъеммес вузанлы пумит. Эн оске реформаторъёслы! Асьмеды асьмеос утьыны быгатомы, анай музъеммес утьыса гинэ. Со асьмелэн берпуметӥ осконмы. Ум сётэ сое тус-тас карыны. Та чуръёсты гожъякум, депутатлэн А. Горошниковлэн "Пилиськем тусь дуре ум кыле-а?" статьяеныз газеттылэн номерез вуиз. Отын со вера улон интыосъя реформа пумысен сюлэм висёнзэ. Мон быдэсак огкылысь луисько солэн статьяеныз. Бен, вань куректонэз, чиновникъёслэсь мыдланьяськемзэс газетэ уд, дыр, гожты но меӵак алдаськонэз, эрказъяськемез шара вераны одно ик кулэ. ... Куать ар ӵоже весь усиськомы пыдэстэм бекчее. Ельцинэз кыкетӥ дырлы ӧм ке бырйысалмы, улон мукет пала берытскысал ини. Со уксёен гинэ басьтӥз властез ас кияз. Солы уг яра оскыны. Кызьы мон кылӥ, Ельцинэз вордэм анаез но курла ини, пе, супыльтӥсь, эрекчаськись шуэм пизэ. Тӥни кыӵе адямиос асьмемын кивалто. Анна Абрамова. Пугачево посёлок. 27 февраля в 19.00 в помещении Дома молодежи (ДК "Редуктор") Эктон корка (Дом удмуртского танца) вновь приглашает всех любителей и ценителей традиционного искусства. Хозяева вечера - народный фольклорный ансамбль "Зарни шеп" с. М. Перга. "Удмуртнефтьлы" -25 ТАИЗ АР ӞЕЧГЕС ЛУОЗ Кызьы ивортылӥм ни, му вӧй поттӥсьёс туэ пусъё асьсэлэсь юбилейзэс. Праздник азьын котькудӥз коллектив, ужамезлы йылпумъянъёс лэсьтэмен ӵош, вуоноезлы сюрес чакла. "Ижевскнефтьлэн" ёзъёсаз но дасяськон умой-умой мынэ ни. Ортчыло коллективной договорез кутонъя кенешъёс, профкомъёслэн ар ӵоже ужамзылы дунъет сёто. Пусйыны кулэ, му вӧй поттӥсьёс трос ужпумъёсты ӝуто, котькудзэ пумаз-йылаз вуттон сярысь сюлмасько. Уката но ӟырдыт верасько улон-вылон но ужан условиос ласянь.Тырмымтэосты шараямен ӵош оско, "Удмуртнефть" АО таяз арын эшшо ӟечгес тыршоз, калыксэ шуге-леке шедёнлэсь утёз шуыса. Таӵе инъет понэмын колдоговоре но. Р. ШАРИПОВ. Сибирьын ужалозы Асьмелэн му вӧй поттӥсьёсмы, "Сиданко" АО-лэн куремезъя, матысь дыре ужаны кутскозы Сибирьын, Верх-Тарской месторождениын, юрттозы "Новосибирскнефтегаз" ОАО-лы. Нырысетӥ скважинаез портыны кутскытозь, трос гинэ ужпумъёсты быдэстоно луоз на. Та нуналъёсы выль интыын мыно проектной ужъёс. Вахтаен-вахтаен отчы ветло строительёс, буровикъёс. Соослэн лёгем сюрестӥзы выль интые ӝоген кошкозы му вӧй поттӥсьёс. С. СЕМЕНОВ. Сталинградын ожмаськонлы - 55 ар Тулыспал ялэмын Атай музъеммес утисьлэн толэзенызы. Сталинградын ожмаськонлэсь 55 ар тырмонзэ пусйыса, Ижевсклэн адяминистрацияз 3 феврале ортчиз та ожмаськонэ пыриськем ветеранъёсты сӥлы карон ужрад. Дас ар талэсь азьло Сталинградын ожмаськемъёс шаерамы 400 пала лыдъясько на вал, табере соос 170 мурт сяна кылемын ӧвӧл ни. Та нуналэ ик ветеранъёс люкаськылӥзы "Металлург" культурая двореце. Соос азьын вераськизы мэриысь депутатъёс но военно-патриотической огазеяськонъёсысь егит курсантъёс. Э. КУМАЧЕВА. ЗАО "СОЛУР" Предлагает крупным и мелким оптом со склада г. Набережные Челны СОЛЬ ВСЕХ ВИДОВ в том числе соль "Экстра" йодированная фасовка в пакетах по 1 кг. КАМЕННЫЙ УГОЛЬ Марка - Гр, фракция 0-300 мм, зола 18,8 %. Для постоянных покупателей скидки до 10 %. Тел./факс: Н. Челны (8552) 42-92-75, 42-51-80. Ижевск (3412) 76-04-10 Адрес: РТ, г. Н. Челны, ул. Гидростроителей, 17. (здание УПТК КАМГЭС). Малпаськытэ но, сюлэмшугъяськытэ но АДЯМИ МЕДАЗ ЫШЫ Шаерамы алигес ветлӥз азьвыл тодмо идеолог Александр Яковлев. Табере со кивалтэ политической зӥбет улэ шедемъёслэсь саптам нимзэс берыктонъя но утёнъя комиссиен. Со кылдытэмын но ужа Россилэн Президентэз бордын. Озьы ик луэ дуннеысь "Демократия" фондлэн президентэз, Россиысь социальной демократия партилэн (РПСД) кивалтӥсез но РАН-лэн академикез. Александр Николаевич вал Россилэн Канадаысь посолэз но Дуннеысь экономикая но калыкъёслэн кусыпъёссыя институтлэн директорез. Кема ужаз партийной аппаратын, нош 1991 арын куриськон гожтӥз но партиысь потӥз. - Мынам улонэ Удмуртиен но герӟаськемын. Шимес война дыръя, 1942 арын, Глазовысь военной училищеез быдтыса, фронтэ кошки, - тодаз вае Александр Николаевич.- Соку куазь туж кезьыт, 42-43 градус улӥз. Мыным 18 арес вал. 2 феврале лейтенант луи, погонъёсам кык пичи кизили бырттӥзы. Кыӵе бадӟым шумпотон вал. Нош ожмаськыны дышетским город вӧзысь нюлэскын. Вань на-а меда со? Учкыны одно ик ветло. Фронтын тушмон пулялэсь курыт шӧмзэ но веръяй, мӧляям орденъёс но юнме уг пишто. Александр Яковлев - туж тунсыко, визьмо но аспӧртэмлыко адями. Быгатэ азьпала учкыны, ортчемзэ но уг вунэты. Сотэк, пе, адямилэн ӵуказе нуналэз уг вордӥськы. Тӥни соин ик историез зэм возьматон вылысь, тодосчи трос лэсьтэ: кызьы ке политической зӥбет улэ шедемъёслэсь саптам нимъёссэс берыктонъя, озьы ик историен герӟаськем книгаос поттонъя. Солэн верамезъя, зэмос документъёсын 4 томен книга печатьысь потэмын, нош витетӥез печатлаське. Соос пӧртэм дыръёслы сӥземын, нырысез, шуом, Кронштадтлы, мукетыз - Катыньлы, куинетӥез - командарм Филипп Мироновлы, ньылетӥез - Лубянкалы. Витетӥез герӟаськемын 50-тӥ аръёсын, антипартийной группаен (Маленков, Молотов, Каганович но Ворошилов). Ваньмыз ик печатласько, "Демократия" фонд юрттэмъя. Табере соосты Америкаын английской кылэ берыктыса поттыны мылкыд каро. Китайысь но вазиськонъёс вань ни. Таиз ар ялэмын адямилэсь правооссэ утёнъя арен. Со юрттоз Москваысь но интыосысь комиссиослэсь ужзэс умоятыны. Ватытэк верано ке, асьме дорын но ваньмыз уг лэсьтӥськы. Ижевскын гинэ политической зӥбет улэ шедемъёс 1,5 сюрслэсь уно лыдъясько. Данакезлэн соослэн ваньбурзы таламын, тус-тас каремын вал. Табере сое берыктыны туж секыт. ГУЛАГ-ын пукемъёслы эмъяськыны санаторие путёвкаос одӥг-кык гинэ висъяло, нош соос 70 мурт кылемын на. Александр Николаевичлэн 1000-лэсь ятыр статьяез печатламын. 1986 арын, пе, монэ Политбюрое членэ бырйизы. Соку страна меӵ ярдурын сылӥз ни. Держава куашкан калэ вуэмын вал. Валамонгес вераса, нефть вузамлы коньдон (долларъёс) быдтэмын-сиемын, зарнимы ӧй ни вал, нош нянь палэнысь арысь аре тросгес басьтыны кутским. Маке но кароно вал. Ӵошатон вылысь: 1909 арын Россия огназ США, Канада но Аргентина мында ю тысь вузаз, нош курег пуз быдэс дуннеын - ӝынызэ. М. Горбачев но мукет кивалтӥсьёс югдурез шонер валало вал. Страналэн азьланез сярысь сюлмаськыса, наукаез но техникаез азинтон вылысь, партийной пленум ортчытӥзы. Уно миллиардъёс быдтӥзы, нош пайдаез ӧз луы. Кунгож сьӧрысь басьтэм ӟеч оборудование (14 миллиард манет тыр) складъёсын но предприятиосын кыллизы, ӧз ужалэ. Малы? Вылӥысен зӥбон амалъёслэсь куштӥськыса воштыны кулэ вал обществолэсь азинскон сюрессэ, нош предприятиослы эрик сётоно вал. Тани гурт хозяйстволы уксё дурен кисьтылӥзы, нош пайдаез ичи вал. Вуж система ӧз ужа ни. Сое выльдоно вал. Кызьы? Каллен азинскыса малпазы демократиез пыӵатыны но граждан общество лэсьтыны. Дуннеын таӵе амал нырысьсэ кутӥське. Каллен азинскон сюресмес уретӥз 1991 арын августэ путч. Кивалтонэ, политикае лыктӥзы кыкетӥ "тулкымысь" демократъёс. Туала Президентлы со кулэ вал. Экономикаын "шоковой терапия" ортчиз. Но Россия таӵе бадӟымесь воштӥськонъёслы дась ӧй вал. Куд-огез асьмеды Польшаен ӵошато, отын но, пе, сыӵе ик югдур вал, но страна пыд йылаз ӝог султӥз. Нош отын музъем крестьянъёс киын вал ук. Нош асьмелэн? Столыпин музъемез ужасезлы сётыны выриз, сое басьтыны коньдон но сётъяз, но ассэ быдтӥзы. Россиын али но музъем ваньбур карымтэ. Александр Николаевичлэн котькыӵе ужпумъя аслаз малпанъёсыз. Тани армияя ик. Сое выльдоно, пе, военной реформа одно кулэ. Малы 6,7 миллионъем армия, 65 сюрс танк возёно вал? Ватонэз ӧвӧл, 70 процентэз производство ож тӥрлык но мукетсэ поттӥз. Отчы пӧртэм удысъёс (гурт хозяйство, культура, тазалыкез утён) пыр коньдон кошкылӥз. Али но асьмелэн генералъёсмы, быдэс дуннеен ӵошатыса, 1,5 поллы трос. Та ужпумен ик люконтэм герӟаськемын ож тӥрлык поттӥсь предприятиосты выльдон, конверсиез нуон. Та ужен ӝог гуньдӥм. Малы ке шуоно, заводэз калыклы вуз поттонэ выжтыны 3-4 пол уногес уксё висъяно вал. Нош ик коньдон ӧм шедьтэ. Вакчияк вераса, предприятиосты выльдон асьсэ вылэ погыльтэмын вал. Трос ӵашетӥм-керетӥм, нош выльдӥськон ӧз азинскы. Али но югдур уг тупатскы. Соин ик туннэзэ пусйыса, Александр Яковлев ватсаз: - Россиын реформаосты калык пала берыктоно, адями медаз ышы, со понна ваньзэ лэсьтоно. Тӥни малы Социальной демократияя партия странаын валтӥсь инты басьтыны кулэ. Юрттоно пичи ужбергатӥсьёслы но, фермеръёслы но. Лэсьтоно социальной общество, социальной государство. Отын мед луозы ас коже кивалтон, общинаос, шуом, кышномуртъёслэн, дышетӥсьёслэн, врачъёслэн. Вылӥысен кивалтыны уг яра. Милям партимылэн программаез 4 валтӥсь люкет басьтэ: калыклэсь тазалыксэ утён, дышетон, культура но семья. Со ке быдэсъяськиз, ваньмыз умой луоз. Кивалтон куинь ёзэн мед луоз: валтӥсь власть (центр), интыосысь власть (регионъёс, соосты огазея Федерациысь Совет) но профсоюзъёс (удысъёсъя яке интыосъя мед ужалозы). Соин ӵош ик выльдоно быръёнъёсты. Госдумае 30 процентсэ гинэ депутатъёсты партиос пыр быръёно (али ӝыныез). Табере амалтэк юан кылдэ: демократия вормиз ни-а^? Озьы шуыны уг луы. Кыл веранлы, печатьлы эрик сётэмын, демократилы матын луись быръёнъёс радъямын, "кезьыт война" быдтэмын, нош мукет ласянь, кивалтон аппарат, бюрократия арысь аре пульдэ но политикае пыриськыны выре. Тӥни огшоры бюрократ демократилы бадӟым кышкытлык кылдытэ.. Чиновникъёс калыклэсь мылкыдзэ куашкато но производствоез азинтонэ могӟетъёс пукто. Кивалтон аппаратлэн будэмез мукет ласянь но умоен уг берытскы, бюджетлэн бадӟым люкетэз коньдон сое возьыны кошке. Собере асьсэос ик кивалтӥсьёс социальной удысын ужасьёслы чик кӧбератэк шуо, бюджетын, пе, коньдон ӧвӧл. Тӥни сыӵе герд улонамы пумен мургес пыӵа. Азьло дыре, выль ар кутскыку, аппаратэз 5 процентлы кулэстон сярысь яло вал, быдэсто-а, уг-а вал сое, эскерись ӧз шедьылы, нош ар кутскем бере выль ёзъёс но ужан интыос усьтӥськылӥзы. Мар бен, тодмо политиклэн куд-ог веранъёсыныз, малпанъёсыныз соглаш кариськыны секыт. Но одӥгеныз соглаш кариськытэк нокызьы уг луы: котькытын адями сярысь зэмос сюлмаськон мед луоз. Геннадий РОМАНОВ. Вниманию владельцев квалификационных аттестатов 1 категории на право совершения операций с ценными бумагами Согласно Положению "О системе квалификационных требований к руководителям и специалистам организаций, осуществляющих профессиональную деятельность на рынке ценных бумаг, а также к индивидуальным предпринимателям - профессиональным участникам рынка ценных бумаг", утвержденному Постановлением ФКЦБ России от 2 октября 1997 г. � 28, лица, владеющие квалификационными аттестатами Министерства финансов РФ 1 категории на право совершения операций с ценными бумагами, имеют право обменять указанные аттестаты на квалификационные аттестаты Федеральной комисси по рынку ценных бумаг. Срок действия аттестатов Министерства финансов РФ прекращается с 22 апреля 1998 г. Для обмена аттестатов их владельцам необходимо представить в Комитет по ценным бумагам и фондовому рынку при Правительстве УР (ул. Советская, 1, каб. 198): квалификационный аттестат 1 категории на право совершения операций с ценными бумагами; анкету по форме согласно Приложению 2 к Постановлению ФКЦБ от 02. 10. 97 г. � 28; нотариально удостоверенную копию документа о высшем образовании (для лиц его имеющих). Справки по телефону: 78-53-35. Малпамтэ шорысь вераськон Инвожо улӟе... толалтэ Та пумиськон вал Грах ёросысь Лолошур-Возжи школаын. Отчы шаерысьтымы тодмо прозаиклэсь Роман Валишинлэсь вордскемез дырысен 60 ар тырмонзэ пусйыны, котыр гуртъёсысь сяна, Ижевскысь но Башкортостанысь трос удмуртъёс люкаськылӥзы. Роман Галяскарович угось та школаын кӧня ке ар пиналъёсты дышетӥз. Директор но вал. Ӵапак татын кылдытӥз "Инвожо уйшоре но пиштэ" повестьсэ но куд-ог веросъёссэ. Книгаяз писатель пыртылӥз но возьматӥз Лолошур-Возжиысь но адямиосты. Повестез лыдӟыса, тросэз тодмазы отысь асьсэды. Ярато вал Грах ёросын Валишинэз. Соин ик, вылды, прозаиклэн 60 ар тырмонэз пӧрмиз бадӟым, шулдыр праздниклы. Весяклы вунонтэм кылёз со уноезлы. Мӧйыослы но, егитъёслы но. Лолошур-Возжие трос писательёс, журналистъёс, пӧртэм куноос ветлӥзы. Вуылӥзы Роман Валишинлэн Башкортостанысь ӵыжы-выжыосыз но. Вынзэс тодазы воземзы, данъямзы понна, музъемозь ик йыбырттӥзы, музейзылы трос документъёс, кузьымъёс кельтӥзы. Вераны кулэ: та бадӟым ужрадэз школа ас кужыменыз дасяз, радъяз. Зэм, пичильтык коньдонэн юрттӥзы куд-ог ужась коллективъёс. Ми, Ижевскысь лыктэмъёс, тужгес но шумпотӥмы писательлэсь вордскем нуналзэ пусъёнэ нылпиослэн мылысь-кыдысь пыриськемзылы. "Удмурт кенеш" но "Дэмен" огазеяськонъёсты ӵемысь пыкыло угось, егитъёсын тырмыт уг ужало шуыса. Школьникъёс куноослы дасяллям трос кузьымъёс, чебер кырӟанъёс но эктонъёс, кыдёкысь лыктэмъёсты соос вӧйын нянен но шулдыр кырӟанъёсын пумитазы. Бадӟым празднике ветлӥзы "Удмурт кенеш" огазеяськонлэн та палась кивалтӥсьёсыз А. В. Тарасова но Ю. К. Рожин. Пӧртэм гуртъёсысь артистъёс возьматӥзы туж яркыт концерт. Бадӟым тау соослы. Нош мынам нимысьтыз вераме потӥз нылпиослэн инвожо сяськалы сӥзем ӵошатсконзы-конкурссы сярысь. Со мынэсьтым мылкыдме зол бугыртӥз. Р. Валишинлэн повестяз угось та сяськалэн тусыз, чеберез, кужымез шӧдскымон инты басьтэ. Бадӟым классъёсын дышетскисьёс ас быгатэмзыя ӵапак та сяськаез суредаллям. Быдэс борддор тыр лякылэмын соос. Ӵужыр-ӵужыр гомало яркыт тылъёсын! Инкуазьмылэсь тусбуйзэ усьтӥсь, гужемлэсь пӧсь шокамзэ возьматӥсь сяськаез котькудӥз ас сяменыз суреданы тыршем. Сюжетъёссы но паймоно кадесь. Мур малпаськонэ уськыто, улосмес пӧртэм ласянь усьто. Кырын ӟырт кезьыт ини, нош школа пушкын инвожоос чылкак али гинэ гомӟиллям- усьтӥськиллям кадь. Трос суредъёс синъёсты воксё ас бордазы кыско. Нош малы ке огез гинэ дышетскись инвожоез возьматэм егит ныллэн тусбуез пыр. Улаз гожтӥськем: "Ефимова Надя". Тодматскеме потӥз нылашен. Конкурслы йылпумъянъёс лэсьтыны чакламын вал ай бӧрысьгес. Но мон, дышетӥсьёс вожзэс медам поттэ, ӧжыт азьпалтӥ соосты: сценазы вылэ кык пол тубано медам луы шуыса, огеныз вормисен ялӥ Н. Ефимоваез. Адямилэсь чеберзэ бумага вылэ пуктыны, солэсь малпанъёссэ, сюлэмзэ усьтыны котьку туж секыт угось. Зэмос суредасьлэн но, кылбурчилэн но, прозаиклэн но, драматурглэн но со кытӥяз уг пӧрмы. Нош Надя кызьы быгатэм, озьы ик лэсьтэм. Али быдэ вуись нылаш пумтэм шумпотэ яркыт инвожолы. Сяськалэн но, нылмуртлэн но чеберзы огинэ кисьтӥськиллям кадь. Соин улэп инвожо уката но кужмо тылсияське. Надяез огеныз вормисен ялыса, сцена вылысен мон солы кузьмай В. Ившинлэсь "Котыртӥ- котыртӥ" книгазэ (асламъёсыз татӥысь трос лыдӟисьёс киын вань ни). Жюрилэсь малпанзэ мон сураськымтэ - соос но Н. Ефимоваез вормисен ялӥзы. Тӥни соку будӥсь усточилэсь малпамтэ шорысь интервью басьтоно кариськи. - Кыӵе классэ ветлӥськод ни, Надя? - Дасэтӥе. - Нош кызьы дышетскиськод? - Эшъёсы кадьгес ик. Вань "витьёсы" но, луыло "куиньёсы" но. - Мар тужгес секытэн сётске? - Химия. - Малы? - Мугзэ ачим но уг валаськы. Тыршисько кадь но... Пӧртэм формулаос, реакциос йыре малы ке шугенгес пыӵало. - Мумид-аид кинъёс-о? - Атае механизатор. Анае суредась... - Тон кин луыны чакласькод азьланяз? - Дышетӥсь кариськеме потэ. Суреданъя яке кылъя. - Суредась дышетскыны пырыны бен ӧд тыршылы на-а? - Тырши вал - ӧз пӧрмы. Пӧртэм арбериослэсь вужер кызьы сётэмзэс возьматыны уд быгатӥськы на шуизы. - Нош егит нылэз но инвожоез суреданы кема-а вырид? - Кема ик. Озьы но сокем ӧз пӧрмы на. Капчи вылымтэ суредасьлэн ужез. - О-о! Созэ валаськод бере ини, одно ик дышод ай. - Мед вал. - Тон, Надя, туннэ татчы пумиськонэ вань лыктэмъёслы кузьмад инвожо сяськадэ. Нош аслыд кыӵе ке но муген сяська кузьмаллязы-а ини? - Ӧз на... - Школаез йылпумъякуд, одно сётозы ай... Люкиськыкумы мон кури вал Вениамин Ившинлэн книгаезлэн шорсюлмызъя одӥг суред лэсьтыны. Лэсьтэм ведь. Пуштроссэ но валам кадь. Кылбуръёсаз автор трос пусъе улонмылэсь чеберзэ но, пиртэш палъёссэ но. Пеймыт уез но, югыт нуналэз но ас сяменыз суреда кылбурчи. Удмурт драмтеатре ветлыкузы, выль ужзэ мыным кельтӥз Н. Ефимова. Туж малпаськыса лэсьтэм суредзэ. Шори люкем укно синъёстӥ яркыт адӟисько кадь Лолошур-Возжи палась но, Кез котырысь но паськытэсь лудъёс, ӵужектӥсь ӟег, чылкыт инбам, азьлане нуись сюрес, вож тэль. Вадьсазы пиштэ Шунды. Соос быдэс классэнызы лыктӥллям егит артистъёсмылэсь А. Островскийлэн "Серекъялод но, бӧрдод но" пьесаезъя дасям спектакльзэс учкыны. Нялтас мон Надялэсь юай: - Я, кыӵе ни химия ласянь югдурмы? - Умойгес, - шуиз со, кемалась тодмое сямен, дӥсьтысагем, кепыратэк. - Алигес школаямы химилы сӥзем ӝыт ортчытӥзы. Дышетӥсьмы ушъяз. Мынам но ас кужымелы осконэ юнма ни... - Нош мае лыдӟе та вакытэ кылъя вуоно дышетӥсьмы? - пальпотыса юай. - Роман Валишинлэсь гожъямъёссэ выльысь учки на. Вениамин Ившинлэн кылбуръёсысьтыз но трос ӟечсэ тодӥ. "Инвожо" журналысь тӥлесьтыд но "Юсь" повестьтэс лыдӟисько... Татчы ватсаме потэ на: нош А. Островскийлэн чебер пьесаез визь кеньыр люканы уката золгес юрттӥз, дыр, Лолошур-Возжиысь пиналъёслы. Шудо луэ, кивоштӥсьёсмы! Вань ӟеч малпанъёсты та секыт вакытэ но мед быдэсмозы! КИРИЛЛ ЛОМАГИН. Кун Кенешлэн сессияз КИНЛЫ КУЛЭ ЧЕБЕРЪЯСЬКОН? Калык оске на Кун Кенешлы, Правительстволы. Но кӧня меда тырмоз на со оскон? Вераны шуг, малы ке шуоно, Кун Кенешлэн сессиез учкиз ож тӥрлык поттон удысын ужасьёслэн профсоюззылэсь куронъёссэ но нокыӵе решение кутыны ӧз быгаты. Депутатъёс трос вераськизы, данакез чеберъяськыса, бырйисьёссэс тодазы ваизы, ӧз вунэтэ мукетсэ но, ӝоген, пе, ужан дырмы быроз ни. Соос малпаськыны кутскизы вуоно быръёнъёс сярысь. Та ужпумъя сессиын ивортон лэсьтӥз Правительстволэн Тӧроезлэн нырысетӥ воштӥсез Александр Злобин. Со пусйиз: "Предприятиосын уждун тыронъя графикъёс лэсьтэмын. Правительство ужрадъёс кутэ нылпи пособие сётонэз умоятон ласянь. Туэ одӥг июньысен та ужен выроз Калыкез улон-вылонын утёнъя министерство". Но куд-ог предприятиос, шуом, "Ижсталь" но мукетъёсыз, солы пумит луо, нылпиослы коньдон, пе, сётъяно ужась коллективъёсын ик. Сессиын ӟырдыт мылкыдын, лекъяськыса кадь вераськиз Рессовпрофлэн кивалтӥсез Евгений Орлов. Кылем ар, пе, огкылысь улон арлы ӧз пӧрмы. Кун Кенеш но Правительство аслаз ужрадъёсаз профсоюз ужасьёсты уг ӧтчало. Куд-ог предприятиосын ("Ижмаш", Сарапулысь ЭГЗ) 5-6 толэзь уждун уг сётъяло ни. Вылаз ик, нылпиос понна но дыраз уксё уг вуы. Промышленной предприятиосты зол пачкатэ улон коркаоссэс но соцкультбытсэс возён. Соосты интыослы сётон вылысь, 1994 арын федеральной бюджетысь 75 миллиард манет коньдон висъямын вал. Но со мукет азе кутэмын. 1995-тӥ - 1997-тӥ аръёсы но талы уно уксё вуэмын вал. Но со тырмыт ӧвӧл на. Федеральной бюджет 2,5 триллион манет сётыны кулэ ке вал, 1,6 триллион манет гинэ висъямын. Сессиын мукетыз но шарае потӥз. Тани Воткинскын вань предприятиослэн улон юртъёссы но соцкультбытсы, нокыӵе коньдон висъятэк, городлы сётэмын. Тӥни со но юрттӥз татысь предприятиослы арез умой йылпумъяны но ваньбур поттонэз будэтыны. Кылсярысь, сӥлькомбинат кык пол трос продукция поттэм. Жаляса верано луэ, таяз учыре но Кун Кенешлэн сессиез трос дырзэ быдтӥз Удмурт Республикалэн Конституцияз воштонъёс но ватсанъёс пыртонэз эскеронлы. Куд-огез депутатъёс ужпумез учконлы пумит луизы, соя, пе, документъёс вуттымтэ. Озьы ик верамзы потӥз, республикаын но интыосын кивалтон ёзъёсты выльдон мар ӟечсэ сётоз, со умоен берытскоз-а? Али тунаны секыт, ваньзэ улон возьматоз. Таин ӵош мукетыз но ужпум ӝутскиз. Кӧня ке депутатъёслэн (А. Ушаков, И. Казанцев, К. Глухов) ужзэс воштэменызы валче, асьсэлэсь депутат полномочиоссэс ыштӥзы. Нош соос куриськон уг гожто, депутатысь кошкемзы уг поты. Та ужпумъя сессиын валэктонъёс сётӥз Мандатъёсъя но депутатъёслэсь ужзэс радъянъя комиссилэн тӧроез Геннадий Абросимов. Ож тӥрлык поттӥсьёслэн ужъёссы но улонзы пумен уродме. Соин валче та удысын ужасьёслэн профсоюззылэн рескомез аслэсьтыз интызэ утча. Но солы туннэ туж секыт йӧтэ. Быдэс Россиысь ваньбурмес кунгож сьӧрысь странаослы сётон мынэ. Депутат Валентин Кудинов вераське ке удмурт музъем узырлыкъёсмес пайдаё кутон сярысь. Но со толло нунал ни. "Удмуртнефть" асьме киысь кошкиз. Соин кивалтэ "Сиданко". Сое ыштэммы бере гинэ малпаськыны кутским асьмелэсь удмурт му вӧй ёзмес (компанимес) кылдытон сярысь. Профсоюзъёслэн куронзы люконтэм герӟаськемын быдэс промышленностез шуг-секытысь поттонэн. Ар талэсь азьло та удысэз азинтонъя нимаз ужрадъёс кутэмын вал. Дыр ортчиз. Мар бен лэсьтэмын? Промышленностья министр Виктор Долгов сессиын ивортон лэсьтӥз ке но, депутатъёс солэн вераменыз соглаш ӧз луэ. Удысын воштӥськонъёс уг шумпотто, куд-огез предприятиос ("Ижсталь", "Буммаш", ЭМЗ) огсыр ужало ке но, данакез мырдэм "шокало". Азьланезлы но азинскон сюресъёс уг адӟисько. Депутатъёс огез бӧрсьы мукетыз трибуна сьӧры пото но малпанъёссэс верало. Нош Евгения Мальцева юа, вань-а, пе, амалъёс "Редуктор" АО-ез азинскон сюрес вылэ поттыны? Валамон, депутатлэн сыӵе юанэзлы нокин одӥг кылын уз валэкты. Югдур ведь герӟаськемын мукет предприятиосты но шуг-секытысь поттонэн. Огъя пусъёно ке, шаерамы промышленностез улӟытон амалъёс уг адӟисько. Соин ик парламент та ужпумъя постановление но ӧз куты. Депутатъёс ӵектӥзы рос-прос решение дасяны, отын, пе, мед луоз, кин мар понна кыл кутэ, кин коньдон висъя но мукет. Сессиез нуиз Кун Кенешлэн Тӧроезлэн нырысетӥ воштӥсез Владимир Агашин. Дас куатетӥ сессия ужзэ азинтоз 6 феврале. Нош толон ортчиз депутатлэн нуналэз. Г. РОМАНОВ. Берекет Тӥледлы кибашлыос Учке ай та пужыосыз. Макем муспотонэсь адӟисько гондырпи но ӵӧжпи. Суредын кадь таӵе пужыосты керттэмды но, пужыятэмды но луоз. Сӥньысь быръе асьтэ тодэмдыя но мылкыд каремдыя, кыӵеез сюроз ки улады. Гондырлэсь ымзэ - гордэн, синъёссэ - лызэн, нош ӵӧжпилэсь пыдъёссэ но нырзэ ӵуж, ӵужмыт-горд буёло сӥньысэн пуктыны яралоз. Та пужыосыз редакцие ыстӥз Можга районысь Бальзяшур гуртысь автормы. В. М. Кузнецова. Кун Думаысь иворъёс Иракын югдур лэчытомемен сэрен, депутатъёс решение кутӥзы отчы 8 феврале Кун Думалэсь делегацизэ келян сярысь. Отчы пыртэмын депутатмы Михаил Кошкин но. Депутатъёсын ӵош Ираке мынозы журналистъёс но. Соос пӧлын - "Комсомолец Удмуртии" газетысь кык журналист. *** Депутат Андрей Солуянов пумиськылӥз Президентлэн Администрациезлэн кивалтӥсеныз А. Огаревен. Вераськон мынӥз Ижевскысь пыӵал тӥрлык поттӥсь предприятиослэн Китаен валче ужанзы сярысь. Кун Думаысь депутатлэн А. Солуяновлэн пресс-службаез. Берекет Юртты аслыд ачид Кынманы ке шедиды Беризь сяськаысь октэм одӥг сиськон пуньы чечыез суралэ стакан чаен яке пӧсь йӧлэн. Юоно уйлы, кӧлыны выдон азьын. Одӥг лимонлэсь соксэ сурано 100 грамм чечыен. Юылоно кӧлыны выдон азьын 1 сиськон пуньыен пӧсь чаен яке йӧлэн ӵош. Кирень сокез но чечыез (кыксэ но одӥг мында басьтоно) сурано. Юылоно нуналаз кык пол ӵук но ӝыт одӥг сиськон пуньыен. 100 грамм выль яке 2 сиськон пуньы куасьтэм эмезез пӧзьтоно стакан тыр вуэн. 10-15 минут ортчыса, ватсано одӥг сиськон пуньы чечы. Юоно шунытэн кӧлыны выдон азьын. Одӥг сиськон пуньы чечыез, 30 грамм пуш кӧез сурано одӥг стакан пӧсь йӧлэн. Таӵе эмъюмез нуналаз 2-3 пол юылоно. Чылкыт сузям чеснокез векчи вуштон пыр поттоно, сурано чечыен (кыксэ но одӥг мында). Юылоно кӧлон азьын шуныт вуэн ӵош. Та эмъюмен йӧнатско пыэд дыръя но. Берекет Ваньмон дыръяды Йыртӥян Паллянысен буре: 2. Адями яке пудо пуштӥрлык. 9. Кавказысь город. 10. Лымшор палась тылобурдо. 12. Бусы. 13. Гурт пудо. 15. Лыдытӥсь нымы-кибы. 17. Гурезьёсын улон инты. 19. Мертаськон арбери. 21. Кыр тылобурдо. 22. Россиысь краевой центр (шоркар). 23. Ӵыжы-выжы. 25. Европаысь государстволэн шоркарез. 27. Лэсьтӥськонэ мынӥсь сюй. 28. Буяськон. 30. Музъем ужан тӥрлык. 32. Вуын улӥсь пӧйшур. 33. Сяська. 34. Емышо будос. 36. Пудо-животлэн мугор люкетэз. Вылӥысен улӥе: 1. Ӵыжаса шудон. 3. Ву нуллон арбери. 4. Украинаысь город. 5. Муш серер (серел). 6. Йырын нуллон. 7. Чорыг. 8. Пӧйшуран тӥрлык. 11. Электротехника. 12. Адямилэн утисез. 14. Писпуо шулдыр инты. 16. Огазеяськем. 18. Ляльчи. 19. Сюлэмез ужатӥсь. 20. Чорыг. 24. Ужан тӥрлык. 26. Ӵыжы-выжы. 28. Юртъер люкет. 29. Улон инты. 30. Валэн ветлон арбери. 31. Музъем узырлык. 35. Писпу. Шонер валэктон Паллянысен буре. 2. Луп. 9. Нальчик. 10. Пеликан.12. Ана. 13. Вал. 15. Тэй. 17. Аул. 19. Вес. 21. Ыгы. 22. Владивосток. 23. Ака. 25. Рим. 27. Луо. 28. Лак. 30. Усы. 32. Мый. 33. Сяська. 34. Яблокпу. 36. Быж. Вылӥысен улӥе: 1. Туп. 3. Карнан. 4. Львов. 5. Питул. 6. Берет. 7. Чипей. 8. Капкан. 11. Телевизор. 12. Ангел. 14. Арама. 16. Эштос. 18. Лакей. 19. Вир. 20. Сом. 24. Портон. 26. Эмеспи. 28. Лапас. 29. Корка. 30. Уробо. 31. Ыргон. 35. Кыз. Дасяз А. АБРАМОВА. Шӧкыч Эх, улон-вылон... КЫӴЕ УЛӤСЬКОД, МИСКИНЬ СТУДЕНТ? Котьма шу но, студент ваньзэ чидано луэ. Сыӵе ини солэн сямыз - нокыӵе шуг- секытъёс шоры учкытэк, йӧн-йӧн йырйыны тырше тодон-валан изэз. Вераны кулэ, студентъёс тужгес но куанер калык. Бен, ваньзы сярысь ик озьы шуыны уз луы. Но тросэз котькуд копейказэс лыдъяно луо. Тае лыдэ басьтыса ик вылӥ дышетскон заведениосын дышетскись нылъёс но пиос шоры адямиос гажаса учко. Куд-огез паймемзэ кыре но поттэ: кызьы, пе, соос туала вакытэ дышетскыны чидало на. Нош куд-огез куанер студентэз качаны но уг кӧберало вылэм. Тани 1997-тӥ арын Ижевск городлэн кивалтэтэзлэн дунъёсъя, вузкаронъя но калыклы пӧртэм услугаос возьматонъя отделэз 14 огъя улонниосты эскериз. Отын улӥсьёс бадӟымесь дунъёс вылэ ӝожтӥськылӥзы. Ӝожтӥськонъёс юнме вылӥллямтэ. Эскеронъёс возьматӥзы: та огъя улонниосын улӥсьёс ваньзэ 285 миллион манет (!) мултэссэ тыриллям. Валамон ини, вуж коньдон лыдпусъёсын вераськон мынэ. Тодады вайытом, общежитиын улэм понна студент стипендилэсь вить процентэзлэсь трос тырыны кулэ ӧвӧл. Кылсярысь, УдГУ-ын дышетскисьёс 96 сюрс манет басьто. Озьыен, соос огъя улонни понна 4 сюрс 800 манет тырыны кулэ. Жаляса верано, та лыдпус сярысь татын нокин тодаз но уг вайы. Студентъёс 1996-тӥ арысен ни одӥг толэзь понна 14 сюрс 600 манет тыро. Эх, шу!.. Мискинь студент... Шӧкычен ӵош лулӟылӥз Ф. МИННИГАРАЕВ. Шӧкыч Мадиськонъёс Синъёсыз но быжыз ыжлэн кадь ик, нош ыж ӧвӧл. Кин со? Така. Пичи, куӵо, пуштрес быжо, скал кадь бӧксэ, нош скал ӧвӧл. Кин со? Кунян. Иванлэн агайёсыз но, вынъёсыз но ӧвӧл. Нош ачиз со агрономлэн агаез. Кин луэ Иванлы агроном? Сузэрез. Отгадки перевернуть. Удмурт клублы - 75 ар Утёме выжыосмес! Писпу выжытэк уг буды шуо. Туннэ, "Удмурт кенеш" туж тодмо луэм бере, асьмеос ӵем ик тодамы ум ваиське ни кылдэмзэ. Нош со инмысь ӧз усьы ук. Ӵапак 10 ар талэсь азьвыл, улонамы демократилэн нырысетӥ тӧлыз пельтыку, Ижысь удмурт инженеръёс Николай Симанов но Василий Осипов ветлыны кутскизы пӧртэм организациостӥ но огъя улонниостӥ (общежитиостӥ). Лушкемен сямен сипыртӥзы: - Ми кылдытыны турттӥськом удмуртъёсты утёнъя общество. Сыӵе дэмланзэс тросэз ик кылэм-адӟем ӧз карылэ. Малы? Николай Симанов ваньмызлы ӧз вералля кытын ужамзэ (ворсам "Прогресс" институтын). Ӧз валаллялэ, кинлэсь утёно удмуртъёсты (асьмелэн интернационализм ук). Нош мар шуоз "княгиня" Марья Алексеевна (мукет сямен - измем компартия)? Вылаз ик, Симанов - Цицерон ӧвӧл: Иж вӧзын будыса но ӟуч кышноен улыса, удмурт сямен "самосознанимес поднятьтыны выре". Котьма ке но, компартия (шонергес вераса - отысь кузёос) улӟись пушъетэз ӝокатыны ӧз быгаты ни. Улонлы ваче пумит мыныны дӥсьтытэк, со лэзёно луиз Удмурт клублы ужаны, 1989 арын - удмуртъёслэсь ӧтчамзэс люканы. Татын кылдӥз Удмурт культурая дэменлык. Берлогес сое тазьы нимазы: Удмурт культурая "Дэмен" огазеяськон. Дас ар ваиз уно воштӥськонъёс. Коммунизм куашказ. Удмурт клуб интыын кылдӥз "Удмурт кенеш" огазеяськон. Таиныз кивалто туж тодмо удмуртъёс. Клубын дун басьтытэк ужамъёс кин кытчы кариськизы. Огез - бизнесэ, мукетыз - ёрмон дуннее, куинетӥез - выль огазеяськонэ. *** Озьы Удмурт клублэн выжыез вылын ӝужаз паськыт пушъет. Туннэ шонер луоз-а, клублы дас ар тырме шуыса? Удмурт клуб но буш интыыын ӧз вордскы ук. Нырысетӥез сыӵе ёз кылдӥз 75 ар талэсь азьвыл - 1923 арын 10 феврале. Туала тодосчи (учёной) Людмила Шкляева вылэ чӧлскыса, "Удмурт дунне" со сярысь гожъяз 1994 арын октябре. Выльысь тодады вайытом отысь куд-ог учыръёсты. Клуб - со капчи кыл кадь - шутэтскон инты. Нош Удмурт клуб ас вылаз басьтӥз туж бадӟымесь сюлмаськонъёс. Отын вал юридической юрттэт сётон сэрег но педагогикая сэрег, библиотека. Адямиослы валэктӥзы пӧртэм ужпумъёсты. Мар со выт? Мае нимало валюта? Дас ар талэсь азьло, 1988 арын, Удмурт клубе огазеяськемъёс гожъяськон бумага гинэ но басьязы асьсэ коньдонэн. Мар чотын улӥз соиз, нырысетӥ клуб? Солэн крестьян юрт шуонэз вал. Оскоды оло уд, та юрт ассэ ачиз сюдылӥз. Кӧня ке коньдон висъялляз Удмурт клублы но. Таизлы юрттӥзы нянь пыжонни (пекарня), сиськонни (столовой) но буфет. Туннэ сярысь югдур соку умойгес вылэм уж ласянь. Киыд вань - тыршы. Ваньмон дыръязы клубе вуылӥзы андан пӧзьтӥсьёс, техникумъёсын но рабфакъёсын дышетскисьёс, газетчиос но Советъёсын ужасьёс. Соос ортчытъязы удмурт литературалы но кырӟанъёслы сӥзем ӝытъёс. Отын ик кылдӥз шуыны луоз Удмурт драмтеатр. Берлогес клубын усьтӥськиз театрльно-художественной техникум. Вить ар ӵоже отын дышетскизы актёре. Туннэ асьмеос усьтыны ум багатӥське консерватория, культурая яке искусствоосъя институт. Ӝожтӥськиськом, удмурт режиссеръёсмы ӧвӧл шуыса. Кызетӥ аръёсы Удмурт шаер таӵе таӵе ужъёсты ачиз ворме вылэм. Клуб вӧзын кылдӥзы КОР (Октябрь революцилэн клубез) но филармония выллем огазеяськон. Усьтыны чаклазы Удмурт культурая юрт но радиостанция. Соин валче Удмурт клубез ворсазы. *** Ижысь Удмурт клубен огвакытэ ик ужаз Москваын 1922 арын кылдэм "Бӧляк" огазеяськон. Отын ветлӥзы Востокысь ужаса улӥсьёслэн коммунистической университетазы, педагогической но мукет иниститутъёсын дышетскись удмуртъёс. "Бӧляклэсь" уставзэ 75 ар талэсь азьло, 1923 арын 4 январе юнматӥз Калыкез дышетонъя комиссариат, 21 мае - Югдурез утёнъя комиссариат. Тужгес абдратэ тани ма. Удмуртъёслэсь огазеяськонзэс вордӥзы коми профессор В. Налимов, ӟуч тодосчи Я. Прохоров но удмурт К. Герд. Соос сяна, татын лекциос лыдӟылӥзы тодмо кивалтӥсь И. Наговицын но студент С. Ельцов (таиз берлогес партилэн Удмурт обкомезлэн секретарез луоз но Гердэз шымыртонэ пыриськоз). 1924 арын 4 декабре "Бӧляклэн" ёзэз кылдӥз Казаньын. Соин кивалтӥзы И. Михеев, Ашальчи Оки, Е. Павлова. Отӥяз сыӵеесь ик люкетъёс юнмазы Ленинградын, Пермьын, Вяткаын, Можгалан, Дэбесын но уно музон интыосын. 1929 арын чылкыт инбамын адскизы нырысетӥ пилемъёс. Соку чепылляны ӧдъязы Куӟебай Гердэз. Югдурез утёнъя калык комиссариат "Бӧлякез" пыртӥз тушмонъёслы дурбасьтӥсь ёзъёс пӧлы. 1934 арын, С. М. Кировез вием бере, югдур уката лэчытомиз. Собере вуиз 1937 ар. *** Тӥни сыӵеесь соос, "Удмурт кенешлэн" куд-ог выжыосыз. Удмурт калыклэн тужгес визьмо пиосыз но нылъёсыз кужымзэс сётӥзы солэсь туала юртсэ ӝутонэ. Кӧняез ке - быдэс улонзэс. Огазеяськонмес туннэ кин ке вожвылъяськонъёсы кыскыны выре ке, со асьмелы гинэ изъян уг вайы. Сыӵе мурт пож ву кисьта Т. Борисовлэн, И. Наговицынлэн, К. Гердлэн но мукетъёсызлэн нимъёссы вылэ. Утёме выжыосмес! Утёме вуоно вакытмес! Озьы дышетэ асьмеды 75 ар тылэсь азьло усьтэм Удмурт клуб. Алексей Шкляев. Шӧкыч ШӦКЫЧЛЭН ТЕЛЕТАЙП ЛЕНТАЫСЬТЫЗ Коньдонзэс шыръян понна, Африкаысь Чучмег городын улӥсьёс вордскем нуналзэс азьланяз 29 феврале пусйылыны вераськизы. Таӵе нунал луэ ньыль арскын одӥг пол, нош вордскем нуналэз пусйыку, нокин но мукетыз доры куное уз мыны. х х х Кылем арняе Россиысь тодосчиос выль закон усьтӥзы. Социализмысь капитализме выжыку, пе, эшшо одӥг этап луыны кулэ - алкоголизм. Чуръёс, чуръёс... ПИЛИСЬКЕМ ТУСЬ ДУРЫН Али телевизортэм семьяез шер пумиталод ни, дыр. Кинлы мар кельше, сое ик учке. Жаляса верано луэ, чагыр экранын тросгес луо асьме улонлы кельшисьтэм передачаос, американской боевикъёс но мар. Кунгож сьӧрысь ваем фильмъёс, мон сямен, номыр ӟечезлы уг дышето, будӥсь нылпиосмес сӧро гинэ. Ярам, асьме дорын азьвыл поттэм фильмъёсты "Культура" каналъя возьматыны ӧдъязы ини. Но со туж ӧжыт. Ведь шонерзэ верано ке, асьме режиссёръёс, артистъёс али но выль фильмъёс кылдытъяло. Но соос учкисьёс доры туж ӧжытэз вуо, тросэз ӝажыос вылын кыллё. Малы? Берлогес уката тросгес коньдонэн возьматыны медо, дыр. В. И. Ленин вераз вал, искусство адямилы сётэмын шуыса. Нош али искусство узыръёс кие сюриз кадь. Тани басьтом Удмурт кун театрмес ик. Кӧня аръёс вераськонъёс мыно ини солы выль юрт пуктон сярысь. Нош уж интыысьтыз уг вырӟы. Нош театрен артэ сылӥсь азьвыл "Колосс" кинотеатрез выльысь Александровской собор кадь ик чебер ӝутӥзы. Али Михайловской соборез выльысь лэсьтон сярысь поттыло. Трос адямиосын вераськи но, соос мон сямен ик шуо, тазьы лэсьтыны уг яра шуыса. Малы ке шуоно, азьвыл быдтэм черкъёсты выльдыса гинэ асьмеос культурамес ум ӝутэ ук. Культураез умоятыны быгатом, усто театр лэсьтыса, библиотекаосмес выльдыса, мукет культура учреждениос усьтыса. Куд-ог узыр ужбергатӥсьёс, оло, та пумысен малпаськозы. Асьсэлы улыны дворецъёс, шукырес коттеджъёс ӝутэм интые, калыклы ярамон, историе кыльымон кыӵе ке но юрт пуктыны басьтӥськысалзы ке, пайдаез трослы шӧдӥськымон луысал. Таӵе начар улон вакытэ город котырысь губи сямен будӥсь дворецъёс нокинэ уг шумпотто. Калык чотын капчиен узырмемъёслы вожзы гинэ потэ. "Поле чудес" передачаын кадь улон суред ужась муртэ юн вӧсь каре. Пенсиос тыронъя берлоез реформа но пилиськем тусь дуре кадь кельтӥз. Кема витем ужрад тросэзлэсь мӧйыослэсь умоезлы осконзэс чутрак ӵогыса куштӥз. Озьы ӵуказе нуналлы оскон пумен бус сямен тӧлӟе. В. ЧЕРНОВ. Берекет Тӥ юады вал ӜӦК ВЫЛЫН ТӦДЬЫ ВИШТЫ. КЫЗЬЫ СОЕ БЫДТОНО? Гажано редакция! Трос юанъёслы валэктон сётӥськоды. Со туж умой. Оло, мыным но юрттэмды луоз. Ӝӧк вылэ пӧсь арбери пуктыны шедьтӥмы. Полировать карем сайкыт- курень ӝӧклэн шораз ик тӧдьы витшты пуксиз. Луоз на-а сое выльдыны, азьло туссэ берыктыны? Г. ПАВЛОВА. Завьялово район. Полировать карем мебель вылэ пӧсь арберилэсь кылдэм тӧдьы виштыез выльдыны пӧртэм амалъёс вань. Оскалтэ, со виштыез кӧня ке пол спиртэн коттэм ӟустариен калленэн гинэ зыраса. Зырамъя вишты бырыны кулэ. Кӧсамез бере, вылтӥз небыт ыж гон ӟустариен маялляно (полировать кароно). Спиртэ кӧня ке гинэ олифа ватсаса, вишты ӟечгес быре. Кӧсамез бере, вылтӥз одно ик спиртэн коттэм ӟустариен маялляно на. Мукетыз амал. Виштыез калленэн гинэ парафинлэн но сюсьлэн суретэныз (кыксэ но одӥг мында басьтоно) зырано, вылаз кык-куинь полэс пыӵатӥсь бумага (салфетка) вӧлдоно но пӧсятэм утюген волятоно. Вишты ӧвӧл на ке бырем, нош ик суретэн зырано но тазьы ик утюген волятоно на. Куинетӥез но амал вань. Виштыез карандаш бервылэз ӵушылыны нылпиослы шуыса лэсьтэм нимысьтыз резинкаен (ластикен) зырано, собере со интыез спиртэн коттэм ӟустариен маялляно на. Л. ВАСИЛЬЕВА. Шӧкыч Подпись Йыртэмасьёс туала вакытэ ӧжыт ӧвӧл. Соин но, дыр, пӧртэм организациос асьсэлы автоматъёсын возьмаськисьёсты кутоно луо. Иське, пе, вань ваньбурез тус-тас карозы. Нош лушкаськисьёсты туала вакытэ, автоматэн сяна, номырин но уд кышкаты ни, шӧдске. Суредэз В. ШИЛОВЛЭН. Берекет Тодады возе Сугон яке чеснок сииды. Ымысьтыды зын потэ. Мар кароно? Одӥг-кык пуньы йӧлвыл яке кӧня ке пушмульы (грецкой, кедровой) сие, яке одӥг чашка кофе юэ. Киосысь чорыг, сугон, чеснок зын быроз, киосты нырысь-валысь нюромытэм сылалэн зырады но собере майталаса вуэн миськиды ке. Бакча сиёнъёсты сузяку, киосы пеймыт виштыос кылё. Озьы медаз луы шуыса, киостэс уксусэн коттэ но ӵушылытэк ик кӧсатэ. Сузямды бере киостэс огшоры вуэн но каньылэн кошкытоды. Посудаысь чорыг яке сугон зынэз быдтон понна, сое гылтоно уксус ватсам вуэн. Ойдо, эше, кырӟалом Тодмады-а та кык чеберайёсты? Тодмам гинэ ӧвӧл, соослэн ненег куараоссы кырӟанъёсын ӵош тросэзлэн сюлэмъёсазы пыӵазы ни, луоз. Татьяна Ишматова но Марина Галичанина школаын дышетско ай, но сцена вылын соослэн вамышъёссы йыгмытэсь ни. Та нылъёс одӥг пол гинэ ӧз пыриськылэ кырӟанлы сӥзем пӧртэм конкурсъёсы. Кылем арын тани шаерысьтымы удмурт егитъёс пӧлын ортчиз "Ӝужась кизилиос - 97" конкурс. Отын но нылъёс усто быгатонлыкъёссэс возьматӥзы. Туспуктэмъёсыз Г. Юсаевлэн. Шӧкыч ТАУ ТЫНЫД, ДЕНОМИНАЦИЯ! Тросэз кышкало вал: коньдонысь нольёсты куштон, пе, дунъёсты вылӥе ӝутоз. Верамзы ӧз зэма. Озьы ке но, дунъёс пичияк будӥзы. Ижевскын, кылсярысь, 0,75 процентлы. Тужгес но йылӥз сахар песоклы дун - 7,3 процентлы, чайлы - 3,7 процентлы, чорыглы но сырлы - 2,6 процентлы но сугонлы - 4,4 процентлы. Тау тыныд, деноминация! Берекет ТУЛЫСПАЛ Февраль - толлэн берло толэзез. Куазь шуныт пала кыстӥське ини. Соин ик нимзэ но удмуртъёс тулыспал шуиллям. Вашкала славян календарья февраль лютень шуыса нимаське. Украинаысь калык понна али но со лютий, нош белорусъёс но полякъёс понна - лютый. Аслэсьтыз быронзэ шӧдыса кадь лек кужымзэ сильтӧлъёс, буранъёс, лымы пельсконъёс пыр возьматэ угось тол куазь та вакытэ. Шуо: февраль - сильтӧлъёсын узыр, март - ву шапыкъёсын. Тулыспал вуэмен валче, номыр но кадь ӧз воштӥськы. Сыӵе ик лымы, кезьыт но тӧло нуналъёс. Нош чаклась мурт шӧдэ, югыт нунал трослы кузь луиз ини шуыса. Толэзь бырон азьын со будоз кык часлэсь унолы. Инбам сайкыт, чагырпыръем. Лымы но азьло кадь ӧвӧл ни. Кытчы шунды тросгес йӧтэ, отын со ӧжытак шунаны кутске. Куд-ог писпу вайёсын ошиськылэмын дуно пиялалы кельшись векчиесь йӧ ӟузыриос. Омыр но кыӵе ке выльмемын кадь, шоканы капчи. Тулыслэн зыныз шӧдӥське ини, шуо соку калыкын. Нюлэскын феврале шыпыт. Та вакытэ койык сюръёсыз шедьтыны луэ. Мӧйыосызлэн соос январе ик усьыны кутскизы, нош пинал койыкъёс сюръёссэс тулыспал ышто. Ӝоген выль сюръёс будыны кутскозы. Одӥг вайлы соос ватсаськозы. Тросэзлэн кыр пӧйшуръёслэн сюан вакытсы - бызьылон дырзы - феврале кутске. Асьсэлэсь парзэс утчало ӟичыос, ӵӧжмеръёс (горностай). Луд кечлы но огдырлы эш кулэ луэ. Сайканы кутско нарды (барсук) но енотлы тупась пуны. Шунды юнгес пиштон дыръя соос каръёсысьтызы йырзэс мычо но гань-гань шунтӥсько. Нош нюлэс кузё - гондыр - али кӧлэ на. Озьы ке но, уммез мур ӧвӧл ни. Кырыжкук тол ӵоже пыдзэ сюпсьыса улӥз, трослы восьмиз. Таӵе вакытэ гондыр гуэ шедем муртлы кышкыт учыре но шедьыны кема ӧвӧл, изёнзэ куспетӥ карем гондыр туж лек луэ соку. Вашкала дырысен калык котькыӵе вакытэз, дырез, нуналэз чакласа улэ. Тросэз соос тулыспалэн но герӟаськемын. Феврале кезьыт но кӧс ке, пе, улэ, августэ пӧсь улэ. Писпуос феврале ӵем ке гӧртыса улӥзы, мушъёс трос чечы люкалозы. Феврале куазь юн ке кезьытскиз, тулыс вазь вуоз. Шуныт февраль кезьыт тулысэз вае. Макем кезьыт луоз толэзь пумын феврале, сокем шуныт луоз мартэ. А. СУТУЛОВ. Журналистъёсын пумиськонъёс Тырмымтэос шараясько - пайдаез ӧжыт Журналистъёсын пумиськылӥзы Удмурт Республикаысь Кун Кенешлэн Эскерон палатаяз ужась депутатъёс М. Шишкин, Н. Чувашов но Е. Мальцева. Нуналлы быдэ тырмымтэосты шараян бордын ужаськом, шуиз Эскерон палаталэн кивалтӥсез Михаил Шишкин. Со сярысь ивортӥськом Правительствое, Прокуратурае. Но янгышам адямиосты кулэезъя кыл кутытыны уг луы. Республикалэн мырдэм-коньдонэз кытчы кулэ ӧвӧл отчы кошке. Со понна нырысь ик янгыш луо элькун ёзъёс - таӵе малпанэ ми вуимы, данак ведомствоослэсь ужамзэс эскереммы бере. Михаил Иванович верамъя, таяз арын Эскерон палата матысьгес кусыпъёс тупатыны малпа иворъёсты вӧлмытӥсь ёзъёсын. Шараям тырмымтэос сярысь калыклы ивортылыса, оло, ужаммылэн пайдаез ӝоггес шӧдӥськоз, шуиз со. Кылем арын Эскерон палата пыр-поч сэрттэм-пертчем бюджетлэсь быдэсъяськемзэ. Со 86 процентлы гинэ быдэстэмын. Вань лыдпусъёс возьмато: ваньбур поттон уг буды. Экономикаын югдур туэ но уз тупатскы, шуиз Николай Чувашов. Бюджетын коньдон ноку уз тырмы, быдэс хозяйствомы куашкамын ни ке. Та веранэз депутат Евгения Мальцева "Редуктор" АО-лэн ужамез вылын возьматӥз, ачиз со отын 20 ар тыршем. - Му вӧй оборудование поттон, 1996 арен ӵошатыса, 4 поллы кулэсмиз, нош предприятилэн рентабельностез - 3 поллы синӥз. Кылем ар понна уждун пичильтык тыремын, но октябрь толэзёзь гинэ. Ужасьёслэн лыдзы эшшо 300 адямилы кулэстэмын. Завод пумен коммерческой фирмалы пӧрме. Таӵе сюрестӥ заводэз нуыны турттэ солэн выль управляющиез. Секыт югдур али кылдэмын подшипникъёсты поттӥсь заводын но. Но та выллем предприятиосты эскерыны туж секыт, шуиз Евгения Мальцева, малы ке шуоно, кин ми доры ӝожтӥськонэн вазиське, сое соку ик ужысьтыз улляло. Озьы вал "Редуктор" АО-ын, ужысьтыз мозмытӥзы плановой отделлэсь кивалтӥсьсэ: со, пе, кыӵе ке "секретэз" шараяз. Та АО-лэсь ужъёссэ эскерыны быгатӥм, кӧня ке ужасьёссылэн ми доры вазиськемзы бере гинэ. Кылем арын палата озьы ик эскериз шаерамы кутэм законъёслэсь ужамзэс. "Куке пыр-поч тодматскиськод законъёслэн пуштросэнызы, чабкиськиськод гинэ, - шуиз Николай Чувашов. - Куд- огез воксё валантэмесь луо, кылсярысь, кун асваньбурен кивалтонъя закон. Соин ик депутатъёслы ӧжытгес, дыр, люкаськылоно сессиосы но мургес ужано комиссиосын, котькуд законэз котыр ласянь учконо". Т. Банникова. Коньдон дуннеын "Евразия" банк кужмоез но оскымонэз луыны турттэ Банкъёс кылдо но "ӝуало", узырмо но начармо. Сыӵе угось коньдон бергатон удыслэн гожтымтэ законъёсыз. Тани "Евразия" банк но кык ар талэсь азьло туж секыт югдуре шедиз. Тросэз коньдон ужпумъёсъя специалистъёс витё ини вал солэсь ӝоген быронзэ. Но банк шуг-секытъёсты вормиз, паймымон ӝог пыд йылаз султӥз но кужым люканы ӧдъяз. Кӧня ке гинэ лыдпусъёс: кык ар талэсь азьло банклэн пунэмен тыриськонъёсыз 150 миллиард манет ке вал, туэлы кылемын 6 миллиард (вуж уксёен), со но арнялы быдэ сямен кулэсме. 30 процентлы будӥз клиентъёсызлэн понэм коньдонзы, 88 процентлы йылӥзы нимаз адямиослэн вкладъёссы. Тужгес но пусйымонэз - банклэн уставной фондэз 80 миллион манетозь (выль уксёен) вуиз яке кык пол будӥз. Кин матысь тодмо ӧвӧл коньдон бергатон ужпумъёсын, солы та лыдпус ӧжыт мар вералоз. Нош специалистъёс валаны кулэ: "Евразия" луэмын республикаысьтымы кредит сётъясь учреждениос пӧлысь тужгес но кужмоез. Вераны кулэ, кредитъёс сётъян - со котькыӵе банклэн нырысетӥ ужпумез, солэн тусыз, солэн "нянез". Соин ик "Евразилэн" клиентъёсызлэн лыдзы чутрак будӥз. 36 сюрслэсь ятыр луиз. Озьыен, банклы оско. Нош та выллем учреждениос понна - со нырысетӥ интыын. Нимысьтыз вераны кулэ вексельёсын ужан сярысь. Азьвыл соосты вуза вал Коньдон ужпумъёсъя министерство. Нош Россилэн Президентэзлэн указэныз та ужен вырыны кун учреждениослы лэземын ӧвӧл. Асьме республикаын та удысэз ас вылаз басьтӥз "Евразия". Нырысь ик вакчияк валэктом, мар со сыӵе вексель. Шуом, колхоз аслаз ужасьёсызлы 100 миллион манет тыр уждун тырыны кулэ. Но солэсь азьвыл уждун понна налог тыроно. Таизлы ужрадлы хозяйстволэн коньдонэз уг тырмы ни. Кредит ке басьтоно - укыр дуно усе. Сыӵе дыръя колхоз, шуом, 10 миллион сылӥсь векселез 7 миллионэн банкысь басьтэ но 10 миллионэн ик налоговой органэ сётэ. Озьы со выт тыронзэ быдэстэ. Тӥни мар со сыӵе вексель. Юан кылдэ: нош кытысь бен потэ но кытчы луэ 3 миллионэз? Векселез берен коньдонлы пӧрмытыны нимысьтыз дыр тупатӥське. Со куспын банк колхозлэсь 7 миллионзэ бергатыса, 3 миллион яке, быгатэ ке, солэсь но трос пайда поттэ. Огъя вераса, ваньмызлы пайда - колхозлы но, банклы но, бюджетлы но. Веранэз ӧвӧл, огшоры адямилы ваньмыз та валантэмгес но, дыр. Но сыӵе ини "кескич" угось коньдон бергатон удыс, котькудӥзлы уг но сётскы. Малы ке шат, кызьы верам вал ини, куд-огез фирмаос но банкъёс "ӝуаны" шедё. Син медам усьы, но "Евразилы" таӵе адӟон уг кадь "пишты". Вылаз ик, банкысь специалистъёс ялан выль амалъёсты ужазы пыӵато. Тани кылем сӥзьылысен тунсыко вкладъёс кутыны кутскизы. Ӟуч сямен со шуиське "свободно конвертируемый вклад" (СКВ). Адями банке коньдонзэ асьме манетэн понэ, нош ньыль толэзь ортчыса, (мылкыд каремезъя бергес но) долларен басьтэ. Валамон. Та дыр куспын вкладэз тупатэм процентъёслы будэ. Яке басьтом нимысьтыз страховой вкладъёсты. Таяз учыре адями коньдонзэ но банкын йылэтэ, со дыре ик шудтэм учырлэсь но утемын луэ. Вань на коммунальной вкладъёс но. Банк сыӵе вкладысь кузёезлэн косэмезъя коммунальной тыронъёсты тыре, со дыре ик процентъёс но ватса. Каньыл, пайдаё! Веранэз ӧвӧл. Эшшо но бадӟым кузьым "Евразия" лэсьтыны ӧдъя "Ижладабанклэн" вкладчикъёсызлы. Кызьы тодмо, таиз банк векаса улэ ини, калыклы коньдонзэ берыктыны уг быгаты. "Евразия" солэсь кӧнязэ ке филиалъёссэ аслыз басьтӥз, ужасьёссэс но интыязы кельтӥз. Но тужгес но ӟечез - "Ижладабанклэсь" калыклы тыриськонзэ ас вылаз басьтӥз. Валамон, нокыӵе банк но кинэ ке синмаськытон понна сыӵе ужъёсын уз выры. Котьма шу но, нырысетӥ ужпум - тросгес коньдон люкан, сое бергатыса, нош ик коньдон поттон. Озьы ке ӧз луы, кыӵе со банк? Тани "Евразилэн" кивалтӥсьёсыз та виын малпасько республикаысь экономикае тросгес инвестициос кыскон пумысен. Соос али туж ӧжыт вуо. Инвесторъёс угось кышкало коньдонзэс асьме экономикае пыӵатыны. Одӥгез мугез - ӧвӧл кужмо но оскымон банк. "Евразилэн" ӵапак та интыез басьтэмез потэ. Шуг окыны, банк таяз учыре асьме экономикаез ӝутон сярысь гинэ сюлмаське шуыса. Инвестициос угось со пыр лыктозы, банклы процентъёс вайыса. Но мукет ласянь учконо ке, экономикалы но инвестициос омыр кадь кулэ ук. Нош соосты оскымон но кужмо банктэк нокин уз сёты. Мар бен, мед луоз со "Евразия" банк. Г. ТИХОНОВ. Гуртын улӥсьёсын кенешон 11 феврале Завьялово черкогуртын сиён-юон поттӥсь предприятиослэн кивалтӥсьёссы, Правительствоысь муртъёс но Кун Кенешысь депутатъёс совещание ортчытозы. Нош 5 феврале Правительстволэн Тӧроез Павел Вершинин но Кун Кенешлэн Тӧроезлэн воштӥсез Владимир Агашин Завьял ёросысь хозяйствоослэн кивалтӥсьёсынызы пумиськизы. Павел Вершинин верамъя, та пумиськон вуоно кенеш азьын репетиция выллем луиз. Правительстволэн Тӧроез ивортӥз гурт хозяйствоын ортчытоно ужрадъёс сярысь, юанъёслы валэктонъёс сётӥз. Гуртъёсын улӥсьёсты тужгес но сюлмаськыто кунлы келям ю тысь понна коньдон тыронэн, машинно-технологической станциосты кылдытонэн, тулыс ужъёсты ортчытонэн герӟаськем ужпумъёс. Юанъёслы валэктонъёс озьы ик сётӥзы Владимир Агашин, гурт хозяйствоя но сиён-юонъя министр Владимир Жуйков и Завьял ёросысь адяминистрацилэн кивалтӥсез Галина Баталова. Правительстволэн пресс-центрез. Ӟольгыри Пырк! Пырк! Лусьтро ӟольгыри али гинэ вай вылын вал. Табере - пыд улын. Утчаське-кокчаське, котырак чаклаське. Пырк! Тани нош со писпуын ини. Ваньмызлы тодмо но матын луись тылобурдо син азе пуксе, сцена вылысь артистэз Лия Ахеджаковаез адӟыса. Лапег мугорьем, аспӧртэмлыко ымныро, чангес куараё кышномурт учкисе амалтэк бордаз кыске. Театрын пукемдэ вунэтӥськод но вань малпанъёсын сцена вылын возьматӥськись улонэ выиськод, отын шудӥсь адямиос понна шугъяськыны кутскиськод. Мон, кылсярысь, ӧй но шӧдылы, кызьы час но ӝыны ортчиз. Искусствоез яратӥсьёслы Лия Ахеджакова шуд кузьмаз Ижевске лыктыса. Кык ӝыт ӵоже Короленко нимо театрын буш интыос ӧй вал. Асьме доры тодмо актриса вуылӥз "Капик" агенстволэн ӧтемезъя. Мукет дано артистэн Михаил Жигаловен ӵош (таиз но ужа "Современник" театрын) со возьматӥз Николай Корядалэн "Персидская сирень" пьесаезъя спектакль. Солэсь пуштроссэ вераса, пайдаез уз луы. Спектаклез адӟоно. Соку гинэ валалод, макем ӟеч быгатэ Ахеджакова ас ужзэ лэсьтыны. Тау, "Капик"! Татын вуоноез пумиськон луоз мартэ. Куное лыктозы Санкт-Петербургысь артистъёс Михаил Светин но Игорь Дмитриев. И. Лебедев. Лия Ахеджакова. Суредаз Леонид Прозоров. Вордскем нуналэныз ӟечкыласьком мусо мамамес, Кириллова Галина Викторовнаез. Сӥзиськом тыныд яратоно мамамы - улон со кузьда, кӧня улӥд ини, шуд со быдӟа, кинлэн ноку но сыӵеез ӧй вал на. Ми тонэ яратӥськом туж зол. Бадӟымесь азинсконъёс ужад, йыр йылад котьку но мед луоз яркыт шунды но чылкыт инбам. Тынад нылпиосыд. Кун Кенешлэн сессиез Министр юнматэмын, министерство кылдытымтэ Асьме Правительстволэн Тӧроез Павел Вершинин Удмуртия Республикаысь югдурез утёнъя министре ӵектӥз милициысь генерал-майорез Владимир Щербаковез. Талэсь азьло со ужаз Россиысь МВД-лэн валтӥсь управлениезлэн тӧроезлэн воштӥсез луыса. Вордскемын 1955 арын 1 январе Омск областьысь Улӥ омск районысь Борисовка гуртын. Отын 1996 арозь ужамын. Правоосты утись органъёсын 1972 арысен тырше, юридической наукаосъя кандидат. Быдтэмын СССР-ысь МВД-лэсь Горькийысь вылӥ школазэ но Россия Федерациысь МВД-лэсь академизэ. Сое министре пуктон понна 55 депутат куаразэ сётӥз, 24-ез пумит вал, 2-ез куара сётонэ ӧз пыриське, нош 3-ез бюллетень умойтэмен лыдъямын. Тӥни озьы Владимир Щербаков Удмурт Республикаысь югдурез утёнъя министре быръемын. Собере сессия учкиз Удмурт Республикаысь кун национальной политикая концепцилэн инъетаз (кыкетӥзэ лыдӟонэз) ватсанъёс пыртон сярысь ужпумез. Парламент инъетэз юнматӥз но та ужпумъя постановление кутӥз. Шаерысьтымы промышленностез шуг-секытысь поттонъя ужрадъёсты улонэ пыӵатонъя постановление умоен лыдъямын. Но Кун Кенеш Правительствоез куриз та ужпумез, "Ижмаш" АО-ез но гурт хозяйствоез азинтонъя ужрадъёсты туэ апреле сессиын выльысь учкон вылысь дасяны. Правительствоын инвестициосъя министр кылдытонъя ӵектон ӧз ортчы. Со понна 44 депутат гинэ куаразэ сётӥз. Трос юанъёс но ӟырдыт вераськон вал ож тӥрлык поттон удысын ужасьёслэн профсоюззылэсь куронъёссэ быдэсъянэн герӟаськем ужпумъя. Кун Кенешлэн постановленияз дэмламын вал нылпиос понна пособие сётонэз радъяны, семьялэсь доходзэ лыдэ басьтыса выльдоно шуыса. Но депутатъёс сое умоен ӧз лыдъялэ. Та ужпумъя постановлние кутэмын. Удмурт Республикаысь Правительстволы косэмын туэ 1 декабрёзь уждунъя тыронъёсты пытсаны, соя профсоюзной организациосын ӵош 1 мартозь графикъёс лэсьтыны. Мукетыз курон сӥземын нылпиос понна пособиос, улон коркаосты но соцкультбытэз интыослы сётонъя бюджетын коньдон висъянлы. Та ужез син азяз возёзы Кун Кенешысь Экономикаын политикая но бюджетъя комиссия но Правительство. Нош Эскерон палаталы тӧроезлы Михаил Шишкинлы косэмын улон юртъёсты но соцкультбытэз интыослы сётонъя федеральной бюджетысь висъям уксёез кызьы кутэмез эскерыны. Правительство та постановленилэн кызьы быдэсъяськемез сярысь ивортоз Кун Кенешлэн туэ июне ортчоно сессияз. Кун Кенешлэн 16-тӥ сессиез учкыны кулэ на "Удмурт Республикалэн Конституцияз воштонъёс но ватсанъёс пыртон сярысь "Удмурт Республикалэн Законэзлы проект сярысь ужпумез. Соя сессиын вераськиз Законъёсты быдэсъямез чакламъя, калыкез кышкытлыклэсь утёнъя но гражданъёслэн правооссыя комиссилэн тӧроез Александр Борзенков. Кема кенешем бере парламент та ужпумез кельтӥз 17 феврале эскерыны. Сессиын вераськиз Кун Кенешлэн Тӧроез Александр Волков. Алигес Бельгиын ортчиз федерализмез улонэ пыӵатонлы сӥзем международной семинар. Отчы ветлыса, шуиз Александр Александрович, юн оскон пыӵаз: Удмурт Республикаысь Кун Кенеш законъёс дасянъя шонер сюрестӥ мынэ. Соин валче асьме азьын одӥг бадӟым ужпум сылэ - Удмурт Республикалэсь Конституцизэ Россия Федерацилэн Конституциезлы тупамон карон. Кун Кенешлэн сессиез ужзэ азинтоз 17 феврале. Г. РОМАНОВ. Инкуазь сярысь сюлмаськыса Музъеммылэсь чеберлыксэ но чылкытлыксэ эскерон, инкуазез утёнъя законодательствоез быдэсъян понна, калыклэн экологической культураез вылын луыны кулэ. Нош со понна калыклэсь инкуазен герӟаськем тодон-валанъёссэ будэтоно. Тае лыдэ басьтыса Удмурт Республикаысь Кун Кенеш Удмурт Республикаын "Калыклы инкуазез утёнъя тодон-валанъёс сётон удысын кун политика сярысь" постановление кутӥз. Та документъёсъя инкуазез утёнлы дышетон туала тодон-валанъёслэн радлыказы валтӥсь инты басьтэ. Кунэн та удысын политикаез котькуд адямилы экология, инкуазез утён, солэсь узырлыкъёссэ пайдаё но шыръяса кутон пумысен тодон-валанъёс басьтыны луонлыкъёс кылдытэ; инкуазез утёнъя но солэсь узырлыкъёссэ шыръяса кутон вылысь ужрадъёсты быдэсъя; кун властьлэн, интыысь аскивалтонлэн ёзъёссылы, калык огазеяськонъёслы, нимаз адямиослы валче, огъя кужымен ужаны луонлыкъёс кылдытэ. Куӟебай Гердлэн вордскемез дырысен - 100 ар Кизили огназ ӧй вал Удмурт калыклэн быдӟым визьлюкез, синмаськымон кылбурчи но тодосчи Куӟебай Герд Москвае нырысьсэ вуэмез бере ик (1919-тӥ арлэн шораз, апрель-июль толэзьёсы) сюлмаськылӥз ӟуч культура но литература удысъёсысь адямиосын кусыпъёс тупатыны. Пумиськылӥз А. В. Луначарскиен, Н. К. Крупскаяен, М. Н. Покровскиен, мукетъёсыныз. Азьмынӥсь писателен но тодосчиен В. Я. Брюсовен тодматскемез но солы гожтэт гожъямез юрттӥз Вылӥ литературно-художественной институтэ дышетскыны пырыны. Татысен пумиськиз ини быдэс дуннелы тодмо визьпогъёсын. Соос пӧлын вал Н. Я. Марр, В. М. Фриче, Ю. М. Соколов, П. Н. Сакулин, В. Ф. Переверзев но мукетъёс. Москваын дышетскыкуз, тужгес но аспирант вакытаз, Куӟебай Герд мылысь-кыдысь пыриськылӥз Москвалэн литература улоназ, вуылӥз писательёсын котькыӵе пумиськылонъёсы, ӝытъёсы. Отын ӵемысь вераськылӥзы кызетӥ аръёсысь тужгес тодмо гожъясьёс. Соос пӧлын - Сергей Есенин, Владимир Маяковский, Демьян Бедный, мукетъёсыз. Со вакытэ ик удмурт кылбурчи тодматскылӥз кун сьӧрысь азьмынӥсь литераторъёсын. Нырысь ик - асьме доры келям писательёсын. Тодмо пор гожъясьлэн Александр Токлэн верамъёсызъя (соин ӵош Герд ужаз Центриздатын), удмурт кылбурчи но тодосчи сюлмысь эшъяськылӥз тодмо поляк гожъясен Бруно Ясенскиен, мадьяр гожъясьёсын Эмиль Мадарасэн но Бела Иллешен. Нош тужгес ӟеч кусыпъёс тупатӥз тодмо мадьяр кылбурчиен Антал Гидашен. Таиз аслаз кылаз берыктӥз Гердлэсь ӟуч кылын гожтэм "Я ни разу не видел море" кылбурзэ. 1927-тӥ арын печатлаз сое мадьяр коммунистъёслэн лушкем потӥсь "100 %" изданиязы. Азькылаз Антал Гидаш гожтӥз: "Удмурт литература ӝужаны кутскиз кылем даурлэн куатьтонэтӥ аръёсаз. Зэм, со огинтыязгес сылӥз: эксэй кузёяськон вакытэ сяськаяськыны нокыӵе луонлык ӧй вал. Туннэ удмуртъёс но дӥсьтӥсьгес луо ни. Нош тужгес азьмынӥсь кылбурчизы, Куӟебай Герд, ас ужъёссэ ачиз ик ӟуч кылэ берыкъя... Кин меда уг шӧды Шандор Петефиен тужгес огкадь луэмзэ?.. Солэн кылсуредъёсыз паймымон чылкытэсь, чебересь, зӥбет улысь мозмем калыкез азьланезлы оскыны ӧтё, тыр кужым сёто. Японилы, собыдӟа азинсконъёс басьтон понна, ньыльдон-витьтон ар кулэ луиз ке, мадьяръёсын одӥг выжыысь калыкъёс но вынъёссэс сутозы..." Антал Гидаш Куӟебай Гердлэн секыт шугадӟонэ шедемез сярысь тодэмез бере гожтӥз: сыӵе егит, визьмо адямиез куасалтӥзы куамынэтӥ аръёс. Кӧня ӟеч уж лэсьтысал на со ас калыкез понна!.. Со сяна, Куӟебай Герд Москваысен пумиськылӥз француз гожъясьёсын но. Александр Эриклы одӥг гожтэтаз ивортӥз: "Анри Барбюс дорын вал. Тодматски соин 1924-тӥ арын 5-тӥ мартэ. Туж ӟеч адями. Француз эшеным кенешимы СССР-ысь калыкъёслэн гожъямъёссылэсь ужъёссэс Европаысь кылъёсы берыктон сярысь". Тужгес матысь кусыпъёс тупатӥз Герд кунгож сьӧрысь вуэм но кыӵе ке мугъёсын валче СССР-ын улӥсь писательёсын. Трос пол пумиськылӥз турок гожъясен Назым Хикметэн, кӧня ке пол соин ӵош вераськылӥз литературалы сӥзем ӝытъёсын. "Кузница" огазеяськонлэсь национальной секцизэ кылдытӥсьлы сямен, уно пол пумиськылоно луиз швейцар кылбурчиен Отто Фольхартэн, япон писателен Ёсики Хаямаен, полякен Ян Шашкевичен, индусэн Луганиен, чиганъёсын Панковен но Германоен, крым бигерен Шейх-Задеен но трос мукетъёсыныз. А. В. Луначарский лэзиз ке но, Куӟебай Герд ӧз быгаты финн тодосчиосын но писательёсын пумиськыны. Тодон-валанзэ будэтэмез потыса но ӧз быгаты Финляндие но Венгрие мыныны. Зэм, финн писательёсын пумиськылыны луонлык кылдӥз Карелиысен гинэ. Татысь Наркомпрослэн шаерез тодонлы сӥзем ужпумъёсызъя визь-кенеш сётӥсез луыса, кӧня ке пол вуылӥз Петрозаводске, пумиськылӥз калыкен. Соку ик тодматскиз Карелиысь тодмо финн гожъясьёсын Ялмари Виртаненэн, Урхо Руханенэн но мукетъёсыныз. Соосын Кузьма Павлович сюлмысь вераськылӥз ас литературадэ азинтон сярысь. Тужгес юн эшъяськиз Куӟебай Герд коми кылбурчиен Василий Ильич Лыткинэн. Соин ӵош одӥг вакытэ дышетскиз институтын но аспирантураын. Соку ик Василий Лыткин ас кылаз берыктӥз удмурт эшезлэсь кӧня ке кылбурзэ но "Война" ("Ож") поэмазэ. Удмурт кылбурчи лыдӟисьёссэ тодматӥз "Чебер нылъёс" синмаськымон коми кырӟанэн. Василий Лыткинлэн тодаз ваемезъя, удмурт кылысь со асэстӥз кылбуръёс кылэз. Со дырысен та кыл коми кылын кылбуръяс шуыса чузъяськыны кутскиз. Москваын кылдытэмын вал пролетар гожъясьёслэн огазеяськонзы. 1925-тӥ арлэн пумаз отын вал дас тямыс секция. Соос пӧлын ик - удмурт ёз. "Кузница" огазеяськонлэн ужаз мылысь-кыдысь пыриськизы бигер гожъясьёс Вазых Шамсетдинов но Фатхи Бурнащев, япон гожъясь Ёсики Хаяма, белорус гожъясь Михаил Дроздов, калмык гожъясь Амур Санан но куд-ог мукетъёсыз. Ваньмыныз Герд сюлмысь эшъяськылӥз. "Кузница" огазеяськонлэсь национальной секцизэ кылдытэм бере, пӧртэм калыкъёслэн писательёссы пумиськылӥзы Москваысь ужаса улӥсьёсын. Пумиськылонъёс озьы ик вал Калыкез дышетонъя юртын, Индустриальной институтын, Дзержинский нимо казармаосын, Кыдёкысь Ӵук палась калыкъёслэн институтазы, мукет интыосын. Одӥгез ужрад сярысь гожъязы: "Та юртын ортчиз полякъёслэн туала кылбуретсылы сӥзем ӝыт. Отын бадӟым инты висъямын вал пичи калыкъёслэн поэтъёссылы но музыкантъёссылы. Асьсэлэсь ужъёссэс лыдӟизы удмурт кылбурчи Герд, "турок Маяковский" - Назым Хикмет, украин поэт Алексеенко..." 1928-тӥ арын 10-тӥ мартэ тодмо луиз: пролетар гожъясез Иоганн Бехерез быдтыны туртто. СССР- ысь калыкъёслэн гожъясьёссы но кун сьӧрысь вуэм но Москваын улӥсь писательёс мур сюлэмшугъяськыса пумитъясько тазьы дауртонлы. Куӟебай Герд сяна, таӵе мылкыдзэс веразы армян кылбурчиос А. Акопян но И. Айкуни, калмык писатель Амур Санан, осетин писатель Дзахо Гатуев, коми-зырян поэт Василий Лыткин, азербайджан поэт Микаэл Рафили, поляк поэт Ян Шашкевич, мукетъёсыз. Та аре ик Куӟебай Герд, Сигизмунд Валайтис, Ян Шашкевич вуылӥзы Алексей Максимович Горький доры. Алексей Максимович тунсыкъяськылӥз СССР-ысь ичи лыдъем калыкъёслэн улон-вылонэнызы но литератураенызы. Ӟеч мылкыдын ӧз пумиталля куспазы кылдылӥсь тэргаськонъёсты. Та пумиськон сярысь Куӟебай Герд бератаз шумпотыса тодаз вайылӥз "Максим Горький дорын" кылужаз. Алексей Максимовичлы "СССР-ысь калыкъёслэн поэзизы" антологиез волятыны курыса вазиськиз бере, ӟуч писатель сюлмысь шуиз: "Туж ӟеч но бадӟым уж та. Мон шумпотыса басьтӥсько со борды. Ӟучъёс но мед тодозы пичи калыкъёслэсь литературазэс". Куӟебай Герд Горькиез Удмуртие ӧтиз. Алексей Максимович шуиз: "Оло, вуо но: кин тодэ. Ӧтись туж трос. Удмуртъёс, поръёс, чувашъёс азьвыл туж бере кылё вал. Али мынам учкеме потэ тӥляд улонды шоры. Тӥ сярысь вань гожъямъёсты лыдӟисько. Тани тӥ мон доры лыктӥды, нош куд-огдэс газетъёсъя тодӥсько ини". Собере азьланьтӥз: "Эксэй вакытэ улонды сярысь тодэ вайыны ик кышкыт. Нош али литературады но, театрды но сяськаяло. Тӥлесьтыд но мукетъёслэсь литературадэс выль ӟуч литература борды ватсад ке, паймымон арбери кылдоз". Соку Герд солы шуиз: "Тӥляд ужъёсты берыктӥсько ни удмурт кылэ но". Ивортӥз соослэсь нимъёссэс. Нош Алексей Максимович шуиз: "Ваньзэ берыктыны кулэ ӧвӧл. Куд-огез, оло, вужмиз но ни. Зэм, веросъёсты кулэ". Со дыре ик ватсаз: "Берыкъялэ, берыкъялэ... Калыклы синзэ усьтоно. Та ужез быдэстыны луоз ас кылыдлэсь луонлыкъёссэ кутыса гинэ". Та пумиськон удмурт кылбурчиез бурдъяз. Алексей Максимович дорысь кошкыкуз, сюлэмыз мукет сямен жугиськыны ӧдъяз кадь. Котыр югытгес луиз. Зэм, таӵе пумиськонъёс туж ик ӧз яраллялэ ВАПП-ын ужасьёслы. Зэмлыкез тодыса, та сярысь шонер гожъяз Ян Шашкевич но. Со шуылӥз: "Национальной литератураез азинтонын ВАПП номыр ик ӧз лэсьты. Гожъяськон сярысь кенешм интые, татын тросгес йырйиськонъёс. Сыӵе югдур кылдыто РАПП-ысь адямиос. Критикъёс куддыр умойтэм дунъяло пичи калыкъёслэн гожъясьёссылэсь ужъёссэс. Котькудзэ мертало одӥг мертэтэн. Озьы соос национальной литературалы азинскыны люкето гинэ". Аршалуис Аршаруни, кылсярысь, одӥг бугоре бинялтыны турттэм вань писательёсты. Нош аспӧртэмлыксэс тодыны чылкак тыршымтэ. Аслаз кылужаз со вӧсь карыса гожъяз: "Социализм лэсьтэмез адӟонтэм вылысь, Абашели, Гранели, Герд, Чулпан но соос выллемъёс синъёссэс юри вотсазы. Вань "ярдуръёссылэсь ишкалтӥськем" поэтъёс. Соос весь ӝожтӥсько: Туж секыт ук улыны, Чик азьланез тодытэк, Туж секыт ук кырӟаны, Вӧзад кырӟась луытэк! Нош кылдэм югдурысь потон амал кыӵе? Огнад кылид ке, социализм лэсьтсьёсын-пролетариатэн но солэн юрттӥсеныз, крестьянствоен, - ӵош уд вамышъяськы ке, иське, утиськон мукет азьысь утчано. Та адямиос - палдэм шелепъёс выллем..." Тазьы дунъя вал Аршалуи Аршаруни пӧртэм калыкъёслэн писательёссылэсь - грузинъёслэсь Абашелилэсь, Гранелилэсь, узбеклэсь Чулпанлэсь, удмуртлэсь Куӟебай Гердлэсь - ужъёссэс. Вылаз ик, паймымон соиз: Куӟебай Гердлэсь "Огнам" кылбурзэ со поэма шуэм, нош отын чылкак кызь чур гинэ. Та кылбур гожтэмын вал ай революцилэсь азьвыл, нош Аршаруни выжтэм сое социализм лэсьтон вакытэ. Вылаз ик, кулэтэм ужен вырисьлэн уйбыртонэныз лыдъя. Нош Куӟебай Гердэз но мукет визьмо кылбурчиосты палдэм шелепъёс шуэ. Куӟебай Гердлэн та кылбуръёсыз ӟуч кылэ берыктэмын ӧй вал ай соку. Нош ӟуч кылын гожтэмъёссэ Аршарунилы сётэм, дыр, Шунды ӝужан палась калыкъёслэн институтсылэн аспирантураяз дышетскись Яков Ильин. Таиз Кузьма Павлович вылэ весь чагиськылэм. Таӵе югдур юнме шорысь ӧз кылды: ини ас шаераз ик поэтлэсь кылбуръёссэ умойтэм дунъяны кутскизы. Аршаруни критикен кенжытэм учырез Герд ӟеч-ӟеч экерыны куриз. "Кузница"-лэн одӥгаз люкаськоназ но шуиз: ӟуч писательёс мукет калыкъёслэсь улон-вылонзэс уг тодо, сое кулэезъя уг югдыто. Югдурез шонер валэктыны быгатозы берыктэм ужъёс гинэ. 1928-тӥ арын 14-тӥ декабре нацбюро вуиз таӵе малпанэ: 25-тӥ декабрёзь ортчытоно "Удмурт литература но отын Гердлэн интыез" трос калыкъем ӝыт. Вераськон вылысь ӧтёно Иосиф Наговицынэз но. Озьы ик - Аршаруни эшез. Ӝыт-кенеш ортчиз кӧснуналэ, 20-тӥ декабре, кыдёкысь Ӵук палась калыкъёслэн ассоциациязы. Куӟебай Гердлэн ужъёсызлы вылӥ дунъет сётэмын. Нош Аршаруни критиклэн статьяез аслэсьтыз бервылзэ возьматӥз ик: отын шараям писательёс - Гранели, Чулпан, Герд - пытсамын вал, быризы но соос "вань калыкъёслэн атайзылэн" синазькыль сьӧлтэтаз. Зэм, дыр ортчиз. Куамын ар висатыса, визьлюкъёслэн ӟеч нимъёссы берыктэмын. Нош соосты дэриен наштам адямиос мукет сямен вераськыны ӧдъязы. Аршалуис Аршаруни но очеркъёсын "Ортчеменыз пумиськон" книгаяз 1928-тӥ арын печатлам кылужзэ вунэтыса вера Куӟебай Гердлэн лэчыт визьмыз сярысь. Вылаз ик, аслэсьтыз малпанъёссэ юнматон вылысь пыкиське Алексей Максимович Горькийлэн но СССР-ысь Вылӥ Кенешлэн Президиумезлэн Председателезлэн пичи калыкъёсты азинтон ужпумъёсъя воштӥсезлэн П. Г. Смидовичлэн кылъёссы вылэ. Со сяна, Аршалуис Аршаруни ассэ кожа Куӟебай Гердлэсь ужъёссэ печатланы юрттӥсь, соос сярысь сюлмаськись литератор. А. М. Горькийлэн архивысьтыз удмурт поэтлэсь кылбуръёссэ синйылтыса шуэ: "Та чуръёсты гожтӥсь адями кылбуръёсты Алексей Максимовичлы Соррентое келяз. Альманахлэн редколлегиезлы соос яразы. Горький но вылӥ дунъяз..." Тӥни кызьы воштӥсько вылэм 20-тӥ-30-тӥ аръёсы уно изъян ваем адямиослэн малпанъёссы. Удмурт литературалы сӥзем ӝыт бере ик Москваын ортче украин литературалы но искусстволы сӥзем нырысетӥ декада. Татысен Герд пумиськылэ тодмо украин гожъясьёсын. Соос пӧлын вал И. Микитенко, П. Тычина, В. Со сюро, Б. Антоненко-Давидович, Остап Вишня, Л. Первомайский, Ю. Яновский, И. Ле, А. Головко но мукетъёсыз. Куӟебай Гердлэн украин эшъёсызлы сӥзм кылбурез шуныт пумитамын вал. Нош март толэзе ини украин кылэ берыктэмын (берыктӥз поэт П. Усенко) но печатламын "Молодняк" журналын (Киев, 1929-тӥ ар, 3-тӥ номерез). "Кузница"-лэн национальной секциез 1929-тӥ арын ай улӥз бадӟымесь малпанъёсын. Ян Шашкевич гожъяз: "Туэ чакламын данак гожъясьёслэсь ужъёссэс ӟуч кылэ берыктыса поттыны. "Ваньмыз понна журнал"-ын кылдытӥське пӧртэм калыкъёслэн литератураоссылы сӥзем отдел. Али эскериськом Узбекистанысь гожъясьлэсь Лолахан Сейфулиналэсь книгазэ, озьы ик печатланы дасяськом удмурт кылбурчиез Куӟебай Гердэз..." Ӝожомыса верано луэ: та малпанъёс ӧз быдэсме, нош национальной секция вадьсы 1929-тӥ арын март толэзе люкаськизы сьӧд пилемъёс. МАПП-лэн коммунистической фракциез вуиз таӵе малпанэ: "Кузница"-лэсь национальной бюрозэ асэрказ лэзёно. Пичи калыкъёслэн гожъясьёссы меӵак пумитъяськизы талы, нош пумозяз сылыны кужымзы ӧз тырмы. Ваньзы сямен быризы ГУЛАГ-лэн лагерьёсаз. Озьы туж ӝож йылпумъяськиз СССР-ысь калыкъёслэн литератураоссылэн тужгес усто адямиоссылэн ӟеч кичӧлтонзы. Нош соос юн оско вал ук: выль кенешо власть со понна ик кылдытэмын - пичи калыкъёслэсь литературазэс но культуразэс азинтон но соослы дурбасьтон вылысь... Та адямиос зол янгышазы. Шимес вакытлэн нокинэ жалясьтэм поглянэз улэ ӝимиз удмурт калыклэн тужгес визьмо пиез но - Куӟебай Герд. Кузьма Павлович быдэсак выйтӥськиз вал ни Москваысь литература улонлэн тужгес мур ӧраз, мылысь-кыдысь турттылӥз вань калыкъёслэсь Москваын улӥсь литераторъёссэс огазеяны. Солы, тужгес быгатӥсезлы, ас вылаз нырысетӥен чиданы кылдӥз МАПП-лэсь, ВАПП-лэсь но со выллем мукет синазькыль огазеяськонъёслэсь адямиез жалясьтэм шуккетъёссэс. Кызетӥ аръёслэн кыкетӥ ӝыныысенызы кутскыса, Иосиф Сталинлэн кивалтэмез улсын соос жалятэк быдтыны ӧдъязы пичи калыкъёслэсь тужгес ӟеч кужымъёссэс. Та тылӝуын быризы удмурт калыклэн но визьмо нылъёсыз но пиосыз. Ф. ЕРМАКОВ, профессор, Удмурт Элькунысь наукая но культурая дано ужась, Вань удмуртъёслэн Куӟебай Герд нимо премизылэн, Удмурт Элькунысь Кун премилэн лауреатсы. Вань на ик ай пӧламы батыръёс Уваысь музейын усьтӥськиз Узей-Тукля гуртын улӥсь егит художниклэн Геннадий Сидоровлэн нырысетӥ нимысьтыз адӟытонэз. Витьтон пала суредъёс, даслэсь ятыр киужъёс бордазы кыско аспӧртэмлыко луэменызы. Адӟытонэз усьтонэ ветлэм Семён Виноградов, элькунысьтымы калык художник, люкаськемъёс азьын тазьы шуиз: "Удмурт калык возиськыны быгатоз батыръёсыз вылын гинэ. Одӥгез соос пӧлысь - Геннадий Сидоров. Ӝужыт мугоръем, горд йырсиё но тушо воргоронлэн ас шаерзэ яратэмез котькуд ужаз шӧдӥське". Пусйымон соиз: Геннадий Евгеньевич луэ гуртысьтызы киужъёсыз юртлэн директорез. Ас быгатонлыкъёсызлы со дышетэ пичи бӧлякъёссэ. Озьыен, Бызара палъёсын (тазьы шуо удмуртъёс Узей-Тукля гуртсэс) кылдозы выль чеберлыко пушъетъёс. И. Кричев. КАПИТАЛ ДУННЕЕ ВЫЖОНЛЫ ПУМИТ Кылем кӧснуналэ Иж карын ортчиз Удмурт Элькунысь коммунистъёслэн 1997 арын ужамзылы йылпумъянъёс лэсьтонъя конференцизы. Асьме шаерын КПРФ туала вакытэ азьло КПСС-лэсь ужзэ азьланьтэ шуыса лыдъяно ке, таиз конференция 45-тӥез вал. Отын доклад лэсьтӥз КПРФ-лэн Удмурт обкомезлэн нырысетӥ секретарез, Россиысь Кун Думалэн депутатэз Н. И. Сапожников. Докладаз со туала властьёслэсь ужась калыклы пумит вамышъёссэс-ужрадъёссэс сэрттӥз-пертчиз, соослэсь кытчы вуттонзэс трос лыдпусъёсын возьматӥз. Пусйиз, ужась адямиос капитал дуннее выжонлы пумит луэмзэс пумен кужмогес возьмато шуыса. Кылем арын 27 мартэ адямиос нырысьсэ меӵак политической куронъёсын потӥзы, Россилэн Правительствоезлы курссэ воштыны ӵектӥзы, огъя политической стачкалы дасяськыны ӧтизы. Но вераны кулэ, Удмуртиын сыӵе куронъёсын сокем трос калык ӧз ӝутскы на. Соин ик партийной организациос азе ужпум пуктэмын калык пӧлын валэктон ужез кужмоятон сярысь. Ортчем арын каллен-каллен кужым люканы кутскиз комсомол но. КПРФ-е пырыны ӧдъязы егитъёс но, шоро-куспо арлыдо адямиос но, шорлыдын арлыдзы 33 арес. Азьланьтӥське коммунистъёслэсь партийной документъёссэс вошъян. Калык пӧлын эшшо кужмогес ужано луоз быръёнъёслы дасяськон вакытэ, Россиысь вань патриот луись кужымъёсын огазеяськыса. Оскон кылдэ, коммунистъёслы дурбасьтӥсьёслэн радъёссы пумен йылозы шуыса. Кылем арын коммунистъёс пусйытэк ӧз кельтэ Быдӟым Октябрь революцилы 80 ар но СССР-лы 75 ар тырмон нуналъёсты. Нош "демократъёс" соосты "вунэтыны", историысь ӵушыны туртто вал. Конференциын данакез делегатъёс, югдурез валаса, ӟырдыт вераськизы, кылсярысь, Ува парторганизациысь делегат коммунист Ю. Е. Горячих. Та ёросын Россилэсь Президентсэ бырйыку, котькинлэсь трос куараос люказ Геннадий Зюганов. Юнме ӧй вал со. Удмурт егитъёс пӧлын ужан но "Шунды" огазеяськон сярысь вераськиз Пичи Пурга ёросысь Игорь Чернышов. Тужгес но яркыт вераськиз партилэн ужъёсаз шуг-секытъёс но соосты вормылыны тыршемзы сярысь КПРФ-лэн Татарстанысь рескомезлэн секретарез Р. Г. Садыков. Татарстанын али вань городъёсын но районъёсын партийной организациос кылдытэмын. Но соослы нюръяськоно луэ федеральной властьёслы пумит но, президентсылэн М. Шаймиевлэн куд-ог ужрадъёсызлы пумит но. Татарстанын юри сурамын вал Россилэсь Президентсэ быръёнлэн йылпумъянъёсыз. Со ужъёсты умойтэмен лыдъяз РФ-ысь Вылӥ суд но. Татарстанын кужмоя национальной движение, но татын ӧръясько кык кужымъёс: ТОЦ (татар общественной центр) но Интифак. Коммунистъёс ӟеч кусыпъёс возьыны тыршо ваньмыныз калыклы дурбасьтӥсь кужымъёсын, нош национальной движениын асьсэлы матын лыдъяло Интифак огазеяськонэз. Отчётъя но сое эскеремъя конференция резолюция кутӥз. Конференцие делегатъёс быръемын но лыктэмын вал вань ёросъёсысь но каръёсысь. Нош витяз ёросын партилэн райкомъёсыз ӧй вал на, соин ик татын бырйизы соослы секретарьёсты. Делегатъёслы кельшиз та конференцилэн радызъя, ӝегатскытэк мынэмез. Бадӟым кенешон кутскиз но, йылпумъяськиз но "Интернационал" партийной гимнэн. Л. ФЕДОРОВ. Шунды Вакчияк Удмурт егитъёслэн "Шунды" дэменлыксылэн 1997 арын орчытэм ужрадъёсыз 3-9 январе удмурт шаерысь 12 ёросысь но Татарстанысь бадӟым классъёсын дышетскись 80 нылпи шутэтскиз тазалыкез юнматонъя "Заря" лагерьын. Пӧртэм ужрадъёсы пыриськем сяна, пиос но нылъёс психологияя тодон-валанъёс люказы. 14 феврале ортчиз "Огазеяськонлэн азинсконэз но валтӥсь план бордын ужан" семинар. Солэн ужаз пыриськизы "Шундылэн" правленияз но кенешаз быръемъёс, ёрос ёзъёсысь азьветлӥсь егитъёс. 22 феврале Игра, Дэбес, Кез ёросысь егитъёс асьсэлэсь быгатонлыкъёссэс возьматӥзы КВН-ын, ужрад сӥземын вал Атыкай музъеммес утисьёслы. 14-20 мартэ Башкортостанын ортчиз "Удмуртия-Башкортостан: национальной культура но егитъёс" ужрад. Солэн ужаз пыриськизы дэменлыклэн правленияз быръемъёс, журналистъёс, писательёс, кырӟан гожъясь авторъёс, "Шулдыр ӝыт" но "Инвугур" ансамбльёс. 24-26 мартэ Егитъёсын ужанъя кун комитетлэн, Нациосын ужанъя комитетлэн но Удмурт Республикаысь Правительстволэн юрттэмез улсын егит гожъясьёс, суредасьёс, крезьгурчиос понна ортчиз "Егит дунне" семинар. Солэн ужаз пыриськиз 50 мурт. 3-10 июле "Шунды" дэменлык но Ижевскысь Гуманитарной лицей ортчытӥзы бадӟым классъёсын дышетскись финн-угор нылпиослэсь ньылетӥ слётсэс. Шаерысьтымы сяна, солэн ужаз пыриськизы Эстониысь, Комиысь, Марий Элысь но мукет улосъёсысь пиналъёс, ваньмыз 81 мурт. Слёт дыръя ик ортчиз литературая, этнографияя, лингвистикая, историяя, шаерез тодонъя, биологияя, экологияя но географияя научно-практической конференция. 21-30 июле ИСАР/УСАИД огазеяськонлэн коньдонэн юрттэмезъя "Семена демократии" программа улсын ортчиз экологияя "Турипи" экспедиция. Солэн ужаз пыриськиз шаерысьтымы бадӟым классъёсын дышетскись 40 нылпи, "Вож тулкым" программая конкурсын вормисе потэмъёс. 11-13 июле "Шунды" дэменлыкысь егитъёс пыриськизы Йошкар-Олаын ортчем финн-угор егитъёслэн фестивалязы. Ужрад чакламын вал Финн-угор выжыысь егитъёслэн ассоциеныз (МАФУН). 25 июльысен 2 августозь усточи но быгатӥсь нылпиос понна радъямын "Шундыкар-97" шутэтскон лагерь. Лагере шедён понна пиналъёс пыриськизы "Культура, творчество, ваньмон дыр" программа улсын радъям конкурсэ. Лагерьын шутэтскизы Удмуртиысь но бускель шаерысь 176 нылъёс но пиос. 17-21 октябре Марий Элын ортчиз: "Удмуртия - Марий Эл: национальной культура но егитъёс" ужрад. Солэн ужаз пыриськизы дэменлыклэн правленияз быръемъёс, журналистъёс, писательёс, кырӟан гожъясь авторъёс, "Шулдыр ӝыт" но "Инвугур" ансамбльёс. 18-21 ноябре дэменлыклэн правленияз быръемъёс пыриськизы МАФУН-лэн конгрессаз (Эстония, Таллинн). 23 ноябре Россиын Финляндилэн нуналъёсыз ужрад улсын ортчиз "Россиысь финн-угор калыкъёс толон, туннэ - нош мар луоз ӵуказе?" симпозиум. Солэн ужаз пыриськиз дэменлыклэн правленияз быръем Алексей Андриянов. 12 декабре шаерысьтымы егит кырӟасьёс пӧлын ортчиз "Ӝужась кизилиос" конкурс. 24 декабре удмурт егитъёс понна ортчиз Выль арез пумитан ӝыт. Шулдыръяськонэ пыриськизы Завьялово, Якшур-Бодья, Пичи Пурга, Киясово но мукет ёросъёсысь но Ижевскысь егитъёс. Юалэ - валэктом Вазиське судэ Кылем арын 1 июньысен милям школамылэн директорез отпуске потӥз. Интыяз кельтӥз мукет дышетӥсез, кудӥз соку отпускын вал. Приказ со пумысен гожтэмын ноябре гинэ: "Отпускысь ӧтёно но огдырлы директоре пуктоно Т. Г. Ивановаез". Солы директорлэсь ужъёссэ быдэсъямез понна коньдон ӧз тыре. Бухгалтериын валэкто: кык полэс уждун тырыны ум, пе, быгатӥське. Шонер-а со? Г. ЕФИМОВА, Шаркан ёросысь Сурон школаысь дышетӥсь. Директорлэсь ужъёссэ быдэсъямез понна, Т. Г. Ивановалы дышетӥсьлэн уждунэз вӧзы ватсаса коньдон тырыны кулэ. Со сярысь приказын но гожтэмын луыны кулэ вал. Озьы ӧвӧл бере, Т. Г. Ивановалы судэ гинэ вазиськыны кыле на. Сыӵе валэктон сётӥзы республикаысьтымы ужъя правовой инспекциын. КЕНЕШОЗЫ ЕГИТЪЁС 14-тӥ феврале удмурт егитъёслэн "Шунды" дэменлыксы ортчытэ йылпумъянъёслы но быръёнъёслы сӥзем 5-тӥ конференцизэ. Ӧтчаме люкаськозы шаерысьтымы егитъёс, тодмо адямиос, дышетӥсьёс, студентъёс, ваньзы, кинлы матын гитъёслэн улонзы, соослэн сюлэмшугъяськонъёссы, азьланьын улонзы. Егитъёс вералозы асьсэлэн улэм-вылэмзы, сюлмаськонъёссы сярысь, кенешозы азьланьын быдэстоно ужпумъёсъя. Конференцилэн ужаз пыриськыны вань мылкыд карисьёсты ӧтиськом Ижевскысь "Октябрь" культура юртэ, кутсконэз ӵукна 10 часын. Юанъёсын вазиськоно 51-07-96 телефонъя. Н. ПАНТЕЛЕЕВА. Кема висемез, 61-тӥ аресаз мыныкуз, улонысь кошкиз тодмо удмурт режиссёр, актёр, Удмурт Элькунысь искусствоосъя дано ужась Кондратий Борисович Ухов. Быдӟым Кондӥ нималляз вал ассэ серекъяса-мактаса удмурт калык понна висись, сюлмаськись но трос лэсьтэм воргорон. Кондратий Борисович Ухов вордӥськиз Можга ёросысь Акашур гуртын 1937-тӥ арын 4-тӥ апреле. Ленинградысь А. Н. Островский нимо театральной институтэз йылпумъяса, Удмурт театрын артист, собере директорлэн воштӥсез луыса ужа. Удмурт кун филармониын но телевидениын режиссёрын кема тыршиз. Уно аръёс ӵоже вал Казань киностудилэн фильмъёсты удмурт кылэ берыктонъя режисшрез. Ужаз ӟуч фильмъёсты удмурт кылын ас калыкез доры вуттон бордын. Куӟебай Гердлэсь "Соперницы" фильмзэ шедьтыса-выльдыса, экран вылэ выльысь поттӥз. Кондратий Борисович Уховлэн яркыт тусбуез но быдэстэм ужъёсыз ялан улозы удмурт калыклэн сюлэмаз. Эшъёсыз. Эстониын пумиськонъёс Ульчаын но йыромод кылтэк Милемды, Удмуртиысь вуэмъёсты, Эстониысь парламентын шуныт пумитазы. Келясьёсмы кытчы ке ышем бере, Удмурт телевидениысь операторен Олег Кропачевен ӵош олокытчы но пырам. Зэм, берлогес милемлы небытак тодамы вайтытӥзы: огнын татӥ калтыртыны уг яра. Отчыозь ми асьмеос вань кулэзэ адӟимы ни вал. Котьма ке но, мон валэктон ӧй шедьты туж огшоры юанлы: кыӵе кун со - Эстония: президентской-а (Россия кадь), парламентской-а (Удмуртия кадь)? Эстониын вань ук республикалэн президентэз но, Рийгикогу (Кун Кенеш) но. Президент - кунлэн йырыз, ог-огенызы герӟа Кун Кенешлэсь, Правительстволэсь но судъёслэсь ужъёссэс, юнматэ но мозмытэ Правительствоысь адямиосты. Конституцияя солэн правоез вань Кун Кенешысь депутатъёслэсь ужзэс дугдытыны но отчы выль быръёнъёс ялыны. Ваньмыз валамон кадь. Нош Кун Кенешлэн азьвыл депутатэз, экономикая министрлэн али юрттӥсез (советникез) Антс Паю вера мукет сямен: - Эстонилэсь Конституцизэ туж паймымон амалэн гожтӥзы. Кун Кенешысь 30 депутат но калык конгрессысь (вал сыӵеез но ёз) 30 мурт лэсьтӥзы аспӧртэм огкыл (договор). Соя туала президентлэн интыез улонлэн куронъёсызлы уг тупа. Малы? 1940 арын Эстониен кивалтэм президентэз (ачиз ӧвӧл ни) алиосыз депутатъёс янгыш каро: со пумитъяськымтэен, пе, СССР пыриз Эстоние. Озьы медаз ни луы шуыса, пе, кунмы парламентской мед нимаськоз. Бен, азьвыл кивалтӥсьёсты туала визьмын пыкылыны шуг ӧвӧл. Нош мар карыны быгатысал соку президент горд кизилиё танкъёс азьын? Вакытэз сыӵе вал. Эрикеныз ӵош Эстония ыштӥз котьмазэ. Маде Антс Паю: - Милям президентмылэн вал аспӧртэм пусэз. 1940 арын сое СССР-е нуизы но ватӥзы. Озьы ик ышизы Тартуысь но музон университетъёсысь архивъёс. Президентлэн пусэз герб яке медальон выллем, туж чебер но номырин дунъянтэм маке. Сыӵе ваньбурез берыктон сярысь законэз Россиысь Кун Дума ӝогак кутоз шуыса, малпанмы ӧвӧл. Нош осконмес ум ыштӥське. Россия но Германия куспын та удысъя кенешонъёс мыно ук. Россия но Эстония куспын но пичияк инъет вань. Борис Ельцин Свердловскын ужаку, отысь университетын проректор вал эстон воргорон Рудольф Пихоя. Берлогес со Москвае выжиз но Россиысь валтӥсь архивариус луиз. Кӧня ке пол Таллиннын вал. Россиысь но Эстониысь архивъёсъя департаментъёслэсь кусыпъёссэс юнматӥз. Оло, соос ваче кыл шедьтозы но президентлэсь пуссэ берыктыны юрттозы. Воштӥсько аръёс, мукет луо кивалтон ёзъёс. Кун Кенеш но таяз даурын уно пол вошъяськылӥз. 1920-1934 аръёсы сое бырйылӥзы куинь арлы огпол. Асьме Удмурт шаерамы музэн ик, со одӥг палатаен вал. 1938 арын куатетӥез парламент луиз Россиын кадьгес, кык палатаен. 80 депутат пукиз Кун Думаын, 40-эз - Кун Кенешын. 1995 арын быръемын тямысэтӥез парламент. 101 депутат кылдытэ одӥг палатаен Кун Кенеш. Солэн правленияз пыро Кун Кенешлэн тӧроез но кык вице-тӧро. Тӧро нуэ парламентлэсь кенешъёссэ. Куд-ог учыръёсы, президент ас ужзэ быдэсъяны пӧрмымтэ дыръя, тӧро быгатэ солэсь но удыссэ валтыны. Депутатъёс огазеясько дас комиссие, партиос пыр бырйиськемъёс - ас фракциосазы. Кун Кенешлэн ужез мынэ Тоомпеа нимо туж чебер дворецын (замокын, шуо эстонъёс). Котькуд ӝӧк сьӧры интыяське кык депутат. Залын пуко президент, Правительствоысь адямиос, мукет кивалтӥсьёс, балконъёсын - журналистъёс но мылкыд карисьёс. Котькытын - туала электроника. Уд но оскы, выль компьютер но ог 500 арлэсь азьвыл ӝутэм замок куспазы "огъя кыл" шедьто шуыса. Огъя кыл уггес шедьтыло туннэ быръем депутатъёс. Ваньмыз - эстонъёс но, ӟучъёс но - эстон сямен верасько ке но (парламентын музон кылэз кутыны лэземын ӧвӧл). Милемлы ӟуч депутатъёс возьматыны выризы кыл сярысь закон шоры умойтэм мылкыдын учкемзэс. Эстонъёс соку ик шонертӥзы: сыӵе малпанэн уло пичи люкетэз гинэ депутатъёс, Кун Кенеш нуэ аслэсьтыз гожзэ. Кытысь потӥзы тупамтэос? Мон юри учки ӟуч газетъёсты, эстонъёсты кури ас мылкыдзэс усьтыны. Ваньзэ, оло, тырмыт ӧй вала, нош огъя югдур син азям пуксиз. Кыл сярысь закон Эстониын кемаласьгес кутэмын ини. Отын одӥг гинэ кун кыл. Табере сыӵе законэ пыртэмын тупатонъёс. Таосызъя эшшо тросэзгес адямиос тодыны кулэ эстон кылэз. Со гинэ ӧвӧл ай. Депутатъёс но кылъя экзамен сётоно луозы. Сыӵе тупатонъёслы пумит вал 101 пӧлысь куатез ӟуч депутат. Нялтас пусйыны кулэ: ӟучъёс куспазы уг тупало но бырйисьёссэс утён ласянь трос ик лэсьтыны уг быгато. Тупатонъёс (шонергес - выль закон) "йӧто" бизнес борды но. Со герӟаськемын ке доразы ветлӥсь адямиосын но документъёс лэсьтонэн. Ӟуч сямен гинэ вераськисьёс табере куалектэмын. Соосты азьвылгес палэнтӥзы кун ужлэсь (госслужбалэсь). Табере, пе, нимаз фирмаос пӧлын вожмаськон потӥз ке, ӟучъёсызлы пӧсь йӧтоз. Вылаз ик, отын ужасьёс, кыл шӧлкы ватскыса, ог-огзэ вылэ чагиськонъёс пӧралозы. Газетъёслы осконо ке, азьвыл коммунист, али Кун Кенешысь депутат Тоомас Алаталу дэмла эстон кылъя экзаменъёс тупатыны интыын аскивалтонъя ёзъёсы депутатэ кандидатъёс понна но. Нош Лаура Вахтре эшшо пыдлогес пырем. "Кылтэм" таксистъёс но йырси ӵышкисьёс, пе, эстонъёсты олокӧня дасо аръёсын курадӟытӥзы. Табере дыр вуиз пунэмзэ берыктыны. Эстониын пумен юнгес чузъяське ӟуч ужбергатӥсьёсты (предпринимательёсты) сыӵе законлы пумит огазеяськыны ӧтён. Туала ӟучъёслэсь ваче кусыпъёссэс чакласа, солы оскон ӧвӧл. Юнгес оскиськод мукетызлы. Данакез валаны ӧдъяло: эстон кылтэк нокытчы мыныны. Котькызьы черекъя, правоостэ зӥбо шуыса, котькӧня тэльмыры Европаысь но дуннеысь ёзъёслы (организациослы), мукетыз сюрес ӧвӧл. Тӥни малы ӟуч газетъёсын ик адскыло ни эстон кыл секыт ӧвӧл шуэмъёс. Тани Азери посёлокын эстонъёс ӝыныез пала. Школаын 12-14 кузя ӟуч нылпиос ваньзэ сямен урокъёсты ортчо эстон кылын. Кык толэзьскын дышо лабыртыны. Керетонъёс ӧвӧл покчиос пӧлын но, мӧйыос пӧлын но. Куд-ог анайёс тау каро ай: эстон кылэз дышетон сяменыз, пе, пиналы ужасьгес но кылзӥськисьгес луиз. Татын лыдэ басьто мукетсэ но. Ӟуч пиналъёс, пе, медаз пӧрме ӵыжы-выжытэм адямиослы. Соос озьы ик тодыны кулэ ӟуч кылэз, историез, ӟуч культураез. Кун Кенеш сярысь мадён палдурес пӧрмоз, депутатъёслэсь кызьы улэм-вылэмзэс чик вератэк кельтӥмы ке. Тоомпеа замок азьысь уд адӟы дунтэм машинаосты. Синэз палёмыто мерседесъёс, аудиос, вольвоос но музон иномаркаос. Учком кӧня ке лыдпусэз. Ужтэк кылем мурт толэзяз шорлыдын басьтэ ог 240 крона (120 манет), дышетӥсь - 2100 (1050 манет), коньдон бордын ужась - 7500 (3750 манет). Шоро-куспо уждун - 3500 крона (1750 манет). Огшоры пенсионерлы тыро 1100 крона (550 манет), пенсие кошкем азьло депутатлы - 10 сюрс (5 сюрс манет). Таиз шутэтскыны быгатэ куинь арлы вазьгес. Кык ар ортчыса, пенсия луыны быгатоз 15 сюрс крона (7 сюрс 500 манет). Валамон ини, кун властьлэн котькыӵе ёзэз музэн ик, Кун Кенеш но быдэсъя туж кулэ ужез. Амалтэк кылдэ таӵе малпан: куд-ог адямиос депутат луыны туртто, дыр, бадӟым дан, уждун но пенсия понна. Соосты уг висьыто ни калыклэн сюлмаськонъёсыз. Таӵе "висёнэн" Эстония гинэ черламын ӧвӧл. Сыӵе ини данак кузёослэн сямзы. Алексей ШКЛЯЕВ. Таӵе юртын интыяськемын Эстониысь Кун Кенеш - Рийгикогу. Парламентлы ваче пумит интыяськемын ӟуч черк. Удмуртиысь куноос Кун Кенешлэн юртаз. Туспуктӥз Олег КРОПАЧЕВ. Удмурт Элькунысь национальной театрлэн тулыспал толэзьлы репертуарез 10/вт. - А. Шкляев "Дор" (Кык ёзэн пьеса) 12/чт. - Ф. Буляков "Бызьыны вуэм песяйёс" (Кык ёзэн калык комедия) 14/сб. - Е. Загребин "Эш-Тэрек" (Исторической драма) кутске 14 часэ 17/вт. - Н. Антимонов, С. Адуев "Эмеспиос" (Куинь ёзэн водевиль) 19/чт. - Крезьгурчилэн но драмаысь артисткалэн Ольга Зориналэн творческой ӝытэз 25/ср. - В. Морозов "Юсьёс кошко ке..." (Драма) Спектакльёс кутско 18 часэ. Жингыртоно 78-79-81; 78-45-92. Журналистъёсын пумиськонъёс ТОЛ ШУДОНЪЁС БЕРГЕС КУТСКОЗЫ Гуртъёсын улӥсь спортсменъёс асьсэлэн тол праздниказы туэ быдэс арнялы бергес люкаськозы. Солэсь мугзэ Анатолий Касихин, республикаысьтымы Физкультурая но спортъя кун комитетлэн кивалтӥсез, валэктӥз коньдонлы ёрмонэн. Тол шудонъёс ортчозы 27 февральысен 1 мартозь Алнаш районысь Асаново совхоз-техникумын. Туж умой луысал, та ӵошатсконъёсы котькуд район ыстысал ке ӟеч, быгатыса дасям командазэ. Журналистъёсын пумиськонын пыр-поч йылпумъянъёс лэсьтэмын кылем арын ужамлы. Спортэз гажасьёс ӟеч тодо та удыслэсь югыт но пеймыт интыоссэ, азинсконъёссэ но тырмымтэоссэ. Берло дыре югдур шӧдскымон умояз Пичи Пурга районын. Татысь школаосын, ужась коллективъёсын быгатыса радъяло пӧртэм пумо ӵошатсконъёсты но конкурсъёсты, Удмуртиын нырысьёсыз пӧлын кутӥзы спортэз азинтонъя 2000-тӥ арозь нимысьтыз программа. Ваньмыз ке соослэсь адӟем карысалзы! Тау карон кылъёс вераны кулэ Глазов городысь но Алнаш районысь физкультураез но спортэз улон интыосын пуктыны быгатӥсьёслы. Республиканской конкурсын соос вормизы, табере пыриськозы Всероссийской смотре. Веранэз ӧвӧл: ма быдӟа шумпотон ваё пиналъёсмы понна азбарысь хоккей площадка но мукет спортивной сооружениос. Пиос ӝытлы быдэ отчы кыстӥсько, кырсь ужъёсын вырыны дырзы уг кыльы ни. Жаляса верано, таӵе кичӧлтӥсьёс, нылпиосты ас бордазы биньыны быгатӥсьёс, физкультурая дышетӥсьёс пӧлын но пумен шергес пумиськыло ни. Со бордысен кутске спорт шоры учкон. Зэм, куд-ог регионъёсын ӵошатыса, Удмуртия та ласянь кужымзэ возьматэ на. Биатлонын республикамылэсь данзэ азинтэ Алексей Кобелев, ӝог ветлонын - Герман Скурыгин, велосипедэн ворттылонын - Мария Феклистова, шашкиен шудонын - Алексей Чижов... Таин ӵош шугъяськытэ "кизилиосмылэн" арысь аре шеромемзы. Япониын ортчись Олимпийской шудонъёсы А. Кобелев огназ мынӥз. А. М. Касихин оскытыны выриз ик, спортсменъёсмылы кивоштӥсьёс будо шуыса, но соку ик юам потэ: дорамы быдэ вуыса уз кошке-а палэнэ, ӟечгес, шунытгес инты утчаса? Ватонэз ӧвӧл, уждун тырон, улон- вылон ласянь Удмуртиез азьпалтӥсьёс трос гинэ. Озьы туэ асьмеос ыштӥм куасэн бызьылонъя огзэ кужмо спортсменмес Сергей Крянинэз. Табере со утёз Тюменьлэсь данзэ. Быгатонлыксэ ӝутоз кунгож сьӧрысь спортъя школаосын. Спортсменлэн ужан даурез уго вакчи - соин ик котькудӥз тырше ас понназ бадӟымгес пайда поттыны. Нош асьме дорын та ласянь, зэмен но, югдур ушъяськымон ӧвӧл. Кызьы пусйиз спортъя кун комитетлэн кивалтӥсез, пунэмен тыронъёс трос гинэ люкаськемын нимаз адямиослы но. 7 миллион манет пала - Кобелевлы, 5 миллионлэсь ятыр - Феклистовалы но мукетъёсызлы. Пумен лябӟо нылпи спортивной школаос, базаос, вужме инвентарь. Огъя вераса, толлы быдэ усись лымы гинэ инмысь коньдонтэк ваське на. 1998 арлы республикалэн бюджетэз та удысъя нош ик сюбегатэмын 3 миллиард 700 миллион манетозь. Кылем арын спортэз азинтон кулэ кариз вал 5 миллиардлэсь ятыр. Коньдонлэн тырмымтэез шӧдӥськоз спортсменъёсты дасян вылын, кин но со нош ик уз шедьы дуннеысь ӵошатсконъёсы, кошконо луоз мукет регионъёсы, мукет странаосы. Отын асьмелэсь будэтэм нылъёсмес, пиосмес тросгес дунъяло. Л. МЕДВЕДЕВА. Удмуртия Италилы матын Россия Федерацилэн Президентэз Италие визитэн ветлӥз. Та кунэн 15 документ юнматэмын, соос пӧлын - политикаын, экономикаын, социальной удысын валче ужанъя план, кудзэ 20 ар куспын быдэстыны чакламын. Озьы ик Удмуртилэн но Италилэн кусыпъёссы юнмалозы. Россиысь делегациен ӵош татчы вуылӥз Кун Кенешлэн Тӧроез Александр Волков. Со "Фиат" компаниен "Орбита" автомобильлы двигатель поттон, "Мерлони" но "Олимпия" фирмаосын бытовой техника поттон, Кизнерын химической ож тӥрлыкез быдтон пумысен вераськиз. Кун Кенешлэн пресс-службаез Спорт Ӵошатскизы но, шутэтскизы Япониысь Нагано городын азинско тол Олимпийской шудонъёс. Та нуналъёсы ик Ижевскын ортчизы куасэн бызьылонъя нимысьтыз олимпийской ӵошатсконъёс. Дорамы вуылӥзы Марий Элысь, Пензаысь, Алтайысь ӧлексы спортсменъёс. Удмуртия таяз учыре дасяз кык команда: калыкез дышетонъя но калыкез улон-вылонын утёнъя министерствоос пыр. Куас сюресъёс вылын кужымзэс эскеризы 50 спортсменъёс. Таӵе ӵошатсконъёс Россиын ортчо 1993 арысен, Удмуртиын - нырысьсэ. Асьмелэн сборной командамы пыре кужмоосыз пӧлы. Ижевск кунооссэ умой пумитаз, шуыны луоз. Ӵошатскем сяна, соос понна дасямын вал шутэтскон программа. Ӟеч концерт возьматӥз "Танок" ансамбль, спортсменъёс тодматскизы Ижевск городэн, вуылӥзы Воткинске П. И. Чайковскийлэн музеяз. А. Павлова. ШУНЫТ КЫЛ НО ДУНО Ортчем аръёс, война вакыт... Уноез со кӧшкемыт вакытэз син азязы возё. Нош вунэтод шат сое? Семьяед, нылпиед бордад ке, оло, огдырлы вунэтылод ик, нош дымбырак огнад ке тон? Капчи мылкыдо адямиос таӵе югдурысь но потыны юртто вылэм. Завьялово селоын кӧня ке аръёс ӵоже ужа ини калыкез улон-вылонын утёнъя центр. Арлыдо адямиос, огназы кылемъёс, шуге-леке сюремъёс понна солэн ӧсъёсыз усьтэмын. Ӟеч кылъёсын гинэ верам потэ вылэм отын тыршисьёс сярысь. Нимысьтыз пусйысал Раиса Константиновна Моторинаез. Та кышномурт ми понна вордскемын кадь. Котькудмес со бурдъялоз, серекъятоз, кырӟаны-вераны косоз. Нош мӧйы, арлыдо адямилы шуныт кыллэсь дуноез маке вань на меда. Г. КОНДРАТЬЕВА, пенсионерка. Пӧртмаськоно ӧвӧл Газетлэн одӥг номераз печатласькиз кыл ужпумъёслы сӥзем "Ӧжытак чакласьконо" нимо материал. Мон соин быдэсак огкылысь. Ачим но весь малпаськисько удмурт кылмес пӧртмамзы сярысь. Зэмзэ но, нырысь ик радио но телевизор пыр вераськемзэс валаны секыт луиз. Соос огпол верало но, ужез быре. Нош газетэз, журналэз кие кутыку, ас поннад валаны тыршиськод, малпаськыса-малпаськыса лыдӟиськод. Куке валаськод, куке уд - озьы ик кыле. Соин валче мылкыд но куашка: азьвыл кадь капчи ӧвӧл ни "Удмурт дуннеез" но лыдӟыны. Газетын мед луозы ваньмызлы валамон ӟуч кылъёс но: соослы асьмеос дышимы ни ук. Мон нимаз уг гожты ни мукет лыдӟисьёслэн но курадӟемзы сярысь. Зэмзэ но, поталэ али калык пӧлы, тужгес ик - гуртъёсы. Отысь трос ӵектонъёс вайысалды сьӧрады. Гурт калык басьтэ ук газеттэс но, журналъёсыз но. Нош пиналъёс шонерак шуо: ӟуч газетэз лыдӟыны капчигес. Отчы но олокыӵе но кунсьӧр кылъёс пыртыло ке но ини. Зэм, тросэз ӟучъёс асьсэос но курлало ни сураськем кылзэс. Сьӧраз ик ортчиськоды, мултэссэ куасалтӥськоды. Ог куамын-ньыльдон аресъем куд-ог удмуртъёс ас кылзэс школаын ӧз дышетэ ни ук. Нош телевидение, радио но печать югдурез эшшо шугомыто. Та уж борды шуак кутскыны уг яра вал, дыр. Дыр ачиз возьматоз. Дунъялоз но, дышетоз но, валэктоз но. АННА АБРАМОВА. Пичи Пурга ёросысь Пугачёво посёлок. Ош кузё тодмо Валлян Пичи Пурга ёросын ортчиз газетмылэн праздникез. Соку ик тодмо луиз гожтӥськисьёслы сӥзем ошмылэн кузёез. Бадӟым шуд усиз Арлан гуртысь Иван Демаковлы. Ужысь ветеран газетмес пичи дырысеныз басьтэ. Та ужрад сярысь пыр-почгес тододы пятницае "Улон-вылон" передачаез учкыса но суббота номермес лыдӟыса. И. Кричев. ЭШМЕС БУРЕ ВАЙЫСА Улонысь кошкиз Виталий Ильич Николаев, писатель, поэт, журналист, нылпиослэн яратоно эшсы. 1940 арын 1 сентябре соин ӵош ми мынӥм Ижевскысь 30 номеро школае, Виталий - 1-тӥ "а" классэ, мон - 1-тӥ "б" классэ. Нырысьсэ адӟем бере ик, Виталий маиныз ке но бордаз кыскиз. 8-тӥ классысен милемыз огазеязы. Класэнымы кивалтӥсе пуктӥзы Софья Александровна Кривилеваез. Огаз классной часын монэ косӥзы эшъяськон сярысь ас малпанъёсме вераны. Мон умой-умой дасяськи. Вераськонме йылпумъяй Тарас Бульбалэн кылъёсыныз. Классмы сярысь ке верано, куспамы туж тупаса, огкылысь улӥм. Витя "витьёслы" гинэ дышетскиз. 9-тӥ классысен Николаевъёс улыны Глазове выжизы. Виталий отысь школаез зарни медален йылпумъяз. Озьы ик умой оценкаосын быдтӥз Москваысь государственной университетэз. Яркыт пытьы кельтӥз Виталий Ильич Удмурт телевиденилэн ортчем сюресаз, огез устоез диктор но режиссёр луыса. 80-тӥ аръёсы милям районамы Че Гевара нимо интернациональной клуб ужаз. Соин кивалтыкум, ӵош дышетскем эшме одӥг пол гинэ пумиськонъёсы ӧй ӧтча. Нырысетӥ ветлыкуз, со пыр-поч тодматӥз Татьяна Барамзина сярысь гожтэм повестеныз. Мукет дыръя тодматӥз "Навеки с Россией!" выль гожтэм кылбуреныз. Юрттӥз милемлы литературно-музыкальной композиция дасякумы но. Пиналъёсты радио пыр чылкыт вераськыны дышетӥз В. И. Николаев. Эшелэн улонысь кошкемез сярысь секыт иворез кылӥ телевизор пыр. Берпуметӥ сюрес вылаз келяны люкаським ваньмы. Ӟеч лу, Витя! Тынад тусбуед, вераськем, серекъям куараед пыраклы кылёз милям сюлэмъёсамы. Л. КРИВИЛЕВ. Та сярысь гожъямын вал Висись сярысь сюлмаськыса "Удмурт дуннеез" лыдӟисьёс ӧз вунэтэ на, дыр, Уваысь райбольницалэн инфекционной отделенияз алама югдур сярысь гожъямез. Кык ар талэсь азьло со интыяськемын вал куашкан калэ вуэм пу юртын. Вӧлдэтэз сисьмемен, одӥгзэ палатаез пытсано луизы. Куазь зорыку, вӧлдэтысь кык интыетӥ ву бызиз. Отделениын медикъёслы но висисьёслы одӥг туалет сяна ӧй вал. Ӵужектонэн висисьёслы педло потаны ведра пуктылӥзы. Статьяез быдэс коллективен лыдӟизы, эскеризы, котькудӥз ужась та пумысен мылкыдзэ вераз. Дэмламын вал отделенилэн заведующиезлы П. П. Петровлы ёрослэн администрацияз мыныны но юрттэт курыны. Зэм, талэсь азьло но Павел Павлович отчы трос пол вуылӥз. Солэсь верамзэ кылзылӥзы но шуылӥзы: - Валаськом: югдур секыт. Коньдон уг тырмы. Кӧня ке арзэ чидано луоз. Таяз лыктэмаз П. П. Петров шоры мукет синмын учкизы. Эмъяськон юртэз эскерыны кылдытӥзы нимысьтыз комиссия. Кӧня ке нунал ортчыса, выльдэмын вал юртлэн липетэз, вӧлдэтлэн куд-ог интыосыз. Соку ик дасяны кутскизы выль юрт пуктыны проектно- сметной документация. Собере, уж борды басьтӥськиз "Глория" лэсьтӥськон фирма. Проект улыно-вылыно юрт ӝутыны дасямын, нош сомында коньдон шедьтыны луонлык ӧвӧл. Висисьёслэсь лыдзэс чакласа, кенешизы но больницалэсь юртсэ одӥг этажен ӝутӥзы. Зэм, улыно-вылыно юртлы проект дасямын вылэм кемаласьгес ик. Нош улон воштӥськемен воштӥськизы дунъёс но трос мукетыз. Кылсярысь, азьло аръёсы кӧткылен (дизентерия) висисьёс ке трос вал, али паськыт вӧлмемын шырвисён (геморрагической лихорадка). Та черен тужгес трос курадӟисьёс Уваын, Каркалайын, Рябовоын. Выль проектъя пуктэм юрт тужгес но тупамон паласькись висёнъёслэсь эмъяськисьёслы. Палатае пырыку, нырысь-валысь пичигес висъетэ, мисьтаськон интые,шедиськод. Киостэ миськыса, ӧсэз усьтӥськод но сюриськод палатае. Татын - кык койка, кык тумбочка, кык пукон, ӝӧк. Выж быдэсак шобыртэмын линолеумен. Палаталэн эшшо одӥг ӧсэз вань. Сое усьтыса вуиськод ваннаен висъетэ. Та боксын ик вань туалетэз, кыре потан ӧсэз. Югыт сёто дневной лампаос. Мебель азьвылэз ик ке но, со выльдэмын, тӧдьы басмаен шобыртэмын. Висисьёслы умоесь условиос кылдытэмын, нош медицинской ужасьёслы ас удыссэс ӟеч- ӟеч радъяны инты ӟоскытгес ик: 16 ужасьлы одӥг комната гинэ висъямын. Медсестраослы комната но ӧвӧл. Кылиськон-дӥсяськон интылы нимысьтыз боксэз висъяно луиллям. Бытовой комнаталы но инты тырмымтэ. Палатаосын радиолы розеткаос вань. Сое кыскыны заявка но кемалась сётэмын. Ӝоген та уж быдэстэмын луоз. Шуггес телевизор ласянь. Укмыс палатае кумыс телевизор кулэ. Одӥг антенна но пуктэмын ӧвӧл. Висись гуртысьтыз ке но телевизор вайытӥз, учкыны сое уз быгаты. Огдыре больницаын 22 адями, йӧнатскыны быгатэ. Ветлон нуналам отын эмъяське вал 15 мурт. Куазь толалтэ чутрак кезьыт кариськылэ. Таин валче ангинаен но, пыэдэн но висисьёс шуак гинэ трос луыны быгатозы. Татысь медицинской ужасьёс пӧлысь данакез бадӟым опытэн, вылӥ квалификациен. Озьыен, луоно вылэм та больницалэсь юртсэ бадӟыматыны, татын ик туберкулёзэн висисьёсты но эмъяны.16 медиклы 22 муртэ гинэ эмъян бюджетлы дуно усе, дыр. Али Селта, Сюмси, Вавож но Ува ёросъёсысь висисьёс та черлэсь Ижевскын эмъяськоно луо. Больницалэн фундаментэз чакламын кык этажен ӝутыны. Малпаськыны кулэ, дыр, кыкетӥ этаж сярысь. Соку туберкулёзлэсь алямзэ дугдытыны умоесь луонлыкъёс кылдысалзы. Нош югдурез быдэсак чаклано ке, выль инфекционной больницалы вылӥ дунъет сётыны луоно. П. Васильев. СТАНОКЪЁС СЫНОМО, ЛУДЫН ЖАГ ТУРЫН ПОТЭ Берло аръёсы выльдӥськонъёсты калык нырысь шумпотыса пумитаз но, со ваньмызлы бадӟым шуд уг вайы. Тани мынам эше, кинэ мон тодӥсько ини ог кызь ар, вань улонзэ ужаз Ижысь электромеханической заводын, нош реформаос кутскем бере, солы трос толэзен уждун тыремысь дугдӥзы, бӧрысь быдэс арлы шутэтскыны (отпуске) ыстӥзы. Та дыр куспын, ас ужзэ зол яратӥсь но тодӥсь адями, пырак воштӥськиз. Со быгатонлыксэ ыштӥз, азьтэммиз, лекомиз, кышноез но сое семьяысьтыз улляз. Табере та кын куртчон кадь воргорон улэ нэнэезлэн пенсиез вылын. Таӵе югдуре шедемын трос адямиос. Соос тужгес уно асьме Удмурт республикаямы. Реформаос кутскем бере, ож тӥрлыклы кулэяськонъёс (заказъёс) кӧня ке поллы кулэсмизы. Кызьы асьмеос тодӥськом, шаерамы заводъёсын 80 процент пала ож тӥрлык поттӥське вал. Табере со нокинлы кулэ ӧвӧл ни. Огласянь умой кадь. Но элькунлы, калыклы со туж трос шуг- секытъёс ваиз. Заводъёсмы мукет вузъёс поттонэ выжыны чаляк уг быгато, соин ик тросэз ужасьёс мултэс луо, нош ужасьёсыз уно толэзьёс уждун уг басьто, семьяоссы сютэм уло. Заводысь станокъёс пумен вужмо-сыномо. Гурт хозяйство но заводъёс рос-прос уг ке ужало, ваньбур ке уг потто, кытысь уксё луоз? Озьы ик социальной удысын ужасьёс но ялан уксё басьтытэк уло. Куанермизы дышетӥсьёс, эмъясьёс (врачъёс), культура удысын ужасьёс. Республикаысь профсоюз кивалтӥсьёс сое котьку син азязы возё. Соослэн сюлмаськемзыя, шаерамы трослы ӧз будэ квартиралы, телефонлы, шунытлы но электрокужымлы дунъёс. Таӵе югдурен валче ик Рессовпрофлэн кивалтӥсьёсыз калыкез люказы "Россия" кинотеатре. Отчы ӧтемын вал Кун Кенешысь но Удмурт Правительствоысь кивалтӥсьёс, озьы ик бадӟым предприятиослэн директоръёссы. Рессовпрофлэн тӧроез Евгений Орлов вераз, 1997 арын чаклам мында продукция поттымтэ, коньдонлэн кужымез лябӟе. Дышетӥсьёслэн, врачъёслэн, культура удысын ужасьёслэн но Правительстволы осконзы быре ни. Та удысын ужасьёслэн асьсэлэн но янгышсы вань, профсоюзъёссы куд-ог районъёсын ляб ужало, ас калыксылэсь правооссэ уг утё. Ас интызэс ышто ни бадым предприятиосысь профсоюзъёс. Ог-огзэс валаса ужало Сарапулысь, Играысь но Ижысь профсоюзъёс но кивалтӥсьёс. Соин ик та ёросъёсын ченгешонъёс ӧжытгес луо. Уждун тырон нырысь интыын мед луоз, сое сётэм бере гинэ налог тыроно. Та нуналэ, 2 феврале, "Россия" кинотеатрлэн бадӟым залаз ог 1500 адями люкаськиз. Лыктэмын вал вань районъёсысь, городъёсысь, республикаысь, заводъёсысь но колхозъёсысь кивалтӥсьёс. Трибуна сьӧры пото пӧртэм удысъёсын тыршисьёс. Тани автозаводысь слесарь Юрий Ефимов шуэ, миым чылкак 8 сюрс пала гинэ автомашина бичам. Заводэз пыд йылаз султытыны малпало вал американецъёс, французъёс, немецъёс, японецъёс, но юрттэт ӧз вуы. Предприятиын "Орбита" автомобиль лэсьтыны кутскизы вал, нош солы двигатель уг тырмы. Уфаысь завод сое дыраз но тырмыт уг сёты. Озьы цехъёс толэзен-толэзен уг ужало, автомобиль лэсьтӥсьёс пичи уждунзэс но дыраз уг басьто. Гурт хозяйствоын ужасьёслэн сюлэмшугъяськонзы сярысь вераз Кизнер районысь Клавдия Курбатова. Али республикаын трос сюрс гектар музъемъёс кизьытэк кылё, отын жаг турын будэ. Малы ке шуоно, техника вужмемын, ӵем тӥяське, эстӥськон но машина вӧй уг тырмы. Гуртын ужасьёс будэтэм ю-няньзэс но вузаны уг быгато. Пудо сиён тырмымтэен, скалъёсты, парсьёсты чик куайытытэк вандоно луэ. Али музъем ужасьёслэн но пудо сюдӥсьёслэн уждунзы, вуж уксёен вераса, кык сю сюрс манетлэсь ӧжытлы гинэ трос. Гуртын улӥсьёсты ас хозяйствозы гинэ сютэм улонлэсь уте на. Транспортын ужасьёслэн нимынызы вераськиз Сарапул городысь Сергей Обухов. Республикаын 60-90 процентэз автобусъёс вужмемын, отын калыкез но нуллыны кышкыт. Соин сэрен маршрутъёсты но пытсано луэ. Мынӥсь-ветлӥсьёслы витьтон куать пумо льготаос сётэмын. Озьы удыс тырмыт уксё люканы уг быгаты. Дунтэк ветлӥсь калыклэн лыдыз арысь аре будэ. Нош транспортникъёслы уждун тырон 3-4 толэзьлы ӝега. Югдур капчи ӧвӧл калыкез дышетон, тазалыкез утён но культура удысъёсын. Ижевсклэн мэрез Анатолий Салтыков ивортӥз, вань предприятиослэн юртъёссы городлы сётэмын шуыса. Али городысь бюджет чотын 70 процент квартира дун тыриське, 60 процент - транспорт дун, 80 процент - нылпи сад дун. Азьланяз пыӵал тӥрлык поттон арысь аре кулэсмоз, 2000 арозь куиньмослы, бӧрысь уката трослы. Соин ик заводъёслы ӝоггес выжоно калыклы кулэ луись вузъёс поттонэ. Арлэн пумаз ӧжытак интыысьтыз "вырӟиз"" "Ижмаш" АО. Автозаводын Южной Кореяысь ваем ёзъёслэсь кык сю автомобиль бичамын ини. Туэ та лыдпус шӧдскымон будыны кулэ. Машина но пулэсь арбериос поттонэ мыло-кыдо юрттэт (инвестициос) утчано. Налогъёсты тыроно уждун сётъям бере гинэ. Нылпи будэтэм понна пособиез туэ но ог люкетсэ вузъёсын сётъяно луоз. Егит специалистъёслэсь уждунзэс будэтыны кулэ. Умой-умой эскероно транспортэн ветлон льготаосты. Кун Кенешлэн Тӧроезлэн нырысетӥ воштӥсез Владимир Агашин шуиз, промышленность ужатэк, бюджетын уксё ноку уз луы. Уждун но нылпиослы пособие сётон бюджетын нимаз ёзэтэн пыртоно. Бюджетлэсь быдэсъяськемзэ ялан син азьын возёно. Ӝоггес вуттоно Правительство, профсоюз но предприятиос куспын огкылэз. Н. ВОЗИСОВ. СТАЛИНГРАД - ВОРМОНЛЫ ПАМЯТНИК Пумен ӧжыт кылё асьме пӧлын ожысь но ужысь ветеранъёс. Ар ӵоже нош ик кулэсмизы Сталинград понна ожмаськисьёс но. Сталинград понна ожмаськисьёс пӧлын Ижевскын 170 мурт гинэ кылемын. Соос "Металлург" культура дворецын егитъёсын пумиськизы. Мыным шуд усиз война бере Волгоградэн тодматскыны. Выль город сярысь одӥг поэт тазьы гожтӥз: "Луоез гудӥд ке, со ӵуж уз лу, геройёслэн виренызы сьӧдо-гордо луоз". Сталинград ожмаськонлэн тылӝуэз быдэс странаямы пыӵаз. Удмуртиысь ужаса улӥсьёс секыт ожлы юрттон понна, коньдонзэс но дӥськутъёссэс сётӥзы. Война йылпумъяськем бере, ньыльдонэтӥ аръёслэн пумазы Сталинградлэн лымшор палаз кутскизы Волго-Донской судоходной канал лэсьтыны. Городын ӝоген выль ульчаос кылдӥзы. Одӥгезлы ульчалы Удмуртской ним сётӥзы. Кызьы тодмо, Сталинград ожын 90 процентэз улон юртъёс куашкатэмын вал. Ваньзэ выльысь лэсьтоно луиз. 1948-тӥ арын феврале комсомоллэн ӧтемезъя кутскиз Сталинградэз ӝутон. Та кичӧлтонлы нырысь ик вазиськизы Кизнер механизированной лесопунктысь ужасьёс. Соос феврале, кык воскресник ортчытыса, Сталинградлы келязы 600 кубометр нюлэс. Городэз ӝутонэ лыктэмъёс пӧлын тужгес но сюлмысь тыршиз Грахово районысь нылашлэн Мария Суслопаровалэн бригадаез. Егит лэсьтӥськисьёс нуналлы быдэ нормазэс мултэсэн быдэсъязы. Городысь универмаглэн подвалысьтыз 1943 арын 31 августэ фельдмаршалэз Паулюсэз штабеныз ӵош пленэ басьтӥзы. Татысь площадьлэн Ялан ӝуась тыл дораз одӥгаз шайгуын ватэмын Советской Союзлэн Геройёсыз генерал-майор В. Г. Каменщиков, Испаниысь Коммунистической партилэн кивалтӥсезлэн Доллорес Ибаррурилэн пиез - пулемётной роталэн командирез гвардиысь капитан Румен Руис Ибаррури, бигер артиллерист капитан Х. Ф. Фаттяхутдинов. Котькинлэсь сюлэмзэ вырӟытэ 102 метръем ӝуждалае интыяськем Мамаев курган. Татын война дыръя тужгес но ӟырдыт ожъёс ортчизы. 104 нунал но уй та вырйыл понна нюръяськизы. 1967 арын 15 октябре Мамаев курганын Сталинградлэн геройёсызлы сӥзьыса, памятник-ансамбль пуктэмын вал. Волгоградын улӥсьёс уг вунэто калыклэсь ӟеч ужъёссэ. Юнме шат та город адямиосыз магнит сямен бордаз кыске. В. ЧЕРНОВ. Ма туннэ сюлмаськытэ ГУЖЕМ КЫДЁКЫН НА, НОШ ОМЫР ПӦСЯ НИ Лыдӟисьёс тодо ини: кык толэзь ортчыса, асьме элькунын быръёнъёс ортчозы. Асьмеос ёросъёсын кылдытом кун властьлэсь ёзъёссэ. Озьы чакламын Борис Ельцинлэн Удмуртия пумысен Указаз но асьме парламентэн берло толэзьёсы кутэм документъёсын. Городъёсын быръемын луозы аскивалтонъя органъёс но мэръёс. Нош интыосын (гуртъёсын но посёлокъёсын) аскивалтонъя ёзъёсты кылдытыны чакламын туэ августэ. Республикаысьтымы ӝыныез пала калык шоркарын улэ бере, тулыс вылтӥ тужгес но кужмоез нюръяськон, валамон ини, Ижын ӧръяськоз. Городысь Думае но мэре кандидатъёсты пусъён ӧз кутскы на ке но, али тодмо ни: пӧртэм движениос, партиос, огазеяськонъёс "сайкамын", соос выльысь но выльысь эскеро фамилиосын списокъёссэс, пыр-поч дасясько политической ожмаськонлы. Кыӵе бен кужымъёс таяз учыре куспазы вожвылъяськозы, кинэ соос поттозы сцена вылэ? Куд-ог адямиослэсь нимъёссэс шараяны луэ ни кадь. Аслаз туала ужан интыяз одно ик кыльыны тыршоз Анатолий Салтыков. Солэн вань командаез, вань аппаратэз, вань кусыпъёсыз. Бырйисьёсын тодматскыны кулэез ӧвӧл: сое ваньмыз тодо. Но уноез эшъёс Анатолий Иванович понна куаразэс сётозы шуыны нокызьы но уг луы. Мугез тодмо. Ньыль ар ӵоже Ижевскын ӟеч воштӥськонъёс ӧз луэ уго. Солэсь но ортчыт: данак тодметъёсъя асьме шоркар бере кылиз бускель бадӟым городъёслэсь. Казане, Уфае, Екатеринбурге ветлӥсьёс ымзэс усьтыса верало отысь урамъёслэн, вокзалъёслэн, транспорт дугдылон интыослэн чеберскемзы сярысь. Нош асьмелэн? Коркаослэсь вылтуссэс, пушсэс шулдыртон сярысь веранэз ӧвӧл. Сюрес вылысь лымыез гинэ но сузяса ум вуттӥське. Шӧдскымон сюбегаз улон юртъёс лэсьтон, куашкамын-дугдытэмын данак предприятиос. Вузкарон интыослэн гинэ лыдзы чутрак будӥз. Соос табере котькуд сэрегын. Но городын улӥсьёс пӧлысь уноезлэн сыӵе азьёсты адӟемзы ик уг поты - уго синъёс палёмо, нош маке басьтыны амал ӧвӧл. Собере мукетсэ но пусъёно. Вылӥ кивалтӥсьёсмы кема дыр ӵоже куспазы ченгешыса улэмен, калык пӧлын таӵе но малпан кылдэмын ни: а-а-а, асьме кузёлы городлэн сюлмаськонъёсыз кулэ ӧвӧл, со властьлы гинэ ёрмыса улэ... Соин ик Анатолий Салтыковлы пуконзэ ас улаз кельтыны шуг луоз. Мэр кариськемез потэ мукет тодмо адямилэн но. Вераськон мынэ Россия Федерациысь Кун Думалэн депутатэз Андрей Солуянов сярысь. Кык ар талэсь азьло со секыт нюръяськонын вормыны быгатӥз кужмо политикъёсты Владимир Подопригораез, Галина Климантоваез, Николай Сапожниковез. Егит, учкымон воргорон Ижын улӥсьёслы тодмо луэ депутат луэмезлэсь азьло лэсьтӥськон удысын ужаменыз. Со кылдытӥз "Град" компания, кудӥз табере столицаын паськыт радъя улон но мукет юртъёс лэсьтонэз. Солуяновлэн вань етӥз юрттӥсьёсыз, вань аслаз фондэз (озьыен, коньдонэз), вань Москваын кужмо эшъёсыз. Озьы ке но, бырйисьёс пӧлын вӧлмись вераськонъёсъя, парламентлэн депутатэзлэн ужез город йырлэн сюлмаськонъёсызлэсь висъяське ик. Быгатоз-а егит адями секыт ныпъетэз нуыны, тугаськем бугоре биниськем ужпумъёсты быдэстыны? Кин тодэ. Андрей Солуяновен одӥг радын сылэ, шуыны луоз, Сергей Чикуров - Кун Кенешлэн но Городысь Думалэн депутатэз, "Город" финансово-строительной компанилэн кивалтӥсез. Ӧд вунэтэ на, дыр, со мэр луон понна нюръяськонэ ньыль ар талэсь азьло но пыриськиз но кыкетӥ интые потӥз. Али Сергейлы 32 арес. Ижын потӥсь газетъёсъя чаклано ке, солэн нимыз мукетъёсызлэсь ӵемгес кылӥське. Егит мурт яке ачиз валаз, яке сое кин ке но ас вакытаз индылӥз, вылӥе ӝутскон понна, одно ик оскымон пресса кулэ шуыса. Озьы-а, тазьы-а, но тодмо огез: ньыль ар куспын Чикуров трос коньдонзэ висъяз выль газетъёс кылдытонэ, эшъяськиз кужмо журналистъёсын. Тодады вае ай, "Неделя Удмуртии" газетлы, уногес лыдӟисьёсты со котыре огазеян вылысь, кык комнатаен копак выль квартираосты приз чотын сётэмзэ ик, куке одӥгезлэн дуныз кемалась ини сю миллион (вуж сямен вераса) манетлэсь ятыр. Кин тодэ, оло, ӵапак озьы ужамез юрттоз солы тужгес но кысык вакытэ мукетъёссэ азьпалтыны. Пушкин урамысь горд юртысь бадӟымаз кабинетэ пырыны пумит ӧвӧл, пе, Андрес Вальме но. Военно-политической училищеез йылпумъям мурт политика котырын далай гинэ поръя ини. Куке но со вал Владимир Жириновскийлэн Удмуртиысь "ӧрӟиез", собере герӟаськиз мукетъёсыныз депутатъёсын. Ассэ ӝыны эстон, ӝыны ӟуч шуись егит воргорон берло дыре укыргес тодмо луиз "Золотая провинция" газетэн валлин. Со лыдъяське та "ӵуж", мукет сямен вераса, бульварной изданилэн валтӥсь редакторез. Олокыӵе но зэмос но малпам учыръёс сярысь супыльтонъёсты печатлась газет огшоры лыдӟисьёслы кельшиз кадь, куд-ог йӧно адямиос калык азьын со шоры киынызы шонтэм каро ке но, асьсэос одӥг номерзэ кельтытэк лыдӟо. Соиз озьы. Но, малпасько, йыг-йыг муртъёс та адямилы уз дурбасьтэ. Ма, аслыз но Вальмелы быръёнъёсы пыриськон реклама понна яке мукет кандидатлы кызьы ке юрттон вылысь гинэ кулэ кадь. Нимысьтыз вераськон Валерий Загайнов сярысь. Тазэ адямиез мэре кандидатэ дэмлало ни уно коллективъёс. Кылсярысь, Устинов ёросысь дышетӥсьёс. Уго выль район кылдэм бере, со отын исполкомлэн кивалтӥсез луыса ужаз. Валерий Федоровичез мэрлэн интыяз адӟемзы потэ Ижысь нефтяникъёслэн но, НГДУ-ысь вить сю пала адямиос, кенешъёс ортчытъяса, решение кутӥзы: Загайновез куроно кандидат луыны. Малыез валамон. Со куке но вал та управленилэн кивалтӥсезлэн воштӥсез, ассэ возьматӥз умой ласянь. Редакцие кӧня ке жингыръясьёс но вал ни. Юаллясько, кин, пе, со, кыӵе выжыысь, кыӵе сямъёсыз. Кандидат кариськиз ке, биографизэ паськыт возьматозы ай. Вакчияк тазьы вераны луоно. Вордскемын 1945 арын Киров улосысь Котельнич городын. Ӟуч. Ужамын пӧртэм интыосын. Али луэ шаерысьтымы жилищно-коммунальной хозяйствоя огазеяськонлэн валтӥсь директорез. Кун Кенешлэн депутатэз, быръемын Селта ёросысь округъя. Хозяйственной ужез ӟеч тодэ. Городлэн сюлмаськонъёсыз но солы тодмотэмесь ӧвӧл. Тӥни сыӵе адями. Кыӵеесь тырмымтэосыз? Соос котькуд адямилэн сямен ик вань, вылды. Кылсярысь, Ижын улӥсьёс пӧлын сокем тодмо луымтэез. Уго та дырозь со, кызьы шуо, бадӟым политикае туж ик ӧз пыриськы, тросгес выриз огъя улон-вылонэн герӟаськем ужпумъёсын. Кинлы ке, оло, уз кельшы палэнын вордскемез. Но со дыре ик чаклано ке, Ижын дас ньыль ар ӵоже улэ ни. Туннэ-ӵуказе, оло, вераськонъёсын выль фамилиос но кылдозы на. Кылсярысь, кинэ ке но, оло, дэмлалозы коммунистъёс. Кызьы шуо, дыр возьматоз ни. Ма, собере вуоно кандидатъёс сярысь вераны но вазь на. Но ваньмыз ик соос регистрация пыр ортчыны, нош со понна бырйисьёслэсь ичизэ вить сюрс куараоссэс бичаны кулэ. Мылкыд карисез понна со шуг ӧвӧл, вылды. Быръёнъёсъя кампания нуналмысь кужмоя. Ижын но, быдэс республикаын но омыр "ӟырда". Мэр луон понна нюръяськон юн но адямиез жалясьтэм оръяськыны турттэ кадь. Ми тыршом та ужрадэз син азяды возьыны. Иван ЛЕБЕДЕВ. А. М. Никитинэз Удмурт Республикаысь югдурез утёнъя министрысь мозмытон сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Никитин Александр Макаровичез Удмурт Республикаысь югдурез утёнъя министрысь мозмытоно. Удмурт Республикаысь Кун Кенешлэн Тӧроез А. А. Волков. 1998 арын 6 феврале. � 582-И В. Ф. Щербаковез Удмурт Республикаысь югдурез утёнъя министре юнматон сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Щербаков Владимир Филипповичез Удмурт Республикаысь югдурез утёнъя министре юнматоно. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 6 феврале. � 583-И Ижысь думалэн сессиез бере Аналтэмын-а егитъёс? Быдэсак озьы шуыны уг луы. Но туннэ егитъёсын ужан, соослы ӟеч сямъёс пыӵатон котькинэ сюлэмшугъяськытэ, озьы ик Ижысь гордумалэсь депутатъёссэ но. Мукет ужпумъёсын ӵош думалэн 33-тӥ сессиез рос-прос учкиз "Ижысь егитъёс" программаез. Та кулэ документ бордын кема ужазы, Программа оглом урод ӧз ке но пӧрмы, депутатъёс умоесь ӵектонъёс но дэмланъёс сётӥзы. Кинъёсты бен асьмеос егитъёсын лыдъяськом? Кинлы 14-ысен 30 арес тырмемын ни. Соос пӧлысь одӥг куиньмосэз ужа, уноез шор ёзо школаосын но ПТУ-осын дышетске, 25 сюрс студентъёсмы. Туннэ жаляса верано луэ, тросэзлэн егитъёслэн тазалыксы ляб, 30 процентэз армие басьтыны уг яра. Берло дыре егитъёс пӧлын паськыт вӧлмо юон, наркомания но мукет сыӵе выллем урод сямъёс. Со бен юнме шорысь ӧвӧл. Егитъёс пумен ичигес пырисько спортэ, нылпи спортивной школаос пытсасько. Егитъёсын тыро-пыдо ужасьёс ӧвӧл ни. Котькытын сямен соос асэрказы лэземын. Уродэзлы туж зол дышето пӧртэм телепередачаос. Соос вӧлмыто адямиез вӧсь, сантэман карон амалъёсты. Секс, порнография чагыр экран вылысь уг бырылы. Тӥни тае депутатъёс нимысьтыз пусйизы но огкылысь шуизы, малы, пе, мукет странаосын (США, Германия) телевидение сыӵе фильмъёсты уг возьматы, нош асьмелэн лэземын. - Берло дыре асьмеос ужась адямиез (слесарез, андан ӵыжатӥсез, нянь пыжисез, сантехникез) ум адӟиське ни, - ватсаз Галина Репина. - Школаосын родинамес гажан мылкыд уг пыӵатӥськы, отын музейёс ньӧмыз понна усьтылэмын. Егитъёс городмылэсь историзэ но уг тодо, тодэмзы но уг поты. Егитъёсты ужаны ум дышетӥське. Нош сотэк кызьы ӟеч улонэ вуом. Егитъёс - ӵуказе нуналмы. Соос сярысь нуналмысь сюлмаськоно. Нош депутат Александр Щербаков программалэсь умой палзэ пусйыса, уно шекъёссэ но шараяз. Кылсярысь, Александр Иванович пырак шуиз, отын, пе, уг адӟиськы национальной культураез азинтон-ӝутон люкетэз. Та уж шоркарын аналтэмын, шуыны луоз. Туж ичи фольклор ансамбльёсмы, музейёсмы. Ваняз но патриотической уж уг нуиськы. Программалэсь сюбег интыоссэ вераса, депутатъёс пырак шуизы, телевидениын, пе, дугдоно ни боевикъёсты но сыӵе выллем кинофильмъёсты возьматъямысь. Соос, пе, егитъёслы номыр ӟечсэ уг сёто, ог-огзэсты вузаны, вӧсь карын гинэ дышето. Солэсь урод бервылъёссэ туннэ вераны ик шуг. Адямиосты сьӧсь амалъёсын быдтон, кышномуртъёсты сантэман шат соин герӟаськемын ӧвӧл? - Асьмеос производстволэсь палэскиськом, - пусйиз Шамиль Итешев. - Калык ваньбур, вузъёс поттыны кулэ. Егитъёсты нырысь ик ужез яратыны дышетоно. Школаосын ужан профессиос сётонэз выльдоно. Ведь ваньзэ нылъёсты вуриськыны, керттӥськыны, пиосты пул вӧлыны гинэ уд дышеты. Куд-огез шуиз, программаын, пе, уг шӧдӥськы администрациысь калыкез дышетонъя управленилэн интыез. Егитъёслэн общественной организациоссы ӧвӧл ни бере, та ужез кин ке но быдэсъяны кулэ ук. Егитъёс общественно-политической улонэ мылысь-кыдысь мед пыриськозы. Ӝутоно рользэс дышетӥсьёслэсь но иворъёсты вӧлмытӥсь ёзъёслэсь. Анатолий Салтыков дэмлаз, программаын, пе, мед адӟиськоз инвалидъёслы, анай-атайтэк кылемъёслы юрттэт сётон. Ӧвӧл вунэтоно егит семьяосты. Ведь ваньмыз уг но юы, наркоманъёс но уг луо. Ӟечез ворме ай. Программа инъетлы кутэмын. Думалэн сессиез озьы ик эскериз Иж администрацилэн 1997 арын ужамез сярысь отчётсэ. Та ужпумъя ивортон лэсьтӥз нырысетӥ вице-мэр Вячеслав Засыпкин. Оглом, шоркар миым урод ӧз ужа, йылӥз промышленной продукция поттон. Куд-ог предприятиос ("Буммаш", "Ижсталь", "ИЭМЗ") уногес ваньбур поттӥзы. Тани будӥз андан ӵыжатон, мотоциклъёс, радиоприёмникъёс, насосъёс, линолеум поттон, кӧня ке йылӥз палэнысь юрттэт (инвестициос), огсыр ужа город хозяйство (коммунальникъёс, электротыл, газ, шуныт сётӥсьёс) но мукетыз. Азинске капчи но нюлэс промышленность. Огъя вераса, миым, валля арен ӵошатыса, промышленной продукция поттон 5 процентлы йылӥз. Кык предприятиослы - "Буммаш" но "ИЭМЗ" АО-ослы инвестициосъя кредит висъямын. Нырысез со коньдонэн андан ӵыжатон удыссэ выльдэ но ватсаса 200 ужан интыос кылдытэ. Электромеханической завод уксёзэ висъя лазерной установкаос поттонэ. Городын каллен мынэ лэсьтӥськон. Миым 1000 миллиард манет гинэ кутэмын. 9 толэзьскын 387 квартира вуттэмын, яке 1996 арен ӵошатыса, 73,9 процент луэ. Та удысэз азинтон пумысен малпанъёссэс веразы Виктор Тарасенко но мукет депутатъёс. Г. РОМАНОВ. ЖКХ-лэн ТПО-езлэн генеральной директорезлы, Удмурт Республикаысь Кун Кенешлэн депутатэзлы В. Ф. Загайновлы вазиськон Гажано Валерий Федорович! Матэктэ Ижевск городлэсь мэрзэ быръён. Ижевскен калыкез валтыны-ӝутканы быгатӥсь, городлэсь шуг-секытъёссэ тодӥсь, дышетон удыслэсь - азьланезлы осконлэсь - ужпумъёссэ валась адями кивалтыны кулэ. Ми малпаськом, таӵе куронъёслы тужгес но тупаськоды тӥ, Валерий Федорович, угось Устинов ёрослы йыр луиды солэн тужгес но секыт вакытаз. Ми, Ижевск городлэн Устинов ёросысьтыз 50 номеро школаысь дышетӥсьёс, вазиськиськом тӥледлы куронэн: Ижевсклэсь мэрзэ быръёнэ пыриське, кандидат луыса. Тӥляд сюлмаськеменыды, ёросамы лэсьтэмын но пайдаё ужало школаос но нылпи садъёс, пиналъёслы поликлиника, уно магазинъёс. Ми тодӥськом, тӥляд уно тодон-валанъёсты, профессиеныды герӟаськем быгатонлыкъёсты, ужамды понна тӥ котьку но кыл кутӥськоды, адямиос сярысь сюлмаськиськоды, соослы одно ик юрттыны тыршиськоды. Ми оскиськом, таӵе сямды быръёнъёсын вормыны но яратоно городмылэн дэлетэз понна тыршыны инъет кылдытоз. Малпаськом, милемлы дурбасьтозы городысь дышетӥсьёс, предприятиос, ветеранъёс но интеллигенция. Кутэмын коллективлэн ӧтчамаз 1998-тӥ арын 5-тӥ феврале. Ӧтчаме ветлӥз 96 адями. Коллектив куремъя - ӧтчамлэн тӧроез И. А. Клименко, ӧтчамлэн секретарез - Н. В. Емельянов. Шӧкыч Отысь-татысь Ю кӧня мылыд потэ Ӟеч кузьым дасяз Саратовысь курытсэ ӟистыны яратӥсьёслы городысь кивалтэт. Табере милициын ужасьёс урамысь кудӟем муртэ сазьтӥськонние уз нуэ ни. Доразы келялозы. Шиш тӥлед гольык апай! Ингушетилэн президентэз Руслан Аушев аксакалъёслэн куремзыя "Спид-инфо" газетэз но "Плейбой" журналэз республикаын вӧлмытонэз алон сярысь указ поттӥз. Витиськом жингыртэмдэс Кышкытлыклэсь утиськонъя федеральной службалэсь Удмурт улосвылысь управленияз (УФСБ) берло дыре ялан тросгес вуо гражданъёслэн пӧртэм правонарушениос сярысь гожтэтъёссы но вазиськонъёссы. Со дыре ик соослэн иворъёссы ӵем дыръя беромо. Соин валче управлениын уй но нунал ужаны кутскиз "оскымон телефон" - номерез 75-83-46. Соя котькуд адями ивортыны быгатоз лэсьтэм яке дасяськись йыруж сярысь, кудӥныз нюръяськон пыре ФСБ-лэн ужпумъёсыз пӧлы. Та иворъёс луыны быгатозы: - Россиысь яке мукет кунъёсысь гражданъёслэн секретной тодонъёсын тунсыкъяськемзы сярысь; - терроризмен герӟаськем ужъёс сярысь; - контрабанда сярысь; - пыӵал тӥрлыкез законэз тӥяса возем, лэсьтэм яке вузам сярысь; - наркотикъёсын герӟаськем ужъёс сярысь; - государственной органъёсын кузьмаськон (коррупция) сярысь. Кулэ дыръяз ивортӥсьлэн нимтулыз шарае поттэмын уз луы. Россия Федерациысь Кышкытлыклэсь утиськонъя федеральной службалэн Удмурт улосвылысь управлениез. Берекет Тодматске: выль кырӟан ВОРДӤСЬКЕМ МУЗЪЕМЕ Кылъёсыз Н. Байтеряковлэн Крезьгурез А. Бекмачевлэн Вордӥськем бусыос но шуръёс Сектазы вал монэ, сюдӥзы. Кӧкыме веттаса, ӵук тӧлъёс Чебересь веросъёс мадизы. Мон татын бурдъяськи но юнмай, Оскыса вамыштӥ улонэ. Нош туннэ нырысьсэ мон малпай: Туж уно ни тыныд тыронэ. Нош тырмоз-а мынам кужыме, Берыкто-а ваньзэ, ма сётӥд? Яратон вордӥськем музъеме, Тон монэ улыны дышетӥд. Вазиське юристъёслы Ижевскысь ляб адӟисьёслы юрттонъя центрын ужало юристъёс. Валэктонъёс сёто чаклам льготаосъя. Центрозь мыныны луэ 6 но 9 номеро троллейбусъёсын но 2, 7, 8, 11, 15, 20, 24, 41 номеро автобусъёсын "Соланж" ресторан дорозь (Интернациональный переулок, 11). Юристъёс тазьы ужало: понедельнике но средае 16 часысен 19 часозь, вторнике но четверге - 11 часысен 14 часозь, пятницае но субботае - 9 часысен 11 часозь. Жингыртыны луоз 78-48-83, 59-80-83 телефонъёсъя. Верало лыдпусъёс Кеносысь ваньбур пайда уг вай Статистикая кун комитетлэн ивортэмезъя, ортчем аре республикаысьтымы предприятиосын 1522 миллиард манет тыр ваньбур поттэмын. 1996 арен ӵошатыса 100,2 процент луэ. Озьыен, уллань васькон дугдытэмын кадь, но со улонын уг шӧдӥськы на. 1008 миллиард манет тыр ваньбур складъёсын кылле. Электро но шуныт поттон 6,7 процентлы кулэсмиз, нош нефть кыском - 2,6 процентлы. Пӧртэм машинаос лэсьтон 0,8 процентлы будӥз. Подшипникъёсты дасян 1996 арен ӵошатыса, 48 процентлы, нош конденсаторъёсты 42 процентлы кулэсмиз. 8233-лы ӧжытгес автомобиль лэсьтэмын, 12436-лы ичигес поттэмын магнитофон. Соин валче, станок поттон 129-лы будӥз, мотоцикл - 17620-лы, мисьтаськон машина - 16792-лы. Нюлэс коран но сое складъёсы ваён, 1996 арен ӵошатыса, 89 процент луэ. Трослы кулэсмиз пулэсь тара, косяк, паркет, пу корка дасян. Кӧнялы ке будӥз пу плита (26 процентлы) но мебель (8 процентлы) лэсьтон. Заводъёсын лэсьтӥськон материал дасян 16 процентлы кулэсмиз. Капчи промышленностьын ваньбур поттон, 1996 арен ӵошатыса, 91 процент луэ. Арысь аре кулэсме пыдкутчан вурон но ку посон. Сиён-юон дасян азинске, со 6,2 процентлы будӥз, аракы пӧзьтон 36 процентлы йылӥз. Быдэсак промышленностез вераса куашкан дугдытэмын кадь но лыдпусъёс туж шумпотымон ӧвӧл. Валтӥсь удысъёслэн азинскемъёссы уг шӧдӥсько на. Соиз но сюлмаськытэ, поттэм ваньубр уноез складъёсы мынэ, сое басьтӥсь ӧвӧл, со вужме, дунтэма. Н. Возисов. "ВЕРАСЬКИСЬ" БАРАБАН Игра палъёстӥ мынӥсь-ветлӥсьёс паймыса учко нефтяникъёсын пуктэм барабан шоры. Бадӟым сюрес вылысь Лозолюкско-Зуринской месторождение кожыку, аспӧртэмлыко экскурсие шедёд: барабан бергамъя вошъясько лыдпусъёс, нимтулъёс - соос возьмато му вӧй, газ поттӥсьёслэсь нуналлы, арнялы быдэ ужамзэс. Огъя вераса, сётэ туж узыр информация. Со понна ӟеч кылъёс вераны кулэ Г. И. Русскихлы - 4 номеро цехлэн кивалтӥсезлы, татысь механиклы М. В. Огородниковлы но рабочийёслы. "Визитной карточказэс" та кибашлыос лэсьтӥзы ваньмон дыръязы, шутэтскон нуналъёсазы. Ужзы - адӟем карымон! А. СЫРОКИН. Кун Кенешын Удмурт Республикаысь Кун Кенешлэн Президиумезлэн заседаниез дас ужпум эскериз. Тужгес лэчыт ортчиз Правительстволэсь му вӧй поттӥсь но газ кыскись скважинаосты кун бюджет чотын уже кутон сярысь постановленизэ (юнматэмын вал кылем арын) но "Удмуртская национальная нефтяная компания" кылдытон сярысь постановлениезлэсь инъетсэ эскерон. Кыкез ужпум иворъёсты вӧлмытӥсь ёзъёслы сӥземын вал. Печатья но иворъёсъя министерство 1998 арын газетъёслы гожтӥськонлы йылпумъянъёс сярысь ивортӥз. Та пумысен кутэмын "Удмуртия" кун телерадиокомпанилэн Кенешаз Кун Кенешлэсь муртъёссэ пыртон сярысь постановление. Кун Кенешлэн пресс-службаез. Италилэн шунытэз дорамы но вуоз Та арня куспын Россилэн Президентэз ветлӥз Италие. Делегацие пыртэмын вал кызь куинь мурт. Пӧлысьтыз куинез - улосъёслэн кивалтӥсьёссы. Санкт-Петербурглэн мэреныз но Нижний Новгород областьлэн губернатореныз ӵош кыдёкысь странае ветлӥз Удмурт Республикаысь Кун Кенешлэн Тӧроез Александр Волков. - Россия но Италия куспын юнматэмын валче ужанъя кема дырлы план, - шуиз Александр Александрович толон журналистъёс азьын. - Чакламын асьме ГАЗ заводын "Фиат" тодмо но дано фирмаен ӵош выль автомобильёс поттыны, Санкт-Петербургын радъямын луоз автобус лэсьтон, ваче кусып тупатозы асьме "Газпром" но Италиысь промышленникъёс. Удмуртия ласянь ке верано, пусйымон соиз: огъя программае пыртэмын химической ожтӥрлыкез быдтон бордын ӵош ужан сярысь ужпум. Малпаськомы Кизнерын та ласянь огъя удыс кылдытыны. Со понна Италия дась ини сётыны тырмыт коньдон. Куд-огез шуоз, малы со кулэ луиз меда кыдёкысь государствоын улӥсьёслы? Нырысь ик, азинскем странаос сюлмасько быдэс фирмаын кышкытлыклэсь палэнскон сярысь. Кыкетӥез муг герӟаськемын экономика ласянь пайда поттыны луонлыкен. Ӟеч технологиос шедизы ке, озьы ик луоз. Асьмелэн та ласянь Камбаркаын ужъёс вырӟизы ни. Табере Кизнерын но, оскисько, маке со пӧрмытом. Посолъёсын мон кема кенеши та пумысен, али ужме азинтоз МИД. Отӥяз быгатом нимысьтыз соглашение юнматыны. "Ижмаш" огазеяськон Александр Волковлы вазиськиз вал, "Орбита" автомобильлы Италиысь двигательёс басьтон сярысь кенешыны курыса. "Фиатлэн" вице-президентэныз пумиськон оскон сётэ, малпан быдэсмоз шуыса. Нырысь-валысь вераськемын 3-3,5 сюрс мотор басьтыны. Калыклы сыӵе машина кельшиз ке, кусыпъёсты юнматыны но луоз. Вуоно толэзе кунгож сьӧрысь фирмаысь специалистъёс асьме доры вуозы ни, югдурен тодматскон вылысь. Россия Италиысь вуись коньдонлэн ог люкетэз шедёз, вылды, Удмуртиысь куд-ог мукет предприятиослы но. Кылсярысь, кондиционеръёс, мукет со выллем техника уртче поттон ласянь уж нуо Ижысь электромеханической заводлэн кивалтӥсьёсыз. Кунгож сьӧры ветлыкуз, Александр Волков ӧз вунэты гуртоослэн сюлмаськонъёссы сярысь но. Чакламын ӵош ужаны асьме доры "Етӥн" программа бордын. - Етӥнэз ӟеч будэтыны но солэсь умой вуз потыны дышимы ке, гурт хозяйствомес азинтыны со умой луонлык сётоз, - пусйиз Кун Кенешлэн кивалтӥсез. Ма бен, вань малпанъёс быдэсмизы ке, пӧсь Италилэн шунытэз, оло, салкым Удмуртиямы но вуоз. Пресс-конференция дыръя Александр Волков мукет ужпумъёсъя но вераськиз. Тани толон асьме дорын вал Россиысь Центральной Банклэн кивалтӥсез Сергей Дубинин. Со вуылӥз Воткинске, тодматскиз Ижысь радиозаводэн связья выль тӥрлык поттӥсьёсын, пумиськиз республикамылэн кивалтӥсьёсыныз. Тулыс вылтӥ Удмуртие мукет бадӟым куноос вуылозы. Кылсярысь, Борис Немцов, Санкт- Петербурглэн мэрез Владимир Яковлев. И. Лебедев. Правительствоын 8 ТОЛЭЗЬ УЖДУНТЭК Адямиос ваньбур потто ке но, уждун толэзьёсын уг бичало. Сыӵе югдур бадӟымесь предприятиосын, гурт хозяйствоын, нюлэс комплексын но музон интыосын. Тани "Ижмаш" АО-ын ӝыны ар уждун тырымтэ, нош куд-ог предприятиосаз - 8 толэзь. Та но мукет учыръёс сярысь журналистъёслы мадиз Правительствоысь ужъя комитетлэн тӧроез Сергей ФЕФИЛОВ. Со шуиз, али, пе, дасяське Правительство, профсоюзъёс но уж сётӥсьёс куспын тупанкыл (соглашение). Миымлы со кутэмын вал, но отысь самой кулэ куать люкетэз быдэстымтэ. Соос герӟаськемын уждун, пособиос сётонэн но мукетыныз. Кызьы ивортылӥм ни вал, 2 феврале Ижысь "Россия" кинотеатрын бадӟым пумиськон ортчиз. Отчы ветлӥзы сюрслэсь уно пӧртэм удысъёсын ужасьёс но Кун Кенешысь, Правительствоысь, мэриысь, профсоюзысь кивалтӥсьёс, озьы ик Россиысь Президентлэн Удмуртие ыстэм муртэз. Та ужрадын лэчыт вераськон мынӥз. Республикаысь кивалтӥсьёслы пӧсь йӧтӥз. Пумиськонын озьы ик ӝутэмын таӵе ужпумъёс: культура удысын ужасьёслы льготаос, нылпиослы, ужтэк кылемъёслы пособиос, вылӥ дышетскон заведениосын (академиосын, университетъёсын) 1996-97 аръёс понна уждун сётон, Москваысь юрттэтэз (трансфертэз) шонер кутон, школаослы книгаос поттон, элькунамы буёло металлэз лушкан но мукетыз. Туннэ адямилы улыны шорлыдын 402 манет кулэ. Азьло сое лыдъяло вал 19 пумо сиён-юон басьтонъя, али 25 пумо каремын. Нош со вӧзы кемалы чидась вузъёс басьтонэз ке лыдъяно, со лыдпус 781 манет луэ. Валамонгес вераса, отчы пыре холодильник, телевизор, мисьтаськон машина но мукетсэ басьтон. х х х Миым республикаямы шорлыдын уждун 794 сюрс манет луиз. Комитет 1995 арысен выре вань удысъёсын уждунэз радъянъя акт кутыны, но со дэмӟе Кун Кенешлэн сессияз. Депутатъёс- кивалтӥсьёс солы пумит луо. Г. РОМАНОВ. Выт кекатэ Туэлы бюджет вуттымтэ на. Но солэн доход люкетэз котькинэ сюлэмшугъяськытэ. Кытысь бен коньдон вуоз? Производство гуньдэм кадь улэ, бадӟымесь предприятиос но, лэсьтӥськисьёс мырдэм "шокало". Малы бен промышленность уг улӟы? Мугъёсыз ичи ӧвӧл. Но предприятиослэн кивалтӥсьёссы одӥгеныз бадӟым муген лыдъяло бадӟымесь налогъёсты. Соос, пе, азинскыны люкето. Тани ваньбурлы (имуществолы) налог азьло 1,5 процент ке вал, али со 2,5 процент каремын, нош сюрес понна выт 0,3-ысен 2,5 процентозь вуттэмын. Собере ватсаны кулэ на НДС-эз, доход но пайда басьтэм понна налогъёсты. Тӥни озьы предприятилэн уксёез уг кыльы ни уждун тырыны, производствоез паськытатыны, выль амалъёсты (технологиосты) пыӵатыны, ӟеч оборудование басьтыны вужзэ выльдыны. Нош специалистъёсты дасян, соослэсь тодон-валанъёссэс будэтон сярысь вераськон ик уг мыны ни. Тӥни соин ик ӝекатскытэк умоятоно налог бичанэз. Г. Васильев. НОШ ИК ВУОЗ ТУЛЫС Уд но шӧдылы, вуозы тулыс бусы ужъёс. Соин ик алигес Завьялово черкогуртэ люкаськылӥзы республикаысьтымы гурт хозяйствоослэн кивалтӥсьёссы. Кенешын гурт хозяйствоя но сиён-юонъя министр Василий Жуйков ортчем арлы йылпумъянъёс лэсьтӥз но туэ быдэстоно ужпумъёс сярысь вераз. Кенеше ветлӥз Удмурт Правительстволэн Тӧроез Павел Вершинин но Кун Кенешысь Агропромышленность удысъя, музъем кусыпъёсъя но инкуазь узырлыкъёсты кутонъя комиссилэн тӧроез Аркадий Малков. Люкаськемъёс лэчыт ужпумъёсты учкизы. Со сярысь ивортом газетлэн вуоно номераз. Н. ВОЗИСОВ. ГОРОДМЫ УЗЫРМОЗ-А, КУАНЕРМОЗ-А? Та юанлы Ижевскын улӥсьёс валэктон шедьтозы, 16 феврале 17 часын городлэн администрацияз лыктыса. Вераськон мыноз туэ арлы чаклам бюджетлэн проектэзъя. Люкаськемъёслэн юанъёссылы валэктон сётозы валтӥсь специалистъёс. Кенешон ортчоз мэрилэн юртаз, 3-тӥ этажысь бадӟым залын. Ӧтисько вань мылкыд карисьёс. Ижевск городысь администрацилэн пресс-службаез. Шӧкыч ЙЫРӤЯН Математикая дышетӥсьлэн Курег Пузановичлэн 7-тӥ классын дышетскись пиез Абдрам кык час урокъёссэ лэсьтӥз. Та дыр пӧлысь со 15 минутсэ киыныз ныраз гудӥськиз. Эшшо 15 минут ӝӧкысьтыз ластик утчаз, географияя учебникысь гольык нылмуртлэсь мугорзэ ӵушылон понна, кудзэ суреданы талэсь азьло со 45 минут быдтӥз. Эшшо 25 минут урамысь куакаосты лыдъяса пукиз. Ӝыны час пала дневникысьтыз туннэ басьтэм кыксэ лезвиен быдтыны выриз. Юан: кӧня пуктӥзы ӵуказеяз Абдрамлы математикаысь дорысь ужез понна? ХВИИИ тол Олимпийской шудонъёс Нагано пиштэ зарниен, азвесен... Япония ас сяменыз, ас сямъёсызъя пумитаз быдэс дуннеысь вуэм кунооссэ. Тол Олимпийской шудонъёсты радъясьёс вылэ Международной олимпийской комитетлэн президентэз Самаранг бальзам "пазьгиз": ваньмыз, пе, вӧй вылтӥ кадь мед мыноз. ЪВИИИ Олимпийской шудонъёс усьтӥськизы 7 феврале, йылпумъяськозы 22 феврале. Пичигес гинэ "гуртэ" огдырлы люкаськизы 3,5 сюрс спортсменъёс но ӧтем куноос. Соос пӧлын асьмелэн но землякъёсмы: Алексей Кобелев, Тамара Тихонова, Сергей Крянин. Олимпийской гурт интыяськемын 19 гектар музъем вылэ, отчы пуктэмын 22 юрт, апартаментъёсыз - 1032. Ма карозы соосын шудонъёс бырем бере? Японилэн кивалтӥсьёсыз азьвыл ик чаклазы нимаз адямиослы улон интылы висъяны, озьыгес ик юртъёс но ӝутэмын вал. Умой ай, 68 пӧртэм ӵошатсконъёс пӧлы баскетбол пыртымтэ - огаз коркан ӝужыт потолокез ӧвӧл. Олимпийской гуртын ма кулэ - ваньмыз вань. Уд шедьты татысь кык пумо арбериез гинэ: тамакез но винаез. Спортсменъёсты утёнэ-чакланэ пуктэмын 140 полицейскойёс. Нош ваньзэ ӵошатскон интыосты вераса (Нагано городын сяна, соос ортчо эшшо ньыль районын) порядокез уте 6 сюрс мурт. Олимпиадалы дасяськыса, югдурез утисьёслы вуризы нимысьтыз форма - 30 градус кезьытэз чидась дӥсь. Куазь куноос азьын лек сямзэ ӧз поттылы на: нуналлы быдэ сямен лымы усе я зор кыдыра. Огъёсызлы со люкетэ, мукетъёсызлы юрттэ. Пусъём на: котькудӥз спортсмен Олимпийской гуртысен телефон пыр вераськыны быгатэ семьяеныз, ӵыжы-выжыосыныз. Со понна японецъёс нимысьтыз дасязы 27 сюрс телефон карточкаос. *** Кыӵе кузьымъёс дасяз меда асьмелы Шунды ӝужан палась страна? Россилэсь данзэ утьыны Наганое мынэмын 126 мурт. Кӧня медален берытскозы гуртэ асьмелэн спортсменъёсмы? Нырысетӥ вормисьёс тодмо ни. Нылкышноос пӧлын куас сюресъёс вылын нырысетӥ зарни медалез басьтӥз Ольга Данилова. 15 сюрсэз иськемез со котькинлэсь ӝог ортчиз. Кык пол олимпийской чемпионка луиз ни мукетыз кужмо лыжницамы - Лариса Лазутина. Кык спортсменкаосмы гинэ командалы 5 награда ваизы ни. Россилэн сборнояз зарни но азвесь медальёс нуналмысь нуналэ юнгес жингырто. Специалистъёс верамъя, Наганоын вормисе потоз соиз команда, кудӥз пӧртэм ӵошатсконъёсын 11 пол зарни медаль басьтоз. Россиысь спортсменъёслэн тырмоз меда кужымзы сыӵе ӝуждалае ӝутскыны? 11 зарни медаль. Ӵапак табыдӟа трофей люказ вал асьмелэн командамы Лиллехаммерын ортчем Олимпийской шудонъёсын, но... кылиз кыкетӥ интые. Норвежецъёс, кутэм законъёсты тӥяса, лыдэ басьтӥзы вань мдальёссэс но... нырысетӥ интые потӥзы. Тӥни озьы, кык полэс бухгалтерия пумиськылэ вылэм Олимп гурезь йылын но. Кыӵе удысын Россиысь спортсменъёс вормыны быгатозы? Куасэн бызьылонын, биатлонын, фигурной катаниын, хоккейын? Кин тодэ, Нагано, оло, мукет удысъёсын понна но кузьымъёссэ уз жаля. Олимпиада йылпумъяськытозь кыле на 8 нунал. Таӵе юртъёсын уло спортсменъёс. Гурезь йылысь пул вылын нискылан. Ольга Данилова но Лариса Лазутина нош ик вормизы. Ӝоггес, ӝоггес! Финиш матын ни. Йӧ вылэ чебер пужыос суредазы но зарни медальёс утӥзы Оксана Казакова но Артур Дмитриев. (Снимокъёс басьтэмын компьютер пыр Интернет огъя сетьысь). Нылпи понна толэзьлы быдэ сётӥськись пособиез юнматон но тырон радэз воштон сярысь Удмурт Республикаысь Правительстволэн Постановлениез 1998 ар 2 февраль, Ижевск город. �68 Россия Федерациысь Правительстволэсь "Нылпи понна толэзьлы быдэ сётӥськись пособиез юнматон но тырон радэз воштон сярысь" 1089 номеро постановленизэ, кудӥз юнматэмын 1997 арын 28 августэ, быдэсъян понна нылпиосын гражданъёслы кун пособиосты тыронэз радъян вылысь, Удмурт Республикаысь Правительство пуктэ: 1. Удмурт Республикаысь Калыкез улон-вылонын утёнъя министерство но республикаысь городъёслэн но ёросъёслэн администрациоссы нылпиосын гражданъёслы кун пособиосты юнматонэз но тыронэз калыкез улон-вылонын утёнъя ёзъёслы сётонъя ужез радъяны кулэ, приложениез лыдэ басьтыса. 2. 1998 арын Ижевск городын но Глазов городын нылпи понна толэзьлы быдэ сётӥськись пособиез тыронъя радлэсь аспӧртэмлыкъёссэ юнматоно. 3. Игра, Якшур-Бодья, Каракулино но Воткинск ёросъёсысь быръем ёзъёслэн нылпи понна толэзьлы быдэ сётӥськись пособиез ёросъёслэн бюджетъёссы чотын тырон сярысь решениенызы соглаш кариськоно. 4. Республикаысь городъёслэн но ёросъёслэн администрациосынызы кивалтӥсьёслы дэмлано нылпиосын семьяослы пособиез тыронъя пунэмез берыктыны, пособиосты тыронэз калыкез улон-вылонын утёнъя ёзъёслы сётэмлэсь азьвыл толэзь понна но. 5. Удмурт Республикаысь Калыкез улон-вылонын утёнъя министерствоез косоно "Нылпи понна толэзьлы быдэ сётӥськись пособиез котькудӥзлы нимаз тырон сярысь" Удмурт Республикалэн Законэзлэсь инъетсэ дасяны 1998 арын 1 мартозь. 6. Та постановленилэсь быдэсъяськемзэ эскерозы Удмурт Республикаысь Правительстволэн Аппаратысьтыз Социальной азинсконъя управленилэн семьяен ужанъя, калыкез улон-вылонын утёнъя но калыклэсь тазалыксэ утёнъя отделэз, Удмурт Республикаысь Калыкез улон-вылонын утёнъя министерство, Удмурт Республикаысь Коньдон ужпумъёсъя министерство. Удмурт Республикаысь Правительстволэн Тӧроез П. Н. Вершинин. Удмурт Республикаысь Кун Кенешлэн дас куатетӥ сессиезлэсь заседанизэ мукет дырлы выжтон сярысь Удмурт Республикаысь Кун Кенешлэн Президиумезлэн Постановлениез 1998 арын 17 феврале Россия Федерациысь Федеральной Собраниын Россия Федерацилэн Президентэзлэн арлы быдэ сётӥськись посланиеныз тодматскыны чакламен валче Удмурт Республикаысь Кун Кенешлэн Президиумез пуктэ: Удмурт Республикаысь Кун Кенешлэн дас куатетӥ сессиезлэсь заседанизэ 1998 арын 17 февральысен 19 феврале выжтоно. Удмурт Республикаысь Кун Кенешлэн Тӧроезлэн нырысетӥ воштӥсез В. И. Агашин. Ижевск город, 1998 арын 12 феврале � 451-И. Берекет Кибашлыос Ужед шумпотон ке вае Иван Афанасьевич Воронцов - плотник. Дасо аръёс ужа ини Ижевскысь механической заводлэн 69 номеро нылпи садаз. Егит дырыз ортчиз армиын, 25 ар служить кариз. Отын ик дышиз пулъёсын ужаны. Пенсие потэмез бере Иван Афанасьевичлы уж шедьтон пумысен сюлмаськонэз ӧй вал. Нылпи садын воргоронлы уж котьку сюре, я рама лэсьтэ, я ӝӧк, я пукон тупатэ-лэсьтэ. Кибашлы мурт нылпиос понна нимысьтыз шудон сэрегъёс но пӧрмытэ. Пиналъёслы туж кельшо, кылсярысь, парикмахерлэн, вузкарисьлэн сэрегъёссы. Отын пичиос мыло-кыдо шудо, бадӟымъёслэн улонзылы дышетско. Нош кыӵе валаса но чебер пуктэ со гур. Тодмооссы куро ке, та ужлэсь со уг пыкиськы. Корка пушез штукатурить кароно ке, нош ик Иван Афанасьевичлы вазисько. Тынад ужед мукетъёслы ке кулэ, шумпотон ке вае, со-а умой ӧвӧл. Л. ЯКОВЛЕВА. Туспуктэмез В. КАМАШЕВЛЭН. Берекет Чеберез лэсьто зарни киос Кибашлыослэсь асьсэ киосынызы лэсьтэм арбериоссэс вузаны Юкаменскын усьтэмын вал нимысьтыз "Умелец" магазин. Вузлэсь дунзэ ӧжытак гинэ будэтыса, татын пӧртэм киужъёсын вузкаризы. Усточиос нимысьтыз трос ӧвӧлэн, пайдаез ӧз шӧдӥськы. Чеберлыкъя юртэз усьтэм бере, малпан вал, киужъёс тросгес луозы, вузкаронэз ӟечгес радъяны луоз шуыса. Нош озьы ӧзгес луы. Ужтэк кылемъёс пӧлысь центр пыр киужъёслы (куиськыны, бадь ньӧрлэсь арбериос кутаны, керттӥськыны, пул вылэ буёлъёсын пужыос пуктыны) дышетскем муртъёс уг дырто ужъёссэс татчы вайыны. Киужъёсын гинэ кӧтэз тырыны али уггес луы на угось. Кунгож сьӧрысь но пӧртэм интыосысь ваем арбериос адямиослэн син шоразы ӝоггес йӧто. Быгатыса, вань сюлэмдэ поныса лэсьтэм киуж понна гинэ дун но пуктыны возьыт ӧвӧл. Нош интыысь усточиос яке али гинэ киужъёс борды басьтӥсько ай, яке уно дырзэс та ужзылы висъяны уг быгато. Веранэз ӧвӧл, вань сыӵе усточиос, кудъёсызлэн ужъёссы ӝажы вылэ ик уг вуо, пумен басьтӥсь шеде ини. Художественной салонэн кивалтӥсь, со ик али вузкарись но, Н. Сысоева данъяськыса вера пенсионер Б. Баженов но суредась Н. Поторочина сярысь. Вань сюлэмзэс поныса быдэсто угось соос ужъёссэс. Бронислав Александрович быгатыса лэсьтэ кызьпу туйлэсь пӧртэм арбериос, нош Надялэн вӧшъёс, посудаос, шкатулкаос вылын - городецкой амалэн пуктэм пужыос. Али кибашлыос понна висъямын вӧл-вӧл инты. Художественной салонын ортчытъясько пӧртэм адӟытонъёс, соку ик синмаськем арбериосты но басьтыны луэ. Вузкаремез понна Н. Сысоева уксё уг басьты. Арбериосты вузан понна салонэ вуэм коньдонэз быдэсаксэ куто усточиослэн центразы кулэ луись материалъёс басьтыны. Али, арлэн пумаз, Юкаменскысь кибашлыослэн тросэз ужъёссы Ижевскысь чеберлыкъя юртэ нуэмын. Красногорскъёс но играос бере, али отын учкисьёслы быгатэмзэс возьмато юкаменскъёс но селтаос. Выставкаын вань пӧртэм ужъёс: З. Чувашовалэн пужыятскемъёсыз, Б. Баженовлэн бадь ньӧрлэсь но кызьпу туйлэсь лэсьтэм арбериосыз, Н. Сабрековалэн куролэсь кутам ужъёсыз, Т. Араслановалэн но Е. Дмитриевалэн аспӧртэмесь ковёръёссы, Л. Прокашевалэн пӧртэм буёлъёсын суредам арбериосыз, А. Сысоевалэн (али кулэмын ини) чильпаськемъёсыз, чебересь пужыятскемъёсыз. Тазьы трос нимъёсты вераны луысал. Кибашлыослэн центренызы кивалтӥсь Р. Балтачева лыдъя, пужыос калыклэсь сямъёссэ, йылолъёссэ мед возьматозы, вашкалазэ, вунэмзэ мед улӟытозы шуыса. Соин ик гужем малпало гуртъёсы нимысьтыз потаны, дэремъёсысь, ӵушконъёсысь, нянь возёнъёсысь, вӧшъёсысь но мукет арбериосысь пужыосын тодматскыны. Озьыен, Юкаменскын коньдон поттон сярысь гинэ уг сюлмасько, калык сямъёсыз, соослэсь быгатонлыксэс утьыны тыршо. Кивалтӥсь оске, кӧня ке арлыдо кибашлыос егитъёсты но доразы яке центрысь кабинетъёсын дышетыны мылкыд карозы шуыса. Зэм, вань шуг-секытъёс: ляб материальной базазы, тырмыт ӧвӧл ужан интыос. Калык творчествоез котыр ласянь азинтон понна, центрын ужаны кулэ быдэн одӥген ке но мастеръёс. Тани алигес уже кутӥзы столярез, пул вылэ суредась мастер но кулэ на вылэм... Ёросысь кулэяськись муртъёс центр пыр али быгато асьсэлы заказъёс лэсьтыны - кинлы мар кулэ, сое ик лэсьтозы. Алигес тани укно рамаослы но кулэяськнозэс кыл вератэк басьтӥзы. Р. Балтачева верамъя, ми, пе, ваньзэ лэсьтыны дасесь: мед луоз коньдон. Коньдон ке луиз, материал но, инструмент но, станок но басьтыны быгатозы. Художественной салонэн кивалтӥсь Н. Сысоева выставкае кылем киужъёсты учкыны ӧте, пумен маде: - Милемын ӵош мыло-кыдо тырше куамын мурт кибашлы, Пышкет, Юкаменск, Вылӥ Уни шор ёзо школаос. Мукет азьысь пиналъёсын но кусыпъёс тупатыны выриськом: школаосын умой база, нош нылпиослы пичиысен ик чеберлыкез пыӵатыны тыршем пайдаен гинэ берытскоз. Нина Николаевна ӝӧк вылын кыллись чеберъяса вандылэм вӧшъёсты возьматэ. Со районысь калыклы улон-вылонын юрттэт сётонъя центрысь егит поварлэн Николай Фефиловлэн ужъёсыз. Туэ гинэ, пе, со та борды басьтӥськиз. Кин тодэ, оло, со зэмос мастер луоз, азьланяз киоссэ эшшо но эшшо волятоз, мукетъёссэ но шумпоттоз. Артэ ик киоскын вузкарись Елена Ушаковалэн пул вылэ пӧртэм буёлъёсын суредам арбериосыз тыремын. Соос туж чебересь но аспӧртэмесь. Тани Вылӥ Уни школаысь ужъя дышетӥсьлэн (али пенсионер) Герман Денисович Караваевлэн пуэз вӧлонъя аслаз токарной станокез вань. Солэн киужъёсыз туж чебересь, вольытэсь. Ӝажы вылын сыло та кибашлы муртлэн стругез, порыез, куарнянь бугортонэз, дӥсь ошылонэз. Син шоры, соку ик йӧто пӧртэм буёло суредам бекчеос, нянь возёнъёс, картинаос, панно. Ваньмыз со Ново-Елово гуртысь суредасьлэн Г. Петровалэн. Нош Юкаменск школаысь Г. Максимова спичкаослэсь Кремль борддорез пуктэм. Адӟытонын аспӧртэм адӟисько Юкаменскысь А. Сидоровлэн пулэсь но курлэсь лэсьтэм ӝӧк вылын возён лампаосыз но светильникъёсыз. Ф. Клабуков пенсионер салонэ вуттэ карнанъёс, корзинаос, тусьёс. Аслэсьтыз пизэ но та ужлы дышетӥз ини. Чебересь адӟисько мӧйы нылкышноослэн киосынызы вурем тапочкиос, керттэм выжлёгетъёс, пӧзьёс, носкиос, кофтаос но мукет арбериос. Юкаменскын улӥсьёс туж ик трос ӧвӧл, соин ик салонэ вуэм арбериосты, одӥгтэм басьтӥсьёс шедёзы шуыса, оскон ичи. Соин ик, кызьы вера Р. Балтачева, киужъёсын вузкарыны гуртъёсы но поталозы. Басьтӥсьёс сюризы ке, адямилэн нош ик мукет уж борды кутскыны мылкыдыз ӝутӥськоз угось. Селоын кибашлыослэн юртсы вить ар ӵоже ужа ини. Та дыр куспын трос мар но со умоез лэсьтэмын. Ужтэк кылемъёс асьсэлэн мылкыдзыя кыӵе ке но киужъёслы дышетско. Уже пырон ласянь шуг-секытъёс кылдо ке но, асьсэлы мар ке но лэсьтыны йӧндыро ини. Районысь кибашлыослэн кылдӥз асьсэлэн центрзы, кытын соос ог-огзылэсь адӟем карыны быгато, ог-огзэс дышето но мар. Ялан ужась художественной салонын ортчытъяськись адӟытонъёс (отчы дун тырытэк пырыны луэ) но юкаменскъёслы трос сёто. Котькудӥз татчы пырем мурт, мон малпамъя, аслыз ачиз шуэ, дыр: мон но тазьы лэсьтыны быгатысал. Кудӥз-огез кияз одно ик керттӥськон вень кутоз, яке кызьпу туйлэсь посуда лэсьтыны кутскоз. Озьыен, адямилэн ваньмон дырыз пайдаен берытскоз. Л. Сунцов. Юкаменск район. Удмурт Республикаысь шуръёсын но вуо интыосын кышкытлыклэсь утиськонъя но адямиослэсь улонзэс утёнъя ужрадъёс сярысь Удмурт Республикаысь Правительстволэн Постановлениез 1998 ар 12 январь Ижевск город � 7 Шуръёсын но вуо интыосын кышкытлыклэсь утиськыны но адямиослэсь улонзэс утьыны луонлыкъёс кылдытон понна Удмурт Республикаысь Правительство пуктэ: 1. Удмурт Республикаын ву вылын адямиослэсь улонзэс утёнъя правилоосты, Удмурт Республикаысь шуръёсын но вуо интыосын пичи судноосын уян правилоосты юнматоно. 2. Интыысь аскивалтонлэн йыръёссылы но республикаысь городъёслэн но ёросъёслэн администрациосынызы кивалтӥсьёслы дэмлано: ведомствоослэн улосъёсысьтызы кузётэм вуо интыосты но калыклэсь ву дурын шутэтскон интыоссэ ведомствоослэн балансъёсазы юнматыны; шуръёсын адямиослэсь улонзэс утёнъя ужрадъёсты чакланы но юнматыны; шуръёсысь но вуо интыосысь юрттэт сётӥсь станциослы но постъёслы техника, оборудование, ваньбур сётонъя ужрадъёс кутыны. 3. Удмурт Республикаысь Пичи судноосъя кун инспекцилы (ГИМС), республикаысь ВОСВОД-лэн кенешезлы иворъёсты вӧлмытӥсь ёзъёс пыр ("Удмуртская правда", "Известия Удмуртской Республики", "Удмурт дунне" газетъёс, "Удмуртия" кун телерадиокомпания) республикаысь шуръёсын но вуо интыосын кышкытлыклэсь утиськонъя, адямиослэсь улонзэс утёнъя валэктон уж нуоно но калыклы ву вылын адямиослэн но пичи судноослэн кышкыт учыръёсы шедемзы сярысь ялан ивортылоно, дун тырытэк. Удмурт Республикаысь Правительстволэн Тӧроез П. Н. Вершинин. "Удмуртнефтьлы-25" БУГУЛЬМАЕ УМ ВЕТЛЭ НИ Му вӧй поттӥсьёс трос аръёс ӵоже Татарстанысь полиэтилен гумы вайылӥзы. Туэ арысен палэнысь басьтэмысь дугдӥськом - "чулокез" дасяны асьмеос дышим. Сыномыны сётскисьтэм материаллэсь гумы эскерон вылысь (6,5 иськемъем кузьдалаен) поттэмын кылем арлэн пумаз. Со мыноз ву но нефть кысконэ. Январе цех умой-умой ужаны ӧдъяз. Нырысетӥ линия вӧзы ватсаськиз на кыкетӥез. Татын дасяло 114-219 миллиметр пасьталаем гумыосты. Ӵапак сыӵе трубаосты "Удмуртнефть" басьялляз Бугульмаысь. Г. БОБРОВ. БЫРЪЁНЪЁСЛЫ ДАСЯСЬКОН КУТСКИЗ Кин меда кивалтоз республикамылэн столицаеныз? Со сярысь вераськонъёс мыно ни, тунаны вазьгес на ке но - мэрез быръён чакламын 12 апрельлы. Та нуналлы дасяськон кутскемын. Ижевскысь Городской Думалэн 34-тӥ сессиез пыр-поч эскериз городысь администрацилы кивалтӥсь но Думае депутатъёсты быръён ужпумъёсты. Татын ик юнматэмын вить районъёслэн территориальной избирательной комиссиоссы, пусъемын избирательной округъёслэн границаоссы. Депутатъёслэсь лыдзэс чакласа, Ижевскъя юнматэмын 30 избирательной округ. Мэрез быръёнын Ижевск город быдэсак одӥг избирательной округ луэ. Депутатъёс озьы ик эскеризы быръёнъёсты ортчытонэн герӟаськем коньдон ужпумъёсты. Висъямын, выль сямен вераса, 1 миллион манет. Л. ДМИТРИЕВА. Шӧкыч Подпись Кин луоз Ижевск городлэн выль кузёез? Та юан трос адямиосты сюлэмшугъяськытэ. Угось городлэн мэрез киын луоз власть. Быръёнъёс 12 апреле ортчозы. Нош кивалтӥсь луон понна нюръяськон али ик пуромыны ӧдъя ни. Лымы мунё: Монэ мэре бырйиды ке, котькуддылы быдэн кешыр сёто, эмалировать карем ведра. Коркаосты шунтон трубаос сярысь но сюлмаськоно уз луы ни. Ваньзэ радъяло! Суредэз Л. Прозоровлэн. Сизьымдон кык арес тырмонэныз асьсэлэсь яратоно анайзэс, Кузёбай гуртысь Кузьмина Евдокия Ивановнаез, ӟечкылало нылпиосыз но нылпиосызлэн нылпиосыз. Мусо анаймы! Вань сюлмысьтымы ӟечкыласьком тонэ. Сӥзиськом тазалык, капчи мылкыд, ымнырад мед шудоз шумпотон но пальпотон. Сюлмыд но, мугорыд но медаз тод висёнэз, жадёнэз, куректонэз. Гажаса Савинаослэн, Кузьминъёслэн но Никоновъёслэн семьяоссы. Продается дом 4 х 8 м в п. Нов. Чернушка Якшур-Бодьинского района в 24 км от города (имеется баня, стайка, летняя кухня, яма кирпичная, сад, огород 16 сот., вода в доме. Обращаться по телефону 58-78-35 (в Ижевске). Соослы оскиз калык "ОЛОКЫЗЬЫ НО ЮРТТЭ..." Арлэсь ӧжыт гинэ трос дыр ортчоз но, Кун Кенешлэн туала депутатъёсызлэн ужан дырзы йылпумъяськоз. Ма лэсьтыса вуттӥзы ни соос куинь ар куспын? Ӧз-а вунэтэ бырйисьёссэс? "Удмурт дунне" газетлэн редакциез малпа та ужпумез ӝутыны. Оскиськом, тӥ но, гажано лыдӟись эшъёс, та ласянь юрттоды шуыса. Ивортоды малпанъёстэс, пусъёды тырмымтэосты. Нош туннэ кутскон понна сётӥськом Селта ёросысь куд-ог бырйисьёслэсь верамъёссэс. 1995 арын 93 номеро округъя депутат луиз Валерий Федорович Загайнов, Удмурт Республикаысь жилищно- коммунальной хозяйствоя объединенилэн валтӥсь директорез. Н. Ворожцов, ёросысь ветеранъёслэн советсылэн кивалтӥсез: - Мӧйы муртъёслэсь кулэяськонъёссэс депутатмы ялан син азяз возе. Арлы быдэ со юрттэ вить квартираез тупатъяны. Валерий Федорович ик сюлмаськиз ветеранъёслэн хорзылы костюмъёс шедьтыны. Со котьку ик вала кадь милемыз... В. Погребовский, райсоветлэн депутатэз, Селта школаысь дышетӥсь: - Ёросмы понна Загайнов трос лэсьтӥз ни. Сое ми ас выламы но шӧдӥмы. Кема дыр ӵоже школамылэн липетэныз курадӟим. Табере со выльдэмын, чебер адске. Ма, Валерий Федорович огшоры улонын но синмаськымон адями. Котькудзэ кылзыны быгатэ, трос тодэ. Кун Кенешын Селта ёросын улӥсьёслэсь гинэ кулэяськонъёссэс быдэсъян сярысь сюлмаськонэн уг улы, быдэс республикалэсь интересъёссэ утьыны тырше. Н. Зуева, Югдонысь гурт администрацилэн кивалтӥсез: - Валерий Федорович олокызьы но юрттэ, ноку но уг палэнскы куронъёсмылэсь. Тани, кылсярысь, Кейлуд-Зюньяысь ву кыскон гумыосты тупатъяны юрттӥз. Кин ке шуоз, со туж пичи уж ук. Сыӵе верамен соглаш кариськыны уг быгатӥськы. Уго гуртоос понна водопровод туж кулэ. В. Мартынов, Селта больницаысь валтӥсь врач: - Нылпи отделенилы депутатмы буёло телевизор кузьмаз, лэсьтӥськон-тупатъян ужъёсты ӝогомытыны юрттӥз. Со сяна, трос кужымзэ сётӥз больницамылэсь 100 ар тырмонзэ пусъёнэн герӟаськем ужъёсты быдэстон ласянь. Тодӥсько, селтаос оскыса ветло депутатэн пумиськонъёсы. Котькуд бырйисьлэсь куронзэ со быгатэмезъя быдэстыны тырше. Н. Однолько, архитектор: - Пож вуэз гылтон коллектор лэсьтыны юрттэмез понна гинэ ик селтаос депутатсылы йыбырттыны дась. Тӥни сыӵе верамъёс. Бен, нокин уг пусйы депутатлэн ужысьтыз тырмымтэосты. Но солэн нимыз адямиослы ӟечсэ гинэ тодэ вайытэ ке, урод шат? Кызьы тодмо, Ижын улӥсьёс дэмлало Валерий Загайновлы мэре кандидат луыны. Та сярысь веранъёсты селтаос шумпотыса пумитазы. Соос оско угось, калык бырйиз ке, шоркарлэн вылтусыз но, пуш палыз но умой пала воштӥськозы. В. ЛЕПТЯГИН. ДЫШЕТӤСЬ Г. А. Архиповез буре вайыса Тулыс шунды Тылси выллем Кужмо ке луысал, Дунне вылысь Вань калыклы Шудбур мон пазясал. Зэм но, дунне вылысь вань калыклы шудбуп пазяны дась вал та кылбур чуръёслэн авторзы Георгий Архипович Архипов. Кӧня но кыӵе гинэ муртъёслы та бугрес улонэ сюрес лёгыны ӧз юртты меда со?! Егит дыръяз, арлыдо мурт сямен, ӵыжы-выжыоссэ, эшъёссэ ялан чакласа возиз, кын корт куртчон вакытаз - соослэсь пиналъёссэс син шорысьтыз ӧз ыштылы, берло аръёсы - таосызлэсь но нылпиоссэс бурдъяны тыршиз на. Мертантэм ӟырдыт вал вал солэн сюлэмыз. Ӟырдыт но, шырыт но. Тыпы кадь мугорыныз троссэ сайялляменыз, лэся, дырызлэсь ӝог ыштӥз кужымзэ, лябӟытӥз-куасьтӥз ноку но погыртыны луонтэм мугорзэ. Асьме пӧлысь со витьымтэ шорысь кошкиз. Кошкиз аслаз зӥбыт сямыныз вӧсез, пӧсез но кезьытэз мултэсгес чидаменыз... Мынам сюлэмам со пыриз ог куамын ар талэсь азьло, Баяран школае "Вай бур кидэ" кылбур книгаеныз тодматыны вуылыкуз. Соку мон 6-тӥ классын дышетскисько вал. Кыӵе-кыӵе чебер но йӧно вал со! Тартуысь аспирантураез сокугес гинэ быдэстэм егит воргорон ас выросъёсыныз, зӥбыт, сюлэм борды бинялскись куараеныз покчизэ но, бадӟымзэ но кылзӥсез бордаз кыскиз. Дорамы ветлэмез бере ик школаысьтымы ог дасо пиналъёс газетъёсы гожъяны ӧдъязы. Соос пӧлын - мон но. Табере тани, вис карылытэк, ог куамын ар гожъяськисько ни. Сомында аръёс ӵоже мон шӧдыл Георгий Архиповичлэсь индылонъёссэ, лякытэн гинэ валэктэмъёссэ, нуналмысь юрттыны но визьноданы сюлмаськылэмзэ. Георгий Архипович мон понна нырысь ик вал кылбурчи, журналист, кылчи. Берло ини валай: та адямилэн бадӟым сюлэмаз каръяськемын вылэм солэсь но дуноез но даноез - анайдэ, ас калыктэ, кылдэ яратон. Тӥни солы вань улонзэ дышетӥз шаерысьтымы но солэн палэнысьтыз пиналъёсты но егитъёсты. Кылбур книгазэ кузьмаса, мыным со поэзиез но валаны кизэ сётӥз кадь. Табере, книгаосыным тодматъяса, со сямен ик ачим но школаостӥ ветлӥсько ини. Гожъяськонэн ноку но герӟаськылымтэ семьямы быдэсак сямен та удысэн "висьыны" кутскиз. Рая сузэрелэн одӥгез кылбурез нылпи сборнике но пыртэмын, Вячеслав выны али но ёрос газетэ гожъя. Нош Алёна нылы мынэсьтым кутскем ужме азинтэ ини 4-тӥ классысен ик. Со печатласькиз ни "Ӟечбур!" но "Удмуртская правда" газетъёсын. Статьяос сяна, гожъя кылбуръёс но. Малы мон ваньзэ тае верасько? Угось котькудзэ та учырез герӟаз но азинтыны инъет кылдытӥз одӥг адями - Георгий Архипов. Трос шуныт кылъёс сюлмысь пото но пачылмыса кисьтӥсько, ортчемзэ тодам вайыса, вуонозэ малпаса. Г. А. Архипов, удмурт кыллэсь чеберлыксэ ыштонтэм вылысь, туж трос лэсьтӥз кадь потэ, Ярын потӥсь "Сельской правда" газетлэн редакцияз ужакуз. Нош кыӵе секыт улыса-вылыса но со трос аръёс ӵоже кужымзэ но тазалыксэ жалятэк ужаз котькуд удысын. Редакторлэн воштӥсез луыса но Яр посёлок шорысь ик куашкан калэ вуэм коркан улӥз. Книгаоссэ корказ но лапасъёс улын возиз, ачиз гур вылын кӧлаз. Иже вуыса но улонэз пӧртэм ик ӧз луы. Георгий Архипович, туж дуно библиотеказэ улэп дыръяз ик кытчы ке интыяны курыса, пӧртэм интыосы вазиськылӥз - санэ ӧз басьтэ куронзэ. Табере тани со кнгигаос ик ваньмызлы кулэ ни, пе?! Верай ини: Георгий Архипович шаерысьтымы но солэн палэнысьтыз тросэзлэн ужасьёслэн журналистика, кылэз тодон-валан но кылбуран удысъёсын зэмос дышетӥсьсы луэ. Со Ярын ужакуз, отысь удмурт но ӟуч газетъёсын литературалы но сатиралы сӥзем нимысьтыз бамъёс потылӥзы. Соин ик ёрос газет пиналъёсты но, арлыдоосты но огазеялляз. Отын ӵем ортчылӥзы лыдӟисьёсын но гожъясьёсын пумиськылонъёс. Ӵапак одӥгаз сыӵе ужрадын тодматски сӥё-дано поэтъёсын Флор Васильевен но Владимир Романовен. Со вакытэ ёрос газетысьтымы литкружок шаерамы одӥгез кужмоез вал, дыр. Верало таӵе учырез гинэ. Юнкоръёслэн одӥгаз семинаразы тодмо писательёсын ӵош вуылӥзы Удмуртиысь, Башкириысь, Татарстанысь егит гожъясьёс. Соос пӧлын вал Ульфат Бадретдинов, Илья Ильин, Владислав Кириллов, Валерий Нуриахметов, Нина Ефремова (Петухова). Али ваньзы ик соос асьсэос нылпиосты гожъяськыны дышето ни, тросэзлэн книгаоссы но потэмын. Ӵапак со семинарлэн "емышъёсыз" луо кылбурчиос Михаил Федотов но Виктор Шибанов. Бен, гожъяськон удыс капчи ӧвӧл. Озьы ке но, Георгий Архипович та ужез туж быгатыса азинтӥз. Тӥни сыӵе ӟырдыт сюлэмо адямиос али тросгес мед луозы вылэм удмурт газетъёсын-журналъёсын, тужгес но - ёросъёсын потӥсьёсаз. Угось ӵапак соос творчество удысысь кивоштӥсьёслы улонэ сюрес сёто. Тросэныз пиналъёсын но егитъёсын кусып возьыса, Георгий Архипович соосты литератураез но чеберлыкез валанэ кыскиз, асьме удмурт кылмылэсь узырлыксэ мургес валаны дышетӥз. Со понна мон котьку но бадӟым тау карисько Дышетӥселы. Г. А. Архипов туннэ асьме пӧлын ӧвӧл ни ке но, ӟырдыт сюлэмызлэн пӧсез ялан шунтоз асьмемыз, чебер тусбуйыз улоз син азямы, лякыт куараез чузъяськоз пель сьӧрамы. Вунонтэм кылёзы кырӟанъёсыз но кылбуръёсыз. - Сяська, малы куасьмиськод? - Выльысь ӝужаны. - Кызьы озьы? Паймисько... - Выль сяська кылдыны. Оскисько: Георгий Архипович Архиповлэн дышетэм выль сяськаосыз трос гинэ ӝужалозы на. Алексей ЕЛЬЦОВ, кылбурчи, Удмурт Элькунысь дано журналист. Шӧкыч ЭН ЭШЬЯСЬКЕ ТЫЛПУЭН Тылпу нокинлы но пайда уг вайы. Со сярысь ваньмы асьмеос умой тодӥськом. Озьы ке но, тылпулэсь чакласькыны, эскериськыны туж ик ум тыршиське. Со сярысь верало лыдпусъёс но. Кылсярысь, Ижевскысь Индустриальной ёросын гинэ кылем арын 150-лэсь ятыр тылпу луиз. Нош бервылыз тодмо ини: ӝуам улон инты, кулыны яке сӧсырмыны шедем адямиос. Вераны кулэ ӧвӧл, дыр, кыӵе кышкытлык кылдытэ "горд атас", куке со кузёяськыны ӧдъя трос калыко интыын. Кылсярысь, общежитиын. Тае уг вунэто тылпу кысӥсьёс но. Соин ик 19 номеро пожарной частьысь ужасьёс кемалась ӧвӧл городысь огъя улонниосты эскерыны потазы. Нокудаз но чаклам общежитиосын пожарной сигнализацизы уг ужа. Нош борддоръёс, яке шонергес вераса, щитъёс, кытын луыны кулэ тылпу кысыны юрттӥсь пӧртэм арбериос, шал-шал бушесь. Малы ке шуоно, кескич улӥсьёс отысь арбериосты кемалась лушказы ни яке вузазы. Со гинэ мар ай, куд-огаз огъя улонниосын телефонзы гинэ но ӧвӧл. "Горд атас" кузёяськоно ке луиз, коть караул шуыса кесяськы. Тылпу кысӥсьёс уз кылэ. Тужгес но секыт югдур кык общежитиосын: "Редуктор" акциосын огазеяськонлэн но УНГС-лэн (Нефтья но газъя лэсьтӥськон управление). Берпуметӥезлэн кивалтӥсьёсыз уг но тодо, кыӵе организация соослэн огъя улоннизылэн кузёез луэ. Малы ке шуоно, вуж кузёзы (УНГС) кемалась ни соослэсь куштӥськиз, нош вылез (город) аслаз бурд улаз ӧз на басьты. Соин но, оло, улӥсьёс общежитилэн правилоосыз шоры сяласько, шуыны луоз. Кухняысь пӧсьтэм, куашкан калэ вуэм электроплитаос соослы уг кельшо, шӧдске. Соин ик сиён пӧзьто улон комнатаосын. Нош огъя кухняын - номыре адӟыны луонтэм тамак ӵын. Нефтяникъёслэн но газовикъёслэн общежитиязы улӥсь С. Наумов шуиз, кухня, пе, со ӵапак тамак кыскон инты. Тунсыко, нош кытын меда соку сиён пӧзьтоно? Вераны кулэ, огъя улонниосын тамак кыскон тужгес но кышкытлык кылдытэ. Малы ке шуоно, татын кытын мылзы потэ отын ик кыско. Тамак пумъёс котькытын: кухняын, коридорын, тубатъёс вылын, лифтын. "Редуктор" акциосын огазеяськонлэн общежитияз кыскисьёслы та ласянь юртто но, шуыны луоз. Татын вахтаын ик тамак вузало. Кыскемед но ӧз поты - кыскод. Общежитиын улон правилоос шоры кивалтӥсьёс но чиньызы пыр учко. Озьы вераны луоз "Редуктор" АО- лэн кивалтӥсез И. Банников но воргоронъёслэн огъя улоннизылэн администраторез Т. Титова сярысь. Эскерон возьматӥз: тылпулэсь чакласькыны татын уг но выро. Та дырозь, пе, ӧй вал, азьланяз но уз луы. Нош пожарной сигнализация, пӧртэм тылпу кысон арбериос сярысь вераськон поттэмысь, соослэн "коньдон ӧвӧл" шуэмзы потӥз. Бен, таиз валамон кадь. Нош мукетыз воксё но йыре уг тэры. Улон юртлэсь план-схемазэ суреданы коньдон шат кулэ? Эскеронъёслэн йылпумъянъёссы ӝожмытэсь. Ум чакласькиське асьмеос тылпулэсь. Нош со шӧдтэк шорысь вуэ. Соку гинэ огнетушитель утчаськом, нош со ӧвӧл, соку гинэ ведра борды кырмиськиськом, нош со пась... Озьы медаз луы вылэм. А. ЕМЕЛЬЯНОВ, 19 номеро пожарной частьысь инспектор. Малпаськон понна ТАМАК КЫСКИСЬКОД - ГОЖТӤСЬКЫ ГАЗЕТЛЫ Кытчы меда мынӥськом, асьме дорын будэтэм сӥлез-йӧлэз государствомы кулэ уг кары ни ке? Кунгож сьӧрын, пе, дунтэм. Оло, соку шаерысьтымы вань калыкез кунгож сьӧры ыстоно дунтэм сиён-юон поттыны? Ӝӧк сьӧрын керетыса пукись кивалтӥсьёсты, депутатъёсты ӝыны арлы ке но колхозъёсы ыстоно вылэм, учкысалмы, кызьы меда уждунтэк ужасалзы соос. Амалтэк чигиськод ук, мар вие вуттэмын гурт калык. Куамын аресозь пинал пиос газетлы шуыса дорамы вуыло. Азьло аръёсы люкамме но, кылем арынзэ но пуд мында сётӥ. Малпаськоды, лыдӟемзы потыса озьы ветло соос? Кытын, пе. Тамак басьтыны уксёзы ӧвӧл, самосад кыско. Со понна вылӥ кузёосмы майбыр шоголь ветло, дуно сигарет гинэ кыско, дыр. Нылпиосылэсь пичи кылем дӥськутъёссэс но кулэяськисьёсызлы сётъяй. Мынам соос куать кузя, ваньзы пыдъяськемын. Шуисько вал, гуртэ эн кыле, кошке городэ, ужалоды но, шутэтскоды но. Ми кадь кус тӥянэз пиналъёслы, егитъёслы адӟыны ноку медаз кылды вылэм шуыса улӥськиз. Улон нош ик йырчукин берытске, лэся. Книжкае манетэн, кыкен люкам уксёмес быдтӥзы. Кинлы ӝожтӥськод? Ярам, ми пенсионеръёс ни, пенсимес улыны тырмытӥськом. Колхозникъёс туж жаль пото. Кунгож сьӧрысь сиён-юон но дӥськут ворттэмысь дугдӥзы ке, соку гинэ улон умойлы воштӥськоз. Нош ку меда сыӵе дыръёс вуозы? З. ВОЛКОВА. х х х Селта районысь Умедьгуртын улӥсь Зоя Николаевналэсь та гожтэтсэ газетамы печатласа, гуртын улӥсь воргоронъёслы амалтэк вазиськем потэ: тамак кыскиськод - гожтӥськы газетлы. Соку "Удмурт дунне" тӥледлы одӥг полэс гинэ пайда уз сёты. Чаклалэ асьтэос: газетмылэн одӥг номерез сылэ 50 копейка (500 манет) - базарысь одӥг пачка дунтэм кыскон - 90 копейкаен (900 манет). Нуналлы одӥг пачказэ ӵындӥсь мурт арняяз быдтэ 6 манет 30 копейка (6 сюрс 300 манет), толэзяз - 25 манет 20 копейка (25 сюрс 200 манет), ӝыны арскын - 151 манет 20 копейка (151 сюрс 200 манет), быдэс арскын - 302 манет 40 копейка (302 сюрс 400 манет). Нош "Удмурт дунне" газетлэн быдэс арлы дуныз 66 манет (66 сюрс манет). Ӝыны арлы гожтӥськыса гинэ но, газет бумага кӧнялы тырмоз асьтэлэн бакчаяды будэтэм тамак турынэз бинялтыны. Соиз но умой. Ӵын поттэмдылэсь азьло кӧня тунсыко иворъёсын тодматоз тӥледды "Удмурт дунне". Серем-а? Бен, шулдырез чик но ӧвӧл. Уг малпаськы, тамак кыскись воргоронъёс табере газетмылы уллёен гожтӥськыны мынозы шуыса, но газетмес лыдӟон понна, кысконзэс ке шыръясалзы яке воксё но куштӥськысалзы, соку тазалыксылы но изъянэз ӧжытгес луысал, "Удмурт дуннелэн" но эшъёсыз йылысалзы. Л. МАЛЫХ. Чуръёс, чуръёс... Тросгес луысалзы ке "Удмурт дунне" газетэз лыдӟисьёслэн лыдзы йылӥз, ма понна мон но туж шумпотӥ. Газет бамъёс юнгес но юнгес бордазы кыско, малпаськыто, нош тужгес но ярамон статьяосты вандыса кельтӥсько. Гажасько но дунъясько анай кылмес данъясьёсты. Кылсярысь, Анна Абрамова, Василий Ванюшев, Леонид Федоров асьсэ гожтэмъёсынызы сюлэмез ик вырӟыто. Зэм но, окмоз ни асьмелы асьмедыз ултӥяса возьыны. Удмурт адями сярысь ушъямон, ӟеч, чебер кылъёс вераны кулэ. Ужась но чидась калыкмы ялан куанер улыны кулэ шат? Визьмо, ужась, шуг-секытлы сётскисьтэм муртъёс котькыӵе калык пӧлын вань. 13 январе потэм газетысь, шонергес "Герд" бамысь, сюлэмез вырӟытӥз "Чалмыт улэме уг луы" нимын потэм статья. Тросгес мед луысалзы кышкасьтэм, удмуртлыкмес утись, политика улонэ пыриськись адямиосмы. Оло, улонмы но капчиёмысалгес. Ӝоген депутатъёсты быръён нунал но вуоз. Нош кинэ быръёно? Кинлы осконо? Мынам Валерий Митрофанов, Валентин Тубылов кадь адямиослы оскем птэ. Светлана Федулова, Ижевскын улӥсь. ӞУЧ ЁРОСЫН УДМУРТ ШӦМ Пӧртэм интыосын али ортчыло Куӟебай Гердлэн вордскемез дырысен 100 ар тырмонлы сӥзем ужрадъёс. Со вал Камбаркаын но. Районысь Советлэн тӧроез Владимир Новиков люкаськемъёсты тодматӥз тодмо удмурт тодосчилэн (учёнойлэн) но кылбурчилэн улон сюресэныз но лэсьтэм ужъёсыныз. Асьсэлэсь быгатэмзэс возьматӥзы дышетӥсьёс, дышетскисьёс, музон удысъёсын тыршисьёс. Адямиос сак кылӟизы куноосты - ужбергатӥсез Владислав Якуповез, тодосчиез Риф Насибуллинэз, газетчиез Алексей Шкляевез. Калыкез абдратӥз дано кырӟась Геннадий Ганьков. Таӵе ужрадэз Камбаркаын дасяны капчи ӧвӧл. Удмуртъёс ӧжыт, соос но лыктэмын бускель Башкириысь. Гердлэн книгаосыз сярысь вератэк ни, куд-огезлэн со сярысь татчыозь кылылэмез но ӧвӧл. Камбарка интыяськемын Кам сьӧры, отчы ижъёс ӵем уг вуыло. Но "Удмурт кенеш" огазеяськонлэн районысь люкетэныз кивалтӥсь Федор Кабиров та ужрадэ кыскыны быгатӥз кивалтӥсьёсты, педагогъёсты, культураен вырисьёсты, пиналъёсты. Кин тодэ, Герд, оло, копак ӟуч районлы удмурт шӧм пыртыны юрттоз. И. СИДОРОВ. АСЬМЕЛЭСЬ ДЫШЕТСКОЗЫ Та нуналъёсы Ижевскын ужало Россиысь Калыкез дышетонъя министерствоысь специалистъёс. Москваысь сяна, лыктэмын Санкт-Петербургысь но Новгородысь дышетӥсьёс. Маин Центрез бордаз кыскиз Удмуртилэн столицаез? Нырысь ик, пиналъёслы ватсаса тодон-валанъёс сётонъя люкам ӟеч опытэныз. Куноос арня ӵоже вуылозы тросаз школаосы, лицейёсы, быдэ вуымтэосын ужанъя клубъёсы, пинал кибашлыослэн выставкаосазы но мукет интыосы. Огъя вераса, вуэм делегацилы уж тырмыт дасямын. Ижевскын люкам материалъёсъя ивортон лэсьтэмын луоз Россиысь Калыкез дышетонъя министерстволэн апрель толэзе ортчоно коллегиезлэн заседанияз. Дышетӥсьёсмылэсь ужамзэс Москваын, мукет бадӟым городъёсын но синйылто бере - со туж умой ни. Дорамы таӵе ик дунъет сётӥсь мед луысал на. А. СЕМЕНОВ. "Турипи" но жаг куян Республикаысьтымы пӧртэм ёросъёсысь ньыльдонлэсь ятыр пинал кылем гужем июльлэн пумаз пыриськиз экологияя "Турипи" экспедицие. Сое радъяны юрттӥз ТСАР огазеяськон. Экспедицие шедён понна пиналъёс пыриськизы экология ужпумъёсъя конкурсэ. Экспедиция ортчиз, Пичи Пурга районысь Кечол шор ёзо школалэн юрттэмезъя. Удмурт кун университетысь но Ижевскысь медициная академиысь валтӥсь преподавательёслэн но аспирантъёслэн кивалтэмзы улсын пиналъёс тодматскизы инкуазь пӧртэмлыкъёсын. Тодматскизы отын улӥсь лулосъёсын, будосъёсын. Палэнэ ӧз кыле гуртын улӥсьёс но. Юан-веранъёс ортчытыса но мукет эскеронъёс пыр чакламын соослэсь тазалыксэс. Вань со люкам "узырлыкъя" нылпиос дунъет сётӥзы, кыӵе изъян вае адями аслаз ужан удысаз котырысь инкуазьлы, аслаз тазалыкезлы. Шор Кечол гурт котырысь инкуазез чылкытатонъя нимаз-нимаз дэмланъёс но дасязы. Кылсярысь, чакламтэ азе трос гинэ жуг-жаг куянъёс кылдӥллям, уноез соос ву котыре ик интыяськемын. Кечол тыысь вуэз эскерон но возьматӥз отчы кырсь вуослэсь мултэс люкаськемзэс но жуг-жаген тырмемез. Зэм, ваньмыз ик та дышетскись нылпиос экологъёс уз луэ, отчыозь будыны но кулэ ай. Но соос ваньзы ик ярато инкуазез, экспедиция бере уката но матэгес луизы солы. Азьланяз но трос тунсыкозэ, пайдаёзэ усьтозы на та пиналъёс, инкуазен ваче ки кутскыса. Оскиськом, кутскем ужмы азьланьтӥськоз, мукетъёсыз но нылпиос пыриськыны быгатозы выльысяз "Турипи" экспедицие. В. Капитонов, Удмурт кун университетысь валтӥсь преподаватель, экспедицилэн кивалтӥсез. Кинлы парсьпи, нош Иванлы - ошпи Кема гинэ калтыртӥз Пичи нимо ошпи газетмылы гожтӥськемъёслэн юртъеръёссы котыртӥ. Асьтэос чаклалэ, 13 сюрс мурт пӧлысь кудзэ ке одӥгзэ быръён капчи уж ӧвӧл. Алнаш палъёсы ке кожоно, шарканъёс но ӧжыт гожтӥськымтэ, играос, балезиноос озьы ик трослы бере уг кылё. Собере, маин пӧртэм Башкортостанысь Янаул ёросысь яке Сюмси, Грах палась лыдӟись? Татын улӥсьёс но озьы ик яратыса лыдӟо ук "Удмурт дуннеез". Йырыз копак поромиз мискиньлэн, кудпала кариськыны уг вала ни. Ярам, сюрес вожын мӧзмыт куараен бӧксӥсь ошез синйылтӥзы Удмурт телевидениысь "Улон-вылон" передачаез дасясьёс, юрттӥзы солы азьлане вамыштыны. Нош шонерзэ верано ке, Маши нимо нылоклэн капчи киыз, лототронысь шаръёсты бырйыса, кожытӥз сое Пичи Пурга ёросысь Ильинск черко гуртэ. Таяз учыре ошпилы нош ик йыртӥян сюриз: татчы ик кылёно яке артысь Абдэс-Урдэс, Арлан, Чокал, Шупшади, Сосновка гуртъёсысь шуныт гид утчано? Кема тунаны ӧз сётэ, кузётэм мае ке соку ик синйылтӥз "Красная звезда" колхозлэн председателез Василий Окунев. Буйгатӥз, сокем кыдёкысь, Кизнер ёросысь Мичурин нимо колхозысь вуэм куноез сӥлы карытэк нокызьы уз луы, пе. Котырысь гурт калыкез культура юртэ люкаса, бадӟымос праздник ортчытом шуиз, отын ик выль кузёеныд но тодматскод, пе. Озьы тӥни, Пичилы луыса, "Удмурт дунне" газетын ужасьёслы но шуд усиз Ильинск котырысь гурт калыкен тодматскыны. Пусйымон соиз, газетлы туэ тырмоз тямыстон ар. Ош кузёез быръён ужрад зэмос празднике ӧръяськиз, шуыны луоз, кызьы ке лыдӟисьёс понна, озьы ик газетын ужасьёс понна но. Нош кыӵе праздник ӧтем куноостэк? Ӝытэ пыриськизы "Удмурт кенеш" ассоциацилэн тӧроез Валентин Тубылов, Пичи Пурга ёросысь администрацилэн кивалтӥсезлэн воштӥсез Валентина Панфилова, та ёросысь ик почта кусыпъёсъя узеллэн кивалтӥсьёсыз, газетлэн конкурсэз пыр вормисе потэм почтальонъёс но трос мукет куноос. Тӧр сэргын пукизы ошпилэн кирос атайёсыз Аркадий Малков но Виталий Тюнин. Ӝытэз ортчытыны гуртоос ӟеч гинэ дасяськиллям. Культура юртлэн фойеяз кибашлыослэн ужъёсынызы бадӟым выставка радъямын вал. Ковёръёс, сяська пужыосын мальдӥсь валес котыръёс, чильтэръёс, пужыё носки-пӧзьёс, маиз гинэ ӧвӧл отын. Куно пумитан гурен но пӧраськемъёсын возьмаллям Ильинск палъёс кыдёкысь лыктэмъёсты. Нош сцена вылын югдӥсь тыл сямен пиштӥзы амарилислэн улэп сяськаосыз. Кутскиз кема возьмам ӝыт. Кинлы меда сюроз ни Ошпи? Таӵе малпан берга, вылды, котькудӥзлэн залын пукисьлэн йыраз. Тук-тук! йыгасько сюлэмъёс. Но мар ай та таӵе? Ош вӧзы лыдӟисьёс понна ватсаськизы на мукет но кузьымъёс. Иське, Ильинск почта ёзлэн кивалтӥсезлэн Галина Степановалэн та ужрадлы шуыса нимысьтыз пужыятэм пуйыысьтыз одӥгезлэсь гинэ газетлы гожтӥськисьлэсь нимзэ уз кыске. Тани Шупшади гуртысь Лидия Степанова чай юыны пуксьыкуз, ӟеч кылъёсын котьку тодаз ваёз ни, дыр, "Удмурт кенешез". Нош Ильинскысь газосварщиклы Юрий Филимоновлы удалтӥз парсьпиен. Таӵе кузьым лыдӟисьёс понна дасям "Красная звезда" колхоз. Вал на мукет пӧртэм кузьымъёс но - дунтэмъёсыз но дуноосыз. Нокудӥз но гурт обиде ӧз кыльы. Но тужгес удалтӥз арланъёслы. Пичи гинэ гуртын ӝыныезлэсь тросэз улӥсьёс эшласько вылэм "Удмурт дунне" газетэн. Кызь кык мурт пӧлысь куинез утӥз кузьым. Ошмы но со пала ик йырзэ шонтӥз. Шудо кузёос, пенсионеръёс Мария но Иван Демаковъёс, Машалы сяна, тау карыны кулэ, дыр, ньылетӥ классын дышетскись Максим Устиновлы но. Усто кырӟаны быгатӥсь та пияшлы оскемын вал угось Ошпилэсь азьлань сюрессэ тодыны. Мар бен, туж шумпотымон: тужгес но дуноез кузьым газетмылэн кемала дырысь эшъёсызлы сюриз. Таин Пичи ошлы сӥзем зэмос выжыкылмы йылпумъяське. Тау кылъёс верам потэ на люкаськемъёслы калыклы шулдыр мылкыд кузьмась кырӟась-верасьёслы Анна Плотниковалы, Николай Волковлы, Сосновкаысь "Пужым пушъет" ансамбльлы но кивалтӥсьсылы Леонид Душниковлы, Курчум-Норъяысь Валентина Каменщиковалы, Надежда Костылевалы но Любовь Акчуриналы, озьы ик Ильинск калыклы. Л. Малых. Туспуктэмъёсыз В. Камашевлэн. Гидэ - ӟеч пудо, музъеме - "зарни" кидыс Тулыс вуон азьын котькуд аре республикаысьтымы гурт хозяйствоын но соин герӟаськем удысъёсын тыршисьёс (АПК) кенешыны люкасько. Та сям улонэ пыӵаз ни. Выльдӥськон кутскем бере, гурт хозяйствоын ужасьёслэн сюлмаськонъёссы трослы будӥз. Шуг- секытъёсты капчигес вормыны дэмен ужаса-кенешыса. Удыслэн миым ужамез но туэлы ужпумъёс сярысь вераз гурт хозяйствоя но сиён-юонъя министр Василий Жуйков. Юослы будыны куазь тупаз, шуыны луоз, бусыын тыршисьёс но агротехникалэсь куронъёссэ умой быдэсъязы. Озьы 1 миллион 140 сюрс тонна ю-нянь люкамын, 1996 арен ӵошатыса, 148 сюрс тонналы тросгес, нош гектарысьтыз - 3 центнерлы. Алнаш район гектарысьтыз 24,4 центнер басьтӥз, вавожъёс - 23,8, можгаос но пичи пургаос - 22-23, нош Асан совхоз техникум - 40, Завьял районысь "Ижевское" ОПХ - 33 центнер. Миым 87 сюрс тонна картофка бичамын гектарысь 107 центнер усиз, нош Алнаш районын - 140, Вавож ёросысь "Луч" колхозын - 240 центнер. Етӥн, 1996 арен ӵошатыса, ӝыныез гинэ люкамын. Пудо уллё арысь аре сӥнэ. Кылем арын скалъёслэн лыдзы 6 процентлы кулэсмиз, парсьёслэн - 5-лы. Тылобурдо вордон фабрикаос кык пол трос курег будэто. Тани Завьялово районын скаллы быдэ шорлыдын 2750 литр кыскемын, со пӧлысь 72 процентэз нырысетӥ сортэн вузамын. Воткинск районысь "Пихтовка" хозяйство скаллы быдэ 4 700 литр басьтӥз, та ёросысь ик "Чайковскийын" - 4 200 литр. Сюмсиос, кизнеръёс, селтаос 2000 литрлэсь ӧжыт кыскиллям. Сюмси районын одӥг "Нива" эштос гинэ та лыдпуслэсь ятыр люка. Туж шуг фермеръёслы, соос кредит басьто но берыктыны уг ни быгато. Ортчем аре 15 хозяйствоос гинэ пайдаен ужазы. 60-лэсь трос хозяйствоос куашказы, соиз валамон, вужмем техникаен ужаны секыт. Та дыре гуртын улӥсьёслэн тужгес трос сюлмаськонзы - умойгес тулыс кизён ужъсьёслы дасяськон. Туэ кидыс тырмыт дасямын, 78 процентэз кизьыны ярамон, кӧнязэ ке чылкытатоно на. Кылем аре одӥг гектаре 11-12 килограмм минерал сылал пыртэмын, нош туэ кык пол ичи шедёз. Эстӥськон ӝыныез дасямын кылемзэ басьтыны кредит кулэ луоз. Трос хозяйствоосты шуге-леке вуттоз вужмем техника. Туэ котькуд районын МТС (машинно- технологической станция) кылдытыны чакламын. Отын вужмем техникаез тупатъялозы, вылез но вуоз. МТС-ысь траторъёс но - комбайнъёс районысь вань хозяйствоосын уже кутӥськозы, АПК-ез азинтонъя программа дасямын вал. Нырысетӥ люкетаз хозяйствоослэсь нимзэс вошъян нокыӵе пайда ӧз вайы. Азьло нимын ик усто ужало ик Вавож, Можга, Ува но куд-ог мукет районъёсысь колхозъёс. Та хозяйствоосын техника дыраз тупатӥське, дисциплина вылӥын, юисьёс-азьтэмъяськисьёс но ӧжытгес. Программаез уже пыӵатэм бере, ю-нянь кеносъёсын уз кылльы ни, сое пызь изӥсь предприятиосын кеньырлы, пызьлы, комбикормлы пӧрмытозы. Солэн пайдаез нянь будэтӥсьёслы но соку ик шӧдӥськоз. Таяз аре хозяйствоос, кытын скаллы быдэ 2000 литрлэсь ӧжыт йӧл кыско, юрттэт (дотация) уз басьтэ. Сое бадӟымгес сётозы. 4000 литрлэсь трос кыскисьёслы. Юрттэт вуоз сӥль, ыж гон но ю тысь понна. Гурт хозяйствоя министерство пудоосты висёнлэсь утёнлы ӧжыт саклык висъя. Соин уно пудо кулэ но, хозяйствоос бадӟым изъян адӟо. Ортчем аре уно скалъёс висизы но 18 сюрс кунянъёс кулӥзы парсьёс - 34 сюрс. Тросгес пинал пудо быре Алнаш, Грах но Каракулино районъёсын. Удмурт Республикаысь Правительстволэн Тӧроез Павел Вершинин, гурт хозяйствоын ужпумъёс сяна, вераськиз мукет удысъёсын но югдур сярысь. Котькуд вакытэ республикаысьтымы гурт хозяйстволэн азинсконаз кин ке но шӧдскымон пытьы кельтэ, уката ик бадӟым хозяйстволэн кивалтӥсьёссы. 60-70 аръёсы синмаськымон ужазы но хозяйствозылэсь экономиказэс юнматӥзы Горынцев, Горбунов, Лазарева, нош соос бере - Сырых, Чувашов, Калинин. Али но тросэз егит кивалтӥсьёс, секытлы сётскытэк выль амалъёс шедьто но хозяйствооссы пайдаё ужало. Республикаысьтымы районъёс но хозяйствоос люкемын группаослы. Малы со озьы? Кызьы тодмо, уй пал районъёсын музъемъёс но начаресь, сюресъёс но уродэсь. Соослы секытгес йӧтэ ю-нянь будэтыны, пудо вордыны. Та ласянь шор районъёсын югдур умойгес. Нокытын ю-нянь будэтон, сӥль- йӧл поттон капчи уг сётскы ке но, лымшор районъёсысь хозяйствоослэн музъемъёссы ӟечгес, сюресъёссы вольытгес, соин ик поттэм ваньбурлэн но асдуныз пичигес луэ. Ваньзэ сое чакласа, висъям юрттэтлэн быдӟалаез пӧртэм луоз: Лымшорын пичигес, уйпалын бадӟымгес. Кылдытэм МТС-ёсы тросэз техника кунгож сьӧрысь ваемын луоз. Со асьмелэнлэсь оскымонгес ужа. Вылаз ик, асьме заводъёс улӥ ӟечлыкен техника сёто солэсь дунзэ будэто. Озьы ке ӧй луысал, хозяйствоос дорамы поттэм трактор-комбайн басьтысалзы. Миым Сиён-юонъя удмурт корпорация ю-тысь понна хозяйствоослы уксё тырыны ӧз быгаты. Табере та ужпумез ялан син азяз возёз министерство. Колхозъёслы уксё тырыны нимаз кредит висъяськоз. Павел Николаевич умой ужамзэ пусйиз Сюмси районысь "Нива" колхозлэсь (кивалтӥсез Валерий Никифоров). Туэ етӥн будэтонлы бадӟым саклык висъямын луоз. Со понна бюджетэ нимаз ёзэтэн 1 миллиард манет пыртэмын луоз. Огъя вераса гидэ, ӟеч пудо мед пыроз, музъеме зарни кидыс мед усёз. Н. ВОЗИСОВ. Вавож районысь Гурезь-Пудга шор ёзо школаын 19 ар ужа ини Надежда Геннадьевна Щеткина. Глазов пединститутлэсь физикая но математикая факультетсэ йылпумъяса, дор палъёсызлэсь кыдёке кошконо луиз. Вордскем Кез районзэ ялан уйвӧтъёсаз но адӟылӥз вал нырысь пал. Бӧрысьгес малпанъёсыз воштӥськизы, татын ик семья но кылдытӥз. Надежда Геннадьевнаен данъясько дышетӥсьёс но, дышетскисьёс но. Азинсконъёссэ шӧдыса, 1990-тӥ арысен сое завуче ужаны пукто. Туспуктэмез В. БЕЛОМОРСКИХЛЭН. Кемалась ик ӧй вал Кунэз кышкытлыклэсь утёнъя органъёс Выль ар азьын пусйизы 80 ар тырмонзэс. "Удмурт дунне" газет но быгатэмезъя пыриськиз та дано лыдпусэз пусъёнэ. Ӧжыт ӧм ке но гожтэ чекистъёслэн толло но туннэ ужъёссы сярысь, тросэз мадьытэк кылиз. Соин ик туннэ дэмласьком на асьме контрразведчикъёсмы сярысь тодады вайыны. Иван агай - ошпилэн кузёез Уно толэзь ӵоже ми, редакциын ужасьёс, тунаса улӥм: кыӵе ёросэ но кинлы шедёз кузьыммы - 400 килограммъем ошпи. Газетэз лыдӟисьёсмылэн но сюлэмзы ӵогъялляз, дыр. Тани ук, Ильинск клубе но мамында калык люкиськиз, пукон инты но ваньмызлы ӧз шедьы, ява. Котькудӥз оскиз, луоз: ошпи мыным сюроз. Нош котькинлэсь шудо вылэм Арлан гуртысь 70 аресъем воргорон пенсионер Иван Ильич Демаков. Вормисе потэмзэ тодэмез бере кӧня ке минут ортчем бере гинэ соин кенешиськом. - Оскиды-а, ӧд-а, "Удмурт дуннелэсь" кузьымзэ басьтоды шуыса? - Ма, со сярысь кӧня ке малпаськылӥ ик. Тани "Улон-вылон" передачаын нырысетӥ тур дыръя пичи нылаш Маша Пичи Пурга ёрослэн лыдпусэныз шарез поттӥз, собере - Ильискысь почта ёзлэн лыдпусэныз. Мынам но кузпалэ Маша, со ик газетлы но гожтӥськиз вал. Юнме шорысь озьы уз луы, малпаськылӥ мон, оло, ошпиез но утом ай. - Осконды быдэсмиз, табере ошпи гидкуазьдэ шулдыртоз. - Туж шумпотӥсько, "Удмурт дуннеын" ужасьёс лыдӟисьёссылы таӵе кузьым дасяллям шуыса. Туж кемалась эшъяськисько ни газетэн, но ужрад огпол но ӧй вал на кадь. Кылем арын сӥзьыл гинэ скалмес но кунянмес вузам. Пересьмиськом ини уг, пудо котырын бызьылыны но секытгес луэ. Соин ик та ошпиез но коньдонэн басьтом, дыр. - Пичи уксё ӧвӧл со - ошпи дун. Чебер ик ӧвӧл, дыр, но уд вералэ-а, кытчы кароды со быдӟа коньдонэз? - Кыӵе ке бадӟым вуз басьтом, дыр. Собере нылпиослы но пичияк юрттоно. Нылъёсы уло но ужало Ижевскын, одӥгез - дышетӥсь, мукетыз - медсестра. Одӥгез пие улэ гуртамы ик, нимаз юртъерен. Алексей нимоез - майор. Погонэн адями со сыӵе ини, аслыз ачиз кузё ӧвӧл. Шер бертылэ дор палъёсаз. Нылъёсмы уг вунэто, арнялы быдэ сямен вуыло. - Нылпиостэс дышетыны сюлмаськиллям. Озьы-а? - Озьы-озьы. Ми ёзъёслы тырмыт дышетскыны ӧз кылды. Улон сыӵе вал ук. Ма, мон сизьым ар дышетски ик. Куать иськеме Ильинск школае ветлылӥм вал. Нырысетӥ араз пыдэ пононэ ӧй вал. Сӥзьыл школае гольык пыд бызьылӥ ин. Лымы усем бере, дышетсконме куспетӥ кароно луиз. Собере кут кутаны дыши, кӧня меда кутай соосты, вераны ик уг быгаты. Войнае атае но братэ быризы. Туж секыт вал со. - Туала улонмы но капчи ик ӧвӧл ук. - Ма, туала улонэз азьлоеныз ӵошатод шат. Туннэ тӧдьы нянь сииськом ни. Ми пенсия басьтӥськом, пудо-живот, бакча возиськом. Номырлы ик ум ёрмиське кадь. Нунал лумбыт бызьылӥськод. Пенсиын ке но, дыр воксё уг тырмы. Тани али вакытыз сыӵе: ялан лымы октоно-калтоно луэ. Азьло нош кыӵе улӥм. Война дыръя но, война бере но колхозник шутэтскытэк ужалляз. Армие басьтэмзы бере, мон туж зол пайми: отын гинэ но солдатъёслы шутэтскон нуналъёс сётъяло вылэм. Армия бере ужаны интыяськи чугун сюрес вылэ. Отысь ик пенсие но потӥ. - Иван Ильич, кызьы тӥ малпаськоды, ма асьмелы тырогес улыны люкетэ? - Дисциплина ӧвӧл. Азьло со ласянь золгес вал. Уг тодӥськы ни, войналэсь азьло-а, война вылтӥ-а бускель хозяйствоын кык кышномуртъёс шундыберган лушкаллям. Соосты тюрьмае пуктӥзы. Одӥг шаньга шундыберган понна. Огез берытскиз ик, мукетыз ӧз ни. Али котькудӥз сямен мар лэсьтэмез потэ лэсьтэ. Кивалтӥсьёсты ик басьтом. Соос миллионъёсын уждун басьто, нош ужась мурт уксётэк пуке. Азьвыл аръёсы югдур сыӵе ӧй вал. Мар шуод, ӟеч улон асьме бордысь потэ. - Нош удмурт кыллэн ӵуказе нуналэзлы оскиськоды-а? - Оскисько. Огвакытэ сое воксё вунэтӥзы ни вал. Тани Пичи Пургае мынӥськод но кылӥськод, удмуртэз но ӟуч сямен лабыртэ. Пиналъёс сярысь веранэз ик ӧвӧл ни. Табере удмурт кыл но ӵемгес чузъяське ни. Алигес гуртамы ёрос больницаысь врачъёс ветлӥзы, калыкен удмурт кылын лад-лад гинэ вераськизы. - Мар сӥзьысалды "Удмурт дуннеез" лыдӟисьёслы? - Верай ини, мон газетэз трос аръёс ӵоже лыдӟисько. Азьланяз но соин уг люкиськы. Басьтэлэ но лыдӟелэ "Удмурт дуннеез". Соку тӥ но, оло, мон кадь ик шудо луоды. Ю. Александрова. КЫК ПОЛЭС НЮРЪЯСЬКОН Кун Кенешысь Наукая, дышетонъя, культурая но егитъёсын ужан политикая комиссилы ортчемез ар капчиен ӧз сётскы. Быдэс ар ӵоже валтӥсь интыын вал уждун ужпумъёсты сэрттон-пертчон. Та ужпум бордысен кутсконо луэ котькуд ужан нуналэз, шуэ комиссилэн тӧроез Алла Васильевна Еременко. Тужгес но секыт югдурзы дышетӥсьёслэн: я отын, я татын соос пумитъяськон ужрадъёс ортчытъяло. Буйгало огъёсыз, ӝутско мукетъёсыз - ваньмызлы дыраз уждун тырыны луонлыкъёс ӧвӧл. Озьы, дыр, со луэ ини, угось кылем арын калыкез дышетонлы бюджетын учкем куронъёс пумозяз быдэстэмын ӧй вал. Кылсярысь, книгаос, учебникъёс поттонлы бюджетын чакламын вал 5 миллион манет (выль коньдонэн вераса). Со сокем трос ӧвӧл но кадь, но та коньдон но шедьтэмын ӧй вал. Алла Васильевналэн верамезъя, та ужпум пумысен трос вераськонъёс вал асьме Правительствоын но, Москваын но. Табере таяз арлэн бюджетаз книга поттонлы 23 миллион манет пала висъяны учкемын. Мед быдэсмоз вылэм. Мед вылэм, но котьку озьы уг луы. Кӧня ӟеч законъёс бордын ужаз милям комиссимы кылем арын, но пайдаез сокем ик уг шӧдӥськы, шуэ А. Еременко. Законъёсмылэсь ужамзэс эскерон вылысь, потамы Глазов, Камбарка, Пичи Пурга, Сарапул, Воткинск, Вавож районъёсы. Жаляса верано, шумпотымонэз ӧжыт. Мар бен люкетэ? Нош но нош коньдонлэн тырмымтэез. Тани туэ кутэмын егитъёсын ужан политикая нимысьтыз программа. Но сое быдэстон понна бюджетын, интыысь бюджетъёсты но вераса, коньдон висъяськоз-а меда? Та ужез нуонлы али 11 район гинэ коньдонзэс висъяны дасесь. 1998 арлы бюджетлэн проектэз бордын али министерствоос но депутатъёс ужало на. А. Еременколэн комиссиез нюръяське, бюджетын кутэм законъёсты улонэ пыӵатон понна нимысьтыз коньдон мед висъямын луоз шуыса. Комиссия озьы ик бюджетын коньдон висъяны ӵектэ: - педучилищеосын дышетскисьёсты сюдон но училищеосын дышетскись сирота нылпиосты сюдон понна; - нылпи юртъёсы, интернатъёсы небыт мебель басьтон понна; - асьме нылпиослы республикамылэн палэназ дышетскон, эмъяськон, олимпиадаосы пыриськон понна; - гуртъёсысь нылпиосты школае транспортэн нуон-ваён понна; - Диагностической центрлы, кытын эмъясько висись пиналъёс; - дышетӥсьёслы внеклассной уж нуон понна; - нылпиослэсь тодмо спортивной командаоссэс возён понна. Мар бен пусйымонзэ лэсьтӥз на та комиссия кылем ар ӵоже? Вератэк уз луы Щепкин нимо театрлэсь национальной студизэ йылпумъям удмурт егит артистъёслы улон интыос висъян сярысь. Оскон вань: бюджет чотын ужась организациос туэ мозмытэмын луозы машина воземзы понна дорожной фондэ налогъёс тыронлэсь. Та сярысь законлэн проектэз дась ини, бюджетын но талы нимысьтыз статья учкемын. Зэмзэ но, кыӵе ке школалы яке нылпи юртлы кузьмам машина но куд-ог дыръя шумпотон интые уно сюлмаськонъёс вае, уго машинаез регистрировать карон понна гинэ трос коньдон тыроно. Кылем арын усьтэмын вал Балезино - Ижевск чугун сюрес лэсьтӥсьёслы памятник. Та уж кема аръёс ӵоже мырдэм-мырдэм мынӥз вал. Трос курадӟонъёссы библиотекаосын ужасьёслэн. Кулэ журналъёслы, газетъёслы коньдон ӧвӧлэн гожтӥськыны уг луы. Та ужпум арысь аре ӝутскылэ ке но вал, быдэстытэк кыльылӥз. Туэ та ужпумлы комиссия нимысьтыз саклык висъяз - газетъёслы, журналъёслы гожтӥськыны библиотекаослы коньдон висъямын вал. Тросаз интыосын культурая юртъёс, клубъёс эстӥськытэк сыло. Юрттэт сётэмын 28 сыӵе юртлы. Россиын али дасямын ини школаосын реформаос ортчытонъя нимысьтыз концепция. Асьме дышетӥсьёс но сое котыр ласянь эскеризы ини. Ушъям интые, дышетӥсьёс сое ӵемгес пыкыло, курлало. Нош кызьы меда учко та чаклам реформаос шоры комиссилэн адямиосыз? Алла Васильевналэн верамезъя, сыӵе реформаосын быдэсак соглаш кариськыны уг луы, уката ик половой воспитаниез нуонъя чаклам программаен. Дышетӥсьёсын, Калыкез дышетонъя министерствоен валче ужаса, со реформаосъя асьмелэсь куронъёсмес дасямы. Тӥни озьы тырше Кун Кенешлэн огез ялан ужась комиссиез: нырысь нюръяське калыклы кулэ законъёс дасян но кутон понна, собере нош ик нюръяське законъёсты улонэ пыӵатон понна. Т. БАННИКОВА. КЫЛ КУТОНЛЭСЬ УД ВАТСКЫ Госбезопасностьысь ветеранъёслэн верамзыя, война бере соослы трос саклыксэс но дырзэс висъяно луиз фашистъёслэсь гыжкалъёссэс шараянлы. 1953 арын августэ Завьялысь чекистъёслы ивортӥзы "Красноармеец" колхозлэн тӧроезлэн валантэм улэмез сярысь. С. П. Хатункин Удмуртие вуэмын шунды пуксён палъёсысь. Ӵыжы-выжыосыз пӧлысь нокинэн но кусып уг возьы, вордскем палъёсаз уг берта. Колхозэ милициын ужасьёс вуо ке, соослэсь лыктэм мугъёссэс тодыны тырше, сюлэмшугъяське. Эскеронъя тодмо луиз, С. П. Хатункин вордскемын Воронеж областьын. Завьял районысь Бахил гуртэ вуэм 1945 арын сӥзьыл, госпитальын эмъяськемез бере. Сӧсырмыны шедем, фашистъёслы пумит ожмаськыкуз. Бахилын со кышнояське, корка басьтэ. Нырысь ужа колхозын бригадир луыса. Кык ар дышетскемез бере, сое "Красноармеец" колхозлы тӧрое пукто. Дышетскыкуз партие пыре. Улоназ номыр но сыӵе-таӵеез ӧвӧл кадь: огшоры воргорон, фронтовик. Но чекистъёс мур-мур бугыртӥзы пӧртмолэсь улон сюрессэ. 1941 арын октябрьлэн кутсконаз Хатункин Горд Армиысь пегӟыса дораз, Сумы областьысь Тростянец городэ, бертэ. Соку ик интыяське немецкой полицие. Нырысь вал огшоры полицай, нош дас нунал ортчыса луэ Смородино станциысь полицилэн кивалтӥсез. Та должностьын служить каре 1943 арозь. Полициен кивалтыкуз, Хатункин чугун сюресэз, отысь юртъёсты но вагонъёсты возьманэз радъя, ачиз эскере постъёсты но нарядъёсты, кутылэ но эскере осконтэм адямиосты, ӵем дыръя жугылэ соосты. 1942 арын тулыс полицайёс кырмо одӥг воргоронэз, со кеносысь кӧжы лушказ шуыса. Хатункин сое районысь полицие келя. Отын та воргоронэз ошо. Та аре ик Хатункин аслаз полицайёсыныз ӵош ичизэ сизьым пол пота партизанъёсты утчаны. 1943 арын августэ со эшъёсыныз ӵош советской парашютистэз кырме. Мар луиз соин азьланяз, тодмо ӧвӧл. 1943 арын сентябре предатель немецъёс сьӧры Винница областе пегӟе. Татын но полициын ужа: калыкез немецъёс вылэ ужатэ, выт бича, обыскъёс лэсьтэ но пудо сиён таласа ветлэ, адямиосты жуге. Озьы кыстӥське вуоно арын мартозь. Хатункин немецъёслы вузаськемзэ ватыны быгатӥз. Сое армие басьто. 1945 арын октябре демобилизация бере, со дораз уг берты, кыл кутонлэсь кышка. Лыктэ Удмуртие, татын сое шараяло. С. П. Хатункин военной трибуналъя 10 арлы пытсэтэ шедиз. Илья Алексеевитч Майшевез ӝегатӥзы Уваысен 1944 арын 12 ноябре. Та районысь Рябово гуртысь со 1941 арын войнае кошкиз. Октябре пленэ сюриз. Лагерьысь пегӟе, сизьым толэзь ӵоже ватскыса улэ. Собере нош ик лагерь, одӥгез, кыкетӥез. 1943 арын апреле ачиз куриське немецкой армие. Майшевез сапёрной батальонэ ысто. Татын со радиостанциен ужаны но пуштытъяны дышетске. Дасязы сое агентэ-диверсантэ. Выль кузёосызлэсь оскемзэс Майшев ӝоген быдэсъяны ӧдъяз. 1943 арын со немец разведкалэн косэмезъя тодматске партизан отрядэн кусып возись Дрозд Фросяен. Фросяез алданы быгатыса тодэ, нылмурт доры партизан лыктыны кулэ шуыса. Майшев ӝегатскытэк ивортэ со сярысь немецъёслы. Фросяез, солэсь анайзэ, атайзэ, сузэрзэ но лыктэм партизанэз фашистъёс ыбо. Кык толэзь ортчыса, Майшев нош ик кузёоссэ шумпоттэ. Со Хрущев нимо партизан отрядэ каръяськыны быгатэ. Собере тушмонлы ивортэ мукет отряд сярысь: интызэ, кужымзэ, лыдзэ. Немецъёс 25 партизанэз быдтӥзы но Соколянка гуртэз сутӥзы. Соку ик Майшев лушкемен вие А. П. Баклэн отрядысьтыз взводлэсь командирзэ. Ачиз пегӟе украинской националистъёслэн отрядазы. 1944 арын 3 январе фашистъёслэсь мозмытэм Ружин гуртысен партизанъёслэн командирзы А. П. Бак Майшевез ӝегатыкуз ыбе но пыдзэ сӧсыртэ. Майшевез госпитале нуо. Отысь сое мукет сӧсырмемъёс пӧлын тылэ келяло, медикъёс но возьмасьёс кӧлэме кылё. Йӧнамез бере Майшев пегӟыса Увае бертэ. Ужаны интыяське чугун сюрес вылэ. Татысен ик сое шараяло но кырмо. Военной трибунал предателез ыбыны приговор кутӥз. Кызьы ивортӥм ни, кылем арня куспын Россилэн Президентэз Борис Ельцин ветлӥз Италие. Делегациын вал асьме Кун Кенешлэн Тӧроез Александр Волков но. Россиысь лыктэмъёс вуылӥзы Ватиканэ. Соосты ӟечкылаз Папа римский. А. Волковлы католической черклэн йырыз сётӥз азвесь медаль. "Удмурт кенеш" палэнэ уг кыльы Кылем пятницае Иже люкаськылӥзы вань удмуртъёслэн огазеяськонзылэн Пичи кенешаз быръем муртъёс. Национальной собранилэн ужез кык люкетлы висъямын вал. Кенеше лыктэмъёс нуназеозь трос ужпумъёсты эскерыны вуизы. Соос пӧлын - интыосысь кивалтон ёзъёсы бырйисьёслы дасяськон но отчы пыриськон, гуртын улӥсьёслэсь кивалонъя общественной органъёссэс (гурт кенешъёсты) кылдытон сярысь положениез эскерон. Ӟырдыт вераськон ӝутскиз Удмурт Республикалэсь конституцизэ выльдыны мылкыд карисьёс пумысен. Кылдэм югдурез лыдэ басьтыса, Пичи Кенеше быръемъёс огкылысь сямен кутӥзы нимысьтыз вазиськон, соос куризы конституциез воштон сярысь ужпумез Кун Кенешлэн эскероно ужпумъёсыз пӧлысь куштыны но калыклы та вакытэ кулэгес луись ужъёс борды басьтӥськыны. Нуназе бере филармонилэн залаз эшшо но трос калык луктӥз. 14 часын кутскиз Куӟебай Гердлэн 100 ар тырмонэзлы сӥзем кенеш. Солэн улонысьтыз тодмотэм учыръёс, творчествоез сярысь веразы учёнойёс Фома Ермаков, Владимир Владыкин, Альберт Разин но мукет эшъёс. "Удмурт кенешлэн Тӧроез Валентин Тубылов ялӥз, Куӟебай Герд огазеяськонлэн Данъян книгаяз пыртэмын шуыса. Пумиськон йылпумъяськиз шулдыр концертэн. О. Марков. Журналистъёсын пумиськонъёс "Узыръёс" но курасько Удмурт музъеммы котьмаин узыр. Солэн сӥосаз, газ, му вӧй сяна, вань уранэз но, пӧртэм пумо эгырез но. Коть туннэ ик кутскыса, шахтаос пукты. Ужпум мукетыз бордын: быгатом-а та узырлыкмес республика понна ужатыны, калыкмылэсь улон-вылонзэ умоятыны? Юан ас кожаз кылдэ, нефтьлэсь потэм коньдонмылэсь быдэс дуннее пазьгиськемзэ адӟыса. Миллионъёсын, миллиардъёсын кошкемын со пӧртэм пумо кузёослэн счётъёсазы. Узыр Удмуртия нош ялан Москваетӥ кураськыса ветлэ. Ма карод на, озьы ужаськомы бере. Му вӧй поттон пумысен газетамы огпол гинэ ӧм гожъялэ ни. Туннэ нош ик берытскиськом со борды, муг сётӥз та удысын нырысьсэ вузаськон-конкурс ортчытон. Та сярысь журналистъёслы вакчияк ивортон лэсьтӥз республикаысь Правительстволэн Тӧроезлэн воштӥсез А. Г. Злобин. - Нефть поттонъя конкурсэ сюризы Патраковской, Центральной но Турецкой месторождениос, - шуиз со. - Ваньмыз лэсьтэмын Россия Федерациын инкуазь но музъем узырлыкъёсты кутон сярысь законъя. Быръемын вал но ужаз 24 экспертлэсь кылдытэм нимысьтыз комиссия. Кыӵе куронъёс ми пуктӥм му вӧй поттон интыосты басьтыны мылкыд карисьёс азе? Нырысь ик - коньдонэн но экономикаен герӟаськемзэ: кудӥз кузё тросгес пайда сётыны быгатоз. Кыкетӥез - кин умойгес радъялоз геолого-разведочной но технической ужъёсты. Кызьы пусйиз Александр Григорьевич, Удмуртиын та выллем конкурс нырысьсэ ортчиз, Россия Федерациын но умой-умой радъямтэ. Соин ик азьланяз трос тупатъянъёс, ватсанъёс пыртоно луоз на. Конкурсын ньыль конкурент пӧлысь вормиз Удмурт нефтяной компания. Со ужалоз "Удмуртнефтен" ӵош, кузёез - Москваын улӥсь господин Логвиненко. Комиссие быръем муртъёс та адямилы оскемзэс верало, тодо сое Ижевскысь мотозаводын ужамезъя. Кӧня тыр усиз выль кузёлы му вӧй поттон инты - со сярысь журналистъёслы ӧз вералэ. Пусъемын огез - республика понна пайдаез одно ик луоз, налогъёсты гинэ басьтыса но. - Туннэ нуналлы Удмуртиын эшшо 46 месторождение кузеоссэс витё, - шуиз А. Г. Злобин. - Басьтӥсь шедиз ке - вузано, республикамылы пайда мед ваёзы. Выль интыосты утчанэз, геолого-разведочной ужъёслы быдтэм коньдонэз государство ас вылаз басьтэ. Со чотын асьме бюджетэ месторожденилы быдэ 50 ар куспын пыре 14-17 миллиард манет. Нош кӧня ыштонъёс адӟиськом - таизэ нокин уз вера. Музъем сӥосты киултон понна ожмаськонлэн пумыз-йылыз уз луы. Вормозы узыръёс. Соиз валамон. Маиз кылёз та музъем вылын улӥсь-вылӥсь калыклы? Тӥни ма бордын ужпум. Л. Медведева. ЪВИИИ Тол Олимпийской шудонъёс Кин кӧня утӥз (16 февральлы) Зарни Азвесь Бронза Норвегия 5 7 4 Германия 5 5 6 Россия 7 3 1 Австрия 2 3 6 Канада 4 4 1 Россилэн сборноез нуналлы быдэ сямен зарни октэ. Бадӟым вормон басьтӥз япон йӧ вылын 20 аресъем москвич Илья Кулик. Зарни медаль "пальпотӥз" Галина Куклевалы. Интернет огъя сетьысь нош ик выль ивор вуиз: нылъёсмылэн командазы 4х5 иськеме бызьылонын, 55 минут 13 секунд куспын сюресэз ортчыса, вормисе потӥз! Таиз зарниез "дуризы" Нина Гаврилюк, Ольга Данилова, Елена Вяльбе но Лариса Лазутина. Коньдон дуннеын ПОЧИНОК НОШ ИК КЫШКАТЭ Элькун Правительстволэн юртаз кылем субботае люкаськылӥзы Удмуртиысь бадӟым промышленной предприятиослэн директоръёссы но коньдон ужпумъёсъя валтӥсь специалистъёс. Соосын пумиськон ортчытӥз Россиысь выт тыронъя кун службалэн кивалтӥсез Александр Починок. Валамон ини, директоръёслы та пумиськонлэсь мар ке но ӟечсэ витьыны шуг вал. Озьы ик луиз: Александр Петрович выт тырисьёсты ӧз буйгаты, тросгес кышкатӥз кадь. Ма, меӵак вераз ук: "Жалямез эн вите, югдур секытгес но луыны быгатоз ай". Час но ӝыны пала вераськытозяз, кӧня ке пол ивортӥз, таяз арлы бюджет туж чурыт луоз шуыса. Мукет сямен вераса, вытъёстэс, пе, берпум копейкаозь тыроды, нош казнаысь трос коньдон эн вите. Кин ке тыриськонъёсыныз шуге-леке вуиз ке, тыриськоз государстволэн дуно бумагаосыныз. Пунэме кылемъёсты нокин но уз жаля. Со дыре ик государство но тыршоз интыысь бюджетъёслы но предприятиослы коньдон дыраз висъяны, кылсярысь, пыӵал тӥрлык поттӥсьёслы. Соин ик али ваньмы азьын одӥг бадӟым ужпум - выт тырисьёслы но, государстволы но рос- прос чаклано ог-огзы азьын пунэме кылемзэс но сое ӝегатскытэк тыроно. Коньдон ужпумъёсъя югдурлы дунъет сётыса, А. Починок пусйиз, та удысын шуге-леке вуон ӧвӧл на ортчемын шуыса. Зэм, манет али но юн, матысь дыре но сыӵе ик кылёз, но предприятиослэн ог-огзылы бадӟым тыриськонъёссы сэрен югдур ушъямон ӧвӧл. Директоръёс огдышемзыя бадӟым дунъёслы ӝожтӥськыны ӧдъязы вал, но Александр Петрович соосты уретӥз: тӥ, пе, ваньзэ зэм вераськоды, но вытъёстэс озьы но, тазьы но тыроно луоды. Собере кӧня ке буйгатӥз ик, чугун сюрес вылын, музъем эгыр но электрокужым понна дунъёс воштӥськыны кулэ шуыса. Озьы ик шӧдскымон кулэсмозы сурлы но чеберъяськон (ювелирной) арбериослы акцизъёс. Зэм, таиныз иворен люкаськемъёс туж ик ӧз тунсыкъяське кадь. Сурен но зундэсъёсын йырин шат, ужасьёсыдлы толэзьёсын уждун тырыны уд ке быгатӥськы. Вылаз ик, выт тыронъёс, шӧдске, нош ик будозы. Тани табере вань юртъёсты (улон коркаосты но, завод корпусъёсты но) рынок дунэн, вылӥенгес, дунъялозы. Озьыен, соос понна налог но йылоз. Директоръёс туж пӧсекъязы налогъёс сярысь умойтэм законъёс пумысен. А. Починок киоссэ гинэ вӧлъяз: мон, пе, янгыш ӧвӧл, законъёсты мон уг кутӥськы. Соиз но зэм: Александр Петрович кыл вылын котькӧня мед жалялоз директоръёсты, котькӧня мед соглаш луоз соосын, но солы но, ваньмызлы сямен ик, законэз быдэсъяно луэ. Пумиськонэз йылпумъяса, А. Починок валантэмгес ватсан лэсьтӥз. Кин, пе, бюджетэ тросгес коньдон тыроз, со ик ӟечгес улоз. Сыӵе, пе, туала бюджет. Директоръёс пальпотӥзы... Г. ТИХОНОВ. Син азяз возёз Миым Удмурт Республикаысь Правительство бадӟым инты висъяз бюджет чотын тыршисьёслы уждун тыронэз радъянлы, сое дыраз сётъянлы. Озьы югдур умояз, шуыны луоз.Секыт ке но вал, социальной удысъёслы декабрь понна уждунлы уксё висъямын ни. Мукетгес суред ваньбур поттӥсь предприятиосын. Данаказ отын дыраз коньдон уг сётъяло. Но вань сыӵе предприятиос, кытын югдур умойгес. Вераськон мынэ "Ижсталь", "Буммаш", Ижысь электромеханической, радиозавод, Воткинскысь машиностроительной но Глазовысь механической заводъёс сярысь. Та коллективъёсын ужасьёс дыраз уждун басьто, предприятиослэн бюджетэ тыронъёссы пытсамын. Озьы шуыны уг луы "Ижмаш", "Ижевский механический завод" кун предприятие, "Спецгазавтотранс", "Ижевский мотозавод "Аксион" Холдинг", "Сарапульский электрогенераторный завод", "Редуктор", "Нефтемаш" АО-ос но мукетъёсыз сярысь. Нырысетӥ кык предприятиослэн уждунъя гинэ быдэн 53-55 миллион манетлэсь уно тыронъёссы люкаськемын. Ватсаны кулэ, миым 1 январёзь механической заводлэн тыронэз али сярысь 6 миллион манетлы (выль коньдонэн), тросгес вал, нош "Ижмашлэн" туэлы 2 миллионлы будӥз. Удмурт Правительство туэ та ужез, предприятиосын уждун радъянэз син азяз возьыны басьтӥське. Малы ке шуоно, промышленностьын гинэ югдур таӵе ӧвӧл, сыӵе предприятиос вань лэсьтӥськон, транспорт, гурт хозяйство удысъёсын. Соослэсь нимъёссэс но вераса уд быдты. Нош ог-огзылэсь висъясько тыронъёссылэн быдӟалаенызы. Г. РОМАНОВ. Эстониын пумиськонъёс ПЕРЕСЬ ТООМАС ВӦЗЫН Таллинн шорысь ик "Палас" гостиницаын одӥг уй-нунал улэм понна тыроно 100 доллар - 600 манет котыр. Со ӵоша Россиын толэзьем уждунэн. Валамон ини, отын улыса, огшоры калыклэсь улэм-вылэмзэ уд вала. Нош городысь кемалы кошкылыны уд ваньмы. Амалтэк учконо луэ интыысь газетъёсты. Кызьы бен шока огшоры калык? Тани "Эстония" газетын сюлэмшугъяськемзэ вера Альвина Сиренко. Со юрттыны мылкыд карем огъя улонниын (общежитиын) туберкулёзэн курадзись Михаиллы. Таиз кызь ар тыршем заводын, али ужтэк кылем. Врачъёс шуиллям: ми пыдйылчиосты ум йӧнатӥське. Сиренко 90 крона (45 манет) тыре но участковой врачез огъя улонние ӧте. Таиз уг вуы. Ӝог юрттэт сётон станциысь кык дыдыос лыкто но висисез учкытэк кошко. Кыкетӥзэ ӧтем бере соос ик вуо, Михаилэз больницалэн коридораз кушто но кошко. Тужгес паймытэ тани ма. Ваньмыз вылӥ верам эмъясь шуонъёс - ӟучъёс. Эстон врач Томсон гинэ басьтӥськиз Михаилэз бурмытон борды. Куать нунал ортчыса, воргорон шокамысь дугдӥз. Кулон азяз пальпотӥз на: райын кӧня ке улӥ, пе. Законъя учконо ке, участокысь врачъёс йӧнатыны кулэ ӧвӧл бомж шуонъёсты. Сыӵеослы юрттыны выре христианъёслэн "Агапе" огазеяськонзы гинэ. Городысь кузёос кемалась верасько ни дунтэк эмъян центр кылдытон сярысь. Ку со луоз? Нокин уг тоды. "День за днем" газет нуналысь нуналэ маде ужтэк кылемъёс сярысь. Сыӵеос пӧлы ӵемгес сюро висьылӥсь нылпиё анайёс, пенсие потон арлыд пала матэктӥсьёс, эстон кылэз тодӥсьтэмъёс. Толэзяз басьто ог 240 крона (120 манет). Сыӵеосты утись законын чакламын ужтэмъёсты выль ужлы дышетыны. Нош отчы туж ичи коньдон висъяське. Вылаз ик, одӥг сент (асьме копейка выллем) уг сётӥськы эстон кылэз дышетонлы. Эстониысь Кун Кенеш умоен лыдъяз Латвиен, Литваен но Финляндиен гожтэм тупанкылъёсты (соглашениосты). Эстониысь ужтэмъёс кудаз ке кунэ кошко ке, пособие басьтыны быгато отысь валютаен. Кунысь кунэ ветлӥсьёс ӧвӧл кадь. Туз Африкаын но туз шуэм сямен, ужтэм - Хельсинкиын но ужтэм, со вылэ отын но зарни пырыос уз усе. Финляндиысь СТТ агентство маде Таллиннын наркотикъёсын вузкарон сярысь. Городлэн шорсюлмаз каръяськемын 2 сюрс - 2 сюрс 500 пала наркоман, данакез - ӟуч сямен вераськисьёс. Соослэн лыдзы весь будэ егитъёс но пиналъёс чотын. Мае мон адӟи ас синмыным? Офицеръёслэн азьвыл юртазы, ӟуч культурая центрын, трос мадизы соосты ултӥям сярысь. Куд-огез азьло командиръёс зэмен ик жалесь. Соос татчы сюризы 90-тӥ аръёсы гинэ. Эстон кунэн, калыкен но кылын тодматскыса ӧз вуэ, СССР куашказ. Эстонилэн гражданинэз луыны ӧз быгатэ. Россилэсь гражданствозэ басьтӥзы ке но, маин юрттоз соослы Москва, пенсиен сяна? Балтика флотысь вылӥ офицеръёс усьтыр-табыр кошкизы (пегзизы, шуо татын), улӥ командиръёсты кельтӥзы. Эстониын улэ ог 400 удмурт. Алигес кылдытӥзы асьсэлэсь огазеяськонзэс. Солэн кивалтӥсез Татьяна Новожеева пусъе: удмуртъёс шоры эстонъёс шуныт мылкыдын учко. Тае бен ачим но шӧдӥ. Ваньмон дыръям ветлоно кариськи газет печатлан комбинатэ. Монэ келяны мылкыд кариз Таллиннэ кылем азьвыл офицер. Кивалтӥсь доры пырим но, офицер черектӥз: - Ми - Россиысь! Тодматскеммы потӥз тӥляд ужан амалъёсыныды. Кузёлэн синмаз кезьыт тылгизьы чилектӥз. Мон тупатскыны дыртӥ: - Удмурт мон. Чебер печатлам журналъёстылы синмаськи. Вань цехъёссэс возьматӥз. Магазинъёстӥ ветлыкумы, Ижысь телеоператорез Олег Кропачевез швед шуылӥ, асме - солэн удмурт переводчикез. Узыресь кожаса, вылды, милемлы оломар но дэмлаллязы. Маскаръяськытэк вераса ке, ужтэк кылемъёсты но ултӥям ӟучъёсты вунэтоно ке, Таллиннлы синмаськемысь уд дугдылӥськы. Милемды пыртылӥзы дано кырӟасьлэн Георг Отслэн дышетскем лицеяз. 12- тӥ классысь пиналъёс лабырто эстон, англи, француз но ӟуч сямен. Шуо: огдыре ньыль кылэз дышетыны сокем шуг ӧвӧл. Быгатэмзэс возьматыса, "Отче наш" молитваез француз кылын чирдӥзы. Школазы "француз лицей" лыдъяське бере, француз кыллы дышетэ Франциысь юри ӧтем педагог. Ӟуч кылэн но Россиен сокем уг тунсыкъясько. Россилэн Эстониысь посолэз Алексей Глуховлэн малпанэз мукетгес: - Кызьы Эстония улоз Росситэк? Куамын процент узырлыкез люкаське асьме грузъёсты келямез чотын. Запад пала кыстӥське ке но, кинлы отын кулэ солэн вузъёсыз? Миленымы кивалтӥз Кун Думалэн Удмуртиысь депутатэз Андрей Солуянов. Со кыл сётӥз Эстонилэсь Россиен но Удмурт шаерен кусыпъёссэс юнматонэ пыриськыны. Таллинн ӟучъёсты зӥбе шуыса, Москва соин вузкаронэз юн пачкатӥз вал. Кунгож вамен вуз поттӥсьёс кык полэс налог тырылӥзы. Табере Россия шӧдэ ни: озьы Эстониез уд шымырты. Тӥни малы депутатмы сюлмаське налогез капчиятон сярысь. Улон возьматӥз: Москва но, Таллинн но ог-огзытэк улыны пӧрмыто. Но бускель кусыпъёс сыӵе луыны кулэ ӧвӧл. Калык шат янгыш, Молотов но Риббентроп Эстониез Союзэ пыртон пумысен соглаш луэм понна? Ӟучъёс, эстонъёс, удмуртъёс - керетыны кулэ шат, 1943 арын 1 декабре Сталин но Рузвельт кенешизы ке Эстониез война бере СССР-е кельтон сярысь? Котьма шу, но ӝыны даур ӵоже одӥг странаын улыса, асьмеос ог-огмылы дышим. Оло, вашкала вирмы но асьмеды ог-огмы пала кыске. Таллиннын архитектура чылкак мукет ке но, мыным со матын. Тани Тоомпеа нимо гурезь йылысь сыӵе ик нимын замок укша ук кыӵе ке измем крезьгурлы. Отын кузёяськизы шведъёс но, датъёс но, немецъёс но, ӟучъёс но (Петр И Таллиннэз басьтӥз 1710 арын). Нош эстонъёс дворецъёссэс весь чеберъязы но туннэозь утьыны быгатӥзы. Кыл уд шедьты Таллиннысь карлудэз ушъяны. Татчы интыяськемын ратуша - городысь аскивалтон. Соин ик эстонъёс та данъяськон интызэс ратуша площадь шуо. Бадӟым ӧвӧл ке но, отысен чылкак мукет дуннее но музон дауре вуиськод кадь. Отысь огаз башня йылын улэ эстон калыкез утись пус - пересь Тоомас. 70-тӥ аръёсын СССР-ын мынӥз "Украли старого Тоомаса" фильм. Выжыкыл выллем лэсьтэм картинаын быдэс Эстония бугырскиз, утисьсэ азьло интыяз берыктон сярысь сюлмаськыса. Россиысь туж уноез карлудъёс пӧрмизы вузкарон интыослы. Таллиннын та сярысь тодазы но ӧвӧл. Мэрия ужа площадьлэсь статуссэ тупатон сярысь. Отын нырысетӥ курон таӵе: кулэстоно карлудын пӧртэм ужрадъёсты. Рос-прос пусъёно, мар карыны яра, мар - уг. Отын уно кафеос. Азьланяз соос вӧзысь уд адӟы ни сэрпалтэм бумага стаканъёсты, ӵындӥсь пичи гриль-гуръёсты, сурен но вуэн шуръёсты. Таллиннлы мэре али быръемын кышномурт, Иви Ээнмаа. Со лыдъя: ратуша вӧзын медаз ӵашетэ машинаос но, адямиос но. Мэр дэмла карлудэ потӥсь вань укноос дуре сяськаос пуктылыны. Солэн татын кыскыны лэземез уг поты. Куд-огезлы уг кельшы сурен вузкарон. Таӵе чыры-пырыосын артэ вань на бадӟым сюлмаськон. Ратушалэн вылыз чебер ке но, пуштросэз пумен куашка. Огез сэрегез мур выемын. Куд-ог башняосты юнматъяло езэн но... изваскаен. Дыр вуэ карлудысен берен "Паласэ" берытскыны. Ульча сэрегъёсын лушкемак вузкаро из сирен (янтарен), тӧдьы пыръем металлэн (азвесь шуыса оскыто), Горд армилэсь кылем изьыосын но мукет дӥськутэн. Котькуд адямилэн улон гожез аслаз. Котькуд кунлэн сямен ик. Алексей ШКЛЯЕВ. * Вашкала Таллинн. Туспуктӥзы автор но Олег КРОПАЧЕВ. "Удмурт дунне" газетлэн призэз понна Пумиськом Асановоын Витетӥ республиканской тол гурт шудонъёс туэ ортчозы Алнаш районысь Асаново посёлокын 27 февральысен 1 мартозь. Валтӥсь судьяе юнматэмын Вячеслав Иванович Беляев. Ӵошатсконъёслэн программазы: 26 февраль 16 часозь Делегациослэсь представительёссэс пумитан, мандатной комиссилэн ужамез. 18.00 Валтӥсь судейской коллегилэн заседаниез. 27 февраль 14 часозь Спортсменъёсты пумитан но интыян. 15.00 Гимнастикая ӵошатсконъёс (тол многоборье) 18.00 Тол спортивной праздникез сӥё-дано усьтон. 20.00 Валтӥсь судейской коллегилэн заседаниез. 28 февраль 9.30 Пневмотической винтовкаысь ыбылӥськон (тол многоборье). 9.30 Ӵошатско спортивной семьяос 10.30 Куас сюрес вылэ пото: нылкышноос-ветеранъёс - 3 иськем воргоронъёс-ветеранъёс - 5 иськем нылъёс - 5 иськем нылкышноос - 5 иськем пиос - 10 иськем воргоронъёс - 10 иськем 13.30 Куасэн бызьылонъя ӵошатсконъёс (многоборье): 40 но солэсь ятыр арлыдо нылкышноос - 2 иськем 35-39 арлыдъем нылкышноос - 3 иськем 16-34 арлыдъем нылъёс, нылкышноос - 3 иськем 50 но солэсь ятыр арлыдо воргоронъёс - 5 иськем 40-49 арлыдъем воргоронъёс - 5 иськем 16-39 арлыдъем пиос но воргоронъёс - 10 иськем 14.00 Пневматической винтовкаысь ыбылӥськон (районъёслэн кивалтӥсьёссы). 18.00 Судейской коллегилэн заседаниез. 1 март Эстафета 9.30 Ӵошатско спортивной семьяос. 10.10 Стартэ пото нылкышноос 11.00 Стартэ пото воргоронъёс 13.00 5-тӥ республиканской тол гурт шудонъёсты сӥё-дано йылпумъян. Ватсан: тол ӵошатсконъёслэн программаязы туэ нырысьсэ пыртэмын баскетбол. Соя финальной шудонъёс ортчозы Сарапулын 20-22 феврале. Кун Кенешын ДЕПУТАТЪЁСЛЭН КУРОНЗЫ Кун Думалэн "Удмуртиысь коммунистъёс" фракциысьтыз депутатъёс А. Бегунов, А. Горохов но Ю. Семенов журналистъёсты тодматӥзы Удмурт Республикалэн Конституцияз чаклам воштонъёслы пумит луэмзы сярысь гожтэм вазиськонэнызы. Та вазиськонэн соглаш луэмзэ верам 40 депутат. Конституцилэн проектаз чакламын пыртыны сыӵе ватсанъёс но воштонъёс, кудъёсыз республикамылэн кивалтӥсезлы президентлэсь полномочиоссэ сётон сяна, калыклы номыр ӟечсэ уз вае, экономика но уз тупатскы. Сыӵе Конституция кутэмын луиз ке, республикаямы югдур уката но лэчытомоз. Соин ик ми куриськом, шуэмын вазиськонын, воштонъёсын но ватсанъёсын тупатэм Конституцилэсь инъетсэ эскеремысь дугдыны но депутатъёслы выль быръёнозь кылем дырзэс социально-экономической ужпумъёслы сӥзьыны. Т. МИРОНОВА. Оскон тӧлӟе Али быдэс странаысь но, асьме республикаысь но пӧртэм удысъёсын ваньбур поттӥсьёс шуге-леке шедемын. Тани гурт хозяйствоын ужасьёслы инкуазь "юрттӥз" ке но, ваньбур поттон, 1996 арен ӵошатыса, 1,2 процентлы гинэ йылӥз. Ю-нянь будэтонын, 1996 арын сярысь, пайда 7 процент гинэ луиз, нош пудо вордонын кулэсмиз 3,1 процентлы. Шаерамы миым 1 миллион тонналэсь уно ю тысь кутсамын яке, 1996 арен ӵошатыса, 12 процентлы тросгес, бакча сиёнъёс - 10 процентлы. Картофка валля арын мындагес ик дасямын - 572 сюрс тонна, етӥн мертчан - 0,9 сюрс тонналы ӧжытгес. Ю-нянь но етӥн будэтонын нырысетӥ радын эштосъёс мыно, фермеръёслэн люкетсы туж пичи на. Ю- нянь вузан 10 процентлы будӥз ке, картофка 29 процентлы ичигес вузамын, бакча сиёнъёс - 18 процентлы. Кулэсме пудолэн лыдыз но сӥль вузан. Со понна колхозъёсын но совхозъёсын йӧл кыскон 1,3 процентлы йылӥз. Миым 342 сюрс тонна йӧл люкамын. Шорлыдын одӥг скаллэсь 2475 килограмм йӧл кыскемын, кылем арен ӵошатыса, со 188 килограммлы уногес. 26,5 миллион курег пуз люкамын, 1996 арлэсь 7 процентлы трос. Фермер хозяйствоос 67-ез быризы. Куинь сюрслэсь уно фермер хозяйствоос 62,7 сюрс гектар вылын ю-нянь будэто. Туж ичи со, быдэс республикая 4 процент гинэ луэ. Озьыен, фермер странаез сюдоз шуыса оскон пумен тӧлӟе. Оло, соос тросгес сиён-юон поттысалзы, но государство нокыӵе юрттэт уг сёты. Вылаз ик, техниказы уг тырмы, ванез но зол вужмемын. Н. ВОЗИСОВ. Кыл дунне СИНЙЫЛТЫТЭК КЫЛИЛЛЯМ Удмурт орфографияя словарьын, грамматикаосамы но мукет пӧртэм учебникъёсамы пал кыл но поттылэмын ӧвӧл предложение шоры кемдэм басьтэмкылъёс (цитатаос) но соосты кызьы висъян сярысь. Нош таӵе учыръёс удмурт кыламы ӵемысь пумиськыло. Тани соос. 1. Вераськон куспамы "азьвыл интыяд ик-а ужаськод" шуыса юаны шедьтӥ (Пичи ке но возьытмы вань- а асьмелэн? - "Ӟечбур!", 1994-тӥ ар, 25-тӥ номерез). Учкелэ: шуыса кыл валэктоно кылыз азьын сылэ бере, запятой пуктыны кулэ ӧвӧл. Пуктӥм ке но, со шонертон учырез пусъе шуыса валаны луэ. Учке, тазьы: азьвыл интыяд ик-а ужаськод шуыса вераськон куспамы. Таӵе ик пуштрос пыӵалоз шуыса кыллэсь вайзэ кыкналасянь тиреен висъяса но. Нош чылкак пусъёстэк гинэ ке, веранмылэн огъя пуштросэз мыдланьскоз. Тазьы: вераськон куспамы ужаськод. Соин ик та выллем югдурын кавычка амалтэк пуктоно луэ. 2. Витя отын улӥсько шуиз (Ӝужаз, лэся, шуд кизили. - "Ӟечбур!", 1996-тӥ ар, 11-тӥ номерез). Таяз учыре кавычкаос пуксьытэк кылиллям но, валантэмгес луэм, кин ма сярысь вераны выре: яке ачиз Витя кытын ке улэ, яке со кинлы ке, муртлы, улон инты ӵектэм вылэм но, та берлоез со пумысен маде. Озьы но, тазьы но валаны луоно. Веранэз лачмытгес тазьы гожтоно вылэм: Витя "отын улӥсько" шуиз. Таяз учыре валамон луиз: кавычкаосы кутэм кылъёсты Витя верам, ас сярысьтыз мадьыкуз. 3. Матысьгес тодматскемзы бере, Клара Фёдоровна нылашлы одно ик юртто шуиз (Косыкузы уг пӧрмы. - "Ӟечбур!", 1997-тӥ ар, 32-тӥ номерез). Таяз учыре но кыкетӥ эскерем веранамы выллем ик янгыш: кавычкаос пуксьытэк кылемын. Соин валче солэсь пуштроссэ мыдлань но валаны луоно. Кылсярысь, тазьы: матысьгес тодматскемзы бере гинэ юрттоз. Шонергес луысал тазьы: матысьгес тодматскемзы бере, Клара Фёдоровна нылашлы "одно ик юртто" шуиз. Куд-ог авторъёс та выллем учыръёсын запятоез уже кутыны дэмлало. Кылсярысь, тазьы: мельник Фома Щербаков, Аныкъёслэн ужзы та, шуэ. Нырысь учкыса ик валамон: та югдурлы запятой чик но уг тупа. Кавычкаос пуктыса ик шонергес луысал тазьы: мельник Фома Щербаков "Аныкъёслэн ужзы та" шуэ. Но та выллемъёсаз учыръёсын пуштросэз лач, валамон, нокыӵе сураськонэз ик ӧвӧл бере, пус пуктытэк но яралоз. Паша туннэ дораз берто, шуиз (Шонер гожъяськон. - "Кенеш", 1997-тӥ ар, 3-тӥ номерез). Таяз веранын запятой чылкак кулэтэм интые пуксем, шуиз кылэз пыртэм кыл шуыса чаклаллям, лэся. Но синтаксисэз лыдэ басьтоно ке, соку ик адске: шуиз сказуемой чотын кутэмын. Озьыен, кылдэмезъя чакласа, тазэ учырез но, запятоен ӧвӧл, кавычкаосын висъяса, шонергес луысал. Тазьы: Паша туннэ дораз "берто" шуиз. Но кавычкаос пуктытэк но пуштросэз лач, валамон бере, пусъёстэк но яралоз. Тазьы: Паша туннэ дораз берто шуиз. Та эскерем учыръёсамы кавычкае кутэм басьтэмкылъёс (цитатаос) но кавычкатэм кылъёс но шуыны кылын герӟаськемын. Но вӧзазы со выллемесь ик вайёссэс кылдытылыны быгато мукет глаголъёс но. Кылсярысь: таиз пиед мыным быдэс ачид тус потэ; одӥг нуналэ ми пӧртмаськыны потыны кенешимы; ачим ма карыны уг валаськы ни; тон сое вормо кадь потӥськод-а? Таос радын ик пумиськыло таӵе аспӧртэм формаос но: мон тон уд берты ни кожай вал яке: мон тон уд берты ни малпай вал, мон тон уд берты ни шуисько вал. Та веранын, огласянь, кык подлежащеез, кык сказуемоез шуыны луэ, мукет ласянь - тон уд берты ни люкетэз прямой дополнение кадь. Кылдэмезъя чакласа, та берло амал ик шонергес луэ. Эшшо таӵеез: ас сузэрзэ ке Коли ялан "тон пичи на ай" каре вал. Таиз но, учкелэ, сыӵе ик учыр. Кыӵе малпанэ вутто таӵе суредъёс? Предложение шорын басьтэмкыл (цитата) кыкналасянь кавычкаосын висъяськылэ. Но куд-ог учыръёсы веранлэн огъя пуштросэз лач, валамон кадь ке, кавычка, юнме мултэс пус луэ шуыса, усьыны но быгатэ. Соку кылдэ неоформленной цитата (но таӵе югдурын но вунэтоно ӧвӧл: кылдэмезъя чакласа, кавычкаос отчы кулэ луысалзы). Шуыны кыл музэн ик вӧзазы оформленной но неоформленной цитата формаос кылдытылыны быгато карыны, кожаны, малпаны но куд-ог мукет глаголъёслэн формаоссы. В. ВОЗНЯКОВ. Вирсэрлы вал со Тодмо кылбурчилы Александр Вотяковлы тырмысал 70 арес. Таиз ар озьы тупаз: мынам вордскем Завьял ёросысьтым кылбурчиослэн пусйымон аресъёссы-юбилейёссы луысал. Александр Вотяковлы 17-тӥ феврале 70 арес тырмысал, Георгий Петуховлы 14-тӥ мартэ - 60 арес. Кыкназы ик таос кужмоесь кылбурчиос но журналистъёс вал. Кыксы но асьмелэн радъёсысьтымы вазь кошкизы. Ортчизы ни дасо аръёс. Тодо на-а соос сярысь туала калыкъёс, тужгес но егитъёс? Куддыръя сюлэме ӝож мылкыд но каръяськылэ: оло, каллен-каллен вунэтозы ини? Берпуметӥ аръёсазы улонзы но туж мӧзмыт йылпумъяськиз уго. Улон возьматэ: усто кылбурчиосты уг вунэто. Сыӵе оскон кылдыто берло аръёсысь пӧртэм суредъёс. Кылем арын, кылсярысь, монэ шумпоттӥз таӵе учыр: Завьял ёросысь кылъя но литературая дышетӥсьёслэн кичӧлтэмзыя но тыршемзыя поттэмын дышетӥсьёслы пособие - та палъёсын вордскем но будэм писательёслэн но поэтъёслэн творчествозы сярысь уж. Вань угось ёросын удмурт литератураез дышетонъя сыӵе программа. Книгалэн авторъёсыз лыдъяло: Завьял ёрос туннэ данъяськыны быгатэ тямыс писателеныз. Удмурт литератураез ке басьтоно, шуо соос, отчы шӧдскымон пытьы кельтӥзы А. Д. Вотяков, Г. Я. Петухов, И. Т. Дядюков. Дышетӥсьёслэсь тодонлыксэс будэтонъя институтын поттэм книгае та кылбурчиос сярысь материал люкам Якшур школаысь дышетӥсь В. Г. Морозов. Озьы бере, оскон вань, удмурт школаосын но та кылбурчиосты тодыны-валаны тыршозы шуыса. Мыным матын луэ Александр Дмитриевич Вотяков. Лыдӟисьёслы со тодмо бадӟым поэт- лирик луэменыз, удмурт калыклы туж яра кырӟанъёсыныз, покчиослы чуръёсыныз, тунсыко выжыкылэныз но пьесаеныз. Со сяна, усто журналист но вал: ужаз "Советской Удмуртия" газетын. Нырысь дасяз "Пинал куараос" бамез, собере - "Шӧкычез" но культура удысъя материалъёсты. Кӧня ке ар ужаз Удмурт радиоын. Александр Дмитриевич вордскиз 1928-тӥ арын 17-тӥ феврале Завьял ёросысь Подшивалово гуртын. Куамынэтӥ аръёсы ик пияш дышетскыны туж чырткем кутскем вылэм. Кыланы-бураны, кырӟан гурез валаны но вазь нодъяськем. Со быгатонлыкъёсыз ик пинал дышетскисез вуттӥллям усто пиналъёсты дышетонъя Ижысь музыкальной школа-интернатэ. Соин ӵош отын дышетскиз вуоно композитор Николай Шкляев. Юн эшъяськыса, ог-огзылы юрттыса улэмзы сярысь со али но шуныт мылкыдын тодаз вайылэ. "Сашалэн куараез жингрес чузъяськылӥз. Усто кырӟалляз. Фортепьяноен шудыны дышетскиз. Бурдъяськем мылкыдын мынэ вал солэн дышетсконэз..," - озьы тодаз вае Н. Е. Шкляев. Но собере кутскиз Быдӟым Отечественной война. Сашалэн атаез, Митрей агай, Иже лыктӥз но пизэ дораз нуиз. Мон, шуиз со, оже кошкисько, доре покчи вынъёсыд кылё, ужано луод. Война аръёсы солы мӧйыос интыын бусыын но нюлэскын ужано луиз. Атаез ожмаськыку, пияш вылэ вань колхоз ужъёс усизы: гыриз, кизиз, нюлэс дасяз. Нырысетӥ кылбуръёсаз но ӝоген пыӵазы со мылкыдъёсыз: ужез яратон, вань шуг-секытэз чидан сярысь чуръёс кылдылӥзы. Озьы верано кылъёсыз нырысьсэ вордскылӥзы войнаен валче. Нырысетӥ кылбурзэ "Советской Удмуртия" газетын поттӥз 1948-тӥ арын. Собере чуръёсыз люкаса поттэмын вал 1958-тӥ арын "Нырысетӥ вамыш" бичетын (сборникын). Маин пыӵало сюлме Александр Вотяковлэн ужъёсыз? Поэтлэн огшоры удмурт семьялэсь ӟеч сямъёссэ, чылкыт сюлэмзэ валаменыз, возьматыны быгатэменыз ӧвӧл меда? Творчествоез ӧръяськыны кутскыку ик со кылдытӥз мур пуштросъем "Асьмеос кужмо", "Огшоры нунал", "Нэнӥен вераськон", "Нэнӥлэн кырӟанэз" но мукет кылбуръёссэ. Тросэз соос гуртын война дыръя но секыт аръёсы котьмае чидам удмурт нылкышнолэсь сюлэмзэ, малпанъёссэ мур усьто, со вакытысь егитъёслэсь секыт улонзэс, ӵуказе нуналлы осконъёссэс возьмато. Ӟеч сямъёсты утьыны тыршисьёс пӧлын азьветлӥсь вал кылбурчи Александр Вотяков. Кин уг тоды но уг кырӟа меда солэсь Николай Шкляевен ӵош кылдытэм "Нэнӥелы" кырӟанзэ? Николай Зубковлэн радио пыр кырӟамез бере ик калык пӧлы вӧлмиз со, вань удмуртъёслэсь сюлэмъёссэс вырӟытӥз. Маин меда кырӟан бордаз сокем кыске? Сюлэме мур пыӵась но туж огшорыесь кылъёсыныз, луоз. Трос мукет кырӟанъёс но гожтӥз кылбурчи аслаз пичи дыр эшеныз Н. Е. Шкляевен ӵош. Куддыръя - уйёсыз но кӧлытэк, кенешыса, Удмурт театрлэн уно спектакльёсызлы но кельшымон чуръёс но гуръёс утчаса. Нош "Нэнӥелы" соос пӧлысь тужгес чеберез, ноку вужмисьтэмез. Удмуртлэсь ӟеч сямъёссэ валамез ик юрттӥз кылбурчилы тужгес но шунытэсь чуръёссэ матысь муртъёсызлы сӥзьыны. Одӥгез сыӵе кылбурез - "Дядиелы". Тазэ со армиын дыръяз гуртаз гожтэтэн ыстӥз Ленинград улосысь. Со палъёстӥ атаез но, Дмитрий Иванович, ортчем. Ож лудысь сӧсырмыса бертӥз. Гуртаз колхозын ужаз, кӧня ке арзэ бригадир вал. Нош орденэз кузёзэ улонэзлэн берло аръёсаз шедьтӥз ни. Атаезлы сӥзьыса, поэт гожтӥз на "Дядиелы" кырӟан но. "Нэнӥелы" сямен ик, таиз но калык пӧлы мед вӧлмысал. Туж шунытэсь чуръёсыз нылызлы сӥземын. Сыӵе со, "Пинал актриса" кылбур. Ӧжыт ӧвӧл эшезлы Николай Шкляевлы сӥземъёсыз но. Тужгес ӟечез - "Кырӟан". Нош тужгес но уно шуныт кылъёссэ сӥзиз Александр Дмитриевич гажанэзлы - яратоно кузпалэзлы Мария Васильевналы. Туж уноез кырӟанъёслы пӧрмизы егит дыръяз ик. Нош учке ай, кӧня шуныт мылкыд кисьтэмын та чуръёсы ("Уӵые тон мынам" кылбурлы гур кылдытӥз композитор Александр Корепанов): Вож садысь уӵые тон мынам, Синпӧртмась сяськае возь вылысь, Тон кытысь пумиськид улонам, Кизили кадь пиштӥд инбамысь? Кузпалызлэн улонысь вазь кошкемез кылбурчилэсь сюлэмзэ чигтӥз, туж вӧсь кариз. Шонер лэсьто Завьял ёросысь дышетӥсьёс, Александр Вотяковлэсь творчествозэ нимаз- нимаз темаосъя эскерыса. Соос висъяло инкуазьлы, анайлы но вордскем шаермылы сӥзем кылбуръёссэ, кырӟанъёслы пӧрмемъёссэ, нимысьтыз верасько нылпиослы сӥзем творчествоез сярысь - "Ойдолэ бакчае", "Вить кузя ми" книгаосыз, "Иши" выжыкылэз но "Гондырпи Иши" пьесаез сярысь. Нош мон висъясал на сатирической кылбуръёссэ, басняоссэ но серемес веросъёссэ, "Советской Удмуртия" газетлэн "Шӧкыч" бамаз потэм ужъёссэ. "Советской Удмуртия" газетлэн редакцияз ужакуз, Александр Дмитриевич трос эшъёсыныз тупаса улӥз. Тужгес но матысьёсыз вал Николай Васильев, Семён Перевощиков, Герман Ходырев. Ӵош чуръёссэс кылдытъязы, огзылы огзы юрттылӥзы. Соку кылдэм чуръёссэс но нырысь ик ог-огзылы лыдӟылӥзы. Нош журналистэз данъясь гимн кин кылдытӥз? Нош ик Александр Вотяков но Николай Шкляев: Сюресъёс, пӧртэмесь сюресъёс Вирсэръёс кадь ортчо дуннетӥ. Уг, уг шутэтско ноку соос, Шутэтске-а куке журналист? Ӟеч тодэ ваёнъёссэ кельтӥз со сярысь газетын ӵош ужам эшез Герман Ходырев. Удмуртиысь калык кылбурчи Завьял музъем вылын будэм эшезлэсь котькыӵе дырзэ тодылӥз. Со тазьы гожтӥз: "Александр Вотяковлэн ваньмаз сямен кылбуръёсаз одӥг малпанэз югекъяз - вае эшъяськыса уломе". Тодэ ваёнъёссэ Герман Ходырев таӵе кылъёсын йылпумъя: "...Александр Вотяковез калык котьку но ӟечен буре ваёз. "Нэнӥен вераськон" бадӟым кылбураз со туж визьмо вераз: Шаер азьын сюлмы чылкыт - Уже понна уг возьдаськы. Вань улытозяз со сыӵе вал. Ортчозы аръёс. Выль лыдӟисьёс будозы но, Александр Вотяковез чебер но мыло-кыдо лирической кылбуръёсыз, кырӟанъёсыз, нылпиослы усто гожтэм чуръёсыз понна буре ваисьёс уз быре. Вань гожъямъёсыз - дунъяны луонтэм дуно шыкыс". Леонид Фёдоров, Удмурт Элькунысь дано журналист. Уӵылэн кырӟанэз уз куасьмы Та адямиез ас дыраз тросэз тодо вал: крезьчиос, крезьгурчиос, артистъёс, театрын но радиокомитетын ужасьёс. Соку радио пыр калык инструментъёсъя оркестр шудэм улсын нуналлы быдэ сямен чузъяськылӥзы удмурт калык гуръёс, композиторъёслэн гожтэм кырӟанъёссы. Нош оркестрын шудылӥзы Виктор Иванович Егоровлэн дышетэм крезьгурчиосыз - Ленинградысь театральной институтэз йылпумъям но Удмурт театрын ужась артистъёс. Институтын ньыль ар дышетӥз со Удмуртиысь ыстэм егитъёсты. Отын ик кылдӥз оркестрзы но. Нош институтын дышетскон ялан уг кыстӥськы. Егитъёс, артист луыса, Ижевске бертӥзы. Татын соосыз выль уж возьма вал: сцена вылэ потыса, спектакльёс шудон. Ӝожмыт мылкыдын люкиськизы соос асьсэ дышетӥсьёсынызы. Ӝожомизы егитъёс борды лулынызы биниськем дышетӥсьёссы но. Артистъёс соосыз сьӧразы, Удмуртие, ӧтьылӥзы, таосыз кусыпъёссэс утьыны кыл сётӥзы. Нош кин ке малпа вал-а, люкиськыкузы тазьы вераськемзы улонын зэмалоз шуыса? Ог-огзылэсь мылкыдзэс гинэ ӧз буйгатылэ-а соос? Чик но озьы вылымтэ, ява. Бордазы тужгес но думиськем Евгения Константиновна Лепковская (артистлы дышетӥсьсы) но Виктор Иванович Егоров (крезьчи луыны дышетӥсьсы) сётэм кылзэс быдэстӥзы: пыр улытозязы ӧз люкиськылэ асьсэлэн дышетскисьёсынызы. Евгения Константиновна будэтэм артистъёсыз сярысь "Экзамен каждый день" нимо книга гожтӥз. Котькуд ар-кык ортчыса, доразы, Ижевске, вуылӥз. Виктор Ивановичлы нош араз кык пол вуылэмен гинэ ӧз тырмылы: бератаз воксёлы Ижевске лыктӥз. Маин сокем йӧноесь вал меда та удмурт артистъёс? Усто дышетӥсьёссэс данъяменызы- а, эшшо маин ке мукетыныз но-а? Дышетӥсьёсты асьсэ дышетскисьёссылы матэ кариз кыкна ласянь ог-огзылы лул-сюлэмзэс усьтыса ужамзы. Дышетскисьёссы ласянь ке верано - басьтэм тодон-валанъёссэс артистлэн улоназ - ужаз мур пыӵатыса, нод-нод возьматыны быгатэмзы. Виктор Иванович нош соослэн крезьгуръёсты яратэмзылы, тужгес но удмурт калыклэсь крезьгуръёссэ тодэмзылы синмаськиз. Нуналмысь кылзыны дась вал со выль но выль, ачиз та дырозь ноку кылылымтэ удмурт калык гуръёсты. Макем сюлме пыӵасесь соос, мылкыдэз бугыртӥсесь! Тӥни со ик муг луиз дышетӥсезлэн дышетскисьёсыз борды сюлмыныз ӟиго-ӟиг думиськемез. Трос гинэ малпай ини мон берло дыре та сярысь. Ленинградын улонниез, семьяез, ужан удысэз вань вылысь, татчы, Ижевске, кыстӥськыны, бератаз улыны лыктыны?! Тани бугыръяськисько дышетӥселэн дыр ортчемъя ӵужектыны вуэм гожтэтъёсыз пӧлын. Соосыз, утиськемъёссэ, дуно синпель чотын возисько. Тани, дышетсконмес йылпумъяса, Ижевске бертэммы бере, кыкетӥ гожтэтэз, люкиськеммы дырысен куинь толэзь ортчыса гожтэмез: "...Дыр ортче, нош мынам тӥ сярысь ӟеч малпанъёсы уг тӧлӟо... Тӥ мыным эшшо но дуногес потӥськоды. Табере жалясько ини: малы гужем сьӧрады ӧй мыны? Юн ӧпкелисько трос ужъёсты быдэстыса вуымтэысьтым. Нош Удмуртия понна троссэ лэсьтыны луоно вал. Азьланяз та ужез быдэстыны луоно на. Малпасько: асьмеос одно ик пумиськом! Ку вераны уг быгатӥськы на. Со ачим бордысь но, ӧжытак тӥ бордысь но потэ, мукет мугъёс но вань..." Отӥяз Виктор Иванович отпусксэ кызьы отчытэмез сярысь вера. Одӥг толэзьзэ гуртын вылэм, отӥзэ - дораз, Ленинградын. Дорысьтым потатэк, пе, удмурт кырӟанъёслы партитураос дасяй. Азьвыл дасям кырӟан бичетме, пе, выльысь тупатъяй. Кема ик витёно ӧз луы - дасям бичетэз Ижевске вуиз. Тупатъякуз партитураосаз баянлэсь партизэ пыртэм. Кыӵе усто со ми понна но, самодеятельной коллективъёс понна но. Мукет гожтэтаз Виктор Иванович тунсыкъяське Ижевскысь но быдэс Удмуртиысь музыкальной улонэн: профессиональноеныз но, самодеятельной удысэн но. Гожты, пе, мыным со сярысь пыр-поч. Ми гожъяськом вал вань куронъёсызлы но юанъёсызлы озьы ик. Ми - со Иван Протодьяконов но мон. Ки уламы шеде-а удмурт кырӟанъёсын вуж пластинка, газетын я журналын печатлам выль кырӟан - номыр но уг мыльы. Пуштроссэ ӟуч кылын валэктыса, конвертэ понӥськом но ыстӥськом. Со пумтэм шумпотылӥз гожтэтъёсмылы. Ачиз пунэмзэ ми доры лэзьяз ини оркестровать карем произведениослэсь партитураоссэс. Толалтэ яке гужем, каникулъёсыз дыръя лыктылыкуз, сьӧраз вайылӥз. Солэн Ижевске лыктэмез дышетскисьёсыз понна бадӟым шумпотон вал. Шумпотон но дышетӥсьмылэсь мӧзмем мылкыдмы огазеяськыса милесьтым кужыммес ватсаллязы. Театрын ужан вискамы дыр шедьтыса, кошкытозяз нуналлы быдэ репетициос ортчытъям. Нырысь лыктэмаз ик концертной программа дасямы. Дасям концертмес калык азе поттоно кариським. Нырысь кылзӥсьёс луизы Ижевскысь совпартшколаын дышетскисьёс. Программаямы ог дасо удмурт калык гуръёс, Иван Краснопёровлэн, Николай Шкляевлэн кырӟанъёссы. Солистъёсмы но асьме пӧлысь ик - Галина Кельдиярова, Нина Бакишева, Роза Максимова. Нырысь чузъяське "Уй пеймыт вал соку". Ӵапак та кырӟанэз, милемлы луыса, нырысетӥзэ кылӥз Виктор Иванович. Кылӥз но бӧрысь ӧз люкиськы ни. Сокем ярам со ӟуч крезьгурчилы - эсьма, тэк улыкуз яке кыӵе ке киужен вырыкуз, ӵем дыръя "Уй пеймытэз" нукыртылоз вал. Совпартшколаын дышетскисьёслы но концертмы ярам: котькуд номермес ӟырдыт чабыса пумитазы. Татын ик ми республикаямы нырысьсэ возьматӥмы Виктор Ивановичлэсь оркестрен удмурт гуръёсъя шудыны гожтэм фантазизэ но. Кызьы тодмо, удмурт крезьгур та дырозь калык инструментъёсъя оркестр шудэм улсын ӧз чузъяськылы на вал. Удмурт музыкальной искусствоын со выль пушъет луиз. Совпартшколаын дышетскисьёс, концертмес дунъям гинэ ӧвӧл, коллективмес инъет карыса, профессиональной оркестр кылдытыны ӵектон сётӥзы. Со милемыз уката но лӧпкытӥз. Виктор Ивановичмылэн но, та сярысь тодыса, кыкетӥ "бурдъёсыз" потӥзы кадь. Нош улонын та ӵектонзы быдэсмытэк ик кылиз. Нош мугез, али сямен ик, со вакытэ но одӥг вал - коньдон ӧвӧл. Но ми бурдъяськем мылкыдмес ӧм сиялтэ. Умой кусыпъёс тупатӥмы радиокомитетэн. Татысь хор ужа вал почтамтлэн Карл Маркс урамысь юртаз, куинетӥ этажысь бадӟым студиын. Огдышем сямъя соос (хорысь артистъёс) нуназе куинь час котырын ужзэс быдтылӥзы. Соос бӧрсьы татчы ик ми люкаськылӥм. Эркын, югыт но шуныт интыын куаныса дасяллямы асьмелэсь программаосмес. Дасяса вуттэммы бере, татысен ик плёнка вылэ гожъяллямы но, Удмурт радио соосыз эфире сётылӥз. Озьы кыстӥськиз дас сизьым ар! Сюлэсь уно крезьгур дасяса, ми плёнка вылэ Ленинградысь но Москваысь ветлэм "Мелодия" фирмалэн бригадаосыныз пластинкаосын поттон понна но гожъямы. Шугъяськон дыръёсмы но вал. Кылсярысь, оркестрмылы котькудаз сямен ик репетициямы кивалтӥсь дирижёр кулэ. Виктор Ивановичмы нырысь татчы улыны лыктэмын ӧй вал на. Куддыр сое воштылӥз Иван Константинович Протодьяконов, куддыр ӧтьылӥмы Герман Афанасьевич Корепанов композиторез. Кӧня ке пол ветлылӥз Музыкальной училищеысь дышетӥсь А. Л. Латкин. Гурысь пӧсь табанез кадь возьмаса улӥмы ми Виктор Ивановичмес. Тол каникулаз берлозэ вуылыкуз поттылӥз Ижевске воксёлы лыктыны мылкыдыз сярысь. Но тани мар вера со 1959 арын июне ыстэм гожтэтаз: "Вуоноез дышетскон ар мон понна секыт луоз: выпускной курсэн ужало. Оркестрам 53 мурт, соос ик домбраен шудонъя экзамен сётыны кулэ. Тулыс зачётсэс алама ӧз сётэ. Гужемзэ дачаын шутэтскыкум, тӥледлы вуоно арлы репертуар дасяны малпасько. Тӥ доры улыны лыктон сярысь ужпум огшоры гинэ ӧвӧл. Училищеын выпускной классме мукет дышетӥсьлы сётыны шуг луоз. Вай вуоно арозь кельтом та ужпумез. Соку капчиен лэзёзы. Асьтэос лыктэ мон доры дачаын шутэтскыны: чорыгалом, губиялом, узы-боры бичалом". Пӧлысьтымы огмы но ӧтёнэзлы вазиськыса ӧм вуттэ. Со понна ачиз 1960-тӥ арын сӥзьыл ми доры вуиз. 7-тӥ ноябре ӝытпал ми Гай Сабитович Сабитовлэн, Илья Андриянович Зоринлэн но Николай Егорович Шкляевлэн семьяосынызы праздник ӝӧк сьӧрын пукиськомы вал. Ӵапак соку ӧсэ йыгаськись луиз. Усьтӥ но - ба: - Виктор Иванович! "Ӧд возьмалэ-а? Со понна мон - воксёлы!" Куномылэн праздник нуналэ кемдэмез туж иназ луиз. Эшъёсылэн семьяоссы соин азьвыл ик тодмо вал ини. Юмшанмы, шукыяськись вина кадь, ӝутскем мылкыдын ортчиз. Вот табереяз милемлы дирижёр утчаса ветлоно ӧз луы ни: Виктор Ивановичмы нош ик бордамы. Уждун басьтыса ужан вылысь, со ӝегатскытэк "Ижмаш" культура дворецысь калык инструментъёсъя оркестре ужаны интыяськиз. Азьланяз эшшо но ужан инты шедиз на - Музыкальной училищеын, бератаз - Культурно-просветительной училищеын. Лыктэм пумысеныз Виктор Иванович ми дорын улӥз, нош вуоно арын вордскем нуналзэ, 17-тӥ тулыспалзэ, аслаз кык бӧлето квартираяз пумитаз ини. Та дырысен со, пенсие потытозяз, ас улонзэ быдэсак удмурт музыкалы, егит крезьгурчиосты будэтонлы сӥзиз. Капчиен ӧз ортче та аръёсыз. Кышноез, Ираида Арсентьевна, балетмейстер, Ижевске лыктыны ӧз ӝутӥськы: ужлы ёрмоз малпаз, луоз (соку асьме дорын Удмурт музыкально- драматической театрын балетной труппа вал ни). Чылкак огназ улэмлэсь, пенсие потэм апаез, Софья Ивановна, дырын-дырын ветлылыса, толэзен-толэзен улӥз ик. Отпускын луылыкуз, кышноез но вуылӥз. Ачиз но, отпуске потыса, Ленинградэ шонтылӥз. Бератаз сузэрез, Надежда Ивановна но, асьме шаеренымы кӧня ке пол вуылыса тодматскылӥз. Куд-огез, ас ёзо тодмоосыз, кылпум поттылӥзы ик "улонзэ радъян" сярысь, но со "одӥгзэ яратӥсь" сямзэ воштыны ӝутӥськыны ик ӧз малпа. Кышноезлэсь палэнын одӥг гинэ "яратонэз" вал солэн - удмурт крезьгуръёс. Виктор Иванович аслаз ужъёсыныз куинь книга поттӥз. Та дырозь нокин но озьы, оркестрен шудыны дасяса, удмурт кырӟанъёсыз книгаен поттӥсь ӧй вал на. Изданилы дасям кык удмурт кырӟан бичетъёсыз нош поттытэк ик ышизы. Печатламъёсыз али ке но куд-ог коллективъёслэн ки улазы, соос чузъясько концертъёсын, Крезьгуръя училищеын, школаосын. Пенсие потыса но Виктор Иванович яратоно ужезлэсь ӧз куштӥськы. Сизьымдонэтӥ аръёслэн шоразы, кышноез секыт висьыны усемен, выльысь Ленинградэз пала кыстӥськоно луиз. Татысь патерзэ Ленинград областьысь Гатчина дачной городысь одӥг комнатаен воштыса, отчы улыны интыяськиз. Отысен но Ижевске вуылон сярысь малпанэн улэ на вал. Ленинградэ электричкаен ветлонэз часлэсь гинэ уно. Но гожтэтысьтыз шуныт мылкыдыз туж ик уг шӧдӥськы. Тани соос пӧлысь одӥгез: "Гатчинаын улонэ огшоры ортче. Куазь гинэ ялан кезьыт улэ. Шунды шер возьматъяське, ялан кезьыт тӧл пелля. Мылкыдыным тӥ пӧлын: бакчаяды корказь лэсьтыны "юрттӥсько". Вань на-а мынам шырчиккаре? Мылкыд карисько сад-бакчаяды удалтэм емыш будэтыны... Мынам издательстволы ужъёсы сярысь ум дыртэ али: адӟом, маиз кулэгес луоз. Малпасько "Егитъёслы эктон гур" борды пуксьыны, партитура лэсьтыны: крезьгурез ялан йырам чузъяськыса улэ. Удмурт крезьгуръёсын бичетэ сярысь сюлмаськисько: медаз таркалэ вал..." "Егитъёслы эктон гур" произведенизэ со быдэстӥз но лэзиз Ижевске. Нош милям оркестрмы Виктор Иванович кошкем бере куашказ, ми сое шудыса ӧм вуэ ни. Нош ачиз ялан улэ ми сярысь, удмуртъёс сярысь малпаса. "Ваньдылэсь, быдэс Удмуртилэсь мӧзмисько. Нош Ижевске ветлон сярысь малпанэ программаям, сое мон быдэстыны тыршо тол куазен", - гожтэ со мукет гожтэтаз. Зэм, программазэ быдэстыны ӧз кылды. Улонэзлэн берпум аръёсаз лулгажан муртэныз валче улонэз уриськиз: кышнозэ ватӥз. Таӵе секыт югдур аслэсьтыз но катьсэ быдтӥз. Верало на эшшо одӥг ӵужектэм гожтэтэз сярысь. Со 1976 арын шуркынмон толэзе ыстэмын. "Боря! (тазьы вазиське вал со мыным) Ӟечкыласько тонэ но мыным дуно вань эшъёстэ (отӥяз нимын-тулын вазиське вань ӵош дышетскем эшъёсмылы) дышетскондэс йылпумъямдылэн юбилеез матэктэмен! Мылкыд карисько ваньдылы тазалыко луыны, творческой ужъёсады выль азинсконъёс басьтыны! Мынам тӥледын ужам аръёсы улонам тужгес яркытэсь учыръёс луизы. Туж бадӟым тау тӥледлы!" Тӥни сыӵе вал милям гажано дышетӥсьмы, дуно эшмы, ноку вунонтэм Виктор Ивановичмы. Али мон туж юн ӧпкелисько гажано дышетӥселэсь вань гожъямъёссэ утьыны быгатымтэысьтым. Сокем умой адямиос улонысь но ноку кошкыны кулэ ӧвӧл шуыса малпай, оло. Мукетыз бадӟым сьӧлыке - кулэмез бере келяны ветлэме ӧз луы. Тани ачим но пересьми ини - кулэм арзэ йырсазям возьыны ӧй быгаты. Кылем гожтэтъёсыз гинэ ялан улэп суредало. Борис Саушкин. Александр ВОТЯКОВ ТӤНИ КЫӴЕ ЛЭЙКА УЗЬЫМ Липет йылэ ик йӧтскыса, Сьӧд пилемъёс ортчо бӧрсьысь. Кытчы кошко туж дыртыса, Кезьыт толэз ваё кытысь? Уен-нунал дугдылытэк Си пуж пыртӥ пужнэ куддыр. Быдэс инбам, оло, пӧсьтэм, Пырак ватскем, лэся, шунды. Озьы кадь со потэ гинэ, Ужзэ ачиз лэсьтэ инкуазь. Инбам выльысь сайкыт туннэ, Шунды пальшаз ӵукна ик вазь. Нош гурт пумысь куаро нюлэс Гордмыт тылын яркыт ӝуа. Кезьыт, пужнӥсь сӥзьыл зоред Вож дуннеез зарнивуа. Лудъёс кельшо сьӧд куакалы - Арам муос ни ӝутэмын. Соос дасесь кезьыт толлы - Шутэтскыны лымы улын. Тӥни кыӵе лэйка узьым, Вож буртчинэн ини пиштэ. Ужась муртлы со ӟеч кузьым, Азьланезлы оскон сётэ... х х х Огазьын дыръямы мон ӧй оскы, Асьмеос люкиськом шуыса. Верано кылъёсме но ӧй вера, Ог-огмес валалом кожаса. Мусое, мон ваньзэ тодӥсько на. Кепырась тусбуед син азям. Кусыпмы кыдёкын-а, матын-а, Тон озьы но котьку мон вӧзам. Со шудо вакытэз вунэтод-а? Яратон кыкнамес ик вормиз. Мӧзмонэз нуналэн мерталод-а, Огнунал ке даур кадь потӥз? Пытьые возь вылэ но, лудэ но Уз, уз кыльы, сое тодӥсько. Сюлэмы сюлэмад кылемын, дыр, Мон солы, мусое, оскисько. Шуныт кыл Тӧдьы кызьыпу кадь тон веськрес, Чебер, возьвыл сяська выллем, Ужын нош макем сэзь, чупрес - Шудлы гинэ оло вордскем. Али милям син азямы Тон пуксиськод ке сыӵеен, Кулэ дыръяз ни, тодскомы, Тонэ уд куаса лек тӧлэн. Война вакыт тыпы кадь юн Султӥд, вӧлъяд пельпумъёстэ. Визьмысь со дыр ноку уз вун - Воштӥд кужмо пиосмуртэ. Дасяд нюлэс, гырид, кизид, Сюлмысь утид нылпиостэ. Мынӥд оже, пыӵал кутӥд, Сылӥд воргоронэн артэ. Туннэ воргоронэн артэ Будэтӥськод ю-нянь лудын. Тыныд ваньмыз ик пальпотэ, Сӥзе шудбур музъем вылын. Тыпы кадь юн, туж зол сямыд, Кызьпу выллем веськрес ке но. Кызьы уд вера шуныт кыл Тыныд, советской нылкышно. Удмурт музъемлы Та мусо вордӥськем палъёсам Бер сӥзьыл но тулыс кадь потэ. Шунытсэ весь сётэ улонам, Калыкме гажаны дышетэ. Удмурт музъем - вордскем инты, Тон кадь ӧвӧл ни мукетыз. Кытчы гинэ улон монэ Уз вутты, мон луо тонэн. Луи ке но куке огнам, Вордэм анай кылын сюлмам Мон верасько тонэн шара, Тон но куара сётод шорам. Тынэсьтыд чеберзэ утчаса, Мон уг ветлы, уг кошкы палэн. Кызьпуо арама, льӧмпуо сад Люконтэм герӟамын сюлэмен. Егит дыр кадь милям тол куазьмы, Гужеммы нош, мусо вешаса, Чабеймес будэтэ лудамы. Тэль сылэ, выль кенлы укшаса. Кин уз вала, кыӵе яратон, Кин уг тоды меда мӧзмонэз, Нош нырысь ик ваньмы понна тон, Вордӥськем палъёсмы, дуноез. Удмурт музъем - вордскем инты, Тон кадь ӧвӧл ни мукетыз. Кытчы гинэ улон монэ Уз вутты, мон луо тонэн. Луи ке но куке огнам, Вордэм анай кылын сюлмам Мон верасько тонэн шара, Тон но куара сётод шорам. Бусыос, ой, колхоз бусыос Бусыос, ой, колхоз бусыос, Сюлэмлы тӥ котьку, дыр, дуно. Арамын ини ваньмыз юос, Нош малы-о ӧвӧл ӵыдоно? Лудъёсты возьмаса кадь сыло Кӧс куро зуродъёс гурт валлин. Нош бамал со палан, кожалод, Бусыез ӟыгыртэм чагыр ин. Толон ӝыт гинэ ми комбайнэн Зарезьын кадь ветлӥм ю пӧлын. Нош туннэ егит ныл тракторен Бусыез котыръяз ни отын. Бусыос, ӵыдонтэм бусыос, Тӥ гужем коть сӥзьыл шулдыресь. Соинтэк-а колхоз кеносъёс Та зарни ю-нянен узыресь?! Удмуртиысь Национальной банклы - 75 КОНЬДОН ПУЙЫ НО СТРАНАЛЭН "ТАЗАЛЫКЕЗ" Сергей Дубинин - Россиысь Центральной банклэн тӧроез - Ижевске лыктэмзэ тазьы валэктӥз: провинциын улӥсьёслэн мылкыдъёсынызы тодматскеме потӥз, пе. Но мугез мукетгес вал, дыр, малы ке шоуно, Удмуртиысь Национальной банклы, Центробанклэн ёзэзлы, туэ тырме 75 ар. Асьме банкиръёсты ӟечкыланы, соосын кусыпъёссэс юнматыны шаерамы Татарстанысь, Башкоростанысь, Челябинскысь, Кировысь но мукет улосъёсысь национальной банкъёслэн кивалтӥсьёссы лыктӥзы. Красноармейской урамысь Национальной банклэн чильк-вальк кисьтаськись выль юртаз странаысьтымы валтӥсь банкир пресс-конференцизэ ортчытӥз. Ачиз Сергей Дубинин но, Удмуртиысь Национальной банклэн тӧроез Равиль Каримов но, Кун Кенешлэн Тӧроез Александр Волков но огкылысь сямен оскытӥзы, банковской системаез азинтыны кулэ шуыса, угось со юрттоз кунгож сьӧрысь инвестициосты кыскыны. Кылем арын, кылсярысь, сыӵе коньдон Удмуртие куинь поллы тросгес вуиз, 1996 арен ӵошатыса. Банкъёс пӧртэм луыны кулэ: кунлэн но нимаз адямиослэн, бадӟымъёсыз но пичиосыз. Огзэ гинэ лыдэ басьтоно: ваё-а соос пайда яке вань табышсэс "сиыса" быдто-а. Нош Сергей Дубининлэн юанъёслы валэктонъёсыз пӧлысь кыксэ нимысьтыз пусъем потэ. Нырысетӥез герӟаськемын Центробанклэн Ижевскысь радиозаводлэн кусыпъёсыныз. Центробанк та дыре кылдытэ "Банкир" нимо телекоммуникационной система, кудӥзъя космосысь спутникъёс пыр Россиысь банкъёсын ӝегатскытэк герӟаськыны, иворъёсты келяны, операциосты ортчытыны луоз. Радиозавод та системалы музъем вылын ужась станциос лэсьтэ. Таяз арын 50 сыӵе станциос дасямын луозы. Радиозаводлэн огъя продукцияз Центробанклэн заказъёсыз 12 процентсэ басьто. Россиысь валтӥсь банкир оскытӥз, банк азьланяз но та заводэн кусыпъёссэ юнматыны малпа шуыса. Валамон ини, манетлэн деноминация бере "тазалыкез" палэнэ кельтэмын ӧй вал. Сергей Дубинин валэктӥз, манетлэн долларлы пумит дуныз, огъя дунъёс будэмъя вошъяськоз шуыса. Кылсярысь, али толэзьскын дунъёс 1,4 процентлы йыло ке, манетлэн дуныз 1,1 процентлы синэ. Мултэс коньдон но поттэмын ӧвӧл, пе. Озьы ӧй ке луысал, дунъёс азьвыл сямен нуналмысь будысалзы. 1998-2000 аръёсы чакламын 1 долларез 6,2 манетэн воштыны, 15 процентлы кулэстыса яке йылтыса. Таӵе валютной коридорез Центробанк, Правительство утьыны тыршозы. Одӥг кылын вераса, матысь дыре манетлэн "тазалыкез" уз йӧна - йӧно доллар сьӧры азьвыл сямен ик чутышак- чутышак уиськоз. О. ВАХИТОВА. Россия Федерациысь Кун Думалэн депутатэзлэн А. В. Солуяновлэн Удмурт Республикаысь иворъёсты вӧлмытӥсь ёзъёслы вазиськонэз 13 феврале Ижевскысь газетъёсын бырйисьёссылэн гожтэтсы печатламын вал. Соос куризы монэ Ижевск городлэсь мэрзэ быръёнэ пыриськыны кандидат луыса. Мон малпасько, бырйисьёс адямилы власть сёто ке, сыӵе адями аслэсьтыз сюлмаськонъёссэ палэнтыны но бырйисьёсызлэн куронъёссы сярысь гинэ сюлмаськыны кулэ. Мон соослэсь куронзэс санэ басьтӥсько но быръёнъёсы пыриськыны мылкыд карисько. Ижевскын улӥсьёс малпазы ке, городлэн мэрез луыса уногес пайда ваё шуыса, Россиысь Кун Думаысь депутатлэн мандатэзлэсь куштӥськыны дась. Вазиськон Городъёсысь но районъёсысь администрациослэн тӧрооссы, предприятиослэн но организациослэн (котькыӵе ваньбурен) кивалтӥсьёссы но ужбергатӥсьёс, тӥледлы вазиськиськом секыт югдур кылдэмен валче. Мугез одӥг. Фондэ туж ичи коньдон вуэ. Соин ик февраль понна адямиос пенсизэс басьтыны уз быгатэ. Тани январе чакламлэсь 57 миллион манетлы ичи уксё вуэмын, нош февральлэн нырысетӥ арняяз - 20 миллион. Февральлы ӧжытсэ 155,4 миллион манет кулэ. Тӥни нырысетӥ арняе одӥг витьмосэз (20 процент) гинэ уксё висъямын. Озьы 12 районын пенсиос тырон кутскымтэ вал. Тӥни соин ик Россиысь Пенсиосъя фондлэн Удмурт Республикая отделениез вазиське фонд азьын тыронъёстэс пытсаны но азьланьын милемлы дыраз коньдон сётъяны. Пенсионеръёслы феврале уксё висъяны ӧм ке быгатэ, соослэн улонзы уката уродмоз. Ми озьы ик вазиськиськом республикаысь банкъёслы: соос вуэм коньдонэз Пенсиосъя фондэ ыстонэн медаз ӝегалэ. Россиысь Пенсиосъя фондлэн Удмурт Республикая отделениез. Кызьы ужа депутат Софья Широбокова: "УЖАСЬКО ГОРОДЫН, УЛӤСЬКО - ГУРТЫН" Котькуд адямилэн ним пушказ кыӵе ке но пуштросэз ватэмын, шуо. Зэм-а со озьы, меӵак уд вера. Но тани Кун Кенешысь депутатлэн Софья Эльфатовна Широбоковалэн нимаз гинэ ӧвӧл, быдэс нимтулаз кыӵе ке ватосэз (секретэз) шӧдиське. Ойдолэ лыдӟисьёсмылы каллен-каллен усьтыны турттомы со ватосэз. Соку гинэ валаломы, дыр, макем тупа адямилэн нимыз солэн сямъёсызлы но улонэзлы. - Софья Эльфатовна, тӥ кык кылын, ӟучен но, удмуртэн но, туж вольыт вераськиськоды. Тустыя но, оло, удмуртлыгес кельшиськоды. Озьыен, тӥ удмурт нылкышно? - Удмурт луи, удмурт воргоронлы бызьыса. Но гурт хозяйствоя институтын дышетскыкум, удмурт кылэз валасько ке но вал, вераськыны ӧй дӥсьтылы. Сыӵегес ик вал общежитиын одӥг комнатаын ӵош улӥсь эшъёсы но. Удмурт кылын вераськыны дышемелы бадӟым тау карисько картэлэн нэнэезлы (песянаезлы). Нылпиосмес со возьмалляз, ачиз ӟуч кылэз чик но уг тоды вал. Тӥни озьы со мынам валтӥсь дышетӥсе луиз. Собере "Чутырский" совхозын, кытын мон экономист луыса ужай, вань кенешъёс удмурт кылын ортчылӥзы. Кылъёсты тодон пумысен тазьы верасал: гажаськод ке выжы калыктэ, вань ке солэсь кылзэ тодон мылкыдыд - котькыӵе кылэз дышетыны луэ. Сиён пӧракум, дӥсь миськыкум удмурт кырӟанъёсты кылӥсько ке, сюлмы ик буйга. Али сомында выль, чебер удмурт кырӟанъёс вань ини. Малпасько, яратон кылъёсты но ӟуч кылын сыӵе мусо уд вера. - Кыӵе выжыысь-о бен тӥ потэмын? - Вордӥськи Вавож районын, Волипельга черкогуртын. Анае ӟуч вал, атае - бигер. Кыкназы ик дышетскемын Асан совхоз-техникумын. Анае сярысь но нокин уз вера вал, со ӟуч кышномурт шуыса. Техникум бере сое ужаны удмурт гуртэ ыстӥллям. Удмурт кылэз валатэк, одӥг арня бӧрдыса улэм, кыкетӥ арняяз валаны кутскем, нош толэзь ортчыса, вераськыны но дышем ини. Тӥни сыӵе интернациональной семьяысь потэмын мон ачим. Нош пыд йылам султӥ, тодмо луи картэлэн семьяяз улыса. Соос монэ будэтӥзы шуи ке, уг янгыша, угось туж вазь бызи, 19 аресысен Широбоковъёслэсь фамиллязэс нуллӥсько. - Депутат луон понна коньдонтэк уд вормы, шуо. Озьы-а со? - Таин мон быдэсак соглаш ӧвӧл. Быръёнъёсын вормыны, кужмо воргоронъёсты азьпалтыны мыным нош ик юрттӥз семьяелэн данэз. Картэ Широбоков Николай Алексеевич соку тросэзлы тодмо адями вал ини - капчи атлетикая спортсмен, спортъя мастере кандидат. "Чутырский" совхозын валтӥсь агроном луыса ужаз, собере совхозлэн директорезлэн воштӥсез вал. Совхозлэн кивалтӥсьёсыз мынэсьтым кандидатураме ӵектӥзы, нош калык монэ тодэ ни вал райсоветын депутат луыса ужаме дырысен. Картэным кенешыса, соглаш кариськи. Семья ке зол, секыт ужъёслэсь кышканэз ӧвӧл. - Тӥ вылэ али туж секыт ныпъет ошемын: кивалтоно луиськоды Экономикаын политикая но бюджетъя ялан ужась комиссиен. Малы сыӵе секытэн берло дыре мынэ бюджетэз кутон? - Бюджетэз кутон понна, сое ньыль пол эскероно-лыдӟоно - сыӵе солы тупатэмын радэз. Со бордын ужа на нимысьтыз кылдытэм группа, кытчы пыро Правительствоысь, ёросъёслэн администрациосысьтызы но Ижевсклэн мэриысьтыз адямиос. Бен, азьло аръёсы сярысь, бюджет секытэн но секытэн кутӥське. Нырысь ик трос люкаськемын пунэм тыронъёс (340 миллиард манет пала) - соосты кызьы ке но берыктоно, озьыен, берыктымтэ тыронъёс выль бюджетэ но выжо. Ужпумъёс кылдӥзы аскоже кивалтон сярысь законэз кутэмен валче но. Азьло аръёсы вань районъёслы (дотационной но дотацитэм) лыдпусъёс куинь арлы азьпал ик лэзиськылӥзы. Бичам налоглэн быдӟалаез, 100 процентэз ик, районъёсы кыльылӥз. Табере выль законъя ог люкетсэ районъёс республиканской бюджетэ келяны кулэ. Кылем арын бюджетамы Москваысь трансфертъёс пыр 3 триллион манет пала коньдон вуиз вал. Туэ солы оскиськонэз ӧвӧл ни. Тазьы малпасько на: бюджетэз дасяку, ляб тодӥськомы предприятиослэсь луонлыкъёссэс, лыдпусъёсты тупатӥськомы предприятилэн азьвыл аре ужамез вылэ чӧлскыса гинэ. Госзаказъёс, планъёс бордын умой-умой ум ужаське. Тани автозаводын кылем арын чакламын вал 40 сюрс автомобиль поттыны, нош лэсьтэмын 8 сюрс гинэ. - Софья Эльфатовна, кызьы тӥ малпаськоды, кыӵе валтӥсь ужрад кутоно экономикамес ужатон понна? Бюджет экономикамылэн синучконэз луэ ук. - Нырысь ик кутоно налогъёсты бичанъя кодекс. Предприятиослы, фирмаослы, организациослы чурытэсь куронъёс пуктытэк, азьлань уд вамышты. Али тросэз налог тыронъёссылэсь палэнскыны турттэ. Соин но, вылды, республикамылэн бюджетэз арлы быдэ пасё-пасё луэ, нош солэн ӝыны пала люкетэз Россилэн юрттэмез чотын кылдытӥське. Со дыре ик асьмеос но Москвае республикаысьтымы сомында коньдон келяськом, мар быдӟа отысь басьтӥськом. Коньдонлэсь озьы котыръяськыса бергамзэ, оло, дугдытыны но кулэ. Татарстанын быгатӥзы ук - республикаязы поттэм коньдонэнызы асьсэос кузёясько. Туннэ вань предприятиосмес зол-зол ужатыны быгатысалмы ке, асьме республикамы но, малпасько, ас кожаз азинскыны луонлыкъёс шедьтысал. Нош али бюджетмы кӧня ке удысъёс вылэ гинэ чӧлскыны быгатэ. Соос пӧлын "Удмуртнефть", аракы поттӥсь заводъёс но ож тӥрлык поттӥсь предприятиос. - Тӥляд бырйисьёсты - гуртын улӥсьёс. Туннэ соосты туж сюлмаськыто музъемез вузаны лэзён сярысь вераськонъёс. Мар тӥ шуысалды соослы та пумысен? - Зэм, Зуринской округам музъем вылын ужасьёс уло. Мынам малпамея, музъемез вузаны уг яра. Озьы луиз ке, гуртъёсмы бырозы. Учке ай, кытчы вуттӥз ни вал совхозъёсты но колхозъёсты кужмысь быдтон: соосын валче ворсаськизы школаос, нылпи садъёс, больницаос. Гуртъёс пересьмыны кутскизы. Ярам, мыдлань сюрестӥ мынэммес валамы кадь. Но мукет сямен учконо ке, туннэ шаерамы 10 хозяйство гинэ пайдаё ужа. Озьыен, музъем номыр но уг сёты кадь. Но татын музъем янгыш ӧвӧл, тросэз потэ ачиз адями, кивалтӥсь бордысь. Тросэз хозяйствоос лябесь ке но, крестьян адями ас музъемысьтыз аслыз озьы ке но пайда поттыны быгатэ. - Софья Эльфатовна, городын улыса, ӵем-а пумиськылӥськоды ас бырйисьёсыныды? - Ваньмызлы тазьы шуисько: мон ужасько гинэ городын, нош улӥсько гуртын. Бырйисьёсыным арнялы быдэ пумиськылӥсько. Соослэсь куронъёссэс быдэстон вылысь, пӧртэм организациосы 135 пала вазиськон ыстӥ. Быръёнъёс азьын кыл сётӥ вал округысьтым котькуд школалы, котькуд хозяйстволы юрттыны. Медаз поты ушъяськем кадь, но ас азям пуктэм ужпумъёсме туннэ нуналлы быдэстӥ ни. Зэм, кык хозяйство дорозь ӧй на вутскы но, малпасько, дыры вань на. Кылем ар ӵоже 45 пумиськон ортчытӥ. Адямиослэн куронъёссы пӧртэмесь ке но, ваньзы соос коньдонэн герӟаськемын. Тӥни сыӵе малпанъёсын улэ но ужа депутат Софья Эльфатовна Широбокова. Тодӥсько, куд-ог депутатъёслэн коньдонэн ужась юрттӥсьёссы вань. Нош та егит нылкышнолэн сыӵе ужасьёсыз ӧвӧл, соос интые вань школаын дышетскись куинь нылпиез, оскымон картэз. Вань солы юн оскисьёс - таосыз ӟеч мылкыдын котьку но юрттыны дасесь. Эшшо, эшшо Софья Эльфатовна сьӧраз котьку нуллэ ужан тӥрлыксэ - микрокалькуляторзэ. Сотэк нокызьы уг луы. Уката ик али, куке тыныд оскемын самой секыт но кулэ уж - бюджетэз дасян но сое лыдъяса-чакласа возён. Та уж юнме оскемын ӧвӧл, дыр, визьмо, улонэз валась кышномуртлы, угось солэн Софья нимыз но грек кылысь ӟуч кылэ "мудрая" шуыса берыктӥське. Татьяна БАННИКОВА. Шунды Ӝужамтэ шунды уз шунты Куазь укыр кезьыт кариськемен-а, яке "Шунды" дэменлыклэн тылсиосыз бездытгес пиштыны ӧдъязы, но йылпумъянъёслы но быръёнъёслы сӥзем витетӥ конференциын егитъёслэн ӟырдыт мылкыдзы ӧз шӧдӥськы. Ижевскысь "Октябрь" культура юртын 14 феврале мӧзмыт вал. Конференцилэн ужаз пыриськизы Ижевскысь но эшшо куать ёросысь делегатъёс, 75 пӧлысь 45 мурт. Бен, кезьыт куазь но янгыш, дыр, тросэзлэн егитъёслэн лыктыны быгатымтэзылы. Но озьы ке шуоно, тужгес кыдёкысьёсыз, яръёс, номыр шоры учкытэк вуиллям. Кызьы шуиз Яр ёрос администрациысь егитъёсын ужанъя отделлэн кивалтӥсез Андрей Иванов, ёросъёсысь егитъёсын ужанъя отделъёс но сюлмаськыны кулэ вал делегатъёсты Ижевске келян сярысь. Ӧйтод, яке егитъёс нокинлы кулэ ӧвӧл, яке егитъёслы номыр кулэ ӧвӧл. Учконо ке, "Шунды" дэменлык тямыс ар ӵоже ас котыраз огазеяны быгатӥз ни шаерысьтымы 1500 нылъёсты но пиосты. Но, Ангелина Крыловалэн верамезъя, лыдпус бордын ужпум ӧвӧл, зэмос ужъёсын астэ возьматоно. Зэмзэ но, ужъёс борды ӟеч-ӟеч басьтӥськоно ке, "Шундылэн" кужымез ӧжыт ӧвӧл. Солэн ёзъёсыз тросаз ёросъёсын кылдэмын ни. Адӟем карымон ужало можгаос, дэбесъёс, глазовъёс, яръёс. Бен, шаерамы ӧжыт ӧвӧл ӟырдыт мылкыдо егитъёс, соослы дырыз дыръя сюрес возьматыны, юрттыны гинэ кулэ. Но, кызьы тодӥськом, тросэз али коньдон вылэ пыкъяське. Ньылетӥ конференция ортчем дырысен вань умойлы воштӥськонъёс но. 1997 арын шаерамы кутэмын трос аръёслы чаклам "Удмуртиысь егитъёс" программа но "Удмурт Республикаын егитъёсъя кун политика сярысь" Закон. Егитъёслэн мукет огазеяськонъёссы сямен ик, "Шунды" дэменлык но аслаз ужъёсаз та документъёс вылэ пыкъяськыны кулэ. Соя ик ужан программаос кутоно. Нош али пусйыны луоз "Вож тулкым" (кивалтӥсез Владимир Капитонов) но "Культура. Творчество. Ваньмон дыр" (кивалтӥсез Надежда Уткина) программаосты. Улонэ пыӵан понна табере котькуд проограмма конкурс пыр потыны кулэ, соку гинэ сое быдэстонлы коньдон висъяськоз. Озьыен, "Шунды" дэменлыклэн кивалтӥсьёсызлы но, правление, кенеше быръемъёслы но пыч-пыч ужано луоз азьлане выль вамышъёс понна. Пусйыны кулэ, таяз конференциын бадӟымесь воштӥськонъёс луизы. "Шундылэн" кенешезлы кивалтӥсе быръемын Галина Юсупова, Егитъёсын ужанъя кун комитетлэн тӧроезлэн воштӥсез, правлениен кивалтоз Татьяна Мазитова, дэменлыклэн одӥгез азьветлӥсез. Л. Малых. Ярысь егитъёслэн "йырзы" Андрей Иванов. Владимир Куликов на Александр Князев дышетско Удмурт кун университетын, мылысь- кыдысь пырисько дэменлыклэн ужъёсаз но. Конференция бере егитъёс ужазы, секциослы люкиськыса. Туспуктэмъёсыз В. Камашевлэн. Иворто газетъёс 16-тӥ февральысен Турциысь "Тюркиш эрлайнз" авиакомпания "Казань-Стамбул-Казань" рейс усьтӥз. Та маршрутэтӥ лобалоз "Боинг-737" самолёт. Казане сяна, Стамбулысь самолётъёс Россиысь кыказ городэ лобало на. "Татарстанэ нырысетӥ рейсэн лыктозы Турциысь авиацияя министр но "Турецкие авиалинии" авиакомпанилэн директорез", - ивортэ "Вечерняя Казань" газет. *** Кылем арын Москваын милиция 16 сюрс кураськисез ӝегатӥз, гожтэ "Труд" газет. Огез сыӵе пыдйылчи нуналскын 20 сюрс манет пайда поттэ. Ортчись адямиослэсь сюлэмзэс небӟытон понна, соос вӧзазы нылпиосты сылыто, ӧлексы улэ аналско. Уголовной кыл кутон улэ соосты кыскыны уг луы, малы ке шуоно, адямиос жаляменызы асьсэос уксёзэс кузьмало. *** Израильысь "Маарль" газет Персидской заливын кылдэм югдур сярысь гожтэ. Со малпамъя, США Иракен ожмаськон ӝутӥз ке, Запад но Россия куспын нош ик эчешонъёс-тупамтэос кылдозы, 60-тӥ-70- тӥ аръёсы кадь ик. Россиысь Президентлэсь Б. Ельцинлэсь берло верамъёссэ Западысь политикъёс тазьы валазы: куинетӥ мировой война ӧс куспын сылэ ини, угось Россия Садам Хусейнлы дурбасьтэ. США Москвалэсь мылкыдзэ санэ ӧз ке басьты, Ельцин Америкаысь властьёсты пыкылыны кутскоз. Таосыз но ини уз пуке, малпа газет. *** Великобританиысь нимысьтыз кылдытэм комиссиез Ватиканлэн лушкем архивъёсыныз ужаны лэзизы. Америкаысь "Вашингтон Пост" газет ивортэмъя, со юрттоз валаны, кызьы католической черк но фашистъёс кыкетӥ мировой война вакытэ кусып возизы. Лорд Джаннер, комиссилэн тӧроез, верамъя, табере тодмо луоз, кытчы, кызьы, кин юрттэмен нацистъёс мукет калыкъёслэсь лушкам ваньбурзэс ватӥзы, кыӵе кунъёсы ыстӥзы. Комиссия Ватиканысь архиепископъёсын ӵош архивлэн 12 томеныз ужалоз. *** Швециын улӥсь эстонец Петер Пуйде печатлаз Быдӟым Отечественной война вакытэ эстонецъёслэн уно еврейёсты быдтэмзы сярысь документальной роман. Та произведение Эстониысь историкъёсты чылкак пурӟытӥз, угось татысь официальной история оскытэ, эстон калыкез советской оккупация зӥбыса возиз шуыса. Книга потэм бере авторзэ виёнэн, сӧсыртонэн кышкатӥзы. "Пуйде зэмзэ но кушетскиз, Швециысь Африкае пегӟиз", - гожтэ "Новые известия" газет. Крепостной правоез воштон, яке Кызьы мон историен экзамен сётӥ Серемес учыр Экзаменъёс сётон вакыт вал со. Эшъёсылы чагиськисько, малы гинэ та историез бырйи, уйвӧтам но, шуисько, адӟо ини сое. Озьы ик луиз. Вӧтасько: Мон кесяськем дӥськутэн, пасяськем кутэн. Крестьян-эшъёсыным асьмелэн баринмы доры мынӥськом. Ваньмы саникъёсын, бодыосын, лопатаосын. "Эрике ӧд лэзе ке - шуиськом, ми тӥледыз туж зол жугом. Сётэ асьме понна ужаны, милям семьяямы сизьымлэсь но уно нылпиосмы. Кызьы, маин соосты сюдом, дӥсялом?" Собере мар вал, уг валаськы ни. Тодӥсько огзэ: мон эшъёсыным кесяськисько: Ура! Крепостной правоез воштӥзы. Мон уйвӧтам уйбыртӥсько, пе, семьяосы озьы шуо. Аслым верало ке - номыре уг тодӥськы ни. Тани али но, вераськемме кылыса, анае валес доры лыктэм, ма шуид шуыса. - Ура! Крепостной правоез воштӥзы, - кесяськисько, пе. Тӥни ма дырозь со история монэ вуттӥз. Школаын но, гуртын но одӥг малпан - кызьы экзамен сётод. Ай одӥг гинэ ке луысал. Шимес: историен лыдӟиськы, немец кылын гожъяськы, ӟуч кылын шонер гожъян правилоосты учкы, алгебраен дасяськы. Зэмзэ но, шузимод! Дыр валантэм ӝог ортчиз. Всё, капут! Историен экзаменлы дасяськем кари ик. Лыдӟем берам ас поннам верасько, нош ӵукна султӥсько - одӥг кылзэ но уг тодӥськы ни. Вунэтӥ... Йыр ке йыр, пыд ке пыд! Кирос лэсьтыса, классэ пырисько. Кышкаменым пыдъёсы дыр- р! куалекъяло. Ма, кызьы уз, одӥг билеттэ но рос-прос уд тодӥськы ке. Дырекъясь киосын билет кыски. Ур-р-р-а-а! Самой капчи билет сюриз. Нош мон кышкаса пукисько вал ини, со пӧрмостэм "крепостной право" сюроз шуыса. Уг тодӥськы, ма мыным юрттӥз соку, оло ачиз шудо учыр, оло бур пыд улам лёгем вить копейка. Ӧйтод, ӧйтод.... Ольга Шихова. Вавож ёрос, Зямбай школа. Правительствоын ВУЭМ ПИСПУ ПЫД ЙЫЛАЗ СИСЬМЕ Кызьы бен туннэ уло нюлэс будэтӥсьёс но сое утисьёс? Удыс азьын кыӵе ужпумъёс сыло? Со сярысь журналистъёслы мадиз шаерысьтымы нюлэс хозяйствоя министр Николай БУЕРАКОВ. Берло дыре та удысын но бадӟымесь воштӥськонъёс ортчо. Кутэмын Нюлэс кодекс. Соя табере нюлэс Россия Федерацилэн ваньбурез луэ. Талы пумит вал Карелия но Хабаровск край. Соос вазиськизы Конституцияя Судэ. Но суд куронзэс умоен ӧз лыдъя, нюлэсэз, пе, интыослы сётыны уг яра. Озьы нюръяськон йылпумъяськиз. Табере удмурт нюлэсъёсын но Россия кузёяськоз. Россиысь Нюлэс департаментлы туэ 200 ар тырме. Солы сӥзьыса, июне Москваын ортчоз та удысын ужасьёслэн ИВ съездзы. Нош шаерысьтымы нюлэс хозяйство 60 ар тырмемзэ пусйиз ни. Таин валче вераны кулэ: быдэс дунне Россиысь нюлэсъёс шоры сак учке. Угось тэльёсмы самой трос кислород сёто. Соосын ӵошатскыны быгато на Канадаысь но Норвегиысь сикъёс гинэ. Уй палась лысо писпуосты экваторысьёсыныз (лымшорысь) уд ӵошаты. Берлоосыз туж ичи кислород потто. Вылаз ик, паськытэсь писпу куаръёс сисьмыкузы уно углекислой газ потто. Пусйыны кулэ, Россиысь нюлэсъёс быдэс дуннеын 65 процент басьто. Элькунамы миым йылпумъямын сикъёсты эскерон (лесоустройство). Со 10 арлы одӥг пол лэсьтӥське. Нюлэс хозяйствоослэн тыршемзы син азьын: лысо (кыз, пужым) нюлэсъёсмы данаклы паськытамын. Туж умой со. Таӵе писпуослы кулэяськон арысь аре будэ. Нюлэс хозяйствоос азьын озьы ик тэльёсты но сикъёсты утёнъя бадӟым ужпум сылэ. Тани миым 56 пол тылпу поталляз, 30 гектар вылысь писпу ӝуамын, нош 1996 ар уката секыт вал: 206 пол тылпу ӝутскылыса, 200 гектар пала нюлэсмы быдтэмын. - Милемлы зоро но кезьыт гужем кельше,- серем пыр шуэ Николай Яковлевич.- Тани миым командировкае мынӥськом вал. Якшур-Бодьяе нуись сюреслэн 5-тӥ километраз бӧрсьысь куинь-ньыль интыосын шӧдтэк шорысь тылпу потӥз. Ӝогак кысыны кутским, нош азьпаламы быдэ вуымтэос тэле пегӟизы. Соос тылын шудыны кутскиллям, нош вӧзазы ик - АЗС но "Дзержинец" нылпи шутэтскон лагерь. Берло дыре таӵе учыръёс пумен тросгес луо. Но нюлэсъёс ӵемгес ӝуало, тулыс бусыосысь куроез сутыку, нюлэс корасьёслэн янгышенызы но адямиослэн тэльын асьсэды умойтэм, чакласькытэк воземенызы. (Таиз муг нырысетӥ инты басьтэ). Кӧня ке вераны кулэ межколхозлесхозлэн (колхозъёслэн, совхозъёслэн) нюлэсъёсыз сярысь. Со 30 ар талэсь азьло кылдытэмын. Гурт хозяйствоослэн музъемзы вылын интыяськем сикъёс-тэльёс асьсэлы колхозъёслы но совхозъёслы сётэмын. Выль кодексъя, пу-кор дасяны билет сётӥське, хозяйстволэн кивалтӥсез лэземъя гинэ. Соя колхоз тэлез кораны быгатэ кун лесхоз. Но та аръёсы гурт хозяйствоос асьсэ нюлэсъёссэс ыштыны кутскизы, пичи крестьян, фермер хозяйствоос, эштосъёс луэменызы. Куд-ог интыосын нюлэс гожъёссэс но уг тодо ни. х х х Туннэ тани мае нимысьтыз пусйыны кулэ. 60-тӥ аръёсы элькунамы нюлэсэз жалятэк корам, яке висъямлэсь 2-3 пол трос. Табере югдур воштӥськиз, нюлэс коран чутрак синӥз. Миым, кылсярысь, ӝыныез но вуэм нюлэс погыртымтэ. Нош Россиын - одӥг ньыльмосэз. Тӥни озьы вуэм нюлэс пыд йылаз сисьме, писпулэн ӟечлыкез быре, уката ик - кызьпулэн но пипулэн. Нош куаро писпу ӝог, 40-50 ар куспын, кораны вуэ. Али быдэс республикаямы 25-27 процентэз нюлэс (кыз, пужым) мерттэмын ни. Та лыдпус арысь аре будэ. Соин ӵош ик верам потэ: нюлэсчиос тросгес мертто кыз, ӧжытгес - пужым. Питомникъёслы сое лыдэ басьтоно вылэм. Мугез бен тодмо. Ненег пужым йылъёсты койык (лось) сие, но ведь ваньзэ уг быдты. Пужым усто лэсьтӥськон материал луэ. Сое вунэтыны уг яра. Кыкетӥез бадӟым ужпум - кадръёс дасян. Кин бен туннэ лесник луыса ужа? Азьвыл механизатор- колхозник. Солэн нюлэс хозяйствоя нимаз дышетскемез ӧвӧл. Нош лесничийёс, соослэн юрттӥсьёссы, мастеръёс но инженеръёс вылӥ образованиен специалистъёс луыны кулэ. Рынокен экономикае выжон вакытэ Марий Элысь, Свердловскысь, Ленинградысь выпускникъёс дорамы уг лыкто ни. Лубяны техникумысь кӧня ке вуо на, нош Ижысь гурт хозяйствоя кун академия нюлэс хозяйствоя специалистъёсты келялоз кык ар ортчыса гинэ. Соин ик министерство академилы юрттэ, юнэсь кусыпъёс возе. Умоен верам потэ дышетскись пиналъёслэн нюлэс хозяйствое пыриськемзы сярысь. Валля арын шаерамы 124 школьной лесничествоос ужазы ке, миым 135 вал ни. Гужем дышетскисьёс нюлэсчиослы трос юртто. Соос ужало питомникъёсын но нюлэсъёсын. Нюлэс хозяйствоосын ваньзэ-ӧвӧлзэ 3,5 сюрс мурт ужа, гужем со лыдпус 12,5 сюрсозь вуэ. Огъя вераса, нянь будэтӥсьёслэн кадь ик нюлэсчиослэн тулыс но гужем кысык дырзы. Дыраз нюлэс мерттоно, кулэезъя сое утёно. Кызьы бен улэ туннэ гуртысь лесник? Уждунэз бадӟым ӧвӧл, быдэс удысъя шорлыдын 400 манет усе. Но лесниклы одӥг гектар музъем сётӥське, пу дасяны льготаез вань но мукет. Коньдон дыраз сёто. Тани Воткинск лесхозысь, пе, ньыль ӝожтӥськон вуиз дыраз уждун сётымтэзы сярысь, шуэ министр. Нош ӝегатӥллям 2-3-4 нуналлы гинэ. Тӥни озьы но луэ. Г. РОМАНОВ. Бускельёсмы дорын: Татарстан Кыктоосын "зориз" Балтась районын кылем ар ӵоже 5 кыктоос вордскизы. Семья понна со - шумпотымон! Озьыен, улон азинске. Центральной больницаысь пинал ваён юртын миым 425 нылъёс но пиос югыт дуннеез адӟизы. Ошлэн арез кык ныл кузьмаз Мирзям гуртысь Эльмира Видманлэн семьяезлы, Бурнакысь Альфира Мударрисовалы. Кыкто пиен узырмиз больницаысь медсестра Зилия Хазиева. Нош Сосваысь Нуракия Ибрагимова огкутскемен ныл но, пи но ваиз. Умой ук! Вож пиналъёс пӧлын батыр луэмзэ соку ик возьматӥз Нуривер гуртысь Альфира Самигуллиналэн пиез. Солэн секталаез - 4 килограммлэсь ятыр. 1997 ар таӵе "урожаен" шум ке но поттӥз, азьвылэныз ӵошатыса, со пумен уллань но уллань ваське. Ар ӵоже гинэ 41-лы кулэсмиз. Бурбашъёс бай уло ... Нош улонзы пӧртэм: огъёсыз булка сиё, мукетъёызлэн ӟег няньлы но коньдонзы ӧвӧл. Кинэ меда со понна янгыш карод ни? Уждун тырон ласянь улонэн ӵош вамышъя "Бурбаш" совхоз, чаклам дырызлэсь одӥг толэзьлы но бере уг кыльы. Нош бускелез "Алан" совхоз, тулыс-гужем понна но калыкезлы уксё уг тыры на. Мугзэ валэктод, дыр, кивалтӥсьёссылэн пӧртэм сямен ужаны-берганы быгатэменызы гинэ. Бурбашъёс будэтэм чабейзэс Малмыже нуыса изӥзы но гуртооссылы пызь люкизы. Картофказэс но коньдонлы пӧрмыто, соин ик уждун дыраз сёто. Районъя 25 хозяйство пӧлысь "Бурбаш" совхоз бай улэ. Кошкем арез со пунэмаськонъёстэк йылпумъяз. Тужгес но секыт югдур - "Смаильын". Та колхоз ыштонъёс адӟе, улӥ ӟечлыкен йӧл вузаменыз. Шишинерын скалъёс йӧло Районлэсь сӥль-йӧл поттон удыссэ арлы быдэ юнмато нимаз хозяйство возисьёс. Та ужез быгатыса радъяло интыысь Советъёс. Синмаськымон но адӟем карымон луо Шишинер гуртын улӥсьёс. Арлы чаклам заданизэс 147 процентлы быдэстӥзы, 3250 центнер йӧл вузазы. Соослэсь трослы ик уг кылё Соснаысь, Янгулысь, Смаильысь скал возисьёс. Озьы шуыны уг луы Пижмарс, Балтась, Нуринер но куд-ог мукет гуртъёс сярысь. Калыклэсь мултэс продукцизэ басьтон адямиослы ӟечен берытске, улон-вылонын семьядэ вордонын юрттэт луэ. Районъя ке верано, 50 400 центнер йӧл люкаськиз личной хозяйствоос чотын. Ваньмыз со вуиз ӝӧк вылъёсамы. А. КУНАЕВ. Шара вераськон Йырмы вань - мугормы ӧвӧл Яке кулэ-а ӧвӧл-а удмурт нылкышноослы нимаз огазеяськон? Азьло аръёсы но, али но обществомылэн улоназ шӧдскымон инты басьто нылкышноос. Вань улӥсьёс пӧлын соос воргоронъёслэсь тросгес лыдъясько быдэс Россиын, нимаз городъёсын но гуртъёсын. Тани Ижевск городмес но ниманы луысал нылкышноослэн городэнызы - татын соос 54 процент пала лыдъясько. Но кышномуртлэсь улонын интызэ та лыдпусэн пусйыса, шонер уз луы. Семьязэ возись, нылпиоссэ сюдӥсь-вордӥсь кышномурт висъяське мукетэныз но: со данак правоостэк кельтэм мурт. Кин быдэсъя тужгес но секыт, кырсь но дунтэм ужъёсты? Кышномурт. Кин ӵемгес ужтэк кыле? Кышномурт. Вашкала аръёсы но, революция бере но нылпиосты дышетонэн воргоронъёс вырылӥзы, табере та удыс но быдэсак нылкышноос вылын возиське. Пӧламы кышномуртъёс тросгес ке но, ас кужымзэс быдэсак усьтыны но, асьсэдыс утьыны но уг быгато. Соин ик вань калыклы сямен ик, кышномуртъёслы но кулэ валтӥсь. Совето Союзысь нылкышноос понна кема аръёс ӵоже сыӵе тӧро мактал вал Валентина Терешкова. Берло осконзэс ыштыса, кӧня ултӥям кышноос солэн нимыныз герӟаллязы, солэсь юрттэт курылӥзы. Солэн кичӧлтэмезъя ик интыосын но кылдылӥзы женсоветъёс. Табере Советской нылкышноослэн комитетсы ӧвӧл ни. Кылдытэмын мукет ёз - Россиысь Нылкышноослэн союззы, соин али кивалтэ Алевтина Федулова. Россиысь Нылкышно союзлэн люкетэз вань асьме республикаын но - Удмуртиысь Нылкышноослэн союззы. Соин кивалтэ Зоя Степнова, "Сактон" предприятилэн директорез. Союзлэсь ёзъёссэ шаерамы радъян бордын озьы ик трос ужаз Кун Думалэн азьвыл депутатэз Галина Климантова. Солэн кичӧлтэмезъя ик тросаз районъёсын усьтӥськылӥзы семьяосын ужанъя отделъёс но центръёс. Нош макем паськыт ӧръяськиз семьялэсь улонзэ радъян удыс. Удмуртиысь Нылкышноослэн союззы кылдытэмын вал вань кышномуртъёслэсь кулэяськонъёссэс быдэсъян понна. Висъялод шат асьме нылкышноосмес ӟучлы, удмуртлы, бигерлы, ваньзэсты огазеяло ке огъя сюлэмшугъяськонъёс: нылпиосты будэтон, пал кылемъёслы юрттон, юонэн нюръяськон. Озьы ке но, котькуд выжылэн вань кадь аслыз гинэ тупась сюлмаськонэз. Тазьыгес оскытыса кылдытэмын вал Удмурт нылкышно кенеш. Кичӧлтӥсез но нырысетӥ кивалтӥсез луиз Нина Малых. Та дырозь удмурт нылкышноос кык пол ас ӧтчамъёсазы (конференциосазы) люкаськылӥзы ни. Берлоез ортчиз ар талэсь азьло. Отын быръемын выль тӧро - журналист Татьяна Корнилова но 17 адямилэсь правление (пичи кенеш). Малы бен мон ваньзэ тае выльысь тодэ ваисько? Валаны турттон муген: кулэ-а ӧвӧл-а удмуртъёслы нимысьтыз нылкышно огазеяськон. Кулэ ке кыӵе луыны кулэ? Ужано нимаз яке "Удмурт кенеш" огазеяськонэ, яке Удмуртиысь Нылкышноослэн союзазы пырыса? Тани мар вера та пумысен куд-ог малпанъёссэ Татьяна Корнилова: - Правленимы вань - организацимы ӧвӧл. Мукет сямен вераса йырмы вань - мугормы ӧвӧл. Озьы ӟеч ужаны уг луы. Малпанъёсмы умоесь кадь. Нош лэсьтыны кутскиськод ке, я соиз, я таиз ӧвӧл. Самой секытэз - коньдон бордын, туэ сотэк одӥг пол но уд вамышты. Уставмы но кутымтэ бере, ас кожаз ужась организациен милемыз уд лыдъя. Мон сямен, ми али кыӵе ке тубатлэн самой улӥ лёгетаз кугӟамын. Дорамы адямиос кыӵе ке куронэн лыкто ке, юрттыны меӵак ум быгатӥське. Тӥни соку кутскиськом ини тубатмылэн лёгетъёстӥз бызьылыны: я "Удмурт кенеше", я Правительствое, я мукет организациосы вазиськиськом. Тӥни озьы одӥг ужпумез быдэстон понна гинэ трос интыостӥ ортчоно луэ. Ёзъёсмы районъёсын но ӧвӧл. Нош кыӵе зол ужатэм потэ мыло-кыдо удмурт нылкышноосмес. Уставмы, счётмы, кабинетмы, телефонмы луысал ке, ужмы лякытгес ӧръяськысал. Эшшо тазьы малпасько на: удмурт нылкышно огазеяськонэн кивалтыны кулэ мукет ужлэсь мозмытэм адями. Удмурт нылкышно кенешлэн правленияз пырисьёслэн малпамзыя, соослы лякытгес, пе, ужаны луысал, "Удмурт кенешлэн" бурдъёсыз улэ кариськыса. Мон сямен, зэмзэ но, со шонер, одӥг кивалтэм улсын ужаны капчигес. Собере али гинэ ӝутскись удмурт движениез пичи юдэсъёслы люкыны уг яра. Озьы но удмуртъёс воксё сураськизы ни, малы ке шуоно, куд-ог ёросъёсын "Удмурт кенешлэн" но, "Дэменлэн" но, "Шундылэн" но нимаз ёзъёссы кылдытъямын ни. Мынам валамея, палэнскыны уг яра Удмуртиысь Нылкышноослэн союззылэсь но. Таизлэн кичӧлтэмез улсын районъёсын радъямын ни семьяосын ужанъя центръёслэн но отделъёслэн ужъёссы. Бен, Удмурт нылкышно кенеш кулэ ӧвӧл уд шуы. Кепырась кышномуртлы ас куректонъёсыныз татчы лякытгес вазиськыны. Номыре уродэз ӧвӧл, дыр, со бадӟым "машиналэн" самой пичи ёзэз ке но луиз. Но кыӵе ёзэз? Быдэс машинаез бергатӥсь ёзэз! Солэн ужамез шӧдӥськиз ке адями вылын - со туж умой ини. Мар бен лэсьтӥз Удмурт нылкышно кенешлэн правлениез кылем ар ӵоже? - Самой бадӟымез ужпум вал Ашальчи Оки нимо премиен дано адямиез пусъён, маде Т. Корнилова. - Сое азьвыл сётылӥзы удмурт нылкышно кылбурчиослы. Правление таӵе куронэз воштоно кариськиз. Табере пусйылыны чакламын наука, дышетон, тазалыкез утён, культура, искусство удысъёсты азинтӥсььёсты но. Мынам малпамея, со шонер. Озьы кылем арын данъямын тодмо учёной Людмила Христолюбова. Таяз арын кызьы ке но вырӟытоно вал удмурт кунокуа усьтон ужпумез. Та сярысь газетамы вакчияк ивортылӥмы ни. Но ужпум коньдонэн гинэ ӧвӧл герӟаськемын. Ужаны чакламын Ижевскысь 7 номеро училищеен ӵош. Нош таиз али куашкан калэ вуэмын. Соин ик утьыны турттоно отысь дышеткисьёсты, данакез нылъёс гуртъёсысь вуэмын! Татын соосты удмурт киужъёслы туж усто специалистъёс дышето. Училищеез быдтэмъёс ужаны быгатысалзы удмурт кунокуаын но, районъёсысь киужъёсъя центръёсын но. Ма ватонэз, тросэз сыӵе центръёс, удмурт искусствоез мур валасьтэм адямиос кие сюрыса, рос-прос ужаны уг быгато. Но кызьы меда али та бордын ужъёс мыно? - Со мынам пӧськые, - шуэ Т. Корнилова. - Та ужпум пумысен ветлӥ Правительстволэн кивалтӥсьёсыз доры. Кызьы меда училищеез но кельтоно, удмурт коркаез но ӝутоно? Монэ паймытӥз Калыкез дышетонъя министерстволэн ассэ воземез. Малпасько вал отысь юрттэт басьтыны. Но шӧдӥ: отын ужасьёслэн нюръяськемзы уг поты. Лякыт сюрестӥ мыныны туртто: 7 номеро училищеез 28 номеро училищеен огазеяны малпало. Но озьы ке луиз, возиськоз на-а соку удмурт киужлы дышетон? Тӥни сыӵе ужъёсын выре Удмурт нылкышно кенешлэн правлениез. Ляб ужамез понна пыкылыны ым уг пыры. Ялан сюлмаське ӟеч ужъёс лэсьтон сярысь. Но улон куре умой-умой малпаськыны: туннэ кыӵе луыны кулэ Удмурт нылкышно кенеш? Сюрес вожын кема сылыса, нокинлы но пайда уд лэсьты. ТАТЬЯНА БАННИКОВА. Шунды Улон виштыос "МИСКИНЬ!.." Огшоры тол нунал. Инбам дыртытэк гинэ пужнэ тӧдьы мамыксэ. Азьтэмгес лымы пырыос гань-гань васько, нош куд-огез, шаплыосызгес, чиль-валь каро, синме пыро... Черк азьын трос гинэ кураськисьёс. Син шорам йӧтӥз одӥг пиосмурт. Сурыкмем фуфайка, кышъям штан (оло воргорон со, оло тузонын погыллям мучоло). Ымнырыз паськыт, ӵыж-ӵыж. Мӧзмыт пуке со ящик вылын. Азяз - коробка. Отчы пичиен-пичиен коньдон люкаське. Татын ик костыльёс кыллё. Вӧзтӥз ортчись котькуд муртлы воргорон одӥг "кырӟанзэ" мытэ: "... Озь но тазь, тазь но озь... Пыдъёсы табере чик уг выро ни..." Нош адямиос та кураськись вӧзтӥ ӵем гинэ ортчо. Ӟеч сюлэмоосыз кисыосазы кема бугыръясько но уксё потто, поно пичи коробкае. "Тау, тау..." - мыкыръясьськыны кутске соку дырекъясь горд ымныр. Нош коньдонзэс сётъяло огшоры улӥсь адямиос. Ма, ӧжыт-а жалясьёс! Лыкто, коньдонзэс сёто но, ӟеч лэсьтэмзылы шумпотыса, азьлань кошко. Зэм но, жаль мискинь адями, ветлэмез но уг луы ук. Шудтэм, кӧтыз но сюма, дыр, дӥсез но векчи гинэ, юртэз но аслаз ӧвӧл, дыр... Тодысалзы ке соос!.. Кема гинэ пукиз воргорон, собере кошкыны дасяськиз. Лыдъяз кураськыса люкам уксёзэ, кисыяз понӥз, костыльёссэ паллян кияз кутӥз но... султӥз (!) Костылез вылэ уг пыкъяськы, огшоры гинэ сылэ. Собере юн вамышъёсын мынӥз винаен вузкарись лырёк доры. Вот тыныд "пыдъёсы чик уг выро ни"! Вот тыныд "мискинь"! Татьяна ПАНТЕЛЕЕВА. Пичи Пурга ёрос, Вуж Монья школа. Нагано: я зоре, я лымыя Асьмелэн нылкышноосмы дышемын дуннеез паймытъяны. Тол Олимпийской шудонъёсын соослэн нимзы пароль выллем вӧлско вань странаосы но континентъёсы: Галина Кулакова, Тамара Тихонова, Елена Вяльбе, Любовь Егорова... Туннэ Лариса Лазутина. Наганое мынэм спортсменъёсмы пӧлысь али со самой узырез - 10 нуналскын люказ 3 зарни медаль! Россилэсь сборнойзэ Япониын табере герӟало Лазутиналэн нимыныз. Соин ӵош Россилэсь сборнойзэ азьлань валто Нина Гаврилюк, Ольга Данилова, Юлия Чепалова, Елена Вяльбе. *** Сапыр-сапыр усись кот лымы куас сюрес вылэ потӥсьёслы, биатлонистъёслы туж люкетэ. Учкисьёс но татчы ӧжытгес лыкто. Лиллехаммерен ӵошатыса (Олимпиада-94), японецъёс спортысь та удысэз уггес ярато. Со понна одӥг билет но уд шедьты йӧ вылын нискыланэ, трамплинысь тэтчанэ. Соос Олимпиада кутскытозь ик ваньмыз вузамын вал. Нош куасэн бызьылонъя стадион, чакламын со 17 сюрс учкисьлы, нуналлы быдэ ӝыныез гинэ тырме. Япониын улӥсьёс хоккеез но сокем уг гажало вылэм. Таӵе дунъет сётоно, отысь но татысь буш интыосты адӟыса. Тӧдьы Олимпиадаез ортчытӥсьёс ӵошатсконъёс чотын чаклало поттыны 42 миллион доллар. Трос-а со, ӧжыт-а? Огез тодмо: Наганоысь меӵак репортажъёс нуон понна, дуннеысь телекомпаниос вылӥ верам лыдпуслэсь 10 поллы ятыргес коньдон тыризы. *** - Канадаез, США-ез, Швециез вормоды-а? - Вормом, конечно! - шуиз журналистъёслы Валерий Каменский, 31 аресъем хоккеист. Таиз Олимпиада ми понна тужгес но секытэз, но даноез, нырысьсэ пумисько профессионалъёс. Россиянъёс соос пӧлын ляб уг адско, троссэ ӟеч сямъёсмес ыштӥм ке но. - Бадӟым хоккейлэсь школазэ тӥ кутскиды Владимир Васильев бордын, собере шудӥды ЦСКА-ын Виктор Тихонов дорын, туала тренерды - "Колорадо Эвеланш" клубысь Марк Крофорд, табере шедиды Владими Юрзинов вӧзы. Соин ӵош вуиды Наганое... - Юрзиновез мон кемаласен тодӥсько, Россилэн сборнояз со кыкетӥ тренер вал. Кӧня ке ар ӵоже ужаз Тихоновен. Кыксэс но умоен гинэ пусйысал. НХЛ-ын югдур чылкак мукет, отын тон сьӧры нокин уг бызьылы, уг дышеты соизлы яке таизлы. НХЛ-ын котькудӥз спортсмен аслыз ачиз кузё. Отысь чемпионатэз Россиысеныз матысь но уд ӵошаты. - Кинэн шудыны тӥледлы кельшегес: Павел Буреэн но Алексей Жамновен яке Клод Лемьеен но Петер Форсберген - туала клубысьтыды хоккеистъёсын? - Меӵак вераса, Буре но Жамнов мыным трослы матын: соосын ужаны луэ, соос тонэ валало. - Валерий, тон пичиысен астэ хоккейлы сӥзид. Со вылын миллионъёсын доллар люкаськод. Улонысь мар кулэ - ваньзэ басьтӥд. Спортысь кошкон сярысь малпан уг лыктылы на-а? - Уг. Сыӵе мылкыды ӝутскиз ке, соку ик кошко. Нош али улӥсько хоккеен, хоккеен гинэ. *** Зарни медаль понна нюръяськонын тазалыксэ жалясь ӧвӧл ни: кин кызьы допинг пыр но выль вормон басьтыны выре. Наганоын сьӧд списоке нырысьёсыз пӧлын шедиз Ребальяти Росс, Канадаысь 27 аресъем спортсмен. 8 феврале гинэ гурезьысь ӝог нискыланын со зарни медаль басьтӥз, ньыль нунал ортчыса, медицинской комиссия шараяз: спортсменлэн вирысьтыз шедьтэмын марихуана. Соин валче Канадалэн командаез зарни медальзэ ыштэ. Сыӵе решение кутӥз Международной Олимпийской комитетлэн исполкомез. Кылдэм югдурез эскероз на суд. Россиысь спортсменъёс та ласянь чылкытэсь. Хоккеистъёсты вератэк, ваньзы соос потӥзы антидопингъя центр пыр. "Анализъёссы умоесь", - шуиз центрлэн кивалтӥсез Виталий Семенов. Ортчем Олимпиадаосын, кылсярысь, Атлантаын, куд-ог "кизилиосмес" паньсаны выризы бромантон эмъюм пыр. Командамы та керетонысь "кӧсын" потӥз, верам препарат юыны алымтэосыз пӧлы соку шедьымтэен гинэ. Нош кылем арын Тронхеймын ортчем куасэн бызьылонъя дуннелэн чемпионатаз допинглэн сьӧлтэтаз ӝимиз куать пол олимпийской чемпионка Любовь Егорова. Та муген Наганое лыктон сюресэз солэн пытсаськиз. Ӝыны ар ортчыса, Афины городын ортчем капчи атлетикая дуннелэн чемпионатаз дисквалификация басьтӥзы эшшо кык спортсменмы. Озьыен, "гуртысь" эскеронъёслы оскон сокем ик бадӟым ӧвӧл. Пусйыны кулэ, допинген нюръяськонэ Нагано юнматӥз Японилэн спецслужбаысьтыз тужгес но ӟеч специалистъёсты. Нимысьтыз лабораториос котькуд спортсменлэсь вирзэ но кызьзэ туж сак эскеро, анализ сётӥсьёслэсь котькуд вамышсэс чакла охрана но госбезопасностьлэн агентэз. Шунды Сюрес вожын Улӥез улӥ яке вылӥез улӥ? Котькуд аре, студентъёслэн тол каникулъёссы дыръя, Безменшур школаын ортче татысь дышетскемъёсын пумиськон, 23 январе но вань мылкыд карись студентъёс ӧтемын вал. Пӧртэм дышетскон интыосысь люкаськизы соос: Глазов пединститутысь, Можга педучилищеысь но Удмурт кун университетысь. Школаысь пиналъёс тунсыкъяськизы соослэн дышетсконэнызы, кыӵе экзаменъёс сётоно луизы, кызьы шутэтско но мукет. Классын дышетӥсьёс но пукизы, кыкез соос пӧлысь Можга педучилищеез быдтэмын. Оло , соин но, дыр, соос педучилище вылэ выжизы. Милемлы но, вузын дышетскисьёслы, тунсыко потӥз дышетсконзы сярысь кылзыны. Но мон ӧйгес вала вераськонмылэсь "конкуренция" шуонэ выжемзэ. Споръяськон но пичияк потӥз, ку умойгес школаысь кошкыны: 9-тӥ яке 11-тӥ класс бере. Вазь кошкемъёсыз лыдъязы укмыс бере, мукетъёсыз - 11 бере. Потэ вал кылзэме пиналъёслэсь но малпанзэс, но соос чалмыт пукизы. Шугъясько на, шӧдске, сюрес быръён ласянь. Ойдо, мед малпаськозы на. "Педэз" быдтэмъёс лыдъяло, училище бере специалистъёс золгес луо шуыса. Бен, вань, дыр, соиз но. Тани милям курсамы тросэз педучилище бере ке но, ми кадьгес дышетско, потэ мыным. Вань горд дипломен быдтӥсьёс, тӥни соослэн зол дышетскемзы туж шӧдӥське. Мон чик уг курласькы педучилищеез, угось ачим 9 класс бере отчы мынӥсь вал, но ӵапак со дыре Удмурт кун университетын усьтӥськиз журналистика отделение. Журналист луэме потӥз, школае ик кылёно кариськи. Семьяын но споръяськон потылӥз. Атае педучилищее мынон понна вал, отын, пе, золгес дышето, анае - вузын дышетскон понна. Кыксылэн ик монэ адӟемзы потэ вал дышетӥсен, нош мон бырйи мукет сюрес. Татчы пырыны дышетӥсе но мылкыдме ӝутӥз. Нош журналистика отделение училищеын луысал ке, отчы мынысал, "улӥез-вылӥез" курлатэк. Мынам тросэзлэсь кылэме вань, педучилищеын, пе, дышетскыны шуггес. Нош кытын капчигес меда дышетсконлэсь емышсэ сиыны? Ӧвӧл, эшъёс, озьы вераськыны уг яра. Дышетскон со котькытын дышетскон, одӥгезлы таяз шуг йӧтэ, мукетызлы - капчи. Вылӥ диплом понна гинэ но дышетсконо ӧвӧл. Кызьы тыршид, сюлмаськид, сыӵе ик тодон-валан но басьтод, училище-а со яке университет. Уг луы шат аслыд дышетскон инты бырйыны, яратыса, умой малпаськыса,берло жалянтэм вылысь, вань сюлэмзэ яратоно ужедлы сётон понна. Анна Кузнецова, Удмурт кун университетысь студентка. Шунды Ха-ха-ха, хи-хи-хи Луд кечен гондыр шедьтӥллям зарни. Керето, пе. Гондыр кема малпаськымтэ, шуэм: - Ойдо, кин тросгес пинь уськытоз, солы ик зарни луоз. Луд кеч соглаш луэм. Нырысь мыжгем луд кеч. - Кӧня? - юам гондыр. - Одӥг, кык, куинь...куать. Собере гондыр луд кечез мыжгем но юам: - Кӧня? - Ний? - Кызьы ньыль? - А бофе ӧвӧй ни. *** Дышетӥсь - Вовалы: - Нош тон мар сярысь малпаськиськод? - Мон? Мон малпасько ужаса вить сю сюрс басьтыны. Атае кадь ик. - Атаед сомында басьтэ-а? - Уг, мар тӥ. Со но со сярысь малпаське... *** Дышетӥсь: - Пети, тыныд кельшизы-а каникулъёс? - Туж ик ӧз, сочинение гожъямон. *** - Коли - самой кылзӥськисьтэм дышетскись, - вера одӥгез дышетӥсь мукетызлы. - Но туж паймоно кадь, одӥг урокез но келлямез ӧвӧл. Света Аркова. Пичи Пурга ёрос, Карашур гурт. СЬӦД ОШМЕС Сьӧд Ошмес гуртмы пичи ке но, мыным туж кельше. Малы ке шуоно, вордӥськем гурттэ, анай-атайдэ, ӵош будэм но шудэм эшъёстэ, пинал дырдэ номырин уд вошты. Тодэмды потэ-а, кызьы кылдэм мынам яратоно гуртэ? Азьло дырысен Сьӧд Ошмес сярысь улэ ини таӵе веран. Гуртмы кылдэм укмысэтӥ даурлэн кутсконаз, куке татчы лыктӥллям Пуны гуртысь но Кузёбайысь адямиос. Нюлэс но, пе, татын азьло бадӟым шимес пеймыт вылэм. Со лыктэм адямиос кема малпаськыса улӥллям, кытчы умойгес луоз мыныны: бадӟым Оӵ шур пала яке татчы ик интыяськоно. Кема малпаськиллям соос, нош ӵуказеяз вераллям ог-огзылы малпанъёссэс. Одӥг визьмо пересьлэн дэмламезъя кариськиллям: боды йылэ, пе, бун думиллям, собере учкыса улӥллям, кудпала бунэз тӧл пельтоз. Бунзы возьматэм Оӵ шур пала. Соин ик удмуртъёс отчы кошкиллям. Но соос отын кема ӧз улэ, пе - кышказы нылпиоссы понна: пиналъёссы вуэ усьылозы. Соин, вылды, соос ми пала, бадӟым ошмес дуре вуиллям. Туж кельшем таиз интызы, тужгес но шумпотӥллям ошмеслы. Асьсэлы улыны коркаос ӝутылӥллям, писпуос мерттӥллям, Нош со шурлэн тани маиз паймоно кадь вылэм: бугыръяськыса, пӧзьыса улэ, пыдэсыз ик, пе, адӟиське вал. Кышноослэн, ву омыртыкузы, ведраоссы ошмесэн валче кытчы ке кыдёке-кыдёке кошко вылэм. Нош пыдэсыз ошмеслэн сьӧд-сьӧд вылэм. Соин ик, вылды, ошмессэс Сьӧд Ошмес нималлям. Со бордысен та ним милям гуртмылы но лякиськем. Света Михайлова. Алнаш ёросысь Усо (Муважи) школа. Уждун интые парсьпи Юкаменск. "Мир" колхозысь Новоелово гуртын ужасьёс кемалась ини уждун ӧз басьтэ вал. Гуртысь парсь гидзы нуналлы быдэ кохозлы ыштонъёс ваиз. Кезьыт гид куашкан калэ вуиз, ӝук пӧзьтыны ӧз окмы эстӥськон. Пайда вайымтэысьтыз гидысь кык сю парсь уждун ӵотын люкылэмын вал колхозысь ужасьёслы. Соин валче, "Мирысь" кивалтӥсьёс асьсэ ужасьёссылы пунэм тыронъёссэс ноябрь толэзёз быдэстӥзы. Туннэ нуналлы колхозысь Новоелово фермае кельтэмын 24 мумы парсь гинэ, нош вордскем парсьпиоссэс озьы ик вузаны чаклало колхозын ужасьёслы. Л. Сунцов. Ӵош ужаны капчигес Таяз аре гурт хозяйствоос но соосын герӟаськем пердприятиос ӵош ужаны кутскозы, нош кудъёсыз пырак огазеяськозы. Со ужез радъяны капчи-каньыл ӧвӧл, сое котьма ласянь валаса, чакласа лэсьтоно. Соин ик алигес республикаысьтымы та удысын кивалтӥсьёс кенешыны-дышетскыны Ижевске люкаськылӥзы. Таӵе воштӥськонъёсын (реформаосын) шаерамы Удмурт Правительстволэн Тӧроезлэн воштӥсез Александр Злобин кивалтоз, нош ёросъёсын - гурт хозяйствоя управлениослэн кивалтӥсьёссы. Огазеяськон, оло, пайда ваёз. Солы оскем потэ вал. Н. Возисов. Бергатэк пызь но уг изӥськы Мар ватонэз, улонмы берло вакытэ юн чукинскиз. Вуко кӧосмы туж ляб берганы ӧъязы яке воксё но дугдӥзы-а, мар-а шуод. Озьы ке но, туннэ улыны кулэ, мар ке но тунсыкозэ, ӟечсэ, сюлэмыдлы матэ луисьсэ кулэ ук. Ялан уродэз вылэ гинэ чӧлскыса уд улы. Тае ӟеч вала Можгаысь сукыръёслэн обществозы. Шуг-секытъёслы сётӥськытэк, татын кылдытыны быгатӥзы чебер кырӟаны быгатӥсьёслэсь хорзэс. Кивалтэ соин Пётр Николаевич Николаев. Вордӥськемын районысьтымы Казакгуртын. Егит дыръяз Алнашысь ёрос культура юртын музыкальной кивалтӥсь луыса одӥг ар гинэ ӧз ужа. Табере солы 65 арес. 25 арлэсь уно Можгаын улэ ини. Татын кема аръёс ӵоже кивалтӥз ветеранъёслэн хоренызы. Пётр Николаевич магнитэн сямен ас котыраз адямиосты люканы быгатэ, аслыз но, мукетъёсызлы но юнэсь куронъёс пуктэ. Солэн бадӟым талантэз ас коллективзэ вакчи дыр куспын вылӥе ӝутыны быгатӥз. Юнме-а та синмаськымон крезьчилы сётэмын "Россия Федерациысь культура удысысь сӥё-дано ужась" вылӥ ним. ВОС-лэн (Всероссийской общество слепых) Можгаысь территориальной первичной организациысьтыз хор 25 адямилэсь кылдытэмын. Соос ваньмызгес ик Можгаын улӥсьёс луо, озьы ик вань ёросысьтымы но усточиос. Районмы угось та зонае ик пыре. Вераны кулэ созэ но. Милям ёросамы али ляб адӟись 79 мурт лыдъяське, соос пӧлын нырысетӥ группаен - 38, 60 ареслэсь бадӟымъёсыз - 69. Ваньзы соос люкемын 6 группалы. Сизьымез огназы кылем ляб адӟисьёс уло ветеранъёслэн интернат юртазы, ньылез - семьяосын. Огназы кылем ӧлексыосты утьыны юнматэмын сизьым нимысьтыз ужасьёс. Можга городын но Можга ёросын улӥсьёс сукыр кылемъёслэсь хорзэс ӟеч тодо ини. Нош алнашъёслэн соосын тодматсконзы кутскиз миым гинэ. Вуылӥзы Варзийылэ, Туймылэ, ёрос больницае. Варзи-Ятчи санатроие но мукет интыосы. Пусйыны кулэ, котькытын ик та коллективез шуныт пумитало. "Быдэс Алнаш ёросэ концертъёсын вуыломе", - сыӵе вазиськон кутэмын вал та организацилэн бюроезлэн одӥгаз заседанияз. Тӥни сыӵе ӟеч мылкыдо артистъёс табере я сояз, я таяз гуртэ вуо. Концерт понна соос дун уг куро. Одӥгез умойтэм: ӧвӧл та организацилэн аслаз автобусэз. Соин ик транспортэн шуг-секытъёс кылдо. Самодеятельной артистъёс вазисько ёросысьтымы гурт администрациослэн но колхозъёслэн кивалтӥсьёссылы: тӥляд гуртысьтыды калыклэн та усточиослэсь концертсэс учкемез потэ ке, лэсьтэ заказ но, коллективез дорады ваён но берен келян вылысь, транспорт висъялэ. Гуртъёсын озьы ик каро. Тани 11-тӥ январе, кылсярысь, радио пыр ивортӥзы: "Ӵуказе асьме доры (Улын Сырьез гуртэ) лыкто куноос-адӟись сюлэмъёс туж бадӟым концертэн. Соин ик соос доры лэзёно автобусмес. Концерт кутскоз нуназе 12 часын. Нош Улын Сырьез гуртын улӥсьёс клубе 10 часысен ик люкаськыны кутскизы. 12 часлы бушез пукон инты ӧй вал ини. Пумтэм кичабонъёсын пумитаськом дуно куноосмес. Витеммы-пумитаммы юнме ӧвӧл. Учкемъя учкем потэ, кылзэмъя кылзэм потэ шуэмъя, люкаськем калык паймыса кылзэ сюлэм пыдэсысь ик потӥсь кырӟанъёсты. Соос, сукыр кылемъёс, сцена вылысен, синмоослэсь улон шоры учконзэс чылкак выль сямен радъяны дышето, чурытомем сюлэмъёсты небӟытыны юртто. Пӧртэм кырӟанъёс, романсъёс, серемес частушкаос чузъясько я хор, я нылкышноослэн ансамбльзы, я нимаз артистъёслэн кырӟамзы улсын. Кылсярысь, кузпалъёс Галина но Равиль Латыповъёс асьсэос кылбуръёс гожъяло. Соос сӥземын Удмурт шаермылы, Можга городлы, данъяло асьме чебер инкуазьмес. Одӥг кадь усто пӧрмыто ӟуч, удмурт но бигер сямен. Сюлэмез позыртӥсь жингрес куараосынызы люкаськемъёсты паймытӥзы Евдокия Махнева, Фёдор Селифанов, Петр Николаев, Клавдия Николаева, Юлия Топыркина. Римма Туганаева но мукетъёсыз. Артистъёс пӧлысь кудзэс ке нимысьтыз висъяны ик шугъяськоно. Репертуаре удмурт но ӟуч калык кырӟанъёс, пӧртэм авторъёслэн кылъёссыя кылдытэм произведениос пыремын. Тодматском Сергей Есенинлэн, Ашальчи Окилэн, Пантелей Кузнецовлэн но мукет гожъяськисьёслэн кырӟанлы пӧрмем чуръёсынызы, "Черный ворон", "Выткался на озере", "Ой, гужем ӝытъёс", "Выйду на улицу", "Яратон сярысь", "Гажан эше", "Куддыръя", "Шудэд тонэ алдаз ке", "Мӧзмисько" но трос мукет азьло но али гожтэм кырӟанъёсты кылзӥсьёс вырӟыны дӥсьтытэк кылзӥзы. Ма, ваньзэ гожтыны кыл шедьтод-а одӥг гинэ материалын. Усточиос сокем чебер, вань мылкыдзэс поныса, шулдыр кырӟаны быгато, соос шоры учкыса, огдыре сюлэм но шымырске, шум но потэ. Ведь соос пӧлысь куд-огез чик но уг адӟы. Нош кырӟанъёс пыр сюлэмъёссэс учкисьёслы-кылзӥсьёслы эркынак усьто. Зэмзэ но, соос сярысь адӟись сюлэмоос шуыса верамзы туж интыяз. Быдэс гуртэн сямен утялтӥзы дуно куноосмес - пӧртэм пыжиськемъёсын, сиён- юонъёсын. Таӵе пумиськонъёс ӵем уг луо угось. Гурт калыклэн нимыныз бадӟым тау кареммес вераськом ваньмызлы, кин таӵе вунонтэм шулдыръяськонэз ортчытыны юрттӥз, вань ужрадъёсы мыло-кыдо пыриськиз, чукинскем улонамы ӧжытак ке но сайкыт тус пыртӥз. Синтэмъёслэн Можгаысь обществоенызы ёросамы герӟаськыны луоз Варзийылысь 6-31-06 номеро телефонъя Евдокия Васильевна Махнева пыр. Ӧтелэ асьтэ доры татысь усточиосты. Озьы тӥ ӟеч уж лэсьтоды кызьы ке ас гуртоостылы, озьы ик асьсэлы артистъёслы но. Зэм, бергатэк пызь но уг изӥськы. Ачид сярысь ачид сюлмаськытэк ӟечсэ уд адӟы, улонэд трослы палдургес луоз. З. Сорокина. Алнаш ёрос. Буёло кортъёсты лушкан 2,4 пол йылӥз Удмуртиысь предприятиосын но организациосын буёло кортъёсты но соослэсь лэсьтэм арбериосты лушкан арысь аре будэ. 1996 арын 272 таӵе йыруж пусъемын. Таин валче предприятиослы 2,5 миллиард манет тыр изъян ваемын. 1995 арен ӵошатыса, буёло кортъёсты лушкан учыръёс 2,4 поллы будӥзы. 1997 арын но югдур ӧз воштӥськы. Талэн мугъёсыз уно. Кылсярысь, пердприятиосын но организациосын буёло кортъёсты кутон, лыдъян-чотан, вузан-басьтон кулэезъя радъямын ӧвӧл. Та удысын югдурез воштон понна Удмурт Республикаысь Правительство уно ужрадъёс ортчытыны чакла. Соос юнматэмын "Промышленной но бытовой ломез, буёло но сьӧд кортъёслэсь кылем- мылемъёссэс басьтонэн, пайдаё кутонэн, складъёсы люкамен, интыямен но интызэс вошъямен герӟаськем ужез ӟечгес эскерон сярысь" постановленияз. Шунды Школа но улон Пряникен уд пӧя, сюлоен уд дышет Школа. Мар меда со туала дышетскись понна? Сое тодон вылысь кӧня ке юанъёсын вазиськоно кариськи ӵош дышетскись эшъёсылы. Вераськонэ пыриськизы: Лена но Оля Перевозчиковаос, Сергей Широбоков, Руслан Федоров, Таня Абросимова, Ирина Гаврилова, Дима Белых, Алёша Широбоков, Костя Гильманшин. - Мар сётэ тӥледлы школа? Оля: - Нырысь ик, школа мыным тодон-валан сётэ. Школаын пумиськисько эшъёсыным, шумпотыса ветлӥсько дышетскыны. Лена: - Тодон-валан. Школатэк азьлань нокытчы уд мыны. Урокъёс дасямын ке, мылкыд ик капчи луэ, нош дышетымтэ ке, пукиськод ини, медаз гинэ юалэ шуыса. Сергей: - Номыр но уг. "Кыкъёс" трос пуктыло. Руслан: - Тодон-валан, школатэк азьпал сюресме уг адӟиськы. Таня: - Тодон-валан, но ӵем дыръя ми сое ваньзэ ум басьтӥське, азьтэмъяськиськом. Ирина: - Выль тодон-валанъёс. Эшъёсын пумиськылонъёс. Дышетскыны туж яра. Дима: - Тодон-валан. Вуоно улонэ усьтэ ӧсъёс. Соиз урод, аръёс ортчо, нош эшъёсын люкиськем уг пот. Лёша: - Визь сётэ, но трос ӧй люка на, азьтэм быдтэ. Костя: - Тодон-валан сётэ, дышетӥсьёсмы умой сямъёс пыӵатыны тыршо, тодмотэм юанъёслы валэктонъёс сёто, мон татын эшъяськыны, ог-огедлы юрттыны дышетскисько. - Кыӵе кружокъёсы ветлӥськоды? Кудӥз тужгес но кельше? Оля: - Мон яратӥсько эктонъя но драматической кружокъёсты. Аслэсьтым кужымме эскерисько Лена: - Юнкоръёслэназ. Мукетъёсаз ветлыны дыр ӧвӧл, урокъёс трос. Сергей: - Нокудаз но уг. Руслан: - Мотокружоке ветлӥсько, право басьтоно вал. Таня: - Спортивнойёсаз. Туж гажасько соосты, угось соос мыным тазалык сёто. Ирина: - Юнкоръёслэназ но керттӥськон кружоке. Малы но солы дыши ини кадь, шумпотӥсько. Лёша: - Эктонъя кружок гинэ яра. Костя: - Яра куасэн бызьылыны. Шумпотыса ветлӥсько пуэз чильпанъя кружоке. 8-тӥ Мартлы чильпам кузьымъёс дасясько ни. Пуксисько ке уже борды, ваньзэ вунэтӥсько кадь. Оля: - Мон яратӥсько ӟуч книгаосты, журналъёсты но ӟучъёссэгес лыдӟисько. Лена: - Али дышетскисьёс яратон шоры учкыны кутскизы. "Маруся" выллем журналъёсын со сярысьгес гинэ гожъямын. Вылъёссы но чебересь, яркытэсь соослэн. Удмуртъёсыз пӧлысь кельше "Инвожо" журнал. Сергей но Руслан: - Детективез. Таня: - Удмуртъёссэ лыдӟыны яратӥсько. Ачим удмурт бере, сыӵезэ ик лякыт лыдӟыны потэ. Авторъёс сюлэм пыртӥзы поттыса гожто произведениоссэс, соин соос мыным матын. Ирина: - Приключениос, фантастика, выжыкылъёс ярало. Лыдӟыны кутскисько ке, пушказ ик выисько кадь. Дима: - Журналъёсты яратӥсько лыдӟыны, соос современноесь. Лёша: - Нокыӵезэ но уг яратӥськы, уг поты лыдӟиськеме. Костя: - Война сярысь. Тросгес тодэме потэ асьме калыкмылэсь шуг-секытъёс пыр ортчемзэ, геройёслэсь подвигъёссэс. Оля: - Урод. Оло, юыны-кыскыны пиналъёс асьсэ понна ӧй но кутскысалзы, но кинлэсь ке адӟо ке, мон рыжий-а, мар-а, шуо. Эшшо ке мода, пе, сыӵе на. Лена: - Асьсэлэн ужзы. Мыным уг, асьсэлы асьсэос урод лэсьто. Бен урод ик, со зынэн шокано луэ. Руслан: - Огшоры. Ачим сыӵе ужен уг выриськы на. Таня: - Урод. Тазалыкез быдтэ. Ярам ай, пиос ке, нош нылъёс- вуоно анайёс ук? Соослы али ик малпаськоно та сярысь. Ирина, Сергей но Лёша: - Урод. Дима: - Урод. Тазалыкез лябомытэ. Костя: - Бадӟым будӥ ке, вина но уг юы, тамак но уг кыскы. Туж урод со. - Яратон дышетскыны юрттэ яке уг? Лена: - Мыным со люкетэ. Сергей: - Юрттэ кадь, кужым сётэ. Руслан: - Люкетэ. Урокез уд малпаськы. Таня: - Дышетскыны люкетэ. Йырын соку дышетскон ӧвӧл ни. Ирина: - Люкетэ кадь. Дима: - Малпаськоно ай! Лёша: - Яратон дышетсконлы юрттэ. Костя: - Яратон дышетскыны уз люкеты кадь. Кин ке яра ке, умойгес дышетсконо. Школалэн директорез луыса, мар выльзэ лэсьтысалды кадь? Маиз уг яра школаын? Лена: - Школаын ваньмыз яра. Номырзэ но ӧй воштысал. Сергей но Руслан: - Кызьы вань, озьы ик кельтысал. Таня: - Школалэн пушкыз уг яра. Директор луысал ке, борддоръёсты чебер карысал. Ирина: - Дышетскисьёс куд-огъёсыз уг ярало, малы ке шуоно, асьсэды урод возё. Дисциплинаез юнматысал. Дима: - Школаетӥ бызьылыны лэзьысал. Лёша: - Школаез бадӟым карысал. Бызьылыны инты пичи. Костя: - Дисциплинаез юнматысал. Вераськиз Лариса Якунина. Як.-Бодья ёросысь Мукши школа. ДЫШЕТӤСЬЁС ВУНЭТЭМЫН ӦВӦЛ Кун Кенеше вуо школаосын, училищеосын, нылпи садъёсын ужасьёслэн вазиськонъёссы, уждунзэс, пособиосты тырыны курыса. Кун Кенешлэн Наукая, дышетонъя, культурая но егитъёсын ужанъя комиссиез ивортэ, та вакытэ 1998 арлы бюджет бордын ужан мынэ шуыса. Комиссия дышетон, социальной удысъёсын ужасьёслэсь куронъёссэс, ӵектонъёссэс лыдэ басьтӥз но соосты Правительствое ыстӥз. Таин валче 1998 арлы бюджетлэн инъетаз чакламын дышетӥсьёслы методической литература понна толэзьлы быдэ компенсация сётыны, нылпи юртъёслы, школа-интернатъёслы коньдон висъян сярысь, бюджетной организациосты транспорт басьтыкузы налог тыронлэсь мозмытон сярысь статьяос пыртэмын, озьы ик "Калыкез дышетон сярысь", "Культура сярысь", "Физической культура но спорт сярысь", "Егитъёсын ужанъя кун политика сярысь" законъёс но палэнэ кельтэмын ӧвӧл. Нош ЕТС-лэн нырысетӥ разрядэзлэсь ставказэ будэтон сярысь ужпумез Россиысь Правительство эскере. Соин ик Кун Кенешлэн Президиумез та пумысен ӵектонъёссэ Россия Федерациысь Правительствое но Кун Думае ыстӥз. ФЕДЕРАЦИЛЭН КЕНЕШЕЗ УЖА Кун Кенешлэн Тӧроез Александр Волков кошкиз Москвае, Федеральной Собранилэн ужаз пыриськон понна. Депутатъёс азьын вераськиз Россия Федерацилэн Президентэз Борис Ельцин. Федерацилэн Кенешез 19 ужпум эскероз. Соос пӧлын - Россиын экономикаез юнматыны луонлыкъёс кылдытон сярысь постановление, Музъем сярысь кодекс, кудзэ Кун Дума умоен лыдъяз, пенсиосты тырон сярысь закон но мукетъёсыз. Кун Кенешлэн пресс-службаез. Инкуазь суред ТУЛЫСПАЛ Педлон - кион сюан толэзь. Кион музэн вузо тӧлъёс... ... Пинал тулыс Тол Бабаен Весь нюръяське но нюръяське. Кезьыт лымы февральысен Тулыс зынэн ини паке. (Флор Васильев). Кӧня ке нунал ӵоже инкуазь нырулыса кадь улӥз. Дырын-дырын гинэ усьыло тӧдьы мамык лымы пырыос. Усемзыя чилекъяло-ворекъяло соос. Писпу вай вылысен чузъяське аспӧртэмлыко крезьгур - куаразэс эскеро пислэгъёс. Ма, ӟольгыриос, ӵанаос но ӟабыльтӥсесь луизы ни, эшшо но кужмогес каргето кырныжъёс. Тулыспал толэзь вуиз ук улосамы! Инкуазез эскерисьёс толэз куинь люкетлы висъяло. Тол кутскон - нырысетӥ лымы усёнысен толсурлэн самой вакчи нуналозяз кыстӥське; зэмос тол - 26-тӥ толсурысен тулыспал толэзь кутскытозь; куинетӥ люкетэз - толлэн тазалыкез лябӟон вакытэ: нунал кык часлы будэ, шунды но огшоры гинэ уг югды, шуныт тылсиоссэ кузьманы кутске. Липет вылысь шапыкъёс усьылыны кутско, уйёсы - йӧ ӟузырилы пӧрмо. Синоптикъёс эскеремъя, асьме улосын та толэзе шор-куспо кезьыт 10 градус котырын возиське. Но луо витьымтэ-возьмамтэ пӧртмаськонъёс но. 1935 арын тулыспал толэзе 5,7 градус шуныт вылэм, 1929 арын - 38,2 градус кезьыт! Тулыспал толэзь эрказъяське пельсконъёсын но буранъёсын. Озьы ке но, шунды ас ужзэ лэсьтэ: писпуос выжыысь лымы каллен шунаны кутске ни. Толэзьлэн шор вадьсаз чырмыт крезьгураны кутско ни пислэгъёс, ӟузьыос. Кутско кионъёслэн, ӟичыослэн сюанъёссы. Та вакытэ юри куас вылэ султыса нюлэскытӥ ортче ай. Син азяды одно ик йӧтоз пазяськем гон бервылъёс, лыдтэм пытьыос, вир шапык бервылъёс. Ӵемысь уго семья кылдытон понна "казакпиос" пӧлын жугиськонъёс пуромыло. Толэзьлэн берпуметӥ нуналъёсаз кионъёс семья кылдыто, кузэн-кузэн уллёысь палэнско. Та дыре ик тулыс "шудонъёссэс" мыто луд кечъёс, гондыръёслэн вордско пӧзь быдӟаесь пиоссы. Чорыгасьёс понна матэктэ кысык вакыт. Со дыре ик тыметъёсын кышкытлык кылдэ: йӧ зӧк луэмен, чорыгъёслы шоканы омыр уг окмы. Соин сэрен, тросэз бырыны шедё. Писпуос вожмыт тусъемесь луо. Кызо нюлэскы ке пырид, лымы вылысь синйылтод лыдтэм кускыли тысьёсты. Та дыре кызъёс тысьёссэс пазяло-кизё. Ас синъёсыным адӟи: сизь капчи тэтчаса бича лымы вылэ усем кидысъёсты. Малы-о кокаськыса пукод дась сиён вань дыръя? Калык чакламъя, нырысетӥ феврале куазь чебер, шундыё ке луиз, вить тулыслэсь вазь вуэмзэ. 2 тулыспалэ лымыя ке, вӧй юон дыре пельскоз. 10 феврале, Ефремлэн нуналаз, тӧласькиз ке, гужемез зоро луоз. 15 феврале толэн тулыс ваче син пумиське. Кутске ваче нюръяськон. Та ӵошатсконын котьку вормисен потэ Тулыс апай. Калыклэсь чакламъёссэ гожъяса быдтод шат? Огез тодмо: инкуазь вамыш лэсьтӥз ни тулыс пала. Н. НИКИФОРОВ. Фотоез М. ЕГОРОВЛЭН. Адями пересьмыны уз сётӥськы Америкаысь биологъёс ялан егитомыны амал шедьтӥзы. Огез учёной Майкл Уэст валэктэмъя, табере адями клеткаослэн пересьмеменыз "кивалтыны" луэ. Клетка улытозяз кык люкетлы 70 пол висъяське. Экстракт ватсаса, учёнойёс кылдытӥзы сыӵе клетка, кудӥз 100 пол люкискье но пересьмыны уг ик малпа. Учёнойёс оскыто, табере мугор пересьмемен герӟаськем висёнъёсты, сюлэм черъёсты, ракез эмъяны луоз шуыса. Но опытъёс, эскеронъёс ортчытон понна, вить-дас ар кулэ луоз на. Удмурт Республикалэн Конституциезлэн выль инъетэныз валче "Удмурт Кенеш" ассоциацилэн Пичи кенешезлэн вазиськонэз 1998 арын 19 феврале Удмурт Республикаысь Кун Кенеш эскероз Удмурт Республикаысь Конституцилэсь выль инъетсэ, кудӥз республикаямы президентлэсь постсэ кулэ каре. Нош 1994 арын, юалляськонъёс ортчытыку, шаерысьтымы 68 процент бырйисьёс талы пумит луизы. Озьы ке но, Кун Кенешлэн Тӧроез А. А. Волков но, куд-ог депутатъёс но ужпумез выльысь ӝуто. "Удмурт Кенеш" огазеяськонлэн Пичи кенешез лыдъя, та постэз юнматон Удмуртилы кулэ ӧвӧл шуыса. Со республикалэсь полномочиоссэ но уз паськытаты, социальной удысын, экономикаын кылдэм ужпумъёсты но уз быдэсты. Солэсь но кышкытгес: властьёс куспын тупамтэос, эчешонъёс пурӟозы, кун аппаратын ужасьёслэн лыдзы йылоз, соосты возёнэ тросгес коньдон кошкоз. Ваньмыз со республикаямы политикаын, социальной удысын, экономикаын кылдэм секыт югдурез эшшо но шугомытоз. Россия Федерациысь Федеральной Собраниын та вакытэ "Россия Федерациысь улосъёсын кун властьлэн ёзъёссылэн радлыкез сярысь" Закон быдэсме. Таин валче Пичи кенеш дэмла, сое юнматытозь, та ужпумез Кун Кенешлэн сессиезлэн повесткаысьтыз куштыны но шаерысьтымы калык сярысь сюлмаськыны кутскыны. Ми оскиськом: со юрттоз политикаын, социальной удысын, экономикаын югдурез воштыны но кризисысь огсыр потыны луонлык кылдытоз. Кортэз кышъя, юэз дурыныз омыръя Гурт хозяйствоын ужасьёслы сӥзем праздник нуналэ трос шуныт кылъёс верамын вал Каракулино районысь "Рассвет" колхозысь механизаторлы Пётр Осиповлы. Со юрттӥсеныз, 11-тӥ классын дышетскись Евгений Осиповен, районысь егит комбайнёръёслэн ӵошатсконазы вормисьёслэн радазы потӥз. Пётр Осиповлы туэ январе 31 арес тырме. Ныргындаысь шор ёзо школаез йылпумъям бераз Петр Геннадьевич Сарапулысь СПТУ-ын дышетскиз но механизатор луиз. Собере сое военкомат шофёръёсты дасян курсэ ысъяз на. Гуртаз басьтэм тодонлыкез армиын туж юрттӥз. Отын со кибашлы солдат но оскымон эш вал. Вордӥськем Быргында гуртаз бертыса, Петр Геннадьевич дас ар тракторист но шофёр луыса ужа ини. Лудысь юосты утялтыку со котькуд ар комбайн сьӧры пуксе. Машинаез Осиповлэн туж вуж, со трос пол "кышъямын" ини. Комбайнзэ "вырӟытон" понна со сэрттэ-пертче куям машинаосты, озьы ёзъёссэ рос-прос вошъям бераз "корт эшез" аран бырытозь оскымон ужа. Осипов кузпалъёс пи но ныл будэто. Людмила Михайловна куинь ар школаын ужаз берло вить арзэ колхоз фермаын кунян сюдэ. Со но картэз сямен ик ас удысаз синмаськымон тырше. Р. ТОКМУРЗИН. КОТЬКУД Ю НЯНЬЛЫ УГ МЫНЫ Нянь пыжись комбинатъёсмы Башкортостанысь, Татарстанысь, Казахстанысь но мукет интыосысь пызь басьто. Удмуртиын будэтэм чабей уг яра: клейковинаез туж ичи - 15-18 процент гинэ, луыны кулэ 30 процент. Соин ик сьӧрлось ваемез вӧзы 10 процент асьмелэсьсэ ватсало но нянь пыжо. Малы сыӵе югдур кылдэмын? Ужпум тани ма бордын вылэм. Бускель нянь будэтӥсьёс дыраз гыро, ӟеч кидыс кизё, музъемзэс кыедало, минерал сылалъёс сёто но жаг турынэн нюръясько. Соин ик соос нянь будэтон удысын азьпалан мыно. Удмуртиын музъем ужъёлсы, бускельёсын ӵошатоно ке, коньдон ичигес висъяллязы но висъяло. Соин сэрен но гуртоос шуге-леке сюремын. Озьы ке но, Каракулино, Ува, Вавож ёросъёсын 20-25 процентъем клейковинаен чабей будэто ини. Озьыен, асьмелэн но ю тысьмы кужымзэ люкалоз на. А. НИКИТИН. Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Культура удысын вормонъёс басьтэмез но уно аръёс ӵоже сюлмысь тыршемез понна "Россия Федерациысь культура удысын дано ужась" сӥлы карон ним сётоно Сидорова Анетта Петровналы - Удмурт Республикаысь Кун Кенешлэн Наукая, дышетонъя, культурая но егитъёсын ужанъя ялан ужась комиссиысьтыз референтлы. Физической культураез но спортэз азинтонын вормонъёс басьтэмез понна "Россия Федерациысь физической культура удысын дано ужась" сӥлы карон ним сётоно Кремер Гарий Ильичлы - Удмурт Республикаысь Физической культурая но спортъя кун комитетлэн киватӥсезлэн воштӥсезлы. Россия Федерацилэн Президентэз Б. Ельцин. Москва, Кремль, 1998 арын 26 январе. � 80. *** Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Сиён-юон поттон удысын вормонъёс басьтэмзы но уно аръёс ӵоже сюлмысь тыршемзы понна "Россия Федерациысь сиён-юон поттон удысын дано ужась" сӥлы карон ним сётоно Пьянкова Татьяна Петровналы - акциосын "Ижмолоко" огазеяськонысь мороженой поттонъя фабрикаен кивалтӥсьлы, Тимашев Владимир Николаевичлы - акциосын "Ижмолоко" огазеяськонысь валтӥсь инженерлы, Щемелёва Валентина Никифоровналы - акциосын "Ижмолоко" огазеяськонысь производствоен кивалтӥсьлы. Россия Федерацилэн Президентэз Б. Ельцин Москва, Кремль, 1998 арын 27 январе. � 88. *** Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Кун азьын вормонъёссы, уно аръёс ӵоже сюлмысь тыршемзы но калыкъёслэсь кусыпъёссэс, эшъяськон мылкыдзэс юнматэмзы понна пусъёно: Почёт орденэн Болотов Борис Дмитриевичез - акциосын "Ижмашстанко" огазеяськонысь слесарез, Коробейников Юрий Сергеевичез - ациосын "Ижмаш-Авто" огазеяськонысь слесарез, Санников Виктор Николаевичез - акциосын "Ижмаш" огазеяськонысь элекромонтёрез, Татаринцев Владимир Петровичез - акциосын "Ижмаш-Мото" огазеяськонысь цехен кивалтӥсез. Дружба орденэн Поскрёбышев Леонид Трофимовичез - акциосын "Ижмаш-Авто" огазеяськонысь оборудованилэсь наладчиксэз, Репин Владимир Николаевичез - акциосын "Ижмаш-Мото" огазеяськонысь токарез. "За заслуги перед Отечеством" орденлэн ИИ степенё медаленыз Астраханцев Георгий Мартеловичез - акциосын "Ижмаш" огазеяськонысь слесарез, Благоразумов Александр Евгеньевичез - акциосын "Ижмаш" огазеяськонысь бюроен кивалтӥсез, Булдакова Нина Петровнаез - акциосын "Ижмаш" огазеяськонысь отделениен кивалтӥсез, Вахрушев Николай Валерьяновичез - акциосын "Ижмаш-Авто" огазеяськонысь электрогазосварщикез, Елмашева Галина Андреевнаез - акциосын "Ижмаш" оазеяськонысь опиловщикез, Зорин Игорь Николаевичез - акциосын "Ижевский инструментальный завод" огазеяськонысь слесарез, Копылов Виктор Владимировичез - акциосын "Ижмаш" огазеяськонысь бюроен кивалтӥсез, Корепанов Вениамин Петровичез - акциосын "Ижевский инструментальный завод" огазеяськонысь фрезеровщикез, Романенко Геннадий Яковлевичез - акциосын "Ижмаш" огазеяськонысь слесарез, Стародубцев Борис Ивановичез - акциосын "Ижевский инструментальный завод" огазеяськонысь отделэн кивалтӥсез. Машина лэсьтон удысын вормонъёс басьтэмзы но уно аръёс ӵоже сюлмысь тыршемзы понна "Россия Федерациысь дано машиностроитель" сӥль карон ним сётоно Русских Василий Андреевичлы - акциосын "Ижмаш" огазеяськонысь бюроен кивалтӥсьлы, Шамшурин Юрий Афанасьевичлы - акциосын "Ижмаш" огазеяськонысь бюроен кивалтӥсьлы. Законъёсты быдэсъямез эскерон удысын вормонъёс басьтэмез но уно аръёс ӵоже сюлмысь тыршемез понна "Россия Федерациысь дано юрист" сӥлы карон ним сётоно Богомолова Любовь Михайловналы - акциосын "Ижмаш" огазеяськонысь юридической отделлэн кивалтӥсезлэн воштӥсезлы. Экономикаын но коньдон ужпумъёсъя удысын вормонъёс басьтэмез но уно аръёс ӵоже сюлмысь тыршемез понна "Россия Федерациысь дано экономист" сӥлы карон ним сётоно Баранова Людмила Ивановналы - акциосын "Ижмаш" огазеяськонысь планово- экономической отделлэн кивалтӥсезлэн воштӥсезлы. Россия Федерацилэн Президентэз Б. Ельцин. Москва, Кремль, 1998 арын 26 январе. � 82. РАКЕТАОС ИНМЕ УЗ ӜУТСКЕ НИ Кӧня ке пумо ракетаосты кулэстон ласянь СССР но США куспын огкыл (договор) кутэмын. Россия Федерацилэн Правительствоез кылем ар пумын 29 декабре 1818-р номеро распоряжение кутӥз. Соя Воткинскын чаклаське чурыт эстӥськонэн ужась ракетаосты быдтонъя установка-завод пуктыны. Нырысь малпамын вал таӵе завод пуктыны Пермьын. Но ас доразы быръёнъёсын валче солы пумит калыкез ӝутӥзы, юалляськон ортчытоно, шуизы. Табере кылзэс воштыны выро на, но, кызьы шуо, поезд кошкиз. Америка асьме пала матэктэ. Нырысь отчы ӧтизы доразы пуктэм сыӵе заводэн тодматскыны Россиысь но Удмуртиысь специалистъёсты. Делегацие пыртэмын вал Москваысь адямиос, "Воткинский завод" кун предприятиысь валтӥсь инженерлэн воштӥсез Николай Козлов но шаерысьтымы инкуазь узырлыкъёсъя но инкуазез утёнъя министрлэн нырысетӥ воштӥсез Михаил Кургузкин. Делегация рос-прос тодматскиз Калифорниысь "Чайн-Лэйк" базаен. Отын быдто- суто ракетаослэсь, снарядъёслэсь но авиабомбаослэсь эстӥськонзэс. Асьме заводмы сюбеггес луоз, чурыт эстӥськонэн ракетаосты быдтон бордын гинэ ужалоз. Алигес Воткинске ветлӥз США-ысь бадӟым делегация (дас мурт). Соос учкизы завод пуктон интыез, чаклазы луонлыкъёсмес но тодматскизы машзаводэн. Кызьы бен та уж кутскиз? Америкаын дорамы таӵе установка ӝутонъя конкурс ортчытӥзы. Вормисе потӥз "Локхид Мартин" фирма. Со США-ысь правительстволы ӵектӥз ракетаосты быдтонъя самой чылкыт но усто технология, яке инкуазез кырсьмытӥсьтэм амал. Со герӟаськемын ракетаысь гурын эстӥськонэз каллен сутонэн. Малы бен Америка юрттыны басьтӥське? Нырысь ик, сыӵе курон гожтэмын вылӥ верам огкылын. Кыкетӥез, инкуазез кырсьмытонтэм вылысь. Ракетаез быдтыны луэ, сое пуштытыса, кызьы СС-20-ез каризы. Но соку адямилы изъян ваись тузон инме ӝутске но берло кытчы ке но пуксе. Россиысь Обороная министерствоысь валтӥсь экологлэн верамезъя, Пермьын, пе, сыӵе установка ӝутысалзы ке, городын инкуазь 7 пол умойгес луысал, ватсаса 1300 ужан инты кылдысал но 2013 арозь кун заказ луысал. Табере со выже Воткинске. США-ысь правительство таӵе завод пуктыны 50-70 миллион доллар висъяны чакла, нош Россия коньдон сётоз сюресъёс, улон но ужан юртъёс но мукетсэ лэсьтыны. Со инфраструктура шуыса нимаське. Америкаын ӧвӧл асьмелэн кадь жуг-жаг куян интыоссы. Ваньзэ сое нимаз заводъёсын переработать каро но инкуазез уг кырсьмыто. Отын калыклэсь номыре уг вато, сыӵе заводъёсы экскурсиос ветло, адямиослы ваньзэ возьмато. Отын лыдъяло: калыклэсь мае ке ватӥськод ке, со адямиосты кышкатэ. Завод пуктон инты быръемын "Воткинский завод" кун предприятилэн 95 номеро цехез вӧзы. Со Америкаысь инспекторъёслы (Воткинскын улӥсьёслы) но кыдёкын ӧвӧл, городлы но матын уд шуы. Отчы кыскозы 2-3 иськем чугун сюрес. х х х США-ысь делегация кошкон азяз журналистъёсын пумиськиз. Россиысь чурыт эстӥськонэн ужась ракетаосты быдтонъя программалэн кивалтӥсез Джо Р. Биаджони шуиз: - Лос-Анджелес дорын милям сыӵе установкамы ужа ни. Тӥляд специалистъёсты сое адӟизы. Туж чылкыт завод, инкуазез уг кырсьмыты. Ваньзэ чаклало мониторъёс- компьютеръёс, нош оператор тамак кенжытэ ке, автомат ужез дугдытэ. Дорады но таӵе завод пуктом. Заводды юн кельшиз, Россиысь таӵезэ ӧм адӟе на, котыр чылкыт. - Нош ужаны ку кутскоды? - Али дасяськон уж мынэ. Июне нырысетӥ из (кирпич) поном но 18 толэзьскын вуттыны малпаськом. Со 4 ар ужалоз но отын СС-24 но СС-25 ракетаосты быдтоз. Ракеталэн корпусэз лэсьтӥськонэ мыноз: выжъёс ӝутыны но канализация гумы кыскыны. Со юн ӟеч, кемалы чидась стеклопластиклэсь лэсьтэмын. - Милям ракетаосмы тӥлядъёсызлэсь маин ке висъясько-а? - Одно ик, тӥляд пӧртэмесьгес. Соин ик ми ӵош ужалом Россиысь специалистъёсын но экологъёсын. Лыдэ басьтэмын луоз эстӥськонлэн химической составез. Огъя вераса, чурыт эстӥськонэн ракетаосты быдтон технология ӵош кылдытом, российско- американской луоз. Нош завод пуктэммы бере, ми асьмеос ваньзэ чаклалом. Омырез но инкуазез уг кырсьмыты-а шуыса. - Машзаводмы сярысь мар ватсасалды на? - Мон кӧня ке верай ни вал. Пусйысал калыклы вузъёс поттыны быгатэмдэс. Россиын военной заводъёсты выльдон (конверсия) туж каллен мынэ. Заводады производство валаса радъямын. Ми Россиын 1994 арысен ужаськом, Владивостокысен Мурманскозь вуылӥм ни, нош тужгес яраз "Воткинский завод", таӵезэ предприятиез нырысьсэ адӟим. - Таӵе завод пуктыкуды, кызьы калыкен ужады? Оло, милемлы но со пайдаё луоз? - Ми ваньзэ лэсьтӥськом, улӥсьёслэсь номыре ватытэк. Калыклы валэктӥськом, мар пуктэммес возьматӥськом. Озьы адямиос милемлы оско но уг пумитъясько. Та уже паськыт кутӥськом ивор вӧлмытӥсь органъёсты (газетъёсты, телевидениез, радиоез). х х х Пресс-конференция ортчытэм бере пумиськылӥм "Воткинский завод" предприятиысь валтӥсь инженерен Равиль Анутовен. Со умоен лыдъя заводазы таӵе установка пуктонэз. Американецъёс, пе, асьмелэсь номыр уг куро, нош асьмелы кылёзы сыномисьтэм корт, кабель, дуно металлъёс но ракеталэн стеклопластиклэсь ӟеч корпусэз, порошок выллем алюминий но сылал. Воткинскын озьы ик быдтэмын луозы Украинаысь ракетаос. Татын ватсаса 1000 ужан инты усьтӥськоз. Заводэз ӝутозы асьмелэн лэсьтӥськон организациосмы. Кинлы со оскемын луоз, конкурс возьматоз. Выль завод, валамон, машзаводлэсь экономиказэ юнматыны юрттоз. Установкалы оборудование поттозы Америкаын но, дорамы но. Г. РОМАНОВ. 23 февраль - Атыкай музъеммес утисьёслэн нуналзы. Горд Армия вордскиз странамылэн тужгес но секыт вакытаз - граждан ож мыныку. Солэн кужымез тырмиз вань интервентъёсты но тӧдьы армиез пазьгыны, 1941-1945 аръёсы ӝыны Европаез фашизмлэсь утиз. Аръёс ӝог ортчо. Озьы ке но, асьмелэн калыкмы выжыысь выжые уте но сюлмаз возе Родинамылэн шудэз понна улонзэс жалятэк ожмаськем батыръёсты. Песятайёсмылэсь ужзэс туннэ азинто соослэн пиоссы но пиоссылэн пиоссы. Россилэн ортчем сюресаз котькыӵеез вал ни, огзэ пусъём: солэн басьтэм вормонъёсаз - армилэн воштонтэм интыез. Озьы мед луоз азьланяз но. УДМУРТИЫСЬ ДЕПУТАТЪЁС ВАЛЧЕ УЖАЛО Вожъяськыса учкисько Удмуртиысь депутатъёслэн А. Солуяновлэн, М. Кошкинлэн но Н. Сапожниковлэн Кун Думаын быгатыса но валче ужамзы шоры. Тазьы шуиз журналистъёслы Валентин Цой, Кун Думаысь Иворъёсты вӧлмытон политикая но связья комитетлэн кивалтӥсез алигес Андрей Солуяновен ӵош Ижевске вуылэмез бере. Тани али но, бюджетэз дасян вакытэ, соос тыршо отчы сыӵе ватсанъёс пыртыны, кудъёсыз республикамы понна но пайда вайыны кулэ. Озьы кӧня ке поллы будэтэмын луоз республикамылы чаклам трансфертъёслэн быдӟалазы, тросгес коньдон висъяськоз сюресъёс лэсьтон удыслы, нимысьтыз - гуртъёсын сюресъёслы. Депутат А. Солуянов сюлмаськемзэ вераз "Ветеранъёс сярысь" Законлэн быдэсъяськымтэез пумысен. 1997 ар ӵоже Сбербанк одӥг льготной кредит но ветеранъёслы корка пуктон понна ӧз сёты, кызьы учкемын вал законын. Озьы ик лэсьтӥськонлы дунтэк уг висъяськы музъем. Ижевскысь ветеранъёслы кылем арын санаторийёсын эмъяськон понна 337 путёвка гинэ сётэмын. "Ветеранъёс сярысь" Законэз улонэ пыӵатон понна, вань бюджетъёсын солы нимысьтыз коньдон висъяны чаклано. Матысь дыре депутат А. Солуянов та ужпум бордын ужаны малпа. Т. МИРОНОВА. Пайдаё пумиськонъёс Ивортылӥм вал ини, Кун Кенешлэн Тӧроез Александр Волков Федеральной Собранилэн кенешаз пыриськиз шуыса. Со сяна, Александр Волков кӧня ке пумиськонъёс ортчытӥз. Кылсярысь, Президентлэн администрациеныз кивалтӥсен Виктория Митинаен сэрттӥз-пертчиз Президентлэсь "Удмурт Республикаын кун властьлэсь ёзъёсызлэсь но интыысь аскивалтонлэн ёзъёсызлэсь кусыпъёссэс радъян сярысь" Указзэ быдэсъянэн но Удмуртилэн Конституцияз воштонъёс но ватсанъёс пыртонэн герӟаськем ужпумъёсты. Кун Кенешлэсь тазьы ужамзэ Президентлэн администрацияез умоен лыдъяло. Виктория Митина мартэ Ижевске лыктыны малпа. Пайдаё ортчиз Росвооружениен кивалтӥсьлэн воштӥсеныз пумиськон. Али дуннеысь экономикалэн ож тӥрлык поттон удысаз Россилэн кужымез юнма, нош Удмуртиысь обороная комплекслэн продукциез солы юрттысал, - пусъе Александр Волков. Пумиськонын чакламын, кыӵе продукция кунгож сьӧры мыноз но кыӵе заводъёс сое поттозы. Со сяна, Росвооружение Ижевскын пыӵал тӥрлыклы сӥзем музеез пуктонлы уксё висъяны чакла. Республикаямы Ож тӥрлык поттонын кусып возёнъя координационной кенеш кылдытэмын луоз. Та структура огазеялоз Удмуртиысь обороналы ужась предприятиосты, Кышкытлыклэсь утиськонъя но Югдурез утёнъя министерствоосты. Пумиськонъёс ортчытэм сяна, Александр Волков "Эхо Москвы" радиолэн меӵак эфираз пӧртэм юанъёслы валэктонъёс сётӥз. Соос герӟаськемын вал Россиысь Президентлэн Федеральной Собрание азьын вераськеменыз, химической ож тӥрлыкез быдтон сярысь Россия но Италия куспын огкылэз дасянэн. Кун Кенешлэн пресс-службаез. ПРАВИТЕЛЬСТВОЫСЬ ИВОРЪЁС Правительстволэн Тӧроез Павел Вершинин косӥз Россиысь Правительствоен кутоно огкыллэсь инъетсэ дасяны. Со жилищно-коммунальной реформаез ортчытонлы, взаимозачётъёсты быдтонлы, бюджетъёс азьын пунэмъёсты берыктонлы сӥземын луоз. Огкыллэсь инъетсэ дасялозы Удмурт Республикаысь Коньдон ужпумъёсъя но Экономикая министерствоос. Та выллем огкылъёс интыысь аскивалтонлэн ёзъёсыныз но кутэмын луозы. х х х Ваньбур поттон удысын ужасьёслы уждун тыронъя пунэм берло кык толэзь куспын ӧз йылы. Правительствоысь Ужъя комитетлэн тӧроез Сергей Фефилов ивортэмъя, уждун тыронъя пунэм 652 миллион манет люкаськиз ини. Нимаз предприятиосын уждун тыронъя ужпумез Ужъя комитет арнялы быдэ эскере. х х х 19 мае Павел Вершинин Москвае кошкиз, Федерацилэн Кенешезлэн ужаз пыриськон понна. Удмуртиысь Правительстволэн Тӧроез Наукая, культурая, дышетонъя, тазалыкез утёнъя но инкуазез утёнъя комитетын ужа. Со сяна, Павел Вершинин Россиысь Правительствоын пумиськонъёс ортчытоз. х х х Правительстволэн Президиумез эскериз жилищно-коммунальной хозяйствоез выльдонлы сӥзем ужпумъёсты. 1998-99 аръёсы ЖКХ-лэн объектъёсызлэсь ужзэс ӟечомытонъя ужрадъёс чакламын. Президиум юнматӥз Нюлэс кутонэз эскеронъя межведомственной комиссия сярысь положениез. Комиссия чаклалоз, нюлэсъёсты кытысь но кӧня корано, кӧнязэ арендае сётоно, со понна кӧня коньдон куроно, мукет ужпумъёсын выроз. Комиссилы тӧрое юнматэмын Правительстволэн Тӧроезлэн воштӥсез Владимир Зенин. Гурт хозяйствоя но сиён-юонъя министерствоез косэмын "Удмуртское" но "Можгинское" кун предприятиослы, Завьял ёросысь "Восточный" совхозлы но Можга ёросысь "Верхнеюринское" АО-лы ӟеч выжыысь пудо басьтыны юрттыны. Сюмси ёросысь "Выль улон" колхозлы пилорамазэс выльдыны но Якшур-Бодья ёросысь Киров нимо эштослы фермазэс тупатъяны коньдон висъямын. Удмурт Республикаысь Правительстволэн Тӧроезлэн секретариатысьтыз пресс-центр. Шӧкыч Эх, шу! Жингыр, шу! Машинатэк кыли эн шу! Машина кильтыръяськон, чеберъяськон арбери ке но ӧвӧл, дуно маке. Соин но солэн кузёез сак улыны кулэ. Угось ӵемысь моторо уроболэн паллянэ кожон сямыз кылдэ. Шонергес вераса, лушкаськисьёс дуно ньыль питрано макеез синйылто но кузёез адӟымтэ дыръя шыпытак отчы пуксьыса тӧлӟо. Нош собере сизьым пуныен но утчаса уд шедьты ни. Милиция но ӵемысь номырин но юрттыны уг быгаты. Лушкам машинаос чиптэм-чаптэм ышо. Бен, тӥ эн малпалэ со котьку ик озьы луэ шуыса. Асьмелэн милицимы асьмемыз утьыны тырше ик на. Ӵемысь дасез вылын улыны дышемъёсты лушкаськон бервылтӥзы ик капырто. Озьы кутэмын вал 11-тӥ январе Михаил В. Ижевскысь Бакинская ульчаын сылӥсь "Нива" вӧзтӥ ортчыкуз, солэн киыз лыдыны кутскиз, шӧдске. Машинаысь дуно арбериосты басьтӥз но, пегиз. Шонергес вераса, пегӟыны выриз. Угось кыдёке кошкыны солы ӧз кылды. Милициын ужасьёс кырмизы. Та нуналэ ик кутэмын вал эшшо куинь лушкаськисьёс - машинаосты качасьёс. Соин ик, чаклаське эшъёс. Машина - со шудон арбери ӧвӧл. Ачиз ветлӥсь уробоед вань бере, олокыӵе но шуг-секытъёс кылдо вылэм. Яке куддыр ачид но кылдытъяськод. Ӵапак озьы малпа Олег М. 13-тӥ январе со сюрес вылын кынмыса сылӥсь воргоронъёсты жаляса пуктоно кариськиз. Нош соосыз тау карем интые, пистолетлы укшась арбери возьматӥзы но кузёез машинаысь потыны "куризы". Нош собере чиптэм-чаптэм ышизы. Олеглэн шудэз вань ик вылэм ай. Солэн "корт валэз" Ижысь Ленин ёросысь Степная ульчаысь шедьтэмын вал. Нош 56 аресъем Владимир Г.-лы туж ик ӧз удалты. Ижевск-Воткинск трактлэн 30-тӥ иськемаз сюресчиос сое туж зол жугизы но пуртэн бышказы. Кӧня ке час ортчыса, та йыружез лэсьтэмзы понна ӝегатэмын вал 27 аресъем Руслан но 26 аресъем Игорь. Кыдёке пегӟыны ӧз вутске мукет кык егит пиос но: 19 аресъем Александр Л. но 17 аресъем Андрей З. Таосыз пуртэн кышкатыса "жигули" машиналэн водителезлэсь автомагнитолазэ талаллям. Табере соос пытсэтын шутэтсконо луозы. Нош отын воргоронъёс та йыружзы понна, уголовной кодекслы осконо ке, куиньысен тямыс аресозь пуконо луозы. Бератаз верам потэ на, ачиз ветлӥсь ньыль питрано (яке ӧжытгес-а) урободы вань ке, пельёстэс сак возе. Угось машинатэк кыльыны но кема ӧвӧл. М. Дуванов. Гажано редакция, - гожтэ Можга ёросысь Кватчи гуртысь Валера Шикунов. - Тӥледлы мон вазиськисько нырысьсэ. Мыным туж кельше газетысьтыды "Шӧкыч" люкетэз. Отын вань трос кулэез но маскараез, соин ик малпай тӥледлы гожтыны аслэсьтым юморескаме. Мон туж шумпотысал, тӥ сое газетады поттысалды ке. Солэн нимыз "ОЗВЕРИН" Кыед Иван гуртын воргоронъёс пӧлысь ошлэн кадь зол кужыменыз висъяськиз. Солэсь гуртоос али ке но кышкало. Нош кышноез, Марпа, со шоры трос уг учкы, пельдораз табаен васькытъя, тыбыр кузяз гур суранэн сётъя, йыраз ухватэн тышка... Одӥг чебер нуналэ таӵе улонлы солэн чиданэз быриз. Ӵапак кылӥз "Озверин" эмъюм лэсьтӥллям шуыса, кудӥз, пе, адямилэсь вожзэ поттэ. Иван городэ мыноно кариськиз та эмъюмез утчаны. Базарез но ортчиз, дасо мында лавкаосты "бугыртӥз", олокӧня аптекае пыраз - нокытын но ӧвӧл. Иван йырзэ ик ыштӥз вал ини, мар карыны паймыса шӧдтэк шорысь урамысен тодмотэм муртэ пумитаз. Соиз юаз: - Вить минутскын сю доллар басьтэмед потэ-а? Кыед Иван шумпотэменыз интыяз ик пограське вал, моганы ик ӧдъяз. Ӵапак тупаны кулэ ук озьы, тодмотэм мурт телевидениысь вылэм, "Озверин" эмъюмлы реклама лэсьтыны таза воргоронэз утча. Со Иванэз нуиз студие но ваньзэ рос-прос валэктӥз. Передача, пе, меӵак эфирын луоз. Вуиз эфире потон дыр но. - Ваелэ вераськом "Озверин" эмъюм сярысь, - шуэ передачаез нуись. - Вераськом, - вазе Иван. - Валэктэ вал мыным, Иван Абдулович, мае тӥ шӧдӥды та эмъюмез юэмды бере? - "Озверинэз" юэме бере, мон нырысь ик шӧдӥ, лусьтро быжы потӥз шуыса, собере така сюръёс будӥзы, вылтыр гонэн шобырскиз, куарае муры скалэз утчась ошлэн бурсэмезлы кельшись луиз, синъёс вирен тырмизы, собере номырзэ но уг тодӥськы ни. - Таиз валамон, нош тӥ сое кӧня юиськоды? Татын Иван тыпак дугдӥз, угось, кӧня юыны солы ӧз валэктэ. Воргорон солэсь могӟемзэ валаз но чиньыеныз валэктыны кутскиз, "кык" шуыса. - Одӥг кобы, - шуэ Иван, нош ачиз ялан возьматӥсез шоры учке. Соиз шаплыгес вырыны кутскиз. Омырын "П" буква гожтэ, нуны веттам каре. Со озьы кык пилюля юоно шуыса возьматыны выре вылэм. - Кык кобы! - вазиз Иван. Возьматӥсез со вие пукон вылысь усиз, улмо кадь гордэктӥз. Нош передача нуись ялан юа но юа. Кыед Иван мар вераны паймиз ини. Воргорон выж вылын ньыль пыдъяськыса ветлэ но ялан азьвыл кадь возьматъя. - Кык ӟенелик! - кеськиз Иван. Учке но, воргорон выж вылын ӝуштыса кылле ини. Врачлэн тӧдьы дӥсезлэсь но бездыт луэм. Соку сое больницае нуизы. Иван сьӧраз мынӥз, передачалэсь йылпумъяськемзэ но ӧз возьма ни. Ог дасо минут улыса, воргорон улӟиз но, сю долларзэ сётӥз. - Мон тӥледыз эшшо огпол адӟи на ке!.. - вазиз но могӟиз со. - Мар луоз, огпол адӟиды на ке, кык сю доллар сётоды на-а? - серектӥз Кыед Иван. Воргорон миндэр вылэ усиз. Кыед Иван соку эмъюмтэк ик бертоно луиз. Коньдонзэ кышноезлы сётэм бере, соиз туж шумпотӥз. Гур суран борды но табере шер йӧтскылэ ни. Сӥземын милицилы Национальной музейын усьтӥськиз милицилэн историезлы сӥзем адӟытон. Трос тунсыко материалъёс люкамын татчы, калыкез кышкытлыклэсь утёнъя органъёслэн соку гинэ кылдыны ӧдъям вакытысенызы кутскыса. Милицилэн нырысетӥ радъёсыз кылдытэмын вал Октябрь революция бере ик, 1917 арын. Соку йыртэмасьёсын нюръяськыны мылкыд кариз Иж заводысь 98 ужась. Бӧрысь соослэн лыдзы шӧдскымон йылӥз. Туннэ МВД-лэн пӧртэм ёзъёсыз ужало. Йыртэман учыръёс азьло но ӧжыт ӧй вал: лушкаськонъёс, жугиськонъёс. Война аръёсы будӥз дизертиръёслэн лыдзы, трос сюлмаськонъёс ваизы амнистия улэ шедемъёс. Ог вакытэ шараямын вал пӧяса коньдон лэсьтӥсьёслэн нимъёссы. Туннэ йыружъёс пӧлысь котькинэ кышкатӥзы "сантехниклэн" ужъёсыз. Ваньмыз со йыртэмасьёс шараясько МВД- лэн органъёсаз улонзэс жалятэк ужась пиосын. Соослэсь нимтулъёссэс адӟыны луэ музейысь экспонатъёсын артэ: П. А. Кукушкин, В. П. Кузнецов, М. С. Нургалеев но мукетъёсыз. Тужгес кышкыт преступникъёсты ӝегатон дыръя милициысь 28 ужась бырыны шедиз. Соослэн нимъёссы вунэтэмын ӧвӧл. Н. ЛИПИНА АТЫКАЙ МУЗЪЕММЕС УТИСЬЁСЛЫ Вань сюлмысьтымы ӟечкыласьком тӥледыз Атыкай музъеммес утисьлэн нуналэныз. Туэ та праздник тужгес но пусйымон, шумпотымон, угось Рабоче-крестьянской Горд Армия кылдэм дырысен 80 ар тырме. Со Родинамес секыт вакытъёсы тушмонъёслэсь утиз. Рабоче-крестьянской Горд Армилэсь, СССР-ысь Советской Армилэсь но Военно-Морской флотлэсь йылолъёссэ утьыса но узырмытыса, Россия Федерацилэн туала Вооружённой Кужымъёсыз кунлыкмес, странамес кышкытлыклэсь азьло сямен ик возьмало. Армиын но флотын туала егитъёс, нокыӵе шуг-секытъёс шоры учкытэк, вордскем шаерзэс дунъяны, утьыны, кышкасьтэм, юн сюлэмо луыны дышетско. Гажано воргоронъёс, егит пиос, вань сюлмысьтымы сӥзиськом тӥлед, ӵыжы-выжыостылы но тодмоостылы юн тазалык, ог-огеныды тупан, службады огсыр мед ортчоз - Россилэн но солэсь люконтэм Удмурт Республикалэн дэлетсы, шудбурзы понна. Праздникен! Удмурт Республикаысь Кун Кенеш Удмурт Республикаысь Правительство Правительствоын Кин сузя лымыез? Кылем вторнике журналистъёсын пумиськиз элькунысьтымы жилищно-коммунальной хозяйствоя огазеяськонлэн кивалтӥсез Валерий Загайнов. Люкаськемъёслы со мадиз удысын туннэ ужъёссы, реформа ортчытон но куд-ог мукет ужпумъёс сярысь. Та удыс, зэмзэ но, туж кулэ. Сотэк одӥг адями но улыны уг быгаты. Али солэн 115 предприятиосаз 20 сюрс мурт ужа. Ву, шуныт сётон гумыосыз сюрс километрлэсь уно ни. Коммунальникъёс утялто-чылкытато ульчаосты, возё гостиницаос, мунчоос, мисьтаськон интыос, утё улон коркаосты но мукетсэ. Но берло дыре удыслэн услугаосыз пумен дунояло. Тани 1992 арозь адями 1 квадратной метр улон инты понна 16,5 копейка тыре вал, табере со инмозь ӝутэмын но туэ квартира возись вань расходъёс пӧлысь 30 процентсэ тыроз. Мар понна бен жилищно-коммунальной хозяйствоын реформа ортчытӥське? Нырысь ик, удысэз выльдон, услугаослэсь ӟечлыксэс ӝутон, эстӥськонэз, вуэз, газэз, шунытэз шыръяса кутон вылысь. Кыкетӥез, та удысэз рынок амалэн ужанэ выжтон понна. Тӥни соин ик али предприятиос, организациос, улон юртъёсты чаклась ёзъёс (ЖЭУ-ос) эскерись приборъёс но счётчикъёс пуктыло. Куд-ог интыосын квартира понна ӝыны дунзэ басьто ни. Асьмеос та ласянь бере кылиськом. Валамон со. Республикамы ваньмызлэсь висъяське, конверсия гуньдэмын, калык йӧскадь уг ужа. Кытысь со коньдон шедьтоз квартираезлы дун тырыны. Озьы миым удыслы 7 миллиард (вуж коньдонэн) юрттэт сётэмын, нош туэ, пе, 100 миллиард кулэ луоз. Соин валче Валерий Федорович шуиз, мон, пе, Россиысь Президентлы но Правительстволы вазиськон гожтӥ но сое Кун Кенешлэн сессияз лыдӟо. *** Бен, туннэ меӵак пусйыны кулэ: удысэз выльдон, реформа туж каллен мынэ. Шаерамы кылдытӥське Кун жилищной инспекция. Со чакланы кулэ услугаослэсь ӟечлыксэс. Таин ӵош ик али удысэз эскеро аудиторъёс. Но йылпумъянъёсыз ӧвӧл на. Пресс-конференциын вераськон потӥз кин урамъёсты, тротуаръёсты лымылэсь сузяны- утялтыны кулэ. Валерий Загайнов та ужез Ижысь администрация вылэ погыльтӥз, городлэн Уставысьтыз одӥг ёзэтсэ лыдӟиз. Но соку амалтэк юан кылдэ: "Малы жилищно- коммунальной хозяйствоя огазеяськон кулэ? Шат ӧвӧл солэн нимаз техникаез, лымы сузян-утялтон машинаосыз но мукетыз?" Ваньмыз вань. Но азьвыл дышем сямъя со ог- огед вылэ куштон амал луэ. Тӥни соин ик, вылды, Валерий Фёдорович валэктыны ӧз быгаты адямиослы кин счётчикъёс пуктылыны кулэ. Нош выль юрт пуктыны яке коркаез ӟеч-ӟеч тупатъяку, отчы ваньзэ лэсьтӥськисьёс пуктозы. Соиз валамон. Мукетыз ужпум герӟаськемын удыслы коньдон висъянэн. Коммунальникъёс шорлыдын толэзяз 800 манет уждун басьто ке но, миым соослы 20 миллиард уксё висъямтэ, нош туэлы бюджетын 14 процентлы кулэстэмын. Веранэз ӧвӧл, со ватсаса шуг-секытъёс кылдытэ. Но али вераськон мынэ ваньбурлы (имуществолы) налогез 0,1 процентысен 1 процентозь будэтон сярысь, яке 10 поллы. Со котькуд адямилы, семьялы шӧдскымон шуккет луоз. Г. Романов. "ЯРАОС УГ БУРМО" Туэ 15 феврале асьме офицеръёсты но солдатъёсты Афганистанысь поттэм дырысен 9 ар тырмиз. Дыр ортче, но отысь бертэмъёс али но уйвӧтъёсазы Афганистанэз адӟо, ожмасько, эшъёссэс ыштыло... Нокинэн ялымтэ ож лудэ 14 сюрс егит пияш кылиз, соос пӧлысь 147-ез - Удмуртиысь. 20 сюрс адями ӧлексы кылиз, 83-ез - асьме шаерысь. Уноез солдатъёс пленэ шедьыса, али ке но вордскем шаеразы бертыны уг быгато. Сыӵеос, доразы бертон вылысь, Афганистанысь пегӟыса, Пакистан, Турция но мукет кунъёсы "пачкамын". Куд-огъёсыз соос, семья кылдытыса, Афганистанэ пыраклы улыны кылизы. Но янгышмес ӧм валалэ на, шӧдске. Собере Чечняе Удмуртиысь 51 адями быриз, 10-эз пыраклы ӧлексы луыса бертӥзы. Оло, лыдпусъёс ичигес но луысалзы, отчы юри медъяськем но ожмаськыны дышетэм адямиосты келясалзы ке. Эшшо но вӧсь луоно на пиосмы шоры учкыса, куке таӵе керӟег вакытэ соос ужаны интыяськыны уг быгато, эмъюм басьтыны коньдонзы ӧвӧл. Ож тылысь вуэмъёс пӧлын визьзы сураськемъёс, "ож висёнэн" черламъёс но вань. Сыӵеос улонлэн ӧраз выльысь пырыны быгатозы на меда? Вераны шуг. Бен, сэрттоно-пертчоно ужпумъёс трос. Данакез соос алигес эскеремын вал Афган ожгарчиослэн Удмурт Кивалтэтын ортчем пумиськонзы дыръя. "Афганецъёслэн" радъёсазы ик султо "чеченецъёс". Ижысь Индустриальной ёросын кылдытэмын Чечняын ожмаськемъёслэн кенешсы. Туспуктэмъёс вылын: * Афган ожгарчиослэн Удмурт Кивалтэтын ортчем пумиськонзы дыръя. А. НИКИТИН. В. БЕЛОМОРСКИХ (фото). Кун Кенешлэн сессиез НОМЫР ӦЗ КУТЭ Валлян, 19 феврале, кызьы ивортӥм ни вал, люкаськылӥз Кун Кенешлэн дас куатетӥ сессиез. Парламент нош ик быдэс нунал одӥг ужпум бордын бергаз. Вераськон мынэ Удмурт Республикалэн Конституцияз воштонъёс но ватсанъёс пыртон сярысь. Тая депутатъёслэн малпанъёссы пӧртэмесь: одӥгъёсыз Конституциез выльдон понна, нош мукетъёсыз солы пумит луо. Тӥни соин ик депутатъёс-коммунистъёс та ужпумъя постановленилы кыкетӥ (альтернативной) инъет дасяллям. Но сессия нокыӵе решение ӧз куты. Бер ӝытазе сессия эскериз "Ижладабанкын" кылдэм югдурез. Соя ивортон лэсьтӥз элькунысьтымы Национальной банклэн тӧроез Равиль Каримов. Депутатъёс ивортонэз умоен лыдъязы, нош жилищно-коммунальной хозяйствоын реформа ортчытон пумысен Б. Ельцинлы но В. Черномырдинлы вазиськон ыстонлы пумит луизы. Кун Кенешлэн сессиез сярысь отчётэз вуоно номерын печатлалом. Сессия ужзэ азинтэ 24 феврале. Г. ВАСИЛЬЕВ. ХВИИИ Тол Олимпийской шудонъёс Хоккей Хоккеистъёсмы данзэс утё. Нырысетӥ матчын ик Федоров-Яшин, Коваленко 5 гол пыртӥзы! Нош кин шуоды Россилэн сборноез понна тужгес но зол вмсе? Хоккеистъёслэн чебер, егит кышнооссы. Соослэн интыоссы - прессаен артэ. Кин кинлэн кузпалэз - тодмалод вылазы дӥсям свитеръя: гожтэмын картсылэн шудон номерез но нимтулыз. Нош Валерий Бурелэн кышноез, Голливудысь актриса Кэндис Кэмерон, бамъёсаз Россилэсь флагзэ суредаз на. Хоккее ветлэм сяна, кызьы шутэтско нылкышноос. Ветло магазинъёсы, буддистъёслэн храмазы, огъя вераса, тодматско Япониен. Сергей Немчиновлэн кузпалыз, Елена, шумпотонзэ ватытэк шуиз: - Асьмелэн командамы туж тупаса, огкылысь улэ. Хоккеистъёслэн мылкыдзы бурдъяськемын. Ми но, нылкышноос, соослэсь адӟем кариськом, ваньмон дырмес ӵош ортчытӥськом. Олимпиада дорозь мон тодмо вал Катя Мироноваен гинэ, Дмитрий Мироновлэн кышноеныз, нош Стелла Зелепукинаен ӵош улӥськом Нью-Йоркын. Наганоын табере ваньмы эшъяським. *** Россилэн сборноез йӧ вылэ нырысетӥ потэмаз ик 9:2 счётэн "пазьгиз" Казахстанлэсь командазэ. Озьы ке но, Казахстанлэн спортъя министрез Акопаев вань хоккеистъёссэс пусйиз правительственной наградаосын, словакъёсты вормемзы бере. Казахстанысь спортсменъёс понна со зэмос подвиг вал! Кин оскысал, та страналэн хоккеистъёсыз Наганоын "куасалтозы" быдэс дуннелы тодмо чехъёсты шуыса? Вормон сярысь иворез кылыса, Казахстанлэн президентэз Назарбаев правительстволэн кенешаз ӧжытаклы вис ялӥз. Залын пукисьёс геройёссылы султыса кизэс чабизы. Пусъём на: быдэс командазы - Усть-Каменогорскысь, Гловацкиез но Антипинэз вератэк (таосыз вордскемын Темиртау городын). Хоккейлэн историяз ХХ даурын таӵеез нырысьсэ пумиське. Дуннеысь кужмоосыз радэ шедён, турнирлэн финалаз потон - Казахстан понна со туж бадӟым вормон. *** Йӧ вылын эктон Фигуристъёс пӧлын Наганоын зарни "потто" Санкт-Петербургысь тренерлэн Тамара Тарасовалэн дышетскисьёсыз. Олимпийской шудонъёсты лыдэ басьтыса, вань тренеръёс пӧлын солэн дасям параосыз куинь пол чемпион луизы ни. Олимп гурезь йылэ тубыны быгатӥзы Россиысь сизьым тренеръёслэн дышетэм нылъёссы но пиоссы. Станислав Жук: Роднина-Уланов (1972 ар) Роднина - Зайцев (1976) Гордеева - Гриньков (1988) Татьяна Тарасова: Роднина - Зайцев (1980) Бестемьянова - Букин (1988) Климова - Пономаренко (1992) Тамара Москвина: Валова - Васильев (1984) Мишкутёнок - Дмитриев (1992) Казакова - Дмитриев (1998) Елена Чайковская: Пахомова - Горшков (1976) Линичук - Карпоносов (1980) Марина Зуева: Гордеева - Гриньков (1994) Наталья Линичук: Грищук - Платов (1994) Алексей Мишин: Урманов (1994) Людмила Белоусова но Олег Протопопов тренировкаосты ас кожазы ортчытъязы. *** Олимпийской чемпионка Оксана Грищук уг ваты: йӧ вылын эктонъя Наганоысь со бертыны малпа кык полэс Олимпийской чемпионка луыса. Та муген ик алӥськиз Голливудысь киносъёмкаослэсь. Оксанаез кинорежиссёръёс син шоразы возё. Олимпиада бере ӧтё ни Коста-Рикае. Оксаналы дэмлало манекенщицаослы сӥзем фильмын валтӥсь ролез шудыны. Съёмкаос мынозы вить толэзь ӵоже. Фигуристкалы таӵе ӵектон сюлэмызъя ӧвӧл ке но, шуиз: "Монэным ӵош луиз ке Женя (Евгений Платов - Грищуклэн партнёрез), соку - соглаш!", гожтэ "Спорт-экспресс" газет. Куӟебай Гердлэн вордӥськемез дырысен - 100 ар Дунне адями Улосамы но сьӧрлон азьланьтӥсько Куӟебай Гердлэн вордӥськемез дырысен сю ар тырмонлы сӥзем ужрадъёс. Таӵе сӥё-дано пумиськонъёс алигес радъяз Марий Эл. Мари-Турек ёросысь Бадӟым Карлыган гуртысь удмуртъёс доры вуылӥзы Удмурт Элькунысь писательёс, журналистъёс, артистъёс, Удмурт шаеръюртын (Национальной музейын), Культурая министерствоын, Удмурт егитъёслэн "Шунды" дэменлыказы ужасьёс, Пичи Пургалась "Зарни шеп" ансамбль. Кыдёкысь лыктэмъёсты дышем сямъя пумитазы сылалэн-нянен. Таӵе сӥё-дано ужез ас вылаз быдэсак басьтэм гуртысь "Ӟардон" ансамбль. Устоесь ик татысь егитъёс: та шуытозь кырӟалозы-вералозы, куноослы но мӧзмыны уз сётэ. Дышем сямъя ик сюдӥзы-вордӥзы. Утыр тодматӥзы вуоно ужрадъёсын. Нырысетӥяз ӝытэ трос калык люкаськиз ӟуч Хлебниково гуртэ. Тани сцена вылын, солэн шор вадесаз - Куӟебай Герд. Ӝытэз усьтыса, Драмая удмурт кун театрысь актёр Сизьньӧр пи Леонид Доманов лыдӟе Кузьма Павлович Чайниковлэсь кылбуръёссэ. Сюлэмыз дыректытэк уг вера соосты. Синпумъёсаз но утыр лыкто кадь ӧтьымтэ синвуосыз. Тани актёр каллен матэктэ Куӟебай Гердлэн тусбуез вадьсы. Солэсь дано нимзэ весь буре ваён вылысь, кылбурчилэн йыразяз льӧль сяська понэ. Вань люкаськем калыклы нош шуэ кадь: эн вунэтэ та нимез! Асьмелэн со одӥг! Сцена вылэ потэ мукетыз куно-кылбурчи, тодосчи, кылтодон наукаосъя кандидат Анатолий Уваров. Люкаськем калыклы одӥг но дыртытэк маде та быдӟым визьлюклэн (удмуртлэн) улэм-вылэмез, ноку вунонтэм ужъёсыз сярысь. Таӵе учыръёсы гурт калык пӧлын одно ик луо шӧмаськемъёс. Та ӝытэ но одӥгез лӧпшаны кутскиз. Аляк адями музонъёссэ алыса выллем вазиз: - Малы гинэ лыктӥды меда? Уг яра ке, кошкелэ татысь! Кылзыны люкетӥськоды ук! Анатолий Николаевич соку ӧз чида, вазиз: - Зэм но, эшъёс, кылзэмды уг поты ке, ӧс пытсамын ӧвӧл! Люкаськем калык чалак луиз. Сцена вылэ со куспын вамыштӥз Пичи Пургалась "Зарни шеп" ансамбль. Кырӟало-верало усточиос, нош асьсэос чылкак бубылиос кадь. Мусояса верано ке, Куӟебай Гердлэн вордэм нылпиосыз. Ӝытазе ваньмы вамыштӥмы Бадӟым Карлыган гуртысь культура юртэ. Таӵе пумиськонлы азьвыл ик дасяськиллям ӟаны починкаос (Ӟаны починка - гуртлэн музон нимыз). Люкаськемъёсты Куӟебай Гердлэн улэм-вылэменыз ӟечгес тодматыны малпаллям. Со понна дасяллям нимысьтыз возьматон но. Ваньмыз сярысь сюлмаськем Удмурт культурая центрлэн тӧроез Мария Главатских. Ӵуказеяз, нуназе вадес, куноос вамыштӥзы школае. Удмурт кыллы но литературалы дышетӥсьсылэн Елена Львовна Кондаковалэн сюлмаськемез улсын татысь нылпиос но дасяллям нимысьтыз ужрад. Чебер дӥсяськем нылъёс но пиос сцена вылэ пото но сюлмысь лыдӟо Кузьма Павлович Чайниковлэсь тылтэк ӝуась чуръёссэ. Татысь пиналъёс мылысь-кыдысь кырӟало но, экто но. Соосты огазея "Вуюись" ансамбль. Та нуналэ со но шудӥз-эктӥз. Люкаськемъёслы тужгес яразы Карлыган удмуртъёслэн кырӟан-веранъёссы. Малмыж уездысь калыкез дышетонъя ёзлэн удмурт люкетэныз кивалтыкуз, ӵапак соосты ик ӧз бичалля шат Куӟебай Герд? Берло ини огазеяз но поттӥз "Малмыж удмуртъёслэн кырӟанъёссы" нимо книгаен. Пичи Пургалась "Зарни шеп" нош ик паймытӥз устолыкеныз. Концертъёсты нуись, со ик кырӟась Василий Громов учкисьёсын огкыл паймоно кадь ӝог шедьтэ. Солэн верамъёсысьтыз соку ик тодӥськод та ансамбльлэсь вань лёгам сюресъёссэ. Драмая удмурт кун театрысь актёр Леонид Романов, кылбурчиос Анатолий Уваров, Галина Романова лыдӟизы серемес чуръёс, ас кылбуръёссэс. Со вакытэ ик сюлэмшугъяськыса вераськизы ас кылзэс вунэтыны ӧдъясь удмурт пиналъёс, Куӟебай Герд, солэн кайгуо вакытэз но секыт шугадӟонъёсыз сярысь. Ӝытазе нош ик уно калыкен тырмиз Бадӟым Карлыган гуртысь культура юрт. Таяз учыре пумиськонэз усьтӥз та палъёсысь тужгес тодмо "Ӟардон" ансамбль. Ӝытэз нуисьёс таяз радэ но лулысь-сюлмысь мадизы удмурт калыклэн быдӟым визьлюкез сярысь. Нош чузъяськись кырӟан-веранъёс ӵапак ӧвӧл шат Кузьма Павлович Чайниковлэн удмуртъёс сярысь сюлмаськемезлэн емышез? Удмурт кырӟанэз котькуд удмурт гуртэ, котькуд удмурт пӧлы вӧлмытон сярысь малпаськылӥз ук со. Сое эшшо огпол возьматӥз "Ӟарни шеп", Карлыган удмуртъёсты удмурт шаерысь тужгес чебер удмурт гуръёсын тодматыса. Таяз пумиськонын котькудӥз аслэсьтыз веранзэ герӟаны турттӥз Куӟебай Гердлэн ноку вунонтэм ужъёсызлы, оглом - быдэс бездӥсьтэм нимыныз. Сыӵе мылкыдзэс возьматӥзы Марий Эл-ысь культурая но нациослэн ужъёссыя министрлэн воштӥсез Василий Яналов, Мари-Турек ёрослэн йырыз Юрий Горячкин, Пор радиоысь редактор тодмо кылбурчи Геннадий Сабанцев, Бадӟым Карлыганысь гурт кенешлэн тӧроез Юрий Осинов, Удмурт кивалтэтысь Нациосын ужанъя комитетысь валтӥсь удысчи Лариса Буранова, "Зарни шеп" ансамбльлэн кивалтӥсез Федосья Тубылова. Пумиськонъёс дыръя кык ӝыт ӵоже ужаз Куӟебай Гердлэн улэм-вылэмезлы, солэн ноку вакытэзлы сӥзем возьматон. Удмурт шаеръюртын (Национальной музейын) ужась Серафима Лебедева мылысь-кыдысь тодматӥз тунсыкъяськисьёсты та быдӟым адямилэн нимыныз герӟаськем вань иворъёсын. *** Мари-Турек ёросысь Бадӟым Карлыган гурт тодмо соин но: кылем даурлэн кутсконаз татын усьтӥськиз Центральной удмурт школа. Уно удмурт нылъёсты но пиосты визё-буро кариз со. Центральной удмурт школаын дышетскизы но бератаз тужгес тодмо адямиос луизы нырысетӥ нылкышно кылбурчи эмъясь Ашальчи Оки (Лина Григорьевна Векшина), солэн агаез кылбурчи Айво Иви (Иван Григорьевич Векшин), тодмо революционер удмуртъёсты югдытӥсь Максим Прокопьевич Прокопьев, школаез кылдытӥсьлэн Кузьма Андреевич Андреевлэн нылыз Ольга Кузьминична Андреева, мукет визьмо удмуртъёс. Зэм, азьвыл юрт ӧвӧл ни - со быдэсак выльдэмын. Нош улос татын сыӵе ик вашкала. Вуж но выль юртъеръёсты лек сильтӧллэсь выллем утё ай азьвыл мерттэм писпуос. Школаез кылдытӥсьлэн Кузьма Андреевич Андреевлэн коркаез интыын но кемалась сылэ ини вылез. Таиз азьвылэныз одӥг но герӟаськемын ӧвӧл. Инъямын туала лэсьтӥськон арбериослэсь, шунды шорын чильк-вальк кисьтаське... Та палан ик пӧзе чылкыт ошмес. Леонид Григорьевич Романов мӧйыослэн верамысьтызы тодэ на: та ошмес доры куке но вуылӥллям Куӟебай Герд но Ашальчи Оки. Со дырысен уно ар ортчиз ни, тросэз воштӥськиз, нош ошмес туннэ но пӧзе. Котькыӵе сильтӧллэсь, пелляськись куазьлэсь уте сое ӟеч- ӟеч липет. Карлыган палъёсы удмуртъёслэсь кырӟан-веранъёссэс люканы вуылыкуз, Куӟебай Герд кӧня ке нунал ӵоже улэм Шамаев кузпалъёс дорын. Туннэ ӝожомыса верано луэ: юрт кузё, арлыдо кышномурт, югыт дуннелэсь кӧня ке ар талэсь азьвыл гинэ люкиськем. Та палъёсын но табере Куӟебай Гердэз ӟеч- ӟеч тодӥсь ӧвӧл ни. *** Удмуртъёс та палан пумен ӟучомо. Бускель Хлебниково гурт быдэсак ӟуч лыдъяське ке но, пӧлазы трос удмуртъёс но. Егит дыръязы лыктыса, пыраклы выжыяськиллям татчы. Мӧйыос анай кылзэс тодо ай. Сюлэм шымырске, егитъёс шоры учкыса. Чылкак удмурт тусо нылъёс но пиос удмурт сямен пал кыл но уг валало. Куӟебай Герд тае ӧй чидасал. Туннэ но луло луысал ке, паймысал, дыр: вакыт чылкак воштӥськиз, нош ужъёс ялан дыг мыно. Югдур сыӵе ик луоз, ӧз луэ ке пӧламы Мария Главатских кадь адямиос. Таӵе шӧртчиос ванен ик улэ но, сяськая но, эшшо но кужмогес луэ удмурт калык. *** Удмурт Элькунысь Культурая министерствоын ужасьлэн Людмила Жуковскаялэн ивортэмезъя, Куӟебай Гердлэн вордскемез дырысен сю ар тырмонлы сӥзем ужрадъёс азьланьтӥськозы музон бускель улосвылъёсын но - Татариын, Башкириын, Пермь, Киров улосъёсын. Удмуртъёс та адямиез уз вунэтэ. Уз вунэты быдэс дунне! ЕЛЕНА ВИНОГРАДОВА. Владимир Беломорскихлэн туспуктэмъёсыз. Наталь Юон - урод сям. Кӧня адямиез выйытӥз ни со аслаз пыдэстэм бекчеяз, нош кӧняез асьсэлэсь черодзэс возьмало. Дугдэ, малпаське! Оло, бер ӧвӧл на дунне шоры сазь синмын учкыны? Нылпиостылэсь, анай-атайёстылэсь, кузпалъёстылэсь шудзэс эн воштэ аракыен. "12 вамыш" - озьы нимамы газет бамын усьтӥськем выль сэрегез. Галиналэн но Людмилалэн сюлэм усьтонъёсынызы тодматскыса, оло, тӥляд но соосын герӟаськемды потоз. Та нылкышноослы вазиськемды луоз таӵе адресъя: 426072, Ижевск город, Молодёжной урам, 34 номеро юрт, "Семья" центр. Телефон номерез: 30-59-89. Асьтэлэсь малпанъёстэс, мылкыдъёстэс озьы ик верамды луоз газет пыр. Галинаен но Людмилаен вераськонмы азьланьтӥськоз мукет номеръёсын но. Л. МАЛЫХ, "Наталь" бамез дасясь. ХВИИИ тол Олимпийской шудонъёс РОССИЯ - КУИНЕТӤ ИНТЫЫН ХХ даур понна Тол Олимпийской шудонъёс йылпумъяськизы, вуоноосыз табере ортчозы ХХИ даурлэн кутсконаз Америкалэн Соединённой Штатъёсаз. Россилэн сборноез, Олимпийской шудонъёслэн историязы, ваньзэ-ӧвӧлзэ 100 зарни медаль люказ. Со пӧлысь 9-эз басьтэмын Наганоын. Нырысетӥзэ басьтӥз Ольга Данилова. Выль олимпийской рекорд пуктӥз асьмелэн лыжницамы Лариса Лазутина. Огкутскемен, бӧрсьысь бӧрсе 3 зарни медаль утӥз. Куасэн бызьылонъя сюресъёс вылын нылъёсмы басьтӥзы ваньзэ - витьсэ ик зарни наградаосты. Со понна ӧз удалты пиослы. Озьы ик зарни медальёстэк Япониысь бертӥзы хоккеистъёсмы но. Чехъёс котыр ласянь кужмо луэмзэс но усто шудэмзэс возьматӥзы. Ма шуод на: спорт - со спорт. Ворме кужмоез пӧлысь кужмоез. Газетъёс гожъямъя, американецъёс Россилэн сборноезлы, асьсэлэн чакланъёссыя, сӥзё вал 6-тӥ инты гинэ. Малпамзыя ӧз пӧрмы: Германия но Норвегия бере луим куинетӥосыз. Лиллехаммерын 12 зарни медаль люкаса потӥм вал кыкетӥ интые. Таяз шудонъёсын ассэ зол возьматӥз Германия. Ваньзэ 29 медаль люкаса, ХВИИИ тол Олимпиадаын немецкой сборной команда чемпион луиз. КУН ДУМАЫСЬ ИВОРЪЁС Россиысь парламентын кылзонъёс ортчизы пыӵал тӥрлыкен вузкаронъя кылдэм югдур пумысен. Отын вераськизы "Ижевский механический завод" кун предприятилэн генеральной директорез Василий Чугуевский, Удмурт Республикаысь Кун Кенешлэн депутатэз Олег Кузьменко но Кун Думаысь депутат Андрей Солуянов. Вераськисьёс тужгес но бадӟым саклык висъязы таӵе ужпумлы: пыӵал тӥрлыкен вузкарон быдэс дуннеын огез бадӟымез пайда ваись удысэн лыдъяське. Но пыӵал поттӥсьёс ас вузъёссэс рыноке поттыку, уката ик кунгож сьӧры вузаку, туннэ пӧртэм шуг-секытъёсын пумиськыло. Соин ик Россиысь оружейникъёслэсь интересъёссэс утён понна бадӟым уж нуоно асьме дипломатъёслы но политикъёслы. х х х Улон коркаос лэсьтонъя комиссилэн кенешез ортчиз. Кун Думаысь депутатъёс сяна, солэн ужаз пыриськизы США-ысь конгрессменъёс, Россиысь Правительстволэн адямиосыз но федерацилэн улосвылъёсысьтыз кивалтӥсьёс. Та ужпумъя югдурез мур валаса вераськиз Удмурт Республикаысь Правительстволэн Тӧроезлэн нырысетӥ воштӥсез Юрий Питкевич. Егит семьяослы улон юртъёс пуктон сярысь вераськиз озьы ик асьме депутатмы Андрей Солуянов. Кун Думаысь депутатлэн А. Солуяновлэн пресс-службаез. Кун Кенешлэн сессияз КУЛЭ-А РЕСПУБЛИКАЛЫ ПРЕЗИДЕНТ? Кун Кенеш кемалась выре кивалтон амалъёсты выльдонэн. Со нырысь ик герӟаськемын республикалы йыр яке президент быръёнэн. Нош со понна Конституциямы воштонъёс но ватсанъёс пыртоно. Тӥни соин Кун Кенеш кылдытӥз комиссия. Таиз дасяз Удмурт Республикалэн Конституцияз воштонъёс но ватсанъёс пыртон сярысь законлы инъет. Ӵапак та ужпум рос-прос учкемын Кун Кенешлэн дас куатетӥ сессиезлэн 19 феврале ортчем кенешаз. Кызьы бен со мынӥз? 34 депутат-коммунист асьсэлэсь ӵектонзэс дасяллям. Та документъёсты депутатъёс фракциосын но комиссиосын эскеризы. Ваньмаз огкылэ ӧз вуэ. Депутатъёс шори люкиськизы, шуыны луоз. Огъёсыз чутрак пумит луо Конституцие воштонъёс пыртонлы но президент быръёнлы, мукетъёсыз дурбасьто йыр кылдытонлы. Тӥни сыӵе мылкыдъёсын ужа удмурт парламент. Куинь ар талэсь азьло Вылӥ Кенеш кутӥз вал республикалы президент быръён сярысь закон. Та пумысен калык пӧлын юалляськон ортчытӥз. Данакез президент быръёнлы пумит луиз. Собере трос гинэ дыр ортчиз ни. Россиын асьме Удмурт Республикаын гинэ кылиз на парламент амалэн кивалтон. Миым тулыс Россиысь Кун Дума кутӥз Россия Федерациысь субъектъёсын кун властьлэсь быръем но быдэсъясь органъёссэ радъянъя огъя инъетъёс сярысь закон. Отын меӵак пусъемын: субъектъёсын одно ик медло вылӥ должностен адями - интыысь быдэсъясь органлэн тӧроез (йырыз) - калыкен быръем кивалтӥсь. Асьмелэн кыӵе югдур? Удмурт Республикалэн али ужась Конституциезлэн 10-тӥ ёзэтаз гожтэмын: "Удмурт Республикаын кун властез быдэсъяло Кун Кенеш, Правительство но судъёс". Кун Кенешлэн огдырлы быръем комиссиез сое тазьы воштыны ӵектэ: "Удмурт Республикаын кун властез быдэсъяло Бадӟым тӧро (йыр), Кун Кенеш, Правительство, Конституцияя суд, мировой судьяос, интыосысь (районъёсысь но городъёсысь) кун властьлэн ёзъёсыз". Тӥни табере ӵошатэ, кыӵе выльдон-ватсан ӵектӥське. Та но мукет воштонъёсты учкизы депутатъёс. Кызьы верай ни, парламент умоен уг лыдъя дасэтӥ ёзэтэ таӵе ватсан пыртонэз. Нош Кун Кенешлэн та ужпумъя постановлениезлы инъетын гожтэмын вал: Конституцие пыртыны ӵектэм воштонъёсты но ватсанъёсты газетъёсын печатлано, калыкын эскерон вылысь, туэ 15 апрелёзь адямиослэсь дэмланъёссэс люкано но май толэзе сессиын учконо. Данакез депутатъёс солы пумит кариськизы. Депутатъёс-коммунистъёс ӵекто 10-тӥ ёзэтэз кабзэ куштыны, Удмурт Республикалэн Конституцияз воштонъёс но ватсанъёс пыртон сярысь законлы асьсэлы проектсэс инъет чотын кутыны, ватсанъёс сётъяны Кун ужез радъянъя, нациос куспын политикая но интыын ас коже кивалтонъя комиссие. Собере, пе, комиссия потоз сессие. Огъя вераса, депутатъёс-коммунистъёс Конституциямы трос воштонъёс пыртыны уг ӵекто. Соос лыдъяло сыӵе ёзэтъёссэ выльдыны, кудъёсыз уг тупало Россилэн Конституциезлы но федеральной законодательстволы. Мар веразы депутатъёс? Тужгес лэчыт вераськиз Дэбесысь депутат Александр Горошников: - Куд-огез депутатъёс милемлы мыр-мыр валэктыны выро, республикаямы, пе, ужъёс урод мыно, йыр яке президент ӧвӧлэн. Кин бен солы оскоз? Россиын ваньмаз сямен областьёсын но республикаосын вылӥ кивалтон выльдэмын, нош ужъёссы малы ке ӟеч радъямтэ, югдур огкадь котькытын сямен. Шаерысьтымы вылӥ кивалтӥсьёсмылы но полномочиос тырмыт сётэмын. Соосты уже гинэ кутоно. Ватонэз ӧвӧл: кун кивалтон аппарат ялан пульдэ но сое возьыны уно коньдон кошке. Мар бен солы пумит шуод? Правительство куддыръя зэмзэ но выль ёзъёс кылдытэ. Та пумысен огпол гинэ вераськон уг пуромы ни. Валентин Тубылов Конституцилэн 10-тӥ ёзэтаз гинэ ватсан ӵектэ. Со герӟаськемын республикалы йыр кылдытонэн. Со, пе, мед бергатоз Правительствоез (вылӥ быдэсъясь органэз). Валентин Жебровский: юано калыклэсь, мар вералоз куинь таӵе юанлы: кулэ-а элькунлы бадӟым тӧро? Кулэ-а Правительствоен кивалтӥсь бадӟым тӧро? Кулэ-а президент? Кыӵе амалъёсын Конституцие воштонъёс но ватсанъёс пыртоно? - Асьмелэн сыӵе законмы ӧвӧл,- ивортӥз депутат Юрий Семенов.- Азьло сое кутоно, собере воштонъёс борды басьтӥськоно. Ведь вераськон мынэ Удмуртиын кун ужез радъян сярысь. Со капчиен уг сётӥськы. Республикалы президент ке бырйим, солэн адямиосыз нокинлэсь уз кылзӥське, соос борды йӧтылыны уз луы. Соин ик та ужпумъя юалляськон ортчытоно. - Асьмеос ӧжытгес эскериськом экономикаен герӟаськем ужпумъёсты,- вера Николай Чувашов.- Тросгес выриськом кун властез но мукетсэ золомытыны. Со куспын Удмурт сиён-юон корпорация 27 миллиард манет уксёез тус-тас кариз, нош кыл нокин ӧз куты. Мукет но сыӵе выллем учыръёс пумиськыло. - Мон сямен,- шуэ Правительстволэн Тӧроез Павел Вершинин,- вужзэ но, выльзэ но Конституциез печатлано. Калык ачиз мылкыдзэ мед вералоз. Асьмеос огкыл шедьтыны кулэ. Но Кун Кенеш куд-ог документъёсты дыртыса лэсьтэ но депутатъёслы бер сётъя. - Асьмеос куинь ар ӵоже трос ужпумъёсты сэрттӥм-пертчим ни,- пусъе Кун Кенешлэн Тӧроез Александр Волков. - Интыосын ас коже кивалтонэз пыӵатонын валантэмез но ичи ӧвӧл ай. Сельсоветъёсын но гуртъёсын сыӵе амалэн кивалтон мед луоз, нош районъёсын но городъёсын - кун власть. Асьмелэн опытэнымы тодматско ни кунгож сьӧрын но. Монэ юнме шорысь Бельгие но Италие ӧз нуллэ. Валамон, быдэсъясь властез юнматоно. Со юрттоз шуг-секытысь потыны. Асьмеос та ужен ум дыртӥське, куд-огез депутатъёс озьы шуо ке но. Республикалэн йырыз вань калыкен быръёно адями, Правительствоен но мед кивалтоз. Россиын таӵе амалэн ужасьёс трос ни. Кун Кенешлэн сессиез та ужпумъя нокыӵе решение ӧз куты. Соин ик кык комиссилэсь огкыл утчась одӥг комиссия кылдытэмын. Со парламентлы выль постановление дасялоз. Геннадий РОМАНОВ. Иван Образцов, история наукаосъя кандидат, запасысь полковник. Данъялом-а, буре-а ваём? Асьмеос, Россиын улӥсьёс, туннэ ке но пумозяз умой-умой ӧм валалэ на кыӵе коже сюреммес, кудпала шонскеммес. Соин но, вылды, ӵемысь малпаськиськом но йӧндыртӥськом на коммунизм лэсьтон вакытъёсы сямен. Нош улон интыяз уг сылы. Тани 23 февраль но сӥё-дано праздникысь пумен пӧрме Советской Армиез буре ваён нуналлы. Мар луиз шуоды сыӵе кужмо, дуннеез кышкытлыклэсь утьыны быгатӥсь армиенымы? Оло, вашкала дыръёсы сямен, ӟуч князьёслэн войскоссы сямен, ож бусыын быриз? Яке космосысь вуэмъёс кужымзэ пазьгизы-а? Ӧз. Соиз но, таиз но уг тупа. Аамалтэк тодад ваёд Владимир Ильич Ленинлэсь верам кылъёссэ. Граждан ож йылпумъяськем бере, егит Советской государстволэн кивалтӥсез шуиз: "Асьмеды нокин но уз вормы, асьмеды асьмеос ке ӧм быдтэ". Советской Армия одӥг тушмонлы но ӧз сётскы, жуммытӥзы политической "вузчиосмы". Котькӧня шекъёсыз солэн медло, но 5 миллионъем армия 60 сюрс танкъёсыныз, трос сю атомной подводной лодкаосыныз но стратегической бомбардировщикъёсыныз, дасоосын мотострелковой, танковой, воздушно-десантной дивизиосыныз ас калыксэ, ас музъемзэ гинэ ӧз усьты. Меӵак верало, СССР вань дыръя, одӥг агрессор но ӝыны даур ӵоже ӧз дӥсьты асьме шоры урдскыны. Вооружённой кужымъёсмы шоры гажаса но кышкаса учкылӥзы. Нош адӟиськоды-а, ма дуартэ США Иракен? Со огкутскемен та пичи странаез дась пеньлы пӧрмытыны. Америкалэсь сямзэ уд вошты: аслэсьтыз лябъёссэ зӥбыса возьыны дышемен. Лыдпусъёс верамъя, планетаямы улӥсьёс пӧлысь 1 американец вылэ али 5 мурт ужа. Туала политикъёс россиянъёсты но берлоосыз радэ пырто ни, миллионъёсын, миллиардъёсын басьтэм кредитъёс пыр. Огшоры калыклы огзэ вунэтоно ӧвӧл: котькыӵе государствоез, пичи-а со, бадӟым-а - шуге-леке сюремлэсь уте армиез. Россия Вооружённой кужымъёссэ ялан кулэстэ, мултэс трос коньдон отчы кошке шуыса. Зэм, бадӟым армилэн со быдӟа ик кулэяськонъёсыз но. Нош мукет ласянь: кин асьмеды ӝыны даур ӵоже войналэсь уте ни? Ож тылӝу пыр потэм поколение тае ӟеч вала. Вала мукетсэ но: котькызьы сантэманы мед вырозы советской солдатэз, фашист музэн, мурт музъемъёсты киултон сярысь солэн малпанэз ӧй вал, уз но луы. Асьмеос утим но утиськом вордскем музъеммес. НАТО-ысь экспертъёс верамъя, Советской Армилэн ударной дивизиосыз быгатысалзы, 72 час куспын быдэс Европаез ортчыса, Ла-Маншозь вуыны. Шонер дунъет сётэмын. Табере адӟиськом: ма лэсьтыны ӧз пӧрмытэ Западысь генералъёс но политикъёс, лэсьтӥзы асьмелэнъёсыз. Вылысьтыз вылаз гожтэм договоръёс СССР-лэсь армизэ син шорын куашкатӥзы. Воткинске вуылыкум, мон котьку тодам ваисько "ОКА" выль советской оперативной ракетной комплексэз. Дуннеын сое ортчисез ӧй вал, конверсие улэ кыскон сярысь одӥг договор улэ но ӧз шедьы. Озьы ке но, зарезь сьӧрысь "эшъёсмы" азьын чеберъяськон вылысь, "ОКА"-ез быдтӥзы. Малы? Та юанлы мон туннэ ке но валэктон уг шедьтӥськы. Нош кулэ-а вал Россилы, СССР-лэсь данзэ утисьлы но азинтӥсьлы, Восточной Европаысь сокем ӝог пегӟыны, аръёсын люкам военной кужымзэ ас киосыныз быдтыны? Мон сямен, тае нокызьы но шонере поттыны уз луы. Асьмелэн историямы со весяклы сьӧд вишты кельтоз. Котькудӥз визьмо политик, азьпал улонзэ адӟыны быгатӥсь мурт вала: Восточной Европаын котькыӵе воштӥськонъёс мед ортчысалзы, кышкытлыклэсь утись- визьмась кужымъёсты исаны лэзёно ӧй вал. Озьы гинэ Европаын улӥсьёс уйёссэс умой кӧласалзы, нош Россия кыдёкегес палэнскысал НАТО-ен бускель луонлэсь. Россилэн дыртыса потэмез нокинлы но ӟечен ӧз берытскы. Сое нырысь ик шӧдӥм, Югославия "гомӟемъя". Россия юрттыны ӧз дӥсьты, данэз но уго паньсэмын вал ни. Озьы быриз огез нырысетӥез, тужгес но кужмоез стратегической оборонительной инъетмы. Тумошо ук: Московской военной округ приграничной луиз ни! Странаез, армиез быдтон кутскиз Беловежской пущаысен. Аслэсьтыз рользэ шудӥз Чечнялы пумит ӝутэм ожмаськон но. Жаляса верано: Россилэн армиез та адями сӥль коранэ пӧяса донгемын вал асьме кивалтӥсьёсынымы ик. Дыр ортчыса, история ваньзэ шарае поттоз, интыяз пуктоз ай. Но кин берыктоз кайгулэсь губырскем егит кышномуртлы солэсь вордэм пизэ, кин ӝутоз куашкатэм, сутэм гуртъёсты но городъёсты, кин тупатоз калыкъёслэсь тэшкам кусыпъёссэс? Армиез, та быдӟа государствоез вузасьёс ке шат? Чечен тылӝу туннэ но гыбда на. Калык сюлэмын со озьы гинэ уз кысы. Ватонэз ӧвӧл: туала армия котыр ласянь жуммытэмын. Сое возьыны, сюдыны, дӥсяны уг тырмы коньдон. Озьы-а ӝутод солдатлэсь Родиназэ гажан мылкыдзэ? Юри кутскыса гинэ быдтод со быдӟа Вооружённой кужымъёсты но Военно-Морской флотэз. Нош кыӵе югдур кунгож сьӧрын? Дуннеысь валтӥсь армиос ялан азинско, военно- технической революциен ӵош вамышъяло. Туннэ со, оло, уггес шӧдӥськы на. Но ӵуказе улыса асьмеды сутыны луонтэм кыдёке кельтозы. Западысь экспертъёс верамъя, Россиез ӝоген дунъямысь дугдозы бускель государствоос но: ассэ ачиз дунъяны быгатӥсьтэм муртэ мукетъёсыз гажалозы-а? Дуннеен кузёясько кужмоосыз. Античной геройлэн верам кылъёсыз ӵапак тупало туала улон-вылонмылы. Россия, ватонэз ӧвӧл, Западэз магнитэн кадь, ялан бордаз кыске музъем узырлыкъёсыныз. Соин ик котькыӵе амалъёс пыр выре, асьме доры пырыса, весяклы татчы выжыяськыны. Россилэн туала кивалтӥсьёсыз быгатозы-а меда вашкала государствомес утьыны? Тырмоз-а армилэн кужымез, "эшъёсмы" азе пыдесъяськытэк, ас музъем вылаз кузё луыны? Ваньмыз со потоз асьме бордысь. Мон оскисько, Россия та сьӧд кожысь одно ик потоз, армизэ, калыксэ бырыны уз сёты шуыса. Соку выльысь берыктоз дунне азьын ыштэм данзэ но интызэ. Куамын ар ортчыса Алигес Зура шор ёзо школае люкаськылӥзы 30 ар талэсь азьло сое быдтэм дышетскисьёс. Йӧно кышномуртъёс но воргоронъёс выльысь парта сьӧры кадь пуксьылӥзы, ортчемзэ тодэ ваизы. Нош али дышетскисьёсыз соослы шулдыресь кырӟанъёс-веранъёс дасяллям. Пумиськон туж тунсыко ортчиз: кӧня ӟыгыръяськонъёс но, шумпотон синкылиос но вал. Ваньмыз соос ужало пӧртэм интыосын: правоосты утись ёзъёсын, кивалтон удысын, ваньбур поттонын но музонын. Школа сярысь ке верано, со усьтэмын 1885 арын. Нош 1968 арын быдтэмъёс дышетскизы улыно-вылыно пу школаын. Пумиськон но отын ик ортчиз. Со пуктэмын 47 ар талэсь азьло. Валамон, пу юрт вужмиз, со возьма чередемез яке выль школа пуктэмез. Ведь берло дыре отын дышетскисьёслэн лыдзы уг кулэсмы, 400-500 нылпиос дышетско. Выль юрт пуктон сярысь но малпаськыны кулэ ни. Сыӵе сюлмаськонэн ик улэ школалэн директорез Юрий Стрелков. Татчы ведь тодон-валан басьтыны ветло Зуралы матысь гуртъёсысь нылпиос но. Дышетскыны умоесь условиос кылдытоно, сотэк муресь тодон- валанъёс сётыны ум быгатэ. Г. ВАСИЛЬЕВ. Кусыпъёс - герӟетъёс Статистикая кун комитет ивортэмъя, ортчем арын республикаямы 13 миллион тонна ваньбур нуэмын-ваемын. Со 1996 арен ӵошатыса 14 процентлы ӧжыт. Чугун сюрестӥ, автомашинаен, самолётэн груз нуон шӧдскымон кулэсмиз, шур кузя ваньбур кык поллы ичигес келямын. Автобусэн 36 процентлы тросгес калык нуэмын, нош самолётэ но теплоходэ пуксьылӥсьёслэн лыдзы кулэсмиз. 1997 аре сюресъёс 105 километрлы тросгес тупатэмын, озьы ик 17 выжъёс выльдэмын. Ортчем аре телефон возисьёслэн лыдзы 5,2 процентлы будӥз Миым Калык тросгес вераськиз мукет городъёсысь тодмоосыныз, нош газет, журнал ӧжытгес лыдӟиз. Н. ВОЗИСОВ. Ма туннэ сюлмаськытэ Кык дэремез куинь муртлы уд люкы Тодӥськоды-а, мар али герӟа Россиын вань улӥсьёсты? Бюджет пумысен вераськон. Президент но, вань ёзъёсысь депутатъёс но, огшоры адямиос но уен-нуналэн сямен кенешо пичи но вкечи шобретэн вань калыкез шунтон сярысь. Кун Думае быръем эшъёсмы бюджетлы инъетэз ньылетӥзэ эскеро ни - пайдаез ӧвӧл. Виктор Черномырдин, оло, арнялы быдэ соос доры ветлэ: лӥятэ, буйгатэ, пышкетэ - воз уг вырӟы. Тани квартал ортчоз ни - бюджет юнматымтэ на. Кӧня коньдон "вылӥысь" вуоз нимаз улосъёсы? Россиын бюджетъя Закон кутымтэ бере, та юанлы шонер валэктон сётыны нокин уг быгаты. Кылем арез Удмуртия пумитаз юнматэм бюджетэн. Туэ озьы ӧз пӧрмы. Ай бюджетэз рос-прос эскерон борды асьме депутатъёс тани туннэ гинэ кутско. Котькудӥзлэн мылкыдыз вань тросгес коньдон кыскыны аслыз матын луись удысэ. Нош со уг тырмы. Дышетӥсьёслы чаклам уксёез улон юртъёсты возёнэ сётоно ке, школаын ужасьёс парламент азе пыраклы улыны выжозы - нылпиос соослы кулэ уз луэ ни. Коммунистъёсты коньдонтэк кельтоно ке, сотэк но ёмыраны кутскем коркаосмы воксё куашкалозы. Мар кароно? Кылдэм югдурез шонер валаны тыршоно, дыр. Куд-огезлы, оло, езэ но золтоно та секыт вакытэ. Озьы-а, тазьы-а - депутатъёсмы куспазы огкыл шедьтыны кулэ. Бюджет сярысь малпанэн уло Ижевсклэн кивалтӥсьёсыз но. Калыклэсь та пумысен мылкыдъёссэ ӟечгес тодон вылысь, соос алигес администрациын нимысьтыз кылзонъёс ортчытӥзы. Пумиськонэ трос адямиос лыктӥзы. Мэр Анатолий Салтыков вераз кылем арын пӧртэм кулэяськонъёсы коньдонэз кызьы кутэмзы но туэлы чаклам лыдпусъёс сярысь. 1997 арын Ижевск "сииз" 1233 миллиард манет коньдон (вуж дунъёсъя). Со пӧлысь 28 процентэз кутэмын жилищно-коммунальной хозяйствое. Котькудӥз ньылетӥез манет быдтэмын калыкез дышетон удысэ. 17 процентэз уксё мынӥз тазалыкез утёнэ. Культуралы но искусстволы кылиз ӝыны процент, мугорез юнматон культуралы - 0,3 процент, котырысь инкуазез утёнлы - чылкак 0,1 процент. Городысь специалистъёс лыдъяллям, Ижевскез умой азинтон понна, туэ вуж дунын 5,4 триллион манет кулэ. Валамон ни, сомында коньдон шоркармылэн нокызьы но уз шедьы. Вань расходъёсты чаклано луоз, люкаськоно уксёлэсь кӧнязэ лыдэ басьтыса. Мэрлэн верамезъя, ужаса улӥсьёслэн подоходной налогысьтызы но ваньбурлы вытысь городэ кельтоно люкетъёсты кулэстэмен (озьы лэсьтыны пусъемын республикамылэн бюджетэзлы инъетын), Ижевск туэ 170 миллиардлы ичигес коньдон басьтоз. Мар кароно? Экономистъёс шуо: транспортэн ветлон дунэз 2 сюрс манетозь йылэтӥд ке, ватсаса 80 миллиард манет люканы луоно, пенсионеръёсты дун тырыса ветлыны косӥд ке, доход эшшо 60 миллиардлы йылоз. Валамон ни, таӵе сюрес вылэ городлэн кузёосыз уз султэ, уката ик матэктӥсь быръёнъёсты лыдэ басьтоно ке. Соос мукет амалъёс утчаны малпало. Кылсярысь, ӟечгес ужаны экономикаез азинтон бордын. Яке чупресгес кариськыны туала технологиосты пыӵатон ласянь.Басьтом тани счётчикъёсыз ик. Соосты уже кутон шунытэз, вуэз ог дас процентлы шыръяны луонлык сётэ. Быдэс городъя чаклано ке, со чотын уно гинэ ватсаса коньдон люкаськысал. Кун власть та аскивалтонъя ёзъёс куспын кылдэм тэкшерон, валамон, кыкна ласянь ик уродэн берытске. Анатолий Салтыков городлэн улоназ пумиськылӥсь унозэ шуг- секытъёсты валэктӥз ӵапак та вожвылъяськонэн. Республикалэн кивалтӥсьёсыз, пе, юромо туртто шоркарлэсь хозяйствозэ пачкатыны. Кин тодэ ни. Оло, озьы но куддыр луылэ. Тодмо огез: городын улӥсьлы со мугъёсты тодон чик но кулэ ӧвӧл, солэн ӟечгес, тыргес, кышкатэкгес улэмез потэ. Адямилэн доходысьтыз налог кельто бере, со сярысь унозэ сюлмаськонъёсты государство ас вылаз басьтыны кулэ. Асьмелэн озьы уг луы на. Люкаськемъёс азьын вераськиз Ленин ёросэ пырись Новые Парники посёлокысь аскивалтонъя общественной ёзлэн кивалтӥсез Павел Бегунов. - Посёлокмы нокинлы кулэ ӧвӧл, - шуиз со. -Трансформаторлэн кужымез уг тырмы ни. Соин ик нуналъёсын тылтэк улӥськом. Холодильнике тырем сиён-юон уродме, ву нуллоно луиськом шурысь. Жуг-жагез воксё куинь ар ӵоже уг потто ни. Тани али лымыез гинэ но сузясь ӧвӧл. Ма, мукетъёсыз но вераськисьёс трос шуг-секытъёссэс веразы. Дышетӥсьёслэн сюлмаськонъёсынызы тодматӥз 91 номеро школалэн директорез. Тазалыкез утисьёслэн нимынызы вераськиз 6-тӥ нылпи больницаысь врач. Но куд-ог эшъёс люкаськемлэсь мугзэ но суразы кадь. Бюджетъя ӵектонъёссэс сётэм интые, соос кутскизы Анатолий Салтыковез данъяны, сое мэре кандидатэ дэмланы. Кин тодэ, сыӵе адямиосты, трибуна сьӧры поттыны, оло, чакламын вал ужардэз дасясьёслэн малпамзыя. Котькызьы медло ни но, пусйымон соиз: кивалтӥсьёслы калыкен ӵемгес пумиськылоно. Быръёнъёс азьын гинэ ӧвӧл, мукет вакытэ но дыр шедьтоно адямиосты люканы, соосын кенешыны. Соку бюджетэз но дасяны каньылгес луоз. Уго пӧламы вань котькыӵеосыз. Тросэз эшъёс кизэс коньдон курыса мычо ке, куд-огез кылдэм ужпум шоры мукет сямен учко. Кылсярысь, та пумиськонын ик Октябрь ёросысь "Союз-Чернобыль" обществолэн кивалтӥсез Юрий Баранов тазьы шуиз: "Милемлы номыр кулэ ӧвӧл, уж сяна. Уж луиз ке, бӧрысь ми городлы но юрттом..." Кызьы люкод кык дэремез куинь муртлы? Номыр уз пӧрмы. Одӥгез ялан палэнэ кылёз. Югдурез тупатыны одӥг гинэ амал вань - вуроно куинетӥ дэрем. Озьы ик быдэс улонамы но. Ӟечгес улон вылысь, уногес ваньбур поттоно. Соку со ваньмызлы окмоз. И. ЛЕБЕДЕВ. Кыӵеесь тӥ, атай киос? Улонын ӵем дыръя семьяос атайтэк яке анайтэк кылё. Ми но, выны Толя, апае Катя но мон пичиысен атайтэк кылимы, мон сое туспуктэмысь гинэ тодӥсько на. Улӥмы ӵужнэнэенымы ӵош. 7-тӥ классын дышетскыкум, анае тодматскиз бускель ёросысь дышетӥсен. Со но кузпалзэ ыштэм, куать нылпи анайтэк кыле Григорий Николаевич Колесников, быдэс ар огназ улэ, вить иськеме школае ветлэ, семьязэ сюдэ, гужемзэ ог витьтон муш уморто уте. Доразы одӥг пол ветлэмез бере ик, анаймы милемыз огинэ люказ: мыноно-а, ӧвӧл- а, малпанъёсмес юаз. Ми куиньнамы ик соглаш луим. Вуоно атаймы но дорамы вуылӥз. Озьы кык семья огазе луиз, ваньмыз укмыс нылпи. Но укмыснамы ик одӥг ӝӧк сьӧры пуксим куинь ар ортчыса гинэ, атаелэн пиез морфлотысь вуыса. Мыным туж секыт вал "атай" кылэз шара вераны, улытозям нокинлы озьы ӧй вазиськылы бере. Нош анайме атай ласянь вынъёсы-сузэръёсы соку ик анай шуыны кутскизы. Ӝыны ар пала мон курадӟи. Кыӵе потэ вал атай шуыса вазиськеме, нош ымы уг пыры. Одӥг пол анае атаймес муш садэ ӧтьыны косӥз. Корка пыреме ӧз поты но укно улысен туж зол кеськи: "Атай!" Со бызьыса потӥз, мар луиз, шуэ, нош мон уг тодӥськы мар вераны, оло, шоканэ ик пытсаськиз. Атай валаз, лэся, мынэсьтым шуге- леке вуэмме: дорам лыктыса, йырме маялтӥз, тыбырме топ-топ вешаз, нош аслаз синъёсыз котмизы. Тӥни озьы мон валай, шӧдӥ атай киослэсь кыӵезэс. Нимы Нинӥ, нылы гинэ вал. Анаеным куспазы туж тупаса, ог-огзэс яратыса улӥзы. Соос кыкназы но дышетӥсьёс вал бере, укмыс нылпиосты соё-таё карылыны ӧз быгатылэ. Нош мыным потэ вал, атае монэ самой зол яратэ. Гитараен, аккордеонэн шудыны дышетӥз. Баянэн шудыны дышетски ини педучилищеын. Ӵукна султыку, атай милемды вешаса сайкатэ вал, нош анае - мукет сузэр-вынъёсме. Нылпиос пӧлын керетонъёс одӥг пол но ӧз ӝутскылэ. Ньылез одӥг дыре студент луыса дышетским. Али аслам кык гинэ нылпиосы, но атайме туж ӵем тодэ ваисько: кызьы меда быгатӥз сомында нылпиез дышетыны, дӥсяны-кутчаны, сюдыны. Ноку но тышкаськемез ӧй вал, но аналскыса, азьтэмъяськыса улыны ӧз сётылы. Солэсь ик дышетски мушканы но. Дас сизьым ар ӵоже кылдӥз атаеным улыны. Аслам семьяе ке но вал ни, атай юртам ӵемысь бертылӥм. Войнае ветлэм бервылъёсыз атайме улонысь вазь нуизы. Сое ыштон мон понна туж бадӟым куректон вал. Али но бӧрдыса гожъясько: луло дыръяз ӟеч кылме вераса ӧй вутты. Мушъёс дорын вырисько ке, атае нош ик син шорам пуксе. Мынам сюратае (валамон мед луоз шуыса гинэ озьы гожтӥсько) зэмос атай вал, зэмос адями, зэмос дышетӥсь. Куд-огезлэн аслаз вордэм атаез но сыӵе уг луы. Войнаын ӵош ожмаськем эшез атаелы таӵе гожтэт ыстӥз вал, жаль, со та гожтэтэз лыдӟыны ӧз вуы ни: "Тон, Гришенька, улонад кык подвиг лэсьтӥд: войнаын но укмыс нылпиез будэтыса". Мон та кылъёсын быдэсак соглаш. Анае но сыӵе ик подвиг лэсьтӥз шуысал: куать нылпиен семьяе мыныны дӥсьтӥз, ыштэм анайзэс воштӥз. Н. Ермокина. Пичи Пурга, Кечево гурт. Наталь "МОН АЛКОГОЛИКЛЭН КЫШНОЕЗ" Котьмалэсь но зол та улонын мынам потэ вал картме юонлэсь куштӥськытэме. Мар гинэ ӧй кары, кыӵе гинэ амалъёс ӧй утча, кинэн гинэ ӧй вераськы - ваньмыз пайдатэм. Бӧрдон но, керетон но ӧз юрттэ. Соку ини ваньмыз шоры киыным шонтӥ, ачим шоры но. Кызьы ке огпол кылӥ, Устинов ёросысь "Семья" центрын кылдытэмын юись муртъёслэн ӵыжы-выжыоссылэн огазеяськонзы - "Ал-Анон". Ужало соос "12 вамыш" программая, нош люкаськыло арняяз кык пол. Мынӥ туж оскытэк. Но син шорам соку ик йӧтӥз люкаськемъёслэн задор, капчи мылкыдзы. Кышномуртъёс оген-оген мадизы юись картъёсынызы курадӟонъёссэс. Мукетъёсыз но вераськонэ пыриськылӥзы, дэмланъёс сётъязы, пумен асьсэлэсь учыръёссэс мадё. Та кенешонын мон валай - картэ мынам висе, кызьы висё туберкулёзэн, диабетэн яке мукет маин ке. Азьланяз но ветлоно кариськи та кенешъёсы. Пумен-пумен ачим но вераськонъёсы ӧръяськи. Отысь но татысь утчалляй вина юон висён сярысь гожъямъёсты. "Ал-Анонэ" толэзь пала ветлэме бере гинэ умой-умой валай - солэн программаез мон понна чакламын. Мынэсьтым валанме но чиданлыкме будэтыны, вань шуг-секытъёсты керӟегъяськытэк пумитаны. Кенешъёсы ветлыса дыши малпанлы: нокытчы уд пегӟы - мон алкоголиклэн кышноез. Валай, картэ сямен ик, юонлы пумит мон кужымтэм. Озьыен, кузпалэным ӵош мон ачим но висисько. Иське, нырысь ик дышетсконо асме киям кутыны, аслым ачим юрттыны. Мылкыдъёсы юнмам бере, юон висён шоры учконъёсы воштӥськизы. Ужъёсы но умой мыныны кутскизы. Улон шоры мукет синмын учкон капчи уж вылымтэ. Котькыӵе секыт медло, но дышетсконо выль сямен берганы. Туннэ нуналэз малпаку, тодад возид ке толлоезлэсь вань умойзэ, уродзэ палэнэ кельтыса, ӝоген улон сюресэд югектоз. Зэмен но, "Ал-Анон" юрттӥз мыным огпалась огпала шонаськонъёсме палэнтыны но шонер сюрестӥ вамыштыны. Юонэ выем картэлы луыса вуи ке но та огазеяськонэ, ӝоген валай: азям усьтӥсько мукет но инвисъёс. Мон будӥсько, будо мынам малпанъёсы, валанъёсы. Со сяна, "Ал-Анонын" мон дышетскисько сюлэмшугъяськонъёсме, йыркурме, асме янгышен лыдъямме палэнтыны. Пушкам тымиськем секыт малпанъёсы зӥбемысь дугдо, ачим кадь шуге-леке сюремъёсын вераськыса, ас адӟонъёсме, осконъёсме соослы усьтыку. Али мон валасько ни, котырысьтым адямиос шоры учконме воштыса, улыны трослы капчи луиз. Мон кулэ асме ачим гажаны но яратыны. Улонэ медаз тырмы юись картэным гинэ, аслэсьтым улонме мон быгатӥсько ачим бергатыны. Кинлы юрттэт, визь- кенеш кулэ - вазиське. ЛЮДМИЛА. Наталь Малпаськытӥсь югдур. Пиосмурт синкылиос Ортчем гужеме вал со. Капка азьысьтызы пуксёнын Степан Степановичлэсь кыӵе ке егит воргоронэн вераськемзэс синйылтӥ. Кема пукизы соос. Корказы но ӧз пыралэ. Малпай: "Кыӵе ке тодмоез, дыр". Нош фермаын ужасьёс ивортӥзы: "Журавлёвлэн пиез лыктэм. Эсьмаса, корказ ӧтьыса куноямтэ но". Та йырпоромымон ивор монэ воксё усыкмытӥз. Уго кемаласен тодӥсько: кузпалъёслэн нылпиоссы ӧвӧл. Озьы ке но, сюлэмы пирсэкъяса улӥз. Бератаз, магазинысь ӵошен вамышъякумы ни, юатэк ӧй чида. - Степан Степанович, тӥляд пиды куное бертылэм, шуо гуртоос. Кытын-о улэ со? Нош тӥ нылпиды ӧвӧл шуиды вал ук. - Газетэ гожтыны-а малпаськод, Николай? - кырыжак шорам учкиз со. - Сыӵе малпанэ ӧвӧл, Степан Степанович. Тунсыкъяськисько гинэ. Дыртытэк ульча кузя вамышъянъямы, бускеле мыным ваньзэ лад-лад мадьыны тыршиз. Люкиськыкумы ни кылме сётӥ: "Уг, та учыр сярысь ӟуч газетэ уг гожты. Гожъяло удмуртаз гинэ. Оло, кинэ ке мур малпаськонэ уськытоз". Воргорон соглаш кариськиз. ... Бураши гуртэ Степан Журавлёв ож лудысь кузпалъяськыса бертӥз. Кышноез но базар мунё кадь мусо. Антонида Петровна дышетӥсь вылэм, соку ик гуртысь школаын нылпиосты дышетыны басьтӥськиз. Ожысь чутса бертэм воргоронэз сельсовет председателе ужаны ӵектӥзы. Со вакыт сельсоветэ дас кык гурт пыре вылэм, ог-огзылэсь дасо иськемъёсын люкемын. Пичиесь гуръёсты огазеян аръёсы соос пӧлысь кыкез гинэ кылизы на. Дасэз воксё ышиз-быриз, таркаськиз. Ужзэ быдэсъянъяз выль тӧро котькуд гуртэ валэн яке пыдын ветлылӥз. Чут луэмез уката но жадьытӥз кадь воргоронэз. Ӵемысь ветлоно гуртаз кӧлоно но луылӥз. Со аръёсы гуртъёсын таза воргоронъёс ӧжыт вал. Тросэз ожын быризы, егит пиосты ФЗО-е келязы. Вань секыт уж нылкышно пельпумъёс вылэ усиз. Ӧй вал кӧттырымон сиён, ӧвӧл жалясь кузпалзы (тросэзлэн быремын), егит нылъёс пи чупамез, вешамез тодытэк будӥзы. Куд ке гуртэ палэнысь воргорон лыктыку, кышноос, нылъёс чылкыт дӥськутсэс дӥсяны тыршылӥзы, лыктэм адямиез куное ӧтьылӥзы, уйлы кыльыны ӵектӥсьёсыз но трос гинэ вал. Степан Степанович огпол кыдёкысь гуртын ӝегаз. Ульчаын чар-чар кезьыт. Ӵапак Йӧ вылэ султон (Крещение) - юондыр азьын вал со. Кенешысь потыса ульча кузя вамышъякуз ни уйыса сутӥз оген кышномурт. Ойдо, пе, Степан Степанович, пӧсь чаен ке но кунояса лэзё. Бертон сюресты кузь на. Ольга чорок огназ улэ. Сюанзы бере ик кузпалэз оже кошке но бырыны шеде. Соку гинэ кылдэм семьялы Инмар мусояськыны гинэ но дыр уг сёты. Пырем кунозэ кышномурт пыжем картошен, сылалтэм кубистаен, буй-буй нянен утялтӥз. Бускеляз ветлыса, курытсэ но шедьтӥз. Ог кылын вераса, ӧвӧлзэ но вань карыны тыршиз Ольга дуно куноез понна. Кошкыны дасяськем куноез шоры кышномурт ӝожмыт синъёсын учкиз но дӥсьтытэкгес вазиз.: "Кыль кӧлыны, Степан Степанович. Кузьма мыным анай луон шумпотонэз. Пересьмон арлыдам юрттӥсе но, утисе но со луоз". Ольгалэн куараез дырекъя, синъёсыз куриськонэн тэльмыро. Журавлёв ас кузпалзэ тодаз ваиз но чутрак вазиз: "Уг быгатӥськы, Ольга, тонэ мусояны. Ас Тоняме лул-сюлмысьтым яратӥсько. Гуртады кыл вӧлдозы но кузпалылэн пеляз кылӥськоз. Ӟеч улон- вылонмы куспетӥ тэшкалоз ук!" Пал кышно кема ӧз малпаськы, пыдесъяськиз, но йыбырттыса ик куриське: Юртты, Степан Степанович! Мынам нылпиелэн атаез медло тон кадь ик чебер, визьмо, курытсэ мултэс юисьтэм. Нош тонэн секыто луэмме нокин уз тоды. Кылме сётӥсько тон азьын но, Инмар азьын но". Воргорон сётскиз ик, дӥсьёссэ берен ӵоге ошылӥз. Уйбыт мусояз со яратонлэсь мӧзмем пал кышноез. Супыльтӥсез медаз луы шуыса, гурт калык сайкатскемлэсь азьло ик сюрес вылэ потӥз. Аслэсьтыз секытэн луэмзэ тодыса, Ольга вордскем гуртэзлэсь палэнэ, Свердловск улосэ кошкиз. (Та сярысь Журавлёвлы со лушкемен ивортӥз сельсоветэ справкалы вуылыкуз). Ортчизы аръёс. Степан Степанович кемалась шутэтскыны потэмын. Со дыр ӵоже Ольгалэсь одӥг но ивор ӧз вуы, ӧз но пумиськылэ ни. Воргорон, кытын ке палэнын ас нылпиезлэсь будэмзэ тодӥз ке но, чус улӥз. Кылем гужеме, чик малпамтэ-возьмамтэ шорысь, пиез атайзэ утчаса вуиз. Адӟемез, ваче син учкыса кенешемез потэм, вылды. Анаез, Ольга, кулэмын ни. Геня табере ачиз атай, кык нылъёсыз будо, кузпаллы ӟеч сямо нылмурт шедиз. Степан Степанович, ас кузпалэзлэсь курдаса-а, мукет муген-а, кыдёкысь вуэм кунозэ корказ гинэ но ӧз ӧтьы. Капка азьысь пуксёнын гинэ враськиллям. Та учыр сярысь, оло, нокин но ӧй тодысал. Нош Геня мылкыдзэ усьтытэк чидамтэ, автобус витись гуртоослы ваньмыз сярысь мадем. Автобусэ пуксьыкуз, пиосмурт синкылизэ ки мышкыныз ӵушыса, пе, лулскиз: "Ноку но ӧй малпа вал, мынам атае из сюлэмо адями шуыса. Эсьмаса, ваем кузьымъёсме, саламъёсме гинэ но ӧз басьты. Шакшы!" Зэм, пиосмурт синкылиос сюлэм туж вӧсь луыку гинэ кыре курисько. Мадёнзэ йылпумъяса, Степан Степановичлэн но синдуръёсыз нюромизы. Мынэсьтым ӝогак палэнскиз но капка выжыяз дыртӥз. Ма сярысь малпаз меда со? Оло мынам юалляськеме сюлэмзэ чепыльтӥз? Оло ӧпкеле? Шуг вераны. Н. Никифоров. Правительствоын пумиськон БАНК СӤЗЕ ТЫР ӜӦК ВЫЛ Кылем субботае, 21 феврале, Ижевске ветлӥзы Москваысь "СБС-АГРО" банклэн директоръёссылэн советэзлэн тӧроез Александр СМОЛЕНСКИЙ, солэн нырысетӥ воштӥсьёсыз Юрий ГРУШИН НО Андрей ЛАКТЮКОВ, Урал улосысь ёзэзлэн кивалтӥсез Алексей БЕЗУМОВ но мукетъёсыз. Та нуналэ ик Удмурт Правительствоын паськыт пумиськон ортчиз. Отчы ветлӥзы республикаысь, городъёсысь, районъёсысь, бадӟымесь промышленной АПК-е пырись куд-ог предприятиослэн кивалтӥсьёссы. Кенешын гожтэмын Удмурт Республикаысь Правительство но "СБС-АГРО" банк куспын тупанкыл. Алигес гинэ дорамы вал Центральной Банклэн тӧроез Сергей Дубинин. Табере лыктӥзы Россиысь одӥгезлэн кужмо банклэн кивалтӥсьёсыз. Но ватсаны кулэ, Александр Смоленский кемалась дасяське ни вал Удмуртие лыктыны. Банклэн нимызъя ик валано, со ужа нянь будэтӥсьёс но сӥль-йӧл поттӥсьёс понна. Та удысэз азинтонэ сяна, Банк кредит сётыны дась автомобиль, мотоцикл поттонэ но мукет проектъёсты уже пыӵатонэ. Пумиськонын сыӵе мылкыд юн шӧдӥськиз. Со ке ӧй луысал, тупанкыл но ӧй вордӥськысал. Мукет сямен вераса, "СБС-АГРО" басьтӥське республикаысьтымы трос удысъёслы юрттыны, коньдон бергатонэз умоятыны, вузкаронэ но услугаос сётонэ коньдонтэк ужан амалэз пыӵатыны, пичи ужбергатӥсьёсты бурд улаз басьтыны, инвестициос утчаны но мукет. Со уг палэнскы социальной удыслэсь но. Банк озьы ик юрттоз туж кулэ производствоез азинтыны но ог-огедлы пунэм тыронъёсты кулэстыны. Со понна шаерамы кылдытӥське инвестициос но кредитъёс сётонъя центр. Отчы пыриське "Агропромбанклэн" Удмурт филиалэз. Центр чакла региональной программаосты быдэсъянэ, гурт удыслы коньдон сётъяны, нош кысык ужъёслы (кизёнлы- аранлы) льготной кредит висъяны. Соин ӵош ик кужмоялоз пластиковой картаосын ужан. Меӵак пусйыса, "СБС-АГРО" юрттоз пичи ужбергатонъя программаосты но проектъёсты быдэсъяны, бадӟымесь промышленной предприятиосты выльдыны, ӟеч тӥрлык басьтыны, машинно-технологической станциос кылдытъяны, переработкаез паськытатыны но предприятиослэсь оборотной средствооссэс будэтыны. Валтӥсь тупанкыл дас арлы кутэмын. Соя эшшо 16 пичиесь тупанкылъёс гожтэмын на. Соос герӟаськемын гурт хозяйствоосын продукция поттонэн, сое переработать каронэн, лэсьтӥськон материалъёс вуттонэн, адямиослы нимаз улон коркаос ӝутонэн но мукетыныз. Со понна висъямын луоз 1,5 миллиард манет коньдон. Нырысь ик уксё сётӥськоз туж кулэ инвестициосъя проектъёслы но программаослы: "Тылобурдо вордон", "Йӧл", "Сӥль", "Сур заводъёс", "Чорыг", "Бакча сиёнъёс", "Етӥн", "Куос", "Сельхозтехника", "Газ кыскон", "Нимаз коркаос пуктон" но мукетыз. Удмуртия Россиын куинетӥез улос луоз, кытын банк коньдон висъялоз музъем кадастр дасянэ. Со чотын гинэ бюджетэ ватсаса 30 процент уксё пыроз. Банк озьы ик малпа коньдон сётыны ю тысез переработать карон комплексъёс ӝутонэ, вирлэсь биопрепаратъёс, рефрижераторъёс но кынтӥсь тӥрлык поттонэ. Кенешын люкаськемъёслы со сярысь мадиз Александр Смоленский. Москваысь куно шуиз: - Ми ялан син азямы возиськом калыклэсь басьяськыны быгатонлыксэ. Россиысь АПК-лы кык мтллиард доллар тыр кредит висъяны луонлыкъёсмы вань. Ми юрттом автозаводдылы, радъялом адямиослы кредит амалэн автомобиль вузанэз, паськытатом нимаз лэсьтӥськонэз. Тросгес кизе етӥн, ми сое басьтом но мур переработкаез пыӵатом. Отӥяз Александр Павлович туж жаляса пусйиз, туннэ, пе, асьмеос кунгож сьӧрысь сельхозтехника (дуно ке но) басьтӥськом на. "Россельмаш" уродэсь комбайнъёс поттэ, бадӟымесь ыштонъёс адӟиськом - бусые уно ю тысь кисьтӥське. Пумиськонын озьы ик вераськон мынӥз спирт поттон, кирпич шуккон заводъёс пуктон сярысь. Кылсярысь, спирт заводъёсты вуттыны ичизэ 100-110 миллион уксё кулэ луоз. Нош пияла заводмы Россиын нырысез луоз, кытын котькыӵе пияла лэсьтозы, автомобильёслы но. Татчы висъям коньдон кык арскын берытскоз но пайда сётоз. Калыклы лэсьтӥськыны вылез заводмы араз 120 миллион кирпич шуккоз. Асьмелы дышетсконо ни Западын кадь сантехника но поттыны. Со сярысь кенешын вераськиз Правительстволэн Тӧроезлэн нырысетӥ воштӥсез Юрий Питкевич. Уд но малпа, но банклэн кивалтӥсьёсыз юн тунсыкъяськизы элькунамы вал вордонэз азинтонэн. Запад, пе, вал вордонэз но искусствоез азинтонэ коньдон жалятэк висъя. Г. РОМАНОВ. Махоркаен пуйы - нылызлэсь 1942 арез пумитан азьын 856-тӥ артиллерийской полкысь 313-тӥ стрелковой дивизия ожмаськиз Повенец город дорын. Самой соку отысь ожгарчиос Удмуртиысь пиналъёслэсь саламъёссэс басьтӥзы. Старшина Александр Яровлы шедиз махоркаен пуйы... аслаз Як-Бодья школаысь 3 классын дышетскись Валя нылызлэсь. Пуйы пушкысьтыз со таӵе гожтэмез лыдӟиз: "Гажано ожгарчи! Жуге фашистъёсты, мозмытэ атай музъеммес. Берытске вормонэн. Мынам атае но фронтын ожмаське". Нылызлэн гожтэтэз но саламез бурдъязы Яровез. Дивизиысь мукет солдатъёс но шумпотӥзы саламъёслы, выль кужым басьтӥзы кадь соос. Та учыр чярысь мон тодӥ Обороная министерстволэн архивысьтыз. Нош А. В. Яровен нырысьсэ пумиськи 1967 арын дивизилэн слётысеныз. Трос тунсыкозэ мадиз герой соку ачиз сярысь но ӵош ожмаськем дивизиез сярысь но. Карелиысь ожмаськем бервылъёсазы вуылыны мыным ӵектӥз. Куронзэ быдэстӥ. Вуоно араз ик Петрозаводск, Медвежьегорск, Повенец городъёс пыр ортчи. Тужгес синмаськи Повенецысь музейлы. Тросэз ӧз но тодылэ, Олонецкой губерниысь та пичи гинэ городэ ссылкае "всероссийской староста" Михаил Каланин келямын вал шуыса. Нош Быдӟым Отечественной война аръёсы татӥ фронт ортчиз. 1944 арын 18 июнёзь фашистъёсты азьлань шунды ӝужан пала лэзёнтэм вылысь татын лек ожмаськиз 313-тӥ стрелковой дивизия. Повенецын но со котырысь музъем вылын трос ожгарчиос быризы. Отын улӥсьёс али но утялтыса возё соослэсь шайвылъёссэс. Алигес пумиськылӥ Кыква школаын дышетэм пияшеным Герман Воробьевен. Вераськонмы потӥз 313-тӥ стрелковой дивизия сярысь но. Макем пайми, куке тодӥ Германлэн атаез Степан Воробьев одӥг полкын ожмаськемын Александр Яровен. Атаез Германлы вералляз, пе, махоркаен пуйы сярысь но. Жаляса верано, Александр Яров но Степан Воробьев улэпесь ӧвӧл ни. Виктор Поздеев, запасысь капитан. Удмурт Республикаысь Кун Кенеш, Правительство мур куректыса иворто Глазовлэн дано гражданинэз, Глазовысь Калык депутатъёслэн кенешсылэн исполкомезлэн азьвыл председателез Мусихин Анатолий Иванович улонысь кошкем сярысь но ӵыжы-выжыосызлы но матысь муртъёсызлы кайгыремзэс верало. Удмурт шаерез Ӟуч кунэн валчеясь Иван ИВ - быдӟым ӟуч князьлэн Василий ИИИ-лэн пиез. Ортчыт лек сямыз но вань улытозяз шӧтэм эрказъяськемъёсыз понна калыкын сое Грозный шуиллям. Улӥз Иван Грозный, 53 аресэ выжытозяз. Ӟуч кунэн эксэй луыса кивалтӥз 37 ар. Та дыр ӵоже Ӟуч кунэз со олокӧня пол бадӟыматӥз. Ӵапак соку куашкатӥз Бигер кунэз. Ӵапак соку ик Ӟуч кун борды валчеяз лымшор удмуртъёслэсь Арча огъялыксэс (княжествозэс) но. Лымшор удмуртъёсты ӟуч калыкен валчеякуз, Маргарита Гришкина профессорлэн гожъямезъя, Иван Грозный соослэсь дас кык азьветлӥсьсэс-кивалтӥсьёссэс быдтэм. Кызьы ивортэ "Русские цари. 1547-1917" книгаын (Ростов-на-Дону, Москва, 1997) кунгож сьӧрысь тодмо тодосчи Франк Кемпфер, Иван Грозный семьяын улон ласянь но каньыл шуоно вылымтэ. Та эксэйлэн сыӵеез яркыт адӟиське улытозяз сизьым пол кузпалъяськемысьтыз но. Иван Грозныйлэн нырысетӥ кышноез вылэм Анастасия Романова (со куать нылпи вордэм), кыкетӥ кышноез - Кученя Темрюковна (ӟуч нимызъя - Мария Черкасская), куинетӥ кышноез - Мария Собакина, ньылетӥ кышноез - Анна-Мария Колотовская, витетӥ кышноез - Анна Васильчикова, куатетӥ кышноез - Василиса Мелентьева, сизьыметӥ кышноез - Мария Нагая (одӥг пи вордыса вуттэм). Куке но "Наука и жизнь" журнал гожъяз вал: та нырысетӥ ӟуч эксэйлэн сизьым кышноез пӧлысь паймымон визьмо но, чебер но вылэм Василиса нимоез. Ӟуч калык выжыкылъёсы со пырем Василиса Прекрасная но Василиса Премудрая нимъёсын. Иван Грозныйлэн син шораз йӧтэм бусыысен, кыӵе ке губерниетӥ ортчыкуз. Василиса соку быземын вылэм ини. Тазьызэ тодэмез бере, Иван Грозный вӧзысьтыз адямиосыз пыр солэсь картсэ - дьякез - бышкалтыса виыны косэм. Со учыр вылэм 1579-тӥ арын. Выль картэныз Василисалы кема улыны кылдымтэ: вуоно араз ик кулэм. П. ПОЗДЕЕВ. Учкод - палёмод Та нуналъёсы Ижысь автозаводлэн Культура юртаз "Удмуртиысь покчи бизнес туннэ но ӵуказе" нимам адӟытон-ярмарка усьтӥськиз. Покчи бизнесын тыршисьёслэн валтӥсь директорзы Михаил Зайцев шуиз: "Та адӟытон Удмуртиысь покчи предприятиосты улӟытонын но соосты огазеянын нырысетӥ вамыш луэ. Валамон ини, бадӟым предприятиослэн кивалтӥсьёссы милемлы пумит, но ог-огмес Удмурт Правительствоен валаса ужаськом". Культура юртэ трос калык люкаськиз. Лыктэмзы юнме ӧз луы. Куамынлэсь трос пичи предприятиос асьсэлэсь ужам емышсэс возьмато. Мар гинэ татын ӧвӧл? Шарканъёс ваиллям керттэм, вурем, куэм дӥськут, пулэсь вӧлыса лэсьтэм пӧртэм арбериос. (Кивалтӥсьёссы Надежда Фёдорова, Владимир Шаркин). Шӧдӥське, котьма лэсьтэмын сюлэмлэсь вань шунытсэ сётыса, яркыт буёлъёсын. Учкиськод но синэз воштыны уг луы. Сарапулысь "Альвик" возьматэ-вуза сапег, ботинка, туфли пыдкутчанъёсты. Татын соосты вашкала дырысен лэсьто. Столицаысьтымы "Иж-велосипед" ЗАО (директорез Равиль Булатов) дас пӧртэм велосипед лэсьтэ, куатьсэ выставкае ваиллям. Ижысь "Нина" ИЧП (директорез Нина Чиркова) паймытэ яркытэсь пужыятэм панноосын но мукет чебер арбериосын, соос удмурт шӧмын - мылкыдын лэсьтэмын. Ирисс ООО (директорез Людмила Бочкарева) удмурт пужыен лэсьтэм-дасям дӥськутэныз бордаз кыске. "Мико" но радиозаводысь эштосъёс ческыт пӧрам сиёнъёсынызы шумпотто. Адӟытон-ярмарка туж тунсыко, татысь котькин аслыз ярамонзэ адӟоз-шедьтоз. Н. Возисов. Выставка ужаку. Туспуктэмъёсыз В. Камашевлэн. Шахмат Йылпумъяськиз ветеранъёс пӧлын шахматэн шудонъя Удмуртилэн первенствоез. Ӵошатсконъёсы пыриськизы 55 арес но мӧйыгес шахматистъёс. Ас ёзъёссы пӧлын вормисе потӥзы Иоган Вельтмандер (9 очко пӧлысь 7-зэ люказ), Владимир Федосеев (9 очко пӧлысь 7-зэ). Районъёсысь вуэмъёс пӧлын котькинлэсь кужмо луэмзэ возьматӥз Можгалась Рамзи Сайфуллин (9 очко пӧлысь 4,5). Нылкышноос пӧлын 12 мурт нюръяськиз. Чемпионка ним басьтӥз Тамара Евстратова (11 очко пӧлысь 9,5). Тамаралэсь кык очколы ӧжытгес люказы куинез шахматисткаос: Галина Белякова, Валентина Гринченко но Любовь Созонова. Куинетӥ интые потӥз Зинаида Иютина. Шахматэн тунсыкъяськисьёс ужрадэз ортчытыны юрттэмзы понна тау каро акциосын "Удмуртнефтегазстрой" огазеяськонлы. И. Шахов. Шумпотон Дано удмурт поэтлы Куӟебай Гердлы 100 ар тырмемен валче, та бадӟым ужрадэ итӥськыны ӧдъязы шаерысьтымы коньдон ужпумъёсын вырись структураос но. Кылсярысь, АКБ "СБС-АГРО"-лэн удмурт регионъя филиалэз гурт но ёрос библиотекаослы кузьмано кариськиз 250 экземпляр ӟуч но удмурт кылын поттэм Герд сярысь выль книгаосты. Та кузьымъёс вуэмын ни Воткинск, Алнаш, Сюмси, Ува, Красногорье, Пичи Пурга ёросъёсы. Удмуртъёс понна шумпотон ӧвӧл шат со? С. Петрова. Пукись вуэз ӧръяно Улон "питран" берга-берга но выльысь азьло интыяз берытске. Зэм ик, аръёс- дауръёс ортчыса, улон воштӥське, котырсконэз мукетгес луэ. 20тӥ-30-тӥ аръёсы кылдытэм МТС-ёсысь техника хозяйствоослы люкылэмын вал, нош берло аръёсы гурт хозяйствоын соослы кулэлык кылдӥз. Табере машина но техника возён станциос котькуд ёросын ужалозы. Озьы ик кызетӥ аръёсы НЭП вакытэ кылдэм покчи предприятиос но быдтэмын вал. Нош соос странамы понна туж трос кулэ ваньбур поттылӥзы. Али, сизьымдон ар ортчыса, покчи предприятиос шоры мукет синмын учкыны кутскизы. Покчи бизнесын поттэм ваньбурез адӟытон дыръя, ужбергатӥсьёслэн кивалтӥсьёссы Михаил Зайцев но Виктор Пушин пресс-конференция ортчытӥзы. Журналистъёслы верамын вал солэн нырысетӥ вамышъёсыз сярысь. 1993 арын 25 октябре Удмурт Правительстволэн кутэм постановленияз чакламын пичи предприятиослы юрттэт сётыны. Та ужез вырӟытон понна кылдытэмын Кенеш (Совет), кудаз пыро ужбергатӥсьёс, тодосчиос министерствоосын но ведомствоосын ужасьёс. Ньыль ар куспын ӧжыт ӧвӧл лэсьтэмын. Дасямын законъёс, котькуд аре кутӥське- пусйиське ужанъя программа. Покчи ужбергатонлы юрттон понна, Удмурт правительствоын но Комитет кылдытэмын. Со районъёсысь но городъёсысь пичи бизнесэн тыршисьёслы кулэ иворъёс вӧлмытэ, нодлыко валэктонъёс сётъя. Комитет умой кусып возе интыосысь администрациосын, отысь ужасьёсын семинаръёс ортчытъя, соосын ӵош районъёсын ваньбур поттӥсьёслы юрттэт сётонъя ёзъёс кылдытэ. Пичи предприятиослы юрттон понна, республикаямы нимысьтыз фонд кылдытэмын, нош бюджетын нимаз чурен уксё висъяны чаклаське. Фондысь коньдон чотын Ижевскын ужбергатӥсьёсты дышето, районъёсын консульпунктъёс усьтэмын. Ортчытъясько "Устоез ужбергатӥсьёс" нимо (Предприниматель года) конкурсъёс. Красногорск районысь ужтэк кылемъёсты но сӧсыръёсты пу вӧлон но куды кутан ужъёслы дышетэмын. Юрттэт сётонъя фонд покчи предприятиослы кредит висъялля, солэн процентэз банкен ӵошатыса пичигес. *** Покчи предприятиос ваньбур поттонзэс арысь аре будэто. Али Удмуртиын 7500 сыӵе коллективъёс. Та предприятиосын сю сюрс адями ужа, миым отын тыршисьёслэн лыдзы 14 процентлы йылӥз. Соос 1 триллион 925 миллиард манет тыр (вуж коньдонэн) ваньбур поттӥзы, республикаямы огъя ваньбурлэн со 9,2 процент люкетэз луэ. Москваен, С. Петербурген но куд-ог улосвылъёсын ӵошатыса, ӧжытгес. Республикамы Россиысь 89 республикаосты но областьёсты басьтыса, шор радын луэ. Али покчи предприятиослэн луонлыкъёссы вань выль вамышъёс лэсьтыны. Со сярысь пусйиз Федеральной Собрание вазиськоназ Россилэн Президентэз Борис Ельцин но. Н. ВОЗИСОВ. ДОКТОР ЛУИЗ "Ӟеч кышно - ӝыны юрт",- шуо удмуртъёс. Ӟеч тодосчи - ӝыны наука. Тазьы вераны луысал Анна Сергеевна Зуева-Измайлова, солэн кылтодон наукаын чупрес ужамез сярысь. 11-тӥ тулыспалэ Москваын, Литературая А. М. Горький нимо институтын, ортчиз солэн доктор диссертацизэ утёнэз. Тани визьмо, трос тодӥсь-валась профессоръёс азе потэ йыг-йыг удмурт кышномурт- тодосчи. Сайкыт вож дэремен, сяськаё чыртывесен. Синмаськымон. Анна Сергеевна аслэсьтыз "Удмурт литератураын языческой но христиан йылолъёс" нимо диссертацизэ институтысь тодосчиослэн кенешсы азьын уте. Анна Зуева татчы нырысьсэ вуэ 1973-тӥ арын, Удмурт кун университетэз йылпумъяса. Чупрес нылаш висъяське вал тодмо ӟуч профессорлэн Борис Корманлэн теориезлы дурбасьтэменыз но наукаын ас сюрессэ шедьтыны юн тыршеменыз. 1977-тӥ арын кылтодон наукаосъя кандидат луыса, наукаын ужанзэ азьланьтэ: Удмурт кун университетын тырше, статьяос гожъя, монографиос поттэ. Оглом 200-лэсь ятыр уж (удмурт, ӟуч, финн, эстон, венгер но англи кылын) дася. Кызь ар тыро-пыдо ужаса, нош ик кафедра сьӧры султэ: табере ини доктор диссертацизэ уте. Диссертантлы юанъёс сётъяло. Визьмо тодосчиос, диссертациез пыр-поч эскерыса, солэсь шекъёссэ шараяло, ӟеч интыоссэ пусъё. Диссертант маде, тодматэ, юанъёслы валэктонъёс сётэ. Диссертациез вылӥ дунъязы Казаньысь кун университет но куинь официальной оппонентъёс. Литературая А. М. Горький нимо институтысь кылтодон наукаосъя доктор, профессор Аветик Исаакян ӟеч кылъёсын пусъе диссертацилэсь куинетӥ люкетсэ. "Удмурт литератураысь христиан шӧмъёс" шуыса нимаське со. Кыкетӥез оппонент, Удмурт кун университетысь кунсьӧр литературая кафедраысь дышетӥсь профессор Анатолий Викторович Лашкевич, вера: - Анна Сергеевналэн ужез удмурт литературамес дунне литератураозь ӝутэ. Соин ӵош огкылысь кариське бускель Мордва кун университетысь профессор Андрей Иванович Брыжинский, куинетӥез оппонент. Залын пукисьёс но ас мылкыдзэс веразы. Литературая институтысь профессор Халык Кёраглы, трос юанъёс сётъя ке но, диссертацилэсь кулэлыксэ вылӥ дунъя. Удмурт кун университетлэн ректорез Виталий Анатольевич Журавлев шумпотэ, диссертациез утён Куӟебай Гердлы сӥзем юбилеен ӵош тупаз шуыса. Нош удмурт тодосчи, кылтодон наукаосъя кандидат Тамара Ивановна Тепляшина тодаз вае: - 70-тӥ аръёсы удмурт литератураез эскеронэ вуизы егит куараос. Анна Зуева соку ик чырмыт вал ини. Диссертаци утёнзэ йылпумъяса, А. С. Зуева-Измайлова тау кариз институтлы, отысь национальной литератураосъя отделлы. Угось татысь адямиос солы наукая сюрес вылэ йыгмыт султыны юрттӥзы. Анна Сергеевналэн дышетӥсез, Нина Николаевна Воробьева, тазьы шуэ азьвыл аспиранткаез сярысь: - Будӥз, юнмаз, ас сюрессэ лёгиз. Сюресты мед паськыталоз, Анна Сергеевна! Бадӟымесь вормонъёс тӥледлы! Маргарита СЕЛЬЧЕНКОВА, Удмурт Элькунлэн постпредствояз ужась. Эстониын пумиськонъёс Ошмес, куншет, тугрик... Малы ветлӥм ми Эстоние? Россиысь Кун Думалэн депутатэз Андрей Солуянов верамъя, Эстонилэсь но Удмуртилэсь кусыпъёссэс калык дипломатия шуоно амалэн юнматыны. Отчы мынонмылэн мукет мугез но вал. 1992 арын Ижысь механической завод Финляндие келяз 15 сюрс пистолет. Ыбылӥськыны дышетскон Иж-70 трослы ик пӧртэм ӧвӧл Макаровлэн пистолетъёсызлэсь. Вузъёс Эстониетӥ кошкыку, соосты эскеризы отысь таможенникъёс. Документын ичигес тӥрлык возьматэмын. Сое шӧдӥллямтэ Ижысь таможняын ужасьёс. Эстониысь Таможняя департамент таӵе валантэм югдурез сэрттыны-пертчыны куриз Таллиннысь судэз. Со куспын Удмуртиысь шонер гожтэм документъёс вуизы. Суд сыӵе учырез ӧз эскеры ни. Пистолетъёс ӧз вуэ Финляндие, ӧз берытске Удмуртие. Таяз учыре Таллиннысь суд вазиськиз Ижысь механической завод. 1993 арын 24 мае со пуктӥз: 7 июнёзь берыктоно яке вузэз, яке дунзэ. 1995 арын суд нош ик шонерен лыдъяз азьло решенизэ. Югдур озьы но ӧз тупатскы. 1996 арын 5 декабре суд лыдъя ни копак мукет сямен: заводлэсь куронзэ быдэстоно ӧвӧл. Эстониысь ми тросэзлэсь юалляським ышем пистолетъёс сярысь. Огъёсыз янгыш каро таможняез. Мукетъёсыз оскыто, ож тӥрлыкез депутатъёс асьсэ куспын люкылӥзы. Вузъёслэсь пытьызэс ӧм адӟе. Ижъёс пӧртэм ужрадъёс кутылӥзы. Депутат А. Солуянов но заводысь профкомлэн тӧроез В. Кушко кыл куризы вань удмуртъёслэн 6-тӥ ӧтчамазы, таиз вынлыко Эстонилы ас кылзэ мед вералоз шуыса. Россиысь Пыӵал тӥрлык поттӥсьёслэн союззылэн тӧроез М. Калашников гожтэт ыстӥз Россилэн премьер-министрезлы В. Черномырдинлы, та уже пыриськыны ӧтьыса. Пистолетъёсты со дунъя 45 сюрс доллар тыр. Эстониын милемын ӵош вал механической заводлэн ваньбур поттон удысысьтыз ӝожтӥськонъёсъя бюроен кивалтӥсь Семён Иванов. Таллиннын со вераськиз заводлэн но удмуртъёслэн ӧтчамзылэн нимынызы (таяз делегат вал). Ӧтчамлэсь Эстониысь парламентлы вазиськонзэ со сётӥз Юхан Ааре депутатлы. Таиз кивалтэ Эстониысь Кун Кенешысь Россиен куспын возёнъя группаен. Ӟуч но удмурт сямен Семён Петрович вольыт бӧтьыртэ. Со пусйиз: - Заводамы вить толэзь ӵоже уждун уг сётъяло ни. Пистолетъёслэн дунзы ӵоша кык толэзьем уждунлы. Нош мон ӧй лыкты, татысь ӵуказе ик быдэс мешок коньдонэн кошкыны малпаса. Вузлэсь дунзэ берыктыны вань музон амалъёс. Эстония сётыны быгатысал мукет вузъёс. Яке пунэмзэ тырыны Россилэн бюджетэз пыр. Мар мон вераны быгато заводысь эшъёсылы? Тӥ юрттоды шуыса туала оскон вань-а? - Одно ик оскелэ милям юрттонмылы, - шуиз Юхан Ааре. Удмуртъёслы дурбасьтыны мылкыд каремзэ пусйиз Кун Кенешлэн тӧроез Томас Сави. Таллинн дорынгес ужа вал дуннеысь финн-угоръёслэн огазеяськонзылэн конгрессэз. Ми отчы люкаськемъёсты но куримы вал таӵе ужпумъя ас малпанзэс вераны. Нош егитъёс милемды ӧзгес валалэ кадь. Ми, пе, выриськом культураен, политикае пыриськеммы уг поты. Россиысь но Эстониысь куд-ог журналистъёс та ужпум сярысь маскаръяськыса ивортыны выризы. Огез газет поттӥз таӵе йыръян: "Братья финноугрики, верните наши тугрики!". Вуз понна, пе, дун басьтыны кулэ славян но, тунгус но, калмык но. Таӵе ужъёсын вашкала огъя выжыез тодэ ваё ке, со паймымон ини. Малы бен паймонэз, финн-угор калыкъёс ас эшъяськонзэс пӧртэм удысъёсын азинтыны выро ке? Туж шумпотымон вал удмуртъёсын адскон. Соос милемды вокзалын ик пумитазы. Киязы пичи гинэ удмурт флажок. Ми соослы кузьмамы ни зэмос бадӟым удмурт куншет (флаг). Али Эстониын улэ ог 400 удмурт. Тартуысь вашкала университетын дышетско студентъёсмы. Удмуртъёс алигес кылдытӥзы "Ошмес" огазеяськонзэс. Соин кивалтэ егит кышномурт Татьяна Новожеева. Эстон эшъёс оскыто: сое пусъён (регистрация орчытон) ласянь нокыӵе шуг-секытъёс уз кылдэ. Трос пӧртэм пумиськонъёс вал Таллиннын. Табере ми но оскиськом: вынлыко Эстония пыд йылаз пумен йыгмытгес султэ. Россилы но дыр вуэмын сое зэмос кунэн лыдъяны но эшлыко кусыпъёс тупатыны. Тае ик пусйиз Россилэн Эстониысь посолэз но. Ӟучъёсты отын зӥбо шуыса весь черекъян нокинлы но пайда уз вайы. Тае огшоры калык валаз ни. Асьмеды герӟась биньгозыез мед кутозы политикъёс. Алексей Шкляев. Посольствоын пумиськизы Алексей Глухов но Андрей Солуянов. Эстониысь удмуртъёс шумпото удмурт куншетлы. Таллинн милям сюлмамы. Туспуктӥз Олег Кропачев. ФЕДЕРАЦИЯЯ СОВЕТЫН Алигес Федерацияя Совет эскериз Президентлэсь ветозэ. Со герӟаськемын музъемез вузан ваньбурлы пӧрмытонэн. Вылӥ Палата нокыӵе решение кутыны ӧз быгаты, уноез депутатъёс пумит луизы, нош 15-ез мылкыдзэ ӧз вера. Соос пӧлын вал Павел Вершинин но. Музъемез вузаны лэзён понна вераськиз Татарстан Республикалэн Президентэз М. Шаймиев. Но та ужез, пе, юн чакласа возёно, киысь лэзьыны уг яра. Сое возьматэ Саратов областьлэн опытэз. Нош Москва музъемез арендае сётэмез чотын кӧня коньдон поттэ. Тани республикамы гинэ удмурт представительстволы 4 сотка музъем понна 1.200 миллиард коньдон тыриз. Со 49 арлы сётэмын. Г. ВАСИЛЬЕВ. Толон, Атыкай музъеммес утисьлэн нуналаз, Ижысь ялан ӝуась тыл доры трос делегациос тыризы сяськаос. Шуд понна быремъёсты буре ваёнэ пыриськизы Кун Кенешлэн Тӧроез А. А. Волков, Правительстволэн Тӧроез П. Н. Вершинин, Россилэн Президентэзлэн Удмурт Республикае ыстэм муртэз В. В. Балакин, Ижлэн мэрез А. И. Салтыков, мукет кивалтӥсьёс, генералъёс, офицеръёс, ожысь но ужысь ветеранъёс. Ялан ӝуась тыл дорын. Спорт 14-15 феврале Москва дорысь Раменской городын ортчиз ипподрометӥ автомобилен ворттылонъя Россилэн чемпионатэз. Ижысь Сергей Балдыков отын вормисе потӥз. Нош кылем шутэтскон нуналъёсы Ярославьлын ортчизы спортысь та удысъя калыккуспо ӵошатсконъёс. Серге Балдыков отчы Антон Зиновьевен ӵош пыриськизы. Экипаж таяз учыре но азьпалан. Э. Васильева. Самой вакчи толэзь Тямыстон ар талэсь азьло (1918-тӥ арын 14-тӥ феврале) РСФСР-ысь совнаркомлэн декретэныз асьме странаын юлианской календарез воштӥз григорианскоез. Озьы та аре 31 январь бере нырысетӥ февраль ӧз луы, соку ик вуиз 14 февраль. 1918-тӥ ар Россилэн историяз самой вакчи ар луиз. Со 352 нунал гинэ кыстӥськиз. Та арысь февраль толэзь но самой вакчиез луиз. Озьы Советской Россилэн историысьтыз 13 нуналэз усиз, шуыны луоз. Шунды "12 вамыш" Сазьтӥськон Гажано удмурт эшъёсы, мынам тӥледлы газет пыр вазиськеме потӥз. Юись нылкышноосты но пиосмуртъёсты адӟыса, соин йырин курадӟись пиналъёс понна сюлэмы вӧсь луэ. Али мон тодӥсько ни, сю адями пӧлысь кызез вина юон висёнэн курадӟе. Мон ачим но пиналысен веръялляй, малпай, ваньмыз юись уг луы ук. Асме юыны быгатӥсьёс пӧлы пыртылӥ. Табере валай ни, со кызь адями пӧлысь одӥгез - мон. Дас сизьым арескам мыным макмыр вал ни, но курадӟонысь соку вина юытэк потыны быгатӥ. Кӧня ке дыр ортчыса, макмыр вылам вина юыны кутски. Уже ӵукна ке мыноно вал, ӵемгес но ӵемгес ӝытазеяз юылӥ. Собере кык но, куинь но нунал "шулдыръяськи". Одӥгпол озьы юэме бере уже лыктӥ. Киосы куалекъяло. Нош мыным киосын ужано, адямиен синмысь синме пуконо. Ас поннам соку валасько ни вал - юон мыным курадӟон гинэ вае, но со валанме пыдло ватылӥ кадь. Ачим малпасько, ӝоген ужанниям но ваньмыз тодозы. Мар возьыт со! Вина юонлэсь трос пол куштӥськыны турттӥ. Дыр ортче но, вань курадӟемъёсме выльысь вунэтӥсько. Пушкам каръяськем кыӵе ке но чер донгылӥз кадь монэ вина пӧлы, со шӧтэм кужымлы пумитъяськем ӧз ни луы. 1984 арын вал со. Ужам юыса лыктӥ, номыр карытэк нош кӧня ке гучык йылтӥ на. Собере кулон калэ вуи, ярам, эмъясьёс юрттӥзы. Ужанниям оскизы, уг ни юы шуыса, вылӥгес уж но дэмлазы. Но мон валай, со ужын асме возьматэме уз ни луы, соглаш ӧй кариськы. Табере мон ньыль но, вить но нунал люкиськыны ӧй быгатылы аракылэсь. Юэм берам, сюлэмам шимес луылӥз, калыклэсь возьдаськылӥ. Валаны кутски - кулон калэ вуисько шуыса. Умой ужамме лыдэ басьтыса, ужанниям ялан жалязы, ӧз уллялэ, арняен ке но ӧй поталля. Ветлылӥ юонлэсь эмъяськонние но. Кык-куинь толэзь ортчыса, ачим но валатэк, нош юылӥ. Семьяын но улонмы алама вал. Картэным керетылӥм, со монэ жугылӥз но. Ачиз но бен чырты сьӧртӥз ӧз киськалля. Юэм понна ог-огмес тышкаськылӥм ке но, куке соку ӵошен но бутылкаосты бушатъям. Али но син азям вить аресъем пиелэн синъёсыз, солэн юамез: "Мама, мар тыныд луиз?" Соку со нырысьсэ, лэся, валаз мынэсьтым кудӟемме. Кӧня аръёс ортчизы собере, кӧня кайгуэз, кышканэз, возьдаськонэз адӟоно луиз солы! Ярам, Инмар монэ но, пиме но ӧз кушты, утиз. Мон ньыль ар уг ни юиськы, кузпалы но куштӥськиз "вож кыйлэсь". Пие умой адями будӥз, университетэз быдтыса, пиналъёсты дышетэ. Мон мукет уже интыяськи, эшъёсы гажало, мон но асме ачим гажаны кутски. Кызьы бен мон, сыӵе шимес югдуре вуыса, кужым шедьтӥ выльысь улыны но улонэз яратыны? Со сярысь тӥледлы но вераме потэ. Оло, кин ке но лыдӟоз, малпаськоз улонэз сярысь, валалоз вина юон висёнлэсь кышкытлыксэ. Мон солэсь куштӥськыны быгатӥ, тӥляд но пӧрмоз, бадӟым мылкыд гинэ медло. Висёнэ мынам мургес но мургес пыриз. Алкоголизм шуон, одӥг пол лякиськыса, пырак улытозязлы адями бордысь уг куштӥськы. Кызьы сахарной диабетэн висисьёс сахарез уг сиё, озьы ик мон но вина юытэк улыны кулэ. Юон вакытъёсам мон ӵемгес но ӵемгес малпаськыны кутски, мар луэ монэн, кызьы та югдурысь потоно. Уллямзылэсь азьло ужысь кошконо луи, ачим ик куриськон гожтыса. Чоркак поннам кыли. Ужысь кошкыкум одӥг кышномурт шуиз, митэк, пе, тон забор улэ кулод. Мынам кулэме ӧз поты. Нош юэмысь дугдыны быгатымтэеным, бӧрдыса шуылӥ: "Кыӵе жади ни мон улыса". Зэмен но, мон котьмае пурысен гинэ адӟылӥ на, улонлэсь шулдырзэ ӧй вала ни. Но юымтэ дыръям кытысь ке нош ик кужыме потылӥз. Гуртын но, сад бакчаям но котьмар ужалляй. Озьы ке но, валасько вал, дыр ортчоз, мон нош ик юо. Винаез коть музъем пыдсы ват, номыр уз юртты. Пушкам каръяськем "вож кыез" нокызьы вормыны уг быгаты. Собере сыӵе малпан но йырам лыктылӥз. Мугоры висемысь ӝоггес дугдэ, нош лулы уг но йӧналля кадь, соин ик огнам ӧвӧл улоно, сыӵе ик юись адямиосты шедьтыса огазеяськоно. 1989-тӥ-1990-тӥ аръёсы кылӥ анонимной алкоголикъёслэн кыӵе ке но огазеяськонзы сярысь. Мон соослы гожтэт ыстӥ Москвае. Соос но мыным гожтӥзы. Табере малпасько ни, мон ачим йӧнатскыны быгато. Но озьы ӧз луы. Ужтэк, огнам кылемын. Куинь ар кулэ луиз на валаны - висёнме мон огнам уг вормы. Туж секыт дыръя черке мынылӥ, асме мукет пала берыктонъя пӧртэм амалъёс утчай. Лыдӟылӥ юон но юон висён сярысь гожъямъёсты. Озьы мар но со валаны кутски. Одӥг пол кыӵе ке газетысь лыдӟи, кулон гинэ, пе, адямилы улонзэ воштыны уг сёты, секыт ке, тыныд, шедьты кинлы уката секытгес но юртты солы, соку тыныд капчигес луоз. Адямилы туж секыт ке, со Инмарлы вазиське. Мон но ньыльдон арес тырмем бере Инмарез валай, солэсь юрттэмзэ шӧдӥ. "Выль иворез" лыдӟылӥ, ваньзэ ӧй вала ке но, дышетскыны ветлылӥ. Ӵукна вазь султыса бызьылӥ, пӧсь но кезьыт вуэн пыласькылӥ. Улонлы шумпотонэ кылдӥз, но дырын-дырын тодам лыктылӥз, мон вина юонэн висисько шуыса. Сыӵе дыре монэ пӧсь вуэн пылатылӥзы кадь. Туж кышкалляй угось, кызьы уло, мар луоз азьланяз? Возьыт вал азьло юэме, асме кызьы воземе понна. Нош ужаны кытчы интыяськод? Туж шуг луысал кытчы ке пырыны. Юалозы азьло ужысьтым малы кошкемме, жингыртыса мугзэ тодозы. Азьло сыӵе дыре мон юысал ни, нош табере быгатылӥ возиськыны. Одӥг пол телефон жингыртӥз, тӥледын, пе, Москваысь верасько, нимез шараятэк огазеяськем юисьёслэн информационной службаысьтызы. Кыӵе, пе, улӥськоды, юрттэт кулэ-а, кызьы юон ласянь? Мон уйвӧтын кадь кылски. Шуисько, кытчы бен юонме каром на, но тыршисько сазь улыны. Воргорон пумитам капчияк серектӥз, ми но, пе, тыныд юрттом. Шуэ, вань сыӵе программа нимаське со "12 вамыш". Соя юисьёс нимзэс шараятэк огазеясько но ог-огзылы юонлэсь куштӥськыны юртто. Жингрытӥселэн нимыз Владимир, гожтэтме шедьтэм архивысьтызы. Со но мон сямен ик вина юонэн висись мар ке вылэм. Владимирен ми пумиським 1995 арын Россиысь нимзэс шараятэк огазеяськем юисьёслэн (алкоголикъёслэн) форумазы. Кыӵе тон воштӥськем, шуэ, телефон пыр нырысь вераськыкумы куараед но шайгуысь кадь кылӥськиз. Владимир сяна, со секыт вакытэ мылкыдме ӝутыны юрттӥзы на одӥг кышномуртлэн гожтэтъёсыз. Та адямиос ик мынам, ӟуч сямен вераса, духовной спонсоръёсы луизы. Форумысен мон шуи, Ижевскын но сыӵе огазеяськон луоз. Мае ке туж-туж лэсьтэмед потэ ке, кужым но шеде вылэм. 1994 арын 16 декабре ми нырысьсэ дас ньыль кузя люкаськылӥм ни вал вина юонлэсь куштӥськон сярысь вераськонэ. Табере Ижевскын кык сыӵе огазеяськон, нырысетӥезлы куинь ар тырмиз ни. Нош Глазовысь сыӵе огазеяськонлы кык ар луиз. Мон выльысь вордӥськи кадь, вина юон сярысь уг но малпаськы табере, семья куспамы но каньыл луиз. Туж гажасько огазеяськонысьтымы эшъёсме. Шумпотӥсько, дорамы лыктыса кин ке юонлэсь куштӥськыны быгатэ ке. Данъяськисько адямиослы юрттыны быгатэмелы. Газет пыр вазиськисько лыдӟисьёслы но. Кинлы ке юрттэт кулэ яке кыӵе ке юанъёсты кылдӥзы, жингыртэ яке гожтэтэн вазиське. Галина. АСЬМЕ НЕФТЕЗ АСЬМЕОС ПОТТОМ Элькунысьтымы Правительстволэн Президиумезлэн берло кенешаз лэсьтэмын Патраково, Турецкой но Центральной интыосын му вӧй (нефть) утчанлы но поттонлы сӥзем конкурслы йылпумъянъёс. Со понна нюръяськиз Россиысь вить компания - "Кама-нефть" (Пермь), "Ритэк" (Москва), "Уралнефтегаз" (Ижевск) но Удмуртиысь "Удмуртгеология", "Чепецкое НГДУ" но "Удмуртиысь нефть компания". Та ужрадэ пыриськемъёслэсь ӵектонъёссэс чакласа но кӧня пайда сётыны быгатэмзэс лыдэ басьтыса, комиссия вормисен лыдъяз "Удмуртиысь нефть компания" огазеяськонэз. Солэн кужымез но коньдонэз вань. Озьы компания проектын чаклам мында нефть кыскыны быгатоз: нырысетӥ дас арскын - 6 миллион тонна, яке сомында, кӧня ар ӵоже кыске туж бадӟым "Удмуртнефть" огазеяськон. Со дыр ӵоже кунмы пӧртэм тыронъёс чотын 1 миллиард манет уксё басьтоз (выль коньдонэн). Р. ДАНИЛОВ. Конкурс Национальной библиотекаын куинь нунал ӵоже экономикалы но бизнеслы сӥзем семинар ужаз. Та удысын тодон-валанъёсты будэтонъя "Евразия" фонд конкурс ялӥз. Отчы пыриськыны быгатэ котькудӥз мылкыд карись, аслаз ужан программаезлы проектэныз. Устоосыз проектъёс коньдон премиосын пусъемын луозы. Валантэм юанъёсын вазиське Национальной библиотекае. Наталь Кӧс шыд но зумыто Пичи Пурга ёросысь Чутожмон гуртысь Быковъёслэн семьязы тросэзлы адӟем карымон. Полина Степановна но Анатолий Дмитриевич куинь нылпи будэтӥзы. Коляен данъясько тодмо суредась луэменыз, уго солэн кивалтэмез улсын кылдӥз Ижевск городлэн гербез. Нылъёссы солэсь бере уг кылё. Можгалась педучилищеез йылпумъяса, Валя ужаны кутскиз Ижевскысь 67 номеро школаын. Удмурт кылэз гажамез вуттӥз сое удмурт национальной центр сад-школае. Усто дышетӥсь сяна, Валентина Анатольевна адӟем карымон на семьяяз но. Тупаса улӥсь кузпалъёслы кӧс шыд но шуд вае, пе. Порцевъёслэсь семьязэс но шудоен лыдъяны луоз. Кузпалыз Александр Германович яратэ пулэсь пӧртэм арбериос лэсьтыны. Солэн киужъёсыз корка пушсэс но шулдырто. Нош Дима пиез умоесь отметкаосын шумпоттэ. Семьялэн шунытэз нылкышно бордын возиське. Нош мар малпа та пумысен ачиз Валя? - Нылкышно, анай ке тон, лу котыр ласянь адӟем карымон, дӥсьтӥсь, верам кылыдлы кузё луись, эшъёстэ но семьядэ валтыны быгатӥсь. Огкылын вераса, бадӟым букваен адями. В. Кутузова. В. Порцева. Туспуктэмез В. Камашевлэн. Тегеран - Ижевск "ТОЛДЫ КЕЗЬЫТ, НО МИЛЕМЛЫ ЯРА", - шуизы Иранысь куноос Кык нунал ӵоже Удмуртилэн столицаяз ужаз Иранысь делегация, ваньмыз 9 мурт. Кивалтӥсьсы доктор Сейед Мустафа Сафави, дышетонъя, наукая но техникая министрлэн воштӥсез, Ижевскен азьвылгес тодматскиз ни. Лыктэм куноос пӧлын - ваньмыз сямен инженеръёс но докторъёс - спутниковой связез радъянъя специалистъёс. Пусйыны кулэ, Иранэн кусыпъёсмы пумен паськытало. 1997 арын та странаен вузкарон вуиз 6 миллион долларозь. Удмуртия пӧсь шаере келя мотоциклъёс, станокъёс, нюлэс. Отысь вуо сиён-юон, дӥськут но калыклы кулэ луись пӧртэм пумо вузъёс. Иранын но асьме республикаын кылдытэмын ӵош ужась предприятиос. Огкылысь ужан ӟечсэ гинэ вае Россия понна но. Таиз пумиськон - калыкъёс куспын эшъяськонын азьлане эшшо одӥг вамыш. Иранысь делегация тодматскиз Ижевскысь государственной технической университетэн, вуылӥз спутниковой связьлы аппаратура поттонъя предприятиосы. Кык арня ортчыса, Иранэ мынозы Удмуртиысь представительёс. Лымшор государство та выллем кусыпъёс огвакытэ тупатэ США-ен, Франциен, Китаен. Быръёз выли ӟечлыко, оскымон оборудование поттӥсь предприятиез. Спутниковой связьтэк уго огез но ассэ гажась страна туала вакытэ улыны уг быгаты, со - быдэс дуннеен кусып возён. Л. МЕДВЕДЕВА. Ӵошен капчигес вормыны Россиысь калыклэн патриот союзэз (НПСР) одӥг ар но ӝыны талэсь азьло кылдытэмын. Алигес республикаысьтымы НПСР конференция ортчытӥз. Та кенешонын одӥг быръён ёзэ огазеяськизы КПРФ, Аграрной партия но солэн профсоюзэз. Быръёнъёсын угось ӵошен капчигес ужаны. Тани Иж городысь думае депутатэ 28 адями кандидатэ ӵектэмын ни. Соос пӧлысь 23-езлы витьтон арес но ӧвӧл ай, 2-ез наукая доктор, 4-ез наукая кандидатъёс. Дас куинь адями пӧлысь Ижысь мэре кандидатэ дэмламын Сергей Савичев. Сергей Юрьевич вордскемын 1964 аре Камбарка районысь Кама посёлокын. 1986-тӥ арын Ижысь механической институтэз йылпумъяз. Отын дышетскыкуз стройотрядъёсын кивалтӥз. Ньыль ар Иж городысь Комсомоллэн комитетаз ужаз. Али Сергей Савичев "Удмуртгражданпроект" институтысь директоръёслэн кенешенызы (советынызы) кивалтэ. Со Кун Думалэсь депутатлэн Николай Сапожниковлэн юрттӥсез. Пресс-конференциын вераськизы но сое нуизы Удмуртиысь КПРФ-лэн рескомысьтыз секректарьёс Юрий Семёнов но Владимир Бодров. Соос пусйизы, кандидат егит ке но, улонэз вала. Ижын улӥсьёслэсь вань сюлэмшугъяськонъёссэс тодэ. Н. Возисов. "Гердэ" Паймытэ монэ улонмы Маин меда ӵошатыны луысал туала улонмес? Бекыраса, ӟукыртыса, мырдэм-мырдэм азьлань мынӥсь уробоен шат? Отысь ваньбурез но угось, йылэм интые, пумен киргаса кыле. Туала кивалтӥсьёсмы ваньбур поттонэз но будэтыны уг пӧрмыто, дась люкамзэ но кир-пазь карем выллем, чаклатэк куто... Трос ужпумъёсъя вераськыны малпасько вал асьме калыклэн ВИ Ӧтчамаз. Кыл ӧз сётэ. Мукетъёсызлы но малпанъёссэс, дэмланъёссэс усьтыны кулэ вал угось. Нырысь ик, вераны чакласько вал огъёсызлэн ялан узырмемзы, нош начаръёслэн пумтэм кырадӟемзы сярысь. Кивалтӥсьёс, тросэз чиновникъёс уго толэзяз 10-20 миллион манет, пе, вуж уксёен лыдъяса, уждун басьто, нош ваньбур поттӥсьёс, пенсионеръёс, бюджет чотын улӥсьёс - ог 250-300 сюрс манет гинэ. Ма, нёшто сое ӧжыт коть калык радъягес тупатыны уг луы? Кудысьтыз ке газетысь мон лыдӟи, Федерацияя Кенеше сюрес муртъёс, пе, котькудӥз араз сомында коньдонэз быдто, соин кӧня кулэ луысал арбыт сюдыны 2 сюрслэсь ятыр пенсионеръёсты! Президент но, мукетъёсыз но уно пол вераллязы, чиновникъёслэсь лыдзэс кулэстом шуыса. Улонын чылкак мукет сямен кошке. Асьме доры но тани ыстӥзы Россия Федерацилэн Президентлэсь нимысьтыз адямизэ. Солэн штатэз вань на ай. Соослы кӧня тыре казна: вылаз ик, Удмуртие сыӵе муртэ ыстэмзы асьме калыкез сантэмам выллем луэ ук. Ма, собере Президент ачиз меӵак ветлыса но, указъёсыз пыр но кивалтыны быгатэ ук. Государственной органъёс пыр но, связь пыр но. Вань уно мукет амалъёс. Вылӥысь адямизэс ыстэмзэс озьы валасько: удмурт калык, пе, ас куназ кузё ӧвӧл. Ӧтчамын мон вераны ӧдъясько вал М. Кокорин сярысь но. Укыр лек гожъя со удмуртъёс сярысь, паньсаны тырше кадь асьме калыкез. Съездын кӧяса-вӧяса вераськиз ке но, одӥг кылызлы но ӧй оскы. Тани нош ик со чутрак пумит кариське Ижын удмурт куала усьтонлы. "Удмурт вӧсь" отчы милям Камбаркаямы выллем кышкыт химической пыӵал тӥрлык - люизит - возьыны кеносъёс пуктыны уг чакла ук. Люизит сярысь мургес ке верано, таиз но асьме музъем выламы ваемын вылэм, калыкмылэсь юатэк-вератэк. Кышкыт интыын улэммы сярысь ми тодӥм кӧня ке ар талэсь азьло гинэ. 6000 тоннналэсь ятыр ядэн артэ улӥськом. Марысь мар ке, быдэс улосмес сутоз ук со. Тодосчиослэн чакламзыя, таӵе кышкыт ядэз поттон но возён асьме шаермылы, калыкмылы бадӟым изъян вае. Табере тушмонэз быдтыны лэсьтэм эзель, асьмелэн лек тушмонмылы пӧрме ни. Россилэн, шӧдске, сое каньылэн, нокыӵе кышкытлыклэсь быдтыны кужымез но уг тырмы ни. Сое Кам дурысь нуыны но, сутыны но нокыӵе йӧскадь технология кылдытымтэ на. Ялан вераськыса гинэ уло кивалтӥсьёс но, Обороная министерство но. Таӵе бадӟым кышкытлыкен меӵак артэ улӥськом бере, калыклы коть пичильтык компенсация - уксё мед тырозы вылэм. Таиз ласянь но закон уг куто. Коньдон ӧвӧл, шуо, нош учконо ке, чиновникъёсты кулэстэм чотын гинэ но мар ке со лэсьтыны луысал, дыр. Москваысьёсыз но, татысьёсыз но кивалтӥсьёсмы шуг югдуре шедем калык сярысь уг сюлмасько бере, Инмар мед утёз ини ваньмес. Нош ми, ёросысь удмуртъёс, номыр шоры учкытэк, ас улонмес шулдыргес карыны тыршиськом. Районамы фольклоръя кык ансамбль кылдытэмын. Арлы быдэ сямен Башкириысь удмуртъёсын, Ижысь ӵыжы-выжыосынымы пумиськылӥськом. "Удмурт кенешлы" тӧрое бырйимы улон-вылонэз умой валась, политикае но мылысь-кыдысь пыриськись муртэ В. К. Тубыловез. Азьвылъёсыз отысь кивалтӥсьёс камбаркаослы тырмыт ӧз юрттэ, кусыпмы но лябгес вал. Оскиськом: табере огазьын умойгес быдэсъялом ас азямы сылӥсь ужпумъёсмес. Огазеяськонмы юнгес пезьдэт мед сётысал асьме калыкмес сантэмасьёслы но урод карыны турттӥсьёслы. Вань калыкъёсын уртче улыса, ужаса гинэ ӝоггес умоялоз улон. Ф. Кабиров, "Удмурт кенеш" огазеяськонлэн Камбарка ёросысь ёзэзлэн кивалтӥсез. "Гердэ" Дано бӧлякмылы сӥзьыса "Удмурт кенеш" огазеяськон туж умой ортчытӥз Куӟебай Гердлэн вордскеме дырысен 100 ар тырмемлы сӥзем сӥё-дано ӝытэз. Кун филармоние трос калык люкаськылӥз. Ветлӥзы ваньмысьтыз сямен ёросъёсысь куноос. Операя но балетъя тетарын сямен ик, нош пумиськылӥм яратоно артистъёсынымы, кылбурчиосынымы, крезьгурчиосынымы. Кызьы гожъям ни, "Удмурт кенешлэн" Тӧроез Валентин Тубылов праздникын ялӥз, Куӟебай Герд огазеяськонмылэн Данъян книгаяз пыртэмын шуыса. Та сярысь свидетельствоез со сётӥз Юрий Чайниковлы (Гердлэсь ӵыжы-выжызэ адӟиськоды снимок вылысь. Со вераське Пичи кенеше быръем муртэн Екатерина Спиридоноваен. Таяз программае куд-ог ватсанъёс пыртэмын ке но вал, мултэс ӧй луысал, вылды, выль авторъёсты но утчаны. Вис дыръя мыным тани вазиськиз кылбурчи Семён Перевощиков. Туж, пе, лыдӟеме потэ К. Гердлы сӥзем кылбурме. Дэмлай президиумлы вазиськыны. Ӧз дӥсьты, лэся, Семён Андреевич. Нырысьсэ адӟи сое сыӵе кепырась мылкыдын. Кылбурез сцена вылысен ӧз чузъяськы. Мон кури сое "Герд" баме печатланы. Лыдӟи но гуньдӥ: Куӟебай Гердлэн ыбонзы азьын верано кылъёсызлы, мылкыдызлы туж тупало отысь чуръёс. Лыдӟе, одно ик лыдӟе кылбурез, гажано эшъёс! К. Ломагин. Туспуктӥз В. Камашев. Семён Перевощиков Кылӥсько Гердлэсь куаразэ Зари шундыез мон гажай но кырӟай, Бадӟым кужымзэ шӧдыса, тодыса. Удмурт калыклы ӟеч кылме вералляй, Дэмен кизьыны, араны ӧтьыса. Зарни шундые но удмурт калыке, Тани тӥ дорысь весяклы кошкисько. Пичи но ӧвӧл азяды сьӧлыке, Сое валаны, оскыны курисько. Лулы, мугоры пушкысьтым потыса, Уз кошкы сьӧрло но уз лоб палэнэ. Вирен ӵабышъям чуръёсме октыса Ваёз но кельтоз улонэ-вылонэ. Ӧд уте, ӧд валалэ, кин сыӵе Герд, Ӧй вал мон кирос но уг луы оброс. Кысэ сюлэмы, шайгуысь мон уг берт, Я, сайкалэ, султэлэ, уд выжыос! Ачим тӥледыз ӟыгыръяй но шунтӥ, Сяська мерттыны жуг-жагез урыны. Асме но ӧй жаля, визьме но сётӥ Шудо улонэз лэсьтыны, дурыны. Сюрес шорысен бырисько, кулӥсько, Эн бӧрдэ, эшъёс, но эн чигиське, эн. Уно выль ужъёс азьпалан адӟисько, Сэзь вамыштэ Тӥ пумитаз шундылэн! Удмурт парламентын Одӥгез пытсаськиз, мукетыз усьтӥськиз Зэмзэ но, уд вала та депутатъёсты, мар понна соос нюръясько, мар сярысь сюлмасько. Вераськон нош ик мынэ Удмуртилэн Конституцияз воштонъёс но ватсанъёс пыртон сярысь. Депутатъёс-коммунистъёс огпала шонско, городысь кӧняез ке - мукет пала. Тӥни соин ик парламент нокыӵе решение кутыны уг быгаты. Питранэ юри боды пуктэм кадь луэ. Но та ужпумез котькуд ласянь котькызьы бергаты, одӥг ярдуре одно ик вуоно. Тазьы улыны уг яра, та ужпумез йылаз-пумаз вуттонлы кӧня дыр, кӧня кужым быдтэмын ни - сое нокин уз вера, номырин уд но лыдъя. Но сессиысь куд-огез депутатъёс кошкемен, парламент Конституцие воштонъёсты но ватсанъёсты газетъёсын печатлан ласянь нокыӵе документ ӧз куты, шуыны луоз. Соосты печатлан понна 43 депутат гинэ куаразэ сётӥз. Куд-огез депутатъёс сое умойтэм решениен лыдъяло, сессиын, пе, кворум ӧй вал. Тӥни соин ик депутат Николай Юшков но мукетъёсыз воштонъёсты но ватсанъёсты печатално, пе, 43 депутатъёслэн нимынызы гинэ. Оло, озьы ик кароно, калык мед тодоз Удмуртилэн Конституцияз кыӵе выльдонъёс дэмласько. Нуназе бере, кык но ӝыны часэ усьтӥськиз Кун Кенешлэн 17-тӥ сессиез. Кызьы азьло ик ивортылӥм ни вал, со быдэсак сӥземын луоз туэ арлы бюджет кутонлы. Соин ик эскероно ужпумъёс ичи чакламын. Нырысь учкемын вал ньыль гинэ. Но кык комиссиослэн тӧрооссы Аркадий Малков но Геннадий Абросимов куризы на таӵе ужпумъёсты эскерыны: "АПК-ын секыт югдур кылдэм сярысь" но "Депутатъёслэн Игорь Казанцевлэн но Александр Ушаковлэн полномочиоссы сярысь". Кыкез соос повесткае пыртэмын. Дас сизьыметӥ сессия туэ социально-экономической азинсконъя программаез но бюджетэз сяна, озьы ик учкоз на кадръёс но Россилэн Президентэзлы вазиськон ыстон сярысь ужпумъёсты. Но туннэ меӵак пусйыны кулэ, куд-огез депутатъёс (Анатолий Салтыков, Валерий Фридрих) чутрак пумит вал бюджетэз эскерыны. Анатолий Иванович, кылсярысь, ватсаз, бюджет, пе, калыклэсь куронъёссэ быдэсъяны уз юртты. Отын чакламтэ улон юртъёсты, нылпи учреждениосты возьыны юрттэт (компенсация), калыкез дышетонлы книгаос поттон, культура, бюджет удысын ужасьёслы уждун будэтон, промышленностез азинтон но мукет. Бюджетэз эскерон понна 57 депутат куаразэ сётӥз, 7-ез пумит вал. Социально- экономической азинсконъя доклад лэсьтӥз элькунысьтымы экономикая министр Евгений Аверьянов, нош со доклад - Кун Кенешысь Экономикая но бюджетъя комиссилэн тӧроезлэн воштӥсез Софья Широбокова. Бюджетъя вераськиз коньдонъя министр Владимир Бельтюков. Депутатъёс докладчикъёслы уно юанъёс сётъязы, уката ик трос Владимир Васильевичлы. Со валамон. Бюджетын нокинлы тырмыт уксё висъяны учкымтэ. Тани депутат Иван Абрамов (ИжГТУ-лэн ректорез) юа, малы, пе, коньдон висъяське Кадръёс дасянъя урал центрлы, куке солэн лицензиез но ӧвӧл. Жаляса вераны луэ, коньдонъя министр валэктон сётыны ӧз быгаты. Кыӵе бен луоз туэлы бюджетмы? Кун бюджетлэн доход люкетаз 2366922 сюрс манет уксё пыртыны чакламын, нош расходъёсыз 3003907 сюрс манет луозы, отчы уг пыро бюджетэ пырисьтэм фондъёслэн 1674386 сюрс манет коньдонзы. Тӥни озьы Кун бюджетын али 636985 сюрс манет коньдон уг тырмы, яке 27,8 процент. Мукет сямен вераса, со дефицит луэ. Федеральной бюджетысь трансфертъёс чотын 600000 сюрс манет висъяны учкемен. Кун Кенешлэн 17-тӥ сессиез толон ужаз, депутатъёс эскеризы туэлы социально- экономической азинсконъя программаез но бюджетэз. Со сярысь вералом вуоно номерын. Г. Романов. Ӧтё куас сюресъёс Кинъёс соос, кудъёсызлы сӥзисько ӵектонъёсме? Мултэс вамыш лэсьтыны, куасэн нискыланы яратӥсьтэмъёс. Соос яке тазалыксылэн юнэзлы оско, яке солы дыр уг шедьто. Нош пӧртэм пумо упражнениос улон кужым пыӵато, мылкыдэз бурдъяло, тужгес но куасъёс. Тӥни малы нискыланы потыны ӵектӥсько нырысетӥ усем лымы вылтӥ ик. Куасэн нискылан дыръя мугорысь вань сӥль быгытъёс ужало, вир огъя ветлэ. Шоканы кулэ озьы, кызьы тӥледлы капчигес. Маин эшшо висъяське на куасэн нискылан мукет упражнениослэсь? Мугорлэн бӧрсьысь бӧрсе золтӥськеменыз но лябӟеменыз. Озьы пуш ёзъёс огъя юнмало. Куасъёслэн пайдазы сярысь трос вераны луэ, соин ик кӧня ке ӵектонъёсмы. Нырысетӥ нуналъёсаз нискыласа 8-12 иськемлэсь трос ортчоно ӧвӧл. Ӝоглык сярысь эн малпаське. Дыр ортчыса, мугорды ачиз куроз куд-ог иськемъёсты чалякгес ортчыны. Арняяз ӧжытсэ куинь пол нискылано, 30-60 минут дыр ӵоже. Ватсаса вералом на, куасэн нискылан вакыт пыдын бызьылонэз, упражнениосты вунэтоно ӧвӧл. Соослы дырдэс гинэ ӧжытгес висъяны луоз. Тазалыктэс юнматонъя визь-кенеш басьтыны быгатоды Свобода урамысь 187 номеро юртысь. В. Лямина, тазалыкез юнматонъя диспансерысь врач. ТАЗАЛЫКЛЭН НУНАЛЭЗ Кез. Ӟеч сямлы пӧрмиз районын тазалыклэсь нуналзэ ортчытъян. Нырысь Кез шор ёзо школа сое ас понназ радъялляз. Бӧрысь ужрадэ быдэс район кыстӥськиз. Со сяна, куное вуылыны мылкыд каризы бускель районъёсысь, Пермь областьысь спортэз яратӥсьёс. Тазалыклэн нуналэз берлозэ татын кылем шутэтскон нуналъёсы ортчиз. Котьку сямен ик трос калык люкаськылӥз. Е. ОРЛОВА. "Гердэ" Азьлане ӧтисьмы Куӟебай Герд но удмурт школа Элькунамы нырысетӥ удмурт школалэн тодметъёсыз кылдӥзы ЪИЪ даурлэн пумаз но ЪЪ даурлэн кутсконаз. Ӵапак со вакытэ калыкез югдытӥсьёс И. С. Михеев, И. В. Яковлев, Н. И. Ильминский, Г. Е. Верещагин трос кужымзэс сётӥзы удмурт школалэсь инъетсэ кылдытонлы. 1872-тӥ арын Казаньын усьтэмын вал нырысетӥез инородческой учительской семинария. 1883 арын Карлыган черкогуртын, Ильминскийлэн юрттэмезъя, Кузьма Андреев усьтэ удмурт дышетӥсьёсты дасянъя нырысетӥ школа. Калыкез югдытӥсьёс озьы ик трос сюлмаськизы устоесь учебникъёс но методика ласянь юрттэтъёс дасян сярысь. И. Михеевлэн "Сочинения по картинкам" пособиез, кылсярысь, 17 пол поттылэмын но школаосы вӧлмытэмын вал. Тужгес но сэзь, йыгмыт вамышъёсын удмурт школа азинске 1920-тӥ-30-тӥ аръёсы. Соку кылдытэмын но поттэмын вал асьмелэн но нырысетӥез удмурт "Букварьмы", "Лыдӟон книгамы", "Удмурт кыл грамматикамы". 1934-тӥ арын вордскем кылынымы поттэмын 22 пумо учебник. Вераны кулэ тани мае: начальной школалы учебникъёс нимысьтыз кылдытэмын вал, нош 5-тӥ - 7-тӥ классъёслы биология, география, история - ӟучысь удмуртэ берыктыса. Та удысын тужгес но ӟеч ужазы Михеев, Прокопьев, Глезденев, Ильин, Ларионов но мукетъёсыз. Ӵапак та вакытэ общественно-педагогической улонэ мыло-кыдо вань визьзэ-кужымзэ, тодонзэ сётыса пыриське Куӟебай Герд но. Дышетсконзэ йылпумъяса, со ужа Бадӟым Учаысь школалэн кивалтӥсез луыса, собере Малмыжын дышетон отделэн кивалтэ. Та аръёсы тужгес но яркыт усьтӥсько-шӧдӥсько К. Гердлэн визьмо кивалтӥсь но ужъёсты усто радъясь луэмез. Со трос кужымзэ сётэ удмурт кадръёс дасянлы. Москва пыр быгатэ Выль Мултан черкогуртын педучилище усьтыны. Со вал шаерамы кыкетӥез таӵе училище. Отын ачиз ик дася дышетӥсьёслэсь тодонъёссэс муромытонъя пӧртэм курсъёс, лыдӟе педагогикая но методикая тунсыко лекциос. К. Герд уно пол пусйылэ: удмурт пиналэз визьмо будэтон, солы муресь тодонъёс сётон, ӟечесь сямъёс пыӵатон понна, нырысь ик техникумъёсын но институтъёсын дасяно кужмоесь кадръёс. Удмурт шаерамы институт усьтоно. "Гудыри", "Ижевская правда" газетъёсын печатлам пӧртэм статьяосыз пыр со удмурт но ӟуч кылын вазиське дышетӥсьёслы но нылпи садын ужасьёслы: пиналлы ӟечесь тодон-валанъёс сётон понна, дышетӥсь нырысь ик ачиз мур гажаны кулэ анай кылзэ. Тани "Вордскем удмурт кыл" но "Малы удмурт кыл кулэ" статьяосын Куӟебай Герд пыкылэ дышетӥсьёсты, кивалтӥсьёсты, тужгес но партийной ужасьёсты, ас кылзэс гажамтэзы понна, со гинэ ӧвӧл ай, ас кылзэс ултӥяны, саптаны тыршемзы понна. Со дыре ик Герд вазиське удмурт крестьян калыклы но, озьыен, шуом, анай-атайёслы но, удмурт кылзылэсь палэнтӥськемзы потэ шуыса. Со вакытэ ик со крестьянэзлы дурбасьтэмез но потэ кадь. Валэктон сётэ. Дауръёсын удмуртэз ултӥяса, серекъяса воземзы бере, удмурт кылэз мыскыл каремысьтызы, крестьянлэн осконэз кысэмын ини, пе. Калыклэсь таӵе усем-кысэм мылкыдзэ ӝутон понна, шуэ со, нырысь ик ӝутоно удмурт кыллэсь данзэ. К. Гердлэн школаен, национальной тодонлыкен герӟаськем вань ужъёсаз шорсюлэмыз, валтӥсь малпанэз луэ вордскем кыл, удмурт кыл, сое утён; солэсь узыр, чебер но мусо луэмзэ возьматон; солэсь обществолы кулэлыксэ ӝутон, сое гажан мылкыд. Быдӟым ӟуч педагоглэсь К. Д. Ушинскийлэсь дышетэмъёссэ чакласа, Герд выльысь но выльысь валэктэ: пинал та чебер дуннеен, котырысь улонэн тодматскыны кулэ нырысь ик анай кылыз пыр. Парта сьӧрын пукемез бере, сое 2-тӥ - 3-тӥ араз гинэ туж лякытэн выжтоно ӟуч кыллы дышетонэ. Аслэсьтыз малпанзэ пинал чебер но вольыт, радызъя вераны мед быгатоз удмурт но, ӟуч но кылъёсын. Та ужез быдэстыны луоно, устоесь программаос, учебникъёс но пособиос дасяса гинэ. Кызьы тодмо, та бадӟым уж борды со 20-тӥ аръёсы рос-прос басьтӥське. Вакчияк гинэ тодады вайыто: 1923-тӥ арын поттэмын "Удмурт кыл но выжыкыл веран удмурт школаын" книга, 1924-тӥ арын - "Шуныт зор" учебник, 1929-тӥ арын - "Выль сюрес" учебник-хрестоматиос. Со сяна, ӟуч кылын поттэмын вал: "Программа-минимум по удмуртскому языку, фольклору и литературе по переподготовке учителей удмуртских школ И ступени", "Программа по удмуртской литературе для удмуртских педагогических техникумов". 20-тӥ аръёслэн шоразы К. Герд трос тырше ӟуч учебникъёсты удмурт кылэ берыктон бордын. Тани "Начальная (наглядная) геометрия". Сое Герд нимам "Кутскон геометрия". Берыктонзэ удмуртлы матын карыса лэсьтэм. Дышетӥсьёслы валэктоназ шуэ: удмурт кылын геометрияя терминъёс ӧвӧл, соин мон сое ачим малпай, заданиоссэ но удмурт пиналлы матысь темаосын вошъяй, кылсярысь: прямая линия - шонер гож, прямой угол - шонер сэрег, острый угол - йылсо сэрег, тупой угол - мырко сэрег, параллельные линии - валлин гожъёс, пересекающиеся линии - кечат гожъёс, ломаная линия - тӥям гож. К. Герд трос валанъёсты асьме кылын сётэ. Мукет книгаосты но асьме кылэ берыктэ. А. В. Ланковалэсь "Арифметический задачниксэ" "Лыдӟиськыны дышетскон книга" шуэ, М. И. Ильинлэсь "Географизэ" - "Палъёсыз тодон". Ваньмыз валэктонъёс - асьме кылын. Умой берыктэмын И. И. Никитскийлэн "Окружающая нас природа" книгаез. Таиз нимамын "Асьме котырысь инкуазь". Ваньмыз та учебникъёс, ӟучысь берыктэмын ке но, удмурт пуштросо, зэмос удмурт шӧмо пӧрмемын. Оглом вераса, Куӟебай Гердэз сюлмаськыто таӵе ужпумъёс: - Анай кыллэсь кулэлыксэ ӝутон, сое азинтон. - Вордскем кылмес узырмытон, чылкытатон, выль валанъёс кылдытон. - Удмурт кылэз нылпи садъёсын но школаосын ӟеч но мур дышетон. - Учебникъёс, пособиос но программаос дасян, соослэсь ӟечлыксэс ӝутон. - Удмурт школаослы, нылпи садъёслы устоесь, мур тодӥсь-валась но быгатӥсь дышетӥсьёсты, ужасьёсты дасян. - Удмурт пиналлэсь психологизэ чакласа, соин нимаз-нимаз ужаса, школаын сое дышетонэз радъян. - Ӟуч кылэз мур гажан, удмурт кылын сямен ик, ӟуч кылын но котькудӥз ас малпанзэ чебер но вольыт, радызъя вераны но гожъяны мед быгатоз шуыса дышетон. Тӥни ваньзэ сое чаклано ке, со аръёс но асьме вакытъёс чик уг висъясько кадь ог- огзылэсь. Чик но ортчымтэ уно аръёс. Герд туннэ но асьме пӧлын, асьме вӧзын пуке кадь. Со ужпумъёс сокем матынэсь асьмелы - туннэ но соос дышетон удысын тужгес лэчытъёсыз пӧлы пыро. Соиз валамон, 50-тӥ - 60-тӥ аръёсы югдур воштӥськиз. Вордскем кыл предмет чотын гинэ кылиз учебной планэ. Дышетон выжтэмын вал ӟуч кылэ. Национальной школалэн одӥг гинэ тодметэз кылиз: анай кылэз предмет луыса дышетон. Удмуртиын вань предметъёсты удмурт кылын дышетон мынӥз 1957-тӥ арозь. Собере 5-тӥ - 7-тӥ классъёсын переводной учебникъёс дугдытэмын вал. Нош национальной школаын удмурт кылын берпуметӥ учебник потӥз 1968 арын. Но Куӟебай Гердлэн лёгем сюресэз быдэсак ӧз согиськы. Национальной школа выльысь улӟыны кутскиз 80-тӥ аръёслэн пумазы, куке обществоямы ыртыны ӧдъязы сайкыт тӧлъёс. Али выльысь тыршиськом удмурт школаослэсь лыдзэс йылтыны. Туннэ 425 школаын анай кылмес дышето. Удмурт школаез выльдонлы, азинтонлы министр дыръяз трос кужымзэ сётӥз А. М. Лисина, али но мылысь-кыдысь юрттэ. Поттӥськом трос выль учебникъёс. 1993-тӥ арын, кылсярысь, поттӥм 24 учебник но пӧртэм пособиос. Удмурт школалэн историез но Куӟебай Гердлэн нылпиосты дышетон удыслы котыр ласянь юрттэмез сярысь материал люканы мыным юрттӥз профессор Ф. К. Ермаков. Солы бадӟым тау. Нош верамме йылпумъяме потэ К. Е. Ломагинлэн "Инвожо" журналэ печатлам статьяысьтыз кылъёсын: К. Герд - со асьмелэн Пушкинмы но, Ломоносовмы но, со - асьмелэн шундымы, азьлане ӧтисьмы, ӝутӥсьмы, огазеясьмы, герӟасьмы, революция вакытэз но туннэзэ огазеясь гердмы. В. Ившина, Элькунысьтымы калыкез дышетонъя министерстволэн национальной школаосъя ёзэзлэн кивалтӥсез. В республиканской тол гурт шудонъёс АСАНЪЁС КУНО ПУМИТАНЫ ДАСЬ Алнаш палъёсы одӥг пол коть вуылэмды вань ке, тодӥськоды луоз татын улӥсь калыклэсь куно пумитан-келян сямзэ. Алнашын 1966 арын ортчизы В республиканской гужем гурт шудонъёс, туннэ нош ик шаерысьтымы спортсменъёс люкасько та музъем вылэ, Асаново совхоз-техникуме. Кылдэмез дырысен со пусйиз ни 103 ар тырмонзэ, озьы ке но, ялан егит, задор кужымен тырмемын ульчаосыз но улон, дышетскон юртъёсыз. Асан совхоз-техникум данъяське республикамы понна ӟеч кадръёс дасяменыз, спортын, культура удысын, ужын выль но выль вормонъёс басьтэменыз. Оскиськом, асанъёслэн каньыл, задор мылкыдзы пыӵалоз куноослы но. Вералом на: татчы вуозы вань районъёсысь 700 пала спортсменъёс. ТОЛ ШУДОНЪЁСЛЭН ПРОГРАММАЗЫ: 26 февраль, четверг 16 часозь Делегациосты пумитан, ужа мандатной комиссия. 18.00 Валтӥсь судейской коллегилэн кенешез. 19.00 Художественной фильм. 21.00 Дискотека. 27 февраль, пятница 14 часозь. Спортивной делегациосты пумитан. 15.00 Гимнастикая ӵошатсконъёс (тол многоборье). 18.00 Тол шудонъёсты сӥё-дано усьтон (Центральной площадь). 20.00 Валтӥсь судейской коллегилэн кенешез. 21.00 Шутэтскон ӝыт. 28 февраль, суббота 9.30 Пневматической винтовкаысь ыбылӥськон (тол многоборье). 9.30 Ӵошатско спортивной семьяос. 10.30 Куас сюрес вылэ пото: нылкышноос (ветеранъёс) - 3 иськем воргоронъёс (ветеранъёс) - 5 иськем нылъёс - 5 иськем нылкышноос - 5 иськем пиос - 10 иськем воргоронъёс - 10 иськем 13.30 Куасэн бызьылонъя ӵошатсконъёс (многоборье): нылкышноос (40 аресъем но ятыргес) - 2 иськем нылкышноос (35-39 арлыдъем) - 3 иськем нылкышноос (19-34 арлыдъем) - 5 иськем воргоронъёс (50 арлыдъем но ятыргес) - 5 иськем воргоронъёс (40-49 арлыдъем) - 5 иськем воргоронъёс (19-39 арлыдъем) - 10 иськем 14.00 Пневматической винтовкаысь ыбылӥськон (ӵошатско районъёслэн кивалтӥсьёссы). 18.00 "Тон но мон", тематической ӝыт (средней школалэн юртаз). 19.00 "Золушкалэн балэз" (музыкальной школаын). 20.00 Валтӥсь судьяослэн кенешсы. 21.00 Дискотека. 1 март, арня нунал Эстафетаос: 9.30 Ӵошатско спортивной семьяос. 10.10 Ӵошатско нылкышноос (4х3 иськем). 11.00 Ӵошатско воргоронъёс (4х5 иськем). 13.00 В тол гурт шудонъёсты сӥё-дано йылпумъян. Вакчияк Кизнерын но шунды ӝужалоз Вераны луонтэм шуныт мылкыдын ортчиз алигес Кизнерын Куӟебай Гердлы сӥзем ӝыт. Тужгес но пусйымон вал соиз: кизнеръёс доразы куное ӧтизы бускельёссэс - Киров улосысь Вятские Поляны ёросын улӥсь удмуртъёсты. Соос понна та праздник тужгес но шумпотымон луиз, лыктэмъёс залын бӧрдыса пукизы. Калык трос люкаськиз. Чеберъям сценаез уката но учкымон кариз интыысь суредасьлэн Николай Чапурнойлэн ужез. Со лэсьтӥз Куӟебайлэсь портретсэ. Кармыж школаысь пиналъёс дышетӥсьёсынызы ӵош дасязы кылбуръёсын но кырӟанъёсын нимысьтыз сузьет. Нациосты азинтонъя ёрос центрлэн кивалтӥсез, "Удмурт кенеш" огазеяськонлэн Кизнер люкетэзлэн тӧроез Елизавета Петрова люкаськемъёсты тодматӥз Гердлэн улон сюресэныз, вераз элькунамы улӥсь калыкъёслэн кусыпъёссы сярысь. Калыклы возьматӥзы бадӟым концерт. Сцена вылэ ог 140 мурт потаз. Огъя вераса, ӟучомыны кутскем ёрос понна та сӥё-дано ужрад удмуртлыкмес азинтонэ шӧдскымон вамыш кадь луиз. Кызьы пусйизы люкаськемъёс, Кизнерын но зарни шунды ӝужалоз ай. И. Кричев. "Удмурт дуннелэн" азвесь кубокез понна ГУРТЪЁСЫСЬ СПОРТСМЕНЪЁСЛЭН ТОЛ ШУДОНЪЁССЫ Игра - Сарапул (Сигаево) - Можга (Б. Уча) - Яр Спортэз яратӥсьёс но лыдӟисьёсмы тодо: "Советской Удмуртия" - "Удмурт дунне" газетлэн кубокез понна ӵошатсконъёс ортчыло 1952 арысен. Та дыр ӵоже кубокмы кин кие но ӧз вуылы ни! 43 ар ӵоже люкаськем призёръёслэн нимтулъёсынызы газет тодматӥз 1996 арын 22 феврале потэм номераз. Туннэ сётӥськом берло 4-тӥ шудонъёсын вормисьёслэсь нимъёссэс. 1994 ар (п. Игра) Куасэн бызьылон 19-34 аресъем нылкышноос (5 км): 1. А. Нуруллина (Можга) - 16 мин. 49 сек. 2. В. Чуракова (Игра) - 16 мин. 57 сек. 3. И. Михайлова (Завьялово) - 17 мин. 02 сек. 35 аресъем но солэсь мӧйы нылкышноос (3 км): 1. А. Борисова (Можга) - 11 мин. 34 сек. 2. Н. Данилова (Дэбес) - 11 мин. 37 сек. 3. Н. Бочкарева (Завьялово) - 11 мин. 40 сек. 18-39 аресъем пиосъёс (10 км): 1. О. Перевозчиков (Шаркан) - 30 мин. 19 сек. 2. П. Якимов (Ува) - 30 мин. 37 сек. 3. А. Шадрин (Завьялово) - 30 мин. 39 сек. 40-49 аресъем воргоронъёс (5 км): 1. В. Ефремов (Игра) - 16 мин. 06 сек. 2. В. Новиков (Сарапул) - 17 мин. 10 сек. 3. В. Кайсин (Балезино) - 17 мин. 10 сек. Нылкышноослэн 4 х 3 км эстафетазы: 1. Завьялово (Н. Петрова, И. Михайлова, В. Трофимова, О. Миронова) - 45 мин. 43 сек. 2. Можга (А. Нуруллина, Н. Шудегова, Л. Орлова, А. Борисова) - 46 мин. 02 сек. 3. Игра (Е. Корепанова, Н. Корепанова, Е. Кожевникова, В. Чуракова) - 49 мин. 08 сек. Пиосъёслэн 4 х 10 км эстафетазы: 1. Завьялово (С. Агафонов, В. Григорьев, А. Шадрин, С. Чирков) - 1 час 05 мин. 17 сек. 2. Можга (Ю. Бибиков, Александров, О. Санников, В. Федоров) - 1 час 06 мин. 35 сек. 3. Глазов (В. Дзюин, А. Богданов, В. Вершинин, А. Балтачев) - 1 час 06 мин. 55 сек. Спортивной семьяос Командаен бызьылон: 1. Новиковъёс (Сарапул) - 7 мин. 04 сек. 2. Романовъёс (Можга) - 7 мин. 08 сек. 3. Тронинъёс (Игра) - 7 мин. 27 сек. Эстафета: 1. Романовъёс (Можга) - 20 мин. 17 сек. 2. Новиковъёс (Сарапул) - 21 мин. 10 сек. 3. Тронинъёс (Игра) - 22 мин. 54 сек. Тол многоборье 18-34 аресъем нылкышноос: 1. Е. Корепанова (Игра) 2. А. Нуруллина (Можга) 3. В. Трофимова (Завьялово) 35-39 аресъем нылкышноос: 1. И. Седых (Завьялово) 2. А. Борисова (Можга) 3. З. Васильева (Игра) 40 аресъем но солэсь мӧйы нылкышноос: 1. А. Емельянова (Як.-Бодья) 2. Н. Меньшикова (Вавож) 3. Е. Полякова (Яр) 18-39 аресъем пиосъёс: 1. В. Федоров (Можга) 2. В. Громов (Пичи Пурга) 3. С. Бобров (Як.-Бодья) 40-49 аресъем воргоронъёс: 1. И. Морозов (Вавож) 2. Ю. Константинов (Можга) 3. Г. Зедияров (Завьялово) 50 аресъем но солэсь мӧйы воргоронъёс: 1. Ю. Евдокимов (Камбарка) 2. Г. Булычев (Завьялово) 3. Л. Зайцев (Вавож) Тупен хоккей 1. Ува. 2. Игра. 3. Воткинск. Ыбылӥськон 1. П. П. Агафонов, Ш. А. Балтачев (Юкаменск) 2. В. М. Зинков, А. П. Пестерев (Завьялово) 3. И. Н. Колпаков, В. Д. Сорокин (Алнаш) Огъя командаос 1-тӥ группа. 1. Можга. 2. Завьялово. 3. Игра. 2-тӥ группа. 1. Дэбес. 2. Кез. 3. Вавож. 1995 АР (с. Сигаево, Сарапул район) Пинал нылъёс - 5 км: 1. О. Вахрушева (Як.-Бодья) - 21 мин. 05 сек. 2. А. Берлинских (Завьялово) - 21 мин. 33 сек. 3. О. Романова (Можга) - 22 мин. 15 сек. Пинал пиос - 10 км: 1. Р. Иванов (Завьялово) - 35 мин. 15 сек. 2. А. Семакин (Шаркан) - 35 мин. 34 сек. 3. Д. Максимов (Балезино) - 35 мин. 38 сек. Нылкышноос - 5 км: 1. Ю. Шамшурина (Завьялово) - 20 мин. 03 сек. 2. Н. Овсянникова (Завьялово) - 20 мин. 19 сек. 3. А. Нуруллина (Можга) - 20 мин. 26 сек. Пиосъёс - 10 км: 1. В. Григорьев (Завьялово) - 33 мин. 56 сек. 2. В. Корепанов (Балезино) - 34 мин. 24 сек. 3. С. Поторочин (Як.-Бодья) - 34 мин. 25 сек. Нылкышноос-ветеранъёс - 3 км: 1. Н. Данилова (Дэбес) - 10 мин. 35 сек. 2. Ю. Рудина (Яр) - 10 мин. 41 сек. 3. Л. Близнецова (Пичи Пурга) - 11 мин. 22 сек. Пиосъёс-ветеранъёс - 5 км: 1. В. Ефремов (Игра) - 19 мин. 15 сек. 2. В. Зайцев (Вавож) - 19 мин. 31 сек. 3. В. Кайсин (Балезино) - 19 мин. 33 сек. Нылъёслэн 4 х 3 км эстафетазы: 1. Завьялово (Н. Овсянникова, Ю. Шамшурина, Н. Бочкарева, А. Берлинских) - 40 мин. 07 сек. 2. Можга (Н. Борисова, А. Нуруллина, А. Борисова, О. Романова) - 40 мин. 40 сек. 3. Глазов (И. Баженова, О. Поздеева, В. Баженова, Ж. Баженова) - 41 мин. 12 сек. Пиослэн 4 х 5 км эстафетазы: 1. Балезино (Д. Максимов, В. Зайцев, В. Корепанов, Н. Корепанов) - 1 час 09 мин. 00 сек. 2. Завьялово-1 (Р. Иванов, А. Смелов, В. Демидов, В. Григорьев) - 1 час 09 мин. 40 сек. 3. Сарапул (А. Пименев, Н. Валеев, В. Гильфанов, В. Культин)- 1 час. 09 мин. 55 сек. Спортивной семьяос Командаен бызьылон: 1. Надежда, Римма, Виктор Новиковъёс (Сарапул) - 8 мин. 22 сек. 2. Яна, Екатерина, Леонид Романовъёс (Можга) - 8 мин. 47 сек. 3. Игорь, Валентина, Александр Чирковъёс (Игра) - 9 мин. 47 сек. Эстафета: 1. Надежда, Римма, Виктор Новиковъёс (Сарапул) - 22 мин. 40 сек. 2. Яна, Екатерина, Леонид Романовъёс (Можга) - 22 мин. 55 сек. 3. Владимир, Татьяна, Василий Елгановъёс (Завьялово) - 25 мин. 09 сек. Тол многоборье 16-34 аресъем нылкышноос: 1. И. Михайлова (Завьялово) 2. З. Григорьева (Можга) 3. Е. Ефремова (Игра) 35-39 аресъем нылкышноос: 1. А. Борисова (Можга) 2. И. Седых (Завьялово) 3. А. Трефилова (Шаркан) 40 аресъем но солэсь мӧйы нылкышноос: 1. Е. Тронина (Игра) 2. А. Емельянова (Як.-Бодья) 3. Н. Парамонова (Завьялово) 16-39 аресъем пиосъёс: 1. Э. Блинов (Можга) 2. С. Главатских (Кез) 3. В. Федоров (Можга) 40-49 аресъем воргоронъёс: 1. С. Шишкин (Можга) 2. В. Гусев (Можга) 3. Обухов (Кез). 50 аресъем но солэсь мӧйы воргоронъёс: 1. Ю. Евдокимов (Камбарка) 2. Н. Кудрявцев (Можга) 3. Л. Зайцев (Вавож) Пичи футбол 1. Пичи Пурга. 2. Балезино. 3. Сарапул. Ыбылӥськон 1. С. Фалалеев (Можга) 2. С. Хохряков (Завьялово) 3. П. Перевощиков (Игра) Огъя командаос 1. Завьялово. 2. Можга. 3. Игра. 4. Сарапул. 5. Балезино. 6. Пичи Пурга. 1996 АР (Бадӟым Уча гурт, Можга район) Пинал нылъёс 5 км: 1. С. Коврова (Камбарка) - 15 мин. 25 сек. 2. Т. Берлинских (Завьялово) - 16 мин. 08 сек. 3. О. Мушина (Шаркан) - 16 мин. 08 сек. Пинал пиос - 10 км: 1. А. Баженов (Балезино) - 31 мин. 30 сек. 2. Е. Иванов (Можга) - 31 мин. 48 сек. 3. А. Шиляев (Ува) - 33 мин. 30 сек. Нылкышноос - 5 км: 1. Е. Рыбакова (Можга) - 14 мин. 44 сек. 2. А. Нуруллина (Можга) - 14 мин. 46 сек. 3. В. Чуракова (Игра) - 14 мин. 51 сек7 Пиосъёс - 10 км: 1. В. Корепанов (Балезино) - 30 мин. 01 сек. 2. В. Гильфанов (Сарапул) - 30 мин. 41 сек. 3. В. Григорьев (Завьялово) - 30 мин. 52 сек. Нылкышноос-ветеранъёс - 3 км: 1. Н. Данилова (Дэбес) - 9 мин. 41 сек. 2. Ю. Рудина (Яр) - 10 мин. 12 сек. 3. Н. Бочкарева (Завьялово) - 10 мин. 26 сек. Пиосъёс-ветеранъёс - 5 км: 1. А. Смелов (Завьялово) - 15 мин. 48 сек. 2. В. Корепанов (Можга) - 16 мин. 00 сек. 3. В. Ефремов (Игра) - 16 мин. 24 сек. Нылъёслэн 4 х 3 км эстафетазы: 1. Завьялово (Т. Берлинских, Н. Бочкарева, Н. Овсянникова, В. Трофимова) - 44 мин. 25 сек. 2. Можга (О. Романова, А. Борисова, Е. Рыбакова, А. Нуруллина) - 45 мин. 38 сек. 3. Шаркан (О. Мушина, А. Трефилова, С. Тетерина, О. Иванова) - 47 мин. 05 сек. Пиослэн 4 х 5 км эстафетазы: 1. Завьялово (Н. Пушин, А. Смелов, А. Шадрин, В. Григорьев) - 52 мин. 37 сек. 2. Балезино (А. Баженов, И. Горшков, Н. Корепанов, В. Корепанов) - 54 мин. 15 сек. 3. Можга (Е. Иванов, В. Корепанов, В. Александров, Ю. Бибиков) - 54 мин. 15 сек. Спортивной семьяос Командаен бызьылон: 1. Надежда, Римма, Виктор Новиковъёс (Сарапул) - 8 мин. 12 сек. 2. Яна, Екатерина, Леонид Романовъёс (Можга) - 8 мин. 32 сек. 3. Константин, Лидия, Леонид Близнецовъёс (Пичи Пурга) - 8 мин. 38 сек. Эстафета: 1. Яна, Екатерина, Леонид Романовъёс (Можга) - 20 мин. 02 сек. 2. Надежда, Римма, Виктор Новиковъёс (Сарапул) - 20 мин 10 сек. 3. Игорь, Валентина, Александр Чирковъёс (Игра) - 21 мин. 44 сек. Тол многоборье 16-34 аресъем нылкышноос: 1. З. Григорьева (Можга) 2. Н. Суворова (Яр) 3. Л. Васильева (Балезино) 35-39 аресъем нылкышноос): 1. А. Борисова (Можга) 2. А. Трефилова (Шаркан) 3. И. Чиркова (Игра) 40 аресъем но солэсь мӧйы нылкышноос: 1. Н. Парамонова (Завьялово) 2. Е. Тронина (Игра) 3. А. Емельянова (Як.-Бодья) 16-39 аресъем пиосъёс: 1. Э. Плицев (Можга) 2. Г. Лекомцев (Игра) 3. Г. Русаев (Пичи Пурга) 40-49 аресъем воргоронъёс: 1. А. Белослудцев (Каракулино) 2. И. Горшков (Балезино) 3. В. Гусев (Можга) 50 аресъем но солэсь мӧйы воргоронъёс: 1. В. Комлев (Як.-Бодья) 2. В. Волков (Балезино) 3. Ю. Евдокимов (Камбарка) Пичи футбол 1. Ува. 2. Пичи Пурга. 3. Балезино. Ыбылӥськон 1. С. Фалалеев (Можга) 2. П. Коростин (Каракулино) 3. В. Городилов (Алнаш) Огъя командаос 1. Можга. 2. Завьялово. 3. Балезино. 4. Игра. 5. Пичи Пурга. 6. Сарапул. 1997 АР (п. Яр) Пинал нылъёс - 5 км: 1. Н. Новикова (Сарапул) - 15 мин. 18,5 сек. 2. О. Романова (Можга) - 16 мин. 15 сек. 3. О. Перевозчикова (Глазов) - 16 мин. 22 сек. Пинал пиос - 10 км: 1. Е. Иванов (Можга) - 32 мин. 05 сек. 2. Д. Панаев (Як.-Бодья) - 32 мин. 45 сек. 3. Д. Трапезников (Воткинск) - 33 мин. 02 сек. Нылкышноос - 5 км: 1. Н. Овсянникова (Завьялово) - 14 мин. 45 сек. 2. Н. Пестова (Глазов) - 15 мин. 16 сек. 3. И. Михайлова (Завьялово) - 15 мин. 29 сек. Воргоронъёс - 10 км: 1. И. Королев (Пичи Пурга) - 30 мин. 16 сек. 2. В. Корепанов (Балезино) - 31 мин. 11 сек. 3. В. Григорьев (Завьялово) - 31 мин. 18 сек. Нылкышноос - ветеранъёс - 3 км: 1. Н. Данилова (Дэбес) - 10 мин. 41 сек. 2. Л. Близнецова (Пичи Пурга) - 11 мин. 17 сек. 3. Т. Валеева (Сарапул) - 11 мин. 19 сек. Воргоронъёс - ветеранъёс - 5 км: 1. А. Смелов (Завьялово) - 16 мин. 45 сек. 2. В. Ефремов (Игра) - 16 мин. 51 сек. 3. Н. Батаногов (Шаркан) - 17 мин. 02 сек. Нылъёслэн 4 х 3 км эстафетазы: 1. Завьялово (О. Мамонтова, Н. Бочкарева, И. Михайлова, Н. Овсянникова) - 44 мин. 01 сек. 2. Можга (О. Романова, Е. Романова, Е. Рыбакова, Н. Борисова) - 44 мин. 01, 5 сек. 3. Глазов (О. Перевозчикова, В. Кунаева, О. Поздеева, Н. Пестова) - 46 мин. 02 сек. Пиослэн 4 х 5 эстафетазы: 1. Як.-Бодья (Д. Панаев, А. Алексеев, А. Вахрушев, В. Копысов) 55 мин. 19 сек. 2. Балезино (И. Дмитриев, В. Кайсин, Д. Максимов, В. Корепанов) - 55 мин. 39 сек. 3. Можга (Е. Иванов, В. Корепанов, В. Александров, Ю. Бибиков) - 55 мин. 52 сек. Спортивной семьяос Командаен бызьылон: 1. Андрей, Юлия, Сергей Рудинъёс (Яр) - 7 мин. 21 сек. 2. Валентина, Римма, Виктор Новиковъёс (Сарапул) - 7 мин. 50 сек. 3. Елена, Светлана, Георгий Долгановъёс (Шаркан) - 8 мин. 04 сек. Эстафета: 1. Валентина, Римма, Виктор Новиковъёс (Сарапул) - 20 мин. 12 сек. 2. Андрей, Юлия, Сергей Рудинъёс (Яр) - 20 мин. 36 сек. 3. Максим, Надежда, Сергей Сунцовъёс (Балезино) - 21 мин. 05 сек. Тол многоборье 16-34 аресъем нылкышноос: 1. Л. Корепанова (Игра) 2. З. Григорьева (Можга) 3. Л. Васильева (Балезино) 35-39 аресъем нылкышноос: 1. И. Седых (Завьялово) 2. Н. Яковлева (Можга) 3. И. Чиркова (Игра) 40 аресъем но солэсь мӧйы нылкышноос: 1. А. Борисова (Можга) 2. Г. Наговицына (Балезино) 3. Н. Парамонова (Завьялово) 16-39 аресъем воргоронъёс: 1. Э. Плицев (Можга) 2. С. Главатских (Кез) 3. А. Вахрушев (Балезино) 40-49 аресъем воргоронъёс: 1. А. Белослудцев (Каракулино) 2. В. Гусев (Можга) 3. В. Медведев (Завьялово) 50 аресъем но солэсь мӧйы воргоронъёс: 1. Н. Бушмакин (Воткинск) 2. Ю. Телегин (Завьялово) 3. Ю. Евдокимов (Камбарка) Ыбылӥськон 1. В. Чирков (Игра) 2. М. Четкарев (Завьялово) 3. А. Анисимов (Балезино) Огъя командаос 1. Завьялово. 2. Можга. 3. Балезино. 4. Як.-Бодья. 5. Игра. 6. Пичи Пурга. Университетлы - Гердлэсь нимзэ Удмурт кун университетын кык нунал ужаз финн-угор литература кылъёсыз умоятон но азинтон ужпумъёсъя симпозиум. Со сӥземын вал Куӟебай Гердлэн вордӥськемез дырысен сю ар тырмонлы. Симпозиумлэн ужаз пыриськизы кун сьӧрысь куноос но. Ужрадэ люкаськемъёсты нырысетӥ нуналаз ӟечкыласа вераськизы Удмурт кун университетлэн ректорез Виталий Журавлев, "Удмурт кенеш" огазеяськонлэн тӧроез Валентин Тубылов, мукет адямиос. Куӟебай Герд, чеберлыко кыл сярысь тунсыко веранъёсын тодматӥзы журналист Николай Кузнецов, тодосчиос Зоя Богомолова, Александр Шкляев. Ӟеч веранъёс дасяллям егит финн тодосчи Мирьям Пенттинен но кылтодон наукаосъя доктор Михаил Атаманов. Симпозиум мыныку ужазы секциос. Отчы пыриськем адямиос мылысь-кыдысь кенешизы Куӟебай Гердлэн чеберлыко ужъёсыз, выль нимкылъёс, чеберлыко удмурт кыллэн эгесъёсыз, кылысь кылэ берыктон, кыллы дышетон но данак мукет ужпумъёс сярысь. Йылпумъясь кенеше люкаськемъёс уно визьмо малпанъёссэс веразы. Нош одӥгез дэмлан таӵе вал: Удмурт кун университетлы сётоно Куӟебай Гердлэсь нимзэ. Та ӵектонэн вазиськоно университетысь тодосчиослэн кенешазы но Удмурт Кивалтэтэ. Симпозиум шумпоттӥз эшшо одӥг иворен: университетысь дышетӥсь кылтодон наукаосъя доктор Иван Тараканов луиз Вань удмуртъёслэн Куӟебай Герд нимо премизылэн лауреатэз. Сыӵе кузьым дасям тодосчилы "Удмурт кенеш" огазеяськон, солэн тӧроез Валентин Тубылов. Вормизы кужмоосыз Куӟебай Гердлэн вордӥськемез дырысен сю ар тырмонлы сӥзьыса, Удмурт Элькунысь Культурая министерство, Удмурт Кивалтэтысь Нациосын ужанъя комитет, Удмурт Элькунысь Писательёслэн огазеяськонзы но Драмая удмурт кун театр ялӥзы вал пьесаослы конкурс. Алигес лэсьтэмын йылпумъянъёс. Нырысетӥ инты нокинлы сётэмын ӧвӧл. Кыкетӥ интые потӥз элькунысьтымы тодмо драматург Егор Загребин. Данъясь премия утӥз писатель Никвлад Самсонов. Спектакльёс матысь дыре возьматэмын луозы сцена вылын. "Удмурт Кенеш" огазеяськонлэн огез валтӥсь ужпумез - социальной удысын, экономикаын, культураын воштонъёс ортчытонэ пыриськон. Ми малпаськом, сое быдэстыны гуртъёсысь кенешъёс юрттозы, калыклэсь куронъёссэ, улослэсь аспӧртэмлыкъёссэ чакласа. Дэмласьком гурт кенеш сярысь валатон сётӥсь положениен тодматскыны. Гуртъёсын сое уже кутысалзы ке, улонэ пыӵатысалзы ке, умой луысал. "Удмурт Кенеш" ассоциацилэн президентэз В. К. Тубылов. Удмурт Республикаысь улосын аскивалтон - ӧтчам но гурт кенеш сярысь валатон Огъя валанъёс 1. Улосысь аскивалтон - татын улӥсь калыклэн ас мылкыд каремезъя огазеяськемез, гуртын кылдэм ужпумъёсты ас кужыменыз яке кылдытэм ёзъёсыз пыр быдэстон понна, улӥсьёслэсь куронъёссэс но улослэсь аспӧртэмлыкъёссэ лыдэ басьтыса. 2. Гурт кенеш кылдытӥське, гуртысь вань улӥсьёсты (юрт кузёосты) ӧтчаме люканы луонлык вань ке Ӧтчам люкаськылэ арскын кык пол яке ӵемгес, гурт кенеш, тӧро яке гуртын улӥсьёс ӵектэмъя. Со решение кутыны быгатэ, гуртын улӥсьёс (юрт кузёос) пӧлысь ӝыныез ӧтчаме лыктэ ке. 3. Гурт кенеш ужа, "Удмурт Республикаын интыысь аскивалтон сярысь" Удмурт Республикалэсь Законзэ, Муниципальной образованилэсь уставзэ но Гурт кенеш сярысь валатонэз лыдэ басьтыса. 4. Гурт кенеш но солэн ёзъёсыз сярысь валатонэз кутэ ӧтчам, нош юнматэ муниципальной образованилэн администрациез. 5. Гурт кенешез но солэсь тӧрозэ быръе ӧтчам 1-3 арлы. 6. Гурт кенешен кивалтэ тӧро. Сое дырызлэсь вазь воштыны луоно, ӧтчаме сыӵе решение кутэ ке, гурт кенеше пырись муртъёсты но воштыны луоно, кулэ луэ ке. 7. Гуртлэн тӧроез ужамез понна ӧтчам азьын кыл кутэ но ӧтчамын гурт кенешлэн ужамез сярысь маде арлы быдэ. 8. Гурт кенеш - со юридической лицо. Гурт кенешлэн быдэсъяно удысъёсыз 1. Гурт кенеш: - ӧтчамъёслэсь решениоссэс, муниципальной образованилэн ёзъёсызлэсь решениоссэс быдэсъяны луонлыкъёс кылдытэ; - гуртъёсты чебермытон-выльдонъя, чылкытатонъя, сюресъёсты, тротуаръёсты, выжъёсты, колодчаосты, водопроводэз, спортивной но нылпи площадкаосты лэсьтонъя но тупатонъя ужрадъёсты радъя но соослэсь быдэсъяськемзэс эскере; - шайёсты утялтонэ калыкез ӝутка; - шуръёсты, ярдуръёсты, ошмесъёсты, писпуо интыосты чылкыт возьыны тырше; - тужгес ӟеч юртъерлы конкурс ортчытэ; - милицилы юрттэ; - тылпуослэсь утиськонъя но улосэз чылкытатонъя ужрадъёсты радъя; - калыклы улон-вылонын юрттэ; - муниципальной образованилэн кивалтӥсезлы гуртын юртъёслэсь планъя пуксемзэс эскерыны, музъемез люкемез но сое пайдаё кутэмез чакланы, гуртлэсь музъемзэ вузамлэсь утьыны юрттэ; - культурая юртъёсын но школаосын ӵош калыклы ӟеч сямъёс пыӵатонъя, тодон- валанъёс вӧлмытонъя ужрадъёс ортчытэ, быръёнъёсты, референдумъёсты но политикаен герӟаськем мукет ужрадъёсты радъяны юрттэ; - гуртысь вузкарись, юрттэт сётӥсь предприятиослы, культурая юртъёслы, больницаослы, школаослы ужаны юрттэ; - улӥсьёслэсь вазиськонъёссэс но ӝожтӥськонъёссэс эскере. 2. Гурт кенешлэсь нормативной актъёссэ, законъя но ас компетенциезъя кутэмъёссэ, та улосысь юридической лицоос но нимаз адямиос одно ик быдэсъяны кулэ. 3. Гурт кенешлэсь решениоссэ быдэсъятэк кельтон, адямиослэн асьсэды умойтэм воземзы, калыкез ултӥямзы эскерисько ӧтчамын, соосъя ужрадъёс кутӥсько. 4. Гурт кенешлэсь решениоссэ, ас компетенциезъя кутэмъёссэ, кун властьлэн ёзъёсыз палэнтыны уг быгато. Тӧролэн правоосыз но быдэсъяно ужъёсыз 1. Тӧро быгатэ: - гурт кенешен вераськыса ӧтчам люканы; - тӧролэн но гурт кенешлэн ужпумъёссыя муниципальной образованилэн, предприятиослэн но учреждениослэн кивалтӥсьёссылы вазиськыны, ӧтчамъёслэсь но гурт кенешлэсь решениоссэс быдэсъян бордын ужаны; - асьсэды умойтэм возись, ӧтчамлэсь решениоссэ но тӧролэсь куронъёссэ быдэсъясьтэм муртъёслэсь валэктонъёссэс кылзыны. Кулэ луэ ке, тӧро быгатэ та пумысен материалъёсты муниципальной образованилэн кивалтӥсезлы, административной ёзъёсы ыстыны, сыӵе муртъёсты кыл кутытон понна; - гурт кенеш косэмъя, сельсоветъёслы но ёросысь Советъёслы ӵектонъёс сётыны, гуртысьтыз калыкезлэсь куронъёссэ эскерыку, сессиосы пыриськыны; 2. Гуртлэн тӧроез удыссэ быдэсъя уждун басьтытэк (ӵемысьгес), солы кӧня ке коньдон тырыны быгатэ муниципальной образование яке гурт кенеш. 3. Тӧро сельсоветын ас гуртысьтыз калыкезлэсь куронъёссэ уте, со дыре ик "Удмурт Кенеш" огазеяськонлэн ёрос кенешаз пыре. Гурт кенешлэн экономикае пыриськемез но коньдонэз 1. Гурт кенеш быгатэ: - вузкарись но юрттэт сётӥсь кооперативъёсты но организациосты кылдытыны юнматэм радлыкъя; - калыклэсь, предприятиослэсь, учреждениослэсь но организациослэсь ас мылкыд каремзыя сётэм коньдонзэс люканы, калыклэсь улонзэ капчиятонэн герӟаськем ужрадъёсты быдэстон понна; - куд-ог гражданъёслы (предприятиослы, кооперативъёслы) интыысь бюджетэ налогъёс тыронъя льготаос сётыны куронэн вазиськыны. 2. Гурт кенешлы коньдон калык ас мылкыд каремзыя люка, интыысь аскивалтонлэн но кун властьлэн ёзъёсыз сёто, нимаз адямиос, предприятиос но организациос ас мылкыд каремзыя висъяло, ачиз гурт кенеш пӧртэм ужрадъёс ортчытыса уксё поттыны быгатэ. 3. Гурт кенеш аслаз коньдонэныз ачиз кузёяське, сое кулэезъя гинэ кутыса. Тӧро ӧтчамын уксёез кутэм сярысь арлы быдэ ивортэ. Усьтӥсько выль кафедраос Берло вить ар куспын Удмурт кун университетын дышетскись студентъёслэн лыдзы 2 сюрслы йылӥз. Со герӟаськемын татын выль кафедраослэн усьтӥськеменызы валче. Кылсярысь, кемалась ӧвӧл кылдытэмын му вӧй промышленностьлы специалистъёсты дасянъя кафедра. Кыкетӥ арзэ искусствоосъя факультетын дышетско пыӵал-тӥрлык поттонын вуоно дизайнеръёс. Механической заводысь пыӵал-тӥрлык поттонъя мастеръёсты дасянъя школаез йылпумъясьёс тодон-валанзэс будэтыны быгато художник-гравёр но прикладное искусство и дизайн в оружейном производсте специальностьёсъя. В. Рогалев. Берекет Тодады возе Сӥлен шыд пӧзьтыны малпады. Кезьыт вуэ нырысь-валысь понэ лызэ. Ву быректӥз ке, сӥльзэ но йылтэ. Мугорлы кулэ луись вань веществоос озьы сӥльын кылёзы. Шыд вылэ лӧптэм пурысь шукыез октыны кулэ ӧвӧл, со угось сиёнлэн самой зумытэз. Ляб тыл вылын пумен пӧземъяз шукы быроз. Бакча сиёнэн ке шыд пӧзьтӥськоды, бакча емышъёсты быректӥсь вуэ понэ но лябгес тыл вылын пӧзьтэ. Озьы витаминъёс уз уродме. Борщ пӧзьтӥськоды. Шыд чебер горд тусо мед луоз шуыса, тазьы лэсьтэ. Горд кушманэз палатэк нимаз пӧзьтэ, вуштон пыр поттэ но пурт йылын лимон кислота но сакыр песок йылтыса суралэ но ӧжытак пукетэ. Собере ватсалэ борще но быректытэ. Сиёнды дась. Пӧзись шыдэ ву ватсаны уг яра - шӧмыз уродмоз. Йылэтыны кулэ ке, быректэм ву ватсалэ. Куреген шыдэ лавр куар уг ватсало - шыдлэн шӧмыз уродме. Сӥлен шыдэ сылал ватсало пӧзьтэмысь дугдэмлэсь азьло, чорыг лыме - пӧзьтыны пуктыку ик. Мискинь Ваньмызлы тодмо: гожтэм мае ке тӥрен ӵогыса но уд кушты. Туннэ, аскивалтонъя ёзъёсы быръёнъёс азьын, тунсыко потӥз кивалтонэ выльысь мерскись эшъёслэсь азьло программаоссэс учкыны. Ижын йыр кариськон понна 1994 арын нюръяськыкуз, тани тазьы адӟе вылэм вуоно ужзэ Анатолий Салтыков: "Мэр ас котыраз городысь вань таза кужымъёсты огазеяны, сосын ӵош быдэстымон ужпумъёс пусйыны но со понна тупамон амалъёс шедьтыны, котькуд решение котыр ласянь чакласа кутыны кулэ. Мэрлы но городысь Думалы юнматоно сыӵе првилоос, кудъёсыз тупасалзы калыклэн кулэяськонъёсызлы". Ма бен, ойдолэ табере учком, быдэсмизы меда кагаз вылэ пусъем малпанъёс? Цалтыков вӧзын, солэн нырысетӥ воштӥсез луыса, кык ар ӵоже ужаз Виктор Павлович Бондаренко. Городысь администрациын со кыл кутӥз коньдон ужпумъёс понна. Проограммаез нош ик тодэ ваёно ке, Бондаренко луиз "таза кужымъёс" пӧлысь одӥгез. Администрацилэсь ужзэ, бюджетысь коньдонэз кызьы кутэмез планын пусъемъя эскерон шараяз трос тырмымтэосты. Россия Федерациысь Коньдон ужпумъёсъя министерстволэн Удмурт Республикая контрольно-ревизионной управлениез (КРУ) гинэ уно дасо миллиард манет отчы-татчы кошкем коньдонэз "шедьтӥз". Адямиослэн налогъёссы чотын люкаськем уксёез городын чакласькытэк куто вылэм. Трос умойтэм учыръёс шараяськизы Горкоммунтеплосеть" предприятиын, лэсьтӥськон удысын, куд-ог больницаосын но мукет интыосын. КРУ-лэн материалъёсызъя республикаысьтымы прокуратура сыӵе организациослэн кивалтӥсьёссы вылэ уголовной ужъёс кутсконо луиз. Нош вице-мэрлы Виктор Бондаренколы со ялӥз должностезлы тупамтэез сярысь. Валамон ни, Анатолий Салтыковлы юрттӥсьсэ палэнтытэк ӧйлась. Виктор Павлович, кызьы ӝоген ивортӥзы Ижысь мэриын, висьыны усиз. Но юнме шат Салтыковлэн азьло быръёнъёс азьын дасям программаяз тазьы гожтэмын вал: "Властьлэн интыысь ёзъёсыз ӧжыт ке но берыктыны кулэ обществоын воштӥськонъёсын валче кылдӥсь ыштонъёсты". Соин, лэся, кылем арын июне Виктор Бондаренколы, со вакытэ кыкетӥ группаысь инвалидлы, ужаны лэзьымтэ муртлы, "компенсация" сёто - сое Ижевскысь калыкез шугадӟонъёслэсь утёнъя комитетлы кивалтӥсе юнмато. Талэсь азьло городын таӵе ёз ӧй вал. Ӵапак та комитетлы оскемын ӧжыт уксё басьтӥсь адямиослы юрттэт сётонэз радъян, льготаос тупатонэз чаклан. Тӥни сыӵе дано уж шедиз Бондаренко эшлы. Озьы ик пукысал, дыр, со выль интыяз. Но... Шундыё куазен гудыртэм кадь луиз калык пӧлы вӧмем "ивор": азьло вице-мэр ӝыны дунын басьтэм куать комнатаен квартира. Солэн быдӟалаез ог кык сю квадратной метр. Дуныз - 2.000.000.000 (кык миллиард) манет пала! Валамон, Бондаренко сомында коньдон ӧз тыры. Озьы ке но, валась адямиослэн лыдъямзыя, квартираысьтыз котькуд квадратной метрезлэн дуныз ичизэ куать миллион манет луэ. Озьыен, Виктор Павлович выль улон интыез понна миллиард манетлэсь уно коньдон тырыны кулэ. Ойдолэ табере ӵошатом. Туэ январе Ижысь пенсионерлы чидамон улон вылысь кулэ вал ог 300 сюрс манет (азьло дунын). Бондаренколы быдтэм коньдонэн толэзь ӵоже улыны быгатысалзы ньыль сюрс (!) пенсионеръёс. Яке мукет ласянь учком. 200 квадратной метръем интыын умой гинэ улысал дас одӥг адями. Котькудӥзлы шедьысал нормаен тупатэм мында инты - 18 квадратной метр. Ма, та квартираын кухняез гинэ ог кызь метръем. Тӥни озьы. Мукетъёсыз сярысь сюлмаськыны пуктэм чиновник калыкез шугадӟонъёслэсь утёнъя программаез быдэстыны ачиз бордысен кутскиз. Кӧня ке дыр ӵоже ужтэк пукиз бере, со, мискинь, ассэ начар улӥсьёс пӧлы пыртӥз, шӧдске. Оло, табере ужтэк кылем мукет эшъёслы но сыӵе ик вӧл-вӧл выль квартираос кузьмалозы?... Номыр уд шуы, азьло быръёнъёс азьын кутэм программаос Ижын чакламлэсь но зол быдэсьясько. А. Капустин. Машина дуннеын Пичи Пурга районысь Ильинск шор ёзо школаын дышетскисьёс ваньмон дырзэс туж аспӧртэмлыко ортчыто. Кин ке яратэ куасэн нискыланы, кин ке - пыдын бызьылыны, нош 9"а" классын дышетскись Витя Григорьев - машинаосын шудыны. Шудэм сяна, ачиз ик соосыз лэсьтэ но. Кемалась ик ӧвӧл Ильинск черкогуртысь библиотекаын солэн ужъёсызлы сӥзем выставка радъямын вал. Кӧня пумо шудонъёс лэсьтэмын Витялэн киосыныз! Соосты картонлэсь, векчи езъёслэсь лэсьтылэ ке вал, табере пулэсь но йӧндыре ни. Со сяна, пичи батарейкаосын моторъёссэс но ужатэ. Пияш яратэ физика предметэз. Оло, со ик юрттӥз Витялы машинаосын эшъяськыны. Физика предметэн со азьланяз но люкиськыны уг дырты, малпаське телемастере дышетскыны, нош "машина дуннезэ" - сюлэмаз возьыны. Витя Григорьев но солэн ужъёсыз. В. Кутузова. Туспуктэмъёсыз В. Камашевлэн ПАРТЧИОСЛЫ КУЛЭ КЛУБ Вавож. Районысь администрациен кивалтӥсьёс татысь хозяйствоосы пичи кенешъёсын потало. Выль арысен соос ӝыныезлэсь ятыр гуртъёсы вуылӥзы ни. Гурт калыклэн сюлмаськонъёсыз ӧжыт ӧвӧл, кылсярысь, гурезь-пудгаослэн. Таослы матын интыяськемын Куӟебай Гердлэн вордскем Малиновка гуртэз. Соин ик солэн вордскемез дырысен 100 ар тырмонлы сӥзем праздникъёсты троссэ радъяло партчиос (гурезь-пудгаос). Тани гужем бадӟым ужрад ортчытыны чаклаське. Отчы лыктозы трос куноос, пӧлазы кунгож сьӧрысь но. Нош Гурезь-Пудгаын клуб куашкан калэ вуэмын. Кытчы калыкез люкалозы? Асьсэлэн сюлмаськонъёссы какможъёслэн. Татысь леспромхозлэн куашкамез быдэс посёлок вылын шӧдӥськиз. Южный Какможын табере радио уг ужа, пытсамын мунчозы, ӝыныё ӝутэмын спортзал... Н. ЛИПИНА. ПАСПОРТТЭС ӜИКЫТ ВОЗЕ Паспорт Россиысь гражданинлэн валтӥсь документэз луэ. Со сётӥське котькуд 14 арес тырмем муртлы. Паспорт кулэ луэ уже интыяськыку, дышетскыны пырыку, пенсия басьтыку, кузпалъяськыку но мукет. Та документэз ӝикыт возёно, уго ӵем пумиськыло сое ыштон учыръёс. Паспортэз юромо лушкасьёс но вань, кудъёсыз сое "ас интыяз" уже куто. Та документэз валаса "ыштэм" муртъёс кыл кутоно луо. Соин ик кӧня ке ӵектонъёс: - паспорттэс бӧрсяды юнме дыръя эн нуллэ, эн возе сое дӥсь кисыын, сумкаын; - паспортты бӧрсяды дыръя сюлмаське сое пыдлогес, лушканы быгатонтэм азе интыяны; - дорады паспорттэс ышыг, син шоры йӧтӥсьтэм азьын возе. Паспортты ышиз ке, соку ик паспортно-визовой службае вазиськоно. Выль паспорт толэзь ӵоже лэсьтӥське яке кемагес но. Выль паспорт басьтыны заявление гожтӥсьёс пӧлын вань сыӵеос, кудъёсыз вужзэ "ышто", отысь "сьӧд виштыоссэ" ватон вылысь. Эн вунэтэ, выль документ сётон азьын со "сьӧд виштыослэн" ваньзы-ӧвӧлзы ӟеч-ӟеч эскериське. Ф. ПЕТРОВА, Первомайской РОВД-ысь паспортно-визовой службалэн кивалтӥсез. Одӥгез мальдытэ, мукетыз капыртэ Берло аръёсы странаямы улон зол воштӥськиз. Соин ӵош адямиослэн сямъёссы но мукетгес луизы: азьло ужтэк кылем адямиосты шуг шедьтыны вал, нош али котькудӥз дасэтӥез быдэ вуэм пиосмурт яке нылкышно нокытын уг ужа. Мылем адями вакчи дыр куспын воштӥське. Солэн вань калык кадь ик сием-юэмез, дӥсяськемез потэ. Нош кытын ужасьтэм адямилэн уксёез? Сотэк угось номыр уд басьты. Кыле одӥг амал - лушкаськон. Кудӥз организациосысь, пӧртэм предприятиосысь алама "кыллись" ваньбурез дораз нуэ-вуза, мукетыз - квартираосты сузя. Мынам синйылам шедизы соослэсь пӧртэмъёсызгес. Шушан кышномуртъёс ӧвӧл, шуо. Со зэм. Но кудӥзлы инмар чебергес ымныр но, веськресгес мугор но сётэм. Соос пӧлын но ужасьтэмъёс ӧжыт ӧвӧл. Таосыз мугорзэс вузаса уксё жильдо. Малы-о бен, инмарен сётэм "шудэз" кезьыт урамын яке висисьёс пӧлын быдтод? Мынам чакламея, сыӵе нылъёс тросэз огдыре базарын вузаськылэмын. Чебер апокъёс пиосмуртъёслэсь пӧртэм сямен уксё-ваньбур кыско. Мынэсьтым эшъёсме соос пырак юлтошъёсылэн квартираязы "кылизы". Та нылъёс ӵошен, кык кузя ужало. Одӥгез писомуртэз "яратэ", мукетыз карманъёсты, шкафъёсты "сӥсъя". Валамон ини, дусым утчало, огназ яке пересьмем нэнэеныз улӥсьёс пӧлысь, кудӥзлэн кисыез но куддыръя тыро луылэ, сиён-юонэн но утялтыны быгатэ. Володя К. Ижысь одӥгаз бадӟым заводын мастер луыса ужа. Улэ вал кык висэто квартираын нэнэеныз. Мумизлэн тазалыкез зол ӧй вал ке но, аракыез яратылӥз. Одӥг пол шулдыръяськон-шутэтскон ӝытын Володя чебер апаен тодматскем. Эктонъёс бырем бере, выль тодмозэ дораз ӧтем, соиз эшетэк уг мыны шуыса, чутрак пумит луэм. Володя кыкназэс ик куное нуэм. Нырысь ветлыкузы лушкаськемзэс шӧдымтэ. Выль эшъёсыныз мемизэ но тодматэм. Озьы апайёс Володя ӧвӧлтэм дыръя но куное пыраллям ини, пересь кышномуртэз сектаны соку куддыр аракы но вайылӥллям. Котькуд магазинын кунгож сьӧрысь ваем спирт вузаллязы, тросэз сое юыса "сопал дуннее" но кошкылӥз. Одӥг пол нылъёс пересез мултэсгес секталлям. Володя, уй сменаысь бертыса, шокасьтэм нэнэзэ выж вылысь адӟем. Пересез ватэм бере но возьыттэм апайёс Володя доры ветлэмысь дугдӥллямтэ. Адӟись ӧй вал угось, кин Володялэсь мемизэ сектаз. Эше огназ кылем бере, нылъёс асьсэды со дорын кузё кадь возьыны кутскиллям. Одӥг пол соос кошкем бере, Володя "адӟымтэ" ни магнитофонзэ но чассэ. Учкем шкаф пушказ, нош отын ваньмыз выль дуно ваньбур: ковер, валес котыр, покрывалоос, выль басьтэм гоно (меховой) изьыез, костюмез "пыдо" луиллям. Валамон ини, ваньмыз соос одӥг кутскемен гинэ нуэмын ӧй вал. Володя выль дӥськутэн шкафсэ туж шер усьяллям, соин ик апайёслэсь лушкаськемзэс шӧдылытэк улэм. Озьы Володя "визьмаськиз". Мукетыз тодмое Толя Ш. - ожгарчи, прапорщик. Пичи комнатаын огназ улыкуз, трос апайёсты дораз куноятылӥз. Нош котьмалэн пумыз луэ, одӥгез сое "кияз кутӥз". Толя угось весь ушъяськылӥз, квартира басьтӥсько шуыса. Зэм ик, ӝоген Толя куинь висэто кооперативной квартирае выжиз. Дораз улыны ӧтиз дусымзэ но. Кема ик дыр ӧз ортчы, эшъёссэс, ӵыжы-выжыоссэс сюанэ люказы. Кӧня ке дыр ӵош улэмзы бере, кышноез Тоня вераз, мынам гуртын пие вань шуыса, сое, пе, асьме доры ваёно. Толя гуньдэм кадь луиз. Тонялэн паспортаз угось пиез сярысь номыр гожтэмын ӧй вал. Апайлэн сыӵе документэз кык вылэм - одӥгаз пиез гожтэмын, мукетыз ӧвӧл. Озьы, туж зол "ужатэк", Тоня Толялы вить аресъем нылпи "кузьмаз". Ог кык ар гинэ кузпалъёс выль квартираяз улӥзы. Юлтоше "калгон" сямзэ ӧз кушты, соин ик кусыпсы сӧриськиз. Выль квартиразэс люкиськем беразы воштӥзы. Толя пыриз одӥг висэто, нош Тоня пиеныз кык висэто квартирае. Тӥни озьы эше кышноеныз "бадӟым шудэз" адӟытэк но "мусоезлы" вӧл-вӧл квартира "кузьмаз". Та учыр но Толялэн йыраз трос "кеньыр" ӧз будэты. Выль интыяз но со апайёсты куное ӧтча, ӵемысь соос кык-куинь кузя лыкто. Котькуд вуылэмзы бере Толялэн маиз ке но ыше. Ортчем аре гинэ соос нуиллям видеоаппратура, транзисторной приёмник, покрывало, мамыкен шобрет (одеяло), одӥг миллион манет уксё но мукет чыр-пырыос. Вань на мукет но тодмоосы, кинъёслы калгись апайёс трос шуд уг сёто, уно сюлмаськон но куректон гинэ ваё. Лушкаськемзы бере соосты шедьтыны но шуг, тросэз соос кык паспорт возё, куриськод ке, чик пыкиськытэк одӥгзэ,пӧяса лэсьтэмзэ возьмато. "Малы, кӧня ке манет понна заводын, фабрикаын, магазинын, базарын, больницаын жадьымон тыршод, куке тонэ кыӵе ке но пиосмурт сюдоз, секталоз, изьыны выдтоз" - озьы верам мынам бӧляк кышномуртэлэн эшез. Та выллем улон шоры учкисьёслэн лыдзы будэ. Уката но трос соос егитъёс пӧлын. Таӵе сямъёслэсь вӧлскемзэс ӧм ке быгатэ дугдытыны, кыӵе улон асьмеды возьма? "Сӧриськем" егитъёслэн, валамон ини, пиналъёссы но пӧртэмесь уз луэ. Огназ улӥсь пиосмуртъёслы но котькудзэ чебер апаез куное ӧтёно ӧвӧл, уката одӥг кутскемен кыксэ. Ӵошен кунояськись апайёслэн лушкаськем сяна, мукет урод уж лэсьтыны но "кизы пыроз". Н. Возисов. Эрик яке байлык? Ма дуногес? Таӵе юанъёслы валэктон утчазы "Иворъёсты вӧлмытонъя ёзъёс но политика" семинаре люкаськемъёс. Ижевскын кык нунал ӵоже ортчем ужрадэ радъязы Германиысь Конрад Аденауэр нимо фонд но иворъёсты вӧлмытон технологиосъя Межрегиональной фонд. Отчы люкаськылӥзы республикаысьтымы журналистъёс, Кун Кенешын, Правительствоын ужасьёс. Шаермылэн куноосыз - Конрад Аденауэр нимо фондлэн кивалтӥсез Герд Д. Боссен, "Немецкая волна" радиолэн кивалтӥсез Вольтер фон Тизенхаузен, журналист Вольфганг Фехнер - юн оско, иворъёсты вӧлмытонъя ёзъёс эрикоесь луыны кулэ, кун ласянь нокыӵе косон-зӥбон учыръёс медаз шӧдӥське. Озьы гинэ журналистика удыс азинскоз, гожъяськись муртъёс странаын, республикаын, ёросын кылдэм югдурез шонер возьматозы, калыклы зэмлыко иворъёс вуттозы. Германиын одӥг но кун издание ӧвӧл, кун ёзъёс одӥг газетлы но уксёен уг юртто. Озьы ке но печатья рынок узыр, 450-лэсь ятыр пӧртэм изданиос печатласько, котькудӥз улэ но азинске ас кужыменыз. Валамон ини, зэмос демократия, ӟеч ужась экономика луонлык сёто вань удысъёслы рос-прос азинскыны. Россилы та ласянь трос но кема аръёс ӵоже ужано луоз на. Зэм, асьме шаерын но та вакытэ эрико пресса ӝужа ини. Но югдурез шонер возьматэ-а со, шуг вераны. Семинаре люкаськемъёс но пусйизы, рыноке выжон вакытэ тросэз изданиос кун юрттэттэк ужаны уз быгатэ. Нош соос ке ӧз луэ, уно лыдӟисьёс шонер но зэмлыко иворъёстэк кылёзы. Ю. Михайлова. Берекет ТАКМАКЪЁС Та кикылэн, ой, силемез Кыдёкысен кылӥське. Шудтэм муртлэн, ой, улэмез Кырӟамъяз ик шӧдӥське. Италмасэз тодӥськомы, Удмурт сяська шуыса. Гажан муртмес тодӥськомы, Чеберезлы луыса. Ву вылэ сяська куштӥ но, Солэн тулкымез ӧй вал. Палэнысь туган кутӥ но, Пумиськылыны ӧйлась. Сьӧдчабейлэн кадь уг луы Ӵуж чабейлэн сяськаез. Малпамъя улэм уг луы, Сыӵе ини вакытэз. Эн ни тӧла, тополь садэ, Чебер вайдэ тӥялтод. Эн ни малпа пинал дырдэ - Уд ни шедьты, куректод. Ортчыт шаплы поезд кошке, Тук-тук вазё питранъёс. Пинал сюлэм, ой-ой, шуэ - Кыдёке кылё эшъёс. Т. КУЗЬМИН. Алнаш район, Кузёбай гурт. Серекъялод но, бӧрдод но - Кытын картэд али? - Дорын. Ньыль пыдо эшеныз ӵошен. - Мон та дырозь ӧй ик тодылы, тӥляд пуныды вань шуыса. - Мар тӥ, со пуны ӧвӧл - диван. ГУР АЗЬЫН-А ИНТЫЕЗ УДМУРТ КЫЛЛЭН? яке Малы уг шумпотто дышетонын ортчытыны чаклам выльдӥськонъёс Кема аръёс ӵоже асьме странаын нырысь интыын сылылӥзы государствомылэн интересъёсыз. Соосты быдэстон понна ик адями ужалляз но, дышетскылӥз но: предприятиосын тыршылӥзы госзаказъёс вылэ чӧлскыса, вань нылпиосты "советской карон" понна дышетылӥзы но будэтылӥзы огкадь программаосъя, вузъёсын но дасяллязы государстволы гинэ кулэ специалистъёсты. Бен, государствомес ӝутон, мукет странаослэсь бере кылёнлэсь утён понна, сыӵе политика со вакытлы, оло, шонер но вал. Сыӵе улонэз быдэсак курланы уг яра. Но, огкадь тупатэм мертэтъёсын улыса, адями ассэ ачиз быдэсак ыштылӥз кадь. Пӧртэм нациосысь потэм адямиослэн сямъёссы, аспӧртэмлыко малпанъёссы, кулэяськонъёссы зӥбиськыса улӥзы. Выльдӥськон кутскемен, адями но государство шоры учконъёс чутрак воштӥськизы, котькуд адями но мургес малпаськыны кутскиз "мон", "ачим" луон сярысь. Государствоен куасалтэм адями эриксэ шӧдӥз. Шӧдскымон воштӥськонъёс кутскизы дышетон удысын но. Валтӥсь интыын луизы, государстволэн ӧвӧл, адямилэн кулэяськонъёсыз. Визьмо адямиос бен азьло но валаллязы, пӧртэм нациосысь потэм нылпиосты ӟуч нылпиосын огкадь дышетыны уг яра шуыса. Но ӝожтӥськыны нокытчы но нокинлы вал, собере "националист" шуонлэсь но кышкаллязы на ай. Табере югдур воштӥськиз. Ичи лыдъем калыкъёслэсь интересъёссэс утён бордын ужало дуннеысь бадӟым организациос ООН, ЮНЕСКО. Со сяна, Москваын кылдытэмын Национальной дышетон ужпумъёсъя институт. Сыӵе институтъёс ужало Россилэн улосвылъёсаз но. Кӧня ке ар талэсь азьло Удмуртиын но кылдытэмын вал Дышетон удысын национальной ужпумъёсты тодон-эскеронъя институт. Соин кивалтэ педагогика наукаосъя кандидат Зоя Витальевна Суворова. Республикамы сярысь гинэ ке верано, берло аръёсы национальной дышетонэз улӟытонлы но азинтонлы саклык висъямын пӧртэм законъёсын но программаосын. Кылсярысь, "Калыкез дышетон сярысь" Законын (1995 ар), республикаямы улӥсь удмуртъёслэсь но мукет калыкъёслэсь вордскем кылзэс утёнъя кун программаын (1994 ар), национальной дышетонэз азинтонъя концепциын (1991 ар) но алигес гинэ депутатъёсын кутэм национальной политикая концепциын (1998 ар). Зоя Витальевналэн верамезъя, национальной ужпумъёслы, зэмзэ ик, нимысьтыз саклык висъяськыны кутскиз 80-тӥ аръёслэн шорысеныз кутскыса. Со нырысь ик герӟаськемын вал калыкъёслэн асваланзы будэмен но соин валче национальной огазеяськонъёслэн улӟеменызы. Та вакытэ удмурт, бигер, пор, чуваш кылъёсын трос гинэ поттэмын вал пӧртэм книгаос, учебникъёс но пособиос. Туннэ республикаямы ужа удмурт кылэз дышетӥсь 425 школа, со сяна, усьтэмын на 34 школа, кытын вордскем кылзэс дышето шаерамы улӥсь мукет калыкъёслэн нылпиоссы. Ижын ужаны кутскиз "нылпи сад - школа" национальной центр (директорез Ольга Константиновна Шилова). Сыӵе басьтэм азинсконъёслы шумпотоно кадь. Но Россия Федерацилэн 1997 арын дасям дышетонын реформаос ортчытонъя концепциезлэн проектэз уно сюлмаськонъёс но юанъёс кылдытэ. Малы? Малпанъёссэ вера З. В. Суворова: - Туж секыт валаны со документэз. Одӥгаз бамын но ӧвӧл сыӵе кылъёс: этнос, нация, национальной школа. Кык-куинь интыосын гинэ верамын калыкъёслэн социально- демографической группаоссы сярысь. Но мар-о со сыӵе? Малы сыӵе кышкаса пыртэмын со кылъёс? Та концепция пумысен люкаськылӥз республикаысьтымы Калыкез дышетонъя министерстволэн коллегиез. Вань ӵектонъёсынымы вазиськимы Правительствое. Нош Правительстволэн Тӧроез Павел Николаевич Вершинин пыриськиз Россиысь парламентлэн та ужпумъёсъя ортчем кылзонъёсаз. Малпасько, отын ас мылкыдъёссэс веразы мукет национальной республикаосысь лыктэм адямиос но. Меӵак верано ке, та концепция пичи калыкъёс понна берлань чигнан кадь луэ. Таӵе малпанъёссэс туннэ озьы ик верало удмурт классъёсын ужась тросэз дышетӥсьёс но. Оло, зэмзэ ик, вань школаос выльысь ӟучомытэмын луозы? Со сярысь ик уг вера меда выль паспортъёсысь "национальность" графаез куштон но? Туннэ Россиын 150 пала пӧртэм калык улэ. Мар возьма соосты, соослэсь нылпиоссэс азьланяз - концепцилэн проектысьтыз валаны уг луы, малы ке шуоно, национальной школаос азе нокыӵе ужпумъёс пуктэмын ӧвӧл. Сюлэм вӧсь луэ, шуэ Зоя Витальевна, уго концепциын национальной школаослы сӥзем люкет быдэсак куштэмын. Оло, соин ик валэктыны луысал, малы берло дыре нош ик туж ӧжыт коньдон висъяське национальной книгаос поттонлы но? Тӥни сыӵе секыт мылкыдъёс кылдытэ дышетонын реформаос ортчытонъя концепцилэн инъетэз. Со озьы ик, тупатъятэк, кутэмын луиз ке, нырысь ик шуге-леке сюрозы удмуртъёс выллем ӟучомыны кутскем пичи калыкъёс. Шуом, Татарстанын, Башкортостанын национальной школаос кемалась пыд йылазы йыг-йыг сыло ини, соин ик соосты вылӥын чаклам реформаосын уд погырты ни. Нош асьмелэн удмуртлыкез ӝутон кемалась ик ӧз кутскы, одӥг чылк-чылк удмурт школамы но ӧвӧл на ай. Вылаз ик, мукет калыкъёслэсь туж бере кылим удмурт кылмес государственной карон сярысь законэз кутымтэмы пумысен но. Соин ик удмурт кылмылэн кулэлыкез туж улӥын возиське, соин ик вордскем кылзэс туннэ 42 процентэз сяна удмурт нылпи уг дышеты. Соин ик, кылмылэсь кулэлыксэ валатэк, мумы-бубыос пиналъёссэс удмурт классъёсы сётыны уг дырто - тӥни соин ик дышетонын мур малпаськытэк чаклам реформаос но лэсьтэм азинсконъёсмес каллен-каллен дугдытыны но быгатозы. Вылаз ик, бадӟым кивалтӥсьёсмылэн но удмурт кылэз тодыны тыршон мылкыдзы сокем ик уг шӧдӥськы кадь. "Удмурт кыл гуртын гинэ кулэ",- таӵе выллем вераськонъёсты ӵем гинэ кылоно луэ, шуэ Зоя Витальевна. Сыӵе малпанъёсын, зэмзэ ик, зэмлыкез вань: вань бумагаосты гожтон, вузъёсын дышетон, официальной кылын вераськон ӟуч кылын гинэ радъямын. Соин ик удмурт анайёс нылпизылэсь азьпал сюрессэ уг адӟо. Нош психологъёс кемалась валэктӥзы ини: кык кылэз тодон нокинлы уг люкеты, нокинлы мултэс уг луы, со адямиез уката но визьмогес, узыргес каре. Туж умой луысал дышетонын ортчытыны чаклам воштӥськонъёс но калыклы сыӵе оскон ке пыӵатысалзы. Туннэ та вераськонамы пыриськиз педагогика наукаосъя кандидат Зоя Витальевна Суворова гинэ. Малпасько, ӝутэм ужпумъя малпанъёссэс вералозы учёнойёс, дышетӥсьёс, анайёс. Татьяна БАННИКОВА. * Удмурт Элькунысь дышетон удысын национальной ужпумъёсты тодон-эскеронъя институтлэн кивалтӥсез З. П. СУВОРОВА. Туспуктэмез В. КАМАШЕВЛЭН. Берекет ИНКУАЗЬ ГЕРДЪЁС Инкуазьлэн шулдырез ваньместы асьмеды ӵемысь паймытъя. Сое адӟыны, дунъяны но валаны, чеберлыкезлы шумпотыны гинэ ум валаське кадь. Сакгес учкид ке, арлэн котькуд вакытаз паймымонзэ пумиталод. Кыӵе тунсыко будосъёслэн, пӧйшуръёслэн, бурдоослэн дуннеязы лушкемен вамыштон! Шунды гинэ но огкадь уг ӝужа, уг пуксьы, шуэ асьме калык. Кӧня тунсыкоез ватэмын адями синъёслэсь, кӧня валантэмзэ пумитаськод отысь! "Удмурт дунне" газетмы арысь аре мур, ӟеч пуштросъем луэ. Котькудӥз лыдӟись отысь шедьтоз аслыз кельшымонзэ, кулэзэ. Соин ӵош ик ӧжытгес гожъяськом кадь инкуазь, пӧйшуръёс сярысь. Зэм, инкуазьлы сӥзем материалъёс пото. Нош медло вылэм пӧйшуръёслэн, бурдоослэн улон-вылонзы сярысь мур пуштросъем, тунсыко гожтэм бамъёс. Сое дасяны юрттысалзы, дыр, биологъёс, пӧйшурасьёс, котькудӥз инкуазен тунсыкъяськись адями. Азьвыл аръёсы ачим но туж яратыса лыдӟисько вал "Комсомольская правда" газетысь "Окно в природу" рубрика улэ интыям материалъёсты. Туж тунсыко потэ телевидениысь "Пӧйшуръёслэн дуннеязы" передача но. Кема аръёс ӵоже та передачаез дасяз но нуиз тодмо журналист Василий Песков. Бератаз, телевидениын ужасьёсты отчы-татчы вошъяны кутскемен валче, Василий Михайлович выжиз "Россия" каналэ, ОРТ-ын табере та передачаез азинтэ тодмо биолог Николай Дроздов. Мыным юн кельшо кыкез ик тележурналистъёс. Ӟечлык ласянь соослэн передачаоссы огкадесь: куддыръя туж тунсыко, куддыръя мӧзмытгес. Гожъяськон ласянь но кыксы ик устоесь. Шонерзэ вераса, Василий Михайлович аслэсьтыз эшсэ ӧжытак азьпалтэ но кадь. Тросэзлы тодмо солэн "Шаги по росе" (та книгаез понна солы сётэмын вал Ленинской премия), "Белые сны Антарктиды", "Земля за океаном", "Отечество", "Таежный тупик" книгаосыз. Нош Николай Николаевич трос гожъя Россиысь заповедникъёс, пӧртэм пӧйшуръёс, бурдоос сярысь научной ужъёс. Солэн гожъямез валамон дышетскись пиналъёслы но, тодосчиослы но, музъем ужасьёслы но... Огаз интервьюын Николай Дроздов вераз: "Дасясько сборник, нимаськоз "Дроздовлэн анекдотъёсыз". Котьмаин тунсыкъяськись журналистъёс соку ик юазы: "Юрий Никулинлэсь адӟем кариды-а?" Биолог валэктӥз: "Юрий Владимирович люкалляз котькыӵе анекдотъёсты. Нош мон - экологической чылкыт луэмъёссэ гинэ. Соос ваньзы герӟаськемын пӧйшуръёслэн, бурдоослэн, мукет лулоослэн дуннеенызы". Тани Дроздовлэн кык анекдотъёсыз. Воргорон пуныеныз картаен шудэ. Вӧзазы дугдэ мукетыз воргорон. Шудэмзэс учкыса лулске: "Кыӵе визьмо пуны!" - Кыӵе визьмо со? - шулӟектэ соиз.- Кык пол шузие кылиз ук. - Нош асьтэос? - Э-э, монэ но кык пол шузие кельтӥз пуны лул! Кыкетӥез эшшо но вакчи. Ресторанысь пото кык кудӟем пыӵъёс. Ваче кенешо: "Пыдын вамыштомы-а яке пуны борды-а канжаськомы (кечырскомы)? Газетмес тунсыко карон понна ӵектӥсько толэзьлы огпол ке но "Инкуазь гердъёс" нимо рубрика кылдытыны. Отчы трос тунсыкозэ гожъялозы кадь потэ мыным, аспӧртэмесь туспуктэмъёс но шедёзы. Н. НИКИФОРОВ. Киров улос, Бураши гурт. Кун Кенешлэн сессиез Кун Кенешлэн дас сизьыметӥ сессияз кадровой ужпумъёс эскеремын вал. Павел Вершинин ӵектӥз Правительстволэн Тӧроезлы агропромышленной комплексъя воштӥсе юнматыны Владимир Зенинэз - "Вараксино" птицефабрикалэсь азьвыл директорзэ. Ӵектонэз депутатъёс умоен лыдъязы. 1998 арлы бюджетлэн инъетэз сярысь вераськиз Кун Кенешысь Экономикаын политикая но бюджетъя комиссилэн тӧроезлэн воштӥсез Софья Широбокова. Сессия мукет ужпумъёсты но эскериз. Инъет карыса кутэм документъёсты депутатъёс согласительной комиссилы тупатъяны ыстӥзы. Социальной удысэз но экономикаез азинтонъя программаез но бюджетлы проектэз отын эскерем бере, соос Правительстволы учкыны сётэмын луозы на. 17 мартэ сессия ужзэ азьланьтӥз. Депутатъёслэн бюджет сярысь малпанъёсынызы газетмы вуоно номераз тодматоз. Кун Кенешлэн пресс-службаез. Чуръёс, чуръёс КУЛЭМЕД ПОТЫТЭК КУЛОД Алигес газетысьтыды лыдӟи сюлэмез портӥсь статья, егитъёс но, мӧйыос но йырзэс, пе, быдто, кыӵесэ пыро. Кызьы таӵе улонэн йырзэс уз быдтэ? Ужасезлы куинь-ньыль толэзен коньдон уг сётъяло, ужтэк кылемез нош маин улоно? Йыр быдтон ик вань со. Тани мынам кенэлы больницаын УЗИ лэсьтыны косӥллям, со понна 32 сюрс манет тырем. Маин улоно кык нылпиен семьялы? Пиналъёссы 5-тӥ но 7-тӥ классын дышетско, дӥсь калык радъя кулэ каро соос. Пие воксё коньдон уг басьтылы, уждунэз магазиназы висъям сиёнлы кошке, сое но тетрадь вылэ гожъяло. Кенэлэн уждунэныз гинэ маке-маке басьто ини. Ай табере нылзылэн сюрлыез будэ, мартэ, каникулъёсыз дыръя, йӧнатоно, шуо, 150 сюрс манет, пе, кулэ. Война дыръя кырӟан вал, мар война та, мар война та шуыса, али мар улон та, мар улон та, кулэмед поттэк но кулод. Озьы луыса кошке кадь. Висись муртлэн кызьы улэмез потоз, эмъяськыны коньдонэз ке ӧвӧл? Ельцинэз, Горбачевез, соослэсь пиналъёссэс, пиналъёссылэсь пиналъёссэс,таӵе улонэ вуттоно вал, кыӵе меда потысал таӵе улон? Али, шуиськоды, куатьтон процентэз вузъёс кунгож сьӧрысь вуо. Соос адямилы секыт висёнъёс кылдыто. Верало, кунгож сьӧрысь ваем тылобурдо сӥлез сиёно ӧвӧл, висён кутод, пе. Отын ик маке кулэ ӧвӧл сӥль магазинъёсы вуэ. Малы кулэ асьмелы эму тылобурдо сӥль? Курег вордон фабрикаосмы мед пытсаськозы но, кунгож сьӧрысь ядэз мед сиём шуыса-а, мар-а? Ельцин ас эрказ лэзиз улонэз, кунгож сьӧрысь калыкен асьме калыкез сураз-пожаз. Странаен кивалтыны кулэ огшоры калыкез валась, солы дурбасьтӥсь адямиос, зэмос кивалтӥсьёс. Л. ЗОРИНА, Ижевскын улӥсь пенсионер. Журналистъёсын пумиськонъёс Кыллись из вожектэ Кун Кенешысь Промышленностья, инфраструктураез азинтонъя, вузъёсын но юрттэтъёсын рынокез кылдытонъя ялан ужась комиссиысь депутатъёс дасям бюджетлэсь инъетсэ туж лябен лядъяло. Со сярысь журналистъёслы ивортӥз комиссилэн тӧроезлэн воштӥсез Александр Горохов. Солэн верамезъя, бюджетын лыдэ басьтымтэ комиссилэн ӵектонъёсыз но. Кылсярысь, комиссия куре таӵе ӵектонъёсты пыртыны: - кулэстон госаппаратын ужасьёсты. Бюджетлы со 22 миллион манет пайда ваёз. Нош кылем ар ӵоже отын ужасьёслэн лыдзы 2,7 процентлы йылӥз; - автомобильёс, мотоциклъёс басьтыны мылкыд карисьёс понна радъяно соосты кредит пыр вузанэз но лотереяен шудонъёсты; - ӟечгес радъяно базаръёсын вузкаронэз, вань вузкарисьёслэн луыны кулэ кассовой аппаратъёссы. Озьы ужаса бюджетэ эшшо 110 миллион манет пала коньдон пыртыны луэ; - вуэз шыръяса возён вылысь, квартираосы пуктылоно счётчикъёс; - бичаны кутсконо пластмасслэсь лэсьтэм посудаез - озьы инкуазьлы но, адямиослы но умой луоз; - му вӧй вузанэн республикамы ачиз мед кузёяськоз. Та куронъёс нырысьсэ гинэ уг чузъясько ни. Журналистъёс, депутатъёс понна но соос кемалась тодмо ини. Но мар меда люкетэ соосты улонэ пыӵатыны? Комиссилэн лыдъямезъя, промышленоостьлэсь ужамзэ 110 процентозь, пе, ӝутыны луэ. "Со понна асьмелэн "куинь китъёсмы" вань, шуо: автозавод, вина поттон но му вӧй поттон. Но кылем арын автозавод 8 сюрс машина сяна ӧз потты, туэ но январь ӵоже 300 гинэ поттэмын. "Удмуртнефть" ОАО сярысь ке верано, федеральной бюджетэ тыронъёсыз гинэ солэн 141 миллиард манет тыр люкаськемын (1998 арын 1-тӥ январьлы). Озыьен, кин янгыш? Власть? Озьы, дыр. Сыӵе малпанэ вуиськод Александр Гороховлэсь верамъёссэ кылзыса но. Трос машина поттыны уг тырмо двигательёс, укыр бадӟым саклык висъямын кунгож сьӧрысь машинаос бичанлы, нош Россиысь двигатель поттӥсь заводъёсын договоръёс гожтэмын ӧвӧл. Ар но ӝыны толэзь талэсь азьло депутатъёсын дасямын вал промышленностез ӝутонъя но азинтонъя законлэн инъетэз. Нош со кылле. Эскерымтэ. Алигес гинэ, пе, правительствое келямын. Т. Банникова. КЫӴЕ ЗОР МИСЬКОЗ МЕДА САПТАМ ПЫТЬЫОСМЕС, РОССИЯ? Кызетӥ даурлэн пумаз Россия, йырсазьзэ ыштэм мурт кабен, я отын, я татын юнме шорысь кутскыса, пиосызлэсь вирзэс кисьтэ. Озьыен, кинлы ке но со туж кулэ. Нош кин дунъялоз адямилэсь улонзэ? Кулэ-а вордэм пиосмы туала государстволы? Атай музъеммес утисьёслэсь заслугаоссэс, военной службазэс нуэмзэс но ужамзэс лыдэ басьтыса, 1995 арын 12 январе кутэм "Ветеранъёс сярысь" Федеральной законын пыр-поч верамын куд-ог льготаос но кинлы ма понна сётӥське "ветеран" ним. Соос люкемын вить пӧртэм категорилы. Быдӟым Отечественной войнае ветлэм солдатъёс оградын сыло кунгож сьӧрын ожмаськемъёсын. Россия армизэ пыртылӥз Венгрие, Алжире, Египетэ, Йемен Арабской Республикае, Вьетнаме, Сирие, Анголае, Мозамбике, Эфиопие, Камбоджае, Бангладеше, Лаосэ, нош ик Сирие но Ливанэ, Афганистанэ. Татын ожъёс тужгес но кема кыстӥськизы: 1978 арысен 1989 арозь. Ӝыны дунне асьмелэн вал! Пиосты мурт музъем вылэ ыстылӥзы, интернациональной долгмес быдэсъяськом, бускель калыклы юрттӥськом шуыса. Бӧрысьгес тае мукет ӧре выжтӥзы: война, пе, гомӟемын вылэм асьме войскоосын, армиенымы кивалтонэз умойтэм радъямен но политикъёслэн янгышъёсынызы. Советской Союз куашкаса, вир кисьтон выжӥз асьме вылэ: Карабах, Таджикистан, Грузия, Чечня. Таосыз вир кисьтон интыос "Ветеранъёс сярысь" Законэн герӟаськымтэ. Соослы кыӵе дунъет сётыны уг валало, шӧдске. Удмуртиысь солдатъёс ас долгзэс быдэсъязы отын но, татын но - огез но "пӧсь" инты соостэк ӧз ортчы. Бырем пиосты цинк коросэн вайылӥзы. Соослэн шайгуоссы пумиськыло шайвыллы быдэ. Бертэмъёсызлэн но сюлэмвисёнъёссы али ке но ӧз бурме на. Шуг-секытъёсысь потыны ог-огзылы юрттон вылысь, "Ветеранъёс сярысь" Законъя ик "афганецъёс"- ветеранъёс огазеяськон кылдытӥзы. Сӧсырмем но шуге-леке кылем боецъёслы асьсэлэн правооссы понна дэмен нюръяськоно луэ. Афганистанысь ветеранъёслэн союзэнызы Удмуртиын кивалтэ Валерий Алёхин, Афганистанын сӧсырмемъёслы юрттонъя республикаысь фондэн кивалтэ Сергей Морозов, прапорщик, мотострелковой батальонысь комсомольской организацилэн азьвыл секретарез. Со ик азьветлӥсь луэ Иж карысь ветеранъёслэн организациязы но. Афганистанын ожмаськемъёслы законъёсъя куд-ог льготаос чакламын, соослэн правооссы Быдӟым Отечественной ожысь ветеранъёслэн кадесьгес ик. Нош тросэз адямиос, ожмаськонэз но армиын службаез-улонэз асьсэос адӟем муртъёс лыдъяло, Чечняын ожмаськонлэн но бервылъёсыз Афганистанын кадь ик жоб вал, трос куректонэ-бӧрдонэ вуттӥзы. Отын но, татын но вирзэс кисьтӥзы яке пыраклы сӧсыр луыса, висьыса бертӥзы. Удмуртиысь кӧня сю пиослэн сьӧд адӟонъёссы Чечняен герӟаськемын меда? Отын быриз 48 егит пи. Тӥни озьы, одӥг странаын - бадӟым но кужмо СССР-ын улэмъёс огзэсты огзы быдто. Россилэн армияз контракт лэсьтыса служить карись старшина Александр Филатов ӟеч тодэ Чечняысь Аргун город дорын 1996 арын 6 августэ луэм сьӧд ужез. Батальонзэс кӧня ке автомашинаосын ысто разведкае. Соосты пумитало боевикъёс. Юн сӧсырме разведчикъёслэн командирзы, быре комбатсы, собере - Филатовен ӵош служить карись эшез Шаркан ёросысь Мишкино гуртысь Юрий Миненков. Старшина эшсэ гуртаз цинк коросэн вуттӥз. Юрий Миненков армие келямын вал Ижевскысь Индустриальной районысь военкомат пыр. Мукетыз учыр. Связист Игорь Кузьмин 1995 арын 12 январе Удмуртиысь 125 пиосын ӵош келямын вал Хабаровск пала. Со ачиз но, эшъёсыз но, мумы-бубыосыз но ӧз малпалэ, сюрес Чечняе, вир кисьтонэ вуттоз шуыса. Шунды ӝужан палан Игорьлы куинь толэзь но служить карыны ӧз кылды, 27 апреле Кавказэ келязы ни. Самолёт вуттӥз Владикавказэ, собере - Моздоке. Кошкыкуз капчи, вазиськись, улонэз но анай-атайзэ яратӥсь мылкыдо вал, армие мынонлэсь палэнскыны но армимес курланы со ноку но ӧз малпалля. Нош бертэмез бере нырысьгес чидасьтэм, малпаськись, керӟегъяськись, ӝож мылкыдо вал, ымнырысьтыз пальпотонзэ но ӧй адӟысал, оло, шуэ анаез. Умйылтӥз но шимес уйвӧтъёс адӟылӥз, шӧдске. Тани табере гинэ, ӝыны арлэсь кема гуртын улыса, ӧжыт буйгатске, улонэзлэн ӧраз пыре ини кадь. - Кӧня эшъёсы син азям ик быризы,- туж юн жаляса вера Игорь.- Тужгес но жаляй но куректӥ Ижысь Олег эше понна, кудӥныз службаын ӵош вамышъям. Ож бере, сое жаляса, ас поннам бӧрдӥ: простить кар монэ, Олег, малы мон улэп кыли, нош тон ноку уд берытскы ни. Милям частьмы лымшор палан пӧртэм интыосын ожмаськиз но дугдылӥз, нош тужгес но пӧсь вакыт йӧтӥз 1996 арын тулыспал толэзе, эшшо шонергес вераса, тужгес секыт вал 23 феврале. Ожъёс мынӥзы дугдылытэк кык нунал ӵоже. Россиысь войскоослэн колонназы Бамут дорысен быдэсак сямен быдтэмын вал. - Ми валамы,- шуэ Игорь,- егитъёслы - милемлы но, чеченъёслы но, ож кулэ ӧй вал. Офицеръёсмы оскытылӥзы, югдурез ми гинэ тупатыны быгатом шуыса. Но ми дырын-дырын вераськылӥм ук чеченъёсын. Огпол 6 муртэ пленэ кутӥм, юаськом, ма понна соос ожмасько. "Ми утиськом вордскем шаермес,- шуо.- Нош тӥ?" "Милемлы приказ сётэмын",- шуиськом. Игорьлэн службаез оглом умой йылпумъяськиз, озьы малпа ачиз но, анаез но. Воин сӧсырмыны но шедьылӥз, госпитальын йӧнатӥзы, но тае лыдэ басьтӥсь но ӧвӧл ни. Гуртаз вуиз чылкак мукет адями, азьло кадь шулдыр мылкыдыз кематэк ӧз берытскы. Ӵем дыръя шимес уйвӧтъёс адӟылӥз, шӧдтэк шорысь сайкалляз, бырем эшъёссэ адӟыса, шара вераськылӥз. Армия сярысь вуоно солдатлэн малпанэз чылкак мукет вал. Чечняын ожмаськемъёс али но уйёссэс уг кӧло. Ыштэм тазалыксэс соослэсь ноку но уд берыкты ни. Трос шуг-секытъёссы: уже интыяськон, дышетскыны пырон, семья кылдытон ласянь. Ӧвӧл уго соослы юрттон вылысь решениос, "чеченъёслэн" правооссы законъёсын юнматэмын ӧвӧл. Тани мар вера "афганецъёслэн" азьветлӥсьсы Валерий Алёхин, Чечняысь бертэм пиосты огазеяськыны со ӧтиз, быгатэмзыя юрттыны кыл сётӥз: - Кӧня ке вамыш лэсьтэмын ик: соослы люкаськылыны нимаз сэрег висъямын. Адрессы - Пастухов урам, 41-тӥ "а" юрт. Та коркалэн пумаз - Афган ветеранъёслэн союззы но отын ожмаськемъёслы юрттонъя фонд. Ветеранъёсын кылем арын пумиськылэм бере, малпан кылдӥз: та выллем огазеяськонъёс котькуд ёросын но городын мед луозы. Нырысь ик та борды кутскиз Индустриальной ёрос. "Чеченецъёслы" но "афганецъёслы" нимысьтыз комната висъямын. Соин кивалтэ майор В. Ю. Порошин. Адӟем карыса, ветеранъёслэн организацизылэн люкетъёсыз кылдо та вакытэ Ижысь мукетъёсаз ёросъёсын, Сарапулын, Воткинскын, Глазовын, Уваын, Можгаын, дасясько кылдытыны Алнашын. Жаляса верано, элькунмылэн Кивалтэтэз но, Ижысь мэрия но организацимылы коньдонэн рос-прос юрттыны уг быгато, бюджетэн чакламын ке но. Секыт югдуре шедем эшъёсмылы юрттыны шуг, но быгатэммыя тыршиськом. Кылем арын 4 "афганецмы" квартира басьтӥз. Россиысь кивалтӥсьёс асьсэос но сураськемын, Чечняын вир кисьтонэз кызьы дунъяны уг валало. Тани Индустриальной ёрослэн кивалтӥсьёсыз но азьло воинъёсты люкаса вераськизы, соос, пе, Чечняе ожмаськыны ӧз ветлэ: отын Конституцилэн куронъёсызъя порядокез утён понна нюръяськизы. Со понна гинэ ке луысал. Афганистанын сямен ик, таяз но республикаын егитъёслэн но калыклэн трос вирзы кисьтӥськиз. Россилэн кивалтӥсьёсыз сяна, кин янгыш? Леонид ФЕДОРОВ. Газет гожъям бере Сюлэм висёнме бугыртӥз 27 январе потэм номерысь синйылтӥ Елизавета Камашевалэсь "Эн вунэтэ чугун сюрес лэсьтӥсьёсты" нимын гожтэм статьязэ. Мынам сюлэм висёнэ, кӧт ӝоже сярысь гожтэмын. Туж шонер вера Камашева эш. Солэн малпанъёсыз борды итӥськоно кариськи. Угось мон но чугун сюрес лэсьтонын ненег ёзвиосме тӥяй, пӧсьсэ, но кезьытсэ но адӟоно луи. 1996 аре февраль толэзе газет баме гожъяй вал ини секыт ужаммы сярысь "Мынӥсь валэз ялан улляло" статьяын. Мукет эшъёс но трос гожъязы ини та сярысь. Соин ик ялан одӥг выллемзэ вераны кулэез ӧвӧл ни, дыр. Бен, чугун сюрес лэсьтӥсьёсты данъяса, памятник пуктэмын. Но кинъёс отын ужазы, нимын-тулын гожъяса, нокытын но кылемын ӧвӧл, дыр. Табере кинлэсь юалод? Куд-огез шуэ, дыр, ваньмызлы война дыръя секыт йӧтӥз, но ми, пинал калык, вормыса но вормытэк, быгатыса но быгатытэк, тырмыт шутэтсконэз-кӧлонэз но адӟылытэк, мӧйыос радын ужамы. Али, мон малпамъя, 13-14 арес нылпизэ одӥг анай-атай но сыӵе секыт уже уз сёты. Ма карод, улон сыӵе вал. Ноку но будӥсь егит калык милесьтым война дыръя кадь секыт улэммес медаз адӟе. Со Ижевск-Балезино чугун сюрес вылтӥ ветлыны кылдӥз ке но, поезд уин ортчылӥз бере, ужам бервылъёсмес учкыны ӧй быгатылы. Эх, ветлы, учкы вал со тодмо интыосты, озьы гинэ малпаса ортчиськод на. Камашева эшлэн малпанъёсыз-куронъёсыз борды итӥськыса, мон но вылӥ кивалтӥсьёслы сюлворисько, арлыдоослы маин ке но шумпотон мед кузьмалозы шуыса. М. Хохрякова. Шаркан район Балтач гурт. Ижысь Октябрь районын Берло дыре юн шӧдӥськыны кутскиз Киров нимо парклэн кырсёмемез. Татын будӥсь писпуос куасьмыны ӧдъязы. Таин валче ӝоггес утчано кылдэм югдурысь потон амалъёс. Ижевск городлэн мэрез Анатолий Салтыков со понна вуж коньдонэн 50 миллион манет висъяз. Висись писпуосты эмъян пумысен гожтэмын договор Ленинградысь одӥгеныз институтэн. *** 9 номеро школалэн юртэз куашкан калэ вуэмын вал. Соин валче со пытсамын. Татысь дышетскись пиналъёс артэ школаосы интыямын. Ужтэк ӧз кыле отысь сюлэсь уно дышетӥсьёс но. Школалэсь юртсэ туэ ар ӵоже выльдыны чакламын. Табере со бадӟымгес, куинь этажъем луоз. *** Игерман гуртын улӥсьёс шумпото. Азьвыл татын магазинзы гинэ ӧй вал. Нянь отчы машинаен нуллӥзы. Табере соослэн асьсэлэн магазинзы. Алигес пуктӥзы на школа, медпункт. Э. Кумачёва. Кенешозы тазалыкез утисьёс 5 мартэ Ижевск городлэн администрацияз люкаськозы эмъясьёс. Ужрадэ пыриськозы Тазалыкез утёнъя управлениысь специалистъёс, медицинской страхованиея фондысь ужасьёс, Медициная академиысь учёнойёс. Кенешонын эскеремын луоз берло 4 ар ӵоже Ижысь медициналэн азинскемез. Э. Васильева. "Кечасьёс" Ог кызь минут сылэм бере, шӧдскымон кынмиськиз, куазь небыт ке но. Нош мынам эшъёсылы нокыӵе ик ӧвӧл, лэся. Дышемын, шӧдске: соос угось нунал лумбытэн кырын, сюрес вылын. Татьяна Лукашова но Владимир Шишкин - Ижевскысь пассажирской автотранспортной объединениысь контролёръёс-ревизоръёс. Соос, кызьы валады ини, луоз, эскеро автобусъёсты. Шонергес вераса, отын пукисьёсты: билетэн-а ветло соос. Туннэ соослы сётэмын кык сюрес - Воткае но Якшур-Бодьяе нуисьёсыз. Татьяна Петровна но Владимир Васильевич ӵукна куать часэ вуиллям Якшур-Бодья сюрес вылэ. Эскериллям куинь автобусэз. Табере тани сылӥськом Воткае нуись сюрес вылын. Дыр - 7 час 30 минут. Ӝоген вуиз Чайковские мынӥсь автобус. Татьяна Петровна соку ик кутскиз билетъёсты эскерыны, нош Владимир Васильевич водительлэсь документъёссэ учке. Ваньмыз умой. Ог кык минут ортчыса, автобус азьланьтэ сюрессэ. Бӧрсяз ик вуэ Воткае мынӥсез. Тазэ но машинаез эскерисьёс кык минутлэсь кема уг ӝегато, ма, калыкез но угось отын куать адями сяна ӧй вал. Нош Июльскойысь лыктӥсь автобуслэн ӧсъёсыз ик мырдэм усьтӥськизы, сокем трос калыкез. Тазэ автобусэз ӝыны час пала эскерозы ини шуыса малпасько. Аслам ветлэмея угось тодӥсько таӵе выллем югдурез. Тросэз адямиос городэ уже мыно, куд-огез поездэ яке самолётэ дыртэ, нош соосты тани витьымтэ шорысь ӝегато. Кызьы уд керӟегъяськы сыӵе дыръя? Но таяз учыре контролёръёс ӟеч сямзэс возьматӥзы. Котькуд адями борды ӧз тэбине, ӧслы матысьёссэ гинэ эскеризы но шудо сюрес сӥзизы. Кин тодэ, оло, корреспондентлэсь кепыразы. Нош ик витиськом мукетсэ автобусэз. Со вискын мар но со юалляськисько выль эшъёсылэсь. Владимир Васильевич удысаз куатетӥ арзэ ужа ини, вань мае мадьыны: - Ма, номыр но ортчыт тунсыкоез ӧвӧл кадь ужамы. Толалтэ тани кынмыса сылӥськом, гужемзэ зор улын котмиськом яке тузонэн но ӵынэн шокаськом. "Кечъёсты" уллёен ум кутылӥське. Малы? Ма, зэмос кечъёс сямен ик, милямъёсыз но, шӧдске, бырон калэ вуо ини. Толон но тани одӥгзэ гинэ кырмимы. Туннэ одӥгзэ но ӧм на. Котькуд контролёр толэзь куспын 400 автобусэз эскерыны кулэ. Нош вань-а план, кӧня "кечъёсты" со кутыны кулэ? Вань но, ӧвӧл но шуыны луоз. План нокыӵе бумагаен юнматэмын ӧвӧл, но со дыре ик кивалтӥсьёс тросгес штрафъёс вайыны куро. Нош йыртэмасьёс ӧвӧл ке? - Вань соос, но кутыны шуг, - азьланьтэ Владимир Шишкин. - "Кечъёс" водительёсын но кондукторъёсын ӵем дыръя огъя кыл шедьто. Шуом, пассажир ӝыны дунзэ гинэ тыре но билет уг басьты. Солы но, водителен кондукторлы но меӵак пайда. Нош азьпалан сюрес вылын контролёръёслэн ужамзы сярысь шофёръёс ог-огзылы одно ик иворто. Валамон, ми автобусэз эскерыкумы, одӥг пассажир но билеттэк уг луы. - Я, "кечез" кырмизы. Нош со штраф уг ке тыры, пумитъяське ке, соку мар? - Ма, ваче гадь кырмаськон учыръёс но луыло. Пассажир штраф уг ке тыры, ми сое автобусысь васькытӥськом. Но озьы лэсьтыны яра гужем гинэ, толалтэ ми сое асьме службаямы нуиськом. Милицие вазиськон учыръёс но луыло. Юнме шорысь шат ми автобусъёсты ГАИ-лэн постъёсыз дорын дугдытъяськом. - Одӥг-ог кылоно луэ, куд-огез шӧртчиос, пе, контролёр улэ аналскыса, пассажиръёслэсь коньдонзэс кесё. Кыӵе документъёсыз луыны кулэ эскерись муртлэн? - Контролёрлэн удостоверениез но маршрутной листэз. Ми та документъёсты возьматыны кулэ пассажирлэн нырысь куремезъя ик. - Нош мар тӥ верасалды автобусъёсты эскерон дыръя кема ӝегатон сярысь? - Милемлы автобусэз эскерыны нокыӵе дыр тупатэмын ӧвӧл. Соиз зэм, ӝегатон учыръёс луыло, тани, кызьы тӥ шуиськоды, Июльской маршрутын ик. Но ми янгыш ӧвӧл ук, ас ужмес коть озьы, коть тазьы но лэсьтыны кулэ. Автобусын мултэс трос калык луэ - тӥни ма бордын ужпум. Кыӵе маршрутъя тросгес калык мытэ-ветлэ, отчы автобус но ватсано. Соку нокыӵе керӟегъяськон учыръёс уз луэ. ...Нуназе бере куинь часэ Т. Лукашова но В. Шишкин кивалтӥсьёссылы А. Поздеевлы сменазэс сёто, ужамзылы йылпумъянъёс лэсьто. Кутэмын, пе, одӥг "кеч", билет басьтӥз, штраф тыриз. Ӵуказе ӵукна куать часэ контролёръёс нош ик сюрес вылэ потозы. Озьы нуналлы быдэ, тол но, гужем но. Г. Тихонов. Татьяна Лукашова но Владимир Шишкин сюрес вылын. Туспуктэмез В. Камашевлэн. Куноос лыкто но кошко Кылем толэзе Ижысь машина поттӥсьёс доры ветлӥзы Чехиысь "Шкода-Авто" но Германиысь "Фольсваген" компаниосысь делегациос. Вераськон мынӥз автомобиль поттонын ӵош, огъя кужымен ужан сярысь. "Ижмаш" АО-лэн валтӥсь директорез Владимир Гродецкий гожтӥськиз "Ижмаш" но США-ысь "Смит-Вессон" компаниен кусыпъёс тупатонъя но вузкаронъя огкыл улэ. Соя Америкае келямын луоз служебной ож тӥрлык. "Ижмаш" группа миым вань бюджетъёсы 129,8 миллиард манет налог тыриз, 1996 арен ӵошатыса, 5 поллы тросгес. Со пӧлысь ачиз "Ижмаш" ОАО Россилэн бюджетаз 69 миллиард манет келяз, Удмуртилэн бюджетаз 18,5, нош Ижевсклэн бюджетаз - 21 миллиард манет. Та ужез быдэстыны луиз банкъёслэн вексельёссы но поставщикъёсын пунэм тыронъёссы пыр. Кызьы тодмо, миым декабре Турциысь "Тофаш" фирмаен "Иж-2126" автомобильлы 3 сюрс "Фиат" двигательёс басьтон пумысен тупанкыл гожтэмын вал. Кун Кенешлэн Тӧроез Александр Волков туэ феврале Италие ветлыкуз вераськиз "Фиатлэн" вице- президентэныз Серпе де Паленэн. Соос одӥг кылэ вуизы, "Ижмаш", "Фиат" но "Тофаш" куспазы тупаса ужалозы шуыса. Тулыс Италиысь куноос дорамы лыктозы. Г. Васильев. Кунгож сьӧрысь иворъёс Чехиын матысь дыре наркотикъёсты шара вузаны лэземын луоз. ДПА агентство ивортэмъя, Чехиысь властьёс, Европаын мукет кунъёслэсь адӟем карыса, наркотикъёсын вузкаронэз радъяны малпало. Чехъёс пӧлын ортчытэм юалляськонъёс возьмато, данакез правительстволэсь таӵе кичӧлтэмзэ шонерен лыдъя. Озьыен, ӝоген та пумысен законъёс кутэмын луозы, нош Чехиысь наркоманъёс понна выль даур кутскоз. *** "Бильд ам Зонтаг" газетэз сюлмаськытэ Германиын ужтэк кылемъёслэн йылэмзы. Кылем арын мында татын берло дыре ужтэк пукисьёс ӧй вал на - 5 миллион адямилэсь трос. Газет пусъе, правительствоез но, Гельмут Колез но та ужпум уг сюлмаськыты, лэся. Коль сыӵеосыныз гинэ ужпумъёсын выре, кудъёсыз солы власть котырын возиськыны луонлык кылдытозы. Калыклы уж сётонэн герӟаськемъёсыз соос пӧлы уг пыро. Канцлерлы но, правительстволы но тодазы возёно вылэм, налог тырисьёслэн кисыысьтызы уждун басьто шуыса, гожтэ газет. *** "Скриппс Хауэрд" информагенствоысь журналист Джеймс Мик Россиысь бюджет чотын ужасьёслэн уждунтэк улэмзы сярысь гожтэ. Западын таӵе учыр луысал ке, гожтэ американец, газетъёс, радио, телевидение та ужпумен гинэ вырысалзы на. Профсоюзъёс югдурез валэктыны, уждунэз берыктыны курысалзы, нош политикъёс янгыш муртъёслэсь кылзэс юасалзы. Нош Россиын чылкак мукет сямен луыса кошке. Огазеяськыса, кужымзэс ӧръяса, урамъёсты потэм но пумитъяськем интые, адямиос ас понназы куректыса тыпак уло яке голодовка яло, ужзэс огдырлы урето. Валамон, таӵе гинэ ужрадъёс пайда уг ваё. Тужгес паймытэ соиз: власть валэктыны уг быгаты, кытчы кошке коньдон. Кызьы инкуазь шукыръяськонлэсь, тудвулэсь, пӧсьлэсь утиськыны уг луы, озьы ик уждунэз но басьтыны амал ӧвӧл - тӥни кызьы малпало, лэся, Россиын улӥсьёс, гожтэ Джеймс Мик. Со дыре ик ваньмыз валало: уксёез лушкало. Шӧдӥсько, дыр, советской воспитанилэн, крепостной праволэн но татаро-монгольской зӥбет улын улэмлэн пытьыоссы. Али ке но ужасьлэн но кивалтӥсьлэн кусыпъёссы феодализм вакытысь кусыпъёслы укшало на: кузёлэн правоосыз но луонлыкъёсыз лекос бадӟымесь, нош ужасьёс уждунзэс кузьымез сямен возьмало. Дуннеысь Валютной Фондлэн Россилы сётэм кредитъёсыз кивалтӥсьёслэн кисыосазы кылё, нош калык чида но чида. *** Англиысь "Таймс" газет гожтэ, Польшаын быдэ вуымтэос понна комендантской час ялэмын шуыса. Таин валче пиналъёс пӧлын йыртэман учыръёс трослы сӥнизы. Быдэ вуымтэослы, дас тямыс арес тырмытозязы, кызь куинь час бере урамъёстӥ мӧйыостэк калтыртыны лэземын ӧвӧл: Польшаысь властьёс, егитъёс пӧлын йыружъёслэн лыдзы будэмлэсь кышкаса, Великобританиысь адӟем кариз. 80-тӥ аръёсы Англиын таӵе программа бадӟым пайда ваиз вал. Лэчыт ужпум Йыр уйжомон яке йыруйжомонтурын? Таӵе пичи но уно бадӟым юанъёслы кылъя симпозиум валэктон ӧз сёты Кык нунал ӵоже Удмурт кун университетын мынӥз финн-угор кылъёсты умоятон но азинтон сюресъёслы сӥзем симпозиум. Пусйыны кулэ: таӵе ужрадэз кемалась витим. Асьмелы весь вераллязы уга: сое люканы коньдон ӧвӧл. Тау университетлы, Куӟебай Гердлэн вордскемез дырысен даур тырмон аре сыӵе секыт ныпъетэз ас вылаз ӝутыны дӥсьтэмез понна. Кылэз азинтонын Россиысь финн-угор дунне али сюриз сюрес воже. Вуж сямен, кипучей-могучей шуыса, гожъяськыны ӟеч ӧвӧл ни. Выль ӧр утчаны секыт. Шедьтӥз-а сое Ижын ортчем симпозиум? Мон малпамъя - ӧз. Учкоме та пумиськонэз радъясьёсты. Бумагалы осконо ке, университет сяна, отчы пыриськиллям Россиысь Огъя но нимаз профессиослы дышетонъя министерство, Удмуртиысь Наукая, вылӥ но шор профессиослы дышетонъя комитет, Калыкез дышетонъя министерство, Национальностьёсын ужанъя комитет, "Удмурт кенеш" огазеяськон. Симпозиумлэн кутсконаз университетысь но "Удмурт кенешысь" кивалтӥсьёсты гинэ адӟыны шуд усиз. Туж ичи адямиос лыктӥллям Кун Кенешлэн Тӧроез бордын кылдытэм нимкылъёсъя но шонер гожъяськонъя комиссиысь. Солэсь кыл кутӥсь секретарьзэ Александр Овчинниковез берлогес пыкылӥ но, таиз паймиз: монэ ӧз ӧте, пе. Куазь кезьыт ке но, Финляндиысь, Комиысь но музон интыосысь тодосчиос (учёнойёс) дорамы вуизы, нош Глазов пединститутысь, Ижысь Калыкез дышетонъя министерствоысь - тросэз ик ӧз. Кызьы сое валано? Оло, куд-огез тазьы лыдъязы: наука мед ужалоз наукалы, практика мед пырскоз ас понназ? Озьы азьвылгес ик висъяськеммылэн изъянэз шӧдӥське ни. Комиос выль кылъёсын кык бюллетень печатлазы, асьмеос - огзэ но ӧм. Малы? Нимкылъёсъя но шонер гожъяськонъя комиссиысь огезлы секцилы оскизы вал район, город но гурт нимъёсты радъяны. Туж кулэ удыс. Удмурт кунлы выль тодметъёс - кунпус (герб), куншет (флаг) но кункрезь (гимн) юнматэм бере, ваньмыз сямен городъёс, районъёс, администрациос, предприятиос, организациос сэрытак вошъяно луизы вывескаоссэс, печатьёссэс но штампъёссэс. Выльёсаз рос-прос пусъёно ни вылэм: Вотка яке Воткинск, Глаз яке Глазов, Валион яке Валъюон. Инты нимъёсъя вылӥ верам секцие юнматэм эшъёс сыӵе кысык вакытэ ма каризы? Комиссиысь мукетаз ёзэ, нимкылъёсты (терминъёсты) эскерись секцие, лыктӥзы но монэ пыжизы: тӥ умойтэм ужаськоды, ог-огеныды керетӥськоды, ужан "кухнядэс" калыклы юнме возьматӥськоды. Та вакытэ ик асьсэлэсь удыссэс вунэтӥзы. Республикаысь вывескаосын но печатьёсын выльысь пишто сурам-пожам удмурт кылъёс. Азьланяз, куке-соку, инты нимъёсмес радъямы ке, организациослэсь нимъёссэс выль сямен гожъяны куримы ке, кылзӥськозы-а асьмелэсь? Коньдонмы солы ӧвӧл ни уз шуэ-а? Вань-а татын янгыш муртъёс? Вань. Комиссиысь ог люкетэз адямиос дун басьтыса ужазы лыдъяське, мукетъёсыз отысь кошкизы. Озьыен, кылемъёссэ сэзьгес бергатоно вал, ужасьтэмъёссэ чупресъёсыныз воштоно. Таиз но амал вуныса кылиз. Озьы коньдон быдтэмын, уж быдэстымтэ. *** Симпозиумын пусъемын: Герд дыръя но, али но ваньмыз сямен финн-угор кылъёс азинско куинь амалэн. Нырысетӥез: выль кылъёс кылдо вужъёсыз вылын: кивалтон- кивалтэт (правительство). Кыкетӥез: музон кылысь пунэмам чотын. Кылсярысь: Дума. Куинетӥез: кылэз меӵак берыктыса (калька кылдытыса). Шуом: себестоимость - асдун. Шедьтэмын мукет амалъёс, но соос укыр бадӟым инты уг басьто на. Пумиськонын туж кылэме потэ вал: асьмеос кыӵе ужпум (цель) пуктӥськом, выль кылъёс кылдытыку? Таӵе юанэн кемаласьгес нерад карисько нимкылъёсъя но шонер гожъяськонъя комиссиысь тодмоосме но. Малы? Сотэк уг валаськы уга, кудӥз кыл асьмелы юнгес тупа: бюджет яке коньдэт, комиссия яке ӧри? Паймоно кадь, нырысетӥ ужпумез нокин но рос-прос уг тоды. Огез гинэ "ӧртчи" шуон тазьы индылын выриз: выль кылъёс, пе, кулэ соин - ӟучъёс асьмеды медаз пыкылэ, кыл запасты туж куанер шуыса, вераськемдэс удмурт кылэз тодытэк но валаны луэ шуыса. Мар бен, дыго-мого ке но ужпум пуктэмын, ӟеч-а, урод-а, но пусъемын: удмурт мед вераськоз ӟучлы валантэм кылын. Сыӵе "бадӟым" куронэз асьмеос туж аспӧртэм сямен быдэсъяськом. Асьмелэн тазьы позыръяськеммы ӟучъёс понна кезьыт но, пӧсь но уг йӧт. Ӟучъёс ӧйтод, асьмеос, удмуртъёс, вордскем кылмес валамысь дугдӥськом. Тани симпозиумлы сӥзем программаысь но адӟисько сыӵе "зарни кылъёсты": дырвис (ӟуч люкетэзъя валай - регламент), юртполэс (этаж, вылды), йӧскалык (национальность). Ӟучъёс сыӵе дыръя маскаръясько: вуэн ӵош нуныдэс но пальккиды, пе. Мыным огпол гинэ ӧз йӧтылы ни "кулэтэм" юанъёсыным куд-огзэ курадӟытэме понна. Нош ас азяд чот-чот ужпум пуктытэк, мар-о лэсьтод? Шурез ӵыпемлэсь азьло ик рос- прос малпано ук: тыметын чорыг-а вордод яке вукоын пызь-а изод? Монэ чепылляло тазьы: нимкылъёсты малпаку, пе, ченгешонъёсты кыре поттыны уг яра, калык медаз адӟы выль кылъёс дурон кебитмес. Выль юан - малы медаз адӟы? Бен, Александр Пушкин ӵемгес гожъяськиз "узыр дворян" кылын, Максим Горький - "гольык пыд" кылын. Туала тодосчиос кылдытыны кулэ вань калыклы валамон кылэз. Шонергес вераса, азинтыны кулэ дасьсэ, 20-тӥ аръёсы Куӟебай Герд но мукетъёсыз тыршыса огазеям огъя кылмес. Малы меда сыӵе ужмес ватыны кулэ кухня шуонамы? Калыкмылэсь вордскем кылзэ волятыны паськыт демократия люкетэ ке шат? Тодосчиослэсь эшшо одӥг юанлы валэктэмзэс возьмай. Кыӵе черодъя утчано выль кылъёс? Азьвыл со умойгес радъямын вал. Республикамылэн Конституциезлы инъетэз (проектэз) куто но учко: кыӵеоссэ кылъёсты ӟуч кельтоно, кыӵеоссэ воштоно? Собере дыр вуиз удмуртэ берыктыны Россиысь но Удмуртиысь кун властьлэн ёзъёсыз (органъёсыз) куспын быдэсъяно ужъёсты люкылон сярысь Огкылэз (Договорез). Табере сыӵе радлык ышиз. Нокин уг вера: малы тодосчиосмы сэрттыны-пертчыны дырто куймыр но изсир выллемъёсты? Волятоно кылъёсты мон черодэ пуктысал тазьы. Пусйим: нимкылъёсъя но шонер гожъяськонъя комиссия кылдытэмын Кун Кенешлэн Тӧроез бордын. Номыр умойтэмез уз луы, комиссия нырысь ик Кун Кенешлы юрттӥз ке выль законъёсты берыктыны. Удмуртъёс понна кӧня валантэм интыос отын! Ӝегатскытэк радъяно инты нимъёсты. Законэз чакланэн ик герӟаськемын мукетыз могӟет. Вылӥ верам комиссилэн дэмланъёсыз кужыме пыро, соос бюллетеньын печатлам бере гинэ. Верай ни: татчыозь одӥг бюллетень но потэмын ӧвӧл. Озьы бере, законъя кутыны яра вылӥ верам Конституцие но Огкылэ сюрем кылъёсты гинэ. Соку кыӵе правоен кивалтӥське Удмурт радио (куддыръя телевидение), нокытын юнматымтэ кылъёсты веракуз? Сыӵе юанлы мыным валэктон ӧз сёты на "Удмуртия" кун телерадиокомпаниысь огез но кивалтӥсь, нимкылъёсъя но шонер гожъяськонъя комиссие пыртэм одӥгез но адями. Лул вылаз султэме бере, комиссилэн кыл кутӥсь секретарез Александр Овчинников шуиз: - Радиолы право сётэмын выль кылъёсты калык пӧлын эскерон вылысь кутыны. - Малы одно ик радиолы гинэ сётэмын? Кин кутӥз сыӵе решение? Возьматэлэ бумага вылысь. - Бен комиссилэн огаз кенешоназ асьтэос сыӵе ӵектон сётӥды ук! Паймод! Мынам ӵектонэ ас кожаз пӧрмем, ява, юнматэм решенилы. Зэм, Удмурт радиолэсь со понна мыным тау каремзэ ӧй кылы на. Мон лыдъясько тазьы: выль кылъёсты эскерон вылысь вӧлмытыны яра соослы сӥзем нимысьтыз веранъёсты гинэ. Сыӵе сурам-пожам югдур пумысен удмурт тодосчиосмы кытӥяз тазьы оскыто: комиссилэн бюллетеньёсыз, пе, печатламын ӧвӧл на, кӧня ке сю кыл рос-прос эскеремын ни, соосъя решение кутэмын. Озьыен, малы-о бюллетенез витьыны кулэ? Выль кылъёсты улонэ али ик пыӵатоно! Со луэ комиссия сярысь положениез меӵак тӥян. Мургес учкыса, адямилэсь ивор басьтон эриксэ но правозэ талан. Озьы ке но, мон, оло, сыӵе веранэн солаш кариськысал. Но... Йыр уйжомон -2 Комиссилэн огаз кенешаз люкаськемъёс берыктыны выризы собственностез. Куараосты оген-оген лыдъязы. Укмыс мурт шуиз: асваньбур. Огез - асъет Мар со сыӵе ет? Кудӥз-о кыл пыӵаны кулэ? Ваньмыз валамон кадь. Соку малы Удмурт радио весь вера асъет, чик уг тоды кадь асваньбурез? Мугез туж огшоры. Асъет кыл понна одӥг гинэ куара сётӥз вал уга радиоын ужась. Та пумысен вераськон пуромылӥз симпозиумын но. Ченгешонъёсты кулэстон вылысь, отын сётэмын вал умой ӵектон. Ӟучысь кудаз ке финн-угор кылэ берыктыку, пе, одно ик одӥг кылэз гинэ юнматоно ӧвӧл. Мед луоз ужанрад но дырвис (регламент), асваньбур но асъет. Кудӥз калыклы яралоз, сое ик кутоз. Оло та дэмланэз зэмен ик пыртоно нимкылъёсъя но шонер гожъяськонъя комиссия сярысь положение? Соку куд-огез керетон но ӝегатскон мугъёс бырозы. х х х Куддыръя сьӧд коӵыш меӵак висъя тодосчиосты (шуом, теориен вырисьёсты) но газетчиосты (практикаен нуналмысь вырисьёсты). Берыктоно тае: Правительство Удмуртской Республики. Тодосчиос ӵекто: Удмурт Элькун Кивалтэт. Теория ласянь шонер кадь. Газетчиос "ӵыжасько": шуоно, пе, Удмурт Элькунысь Кивалтэт. Малы? Правительство выльмиз ке, кызьы гожтод? Выль Удмурт Элькун Кивалтэт? Но тазьы солэн пуштросэз воштӥське ук, Правительство Республики нового удмурта мактал луэ. Оло, Удмурт Элькун выль Кивалтэт? Мыркгес. Газетчиослэн дэмланзы вольытгес. Удмурт Элькунысь Кивалтэт - Удмурт Элькунысь выль Кивалтэт. Тодосчиосмес мон вӧсь каро, дыр. Нош вератэк уг чидаськы. Дасо аръёсын ӟуч сямен малпаськыса, соос вордскем кылзылэсь пумен люкисько но нуналмысь пумиськылӥсь учыръёс сярысь вольытак гожтыны но вераны уг быгато ни. Тӥни кытысь пото теориен но практикаен вырисьёс куспын вожвылъяськонъёс. Таӵе малпамлэсь шонерзэ возьмато мукет учыръёс но. Шонер гожъяськыны дышетӥсьёсмы пӧлысь тросэз-а асьсэос валало кытчы кыӵе пус пуктыны? Газетъёсы-журналъёсы вуэм гожтэтъёссыя дунъяно ке - туж ӧжытэз. Таиз пумысен отӥяз кенешом ай. Котькыӵе ужпумез басьты, одно мырӟиськиськод комиссия вылэ. Симпозиумын трос ӧз вераське мукет республикаосысь сыӵе ёзъёслэн ужамзы сярысь. Кулэ вылэм. Соос пыр сяна, асьмеос нокызьы ум быгатэ кылмес волятыны. Туннэ ик рос-прос пуконо таӵе юанъёс бордын. Кӧня мурт медло комиссиын? Кӧня тодосчи, газетчи, писатель? Валтӥсь редактор-а, огшоры корреспондент-а, корректор-а отын кулэгес? Кыӵе амалэн выльдоно комиссиез? Кыӵе ёзъёс пыр (печать, телевидение, радио) солэсь ӵектонъёссэ улонэ пыӵатоно? х х х Симпозиумын комиослэсь но, поръёслэсь но юай: тӥляд республикаосады кинъёс юнгес дурбасьто выль кылъёслы, кинъёс уг? Югдур котькытын огкадь вылэм. "Пересьёс" - "Коми му", "Мари Эл", "Удмурт дунне" выльзэ пыӵатыны уг дырто. Радио котькытын дӥсьтӥсьгес. Мынам тодэме потӥз: сыӵе югдур нимаз адямиосын-а герӟаськемын яке асьмелы валантэм кыӵе ке "законэн"-а? Серем улсын вераны выризы: "мӧйы" газетъёсын, пе, консерваторъёс пуко, соосты номырин уд вырӟыты. Та пумысен маскаръяськытэк малпаськоно. Пыкиськон муг таӵе, дыр. Газетчиос юнгес шӧдо калыклэсь мылкыдзэ. Кылдэ уг валало - газетэдлы уг гожтӥсько - тиражед кулэсме. Радиодэ бордаз ик лякиськыса кылзо-а, сялӟиськыса кысо-а - кин тодэ? Тӥни малы газетчиос кыл бордын туж чакласькыса ужало. Кулэ-а соосты азгынмемъёс шуыса пыкылыны? Мон кемалась дэмласько ни выль кылъёсты кык "пуйые" тырыны. Нырысяз возёно ӵуказе ик кутонооссэ. Газетъёс но, журналъёс но, телерадиоос но мед сюлмаськозы соосты улонэ чалякгес пыӵатыны. Шуом, улосвыл (территория), ёз (орган). Мукетаз пуйые каръяно вылэм запасмес. Сыӵе кылъёс туннэ валантэмесь на (эрикрад - право, катрадлык - законодательство). Дас-кызь ар ортчыса, оло, кулэ луозы. Кин тодэ, оло, тау карозы кызетӥ даурлэн пумаз ужамъёслы. Шуозы: кыӵе визьмоесь вылӥллям, милемлы дуно зарни кылпуйы люкаса кельтӥллям. Озьы асьмеос ӟечен тодамы ваиськом ук Куӟебай Гердэз. Симпозиумын тросэз тросэз вераськизы солэн, мукет тодосчиослэн но писательёслэн удмурт кылэз волятэмзы сярысь. Пусйизы: Герд дыръя туж уно выль кылъёс малпамын. Кылбур шуонмы выжем коми кылэ но (кывбур). Мон, чидасьтэм сюлэм, выльысь кылме куртчыны ӧй быгаты. Юасько: кӧняез кылъёс 20- тӥ аръёс бере улонэ пыӵазы, кӧняез ӧз, малы ӧз? Одӥг муг гинэ веразы: 30-тӥ аръёсы, пе, Гердэз шымыртыны ӧдъязы но, гожъясьёс солэн данак кылъёсызлэсь куштӥськизы. Та валэктон шонер, вылды, история ласянь. Кылчи (филолог) югдурез мургес бугыртыны кулэ вал. Кызьы но малы огзэ кылэз калык аслыз каре (гожтэт), музонзэ палэнтэ (ужчи - рабочий). Туннэ кызьы дунъясал соосты? Тодосчиос сыӵе учыръёсты пыр-поч эскерысалзы ке, 20-тӥ аръёсы вылэм янгышъёсмес асьмеос выльысь ӧй лэсьтысалмы. Ӟучъёс верамъя, одӥг мажес вылэ кык пол ӧй лёгиськысалмы. х х х Лэчыт пӧрмиз шонер гожъяськон сярысь ченгешон но. Кӧня ке толэзь талэсь азьвыл Ижысь ваньмызлэн удмурт газетъёслэн но журналъёслэн валтӥсь редакторъёссы шара гожтэт пыр дэмлазы отглагольной но деепричастной оборотъёсты запятоен висъятэк келляны. Малы ке шуоно, правилоос татын укыр мудронэсь но валантэмесь. Симпозиуме лыктэм удмурт тодосчиос таӵе ӵектонэз шонерен ӧз лыдъялэ. Озьы ик рос- прос ӧз валэктэ сложной кылъёсъя правилоосты. Меӵакгес вераса - валэктӥзы, но индылэмзэс йырын возён понна, Удмурт кун университетлэсь удмурт кылтодон люкетсэ горд дипломен йылпумъяны кулэ. Отын дышетскымтэос лякытэнгес тодмалозы китай иероглифъёсты. Тани куд-ог верамъёс. Иван Тараканов, удмурт профессор: - Трос кылъёслэсь пӧрмем сложной кылъёсты гожъяно огазе. Кылсярысь, куткулонгуби. Юрий Андуганов, пор профессор: - Мон ачим кылчи. Валасько, сыӵеосты ӵош гожъяно шуыса. Но кык-куинь этажъем кылъёс пӧрмо ребусъёслы, соосты сэрттыны-пертчыны лекос шуг. Соин ик нимаз гожъяно. Иван Тараканов: - Татын лыдэ басьтоно огзэ. Сложной кыл ке - гожтоно ӵош, фразеологизм ке - нимаз. Алексей Шкляев: - Мон но, милям туж уноез лыдӟисьёсмы но, тӥляд горд диплом басьтэм студентъёсты но висъяны уг быгато сложной кылэз но фразеологизмез. Пӧсь уж дурын та сярысь малпаса улэмдэ уз вите. Иван Тараканов: - Малпано ӧвӧл - тодоно сое. Пумитаз мон кыл ӧй шедьты. Али верасал: ӟуч кылын гинэ печатлам "Научная грамматика" книгаез ойдолэ вань удмуртъёс пӧлын лыдӟом но, оло, шонергес гожъяськыны дышом. Нош туннэ валантэм мыным: оло йыр уйжомон, оло йыруйжомонтурын. Иван Тараканов сыӵеосты дэмла огазе лякыны: герберсяська, гудырикошконтолэзь. Мугзэ валэктэ озьы: кык-куинь кыллэсь пӧрмем но выль валан сётӥсь кылъёсты ӵош гожъяно. Татын нош ик пумитъяськем потэ. Герберсяська кылэз музэн ик, соку огазе кароно со выллем музон кылъёсты: италмассяська, невскийкартошка, Чушнииваннюню, Сэдыкапай, владимиртяжеловозвал, плимутроккурег, холмогорскал. Малы асьмеос курдаськом сыӵе ребусъёсты юдыны? Медло тазьы: январь толэзь - толшор толэзь, суббота нунал - кӧс нунал. Адамадями ӧвӧл - Адам адями. Улон асьмеды кӧня пол дышетъяз ни: теориын макем мудронэсьгес правилоос кутӥськом, практикаын сокем юнгес чутӥськом. Юнме шорысь шат Удмурт кун университетысь дышетӥсьёс но янгышен гожъясько? Серекъятэк ке, мон тросгес эрик сётысал гожъясьёслы. Иван Тараканов кызьы ке шуиз: ярам, ӵошатон оборотъёсиы запятоен ум висъялэ ни, журналистъёслы "уступка" лэсьтом. Юан кылдэ: малы кулэ журналистъёслы "уступка"? Со - калыклы ӟеч карон ук, огшоры адями йырзэ мултэс медаз тӥя шуыса сюлмаськон. Котькудӥз ручказэ кышкатэк мед кутоз: мон гожъяськыны пӧрмытӥсько, мынэсьтым чуръёсме уз серекъялэ. Вунэтӥськом ни авторлэн пусэз шуонъёсты но. Тодмо писательёс сое ӵемысь куто. Малы асьмеос возьдаськыны кулэ? Сыӵе пус уг шарая авторлэсь ляб тодон-валанзэ, со возьматэ гожъясьлэсь аспӧртэм манерен малпаськемзэ. Эшшо одӥг ӵектон. Выль кылъёсты сямен ик, гожъяськон правилоосты но огдырлы кык- куинь пӧртэм кельтоно. Мар кышкытэз? Деепричастной оборотэз висъялом-а, ум-а, со оборот ик луыса кылёз. Отӥяз адӟом: пуктоно-а запятой, ӧвӧл-а. Шонер пусйиз Юрий Андуганов: гожъям кылъёс одӥг адямилэсь малпанзэ мед вуттозы мукетыз доры, нош лекос уно пусъёс та ужлы люкето гинэ. Малы мон таӵе куронъёсын меӵак вазиськисько Иван Васильевич Таракановлы? Мукет тодосчиосын ӵошатыса, со юнгес вала газетчиослэсь сюлэм висёнъёссэс (яке сюлэмвисёнъёссэс-а гожтоно?), ӵемгес гожъя удмурт изданиосы материалъёс. Ченгешон сямен мон, оло, сое вӧсь но карылӥсько. Нош вожзэ уг потты, пӧртэм малпанъёслэсь (идеяослэсь) нюръяськонзэс уг пӧрмыты нимаз адямиос куспын вожвылъяськонлы. Таяз учыре но оскисько: профессор Тараканов уз вогъяськы но дэмланъёсме рос-прос сэрттоз-пертчоз. Котьма ке но, симпозиум кӧня ке бугыртӥз тодосчиослэсь но гожъяськисьёслэсь сюлэмзэс, соин ик мон выльысь сётӥсько уно пол верам ӵектонме. Удмурт кылмес азинтон но гожъяськон правилоосты умоятон вылысь, асьмелы одно ик люкано нимысьтыз бадӟым кенеш. Отын лад-лад сэрттоно-пертчоно азьлане мынон сюресъёсмес. Гожъяськонмес но вераськонмес волятоно озьы - нокин но медаз кайгыры, асьме кыл секыт но шакрес шуыса. Чебер кыллэн кузёез чебер медло, чебер калыклэн кылыз чебер медло. Алексей ШКЛЯЕВ. Малпан КЫТЫСЬ ПОТЭ "ДЕДОВЩИНА"? Берло дыре армиын кузёяськись "дедовщина" сярысь ӵемгес но ӵемгес вераськиськом. Солдатъёслэн ог-огзэс ултӥяменызы, серем каременызы туннэ нокинэ уд паймыты. Малы таӵе югдуре вуим? Кин янгыш? Таин валче малпан кылдэ, оло, пиосты армие вазь басьтэм бордысь со потэ? Адями улонэз валаса ик ӧз вутты, солэн асваланэз юнмамтэ на. Лымшор палан будэм пияшъёс чалякгес воргоронлы пӧрмо, соос вазьгес мычыны кутско бычыраны вуэм тушсэс. Соин ик армие мынон вакытазы "сьӧдъёс" трослы кужмоесьгес луо. Со тужгес но шӧдӥське служить каронзылэн нырысетӥ араз. Армие кошкыкуз, пияшлэн соку гинэ сяськаясь яратонэз кыле. Ӵемысь со нылаш сое уг возьма. Солдатлэн сюлмыз бӧрдэ. Вылаз ик, анай-атайёсыз номырин шумпоттыны уг быгато. Доразы номыр вылез ӧвӧл, атайзы юэ, коньдон ӧвӧл. Мар кароно солы? Ас лексэ эшъёсыз вылэ кисьтоно. П. ВАСИЛЬЕВ. Кыӵе интыын Республикаысьтымы промышленность миым ваньбур поттонзэ 100,2 процентлы тырмытӥз. Урал зонаын со лыдпус - 99,6 процент. Шаермес азьпалтӥз бускель Пермь область (106,8 процент). Татын уждун но 1,5 поллы уногес басьто. Элькунамы котькуд адямилы улыны, Урал сярысь, 100 манетлы тросгес уксё кулэ. Нош ужасьтэмъёсмы котькытынлэсь уно. Миым шаермы Россие сётӥз 2 триллион 64 миллиард манет, нош отысь басьтӥз 24 миллиардлы ӧжытгес. Г. Васильев. Можга педучилищеысь иворъёс Можга педучилищеын кемалась витё ни вал та нуналэз. Толон огъя улоннилэн (общежитилэн) выль 4 этажъем юртэз усьтӥськиз. Та сӥё-дано ужрадэ пыриськизы татысь дышетӥсьёс, студентъёс, лэсьтӥськисьёс, ӧтем куноос. Сьӧрлось лыктэм дышетскисьёс сяна общежитиын улыны ордеръёс басьтӥзы егит дышетӥсьёс но. Выль коркан улон-вылонды шудо-буро мед ло! *** Алигес училищеын куинь шудо нуналъёс вал: вордскиз нырысетӥ газетсы. Татысь суредась Владимир Кашин йылаз-пумаз вуттӥз бадӟым ужзэ. Буёло дэра вылэ городысь тодмо адямиослэн тусбуйёссы кельтэмын. Училищеын сӥё-дано пусйизы Дмитрий Лукъяновлэсь вордскемез дырысен 65 ар тырмемзэ но дышетон удысын 40 ар тыршемзэ. Тодмо педагоглэн дышетэм пиосыз - нылъёсыз табере асьсэос но данэ потӥзы ни. Соос пӧлысь уноез школаосын тыршо. Пӧлазы вань писательёс, журналистъёс, министръёс, тодосчиос, мукет удысысь тодмо адямиос. Г. Юсаев. Быръёнъёс азьын "СЁТЭМ КЫЛМЕ БЫДЭСТӤ",- шуиз журналистъёсын пумиськон дыръя Ижевск городлэн администрациезлэн кивалтӥсез А. И. Салтыков. Вуоно быръёнъёс азьын 4 ар ужамезлы вакчияк йылпумъянъёс лэсьтӥз, соин ӵош мэрлэн интыез понна нюръяськонэ пыриськыны соглаш луон мылкыдзэ вераз. Таӵе куронэн Анатолий Ивановичлы вазиськизы ни городысь 46 предприятиос, организациос но куд-ог нимаз адямиос. Соос пӧлын: "Буммаш" ОАО, 3 номеро медсанчасть, тодмо спортсменкаосмы Галина Кулакова но Тамара Тихонова, Удмурт госуниверситетысь студентъёс но трос мукетъёсыз. - Оскемзы понна ваньмызлы тау карисько,- шуиз Ижевсклэн мэрез,- соин ӵош верало: аслэсьтым 4 арлы чаклам программаме мон быдэстӥ. Городской Дума, администрация вань быгатонозэ лэсьтӥзы, Ижевскез шуг-секытэ шедёнлэсь утён вылысь. Вераны кулэ, городмы улӥз ас поттэм коньдонэз чотын, палэнысь пунэмаськытэк, кураськытэк. Луонлык шедьтэмын пенсионеръёслы городысь транспортын дун тырытэк ветлыны, школаын дышетскисьёсты дунтэк сюдыны. Секыт ке но, утьыны быгатӥм Ижевсклэсь хозяйствозэ. Каллен ке но, выльдӥське мынон-ветлон транспорт. Ваньмыз со лэсьтэмын но лэсьтӥське городлэн бюджетэз чотын. Журналистъёс А. И. Салтыковлы пӧртэм юанъёсын вазиськизы. Кылсярысь, кыӵе ужрадъёс кутэмын, пыдйылчиосты (бомжъёсты) ульчаосысь утялтонъя но йыртэмась егитъёсын ужанъя? - Улон интытэк кылемъёслы Ижевскын алигес усьтэмын кӧлан юрт. Зэм, отын интыез ӧжыт. Но та сюлмаськон одӥг город вылэ гинэ медаз усьы, малы ке шуоно, республикаысь югдурез одӥг приют пыр гинэ уд тупаты. Быдэ вуымтэосын ужанъя пусйысал "Подросток" клубез. Город понна со туж трос лэсьтэ. - Ведомственной луись нылпи садъёсты, предприятиос алӥськемен, ваньзэ тӥ ас вылады басьтӥды. Мумы-бубыос вылын со кызьыгес шӧдӥськоз? - Соос тыро 20 процентсэ, кылемзэ висъя Ижевсклэн администрациез. - Ар ӵоже городъя оглом кӧня налог люкаське но кыӵе люкетэз татчы кыле? - Люкаське ог 3,5 миллиард, Ижевске кыле 1 миллиардэз. - Анатолий Иванович, вераськонъёс ветло, тӥ Москвае улыны кошкиськоды шуыса... - Со юнме супыльтон. Кемалась Германие но келяло кадь ни... Мынам выжыосы татысь, удмурт музъем вылысь. Мон Ижевске лыктӥ 1966 арын. - Городысь транспортын мынон-ветлонъя туала льготаос уз воштӥське-а? - Отысь ветеранъёс понна - уз. Пенсионеръёслы учком, туэ арлы кутэм бюджетэз чакласа. А. И. Салтыков пыр-поч валэктонъёс сётӥз журналистъёслэн мукет юанъёссылы но. х х х Городысь избирательной комиссия ивортэмъя, Ижевскысь мэрлэн интыез понна нюръяськонэ пыриськыны мылкыд кариз ни 12 мурт. Л. МЕДВЕДЕВА. Оло оскод, оло уд УЙВӦТЫН АДӞЕМ ТЫЛОШМЕС Асьме улон-вылонамы олокыӵе но паймымон учыръёс пумиськыло. Куддыръя ас синъёсыныд адӟемлы но оскем уг поты кадь. Но... оскытэк амал ӧвӧл. "Сьӧд кашо зундэс" кышкыт-кӧшкемыт повесте бордын ужакум (соин "Удмурт дунне" ас лыдӟисьёссэ тодматӥз 1994 арын), мыным ведӥнъёс, сьӧд кужымъёс сярысь трос юалляськоно луиз арлыдоослэсь, бугыръяськи пӧртэм газет-журналъёсысь, книгаосысь. Огзэ ӟеч валай: лыдӟисьёс туж юн оско сьӧд кужымъёслы. Угось трос гожтэтъёс вуылӥзы визь-кенеш курыса. "Кызьы утиськоно ведӥнлэсь?" яке "Кызьы дышетсконо ведӥнлы?" Нош автор таиз сярысь, бигеръёс верамъя, ачиз но "белмей" - уг тоды. Югыт дунне выламы паймомынэз пумтэм. Сьӧд но тӧдьы кужымъёслы огкадь оско дышетскемез но, дышетскымтэез но. Гуртамы вань егит пор кышномурт (нимтулзэ воштӥ). Удмурт калык пӧлын малы ке улэ сыӵе оскон: пор кышноос, пе, котьмалы йӧндыро. Со дыре ик поръёс но озьы малпало вылэм асьме выжы калыкмы сярысь. Ольга шулдыр мылкыдо кышномурт, тырше пудо вордон удысын. Ӧжытак курытсэ но веръя, ӵош ужась эшъёссэ курдатэ: "Мынэсьтым вожме ке поттӥды, мон одно ик тӥледлы маке-маке йӧнтэмзэ лэсьто". Собере чиньыоссэ куасалляса лыдъяны кутске аслэсьтыз лэсьтэм кырсь ужъёссэ. Кинлы чер кузьманы быгатӥз, кин солэн юриськемез-каргаськемез бере кизэ я пыдзэ чигтыны шедьтӥз. Шонерзэ вераса, уг оскиськы мон солэн "быгатонлыкъёсызлы", калыкез юри курдатэ кадь потэ. Та нуналъёсы Ольга серекъяса тодаз ваиз луэм учырез. Пумиським, пе, председателен. Кивалтӥсьмы юа: "Ольга, тон мыным маке-маке ӧд лэсьты-а? Берло дыре укыр йыры висе". Ольга пальышаса, пе, шуисько: "Уждунмес дыраз уд сётъяськы, соин ик сыӵе дауртӥ". Председательмы со нуналэ ик кышномуртлы 200 сюрс аванс гожтыса сётэм. Серекъялод но, бӧрдод но, ява! Бускелямы улэ Белоруссиын вордскем но быдэ вуэм кышномурт. Ас сярысьтыз ватытэк вера: "Синъёсы но мылкыды уродэсь мынам". Эн оскы вылэм, амалтэк осконо луэ. Ог аре парсьмы пияны ӧз быгаты, куспетӥ вандоно луим. Бускельмы ачиз шараяз: мынам син азям пудоостэс эн возьматъялэ. Парсьтэс адӟи но тазалыкезлы паймыса, маке со шыпыртыны вутски вал. Со ик луиз кырсь уже. Берлогес ни скалмылэсь веразэ адӟыса лулскиз: "Ну и вы..." "Вымя" шуыса, пе, ӧй вутты. Иське, скалды воксё йӧл сётэмысь ик дугдысал. Озьы ке но, скалмы куинь ноныё кылиз. Белорус кышномуртлэн кузпалыз курытсэ юыны яратэ вал. Керетон ӝутылыкуз, кышномурт ӵемысь ми дорын ватскыса улӥз. Ог нуналэ аракы басьтыны коньдон курыкуз, вожез потыса, пе, кеськи: "Ме, басьты аракыдэ. Берпуметӥ ӟенеликед медло! Нош аракыез юыса, машина улэ мед шедёд!" (Та верам кылъёслэсь зэм луэмзэс шарая кузпалэз но). Ужпум но паймымон берытскиз. Кудӟем картсэ та нуналэ ик машина сӧсыртӥз. Йӧнатскемез бере, витетӥ арзэ курытсэ но уг веръя ни. Йырвизез котькызьы бергатӥд ке но, валаны шугъяськоно. Кин-о юрттэ таӵе учыре? Сьӧд кужым-а, инсьӧр кужым-а? Ог дасо арлэсь азьло бускель гуртамы нуназе куазен ӝутскиз туж бадӟым но кышкыт тылпу. Гужем нуналэ 16 юрт пеньлы пӧрмытскиз. Кужмо тӧласькемен, "горд атас" ог юртысь мукетаз капчиен выжиз. Ульчалэн огпал радысьтыз юртъёс сутскыса мыно. Тани-тани гомӟоз оген улӥсь арлыдо бигер кышномуртлэн коркаез но. Песянай бускельёсыз музэн коркасьтыз арбериоссэ поттылыны ӧз дырты, кияз ӟазеглэсь тӧлпуззэ кутыса потӥз но маке-маке шыпыртыса юртсэ котыртӥз. Тыл, вань люкаськемъёслэн син азязы, та юртэз тэтчыса, мукет юрт вылэ гомӟиз. Озьы солэн коркаез сутскытэк кылиз. Ма юрттӥз меда, кыӵе адскисьтэм кужым? Мынам арлыдоослэсь трос пол кылэме вань: "Бускельёс ӝуаку, пе, ас юртъердэ тӧлпузэн котыртоно. Со, пе, тылпулэсь утиськыны юрттэ". Тодам на анаелэн корка сигысь арысь аре ӟазеглэсь тӧлпуззэ вошъямез. Гуртысьтымы арлыдо кышномурт маде: "Кузпаллы бызьыса, сизьым ар ӵоже секыто ӧй луы. Арлыдоос визьнодамъя, выль толэзь ӝужаку, пыдесъяськыса ик Инмарлэсь куриськи: "Возьматы вал мыным но нылпи ымнырез". Янгыш куриськиськем, нылпидэ сёт шуоно вылэм, дыр. Пие вордскиз ик, но жаляса верано, кӧня ке толэзьскын черласа кулӥз. Инмарез янгыш уг кариськы, куриськемея ик лэсьтӥз: нылпилэсь ымнырзэ гинэ возьматӥз но берен талаз". Паймымон улон та дунне вылын. Кыӵе адскисьтэм кужымъёс кивалто меда инкуазен но адямиосын? Осконо-а сьӧд кужымъёслы, Инмарлы? Юанъёс, юанъёс... Валэктон сётӥсез гинэ ӧвӧл. Н. НИКИФОРОВ. Кун Кенешлэн сессияз ШОБРЕТЭЗ КОТЬКӦНЯ КЫСКА... Кун Кенешлэн дас сизьыметӥ сессиез 25 феврале быдэс нунал ӵоже рос-прос учкиз туэлы социально-экономической азинсконъя программаез но кун бюджетлы инъетэз. Берлоезъя содоклад лэсьтӥз Экономикая но бюджетъя комиссилэн тӧроезлэн воштӥсез Софья Широбокова. Солы юанъёс сётъямзы бере, депутатъёс кутскизы программаез но бюджетэз эскерыны. Тая ас малпанъёссэс но ӵектонъёссэс шараязы кызь витьлэсь уно депутатъёс. Валамон, ваньмызлэсь мылкыдъёссэс вераны ум быгатэ. Бюджетэз учкыку, куронъёс арлы быдэ огкадесьгес луо. Шуом, котькудӥз депутат шобретэз ас палаз кыскыны выре, удысэз сярысь сюлмаське. Нош бюджетэ кызьы тросгес уксё пыртоно, доход люкетсэ будэтоно, со сярысь ӵектонъёс ӧжыт луо. Курыны капчигес угось. Но ваньмыз сярысь озьы шуыны уг луы. Данакез вераськизы производствоез улӟытон, гурт удыслы юрттэт сётон, коньдонэз пайдаё кутон но мукет ужпумъёс сярысь. Нырысь ик кыл куриз Климентий Роговец, Горьковской чугун сюреслэн Иж ёзэзлэн кивалтӥсез: - Бюджетэз эскеронлы мон пумит вал. Сётэм ватсанъёсме лыдэ ӧз басьтэ. Азьланьын чугун сюрес вылын нуон-ваёнлы тарифъёс кулэсмозы. Нош республика удыслы коньдон уг висъя. Сарапулысь мэрен Роберт Берген одӥг кыл шедьтӥм, отчы но Пермь областе 1 мартысен поезд ветлоз ни. Тросгес сюлмаськоно калык сярысь. Пенсионеръёсты но нылпиосты страховать карон сярысь закон кутоно. Сад-бакчаосы адямиосты дунтэк нуллоно. Николай Веретенников, Глазовысь "Реммаш" АО-лэн валтӥсь директорез: - Кун бюджетлы таӵе инъетэз туж секыт учкыны. Данакез ӵектонъёс пыртымтэ. Отчы шедьымтэ гурт удыслы юрттэт, жилищно-коммунальной хозяйствоын реформа ортчытон (адямиос 50 процентсэ расходъёсты тырыны уз быгатэ), социальной удысэз азинтон но мукетыз. Правительстволы тросгес сюлмаськоно палэнысь юрттэт (инвестициос) шедьтон, предприятиосты улӟытон сярысь. Интыысь налог быдэсак ёросъёсы-городъёсы ик мед кылёз. Сергей Протозанов, Ижысь мэрлэн нырысетӥ воштӥсез: - Гуртэз куашкатӥм ни, табере промышленностез выйтом, соку бюджетэ кабзэ уксё уз вуы. Бюджет йӧскадь лыдъямтэ, отын юн трос "омырез". Предприятиос продукция поттонзэс 5-6 процентлы йылэтыны быгатозы-а? Бен, сыӵе луонлыкъёс вань. Нош "Удмуртгеологилэсь" 100 миллион манет уксёзэ талан умоен берытскоз-а - секыт вераны. Бюджет бордын туж трос ужано на. Геннадий Колесников, "Ижсталь" АО-лэн валтӥсь инженерез: - Ми пайда поттыса ужаськом. Но со кошке налог тырыны, соцкультбытэз возьыны но музон интые. Производствоез выльдонэ, паськытатонэ уг кыльы ни. Туннэ асьмеос мае эскериськом, мон уг валаськы. Бюджетын 27,6 процент дефицит люкаське, нош кызьы сое пытсаны малпа Правительство - чик валантэм. Нош ик ватсаса налог бичано, вексельёс, облигациос поттоно луоз. Мукет амалъёс ӧвӧл ни. Бюджетэ пырисьтэм нимаз фондъёслэсь коньдонзэс талам, но со ӟече вуттоз-а? Таӵе бюджетэз кутыны уг яра. Валентин Комлев, Як.-Бодьяысь гурт хозяйствоя управлениысь валтӥсь агроном: - Гурт хозяйствоос мырдэм шокало. Миым 436 пӧлысь 15-ез гинэ пайда басьтӥз, нош 25-ез куашкамын, шуыны луоз ни. Али ми макем тросгес поттӥськом продукция, сокем уногес адӟиськом изъян. Соин ик гуртысь кошко усто специалистъёс, кивалтӥсьёс, но мукетъёсыз. Шӧдӥське, государство бадӟымесь хозяйствоосты быдтыны выре. Сыӵе ужпум пуктэмын. Таӵе политика луиз ке, гурт кема уз чида ни, бырон калэ вуоз. Александр Горохов, Кун Кенешысь Промышленностья, соин герӟаськем удысъёсты азинтонъя, вузъёс но услугаос сётонъя комиссилэн тӧроезлэн воштӥсез: - Бюджетын уксё висъяно нимаз программаосты быдэсъянэ, автозаводэз азинтонэ но нефтеперегонной завод пуктонэ. Асьмелы таӵе производство туж кулэ: Сырьёмы вань, тырмоз ни палэнысь бензин, вӧйёс, эстӥськон басьтыны. Вылаз ик, со дунтэм усёз. Нош кытысь коньдон шедьтоно? Кивалтон аппаратэз но служебной автотранспортэз быдэн 10 процентлы кулэстоно. Со чотын гинэ кӧня шыръяськоз бюджет уксё! Анатолий Ешкеев, Пичи Пурга районысь "Мир" колхозлэн тӧроез: - Гуртын секыт югдур кылдэмын. Данакез ужпумъёс уг быдэсъясько. Тани чидантэм урод мынэ гуртъёсы газ кыскон. Районэтӥ 7 газ гумы кошке, нош чагыр эстӥськонэз кутыны ум быгатӥське. Соин ик гуртэ газ вуттонъя нимысьтыз программа дасяно. Соку амалтэк юан кылдэ: "Кытысь коньдон шедьтоно?" Амал вань. Научно-исследовательской ужлы 5 миллион манет висъяны учкемын. Сое но АПК-ез азинтонъя фондысь ӝынызэ коньдонэз газ кысконэ сётоно. Собере кивалтӥсьёслэсь лыдзэс синэтоно. Милемлы пайдаё ужаны люкето эскерись органъёс. Соосты но кулэстӥд ке, номыр уз луы. Соин ӵош ик малпаськоно ляб хозяйствоосты пыд йылазы вуттон сярысь. Скаллы быдэ 2000 килограммлэсь ӧжыт йӧл кыскисьёслы ӧм ке юрттэ, соос уката лябӟозы, бырон калэ вуозы. Таӵе хозяйствоослэсь палэнскыны уг яра.Ведь быдэс дуннеын гурт хозяйствоослы государство юрттэ, дотация сётэ. Отын куазь ке люкетэ, пичи урожай ке басьто, юрттэт но уногес вуэ. Асьмелы но сое лыдэ басьтоно. Мукетыз сюлмаськонмы герӟаськемын техникаез выльдонэн. 80 процентэз со вужмемын ни. Мон уг валаськы машинно-технологической станциосты кылдытонэз. Малы отчы кунгож сьӧрысь техника басьтоно? Асьмелэн "Дон" комбайнъёсмы уродэсь шат? Овӧл. Соос дунтэмесьгес но. Малы Западлы ватсаса ужан интыос кылдытӥськом? Шаерамы арлы быдэ 8 миллион тонна нефть поттӥськом. Кызьы сое кутӥськом, нокин уг тоды. Узырлыкмы палэнэ кошке, республикалэсь экономиказэ юнматыны уг юртты. Павел Вершинин, Правительстволэн Тӧроез: - Промышленность туэ 5-6 процентлы уногес продукция поттыны кулэ. Тани кинлы кельшоз таӵе югдур: автозавод миым 8 сюрс автомашина поттӥз, нош отын 8 сюрс мурт ужа. Азинске улон коркаосты, соцкультбытэз интыослы сётон. Соин валче Ижлы ватсаса 38 миллион манет висъямын луоз. Элькунамы кужмоя нефть поттон. Кылдытэмын Удмурт му вӧй компания. Со понна Юрий Лужков коньдон висъя. Али нефтьлэсь бюджетэ самой трос уксё вуэ. Соин ӵош ик музъемез кышкатэк арендае сётоно. Паськытатоно нимаз лэсьтӥськонэз. Гурт удыслы туэ бюджетысь 10 процент уксё висъяны учкемын. Правительство амалъёс утча нылпиос понна пособиос сётонъя. Со мед вуоз, кинлэн 3 пичи уждунлэсь ичи доходэз луэ. Александр Волков, Кун Кенешлэн Тӧроез: - Вуоно арын ужаммылы йылпумъянъёс лэсьтом на. Но асьмелы быдэстымон бюджет кутоно. Автомобиль поттонъя нимаз программа чаклано. Сое туэ ӧжытсэ 60 сюрс бичано. Озьы ик тросгес поттоно мотоциклъёс но мукетсэ. Производствоез паськытатытэк, бюджетэ уксё уз вуы, улонмы но уз умоя. Улон инты лэсьтӥсьёслы уката уногес кредит сётъяно. Кутсконо ни цирк лэсьтон борды. Рынокъёсын но прядок кулэ. Адями мултэс сиён-юонзэ кышкатэк вузаны мед быгатоз, нокин медаз люкеты. "Етӥн" программаез улонэ пыӵатоно, со пайда вайыны кулэ. Кун бюджетлэсь доход люкетсэ будэтонъя амалъёс утчанлы сӥзьыса, нимысьтыз сессия ортчытыны ӵектӥз депутат Николай Чувашов. Сессиын озьы ик ӟырдыт вераськон мынӥз социальной удысъёсын ужасьёслы, синтэм кылемъёслы юрттэт сётон, химической ож тӥрлыкез быдтон, жилищно-коммунальной хозяйствоез выльдон, методлитература поттон, пичи ужбергатонэз азинтон, кутэм законъёсты ӟеч быдэсъян но мукетыз сярысь. Программа но, бюджетлэн доход люкетэз но дефицитэз инъетлы кутэмын. Кун Кенешлэн дас сизьыметӥ сессиез выльысь усьтӥськоз 17 мартэ. Геннадий РОМАНОВ. Данъямтэ дан Куинь ныл но одӥг пи будэтӥзы Климкинъёс-кузпалъёс. Дышетскизы вуриськисе, бухгалтере, шофёре, кылизы Кузьыли гуртэ ик. Светазы гинэ аспӧртэмгес. Анайёсыз но выныз гуртысь кошкыны уг ӵыдо - таиз ас малпанъёсаз кыдёкысь шаеръёсты адӟе. Школаын данак эшъёсыз хорын кырӟало, со нимазгес кариське но Алнаш районысь устоосыз пӧлы сюре. Дас класс бере Алнаш палась ик Уткин Коляен ӵош лыктӥз Ижысь крезьгуръя (музыкая) училищее. Татчы ӵемгес йыгасько городъёс. Соос шоры Светлана учке но куалекъя. Арганэн яке гитараен уг шуды, нотаос пӧлысь до но ре шуонэз сяна уг тоды. Ярам, Уткин оркестре гожтӥськиз, нош Клинкина... Кинэз тонэ татчы лӧпкытӥз меда? Котьма ке но, солэсь куаразэ кылзӥзы, мурт куараосты кылэмзэ чаклазы. Светлана мукетъёссэ сак кылэ вылэм. Тани ӝӧк сьӧрын пукисьёс пӧлысь огез мукетызлы шыпыртӥз: - Бен таидлэсь колоратурной сопрано пӧрмоно ук. Мар со сыӵе? Нылаш уг тоды. Урод-а, ӟеч-а? Малы со шоры сак учкыны ӧдъязы? Дэремез шат кырыжак пуке? Музыкая но искусствоя школаосты йылпумъямъёсын ӵош Климкина но сюриз училищее. Удалтӥз. Сое дышетыны басьтӥськиз тодмо удмурт кырӟась Евгения Пахомова. Валэктӥз шоканэз радъяны, нотаосты тодманы, классикаез кылзыны но валаны. Октава, форшлаг, минуэт кылъёс матынэсь луизы. Светлана тодӥз, мар со сыӵе колоратурной сопрано. Сопрано - кышномуртлэн векчи куараез, колоратурной - узыр буёло. Сопраноез коть кык полэс колоратурной медло, соин кивалтыны быгатэм кулэ. Тужгес ик - кык яке трос кузя кырӟаку. Мукетъёсыз пӧлын тынад гинэ куараед висъяське ке, эн данъяськы - чакласькы но эшъёстэ кылзы. Озьы ик фортепьяноен шудыны дышетсконо. Эктонъёсын тодматсконо. Ваньмыз ик уг чидало чурыт куронъёсты - кошко. Тани Алнашысь ик лыктыса дышетскись Николай Постников аслаз группаяз чорк-чорк огназ кылиз. Дышетскыны секыт ке но, егитъёс казармаын сямен ӧз улэ. Баянист но кӧня ке кырӟасьёс огазе карисько, кӧня ке номер дасяло но калык пӧлы потало. Климкиналы матынэсьгес вал Николай Шкляевлэн кырӟанъёсыз. Оло, озьы ветлыса ик Светлана рос-прос малпаськыны ӧдъяз сцена вылын ужан сярысь. Сое консерваторие ыстыны турттӥзы ке но. Ма, дипломаз но озьы гожтэмын ук: академической хорысь артист. Вылаз ик специальностезъя (кырӟанъя) экзаменын со группаысь огназ "вить" басьтӥз. Та вакытэ Светлана сюриз Анатолий Мамонтовлэн син шораз. Эскериз но кутӥз "Италмасэ". Та гужем ансамбльысь уноез артистъёс кошкизы гастроле. Татчы кылисьёсты, Анатолий Васильевич куриз выль репетициоссэс азинтыны. Климкинаез нимысьтыз индылӥз: дасяно пе, "Дас сизьым арес" кырӟанэз. Светлана та кырӟанэз кылылӥз ни. "Италмасысь" ик Ирина Мерказова быдэстэмъя. Озьыен, сое мукет сямен нёжъяно. Нылаш басьтӥз нотаос, учкиз кылбурез. Фортепьяноен шудыса оскалтӥз. Капчи вылымтэ. Училищеын дышетӥзы академической амалэн кырӟаны. Нош таиз матынгес калык кырӟанлы. Нылашлэн гужембыт тыршемез пайдатэм ӧз луы. Мамонтов "Дас сизьым" аресэз пыртӥз ансамбльлэн репертуараз. Тямыстонэтӥ аръёсы ог люкетэз артистъёс кырӟазы гинэ, мукетъёсыз эктӥзы гинэ (али ваньмыз сямен кырӟасьёс эктыны быгато). Кырӟасьёс пӧлысь Светланалы кельшиз Валентина Серебренникова. Со но Алнаш палась, сцена вылын артэгес сыло. "Италмасэ" кемаласьгес вуэмын бере, пинал эшезлы ваньзэ рос-прос валэктэ. Эктӥсьёс пӧлысь син шоры йӧтӥз Леонид Смагин. Кема тунаськыса ӧз улэ - кузпалъяськизы. Улыны кутскизы ансамбльлэн общежитие шуоназ - ньыль комнатаен квартираысь огаз комнатаын, мукет куинь семьяен артэ. Укмыстонэтӥ арын артистъёс пӧлын вераськон потӥз выль коллектив кылдытон сярысь. Леняен но кенешиллям ни. Кузпалъёс кема бергатӥзы таӵе йыртӥянэз. Балет группаын эктӥсьлэн мукет интыын пӧрмоз оло уз - отын кырӟано но луоз. Нош Светланалы выль коллективын, оло, вазьгес сётозы нимаз улон инты. Егитэсь ке но, сюлэмъёссы шонер шӧдӥлям. "Италмасэ" кылем воргоронлэн стажез ӧз чигы, пенсие вазьгес потон дырыз ӧз ышы. "Айкае" выжем кышномуртлы висъязы кык комнатаен квартира. Озьы кошке ни артистъёслэн улон-вылонзы. Леонид Америкаын эктэ. Светлана Италиын кырӟа. Кырӟам гинэ ӧвӧл, удмуртъёс пыриськыло городъёсысь тужгес чебересь нылъёслэн ӵошатсконазы. Смагиналы нырысь интые потыны ӧз удалты - Наталья Широбокова луиз мисс. Сотэк но дан лыктэ ни кадь. Автозаводысь инженер Михаил Оськин огпол вуттӥз выль кырӟанзэ. Николай Байтеряковлэн "Вамыштомы артэ" кылбурезъя, пе, малпай. Кивалтӥсьсы Николай Широких сое сётӥз Валентина Пудовалы но Светлана Смагиналы. Одӥг та кырӟанэз гинэ ӵошен быдэстӥзы. Но ӵапак со бордысен калык тодманы кутскиз та егит чебер кышноосты. Витизы на эшшо кык кузя кырӟамзэс. Мар карод, сцена вӧзысь сюресъёс читыр-чутыресь. Валентина Пудова но Николай Широких кошкизы филармоние, Света Смагина кылиз "Айкае". Уг, солэн музон коллективен воштэмез уг поты фольклоръя театрзэ. Адямиосыз трос ӧвӧл, куспазы юн эшъясько. Выль арез но мукет праздникъёсты ӵошенгес пумитало. Удмурт театрын но, кунгож сьӧрын но соосты ярато. Мар кулэ на тупан вӧзы? Татьяна нылыз скрипкаен но фортепьяноен шудыны выре. Мар кулэ шудо пинал вӧзы? Леонид Смагин - дано артист. Светланалэн нокыӵе нимыз ӧвӧл на. Но сое калык данъя ни. Мар кулэ на учкисьлэн дунъямез вӧзы? А. СИДОРОВ. Светлана Смагина. Туспуктӥз М. Менладшин. Верало лыдпусъёс Дунъёс будо, уждун уг йылы Статистикая Кун Комитет ивортэмъя, 1997 арын калыклы 8265 миллиард манет тыр пӧртэм вузъёс вузамын, 1996 арен ӵошатыса 14 процентлы тросгес. Ортчем арынлэсь калык тросгес сиён-юон басьтӥз, со пӧлысь аракылэн люкетэз 14 процент луэ. Вузам ваньбур пӧлысь кунгож сьӧрысь ваемез одӥг куиньмоссэ басьтэ, нош 85 процентсэ - сьӧрлось видеотехника. Кылем арын ӝыныез пала аракы но сур, 10-20 процентэз сӥль но чорыг, 10 процент пала мукет сиёнъёс вузаны лэземын ӧй вал. Соос пӧлы озьы ик пыртэмын вал 20 процент пала дӥськут, майтал, электроприборъёс. 1997 аре дунъёс 12 процентлы будӥзы. Шӧдскымон дуноязы сиён-юонъёс: кӧс вӧй, сакыр пызь, бакча сиёнъёслэсь лэсьтэм консерваос, чай, кофе, сӥль, джем, повидло. Сиён-юонъёслэн дунъёссы котькуд районын но городын пӧртэмесь. Тани картофкаез Воткинскын одӥг килограммзэ 1311 манетэн вузало, Уваын - 650 манетэн. Кило нӧкы Воткинскын 24800 манет сылэ, Можгаын - 20414 манет (верамын вуж дунын) оглом вераса, сиён дунтэмгес Уваын усе, тужгес дуно - Воткинскын. Мукет вузъёс пӧлысь золгес дунояз бензин, велосипед, тамак, ювелирной изделиос. Тужгес кулэ луись сиёнлэн дуныз арысь аре ӝутске, нош уждун огинтыяз "сылэ". Н. Возисов. Оштормо-Юмья гуртысен Улынгуртозь - куинь секундскын Озьы луэ-а? Сокем эн пайме таӵе юанлы. Сое сётэ "Кизили" журналысь Пальыштык. Озьыен, пальпотыса малпаськоно. Оштормо-Юмья гурт сярысь кылэмды вань, дыр. Со пуксемын Татарстанысь Кукмор ёросэ. Та гуртысь школаын дышетскемын Иван Михеев, Валентин Кельмаков, Пётр Захаров, Герман но Владислав Кирилловъёс... Али Оштормо- Юмья школаез удмурт гимназия шуыны луэ. Асьме калыкмылэсь ортчем сюрессэ, кылзэ, аспӧртэмлыксэ эскеронлы татын бадӟым саклык висъяське. Пиналъёслы тодон-валан люканы юртто удмурт тодосчиос Фома Ермаков, Зоя Суворова но мукетъёсыз. Нош Улынгурт сярысь веранэз ӧз кыль ни. Оштормо-Юмья ик со. Асьмелэн тросэз гуртъёсмы кык-куинь нимын уло угось. Соку малы Оштормо-Юмья гуртысен Улынгуртозь мыныны куинь секунд кулэ? Пальыштык тазьы валэктэ: "Юанэз лыдӟыны ог 3 секунд дыр быре". Пальыштыклэн мукет юанъёсыз но вань. Таосыз но герӟаськемын Татарстанысь удмуртъёсын. Юанъёс пиналъёслы чакламын. Номыр шоры учкытэк, тӥ но, бадӟымъёс, ӧжытак малпаське ай. - Кызьы "Маскара" кыл герӟаськемын Татарстанэн? - Вожой шур дурысь вож садо Вандэмо гуртысь Миша, Саша но Коля вань удмуртъёслы тодмо луизы . Кызьы соослэн фамилиоссы? - Татарстанын одӥг шур вылысь выж вылтӥ (коть пыдын, коть машинаен) кык часлэсь кема потоно. Малы? Кыӵе шур со? - Эшкабей Ондӥ, Нунок Миколай, Кузьпинь Ванюрка, Матрос Сенька улӥзы, уло но улозы... Кытын? Пальыштык юнме шорысь ӧз малпа та юанъёсты. Соос потозы туэ "Кизили" журналлэн куинетӥ номераз. Со быдэсак сӥземын луоз Татарстанысь удмурт нылпиослэн творчествозылы, фольклорзылы. Кылем арын но "Кизилилэн" та выллем номерез вал: отын возьматӥмы Башкортостанысь удмуртъёслэсь улэм-вылэмзэс. Та элькунъёсын витьтон сюрс ёрос удмуртъёс уло. Арлы быдэ журналмылэн ог 600-700 экземплярез соос доры кошке. Удмурт Элькунлэн палэназ улӥсь лыдӟисьёсынымы кусыпъёсмес юнматон понна, кылем арын милям редакцимы нимысьтыз программа кутӥз. Со программаенымы пыриськимы Москваысь "Открытое общество" институтлэн (Сорослэн фондэз) ялэм конкурсаз. Отын Россиысь мукет нылпи изданиос но асьсэ кужымзэс эскеризы. Милям проектмылы ӟеч дунъет сётӥзы. Малпанмес быдэстон вылысь, Татарстанэ, Башкортостанэ, Свердловск улосэ потаны кӧня ке коньдон но висъязы. Кылем арын, шуркынмон толэзе, редакциысьтымы вань ужасьёс ветлӥзы Татарстанысь Огырчи (Агрыз) ёросысь Сарсак-Омга гуртэ. Быдэс коллективенымы тазьы потаммы ӧй вал на. Элькунысьтымы дано артистэз Г. И. Бекмановез но сьӧрамы чортӥмы. Геннадий Иванович пумит ӧз луы: ӟеч мылкыдын потӥз сюрес вылэ. Сарсак-Омгалан куинь пумиськон ортчытӥмы: кыксэ клубын, одӥгзэ - нылпи садын. Со пумиськонъёс "Кизили" журналлэн зэмос праздникезлы пӧрмизы. Покчиос, егитъёс, мӧйыос мылысь-кыдысь пыриськизы аспӧртэм ужрадэ, журналмылэсь азьвыл номеръёссэ, удмурт книгаосты, кассетаосты басьтытэк кылисьёс ӧй вал, дыр. Вуэм куноослы юанъёс но сётъязы, дэмланъёссэс но веразы. Самодеятельной композитор Леонид Лазарев "Кизили" журналлы кырӟанъёссэ кузьмаз, нош пиналъёс выль чуръёсынызы, суредъёсынызы тямыстонлэсь уно ужъёссэс вуттӥзы но сьӧрамы келязы. Сарсак-Омгала вуылэммылэн пайдаез мукет ласянь но шӧдӥськиз: отын лыдӟисьёсмылэн лыдзы туэ, кылем арен ӵошатыса, кык пол йылӥз. Журналмылэн кылкутӥсь секретарез Люза Бадретдинова кылем арын ик ветлӥз Татарстанысь Балтаси ёросэ. Пусйыны кулэ: татын "Кизили" журналэз туж яратыса басьто. Шорлыдын вераса, котькуд 31-тӥ удмурт гожтӥськемын милям журналмылы. Талэсь умоез лыдпус ӧвӧл ни. Ӵошатэ: Башкортостанысь Татышлы ёросын котькуд 53-тӥ удмурт эшъяське "Кизилиен", Пичи Пурга ёросын - котькуд 73-тӥез, Алнаш ёросын - котькуд 80-тӥез... Балтаси палась удмурт пиналъёс конкурсъёсамы но мылысь-кыдысь пыриськыло, кылбуръёссэс, веросъёссэс, суредъёссэс но ысъяло. Тани кылем арын Татарстанысь 137 гожтэт басьтӥм, со пӧлысь 37-ез - Балтаси ёросысь. Татарстанысь Кукмор ёросын но журналмес лыдӟисьёс ӧжыт ӧвӧл. Туэ соослэн лыдзы 150-лэсь трос. Та ёросэ но вуылытэк ӧм чидалэ. Туэ, толшор толэзьлэн пумаз, отчы ветлӥмы "Ӟечбур!" газетлэн редакцияз ужасьёсын Александр Лаптевен но Владимир Беломорскихен ӵош. Ньыль нуналскын куать пумиськон вал. Куазь дугдылытэк пелляськиз ке но, котькуд школаын милемыз тулыс кадь шуныт мылкыдын пумиталлязы. Машинамес кытчы интыян, кытын кӧлон сярысь милемлы сюлмаськоно ӧз луылы, котькытын матысь тодмооссэс, ӵыжы-выжыоссэс сямен, сӥлы карылӥзы. Сыӵе сямзы синмаськымон но данъяськымон. Угось шаерысьтымы унояз удмурт гуртъёсын со ышемын ни. Шор Кумор, Оштормо-Юмья, Поч.-Сутер, Нижняя Русь, Нырья. Ваньмаз ик та гуртъёсын шор ёзо школаос чебересь, туала куронъёсъя лэсьтэмын. Пушказы пыриськод ке, соку ик валаськод - татын удмуртъёс дышетско: бордгазетъёс, ӧтёнъёс, визькылъёс асьме кылын гожъямын. Пиналъёс но куспазы анай кылынызы верасько. Дышетӥсьёссы но асьсэ палась. Пӧлазы бигеръёс вань ке но, ваньмыз сямен удмурт кылын верасько. Нош удмуртъёс бигер кылэз умой валало. Кукмор ёросэ ветлыкумы, ми отысь удмуртъёслэсь ӝожтӥськонъёссэс ӧм кылэ. Бен, шуг-секытъёс котькытын вань. Соосты вормыны кулэ. Мар ватонэз, Татарстанын улон- вылон мукетгес ӧретӥ мынэ. Бюджет чотын улӥсьёслэн тужгес пичи уждунзы 350 манет. Ваньмыз ик потэ та лыдпус бордысь. Нош асьме элькунамы тужгес пичи уждун 60 манет сяна ӧвӧл (Россияя со 80 манет). Бускельёсмы колхозъёссэс, совхозъёссэс но возьыны быгато на. Адӟем карымонэз уно... Татарстанысь удмуртъёслэн лыдзы сокем бадӟым ӧвӧл - ог 24 сюрс. Нош кӧня дано адямиоссы потэмын: калыкез югдытӥсьёс Иван Яковлев, Иван Михеев, Гавриил но Максим Прокопьевъёс, писательёс Григорий Медведев, Жомбо Очей (Алексей Жомбин), Михаил Григорьевич но Михаил Антонович Можгинъёс, Михаил Петров, Евгений Самсонов, Гай Сабитов, Николай но Александр Белоноговъёс, Алексей Ермолаев, Владимир Романов, Владислав Кириллов, Пётр Захаров, филологияя наукаосъя докторъёс Иван Тараканов но Валентин Кельмаков, тодосчиос Василий Алатырев, Ирина Нуриева, журналистъёс Елена Глебова, Валерий Тероков, Евгения Плотникова, Россиысь дано артист Геннадий Кузнецов, Удмурт Элькунысь дано артистка Анна Прокопьева, артистъёс Николай Прокопьев, Пётр Данилов но мукетъёсыз. Оскисько, та списоклэн пумыз уз луы, выль нимъёс, фамилиос одно ик кылдозы на. Та гожъямме лыдӟытозяды, оло, Пальыштыклэн юанъёсызлы но валэктонъёс шедьтӥды ни. Татарстанысь удмуртъёсын тунсыкъяськисьёс понна юанъёс секытэсь ӧз потэ, дыр. Соку эскере-ӵошатэ валэктонъёстэс: - Татарстанысь Кукмор ёросын вань Маскара гурт. - Алабго (Елабуга) ёросысь Вандэмо гуртын вордӥськемын тодмо удмурт писательёс Михаил Петров, Александр но Николай Белоноговъёс. - Ык(Ик) шур висъя Татарстанэз но Башкортостанэз. Нырысетӥяз уло Москва дырын, кыкетӥяз - Уфа дырын (таиз Москвалэсь кык часлы вазьгес). Шуом, Татарстанысь 8 часын Ык (Ик) шур вамен потӥськод ке, Башкортостанын соку 10 час луэ ни. - Та геройёс улӥзы, уло но улозы Григорий Медведевлэн книгаосаз, лыдӟисьёслэн сюлэмъёсазы. Татарстанысь Бавлы, Алабго (Елабуга), Мамадыш но куд-ог мукет ёросъёсын но удмуртъёс уло. Соос доры но сюресъёс мед вуттысалзы. Бӧлякъёсынымы пумиськыны мылкыдмы вань. Ульфат Бадретдинов, "Кизили" журналлэн валтӥсь редакторез. Туспуктэм вылын: Нырья школаысь дышетӥсьёс Зоя Яковлевна Егорова, Елена Абрамовна Кузьмина, Светлана Анатольевна Алексеева удмурт кылъя ужрадлы дасясько. Поч.-Сутер школаын пумиськон дыръя. Завуч Любовь Николаевна Осипова дышетскемезъя математик, нош мылкыдыз, сюлмыз удмурт кыл но литература бордын. Нылъёсыз но бырйизы филология удысэз. Владимир Беломорскихлэн туспуктэмъёсыз. "Гердэ" "Дэменлэн" корка пуконаз Алигес удмурт культурая "Дэмен" огазеяськон ӝыт пуконэ ӧтчалляз Ижевскысь Устинов, Октябрь, Ленин но Первомай ёросысь удмурт кыллы но литературалы дышетӥсьёсты но библиотекаосысь удмурт ёзъёсын ужасьёсты. Ӟырдыт вераськон ӝутскиз отын. Куноослэн пӧртэм юанъёссылы валэктонъёс сётӥз "Дэменлэн" тӧроез В. А. Осипов. Собере дышетӥсьёс но библиотекаръёс веразы асьсэлэсь сюлэмшугъяськонъёссэс но куронъёссэс. Котькинлы тодмо: али улонмы секыт, коньдон уг тырмы нокыӵе удыслы но. Нош калыкез дышетон но культура уката бадӟымесь шуг-секытъёсын пумиськыло. Нимысьтыз шуген азинске столицаямы удмурт нылпиосты дышетон, нош библиотекаосы вордскем кылын потӥсь журналъёсты, газетъёсты басьтыны кытын-отын воксё коньдон висъямысь дугдо ни. Сыӵе югдурез лыдэ басьтыса, кенешонэ люкаськемъёс Кивалтэтмылы, Калыкез дышетонъя но Культурая министерствоослы, "Удмуртия" издательстволы вазиськон кутӥзы. Отын соос куро 2-тӥ но 3-тӥ классъёслы "Анай кылэз", удмурт-ӟуч но англи кылын суредъёсын словарез, "Покчи эше" книгаез, Б. Загуляевалэсь ӟуч-удмурт словарьзэ, начальной классъёслы "Лыдӟон книгаез" ӝоггес поттон ласянь юрттыны, нош библиотекаослы асьме кылын потӥсь журналъёсты, газетъёсты басьтыны ятыргес коньдон висъяны. Озьы ик соос дэмлало Ижевскысь удмурт пиналъёслы гимназия усьтыны. "Дэменэ" люкаськемъёс Кун Кенешез эшшо одӥг пол куризы на республикаямы "Кун кылъёс сярысь" Законэз ӝоггес кутыны, "Библиотекаослэсь ужзэс радъянъя" Законэз йылаз- пумаз вуттыны. К. Егоров. Кӧня ке чурен "Удмурт кенешлэн" Устинов ёросысь люкетаз огазеяськемъёс алигес вуылӥзы Союзной урамысь ӝыт ужась школае. Отчы лыктэмъёсты кенешчиослэн кызьы ужаменызы рос-прос тодматӥз "Удмурт кенешлэн" районысь ёзэзлэн тӧроез Е. К. Егоров. Собере люкаськемъёс кенешизы городысьтымы думае но Ижевсклы мэр быръёнэ ӟечгес пыриськон пумысен. Верамын вад куд-ог кандидатъёслэн нимъёссы но. Асьсэлэсь дэмланъёссэс, ӵектонъёссэс веразы Р. В. Кириллова, Л. П. Федоров но мукетъёсыз. Журналист К. Е. Ломагин вакчияк вераськиз К. Гердлэн вордскемез дырысен 100 ар тырмемен валче ужрадъёсы пыриськемез сярысь. Азьлоосаз пумиськонъёсы сямен ик, таяз но кенешонэ трос гинэ выль адямиос ветлӥзы. Озьыен, "Удмурт кенеше" огазеяськисьёслэн радъёссы пумен йыло. *** Арня талэсь азьло Завьялын ортчиз Атай музъеммес утисьёсты данъян ӝыт. Отчы люкамын вал Бадӟым Отечественной войнае ветлэмъёс, Афганистанын, Чечняын ожмаськемъёс, Венгриын огвакытэ ортчытэм ужрадъёсы пыриськемъёс. Мӧйымем, пурысьтам батыръёсмы синкыли пыр тодазы ваизы ортчем сюрессэс, бырем эшъёссэс. Ёросысь администрацилы тау каризы, ожысь ветеранъёсты огазе люкаллямзы, соослы пичи ке но юрттэмзы понна. Та пумиськонэ ветлӥз "Дэмен" огазеяськонлэн кивалтоназ быръем ветеран С. А. Ильин но. Ас вакытаз солы но "шуд усем" Венгриын ортчем ужрадъёсы пыриськыны. *** Воткинскын таяз толэзе ортчиз "Жингырты, удмурт кырӟан" фестиваль. Отчы пыриськизы трос усточиос, коллективъёс, крезьгуръёс гожъясьёс. Устоосыз пӧлысь устоосыз пусъемын дуно кузьымъёсын, дипломъёсын. Бадӟым концертын вормисьёсты ӟечкыланы ветлӥз "Удмурт кенеш" огазеяськонлэн тӧроез В. К. Тубылов но. *** Кылемаз кӧснуналэ Октябрь ёросысь В. Азин нимо библиотекае люкаськылӥзы "Удмурт кенешлэн" та районысь люкетаз огазеяськемъёс. Соос нырысь тодматскизы Куӟебай Гердлэн вордскемез дырысен 100 ар тырмонлы но Атай музъеммес утисьёслэн нуналзылы сӥзем стендъёсы люкам материалъёсын, вакчияк кенешизы Ижевскысь думае депутатъёс быръён сярысь. Собере нылкышноос воргоронъёсты шуныт ӟечкылазы праздникен. Кунокуаос котькудзэ пиосмуртэ вакчияк вераны куризы армиын дыръязы кыӵе тужгес но кышкыт но серемес учыръёсы сюрылэмзы сярысь. Пусйыны кулэ: пиос ваньзы-ваньзы ветлӥллям службае. Кудӥз кунгожын сылэм, кудӥз Амур дуре, кудӥз Тихоокеанской флотэ сюрем, кудӥз вуылэм Венгрие, нош одӥгез Свердловскын гинэ службазэ ортчытэм. Пиосъёс ваньзы сюрылӥллям секыт учыръёсы, нош тужгес но мыло-кыдо, вань калыкез горытыса мадизы серемес югдуръёсы шедьылэмзы сярысь. Нылкышноос коскамон серекъязы, воргоронъёслы кырӟанъёс пыр усьтӥзы сюлэмзэс, Атай музъеммес утисьёслы ӟеч мылкыдъёссэс веразы, соосты чаен куноятӥзы. Воргоронъёс ӧз вунэтэ пунэм тыронзэс но. 8 Март азьын ваньзэ нылкышноосты куное отём шуизы. Мар бен, вуоноез пумиськон уката шулдыргес, пайдаёгес луоз, дыр. Нылкышноостэк угось огез но уж уг ортчытӥськы та дуннеын! Суреда инкуазез Ижын, изосикусствоосъя музейын, усьтӥськиз шаерысьтымы тодмо суредасьлэн Анатолий Русскихлэн ужъёсыныз адӟытон. Анатолий Тихоновичез выль выставкаеныз ӟечкылазы Удмурт Элькунысь Кун Кенешлэсь Тӧрозэ воштӥсь Алексей Красильников, элькунысьтымы Суредасьёслэн огазеяськонзылэн тӧроез Пётр Ёлкин, калык суредасьёс Семён Виноградов, Менсадык Гарипов, искусствоосъя дано ужасьёс Валерий Кононов, Борис Постников, Вячеслав Костылев, Иж мэриысь культурая но туризмъя управлениын ужась Мария Дятко, мукет адямиос. Аспал эшсылы ӟеч кылъёссэс веразы Ува ёрос кивалтэтлэн тӧроез Сергей Иконников, суредасьлэн ӵош дышетскем эшъёсыз. Чебер кырӟанъёсын ӟечкылазы Ӟуч культурая огазеяськонысь адямиос. Анатолий Русскихлэн данакез суредъёсыз сӥземын инкуазьлы. Арлэсь котькыӵе вакытсэ синйылтэ художник: тол но, тулыс но, гужем но, сӥзьыл но чибор буёллы пӧрмыса выдо дэра вылэ. Суредасьлэсь трос ужъёссэ люкам ни Москваысь профессор тодмо коллекционер Николай Витрук. Та ӝытэ со но художниклы ӟеч кыл вераз, азьланяз выль азинлыкъёс сӥзиз. Нырысьсэ Удмурт Элькунысь искусствоосъя дано ужасьлэн, Россиысь Суредасьёслэн огазеяськоназы быръем муртлэн Рем Тагировлэн ужъёсыныз адӟытон усьтӥськиз суредасьёслэн Пушкин ульчаысь юртазы. Ачиз Рем Касимович улонысь кык ар талэсь азьло кошкиз ни, нош ужъёсыз уло. Рем Тагиров но туж яратэ вылэм инкуазез. Со сярысь вера котькуд ужез. Ачиз художник буёлзэ ӧжыт гинэ палькке кадь, нош дэра вылын со вискын ик кылдэ аспӧртэм суред. Улонысь дырызлэсь вазь кошкем адями сярысь ӟеч кылзэс веразы элькунысьтымы Суредасьёслэн огазеяськонзылэн тӧроез Пётр Ёлкин, Рем Касимовичлэн Рустем пиез, критик, литературовед Зоя Богомолова, кылбурчи Олег Поскрёбышев, суредасьёс Евгений Скобелев, Василий Морозов, Валентин Белых. Та ӝытэ ик чузъяськиз Рем Касимовичлэн куараез: магнит лента вылэ со гожтэмын улонысь кошкемезлэсь азьвыл. Паймымон соиз: суредасьлэн ужъёсыныз адӟытон нырысьсэ возьматӥське. Улэп художниклы таӵе шудэз адӟылыны кылдымтэ. Дипломъёсын пусъемын Удмурт кун филармониын ортчиз ас шаердэ яратонлы сӥзем кырӟанъёслы конкурс. Радъязы сое Удмурт Элькунысь Культурая министерство, Калык кибашлыослы юрттонъя центр, Егитъёсын ужанъя кун комитет. Конкурсэ пыриськизы гуртъёсысь но городъёсысь кырӟась-верасьёс. Пиосмуртъёс пӧлын нырысетӥ интые потӥз Вотка ёросысь Кукуи гуртысь Александр Бахтин, кыкетӥ интые - Глаз ёросысь Кожиль гуртысь Руслан Дюкин, куинетӥ интые - Сарапулысь арлыдо воргорон Николай Кривошеев. Нылкышноос пӧлын нырысетӥ луиз Можгалась Татьяна Селиванова, кыкетӥ - Алнаш ёросысь Улын Котныр гуртысь Анна Плотникова, куинетӥ - Вотка ёросысь Пихтовка посёлокысь Галина Клеменова. Коллективъёс пӧлын вормизы Сарапул городысь "Русь", "Иван да Марья", Якшур- Бодьялась калык кырӟанъя "Русская песня", Сарапул ёросысь Сигаево черкогуртысь "Орион", Можга ёросысь Бадӟым Уча черкогуртысь вокальной ансамбльёс, озьы ик - Вавожысь Наталья Матвеева но Елена Вальд. Ӟеч кырӟамзы но шудэмзы понна, нимысьтыз дипломъёсын пусъемын - Сарапул ёросысь "Орион" ансамбль, Вотка ёросысь Александр Бахтин, Юкаменск ёросысь Рамай Арасланов, Глаз ёросысь баянист Михаил Копылов, мукет усточиос. Инкуазь но адями Тэльын пӧйшуртэк мӧзмыт Берло дауре тэльын улӥсь пичи вынъёсмы (пӧйшуръёс) унолы кулэсмизы, соин соосты утёнъя нимысьтыз ужрадъёс кутэмын. Горд книгае пыртэм пӧйшуръёс сярысь гожъяй вал ини. Инкуазез яратӥсьёсты таяз учыре тодматэме потӥз на шаерысьтымы пӧйшуръёсын, кудъёссэ кутыны-ыбыны лэземын. Со сярысь валэктонъёс сётэ Республикаысьтымы Пӧйшуран хозяйствоя управлениысь валтӥсь охотовед Светлана Украинцева. Будосъёс сямен ик пӧйшуръёс но куд-ог аре "удалто", трос пияло-будо, нош кӧня ке аръёс ортчыса кулэсмо. Тани, шаерысьтымы огез, бадӟым пӧйшур - койык. Ог дасо ар талэсь азьло со дас кык сюрс пала лыдъяське вал, нош али тямыс сюрс но ӧвӧл ни. Уно койыкъёс Кез, Игра, Ува районъёсысь тэльёсын, нош туж ӧжыт Каракулино, Алнаш палъёсын. Со валамон, лымшор палан инкуазь но будосъёс но койыклы уг тупало. Мукетыз синмаськымон пӧйшурмы - луд парсь (кабан). Соос асьме шаерын трослы будӥзы нюлэсъёсмес зол кораны кутскем бере, та пӧйшуръёс угось пеймыт тэлез уг ярато. Луд парсьёс ярато глазов, дэбес, якшур-бодья, можга бусыосты, туж ӧжыт соос Вавож, Грах, Каракулино районъёсын. Толалтэ, мур лымы дыръя соосты сюдоно луэ картофкаен но мукет пудо сиёнэн. Гондыръёс асьме палан ноку ӧз бырылэ, пӧйшурасьёс соосты куд-ог аръёсы тросэн быдтылӥзы ке но. Та кужмо пӧйшур улэ глазов, балезино, кез, селта тэльёсын (солэсь ятыр лыдъяське), чик уг пумиськылы Алнаш, Каракулино районъёсын. Мыйёс (бобр) асьме палан огдыре быремын вал ини. Война бере соосты Воронеж улосысь ваизы. Мыйёс асьме инкуазьлы дышизы, вань улосъёсын пи потто, лыдзы йылэ. Тужгес но вуэз яратӥсь пӧйшурлы тужгес но яраллям игра, сюмси тыос, татӥ соос сюрслэсь но трос уло, нош туж ӧжыт Камбарка но Каракулино районъёсын. Ӟичыос республикаямы ноку ӧз бырылэ, соос котькудаз ёросын вань, тужгес но трос та кескич пӧйшуръёс Балезино, Селта, Кизнер, Можга палъёсын. Сёръёс (куница) ӵемгес пумисько Красногорск, Ува, Кизнер районъёсысь тэльёсын. Нош уката но узыр нюлэсъёсмы тӧдьы луд кечъёсын но коньыосын. Кез, Красногорск, Игра ёросъёсын та пӧйшуръёс уно сюрсъёсын лыдъясько. Сьӧсь пӧйшуръёс: балян но кион трос ӧвӧл ке но, шӧдскымон изъян ваё, мукет тэль "пудоез" мултэс быдто. Соос, уката ик кионъёс, одӥг азьын уг уло, уно иськемлы интыоссэс вошъяло та сьӧсьёс али тросгес Кез, Красногорск, Як.-Бодья районъёсын. Котькуд аре пӧйшуръёсты шумпотто "луд курегъёс": сяла, тур, дукъя. Сялаез пумитаны луэ пӧртэм интыосын, кытын вань писпуос. Берло дыре нюлэскын но гурт хозяйствоын минерал сылалъёс но ядохимикатъёс ӧжыт кутӥсько, соин ик тылобурдоос но пӧйшуръёс капчи "шокчизы", уллёоссы пумен йыло. Али республикаямы кызь вить сюрс пала пӧйшурасьёс. Соос тросгес куто тӧдьы но пурысь луд кечез, коньыез, сялаез, турез, дукъяез. Туж ӧжыт шедё гондыръёс, нардыос (барсукъёс), сёръёс, балянъёс, мувыр чайыос (хорёкъёс), кионъёс. Быгатӥсь пӧйшурасьёс гуртазы буш киын уг берто. Сюмси ёросысь Вылынгуртын улӥсь агае Евгений Возисов тэльысь котьку сямен, коньыен, яке турен вуэ. Толалтэ куспын ог сю пала коньы ку дася. Одӥг пол со ыбем коньызэ басьтыны кызэ тубем, улвай чигыса усем но зол шуккиськем. Будосъёслэсь но пӧйшуръёслэсь сӥль - вирысьтызы кужмо эмъясь интыоссэ валась адями, соосты "кутыса" йӧназ. Туэ но капчи мылкыдын тэле ветлэ. Кема ик дыр уз ортчы, тулыс вуоз, соку пӧйшурез ыбылыны уг яра ни, сое агае зол чакла, юнме пӧйшурез уг быдты. Куд-огез лулоосты тулыс но гужем но кутылэ. Нош та вакытэ кузы соослэн ӧвӧл ярамон, сӥльзы но сиёно кадь ӧвӧл. Таӵе пӧйшурасьёс инкуазьымылы бадӟым изъян лэсьто. Республикаямы ортчем аре витьсюлэсь трос браконьеръёс шараямын, со пӧлысь дас сӥзьымез - койыкез быдтӥсьёс, сӥзьымез - кыр парсез, одӥгез - гондырез. Валамон ини, инкуазьын "кузёяськисьёс" уногес, но соос ваньзы син улэ уг шедё. Сӧсырмыны шедем пӧйшуръёс, ыбисьёслэн киязы ӵемысь уг шедё. Кӧня ке нунал улыса, соос куло, быро-сисьмо. Бӧрысь сыӵе шӧйлэсь пӧртэм висёнъёс вӧлско. Сӥлез, куэз, гонэз сяна, пӧйшуръёслэн мукет мугор люкетъёссы но дунъясько, уже кутӥсько. Тани, шуом, койыклэсь сюрсзэ, луд парсьлэсь пиньзэ, кионлэсь, балянлэсь, гондырлэсь йыркобызэ ӵемысь пӧйшурасьёслэн но экзотикаез яратӥсьёслэн квартираязы адӟылыны луэ. Гондырлэн но луд парсьлэн кӧйзы но сэпсы (желчь), нардыослэн но суроклэн кӧйзы, мыйлэн струяэз эмъяськыны ярало, соослэсь ӟеч эмъюм лэсьто. Тӥни, мамында пайдазы пйшуръёслэн. Соосты юнме быдтонлэсь утён понна республикаямы дас кык заказник кылдытэмын. Шаерысьтымы пӧйшуран хозяйствоос но заказникъёс уксё куто республикаысьтымы бырись пӧйшуръёсты пӧртэм интыосы вӧлмытыны, кионъёсты быдтыны, сылал басьтыны (тросэз пӧйшуръёс сое туж ярато), кидыс басьтыны но кизён ужъёс нуыны (луд парсь понна нюлэс кыралъёсы сезьы кизьыло, картофка мерттыло). Тросэз пӧйшурасьёс ас мылкыдзыя, нокин косытэк, соосты сюдо, шуг-секытъёсысь мозмыто. Ваньмы сюлмаським ке, удмурт музъемамы пӧйшур уллёос арысь аре будозы, инкуазьмы уката узырмоз. Тодамы ваёмы, соос угось будосъёсты но кизё-вӧлмыто, уката ик мульыяськисьёссэ. Адями инкуазез вормись гинэ луыны кулэ ӧвӧл, мед "пӧрмоз" сое узырмытӥсьлы. Н. Возисов. Инкуазь но асьмеос Кионэз пурысь луэмез понна уг жуго Кионэз адями ноку ӧз яратылы. Та ньыль пыдо сьӧсь бадӟым изъян вае угось гуртын улӥсьёслы, гурт но пӧйшуран хозяйствоослы. Кион туж кӧттырмостэм маке. Сутка куспын шорлыдын солы куинь килограмм пала сӥль кулэ. Республикаысьтымы пӧйшуран хозяйствоя управленилэн ивортэмезъя, нюлэсъёсын али кионъёслэн лыдзы трослы будэмын. Соин ик трос кыр пӧйшуръёс сьӧсь ыме шедё. Кионъёсты быдэс ар ӵоже кутылыны лэземын. Миым, кылсярысь, 85-ез та сьӧсь пӧйшур быдтэмын вал. Кионъёслы пумит ёросъёсын нимысьтыз ужрадъёс чакласько. Озьы гинэ кутыны яке маин ке пӧяны соосты уг луы угось. Соин ик горд ӟустариосын (флагъёсын) котыртэмъёс лэсьтылоно луэ, трос пӧйшуръёсты "кыткыса". Умой радъяло та ужъёсыз Игра, Кез, Балезино ёросъёсысь пӧйшурась хозяйствоос. Мадеме потэ одӥгаз таӵе котыртэмын сылэмзы сярысь. Уин кионъёс койыкез (лосез) кесяллям но кӧтсы тырыса шутэтскыны кариськиллям. Та инты котырысь нюлэс егерьёсын бадӟым интыетӥ горд ӟустариосын кенерамын. "Тылын ӝуась" таӵе кенер вамен потыны кион уз дӥсьты, солы та котыртэм тылпу выллем потэ угось. Ӵукна кион пытьыосты эскеро, потэмын ӧвӧл-а, пе, котыртэмысь. Ӧвӧл, иське, интыязы. Куспазы шыпытэн гинэ верасько. Соос шоры палэнысен учкыны тумошо йӧтэ. Кионъёс, оло, иськем кемын, нош соос кылтэм-ымтэм муртъёс кадесь. Чакласькон, таӵе пӧйшуранын самой кулэ маке угось. Одӥг гинэ умойтэм вамышед ваньзэ быдтыса куштоз, сомында муртлэн тыршемез юнме луоз. Тани тӧдьы халатэн пӧйшурасьёс тупатэм интыосы - номеръёсы - султӥзы. Котырак чал-чал. Дыр туж каллен кыстӥське. Сюлэмыдлэсь йыггетэмзэ гинэ кылӥськод. Чидатэк возьмаськод - ку пумитад потозы ньыль пыдо сьӧсьёс. Тани кытын ке но палэнын кеськем куара кылӥськиз. Озьы кион уллёез номеръёсын сылӥсьёс пала кышкато. Кионъёс дыртытэк гинэ лать-лать бызё, пумен матэ но матэ вуо. Тани одӥгезлэн кионлэн лопырскем гонэз адӟиськиз. Со кыралэ бызьыса потӥз но султӥз. Кузь гоно йырзэ вылэ ӝутыса, омырез зынъяз. Йыр берысьтыз кузь гонэз пештырскиз. Сылэ, горд флагъёс шоры кышкатскыса учке. Синъёсыз лек тылӝуэн пишто. Нокытчы кариськыны. Улонлэсь шӧмзэ трос аръёс ӵоже ас вылаз шӧдэм кион мынон сюрессэ шуак воштӥз но - ыбыса йӧтымон азе вуиз. Самой дырыз ыбыны. И. Коньковлэн ыбем куараез быдэс нюлэсэз ик кадь сэзъялтӥз. Сьӧсь соку ик усиз, ымнырыныз лымые гуштыса. Мукет азьын сылӥсьёслэн но ыбем куараоссы кылӥсько. Ыбиз В. Горбушин. Пӧйшур губыртӥськыса азьлань бызе. Пӧйшурась ассэ куаретэ, неужто, пе, ӧй йӧтты. Но пичияк осконэз вань на. Озьы ик вань. Кион вамышен гинэ азьлане мыныны кутскиз, собере гаӵак урдэс вылаз пограз. Нош ик ыбем куара юн шуккиськиз. Таиз С. Масленников. Эшшо огез сьӧсь "ваньмиз". Кионъёсты кутылон чаломиз, нош пӧйшурасьёс кема куспазы вераськыса, ог-огзэс пыӵкылыса, серекъяса улӥзы на. Егерьлэн сюлмаськемезлы тау каризы. Егерьёс сярысь поттылэмысь, нимысьтыз пусйыны кулэ, дыр, Балезино ёросысь Сергино гуртысь егерез-общественникез. И. М. Коньков - фермер, мушъёс вордэ. Ку зпалэныз ӵошен вить пинал будэто. Картэзлы пӧйшуранын но юрттэ, кионъёсты котыртэтэ улля. Иван Михайлович ёросысь охотоведъёсын ӵош ужа, эрик уг сёты браконьеръёслы. Мар вераны луоз на Иван Коньков кионъёсты куасъёс вылын мур лымыетӥ уйылыса кутыны быгатэ. Визьмо, чакласькись пӧйшурез-кионэз кутыны тодэм-валам, быгатэм сяна, коньдон но кулэ. Та уже коньдонэз жаляно ӧвӧл. Арлы быдэ миллиард пала ыштонъёс адӟиськом та сьӧсь пӧйшуръёслэсь. Зэм, кивалтӥсьёс сое валало. Кионъёсты кутылон ужрадэ уксё висъяло, пӧйшурасьёс пӧлын ӵошатсконъёс ортчытъяло. Тани миым республикаысьтымы пӧйшуранъя хозяйство "Логово-97" ӵошатскон радъяз вал. Ёросъёсысь уно пӧйшурасьёс пыриськизы отчы. Нырысь интые потӥз Иван Коньковлэн бригадаез (Балезино район), дас кион кутэмын. Койыкез кутыны лицензия сётэмын но куинь миллион манет коньдон висъямын. Куать кион кутэмзы понна кыкетӥ инты сётэмын Ю. Ложкинлэн бригадаезлы (Игра район). Нош Играысь Ю. Широбоков одӥг мумы кионэз но 18 кучапиосты кутэм. Вераны кулэ на Игра районысь ик В. Широбоковлэсь, В. Сергеевлэсь, Красногорск районысь А. Берестовлэсь но мукет пӧйшурасьёслэсь нимъёссэс, кинъёс мыло-кыдо пырисько сьӧсь пӧйшуръёсты быдтыны. Пӧйшуран хозяйствоосмы пайдаё мед ужалозы шуыса, котькытын быдэс ар ӵоже кионъёсты пӧртэм амалъёсын быдтон сярысь сюлмаськоно. Миым гинэ кионъёс изъянтӥзы 40 пужейёсты, 15 кыр парсьёсты но трос мыйёсты (бобръёсты) но мукет пӧйшуръёсты. А. Сутулов. "Удмурт дунне" газетлэн кубокез понна ВОРМИЗЫ МОЖГАОС Кызьы ивортылӥмы ни, 27 февральысен 1 мартозь Алнаш районысь Асан совхоз- техникумын ортчизы шаерысьтымы гурт спортсменъёслэн В тол шудонъёссы. Куинь нунал ӵоже ӟырдыт нюръяськон мынӥз нырысетӥ радъёсы шедён понна. Тужгес но трос очко люканы быгатӥз Можга районлэн командаез. Со ик утӥз газетмылэсь азвесь кубоксэ. Тодады вайытом: кылем арын вормизы вал Завьялово районысь спортсменъёс. Туэ соос кылизы кыкетӥ интые. Куинетӥ луиз Играысь команда. Кыкетӥ группаын призёръёс радэ шедизы Алнаш, Яр, Дэбес районъёсысь спортсменъёс. Тол шудонъёслэн мынэменызы но вормисе потэмъёслэн нимъёсынызы тодматом газетмылэн вуоно номераз. Л. МЕДВЕДЕВА. Радиозаводлы - 40 Капчи-а инме ӝутскыны? Та нуналъёсы Ижысь радиозаводлы тырме 40 ар. Россиын та одӥгез усто предприятие луэ. Азьло кин бен тодэ вал космосэн но оборонаен герӟаськем продукция поттӥсьёсты? Табере заводэн тодматскыса малпаськод, одӥгез но космической аппарат яке ракета Ижын лэсьтэм прибортэк инме уг ӝутскы вал. Али югдур воштӥськиз. Предприятие мырдэм шока уд шуы, но солэн ваньбур поттон ӧрез мукет пала берытскиз. Азьло 85 процент продукциез обороналы ке кошке вал, табере - дас процентэз гинэ. Заводлэн цехъёстӥз ортчиськод но, сюлэм шымырске. Туж ӟеч, программаен ужась станокъёс сыло. Кык-куинь сменаен ужась предприятие одӥг сменае выжиз. Озьы ке но, ӟеч мылкыд кельтӥсез но вань. Механической, космической технологиосъя но мукет цехъёсы пыриськод ке, котыр чылкыт, ваньмыз тӧдьы халатэн ужало. Журналистъёсты но озьы ик дӥсязы. Но со гинэ ке луысал: кивалтӥсьёс интыязы, нош ужан смена кутске 11 часэ гинэ. Шыръяло электрокужымез. Россиысь гинэ таӵе ужан радлыкез шедьтод. Предприятие али лэсьтэ вылӥ классэн радиоэлектронной космичекой системаос. Со бен капчиен уз сётӥськы. Коллектив утчаське, мылысь-кыдысь тырше. Республикаямы котькинлэсь азьло, 1993 арын акциосын ужась огазеяськон луиз. Коллектив 56 процент акциосты возе (со киын эскерон пакет), 20-ез сётэмын Удмурт Правительстволы, 13-ез - США-ысь фирмалы, нош 11-ез - Россиысь нимаз акционеръёслы. Тӥни соин ик заводлэн валтӥсь директорез Игорь Валиахметов меӵак шуэ: - Ми азьланезлы оскыса ужаськом. Огазеяськонмес нокин уз но басьты, уз но вуза. Ваньбур поттон сярысь ке верано, берло дыре выльдӥським. Космической технологиосъя производственной центр кылдытӥм. Со 22 нимаз (дочерней) предприятиосты огазея. Учредителез одӥг - "Ижевский радиозавод" ОАО. Озьы ик нимаз ужало лэсьтӥськисьёс, транспортникъёс, ремонтникъёс, калыкез сюдӥсьёс но мукетъёсыз. Соос асьсэос коньдон потто. Завод возе социальной удысэз: ужало больница, нылпи шутэтскон лагерьёс но базаос. Предприятие миым 200 миллиард манет тыр продукция вузаз, нош дочерней предприятиос заводлэн палэназ эшшо 30 миллиард манетлы ужъёс быдэстӥзы но услугаос сётӥзы. Туэ АО продукция поттонзэ 20 процентлы будэтыны чакла. Бадӟым люкетэз со герӟаськемын "Банкир" комплекс но ретрансляторъёс поттонэн. Кылем арын та ужъёс 15 процент ке басьто вал, туэ 2 поллы йылозы. Юнме угось алигес татчы ӧз ветлы Центробанклэн тӧроез Сергей Дубинин. Одӥг "Банкир" инмын лоба ни. Сое космосэ лэзьыку, Байконуре ӧтьылӥзы заводлэсь валтӥсь директорзэ но. "Банкир" пыр Центробанк интыысь котькыӵе ивор но коньдон висъяны быгатэ. Со туж ӝог быдэстӥське. Озьы ужа ни Тверь область. Ӝоген Удмуртия но таӵе амалэ выжоз, связь кабельтэк луоз. Али кыкетӥзэ "Банкирез" дасяло ни. Азьланьын таӵе связь кулэ луоз Казначействолы, Сбербанклы, Пенсиосъя фондлы, налог органъёслы но мукетъёсызлы. Радиозавод озьы ик поттэ калыклы вузъёс, связистъёслы радиорелейной техника, чугун сюреслы кышкыт учыръёслэсь утиськонъя автоматъёс, МВД-лы пичиесь радиостанциос но мукетсэ. Но предприятие ӵошатскыны уг быгаты на Западэн, Южной Кореяен но США-ен. Вераськон мынэ калыклы усто но чебер вузъёс поттон сярысь. Мугез тодмо: республикамы, предприятие кема дыр ӵоже пытсамын вал, кунгож сьӧрысь странаосын нокыӵе кусыпъёс возён сярысь малпаськись ик ӧй вал. Табере завод усьтэмын. Алигес гинэ предприятие вуылӥзы Иранысь но Южной Кореяысь делегациос. Завод 40 ар тырмонзэ выль азинсконъёсын пумита. Со космической связьлы выль техника поттэ. Нош азьланезлы уката бадӟымесь малпанъёссы. Игорь Наримановичлэн ивортэмезъя, завод 2000 арын, туэен ӵошатыса, кык пол тросгес продукция поттоз. Предприятие юбилеезлы кемалась дасяське ни. Коллективъёсын ортчытэмын ужаны быгатонлыксэс учконъя конкурсъёс. Али мыно спартакиада но художественной самодеятелностья смотръёс. Нош 4, 5 но 6 мартэ заводэ лыктыны быгатозы татысь ужасьёслэн ӵыжы-выжыоссы но тодмооссы. Выльдэмын ни азьмынӥсьёслэн пулзы. Та нуналъёсы печатьысь потӥз "40 лет в мире электроники" книга. Со сӥземын заводлэн вордскемезлы, азинскемезлы но юнмамезлы Г. Романов. Вамыштомы артэ Ульчаын куазь ӟырдамын - куамын градуслэсь кезьыт. Лыктозы-а нылпиос школае ӝытазе? Соос Вуж Мартьян, Пычанка гуртъёсысь дышетскыны ветло уго. Ӧз кышкалэ ӟырт кезьытлэсь - лыктӥзы. Завьял шор ёзо школаысь 10-тӥ "ж" но 11-тӥ "д" классъёсын дышетскисьёс классэн кивалтӥсьёссы Татьяна Апполоновна Симанова но Елена Григорьевна Бахтина кивалтэм улсын туж аспӧртэмлыко литературной ӝыт ортчытӥзы. Озьы ик та ужрадэ туж мылысь-кыдысь пыриськиз Удмурт кун университетысь удмурт кылтодонъя факультетлэн витетӥ курсаз дышетскись Татьяна Владимировна Белова. Вераны кулэ: Татьяна Белова вить ар талэсь азьло та школаез ик йылпумъяз, солэн классэн кивалтӥсез но дышетӥсез вал Татьяна Апполоновна. Яратоно дышетӥсез доры ик со лыктӥз рпактиказэ ортчытыны. Та классъёсын дышетскисьёс кык командалы люкиськизы - "Италмаслы" но "Инвожолы". Собере ог-огзылы тунсыкоесь юанъёс сётъяны кутскизы. Шуом, кытын вордскемын Куӟебай Герд, кыӵе произведениоссэ тодӥськоды? Ашальчи Окилэн кыӵе сборникез потӥз Москваын, кин юрттӥз солы сое поттыны? Кӧня иськем кыстӥське Сибирь сюрес Удмуртилэн музъемез вылтӥ? Верано Удмуртиысь куать бадӟым шурез. Нырысетӥез удмурт писатель? Кыӵе удмурт композиторъёсты тодӥськоды но, кыӵеосызлэн операоссы, опереттаоссы но балетъёссы вань? Кыӵе арын потыны кутскиз "Дась лу!" газет? Вормиз "Италмас" команда. Та ӝыт туж юрттӥз дышетскисьёслэсь тодон-валанзэс эшшо но узырмытыны. Дышетӥсьёссы но шумпотӥзы, ӧжытак паймизы но пиналъёссылэн трос тодэмзылы. Яратыса, гажаса, ноку но ум люкиське, вамыштомы артэ - таӵе кыл сузьетъёслэсь но кылъёслэсь пӧрмытоно вал командаослы ог-огзылы шуныт мылкыдо ӟечкылан. Туж шунытэсь пӧрмизы соос. Собере вал пӧртэм шудонъёс но эктонъёс. Озьы капчи мылкыдын люкиськизы кык классысь дышетскись пиналъёс. Таӵе шуныт мылкыдо ӝытъёс, тодон-валанъёссэс муромытэм сяна, нылпиосты ог-огзылы эшшо но матэгес каро. В. Глазырина. Калыкез тылпулэсь утиськыны дышетонъя ужрадъёс сярысь Удмурт Республикаысь Правительстволэн Постановлениез 1998 ар 20 февраль Ижевск город � 110 Удмурт Республикаысь Правительство пусъе, республикаын тылпуос ӵем потало шуыса. Берло 5 ар куспын 14,7 сюрс тылпу гомаз, 799 адями быриз, 660 мурт сӧсырмиз. Та дыр куспын тулпуосын быремъёслэн лыдзы 2,2 пол йылӥз. Тылын сутскиз 6,2 сюрс юрт, 400 быртык техника, 2,6 сюрс пудо. Тылпуослэсь утиськон понна, "Тылпуослэсь утиськон сярысь" Федеральной законлэсь 18-тӥ ёзэтсэ лыдэ басьтыса, Удмурт Республикаысь Правительство пуктэ: 1. Министерствоослэн, ведомствоослэн, Удмурт Республикаысь ёросъёслэн но городъёслэн администрациоссылэн кивалтӥсьёссы, мукет предприятиослэн но организациослэн кивалтӥсьёссы, кызьы радъяськемзы но асваньбурез кызьы кутэмзы шоры учкытэк, 1998 арын но арлы быдэ ужасьёссэс тылпулэсь утиськон амалъёслы дышетыны кулэ. Тылпуослэсь утиськонъя кун службаен кылдытэм но юнматэм программая. 2. Удмурт Республикаысь Калыкез дышетонъя министерство, профессиослы дышетӥсь вылӥ, шор ёзо, начальной учреждениослэн, огъя тодон-валанъёс сётӥсь но дышетонъя мукет учреждениослэн кивалтӥсьёссы студентъёсты, дышетӥсьёсты, кылзӥсьёсты тупатэм радлыкъя юнматэм программаосъя тылпулэсь утиськон амалъёслы дышетонэз радъяны кулэ, вуоно специальностьсэс лыдэ басьтыса. 1998 арлэн нырысетӥ палараз тулпуослэсь утиськон амалъёслы дышетӥсьёс пӧлын аттестация ортчытоно. 3. Интыысь аскивалтонэн но Удмурт Республикаысь ёросъёслэн но городъёслэн администрациосынызы кивалтӥсьёслы дэмлано калыкез тылпулэсь утиськон амалъёслы дышетонэз радъяны, улыны интыяськемзылэсь азьло гражданъёсты тылпулэсь утиськон амалъёсын одно ик тодматыны, муниципальной ваньбуре пырись предприятиослы но организациослы тылпулэсь утиськон сярысь инструкциос люкылыны, тылпуосты алонъя ужрадъёсы но тылпуосты кысонэ ас мылкыд каремзыя пыриськем пожарнойёслы улон- вылонын юрттонъя гарантиос чакланы. 4. Удмурт Республикаысь Печатья но иворъёсъя министерство тылпуослэсь утиськонэн герӟаськем иворъёсты ӝегатскытэк но дун тырытэк сётонлы радэз юнматыны кулэ иворъёсты вӧлмытӥсь кун ёзъёслэн редакциоссы пыр. 5. Удмурт Республикаысь ёросъёслэн но городъёслэн администрациоссылэн кивалтӥсьёссылы дэмлано Удмурт Республикаысь ёросъёслэн но городъёслэн быръем ёзъёссылы 1998 арын муниципальной образованиын тылпулэсь утиськонлы коньдонэз нимаз чурен юнматон сярысь ӵектон сётыны. 6. Удмурт Республикаысь Югдурез утёнъя министерство ведомствоослы, министерствоослы, предприятиослы тылпулэсь утиськон ужпумъёсъя инженеръёсты, преподавательёсты дасяны юрттыны кулэ. Калыкез тылпулэсь утиськон амалъёслы дышетонэз сакгес эскероно. 7. Та постановленилэсь быдэсъяськемзэ эскероз Удмурт Республикаысь Правительстволэн тылпуослэсь утиськонъя комиссиез (Ю. С. Питкевич). 8. Та постановлениез "Известия Удмуртской Республики", "Удмуртская правда", "Удмурт дунне" газетъёсын печатлано. 9. Постановление кужыме пыре сое печатлам нуналысен. Удмурт Республикаысь Правительстволэн Тӧроезлэн нырысетӥ воштӥсез Ю. С. Питкевич. СИЗЬГУРТ ЧИПЧИРГАН Тулыспал толэзьлэн кутсконаз Удмурт кун филармониын огшокчем кадь ортчиз тодмо крезьгурчилэн Пантелей Кузнецовлэн куатьтон арес тырмонэзлы сӥзем ӝыт. Сое радъязы Пантелей Николаевичлэн матысь эшъёсыз - Удмуртиысь калык писатель Петр Константинович Чернов но "Италмас" ансамбльлэн кивалтӥсез, Россиысь искусствоосъя дано ужась Анатолий Васильевич Мамонтов. Та ужрадэ пыриськиз "Удмурт кенеш" огазеяськон но. Ӝытэз шулдыртӥзы юбилярлэн Уваын кылдытэм "Купанча" ансамблез но сӥё-дано "Италмас", музон коллективъёсын тыршись артистъёс. Син азе нош ик ӝот-ӝот пуксиз Алнаш вӧзысь Сизьгуртын вордӥськем но будэм пияшлэн улонысь пӧртэм удысъёсын аслэсьтыз интызэ утчамез но бератаз, вӧл-вӧл бызись шур кадь, крезьгуръёсын ӧръяськемез. - Вить ар талэсь азьло та залын ик ортчиз та выллем ӝыт,- шуиз Пантелей Николаевич.- Соку мон верай, укмыстон пала кырӟан гожтӥ ни шуыса. Вить ар ӵоже эшшо сю кырӟан кылдытӥ на. Зэмзэ но, радио пыр ялан тросгес кылӥськом Пантелей Кузнецовлэсь жингрес гуръёссэ. "Италмас" ансамбль но мыло-кыдо кырӟа соосты. - Бурдъёс ик кылдо кадь, тынэсьтыд гуръёстэ профессионалъёс жин вазьыто ке, - шуэ та пумысен Пантелей Николаевич. Дыр вуэмын ни Пантелей Кузнецовлэсь кырӟанъёссэ нимаз книгаен поттыны. Со дасямын но ини - кемалась "Удмуртия" издательствоын кылле. Нош поттыны коньдон ӧвӧл. Ува ёрос кивалтэт кылзэ сётэ та ласянь юрттыны. Шулдыр ӝытэ калык пӧлын верам ӟеч кыл зэмаса мед вуттоз вылэм. Тодмо крезьгурчилэсь ужъёссэ наградаосын пусъён сярысь но кылпум потылӥз. Таиз но кулэ муртъёслэн пелязы пыроз, оло? Нош мон "Удмурт дуннеез" лыдӟисьёслы ӵектӥсько Пантелей Кузнецовлы вазиськыса гожтэм кылбурме. Туймы жильыртӥз-а, Сяська зын вӧлмиз-а, Сизьгурт возьёсын ӵуж уӵы-а чирдӥз? Льӧмпу шокамъя-а, Нылмурт вешамъя-а Пинал сюлэмад чипчирган шудылӥз? Гажан но, мӧзмон но, Шудон-серектон но Баян куараен кырӟало-верало, Шӧртчи нылмуртъёс но, Кильтро кенакъёс но Кырӟан гуръёстэ асьсэлы карыло. Кызьпу арама-а, Кызо сьӧд нюлэс-а - Кудзы-о каро тонэ сокем етӥз? Кылбур жингыртэм-а, Инмар гудыртэм-а - Кызьы-о ваньзэ крезьгурад тэрытӥд? ... Туймы жильыртӥз но, Сяська зын вӧлмиз но, Сизьгурт возьёсын ӵуж уӵы но чирдӥз, Льӧмпу шокамъя но, Нылмурт вешамъя но Пинал сюлэмад чипчирган шудылӥз. Василий ВАНЮШЕВ, "Удмурт кенеш" огазеяськонлэн исполкомаз быръем мурт. * Крезьгурчи Пантелей Николаевич КУЗНЕЦОВ пумиськиз эшъёсыныз. Выль эшъёсмы кылдӥзы "Ныргындыш сем" ансамбльлы туэ пумиськылыны кылдӥз Сарапулысь ӵыжы-выжыосыныз. Поръёс татын трос: лыктэмын Татарстанысь, Башкортостанысь, Марий Элысь, Свердловск, Киров улосъёсысь, озьы ик - Россилэн мукет палъёсысьтыз. С. К. Орджоникидзе нимо заводлэн культура дворецезлэн чебер но эркын залаз люкаськылӥз сю ёрос адями. Соос пӧлын вал пурысьтам йырсиё ветеранъёс но, егитъёс но, пиналъёс но. Кенеш но ортчиз. Солэн быдэстно ужпумез одӥг вал: Сарапулын кылдытоно "Марий ушем" огазеяськонлэсь ёззэ. Ижын со вань ини: кылдӥз кылем арын. Ёросъёсын но таӵе огазеяськонъёс ӟеч ужало. "Одо марий ушем"-лы кивалтӥсе юнматэмын Удмурт Элькунысь Югдурез утёнъя министерствоын ужась милициысь подполковник А. И. Радыгин (Сарапулысь поръёслэн кенешазы но мылысь-кыдысь пыриськиз). Сарапулын но кылдӥз "Марий ушем" огазеяськонлэн люкетэз. Ми оскиськом: со утёз, ӝутоз но азинтоз поръёслэсь узыр калык кылоссэс, аспӧртэмлыко йылолъёссэс, чебер малпанъёссэс. Кивалтӥсе огкылысь юнматэмын юрист В. А. Ижболдин. Кенеше тросгес калыкез люкан вылысь, ужрадэз ортчытонъя комитет коллективмес но ӧтчаз. Нош артистъёсмы мылысь-кыдысь тыршизы: асьсэлэсь быгатонлыксэс, пор калык кылосэз сюлмысь яратэмзэс возьматӥзы. Учкись тае валаз: котькуд кырӟан-веран бере кужмо чабылӥз. Нош концерт йылпумъяськиз но, Сарапулысь выль эшъёсмы туж шуныт люкиськизы милемын. Азьланяз Ныргында музъем вылын но пумиськыны мед кылдоз. Р. Токмурзин. Шаермылэн историысьтыз Няньзы но мултэс луылӥз озьы тыршылӥзы коммунаръёс Кармыж сельсоветын Арвазь-Пельга гурт огез бадӟымез вал. Солэн музъемъёсыз гуртлэсь 4-5 иськемлы кыдёке кыстӥськылӥзы. Вань бусы ужъёс киын но валэн гинэ быдэсъяськылӥзы. Кыдёкысь бусыосын кӧлыса ужаллязы. 1926 арын кӧня ке крестьян хозяйствоос огаз сыӵе бусые коммуна кылдытыны малпазы, Кичӧлтӥсе басьтӥськиз Иван Изосимович Аравицкий. Гуртооссэ люкаса, со шуиз: "Нимамы ужаса умой улонэ ум вуэ. Капчигес луоз огинэ кариськыса ужаны. Коммунаослы государство но, пе, юрттоз. Мон алигес волостной правление ветлӥ. Оскытӥзы, кидыс, пудо-живот, техника басьтыны ссуда сётомы шуыса". Та кенешын ик огкылэ вуизы коммуна кылдытон сярысь. Айшургуртлы матэгес, Ишек шур дуре, инты быръемын вал. Котыр гуртъёсын пумен кылдылӥзы колхозъёс. Арвазь-Пельгаын колхоз тӧрое бырйизы Николай Николаевич Еремеевез. Тӥни соку ик кылдӥз колхозлэн нимыз - "Шунды ӝужан". Умой улӥсь крестьянъёс колхозэ пырыны ӧз дыртэлэ. Кудзэ соосыз кулаке поттылӥзы, кудзэ тросгес нянь но сӥль тырытылӥзы. Колхозъёслы государство юрттылӥз машинаос басьтыны, общественной юртъёс, складъёс пуктылыны. Государстволэн юрттэмезтэк соку МТС-ъёс но ӧй кылдылысалзы, дыр. Крестьянъёслэн ужзы капчияз, ю-нянь умойгес будэтыны тыршизы, трудоденьлэн дуныз будӥз, дисциплина но юнмаз. Кылсярысь, 1938 арын асьме ёросын туж умой урожай басьтӥзы, котькуд трудоденьлы быдэн 6 килограмм ю тысь люкылӥзы, государстволы тыронзэс но быдэстӥзы. Куд-ог семьяослэн ю-няньзы трос гинэ люкаськиз, соин ик мултэс няньзэс колхоз складэ кельтыны курылӥзы. Кӧня шумпотон ваиз со адямиослы, нимаз ужакумы ноку но сомында нянь ӧм басьтылэ, шуылӥзы соос. Быдӟым Отечественной война вакытэ вань секыт ужъёс кышномуртъёслэн, пиналъёслэн пельпумъёссы вылэ кылизы. Война вылтӥ "Шунды ӝужан" колхозэн кивалтӥз егит чупрес нылаш Евдокия Исаковна Рябинова. Со, пиосмурт сямен, вал вылэ пуксьыса, бусыостӥ ӵем гинэ котыръяськылӥз, ужасьёссэ эскерылӥз. Война вакытэ но со бере аръёсы Евдокия Рябиновалэн кивалтэмез улсын та колхоз Бемыж районын азьветлӥсьёс пӧлын вал. Чырмыт кышномурт котьку но калык пӧлын вал. Со ик кивалтылӥз кырӟась-эктӥсь пиналъёслэн коллективенызы, ӵем дыръя райцентре концертъёсын поталлязы. Иван Изосимович Аравицкий фронтысь бертэмез бере кужмысь кутскиз выль улон понна нюръяськыны. Атайзылэсь адӟем карыса ужазы нылпиосыз но. Нылзэ, Зинаез, ӵошатыны луысал, дыр, Паша Ангелинаен. Ас трактореныз сомында колхоз бусыосты гыриз-кизиз. Николай пиез 1943 арын военкоматэ мыныса куриськиз армие. Танкистъёслэн частязы сюрыса, дышетскиз радистэ. Фашистъёслы пумит ожмаськиз Нырысетӥ Украинской фронтын куинетӥ танковой армиын, кудӥныз кивалтӥз генерал Рыбалко. Николай Аравицкий "Т- 34" танкеныз Берлин понна ожмаськнъёсы пыриськиз. Секыт сӧсырмемез бере но, частьысьтыз ӧз кошкы. Прага городозь вуиз. Чекъёслэсь столицазэс фашистъёслэсь мозмытон дыръя, танкез ӝуаны кутскиз. Ӝуась машинаысьтыз мырдэм потӥз. Николай Иванович Аравицкий дораз умой медальёсын но орденъёсын бертӥз. Соку ик тракторе пуксиз. Вазь тулысысен кутскыса бер сӥзьылозь бусыосысь ӧз пота. Кема аръёс ӵоже "Заветы Ильича" колхозын гаражен кивалтӥз. Умой адямиез пӧртэм кивалтоно ужъёсы бырйылӥзы колхозысь коммунистъёслэн организациенызы но кивалтӥз, депутатэ но бырйылӥзы. Кык ар ортчиз ни солэн улонысь кошкемез дырысен. Но сое ялан тодазы возё гуртооссы но нылпиоссы. Кузпалэныз 4 ныл но 2 пи будэтӥзы, ваньзы дышетскемын. "Заветы Ильича" колхоз туэ но умой урожай басьтӥз. Коммунаръёслэн кельтэм пытьыоссы татын али но шӧдӥсько на. В. ЕГОРОВ, ожысь но ужысь ветеран. МИНИСТРЛЫ - "КОЛ" Сыӵе дунъет сётӥз Правительстволэн Тӧроез Павел Вершинин аслаз министрезлы Василий Жуйковлы кылем понедельнике ортчем кенешын. Мугез но вань уго.Гурт хозяйствоя но сиён-юонъя министерство вань удысъёсъя сямен бере кыльыса ужа. Эстӥськон, минеральной сылал вуттон сярысь уг сюлмаськы, лябомем огазеяськонъёсты юнъёсыз борды итонэн ӝега, тылобурдо вордон фабрикаосын югдурез тупатыны уг дырты, аппарат пумен зӧкоме... Министрлэн воштӥсьёсыз гинэ ог дасо кузя ини. Премьер-министр аслэсьтыз юрттӥсьсэ калык азьын нырсетӥзэ гинэ уг "пыжы" ни. Соиз но дышем, шӧдске. Аслэсьтыз янгышъёссэ мукетъёсыз вылэ погыльтыны тырше. Валантэм соиз, ӧвӧл шат асьме шаерын министрын ӟечгес ужаны быгатымон адями?.. А.РЯБЧИКОВ. "Удмурт дунне" газетлэн кубокез понна НАГАНОЛЭН ТЫЛГИЗЬЫЕЗ ПАЗЬГИСЬКИЗ АСАНОЗЬ Нырысетӥ нунал Араз одӥг пол гинэ луэ таӵе праздник - тӧдьы олимпиада огазе люка шаерысьтымы вань гурт спортсменъёсты. 25 район пӧлысь туэ огез но палэнэ ӧз кыльы! 27 февраль 18 час. Кутске парад. Устоосыз пӧлысь устоосыз командаос вамышъяло нырысетӥ радъёсын - ИВ тол гурт шудонъёсын вормисьёс - завьяловоос, можгаос, балезиноос... Соос бӧрсьы площаде пото Якшур-Бодьяысь, Играысь, Пичи Пургаысь делегациос. Тӥни кин пӧлын пуромоз нюръяськон! "Удмурт дуннелэсь" азвесь кубоксэ талан мылкыдзы уката но шӧдӥське играослэн. Адӟом ни: кин кинэ азьпалтоз, кин кинэ вормоз. Праздник азинске. Лыктэм куноосты ӟечкылало но ӟеч мылкыд сӥзё Алнаш районлэн, Асан совхоз-техникумлэн кивалтӥсьёсыз, Удмурт Республикаысь Кун Кенешлэн но Правительстволэн тӧрооссы А. А. Волков но П. Н. Вершинин, ӵошатсконъёсты радъясь комитетлэн кивалтӥсез Удмурт Правительстволэн Тӧроезлэн воштӥсез А. М. Лисина. Котьку сямен, таяз но тол шудонъёсы вуиз быдэс дуннелы тодмо землячкамы Галина Алексеевна Кулакова. Алигес гинэ со бертӥз Наганоысь. Отысь ваем олимпийской тылгизьыосты шуныт кылъёсын ӵош пазьгиз Асанэ люкаськем спортсменъёслэн сюлэмъёсазы. "Удмурт дунне"/ газетлэн редакторез А. П. Шкляев люкаськемъёсты бурдъяз выль вормонъёсы. 46 ар талэсь азьло гуртъёсысь спортэз яратӥсьёс нырысьсэ пумиськизы куас сюресъёс вылын. Озьы кутскиз "Советской Удмуртия" газетлэн киысь кие вошъяськись кубокез понна нюръяськон. Шумпотоно: та дыр ӵоже Удмуртиысь спортсменъёслэн радъёссы арысь аре юнмало. Кужмоосыз пӧлысь кужмоосыз тодмо ни быдэс дуннелы: Галина Кулакова, Тамара Тихонова, Нина Парамонова, Юлия Шамшурина, Владимир Никитин... Ӝоген кылом выль нимъёсты. Удмуртилэн сборнояз пырыса, гуртъёсын будэм нылъёсмы но пиосмы арлы быдэ пырисько Россилэн но солэн палэназ ортчись ӵошатсконъёсы. Тол шудонъёс усьтэмын! Тӧл шорын лопыръяськыса ӝутско флагъёс. Ӝуатске "пичи олимпиадалэн" яркыт пиштӥсь тылыз. Асан вадьсысь пеймыт инмез югдыто трос сю сюрс льӧль, чагыр, вож, ӵуж кизилиос. Соосты воштэ азвесен шудӥсь тӧдьы кульчо. Праздник кутскиз! Сьӧрлось вуэм куноосты данъяло валъёс вылын вуэм удмурт пиос-батыръёс, Калмез но Ватка, Ядыгар, Донды, Идна, Зерпал выжыос. Соосты воштэ юг-юг тӧдьы юсь - Лымы ныл - В тол шудонлэн кузёез. Сьӧраз ваем пичи эшъёссэ - лымы пырыосты. Соос бергамъя, куазь но лӧптз кадь: ӵыж выль шобретэн вализ шунды шорын сылмыны кутскем куас сюресъёсты. Кинлы меда ӵуказе удалтоз ни? Кинлы пальпотоз нырысетӥез зарни медаль? Со понна нюръяськонэз туннэ нуналысен мытӥз ни тол многоборье. Ӵуказе вазь ӵукна ик куас сюрес вылэ потозы спортэн эшъяськись семьяос. Озьыен, азьпалан кык нунал кинэ ма вите: вормон, келян, шумпотон, ӝожомон. Спорт - со спорт. Мукет сямен уг луы. Кыкетӥ нунал Асанын куазь Япониын кадь: вазь ӵукна кыдыртӥз, нуназе шорын лымыен согиз, мугорез сӥсъясь тӧлзэ вуттӥз. Ыбылӥськисьёслы умой, соос спортъя комплексын, шуныт азьын син лэчытсэс эскеро. Та дыре ик, нуналлэн пӧртмаськемез шоры учкытэк, стадионэ пумтэм-йылтэм вуо куасэн бызьылӥсьёс но соос понна "висисьёс". 9 час 30 минут. Стартэ пото 23 спортивной семьяос (уг пырисько киясаос но камбаркаос гинэ). Кин кинэ кельтоз? Кужмоосыз трос гинэ: Сарапулысь Новиковъёс, Якшур-Бодьяысь Виноградовъёс, Ярысь Рудинъёс - кылем арлэн зарни призёръёсыз. Тол шудонъёсъя адске ни: асьсэ музъем вылазы одно ик вормо кузёос. Озьыен, финише нырысьёсыз пӧлын, оло, вуозы Асанысь Липинъёс? Нош куазь, юри ӧчкарем кадь, вожомыса лымыя. Умой коть, тэль пыр лёгем сюрес лек тӧллэсь пичияк ке но уте. Пиналъёс пӧлын финише котькинлэсь вазь вуэ Сарапулысь Новиковъёслэн семьязы. Соослэн 14 аресъем Валя нылзы, тылобурдо лобем кадь, котькинлэсь ӝог ортче дистанцизэ. Жадемез пичи но уг шӧдӥськы. Соослэсь трослы ик уг кылё Играысь Лекомцевъёс, тани-тани гурезь йылэ тубозы но берпуметӥ метръёссэс йылпумъялозы Шарканысь Хохряковъёс, Ярысь Рудинъёс... Ортче секунд, кык, куинь... Та дыр куспын азьпала потыны быгато "тӧдьы олимпиадалэн" туала кузёосыз - Липинъёс. Озьыен, туннэ нунал понна нырысетӥ медальёс утэмын. Зарни шедиз Валентина, Римма но Виктор Новиковъёслы. Азвесь - играослы: Татьяна, Нина но Герман Лекомцевъёслы. Бронзалэсь награда пальпотӥз Шаркан районысь Хохряковъёслэн семьязылы: Николайлы, Антониналы, Анатолийлы. Вералом на: Ярысь но шарканъёс бертӥзы вал бронзаен. Отын районзылэсь данзэ утизы Долгановъёс: Елена, Светлана но Георгий. Куас сюрес вылэ пото ни музон спортсменъёс. 3 иськеме бызьылонын быгатонлыксэс возьматозы нылкышноос-ветеранъёс. Татын но нюръяськонэд мыноз ке мыноз! Дэбесысь Нина Даниловаез алнаш палъёсын коть кин ке ортчыны пӧрмытоз меда? Уз, дыр. Огез кужмо спортсменка, спортысь мастер, ваньмаз тол шудонъёсын И интыез басьтэ. Туннэ но адске ни: Нина одно ик вормоз! Ӝоген - финиш. Стадион тыр шуккисько дэбесъёслэн куараоссы: "Ни-на! Ни-на!" Нош ик зарни медаль! Вить тол ӵошатсконъёсын - витетӥез вормон! 3 иськемез Нина Данилова ортче 10 минут 36 секунд куспын, Ярын сярысь, 5 секундлы ӝоггес. Молодец! Кыкетӥ луиз Завьяловоысь Надежда Бочкарева. Надялэсь пырак 5 секундлы гинэ кыльыса, сюрессэ йылпумъяз эшшо огез тодмо лыжницамы - Пичи Пурга районысь Лидия Близнецова. Лымы сюрес сӥяса уг вуы, сое выльысь арато 5 иськеме потӥсь воргоронъёс- ветеранъёс. Зэм, та кыл огезлы но спортсменлы уг тупа на. Ваньзы егитэсь, сэзесь. Мылкыдзы - уртче! Бадӟым Учаын ортчем ӵошатсконъёсын вань эшъёссэ азьпалтӥз вал Завьяловоысь спортсмен Александр Смелов, Ярын но солэсь чупресэз ӧй вал. Нош туннэ кин меда азьпалтыны быгатоз Дэри ёросысь батырез? Вис карытэк усись лымы синъёсы, ымныре лякиське. Ярам ай, биатлон татын ӧвӧл: Наганоын сямен, ӵошатсконъёсты куспетӥ кароно луысал. Огез бӧрсьы мукетыз стартэ пото 24 воргоронъёс - спортэн люкиськыны ӵыдӥсьтэм адямиос. Соос пӧлын - Играысь Вениамин Ефремов, Дэбесысь Вениамин Серебренников... 5 иськемез 16 минут но 5 секундскын ортчыса ворме Владимир Корепанов! Кылемаз тол шудонъёсын со куатетӥ интыын гинэ вал. Озьыен, асан музъем выль кужым кузьмаз. Ӵапак таӵе ик дырын финишлэсь линизэ выже Вениамин Ефремов. Зол! Номыр уд шуы. Играысь спортсмен но мимала дырзэ умоятӥз 46 секундлы. Ӟечкыласьком тӥледыз, "кыктоос", зарни призёр луэменыды! 12 секундлы бере кыльыса, куинетӥ интыез басьтэ Балезиноысь Владимир Кайсин. Смеловлы таяз ӵошатсконын ӧзгес удалты: Уваысь Александр Перевощиковен ӵош финише вуыса, соос люко 4-тӥ интыез. Ветеранъёслэсь сюрессэс азинто пинал нылъёс но нылкышноос. Дистанцизы - 5 иськем. Комментатор Михаил Фатхутдинов котькуд командаез, котькуд спортсменэз нимын-тулын тодэ. Витетӥ арзэ со нуэ ни та ӵошатсконъёсты - "улэп энциклопедия". Стадион тыр чузъяське солэн зыч-зыч куараез. Минутъёс, секундъёс, рекордъёс, нимъёс - ваньмыз арен-арен, ӝажыен-ӝажыен зӧк тетрадяз люкамын. Нимысьтыз пусъёно судьяослэсь ужзэс. Соослэн йырзы - международной категориен судья Вячеслав Иванович Беляев арысь аре вань ӵошатсконъёсты умой, быгатыса радъя. Ватонэз ӧвӧл: судья бордысь тросэз потэ - вормон мылкыд но, азьланезлы оскон но. 5 иськемез котькинлэсь ог ортче Валентина Чуракова - Играысь спортсменка. Бадӟым Учаын потӥз вал куинетӥ интые гинэ, сюрессэ соку келяз Елена Рыбаковалы но Альфия Нуруллиналы. Миым но эшъёссэ азьпалтысал, дыр, но... кык толэзьем пиналэныз кузь сюрес вылэ потыны ӧз дӥсьты. Валя спортэн эшъяське ини дас кыкетӥ арзэ. Котькуд гурт шудонъёсы мылысь-кыдысь пыриське но вылӥ интые шеде. Кабачигуртысь егит анай нуналлы быдэ кадь асьсэ нюлэсъёстӥзы бызьылӥз, нош мултэсгес ваньмон дырыз луыку, рейсовой автобусэн Играла тренировкаосы ветлылӥз. Пусйыны кулэ, азяз пуктэм малпанзэ Валя быдэстӥз: вордскем нуналэзлы кузьым - зарни медаль! Туннэ - Валентиналэн праздникез! Дистанцизэ ортчиз 17 минут но 29 секундскын. Пырак 2 секундлы гинэ зарни призёрлэсь кылиз Завьяловоысь спортсменка Надежда Овсянникова. (Тодады вайытом: кылем арын со 5 иськеме бызьылонын нырысетӥ интыын вал). Финише вуэ куинетӥез лыжница - Наталья Пивоварова - Воткинск районлэн представителез. Наташаен ӵош - огез кужмо спортсменкамы - Можгаысь Альфия Нуруллина. Кыксы но нылкышноос трассаез ортчо 17 минут 35 секундскын. Витетӥ интыез басьтэ Глазовысь Наталья Пестова. Егит нылъёс пӧлын (1980-1983 аръёсы вордскемъёс) Лидия Кильдебаеваез ортчисез ӧй вал. Воткинскысь спортсменка нырысьсэ пыриськиз республикаямы ортчись тол шудонъёсы - соку ик зарни медаль утӥз, командаезлы 78 очко кузьмаса. 5 иськемез ортчиз 17 минут 17 секундскын. (Ӵошатон понна: 1996 арын та дистанциез 15 минут 25 секундскын ортчыса, вормиз Камбаркаысь Светлана Коврова. 1997 арын - Сарапулысь Надежда Новикова (15 минут 18,5 секунд). Озьыен, пуктэм рекорд кылиз Надя кие. Жаль, Асанын солы ӧзгес удалты. 9 секунд келяса, финише кыкетӥ гинэ вуиз. Куинетӥ интыын - Шаркан районысь Ольга Мушина. Валля арын но та нылаш бронзовой призёр вал. Эшшо но зол нюръяськон пуроме егит пиос пӧлын. Соос бызё 10 иськеме. Андан сямен, лымы ӵыжаны ке быгатысал, куасъёс улысь тылгизьы пазяськысал ни. Тачыр-тач! шуккисько куас бодыос, вань ни чигемъёсыз но. Кин кужымзэ пумозяз шыръяны быгатоз? Азьвыл шудонъёсысь зарниен бертӥзы вал Балезиноысь Андрей Баженов но Можгалась Евгений Иванов... Туннэ - Александр Мезенцев! Шарканысь спортсмен кузь сюрессэ ортче 30 минут но 40 секундскын. Солэсь одӥг секундлы гинэ кыле можга пи - Евгений Иванов, куинетӥ интыын - Играысь огез кужмо бызьылӥсь - Павел Шкляев. Вормисе пото Играысь Алексей Иванов, Завьяловоысь Руслан Иванов но Василий Григорьев. Туннэ ик куас сюрес вылын кужымзэс мертазы тол многоборьее пыриськисьёс, шонер ыбылӥськемзэс возьматӥзы районъёслэн кивалтӥсьёссы. Огъя вераса, зарни, азвесь, бронза медальёс шильыр! вазизы. Куинетӥ нунал Туннэ - эстафета, тужгес но лэчытэз, бордаз кыскисез ӵошатскон. Со возьматоз ини: кин Асанын келяз, кин вормисьёс радэ шедиз. 9 час 30 минут. Старт сётӥське спортивной семьяослы. Нырысетӥ этапез (1 иськем) бызё нылпиос, кыкетӥ этапын (2 иськем) - анайёс. Атайёс, 3 иськемез ортчыса, эстафетаез йылпумъяло. Али шуг вераны, кин меда 23 семья пӧлысь призёр луоз. Вераськонъёс мыно Новиковъёс сярысь. Соос бӧрсьы вуозы, дыр, Рудинъёс... Тани финишлэсь гожзэ кельтыса, эстафета бодыез анаезлы сётэ Валя Новикова! Нылзылэсь мытэм сюрессэ озьы ик ӟеч ортчо мумы-бубыосыз - Римма но Виктор Новиковъёс. Вормон - соос киын. Азвесь но бронза шедиз Играысь Лекомцевъёслы но Алнашысь Липинъёслы. Вералом на, Асанэ лыктэмын кужмоосыз пӧлысь кужмоосыз семьяос, районъёсазы вормисе потэмъёс. Кутске нылкышноос пӧлын 4 х 3 иськеме эстафета. Кылем арын та сюресэз котькинлэсь вазь йылпумъязы вал Завьяловоысь нылъёс. Туэ зол дасяськыса вуэмын Воткинскысь, Играысь, Можгаысь командаос. Нырысетӥ номер улын эстафетаез мытэ Можга районысь Бадӟым Уча гуртысь тодмо спортивной семьяысь Яна Романова. 2 номер - завьяловоослэн, 3 - воткаослэн, 4 - играослэн. И этапын эшъёссэ кыдёке кельтыса нырысь ик вуэ Лилия Кильдебаева (Воткинск). ИИ этапын азьпала потэ Сарапулысь Надежда Юшкова, со бере - Екатерина Романова (Можга) но Нина Данилова (Дэбес). Берпуметӥ этап возьматӥз: можгаослэсь кужмоез та нуналэ ӧвӧл. Кыкетӥ но куинетӥ интыосты басьто Воткинскысь но Глазовысь нылъёс. Берлозэ командаез утиз, шуыны луоз, Наталья Пестова. 4 х 5 иськемъем эстафетаын но вормизы можга пиос: Юрий Бибиков, Василий Александров, Владимир Корепанов, Евгений Иванов. Ярын соос куинетӥ интыын гинэ вал. Пусйыны кулэ: Можга районысь команда В тол шудонъёслы умой-умой дасяськемын. Вормон ас кожаз уг лыкты. Таӵе йылпумъян лэсьтыны луэ, куинь нунал ӵоже мынэм нюръяськонэз учкыса-чакласа. Газетмылэн кубокез Завьялово районысь кошкиз Можгала. Келяны котьку но секыт. Но осконо азьланезлы. Ӟеч лу, Асан посёлок! Тау тыныд шаерысьтымы спортсменъёсты огинэ люкамед понна. Тырмымтэос вал ке но, соос вунозы. Сюлэмъёсамы кылёз умоез гинэ. Табере пумиськом гужем ӵошатсконъёсын, Красногорское черкогуртын. Витетӥ тол шудонъёсысь репортажез дасязы: Валентина КУТУЗОВА, Людмила МЕДВЕДЕВА, Владимир КАМАШЕВ (фото). УЖДУН МЕДАЗ ӜЕГА Удмурт Республикаысь профсоюзъёслэн федерацизылэн тӧроез Евгений Орлов алигес гожтэтэн вазиськиз Правительстволэн кивалтӥсезлы Павел Вершининлы. Отын шуэмын: Кун Кенеш туэ 8 феврале кутэм постановлениеныз юнматӥз уждунэз котьмалэсь азьло тырон сярысь куронэз. Профсоюзъёслэн ӵектэмзыя, Россилэн Правительствоез но улосъёсы но банкъёсы валэктон келяз, уждунэз налог тыремен огдыре сётъяно шуыса. Озьы ке но, Удмуртиысь банкъёслэн уждун тырыны коньдон предприятиослы сётэмзы уг поты. Соин ик профсоюзъёслэн федерациязы ужась коллективъёслэсь трос ӝожтӥськонъёс вуо. Евгений Орлов Правительстволэсь кивалтӥсьсэ куре предприятиосысь ужасьёслы уждун тыронэз ӝегатон понна янгыш луись муртъёсты люканы но Кун Кенешлэсь косэмзэ быдэстон вылысь ужрадъёс кутыны. О.ЗОНОВ. УДМУРТ ПРАВИТЕЛЬСТВОЫН Шаерысьтымы Правительстволэн Тӧроезлэн Павел Вершининлэн районъёсы, городъёсы но бадӟымесь промышленной предприятиосы ветлонэз сяме пыӵаз ни. Кылем пятницае Павел Николаевич вуылӥз Сюмси районэ. Нырысь ик со тодматскиз "Нива" колхозэн. Хозяйствоын тыршо визьмо специалистъёс но устоесь азинсконъёс басьто. Тужгес но ӟеч ужало нянь будэтӥсьёс. Выль амалъёсты пыӵатыса, соос удалтэм ю-нянь будэто. Гуртын ужпумъёс сярысь ӟырдыт вераськон вал колхоз фермаын но хозяйстволэн правленияз. Собере Правительстволэн Тӧроез калыкез улон-вылонын утёнъя министрен Николай Бессогоновен ӵош ветлӥзы Пижил черкогуртысь психоневрологической интернатэ. Отын кенешизы солэсь материальной базазэ юнматон но асьсэ кужымен сиён-юон будэтон сярысь. Сюмси шор ёзо школаын вераськон вал дышетӥсьёслы уждун, компенсациос но пособиос сётон, соослэсь тодон-валанзэс будэтон но дышетскисьёсты школаын сюдон сярысь. Нуназе бере премьер-министр районысь предприятиослэн но организациослэн кивалтӥсьёсынызы но специалистъёсын кенеш ортчытӥз. х х х Правительстволэн Президиумаз учкемын "1998 арын Удмурт Республикалэсь кун заёмъя облигациоссэ поттон сярысь" Удмурт Республикалэн Законэзлы инъетэз. Заёмъя облигациос поттэмын луозы 500 миллион манет тыр. Со лэсьтӥськоз Россия Федерациысь Коньдонъя министерстволэн эмиссияя куронъёсызъя. Законопроект Кун Кенеше сётэмын. х х х Юнматэмын ужтэк кылемъёслы туэ юрттэт сётонъя ужрадъёс. Удмурт Республикаысь Калыкез уже интыянъя кун комитетлэн кивалтӥсез Евгений Роганов пусйиз, миым быгатӥм ужасьёслэсь лыдзэс возьыны но ужтэк кылемъёслэсь лыдзэс 7,4 процентысен 5,8 процентозь кулэстыны. Чаклам ужрадъёсъя туэ уката умойгес луоз ужасьёсты, пичи ужбергатӥсьёсты утён но соослы юрттон. Оскон вань, туэ ужтэк кылемъёслэн лыдзы миым сярысь трос уз луы. х х х Правительстволэн постановлениезъя, "Удмуртнефть" ОАО-лы 5 арлы право сётӥське Азино но Кабаново месторождениосын му вӧй поттыны. х х х Биатлон комплексын ву сётӥсь гумыос кыскон ужъёс й ылпумъямын, табере со Иж городлы муниципальной ваньбуре сётӥське. Баланс дуныз 2,3 миллион манетлэсь уно. х х х "Гарант", "Аксион", "Нефтемаш" АО-ослы но калыкез улон-вылонын утёнъя "Доверие" чековой инвестиционной фондлы государстволэн адямиосыз юнматэмын. Удмурт Республикаысь Правительстволэн Тӧроезлэн Секретариатысьтыз пресс-центр. ОДӤГ, КЫК, КУИНЬ... Куке но асьме автозавод ар ӵоже сю сюрсъёсын машинаос поттэ вал. Кылем арын конвейерысь васькиз ог тямыс сюрс "Москвич". Туэ "Ижмашлэн" кивалтӥсьёсыз чаклало куамын сюрс авто поттыны, нош Кун Кенешлэн Тӧроез сессиын алигес вераськыкуз дэмлаз солэсь кык пол трос машина бичаны. Пӧрмоз меда? Оскыны шуг. Январе уго ог 300 гинэ машина поттэмын. Кылем толэзе - солэсь куинь пол ичи. Мартэ... Ма луоз мартэ, вераны ик шуг, югдур заводын туж секыт. Озьыен, конвейерысь арня ӵоже васькись машинаосты ӝоген чиньыен гинэ лыдъялом на. Автомобильёсты поттонэн герӟаськем ужпумез эскеронлы сӥземын вал та арнялэн кутсконаз асьме Правительствоын ортчем пӧсь вераськон. Премьер Павел Вершинин, "Ижмашлэн" валтӥсь директорез Владимир Гродецкий, мукет кивалтӥсьёс кенешизы югдурез ӝегатскытэк тупатон сярысь. Оло, табере ужъёс вырӟозы? В.ГЛАЗЫРИН. ЭКТЫТОЗ "АЙКАЙ" НО Кылемаз удмурт арня ӝытазе Ижысь Егитъёслэн культура юртазы усто ортчиз удмурт эктонлы сӥзем ӝыт. Таяз учыре лыктэмъёсты шумпоттӥз Пичи Пургалась "Зарни шеп" ансамбль. Солэн кивалтӥсез Удмурт Элькунысь культура удысысь дано ужась Федосья Тубылова, ансамбльысь усточиос лулысь-сюлмысь дышетӥзы культура юртэ люкаськем удмурт егитъёсты вуныны кутскем удмурт эктонъёслы, шудонъёслы. Кӧттырымон шулдыръяськизы нылъёс но пиос: та ӝытэ жадемзэс ик ӧз валалэ кадь. Эктонлы сӥзем ужрадъёсты мылысь-кыдысь радъя егит тодосчи Андрей Прокопьев. Таиз ӝыт кыкетӥез ни вал. Вуоноез ортчоз южтолэзьлэн (март) пумаз. Таяз учыре люкаськемъёсты эктытоз фольклор кырӟанъя "Айкай" театр. Вакчияк ЭШЪЯСЬКОН СӤНЬЫС МЕД ПӦРМОЗ ГОЗЫЛЫ Сыӵе мылкыдын вераськизы алигес Россиысь Нациосын ужанъя но Федеративной кусыпъёсъя министерствое люкаськемъёс. Татын ортчиз информационно-справочной изданилэсь инъетсэ эскерон. "Россилэн улосъёсыз" ("Регионы России") шуыса нимаськоз со. Изданиез дасяны юртто министерство, Культураез азинтонъя Москваысь "Столица" фонд, Россиысь вузкаронъя палата, "Инфосервис-Унисон" фирма. Асьсэдыз гажась вань предприятиос, учреждениос но организациос тыршо та справочнике кулэ луись ивор пыртыны. Пусйымон соиз: проект лэсьтӥське, компьютер техникалэсь туала азинсконъёссэ лыдэ басьтыса. Озьыен, пӧртэм сэрегъёсын улӥсьёс ӝоген быгатозы компьютер пыр асьсэлы кулэ луись ивор шедьтыны но ог-огенызы кусып тупатыны. Валамон ни, справочникын возьматэмын луоз асьме шаер но. М.СЕЛЬЧЕНКОВА (телефакс пыр). ТОЛ МНОГОБОРЬЕ (куасэн бызьылон, ыбылӥськон, гимнастика) 16-34 аресъем нылкышноос 1. Елена Корепанова (Игра) - 161 очко 2. Зинаида Григорьева (Можга) - 143 очко 3. Валентина Калашникова (Дэбес) - 140 очко 4. Татьяна Абрамовских (Балезино) - 139 очко 5. Ольга Леус (Глазов) - 134 очко 6. Марина Вахрушева (Завьялово) - 122 очко 35-39 аресъем нылкышноос 1. Ирина Седых (Завьялово) - 152 очко 2. Валентина Гришкина (Алнаш) - 134 очко 3. Ирина Чиркова (Игра) - 132 очко 4. Ираида Рябова (Балезино) - 116 очко 5. Алевтина Степанова (Можга) - 112 очко 6. Любовь Дряхлова (Як.-Бодья) - 107 очко 40 но солэсь ятыр аресъем нылкышноос 1. Алевтина Борисова (Можга) - 172 очко 2. Нина Парамонова (Завьялово) - 165 очко 3. Альбина Емельянова (Як.-Бодья) - 165 очко 4. Зинаида Васильева (Игра) - 157 очко 5. Галина Наговицына (Балезино) - 152 очко 6. Светлана Ракова (Яр) - 141 очко 16-39 аресъем пиос 1. Эдуард Плицев (Можга) - 160 очко 2. Герман Русаев (Пичи Пурга) - 151 очко 3. Семен Бусыгин (Алнаш) - 143 очко 4. Александр Вахрушев (Балезино) - 143 очко 5. Сергей Главатских (Кез) - 140 очко 6. Алексей Поздеев (Яр) - 137 очко 40-49 аресъем воргоронъёс 1. Евгений Ветров (Кизнер) - 156 очко 2. Владимир Медведев (Завьялово) - 153 очко 3. Вениамин Гусев (Можга) - 152 очко 4. Виктор Сидоров (Пичи Пурга) - 149 очко 5. Сергей Коротаев (Шаркан) - 144 очко 6. Владимир Потемкин (Яр) - 143 очко 50 но солэсь ятыр аресъем воргоронъёс 1. Семен Шишкин (Можга) - 159 очко 2. Юрий Телегин (Завьялово) - 157 очко 3. Юрий Усков (Игра) - 154 очко 4. Иван Саушкин (Алнаш) - 154 очко 5. Николай Замыров (Як.-Бодья) - 147 очко 6. Михаил Петров (Пичи Пурга) - 140 очко Быръёнъёс азьын ТӦЛӞОЗ МЕДА БУС? Тазьы учкиськод ке, асьмеос ялан бере кылиськом. Тол но асьме доры малпамтэ шорысь вуэ, тулыс но витьымтэ вакытэ кузёяськыны шӧта. Озьы ик луэ кадь ини туала быръёнъёсын но. Законъёсты дыртӥд-вуттӥд кутӥм, праздник нуналъёсы калык пӧлын юалляськон ортчытӥм (соку шонер-а, мыдлань-а ужаммес али эскере республикаысьмы Вылӥ суд), быръён нуналлы дыр тупатӥм... Ваньзэ табере бызьылыса лэсьтоно луэ. Ар- кык талэсь азьло ӧм тодэ, лэся, та тулыс вылтӥ интыысь кивалтон ёзъёсы быръёнъёс ортчытоно луоз шуыса. Кылем понедельнике Кун Кенешын ӟырдыт кенешон вал. Татчы ветлӥзы ёросъёсысь кивалтӥсьёс. Вераськон, валамон ни, мынӥз быръёнъёс сярысь. Александр Волков пусйиз, номыр шоры учкытэк, соос тупатэм дыре ортчозы шуыса. Шаерысьтымы быръёнъёсъя комиссилэн кивалтӥсез Афанасий Тубылов тодматӥз кылдэм югдурен. 27 февральлы вераса, унояз районъёсын кулэезлэсь ичи кандидатъёс ӵектэмын ай. Шуом, Кезын 35 депутат бырйыны кулэ, законъя учкемын котькуд округе ичизэ кык кандидат, озьыен, 70 муртэ дэмлано, нош отын 7 адями гинэ ӵектэмын вал ай. Пӧртэм ӧвӧл Вавожын, Камбаркаын, мукет ёросъёсын. Городъёсын ужпум мукет. Кылсярысь, Ижын 30 мандат пӧлысь котькудӥз понна али ик куать мурт "ожмаськыны" дась ни. Трос люкасько сыӵеос Сарапулын но. Тӥни сыӵе куӵо суред. Кандидатъёс уг тырмо - урод, соос трос - эшшо но урод, уго соин сэрен уногес коньдон кулэ луоз. Кандидатъёсты пусъён матысь нуналъёсы (городъёсын - 7 мартэ) йылпумъяськоз. Тырмыт-а луиз соослэн лыдзы, быгатозы-а депутат кариськыны мылкыд карисьёс ӵектӥсьёссылэсь кинюртэмъёссэс люканы но комиссие сётыны? Шуг вераны. А. Тубыловлэн шуэмезъя, быръёнъёсты умой ортчытон вылысь кулэ 7,5 миллион манет коньдон. Бюджетын чакламын ог 5 миллион сётыны. Озьыен, котькытын коньдонэз шыръяны тыршозы. Кандидатъёслы быдэн 100 манет сётыны пусъемын. Ма соин туала дыре карод? Ёрос газетын огпол пичи статья поттымон сяна ӧвӧл ук со. Бен, котькудӥзлэн луонлыкез вань нимысьтыз счёт усьтыны. Но татын али "вӧлдэт" тупатэмын. Шуом, ёрос депутатэ мынӥсьлэн фондэз 12 сюрс манетлэсь ятыр луыны уг быгаты, Ижысь мэре кандидатлэн - 41 сюрслэсь уно. Быръёнъёсъя комиссиос коньдонэз кутон ласянь туэ чурыт куронъёс пукто: палэнысь, чакламтэ интыысь одӥг копейка но медам кошкы, соизлы яке таизлы кандидатлы дурбасьтон понна. Быръёнъёсъя законъёс арлы быдэ сямен вошъяськылэмен, валэктон уж нуыны дыр тырмымтэен, кенешонэ люкаськемъёс избиркомлэсь тӧрозэ уно юанъёсын курадӟытӥзы. Быгато-а ёрос йыръёс депутат луон понна нюръяськонэ пыриськыны? Нош соослэн воштӥсьёссы? Озьы ке, ваньзэсты туннэ быдэсъяно ужъёссылэсь мозмытоно луоз ук. Кин соку районэн кивалтоз? Кызьы бӧрысь юнматоно луоз ёрос администрацилы кивалтӥсь? Таӵе но мукет юанъёс вылысьтыз вылаз кылдӥзы. Ярам коть, Афанасий Ильич быръёнъёс радъянын, кызьы шуо, пуны сииз ни. Озьы ке но, со но куд-ог ужпумъёсъя валэктон сётыны шугъяськиз. Туала законъёсъя, ёросъёсын кун власть кылдэ бере, главаез вань калык уз бырйы ни. Администрацилы кивалтӥсез юнматоз ёрос депутатъёслэн кенешсы, сое голосование пыр ортчытыса. Кенешон дыръя азьло вераськон ӝутскиз: оло, пе, кивалтӥсе кандидатлэсь нимзэ нырысь вераны кулэ республикамылэн йырыз. Озьы, валамон ни, умой луысал, пусйиз та пумысен Александр Волков, соку кун власте пырись ёзъёслэн радзы юнмасал. Но тазьы лэсьтон понна выльдоно документъёсты. Ёрос советъёс та арня куспын ик уставъёссэс воштон сярысь решение кутӥзы ке, ми юрттом та малпанэз улонэ пыӵатыны, со понна Москвае вазиськыны, вераз Кун Кенешлэн кивалтӥсез. Быръёнъёсты радъянын бусэз трос на. Ма, валантэм интыос азьпалан но луозы. Сыӵе учыръёсты палэнтон вылысь, та кысык вакытэ республикамылэн вуоноез сярысь сюлмаськись вань адямиослы кужымзэс кызьы ке но огазеяны тыршоно, дыр. Сотэк ужась, оскымон кивалтон ёзъёс кылдытыны ум быгатэ. Быръёнъёс бюджетысь коньдонэз юнме быдтонлы пӧрмозы. И. ЛЕБЕДЕВ. Егитъёс сярысь сюлмаськыса 26 мартэ Ижысь администрациысь Егитъёсын ужанъя комитет но Студентъёслэн ассоциацизы ортчыто "День карьеры" акция. Со тужгес пайдаё луыны кулэ вузъёсты йылпумъясь студентъёс понна, кудъёсыз шугъясько уж инты шедьтонэн. Татын соос тодматскозы доразы кутыны соглаш луись куд-ог предприятиосын. Оло, кин ке со аслыз тупась уж но бырйыны быгатоз. Ватсаса сётоно юанъёсъя вазиське таӵе телефонъёсъя: 22-88-74, 75-65-86, 75-80-66, 75-20-34. В. Н. Зенин сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Зенин Владимир Николаевичез Удмурт Республикаысь Правительстволэн Тӧроезлы воштӥсе юнматоно. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 25 феврале. � 599-И Куӟебай Гердлэн вордӥськемез дырысен - 100 ар ВОРМИЗ "ШУНДЫ" Кизнер ёросысь Безменшур гуртын туж тунсыко ортчизы Куӟебай Гердлы сӥзем ужрадъёс. Пиналъёслы но, дышетӥсьёслы но мӧзмыны дыр ик ӧй вал, каникулэ бертэм студентъёс но туж мылысь-кыдысь пыриськизы татчы. Нырысь ик радъязы Гердлэн "Матӥ" веросэзъя "литож". Ӝытэз усьтӥз удмурт кыллы дышетӥсь Валентина Николаевна Кузнецова. Собере вераськонэз азьланьтӥзы студентъёс. Соос веразы Кузьма Павлович Чайниковлэн улэмез-вылэмез, дышетскемез сярысь, тодматӥзы туала иворъёсын. Ужрадэз туж улӟытӥз Куӟебай Гердлэн куараез - ас кылбуръёссэ лыдӟемез. Куӟебайлэсь рользэ быгатыса шудӥз англи кыллы но экономикалы дышетӥсь Виктор Анатольевич Кузнецов. Докладъёс бере кутскиз "литож". Ортчытӥськиз со ньыль команда вискын. Ӵошатскисьёс ог-огзылы сётъязы тунсыко юанъёс. Уд но малпа: сыӵе пичи верос, нош кӧня ужпум пуктыны быгатӥзы пиналъёс. Возьматӥзы татысь люкетъёсты, асьсэ суредъёссэс. Вормисе потӥз "Шунды" - дышетӥсьёслэн командазы, соос бӧрсьын - студентъёс, куинетӥ интыез люкизы дышетскисьёслэн командаоссы. Ӟырдыт "литож" бере шудӥсьёс "сӥялскизы" юзмыт компотэн но ческыт пӧрамъёсын. Нош йылпумъяз ужрадэз дискотека. Мукет нуналаз вал анай-атайёслэн кенешсы. Докладъёс лыдӟем бере, люкаськемъёс одӥг минут ӵоже шып сылӥзы, Соловецк шормуӵын быремъёсты буре вайыса. Пумаз пиналъёс кырӟазы. Анна КУЗНЕЦОВА, Удмурт кун университетын дышетскись. ВЫЛЬЫСЬ БЕРЫТСКЫЛӤЗ КАДЬ Дасэтӥ тулыспалэ Пичи Пурга культура юртын но ортчиз Куӟебай Гердлы сӥзем ужрад. Отчы люкаськылӥзы ёросысь кыллы но литературалы, историлы, географилы дышетӥсьёс, пӧртэм удысъёсын ужасьёс, пиналъёс, ёрос кивалтэтысь адямиос, ӧтем куноос - Ф. К. Ермаков, Ю. А. Фомин, Л. А. Вахитов, В. К. Тубылов, озьы ик - быдӟым дышетӥсенымы, югдытӥсенымы тунсыкъяськисьёс. Аспӧртэмлыко ортчиз пумиськон. Нырысь ужазы секциос. Пиналъёс куспын радъямын вал викторина: сэрттэмын-пертчемын тужгес секыт юанъёс. Дышетӥсьёслэн нимынызы вераськиз Гожня школалэн директорез Р. П. Герасимова. Со вазиськиз ӧтем куноослы таӵе куронэн: пиналъёс доры вуттоно Куӟебай Гердлэсь нылпиослы сӥзем кылбур сборникъёссэ, школаосы вӧлмытоно солы сӥзем кинофильмез. Вераськизы ӧтем куноос но. Котьку сямен паймытӥз Ф. К. Ермаков. Пурга калыклэн нимыныз музъемозь йыбырттӥськомы тӥледлы, Фома Кузьмич, чылкыт зэмлыкез калык доры берыктэмды, вормыны луонтэм ужез быдэстэмды понна. Тау! Паймымон ортчиз конференцилэн кыкетӥ люкетэз но. Нуиз сое "Маяк" газетмылэн редакторезлэн воштӥсез З. Я. Титова. Пӧламы выльысь берыктӥз кадь со удмурт калыкмылэсь дано пизэ. Сюлэме пыризы солэн гань-гань верам, сюлэм шунытэныз тырмытэм кылъёсыз. Тау тӥледлы, Зинаида Яковлевна. Кыӵе шумпотысал, дыр, Куӟебай Герд, кылысал ке та нуналэ сцена вылысен чузъяськись кырӟанъёсты, кылбуръёсты, сценкаосты. Бен, бен: быдэсмизы уго солэн малпанъёсыз, юнме ӧз луы калыкез сярысь сюлмаськемез. Та сярысь веразы "Зарни шеп" ансамбль, Иваново-Самарскысь, Аксакшурысь, Юриысь кырӟась уӵыос. Нош Вуж Моньялась усточиос нимысьтыз номеръёс дасяллям: Куӟебай Гердлэн кылбуръёсызъя сценкаос малпаллям, кылбур лыдӟыны быгатэменызы паймытӥзы Ольга Гагарина, Николай Васильев, Павел Филимонов. 6-тӥ но 7-тӥ классъёсын дышетскисьёс возьматӥзы сценкаос но "Гондыръёс" выжыкылысь люкетсэ. Усто пӧрмиз. Нылпиосты та ужрадлы рос-прос дасяллям школаысь дышетӥсьёс Н. М. Архипова но Н. Ф. Михайлова. Нош конференция котькудӥзлы ӟеч мылкыд кузьмаз, азьланяз ужаны кужым пыӵатӥз. Мария НИКИТИНА, Пичи Пурга ёросысь Вуж Монья школаысь дышетӥсь. ВАКЧИ САЕСО БӦЛЯКЪЁС Очерк Мугорылэн веськытэныз, Мугорылэн веськытэныз - Туган кутын ай луоно! Туган кутын. Жингыр каре вагонын. Кык воргорон сьӧры кыӵе ке тодмотэм кышномурт но нёжъяны выре. Кылъёссэ валатэк итӥське: - Ля-ля-ля! Ля-ля-ля! Что за песня? Сю граммзэ веръям воргорон лӧптэ: - Тыныд маке шат? Ойдо эктыны! Очкиен пиосмурт учкиз картае: - Татӥын татаръёс но удмуртецъёс уло. Соос озьы даурто, вылды. Кырӟан весь биниське: Пияла чарка, Ныглес чарка Тыгляз кошкиз ай, шӧдӥд-а? Тыгляз кошкиз. "Сю грамм" ӧз чида ни - чемоданаз месӥськиз: - Гуртам нуисько вал. Раз пошла такая пьянка, режь последний огурец! Кияр интые шампанскойзэ поттӥз но купеысен коридоре вамыштӥз: - Ля-ля-ля! Ти-ри-ри! Кто вы? Удмурды? - Удмуртъёс! Геннадий Кузнецов но Петр Данилов весь азьланьто: Ӝыт шудон пӧлы, Туган, потод-а? Шудон пӧлысен Чупан лэзёд-а? Пульыяськись юон ваньмызлэсь мылкыдзэс ӝутӥз. Кыдёке мышке кылиз ни Арск город. Сюресчиос весь юаллясько на: кинъёс соос - удмуртъёс? Кытчы мыно? Кытчы ветлӥзы? Поезд Свердловске вуытозь кыстӥськысал на, вылды, таӵе лабыртон. Ӧз пӧрмы. Огырчие (Агрызэ) вуыса, удмурт кырӟасьёс поездысь васькизы. Чугун сюресъёс вайяськизы. х х х Дас кыкетӥ дауре Арча музъем пыремын вал Волгадур Булгарие. Аръёс (удмуртъёс) улӥзы булгар эксэйлэн бурд улаз. 1552-тӥ арын ӟуч эксэй урдскиз Кузон вылэ. Ож тылӝуэ нырысь сюриз Арча. Пленэ шедиз 12 князь, 7 воевода, 300 сотник но старейшина. Соосты ӟучъёс олокӧня пол вайылӥзы котыртэм Кузон доры. Аръёс кузонъёсты куризы пумитъяськемысь дугдыны. Таосыз ӧз сётске. Соку аръёсты я ыбылӥзы, я йылсо майыг йылэ пуктылӥзы, я ошылӥзы. Озьы быриз ар калыклэн визьмыз но кужымез. Зэм, удмуртъёс пыраклы ӧз ыше, али но дышето ас кылзэс, малпало ас кылбурзэс, нёжъяло ас кырӟанзэс. Туала поездэн Арча пыр ортчыкузы, вашкала бӧлякъёссэс буре вайыса, выльысь мыто тодмо чуръёссэс: Ваёбыжлэн тылыеныз Гожтэт гожтын ай луоно, Гожтэт гожтын. х х х Нырысь-валысь секыт вал Геннадий Кузнецовлы. Москваысь Иже яке Ижысен Москвае ширтыкуз, поезд Арске я дугдэ, я уг. Тодмо ымнырез гинэ ӧвӧл, тодмо бусыез но уд адӟы. Ай татысен Балтач но Чаӟа (Ципья) палозь олокӧня дасо иськем на. Пиез уг бертылы шуыса, анай но кайгыре, вылды. Соку, тамбуре потыса, пиосмурт ас понназ нукыртэ: Анае гурзэ эстэм, дыр, но, Муръётӥз ӵыныз потэ, дыр... Люгдур шуон воштӥськиз, "Айкайын" Петя Данилов ужаны ӧдъям бере. Воргоронъёслэн сюлэмъёссы ик люгытэсьгес луизы. Нырысь дӥсьтытэк, собере пумен сэзьгес нёжъяны шӧтазы: Тон толон ӝыт кытцы мынӥд? Тон толон ӝыт кытцы мынӥд? Сари валдэ ай кыткыса, Сари валдэ. Отӥяз вӧзазы итӥське куинетӥ эшсы - арган. Куараоссы уката эркынгес ӧръясько: Ми но озьы мыном али, Ми но озьы мыном али. Выль туганмес ой кутыса, Выль туганмес. Огпол поезд татӥ уин кошкыны кулэ вал. Пиос ӧз выдэ. Ӵапак уйшоре вагонын чузъяськиз: Ой, туган, марлы Пегаськод ялан? Вождэ эн потты, Чупай ке, ява. Данакез сюресчиос таӵе концертэз юри витиллям, кожалод. Артэ вагонъёсысь но потӥзы. Огез шампанской вуттэм. Ӵукнаозь юалляськизы удмуртъёс сярысь. Удмурт шаер сярысь. Артистъёс сярысь. х х х Чебер кырӟась кык пиёкъёс одно артистэ дышетском, шуизы. Витетӥ классын куараоссы шуак чигиськизы. Кырӟакузы гинэ уг, вераськыкузы но ӟазырто. Кызьы бен тазьы улод? Кыӵе артист пишмоз ? Отӥяз куараос юнмазы. Нош Геналэн юлтошез та вискын малпанзэ воштэм. Лэсьтӥськисе дышетскемез потэм. Поезд сое нуиз Сибире, Кузнецовез - Казане, крезьгуръя (музыкая) училищее. Удмурт пиез кемалась витё ни вылэм, лэся. Армие, пе, ветлы но - одно кутом. Армилэсь азьвыл Гена Иже ворттылоно кариськиз. Котьма шу, нош удмурт пиез Удмурт шаер ас бордаз золгес кыске. Поезд уин огдырлы дугдылӥз кыӵе ке тодмотэм интые. Пиёк потӥз кыре. Ченбер выжыкыл дуннее вуиз кадь: шыпыт, шуныт, усто! Мон татын уло, вазиз Гена аслыз ачиз. Со лыктӥз Ижысь культурая училищее. Пыриз хорлы дирижёръёсты дасясь люкетаз. х х х Кыдёкын со, Чаӟа школа - Татариысь Арча сьӧрын. Отысь Данилов Петр бордгазетъёс суредалляз. Дышетӥсьёс дэмлазы дас ар дышетскыны но университетэ йыгаськыны. Пияшлэн черсаз музон шорт биниськиз. Семьяын нылпиоссы трос бере, кин сое сокудняла дышетоз? Тямысэтӥ класс бере бырйыны ӧдъяз суредасьёсты дасясь училищеез. Казане мыноно ке шат? Кыдёкын ӧвӧл. Нош Балтач палась удмуртъёс отчы уг пыро кадь. Кин-о сюрес возьматоз? Одӥгез тодмо ныл дышетске Дэбесысь педучилищеын. Каникулэ бертэмын. Со доры Петр кык арня пала ветлӥз, карандашен суреданы дышетскыса. Ӝыны Татария но быдэс Удмуртия пыр потыса, Данилов вуиз Чупчи дуре. Экзаменъёссэ умой сётӥз. 30 манет стипендия басьтод, шуизы. Ньыль арзэ ик пияш ӧз улы общежитиын. Пыриз муртъёс доры кунокуае (квартирае). Зэм, муртъёс шуыны ымыд пыроз шат Осотов кузпалъёсты? Одӥг семья кадь вал соос. Кыдёке ке но, дораз пияш ӵем бертылӥз. Берлань Дэбесэ берытскыкуз, поездын умме усем. Играын вагонысь потэм интые, пырак Пибаньшурын гинэ сайказ. Отысен вуиз Кезэ. Нош Дэбесэ автобус ӧз мыны - букос. Сюрес куамын иськемлэсь кузь. Петя пыдын вамыштӥз. Копак жуммиз ке но, Чаӟаысь ыстэм саламзэ вуттӥз Осотовъёс дӥне. Салам - дорын виятэм аракыен ӟенелик. х х х Культурая училищеысь кыкетӥ курсын дышетскись Кузнецов Генаез шуак армие нуизы. Бертытозяз ёзъёсыз диплом басьтӥллям. Со но Казаньысь культурая училищее пырон сярысь ӧз малпа ни, дышетсконзэ Ижын йылпумъяно кариськиз. Училищеын диплом сётӥзы но выльысь лӧпкытӥзы Казане: таяз учыре - культурая институтэ. Но Кузнецовез синйылтыса вуттэм Анатолий Мамонтов. Озьы "Италмас" ансамбле ватсаськиз чебер куара. Нырысь Геннадий Кузнецов сюриз хоре. Собере Анатолий Мамонтов сое эскериз, нимаз кырӟатыса. Кельшиз, вылды, чебер тенор гур. Кивалтӥсь соин гинэ уг буйгатскы. Куара вӧзы кулэ на, пе, соин кузёяськыны быгатэм. Кузнецов кор ӝутъя кадь, сокем жаде. Дораз бертыса, вераськемез гинэ ӧвӧл, ымзэ но усьямез уг поты. Кинлэсь трос куро - со трос сётэ - солы тросгес сёто. Геннадий луиз Россиысь дано артист. "Италмасын" ик кырӟась кышноеныз ӵош басьтӥз кык комнатаен квартира. Но бадӟымгес будэм пиналъёс яна потыны туртто... х х х Туала вакытэ Дэбес педучилище, мукетъёсыз сямен ик, диплом сётыса, уже уг интыя. Азьвыл чылкак мукет сямен вал. Дипломен ӵош басьтэм направлениея школае эн мыны ай - бордад прокурор тэбинёз. Тужгес устоосызлы гинэ шуд усьылӥз "эрико" диплом курыны. Даниловлэн дипломез быдэс училище понна одӥг - горд. Озьы пияш та аре ик пыриз Удмурт университетэ. Дэбесын дышетскыкуз, Даниловлы огпол дэмлазы халтура шуон. Нюлэс хозяйстволы стенд, пе, суредано. Ужзэ сизьым манетлы дунъязы. 30 манетъем стипендия вӧзы бадӟымос ватсэт. Университетын но со уж утчаны ӧдъяз. Эшеныз чиганъёс музэн отӥ-татӥ бызьылӥзы но - огаз школаын лаборант луиз. Факультетын машинкаен котькинлэсь ӝог печатла вал бере, ачиз верамъя, секретарь-машинистэ кутӥзы. Удмурт кун филармониын афишаос суредаз. Со гинэ ӧз тырмы. Юрий Лобановен ӵош ветлыны малпаз удмурт студентъёслэн "Чипчирган" ансамблязы. Зэм, малы ке весь малпалляз, куараез йӧнтэм шуыса. Кивалтӥсьсы Розита Анкудинова матэктыку, кескич Петыр ымзэ усья паськыт - кымысысьтыз вирсэръёсыз пульдытозь, нош куаразэ уг потты. Ӧз уллялэ бере, пумен дӥсьтӥсьгес луиз. 1986-тӥ арын, диплом басьтыкуз, Даниловлэн кышноез вал ни - ас группаяз ик дышетскем маке. Егит воргоронэз аспирантурае дэмлазы. Нош вань улытозяз немец кылэз ньӧмыз поннагес дышетӥз бере (весь сюрылӥз ляб группае), ӧз дӥсьты. Мынӥз Иж дорысь Пирог гуртэ. Школаын дышетӥз суреданы но чертёжъёс лэсьтылыны. Татын ик ужало "Чипчирганысь" эшъёсыз Владимир Напольских но Борис Баталов. х х х Кӧняез ке артистъёс вераськыны ӧдъязы "Италмасысь" кошкон сярысь. Мугъёс вал. Секытэн люкиськизы. Николай Широких, кузпалъёс Кузнецовъёс, Серебренниковъёс, Прокопьевъёс но мукетъёсыз кема утчазы выль ним. Син шоразы йӧтӥз тодмо удмурт тодосчилэн (учёнойлэн) Кузьма Куликовлэн гожтэм выжыкылэз. Отын вань вашкала чебер ним - айкай (яке Айкай). Со - нырысетӥ шумпотон. Со ик - чебер ныллэн нимыз. Кисьтэм-басьтэм кадь тупа выль ансамбльлы. Выль коллективлы, фольклоръя театрлы, соку ик чатырскыны ӧз кылды. Шораз кезьыт синмын но учкисьёс вал. Но пельпумъёссэ пумен-пумен шонертӥз. Соин ӵош - Геннадий Кузнецов но. Уката эркынгес кырӟаз, эктӥз, арганэн шудӥз. Зэм, гитаралы ичигес саклык висъя ни. Озьы ик таки уг ваньмы крезен эшъяськыны. х х х Ваньмон дыръя Данилов... куиське. Огез куиськонэз школаын, кыкетӥез - дораз. Кышноез но яратэ та ужез. Табере воргорон валаны кутскиз пичи дыръяз кылэм кылъёслэсь пуштроссэс. Татариысь Кукмор дорысь удмуртъёс чаӟаосты вакчи саесъёс шуо. Малы? Кукмор кышноослэн дэремъёссы кузь саесо. Чаӟаослэн саесъёссы гырпумозь гинэ. Ужаку медаз люкетэ, пе. Юондыр (праздник) нуналэ гинэ вакчи саесъёсазы итэт дэмӟыто. Петр Павлович куэ вашкалаос музэн, 40 сантиметр пасьта кесэген. Со ӵапак саеслы окме. Кызьы сыӵе муртэ мурт карозы "Айкайын"? Кырӟа, суреда, дӥськут малпа, куэ, вуре. Зэм, школаысь копак уг кошкы. Кин тодэ, кудлань погыльскоз ай отӥяз дунне питран. Школа кивалтӥсьёс урокъёссэ ӵукналы пукто. Соосты ортчытъя, ворттэ городэ, репетицие я концертэ. Гастроле кошкыкуз, урокъёссэ нуэ кышноез. х х х Али Кузнецовъёс уло ньыль комнатаен квартираын. Варманайзы утялтыса будэм нылпиоссы бадӟымесь ни. Нылзы университетын, пизы школаын. Нош капчияк шокчыны маза ӧвӧл. Сюлэм утча аслыз выль удыс (яке висён?). "Айкайлэн" туала кивалтӥсез Евгений Серебренников но дано артист Геннадий Кузнецов артэ бакчаос басьтӥзы. Отысен ик Женя возьматӥз кытысь ке шедьтэм такмакъёссэ. Геня бырйыны кутскиз тупась гур. Маке но пишмиз кадь. Кузнецов музон гуръёс но утча. Сюлмаз маке кылӥське ни кадь, нош кылъёсыз ӧвӧл. Могӟемзэ вераны шедьтӥз тодмоезлы Гильман Касимовлы. Таиз бигер выжыысь. Удмурт сямен куд-ог удмуртъёслэсь чебергес бӧтьыртэ но гожъяське. Шунды кадь пальпотэ: - О, мынам ӵапак таӵе стихе вань! Пумзэ тупатӥзы - кырӟан пӧрмиз. Али Кузнецов сак лыдӟе Куӟебай Гердлэсь но Михаил Федотовлэсь кылбуръёссэс. Соосъя гуръёс инъяны выре. х х х Огпол "Айкай" вуиз Дэбесэ. Концерт дыръя Михаил Ворончихин калыклы ялӥз: - Нош таиз кырӟась - тӥляд бӧлякты Евгений Серебренников! Таиз - дӥськут дасясь Петр Данилов... - Со но милям бӧлякмы! - черектӥзы залын. х х х Бӧлякъёслэсь но матынэсь соос - Серебренников, Данилов, Кузнецов, Ворончихин, музон артистъёс. "Айкайлэн" данэз будэ. 1990-тӥ арын гинэ кылдэм маке вуылӥз ни Монголие, Венгрие, Швецие, Швейцарие, Италие, Финляндие. Мед ветлоз! Адӟем потэ! Алексей ШКЛЯЕВ. * Геннадий КУЗНЕЦОВ но Петр ДАНИЛОВ ортчо Арча дортӥ. Туспуктӥз Михаил МЕНЛАДШИН. Казак выжыысь чебер кенакмес но удмуртомытӥськом ни Кемаласен шӧдӥсько ини таӵе воштӥськонъёсты: куд-огез ӟучъёс но, асьме пӧлын улыса-улыса, удмуртъёс выллемесьгес потыны кутско. Выросъёссыя но, вераськон манерзыя но, зӥбыт-востэм сямзыя но. Мынам малпамея, удмуртлыкмы, котькинэн тупаса, зӥб-зӥб улон сяммы каньылля озьы пыӵа бускельёсмылы. Кытӥяз сыӵе адямиос, удмуртлы синмаськыса, весяклы кылё шаерамы, чебер дормес пыраклы сюлмазы бинялто, асьмеды выжы-кумы чотын лыдъяло. Та выллемесь учыръёсты трос вераны луоз. Тани Санкт- Петербургысь крезьчи, крезьгурчи Виктор Егоров, кырӟанъёсмылы, калыкмылы пумтэм синмаськыса, уно аръёс ӵоже дорамы улӥз. Кулытозяз асьме калыкмес сюлэмаз утиз- возиз. Олег Поскрёбышевмы но зӥбытлыкезъя но, куараезъя но, вазиськемезъя но, кылбуръёссэ нёжъяса лыдӟемезъя но, котырысьтыз ваньмызлы юрттон мылкыдызъя но ӵапак удмурт кадь потэ. Сыӵе ик Павел Куляшовмы но. Ма, эсьмаса, Оренбург палась вуэм чебер казак нылкышномы Зоя Алексеевна Богомоловамы но - наӵ-наӵ асьмелэн. Вань сямъёсызъя - востэмлыкезъя, асьмеды яратэмезъя, нокинэн ноку керетымтэезъя, литераторъёсмес котьку вылӥе ӝутыны тыршемезъя. Туж ӟечесь ӟуч сямъёсыз борды со, мынам чакламея, вань мугораз пыӵатӥз ни удмуртлыкмес но. Вожзэ уз потты, дыр, озьы шуэмысьтым. Сое асьмеос сыӵе удмуртомытӥмы ини, куд-огез, кин луэмзэ тодӥсьтэм огшоры адямиос, ӟуч муртэ удмурт нылкышноен лыдъяло ни. Таин валче вераме потэ одӥг учыр сярысь. 1986-тӥ арын вал кадь со. Тулаын ортчизы удмурт культуралы но литературалы сӥзем нуналъёс. Тулякъёсын трос пумиськылонъёс вал. Писательёсынымы огез сыӵе кенешон радъямын вал профсоюзъёслэн юртазы. Пӧсь парен кырӟа Тулаысь самовар, ымын сылмо пряниксы, ческытэсь конфетъёссы. Юонлэсь но золгем кудӟоно ӟеч куноятэмзылэсь. Ӝӧк сьӧрын - Зоя Алексеевна, Олег Поскрёбышев, Николай Байтеряков, Вениамин Ившин но мукетъёсыз. Зоя Алексеевна котькудӥныз тодматэ Тулаысь куноосты, люкаськем калыкез. Вольыт мадемез пырак поэма кадь кисьтӥське. Тросэз, тужгес пиосъёс, синъёссэс вошъятэк учко З. А. Богомолова шоры, котькуд кылзэ сюлэмазы пыӵато. Зоя Алексеевналэн ӟеч кылъёсыз, мылкыдыз воксё бурдъязы асьме кылбурчиосты. Таӵе бадӟым пумиськонэ нырысьсэ лыктэм Веня Ившин но туж зол, эркын лыдӟиз кылбуръёссэ. Мон но асьме воргоронъёсынымы данъяськыса кылзӥсько котькуд чурзэс. Пумиськон кема ке но мынӥз, тулякъёслэн кӧтсы ӧз тыры кадь - выльысь но выльысь куро кылбуръёс лыдӟыны. Зоя Алексеевна Богомоловалы но пӧртэм юанъёсын вазиськыло. Шӧдӥ: удмурт поэзилэн пуштросэз туж матын кыдёкысь тулякъёслы но. Удмуртъёс сярысь тросгем тодэмзы потэ. Со ӝытэ ик филармониязы бадӟым концерт возьматӥзы асьмелэнъёс. Залын калыкез таляк, мыным ватсаса пукон сётӥзы ни. Таяз учыре ваньзэс паймытӥз-бурдъяз Геннадий Михайлович Корепанов-Камскиймы. Зэмос герой - батыр кадь вал со сцена вылын. Кырӟа но, шула но, эктэ но, валъёссэ но улля, самоварзэ но быректытэ, кышнозэ но эктытэ... Быдэс ансамбль кадь огназ. Музонъёсыз но артистъёсмы туж чебер адӟиськизы - вожзэс медам поттэ. Но Корепанов-Камский, кизили выллем, гомак югдытӥз залзэс. Концертэ лыктэмъёс ялан чабо кизэс, Геннадий Михайловичез кырӟаны курыса. Ӝыт йылпумъяськон азьын вӧзамы пукись мӧйы кузпалъёс куспазы сипырто: - Ну бен чебересь, шаплыесь вылӥллям та удмуртъёс - Корепанов-Камскийзы но, Зоя Богомоловазы но: Зоя Алексеевна удмурт ӧвӧл, ӟуч шуыса, мон ӧй валэкты ни. Юромо возиськи, сбӧлыкай. Мурт кареме ӧз поты та чебер нылкышноез. Ма, зэмзэ но, со асьмелэн тужгес дано нылкышноосмылэсь, воргоронъёсмылэсь удмуртлыксэс сюлэм котыраз бинялтӥз ни литературамы, искусствомы пыр. Трос ӟечсэ пыӵатӥз аслыз, Куӟебай Герд, Геннадий Красильников, Флор Васильев, Семён Самсонов, Николай Байтеряков, Степан Широбоков, Ашальчи Оки но мукетъёсыз сярысь очеркъёс гожъякуз, прозаенымы но поэзиенымы тодматскыкуз. Лякыт мылкыдо анай, апай музэн, со будэтэ егитъёссэ но литераторъёсмес. Мар ватонэз, кытӥяз пумиськыло, вылды, бездытэсьгес гожъямъёсмы но. Нош Зоя Алексеевна сыӵе учыръёсы но егитъёслы янгышсэс валаны юрттэ, куаразэ чик ватсатэк, будэтытэк. Йӧнатӥсь эмъюм мактал солэн котькуд верамез, нодламез. Алигес вань калыкенымы, дэмен пусйимы Зоя Алексеевналэсь вордскем нуналзэ. Азяз пыдесъяськылӥзы дано писательёс но, депутатъёс но, бадӟым тӧроос но, быдэс дуннелы тодмо конструктор но, крезьгурчиос но. Сое пукытӥзы туж ӝужыт азьын - королевалэн пукон вылаз. Ӝытбыт шудӥз оркестр (азьло сокем трос крезьчиосын нокинэ но ӧз данъялэ на вал). Гажамзэ, яратэмзэ вераны сцена вылэ тубазы уноез удмуртъёс но, пӧлазы ик - "Удмурт кенеш" огазеяськонлэн тӧроез В. К. Тубылов. Нимысьтыз дуно кылъёс вераз "Удмурт дунне" газетлэн валтӥсь редакторез А. П. Шкляев. Соос но Зоя Алексеевналэн сюлэмаз нош ик пыӵатӥзы кадь удмуртлыкмес, ӟеч муртъёсты мур гажан, сӥлы карон ӟеч сяммес. Бен, бадӟым нуналаз ӟуч казак нылкышномес уката удмуртомытӥм. Сое мон выльысь шӧдӥ мыным верам кылъёсысьтыз но. Калык трос вал бере, кузьымме сётӥ мукет залысен. Кызьы ке вазиськылӥз вал, романме но мукетъёссэ книгаосме курыса. Муг шедиз - сётӥ. "Тау, яратоно Кириллэ", - шуиз со ӵыжектыса, зэмос-зэмос удмурт нылкышно музэн. Куд-огез эшъёс, та чуръёсыз лыдӟыса, медаз шуэ: Зоя Алексеевна Богомоловалэн данэз борды аслэсьтыз но нимзэ лякем. Озьы лэсьтыны чик ӧй малпа: мае шӧдӥ, валай та ӝытысен - со сярысь ик гожтӥ. Кирилл Ломагин. Кузёосызлы пайда ӧз сёты Советской войскоослэн Афганистанын ожмаськемзы госбезопасностья органъёс азе выль ужпумъёс пуктӥз. Тросэз асьмелэнъёс пленэ шедизы, куд-огез асьсэос сётскизы но тушмон палан ожмаськизы. Таӵеосыныз туж тунсыкъяськизы пӧртэм спецслужбаос, нырысь ик ЦРУ. Кызьы соос уже кутӥзы военнопленнойёсты, умой возьматэ Кротовен кылдэм югдур. Кротов, Афганистанын служить карыкуз, нокинлэсь юатэк частьысь кошкыса, бандае шеде. Отын кема улэмез бере, одӥгаз советской блок-постэ лыктэ. Частьысьтыз кошкемзэ валэктэ командиръёсыныз тупамтэеныз. Бандитъёс кутэм бере, пе, трос курадӟонэз адӟи но пегӟыны быгатӥ. Суд Кротовез дезертир луэмез понна янгыш кариз. Пукиз со Удмуртиын. Ӵапак соку ик шедиз КГБ- лэн син шораз. Эскерон дыръя тодмо луиз: Кротовез ас палаз кыскем ЦРУ-ын ужась. Валамон, азьвыл сое котыр ласянь эскеризы, визьзэ сыназы, пыр-поч юалляськизы службаез сярысь, тодӥзы матысь ӵыжы-выжыосыз но тодмоосыз сярысь. Вербовказэ юнматӥзы, пленэ сюрем асьме солдатъёс азьын уродэ поттыса. Кротовлы косэмын вал СССР-е кема дырлы "пыӵаны, пыдэсаз пуксьыны", сётӥзы кусыпъёс тупатыны парольёс. Кротовлэсь зэмос ымнырзэ шараян понна, Удмуртиысь чекистъёслы трос гинэ ужано луиз. Соослы озьы ик юрттӥзы СССР-лэн КГБ-езлэн Центральной аппаратысьтыз эшъёссы но Афганистанын ужась разведподразделениос. Кутэмын вал выль ужан амалъёсын, кылсярысь, психология но криминалистика удысъёсын. Кротовлэсь ужъёссэ сэрттон-пертчон дыръя, трос выльзэ тодыны удалтӥз США-ысь спецслужбаослэн Афганистанын ужан амалъёссы сярысь. 53 мурт дышетскоз Россия данак странаосын тупанкыл кутӥз отын кивалтон удысэ специалистъёсты отын дышетон пумысен. Республикаысьтымы туэ 53 мурт музон кунъёсын тодон-валанзэс будэтоз. Оглюкетэз студентъёс иностранной кылэз уз дышетэ, дышетонын аспӧртэмлыкъёсыз луозы, мукетъёсыз одно ик дышетозы. Калык хозяйстволы кивалтӥсьёсты дасянэ куто 35, нош кун служащийёсы - 40 аресозь. Алигес шаерысьтымы кык мурт ("Ижнефтемаш" но "Аксион" АО-осысь) Японие дышетскыны кошкиз ни. Г. Васильев. КЫӴЕ НЫЛКЫШНООС!.. Алигес Ижевске вуылӥзы "Фристайл" тодмо ансамбльысь артистъёс.. Концертэ люкаськемъёс пӧлын пичиос но, мӧйыос но вал. Нырысетӥ кырӟанъёсты учкисьёс шып кылзӥзы. Концерт азьланьтӥськемъя, залын мылкыд воштӥськиз, бугырскиз. Бератаз ини пуконзы вылысь султыса, егит нылъёс, пиос эктыны ӧдъязы. Пумиськон праздниклы пӧрмиз. Туннэ "Фристайл" группаын ньыль адями, соос пӧлысь куинез - Сергейёс. Кырӟасьёссы - Нина Кирсо но Сергей Дубровин. Сергей Ганжа - гитараен шудӥсь, Сергей Кузнецов - композитор но пианиноен шудӥсь. Татьяна Назаровалэн кылъёсызъя кырӟанъёс гожъяло композиторъёс Сергей Кузнецов но Анатолий Розанов. Концерт бере кӧня ке юанэн вазиськи Нина Кирсолы. - Ижевск милемыз кезьыт пумитаз,- шуиз тодмо кырӟась,- али гинэ Турцие но Германие ветлӥмы вал: отын куазь шуныт. Но мон татын шунай, учкисьёслэсь- кылзӥсьёслэсь чилясь синъёссэс адӟыса. Адями концертэ шутэтскыны лыктэ ук. Мон малпасько, концертмы удалтӥз. Ми быгатӥмы калыкез шумпоттыны. Адями эктэ ке, озьыен, солэн ваньмыз умой. Учкисьёс тужгес но яратыса пумитазы Нина Кирсолэсь "Три сосны", "Кораблик любви" но Сергей Дубровинлэсь "Ах, какая женщина" кырӟанъёссэс. Асьмеос но, эх, кыӵе нылкышно шуыса вазиськысалмы ке, одӥгезлэн но сюлэмыз салкым ӧй кыльысал, дыр. * Кырӟа Нина КИРСО. * Сергей ДУБРОВИН но Сергей ГАНЖА. Туспуктӥз но гожтӥз В. КАМАШЕВ. Улон но нылкышно Яраты астэ, яратозы тонэ Анай, кузпал, кивалтӥсь, политик - нылкышно туннэ ассэ котыр ласянь возьматыны быгатэ. Но котькыӵе удысын со мед луоз, котькыӵе вылӥе мед ӝутӥськоз, нылкышно котьку ик нылкышно кылёз - аслаз сямъёсыныз, куронъёсыныз, семьяез но нылпиосыз сярысь сюлмаськонъёсын. Нылкышноослэн туннэ нуналзы сярысь вераськонэ ӧтиськом Удмурт Правительствоысь семья ужпумъёсъя, калыклы улон-вылонын юрттонъя но тазалыкез утёнъя отделлэсь кивалтӥсьсэ Ирина Галинаез. - Вашкала дырысен кышномурт вал семья улонлэсь шунытсэ, югытсэ утись. Кыӵеен адӟиськоды туннэ нуналысь нылкышноез? - Туала кышномуртъёс кужмоесь, шуысал. Воргоронъёсын одӥг кадь луонлыкъёссы вань вылысь, асьсэлэн ненег пельпумъёссы вылэ укыр трос сюлмаськонъёсты басьтыны туртто. Бен, туннэ нуналэ кышномуртлы капчи ӧвӧл улон тубатъёс кузя ӝутӥськыны, но аслаз сямыныз, ӝабыртӥськыны, шуг-секытъёс вамен потыны быгатэменыз ву вылын возиськыны солы капчигес. Семья кусыпъёсты но чакласькод ке, люкиськон сярысь кылпум нырысь ик ӝуто нылкышноос. Воргоронъёслы секыт йӧтэ зӥбись шуг-секытъёслы пумит султыны, выль улонлы дышетскыны кыӵе ке но амалъёс утчаны. Соин ик соос буйгатскыны туртто аракыен, наркотикъёсын, асьсэды быдтытозь но вуэ. Нылкышноос амалтэк ваньзэ ас киязы кутоно луо - нылпиосты сюдо-вордо, юртэз возё, коньдон потто. Нош кужмо луыса, кышномурт аслыз юан сётыны кутске: малы мыным ӧвӧлтэм юрттӥсь кулэ? Сыӵе учкон тужгес но вӧлмемын егитъёс пӧлын. Со ик вуттэ котькуд витетӥзэ егит семьяез люкиськон калэ. Нылкышноосты кужмогес кариськытэ асьмелэн государствомы но. Нылпиосты утён ласянь чаклам льготаос, кылсярысь, ваньмыз анайёс вылэ ошемын, законъя со озьы чакламтэ ке но. Туж ӧжытэз атайёс висись пиналэнызы доразы пуко. Кинлы кулэ бен кышномурт сыӵе секыт ныпъетэн, кин кутоз сое уже? Уката ик палэнтӥськыны туртто пинал нылъёслэсь, шуо, бызёз, нылпи ваёз, ай эшшо одӥгзэ гинэ уз. - Кыӵе ӝожтӥськонъёсын, куронъёсын нылкышноос тросгес вазисько тӥледлы? Кудзэ ужпумез нырысь интые пуктысалды? - Уноез ёрмо коньдонлы, юрттэт курыса вазисько. Но уката ик трос куронъёс нылпиосты эмъянъя. Семья ужпумъёсъя туннэ нуналлы быдэстоно ужпумъёс туж трос. Но нырысетӥ итые мон пуктысал пинал нылъёслэсь, нылпи ваёно кышномуртъёслэсь тазалыксэс утёнэз. Нылкышноосты дышетоно асьсэ сярысь сюлмаськыны, тодон-валанъёссэс будэтоно. Туннэ тужгес но шугъяськыто гуртын улӥсь кышномуртъёс. Паймиськод соослэн асьсэды но, нылпиоссэс но утьыны быгатымтэзылы, тазалыксы сярысь сюлмаськымтэзылы. Нылкышноос уг тодо законэн чаклам правооссэс но. Шуг-секытъёс пӧлы йыромыса, отысь потыны амалъёс уг ик утчало ни. Бен ваньмыз сярысь озьы вераны уг луы, адӟем карымон, сьӧразы валтыны быгатӥсь нылкышноос бырымтэ на. Озьы ке но, азьланез шоры учкыса, шумпоттӥсь суред син азе уг пуксьы. Туннэ висись кышномурт - со висись нылпи, висись кивоштӥсьёс. Вылаз ик тросэз нылкышноос юон пӧлы выемын. Кытчы со вуттоз? Та югдурысь потон понна утчано кыӵе ке но амалъёс. Шаерысьтымы Нылкышно кенешен ӵош ёросъёсын ми ортчытӥмы ни ньыль бадӟым конференция. Отын вераськон мынэ гуртысь нылкышноослэсь тазалыксэс утён сярысь. Удмурт Правительство ласянь но валан вань. Озьы ке но, куд-огез шуэ, малы, пе, семья улонэ пыриськиськоды, кӧня нылпи ваёно - асьмеос тодом. Учкиськод ке, сизьым нылпиен арлыдо кышномурт тямысэтӥзэ вайыны дасяське на, нош уждун ӝыны арен уг басьты, семьяез ёрмыса улэ. Мукетыз учыр. Трос нылпиё анай, аслаз кужымезлы оскытэк, вордӥськем нунызэ больницае ик кельтэ. Ярам, нылпи вайыны быгатӥсьтэмъёс пӧлын черод бадӟым, кулэтэм пиналэз ӝог гинэ кыӵе ке семьяе интыялозы. Вакыт воштӥськиз, нылкышноослы сое валаны кулэ. Яратэ асьтэды, асьтэос ке ӧд, кин тӥ сярысь сюлмаськоз? - Газет лыдӟисьёслэсь трос гожтэтъёс вуо, уждун, пе, ум басьтӥське, нылпи пособиос ӝегало. Кызьы улоно? Анайлэн, нылкышнолэн, кивалтӥсьлэн синмыныз учкыса, мар дэмласалды соослы? - Кыӵе ке но дэмланъёс сётыны туж шуг. Но мон малпасько, нылкышно одно ик ассэ кыӵе ке но ужлы дасяны кулэ. Возьмаса ӧвӧл улоно государстволэсь коньдонэн юрттэмзэ. Утчаськоно, быръёно тупамон уж. Адӟем карымон ӧвӧл шат Ижевскын улӥсь куинь нылпиё семьялэн шуг-секытэз вормыны быгатэмез? Уждун уг сёто, улон интызы туж ӟоскыт. Кутскизы но, мороженой вузаны ӧдъязы, нылпиоссы но басьтӥськзы уже. Ӝоген та семья куинь комнатаен квартира басьтыны быгатӥз. Туннэ улонмы котькудзэ ачиз сярысь сюлмаськыны косэ. Соин ик шедьтоно аслэсьтыд визнандэ. Колбасаен ке ӧвӧл, вӧйын ке но нянед мед луоз. Нош кыӵе ке но ужлы дышетскыны луонлыкъёс али вань. Усьтэмын пӧртэм курсъёс, школаос. Мылкыдыд но аслыд осконэд гинэ мед луоз. Луонлык утчаса, пичиен-пичиен коньдон люкано нылпиосты дышетонлы. Но анай-атайёс асьсэ азе нырысь ик таӵе ужпум пуктыны кулэ: кӧня нылпиез сюдыны-вордыны быгатозы, соос ёрмонэз медаз тодэ шуыса, азьланяз асьсэды но утялтыны мед быгатозы. Егитъёс сярысь ке верано, соос али мылысь-кыдысь кыстӥсько тодон-валанъёс басьтыны, ужтэк кылемзы уг поты. Мынам нылы тани коклюшкаосын керттӥськыны дышетскиз, музыкальной школаез быдтӥз. Шуисько, тынад вакытад мынам сомында удостоверениосы ӧй вал, табере астэ но сюдыны быгатод ни. - Ирина Владимировна, кызьы учкиськоды асьсэды воргоронъёслэсь вылӥе пуктӥсь, зол сямо кышномуртъёс шоры. - Кышномуртъёс кужмо луыны кулэ шуисько ке но, мон феминистка ӧвӧл. Нылкышнолэн но воргоронлэн дунлыкез обществоын одӥг секталаем луыны кулэ. Асьмеос нылпиез кубистаысь но ум шедьтӥське, пробиркаын но ум быдэтӥське, вордӥськом яратыса, яратоно муртмылэсь. Соин ик, ог-огмес гажаны кулэ, оло, кыл но кутоно вӧзысьтымы воргорон понна. Малпаз ке, яратоно муртсэ нылкышно кужмо но карыны быгатоз. Мон сямен, кышномурт весь одӥг ымнырын ветлыны кулэ ӧвӧл. - ужын со одӥг, нош гуртын мукет медло. Адямиен вераськыку тыршоно сое валаны, ӧвӧл палэнтӥсько, малпанэд соя уг тупа ке но. Мон пумит ваньзэ пазяса, лёгаса куштонлэсь. Котькытын эсэпсэ валано. - Мар кулэ нылкышнолы шудо но чебер луон понна? - Яратон, дыр. Яратыны кулэ астэ ачид, матысь адямиостэ, нылпиостэ. Со сяна, котькытысь ӟечсэ гинэ адӟыны тыршоно. Но котьку ик со озьы уг луы. Шуом, ӵукна сайкаса гинэ вуиськод, радио пыр пӧртэм йыружъёс сярысь кылӥськод ни. Ымнырад, синъёсыд сюлмаськон ӝуатӥське, кызьы ай ни отын нылы. Со мылкыдэз эшшо но бугыртэ автобусын - троллейбусын ӝутскем керетон. Со асьмеды чеберен уг возьматы. Быгатоно астэ утьыны вань сьӧдэзлэсь. Соин ик мон шуисько, улоно туннэ нуналэн, ваньмыз шоры ӟеч мылкыдын учкыса. Тон ке умоен вазид, тыныд аслыд ик со ӟечен берыктӥськод. Соин ик, 8 Март праздникен ӟечкыласа, вань нылкышноослы сӥземе потэ ӟеч мылкыд, уно пальпотонъёс, шуныт кылъёс. Л. Малых. Муртлэн шумпотонэзлы шумпотэ Мае даур сётэ - ваньзэ пыртӥз поттэ Дуннеын вань адямиос пӧлысь котькинлэн но аслаз анаез тужгес но чебер йӧтэ, дыр. Милям но озьы ик. Яратоно анаймы Лидия Михайловна Кадырманова - атаймылэн мусо кышноез, милям нылпиосмылэн ӵужанайзы. Паймымон адями со. Нош мар понна ми данъяськиськом соин? Та сярысь вераммы потэ. Милям семьяямы ноку керетэммы ӧвӧл. Анаймы тэрытӥськыны быгатэменыз котырысьтыз ваньмызлы капчи но шумпотон мылкыд кылдытэ. Тани огез внукез тазьы шуэ: "Ӵужае мар ке лэсьтыны куре ке, озьы куре - солэсь куремзэ шумпотыса лэсьтӥськод"... Нош Колимы шуиз: "Мон аслым ӵужае выллем кышно быръё". Адӟем карымон кышно, зэмос адями, анай но ӵужай со. Анаймылэн трос эшъёсыз. Соос пӧлын ас ёзъёсыз гинэ ӧвӧл - уноез пиналъёс. Милемлы но - матысь эш со. Маиз гинэ сюлмамы вань, ваньзэ тужгес оскымон адямимылы, яратоно анаймылы вераммы луэ. Та ласянь эшъёсмы но милемлы шуо: "Тӥляд анайды кыӵе вожъяськоно кадь!" (Тросаз семьяосын, угось, тэрытэк уло, анаенызы но уг эшъясько). Кыӵе гинэ лэсянтэм югдуре медаз ӝимы со - ноку "караул" шуыса уз улы, шуг- секытэз вормыны амал одно ик шедьтоз... Чыры-пыры учыръёсы но уг паймытӥськы. Шуом, витьымтэ куноез но кема возьмам адямиез кадь утялтоз, керӟег пиналэз но лӥятоз, куашкам мылкыдэз но ӝуткалоз, керетӥсьёсыз небыт вешась кылын буйгатоз... Соин улон-вылон сярысь туж тунсыко вераськыны, кылзэм передачаос, лыдӟем книга сярысь но кенешыны, театре но ветлыны... Со яратэ удмурт эстрадаез, пыриське вашкала праздникъёсы, ноку уг аналты дано адямиосын кусып тупатыны луонлыксэ но... Котькӧня арес мед луоз - улонлэсь бере уз кыльы. Мае вакыт вае, мар даур сётэ - ваньзэ ас пыртӥз поттэ. Нош кыӵе кибашлы милям анаймы! Зэм, быгатӥсь кышноос ӧжыт ӧвӧл. Озьыен мар выльзэ вераломы ми та пумысен? Милям малпаммыя, зарни киё адямиос вамышлы быдэ пумиськылысалзы ке, синусёнэз но, вожъяськонэз но тодӥсь ӧй луысал. Анаймы магазинысь дӥськут шер басья, со ачиз вуриське. Аслыз гинэ уг, милемды но, милесьтым нылпиосмес но шумпоттэ. Вужмем дэремлэсь гинэ но син куспын синмаськымон арбери вуттэ. Выжлёгетъёс но куэ (куиськон станок атаймы лэсьтыны юрттӥз), шобретъёс но сырылэ. Вуриськон машинаеныз шторкаосы, миндэр пуйыосы, дэремъёсы паймымон чебер пужыос пуктылэ со. Нош быземезлэсь азьло вуриськем но, пужъятскем но, чильпаськем но машинатэк - киыныз: ӝӧккышет-а со, ӵушиськон-а, укно шторкаос-а, валес котыр-а... Али ке но со киужъёссэ укноосамы, борддоръёсамы ошыса возиськомы. Сурыкмымон жадьыса, керӟегъяськыса ужысь бертыку (мар но секыт нуналъёс уг луыло), анаймылэсь синпельлы кузьмам киужъёссэ адӟиськод но, ӝожомем мылкыд соку ик ортче. Куд-ог пужыятэм ужъёссэ пияла вискы, рамкаосы интыямы: "Вал", "Ныл но кучапи", "Сирень керттэт", "Куинь батыръёс"... Унозэ киужъёссэ кузьма ӵыжы-выжыосызлы, эшъёсызлы. Вордӥськем гуртаз но палёмытӥсь кибервылзэ уноезлы кельтӥз. Оренбургъёслэн выллем шаль-кышетъёсты но анаймы керттэ. Кыӵе ненегесь, капчиесь соос пӧрмо - ваньмыз векчи венен керттэмын, "Ужез ӝегыт ке но - чебергес луэ", - шуэ со. Тани егит дыръямы шиньонъёсты туж дунъяло вал. Кытысь нош карод ай сое? Вылаз ик, дуныз но "куртчылӥське". Анаймы соку ик дышиз шиньон лэсьтыны. Ми кык сузэр- апайёс, кык казак нылъёс, шулдыръяськон ӝытъёсы шоголь йырси керттэтэн ветлӥськомы вал. Пужыё чильпам чулкалы но вожъяськыса ӧм ветлэ: куиньнамы ӵош пужы малпаськомы но анаймы керттэ. Тани пель сьӧрамы "макраме" кыл урдсаськиз, учкиськом но - анаймылэн борддораз выль амалэн керттэм киуж ошемын ини... Кемалась ни анаймы пенсиын, но тэк пукон дырзэ солэсь уд адӟы. Квартираяз ремонт лэсьтоно: линолеум ӧз кельшы - аслаз сюлмысьтыз потэм пужыен выжзэ буяз. Кинлэн ке вордӥськем нуналаз кузьманы. Коркан ветлоно шуныт пыдкутчанъёс вуре. Синмаськем чебер буёло шпагатлэсь керттэм киужъёслы - отын ик ачиз но йӧндыре ини, вань ӵыжы- выжыосызлы кузьмаз сыӵе ик ужъёссэ. Яратоно эшъёсыз - укно дураз мерттэм сяськаос но. Кыӵе но чебер кашпоос уг кертты соослы. Гульёстэк макем куанер но бездыт луысал, пе, улонэз! Ӵукна султоз но садъёсыныз ӟечъяськоз, сюлмысь вераськоз. Соин, дыр, гульёсыз арбыт сяськаясько. Нош форточкаез усьяку, кудӥз ке кынманы шеде ке, со уйзэ уг изьы: сяськаез шоры шока, вӧсяське - одно ик тэлеӟытэ... Анаймы калык визез уте, буре вайыса улэ. Калык сямъёсыз, визькылъёсыз, меӵкылъёсыз котьку ик интыяз кутоз, тодыса вералоз. 1900 пословица бичаз ни. Мукетаз зӧк тетраде быдэсак такмак гожъяз. Соосыз ваньзэ йыраз возе ук! Табере атаймы ӵектӥз солы сыӵе ик тетраде тодэм акиятъёссэ (анекдотъёссэ) гожъяны: Юрий Никулинлэсь ӧжыт уз луы, дыр, сокем трос тодэ со. Туж яратэ кырӟанъёсыз. Тодэ соосыз бигер, пор, немец, чуваш кылъёсын. Бугыртӥськем мылкыдзэ быгатэ со кыласа-бураса вераны. Валля аре одӥгзэ кылбурзэ "Удмурт дуннее" но печатлазы. Тӥни сыӵе милям дуно аныкаймы. Нош атаймы шуэ: "Анайды тӥляд - зарни". Л. Евдокимова, Н. Васильева. Ижевск город. Берекет Инкуазь гердъёс МУСПОТОН ӴУЖ ГАДЬ Пукисько гожъяськон ӝӧк сьӧрын. Корказь ӧс борды йыгаськем куараез кылӥ. Ӝогак потӥсько но... нокин ӧвӧл. "Тӧл-а эрекчаса йыгаськиз меда?" - котыр эскерисько на. Ӝӧк сьӧры пуксьыса гинэ вуисько но - нош ик йыгаськем куара. Таяз учыре монэ кыре ӧтись ерпечкаез синйылтӥ. Парсьмес вандыку, кортӵог борды кӧй юри оши вал. Отчы кунояськыны пислэг вуэм вылэм. Со ик озьы, шатыр поттыса, кӧез пул борды йыгаса кунояське. Амалы ӧз луы ни: кынмем сиёнзэ басьтӥ но сливапулэн улваяз оши. Мед кунояськоз ойдо. Гужем но ӵемысь мед вуылоз сад- бакчаямы. Та муспотон бурдолы пичи дырысеным синмаськисько. Ма, гужем соос син улэ сокем ик шара уг йӧто. Нош толалтэ гурт котыре, калык вӧзы лыктытэк амалзы ӧвӧл ни. Пислэг укное ке пуксе - выль ивор вуоз, шуэ асьме калык. Ӧйтӧд, ӧйтӧд. Нош одӥгез тодмо: толалтэ гуртэ ке вуо, озьыен, кӧттыр утчало. Та пичи тылобурдолэн секталаез 20 грамм ёрос луэ. Нюлэскын улӥсь бурдо ке но, калыклы матэ вуытэк амалыз ӧвӧл. Сиён шедьымтэ дыръя, пислэгъёс бырйиськыса уг уло ни. Ма шедем, сое кокчало: нянь пыры но, кеньыр но, кӧй юдэс но - ваньмыз кӧттыр. Юрий Дмитриевлэн инкуазьлы сӥзем книгаысьтыз лыдӟисько таӵе чуръёсты: "Толалтэ трос пислэгъёс бырыны шедё. Ӧвӧл, кезьытлэсь ӧвӧл, сютэмен куло мискиньёс. Тулыс вуытозь, котькуд дас пислэг пӧлысь огез-кыкез гинэ улэп кыле". Макем ӝож! Нош ма карод? Юрттоно вылэм. Гужем соос асьмелы но трос юрттозы ук. Тодосчиос эскеремъя, пислэгъёс трос нылпи вордыны быгатӥсь семья кылдыто. Карысьтызы ӵемысь синйылтод 10-14 пузъёссэс. Таӵе бадӟым семьяез сюдон понна, анай- атайёслы нуналаз ог 400 пол сиён вуттыны кулэ. Сюдо соос ас нылпиоссэс кык арня ӵоже. Нош сюлмаськонзы таин уг быры на. Карзэс кельтэм нылпиосты но утялтытэк, сюдытэк амалзы ӧвӧл. Та ныпъет ӵемысь атай пельпум вылэ усе. Малы ке шуоно, мумы пислэг та дыре кыкетӥзэ пуке ни ас пузъёсыз вылын. Озьыен, кӧня нумыръёсты, сад- бакчаысь изъянтӥсьёсты быдто одӥг кузъяськем пислэгъёс гинэ! Ведь нылпиоссэс сюдэмен валче, асьсэлы но кӧттыр шедьтоно. Нош бадӟым тылобурдо нуналаз ас секталаез сярысь кык но ӝыны пол мултэс сиён кулэ каре. Пислэг туж кулэ но чебер бурдо. Солэн аспӧртэмлыко "пинь-пинь!" крезьгурез ик шумпотон мылкыд кузьма. Озьы со куазьлэсь шуныт кариськемзэ ивортэ, тулыс матэктэмлы шумпотэ. Уго южтолэзь пумын со, аслыз кар лэсьтон вылысь, кельшымон инты бырйыны кутскоз ни. Асьме учёной-биологмы Серафим Васильевич Соколов "Бурдо крезьчиос" книгаяз гожтэ: "Огпол пичи дыръям нальыкен пислэгез кутӥ. Киям басьтӥ но - пислэге... кулӥз. Жаляса учкеме бере, бурдоме пуклёк вылэ понӥ. Секунд но ортчиз-а, ӧз-а - пислэге векчи куараен шултӥз но шур! гинэ лобӟыса кошкиз". Таӵе учыр сярысь мынам мукет изданиосысь но лыдӟеме вань. Пислэгез тыбыр вылаз возиськод ке, со огдырлы жӧломе вылэм. Собере нош ик катьяське. Уть ай, кыӵе паймымон! Соку ик кескич ӟичыен ӵошатэм потыны кутске. Та ӵуж гадё бурдоос тол куазен но писпуосты эскерыса уло. Соослы угось одно ик улэп лулоослэн белоксы кулэ. Соин ик ӵемысь синйылтод улвай вылтӥ тэтчаса, сак эскерыса ветлӥсь пислэгъёсты. Писпулэн улвай гыркъёсысьтыз, сул улысьтыз соос ӵемысь шедьтыло толйыны ватскем нымы-кибыосты. Озьыен, кык пӧртэм малпан кылдыны уг быгаты: пислэгъёс асьсэ тыршеменызы, сад- бакчаосмес утеменызы асьмелэсь данъяммес гинэ возьмало. Со дыре ик - тол нуналъёсы юрттэммес но. Н. НИКИФОРОВ. Киров улос, Бураши гурт. Шӧкыч Гильман КАСИМОВ НЫЛКЫШНООСЛЫ Жингрес тулысмес усьто Чебер апайёс. Тӧдьы лымыез шунто Ӟырдыт сюлэмъёс. Кин мылкыдъёсмес ӝутэ? Тӥ - нылкышноос. Кин милем бурдъёс сётэ? Тӥ - нылкышноос. Дуннеын тӥтэк уг мын, Ой, уг мын ужмы, Кизили тӥтэк инмын Ӧз на кенжылы. Эх, куддыр ум тодӥське Ватэм малпандэс, Ми куддыр ум шӧдӥське Чидась сюлэмдэс. Кышномурт азьын милям Мылкыдмы шара - Пиослэн улон шудзы Тӥ котыр берга. Эх, куддыр ум тодӥське Лушкем малпандэс, Ми куддыр ум шӧдӥське Пӧсь яратэмдэс. Шӧкыч ЛЫДӞИ НО ПОГРАЙ! Книга вузан магазинын. - Тӥляд вань-а "Пиосмурт - кышномуртлэн кузёез" книгады? Вузкарись: - Фантастикамы ӧвӧл. х х х Пинь эмъясь дорын. - Мар дауртӥды?! Мукет пиньме ишкалтоно вал ук! - Эн сюлмаське, пичиен-пичиен со дорозь но вуо ай... х х х Магазинэ пыре егит чебер ныл. - Кӧня сылэ та басмады? Вузкарись пиосмурт: - Дуно уг. Одӥг метрез - одӥг чуп карем. - Зэм но дунтэм, мон тямыс метрзэ басьто. Тани адресэ. Песянае дунзэ тыроз. Люказ Татьяна ПАНТЕЛЕЕВА. Пичи Пурга ёрос, Вуж Монья гурт. Берекет Лыдӟисьёслэн куремзыя Яратыса кылзӥсько Геннадий Ганьковлэсь кырӟанъёссэ. Туж кельше солэн "Уллапал ныл" кыранэз. Ужан-пӧран дыръя весь ас поннам нукыртсько, нош кылъёссэ копаксэ уг тодӥськы. Газетты пыр, оло, та кырӟанлэсь кылъёссэ сётоды. Газеттэс ялан басьтӥсько. Ми кадь огшоры лыдӟисьёслы со трос тунсыкозэ, пайдаёзэ сётэ. Г. ИГНАТЬЕВА. Завьял ёрос. Уллапал ныл Крезьгурез Г. Ганьковлэн. Кылъёсыз Я. Майковлэн. Урамамы вож садъёсын Юмшало тӧлъёс. Бер ытъёсы укноосын Пиштыло тылъёс. Выллапалась уллапала Васькисько туннэ. Палэзьпуос шыпыртыса Келяло монэ. Уллапалан, уллапалан Пиштыло тылъёс. Улла... улла... уллапалан Чебересь нылъёс. Котыр вӧлме шудон пӧлын Жингырес кырӟан. Лыз инбаме вӧлдӥськемын Кизили-марӟан. Ӧй но шӧды синмаськемме Уллапал ныллы... Шедьто меда кулэ кылъёс Вераны солы? Уллапалан, уллапалан Пумиськи нылэн. Улла... улла... уллапала Весь ӧте сюлэм. Уллапалась бакча бертӥ Кыстӥське сюрес. Лысвуаськем бадьёс пӧлтӥ Келяло нылэз. Вадесамы ворекъяса Кизили югдоз. Вератэк но яратэмме Чебер ныл тодоз. Уллапалан, уллапалан Уӵыос чирдо. Улла... улла... уллапалась Шудбурме шедьто. Уважаемые кандидаты в депутаты в органы местного самоуправления городов и сельских районов! Информационная служба газеты готова оказать Вам поддержку в проведении предвыборной кампании. Звоните: 24-59-78, 24-56-67. Устоез воспитатель Можга роноысь методистъёс районысьтызы дышетӥсьёс но воспитательёс пӧлын арлы быдэ кыӵе ке ӵошатсконъёс ортчытъяло. Кылсярысь, миым тодмо луиз устоез дышетӥсь, нош туэ - устоез воспитатель. Покчиосын ужасьёс пӧлысь конкурсэ пыриськыны мылкыд карисьёс нырысь ик гожтӥзы реферат. Кужымзэ, визьмо луэмзэ эскериз дас одӥг мурт. Пӧлысьтызы куатез - Т. Л. Михайлова (Ломеслудысь нылпи сад), В. А. Городилова (Вишурысь нылпи сад), Н. Н. Миловидова (Пычасысь 1 номеро нылпи сад), Н. С. Фалалеева но Т. М. Смирнова (Бадӟым Учаысь нылпи сад) но тужгес егитэз Г. А. Уткина (Бадӟым Кибьяысь нылпи сад) - конкурслэн кыкетӥ люкетаз сюризы. Со ортчиз Можга городын. Со: Воспитательёс асьсэ быгатонлыкъёссэс котыр ласянь возьматӥзы: кырӟазы-веразы. Пӧртэм юанъёслы валэктон сётӥзы. Йылпумъянъёс лэсьтыса, устоез воспитатель ним но нырысетӥ категория сётэмын Надежда Сидоровна Фалалеевалы. А. ИВАНОВА. Шӧкыч - Ой, та Миктаез, яратоно кышноез понна музъем улысь но коньдон шедьтоз... Суредэз Л. ПРОЗОРОВЛЭН. Гажано нылкышноос Быдэс дуннеын 8-тӥ Март яратонлы, осконлы, гажанлы сӥзем нуналлы пӧрмиз. Та нуналэ котькудӥз адями вордскем юртсэ но анаезлэсь мусоесь киоссэ тодаз вае. Соослэн шунытсы асьмелэсь улон сюресмес югдытэ. Тӥляд ваньзэ чиданы быгатэмды, асьтэды жалямтэды котьку но юрттӥзы Музъем вылын тупаса улыны, семьяостэс утьыны. Ӟеч сямъёс пыӵатыны тыршемды азьланезлы оскон кылдытэ но вань шуг-секытъёсты вормыны кужым сётэ. Улон капчи ӧвӧл, соиз зэм. Вань секытэз тӥ вылэ усе. Общество оске инкуазен сётэм визьдылы, быгатонлыкъёстылы, соос сюлэмъёсмес измемлэсь, малпанъёсмес кырсьмемлэсь утёзы, ог-огмес валаны дышетозы. Кун тӥ азьын кыл кутыны кулэ семьяез юнматонын, анайёслэсь но нылпиослэсь тазалыксэс утёнын, калыклы юрттэт сётонын кызьы тыршемез понна. Удмуртиысь властьёс та удысъёслы азьло сямен ик бадӟым саклык висъялозы. Вань сюлмысьтымы сӥзиськом тӥлед юн тазалык, яратон, оскон, тупан но ог-огдэ гажан, коркаосты шунытэсь мед луозы, нош улонады шудбур но шумпотон гинэ мед пумиськозы. Удмурт Республикаысь Кун Кенеш Удмурт Республикаысь Правительство Берекет Вашкала сямъёс, йылолъёс ШОРТ МИСЬКОН Вӧйдыр праздник ортчемен валче, мон син азям пуктӥ вашкалаосмылэсь шорт миськон йылолзэс. Кылсярысь, Селта палась котькуд семья сямен шортсэ миськыны турттэ вал вӧйдыр арня вискын. Тол ӵоже черсэм дэра шортсэс пӧсь эстэм бырем гуре пенен сурам вуэ котыса пукто. Шобыръяса уй ӵоже соосты париськыто. Ӵуказеяз, кин кинэн куспазы вераськыса, шортъёссэс тыметысь люкмесэ валэн васькыто, веме выллем лэсьто. Шортсы ичи уг луы, кудӥз 30-40 ӝоктэм но черсыса вуттэ. Со ӝоктэмъёсты пумъёстӥз кык кузя куто но (кузьдалазы 2,5-3 метръемесь) люкмесын шонало, пызьыръяло. Чылкыт миськем шортэз собере радэн-радэн куасьтыны кенеръёс вылтӥ ошыло. Нош ӝытазе веме калык шорт миськем табань сиыны пуксе. Кумышка юо, шулдыръясько. Табаньлы кыӵе гинэ зырет уг лэсьто вал: картофка пунем, ӟизатэм йӧлпыдлэсь йӧлвылэн сурет, йӧлын ӝуклэсь зырет но мукет. Озьы ик табань веттонъёс но пӧртэм пумоесь дасяллязы. Озьы шорт миськон быдэс праздниклы пӧрме вал. Вӧй шулдыръяськон шуо вал сое. Пиналъёс та вакытэ кин маин быгатэ гурезь йылын нискылало. Миськем шортсы куасьме ке, нылкышноос сое буяло, куиськон борды кутско. Паскалы (Акашкалы) анайёс нылпиоссылы одно ик выль дэрем, выль штани (эрезь) вуттыны тыршо. Басма соку уг шедьы вал угось, басьтыны уксё но ӧй вал. Мон али ке но паймисько, кызьы мемейёсмы ваньзэ черсыса-куыса вутто вал. Етӥнэз дэрем яке ӵушкон карон понна, мар но лэсьтыны кулэ ӧвӧл ук азьло, дыр но уно кулэ. Табаньлы картофка зырет сярысь поттылӥ вал. Али кӧс утён дыр. Соин ик ми палъёс али картофкаез паласа пӧзьто но вуэныз гинэ кизерто, туё но кӧс вӧен гинэ сураса зырет дасяло. В. СЕМЕНОВ. Шӧкыч ПЕДУНЬЛЭН ӞЕЧКЫЛАНЪЁСЫЗ Ӝог ик берга асьмелэн та дуннемы. Дырлэсь кытӥ но ма ортчемзэ валано ӧвӧл. Ӵукна Инмарлы йыбырттӥськод гинэ, ӝытсэ нош ик Марья вӧзы каръяськоно ни. Озьы - нунал бӧрсьы нунал. Одӥгез толэзь киыныз шонтэ гинэ, ӧсэ мукетыз йыгаське ни. Тани нош ик тулыслэсь вуэмзэ шӧдыны ӧйлась. Вуиз мусо нылкышноосмес ӟечкылан, сяськаен но синпель кузьымен шумпоттон дыр. Мынам но туннэ чебер апайёсмес сюлмысьтым ӟечкылам, бадӟым шуд но тазалык сӥзем потэ. Нырысь ик вазиськисько соослы, кинъёсты улытозям вунэтыны уг быгатӥськы, али кадь ик син азям возисько. Нырысь ик музъемозь йыбырттӥсько Мотя апайлы. Нылпи садын со ялан сиёз вал омлетме, колбасаме но котлетме. Кӧтыд, пе, мултэс медаз буды, пиньёсыд юнэсь но чылкытэсь мед луозы, висёнъёс мед палэнскозы. Кызьы тодэ уд вайы кык класслы мынэсьтым вазь мынӥсь Таняез. Кӧня ке пол со мынэсьтым талалляз мороженойлы коньдонме. Уг яра, шуэ, сое трос сиыны, ангина паласькоз. Одӥг парта сьӧрын пуким тыл кадь горд йырсиё Машиен. Урокме веракум, со лушкемен сыӵе валэктонъёс сётылӥз, быдэс класс горыса выж вылын погылляське вал. Тодам возисько физкультураен дышетӥсьмес Анна Ивановнаез. Милемды ульчае поттыса косоз вал: ӝутэ бурзэ пыддэс, ӝутэ паллянзэ. Пумитаз мон котькинлэсь азьло ымме усьтоно кожасько. "Нош ма вылын сылоно?" - яке мукет со выллем юан сётӥсько. Дышетӥсьмы нош ик "кык" ляке. Ӟеч кылме верасько институтысьтымы деканлы Мухиналы. Мынэсьтым кызьы дышетскемме кузьымъёс пыр гинэ дунъялляз. Со понна экзаменъёсты, мукетъёс сямен, кык-куинь пол сётылоно ӧй луылы. Тужгес но бадӟым салам верасько азьвыл кышноелы Нюсалы. Ӵем дыръя валесын мыным со мурт нимын вазиськылӥз. Котьку лыдъялляз: ческыт но тыр сиён, пе, тазалыклы урод, азинлыко ужаны уг юртты. Табере мукетсэ таза улыны дышетэ. Ойдо мед, йыркурме уг возиськы. Выль сюресэз шудо мед луоз. Я бен, гажано анайёсмы но апайёсмы, вань воргоронъёслэн нимынызы эшшо огпол ӟечкыласько тӥледды праздникеныды. Сӥзисько ваньзэ умойзэ гинэ. Тӥ понна ӝутӥсько чильпырась аракыен сюмыкме! Берекет ПРАЗДНИК ӜӦК ВЫЛАДЫ САЛАТ "ЛЬӦЛЬ КУБИСТА" Сылалтэм кубистаез сурано горд кушман сокен. Отчы ватсано сугон, нюрмульы (клюква). Сурано кӧс вӧен. Та салат туж огшоры но ческыт, ӝӧк выл но чебер адӟиське. ПЛОВ Рислэсь пӧзьтэм та сиён праздник ӝӧкез туж шулдыртоз. Дасяно сое зӧк пыдэсо посудаын яке казанын. Пыдэсаз кӧй но вӧй поныса (кыксэ но одӥг мында), посудаез пӧсятоно. Отчы юдэсэн-юдэсэн пононо сӥль (умойгес луоз ыж сӥль), кӧня ке улыса - котырес вандылэм сугон, зӧк вуштон пыр поттэм ӵуж кушман. Сӥль чебер тусо луиз ке, отчы ватсано ческытатӥсь будосъёс (вань ке, умойгес луоз барбарис но зира). Табере вылтӥз пононо миськем рисэз но йылтоно ву но сылал. Ву рислэсь вылӥе кык сантиметр ӝуждалалы гинэ ӝутскемын мед луоз. Пловез суратэк но вылтӥз шобыртытэк пӧзьтоно. Вуэз рис ваньзэ пушказ кыскиз ке, посудаез шобыртоно но 15-20 минут ӵоже ляб тыл вылын пӧзьтоно на. Ӝӧк вылэ пуктоно лазег тэркыосын. Пыдэсаз пононо риссэ, вылӥяз - векчи юдэм сӥль юдэсъёсты. Пловлы усто луо помидорлэсь но огречлэсь лэсьтэм салатъёс. 1 кг рислы мынэ: 1 кг сӥль, 1-1,5 кг ӵуж кушман, кӧня ке йыр сугон, 1,5 стакан кӧй-вӧй, 2 кг ческытатӥсь будосъёс. Л.ЯКОВЛЕВА. Быръёнъёс азьын Огазе "Удмурт кенешлэн" кичӧлтэмезъя, та арнялэн кутсконаз люкаськылӥзы солэн исполкомаз быръем муртъёс, удмурт культурая "Дэмен" огазеяськонлэн, удмурт нылкышноослэн кенешсылэн, "Шунды" дэменлыклэн но "Удмурт вӧсьлэн" кивалтӥсьёссы. Соослэн одӥг интые лыктэмзы ик пусйымон ни. Люкаськемъёс кенешизы ужзэс уртче радъян сярысь. Валамон ни, вераськон ӧръяськиз матэктӥсь быръёнъёс сярысь но. "Удмурт кенешлэн" Ижысь ёзэзлэн тӧроез Илья Байметов ивортӥз городысь Думае быръёнъёслы дасяськонлэн мынэмез сярысь. Кызьы тодмо, шоркарамы куамын депутат луоз. "Удмурт кенеш" кандидатэ дэмла ог дасо муртэ. Соос пӧлын - профессор Владимир Байметов, экономист Елена Титова, профсоюзын ужась Анатолий Гусев, журналист Василий Михайлов, дышетӥсь Ольга Шилова но мукет эшъёс. Быръёнъёсъя комиссиын регистрация ортчон вылысь, депутат луыны мылкыд карись котькуд эшлы ог 300 подпись люкано (аслаз вуоно округаз). Тазьы учкыса, трос ӧвӧл кадь. Но туала вакытэ та уж капчиен уг сётскы. Уноез бырйисьёс шуг-секытъёслэсь жадемын ни, соослы "гордэз" но, "тӧдьыез" но депутат кулэ ӧвӧл ни, шӧдске - осконзы быремын уго. Кызьы шуиз кенешонын вераськисьёс пӧлысь одӥгез, мон, пе, кинюртэм люкаса, квартираостӥ куинь час ветлӥ но тямыс муртлэсь гинэ подписьсэ шедьтӥ. Соин ик Илья Байметов вазиськиз люкаськемъёслы, та кысык вакытэ ог-огмылы юрттыны курыса. Уго мукет огазеяськемъёс быръёнъёсъя ужъёсты коньдон тырыса радъяны быгато ке, асьмелэн сыӵе луонлыкмы ӧвӧл. Нош мар малпало удмурт движенилэн азьветлӥсьёсыз вуоно мэр сярысьКандидатъёс пӧлын асьме выжыысь потэмъёс ӧвӧл бере, соос Анатолий Салтыков пала кариськыны дэмлазы. Кылдэм югдур но азьланьын ужпумъёс сярысь вераськизы озьы ик "Удмурт кенешлэн" тӧроез, солэн воштӥсьёсыз, исполкоме быръемъёс, мукет эшъёс. Асьмелы озьы ужано, удмуртлэн удмуртлы юрттон мылкыдыз мед кылдоз, тазьы вераз асьме выжыссь нылкышноослэн азьветлӥсьёссы пӧлысь одӥгез - Зоя Суворова. Солэсь малпанзэ азинтӥз Нина Малых. Удмуртъёс пӧлын вань огъя уж понна быдэсак "ӝуась" адямиос, тани Воткинскысь Альбина Вахрушева, удмурт кырӟанлы сӥзем праздник ортчытон вылысь, тол пальтозэ вузам, пусйиз Нина Игнатьевна. Сыӵе адямиосты одно ик син азьын возёно, данъяны тыршоно. Пумиськонэз йылпумъяса, Валентин Тубылов кенешонлы умой дунъет сётӥз, нылкышноосты матэктӥсь праздникен ӟечкылаз. Азьланьын но тазьы ик ужалом, шуиз со, огазе. Е. ПОПОВ. Берекет Вае серекъялом Тонтэк соослы... мӧзмыт Одӥг адями бадӟым городын улӥсь эшез доры куное лыктӥз. Эшез нырысь-валысь туж шумпотӥз. Нош дыр ортче, лыктэм куно кошкыны уг малпа. Вазиськоно кариськиз: - Уд малпаськы-а, кузпалыдлы но нылпиосыдлы тонтэк мӧзмыт шуыса? - Шонер вераськод, - вазиз пумитаз куно, - ӵуказе ик гожтэт ысто, мед лыктозы шуыса. Н. профессорлэн лекциез Кык тодмотэм адямиос автобусын верасько. - Н. профессорлэн лекцияз тӥ туннэ мыноды-а? - юа одӥгез. - Бен, - шуэ мукетыз. - Эн мынэ. Мон кылэм вал, Н. лекциоссэ туж урод лыдӟе, пе. - Мынытэк уз луы, - вера соиз, - мон - Н. профессор. Визьмооссэ уг куты - Господин директор, малы тӥ уже ӧд кутэ Браун инженерез? - юа сое воштӥсез. - Куке но со мынам кузпалэным кышнояськылэм, собере люкиськем. Мынам аслэсьтым визьмо муртэ уже кутэме нокызьы но уг луы. Иське, со мынамез ӧй вал - Алигес гинэ ӵапак адӟи, кызьы егит воргорон кузпалдэс чупаны турттэ вал. - Пӧрмытӥз-а бен? - Ӧз. - Иське, со мынамез ӧй вал. Толлэн пыдбераз тулыс лёгиське, Шуныт омырен гадь тыр шокыштэ. Уз чида тол куазь, кылёз шубазэ: - Кузё лу, - шуоз, - эше-тулысэ! Тодмо нимъёс но нуналъёс Март 5. - 65 ар талэсь азьло (1933) усьтӥськиз колхозникъёслэн-ударникъёслэн И областной съездзы. 6. - 40 ар тырме (1958) Ижевскысь радиозавод кылдэм дырысен. Солэн нырысетӥ продукциез, "Волна" радиоприёмникъёс, поттэмын вал 1058 арын июнь толэзе. 12. - 65 ар талэсь азьло (1933) кылдӥз РФ-ысь аграрной партилэн Удмурт республиканской организациез. Со нюръяське гуртын улӥсьёслэсь агропромышленной комплексын ужасьёслэсь улон-вылонзэс умоятон понна. 13. - Вордскемез дырысен 95 ар тырме Макар Иосифович Волковлы (1903-1990), удмурт критиклы но очеркистлы, "Удмурт коммуна" газетлэн редакторезлы, Удмурт госиздатлэн кивалтӥсезлы. Вордскемын Балезино районысь Салматово гуртын. 14. - Вордскемез дырысен 60 ар тырме Георгий Яковлевич Петуховлы (1938-1972), удмурт кылбурчилы-сатириклы, журналистлы. Берло аръёссэ ужаз "Советской Удмуртия" газетын "Шӧкыч" бамез дасян бордын. Улонысь кошкиз 1972 арын. 15. - 40 ар талэсь азьло (1958) Финляндиысь Турку городысь судноос лэсьтонъя заводысь ву вылэ лэземын вузкаронъя теплоход, сое бускель государство дасяз СССР- лэн заказэзъя но проектэзъя, нош ним сётӥзы Удмуртилэн столицаезъя - "Ижевск". 16. - 20 ар талэсь азьло (1978) "Ижмаш" объединенилэн мотоциклъёс лэсьтонъя конвейерысьтыз потӥз 5 миллионэтӥез мотоцикл. 18. - Вордскемез дырысен 95 ар тырме Василий Васильевич Паринлы (1903-1971), физиология но медицина удысысь тодмо учёнойлы. Тужгес но шӧдскымон пытьы со кельтӥз космической бологияя но медициная эскеронъёсын. В. В. Парин пӧртэм аръёсы кивалтӥз Свердловскысь, И Московской медицинской институтъёсын но странаысьтымы куд-ог мукет тодмо научной учреждениосын. Вордскемын Ува районысь Кейлуд гуртын. 20. - Вордскемез дырысен 55 арес тырме Владимир Емельянович Владыкинлы (1943), история наукаосъя докторлы, профессорлы. Соин гожтэмын 100-лэсь ятыр научной ужъёс. В. Е. Владыкин - Удмурт Республикалэн кун премиезлэн лауреатэз; Финляндиысь финн- угор обществолэн но Венгриысь Наукаосъя академилэн этнографияя обществоезлэн член- корреспондентэз. Владимир Емельянович тодмо кылбур гожъяменыз. Лыдӟись кие вуэмын "Марлы кырӟа тюрагай" ("Отчего поёт тюрагай") сборникез, "Йыбырскон" ("Благодарение") книгаез но мукетыз. 23. - 80 ар талэсь азьло (1918) Сарапулын усьтӥськиз Советъёслэн драмая театрзы - Удмуртиын нырысетӥез профессиональной театр. Солы художнике-постановщике юнмато М. А. Зверевез. 1935 арысен театр государственной шуыса нимаське. 28. - Вордскемез дырысен 95 ар тырме Степан Михайлович Бурбуровлы (1903-1939), литературной критиклы, журналистлы, партийной ужасьлы, Удмурт госиздатлэн редакторезлы, СССР-ысь Писательёслэн союззылэн членэзлы. "Троцкистъёс" но "векчи буржуазия" радэ пыртыса, репрессия улэ кыско. Чылкыт нимыз берыктэмын 1984 арын гинэ. Та толэзе ик - 60 ар талэсь азьло (1938) кырӟанъя но эктонъя Удмурт ансамбльлэн куараез нырысьсэ чузъяськиз всесоюзной радио пыр. - 55 ар талэсь азьло (1943) Ижевск-Балезино чугун сюреслэн ог 150 метр кузьдалаез уже кутӥськиз ни. Быдэсак йылпумъямын 1945 арын 1 мартэ. Дасяз Е. Ушакова, ЦДНИИ-ысь отделлэн кивалтӥсез. ТУЛЫС БИЧАТЭ Мар луиз та нылкышноен - ачиз но валаса уг вутты на кадь... Нош кылем арын тулыспалэ малпамтэ шорысь солэн йыраз чуръёс кылдыны, сюлмаз гуръёс веттаськыны ӧдъязы. Уин сайка - ӝог-ӝог гинэ ки улаз сюрем кагазэ гожтэ... Собере эшшо но эшшо султоно луэ. Оло со вуись тулыс ас сярысьтыз шӧдытэ-бичатэ, оло ортчем аръёсысь тодэ ваёнъёс бугырто-лӧпкыто... Гожъямез зӧк тетрадь тыр люкаськиз. Кылбур гожъяны ылам кышномурт редакцие сюрес шедьтӥз. Шонерзэ - сюрес лёгиз. Толэзьлы быдэ сямен вуэ со ми доры, капчияк пальпотыса пыре, выль гожтэмзэ сётэ, эшшо саламзэ поттэ на. Кырги пал (Пермь улосысь Куеда ёрос) вераськон сямыныз милемыз шулдыртэ. Муслима Садиековна - пинал мылкыдо кышномурт. Соин но, дыр, 58 аресаз "кылбур висён" шедьтӥз. Нош ужа со Пичи Пурга ёросысь Пугачёво посёлокын воинской частьын. Муслима ШАРАЕВА АЗЬПАЛА УЧКЫНЫ Узыез-борыез бичаку, Мыкырскытэк уг луы асьмелы, Дуннеын весь ӵошен улыку, Малпаськытэк уз луы асьмелы. Умоесь малпанъёс йырвизьмысь, Шунытэсь кылъёсмы сюлэмысь, Югытэсь тылсиос синъёсысь Азьпала мыныны юрттозы. Луылэ куддыръя янгышмы, Малпатэк лэсьтылэм ужъёсмы. Йырвизьмын ке чебер малпанъёс, Луозы шонересь сюресъёс. Шудоесь мед луоды Анайдэс но атайдэс Сюлмысьтыды яратэ, Шуныт кылдэс вералэ, Бӧрдыны эн сётэлэ. Шуныт, мусо кылъёсты Соосыз шумпоттозы. Соослэн куриськемзы Тӥледлы нош юрттозы. Анай дуно ваньмызлэсь, Атай но уг кыль солэсь. Эн вунэтэ визькылзэс, Кылзӥське тӥ соослэсь. Шудоесь мед луоды, Шундыен мед улоды, Асьтэ анай-атайдэс Ӟечен буре ваёды. Уйвӧт пыр Туннэ мынам кузь уе Уг лу умме усеме... Уйвӧт пыр мон кылӥсько Тынэсьтыд вамышъямдэ, Вужердэ ни адӟисько, Лыз чебересь синъёстэ. Ӵыжыт бамдэ чупасько, Сайкыт синмад учкисько. Мусо кылме верасько, Тонэ нош ӟыгыртӥсько... Уйвӧтам тон адӟиськид, Мӧзмемъёстэ валатӥд. Ӧвӧл ни тон шуыса, Миндэрме чупай-коттӥ. Шӧкыч СУРЕДАСЬ ПАЛЬПОТЭ - Шузимод, ява, Маши: Улошогуртын, пе, эриктэмамтэ нылъёссы ик ӧвӧл ни... - Нош мон мар верасько тыныд: Улошогурт нылъёслэсь шудоосыз ӧвӧл... Кин тон, "Чеберина - 98"? Шӧдытэк сямен улонамы пыӵазы чебер нылашъёслэн ас пӧлазы ӵошатсконъёс но. Ма карод, улон воштӥськемъя, азьлоосыз, вашкалаосыз, сямъёс ышо-вуно, со интые вордско выльёсыз. Алигес Ижын удмурт нылъёслэн конкурссылэн кыкетӥ люкетэз ортчиз. 14 апокъёс "Ижмаш" Двореце люкаськемъёслэсь синзэс палёмытӥзы чеберенызы, кыланы-бураны, эктыны-кырӟаны быгатэменызы паймытӥзы. Кин вормоз "Чеберина - 98" конкурсын? Вераны али нокин уг басьтӥськы. Сокем чебересь но мусоесь нылашъёс. Конкурс азьланьтӥськоз на. Туспуктэмез Г. Юсаевлэн. Шӧкыч Йыртӥян Паллянысен буре: 1. Сяськаясь лымыё толэзь. Кульчоосъя: 1. Сотэк уд ванды дӥсь, уд ӝут корка; 2-1. Кудӟем воргоронлэн мылкыд - зарезь...; Вылӥысен улӥе: 3,4. "Паллянысь" берытскись воргоронэз куно ӝӧк вылаз возьма ... но ... ; Кульчоосъя: 5. Утялтымтэ ... тол но гужем ӟукыртэ; 6. Воргорон чыртые нылкышно ошет; 7. Нюлэс тылобурдо ("туала" ӟучъёслэн яратоно сиёнзы); 8. Паньтэм; 9. Сизьллы быдэ солэн емышез чебер апайлэн бамыз кадь льӧль ӝуатске. Утчам кылъёс: Паллянысен буре: 1. Март. Кульчоосъя: 1. Мертэт. 2-1 Тулкым. Вылӥысен улӥе: 3,4. Ку, лы. Кульчоосъя: 5. Ыбес. 6. Сӥес. 7. Сяла. 8. Адаш. 9. Шупу. СЮ АР ТЫРМОНЭН ВАЛЧЕ Туэ, 20-тӥ феврале, Москваын ортчиз татысь удмуртъёслэн "Герд" нимо национально- культурной огазеяськонзылэн кенешез. Отын кылзӥмы удмуртъёслэн куатетӥ Ӧтчамазы ветлэм делегатмылэсь Илья Петрович Афанасьевлэсь иворъёссэ. Соку ик кенешимы Москваын 20-тӥ мартэ Ашальчи Окилы, солэн вордӥськемез дырысен 100 ар тырмонлы, сӥзем ӝыт ортчытыны. Удмуртиын вордӥськем трос адямиос уло но ужало Москваын. Соос пӧлысь 1800-эз удмуртъёс луо. Соосыз "Герд" ас котыраз огазеяны тырше. "Удмурт дунне" газетэз лыдӟисьёслы вазиськиськомы таӵе куронэн: Москваысь постпредствое ивортэлэ Москваын но со котырын улӥсь удмурт эшъёстылэсь нимтулзэс, улон интызэс, телефон номерзэс. Милям адресмы: 107813, Москва, ул.Садово-Черногрязская, дом Н 10, постпредство Удмуртии (тел.207-33-81). Михаил Калаев (Москваын улӥсь удмуртъёслэсь куронзэс быдэстыса). "Ижмашлы" - патент Туэ феврале Дуннеысь патент ведомствоын (РСТ Швейцария) Калашниковлэн автоматэз выль ужен (изобретениен) лыдъямын. Патент возись луэ "Ижмаш" ОАО. Табере АК-ез мукетъёсызлы поттон понна "Ижмашен" вераськыны яке кусыпъёс тупатыны кулэ. Али куд-ог странаосысь сыӵе куронъёс вуо ни. Нош нырысь лыдъямъя, автоматэз поттыны огкыллэн условиосызъя лицензия 1-ысен 6 миллион долларозь сылоз. Али чаклаське АК- ез поттӥсь кунъёсты паськытатыны. Кызьы тодмо, Калашниковлэн автоматэз 49 ар ӵоже нокыӵе патент утьымтэ вал. Миым Швейцариысь "Русна АГ" фирмалэн юрттэмезъя басьтэмын вал Евразийской патент. Солэн кужымез вӧлме СНГ-ысь 9 странаосы. Сыӵе ик уж али нуиське Драгуновлэн снайперской винтовкаезъя (СВД), Никоновлэн автоматэзъя но 19 номеро "Бизон" пулемёт-автоматъя (ПП). "Ижмаш" АО-лэн валтӥсь директорезлэн Владимир Гродецкийлэн верамезъя, автор ним басьтон каньылэн уз ортчы, нош куд-огезъя туж секытэн мыноз. Но табере "Ижмашлэн" кужымез тырмоз, солы юридической право сётэмын, Ижысь пыӵал тӥрлыкез утён вылысь. Г. Васильев. ВАНЕЗ УД ВАТЫ, ӦВӦЛЭЗ УД ВОЗЬМАТЫ Россиын улӥсьёс берло аръёсы котькуд тулыс кытын, ку, кӧня коньдон басьтэмзы сярысь справкаос бичаса бызьыло - табыш басьтэмзы сярысь декларациез налогъёсъя инспекцие сётон сярысь сюлмасько. Выль ужлы шуген дышиськом, вылды, угось котькуд ар та пумысен уно юанъёс кылдо, со сяна, выт тырон сярысь законъёс но ӵемысь вошъясько. Юанъёсмылы валэктон сётыны соглаш кариськиз Андрей Николаевич СКВОРЦОВ - Удмурт Республикаысь Налогъёсъя кун инспекциысь отделэн кивалтӥсь. - Налогъёсъя декларация - ма со сыӵе? - Налогъёсъя декларация - гражданинлэн ар ӵоже табыш басьтэмез, кӧня выт тыремез сярысь ивортэмез. Ар ӵоже басьтэм табыш пӧлы, уждун сяна, пыро на: премиос, кузьымъёс, коньдонэн юрттэт (матпомощь), огкылъя ужам понна уксё, гонораръёс, дивидендъёс, уждун чотын сётэм сиён-юонлэн, вузъёслэн дунзы... Ар куспын кӧня уксё басьтэмды сярысь тодэмды потэ ке, вазиськоно предприятиослэн, учреждениослэн, организациослэн бухгалтериосазы, кытысь уждун, кузьымъёс яке гонораръёс басьяды. Соос гожтозы табышты но отысь выт кельтэм сярысь справкаосты. Та документъёсты декларация борды юнматоно. - Кин налогъёсъя декларациез сётон сярысь сюлмаське? - 1997 арын табыш басьтэмзы сярысь декларациез сёто: та арын одӥг интыын ужам муртъёс, мукет интыосысь но табыш басьтӥзы ке но, соослэн налог улэ шедись табышсы ар ӵоже 12 миллион манетлэсь уногес люкаськиз ке; та арын пӧртэм интыосын ужам муртъёс, предприятиослэсь, учреждениослэсь, организациослэсь табыш басьтыса, выт улэ шедись табышсы ар ӵоже 12 миллион манетлэсь уногес люкаськиз ке; ужбергатӥсьёс, асьсэлы коньдон ас быгатэмзыя поттӥсьёс, кылсярысь, ваньбурзэс арендае сётыса, вузаса, кӧня табыш басьтэмзы шоры учкытэк. Налог басьтон улэ шедись уксё - ар ӵоже поттэм табышлэн ог люкетэз. Татчы уг пыры нылпиослы, Пенсиосъя фондэ висъям но пӧртэм льготаосын чаклам коньдон. 1997 арын поттэм табышлэсь налог тазьы басьтӥське: Налог басьтоно Налоглэн табышлэн быдӟалаез быдӟалаез 12.000.000 манетозь 12 процент 12.000.001-24.000.000 манет 12.000.000 манетлэсь ятыргес уксёлэн 20 процентэз + 1440.000 манет 24.000.001 - 36.000.000 манет 24.000.000 манетлэсь ятыргес уксёлэн 25 процентэз + 3.840.000 манет 36.000.001 - 48.000.000 манет 36.000.000 манетлэсь ятыргес уксёлэн 30 процентэз + 6.840.000 манет 48.000.001 манетлэсь ятыргес 48.00.000 манетлэсь ятыргес уксёлэн 35 процентэз + 10.440.000 манет - Кин налогъёсъя декларациез уг сёты? - Налогъёсъя декларациез сётэмлэсь мозмытэмын: 1997 арын одӥг интыын гинэ ужам но отысь гинэ табыш басьтэм муртъёс; предприятиослэсь, учреждениослэсь, организациослэсь, озьы ик ужысьтызы но табыш басьтэм муртъёс, налог улэ шедись табышсы 12 миллион манетлэсь ичигес ке. Тодады вайытӥськом: декларациосты сётоно 1 апрелёзь. Табышсэс ватыны турттӥсьёс административной, уголовной кыл кутон улэ шедё. х х х Валамон, таӵе ужрадлы кутскон сётыса, кун оскиз, пайдаез луоз шуыса. Кылем арын, кылсярысь, Удмуртиысь выт бичанъя ёзъёс ватсаса 24,5 миллиард манет тыр подоходной налог басьтӥзы. Таблицаез учкыса, валатскиды, луоз, налогъёс шоро-куспо улӥсьёслэсь тужгес но трос басьтӥсько шуыса. Сыӵеос пӧлы пыриськоды ке, сак кариськоно. Угось налогъёсъя декларация, кӧня табыш басьтэмдэс шараям сяна, кӧня выт тыремдэс но возьматэ. Мултэс тыремдэс кун берыктыны кулэ. О. ВАХИТОВА. Кунгож сьӧрысь иворъёс Англиысь школаосын дышетӥсьёслы лэземын жугиськись, урокез нуыны люкетӥсь, аляк нылпиосты ӧжытак вӧсь карыны - классысь кужмысь поттыны, донганы, китӥзы кутыса зӥбломытыны, гожтэ "Дейли Телеграф". Калыкез дышетонъя министерство поттӥз нимысьтыз документ, кудӥз валэктэ, кыӵе учыръёсы нылпиосты кужмын визьмано, нош ку киосты кузь лэзьяны уг яра. Кылсярысь, лэземын ӧвӧл йырсиез кысканы, чыртыетӥ возьыны, киосты бералляны. Таӵе дышетон амалэз пыӵатыны асьсэос дышетӥсьёс куризы. Малы ке шуоно, пиналъёс дышетӥсьёссы вылэ мыжыкъёсын туж ӵем урдскыло, дышетӥсьёс но амалтэк "жугиськоно" луо но суд улэ сюро. х х х Музъем вылысь самой арлыдоез адями Непалын улэ, ивортэ "Франс Пресс" агентство. Бир Нараян Чаударилы ӝоген 141 арес тырмоз. Озьы ке но, Гиннеслэн книгаяз сое пыртыны уг луы, малы ке шуоно, вордскемез сярысь свидетельствоез ӧвӧл. Соин ик со ӵошатскыны уг быгаты Франциысь Жанна Кальманэн. Гиннеслэн книгаяз гожтэмын, та кышномурт 122 арескысен улонысь кошкиз шуыса. Журналистъёс вуылӥллям Непалысь пересь доры но арлыдэзлы паймиллям. Воргорон валэктэм: ас киыным будэтэм тамак кыскисько, аракы уг юиськы, соин кема улӥсько, пе. Бир Чаудари Гиннеслэн книгаяз сюрымтэезлы уг куректы, мукетыз сярысь сюлмаське - 150 аресозь улэме потэ, пе. х х х Антарктидалэсь узырлыкъёссэ но инкуазьзэ утён сярысь огкылэз 43 кун юнматӥз, ивортэ "Франс Пресс" агентство. Инкуазез яратӥсьёслэн - "вожъёслэн" ӵектонзы улонэ пыӵаз - адямиен йӧтылымтэ, кырсёмымтэ шаерез цивилизацилэн емышъёсызлэсь утьыны малпамын. Таин валче оскон кылдэ, пингвинъёс, нерпъёс, китъёс матысь дыре уз быре шуыса. Антарктидалэсь экосистемазэ утён понна, шахтаосты пуктыны, му вӧй кыскыны лэземын ӧвӧл, уг яра удобрениосты, пестицидъёсты, пуныосты вайыны. Научной станциос гинэ азьло сямен ик ужалозы, но вань жуг-жагзы, кылем-мылемъёссы материкысь чылк-чылк утялтэмын луозы. х х х Порохез (дары), фарфорез, кагазэз но лапшаез Китайын улӥсьёс нырысьсэ лэсьтӥзы. Со сяна, реклама но татын ик вордӥськем, гожтэ "Франс Пресс" агентство. Гансу провинциын ужась археологъёс историлэсь ватоссэ шедьтӥллям, кудӥз возьматэ, реклама 7-10 дауръёсы ик вылэм ини шуыса. Магазинъёслэн, лавкаослэн кузёоссы басьяськисьёсты, урам тыр кесяськыса, доразы ӧтьылӥллям: выль вузъёс, пичиесь дунъёс! Ӧтиськом ваньзэсты! Реклама соку ик ини вузкаронлы кужым сётэ вылэм, соин ик Гансу провинциын та удыс азинскемын вылэм. КЫЗЬЫ "СЮЛМАСЬКО" КАЛЫК СЯРЫСЬ "Известия Удмуртской Республики" газетысь "Где ты, мой последний дом?", "Удмурт дунне" газетысь "Мискинь" статьяосты лыдӟыса, чылкак паймиськиз. Мар гинэ уг даурто вылэм Ижевск городысь вылӥ кивалтӥсьёс. Таин валче тодам лыктӥз Ижевскысь ветеранъёслэн клубазы январь толэзьлэн пумаз ортчем пумиськон. Соку мӧйыос азьын вераськизы городысь калыкез шугадӟонлэсь утёнъя районъёсысь отделъёслэн кивалтӥсьёссы. Соос пӧлын ик вал Ижевскысь калыкез шугадӟонъёслэсь утёнъя комитетлэн кивалтӥсез В. П. Бондаренко. Виктор Павлович трос чебер кылъёсын вераськиз ветеранъёс понна мар лэсьтэмзы, соослы кыӵе но кӧня юрттэт сётэмзы, соослэсь улон-вылонзэс капчиятон вылысь, кыӵе ужрадъёс кутэмзы сярысь. Нош номыр ӧз поттылы аслаз кызьы улэмез, малы кулэяськемез сярысь. Возьыт потӥз луоз со сярысь вераны. Соиз валамон, малы ке шуоно, со майбыр улэ вылэм. Газетын гожтэмъя, солэн куать комнатаен ог кык сю квадратной метр быдӟа квартираез вань. Нош солэн дуныз кыӵе - кык миллиард манет пала! (Выль коньдонэн кык миллион). Ачиз сомында коньдон люказ шуоно ке, со осконтэм. Кин но ма понна солы сыӵе квартира кузьмаз? Кыӵе заслугаосыз вань городын улӥсьёс азьын? Валантэм. Виктор Павлович али луэ Ижевскысь калыкез шугадӟонъёслэсь утёнъя комитетлэн кивалтӥсез. Аслаз должностезъя, со нырысь ик сюлмаськыны кулэ вал ожысь но ужысь ветеранъёс, соослэсь улонзэс ӧжытак ке но капчиятон сярысь. Нош со озьы ӧз луы, нырысетӥ интые пуктӥз ассэ. Ветеранъёсын январе пумиськон дыръя со сярысь мӧйыос тодысалзы ке, уг тодӥськы мар луысал, сое, оло, залысь ик уллясалзы, дыр. Али кӧня ветеранъёс витё на улон условиоссэс умоятэмез. В. П. Бондаренко со сярысь тодытэк уг улы, дыр. Таин валче вераме потэ на эшшо одӥгез сярысь. Малы кулэ луиз Ижевскысь администрациын калыкез шугадӟонъёслэсь утёнъя комитет кылдытыны но солы кивалтӥсе кыкетӥ группаен инвалидэз пуктыны? (ВТЭК-лэн решениезъя, со ужаны быгатӥсьтэмен лыдъяське). Сыӵе отделъёс вань ук городысь котькуд районлэн администрацияз. Тырмысал соосын но. Оло, городлэн мэрезлэн А. И. Салтыковлэн аслаз оскымон эшеныз люкиськемез ӧз поты. Таизлэн "ужъёсыз" сярысь уг вера ни. Со сярысь тодо ни, дыр, газетъёсты лыдӟисьёс. Оскем потэ вылэм, В. П. Бондаренко но А. И. Салтыков газетъёсын потэм материалъёс пумысен асьсэлэсь малпанзэс вералозы но со сярысь газетъёс пыр ик лыдӟисьёслы ивортозы шуыса. Г. ПАВЛОВ. КЫӴЕ ӜАЖЫЫН ТЫНАД КНИГАЕД Южтолэзьлэн дас одӥгетӥ нуналаз Удмуртиысь писательёслэн кема возьмам ӧтчамзы люкаськоз. Эскероно ужпумъёс трос гинэ люкаськизы уго. Тани, шуом, кыӵе югдуре сюремын писатель туала улонын, кулэ-а со та ӝог бызись улонамы туннэ нуналлы тупатскыса гинэ вамышъяны, кыӵе дунлыкъёс пыр учконо ас гожъямъёсыд шоры, кыӵе ӝажые пуктоно азьвыл гожтэм производственной но историко-революционной романъёсыз, повестьёсыз ("Секыт зӥбет", "Вурысо бам", "Лӧзя бесмен", "Лудӟи шур дурын", "Ӟардон азьын", "Вуж юрт", "Тӧлсяська", "Йыбыртты музъемлы", "Дыдыкъёс бус пӧлы уг йыромо" но мукетсэ). Озьы ик луоз "граждан поэзия", удмурт драматургилэн сцена вылын улонэз, книга поттон но вӧлмытон ужпумъёс сярысь вераськон. Кенешонэ пыриськозы писательёс, тодосчиос, журналистъёс, книга поттӥсьёс, кивалтӥсьёс - ваньмыз, кин мылкыд каре. Т. ЧЕРНОВА. ГУРТ УЖЪЁС КӦНЯ ЙӦЛ КЫСКЕМЫН? (2 мартэ) Районъёс Скаллы быдэ (кг) Ваньмыз (ц) 1998 арын 1997 арын 1998 арын 1997 арын Яр - 4,0 4,1 231 257 Глаз 7,1 5,8 535 461 Юкаменск 5,2 4,6 264 256 Балезино 6,5 5,6 574 512 Красногорск - 4,0 4,1 157 168 Кез 5,2 4,5 307 283 Дэбес - 5,9 6,0 293 305 Игра 7,3 6,2 279 249 Якшур-Бодья - 5,8 5,9 138 137 Шаркан 6,3 4,8 296 240 Селта 4,7 3,5 166 145 Сюмси 3,6 3,3 70 70 Ува 7,6 6,9 574 523 Вавож 7,7 6,9 395 366 Кизнер 5,2 4,3 223 201 Можга 8,4 7,1 777 666 Грах 5,3 4,9 177 179 Алнаш 7,2 6,6 458 440 Пичи Пурга 6,7 6,0 457 420 Кияса 5,1 4,3 238 213 Каракулино 4,7 4,3 193 190 Завьялово 7,5 6,2 626 543 Вотка 7,2 6,3 409 386 Сарапул - 5,4 5,4 439 488 Камбарка 5,1 4,0 38 30 Республикая 6,3 5,5 8 314 7 728 Ортчем арен ӵошатыса, кысконо скалъёслэн лыдзы ог тямыс сюрсмы кулэсмиз ке но, туэ йӧл республикаямы тросгес люкаське. Озьыен, хозяйствоос ӟеч пудо вордо, соослы тырмыт но вылӥ ӟечлыко сиён сёто. Зэм ик, кылем гужем гурт калык азьло аръёслэсь уногес пудо сиён дасяз. Нош районъёсты ӵошатоно ке, йӧл туж пӧртэм люкаське. Можгаос, уваос, вавожъёс, завьялъёс, играос скаллы быдэ нуналаз 7-8 литра йӧл кыско ке, яръёс, сюмсиос, красногорскъёс ньыль пала гинэ. Озьыен, берпум верам районъёсын ӧжытгес сюлмасько пудооссы сярысь. Али кунянъёс вордӥсько, соин ик скалъёсты вылӥ ӟечлыко сиёнэн сюдоно. Н. ВОЗИСОВ. Уждунтэк кӧня чидалод? Таӵе юанлы туннэ нокин уз валэкты. Мугъёс вератэк но валамон. Адямиос ужало, ваньбур потто, нош коньдон толэзьёсын уг басьто. Тани чаклалом нюлэс промышленностья предприятиосты. Сарапулысь лесокомбинатын быдэс ар ӵоже уждун уг сётъяло ни. Табере мын но малпаськы, кызьы адямиос уло? Сарапулысь эшъёссылэсь "адӟем каро", лэся, "Глазовский леспромхоз" огазеяськонын. Татын ӝыны ар уждун уг тыро ни. Куинь-вить толэзьлы уждунъя тыронъёссы люкаськемын, "Игринский завод домостроения", "Менильский ЛПХ" (Игра), "Кезский леспромхоз" но "Какможский ЛПХ" (Вавож) огазеяськонъёсын. Нош "Игринский леспромхоз" но "Балезинский" ОАО- ысын уждунъя тыронъёссы одӥг-кык миллион манетлэсь уно ни. Но та удысын но вань умой ужась коллективъёс. Уждунъя чик но тыронъёссы ӧвӧл "Глазовская мебель", "Можгинский лесокомбинат", "Ижмебель", "Кизнерский леспромхоз" но "Увинский леспромхоз" огазеяськонъёсын. Кызьы бен ужало лэсьтӥськон, капчи но сиён-юон поттонъя промышленность? Нырысяз бере кылисьёсыз тросгес. Тани Глазовысь РСУ-ын 13 толэзьлы уждун тыронзы, нош Ижысь жилищно-ремонтной управленилэн РСУ-аз - 11 толэзь. Та ласянь югдурзы умой Можгаысь "Свет" АО-ын, Балезиноысь "Стройматериалы", "Можгинский КПП" ТОО-сын, Як.- Бодьяысь силикат материалъёс поттонъя заводын но Ижысь "Дорожник" огазеяськонын. Арысь аре ужъёссы умой мыно Ижысь "Сактон", "Зангари", "Инвис" АО-осын, Сарапулысь "СарКОО" АО-ын но, "Кама" ТОО-ын. Озьы ик азинлыко тыршо Глазовысь, Сарапулысь ЛВЗ-ёс, Воткинскысь, Глазовысь сиён-юон, Уваысь нянь комбинатъёс но Глазовысь нянь продуктъёсъя комбинат. Асьсэлэн ужасьёссылы дыраз уждун уг тыро Глазовысь комбикорм заводын, Ижысь "ИМКО" ОАО-ын, Сарапулысь кеньыр изон заводын, Можгаысь мясокомбинатын, элеваторын но консерва заводын, Ижысь 1 номеро нянь продуктъёсъя комбинатын но мукетъёсаз. Тӥни озьы ужаськом но улӥськом. Р. Данилов. Ӟардонэз шумпотыса пумитало Ижевск вӧзысь Ягул черкогуртын бадӟым саклык висъяло сӧсыръёслы, ожысь но ужысь ветеранъёслы. Татысь кивалтӥсьёс котькуд аре соосты клубе яке сиськонние (столовое) люкаса данъяло, дуно кузьым сётъяло, нош бӧрысь дышетскись пиналъёс, яке мӧйы артистъёс шулдыр концерт возьмато. Ягул сельсоветысь ветеранъёс но сӧсыръёс туэ но вунэтэмын ӧй вал. Люкаськемъёс пӧлысь мон синйылтӥ куинь пиосмуртэз но кык нылкышноез, кинъёслэн гадязы орденъёс но медальёс чиляло. Григорий Максимович Кожевников Быдӟым Отечественной ожмаськонъёсты Прибалтикаысен кутскыса, Германиозь вуиз. Кышкатэк ожмаськемез понна одӥг орден но трос медальёс сётэмын. Войналэн берпуметӥ нуналъёсаз бур пыдыз сӧсырмиз. Та ожъёс дыръя ик Тимофей Иванович Собачкин немец фашистъёслэсь мозмытэм Украинаез, Польшаез, Румыниез, Югославиез, Австриез. Тимофей Ивановичлэн ож сюресэз трос орденъёсын но медальёсын пусъемын. Берпум ожын со 1 группаысь инвалид луиз. Василий Петрович Дорошенко вордскемын Украинаын. Озьы ик трос ожъёсты, музъемъёсты мозмытэм понназ солы Горд Кизили (Красная Звезда) орден но дас медаль сётэмын. Сӧсырмем бераз Удмуртиысь госпитальын эмъяськиз но Ягулысь кышно басьтӥз, табере удмурт сямен вераськемез но вала ини. Анастасия Федоровна Курочкина война сюресъёсты ортчемын ӧвӧл, нош фронтлэн мышказ уно курадӟонэз адӟемын. Война аръёсы Якшур-Бодьяе нуись тракт лэсьтонын тыршем. Гуртаз бертыса тросгес ужам бакча сиён будэтонын. Быгатыса ужамез вить медален пусъемын. Нош Антонида Кузьмовна Никифорова вань улонзэ Ижысь пыӵал тӥрлык лэсьтон заводын тыршиз. Ньыльдон укмыс ар ужамез бере пенсие потӥз. Умой, лякыт сямо кышномуртлэн гадяз ньыль медаль пиштэ. Али огназ ке но кылемын, пудо вордэ, бакча мерттэ. Тӥни сыӵеесь Ягулын ветеранъёс. Сӧсырмемын ке но, соос куашкам мылкыдын уг уло. Ӵукна ӟардонэз шумпотыса пумитало. Арысь аре ӵош люкасько, ортчем аръёсты, пинал дыръёссэс тодазы вае, бер ӝытозь шулдыръясько. Та нуналэ но соос, пиналъёс концерт возьматэм бере, кема жингрес кырӟазы но эктӥзы. Таӵе пумиськонъёсты котькуд аре радъяло сельсоветысь кивалтӥсьёс Георгий Бочкарёв, Надежда Гарбалинская, ветеранъёслэн советсылэн председателез Михаил Шкляев, клублэн кивалтӥсез Любовь Пенькина, колхозлэн председателез Виктор Пятов, баянист Вячеслав Галичанин. Соослэн сюлмаськеменызы сӧсырмем ветеранъёслэн ӝытъёссы тунсыко ортчыло. Н. ВОЗИСОВ. Тодматске усто ужась удысэн "Удмуртторф" пунэм коньдонэн уг улы Таӵе ужась удысъёсты туала вакытэ утчаса но уд шедьты. Но вылэм на. Со - шаерысьтымы "Удмуртторф" кун предприятие. Оло оскоды, оло уд, но торф поттӥсьёс кемалась пунэм коньдон (кредит) басьтытэк ужало ни. Со потэ удысысь кивалтӥсьёслэн но специалистъёслэн производствоез быгатыса радъямзы бордысь. Но татын тужгес но трос тыршемез валтӥсь директорлэн Анатолий Марченколэн. Татын со 34 ар тырше ни. Со пӧлысь 16 арзэ кивалтэ производственной объединениен. Анатолий Владимировичлэн таӵе юн секыт дыре но ваньмыз умой пӧрме. Кивалтӥсь трос утчаське, уно выльзэ пыӵатэ. Со лыдъя, Москва шоры учконо ӧвӧл, асьмелы ужано но налогъёс тыроно. Соку вань калык умойгес улоз. Шаерамы, зэмзэ но, таӵе ужась удысъёсмы но предприятиосмы трос ӧвӧл. Торф поттӥсьёс умой йылпумъязы ортчем арез. Куинь сюрс тонна сьӧд сюй ӝутэмзы сяна, 205 сюрс тонна нефть кыскизы на. Нош та уж борды кутскизы 13 ар талэсь азьло. Табере "Удмуртторфлэн" вань аслаз му вӧй кыскон скважинаосыз, 11,5 километр нефть гумыез. Огъя вераса, удыс ваньзэ 1300 сюрс тонна "сьӧд зарни" поттӥз ни. Удыслы висъямын Чур но Южно-Лисинской-Черновской местрождениос. Берлояз 11 скважина нефть кыске ни. Эшшо 8-10 скважина пуктыны кулэ на. Солы ичизэ 2,5 миллиард манет уксё висъяно. Отчы ужасьёсты вахта амалэн нулло. Но со инты шуг, отӥ бызё Вотка но Быги шур. Юн чакласьконо, нефть инкуазез медаз кырсьмыты, юн утёно шуре шедемлэсь. Элькунысьтымы Инкуазь узырлыкъёсъя но инкуазез утёнъя кун комитет югдурез вала, нефть кыскисьёслы юрттэ. Нош мукет ласянь, Черновскойын улӥсьёс кыӵе шумпотӥзы, соослы уж шедиз шуыса. Объединение алигес нефтяникъёслы санитарной машина сётӥз. Озьы татын ужъёссы но пумен кужмояло, араз 300 сюрс тонна нефть поттон сярысь малпасько ни. Ӟеч коллектив кылдӥз, кулэ дыръяз гурезез но берыктоз, шуэ калык. - Бере уг кылё торф поттӥсьёсмы, - данъяське Анатолий Владимирович. - Ялан усто ужало Полом, Дзякино, Орлово, Нюрдор-Котья торфо предприятиосмы. Берло дыре кусып тупатӥм Грециысь фирмаен. Со 40-100 тонна сьӧд сюй куре. Табере торфлы но сертификат басьтоно. Сотэк мукет кунъёсы уд вуза. Берло дыре калыклы но полиэтилен мешокъёсын вузаськом ини. Миым бускель Киров областе 110 сюрс тонна келям. Но торфмы пумен кулэсме, со кемалы уз тырмы ни. Рынокен экономикае выжон вакытэ уноез предприятиос но удысъёс мырдэм возисько. Озьы уд шуы торф поттӥсьёс сярысь. Кылем арын соос, валля арен ӵошатыса, 20 процентлы тросгес продукция поттӥзы но 41 милиард манет пайда басьтӥзы. Удыслэн ӧвӧл тыронъёсыз налогъёсъя но уждунъя. Таӵе секыт дыре соос лэсьтӥсько, улон юртъёс ӝуто. Нюрдор-Котьяын 18 квартираен корказэс вуттӥзы, али кыкетӥез борды басьтӥськизы. Предприятие юнма, миым ватсаса 40 мурт ужасьёс кутӥзы. Торф поттӥсьёс рабочей посёлокын выль ужан интыос усьто. Туж умой со. Объединение нюлэс но дася. Нош торфен ужанзэ юн выльдӥз, мур переработкае выжиз. Со бадӟым пайдаен берытске. Анатолий Марченко лыдъя: асьмелы зарезь сьӧрысь, Западысь фирмаос юрттэт, уксё уз сётэ, кун бюджетысь но коньдон возьманэз ӧвӧл. Осконо аслад кужымедлы, луонлыкъёсыдлы но ужасьёсыдлы. Тӥни со бордын, пе, азинсконмы, ӝутсконмы но ӟеч улонэ вуонмы. Одӥгез сярысь эшшо вераме потэ на. Анатолий Владимирович 1990 арын США-е ветлӥз, Техас штатын вал. Нош Хьюстонын кенешизы республикаямы нефтеперегонной завод пуктон сярысь. Технической документация но лэсьтӥзы вал. Но жаляса верано луэ, кутскем ӟеч уж коньдонмы ӧвӧлэн гуньдӥз, шуыны луоз. Со дыре ик бигеръёс Альметьевскын американецъёсын ӵош вакчи дыр куспын нефтеперегонной завод пуктӥзы. Со арлы 1 миллион тонна му вӧйез переработать каре. - Нош асьмеос завод пуктон инты гинэ но ӧм шедьтэ, - валэктэ Анатолий Марченко. - Нырысь чакласьком вал Сарапул районэ ӝутыны - калык пумит луиз. Ижевск котыре но музъем бырйыны люкетӥсьёс шедизы. Тӥни сыӵе югдур. Объединениын ужпум пуктэмын: котькуд ужасьлы туэ ичизэ 5 сюрс манетлы продукция поттыны. Со ужа хозрасчётъя, ваньзэ лыдъяло-чотало. Нош ачиз Анатолий Владимирович шуэ, мон, пе, республика понна ваньбур поттӥсько, нош малы кулэ акциосын огазеяськон (АО), сое нокызьы уг валаськы: палэнэ ужан вылысь шат. Кызьы лэсьтэ "Удмуртнефть" но мукетъёсыз. Предприятиез басьтон, кузё улон понна, азьло адямилэсь психологизэ, сямъёссэ воштоно. Соку гинэ оло мар ке пӧрмоз. Зэмзэ но, малпаське ай, малы кулэ АО, куке "Удмуртторф" сотэк но ужасьёсыз сярысь нуналмысь сюлмаське, дыраз уждун сётэ, медообрудование басьтэ, нылпи учреждениос возе, эмъяськыны уксё висъя, улон юртъёс пуктэ но музон услугаос сётэ. Тани "Вишур" торфопредприятиын 40 мурт ужтэк кылемын. Кин соослы юрттоз? Валамон, Москва уз, асьмелы ик малпаськоно. Мукетыз пример. Сюмси районысь "Орловское" торфопредприятиысь нылпи учреждениын сиён-юонзы ӧвӧл. Кин бен соослы сӥль но йӧл висъялоз? Конечно, асьмеос. Тӥни туннэ таӵе пурысь улон-вылонмы. Нош данакез предприятиос пыд йылазы мырдэм сыло, тыро-пыдо продукция уг потто, нош кивалтӥсьёссы уждун басьто. Г. Романов. УСТОЕЗ МАГАЗИН Селта районысь магазинъёс пумен чеберско. Гуртысь вузкарисьёслэн ужан культуразы ӝутске. Тани алигес Удмуртпотребсоюзысь шумпотымон ивор вуиз: райполэн "Юбилейный" магазинэзлы (кивалтӥсез Маргарита Красноперова) "Удмурт Республикаысь устоез магазин" ним но И степенё диплом сётэмын. Зэмзэ но, сиён-юонэн вузкарисьёс юнме шорысь сыӵе ним ӧз басьтэ. Магазинэ пыремед потытэк но пырод, котыр чылкыт, ӝажыосын вузъёс туж валаса тыремын, басьяськисьёслы ваньмыз адӟиське. Кооператоръёс калыклэсь кулэяськонъёссэ умой валало но быдэсъяло. Соин ик адямиос магазинэ шумпотыса лыкто, отысь капчи мылкыдын кошко. Г. ВАСИЛЬЕВ. Экономикаысь ужпумъёс Сибире - му вӧйлы "Удмуртнефть" ОАО, кызьы ивортылӥм ни вал, табере луэ "Сиданко" му вӧй компанилэн одӥгез дочерней предприятиез. Алигес солэн валтӥсь тӧроез Евгений Богомольный ортчытӥз пресс-конференция. Отын со йылпумъянъёс лэсьтӥз предприятилэн миым ужамезлы но мадиз азьланезлы ужпумъёс сярысь. "Удмуртнефть" арез умой йылпумъяз. Планлэсь вылтӥ 300 сюрс тонна "сьӧд зарни, поттӥз" (ваньзэ 5630 сюрс тонна). Солэн кун бюджетэ тыронэз ӧвӧл, кӧня ке пунэмъёсыз кылемын на федеральной но интыосысь бюджетэ. Кылем арын Кун Кенеш секыт интыосысь нефть поттонэз радъянлы льготной налог тупатӥз вал. Со юрттӥз куинь квартал ӵоже ватсаса 46 миллион манет коньдон басьтыны. - Туэ ми, кылем арен ӵошатыса, 100 сюрс тонналы ичигес нефть кыскыны чакласьком, - ивортӥз Евгений Исакович. - Шаерамы му вӧй поттон кулэсме, секыт интыос гинэ кылё на. Соин ик предприятилэн ёзэз ужаны кутске Сибирьын, Новосибирск областьын. Отын 8 скважина портоно но 180 иськем гумы кысконо луоз. Та ужъёсты быдэстыны юртто "Удмуртнефтестрой" но "Новосибирскнефтегаз" огазеяськонъёс. Мар бен со асьмелы сётэ? Нырысь ик, ватсаса ужан тӥрлык интыос. Республикаысьтымы промышленной предприятиос ("Воткинский завод", "Ижнефтемаш", "Редуктор" АО-ос) му вӧй кыскон тӥрлык но качалкаос поттозы. Сибирьын арлы быдэ Удмуртиысь нефтяникъёс ӧжытсэ 2 миллион тонна нефть поттозы. Озьы со луоз 6-8 ар ӵоже но "Удмуртнефть" вуоно арысен му вӧй кысконзэ будэтыны кутскоз, уллань уз лэзиськы ни. Тӥни мар понна со лэсьтӥське. Нош нефть - со политика. Огазеяськон умой возе социальной удыссэ. Азьло кадь ужало нылпи шутэтскон лагерьёсыз, больницаосыз, эмъяськон учреждениосыз, син азяз возе 200 километр асфальт сюрессэ. Миым 8 нылпи учрежденизэ интыослы сётӥз. Со понна пайда басьтэмысьтыз 83 миллиард манет уксё висъяз. АО-лэн 500 сюрс квадратной метр улон коркаосыз. Туэ кыкетӥ паларысен интыослы сётъяны ӧдъялозы. Со понна 50 миллион манет сётыны чакламын. Огазеяськон ужасьёсызлы али но коркаос пуктэ но улон условиоссэс умоятэ. Миым 40 миллиард манет тыр выль улон интыос ӝутэмын но вужъёсыз басьтэмын. Туэ со понна 27 миллион манет висъяло. Кызьы бен со люкиське? Учко котькудӥзлэсь кӧня ар ужамзэ. Адями берло квартира дунзэ берыктэ. Огъя вераса, АО туэ капитальной лэсьтӥськонэ 538 миллион манет коньдон висъяны учке. Алигес тодмо луиз, "Удмуртнефть" ОАО-лэн директоръёссылэн советсылэн тӧроез Валентин Кудинов Россилэсь Кун премизэ басьтон понна нюръяськон кыкетӥ туре потӥз. Со отчы шедемын му вӧй поттонэ выль амалъёсты (музъем валлин портон) пыӵатэмез понна. Тани миым 23 скважина озьы ужаз, нош туэ эшшо 33-ез сыӵе амалэн нефть кыскоз. Со сяна, 100 скважина, урдэс ласянь гумы лэзьыса, му вӧй поттэ на. Таӵе амал, 2,5-3 ар ортчыса, пайда сётыны кутске. Элькунамы куинь нефть кыскон интыез (Патраково, Центральной но Турецкой) басьтонъя конкурсын вормисе потӥз "Удмуртиысь нефтья компания". Солы юрттыны басьтӥське, "Удмуртнефть" но, малы ке шуоно, со киын компанилэн 5 процент акциосыз. Туэ нефтяникъёс выль ёзлы 100 миллион манет коньдон висъяны малпало. Соин ӵош ик АО-лэн кунгож сьӧрысь фирмаосын 4 ӵош предприятиосыз (СП-осыз) ужало на. Миым соос 3 миллион доллар пайда ваизы. Республикаямы кемалась вераськон потэмын нефтеперегонной завод пуктон сярысь. Но Евгений Исакович солэсь юн кулэзэ уг адӟы. Пресс-конференциын рос-прос кенешон мынӥз "Ижладабанк" сярысь. Солэн азьвыл президентэз Сергей Бобогло Октябрьской судэн выльысь ужаз берыктэмын. Со луэ вал банклэн кенешезлэн адямиез, Сергей Михайловичлы ӵектэмын вице-президент луыны. Нош банклэн али тӧроез Дмитрий Якушев сётэм кылзэ ваньзэ уг быдэсъя. Соин отын югдур уг тупатскы. Нош 14 сюрс вкладчиклы ӧжытсэ 29 миллион манет уксё сётоно, нош 793-езлы - 4 миллион доллар. Кызьы бен со ужез бергатоно. Утчаськод ке, амал шеде вылэм. "Ижладабанклэн" директоръёссылэн советсы ӵектэ банклэсь юртсэ Удмурт Правительстволы вузаны. Со 19,4 миллион манет пала сылэ. Та коньдон "Евразия" банк пыр ("Ижладабанкен" огазеяськыса) 11 сюрс вкладчиклы сётэмын луоз. Тӥни озьы правительство "Евразилы" тыронзэ берыктэ. 300-500 вкладчик (соослэн быдэн 50 сюрс манет коньдонзы банке понэмын) берло басьтозы. Ватсаны кулэ, та кык банклэн одӥгез узыр учредительзы луэ "Удмуртнефть", вкладчикъёс но данакез нефтяникъёс. Евгений Исакович умоен пусйиз кадръёс дасян борды басьтӥськемзэс. Тани туэ Удмурт кун университет нырысьсэ поттэ нефтья специалистъёсты. Со туж дыраз ватсаськиз. Кӧняез ке Новосибирск областе но ужаны ветлозы. Тӥни озьы наукае но дышетонэ висъям коньдон пайдаен берытске. Г. Романов. Депутат но солэн ужез Чидан пӧртэм сямен пуштэ Умой сямлы пӧрмиз ни Кун Думаысь депутатлэн Андрей Солуяновлэн журналистъёсын пумиськонъёсыз. Огвакыт журналистъёс ик сое пыкылӥзы вал, иворъёсты вӧлмытӥсь ёзъёслэсь палэнскыса улэмез понна. Табере депутатлэн тыршеменыз журналистъёсын кусыпъёс возён туж умой радъямын. Матэктӥсь быръёнъёс азьын таӵе ужан амал депутатлы уката но кулэ, дыр. Таяз учыре соин ӵош Удмуртие вуылӥзы Кун Думаысь "Российские регионы" фракцилэн кивалтӥсез Олег Морозов но "Наш дом - Россия" фракциысь депутат Михаил Бугера. Кызьы тодмо ини, федеральной бюджетлэн инъетэз ньылетӥ пол эскерем бере но кутытэк кельтэмын. Солы пумит тужгес но зол мылкыдъёссэс вераллям "Яблоко", НДР фракциосысь депутатъёс но В. Жириновский. Михаил Бугера бюджет пумысен шуиз, со, пе, 1998 арын, оло, воксё но кутымтэ луоз. Но Россилэн улосвылъёсызлы со кышкытлык уз кылдыты, угось трансфертъёсты соос азьло сямен ик басьтозы. Мукетгес малпанъёссы "Российские регионы" фракциысь депутатъёслэн. Соос куаразэс сётӥзы вал бюджетэз кутон понна. Бюджетэз дасяку, соос туж зол нюръяськизы вал ас регионъёссылы коньдонэн юрттон вылысь. Кызьы валэктӥз А. Солуянов, отчы пыртэмын вал "Ижмаш" АО-лы юрттон ласянь статья но. Табере шуг вераны, рагионъёслэн куронъёссы выль дасям бюджетын чакламын луозы-а уз-а. Удмуртиысь бырйисьёслэсь куронъёссэс лыдэ басьтыса, депутат А. Солуянов парламент азе ӵектонэн потӥз, 1994-1996 аръёсы Чечняын ожмаськем военнослужащийёслы Афганистанын ожмаськемъёсын огкадь правоос тупатон сярысь. "Российские регионы" фракциысь депутатъёс син азязы возё Россилэсь данак улосвылъёссэ, уго та огазеяськонэ али 33 регионысь депутатъёс пыро. Кытын-о бен меда туннэ тужгес но секыт югдур? Таӵе юанэлы Олег Викторович Морозов тазьы валэктӥз: - Нокытчы вуылытэк, Москваын гинэ ке улоно, кожалод, тон Россиын уд, кыӵе ке шудбуро, ваньбуро государтвоын улӥськод. Татын калык уг кайгыры, бюджет чотын ужасьёс но, пенсионеръёс но дырыз дыръя коньдон басьто, вылаз ик, соослы ватсаса тыриське на "президентлэн коньдонэз". Нош вуиськод ке Москвалэн палэназ интыяськем округъёсы - паймиськод калыклэн чидамезлы. Трос интыосы вуылӥ ини, но Ростовын, Донбасын кадь курадӟыса улӥсьёсты ӧй адӟылы на. Малпасько, шахтёръёс али, зэмзэ ик, бырон калэ вуэмын. Аръёсын коньдонэз адӟытэк но кӧттырымон сиськытэк уло ини. Лякытгес уло Москваысь дотациос басьтӥсь республикаос, кылсярысь, Башкортостанын, Ханты-Мансиын. Но, кызьы вераз Андрей Владимирович Солуянов, калыклэн но, пе, чиданэз пӧртэм. Тани алигес вуылӥмы Новгородэ. Татын, вань дышетӥсьёслэн забастовкае потэмзы сэрен, югдур киын возёнтэм луэм. Нош тодӥськоды-а кӧня нуналлы ӝегатӥллям соослэсь уждунзэс? 5 нуналлы. Серем кадь. Но Быдӟым Новгородын улӥсьёс, мон сямен, мургес гажан пыӵато ас чиданэнызы данъяськись калыкъёс сярысь. Т. БАННИКОВА. Тулыс праздникъёс азьын Ижысь администрация премиосыныз пусйиз устоосыз пӧлысь устооссэ нылкышноосты-учёнойёсты. Соос пӧлы шедизы Лариса Галоган - "Ижевск - город оружейников" диск кылдытэмез понна, Галина Башкирова - медицина удысын вормонъёсыз понна, Светлана Ижболдина но Надежда Кондратьева - таза сюро пудолэсь выль выжыоссэ кылдытон бордын ужамзы понна, Екатерина Тюлькина - кардиология удысысь научной ужъёсыз понна, Клара Серебренникова - семья кусыпъёсты эскеронъя методической ужъёсыз понна, Римма Голдина - финн-угор выжыысь калыкъёслэсь историзэс эскеремез понна, Наталья Шлык - школаын дышетскисьёслы урокъёс дасямез понна, Валентина Синюхина - экономика но ужбергатон удысъя эскеронъёсыз понна но Людмила Христолюбова - Удмуртиысь учёнойёс сярысь монографиез понна. Азьвыл ик ялэм конкурсэ пыриськем 32 мурт пӧлысь 10-сэ бырйыны капчи ӧй вал, уго котькудзылэн соослэн асьсэлэн ужан амалъёссы, асьсэлэн вормонъёссы. Туала арын кышномурт оломаин но паймытэ. Светлана Ижболдина. Римма Голдина. Туспуктэмъёсыз В. Камашевлэн. Одӥгаз кабинетын... Жингыртӥз кема возьмам гырлы. Университетлэн паськытэсь коридоръёсаз кылӥськизы пӧртэм куараос; муш уллё гужгетэ, кожалод. Нош ми кабинетысьтымы потыны ӧм дыртэ; угось радъяськиз тунсыко кенешон. Котькудӥз ныл (пиосмы группаямы ӧвӧл) аслэсьтыз кема возем малпанзэ кисьтэ. Висе шӧдске егит журналистъёслэн сюлэмзы. Туала удмурт кылъя дышетӥсьмы Надежда Ивановна Ураськина радъяз та ужпумез 31-21-тӥ группаысь студентъёс пӧлын. Нырысь вераськон потӥз телевидение сярысь. Собере со выжиз газет вылэ. Радио но кыдёкын ӧй вал ни. Удмурт кыллэн выльдӥськемез - "пӧсь вераськонлэн" кылдон мугез. Уноезлэсь гинэ кылыны луоз таӵе кылъёссэс: "Телевизорез лэзем ик уг пот: вераськемзэс валано ӧвӧл ни". Укыр трос выль кылъёс пыртэмын, пе. Удмурт радио сярысь но ӧжыт уд кылы таӵе "чебер" кылъёсты. Газетэз но, пе, кутӥськод ке, шуг потэ лыдӟыны. Тае ӵем кылоно луэ мӧйыгес, арлыдогес адямиослэсь. Дас укмыс аресъем эше шуэ: "Мон чик пумит уг луиськы таӵе ужрад ортчытэмзылы. Но мон азьын малы ке кылдэ таӵе суред: ӝӧк вылын вазаосын сылэ кык сяська керттэт. Соос пӧлысь одӥгез возь вылысь али гинэ ваемын - сяськаос улэпесь на, нош мукетаз - магазинысь, заводын лэсьтэмын. Туала удмурт кыл мыно понна юри пӧрмытэм кадь потэ". Та пумысен вераськоно кариськи на куамын укмыс арессэ тырмытэм тодмо кышномуртэн. Малы ке шуоно, таӵе арлыдъем кышноос пӧлысь тросэз пумит луо таӵе ужрадлы. Нош та адями шуиз: "Мыным яра таӵе уж. Ведь кӧня ӟуч кылъёс!" Та ужпум капчиен уг ортчы - шуг дышыны, ӧвӧл словарьёс.... Ярам, куд-ог журналъёсын, газетъёсын ивортыло выль кылъёслэн пуштроссы сярысь. Озьыен, удмурт кылмы быронлы уз сётскы. Со ялан выльдӥське, азьлань дыртэ. Азинсконъёс солы! Оксана Москова, Удмурт кун университетлэн журналистика ёзаз дышетскись. Сояз дуннее капка ворсаське Визьмо адямиос пӧлысь кин ке но вераз вал: калыклэсь культуразэ, пе, возьматэ кулэмъёсты сӥлы каремез но возьматэ. Туж шонер верамын, номыр уд шуы. Асьме калык пӧлын но кулэм муртэ ватон, сое буре ваён котьку но ӟеч но туж кулэ ужен лыдъяськиз. Туала дыре но, туж ёрмыса ке но улӥськом, кулэм матысьёсмес берпум сюресэ келян понна ӧвӧлтэм коньдонмес но ум жаляське. Одно ик тыршиськомы ватыны соосты умойгес шайвылэ, утчаськомы шулдыргес инты, кулэм ӵыжы-выжыосмылы матэгес. Нош вань-а соос али, умойгес шайвылъёс, шулдыргес интыос? Кулэм ватонэн кемаласьгес выремен-а, мар-а но (инмар мед утёз) мон туж пайми: Ижевскын кулэмъёсты матысь дыре ик нокытчы луоз ватыны. Асьме улонамы али тачак лэчыт ужпумъёс, сюлэм висёнъёс. Но мон ноку но ӧй малпа вал, шуг-секытъёс шайвылэ но вуэмын ини шуыса. Иж котырын али кык "ужась" шайвылъёс - Южной но Хохряки. Сояз но, таяз но буш интыос ӧвӧл ни. Кулэмъёсты вуж шайгуос вискы вато. Ярам коть толалтэ шайвылэ ветлӥсь ӧвӧл. Нош тулыс та номырлы ярантэм суред шараяськоз ук. Мар шуозы меда адямиос, матысь кулэмъёссэс буре вайыны лыктыса, шайгуоссы доры матэктыны ӧз быгатэ ке? Ижевскысь шайвылъёсты эскерыса-утялтыса возе "Ритуал" муниципальной предприятие. Кулэъёсты ватыны интыослы ёрмон "Ритуал" понна шуак-дуак ӧз луы. Предприятилэн кивалтӥсез Юрий Арикеев кык ар талэсь азьло ини ӵашетон ӝутӥз со пумысен. Кӧня гожтэтъёс гожъямын мэрие чиновникъёсын, кӧня пумиськонъёс ортчытэмын! Шайвылъёсын герӟаськем ужпум сярысь тодо А. Салтыков, солэн воштӥсьёсыз Артемов, Феклистов, Трухин. .. Озьы ке но, номыр уг воштӥськы. Зэм, выль шайвыллы инты висъязы ик. Ним но шедьтӥзы: Западной, пе, луоз со. Быдӟалаез 80 гектар. Шайвыл возисьёс нырысь-валысь бурдъяськизы вал. Выль шайвыл калык радъя лэсьтыны малпазы. Мед, пе, луоз отын административно-бытовой юрт, котельной, гараж, морг, ритуальной зал... Вазьгес ымзэс усьтӥллям. Ваньзэ сое лэсьтон понна коньдон кулэ угось. Нош мэрия уг сёты. Зэмзэ но, миллиардъёсты шайвылэ-а куштод яке чиновникъёслы квартраос басьтыны-а быдтод? Кудӥз кулэгес? Шонер, бадӟым кивалтӥсьёслы улон интыос город понна тужгес но кулэгес. Западной шайвыл али но усьтымтэ на. Кулэмъёсты буш бусые уд ваты ук. Со дыре ик мэрия коньдон шедьтыны быгатэ вылэм. Етӥз бигеръёс кивалтӥсьёссылэсь чыртызэс кырмизы-а, мар-а но, асьсэлы шайвыл лэсьтыны уксё портӥзы. Али соос кулэмъёссэс Западной шайвыллэн ог люкетаз ватыло. Православнойёслэсь вожъяськон мылкыдзэс ӝутон понна мон сое уг вераськы. Коть аллахлы, коть Христослы оскы - сояз дуннеын асьмеос ваньмы огкадесь, дыр. Соин ик "Ритуалын" ужасьёс буйгатско гинэ, одӥгез коть ужпум быдэстэмын шуыса. Юрий Арикеев выль шайвыл усьтонлы осконзэ уг ке но ышты, осконэн гинэ уг улы. Кулэмъёсты воксё нокытчы ватыны луиз ке, нырысь ик солэсь кылзэ юалозы угось. Мэрия - кыдёкын но вылӥын, нош Арикеев ки улын. Юрий Александрович вераськиз ини Завьял ёросысь но "Металлург" совхозысь кивалтӥсьёсын. Хохряки но Южной шайвылъёсты паськытатон пумысен. Соосыз но, таосыз но быдэн 5-6 гектар музъемзэс сётыны соглаш кариськизы. Матысь дыре ик ини та выль интыосы кулэмъёсты ватыны луоз. Но эриктэк юан кылдэ: кемалы-а со тырмоз? Лыдъяны шуг ӧвӧл. Али Ижын толэзьлы быдэ 500-лэсь ятыр адями кулэ. Котькуд шайгулы 2,5 квадратной метр музъем чакламын, кенерен ке - кык пол тросгес. Котькызьы бергаты, но выль шайвыл городлы одно ик кулэ. Табере мукетыз ужпум борды ӧжытак ке но йӧтскем потэ. Берло аръёсы асьмеос малы ке но дугдӥмы гажамысь кулэмъёмес. Тани Воткаысь вашкала Нагорной шайвылэ гаражъёс но кладовкаос, пе, пукто. Ижысь Александровской шайвылэ ватэм "афганецъёслэсь" памятникъёссэс лушканы турттӥллям. Завьялысь шайвылын киросъёсты ыбылӥллям... Мар дауртӥськом, кытчы шонскиськом? Туала улон шат озьы асьмеды асгынмытэ? Котькызьы мед луоз но, котькудмы отчы, шайвылэ, вуом ук. Син азяды пуктэ ай, кызьы тӥляд шайгу вылады кыӵе ке октос- калтосъёс укылтэмъясько. Кулэмъёслы, пе, ваньмыз одӥг кадь, номыр кулэ ӧвӧл ни. Озьы меда? Уг оскиськы. Г. Тихонов. Коньдон дуннеын "СБС-АГРО" юнма Укмыс ар талэсь азьло 14 феврале усьтӥськиз "СБС-АГРО" коммерческой банк. Нырысь сое "Столичный" нимазы, нош туала нимыз - "Столичный Банк Сбережений". Кыӵе бен со банк? Россиысь одӥгез кужмоез, вить бадӟымесь банкъёс пӧлы пыре, нош Европаын 500 банкъёс пӧлын луэ. 2,5 миллиард манет тыр аслаз капиталэз, нош чылкыт активъёсыз - 20 миллиард манетлэсь уно (вуж коньдонэн). Россиын солэн 11 банкез но 1500 филиалэз но ёзэз. Отын ужа 45 сюрс специалист. Коньдонэз туж быгатыса бергато. Банклэн вань "СБС-Лизинг" компаниез, страхованиея эштосэз (уставной капиталэз 285 миллион манет), "СТБ-Турс" туристической фирмаез, "Доброе дело", кун луисьтэм пенсиосъя "Инкахран" фондэз но мукетыз. "СБС-АГРО" миым вылдӥськиз агропромышленной комплекс пала берытскиз. АПК-лы ссуда но льготной кредитъёс сётэ нимаз программаосты кизён-аран ужъёсты быдэсъяны. Со юрттэ гурт хозяйствоосын лэсьтӥськыны, газ, телефон кыскыны но мукет ужъёсты лэсьтыны. Тани миым банк тупанкыл гожтӥз Россиысь одӥгеныз бадӟым ю тысь вузась "ОГО" фирмаен (солэн арлы оборотэз 1,2 миллиард доллар луэ). Банк мылысь-кыдысь пыриськиз "Росагромаш" концерн кылдытонэ. Со огазеяз Россиысь сельхозмашинаос поттӥсь 30 предприятиосты. Банк юрттэ Россиын музъем кадастр кылдытон ужез автоматизировать карыны. Пумен паськытатэ но кужмоятэ мукет кунъёсысь банкъёсын кусыпъёссэ (Китай, Германия). Нош "СБС-АГРО" банклэн Удмуртрегиональной банкез кызьы ужа? Кылем арын со 240 миллиард манет тыр кредитъёс сётӥз, со пӧлысь гурт удыслы - 78 миллиард манет. Валютаен ужамез 63 миллион доллар луиз, нош пластиковой карточкаосъя оборотэз - 77 миллиард манет (вуж уксёен). Огъя вераса, со 25 сюрс пала карточкаос сётӥз ни. Удмурт филиал умой ужа АПК-лы нимаз фонд пыр висъям бюджет коньдонэн. Туэлы со фондъя 100 миллион манет висъяны чакламын. Али Гурт хозяйствоя но сиён-юонъя министерствоен ӵош филиал учкиз ни 37,5 миллион манетлы кредит сётыны. Чакламын ни кинлы висъянэз но. Миым "СБС-АГРО" нимаз фонд пыр тулыс кизёнэз ортчытонлы 1.558 миллиард манет кредит сётӥз вал. Со банклы ваньмыз берыктэмын ни. Озьыен, со ӧз янгыша, та удыслы юрттэт сётыса. Вылаз ик, гуртын золэсь но пайдаё ужась хозяйствоослэн лыдзы каллен будэ. Мар понна бен филиал кредит сётэ? Эстӥськон, вӧйёс, минерал сылалъёс, воштос ёзъёс басьтыны. Ваньмыз лэсьтӥське гуртысь хозяйствоослэн куронъёссыя. Нош туэ нырысетӥ кварталэ со ссуда висъя сӥль но йӧл предприятиосты юнматыны. Соин ӵош ик кредит басьто промышленной предприятиос но. Туэ ужазы кыӵе бен воштӥськонъёс луозы? Пӧртэмез со, кредит тросгес висъялозы гуртысь ваньбур поттӥсьёслы, переработчикъёслы минерал сылал, эстӥськон, вӧйёс поттӥсьёслы, мукет сямен вераса, кин АПК понна ужа. Тӥни озьы гурт удысын матысь дыре коньдон бергатон уката ӝог йылоз но, басьтэм кредит пайдаен берытскоз. Соин ӵош ик банкез сюлэмшугъяськытэ удыслэн залог люкетэз. Со туж ляб на. Вылаз ик, АПК- лэн мукет коммерческой банкъёслы тыронъёсыз ялан будо. Сое лыдэ басьтыса, республикалы нимаз фонд пыр висъям уксёез юн хозяйствоослы гинэ сётъяно. Сое озьы ик бурд улаз мед басьтоз Удмурт Республикаысь Коньдонъя министерство. "СБС-АГРО" коньдон висъя гуртын лэсьтӥськонлы лизингъя проектъёсты но мукетсэ быдэсъяны. Али филиал дасяське куд-ог выль программаосты улонэ пыӵатыны. Со герӟаськемын автомобиль, студентъёслы компьютеръёс басьтыны, пенсионеръёслы кредит сётонэн. Тани, шуом, адями мылкыд кариз аслыз автомашина басьтыны, со 30 процентсэ коньдонзэ ачиз висъя, нош 70 процентсэ банк ссуда чотын сётэ. Умой амал. Ӝоген вуттэмын луозы гуртъёсы телефон но газ кысконъя программаос. "СБС-АГРО" - паськыт удысъем банк. Со кредит висъя республикаысьтымы городъёсысь но районъёсысь администрациослы, промышленной предприятиослы но коммерческой ёзъёслы. Тани Ижысь администрацилы миым 10 миллиард манет сётӥз, "Ижмаш" АО-лы - 12,1 миллиард ("Хендэ" южнокорейской автомобиль бичаны), нош Удмурт Республикаысь Коньдонъя министерстволы (нылпиослы пособие понна) - 45 миллиард манет. Соин ӵош ик банк юрттэ калыклы но, кылсярысь, со тупатӥз губернской, пенсионной, нылпиос понна но мукет вкладъёс. Со шаерамы самой вылӥ процент тыре. Банк музон услугаос но сётэ. Со пӧлысь одӥгез луэ предприятиын но организациосын уждунэз но стипендиосты пластиковой картаосын басьтон. Соин валче филиал банкоматъёс усьтонъя программа дася. Ижын 5-ез ужало ни, 2-сэ ӝоген вуттозы. Со сяна, 22 офисын пуктэмын ни импринтеръёс - пластиковой картаосын коньдон басьтонъя нимаз аппаратъёс. Азьланьын Удмуртиысь вань городъёсын но районъёсын ужалозы банкоматъёс. Али пластиковой карточкаосын уждун сётъяло ни Сарапул, Воткинск, Глазов городъёсын, "Ижнефтемаш", "Буммаш" АО-осын. Вань та ужрадъёсты но программаосты быдэстон, веранэз ӧвӧл, юрттоз республикалэсь экономиказэ юнматыны но калыклэсь улон-вылонзэ умоятыны. Банк туэлы но бадӟымесь малпанъёсын улэ. Со дасяське 10 ар тырмонзэ пусйыны. Г. Романов. СУРЕДАСЬ НО, ДЫШЕТӤСЬ НО... Геннадий Сидоров туж егит на, нош нимыз Ува ёросын улӥсьёслы ӟеч тодмо ини. Узей- Туклялан будэм пияш школазэ йылпумъяз гинэ - клубе ужаны интыяськиз. Собере армия, выльысь клуб, университет. Сое 1993 арын йылпумъя но выльысь дораз берытске. Отын угось вить ар ӵоже вите ни кышноез, нылпиез, гурт калыкез. Вузэз йылпумъяса, со табере луиз Геннадий Евгеньевич но, суредась но, чертёжник но, дышетӥсь но. Уваын ӟеч тодо удмурт художникъёсты В. П. Кузнецовез но Г. А. Чирковез. Соослэн выставкаоссы Уваысь художественной галереяын огпол гинэ ӧй вал ини. Куатетӥ тулыспалэ (феврале) усьтӥськиз мукетызлэн удмурт усточилэн, Г. Е. Сидоровлэн, нимысьтыз выставкаез. Калыкез ужъёсыныз тодматон Уваын нырысетӥзэ ке радъямын, талэсь азьло выставкаоссэ возьматъяллям ини Пичи Пургалан но элькунысьтымы Кибашлыослэн юртазы. Сидоровлэсь ужъёссэ синйылтӥзы ни сьӧрлось куноос но. Кӧняез ке суредъёсыз кошкизы Францие но Германие. Нош суреданы со школаын дышетскыкуз ик котькинлэсь ӟеч быгатэ вал ини. Узей-Туклялась культура юртлэсь борддоръёссэ дас ар талэсь азьло чебермаз - соосты али ке но воштыны уг малпало на. Выставкаез усьтонэ уно калык люкаськылӥз. Экскурсовод Мира Завертяева лыктэмъёсты вакчияк тодматӥз суредасьлэн улон сюресэныз но шунытэсь кылъёс вераз Сидоровлэн ужъёсыз сярысь. Геннадий Евгеньевич куатьтонлэсь трос суредзэ ваем. Котькудӥз доры дугдӥськод но шораз учкыса, кошкыны уд ӵыдӥськы ни. Ваньмыз мылкыдэз бордазы кыско асьме шаерез возьматэменызы. Тон та интыез тодӥськод, азьвыл но отчы вуылӥд кадь ини. Тани кӧняезлэн ке нимъёссы: "Палэзьпу", "Гурт бервыл" (бырем Яски гурт бервыл), "Ува инкуазь", "Бӧрдӥсь кызьпуос", "Та шукрес Изёй шур" (толалтэ но уг кынмы), "Чорыгъёс" (йӧ улысь али гинэ поттэмын), "Чабишурысь сяськаос", "Льӧмпу сяськаос", "Анайёс", "Шайтангурт" (Алнаш ёрос), "Ермаково - мынам доре", "Егитъёслэн урамзы" (Узей-Туклялась ульча), "Жингрес сӥзьыл", "Ӵужъялгурт" (Вавож ёрос), "Анатолий Назаров астрологлэн портретэз", "Теньгурт бервыл" но мукет. Лыктэмъёс кема дыр ӵоже синмаськыса учко "Прикладное искусство" сэреге интыям пӧртэм пумо арбериос шоры. Пулэсь, ньӧрлэсь, кызьпу туйлэсь, соосты вӧлыса, куасалляса, кутаса, вуштыса, гыркйыса, волятыса, мар гинэ лэсьтыны уг быгаты вылэм Геннадий Евгеньевич. Сидоровлэн ужъёсызлы туж вылӥ дунъет сётӥз выставкаез усьтонэ лыктэм калык. Суредась Семен Виноградов шуиз: - Увае мон кызь ар талэсь азьло но вуылӥ. Соку кивалтӥсьёс бадӟым инты висъяло вал ваньбур поттонлы. Таяз лыктэмам шумпотӥсько культура но искусство пала берытскемзылы. Шаерамы туж тодмо крезьгурчимылэн Пантелей Кузнецовлэн, суредасьтылэн Анатолий Русскихлэн нимъёссы. - Паймымон та воргорон,- будэтэ Семен Николаевич. - Гур пуктӥсь но, столяр но, архитектор но. Инмар солы кужым но, устолык но огдыре сётэм. Куиньзэ суредзэ туннэ ик художественной советэ келяны луоно. Нош Художникъёслэн союзазы кутыны дыр али ик вуэмын ини. Г. Е. Сидоровез усто выставка дасяменыз шуныт ӟечкылазы мукет суредасьёс но, пӧртэм удысъёсысь тодмо адямиос но. Соос пӧлын вал Пантелей Кузнецов, Георгий Чирков, Леонид Прозоров, Пичи Пургалась Николай Тарасов, Балезиноысь Игорь Лекомцев но мукетъёс. Концертэн шулдыртӥзы Узей-Туклялась кырӟасьёс-верасьёс. Выставка ужалоз толэзь ӵоже. Лыктэлэ учкыны, тодматскыны - уд жалялэ. П. ИВАНОВ. Оскон ӞЕЧЕЗ ӞЕПЫН УГ НУЛЛО Кылем арлэн пумаз Москваын ортчиз Россия Федерациысь ожысь но ужысь ветеранъёслэн кенешсылэн пленумез. Отын бадӟым саклык висъямын вал интыосысь огазеськонъёслэн ужамзылы. Кӧня ке областьёс пӧлын асьме республикаысь ветеранъёслэн кенешсылэн но нимыз поттылэмын вал. Ма шуод, районъёсысь пичиесь но бадӟымесь огазеяськонъёслэн ужазы трос тырмымтэос. Маке но уг герӟаськы, кутскем ужез пумаз вуттыны уг луы. Со сярысь верамын вал республикаысьтымы ветеранъёслэн кенешсылэн 12 феврале ортчем пленумаз но. Кенешлэн кивалтӥсез М. Е. Зыков но пленуме лыктэм ветеранъёс трос янгышъёсты, быдэстымтэ ужъёсты шараязы. Йӧтӥз ёрос администрациосысь, предприятиосысь но организациосысь кивалтӥсьёслы ветеранъёс сярысь кулэезъя сюлмаськымтэзы понна. Умоез но синйылтытэк ӧз кыльы. Пленумын ӟеч кылъёсын пусъемын вал Ижевск городысь, Завьялово, Як.-Бодья ёросъёсысь ветеранъёслэн кенешъёссы. Мӧйы эшъёссэс уг вунэто "Буммаш" акциосын огазеяськонъёсын, Горьковской чугун сюрес ёзын, 17 номеро лэсьтӥськон трестын, Вараксиноысь тылобурдо вордон фабрикаын тыршисьёс. Татысь кивалтӥсьёс асьсэлэн пенсионеръёссылы я коньдонэн, я сиён-юонэн юртто, улон инты висъян ласянь сюлмасько. Як.-Бодья ёросысь ветеранъёслэн кенешсылэн ужез умой ласянь пусъемын вал бере, мынам пумиськеме потӥз кивалтӥсенызы Василий Петрович Вахрушевен. Мукет мугез но вал матэгес тодматскыны. Ижевскысь Центральной площадь дорысь Данъян пул вӧзтӥ ортчыкум, одӥг пол гинэ ӧй синйылты та воргоронлэсь туспуктэмзэ. Кӧня ке кылын гожтэм чуръёс адями сярысь трос-а бен вералозы? Василий Петрович пенсиын ке но, солы бадӟым уж оскемын - адямиосын ужан. Нош вазиськисьёс пӧлын котькыӵеосыз вань - дунне шоры котькудӥз ачиз сямен учке угось, аслаз куронэз, дэмланэз, валанэз. Василий Петрович тае туж ӟеч вала. Адямилэн улон коркаез куашкан калэ вуэмын - сэзъяно яке выльдоно. Кӧня пол ини таӵе куронэн ветлӥзы дораз ожын сӧсырмемъёс. Мар ке но кароно, нош мар бордысен кутскод? Вахрушевез та юан нуналлы быдэ сямен сюлэмшугъяськытӥз. Ӧз чида, вераськоно кариськиз кенеше пырись эшъёсыныз. А. М. Безносов, В. П. Богданов, Н. С. Загребин но мукетъёсыз визьмо дэмланъёс сётӥзы. Та пумиськонзы Василий Петровичез ёрос кивалтӥсьёс доры вуттӥз. Вераськон капчиен ӧз ортчы. Кытчы гинэ коньдон кулэ ӧвӧл - огзэ кышъяно, мукетсэ, созэ лэсьтоно, тазэ басьтоно. Кытысь ваньмызлы коньдон шедьтод? Но ветлэмез пайдатэм ӧз луы. Ветеранъёслэн кулэяськонъёссылы 160 миллион манет (вуж коньдонэн) висъямын вал. Сурыкмем коркаоссэс выльдыны кӧня ке мурт юрттэт басьтӥз. Со понна уже кутэмын 102 миллион манет коньдон. Нош тупатоно- выльдоно тямыстонлэсь ятыр. Ваньзэ сое лыдэ басьтоно ке, висъям коньдон коӵыш синву мында но ӧвӧл. Кудӥзлы юрттод? Ярам, семьяын кин ке быгатӥсез вань ке, но уноезлэн ветеранъёслэн юрттӥсьёссы ӧвӧл ни. Чылкак огназы кылемъёс но вань. Василий Петрович уг чигна шуг-секытъёс азьын, азьпала оскыса учке. - Быгатэммыя ваньмызлы юрттом, ветеранъёс ӝожтӥськоно медам луэ ми вылэ, - шуэ со юась-верасьёслы. В. П. Вахрушев нырысетӥ арзэ та ужын ӧвӧл. Солэн нимыз ӟеч тодмо шаерамы, ужаменыз тодматскыны ветло бускель ёросъёсысь ветеранъёслэн кенешсылэн кивалтӥсьёссы. Бен, ожысь но ужысь ветеранъёслэн Всероссийской съездзылэн делегатэз Василий Петрович Вахрушев тодэ, калыкен юн кусып возён понна огъя уже кысконо улонэз тодӥсь-валась, быгатӥсь адямиосты. Со озьы ик лэсьтэ. В. СМИРНОВ, ожысь но ужысь ветеран. Николай Никифоров АВТОР Серемес верос Егор газет-журналъёсты котьку но берпуметӥ бамысеныз лыдӟыны кутске. Мугез валамон: татӥе уго интыяло серемес веросъёсты, пышкылонъёсты, "пеле йӧтонъёсты" (выльдӥськонэн сэрен фельетонэз озьы нимало ни, вылды). Сюлэмыз ӝож егит воргоронлэн. Тани али но берпуметӥ бамысь ас нимтулзэ адӟыса, пӧсьвуаськиз кадь со. "Асьмелэн котьку но ӟеч вузэз кыдёке, пыдло ватыны тыршо,- малпаське со ас понназ. - Анекдотъёсты гинэ басьтом. Куке но нырысетӥ бамаз печатлалозы кожаськоды-а? Хи-хи! Серекъяса кӧтыд пульдоз! Соку уго тон туж кулэ луись статьяосты лыдӟыны кужым уд шедьты ни. То-то! Шудон-маскаръяськонлы инты тодмо: берпуметӥ бам, берпуметӥ колонка, берпуметӥ сэрег... Огкылын вераса, газет-журналъёслы кышъет! Пась интызэс маин ке но ӵоксано ук. Э-э, та сярысь кылпум ӝутытэк уз луы, дыр,- интыысьтыз султӥз Егор.- Мон но гожъяськись адями, автор. Нош автор ас правозэ законэн утьыны кулэ". Воргорон толон уин, кузпалэз кӧлыку, ӵабъям юморесказэ гадь кисыяз донгиз но редакцилэн юртэз пала вамыштӥз. Ярам ай, райцентрын улэ бере, кыдёке ветлоно ӧвӧл. Асьсэ урамазы ик. - Ӟечом-буром, пилеш уром! - гудырес куараеныз вазиз со, ӧсэтӥ пыремен валче. - Ӟеч, ӟеч,- мылкыдтэк кадь вазиз ӝӧк сьӧрын гожъяськыса пукись воргорон. Пилеш йырзэ вераса ӟечбуръяськисьёс ӧз шедьылэ на вал солы. Озьы ке но пуксьыны ӵектӥз. - Татӥгес лыктыса интыяське. Тусбуйды маке туж тодмо йӧтэ. Кин бен луиськоды ай тӥ? - Малы "тӥ?" - соку ик пештырскиз Егор.- Мон огнам ук. Значиться, тон шуыса юано. Эх, тон, грамотей! - А-а,- нёжтӥз редакциын ужась, тыр кӧтсэ маялтыса.- Кыллы шаплы вылӥллямды. Ну, вера ни: кин луиськод, ма муген? - Ох-хо! Йыртышкам зырен шуккиськод тон, эше. Монэ но уд тодмаськы, оло? - интыысьтыз ик султӥз Егор.- Мон удмурт Жванецкий ук, Задорновен но ӵошатыны луысал. Вакчияк вераса, Лопшоев мон. Лопшо Педуньлэн вынызлэн покчи пиез. - О-о, тодам, тодам песятаед. Синмаськымон пересь вал. - Мынэсьтым гожъямъёсме "Шулдыр ӝытысь" Ушаков сцена вылын мадьылэ, "Шӧкыч" бамын чик тупатъятэк-вакчиятытэк печатлало. Нош тӥляд, прости за выражение, зырымесь газетты, котьку берпуметӥ сэрегаз интыя. Та авторез сантэмам луэ ук! - Озьыен, ӝожтӥськонды кылдӥз? Гожъямъёстэс вакчиятыса печатлало? Шонер-а валай? - папирос пачкаез доры сузьтӥськиз редакцилэн сотрудникез. - Так точно, корреспондент эш! - армиын музэн чырткемак вазиз Лопшоев.- Чик вир поттытэк вандӥськоды ук монэ. Быдэс тетрадь гожъяса келясько но, кӧня ке чур печатласькоды. Нош отын, кумышкалэн музэн, кудӟытӥсез но ӧвӧл ни, шӧмыз но не то. Чырс пыдыез гинэ кельтэмын. Самой ӵушкась, самой серемес, самой синкылиосты поттӥсь чуръёссэ куштыса печатласькоды ук. - Луылэ озьы но, Лопшоев эш. Куддыръя вакчиятытэк амалмы ӧвӧл. Газетлэн но аслаз быдӟалаез, куронъёсыз вань уго,- ас мылкыдзэ шараяз редакциысь воргорон. Лыз-лыз ӵынзэ форточка пала кульчояса лэзьянъяз, маке малпаськемез бере юаз: - Выль гожтэм ужды ӧвӧл-а сьӧрады? - Как жо? Кызьы сотэк редакцие кожалод? - соку ик гадь кисыысьтыз тетрадьзэ поттӥз Лопшоев.- Тани толон гожтӥ, шедевр! Лопшоев сэзь кариськыса, артист музэн киоссэ шонаса лыдӟыны басьтӥськиз. "... Котыр Петыр кемалась кузпалъяськыны медэ ни вал. Нош кожой куко, чипей синмо, кучыран ныро, бегемот ымо егит пилы кин-о синмаськоз меда? Бератаз, Балтась урамысь "уй бубылиез" лушкаса пыртыны йӧндыриз ик. Эшъёсыз юрттӥзы, конешно. Сыӵе ужез ачиз ӧй йӧндырысал, гурсуран!.." Лыдӟонъяз Лопшоев редакциын ужась шоры учкылэ. "Пальпотылэ-а, уг-а?" Нош соизлы пӧсь но, кезьыт но ӧвӧл кадь. "Зима - это толалтэ, да?" - шуыса юало кадь кескич синъёсыз. - Табере самой сюлэмез бичатӥсь интыяз вуиськом, корреспондент эш,- саклык висъяны куриз Лопшоев. - Кылзӥсько, кылзӥсько. Туж тунсыко гожтэмед. Автор ас лыдӟонзэ азинтӥз. "... Петырен "уй бубылиос" мунчое кошкизы. Отысен, выл дӥсьёссэ куштыса, егит воргорон юаз: - Воксё кылиськом-а, мусое? Яке турсикен-а пыласьком? - Мон гужем плавкиос уг дӥсяськы, Петыр,- пальпотӥз кышноез.- Гольык пыром. От, япона мать! Кыӵе мунчо вал со! Кыӵе секс! Петыр та нуналысен ассэ рае шедемен лыдъяны кутскиз",- лыдӟонзэ йылпумъяса, каньылак шокчиз Егор. - Кельшиз-а? Эсьмаса, лыдӟисьёсты серекъяса ӝӧк улазы питыралозы, ява! - Ӧжытак вакчиятытэк, тупатъятэк уз луы, дыр, Лопшоев,- меӵак вазиз газетын ужась. - Кытӥзэ? Маиз мултэс? - синъёсыз ик питырскизы авторлэн. - Нырысь ик, геройдылэн тусбуез укыр шуш суредамын. Вань ӵошатонъёсты тылобурдоослэсь, пӧйшуръёслэсь басьтэмын. - Нош гуртое сыӵе адями ке? - Ну, шуом, тусбуйзэ ум исалэ. Нош малы егитъёслэсь мунчое ӵошен ветлэмзэс сыӵе серемес, осконтэм карыса возьматонэз? Собере татын лушкем яратон калык син азе поттэмын. Ма шуозы анай- атайёс? Газетмес уго нылпиос но лыдӟо. - Опять двадцать пять! киоссэ ваче чабкиз Лопшоев.- Нош кин дышетыны кулэ сыӵе ужлы егит поколениез, будӥсь кивоштӥсьёсмес? А-а? Сотэк соос но Котыр Петыр музэн мунчое турсикен пыраны кутскозы. - Та темаез ӝутыку, сак кариськыны кулэ, Лопшоев эш. Тани ачид кӧня арес дыръяд тодӥд лушкем яратон сярысь? - Мон-а? Мо-о-он! - воксё моганы кутскиз Егор. - Кызь куинь арес тырмытозям, нылпиос убоос вылын вордско, кожай. Нокин со сярысь ӧз мадьылы. Анай-атае гуртысь интеллигентной адямиос вал: инженер но дышетӥсь. Кызьы соос мыным валэктозы? Соин ик ас уженым лыдъясько: сыӵе темаосты газет бамъёсын ӝутоно! - Тӥ кузпалъяськемын-а, Лопшоев эш? - Конешно. - Нылпиосты но вань? - Вить кузя. - Тӥни кызьы,- нырысьсэ пальпотӥз редакциын ужась.- Лушкем яратон сярысь чик валэктӥсь ӧй вал шуиськод, нош ачид вить нылпиос йӧндыремед ни. - Э-э, таиз понна бускелелы, Гугул Миколлы тау карыны кулэ. Со ваньзэ дышетэ монэ, мунчое но ӵошен ветлӥськом. - Кинэн? Кузпалэныд-а? - Шонер валалэ. Мон нырысь нылпиосмес миськыса-пылатыса дорамы келясько. Ярам, мунчомы асьмелэн, бакчаямы ик сылэ. Собере Гугул Миколэн кузпалэ лыкто ни. Мон укно вӧзысь ӟус вылэ интыяськисько но соослэсь мусояськемзэс учкыса пукисько. Микол кышномуртэ кызьы чупаны, мугорзэ маялляны дышетэ монэ. Туж бадӟым тау солы со понна. - Собере? - синъёсыз ик чилектӥзы кылзӥсьлэн. - Мадь тон, мадь, Лопшоев эш. Тунсыко ук. - Собере Гугул Миколэн Зояос лапча вылэ пыриськыны интыясько. Нош мон сигарет ӵындыны, чылкыт омырен шоканы мунчо азе потӥсько. - Миколэдлэн кузпалэз ӧвӧл шат? - О-о, куинь пол кузпалъяськылӥз ни вал. Ваньзы толэзь улыса кошкизы. "Пиосмурт ужен сьӧсь кадь, пе, шуо". Ма, тодмо ни, Микол ужез гажа, лэсьтӥськонын тырше, плотник. - Нош нылпиосыд ачид тусоесь-а, Лопшоев эш? - Э-э, кин тодэм ни соосты? Тусбуй будэмъя воштӥське, шуо ук. Зэм, йырсиоссы гинэ гордань. Ӵапак Гугул Миколлэн кадесь. Ӝӧк сьӧрысь воргорон, бекче кӧтсэ выретыса, горыны кутскиз. "Юморескае кельшиз, лэся,- чилектӥз Лопшоевлэн йырвизьмаз.- Анекдотысь жирафлы музэн, пуштросэз берло гинэ йырвизьмаз вуиз, шӧдске". - Печатлалоды-а выль ужме? - Одно ик, Лопшоев. Гожъямдэ мур пуштросъемо карон понна, мон ог нунал дорады ветло ай. Ӵошен пуком, курытсэ веръялом, мунчояд ветлом. Только со нунал Гугул Миколдэ эн ӧтча, ява. Егорлэн, киосыз интые, бурдъёс кылдӥзы кадь. Кыӵе ке кырӟан гурез шуласа дор палаз вамыштӥз со. Ма кулэ на авторлы? Гожъям уждэ мед ушъялозы но газет баме мед печатлалозы. Книга дуннелэн кузёез Пичи Пурга районысь Вуж Монья школаын дышетскыкуз, Надя уй куспын зӧк книгаосыз лыдӟыса потылӥз. Книгаен эшъяськемез ик юрттӥз солы азьланяз но сюрес бырйыны. Пермьысь культурая институэз йылпумъяса ужаны кутскиз Пичи Пурга библиотекаын. Нош 1996-тӥ арысен Надежда Николаевна Вахрушеваез, умой ужамзэ шӧдыса, ёрос библиотекаен кивалтӥсе пукто. Книга дуннелэн кузёез доры лыдӟисьёс но трос гинэ вуыло. Уредэз Л. Прозоровлэн. Кузебай Герд Вина юон - удмурт калыклы бырон Куӟебай Гердлэн та статьяез печатламын вал 1920 арын Сарапулын "Гудыри" газетын. Та аре ик со потӥз нимысьтыз книгаен. Статьяез сётӥськом авторлэн ас гожтэм манереныз, диалектной формаоссэ озьыгес ик кельтыса (куд-ог дыръя со ачиз ик скобкаосын валэктон сётэ, вань калыклы валамон мед луоз шуыса). И. Ку кылдэм вина? Музъем вылэ вина юон кылдэм туж кемаласен. Котькыӵе (турлы) калыклэн вань кыӵе ке но кудӟытӥсь юонэз, сотэк нэкинь но уг улы. Кытысь, кызьы калык шедьтэм кудӟытӥсь юонэз? Азьлон калык, вашкала дыръя, уло вылэм выжыен-выжыен. Ачмелэн кадь коркаос лэсьтыны соос тодӥллямтэ. Улӥллям тэльёсын, ачсэлы бадӟымесь (зӧк) гу гудӟыса (кораса). Сиён-юон тэльысь пӧйшуръёсыз (зверьёсыз) шедьто вылэм. Тӥни ук, озьы ветлон-ветлон интыязы, шедьтозы вылэм тэльысь сины эмезьёс, узыос. Ваньды ик, эшъёс, тодкоды, дыр: эмезез тырос (уно) сикод ке, олокыӵе жиль-жиль луоно. Котьку пересьёс тазьы шуо: "Осто, Иньмаре, эмезь сиса кисьмай". Эмезез, узыез таман гондыр но уно сие ке, кисьмаса изе. Марлы-о со сыӵе? Тани марлы: эмезьлэн, узылэн пушказ вань кудӟытӥсь маиз ке( алкоголь). Вашкала адями но азьлон, гондыр сеен сыӵе емышъёсты сиса, кудӟем кадь луод вылэм. Жадем муртлы тырос-а (уно-а) кулэ? Нунал лумбыт тэляса ветлыса со жадёз вылэм; емышъёсыз сиса, кудӟыса, кисьмаса, жадемез но веськам кадь луоз вылэм. "Жадемез веськатэм бере, со умой маке", - шуса малпаз ини вашкала адями. Озьы малпаса кутскиз эмезез люкаса чырсатыны, аслыз вина лэсьтыны. Собере, нянь кизьыны дышем бераз, няньлэсь виназэ поттыны дышем. Озьы дунне вылэ кылдэм арак (вина). ИИ. Ку вина удмурт пушкы кылдэм? Ку вина удмуртъёс пӧлы кылдэм, тодӥсь нэкинь но ӧвӧл. Удмуртъёс ачсэос вина сярысь выжы И кылъёсазы тазьы шуо: "Аракыез (винаез) юны удмуртъёсыз шайтан дышетэм". Куд выжы кылъёсын винаез "шайтан ву" шуо. Озьы но, вашкала тырысен ик, удмуртъёс, Иньмарез буре вайыкузы, винаез Иньмарлы курбон карса сётозы вылэм. Тае чакласа, ку удмуртъёс Иньмарез тодны кутскиллям, соку ик винаез шедьтӥллям шуны шонерак луоз. Котьку вӧсяськыкузы соос винаез тылэ кичкаса вӧсясько. Со тырысь ик сое юо. Со тырысь дугдылтэк пӧзьто. "Ютэк улонлэн шулдырез ӧвӧл. Маиз понна улод?" - шуо удмуртъёс. ИИИ. Ку удмуртъёс винаез юны кутско? Винаез удмуртъёс юны вордскем беразы ик кутско. Кӧкыын дыръязы ик соос вина юны дышо. Пичи нунылы ымкыль йӧтэ - доктур доры мынны нылкышноос уг дырто. Йӧналоз шуса, соос пичи нуныез винаен сектало, пичи тырысеныз ик юны дышето. Кыӵе ке куно усе-а, кунян, ыжпи вордско-а, нылпиос дунне вылэ кылдо-а, котьку удмурт адями юондыр лэсьтэ, кунозэ, маин утялтыны валатэк, визьтэм лутозяз винаен секта. Мынэ али удмурт гуртъёстӥ. Котьку тӥ отысь шедьтоды кудӟем муртъёсыз. Юон удмуртъёс пушкын вӧлдӥськемын. Юон быдтэ ачме удмурт калыкез. Соин юон шоре синэз ӵоктаса учкыны кулэ ӧвӧл. Юонэз быдтыны кулэ!... ИВ. Вина юонлэн умойтэмез Вина юон укыр (туж, лекос) мур выжызэ лэзиз ини удмуртъёс пушкы. Со удмуртлэсь улон сямзэ но сӧрса быдтэ ини. Синьтэмъёс, куктэмъёс, йыр быдтонъёс - со ваньмыз юонлэн ужез. Вина юон ӧй ке лусал, удмуртлэн улон сямыз но умойгес лусал. Улон сямзэ гинэ ӧвӧл, таман визьзэ но, лулзэ но калыклэсь вина сӧрса быдтэ ини. Чаклалэ али удмурт калыклэсь вераськемзэ... Со тазьы шуэ: "Ютэк дунне вылын улны уг луы", "Ю, нэмырлэсь эн кышка", "Пересьёс юиллям, умой улӥллям; ми юом - шудо улом". Озьы тӥни удмуртъёс юон сярысь верасько. Соос винатэк улны уз луы кожало.... Вина юса адями туж визьмо луэ шуса малпало. В. Мар верало докторъёс? Табере, эшъёсы, учкоме: вань-а юонлэн кыӵе ке пайдаез (пользаез), ӧвӧл-а? Пайдаез вань ке, султытэк юоме, ӧвӧл ке, вина (аракы) юон сюмыкъёсме кыдёке сэрпалтоме. Докторъёс кемалась тазьы шуо: "Юись мурт - бырем мурт..." Марлы озьы шуо соос? Тани марлы: винаез тырос (уно) юса, сюлмыз шугектыса, адями туж уноез кулэ; юись мурт чальгем (ӝоггем) висьны куське, кынманы сюре, элексы луэ... ВИ. Вина юса кӧня-о быро? Вина юса арлы быдэ кӧня калык кулса быре, ваньзэ тодыны уг луы. Ваньзэ гожъясь но ӧвӧл. Озьы но докторъёс тодӥллям: 1887 арын шӧдтэк шорысь вина юса кулӥллям 4128 пиос, 389 кышноос, ваньмыз - 4517. Со мында кулэмын Муско пал губерняосын. Татӥ, ачме палтӥ (ёростӥ) талэсь но уногем быро. Табере тодэмын ини, арлы быдэ кӧня адями кулэ, со кулэм муртъёс пушкысь ӝыныез вина юса кулэмын луэ шуса. Ачме палан арлы быдэ винаез (кумышкаез) юэменызы 6000 адями кулса быре. ВИИ. Юись муртъёс вакчи арлыдо луо Юись мурт кузь арлыдо но уг луы. Маин ке висьны куське, кынме, чакотка шоры йӧтэ, кулса кошке. 23 арескын юны кутскем мурт 40 арлэсь кема уг улы, 13 арескын юны кутскем мурт 26 ар сяна уг улы. Талэсь тыросгем (уногем) туж шерез улэ. Улэ ке но, весь висьса, курадӟыса, векаса улэ. ВИИИ. Вина калыкез быдтэ Кемалась чакласа шедьтэмын ини: юись муртъёс тыросэз ачсэсыз ачсэос кудӟем дыръязы быдто шуса, 100 кулэм мурт пушкысь кудӟем йырыначсэсыз быдтыса 13 адями кулэ: ошке, вуэ четче, ассэ вандэ, ыбе... ИЪ. Вина адямиез визьтэм каре Вина (арак) юыса, адями визьтэммись луэ. Ачмелэн визьтэммыса висись 100 адями пушкысь 42 мурт вина юса визьтэммемын луэ. Францияын 27 адями визьтэмме, Америкаын - 20, Швейцарияын - 15, Англияын - 14. Ачме Россияын удмурт пушкын котькинлэсь но тырос (уно) луэ визьтэммон. Ъ. Вина урод ужъёсыз кылдытэ Урод ужъёс но - жугиськонъёс, вииськонъёс, лушкаськонъёс - ялан вина юса луэ, ялан соосыз (соосты) вина кылдытэ. Юымтэ (саӟь) дыръяз адями кыӵе ке но синьмаськоно кадь лачмыт, умой луэ. Ваче куспаз ноку но керетон, жугиськон, тэргаськон уг потты. Вина юэ ке, оло, со пушкы шайтан пырса каръяське, лэся. Умой, визьмо адями ик дымак (чылкак) визьтэмме: кесяське урам тыр, жугиське, пуртэн кышнозэ уйылэ, кинлэсь ке но укнооссэ зырын жиль-жиль тышка. Азьлон Германияын урод ужъёсын сюрем 100 адями пушкысь 50 мурт, кудӟыкуз урод уж лэсьтэмен, тюрмаын пукоз вылэм. Голландияын - 70 мурт. ЪИ. Вина узырзэ куанермытэ, куанерзэ - кураськытэ Вина юон адямилэсь улон сямзэ но сӧре: узырзэ - куанермытэ, куанерзэ кураськыны поттэ. Юай мон огпол одӥг куанер муртлэсь: "Марлы тон юиськод?" - шуса. - Туж (лекос) начар (алама) улэменым, куректыса юисько, - шуиз со мыным. - Нош марлы начар улӥськод? - кыктэтсэ мон солэсь юай. - Юэменым: весь юисько, уг ужаськы, кураськисько, - шуиз со мыным. Юись мурт начар (урод, алама) ужа. Соинь солы ужамез понна уксё но (коньдон) тырос (уно) уг сёто. Уксёзэ со юса быдтэ. Нянь басьтытэк, ужаса шедьтэм уксёзэ виналы (кумышкалы) быдтэм бере - умой, ӟеч улон кошке ини сыӵе адями котырысь? Улса-улса, со пыдйыл потэ, кураськыса ветлэ, оӟы но юонзэ уг кушты. Одӥг адями чакласа шедьтэм: нуналлы 100 манет сёткам уксё пушкысь 30 манетсэ кураськисьёс нуналлы быдэ вина юса быдто, пе. ЪИИ. Вина пӧзьтыса, ваньбур быре Туж тырос ваньбурзэс быдто адямиос, вина пӧзьтыса. Чаклалэ али удмуртъёсыз. Кажной семья пушкын вина пӧзьтыса ар ӵоже 15 пуд мында быдто туж ӧжытэз. Музъем вылын удмуртъёс ог миллион мында луозы. Со миллион мында пушкысь 200 сюрсэз вина пӧзьтӥзы ке, озьы но ар ӵоже соос ваньзы 3 000000 (куинь миллион) пуд нянь быдтозы. Со няньлэн ваньмыз кумышка уг луы али. Ӝыныез сеен, пыды луса, тэле, нюке кисьтаськыса кыле. Таман пудо-животлы но уг сюры... Одӥг пудысь 4 черык (четверть) вина сюре, 3 миллион пудысь 12 миллион черык вина сюроз. Со 12 миллион черык винаез ваньзэ удмуртъёс ар ӵоже юса быдто. ЪИИИ. Вина пӧзьтон удмурт нылкышноез синьтэм каре Туж уно удмурт нылкышноослэн синьзы висе, туж уноез тёпак синьтэм, номре но уг адӟо. Марлы со озьы? Кинь солы винамат? Ваньмызлы вина (кумышка) пӧзьтон винамат. Нылкышноос вина пӧзьтыкузы, весь тыл дурын, ӵын йылын улса, соослэн синьзы куректыны куське, собере ӵынаса гордэктыса висьны куське. Висьса-висьса со тракома луэ. Удмурт кышно, доктур доры мынытэк, оло, ортчоз шуса, корказ пуке но, синьтэм луса вуэ. Вина пӧзьтыкузы, соос кынманы но сюро. Куддыр, секыт выӵкыосыз ӝуткаса, кудӥз шӧй нуны вордэ, кудӥз, пыдзэ кынтыса, ревматизм нимо пыд висён шедьтэ. ЪИВ. Вина егит (пинал) калыкез сӧрса быдтэ Туж уноез калык та вина юонэн сӧриськыса быре. Уката ик та винаен сӧриськыса быро егит калыкъёс. Юса соос лушкаськыны но дышо, ачсэзыс кызьы воземзэс уг валало ни. Нылъёс, воӟытсэс ыштыса, урам (ульча) куӟа уйбыт-уйбыт пиосын костаськыса ветло. Урод висёнъёс шедьто. Со алама (урод) висёнъёсыз егит калык пушкы вӧлдо. Соинь табере удмуртъёс пушкын 100 адями пӧлысь 10-эз сяна урод висёнъёсын висьтэк кылемез ӧвӧл ни. Висем муртлэн пиналъёсыз уг лу ни. Луэ ке но, гижлоесь, начаресь вордско, улонэс уг луо. ЪВ. Вина дышечкись пинялэз но сӧрса быдтэ ини Юмшась калыкез сяна, вина дышечкись пиналъёсыз но сӧрса быдтэ ини. Удмурт пӧлын улыкум, мон туж ӵем адӟисько вал пиналъёслэсь арак (вина) юэмзэс. Мар мындаез меда вина юэ шуса тодэме потса, мон содӥг удмурт учильшаын, Малмыж уездын, юай пиналъёслэсь ачсэлэсь тазьы: 1. Кӧня-о арескын кутскид винаез юны? 2. Вань-а юэмед винаез? 3. Кин-о тонэ сектаз винаен: аид-а (атаед-а), мумиед-а, эшед-а, сестраед-а, братэд-а? Пиналъёс мылзы поттэк веразы: кудӥз возьдаськыса, чик номыр но уг вера вал. Кызьы но озьы луиз вань пиналъёслэсь юаса тодэме: 35 юам пинял пӧлын 27-ез вал пиос, 8-эз нылъёс. Юам-вераме таӵе пуксиз: 1. 21 пиос винаез юны кутскиллям ньыль-вить арескын, 2 - сизьым арескын, 2 - тямыс арескын, 1 - куинь арескын. Чик винаез юымтэез 1 сяна ӧвӧл. 2. 8 нылъёс пӧлысь 5-ез юэмын вить арескын, 1 - куать арескын, 2 - ньыль арескын, 7 нылъёс али но винаез ачсэос пӧзьтыса юо на. 34 юись пиналъёс пӧлысь 25-сэ секталлям атайзы, анайзы, 2 - братсы, 3 - сестразы, 4 - эшъёссы. Та бере паймонэз но ӧвӧл ни, марлы ачмелэн со мында нылпимы кулса быре. Со сяна, вина туж тырос нылпиосыз сӧрса быдтэ: юны дышетэ, визьтэм каре, лушкаськисе поттэ, урод висёнъёс сётэ. Пичи тырысен ик юны дышса, пиналъёс будэм беразы но юисесь луо. Тэччиз (здоровой) но уг будо соос: пашмем, тэйӟем кунян кадь будо. Кышнояськем бераз таза луоз-а сыӵе муртлэн нылпиез?.. ЪВИ. Мар гожъяло удмурт поэтъёс вина юон сярысь? Та вина юон - туж урод (алама, начар), умойтэм уж. Та верамез чакласа, котькинь но монэн соглас луоз, дыр. Юонлэсь уродзэ удмуртлэн дышетӥськем муртыз кемалась шӧдӥз ини но, соин кызьы ке но нюръяськоно, шуиз. Весь озьы дугдылытэк удмуртъёс вина юса улӥзы ке, ваньзы висьса но элексы луса бырозы. Соин удмурт поэтъёс (книга гожъясьёс) уно стикотвореньяос но гожъяло та уж сярысь. Соос малпало: "Ми гожъям ке, удмурт калык валалоз, марлы ми гожъяськом но, оло, воксё вина юэмысь дугдоз", - шуса. ЪВИИ. Михаил Можгин Удмурт поэзия 1905 ар палан гынэ умой, шонер сюрес вылэ пуксиз. Та дырозь удмурт сяин нэкинь но стикотворенья гожъясь ӧй вал. Котькинлэсь азьло кутскиз гожъяны удмурт поэт Михаил Можгин. Нырысь ик со кутскиз гожъяны удмурт калыклэн вина юса шудтэм луэмез сярысь. Солэн быдэс "Беглой" нимо поэмаез вань. Отын одӥг шудтэм пиосмурт юэм эшеныз но изем. Со вадьсын, олокинь лыктыса, эшсэ вандыса кельтэм. Калык лыктэм но, винаматтэм мае ке, тон вандӥд шуса, туж жугиллям но тюрмае пуктӥллям. Со, тюрмаысь пегӟыса, тэльёстӥ ветлэм пегаса. Дораз бертэмез луымтэ ни. Огпол озьы ветлыкуз, сое шедьтӥллям но, стражникъёс пыӵалэн ыбыса вииллям. Озьы чик юнме (напрасно) бырем вина юонэн йыринь шудтэм адями. ЪВИИИ Векшина Акулина Шудтэм вина юисьёс сярысь гожъя та вадесын удмурт поэтесса Векшина Акулина. Со пинал поэт али. Тани солэн стикотвореньяез: Вина быдтэм улэмез Иван куное ветлэм, Визьзэ быдтымон юэм, Бертыса жугиськыны куськем, - Кышнозэ пуртэн бышкалтэм. Кышноез пограм кулыса, Визьтэм картсэ каргаса. Нылъёсыз кышкаса пегӟиллям. Лушкем урамын бӧрдӥллям. Иванэз тюрьмае пуктӥллям, Вылаз рестан дӥсь дӥсяллям, Пыдъёссэ жильыен думиллям, Пегӟемез мияз лу шуиллям. Нылъёсыз кылиллям калыке, Ветлӥллям, чурыт кыл кылыса. Одӥгез соосыз мыжгоз, Мукетыз соосыз чабкоз. Зэм (чын) ӧвӧл кожаськоды-а Векшиналэн таӵе гожъямез? Та сяна но солэн уно мукет стикотвореньяосыз. Котькудаз но со удмурт кышноосыз жаля. Куанеръёс! Соос юонэн нерад луса уло. Пичи коркан чаг тыл ӝуа, Чаг тыл ӝуа, коркаез ӵынатэ, Чаг тыл дурын кышномурт пуке, Кышномурт пуке, киуж ужа. Ӵыжыт бамез солэн кӧсэктэм, Юись картлы бызьыса, Сьӧд йырсиосыз куанерлэн пурысьтам, Уен нуналэн куректыса. Сыӵе шудтэм кышноосмы ачмелэн туж уно! Кудӥз, ачиз ик вина пӧзьтыса, картсэ винаен сектаса, ассэ шудтэм каре. Озьы гожъяло та сярысь удмурт поэтъёс. Соослэн ас яратон калыксэс туж визьмамзы потэ. Вордӥськем калыксы умой, ӟеч мед улоз шуса туртто соос... ИЪ Куштэ вина пӧзьтондэс! Тӥ табере адӟиды ини: ма мында вина дунне вылэ урод ужъёсыз кылдытэ, ма мында калыкез шудтэм каре, ма мында удмуртъёс курадӟыса уло. Та верамелы визьмо адями оскоз, визьтэмез, оло, пеляз ик уз поны. Ӵок! Оло, ваньмыз удмурт калык визьтэм луса быремын ӧвӧл али. Оло, солэн кӧня ке визьмыз но вань на али. Оло, со но Финляндия сеен, вина юэмлэсь дугдытскыса, ас улонзэ чебер, шудо тупатоз. Собере быдэс дуннелы сано луоз. Мон ӧтисько вань удмурт калыкез: "Куштэ чаляк (ӝог) вина пӧзьтондэс, эн юэ ни сюмыкъёстэс. Вина юса ветлытозь, ветлэ дышечкон корка, книга лыдӟе, люгыт дуннее потэ!.. Пиналъёстэс ваньзэс дышечкыны ыстэлэ (лэзьялэ)!" "Удмуртнефтьлы" - 25 Сӥё-дано медаль басьтозы "Удмуртнефть" АО-ысь устоосыз пӧлысь устоосыз ужасьёс. Медаль сётэмын луоз 15 ар но солэсь ятыр стажъем му вӧй кыскисьёслы. Та наградаен озьы ик пусйыны чакламын адямиосты, техникаез, оборудованиез утись муртъёсты, шуге-леке шедён учыръёсын асьсэды кышкатэк возисьёсты. Ватонэз ӧвӧл, нефтен ужан ӵемысь герӟаськемын луэ пӧртэм пумо шуг-секытъёсын, куалектӥд ке - ачид но бырод, эшъёстэ но сьӧрад кыскод. Медаль но сӥё-дано ним вӧзы сётӥськоз 24 пичи уждунъем коньдон премия. Кивоштӥсьёс - отличникъёс Му вӧй поттон удысысь валтӥсь специалистъёсты табере дася Удмурт госуниверситет. Витетӥ курсын дышетскисьёс, государственной экзаменъёссэс сётыса, табере басьтӥсько дипломной ужъёссэс дасян борды. Кызьы шуиз факультетлэн деканэз А. Я. Волков, 27 студент пӧлысь куинез гинэ "3" басьтӥз, кылемез - "4" но "5". Арысь аре вылӥ отметкаослы гинэ дышетскизы Россиысь Президентлэн стипендиатэз Николай Чирков, "Удмуртнефтьлэн" стипендиатъёсыз Владислав Лекомцев, Андрей Мерзляков, Алексей Лялькин. Егитъёслэсь тодон-валанъёссэс эскеризы "Удмуртнефть" АО-лэн Директоръёсызлэн советсылэн кивалтӥсез В. И. Кудинов, "Удмуртнефть" АО-лэн генеральной управляющиезлэн нырысетӥ воштӥсез В. А. Шмелев но мукетъёсыз. Соослы вуоно кивоштӥсьёссылэн валэктонъёссы кельшизы. Н. БОРИСОВА. Николай Лебедев: "Ми утиськом калык коньдонэз" Странаын выльдӥськон кутскемен, тросэз экономика удысэз эскерись-чаклась ёзъёс лябӟизы яке чылкак быризы, шуом, райкомъёс ик яке калык контроль. Кырсь сямо адямиослы бадӟым эрик кылдӥз калык ваньбурез тус-тас карыны, кизэс бюджетэ лэзьыны. Валамон. Государство тае чиданы ӧз быгаты. Соин ик 1996 арын 25 июле Россиысь Президентлэн "РФ-ын кун эскеронэз радъян вылысь ужрадъёс сярысь" нимысьтыз Указэз потӥз. Отын косэмын вал РФ-ысь Коньдон ужпумъёсъя министерстволэсь Контрольно- ревизионной управленизэ пыртыны кун финансовой эскеронъя огъя системае. Мар со сыӵе управление? Кыӵе ужпумъёсты быдэсъя? Кыӵе солэн кужымез? Со сярысь туннэ лыдӟисьёсмылы маде Николай Лебедев, Российской Федерациысь Коньдон ужпумъя министерстволэн Удмурт Элькунъя Контрольно-ревизионной управлениезлэн кивалтӥсез. - Нимызъя ик валаны луэ, милям управленимы коньдон удысэс эскерыса-чакласа возьыны кулэ шуыса. Пыр-почгес ке верано, быдэстоно ужпумъёсмы пӧлы нырысь пыро: - министерствоослэсь, предприятиослэсь, организациослэсь но учреждениослэсь кун коньдонэз утемзэс но сое уже кутэмзэс эскерон; - ваньбур поттӥсь ёзъёслэсь ужамзэс правоез утёнъя органъёслэн куремзыя эскерон; - юридической ёзъёслэсь коньдонэн государство косэмъя ужамзэс эскерон. Миым тани ортчытӥм 656 ревизия, 531-зэ - бюджет чотын улӥсь учреждениосын но 125- сэ асьсэос ваньбур поттӥсь ёзъёсын. - Кытын но кыӵегес со эскеронъёс вал? - Кылсярысь, Удмурт Республикаысь Правительстволэн куремезъя, кызяз районъёсын но городъёсын эскерим, кызьы уже кутӥсько Коньдон ужпумъёсъя министерстволэн нылпиослы юрттэт сётон вылысь висъям вексельёсыз. Та эскеронъёслы йылпумъянъёс лэсьтэмын вал Правительствоын но куд-ог интыосысь администрациосын. Правительство интыысь кивалтӥсьёслэсь кылзэс чурыт гинэ юаз нылпиослы пунэме кылемзэс 1 декабрёзь ваньзэ тырыны косӥз. - Та вакытэ нокинэ но уд паймыты уждун, пенсия, стипендия ӝегамен. Со дыре ик куд-ог кивалтӥсьёс та ужлы висъям коньдонэз асьсэлы пайда поттон понна палэнын бергато. Тӥляд управлениды та ужпумен кызьы ке коть выре-а? - "Кызьы ке" гинэ ӧвӧл, ми та удысэз ялан но туж сак чакласа возиськом. Кылем арын 678 эскерон ортчытэмын. Ми шараямы: 35 учреждениын но организациын уждунлы но стипендилы чаклам коньдон пӧлысь 1005,4 миллион манетэз воксё мукет уже кутэмын. Со сярысь ивортэмын вал республикаысь прокуратурае, Правительствое, Ужъя комитетэ но интыосысь организациосы. Кылем декабре эскеримы вань районъёсты, городъёсты но 6 министерствоосты, кызьы отын уждун тыро бюджет чотын улӥсь учреждениосын. Жаляса верано луэ, татын но тырмымтэос шараямын. Укмысаз районын но городын "сьӧлыкаллям" 386,6 миллион манет тыр со пӧлын Завьял ёросын - 10 миллион манетлы, Юкаменск ёросын - 18,1 миллионлы, Вотка городын - 3,8 миллионлы. Милесьтым ивормес Правительство лыдэ басьтӥз но 11 райгорфинотделъёслэсь кивалтӥсьёссэс кыл кутытӥз. Огъя верано ке, ми кылем ар ӵоже 304 учреждениосты но организациосты эскерим но 54,1 миллиард манет тыр ыштонъёс шараямы, со пӧлысь данакез - бюджет чотын улӥсь учреждениосын. - Кыӵе тырмымтэос ӵемгес пумиськыло, Николай Иванович? - Мон соосты кык пӧртэмлы люкысал. Нырысь ик, коньдонэз бюджетэн яке сметаен чакламтэ ужъёсы кутон. Татчы пыртыны луоз документъёстэк ваньбур басьтонэз, уждун, командировочной коньдон нормаен чакламлэсь трос тыронэз, мултэс ужасьёсты возёнэз, юнме понна премиос сётъянэз. Мукетъёсыз меӵак герӟаськемын коньдонэз но ваньбурез лушканэн но тус-тас каронэн. Валамон ини, таиз законэз тӥян луэ. - Кыӵе бен мугъёссы та тырмымтэослэн? - Огласянь учкыса, соос пото финансистъёслэн ляб тодон-валанъёссы бордысь, азьтэмзы бордысь яке огшоры кырсь сямъёссы но. Мукетсэ пусъёно ке, государство ласянь эскерон выльдӥськон вакытэ туж лябомиз. Шуом, быдтэмын калык контроль. Нош со туж бадӟым но йыртэмасьёс понна кышкыт кужым вал. Куд-огаз ведомствоосын но предприятиосын туж ляб ужало яке воксё быдтэмын эскерись органъёссы. Государствоын огъя эскерон уж но умойтэмгес радъямын. Республика аслэсьтыз ёзъёссэ эскере, район - аслэсьтыз, сельсовет - аслэсьтыз. Но одӥг тусьтыысь сиськисьёс ог-огзэсты вӧсь карозы шат? Ярам коть, милям управленимы быгатэ ваньзэсты вылӥысен улӥозь эскерыны. - Та пумысен юам потэ, Николай Иванович. Тӥляд управлениды Россиысь министерстволэн ёзэз луэ бере, тӥ республиканской органъёслэсь но кылзэс юаны быгатӥськоды. Соин валче тӥледды "канжатыны" уг туртто-а интыысь властьёс яке кызьы ке вӧсь карыны? Тӥ Удмуртиын улӥськоды но ужаськоды ук... - Та дырозь номыр сыӵеез ӧй вал ай. Марысь мар ке, ми асьмелэн кужыммылы оскиськом: закон ми палан ук. Нырысь ик, ачид гинэ эн сьӧлыка, астэ пыкылыны муг эн сёты. - Тани асьтэлэн верамдыя ик, трос миллиардъёсын герӟаськем тырмымтэосты но йыртэманъёсты тӥ шараяськоды. Нош мае ке коть берыктыны луэ-а на? - Та ласянь ми матысь кусып возиськом законэз утись органъёсын. Тани миым но следствилы сётэмын 50 уж, кудъёсыз герӟаськемын 50 931,5 миллион манет тыр ыштонъёсын. Ӝутэмын 26 уголовной уж. Со сяна, 393 кивалтӥсь кыскемын административной но материальной кыл кутон улэ. Государстволы берыктэмын 18,5 миллиард манет. Со пӧлысь 500 миллионэз "кесемын" меӵак янгыш муртъёслэсь. Тӥни озьы ик ужаськом быгатэммыя. Та секыт вакытэ, ваньмыз сураськем-пожаськем дыре кин ке но утьыны кулэ ук калык коньдонэз. Г. ТИХОНОВ. МЕНЯЕТСЯ с/о на массиве "Загородный" по Як.-Бодьинскому тракту 5 соток, дом 5һ0 с верандой 2һ0, баня, стайка, кессон, сортовые посадки - на квартиру или дом. Или продается. Тел. 21-88-56, вечером. Библиотекаослэн ужан амалъёссы ЛЫДӞИСЬЁССЫ ШЫРЫТЭСЬ Ижевскысь В. Азин нимо библиотекае ӵем вуылӥсько. Алигес нош жингыртӥз "Дэменлэн" одӥгез ӟырдыт юрттӥсез Т. М. Лямина: ӵуказе, пе, дорамы лыктоды-а. - Умой ӧвӧл весь ветлыны, шуисько. - Библиотекае ветлэмлэсь кепыраны уг яра,- валэктэ Тамара Михайловна.- Ми дорын ӝытлы быдэ пукисьёсыз но туж трос... - Мар бен ӵуказе луоз? - Выль книгаосын, К. Гердлы сӥзем гожъямъёсын тодматом. Атай музъеммес утисьёсты но ӟечкылалом, дыр. Одно ик витиськом. Куӟебай Гердлы сӥзем статьяды сярысь но, оло, мадёды... - Я, иське, мынӥсько... Лыдӟиськон залазы пыри но пайми: книгаоссы азьвыллэсь шӧдскымон тросгес луиллям. Татчы ветлӥсь писательёс уго ӟеч сям кутӥзы ни: лыдӟисьёсынызы пумиськыны лыкто ке, библиотекалы одно ик кузьмало асьсэлэн гожтӥськеменызы книгазэс. Соосты татын ужасьёс люкало адӟымон интые, борддоре. Шӧдӥське: уг тэро ни дуно кузьымъёс. Ӝоген выль стенд пуктоно луозы. Книгаоссэс кузьмаллям Зоя Богомолова, Роза Яшина, Олег Поскребышев, Анатолий Уваров, Леонид Емельянов, Алексей Ельцов, Владимир Тяптин но трос мукетъёсыз. - Витьтон пала сыӵе книгаосмы люкаськизы ни, - валэктэ библиотекалэн кивалтӥсез Нина Петровна Учанова.- Писательёс пумен узырмыто милемыз. - Нош таиз кыӵе книгаос ваем? - юасько директорлэсь, борддоре ошем тау каронэз лыдӟыса. - Паймымон адями со, Ираида Борисовна Половикова,- шуныт кылъёсын валэктэ Н. П. Учанова.- Шаерамы берытскемын Прибалтикаысь. Пумен ӵем ветлыны кутскиз библиотекаямы. Лыдӟиське, пуке, пӧртэм литератураен тодматске. Нош огпол мыным вазиськиз но юа: тӥледлы книгаос кулэ ӧвӧл-а? Туж кулэ вылэм но, шуисько, ми коньдон ласянь начаресь. Нош мон, шуэ Ираида Борисовна, сёто дунтэк. Кузьмало, гажаса. Мыным туж яра тӥляд библиотекады... И. Б. Половикова ваем 122 книга! Ай кыӵеесь соос! Михаил Шолоховлэн, Олесь Гончарлэн, мукетъёсызлэн трос томъёсын сочинениоссы. Туж чеберъяса, дуно бумага вылэ печатламын. Прибалтикаын быгато уго устоесь книгаос поттыны. Гажано лыдӟись кузьмам Бадӟым Ӟуч Энциклопедизэ но. Ньыльдон ёрос книгаез - ӟуч но кунгож сьӧрысь писательёслэн гожъямъёссы. Номырин дунъянтэм узырлык понна пумтэм тау каро библиотекаын ужасьёс. Тулыс шунды шоры кадь кыстӥсько та лыдӟон корка котыре уно адямиос. Соосты кыске, вылды, библиотекаын ужасьёслэн либыт сямзы, шырыт сюлэмзы, пырем муртлы шуныт вазиськемзы. Ӵапак соин ик 88 книгазэ В. Азин нимо библиотекалы кузьмаз Эмилия Павловна Демакова но. Туж тунсыкоесь соос, вунонтэм вашкала сузьетъёс. Тросэз герӟаськемын инкуазез эскеронэн, тодонэн. Озьы ик мукетыз лыдӟись, Светлана Александровна Артамонова, дунтэк сётӥз 33 книгазэ. Ваньмыз сямен - нылкышноослы сӥзем романъёс. Та начар улон вакытамы лыдӟиськон коркалы со туж бадӟым юрттэт! Библиотека юн кусып возе мӧйыосын но, нылпиосын но. Соослэсь киужъёссэс возьматъяло адӟытонъёсын. Али тани паймымон выставка дасяллям 141 номеро нылпи комбинатысь покчиослэн киужъёсынызы. Отын ортчытӥллям вылэм чукъёслы сӥзем аспӧртэм бал. Пиналъёс пӧртэм басма юдэсъёслэсь-чукъёслэсь вурылӥллям синмез ас бордазы кыскись дӥсьёс. Кыӵе шумпотоно быгатэмзылы. Модельёс лэсьтонэ мылысь-кыдысь пырисько, эсьмаса, пичи пиос но. Туж но туж ушъямон дӥсьёс пӧрмытӥллям Илья Лукиных, Тима Гаврилов, Игнат Поляков но музонъёсыз. Меӵак верасько: та пинал усточиос троссэ нылъёсты но азьпалтӥллям. Кин тодэ, соос азьланяз, оло, тодмоесь дӥсь вурисьёс но луозы ай. Трос выльзэ тодӥ-адӟи та библиотекалэн музон сэргысьтыз но. Тамара Михайловна возьматӥз комнатазэс. Али татын усьто удмуртъёслэсь улэм-вылэмзэс, юрт котырысьтызы куд-ог тӥрлыкъёсты, дӥськутъёсты возьматӥсь комната. Асьме историен, шаерен герӟаськемын со. Библиотекарьёслэн эшсы - тодмо суредась Герман Иванович Прорехин юромо та сэреглы суредам В. М. Азинлэсь тусбуйзэ. Весяклы сётэм библиотекалы. Алнаш ёросысь Туймыйылысь Ильинъёс кузьмаллям чалма. Туж векчи сӥньыслэсь, паймымон вольыт но чеберъяса куэмын. Куэм дэремъёссы но вань. Нош огзэ шортдэремез вурем ачиз Тамара Михайловна Лямина. Син шоры йӧтымон пӧрмем. Озьы пумен, каньылля узырме ини комнатазы. Нош ми пумиськон нуналэ уката бадӟым кузьым вуттӥзы та сэреге. Тупаны ведь кулэ: тазэ но адӟыны кемдӥз. Удмуртлык понна ужасьёс пӧлысь одӥгез тодмо врач чебер, шаплы нылкышно Елена Аркадьевна Ботникова бадӟым бинетэн пыриз. Люкаськем калыкен ӟечъяськиз но Тамара Михайловнаез ӧтиз. - Ойдолэ, учком выжлёгетмес. Тупалоз-а, яралоз-а? Поннам малпай: кызьы, пӧй, уз тупа шырыт сюлэмо нылкышнолэн кузьымез! Кечат-вамат гожъёсын куэмын. Туж чебер, вольыт. Выж вылэ вӧлдӥзы но быдэс сэрег ик югытомиз кадь. Та удмурт сэрегын но возьматонъёс радъямын ни. Пичигес ӝӧк вылын интыямын "Ижсталь"" огазеяськонын ужам усточилэн Неля Адиятовалэн туж чебересь киужъёсыз. Зэмос мастерлэн кадь пӧрмиллям театрлы маскаосыз. Нош макем чебер адӟисько мульы кӧмъёслэсь лэсьтэм арбериос! Паймымон усто "Шуд ваись тылобурдоез", чашаосыз. Кыӵе ке выжыкылысь суредъёс кадь адӟисько. Н. Адиятовалэн дуно киужъёсыз возьматъямын ни шаерысьтымы кибашлыослэн В. Сивков урамысь юртазы, Москваын но, музон городъёсын но. Шумпотыса, капчи мылкыдын бертӥ пумиськонысь. Быгато ик В. Азин нимо библиотекаысь нылкышноос калыкен ужаны. Туж ярато лыдӟисез но, гожъясез но. "Удмурт кенеш" огазеяськонлэн Октябрь ёросэз но татын пӧртэм-пӧртэм ужрадъёс ортчытъя. Та библиотека устоесь кусыпъёс тупатӥз ини финн-угор выжыысь калыкъёсын но, тужгес ик - Венгриысь эшъёсынызы. Кирилл ЛОМАГИН. Умой адямиос Ӵыжтэм вӧен кадь шунтӥзы Таза муртлэн тодаз лыктэ меда эмъяськон юртъёс сярысь, кӧня сюосын, сюрсъёсын висись калык кылле отын. Султыны копак быгатӥсьтэмезлэн, туж лябӟемезлэн ымныр вадесаз сьӧд эзель, паськыт бурдъёссэ вӧлъяса, пӧсь лулэз возьма. Туж потэ, дыр, сое ӝоггес ишкалтэмез но сьӧраз инсьӧры басьтэмез. Нош адямилэн сётӥськемез уг поты, улонзэ ыштонтэм понна, одӥг сӥньыс нюжа борды но кырмиськыны дась. Нош ветлыны быгатӥсез ӵемысь сылэ укно дурын, ӝожмытэсь, мӧзмытэсь синъёсын вожъяськыса учке ульчаысь мынӥсь-ветлӥсь калык шоры. Ачим но эмъяськон юртъёсы ӵем сюрылӥсько бере, мыным со ваньмыз туж тодмо. Аслэсьтым секыт малпанъёсме кызьы ке но буйгатон вылысь, урод мылкыдме пыд улам лёгыны малпаса вамышъясько Ижевскысь республиканской больницалэн паськыт коридортӥз. Адӟисько: пумитам лыктэ веськрес мугоро, пыӵ кадь капчи лёгаськыса, тӧдьы халатэн туж йӧно кышномурт. Уг тодӥськы малы, но та нылкышно шоры мынам туж потӥз ваземе. Малпасько, ымам, пӧй, уз чабкы, оло, со удмурт анайлэн вордэм нылыз. Нош пумитам шедем мурт пальпотыса туж либыт куараен шорам капчияк вазиськиз. Соку тодӥ, со пульмонология отделенилэн заведующиез Галина Андреевна Яковлева вылэм шуыса. Шорам вазиськем анай кылъёс сюлэмме ӵыжтэм вӧен кадь шунтӥзы, нош секыт малпанъёсы кӧня ке дырлы соку ик тӧлӟизы. Тӥни кыӵе кужымез вылэм яратоно но дуно анай кылмылэн. Висисьлэсь нырысь-валысь одно ик лулзэ, пе, эмъяно, собере - висёнзэ. Нош лул понна кык-куинь гинэ шуныт кыл кулэ. Соинтэк-а висись мурт эмъясь врачез шоры Инмар яке вордэм анаез шоры сямен учке, солэн быгатэмезлы, тодэм-валамезлы оске. Галина Андреевнаен пумиськеме бере, сюлэмам та отделение сярысь гожтон мылкыды пуромиз. "Удмурт дуннеез" лыдӟись эшъёсы мед, пӧй, тодозы, кыӵе чылкыт сюлэмо, чебер мылкыдо удмурт нылъёс но пиос ужало эмъяськон юртъёсын. Висись шоры эмъясь мурт вордӥськем кылыныз вазиське ке, кыӵе каньыл луэ сюлэмызлы, висёнэз но ӧжытак басыла кадь. Ачиз сярысь гожтоно герое вераны уг дырты, со понна данъяськыса вера ӵош ужась эшъёсыз, кивалтӥсьсы сярысь. Та вакытэ эмъяськон интыосын капчи ӧвӧл, шуэ со. Тани милям кивалтӥсьмылы, Григорий Ильич Ивановлы но, пе, питранэ шедем коньылы сямен бергано-сюлмаськоно луэ. Урод югдур оборудованиез выльдонэн, коньдон ӧвӧлэн, эмъюмъёс, сиён-юон, изён котыръёс басьтонын шуг-секытъёс кылдо. Озьы ке но, котькыӵе секыт учырысь потыны татын амалъёс утчало, ужасьёслы но, висисьёслы но улонзэс, эмъяськонзэс быгатэмзыя умой радъяны тыршо. Ас удысаз Галина Андреевна дасо арлэсь кема ужа ини. Нунал ӵоже кинэн гинэ солы пумиськоно но кытчы гинэ вуттӥськоно ӧвӧл. Г. А. Яковлеваен ӵош ужа 4 врач, 11 медсестра, 7 санитарка. Ваньзы соос мыло-кыдо тыршо, висисьёслы эмъюмен гинэ ӧвӧл, ӟеч кылын но юртто. Шумпотоно: ардлыдо эшъёссылэсь адӟем каро егитъёсыз. Ачиз сярысь но мар но со тодӥ. Галина Яковлевна вордӥськемын Яр районысь Сяннял (Нижний Укан) гуртын. Школаез зарни медален йылпумъяз. Котькытчы шаплы басьтӥськись ныл мединститутэз бырйиз. Сыӵе мылкыдзы вал анай-атайлэн но. Бадӟымез сьӧры кыстӥськизы кыкез пичиосыз но, та институтэз ик йылпумъязы. Семьяысь одӥгез луиз дышетӥсь, мукетыз - инженер. Озьы та удмурт семьяын витезлы ик нылпилы вылӥ тодон-валан басьтыны удалтӥз. Институтысь та чебер визьмо нылашез синйылтӥз Шаркан районысь Улӥ Тылой гуртысь татчы ик дышетскыны лыктэм студент Владислав Яковлев. Таизлэн но семьязы бадӟым. Тямыс нылпиосты утиллям-вордӥллям, ваньзылы ик вылӥ тодон-валан сётыны быгатӥллям анаен атай. Кык егит сюлэмъёс ог-огзытэк улыны ӧз ни быгатэ, кузпалъяськизы. Егит специалистъёсты ужаны ыстӥзы Шарканэ. - Самой чебересь, шулдыресь аръёсмес ми отчы кельтӥмы, - вера Галина Андреевна. - Отын ми юнмамы, кыдамы, трос ӟеч эшъёсын тодматскимы. Адямисыз валаны но гажаны дышимы. Али но Шарканэн герӟаськем трос чебересь тодэ ваёнъёсмес сюлэмамы возиськом. Отӥяз Яковлев кузпалъёслэн улон сюрессы Ижевске вуттэ. Владислав Степановичез басьто тазалыкез утёнъя министерствое. Ог-огзэс валась кузпалъёс кыкназы но уж пӧлы выемын. Удыссы пӧртэм (В. С. Яковлев - тазалыкез утёнъя министрлэн юрттӥсез луэ), нош сюлмаськонъёссы одӥг кадесь - калыклэсь тазалыксэ утён. Кузесь тол ӝытъёсы соос тупен-тупен сэртто-пертчо асьсэлэсь сюлэмшугъяськытӥсь ужпумъёссэс. Шутэтскон, ваньмон дыръёсазы ветло удмурт спектакльёсты учкыны. Ярато ческыт пӧраськыны, асьсэлэсь ӵыжы-выжыоссэс, сузэр-вынъёссэс кунояны. Нош гужем, мазэ веранэз, ужлэн пумыз-йылыз ӧвӧл: сад-бакчаын выроно, мушъёсыз утялтоно. Сад-бакчаысь корка пушкысь мебельзы но картэзлэн но пизылэн быгатӥсь киосынызы, пе, лэсьтэмын. Кык нылпи будэтӥллям та шудо кузпалъёс. Пизы Москваысь инженерно-физической институтэз йылпумъям. Отын ик улэ но ужа. Нылзы быръем анай-атаезлэсь ик институтсэс. Али Москваын - ординатураын дышетске. Тӥни сыӵеесь соос - Яковлев кузпалъёс, тазалыкез утён удысысь адӟем карымон адямиос. Удмурт калыкмы пӧлын тросгес мед луозы таӵе синмаськымон, адӟем карымон вылӥ тодон-валанэн адямиос. Нош соос пульмонологической отделениын но вань гинэ, кудъёсыныз луэ данъяськыны но, сюлэмез но буйгатыны, кудъёсыз котьку дась висисьлы юрттэт сётыны. Галина Андреевналэн ӟеч, шырыт сюлэмыз, шуныт мылкыдыз котьку мед шунтозы висисьёслэсь сюлэмзэс. Ӟеч нимыз мед кылӥськоз ымысь ыме, пельысь пеле, газет бамысь газет баме мед поталоз солэн котьку пальпотӥсь тусбуез. Бадӟым тау больницаысь вань ужасьёслы монэ утялтэмзы но эмъямзы понна. В. Васильева. Ува палась иворъёс Школалы - даур Чекан школа туэ 100 ар тырмонзэ пусйиз. Нырысь кылдытэмын вал земской училище, нош бӧрысьгес тямыс классъем школа. Чеканысь нылпиос тодон-валан басьтонзэс азьланьтӥзы Удугучин шор ёзо школаын. Сьӧр гуртъёс котькугес ик удугучинъёслэсь висъяськылӥзы: дышетсконын но, спортын но. Аръёс ортчемъя, Чеканын но шор ёзо школа кылдӥз. Пу юрт кирпичен воштӥськиз. Озьы ке но, февраль толэзе вӧл-вӧл школаын улмолы гинэ но усьыны интыез ӧй шедьысал. Азьвыл дышетскемъёс тодазы ваизы пинал дырзэс. Та ӝытэ Чеканысь агрошколаын трос кузьымъёс кузьмазы, шуныт кылъёс веразы, нош Воткинскысь музыкально-педагогической колледжысь преподавательёс но Ува культура юртысь "Юность" ансамбль быдэс ӝыт ӵоже лыктэм куноослэсь мылкыдзэс шулдыртӥзы. Йыртэмасьёс кутэмын Кылем толэзьлэн шоразгес Уваын войнаын выллем вал. Ижевскысь вуэм омоновецъёс котькуд сюрес вылын автоматъёсын сылӥзы. Нош мугез сыӵе вылэм: кык таджикъёс кык нылпиез, кык егит воргоронэз вииллям, егит кузпалъёсты пуртэн бышкаллям но быдэс корказэс сутоно кариськиллям. Сӧсырмем кузпалъёс больницае вуттэмын. Кӧня ке ар талэсь азьло Увае нырысетӥ таджик вуиз. Шӧдӥз, лэся, удмуртъёслэсь лякыт сямзэс, сьӧраз мукет эшъёссэ но ӧтиз. Берло дыре соос дасо мында люкаськизы, вузкарон ужзы но ӧръяськиз. Шуныт палась вуэмъёс кивалтӥсьёслы но кельшизы. Узыръёсызлыгес пропискаен юрт, транспорт басьтыны лэзизы. Таӵе ужбергатӥсьёслы удмурт нылъёс но синмаськизы, нош кык ныло-пиё кышномурт картлы пыртӥз. Ужзы эшшо но азинскиз. Вузкарон удыссэс паськытатон вылысь юрттыны ӧтиллям на кык воргоронэз (ӵыжы-выжыоссэс). Татысен кутскиз, калыкъёс верамъя, адӟемпотостэм карон. Йыртэмасьёсты кема утчано ӧз луы, дорысьтызы ик кырмизы. П. ВАСИЛЬЕВ. Правительствоысь иворъёс Правительстволэн кенешаз эскеремын промышленностьын политикая концепцилэн но озьы ик эстӥськонэз но электрокужымез пайдаё уже кутонъя законлэн инъетъёссы. Ас малпанъёссэс но ӵектонъёссэс веразы вузкаронъя но улон-вылонын юрттэт сётонъя министр П. Пономарёв, промышленностья министр В. Долгов, Кун Кенешлэн депутатэз, ИжГТУ-лэн ректорез И. Абрамов. Эскерем бере документъёс тупатъяны келямын на. *** Туэ трос лымы усемен, уно сюлмаськонъёс кылдо. Лымылэн зӧкталаез, мукет аръёсын ӵошатыса, туэ 30-50 процентлы тросгес. Со шуак шунаны кутскиз ке, кышкыт югдур кылдыны быгатоз. Шудтэм учыръёсты азьпалтон вылысь, али ик ужрадъёс кутоно. Та ужпумлы сӥземын вал тудвуэз чакланъя комиссилэн кенешез. Сое нуиз Правительстволэн Тӧроезлэн нырысетӥ воштӥсез Юрий Питкевич. Азьло аръёсы сямен ик та нуналъёсы уй но нунал ас ужзэс нуо Граждан обороная но Кышкыт учыръёслэсь утиськонъя штабъёс, районъёсын но городъёсын ужало тулыс тудвуэз чакланъя комиссиос. Куд-ог шуръёс вылын та нуналъёсы радъямын луозы йӧэз пуштытон ужъёс. Вань та ужпумъёсъя Кышкытлык учыръёслэсь утиськонъя комитетлэн комиссиез меӵак ужрадъёс чаклаз. Удмурт Республикаысь Правительстволэн Тӧроезлэн секретариатысьтыз пресс-центрез. Пыдыз ӧвӧл - доре вуэ Кин со, мар со сыӵе? Ма, тани ук, кияды кутэм "Удмурт дунне" газет ик. Мукетъёсыз но газет-журналъёс лыдӟись доры пыдын уг вуо, соосты нулло почтальонъёс. Зор-кот, кезьыт куазь шоры учкытэк, тыро сумкаосын вамышто соос урамъёс кузя. Бен, тыро шуэмысь, туала вакытэ со трослы капчиёмиз. Но лыдӟисьёс понна "ожмаськон" почтальонъёс пӧлын уг чалмылы. Соосты пӧртэм конкурсъёсын но гочато угось. Удмурт Республикаысь Почта пыр кусып возёнъя федеральной управление (УФПС) 8 Март праздник азьын (почтаын тросгес нылкышноос ужало угось) 1998 ар понна газет- журналъёслы гожтӥськонъя йылпумъянъёс лэсьтӥз. Управленилэн кивалтӥсезлэн воштӥсез С. К. Верченов верамаз пусйиз, газет-журналъёслы гожтӥськонъя бускельёсмы Башкортостан но Татарстан дорозь асьмелы кыдёкын ай. Башкортостанын, кылсярысь, 1000 улӥсьлы быдэ 553 газет-журнал усе. Нош Россиез басьтоно ке, та лыдпус 232-озь гинэ вуэ. Шаерысьтымы ӟечен пусйыны луоз Вавож, Грах, Дэбес, Каракулино, Кияса, Шаркан но куд-ог мукет районъёсты. Таосаз 1000 адямилы 263-ысен 394-ёзь газет- журнал усе. УФПС кыкетӥ арзэ ортчытэ ни "Устоез почтальон" конкурс. Кылем аре сямен ик, таяз арын но гожтӥськонъя тужгес ӟеч ужамзэ возьматӥз Як.-Бодья селоысь почтальон Т. Г. Колодкина. 1574 мурт гожтӥськытӥ со шаерамы но Россиын потӥсь пӧртэм газет- журналъёслы. Конкурсын вормисе потэмез понна со пусъемын видеомагнитофонэн, кылем арын солы кузьмазы вал телевизор. Дуно кузьымъёсын пусъемын мукет но почтальонъёс. "Удмурт дунне", "Удмуртская правда" но "Известия Удмуртской Республики" газетъёс озьы ик гожтӥськонъя конкурс ялӥзы вал. Устооссэ почтальонъёсты соос но пусйизы дуно кузьымъёсын. Л. Малых. Т. Г. Колодкинаез ӟечкылало УФПС-лэн кивалтӥсез Ю. М. Кайгородов но солэн воштӥсез С. К. Верченов. Шаркан районысь почта пыр кусып возёнъя узеллэн кивалтӥсез В. А. Мушин. "Удмурт дуне" газетлэн валтӥсь редакторез А. П. Шкляев ӟечкыла газетэнымы эшъяськись устооссэ почтальонъёсты. Туспуктэмъёсыз В. Камашевлэн. Оскон ДУНТЭК ВУЗАМ АРЪЁС Кӧня иськем сюресъёсты ортчи меда сизьымдон вить ар ӵоже улытозям, мае но адӟыны ӧз кылды. Вань со шуг-секытъёс пыр потэмме син азям пуктыса, пушкы ик тыре... Дас куинь арескам кутски ужаны. Ми, пинал макеос, парсь возьмаськом вал, мӧйыосын ӵош бусы ужъёсы но ветлылӥм. Ӵем дыръя уйёсты отын ик ортчытоно луылӥз. Бусыын ик сиён пӧзьтылӥзы, сюдылӥзы. Али ке но уг вунэтӥськы одӥг учырез. Эшеным Таня Феофановаен ӵош одӥг амезё герыен музъем гырим. Колхозмылэн председателез Прокофий Иванович Усманов ӟеч ужаммы понна милемды ӝыны метр лентаен шумпоттз. Кытчы керттыны ёрмим, адямиос мед адӟозы шуыса, валмылэн изнэсаз думим. Ужамы Пичи Пурга ёросысь Ленин нимо колхозын, Улысь Кечоллэн музъемъёсаз. Сизьым классэз йылпумъяме бере, конторае учётчике кутӥзы. Малпало вал ини счетоводъёслэн курсъёсазы лэзьыны. Отчы мыныса ӧй вутты, трактористкае, пе, дышетскод. Со вал 1939-тӥ - 1940-тӥ аръёсы. Дышетскимы уин, тол куазен. Озьы тӥни пинал нылмуртэ ӝогак пуктӥзы У-2 тракторе. Туж кылзӥськисьтэм вал со, берлань сётэ, ускорительёс ӧвӧл. Нырысь арзэ уг валаськы вал кытӥзэ мар карыны. Нош эстӥськонэз мултэс быдтэм понна ужамысь кельтылӥзы. Урод карыны турттыса, лэся, та тракторен ик ужась воргорон, мон пуксён азьын, клапанъёссэ берыкъя вылэм. Солэн озьы выремез, мыным гинэ ӧвӧл, государстволы но кӧня изъян ваиз. 1943 арын та тракторен ик ужакум шуккиськыны шеди. Ижевске валэн нуыса, киям гипс понӥзы. Быдэс толэзь озьы ветлӥ. Умойтэм бурмем, со киыным али ке но курадӟисько, номыр секыт ужаме уг луы. Со аре ик толалтэ лэзизы монэ Сарапулэ, бригадире дышетскыны. Гужемзэ ини бригадирлы юрттӥсе пуктӥзы. Ар но уг ортчы, нош ик дышетскыны лэзё, таяз учыре - механике, Можгалась вить толэзьем курсъёсы. Секыт ик йӧтӥз соку мыным. Нянь ӧвӧл, дӥськут ӧвӧл. Поездлэн подножкаяз кечырскыса, арнялы быдэ бертылӥсько вал доре. Я, дышетски, ӟеч дипломен гуртам бертӥсько. Но шуг-секытэз азьпалан вылэм ай. Толалтэзэ доставщик луыса весь Ижевске лэзьязы, нош гужемзэ трактористъёслэн бригадирзылы юрттӥсе юнматъязы. Гуртэз но уг адӟылӥськы ни, толалтэзэ Ижевскын ик улӥсько, шутэтскон нуналъёсы гинэ бертылыны кылдэ. Тракторъёслы, машинаослы воштос ёзъёс утчаса, кытчы гинэ вазиськылоно ӧй луы - ремзаводэ, сельхозснабе, мукет интыосы. Мар ке шедьтӥсько, ивортӥсько ини. Валэн лыкто но, со ёзъёсты квартираям нуллӥськом. Собере, тракторен лыктыса, ваньзэ Кечолысь МТС-э келясько. 1950-тӥ арозь озьы ужай, отӥяз нош ик бригадирлы юрттӥсе пуктӥзы. Та удысын сизьым ар тырши на. 1957 арын тракторъёсты колхозъёсы люкизы, соку ини та уж бордысь палэнски. Кытчы табере кариськод? Киы висе, секыт ужаме уг луы, озьы но группа ӧз сётэ. Ӟеч муртъёс сюризы, столовое ужаны интыяськи. Но уждуныз туж ӧжыт вал - 30 манет. Кӧня ке ужаса улыны кошкимы Завьялово ёросысь "Пальниковский" совхозэ. Оло, ваньзэ та сюлэм висёнъёсме ӧй но гожтысал, но пенсия туж ӧжыт тупатӥзы, ужам аръёсы но 36 ар люкаськиллям. 1976 арын пенсие потыса, ужаны ӧй быгаты ни. Нокытчы пыронтэм ӝож потэ, ужась адямиосты кулэезъя дунъямтэзы. Ми шат янгыш сокем секыт аръёсы ужано луиз шуыса? Тазалыкмес, егит дырмес жалятэк, странамы понна, ӟеч улон понна тыршим ук. А. БАЙКОВА. Завьялово ёросысь Пиканы гурт. Бускельёсмы дорын "Ошмес син" - Гондырын Алигес Бадӟым Гондыр культура юртын шулдыр концерт ортчиз. Люкаськем калык азьын быгатэмзэс возьматӥзы бускель Башкортостанысь Бигенеевской школаысь дышетӥсьёс но Татышлы ёросысь музыкальной училищелэн Бигенеевской филиалысьтыз дышетскисьёс. "Ошмес син" коллективен кивалтэ Бигеней школаысь дышетӥсь Светлана Мензариповна Сабанчина. Концерт ваньмызлы туж кельшиз. Ӝыт ӵоже чузъяськизы удмурт кырӟан но эктон гуръёс, бигер крезьгуръёс, ӟуч хороводъёс но мукет. Баянэн шудӥз Флюр Ахметшин, солы юрттӥзы музыкая училищеын дышетскисьёс. Гондыръёс "Ошмес синысь" артистъёслы тау каризы. Отын уго пиналъёссы удмурт кылэз уг дышето ни. Татышлы ёросысь куноос Бадӟым Гондырысь "Тюрагай" ансамблез пунэмзэ концертэн доразя ӧтизы. Табере "Тюрагайёс" но бускель Башкортостанэ дасясько. Пумиськон ӝыт пайдаё но шулдыр ортчиз. Ш. Меншарапов. Куеда ёрос Бадӟым Гондыр гурт. Верало лыдпусъёс Огез висе, мукетыз йыртэма Республикаямы миым 479 сюрс адями паласькись висёнэн курадӟиз. Котькуд сюрс адями пӧлысь 293-ез висиз. Валля арен ӵошатыса, миым 5,9 поллы йылӥз шыр висёнэн (геморрогической лихорадкаен) черламъёслэн лыдзы, коклюшен висисьёслэн - 3 поллы, скралатинаен - 25 процентлы, туберкулёзэн - 18 процентлы будӥз. Дифтериен, дизентериен, вирусной гепатитэн калык ӧжытгес висиз. Республикаямы миым 24754 йыртэман учыр пусъемын, 1996 арен ӵошатыса, 15 процентлы ӧжытгес, со пӧлысь 61 процентэз лушкаськисьёс вылэ усе, йыружъёслэн лыдзы 12-ысен 20 процентозь йылӥз. Кык поллы тросгес ӝегатэмын наркотик вузасьёс. 14,4 сюрс ӝегатэм йыртэмасьёс пӧлысь ӝыныез нокытын уг ужа, соос пӧлын 13 процентэз - быдэ вуымтэос, 11 процентэз - нылкышноос. Ар куспын 13,2 сюрс адями пытсэт улэ кыскемын. Н. Возисов. Спорт Скурыгин - чемпион! Адлерын спортивной амалэн ветлонъя Россилэн тол чемпионатэз ортчиз. 35 иськемез котькинлэсь ӝог ортчиз но дуннелэсь рекордзэ выльдӥз Ижевскысь Герман Скурыгин. Озьы асьме спортсменмы куинетӥзэ ни страналэн чемпионэз луиз. "Знамя" - вылӥ лигаын Тупен хоккеез Воткинскын улӥсьёс валало но ярато. Городлэсь данзэ 20 ар ӵоже ни уте "Знамя" команда. Берло аръёсы со пумен зол но зол "йыгаськылӥз" вылӥ лигае. Туэ тани удалтӥз. Переходной турнирын Воткинскысь хоккеистъёс бӧрсьысь куинь командаосты вормыса, турнир йылпумъяськытозь ик вылӥ лигае пырыны "шудо билет" утӥзы. Соин ӵош ик Россилэсь кубоксэ но басьтӥзы. "Газовик" дасяське Ижысь "Газовик" футбол команда матысь нуналъёсы Кипре кошкоз. Чемпионатлы дасяськонзэ татын со азьланьтоз. Талэсь азьло асьме команда понна шудыны дасяськись футболистъёс люкаськылӥзы ни Болгариын но Турциын. Мукет командаосын шудэмез- пумиськылэмез пӧлысь пусйымонэз Болгарилэсь чемпионзэ, Левеки командаез, 1:0 лыдын вормемез. Ӵапак солы уго Россилэн сборноез миым келяз вал. Нош чемпионатэз "Газовик" мытоз Воронежын 29 мартэ. М. КУЗЬМИН. Герд - Кам тупалан Удмурт калык но иземысь пумен сайка ни. Со доры но ӝужась зарни шундылэн нырысь тылсиосыз пишто. Но ваньмыз со герӟаськемын Куӟебай Гердлы 100 ар тырмонэн. Солы сӥзьыса, котькытын ортчыло пумиськонъёс, ӝытъёс, ӧтчамъёс, конференциос... Бере ӧз кыле Башкорт музъем вылын улӥсь удмуртъёс но. Кам сьӧрысь пӧртэм ёросъёсын улӥсь бӧлякъёсмы люкаськизы "Куӟебай Гердлы - 100 ар" межрайонной научно-практической конференцие. Со ортчиз Янаул ёросысь Шыр (Каймашабаш) шор ёзо школаын. Юнме шорысь та интыез ӧз быръе. Угось Каймашабаш школалэн историез сю арлэсь ортчемын ни. 1896 арын татын усьтӥськиз кыкетӥ ступенё кык классъем школа. Дышетскыны котыр-котыр гуртъёсысь ветлылӥзы. Нош 1902-1908 аръёсы та школаын дышетӥз удмурт калыклэн дано пиез тодмо кылбурчи-революционер Максим Прокопьев. Соин но, дыр, школалэн директорез Узбекистанысь калыкез дышетон удысысь отличник Г. З. Мардамшин люкаськемъёсты вакчияк тодматӥз школалэн ортчем сюресэныз. Мӧзмыт ӧй вал конференциын докладъёсты кылзыны но. Шудек школаысь удмурт кылъя но литературая дышетӥсь Р. М. Гараева но Барабановка школаысь С. Г. Кусниярова веразы Куӟебай Гердлэн улон вакытъёсыз но анай кылэз дышетонын туала ужпумъёс пумысь. Татышлы ёросысь "Азьлань" газетлэн редакторез, писатель Андрей Гильмаев ас вераназ люкаськемъёслэн син азязы пуктыны юрттӥз бугырес пилемо 30-тӥ аръёсты. Нош кызьы вуоно дышетӥсьёсты дасян мынэ? Та ужпум ӝутэмын вал Нефтекамскысь педагогической училищеысь дышетӥсьлэн Т. Р. Гилимзяновалэн докладаз. Мукет тунсыко ивортонъёс сяна, люкаськемъёс шумпотыса кылзӥзы Янаул но Татышлы ёросъёсысь куьтурая дэменлыкъёслэн тӧрооссылэсь Ю. С. Салтыковлэсь но Р. Б. Галямшинлэсь вераськемъёссэс. Со сяна, дышетскисьёс куспын ортчиз Гердлы сӥзем викторина, бадӟым литературно- музыкальной композиция. Огкылын вераса, люкаськон бадӟым празднике ӧръяськиз. К. Гердлы сӥзем ужрад дыръя. Туспуктэмъёсыз Мударис Менладшинлэн. Редакциын пумиськон ЛЕОНИД КАПЛУН: "МАЖЕС ВЫЛЭ КЫК ПОЛ ЭН ЛЁГИСЬКЫ" Леонид Каплун - "Ижевскгаз" ОАО-лэн валтӥсь директорез. Та удысэн 10 ар кивалтэ ни. Туэ солы 50 арес тырме. Ужан сюресэз кутскиз металлургической комбинатын, куинь ар термист-травильщик вал. 1974 арын йылпумъяз горно-металлургической институтэз, инженер-энергетик луиз. Егит специалистэз ыстӥзы Ижевске, "Ижтяжбуммаш" заводэ. Татын инженер-наладчикысен валтӥсь энергетиклэн управлениезлэн тӧроезлэн воштӥсез луиз. Нош 1988 арын "Ижевскмежрайгаз" производственной управленилы кивалтӥсе быръемын, конкурсын вормисе потӥз. Леонид Рувимович вис карытэк тодон-валанзэ будэтэ. Со быдтӥз Хельсинкиысь (Финляндия) университетэз, "Менеджмент но производствоен кивалтон" ёззэ. Миым йылпумъяз Россия Федерацилэн Правительствоысьтыз Калык хозяйствоя академиез. Алигес Леонид Каплун редакцие ветлӥз. Соин "котырес ӝӧк" сьӧрын пумиськон вал. Огазеяськонлэн тӧроез журналистъёслы мадиз удыслэн будэмез, азинскемез, ӵуказе нуналэз но азязы сылӥсь ужпумъёс сярысь. Леонид Рувимовичен тунсыко но пайдаё вераськон пӧрмиз. Кӧня ке тодамы ваём ортчемзэ. 1957 арын металлургической заводлэн газовой участокез бордысен кутскиз Удмуртилэн столицаяз газ кыскон. Кизер эстӥськон дорамы вуиз Омскысь. Нош 1961 арын УАССР-ысь Министръёслэн Советсы "Горгаз" трест кылдытон сярысь постановление кутӥз. Соку 2700 квартираосы газ сётэмын но музъем пушкы согемын вал газ возёнъя одӥг бадӟым бекче. Нош Россиын кизер эстӥськон поттыны ӧдъязы 1834 арын Петербургын. Та ёзлэн нырысетӥ президентэз вал Д. Дантес (со А. С. Пушкинэз ыбиз). 1966 арын Ижевск газ басьтыны кутскиз Татариысь, Минибаево му вӧй кыскон интыысь. Но со кема ӧз возиськы, чагыр эстӥськон улӥ ӟечлыкен, пӧлаз сераез трос вал. Озьы ке но, 1971 арын пачкатэм газ 43 сюрс квартираосы, 21 промышленной предприятие но коммунально-бытовой удысъя 400 предприятиосы лыктӥз. Со сяна, 4572 квартирае сетевой газ вуттэмын. Ижысь газ хозяйстволэн выль азинсконэз кутскиз 1973 арын. Городлы кулэ вал Сибирьысь природной газ. Со понна Пермьысь 247 иськем газ гумы кыскемын. Нош "Медвежье-Центр" 2120 километръем газопровод кутске Тюмень областьысь. Тӥни соку Минибаевоысь газлэсь куштӥськыса, Удмуртиын кутскиз промышленной предприятиосты но улон юртъёсты, дуно кизер газ интые, сетевой газэ выжтон. - Леонид Рувимович, удысты сярысь туннэ мар верасалды? - Ушъяськемлы медаз пӧрмы. Ми азинскон сюрес вылын. Али "Ижевскгаз" ОАО-лэн 3 газ сётон станциосыз (ГРС), 85 газ висъян пунктъёсыз (ГРП), 154 электрохимической станциосыз но 220 сюрслэсь уно квартираосы газ вуэ. Со понна кыскемын 1340 иськем сетевой но 20 иськем кизер газъя гумыос. Огазеяськон чагыр эстӥськон сётэ 106 бадӟымесь промышленной, 256 коммунально-бытовой предприятиосы, Ижын, Завьялово, Пичи Пурга но Якшур-Бодья районъёсын улӥсьёслы. Тямыстонэтӥ аръёсы Ижевскын кутским нимаз коркаосы газ кыскыны. Ӵошатон вылысь, кӧня ке лыдпусъёс верало. 1989 арын 50 семьялы гинэ чагыр эстӥськон пыртэмын ке вал, 1995 арын - 2000 адямилы, нош 1996 арын 3500 квартирае но нимаз коркаосы газ вуттӥм. Миым но та ласянь умой ужам. Али Кионгоп дорысь ГРС-ысь кык гумы кузя Ижевске газ сётӥське. Валля арын вуттӥм кӧня газ кутэмез чакланъя телеметрической амалэз. Со УКВ связья ужа. Миым лэзим бытовой но промышленной газовой счётчикъёсты эскеронъя но тупатъянъя выль оборудованимес. Табере со юрттоз чагыр эстӥськонэз ӝикыт кутыны но шыръяны. Азьло счётчикъёсмес Татариын чаклало вал. Нош Гагарин урамысь выль производственной базамы юрттоз уката ӟечгес но азинлыко ужаны. Соин ӵош ик предприятиосамы вуо компьютеръёс. - Кызьы тӥ таӵе секыт, рынокен экономикае потон дыре, чидам гинэ ӧвӧл, азинскыны- лэсьтӥськыны быгатӥськоды на? - Предприятиослы но калыклы ми дыраз, дугдылытэк но тырмыт чагыр эстӥськон сётыны кулэ. Озьы ик шудтэм учыръёс но медаз луэ. Предприятимы быдэс Россиын но Советской Союзын котькинлэсь азьло пыӵатӥз шудтэм учыръёсты (авариосты) палэнтонъя усто технологиез но гумые газэз кысытэк мукет гумыез ӵыжатон амалэз. Со давление сётыса быдэстӥське. Куке мон татчы лыктӥ, городын коллективлэн данэз ӧй вал, шуыны луоз. 1989 арын предприятиын толэзяз шоро-куспо уждун 82 манет вал. Соин ик ужасьёс ӵем вошъяськизы. Но выльдӥськем бере, кутскиз, промышленной предприятиосысь ӟеч специалистъёс дорамы лыктӥзы. Коллектив огсыр ужаны ӧдъяз. Данакез али 20-30 ар дорамы тырше но предприятилэн валтӥсь кужымез луэ. Азинскон нырысь ик потэ адямиос бордысь. Сое адӟо. Тани 1995 арын "Росгазификация" АО но РФ-ысь Эстӥськонъя но энергетикая министерство коллективмылы "Россия Федерациын газовой хозяйствоя устоез предприятие" ним но И степенен диплом сётӥзы. Нялтас вераме потэ на международной наградамы сярысь. "Ижевскгаз" ОАО-лы 1996 арын сётэмын "Факел Бирмингама" премия, зарни медаль, Почёт грамота но сертификат. Со премия тупатэмын 1956 арын Д. Эйзенхауэрен. Таӵе наградаез сёто рынокен экономикае выжонын шуг- секытъёсты вормисьёслы. Тӥни озьы али гинэ асьмеос берытскиськом ай эстӥськон но энергетика удыс пала. Ведь экономикаын со валтӥсь инты басьтэ. Соин ик быдэс дуннеын сыӵе премия сётӥське шуг-секытысь потыны быгатӥсь предприятиослы, корпорациослы, трестъёслы но фирмаослы. - Леонид Рувимович, выль производственной базадэс малы Ленинской районын пуктӥськоды? Маин ке со герӟаськемын-а? Одно ик. Коммунаров урамысез базамы 120 сюрс адямилы гинэ газ сётыны лыдъямын вал. Тӥни соин ик асьме кужымен выльзэ ӝутӥськом. Та район али ваньмызлэсь ӝог азинске. Ижевсклэн генпланэзъя, Александрово микрорайонын 350-400 сюрс мурт улыны кулэ. Со сяна, трос отын нимаз коркаосын улӥсьёс. Калыклэсь куронъёссэ чакласа, ОАО-ын кылдытӥм ремонтно-строительной управление (РСУ). Со быдэсак ужа адямиослы газ пыртонъя. Тӥни соин ик Шудья гурт доры куинетӥзэ ГРС пуктӥм. Отысь чагыр эстӥськон лыктэ 13-тӥ ульчаысь выль котельное но 1 номеро ТЭЦ-е. Со быдэс микрорайонэ шуныт сётыны кулэ. Выль базамы сярысь ке верано, отын луозы аварийно-диспетчерской службая, корка сетьёсъя но музъем пушкытӥ кошкись гумыосъя ёзъёсыз, автотранспортэз выльдонъя, производствоез дасянъя но гумыос возёнъя цехъёс, складъёс, столовой но музонэз. Туэ сое вуттыны чакласьком. Миым январе ӧсъёссэ усьтӥз газовой оборудование но бытовой электротехника вузанъя магазин но ужаны ӧдъяз абонент отделлэн люкетэз. Ӵуказе нуналмы но туннэ адӟиське ни. Валля арын Россиысь Правительство гуртэ газ кысконъя нимысьтыз постановление кутӥз. Сое ми улонэ пыӵатӥськом ни. Миым 1281 семья чагыр эстӥськонлы шумпотӥз. Со пӧлысь Ижевскын - 934, нош Завьялово, Пичи Пурга но Якшур-Бодья районъёсын - 347 семья. Огъя вераса, производствомес ялан паськытатӥськом. Россиысь 350 газовой хозяйство пӧлысь предприятимылы вылӥ категория сётэмын. Юнме шорысь сыӵе ним ум нуллӥське. Улонмы секыт луэмен, ми Удмурт Правительстволы ӵектӥм гуртын но городын нимаз коркаосын улӥсьёслы, огкыл гожтыса, кредит амалэн газ пыртыны. Берло семья 5 ар ӵоже тыронзэ берыктысал, газэз но уже кутысал: корказэ шунтысал, сиён пӧрасал. Но вылӥ быдэсъясь орган кылзэ ӧз вера на, но ужпум быдэстонтэм ӧвӧл. Калыклы газ гумыос кыскон туж дуно усе, изъян вае. Ми куриськом ваньбур понна налоглэсь мозмытыны, но Правительство сое уг кылы. Тани миым сетевой газлэсь 9 миллиард изъян адӟим. Сое вузаськом 200 манетэн, нош асдуныз 320 манет усе. Газлы дун тупатэ Россиысь Правительство, отысь Федеральной энергетической комиссиен кенешыса. Ми сое быдэсъяськом гинэ. Нош жилищно-коммунальной хозяйствоын реформа ортчытонэн 10 арлы бере кылим. Озьы ик урод мынэ Президентлэсь указъёссэ но законъёсты улонэ пыӵатон. - Мар верасалды "Газпромен" огазеяськон но "Межрегионгаз" сярысь? - Ми та кык ёзъёслэсь кабзэ пӧртэмесь. "Газпром" газ поттэ, ми сое басьтӥськом, предприятиослы, калыклы вузаськом но эксплуатационникъёс луиськом. Тӥни соин ик "Газпромен" огазеяськыны нокызьы ум быгатӥське. Со монополист, милемды пачкатыны 2 ар выриз, но ӧз пӧрмы. Нош "Межрегионгазэз" "Ижевскгазэн" уд ӵошаты. Со, мон сямен, кулэтэм ёз вордскемын, Москвалы налог бичан понна. Солы сыӵе полномочиос сётэмын. Мукет сямен, мон ужасько Удмуртилы, нош В. Возисов - Москвалы. Сое калык тодыны кулэ. Тани Самараын, Ульяновскын но Казаньын газовой хозяйствооссэс быдтӥзы но гырпумзэс куртчыло ни. Милемды Удмурт Правительство бурд улаз басьтӥз, куашкатыны ӧз сёты. Газовой хозяйстволы ми кузё луиськом, гумыос "Ижевскгаз" киын. "Межрегионгазлы" бадӟымесь правоос сётэмын ке но, соослэн номырзы ӧвӧл, кузёоссы Москваын пуко. - Леонид Рувимович, интыысь органъёсы быръёнъёс матэкто. Гордумае шедьыны мылкыдды вань-а? Вань ке, малы? - Быръёнъёсъя 10 номеро Чайковский округъя депутатэ кандидат луыны малпасько. Мыным мандат кулэ городэз азинтонэн герӟаськем ужпумъёсты быдэсъяны. Гордумаын мед луозы улонэз валась экономистъёс, хозяйственникъёс, юристъёс. Али сыӵе депутатъёс уг тырмо Удмурт парламентын но. Соин ик лэчытэсь производственной ужпумъёс палэнэ кылё. - Тӥ визьмо кивалтӥсь, азьпала адӟиськоды, вылӥ образованиен куинь дипломды. Кызьы дыр шедьтӥськоды на спортэн вырыны, суреданы, фотоос лэсьтыны, видеофильмъёс пуктыны, суредъёс люканы но музыкаен шудыны? - Егит дыръям котьмалы дыры тырме вал. Спортъя мастер но луи, молотэз 54,5 метре лэзьылӥ. Спорт мыным трос сётӥз, тужгес но шуг-секытъёсты вормыны дышетӥз. Улонам гожтымтэ законэ таӵе: "Шугез пыр - вормонэ". Со зол юрттэ. Али 12 видеофильме, котькудӥз 180 минут кыстӥське. Яратӥсько фотоос лэсьтыны. Кышноеным кык нылпи будэтӥськом. - Сад-бакчады вань-а? - 1992 арын гинэ "Полянка" сад эштосын музъем басьтӥ, отчы пичильтык пу корка пуктӥ. Табере дыши музъемен ужаны, туж яратӥсько инкуазез, нюлэскы потаны. Отын коть куд-ог ужпумъёсты огдырлы вунэтыны луэ. Но улонын капчизэ уг утчаськы, шуг- секытъёсты вормыны дышетскисько. Огвыллем янгышъёс лэсьтэме уг поты. Кызьы шуо, мажес вылэ, пе, кык пол эн лёгиськы. Дасяз Геннадий РОМАНОВ. Туспуктӥз Владимир КАМАШЕВ. УДМУРТ РЕСПУБЛИКАЫСЬ КУН КЕНЕШЛЭН ТӦРОЕЗЛЭН Калинин В. П. сярысь Постановлениез Удмурт Республикалэн Прокурорезлэсь ивортонзэ эскерыса пуктӥсько: Ижевск городысь Ленин ёрослэн прокурорез Калинин В. П. ужасьёссэ тырмыт но кулэезъя эскерымтэ понна, ма вуттӥз прокуратураысь куд-ог ужасьёслы пумит мошенничество но кузьым басьтон учыръёсъя уголовной уж ӝутонэ, Ижевск городысь Ленин ёрослэсь азьвыл прокурорезлэсь Калинин Виктор Павловичлэсь "Удмурт Республикаысь дано юрист" нимзэ басьтоно, кудӥз сётэмын вал Удмурт Республикаысь Кун Кенешлэн Тӧроезлэн Постановлениезъя 1998 арын 6 январе. Пусъёно, Удмурт Республикалэн Прокурорез Походин В. М. кун наградаосын пусйыны ӵектэм муртъёсты быръёнэз ӟечгес радъяны кулэ. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 4 мартэ. � 518-И. Леонид Емельянов Кудпала берга дунне питран? Кылем арын писатель Леонид Емельянов йылпумъяз "Кудпала берга дунне питран?" повестьсэ. Солэн нырысетӥ но кыкетӥ люкетъёсыз печатламын -1993-тӥ арын "Кенеш" журналын. 10-тӥ-12-тӥ, 1995-тӥ арын 6-тӥ-8-тӥ, 10тӥ-12-тӥ номеръёсаз. Куинетӥ люкетсэ "Кенеш" печатланы кутске туэ 2-тӥ номерысеныз. Туннэ ми тодматӥськомы повестьлэн оглюкетэныз. ... Тыпыкар дорысен ог куамын-витьтон иськемын сылӥсь Бадӟым Пудга ёросын синмаськымон калык улэ. Вашкала дыръёсы ик та интыосысь узыр музъемъёсыз удмуртъёс синйылтӥллям. Паськытэсь но сюбегесь шуръёсын, веськрес пужымъёсын но кызъёсын шобыртэм улос адямиослэсь сюлэмъёссэс бордаз кыске. Нош со шуръёс валлин кыстӥськись арамаосты чеберъяло льӧмпуос, палэзьпуос, сюсьтыл кадь веськрес кызьпуос, лабрес беризьёс но пӧртэм куаро писпуос. Ӵыдонтэм шулдыр луэ татын писпуослэн сяськаяськон вакытазы. Дыр ортчемъя, возьёсыз но чеберъяло ӵуж гырлы кадь италмас но мукет турлы сяськаос. Мушъёс жадьытэк лобало сяськаос вылтӥ но адямиослы чечы люкало. Удмурт мушкасьёслэн данзы вашкала дырысен вӧлмемын туж кыдёкысь кунъёсы но шаеръёсы. Удмуртъёс асьсэос но мушъёс кадь ик ужаны яратӥсь, мултэс зульытэк, котькыӵе шуг-секытъёсты вормись но урод сямо калыкъёслэсь зӥбетсэс чидась калык. Кыӵе гинэ выжыос курадӟытыны ӧз выре удмуртъёсыз: хазаръёс, монголъёс, бигеръёс, берло вакытъёсы ӟучъёс но палэнэ ӧз кыле. Но удмуртъёслэсь чиданлыксэс нокин но тӥяны ӧз быгаты. Пудга выжыос но ас калыксылэсь данзэ ӟеч утьыны тыршо. Учкелэ али туала пудгаослэсь бусыоссэс, возьёссэс, улон коркаоссэс, юртъёссэс, садъёссэс, бакчаоссэс - котькытын сюлэмзэс сётыса ужам кибервылзы адӟиське. Нош шулдыръяськыны, ваньмон дырзэ радъяны кин меда соос кадь ӟеч быгатэ? Паймымон визьмо, сюлмо но чебер калык улэ Пудга ёросын. Бадӟым Тыпыкарен артэ вылысь но удмуртъёс пӧлысь туж ӧжытэз городэ кошке. Соинтэк-а ёросын кык куиньмосэз улӥсьёс удмуртъёс луо? Тӥни сыӵе синмаськымон ёросэн, отын улӥсь калыкен дасо аръёс ӵоже быгатыса кивалтэ лякыт сямо, визьмо удмурт пи. Йыг-йыг шуккем, шоро-куспо но веськрес мугоро воргоронэз пудгаос, чипыен- куреген шуэм сямен, ӟеч ужъёсыз понна гажаны кутскизы но одӥг ымысь шуизы: "Ӟег нянь кадь адями". Калыклэсь сыӵе дунъет басьтон понна, ой, кӧня ӟег нянь но сылал сиыны, дасо поттэм ведра нюласа вудэ кисьтыны кулэ. Таблов Владимир Павлович вордскемын но будэмын удмурт крестьян семьяын. Пичи дырысеныз шӧмъямын музъем ужез. Школаын дышетскыкуз ик гужем каникулъёсыз дыръя эшъёсыныз ӵош кусоен турназ, сюрлоен ӟег араз, етӥн ишкиз, валэз уробое ури-бери кыткыса, бусые кыед ворттылӥз, пар музъемез гырылӥз, усыялляз. Эсьмаса, пастух луыса но тэльёсты, пар бусыосты котыръяса, колхоз пудоез утялтӥз. Шор ёзо школаын дыръяз ик, кияз тӥр кутыса, бугро ӵупылӥз, ӝӧк-пукон струганы дышиз, ява. Школазэ йылпумъяса, гуртын ужась специалистъёсты дасясь техникуме дышетскыны интыяськиз. Усто дышетскиз, нош бӧрысь та удысъя ик институтэз йылпумъяз. Тодосчи зоотехнике куриськиз аслаз вордскем гуртаз. Калыкен ужаны быгатӥсь егит воргоронэз ӝоген бригадире бырйизы. Нош кык ар ортчыса, колхозысь коммунистъёс асьсэлы азьветлӥсь каризы. Колхоз тӧроен, огкыткетэ пыриськыса, огкылысь тыршизы. Уртче ужамзылэн пайдаез ӝог адӟиськиз: хозяйствозылэн ваньбурез арысь аре будыны кутскиз. Владимир Павловичез синйылтӥзы ёросысь кивалтӥсьёс. Райкомлэн секретарез, колхозэ "ӵемтылыкуз", синмаськыса чаклалляз егит кивалтӥсьёслэсь ужамзэс. Со вакытэ райкомъёсын музъем ужан удысэн кивалтӥсь инъетъёс кылдытъязы. Кинъёслы бен сое оскод? Валамон: музъем ужез ӟеч валась адямиослы. Солэсь но вылӥ дунъяськиз партийной уже лыктӥсь муртлэн калыклэсь мылкыдзэ, сюлэмзэ валамез. Солэсь огъя сюлмаськонъёссэ ӧд шӧды, ӧд вала ке, котькыӵе визьмо инструкциосыз, уставез, программаез улонэ пыӵатыны выремъяськы, тынэсьтыд зэмос партиец, уката ик кивалтӥсь уз пӧрмы. Тӥни малы райкомлэн секретарез "ӵемтылыны" кутскиз Таблов доры. Куспазы кема вераськыса пукылэм сяна, со ветлӥз соин ӵош калык пӧлтӥ, трос пол луылӥз огъя колхоз ужпумъёс но партийной люкаськемъёсын. Берпуметӥзэ пумиськыкузы, секретарь выжыятъяса мар ӧз выры, шонерак шуиз: - Райкомлэн бюроезлэн но секретарьёслэн мылкыдзы вань тӥледыз, Владимир Павлович, партийной уже дэмланы. Кызьы тӥ асьтэос малпаськиськоды та ӵектонмы сярысь? - Ма, мон валай котырам сокем бергамдылэсь мугзэ. Вазь ӧвӧл-а сыӵе бадӟым уже потыны? Гурт калыкеным ӵош тыршеме потэ на. Быдэс ёросэн вырыны мыным вазьгес на дыр. - Самой киыз но пыдыз шуэм сямен ёросын кужымдэс эскерыны. Котькыӵе будослэн, писпулэн аслаз сяськаяськон дырыз. Тӥляд сыӵе вакытты вуэмын ни. Ӝеганы уг яра. Адямилэн ужан аръёсыз сокем кузь ӧвӧл. Пенсие потон дырыд вуытозь, астэ эскероно, кыдатоно улон тубатэдлэн котькуд падӟаяз. Ма, сыӵе дэмланлы визьмо, улонэз валась адями уз пумитъяськы. - Но сё-же малпаськыны дыр сётэ вал. - Арня тырмоз-а? - Тырмоз. Райкомын но Таблов пукон вылаз штанъёссэ зыраса ӧз пукылы. Уен-нуналэн шуэм сямен ветлылӥз колхозъёстӥ но совхозъёстӥ. Толэзь-кык ортчыса, вань хозяйствоослэн кивалтӥсьёсынызы но партийной организациослэн секретарьёсынызы тодматскыны вуиз. Дыр ортчемъя, вань гуртъёсысь югдурез ӟеч тодэ вал ини. Кулэ дыръяз умойтэм учыре шедемъёслы дыраз юрттылӥз. Ужаны быгатэмзэ адӟыса, Табловез райкомлы кыкетӥ секретаре бырйизы. Та удысын но ассэ умоен гинэ возьматӥз. Аслаз ужаз но улоназ адӟем карылӥз но дышетскиз райкомзылэн нырысетӥ секретарезлэсь. Одӥг ӝытэ райкомысь ужасьёс доразы яке ужъёссыя кошкем бере, Табловез кабинетаз ӧтиз шефез. - Алигес гинэ мыным Грознов жингыртӥз. Вераськонмы тӥ сярысь вал. Ӟечкыласько тӥледыз, Владимир Павлович. - Маин? - Обкомлэн тӥледыз эшшо но вылӥ уже дэмламез потэ. - Кыӵе вылӥ уже? - Ваньзэ тӥледлы ачиз Василий Капитонович вералоз. Нош мон солэсь ӵектонзэ умоен лыдъяй но тӥ сярысь зэмлыкез верай. Усто ужась но синмаськымон адями шуи. Тӥни озьы, Табловез улон тубатъёсыз вуттӥзы Бадӟым Пудга ёросэ. Райкомлэн пленумаз Владимир Павловичез огкылысь бырйизы нырысетӥ секретаре. Толэзь ӵоже сое райкомлэн аппаратаз, ёросэн кивалтӥсь учреждениосын но организациосын ужасьёс райкомысь шедьтыны ӧз быгатылэ. Зэм, котькуд арня пумын ужан кабинетаз райкоме вуэм документъёсын тодматскылӥз, кысык быдэстоно ужъёсты бергатылӥз, ёросысь кивалтӥсьёсын, ужасьёсын вераськылӥз. Нош ёросэн тодматсконэз колхозъёс но совхозъёс бордысен кутскиз. Котькудаз хозяйствоын пыраз пудо-вордон фермаосы, мастерскойёсы но гаражъёсы, лэсьтӥськисьёс но дурисьёс доры, школаосы но клубъёсы, магазинъёсы но столовойёсы. Котькытын мылысь-кыдысь вераськылӥз огшоры ужасьёсын но кивалтӥсьёсын, валаны тыршылӥз соослэсь сюлмаськонъёссэс, ӝожтӥськонъёссэс. Хозяйствоын кык-куинь нунал ӵоже пумиськылэмез бере, огъя люкаськонъёс яке активистъёсын кенешонъёс ортчытъяз. Нош коммунистъёсын собраниосын соос азьын сылӥсь ужпумъёс сярысь ӟырдыт вераськонъёс ортчылӥзы. Сыӵеесь ик ужрадъёс вал ёросысь предприятиосын, организациосын но учреждениосын. Пумиськонъёссэ Таблов йылпумъялляз комсомолын, профсоюзын но культура удысын ужасьёсын кенешонэн. Пудга ёросын Табловлэн нырысетӥ вамышъёсыз туж яразы калыклы. Укыргес ик -коммунистъёслы. Нош кусъёссэс куасаны жалясь, супыр-сапыр ужась кивалтӥсьёслэн мылкыдзы куашканы кутскиз. Огзэ- кыксэ сыӵе "тыршисьёсты" райкомлэн бюрояз "пыжемзы" бере, нырулыса пукись кивалтӥсьёс амалтэк сайкиськоно но вамышъёссэс йыгмытгес кароно луизы. Райкомлэн бюрояз-а, пленумаз-а, депутатъёслэн сессиязы-а, исполкомлэн люкаськоназ-а - вераськонъёсызлы Таблов котьку но азьвыл ик дасяськылӥз. Юнме дыр быдтыса яке ньӧмыз понна гинэ ӧз вераськылы. Кивалтӥсьлэн данэз чаль гинэ будыны кутскиз. Сое ӝутыны эшшо но юрттӥз таӵе умой сямыз: сётэм кылзэ тӧлъя-буръя ӧз лэзья. Нош верамзэ кыӵе ке муген дыраз быдэстыны уг быгаты ке, адямилы валэктэ, малы ӝега ужпум. Курисез буйгатске, кивалтӥсьлы осконэз уг быры. ... Пудга калык, колхозъёс кылдэм дырысен ини, уртче улэм но ужам сяна, ӵош шутэтскыны, шулдыръяськыны яратэ. Соослэн сӥё-дано хорзы куамынэтӥ аръёсы тодмо вал быдэс удмурт шаерамы. Соослы нырысетӥен шуд усиз Москваын улӥсьёс азьын асьме калыкмылэсь искусство удысын быгатонлыксэ возьматыны. Гуртын тыршисьёслэн Всесоюзной выставкаязы пудгаос ог дасо концерт возьматӥзы. Табловлэн кузпалыз туж яратэ кырӟаны-эктыны. Пудгае лыктэмзы бере ик Феняез хоре ветлыны кутскиз но, ар ортчыса, ачиз сӥё-дано хорен кивалтыны кутскиз. Картэзлэн ваньмон дыръёсыз луо ке, сое кужмысь нуэ репетициосазы. - Малы ми, кивалтӥсьёс, палэнскиськом сыӵе умой шутэтсконлэсь, калыклэсь? - малпаськылӥз Таблов. - Ведь усто кырӟан сюлэмез бугыртэ но, буйгатэ но, адямилэсь ужаны мылкыдзэ но ӝутэ. Таӵе шутэтсконэ бадӟым кивалтӥсьёсмес но кысконо. Соослэсь адӟем карозы ужасьёссы но. Райкомлэсь секретарьёссэ, отделъёсын кивалтӥсьёсты, исполкомлэсь тӧрозэ, кивалтӥсьёссэ хоре ӧтёно... Кылдэм сямъя, тулыс бусы ужъёсты йылпумъяса, быдэс ёрослэн "Гырон быдтон" праздникез ортче. Ёросысь тужгес чебер баблес писпуосын шобыртэм арамаын паськыт тымет чиля шунды сиос улын. Отысь возь вылэ быдэс ёросысь калык люкаське. Пичиослы, пересьёслы, егитъёслы, мӧйыослы туж шулдыр татын. Тани паськыт возьёс но арамаос кузя вӧл-вӧл чузъяське сюлэмез но лулэз бугыртӥсь удмурт кырӟан. Ог сю пала кырӟась азьын, дирижёрлэн кивалтэмезъя, огез гур воштӥське мукетэныз. - Учке ай, учке ай, мар тамаша та! - кырӟасьёс шоры киоссэ мыче мӧйы воргорон. - Ма, Табловмы но, мукет кивалтӥсьёсмы но - ваньзы мылысь-кыдысь кырӟало ук? Молодец Феня Таблова! - шумпотонзэ уг ваты мукетыз воргорон. - Быгатэм вань кивалтӥсьёсмес хораз кыскыны. Бер ӝытозь шулдыръяськиз возь вылэ люкаськем калык. Егитъёс куспазы спортъя ӵошатсконъёс ортчыто. Эсьмаса, уяны яратӥсьёс но чипейёс кадь тыршо. Егитъёс пӧлын Таблов но чукырна кадь, сэзь но ӝог уя. Уг кыльы сьӧрысьтызы. "Гырон быдтон" шулдыръяськоназы Таблов ӧтиз обкомысь ужасьёсты но. Соос пӧлын вал Емшанов. - Ну, паймытӥды, Владимир Павлович. Туж усто радъямын вал шулдыръяськонды. Вуоно планёркаямы аппаратмы азьын мадё "Гырон быдтонды" но культура удысысь азинсконъёсты сярысь. Элькунамы вӧлмытон вылысь, Пудгалан ёрос райкомъёсысь идеология удысын тыршись секретарьёслэсь но отделъёсын кивалтӥсьёслэсь, исполкомъёсысь культура отделэн кивалтӥсьёслэсь семинарзэс ортчытон сярысь мед сюлмаськозы. - Возьытэ ум усе-а, Алексей Павлович? Мукет ёросъёсын но усто ортчытъяло ук праздникъёссэс? - Соиз, оло, озьы но. Нош тӥляд маке асьтэлэнэз вань. Собере ведь, шулдыръяськон сяна, умоесь азинсконъёсты культура удысын. Кыӵе но художественной коллективъёсты уг тыршо! "Калык хорды", "Арганчиды", пӧртэм ансамбльёсты, калык театръёсты вань. Пудгаос сак утё калыклэсь вашкала дыръёсы кылдэм йылолъёссэ. Со ведь туж усто. Нылпиосмы но егитъёсмы выжы нюжаосмес медаз уретэ, соосты мед азьланьтозы. - Зэм, со туж умой. Мӧйы калык сое ӟеч вала, утьыны тырше. Мон сямен валало котькуд ёросын, котькуд гуртын но. Кулэез вань меда милесьтым ёросмес висъяны? - Владимир Павлович, со ужрад тӥледыз висъян, ушъян вылысь уз лэсьтӥськы. Семинар, аппаратлэн штамп кылъёсыныз вераса, тӥлесьтыд ужан амалъёстэс возьматон луыны кулэ. Сю пол кылытозь, огпол ас синмыныд мед адӟод шуэм сямен, пайдаез устогес луыны кулэ. Быдэс элькунысьтымы идеология но культура удысъёсысь кивалтӥсьёс люкаськизы ке, котькудӥзлэн маке но выльзэ тодэмез луоз. Асьсэлэн но ёросъёсазы вордскем сямъёссы сярысь верамзы потоз. Газетысь, журналысь статьяез лыдӟон, радио но телевидение пыр верамез но, возьматонэз кылзон но, учкон но ужъёсмес радъяны юртто. Нош тон азьын вераськись адямилэн кылыз котьмалэсь но кужмогес но матынгес. Асьмелы сое вунэтыны уг яра... Пудгала семинарез ортчытыны ветлӥзы обкомлэн идеология ужпумъёсъя секретарез Нина Илларионовна но, Культурая министерствоысь кивалтӥсьёс но. Ачиз Грицко но лыктыны малпа вал, но малы ке ӧз вуы. Мукет ужъёсыз ӝегатӥзы-а, мар-а. Соиз ини аслаз ужез. Удмурт ёросын кылдэм йылолъёсыз, вашкала но туала сямъёсыз ас синъёсыныз адӟысал ке Грицко, элькунэ алигес лыктэм адями, аслыз туж уно пайда басьтысал. Оглом вераса, семинар ӟеч ортчиз. Отчы ветлэмъёс ваньзы сямен тау карон кылъёс вераса люкиськизы огазе люкаськем эшъёсынызы. Емшанов ӵем вуылӥз Пудгала. Кытӥяз, бюролэн косэмезъя, обкомлэсь кыӵе ке огъя ужрадъёссэ радъяны, нош мукетъят - отделзылэн ужъёсызъя. Тани али но со ёросысь усто ужась культурая юртлэн кивалтӥсеныз кенешыны лыктӥз. Отделзы малпаз Антоновалэсь ужзэ рос-прос эскерыны но, гуртысь культура удысын тыршисьёсыз со доры люкаса, семинар ортчытыны. Антоновалы алигес, отделлэн кичӧлтэмезъя, Россия Федерациысь культура удысын сӥё-дано ужась ним сётэмын. Вань ужъёссэ быдэстэмез бере, Емшанов Таблов доры пыриз но мадиз ёросын лэсьтэм ужъёсыз сярысь но аслэсьтыз малпанъёссэ. - Алексей Павлович, ӧтисько тӥледыз тунсыко партийной люкаськонэ. Сыӵезэ нокытысь но ӧд адӟе на, дыр, - вераськон куспазы ӵектӥз райкомлэн нырысетӥ секретарез. - Тунсыко ужрадэ мон шумпотыса мыно. Сю пол кылытозь, огпол ас синмыныд адӟод. Колхозэ вуыса, Табловен Емшанов коммунистъёслэн азьветлӥсенызы пумиськизы. Таблов сое тодматӥз Емшановен. - Мон обкомысь ужасез ӧти ӝыт люкаськонады. Али тодмато сое хозяйствоеныды. Вуылом механизаторъёс, пудо вордӥсьёс доры, кенешом соосын, валаны тыршом сюлэмшугъяськонъёссэс, малпанъёссэс. Куномылы люкаськонын вераськонъёсмы валамонгес мед луозы. - Туж усто, Владимир Павлович. Тӥледыз уго калыкмы чипыен-куреген шуэм сямен тодэ. Иське, мон сьӧрады уг ветлы. Люкаськонмылы дасясько на. Ӝыт витисько тӥледыз. Пырало на столовоямы: тӥледлы сиён дасяны дэмлало. Люкаськонамы тыро кӧтын мыло-кыдогес пукоды. Колхозникъёсын лумбыт пумиськылыса, партийной кивалтӥсьёслы югдур ӟечгес валамон луиз. Таблов, ма, татчы ӵем вуылэ но, солы тросэз кемалась тодмо. Нош Емшановлы ваньмыз выль вал. Табере люкаськемын со куноын кадь уз пукы, ачиз но мар но со вераны быгатоз колхозын ужъёссы сярысь. Нош солэсь гуртъёсын улӥсьёслэн тодэмзы потэ элькунамы улон-вылон, газетъёсын, радиоын, телевидениын печатламтэ, верамтэ, возьматымтэ иворъёс сярысь, сояз яке таяз карын, ёросын кылдэм югдуръёсты. Тыпыкарын ужасьёс ӵем уг вуыло уго гуртъёсы. Емшановлы улытозяз уно пӧртэм люкаськемъёсын пукылоно но вераськоно луылӥз. Вуылӥз со партиецъёслэн, комсомолецъёслэн, профсоюзэ пыремъёслэн ужрадъёсазы, быръёнъёслы сӥзем но мукет муген люкаськемъёсы. Куд-ог дыръя писательёс дорын удмурт кылын вераськылӥзы. Элькунлэн огъя люкаськонъёсаз но кытӥ-отӥ удмурт кылын вераськисьёс шедьылӥзы. Нош туннэ колхозысь коммунистъёслэн люкаськемазы Емшанов аслаз пельёсызлы ӧз оскы: люкаськемез усьтонысен ворсатозь вераськон быдэсак удмурт кылын мынӥз. Эсьмаса, Таблов но туж чылкыт удмурт кылын вераськиз бере, Емшановлэн но ӟуч сямен вераськыны ымыз ӧз усьтӥськы. Люкаськон ортчем бере, солэн тодэмез потӥз: кемалась-а татын таӵе ужрадъёсты удмурт кылын ортчытъяло? - Пудга ёросэ вуэмелэсь азьло но татын партийной кенешъёс удмурт кылын ортчыло, пе, вал ини. Мон сое умоен лыдъяй но мукет партийной организациослы но дэмлай. - Нош татысь коммунистъёс пӧлын ӟучъёс но вань, дыр, ук? - Куинез ӟуч. Но соос асьме кылын куд-ог удмуртъёслэсь чылкытгес бӧтьырто. - Протоколъёссэс бен кыӵе кылын гожъяло? - Удмурт кылын ик гожъяло вал. Но обкомлэн архиваз ужасьёс ӟуч кылэ берыктыны косылӥзы. Удмурт кыл, пе, кун кыл ӧвӧл ук. Катэз, пе, тӥяны уг яра. Нош партилэн Уставаз документъёсты кыӵе кылын гожъян сярысь пал кыл но верамын ӧвӧл ук. - Удмуртъёс люкаськемъёссэс асьсэ кылын ортчыто, нош протоколъёссэ ӟуч сямен гожъяно-а? - юай мон архивын ужасьёслэсь. - Соиз сярысь мон тӥледлы номыр но вераны уг быгатӥськы. Вазиське обкомлэн бюрояз. Отын кулэ решение кутӥзы ке, удмурт кылын гожъям протоколъёстэс но постановлениостэс ми архиве басьтом, - вераллязы татын ужасьёс. Таблов шуиз: мон сётаки вераськи та ужпумъя орготделын ужасьёсын но кыкетӥ секретарен Балковен. Соосыд кылэм-адӟем но ӧз каре. Тӥляд, пе, сыӵе кулэтэм ужъёсын вырыны дырды вань, лэся. Документъёс архивъёсы кутӥсько государственной кылын. Нош со асьмелэн ӟуч кыл. Историкъёс, мукет тодосчиос, удмурт кылэз тодӥсьтэмъёс кызьы ужалозы архивын? Берыктӥсьёсыз медъялозы-а, мар-а? - Татын но уг-а шӧдӥськы Конституциенымы пӧртэм выжыосысь калыкъёслы одӥг кадь правоос сётэмлэн быдэсъяськымтэез? - юаз Емшанов. - Удмурт Конституциямы но гожтэмын ук: удмурт но ӟуч калыклэн одӥг кадесь правооссы вань. Нош тани та учырмы гинэ но возьматэ: улонамы со озьы матын но ӧвӧл на. - Шонерак озьы ӧвӧл, дыр. Удмурт кылмылы Конституциен кун кыл статус сётэмын ӧвӧл ук. - Соиз зэм, Владимир Павлович. Куамынэтӥ аръёсы элькунлэн кивалтэтэз кыл ужпумъёсъя "Рудья" шуыса нимаськись комиссия кылдытылӥз. Со уно ӟеч ужъёс лэсьтӥз удмурт кылэз юнматонын. Кылсярысь, ӟуч кылын потӥсь газетъёсын ӟуч кивалтӥсьёс понна удмурт кылын дышетон сэрегъёс печатласькизы. Уно уж лэсьтэмын вал удмурт кылэз кун кивалтэтэ пыӵатон понна. Ёросъёсын но волостъёсын, кудъёсаз оглом удмуртъёс улӥзы, документъёсты гожъян но асьме кылын радъямын вал ини. - Нош малы меда со ӟеч малпам ужъёс ӧз азинске но улонамы ӧз пыӵалэ? - Куамынэтӥ аръёслэн шоразы быдэс кунамы, озьы ик асьме шаерамы но кутскиз "националистъёсын" нюръяськон. Со кӧшкемыт аръёсы калыкмылэн тужгес визьмо пиосыз но нылъёсыз пӧлысь уноез тушмон карыса келямын вал тюрьмаосы но лагерьёсы. Тросэз соос вордскем палъёсазы ӧз берытске ни. Мар паймонэз: кылмы бордын ужась тодосчиосмы, журналистъёсмы, писательёсмы но репрессиос улэ шедизы. Писательёслэн союззы но быдэсак пазямын но пытсамын вал со аръёсы. Самой со бордын удмуртлыкмылэн кема аръёслы ӝегамез но огинтыяз сылэмез. *** Улонын ваньмыз малпамъя гинэ уг мыны. Пумиськыло малпамтэ учыръёс но могӟетъёс. Бадӟым Пудгалан дас арлэсь кема ужатозяз, Табловлы но пӧртэм сямо, пӧртэм мылкыдо кивалтӥсьёсын пумиськылоно луылӥз. Одӥгъёсыз вань сюлэмзэс, вань малпанъёссэс усьтыса кенешылӥзы соин, ёрослэн йырыныз. Умоесь дэмланъёс сётылӥзы, янгышъёссэс шонерак синмаз вераллязы. Сыӵе адямиос уго огъя уж понна сюлмаськыло, улон-вылонмес ялан азьланьтыны тыршо. Но вань сыӵеосыз но, кинъёс асьсэлэсь гинэ малпанъёссэс инмарлэсь но вылӥе ӝутыло. Асьсэлэн синмазы майыг ӵогӟемын, нош муртъёслэн синмысьтызы пыӵсэ но скал быдӟа адӟо. Соос чидатэк возьмаса уло, ку адямиез кужмогес куртчыны но солэн сюлэмаз вунонтэм пытьы но куректон кельтыны луоз. Таблов кемалась шӧдӥз ёрослэн шорсюлмаз интыяськем бадӟым колхозысь партийной организацилэн секретарезлэсь урод сямъёссэ. Керӟег сюлэмо адямилы номыр но мылкыдызъя уг тупа. Солы уг яра, кызьы ёрослэн кивалтӥсьёсыз люкыло элькунэн висъям коньдонэз, лэсьтӥськон ваньбурез, тракторъёсты но пӧртэм машинаосты. Ёросысь кивалтӥсьёс фондъёсты вань организациосын ӵош пыр- поч эскерем но люкылэм бере, керӟег адямиед кутске кивалтӥсьёслэн кабинетъёстӥзы ӵашетыса ветлыны. Солы валэкто вапумез, буйгатыны выро, нош со, пилиськыны сётскисьтэм пуклёе шуккем но бералтыны луонтэм тул кадь, аслаз малпанэз вылын сылэ. Нокуд пала сое уд чальтчыты. Супыльтэмен гинэ буйгатскысал ке, чидасал ини. Но керӟегед, зэмзэ но, кагаз вылэ сьӧд малпанъёссэ ӵабъяса, пӧртэм интыосы гожтэтъёс ыстылэ. Тани огзэ сыӵе кагаззэ ыстӥз Москваын потӥсь одӥгаз центральной газетэ но. Редакция куриз со "ӵабъямез" эскерыны элькунамы ТАСС-лэсь алигес вуэм корреспондентсэ. Соиз олокӧня пол пумиськылӥз керӟеген но блокнотъёсаз сомында супыльтонэз гожъяз - быдэс книгалы тырмысал, ява. Керӟеглэн верамъёсаз ма но со зэмлыкез но вал. Огъя уж понна сюлмаськись, ӟеч сямо адями со тырмымтэосты пенӝак ӟепаз люкаса ӧй возьысал. Мынысал Таблов яке ёросысь мукетъёсыз кивалтӥсьёс доры но ваньзэ соослэн синъёсазы учкыса верасал. Кивалтӥсьёс асьсэос валасалзы, кытын зэмлык, кытын пӧяськон. Нош корреспондент ёросысь кивалтон аппаратысь куд-ог ужасьёсын вераськыса буйгатскиз. "Сёровно нырысетӥ кивалтӥсьёс асьсэлэсь янгышъёссэс ватыны тыршозы. Мар юнме дырез быдтод? - малпаськиз со ас понназ. - Чалякгес быдэстоно редакцилэсь куронзэ". Газет печатлаз "лэчыт" статьязэ. Обкомысь но ёросъёсысь партийной ужасьёслы центральной газетысь Бадӟым Пудга райкомлэн "урод" ужъёсыз сярысь статья шулдыр шундыё нуналэ чагыр инмын кужмо гудыртэм кадь луиз. Кыӵе но вераськонъёс ӧз мынэ элькунысь ёросъёсын но обкомын партийной ужасьёс пӧлын. Уноез соос Табловез тодо уго умой кивалтӥсен но визьмо адямиен. Партийной конференциосын, обкомлэн пленумъёсаз, Вылӥ Кенешлэн люкаськемъёсаз со котьку но вакытлы тупась, туж кулэ ужпумъёсты ӝутылӥз. Мар ватонэз, сыӵе бадӟым люкаськонъёсын куд-огез вераськисьёс асьсэзыз возьматон поннагес ӝутскылӥзы трибуна сьӧры. Дасо минут оломар сярысь но супыльто. Президиумысь "регламентэз чаклалэ!" шуыса кеськем бере но дугдыны уг валало. Ма, соос асьсэос туж визьмо но кулэ макеосты вераськом кожало. Газетэз лыдӟыса, уно ёросъёсысь кивалтӥсьёс ӧз оске Москваын печатлам статьялы. Со Тыпыкаре вуон нуналэ, ӵукна Грицко дышем сямызъя ӝӧк вылаз кыллись выль газетъёсты бугыръяз. Синъёсыз шоры йӧтӥз Пудга райком сярысь статья но. Туж сак лыдӟемез бере, мылкыдыз ӟырданы кутскиз: - Тӥни кыӵе вылэмед тон, сӥё-дано но мултэс ушъям Таблов! Балков мыным юнме ӧз вералля, дыр: со, пе, кемалась мертаське ини кун кивалтэтэ интыяськыны. Табере учком, оло, ёрос кивалтэтысь но сэрпалтоно луоз... Табловлэн данэз ёрос кивалтӥсьёс пӧлын вылӥын. Соин ик та ужпумез кескич но котыр ласянь эскерыса быдэстоно. Кожевниковен та ужрадэз лэсьтыны ӧй пӧрмытысал, дыр. Нош парткомиссилэн вылезлы тӧроезлы аслым кадь оскисько. Кушаса мар сётонэз уз луы. Пичильтык гинэ малпанме возьматӥ ке, ваньзэ кулэ радызъя быдэстоз. Букоез дыраз куасано... Собере Грицко дораз ӧтиз парткомиссилэсь но орготделлэсь кивалтӥсьёссэс. - Ӧд ке лыдӟе на Москваын потӥсь газетысь Бадӟым Пудга райкомлэн "ӟеч" ужъёсыз сярысь статьяез, али ик тодматске соин. - Лыдӟим ини, Павел Сергеевич, - огымысь кадь шуизы ӧтем адямиосыз. - Соку курисько малпанъёстэс вераны. - Корреспондентъёслы мон сокем ик уг оскиськы, - кутскиз веранзэ орготделлэн кивалтӥсез. - ТАСС-лэн корреспондентэзлы но-а? - Мар-о, соос инмаръёс-а? Соос пӧлын но олокыӵеосыз но сюрыло. Нош таиз палэнысь лыктэмын, элькунмес но, кивалтӥсьёсмес но ӟеч-ӟеч уг тоды на. Асьмелэн ужасьмылы рос-прос эскероно та статьяын верам вань фактъёсыз, учыръёсыз. - Туж умой, со сярысь ик мон но малпаськисько вал. Тани тӥ кыкнады потоды Бадӟым Пудгала но зэмлыкез тодытэк уд берытске. Парткомиссилэсь кивалтӥсьсэ кузё ӝыт нош ик ӧтьылӥз дораз. Вераськонзы Таблов сярысь мынӥз. Соиз валаз, мар кулэ шефезлы. Эскерисьёс арня пала улӥзы Пудгалан, пумиськылӥзы трос адямиосын. Райкомлэн но ёрос организациослэн ужысьтызы умоеныз ӵош трос тырмымтэосты но янгышъёсты шедьтӥзы. Сыӵеосты утчад ке, котькуд ёросын кивалтӥсьёслэн ужысьтызы ӧжыт уд шедьты. Улон - со улон. Нокытын но асфальт сюрес вылтӥ кужмо ширтӥсь машинаослэн ортчемзы кадь уг ӧръяськы. Сюрес вылаз шедьыло нюкъёс- гопъёс но, куашкан калэ вуэм выжъёс но, куазь жобан дыръя люкаськем лымы букосъёс но, кужмо зоръёс бере дэриен кисальӟем вырйылъёс но. Ваньзэ со могӟетъёсты вормыны кӧня кужым, чиданлык кулэ! Кытӥяз канжаськытэк, пыд йылысьтыд усьытэк ортчыны но уд быгаты. Сыӵе дыръёсы адямилы дыраз кулэ юрттэт но, визь-кенеш но. Дыраз но валаса сётэм юрттэт но кенеш адямилы выль кужым сёто но, со ворме вань могӟетъёсты. Нош адями сюлэмысь "сьӧд" виштыоссэ гинэ утчало ке, солэн кужмыз огдырлы юскиське. Озьы каризы Табловез. Мазэ гинэ "сьӧдзэ" шедьтӥллямтэ Грицколэн ыстэм "копаськисьёсыз". Таиз кивалтӥсь "курытэныз" эшъяськем, пе, соиз ваньбурез капыръя, пе, мукетыз - браконьер, пе, ньылетӥез "финансово-хозяйственной дисциплинаез тӥя", пе. Вань со "сьӧд" виштыос, пе, потэмын Табловлэн кивалтӥсьёсыныз "беспринципно" выременыз но соос азе "чурытэсь куронъёс" пуктыны быгатымтэеныз. Озьыгес гожтэмын вал обкомлэн бюрояз, Бадӟым Пудга райкомлэн пленумаз кутэм постановлениосын но. Сыӵе "ужъёсыз" понна обкомлэн бюроез но райкомлэн пленумез Табловез ужысьтыз мозмыто. ... Арня пала Таблов, секыт макмырен курадӟись мурт сямен, жӧломыса ветлӥз. Секыт, туж секыт вал сыӵе шуккетэз чиданы. Но мар карод, обкомлэн кияз самой вылӥ но кужмо власть. Кызьы малпаз вылӥ кивалтӥсь, озьы ик луоз. Котькӧня ӟеч ужъёс лэсьты дасо аръёс ӵоже, огпол янгышад ке, ваньзэ вунэтозы. Будто адями кыӵе ке йыруж лэсьтӥз кадь. Аслаз кузёезлы уно аръёс ӵоже умой тыршем пуныез огпол солэсь ӟеч сиёнзэ арам каремез понна, берпалаз ӵыжыса уллям сямен луэ ук парти улонын но. Л. И. Брежнев кивалтон вакытэ кутэмын вал "Моральный кодекс строителя коммунизма" нимаськись индылон. Солэн пуштросэз туж шонер но кельше "Библиысь" адямиез гажан но черклэн солэсь данзэ утён сярысь дышетонэзлы. Нош улонамы со туж визьмо гожтэм принципъёсты чик малпаськытэк таркало сьӧраз ортчем, партилэн вылӥ постъёсаз пуктэм куд-ог кивалтӥсьёс. Тӥни кытысен потэ тоталитаризм шуон системалэн выжыез. Вылӥе сюрем куд-ог кивалтӥсьёс асьсэзыз инмар кожаны кутско. Умой-умой чакласькытэк, котыр ласянь эскерытэк, сюлэмзылы маин ке кельшисьтэм кивалтӥсьёсыз одӥг сапен сэрпалто ужысьтызы. Шуныт юртысь уллям пуны сямен, котькытчы мын: тон кузёедлы кулэ ӧвӧл ни. Куд-ог ляб сямо кивалтӥсьёс, шуг-секытэ Таблов кадь сюрыкузы, юскиськыса пияла пыдсы выё. Мукетъёсыз, пож ву кисьтаса, пӧртэм инстанциосы чагиськонъёс ӵабъяло но асьсэзыз зэмлык понна нюръяськисен лыдъяло. Куинетӥосыз котькыӵе ужлэсь палэнско но семьяоссылэн сильсьӧразы пуксё. Ньылетӥосыз бомж шуонъёслэсь армизэс будэто. Сыӵеос пӧлы ӧз пыры Таблов. Ӧз ветлы кивалтӥсьёс, "гоно" киё тодмоосыз дортӥ, ужан инты утчаса. Малпаськиз но мынӥз Пудгаен артэ интыяськем совхозэ. Тодэ вал: отын али зоотехник утчало. Совхозлэн кивалтӥсьёсыз сыӵе куронлы нырысь-валысь чылкак паймизы: "Ма, Владимир Павлович, калыкмы уз вала, дыр, сыӵе бадӟым ужысь огшоры интые куриськемдэс. Тани главной зоотехникмы ӝоген пенсие потыны малпа. Оло, ӧжытак витёды?" - Уг, уг витьы. Пенсие кошкемез бере но солэн интыяз уг мыны. "Сьӧлыкъёсме" вылӥ кивалтӥсьёс бордам лякизы бере, соосты пичи ужысен куръяны кутско. Сюлэм-лулме буйгатӥ ке, отӥяз адӟом. Оло, серем мактал кароды, но дунне питран но весяк шонер уг берга: кытӥяз уллань питра, собере нош ик выллань ӝутске. Озьы ик луылэ адямиен но. Инмарлы тау: тазалыке вылэ уг ӝожтӥськиськы на. Котькыӵе ужын кужмы тырмоз на. - Вождэс эн поттэ, Владимир Павлович, ми шумпотыса басьтом тӥледыз уже. - Соку али ик огкыл шедьтомы. Монэ жаляса мар, азьвыл вылӥ кивалтӥсь карыса, мукет ужасьёстылэсь номырин но эн висъялэ. Куронъёс но дисциплина вань ужасьёслэн кадь ик мед луозы. Дисциплинаез тӥяй, косэмдэс ӧй быдэсты ке, ваньмызлы сямен огкадь ужрад кутэлэ. *** Уж гинэ бурмытэ лул-сюлэм висёнэз. Каньылля буйганы кутскиз Табловлэн но секыт мылкыдыз. Юрттӥзы солы вӧзаз ужась эшъёсыз, совхозлэн кивалтӥсьёсыз, семьяез. Толэзь но ӧз ортчы - сое, азьвыл бадӟым кивалтӥсез, асьсэлэн адямизы каризы. Секыт, кырсь ужлэсь, (пудо вордонын сотэк уг луы уго) Таблов ӧз палэнскы. Ужаку но, нуназеяку но, шутэтскыку но артэ ужась эшъёсызлэсь ӧз палэнскылы. Одӥг мылкыдо, шудо семьяын кадь тыршизы. Адями котькызьы мед тыршоз азьлозэ вунэтыны - лул-сюлмысь со капчиен уг кошкы. "Мар луиз меда Грицкоен? Ведь нырысь со ассэ котькуд ласянь умоен, лачмытэн, визьмоен, адямилэсь малпанъёссэ ӟеч валасен возьматӥз вал, - малпаськылэ огназ кыльылыкуз Таблов. - Ну, монэ, шуом, вал мар понна пыкылыны. Куд-огез ёрос кивалтӥсьёсмы вунэтыны кутскизы кин луэмзэс. Соосын, ваче син пуксьыса, огпол гинэ ӧй пыкылы, алылӥ. Оскылӥ, оло, янгышъёссэс валалозы шуыса. Адямиез жалян сямыд, солы мултэс осконэд ас вылад берытскиз ук, Владимир Павлович. Кут вал дыраз чурытэсь ужрадъёс. Кызьы шуо бюрократъёс, бюроын лусйы вал, сюлэм пушказ пыӵатозяз. Оло, валасал кивалтӥсед? Иназ мынысал мукетъёсызлы но. Сьӧраз ортчемзэ ужысьтыз но улляно вылэм. Обкомъёслы со ласянь капчигес. Янгышам адямиез отысь пешкытӥд - со интые кулэ муртэ шедьтыны сокем шуг ӧвӧл. Нош ёросъёсын толэзьёсын утчано луэ кивалтон уже тупась адямиез. Шонер верало калыкын: адями, пе, янгыш лэсьтэмез бере гинэ визьмаське. Сыӵе дыръя куд-огез ассэ буйгатэ, берло мар на шуыса. Шонер ӧвӧл со. Янгыштэ валан ноку но бер ӧвӧл. Азьланяз озьы медаз ни лу шуыса, ноку эн вунэты янгышъёстэ. Ну, монэ, шуом, ӟучъёслэн верамзыя, "поделом" уллязы ужысьтым. Нош мынэсьтым куинь толэзь азьло мар понна чальтчытӥзы Сэбед райкомлэсь кивалтон уже алигес кутскись нырысетӥ секретарьзэ? Чылкак валантэм. Калитов выль интыяз ужзэ но ӟеч-ӟеч валаса ӧз вуы на вал, нош сое куасалтӥзы ни. Райкомлэсь пленумзэ кык пол ортчытоно луэм. Нырысяз Грицко ачиз ӧз ветлы отчы: орготделысьтыз ужасьёсыз пленумез ортчытӥзы. Обкомысь тодмо эше вераз: пленумзы, пе, огыр-бугыр ортчиз. Сэбед райкомын кема ужам адямиос шуиллям: - Калитов ар но ӧз ужа нырысетӥ секретарь луыса. Нош милям чакламмыя, солэсь умой кивалтӥсь пӧрмоз. Со тырше адямиослэсь мылкыдзэс, сюлэмшугъяськонъёссэс валаны, быгатэ, кылдэм вапумысь потон вылысь, дыраз но усто визь-кенеш сётыны. Ми сямен, партийной ужын со туж умой сям но асьме профессимылэн шорсюлмыз луэ. Калитов быгатэ адямиез кылзыны но валаны, ноку уг керӟегъяськы, лякыт но визьмо мурт. Конференцимы ӝыны ар гинэ талэсь азьло ортчиз. Малы соку обком кивалтӥсьмес воштон сярысь кылпум ӧз ӝуты? Нош али, гужем кысык бусы ужъёс дыръя, Калитовез пыкыло, ёросын пудо-сиён дасянэз радъяны, пе, уг быгаты. Шонерак вераса, татын Калитовез гинэ янгышатыны уг луы. Асьмеос, райкомлэн аппаратаз ужасьёс но, пленумлэн членъёсыз но, лад-лад ӧм басьтӥське Калитовлы юрттыны. Ма, собере бускель ёросъёсамы но пудо-сиён дасян ужъёссы сокем ик ушъямон ӧвӧл. Иське, обкомлэн логикаезъя со ёросъёслэсь но кивалтӥсьёссэс ужысьтызы сэрпалляно-а, мар-а?.. Райкомлэн членъёсыз чутрак пумит луиллям нырысетӥ секретарьзэс ужысьтыз мозмытонлы. Кык мурт гинэ обкомлэн ӵектонэз понна киоссэ ӝутэм. Ужпумлэн озьы берытскемез Грицколы ярамтэ. Орготделысьтыз ужасьёссэ "пыжемез" бере шуэм: - Калитовлэсь ужамзэ эскером бюроын но сое ужысьтыз мозмытон сярысь решение кутом. Собере ини нош ик райкомлэсь пленумзэ люкалом. Ачим но мыно пленумазы но бюролэсь решенизэ уж вылын быдэсто... Обкомлэн бюрояз Грицколэсь Калитовез ужысьтыз мозмытон сярысь ӵектонзэ умоен лыдъяллям. Гурт ужпумъёсъя секретарь Зайлыков гинэ соглаш луымтэ. Со шуэм: - Калитовлэн ужан опытэз ичи на. Но мон оскисько: солэсь усто кивалтӥсь пӧрмоз. Ваелэ, эшъёс, ум дыртэ. Оском на адямилы. - Тӥ, Степан Семёнович, партимылэн 27-тӥ съездэзлэсь решениоссэ валаллямтэды на, шӧдӥське. Выльдӥськон, перестройка шуон вакытэ тяпайтыса ужась кивалтӥсьёсыз чиданы уг луы. Кӧня чидалом на Калитовез? Ёрослэсь экономиказэ чылкак куашкатозяз-а? - Юрттыны кулэ егит кивалтӥсьлы. Эшшо верасько на: мон сямен, Калитов - будӥсь кивалтӥсь. Кадръёсын озьы ужаны уг яра! - Кӧня соин выроно на?! Уз пӧрмы Калитовлэсь усто кивалтӥсь. Чалякгес воштоно сое... Райкомлэн пленумез но Грицко партилэн 27-тӥ съездэзлэсь решениоссэ ушъяса шуизы: - Кин съездлэсь решениоссэ сюлмыныз валаз, со гинэ быгатоз улонамы воштӥськонъёсыз азинтыны. Нош кинъёс ӧз валалэ сое, перестройка сярысь супыльтыса гинэ уло, сыӵеослы партийной ужын инты уз луы. Соин ик обкомлэн бюроез Калитов эшез ужысьтыз мозмытыны ӵектэ... Калитовез куштонлы пумитъяськисьёс вал ик но, Грицко соослэсь верамъёссэс кылэм-адӟем но ӧз кары. Райкомлэн орготделэныз кивалтӥсь нылкышно Рогазина синкылиосыз потыса вераськиз. - Тазьы ке ужады кадръёсын, тужгес но удмуртъёсын, Грицко эш, тӥледлы удмурт шаерамы кема кивалтыны уз кылды, - веранзэ йылпумъяз со. Тӥни озьы, областной партийной организациын удмурт кивалтӥсьёслэн лыдзы нош ик одӥг муртлы кулэсмиз... Тани табере мон но сыӵеос пӧлы пыри. Номыре ӧвӧл, Владимир Павлович, йырдэ ошыны уг яра. Арлыды сокем бадӟым ӧвӧл на, тазалыкме инмар уте. Тодмо вылӥ кивалтӥсьлэн верамезъя, асьмелэн урамамы но праздник вуоз на... Кыкто мурт кадь Соосыз тани тазьы огазе люка на вылэм... Но улонысь кошкизы ни калык поэт Николай Байтеряков, крезьгурчи Геннадий Павлов. Зэмзэ ке, пырак тазьы огинэ кариськыса пукылыны, ог-огедлэсь лул кырӟандэ кылзыны трос-а меда кылдылӥз? Улон уго котькудзэ ас сяменыз нырке но пӧртэм пала кожытъя. Нош со понна вань художник. Йыраз кылдэм суредзэ зэмослы пӧрмытэ: котькудзэ пуктэ озьы, кыӵеен адӟемез потэ. Ӝамдэлы чалмиз баянлэн куараез. Таиз но, соиз но ас вактазы усем кадь малпаськонэ выизы. Кылбурчиослэн сюлэмазы веттам чуръёссы сайкало... Аслаз суредасьлэн син азяз буёлъёс улӟо... Суред быдэсмиз. Нош ик одӥгез бадӟым уж югыт дуннеез адӟиз. Ачиз Владимир Кашин табере ас кылдытэм тусбуез вӧзын кыкто мурт кадь сылэ. Нош соин артэ - эшъёсыз: Анатолий Леонтьев, Николай Байтеряков, Александр Белоногов но Геннадий Павлов. Можгалэн дано пиосыз. Т. Николаева. Г. Юсаевлэн туспуктэмез. Кыл дунне Йыр кур медаз лу! "Удмурт дуннеез" кие кутыку ик малпаськод ни: валантэм кылъёсыз трос, дыр. Озьы ик вань: нош ик шедё асъет, ӧри, табыш, эль, лулчеберет но туж уно мукетъёсыз. Малы кулэ соос, калыклы валамон ӧвӧл ке? Кылэз одӥг муртлы гинэ малпано ӧвӧл, со ачиз лыктэ, калыке сюрес ачиз шедьтэ но бератаз пыраклы кыле. Берло дыре ӵемысь кутӥськылэ коньдэт кыл. Со валамон кадь, нош бюджет валамонгес. Ми палъёс серекъяло ни: коньдэт, кышнодэт, машинадэт... Дэт люкетэз олокытчы но лякыло. Мукет кылысь лыктэм кылъёс удмуртъёслы валамон ке, мед кылёзы озьы ик. Малы палэнтод соосты? Кылсярысь, таӵеоссэ: пресса, власть, процент, заседание, сессия, посёлок, референдум... Кыӵе вал литература кылмы, сыӵе ик мед кылёз ини. Малы валантэмзэ кужмысь малпано на? Ма сётэ со? Шузимытэ гинэ. Йыркур кылдытэ. Шуиськом: пиналъёсмес удмурт кыллы дышетоно. Нош соос гуртазы огзэ кыло, газет-журналъёсысь мукетсэ адӟо... Татын но валантэм югдур кылдэ. Кыл - шудон ӧвӧл. Тодосчиос та веранэз пелязы ӟеч-ӟеч мед понысалзы. Валамон соиз но: удмурт кыл удмурт калык пӧлын гинэ йыг-йыг улыны быгатэ. Со дыре ик туж каллен воля, будэ, чеберске. Сое вакчи дыр куспын уд узырмыты - куронъёсыз аслаз. Мае возьматэ элькун кыл? - Эль - край, сторона, страна. Оскисько: со но туж тросэзлы тодмотэм. Лыдӟыку пумитано ке, юзыр-кезьыр луоно. Газеттэ ик коть сэрпалты. Кун - государство. Кыӵе ке страна. Нош асьме шаермы государство шат?.. Гажано тодосчиос! Уг луы-а улосмес шаермы, Удмуртия, республикамы, вордскем палъёсмы, вордскем музъеммы шуыны?.. Удмурт сямен ӟеч-ӟеч валэктоно ни Кун Кенеш кылъёсты но. Ёрос кыл но пумозяз валантэм. Куддыръя сое райцентр шуыса валаськом, куддыръя - быдэс район. Кӧня ке кыл шонер гожъяськон сярысь. Чурысь чуре выжтыку, одӥг буквазэ азьвыл мукет чуре ноку но уг кельто вал. Одӥг букваез гинэ мукетаз уг выжто вал. Соос янгышен лыдъяськылӥзы. Со понна ӧжыт гинэ "кык" ӧз басьяллялэ дышетскись пиналъёс. Нош али ма луэ? Сыӵе янгышъёс - номерлы быдэ. Курегпуз, ыжгон кылъёсты котьку гожъяллямы ӵош. Малы ке шуоно, соослэн валатонъёссы мукетгес, одӥг кыл луо: яйцо, шерсть. Нош ӟазег пуз, пуны гон, скал гон, кылъёсты ӵош нокызьы но уд гожты. Чаклалэ: гусиное яйцо, собачья шерсть, коровья шерсть... Азьланяз но валантэм кылын гожъязы ке, малпаськоно луоз мукет газет сярысь. Но туж ӝож потоз. Малы ке шуоно, одӥг гинэ бадӟым удмурт газетмылэсь мынам люкиськылэме ӧвӧл. Василий Вахрушев, удмурт кыллы но литературалы азьвыл дышетӥсь. Шаркан черкогурт. Кытысь потэ кузьмаськон-вузаськон? Вань сыӵе умойтэм кыл - блат. Сое кылыса, соку ик син шоры пуксе кырсь суред: тани кин ке но ватскыса кадь потэ магазинлэн бер ӧсысьтыз сиён-юонэн тырымытэм сумка, сьӧд мыйыко воргорон шыпыр-шыпыр вераське деканэн, квартираосты люкылонэн герӟаськем чиновник кабинетаз ворсаськыса лыдъя-чота кузьым чотын шедем манетъёссэ... Ваньмыз со озьы. Но, синмамы учкыса верам ке, блат шуон котькудмылы ик тодмо ук. Уго со вал, вань но луоз азьланьын. Мар бен со сыӵе блат? Та кыллэн кылдэмез сярысь ке верано, со нырысь ик потэмын лушкаськисьёслэн но пытсэт сьӧрын пукисьёслэн вераськемысьтызы. Бӧрысьгес блат шуон возьматыны кутскиз тодмоос пыр аслыд кыӵе ке пайда поттонэз, мукет сямен вераса, законэз тӥяса, мурт чотын улонэз. Сыӵе валэктонъёс шедьтыны луэ словарьысь. Малы бен сыӵе урод сям зол выжыяськемын асьме улонамы? Мон сямен, со понна котькуд адями но, дыр, янгыш, Учке ай, кызьы асьмеос, чик но малпаськытэк, куддыръя укыр вылӥе ӝутӥськом воксё дантэм адямиосыз. Нош макем вылӥе лэзиськом адямиез, сокем тросгес сётӥськом солы кивалтыны, коньдонэн вырыны но мукет луонлыкъёс. Сётыны сётӥськом, нош ужамез понна кылзэ юаны вунэтӥськом. Табере малпаське, кӧня меда быдэс Россиын министръёс, депутатъёс, векчи чиновникъёс. Осконды вань-а, ӵыжы- выжыоссы, тодмооссылэн тодмооссы соос чотын асьсэлы кыӵе ке но пайда поттытэк уло шуыса? Я квартираос, машинаос дунтэмен басьто, котттеджъёс лэсьто, я асьсэлы шуныт ужан интыос шедьто. Власть ке воштӥське, бюрократической тубатлэн ёзэз но тӥяське. Но азьло сямен ик, со тубатлэн пагӟаосыз вылэ султо выль властьлы матысь тодмооссы, ӵыжы-выжыоссы. Озьы лэсьтӥське кадь кадръёсъя политикалэн валтӥсь люкетэз. Россиын улӥсьёс пӧлын 70 процентэзлэн туннэ кыӵе ке но льготаоссы вань. Соос пӧлы ожысь но ужысь ветеранъёс, сӧсыръёс, студентъёс, военнослужащийёс, Афганистанын ожмаськемъёс, Чернобыльын ужамъёс гинэ ке пырысалзы, государствомылы тау карысалмы - уг вунэты, сюлмаське шуысалмы. Но соос пӧлын туннэ - депутатъёс, судъёсын, прокуратураын, милициын, полициын, таможняын ужасьёс. Государствоен сыӵе кусып возьыса луэ на шат зэмлык но калыклэн кулэяськонъёсыз понна нюръяськыны? Соин сэрен ик должностен адямиос но политикаын азьветлӥсьёс пӧлын йыло коньдон кузьым (взятка) басьтон, вузаськон учыръёс - тодо ук, закон соосты утёз. Кылем арын республикамылэн прокуратураяз коррупциен нюръяськон ужпумъя лэчыт кенеш ортчиз. Отын ивортэмын вал коррупциез шараям ньыль учыр сярысь гинэ. Соос но интыосысь ас коже кивалтон ёзъёсын герӟаськемын вылӥллям. Серем ӧвӧл шат со? Со дыре ик районъёсысь прокуроръёслы но, республикаысь Эскеронъя комитетлы но, Кун Кенешысь Эскерон палаталы но трос сыӵе учыръёс тодмо. Блатлэн выжыяськемез мукет муген но герӟаськемын: Россия котьку данъяськылӥз дефицит шуонэн. Рыноке выжемлэсь азьло я соиз, я таиз вуз ӧз тырмылы. Та понна нош ик янгыш вал государство. Экономикалэсь ужамзэ кулэезъя радъяны со ӧз быгаты. Но янгыше уськытылӥзы "пичи" адямиосыз. Уг тырмы сакыр-песок - янгыш, пе, аракы позьтӥсьёс, шӧдтэк шорысь ышиз пинь сузян паста - нош ик янгыш луо юисьёс. Нош малы ӧз тырмылэ мисьтаськон порошок, колбаса, пыдкутчан, мукет кулэ вузъёс? Валэктон ӧй вал. Семьязэ маин сюдыны-дӥсяны ёрмем адями нокыӵе блатлэсь ӧз курдалля, вузкарисен ӟеч кусып возиськод ке, тон самой шудо адями ини. Рынокен экономикае выжеммы бере, магазин ӝажыос олокыӵе но чебер, ческыт арбериосын тырмизы. Но адями нош ик эриктэм, табере ини троссэ кекатыса возе коньдонлэн тырмымтэез. Блатлэсь быдэсак мозмытскыны нош ик уг луы. Пунэм тыронъёсы пырыса ке но, адями секыт югдурысь потыны выре. "Коньдонэд ке вань, блат кулэ ӧвӧл", - шуизы мыным куд-ог тодмоосы. Но та малпанэн быдэсак соглаш кариськыны уг луы, угось туала вакытэ, куке данак луизы ужтэк кылемъёс, ӟеч уж шедьтон понна но тодмоос кулэ. Сю манетэд ӧз ке но лу, ӵок, мед луозы сю эшъёсыд - таӵе веран асьме улонын юнме кылдэмын ӧвӧл, дыр. Быдэ вуымтэ нылпиослэсь кылоно луэ: "Ми анай-атайёсмы сямен ум курадӟе, умойгес, ӟечгес уломы". Номыр соослы уд шуы, озьы ик луыны кулэ кадь. Но котьма ке но, кема аръёс ӵоже пиналъёсмы мукет сямен улыны уз на быгатэ. Арысь аре пӧртэм дышетон заведениослэн ӧсъёссы усьтӥсько дышетскыны мылкыд карись нылпиос понна. Но татын но блаттэк уг ортчы, уката ик престижной шуоно факультетъёсы пырыку. Та пумысен малпанъёссэ вера Удмурт кун университетысь Адямиез эскеронъя институтлэн директорез Альберт Алексеевич Разин: - Куд-ог нылпиос туж ляб тодон-валанъёсын институтэ пырыны лыкто. Но абитуриентъёс пӧлысь мон туж визьмозэ синйылтӥ ке, вань кужымме сёто солы институтэ пырыны юрттон понна. Монэным вал сыӵе учыр: Кизнер ёросысь одӥг медалистлы экзаментэк экономикая факультетэ пырыны юрттӥ. Школаын дышетскытозяз "ньыльёсыз" но вылымтэ, кырӟась, спортсмен, олокӧня почёт грамотаосыз. Но малы ке уг оскы вал, математикаез "витьлы" сётоз шуыса. Солы дурбасьтон понна ачим мынӥ ректор доры. Сыӵе вамыше понна возьыт ӧвӧл, али но чакласа возисько со студентлэсь дышетскемзэ - "вить" гинэ октэ. Таӵе сюлмаськонме но вераме потэ. Удмурт нылпиослы квота кулэ, дыр. Но малы меда удмурт студентъёс пӧлын вань азьтэмъёс, лякыт, шулдыр улонэз утчасьёс, дышетскемзы уг поты, вина юо, тамак кыско. Малы дышетскыны уг тыршо? Удмурт филология факультетын огаз аре одӥг курсысь оглом тямыссэ уллязы. Возьыт! Мынам тодэмея, кылем душетскон арын Удмурт кун университетын шараямын вал абитуриентъёслэсь уно коньдонзэс кыскыны быгатэм преподавательёс. Сьӧраз ортчемъёсызлэсь со понна кылзэс зол юазы. Но азьланяз но сыӵе учыръёс уз ни луылэ шуыса, сокон ӧвӧл, угось асьме вузъёсын преподавательёслэн уждунзы шорлыдын вераса 350-500 манет гинэ луэ. Соин ик соос асьсэлы ватсаса уж утчало, тросэз школаосын урокъёс нуо. Озьыен, визьмо, дышетскем адямиослы но блатлэсь куштӥськыны уг луы. Сыӵе улон калэ вуттэмын быдэс Россия. Табере нош ик кӧня ке выжомы историмы вылэ. Ку, кыӵе дырысен сокем сӧриськыны кутскизы адямиос? Кыӵе калыкъёс тужгес но золгес уло блат, мурт чотын? Альберт Алексеевичлэн малпанъёсыз мыным тужгес но тунсыко потӥзы: - Пӧртэм калыкъёслэн, удмуртъёсты вераса но, блатсы ӧй вал, дыр, общинаен улыкузы. Соку адямилэн быдэс улонэз калыклэн син азяз ортчылӥз. Адями номыр ӧз лэсьты на, но община тодэ ини, мар со лэсьтыны малпаське. Кызьы, мар чотын адями ваньбур поттэ - ваньмыз тодмо луылӥз. Общинаос быремен, улонлэн радыз тӥяськиз. Тӥни сыӵе малпанъёсыз философия наукаосъя кандидатлэн. Солэн верамезъя, блатэн нюръяськыны али юрттоз зол радъям эскерон (контроль) гинэ. Альберт Алексеевичлэсь малпанъёссэ азинтыса, мон верасал на, блатэн нюръяськон ужпум обществомы азьын туннэ нуналлы меӵак пуктэмын ӧвӧл на, угось со понна нырысь ик государство адямилы блаттэк улыны луонлыкъёс кылдытыны кулэ. Тӥни соку гинэ данъяськыса вераны быгатомы: Адями - кыӵе со данъяськымон кылӥське. Татьяна Банникова. Вылӥ судын Юалляськон-а, алдаськон-а? 17 февральысен кутскыса, Вылӥ судын мынэ 4-9 январе районъёсын орчытэм гурт кенешъёслы йылпумъянъёсты эскерон. Соосты умойтэмен лыдъяса, судэ вазиськизы Кун Кенешлэн депутатъёсыз Н. Н. Нагорных, А. Н. Ешкеев, С. Г. Чаузов, Камбаркаын, Можгаын улӥсьёс. Та кенешъёсы вань бырйисьёс пӧлысь пыриськиз 27 процентэз, отысь 70 процентэз мылкыдзэ вераз, районазы кун юнматон сярысь. Калыкез валаны шуг ӧвӧл: гурт хозяйствоын секыт югдур кылдэмын. Сое тупатон понна кулэ юн власть, интыысь ас коже кивалтонъя органъёс уз ворме. Республикаысь Вылӥ судэ вазиськисьёс (соос 6 мурт) искен потӥзы, Кун Кенешлэсь кык законзэ умойтэмен лыдъяса. Соос радэ шедизы "О гарантиях учета мнения населения при установлении и измерении границ муниципальных образований" но "Об упразднении муниципальных образований районов Удмуртской Республики и образовании муниципальных образований сельских поселений, сельских округов, сельсоветов" Законъёс. Нырысетӥез кутэмын вал кылем арын 23 декабре, кыкетӥез - туэ 8 январе. Искен вазиськисьёс ортчытэм гурт кенешъёсты умойтэмен лыдъяло тани малы: соос люкамын вал Выль ар праздникъёс бере ик, туж дыртыса. Кылын мазэ-созэ валаса но ӧз вутты. Нош берло мар ке - поезд кошкиз. Документъёс кутэмын. Кытын но отын вераськон ньӧмыз понна гинэ мынӥз шуыны луоз, кенешъёслэсь протоколъёссэс ас тодэмзыя "пӧразы". Вань на мукетыз но: калыкен вераськон ӝутэмын вал закон печате потэмлэсь азьло. Амалтэк юан кылдэ: кинлы кулэ луиз сокем дыртыса юалляськон? Туннэ нуналлы судын показаниос сётӥзы ни 30-лэсь ятыр адямиос: сьӧрлось гуртъёсын улӥсьёс, интыысь кивалтӥсьёс но пенсионеръёс. Веранъёссы пӧртэмесь, но данакез пусъё: азязы пуктэм юанъя соослэн нокыӵе шуг-секытъёссы ӧз кылдэ, кенешын сётэм куаразы ас тодэм-валамзыя сётэмын. Свидетельёс верамъя, кужмысь соосты нокин кенеше ӧз улля, Ижевскысь вуылэм депутатъёс, министръёс люкаськем калыклэн юанъёссылы валэктон сётӥзы, нокыӵе агитациен ӧз выре. Кун Кенеш ласянь суд азьын кыл кутэ Александр Борзенков - Законностья, обществоез, кышкытлыклэсь утёнъя но адямиослэн правооссыя комиссилэн кивалтӥсез. Со малпамъя, республикаын кутэм законъёс федеральнойёсызлы пумит уг луо, озьы бере, судэ вазиськыны мугез но ӧй вал. Котьма ке но, Вылӥ суд кутскем ужзэ йылаз-пумаз вуттытэк уз дугды. Со ик гурт калык пӧлын ортчытэм юалляськонъя берпуметӥ кылзэ вералоз. Л. Медведева. ВАЗИСЬКЕ - ЮРТТОМ! Толэзь но уг кыльы ни 12 апрелёзь. Та нуналэ тросэз асьме пӧлысь вамыштозы быръёнъёсъя участокъёсы. Уно кандидатъёс пӧлысь бырйыны быгатом тужгес но умойзэ, нимаз адямилы тупамонзэ. Нош со понна асьмеос тодыны кулэ мандат понна нюръяськыны мылкыд карисьёслэсь улэм-вылэмзэс, сямъёссэс, малпанъёссэс. "Удмурт дунне" газетын ужасьёс вазисько кандидатъёслы, соослэн дурбасьтӥсьёссылы, юрттӥсьёссылы: ми юрттом тӥледлы та кысык вакытэ! Ижысь мэре но столицаысь Гордумае шедьыны турттӥсьёслы газет бамын дунтэк сётэмын луоз пичияк инты. Солэсь быдӟалазэ тупатоз Ижысь быръёнъёсъя комиссия. Со сяна, котькудӥз кандидат быгатэ газетэ ачиз сярысь материал сётыны, дун тырыса. Одӥг чурлэн дуныз - 12 манет. Лыктэ, жингыртэ редакцие - огкыл шедьтом! Озьы ик ивортӥськом: милям табере вань асьмелэн компьютеръёсын ужанъя отделмы. Отын лэсьтыны луэ плакатъёс, календарьёс, ӧтён-ӝуткан материалъёс. Тӥледлы юрттозы удыссэс ӟеч тодӥсь-валась специалистъёс. Дыртэ! УДМУРТ КУН ФИЛАРМОНИЛЭН ЗАЛАЗ 19 МАРТЭ "Катанчи" театрысь артистлэн АНДРЕЙ УРАСЬКИНЛЭН "ОСКИСЬКО" творческой ӝытэз. Тӥледыз шулдырто: Анна ПЛОТНИКОВА Александр БАЙМУРЗИН Евгений АНДРЕЕВ Андрей СОЛОВЬЕВ Леонид БАЖЕНОВ. Кутсконэз 19 часэ. Касса ужа 14 часысен. Тел. 23-22-71. КУЖМОЕЗ - РОССИЛЭН КОМАНДАЕЗ Та нуналъёсы "Строитель" спорткомплексын ортчо Европалэн Кубокез понна биатлонъя ӵошатсконъёслэн 9-тӥ этапсы. Кужымзэс мертаны люкаськизы Россилэн, США-лэн, Белоруссилэн но Австрилэн командаоссы. Россилэсь данзэ утё Валерий Медведцев, Сергей Чучалин, Андрей Шашов, Павел Вавилов но мукетъёсыз. Нырысетӥ вормисьёслэн нимъёссы тодмо. Пиосъёс пӧлын 20 иськем сюресэз котькинлэсь ӝог ортчизы Вячеслав Кунаев, Владимир Псарев но Эдуард Усаньков. Юниоръёс пӧлын 5 иськемын кужмоосыз вал Александр Зайцев, Максим Максимов, Андрей Прокунин. Кунгож сьӧрысь спортсменъёслы таяз учыре лты. Соос 10-тӥ интылэсь улӥе кылизы. Туннэ ӵошатсконъёс азьланьтӥсько, нош йылпумъяськозы соос арня нуналэ эстафетаен. Э. ВАСИЛЬЕВА. Кытын векчи - отын чиге Веранэз ӧвӧл, кыӵе секыт югдуре шедемын калыкез эмъян удыс. Вылаз ик, 60-тӥ-70- тӥ аръёсы ӝутэм юртъёс ялан тупатъямез кулэ каро. Вужмо электропроводъёс, оборудование - тани-тани тылпу потоз. Шуге-леке вуытозь - одӥг вамыш. Озьы шуыны луоз Ижысь "Редуктор" АО-лэн 6 номеро медико-санитарной частез сярысь. Больницалэсь юртсэ выльдыны выро ке но, тылпуэн нюръяськисьёслэн куронъёссы бумага вылэ ик кылё. Кин оскытоз, тылпу потон учыр луиз-мараз ке - адямиос дыраз потыны вуозы шуыса? Та выллем ик югдур городысь тазалыкез утёнъя управленилэн 2 номеро стоматологической поликлиникаяз. Солэн кивалтӥсезлы трос пол верамын ни тырмымтэос сярысь, озьы ке но, номыр уг лэсьтӥськы.Туннэ но уг ужа тылпулэсь утиськонъя сигнализация, кышкытлык кылдытэ ӟоскыт интые пуктэм электрооборудование. Паймымон, но пинь эмъясь врачъёс асьсэос кытын шедем отын тамак кыско, тамак пумъёссы пыд улын ик лошъясько. Нош кенжизы ке? Я, шуом, вуж больницаосын таӵе югдур. Выль юртэ потыса но пӧртэм вылымтэ. "Буммашлэн" 7 номеро медико-санитарной частьысьтыз нылпи отделение выжиз выль интые 4 этажъем корка. Ваньзэ мар кулэ - ваизы... тылпу кысон арбериос сяна. Тӥни озьы но луылэ. Собере кинэ ке но янгыше уськытӥськом, ортчемез сярысь жалямъяськиськом. Огзэ гинэ ум валаське: котькудӥз кышкыт учыр потэ адями бордысь. А. ЕМЕЛЬЯНОВ. КЫЗЬЫ УЛӤСЬКОД, ВАНЬБУР ПОТТӤСЬ? Тросэз шуг-секытъёс потӥзы кун предприятиосты кузёослы вузан бордысен. Та ужрадэз ортчытыку, калыклэсь ӧз юалэ, вылӥысен косон вуиз - котькыӵе амалэн кузё луэ, но кун предприятиос медаз луэ. Озьы чик малпаськытэк акциосын усьтэм, пытсам огазеяськонъёс, эштосъёс (ОАО, ЗАО, ТОО) вордскизы. Кызьы бен соос туннэ ужало? Уноез мырдэм возисько, куашкан калэ вуэмын, но кӧняез ке шокало на. Таӵе югдурез куд-огез капчиен валэкто, милемды, пе, конверсия пачкатэ, ож тӥрлык поттэмысь дугдыны ум быгатӥське. Шонер-а бен со? Куд-огезлы, зэмзэ но, со люкетэ, ракета, автомат бичанысь ӝогак гинэ калыклы вуз поттонэ уд выжы. Но государство предприятиосты выльдонэ (конверсилы) берло дыре кӧня коньдон висъялляз ке но, уноез со отчы кутымтэ, уждунлы яке чылкак мукет азе кутэмын. Нош мар бен люкетэ сӥль комбинатъёслы, элеваторъёслы, йӧл заводъёслы пайдаё ужаны? Номыр уг. Я бен, чаклалом промышленной предприятиослэсь ужамзэс, кызьы соос рабочийёссылы уждун тыро. Республикаямы чылкак сизьым предприятие гинэ ужасьёсызлы дыраз уждун сётъя. Соос пӧлы пыро: Ижысь ЭМЗ, "Буммаш", "Спутник" (УПП ВОС), Глазовысь ЧМЗ, "Металлист" но "Воткинский завод". Тӥни чиньыен лыдъямон ук. Нош мукет огазеяськонъёсын югдур кабзэ пӧртэм. Тани "Сарапульский машиностроительный завод" ОАО-ын 9,3 толэзь ӵоже уждун тырымтэ, "Ижмашын" - 6,5, Алнашысь ремонтно-технической предприятиын (РТП), Воткинскысь "Завод радио- технического оснащениея" но Ижысь "Редуктор" ОАО-осын - быдэн 5 толэзьлэсь уно. Куинь-ньыль толэзь уждунзэс уг адӟыло ни "Ижевский механический завод", "Машиностроительный завод "Инвис", Ижысь "Металлист" но Можгаысь "Конус" АО- осын ужасьёс. Нош кытын уждун сётонъя 1-2 толэзь виссы, сыӵе предприятиосты ум но вераське ни Соос угось данак.. Г. ВАСИЛЬЕВ. Быръёнъёс азьын КЫӴЕ АЗБАРЕЗ - КЫӴЕ ИК КУЗЁЕЗ Визьмо йыр, шуо, сю муртэ сюдэ. Та кылъёслы нокызьы оскытэк уг луы жилищно- коммунальной хозяйствоя Можгалась муниципальной предприятилэсь ужзэ чакласа-тодыса. Малпалэ ай асьтэос. Мукет городъёсын ульчаос кырсесь, лымы букосъёс сюресэз пытсало, нош можгаослэн лымыя-а, зоре-а, жоба-а, пелляське-а - урамъёссы чылк-чылк сузямын-ӵужемын. Тае шӧдо-валало городын улӥсьёс но, куноос но синйылтытэк уг кельто. Кызьы бен можгаос майбыр уло, чылкыт возисько? Оло, липетэн возъяло инбамез? Югдур валамонгес луиз город хозяйстволэн кивалтӥсеныз Кун Кенешлэн депутатэныз Игорь Семеновен пумиськыса. Со малпамъя, мукет городъёсын, ёросъёсын коммунальной службаос нимаз пичи ёзъёслы люкиськылӥзы. Рыноке выжон но эрик басьтон уноезлэсь егит кивалтӥсьёслэсь йырзэс поромытэм. Яна потыса, котькудӥзлэн кузё кариськемез потӥз, вылды. Нош ма со сётоз предприятилы, барыш-а, изъян-а ваёз, нокин лыдъясь- чотась луымтэ. Табере бӧрдо, ӝожтӥсько - коньдон, пе, ӧжыт висъяське. Можгаос люкиськон сюрес вылэ ӧз коже, огъя предприятизэс кужмоятыны сюлмаськизы, коньдон поттон амалъёс утчазы. Таӵе ужзылэн пайдаез син азьын. Мукетъёсызлэн уксёзы пуж пыр кадь ке вия, лымшор городысь коммунальникъёс паймымон ӟеч уло: миым табышсы (вуж дунъёсъя) 7 миллиард! пала люкаськиз. Коньдон - со зор ӧвӧл, инмысь уг васькы. Кытысь бен со лыктэ-люкаське предприятилэн кисыяз? - Палэнысь заказъёс пыр,- шуэ Игорь Николаевич. Пусъёно созэ но, возьмаса уг уло, асьсэос утчало, мар лэсьтыны быгато - ивортыло. Коммунальникъёслы вазиськыло моторъёсты, насосъёсты выльдон пумысен. Трос пумо приборъёсты но тупатъяло татысь кибашлыос. Со сяна, юртто предприятиослы, организациослы техникаен но. Валамон, таизлэсь но кисые коньдон пыре. Вань на та уксё пуйылэн мукет палыз но. Со лыдъян- чотанэз валан но ваньбурез пайдаё, шыръяса уже кутон. Тӥни озьы, пичи ву шапыкъёслэсь шуръёс кылдэм музэн, коньдон пуйы но калленэн зӧкоме, предприятилэн инъетэз но юнма. Миым гинэ коммунальникъёс ас кужыменызы шуныт гараж ӝутӥзы, котельнойзэс выльдӥзы, 5 иськем кузьда шуныт сётӥсь но 3 иськем ву бызён гумыоссэс вошъязы. Выль аре коммунальной хозяйствоысь коллектив пунэме кылёнъёстэк выжиз. Туала вакытэ таӵеен данъяськыны луэ ни. Ма озьы ик вань, татын ужасьёс данъясько коллективенызы, гажало, ярато асьсэлэсь кузёзэс. Семенов сярысь шуныт вазисько городын улӥсьёс но. Ӟеч ужъёсыз син шорын бере, та визьмо кивалтӥсез, сабырлы удмурт воргоронэз калыклэн быдэс городлы кузёен адемез потэ. Ма бен, ужезъя ик данэз! Г. ЮСАЕВ. Чуръёс, чуръёс Малы? Улонэз малпаса, кӧня синкыли кисьтӥськике, уйёсты но эрказ кӧлыны уг луы. Уждунэз толэзьёсын ӝегато. Нылпи пособие ӝыны арен уг сёто. Малы ми, пал кышноос, пособие басьтыны, мукетъёсыныз ӵошатыса, шугъяськиськом? Малы вань законъёс йӧскадь уг быдэсъясько? Мон колхозын скал кыскись луыса ужасько. Берлозэ уждун апрель толэзь понна басьтӥм, сыӵегес ик югдур нылпи пособиен но. Ӵош ужась эшъёсы пиналзы понна пособие дыраз басьто. Игра районлы, мукет районъёсын ӵошатыса, дотация уг висъяськы. Со ас кужыменыз пырпотэ, тросэзлы улӥсьёслы нылпи пособие дыраз тыро. Нош ми, пал кышноос, Калыкез улон-вылонын утёнъя минитерство пыр пособие басьтӥськом, ялан витёно луэ. Малы милемды но соос радэ уг пырто, пособие радызъя уг тыро? Нош уждун сярысь ке верано, оло, куд-ог районъёсысь дышетӥсьёс сямен милемлы но огдырлы ужмес дугдытъяно? Жаляса верано, пудолэсь бӧксэмзэ бадӟым кивалтӥсьёс уз кылэ. Таӵе улонмы понна пудо шат янгыш. Л. МЕЛЬНИКОВА. Игра район. Шӧкыч НЫРЫСЬСЭ КЫЛӤЗ АТАЙ НИМЗЭ Ува ёросысь Турынгуртын улӥсь Анатолий Бородинэз егит уд шуы ни. Ар ортчыса, солы 40 арес тырмоз. Но адямилы атай нимыныз вазиськись ӧй вал на. Уз но луы ни, дыр. Мар карод. Ваньмыз понна - та дырозь семья кылдытымтэез но, казна коркась потамтэез понна но ачиз янгыш. 19 арес дыръяз ай, армие мынэм интые, куинь арлы пытсэт улэ шеде. Эрике потэмез бере, куинь ар ёрос кызьы но озьы чидатскиз, собере нош ик берланьяськыны кутскиз. Таяз учыре эриксэ вить арлы талало. Та пукемез бере но куинь ар сяна уг чида. Юнме уг шуо ук: дэрилы дышем парсез, пе, уд тупаты ни. Бородинэз нош ик куинь арлы бышкись ез сьӧры пырто. Отын люкам "визьмыз" ар ортчыса тӧлӟиз. Ӵапак со дыре Лапиналэн, ас нимзэ ум вералэ, пиосыз гидзэ кесязы. Интызэ кенераса ӧз быдтэ, тол вуиз. Ыжъёсты поттыны но нокытчы. Нылкышно гуртоезлы Шаклеинлы вазиське. Таиз чарка шӧмъямез бере шуэ: - Вай ай юрттӥсе ӧтём Бородинэз. Кенердэ син куспын вуттом. Бородин дорын воргоронъёс усьтэм ӟенеликез кыкназы бушато. Куспазы маке сипырто но, Шаклеин ӝогак кошке. Нылкышно со сьӧры калъяськиз вал, потэмез ӧйлась. Ӧс педло палтӥз пытсамын. Бородин жон! вуттӥз нылкышнолэн пельдӥняз. Мазэ-созэ валамезлэсь азьло, кужмысь пыртӥз мурӝолэ. Лапина пытсам ӧсэ йыгаське, кӧня куараез тырме черекъя. Куркаосты возем мурӝолын нӧд, дэри. Коласа ветлонъяз, нылкышно одӥгзэ сапегзэ ыштэ. Вожомем воргорон нылкышноез мурӝолысь поттэ но шораз пуртэн урдске. Гольык кылиськытэ, пумен ачиз но дӥсьсэ куя. Отӥяз ма вал, вератэк но валамон. - Смотри! Кинлы ке поттылӥд ке, аслыд ик урод луоз! - Кышкатӥз Бородин, нылкышноез келякуз. Мыскыллям, ултӥям нылкышно ул дэремзэ но дӥсяны вунэтэм. Мурӝолысь сапегзэ но ӧз утча. Бородинлэсь пал катазэ кутчаз. Адямиез эриктэмам бервылъёсты сяна, следовательёс Бородинлэсь шедьто на 11 грамм наркотиксэ. Та "эмъюмлэсь" дораз кызьы вуэмзэ, валамон ни, воргорон "уг тоды". Бородинлы тодаз вайыны аръем дыр сёто. Тодмо луиз на: эрказмем воргорон гуртысьтызы эшшо одӥг нылкышноез эриктэмам на. Ваньмыз со понна Бородинлы решётка сьӧрын пукыны куать ар ватсало на. Судлэн заседаниез мыныку, йыртэмась нырысьсэ, дыр, кылӥз солы атай нимыныз вазиськемез. Мар бен, вань улонзэ мыдланьяськись макелы мукетыз уг кыльы. В. ТРОФИМОВ. Наталь Газет гожъям бере "Утчалэ нылпидылы атай" "Нылпиосме сюратайлы уг оскы" статьяез лыдӟеме бере, мон но гожтоно кариськи. Ми кузпалэным валче улӥмы 42 ар. Кыӵе ӟеч атай вал со мынам нылылы. Дас укмыс арескам бызьытэк пинал ваи. Туж возьдаськи, асме воксё палэнтӥ калык пӧлысь. Шуи, мон ноку но уг бызьы, нылме огнам будэто. Но улонэ мукет сямен берытскиз... Кузпалылэн атаез, войнае кошкыкуз, берпум кылзэ верам: "Мон войнае куинетӥзэ кошкисько, уг ни берты, нош пие бертоз. Мед кышно басьтоз". Верам мынэсьтым нимме. Соку мыным дас сизьым арес вал. Мон сое калыкъёслэсь кылӥ, но серем гинэ кари. Ӝоген улонэ чукинь берыктӥськиз, мон пинал ваи. Вуоно кузпалэ войнаысь бертӥз - веськрес, чебер казак пи. Одӥг нуналэ басьтӥсько гожтэтсэ. Сабантуй нуналэ ойдо пумиськом, пе, огазе кариськом, атаелэсь верам кылзэ быдэстэме потэ. Пумитаз номыр ӧй гожты. Азьло сое серекъяй вал, нош табере асме ултӥяй. Ортчиз ӝыны ар, нош ик мыным гожтэт вуиз, таяз учыре но ӧй вазиськы. Озьы ньыль гожтэт басьтӥ, ачим нош ӧй гожты. Одӥг нуналэ малпамтэ шорысь пумиським. Монэ дугдытӥз но юа: - Малы номыр уд гожтӥськы? Шуисько: - Тон чебер казак пи, нош мынам нылы вань, утча пинал нылъёсты. - Мон тодӥсько нылыд сярысь. Оло, со понна но тонэ басьтыны малпасько. - Нылме картэн уг вошты,- шуисько пумитаз,- обижать карид ке, мон тыныд кышно уг луы. Со нош ик оскытэ: - Нылдэ мон ноку но обижать уг кары. Верам кылыз мыным паймоно кадь потӥз, малпаськонэ уси: "Оген улыны секыт луоз, бызьыса ик шудме утчало". Гожтӥ соглаш луэмме. Огшап улэммы бере, картэ мыным вераз, мон, пе, кык пол контузить каремын, сӧсыртэмын, нылпиосмы ноку уз луэ. Ваньзэ тодэме бере, мон солы ӧй йыркуръяськы, ас поннам шуи: "Тонэ война ранить кариз, мон но, война ке ӧй луысал, пинал ӧй вайысал, мон тонэ ноку но уг кушты". Улӥмы огкылысь, ноку ӧм даллаше. 10 класс бере нылы пыриз институтэ. Котькуд толэзе уксёен юрттылӥм. Мон шуисько 20 манет лэзём, картэ шуэ - 30 манет, 30 манет ке верасько, 40 манетозь вуттэ. Нырысетӥ толэзьёсы нылы гожтэтсэ мон вылэ гожтэ вал. Кузпалы сое пыртэ но, ме, тыныд гожтэт вань шуыса, азям куштэ, ачиз коркась потэ. Одӥг пол озьы луиз, кык пол, куинь пол. Собере мон нылылы ивортӥ, папаед вылэ гожты шуыса. Кема ик дыр ӧз ортчы, кузпалы шуэ, нылылэсь гожтэт, пе, басьтӥ. Кыӵе шудо вал со та нуналэ. Нылы институтэз быдтӥз, бызиз, вордскизы пиналъёссы, школае ветлыны кутскизы. Соос улӥзы городын, ми - гуртын. Каникулъёс дыръя кузпалы внукъёссэ арлы ньыль пол гуртэ вае но, келя но вал. Армие кошкизы но, кузпалы кыксы доры ик служить карон интыязы ветлӥз. Малы мон тае ваньзэ гожтӥ? Туж вазиськеме потӥз пинал кышноослы. Нылпиен бызьыны малпаськиды ке, нырысь пиналдылы атай утчалэ. Со ик луоз тӥледлы умой кузпал но. Весь верало: яратон, яратон. Мон шуысал: жалян яратонлэсь вылӥын. Кузпалы мыным кузпал ӧй вал, со мыным луиз матысь эш, нош нылылы - атай. Тау шуисько инмарлы - сётэм мыным чиданлык. М. ШАБАЛИНА. Грахово черкогурт. УЧКИСЬЁСТЫ ӦЗ ПӦРТЭМАЛЭ Та нуналъёсы Ижысь Короленко нимо театрын ортчиз Россиысь калык артистъёсын Михаил Светинэн но Игорь Дмитриевен пумиськон. Нырысез ужа Москваысь комедияя Акимов нимо театрын. Нош озьы ик учкисьёс сое тодо пӧртэм кинофильмъёсъя. Удмуртилэн столицаяз дано артистъёс пыриськизы С. Носовлэн "Дон Педро" пьесаезъя режиссёрен Т. Казаковен пуктэм спектакле. Актёръёслэсь ужзэс шуныт пумитазы. Тужгес но яраз Светинлэн но Дмитриевлэн юн быгатыса, сюлэмзэс, вань мылкыдзэс сётыса шудэмзы. Соку ик шӧдӥськиз: учкисьёсты артистъёс Москваысьлы но сьӧрлосьлы уг висъяло. Кельшиз лыктэмъёслы пьесалэн пуштросэз но. Со угось юн герӟаськемын-тугаськемын туннэ нуналэн. Возьматэмын мӧйымыны кутскем кык адямиослэн сюлмаськонъёссы, куректонъёссы, улонын янгышанъёссы но зэмлыкез утчамзы. "Дон Педро" спектакле вуылӥз милям художникмы Леонид Прозоров но. Солэн суредэз вылысь адӟиськоды Россиысь калык артистэз Михаил Светинэз. Газетъёс иворто США ООН-ын куара сётон правозэ ыштыны быгатоз, та огазеяськонлы тыронъёссэ ӧз берыкты ке, ивортэ "Ассошиэйтэд Пресс" агентство. Со сярысь вераз ООН-лэн коньдон ужпумъёсъя кивалтӥсез Джозеф Коннор. Та вакытэ США-лэн тыронэз 1 миллиард 300 миллион доллар люкаськиз. Соин валче президентлэн администрациез но Конгресс куспын ченгешонъёс пуромизы. Конгресс (отын данак республиканецъёс) куре ООН-лы США-лэсь тыронзэ 25 процентлы кулэстыны. *** "Финансовые Известия" газетлэн чакламезъя, Россия ӝоген му вӧй поттӥсь государствоос пӧлысь палдыны быгатоз. Странаысьтымы компаниос со сярысь сюлмаськыны кутскизы январь толэзьлэн пумаз. Ӵапак соку дуннеын му вӧйлы дунъёс чутрак усизы. Соин валче Россиысь предприятиос толэзьлы быдэ 400 миллион доллар пала ышто. Дуннеын ортчем финансовой кризис странамес сокем ӧз зуркаты, нош му вӧй поттонэн герӟаськем шуг-секытъёслэн пытьыоссы туж кышкыт луыны быгатозы, угось Россилэн бюджетэзлэсь бадӟым люкетсэ тырмыто нефтедолларъёс, пусъе "Финансовые Известия" газет. *** Красноярскын шараямын фальшивомонетчикъёслэн ватскыса ужась цехсы, гожтэ "Красноярский рабочий" газет. Татын суредало вылэм манетъёс но , долларъёс но. Милиция кие озьы ик шедиз уно копировальной но компьютерной техника. Квартира чылкак Гознаклэн ёзэзлы укша вылэм - вань отын бадӟым микроскоп, уксё дасяны нимысьтыз пресс, купюраосты вандылыны станок. Правоез утёнъя ёзъёсын ужасьёс озьы ик шедьтӥзы свинецлэсь клишеос, пӧртэм буёлъёс но лакъёс. Йыртэмасьёс дасяло вылэм 100 манетъем но 100 долларъем купюраос, озьы ик, паспортъёс, военной билетъёс но пӧртэм коммерческой ёзъёслы бланкъёс. Берекет Юртты аслыд ачид Чеснок юрттоз егит возиськыны Китайысь вашкала эмъясьёс уже паськыт куто вылэм чеснокез. Со адямилы юрттэ, пе, кема дыр ӵоже егит возиськыны, мугорысь вужмись тканез выльысь выльдыны. Сыӵе эмъюм дасяны но сое уже кутыны номыр шугез ӧвӧл. 350 грамм чеснокысь соксэ пызьыртыса сурано чылкыт 300 грамм спиртэн. Посудаез 10 нунал ӵоже салкым интыын лач пытсаса возёно. Собере 2-3 полэс марля пыр сӥсъяно но эшшо 3 нунал ӵоже пукетоно. Табере луоз юэмды нимысьтыз схемая, кудӥз сётэмын улӥын. Эмъюмез одно ик юоно, 50 грамм салкым йӧлэн сураса. Эмъюм юон нуналъёс юон дыр но кӧня шапык юоно ӵукна нуназе ӝытазе 1 1 2 3 2 4 5 6 3 7 8 9 4 10 11 12 5 13 14 15 6 15 14 13 7 12 11 10 8 9 8 7 9 6 5 4 10 3 2 1 Дас одӥгетӥ нуналысен кутскыса, эмъюм бырытозь, юылоно нуналаз куинь пол быдэн 25 шапыкен 50 грамм салкым йӧлэн. Тодады возе: мукет дыръя таӵе эмъяськонэз уже куто 5 ар ортчем бере гинэ! Л. Васильева. Ӵуказе - жилищно-коммунальной хозяйствоын ужасьёслэн нуналзы Ижысь 2 номеро жилищно-ремонтной предприятие 109 улон юртэз чакласа возе. Чаклам гинэ ӧвӧл, тупатъян-выльдон ужъёсын выре. Тани миым гинэ татысь коллектив 3009 метр ву бызён гумыосты вошъяз, 1735 ӧс выльдӥз, 1263 квадратной метр бетон вӧлдӥз, 1005 метр выль электропроводка кыскиз но мукет ужъёсты быдэсъяз. Капчи ӧвӧл та удысын тыршисьёслы. Кырыж учкылӥсьёс но вань шоразы. Нош кин дӥсьтоз меда туннэ слесарез Рафис Заляевез, (паллянысез) яке электрикез Леонид Хайдаршинэз (бур паласез) ултӥяса вераны? Ма мугез но ӧвӧл. Воргоронъёс ужзэс ӟеч тодо, калыкен лякыт верасько. Слесарьёслэн бригадирзы Сергей Миляев (паллянысен кыкетӥез) но липиськисьёслэн кивалтӥсьсы Виктор Чулков - тодӥсь-валась специалистъёс. Ньыльназы ик та удысын дасо арлэсь кемагес тыршо ни. Ӵемгес кранъёсты позыръяло, шергес чертёжъёсы учкыло. Вань - котьмалэн - аслаз дырыз. Вылӥ профессионалъёс быгато огкадь, созэ но, тазэ но. Туспуктэмез Г. ЮСАЕВЛЭН. Шаерысьтымы жилищно-коммунальной хозяйствоын ужасьёслы Сюлмысьтымы ӟечкыласьком удысысь тыршисьёсты, специалистъёсты но ветеранъёсты профессиональной праздникенызы. Жилищно-коммунальной удыс калык хозяйствоын котьку но бадӟым инты басьтылӥз, соин уго герӟаськемын экономикалэн юн но кужмо луэмез, калыклэн улонысьтыз ужпумъёсты быдэстон. Экономикаысь шуг-секытъёс шоры учкытэк, коньдон тырмымтэ, тыронъёс будон дыръя но юртъёсы но квартираосы вуо шуныт но ву, тыл но чагыр эстӥськон, выльдӥсько улон юртъёс, выжъёс, чылкыт луо городъёс, будосъёсын шобырско ульчаос но азбаръёс, лэсьтӥсько сюресъёс. Удмурт Республикаысь жилищно-коммунальной хозяйстволэн городъёсысь но ёросъёсысь ёзъёсызлэн ӟеч ужанзы сярысь нуналлы быдэ сюлмаське кызь сюрс муртъем коллектив. Сюлмысь тыршемды но уждэс яратэмды, вылӥ быгатонлыкъёсты но зэмос кузё луэмды понна мур гажаськом тӥледыз но тау кариськом. Жилищно-коммунальной хозяйствоын вань ужасьёслы но семьяоссылы сӥзиськом юн тазалык, шуд, ӟеч малпанъёссы одно ик мед быдэсмозы! Удмурт Республикаысь Кун Кенеш. Удмурт Республикаысь Правительство. Шӧкыч Кылбур пырыос Пиосмурт ке луысал... Мон пиосмурт ке луысал... Кыӵе меда адӟиськысал? Ачим кадьгес, ачим тусо, Но мыйыко, тушо. Бен, малпасько ке, тумошо. Синучкон Тӥляд синучконды Возьматэ пересь. Тӥляд синучконды Азьпалтэ дырез. Мон адскисько Картош ныро но зӧк. Бен, мугоры Лаш-лаш ик - ӝӧк. Татьяна Чернова. Наталь Палэзьпуын улмо уг кисьма Лыдӟи "Гурезь лыктӥз адями доры" статьяез но гожтоно кариськи, сюлэмме вырӟытӥз со мынэсьтым. Мон туж соглаш авторен, пиосмурт пала но дурбасьтэме потэ. Гожтӥсь мурт егит на, улонэз, семьяен улонэз ӧз адӟы, нош мон солэсь ог дасо аръёслы мӧйыгес, соин ик ас мылкыдме вераме потэ. Улӥсько гуртын, кузпалэным люкиськемын. Вань сыӵе ӟуч пословица: "Что имеем - не храним, потерявши - плачем". Гуртын пиосмурттэк туж секыт вылэм улыны. Чыры-пыры ужлы гинэ но кинэ ке медъяно, ӟенелик пуктытэк уг луы. Куддыръя юасько: - Марлы нош одно ик аракы, уксёен басьтэмед уг луы шат? Нылпиосыдлы, кышноедлы мар ке но басьтод - соос кыӵе шумпотозы. Нош воргоронъёс шуо: - Уксёен туж дуно усёз. Дуно ке потэ, ӝыны дун гинэ басьты, но сое ваньзэ семьяедлы ну. Нош аракы юыса дуно уг усьы шат? Одӥг бутылкаез тон огнад уд юиськы, котьку эшъёс сюрозы. Соин гинэ уг тырмы, нош мукетсэ утчаны мыноно. Собере даллашон, жугиськон... Мукет нуналаз йыр висе... Прогул... Яке кин ке техникаен ужа - малы ке но одно ик сюрес урдсы вуоно... Штраф... Начальство сизьдэ... Семья куспын керетон... Мукет ласянь ке учконо: малы воргоронъёс юо? Соослэн доразы бертэмзы уг поты, малы ке шуоно, кышнооссы "чырс" ымнырын, сьӧд халатэн пумитало. Вылаз ик, марлы ке но ӝожтӥськозы на: нылпиоссы мар ке дауртӥллям, уксё уг тырмы, дорысь уж лэсьтымтэ. Уг луы шат карттэ одӥг пол ке но мыньпотыса яке чупаса пумитаны, мусо кылъёс вераны? Асьмеос, удмуртъёс, туж возьдаськиськомы мылкыдмес усьтыны, яратэммес возьматыны. Нош со возьдаськонэз ӧжыт ке но зӥбысалмыке. Кыӵе шумпотыса бертысалзы доре картъёсмы. Собере, гуртысь туала кышномуртъёс асьсэос но туж бере уг кылё тамак кысконъя но, вина юонъя но. Нош кыӵе пелез вандӥсь кылъёсын вераськыны, черекъяны быгато? Сыӵе кышномурт шоры пиосмурт ас эшез шоры сямен гинэ учке на, нокыӵе кышномурт луэмзэ уг адӟы ни. Воргорон но нылкышнолы огпол-кык пол ке но сяська мед кузьмасал. Оло, соку кышномурт тодаз вайысал, со - кышномурт. Собере, пиосмуртлэн улоназ одно ик быдэстоно кыӵе ке ужпумез яке яратоно ужез мед луоз. Соку со аслэсьтыз малпанъёссэ йылаз-пумаз вуттыны тыршоз, юыны дырыз но, мылкыдыз но уз кыльы. Нош кышномурт солэн нырысетӥ юрттӥсез луыны кулэ. Мыным воргоронъёс ӵем гинэ ӝожтӥсько: "Кышное сыӵе-таӵе, весь ужасько, нош солы ноку уг тырмы. Яке, кышноелэн кылзэ кутэмез чик уг луы, соин ик ӧжытак мыжыкен дышетоно луэ... Кышное туж азьтэм но мукет". Малы соос мыным сюлэмшугзэс верало? Эшъёссы сереме гинэ уськытозы, нош кузпалъёссы соосыз уг валало. Соин ик пиосмуртъёс оген улӥсь кышномурт доры мыно, яке сюлэм висёнзэс аракые выйтыны туртто. Оло, тӥ монэн соглаш ӧвӧл, но мон аслэсьтым малпанъёсме гожтӥ. ЕЛЕНА А... Берекет МЕӴАК НО МОГАК Пась умортое шырчик уг каръяськы. Пеймыт азьын сисьпу но пиштэ. Ошмес пожамлэсь уг кышка. Одӥг такалэсь кык кузэ уд басьты. Ош вылэ зу уг поты. Нырысьсэ кыткем вал ӵыжаське. Пельтэм поплы сизьым пол обедня уг жуго. Пунылэн быжыз пунызэ уз азьпалты. Коньы быжыныз улэ. Кеньырез пырыен уг лыдъяло. Ӟеч вуз базарын кема уг кылльы. Изэз тӥрен уд ӵогы - пиртэш гинэ карод. Инмез йырчукин уд берыкты. Тэкитам уробо капчи мынэ. Тылпулэн серметэз ӧвӧл. Тӧллы пумит эн сяла. Чибинь шоры зыр уг урдо. Можгалан ӵош ужась эшъёсыз мур куректо Удмурт Республикаысь Югдурез утёнъя министерствоысь участковой инспекторъёслэсь ужзэс радъянъя но быдэ вуымтэос пӧлын правоез тӥян учыръёсты алонъя отделлэн кивалтӥсез Пашенцев Леонид Алексеевич улонысь кошкем пумысен. Президент правительство азе быдэстыны луонтэм ужпум пуктӥз, малпанзэ вера "Российские вести" газет. Со кылзэ сётӥз пенсиослэсь быдӟалазэс матысь дыре 20 процентлы будэтыны. Со понна правительстволы толэзьлы быдэ ватсаса 3 миллиард манет выль уксёен шедьтоно луоз на. Туннэ нуналлы Президентлэсь ӟеч малпанзэ улонэ нокызьы пыӵатыны уг луы, угось предприятос Пенсиосъя фондлы тыронъёсынызы жегало. Озьы бере та вакытэ пенсиосты ӝутон понна коньдонэз басьтыны нокытысь, валэктэ "Российские вести" газет. Берекет Ортчемзэ тодэ вайыса Песьтэрысь нянь колды, кекер, юача но мукетыз Та гожтэтам ортчемез сярысь вераме потӥз. Оло, кин ке шуоз, марлы со кулэ, туннэез сярысь гожъяно. Нош мон сямен, асьмелы вунэтыны уг яра ортчемзэ. Сотэк улон сюресмес дунъяны ум быгатэ, туннэез син шорамы палдурес пуксёз. Улон капчи ӧй вал. Нош вашкала дырысен бадӟым семьяен улыны, ужаны дышемъёслы, ӟеч сямъёс, йылолъёс, аспӧртэм удмурт пӧраськемъёс, пыжиськемъёс котьку сӥлы вал. Али оген улыса, лэся, ваньмыз со син азе уката яркыт пуксе, пинал дыръя ческыт сиемъёс тодэ лыкто. Вордӥськи мон 1923 арын. Семьямы бадӟым. Бадӟымез агае кышнояськемын вал ини. Аръёс ортчемъя 12 кузя но луимы. Котькуд семья ас анаосмы вылын ужаськом. Син азям туннэ, кадь ик пуксе асьме ана вылын араммы. Котьку но покчи Семон агае бордын ужаны турттӥсько вал. Со мыным культолы е лэсьтэ, культоме керттэ, пуктос (груда) но пуктэ. Дышымтэ маке одӥг пол чиньыосме сюрлоен вандыны шедьтӥ. Нэнэ кышет дурзэ кесиз но, агае ванскем чиньыосме бинялтӥз. Кенакмылэн пичиосыз но бусые ваемын. Пинал писпуэз някыртыса, отчы кӧкыез ошиськом но веттаськом. Со чаль гинэ умме усе. Мукет дыръя бӧрдыкуз, кушам нянез чылкыт ӟустарие биньыса, вож нунылы ноны сётӥськом, сюрноныен но сюдӥськом. Нуназе гинэ ялкарыны (шутэтскыны) дугдылӥськом. Соку быдэс семья огазьын. Пересь нэнэмы песьтэрысь нянь колдыоссэ, ӝожонэн пызь пуйызэ поттэ. Тусьтыосты песьтэр вылэ пуктэ но ӝожон суралтэ, мукетаз посудае сарваысь аръян понэ. Нянь шормало но, сиськыны пуксиськом. Пӧсь шунды пыже. Тэль салкымын но сю куасьме. Ошмесэ сарваен вулы ветлӥськом. Юыса - мар аран удысэ султӥськом. Озьы куазь ӝомал усьытозь ужаськом. Пудоез утялтыны, семьялы шыд пӧзьтыны пересь нэнэ вазьгес бертэ. Ӵукна но пересьмы бергес лыктэ. Со угось аръян шукке, нянь, мукет пӧрамъёс пыже но милемлы бусые вуттэ. Сьӧраз кенаклэн пиналъёсыз бӧрдыса, синъёссэс зыраса вуо. Самой пичизэ нэнэ ныпъяса вае. Макем жадиз со гуртын пӧраса, табере пиналъёсын, сарваен но песьтэрен бусые мырдэм но кызьы вуиз. Сое но удысэз вите - араны кутске. Ой, мискинь нэнэе! Пичиесь дыръямы жаляны но, юрттыны но ум валаське. Нош отӥяз бер луэ. Нош вордӥсьёсмес ялан ӟечен гинэ тодамы ваиськом. Шундылэсь азьло яке соин ӵош султылӥзы. Пудооссэс котькинлэсь вазь нюлэскы улляны вутскылӥзы. Парсьёсты гуртын сюдыса ӧз курадӟылэ. Пиянооссэ но пичиесь парсьпиосын мумы парсьёсты но вазь гужем ик нюлэскы нуо. Сӥзьыл быдэс уллё пудоез гуртэ улляськом. Быдэн хозяйствоос 3-4 кысконо скал возьылӥзы. Толалтэ соосты шуре люктаны васькытъямы. Арня нуналъёсы ми, пичиос, изиськомы на. Нэнэ гур азьын табаосын шальтыртэ но шуэ: - Пиналъёс, ойдо султэ ини пӧсь табаньме сиыны. Ческыт зыретъёс лэсьтӥ: вӧй сырк, ӟизатэм йӧлэн йӧлвылэн сурет, йӧлэн ӝук зырет. Нырысь вӧялэ вӧен, собере зырет понэ. Быдэс семья табань сие. Собере кин ма ужаны ӝӧк котырысь палэнско. Ӝуаса бырем гурын одно ик кыӵе ке но удмурт пӧрамъёс пыжо: сяртчынянь, корам картофкаен пыжос, пызьнянь (сезьы пызьлэсь ыльнянь пуштрос). Бырем гуре ик кӧжы пукто но пӧземез бере кӧжы пог лэсьто. Шур дурын бадӟым пуртыын варсен кенэмен ӝук кадь пӧзьто. Сӥямез бере дуско вылын вандыло. Ой, ческыт ук! Пӧртэм перепечъёс, ӝукен яке картофкаен кекер, юача пыжо. Ваньмаз ик пӧраме сӥль яке зумытлы вӧй поно. Сезьпызь, кӧжы но картофка кисаль пӧзьто, кӧртчал лэсьто. Ма, ваньзэ гожтыса быдтод-а, кыӵе но сиёнъёсын уг паймытъяло вал нэнэй-анайёсмы. Пинал дыръя со сиемъёс уйвӧтын кадь гинэ тодэ лыкто на. Ӝоген нимъёссы но вунозы ини ай. Арня нуналъёсы арлыдоос, пиосъёс но кышномуртъёс, сайкытгес дӥсен дӥсяськыса, черке мыно. Лысо гуртамы куинь иськем улсысь черк гырлы туж шулдыр кылӥськылӥз. Черкен герӟаськем праздникъёсыз котькудӥз утьыны, сӥлы карыны тыршылӥз, а то, пе. Инмарлэн йырыз кур луоз. Иськавынъёсын ӧтчаськизы-кунояськизы пинал пыртыку, ӵӧжыен табань сиыку, вандос (пудо) вандыку. Вӧсяськылӥзы асьсэ дорын пичи куалаосазы но. Инмарез шуд-дэлетсэ мед сётоз шуыса сюлворылӥзы-курылӥзы. Пурга воршудмылэн гуртамы бадӟым куалаез вал. Мынам атае гурт вӧсясь (гурт поп) лыдъяськылӥз. Отын гурт тылобурдоез (ӵӧж, ӟазег, курка) вандо но нош ик Инмарлы сюлворо, кулэмъёсты тодазы ваё. Сюанъёс но ноку вунонтэмесь туж шулдыр ортчытъязы. Ваньзэ уд но вера. Ма, колхозэ но пырыса, огкылысь, тупаса ужаны кутскимы. Бригадиръёс, ачиз председатель но ужмылэсь ӟечлыксэ но, кызьы, кӧня лэсьтэммес эскерыса улӥзы. Гужем куазен урамысь одӥг пиналэз но уд пумита. Сизьым аресысен соос бусыын урисько ни. Гуртын губырес пересьёсын пичи нылпиос гинэ кылемын. Озьы но ужась киос уг тырмо вал. Ог 6-7 ар талэсь азьло колхозын но бен улон умояз вал ини. Нош али вакытмес сурым коркаен, жобась куазен шат ӵошатод. Урод, ичи ужамен, экономикамы куашказ. Али дыре таза мугоро, сӥльвиро егитъёслы уж ӧвӧл, лэся, шаянтыны ваньмо: юыны, жугиськыны, лушкаськыны... Туала вакытмы ачиз сыӵе улон сюрес вылтӥ валтэ кадь соосыз. К. ЗАГРЕБИНА. Як.-Бодья ёрос, Лысо гурт. Шӧкыч СЮДӤЗЫ-СЕКТАЗЫ НО БАКОМИЗЫ Серемес верос Та кык ужасьтэм паньтэмъёслы, нимзэс ог-огзылэсь висъян понна, Дима но Митя вазисько. Нунал ке вордске, соос магазин дорын ни. Асьсэлэн кисызы котьку буш бере, кинэ ке коньдоно муртэ возьмаса сыло. Таяз учыре но малпанзы одӥг - кытын ке но йырзэс веськатоно. Одӥгез кисы пыдсысьтыз поттӥз азьвыл бичам сигарет но папирос пумъёссэ, мукетыз - газет юдэссэ. Тамаксэс бинялтыны ӧз вуттэ, Дималэн син шораз йӧтӥз бадӟымесь букваосын гожтэм ялон: ваньзэ мылкыд карисьёсты ӧтиськом, пе, Коньывыре, гуртлэн юбилеезлы сӥзем празднике. Дималэн но Митялэн синъёссы уйсылэн кадь чилятскизы. Ваче пал кыл поттылытэк, ог- огзэс валазы. Ӝегатскытэк шонтоно Коньывыре. Вылаз ик, мылкыд карисьёсты, пе, отчы автобусэн дунтэк нуозы но ваёзы. Юлтошъёс марысь-мар сьӧразы кутӥзы Митялэсь лапас улысь ӝажыын костаськись фотоаппаратсэ. Коньывыр матын ӧвӧл ке но, вольыт сюрес соосты отчы ӝог вуттӥз. Тэль шур дурысь возь тырмемын калыкен. Кыдёке шуккиське арган куара, нылъёслэн но пиослэн кырӟамзы. Куакъёс котырын бӧлякен-бӧлякен пуко гуртоос но куное лыктэмъёс. Ожо вылэ валем ӝӧккышетъёс вылын кыӵеез гинэ сиёнъёс, юонъёс ӧвӧл. Сӥльын ӝук, чорыг лым, табань, перепеч. - Чырткемесь-а, гажано юлтошъёс! - паньтэмъёс вуизы огъёсыз пукисьёс доры.- Ӟечкыласьком тӥледды вунонтэм праздникеныды! - Кытысь, кинъёс луиськоды? - тодэмзы потӥз кузёослэн. - Райцентрысь ми, юри ӟеч кылмес вераны лыктӥм. - О! - бурдъяськизы соосыз.- Чале, чале татчы, пӧламы кариське. Дима но Митя сое гинэ возьмаса улӥзы. Интыяськыкузы ик соослы чарка вуттӥзы. Нош кытын одӥгез, отын кыкетӥез но дась. Мыло-кыдо адямиослы тау карыса, Дима но Митя гылӟизы мукет интые. Татын но соосты кема витем макеосты музэн сюдӥзы-сектазы. Йыразы шулдыр луэм бере, Митя лушкемак йӧтскиз эшезлэн кӧтурдсаз, фотоаппаратэз шоры возьматӥз. Нош ик ӝог валазы ог-огзэс. - Эшъёс, огинэгес кариське,- вазиз Митя пукисьёслы.- Ваньдэсты патретэ пуктом, газетэ поттом. Тае адӟыса, котырысь калык но кыстӥськыны кутскиз. Димаен Митялы коньдон донго, чарка кымало. - Патретъёстэс, арня ортчыса, асьмеос дорады вуттом,- оскыто паньтэмъёс. Кисызы тордэм бере, Дима валатскиз: - Асьмелы чалякгес шупчоно татысь. Юнме уг шуо: юись муртэ, пе, ньылоныз быдтэ. Димаен Митя но ӧз чидалэ: татын ик сылӥсь автолавкаысь ӟенелик басьтӥзы. Палэнэ кариськыса, сое пыдсозяз кымалтӥзы. Кыдёке кошкыны ӧз быгатэ ни, коньдонэн басьтэм черзы пыд йылысьтызы погыртӥз. Одӥгез пушнере сапкиськиз, мукетыз - гопе пограз. - Ма, аппаратсэс но ыштозы ук таос,- юэмъёсты кин ке жалясь луиз. Фотоаппаратэз ӝутӥзы но... бакомизы. Отын номыриз вылымтэ. Пияла синмыз но буш, плёнкаез но ӧвӧл. - Вот покачъёс! - куаш потто гуртоос.- Соосты, ӟеч адямиос кожаса, куно кариськом, коньдон тыриськом. Кытысь ке вуиз липет вылаз лыз тылъёсын машина. Паньтэмъёсты милиционеръёс, пуклёкъёсты сямен, выж вылэ тыризы но гурлатӥзы райцентр пала. - Эн сюлмаське,- оскытӥзы гуртоосты.- Ваньзэ люкам коньдонзэс одӥг коньызэ кельтытэк берыктом. ... Тани ӝоген вуоз ни вылез гужем. Коньывыръёс милиционеръёсты но кайта-берло ӧз адӟе ни, Димаен Митя но чиптэм-чаптэм ышизы. К. ЕМЕЛЬЯНОВ. Игра ёрос, Лонки-Ворцы гурт. Берекет ТӤЛЯД КУРЕМДЫЯ Гажано редакция! Тӥледлы куронэн вазисько Кез ёросысь Ю-Тольён гуртын улӥсьёс. Гажаса лыдӟиськом "Берекет" бамъёсты, туж витиськом удмурт кырӟанъёсты. Печатлалэ вал газет бамады Валентина Пудовалэсь кык кырӟанзэ. Жаляса вераськом, кырӟанъёслэсь нимзэс ум тодӥське. Огаз кырӟанын вань таӵе кылъёсыз: "Не муми мынам, не буби мынам, ненокин но жалясе ӧвӧл", мукетаз таӵе кылъёсыз: "Егит пинал дырме нокин уз берыкты, ӟырдыт яратэмме кин ке уз вунэты". Гурт калыклэн куремезъя О. КАРКИНА. СИРОТА СЯРЫСЬ Калык кырӟан Ӵукна ӵук султӥ, азбаре потӥ, Уӵыпилэсь куаразэ кылӥ. Кезьыт лысвуос пыдъёсме котто, Синкылие бам кузя ваське. Пичи уӵыпи бӧрдыса чирдэ, Кӧтӝожме вераса со кисьтэ. Мон ӧвӧл татысь, мон туж кыдёкысь, Шудтэм семья пӧлын будэмын. Не муми мынам, не буби мынам, Ненокин но жалясе ӧвӧл. Яратӥсь синъёс, небытэсь киос, Уйвӧтам адӟисько тӥледыз. НЫРЫСЬ ЯРАТОН Кылъёсыз но крезьгурез Г. Корепанов-Камскийлэн Лабрес ваё льӧмпу Сылэ укно улам. Шораз мон мӧзмыку Учкылӥсько ялан. Лымы кадь сяськаез Ческыт зынзэ вӧлдэ, Нырысь яратонэз Льӧмпу сяська шӧдэ. Лымы кадь сяськаез Ческыт зынзэ вӧлдэ. Сюлмысь яратонэз Льӧмпу сяська шӧдэ. Сяська, льӧмпу сяська, Нырысь яратонэ Улэ сюлэм пушкам, Возьма, утча тонэ. Пинал сяська дырме Нокин уз берыкты, Ӟырдыт яратэмме Кин ке уз вунэты. Пинал сяська дырме Нокин уз берыкты, Ӟырдыт яратэмме Нокин уз вунэты. Лабрес ваё льӧмпу - Учке со мон шорам. Нырысь яратонме Со вайытэ тодам. Лымы кадь сяськаез Ческыт зынзэ вӧлдэ, Нырысь яратонэз Инву сяська шӧдэ. Пинал сяська дырме Нокин уз берыкты, Нырысь яратэмме Кин ке уз вунэты. Бускельёсмы дорын: Татарстан Толэс кузьмазы Скаллы быдэ - 21 литр Сомында йӧл кыско та нуналъёсы "Труд" колхозысь дояркаос Любовь Федорова но Римма Кузнецова. Хозяйствоя - 17,8 литр. Гужем шорын кадь! Сиёнзы ческыт: кӧс куазен турнам, куасьтэм турын-куар пырак али возь вылысь ваемын кожалод. Со ласянь "Труд" арысь аре висъяське. Малы ке-а йӧлзы но районъя котькинлэсь трос люкаське. Шумпотон вылэ шумпотон Республикаысьтымы нылпи садъёс пӧлын уно гинэ смотр-конкурсъёс ортчыло. Казаньысь тани нош ик ӟеч ивор вуиз: Карадуванысь ясли-сад кыкетӥ интые потӥз пиналъёслэсь тазалыксэс юнматонъя. Нош Балтасьысь куинетӥ номеро сад тау карон гожтэт басьтӥз - Гульнур Валиевалэн группаез устооосыз пӧлы шедиз. Таӵе ӵошатскон эшшо но ӟечгес ужаны ӧте, творческой мылкыдэз ӝутэ. А. Кунаев. Берекет Пырыос-визьлюкъёс Гурт тылобурдолэсь гонзэ ишкыны кутско йыр ласянь, кырезлэсь - быж палтӥз. Чорыг сьӧмез сузяны умой ву пушкын. Озьы сьӧм огъя уг пазяськы, утялтыны каньылгес луэ. Чорыгез пӧзьтыку, лымаз кӧня ке пол ӧжытэн гинэ кезьыт ву ватсаллялэ ай - чорыглэн шӧмыз трослы ческыт луоз. Бакча сиёнъёслэсь салатэ вӧй ватсало, сылал ӟеч сураськем бере гинэ - сылал вӧй пӧлын уг сылмы. Палатэк пӧзьтэм картошка уз сылмы, кӧмыз уз пилиськы, вуэ кӧня ке шапык уксус ватсады ке. Чепыльтэт сакыр песок ватсаса, котлетлэн шӧмыз трослы ческыт луэ. Озьы ик кароно, бакча сиён пӧзьтыку но. Тороосын кенешон Кизён вуоз Пумен матэ вуо тулыс бусы ужъёс. Нош та удысын сюлэмшугъяськытӥсь ужпумъёс пумтэм люкаськемын. Соос герӟаськемын кызьы ке кизёнлы дасяськонэн, озьы ик гурт хозяйствоосты выльдонэн. Тани январе-феврале, кылем арын та дырен ӵошатыса, йӧл поттон 10 процентлы йылэмын ке но, пудолэн лыдыз ялан кулэсме. Соин ӵош ик гурт хозяйствоос трос ыштонъёс адӟо улӥ ӟечлыкен продукция вузаменызы. Миым сыӵе муген гинэ 32 миллиард (вуж уксёен) манет коньдон басьтымтэ. Со пӧлысь бадӟым люкетэз йӧл но сӥль вузамлэсь. Кулэезъя уг мыны тулыс бусы ужъёслы дасяськон. Гурт хозяйствоя но сиён-юонъя министрлэн Василий Жуйковлэн верамезъя, 80 процент ёросэз гинэ музъем кизьыны дась, кын улэ гыремын. Секыт югдур сельхозмашинаосъя но. Данакез техника вужмемын, 40 процентэз уг тырмы. Кидыс но картофка тырмыт кисьтэмын, но туж ляб мынэ эстӥськон, вӧйёс но минерал сылалъёс басьтон. Быдэс республикая дизтопливо 25 сюрс тонна ке кулэ, чылкак 2 сюрс тонна гинэ кылемын. Сыӵе ик югдур бензинъя. Хозяйствоосы со ваньзэ-ӧвӧлзэ 1 сюрс тонна вуттэмын. Та ласянь гурт хозяйстволы юрттыны басьтӥське "Удмуртнефтепродукт". Со туж умой. Хозяйствоосын урод радъямын техникаез тупатъян. Камбарка районын та уж борды чик но ӧз басьтӥськылэ на. Со дыре ик куд-огез ёросъёс пумит луо машино-технологической станциос (МТС-ъёс) кылдытъянлы. Малы меда отын оско, кыӵе техникаен музъемзэс гырозы-кизёзы? - чик вылантэм. - Республика азьын бадӟымесь ужпумъёс сыло, - шуиз Удмурт Правительстволэн Тӧроез Павел Вершинин. - Туэ промышленной продукция поттонэз миым сярысь 5,4 процентлы будэтоно. Правительство озьы ик бадӟым инты висъя бюджетникъёслы дыраз уждун тыронлы, тулыс бусы ужъёслы дасяськонлы, пудо толйытонэз умой быдтонлы но музонэзлы. Соин ӵош ик удыслы тыршоно, "СБС-АГРО" банклы басьтэм кредитсэ 15 мартозь берыктыны. Правительстволэсь тӧрозэ озьы ик сюлэмшугъяськытэ куашкан калэ вуэм 25 хозяйствоосты выльдон, соослы юрттэт сётон, ӟеч кидысъёс уськытон но пудо выжыез умоятон. Нялтас верам потэ на, шаерамы 137 хозяйствоос гаӵоло кылё, шуыны луоз. Соослы нош государство ласянь юрттэт (дотация) уз вуы. Туннэ нимысьтыз пусйыны кулэ, йӧллы но сӥльлы республикаямы закупочной дунъёс пичиесь. Хозяйствоос макем уногес продукция потто, сокем тросгес ыштонъёс адӟо. Нош сельхозмашинаослы, электрокужымлы, минерал сылалъёслы дунъёс инмозь вуттэмын. Соин гурт удыс тып-тып интыяз пуксемын, ӝоген вырӟылыны но уз быгаты. Сыӵе муген хозяйствоос уг быгато выль техника басьтыны, музъемазы минерал сылалъёс, изваска пыртыны, лэсьтӥськыны но мукет. Кенешын вераськон ӝутскиз, малы азот удобрениослы гинэ огкылъёс гожэмын но "Сельхозтехникалэсь", "Сельхозхимилэсь" техниказэ тулыс бусы ужъёсты быдэсъянэ кутон сярысь. Берло аръёсы данак интыосын трос музъемъёс гырытэк-кизьытэк кылё. Сыӵе бусыос уно сюрс гектаръёс люкасько ни. Кин бен со понна кыл кутоз? Цое лыдэ басьтыны кулэ районъёсысь гурт хозяйствоя управлениослэн но отделъёслэн кивалтӥсьёссылэн аттестация ортчытыку. Уно хозяйствоосын нимаз дышетскымтэ адямиос кивалто, гурт хозяйствоя специалистъёс уг луо. Озьы выль азинсконъёс уд басьты. Правительстволэн кенешаз музон ужпумъёс но учкемын. Кылсярысь, налогъёсъя кун инспекцилэн тӧроезлэн Владимир Ореховлэн ивортэмезъя, валля арен ӵошатыса, миым 37 процентлы уногес налогъёс люкамын. Но со уката тросгес луысал, интыысь администрациос налогъёсты бичанъя дырез ӧй ке кузёмытысалзы. Миым сыӵе ужрадъёс уката тросгес кутэмын вал. Соин ӵош Удмуртилэн премьер-министрез Павел Вершинин ватсаз, туэ кык толэзьскын чакламлэсь 67 процент гинэ налогъёс октэмын. Со нокинэ уг шумпотты. Татын озьы ик учкемын общественной порядокез утёнэн герӟаськем ужпум. Тая ивортонъёс лэсьтӥзы югдурез утёнъя министр Владимир Щербаков но солэн воштӥсез Валерий Семенов. Вераськон мынэ участковой инспекторъёслэсь ужзэс умоятон но общественной порядокез утёнэ калыкез кыскон сярысь. Правоосты утись органъёсын уногес мед луозы анискинъёс. Соку адями кышкатэк потоз ураме, сое нокин уз иса, лушкаськисьёс но кулэсмозы. Ваньмыз та вылӥ верам ужпумъёс алигес эскеремын Правительстволэн пусъем кенешаз. Отчы ветлӥзы городъёсысь но районъёсысь администрациослэн кивалтӥсьёссы. Г. РОМАНОВ. Быръёнъёс азьын Вить пӧлысь - кин? Ижевск дасяське быръёнъёслы. Со сярысь кемалась верало радио но телевидение, гожъяло дорамы потӥсь вань газетъёс. 12 апрелёзь кылиз на толэзь пала. Озьы ке но, городлэн улоназ политической бугыръяськонъёс сокем уг шӧдӥсько, столицамы улэ но ужа ас сяменыз - огсыр, нокытчы дыртытэк. Мартлэн кутсконаз усем лымы гинэ (синоптикъёс верамъя, берло аръёсты ӵошатыса, со 130-150 процентлы ортчиз ас эсэпсэ), шунды сиос улын ӝоггес сылмыны дыртэ. Инкуазьлэн та сётэм узырлыкез городысь мэрлэн интыез понна нюръяськисьёслы ӟеч "эш" луиз: муг сюриз Ижевсклэсь туала администрацизэ маин пыкылыны. Зэмен но, "инмысь канцелярия" туэ зол гинэ ужаз, предприятиосын, заводъёсын уд ӵошаты. Озьы ке но, городысь ульчаосты уен-нуналэн утялтӥзы, коньдонлы кылдэм шуг- секытъёс шоры учкытэк. Коммунальной службаез нуисьёслы со понна тау шуыны кулэ. Лымыен нюръяськонэз мукет ужпумъёсын ӵош мэрия ялан син шораз возьыны тырше. Со сярысь вераськон поттэмын вал городысь Думалэн нырысетӥ созывезлэн 35-тӥ заседанияз но. Быръёнъёслы дасяськемен ӵош, трос гинэ люкаськемын мукет юанъёс. Ӝоген кутскозы сад-бакча ужъёс. Калыклэн тодэмез потэ: уз воштӥськы-а музъем понна дун тырон? Городысь администрацилэн решениезъя азьвыл тупатэм дунъёс кылёзы озьы ик. Налог тыронлэсь мозмытэмын пенсионеръёс, инвалидъёс, санитарной зонае, тудву улэ шедись интыосын улӥсьёс, со сяна, Ижевск котырысь гуртъёсысь калыкъёс, туэ таӵеос вӧзы ватсаськизы Гондырын (Медведево) улӥсьёс (74 корка). Азьланяз вылӥ верам список йылоз на Завьялово район чотын, угось татчы усе городлэн вань кырсь-курез, завод муръёосысь потӥсь су но ӵын. Омырлэсь чылкытлыксэ эскерисьёс верамъя, тужгес но кырсь со Октябрь но Старки посёлокъёс вадьсын. "Ижсталь" но али калыкез сокем уг усыкмыты, кык номеро ТЭЦ кадь. Депутатъёс нимысьтыз вераськон ӝутӥзы Ижевскысь промышленной предприятиослы юрттэт сётон ласянь. Быгатэмезъя город коньдон висъя, но со тырмыт ӧвӧл. Утчано на мукет луонлыкъёс. Пусйыны кулэ, берло дыре соослэн ужазинлыксы шӧдскымон умояз, ас интыязы лёгаськемысь дугдӥзы. Эшшо одӥг ӟеч воштӥськон чакламын городын улӥсьёс понна: таяз арын ужаны кутскоз калыкез эмъян удысын ӝог юрттэт сётонъя службалэн филиалэз. Таизэ малпанэз улонэ пыӵатӥзы ни городлэн выль кивалтӥсьёсыз, выль быръем депутатъёс. Нялтас вералом: Ижевскысь мэрлэн интыяз ужаны мылкыд каремзэ вераз 5 мурт. Соос пӧлын: Анатолий Салтыков, Андрей Солуянов, Сергей Щукин, Валерий Загайнов, Сергей Савичев. Вить кандидатъёс пӧлысь куаразэ сётоно огезлы: кинлы оскиськод, кинэ городлэн зэмос кузёеныз адӟиськод. Л. Дмитриева. Шӧкыч - Кӧня тыныд верано, Сидор?! Паллянэгес, паллянэгес басьты. Отчы кылизы вал кадь герыосмы. Суредаз Леонид ПРОЗОРОВ. ГАЗЕТЫН КЫДАМЪЁС Удмуртиысь писательёслэн берло ӧтчамазы ӟырдыт кенешон ӝутскиз куд-ог гожъясьёсмылэн творчествозы пумысен. Сыӵе ужпум пуктэмын вал уго: кутоно-а, ӧвӧл-а соосты Удмуртиысь Писательёслэн огазеяськоназ, кыӵе дунъет сётоно кылбуръёссылы, веросъёссылы, повестьёссылы.Зэм, потэм книгаоссылэн лыдзыя дыр вуэмын ни кадь... Огъ мылкыдын таӵе малпанэ вуизы: кылбурчиосты Владимир Возняковез но Алексей Ельцовез, прозаикъёсты Ульфат Бадретдиновез но Кирилл Ломагинэз Удмуртиысь Писательёслэн огазеяськоназы кутоно. Нош... берлоез сярысь верано ке, пусйизы ӧтчаме люкаськемъёс, Кирилл Егорович кемалась ини йыг-йыг гожъяськись луэ, сое тодӥськом кылбуръёсызъя, поэмаосызъя, романозь "будэм" произведениосызъя но. Данъяськыса вераны быгатӥськом: та писательёсмы (В. Возняков сянаез) лобӟон бурдъёссэс юнматизы милям редакциямы, газет ужын кыдаса. Т. НИКОЛАЕВА. Россия Федерацилэн Президентэзлы Б. Н. Ельцинлы Гажано Борис Николаевич! Урал улосысь пыӵал тӥрлык поттӥсь предприятиосын югдур ялан секыт но секыт луэ, соин ик ми пырак Тӥледлы, Президентлы сямен, вазиськиськом, жаляса верано, Правительство уг шӧды-а яке солэн адӟемез уг поты-а страналэн экономикаысьтыз азьмынӥсь удысэзлэсь син шоры йӧтымон но туж ӟырдытэсь ужпумъёссэ. 1. Кема дыр ӵоже уждун басьтытэк улон пыӵал тӥрлык поттӥсь предприятиосысь данакезлэсь ужасьёслэсь лул-кужымзэс, мылкыдзэс уськытӥз, соосты властьлы пумитъяськонэ вуттӥз. Ужась коллективъёслы валэктыны уг луы, малы уждунъя тыронъёс ялан будо но пыӵал тӥрлык поттонъя пичиятэм заказъёс дыръя ньыль толэзьысен арозь кыстӥсько. Син азьын кадръёс лябӟо, уно адямиосты ужысь мозмытэмен, конструкторской но технологической ёзъёсын тыршисьёслэн шоро-куспо арлыдзы ялан будэ, егитъёс воксё лыктэмысь дугдӥзы. Туннэ шер ӧвӧл коньдонлы ёрмон но начар улон улсын астэ ачид быдтон учыръёс. Президентэз но Правительствоез чик сюлмаськисьтэм "оборонка" пумен юнгес ӝутске политической куронъёсын. Тӥляд косэмдыя, 1997 арын 25 декабре Правительстволэн "1998-2000 аръёсы пыӵал тӥрлык поттон удысын реструктуризация но конверсия сярысь" кенешаз Коньдон ужпумъёсъя, Экономикая, Обороная министерствоосты косэмын вал 2 арня куспын Правительствое толэзьлы быдэ (1998 арын январь - июнь толэзьёслы) 1996-1997 аръёс понна тыронъёсты кысонъя график вуттыны. График туннэ но кылдытэмын но юнматэмын ӧвӧл на. Милям малпаммыя, пыӵал тӥрлык поттон предприятиосын секыт югдур кылдэмен валче, тыронъёсты, уката ик уждунэз, ӝегатскытэк берыктон пумысен Тӥ чурыт кылдэс вераны кулэ. 2. Россиысь Правительство адӟытэк уг улы, кызьы арысь аре пыӵал тӥрлык поттонъя заказ кулэсме, данаказ предприятиосын со ньӧмыз понна гинэ сётӥське на, озьы оборонно-промышленной кужыммылэн тужгес дуно люкетъёсыз но технологиосыз куашкало. Данакез заводъёс-комплектаторъёс уг быгато ни валтӥсь предприятиослы воштос ёзъёс вуттыны. Выль продукция поттонын уже кутӥсько тодосчиослэн но конструкторъёслэн азьвыл аръёсы кылдытэм ужъёссы. Пыӵал тӥрлыклэн ӟечлыкезъя азьпалан вамыштӥськом вал, табере со интымес ыштӥськом, матысь дыре пыӵал тӥрлыкен вузкаронын но ыштонъёс адӟом. Со ини кышкытлык кылдытоз кунлыкмес утёнын. Берло аръёсы шӧдӥське паймытӥсь огъя тодмет: арлэн кыкетӥ толэзез йылпумъяське ни, нош одӥг предприятилэн но заказъя лыдпусъёсыз, огкылъёсыз ӧвӧл на. Кинлы ке, оло, министерствоосын, ведомствоосын, Правительствоын валэктыны кулэ, котькуд производстволэн огкыл гожтэм дырысен продукция поттон дырозь, нимысьтыз чаклам технологической, куддыръя арозь, дырыз вань шуыса. Пыӵал поттӥсь заводъёс договоръёстэк но оборотной средствоостэк уг ужало, отын тыршисьёс векчи ужен выро, озьы уждунтэк кылё. Малы Правительство туннэ уг быгаты арлы заказлэсь 20-30 процентсэ сётон сярысь распоряжение кутыны? Малы югдурез уката лэчытомытыны кулэ, со оборонной комплексын сотэк но ӟырдыт ук? Пыӵал тӥрлык поттӥсь предприятиос данакез секыт финансово-экономической югдуре шедемын: ваньзы сямен пыртэмын федеральной, областной, городской вытъёсты, внебюджетной фондъёсы тыронъёсты ӝегатӥсьёслэн радъёсазы, тросэзлэн расчётной счётъёссы пытсамын, со предприятиослэсь ужзэс воксё дугдытӥз. Туннэ предприятиос но организациос юрттыны уг быгато ӧлексыослы, ужзэс ыштэмъёслы, нылпизэс огназы будэтӥсь анайёслы. Коньдон тырымтэзы понна предприятиос кылё тылтэк, газтэк, телефонтэк, вутэк. Со дыре ик государстволэн быдэстэм заказ понна тыронэз пумтэм. Ми ум валаське, уг луы шат пыӵал тӥрлык поттӥсь предприятиосын взаимозачёт ортчытыны. Обороналы ужась предприятиос, федеральной бюджет азьын пунэме кылем мукет организациос ГАЗПРОМ РАО-эн но ЕЭС РАО-эн взаимозачёт ортчытыны быгатысалзы. Ми малпаськом, та ужпумъёсты Правительство но ведоствоос ӝегатскытэк эскерыны кулэ. 4. Правительство ож тӥрлык поттӥсь предприятиосын конверсиез ортчытыны ӧз быгаты. 1997 арын огезлы но федеральной программалы коньдон висъямын ӧй вал. 1998 арын кызьы луоз - тодмо ӧвӧл. Паймоно: Россиысь тужгес но ӟеч производственной фондъёслэн кузёзы - государство - соосты тыро-пыдо кутыны уг быгаты. Оборонаен герӟаськем заказъёслэн лыдзы кулэсме, нош гражданской продукциез поттонлы коньдон уг висъяськы. Соин ик конверсия ултӥямлы кельше. Гажано Борис Николаевич, Тӥ пусйиды вазиськонады, реформаослэн ӝегамзы Россилы изъян ваё шуыса. Ми ӝутӥмы сыӵе ужрадъёсты, кудъёссэ кемалась быдэстоно вал ини. Соос улонэ пыӵасалзы ке, пыӵал тӥрлык поттӥсь предприятиос пыд йылазы султысалзы. Обороналы ужась удысын секыт югдур кылдэмын. Таин валче куриськом Тӥледыз ужрадъёс чакланы - та ужпумъёсты йылаз-пумаз вуттоно ини. Гажаса Свердловск областьлэн губернаторез Э. Э. Россель. Удмурт Республикаысь Кун Кенешлэн Тӧроез А. А. Волков. Пермь областьлэн губернаторез Г. В. Игумнов. Челябинск областьлэн губернаторез П. И. Сумин. Нимаз калыкъёслы сӥзьыса Ашальчи Окилэн вордскемез дырысен 100 ар тырмонлы дасяськон паськыт мынэ Грах районын. Март пумын черкогуртын пичи урам (сквер) усьтэмын луоз. Та нуналъёсы калык культураослы сӥзем нуналъёс ортчо. Ӟучъёс асьсэлэсь сямъёссэс, йылолъёссэс возьматӥзы ни, азьпалан - поръёслэн, удмуртъёслэн, чувашъёслэн ӝытъёссы. Декада озьы ик Ашальчи Окилэн юбилеезлы сӥземын. Э. ВАСИЛЬЕВА. Быръён нуналозь кыле на 27 нунал Ижевск городлы мэре кандидатъёс: 1. Загайнов Валерий Федорович, вордскемын 1945 арын 24 апреле. Улэ Ижевскын. Ужа "Удмурт Республикаысь жилищно-коммунальной производственной объединение" государственной предприятилэн генеральной директорез луыса. Ӵектэмын бырйисьёсын. 2. Савичев Сергей Юрьевич, вордскемын 1964 арын 20 январе. Улэ Ижевскын. Россия Федерациысь Госдумалэн депутатэзлэн юрттӥсез, "Удмуртгражданпроект" институтлэн Директоръёссылэн советсылэн кивалтӥсез, быръемын "Россиысь народно-патриотический союз" общероссийской общественной движенилэн Удмурт ёзаз. Ӵектэмын "Россиысь народно-патриотический союз" быръёнъёсъя огазеяськонэн. 3. Салтыков Анатолий Иванович, вордскемын 1947 арын 29 сентябре. Улэ Ижевскын. Кивалтэ Ижевск городлэн администрациеныз. Ӵектэмын бырйисьёсын. 4. Солуянов Андрей Владимирович, вордскемын 1959 арын 8 ноябре. Улэ Ижевскын. Россия Федерациысь Государственной Думалэн депутатэз. Ӵектэмын бырйисьёсын. 5. Щукин Сергей Геннадьевич, вордскемын 1963 арын 26 январе. Улэ Ижевскын. Ужа "АИФ Удмуртии" газетлэн редакторезлэн воштӥсез луыса. Мынэ ас мылкыд каремезъя. Ижевск городысь быръёнъёсъя комиссилэн председателез О. Т. Завгородний. Ижевск городысь быръёнъёсъя комиссилэн секретарез О. В. Кричевская. Куамын сюрс пӧлысь одӥгез 50-арлэн кутсконаз колхозъёс бадӟыматэмын вал. Со кулэ кариз та хозяйствоын кивалтонэз но чутрак воштыны. 1953 арын гурт хозяйствоез ӝутыны гуртъёсы мынӥзы Шаркан районысь тросэз коммунистъёс - кивалтӥсьёс но. Со кутсконлы кичӧлтон сётӥз партилэн Шаркан райкомезлэн кыкетӥ секретарез Н. М. Шиналов - ас мылкыд каремзъя кивалтыны басьтӥськиз Азин нимо колхозэн. А. И. Иванов кивалтыны кутскиз Пушкин нимо колхозэн, С. С. Титов - "Большевик", Н. Г. Падерин - "Искра", К. И. Пчелин - "Красная звезда", И. П. Вотинцев - "Выль сюрес" колхозэн. Берлогес партилэн райкомезлэн аппаратысьтыз колхозъёсын кивалтыны ыстэмын на вал В. В. Чунарев, В. В. Пушин, А. Н. Ложкин.Соос "Россия", "Путь Ильича" но ЪЪИ партсъезд нимо колхозъёсын ӟеч ужазы. Тридцатитысячникъёс пӧлын бадӟым данэз вал Константин Иванович Пашковлэн - "Идеал" колхозлэн председателезлэн. Сое гуртэ дэмлаз Ижысь В. И. Ленин нимо заводлэн коллективез. К. И. Пашковен ужаны капчи вал. Со ялан утчалляз выльзэ, азьмынӥсьсэ, котьку кенешылӥз специалистъёсын. Куддыр специалистъёс янгыш ке но лэсьтылӥзы, ноку соосты ӧз воштылы, ӧз ултӥялля. Умоен валэктылӥз, асьсэ куспын гинэ вераськыса. Кивалтӥсь чакласа возиз ужан дисциплинаез. Сое тӥясьёс туж кышкало вал асьсэ эшъёссы азьын кыл кутэмлэсь. Вань ук котькуд адямилэн кыӵе ке но керпотонэз. Уг яраты вал юисьёсты, азьтэмъёсты. Сыӵеос колхозысь ӝог гинэ кошкылӥзы. Пашков кивалтон вакытэ колхозникъёс уждун басьтыны кутскизы коньдонэн, пыӵаны ӧдъяз хозрасчёт (таӵеез районын вал нырысьсэ). Толэзьлы быдэ эскерыса возёно луиз пудо-живот продукция вузамез, солэсь ӟечлыксэ. Государство со вакытэ уждун тырыны коньдон ӧз висъялля. Шаркан селоын улӥсьёс али но тодо на райцентрын колхоз ларёклэсь ужамзэ. Отын вузаллязы сӥль, йӧл, ю-тысь но кӧжы, уго уждун тырыны коньдон кулэ вал. К. И. Пашков кивалтон дыръя Шаркан бригадаын лэсьтэмын вал склад, гид, ю-тысь куасьтонъя но шертонъя итым, шуныт мастерской, Кипунын - парсь гид. Яратэ вал кивалтӥсь лэсьтӥськон ужез. Юнмаз колхозникъёслэн но улонзы. Шарканын ӝутскиз выль Колхозной урам. Асьсэ кужымен но колхоз юрттэмъя ӝутскизы Курег гуртын, Вукотлоын, Сушковоын улон коркаос. Шӧдскымон будӥз ваньбур поттон, ю тысьлэн удалтонлыкез. Колхозникъёслэн тыршыса ужамзы пусъемын вал. КПСС-лэн ЦК-езлэн, СССР-ысь Министръёслэн Советсылэн, ВЦСПС-лэн но ВЛКСМ-лэн ЦК-езлэн Горд Знамяенызы. Со али но возиське та хозяйстволэн правленияз. Константин Иванович Пашков колхозэн кивалтӥз 1965 арозь, ужысь кошконо луиз тазалыкез лябӟемен. Али со улэп ӧвӧл ни, но Шаркан музъем вылэ вунонтэм пытьы кельтӥз. Али но сое туж гажаса тодазы ваё. А. Вахрушев. Куазь Синоптикъёслэн ивортэмзыя, матысь дыре тол шунды ӝужан палась секундскын 5-7 метре пельтоз. Термометръёс уин 7-10 градус кезьыт, нуназе 1 градус кезьытысен 3 градусозь шунытозь возьматозы. КУАТЬТОН ТЫРМЫСАЛ Улэ, улэ адями, данэ но потылэ, нош собере сое асьмеос вунэтӥськом, тодэ но вайылӥськом юбилейёсыз дыръя гинэ. Нош таиз тани асьмемын артэ ик улӥз, милям Завьял ёросысьтымы потыса, тодмо журналист но луиз. Быгатӥсь адями вал, но вазь кулӥз. Нош гожтэмъёсыз, газетлэн редакцияз ужам аръёсыз уг вунэтыто. Мон верасько Георгий Яковлевич Петухов сярысь. Синмаськымон кылбурчи но журналист вал со. Туэ, 14-тӥ южтолэзе, солы 60 арес тырмысал. Элькунамы но, ёросамы но тодэ вайыны мугез вань. Вылтӥяськисьтэм, кежегъяськисьтэм, ас ужзэ одно быдэстыны турттӥсь адямиез Завьял ёрос газетлэн редакцияз ужасьёс уг тодо ни: угось тросэз воштӥськизы. Нош мыным соин уно пол пумиськылыны, вераськылыны кылдӥз. Паймылӥ огсыр мылкыдызлы. Нош куддыр редакцие пыроз но шумпотыса ивортоз вал: "Ох и зол тема шедьтӥ. Нош таиз тани тырмымтэосыз ӵушкась выль кылбуре". Сое ярато вал вань эшъёсыз вылтӥяськисьтэм, зӥбыт сямо, споръяськыны яратӥсьтэм луэмез понна. Нош куаразэ, малпанзэ Завьял ёросысь газетлэн редакцияз ужасьёс гинэ ӧвӧл, республикаысьтымы газетъёсын но лыдэ басьтыло ни вал. Пероя эшъёсыз гажазы ке, йыртышсэс ӵем кормано луылӥзы статьяосаз, фельетонъёсаз ӵушкаса гожъям, курласа верам адямиос. Со вордскиз 1938-тӥ арын крестьян семьяын ёросысьтымы Лудӟийыл гуртын. Дышетскиз школаын, собере - ветеринарияя курсъёсын но кӧня ке "Сепычевский" совхозын пудо вордонъя бригадирын ужаз. Лудорвайын шор ёзо школаез йылпумъяз но Свердловск городысь вылӥ партийной школаын дышетскиз. "Ленинец" (али ёросысьтымы газет "Пригородные вести" нимаське), "Удмуртиысь комсомолец" газетъёсын ужаса шараяз сатира амалэн усто ужъёс пӧрмытыны быгатонлыксэ. Потылӥзы пӧртэм литературной материалъёсыз: басняосыз, лек шиё кылбуръёсыз. Гожъяз озьы ик пӧртэм ужпумъёсъя но. Соку ик ини басняосыз, серемес но ӵушкась кылбуръёсыз, фельетонъёсыз печатласькылӥзы "Советской Удмуртия" (али "Удмурт дунне") но "Молот" (али "Кенеш") журналын. Берло аръёссэ, нош кулӥз со витёнтэм шорысь 1972-тӥ арын, кивалтӥз "Советской Удмуртия" газетлэсь лыдӟись доры арнялы быдэ вуись "Шӧкыч" бамзэ поттонэн, гожъяз басняос, трос дышетскиз тодмо удмурт сатириклэн Афанасий Лужанинлэн творчествоез вылын. Солэн матысь эшъёсыз вал кылбурчиос Даниил Яшин, Семен Самсонов, Степан Широбоков, Флор Васильев. Соослэсь со дышетскиз литератураын быгатонлыксэ волятыны, умой тодӥз писательёсты Игнатий Гавриловез, Семен Самсоновез, Трофим Архиповез, Михаил Ляминэз, Удмурт радиоын ужасез кылбурчиез Гай Сабитовез. "Силё-сюрно" сатирической книгаез потӥз ини 1978-тӥ арын гинэ. В. М. Михайлов "Советской Удмуртия" газетын "Лужанинлэсь кичӧлтонзэ азинтыса" но С. А. Перевощиков "Молотын" "Лэчыт кылын" статьяосазы вылӥ дунъязы Георгий Яковлевич Петухов сатириклэсь ужъёссэ. Уг яра вунэтыны ёросысьтымы Лудӟийыл гуртысь крестьян семьяын вордскем но удмурт сатира удысын трос лэсьтэм пилэсь нимзэ. 34 ар гинэ улыны вуыса но со кемалы тодэ вайымон кылиз. Али но сцена вылын чузъяськыло на солэн серемес чуръёсыз, басняосыз, лэчыт кыло кылбуръёсыз. Анатолий ВОЛКОВ, Завьял ёросысь "Пригородные вести" газетын ужась, кылбурчи. КРЕЗЬГУР ПОРЪЯМЪЯ 15-тӥ мартэ Машиностроительёслэн культура юртазы ортчиз духовой инструментъёсъя оркестрлэн но Удмуртиысь дано артистлэн Виктор Сергиенколэн концертсы. Солэн баритонэз шуныт тулкымъёсын кылзӥсьёслэн сюлэмазы пыриз. Виктор Сергиенкоез чебер кырӟаны дышетӥзы Новосибирскысь музыкальной училищеын, собере - консерваториын. Со ужаз Операя но балетъя театрын, дышетӥз музыкальной училищеын, али духовой инструментъёсъя оркестрен ӵош кырӟа. Г. Свиридовлэн но П. Чайковскийлэн романсъёссы, Д. Вердилэн "Отелло" операысьтыз ария, ӟуч но украинской калык кырӟанъёс "Семёновна", "Вдоль по Питерской", "Черемшина"... - кырӟасьлэн репертуарез паськыт. Нош удмурт кырӟанъёс ӧз чузъяське. Оркестрлэн валтӥсь дирижёрез Лев Казберов но дирижёрез Андрей Елисеев кивалтэм улсын чузъяськизы Ф. Зуппелэн "Поэт и крестьянин" увертюраез, Д. Вердилэн "Набукко" операезлы увертюра, "Битлз" группалэн кырӟанъёсыз. Оркестрлэн но кырӟасьлэн куаразы одӥг ӧретӥ тулкымъяськизы. Куд-ог дыръя гинэ кырӟасьлэн куараез, изъёс шоры ӵемтэм кадь, оркестрлэн крезьгураз выйылӥз, ляб чузъяськиз. Концертэз нуиз Удмуртиысь искусствоосъя дано ужась Елена Красновская. Л. ПРОЗОРОВ, Удмуртиысь искусствоосъя дано ужась. Кутозы-а бюджетэз? Туннэ выльысь ужаны кутскиз Кун Кенешлэн 17-тӥ сессиез. Парламент, кызьы ивортылӥм ни вал, бадӟым инты висъялоз туэлы бюджет кутонлы. Сое депутатъёс огпол учкизы ни. Туннэ мар шуозы Кун Кенешлэн ялан ужась комиссиосыз но фракциосыз? Котьку сямен та вераськон мынэ бюджетлэсь расход люкетсэ будэтон сярысь. Нош доход ваись ёзъёс палэнэ кылё. Бюджетэ коньдон пыртон ласянь депутатъёс, ӵектонъёс уг сёто, нош курисьёсыз трос. Сессия озьы ик эскероз мукет ужпумъёсты но. Г. Романов. Кыӵе бен город луоз аслаз милициезтэк? Ижевск городын вить район ке, сомында ик РОВД-ос но. Со сяна, преступностен нюръясько патрульно-постовой батаьон, армие кык арлы басьтэм пиослэн милицейской батальонзы, ОМОН но куд-ог ёзъёс. 1994 арын соос вӧзы ватсаськиз на городысь внутренней ужъёсъя управление. Валамон, милицилэн кужымез будэ ке, умой со. Мукетыз ужпум - котьку-а меда солэсь пайдаез луэ. Жаляса верано луэ, УВД кылдэм бере югдур городын туж ик ӧз воштӥськы. Азьвыл сямен ик кышкыт ӝытазе ураме потыны, азьвыл сямен ик квартираосты сузяло, ульчаын но транспортын кудӟемъёс жоб кылын верасько. Кышкыт йыружъёслэн но лыдзы уг кадь кулэсмы. Малы бен кулэ луиз городлы нимаз УВД? Сотэк но вал ук котькуд районын милиция вылӥ верам батальонъёс, ОМОН но мукетыз. Нлтас вераса, УВД-ын ӵапак райотделъёсын кадь ик службаос, ёзъёс. Ужасез но сомындагес ик, 200 пала луоз. Кивалтӥсьсы полковник. Лейтенант толэзяз 1 сюрс манет (валамон, выль уксёен) пала басьтэ ке, кӧня басьтэ полковник, солэн воштӥсьёсыз, нош озьы ик мукет подполковникъёс, майоръёс, капитанъёс но сержантъёс? Нош УВД-ез возьыны город казнаысь но коньдон мынэ ук. Озьыен, выт тырисьёслэн, огшоры адямиослэн кисыысьтызы. Нош асьмеос йыркуръяськиськом кырсь урамъёс пазьгиськем сюресъёс, куашкам больницаос но нылпи учреждениос пумысен... Кытысь бен ваньмызлы коньдон тырмытод? Югдурез утёнъя министерствоын одӥгезлэн ужасьлэн верамезъя, выль управление кылдытон сярысь трос сюлмаськем городлэн "атаез" А. Салтыков озьы угось, мар со город луоз аслаз УВД-езтэк. Шоркарлы но уз кельшы ук. Мон воксё уг ӧтиськы УВД-ез быдтыны. Кылдытэмын бере, мед ужалоз ини. Но коньдон солы тыриськод бере, ужзэ но юаны кулэ, дыр. Г. ТИХОНОВ. Маин улэ "Ижмаш" ОАО Мартэ шаерысьтымы делегация дасяське Южной Кореяе ветлыны, отысь "Хёндэ" корпорациен куд-ог ужпумъёсты сэрттон-пертчон вылысь. Кызьы тодӥськоды, акциосын "Ижмаш" огазеяськон соин ӵош автомобильёс поттон сярысь огкыл гожтӥз. "Иж-2126" автомобильёслы нырысетӥосыз "Хёндэ" двигательёс дорамы та толэзе вуыны кулэ. *** Эшшо 30 сюрс двигательёс басьтон сярысь акциосын "Ижмаш" огазеяськон огкыл гожтӥз Уралысь моторъёс лэсьтон заводэн. Нырысетӥосыз соос дорамы озьы ик мартэ вуыны кулэ, кылемъёсыз толэзьлы быдэ 3 сюрсэн вуозы. *** Акциосын "Ижмаш" огазеяськонысь куинез конструкторъёс: Михаил Тимофеевич Калашников, Азарий Иванович Нестеров но Владимир Федорович Суслопаров- Россиысь Дизайнеръёслэн Союзазы пыртэмын. Спортивной но пӧйшуран пыӵал тӥрлыкъёслэн авторъёссы вормисьёс пӧлы пыризы Россия Федерацилэн премиез понна ортчытэм "Виктория" адӟытонниын. Э. ВАСИЛЬЕВА. Синтэм муртлы шунды но сьӧд Туэ Удмурт шаерысь син эмъян службалы тырме 75 ар. 1923 арын трахомаез эмъян нырысь интые пуктэмын вал. Ар ортчыса, Ижевскын нырысьсэ син эмъянъя отделение усьтӥськиз. Огдыре йӧнатӥськыны быгатӥз 25 мурт. Шаерамы улӥсьёс пӧлысь 55-88 процентэзлы трахома висён паласькиз, тросэз пыраклы синтэм кылизы. Врачъёслэн нимысьтыз кылдытэм отрядъёссы гинэ 1958 арын калыкез трахомалэсь утизы, нош выжытэм быдтэмын вал 1974 арын. Офтальмологической клинической больница шаерамы тужгес но бадӟымез луэ. Цолы туэ 20 ар тырме. Озьы ик син эмъянъя кафедра но алигес 60 ар тырмонзэ пусйиз. Туннэ нуналлы та кышкыт висёнъя югдур воштӥськемын ни. Умоесь азинсконъёссы Воткинск, Глазов, Можга но Сарапул городъёсысь больницаын. Шаерамы ваньмыз 142 син эмъясь витьтонэз Ижевскын ужа. Со пӧлысь одӥгез медицина наукаосъя кандидат Апполинария Петровна Перевозчикова. - Туж кышкыт висёнэз палэнтыны быгатӥзы тӧдьы халатэн ужасьёс. Ижевскысь медициная интститутын дышетскыкум трахома висён сярысь книгаосысь но арлыдоослэн верамзыя гинэ тодылӥ. Дышетсконме йылпумъяме бере 1967 арын Чувашие ужаны ыстӥзы, отысь кивалтӥсьёс шуизы трахомамы, пе, ӧвӧл ни. Малы ке ӧй оскы, ас синмыным ваньзэсты эскероно кариськи. Гуртъёстӥ ветлыса, сю пала трахомаен висисьёсты шедьтӥ. Соку мон шоры кырыж синмын, кышкасагес учкыны ӧдъязы ке но, ӧй сётскы. Секытэн ортчытӥз куинь арзэ Апполинария Петровна Удмуртилэн палэназ. Егит специалистлэсь сюлмаськонъёссэ ӵемысь кылэм-адӟем но ӧз карылэ. Ӟудэмысьтыз синвуаськылӥз но, нош юрттод шат кайгулы синвуэн. Синтэм муртлы шунды но сьӧд потылӥз. Кӧня адямилэсь улонзэ быдтӥз кӧшкемыт висён. Тросэз егитъёс али малпаны ик уг быгато, мар со трахома, нош арлыдоос - вунэты вал но, со вакыт йырысь уг кошкы. Электротыл ӧвӧлысь быдэс семьяен курадӟылӥзы. Висись синъёс шыртыл но, керосин лампа шоры но учкыны ӧз быгатэ. Чидантэм висён кузёяськиз адямиен. - Трахома висён сярысь малпаськем но уг поты ни, - веранзэ азьланьтэ син эмъясь. - Чувашиын куинь ар ужаса, Удмуртие ик берытске, Яр районэ. Огдышемен яръёслэсь но синзэс эскерыса потоно кариськи. Удмуртиын улӥсьёслэн синъёссы ошмес ву выллем чылкытэсь вал ни. Шумпотэменым нош ик синвуаськи но данъяськи асьмелэн син эмъясьёсынымы. Улон азьлань вамышъя. Кылдэ пӧртэм аудио-видеотехника. Ваньмон дырмес ӵемгес ортчытъяськомы чагыр экран дорын, компьютеръёс сьӧрын. Син висёнъёсты эскерисьёслэн чакламзыя, берло вить ар ӵоже кык поллы кулэсмизы секыт висёнъёсы вуттӥсь учыръёс. Жаляса верано, йылэ кыдёкысьсэ ляб адӟисьёслэн лыдзы. Туннэ нуналлы шаерысьтымы школаын дышетскисьёслэн 38 поцентэзлэн синзы ляб адӟе. Кылемъёсызлэн та лыдпус 28 процентозь вуэ. Висисьёс пӧлысь 75 процентэз близорукостен курадӟо. Нялтас вераны кулэ, миым май толэзе та висёнэз нырысьсэ эмъяны ӧдъязы Удмуртиын. - Азьло аръёсы трахомаен вуёмыса улӥзы, - шуэ А. П. Перевозчикова. - Соин близорукость, глаукома, катаракта висёнъёс сярысь ӧз ни малпаськылэ. Нош туннэ нуналлы та висёнъёс асьмелы тужгес но кышкытэз луо. Кылсярысь, катаракта мӧйымыса кылдэ шуиськом ке но, вань ини егитъёс пӧлын но висён учыръёс. 32 аресъем воргорон синъёсызъя но ымнырызъя чылкак 60 аресъем песятайлы укша. Адямиослы юрттон понна пӧртэм луонлыкъёс ужамы кутӥськом. Очкитэк ветлыны мылкыд карисьёслы нимысьтыз операция лэсьто. Озьы 247 висись очкиезлэсь куштӥськиз ни. Сюлмаськонъёс, малпаськонъёс... Дэбес районысь Уйвай гуртын вордскем нылаш егит дыръяз котьмае чидано луиз. Нош туннэ, со арлыдыз шоры учкытэк, висисьёсын ӵош куректэ но, шумпотэ но. Гуртысь котькуд лыктӥсез ӵыжы-выжыоссэ сямен пумита. Чылкытэсь, чебересь синъёсты адӟыса, Апполинария Петровналэн но синъёсыз пальышало. В. Кутузова. А. П. Перевозчикова уж дураз. Туспуктэмез В. Камашевлэн. Лыктӥды ке, паймоды! Оскисько, 20-тӥ мартэ Ижевскысь Операя но балетъя кун театрын буш интыос уз луэ: солэн сценаез вылын аслэсьтыз 65 арессэ пусъёз "Удмуртия" кун телерадиокомпанилэн Академической хор капеллаез. Куд-огез шуоз но, дыр: солэн концертаз мон огпол гинэ ӧй вал ни, мар выльзэ сётоз на со... Яке: радио, телевизор пыр кылзом ай... Яке: берло дыре та коллективлэн кырӟамез уг яра мыным... Вот, вот, самой та берпум верам кылъёсыз кылӥсько мон куд- ог тодмоосылэсь, соос пӧлын уно егитъёсыз. Таӵе вераськон монэ мур малпаськонэ уськытэ. Ӧвӧл-а герӟаськемын со туала эстрадаен, кытысь асьме вылэ кисьтӥсько туж бездыт крезьгуръёс, валантэм кылъёс но син азьын поръясь куаратэм кырӟасьёс? Паймытэ на мукетыз: со "музыка" но со "кырӟасьёс" егитъёслэн сюлэмазы мур но мур пыӵало. Валасько: косыса уд яратыты, улонлэсь кыӵе ке люкетсэ возъетэн уд возъя - сыӵе вакытъёс (Инмар мед утёз!) медам ни берытске. Озьы ке но..., ойдолэ Академической хор капеллалэсь кырӟамзэ ӵемгес кылзоме! Нош со дыре ик ойдолэ ваньмы ӵош шумпотоме, одӥг кыӵе ке кырӟанэз ик пӧртэм тусбуё карыса кырӟаны быгатӥськомы ни шуыса, ойдолэ шумпотоме, асьмелэн Академической "Италмас" ансамбльмы но Валентина Пудовамы, фольклор кырӟанъя "Айкай" театрмы но Уваысь Пантелей Кузнецовлэн кырӟасьёсыз вань шуыса, ойдолэ... Туннэ мон шумпотыса паймисько: удмурт кырӟанэз тужгес вылӥ - академической - быгатонлыкен коллективъёс кырӟало ни. Ӵуказе мон солы уг ни паймы, малы ке шуод, сыӵе вылӥе ӝутӥськем кырӟан монэ асме ас дорозяз ӝутоз но, мон солы дышо, со мынам улонэлэн ог люкетэз луоз. Мукетызлы но оскисько: 20-тӥ мартэ Ижевскысь Операя но балетъя кун театре ветлэмъёс пӧлын уз ни луэ "та коллективлэн кырӟамез уг яра" шуисьёс, соос огкылысь вералозы: Удмурт шаерамы уногес мед луозы таӵе вылӥ быгатонлыкен кырӟась коллективъёс но солистъёс. Пётр Кубашев, удмурт кырӟанэз яратӥсьёс пӧлысь одӥгез. Уж сёто, ваньбурез потто Ижевскысь автомашина поттон заводлэсь "Мир" нимо культура юртсэ азьло дыре трос калык тодӥсь ӧй вал. Нош берло аръёсы сое быдэс республикаын но, солэн палэназ но тодо ини. Малы? Татын пӧртэм адӟытонъёс (выставкаос) ортчытъяны кутскизы. Туэ гинэ кыкетӥез усьтӥськиз ни. Нырысетӥяз асьме ужбергатӥсьёс корка котырын но со пушкын кулэ луись арбериоссэс возьматӥзы. Отчы ньыльдон пала предприятие пыриськиз. Соос понна пӧртэм семинаръёс ортчытэмын вал, куспазы ог куамын пала огкыл (договор) кутэмын. Туж умой соиз но: ужбергатӥсьёс соку троссэ ваньбурзэс калыклы вузаны быгатӥзы. Нош кылем арняе покчи предприятиос кыкетӥ адӟытонзэс усьтӥзы. Татын куамын ёрос экспозициосысь лэсьтӥськон материалъёсты учкыны но басьтыны луэ. Одӥгъёсыз фирмаос алигес гинэ кылдытэмын ай, мукетъёсыз кемалась ужало ни. Озьы ке но, выставкаын котькудӥзлы инты тырмем. Тани, "Ижметаллургмонтаж" ОАО (кивалтӥсез Владимир Попов), "Тизол" АООТ (кивалтӥсез Михаил Мансуров), "Замки-Редуктор" фирма (кивалтӥсез Виктор Шульга) куамын-ньыльдон ар ас понназы ужало ини. "Ижметаллургмонтажын" кортлэсь пӧртэм арбериос лэсьто, коркаосы шуныт но чагыр сэтӥськон нуыны гумыосты музъеме тыро. Со сяна, пуртыос, мунчо гуръёс, корт капкаос, теплицаос, киоскъёс лэсьто. "Тизол" АООТ Свердловск областьысь Нижняя Тура городын ужа, пӧртэм минералъёслэсь шуныт возись вата дася. Та предприятиын поттэм вузэз СНГ-ысь вань странаос басьто. Тунгон поттӥсь "Замки-Редуктор" быдэс Россилы тодмо. Оскымон ворсэтъёсты басьтӥсьёс ичи ӧвӧл. "АССО-строй" АОЗТ-лэн (кивалтӥсез Рустам Хабибуллин) ньыль бригадаосыз. Отысь ужасьёс лэсьтӥськонын тыршо, коркаосты-квартираосты чеберъяло, проект но лэсьто. Туж тунсыко но чебер арбериосын улон но ужан интыосты чеберъяло "Крафиласт" но "Ижавтопластик" предприятиос (кивалтӥсьёссы Тахир Шакиров но Рауф Кутузов). Покчи ужбергатонын ваньмыз тыршисьёс сярысь шуг вераны. "АСПЭК" лэсьтӥськон управление (кивалтӥсез Петр Камбур) сярысь гожтэм потэ на. Татысь ужасьёслэн "кизы" быдэс республикаысь гуртъёсы но городъёсы вуэ. Алигес Якшур-Бодьяын синмаськымон черкез выльдӥзы, Завьялово районысь кӧня ке гуртъёсын тузӥ юртъёс пуктӥзы. Нош кӧня коркаос соослэн киосынызы ӝутэмын ни Ижевскын! Республикаысь пичи предприятиос бадӟым заводъёсын но фабрикаосын мылем адямиослы уж сёто, шаерысьтымы казнае уксё ваё, магазинъёсысь ӝажыосты тырмыто. Покчи бизнесын ужасьёслэн кивалтӥсьёссылэн Михаил Зайцевлэн но Валерий Зворыгинлэн верамзыя, адӟытонъёс ортчытъяськыку, татчы лыктэмъёс ог-огзылэсь выль ужан амалъёссэс тодо. Озьыен, азьпалан соосын поттэм ваньбурлэн асдуныз кулэсмоз, азинлык будоз. Тросаз шунды ӝужан палась странаосын (Китай, Япония, Южной Корея, Таиланд, Сингапур, Малайзия) покчи бизнеслы кемалась бадӟым саклык висъяло. Табере та государствоос экономикаысь трос удысъёсын асьмеды азьланьтӥзы, ваньбур поттон отын котькуд аре шӧдскымон будэ. Оскем потэ: адӟытонъёс юрттозы асьмелы но вамышъёсмес будэтыны. Н. ВОЗИСОВ. Туспуктэмъёсыз В. Камашевлэн. УЖРАД ӜЕГА Граховоысь калыкез дышетон удысын ужасьёс райцентрысь шор ёзо школаын эскерон ортчыто. Учко отысь нылпиослы дышетон ужез радъямез. Но грипп татчы но вуиз. Тросэз пиналъёс но, дышетӥсьёс но висьыны усемен сэрен, ужрад ӝега. Н. ЛИПИНА. Гердэ УДМУРТЛЫКМЫЛЭСЬ ӦРЗЭ ПАСЬКЫТАТЫСА "Герд" баммес дасясь журналист К. ЛОМАГИН пӧртэм улосъёсысь трос адямиосын пумиськылэ, кенешылэ. Калык пӧлысь "омыръя" улон-вылонмес умоятон, кивоштӥсьёсмес ӟеч будэтон, азьлане мынон сюресъёсмы сярысь малпанъёсты, дэмланъёсты. Тани мар шуэ удмурт культурая огазеяськонлэн Башкортостанысь Янаул ёросысь тӧроез Юрий Саитович САИТОВ: - Вань удмуртъёслэн ВИ Ӧтчамзы, мынам малпамея, умой ортчиз. Асьме калыкмылэсь кужымзэ бугыртыны, огазеяськыны юрттӥз. Зэм, кенешонын вал трос пумо малпанъёссэс верасьёс. Сотэк кызьы-о лыдэ басьтод, шонер пусъёд азьлане мынонмылэсь шор сюрессэ? Тӧроез бырйыку но ӟырдыт пуромизы пӧртэм мылкыдъёс. Одӥгъёсыз огзэ усто адямимес ӵекто кивалтонэ, мукетъёсыз - кыкетӥзэ. Демократие выжимы бере, сыӵе ӟырдыт нюръяськонлы паймонэз ӧвӧл. Трос пӧлысь ворме уго одӥгез, тужгес кужмоез, улонмылэсь кыӵе ӧретӥ азинсконзэ ӟечгес валаны быгатӥсез. Тужгес но тросэз делегатъёс куаразэс сётӥзы В. К. Тубылов понна. Озьы ик луыны кулэ вал, дыр. Лыдъясь комиссилэсь ивортонзэ ваньмы ӟырдыт кичабонъёсын пумитамы. Тӧро вань, табере, озьыен, огкылысь быдэсъяно съездлэсь решениоссэ. Ми, Кам сьӧрын улӥсьёс, ваньмы сыӵе мылкыдын бертӥмы дорамы. Нош кема ик дыр ӧз ортчы, куд- ог газетъёсын со но та пумысен гожтэмъёс потӥзы. Адямиослэсь ымзэс бен уд ӵокта. Но огкылэ вуимы бере, тӥ, туганъёс, ваньды огазьын ужалэ вал. Огез буре, мукетыз паллянэ ке кожиз, сюресмы пазьгиськоз ук. Ваньмыз - ӟечез но, уродэз но - милемлы ӝог кылӥське. Кыдёкын ум улӥське ук - Кам сьӧрын гинэ! Ярам коть, берло вакытэ со выллем вераськонъёс кысӥзы кадь. Ойдолэ, эшъёсы-туганъёсы, ваньзэ лэсьтомы дэмен, ог-огенымы кенешыса, удмуртлыкмылэсь огъя ӧрзэ сураллятэк, ялан паськытатыса, муромытыса. "Удмурт кенеш" огазеяськонлэн Грах ёросысь тӧроез Альбина Владимировна ТАРАСОВА шуиз: - Шумпотӥсько егит пушъетъёсмылы! Съезд бере ми ас эшъёсынымы трос ужрадъёс ортчытӥмы ини. Бадӟым Ӧтчам ваньмылы выль кужым сётӥз кадь. Быдэс ёросэнымы дэмен пусйимы ми палан дышетэм но райгазетлэн редакциям ужам тодмо удмурт писательлэсь Роман Валишинлэсь 60 арес тырмонзэ. Жаль: со туж вазь кошкиз улонысь. Но кошкиз шуэммы уг поты - усто прозаик ялан ми пӧлын. Туж пайдаё вал юбилеез пусъён. Валишинлэн гожъямъёсыз пыр ми удмуртлыкмес шӧдскымон муромытыны быгатӥмы. Тужгес но трос пыриськизы та ужрадэ егитъёс, Лолошур-Возжиысь дышетскисьёс. Музон школаосын но Роман Валишинлэсь произведениоссэ шара лыдӟонъёс, конкурсъёс радъямын вал. Дорамы ветлӥзы Ижевскысь но, Башкириысь но гажано куноос. Табере рос-проос дасяськиськомы районамы вордскем кылбурчилэн Ашальчи Окилэн вордскемез дырысен 100 ар тырмонэз пусйыны. Оскисько: таиз ужрадмы уката зол юрттоз ас калыкенымы данъяськон мылкыдмес кужмоятыны, нылпиосмес ӟеч будэтыны. Нуналмысь чыры-пыры ужъёсмес но весь герӟаськомы таӵе бадӟым малпанъёсын... Быръёнъёс азьын Толон, 16 мартэ, Кун Кенешлэн конференц-залаз люкаськылӥзы городъёсысь но районъёсысь быръёнъёсъя комиссиослэн тӧрооссы. Та ужрадэз ортчытӥз республикаысьтымы Быръёнъёсъя кун комиссия. Отын вераськон мынӥз интыысь органъёсы быръёнъёсты кызьы ортчытон, со понна кӧня коньдон висъяське но мукет ужпумъёс сярысь . Кенешын тупен-тупен валэктонъёс сётӥз Быръёнъёсъя кун комиссилэн секретарез Георгий Пчельников. Г. Васильев. "ПИРТЭШ КИЗИЛИОС" Пичи Пурга ёросысь Бобья-Уча гуртысь калык театр учкисьёслы пӧртэм драматургъёслэн пьесаоссыя ужъёссэ возьматӥз ни. Нош туэ тол вылтӥ татысь артистъёс выль постановка дасяны кутскизы. Ӝоген уго Шаркан ёросысь Быги культура юртын ортчытыны чакламын шаерысьтымы калык театръёслэсь аспӧртэм конкурссэс. Отын асьсэлэсь быгатэмзэс возьматозы Алнаш, Можга, Пичи Пурга но музон ёросъёсысь артистъёс. Та бадӟым ӵошатсконэ озьы ик пыриськоз, вылды, Ижевскысь машина поттӥсьёслэн культура дворецысьтызы калык театр но. Али гуртъёсысь усточиос мылысь-кыдысь ветло репетициосы. Асьсэлэсь геройёссэс яркытгес, мургес возьматыны дышетско. Нош Пичи Пурга ёросысь калык театр таяз учыре сценаез яратӥсьёслы дася асьсэ палась писательзылэн-драматурглэн Никвлад Самсоновлэн "Пиртэш кизилиос" пьесаезъя выль ужзэ. Мар сярысь со - учкисьёс ӝоген тодозы, дунъялозы. Кирилл ЛОМАГИН. ПУДО БЫРЕ Пичи Пурга ёросысь Гожня гуртын фермазы сылэ гурт сьӧрын. Пичи дыръям ферма кылэз кылыкум, город шуыса малпасько вал. Анае но фермае ужаны кошкисько шуылыкуз, городын ужа шуыса данъяськылӥ. Угось кыдёкысен ик пиштыло тылъёс. Горд кирпичен ӝутэм коргидъёс туж чебер адӟисько вал. Нош али, быдэ вуэмен, "городэз" уд тодма ни. Со воксё воштӥськем. Куиняз гинэ коргидын пудо-живот бӧксэ. Кыкез бушесь. Тани таӵе куашкам интыын ужа одӥгез ужась Бекмачева Рита. Гожня фермаын Рита апай ужаны кутскиз 16 арескысен. Мон солэсь юай: - Кин янгыш та фермалэн куашкамезлы? - Утча на янгышсэ. Оло кин ини виноват, ӧз учке бере. Нокинлы но кулэ ӧвӧл та ферма. Нош оло кулэ. Угось та фермаен гинэ Рита апай но азьланьтэ улонзэ. Нош ферма ке куашказ яке пытсазы, кытчы ужаны потоз Бекмачева Рита. Со гинэ ӧвӧл, мукетъёсыз но. Майя СКВОРЦОВА. Гожня гурт, Пичи пурга ёрос. Ортчемзэ вуоноеныз герӟа Ижевске лымшор паласен вуыку, кыдёкысен адско завод муръёос. Кык даур талэсь азьло та интыын сьӧд нюлэс вал. Али Иж шур дурын вӧл-вӧл сылэ "Ижсталь" завод. Заводлэн кылдэмез дырысен лыдъяло Ижевсклэсь но арлыдзэ. "Металлург" газетлэн азьвыл редакторез А. М. Фомичев, Быдӟым Отечественной войнаысь бертэмез бере, мыло- кыдо пыриськиз предприятилэсь музейзэ кылдытонэ. Солы сётӥзы чугун кисьтон корпусэзлэсь пичияк сэрегзэ. Куамын ар талэсь азьло музеез бадӟым выль юртэ интыязы. Туэ татын ортчиз предприятиослэн музейёсысьтызы ужасьёслэн семинарзы. "Ижстальысь" музейлэн кивалтӥсез Н. В. Трапицина люкаськемъёсты тодматӥз заводлэн кылдэменыз но будэменыз. Металлургъёс данъясько ӟеч поттэм анданэнызы. Сое басьто кунгож сьӧрын но. Нырысетӥ мартен гур лэсьтэмын вал 1877 арын. Со дырысен вуж мартенысь ньыль гуръёсын андан пӧзьтыны ӧдъязы, лэсьтӥзы выль матрен но электрокужымен ужась андан ӵыжатон цехъёс. 23 номеро цехез ӝутэм бере, отын анданэз вакуумно-дуговой но электрошлаковой переплавъёсын пӧзьтыны ӧдъязы. Озьы анданлэн ӟечлыкез уката умояз. Музей выль юртэ интыяськон азьын, 1967 арын, татчы ветлӥсьёс асьсэлэсь малпанъёссэс но мылкыдзэс нимысьтыз кылдытэм книгае гожъяны кутскизы. Отын вань Ленинградысь Киров нимо заводысь ужасьёсын ӵош вуылэм кылбурчилэн Лев Ошанинлэн но чуръёсыз. Шуныт кылъёс гожто Донецкысь миниатюра театрысь артистъёс, пионеръёслэсь плавказэс ортчытонэ ветлӥсьёс, "КамАЗ-ысь" ужасьёс, Англиысь лыктэм куноос... Рыноке выжемен, "Ижсталь" но шуг-секытъёсын пумиськиз. Уг тырмы куштӥськем корт но куд-ог материалъёс андан ӵыжатонэз будэтыны. Но металлургъёс оско ӟечезлы. Андан - со промышленностьлэн нянез. Андан тырмыт ке ӧз луы, асьмеос начармом. Кунгож сьӧрысь узыръёслэсь ялан, али сямен, юрттэт сётэмзэс возьмалом. В. ЧЕРНОВ. Судысь куара уг кылӥськы "Ижсталь" огазеяськонын ужакум, мон трос аръёс ӵоже Ленин ёросысь калык судын заседатель вал. Соку туала вакытэ кадь секыт йыружъёс лэсьтӥсез ӧжыт вал. Сыӵе ужъёсты одно ик Удмурт Республикалэн Вылӥ судаз учкылӥзы. Соку республикаын потӥсь газетъёс но судъёс сярысь ӵемгес гожъязы. Калык судьяос но куд-огзэ заседаниоссэс цехъёсын но мукет ужан интыосын ортчытъязы. Отын ик судьяос, прокуроръёс люкаськемъёсыз уголовной но гражданской законъёсын тодматылӥзы. Жаляса верано, али ваньмыз та валэктон уж вунэмын. Газетъёсысь "02"-лэсь йыружъёс сярысь ивортонъёссэс гинэ лыдӟиськом на. Нош судъёсысь заседаниос сярысь материалъёсыз туж шер шедьтод. Судын но прокуратураын ужасьёс калык пӧлын законъёсыз ӧжыт валэкто. Соин но, дыр, йыруж лэсьтонлэн лыдыз уг кулэсмы. Радио но телевизор пыр нуналлы быдэ кылӥськом медъяса адями виён сярысь. Валамон ини, киллеръёсыз уг шедьто. Табере кутӥзы выль Уголовно-процессуанальной кодекс. Солэн статьяосызъя йыруж лэсьтэм понна штраф тырыса мозмытскыны луэ. Нош коньдон ӧд ке шедьты - тюрьмае пуктозы. Жаляса верано, удмуртъёс но берло дыре шимес йыруж лэсьтӥсьёс пӧлын сюрыло. Троссэ отчы кыске юон, ужлэсь пеган, азьтэмъяськон. Сыӵеосты палэнто семьяоссы, ӵыжы-выжыоссы, ӵош ужась эшъёссы. Озьы кутске адямилэн бырон сюресэз. Нош кин со понна янгыш? Малы правоез утён удысэз нуисьёслэн кужмо куаразы уг кылӥськы газет но журнал бамъёсысь? Номыр сярысь шат вераны? В. Чернов. ТЫРОНЪЁССЫ ПЫТСАМЫН Граховоын донорлэн нуналъёсыз ортчизы. Вирзэс сётыны мылкыд карисьёс 280 муртлэсь ятыр люкаськиз. Кылем аръёсын ӵошатыса, со трослы уногес. Озьы районысь больница вир басьтон станцилы люкаськем тыронъёссэ быдэсак пытсаз. О. ВОЛКОВА. "ӞЕЧ ЛУ, ТОЛ, ӞЕЧБУР, ТУЛЫС!.." Артистъёс лыктэмлэсь азьло Нагорный посёлокын улӥсьёс урамъёссы кузя кир-пазьгес ветло вал. Мильым пыжисьёс дорын но ньыль-вить мурт гинэ адске, валэн ворттылӥсьёс котырын но, эсьмаса, пиналъёс но трос ик ӧвӧл. "Мар таӵе? - малпасько поннам, - оло, тол келянлы, тулысэз пумитанлы сӥзем шулдыръяськонзы воксё куашкалоз?" Магазин пушказы пырасьёсыз гинэ золгес адско. Сиёнлы сокем уг кожало татчы, музонгес муген. Егит, задор мылкыдо егитъёсын автобус вуиз но, отысь но, татысь но калык люкаськыны ӧдъяз магазин вадьсы, паськыт ураме. - "Инвожо" ансамбль лыктэм! - Яратоно усточиосынымы нош ик пумиськом! - сипырто нылпиос, шумпото анай-атайёс. Кӧня ке гинэ дыр ортчиз - татын ӟоскыт вал ни гуртоослы. Куазь шуныт, зэмос тулыс вуиз кадь. Вылаз ик, быдэс посёлокез жин-жин чебер куараосынызы тырмытӥзы "инвожоос". Удмурт кырӟанэз воштэ ӟучез, ӟучсэ - музонэз. Алигес гинэ крезен шудэ вал кыӵе ке воргорон, табереяз, учкисько но, крезьзы вуэм ни "Инвожоысь" шаплы нылаш Людмила Камашева кие. Вань калык эктэ-тыпыртэ, пыд улысь лымы вулы пӧрме кадь ини утыр... Кырӟасьёслэн, эктӥсьёслэн лыдзы пумен йылэ, воргоронъёс но вунэтӥзы магазинэ пыран мугъёссэс - нылкышноосын вожмаськыса тыпырто... Чеберъям кошовкаын ворттылӥсьёс но огвакытлы кулэсмизы. "Инвожо" угось, чебер сяська выллем, ваньзэс ас котыраз люка. Мӧйыоссэ но, пичиоссэ но. Зэмзэ ик, туж чебер, йӧно калык люкаськемын та ансамбле: Михаил Журавлев, Алевтина но Анатолий Поткинъёс, Фирая Журавлева, Лидия Романова, Валентина Векшина, Галина Пантелеймонова, Михаил Охотников, Николай Мурашов но трос мукетъёсыз. Кырӟасьёссы- эктӥсьёссы сяна, кӧня ке баянистъёссы калыкез шулдырто. Алигес тани коллективе вуиз крезьчи Вячеслав Ипатов. Ваньмон дыръязы ваньзы сюлэм пӧсьсэс сёто калыклы, "Удмурт кенешлэн", "Дэменлэн" ужрадъёсазы но мылысь-кыдысь пырисько. Вӧй келянэ, тол келянэ ветлӥз "Удмурт кенеш" огазеяськонлэн Октябрь ёросысь тӧроез Земфира Борисовна Петрова но. Та шулдыръяськонэ озьы ик ӧтемын вал Игерман но мукет посёлокъёсын улӥсьёс. Пумитай татын ас палъёсме но - Пичи Пурга ёросысь улыны лыктэмъёсыз, Якшур-Бодья ёросысь удмуртъёсыз но. Ваньзы тау каро "Инвожолы", З. Б. Петровалы, Нагорный посёлокысь усточиоссылы. - Ми городлэсь кыдёкын, бадӟым сюреслэсь палэнын-могын улӥськом, - шуо огез но мыдыз, - соин ик котькудӥзлы таӵе пумиськонлы пумтэм шумпотӥськом. - Нош кинъёс понна куараостэс сётоды вуоно быръёнъёсын? - юай одӥг тодмоелэсь. - Кин ми выллем огшоры адямиос сярысь сюлмаське, соос понна ик быръён участокамы лыктом,- шуэ со. - Выльёсыз синйылтэм адямиосмы вань ини. Калыклэсь палэнскем туала депутатъёс нош мед малпаськозы асьсэ сярысь!.. Кирилл ЛОМАГИН. АТАЕЗ ӴЕКТӤЗ ПИЗЭ Ижевскын Устинов районысь 71 номеро школаын тунсыко пумиськон ортчиз. Кун Кенешлэн депутатэз Геннадий Филиппович Красноперов бырйисьёсыз азьын вераськиз куинь ар ӵоже ас округаз ужамез сярысь. Зэмзэ ик, депутат туж умой юрттэ школаослы, нылпи садъёслы, Чернобыльын ужамъёслы, пал кышноослы. Тупатъяны дыр вуэмын ини куд-ог улон юртъёсты, но коньдон уг тырмы, та ужъёслы городлэн администрациез но туж ляб юрттэ. Соин умойгес луысал, шуиз Г. Красноперов, городлэн мэрияз округысь асьме депутатмес ке бырйысалмы. Депутатэ кандидатэ со ӵектӥз аслэсьтыз пизэ - "Иммар" предприятилэсь кивалтӥсьсэ Олег Геннадьевич Красноперовез. Т. МИРОНОВА. Кин потоз бусые? Та арын удалтэм урожай бичамзылы туж шумпотӥ вал. Дугдозы кожай вал кунгож сьӧрысь ю-нянь нуллэмысь. Но озьы ӧз луы нош ик пызь кунгож сьӧрысь ваиськом. Выль кылдэм "батракъёс" нянь уз будэтэ. Соос лушкаськыны но вина юыны сяна уг быгато ни. Соос ужлы "тушмонъёс", уж ӵектыса но уже уг пыро ни. Пычаский совхоз кылдыку ог дасо Урамъёс быризы. Кӧня бакчаос бушесь. Со гуртъёсын гид тыр скалъёс, валъёс, ыжъёс, курегъёс, ньыль пасека, свинокомплексын сюрсъёсын парсьёс вал. Ваньмыз быриз. Пудо ӧвӧл ни бере кыед бусые уг поты, бусыосын кузёясько жаг турын но пот. Ӝоген бусыосы жаг турын уз поты ни. Вунэтӥськом соизэ но, ведь музъем ваньмес асьмемыз аслыз басьтоз даурлы, ум потэ ни асьмеос отысь. Н. ЛИПИН Кин вылӥынгес? Шахматэн шудонъя международной федерация (ФИДЕ) Россиысь шахматистъёслэсь рейтингзэс печатлаз. Ог 2 сюрс мурт пӧлын - Удмуртиысь но 5 шахматистъёс: Максим Озолин - технической университетысь студент, спортъя мастере кандидат, Удмуртилэн чемпионэз (2510 балл); Владимир Гребенкин - спортъя мастере кандидат, Удмуртилэн трос пол чемпионэз (2415 балл); Владимир Федосеев - спортъя мастере кандидат, "Темп" спортклуб (2375 балл); Александр Филипенко - спортъя международной мастер, Удмуртилэн трос пол чемпионэз, "Металлист" спортклуб (2365 балл), Анатолий Семакин, Удмуртилэн трос пол чемпионэз, "Металлист" спортклуб (2345 балл). Ӵошатон понна: шахматэн шудонъя дуннеысь чемпион Гарри Каспаров люказ 2825 балл. И. Вельтмандер. Котькуд калыклэн - аслаз шундыез Котькуд вордскем адями дунне вылэ кыӵе ке но пытьы кельтэ. Одӥгез аслаз сӥё-дано уженыз шаермылэн историяз весяклы кыле, мукетызлэн улонэз шунды пуксем бере кадь сӥя. Вашкала дырысен книга гожтӥсьёслэн но отысь геройёслэн нимъёссы дауръёсын уз вунэ. Ижевскысь Азин нимо библиотекаысь ужасьёс туж умой лэсьто, искусство но литература удысъёсын тыршисьёсын лыдӟисьёсынызы пумиськонъёс ортчытъяса. Берпуметӥез ужрад сӥземын вал Удмуртиысь калык кылбурчилы О. А. Поскрёбышевлы. Олег Алексеевич татысь лыдӟисьёсын азьвыл но пумиськылӥз. Алигес, татчы ветлыкуз, со библиотекалэн лыдӟон залаз "Удмуртия" издательствоын 1995 арын печатлам выль кылбуръёсыныз "Я вам пригожусь" книгазэ кузьмаз. Отчы гожтӥз: "Гажано лыдӟись эше! Туж шумпото, та книгаысь тӥ шедьтӥды ке асьтэлы ярамонзэ. Тӥляд ӵыжы- выжыостылэн но тодмоостылэн улонзы котьку умой мед луоз. Вань сюлмысьтым, тӥледыз гажаса. Поскрёбышев". Та книга кылбурчилэн вордскемез дырысен 65 ар тырмемлы но творческой уже 40 ар пыриськемезлы сӥзьыса поттэмын. Сборниклэн кутсконаз автор лыдӟисьёслы вазиське, кызьы со инкуазьлэн шокамезъя эскере улонлэсь воштӥськемзэ. Ма веранэз, кылбурчи, усто гожъяны быгатэм сяна, адямиослэн сюлэмазы пырымон кылъёсын вераськыны быгатэ. Кез районлэн Бани гуртысьтыз крестьян семьяын вордскем Олег Алексеевич тужгес но шуныт кылъёсын маде аслаз анай-атаез сярысь. Кылбурчилэн творческой ужез пумысен Вячеслав Захаровлэн книгаяз туспуктэмъёсын возьматэмын О. Поскрёбышевлэн егит дырысеныз туннэ нуналозь улон сюресэз. Поэт туж жаляса вера, улэп дыръяз анаез та книгаез адӟыны ӧз вуы шуыса. Солэн мумиз гожтэт ӧз тоды ке но, нылпиоссэ дышетыны сюлмаськиз. Одӥгез кылбурез анайзэ, Александра Васильевнаез, буре вайыса гожтэмын. Кузьма Чайников сярысь 1933 арын гожтэм следственной материалъёс пӧлысь Поскрёбышев таӵе кылъёсты лыдӟиз: "Куӟебай Герд - азьвыл поэт". Кылбурчилэн йырсиосыз ик пештырскизы кадь. Ведь соку Герд улэп вал на. Олег Алексеевич соку ик палачъёслы пумит ӵушкась кылъёсын кылбур гожтӥз. Библиотекае люкаськемъёс туж бадӟым тунсыкен кылзӥзы Гердлы сӥзем кылбурзэ. Озьы ик мадиз Олег Алексеевич Удмуртиысь делегациен ӵош Москвае Куӟебай Гердлэн вордскемез дырысен 100 ар тырмонлы сӥзем ужрадэ ветлэмез сярысь. "Котькуд калыклэн аслаз шундыез вань. Ӟучъёслэн со - Пушкин, нош удмуртъёслэн - Куӟебай Герд, - шуиз Олег Поскрёбышев. - Кылбурчилэн ужез - адямиосты шунтон. Шунды пиштэ ке, улон но мынэ". В. ЧЕРНОВ. СЮ ВИТЬТОН ТЯМЫСЭТӤЕЗ Матэктэ быдӟым ӟуч крезьгурчилэн аспал эшмылэн Петр Ильич Чайковскийлэн вордӥськемез дырысен сю витьтон тямыс ар тырмонлы сӥзем крезьгуро фестиваль. Соин валче Удмурт кун филармонилэн юртаз кенеш ортчиз. Журналистъёслэн та ужрад пумысь юанъёссылы валэктӥзы Удмурт Элькунысь культурая министрлэн воштӥсез Сергей Мутерко, Удмурт кун филармонилэн тӧроез Нина Таланова, филармонилэн чеберлыкъя кивалтӥсез Валерий МИТРОФАНОВ. Азьвыл аръёсы музэн ик дорамы лыкто трос тодмо адямиос. Крезьгурез яратӥсьёсты шулдыртозы СССР-ысь калык артист, Ленин премилэн лауреатэз Анатолий Соловьяненко, Москваысь государственной академической камерной хор, чеберлыкъя кивалтӥсез - СССР- ысь калык артист, СССР-лэн Кун премиезлэн лауреатэз Владимир Минин, Балетъя Санкт- Петербург кун академической театр (чеберлыкъя кивалтӥсез - СССР-ысь калык артист, СССР-лэн Кун премиезлэн лауреатэз профессор Аскольд Макаров), Вивальди-оркестр (чеберлыкъя кивалтӥсез но дирижёрез - Россиысь калык артистка Светлана Безродная). Кыдёкысь куноосын ӵош фестивале пыриськозы асьме усточиос но. Учкисьёсты шулдыртозы Удмурт Элькунысь государственной духовой оркестр, государственной симфонической оркестр (дирижёрез - калык куспо конкурсъёслэн лауреатсы Николай Роготнев), Удмурт Элькунысь Операя но балетъя кун театрысь, Удмурт кун филармониысь солистъёс. Фестиваль азьын быгатонлыксэс возьматозы егит усточиос. Карэн Шахгалдян (скрипка), Екатерина Леденева (фортепиано), Денис Шаповалов (виолончель), Светлана Твердова (вокал-сопрано), Анатолий Григорьев (вокал-баритон) вуоно учкисьёссылы капчи мылкыд кузьмалозы. П. И. Чайковскийлэн вордскемез дырысен сю витьтон тямыс ар тырмонлы сӥзем фестивалез ортчытыны коньдонэн юрттэ Уральский Трастовый Банк. Е. РОМАШОВА. Шӧкыч Шӧкыч ӟечкыла Та нуналъёсы бадӟым шумпотон иво вуиз. Тодмо гожъясьёсмы Алексей Ельцов, Ульфат Бадретдинов, Владимир Возняков но Кирилл Ломагин кутэмын республикаысьтымы Писательёслэн союзазы. Мон понна со кык вылтӥ шумпотон но, данъяськон но. Ваньзылэн соослэн вылӥе сюрессы угось "Шӧкыче" кожылытэк ӧз ортчы. Нош Алексей Ельцов тани меӵак вера: - Гожъяськн ӧрие мон "Шӧкыч" бамысен кутски шуи ке, уг янгыша, дыр. Уката но золгес эшъяськи соин, редакцие ужаны вуыса. Тӥни кызь ар ни мон журналист, "Шӧкычен" кусыпме уг ыштӥськы. Сое уката но юнматэме потэ. Гожъяй серемес веросъёс но, басняос, палпоттытӥсь чуръёс. Оскисько азьланьын но луозы на соос. - Мар бен, Алексей, сюлмысьтым ӟечкыласько писатель дано ним басьтэменыд. Ӟечесь выль чуръёс тыныд. - Тау. - Писатель нимыд табере мукет удысъя уждэ азинтыны мылкыддэ уката ӝутоз, дыр. Мон вераны турттӥстко "Удмурт чорыг нимъёс" темая бадӟым уж быдэстэмед но тая нимысьтыз диплом басьтэмед сярысь. Табере ученой ним понна нюръяськоно ни. - Бен, та удысын ужме мон азьланьтӥсько. Быгатэмея, та темаез эшшо но азинтыны тыршисько. - Алексей, лыдӟисьёсылы туннэ оло одӥгзэ ке но кылбурдэ кузьмалод? - Шумпотыса. Тани таӵезэ. (Компьютер �1, "Мусо шаер", стихи �3) - Алексей, тынэсьтыд гожъяськон удысын будэмдэ, ялан муромемдэ ӟеч возьматэ таӵе югдур но: куд-ог кылбурчи тыныд кылдытэм чуръёсыдъя пыӵкылонъёс но гожъяло ни. Тани соос пӧлысь одӥгез. Гожтэм сое Николай Никифоров. Уммен суро Гурезь бамал, тӧдьы мугор, эмезь... Сяська пӧлын тон кӧлӥськод мусо... Но вылтыры шуак луиз юз-кезь - Сайкай: кышно - тонэн одӥг тусо. Алексей Ельцов Небыт валес, гольык мугор, Йырсиосыд - ненег буртчин. Кариськисько эшшо задор, Вӧзам кылле ачиз Кылчин. Киос лэсьто лушкем ужзэс - Мугор кузя уллань лэзько... Вылтыр шуак луиз юз-кезь, Ас кузпалме мон тодмасько. Вӧзам выдэм вылэм, шайтан! Я, султоно! Кытын ай штан? Кун Кенешлэн сессиез Будэтоно-а дышетӥсьёслы уждун? Дас тямысэтӥ мартэ парламент ужзэ азинтӥз. Но ӵукна депутатъёс бюджетэз эскерон борды ӧз басьтӥське, кенешизы Ижысь дышетӥсьёслэн куронъёссы сярысь. Соос герӟаськемын уждунэз йылэтонэн но сое дыраз сётъянэн. Та ужпумъя сессиын ивортон лэсьтӥз городлэн мэрез Анатолий Салтыков. Со шуиз, бюджетын уксё уг тырмы бере, жилищно-коммунальной хозяйстволы висъям юрттэтэз (дотациез) дышетӥсьёслы, пе, сётоно. Мэрлэн верамезъя, дышетӥсьёс январьлы уждунзэс мартэ басьтозы, собере - февральлы. Сессиын дышетӥсьёслэн нимынызы 34 номеро школаысь дышетӥсь шуиз: "Милям чиданмы быре ни. Дышетӥсьёслы уждун будэтонэз но сое дыраз сётъянэз умоен лыдъяло 7, 42, 49, 56, 78, 81 номеро школаосысь коллективъёс. Али вылӥ категориен дышетӥсьлы 390 манет уждун тыриське, нош ужаны кутскисезлы - 180 манет. Кызьы соин улоно?". Дышетӥсьёслы уждун тыронъя одӥг Ижын гинэ таӵе югдур ӧвӧл. Мукет социальной удысъёсын но суред уг воштӥськы. Тани калыкез дышетонлы миым бюджетын 104 миллиард манет ке висъямын вал, туэ - 96 миллион манет гинэ, культуралы - 34 но 32, нош тазалыкез утёнлы - 250 но 209 миллион манет. Чылкак пӧртэм лыдпусъёс кивалтон ёзъёсъя. Ортчем арын 50 миллион ке вал, туэ 94 миллион манет пусъемын ни. Кун служащийёслэн лыдзы ялан йылэ, нош бюджет сярысь законъя арлы быдэ 10 процентлы кивалтӥсьёсты кулэстоно. Нош соос маял вылын кадь будо, кыӵе но ёзъёс ум кылдытӥське. Та ласянь Кун Кенеш но бере уг кыльы: референт вылын референт пуке. Депутатлэн Алла Чижковскаялэн ивортэмезъя, Вылӥ Кенешын азьло 88 мурт ужаз, нош Кун Кенешын али - 112 мурт. Сессиын озьы ик вераськон потӥз бюджет чотын ужасьёслэсь но уждунзэс йылэтон сярысь. Но кызьы, мар чотын? Предприятиосмы мырдэм шокало, ваньбур поттон гуньдэм кадь улэ. Соин валче депутат Алексей Красных сессиын верано луиз: промышленностез ӝутон вылысь, парламент номыр ӧз лэсьты. Озьыен, кытысь бен бюджетэ уксё вуоз? Экономика пала берытсконо. Ижлэн бюджетэз социальной удысэз ас вылаз басьтыны уз быгаты. Парламент лыдэ басьтӥз Анатолий Салтыковлэсь ивортонзэ но Ижысь администрацилы дэмлаз дышетӥсьёслы дыраз уждун тырыны, нош Правительстволы та ласянь юрттэт сётыны. Та ужпумъя постановление кутэмын, нимаз-нимаз куара сётыса. Со печатламын луоз газетъёсын. Кун Кенешлэн Тӧроез Александр Волков ӵектӥз Кун Кенешын, Правительствоын, министерствоосын, ведомствоосын, городъёсысь но районъёсысь администрациосын ужасьёслы уждун сётъяны, бюджет чотын ужасьёслы коньдон тырем бере гинэ, нош Кун Кенешлэн, Правительстволэн Тӧроезлы но Иж городлэн мэрезлы республикая шоро-куспо уждунлэсь куать пол гинэ (азьло 8 вал) тросгес уждун сётъяны. Та ӵектонэз учкоз на Кун Кенешлэн комиссиез но соя решение дасялоз. Нуназе бере сессия эскериз кун бюджетэ пыртыны сётэм ватсанъёсты. Но решение кутыны, кворум тырмымтэен, парламент та ужпумез учкыны 19 мартлы кельтӥз. Г. РОМАНОВ. ПРАВИТЕЛЬСТВОЫН Ашальчи Окилэн вордскемез дырысен 100 ар тырмонэз пусъёнлы дасяськон йылаз-пумаз вуэ. Та юбилеез дасясь оргкомитетлэн кенешез ужрадъёслэсь ортчон дырзэс юнматӥз. Операя но балетъя театрын 3 апреле ортчоз сӥё-дано кенеш, 2 апреле Ашальчи Окиез буре ваёзы Алнашын, 3 апреле - Юкаменскын, 4 апреле - Грахын. Та ёросъёсын Акулина Григорьевна улӥз, ужаз. Ӝоген потозы кылбуръёсыныз сборник, нылкышноослэн "Ашальчи" журналзы. Правительстволэн пресс-центрез. ОЙ, МАР КАРОД? Крезьгурез Валентин Карповлэн. Кылъёсыз Галина Романовалэн. Эн ветлы котыртӥм, кулэ ӧвӧл, Эн учкы мусоясь синъёсыныд. Мукетызлы верад тон шуныт кыл, Мукетыныз шулдыр потэ тыныд. Припев: Нош мар карод, кытчы пырод, Кытчы пегӟод, кошкод солэсь? Ой, мар карод та йырыныд, Сюлэм вите бере яратонэз. Эн тыршы тон выльысь кенжытыны Куке но туж яркыт ӝуась тылмес. Азьвыл сямен шудэн пыласькыны Уз тырмы ни солэн пӧсь шунытэз. Припев. Бышкись, чурыт лек йӧныез сямен, Тонэ мон ишкалто сюлэмысьтым. Вуид ке но дорам шуныт зорен, Уз пурӟы ни дунне сяськаосын. Припев. ДАСЯСЬКЫ, СТУДЕНТ! Ижевскысь студентъёслэн общежитиосазы мынэ смотр-конкурс. Со кыстӥськоз май толэзёзь. Мае учко эскерыса ветлӥсьёс? Нырысь интыын - чылкытлык, улон-вылон но шутэтскон условиос, озьы ик - студентъёслэсь ас кожаз кивалтонэ пыриськыны быгатэмзэс. Ижевск городысь мэрлэн постановлениеныз юнматэмын конкурс ортчытонъя оргкомитет. Ужрад ортчоз кык этапен. Нырысетӥ этапын йылпумъянъёс лэсьтэмын луозы егитъёсын ужанъя районъёсысь отделъёсын. Отын вормисе потэм куинь общежитие пыриськоз смотр- конкурслэн кыкетӥ этапаз. Вормисе потэмъёслы чакламын коньдон премиос: И инты понна - 6 сюрс манет, ИИ - 4,5 сюрс, ИИИ инты - 3 сюрс манет. Юанъёсын вазиськыны луоз 22-88-72 телефонъя. А. ДЕМЕНТЬЕВ. ДЫШЕТӤСЬЁС КУРО УЖДУНЗЭС Кӧня ке нуналъёс ӵоже ини бугыръясько Ижевскысь калыкез дышетон удысын ужасьёс. Ас уждунзэс курон понна нырысь пумитъяськон ужрад ортчытӥзы 34 номеро школаысь дышетӥсьёс, бӧрысь тулкымъяськон выжиз 35 номеро школае, нош 18 мартэ забастовка ялӥз 81 номеро школаысь коллектив. Со нуналэ ик дышетӥсьёслэн профсоюззылэн кивалтӥсез В. Чипеев но куинь школаысь дышетӥсьёслэн активзы люкаськылӥзы профсоюзъёслэн юртазы. Кызьы валэктӥз Ижевск администрациысь коньдон ужпумъёсъя отделлэн начальникез В. Наумов, январь понна дышетӥсьёс уждунзэс басьтозы вуоно арнялэн кутсконаз. Мукет толэзьёс понна ӝегатэм коньдонэз сётыны луонлыкъёс ӧвӧл, шуиз со. Нош кытысь меда луонлыкъёс сюро дырыз дыръя уждун тырыны мэриысь чиновникъёслы? Со гинэ ке луысал. Та нуналъёсы тодмо луиз, соослэн уждунзы 30 процентозь, нош куд- огезлэн 40 процентозь, будэтэмын шуыса. Со сярысь нимысьтыз косон гожтэм мэр А. Салтыков. Тае тодэмзы бере, дышетӥсьёслэн пумозяз нюръяськон мылкыдзы уката но юнмаз. 81 номеро школаысь дышетӥсьёс ивортӥзы забастовказэс 24 мартозь азинтэмзы сярысь. Пумиськонэ люкаськемъёс озьы ик вазиськон кутӥзы Кун Кенешлэн Тӧроезлы А. Волковлы. Т. МИРОНОВА. Трактор гуретэм пель сьӧрын кылӥське ни Нуналысь нуналэ шунды вылэ но вылэ ӝутске, лымы букосъёс шунало, интыен-интыен гурезь бамалъёс кыре пото ни. Матэ вуо бусы ужъёс, гурт калык сюлмаськонъёсын улэ ни. Кун Кенешысь Агропромышленность удысъя, музъем кусыпъёсъя но инкуазь узырлыкъёсты кутонъя ялан ужась комиссилэн кивалтӥсез Аркадий Малков алигес пресс- конференция ортчытӥз, кытын вераз-мадиз гурт хозяйствоослэн кизёнлы дасяськемзы сярысь. Туэ тулыс луд ужъёс уката секыт мынозы, малы ке шуоно, техника вужмемын, эстӥськон ваньмыз дасямын ӧвӧл на, - веранзэ мытӥз Аркадий Трофимович. - Кидыс понна гинэ ӧжытак шумпотоно, со тырмыт дасямын. Озьы ке но, ваньмыз ик вылӥ ӟечлыко ӧвӧл. Али республикаямы 436 гурт хозяйство, со пӧлысь 33-эз гинэ пайда басьтыса ужа. Кылем арын бюджетын гурт хозяйстволы 148 миллион манет висъямын ке вал, туэ 245 миллион, со пӧлысь 57 миллионэз кредитэз берыктон понна. Кӧня ке миллион манетлы будэмез хозяйствоослэн улоназы чик уз шӧдӥськы. Йӧл вузам понна 133 хозяйство дотация уз басьты, мукетъёсызлы 24,8 миллион манет висъяськоз, со ортчем арен ӵошатыса ӧжытгес. Нош сӥль понна дотация туж пичи луоз. Етӥн будэтэм но солэсь пӧртэм ваньбур поттэм понна одӥг миллион манет висъяськоз. Туэ тросэз пайдатэк ужась хозяйствоос фермеръёслы сётэмын луозы, яке умой ужась колхозъёсын огазеяськозы. Соослы ваньзэ вить миллион манет сётозы. Музъемъёсты умоятон понна хозяйствоослы 29 миллион манет висъяське, со минерал сылал но известь басьтыны мыноз. Та мында коньдон 436 хозяйство понна туж ӧжыт. Угось, удалтытӥсь сылал туэ зол дуноямын. Сарапул но Юкаменск ёросъёсын пудо бруцеллёзэн но туберкулёзэн висе. Со эзелез быдтыны 10 миллион манет кулэ, нош али 5,8 миллион гинэ висъяське. Берло аръёсы Ижевскысь Гурт хозяйствоя академиын ветеринарной но лесопарковой факультетъёс усьтӥськизы. Азинлыко ужан понна соослы пӧртэм тӥрлык, приборъёс но мукет арбери кулэ. Академиялы со понна 2,5 миллион манет сётэмын луоз. Ваньмыз та лыдпусъёс бюджетлэн проектаз чакламын. Кызьы улонэ со пыӵалоз, вераны шуг. Нырысь ик али тулыс луд ужъёс сярысь малпаськоно: техникаез дасяно, эстӥськон но кидыс. Дыр трос ӧз кыльы ни, лудъёс лымы "дӥсьсэс" кылёзы. Н. ВОЗИСОВ. Виктор Бондаренколэн "сюлмаськонъёсыз" Анатолий Салтыковлэн быръёнъёсты ортчытонъя штабеныз кивалтӥсьёс пӧлын - Виктор Павлович Бондаренко, Ижевсклэн азьвыл вице-мэрез. Та ужысь сое куштӥзы 1997 арын, должностезлы уг тупа шуыса прокуратура решение кутэм бере. Ваньмыз та Ижевскысь мэрез ӧз кышкаты. Прокуратура решениез сярысь ивортӥз ке но, туннэ Виктор Бондаренко городысь калыкез улон-вылонын утёнъя отделэн кивалтэ. Бондаренко нырысь-валысь комсомольской ужен выриз, собере партийной уже выжиз но городысь исполкомлэн кивалтӥсьезлэн воштӥсез луиз. Виктор Бондаренко калыкен быгатыса ужаз, ас удыссэ ӟеч тодыса. 90-тӥ аръёслэн кутсконазы солэн кивалтэмез улсын кылдытэмын вал Ижевскын лицензированиез но приватизациез ортчытонъя документъёс. Кытчы вуттӥз со приватизация, ваньмызлы тодмо. Но та понна гинэ Виктор Павловичез янгыш карыны, оло, уг но луы. Собере Виктор Бондаренко мэрлэн воштӥсез луиз, городысь кӧня ке фондъёсын кивалтыны кутскиз. Соку Ижевскын со сярысь выжыкылъёс ветлӥзы. Виктор Павлович, пе, корт кадь юн адями, Дзержинскийлэсь пӧртэм ӧвӧл. Бондаренко бадӟым адями луиз, уно ужпумъёсын выриз, нош соин огкыл шедьтыны туж секыт вал: муртъёслэсь куронъёссэс санэ ӧз басьтылы, нош аслэсьтыз - быдэстыны кужмысь косылӥз... Нош мар вал 1997 арын, ма солэн карьераезлы люкетӥз? Та юанлы валэктон шедьтон понна, ойдолэ Виктор Павловичез огдырлы палэнэ кельтом но Ижевскысь мукет "батырлы" инты висъялом. Со В. Г. Данилов, Короленко нимо драмтеатрлэн азьвыл директорез, "Айкай-2" нимо частной предприятилэн кузёез. "Айкай-2" ИЧП вордӥськиз 1992 арын, вузкаронэн выриз, посредниклэсь ужъёссэ быдэсъяз. 1997 арын ИЧП сюбегатэм кыл кутонэн огазеяськонлы (ООО-лы) пӧрмиз но пайда ваемысь дугдӥз. Тодмо луиз, 1995 арын "Айкай-2" куашкан калэ вуэмын вал ини шуыса. Солэн коньдонэз пунэмен басьтэмын вылэм. Озьы ке но, предприятие ужзэ азинтэм: выль контрактъёс юнматъям, кунгож сьӧрысь предприятиосын но кусып тупатыны йӧндырем. Но номыр юрттымтэ ни, огазеяськон "выем". Огпол та предприятилэн кивалтӥсьёсыз пунэмам коньдонзэс берыктыны амал шедьтӥллям. Таин валче В. Г. Данилов Ижевскысь пассажирской транспортъя объединенилы (ИПОПАТ) ӵектэм дас "Икарус" автобус басьтыны, ИПОПАТ-лы та дэмлан кельшем, но автобусъёсты басьтыны пумит луэм, коньдон ӧвӧл шуыса. Соин ик объединенилэн со вакытысь директорез Вячеслав Засыпкин (али со Ижевскысь мэрлэн воштӥсез), юрттэт курыса, Ижевскысь мэрилы вазиськиз. Татын но уксё ӧвӧл шуизы. Ма кароно? Амал шедьтӥз Данилов ик. Мэрилы со ӵектӥз шаерысьтымы куд-ог предприятиос, "Айкай-2" огазеяськон но городысь бюджет куспын взаимозачётъёс ортчытыны. Сыӵе операция ортчытыса, автобусъёслы коньдон шедёз, шуиз Данилов. Дэмлам взаимозачётъёс тугаськем бугорлы кельшизы. Со сяна, соос федеральной законъёсты, Ижевскысь администрацилэсь 1995 арын 10 феврале кутэм постановленизэ тӥязы. Та постановлениея взаимозачётъёсты мэрия но бюджет азьын пунэме кылем предприятиос куспын гинэ ортчытыны луоно. "Айкай-2" предприятилэн Ижевскысь бюджетлы тыронъёсыз ӧй вал. Но со пунэме кылиз сыӵе предприятиос азьын, кудъёсыз Ижевсклы тыронъёссэс ӝегатӥзы. Та пумысен огкылъёсты юнматон понна, Виктор Бондаренколэн кинюртэмез кулэ луиз. Бондаренко, гожтӥськоно-а, ӧвӧл-а шуыса кӧня ке малпаськемез бере, фамилизэ документъёсы пуктоно кариськиз. Озьы "Айкай-2" пунэмъёсызлэсь городысь бюджет чотын мозмиз, кылсярысь, Сарапулысь электрогенераторной завод азьын пунэмъёсызлэсь. Нош таиз завод, "Удмуртэнерго" АО но мукет предприятиос ог-огзылы но мэрилы тыронъёслэсь мозмизы. Оглом вераса, взаимозачётъёс 4 миллиард манетлэсь унолы ортчытэмын вал. 1995 арлэн кутсконаз "Айкай-2" ООО но Венгриысь "Икарус Трейд" фирма огкыл кутӥзы. Автобусъёсты та арын ик басьтоно вал, нош Данилов чик ӧз дырты. "Икарусъёсты" басьтыны коньдон поттон вылысь, солы вузаны пӧртэм вузъёс сётӥзы. Предприятилэн документациезъя, вузъёс пӧртэм фирмаосы кошкизы. Нош кытын со фирмаос, тодыны ӧйлась. Малы ке шуоно, троссэ соосты "Айкай-2" предприятилэн кивалтӥсьёсыз инмысь басьтӥзы. Нош вузъёссэ сётӥз предприятиосты пунэмъёссэ тырон чотын. 1996 арын сӥзьыл, ар ортчыса, Россиысь Коньдон ужпумъёсъя министерстволэн Контрольно-ревизионной управлениез шараяз Ижевскысь администрацилэсь бюджет коньдонэз умойтэм кутэмзэ. Соку ик тодмо луиз "Айкай-2" предприятилэн но ИПОПАТ- лэн огкылзы сярысь. В. Г. Данилов со вакытэ аслыз коттедж пуктэ вал ини. Ӝоген со вылэ уголовной уж ӝутӥзы но пытсэт сьӧры келязы. Данилов пытэст сьӧры шедем бере ик Ижевскысь вице-мэр Виктор Павлович Бондаренко сярысь но вераськонъёс потӥзы. Угось "Айкай-2" предприятилэн взаимозачётъёсыз сярысь огкылъёсын но солэн ИПОПАТ-эн контрактъёсаз Виктор Павлович гожтӥськиз. В. Г. Данилов ваньмыз сярысь мадьыны кутскем, лэся. Соин, вылды, со вылэ уголовной уж ӝутэмын вал, иворто Бондаренкоен ӵош ужамъёс. Прокуратурае ӧтьылыны кутскылэмзы бере ик Виктор Бондаренко больницае выдӥз. Кема эмъяськиз. Верасько, нырысетӥ республиканской больницаын солы кык комнатаем палата- люкс висъямын вал шуыса (сыӵеосыз но вань вылэм). Больницаысь Виктор Павлович потӥз, ИИ группаысь инвалид луыса. Городысь чиновникъёслы валэктӥз, сое, куанер но висись адямиез, сьӧдманы но дырызлэсь вазь ватыны туртто шуыса. Мар сыӵе сюлмаськонэз, взятка ӧд басья ке?.. Ӝоген Виктор Бондаренко шыпак кариськиз, но общественной улонэ пыриськемлэсь палэнскиз. Озьыен, ма вал 1995 арын, зэмзэ верано ке "Икарус Трейд" фирмаен контракт юнматыса, Удмуртиысь сизьым предприятиен огкылэ вуыса, "Айкай-2" ИПОПАТ-эн автобусъёсты басьтон сярысь контракт гожтыны малпаз. ИПОПАТ-лэн кивалтӥсьёсыз пумит ӧз луэ, Ижевскысь администрация но дурбасьтӥз. Но городлэн бюджетаз коньдон ӧй вал. Данилов ӵектӥз предприятиос но городысь бюджет куспын взаимозачётъёсты ортчытыны. Солэн мукет амалыз ӧй вал ни, дыр, соин ик огкылъёсы гожтӥськемез понна нырысетӥ вице-мэрлы коньдон дэмлаз - 1 миллион доллар тыр контрактлэсь 2 процентсэ. Сомында коньдон басьтысал "Айкай-2", автобусъёсты дыраз вуттысал ке. Драмтеатрлэсь азьвыл директорзэ тодӥсьёс пӧлысь уноез тодазы ваё, 1995 арын тулыс но гужем Данилов тодмоосызлэсь коньдон пунэмаса ветлӥз шуыса. Виктор Бондаренколы сётон понна меда? Одӥг кылын вераса, Виктор Бондаренко олокызьы но оскытыны тыршиз, Даниловлэсь взятка ӧз басьты шуыса, взаимозачётъёс сярысь документъёсы гожтӥськемзэ ӧз ваты ке но. Тунсыко соиз но. Бӧрысьгес, со огкылъёсты палэнтон но городлэн бюджетаз 4 миллиард манет уксёез берыктон понна, Виктор Бондаренко Удмуртиысь Вылӥ арбитражной судэ исковой заявлениен вазиське. Озьы Виктор Павлович Ижевскысь мэрилэсь тэшкам данзэ но аслэсьтыз ӟеч нимзэ утьыны тыршиз, вылды. Со вакытэ ик быдэс ар мае ке но витиз, ӧз эскеры, кызьы ИПОПАТ-лэн но "Айкай-2" предприятилэн контрактсы быдэсъяське. Паймоно кадь, арбитражной суд взаимозачётъёс сярысь огкылъёсты шонерен лыдъяз но коньдонэз бюджетэ ӧвӧл берыктоно шуиз. Ижевскысь администрация Россиысь Вылӥ арбитражной судэ та пумысен аппеляционной ӝожтӥськон ыстыны малпа вал: 4 миллиард - со ньыль манет ӧвӧл. Но табере Бондаренколы судын вормон кулэ ӧй вал ни. Угось табере со ассэ лякытэн шонере поттысал, огшоры документъёсы гожтӥськон понна взятка нокин уг басьты шуыса. Вице-мэрлэн ужысьтыз Виктор Бондаренко кошконо луиз. Анатолий Салтыковлэн матысь юрттӥсьсэ утьыны выремез пайда ӧз вайы. Та взаимозачётъёсты орчытонэ пыриськемез, мукет та выллем ужрадъёс вице-мэрлэсь данзэ куашкатӥзы. Тодамы ваём эшшо одӥг учырез. "Плодоовощ" АООТ-лы 1 миллиард манет ссуда сётэмын вал. Та коньдонэн кызьы мылпотэ кузёяськыны луонлыкез шӧдыса, "Плодоовощлэн" директорез О. Н. Вьютнов 200 миллионзэ коньдонэн басьтӥз. Бондаренколэн таӵе махинациосыз куке но шараяськыны кулэ вал. Мэрие прокуратураысь вуиз представление. Отын ӵектэмын вал Ижевскысь нырысетӥ вице-мэрлэсь Виктор Бондаренколэсь но мэриысь Коньдон ужпумъёсъя управлениен кивалтӥсьлэсь Валерий Наумовлэсь должностьёссылы тупамзэс эскерыны. Бондаренкоез ужысьтыз мозмытӥзы, Виктор Павлович ачиз куриськиз шуыса. Прокурорлэн ивортэмез сярысь поттылэмын ик ӧй вал. Озьы ке но, со та дырозь ужа калыкез улон-вылонын утёнъя комитетлэн тӧроез луыса, сюлмаське мукет ӧлексыос, пенсионеръёс, анай-атайтэк кылем нылпиос но мукетъёсыз сярысь. Комитетлэн тӧроезлэн интыяз Виктор Павлович пуксиз, уголовной уж йылпумъяськем бере куинь толэзь ортчыса. Ижевскысь мэрия солы выль офислы шуыса сётӥз улон юртысь вить комнатаен квартираез. Отын ӝог гинэ евроремонт ортчытӥзы, ваньзэ рос-прос радъязы-таразъязы, кунгож сьӧрысь вуттэм мебель пуктӥзы но та ваньбурез утьыны кузь коньдон висъязы. Малы ке но городысь кивалтӥсьёс лыдъязы: инты, кытын сюлмасько калык сярысь, одно ик миллионерлэн квартираезлы укшаны кулэ шуыса. Но солэсь калыклы капчи шат?.. Бен, туннэ нуналлы комитет выжиз Ижевск администрацилэн юртаз, нош вить комнатаен квартира ышиз-быриз. ...Коньдон капыртӥз ик-а Виктор Бондаренко? Озьы ке, валамон ини, уксёез утчан пайда уз сёты. Сое ватон амалъёс туж уно, кылсярысь, юртъер яке автомобиль басьтон. Вузаз ук Виктор Бондаренко 1996 арын "Жигулизэ", нош со интые 80 миллион манетэн выль "Волга" басьтӥз. Нылызлэн горд "Москвичез" кылдэ на, со сяна, "Север" микрорайонын куать комнатаен квартира... Берпуметӥезъя Виктор Бондаренко кемалась ик ӧвӧл валэктыны выриз интыысь телевидениын. Ма шуод, та ужпумъя милям но кӧня ке веранмы вань. Со сярысь ик али мадём. Зэмзэ но, 1995 арын Бондаренко лэсьтӥськонъя 17 номеро управление трос этажъем юрт ӝутонэ пыриськон сярысь огкыл гожтӥз. Та уже коньдон висъяса, Виктор Павлович пакла вал 200 квадратной метрлэсь ятырбыдӟалаен куать комнатаен квартира басьтыны. Пуш ужъёсты лыдъятэк, та квартиралэн дуныз соку 250 миллион манет вал. Чаклалэ, 1995 арысь дунъёсын! Оскыны туж секыт, выль квартиралэн кузёез пуш ужъёсты ас кужмыныз бадэстыны малпа вал шуыса. Ас киосыныд куать комнатаын выж вӧлдыны, ванна, раковина, ӧс но мукетсэ инъяны - бронхиальной астмаен курадӟись, вылӥ кивалтонын ужась муртлы валамон, ваньзэ аслыз лэсьтыны моӵез ӧй сузьысал. Озьы-а, тазьы-а, но нырысь-валысь пуш ужъёс квартиралэн дуназ пыртэмын ӧй вал. Нырысетӥ взнос чотын Бондаренко тыриз 25 миллион манет. Собере Виктор Павлович пичи зарплатаысьтыз кварталлы быдэ 9 миллион манет висъялляз. Милям тодэммыя, 1997 арлы Бондаренко квартираез понна тыриз сю миллион манет пала. Но 1997 арлы дунъёс шӧдскымон будӥзы, озьы специалистъёслэн дунъямзыя таӵе квартира табере 2 миллиард пала сылэ. Ум малпаське, ортчем вакытэ сямен ик тырыса, азьвыл вице-мэр корка дась луон дырлы тырмыт коньдон люкалоз шуыса. Нош юрт быдэсак сямен вуттэмын ини. Виктор Бондаренколэн выль юртъераз та вакытэ пуш ужъёс мыно, отын вылӥ ӟечлыкен материал гинэ кутӥське. Озьы бере, Виктор Бондаренколэн доходъёсыз, 1995 арен ӵошатыса, шӧдскымон йылӥзы. ... Оло, туннэ нуналлы Виктор Павлович вице-мэр дыръяз луэм урод учырез сярысь вунэтыны ӧдъяз ни. Бен, Виктор Павлович вылӥ должностьсэ келяз, солэн ужын данэз куашказ. Но мукетсэ со номырзэ но ӧз ышты. Кылиз ужез, кылизы семьяез, автомобильёсыз, соослэсь лыдзэс та дырозь - нокин но шонер вераны уг быгаты. Кылиз 30 миллион манетъем дачаез, со гожтэмын нылыз вылэ, ужъя матысь эшъёсыз сое али но гажало. Вераськисьёс вань, со гажан мылкыд герӟаськемын, пе, тани маин: Бондаренко котькуд эшез сярысь маке но "тунсыкозэ" тодэ но озьы соосты "жильыяса" возе. Нош ӵош ужась эшъёсыз пӧлын - Ижевск городлэн туала мэрез Анатолий Иванович Салтыков но ук. Со сярысь вера, кылсярысь, тани ма но: азьвыл аръёсы Виктор Бондаренколы Ижевск городын укыр быдӟымесь полномочиос сётэмын вал, мэриысь одӥг чиновниклэн но сыӵе кужмыз ӧй вал. Со ас мылкыдызъя, огназ багатылӥз кинлы ке городын музъем сётыны, кинлы ке сётытэк, кинлы ке арендае инты висъяны, кинлы ке висъятэк. Бондаренко туж огшоры гинэ одӥгъёсызлы процентъёстэк ссудаос сётъяз, выт тырыны льготаос тупатъяз, нош мукетъёсыныз ӧз ик вераськылы. Таӵе полномочиос вице-мэрлэн сямъёсыз вылын но шӧдӥськизы. Кин тодэ, оло, сыӵе вакытъёсы со ассэ эксэй выллем но кожалляз. Нош отысь астэ гинэ укыр данъяны кутскон дорозь но кыдёкын ӧвӧл ни... Озьы-а, тазьы-а, но Виктор Павлович Бондаренкоен герӟаськем югдур туж яркыт. Со возьматэ, кызьы власть адямиез изъянтэ, куке ужзэ ӟеч радъяны быгатӥсь мурт ассэ чакламысь дугдэ но эсэпсэ уг вала ни. Туннэ со возьматыны тырше, тупатскиз, сюлмогес луиз, городын улӥсьёслы матэктӥз шуыса. Нош мар карод - сое кулэ каро ук Анатолий Салтыковлэн бырйисьёс азьын вераськонъёсыз. Но кин оскытоз, та нош ик ӟеч дасям спектакль ӧвӧл шуыса. Кин оскытоз, быръёнъёс ортчем бере, Виктор Бондаренколэн ымнырысьтыз гримез уз гылтӥськы но тюрьмаысь пурысь тузонлы уз пӧрмы шуыса... Сергей Кузин. Берекет Ваньмон дыръяды Йыртӥян Паллянысен буре: 3. Дас кык толэзь. 4. Пукись ву. 9. Чорыглэсь сиён. 10. Крезьгуро инструмент. 13. Ялан огдыре потылӥсь издание. 14. Кыскон. 15. Удмуртиысь райцентр. 17. Удмуртиысь посёлок. 19. Чорыган арбери. 20. Тылобурдо. 21. Кеньыр. 22. Дӥськутлы пуктэм кенос. 24. Юон. 27. Пу пильылыны юрттӥсь арбери. 29. Адямиез дунъян. 31. Люкылэм музъем. 33. Пагӟа кыллы синоним. 34. Туйлэсь лэсьтэм посуда. 37. Куиськон яке керттӥськон сӥньыс. 38. Куяськон арбери. 39. Кӧлан инты вадесысь шобыр. 40. Нота. Вылӥысен улӥе: 1. Дӥськут вурон мар ке. 2. Бызем мурт. 5. Юртъер котырысь музъем. 6. Тылобурдо. 7. Беризьлэн "куэз". 8. Вузкарон инты. 11. Йыре понон. 12. Чорыглэн ог люкетэз. 16. Юон. 18. Парсь гон. 19. Чорыган арбери. 22. Корказьысь тыриськон инты. 23. Писпулэн "чиньы-пӧлыез". 25. Еж будос. 26. Радиолокация. 28. Музъем "шобрет". 30. Ӵыпем корка. 32. Нылпи вордӥськонэз уретон. 35. Ог-огдэ валаса ӵош улон. 36. Зӧк гозы. Шонер валэктон Паллянысен буре: 3. Ар. 4. Ты. 9. Мызь. 10. Баян. 13. Газет. 14. Тамак. 15. Ува. 17. Кез. 19. Сак. 20. Тур. 21. Рис. 22. Чум. 24. Сур. 27. Тул. 29. Дан. 31. Ана. 33. Тубат. 34. Сарба. 37. Шорт. 38. Урна. 39. Ын. 40. Фа. Вылӥысен улӥе: 1. Басма. 2. Кышно. 5. Азбар. 6. Тур. 7. Кур. 8. Базар. 11. Берет. 12. Шакас. 16. Ву. 18. Зу. 19. Си. 22. Чулан. 23. Ул. 25. Уд. 26. Радар. 28. Ин. 30 Бугро. 32. Аборт. 35. Эшлык. 36. Канат. Дасяз В. ВАХРУШЕВ. Берекет Вашкала сямъёс, йылолъёс КУБО ДУСЫМ Удмуртъёслэн таӵеез но йылолзы вань-а, вал-а, шуод. Со, оло, котькытын ик паськыт вӧлмемын ӧй вал. Тани, шуом, одӥг аре кык семьяослэн нылпиоссы вордскизы, одӥгаз - ныл, мукетаз - пи. Анай-атайёс соку ик куспазы верасько ини, та кык семьяос дусымъяськозы шуыса. Мукет сямен вераса, азьланьын соослэн та вож нуныоссы ог-огзэс яратозы но, оло, семья но кылдытозы. Со сярысь нылпиоссылы куддыръя вераллязы, куд- огез кулэен ик ӧз лыдъяллялэ. Пиналъёслы ог дасо аресъёс ини (ар-годзэс туж ӧз чаклаллялэ). Пи вордӥськем семьяысь воргорон ныл вордэм кышномуртлы кубо кузьым нуыса лыктэ. Огназ уг - кӧня ке ӵыжы-выжыосыныз, бӧлякъёсыныз. Со сярысь та кык семьяос куспазы азьло ик верасько ини, кыӵе ке но шулдыръяськон яке шутэтскон нуналэз возьмало. Ныл вордэм семья азьло ик ас палъёсызлы, ӵыжы-выжыезлы, тодмоосызлы ивортэ, туннэ доразы кубо кузьымен вуозы шуыса. Вераны кулэ, ныллэн анаезлы ке но кубо сётӥське, со будӥсь ныллы шуыса чакламын. Анай сое гуртын улӥсь муртлы та туж кулэ луись черсон ужлы дышетоз. Кубо ныл кие ик кылёз, со таӵе кузьымез туж сӥлы карыса возёз. Кубо дусым шулдыръяськонэ калык корка тыр ик люкаське. Тодэмъёсыз угось кузьым адӟонэ нялтас ӧтьытэк но лыкто. Ваем кубоез поно ӝӧк вылэ, улаз ӵушкон вӧлдо. Кузьым учкыны лыктэм пиосъёс кубо борды азвесь уксё шукко, нош нылъёс кубо борды лента кертто. Узырезгес яке юыны яратӥсь мурт (тросгес юон мед сётозы шуыса), лыктэм калыклы возьматыса, бумага уксё но понэ вал. Лыктэм куноосты утялто, сюдо- сектало, кырӟало-верало. Одӥг кылын вераса, шулдыръяськон ӝытлы пӧрме ваньмыз. Со аре ик яке берлогес кубо кузьмась пиосмуртлы ныл будэтӥсь семья ласянь кузьым нуыса мыно ни. Куд-ог кузьымъёс будӥсь пилы но яралозы шуыса малпало. Кузьмаллязы бинялтон, дэрем, пужыятэм ӵушкон но мукетсэ. Озьы ик сиё-юо, шулдыръясько. Кузьмаськемзы, сием-юэмзы бере, кузё кышноос ог-огзы шоры дусым шуыса гинэ вазисько на: Орина дусым яке Марья дусым. Нош пиосмуртъёс иськавынъёс луылӥзы, огзы шоры огзы Отдок иськан, Коньы иськан шуыса вазьылӥзы. Нош нылын но пиен дусымъяськыны уг но малпало. Шер ке но, сыӵе учыръёс вал но, дыр, ку кык егит сюлэмъёс ог-огзэс, зэмзэ но, яратылӥзы, яке мумы-бубыос, куспазы кенешыса, егитъёсыз кузъяллязы. Ог-огедлы юрттон, огазьынгес улон поннагес, дыр, таӵе йылол кутэмын вал. Огазьын, тупаса улыса, ваньмыз угось капчиенгес сётӥське. Кузьым кубоез туж чебер лэсьтыны тыршылӥзы. Юромо станок но тупатэмын луэ вал. Озьы ик шуылӥзы - кубо кыскон станок. Отын бен, кубо сяна но мар но со луэ вал лэсьтыны, кылсярысь, куарнянь погыльтон, нушы, черс но мукет. Кубоез станок пыр поттэмзы бере турлы чебер буёлэн буяллязы. Мед чилялоз шуыса, куасьмемез бере, лак интые, курег пузлэн тӧдьыеныз зырало вал. Мертчан, куж яке ыж гон дэмӟытон интызэ - сюморизэ но, пуксён интызэ но пӧртэм тусо чеберъяса вандылӥзы, пурт йылын олокыӵе но пужыос пӧрмытъязы. Кубо лэсьтыны тыршылӥзы суем пулэсьгес. Куд-огез куболэсь сюморизэ огшоры пу лопатка выллем гинэ лэсьтылӥз. Тазэ ми палан ӟуч кубо шуо вал. Таизлы пужы но, буёл но кулэ ӧвӧл, кияд шырпу гинэ медаз мертчы. Тазэ кышноос ушъяллязы, ыж гон черсыны умойгес шуыса. Р. ЯКОВЛЕВ. ВЫЛЬ ПУМИСЬКОН ЛУОЗ Вуоно вордӥськонэ, кызь куинетӥ мартэ, Удмурт шаерысьтымы Национальной библиотекаын ортчоз элькунысьтымы тодмо тодосчилы, кылтодон наукаосъя докторлы, Удмурт Элькунысь наукая дано ужасьлы Роза Ивановна Яшиналы сӥзем пумиськон. Ужрадэ лыктэмъёс тодматскозы та адямилэн улон-вылон сюресэныз, сюлмысь кенешозы удмуртлыкмес утён сярысь. Пумиськонэ люкаськемъёс мылысь-кыдысь вераськозы тодосчилэн "Улон азинске" книгаез пумысь но. Выль уж лыдӟисьёслы данак ӟеч малпанъёс кельтэ. Ужрад кутскоз ӝытазе вить часын. "Удмурт шаер" клуб ӧте дораз вань мылкыд карисьёсты. Берекет Тодэмды ке потэ... КЫТЫН КЫЗЬЫ СИЁ-ЮО Шунды ӝужан палась шаеръёсын ӝӧк вылэ шыд пукто нуназеям бере. Асьмелы сыӵе кутэм сям паймымон йӧтэ. Япониысь корка кузёлэн ӝӧк вылаз ваньмыз вань, отын сиён пуктыны интыез ке но ӧвӧл ни, кунооссылы ялан вераны тыршо, вождэс, пе, эн вае вал, утялтонмы ӧвӧл шуыса. Тросаз лымшор пал шаеръёсын кунооссэс утялто азбарын. Та палъёсын улӥсьёслэн азбарзы но угось корка пуш интыын лыдъяське. Турциын улӥсьёс кунооссылы мунчое мыныны дэмлало. Асьмелэн отчы пыласькыны, веникен пырыны мыно. Нош турокъёслэн мунчозы - клуб мактал. Отын мадисько-верасько, картаен, шахматэн, мукет шудонъёсын шудо, чай, кофе юо. Таиландын улӥсьёс доры куное лыктӥды ке, вераськон сяменыды пӧсь куазь сярысь поттылыны эн шедьтэ: юн вожзы потоз. Вить-дас минутлы куное бер вуэм муртэ англичанъёс уз валалэ, валамзы но уз поты. Татын угось чай юо нимысьтыз тупатэм дыре: ӵукна сиськемзылэсь азьло, нуназе вакыт сиськыку (ленч дыръя) 13 часэ но нуназе бере - 17 часэ. Пакистанын но куд-ог мукет ислам государствоосын сисько, пуньы-вилка кутылытэк, киосынызы, шонерзэ вераса, бур киынызы гинэ. Палляныз сокем "сьӧлыко" лыдъяське: янгышен ке но палляныз ки сиён борды йӧтӥз ке, корка кузё сиёнэз соку ик ӝӧк вылысь утялтыны косоз. Дуно кунолы Швециын одно ик пуксёно кузё кышнолэн паллян палаз но тау карон кылъёс верано. Ӝӧк сьӧрын тӥледлы кыӵе ке но аспӧртэм, дышымтэ сиёнэз ке ӵекто, оскалтэ, яраз ке, сие. Нош сое оскалтыны ик курдаськоды ке, кузёлы валэктыны выре, та сиёнэз сиыны тӥледлы кыӵе ке но яке марлы ке но оскон уг лэзьы шуыса. Аллергия висёнлы но чӧлскемды луоз, мукет сямен вераса, та сиён тӥляд тазалыктылы кышкытлык кылдытыны быгатоз шуыса. Кудӟытӥсь юонъёсты адӟонтэм каро Ближний Востокын улӥсьёс. Куноослы сое ӝӧк вылэ уг пукто. Татын уг ярато ӵаш-маш каремез, тросэн люкаськыса шулдыръяськонъёсты, асьсэды вылтӥ пуктӥсьёсты, вӧзысьтыд адямиез ултӥямез. Израильын дуно кузьымъёс уг сётъяло, таӵе сямез татын туж умойтэмен лыдъяло. Л. ВАСИЛЬЕВА. Москваысь куноос Жилищно-коммунальной хозяйствоын реформа ортчытон сярысь трос гожъяськом. Та ужпумен ик герӟаськемын Москваысь бадӟым делегацилэн шаерамы лыктэмез. Столицаысь куноос тодматскозы коммунальникъёслэн ужъёсынызы но юрттозы удысэз выльдыны. Та ласянь Москвалэн опытэз вань. Нош "котырес ӝӧк" сьӧрын пумиськон сӥземын луоз электрокужымез, газэз, шунытэз шыръянлы, сое ӝикыт кутонлы но музон ужпумъёслы. Г. Васильев. УЛОН НО, СИНВУ НО, ЯРАТОН НО Нош ик бадӟым искусство лул-сюлме шумпотон но синмаськон тылгизьы пазьгиз. Ижевскысь Операя но балетъя театрысь коллектив пуктӥз П. И. Чайковскийлэсь "Евгений Онегин" операзэ. Уно пол кылзӥськемын ини та быдӟым произведение, но котьку ик солэсь выль тодмотэм куараоссэ кылӥськод кадь. Зэмос ӟуч крезьгурын шӧдӥсько кызьпуослэн ӵашетэмзы, шунды пуксемлэн нап буёлъёсыз, 19-тӥ даурысь улонлэн шӧмыз. Нянялэсь рользэ быгатыса кырӟаз но шудӥз Удмуртиысь дано артистка М. Галасеева. Татьяналэн, Удмуртиысь дано артисткалэн Т. Силаевалэн, куараез чебер, небыт. Театрын выль артистъёслэн кизилиоссы ӝуатскизы. ГИТИС-эз быдтэмез бере лыктӥз А. Стрюков, со Онегинлэсь рользэ шудӥз. Саранскысь лыктӥз В. Перхоменко - Ленский, нош Е. Алебина - Ольга - Петербургысь вуиз. Онегин кельшиз чебер, ӝужыт луэменыз, нош баритонэз али но чузъяське кадь пель сьӧрын. Ленский егит, куараез кужмо. Учкисьёс сое пӧсь кичабонъёсын пумиталлязы. Оркестрен кивалтӥз С. Разенков. Декорациос эсэпез валаса лэсьтэмын, соос кылем даурлэсь шӧмзэ возьматӥзы. Операя но балетъя театрлэн таӵе кузьымезлы бадӟым тау. Л. ПРОЗОРОВ. Шунды Егит куараос Сяська ӝужа яратонлы (верос) Суббота ӝыт. Кионкарысь пӧртэм буёлъёсын ворекъясь, шудӥсь дискотека нош ик усьтӥз ӧсъёссэ. Клуб егитъёсын тырмиз. Дас вить - дас сизьым арескад пукод шат гуртын. Егит сюлэм маза уг сёт, мылкыдэз лӧпкытэ, ураме кыске. Корепанов Валерик нодъяське. Залоын Нюра песянаез но бускель кышно кылзэс шерыса пуко. - Ойдо мед шулдыръяськозы, егит дыр - со егит дыр. Ми асьмелэсь пӧртэм гуро кырӟанмес кырӟамы ни, интымы табере гур вылын. - Мар? - юаз карнан кадь губырскем бускель кышно. Пельыз секытэн шуг солы кылыны, ваньзэ валаса уг вутты. - Мар, мар - куака кар, пельыд уг ке кыл, котьма кар. Егитъёс мед шулдыръяськозы, шуисько, Матрон! - куаразэ будэтыса вазиз Нюра песянай. - Бен, озьы но, вылды. Ма карод, дыр азьлань пегӟе, номырин но сое уд суты. Мырак ини, пересез пересьме, егитэз будэ. Мынамез но ерпечкае потӥз клубе, анаез уг ке но лэзьы вал. Ӵок ойдо, мед кыйяськозы-позыръяськозы со дискотекаязы. Валерик потӥз, отӥзэ вераськемзэс ӧз кылы. Кырын шулдыр. Омырын льӧмпу сяськалэн ческыт зыныз лӧсъяське, нырез бичатэ. Пияш вамыштӥз урам кузя. Ас малпанъёсаз выйыса мынэ со, ульчаысь мынӥсь- ветлӥсьёсты уг ик шӧдылы. "Вуиз ни-а меда Валя клубе? Валя... Кельше мыным та нылаш. Песянаелы но яра, лэся, эшъяськеммы. Юнме ведь уз юалляськы Валя сярысь. Собере, бускель кышно азьын ушъяса мадьылэмзэ огпол гинэ ӧй кылылы. Валя усто нылаш, номыре уд шуы. Дышетске но умой, анаезлы но дораз юрттэ, "Вираж" шутэтскон клубе но ветлыны вуэ на. Нош апаез.... Соосты сузэръёс уд но шуы. Уродэн верало Галялэсь сямзэ. Азяд вӧялоз, нош берад сялалоз. Милесьтым но кусыпъёсмес сӧрыны турттэ. Валерик Эгралась 36 номеро училищеын мелиораторе дышетске. Группаязы адскымон адями. КВНэ яке эшшо кыӵе ке ужрадэ дасяськоно, ваньмыз пияш вылын. Журналъёсын- газетъёсын бугыръяське, сценарий дася. Тыршемез юнме уг луы. Трос ужрадъёсын вормисе потылӥз ини группаез. Гуртысьтызы клубен но кусыпъёссэ уг ыштылы пияш. Валяен ӵош "Вираже" ветло. Малпанъёсаз поръяса, Валерик выж доры вуэмзэ но ӧз шӧдылы. Шур сопалан клуб сылэ. Дискотека кутскем ини. Кыӵе ке кунгож сьӧр кырӟан чузъяське. Шур доры лобыса, со бадьпуос пӧлы кугӟа. "Витьыса, витьыса Валя вить луэ ини, дыр, дыртоно", - кузьгес вамыштӥз пияш. Клубе пырыкуз ӧс куспы ӵемтӥз но ӧжыт гинэ ӧз усьы, жоб дыльдыен пужъятэм выж вылэ. Шайтан-а, мар-а шудэ шуыса ас понназ тышкаськиз но эктон залэ пыриз. Тани со пумиськоз гажанэныз, быдэс ӝыт эктозы, ог-огзылэн синъёсазы учкыса. Но... синъёссэ отчы но, татчы но мертчытъялляз - Валя ӧвӧл. Со куспын Валерик доры Галя матэктӥз. Дӥсез гольык вылтырзэ мырдэм ватэ, синъёсаз валантэм тылъёс шудо. Йырсиез вандэмын, горд буямын. - Салам, Валерочка! Мар сыӵе чырсамын, оло, пересьмон басьтэ ини? - Валяез возьмасько, - шуиз пияш но мур лулӟиз. - Со кошкиз, - гольтрес вазиз Галя. - Кытчы? - сюлмыз ик тэтчоно кадь луиз пияшлэн. - Кытчы-пытчы, гур пыдсы, чырсам йӧлвыл сиыны. Уд-а, мар-а валаськы? Я, сокем эн чигиськы, куанере, - Валериклэсь йырзэ маялтӥз, - нырыд воксё выжозь ошиськем, тани гырыны кутскоз. Валяез мон воштыны быгато та ӝытэ. Галялэн киыз мӧля вылтӥз гылӟиз, гадьёссэ ӝыныёзяз кыре поттӥз, уллань васькыса, гольык макес вылтӥз ортчиз. - Тон... - кызьы гинэ ӧз тэтчы Валериклэн кыл йылысьтыз жоб кыл. - Вера, вера, ческытэ, кин мон? Бен, мон сыӵе, но тон понна гинэ, - киосыныз биниськиз пияшлэн чыртыяз, - мон тыныд, быдэс асме сётыны дась... ымдуръёсынысен пыдчиньыосозям, али ик... тани татын выж вылын. Кекатыны турттӥсь гозыез музэн Валерик нылашлэсь киоссэ чыртыысьтыз басьтӥз. - Кытын тынад возьытэд, Галя? - А, турлы сяськаосын шобыртэм возь вылэ кельтӥ, - нокыӵе но ӧз кариськы Галя, - кырын тани салкым кариськиз, ненег макесъёсме кынтэме уг поты. - Ӟечкын курисько, Галя, ыш син азьысьтым! - пияшлэн тани-тани сэпез пӧсьтоз кадь. - Ох-ох, кыӵе со выре. Учке гинэ тӥ... Ярам, гылӟисько. Но мӧзмон сюлэмдэ укыр сюпсиз ке, ать! гинэ кар, вуо. - Азьыдлэсь берыд чебер, - Галя шоры учкытэк вазиз пияш. Нылаш чиньосыныз йӧтскиз Валериклэн бамаз, дыртытэк вамышъяса палэнскиз. Кӧня ке улыса, пияш азьын Олёш кылдӥз. - Ӟечбур, Валерка! Мар-о, мӧзмон шуккиз-а тонэ? - Шуккиз но, оло. - Валяед лыктымтэысь, дыр. Тодӥ-а? - Да, куректон шедьтӥд, пияш. Нош кин понна? Со Валя Чиркова понна? Галяезлэсь пӧртэм кожаськод-а? Со сыӵе поръясь бубыли. Тодӥсько мон соосты. Валерик пуштӥз, пукыӵ ньӧл выллем тэтчиз интыысьтыз: - Мар тынад верамед потэ со "поръясь бубылиеныд"? Мон тыныд уг сёты Валяме пож вуэн пазяны, тодыса ул. Со кырсь мугордэ тышен пичильтык сюд вылэм но, тау шу, чылкыт киосме дэриен наштаме уг поты. Керетонлэн тылӝуаз Валериклэн матысь эшез Костя вуиз. Кыдёкысен ик адӟем ӵашетэмзэс. - Возьма али, Костя, - уг буйгатскы Олёш, - вай мон кисьто ас малпанъёсме Валеркалы, синъёссэ возъям бусэз сылмыто. - Уд, - ӵогиз Костя, - номыр но тон али уд вера. Тынад кылыд изэз но пасялоз, Лоза вамен выжтэк потоз, созэ мон ӟеч тодӥсько. - Ярам, иське, палэнскисько, - сӥялскысагес ини вазиз Олёш но эктӥсьёс пӧлы чуртнаськиз. Валерик но клубын ӧз ӝега, кыре потӥз: Валятэк мар со дискотека? Кошкыса ӧз вутты, викышъям куараез кылӥз: йырзэ ӝутӥз. Пумитаз, ымнырзэ киосыныз пытсаса, Валя лыктэ. - Валя, тон-а со? Мар тонэн? Нылаш дугдӥз, синвуэн пыласькем ымнырзэ усьтӥз. - Валерик, мусое, вождэ эн вай вуымтэелы. Мон янгыш ӧвӧл. Анай куное кошкиз, нош Галя монэ корка пытсаса кельтӥз, - йырзэ Валериклэн гадяз уськытӥз. Пияш нылашлэн мертчан йырсиосыныз шудэ, йырзэ маялляса буйгатыны турттэ: - Эн бӧрды, гажанэ, мынам тыныд чик но йыр кур ӧвӧл. Эн куректы, мон тонэн, тани ук, вӧзад сылӥсько. Валя юнгес ӝиптӥськиз Валерик борды. Кема соос тазьы сылӥзы на шур дурысь кызьпу улын, ог-огзылэсь сюлэм шуккемзэс кылзыса. Андрей Клементьев, Удмурт кун университетысь студент. Вордӥсько, будо, дышетско Республикаямы 900 школа лыдъяське. Отын 270 сюрс нылпи дышетске, со пӧлысь 14 сюрсэз 12 лицейын но 7 гимназиын тодон-валан люка. Школаосын 22,3 сюрс дышетӥсь ужа. 1997 арын 25,6 сюрс пинал 9-тӥ классэз йылпумъяз, 12,8 сюрсэз шор ёзо школаез быдтӥз. Удмуртиын 22 техникум но 8 колледж ужа, отын 24,3 сюрс мурт дышетске но 1,5 сюрс дышетӥсь ужа. Вузъёсты 6013 адями йылпумъяз, со пӧлысь 49 процентэз соку ик уже интыяськиз. Миым республикаямы, азьло арен ӵошатыса, ӧжытгес калык кулӥз но тросгес нылпи вордскиз. Со шумпоттытэ. Сюанъёс 16 процентлы уногес вал, нош люкиськисьёс 10 процентлы кулэсмизы. Туэ арлэн кутсконаз Удмурт Республикаысь миграционной службаын 1051 адями лыдэ басьтэмын. Соос лыктэмын Казахстанысь, Таджикистанысь, Узбекистанысь, Украинаысь. Пӧлазы 58 процентэз ӟучъёс, 16 процентэз удмуртъёс, 12- бигеръёс, 6 - украинецъёс. Калыкъёслэн кужымзы пӧртэм луэмзы бордын Кун Кенешлэн Тӧроез Александр Волков пыриськиз Удмуртиысь бигеръёслэсь ньылетӥ курултайзэс усьтонэ. Люкаськемъёс азьын вераськыкуз, со пусйиз, Удмуртиын куинь этносъёс - славянъёс, финн-угоръёс но тюркъёс уло но, соос пӧртэм инмаръёслы оско шуыса. Калыкъёслэн пӧртэм луэмзы югдурез сӧриськемлэсь, обществоез пичи юдэсъёслы люкемлэсь но националистической мылкыдъёсты вӧлмытэмлэсь уте. Нош Удмуртиын кунлэн национальной политикаез сярысь концепция калыкъёслэсь кусыпъёссэс юнматыны но азинтыны луонлыкъёс кылдытэ. Веранзэ йылпумъяса, Александр Волков съездэ сюлмаськемъёслы пайдаё, азинлыко ужаны мылкыд сӥзиз. Та нуналэ ик Кун Кенешлэн Тӧроез пумиськиз Индус Тагировен - Дуннеысь бигеръёслэн конгрессылэн быдэсъясь комитетэныз кивалтӥсен. Кун Кенешлэн пресс-службаез. ВУЛЭН НУНАЛЭЗ Дуннеысь тросаз кунъёсын 1993 арысен Водоснабжениея международной ассоциацилэн ӵектэмезъя пусъё Вулэсь нуналзэ. Россиын нырысьсэ со 1995 арын "Ву - со улон" ӧтён (девиз) улсын ортчиз. Туэ та нунал 22 мартлы тупатэмын. Республикамыя кылем ар куспын шуръёсысь 279,75 миллион кубической метр ву кыскемын. 224,6 миллион кубической метрез, уже кутыса, выльысь интыяз ик лэземын, со пӧлысь 142,94 миллион кубической метрез гинэ тырмыт чылкытатэмын. Шур вуосты трослы кырсёмыто му вӧй, фосфор, азот, секыт металл, корт пырыос но мукет. Ӧжыт уг пожало соосты гурт хозяйствоос но. Азьланьын югдур эшшо секытомыны быгатоз. Соин сэрен вуосты чылкытатон борды пыр- поч басьтӥськоно. Ф. ПЕСТРУХИНА. Крезьгурчиослы конкурс Кырӟан вордске сюлэмын Удмурт калык кырӟаны яратэ. Озьы ке но трос-а асьмелэн кырӟанъёсын сузьетъёсмы (сборникъёсмы)? Н. Уткиналэн, Г. Ганьковлэн, Ю. Кузьминалэн... Шулдыресь выль кырӟанъёсыз радио пыр, эшъёс пӧлын, пӧртэм ӝытъёсын кылӥськом но соку ик вуно. Шаеырсьтымы усточи пиналъёс понна Егитъёсын ужанъя кун комитет арысь аре "Шундыкар" лагерь радъя. Та пиналъёс ярато на кырӟаны, со сяна, асьсэос ик крезьгур но кылдыто. Вазиськеммы потэ усточи крезььгурчиослы. Удмурт егитъёслэн "Шунды" дэменлыксы тӥ понна "Кырӟан вордске сюлэмын" нимо конкурс ялэ. Вань ке егитъёслы тупась кырӟанъёсты, нотаоссэ но кылъёссэ гожтыса ыстэ ми доры. Эн вунэтэ асьтэ сярысь но ивортыны. Конкурсэ шуыса ыстэм кырӟанъёстэс витём 15 апрелёзь. Дыр ичи кылемын, дыртэлэ! Устоосыз кырӟанъёс пыртэмын луозы "Шундыкар" сборникамы. Озьыен, кырӟанъёстэс витиськом таӵе адресъя: 426000, Ижевск город, Советской ульча, 1 номеро юртэ, "Шунды", телефон 51-07-96. Т. Прокопьева. Милицилы сӥземын Адямиез адямилэсь утён. Дунне вылын вань сыӵе но профессия. Обществомес пӧртэм гыжкалъёслэсь сузяло, асьмеды кышкытлыклэсь сайяло милицилэсь погонъёссэ нуллӥсь егит пиос но воргоронъёс. Соослэн пельпумъёссы вылын возиське улон. Республикаысьтымы милицилэн ортчем сюресэзлы сӥзем музей таяз арня вискын усьтӥськиз Арсеналлэн юртаз. Ӵужектыны вуэм снимокъёс, экспонатъёс, документъёс пыр выльысь улӟо нырысетӥ милицейской отрядъёс но бригадаос, калык ваньбурез утёнъя нимысьтыз отделъёс, оперуполномоченнойёс, тылпу кысӥсьёс, дружинникъёс... Тросэз соос улонысь но кошкемын ни: кудӥз - фронтын, кудӥз - адскымтэ тушмонэн ваче син вуонын. Сыӵе ини милиционерлэн профессиез - котькуд нунал кинлэсь ке но улонзэ утён. Ассэ жалятэк, кулонлы пумит вамыштэ. Музейлы висъям комнаталэн шораз - вӧлдэтозь ӝутскись стелла. Со тырмытэмын чурен- чурен гожтэм нимтулъёсын. Огпалаз - улэпъёсыз, мукет палаз - быремъёсыз. Нырысетӥосызлы наградазэс басьтыны кылдӥз асьсэлы, кыкетӥосызлэсь басьтӥзы ӵыжы- выжыоссы. Малых Юрий, Жуйков Владимир, Кондратьев Андрей, Решетников Александр, Егоров Олег, Королев Борис, Шахтарин Николай, Крюков Борис... Ваньмыз 28 мурт. Чебересь, егитэсь. Соос пыраклы сыӵеен кылёзы ӵош ужам эшъёссылэн, ӵыжы-выжыоссылэн сюлэмъёсазы. 28 милиционер быремын, долгзэ быдэстыкуз, кинэ ке кык пыдо сьӧсьёслэсь ас мугорыныз сайякуз. Стеллалэн пыд выжыяз, горд вир шапыкъёс выллем, огез бӧрсьы мукетыз выдо ӵыж-горд роза сяськаос. Одӥг минут шып сылыса, люкаськемъёс буре ваё шаермылэсь дано пиоссэ. Музеез усьтонэ ӧтемын соослэн кузпалъёссы, пиналъёссы но мумы-бубыоссы. Берло аръёсы гинэ 17 мурт пусъемын Россилэн наградаосыныз - "За личное мужество" но Мужество орденъёсын. Огез но награда, валамон, юнме шорысь уг сётӥськы. Милицилэн толло но туннэ нуналэзлы сӥзем выставка-музей - со республикамылэн ортчем сюресэзлэн яркыт пытьыез. Татысь материалъёс ялан выльдӥськозы. Улон уго огинтыяз уг сылы. Но ӧжытгес мед луозы вылэм курыт синкылиен пылатэм чуръёс но снимокъёс, секытэсь тодэ ваёнъёс. Л Медведева, В. Камашев (фото). Макс Ройз - МВЕУ-ысь профессор Международной Восточно-Европейской университетэ кунгож сьӧрысь тодосчиос ӵем гинэ вуыло, нош журналистъёс та дырозь ӧз вуылэ на вал. Алигес дышетскисьёс, преподавательёс но журналистъёс азьын вераськиз Канадаысь аспӧртэмлыко адями, писатель-журналист Макс Ройз. Гужем 1992 арын солы шуд усиз ужаны Кремльын. Вылӥ кивалтӥсьёсын ӵош командировкаосы потаз, пӧртэм ужрадъёсы пыриськиз. Вань кылэм-адӟемзэ гожъяса кельтэмез юрттӥз Макслы "Чужак в Кремле", "Кровавый пасьянс", "Спаренный рейс" книгаос поттыны. Макс Ройз англичанъёс пӧлын одӥгез гажано но тодмо журналист-обозреватель луэ на. Лыдӟисьёс шумпотыса витё солэсь мур пуштросо но ас малпанъёсыныз узырмытыса гожтэм материалъёссэ. Та пумиськонын Макс мадиз на сюрес вылын пумиськылэм пӧртэм тумошо учыръёссэ. Кунгож сьӧрысь куно азьланяз но малпаське та университетэн кусыпъёссэ юнматыны. Нялтас вераны кулэ, Макс Ройзлы, татысь преподавательёслэн кенешемзыя, МВЕУ-ысь сӥё-дано профессорлэсь дипломзэ сётэмын. В. АНДРЕЕВА. Шунды Тодматске Укыр йӧно, укыр сюлмо Галина Юсупова - Удмурт Республикаысь Егитъёсын ужанъя кун комитетлэн кивалтӥсезлэн воштӥсез. Солэн нырысетӥ сюлмаськонэз - районъёсысь егитъёсын ужанъя отделъёслэн ужамзы. Выль малпанъёсыз - удмурт егитъёслэн "Шунды" дэменлыксылэн Кенешсылэн кивалтӥсезлэн ныпъетэз. Азинсконъёсыз - кылем арлэн пумаз йылпумъяз Россия Федерацилэн Президентэз вӧзысь Кун Службая академиез. Матысь кусып возе Финн-угор егитъёслэн ассоциациенызы (МАФУН), яратоно кырӟасез Надежда Уткина, вераськоназ ӵемысь пыртылэ укыр кылэз. Туспуктэмез В. Камашевлэн. Шунды КИН ШУИЗ, ЯРЫН МӦЗМЫТ? Яр районысь Депутатъёслэн советсылэн 27 январе ортчем сессияз эскеремын вал районысь егитъёслэсь улон-вылонзэс азинтон ужпумъёс. Кутэмын "Яр районысь егитъёс 2000 арозь" огъясь программа. Соя укмыс валтӥсь ужпум чакламын: егит семьяослы но 18 аресозь нылпиё семьяослы юрттон, соин ӵош ик улон коркаос пуктыны юрттон; егитъёслэсь ужпумъёссэс но ужъёссэс иворез вӧлмытон удысъёс пыр возьматон; егитъёсты уже интыян, пичи ужбергатонлы юрттон; пиналъёсын, быдэ вуымтэосын, егитъёсын но егит семьяосын улон-вылонын юрттонъя службаос пыр ужан; ваньмон дырез пайдаё радъян; зэмос гражданъёсты, патриотъёсты будэтон, ас шаердэ но калыктэ гажан мылкыд пыӵатон; нылпиослэн но егитъёслэн огазеяськонъёссылы, клубъёссылы юрттон; усточи но быгатӥсь нылпиослы юрттон; мукет районъёсысь но регионъёсысь егитъёсын кусып возён. Нош кыӵе меда югдур туннэ нуналлы Ярысь егитъёс пӧлын? Та пумысен ас малпанъёссэ вера егитъёсын ужанъя отделлэн кивалтӥсез Андрей ИВАНОВ. - Районамы кылдэм югдурез ӟечгес тодон понна, милям отделмы Яр посёлокысь егитъёс пӧлын нимысьтыз юан-веран ортчытӥз. 119 мурт пӧлысь куатез валэктонъёс сётыны пумит луиз, 77 процентэз куамын аресозь егитъёс вал. Кыӵе йылпумъянъёс лэсьтыны луоз та юан-веран пумысен? Юамъёс пӧлысь 12 процентэз уг тодо районысь егитъёсын ужанъя отдел сярысь. Тросэз пусйизы, егитъёсын ужан политика кызьы ке республикаямы, озьы ик районамы но, Россиен ӵошатыса, трослы улӥынгес. Мон сямен, таӵе пыкылонъёс кылдо иворъёсты вӧлмытонъя удысъёсын кусыпъёсмес кулэезъя тупатымтэмы бордысь но. Нош нырысь быдэстоно ужпумъёс пӧлы тросэз егитъёс пырто уже интыяськонэз. Юамъёс пӧлысь 55 процентэз туала егитъёслы умой дунъет сётӥзы, нош кылемез пусйизы урод сямъёс пӧлы выемзэс, винаен, наркотикъёсын эшъяськемзэс, калык пӧлын асьсэды умойтэм воземзэс, улонын интызэс шедьтыны быгатымтэзэс. Ужмес умоятон ласянь егитъёс пӧртэм дэмланъёссэс но веразы. Кылсярысь, дышетскон заведениосы пырыны мылкыд карисьёслы юрттэт сётонэз радъяно. Та пумысен вераны кулэ, шаерысьтымы Егитъёсын ужанъя кун комитет кыкетӥ арзэ ужа ни "Гуртысь абитуриент" программаез пиналъёс пӧлын вӧлмытонъя. Районысьтымы егитъёслэсь улон-вылонзэс ӟечгес тодыны юрттӥзы на пӧртэм учреждениослэн ужъёссыя дасям статистикая ивортонъёс но. Верало куд-ог лыдпусъёсты гинэ. Егитъёс кузпалъяськыны уг дырто. 1994 арын 142 семья кылдӥз ке, 1996 арын со лыдпус усиз 70-озь. Нош 1997 арын 84 семья кылдӥз. Арысь аре будэ висисьёслэн лыдзы. 1997 арын больницаын кыллиз 3835 мурт, соос пӧлын егитъёс - 1225 мурт. Егитъёс пӧлын тросгес вӧлмемын кынман, шуккиськон, сӧсырмон учыръёс, палась висёнъёс, курадӟо вина юонэн, кӧтпушсы висемен. Нимысьтыз пусйыны луоз армие мыныны дасяськись пиослэн ляб тазалыксы сярысь. 1997 арын 207 мурт пӧлысь 160-эз гинэ армие мыныны тазаен лыдъямын вал. Егитъёс понна кышкытлык кылдыто палась висёнъёс (сифилис, гонорея, трихомонеаз). Кылем арын 23-ез пиос но нылъёс "яратон" висён улэ шедизы. Йыртэман учыръёслэн кулэсмеменызы но яръёс туннэ ушъяськыны уг быгато, тужгес но сюлэмшугъяськыто быдэ вуымтэос. Югдур трослы умоясал, дыр, егитъёс уже интыяськыны быгатысалзы ке. Та ужпум тужгес но секытэз, ужтэк кылемъёслэн лыдзы, азьло аръёсын ӵошатыса, кӧнялы ке кулэсмиз ке но. Мар но со азинсконъёсмы вань ик. Тросэз пиос но нылъёс ужтэк кылемъёслэн центрзы пыр дышетско. Кылем арын озьы 113 мурт ужлы дышетскиз, пӧлысьтызы 51-ез - быдэ вуымтэос. Лыдӟиськон ласянь но егитъёсты пыкылыны уг луы вылэм. Чаклалэ асьтэос: 1995 арын библиотекаосы вазиськиллям 12978 нылъёс но пиос, 1996 арын - 16416, 1997 арын - 19251. Мар бен тужгес но кыске соосты? Фантастика, детектив, приключениос. Егитъёсын ужанъя отделлэсь азинсконъёссэ вераса пусйыны луоз "Доверие" социальной службаез. Визь-кенеш но юрттэт курыса, туннэ нуналлы телефон пыр отчы 300 пол вазиськизы ни. Службалэн ужаз пырисько пӧртэм удысъёсысь врачъёс, юрист, семьялы юрттэт сётӥсь педагог, быдэ вуымтэосын ужась психолог. Татысь специалистъёс валэктон ужъёс нуо, предприятиосы, организациосы, школаосы потаса но, палэнэ кельтэмын ӧвӧл педучилищеысь студентъёс. Пусйыны кулэ мукетсэ но. Яр Ижевсклэсь трослы палэнэ интыяськемын ке но, ми палан но "Шундылэн" тылсиосыз пишто. Удмурт егитъёслэн дэменлыксылэн ёзэз Яр ёросын кылдӥз 1994 арын, солэн ужъёсаз пырисько 200 пала пиос но нылъёс. Тӥни озьы, ваньзэ пыр-поч эскерыса, егитъёслэн ужпумъёссы уката но яркытгес адӟиськизы. Со бордысь ик кылдӥз 2000 арозьлы ужан программа. Табере мӧзмыса пукыны дыр ӧвӧл, ми угось улӥськомы туннэ, ужпумъёсмес но быдэстоно туннэ. Дасяз Л. МАЛЫХ. Шунды "Кызьы улӥськод, пионер" конкурсэ ШУЛДЫРЪЯСЬКЫ НО ӞЕЧ ДЫШЕТСКЫ Куинь ар ӵоже школаямы ужа ини "Родники" нылпи огазеяськон. Солэн ужаз мон но шумпотыса пыриськисько, аслым мар ке но выльзэ усьтӥсько, тодонъёсме будэтӥсько. Нуллӥськом гордо-лызо аспӧртэмлыко галстук, кудӥз возьматэ ошмес вулэсь чылкытсэ но пионеръёслэсь галстуксэс. Та организациен кивалтэ Маргарита Наумовна Габитова. Милемын ялан пӧртэм ужрадъёс ортчытъя. Алигес "Родники" огазеяськонамы выль дышетскисьёсты пыртӥзы. Нырысь ик, ваньзэсты ӟечкылазы, дышетсконазы азинсконъёс сӥзизы но галстук керттӥзы. Шӧдтэк шорысь дорамы магистр вуиз но пиналъёсты ошмес вуэн пазяны ӧдъяз. Та нуналысен соос эшшо но визьмогес, шаплыгес, пе, мед луозы, нош алама сямъёссэс мед куштозы. Собере кыре потӥмы. Отын дасямын вал бадӟым костёр. Тылскем котырын пӧртэм шудонъёс ортчытъям, тунсыко кырӟанъёс кырӟам. Ужрадэз азьланьтӥз дискотека. Эктонъёс вискын пӧртэм шудонъёс, конкурсъёс ортчытъязы. Одӥгез, кылсярысь, таӵе вал: шудсьёслы дас лыдпусозь цифраос люкылӥзы. Котькудӥз чалякгес аслэсьтыз паразэ шедьтыса, со кык цифраосты ватсаса, 10 мед потоз шуыса. Вунэтонтэм кылёз, дыр, "Родники" огазеяськонэ пырем нуналзы. Та огазеяськон милемыз матэгес каре-эшъяськытэ, вань шуг-секытъёсты ӵош вормыны юрттэ. Тодӥсько, азьло аръёсы пионерской организация вал шуыса. Со туж юрттэ вылэм дышетсконын но асьсэды умойгес возьыны но. Котькыӵе ужрадын азьветлӥсьёс вал пионеръёс. Малы меда быдтӥзы та огазеяськонэз? Али "Родники" со интые шуыса кылдытэмын ке но, азьло кадь нылпи огазеяськон луытозь, солы туж кема вамышъяно на. Со маиныз ке но огласянь умой, дыр, но мукет ласянь аламагес. Тросгес шулдыръяськон ӝытъёс ортчыло. Дышетскисьёс отчы яратыса ветло, нош ӵуказеяз малы ке школае адскыны гинэ лыкто кадь, дышетымтэ урокъёсын. Ыше дисциплиназы. Мон малпасько, шулдыръяськыса гинэ улыны уг яра шуыса. Азьвыл пионеръёслэсь ужзэс азьланьтоно вылэм. Малы бичантэм куштӥськем корт, бумага, котыр улосмес вож писпуэн шулдыртонтэм, ошмесъёсты сузянтэм, мӧйыослы юрттӥськонтэм, пӧртэм ӵошатсконъёс радъянтэм, ляб дышетскисьёслы юрттонтэм. Ӝытъёс ортчытъяса, дыр уг кыльы ни мукет ужъёсын вырыны. Кин тодэ, оло, та малпанъёс быдэсмозы на улонын. Наташа ГАБИТОВА. Карамас-Пельга школа, Киясово район. Му вӧй кыскон скважинаослэн лыдзылэн будэменызы валче, Сарапул, Игра, Воткинск районъёсын инкуазь кырсёме. Отын ортчытэм пыр-поч эскеремъёс: югдур кышкыт. Коньдон борды пыкиське кырсь вуосты чылкытатыны станциос пуктон. Игралан, кылсярысь, чаклам кисьтӥськискем му вӧез ӝегатонъя 23 прибор интые пуктэмын 6-ез. Сарапулын - 11 интые 9-эз. "Чылкытатэм" вуэз но юыны уг яра на. Сое кык-куинь пол "выльдоно". Нош со асьмелэн уг лэсьтӥськы. Ву, му вӧй кошкон гумыос дас арлэсь кема ужало. Соин валче трос шудтэм учыръёс луо. Л. ПОМЫТКИНА. ПИНАЛЪЁСЛЫ ЭН СЮДЭ Таӵе алон сётэ Ижевскысь администрацилэн вузкаронъя управлениез пичи пиналъёслы поттэм куд-ог сиён-юонъёс. Соос пӧлы шедемын "Топ-топ" вузкаронъя маркалэн пакетъёсы тырем "Пшеничная с яблоком" ӝукез. Санитарной нормалэн куронъёсызлы та кӧс сиён уг тупа. Матысь дыре вузкарись организациослы косэмын сое быдтыны. Мумы-бубыослы чакласькысагес басьтоно пӧртэм консервантъёсын тырмытэм банкаосты но бумага пакетъёсты: ӟеч лэсьтэм интые, пиналъёслэсь тазалыксэс сӧрыны медаз шедьтэ. П. БУРАНОВ. Париже мыныны коньдон шедёз Кун Кенешлэн Тӧроез Александр Волков пумиськиз Ижевскысь медициная кун академиысь студентъёсын, преподавательёсын. Александр Волков вераз, кызьы шаерамы туэ социальной удыс но экономика азинскозы, парламентлэсь Удмуртилэн Конституцияз воштонъёс но ватсанъёс бордын ужамзэ но республикаысь ёросъёсын интыысь аскивалтонлэн но кун властьлэн ёзъёсазы быръёнъёс ортчытэмлэсь азьвыл кылдэм югдурез дунъяз. Александр Волков пумиськонэ лыктэмъёслэн юанъёссылы валэктӥз, собере академилэсь ректорзэ Николай Стрелковез, профессоръёсты, преподавательёсты но студентъёсты ӟечкылаз дуннеысь "Эрц-мейкер" (Музъем вылысь тодмо адями) программалэсь вылӥ наградазэ басьтэменызы. Алигес тодмо луиз, Ижевскысь медициная академия "Эрц-мейкерлэсь" секыт вакытэ азинскемез понна приззэ басьтӥз шуыса. Сое Парижын сётозы. Кун Кенешлэн Тӧроез оскытӥз, отчы мыныны коньдон шедьтэмын луоз шуыса. Кун Кенешлэн пресс-службаез. Удмурт Республикаысь Правительстволэн Премиос сётонъя кенешез ялэ 1998 арын социальной удысын вылӥ азинсконъёсыз возьматӥсь ужъёсты кутон сярысь. Таӵе материалъёсты сётоно 1998 арын 1 сентябрёзь таӵе адресъя: 426007, Ижевск, Правительстволэн юртэз, 162. Вазиськоно 52-49-95 телефонъя. Город но асьмеос ЖУГ-ЖАГ ИНТЫЕ - СЯСЬКА? Гурт-а со, город-а - улон интызэ котькуд адямилэн чылкытэн адӟемез потэ. Азьвыл аръёсы синмаськыса учкиськом ке вал Прибалтика шоры, али бускельёсмылэн но вань ни син азе йӧтымонэз. Ӝикытлык ласянь тужгес но висъяське Йошкар-Ола, Марий Эл Республикалэн шорсюлмыз. Отысь ульчаосты нуналлы быдэ ӵужо кожалод. Ижевскмы чылкытлык ласянь шӧдскымон "чутэ". Со сярысь веранэз но ӧвӧл: лымы шунаса быриз ке - вань кырсь-курез лӧптоз. Кин бордысь со потэ? Кин жуг-жаг пӧлы выйтэ корка подъездъёсты, тӥя лифтъёсты, сӧрылэ укно пиялаосты, гожма борддоръёсты? Валэктон шедьтон вылысь, ойдолэ ӧжытаклы гинэ кожалом гурт калык доры. Отысь юртъер котырысь уд адӟы таӵе пырултэм суредэз, малы ке шуоно, котькудӥзлэн кузёез вань. Ас киосыныд лэсьтэм уждэ кызьы саптаса куштод? Азьтэм яке юон вылэ чӧлскем мурт гинэ ваньбурзэ супыр-сапыр кароз. Городын, дась квартираосын улӥсьёс пӧлысь тросэзлы пыамын "казённой" мылкыд. Со бордысен ик пото кырсен ӵакмытэм ульчаос, пазьгем электролампаос, телефон- автоматъёс. Ужлы ёрмем йыртэмасьёс уг валало, ваньмыз со калыклэн кисыяз шукке шуыса. Тупатэм, сузям, ӵужем понна - котькудӥзлы нимаз-нимаз коньдон тыроно. Кин тае туннэ нуналозь ӧз шӧды на - ӵуказе одно ик шӧдоз. Югдур воштӥськыны кулэ. Со сярысь журналистъёсын пумиськон дыръя вераз С. А. Трухин, Ижевск городлэн мэрезлэн воштӥсез, городысь жилищной управленилэн кивалтӥсез: - Улон-вылон юртъёс ласянь али трос воштӥськонъёс мыно. Мэрилэн кутэм постановлениеныз вань ведомственной коркаослы кузё луоз город. Туэ но вуоно арын таӵе уж мыноз Металлург районын но электромеханической заводлэн пуктэм квартираосаз. Со понна республикалы выль коньдонэн висъямын 70 миллион манет. Ву но шуныт сётонъя удысъёслы ялэмын конкурс: кин быгатоз та районъёсты ас кияз басьтыны? Ижевскысь мэрилэн постановлениезъя табере котькуд коркалэн луоз кыл кутӥсез - кузёез (старшоез). Азьвыл аръёсы сямен, кылдозы домовой комитетъёс. Куд-ог микрорайонъёсын кутскон сётэмын ини. Табере оском, котькуд корка котырын ӝикыт луоз, укно улъёсын куяськем жуг-жаг интые чебер сяськаос, писпуос будозы шуыса. Маин пӧртэм Удмуртилэн столицаез музон городъёслэсь? Зэмен но, городлэн вылтусызъя, азьпал улон-вылонэзъя туннэ ӟырдыт вераськон мынэ. Быръён нуналэн гинэ со герӟаськемын ӧвӧл. Ум ватэ: Ижевсклы мэр луыны дасяськисьёс пӧлысь котькудӥз тырше ас малпанъёссэ калык доры вуттыны, тросгес куара люканы. Со урод ӧвӧл. Но котьмалэн, чебер сӥзёнъёслэн но, эсэпсы медло. Ватонэз ӧвӧл, асьмеос ӵем дыръя огкутскемен вань ӟеч амалъёсмес ӵушыса куштӥськом, "выльдӥськиськом", ум но валаське пеймыт гуэ куашкаммес. Нош отысь потыны, ӵабъяськыны туж ик капчи ӧвӧл. Ижевсклэсь туала администрацизэ туала вакытэ тужгес но шугъяськыто "хрущёвкаос", 335-тӥ сериен панельлэсь ӝутэм коркаос. - Соосты тупатъянъя-сэзъянъя ялэмын конкурс,- шуиз С. А. Трухин,- кин ӟечгес ужалоз, висъям коньдонэз быгатыса кутоз - мэрия туннэ ик юрттыны дась. Москваын сямен, соосты ваньзэ сэрттыны ум быгатэ, но выльдыны кужыммы тырмоз. Эшшо огзэ пусъеме потэ на: кылем арын 1 сентябрьысен пенсионеръёс улон интызы понна ӝыны дунзэ гинэ тыро. Та льгота чакламын Россилэн Правительствоеныз, нош компенсация тыриське городлэн бюджетысьтыз. Ижевск понна араз со 400-600 миллион манетлы усе. Льготникъёс сярысь ке верано, соослэн лыдзы вуэ ог 80 сюрсозь. Озьы ке но, вань улон коркаос азьланяз возиськозы городлэн коньдонэз чотын. "Ижмаш", "Ижсталь", "Аксион", "Удмуртнефть" секыт ныпъетсэс выжтозы Ижевсклэн пельпум вылаз. 1995- 1997 аръёсы таӵе "кузьым" лэсьтӥз ни 22 пичи но бадӟым предприятие - сётэмын 205 улон юрт. Л. МЕДВЕДЕВА. Оскон вае шумпотон Ой, сюресъёс, сюресъёс, Кыё лёгем пытьыос. Кылё лёгем пытьыос но, Кылё тодэм калыкъёс удмурт калык кырӟанысь Сюресъёс, сюресъёс... Ӝыны дауре ортче ни сюрес вылын. Алигес бертӥ, Финляндие, Швецие ветлыса. Кӧня вал выльёсыныз но, вужъёсыныз но тодмоосын пумиськонъёс! Нырысетӥ пумиськон Москва - кузьыли кар кадь ик: котькытчы мын - котькытын калык. Ваньзы кытчы ке но дырто, бызё, бадӟым куараен шау каро. Мон гинэ туннэ уг дыртӥськы кадь. Хельсинкие мынӥсь поездэ уйшор котырын гинэ вырӟе, нош "Италмасмы", асьтэос тодӥськоды, Муско каре вазь ӵукна ик вуэ. Ленинград вокзалысен малпай кудаз ке но черке яке монастыре ветлыны, юнме вокзалын донгаськыса улытозь. Артэ ик - Ярославль вокзал. Вамыштон инты ик ӧвӧл - калык, калык.... Гуж, пе, вазе. Учкисько - монахиня. Пичи тачкаяз кык чемодан понэм но, ваньмыз кадь ик, кытчы ке но дыртэ. Азьпалан - ӝужыт тубат. Кызьы меда тӥрлыксэ васькытоз? "Матушка, - юасько, - луоз-а тӥледлы юрттыны?" "Луоз", - шуэ. Юано кариськи, кыӵе монастырьысь. "Пюхтицаысь", - шуиз. "О! Эстониысь! Тодӥсько, тодӥсько, мыным но Инмаре отчы вуылыны ӟеч эриксэ сётӥз вал", - шуисько. Тубаттӥ васькон сяменыз мон пала учкиз но, пайми: кыӵе ке но тодмо тусъем кадь потӥз ымнырыз. Эшшо юасько на: "Кытысь тӥ, Удмуртиысь ӧвӧл-а?" - "Удмуртиысь", - шуэ матушка. "Кыӵе районысь?" - "Алнашысь". "Мон но - удмурт", - шуисько. - Грахысь, но Ижын улӥсько". Кыкнамы но туж шумпотӥмы пумиськеммылы. Кӧттырымонамы удмурт сямен вераськимы. Со шумпотӥз, мон, удмурт пи, черкын служить карисько шуыса, нош мон эшшо но - удмурт монахъёсыз, монашкаосыз адӟыны, соосын вераськыны куанӥсько. Нимзэ но юаны вунэтӥськем, мон понна но вӧсяськы шуыны но вунэтӥськем. Нодсыз... Алнаш, Алнаш.... Котьмар ласянь тон азьпалан. Берло дас ар куспын татысь трос гинэ калык улонзэ черкен герӟаз ни, священникъёссы, монашкаоссы но вань. Тани Ӟуннялась ик куинь священник потӥз, монахинязы но вань ини. Вуж школазэс черк каризы. Алигес Николай архиепископмы та гуртэ ветлӥз черкысь престолэз вӧсяны, калыкен ӵош вӧсяськыны. Кытын вӧсяськон - отын улэп улон. Кыкетӥ пумиськон Нуназе ветлӥ Данииловской шуон пиосмурт монастыре. Литургия быремын ни вал; сылӥ, кылзӥ молебенэз. Ӝытазе малпай Донской монастыре ветлыны. Туннэ 12-тӥ ноябрь, дорысь потыкум, Ижын тол вал ини, нош татын туннэ быдэс нунал ведра дурысь кисьтэм кадь ик зоре. Бер сӥзьыл вазь ик пеймыт усе. Шыпыль-шопыль коласькыса вуи Донское. Таӵе куазен, малпай, кин ке но лыктоз меда черке? Зэм, калык трос ӧй вал: ог кызь- куамын мурт вӧсяськисьёс, ог дасо пала егит монахъёс. Котькуд монастырьын капчиен, шумпотыса вӧсяськоно. Туннэ ӝыт но озьы ик. Малпамтэ шорысь урдэскысеным кин ке шыпытэн гинэ вазиз: "Отец Михаил, тӥ но татын-а?" Учкисько но - пинал гинэ нылмурт, ог дас тямыс-дас укмыс арес котырын. Адӟеме вань, куке-соку Успенской черкамы кырӟаны-чирдыны вуылэмез вань. Нимзэ уг ке но тодӥськы, шумпотон - таӵе бер ӝытэ, кезьыт зоро пеймыт уе, мурт городын дор музъемысьтыд адямиен пумиськон... Кин ке но тонэ тодэ, шуныт, небыт кылын вазиське. Паймымон - дас миллионъем городысь храмын сылэ кызь-куамын адями, соос пӧлысь ми кыкнамы - Иж карысь. Инмарлы тау: пичи гинэ Удмурт шаерысьтымы но калык Инмар пала каллен-каллен кыстӥське. Инмаре, дэлето-берекето улондэ сёт удмурт музъем вылын улӥсь калыкъёслы. Куинетӥ пумиськон Азьло аръёсы кадь, кунгож вамен потыку, эскерись-чаклась адямиос туж ик копаськыса уг уло ни. Чемоданъёсты но, кисыосты но уг бугыръяло ни. Туннэ но озьы ик вал. Выборгысь потыса, пичи шур вамен выжимы но, тани поездмы ширтэ ни финн музъем вылтӥ. Суоми кун. Кыкетӥез удмурт доре. Толалтэ но, гужем но, тулыс но, сӥзьыл но та сюрес вылтӥ ортчылӥ ни, но чик ӧз на акыльты на (укно пыр но) финн шаерен, финн калыкен, гуртъёсынызы, хуторъёсынызы, пичиесь гинэ городъёсынызы тодматскыны. Кытчы гинэ эн учкы - котькытын чылкытлык, радлык, нокытын но мылкыдэз сӧрись куштӥськем лошъяськись арбериос ӧвӧл, ваньмыз ӝик-ӝик тыремын, радъямын, утялтэмын, буямын, чеберъямын. Нокин но нокытчы уг дырты. Инкуазь но, адямиос но куспазы огкыл шедьтыса, тупаса уло, уг бугыръясько, ог-огзы вылэ уг урдӥсько. Лахти - туала финн кар. Татын мынам ӟечесь тодмоосы уло - отец Олави, православной черкысь перей но солэн кузпалыз Марья Меррас, богословияя доктор, финн кылэ Библиез берыктон уже пыриськись. Соосын ӵош 1995 арын автобусэн Хельсинкиысь асьме Иж каре берытскеме но матысь тодматскеме вань. Лякыт сюлэмо адямиос. Валлян арын Лахтие миссионеръёслэн праздниказы милемыз Марьяен ӵош ӧтчазы. Кызь сюрс адями азьын удмурт калыке сярысь, осконмы, берыктон ужмы сярысь удмурт кылын верай, Марья асьсэ финн кылэ берыктӥз. Кӧня ке дыр ортчыса, поездмы дугдэ Рихимякие. Тани татысен кыдёкын ик ӧвӧл ни нюлэс шорысь тодмо тыэ - сюсьтыл кадь веськрес пужым ягын, ты дурысь гурезь йылын, адӟиське кузялэс, корт липето корка. Татын мон 1991 арын быдэс толэзь огнам улӥ - берыктӥ ньыль Евангелиосты. Кӧня тодэ ваёнъёс герӟаськемын та шулдыр, чебер интыен, коркаен, тыэн... Тук-тук, тук-тук! Йыгасько-верасько вагон поглянъёс-питранъёс. "Ӝоггес, ӝоггес!" - шуо кадь соос. Кызъёс пыр, кызьпуос пыр адӟиське ини Хельсинки - финн агайёсмылэн шоркарзы. Тодӥсько, перрон азьын сылэ ни Марья. Озьы ик вань! Вагонысьтым потыса учкисько но - сяськаеныз шонаса-сэзъяса ми пала бызе ни. Ымныраз со быдӟа шумпотонэз! Мар понна? Котьку но озьы. Марья! Паймымонлэсь но паймымон адями. Макем тросгес тодӥсько сое, сокем паймисько но Инмарлы тау карисько, удмурт калыкез гажаменыз-жаляменыз, Христос Инмармылэсь ӟеч Иворзэ туала удмурт кылэ берыктонэ пыриськыны чылкыт сюлэмо, калыкмес гажась, яратӥсь адямиез сётӥз шуыса. Тау Инмарлы, тау тыныд, Марья. Тон ке вань, бугрес сьӧд пилемъёс улысь но яркыт шунды пиштыса улэ. Ньылетӥ пумиськон Гуртын дыръям ай Институтлэн директорез Анита Лааксо жингыртылӥз но шуиз: ӝоггес лыктэ ни, тӥледыз Финляндиын туж витё. Марья но озьы ик шуиз. Та веранзы бере нокыӵе ик ӧй кариськы, кин, малпай, монэ сокем-сокем витёз ни... Анита, зэмзэ ик, паймытӥз туннэ: отчы, отчы, пе, ӧтё, сыӵе, сыӵе газетысь, журналысь, радиоысь лыктозы интервью басьтыны. Ӧтисьёс, пе, трос но, кужымды уз тырмы ваньмаз ветлыны. Жалямы но шуимы: та радаз уз быгаты, куке но, берло. Эспо карысь православной черкысь нуналлы быдэ, пе, жингырто, юало, вуиз-а ини шуыса. Отчы мыноно кариськи. Черкысь диакон машинаеныз Марьяен ӵошеннамес нуиз. Умой пумитазы. Удмурт кылын куать быръем псаломъёсты чирдӥ. Служба бере кофе юимы, трос юанъёс вал. Финн телевидение пыр кылем арын кӧня ке пол Библиез удмурт кылэ берыктон бордын ужаме сярысь документальной фильмъёс возьматӥзы но, татысь черке ветлӥсьёслэн ас синмынызы адӟемзы потэм удмурт адямиез, берыктон ужысь сюлмаськонъёсты тодэмзы потэм. Туж яраз татысь черклэн йырыз - о. Фёдор (Хейкки) Хуттунен. Лякыт сямо, ӟуч кылын туж умой вераське. Асьсэос черк пуктыны дасясько. Озьы ке но, удмурт кылын вӧсяськон книга поттыны 700 марка (700 сюрс манет) уксё люказы. Инмаре, ӟеч лэсьтӥсьёслы ӟеч кар! ...Туннэ - инмысь дурбасьтӥселэн Михаил Архангеллэн, Инмарлэн престол азяз сылӥсь Ин кужымъёслэн нуналзы. Одно ик тыршоно служить карыны, причастие басьтыны дасяськоно. Черке пыри гинэ, о. Николай, ӟечбуръяськыса оло вуим, оло ӧм, шуэ: туннэ "Хельсинки саномат" газетысь ивор тодӥ, тон, пе, субботае Хельсинки карлэн кафедральной собораз Лев митрополитэн ӵош служить карод. Служба бере, пе, удмурт кылын Выль Сӥзён потэм сярысь вераськон-пумиськон луоз. Нош ӧйлась....Куалектоно. Ӟигар ик быре. Кулэ бере, дасяськоно ни службалы но, вераськыны но. ...Толон кык газетэ интервью басьтӥзы, туннэ финн радиоысь кыллы бырем журналист, оло, кык час ӵоже юалляськиз. Паймиз Марьялы, кызьы чик дугдылытэк быгатэ удмурт кылын верамме финн кылэ берыктыны. Толэзь пумын, пе, ньыльдон минутъем передача луоз, со быдэсак сӥземын луоз Выль Сӥзёнэ удмурт кылэ берыктонлы. Азьпалан эшшо кӧня интервью сётоно на?.. Хельсинки ӧз тырмы, туннэ Марьяен самолётэн лобиськомы Стокгольме - отын уго Библиез берыктон ужлэн центрез. Туж, пе, пумиськемзы потэ Выль Сӥзёнэз финн-угор калыкъёс пӧлысь ваньмызлэсь азьлон йылпумъям группаен. Ӧтё бере, мыноно. Витетӥ пумиськон Самолётэн трос лобаме вань ини, но чик уг яратӥськы та ӝог лобась, омырын усьылӥсь-ӝутӥськись транспортэз. Но та финн агайёслэн бурдо валзы но йӧнала вылэм: уг но усьылы, уг но дырекъя, ӵошкыт гинэ лобе но лобе. Сюдо-вордо, мар сиемед-юэмед потэ - ваньмыз вань, лякыт кылын верасько. Культура ке, культура ни - мар шуод! Небытак гинэ ӝутӥськимы, небытак гинэ пуксимы. 1997 арын январе Хельсинкиысь Иерусалиме лобыкумы но паймем вал та выллем ик лобеммылы, утялтэмзылы. Запад - мар шуод... Аэропортысь финн эшмы-тодмомы Кайса ӝог гинэ ас машинаеныз вуттӥз эшез доры, Барбру нимо швед ныл доры. Барбру ужа Библиез берыктонъя Институтын. Ньыль ар талэсь азьвыл Стокгольме, Институтлэн юбилеяз ветлыкум, та зӥбыт нылмуртэн пумиськеме вал ини. Туннэ со милемыз ӝыт нянь сиыны ӧтиз. Ӧсэз гинэ усьтӥмы но, кытысь ке но, пыдлось-пыдлось крезьгур куара кылӥськиз... Шопен, Рахманинов, Григ, Чайковский... Сюлмы бугырскиз крезьгурен, ортчем-кошкем вакытэз тодэ ваёнъёсын. Куке но сюлмы ик лычсузьыса кылзӥсько вал классической музыкаез: опера но, балет но шумпотон ваё вал. Черке кошкем бере, радиоме кысӥ. Уж тросэн, чус ужаны дышетски. Вунэтӥ кадь вал ини Бахез но, Бетховенэз но, Сен-Сансэз но. Нош туннэ пумиськи кызь-кызь вить ар талэсь азьло ортчем нуналъёсыным. Корка пушкын ӝомалэс ӝуа люстра, сэрегын сылэ вашкала комод, со вылын - сяська букет, диван. Номыр мултэсэз ӧвӧл. Инмарлы оскисьёс корказы байлык уг люкало, улон интызэс мултэс арбериосын уг ӝокато. Малы ке но мон туннэ дас укмысэтӥ дауре сюри кадь потӥсько. Кузёкамылэн но выросъёсыз, зӥбыт-востэм тусбуйыз ортчем вакытэз тодэ вайыто. "Арлэн вакытъёсыз" - Чайковский - визьмо-йӧно земляке, кытысен но уг луы тонэн пумиськыны?! Тау музыкаедлы. Урамын бер сӥзьыл, писпуос гольык кылемын ни, одӥг-ог кугӟам зарни куаръёс гинэ тӧл бурд улын музъем вылэ васько на. Сюлмын тулыс. Пукысал быдэс ӝыт, та ракат мылкыдлэсь люкиськем уг ни поты. Но тани ӝӧк вылэ кофе вуэмын ини, час ортчыса, ворттоно нырысяз пумиськонэ. Тау, Барбру, швед калыклэн йӧно, сабыр нылыз ортчем вакытэн пумиськыны ӧтчамед понна. Берекетлы мед луоз азьпал улонэз. Куатетӥ пумиськон Швецие ке лыктӥд, кызьы "вашкала" тодмоеныд пумиськытэк! Борислав Арапович... Дунне вылысь трос кунъёсысь Инмарлы оскисьёс тодо та нимез: уго со луэ "Нылпи Библия" книгалэн авторез. Солэн кылдытэм Библиез берыктонъя Институтэз Россиысь, СНГ-ысь вань калыкъёслэн кылъёсазы Инмар кылэз - Библиысь книгаосты берыктэ. Та адями сярысь мон гожъяй ни вал "Ньыль зарезь пыр Иерусалиме" (Иж кар, 1994) книгаям, но али но куинь чур ке но гожтытэк, сюлмы ӧз чида. Вордӥськем музъемез вылын - Югославиын (со хорват) - ялан мынэ на славян калыкъёс куспын ченгешон, ваче вуон, ожмаськон. Кӧня ке ар куспын сяськаяськись Югославия куашкатэм юртлы пӧрмиз. Синкыли, вир, ӵын, калыкъёслэн дунне вылэ пазьгиськонзы. Кин та сьӧд ужез кутскиз?! Валэктон шедьтыны шуг. Борислав вордскемын Югославилэн тылӝу караз - Босниын. Трос-трос ӵыжы-выжыосыз, эшъёсыз, тодмоосыз быризы укылтэм ожын. Аслэсьтыз агай-вынъёссэ но пумитаны туэ мырдэм быгатӥз, одӥгез улэ Франциын, мукетыз - эшшо кыдёкысьгес шаерын. Вань та куректон-кайгуос вакчи дыр куспын куасалтӥллям гажано эшме, кивалтӥсьмес. Ньыль ар талэсь азьло со йыг-йыг, котьмаин тунсыкъяськись, шаплы воргорон вал, нош али юг-юг пурысьтам, ӧжытак губырскем. Вордскем хорват калыксэ кадь, дунне вылысь покчи калыкъёсты гажан-яратонэз эшшо но юнгес луэм кадь потӥз. Пумтэм шумпотэмзэ вераз Выль Сӥзёнлэн удмурт кылын потэмезлы. Одно ик, шуиз, та пумысен аслэсьтым малпанме гожто но кудаз ке но удмурт журналэ ысто. ... Туннэ кыкетӥ черкын пумиськон ини. Шонерзэ ке верано, Швециысь калык ляб тодэ Россиез, нош Удмуртиез ке верано, тодӥсьёс эшшо но ӧжытгес. Урал, П. И. Чайковскийлэн вордскем музъемез, татын автомат лэсьтӥсь Калашников улэ шуиськод ке, соку ӧжытак тодо ини асьме палэз. Туж шумпотыса вераськизы Россиысь эшшо одӥгаз кылэ Христос Инмарлэн Ӟеч Иворез, Солэн дышетскисьёсызлэн, апостолъёслэн, ужъёссы, ыстэм гожтэтъёссы берыктэмын шуыса. Нош пумаз ваньзы султыса вӧсяськизы. Инмарлы тау каризы, Выль Сӥзён потэм понна, удмурт калык Христос Инмарлэн дышетонэныз мед югдытскоз, улоназ, ужаз азинлыкез, берекетэз мед луоз шуыса вӧсяськизы. Быдэс Библиез удмурт кылэ берыктыны азинлык, быгатонлык сӥзьыса, Инмарлэсь куриськизы. Татын но вань сюлэмзэ поныса вӧсяськиз удмурт калыклэн Швециын улӥсь хорват эшез. Мон но удмурт вӧсяськисьёслэн нимынызы Борислав Араповичлы, солэн ӵош ужась ваньмызлы-ваньмызлы эшъёсызлы туж бадӟым тау каремме верасько. Ӟеч лэсьтӥсьёслы, Инмаре, ӟеч кар, ужазы, улоназы азинлык, берекет, дэлето улон сёт. Сизьыметӥ пумиськон Куноын туж ке но умой, дорын эшшо но умойгес. Кемагес ке улӥськод мурт шаерын, сюлэме мӧзмон йыгаськыны кутске. Удмурт шаере, аныкай музъеме мусо ик тон - лымыё, сяськаё, нюлэсо, ошмесо. Сюрпи интые, дор музъемамы улыны кельтӥзы ке но ини "бадӟым агаймылэн" асьсэсыз гинэ яратӥсь нылпиосыз. Озьы ке но сюлэм вордскем шаере куриське. Страналэсь улон-вылонзэ, паймоно кадь, поезд вагонэ пырыса но тодыны луэ вылэм. 1991 арысен кутскыса, арлы быдэ вуылӥсько Суоми кунэ. Туж секыт 1992, 1993, 1994 аръёсы Москва - Хельсинки поезд буш ветлэ вал, мынӥськод купеын одӥгнад, яке - кык ӵошен. Экономика куашкамын, коньдон ӧвӧл, кунгож сьӧры потыны шерезлэн моӵез тырме на вал. Нош туннэ паймоно кадь: вань купеосын калыкез пачылаз. Финн кыл но, ӟуч кыл но огмында ик кылӥсько: ӟучъёс берто, финнъёс мыно... Купеам ӟуч коммерсантэн ӵош пыримы, ми бере ик вуиз ӟуч ныл (оло, нылкышно), сэргы пуксиз но ми пала пал синмыныз но ӧз ни кырмышты, шып гинэ укно пала учкыса мынӥз. Поездмы вырӟон азьын шок-пуль шокаса, трос сумкаосын, бадӟым чемоданэн пальпотыса вуиз финн ныл - эшъёсыз тӥрлыксэ пыртыса кельтӥзы. Со монэ чылкак паймытӥз - пыриз гинэ но шуэ: "О, мон тӥледыз тодмасько, кыӵе шумпотымон пумиськон!" Мон шуисько: "Вождэс эн вае, но мон тӥледыз уг тодмаськы". Юаса ӧй вуы, кызьы, монэ тодӥськод шуыса, со ачиз ик шуиз: "Тӥ сярысь трос финн газетъёс гожъязы ни, телевидение пыр но кӧня ке пол возьматылӥзы ни". Кӧня ке ар талэсь азьло Удмурт Элькунамы но вуылэм ини. Яраз, шуэ, Удмурт шаер. Булае вуылыса, калыкен пумиськем. Удмурт песяйлэсь тусбуйзэ фотобумага вылэ уськытэм. Туркуын потӥсь газетэ сётэм туспуктэмзэ, со понна кузьым басьтэм. Ижысен монэ но, пе, адӟылӥ, но мон тодам чик уг ни ваиськы сое. Москвае, пе, дипломезлы юриспруденцияя материал люканы мынӥсько. Удмуртия, удмурт калык сярысь сюлмысьтымы вераськеммес кылыса, ӟуч коммерсант но вераськонамы пыриськиз. Чай но юим ини, но ялан удмуртъёс, финн-угор калыкъёс, оскон сярысь вераськыса мынӥмы, нош ӟуч нылмы ялан ымзэ ӧз на усьты, кунгож дуре но вуимы ини. Ӧжытак чус кариськимы но, со калленак мон пала берытскиз, туж зӥбытак гинэ юаз: "Вераськонысьтыды мон валай, тӥ Удмуртиысь шуыса. Шонер-а?" "Бен, - шуисько, - мон Удмуртиысь". Кӧня ке кыл ваче вераммы бере, со мыным чылкак но чылкак паймымон история вераз... Но нырысь ик верало, кин со. Нимыз - Вера, ныл фамилиез - Хлебникова, эрико суредась, кылем даурлэн пумаз, асьме даурлэн кутсконаз улэм нимо-дано кылбурчилэн- футуристлэн Вельямир Хлебниковлэн оло внучкаез, оло племянницаез шуиз - вунэтӥ. Бертӥсько, пе, Финляндиысь, Рованиеми городысь, удмурт нылпиослэсь суредъёссэс возьматон выставкаысь (малпасько, Удмуртиын та сярысь нокин но уг тоды шуыса). Куинетӥзэ,пе, ини та выставкаез Финляндиын возьматӥськомы. Удмурт искусствоез, историез эскерись специалистъёсмы тодо та суредъёс сярысь, но кытын соос та аръёсы - малпаськись но, утчаськись но ӧвӧл. Нырысь ик, дыгмы бадӟым, собере тужгес но ляб интымы - ас калыкмылэсь быдэстэм ужзэ дунъяны, сое эскерыны, утьыны, будӥсь егитъёс кие быгатыса, данэн сётыны чик но ӧм на дыше. Ум шуиське: "Уте, калыкмылэн кылдытэм киуж чеберлыкез нокытчы но тус-тас медаз луы, жуг-жаг пӧлы сюрыса, медаз ышы-быры". Нош али верано суредъёсмы, зэмзэ ик, жуг-жаг пӧлысь поттыса, финн кунэ вуттэмын. Куинетӥ ползэ, пе, ини та выставкаез нуллӥсько асьмелэн ӵыжы-выжыосмы доры. Вераськон мынэ Слободской уездысь, туала Киров областьысь Слободской районысь Круглово (удмурт нимыз Чола) черкогуртысь пиналъёслэн суредъёссы, сочинениоссы сярысь. Асьме даурысь 20-тӥ аръёсы та гуртын улэм визьмо, кибашлы нылпиосты, калыкез гажась-яратӥсь ӟуч дышетӥсь. Вань сюлмыныз, шӧдске, со яратэм татысь удмурт калыкез, дышетоно нылпиоссэ. Октябрь революцилэн тулкымез вань калыкъёслэсь улон- вылонзэс бугыртӥз. Бере кылем Россей кунэз ӝутыны кулэ вал дышетскем калык, соин ик та вакытэ одӥгтэм вань нылпиосты кутско грамоталы дышетыны. Чола удмурт гуртэ вуэм ӟуч дышетӥсь азе кык бадӟымесь ужпумъёс ӝутско: ӟуч кылэз тодӥсьтэм калыклэсь синзэ усьтоно но тодонлык сётоно. Пумен-пумен нылпиос ӟуч кыллы дышыса кутско гуртазы ортчись воштӥськонлы сӥзем сочинениос гожъяны. Купеын артэ пукись выль тодмое шуэ, та сочинениосты синвуэ потыса, пе, лыдӟисько, ӟуч кылын шенгыль-пенгыль ке но гожтэмын, татын шӧдӥське кыдёкысь удмурт гуртысь нылпиослэн югыт пала кыстӥськемзы, выль улонлы бадӟым оскиськонзы. Вера шуэ, тужгес но, пе, паймымонэсь удмурт нылпиослэн суредъёссы. "Мынам , - шуэ Вера, - удмурт гуртэ вуылэме ноку но ӧвӧл, ляб тодӥсько калыктылэсь историзэ, культуразэ, но та нылпи суредъёс шоры учкыса, соосын пыр-поч тодматскыса адӟисько та калыклэсь чеберлыкез мур валамзэ. Та калыклэн лулаз-сюлмаз вашкала дырысен пыӵамын чеберлыкез валан, буёлъёсын шудыса кадь, синмез уката палёмытӥсь, шумпоттӥсь суредъёс пуктон". Чола нылпиос тужгес но яратыса суредало валэз - вашкала удмуртъёслэсь гырись, кизись, сюдӥсь вордоссэс. 20-тӥ аръёслэн шоразы та гуртэ кӧня ке пол вуылэм ӟуч этнограф гожъяськись Всеволод Лебедев. Нырысьсэ вуэмез бере ик паймем Россей кунлэн шораз ӟуч кылэз тодӥсьтэм, ас сямъёсыныз-йылолъёсыныз улӥсь калыклы. Адӟем но синмаськем. "Вятские записки" (Киров, 1957) книгаяз со трос шуныт кылъёс вера Слободской котырын улӥсь удмуртъёс сярысь. Та йӧно ӟуч тодосчи, писатель малпам вылэм тужгес устооссэ суредась нылпиосты Ленинградэ дышетскыны нуыны, уката ик - Степан нимо кибашлы пиез. Но пӧрмымтэ - Степан гуртэзлэсь ӵыдымтэ. Всеволод Лебедев татчы берлозэ вуылыкуз ужа вылэм Ленинградысь ӟуч музейлэн этнографияя люкетаз. Чола нылпиослэсь паймымон суредъёссэс, сочинениоссэс сьӧраз Ленинградысь та музее нуэм. Но Вера мадиз чылкак паймымон учырез. Кӧня ке но ар талэсь азьвыл та суредъёс чылкак тодмотэм амалэн вуиллям Москвае но, тодӥськоды-а, кытчы сюриллям? Жуг-жаг куян интые. Вераен одӥг подъездын улӥсь кышномурт жагзэ кисьтыны потэм но, син шораз йӧтӥллям нылпи суредъёс. Соосты огазе бичам... сочинениосты но... Бӧрысь та сярысь Вералы ивортэм. Вера сюлмаськем удмурт нылпиослэсь суредъёссэс утьыны, кытчы ке но интыяны, калыкъёслы возьматыны. Финн ӵыжы-выжыосынымы кусып кылдыса, удмурт нылпиослэсь суредъёссэс саами нылпиослэн суредъёсынызы ӵош возьматон-выставка ортчытӥллям. Финн калыклы ярам, лэся: огез бӧрсьы мукетаз пичигес городъёсын ортчизы суред возьматон нуналъёс. Нош асьмеос, удмуртъёс, быгатомы-а асьме доры но та выставкаез курыны? Малы курыны гинэ, со суредъёсты одно ик асьме доры басьтоно, со асьме калыклэн киуж устолыкез, узырлыкез, профессиональной искусствомылэн кутсконэз, тэтэ карон дырыз ук. Нош али та суредъёсын кузёяське соосты жуг-жаг куян интыысь бичам кышномурт. Со кышномуртлы быдӟым тау карыны кулэ, жуг-жаг пӧлы быронлэсь утемез понна. Вера Хлебникова шуэ: мон та суредъёсты одно ик альбомен поттысал, конментариосы, бадӟым азькылыз но гожтэмын ини, но... коньдон ӧвӧл, нокинлы но соос кулэ ӧвӧл кадь. Бен, асьмелы, удмуртъёслы, нырысь ик, искусство, культура удысъёсын ужасьёслы, одно ик чик ӝегатскытэк утёно та суредъёсты, асьме доры ваёно. Удмурт калыклэн киуж чеберлыкез ас калыкез доры берытскыны кулэ. Тӥни озьы, одӥг сюрес вылын ик кыӵе но пумиськонъёс уг луо. Сюресъёс, сюресъёс... Михаил Атаманов. 2 апреле Удмурт Республикаысь калык артистка Ольга Чужанова творчествоезлы сӥзем, "Театр, тон - яратонэ мынам, тон - висёнэ мынам..." пумиськонэ ӧте. Кутске 19.00 часын. Юалляськоно таӵе телефонъёсъя: 78-79-81, 78-45-92. Ожысь но ужысь ветеранъёслэн Ижевскысь Кенешсы ӧте ветеранъёсты пумиськонэ. Со ортчоз 25 мартэ 11 часын Кун филармонилэн юртаз (Пушкинской ульча, 245). Пумиськон бере луоз концерт. Ӧтиськом егитъёсты 26 мартэ "Редуктор" культура юртын ортчоз уж быръёнлы сӥзем нунал. Егитъёсын ужанъя комитет но "Айесек-Ижевск" фирма юрттозы тӥледлы ӟеч инты шедьтыны, сюлэмдылы кельшись профессия басьтыны. Та выллем пумиськон Ижевскын нырысьсэ ортчоз. Москваын, Санкт-Петербургын, Новосибирскын выль амал улонэ ӝог пыӵаз. Мылкыд карисьёслы 26 числоозь вазиськоно Удмурт кун университетэ (402-тӥ комната, ИВ корпус, тел. 75-65-86, 75-80-66). О. Тимошина. Депутат но солэн ужез Дума "пазьгымтэ" - со ужа. Кун Думае быръёнъёс ортчем бере тырмиз кык ар. Со улэ но ужа. Нош нырысь-валысь кӧня вераськонъёс мынӥзы Думаез уллян пумысен. Сое "пазьгыны" турттэ вал ачиз Президент но. Табере буйгаз, лэся. Кык пол вуылӥз ни Думае. Нырысьсэ пуксьылӥз Президентлэн креслоез вылэ. Дума ужаны кутскем бере, солэн ужаз, дырзы ӧвӧлэн, озьы ик ӧз пыриськылэ Правительстволэн Тӧроез В. Черномырдин, солэн воштӥсьёсыз но министръёс. Табере та ласянь нокыӵе шуг-секытъёс ӧвӧл. Ваньмыз валазы ни, лэся: Россиез секыт югдурысь поттыны луоз огъя кужымен, дэмен ужаса гинэ. Дума кутӥз ини 500 пала федеральной но 4 конституционной закон. Соос бордын ужан понна трос чидан кулэ. Мынам но нырысь-валысь сыӵе чиданэ уг тырмы вал. Куд-ог дыръя мылкыдэз тӥяло журналистъёс но, депутатъёслэсь ужамзэс вылтӥз-вылтӥз гинэ возьматэменызы. Кылсярысь, соос калыклы кӧяса-вӧяса ивортӥзы, кызьы кутэмын вал "Сексуальной продукция сярысь" Закон. Но со дыре ик номыр поттылэмын ӧй вал со нуналэ ик Думаын эскерем лэчыт ужпум сярысь, кудӥз герӟаськемын пенсиосты выль сямен тыронэн. Пенсиос сярысь верано ке, ми турттӥськом ужан стаже пыртыны дышетскон аръёсты, районной коэфициентэз, нылпи но нырысетӥ группаысь сӧсыръёсты утялтон дыръёсты. Коньдон тырмымтэен, тросэз законъёс уг быдэсъясько. Озьы луиз ветеранъёс сярысь законэн. Котьма ке но, ветеранъёслы юрттон вылысь, коньдон (50 процентэз) регионъёсы келямын вал. Но со коньдон кулэезъя ӧз кутӥськы. Туала бюджетын нылпи пособиослы но ветеранъёслы коньдон висъяны озьы ик нимаз статьяосын учкемын. Коньдон уг тырмы тросэзлы Россиын улӥсьёслы. Со дыре ик куд-огез эсэпсэ валатэк улэ ини. Тани кыӵе ивор вуиз Лыдъясь (счетной) палатаысь "ЕЭС Россия" РАО-лэн кивалтӥсез Б. А. Бревнов сярысь. Арендае басьтэм Ил-62 самолётэныз США-е лобалля я пуныез, я вармаез, я кышноез но нылпиез доры. Компаниез чотын басьтӥз квартира но дача. Дачазэ умоятон понна, солы кулэ луиз 387 сюрс доллар. Бревновлэн аслаз уждунэз толэзяз 90 миллион манет быдӟа луыса но сыӵе дачаез возьыны коньдонэз ӧй тырмысал. Татын вератэк уг луы: ас ужасьёсызлы со толэзьёсын уждун уг тыры ни. 1998 арлэн бюджетэныз эскономикамес нокызьы уд азинты, со калыклы пумит луэ. Кунгож сьӧрысь басьтэм кредитъёс чотын экономикаез уд ӝуты. Мон уг тодӥськы одӥг странаез но, кытын сокем паськыт мед кутысалзы кунсьӧрысь кредитъёсты. Бюджетмес коньдонэн тырмытон понна, нырысь ик азинтоно трос сётыны быгатӥсь удысъёсты. Азьло налогъёс аръёсы государство но промышленность юрттылӥзы гуртъёслы, туннэ гурт кредитэн юрттэ промышленностьлы, вузкаронлы но басьяськисьёслы. Дыр вуиз ни банкъёслы но, Центральной Банкез вераса но, вуз поттӥсьёс понна чаклам (ставкаоссэс) выль сямен тупатыны, 10 процентлэсь вылӥын соос медаз луэ, нош гуртъёсысь вуз поттӥсьёс понна 3-4 процент гинэ тупатоно. Али кредит басьтӥсьёслы коньдонзэс банклы берыктоно луэ 20 процентэн. Кин басьтоз гуртъёсын сыӵе кредитъёсты! Кык ар ӵоже Думаын кутэмын 40 пала законъёс, кудъёсыз герӟаськемын гуртъёслэн улонэнызы. Но со законъёс гуньдо я Федерацияя Советын, я Президент дорын. Гурт хозяйствоя но сиён-юонъя министрлэн В. Хлыстунлэн кичӧлтэмезъя дасямын вал агропромышленной комплекслы государство ласянь юрттон сярысь закон, 1997 арын Президент со улэ гожтӥськиз. Но документэз уже пыӵатон понна, та дырозь правительство нокыӵе амалъёс ӧз куты на. Кылсярысь, отын чакламын льготной кредитъёс сётыны, озьы ке но гуртоос сое басьтыны уз быгатэ на. Озьы ик нокыӵе кужымез ӧвӧл на эшшо сояз Думаын кутэм Музъемъя кодекслэн. Кызьы тодмо ини, со кодексъя музъемез вузаны но лэземын. Куд-ог учыръёсы сыӵе луонлыкез, оло, асьмелы но кутоно. Берло ньыль ар ӵоже гинэ республикаямы арлы быдэ оборотысь гырытэк-кизьытэк ыштэ, шорлыдын вераса, одӥг район быдӟа музъемез. Вуза вал со аналтэм музъемез, но малы ке басьтӥсьёс уг сюро. Жаляса верано, Удмуртилэн 1998 арлы учкем бюджетаз гурт хозяйстволы нош ик туж ӧжыт саклык висъямын - озьы кыстӥське ни бӧрсьысь бӧрсьы сизьым ар. Сыӵе секыт югдуре сюрыса но гурт хозяйство Россилэн бюджетаз 20 процент пала коньдон пыртэ. Кун Думаын депутат луыса ужасько аграрной комитетлэн бюджетъя, кредитъя но внешней политикая подкомитетаз председатель луыса. Удмуртие, бырйисьёсы доры вуылыса, нимаз адямиосын но пумиськылӥсько, пӧртэм куронъёсын мыным вазиськылӥз ини 1 400 адями, 1 500 сюрс пала гожтэтъёс эскеремын. Жаляса верано, округе туж бадӟым, ваньмыз доры уг вуиськы, угось ас улосвылад ужан понна толэзьлы быдэ одӥг арня гинэ висъяське. Кык ар ӵоже ӧй на вутскылы кык районъёсы но Можга городэ. Кыӵе куронъёсын бен вазиськыло адямиос? Алигес басьтӥ гожтэтсэс Як-Бодья районын улӥсь сӧсыр ветеранъёслэсь Районазы соос 900 пала. Куро: юрттэ, пе, вал басьтыны яке 20 миллион коньдон келялэ. Тросэз вазисько нылпиоссэс эмъян пумысен. Куро юрттыны лэсьтӥськон материалъёсын. Куд-огез меӵак юало: "Кызьы улоно азьланяз?" Трос ужпумъёсты быдэстон понна, вазиськытэк уг луы республикамылэн кивалтӥсьёсызлы. Тау Удмуртиысь Гурт хозяйствоя но сиён-юонъя министерсволы. Озьы ик ӟеч кусыпъёс кылдӥзы Россиысь Гурт хозяйствоя министерствоен. Азьпалан эшшо кык ар. Лэсьтоно ужъёс туж трос. Йылаз-пумаз вуттоно Музъемъя кодексэз, ужано сельхозпредприятиослы огъя налог тупатон бордын. Котьку сямен ик уг яра палэнскыны бырйисьёслэн куронъёссылэсь. Оскисько 1990-тӥ арын вал со. Уфаысь искусствоосъя институтэз йылпумъяса, вить кузя шальк- шальк воргоронъёс удмурт театрлэсь люкиськоно кариськизы. Котыр ласянь ог-огзэс ӟеч тодӥсьёс нырысь спектакльёс пуктыны малпазы - ӧз пӧрмы. Собере концерт программа дасязы. "Катанчиослы" катанчи усьтӥськиз. Данъяськыса но шумпотыса шуозы вал: самой ӝужытэз воргорон - Геннадий Бекманов, самой бадӟымез - Александр Баймурзин, самой гордэз - Евгений Андреев, самой кескичез - Леонид Баженов но самой шоро-куспоез - Андрей Ураськин. Туж умоесь но со дыре ик туж пӧртэмесь вить эшъёс. Пӧлысьтызы самой арлыдозэ, Лёняез, институтын дышетскыкузы тятя гинэ шуылӥллям. Кибашлы луэменыз троссэ паймытъялоз вылэм. Нимаз коллектив кылдытыса, Баженовез ик афишаос суреданы косӥллям. Нырысь афишаын гожтэмын вал "Катанчи". Озьы, кылдытэм коллективзылы но "Катанчи" ним сётӥзы. Аръёс ортчемъя, воргоронъёслы юнгес чабизы учкисьёс, синмаськизы нылъёс. Ваньмыз ӧръяськиз ни вал кадь, но.... Театрлэсь лушкем мӧзмон Геннадий Бекмановез берен азьло ужаз вуттӥз. Кырӟасез но музыкальной инструментъёсын шудӥсез воштӥзы кык Андрейёс: Ураськин но Соловьёв. Самой шоро-куспоезлэсь кырӟамзэ кылыса-адӟыса, адямиос чылкак абдрало: "Ма, кытысь усем со Ураськинзы, кытын сое татчыозь возиллям?" Андрей лякытак шуылӥз: "Инмысь уси, нош аквариумын кужым люкай". Кизнер районысь Вуж Бодья гуртын улӥсьёс Ураськинъёслэсь семьязэс кырӟась семья гинэ шуылозы вылэм. Атаез Иван Иванович арганлэн зол шудӥз, нош анаез Татьяна Николаевна уӵы кадь кырӟаз. Капчи мылкыдзэс нылпиоссылы но кузьманы быгатӥзы. Бадӟымез нылзы Александра Челябинскысь культурая институтэз йылпумъяз. Та вакытэ Курганысь музыкальной училищеын кырӟаны дышетэ. Андрей но пичиысен ик кырӟаны яратылэм. Ас понназ тыршемез юнме ӧз луы. Кемалась ик ӧвӧл Андрей Ивановичлэн кырӟанъёсын кассетаез потӥз. Со-а шумпотон ӧвӧл артистлы, семьяезлы. Кузпалъёс чылкак ог-огзылы зоремын. Надежда Ивановналэн дипломной ужез театрен герӟаськемын вылэм. Отысен ик нырысьсэ пумиськиллям но. Та дыре Ураськинъёслэн Настя нылзы будэ. Анай-атайзэ со шумпоттэ "вить" отметкаосын гинэ. Ӟеч дышетскем сяна, яратэ эктыны но кырӟаны. Данъяськымон ик Ураськинъёслэсь семьязы. Андрей Иванович эшъёсыз пӧлын самой егитэз ке но, со ас ужзэ ӟеч валась артист. Нырысь-валысь тросгес шудылӥз нылпиослы гожтэм выжыкылъёсын. Соин но дыр, быгатонлыкъёссэ ваньзэ шарае поттыны ӧз дырты. Талантэз вал пластикаын но. Мугорзэ йӧспӧртэм выретӥз. Шораз учкыса гинэ но учкись валалляз ма вераны турттэмзэ. - Удмурт театре вуыкумы, шудоно спектакльёсъя югдур сокем ушъяськымон ӧй вал, - шуэ Андрей Ураськин. - Кулэ вал мар ке но вылез. Улон ялан бугыръяське, пӧзе, нош театр огинтыяз пуке. Кулэ луиз кадь выль омыр. Со сяна, театрлы кулэ ас ужзэ ӟеч валась режиссёр, кудӥз артистэз котыр ласянь дунъяны быгатысал. Тани, Саша Баймурзинлэсь серемес рольёсты шудыны быгатэмзэ адӟизы но буйгатскизы. Нош учконо ке, тодӥсь-валась режиссёръёс бордын, губиос сямен, артистъёс но будо. Оскисько, Москваын ортчоно фестивальёсы но удмурт театрмы соку мылысь-кыдысь пыриськылысал. Жаляса верало, Удмуртиын усто режиссёрмы ӧвӧл на. "Катанчиысь" артист секыт улонлы уг сётскы. Со оске, удмуртъёс востэм сямзэс куштыса ӝабыресгес луозы шуыса. Оске семьяезлы, яратонэзлы, аслаз учкисьёсызлы, кудъёсыз 19 мартэ филармония юртэ концертаз луозы шуыса. В. Кутузова. Шунды СТУДЕНТЪЁС - ВУОНО ПОЛИТИКЪЁС Витетӥ мартэ Ижевскысь Гордумаын ортчиз Городысь студентъёслэн нырысетӥ кенешсы. Таӵе огазеяськон сярысь малпан "Поколение ХХИ века" движение пырись студентъёс пӧлын кылем сӥзьыл ик кылдӥз вал. Ноябрь толэзе азьланезлы ужрадъёс но чаклазы. Нырысетӥ кенешазы городысь студентъёс эскеризы туннэ быдэстоно ужпумъёсты. Вылӥ дышетскон заведениосысь студентъёс понна чакламын нимысьтыз газет поттыны, кышкытлыклэсь утиськон вылысь студентъёслэсь отрядъёс кылдытыны, котькуд вузын усьтыны "Егитъёсты уже интыян биржалэсь" ёзъёссэ. Со сяна, кенешын быръемын вал та огазеяськонлы кивалтӥсь. Со - ИжГТУ-ын дышетскись Алексей Ивайкин. Городысь егит политикъёслэн вуоноез кенешсы луоз 20 мартэ. В. АНДРЕЕВА. Суредасько, гожъясько нылпиос 5 апреле Ижевскын ортчоз нылпи калык творчестволы сӥзем фестиваль. Отын лэсьтэмын луоз Анатолий Салтыковен ялэм "Планета детей" проектлы йылпумъянъёс. Пинал гожъяськисьёс но суредасьёс возьматозы асьсэлэсь Ижевск городлы сӥзем ужъёссэс. Пӧлысьтызы тужгес ӟечъёсыз пусъемын луозы кузьымъёсын. Н. Липина. Селта палъёсын Тыл кысэмын, техника гуньдэмын... но оскон бырымтэ Кызьы улӥськод, кыдёкысь ёрос? Та юанлы одӥг кылын уд валэкты. Ваньмызлы сямен ик, селтаослы но капчи уг йӧты. Но соос чидало, шуг-секытъёсты вормо, азинскон амалъёс утчало, азьланезлы юн осконэн уло. Тӥни со нянь будэтӥсьёслы но, пудо утисьёслы но выль кужым сётэ. Туннэ ӵапак веранмы со сярысь. Нош лэчытэсь ужпумъёс нырысь ик герӟаськемын кизёнлы но мукет бусы ужъёслы дасяськонэн. Тулыс шунды яркыт пиштэ, син ик мальдэ. Нош тӧдь-тӧдь зӧк лымы улын музъем шутэтске, кужым люка. Туэ инмар шаермылы лымызэ ӧз жаля, лэся: фермаос, улон коркаос лымы гурезьёсын котыртэмын, липетъёс но мырдэм чидало, нош бусыосын 1-1,5 метр, оло, люкаськемын. Пересьёс шуо вылэм, трос ке лымы, нянь удалтоз. Но озьы меда? Государстволы гурт удыс кулэ ӧвӧл ни кадь. Басьтом тани кыдёкысь Селта районэз. Татын тыршись, музъемез гажась калык улэ. Ӝӧк вылэз тыр ке но ӧз луы, палэнэ уз кошкы. Миым селтаос, музъемъёссы ӟечесь ӧвӧл ке но, гектарлы быдэ шорлыдын 13 центнер ю тысь кутсазы, выль моньяос 17 центнер басьтӥзы. Тулыслы тырмыт кидыс дасямын но 88 процентэз кизён классозь вуттэмын, нош "Свобода" колхозын, "Родники", "Валамазское" но "Копки" эштосъёсын ваньмыз И но ИИ классозь чылкытатэмын. Секыт югдур "Серп и молот" эштосын. Солэн одӥг куиньмосэз гинэ кидысэз муэ согыны ярамон. Турын кидыссы но тырме, но со жагесь на, нокыӵе классэ уг поты, шертыны кулэ. Кызьы бен селта палъёс бускельёссылэсь, сюмсиослэсь, уногес ю-нянь люкало? Ужан амалъёссэс уг вато. Тани котькытын сямен ик берло дыре бусыосазы туж ичи пырто минерал сылалъёс, кыед но торф. Лыдпусэн вераса, 10-12 пол ӧжыт. Но селтаос утчало музъемлэсь удалтонзэ ӝутонъя мукет амалъёс. Ведь умой улон музъем бордысь потэ. Кызьы соин ужалод, озьы ик урожай басьтод. Соин ик районысь хозяйствоос "Клевер" программаез улонэ пыӵато. Тукъёс (удобрение) басьтыны коньдонзы ӧвӧл бере, трос аръем турын бусыоссэс ялан паськытато. Татын "козлятник" турын но будэто. Со музъемез клеверлэсь но золгес умоятэ, будэ но туж ӝог, гужем ӵоже 2-3 пол турнаны луэ. Али 800 гектар ни клеверзы. Малы бен туннэ ёросысь крестьянин секыт мылкыдын улэ? Мугъёсыз трос. Тани арлы быдэ со гыре, кизе, ара, пудо вордэ, нош шумпотонэз ӧвӧл. Котькыӵе удалтэм урожай басьты, со уг узырмы. Макем тросгес сӥль-йӧл поттод-вузалод, сокем уногес ыштонъёс адӟод. Миым районысь гурт хозяйствоос нянь, сӥль но йӧл вузамзылэсь 15 миллиард (вуж коньдонэн) изъян адӟизы. Одӥг "Свобода" колхоз гинэ пайдаё ужа. Районын ӧвӧл промышленность но переработка. Кылем арын ваньзэ-ӧвӧлзэ 3 миллиард манет доход басьтӥз. Со 87 процент кун юрттэт басьтэ. Туэ районлы 22 миллион манет юрттэт висъяны учкемын. Со уждунлы гинэ кошкоз. Сӥль-йӧл поттэм понна государство дотация сётэ вал. Туэ элькунысьтымы Гурт хозяйствоя но сиён-юонъя министерство, Удмурт Правительстволэн лэземезъя, юрттэт сётонэз выль сямен радъя. Шуом, кин скаллы быдэ араз 2000 килограммлэсь ичи йӧл кыске, солы одӥг манет но коньдон уз вуы, нош трос йӧл басьтӥсезлы уксё но уногес лыктоз. Нырысь-валысь учкыса, умой кадь малпамын. Ӟеч ужасез, сюлмаськисез уката устогес мед тыршоз. Но табере мар кароно бере кылисьёсызлы? Кылсярысь, Селта районысь 12 хозяйство пӧлысь куиняз гинэ котькуд скаллэсь кык сюрслэсь ятыр йӧл люкало. Озьыен, таос гинэ юрттэт басьтозы, кылемезлы, 9 хозяйстволы номыр уз сётӥськы: быриськод ке, быр, куашкаськод ке, куашка. Шонер-а меда таӵе амал быръемын - туннэ шуг дунъяны, улон возьматоз. Мон сямен, татын чик учкымтэ адямилэн, дояркалэн ужамез. Ведь со азьмынӥсь фермаын но, бере кылисяз но огкадьгес ужа: нуналлы быдэ пудозэ сюдэ-утялтэ, кык пол скалъёссэ кыске но мукет ужъёсты быдэсъя. Но хозяйствоын тырмыт но ӟеч пудо сиён дасяны быгатымтэзы доярка бордысь уг поты ук. Тӥни озьы ляб хозяйстволэн азинскон-ӝутскон сюресэз уката пытсаське. Озьы, вылды, республикаямы 25-ез хозяйство куашкан-бырон калэ вуэмын, нош 137-ез пыд йылаз мырдэм сылэ. Гурт калыклэсь мылкыдзэ со зӥбе, ӟеч ужаны суй-пыдзэ юске. Но со гинэ ке луысал. Азьло аръёсы нянь будэтӥсь кыӵе шумпотэ вал тулыслэн вуэмезлы, бусые потыны сӥзьылысен ик дасяськылӥз. Нош табере одӥг сюлэмвисёнъёсыз кылемын. Техникаез вужмемын, выль тракторез, комбайнэз, автомашинаез гуртысь уд адӟы ни. Кылемзэ но тыро-пыдо ужатыны эстӥськон-вӧй, вужзэ но тупатъяны воштос ёзъёс басьтыны коньдонзы ӧвӧл. Гыро, кизё но арало, пунэм уксё басьтыса. Тани миым районысь одӥг "Свобода" колхоз гинэ 2 ДТ трактор (лизингъя) басьтӥз, "Звезда" - вуж МТЗ но "Селтинское" эштос - вуж Т-150 К трактор. Ёросын 29 трактор списать карыны вуэмын, автомашинаос - 16, сеялкаос - 14, герыос - 12, культиваторъёс - 2, комбайнъёс - 3 но трос мукетыз. Вуж коньдонэн вераса, 6 миллиард манетлэсь унолы. Кытӥ векчи, отӥ ик чиге, шуо. Гурт калыклэн со гинэ ке луысал сюлмаськонъёсыз, оло, чидасал но. Электрокужым понна уксё тырымтэзы понна, энергетикъёс, инмысь васькем муртъёс кадь, электроезъёссэс вандылӥзы ни. Районын ваньмыз сямен мастерскойёсын (куиньзэ вератэк) тыл кысэмын, моторъёс гуньдэмын. Кызьы бен соку тулыс кизёнлы дасяськод? Тыл уг вуы клубъёсы, библиотекаосы, интыысь администрациосы, колхоз-эштос контораосы, нош "Селтинское" эштосысь фермаосты 3 нунал электрокужымтэк возизы. Кызьы сое валано - йыре уг тэры. Энергетикъёс тушмонъёс выллем асьсэды возё. Шат соос, нылпиоссы йӧл-сӥль, нянь уг сиё. Кин понна бен уй-нунал тырше крестьянин? Аслыз со ваньзэ ачиз будэтэ, магазинэ сӥль- йӧл, вӧй басьтыны уг ветлы. Берло дыре куд-ог интыосын нянь но кемалась асьсэос пыжо ни. Кин бен малпаз таӵе улонэз - сое туннэ нокин уз вера. Но городысь но, гуртысь но адямиослэн умой улэмзы потэ. Тани районлэн пыдэсаз, Киров областен артэ интыяськем "Копки" эштосэз басьтом. Гольык луо музъем вылын но умой урожай будэто, пудо вордо, нош асьсэос уждун но йӧскадь уг басьто ке но, калык палэнэ уг кошкы. Совето власть дыръя, шаерысьтымы одӥгез бадӟым кивалтӥсь тазьы шуиз вал, Копки палан, пе, музъем ужен выронэз ӧвӧл, гондыръёс гинэ возёно. Озьы-а, тазьы-а, но копкиос та секыт вакытэ, ёросысь мукет хозяйствоосын ӵошатыса, пыд йылазы возисько ай. Нош интыысь администрацилэн тӧроез Николай Шихов шуэ: - Клубмес вуттыны ум быгатӥське, борддоръёсыз памятник кадь сыло. Пенсионеръёслы лэсьтӥськыны 50 кубометр нюлэс дунтэк висъяло, нош со егит семьяослы кулэ вылэм, соос асьсэос корка пуктыны мед быгатысалзы. Ведь бускель Киров областьын егит семьялы 200 кубометр дунтэк тэль сёто. Шат асьмелы озьы карыны ӧй луысал. Малы ке со сярысь нокин уг малпаськы: Кун Кенеш но, Правительство но. - Со дыре ик Сюрек но Игра леспромхозъёс туж ичи нюлэс корало, - ватса районысь администрацилэн тӧроез Владислав Шиляев. - Висъям нюлэс пӧлысь ӝынызэ но уг погырто, писпу пыд йылаз сисьме-уродме, ӟечлыкез быре. Висись яраосмы люкасько. Но умоез но вань. Тани Копкиысь чорыгасьёс, тыметсэс утён-чаклан вылысь, асьсэ кисыосысьтызы быдэн 100 манет уксё сёто. Кызьы сое уд ушъя. Элькунамы татын гинэ чылкыт шуръёс бызё, ошмесъёс пото, уно пӧйшуръёс, тылобурдоос уло, уно узы-боры, губи будэ. Селта калык ас улоссэ яратэ, вордскем музъемез бордын возиське, Сибире нуись бадӟым сюрес но чеберске-воштӥське. Эксэйлэн косэмезъя мерттэм бабылес зӧк кызьпуос интые вылез пушъе. Улон азинске, секыт ке но, калык азьланезлы осконзэ уг ышты. Нунал ке вордӥське, вазь ӵукна ик шумпотыса ужаз вамыштэ. "Копки" эштослэн тӧроезлы Николай Чирковлы, кытчы пырыны инты шедьтонтэм шуг луылэ: зӥбо быдэстымтэ ужпумъёс, тыронъёс, нош фермаысь вож- вож сезьы уд (гидропоника амалэн) будэтӥсьёс доры лыктэ но ваньзэ вунэтэ кадь. Пичи кунянъёслы, ошъёслы со номырин воштонтэм витаминэн узыр сиён юн кельше. Ӝажыосын ӵогыр-ӵогыр узьым выллем сезьы пушъе. Николай Борисович шуг-секытлы уг сётскы, ӵуказеез сярысь малпаське. Туэ, пе, ошпиосты куайытыны гид ӝутом. Йӧл но нуналмысь тросгес кыско ни. Председатель нош ик шумпотэ. Нош Рысан фермаысь дояркаос котьку сямен азьпалан мыно, али скаллы быдэ нуналаз 7 килограмм йӧл басьто ни. Тулыс нуналъёс пумен кузёмо. Тамында лымылэсь шунамзэ но уд шӧдылы, бусыос сайкалозы. Селтаос но калык радъя лудэ потозы: шедьтозы эстӥськон но, вӧйёс но. Сыӵе оскон кылдытэ ёрослэн кузёез, селта музъем вылын вордӥське но будэм, со борды лякиськем адями Владислав Шиляев. Быгатэ со калыкен вераськыны, выль кужым но оскон сётыны. Г. РОМАНОВ. Евгений Николаевич Тронин - сур пӧзьтӥсь. Тросэз воргоронъёс солы вожъясько, дыр: удалтӥз ке удалтӥз ни, номыр уд шуы. Таӵе специальность басьтӥз, Кез элеваторын выль удыс усьтӥськемен. Предприятилэсь продукцизэ вожмаськыса нуо мукет интыосы но. Озьыен, Тронин но ӵош ужась эшъёсыз та секыт вакытэ ас интызэс шедьтӥзы. Суредэз Леонид ПРОЗОРОВЛЭН. Зямбайын кенешон Та нуналъёсы Вавож районысь Мичурин нимо гурт хозяйствоя кооперативын ортчиз научно-практической конференция. Со сӥземын вал хозяйстволэсь ужан амалъёссэ дышетонлы но солэн тӧроезлы Валентин Калининлы. Конференцие ветлӥзы республикаысьтымы вань районъёсысь гурт хозяйствоя управлениослэн, колхозъёслэн но эштосъёслэн кивалтӥсьёссы. Конференциез радъязы Гурт хозяйствоя но сиён-юонъя министерство но Ижысь гурт хозяйствоя кун академия. Озьы зямбайёслэн ужан амалъёссы, оло, ӝоген быдэс шаерамы вӧлмозы. Г. Васильев. Лэчыт ужпум Кин кивалтоз автозаводэн? "Ижмаш". Автозавод. Мотозавод. Удмуртилэн данъяськонэз. Кеамалась-а вал со? Алигес гинэ - 10-15 ар талэсь азьло. Жаляса верано, ваньмыз табере кылемын ортчем дыре. Со быдӟа предприятиос туннэ жуммемын, интыысьтызы вырӟыны кынарзы уг окмы. Ма луоз ӵуказе? Кин кие шедёзы быдэс дуннелы тодмо заводъёсмы? Кылдэм югдурез эшшо огпол кутскыса, умой-умой эскерон вылысь, кылем пятницае автозаводэ ветлӥзы но отын паськытатэм кенеш ортчытӥзы Кун Кенешлэн но Правительстволэн кивалтӥсьёсыз. Автозаводлэн ужамез "2"-лы дунъямын. Та радэ ик шедиз республикаысьтымы промышленностья министерство но солэн кивалтӥсез В. И. Долгов. Зэмен но, машина поттӥсьёс туж секыт югдуре шедемын. Азьвыл аръёсы толэзьлы быдэ конвейерысь сюрсъёсын продукция кошке ке вал, кылем арлы чаклам планзы быдэсмиз 8,6 процентлы (!). Амалтэк юан кылдэ: республикаысь гинэ ӧвӧл, странаысь огез валтӥсь завод кызьы но малы та калэ вуиз? Неужто дырыз дыръя уг луы вал производствоез, соин ӵош ужась калыкез шуге-леке сюронлэсь утьыны? Та юан заводлэн администрациез азе уката но лэчыт пуксиз. Удмурт Правительстволэн Тӧроез П. Н. Вершинин меӵак шуиз: "Чигнаны нокытчы. Тырмоз уллане гылӟыны. Сокем ӟеч инъет вань вылысь, неужто Удмуртия автомобиль поттон удыстэк кылёз?" 1998 арын чакламын 30 сюрс машина лэсьтыны. Но заводлэн туннэ ужамез шоры учкыса, та лыдпуслэн быдэсмонэзлы оскон ӧвӧл. "Ижмашлэн" генеральной директорез В. П. Гродецкий удыслэсь шуге-леке вуэмзэ валэктӥз 30 ар ӵоже ог кабья одӥг пӧртэм продукция поттэмен. - Производствоез ялан выльдыны кулэ вал, - шуиз со. - Кин малпаз, "москвичъёсмы" рынокын интызэс ыштозы шуыса? Автозавод куашканы кутскиз 1991 арысен, 1995 арын пытсан калэ вуиз. Али ваньмызлы валамон: палэныь инвестициос басьтытэк, республикалэн сое ӝутыны кужымез уз тырмы. Предприятиез быдтонтэм вылысь, яке машинаосты дуногес вузано, яке, дунзэс кулэстыса, экономикаез кызьы утьыны быгатоно. Мукет амал ӧвӧл. Ижын поттэм "москвичлэсь" интызэ вожмаськыса басьто кунгож сьӧрысь вуттэмъёсыз. Миым гинэ Россие, шорлыдын вераса, соос миллионлэсь ятыр вузамын. Нялтас пусъё: вань ыштонъёсты лыдэ басьтыса, "москвич" туннэ сылыны кулэ вал ог 100 миллион манет. М. П. Гродецкий верамъя, автозавод ужамтэен сэрен, республикалэн кисыяз кылем арын ӧз вуы 85 миллиард манет. Производство сылэ, машинаослы двигательёс ӧвӧлэн. Таоссэ лэсьтэ Уфа. Отысь заводэн ӵош ужан сярысь договор гожтэмын. Нош малы со уг быдэсъяськы? Валэктонэз одӥг: Ижевскысь автозавод туж трослы пунэме пыремын. Берыктыны номырин. Завод чылкак "кынтэмын" шуэмысь, берло кык аръёссэ поттыны кутскиз 20 пумо машина ёзъёс, соин валче 330 муртлы ужан инты сюриз. Оскон вал Южной Кореяысь "Хёндэ" автомобильёсты лэсьтӥсь фирмалы. Нош со ачиз но али секыт югдуре шедемын. Та пумысен "Ижмашлэн" кивалтӥсез шуиз: - Ӟеч улонлэсь капиталистъёслы ӧм вазиське. Огкылъёс гожтэмын пӧртэм предприятиосын, фирмаосын, банкъёсын. Удысэз азинтон понна, кулэ "улэп" коньдон. Бартер амал, ог-огеныд вузэн вошъяськон трос ыштонъёс вае. Та вакытэ автозавод толэзяз быгатысал 3 сюрс машина лэсьтыны. Кылем толэзе конвейерысь ваньзэ-ӧвӧлзэ потӥз... 60 "штука". Та кыл автозаводын ужамзылы мертэт но, дунъет но луиз ни. Матысь дыре заводлэн капка сьӧраз улляны ччакламын кӧня ке сюрс рабочийёсты. Приказэн соос тодматэмын ни. Тодмо ӧвӧл огез гинэ: кытчы мыноз на быдэс улонзэ, тазалыксэ та производстволы сӥзем арлыдо адями? Кинлы со кулэ? Юанлы вакчияк но чурыт валэктон сётӥз Кун Кенешлэн Тӧроез А. А. Волков: - Одӥг мурт но капка сьӧры уз поты. Тырмоз ужась киосты мултэс карыны. Малы рабочийёс туннэ уждунтэк кылемын? Малы со дыре ик, завод сылыса но, кивалтӥсьёссы коньдон басьто? Татын сюрс пала инженеръёс лыдъясько. Нош вань-а соослэн пайдазы? Машинаослы двигатель, умой-умой утчаськысал ке, Уфаысь сяна, мукет интыосысь но шедьтыны луысал ни. Шонер, туннэ кадь ик нырулыса пуким ке, кунгож сьӧрысь техникалы эшшо но паськыт сюрес сётом. Заводлэн директорезлы али уен-нуналэн "гыроно", конвейер вис карытэк мед ужалоз шуыса. Соку рабочийёс но араз 24 пол, кызьы куре Конституция, ужамзы понна дун басьтыны быгатозы. 591,3 сюрс манет - кылем арын таӵе вал шорлыдъем уждунэз огшоры ужасьлэн. Жаляса верано, со но кияз быдэсак вуымтэ на. Кивалтӥсьёслэн - 1 миллион 167 сюрс. 1994 арын машнаос вузамын ог 7 миллион долларлы но маркалы, 1996 арын та лыдпус усиз 2 миллионозь. "Москвичъёсты" воксё басьтӥсь ӧвӧл уд шуы. Мыно соос Сирие, Финляндие но куд-ог музон странаосы. Но дыраз уг вуы отысь коньдон. Тыронъёссы аръёсын кыллё. Вакчияк - кредитъёс сярысь. Кенешын соосъя трос гинэ пыкылонъёс вал. "Гермес" пыр машина поттон удыслы миллионъёсын коньдон басьтэмын: со чотын завод ваиз кулэ луись дуно оборудование. Но уже кутытэк, ваньбурзы туннэ ке но кылле заборъёс вӧзын. Малы? Заводлэн кивалтэтэз паймемын кыӵе продукция поттыны. Тани-тани Япониысь 65 миллион доллар вуыны кулэ. Соин ма кароно, кыӵе удысэ кутоно? 115 миллион маркалы басьтэм оборудование - азбарын. 1998 арын автозавод чакла "Иж-2126" модель бордын ужаны. Оско: Россиын басьтӥсь шедёз. Ватонэз ӧвӧл: странаысьтымы машина поттон удыс быдэсак герӟаськемын ни кунгож сьӧрысь инвестициосын. Соослы сётӥсько льготаос налог тыронъя но мукетызъя, отечественной продукция поттӥсьёслы, юрттэм интые, налогъёссэс кык поллы ӝуто. Тӥни сыӵе политика. - Завод туннэ сямен сылӥз ке, налогъёс ласянь ӟечсэ эн вите, - шуиз Правительстволэн Тӧроез П. Н. Вершинин. - Туннэ нуналозь тӥляд ӧвӧл бизнес-планды гинэ но. Сотэк нокин но инвестициос уз висъя. Уд ке валаське, кызьы но ма бордысен кутскыны - ветлэ, дышетске "Буммашлэсь". Интыяды пукыса, заводэз уд ӝутэ. Кенешон ӟырдыт пӧрмиз. Автозаводлэн валтӥсь специалистъёсызлы, "Ижмашлэн" генеральной директорезлы трос гинэ пыкылон кылъёс верамын, соин ӵош - шуг-секытысь потонъя пӧртэм дэмланъёс. Оло, зэмен но, кызьы шуиз Правительстволэн Тӧроезлэн воштӥсез А. М. Лисина, машина лэсьтон удысэз но оском ни нылкышнолы-директорлы? Автозаводлэн кивалтӥсьёсыз 3-4 ар ӵоже кыл вылын ялан "азлань мыно", нош производство ворсан калэ вуэмын. Вераськон чурыт пӧрмиз. 15 апреле со азинскоз на Правительстволэн юртаз. Отын пусъемын но юнматэмын луозы автозаводэз шуг-секытысь поттонъя ужрадъёс. Та дыр ӵоже шедёз, дыр, солы йӧн-йӧн кивалтӥсь но. Людмила Медведева. Шунды КИН-О ТОН, ПАВЛИК МОРОЗОВ? История уг сылы интыяз. Ялан азьпала вамыштэ. Воштӥське вакыт, воштӥське улон, воштӥсько малпанъёс. Куд-ог азьло геройёс шоры асьмеос табере кезьыт мылкыдынгес учкиськом ини. Одӥгез соос пӧлысь - пионер-герой Павлик Морозов. Кин-о со? Зэмзэ ик герой яке аслэсьтыз атайзэ быдтӥсь? Куд-огез со шоры кырыж синмын учке, кызьы, пе, атайдэ "вузалод", нош куд-огез егит пияшен данъяськемысь уг дугды. Туэ Павлик Морозовлы вордскем дырысеныз 80 арес тырме. Со вал 1932 арын сӥзьыл. "Пионерская правда" газетын ужась, пионеръёс сярысь тунсыко иворъёс утчакуз, Свердловск улосвылысь Тавдинский ёросын потӥсь газетэз синйылтӥз. Отын гожтэмын вал Герасимовка гуртын луэм кӧшкемыт учыр сярысь. Виемын пионер Павлик Морозов но солэн укмыс аресъем выныз Федя Морозов. Кӧня ке дыр ортчыса, та учыр сярысь быдэс страна тодӥз. Малы бен кулакъёс Павлик Морозовез быдтӥзы? Павликлэн атаез, Трофим Сергеевич, сельсоветлэн председателез вал. Ӵемысь курытсэ ӟистылыны яратӥз. Аракы но коньдон понна пӧртэм документъёс "пӧралляз". Павлик тае адӟытэк-тодытэк ӧз улы Малпаз атайзэ шараяны. Совето властьлы пумит кырсь ужъёсыз понна Трофим Сергеевичез суд улэ кыско. Отын Павлик кышкатэк вераськиз. - Тынад-а со атаед? - юаз судья. - Бен, азьло со мынам атае вал,- шуиз Павлик,- нош али мон сое атаен уг лыдъяськы ни. Трофим Сергеевич паймыса пукон вылаз лэзькиз. Пельёсызлы уг оскы: кызьы-озьы аслаз вордэм пиез атаезлы пумит вераське. Суд Трофим Морозовез вить арлы пытсэт сьӧры пуктӥз. Гуртысь кулакъёс Павлик шоры кырыж учкыны кутскизы. Ӧз кельшы соослы дӥсьтӥсь пияш. Вераськизы виыны. Сӥзьыл, кыкетӥ сентябре, Павлик укмыс аресъем выныныз ӵош нюлэскы губи бичаны мынӥз. Татын ик возьма вал соосты бырон. Гуртысьтызы ик Даниил нимо воргорон но пияшъёслэн песятайзы жалянэз ӧз тодэ. Павликлэн мугорыз вить интыетӥ пуртэн бышкалтэмын вал... Кӧшкемыт! Павлик Морозов быдэс страналы тодмо луиз. Солэн нимыныз нималлязы колхозъёсты, городысь ульчаосты. Солэсь нимзэ тодэ вал котькин - пичиысен бадӟымозь. Павлик Морозовлэн вакчи гинэ улонэз вылын дышетӥзы школаосысь пиналъёсты. Солэн нимыныз данъяськиз котькуд пионер. ... Улон воштӥськиз. Азьло геройёсты пумен-пумен вунэтыны кутским. Туала дышетскисьёс тросэз уг тодо ни Павлик Морозовлэсь нимзэ. Тросэз юало: "Кин-о со?" Мон но та юанэн ик вазиськи Ижысь 76-тӥ школаын дышетскисьёслы. Валэктонъёссы пӧртэмесь но тунсыкоесь вал. Дима Березин, 7-тӥ класс: - Маке но тодмо фамилия, нош кин шуыны уг тодӥськы. Алеша Кремов, 8-тӥ класс: - Павлик Морозов? Уг тодӥськы. Милям классамы со уг дышетскы. Завучлэсь юалэ, со тодэ, дыр. Витя Шадрин, 8-тӥ класс: - Со Иван Сусанинлэн пиез. Ожын трос фашистъёсты быдтэм. Со понна солы сётӥллям Советской Союзлэн Героез ним. Алена Капралова, 7-тӥ класс: - Павлик Морозов? Кыӵе ке но дано артист, дыр. Фамилиез туж тодмо. Сергей Симаков, 10-тӥ класс: - Со кыӵе ке но ужбергатӥсьлэн пиез. Тодэ атаезлэсь кытын ке но коньдон ватыса воземзэ, со сярысь вера бубизлэн тушмонъёсызлы. Нош соосыз Павликлэсь атайзэ, пунэмъёссэ берыктымтэез понна, нюлэскы нуыса виё. Оля Федорова, 9-тӥ класс: - Павлик Морозов - со кыӵе ке но герой. Сое виё кадь. Нош мар понна - уг тодӥськы. Валамон, туала дышетскисьёс уг тодо Павлик Морозовез, нош кин солэн нимыныз ас вакытаз данъяськылӥз, табере выльысь малпаськонэ усиз: кин-о со Павлик Морозов? Герой яке ас вордэм атайзэ "вузась"? Та юанлы нокин но огкадь валэктон сётыны уг быгаты. Одӥгез шуэ герой, мукетыз - предатель. Зэмзэ но, кин-о тон, Павлик Морозов? Ф. МИННИГАРАЕВ. Правительствоын СӤЗЕМЫН УЛОН-ВЫЛОНЭЗ УМОЯТОНЛЫ Удмурт Правительстволэн берло кенешез сӥземын вал 1998-тӥ - 2000-тӥ аръёсы социально-экономической азинсконъя программаез учконлы. Та ужпумез эскерыны кутскемлэсь азьло Правительстволэн Тӧроез Павел Вершинин вакчияк ивортӥз районъёсысь администрациослэн кивалтӥсьёсынызы пумиськылэмез сярысь. Валтӥсь йылпумъян лэсьтэмын таӵе: районъёслэн социально-экономической азинсконъя планъёссы уг герӟасько быдэс шаермыя программаен. Куд-ог интыосын чакламтэ бере кылись предприятиосты шуг-секытысь поттон но огсыр ужаны условиос кылдытон. Нош куашкам хозяйствоосты пыд йылазы вуттонэз нимзэс воштонэн гинэ герӟало, нокыӵе усто ужан амалъёс уг утчало. Шат гуртын ӧвӧл ни устоесь специалистъёс? Вылаз ик, районъёсын уг адӟисько пичи но шоро-куспо ужбергатонэз азинтонъя сюресъёс. Та программа, пусйиз Павел Николаевич, юрттыны кулэ Удмуртиысь калыклэсь улон- вылонзэ умоятыны, адямилэсь шоро-куспо улонзэ кузёмытыны, ужтэк кылемъёслэсь лыдзэс кулэстыны, куанеръёсты утьыны но мукет. Программалы инъетъя ивортон лэсьтӥз республикаысьтымы экономикая министр Евгений Аверьянов. Со ватсаз, та документ, пе, рос-прос учкемын министерствоосын но ведомствоосын. Лыдэ басьтэмын ӵектонъёс но герӟамын Россиысь экономикалэн азинскеменыз. Кылсярысь, 2000 арозь чакламын валовой внутренней продукт (ВВП) поттонэз, миым сярысь, 9,7 процентлы будэтыны, нош промышленной продукциез - 11 процентлы. Программая озьы ик вераськизы тазалыкез утёнъя, калыкез дышетонъя, промышленностья, гурт хозяйствоя но сиён-юонъя министръёс но мукет удысъёслэн кивалтӥсьёссы. Соослэсь куронъёссэс но дэмланъёссэс лыдэ басьтыса, программа бордын ужалозы на. Кыкетӥзэ учкозы мартлэн пумаз, вуоно арняе. Удмурт Республикаысь Правительстволэн Тӧроезлэн секретариатысьтыз пресс-центр. Ижевск - Россилэн кебитэз Москваысь "Адями но карьера" газет Михаил Калашниковлы сӥзем музейлэсь макетсэ печатлаз. Иже ветлыкуз, Москвалэн мэрез Юрий Лужков оскытӥз, та лэсьтӥськонлы вить миллион манет висъялоз шуыса. Со сяна, та музеез кылдытыны мукет организациос но адямиос уксёзэс понынын дась. М. Т. Калашниковлы сӥзем юртын куинь висъетэз луоз. Нырысетӥез возьматоз конструкторлэн улон сюресэныз но ужаменыз, кыкетӥез тодматоз солэн пыӵалъёсыныз, куинетӥез - Россиысь вань пыӵал тӥрлыкъёсын . Ижевсклэн мэрез Анатолий Салтыков шуэ : "Музей городлэсь экономиказэ ӝутоз, татчы туристъёс лыктозы, озьы выль ужан интыос усьтӥськозы". В. Рогалёв. ВАЗИСЬКОН ВАЗИСЬКОНЭН ИК КЫЛИЗ Республикаысьтымы Ожысь но ужысь ветеранъёслэн кенешсы но Пенсиосъя фондлэн Удмурт Республикаысь ёзэз иворъёсты вӧлмытон ёзъёс пыр февраль толэзе вазиськизы вал городъёсысь но районъёсысь администрациослэн, Ижевск городысь бадӟым предприятиослэн кивалтӥсьёссылы Пенсиосъя фондэ налогъёсты дыраз тырон но пунэмзэс берыктон пумысен. Дыр ортчиз, нош югдур ӧз воштӥськы. Пенсиос тыронын ӝеганъёс пумысен валэктонъёс курыса, мон вазиськи Пенсиосъя фондлэн Удмуртиысь ёзэзлэн кивалтӥсезлэн воштӥсезлы Вячеслав ИБРАГИМОВЛЫ. - Пенсиос тыронэн республикаямы туннэ нуналлы бадӟым шуг-секытъёс кылдэмын. 20 мартлы 53 процентэз гинэ коньдон пенсионеръёс дорозь вуиз, нош та нуналлы ик январе, феврале пенсия 78 процентозь тыремын вал. Сокем трослы бере кылёнэз нырысь ик валэктыны луоз республикаысьтымы пӧртэм предприятиослэн, учреждениослэн но организациослэн берло толэзьёсы Пенсиосъя фондэ налог тырымтэысьтызы. Январьлы план 63 процентлы быдэстымтэ, феврале - 73 процентлы. Пенсиосъя фондэ толэзьлы 155-156 миллион манет вуыны кулэ ке, 92 миллион манет палаез сётытэк кылиз. Сыӵе вамышъёсын мыныса, пенсиос тыронъя план март толэзе уз быдэсмы. Ваньмыз-ӧвӧлэз кулэ ке 147 миллион манет, 20 мартлы люкаськиз 80 миллион манетэз. Со сяна, 20 числолы ӧжыт ке но коньдон ыстэ вал Россиысь Пенсиосъя фонд, озьы январе, феврале быдэн 10 миллион манет коньдон кутӥськиз. - Нош мар лэсьтӥське югдурез умоятон пумысен? - Секыт югдурысь потон понна вазиським шаерысьтымы бадӟым предприятиослэн, учреждениослэн, организациослэн нимаз-нимаз кивалтӥсьёссылы, кылсярысь, "Ижмаш" огазеяськонэ, механической заводэ, Горьковской чугун сюреслэн Ижевскысь ёзаз, Сарапулысь но Ижевскысь бюджет пыр коньдон басьтӥсь учреждениосы. Ёрос администрациос пӧлысь налог тыронэн ӝегало Глазов, Алнаш, Балезино, Вавож, Грах, Дэбес, Кизнер, Киясово, Сарапул, Сюмси, Юкаменск районъёс. Кызьы адӟиськомы, вазиськонмы вазиськонэн ик кылиз, коньдон люкаськиз 50 процентлэсь ӧжыт гинэ ятыр. Чаклам планэз туннэ нуналлы быдэстӥз Глазов город, бере уг кылё Можга город, Можга но Игра районъёс, тупатскиз Шаркан район. Озьыен, мукетъёсыныз ӵошатыса, та городъёсы но районъёсы пенсилы коньдон но тросгес висъяськоз. Мынам лыдъямъёсыя, март толэзез пытсаны быгатомы планзэс быдэстэм районъёсын гинэ, соос дасо пала люкасько. Шаерысьтымы мукетаз 20 улосын, жаляса верано луэ, та толэзьлы сётоно пенсия кӧня ке нуналлы ӝегалоз. - Вячеслав Михайлович, Москва ласянь кыӵе ке но юрттэт луоз-а? - Коньдон висъян сярысь 20 мартозь нокыӵе вераськонъёс ӧй вал. Та дыре тросаз регионъёсын югдурзы асьмелэнлэсь секытгес. Бускельёсмылы жингыръям. Асьмелэн тани мартлы пенсия 53 процентэз тыремын, нош Татарстанын - 30 процентлэсь ӧжытак ятыргес, Курганын - 17 процент. Шуг-секытъёссы азьвыл ӧз кылдылэ Челябинскын но Екатеринбургын, али соос но трослы бере кылё. Озьы ке но, осконмы вань, 26 март бере 10-20 миллион манет ке но Москва ыстоз шуыса. Но мартэз пытсаса ум вуттэ ни. - Озьы ке но, юрттэт вылэ гинэ оскиськыса улыны уг луы. Кыӵе сюресъёс тӥ адӟиськоды шуг-секытысь потыны? - Нырысь ик, шаерысьтымы вань бадӟым предприятиослы Пенсиосъя фондэ одно ик коньдон тырыны кулэ, пичиен ке но. Но туннэ нуналлы шаерамы экономика ласянь югдур туж секыт. Тани "Ижмашлэн" но радиозаводлэн расчётной счётъёсазы нокӧня но коньдонзы ӧвӧл, ужасьёссылы уждун товарен тыро. Нош "Ижмаш" гинэ Пенсиосъя фондэ 200 миллион манет тырыны кулэ. Та коньдон Ижевскысь пенсионеръёслы тырмысал куинь но ӝыны толэзьлы. Ижевскысь бюджет чотын уждун басьтӥсьёс но 26-27 миллион манет тырыны кулэ ни. Но кызьы тодӥськом, дышетӥсьёс, врачъёс, культура удысын ужасьёс январь понна но коньдон ӧз басьтэ на. Быдэс республикамыя югдур ӧз ке тупа, пенсиосын шуг-секытъёс азьланяз но кылдозы. - "Кылзӥськисьтэм" кивалтӥсьёслы пумит кыӵе амалъёс кутӥськоды? - Закон милемлы трос правоос сётӥз. Пунэм тыронъёссэс басьтон понна, предприятиослэн, учреждениослэн счётъёсазы вуэм коньдонэз ми ӝегатӥськом. Озьы ик ужаськомы банкротствоя комитетэн уртче. Арнялы быдэ трос пумо ужъёсты сэрттоно- пертчоно луэ. Тани али гинэ Удмурт Республикалэн прокурорезлы ыстӥмы пунэмзэс тырисьтэмъёслэсь нимъёссэс шараясь гожтэт. Кусыпъёсмы умоесь налогъёсъя полициен. Но, жаляса верано луэ, та амалъёсын туала вакытэ нокинэ ик уд кышкаты. Созэ но верам потэ: иворъёсты вӧлмытон удысъёс, югдурез шонер возьматэм интые, куд-ог учыръёсы пенсионеръёслэсь йырзэс сурало. Шуо, Пенсиосъя фонд кулэезъя ужамтэен яке коньдонэз асьсэ понна бергатэменызы, мукет кыӵе ке уже кутэменызы, адямиос пенсия дыраз басьтыны уг быгато. Сыӵе вераськонъёсын асьмеос кыдёке ум вуэ. Валаны кулэ одӥгзэ - предприятиослэн, учреждениослэн кивалтӥсьёссы адӟыны кутскизы ке Пенсиосъя фондэз, налог тыризы ке, соку пенсионеръёс ӝожтӥськоно уз луэ. Милям учрежденимы коньдон ачиз уг потты, со вуэмзэ лыдъя-чота, городъёсъя но районъёсъя люке, эскере налогъёсты шонер тыремез. - Мар бордысен кутске ужан нуналды? - Котькуд ӵукна уже вуыса, мон нырысь ик жингыртӥсько Удмурт Республикаысь Национальной банке, юасько, кӧня коньдон вуиз Пенсиосъя фондлэн расчётной счётаз. Тани туннэ мыным ивортӥзы: 227 сюрс манет коньдон вуэм. Мон сое люки вань районъёсъя, кинлы 10 сюрс, кинлы 20 сюрс, нош кудӥзлы ке 150 сюрс манет. Учкисько ни планэз быдэстэмзыя. Котькуд копейка лыдъямын-чотамын. Нуналлы быдэ сямен кинэ ке но но кылзӥськом Пенсиосъя фондэ тыронъёсыз пумысен. Тани али гинэ жингыртӥзы "Ижсталь" огазеяськонысь, тыронзэс сётонтэм понна кӧня ке дыр куро на. Но милям сыӵе луонлыкъёсмы ӧвӧл. Вань улонзэс ужлы сётэм адямиос сярысь сюлмаськон котькытын ик нырысетӥ интыын луыны кулэ. Л. МАЛЫХ. Гердэ Вашкалаез но, туалаез но огазьын Мон данъяськисько Кияса палъёсысь удмуртъёсын. Чебересь, визьмоесь, йӧноесь - ужаны но, кырӟаны-эктыны но шаплыесь. Сокем трос ик ӧвӧл отын удмуртъёсмы, нош ӟеч сямъёссылы, устолыксылы юн паймо ӟучъёс но, бигеръёс но. Карамас-Пельгаысь усточиосмес Мазитоваосты кунгож сьӧрын но тодо. Киясаос выжыысь выжые кузьмаса кельто ӟеч сямъёссэс. Мар вань устоез - пыӵато нылпиослэн сюлэмазы. Озьы ми палан гинэ кылиз бусы сюан ортчытъян праздник. Шаерысьтымы вань калыкез люкаса, Вуж Сальяын ортчытӥм "Гербер" шулдыръяськонъёсыз. Возьматӥм пересьёслэсь татчыозь кылем бусы сюанзэс. Макем яраз, кельшиз со калыклы! Тросэз, пе, али но сое ӧм вунэтэ на. Пӧртэм интыосысь адямиослэн сыӵе дунъетсылы ми шумпотӥськом. Огдыре ик данъяськиськом. Ваньмыз ӟечез, пусйымонэз, адӟем карымонэз асьмелы юрттэ угось удмуртлыкмес уката муромытыны, вунэтэмзэ выльысь улӟытыны. Та ласянь трос лэсьтэ "Ашальчи" ансамбльмы но. Удмуртлыкмес кужмоятыны шӧдскымон юрттӥз "Дэменлэн" но "Удмурт кенешлэн" мытэм ужзы. Соос калыкмес вырӟытӥзы асьме музъем выламы кузё луон мылкыдмес кужмоятыны. Вань удмуртъёслэн ВИ Ӧтчамзы бере, ми ёросамы пӧртэм ужрадъёс ортчытӥмы ни. Та ласянь тужгес но пусйымон тыршо Карамас-Пельгаысь но Вуж Сальяысь эшъёсмы. Меӵак Киясаын но куд-ог ужрадъёсмы луыло. Татын ми ӵемгес вуылӥськом пересьёслы юрттэт сётонъя юртэ. Вуж Сальяын ушъямон ужа "Кубо" огазеяськон. Соос выль корка пыронъёсыз но дэмен ортчытъяло. Пукон коркаос юртто калыкез огазеяны, шутэтскон дырез пайдаё радъяны, ваче эшъяськонэз кужмоято, ужась муртлэсь данзэ вылӥе ӝуто. Арлыдоосын артэ ик пукон коркаосы ветло егитъёс но али ӝужась пиналъёс. Милям огазеяськонэнымы юн герӟаськемын райгазетысь корреспондент Геннадий Парфенов. Удмуртлыкмы сярысь трос очеркъёс, репортажъёс гожтӥз ни, уно азьмынӥсьёсмес, усточиосмес данъяз. Сое чакласа, ассэ но данъяны кенешим. "Очеркъёсысь геройёсын пумиськон" шуыса нимам ужрадмес ортчытӥм Карамас-Пельгаын. Кӧня шуныт кылъёс верамын вал журналистлы но ёросысь азьмынӥсьёсмылы! Кырӟанъёс, кузьымъёс, ӟечкыланъёс... Соос трос выль кужым пыӵатӥзы очеркъёсысь геройёслы но, корреспондентлы но. Мон поннам малпай: таӵе ужрадъёс радъяны луоно вылэм котькытын. Ёросамы трос усточиос-кырӟасьёс, эктӥсьёс, крезьгур гожъясьёс.Вуж Сальяысь куд- огез быдэс семьяосынызы крезьгуръёс кылдытъяло. Тани Бочкаревъёс но Вахитовъёс трос гинэ выль кырӟан гожтӥзы ни. Надежда Бочкарева ми доры быземын Пичи Пурга ёросысь. Солэн кичӧлтэмезъя, алигес Сальяын ортчиз бускель районысь кылбурчиосын Кирилл Ломагинэн, Анатолий Перевозчиковаен но Любовь Тихоноваен пумиськон. Сылалэн нянен, ӟеч куноослы сӥзем кырӟанэн пумитазы сальяос кылбурчиосты. Та шулдыр ужрадэн озьы ик пусйим "Кубо" огазеяськонлэсь вить ар тырмонзэ. Вунонтэм шулдыр вал школаямы (клубмы кезьытэн, татчы выжим). Салья нылкышноос жин- жин удмурт дӥсьёсынызы пӧрмытскиллям. Нош егит нылъёс - чылкак туннэ бызись кенъёс кадь. Йыг-йыг веськытэсь, выль дэремъёсын, лымылэсь но югыт, тӧдьы айшетъёсын, сӧзыоссы турлы пужыосын чеберьямын. Куноосмылэн синъёссы ик кылизы, дыр, соос вылэ! "Кубоысь" арлыдо нылкышноос но, бадӟым классъёсы ветлӥсьёс но котькудӥзлы кылбурчилы кузьмазы соослэн кылъёссыя кылдытэм кырӟанъёсты, трос юанъёс сётъязы поэтъёслы, мылкыдзэс бугыртӥсь шуныт кылъёс веразы. Бочкаревъёс асьсэлэсь выль кырӟанъёссэс но кузьмазы Пичи Пурга ёросысь лыктэмъёслы. Кунооссэс сальяос тодматӥзы вордскем гуртсылы, Кабакшурлы сӥзем кырӟанъёсыныз, татын кылдэм такмакъёсын. Вуныса ӧз кыле вашкала дырысен кылэм гуръёс но. Огез кырӟан меӵак сӥземын кадь Куӟебай Гердлы, солэн пытсэтын курадӟемезлы, быремезлы. Тазьы, бускель ёросъёсысь усточиослэсь кужымъёссэс огазеяса, трос пӧртэм пумиськонъёс, пайдаё кенешонъёс, ӝытъёс радъяны луоно вылэм. Кыдёкысь дано адямиосты ӧтчан табере дуно усе уго. Ӧтьыкумы коть писательёс, журналистъёс, артистъёс одно лыктыны мед тыршысалзы. Калык соосты котьку вите. Кытӥяз нош Ижысь эшъёсмылы ӝожомоно. Ми одӥг тодмо гожъяськисез дышетӥсьёсын пумиськыны Киясае трос калыкез люкам вал. Ӧз лыкты. Нимзэ юромо ум вераське. Вуоз, дыр, ай одно ик дорамы. Оскиськом пумиськонэзлы. Таин нялтас "Удмурт кенешлы" куд-ог малпанъёсме но вераме потэ. Исполкоме выль муртъёсты бырйыкумы, асьмеос укыр ӝоже уськытӥмы кадь "Дэменлэсь" тӧрозэ Лидия Ореховаез. Пичи кенеше выль быръем муртъёс малы ке вунэтӥзы Лидия Васильевналы дурбасьтыны. Уг тодо, лэся, сое ӟеч. Нош Орехова кадь одӥгез но ӧз дурбасьтылы удмуртъёслы. Сое тодо кунгож сьӧрын но. Озьы мултэс чакласькытэк шонскылыса, асьмеос ум лябзытэ-а огазеяськонмес? Чакламея, музонъёсыз но лулысь-сюлмысь тыршисьёс озёлогес каремын. Нош егитъёсыз, выльёсыз эшъёсмы, вожзэс медам вае, ку ӝутскозы ай соос кемозь! Ку-о араны вуозы "соослэн кизем юоссы? Ма, малпано ке, Л. В. Ореховаез али но ӧтьылыны луоз, дыр, Пичи кенеше, исполкомлэн заседаниосаз. Собере "Удмурт кенеш" кызьы ке ӟечгес мед юрттысал интыосысь ёзъёсызлы. Юнгес кусып мед возёз. Тани бигер культурая огазеяськонысь кивалтӥсьёс асьсэлэн ёзъёсысьтызы эшъёссылы уг вунэтыло праздникъёс дыръя, вордскем нуналазы ӟечкыланъёс но ысъяны. Тӧро гинэ ваньзэ огназ лэсьтыны уз вуы. Солэн юрттӥсьёсыз но шаплыесьгес мед кариськозы вылэм та ласянь. Чыры-пыры ӧвӧл со, ог-огенымы юнэсь кусыпъёс возён кужмоятоз огъя огазеяськонмес но. Н. ПАХОМОВА, "Удмурт кенеш" огазеяськонлэн Кияса ёросысь ёзэзлэн кивалтӥсез. КУН СЬӦРЫСЬ КУНОЕЗ ПУМИТАКУ Россия Федерацилэн законодательствоезъя, Россилэн гражданинэз луисьтэм но мукет кунын улэмез сярысь документэн мурт кун сьӧрысь (иностранной) гражданин луэ. Выльдӥськон кутскем бере, уката ик 90-тӥ аръёсы, кун сьӧрысь уно адямиос, Москвае, Петербурге вуэм сяна, Ижевск кадь пичи городъёсы но лыкто. Берло дыре Азиын улӥсьёс Европае кошко Россия пыр, Удмуртиын вузкаро, куное вуыло, вӧсьлык кусыпъёсты юнмато, вузъёсын дышетско. Куд-огез, кун сьӧрысь вуыса, шаерамы улыны кыле. Ижевскысь Первомайской ёросын, кылсярысь, Америкаысь, Иранысь, Китайысь, Болгариысь лыктэмъёс уло. Кун сьӧрысь уноез адямиос лыкто, асьме организациосын, фирмаосын кусыпъёс тупатон понна. Но тросэз уг тодо, соос понна нимысьтыз куронъёс пуктэмын шуыса. Россилэн, Удмуртилэн законъёссыя, мукет странаосысь шаерамы огдырлы вуэмъёс лыктэмзы бере 24 час куспын пусйиськыны кулэ, кыӵе муген лыктэмзэс лыдэ басьтытэк. Та пумысен вазиськоно МВД-лэн паспортно-визовой службаяз. Та законэз уноез кун сьӧрысь лыктэмъёс, соосты ӧтись организациос, нимаз адямиос ӵемысь тӥяло. Кылсярысь, кылем арын Вьетнамысь гражданъёс административной правоез 48 пол тӥязы, законъёсты озьы ик уг чаклало Турциысь, Монголиысь, Иранысь вуэмъёс. Со понна соосты штраф тырытыны, Россиысь улляны луэ. Ф. ПЕТРОВА, Первомайской РОВД-ысь паспортно-визовой службаен кивалтӥсь. Нюръяськон азьланьтӥське "Уждунэз - дыраз", "Чиновник, ойдо ӵош люкомы мынэсьтым уждунме" - таӵе куронъёс улсын азьланьтӥське Ижевскысь дышетӥсьёслэн нюръяськонзы. Кӧня ке школаос забастовкае потэм дыр ӵоже ӝегатэм уждун берыктэмын 30 процентлы гинэ. Соин ик 34 номеро школаысь дышетӥсьёс пумитъяськон ужрадзэс 2 апрелёзь кыскыны малпало. Январь, февраль толэзьёс понна уждунзэс озьы ик ӧз басьтэ на 81 номеро школаысь дышетӥсьёс. Забастовкае потэмлэсь пайдазэ адӟытэк, та школалэн коллективез Устинов ёрослэн судаз вазиськиз. Т. Миронова. Николай НИКИФОРОВ МИЛЛИОН МАНЕТ УКСЁ Верос Покчи Лӧзя гуртысь дышетӥсь Татьяна Степановна, гуртысь мӧйыос нимамъя, Матяш Такъян, юондыр ортчытыны малпаз. Ас понназ пусйиз: "Трос калыкез ӧтчало, сиён-юон но тырмыт дасяло. Крезьгурлы дышетӥсь Геннадий Леонидович баянэныз лыктоз. Шулдыр мед ортчоз, вунонтэм". Гуртын улӥсьлы сиён-юон ласянь сокем ик шугъяськоно ӧвӧл на. Ваньмыз сямен ас тыршеменыз, ужез гажаменыз дасямын. Бакча емышез но, сӥльыз-вӧез но, сылалтэмъёс, вареньяос но... Нош колбаса, сыр, ӵынатэм чорыгъёс басьтон понна, юри Балтасе ветлытэк, амалыз ӧз луы. Егит дыр эшез, фермаын скалъёсты кыскись Кузей Клава, трос юрттӥськиз на. Пельнянь но ӵошен вераськыса-лабыртыса лэсьтӥзы, куноос пумитан ӝӧк вылзэс но ӵошен ик дасязы. Пельнянь дасян ӝытэ Кузей Клава сюлэмзэ бичатӥсь юанзэ сётытэк ӧз чида: - Паймисько мон тыныд, Такъян,- лулскиз со.- Улон-вылон но сокем шумпотымон ӧвӧл, дышетӥсьёс но уждунзэс толэзен-толэзен басьтытэк уло. Нош тон со дыре ик, сюанлы музэн дасяськыса, юондыр ортчытыны дасяськиськод. Коть мугез муг медло вылэм. А то, уть ай, узырмем: пиезлэсь миллион манет уксё басьтэм! - Э-э, Клава, Клава, - пумитаз пальпотэ эшез.- Шат пиелэн коньдон ыстэмез шумпотыны муг ӧвӧл? Ачид тодӥськод ук: оген будэтӥ, пыд йылаз султытӥ. Капчи-а вал кожаськод? Уката ик гуртоосмы Роман сярысь кыӵе гинэ зулён ӧз пӧралэ ни? Со юись но, лушкаськись но... Нош ужаны кутскыса, анаезлы коньдон ыстӥз гинэ но - ваньзы бакомизы. Соин ик шулдыръяськон ортчытыны малпай. Лушкемен мед закыралозыХ супыльтӥсьёс, мед ӵоксузёзы, пиелэн ыстэм коньдонэныз басьтэм аракыез юыса. - Али котьма дуно шуисько, Такъян,- Кузей Клавалэн сётскемез уг поты на. - Аслыд но коньдон мултэс ӧй луысал ук. - Сютэм уг кулы, Клава. Ӧжыт ке но уждун "палгытъяло" ик, алигес скалме но вузай. Уксёлы ёрмыса уг улӥськы. - Та вамыштэ но уг ушъяськы, Такъян. Кутӥд но пуж-пуж йӧл сётӥсь скалдэ вузад. Егит ук ай тон. Нош скалтэк юртъер но мӧзмылэс кыле. - Пудо сиён дасян секытэн сётске, Клава. Мыным, оген муртлы, кеч вордыса но яралоз. Нош скалтэк мӧзмыт ке луиз, колхозмы уз юртты шат? Ветылзэ вузалоз ай. - Ма, соиз озьы, Такъян. Ачид но гужемъёсы колхозлы юрттӥськод ук, быгатэмъяд уже пыриськиськод,- амалтэк соглаш кариське ни Клава. х х х Матяш Такъянлэн гурт шорын сылӥсь корказ юондыр шукыръяське гинэ. Ог гуртын улэм адямиос но ог-огзылэсь мӧзмыны вутскиллям, кожалод. Ӝӧк сьӧрын ик, ваче кариськыса, маке-маке шыпырто, пальпото, я Геннадий Леонидовичлэн баянэз сьӧры жон-жон кырӟан гур нёжъяло. Матяш Такъян но туннэ ӝыт воксё егит ныл кадь адске. Вожмыт тусо басмалэсь вурытэм дэремез туж кельышлы, пыдъёсаз - чилясь туфлиос. Чыртыяз ошем дунтэм весез но чеберлык ватса гинэ. Ӧжытак ӵужалэс йырсиез, сьӧрпалаз биньыса, льӧльмыт сяськаё заколкаен .юнматэмын. Ымдуръёсаз, синкашъёсаз калык синме шарак йӧтонтэм гинэ буёлъёсын йӧтскем. Тани кузё кышномурт куноосызлэсь чаркаоссэс аракыен нош ик тырмытъяз но аслэсьтыззэ кияз ӝутыса ӵектӥз: - Юэлэ, эшъёсы! Керпотыса эн пуке. Ойдолэ ӝутоме ай Роман пиелэн тазалыкез, азьпалан лыктоно шудбурез понна. - Чырткем мед ужалоз пиед, Такъян! - Анайзэ медаз вунэты. - Нош ик коньдон мед ыстоз. Шулдыръяськом. - Табере кузпалэн мед бертоз ни. Сюан шудысалмы. Ӝӧк сьӧрын пукисьёс пӧлысь котькудӥз кышномуртлы шуныт, ӟеч кыл вераны тырше. Жин-жингыр! вазё тыро чаркаос. Ӝӧк сьӧрын эшшо но шулдыргес кариськиз. Такъян арганчи вӧзы лыктӥз но пальпотыса вазиз: - Шуд ай, Геннадий Леонидович, эктон гуръёсты. Эктэме потыса, пыдпыдэсъёсы кужекъяло ни. - Экты, Татьяна,- пальпотӥз арганчи.- Тон понна ӵукнаозь шудыны дась. Таӵе кылъёсты кылыса, ӝӧк сьӧрын пукисьёс задормизы гинэ. Ог-огзы шоры учкыса, синъёссэс кыньыртӥзы. "Адӟид, кылӥд-а? Кыӵе гурлало: ӵапак кык дыдыкъёс кадесь. Озьыен, ваньмыз зэм. Тӧлтэк писпу куар уг шильырты",- шуо кадь соос ог-огзылы. Бен, лӧзяос тодазы ваё на соослэсь лушкем яратонзэс. Ог кызь ар талэсь азьло Геннадий Леонидович семьяеныз лыктӥз вал гуртазы. Кема улытэк ик кыл вӧлскиз: "Крезьгурлы дышетӥсьсы Матяш Такъянэн "кыштыртыны" кутскем". Татьяна Степановна бызьымтэ нылмурт бере, котьма супыльтыны яра кожаллям, лэся. Ужпум, оло, та сямен ик чусомысал но: кылзэс шерысалзы но дугдысалзы, дыр. Ӧвӧл ук: Матяш Такъян кутӥз но... Роман пизэ вордӥз. Ӟырдам из вылэ пӧсь ву пальккем кадь кариськыса тачыртыны, ӵашетыны кутскиз соку супыльтон. Таӵе кыл вӧлдон-костанэ ӧз пыриськы Геннадийлэн библиотекаын ужась Люба кузпалэз гинэ. Ваньзэ ас понназ чидаз, вормиз. Нош кылем аре, нылыз школаез йылпумъям бере, Иж каре куное шуыса кошкизы но ӧз берытске ни. Заводэ ужаны интыяськем, шуо. Зэм, Геннадий Леонидович олокӧня пол доразы ветлӥз. Нош кузпалэз но, нылыз но берен Лӧзяе ӧз берытске ни. Эсьмаса, ӵошен люкам ваньбур люкетэзлы гинэ но ӧз вуылы. Со дырысен воргорон огназ улэ. Матяш Такъян но, пиез Казане кошкем бере, чоркак огназ кылиз. Лӧзяос пирсэкъяса возьмало та арлыдоослэсь сюан нерге юондыр ортчытэмзэс. Нош таосыз кылэм-адӟем но уг каро кадь. Нырысен эктон круге ачиз Такъян потӥз. Киоссэ вӧлъяса, пезьдыт куараеныз соку ик такмак мытӥз со: Одӥг гинэ сяськае вал - Сое но лёгаллям ук. Одӥг гинэ гажанэ вал - Сое но талаллям ук. Кышномурт капчияк котырскиз но йыбырттыса ик Клаваез эктыны ӧтиз. Малы ке мӧзмылэс кариськизы кадь Такъянлэн синъёсыз, куараез но огдырлы воштӥськиз кадь. Озьы ке но, выль такмак мытонэн ӧз ӝега. Луд ӵӧж поттэм пиоссэ Шошмо кузя уяны. Анай вордэм милемыз Кӧтӝожъёсты шӧмъяны. Эшезлэсь шулдыръяськон дыре вакчи дыр куспын ма муген таӵе мӧзмылэс кариськемзэ нокызьы валаны уг быгаты на Кузей Клава. Ма, кӧня нунал ни, юондырлы дасяськыкузы, шудыса-серекъяса, шулдыр мылкыдо ветлӥз вал Такъян. Нош али корка тыраз куноос ӧтчаз но кузялэс турын куртчем адями кадь кариськиз. "Ас улон-вылонэз пӧрмымтэысь, лушкемен Геннадий Леонидовичлы ӝожа, луоз",- ас понназ малпаз Клава. Эшезлэсь пилемо мылкыдзэ сайкытатон вылысь, юри шаян частушкаез мытӥз со: Синмаськыса гажан кутӥ Кышноё воргоронэз. Огпол-кык пол чуп кариз но Йылэтӥз айшет калэз. Люкаськемъёс пальпотыса-серекъяса кужмогес чабыны кутскизы. Нош Матяш Такъян арганчилы пыдъёсыныз тыпыртыса, йырзэ мыкыртыса ик шудэмез понна тау кариз но, куноосыз пӧлысь огзэ круге ӧтьыса, огдырлы ӝогак палэнскиз. Шулдыръяськон азинтӥське. Лэйкало, ӟукырто выж пулъёс, ваче йыгаськыса, ас сяменызы "крезьгурало" ӝӧк вылысь тэркыос, пуньыос, чаркаос... Такъян ӝогак гинэ шкафысьтыз кыӵе ке эмъюм поттыса юиз но, курыт шӧмзэ быдтыны тыршыса музэн, чиялэсь дасям компотсэ ӟузиз. Огдырлы пытсаськиз, ӵоксузиз со. Нош сыӵе дауртэмзэ нокин ӧз адӟы, ӧз кылы кадь. Геннадий Леонидовичлэн сак синъёсыз гинэ ваньзэ дыраз синйылтӥзы. Уйшор азьын гинэ таркаськизы куноос. Соосты пальышаса, гажаса лыктэмзы понна, тау карыса келяз Матяш Такъян. Арганчи гинэ ӧтчамъёсын ӵош кошкыны ӧз дырты. Огшап чус пукемез бере, ӝӧк вылысь тыро чарказэ басьтыса, гылак юиз но, Такъян вӧзы пуксьыса, мӧзмылэс синъёсаз учкыса куриськиз: - Мадь, мусое. Ма луиз? Кыӵе кайгу сюпсе тынэсьтыд гадь-сюлэмдэ? - Ма сярысь тон, Геня?.. Э-э, Геннадий Леонидович. - Я, эн шузияськы. Мон ваньзэ валасько. Ватытэк мадь. Кышномурт шуак-дуак воргоронлэн пельпумаз йырзэ понӥз но викышъяса бӧрдыны кутскиз. Синвуосызлы эрик сётыса ӧжытак сабырскемез бере шыпыртӥз: - Пимы пытсэт сьӧры шедиз, Геня. - Роман-а? Ма луиз? Ку? - интыысьтыз ик тэтчиз воргорон. - Кудӟем йырыныз мотоциклэ пуксем но пичи нылэз шуккыны шедьтэм. Больницае вуттытозязы ик кулэм, мискинь лул. Романэз вить арлы пуктӥзы. - Иське, тон алигес соин Казане ветлӥд? Судэ-а ӧтчазы? - Бен. - Нош малы мыным пал кыл но ӧд поттылы? - Пыд азям усем адӟонэз огнам ӝутыны вормо кожасько вал. Нош уг лу вылэм. Уен- нуналэн куректон нумыр сямен портэ. - Озьы бере, та пӧртмаськондэ-шулдыръяськондэ малы радъянэз на вал? Пиелэсь, пе, миллион манет уксёзэ басьтӥ... - Гуртоос медаз валатске-шӧдске малпай, Геня. Соин ик, скалме вузаса, аслым ачим пиелэн нимыныз коньдон келяй вал. Вить арлы чидало, оло, дырызлэсь вазьгес но мозмытозы. Дырын-дырын, сое но тае вузаса, почта пыр Романлэн нимыныз аслым коньдон ысъяса улыны малпасько. Тон но юрттод, огнаме уд кушты. - Э-э, та адӟонлы гинэ сётскомы шат асьмеос, Танюша?! - кышномуртэ ӟыгыртыса чупаз Геннадий Леонидович.- Ваньзэ вормом. Егитэсь на асьмеос. Та сямен ик юондыръёс но ортчытъялом, Романлэн сюанэзлы но дасяськом. - Тау, валамед понна, Геня,- воргоронлэн чыртыяз кый музэн бинялскизы Такъянлэн киосыз ______________________ Х закыралозы - вожъяськозы.. МОЖГАЫСЬ ЖИЛИЩНО-КОММУНАЛЬНОЙ ХОЗЯЙСТВОЛЭН ПРЕДПРИЯТИЯЗ УЖАСЬЁСЛЫ Сюлмысьтымы ӟечкыласьком огкылысь улӥсь, ужаны яратӥсь коллективдэс бадӟым вормонэн - Россиысь жилищно-коммунальной хозяйстволэн предприятиосыз пӧлын конкурсын "Выль экономической югдурын пайдаё ужам но конкуренциын вормыны быгатэм понна" ИИ степенё диплом басьтэменыды. Тӥляд сюлмысь тыршемды но уждэс яратэмды, сое вылӥ ӟечлыкен но пайда вайыса быдэсъямды адӟем карымон. Вань сюлмысьтымы сӥзиськом тӥлед, ӵыжы-выжыостылы, матысь муртъёстылы юн тазалык, шудбур, котыр ласянь азинсконъёс! Удмурт Республикаысь Кун Кенешлэн Тӧроез А. А. Волков. Удмурт Республикаысь Правительстволэн Тӧроез П. Н. Вершинин. МОДАЫН - "МОСКВИЧЪЁС" ГАИ-лэн пресс-службаез ивортэмъя, лушкам машинаос пӧлын валтӥсь инты басьтэ асьме дорын поттэм "Москвич". Вуж-а со, выль-а - воштос ёзлы сэрттыны кыкез но огкадь мынэ. Таӵе вожмаськон "сьӧд" рынокын ӝутскиз, автозаводлэн кунсьӧр фирмаосын ужаны кутскеменыз но выль модельёс борды басьтӥськеменыз. Туэ кык толэзь куспын Ижевскын лушкамын куать "Иж-2715", вить - "ВАЗ-2106", сомында ик - "Иж-2126", ньыль - "М-412", быдэн одӥген - "Нива", "Ока", "Субару" но мукетъёсыз. Тужгес но ӵем техника ыше Первомайской но Ленин районъёсын (14 но 13), Октябрь районын - 9, Устинов районын - 7, Индустриальной районын - 4. Л. ДМИТРИЕВА. Герд Гердлы сӥзьыса Мукет интыосын сямен ик, Ижысь Индустриальной ёросын но ортчиз дано бӧлякмес Куӟебай Гердэз данъян ӝыт. Калык люкаськылӥз "Ударник" кинотеатре. Ужрад шулдыр радъяськиз. Фойеын эктӥзы-кырӟазы, отын ик журналист но кылбурчи Елена Виноградова Гердлы сӥзем викторина ортчытӥз. Тужгес но визьмоосызлы синпель кузьымъёс шедизы. Собере калык азьын вераськизы удмуртлыкмы понна вань сюлэмзэс сётӥсь эшъёсмы Альберт Разин, Клавдия Исупова, Илья Байметов. Дано удмурт пи сярысь мадемзы сяна, соос вуоно быръёнъёс пумысен но кенешизы, отчы ваньзэ пыриськыны ӧтизы. Ӝытэз шулдыртӥзы Ижысь культурая но крезьгуръя училищеосысь, усточиослэн школаысьтызы пиналъёс но егитъёс. Сӥё-дано ужрадэ ветлӥз Россиысь Суредасьёслэн огазеяськоназы пыртэм художник Леонид Прозоров но. Соку лэсьтэм суредъёсыз пӧлысь огзэ туннэ газетамы печатласьком. Культурая училищеын дышетскись Ольга Гершун - Вавож ёросысь Зямбай гуртын будэм нылаш. УДМУРТ СЯМЕН ВЕРАСЬКОД-А? ... Инесса Михайловна Петроваен тодматски малпамтэ шорысь, удмурт кыллы дышетскон мылкыдзэ кылыса-адӟыса. Туж, пе, ветлэме потэ нимысьтыз курсъёсы. Вылаз ик - картэз но удмурт, нош вераськыны уг быгаты. И. М. Петровалэн ужез нуналлы быдэ калыкен герӟаськемын, со кивалтэ тазалыкез утёнъя удысысь профсоюзъёслэн республиканской комитетэнызы. Районъёсы вуылыку, удмуртъёсын удмурт сямен зыч-зыч вераськы вал - уг пӧрмы. Соин ик Инесса Михайловна, ваньмон дырыз тупа ке - ялан "словарьзэ" выльдэ. Алигес пырай "Удмуртская правда" газетысь журналист Н. Н. Пузанова доры. Шорам пальпотыса учке: "Нош мон удмурт кылэз дышетонъя курсъёсы ветлӥсько". "Туж умой!" Выжыезъя Нина Николаевна удмурт ке но, троссэ уг вала. Вераськон куспамы редакцие пыриз вылӥ верам тодмое - гуртэ сётэм ужез юаз: одӥг урокез, пе, кельтыны шедьтӥ. Ӵуказеяз мон но дыртӥ Удмурт госуниверситетлэн кыкетӥ корпусаз, 309-тӥ аудиторие. Самой татын удмурт кылэз дышетонъя занятиосты нуэ старшой научной сотрудник Б. Ш. Загуляева. Курсъёсты возьматэм сяна, татчы лыктэмелэн музон но мугез вань. Мон ачим но, удмурт адями, будӥ, вордскем кылме дышетытэк, рос-прос тодытэк. Соин но, вылды, "Удмурт кылэз - 20 урок куспын" нимо телевизионной курсъёс ортчытыны дэмлай. Ӵапак таӵе брошюраез лыдӟи вал бигер кылын. Жаль, малпанэ улонэ ӧзгес пыӵа. Но азьланезлы осконэ вань на. Загуляевалэн ужан амалэз туж аспӧртэмлыко. Со кутэ МГУ-ысь Китайгородская профессорлэсь методиказэ. 15 ар ӵоже дасо сюрс адямиос вакчи дыр куспын дышетӥзы англи, француз, немец но мукет кылъёсты. Кылдытэмын учебникъёс но. Табере черод вуиз удмурт кыллы. Бибинур Шараповна книга дасяз ни, нимаське со "Дуно эше" шуыса. Коньдонэн юрттӥз Финляндиысь Кастрен общество. Нош пичи классъёсын дышетскисьёс понна учебниклы автор луиз Ижевскысь 21 номеро школаысь дышетӥсь О. В. Варзегова. Загуляевалэн книгаез чакламын бадӟым классъёсын дышетскисьёслы но мӧйыослы. Кин ветлэ удмурт кылэз дышетонъя курсъёсы? Кыксэ соос пӧлысь верай ни, эшшо кыкез - аспирантураын дышетскисьёс. Парта сьӧрын пуке археологияя кафедралэн доцентэз В. М. Черных но. Университетын со нуэ "Общий курс истории Удмуртии" предметэз. "Нациез, калыкез валан потэ солэсь кылзэ тодон бордысь",- шуэ со. Немец кыллы дышетӥсь Н. В. Байбекова монэ воксё "йыромытӥз", ассэ Сыктывкарысь вуэм журналист шуыса. Озьы, шудон амалэн, театрын рольёсты люкылэм музэн, мынэ вылэм кыллы дышетскон. Удмурт сямен вераськыны пӧрмытэ ини И. Б. Ворожцова но, Б. Ш. Загуляевалэн кафедраезлэн кивалтӥсез, 15-тӥ арзэ француз кыллы дышетӥсь. Француз манерен пуксись удмурт кыл туж мусо, аспӧртэмлыко кылӥське. Верало на, иностранной кылэз нуыны Бибинур Шараповна ӵапак дышиз туала дышетскисезлэсь. Занятиос арняяз ортчо кык пол - быдэн 3,5 часэн. Ветло Ижевскысь школаосын удмурт кылъя дышетӥсьёс но. Татын пукыса, ас вылам шӧдӥ: удмурт кыл капчиен уг сётскы, уката но - шонер гожъяськыны быгатон. Зэмос школаын сямен ик - гуртэ уж но сёто. Кин мылкыд каре - лыктэ, дышетске, дырды юнме быриз шуыса уд жалялэ. ... Нош сюлэм пыдсы шумпотонэн ӵош кыле маке но курытэз: трос-а меда дуннеын асьме кадь калыкъёс - анай кылзэс иностраннойзэ сямен дышетыны курадӟисьёс? С. ПУШИНА-БЛАГИНИНА. Солэн нимыз вунонтэм Ӵуказе, 27 мартэ, Юрий Гагаринэз буре ваён нунал. Нырысетӥ космонавтлэсь инметӥ 108 минут ӵоже лобамзэ ваньмыз кичабонъёсын пумитазы. Жаляса верано, шумпотон кемалы вылымтэ. 1968-тӥ арын выльысь инме лобыны дасяськонъяз 34 аресъем воргорон бырыны шеде. Аръёс ортчо, нош нырысетӥ космонавтлэн нимыз котьку калыкын улоз. Сӥлы карыса, солэсь нимзэ нулло библиотекаос, музейёс но школаос, ужало егит космонавтъёслэн клубъёссы. Юрий Гагаринлэн нимыз ноку вунонтэм. В. Рогалев. Чеберина яке чеберай? "Чеберина" - со конкурслэн нимыз, нош отчы пырисько чеберайёс - чебер апокъёс. Тазьыгес, дыр, шуоз куд-огез. Нош кудӥз та "чеберина" кылэз быдтыса ик куштоз, мукетыз малы кулэ удмурт нылъёс куспын таӵе ӵошатскон шуыса ӟукыртоз. Озьы-а, тазьы-а, но таӵе конкурс асьме шаерын кыкетӥзэ ортчытӥське ни. Ёросъёсын вормемзы бере, 14 чеберайёс асьсэды возьматӥзы Иж карысь машина поттӥсьёслэн дворецазы. Со вал южтолэзьлэн нырысетӥ нуналаз. Нылъёс удмурт дӥсьёсын но мальдытӥзы, бальной эктонъёсын но бергазы-поръязы? кутюрье кариськыса, йӧспӧртэм вурем дӥсьёссэс но возьматӥзы, озьы ик йырвизьзэс сыназы на. Сомында сӥсъясь- поръясь синъёс азьын капчи ӧй вал нылъёслы асьсэды сцена вылын эркын возьыны - соос артистъёс но, манекенщицаос но ӧвӧл уго. Асьмелэн нылъёсты чеберлыклы дышетӥсь нимысьтыз школаосмы ӧвӧл. Венесуэлаын, кылсярысь, таӵе конкурслы нылъёс кӧня ке ар дасясько. Нош асьмелэн чеберайёсмы... кык-куинь нунал куспын, Ижевске лыктэмзы бере гинэ соосын ужало балетмейстер, манекенщица. Гуртысь нылъёсмылы юртто, дыр, дышетӥсьёссы, анайёссы... Ярам, шуом, вань ке Мукши школаысь (Як.-Бодья ёрос) Римма Ивановна Шкляева кадь дышетӥсьёс. Солэн тыршеменыз та берлояз "Чеберина" конкурсэ пыриськизы куинез нылашъёссы. Нош кӧня меда бызьылоно-утчаськоно луэ, чебер, аспӧртэм дэремъёс вурыны, со понна коньдон шедьтыны. Таяз конкурсын гинэ вить пӧртэм дӥсь кулэ луиз. Соин но, дыр, ёрос конкурсъёсын вормем 23 нылъёс пӧлысь 14-ез гинэ лыктӥзы на Ижевске. Нош Пичи Пурга, Кизнер, Глазов, Селта, Грах но куд-ог мукет ёросъёсын кулэен ик лыдъяллямтэ, шӧдске, таӵе йӧспӧртэм ӵошатсконэз. Ӧйтод, кулэ-а меда асьмелэн Западъя вамышъёсмес мертаны... Весь шуиськом: удмуртлэн аслаз чеберлык шоры учконэз. "Ӟуч мунё кадь чебер" шуон, оло, асьмелы уг но тупа, удмурт ныллы мукетгес ӵошатонъёс утчано, ӧжыт ӧвӧл соос калык кылосын (фольклорын). Шонерзэ ке, удмуртъёслэн бызёно ныл котьку дунъяськиз ужаны быгатэмезъя, киужъёсызъя. Та ласянь удалтэмынгес вал, дыр, ог дасо ар талэсь азьвыл ортчытъям "Ойдолэ, нылъёс" конкурс. Но юнме уг верало: ужась валэз жуго. Культурая министерствоысь калык творчествоя юртлэн кивалтӥсез Зинаида Никитина но Удмурт радиоысь журналист Галина Кондратьева туж тыршо ке но таӵе конкурсъёсыз умойгес радъяны, йыр вылазы "ӵыжинъёс" трос гинэ усьыло, дыр. Котьма ке но, асьме республикаын инвожо толэзе малпало "Краса Финно-угрии" адӟытон-ӵошатскон ортчытыны. Нош солэсь азьвыл, 10 оштолэзе (апреле) Ижевскысь "Металлург" культура дворецлэн сцена вылаз ас йӧнлыксэс возьматозы дас чеберайёсмы: Светлана Бушмакина, Алёна Фёдорова(Як.-Бодья), Марина Моторина (Завьял), Елена Спиридонова (Ижевск), Наталья Кедрова (Алнаш), Людмила Юшкова (Ува-Вавож), Ирина Ложкина (Воткинск), Вероника Кибардина, Елена Филимонова (Можга) но Мальвина Платунова (Шаркан). Чеберлыклы ӧвӧл кыӵе ке чурыт мертэтъёс. Спортъя ӵошатсконын сямен, ӧвӧл татын минутъёс-секундъёс, метръёс-сантиметръёс, килограммъёс. Усьтӥськись сяськаез шат маин ке мерталод-дунъялод? Котькудӥз со ас сяменыз синэз кыске. Кудаз ке воректэ лысву (синву) шапык. Оло нош, самой ненегаз? Со синъёсын, кинлэсь чеберзэ ӧз вуэ синйылтыны. Но кулэ вылэм. Т. Чернова. Герд Ӵуказе пумиськом Брангуртын Ӵуказе "Удмурт кенешлэн" исполкомаз быръем эшъёс люкаськозы Пичи Пурга ёросысь Брангуртэ (Бурановое). Интые потыса, соос тодматскозы татысь калыклэн улэм- вылэменыз, аскивалтонъя общественной ёзъёс кылдытон бордын ужаменыз, вуылозы пӧртэм коллективъёсы. Нош нуназе бере кенешчиос выжозы Пичи Пургае. Исполкомлэн заседанияз эскерыны чакламын "Удмурт кенешлэн" ёрос люкетэзлэсь берло дыре кызьы ужамзэ, Ашальчи Окилы 100 ар тырмонэн валче ужрадъёслы дасяськонлэсь мынэмзэ, мукет ужпумъёсты. Валамон ни, вераськон потоз матэктӥсь быръёнъёс пумысен но. Пургаын ортчем кенешон сярысь ми газетамы одно ик гожтом. О. Марков. Ӵуказе - театрлэн нуналэз Дуннеысь театр удысын ужасьёслэн 1961 арын ортчем конгрессазы 27 мартэз Театрлэн нуналэныз лыдъяны чакламын вал. Со дырысен 37-тӥ арзэ сӥё-дано пусйиськом та лыдпусэз. Театр асьме улонамы бадӟым инты басьтэ. Со возьматэ адямилэсь узыр пуш дуннезэ, нош сцена вылын ужась артистъёс куспын ог-огзэс валан, гажан кусыпъёс тупатэ. Театр герӟа пӧртэм нациен калыкъёсты. Пӧртэм фестивальёс мурт калыкъёслэсь культуразэс валаны юрттэ. Удмурт кун Национальной театр финн-угор калыкъёслэн куиняз фестивалязы возьматӥз асьме калыклэсь сямъёссэ но йылолъёссэ. Ижевскын, Финляндиын, берлоез таӵе фестиваль ортчиз кылем сӥзьыл Йошкар-Олаын. Возьматэмын вал удмурт авторъёслэн Петр Захаровлэн, Егор Загребинлэн пьесаоссыя пуктэм ужъёс. Арысь аре йылэ артистъёслэн лыдзы. Туэ Москваысь Щепин нимо театрез йылпумъяса, Национальной театре 16 егит пиос но нылъёс вуизы. Вуэм выль кужымлы осконъёс бадӟымесь. Матэктэ гужем, соин ӵош - гастрольёслэн дырзы. Театръёс понна нош ик пӧсь вакыт вуэ. Т. АРДАШЕВА. Кун Кенешлэн сессияз Бюджет юнматэмын Парламент трос дырзэ но, кужымзэ сётӥз туэлы бюджетэз кутонлы. Со рос-прос учкемын. Но жаляса верано луэ, депутатъёс нош ик ӧз шедьтэ бюджетлэсь доход люкетсэ будэтон амалъёсты. Азьло сямен ик куронъёссы но ӵектонъёссы герӟаськемын вал уксё кысконэн яке расход люкетэз йылэтонэн. Валлян, 24 мартэ, депутатъёс вань воштонъёсты но ватсанъёсты учкизы но "1998 арлы кун бюджет сярысь" Закон кутӥзы. Соя доход люкетэз 1 миллиард 725 миллион манет юнматэмын, нош расход люкетэз - 2 миллиард 617 миллион манет. Отчы уг пыро бюджетэ пырисьтэм фондъёс. Кун кивалтонэ коньдон висъянэз кулэстыса, дефицит 893 миллион манет кельтэмын. Сессия озьы ик эскериз гурт хозяйствоысь ужпумъёсты. Доклад лэсьтӥз Правительстволэн Тӧроезлэн воштӥсез Владимир Зенин. Агропромышленной комплексын чидантэм урод мынэ тулыс бусы ужъёслы но пудоез кыре поттонлы дасяськон. Со дыре ик гуртысь хозяйствоослы вузам продукцизы понна али но коньдон сётымтэ на. Парламент та ужпумъёслы нимысьтыз инты висъяз. Кун Кенешлэн дас сизьыметӥ сессиез Ижысь дышетӥсьёслэн вазиськонзыя постановлениез умоен лыдъяз. Со сӥземын та удысын ужасьёслэсь уждунзэс будэтонлы. Удмурт Республикаысь Кун Кенеш вазиськон кутӥз Россилэн Президентэзлы, Правительстволы но Федерацияя Советлэн Тӧроезлы. Отын вераськон мынэ "Бюджет удысын ужасьёслы уждун тыронэз радъян сярысь" Федеральной законэз ӝоггес юнматон сярысь. Сессиын депутатъёс пӧртэм ужпумъёсъя ас малпанъёссэс веразы. Тани Александр Горошников вазиськон лэсьтӥз иворъёс вӧлмытӥсь ёзъёслэн ужамзы но депутатлэсь данзэ утён сярысь. Нош Валентин Тубылов умойтэмен лыдъяз Удмурт Республикалэн Конституцияз пыртэм кӧня ке ватсанъёсты но воштонъёсты. "Удмуртиысь коммунистъёс" фракциысь депутатъёслэн нимынызы Конституцие пыртэм воштонъёс но ватсанъёсты кун газетъёсы печатлам пумысен вераськиз Александр Бегунов. Сессиез нуиз Кун Кенешлэн Тӧроез Александр Волков. Г. Романов. ШУДООСЫЗЛЫ УЖ СЮРИЗ Ижевск городлэн Думаяз депутатэ кандидат Олег Геннадьевич Красноперов 27 номеро округын улӥсь бырйисьёслы ивортӥз вал ужтэк кылемъёслы кӧня ке ужан интыос усьтон сярысь. Туннэ нуналлы со доры вазиськиз 120 пала ужтэк кылем мурт. Уже кутэмын 18 адями. Жаляса верано, Устинов ёрослэн администрациез пумит луиз Татьяна Барамзина урамын "Ижмолоко" АО-лэсь эшшо одӥг вузкарон интызэ усьтыны. Пичи магазин усьтӥськысал ке, эшшо 6 адямилы уж сюрысал. Вераны кулэ: Олег Красноперовлэн "Иммар" фирмаез валче ужа атаезлэн "Ижмолоко" предприятиеныз. Т. МИРОНОВА. Россиысь Правительство сэреге пуктэмын. Кемалы-а? Кызьы ваньмызлы тодмо ини, Россилэн Президентэз быдэс Правительствоез отставкае келяз. Мугез ваньмызлы валамон кадь - экономика нокызьы но уг улӟы. Нош мургес ке учконо? Калык хозяйство кемалась пашмемын ини. Малы бен В. Черномырдинлэсь командазэ али гинэ уллязы? Эриктэк малпан кылдэ: Президентлэн та шудонэз ӧвӧл меда герӟаськемын вуоно президент быръёнэн? Политологъёс кыкетӥ арзэ ини Президенэ кандидатэн адӟо В. Черномырдинэз. Озьыен, Б. Ельцин, огпол ыбыса, кык кечез васькытӥз. Нырысь ик, калык азьын ассэ чебере поттӥз - урод Правительствоез куштӥз. Кыкетӥез, вуоно тушмонзэ палэнтӥз. Тужгес но валантэм мукетыз. Малы быдэс Правительство уллямын? Борис Немцов Президентлэн кироспиез кадь вал. Ӧз жаля ук. Со дыре ик В. Черномырдин интые кельтэмын С. Кириенко, Б. Немцовлэн адямиез. Сое туж кужмо кивалтӥсь уд шуы, ассэ нокытын но ӧз возьматы на. Юанъёс трос. Валэктон одӥгезлы но ӧвӧл. Мон та нуналъёсы трос калыкен пумиськылӥ но юалляй: кызьы соос учко Правительстволэн кошкемез шоры. Огшоры адямиос пельпумзэс гинэ шымырто: мар, пе, пӧртэмез, кин луоз, улон уз умоя ук. Библиотекаын ужась солэсь но лэчыт вераз: ачиз но Борис Ельцин, пе, мед кошкысал вань компаниеныз ӵош. Библиотекарьлэн верамез монэ мукет малпаськонэ вуттӥз. Компания шуэмез пумысен. Вторнике ӝытазе телевизор пыр вераськиз ваньмылы тодмо Александр Лившиц. Туж ӟеч кылъёсын вераз В. Черномырдин сярысь. Но асьмелэн кемалась ук аспӧртэм сям кылдэмын: азьвыл кивалтӥсез ӟечен буре ваись ачиз ик со интые пуксе. Озьыен, Лившиц? Нош кин меда со сьӧрын? Калыкын кемалась верасько ини: государствоен Б. Ельцин уг кивалты, соин кузёясько котырысьтыз адямиос. Оло, та берло вамыш но лэсьтэмын Татьяна Дьяченколэн яке Валентин Юмашевлэн валэктэмзыя? Ӧйтӧд, ӧйтӧд, туала Россиын ваньмыз валантэм... Ярам, одӥгзэ коть валаны луэ ик. Вань правительство (уллямез) сютэм уз улы. Кинлы ке бадӟым, куд-огезлы туж бадӟым пенсия сётозы. Кинэ ке азьвыл кадь коньдоно уже интыялозы. Государство аслэсьтыз чиновникъёссэ та дырозь туж ик ӝоже ӧз уськытъя на... Мар калык ми асьмеос? Уг но юа, уг но вера, кин но кызьы милемын кивалтоз. Яке соглаш кариськоно кемалась верамен: котькуд калыклы кулэ сыӵе правительство, кыӵе со калыклэн данэз. Асьмелэн кыӵе данмы? Геннадий Коряков. Школа но улон Пытсэт, школа яке шудо корка? Лыдпусъёс верамъя, берло аръёсы нылпиос ӧжытгес вордӥсько. Но со дыре ик таӵе юан но кылдэ: оло таӵе югдур умойлы? Али но ваньзэсты покчиосмес дышетыны, эмъяны, сюдыны-вордыны ум быгатӥське ук. Туннэ Россиын 1,5 миллион пала нылпиос школаосын уг дышетско. Мар кароно соосын? Ляб дышетскись, висись, укылтэмъяськись пиналъёс школаосын азьло аръёсы но возиськылӥзы. Дышетӥсьёс соосын туж курадӟылӥзы ке но, мултэс ӧз карылэ - сыӵе нылпиосты законъя но школаысь улляны уг луы вал. Шат кыӵе ке йыруж лэсьтэмзы понна гинэ. Зэм, кутӥськылӥз на эшшо одӥг амал: шуг-секыт кылдытӥсь быдэ вуымтэосты интыяллязы заводъёслэн ӝыт ужась школаосазы. Тодон-валан сётэм сяна, соосты кыӵе ке ужлы но дышетылӥзы, угось со вакытэ заводъёс ужась киослы ёрмыло на вал. Но улон воштӥськиз. Предприятиос пытсаськон калэ вуизы, соин валче егитъёслэн ужась киоссы но кулэтэм луизы. Ӝыт ужась школаослы ер пум вуиз. Таӵе югдуре сюриз автозаводысь школа но. Но татысь дышетӥсьёс шуг-секытъёсын нюръяськыны быгатӥзы. Школазы ворсаськиз ке но, нылпиосты дышетэмысь ӧз дугдэ: табере ужано луиз, дышетскисьёсты 13 пӧртэм интыосы - школаосы, училищеосы, войсковой часте - люкылыса. Туж секыт йӧтӥз. Дышетӥсьёс ог-огзэс адӟылытэк ужаллязы. Дэмен туж шер люкаськылӥзы. Тазьы курадӟыса ужан бордысь ик малпан кылдӥз огазе карыны ёросысь школаосын ляб дышетскись вань быдэ вуымтэ нылпиосты. Озьы 1991 арын Ижевскысь Устинов ёросын кылдӥз Егитъёсын ужанъя центр (ЦОМ). Кивалтӥсе юнматэмын вал школалэн азьвыл директорез Тамара Анатольевна Новокрещенова. Нырысь араз усьтэмын вал 7-тӥ, 8-тӥ, 9-тӥ быдэн одӥг класс. Дышетӥсьёс урокъёссэс нуылӥзы нимысьтыз дасям программаосъя. Ваньмыз умой кадь радъяськиз. Но кӧня ке улыса малпаськоно луиз 9-тӥ классын дышетскисьёс сярысь. Тросэзлэн арлыдзы но бадӟым ини, куд-огез одӥг классын 2-3 ар пуке, собере колониосысь бертэмъёсыз но вань. Валамон, дышетсконзэс азьланьтыны мылкыд уз ни каре. Озьыен, соосты одно ик кыӵе ке ужъёслы дышетоно. Нош со понна огкыл шедьтоно училищеослэн кивалтӥсьёсынызы. Кин утча, со шедьтэ, шуо калыкын. Туннэ умоесь кусыпъёс тупатэмын ни 1, 31 номеро училищеосын. Табере Егитъёсын ужанъя центрысь нылпиос дышетско токарьлэн, сантехниклэн, слесарьлэн ужезлы. Бадӟым классъёсын дышетскись нылъёс дасясько пӧраськись, секретарь луыны. Мылкыд карисьёсыз дышетско медсестралэн ужезлы. Та ласянь туж умой юртто 4 но 5 номеро нылпи поликлиникаос. ЦОМ - озьы вакчияк но данъяськыса верало центрзы сярысь нылпиос. Кытын дышетскиськод? ЦОМ-ын. Шонерзэ верано ке, дышетскисьёс "школа" кылэз вераськоназы юри уг пыртыло, малы ке шуоно, школаын дышетскем вакытсы ваньзылы сямен сьӧд буёлъёсын тодазы лыктэ. Нош татын соосты нокин уг ултӥя, уг серекъя, дышетӥсьёс соосын эшъёсын сямен верасько. "Валче ужан но ог-огедлы оскон" - таӵе амалъя радъямын центрлэн быдэс ужез. Али татын 464 нылпи дышетске. Мар сярысь вера та лыдпус? Огласянь - кышкатэ. Угось одӥг ёросысь гинэ татчы люкамын шор ёзо школаосын дышетскыны быгатымтэ уно нылпиос. Мукет ласянь ке учконо, оло, шумпотоно - тамында покчиосты сюрес урдсы сюронлэсь дышетӥсьёс ик утьыны быгатӥзы. Школаосын соослэсь кызьы но озьы мозмытскыны тыршысалзы, шуэ Тамара Анатольевна. Я справка сётыса школаысь келясалзы, я кыкетӥ арлы дышетскыны кельтысалзы, я милициен герӟаськысалзы. Но татын ерпечка нылпиос понна воксё мукет луонлыкъёс кылдытэмын. Монэ туж паймытӥзы таӵе лыдпусъёс. Кылем дышетскон арын 100 пала выпускник пӧлысь 12-ез вузъёсы дышетскыны пыриллям, 38-эз - техникумъёсы, 3-ез гинэ училищеосы, отӥосыз ужаны интыяськиллям. Туэ но югдур сыӵегес ик луыны быгатэ: 12 процентэз малпало вузъёсы пырыны, 29 процентэз - техникумъёсы. Зэмзэ но, та лыдпусъёс шумпотто, но со дыре ик паймыто. Кызьы озьы? Школаын дышетскыны быгатӥсьтэм пиналъёслэн институтъёсы но пырыны кужымзы тырме? Маиныз бен бурдъя но ас бордаз кыске Егитъёсын ужанъя центр? Мон сямен, нырысь ик, ваньмыз потэ дышетӥсьёс бордысь. 18 дышетӥсь пӧлысь тросэз ужало автозаводын школа усьтӥськем дырысен ик. Озьыен, ужан стажзы кызё ар пала ини. Соос туж умой валало та нылпиослэсь пуш улонзэс, сямъёссэс. Нылпиос но дышетӥсьёс пӧлын нокыӵе керетонъёс, ог-огедлы пумит луон учыръёс уг кылдыло. Но школаосысь татчы ужаны лыктэм дышетӥсьёс кема уг возисько - кошко. Озьыен, секыт сямо нылпиосын ужан понна но нимысьтыз быгатонлыкъёс кулэ. Центрын ужась дышетӥсьёслэн тодон-валанъёссы но быгатонлыкъёссы сярысь верало таӵе лыдпусъёс но: витезлы дышетӥсьлы сётэмын вылӥ категория, витезлы - нырысетӥ разряд, эшшо витезлы - кыкетӥ разряд. Ваньзылэн ик дышетӥсьёслэн вылӥ образованизы. Быдэс коллективзэс огазея творчество, ӝутскем мылкыдын ужан. Центрлэн коллективез матысь кусыпъёс тупатӥз Москваысь тодосчиосын. Дышетӥсьёс но тодосчиос валче ужало та центрлы нимысьтыз ужан программа кылдытон бордын. Нылпиос доры ялан вуыло юристъёс, наркологъёс, психологъёс, быдэ вуымтэосын ужась инспекторъёс. Трос ужано луэ семьяосын, куддыръя мумы-бубыос, нылпиоссы сярысь, уногес сюлмаськонъёс кылдыто. Сыӵе семьяосысь пиналъёс но пегӟо. Куддыръя тазьы но луылэ. Шуом, пинал дораз уг кӧлы, нош ӵуказеяз дышетскыны лыктэ. Лек кылъёслэсь кышкаса уг, дышетӥсьсэ жалямен. Дышетӥсь ялан сюлмаськыса ке улэ нылпи сярысь, дышетскись но сое соку ик шӧдэ ук. Тани басьтом историен дышетӥсез Василий Михайлович Перевощиковез ик. Урокъёсыз ӧвӧл ке но, пиналъёссэ эскерыны нуналлы быдэ нырысетӥ уроклы ик лыктоз Пыроз классаз, тодоз, кин ӧвӧл но соку ик доразы жингыръяны кутскоз. Туж лякыт адями, кутскем ужзэ пумозяз вуттытэк ноку уз кельты. Василий Михайлович кема аръёс ӵоже ужамын директор луыса. Коллективлэн туала директорез но солэсь ужан амалъёссэс ас ужаз кутыны тырше, адӟем каре. Быдэ вуымтэос понна та дышетскон юрт зэмос шуныт юрт луиз. Учке ай, выль кружокъёс соос понна дунтэк ужало, эмъюмъёс басьтыны дунтэк быгато, йыр ӵышкем понна гинэ но коньдон уг тыро. Училищеосын дышетскись нылпиос но, дунтэк сиськем сяна, стипендиос но страховой коньдон басьто на. Егитъёсын ужанъя центрлы юрттэ Устинов ёрослэн администрациез но. Солэн тыршеменыз центрын ужаны кутскиз буфет. Центр ужаны кутскем бере, ёросысь школаослэн директоръёссы лякытак шокчизы кадь. Амал кылдӥз котькуд кылзӥськисьтэм, ляб дышетскись нылпиез татчы интыяны. Куд- огезлы "люкетӥсь" нылпилэсь тазьы мозмытскыны нырысь-валысь удалтӥз ик. Но Тамара Анатольевналэн лыдъямезъя, ЦОМ - со колония ӧвӧл. Роноен валче тупатӥзы чурыт куронъёс. Табере нылпиез татчы интыян понна, котькуд май толэзе ужа нимысьтыз комиссия. Отысь адямиос сак кылзо нылпиез, солэсь мумы-бубыоссэ класслэсь - кивалтӥсьсэ, школалэсь директорзэ - соку гинэ нылпилы татчы сюрес усьтӥське. Куд-огезлэсь кылоно луэ, укылтэм, азьтэм нылпиосты лек кылын, еэн яке сюлоен гинэ тупатыны луэ шуыса. Татын чылкак мукет сямен лыдъяло: макем укылтэм нылпи, сокем тросгес чидан кулэ дышетӥсьлы. Шудтэм нылпиез йӧнатыны луэ умой мылкыдын но ненег кылъёсын гинэ. Луыло-а бен та коллективын нылпиез тышкаськон, кылзэ юан но кыл кутон учыръёс? Дас ар ӵоже директорын ужатозям нокинлы одӥг выговор гинэ но ӧй на сёты, шуиз Тамара Анатольевна. Нош тодӥськоды-а, марлэсь тужгес но кышкало вылэм татын дышетскись нылпиос? Кыӵе ке умойтэм вамыш лэсьто ке, соку ик куро: "Эн берыктэ монэ школае...". Центрлэсь быгатыса ужамзэ дунъяны луэ таӵе тодметъя но: кабинетъёслэн ӧсъёссы уг ӵогаллясько ке но, лушкаськон учыръёс уг луыло. Тӥни сыӵе шуныт нылпи юрт ужа Ижевсклэн огаз ёросаз. ТАТЬЯНА БАННИКОВА. Туспуктэмъёсыз Г. Юсаевлэн. Удмурт Републикаысь Кун Кенешлэсь дас тямысэтӥ сессизэ люкан сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Удмурт Республикаысь нырысетӥзэ ӧтчам Кун Кенешлэсь дас тямысэтӥ сессизэ люкано 1998 арын 21 апреле Ижевскын. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 24 мартэ. � 610-И Сессия эскероз Удмуртиысь Правительстволэсь 1997 арын ужамез сярысь отчётсэ но Кун Кенешлэн Тӧроезлэсь Удмурт Республикаын югдур сярысь докладзэ. Герд Огъя кариським ке... "Удмурт кенеш" огазеяськонлэн Ижысь ёзэз алигес кылдытэмын ай. Озьы ке но, ёрос кенешъёслэсь ужзэс радъянын солэн кулэлыкез шӧдӥське ни. Правленилэн членъёсыз люкаськылыны тыршо толэзьлы быдэ. Пӧртэм ужрадъёс ортчытъяны луонлыкъёсты эскеро. "Удмурт кенешлэн" городысь ёзэз понна мэрез но Ижысь Думае депутатъёсты быръён нырысетӥез бадӟым экзамен выллем луэ. Та уж выль огазеяськон понна шӧдтэк шорысь ӧй вал. Солы ми дасяськыны ӧдъямы арлэн пумаз ик. Бырйисьёслэсь гожтӥськемъёссэс люкан возьматӥз: тыршиськод ке, котькыӵе мытэм ужез пумаз вуттыны луоно. Ижысь Думае депутатэ кандидат луизы "Удмурт кенешлэн" укмыс адямиосыз: 3 округъя - В. А. Байметов, Удмурт госуниверситетысь проректор, 8 округъя - И. М. Викторов, "Ижмаш" ОАО-ысь 36 отделысьтыз конструкторской бюролэн кивалтӥсез, 10 округъя - В. А. Ныров, юридической институтысь доцент, 11 округъя - З. Б. Петрова, Октябрь ёросысь администрациын ужась, 12 округъя - Е. С. Чикурова, "Городской стиль" газетысь журналист, 14 округъя - А. И. Поткина, "Удмуртмелиоводхоз" управленилэн кивалтӥсезлэн воштӥсез, 21 округъя - О. К. Шилова, "Нылпи сад-школа" центрлэн директорез, 24 округъя - В. Ф. Михайлов, "Удмуртия" ГТРК-ысь журналист, 29 округъя - Е. М. Титова, Гурт хозяйствоя академиысь доцент. Депутатэ кандидатэ ӵектэмын визьмо но туж гажано адямиос. Удмуртлыкмес азинтонын котькудӥз трос кужымзэ сётӥз ни. Вормизы ке, быръем ёзын кивалтонъя соос трос пайдаёзэ лэсьтыны быгатозы. Ӵектэм адямиосмылы шӧдскымон юрттэт сётон понна, "Удмурт кенешлэн" городысь ёзэзлэн уксёез ӧвӧл. Та ужез ортчытыны выриськомы удмуртлык понна сюлмынызы висись адямиос пыр гинэ. Соин ик ми вазиськиськомы Ижысь котькуд удмуртлы, куаразэс округысьтызы удмурт кандидатсы понна мед сётозы шуыса. Быръён нуналэ асьсэлэн участоказы мынытэк медам кыле вылэм. Ӵошен басьтӥськыса гинэ кандидатъёсмы вормыны быгатозы. Та нуналъёсы "Удмурт кенешлэн" городысь ёзаз ӵем вазиськыло мэр быръён понна нюръяськонын кин пала дурбасьтӥськомы шуыса юанэн. Вить кандидатъёсты ик рос-прос эскеримы. Правленилэн членъёсыз шуизы, удмуртъёс куаразэс сётыны кулэ А. И. Салтыков понна. Малы? Тани алигес республикаысьтымы вань газетъёс печатлазы Конституцие Госсоветэн ӵектэм воштонъёс но ватсанъёс. Отын удмуртъёслэн суверенитетсы сярысь пал кыл но поттылэмын ӧвӧл. Озьыен, асьмелэн кунлыкмылы кышкытлык кылдэ. Рос-прос чаклано ке, та проектын удмуртъёслэн туж трос правооссы сюбегомо. Куштэмын асьмемыз утись 116 статьялэн куд-ог пунктъёсыз но. Мэре кандидатъёс пӧлын 1994 арын кутэм Конституциез утён понна трос лэсьтӥз ни А. И. Салтыков. Со тырше сыӵе законъёс кутыны, кудъёсыз удмуртлыкмес, зэмзэ но, утьыны юртто. Со сяна, Анатолий Ивановичлэн бадӟым опытэз ни городысь хозяйствоен кивалтон удысын но. Солэсь верамъёссэ санэ басьто Россиысь городъёслэн кивалтӥсьёссы. Со пыре интыысь аскивалтонэз азинтонъя Россиысь Президентлэн кенешаз. Иж карысь экономикаез азинтонын но А. И. Салтыковлэн луонлыкъёсыз бадӟымесь. Ваньзэ сое лыдэ басьтыса, ми ӧтиськомы Иж карысь удмуртъёсты куаразэс А. И. Салтыков понна сётыны. И. Байметов, "Удмурт кенеш" огазеяськонлэн Ижысь ёзэзлэн тӧроез. ГУРТ НИМЪЁСЛЭН "ВЫЖЫОССЫ" Умяк но отчы усись пичи шуръёс дурын трос гуртъёс сыло: Эшегйыл, Васильево, Айшур, Макан-Пельга, Кармыж, Ефремово, Поляково, Арвазь-Пельга. Кызьы кылдэмын со нимъёс? Макан-Пельгаын ортчем дауръёсы уно вал вордо вылэм. Соосты бигеръёслы вузалляллям. Бигеръёс вал сӥлез "махан" шуо вылэм. Озьы Пельга воршуд ним борды макан кыл будэтӥськем, гуртлэн нимыз Макан-Пельга луэм. Кармыжез удмуртъёс Бызара шуо. Бызара пӧйшур та палан вашкала дыръя уно вылэм, соин ик калык но гуртсэ озьы ик нимам. Ефремово но Васильево гуртъёслэн нимъёссы кылдэмын татын нырысь корка пуктӥсьёслэн нимъёссы бордысь. Эшегйыл, Умякйыл, Айшур, валамон ини, отӥ бызись шуръёсъя нимамын. Та палан тужгес вашкала гурт Арвазь-Пельга. Нырысь люкетэз кылдэмын шурлэн нимызъя, кыкетӥез - воршудлэн нимызъя. 1750 арын гурт дорысь ыргон шедьтӥллям, соин ик артысь Бемыж гуртэ ыргон ӵыжатон завод лэсьтӥллям. 1970 арын Макан-Пельга вӧзын сюрес лэсьтон дыръя, сюйысь тыпы тусь поттӥллям, нош пушказ адями лысьӧм вылэм. Озьыен, Умяк шур котырын туж вашкала дырысен калык улэ. Оло татын, ыргон ӵыжатон завод котырын, город но кылдысал. Но кӧня ке аръёс ужаса, шахтаосты аналтӥзы. Калык верамъя, рудалэн ӟечлыкез, пе, кулэсмиз но соин валче ыргонлэн асдуныз будӥз. Василий ЕГОРОВ, ужысь но ожысь ветеран. Александр Волков - 30 пӧлын "Независимая газета" алигес печатлаз Россия Федерациысь объектъёсысь кивалтӥсьёслэн политика удысын кыӵе инты басьтэмзы сярысь ивор. Соя Удмурт Республикаысь Кун Кенешлэн Тӧроез Александр Волков шедиз Россиысь 30 азьветлӥсьёс пӧлы. Удмурт Республикаысь Кун Кенешлэн пресс-службаез. Инсьӧры вӧлъям бурдъёс Тодмо учёнойлы-физиологлы академиклы В. В. Паринлы вордскемез дырысен 95 ар тырмысал. Медицинаын но, космической биологиын но со дунъяны луонтэм бадӟым уж лэсьтӥз. Сталинизм вакытэ пытсэт сьӧры пуктыса, бурдъёссэ пачкатӥзы вал ке но, асьме правительство кулэезъя дунъяз солэсь ужзэ: В. Парин пусъемын кык Трудовой Горд Знамя но Ленин орденъёсын. Удмуртиын вордскем, будэм та дано учёной сярысь документальной повесть гожтӥз Семен Александрович Самсонов - "Адямилы но бурдъёс кулэ" нимаське книгаез. Писательлэн гожъян-бугыръяськон ужаз сюлмо юрттӥсез вал Мария Михайловна Самсонова. Та статьяеныз со эшшо огпол вера, кыӵе оскымон эш вылэм кузпалэзлы. Василий Парин вордскиз 1903 арын 18 мартэ Сюмси ёросысь Кейлуд гуртын, дышетӥсьёслэн семьяязы. Урам пала учкись куать укноё бадӟым корказэс атайзы Василий Николаевич котыр гуртъёсысь пиналъёсты дышетыны шуыса ӝутӥз вал. Ачиз со вордскиз Сюмсиын сапег вурисьлэн семьяяз. Дышетскиз Малмыжысь училищеын. Собере Казаньын дышетӥсьёсты дасян институтэз быдтыса, ньыль ар школаын ужаз но выльысь та карын ик университетэ пыриз на, медицинской факультетсэ зарни медален быдтӥз, врач, усто хирург луиз. Ижевскысь мединститутын но дышетӥз, ректорлэн научной ужъёсъя воштӥсез вал. Кейлудын дышетӥсьын ужаз кузпалыз но, Нонна Ивановна. Нырысетӥ мировой война вакыт, картэз ожын дыръя, пиналъёсыныз, Васяен но Боряен, та гуртын улӥз. Со нылкышноослэсь высшой курссэс йылпумъяз, кунгож сьӧр кылъёслы дышетӥз. Соин ик Вася но пичи дыръяз ик тодӥз немец кылэз, собере англи, француз кылъёсты но. Кейлуд - Василий Паринлэн пичи дырыз. Ваньмыз дуно, мусо татын: гольык пыд бызьылэм сюресъёс но, чорыган, борыян интыос но, нырысь школаез но, атай юртэз но. Васяен Борис дышетсконзэс азьланьтӥзы Пермьысь университетлэн медициная факультетаз. Соку отын ик ужа ни вал соослэн атайзы. Со луиз профессор, хирургияя лекциос лыдӟылӥз. Кык вынъёс атайзылы ик экзамен но сётылӥзы. Василий Николаевичлэн пиоссэ но туж хирург каремез, вӧзаз султытэмез потэ вал. Борисэз зэмзэ но луиз хирург. Со Ижевскын усьтӥз нырысьсэ вир лэзьян станция. Василий нош атай сюресысьтыз кожиз. Пермьысен профессор Вериго сое ас лабораторияз кыскиз, ӝогак кафедраяз ассистент кариз но дышетскыкуз ик студентъёсын куд-ог занятиосты солы оскылӥз. Ма, Василийлэн соку ик аслаз научной ужез вал ни. Атаез берлогес валаз: - Вася пиезлэн сюлэмыз физиология наука пала берытскемын. Кык вынъёс Паринъёс - Василий но Борис, огез физиолог, мукетыз хирург, докторской ужъёссэс утьыны Москвае ӵош мынӥзы. Вуиз татчы атайзы но, сое президиуме ӧтизы. Кыксылэсь ик пиослэсь диссертациоссэс ушъязы нош атайзэс сюлмысь ӟечкылазы медицина наукалы сокем етӥз пиос будэтэмез понна. Парин вынъёслэн диссертациоссы Москваын научной ужъёс пӧлын тодмо луизы. Василий Васильевичез татчы ик, нырысетӥ медицинской институтэ, директоре кельтӥзы. Со аре ик гужем кутскиз Быдӟым ож. Та кӧшкемыт войнаен сэрен Василий Васильевичлы ужзэ чылкак мукет сямен кутсконо луиз. СССР-ысь Наркомздравлэн нимысьтыз приказэзъя студентъёсты дасяно луиз оже келяны, нош берпум арзэ поттоно дышетскисьёсты тол шорлы враче поттоно вал. Соин ӧз тырмы, мукетыз приказ косӥз мединститутэз Уфае выжтыны, кык мединститутэз огазеяса. Та ужзэ быдэстӥз гинэ но, Василий Паринэз берен Москвае ӧтизы. Сое пуктӥзы наркомлы заместителе. Солы уен- нуналэн ужано луиз, нокыӵе эпидемия-висён медаз вӧлмы шуыса. Асьме государство юнме ӧз данъя сое: войналэн нырысь аръёсаз ик В. В. Паринлы сётӥзы Трудовой Горд Знамя орден. Ма, зэмзэ но, историын нырысез нокыӵе эпидемитэк война вал таиз. Пӧртэм висёнъёс алязы ке но, солы гомак вӧлмыны ож лудын но, калык пӧлын но ӧз сётэ. Парин ожъёсы нимысьтыз бригада лэзьяз - ужамысь дугдэм сюлэмъёсты выльысь улӟытонъя... Туж бадӟым юрттэт сётӥзы солэн сюлэм но вирсэр сярысь ужъёсыз. Кузпалыз Нина Дмитриевна котькыӵе ужезъя опытъёс лэсьтыны азьло ик ваньзэ дасяса юрттылӥз. Соос вуэн но люконтэм кадь матысь эшъёс вал. Василий Васильевичлэн ас темаез - адямилэн сюлэмысьтыз потӥсь вирлэсь пичи котыретсэ эскерон. Та пичи котырет сярысь быдэс дуннеын, мировой литератураын куинь гинэ научной ужъёс, соос но ог-огзылы пумит гожтэмын вал. Парин ас кылзэ верано кариськиз. Соин со турлы опытъёс лэсьтылӥз писэйёс вылын, пичи вирсэр котыретэз котьма ласянь эскериз. Парин тодӥз: та вирлэсь бадӟым но пичи котыретъёстӥ ветлон кусыпсэ герӟаны нимысьтыз рефлекс вань - солэн "командаезъя" ваньмыз ог-огенызы тупа. Наукае та рефлекс пыре аслаз нимыныз: Паринлэн рефлексэз: Война вакыт ик Москваын куинетӥез институт усьтэмын вал. Наркомлэсь заместительзэ В. В. Паринэз отчы физиологияя кафедралы кивалтӥсе каризы. Со нош ик наукалы матын луиз. Вирсэръёс сярысь монографизэ йылпумъяз но книгаен поттӥз. Кӧня ке ужъёссэ Америкаын но печатлазы. Парин валаз, странаямы научной кужымъёсты огазеясь нимысьтыз медицинской академия кулэ шуыса. Ас малпанэныз вазиськиз Бурденко академиклы но мукет бадӟым учёнойёслы. Соос дурбасьтӥзы. Озьы война аръёсы ик кылдӥз Медицина наукаосъя академия. Президентэ бырйизы Бурденкоз, нош академик-секретарь луиз Парин. Со ик вал кунгож сьӧрын Культурая кусыпъёс возёнъя всесоюзной обществоысь секцилэн (ВОКС-лэн) кивалтӥсез. Пумиталляз США-ысь но Англиысь куноосты. Война бере сыӵе кусыпъёс паськытазы. Советской учёнойёс но ӵемгес потаны ӧдъязы мукет странаосы. Тросэныз делегациосын кивалтӥз В. Парин, лыдӟылӥз лекциос. 1946 арын гужем Советской Союзын куноын вал Америкаысь тодосчиос но врачъёс. Василий Васильевич соосыз странаенымы, медициинской азинсконъёсын тодматӥз. Собере асьме медикъёсты ӧтизы США-е. Отчы командировкае келямын вал академик-секретарь В. Парин но: СССР-ысь министерствоослэн нимысьтыз кутэм постановленизы улэ ачиз И. В. Сталин но гожтӥськиз. Парин соку куинь толэзь вал Америкаын, уно городъёсы вуылӥз, тодматскиз отысь медицинской учреждениослэн ужаменызы, трос докладъёс лэсьтылӥз, асьмелэн выль азинсконъёсмы сярысь мадьылӥз. Сое татын печатязы потылэм ужъёсызъя тодо ни вал, соин ик шумпотыса пумиталлязы. В. Парин США-ысь дораз вуиз 1947 арын февраль толэзе. Соку ик кошконо луиз Перме висись атаез доры. Василий Николаевичез ватӥзы... Москвае бертӥз но - кӧня ке нунал ортчыса, Василий Васильевичез ӧтизы Кремле... Вераськон мынӥз Клюевалэн но Роскинлэн раклы пумит усьтэм препаратсы сярысь (фамилизыя "КР" нимаське). ООН-ын та ласянь странамес юнме янгыш каро вал, Советской Союз, пе, выль эмъюм шедьтэм но ватыса возе шуыса. Соин ик Клюева но Роскин СССР-ын поттыны дасям книгазэс-рукописьсэс Парин пыр американской издательствоослы но дэмлазы. Кремле Паринэз ӧтиллям Жданов доры, татын ик вал Сталин но Берия. Соос Паринэз янгыше уськытӥзы шпионажен: кызьы но малы, пе, рукопись США-е шедиз асьме партилэн но правительстволэн кивалтӥсьёсыз тодматскемлэсь азьло. Собере ик Василий Васильевичез нуыса кошкизы - нокин валаса ӧз вуы малызэ но кытчызэ.Ӵуказеяз вуыса эшшо бугыръяськизы, Паринлэсь кабинетсэ но одӥг комнатазэс сургучо печатен ворсаса кельтӥзы. Нина Дмитриевнаен вераськись ӧй вал, солэн сюлэмыз ӝуаз: маин янгыш меда кузпалыз, кытчы мыноно, ма кароно? Гожъяз со Бериялы но, мукетызлы но. Кылэм-адӟем ӧз карылэ. В. В. Паринэз нокыӵе судтэк 25 арлы келязы, ваньбурзэ талазы, семьяезлы одӥг комнатае гинэ улон инты сётӥзы. (Кылемез вань на.) М. САМСОНОВА. Василий Николаевич Парин кузпалэныз Нонна Ивановнаен, пиосыныз Васяен но Борисэн. КИН КИНЭ АЗЬПАЛТОЗ? Удмуртилэн шорсюлмыныз кивалтыны мылкыд карисез 5 мурт. Кинэ быръёз калык? Удмурт университетысь социальной эскеронъёс нуонъя центр ивортэмъя, юалляськем адямиос пӧлысь данакез куаразэс сётыны дасясько Анатолий Салтыков понна. Кыкетӥ интыын - Валерий Загайнов, куинетӥ - Андрей Солуянов. Юамъёс пӧлысь 34 процентэз оске: 12 апреле ортчоно быръёнъёсын одно ик вормоз городлэн туала мэрез. Загайновлэн но Солуяновлэн та интые пуксёнзылы оске 17 процентэз. Быръён нуналозь кыле 15 нунал. Кин тодэ, кинлэн ке мылкыдыз но, оло, воштӥськоз на. Л. МЕДВЕДЕВА. Кин луоз мэр? Ӝыны толэзь сяна ӧз кыльы ни городысьтымы думае депутатъёс но Ижевсклы мэр быръёнозь. Али котькудӥз малпаське, дыр, кин луоз столицамылэн кузёез? Азьвылэз ик-а кылёз, мукетыз-а вормоз? Али газетъёс ӵемысь печатлало, кӧня процентэз бырйисьёс соиз яке таиз кандидат понна куаразэс сётыны медо. Кытӥяз азьпала потэ Салтыков, кытӥяз - Солуянов, кытӥяз - куинетӥез. Но, мон сямен, асьмелы, бырйисьёслы, сокем тунаськыса пуконо ӧвӧл. Котькудӥзлэсь кандидатлэсь кызьы ужамзэ котыр ласянь дунъяно. Лыдэ басьтоно, дыр, кызьы соос кивалтӥсе потӥзы, чылкытэсь-а киоссы, гажало-а огшоры муртэ? Одно ик санэ басьтоно, вылды, узыресь-а, асьм кадь начаресь-а соос? Укыр узыр мурт, валамон ини, огшоры калыклэсь кулэяськонъёссэ санэ басьтоз быръён нуналозь гинэ. Отӥяз вунэтоз. Вылӥысенгес учкылоз шорамы. Мон кадь арлыдоос котыр ласянь лӧтсамы ини вуоно мэръёслэсь сямъёссэс. Вужезлэсь но кызьы тыршемзэ дунъяськом. А. Салтыковлэн котьмаиз вань ини, шуо. Выльзэ ке, пе, мэре бырйим, аслыз бадӟым юрт, гараж но мукетсэ пуктон сярысь сюлмаськоз. Вылаз ик алиез кузёмы пенсионеръёслы огъя транспортын дунтэк ветлыны луонлык кылдытӥз. Вылез тӧро тае лыдэ басьтоз-а? Тӥни ваньзэ сое чакласа, тодмо эшъёсы А. Салтыковлы дурбасьтыны медо. Оло мон но со понна куараме што ай. Только алиез кузёмы золгес мед сюлмаськоз вылэм городмес чылкыт возён, культураез азинтон сярысь. Удмурт драмтеатрлы юртмы но татчыозь пуктымтэ. Туалаез ке мэрмы кылиз, злгес мед юрттоз начар емьяослы, нылпиослы, пересьёслы, медаз лэзьы ни квартира понна дунъёсы олокыӵе ялан будэтыны. Йыруж лэсьтӥсьёслы пумит но чутрак мед султысал. А. ИВАНОВА, Ижкарысь пенсионер. Кизнеръёс дорын Алигес лымшор районын ортчиз Куӟебай Гердлы сӥзем ужрад. Та ӝытэ ӧтемын вал Киров областьын улӥсь удмуртъёс но. Зал тыр люкаськемъёсты шулдыртӥзы Кармыж шор ёзо школаын дышетскисьёс. Кылбуръёсын но кырӟанъёсын дасям сузьетсы тросэзлэсь сюлэмзэс вырӟытӥзы. Малпасько, азьланяз таӵе ужрадъёс ӵемгес ортчылозы, палэнысь удмуртъёсын кусыпъёсмы юнмалозы шуыса. С. Васильев. Безменшур школа. "Герд" КИЗИЛИ ВӦЗЫ - КИЗИЛИ Музон палъёсын ӵошатыса, Можга ёросысь кивалтӥсьёс, клубъёсын но библиотекаосын ужасьёс, дышетӥсьёс Куӟебай Гердлэн вордскемез дырысен 100 ар тырмонэн герӟаськем ужрадъёссэс ортчытыны шӧдскымон паськыт шоналскизы. Огкутскемен, пе, калыкен, нылпиосын пумиськылоно кык нунал ӵоже. Тросгес гуртъёсы, школаосы вуылоно. - Кужыммы тырмоз-а? - юась луиз. - Дэмен ке басьтӥським, одно пӧрмытом,- шуизы культура отделын.- Куӟебай Герд, дышетскемез бере, нырысь ик асьме районамы ужаны кутскиз. Озьыен, асьмелы чырткемгес кариськыны кулэ. - Писательёслэн огазеяськоназы вазиськоно,- дэмлазы районысь библиотекаын ужасьёс.- Асьмелэсьёссэ но гожъясьёсмес "кытком", Ижевскысь но ӧтём. Ма, бускельёсмылэн, алнашъёслэн но, писательёссы золэсь... Ижысь писательёс трос кузя лыктыны ӧз быгатэ. К. Герд сярысь гожъясьёс Фома Ермаков но Николай Кузнецов ӵапак со нуналэ ӧтемын вал Як.-Бодьяе, кӧняез ке потӥзы Шаркан ёросысь Быги гуртэ (отын усьтӥськиз калык театръёслэн фестивальзы). Куд-ог писательёс К. Гердлэн юбилееныз валче ик дасясько Татарстанэ кошкыны. Котькуд гожъясьмес коть шори люк! Куӟебай Гердлэн кужымез ик юрттӥз, дыр, шуг-секытысь потыны. Можгаослэн чаклам пумиськонъёссы ваньмыз умой ортчизы, шуыны яра. Мыным шуд усиз Бадӟым Учаысь школае ветлыны. Ӵапак татын ужан удыссэ мытӥз вал егит Чайников. Кивалтӥз школаен. Учаос, дано дышетӥсьсылы сӥзьыса, библиотекаязы но, школаысьтызы музеязы но узыр материалъёс люкаллям. Зэм, Гердлэн школаезлэн бервылыз но ӧвӧл ни. Но мон ас поннам йыбырттӥ выль школаязы, гадь тырам кысканы тырши дано землякмылэн лэчыт визьмыныз, мылкыдыныз, тодонъёсыныз татын куке но напчытэм омырез. Туж чылкытэсь, йӧноесь, лачмытэсь пиналъёс дышетско али отын. Шып кылзӥзы ваньзэ верамме. Валэктӥ, малы куамын одӥг ар талэсь азьло гожтоно луи К. Герд сярысь бадӟым материал. Со сярысь статья потӥз туэ январе "Инвожо" журналын. Дырмы трос ик ӧй вал ке но, библиотекарь З. Н. Небросова, школаысь музейлэн кузёез А. К. Изместьева но удмурт кыллы дышетӥсьсы А. П. Бакаева пыр-поч тодматӥзы улэм-вылэменызы. Возьматӥзы удмурт литературая кабинетсэс. Туж яраз. Шӧдӥ: удмуртъёс гинэ ӧвӧл, музон калыкъёс но Куӟебай Гердэз гажало, ярато. Палэнысь татчы вуэм воргорон А. Николайченко лэсьтэм тодмо писательлэсь, дышетӥсьлэсь портретсэ. Ӵуж италмас но бышкись ез пыр шорамы учке визьмо Гердмы. Матысь дыре школаысь музейзы узырмоз на эшшо одӥг документэн. Писательёслэн огазеяськонзы юрттэмен, алигес потӥз К. Гердлы сӥзем туж ӟеч календарь. Сое одно ик кузьмалозы учаослы. Ваёзы на, вылды, мукет материалъёс но. Дано землякмы сярысь пӧртэм тодэ ваёнъёсты люказ писатель Анатолий Комаров. Очеркъёсыз но, повестьёсыз но потӥзы. Вавожын со редактор но вал. Трос котыръяськемын Можга, Алнаш, музон ёросъёстӥ. Литературамылэсь историзэ но, арлыдо адямиосты но ӟеч тодэ. Ӵукна со пумиськыны ветлӥз Александрово школае но библиотекае. Отысь бертыса, К. Гердлэн творчествоез, улэм-вылэмез сярысь пыр-поч вераським педучилищеын. Нош ӝытазе Ижысь лыктэм писательёс ветлӥзы Ӟуч Сюгаилысь но Бадӟым Сибыысь лыдӟисьёсын пумиськыны. Даурез герӟась Гердэз данъяны Сибыысь культура юртазы люкаськемын вал мӧйыос но, егитъёс но, пичиос но. Библиотекарьёс, клубын ужасьёс, дышетӥсьёс мылысь-кыдысь дасяськиллям бадӟым ӝытлы. Крезьгуръёс но, кылбуръёс но жин-жин чузъяськизы татын. Зэмос артистъёс кадь кырӟало арлыдо нылкышноос. Сибы нёжалъёсысь сяськаос выллем адӟисько. Туж яразы "Чингыли" ансамбльысь пиналъёс, соослэсь, оло, уката но мусоесь покчиоссы! Мӧйыослэн, пиналъёслэн, писательёслэн верамъёссыя, Гердмылэн тусбуез кизили кадь усьтӥськиз. Ньылез писательёс пыриськизы та ӝытэ. Сибы калыкез тужгес но шумпоттӥзы Алнашысь кылбурчиос Иосиф Иванов но Иосиф Бобров. Куӟебай Гердэз данъяса, соос сибыос азьын туж вылӥе ӝутӥзы Ашальчи Окиез но. Ӵапак Герд угось юрттӥз егит нылашлэсь жингрес кылбуръёссэ калык пӧлы вӧлмытыны. Алнашысь дуно куноос сибыосты тодматӥзы, кызьы ортчозы Ашальчи Окилэн вордскемез дырысен 100 ар тырмонлы сӥзем нуналъёс. Нош Иосиф Бобров лыдӟиз Ашальчи Оки сярысь поэмаысьтыз люкетсэ. Иосиф Иванов, кӧня ке кылбуръёссэ лыдӟыса, Б. Сибыысь библиотекалы кузьмаз огзэ книгазэ. Шумпотӥ: Алнашысь кылбурчиос лыктэмен, бадӟым вераськон каньылля выжиз Ашальчи Оки вылэ но. Озьы вӧл-вӧл культура юртын ӝуатскизы кадь асьме калыкмылэн кык яркытэсь кизилиоссы - Герд но Оки. Соос весь югдыто асьмеды, соосты нокызьы но ог- огзылэсь люкыны уг луы. Та бадӟым ӝыт тросэзлэсь мылкыдзэ бугыртӥз, лэся. Сцена вылэ огез но мукетыз пото. Туж дуно ӵектонъёссэ вераз Б. Сибыысь музейлэн кивалтӥсез А. А. Юшков. - Мон,- шуэ со,- одӥг тодмое киысь адӟылӥ Ашальчи Окилэсь пинал дырысьтыз туж чебер тусбуйзэ. Кыӵе фотограф сое лэсьтэм - уг тодӥськы, нош кылбурчилэн Алнашысь музеяз та туспуктэм одно ик луыны кулэ. А то асьмелы али ӵем возьматъяло мӧйымем ымныро Окимес гинэ... Туж шонер дэмла шаерчи. Куӟебай Гердэн но Ашальчи Окиен герӟаськем туспуктэмъёсты, тодэ ваёнъёсты, гожтэтъёсты, материалъёсты кытын гинэ вань на - ваньзэ огазе люкано-бичано вылэм. Нош Ашальчилэн мӧйы вакытысьтыз туспуктэм сярысь ке верано, Б. Сибыысь одӥгез воргорон, клубысь потыкумы, мыным шуиз: - Окилэн кылбуръёсыз сямен ик ымнырысьтыз муресь кисыриосыз но мыным туж чебересь пото. Со пужыосы пуксьыса кылемын, дыр, гожъяны лэзьымтэ трос чуръёсыз... Малпаське ай, макем зол верамын! Кыӵе яратэ Ашальчиез огшоры калык! Уноез юн жаляло, ас вакытаз солы ӟырдыт сюлэмзэ вӧл-вӧл усьтыны ӧз лэзе, юнме шорысь ултӥязы-зӥбизы шуыса. Пусйыны кулэ: сибыос пумиськонэз ортчытыны усто сценарий дасяллям. К. Герд сярысь берло потэм книгаосын, литератураен калыкез пыр-поч тодматӥз дышетӥсь О. А. Михайлова. Писательёслэсь кык нунал ӵоже пумиськонъёссэс, кенешонъёссэс радъяны ӟеч юрттӥзы районысь библиотекарьёс Н. Д. Бурина, Т. В. Иванова, С. А. Сидорова но соослэн кивалтӥсьсы Н. П. Загуменнова. Кыказ пумиськонъёсы ветлӥз Кун премилэн лауреатэз Анатолий Леонтьев. Огкылын вераса, писательёс вуылӥзы тямыс гуртъёсы, школаосы, нылпи юртъёсы. Мыным туж яразы М. Сюгаысь пиналъёс. Татын азьло ужаз огез бадӟым кивалтӥсьмы П. Н. Вершинин. Шонерзэ ке верано, таяз учыре огполскын кык пумиськон ортчытытэк ӧйлась. Можга ёросын К. Гердлы сӥзем нуналъёс возьматӥзы: лыдӟисьёс котьку витё писательёсмес. Соослэн емгес кенешемзы потэ улэп гожъясьёсынымы, ӟечгес тодэмзы потэ асьме литературамес, выль книгаосмес. Жаляса верано угось: табере удмурт авторъёслэн гожъямъёссы гуртъёсысь, школаосысь библиотекаосы туж но туж ичи вуо. Начармеммес шӧдоно-адӟоно мукет ласянь но: К. Гердлэн вордскемез дырысен 100 ар тырмонэн валче калыклы возьматыны ӝажыосы туж ӧжыт пуктылэмын берло потэм книгаос, журналъёсы, газетъёсы печатлам статьяос, очеркъёс. Малы ке чылкак одӥг азьысь гинэ адӟи Александр Шкляевлэсь "Ӵашъем нимъёс" книгазэ но. Куд-ог материалъёсты, оло, йылэтоно вылэм ксероксэн но? Туж пайми мукетызлы но: школаосын малы ке куро ӟуч кылын вераськыны. Удмуртсэ, пе, урод валаськом. Озьы вал Бадӟым Учаын но, музон интыосын но. К. Герд азьвыл ужам школаяз туннэ выльысь берытскысал ке, туж ӝожомысал ук, ваньмес "пыжысал". Ма, уг луы шат факультатив амалэн коть удмурт кылэз дышетыны котькуд школаын? Кин люкетэ? Паймисько! "Дэменчиос", "Удмурт кенеше" огазеяськемъёс пыр та ужпумез вырӟытӥм ни вал кадь ук куд-ог ӟучомем сэрегъёсын но. Можга ёросысь калыкез дышетон удысэн кивалтӥсьёс та пумысен азьланяз малпаськозы, вылды. Вуоно арын ӝот-ӝотгес басьтӥськоно вордскем кылмы борды. Таин валче кык кыл коть верам потэ педучилище пумысен но. Тодэмея, татын но берлосьёсаз кык пумиськонъёсын калык ӧжыт люкамын вал. Нош таяз учыре кенешон туж шуныт ортчиз. Жаль писательёслэн дырзы. Соос ужлы ёрмыса уг ветло. Шуак, малпамтэ шорысь уг пырало. Кытӥяз расписаниез но ӧжытак воштыны, тупатыны луылэ, дыр, ук? Ньыльдон-витьтон минутлы коть. Вылаз ик, та педучилищелэн азьвыл историез туж юн герӟаськемын асьме литератураен. Трос писатель татын будэмын. Сокем ӟеч ошмес син медаз куасьмы. Кирилл ЛОМАГИН. Чуръёс, чуръёс 1972 арын мыным шуд усиз вал гурт хозяйствоысь но сиён-юон дасян удысысь профсоюзъёслэн ИХ съездазы делегат луыны. Отын соку вераськон мынӥз гуртын но городын улонлэсь пӧртэмлыкъёссэ быдтон сярысь. Нош умоям интые, улонмы малы ке но мыддорин берытскыса кошкиз. Тани милям колхозмы нимаське "Союз". Вань ужъёсты огъя, ӵош лэсьтыса, бусьтыр улоно кадь. Нош ужасьёсмы август толэзьлы уждун ӧз басьтэ на. Гидъёс скалъёс вылэ куашкалозы ни, гидкуаос чукин-бекин кырыжамынэсь. Колхозмы бырон калэ вуэмын. Шуизы вал, черк, пе, лэсьтоно, Инмарлы оскыса улон ужлы гинэ юрттоз. Черк но ӧз пуктӥськы, солы висъям коньдон но ышиз-быриз. Калык пӧлы вӧлмемын ог-огдэ валамтэос, лекъяськон, ужаммы но уг поты. А. МИРОНОВА. Кез районысь Тортым село. Ачиз но - удмурт батыр "Милям историез тазьы суредасьёсмы ӧвӧл на". Таӵе вылэ ӝутӥсь кылъёсты кылоно луиз тодмо художникмылы Валентин Белыхлэн Чуваш национальной музейын выставкаез усьтӥськыку. "Асьмелэн трос огъяез, огазеясез. Чувашъёсты христианствое выжтон ог сю арлы вазьгес ортчиз. Языческой вӧсьёсмы, сям-нергеосмы но огвыллемесь. Мынам сое шӧдытэме потӥз", - шуиз ачиз В. Белых. Нош выставкае со ваем "Сопал дуннее кошкон", "Вумурт", "Тӧлпери", "Курбон сётон" но мукет ужъёссэ. Валентин чебер вашкала дӥсен ("Алангасарлэн вужерыз" киноысь) вӧсяськон- куриськон ортчытӥз. Чувашъёс туж синмаськизы. "Тынад кузпалыд - удмурт батыр", - таӵе кылъёсты кылоно луиз В. Белыхлэн чуваш кышноез но, Альбина Николаевна. Т. Николаева. КИН УЗЫРМЕ СӤЯМ ВУ ЧОТЫН? Алигес газетъёсын печатламын вал жилищно-коммунальной удысын воштӥськонъёс ортчытонъя программалэн пуштросэз. Соин тодматскыса, адямиос кышкатскизы но, вылды: вить ар ортчыса, квартира понна вань тыронъёс адямиослэн пельпумъёссы вылэ усёзы. Со дырозь но дунъёс ялан йылозы. Туннэ квартиралы тыронъёслэсь 70 процентсэ ас вылаз басьтэ государство. Озьыен, али куинь комнатаен улоннимы понна 150 сюрс манет ке тыриськом, азьланяз кисыысьтымы 500 сюрс манет пала поттоно луомы. Чаклам воштӥськонъёс калыклэн улонэзлы пумит ке мыно, малы соку соос кулэ? Та пумысен малпанъёссэ вераны курим Кун Думалэсь депутатсэ, Правительстволэн ЖКХ удысын выльдӥськонэз ортчытонъя комиссиысьтыз адямиез Андрей Владимирович СОЛУЯНОВЕЗ. - Мон оскисько, - шуиз со,- та программа адямиослэсь улонзэс быдэсак сямен воштоз. - Коньдон пуйыоссэс бушатыса-а? - Озьы шуимы ке, со шонер уз луы. Вераськон нырысь ик мынэ юрттэтъёсты (услугаосты) ӟечгес радъян-быдэсъян сярысь. Вуэз, тылэз, шунытэз тус-тас каремысь дугдоно. Туннэ соослы дунъёс пукто монополистъёс. Но озьы луыны кулэ ӧвӧл. Санкт- Петербургын эскеремын вал "Электросетьлэн" но "Водоканаллэн" ужамзы. Мар со возьматӥз? Кылсярысь, вулы, тыллы дунъёс, асдунзы сярысь, ньыльдон поллы ӝутэмын вылэм. Ортчизы ни кезьыт но кузь тол нуналъёс. Тодӥсько, городын улӥсьёс толалтэ ас квартираосазы кынмысагес улӥзы. - Зэм, кезьытъёслэсь гуръёсын утиськылӥм... - Нош со дыре ик "Удмуртэнерго" тӥлесьтыд коньдондэс ӟеч шуныт сётэм понна кадь ик воксё кепыратэк басьтылӥз. Шуныт сётыкузы, монополистъёс учко ТЭЦ-ын пуктэм счётчик шоры гинэ, кудӥз возьматэ кыӵе температураен ву кошке гумыостӥ. Соя ик тупатӥське пӧсь вулэн дуныз. Но квартираозь вуытозь, ву сӥя ук: гумыос я пасяськемын, я сыномемын луо. Тӥни озьы куд-огез доры пӧсь ву няськаса вуэ ни. Нош пӧсь ву понна дунъёс уг воштӥсько - монополистъёсты со уг сюлмаськыты. Озьыен, вуэн герӟаськем ыштонъёсты асьмеос быдэсак ас кисыысьтымы тыриськомы. - Но, мынам тодэмея, кутэмын закон, кудӥзъя эстӥськон понна дунэз 25 процентлы кулэстыны луэ, пӧсь ву йӧскадь уг ке шунты? - Сыӵе закон вань. Но "Удмуртэнерголы" пумит мыныны туж секыт, счётчиклэн возьматэмезъя, со вералоз, квартираосы пӧсь ву кулэезъя сётэмын шуыса. Сыӵе югдурысь потон понна, одӥг амал гинэ вань: шуныт сётӥсь ёзъёсы (ЦТП), кудъёсыз кӧня ке коркаос понна кыл куто, пуктоно нимаз ужась счётчик. Со ик чакласа возёз, кӧня но кыӵе ву бызе котькуд корка. Со дыре ик сыӵе счётчикъёс эскерыса возёзы ТЭЦ-лэсь ужамзэ но. Кезьыт нуналъёсы ТЭЦ нормалэсь ӧжытгес ке шуныт сётэ, солы со штрафъёс тупатыны быгатоз. - Кӧня бен дуныз сыӵе "визьмо" счётчиклэн? - Вуж дунын вераса, 200 миллион манет. Ижевскын 100 пала ЦТП-ос ужало. Городлэн бюджетэзлы (отчы туэ 1,7 триллион манет коньдон люкаськыны кулэ) сыӵе счётчикъёсты пуктылон сокем дуно уз усьы. Вакчи дыр куспын асдунзэс быдэсак берыктозы. Лыдъямын, котькудӥз счётчик толэзяз 250 миллион манет пайда вае шуыса. Озьыен, сю счётчикъёс одӥг толэзь ӵоже гинэ городмылы 25 миллиард манет барыш ваёзы. - Малы бен соку соос та дырозь уже уг кутӥсько? - Специалистъёс со приборъёсты 1992-тӥ арын ик дасязы. Мынам малпамея, городлэн кивалтӥсьёсыз ноку но пыр-поч ӧз на лыдъяллялэ солэсь пайдалыксэ - монополистъёсын кусыпъёссэс сӧремзы уг поты, вылды. Лякытгес сюрес вань ук: ЖКХ-ез возён понна Москваысь дотациос курыны. Собере со коньдонэз берыктон вылысь, тыллы, пӧсь вулы дунъёс будэтыны. Адямиос чидалозы. Таӵе сюрестӥ мыныса, ЖКХ удысэз выльдонъя чаклам ӟеч малпанъёсты но куашкатыны луэ. - Федеральной законъя ЖКХ-лы чаклам дотациос туэ кулэстэмын ини. Ижевсклэн администрациез коммунальной тыронъёслэсь ог люкетсэ, 20 процентсэ, ас вылаз басьтӥз. Кызьы тӥ учкиськоды сыӵе вамыш шоры? - Со - калыклэн мылкыдыныз шудон, калыкез ас палаз карыны турттон. Но меӵак верано ке, городлэн сомында коньдонэз но ӧвӧл. Соин ик квартира понна тыронъёслэсь кӧня ке люкетсэ ас вылаз басьтон понна городын улӥсьёслэн "ӟепазы пырытэк" нокызьы уз луы. Озьыен, пенсиосты, пособиосты но уждунэз ӝегатон учыръёс азьланяз но луозы. - Шуом, пуктыломы счётчикъёс, монополистъёсын но огкыл шедьтомы - ваньмыз умой радъяськоз. Но со приборъёсын ужасьёс ик собере асьмелы кыӵе ке выль куронъёс уз-а пуктэ? Поттэм коньдонэнызы люкиськемзы потоз-а? - Зэм, куд-ог городъёсын ужало ни нимаз компаниос. Соос ас коньдонэнызы пуктыло ЦТП-ос, быдэсак узырмыто соосты туала куронъёслы тупась приборъёсын. Нош поттэм коньдонысьтызы асьсэлы кельто 20 процентсэ гинэ. Таӵе ужан амал городын улӥсьёслы ӟечен гинэ берытске - квартираосын шуныт, кранысь котьку но пӧсь ву бызе. - Озьыен, жилищно-коммунальной хозяйствоын чаклам воштӥськонъёслэсь кышкано ӧвӧл? - Реформаез сьӧдмало соос, кинъёс дышемын мурт чотын улыны, кинъёс ас машинаоссэс, бадӟым квартираоссэс, телефонъёссэс возьыку но тыронъёссэс берыкто ас ужан организациоссы чотын. Огшоры улӥсьёслы реформа кышкыт ӧвӧл. Е. ПОСАДОВА. Берекет Милям дэмланъёсмы ВОЖ НУНЫЕН АНАЙЁСЛЫ Нылпиды бӧрдэ, сое ялан чакланы дырды ӧвӧл. Ымаз ноны (пустышка) понӥськоды но, нуныды буйга. Малы? Отын номыриз ке но ӧвӧл, угось, солэн дышем сямызъя, ымдуръёсыз выро. Нуны огдырлы буйга, ваньмыз сярысь вунэтэ. Тӥни самой соин ик уг яра тырттэм ноныез ялан уже кутыны, ӧвӧлтэм маин ке пиналэз буйгатыны. Пустышкаез нонӥсь маке лябгес будэ, котырысьтыз арбериосты уг адӟы, шудыны уггес тыршы, югдаз усем кадь улэ. Сыӵе пиналлэн пиньёсыз но умойтэмгес будо. Эскеронъёс возьмато: пустышка нонӥсь нуны, мукетъёсыныз ӵошатыса, вераськыны но бергес кутске. Озьыен, тырттэм нонылэн номыр ласянь но пайдаез ӧвӧл, пиналлы чырткем, таза будыны гинэ люкетэ. Посудаысь сиёнэз но нонтытэк, ноны пыр сюдытэк, умойгес луоз. Кизер ӝукез, яблок яке бакча сиён пунемез (пюре) нунылы сюдоно пичи пуньыен. Татын пиналлы озьы сиськыны номыр шугез ӧвӧл, асьтэлы керӟегъяськыны, дыртыны гинэ кулэ ӧвӧл. Со понна "емышез" луоз азьпалан: пиналды вазьгес вераськыны кутскоз, шуг сётӥськись куараосты шонер вераны быгатоз. Л. ВАСИЛЬЕВА. Куӟебай Гердлэн вордскемез дырысен - 100 ар Вало ӧрысь кож Сцена вылын кырӟасьлэн куараез быдэс залэ шуккиське. Я скрипач, я арганчи шулдырто кылзӥсьёсын тырмем клубез. Троссэ малпаськытэ егит воргоронлэн кырӟамез... ...Вавожын мыно Куӟебай Гердлы сӥзем лыдӟонъёс. Таӵе пумиськон нырысетӥез вал. Татчы пыриськизы тодосчиос, кылбур гожъясьёс, Кузьма Павлович Чайниковез тодӥсь адямиос. Соос гинэ-а? Лыктэмын Куӟебай Гердлэн чуръёсызъя кылдытэм крезьгуръёсты чирдӥсьёс. Тани сцена вылэ кияз скрипкаен потӥз егит пи. Вӧзам пукись воргорон сое тодэ, вылды. Эшезлы лушкемак сипыртэ: "Ӵужъялысь со пи, консерваториез быдтэмын. Тани, шудыны кутскиз ке, астэ кутэмед уз луы - чирдыны ӧдъялод. Кепыралод шат, уд дӥсьты".. Скрипачез тодӥсь муртлэн эшез мар шуыны ӧз тоды. Кырӟаны кутсконэз сярысь веран гинэ паймытӥз, лэся: пальпотӥсь синъёссэ ватӥз. Со куспын скрипка сётӥз ини аслэсьтыз куаразэ. - Кылӥськоды-а, кырӟанлэсь кылъёссэ ик вера кадь крезь: Вало но возь вылын кык чебересь льӧмпу сад. Ойдолэ, эшъёсы, со сад улэ шудыны. Озьы ӧвӧл-а? - юаз бускеле эшезлэсь. - Ма, кин уз вала тодмо гурез? Кисьтэ ук, кисьтэ скрипачед. Ошмес синмысь потэм дун ву кадь ӧръяське шудэмез, - вазиз пумитаз концертэз кылзыны лыктэм мурт. - Ӧз ай, ӧз, Вавож музъем ӧз куанермы на тодӥсь, быгатӥсь адямиос ласянь. Выль пушъетъёс ӝужало пӧламы, - куаразэ ватыны турттыса сямен сипыртэ бускеле. Малы озьы вераз со - ӧй юа. Куӟебай Гердлы сӥзем ӝытэ люкаськемын бере, со сярысь малпаз, дыр, Вавожын улӥсь. - Нош Кузьма Павловичез тодӥсьёс вань на меда? - огкутскемен юасько ини вӧзам пукисьлэсь. - Кызьы уз луэ - вань. Трос ӧвӧл ке но, кӧня ке муртэ шедьтыны луоз. Тани кыкетӥ кресло вылын ик арлыдо кышномурт пуке. Со вералоз тодэмзэ но, адӟемзэ но. - Кин бен со? - Малиновка гуртысь Семонлэн нылыз, Тамара, - шуиз ини бускеле. - Татын, Вало вылын, вордскемын. Гуртын уг улы ке но, палъёсызлэсь мӧзме, шӧдске. Ӧр тыраз кошкись шурлэсь но, вань буёлъёсын шобырскем возьёслэсь но уг ӵыды. Тамара Семёновнаен со ӝытэ вераськыны ӧм быгатэ, ӵуказеяз пумиськыны кенешим. - Кузьма Павловичлэн яратоно возь вылаз, шур дурын, тодэмме мадё, - шуиз Тамара. *** Возь вылтӥ, шур дуртӥ кемагес ветлӥ ке но, Тамара Семёновнаен пумиськи. Дыртытэк мынӥськомы Вало ӧр кузя. - Вераны кыл сётӥ бере, могаса уг улы ни, - кутскиз со. - Мон пичигес на вал, улон-вылонлэсь кызьы бергамзэ шонер дунъяны быгатӥ, оло, ӧй. Гуртамы берлозэ вуылыкуз но Кузьма Павлович Вало дуре васьказ. Мылкыдыз малы ке сураськемын кадь потӥз. Юаны нодэ ӧз тырмы. Табере валасько ини: секыт куректонэз, сюлмаськонэз вылэм. Котькуд вамышсэ эскерыны кутскиллям вылэм ини: ма вералоз, кинэн пумиськоз, ӵошкыт сюрес вылын ӵемтыны уз шедьты-а?.. Тани вуимы ми Вало ӧрысь кож дуре. - Татчы ватэмын зарнилэсь, азвесьлэсь дуно ваньбур, - могаз кышномурт. Кӧня ке сылэммы бере гинэ мадьыны ӧдъяз. ...Юзмыт уе кынмем лымы сюрес дӧдьы сюлъёс улын куажыртэ. Тулыс ини. Липет вылысь нуназе шорын виям ву канаваосы ӧръяське, нош уин тан-тан кынтылэ на. - Но-о, я бен ӝоггес вамышты, му ньылон! Оло, кукъёстэ бодыосын воштӥд - вырӟытъямед но уг поты ни?! - каллен гонӟыртӥсь валэз каллен мынэ кадь потӥз Лукоянлы. Ачиз пумен мышказ кылись сюресэз я лымы улын кыллись Вало возез синйылтэ. - Дӧдьы нырысь турын вылэ пуксьы. Марысь мар ке, нокинлэн тодаз уз лыкты, мар отчы ватэмын, - дэмла Лукоян вӧзаз пукись ныллы. - Тодӥськод ма нуэммес: ачид валаны кулэ. Семонлэн нылыз, укмысэтӥ аресаз ветлӥсь Тамара, азьпалагес пуксиз. Со ваньзэ валаса уг вутты на, малы Лукоян дыртэ, я сопала, я тапала учкылэ. Лушкаськись мурт сямен эскериське: дӧдьы пытьыез но медам кыльы кадь. Лукоян номыр ӧз лушка - Тамара тодэ. Шыкысын кыллись книгаосты гинэ дӧдьы ныре тыриз но вылазы сеникын толъем турынэз понӥз. Э, кыӵе книгаос отын! Вылазы зарни, азвесь букваос печатламын. Таӵеоссэ нылоклэн адӟылэмез но ӧвӧл. Лукоян гинэ валэктыны выриз: уд быгаты лыдӟыны, эн ик туртты. Та книгаос асьме кылын гожъямтэ. Тодон понна, трос дышетсконо ай. Кузьма дядяед сямен, оло, Москвае но мыноно луоз. Соку шатыр! лыдӟод, мар сярысь гожтэмзэ муртлэсь уд юа ни. Татын, нылаш, олокыӵе но кылъёсын гожъям книгаос кыллё. Финнъёслэн, мадьяръёслэн, немецъёслэн кылъёсынызы но вань, лэся: ваньзэ вераны но уг тодӥськы. Тудву кошкон дырозь кыдёкын ӧвӧл ни ке но, лымыен шобырскем Вало ӧр кӧлэ на. Сюрес вылысь кожыса, дӧдьыен вал мырдэм вамышъяз. Юзмыт уе кынмем юж но уг возьы. Лукоян сипыртысагес вераське: тани татчы, пе, ӝоктом та книгаосты. Вало усьтӥськоз но кытчы ке нуоз соосты. Оло, татчы ик выйтоз? - Жаль ӧвӧл-а? - юа Тамара. - Соосыз жалялом, утчаськисьёс вуизы ке, кыкполэс йырвисён шедьтом. Кытысь мар, кытчы нуиськоды, кинлэн та сьӧлыко книгаосыз? Тодозы кызьы юаны: асьмеос дышетоно ум луэ. Кинлы люкетӥзы дӧдьы нырысь книгаос? Со сярысь Малиновкаысь Лукоян Афиногенович Казаков Тамаралы вераз бертон сюрес вылысен гинэ. Со книгаос, пе, Кузьма Павловичлэн. Марысь мар ке, утчаськисьёс, оло, асьме гуртэ но вуозы. Кин тодэ кытчы кожонзэс. Соин уз тырмы ай, юалозы: кинлэн та книгаос, кин сётӥз, малы тӥ доры кельтэмын, кыӵе кусыпъёсты вал? .. Сюлэмез позыртӥзы ке но, мискиньёсты шур коже кельтоно луиз. "Вало тапалан сьӧд пилемъёс уяны кутскизы ке, сильтӧлэн лвктӥсь лек зорлэсь азьвыл книгаосме нокин шедьтонтэм вылысь ват", - шуиз вал Кузьма. Ачиз та шурмы вылэ чӧлскиз. Сюрид ке, зарни букваос но уз уте, кытчы ке нуозы. Малиновкаез но, Вало ӧрез но уд адӟылы ни. ... Семонлэн Тамараез ортчем аръёсы берытскиз кадь... ...Одӥг гужем нуналэ вал со. Кузьма Павлович вынызлэсь пизэ, Марке, но Тамараез возь вылэ ӧтиз. Учком, пе, Вало шур вылын чорыгъёслэсь тэтчамзэс. Куазь шулдыр вал. Возьвыл турлы сяськаосын шобырскемын. Небыт тӧл пельтэмъя, ог- огзылы йыбыртъяло соос. Кузьма Павлович шулдыр куазьлы синмаськиз ке но, мылкыдыз капчи ӧй вал. Кинлэсь ке мӧзмиз-а со, оло, кыӵе ке кайгу зӥбиз? Мылкыдзэ ӧз усьты кылбурчи. Собере тэшкылиос мазэ валасалзы? Озьы шуоно ке, Тамара шӧдскиз: Кузьма Павлович гуртысь потыку кадь ӧй вал, тусыз но воштӥськиз. Малы озьы? Нылаш юаны ӧз дӥсьты - кепыраз. Марк но дун сётыны ӧз быгаты на. Мар со куректон, кытысь потэ - вераны ӧй быгатысал. Пуке Кузьма Павлович Вало ӧрысь кож дурын. Кӧняетӥзэ ини татчы лыктӥз - ачиз но вераны ӧй быгатысал. Татысь возь вылын со турназ, жингрес чебер гуръёсты мытылӥз. Нош али уг но кырӟа, уг но турна, малпанъёсыз пӧлы зымемын. Пуке - берпуметӥзэ кырӟанъёсын, веранъёсын данъям шурлэн ярдураз. Зэм, соку Куӟебай Герд уг тоды на вал дуринчи карлэсь ку пурӟонзэ. Но шӧдӥз азяз чеберъяськисьёсты, мышказ сяласькисьёсты, чагиськисьёсты. Шулдыр возьвыллэсь, зыл кошкись Вало шурлэсь ӵыдытэк, лэся, Кузьма Павлович сьӧраз ваем пиналъёслэсь бызьылэмзэс синйылтэ. Ӵемгес учкылэ Андрей вынызлэн пиез шоры. "Кин луод тон?" - юа аслэсьтыз. Марк Андреевичлы ковёръёсын шобыртэм сюресъёсты лёганы ӧз кылды. Секыт ож аръёсы тушмонэн ваче син пумиськоно луылӥз. Кузьма Павловичез сюлэмаз воземез понна, пытсэтын курадӟиз. Собере дышетскиз, инженер луиз. Кутӥз со адямиосыз сантэмасьёсын талам пероез. Асьме улон сярысь кылбуръёс гожъяны ӧдъяз. "Кызъёс" кылбураз ачиз сярысь но вера: ... Та улонысь пӧсь-кезьытсэ, Шуг-секытсэ пумитакум, Со кызъёслэсь юн луэмзэс Тодам мон ваисько котьку. Секыт вакытэз ортчон пытьытэм ӧз кыльы: Марк Чайников улонысь вазь кошкиз. Нош соку, Вало дурысь возь вылын бызьылон дыръяз, Куӟебай Герд вынызлэн пиез шоры кин луонэз сярысь сюлмаськонэн гинэ учкиз, дыр. Тамара Семёновна кема аръёс ӵоже вераны ӧз дӥсьтылы дӧдьы ныре тырем книгаосты Вало ӧре куяны ветлэмез сярысь. Соослы синмаськиз ке но, кылзэ пинь сьӧраз возёно луиз. Нуиз, дыр, Вало шур кытын ке, кыдёкын, поттэм книгаосты. Выизы-а соос, оло, тулкымъёс вылын лэйкаса сэстӥськизы, - тодӥсь ӧйлась.... Василий Смирнов. Ижевск городысь дышетӥсьёслэсь куронъёссэс быдэсъян ужрадъёс сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: 1. Кун Кенешысь депутатлэсь А. И. Салтыковлэсь Ижевскысь администрацилэн дышетӥсьёслы уждун тыронъя пунэмез берыктыны тыршемез сярысь ивортонзэ лыдэ басьтоно. Ижевскысь администрациез куроно городысь дышетӥсьёслы уждунзэс дыраз тырыны. Удмурт Республикаысь Правительство - Ижевскысь администрацилы та ужпумез быдэстыны коньдон шедьтыны юрттыны кулэ. 2. 1998 арын 1 апрелёзь Удмурт Республикаысь Правительство городъёсысь но ёросъёсысь администрациос бюджет чотын ужасьёслы уждун тыронъя пунэмез берыктыны кулэ, профсоюзъёслэн ёзъёсынызы кенешыса юнматэм графикъёсты лыдэ басьтыса. 3. Россия Федерацилэн Президентэзлы, Россия Федерациысь Федеральной Собранилэн Федерацияя Кенешезлы вазиськоно "Бюджет чотын ужасьёслы уждун тыронэз радъян сярысь" Федеральной законэз ӝоггес кутыны курыса (Вазиськон сётӥське). Россия Федерацилэн улосъёсысьтыз закон кылдытӥсь (быръем) ёзъёсты куроно та Вазиськонлы дурбасьтыны. 4. Удмурт Республикаысь Налогъёсъя кун инспекциез куроно республикалэн но интыослэн бюджетъёсазы вуись налогъёсты ваньзэ бичаны луонлыкъёс кылдытыны. 5. Та постановленилэсь быдэсъяськемзэ эскерозы Кун Кенешлэн Наукая, дышетонъя, культурая но егитъёсын ужанъя но Улон-вылонэз радъянъя политикая, ужъя, тазалыкез но инкуазез утёнъя ялан ужась комиссиосыз. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 24 мартэ. � 607-И Россия Федерацилэн Президентэзлы Б. Н. Ельцинлы Россия Федерациысь Федеральной Собранилэн Федерацияя Кенешезлэн Тӧроезлы Е. С. Строевлы Удмурт Республикаысь Кун Кенешлэн Вазиськонэз Гажано Борис Николаевич! Гажано Егор Семёнович! Удмурт Республикаысь Кун Кенеш вазиське тӥледлы, бюджет чотын ужасьёслэсь уждунзэс будэтонъя ужрадъёс орчытыны курыса. Кылсярысь, туала огъя тарифной сеткалэн (ЕТС-лэн) нырысетӥ разрядэзлэн ставкаез 1995 арын юнматэмын но со Россия Федерациысь пичи уждунлэсь трослы ичи. Удмурт Республикаын 1997 арын январе-декабре шоро-куспо уждун 775,6 манет вал, нош дышетӥсьёс 518 манет басьтӥзы, яке толэзьскын шоро-куспо уждунлэсь 60,2 процентсэ, соос нормалэсь 1,5-2 поллы тросгес ужало ке но. Егит дышетӥсьлэн 7-тӥ разрядъя ставкаез - 165 манет. Нош вылӥ квалификациен дышетӥсь, школаын уно аръёс ӵоже ужаса, 390 манет басьтэ. Таӵе пичи уждунзы эшшо но дунтэма, кема дырлы ӝегаменыз валче. Удмурт Республикаын 1998 арын 23 мартлы уждун 2 толэзьлы ӝегатэмын. Таӵе югдур "Дышетон сярысь" федеральной законлэсь 54-тӥ статьяезлэсь 3-тӥ люкетсэ тӥя. Таӵе шуг-секытъёс люкето ӟеч тодон-валанъёс сётыны, соослы луыса, уноез дышетӥсьёс, тужгес но пиосъёс, школаысь кошко, кылемъёсыз 1,2-2 ставкаен ужано луо. Ваньмыз со дышетонлэсь ӟечлыксэ кулэстэ. Берло дыре гинэ Удмурт Республикаысь Кун Кенеше но Правительствое 5 сюрслэсь уно дышетӥсьлэн гожтӥськеменыз 500 пала гожтэт вуиз. Соос уждунзэс будэтыны куро. Удмурт Республикаысь Кун Кенеш куре тӥледыз, гажано Борис Николаевич но гажано Егор Семёнович, та ужпумез ӝегатскытэк эскерыны но сое быдэстыны луонлыкъёс шедьтыны. Удмурт Республикаысь Кун Кенешлэн дас сизьыметӥ сессиез куремъя. Удмурт Республикаысь Кун Кенешлэн Тӧроез А. А. Волков. Виктория Митина Ижевскын Куинь нунал ӵоже республикаямы ужалоз Россия Федерацилэн Президентэзлэн Администрациеныз кивалтӥсьлэн воштӥсез Виктория Митина. Соин ӵош лыктэм делегациын озьы ик национальной ужъёсъя но федеративной кусыпъёсъя министрлэн нырысетӥ воштӥсез Владислав Туманов, та министерствоысь ик департаментлэн кивалтӥсез Владимир Лапин, Президентлэн Валтӥсь государственно- правовой управлениысьтыз отделлэн кивалтӥсез Анатолий Дубинин, Президентлэн Ас коже кивалтон ужпумъёсъя управлениысьтыз отделлэн кивалтӥсез Андрей Заматаев, Россиысь Юстицияя министерстволэн департаментэзлэн кивалтӥсезлэн нырысетӥ воштӥсез Павел Высоцкий, Президентлэн Администрациеныз кивалтӥсьлэн воштӥсезлэн юрттӥсез Валерий Кузин но Президентлэн Территориальной управлениысьтыз консультант Павел Березин. Виктория Митина пумиськылӥз ини Удмуртиысь бадӟым промышленной предприятиослэн кивалтӥсьёсынызы но быдэсъясь властьлэн ёзъёсаз ужасьёсын. Шаерамы лыктэм куноос озьы ик кенешизы на депутатъёсын, Кун Кенешысь Президиумлэн адямиосыныз, кинъёс ужало Удмурт Республикалэн Конституцияз воштонъёс но ватсанъёс пыртонъя комиссиын. Республикаенымы тодматскыса делегация ас малпанъёссэ вералоз Россилэн Президентэзлэн Удмурт Республикаын кун ёзъёслэсь но ас коже кивалтон ёзъёслэсь кусыпъёссэс радъян сярысь кутэм указэзлэн быдэсъяськемез пумысен. Азьланяз та ужез радъянъя нимысьтыз документ кутэмын луоз. Удмурт Республикаысь Кун Кенешлэн пресс-службаез. Берекет Коть оске, коть эн Кулонэн уг шудо ке но Улонын мар но уг луы, ваньзэ ум но тодӥське, ум но гожъяське. Вераме потэ Пичи Пурга ёросын луэм одӥг учыр сярысь. Кемалась вал ини со. Быдӟым ожлэсь азьло аръёсы. Соку мон куинетӥ классын гинэ дышетскисько вал ай. Кык урок дышетскеммы бере кузь перемена луэ вал. Школа дорысен кыдёкын ик шур ӧвӧл. Ми, пиналъёс, киямы кивалтосэн - кин боды, кин кирпич, кин артана пис шедьтыса, отчы васькиськом. Малы кивалтосэн? Шур сьӧрын Чокал гурт палан гурезь бамын пичигес гинэ нюлэс вал. Сое Луд бакча шуо. Отын Луд выжыос вӧсяськизы. Со нюлэс доры мынӥськом, Лука отын, дыр, шуыса. Самой со Лука нимо воргоронэн герӟаськемын гожтоно учыре. Кулэмлэсь луло кылем муртэн милемды бадӟымъёсызгес пиналъёс кышкато, Лука лыктэ шуыса кесько, асьсэос бызьыса кошко. Ми, пичиос, соос сьӧры ум вуиське, бере кылиськом. Эшшо шуо ке, Лука сутэ ини, кутоз но вирдэс юоз, - лулмы ик пыдтышкамы вуэ кадь. Нош ми асьмеос отчы мынӥськомы ук, нокин уг косы. Милям гуртамы медаз ветлы, сое жугыны шуыса, эшшо кивалтосэн мынӥськом. Чокал гуртысь та писомурт кыӵе ке но висёнэн висьыны кутскем. Кӧня арес вылэм ини солы, али вераны уг тодӥськы. Улыны осконэз бырем но кышноезлы, пе, шуэ, кулӥ ке, вылез дэреме но ӧвӧл, маин ватоды. Штан вуремлэсь кылем-мылемезлэсь, шуэ, дэрем вур но яралоз (Удмуртъёс азьло штанилы дэра куо вал лызэн но сьӧдэн, нош дэремлы - гордэн но лызэн яке ӵужен). Костюм выллем луоз (Мынам но атае кулон азяз анаелы шуиз: Лукаез сямен монэ но костюмен ватоды ини). Кулонлэсь, пе, уд пегӟы, Лукалэн но кулон дырыз вуэм. Миськиллям, дӥсяллям, коросэ понӥллям. Коть жаля, коть эн, кулэм муртэ коркан уд возьы, шай вылэ нуыны кулэ. Коркась потыса, капкаетӥ ураме потӥллям, кыдёке мыныса вуиллямтэ: коросын кыллись мар ке пуксем но котыр утчаське, пе, синъёсыз питыресь, ым усьтӥськемын. Коросэз нуисьёс дэймиллям, коросэз куштӥллям но кин кытчы быгатэм, бызьыса кошкиллям. Лука но кышкаменыз коросысь султэм но синтэм-пельтэм лобатэм. Ватыны лыктэмъёс асьсэос ӧжыт гинэ лулзэс сётӥллямтэ, сокем дэймымон луэм та учыр ваньмызлы. Лука дораз бертымтэ ни, нокин сое адӟись ӧвӧл. Нош та учыр пельысь пеле, ымысь ыме котыр вӧлмем. Арня мында ортчиз-а, ӧз-а, школаысен Петыр нимо эшмы вера ни, милесьтым гидысьтымы ыжмылэсь, пе, Лука вирзэ юыса кошкем. Мукетызлэсь но озьы ик кароз, ыжзэс я мар изъянтоз шуыса, ми, дышетскись пиналъёс, Лукаез кышкатон вылысь, озьы дауртӥськом, кивалтосъёсын ветлӥськомы вал. Тол но ортчиз, гужем но вуиз. Я отын, я татын вераськонъёс пото, Лука, пе, кызъёсы, писпуосы тубаса, тылбурдо кукейёсыз но, пиоссэс но сие. Со гужем узы-боры, губи, пашпу мульы но мукет емышъёс трос вал. Улӟем муртлэсь кышкаса, пиналъёс нюлэскы ик ӧз ветлэ ни. Кинэ ке оген пиосмуртэ нюлэскысь адӟо ке, Лука ветлэ шуыса, мынэмъёсыз но берлань бызьыса берто вал ини. Аран удыссы нюлэс дурын ке, нылкышноос оген араны но кышкаллязы. Куинь ар-а, мар-а ортчыса гинэ Лука дораз бертӥз. Мукет ёросъёстӥ кураськыса, тунаса-пелляса, пе, ветлэм. Берло кылӥськиз, Ижын, пе, тӥрен ужаса, укно янакъёс пуктылыса улэм. Кема гинэ улӥз на кулэмысь улӟем маке. Кыӵе арын кулэмзэ вераны али уг тодӥськы ни. Туж кемаласен Выль Моньялан но одӥг пересь воргорон кулэмысь улӟылэм. Сизьым нунал ӵоже луло улэм на, вераськыса гинэ улэм, но султылыны быгатымтэ ни. Тӥни мар но уг луы улонын. Коть оске, коть эн. Р. Яковлев. Люкаськозы егит гожъяськисьёс Удмурт кун университетын 31 мартэ "Каляга" шулдыръяськон ӝыт ортчоз. Азьло аръёы сямен ик, асьсэлэсь быгатонлыкъёссэс возьматозы татын литературно-творческой кружоке ветлӥсь егитъёс. Соос лыдӟозы асьсэлэсь верос но кылбур чуръёссэс. Нош люкаськемъёслы задор мылкыд пыӵатыны юрттозы гожъясьёс-сатирикъёс. С. ПЕТРОВА. Нош ик - пиналъёс вылэ! Секыт югдур кылдэмын Ижысь училищеосын. Арня талэсь азьло шуныт сётон дугдытэмын 28 номеро СПТУ-ын. Кылем арын сентябрь толэзьысен солэн тыронъёсыз выль коньдонэн 151 сюрс люкаськизы. Таӵе ик югдурзы 17, 19, 25 номеро училищеосын. Кезьытэн сэрен егитъёс уг дышетско, ужамысь дугдӥзы мастерскойёссы но. Та дышетскон заведениос возисько Россия Федерацилэн бюджетэз чотын. Нош Москва коньдон уг ысты. Соин ик паймонэз уз луы, азьланьын кылемъёсыз но училищеос пытсаськозы, соос бӧрсьы - школаос. Э. ВАСИЛЬЕВА. Берекет Такмакъёс ЛЕКРУТ КЕЛЯН ГУР Шур сопалан арган шудэ, Кинъёс кинэ келяло? Шур та палан баян шудэ, Кинъёс кошко кудпала? Кемалы ӧвӧл, кыдёке Кошко мискинь пиосмы. Мыныса тӥ вуиды ке, Гожтэт гожтэ милемлы. Лекрут кошке, нылыз бӧрдэ, Анай кыле келяса. Арган шудэ, баян шудэ, Калык мынэ кырӟаса. Туэ мерттэм улмопулы Шурысь вуэз кисьталод. Мурт пиосын тон эн ветлы, Кык ар монэ возьмалод. Буэх шурмы, ой, вия, дыр, Камышъёсыз кылё, дыр. Камыш ӧвӧл, возьёс кылё, Яратон эшъёс кылё. Бертон нунал ӝоген вуоз, Возьмалэ, туганъёсы. Дунне кусып мед тупалоз, Бертомы, мусоосы. Дыдык пизэ марлы вордэ? - Лыз инметӥ лобаны. Анай монэ марлы вордэм? - Армиын служить карыны. Буэ кузя ветлӥ, ветлӥ, Турлы сяська бичаса. Аныкае, бӧрдод али, Турлы дырме малпаса. Га-гак, шуэ, ой, ӟазегед, Пизэ душес басьтэмысь. Ой, ой, шуэ, аныкае, Лекрут пиез кошемысь. Поезд кошке шуласа но Рельса кыле ӟырдаса. Мон кошкисько туж кыдёке, Анай кыле бӧрдыса. _______________________ х Буэ - шурлэн нимыз. Ш. Меншарапов. Пермь улос, Бадӟым Гондыр гурт. Шӧкыч "ГОРД АТАС" ЛУШКЕМ КОКЧАЛТЭ КЕ НО... Калыкын шуо: куректон пыд улысь потэ. Тылпу но озьы ик. Витьымтэ шорысь омырске но ваньзэ музъемен ӵошкатэ. Но таяз учыре "горд атас" лушкем кокчаськыны ӧз выры, сьӧд ужзэ адямиослэн син азязы, соослэн янгышенызы кутскиз. Ижысь куатьтон кык аресъем Александр Борисович Ермаков городысь одӥгаз лэсьтӥськонэ возьмаськисьын ужаны пыриз. Солэн но угось пенсиез кӧс шыд лымлы но няньлы сяна уг тырмы. Кызьы ке ог ӝыт вуиз Александр Борисович ужан интыяз. Лэсьтӥськисьёс гуртазы бертыны дасясько, дӥсьсэс вошто. Ермаков ортчиз бетон юбоос, выль юрт инъетъёс, бульдозеръёс, кранъёс котыртӥ. Эскериз, ма солы уин возьманы кельто. Ваньмыз интыяз, кулэезъя пуктэмын-радъямын кадь. Пыриз рабочийёслэн бытовка шуоназы. Татын сторож ужан дырзэ ортчытэ. Син шораз йӧтӥз сэргысь кӧня электрокужым кутэмез лыдъясь счётчик. Кылӥз отысь маке тачыр ваземез. Умой-умой учкиз - ез гердын тылгизьыос чилектыло. - Ма со сыӵе? - ӧз чида, юаз воргорон. - Эн сюлмаськы, пересь, уд сутскы,- пальышаз куамын аресъем электрик Гена. Эшъёсыз солы озьы гинэ вазисько. - Кемалась ни со гомӟыны выре,- Гена киыныз возьматӥз счётчик шоры.- Кужмыз уг тырмы. Воргоронъёс гурак серектӥзы. Сторож ымзэ ӧз усья ни. Шып кариськиз. Генаен угось трос уд вераськы. Тон солы одӥг, нош со пумитад дас кыл вералоз. Астэ ик сереме уськытоз. Соин сэрен но, лэся, рабочийёс электриксылэсь ӵемысь тяп-ляп лэсьтэмзэ адӟымтэ улэ кельто. Тазьы луиз таяз учыре но. Вуиз уй. Счётчик ялан тачыртэ. Возьмаськисьлэсь со сюлэмзэ венен бышка кадь. Сюлмаськемез юнме вылымтэ. Тани пиштӥз тыл, "горд атас" лопыръяськыны кутскиз. Ма кароно? Телефон ӧвӧл. Александр Борисович бызиз город ульчае таксофон утчаны но тылпу кысӥсьёсты ӧтьыны. Ярам коть соосыз ӝог вуизы. Тылпуэз кортназы. Таяз учыре ыштонъёс бадӟымесь ӧз луэ. ... Та сярысь, оло, гожъятэк но ярасал. Но кӧня пол ни озьы луылӥз: оскем ужмы шоры чиньыос пыртӥ учкемен, арлы быдэ уно миллион манетъёсын ыштонъёс адӟиськом, тылын быро адямиос. Вылӥ верам учыр но возьматэ: нокыӵе уж дыртӥд-вуттӥд лэсьтэмез уг чида. - Ма со счётчик,- нош ик киыныз шонтэ Гена.- Таксофон утчам интые, ёзна вал рубильникез. Электрокужым ӧй вуысал ни. Нош мукет тодосчиос верамъя, сторож шонер лэсьтӥз. Электроен вырымтэ адямилы со котыре вуылыны лэземын ӧвӧл. Озьыен, янгыш Гена. Со ик кыл кутыны кулэ. Солэн суп- сап лэсьтэменыз, "горд атас" шара кокчаськыны кутскиз. А. ЕМЕЛЬЯНОВ. Меӵак но Могак Кӧс кырӟанэз сюлме уд лякы. Бадьлэн выжыяз бадь ик потэ. Йыркуръяськыса улӥсьлэсь кырӟамзэ ноку но уд кылы. Возьмамтэ кунолы ӝӧккышет юри уг вӧлдо. Куное лыктыса уг ченгешо. Сӥзьыл лыктэм куно атас сие. Котькӧня выр, тӧлэз уд куты. Куддыр дУшеслы но курег сюры вылэ пуксёно луэ. Кый но "сюрес шонер ӧвӧл", пе. Нюке усись адями пушнер борды но кырмиське. Пуньылы быдэ сӥль уз луы. Пушнер сутэ ке но, шыдын пӧзе. Адямиез уж уг куасьты, куректон куасьтэ. Инмар ки сётэм, гозызэ ачид пун. Каллен мынӥсь уробо котьку но гурезь йылэ вуоз. Чорыг кутэмед потэ - пыр вуэ. Яратскод чечыез - чида муш лекамез. Кабан сюрыны но быгатэм кулэ. Сюлэм малпандэ кырӟаса вера. Нырысетӥ орденлы - 300 ар Россилэн эксэез Петр И 300 ар талэсь 1698 арын кылдытӥз нырысетӥ орден - кык йыро ӧрӟиен но "За веру и верность" кылъёсын кизили. Нимыз но вал - Андрей Первозваннойлэн орденэз. Нош пусйылӥзы соин ож лудын но огшоры улонын тужгес висъяськем муртъёсты. "Ижмашлы" сӥзьыса Компьютерлэн кужымез улонамы пумен будэ но будэ. Со нимаз адямилы но, бадӟым предприятилы, организацилы но зэмос эш но юрттӥсь луэ. Компьютеръёслэн кузёоссы та вакытэ тодматскыны быгато выль дискъёсын. Соос сӥземын шаерысьтымы одӥгез бадӟым предприятилы - "Ижмаш" АО-лы. Нырысетӥяз возьматэмын, кызьы кылдӥз предприятие, кыӵе вакытэ кыӵе продукция со поттылӥз. Кыкетӥезлэн нимыз таӵе: "Ижмаш" но солэн пыӵал тӥрлыкез". Валамон ини, Калашниковлэн автоматэз отын бадӟым инты басьтэ. Верамын солэн кылдэмез, кылдытӥсез, туннэ но ӵуказе нуналъёсыз сярысь. В. ВАСИЛЬЕВ. Берекет Пырыос-визьлюкъёс * Укно янакъёсты но рамаосты буямлэсь азьло пиялаосты зыралэ сугон йырлэн ӝыныеныз яке уксусэн коттэм ӟустариен. Озьы тӥ укно син вылэ йӧтэм вӧё буёлэз лякытэн кошкытоды. * Вӧлдэтэз, борддорез бурен (мелэн) яке вӧё буёлэн зырамлэсь азьло выжез майтало вуэн (1 литр вуэ 20-30 грамм майтал мынэ) миськоно. Озьы выж вылэ усем буёлэз, бурез (изваскаез) лякытэн утялтоды. Таӵе суретэн ик зыраны луоз укно синэз (рамаез зырамлэсь азьло), кафелез, чугун плитаосты. * Выж, борддор но мукет интыысь вуж вӧё буёлэз чылкыт сузямды луоз, кизер пиялаен зыраса. Со мед куасьмоз. Огполскын ӧз ке юртты, эшшо зырано на. Кизер пияла - со натрийлэн яке калийлэн силикатэзлэн вуэн суретэз. Вузаське магазинъёсын. Журналистъёсын пумиськонъёс Улонмылэн уробоез бекырске-а? Кун Кенешысь депутатэн, Эскерон палатаен кивалтӥсен Михаил Шишкинэн пумиськонэ журналистъёс лыктӥзы 17-тӥ сессия йылпумъяськем бере. Сессиын кутэм документъёс ӟеч мылкыд уг кельто, шуиз со журналистъёслы, Республикамылэн 1998-тӥ-2000-тӥ аръёсы азинсконэз сярысь кутэм программа но, 1998 арлэн бюджетэз но адямиослэсь ӟеч ужаны мылкыдзэс уз ӝутэ. Бюджет кутэмын 34 процент дефицитэн. Сыӵе бюджет меӵак возьматэ ини туала правительствомылэсь ляб луэмзэ. Озьыен, ужаны быгатӥсьтэм правительствоез, оло, умойгес луысал али ик отставкае келяны? Та сярысь трос малпаськыса уло депутатъёс но. Но, кызьы шуиз М. Шишкин, сыӵе вамыш али асьмелы номыр уз сёты. Таизлы правительстволы одӥг ар гинэ кылиз на ужаны. Мед ужалоз но умой-умой мед малпаськоз, кыӵе ужрадъёс кутоно, бюджетэз коньдонэн тырмытон понна. Та нуналъёсы Россилэн Президентэз отставкае келяз В. Черномырдинлэсь правительствозэ. Мар со сётоз калыклы? Номыр. Ачиз Президент меӵак шуиз ук: мынон сюресмы уз воштӥськы. Тӥни озьы ик номыр уз воштӥськы асьме республикаямы но. Мукет сямен вераса, улонмы сыӵе ик секыт луоз. Правительствоез ке воштоно, вань улон сюресмес мукет сямен радъяно, соку гинэ бекырскем улон уробомес интыяз пуктыны быгатом. Республикамылэн узырлыкез, коньдонэз ӵем дыръя, чик малпаськытэк, я палэнэ кошке, я кулэтэм шулдыръяськонъёслы мынэ шуиз депутат. Кызьы уд паймы таӵе ужрадлы: "Ижмашлэсь" 190 ар тырмонзэ пусъёнлы уно миллионъёс быдтэмын вал, соин валче бадӟым премиос басьтӥзы кивалтӥсьёс, нош рабочийёс 6 толэзь ӵоже ини уждунзэс адӟытэк уло. Нош луэ-а коньдонэз лыдъяса улыны? Луэ, шуиз Михаил Иванович. Адӟем карымон хозяйствоос шаерамы но вань. Соос пӧлысь огез Вавож районысь Мичурин нимо колхоз, кудӥныз быгатыса кивалтэ Валентин Егорович Калинин. Бюджетэ мынӥсь коньдонэз тус-тас каремлэсь утён вылысь, таяз арын Эскерон палата сое уката но зол чакласа возьыны турттэ. Т. Банникова. Чайковскийлэсь нимзэ нуллэ Екатеринбургысь крезьгуръя училище - Уралын но Сибирьын одӥгез мӧйы дышетскон заведение. Со кылдӥз 1916 арын. Нош 1928 арысен сизьымдон ар ӵоже ини нуллэ быдӟым землякмылэсь, композиторлэсь П. И. Чайковскийлэсь нимзэ. Училище дася крезьгурчиосты - культурая, искусствоя учреждениослы, дышетскон заведениослы, художественной самодеятельностья коллективъёслы специалистъёсты. Солэн укмыс люкетъёсаз (отделениосаз) вить сюлэсь ятыр егитъёс тодон-валан люкало. В. РОГАЛЕВ. ШУМПОТОН-А СО... Сяськаос, кузьымъёс, ӟечкыланъёс - ваньмыз та нуналэ тырмыт вал. Со борды луысал на ке тулыс шундыен пальккаськись пальпотон, жинграк! шуккиськись пинал куара... Выль интые выжон, оло, зэмен но соку пӧрмысал шулдыр праздниклы. Ижевскысь Карлутка шур вӧзысь огез нылпи сад табере луиз приёмник-распределитель. Улыно-вылыно юртлэсь укно пиялаоссэ возъязы езлэсь кутам вотэсъёс, тӧдьы халатэз воштӥз милиционер дӥсь. Ма шуод на: улӥськом, вылды, кӧтвеськантэм вакытэ. Та юртын кӧня ке дырлы небыт валес, тырмыт сиён шедьтозы 50-лэсь ятыр нылъёс но пиос, вордэм атыкай юртысьтызы пегӟемъёс. Туннэ нуналлы сыӵеос татын 28 кузя. Котькудӥзлэн - аслаз куректонэз-бӧрдонэз. Быдэ вуымтэосты огдырлы интыянъя центрез усьтонэ ветлӥзы республикаысь югдурез утёнъя министр В. Ф. Щербаков, солэн воштӥсез В. В. Семенов, Правительстволэн Тӧроезлэн воштӥсез А. М. Лисина, Ижевсклэн мэрез А. И. Салтыков но мукетъёсыз. Огез но буш киын ӧз лыкты. Книгаос, спортивной костюмъёс, видеомагнитофон, коньдонэн юрттэт - огез но пиналъёс понна мултэс уз луы. МВД-лэн та ёзэзлэн выль юртэ потонэз ӵапак кемлаз 65 ар тырмонэныз. Валамон ини, приёмник-распределительын ужасьёс понна шумпотоно: кема гинэ витизы ни соос та нуналэз. Нылпиос понна кылдытэмын ӟеч условиос: кӧлан комнатаос, медпункт, спортзал, дышетскон класс, мастерской, столовой... Укно штораос, валес шобретъёс, ӝӧк вылэ валёно салфеткаос, пӧраськон пулъёс - ваньмыз дасямын, пӧръямын пинал киосын. Ӧжытак учконо ке туала центрлэсь ортчем сюрессэ, вераны луоз: 65 ар ӵоже татчы шедьылӥзы 44 сюрслэсь ятыр нылъёс но пиос. Географиез - быдэс Советской Союз. Берло аръёссэ, страна куашкамен, Россилэн палэнысьтыз одӥг-ог гинэ вуисез вань на. Кинъёс со? Тросэз - дорысьтызы, школаысь пегӟемъёс, кудъёссэ, уката но пичи пиналъёсты, анайёссы вокзалъёсы, магазинъёсы куштыса кельто. Милиция дӥсен апайёс, агайёс огдырлы вошто соослэсь самой матысь адямиоссэс. Нош отӥяз... Отӥяз котькудзэ улон люке ас сяменыз: кинэ - приютэ, кинэ - школае, куд-огзэ - колоние... 3-18 аресъемъёс пӧлын вань котькыӵеез. Выль юртын шуныт, чылкыт. Озьы ке но, 28 мурт пӧлысь огезлэн но татын улыны мылкыдыз ӧвӧл: гуртазы бертэмзы потэ. Кужмысь одӥгзэ но уз возе. Мугез мукетгес: мумы-бубыоссы чӧлскемын юон вылэ. Сыӵеослы дуногес асьсэлэн огпӧртэм сюлмаськонзы- висёнзы. Югдурез утёнъя министрлэн воштӥсез В. В. Семенов верамъя, Удмуртиын та вакытэ лыдъяське 29 сюрс пала юись семья, котькудаз будо пиналъёс. Кылем арын медвытрезвителе сюрылэмъёс пӧлысь 5 сюрсэз - нылкышноос. Ар ӵоже гинэ 14 арессэс тырмытыны вуымтэ егитъёсын лэсьтэмын 361 секыт йыруж: 14 мурт виемын, 16-ез секыт сӧсыртэмын, 52 ныл но нылкышно эриктэмамын, 307 муртлэн ваньбурез таламын-лушкамын. 394 пинал келямын колониосы, тросэзлы сётэмын условной наказание. Законэз тӥям понна, ар ӵоже школаосысь уллямын 1700 пала дышетскись... Тӥни малы выль юртэ выжон мылкыдэз ӝутӥсь ужрадъёс пӧлы ӧзгес шедьы. Нылпи сад интые - пытсэт. Шумпотон-а со? Сентябре эшшо одӥг "корка туй" возьма на городмес - пичи йыртэмасьёс понна ӧсъёссэ усьтоз спецшкола. Таиз интыяськоз Воткинской шоссе ураме. Л. МЕДВЕДЕВА. В. КАМАШЕВ (фото). Шӧкыч "Пиналысен висисько бере, ӵем гинэ эмъяськонниын кыллёно луэ. Алигес нош ик отчы шедьылӥ. Йырсиосы пештырскизы. Врачъёслэн азьвыл кабинетъёсазы - пӧртэм магазинъёс. Сюдо ӝукен. Эмъюмъёс - тодылымтэ дунын..." ("Шӧкыче" гожтэтысь). - Мики, асьмеды рае интыяло, лэся, ук. Татчы шедён понна, одӥгзэ гинэ ӧвӧл, кыксэ ик пыдъёстэ тӥялод... - О-о, Ондӥ. Уть ай, "Секс-шопсы" но вань. Озьыен, валесад асьсэос уйлы кышно ваё.... Суредэз Леонид ПРОЗОРОВЛЭН. Шӧкыч "Устоз курлась" конкурсэ ЖАЛЬ ПОТӤСЬКОД, ШӦКЫЧЕ! Гажано Шӧкыч уром, кинлы тон кельшиськод ни - урод бызгетӥсь кутлы. Лобаны выриськод ик на, нош леканы уд быгатӥськы, уд но дӥсьтӥськы ни. Тынэсьтыд лэчыт шидэ кык йыро ӧрӟи ишкалтӥз ни, лэся. "Удмурт дунне" али воштӥськиз, но кӧня ке тупа на азьлоезлы. Азьло вань газет бамъёты тырмыто вал съездъёсын, пленумъёсын супыльтэмъёсын. Али но маке сярысь гожъяны кутскиськоды ке, быдэс газет бам но уг тырмы. Трос гожъялэ пӧртэм статьяос, но вакчигес мед луысалзы соос. А. БАЙСАРОВА. Пичи Пурга ёрос, Чутожмон гурт. Ӝегатэмын преступникъёс Республикаысьтымы Югдурез утёнъя но Кышкытлыклэсь утиськонъя министерствоосын туэ 17 мартэ ӝегатэмын 5 муртлэсь преступной группа. Соос кутэмын пыӵал тӥрлык вузанэн. Таламын боевой оружилы пӧрмытэм 11 стартовой револьвер, 200 пала патрон кӧня ке заготовкаос но пыӵал тӥрлык дасянъя технической документация. Та учыръя ФСБ-лэн следствие нуонъя отдэлэз РФ-ысь Уголовной Кодекслэн ИИ люкетысьтыз 222 статьяя уголовной уж ӝутӥз. Пумиськон лэчыт ортчиз Кун Кенешлэн Тӧроез А. Волков пумиськылӥз дышетон удысын ужасьёслэн профсоюззылэн активеныз. Вераськон капчи ӧй вал. А. Волков люкаськемъёслы ивортӥз Кун Кенешлэн 17-тӥ сессияз дышетӥсьёслэн куронъёссэс эскерем но со пумысен нимысьтыз постановление кутэм сярысь. Постановлениын верамын, Ижевсклэн администрациез, городысь дышетӥсьёслы ӝегатэм уждунзэс берыктон понна вань луонлыкъёсты шедьтыны кулэ шуыса. Та лэчыт ужпумез быдэстонын городлэн администрациезлы юрттыны кулэ Правительство но. Кызьы шуиз на та пумиськонын А. Волков, нырысетӥ апрелёзь городлэн бюджетаз дышетӥсьёс понна вуыны кулэ 15 миллион манет. Та нуналъёсы Кун Кенешлэн нимыныз Россилэн Президентэзлы ыстэмын вазиськон, кытын куремын бюджет чотын ужасьёслы уждун тырыны радъян сярысь федеральной закон ӝегатытэк кутон сярысь. Люкаськемъёс азьын озьы ик вераськизы Кун Кенешысь Наукая, дышетонъя, культурая но егитъёсын ужан политикая ялан ужась комиссилэн кивалтӥсез Алла Еременко но калыкез дышетонъя министрлэн воштӥсез Галина Васильева. Удмурт Республикаысь Кун Кенешлэн пресс-службаез. Шӧкыч Оло, вал, оло ӧй вал Тӥрен трос уд шонаськы Ог бер сӥзьыл ӝытэ Лёгор доры вуиз артысь гуртэ бызем нылыз. Парсьсэ вандыны ӧтиз. Ма, кызьы уд юртты ас нылыдлы но эмеспиедлы? Мыноно кариськиз. Вазь ӵукна ик тӥрзэ, дышем сяменыз, кускысьтыз е висказ донгиз но сюрес вылэ потӥз. Тани бускель гуртлэн пумыз но адскиз ни. Но мар ай та таӵе? Пыдлось коркаос вадьсын бугыр гинэ ӵын ӝутске. Нылызлэн юртсы доры кожиз но бакомиз: бакчаын сылӥсь мунчо тачыр! ӝуа. Котыраз адямиос бызьыло, тылэз кысыны выро. Ма, кызьы кысод - лымы ӧвӧл на, шур кынмемын. "Горд атас" кенер кузя гидъёс пала кыстӥське ни. Воргоронъёс кенерез кесяны выро. Лёгор кема малпаськыса ӧз улы, тӥрзэ кутӥз но огзэ пулэз тэрс! ӵогиз. Со дыре шуш куараен а-а! Кеськись луиз. Легор пулэз киыныз кыскыны вырись эмеспиезлэсь кык чиньызэ кыз улваез сямен палдытэм. "Атасэз" лапкытэм беразы ни Лёгорлы веразы: воргоронъёс парсь зу ӵушкам лампа дасякузы, бензинзэс кисьтыны шедьтӥллям. Нош одӥгез небӟемгес пиосмурт, тамак кенжытыкуз, отчы тылпоттон пумзэ куштэм. Со дырысен Лёгорлэн Борис нимо эмеспиезлы тяп-тяп лякиськиз "президент" кушем ним. Асьме Президентмылэн но, пе, кык чиньыез ӧвӧл. Чабак интые - ӵӧжпи Кылем гужем вал со. Шунды пуксе ини, нош ӵӧжъёс шурысь бертӥллямтэ на. - Лёгор, мын ӵӧжъёсты вай, ӟичыос я кинэз арам карозы, - вазиськиз воргоронлы кышноез. Лёгор нянь шорем кутыса васькиз шур дуре. Ӵӧжъёссы отын. Кряк-кряк! потто. Легор няньзэ гуждор вылэ пыргытӥз, куаразэ поттӥз. Тодмазы кузёзэс тылобурдоос, котыраз люкаськизы. Ӵӧжъёс сиёнзэс быдтытозь, Лёгор тамак аратӥз. Кысконзэ ӧз быдты, бурдоос, вераськыса кадь, тютьык-тютьык бызизы шуре, ньылонзэс гылъяны кутскизы. Шупыль! вазе. - Тӥ бертыны валалоды-а, уд-а, - вожиз потӥз кузёлэн. Нош ӵожъёсты вуысь поттэмез уг луы. Ма кароно? Е вискысьтыз тӥрзэ кутӥз но ӵогиз кузь лулпу борды. Шлач! шуккиз ву вылэ. Вань ӵӧжъёс ышизы, беръёссы гинэ тӧдьыак чилектӥзы. Куинез мукет ярдуре вуизы, кылемъёсыз олокытчы пыризы. Лёгор шур коже учкиз но ма шуыны паймиз - отын ву тӧлпери дыръя кадь поръя-берга. Воргорон бызиз отчы. Адӟе: ярдуре ӵог шуккемын, бордаз думемын чилеп. Соку ик ваньзэ валаз Лёгор. Чёрт валтонлэн, Капитонлэн, нош чорыг лым шӧмъямез потэм. Нош чилепе шедизы ӵӧжъёс. Лёгор мырдэм поттӥз чилепез. Бер ни вал. Куинез ӵӧжъёс нежаллям. Йырыз курен Капитонлэсь чилепсэ Лёгор тӥреныз номырлы ярантэм кариз. Г. ШИШОВ. Берекет Тодӥськоды-а тӥ? Дуннеын самой ӝужыт юрт - Чикаго городысь (США, Иллинойс штат) Сиро-Тауэр. Солэн ӝуждалаез 443 метр. Самой ӝужыт телевизионной башня пуктэмын Торонто городын (Канада, Онтарио провинция) - 555 метр. Одӥгез самой ӝужытэз радиомачта Плоцк город дорын интыямын (Польша, Плоцкой воеводство) - 646,4 метр. Самой бадӟымез музъем ултӥ ветлон - метрополитен (кузьдалаезъя но станциослэн лыдзыя) - Нью-Йоркын (США) - 393,5 иськем, отын 471 станция интыяськемын. Самой кузь - 1800 иськем - Береговой канал (США). Машинаен ветлон сюрес музъем ултӥ самой кузь кыстӥське Швейцариын. Со - Сен- Готард туннель, кузьдалаез 16320 метр. Машинаен ветлон сюрес вылын самой кузез выж кыстӥське 38422 метр. Со Новый Орлеан городысь Понтчартрей 1 выж (США, Луизиана штат). Самой мурез шахта - Витватерфанд (ЮАР, Оранжевой провинция), 4500 метр мурдалаын. Отысь зарни но уран потто. Намибия государствоысь (Африка) Этоша заповедниклэсь бадӟымез ӧвӧл ни. Солэн быдӟалаез - 99525 квадратной километр. Кык государствоез (США-ез но Канадаез) музъем вылтӥ люкись кунгожлэн самой кузь сюресэз - 6416 иськем. Нимысьтыз ӝутэм самой кузь борддор лэсьтэмын Китайын. Со Быдӟым Китайской борддорлэн кузьдалаез - 3560 иськем. Берекет Тодады возе Сугон яке чеснок сииды. Ымысьтыды кӧш зын уз поты, 1-2 пуньы йӧлвыл сииды яке одӥг чашка кофе ке юиды. Юрттэ пушмульы но (грецкой яке кедровой). Удам яке вожектэм картофкаез палатэк пӧзьтыны уг яра, отын ядо вещество - солонин кылдэ. Алюминь табаез миськем бере вылтӥз сузяло кӧс зӧк пырыё сылалэн, нош пушсэ - пинь сузян порошокен, озьы со выль дыръяз кадь ик чебер чилялоз. Кастрюляысь кӧш зынэз быдтыны луэ, векчи пыргытэм пу эгырен зыраса. Чайник пыдэсы пуксемез быдтыны лякыт тазьы. Посудаын быректоно эссенциен яке уксусэн сурам ву. Одӥг стакан вуэ мынэ 2-3 шапык эссенция яке ӝыны стаканлэсь ӧжытгес уксус. Эластикез яке резинаез вурыны машинаен лякытгес луоз, вурыс вадестӥ сюсьтылэн зырады ке. Сахарез, кеньырез но пызез майтал но тамак вӧзын возьыны уг яра - соос кӧш зынэз асьсэ борды кыско. Ковёрлэн тусыз яркыт луоз, ӝытазе со вылтӥ векчи гизьыё сылал пызьнады но ӵуказеяз сылалзэ нюромытэм ӟустариен октӥды ке. Никелен яке азвесен шобыртэм арбериос выль дыръязы кадь чебер чилялозы, соосты нашатырь спиртэн коттэм ыж гон ӟустариен ӵушылыса. ТАЗЬЫ УЛЫНЫ УГ ЯРА Россиез йырвизьмын уд вала, озьы шуэ куд-огез. Зэмзэ но, шонер верамын кадь та кылъёс. Басьтомы тани приватизация шуонэз ик. Асьмеды оскытыны выризы вал, со, пе, государствомылы мултэс коньдон ваёз. Табере солэсь пайдазэ шӧмъяськомы ни ас выламы. Туж ӧжыт коньдонэн вузамын вал бадӟымесь предприятиос, магазинъёс но мукет юртъёс. Со коньдон калыклэсь улонзэ ӧз умояты, ваньмыз мынӥз "выль ӟучъёслэсь" улонзэс узырмытыны. Али государство коньдон уг шедьты дышетӥсьёслы, шахтёръёслы но мукет ужасьёслы дыраз уждун тырыны. Соин ик калыклэн чиданэз быремын. 9 апреле Россиысь ужаса улӥсьёс забастовкае потозы асьсэлэсь куронъёссэс Правительстволы вераны. В. ЧЕРНОВ. Берекет СЕМЬЯЗЭ ШУМПОТТЭ Можга городын улӥсь Вячеслав Исакович Савин туннэ кадь ик тодаз возе на буш кофе посудалэсь тусьты лэсьтэмзэ. - 1995 арын вал со. Ижевскысь больницаын кылльыкум, Вавожысь Пашаен одӥг палатае ӝыми. Солэн ужамез шудэм кадь потылӥз мыным. Ӧй чида, ас быгатонлыкъёсме мон но эскероно кариськи. Буш кофе посудаез кутӥ но вандылоно кариськи, нош со мынэсьтым уг кылзӥськы. Ӧжытак кырыж вандӥсько но киосме ӵабышъя, вир поттэ. Вӧсезлы чидаса, быдэс уйме изьытэк потӥ. Огкутскемен ужме но йылаз-пумаз вуттӥ. Вячеслав Исаковичлэн киосысьтыз сюрмемъёсыз али ке но тодмо на, нош та ужезлэсь ӧз куштӥськы ни. Буш кофе, дезодорант посудаослэсь табере син куспын пӧрмытоз тусьты, пукон, люстра. Дораз пукон сяменыз киужен выре, корка пушсэ шулдыртэ, семьязэ шумпоттэ. В. КУТУЗОВА. Туспуктэмъёсыз В. КАМАШЕВЛЭН. Тыронъёсты пытсаны кулэ Дышетӥсьёслы журнал-газетъёсын, методической пособиосын ужамзы понна люкаськем тыронъёсты таиз ортчись ар куспын пытсаны чакламын. Ижевск городлэн мэрез Анатолий Салтыков со сярысь постановление гожтӥз 18 мартэ. 1995-1996 аръёс понна тыронъёсты ворсаны кулэ апрель-май, 1997 ар понна сентябрь-октябрь толэзьёсы. Э. ВАСИЛЬЕВА. Шӧкыч ЗУЛЬЫМ КЫШНО Егит дыръяз нылмуртэз укыр уно ушъязы: мугорыз - ненег кызьпу, кылыз - небыт маял, ымнырыз - мак сяська. Институтэ пырем бераз но ӧз дугдэ кылзэс лӧдэмысь: кыӵе со визьмо, кыӵе ненег, паймымон мунё но тӥни. Дышетсконзэ йылпумъяса ужаны кутскиз. Завод цехысь кивалтӥсьлэн секретарез со табере. Вань иворъёсты нырысь ик со тодэ: сантехник сапрамын, карн-балка палдэмын, мастер юонлэсь йӧнатске, начальник куинетӥзэ кышнояське. Ужасьёс пӧлын огыр-бугыр. Уж понна сюлмаськ манет тыр, нош пайдаез копейка тыр. Озьы тӥни: ныл дыръяз ӟеч кылъёс вал уно, нош будӥз но луиз зульым кышно. ШЫР КЫШКАТЭ КОӴЫШЕЗ Нылкышнолы вуиз нимтэм гожтэт: "Ивановна, тынад кузпралыдж мукет кышномуртэн калге"... Нимтулыз гожтэмын ӧвӧл бере, нылкышно нокыӵе ӧз кариськы. Арня ортчыса, почта ящикын нош ик кагаз: "Ивановна, - ӵабъямын пиосмурт киын, - кузпалыд , о-о, басейнын егит нылъёсын пылаське. Шыр гольык ведь, покач"... ылкышно мыньпотыса малпаз: таиз,пӧй, ачиз мыным синмаськем кадь. Кӧня ке дыр ортчыса нош ик лыдӟе: "Ивановна, мунчокузёед чылкак сьӧраз ортчемын. Картэд котырын нылкышноос уллёен бергало". Паймем нылкышно чабкиськиз:чыртыяз ошисько бере, синмасько, дыр. Толэзь ортчыса, выльысь нимтэм гожтэт: "Ивановна, кузпалэд Израиле пегӟыны дасяське. Синкылидэ кисьтоно луод..." Тӥни озьы: шыр кышкатэ коӵышез, ачиз карысьтыз потыны курда. САЛЬТРА КЕ САЛЬТРА Паймод но чабкиськод та Сальтра Педорен. Сазь дыръяз сиктанэн кылзэ уд бералты. Нош шӧмо ке, ымыз уг пытсаськылы. Эх, позыръяське, эх, атасъяське ук кышноез азьын: мон, пе, бусёнлэсь лысьӧмзэ огазе люкало. Пыдыныз йыг! лёге выж вылэ. Малы, пе, монэ унябей турын шуиз. Ӝожомем укыр. Нош бусёнэз солэсь кык вылтӥ таза но ӝужыт. Шораз пельтӥз ке, Сальтра погралоз. Соин, лэся, кышноез серекъяса пуке. Педор до-ол сылӥз но валесэ кысмыляк ланьырскиз: ӧрӟиез куака уг кышкаты. Соиз но зэм. ВИТАЛИЙ АГБАЕВ. 21-тӥ дауре - наукаен вачи ки Кык ар ортчыса, асьмеос 21-тӥ дауре выжом. Мае асьмеос сьӧрамы басьтом? Самой ӟечсэ, азьланяз кутымонзэ, умоез сярысь малпанъёсмес. Туала улонысьтымы ваньзэ тае шедьтон, шапыкен-шапыкен люкан но быдэсъяны кутскон ужпумъёсты эскериз "Удмуртия 21-тӥ даур азьын" научно-практической конференция. Дасязы но ортчытӥзы сое Ижевскысь администрация, наукая но культурая "Ижевск" огазеяськон но Удмурт кун университет. Кызьы пусйиз Ижевскысь мэрлэн воштӥсез Г. А. Ахророва, азьланяз вамышъяны наукатэк шуг луоз. Со асьме улонамы эшшо но бадӟымгес инты басьтыны кулэ. Басьтом городмес ик. Солэн тазалыкез культураен, экономикаен, политикаен люконтэм герӟаськемын, ёзъёсыз одӥг бугоре биниськемын. Татчыозь тазалыксэ юнматон но ёзъёссэ пайдаё но огкылысь ужатон понна, город наукаез ӧз ик кутылы, куд-ог учыръёсы сяна, кылсярысь, "Россиысь городъёслэн тазалыксы" программаез быдэсъяны но ульчаосты выльдыны. Нош наукалэн кужмыз таин ӵошатонтэм бадӟым. Вуоно даурын со Ижевсклэсь гинэ ӧвӧл, быдэс шаермылэсь улонзэ чылкак мукет ӧре выжтыны быгатоз. Адями визьлэсь сыӵе луонлыкъёссэ шараязы, ог-огенызы кенешыса, споръяськыса, выль азинскон амалъёсты утчазы конференцие люкаськемъёс - Ижевскысь ньыль вузысь учёнойёс, городлэн ёросъёсысьтыз администрациослэн кивалтӥсьёссылэн воштӥсьёссы, республикалэн Правительствояз, музейёсын ужасьёс, Удмуртилэн историеныз, туалаеныз но вуоноеныз тунсыкъяськись муртъёс. О. Вахитова. Василий Паринэз янгыш каризы США-ысь ракез эмъянъя институтлы Клюевалэсь но Роскинлэсь ужзэс сётэм шуыса. Озьы академик В. В. Парин асьме страналы "шпион" луиз. Мукет сыӵе "тушмонъёсты" сямен ик, сое но этапен келязы Сибире. Пуктӥзы вал ни Норильске мынӥсь баржае... Оломарлы отысь берен васькытӥзы но Владимире берыктӥзы, тюрьмае, штрафной изоляторе пытсазы. Нина Дмитриевна номыр ӧз тоды, ялан бызьылӥз, вазиськылӥз отчы но татчы, картэзлы юрттэт утчаз. Трос вал шоразы кырыж учкисьёс, нырк карисьёс. Школаез зарни медален быдтэм Николай пизэс Ломоносов нимо университетэ ӧз кутэ, биологической факультетлэн деканэз Презент пырак шуэм: "Советской наукаез вузам тушмонлэн пиезлы наукае сюрес ӧвӧл". Николай мыноно луиз чорыг промышленностья но хозяйствоя технической институтэ. Василий Васильевичез допросъёсын туж курадӟытӥзы. Ярам коть, Сталин кулэм бере, дырызлэсь вазь мозмытӥзы - сизьым ар "гинэ" пукиз, ваньзэ кызь витьсэ чидасал на меда. Дораз сое нылпиосыз ӧз тодмалэ ни. Ӧжытак губырскем пурысьтам пересь вӧзтӥ Вася пиез кошкиз - ӧз тодма, Алёша пиез но озьы ик, Нина нылыз гинэ валатскиз, кеськиз: "Папочка!" Нош технической институтын дышетскись Николай пиез Дальний Востокын практикаын вал. Василий Васильевич тау кариз кузпалызлы котькытчы гожъямез-бызьылэмез понна. Со адӟиз Нина Дмитриевналэсь Верховной Судысь басьтэм гожтэтсэ. Отын ивортӥллям: Маленковлы гожтэттыя, пе, Василий Паринлэсь ужзэ Верховной Судлэн коллегиез выльысь эскериз но наказанизэ кулэстӥз - 1953 арын 27 мартэ "Амнистия" указъя Парин мозмытэмын луоз... Нош 29 октябре солы ас кияз сыӵе документ сётӥзы ни: мозмытэмын, судимостез куштэмын... Талы юрттӥз Бакулев академиклэн Молотовлы вазиськемез но. Озьы ке но, ас ужаз берытскыны кема курадӟоно луиз на Паринлы. Верховной Судлэн Военной коллегияз 1955 арын 13 апреле выльысь эскеремзы бере гинэ уголовной уж дугдытэмын вал. В. В. Парин быдэсак реабилитировать каремын. Василий Васильевич ӧз яратылы со ортчем аръёссэ тодаз вайылыны. Ужаны кутскыса, со нош ик наукаяз выиз... Нырысь ужаз Медицина наукаосъя академилэн Картофизиологияя институтаз лабораториын. Собере врачъёслэсь тодон-валанзэс будэтонъя Центральной институтын кафедраен кивалтӥз, нош 1960 арысен луиз академиысь Физиологияя институтлэн директорез. Трос ужаз научной опытъёс бордын. Та аръёсы ик Парин кивалтӥз Москваысь физиологъёслэн обществоенызы. Василий Васильевич ачиз вералляз: "Котькуд исследователь выльзэ утча, шедьтэ, нош самой дуноез луыны кулэ выль талантъёсты шедьтон..." Уноезлы аслаз кибашлы дышетскисьёсызлы со юрттӥз научной ужъёссэс дасяны, куд-ог ужъёссэс нош ӵош гожъязы. Роман Маркович Баевскиен соос кык книга ӵош поттӥзы: "Очерки по космической физиологии" но "Введение в медицинскую кибернетику". 1961 арын 12 апреле быдэс дуннее вӧлмиз ивор: советской адями космосын! Та удысын Василий Васильевич Паринлэсь ужзэ данъяса, солы сётӥзы кыкетӥзэ Трудовой Горд Знамя орден. 60 арес тырмон нуналаз, кык ар ортчыса, солэн гадяз бырттӥзы на Ленин орден. Берло но трос ужъёсыз герӟаськизы инсьӧрен (космосэн). Дасяз но космосэ келяз со, Гагаринэз сяна, Титовез, Николаевез, Поповичез, Быковскиез, Терешковаез... Азьпалан кемагес лобаны дасяно космонавтъёсты дышетон вылысь, академик гожъяз научной статьяос, книгаос. 1965 арын кылдӥз медико-биологической институт (ИМБП), солы директор луиз В. В. Парин. Кык ар ортчыса поттыны кутскиз "Космическая биология и медицина" журнал, Парин быръемын вал "Наука и жизнь", "Природа" но "Наука и человечество" журналъёслэн редколлегиосазы. Со ик вал физиологической наукаосъя Международной союзлэн советэзлэн но космосэз эскеронъя Международной ассоциацилэн действительной члензы. СССР-ысь Медицина наукаосъя академиын Василий Васильевич кӧня ке аръёс ӵоже вице- президент вал, собере сое СССР-ысь Наукаосъя академие действительной членэ (академике) бырйизы. 1971 арын 15 июне тодмо советской учёной, физиолог академик Василий Васильевич Парин кулӥз. х х х Семен Александрович Самсонов Василий Васильевич Паринэн пумиськылӥз 1966 арын, Москваын СССР-ысь писательёслэн Союзысьтызы Вылӥ литературной курсъёсын дышетскыкуз. Соку ик со малпа вал ини та учёной сярысь гожтыны, но кутскыса ӧз вутты, мукет ужъёс ӝегатӥзы, лэся. Нош 1971 арын, Паринлэн кулэмез сярысь радио пыр ивортонэз кылыса, шуак луиз кадь, сюлэмаз тыл ӝуатскиз - басьтӥськиз та малпам ужез борды. Кӧня пол Семен Александрович вуылӥз Москваысь Береговой урамысь дас одӥг номеро юртэ. Мон но соин ӵош одӥг пол гинэ ӧй пыралля та быдэс дуннелы тодмо физиологлэн, Удмуртиын вордскем академиклэн Василий Васильевич Паринлэн улэм корказ. Вуылӥз татчы Зоя Алексеевна Богомолова но, соку соос сьӧразы басьтӥллям тодмо туспуктӥсьмес Иван Кириллович Чирковез но... Пумиталляз милемыз та тодосчилэн кузпалэз Нина Дмитриевна. Со нылпи врач, котьку вылэм Василий Васильевичлэн пӧртэм опытъёс лэсьтылыкуз самой матысь юрттӥсез. Огзэс огзы мур гажаса улӥллям, ньыль нылпи будэтӥллям. Николайзы луэм биологической наукаосъя доктор, СССР-ысь Наукаосъя академилэн океанологияя Шпрехов нимо институтысьтыз профессор. Мукет нылпиоссы но - Нина Васильевна - медицина наукаосъя доктор, профессор, Василий Васильевич - медицина наукаосъя кандидат, Алексей Васильевич - писатель. Пыраммылы быдэ Нина Дмитриевна кузпалызлэн архивеныз рос-прос тодматылӥз, архиве сюрымтэоссэ но со ачиз трос вералляз. Семен Александрович тодӥз академиклэн шудтэм аръёсыз, сое "калык тушмон" карылэмзы сярысь но. Повестьсэ Семен Александрович вуттӥз 80-тӥ аръёсы: нырысь со потӥз 1988 арын "Молот" журналлэн 9-тӥ - 10-тӥ номеръёсаз, нош книгаен - 1991 арын. "Адямилы но бурдъёс кулэ" нимаське со. Та Василий Паринлэн мумизлэн Нонна Ивановналэн кылъёсыз вылэм шуыса пыртэмын Семен Александровичлэн повестяз. Кызьы ке Паринъёс-врачъёс медицинаын выльзэ утчан сярысь вераськыку, мемизы кыл куспазы пырем но шуэм: "Адямиез тӥ бурдъяны быгатэ вал, бурдъяны. Солы но бурдъёс кулэ ук..." - "Зэм но, адями улэ но кулэ,- шуэ Семен Александрович,- кема-а, ӧжыт-а улэ, трос-а лэсьтэ, ӧжыт-а - кулэ. Нош улонзэ со таза но чебер мед улоз. Улонлы шумпотон но сое яратон мылкыдын бурдъяськыса. Нош сыӵе бурдъёс тазалык бордын. Мемиез вазьгес кулӥз. Эшшо улэмез потэ на вал, бурдъяськыса улэмез". Повестьысь та кылъёс сюлэмез бугырто, авторзэ тодэ вайыто. Та повестез бордын ужакуз ик Семен Александрович пумиськылӥз тазалыкез утёнъя асьме министрен но, мединститутлэн ректореныз но, отысь профессоръёсын но. Оло, со но юрттӥз 1993 арын январе одӥг нуналэ Ленин урамысь 15 номеро корка борды но, озьы ик республикаысьтымы Вир лэзьян станция борды тодэ ваён пул шуккыны. Та Паринъёслэн улэм но ужам юртъёссы. Ма, кызьы нош, пе, сотэк, вазьгес ик лэсьтыны кулэ вылэм ни озьы. Ведь та быдэс дуннелы тодмо Паринъёслэн выжызы - асьме удмурт музъем вылын. Мединститутысь профессоръёс но шуо ук: Паринъёс - со Паринъёс. М. САМСОНОВА. Удмурт Республикаысь Правительстволэн Распоряжениез 1998 ар 18 март Ижевск город � 89 - р Автомобильной сюресъёсты но сюрес дурысь сооружениосты утён сярысь правилоосты лыдэ басьтыса, кудъёсыз юнматэмын РСФСР-ысь Министръёслэн Кенешсылэн 129 номеро постановлениеныз 1969 арын 5 мартэ, 1998 арын тулыс сюресъёсты сӧриськемлэсь утён понна: 1. 1998 арын 1-тӥ апрельысен 45 нунал ӵоже уг яра огъя кутӥськись сюресъёс кузя ветлыны вань транспортлы, огъя секталаез 10 тонналэсь уногес ке, урод сюресъёстӥ ортчыны быгатӥсь грузовой автомобильёслы, осьсы самой троссэ 6 тонна груз нуэ ке, вань маркаен тракторъёслы. 2. Сюресъёс кузя ветлыны лэзёно автомобильёслы, йӧл, пызь, эстӥськон, пропан, почта нуллӥсь автомобильёслы, аварийной службалэн автомобильёсызлы, ӝог уродмись сиён-юонэз, эмъюмъёсты, комбикормез, кидысэз, минеральной удобрениосты, пудоез но тылобурдоез нуллӥсь нимысьтыз автотранспортлы, азотэз но кислородэз нуллӥсь автомашинаослы, Удмурт Республикаысь обороная но спортъя, техникая школаослэн но профессиослы дышетонъя шор ёзо учреждениослэн учебной автомобильёссылы, озьы ик нюлэс мерттонэн герӟаськем автомобильёслы но пудолы эмъюм нуллӥсь автомашинаослы. 3. 10 тонналэсь уногес огъя секталаен но осез вылэ самой тросэз 6 тонна нагрузкаен транспортлы огъя кутӥськись сюресъёс кузя юнматэм вылтусо пропускен ветлыны лэземын. 4. "Управление автомобильными дорогами Удмуртской Республики"" унитарной кун предприятилы лэзёно юнматэм вылтусо пропускъёсты предприятиослы но организациослы куд-ог учыръёсы сётъяны, соосын огкыл кутыса, асваньбурез кызьы кутэмзы шоры учкытэк, 10 тонналэсь уногес огъя секталаен но осез вылэ самой тросэз 6 тонна нагрузкаен транспортсы огъя кутӥськись сюресъёс кузя ветлыны мед быгатоз шуыса. 5. Мукет ведомствоос но предприятиос огъя кутӥськись сюресъёс кузя ветлыны пропуск сётыны уг быгато, со сюресъёс котькинлэн мед луозы. 6. Асваньбурзэс пӧртэм сямен кутӥсь предприятиослэн но организациослэн 10 тонналэсь уногес огъя секталаен но осьёссы вылэ самой тросэз 6 тонна нагрузкаен автомобильёссы огъя ветлон сюресъёсты 1998 арын 1 апрельысен 15 маёзь сӧризы ке, соосты тупатъяны коньдонэз улосвылысь сюресъёсъя фондэ ыстоно яке огкылъя коньдон висъяно, приложениез лыдэ басьтыса. 7. Удмурт Республикаысь городъёслэн но городъёслэн администрациоссылэн кивалтӥсьёссы транзитной транспортлэсь городъёс но ёрос центръёс пыр ортчон маршрутъёссэс юнматыны, юнматэм вылтусо пропускен транзитной транспортлы городъёс но ёрос центръёс пыр тупатэм маршрутъёсъя ортчыны луонлыкъёс кылдытыны кулэ. 8. "Управление автомобильными дорогами" унитарной кун предприятие но акциосын "Удмуртнефть" огазеяськон Кун автомобильной инспекцилэн ёзъёсыныз ӵош, огкыл шедьтыса, огъя кутӥськись сюресъёс кузя 10 тонналэсь уногес секталаен бадӟым машинаослы ичигес ветлыны луонлыкъёс кылдытыны, сюрес пусъёсты пуктылонэз но уен- нуналэн дежурствоез радъяны кулэ. 9. Удмурт Республикаысь министерствоослэн но ведомствоослэн кивалтӥсьёссы, городъёсысь но ёросъёсысь администрациослэн кивалтӥсьёссы материалъёсты, сырьёез но мукет грузъёсты тырмыт люканы кулэ 1998 арын 1 апрелёзь, промышленной предприятиос но лэсьтӥськись организациос дугдылытэк мед ужалозы шуыса. 10. Та распоряженилэсь быдэсъяськемзэ эскерозы ЖКХ-ая управленилэн ЖХК-ая но лэсьтӥськонъя отделэз, Удмурт Республикаысь Правительстволэн Аппаратысьтыз лэсьтӥськонъя но производственной инфраструктурая отдел. 11. "Удмуртская правда", "Известия Удмуртской Республики", "Удмурт дунне" газетъёслэн редакциоссы та распоряжениез печатланы кулэ. Удмурт Республикаысь Правительстволэн Тӧроез П. Н. Вершинин Тае тодыны кулэ Кулэсме-а музъем узырлыкмы? Вераськон мынэ удмурт шаермылэн самой бадӟым но дуно узрылыкез - му вӧй сярысь. Элькунамы со ваньзэ 230 миллион тонналэсь уно кыскемын ни. Кӧня бен кылемын на? Туннэ нуналозь утчамын-шедьтэмын 900 миллион тонна. Тӥни озьы та музъем узырлыкмы пумтэм-йылтэм ӧвӧл (куд-огез, оло, сыӵе малпанэн но улэ), нош лыдпусъёслы ке осконо, со 30 ар пала поттыны тырмоз на. Малы сое тупен-тупен гожтӥсько? Республикаямы "сьӧд зарни" поттӥсьёслэн лыдзы пумен йылэ. Тани алигес кылдытэмын Удмурт национальной нефть поттон компания. Солы му вӧй кыскон интыос висъясько. Выль ёзлэн кузёосыз (учредительёсыз) луо Москваысь "Центральной эсьтӥськон компания" (ЦТК) но Удмурт Правительство. Туэ эстӥськон компания дорамы нефть поттонэз радъянлы 20 миллион доллар уксё сётыны малпа (сомында Москва Правительстволэн бюджетаз чакламын, нош 5 ар ӵоже 1 миллиард висъяны кыл сётэ), нош Удмурт Правительство - 1 миллиард манет. Валамон, выль уж борды ӝоггес кутскон вылысь кулэ вылэм палэнысь но юрттӥсьёс-инвесторъёс. Шедёзы-а соос туннэ? Шуг вераны. Малы ке шуоно, кунгож сьӧрысь фирмаосты кышкато кызьы ке Россиысь, озьы ик Удмуртиысь законъёс но налогъёс. Соос инвесторъёслы дорамы ужаны умоесь условиос уг кылдыто. Мар бен али лэсьтэмын ни? Та нуналъёсы Правительстволэн Президиумаз та ужпум учкемын но, сизьымез месторождение Удмурт му вӧй компанилы юнматэмын. Табере музъем узырлыкъёс сярысь законъёсъя Кун Кенеш решение кутыны кулэ. Со герӟаськемын поттэм продукциез люконэн: кӧня нефть кошкоз Москвалы, кӧняез Удмуртилы кылёз. Шаермы му вӧен узыр. Со кун бюджетэ ичизэ 40 процент коньдон сётэ. Миым но нефть поттон азинскиз. Геолого-разведочной ужъёслы 180 миллиард коньдон кутэмын но 10 миллион тонналэсь уно "сьӧд зарни" кыскемын. Но республикаямы та лыдпусэз йылэтыны луонлыкъёс вань. Али 88 месторождение усьтэмын. Со пӧлысь 30-аз гинэ ужъёс, кутско ай. Соосты ӝогомытысал ке, со юрттысал экономикамес юнматыны но бюджетэ тросгес уксё пыртыны. Тӥни сыӵе ужпум сылэ Инкуазь узырлыкъёсъя но инкуазез утёнъя министерство но нефть поттӥсьёс азьын. Удмуртиын 12 му вӧй поттон интыез уже кутонъя конкурс ортчытэмын вал. Вить участник пӧлысь вормисен лыдъямын Удмурт нефть компания но "Сэмсон" американской фирма. Но берлоез ялан тяпайтэ. Нефть поттыны малпанзэ туэ 25 мартозь вераны кулэ ке вал, али но вуттымтэ. Нош мукет ласянь, продукциез люкон сярысь федеральной закон уг ужа. Озьыен, со уж борды басьтӥськыны кулэ Кун Кенеш, Удмуртиын нимысьтыз закон но нормативной актъёс кутоно. Ведь элькунысь Правительство Удмурт нефть компанилы лицензия сётӥз. Соя лэземын Турецкой, Центральной но Патраковской интыосын му вӧй поттонэз радъяны. Г. Романов. Выжыкыл дуннее Озьы нимаз аслэсьтыз выль концерт программазэ Надежда Уткина. Ижевскын улӥсьёс соин тодматскизы ни 16 мартэ. Егитъёслэн юртсы удмурт учкисьёслы дышымтэ ке но, Надялэсь творчествозэ яратӥсьёсты со шуныт мылкыдын пумитаз. Мар шуод, кырӟась но аслэсьтыз быгатонлыкъёссэ жалятэк ӧръяз залын пукисьёслы. Куд-огез вераны туртто, Надежда Уткиналэн кырӟанъёсаз удмурт шӧмыз уг, пе, шӧдӥськы. Нош кин вералоз, кытын со шӧмлэн гожез? Собере, малы ялан одӥг "эктонэз эктыны" кулэ, мукет азинскон сюресъёслэсь палэнскыса? Надялэн удмурт кылъёсъя пӧрмытэм кырӟанъёсыз мылкыдэз но лӧпкытыны быгато, сюлэмез но чепыльто, малпаськонэ но уськыто - соосты сюлэмын кылзыны кулэ. Шумпотоно, солэн сцена вылын актёръёс выллем шудыны быгатэмезлы но. Нош макем чебер удмурт шӧмо дӥськутъёсын палёмытэ Надя учкисьёссэ. Тани таяз концерт программаяз дасям суредасьлэн Людмила Молчановалэн эскизъёсызъя дӥськутъёс. Кинлы кызьы, вылды, нош мынам кӧты ӧз тыры та концертын, эшшо но кылзэм потэ на вылэм Надялэсь кырӟамзэ. Концертын озьы ик шулдыртӥзы Иван Григорьевен но Игорь Михайлов. Таосызлэн но быгатонлыкъёссы учкисьёслы капчи мылкыд кузьмазы. Нош али Надежда Уткиналэн "Выжыкыл дуннее" программаез вамышъя шаертӥмы. Соин тодматскизы ни играос, матысь дыре артистъёс вуозы Можга, Як.-Бодья, Шаркан палъёсы. Л. Малых. Мае возьматӥз ортчем арня ВЫРӞОН И. Элькун политикаез чаклано ке, кылем арняе кин меда укыргес ик адскымон луиз? Мынам малпамея, уно адямиослэн хоразы бозыр-бозыр чузъяськиз Валентин Тубыловлэн куараез. Ма, асьтэос учке ай. Понедельнике "Удмурт кенешлэн" тӧроез пыриське Ижысь активен пумиськонэ, мэре кандидатъёс пӧлысь одӥгез азе куронъёс пуктэ. Вторнике Кун Кенешлэн дас сизьыметӥ сессияз Конституцие воштонъёс пыртонлы пумит выль вазиськонэн потэ. Пятницае ӝыны час ӵоже ваче син вераське Россилэн Президентэзлэн администрациысьтыз кивалтӥсьлэн нырысетӥ воштӥсеныз Виктория Митинаен, "Удмурт кенешлэн" исполкомезлэн паськытатэм заседанияз (со ортчиз Пичи Пургаын) пыриське, ӝытазеяз ньыльдон минут ӵоже меӵак эфирын валэктэ Удмурт радиоез кылзӥсьёслэн юанъёссылы, субботае интервью сётэ "Новый регион" телекомпанилэн "Многоточие" передачаезлы... Ай кӧняез ужрадъёс верамтэ на, уго Валентин Кузьмич нокызьы но уг быгаты пинал дырысеныз пыӵам "умойтэм" сямызлэсь куштӥськыны: Тубылов понна нырысь интыын сылэ уж, со бере ини та сярысь веран. Валамон ини, вань удмуртъёслэн огазеяськонзылэн кивалтӥсезлэн куараез асьме шаерын золгес кылӥське бере, та ассоциацилэн но данэз будэ. Удмуртлыкез ӝутонэн пичи ке но герӟаськем адямиос пӧлысь кинэн гинэ берло дыре уд вераськиськы, ваньмыз сямен пусъё: бен, "Удмурт кенешын" югдур воштӥське, кижи-кожи сюресъёстӥ дэрие нӧдылыса мынӥсь воз пумен потэ паськыт тракт вылэ. Мар шуод, озьы ик луыны кулэ, син гинэ медам усьы. ИИ. "Удмурт кенешлэсь" Ижысь ёззэ кылдытон шоры пӧртэм сямен учкизы. Кин ке шуиз: сыӵе люкет луиз ке, со выль керетонъёслы гинэ инъет сётоз. Мукетъёсыз валэктӥзы: мед, мед кылдоз ватсаса ёз, со асьме "Кенешез" юнматоз. Озьы-а, тазьы-а, но туннэ вераны луэ ни шоркарысь огазеяськонлэн нырысетӥ вамышъёсыз сярысь. Бен, соос капчиен уг сётско. Янгышъёс но луыло. Но быгатӥзы ук солэн правленияз быръем эшъёс депутатэ кандидатъёсты дасяны. Валасько, мандат басьтыны соослы туж шуг луоз, озьы ке но, быръёнъёс вакытэ люкам опыт одно ик куке-соку яралоз. Яралоз депутат луыны мылкыд карисьёслы но, яралоз "Удмурт кенешлы" но. Вератэк кельтыны уг быгатӥськы тани мае. Ассоциацилэн Ижысь люкетэз радъяз туала мэрен но со интые нош ик кыльыны турттӥсь адямиен Анатолий Салтыковен пумиськон. Отчы ӧтемын вал трос калык. Уг тодӥськы малызэ, но ужрадэ кӧня ке дасо мурт гинэ вуиз. Оло Салтыковлэн дантэм луэмез кышкатӥз бырйисьёсты, оло кенешчиос асьсэос лябгес сюлмаськизы калыкез ӧтён-ӝуткан сярысь (луэ вал ук, шуом, ивор вӧлмытӥсь ёзъёсты уже кутыны). Кинлы кызьы, вылды, мыным пумиськон чик но ӧз кельшы. Анатолий Иванович олокызьы но выриз югдурез чеберъяны. Тани, пе, нылпиос уногес вордӥсько, кулӥсьёслэн лыдзы ичигес луэ, ужтэк кылемъёс кулэсмо. Мэрлы осконо ке, вань удысъёсын азинсконъёс басьтэмын. Но улонын озьы шат? Ма, городлэсь кыӵе луэмзэ асьмеос нуналлы быдэ адӟиськом ук. Кивалтӥсьёслэн ваньмыз сямен дырзы быре политикаын нюръяськонлы. Монэ тужгес но паймытӥз залэ люкаськемъёслэн кичабемзы. Тодӥськоды-а, ма пумысен соос чабизы? Мэр ӵектӥз Куӟебай Гердлы памятникез Центральной площаде интыяны. Туж умой дэмлан. Мон но чабысал, со ар-кык талэсь азьло чузъяськысал ке. Нош туннэ... туннэ со, ӟуч кылын вераса, популизм шуиське. Со сыӵе ик гольтрес кылӥське, макем валантэм луо Салтыковлэн Гердэн календаре печатлам кылъёсыз. Пумиськонэ люкаськемъёс но мэр ог-огзэс яратэмзэс возьматӥзы. Но быръёнъёс азьын ӝужам сыӵе яратон туж аспӧртэмлыко луэ. Со огшоры вузкарон. Озьы бере, "Удмурт кенешлы", оло, маке со но шӧдскымонзэ та "яратон" чотын басьтыны тыршоно вал ук. Меӵак шуоно: вот тазэ-тазэ лэсьтэ, соку ми юрттом. Мар-о отын чималиен шудонэз на? Валасько, мэре вить кандидат пӧлын Анатолий Салтыков тужгес но тодмоез. Мар со азьланьын кароз, сое вераны шугез ӧвӧл. Нош мукетъёсызлэн кыӵе луонзы валантэм на. Соин ик, вылды, "Удмурт кенеш" туалаезлы дурбасьтыны малпаз. Мед, котькуд адямилэн, котькуд огазеяськонлэн сыӵе правоез вань. Созэ гинэ верам потэ: кызьы ке но дышетсконо вал чебер кылъёсты зэмос ужлэсь висъяны. ИИИ. Валентин Тубыловлэсь нырысь ик уж сярысь сюлмаськемзэ возьматэ солэн эшъёсыныз ӵош гурт кенешъёс кылдытон бордын ужамез. Вылӥын, Кун Кенешын, выльзэ утчаськом шуыса, олокыӵе но законъёс куто, соосъя ужаны кутско но... бӧрысь со документъёсты суд умойтэмен лыдъя. Кӧня пол озьы луиз ни? Политикаын югдурез син азяз возисез лыдӟись со сярысь ӟеч тодэ. Та ласянь "Удмурт кенеш" чылкак мукет сямен ужа. Шыпытак, калленэн-калленэн со тырше интыосын аскивалтонъя ёзъёс кылдытыны. Бен, инъет вань. Удмуртъёс вашкала дырысен дышемын кысык ужпумъёсты ӧтчамын огазе эскерыны. Асьмелэн, туала дыре улӥсьёслэн, ужзы - со ӟеч амалъёсты улӟытон, али вакытлы тупамон карон. Пичи Пурга районысь Брангуртын кӧня ке ар ӵоже ужа ни ас коже кивалтонъя общественной ёз. Калык (улӥсьёсыз 645 мурт) дырын-дырын люкаськылэ ӧтчаме, со быръе гурт кенеш, отчы пыре ог 60 мурт. Отын ик юнмато старостаез но удысъёсын кивалтӥсьёсты (ваньмыз 9 мурт). Таосыз луо ни президиумлэн членъёссы. Тӥни озьы - туж огшоры. Кыӵе ужпумъёсты бен эскеро гуртоос? Ваньзэ. Кылсярысь, татын туртто вал связья отделениез пытсаны. Кенеш шуиз: ум, ум сётэ. Утизы. Озьы ик мукет ужъёсъя. Кызьы поттылӥм ни, кылем пятницае Брангуртэ ветлӥзы "Удмурт кенешлэн" исполкомаз быръем муртъёс, ёросъёсысь но городъёсысь ёзъёслэн кивалтӥсьёссы, озьы ик интыосысь администрациосын социальной но национальной ужпумъёсын вырись эшъёс. Соос пыр-поч тодматскизы брангуртъёслэн кызьы улэменызы но ужаменызы, кылзӥзы татын азьмынӥсьёслэсь верамъёссэс, адӟизы гуртоослэсь сцена вылын шулдыръяськыны быгатэмзэс, вуылӥзы музейёсы. Нош нуназе бере исполком ужзэ азьланьтӥз Пичи Пургаын. Люкаськемъёс азьын вераськизы ёрос администрацилэн тӧроез Михаил Назаров, солэн воштӥсез Валентина Панфилова, валтӥсь библиотекалэн кивалтӥсез Надежда Вахрушева но мукетъёсыз. Малпасько, "Удмурт дунне" та пайдаё ужрад сярысь азьланьын но гожъялоз на. Нош туннэ йылпумъяса тазьы вераны луоно: интые потаса кенешон возьматӥз, мылкыд кариськод ке, котькуд гуртын улонэз ӧжыт ке но ӟечгес, шулдыргес карыны луоно. Та удыс ӧръяськиз ке, "Удмурт кенешлэн" данэз но шӧдскымон будоз. Калык валалоз, со экранын чеберъяськон но кунгож сьӧры ветлон сярысь сюлмаськонъёсын уг улы, огшоры адямиос сярысь малпаське. Ӵапак сыӵе ик ужпум пуктӥзы уго "Кенешлэн" кивалтӥсьёсыз азе кылем сӥзьыл ортчем Бадӟым ӧтчаме ветлэм делегатъёс. Иван ЛЕБЕДЕВ. Нош ик Кокорин? Кылем субботае Ижын филармонилэн юртаз ортчиз Ӟуч культурая обществолэн конференциез. Кык ар ӵоже быдэстэм ужъёс сярысь веразы правленилэн членъёсыз. Делегатъёс, соос 267 кузя вал, кенешизы азьланьын ужан сярысь. Бырйизы кызь муртлэсь выль кивалтэт. Тӧро нош ик луиз Кун Кенешлэн депутатэз Михаил Кокорин. Е. Попов. Наталь ЛУШКАЗЫ НО ТӤНИ Валентина Ивановналэн Кизнер палъёсы вуылэмез ӧй вал на, нош дӥсьтӥсь сямызлы луыса татчы ик улыны но кылиз. Психоневрологической диспансерысь гожмо дӥсьёсын солань-талань ветлӥсьёс дышетӥсьлэсь ужан мылкыдзэ куашкатӥзы. Ассэ ялан тюрьмаын кожалляз. Соин но, вылды, пегӟон сярысь ӵемгес малпаськылӥз. Инмар вылэм на. Егит специалистэз, огдырлы шуыса, Саркузысь школае ужаны ысто. Нош саркуз пиос сое гинэ витиллям, лэся. Лымшор палъёслэн ныл лушкан сямзы али но вань. - Кузпалэным трос вераськыса, тодматскыса ик ӧй вутты, но синйылтӥ ни вал, - шуэ Валентина.- Вордскем нуналы шуыса, дораз ӧтиз, эшъёсы но люкаськемын ни, пе. Пумитъяськыса ӧй улы - пыри. Со нуналэ эшъёсыз но, вордскем нуналэз но вылымтэ. Пӧяса кышнолы пыртӥз. Соинтэк-а Кузнецове ялан данъяське, Ёлкинаез но пӧяны быгатӥ ай шуыса. Кылдэмез озьы вылэм, дыр. Лушказы ке но, шудо улӥськом, нылпиосмы будо. Кузпалъёс ог-огзылы зоремын кадь. Котькыӵе ужрадын азьветлӥсьёс луо, художественной самодеятельносте ветло. Игорь Иванович арганэн ӟеч шудэ. Ӟучо- удмурто гуртын удмурт кылмес мултэсгес каремзы потылэ, лэся. Озьы ке но, Кузнецовъёс шуг-секытъёслы уг сётско. - Шаерамы улӥсьёс анай кылмес юнгес мед гажасалзы,- шуэ Валентина Ивановна,- быгатэмъязы сое пиналъёссылы но мед пыӵатысалзы. Нылкышноос йыгмыт мед вамышъясалзы туннэ улонэн, медам "вые" вылэм ас семьяосазы гинэ. Капчи мылкыдо кышномуртлэн сюлмыз кыске кырӟась-верась калык пӧлы. Кизнер палан мӧзмысагес улэменыз, лэся, мылкыдыныз Валентина ялан вордскем гуртаз, Можга районысь Сибыын. Нош кыӵе ке муген Ижевске вуэ ке, пӧртэм ужрадъёсы пыриськыны тырше. Бӧрысь кылэм-адӟемзэ гуртаз возьматыны дыртэ. В. КУТУЗОВА. Туспуктэмез В. КАМАШЕВЛЭН. УКСЁ - ВАНЬМЫЗЛЫ КУЗЁ Та веранэз котькудӥз ас вылаз шӧдӥз ни. Зэмен но, туала вакытэ кисыяд коньдонэз ке ӧвӧл - тон кужымтэм, кылтэм-ымтэм мурт кадь: нокыӵе властед, правоед ӧвӧл. Соин но данакез куашетонъёс, ог-огдэ валантэмъёс пото коньдон пусйыез огпалась огпала кыскан бордысь. Ижевск пыре дотациостэк улӥсь городъёс радэ. Озьыен, со нокинлы но уг тэльмыры, поттэм коньдонзэ ас валамезъя уже кутэ. Ӵапак со сярысь вераськон мынӥз городысь мэрилэн Коньдон ужпумъёсъя управлениезлэн кивалтӥсеныз Валерий Наумовен пумиськон дыръя. Со вакчияк йылпумъянъёс лэсьтӥз туэ ужамзылы: - Городлэн бюджетаз 24 мартозь вуэмын 129 миллион манет. Со пӧлысь ог 70 миллионэз - "улэп" коньдонэн, 30 миллионлэсь ятырез - вексельёсын, 29 миллионэз - взаимозачёт чотын. Кредитъёс басьтэмын куинь банк пыр, ваньмыз 24 миллион 260 сюрс манет. Кытчы со кутэмын? 45 процентэз - уждун тыронэ, 4,5 процентэз - "Удмуртэнерголы", медикамент басьтонэ - 3,3, нылпи пособилы - 4,8, книга поттонэ - 1,7, ветеранъёслы юрттонэ - 1,5 процент. Пӧртэм расходъёслы, оглом вераса, кошкемын 93,6 процентэз. Берло нуналъёсы уждун басьтон ласянь югдур тупатскиз бюджет удысын. Туннэ-ӵуказе коньдон тыриськоз нылпи садын ужасьёслы. Вераськон мынэ февраль толэзь сярысь. Март понна пунэмаськонъёсты берыктыны капчигес луоз, малы ке шуоно, городлэн бюджетэз апреле шӧдскымон "зӧкоме" декларациос чотын,- оскытӥз В. Наумов. Правительство ласянь висъямын 31 миллиард манет, нылпи садъёсты городлэн ки улаз выжтон понна. Табере вань заводъёс, предприятиос сыӵе сюлмаськонлэсь мозмытэмын. - Та вакытэ милемыз шугъяськытэ нылпи пособиосты тырон. Законъя коньдон вуыны кулэ федеральной бюджетысь, но тыре город. Витиськом, пунэмаськонъёссэ казна берыктоз шуыса. Валерий Наумов журналистъёслэн пӧртэм пумо юанъёссы валэктонъёс сётӥз. Кылсярысь: - Налогысь кӧняез Ижевске кыле? - 38 процентэз, 62-ез кошке Россилэн бюджетаз. - Ар ӵоже Ижевсклэн кисыяз кӧня манет люкаськыны кулэ? - Чакламъя 1 миллиард 91 миллион манет (выль коньдонэн вераса). - Трос-а тыронъёссы городысь предприятиослэн? - 210 миллион манет. Озьы ке но, быгатӥм секыт толэз бадӟым авариостэк, ыштонъёстэк потыны. Дыраз ветлӥзы автобусъёс но троллейбусъёс, трамвайёс, коркаосы дугдылытэк шуныт но ву лыктӥз. Со понна тау карыны кулэ ас удыссэс уен-нуналэн быгатыса нуись калыкмылы. - Кӧня манет чакламын дышетӥсьёслы методической литературен юрттон ласянь? - Висъямын 9 миллион манет 1995-1997 аръёс понна пунэмаськонъёсты берыктонлы. Со сяна, 1 июльысен город чотын будоз бюджет удысысь ужасьёслэн тарифен тупатэм ставказы - 60 сюрсысен 80 сюрсозь. Л. МЕДВЕДЕВА. Спорт ЧЕМПИОНАТ МЫТЭМЫН Вылӥ но нырысетӥ лигаысь футбол командаос 29 мартэ нырысет нюръяськонэ пыриськизы. Та нуналэ Ижысь "Газовик" пумиськылӥз Воронежын миым вылӥ лигаын шудэм "Факелэн". Асьме футболистъёсмы 1:4 лыдын келязы. Пусъем потэ, туэ "Газовик" трослы выльдӥськиз. Соин ик командалы нырысь-валысь секыт йӧтоз. Валтӥсь тренерез но мукет. Виталий Шевченкоез воштӥз Вячеслав Мельников. Азьвыл со Петербургысь "Зенит" командаын ужаз. Кыӵе интые мертаське туэ "Газовик"? Президентэз Владимир Тумаев котьку сямен вормыны косэ. Тренеръёс та ласянь кепырало, но дас кужмоосыз пӧлы шедём шуыса оскыто. Г. ИВАНОВ. Чеберез ичи вал Алнашын ортчиз шаерысьтымы крезьгурчиослэн Ашальчи Окилэн вордскемез дырысен сю ар тырмонлы сӥзем ӵошатсконзы. Таяз учыре но со шараяз выль нимъёсты. Зэм, соос пӧлысь куд-огез тодмо ни. Ашальчи Окилэн кылъёсызъя тужгес ӟеч кырӟанъёс дасяллям крезьгурчиос Алнаш ёросысь Анна Плотникова, Можгалась Вячеслав Кудрявцев, Можга ёросысь Александр Андреев. Егитъёсын ужанъя кун комитетлэн "Оскон" кузьыменыз пусъемын Завьял ёросысь Изгуртысь Геннадий Орехов. Нимаз учыръёсъя вормизы Алнаш ёросысь Евгений Ганьков, Евгения Волкова, Вячеслав Адаков, Вавож ёросысь Наталья Матвеева, Ижысь Рафис Закиров, Менделеевскысь Виктор Никифоров, Можга ёросысь Николай Жуков, Ува ёросысь Вячеслав Кириллов, Шаркан ёросысь Василий Старших, мукет усточиос. Ансамбльёс пӧлын висъяськизы Можгалась "Марӟан", Шаркан ёросысь Бӧня черкогуртысь коллектив. Зэм, таяз ӵошатсконын ичи вал чебер удмурт крезьгуръёс. Азьланяз кужымзэс мед мертасалзы азьвыл лауреатъёс но. Е. Ромашова. "12 вамыш" Тау карисько Инмарлы "Ал.-Анон" ("Анонимной алкоголикъёс") - со юись пиосмуртъёслэн но кышномуртъёслэн нимзэс шараятэк огазеяськонзы. Отчы ветлӥсьёс асьсэ кужыменызы но выль амалъёсын ог-огзылы, озьы ик мукет юисьёслы юртто сазьтӥськыса улыны. Та огазеяськонэ пырыны быгато юонлэсь куштӥськыны вань мылкыд карисьёс, коньдон тыро ас мылкыд каремзыя. "Ал.-Анон" герӟаськемын ӧвӧл нокыӵе мукет огазеяськонъёсын, осконъёсын, учреждениосын, организациосын; уг пыриськы политикае, нокинлы дур уг басьты, мукетъёсызлэн улон шоры учконзылы пумит уг луы. Ми азьын одӥг ужпум сылэ - куштӥськоно юонлэсь но мукет юисьёслы сазьтӥськыны юрттоно. Ужаськомы "12 вамыш" программая. Со юрттэ юонэн нюръяськыны, озьы ик огазеяськонэ ветлӥсьёсын но мукет адямиосын ог-огдэ валаса но тупаса улыны. "1-тӥ вамыш" шуэ: "Юон азьын асьмелэсь ляб луэммес ми валамы, озьы ик валамы асьмеды кутыны быгатымтэмес". 1. Мынам эшъёсы азьло вераллязы ке но вал, мон алкоголик шуыса, ас поннам малпалляй: котьмар мед шуозы, нош юэмысь мон ачим дугдыны быгато. Оло, пичиен- пичиен но юыны дышетско. 2. Аслым олокӧня пол вералляй ке но, табере, пӧй, ичиен юо ни, ымам ӧжыт гинэ вина шедьылӥз но, дугдыны ӧй быгатылы. 3. Берлоез юэме вал со. Огнам но, картэным но кык арня пала юи. Берпум коньдонмес бутылкалы быдтӥм. Но куке-соку кӧты "тыриз", лэся. Картэ одӥг арнялы уже кошкиз, мон кыли огнам. Коньдонэ но, одӥг шорем няне но ӧвӧл. Сазь дыръям пунэмаськыны возьыт потылӥз. Картэ бертытозь мар но сиыса улӥ. Трос малпаськоно луиз. Юись муртъёс шуо, котькудӥзлэн аслаз пыдэсыз вань. Мон асламез дорозь вуиськем, лэся. Уже ӧвӧл, кефир гинэ но аслым басьтыны уг быгатӥськы. Кин мон? Асме ачим воксё ыштӥсько ни ук. Ураметӥ гинэ но ветлыны возьдаськисько. Нош эшшо юи на ке, мар луоз? Синъёсы усьтӥськизы, асме ачим пӧямысь дугдӥ, лулыным-сюлмыным валай - мон алкоголик, юыны уг быгатӥськы. Валай созэ но, та висёнэным улоно луоз вань улытозям. Нош кытысь кужым шедьтоно? "12 вамыш" программаез лыдӟыса валай, мон гинэ сыӵе вылымтэ, соин ик дугдӥ асме жалямысь. "Ал.-Анон" огазеяськонэ пырыса, 1995 арын дуннеын 2,5 миллионэз юисьёс винатэк улыны быгатӥллям, пе. Нош малы мон уг быгаты? Юрттэт шедьтӥ "2-тӥ вамышысь". "Валамы, милесьтым трослы золгес Кужым гинэ быгатоз милемды шонер малпаськытыны". Нырысетӥ гожтэмам мон верай вал ини, Вылӥ кужымез - Инмарез - мон бер валаны кутски, со доры курадӟонъёс пыр вуи. Пинал дырысеным мон номырлы ӧй оскылы, валалляй ке но - урод уж аслыд ик уродэн берытске, нош ӟечез - ӟечен. Озьы мыным валан лыктӥз: та улонын вань кыӵе ке но Вылӥ кужым. Одӥг пол, отпускысь потон азьын берпум нуналаз, юонние шеди. Кудӟытозям ӧй юы, но аслым пумит лэсьтӥ, возьыт потӥз. Муртэ пӧяны капчи, нош астэ уг луы. Малпасько, кызьы табере ӵуказе ужалом? Киосы дыр куалекъяло, изёнэ кытчы ке тӧлӟиз. Шуак йырам малпан лыктӥз, пыласько но Инмарлы вазисько, пӧй. Озьы ик лэсьтӥ. Пыдес вылам кариськыса вӧсяськи, бӧрдыса ик верай аслэсьтым янгыш луэмме, кужым кури улыны но юонлэсь куштӥськыны. Кыӵе кылъёс вал со, али уг ни тодӥськы, но мыным сыӵе капчи луиз, вань уродэз, кырсез мугорысьтым но сюлэмысьтым потӥз-кошкиз кадь. Умме капчиен уси, нош ӵукнаяз каньыл мылкыдын уже мынӥ. Улонэ умой луиз кадь. Куинь толэзь ӧй юы, Инмарез но вунэтӥ. Нош табере мон тодӥсько: Инмарлы нуналлы быдэ вазиськоно, умоез понна но тау карыса. Куд-ог вакытъёсы монэ Инмар ки йылаз нуиз кадь. Юэменым йырин трос пол уго кулон калэ вуылӥ, но паймоно кадь, сыӵе учыръёсысь номыр луытэк потылӥ. Мон осконлы бырем адями ӧвӧл, Вылӥ кужымез ас сяменым валасько, но со мыным юрттэ. "3-тӥ вамыш". "Малпанэ вуим, асьмелэсь мылкыдмес но улонмес оскомы Инмарлы, кызьыен асьмеос сое валаськом". Мон асме ачим "Пичи Инмар" кадь возьылӥ, ялан мон но мон шуылӥ. Мон лэсьто, мон басьто. Нырме олокытчы но чуртналляй, уката ик кузпалылэн ужъёсаз. Ваньзэ ӧй ке эскеры, улон но дугдоз кожай, лэся. Инмарлы оскеме юрттӥз "3-тӥ вамышез" но валаны. Инмарлэсь юрттэт курисько бере, оскисько солэн кужымезлы. Ваньзэ ӧвӧл басьтоно ас вылам, лэсьтоно кӧнялы тырме кужыме, тэк но пуконо ӧвӧл. Улонэлы но пумитъяськемысь дугдӥ, маи вань, со ик тырмоз, пӧй. Валаны кутски, узырлык - со шуд ӧвӧл на, шуд потэ мылкыддэ каньыл возьыны быгатон бордысь. Азьланез сярысь куалекъямысь, малпаськемысь но дугдӥ. Кызьы кулэ, озьы ик луоз, мар пайдаез аслэсьтым лулсюлэмме таркамысь. Туж мыным кельше одӥг нуналлы программа - ул туннэ нуналэн, ӵуказе вуиз ке, со нош ик туннэ луоз. Алкоголик луэмелы мон уг ни пумитъяськиськы, но мынам вань кужыме юытэк улыны. Лыдӟисько программаез, огазеяськонамы ветлӥсько, мукет юисьёслы юрттӥсько. Сазьтӥськон программаез калык пӧлы вӧлмытон понна радиоез, газетэз, мукет амалъёсты кутыны тыршисько. Со юрттэ аслым но юытэк улыны. Огазеяськонысьтымы эшъёсынымы люкаськыса, вераськонмес кутскиськом молитва бордысен. Лыдӟисьёслэн юанзы кылдоз: мар кароно, адями Вылӥ кужымлы но, Инмарлы но уг оскы ке? Сыӵеос вань огазеяськонамы. Соос котькудзы асьсэлы сыӵе кужым шедьто - кинлы со Инмар, кинлы программалэн яке огазеяськонлэн кужымез. "2-тӥ вамышын" озьы ик верамын � кин кызьы сое ас понназ вала. Ми пӧлын вань христианъёс но, мусульманъёс но, протестантъёс но. Нокин но аслэсьтыз осконзэ уг вылтӥя, гажаса учке мукетыз шоры. Ӵуказе, кӧлэмысь султыса, мон нош ик Инмарлы вазисько, вина юытэк улон курыса. Нош азьло аслым шуылӥ вал, сыӵе-сыӵе дырозь уг юы. Но со выльысь юыны кутсконлы программа выллем луылӥз. Табере ӝыт кӧлыны выдыкум малпасько, нунал ӵоже мар умойзэ лэсьтӥ, маиз ӧз пӧрмы, мар муген? Нош ик Инмарлы тау карисько сомында ужез лэсьтыны, сазь улыны юрттэмезлы. Галина. Редакцилэсь. "12 вамыш" программая кыӵе ке юанъёсты, валамтэосты кылдӥзы ке, кинлы ке юрттэт кулэ ке, вазиськыны быгатоды таӵе адресъя: 426072, Ижевск город, Молодёжной урам, 34, "Семья" центр, Галиналы. Телефонэз - 30-59-89. Асьтэлэсь малпанъёстэс, юанъёстэс озьы ик ыстыны быгатоды газетмылэн редакцияз. "Ал.- Анонлэн" ужамез сярысь веранъёсмес азьланьтом на вуоно номеръёсын. СЮДОЗ-А ФЕРМЕР КАЛЫКЕЗ? Кызьы ивортылӥм ни вал, 20-тӥ мартэ республикаысь фермеръёс дасэтӥ конференциязы люкаськылӥзы. Нырысь-валысь ас кожазы ужасьёс ог вить сюрс пала ке вал, али соос куинь сюрс вить сю куатьтон котыр. Берло аръёсы та лыдпус трос уг вошъяськы. Кӧня мурт музъемзэ аналтэ, сомындаез ик ас понназ ужаны кутске. Ортчем арын но озьы ик луиз. Шумпотоно соизлы, та удысэ лыкто гурт ужез тодӥсь-валась адямиос, нокыӵе шуг- секытлэсь кышкасьтэмъёс. Сое ас докладаз пусйиз Удмурт АККОР-лэн кивалтӥсез Рудольф Максимов но. Конференцие вань районъёсысь ог сю пала делегат люкаськылӥз. Фермеръёслэн музъемзы бадӟым ӧвӧл ке но (73500 гектар), соос республикаямы 14 процентсэ картофкаез, 6 процентсэ бакча сиёнэз но 4 процентсэ ю-нянез будэтӥзы. Зэмзэ вераса, оло, та лыдпус бадӟымгес луысал, но куд-огез будэтэм ваньбурзэ ваньзэ уг "шарая". Музъем вылын ужасьёсты сюлэмшугъяськытэ со: туж секыт картофкаез, бакча сиёнэз но ю-нянез вузаны. Соос чик пайда вайытэк "кыллё" гуосын-кеносъёсын. Кылсярысь, тросэз ю-няньзэс кыкетӥ арзэ нокытчы келяны уг быгато ни. Озьы фермеръёслэн государстволы пунэмен тыронъёссы арысь аре будо. Нош коньдон ӧвӧл бере, музъем ужасьёс уг быгато выль техника басьтыны. Тани ортчем арын но куать трактор, куать автомашина, вить турнан машина гинэ азбаразы пыртӥзы. - Поттэм ваньбур вузанэз капчиятон понна, Гурт хозяйствоя но сиён-юонъя министерствоын нимаз отдел кылдытоно. Фермеръёслы юрттоно умой кидысэн бусыоссэс кизьыны, гидъёсазы ӟеч выжы пудо вордыны. Озьы соослэн хозяйствооссы уногес пайда ваёзы,- пусйиз Рудольф Максимов. Кылем арын фермеръёс, 1996 арен ӵошатыса, 19 процентлы тросгес ваньбур поттӥзы. Улон возьматӥз, быгатыса ужась фермеръёс начар музъемъёс вылысь но гектарысьтыз 30 центнер ю-нянь, 250 центнер картофка люкало. АККОР-лэн кенешез (советэз) ортчем аре ньыль заседание ортчытӥз. Сюмси но Пичи Пурга районъёсы потаса, отын семинаръёс ортчытъяз но фермеръёслы мукет пӧртэм юрттэт сётъяз. Туэ сыӵе ужрадъёс азьланьтӥськозы. Пусйыны кулэ, берло дыре фермеръёс огазеяськыса ужазы кутскизы. Озьы ужзы трослы капчияз. Кенешын озьы ик ивортон лэсьтӥз эскерон комиссилэн кивалтӥсез Валентина Кузнецова. Со пусйиз, АККОР-ын янгышан учыръёс ичи вал шуыса. Соос пӧлысь кыкез сярысь гинэ вераны луысал. Одӥгез - кык трактор сётэмын школаослы, та техника фермеръёслы басьтэмын вал ке но. Мукетыз - егит фермер 28 миллион манет уксё куриз выль интые корка лэсьто шуыса, нош ачиз нокытчы ӧз мыны, курем уксёзэ али но ӧз берыкты на. Мандатъёсъя комиссия ивортэмъя, ог сю пала люкаськем делегат пӧлын ӝыныезлэсь тросэз вылӥ образованиен, сомындаез ик кивалтӥсь луыса ужамын. Уноезлы музъем вылын тыршисьёслы 30-40 арес тырмемын. Та лыдпусъёс шоры учкыса валано - али республикаямы музъемез тодӥсь-валась, бадӟым опытэн адямиос ужало. Люкаськемъёсты ас ужан опытэнызы тодматӥзы Алнашысь Виктор Бобров, Юкаменскысь Сергей Данилов, Сарапулысь Александр Шадрин, Воткинскысь Ольга Баскова, Завьяловоысь Вениамин Матвеев, Шарканысь Павел Киселев, Играысь Валерий Усков, Каракулиноысь Александр Стуков. Ваньзы соос ас хозяйствоязы выль амалъёсты куто, лудъёссэс вылӥ элита кидысэн кизё, гидъёсазы ӟеч выжы пудоос возё. Верам кузёослэн лудъёссы но паськытэсь, гидъёссы но вӧл-вӧлэсь, соин ик соос пайда но бадӟымгес басьто. Гурт хозяйствоя академиысь профессор Валентин Соколов ӵектӥз музъем вылын тыршисьёслы наукалэсь азинсконъёссэ пыӵатыса ужаны. Удмурт тодосчиос берло дыре гурт хозяйствоез пайдаё нуыны уно выль амалъёс ӵекто. Фермеръёслы со тодон-валанъёс трос пайда ваёзы. Гурт хозяйствоя но сиён-юонъя министрлэн воштӥсьёсыз Минахмет Валиуллин но Алексей Белов фермеръёслы уно ӵектонъёс сётӥзы но быгатэммыя котькуд ласянь юрттомы, шуизы. Конференцие лыктэмъёс АККОР-лэн кенешезлэсь ужзэ умоен лыдъязы. Озьы ик Кун Кенешлэн Тӧроезлы Александр Волковлы но Правительстволэн Тӧроезлы Павел Вершининлы вазиськон кутӥзы. Отын рос-прос верамын фермеръёслэн сюлэмшугъяськонъёссы сярысь. Та нуналэ ик делегатъёс Гурт хозяйствоя но сиён-юонъя министерствоен ӵош но ог- огедлы юрттыса ужан сярысь огкыл (соглашение) гожтӥзы. Ортчем арлэн пумаз республикаысь АККОР-ын кредитъя кооператив кылдытэмын. Со фермеръёсты пӧртэм чакламтэ ыштонъёслэсь, шуг-секытъёслэсь утьыны кулэ. Оло музъем вылын ужасьёс со сярысь уг тодо, оло мугез мукет, но али огкыл дас фермеръёсын гинэ гожтэмын. Зэмзэ вераса, гуртын улӥсьёс трос ыштон адӟо инкуазь "пӧртмаськемлэсь" ю бусыын но, пудо гидын но. Огдыре республикаысь кивалтӥсьёс фермеръёслы трос саклык ӧз висъяллялэ, нош туэ соос шоры мукет синмын учкыны кутскизы. Тани таяз 10-тӥ конференцие но Удмурт Республикаысь Правительстволэн Тӧроезлэн воштӥсез Владимир Зенин но Агропромышленность удысъя, музъем кусыпъёсъя но инкуазь узырлыкъёсты кутонъя ялан ужась комиссилэн кивалтӥсез Аркадий Малков пыриськизы. Озьыен, фермеръёслэн сюлэмшугъяськонъёссылы вылӥын но бадӟым саклык висъяське. Н. ВОЗИСОВ. Бускельёссэс шумпоттӥзы Можга городысь эстрадая "Ӟардон" ансамбль нырысетӥ арзэ гинэ ужаны ӧдъяз, нош азинсконъёссы ушъяны луымон. Соосты тодо ни лымшор районын улӥсьёс. Таяз шутэтскон нуналэ вуылӥзы но паймытыса кельтӥзы Алнаш районысь туймыйылъёсты. Шуныт кичабонъёсын пумитазы Вера но Владимир Васильевъёсты, Лилия Макароваез, Нелли Никитинаез но Евгений Семёновез. Нош азинсконъёс басьтыны юрттэ кивалтӥсьсы, культура удысысь сӥё-дано ужась Вячеслав Кудрявцев. В. Андреева. Дэриысь но коньдон потэ Сюресъёсты сӧронтэм вылысь, тулыслы быдэ трактъёс огдырлы ворсасько. Зэмен но, груз нуись-ваись бадӟым машинаос лӧптэм асфальтэз тросэтӥ гудыса кельто. Югдур пӧртэм ӧвӧл городын но - татын уката но сак эскероно: нуоно грузэз дыраз вуттоно. Тае лыдэ басьтыса, Ижевсклэн администрацияз кутэмын решение, транспортлы сётэм пропускъёслы октэм коньдонзылэсь 75 процентсэ кутыны городысь коммунальной хозяйствоез юнматонэ, нош 25 процентсэ - столицамес чеберъянэ, шулдыртонэ. Валамон ини, сюресъёсты выльдон-тупатъян уж, котьку сямен нырысьёсыз радын луоз. Р. Данилов. "Телеинформ" "будӥз" "Телеинформ" телекомпания передатчиклэсь кужымзэ 1 киловаттозь будэтӥз. Солэсь передачаоссэ учкыны быгатозы НТВ программалэн 29 дециметръем каналысьтыз. Татын ик нуналлы быдэ 19 час 10 минутэ тодматскоды городысь иворъёсын. Передача быдэсак сӥземын Ижевсклы. Т. Еремина. Солдатъёслы шайвыл Дырызлэсь вазь улонысь кошкем пиосмес ватон вылысь, Ижевсклэн администрациез городлэн шунды пуксён палаз нимысьтыз шайвыл усьтон сярысь решение кутӥз. Кинъёслы отчы инты висъямын луоз? Боевой действиос дыръя быремъёслы, "пӧсь точкаосы" ветлэмъёслы. Нимысьтыз музъем сётӥськоз воинъёсты-афганецъёсты Буре ваёнъя аллея кылдытонлы. С. Рудин. Бигер гимназия Ижевскын таяз арын усьтӥськоз на эшшо одӥг гимназия - бигер семьяосысь пиналъёс понна. Сыӵе куронэн Калыкез дышетонъя министерствое, городысь мэрие мумы-бубыос огпол гинэ ӧз вазиськылэ ни. Оскон вань, малпанзы туэ одно ик быдэсмоз шуыса. 6 номеро бигер классической гимназия усьтон сярысь постановление кутэмын 17 мартэ, Россия Федерацилэн но Удмурт Республикалэн калыкез дышетон сярысь законъёссы вылэ пыкиськыса. Солэн улонэ пыӵамез понна кыл кутоз Ижевскысь мэрлэн воштӥсез Г. А. Ахророва. Л. Дмитриева. Наталь Ялӥськом конкурс Семья - со "сизьым мон" Туала вакыт нокинлэсь ик тыбырзэ уг маялля. Ёрмытэк но кӧттыро улон понна утчаськоно-бергано, уката ик нылпиос сярысь сюлмаськон вань ке. Ӟуч кылысь берыктыса, семья - со "сизьым мон" шуэм луэ. Кызьы бен улэ туала вакытэ трос нылпиё семья? Удмурт Республикаысь Правительстволэн Аппаратысьтыз семья отделэн ӵош "Удмурт дунне" газет та арлы ялэ конкурс: "Семья - со "сизьым мон"". Конкурсэ пыриськыны быгатозы журналистъёс, писательёс, семья отделъёсын ужась специалистъёс, дышетӥсьёс, огшоры ужасьёс, ужтэк пукисьёс - огкылын вераса, вань мылкыд карисьёс. Но, йылпумъянъёс лэсьтыку, ужъёссы нимаз-нимаз эскеремын луозы гожъяськон удысын тыршисьёслэн. Конкурсэ ыстэм ужъёсын возьматоно куинь но солэсь трос нылпиен адӟем карымон семьяез. Кызьы со туала вакытысь шуг-секытъёсты вормыны быгатэ, ёрмытэк улыны кужым но луонлыкъёс шедьтэ. Возьматоно, кызьы анай-атайёс, пиналъёссэс, дӥсям-сюдэм сяна, соослы ӟеч сямъёс пыӵато, ужлы дышето. Семья улонзы сярысь гожтыны быгатозы асьсэос но анай-атайёс. Конкурслы йылпумъянъёс лэсьтэмын луозы ар пумын. Вормисе потэмъёсты возьмало дуно кузьымъёс. Газетлэн редакциез. Ӟечкыласьком! Кызьы ивортӥз "Удмурт кенеш" огазеяськонлэн исполкомезлэн паськытатэм кенешаз Людмила Христолюбова (премиосъя нимысьтыз комиссилэн кивалтӥсез), Ашальчи Оки нимо премия туэ сётэмын луоз егит гожъясьлы Лидия Нянькиналы. Дуно кузьымез со басьтоз нырысетӥ удмурт нылкышно кылбурчилы сӥзем ӝытын. Лидия Нянькина будӥз Алнаш ёросын, дышетскиз Москваын. Кӧня ке ар ӵоже ужа ни "Инвожо" журналын. Лыдӟисьёслы тодмо луэ мур пуштросъем вакчи веросъёсыныз но сюлэмез вырӟытӥсь кылбуръёсыныз. 1996 арын "Удмуртия" издательствоын потӥз "Ваёбыж кар" нырысетӥ книгаез. "Удмурт дуннеын" ужасьёс сюлмысьтызы ӟечкылало эшсэс дано премиен. Асме шудоен лыдъясько "Нылпиме сюратайлы уг оскы" статьяез "Наталь" бамысь лыдӟыса, мынам но Машилы вазиськеме потӥз. Мон ачим мумилэсь куать толэзьем кыли. Солы но, лэся, асме весь ултӥ карылӥ. Трос умой пиос тодматскыны турттылӥзы, нош мон малпалляй: серем карозы но куштозы. Нош сюранаен будӥсь пилы оски. Со армие кошкиз, мон секытэн кыли. Вордӥськиз нылы. Ньыль ар гожтэт гожъяй (соку сомында служить каро вал), возьмай. Нош со армиысь вуиз ке но, монэ ӧз учкы ни. Сюранаезлэсь кылзӥськиз, мукетсэ кышно басьтӥз. Мон но бызи, 56-тӥ статьяя янгыше уськытэм муртлы. Трос калыкез соку юнме шорысь вӧсь каризы. Нылы мурт ӧз кары картме, папа шуыса вазиськылӥз. Со но, ньыльдон одӥг ар ӵоже ӵош улытозямы, одӥг пол но секыт кыл ӧз вера нылылы. Ӝоген ар луоз ни висьыса кулэмез дырысен. Пинал дыръя валаны уг луы алдаськыны шедемез. Но нылпилэсь кышкано ӧвӧл. Инмар уз кушты, мукетсэ эш шедьтод, ваньмыз пиос сюлэмтэмесь ӧвӧл ук. Нош огнын улыны туж секыт. Уката ик гуртын дышемын пал кышноос вылэ пож ву кисьтаны. Куать толэзьысен мемейтэк кыли, кызь вить арескысен киям нуныен кыли, пурысьтай, куатьтон куать арескын пал кыли, но асме шудо кышномуртэн лыдъясько. Нылылэн сюратаез, Юрий Стрижев, туж но туж умой адями вал. А. Стрижова. Сюмси район, Зон гурт. Кибашлы Кӧня меда асьме шаерын Анатолий Ушаковъёс? Трос, дыр. Одӥгез - артист - ваньмызлы тодмо. Кылемъёсыз - сокем ӧвӧл. Сыӵеос пӧлы пыре Ува ёросысь Поршур гуртын улӥсез но. Анатолий Митрофанович татын пӧртэм ужъёсты быдэсъя. Ушаковез калык гажа лачмыт сямыз понна. Бен, сыӵе со. Озьы ке но, эн малпалэ, воргорон дантэм шуыса. Анатолий Ушаковлэн "котомкаяз" - уно дасо изобретениос. Ужъёсты капчиятон вылысь солэн киыныз-йырыныз хозяйствоын умоятэмын уно машинаос, выльдэмын ини пӧртэм тӥрлык. Зарни кио адями доры олокыӵе но куронэн вазисько гуртысь адямиос. Тодо уго - Толя агай одно ик юрттыны тыршоз. И. Лебедев. Тани со - Аанатолий Ушаков. Суредэз Л. Прозоровлэн. Кивалтон но нылкышно Макем бадӟым инты басьтэ асьмелэн туала улонамы нылкышно кивалтӥсь? Яке шаер шуон корабльмылэн ву вылтӥ гылӟонэз одӥг воргоронъёслы гинэ оскемын? 1996 арын 30 июне Россия Федерацилэн Президентэз кутӥз "Кун властьлэн федеральной органъёсаз но Россия Федерацилэн субъектъёсызлэн кун властьлэн органъёсаз нылкышноослэсь кулэлыксэс будэтон сярысь" Указ. Солэсь кызьы быдэсъыськонзэ чакласа, эскеронъёс ортчытэмын вал. Удмурт Республикаысь быдэсъясь властьлэн но интыысь аскивалтонлэн, законъёс кылдытъясь властьлэн ёзъёсаз но судын нылкышноослэн но воргоронъёслэн кивалтонзыя таӵе суред пуксе. Правительстволэн Президиумаз 9 мурт быръемъёс пӧлын 1 нылкышно. Министръёс, министръёслэн нырысетӥ воштӥсьёссы но воштӥсьёссы ваньмыз 69 мурт, 11-ез нылкышно. Городъёсысь но районъёсысь администрациослэн кивалтӥсьёссы ваньмыз 35 мурт, 3 нылкышно. Администрациослэн кыивалтӥсьёссылэн воштӥсьёссы ваньмыз 129 мурт, 31-ез - нылкышно. Удмурт Республикаысь Кун Кенешлэн ялан ужась комиссиосыныз кивалтэ 13 мурт, 2-ез - нылкышно. Удмурт Республикаысь Вылӥ Судын ваньмыз 30 судья, 8-ез - нылкышно. Районысь судъёсын ваньмыз 158 судья, 80-эз - нылкышно. Государственной луисьтэм удысэз ке басьтоно, акциосын огазеяськон промышленной предприятиослэн директоръёссы но соослэн воштӥсьёссы ваньмыз 39 мурт, 6-ез - нылкышно. Удмурт Республикаысь Кун Кенеше но Ижевск городысь Думае быръемын быдэн 12 нылкышно-депутат. Озьыен, вань ма сярысь малпаськыны нылкышноослы. Асьтэос ке ӧд, кин тӥлесьтыд сюлмаськонъёстэс уж вылын быдэстоз? Газет гожъям бере Визьмы вормылӥз сюлэмме Л. Бакаевалэсь "Нылпиме сюратайлы уг оскы" статьязэ мон мукет сяменгес нимасал - "Нылме сюратайлы уг оскы". Бен, мон но нылме огнам будэтӥсько. Монэ но вал юасьёс, ма, али но сюрозы кузпал но, атай но кариськыны турттӥсь пиосъёс. Но... визьмы вормылӥз сюлэмме. Туж бадӟым курданэ нылы понна. Малы? Ваньмызлы валэктон сётэ Машилэн будэмез. Нылылы мон сыӵе улон ӧй кылдыты. Тодӥсько, туала улонын йӧназ пиосмуртэн кышномурт уз люкиськы, гижысь-пиньысь бордаз ӝабырскоз (мон озьы малпасько). Нош ныл интые пи, ке, вордысал? Вот татын ини мон мукет сяменгес учкысал. Нырысь ик, шурдытэз ныллэн мында ӧвӧл. Кыкетӥез, пиез будэтыны пиосмурт пример кулэ, солы атай вӧзын капчигес эшъёсыз пӧлын возиськыны но. Куинетӥез, анай вӧзын гинэ будэм пиос кышномурт шӧмогес луо, зэмос кузпал но, атай но уг пӧрмы ни соослэсь (верасько азьвыл картэ сярысь). Но картлы бырйысал кузпалтэк кылем пиосмуртэ, люкиськемъёс пӧлысь ӧй утчасал. Огназы кылем пиосъёсты тоже жалясько: курдало, дыр, кыӵеез ми пӧлысь кузпаллы сюроз - шайтан кадез яке шуныт, ӟеч сюлэмоез. Курдасько "курег" кадь луыны, весь нылыд вадьсын квоккетод но, ассэ гинэ тодӥсь куректонэз, жалянэз валасьтэм ныл будэтод. Но номыр ӧвӧл, Инмар пока уте. Огез жаль, ӧвӧл вӧзаз вордэм атаез. Оло, ас понназ вожъяське но, шара уг вера. Нош Машилы сӥземе потэ шуд, тазалык, мед пумиталод зэмос пиосмуртэ: аслыд ӟеч кузпал, нылпиедлы зэмос атай. Али ик сыӵе мӧзмыт малпанъёсын эн улы, Маши, нылпиме огнам вордо но мар шуыса. Вераны гинэ капчи, но кин вылтӥ погыльтӥськиз оген улон, соослэсь адӟонзэс мон тушмонэлы но уг сӥзьы. Уката ик гуртын секыт, сюрозы пож ву кисьтаны турттӥсьёс. Одӥг ласянь анайдэ но мон туж валасько. Нош сюратайдэ? Мон солы тупась кыл уг шедьтӥськы вераны. Одӥг куронэ: эн возьы вань пиосмуртъёслы йыркурдэ, эн учкы соос шоры сюратаеныд ӵошатыса. Ӟеч лу, Маши. Туж шумпотысал, мынам гожтэме, вераме пичи ке но визьмасал, буйгатысал ке тонэ. Н. Л. Можга район. Ваньзэ - театр понна 1956-тӥ арын Ижевскысь механизацияя училищеын дышетскись эшъёсыным ӵош вуылӥ Драмая удмурт кун театре. Ветлэме туж ӟеч мылкыд кельтӥз. Театрын соку ӵапак мынӥз С. Антоновлэн "Поддубенские частушки" повестезъя спектакль. Отын трос кырӟанъёсыз, такмакъёсыз, эктонъёсыз вал, Удмурт актёръёс туж ӟеч шудӥзы. Операез, опереттаез котьку сямен кылзылӥ радио пыр. Зэм, сцена вылысен но адӟеме потылӥз. Но крезьгуръя театр Ижын соку ӧй вал на, берло гинэ кылдӥз. Крезьгуръя но драмая театрлэн кылдон сюресэз сярысь мыным мадиз шаерысьтымы тодмо крезьгурчи, Удмурт Элькунысь искусствоосъя дано ужась Геннадий Корепанов-Камский. Туэ сӥзьыл театр пусъёз кылдэмез дырысен ньыльдон ар тырмонзэ. Та юбилейлы сӥзьыса чакламын солэсь музейзэ усьтыны. 1934-тӥ арын ай соку гинэ кылдэм Удмурт театрын вал операя но балетъя труппаос, симфонической оркестр. Операя труппаез азьлань валтӥзы СССР-ысь Бадӟым театрысь но Москваысь областной театрысь солистъёс. Вакчи дыр куспын со пуктӥз тямыс опера. Операя но балетъя труппаос ик юрттӥзы шаерамы крезьгуръя театр кылдытыны. Зэм, операя труппа берло ӧй вал ни. Нош крезьгуро спектакльёс репертуарысь ӧз ыше. Витьтонэтӥ аръёсы Драмая удмурт кун театрлэн сценаез вылын удмурт кылын мынӥзы "Вуж Мултан", "Аннок", "Сюан", "Камит Усманов" пьесаосъя спектакльёс. Оркестрын соку шудӥз вить-сизьым музыкант. 1957-тӥ арын тулыс Удмурт Элькунысь Культурая министерство азе, актёръёслэн куремзыя, таӵе ужпум пуктэмын вал: кылдытоно крезьгуръя но драмая театр. Сцена вылын возьматыны чаклазы "Мечтатели" пьесая оперетта. Татын мынэ лэсьтӥськон но лэсьтӥськисьёслэн улон-вылонзы сярысь вераськон. Артистъёс сюлэмшугъяськылӥзы: "Быгатомы-а кулэезъя шудыны?" Возьматыны малпазы ас тодэм-валамзэс. Ужзэс быдэстон вылысь, доразы ӧтизы А. А. Асанин режиссёрез-постановщикез. Театрез выльдыны юрттӥзы партилэн Удмурт обкомезлэн нырысетӥ секретарез Г. П. Воробьёв но правительство. Москваысь ӧтизы татысь консерваториез йылпумъясь дышетскисез Г. М. Корепанов-Камскиез. Со дасяське вал ни аспирантураын дышетскыны. Нош улон-вылонэз капчи ӧй вал: улӥз одӥг комнатаен квартираын. Иже бертыны пумит ӧз луы. Геннадий Михайлович соку ик зымиз театр улонэ. Спектакльын шудӥз валтӥсь адямиез - инженерез-лэсьтӥськисез Калмыковез. Соин ӵош шудӥзы драмаысь артистъёс Нина Бакишева, Анна Чубукова, Иван Кудрявцев но мукетъёсыз. Машина лэсьтӥсьёслэн культура дворецсылэн сценаез вылын пуктэм "Мечтатели" спектакль бадӟымесь азинлыкъёс ваиз. 1958-тӥ арын кылдӥз Крезьгуръя но драмая театр. Одӥг липет улэ интыяськизы драмая но крезьгуръя коллективъёс. Соку ик ини оркестрын ужаз кызь тямыс музыкант, нош ялан тыршисез кызь ёрос вал. Драмаысь артистъёс Кузьма Ложкин, Дмитрий Широбоков, Анна Сатарова, Нина Бакишева но мукетъёсыз пыриськизы хорлэн но балетлэн ужаз, соослы мурт ӧй вал антураж, пантомимо, трос рольёссы вал. Куд-огез артистъёс быгатонлыкъёссэс возьматылӥзы эктонъя но кырӟанъя удмурт ансамбльын, куд-огез бератаз быдэсак выжизы театре. Таиз но будӥз, юнмаз, кужым люказ. Солистъёс луылӥзы быдэс Советской Союзысь артистъёс. 1958-тӥ арын Иже учкисьёсыз доры вуылӥз Петрозаводскысь опереттая театр. Соос возьматӥзы "Сильва" спектаклез. Берлогес та театрысь тямыс адями, соос пӧлын аспал эшмы Перевозчикова но, театре выжизы. 1961-тӥ арын театрын кылдӥз вокально-хоровой студия. Солэн одӥгез быдэстоно ужпумез вал ас удысазы ужаны быгатӥсь адямиосты дасян. Соин ик кутэмъёс пӧлын трос удмуртъёс вал. Студие вуиз гуртъёсысь но черкогуртъёсысь укмыс адями. Нош дышетскон понна ваньмыз куамын одӥг мурт басьтэмын вал. Кылзӥзы вить сю ёрос адямиез. Студие кутэмъёсты хорын кырӟаны дышетылӥз театрысь хормейстер А. В. Мамонтов. Дышетскыны лыктэмъёс пыриськылӥзы трос калыкъем сценаосы, хорын кырӟазы. Г. М. Корепанов-Камский ӟеч тодэ на Алиса Сунцоваез. Куараез ӟеч вылэм, хорын кырӟам. Кырӟам сяна, пӧртэм рольёс шудэм. Выль спектакльёс вордӥськылӥзы курадӟыса. Репертуарын вал классика, "Свадьба в Малиновке", "Сильва", "Марица", "Холопка" но таос выллем мукет спектакльёс. "Свадьба в Малиновке" сю пол возьматэмын вал. Яшкалэсь-артиллеристлэсь рользэ шудӥз Г. М. Корепанов-Камский. 1958-тӥ арын со гожтӥз "Любушка" нырысетӥ удмурт оперетта. Отын мынӥз чеберлык, удмурт музъемлэн туннэ нуналыз, солэн быгатӥсь адямиосыз сярысь вераськон. Сценарийлэн авторъёсыз - Л. Перевощиков но К. Полякова. Нош инъет луиз "Дедушкина скрипка" пьеса. "Любушка" оперетта сцена вылын тямыстон пол возьматэмын. Гриша токарьлэсь рользэ но шудӥз егит крезьгурчи Геннадий Корепанов-Камский, нош Любушкалэсь образзэ кылдытӥз крезьгуръя училищеын дышетскись Евгения Пахомова. Театрысь артистъёс гужем гастрольёсын поталлязы шаерысьтымы гуртъёсы. Культура юртъёс чакламын ӧй вал крезьгуро спектакльёс пукылыны. Соку артистъёс гастрольёсын шаермылэн сьӧраз - Пермь улосысь Чайковский, Березники, Соликамск, Башкириысь Балахно, Ишимбай, Черняховск городъёсы потаны ӧдъязы, озьы ик вуылӥзы Татарие. Тодам ваисько на Казаньысен "поручик Лавровский" опереттаез учкемме. Отын кырӟазы-веразы Ижысь артистъёс. Крезьгуръя но драмая Удмурт театрлэсь ялонзэ адӟыса, Казаньысь учкисьёс сюлэмшугъяськылӥзы: соос доры Москваысь но кунгож сьӧрысь артистъёс вуыло, нош таосыз - Удмуртиысь тодмотэм адямиос. Озьы ке но, зал калыкен тырмемын вал. Учкисьёс мылысь-кыдысь пумитазы котькуд кырӟам-верамзэс. Г. М. Корепанов-Камский крезьгуръя но драмая удмурт театрын 1965-тӥ арозь ужаз. Консерваториез йылпумъямез бере, Геннадий Михайлович "Когда поют соловьи" оперетта, "Россиянка", "Заговор" операос, "Чипчирган" опера-балет, "Италмас" балет гожтӥз. Али со театр понна мадькылъёсъя но выжыкылъёсъя "Сказание о любви" нимо балет гожтэ. Г. М. Корепанов-Камский кылбуръёс но гожъя, "Заговор" операезлы, "Чипчирган" опера-балетэзлы либретто, аслаз кылбуръёсызъя кырӟанъёс гожтӥз. Кылем арын потӥз нылпиослы кылбуръёсын "Чучубей" нимо книгаез. Дася мӧйыос понна но. Кылбуръёс сяна, татчы пырозы поэмаос но. В. Лагунов. ТОДМО НИМЪЁС НО НУНАЛЪЁС Апрель 4. - Вордскемез дырысен 100 ар тырме Ашальчи Окилы (Лина Григорьевна Векшиналы), нырысетӥ удмурт нылкышно кылбурчилы, врачлы-окулистлы. Вордскемын Грахово районысь Кузебай гуртын. Солэн кылбуръёсыз, статьяосыз, очеркъёсыз, нылпи веросъёсыз лыдӟись кие вуизы 20-тӥ аръёсы. 1933, 1937 аръёсы Ашальчи Окиез тушмон карыны выризы. Та муген ик Лина Григорьевна гожъяськонлэсь палэнскиз. Вань кужымзэ сӥзиз калыкез трахомалэсь утёнлы. Со понна Л. Г. Векшиналы сётэмын "Удмурт АССР-ысь сӥё-дано врач" ним. Быдӟым Отечественной война аръёсы фронтын хирург вал. Боецъёслэсь улонзэс утемез понна пусъемын боевой наградаосын. 15. - Вордскемез дырысен 90 ар тырме Н. А. Голубевлы, тодмо композиторлы, удмурт спектакльёслы крезьгур кылдытӥсьлы. 23. - 30 ар талэсь азьло (1968) Ижевскын усьтӥськиз "Зенит" стадион. 25. - 5 ар талэсь азьло (1993) Россиын ортчиз Президентлы осконзэс веранъя, Президентэз но РФ-ысь депутатъёсты дырызлэсь вазь быръёнъя референдум. Та юалляськонэ Удмуртиын улӥсьёс пӧлысь пыриськиз 61,19 процентэз. Со пӧлысь 55,92 процентэз куаразэ сётӥз Б. Н. Ельцинлы. Президентэз дырызлэсь вазь быръёнъя мылкыдзэ вераз 30,97 процентэз, калык депутатъёсъя - 40 процентэз. 29. - 30 ар талэсь азьло (1968) ВЛКСМ-лэн Удмурт обкомезлэн бюроезлэн решениеныз кылдытэмын студентъёслэн строительной отрядъёссы. Та толэзе ик: - 80 ар талэсь азьло (1918) эсеръёс-максималистъёс Ижевскын мятеж ӝуто. Соос пала султэ Горд гвардилэн отрядэз но (татысь боецъёс пӧлысь данакез максималистъёс вал). Мятежез 1918 арын 20 апреле зӥбе Казаньысь ӧтем красноармеецъёслэн но морякъёслэн отрядзы. Йылпумъянъёс, дэмланъёс Асьме республикаын куинь нунал ӵоже ужазы федеральной властьлэн ёзъёсысьтыз муртъёс. Кивалтӥз соосын Виктория Митина - Россия Федерацилэн Президентэзлэн администрациеныз кивалтӥсьлэн воштӥсез. Ужамзылы йылпумъян лэсьтыса, Виктория Митина ортчытӥз пресс-конференция. Кун властьлэн ёзъёсысьтыз, Кун Кенешысь депутатъёслэн фракциысьтызы, Правительствоысь муртъёсын, интыысь аскивалтонъя ёзъёслэн йыръёсынызы пумиськеммы, югдурез котыр ласянь эскереммы бере, пӧртэм малпанъёсты лыдэ басьтыса, Кун Кенешлы кун властез но интыысь аскивалтонэз радъянъя ӵектонъёс сётэмын вал, шуиз Виктория Александровна. Со пусйиз, Удмуртия ёросъёсын кун властьлэсь ёзъёссэ кылдытон пумысен правозэ улонэ пыӵатӥз шуыса. Кун властьлэн ёзъёсаз быръёнъёс ортчытон сярысь закон Россилэн Конституциезлы но федеральной законодательстволы пумит уг луы. Ужпум та законэз быдэсъян бордын. Кун властьлэн федеральной ёзъёсысьтыз муртъёс, Удмуртиысь кун властьлэн но интыысь аскивалтонлэн ёзъёссылэсь кусыпъёссэс чакласа но кун властьлэн но интыысь аскивалтонлэн ёзъёсысьтызы муртъёсын кенешыса, ёросъёсын интыысь аскивалтонъя ёзъёсты выльдонэз но кун властьлэсь ёзъёссэ кылдытонэз уретыны ӵектӥзы, малы ке шуоно, ёросъёсын кун властьлэн ёзъёсызлы ужаны законодательной инъет кыдытэмын ӧвӧл на. Таин валче Кун Кенешлы дэмламын "Удмурт Республикаысь ёросъёсын муниципальной кылдосъёсты быдтон но гуртъёсын, округъёсын, сельсоветъёсын муниципальной кылдосъёсты кылдытон сярысь", "Удмурт Республикаысь ёросъёсын кун властьлэн ёзъёсыз сярысь" законъёслэсь кутӥськемзэс уретыны но Кун Кенешлэсь муниципальной кылдосъёслэн быръем ёзъёсазы быръёнъёсты ортчытон сярысь постановленизэ палэнтыны. Ёросъёсын интыысь аскивалтонъя ёзъёслы дэмламын интыысь аскивалтонъя ёзъёсы быръёнъёс ортчытыны чакланы. Кун Кенешлэн пресс-службаез. Журналистъёсын пумиськонъёс Вылез уг ӝутскы, вужез куашка ни Кылем вторнике, 31 мартэ, Правительствоын журналистъёсын пумиськиз Архитектурая но лэсьтӥськонъя кун комитетлэн тӧроез Геннадий Батищев. - Миым комитет бадӟым саклык висъяз улон интылы льготной кредит сётонэз радъянлы, - шуиз Геннадий Павлович. - Озьы ке но, 50 миллиард манетысь 30 миллиардэз басьтытэк кылемын, куиньмос люкетэз со Ижын . Адямиос азьло басьтэм ссудазэс но пумен берыкто ни. Али 2 миллиард манет вуэмын ни, со коньдон мукетъёсызлы сётэмын. Улон инты лэсьтыны яке басьтыны кредит сётон тужгес но умой радъямын вал шаерысьтымы городъёсын (Ижез вератэк) но районъёсын. Жаляса верано луэ, республикаямы лэсьтӥськон чидантэм кулэсмиз. Тани миым 1400 интыен школа вуттэмын, яке 10 поллы ичи. Ужаны кутскиз Ижын усточиослэн юртсы. Али пумен кужмоя диагностической но кардиологической центр пуктон, нош "Ижсталь" АО-лэсь медико- санитарной частьсэ выльдэм бере, отчы выжоз онкологияя центр. Умоен пусйыны кулэ газификациез. Ар ӵоже 305 километр газ гумыос кыскемын. Та уж азьланьын уката паськыталоз. Каллен азинске сюрес лэсьтон. Миым 94 иськем асфальт сюрес вуттэмын. Азьло аръёсын ӵошатыса, 4-5 поллы ӧжыт. Соин ӵош ик шӧдскымон инты висъямын вал вужъёссэ утёнлы. Лэсьтӥськон ужъёс кужмояло Камбаркаын. Со герӟаськемын татысь люизитэз быдтонэн. Россиысь Правительстволэн постановлениезъя, заводлы улон коркаос но мукет социальной юртъёс ӝутыны 6 триллион манет уксё висъяны учкемын. Туэ Обороная министерство 64 миллиард манет сётыны кулэ. Али одӥг улон юрт вуттэмын, мукетсэ но ӝуто ни. Кутскемын чылкытатӥсь сооружениос лэсьтон но музонэз борды. Таӵегес ик ужъёс возьмало Кизнерын. Туэ басьтӥськоно Воткинскын чурыт эстӥськонэн ракетаосты быдтонъя завод пуктон борды. Солы США висъяны малпа 52 миллион доллар. Предприятиын ракета лэсьтӥськонзэ сутозы, инкуазьлы нокыӵе изъян лэсьтытэк. Америкаын сыӵе заводзы вань ни. Проект дасяны 500 миллион манет висъяське. - Дуннеысь выльдӥськонъя банк Воткинсклы 15 миллион доллар кредит сётэ. Со чакламын ву сётонэз умоятыны. Нырысь городын малпало вал ватсаса ву басьтонъя выль предприятие пуктыны. Но чакламъя вужзэ выльдон дунтэмгес усёз, со оскымон ужалоз. Комитет "СБС-АГРО" банклэн татысь ёзэныз 430 миллиард манет тыр кредит басьтыны огкыл гожтӥз ни. Коньдон мыноз гуртын газ кысконэ, нош 50 миллиардэз улон интылы ссудаослы каллен ке но, паськыта пичи панелен (борддорен) нимаз юртъёс ӝутон. Сыӵе корка возьматӥське Ижысь Холмогоров урамын. Журналистъёс Геннадий Павловичлы трос юанъёс сётъязы. - Кызы люкемын вал городъёсъя но районъёсъя улон интылы 50 миллиард манетъем кредит? - Калыклэсь лыдзэ чакласа. Но ведь со коньдон сётӥське бюджетникъёслы но гуртысь продукция поттӥсьёслы. Нош Ижын 7 процентэз гинэ висъям уксё адямиослы сётэмын. Гурт калык пичиен (500-1000 сюрс манетэн) басьялляз. - Туала лэсьтӥськон комплекс - кыӵе со? - Со огазея 900 пала оганизациосты. Данакез со нимаз предприятиос, нош 104-ез муниципальной ваньбуре пыре. Кун предприятиос ичи кылемын. Бадӟымъёсыз пӧлысь 17 но 18 номеро Глазовысь лэсьтӥськон управлениос. Районъёсысь лэсьтӥськисьёс усто ужало. Рынокен экономикае выжон вакытэ ас интызэс шедьтӥзы ни Можгаысь, Уваысь лэсьтӥськон организациос. Соос мебель но потто, асьсэос ик вузкаро. Сарапулысь МСО Каракулиноысь школа-интернатлы кӧлан юрт пуктӥз. - Кызьы мынэ Международной аэропорт лэсьтон? - Со мылысь-кыдысь ӝутӥське. Кун бюджетысь 10 миллиард манет висъяны учкемын, нош кулэ ичизэ 26 миллиард манет. - Лэсьтӥськонлэн ӟечлыкез будэ-а? - Конечно, умоя. Сое возьматэ 17 номеро трестлэн Национальной банк пуктэмез. Ускё ке вань, лэсьтӥськон ӝог паськыта. Та нуналъёсы 18 номеро управленилэн тӧроез воштэмын. Николай Шишкин кема кивалтӥз, табере шутэтскыны потӥз. - 3 номеро ТЭЦ ку вуоз? - Уксё ӧвӧлэн али отын ужъёс гуньдэмын. Но со йылаз-пумаз вуттэмын луоз, нош 2 номеро ТЭЦ-ын пуртыоссэ (котёлъёссэ) вошъяно. Солы но уконьдон уг шедьы. - Трос-а городын куашкан калэ вуэм улон коркаос? - Вераськон мынэ 335 номеро сериен пуктэм юртъёс сярысь. Мукет сямен соосты "хрущёвкаос" шуо. Балконъёссы юнматъямын ни. Валамон, соосты выльдоно. Кӧня сылозы на со коркаос, шуг вераны. Москваын сыӵе юртъёсты Юрий Лужков выльдэ ни. - Му вӧй поттӥсьёс улон инты лэсьто на-а? - Али туж ичи, 1-2 корка пукто, нош азьло аръёсы 30 сюрс квадратной метр квартираос ӝуто вал. Тӥни озьы вылез уг ӝутскы нош вужез ялан уродме, куашкан калэ вуэ ни. (Материалын коньдон вуж сямен сётэмын). Г. Романов. ВЫТ БИЧАСЬЁСЛЭН КЫСЫК ДЫРЗЫ Толон йылпумъяськиз 1997 аре коньдон басьтэм сярысь декларациосты выт бичанъя инспекцилы сётон дыр. Отысь специалистъёслы кылем толэзьлэн пумаз зол гинэ пӧсяно луиз - соос бер ӝытозь ужазы, шутэтскон нуналъёсты но вунэтӥзы. Я, табере кысык вакыт ортчиз. Но инспекторъёслэн сюлмаськонъёссы уг кулэсмо - бичам декларациосты чаклано-эскероно ук. Ма, собере мукет ужъёс но ичи ӧвӧл. Нялтас ивортӥськом выт октӥсьёслэсь куронзэс: 12 сюрс манетлэсь ятыр коньдон пӧртэм интыосысь басьтэмъёс кыӵе ке муген инспекцие тупатэм дыре лыктыны ӧз быгатэ ке, али но бер ӧвӧл на. Макем вазьгес отчы мыноды, сокем, кызьы возьматэ телевидение, ӟечгес кӧлоды. Малпаське... * Выт бичанъя инспекцилэн Ижысь Индустриальной ёросысь люкетаз ужасьёс Светлана ЧЕПУРИНА (кивалтӥсьсы), Алла САЛТЫКОВА но Надежда АЛЕКСЕЕВА (отделъёслэн кивалтӥсьёссы), Галина СВЕТЛАКОВА (валтӥсь инспектор) "Удмурт дунне" газетын пумиськон дыръя. Туспуктэмез В. КАМАШЕВЛЭН. Воткинскысь иворто НЮРЪЯСЬКОН ӞЫРДАМЫН Быръёнъёслы дасяськон куаш! мынэ. Воткинск городлэн мэрез луон понна нюръяськонэ пыриське 3 мурт - ваньзы ик гажано, ужаны быгатӥсь воргоронъёс. Соос пӧлын туала мэр, Кун Кенешлэн депутатэз В. А. Фридрих, Кун Кенешлэн ик депутатэз А. И. Горохов, азьвыл военнослужащий В. Д. Мазур. Кинэ калык быръёз, кин тросгес куара люкалоз - адӟом ни 12 апреле. Инты понна нюръяськон мынэ городлэн Думаяз депутатэ кандидатъёс пӧлын но. 21 мандатэз куспазы люкыны дасяське 86 мурт. Директор шедиз Кема гинэ кивалтӥсьтэк улӥз 2 номеро технической лицей. Дышетскон ар йылпумъяськон азьын директор мырдэм-мырдэм шедиз. Лушкем куара сётыса, та интые быръемын Игорь Степанович Праля. Азьвыл со ужаз 10 номеро училищеын. Выль ӵужон выль сямен ӵуже шуэмъя, кивалтӥсьлэн воштӥськемез училищелэсь улонзэ умой пала берыктоз. Таӵе осконзы дышетскисьёслэн но преподавательёслэн, городысь администрацилэн. Устоез базар - Воткаын Со зэмен но озьы. Таӵе вылӥ дунъет сётӥзы городысь рыноклы шаерысьтымы вузкарисьёс асьсэлэн кенешазы. Матысь дыре мылкыд карисьёсыз вуозы Воткинске, ас синмынызы учкозы базарлэсь ужамзэ. Кык ар куспын татын трос лэсьтэмын. Вань вузкарон интыос - липет улын. Шуныт, югыт. Ар кутскем дырысен рынок чотын гинэ интыысь бюджетэ вуиз ог 20 миллион манет. 1997 арын та лыдпус ортчиз миллиардэз. Ӟеч условиос кылдытэмын автомашинаосын вузкарисьёслы но. Соос но табере пыремын шуныт интые. Бензинэз воштоз газ Апрельлэн шораз таӵе кузьым дася водительёс понна Воткинскысь газ аппаратура поттӥсь завод. Вераны кулэ, кема гинэ та предприятие гуньдэм кадь сылӥз. Кылем арын октябре пичияк "шокыштӥз" но каллен-каллен азьлань вамыштӥз. Ар пумын 7 сюрс газ плита поттӥз, быдэс ар ӵоже - 15 сюрс 300. Продукцизэс вожмаськыса басьто. Завод бурдъяськиз. Туннэ нуналлы келязы ни 7 сюрслэсь ятыр. Ужало бартер амалэн. Коньдон возьмаса пукид ке, нош ик интыяд "кынмод". Та нуналъёсы завод кутскиз машинаослы газ баллонъёс поттон борды. Со бензинэз воштоз. 15 апрелёзь чакламын 120 баллон дасяны. Выль эстӥськонэз нырысь ик эскерыны малпало асьсэлэн "Икарус" автобуссы вылын. Утялтозы сурен но сюкасен Воткинске вуись куноослы котькуд семьяын пукто асьсэ дорын пӧзьтэм сур но чырсатэм сюкась. Кудӟытӥсьтэм юонъёсты поттӥсь завод продукцизэ ялан узырмытэ. "Жигули" сурен артэ матысь нуналъёсы магазинъёсы вуоз "Батыр" нимоез. Ческыт напитокъёс сярысь ке верано, соос 8 пумо: котькудзэ бырйы. Ваньмыз юонъёс дасямын асьме дорын будӥсь емышъёслэсь но турынъёслэсь. Кунгож сьӧрысь ваем "буёлъёсты" уг куто. Воткаослэн продукцизы нуналлы быдэ кошке Пермь областе, Ижевске, Шаркан районэ но музон интыосы. Р. СОФРОНОВА. Лидия Нянькина, Ашальчи Оки нимо премилэн 1998 ар понна лауреатэз Мон - уйлэн нылыз Паймыса учке шорам Вож синмо тулыс Вамышъясько одӥгнам Мон, уйлэн нылыз. Инбамын пиштэ юг-юг Пурысьтам толэзь. Вераны уг тодскы - шуг, Кин дорам уг лэзь. Котькулэсь туннэ мон сэзь, Пальышасько весь. "Ымдурыд тынад - эмезь", - Кылӥсько тӧллэсь. Ульчаын шыпыт. Кӧлэ Быдэсак инкуазь. Пыдчиньы йылам, каллен Бертӥсько дорам. Горшокен марӟан Мон доры ветлӥз уин Паймымон мусо кылчин. Тыбырам таман вешаз, Шат монэ нылыз кожаз? Со кырӟаз шулдыр кырӟан, Горшокен кузьмаз марӟан. "Лэсьты аслыд чыртывесь, Шудбур кур Инмаредлэсь". Та кылъёс бӧрсьы ачиз Олокытчы ӝог ышиз. Ветлы, ветлы, кылчинэ, Мон доры котькуд уе! "МОН ТОДАМ ВАИСЬКО" Ӵапак та кылъёс бордысен кутскиз ӝожмытгес веранзэ Лина Григорьевна Векшина милемлы, дораз адӟиськыны лыктэмъёслы - Аркадий Николаевич Клабуковлы но мыным, со дыре ТАСС-лэн корреспондентэзлы. Чылк-чылк тӧдьы ӝӧккышетэн валем ӝӧк сьӧрын пукись губырскем песянай шоры учкыса, син азям пуктыны тырши солэсь егит дырзэ. Тӧдьы халатэн веськрес мугоро врач. Тани со кияз возе алигес потэм "Сюрес дурын" но "О чём поёт вотячка" кылбур сборникъёссэ. Сюлэмын - пумтэм шумпотон, пӧсь яратон. Азьпалан - быръем ужезлы вань кужымзэ сётон вылысь бугыръяськись мылкыд. Зэм но, адямилэн улоназ мар меда вань синчеберез утёнлэсь дуногес? Та ужлы Линаез дышетӥзы Казаньысь мединститутын. Вордӥськем палъёсаз сыӵе специалистъёс-окулистъёс соку уг тырмо вал. Уже зымыса, жадёнэз валатэк, отчы но татчы вутскылоно луиз. Уж понна дырзэ но кужымзэ жалясьтэм адямилы, Быдӟым ож мыныку, фронтын котькыӵе кышкытлыкъёслы но дышоно луиз. Ожын сӧсырмем солдатъёслы но офицеръёслы солэн, хирурглэн, либыт вазьылэмез кылбурам кадь юрттылӥз сюлэмзэс но йӧнатыны. Вӧсь луэмлэсь мырдэм чидасьёслэн синъёсазы тылгизьыос ӝуатскылӥзы. Таӵе учыръёсты тодаз вайыкуз, куноятӥсьмы, Лина Григорьевна, пальпотонзэ ватыны ӧз быгатылы. Дырын-дырын синкылиосыз но потылӥзы. Лек кыл пистолетлэсь но кышкытгес шуэм сямен, нырысетӥ удмурт кылбурчилэсь- нылкышнолэсь вань улон-вылонзэ тарказы. Калык пӧлысь потэм яркыт талантлы уно вожъяськисьёс, тушмонасьёс вылӥллям. Кылбураны вордӥськем адями, сюлэмыз вӧсь луэмен, гожъяськонзэ пырак азелы куштоно луиз, вань быгатонлыксэ тӧдьы халатлы сётӥз. Лина Григорьевна милемлы нокытын потылымтэ гожъямъёссэ мылпоттэк возьматӥз вал. Кӧня ми сое курим газетэ яке журналэ выльысь печатланы, пумит луиз, киямы ӧз сёты. Малы, пе, мырдэм но кызьы бурмем яраосты выльысь исалод на. Ортчемзэ, егит дырез уд берыкты ни... Лина Григорьевналэсь мадемзэ милемын ӵош кылзӥз солэн огъёзо эшез, "сузэрзэ" вордскем нуналэныз ӟечкыланы лыктэм песянай. Соос пинал дыръязы ӵош будӥллям, созэ- тазэ тодазы вайыса, тани пельнянь пӧраллям. Милемыз утялтыны ӝӧк вылэ пуктӥзы. Ми но сьӧрамы ваем кузьымъёсмес поттӥм. Соосты веръямезлы-шӧмъямезлы быдэ кыдёкысь кенак кыла-бура: "Э, инмаре, шундые, кизилие... Э, лулы, кӧты, сюлмы, кыӵе ческыт вылэм таид",- кӧжыез кисьтэм кадь, туж ӝог вера. Ми но Аркадий Николаевичен таӵе "вӧсян" кылъёсты ӝог мадьыны дауртӥм, пельнянез веръян сямен,- "тачыртыны" ӧм быгатэ... Шулдыр вал со маскаръяськон. Лина Григорьевна котькинлэсь зол серекъяз. Кошкон азямы ми, ваньмы куинь куноос, ӝутскем мылкыдын кырӟамы Герман Корепановлэсь Ашальчи Окилэн кылбурезъя гожтэм "Мон тодам ваисько" кырӟанзэ. Та нунал сярысь тодэ вайытэ Лина Григорьевналэн туспуктэмез но, кудзэ со ас киосыныз кузьмаз мыным. Леонид ДАНИЛОВ. * Лина Григорьевна ВЕКШИНА (Ашальчи Оки) 70-тӥ аръёслэн кутсконазы. Нуналлэн тодметэз Вашкала календарья туннэ пусъё Фалалейлэсь праздниксэ. Та нуналэ кизёно луоз огреч. Калык чакламъя, кызъёс удалтэмын ке ӵыжинэн, иське, огреч удалтыны кулэ. Ӵуказе Константинлэн но Олёна - етӥн кизисьлэн праздниксы. Йылпумъяське валэс юосты кизён дыр, азьланьтӥське етӥн, сьӧдчабей, огреч кизён вакыт. Та нуналэ зор-кот усиз ке, сӥзьылэд нӧдо луоз. Югыт нунал туннэ кыстӥськоз 17 час 8 минут. Сутка ӵоже 4 минутлы йылӥз. Та нуналэ... ар талэсь азьло 2 июне 1919 арын Колчаклэн войскоосыз омырскизы Глазов вылэ. Сутка ӵоже соосын город быдэсак киултэмын вал. 3 июне 1945 арын Обороная кун комитет войскоосты Дальний Востоке но Забайкальее келян сярысь решение кутӥз. Та вакытэ Удмуртиын кылдэм 97-тӥ Витебской но 192-тӥ Горд Знамяен пусъем Оршанской дивизиос отын ни вал. Лыкто дуннеысь гимнасткаос 2-4 апреле Ижевскын ортчоз художественной гимнастикалы сӥзем бадӟым праздник. Дорамы куное лыкто дуннеысь устоосыз пӧлысь устоосыз гимнасткаос. Лыктон мылкыдзэс веразы Польшаысь, Эстониысь, Малайзиысь, Латвиысь, Кипрысь, Казахстанысь стпортсменкаос. Ӵошатонъёсты радъя "Мир женщины" журнал. Солэсь приззэ басьтон понна нюръяськон муноз асьме дорын. Таӵе ӵектонэн потӥз Ижевск городлэн администрациез, художественной гимнастикалэсь, физкультуралэсь но спортлэсь данзэс столицаямы тросгес вӧлмытон вылысь. Соку шӧдскымон кулэсмысал законэз тӥян учыръёслэн лыдзы, уката ик егитъёс пӧлын. Праздникез сӥё-дано пусъён ортчоз 4 апреле 16 часэ. Л. Конышев. Ижлы - 328 Та быдӟа арлыдзэ пусъёз ни туэ гужем Удмуртилэн столицаез - Ижевск. Пичи гинэ завод кутскон сётӥз бадӟым промышленной городлы. Солэн вордскем нуналэз котьку но пӧрме зэмос праздниклы, сюлмысь шумпотонлы, шулдыръяськонлы. Азьвыл аръёсы сямен, туэ но пусъём аспӧртэмлыко "именикез". Со ортчоз 12 июне, пятницае. Праздниклы дасяськонъя юнматэмын оргкомитет, кивалтӥсез - Анатолий Иванович Салтыков. М. Журавлева. Удмурт Республикаысь Кун Кенешлэсь дас тямысэтӥ (азьвыл чакламтэ) сессизэ люкан сярысь Удмурт Республикаысь Кун Кенешлэн Президиумезлэн Постановлениез Удмурт Республикаысь Кун Кенешлэн Президиумез пуктэ: Удмурт Республикаысь Кун Кенешлэсь дас тямысэтӥ (азьвыл чакламтэ) сессизэ люкано 1998 арын 8 апреле Ижевскын. Сессиын эскероно республикаысь гурт ёросъёсын быръем ёзъёсы депутатъёсты быръён сярысь ужпумез. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 30 мартэ. � 463-И Огъя кыл шедьтэмлэн емышез но узыр Финн-угор калыкъёслэн конгрессы вискын консультативной комитет ужа. Со арлы кык пол пӧртэм интыосын люкаськылэ. Алигес пумиськон ортчиз Ханты-манси автономной округын, нош сӥзьылэз луоз Латвиын. Консультативной комитетэ адями быръё конгрессын ик. Солэн ужаз Удмуртиысь кык адями пыриське: "Удмурт кенеш" огазеяськонлэн тӧроез В. К. Тубылов но Удмурт Правительствоысь Нациосын ужанъя комитетлэн тӧроез С. К. Смирнова. Жаляса верано, одӥгзы но соос та ужрадэ пыриськыны ӧз быгатэ, нош мыныны оскемын вал "Удмурт кенешлэн" тӧроезлэн воштӥсезлы В. Я. Митрофановлы. Соин пумиськиз милям корреспондентмы. - Валерий Яковлевич, кыӵе кужымез консультативной комитетлэн? - Комитет бадӟымесь ужпумъёсты сэрттэ-пертче, чакласа возе ортчытэм но азьланьын орчтытоно ужъёсты. Быгатэ вазиськыны президентлы, быдэсъясь ёзъёсы. - Нош кыӵе ужпумъёсты эскеризы таяз учыре? - Комитет эскериз вить бадӟым ужпумез. Нырысетӥез ортчем но ортчоно ужрадъёсын герӟаськемын вал. Мон ивортӥ кык ужрад сярысь. Гердлы сӥзем нуналъёс Москваын сокем ушъямон ик ӧз ортче. Ваньмыз вакчи дыр куспын ньӧмыз понна гинэ радъяськиз кадь. Со сяна, мыным юан сётэмын вал, кызьы ортчоз финн-угор калыкъёслэн фестивальзы Удмуртиын. Таӵе фестиваль сярысь ми Ханты-Мансийске мынон азямы гинэ тодӥмы. Жаляса верано, азьвыл консультативной комитетэ пыремъёс со сярысь ӧз поттылэ. Удмуртия дась ӧвӧл на тае ортчытыны, соин ик вазиськонмес лыдэ басьтӥзы ке, та фестиваль 1999-тӥ арлы кельтэмын луоз. - Кыӵе югдур кадръёсты дасянъя? Мон сямен, та ужпум та вакытэ туж лэчыт? - Финн-угор егитъёс куамын палаез дышетскозы Эстония чотын. Туннэ нуналлы тросгес дышетско Удмуртиысь но Марий Элысь егитъёс. Ваньзэ лыдэ басьтыса, азьланяз квота но юнматэмын луоз, дыр. - Финн-угор калыкъёс пӧлын "Удмурт кенешлэн" куараез кылӥське-а? - Консультативной комитетлэн ужаз "Удмурт кенеш" кепыраса ӧз пыриськы. Отысь адямиос юн оско Валентин Кузьмичлы, тодо, Венгриысь президентэн кусыпъёсыз умоесь шуыса. Солэн данэз бадӟым. Куд-ог ужпумъёсты быдэстонъя Удмуртия азьпалтэ мукет финн-угор калыкъёсты. Вылӥ азинсконъёс басьтон понна асьмелы чупресгес кариськоно но дэмен кенешыса ужано. Соку гинэ "Удмурт кенешлэн" емышез но шӧдӥськоз. - Валерий Яковлевич, нош вуоно конгресс сярысь маке кылпум поттэмын вал-а? - Бен, со ортчоз Финляндиын 11-13 декабре 2000 арын. Сӥзьыл комитетын эскеремын луозы депутатъёслэн лыдзы, ИИИ Международной конгрессын сэрттоно-пертчоно ужпумъёс. - Ханты-манси автономной округе вуыса, ма тужгес но паймытӥз? - Можга, Ува, Игра райцентръёслэсь но пичигес город, тодманы луонтэм воштӥськемын-выльдӥськемын. Отчы финъёс пуктӥллям уй пал калыкъёслэн нылпиоссылы искусствоосъя центр. Со вераны луонтэм чебер но бадӟым. Асьмелэн быдэс Россиын сыӵе центръёс ӧвӧл, дыр. Улон интыоссы кык муртлы чакламын, тазалыксылы ӝожтӥськисьёслы отын ик юрттэт сёто. Одӥг интыын дышетскыса, вылӥ музыкальной образование но басьто. Концерт залъёссы туж тузӥесь, музейёссы но, асьме республикаын сярысь, тросгес. Школаязы ик вань туала куронъёслы тупась ӵыж-выль рояльёссы, кудъёсыныз пиналъёс шумпотыса шудо. Огъя вераса, вожъяськи. Асьмелэн школа-интернатысь налпиосмы сыӵе интыын дышетскысалзы ке?! В. Кутузова. Сазь улон понна Прикарпатьеысь Рожнятовск ёросысь Ясень черкогуртэ пырыку кыдёкысен адӟиське таӵе кылъёсын кирос "Инмарлы оскисьёс юисьёслы пумит". Со 125 ар талэсь азьло пуктэмын. Вазьынгес татын туж ужась калык улэм но бӧрысь кыӵе ке урод адями гуртазы вина юон юрт пуктэм. Пумен калык аракы юыны дышем, пиосмуртъёс вань уксёзэс отчы кельтылӥллям. Нылкышноослэн чиданзы бырем, со кабакез сутӥллям. Бӧрысьгес гурт калык сутскем интые киросэн памятник пуктэм. Табере та палась аракы юисез шер адӟод. В. Васильев. Правительствоын ТУДВУ БАДӞЫМ-А ЛУОЗ? Шаерысьтымы Гидрометцентрлэн тӧроез Татьяна Загребина ивортэмъя, бадӟым тудву луоз шуыны уг луы. Но сыӵе кышкытлык вань. Малы ке шуоно, музъемын уно мускыт люкаськемын но туэ понна данак лымы усемын. Куазь чакласьёслэн верамзыя, апрель, азьло аръёсын ӵошатыса, одӥг градуслы гинэ шунытгес луоз. Озьыен, тудву мукет аръёсы кадь ик луоз 10-20 апреле ӧръяськоз. Удмурт Правительствоысь Кышкыт учыръёслэсь утиськонъя комиссия предприятиосты, организациосты, районъёсысь но городъёсысь администрациосты ӧте калыкез но ваньбурез утёнлы дасяськыны. Та ласянь кышкыт учыръёс луыны быгатозы Иж, Воткинск, Камбарка, Пудем тыметъёс котырын. Тудву бадӟым луиз ке, со адямиослэн коркаосазы пыроз. Соин али ик пыжъёс но мукет утиськон арбериос дасяно. Ву вӧлскыны озьы ик луонлыкъёс вань Игра, Вавож, Пичи Пурга ёросъёсын но музон интыосын. Мар бен али лэсьтӥське? Ижын дасяськон ужъёс мыно ни. Иж шурлэсь ярдуръёссэ ӝуто, ватсаса эскерон постъёс кылдытэмын, калыкен ужан мынэ. Та ласянь озьы ик бадӟым ужпум сылэ республикаысьтымы Правительствоысь Граждан обороная но кышкыт учыръёслэсь утиськонъя комитет азьын. Ву хозяйствоя комитет солы дыраз иворъёс сётыны кулэ. Нош кытын тудву луоз, отын правоосты утись ёзъёслы утёно общественной порядокез но висъяно тылпу кысонъя нимаз техника. Городъёсысь но районъёсысь администрациослы вань тыметъёсты эскеронэз радъяно, ляб ӵыпетэн тыметъёсысь вань вуэз али ик лэзёно но котькытын дежурство тупатоно. Калыкез, пудоосты но мукетсэ утён вылысь, али ик ужрадъёс чаклано. Кылдытъяно ӝог ужась группаос но бригадаос, дасяно пиломатериалъёс, кӧльы, луо но мукетсэ. Калыклы юон ву мед луоз. Сотэк кышкыт паласькись висёнъёс но вӧлмыны быгатозы. Правительствоысь Граждан обороная но кышкыт учыръёслэсь утиськонъя комитет тямыс интыен 6 "Уфимка" пыж, нош Ижысь аэроклуб тудвуэз чакланы Ми-2 вертолёт возьыны кулэ. Г. ВАСИЛЬЕВ. ГУРТ КЕНЕШ УЖА Пичи Пурга ёросысь Брангуртын кӧня ке ар ӵоже ни ужа гурт кенеш. Соин ик отчы алигес вуылӥзы "Удмурт кенеш" котыре огазеяськемъёс. Пумиськон пайдаё ортчиз. * Удмурт культурая "Буко" обществолэн (Брангурт) кивалтӥсез Владимир БАЙСАРОВ. * Вераське Пичи Пурга ёрос администрацилэн тӧроез Михаил НАЗАРОВ. Туспуктэмъёсыз В. КАМАШЕВЛЭН. "Ашальчи" сузьет Удмурт телевидениын кема аръёс ужасько ке но ини, Ашальчи Окилэн вордӥськем гуртаз Кузёбае (удмуртъёс Ускы шуо) вуылыны одӥг пол но ӧз кылдылы вал. Кылбурчилэсь но эмъясьлэсь улон сюрессэ Алнаш черкогуртэн гинэ но возьматыса тырме шуылӥмы, вылды. Татын уго Лина Григорьевналэн улэм юртэз (табере отын музей). Сое тодӥсь калык но трос гинэ, ӵош ужам эшъёсыз но вань али. Кылсярысь, музей-юртэз утись Наталья Николаевна Фадеева. Ӵош ужано син эмъясь враченыз со тодматскем 1952 арын. Музей-юртэн кивалтӥсь Людмила Ивановна Посадова сярысь веранэз ик ӧвӧл - нылкышно кылбурчилэн но врачлэн улон сюресэз сярысь со лад-лад мадёз. Одӥг кылын вераса, Алнашын кадь узыр материал та вакытэ нокытысь шедьтыны уд быгаты... Ашальчи Окилэн вордӥськемез дырысен 100 ар тырмонэзлы сӥзьыса, ми, телевидениын ужасьёс, малпамы нимысьтыз передачаос - сузьет дасяны. Валамон ини, таӵе уж борды кутскемлэсь азьло удмурт калыклэн дано нылызлэсь вань ужъёссэ выльысь но выльысь лыдӟоно, улон герӟетъёссэ сэрттоно-пертчоно, литературоведъёсын-критикъёсын гожъямъёсты пыр-поч эскероно луиз. Ашальчи Окилэн кылбуръёсыз сярысь гинэ верано ке, со палдурес возьматон луысал. Нош вал на ук адями луллэн четлыкын шымырскыса улон дыръёсыз, ожмаськон аръёс. Вал ук аслад улонэд понна сюлмаськон но, висёнъёслы пумит нюръяськон но Юкаменскын, Алнашын ужакуз. Нырысетӥ кылбуръёс вордӥськон но мед син азе пуксёз вылэм, Куӟебай Гердлэн эшъяськемез но мед адӟиськоз. Соин валче бугыръяськон луиз телевиденилэн но радиолэн фондъёсазы. Мар но со шедиз ик... Сузьетмес кутсконо кариським Ашальчилэн вордӥськем гуртысеныз. Вуиз нунал - ми потӥмы Грах ёросысь Ускы гуртэ. Кузь сюрес ӧз акыльты. Йырын бергазы уно малпанъёс, син азе соос пӧртэм суредъёсын пуксьылӥзы. Кыӵе меда со гурт, вань на-а юртъер интыез, кытӥ меда гольык пыдын бызьылӥз пичи Оки? Аслад инкуазедлы синмаськыса но сое яратыса гинэ вордӥсько уго жильыртӥсь кылбур чуръёс... Озьы тӥни кутскиз "Ашальчи Оки" сузьетамы пырись тямыс передачаос бордын ужанмы. Та чуръёсты гожтӥсь но, режиссёр Николай Куклин но, мукетъёсыз но, ӵош ужась эшъёсмы, туж сӥлы карыса вуылӥмы элькунысьтымы пӧртэм ёросъёсы: Алнаш но Грах палъёсы, Юкаменск черкогуртэ, Можга ёросысь Бадӟым Учае. Макем сӥлы карыса верало дано эмъясь сярысь Юкаменск котырысь арлыдоос. Котькуд гуртын тодо на Векшинаез, син эмъясез, нош малы ке уг тодо, кин со Ашальчи Оки. Бен ачиз калык кылбурчимы Николай Семёнович Байтеряков но, Алнашын ужакуз ай, тодылымтэ Ашальчи Оки сярысь. Сыӵе вераськонмы вал милям кулэмезлэсь сизьым-тямыс толэзь азьлогес. Со вераськонмес передачаез учкисьёс синйылтӥзы, дыр. Бен, учкисьёс кылӥзы Ашальчи Окилэсь улэп куаразэ но, ассэ но адӟизы. Пумиськизы писателен Михаил Ляминэн, со вераз Лина Григорьевнаен фронтысен адӟиськемзы сярысь. Вынызлэн нылъёсыныз Елизавета но Клавдия Николаевнаосын но, мукетъёсыныз но тодӥсь муртъёсын пӧртэм пумиськонъёс усьтыны юрттӥзы Ашальчи Окилэсь сямъёссэ, выросъёссэ, улэмзэ. Ӧйтӧд, тырмыт-а, ӧвӧл-а но, быгатэммыя тыршим возьматыны кылбурчиез - кылбуранэ сюрес лёгисез, эмъясез - калыклэн тазалыкез, азьлань улонэз понна тыршисез, адямиез - шуг-секытъёс пыр потыса улон понна, ӟечез понна нюръяськисез. Нялтас будэтэм потэ на созэ но: ӟечен ӧз лыдъялэ, шӧдске, милесьтым Мари Элэ шор ёзо Карлыган школае но Казане вуылыны мылкыд кареммес. "Удмуртия" ГТРК-лэн кивалтӥсьёсызлэн веран-валэктонзы одӥг вал: ӧвӧл коньдон... Семен Карпов, "Удмуртия" гостелерадиокомпаниысь журналист. КЕНЕШИЗЫ НЮЛЭСЧИОС Шаерысьтымы Нюлэс хозяйствоя министерство та нуналъёсы бадӟым кенеш ортчытӥз. Люкаськылӥзы республикаысьтымы нюлэс хозяйствоослэн кивалтӥсьёссы но лесничийёс. Нюлэсчиослэн миым ужамзылы йылпумъянъёс но азязы сылӥсь ужпумъёс сярысь вераськиз министр Николай Буераков. Умойзэ но куд-ог шекъёссэс пусйыса, со шуиз: - Специалистъёсмы, одӥг мурт сяна, ваньмыз аттестация ортчиз. Со оскон сётэ азьланьын ӟеч вамышъёслы. Нош туэ удысмы ужаны кулэ межколхозной нюлэсэн: сое берлань гурт хозяйствоослы сётоно. Миым нюлэс вузамлэсь 9 миллиард манет уксё поттэмын. Но берло дыре со пумен кулэсме, леспромхозъёс нюлэс коранзэс арысь аре кулэсто. Но ми нюлэс ялан тросгес мерттӥськом. Кенешын усто нюлэсчиослы И но ИИ категория сётъязы. Бен, удыс миым огсыр умой ужаз. Бускельёсын ӵошатыса, Удмуртиысь нюлэс ӧжытгес ӝуаз. Туэ кыӵе югдур луоз? Вераны вазь ай. Но Николай Яковлевич люкаськемъёсты ӧтиз та ужлы, озьы ик Нюлэс департаментлы 200 ар тырмонлы умой дасяськыны. Г. ВАСИЛЬЕВ. Репортаж Чигтӥзы мунёлэсь суйзэ Туннэ нылпи юртъёсын буш интыос ӧвӧл. Улэп анай-атайёссы вань вылысь, пиналъёс мултэс луо. Макем капчи вылэм ас вордэм нылдэ-пидэ сюдон-будэтонлэсь палэнтӥськыны: кушты сое вокзалэ яке гожты заявление гинэ - тон эркын. Потэ ке, эшшо одӥг нылпи ворды на - созэ но государство утялтоз. Эшшо одӥг пол кылзӥсько Можга нылпи юртысь тямыс аресъем Максимлэсь диктофон плёнка вылэ гожтыса кельтэм куаразэ: "Можгала мон вуи Сарапулысь. Анай-атайёсы ялан вина юылӥзы. Водка понна мынэсьтым выль чебер курткаме но вузазы. Ми сузэреным ньыль-вить нуналэн огнамы улылӥм, ялан бӧрдылӥм. Одӥг пол анае, выж миськон лентяйка кутыса, укно дурын сылӥсь атайме донгиз. Со укмысэтӥ этажысь усиз, бӧрсяз усиз Катя сузэре но. Атае кулӥз. Сузэре шуккиськиз гинэ, со ӝоген бурмиз, али Сарапулысь нылпи юртын улэ. Анайме пытсэт сьӧры келязы". Нош Максимез Можгалась нылпи юртэ вуттӥзы. Татын со куинетӥ арзэ улэ. Шӧдӥське, эшъёсыз пӧлын тужгес шаплыез луэ шуыса. Доразы пырыкумы ик, пумитамы бызьыса потӥз, куноос лыктэмлы шумпотӥз, луоз. Соку ик фотоаппаратмы шоры мертаськиз, мар, пе, со сыӵе. Вакчи дыр куспын Максим ваньзэ лэсьтыса вуиз кадь: ӟеч лыдӟиськемзэ но возьматӥз, йыр йылаз сылыны быгатэмзэ но адӟытӥз. Эшъёсыз сярысь но со ӧз вунэты: таиз Лена, соиз Оля, тӥни Коляен Витя... Пиналъёс чурен диван вылэ интыяськизы - ваньзы 12 кузя туспуктэм вылэ пуксьыны дасяськизы. Тани соос. Сокем пӧртэмесь. Востэмесь но шаянэсь, кепырасесь но керӟегесь котькинлы оскыны быгатӥсесь, ас пушказы "ватӥськемесь". Но ваньзэсты герӟа огъя тодмет - соос ас вылазы шӧдӥзы яратоно анай-атайёссылэсь кезьытсэс, яке кудӟем атай "дышетӥсьсылэсь" улыны дышетэмъёссэ. Можга нылпи юртын али 68 пинал лыдъяське. Соос пӧлысь куинезлэн гинэ анай-атайёссы улэпесь ӧвӧл ни. Кылемъёсызлэн документъёсазы гожтэмын: "Кельтэмын нылпи ваён юртэ", "Анаез ышемын", тросэзлэн "Анай-атайёссы нылпиоссэс будэтонлэсь палэнтэмын". Та пиналъёс шоры учкыса, таӵе малпан но кылдэ: кин тодэ, оло, татчы вуыса покчиос кӧнялы ке но шудоесьгес луизы. Уго нылпи юртын соосты ческыт сюдо, дӥсяло. Уло пиналъёс "семьяосын". Соос бадӟымесь, 10-12 "кузёен". Улон интыоссы вӧлмытэсь, югытэсь. Котькуд "семьялэн" нимаз сиськон интыез, залэз, шутэтскон сэрегез, кык кӧлан интыез - нылъёслэн но пиослэн. Одӥг анай-атайёслэсь нылпиоссэс татын огазе интыяло. Озьы пиналъёслы шулдыргес луэ. Ӝытъёсы соос телевизор учко, киужлы дышетско яке огшоры шудо. Бадӟымъёсыз пичиосызлы гуртысь ужъёссэс лэсьтыны юртто. Нылпиос шумпотыса мадё асьсэ дышетӥсьёссы, воспитательёссы сярысь. Ужало татын ӟеч эмъясьёс. Нылпи юртэ вуэм пиналъёс тросэз лул-сэр висёнъёсын курадӟо, ӵем пумиськыло шуккиськон учыръёс. Врачъёс пиналъёсты арлы быдэ кык пол ӟеч-ӟеч учко- эскеро. Вань татын пинь эмъян кабинет. Эмъюмъёслы ёрмон учыръёс уг луо. Та ласянь нылпи юртлы юртто шефъёссы - Ижысь мотозаводын ужасьёс. Мар кулэ на кадь пичи дырез шудо карон понна? Но... Вашкалаосмы юнме ӧз вералэ, дыр, анай-атаез сётымтэ бере, инмар уз сёты шуыса. Озьы анай-атайлэсь шунытсэ нылпи юрт ноку уз вошты. Татысь нылъёс но пиос ӟеч валало: кытын ке но вань соослэн матысь адямиоссы. Кин тодэ, оло, пиналзылэсь соос мӧзмизы но ни, валазы асьсэлэсь янгышсэс. Оско солы пичиос, возьмало. Пӧлысьтызы котькудӥз вите, куке нюромем укно пиялаос сьӧрысь адӟиськоз дыртыса матэктӥсь анаез. Макем шудо луысалзы соку Альбинаен Анюта, Коля, Ваня... ваньзы- ваньзы! Максим гинэ но вите шудо нуналлэсь вуэмзэ. Со тодэ: анаез али пытсэт сьӧрын, отын со тямыс ар пукоз. Но пияш ас кужымезлы соке. Оске, ӝоген со Сарапулаз улыны берытскоз. Собере анаез но куке-соку вуоз. Жаль, пе, квартираяз пырыны усьтонэз ӧвӧл. Малы ке пимылы сётыны сое вунэтӥллям. Нылпи юртысь социальной педагог Екатерина Семеновна Борисова милемыз буйгатӥз ик. Максимлэн самой бадӟым малпанэз куке-соку, оло, быдэсмоз. Анаез сое берлань доразы басьтоз, уго нылпиоссэ будэтонлэсь со палэнтэмын ӧвӧл. Нош кылемъёсыз... - Анай-атайёс доры пиналъёс туж шер берытско, - маде Екатерина Семеновна. - Берло аръёс ӵоже Якшур-Бодьяла, Сюмсие нылпиосты келям. Шер пумисько мурт пиналэз асьсэлы карыны мылкыд карись семьяос но. Дорысьтымы пиналъёсты бадӟымесь каро ни, вылды - куинь ареслэсь пичиосыз ӧвӧл. Алигес одӥгзэ гинэ пияшмес Набережные Челные келям. Нош пиналъёслэн семьяын улэмзы потэ. ...Мурт анай-атай вӧзын ке но. Кылем гужем каникулъёс дыръя 45 пинал ӵыжы-выжыоссы, куд-огез огшоры тодмооссы дорын шутэтскизы. Кыӵе тодэ ваёнъёсын берытскизы соос отысь! Веранъёссы кема дрлы тырмизы на. Но пиналъёслэн тазьы шутэтскемзылэн пайдаез мукет ласянь но шӧдӥське: соос тодматско кыӵе луыны кулэ зэмос семья. Нылпи юртын пиналъёс палдурес тодон-валанъёс басьто угось. Бадӟым улонэ потыса, соос асьсэлы сюрес бырйыны кема шугъясько на. Котькуд быдэ вуэм нылпилы кык толэзьем пособие но дӥсь сётӥське. Ваньзэс сямен интыяло училищее. Но азьланьын : шудэд понна нюръяськы ачид. Уз сюлмаськы тон сярысь анай-атаед. Уз юртты тыныд государство: егитъёслэн правооссы туннэ пачкатэмын. Син шоры таӵе суред пуксе. Пичи нылаш бабля йырсиё мунёеныз шудэ. Солань но сое бергатэ, талань но. Тани лемлет бантик думем бордаз. ... Бен, луэ шудыны пал суй шудонэн но. Но умойгес ӧй луысал меда, вӧзаз пукись тушо дядяй сое "кыӵе вал сыӵе ик" тупатысал ке? Вал ук мунё куке но чебер, выль. *** Можга нылпи юртын таӵе лыдпусъёс веразы. Пиналъёссы мултэс луизы 12 ӟуч, 6 удмурт анай-атайлэн. Бигеръёс ас вордэм нылпиоссылэсь уг палэнтӥсько. Лек тышкаськыса ум вераське. Малпаськыны курыса. Э. Кумачева. Туспуктэмез Г. Юсаевлэн. Ву ӟузем кадь пукозы... "Комсомольская правда" газет ивортэмъя Вадимирской областьысь Законодательской собранилэн огез депутатэз ӵектон сётӥз. Дэмланэз СССР-ысь но Россиысь вань депутатъёслэн вань ӵектонъёссы пӧлысь тужгес быдэстонтэм. Со ӵош ужась эшъёсызлы урод кылъёсын тышкаськемлэсь куштӥськыны ӵектӥз; Законодательной собраниын гинэ ӧвӧл, гуртазы но, мунчоын но, шашлык сиыкузы но, пиво юыса, политика сярысь вераськыкузы но... Огез депутат та пумысен серекъяса шуиз" озьыен, вераськемысь чылкак дугдоно? Кин азбаръёсты утялтоз? Воронеж тулысэз нӧдэ, жуг-жаг пӧлы выйыса пумиталод, дыр. Татысь дворникъёс ужаны пумит луизы. Мугез котькытын кадь ик - азбаръёсты утялтӥсьёс уждунзэс берлозэ 7 толэзь азьвыл басьтӥзы. Властьёслэсь сюлворемзэс дворникъёс уг кылзо но городэз тулыс кырсьлэсь сузяны уг малпало. Кемалась ик ӧвӧл областьлэн губернаторез соослы чебер форма сӥзиз вал. Нош улонын мукет сямен луэ: коньдон уждунлы гинэ но уг тырмы, ивортэ "Комсомольская правда" газет. Татьяна Прокопьева Кык ашальчиос Тулыс возь выл - буртчин куаръёс. Тӧллэн небыт вешаськемез. Лымы кошкиз, улӟиз улос, Улляз толбыт возем уммес. Тылобурдо гуръёс пӧлысь Уд висъя мӧзмылэс куара. Ваньмыз чебер, ваньмыз - выльысь, Ваньмыз шудэз сярысь вера. Шунды тылсиосын шунтэм Бубылиос экто, шудо. Та чеберез - ӧвӧл синтэм - Ӧд ке адӟы, одно шӧдод. Тулыс турын-куаръёс пӧлын Улӟо, будо ашальчиос. Калык сюлмын сыӵе нимын Улэ, пе, кык пӧртэм будос. Огез уг йӧты син шоры - Векчи модос, ниж-няж куаръёс. Отын-татын, куакъёс пӧлын, Бусы дуре куддыр потоз. Ческыт зыно, векчи шепо, Ветта ас мугорзэ каллен. Солэсь ваньзэ соку шӧдо, Куке турналляло дэмен. Нош мукетыз ашальчимы - Кыске со ас бордаз синмес. Тулыс вуиз ке, адӟы - мын: Будэ, кытын луэ нюргес. Сяськаосыз аспӧртэмесь: Льӧлесь, гордэсь - ӧвӧл таза. Шонер модос вылаз бӧрсе Пуко соос исаськыса... Нош учкыса - паймод гинэ - Шудэд вуэ кадь капчиен. Секыт мылкыд малы вунэ, Пумиськыса ашальчиен? Берекет Синучкон азьын ПУЖЫОС - ШУНДЫ ПЫРЫОС Гажано редакция! Тулыс вуэмен валче ымныр вылэ пужыос, верамзыя шунды пырыос пото. Кудӥзлы пужы туж кельше, нош мыным трос сюлмаськонъёс вае. Газетты пыр валэктэ вал, кызьы огшоры амалъёсын пужыосты сайкытэсь, адсконтэмесь карыны луоз. "Удмурт дуннеез" ми быдэс семьяен лыдӟиськом, милемлы со туж кельше. Оскисько, та юанме но газет палэнэ уз кельты шуыса. И. Ложкина. Дэбес ёрос. Ымнырысь пужыосты сайкыт каро лимон, грейпфрут, выль огреч сокъёс, сылалтэм кубисталэн вуэз. Луэмезъя ымныр куэз ялан та сокъёсын зыралляны кулэ. Куэз сайкыт каро емышъёс но: узы, боры, горд но сьӧд сутэр. Та емышъёсты (кудзэ ке одӥгзэ) нельконо но ымныре маска выллем вӧлдоно, 20-30 минут ортчыса, шуныт вуэн гылтоно. Калык амалъёс пӧлысь тужгес ӟеч луэ огреч кидыслэсь лэсьтэм настой. Водкаын яке 40 процентъем спиртын кидысэз 2 арня ӵоже пукето но сӥсъяло. Зырамлэсь азьло та пукетэз вуэн сурало: 1 чечы пуньы настое 10 чечы пуньы ву ватсало. Ымнырез зыралляно нуналлы быдэ. Мукетыз амал. Ымнырдэс ӵук но ӝыт зырамды луоз йырын сугон сокен яке курег пуз тӧдьылэн шукыеныз. Отчы одно ик ватсаны кулэ лимон сок. Созэ но, тазэ но одӥг мында ватсано. Синмады но синкашады медаз сюры. Оскалтэ на таӵе но амалэз уже кутыса. Лимон (яке кирень) сокез сурано одӥг мында йӧлвылэн но ымныр вылтӥ зырано (маска лэсьтоно). Лимон сокензэ возёно 15-20 минут ӵоже, нош киренен лэсьтэмзэ - 5 минут. Валамон: синъёсты но синкашъёсты та суретъёслэсь утьыны кулэ. Ымнырез миськоно шуныт вуэн. Л. ЯКОВЛЕВА. Шӧкыч Улон ӧрлэн бурмисьтэм яраез - уждун . Куд-ог колхозъёсын сое кык ар пала ӧз адӟылэ ни. Нош кызьы сыӵе гуртъёсын уло на - валаны уг луы. (Редакцие вуэм гожтэтысь.) Турист: - Кызьы гуртады адямиос уло ни? Микаль: - Со ласянь умой, милям татын ППДОО. Турист: - О-о, сазь йырын вераны но уд быгаты. Нош мар-о со сыӵе? Микаль: - Патриархально-паршивой Демократической Образцовой Общество. Середаз ЛЕОНИД ПРОЗОРОВ. Шӧкыч ПАЛЁМОД НО ТӤНИ - Ватытэк вералэ: зэм-а тӥ сизьым кышно возиськоды? - Зэм, судья эш. Сизьым ар ӵоже ни котыр ласянь оскымон кузпал утчасько. Ялан уг шедьтӥськы. х х х Егит нылкышно вазиське туно-пеллёлы: - Дорады мон ньыль ар талэсь азьло ветлӥ. Соку тӥ мыным тунады вал: картэныды, пе, ньыль пинал вордоды. Озьы ик вань: ньыль пинал будэтӥсько. - Ма кулэ на, туж умой со. - Табере мон юаны лыктӥ: ку луоз ни картэ? х х х Газетын ялон потэ: "Гражданъёс, зоопаркысь пегӟиз горилла. Утялске. Со тужгес но кышкыт нылкышноос понна". Ӵапак со ӝытэ театрысь берто кышноен карт. Кыло - мышказы топ-топ. Учко - горилла. Воргорон тубе одӥгаз писпуэ, нылкышно - мукетаз. Горилла воргоронэн писпуэз зынъя, черс-черс! Кизьнэ но вамыштэ мукетыз доры. Зынъя. Ымдурзэ ческыт нюлыштэ но ӝабырске писпу борды. -Маруся, Маруся! - кесяське воргорон.- Тон солы мыным сямен ик валэкты: туннэ туж жади, йыры висе, пыд йылам умме усисько. х х х Пичи ныл сайка уйшоре, вазиське мумизлы: - Мама-а, мадь мыным выжыкыл. - Вить на, нылы, кӧня ке. Тани бертоз атаед, асьмелы со сыӵе выжыкыл мадёз... х х х Ог ӝытэ Одоть пыре бускелез доры. Соиз пыже мильым. - Пуксьы ӝӧк сьӧры, куно лу,- ӧте кузё. Кыкетзэ вазёно ӧз луы - Одоть ӝӧк сьӧрын ни. Чав-чав! Гинэ сиське. - Ой, ческыт пӧраськод, гыдыке,- чиньытӥз виясь вӧез нблыштэ ӧдоть.- Только ӧжытак зӧкгес пӧрмытӥськод кадь. - Ма, тон одӥген си ук, ӵош кыкен-куинен эн басьты. Берекет ОШТОЛЭЗЬ Апрельлэн нимыз оштолэзь. Тулыслэн шорсюлмыз но пӧечи толэзь луэ со. Ӟучъёс та вакытэз тулыс шулдыръяськонэн (балэн) ӵошато. Жильыртыса кошкись тудвуосын валче, вылды. Тол ӵоже люкаськем лымы син куспын сылме, вулы пӧрме угось. Нырысетӥ усем тулыс зор музъем мугорез миськыны, гылтыны дыртэ. Пипу но бадьпу пучыос пумен зӧкомо, вазь усьтӥськись сяськаос но чеберзэс возьматыны дырто, кужым люкало. Куд-ог пӧйшуръёслэн вордӥськемын луо ни пиоссы. Шуныт палась вуо луд ӵӧжъёс, туриос, чечегъёс, нурканъёс (вальдшнеп), юберъёс но мукет тылобурдоос. Та толэзе сайкало нюлэс кузёосмы но - курень гондыръёс. Сютэмесь, восьтэтэсь пӧйшуръёс соку ик сиён утчаны кутско: кузьыли каръёсты бугыръяло, писпу выжыосты порто, нюрмульыен (клюква) куноясько. Одӥг кылын вераса, та вакытэ арлэн ӵукнаез кутске, ваньмыз сайка, улӟе, пушъе, вожектыны кутске. Оштолэзен кӧня ке калык веранъёс но герӟаськемын. Шунды апрель гурезьысь гужеме нискылтэ. Апрель тудвуос музъемез сайкато. Апрель кот ке, гырон музъем небыт. Апрель усьтэ ошмес синъёсты но вуосты. Апрель сяська лымыез тӥя. Апреле нырысьсэ усем зор воз тыр зарнилы ӵоша. Кызьпуысь трос сурсву вия - гужем зорысагес улоз. Вашкала календарья 4 апреле пусъё Василийлэсь нуналзэ. Бакча сиён будэтӥсьёс кутско ни парник дасян борды. Дӧдьы сюресъёс туннэ-ӵуказе ворсаськозы ни. 16 апреле пусъё Агафьялэсь, Никиталэсь вордскемзэс. Калык чакламъя, Микта вордскытозь, йӧ кошкыса ӧз ке быры, чорыг но уз луы. Та нуналэ, пе, тол уммез бырем бере иземысь султэ вукузё. 17 апрельысен вуо умой-умой шуныт нуналъёс, укноосысь окто кыкетӥ рамаосты. Туэ Быдӟымнунал (Пасха) 19 апреле луоз. Та нуналлы ваньмыз ӝикытатэмын, чылкыт утялтэмын, миськемын луыны кулэ. 21 апреле йӧ пильылӥсьлэсь - Родионлэсь праздниксэ пусъё. Та нуналэ шунды но толэзь пумисько. Куазь чебер ке тупаз - гужемез сыӵе ик луоз, жобаськиз, тӧласькиз ке - ӟеч гужемез эн ик возьмалэ. 29 апреле - Ориналэн праздникез. Кубистаез удлы кизё соку. Тыметъёс, тыос вылын йӧ шунаса быре ни. Лулпу сяськаяське, гурыоссэ - пельугыоссэ лэзья. Нош 30 апреле Зосимлэсь-мушкасьлэсь вордскем нуналзэ пусъё. Пасекаын ӟырдыт вакыт. Мушъем нырысетӥ укто ваё ни. А. СУТУЛОВ. "Титаник" берыктӥз ортчемаз 1912 арын 15 мартэ Атлантический океанлэн вуосаз, "йӧ гурезь" шоры донгиськыса, бадӟым корабль выиз. "Титаникын" соку 2 сюрс 200 адями вал, со пӧлысь улэп кылиз 700-эз гинэ. Шимес учыр сярысь дас одӥг пӧртэм фильм лэсьтэмын. Берпуметӥез 1996 арын пуктэмын. Со понна 200 миллион доллар быдтэм коньдонэз фильм ӝог берыктӥз. Сое дасясьёс 11 "Оскар" басьтӥзы. Ижевскысь "Россия" кинотеатрын "Титаник" 27 февральысен мынэ. Берпуметӥ сеанс 15 мартэ луыны кулэ вал, но калык трос люкаськемен, картинаез возьматон 12 апрелёзь кыскемын. Вань сыӵеос, кудъёсыз фильмез куинь-ньыль пол учкизы ни. Билет дун уго бадӟым ӧвӧл - тямыс манет. Но "сьӧд" рынокын со 50-озь вуэ. Паймонэз ӧвӧл, дыр, кинотеатр азьын "ужбергатӥсьёслэн" кылдэмзылы. Кылем шутэтскон нуналъёсы кык пияшъёс кытысь ке данак "мултэс" билетъёс шедьтӥллям. Басьтӥсьёс но сюризы. Ярано, йыртэмасьёс дырыз дыръя ӝегатэмын. Озьы, "Россия" кинотеатр дорын нуналлы быдэ уно калыкез адӟыса, тодэ лыкто ортчем аръёс. Кытчы соос пыризы? А. Андриянов. Тодмо удмурт писатель но кылбурчи Вячеслав Ар-Серги та шукрес нуналъёсы но оске: чеберлык дуннеез утёз. Озьы-а со, ӧвӧл-а?.. Со сярысь вераськон азинскоз Удмурт филармонилэн юртаз 8-тӥ апреле 18.00 часысен. Вячеслав Ар-Серги пумиськоз солэсь гожъямъёссэ лыдӟем но лыдымтэ адямиосын. Соин ик палэнтэ куд-ог ужъёстэс но лыктэ та аспӧртэмлыко адямилэн но писательлэн творчествоезлы сӥзем ӝытэ. Уката ик: та нуналъёсы солэн вордскем нуналэз. Соин валче автор ӵектэ выль книгаеныз но тодматскыны. Сцена вылын озьы ик луозы шаерысьтымы тодмо адямиос, артистъёс но кырӟасьёс, кылбурчиос но суредасьёс. Вячеслав АР-СЕРГИ х х х Марлы меда таӵе Мӧзмыт Луэ мыным Вордскем нуналъёсам?.. Вырйылысен мон учкисько Ортчем сюресъёсме. Мар ватонэз - Чиндыр-вандыр адско соос. Огез гинэ, дыр, шумпоттэ - Сюресъёсы вылын Ялан адско кык пытьыос, Аслам Но анайлэн сётэм кылчинэзлэн. Капчи нуналъёсам-вамышъёсам Со пытьыос яркыт адско. Нош ку ӵемтылыса, Курадӟыса мон вамышъяй - Пытьы одӥг гинэ адске. Иське, кылчин со вакытэ Монэ нуиз ас ки вылаз. Нош мон ӧй шӧдылы сое, Нош мон ӧй адӟылы сое, Анай гинэ вераз созэ - Толон уйвӧтъёсам Куно кариськыса, Кулэм дӥсьсэ Бызён нылаш кадь воштыса. Тюрагай но беризь Куректонэн тырмем Малпанъёсын Дугдӥ лабрес беризь улэ, Сай вужерлы Ӧпкельыса. ... Мон кыранъёс гожъяй угось тыныд, Тыныд гинэ, инмысь тюрагае. Быдэс тулыс Улос лэйказ кырӟанмылэсь. Лулдэ мон сайкатъяй Кырӟанэным. Сётӥ крезьгур, кылбуръёссэ гожтӥ - Кырӟанэдлы. Тон кырӟалляд - ваньзы паймылӥзы, Ортчыт синмаськизы. Нош мон понна Кулэ ӧй вал данэз, Сюлэм эктэ вал лэйкаса, Сётэм кырӟанэным Инмын жильыртэмдэ кылса. ... Ачим ӧй дырты ӝутскыны, Марлы мыным - Музъем адямилы? ... Лобӟид тон кыдёке, Ышид-бырид. Монэ нош - вунэтӥд. ................................. ... Огзэ уд тодскы вал, Тюрагае, Кырӟанъёсыд акыльтозы - Соос ялан ке огкадесь. Соку гинэ тон - тюрагай. Соку луод тон - тюрагай. Ку, тон шоры жальмыт Учкылыса, Жин крезьёсад выль сиостэ сётӥсь луоз - Вӧзад! ... Куректыса, асме тышкаськыса Сылӥ лабрес беризь Улын. Тани усё ни йыр вылам Ӵуж куаръёсыз, Тулыс кырӟанъёсты согылыса. Эбек Я, кытчы тэтчаськод меда Ӟырдам асфальт вылтӥ Дыртӥсь Вож куэныд кӧсыт чилясь Мусо, пичи эбек? Сутско, дыр, юз нюрлы дышем Вож дылькысьтыд Потэм кузь пыдъёсыд? ...Эн утча ни вордскем нюрдэ, Ыштӥд ни тугандэ - Ӟырдыт кезьыт яратондэ... - Ӧвӧл! - Ӧвӧл! Синзэ кыньыръятэк, Азьлане но азьлане Ӟырдам асфальт вылтӥ, Ӵук шундылы пумит Дыртэ Пичи гинэ, Вож куэныз чилясь эбек. Тыныд - сяськаос Гарамурес гадьын Но Тугаськем йырсиосын. Пӧсям вуэн зораськыса, Лымы вылтӥ Гольык пыдын Дорад мынӥ Гуштылыса. Нош тон шуид серектыса: - Я, учкы, учкы ай Мыштэ! Лёгем пытьыосад Горд сяськаос ӝутскылӥллям. ... Нош мон лулӟи поннам, зэмзэ тодса: "Горд сяськаос, со - Вир шапыкъёсы..." Но пальпотӥ, шудо тусо кариськыса: - Тыныд ваи Сяська керттэт. Я, пумита монэ.. Маскара француз ныл Кытысь-марысь пуксид вӧзам тон, Француз ныл? Кызьы нимыд - Жюльетта, Жанна, Франсуаза? Москва пурты пушкын Бульыр каро пӧртэм Кылын вераськисьёс. Тодӥ - Тон - Парижысь. Татчы лыктэм дышетскыны - Жюльетта, Жанна, Франсуаза? Кылмы тупаз, Куке шуи - Удмуртиысь, пӧй, мон. Отысь, кытын вордскиз Чайковский. Синъёс француз ныллэн Шуныт бусаськизы. Оло нгош, удмурт ныл луид? Оло, нош воксё ми палась? Гадьме ик урдыса, Мон ивортӥ на - тод ведь милемыз! Калашников но ми Дорын улэ. Солэсь шатыр ыбылэмзэ Быдэс дунне кылэ! ... Вужер тусо луиз нылаш. Я, мар меда сыӵе со - Кузь йырси выжы? Вераськимы ӵуказезэ пумиськыны... Ӧз лыкты ведь... Марлы? Сольвейг Нош нылкышно уг быгат возьманы - Мон шуысал Асме алдан понна. Нош нылкышно уг луылы востэм - Шусал мон, Луысал ке возьыттэм. Кезьыт нюлэс пушкын огназ Кылиз ке юрт возьны, Кысоз тылзэ со учогаз Шусал мон, Луысал ке - кылӥсьтэм, Кылӥсьтэм но адӟисьтэм. Нош берпуметӥ шокчыкум, Уз пона, дыр, йырме со алвылаз, Уз кырӟа даурлы кӧлтон гурзэ... Шусал мон, луысал ке - Сюлэмтэм. Нош урамын вузэ я серектэ Ыртӧл. Озьы, дыр, вераське со - Эдвард Григ. Норвегилэн жингрес фьордаз Мон зымисько но уясько, Пырпотыса оскылонтэм малпанъёсме - Дорад... Дорад... Дорад... Нимдэ гинэ тодса, Гӧртэм лулме соин Шунтылыса. . Туннэ Ашальчи Окилы тырмысал сю арес "Чылкак огназ бадӟым сюрес дурын някырскыса, тӧдьы кызьпу будэ... Со кызьпу сямен ик ӧжыт гинэ някырскыса Ашальчи Оки но улонлэн сюрес дураз сылэ..." - тазьы гожъяз вал со сярысь Куӟебай Герд. Табере со "кызьпу" огназ ӧвӧл ни. Удмурт нылкышно кылбурет вож-вож сад кадь пушйиз, сяськаяз... Табере трос ни асьмелэн нылкышно гожъясьёсмы: журналистъёс, кылбурчиос, веросчиос, литературоведъёс. Одӥгъёсыз Ашальчи Окилэсь творчествозэ эскеро, мукетъёсыз сцена вылын образзэ возьмато. Тани та снимок вылысь тӥ адӟиськоды Галина Лесниковаез, Удмурт кун университетысь дышетӥсез: дас ар талэсь азьвыл, Алнашын ужакуз, литературной спектакльын со син азе пуктӥз вал Ашальчи Окилэсь тусбуйзэ. Нош тросэз Ашальчи Окиез пырак улэпен син азязы пуктыны быгато на. Одӥгез соос пӧлысь Августа Васильевна Конюхова, Алнашын ужам мурт, калыкез дышетонысь отличник, "Шудтэм шуд" книгалэн авторез, аслэсьтыз чуръёссэ со Ашальчи Окилы но сӥзе. Грахъёс пӧлын но трос гинэ ай Окиез - Лина Григорьевнаез тодӥсьёс. Туннэ ёрос центрын но, солэн вордскем Ускы гуртаз но шуныт пумиськонъёс ортчо. Отын, оло, чузъясько Клавдия Николаевна Стрижовалэн но та гожтэм чуръёсыз. Т. Чернова. Абитуриент-98 Владимир БАЙМЕТОВ: "ВАНЬ НЫЛПИОСТЫ ВАЛАНЫ КУЛЭ" Удмурт кун университетысь дышетонъя проректорен Владимир Александрович БАЙМЕТОВЕН пумиськонмы ӵапак кысык вакытэ тупаз: та нуналэ татын ортче вал вуоно абитуриентъёсты университетэн тодматон ужрад. Соин ик вераськонмы но кутскиз туэ школаез йылпумъясьёслэн дышетскыны луонлыкъёссы сярысь. - Владимир Александрович, быгатозы на-а асьме нылпиосмы вузъёсын дунтэк тодон- валан люканы? - Дышетскыны мылкыд карисьёслэн лыдзы арысь аре будэ. Туэ но, малпаськомы, университетамы пырон понна бадӟым конкурс луоз шуыса. Но али но тодмо ӧвӧл на, кӧня муртэ дунтэк дышетыны лэзёз Москва. Туэ та ласянь шуге-леке шедемын Россиысь вань вузъёс. - Огвакыт вераськонъёс ветло вал республикаысьтымы кык бадӟым вузъёсты УдГУ-эз но ИжГТУ-эз огазе карыны. Зэмзэ-а со озьы луоз? - Уз. Та ужпум туннэ нуналлы быдэстыны луонтэм. - Гуртысь нылпиослы университетэ пырыны секытгес йӧтэ. Озьыен, соослы азьланяз татчы сюрес воксё уз пытсаськы-а? - Зэм, куд-ог факультетъёсы (историяя, экономикая, юридической) дышетскыны пырыны гуртысь нылпиослы секыт. Озьы ке но, удмурт пиналъёслы юрттон ужез нокызьы но ас эрказ лэзьыны уг яра. Берло дыре матысьгес кусыпъёс возьыны тыршиськом "Удмурт кенешен" но Правительствоысь Нациосын ужанъя комитетэн. Мынам малпамея, соосын валче ужаса, удмурт нылпиосмес ӟеч но дано факультетъёсы но кутыны луэ. Но татын ӵектэм потэ вылэм: удмурт кадръёсты дасян бордын "Удмурт кенешлы" но, комитетлы но пыр-почгес, малпаськысагес ужано. Кылем арын тани "Удмурт кенешысь" гожтэт ыстӥзы вал куд-ог абитуриентъёсты дышетскыны кутон сярысь. Но беромыса вуэменыз, пайдаез ӧз лу ни. Студентъёс нырысетӥ курсэ кутэмын вал ини. Мон сямен, удмуртъёслы али паськытгес уже кутоно заочной амалэн дышетсконэз но. Сыӵе дышетскон радъямын юридической, экономикая факультетъёсын но, коньдон тырытэк дышетскон интыос отын висъяськыло. Туэ тунсыко ужан амал борды басьтӥськиз удмурт учёной Юрий Семенович Перевощиков. Удмурт кылтодонъя факультетын дышетскисьёс пӧлысь со экономикалы дышетонъя нимысьтыз группа бичаз. - Гуртысь егитъёслы вузъёсы пырыкузы квота сётон сярысь меӵак ивортымтэ калыкез дышетон сярысь республикаямы кутэм законын но. Мар верасалды тӥ со пумысен? - Законын со сярысь верамтэ. Но тани алигес Правительствомылэн 311 номеро постановлениез потӥз. Отын пусъемын, вузъёсы одӥг куиньмоссэ гуртъёсысь абитуриентъёсты кутоно шуыса. Но со туж валантэм. Котькуд факультетэ гуртысь сомында егитъёсты нокызьы но кутыны уз луы. Собере татын юан но кылдэ. Шуом, кутомы, но сомында специалистъёс гуртъёслы кулэ-а меда. Керетонъёслэсь но палэнскыны ум быгатэ. Неужто городысь экзаменъёссэ ӟеч сётэм нылпи обиде уз усьы, со интые дышетскыны кутӥзы ке гуртысь ляб дышетскисез. Сыӵе нылпи, судэ вазиськыса, ассэ одно ик утьыны быгатоз. Национальной кадръёсты дасян бордын ужано, но мукет калыкъёсты обидьытэк. Та ужез вырӟытыны, оло, юрттоз алигес депутатъёсын кутэм национальной политикая концепция но. - Владимир Александрович, тӥляд паспортады но гожтэмын, тӥ "удмурт" шуыса. Со улонады кызьы ке юрттӥз-а? - Удмурт луэме вылэ ноку ӧй чӧлскылы. Зэм, мон удмурт. Кин-о бен луом, анае-атае удмурт бере. Анае вордӥськемын Ярын, атае - Можгаын. Ачим вордӥськи Глазовын. Но вордскеме сярысь кагаз отын сётыны пумит луиллям, соин ик вордӥськемме анаелэн улон интыезъя гожтӥллям. Пичи дыръям туж умой вераськисько ни вылэм удмурт кылын. Но жаляса верано, анае-атае Ижевске улыны выжемзы бере, мон ас кылме пумен вунэтыны кутски. Ижевскысь 30 номеро школаез зарни медален йылпумъяй, собере вал МГУ, аспирантура. Психолог луыса ужай Дышетӥсьёслэсь тодон-валанзэс будэтонъя институтын, милицилэн школаяз, университетын. Татын ик монэ психологияя кафедраен кивалтыны пуктӥзы, нош 1994 арысен дышетонъя проректоре бырйизы. Удмурт луэменым ноку дан ӧй поттылы, визьмылы, ас быгатонлыкъёсылы оскылӥ. Но али уже сярысь верано ке, удмуртъёслы быгатэмея юрттыны тыршисько. Соослы матын луэмме туж зол шӧдӥсько. - Тӥ школаез зарни медален йылпумъяды. Сыӵеослы азьло аръёсы институтъёсы пырыны капчигес, дыр, вал. Али куд-ог факультетъёсы медален но туж шуг пырыны. Мар возьма туэ школаез зарни медален йылпумъясьёсты? - Тупатэм куронъёсъя медален пусъемъёс, азьло аръёсы сямен ик, одӥг экзамен сёто. "Вить" басьто ке, мукет экзаменъёслэсь мозмытско. Но куд-ог факультетъёсы, кылсярысь, юридической факультетэ, нырысь экзаменлэсь азьло, сыӵе нылпиос ортчо на собеседование. Собеседованиын асьсэды сокем умой уг возьмато ке, вань экзаменъёсты сёто, нырысетӥ экзамензы "витен" ке но пусъемын. Нош кудаз факультетын конкурс бадӟым ӧвӧл, отын медалистъёслы сыӵе вылӥ куронъёс уг пуктӥсько ни. - Дырез азьпалтыны шуг, но вуоноезлы малпанъёстэк ум улӥське. Кыӵе дышетон амалъёс валтӥсь интыын луозы ХХИ дауре выжон вакытэ? - Туэ иворъёстэк одӥг вамыш но уд ни лэсьты. Ваньзэ соосты йырын но возьыны кулэ ӧвӧл кадь, но тодыны одно ик кулэ. Соин ик туала дышетскисьёслы но, преподавательёслы но ужаны быгатоно компьютерен. Интернет пыр дуннеысь пӧртэм иворъёсты бичаны луэ. Соин ик сюлмаськоно гуртысь нылпиосты но компьютерен ужаны дышетон сярысь. Озьы ик валтӥсь интыын котьку но луоз, кылёз педагоглэн чебер кылыз. Адями кусыпъёсты герӟаса возьыны быгатэ кыл гинэ. - Нош ик вуимы кылэз тодон вылэ. Дышетонын но та ужпумлэсь палэнэ кыльыны уг луы, лэся. - Удмуртиын улӥськомы бере, удмурт кылмы государственной луыны кулэ. Со сярысь шонер гожтэмын Конституциямы но. Мар вераськонэз на кадь. Супыльтӥськом, даллашиськом. Шаерамы 30 процент пала удмуртъёс уло, озьыен, дышетӥсьёс но, чиновникъёс но удмурт кылын вераськыны кулэ - соос калыкен ужало ук. Басьтом Финляндиез ик. Татын 6 процент гинэ шведъёс уло, но соослэн кылзы финн кылын оградэ пуктэмын, государственной ялэмын, вань дышетӥсьёс кык кылын верасько. х х х Байметов Владимир Александрович, психология наукаосъя кандидат, ас ужаз валтӥсь интые пуктэ адямиосты валанэз. Сыӵе угось солэн быръем удысэз. Егит на ай, озьы ке но, солы кивалтыны оскемын коллективъёсын, кудъёсыз ужазы "Ижевскысь нылпиос" программаез но Удмурт Республикаын нылпи движениез азинтонъя концепциез дасян бордын. Ноку уг палэнскы дышетскисьёс, абитуриентъёс, студентъёс азьын сылӥсь ужпумъёслэсь, дӥсьтыса басьтӥське соосты быдэстон борды. Т. БАННИКОВА. Шӧкыч Кышно бырйыны быгатоно Армиысь бертыса, ог ӝыны ар ортчиз-а, ӧз-а, анае ӟурыны кутскиз ни: ку, пе, мыным кен ваёд ни, коркамес нылпи куараосын шулдыртод? Нош мон... Мон ыж кадь востэм. Чебер апаез адӟисько ке, бамы дарали луэ. Синме ӝутыны уг дӥсьтӥськы. Ӵыжы-выжыос, эшъёс но тани чырты выжые вуттӥзы ни. Тон, шуо, ку милемыз сюанад ӧтёд? Огласянь дыртытэмзы но валамон. Гуртысьтымы нылъёс пумен быро: я артысь корка, я сьӧрло валто соосты. Трос бырйиськид ке, кема ӧвӧл пал тури кыльыны. Йырез поромытэ мукетыз но. Кышно басьтӥд ке, мед вордскозы ачид кадь ик визьмо, йӧно нылпиос. Нош туала арын озьы гинэ уг луы ай. Тани бускеле Вася шуак-дуак сюан ортчытӥз - тани вить ар ӵоже ни пинал йӧндырыны уг быгато, кузпалыз ялан муры. Ӵапак со Вася мыным кызьы ке шуэ. Ма, пе, йӧтылымтэзэ нылэз утчаськод. Басьты дась кунянозэ. Мултэс сюлмаськонэз, ужанэз-выронэз уз луы. Шедьтӥз кинэ дэмланы но - шур сопалась Оляез. Солэн нылыз будэ, туэ школае мыноз ни. Анаез синмаськымон, калыклы вазиськись, ужын но удыссэ муртлы уз сёты. Васялэсь бур кизэ кутыса, шлач! чабки паллянэныз. Дыртӥсько анае доры. Таилэн, кылыз быгыльскиз , ымыз усьяське, куараез уг поты. Огшап ортчыса гинэ лоп-лоп вешаны, чупаны кутскиз. Синкылиоссэ ӵушылэ. Курасьёсы Оляен но, анай-атаеныз но мултэс вераськытэк огкыл шедьтӥзы. Трочинь нуналэ сюан ортчытӥм. Кылзэ шерыны яратӥсьёс бен шедизы ик: кышно быръемез сярысь вераськонъёс поттыллӥзы ик. Вот, пе, чебер казакпи пирданэн кышно ваем. Нош мон пумитазы гадьме атаслэн кадь быгыльтӥсько, йырме вылэ урдӥсько. Мон, шуисько самой сертифицированной кышно басьтӥ, мукет сямен вераса, - котыр ласянь эскерем кышно. Мыскылъяны вырисьёс соку ик гуньдо. Олялэн нылыз мынам зарни бугоре. Гуртын ми самой шудо семья луим. С. Савельев, пенсионер, ужысь ветеран. Нуналлэн тодметэз Православной календарья туннэ - Яков Апостоллэн праздникез. Калык чакламъя, ӝытэз шуныт, нош уез кизилиё ке луиз - вань киземез-мерттэмез туэ удалтоз. 14 мае пусъё Еремейлэсь вордсконзэ. Еремейлэн нуналаз куазь чебер ке - аран вакытэ но сыӵе ик сылоз. Зоро-кото ке - быдэс толзэ ёрмыса ортчытод. Еремейлэн праздниказ лысву тӧлӟытозь кизьыны пото вал. Калык верамъя, нянё ке луэмед потэ, Егорий нуналысеныз арня кизь, мукет арнязэ - Еремейлэн вордсконэз бере. Крестьянъёс пӧлын таӵе тодмет вылэм: кизён нуналэ одӥг кузё но пунэмен юдэс няньзэ но, одӥг тысьсэ но уз, пе, сёты: кышка сютэм кылемезлэсь. Югыт нунал туннэ кыстӥськоз 16 час, ӵуказе - 4 минутлы кузьгес. Та нуналъёсы вордскем нылпиослы сётоно нимъёс: Василий, Иван, Игнатий, Никита, Яков, Макар. Та нуналэ... ар талэсь азьло 14 мае 1955 арын СССР, Польша, Румыния, Болгария, Венгрия, Чехословакия но ГДР куспын ӵош ужан но ог-огедлы юрттон сярысь Варшавской договор гожтэмын. СССР-ез быдтонэн ӵош со куашказ. 13 мае 1973 арын Ижевскысь 37-тӥ школаын ортчиз 313-тӥ Петрозаводской Краснознамённой стрелковой дивизиын ожмаськем ветеранъёслэн слётсы. Ижевскын улӥсьёс понна Кыӵе вуэз юо городын улӥсьёс? Кыӵе амалэн сое дунгес кароно? Та ужпумез эскеронъя 14 мае 16 часын Ижевсклэн администрацияз ортчоз "котырес ӝӧк" сьӧрын вераськон. Отчы пыриськозы коммунальной службаын ужасьёс, городысь думалэн депутатъёсыз, общественной организациослэн ыстэм адямиоссы. Кыӵе луоз вулэн ӟечлыкез - сыӵе ик луоз калыклэн тазалыкез. 21 мае 10 часын Нылпиослэн дворецазы ортчоз Ижевскез висёнъёслэсь утёнъя кенешон. Городын улӥсьёслы та ласянь кылдэм ӵектонъёссэс верано 76-33-36 телефонъя. Л. Дмитриева. Университетын пумиськон Валлян Ижевскысь Технической университетэ люкаськылӥзы вузъёслэн но профессиослы дышетон шор ёзо заведениослэн кивалтӥсьёссы. Пумиськонэ ветлӥз Кун Кенешлэн Тӧроез А. А. Волков. Со йылпумъянъёс лэсьтӥз республикамылэн ортчем арын ужамезлы. Азьло аръёсын ӵошатскыса, куд-ог азинсконъёсмы вань. Кылсярысь, экономика удыслы 89 улос пӧлын Удмуртия куамын кыкетӥ интыысь кызь витетӥ интыозь ӝутскиз, социальной удысын - шорысеныз куамын сизьыметӥозь. Табере асьмемыз ӟечгес тодыны ӧдъязы быдэс Россиын но. Озьы ке но, бадӟымесь предприятиос йӧн-йӧн ужамтэен, ваньмыз ушъямон ӧвӧл на. Бюджетэ коньдон ӧжыт люкаське. Соин ик, кылсярысь, курадӟоно луо дышетон удысын ужасьёс. Ичи уждунзэс но соос дыраз басьтыны уг быгато. Вузъёслэн, училищеослэн пӧртэм тыронъёссы нуналлы быдэ йыло. Тросаз заведениосын телефонъёс но уг ужало ни, куд-ог интыосы шуныт но сётэмысь дугдӥзы. Кышкато, ву гинэ но сётэмысь дугдытозы шуыса. Март толэзьлэн пумаз но апрельлэн кутсконаз Москваын ортчиз Калыкез дышетон удысысь министерстволэн коллегиез, кытын йылпумъянъёс лэсьтэмын вал кылем дышетскон арлы. Солэн уженыз ИжГТУ-э люкаськемъёсты тодматӥз Удмурт Республикаысь Правительстволэн Наукая, вылӥ но шор профессиослы дышетонъя комитетлэн кивалтӥсез Сергей Максимович Решетников. Ортчем дышетскон ар Россиын, азьвыл аръёсын ӵошатыса, огшоры ортчиз. Одӥг но дышетскон заведение ӧз ворсаськы. Шумпотоно, миым выльёсыз усьтӥськизы шуыса. Вылӥ дышетскон заведениосын аттестация ортчытон радъямын. Соос быгатэмзыя пырисько кадь та ужрадэ, но валантэм югдур государственной луисьтэм вылӥ дышетскон заведениосын. Россиысь куинь сюрс пала сыӵе вузъёс пӧлысь 250-эз гинэ нимысьтыз лицензия басьтыса ужа. Кылемъёсызлы статуссы кунэн тупатэм куронъёслы уггес тупа на. Мынам малпамея, пумиськон ӝутскем мылкыдын ӧз ортчы, университетэ лыктэмъёслэсь мылкыдзэс зӥбиз, лэся. Вылаз ик, преподавательёслэсь лыдзэс ог 25 процентлы кулэстыны вылӥысь малпан сярысь ивортон. А. А. Волков уно юанъёслы валэктӥз, вуоно быръёнъёс пумысен малпанъёссэ вераз. Пумиськонлэн пумаз со технической университетысь дышетӥсез Иван Кузьмич Печуринэз "Россия Федерациысь вылӥ школаысь дано ужась" ним сётэмен ӟечкылаз но гадяз нимысьтыз знак бырттӥз. В. Кутузова. Журналистъёсын пумиськонъёс Уксё лыдэз яратэ Кун Кенешысь Эскерон комитетлэн кивалтӥсез Александр Кузнецов ивортӥз туэ нырысетӥ кварталэ быдэстэм ужъёс сярысь. Кылсярысь, эскеремын Сарапулысь но Уваысь Асваньбуръя комитетъёслэн ужамзы. Данакез шараян тырмымтэос пото Асваньбурлы йӧскадь реестръёс дасямтэ бордысь. Ува ёросысь озьы ик пыр-поч сэрттэмын-пертчемын хлебоприёмной комбинатлэн ужамез. Татын уно коньдон быдтэмын законэз тӥяса коттеджъёс лэсьтонлы. Мартлы ччаклам ужъёсыз пӧлын комитетлэн таӵеез но вал: Правительствоын ужасьёслэсь кунгож сьӧры командировкаосы потамзылэсь пайда ваемзэ но коньдон быдтэмзэчс эскерон. Трос тыршымтэос шараямын ӧй вал ке но, Удмурт Республикаысь Сьӧрлось калыкъёсын кусыпъёсъя министерствоез куремын куд-ог ведомтсоослэсь командировкаосы ысъямзэс чакласа возьыны. Кызьы ивортӥз А. Кузнецов, арлы быдэ бюджетысь командировкаослы 45-=470 миллион манет коньдон кошке. Адямиос ялан ӝожтӥсько, чиновникъёсты возён понна республикамылэн кисыысьтыз трос коньдон кошке шуыса. Со юнме ӧвӧл, дыр, угось соосты возьыны асьмеос, налог тырисьёс но, юрттӥськом. Та ужпумъя вераськон ӝутэмын вал комитетлэн огаз кенешаз но. Кун Кенешысь депутатъёсын ӵош комитетлэн адямиосыз берлояз сессиын депутатлэн А. Чижковскаялэн ӵектэмезъя куараоссэс сётӥзы госаппаратэз возёнлы туала бюджетын учкем коньдонэз 34 миллиард манетлы кулэстон понна. Мон котьку но со понна сылӥсько вал, шуиз А. Кузнецов. Нырысетӥ кварталэ Эскеронъя кун комитетэ 11 ӝожтӥськон вуэмын, со пӧлысь 4-ез Кун Кенешлэн Тӧроезлэн куремезъя. Вань гожтэтъёс эскеремын. Куд-ог бадӟым эскеронъёсты кылсярысь, му вӧен герӟаськемъёссэ, нуыны чакламын Россия Федерацилэн Лыдъясь палатаеныз ӵош. Кыкетӥ кварталын комитет малпа 15 пала эскеронъёс ортчытыны. Лыдӟисьёс понна вералом на: Эскеронъя кун комитетын 17 адями ужа. Со пӧлысь ньылез - юристъёс, сизьымез - экономистъёс. Комитет ас ёзъёссэ кылдытэ ни Воткинск, Глазов, Можга, Сарапул городъёсын но Игра, Ува посёлокъёсын. Котькуд ёзын ужалоз быдэн 4-5 адями. Т. Банникова. 23-тӥ ёзэт. Удмурт Республикаысь Правительствоен дасям но юнматэм Положениея, дышетонъя, тазалыкез утёнъя, культурая но калыкез улон-вылонын утёнъя учреждениосысь специалистъёс общежетиосын улэмзы понна дун тырозы адямилы быдэ толэзяз 150 манетозь. Нылпи дошкольной учреждениосысь ужасьёслэн нуналлы быдэ одӥг пол сиськемзы понна тыронъёс мыно республикалэн бюджетэз чотын пичи уждунлэн куинь процент быдӟалаен. 24-тӥ ёзэт. Нылпиосын гражданъёслы кун пособиосты тыронэз радъян вылысь, 1998 арын 1 январьысен кутскыса, пособиосты лыдъянъя но тыронъя ужпумъёсты быдэстонэз сётоно Удмурт Республикаысь Калыкез улон-вылонын утёнъя министерстволы. Юрттэт басьтӥсьтэм ёросъёс (Игра, Якшур-Бодья, Воткинск, Каракулино) та пособиосты тыро асьсэ коньдонзы чотын, коньдон ёросъёслэн бюджетъёсазы тыроно налогъёслэн нормативъёсазы лыдэ басьтэмын. 25-тӥ ёзэт. Удмурт Республикаысь Правительствоез лэзёно Ижевск но Глазов городъёсысь нылпи пособиосты вакытэн-вакытэн тырыны: нырысетӥ паларе - городъёслэн бюджетысьтызы коньдон чотын, со понна республикалэн бюджетысьтыз тырмыт коньдон висъяса; кыкетӥ паларе - республикалэн бюджетысьтыз коньдон чотын Калыкез улон-вылонын утёнъя министерстволэн отделъёсыз пыр. 26-тӥ ёзэт. Нылпиосын гражданъёслы 1997 ар понна пособиосъя пунэм тыриськод Удмурт Республкаилэн казанез чотын, пособиос сётэмын луозы 1999 арын, ватсам процентъёсын , соослэн быдӟалазы тупалоз Россилэн Сберегательной банкысьтыз вкладъёслэн басьтон нуналэ юнматэм процентъёссылы. 27-тӥ ёзэт. Нылпиосын гржаданъёслы кун пособиос сётыку, нырысь ик лыдэ басьтӥсько семьяос, кытын одӥг муртлы доход улон-вылон минимумлэсь ӧжыт. 28-тӥ ёзэт. Удмурт Республикаысь Правительствоез лэзёно йылаз-пумаз лэсьтымтэ объектъёсты вузаса люкам коньдонэз капитальной вложениосы ыстыны. 29-тӥ ёзэт. Республикалэн бюджетаз выт мукет тыронъёсты тыронъя отсрочка но выт тырисьёслы сётӥське та ар ӵожелы но со куать толэзьлэсь ятыр луыны уг быгаты, таӵе учыръёсы: республикалэн бюджетысьтыз яке быдэстэм кун заказ понна коньдон ӝегаку - пунэм тыронъёс борды процентъёс ватсатэк; вытэз тырем быдэсак бере яке налогъёсты но пениосты тырыса банкрот луыны кышкытлык кылдэ ке - бюджет коньдонэз кутэм понна тыронэз процентъёс чотын басьтыса, солэн бадӟалаез тупа Россия Федерацилэн Ценральной, банкезлэн рефинансированиея ставкаезлэн куинь ньыльмос люкетэзлы; инкуазь шукыръяськонъёс, технолгической шугадӟонъёс дыръя но мукет секыт, вормыны луонтэм учыръёсы - бюджет коньдонэз кутэм понна тыронэз процентъёс чотын басьтыса, солэн быдӟалаез тупа Россия Федерацилэн Центральной, банкезлэн рефинансированиея ставкаезлэн одӥг кыкмос люкетэзлы. 30-тӥ ёзэт. Удмурт Республикаысь Правиельство быгатэ республикалэсь 1998 арлы бюджетсэ быдэстыку таӵе воштонъёс пыртыны; республикалэн бюджетэзлэн ведомствоослы чаклам расходъёся люкетаз - куд-ог учреждениослы, ужрадъёслы коньдон висъянъя полноочиосты но куд-ог расходъёсты сётэмен валче; экономической классификациез, целевой статьяосты но мукет расходъёсты лыдэ басьтыса, министерствоослы, ведомствоослы расходъёсты люконэ - коньдонэз палэнэ кутэмез текущей финансирование чотэ выжтэмен валче, уксё кутэмез эскерись ёзъёс ӵектэмъя; республикамылэн бюджетэзлэсь расходъёссэ кулэстон, вуэм расходъёсты лыдэ басьтыса, сое бӧрысь Удмурт Республикаысь Кун Кенеш юнматэ. 31-тӥ ёзэт. Удмурт Республикаысь Правительство 1998 арын коньдон висъяны быгатэ сое берыктон вылысь, со юнматэмын республикамылэн бюджетэзлэн функциональной классификацияя разделъёсаз: агропромышленной комплексысь предпрятиослы арлэн дыръёсыныз герӟаськем ужрадъёсы 1 арлы, сётэм коньдон понна процентъёс тыроно - Россия Федерацилэн Центральной банкезлэн рефинансированиея ставкаезлэсь одӥг кыкмос люкетсэ; промышленностьын инвестиционной прграмаосты быдэстонэ, ужан интыосты кылдытонэ. Та удысъёсы уконьдон висъянлэсь радзэ но куронъёссэ юнматэ Удмурт Республикаысь Правительство. 32-тӥ ёзэт. Удмурт Республикаысь Правительствоез лэзёно ёросъёслэн но городъёслэн администрациоссылы сётъяны проценттэк ссудаос кассовой разрывез палэнтон понна, соос кылдо та финансовой арын доход вуэм но расход ортчытэм дыръёслэн тупамтэенызы. 33-тӥ ёзэт. Кун властьлэн ёзъёсызлы но интыысь аскивалтонъя ёзъёслы ӵектоно бюджетэз быдэстыны ресурсъёс шедьтон но доход люкан понна юнматэм радлыкъя займъёс люкылыны но лотереяос ортчытъяны. 34-тӥ ёзэт. Юнматоно: республикалэн бюджетысьтыз коньдонэз кулэезъя кутымтэ понна басьтӥське штраф, солэн быдӟалаез тупа Россия Федерацилэн Ценральной банкезлэн рефинансированиея кык ставкаосызлы; республикалэн бюджетысьтыз коньдонэз ватсам процентъёсын но штрафъёсын дыраз берыктымтэ понна кун ласянь юрттэт, озьы ик выт тыронъя ӝеганы дыр, ӧжыт сётӥське яке дугдытӥське; берыктон вылысь сётэм пунэмез, озьы ик республикалэн бюджетысьтыз уксёез кутэм понна процентъёсты ӝегатыку басьтӥське штраф - Россия Федерацилэн Центральной банкезлэн рефинансированиея ставкаезлэсь одӥг куинь сюмос люкетсэ котькуд ӝегам нунал понна; республикалэн бюджетысьтыз предприятиослы но организациослы сётэм коньдонэз берыктон, озьы ик со коньдонэз кутэм понна тыронъёс но штрафъёс республикалэн бюджетаз тыронъёс чотын кошко. 35-тӥ ёзэт. Удмурт Республикаысь Правительство быгатэ кыскыны заём коньдонэз - республикалэн бюджетэзлэн доход люкетэзлэсь куамын процентсэ. 36-тӥ ёзэт. Удмурт Респбликаысь Правительство кун гарантиосты но поручительство сётыны быгатэ займъёсъя но кредитъёсъя инвестиционной процентъёсты быдэстон понна, республикалэн 1998 арлы бюджетэзлэн расход люкетэзлэн куинь процентозь быдӟалаен. Удмурт Республикаысь Правительстволы гарантиос сётоно 9 миллион манет кредит басьтыны, "Воткинский винзавод" ОАО-лэн бизнес-планэзлы коньдонэн юрттон вылысь, та предпритиын ваньбур поттэмлэсь ватсаса акцизъёс басьтон чотын, Удмурт Республикаысь Правительство, Воткинск городлэн администрациез но "Воткинский минзавод" ОАО куспын тупанкылъя. Гарантия но поручительство сётон радлыкез юнматэ Удмурт Республикаысь Правительство. 37-тӥ ёзэт. Пичи ужбергатонлы юрттонъя Удмурт кун фондэн висъям но льготалы инвестиционной кредитъёс басьтонэ ыстэм коньдон берыктэмын луыны кулэ, ватсам процентъёсты лыдэ басьтыса. 38-тӥ ёзэт. Республикалэн 1998 арлы бюджетаз мукет расходъёсты чаклась но солэсь доход люкетсэ сюбегатӥсь нормативной правововой актъёс улонэ пыӵало, республикалэн бюджетаз ватсаса коньдон пыртон амалъёс вань ке но (яке) республикалэн 1998 арлы бюджетаз нимаз статьяосъя расходъёс кулэстэмын ке. 39-тӥ ёзэт. Удмурт Республикаысь Правительствоез лэзёно республикалэн бюджетысьтыз кассовой расходъёслэн вить процентэз мында коньдонэз, утем статьяосты лыдэ басьтытэк, ыстыны объектъёсты лэсьтонэ, кудъёсыз юнматэмын Удмурт Республикаысь Правительствоен. Интыысь аскивалтонъя ёзъёслы ӵектоно та выллем ик решениос кутонъя кулэ ужрадъёс ортчытыны. 40-тӥ ёзэт. Удмурт Республикаысь Правительствоез лэзёно социально-культурной удысын бюджетъёсты быдэстонъя коньдонлэсь одӥг процентсэ ыстыны улон инты басьтонэ Удмурт Республикаысь Правительстволэн 1997 арын 27 июне кутэм 650 номеро "Республикалэн бюджетысьтыз коньдон чотын улон инты лэсьтон яке басьтон понна берыктонтэм вылысь субсидиос сётон сярысь Положениез юнматон сярысь" постановлениея. Интыысь аскивалтонъя ёзъёслы ӵектоно та выллем ик решениос кутонъя кулэ ужрадъёс ортчытыны. 41-тӥ ёзэт. 1996-1998 аръёсы правопорядокез но экономической кышкытлыклэсь утиськонэз юнматонъя республиканской целевой програмалэн 1 люкетысьтыз 11 пунктлэсь, 3 люкетысьтыз 6,22 пунктъёслэсь, 4 люкетысьтыз 1,3, 4, 5, 6, 8, 9, 10, 12, 15, 17, 18 пунктъёслэсь кутӥськемзэс 1998 арын 31 декабрёзь уретоно. 42-тӥ ёзэт. Выль кылдытэм муниципальной образованиослы коньдон висъяське Удмурт Республикаысь городъёслэн но ёросъёслэн юнматэм бюджетъёссыя но та Законъя. 43-тӥ ёзэт. Та Закон кужыме пыре сое печатлам нуналысен. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 24 мартэ. � 609-И. Тыронъёс пачкато Берло дыре шаерысьтымы ваньмыз сямен гурт хозяйствоос изъян адӟо. Ӵапак сыӵе югдур Селта районын но. Тани быдэс ёросын 15 миллиард манет тыронзы люкаськемын. Кылсярысь, 1994 арын 1 манетлы вузам продукция 85 коньы изъян сётэ ке вал, миым со 1 манет луиз, нош "Гигант", "Валамазское" но "Селтинское" эштосъёсын - 1,5-2,4 манет. Тӥни озьы гурт хозяйствоослэн кредитъя тыронъёссы 41 пол йылӥзы, лыдпусэн вераса, 12 миллиард манет пала. Куд-ог хозяйствоослэн тыронъёссы сомында люкаськемын, кык ар ужаса но бадӟым берыктыны уз быгатэ. Но тужгес но тыронъёссы электрокужымъя (3 миллиард манет) но социальной фондъёслы (5 миллиард манет). Р. Данилов. УКСЁЛЭСЬ "ПЫТЬЫЗЭ" УТЧАЛО Нырысь-валысь калык шумпотыса но оскыса пумитаз выльдӥськонъёсты (реформаосты), нош бӧрысь валаз: солэсь пайдазэ туж кема возьманы кулэ луоз на. Ӧжыт ӧвӧл сыӵеосыз но, кудъёсыз уг оско солэн умой улон ваёнэзлы. Али тросэзлэн ӧвӧл уксёез сиён-юон, дӥськут басьтыны. Куям жуг-жаг пӧлысь (бачокъёсысь) соосты утчало. Реформаослы оскисьтэмъёслэсь лыдзэс будэтӥзы коммерцияя банкъёс но ломбардъёс. Соос калыклы вазиськизы: "Милемлы уксёдэс сётӥды ке, толэзьлы быдэ коньдонды дас- кызь процентлы будоз". Нош "МММ", "Русский дом Селенга", "Русская недвижимость", "Хопёр" но мукетъёсыз син азьын куашказы но кивалтӥсьёссы, миллиард манетъёс кисыосазы поныса, кунгож сьӧры пегӟизы. Озьы ик луиз республикаысьтымы "Ломбард-ипотека" ТОО-ен но. 1992 арын 30-тӥ мартэ Ижевскысь администрация "Ломбард-ипотека" ТОО-ез юнматӥз. Со нырысетӥ нуналъёсысен ик уставзэ тӥяса ужаны кутскиз. Лицензитэк коньдонэн герӟаськем пӧртэм ужъёс нуиз. Законъя со озьы лэсьтыны уг быгаты вал. Бӧрысь ини коньдонэз бергатыны соослы лицензия Ижлэн вице-мэрез Виктор Балакин сётӥз, отчы ачиз ик кинюртӥз. Со дыре фирмалэн калыклы 993 миллион манет тыронэз вал ини. Законъя вице-мэрлэн лицензия сётыны правоез ӧй вал. Сое республикаысь территориальной но отраслевой органъёс гинэ лэсьтыны быгато вал. Озьы ик Виктор Балакин документъёс вылэ гожтылӥськиз, кытын верамын вал, пӧям вкладчикъёслэн уксёзы городэз чылкытатонэ но выльдонэ мынэ шуыса. Зэм-а со, ӧвӧл-а, шараялоз суд. Али "Ломбард-ипотека" ТОО-лэн кивалтӥсьёсыз вылэ уголовной уж ӝутэмын. "Ломбард-ипотекаын" сётэм документъёсын дырыз но пуктылымтэ. Нош отчы данаказ кинюртыны быгатэ вал городлэн мэрез гинэ. Анатолий Салтыков гожтӥськымтэ Пушкинской урамысь 367-тӥ номеро коркалэсь ог люкетсэ соослы сётон сярысь документэ но. Озьы "Ломбард-ипотека", туж трос янгыш лэсьтыса, дуннее потэмын. Солэн рекламаосызлы оскыса, кык сюрс вить сю адями берпум уксёзэ ТОО-е ваиз. Пӧямъёс пӧлын тужгес трос пенсионеръёс. Соос таяз дуннеысь "берпум сюресазы" мыныны уксё люкало вал. Егитъёс уксё дасяло вал я автомобиль, я квартира, я сад- бакча басьтыны. Бадӟым процентъёслы, уксёзылэн ӝог будонэзлы оскыса, доразы уждунзылэсь но пенсизылэн пичи люкетсэ гинэ кельтылӥзы. Уксё басьтон дыр вуиз но шараяськиз: "Ломбард-ипотекалэн" кассаяз одӥг манетэз но ӧвӧл. Озьы котькудӥз кык сюрс вить сю адями быдэн дас - сю миллион манет уксёзэ ыштӥз, нош ваньмыз ог дас вить миллиард чиптэм-чаптэм ышемын. Уксё тырисьёслы берло тодмо луиз: эштосэз кылдытӥсьёс Владимир Лазаренко но Сергей Карпов интыязы уг пуко, пегӟемын ни. Валамон, нокинлэн толэзьёсын-аръёсын люкам уксёзэ тӧлъя-буръя лэземез уг поты. Сизьым пӧям адями Зинаида Заметаева, Андрей Битунов, Зинаида Логинова, Галина Губина, Владимир Тимофеев, Михаил Перепелица но Михаил Иленков Октябрь районысь судэ иск сётӥзы, "Ломбард-ипотека" уксёзэс мед берыктоз шуыса. Пӧртэм удысын кужымзэс жалятэк тыршизы, соос ваньмыз сямен пенсиын ни (Владимир Тимофеев гинэ егит на). Та мӧйы адямиос кыкетӥ арзэ котькыӵе интыостӥ уксёзэс утчаса ветло. Туэ гинэ куинь пол Ижевскысь Октябрь районысь судэ люкаськылӥзы, но пайдаез уг адӟиськы. Судын ужасьёслэн ас понназы кенешемзы бере, судья Андрей Михалёв вераз: "Туннэ вазь на кыӵе ке решение кутыны". Али "Ломбард-ипотекалэн" кивалтӥсьёсыз вылэ уголовной уж ӝутэмын, следствие мынэ на. Кытчы кошкиз калыклэн уксёез? - тодмо ӧвӧл на. Но кызьы-о, сое тодытэк, пӧямъёслы коньдонэз берыктод? Соин ик табере граждан искез ӝутӥсьёс Октябрь районысь судэ следствие бырем бере люкаськозы. Паймоно соизлы но, малы сомында пол пӧям калыкмы али но пӧртэм, зор бере губи кадь потэм, фирмаослы аслэсьтыз уксёзэ, ваньбурзэ сётэ-оске на. Н. ВОЗИСОВ. Уксёез - дыраз Уждун тырон ласянь Воткинскысь предприятиос пӧлын калыксэ умой возе сиён-юонъёс поттонъя комбинат. Татын одӥг нуналлы но ӝеганъёс ӧй вал на. Ӟеч улэмзылы уг паймо - продукцизы котькуд магазинын. Кылем аръёсын ӵошатыса, сиён-юонзы туэ куинь поллы ятыр вузамын. Конфет, карамель, пряник, тортъёс - ваньмыз татын лэсьтэмын. Валась мурт уго кемалась сялӟиськиз ни кунгож сьӧрысь вуттэмез вылэ: мае но асьмелы уг ысто! "Птичье молоко", "Барбарис", шоколадэн сурам пушмульы - ваньмыз со асьмелэн вань ни. Ческыт но дунтэм. В. Боброва. Чилектонысь суредъёс Адями - инкуазьлэн нылпиез. Соин, лэся, фотохудожниклэн Мударис Менладшинлэн уно туспуктэмъёсыз шулдыро инкуазь суредъёс адямилэн улон-вылонэныз вожвылъяськыса- пӧлэстӥськыса кошко. Куспазы соосты адскисьтэм нюжаос герӟало, кожалод. Тани ворпо буёлъёсын ворекъясь возь вылысь сяськаосын, турын-куаръёсын шудэ ыркыт тӧл - котькуд буртчин нюжазэс, ненег бурдъёссэс веша но маялля. Татын но улонлэн аслаз шоканэз шӧдӥське. Ӟоз, тӧдьы сяська вылэ огшаплы пуксьыса, ырась тӧл шорын шутэтскыны-ӟечыраны мылкыд карем - турнаса-ӟозгетыса жадем, луоз. Мукетаз сяська йыр вылын бубыли кузёяське, бурдъёссэ выретыны дӥсьтытэк ик улэ. Тани-тани бурдъёсыныз шонтоз но сяськаосын вӧлдэм-валем возь вылтӥ поръяны шӧталоз. Лэйкаысь сяська вылын ӟечырась ӟоз но, кыдёке тэтчыса, ӟукыртоз - вжик-вжик! турнан удыссэ азинтоз. Бен, зэмзэ но та суредъёс огдырлы, огпол шокчытозьлы гинэ вал, дыр. Улонын ваньмыз воштӥське уго - ӵемысь ортчемзэ берыктэм гинэ ӧвӧл, уд но адӟы ни. Ваньмыз чилектэм музэн чаль ортче. Юнме шорысь шат удмурт калыклэн кырӟаназ таӵе кылъёсыз но пумисько: "Ой, ортчиз ук дауре, чашка чайме юытозь..." Нош сыӵе суредъёсты-учыръёсты пыраклы син азе кельтыны-пуктыны быгатон ваньмызлы уг сётскы. Адӟыны-синйылтыны быгатон сяна, кибашлы луон но кулэ. Сотэк тунсыко но паймымон суредъёс лултэм бумага вылэ уз пуксе, адямилэсь синъёссэ уз шумпоттытэ. Мударис Мензарипович Менладшинлы лэчыт син но, быгатонлык но кинлэсь ке пунэманэз ӧвӧл. Сое ӟеч валазы ар талэсь азьвыл Ижысь чеберлыкъя но кибашлыя юртын возьматскись туспуктэмъёсыныз адӟытоназ-выставкаяз ветлэмъёс но. Отын фотоусточилэн быдэс толэзь ӵоже сизьымдонлэсь трос ужъёсыз возьматскизы но уно калыклы шумпотон кузьмазы. Табере Мударис Менладшинлэн шумпотттӥсь, малпаськытӥсь фотоужъёсыныз тодматско ни вордскем палъёсаз. Туэ 25 южтолэзе Башкортостанысь Янаул городысь Культурая дворецын усьтӥськиз авторлэн ужъёсыныз нимысьтыз адӟытон. Таяз учыре туспуктэмъёслэн лыдзы трослы йылэмын - сюлэсь ятырлы ортчемын - уноез чибориё суредъёс. Таӵе адӟытонлы паймизы ожысь но ужысь ветеранъёслэн хоразы ветлӥсьёс но. Таӵеез ми дорын нырысез, пе. Чилектэм кадь чаль ортчись улонысьтымы суредъёсты учкисьёслы вуттэмез понна фотоусточилы музъемозь йыбырттӥськом, шуизы. Бен, Янаулын нырысьсэ нимысьтыз фотоадӟытон радъямын бере, уно шуныт кылъёс веразы М. Менладшинлы. Угось котькудӥз суред-туспуктэм малпаськытэ, ас дуннеяз вуттэ, шумпоттытэ я куректытэ. Чилектонысь суредъёс пыр асьме удмурт калыкмылэн быдэс вапумез син азе пуксе. Кызьы уд шумпоты Мударис Менладшинлэн сыӵе кузьымезлы! Р. Хайдар. Адӟытон дыръя. Фотоез М. Менладшинлэн. Шедьтоно выль амал Одӥг нунал сётӥз толон Правительстволэн кивалтӥсез Павел Вершинин калыкез улон- вылонын утёнъя министрлы Николай Бессогоновлы, нылпи пособиосты тырыны выль амал шедьтон понна. Нырысь ик коньдон тыроно тужгес ёрмись анай-атайёслы, бӧрысь ини - толэзяз сюрс манет но солэсь ятыр басьтӥсьёсызлы. Сыӵе куронэн Правительство потаз бюджетэз эскерон-юнматон вакытэ но. Кун Кенешлэн депутатъёсыз ваньмызлы соку ик коньдон уз тырмы шуыса валало ке но, ӵектонэз палэнтӥзы. Бырйисьёссы азьын чебере кылемзы потӥз, лэся. Е. ПОПОВ. Огкадь мед сюлмаськысал Иж городлы мэр луэм потӥсьёс трос верало калыклэсь улонзэ капчиятон сярысь. Азьло но озьы ик вал, но уноез кылъёссы улонэ ӧз пыӵалэ. Уно егитъёслэн али квартиразы ӧвӧл. Соос кышнояськемзы бере но общежитиын уло, яке квартирае пыремын, бадӟым уксё тырыса. Асьсэлы корка лэсьтыны соослы туж шуг, уноезлэн со понна коньдонзы уг тырмы. Али городамы трос кузётэм яке аналтэм юртъёс. Сёт вал соосты егит семьяослы, юртты вал улыны луоно кадь тупатыны, но со ужен городысь кивалтӥсьёслэн выремзы уг пот. Куштэм коркаосты, кӧня ке дыр ортчыса, "эрказмем" калык тарка, отысь угось трос лэсьтӥськон но эстӥськон материал шеде. Озьы ваньбур тус-тас луэ, городлы нокыӵе пайда вайытэк. Городысь районъёсын ас коркаосазы улӥсьёс трос шуг-секытъёсты адӟо, кудъёсаз ёросъёсын улонзы капчигес. Тани, ӵошатом Ленин но Первомай ёросъёсты. Нырысетӥяз улӥсьёслэн коркаосазы чагыр эстӥськон (газ) пыртэмын, нош Первомай ёросын газэз баллонъёсын нулло. Татын урамъёс но сюбегесь, зоръёс бере отын ву но дэри пуке, толалтэ лымы уг сузяськы. Вуоно мэрлы городын вань улӥсьёс сярысь огкадь сюлмаськоно вылэм. В. Васильев, ужысь но ожысь ветеран. Финн-угор дунне - книга ӝажыосамы Санкт-Петербургысь одӥгаз издательствоын потӥз Сеппо Лаллуккалэн "Восточно- финские народы России" ужез. Выль книга финн кылысь ӟуче берыктэмын. *** Ижевскысь Удмурт кун университет калык ужпумъёсты сэрттон-пертчонэн тунсыкъяськисьёсты шумпоттоз научной ужъёсын "Национальная проблема: пути решения" сборниклы. *** Мордва университетлы сӥзем книга потӥз Сыктывкарысь издательствоын. Кызь сюрс тиражен Н. Макаркинлэн "Мордовский государственный университет на пороге ЪЪИ века" ужез пӧртэм туспуктэмъёсын, суредъёсын чебермамын. *** Петрозаводскысь научной центрын потӥз статьяосын "Проблемы литературы Карелии и Финляндии" сборник. *** Коми-зырян литературалэн жанръёсызлы сӥзем монографиез потӥз Л. Лыткинлэн. Сыктывкарысь кун университетлэн издательствояз потэм книга озьы ик нимаське: "Жанры коми-зырянской прозы первой трети ЪЪ века" *** Финн-угор калыкъёслэн кылъёсынызы тунсыкъяськисьёс шумпотозы Н. Лысковалэн "Семантический аспект синтаксиса имени существительного в обско-угорских языках" монографиезлы. Потэмын Санкт-Петербургысь "Образование" издательствоын. *** Петрозаводскысь кун университетлэн издательствояз потӥз буёло суредъёсын, туспуктэмъёсын "Село Суйсарь: история, быт, культура" сборник. *** В. Деминлэн "История и типология жанров коми поэзии" монографиез потӥз Екатеринбургысь печатьын. *** "Земляной братец" тазьы нимаське манси калыклэн выжыкылъёсыныз, преданиосыныз, кырӟанъёсыныз но загадкаосыныз сборник. Со берыктэмын ӟуч кылэ. *** Глазовысь педагогической кун институтлэн издательствояз потӥз Б. Каракуловлэн "Русско-удмуртский разговорник" книгаез. Т. Андреева. ТУАЛА ОСТАП БЕНДЕР "Челябинский рабочий" газет ивортэ туала Остап Бендер сярысь. Тодмо геройлэсь лушкаськон амалъёссэ кутыса, Сергей Б. Миасс городысь кӧня ке магазинъёсты "сузяз". Али со пытсэт сьӧры келямын. Сергей ассэ налоговой полициысь инспектор шуылӥз но вузкарисьёслы горд выло документ возьматъяз. Собере магазинлэн накладнойёсыз, сертификатъёсыз пӧлын бугыръяськылӥз. Сотовой телефонэз пыр жингыртэмъяськыса, ӝот-ӝот вералляз, магазинлэсь кассовой лентазэ но коньдонзэ сьӧраз нуоз шуыса. Горд выло документ, гожтэ газет, лушкамын, нош сотовой телефон "Детской мирысь" басьтэмын вылэм. "Налог" кыл вузкарисьёслэсь визьзэс сура-пожа, лэся, соин ик соос зомбилы пӧрмо. Россилэн азьвыл валтӥсь прокурорез студентъёсын пумиськылӥз Алигес Ижевске вуылӥз Россилэн азьвыл генеральной прокурорез Валентин Степанков. Сое дорамы ӧтьылӥз Кун Думалэн депутатэз Андрей Солуянов. Москваысь куно пумиськылӥз УдГУ-ысь журналистикая ёзын дышетскисьёсын. Азьвыл прокурор валтӥз отставкае потэм мугъёссэ, дунъет сётӥз Президентлэн ужамезлы. Ачиз Валентин Степанков пыре Кун Думаысь депутатъёслэн "Российские регионы" фракцияз. Пумиськонын депутат студентъёслэн пӧртэм юанъёссылы валэктонъёс сётӥз. А. Андриянов. Египетысь чуръёс Ваньмыз кышка вакытлэсь, нош вакыт кышка меда пирамидаослэсь? Дунне вылын самой паймытӥсь сизьым арбери вань, пе (ӟуч сямен - семь чудес света). Тани соос: Вавилонысь ошиськем сад, Азиысь Эфес карысь (городысь) Артемидалэн храмез, Зевслэн статуяез (лэсьтӥз Грециысь скульптор Фидий), Пичи Азиысь Кария нимо кунэн кивалтэм Мавзал эксэйлэн гробницаез, Эгей зарезьысь Родос шормуӵе (острове) пыронын 70 метръем юбо (колосс), Фарос шормуӵысь ог 150 метръем мрамор башня но Египетысь пирамидаос. Туннэ нуналозь кылизы на огъёсыз, гинэ пирамидаос. Мукетъёссэ быдтӥзы адямиос, вуос, тӧлъёс. Асьмеос малы ке но малпаськом: пирамидаос сыло туж кыдёкын, син сузёнтэм ӵошал шорын. 96 пирамида пӧлысь куд-огез зэмен ик пустыняын, вылды. Тужгес бадӟымъёсыз - Хеопслэн, солэн Хефрен нимо пиезлэн но таизлэн Микерин пиезлэн пирамидаоссы - Каир вӧзын ик. Городэз ортчиськод, кӧня ке котырскиськод но вуиськод Гиза нимо улосэ, адямиосты ватылэм интые (некрополе). Шунды пала учкы но - Хеопслэн ӝужыт пирамидаез азяд. Сьӧразгес - кык мукетъёсыз. Улӥынгес - дано сфинкс - лев мугоро но адями йыро из (тазэ асьмеос тодӥськом вашкала дуннелэн историезлы сӥзем книгаосъя). Мынам котьку тодэме потылӥз: вольытэсь-а, вогыриёесь-а пирамидалэн борддоръёсыз? Суредъёс пӧртэмесь уга. Хеопслэн пирамидаез доры вуытэк ик синйылтӥ: соос лёго- лёгоесь. Ог метр зӧкта но кыко метр кузьда из юдэсъёс интыен-интыен пырдылэмын. Соин ик, тазалыкед юн ке, каньылля тубыны быгатод пырак йылаз. Мон отчы ӧй ӝутскы (ӧз лэзе). Гожъямзыя гинэ тодӥсько: пирамидалэн йылыз лэчыт ӧвӧл, отын ог дасо метръем площадка кылдэмын ни. Кызьы бен вашкала дыръя чильк-вальк волятэм борддоръёс сыӵе пинё-пинё луиллям? Мугез туж огшоры. Хеопс бере кивалтэм фараонъёс но музон кузёос ишканы косӥллям пирамидаез шобыртӥсь изъёсты. Соослэсь асьсэлы дворецъёс инъяллям. Таосыз али но сыло. Гидлэсь Муса Мухамедлэсь юасько: - Туала визьмын но кужымен шуг ӧвӧл, дыр, пирамидаосты выльысь шобыртыны волятэм изъёсын? - Секыт ӧвӧл, дыр. Нош ми озьы лэсьтыны ум дыртӥське. Вуж синпелетъёсты (памятникъёсты) туала амалэн выльдӥд ке, соос вашкала арбериос уз луэ ни. Озьы дунзэс ыштозы. Пирамидаосты ми куноослы возьматӥськом сыӵеен, кыӵе вуизы асьме вакытэ уно дауръёс ӵоже. 20 фунт (выль дунын 40 манет) портыса, тонэ лэзё Хеопслэн пирамида пушказ. Тонэ нокин но уг келя. Выллане нуэ сюбегалэс коридор. Тылъёс отӥ-татӥ гинэ ӝуало. Дырын-дырын вамышъяськод, кык полэс губырскыса. Йырдэ сотэк вӧлдэтэ кокалод. Пумитад кыӵе ке Тарас Бульба сюриз ке, мынтӥт кошконэдлы эн оскы - палэнскыны нокытчы. Огез адями уллё выллань тубыку, васькыны дасяськисьёс черодзэс витё. Ярам, сямен татчы пыраны дӥсьтӥсьёс сокем уно ӧвӧл. 70 метре ӝутскыса вуиськод коридор пуме. Ӝомо-югдо пиштӥсь тылъёс улын - излэсь вӧлэм корос. Липетэз усьтэмын. Хеопслэн мугорыз нуэмын музон азе. Тужгес етизъёсыз солэн интыяз выдо но фотозэс лэсьтыны куро. Ӝокыт! Чалякгес васькиськод улӥе. Ваче пумит Тарас Бульба уг ке сюры, пичи пасетӥ вамыштӥськод пирамидалэн педпал борддорез вылэ. Йыр берга, сюлэм йыгаське, пельын жон каре, син ӵуж-вож бусаське. Мар та таӵе? Амалтэк тодэ лыкто азьвыл лыдӟем газетъёс но журналъёс. Огъёсыз авторъёс оскыто: фараонъёс юриськизы но, соослэн кылъёссы туннэ но шуге-леке вутто пирамидае пырисьёсты. Мукетъёсыз верало чылкак музон сямен. Пирамидаын, пе, сюлэм буйга, йыр сайкыта, тазалык юнма. Куд-огез Россиын но асьсэлы инъяло ни аспӧртэм пирамидаос. Пуӵъёслэсь. Возь вылын. Уж висказы со улэ каръясько но вань жадемзэс вунэто. Пирамидалэн йӧнатэмезлы оскисьёс шоры мон учкысал Хеопслэн шайгуэз вӧзын. Кызьы меда кырӟасалзы? *** Котьма шу, нош тачак синву но вир кисьтыса лэсьтэм из гурезь нокинэ уз бурмыты кадь потэ мыным. Туала арабъёс маскаръясько: Хеопс, пе, нырысь ик малпаськонэ усиз ужлы ёрмонэз быдтон сярысь. Вашкала адямиос араз одӥг толэзь гинэ тыршо вылэм, отӥяз мар карыны ёрмо. Тӥни сыӵе муртъёсты ик Хеопс люкам пирамида ӝутонэ. Архитекторъёс юри эскериллям: волятэм изъёс вискы одӥг миллиметр но пась медаз кыльы но омыр медаз пыры. Нырысь чакламын вылэм коросэз пирамида улысь гуэ согыны. Улэм-вылэмезъя Хеопслэн малпанэз вштӥськем. Со косэм ассэ ватыны пирамидалэн шораз, ог 70 метръем ӝуждалае. Пирамидаез ӝутон сярысь трос мадьыны луысал. Нош асьме вакытлэсь (эралэсь) азьло витетӥ дауре Грециын улэм тодосчи Геродот сярысь чебергес уд вера, дыр. Египетысь уно адямиослэсь юалляськыса, со асьмелы кельтӥз туж оскымон веранъёс. Тани солэн гожъямысьтыз куд-ог чуръёс: "Хеопс Египетысь вань калыкез косӥз аслыз ужаны. Огъёсызлы косэмын Нил доры вайылыны Араб гурезьёсысь корам изъёсты, мукетъёсызлы - соосты судноосы интыяны, шур вамен выжтыны но Ливия гурезьёс доры вайыны. Лэсьтӥськонын огдыре тыршиз ог сюрс мурт, соос вошъяськылӥзы куинь толэзьлы быдэ. 10 ар быдтӥзы из нуллон сюрес лэсьтыны. Со ог иськем кузьда, шобыртэмын волятэм изъёсын. Пирамида бордын ужазы 20 ар. Сое нырысь инъязы бадӟым падӟаез сямен - пинё-пинё яке тубато-тубато. Со вылтӥ ӝутъязы мукет изъёсты. Таосыз вылэ гожъязы, кӧня коньдон быдтэмын кирень, сугон но чеснок басьтыны, адямиосты сюдон вылысь. Со понна кулэ луэм 41 сюрс 884 килограмм азвесь. Нош кӧня коньдон мынӥз корт тӥрлыклы, сиён-юонлы но дӥськутлы?" Геродот бере, ньыль даур ортчыса, Сицилиысь историк Диодор вуылӥз Египетэ. Со ик пирамидаосты пыртӥз дуннеысь сизьым паймытӥсь арбериос пӧлы. Египетын ярато тазьы вераны: ваньмыз кышка вакытлэсь, нош вакыт кышка пирамидаослэсь. Маин пӧртэмесь мукетъёсыз пирамидаос? Хеопслэн Хефрен пиезлэн пирамидаез лапеггес. Нош йылъёссы одӥг ӝуждалаын, малы ке шуоно, таиз вырйылэ пуктэмын. Вылӥяз кылемын на шобыртӥсь изъёс. Микеринлэн пирамидаез 66 метръем "гинэ". 1500-тӥ арын солэн гранит шобретэз вал на. Али ӧвӧл ни. Ватон интыын чебер базальт корос (саркофаг) вылэм. Сое Португалиысен Англие нуыкузы, корабль выем но, корос ышем. Куинетӥ пирамида сьӧрын эшшо пичиосыз вань на. Соос лэсьтэмын фараон кышноослы. Хеопслэн кышноез Хармер-Нехти ИИ понна инъяллям гранит "юртъер". Хефренлэн кышноезлэн пирамидаез кӧня ке пырдэмын. Микеринлэн кузпалызлы "кар" ӝутӥллям дыртӥд-вуттӥд, куд-ог интыоссэ лэсьтӥллям огшоры кирпичлэсь. Со куашка ни. *** Вашкала Египетын оскылӥзы: лул ноку уг кулы. Соин дано адямиослэсь мугоръёссэс куасьтылӥзы но мумиослы пӧрмытъязы. Шуг тодыны, кин нырысь ик малпаз таӵе амалэз. Асьсэос оскыто: Хор нимо инмар. Дас кыкетӥ дауре улэм араб тодосчи Аб-эль-Латиф оскытэ: мумия - араб кыл: гудронэн но сирен суралтэм маке. Кулэм муртлэсь мугорзэ сёто мумия дасясьёслы. Таосыз нимысьтыз курикъёс куто, нырпелесъёс пыртӥ йыркобые "пыро" но вимез потто. Со интые лэзё кизер гудрон. Таиз берло чурытоме. Синъёс интые пукто эмальлэсь лэсьтэмъёссэ. Жрец (вӧсяськонэн кивалтӥсь) мугорлэсь паллян палзэ лэчыт шерем изэн кыре но кивалтоссэ ӝогак поттэ. Ӝегатскид ке, пе, кулэм муртлэн ӵыжы-выжыосыз вожзэс ваёзы. Таӵе сям потӥз тани ма бордысь. Куд-ог учыръёсы вандыны шедьтылӥзы кулон калэ вуыса катьтэммемъёсты - улэп муртъёсты. Сюлэмез вератэк, пуштросэз (сюлъёсты, пекляосты но мукетсэ) поттылӥзы, пульыяськись битумын пӧзьтылӥзы, вимен но мусэн ӵош интыяллязы горд сюйлэсь, алебастрлэсь, излэсь яке кортлэсь кисьтэм ньыль урнае. Огезлэн шобретаз суредамын адями йыр, мукетаз - шакал йыр, куинетӥяз - ӧрӟи йыр, ньылетӥяз - павиан (обезьян) йыр. Кӧтпушез рос-прос мисько пальма аракыен, куасьто, сирен яке бычкы (пила) пызен тырмыто. Мугорез 70 нуналлы выйто сылал вуэ. Кӧй но быгыт сылмыса быро, кылё на куэн шобыртэм лыос гинэ. Бинтэн бинё котькуд чиньыез, суез, пыдэз, быдэс мугорез. Сое шобырто зарнивуам басмаен, собере вато пирамидае яке гурезь пушкы. Зэм, куддыръя кутылӥзы музон амалъёсты. 33 аресъем Александр Македонский шуак кулӥз, Индиысь берытскыкуз. Эшъёсызлэн сое мурт музъеме кельтэмзы ӧз поты. Нош Египетозь кыдёкын ай, отчы вуттытозь, шӧй изъянмоз. Мур ваннае тыраз чечы понӥзы но отчы Македонскиез выйтӥзы. Египетэ вуттӥзы но ватӥзы. 300 ар ортчыса эскеризы. Солы номыр луымтэ. Автор тау каре "Москва-тур" фирмалы, материал люканы юрттэмез понна. Египетысь чуръёс. Каргаськон Мон трос пол кылылӥ ни фараонъёслэн юриськемзы сярысь. Зэм, та верамъёслы ӧй оскылы. Египетэ ветлон азям юри бугыръяськи на библиотекаосын. Шудэ вылэм, вылды. Ки улам сюриз Россиысь тодосчилэн (учёнойлэн) Сергей Рязанцевлэн "Философия смерти" книгаез. Отысь иворъёсты ӵошатӥ Египетын адӟем суредъёсын. Озьы пӧрмиз таӵе веран. Тодады вайытӥ ни: уноез вашкала пирамидаос но гурезьёсысь шайгуос (гробницаос) трос дауръёс талэсь азьло таркамын вал. Тутанхамон улӥз асьме вакытлэсь (эралэсь) азьло 1400-тӥ -1392-тӥ аръёсы. Со шӧдтэк шорысь кулӥз 18 арескын. Мугез туннэ но тодмо ӧвӧл. Шайгу усьясьёслэсь сямзэс тодыса, вылды, сое ватӥзы гурезьысь мур гуэ. Вылаз интыязы на музон шӧй. Лушкаськисьёс таки ӧз шедьтэ Тутанхамонэз но солэсь вераны луонтэм бадӟым узырлыксэ. Фараонлэн гробницаез шараяськиз таяз дауре гинэ. Англиысь археолог Хоуард (Говард) Картер кивалтэм улсын сое усьтӥзы 1922-тӥ арын. Шайгуысь шедьтӥзы пул. Со дауръёс ӵоже сисьмымтэ но сузмымтэ. Вылаз гожтэмын: "Кулон шедьтоз ваньзэ, кинъёс фараонъёслы люкетозы каньылак кылльыны". Мукет пул вылысь лыдӟизы: "Кулэм фараонлэн лулыз позыртоз лушкаськисьлэсь чыртызэ, ӟазеглэсь чыртызэ музэн ик". Кышкыт кылъёс зэмазы. Гробницаез усьтонэ пыриськемъёс пӧлысь ваньмыз сямен ик кыӵе ке валантэм висёнъёсын курадӟизы но быризы. Кӧня ке удалтӥз аслыз Говард Картерлы гинэ. Со 66 аресозь улӥз но 1939 арын кулӥз. Германиысь тодосчиос уг оско фараонъёслэн каргамзылы. Югудурез соос валэкто тазьы. Вашкала Египетын малпаллязы, кулэм мурт улоз на шуыса. Мумия вӧзы одно тырылӥзы сиён-юон. Таиз отӥяз зынмылӥз но векчи губиосын шобырскылӥз. Соос лач-лач ворсам гуосын уно сюрс аръёс ӵоже витизы адямиослэсь пыронзэс. Губи кидысъёс сюрылӥзы соослэн нёредъёсазы (органъёсазы) но азытӥзы кышкыт пыктосъёс (гижлоос). Тутанхамонлэсь гробницазэ усьтэм бере, куать ар куспын, быриз дас кык мурт. Пӧлазы вал Картерлы юрттӥсь лорд Карнарвон. Фараонлэсь лысьӧмзэ кык мурт 1979-тӥ арын Каирысен Лондонэ ваиз. Таза воргоронъёс шӧдтэк шорысь кулӥзы. 1973-тӥ арын Польшаысь дас кык кузя археологъёс шараязы музон фараонлэсь шайгузэ. Ваньзы быризы. 1974-тӥ арын Чехословакиысь но Америкаысь адямиос кырылӥзы кызь даур (2 сюрс ар) талэсь азьло куасьтэм мумияез. Тодэмзы потӥз: кыӵе паласькись висёнъёсын курадӟиллям вашкала Египетын? Тае тодыны шуг ӧвӧл. Мугоре кыӵе ке микроб сюре ке, соин нюръяськыны ӧдъя выль кужым - антитело шуон. Таизлэн белокез мумия пушкын весяк возиське. Оскон вал, куд-ог микробъёс асьме вакытозь утиськизы шуыса. Та учырез Сергей Рязанцев эскере музон ласянь. Солэн син шораз йӧтэм 1974-тӥ арын Чехословакиын потӥсь "Вес мир" журналлэн 4-тӥ номерез (отысь фотосуредэз печатлаз СССР-ысь "Наука и жизнь" журнал но). Куать кузя "тодосчиос" котыртӥллям ӝӧк вылэ выдтэм мумияез. Соос ӧвӧл дӥсяллям чылкыт изьыос но, азькышетъёс но, резина пӧзьёс но. Йырсиоссы лӧс-лӧс лэзьямын, дэрем саесъёссы йӧтыло шӧй борды. Вашкала Египетысь адями кулэмын ке паласькись висёнлэсь, туала адямиослэн но "осконзы" вань лек кыль шедьтыны. Нош бырыны сюризы ке, газетчиос выльысь мадёзы фараонъёс юриськем сярысь. Пирамидаосты но гробницаосты усьясьёс пӧлысь улэп кылизы юн чакласькисьёс. Соос дӥсяллязы нимысьтыз дӥськут, маска-респиратор, пӧзьёс. Озьы мумияез утьыны турттӥзы туала микробъёслэсь, нялтас - асьсэды но. Каирысь национальной музейын милемлы возьматӥзы обезьяналэсь мумиязэ. Сое шедьтӥллям... азбарын шудӥсь пиналъёс. Таосыз нокызьы "тодазы ваиллямтэ" обезьянэз кытысь поттэмзэс. Нылпиос сое гинэ уг шедьто. 1991-тӥ арын соос Абу-Заабаль город дорын ватос шараяллям. Гуэ пырон ворсамын горд сюй кувшинэн. Таиз шуак усьтӥськиз но, отысь кӧня ке дасо пеймыт арбериос лобӟизы. Чаянъёс (скорпионъёс)! Зэм, соос табере адямилы кулон уг ваё ни - куасьмемын. Вашкалаос тазьы малпаллям, вылды. Лушкаськисьёс нырысь ик кувшинэз усьтозы но, соосты чаянъёс лекалозы. Вашкала дуннеын шудыло вылэм сыӵе аспӧртэм сямен. Кулэмъёс ватско, улэпъёс утчало. Дауръёсын озьы шудо. Музъем вылын туннэ ӧвӧл ни гот нимо калык. Вашкала дыръя со тарказ уно кунъёсты. 410-тӥ арын кулӥз отысь король Аларих И. Верантэм уно узырлыксэ эшъёсыз шайгуаз пононо кариськизы. Нош сое кызьы ватоно лушкаськисьёслэсь? Готъёс огзэ шурез ӵыпизы. Тымет уллапалась ӧр куасьмем бере, отчы мур гу гудӥзы, зарни корос но мукет ваньбур лэзизы, согизы, ӵыпетэз кыризы. Шур азьвыл сямен ик бызьыны ӧдъяз но ватосэз шобыртӥз. Узырлыкез согисьёсты, кылзэс кузь медаз лэзьялэ шуыса, берлогес виизы. Тӥни кызьы гинэ уг сьӧсъяськы вашкала эксэйёслэн каргамзы. *** Кыӵе малпанэ вуиськод, ваньзэ тае адӟыса? Федор Достоевский огаз романаз вераз таӵе малпанзэ. Ӟуч адями, пе, шока туннэ нуналэн. Немец али пырске но сюлмаське, сизьыметӥ выжыысь ӵыжы-выжыосыз ӟеч мед улозы-вылозы шуыса. Нош фараонъёс? Асьсэ калыксэс курадӟытыса, соос ӧз малпаське, дыр, выжыоссы 5-7 сюрс ар ортчыса коть майбыр улонэз мед адӟозы шуыса. Нош луиз ӵапак озьы. Тани мар чотын азинске туала Египет. Суэц канал арскын сётэ 3 миллиард 500 миллион доллар. Му вӧй (нефть) - 2 миллиард. Туризм (пирамидаос, гробницаос, музейёс)- 3 миллиард. Кӧня бадӟым но векчи вузчиос барыш потто куноос чотын! Огласянь, фараонъёс, оло, азьланьын улоно адямиос вылэ юриськизы. Мукет ласянь, туала калыклы ӟеч улыны амал сётӥзы. Сыӵе читыр-чутыр сюрестӥ азинске история. Алексей Шкляев. Огез пирамида. Таӵе 3 миллион 230 сюрс из понэмын Хеопслэн пирамидаяз. Анубис нимо инмар учке мумияез (гробницаысь суред). РЕСПУБЛИКАЛЭН 1998 АРЛЫ БЮДЖЕТЭЗ СЯРЫСЬ УДМУРТ РЕСПУБЛИКАЛЭН ЗАКОНЭЗ 1-тӥ ёзэт. Республикалэсь 1998 арлы бюджетсэ юнматоно, доходэз 1724073 сюрс манет, расходэз 2617257 сюрс манет, бюджетэ пырисьтэм фондъёсты лыдэ басьтытэк. Республикалэн 1998 арлы бюджетэзлэсь дефицитсэ самой троссэ 893184 сюрс манет юнматоно яке республикаысь бюджетлэн расходэзлэн 34,1 процентэз, бюджетэ пырисьтэм фондъёсты лыдэ басьтытэк. 1998 арлэн пумаз республикалэн бюджетэзлэн оборотной кассовой наличностез 15000 сюрс манет луыны кулэ. 1998 арын 1 январьлы бюджетной организациослы кылем арлэн операциосызъя тыронъёс берыктытэк кылизы ке, выль арын соосты тыроно 1998 арлэн бюджетысьтыз сметной назначениосъя, озьы ик кредитъёс, займъёс но ссудаос пыр ватсам коньдон шедьтыса. 2-тӥ ёзэт. Республикалэн 1998 арлы бюджетаз пыртоно бюджетэ пырисьтэм фондъёслэсь коньдонзэс, 831036 сюрс манет доходэн но расходэн, со коньдонэз азьвыл чаклам удысъёсын кутоно. 3-тӥ ёзэт. Республикалэн 1998 арлы бюджетэз тазьы кылдоз: Удмурт Республикаын поттэм вузъёслэн (ужъёслэн, юрттэтъёслэн) ватсам дунзылы налогысь висъям коньдон чотын, Россия Федерациысь Дуно кортъёсъя но изъёсъя кун фондэ сётэм дуно кортъёслэн но дуно изъёслэн ватсам дунзылы налог сяна, та Законэн юнматэм нормаосъя; предприятиослэн но организациослэн табышысьтызы налог чотын - та Законэн юнматэм нормаосъя; банкъёслэн но кредитной но страховой организациослэн, биржаослэн, брокерской контораослэн, посреднической операциосты но сделкаосты ортчытӥсь предприятиослэн табышысьтызы налог чотын - 30 процент ставкая; нимаз адямиослэн табышысьтызы налог чотын - та Законэн юнматэм нормаосъя; инкуазь узырлыкъёсты кутэм понна налог чотын - Россия Федерациысь законодательствоен юнматэм нормаосъя; предприятиослэн но организациослэн ваньбурысьтызы налог чотын - та Законэн юнматэм нормаосъя; городъёслэн, посёлокъёслэн музъемзы но гурт хозяйствоын кутӥськись но кутӥськисьтэм музъем понна арендной тыронъёс но музъем налог чотын - та Законэн юнматэм нормаосъя; спирт, водка но ликёро-водочной изделиос понна акцизъёс чотын - табышсылэсь 40 процентсэ; мукет вузъёс (аракы, сур но мукет) понна акцизъёс чотын, му вӧй, газ, бензин но автомобильёс понна акцизъёс сяна, табышсылэсь 100 процентсэ; кун ваньбурез нимаз адямиослы сётыса поттэм табыш чотын - кутӥськись законодательстволэн нормаосызъя; нюлэсэз кутэм понна, нюлэс тыронъёс но арендной тыронъёс чотын; кун асваньбурысь акциослэн дивидендъёссы чотын, озьы ик кун ваньбурез арендае сётыса поттэм коньдон чотын; кун сьӧр коньдонэз но кун сьӧр валютаен верам платёжной документъёсты басьтэм понна налог чотын - табышлэсь 40 процентсэ; аракыез суменак вузаны право понна лицензионной тыронъёс чотын; налог басьтытэк люкам табыш чотын, кудӥз республикалэн бюджетаз мынэ, законодательство куремъя; мукет налогъёс, сборъёс но тыронъёс чотын, кудъёсыз республикалэн бюджетаз мыно, законодательство куремъя. 4-тӥ ёзэт. Толэзь куспын Удмурт Республикаысь Правительство республикалэн бюджетэзлэсь дефицитсэ кулэстон понна ужрадъёсты чакланы но соосты Удмурт Республикаысь Кун Кенешлэн Президиумезлы юнматон понна сётыны кулэ. Со ужрадъёс пӧлы пыртоно республикаысь коньдон бергамлэсь луонлыкъёссэ, кылсярысь, кунлэн дуно кагазъёсызлэн эмиссизы чотын басьтэм табышез, Удмурт Республикалэн асваньбураз пырись приватизированной предприятиослэсь акциоссэс вузаса, налог бичанэз будэтыса поттэм табышез. 5-тӥ ёзэт. 1998 арын музъем налоглэсь но городъёслэн но посёлокъёслэн музъемъёссы понна арендной тыронлэсь централизацияя люкетсэс 50 процент юнматоно, со пӧлысь 30 процентсэ федерацилэн бюджетаз ыстоно, 20 процентсэ - республикалэн бюджетаз Россия Федерацилэн "Музъем понна тырон сярысь" Законэзъя быдэсъяськись ужрадъёсы. Музъемез кутӥсьёс, нимаз адямиос но гурт хозяйствоын вуз поттӥсьёс сяна, музъем понна налогез тырыны кулэ: И квартал понна - 15 мартэ; ИИ квартал понна - 15 июне; ИИИ квартар понна - 15 сентябре; ИВ квартал понна - 15 ноябре. 6-тӥ ёзэт. Республикаысь калыклэсь тазалыксэ утён понна, Удмурт Республикае ваем аракылэсь но ляб аракылэсь сертификатъёссэс эскерон но та продукциез штрихкодированиен пусъён понна тамында коньдон басьтоно одӥг литрлэсь: водка, ликёроо-водочной изделиос - пичи уждунлэн сизьым процентэз; виски, бренди, коньякъёс, винаос но винной напитокъёс - пичи уждунлэн одӥг процентэз. Аракыез штрихкодированиен пусъем но солэсь сертификатъёссэ эскерем понна тырем коньдонэз республикалэн бюджетаз ыстоно. 7-тӥ ёзэт. Нюлэсэз кутэм понна 1998 арын тырем коньдонэз ыстоно Удмурт Республикаысь Нюлэс хозяйствоя министерстволэн счётъёсаз, та коньдон нюлэс будэтонэ висъямын луыны кулэ кутӥськись законодательствоя. 8-тӥ ёзэт. 1998 арын предприятиослэн но организациослэн ваньбурзылы налоглэн ставкаез налог басьтон улэ шедись базалэн кык процентэз быдӟа луоз. 9-тӥ ёзэт. Гурт хозяйстволэсь басьтоно музъемъёс интые выль музъемъёсты ӝутон 1998 арын 124 сюрс манет сылоз 1 гектарез понна, шорлыдын вераса. Та чотын вуэм коньдон Удмурт Республикаысь ёросъёслэн но городъёслэн бюджетъёсазы мынэ. 10-тӥ ёзэт. Вуись налогъёслэсь но доходъёслэсь люкетсэс Россия Федерацилэн бюджетаз, республикалэн бюджетаз, Удмурт Республикаысь ёросъёслэн но городъёслэн бюджетъёсазы висъяны нормативъёс (процентэн) юнматоно. 11-тӥ ёзэт. Автотранспорт басьтэм понна налог мынэ Удмурт Республикалэн сюресъёсъя улосвыл фондаз, сое тыремлэсь мозмытоно: - дышетон, культура, тазалыкез утён, пудоез эмъян (спецтехника басьтонын), калыклы улон-вылонын юрттэт сётон удысъёсысь кун но муниципальной учреждениосты; - ӧлексыослэн огазеяськонъёссылэн асваньбуразы пырись организациосты, отын ужасьёс пӧлысь витьтон процентлэсь ятыргес ӧлексыос ке; - Удмурт Республикаысь Югдурез утёнъя министерстволэсь подразделениоссэ автотранспортэз республикалэн бюджетэз чотын басьтыкузы; Удмурт Республикаысь Тазалыкез утёнъя министерстволэсь лечебно-производственной мастерскойзэ. 12-тӥ ёзэт. Ӧлексыослэн огазеяськонъёссылы но соослэн асваньбуразы пырись организациоссылы, отын ужасьёс пӧлысь 50 процентлэсь уногес ӧлексыос ке, автомобильной сюресъёстӥ ветлӥсьёслэсь налоглы ставкаез, кудӥз мынэ Удмурт Республикалэн сюресъёсъя улосвыл фондаз, 1 процент тыр юнматоно, озьы ик мозмытоно соосты гурт хозяйствоын кутӥськисьтэм музъемъёс понна налог тыремлэсь, кудӥз республикалэн бюджетаз мыныны кулэ. 13-тӥ ёзэт. Удмурт Республикаысь Кун Кенешлэсь "Удмуртнефть" ОАО-ез музъем узырлыкъёсты кутэмез понна куд-ог тыронъёслэсь мозмытон сярысь" 417-И номеро постановленизэ, кудӥз юнматэмын 1997 арын 3 апреле, 1998 арын но кутоно, "Удмуртнефть" ОАО-лэсь музъем узырлыкъёсты кутэмез понна тырон ставказэ 9,4 процент тыр юнматыса, 1998 арын республикалэн но интыослэн бюджетъёссылэн доходъя люкетсы утиськиз ке малодебитной скважинаосысь ватсаса му вӧй кыскем чотын но огез скважина но ужамысь ӧз дугды ке. 14-тӥ ёзэт. Красногорск ёросысь Валамаз посёлокысь ужась но выльысь кылдӥсь предприятиосты но организациосты, отын ужасьёс пӧлысь кык куиньмос люкетэз Валамаз посёлокын улэ ке, мозмытоно республикалэн бюджетаз но сюресъёсъя улосвыл фондэ мынӥсь налогъёсты тыремлэсь, спирт, водка, ликёро-водочной изделиос но мукет вузъёс понна акцизъёслэсь сяна. Красногорск ёросысь Депутатъёслэн кенешсылы дэмлано Валамаз посёлокысь производственной предприятиосты ёрослэн бюджетаз тыронъёслэсь мозмытыны. 15-тӥ ёзэт. Улон-вылонын юрттэтлы кулэяськись гражданъёсты квотая уже кутӥсь предприятиосты мозмытоно табышысь налог тыремлэсь, кудӥз республикалэн бюджетаз мынэ, сомында манетлы, кӧнязэ предприятие вылӥ верам гражданъёсты уже кутыны быдтӥз, котькудӥз ужан инты понна 100 пичи уждунлэсь трослы мозмытыны уг луы. 16-тӥ ёзэт. 1998 арын мозмытоно табашысь налог тыремлэсь, кудӥз республикалэн бюджетаз мынэ: предприятиосты но организациосты, кудъёсыз коньдонзэс спортъя командаосты, спортъя сооружениосты но нылпиослы но егитъёслы спортъя школаосты возёнэ висъяло, сомындалы, кӧня та Законэн юнматэмын; предприятиосты, организациосты но нимаз адямиосты, кудъёсыз коньдонзэс Удмуртиысь пичи ужбергатонлы юрттонъя кун фондэ висъяло, сомындалы, кӧня та Законэн юнматэмын; Удмурт Республикаысь Юстицияя министерстволэсь исправительно-трудовой учреждениоссэ но солэсь подразделениоссэ, кудъёсыз Удмурт Республикалэн улосвылаз интыяськемын. 17-тӥ ёзэт. Промышленностьысь предприятиосты но организациосты правоя кызьы радъяськемзы шоры учкытэк мозмытоно табышлэн ог люкетэз понна налог тыремлэсь, со 1998 арын, 1997 арен ӵошатыса, продукция поттонэз будэтэм чотын поттэмын ке, дунъёслэсь вошъяськемзэс лыдэ басьтыса, республикалэн бюджетаз висъяны чакламлэн сю процентэзлы мозмытоно. Льготаос чотын басьтэм табыш кутӥське ас производствоез азинтонэ гинэ. 18-тӥ ёзэт. Предприятиосты но организациостьы, кудъёсыз бытовой кылем-мылемъёсты пайдаё куто но мукет арбериослы пӧрмыто, озьы ик дышетско туала теплоизоляционной материалъёсты поттыны, кудъёсыз улон коркаосты но промышленной юртъёсты лэсьтонын кутӥсько Удмурт Республикаысь Правительствоен юнматэм переченья, 1998 арын мозмытоно табышлы налог но музъем понна налог тыремлэсь, кудъёсыз республикалэн бюджетаз мыно. 19-тӥ ёзэт. 1998 арын республикалэн бюджетэзлэн расходъёсъя таӵе статьяосыз утемын луозы, отчы коньдон тырмыт висъямын луоз: уждун (коньдонэн довольствие), социальной страхованилы взносъёсты но бюджетэ пырисьтэм кун фондъёсы висъям уксёез лыдэ басьтыса; стипендиос; нылпиос понна кун пособиос; сюдон (сиён-юонэз вуттон); эмъюмъёсты но перевязочной материалъёсты басьтон; ляб адӟись гражданъёслы нимысьтыз литература басьтон; опека (попечительство) улсын улӥсь нылпиос понна коньдон тырон; нылпи юртъёсты но школа-интернатъёсты возёнэ уксё висъян; пудоослэн паласькись висёнъёсынызы нюръяськон ужрадъёс. Бюджетлэн утьымтэ статьяосызлы сомында коньдон висъяське, кӧня доход басьтэмын луоз. 20-тӥ ёзэт. Республикалэн бюджетысьтыз Удмурт Республикаысь ёросъёслэн но городъёслэн бюджетъёссылы 560966 сюрс манет дотациос висъяно. 21-тӥ ёзэт. Опека (попечительство) улсын улӥсь нылпиослы коньдон тыриськоз, нылпи юртъёсты но школа-интернатъёсты возёнэ, эмъюмъёсты дунтэк но кулэстэм дунын вузанэ но "Ветеранъёс сярысь" Федеральной законэз быдэсъянэ, озьы ик ужасьтэм муртъёслы медицинской страхованилы уксё висъяськоз ёросъёслэн но городъёслэн бюджетъёссы но республикалэн бюджетысьтыз дотациос чотын. 22-тӥ ёзэт. Каракулино, Якшур-Бодья ёросъёсысь администрациослы дэмлано, Удмурт Республикаысь Правительствоен кутэм огкылъёс вылэ пыкиськыса, республикалэн бюджетаз висъяны доходъёслэн расходъёслэсь тросгес луыса кылдэм коньдонэз - Каракулино ёрос - 6764 сюрс манет, Якшур-Бодья ёрос - 6007 сюрс манет, бӧрысь со уксёез та Законлэн нырысетӥ ёзэтэныз юнматэм расходъёсы ыстон вылысь. Кун Кенешын Кун Кенешлэн Президиумез сэрттӥз-пертчиз Кун Кенешлэн дас тямысэтӥ сессияз эскерыны чаклам документъёсты. Со сяна, Президиум Кун Кенешлэн дас укмысэтӥ сессиезлэсь повестказэ юнматӥз. Удмуртиысь Правительстволэсь 1997 арын ужамез сярысь отчётсэ но Кун Кенешлэн Тӧроезлэсь Удмурт Республикаын югдур сярысь докладзэ кылзэм сяна, сессия "1998 арын Удмурт Республикалэн кун займез сярысь" Законэз эскероз. Кун Кенешлэн пресс-службаез. Быръёнъёс азьын КУАРАМЕ СЁТО ВЛАДИМИР ТОЙДОРОВ ПОННА Та нуналъёсы Ижын улӥсьёс мур малпаськонэ но сюлмаськонэ усемын: кинэ быръёно шоркарысь Думае депутатэ но городлы мэре? Калыкен вераськон дыръя адямиос тодо котькуд кандидат сярысь ӟечсэ но, уродзэ но. Уго кин но уг тыршы депутат луыны. Тросэз бырйисьёс тазьы шуо: "Городлэн Думаяз тужгес но пырыны мерско кыдёкысь, Удмуртилэн сьӧрысьтыз лыктэм адямиос, калыклэсь улонзэ чик тодӥсьтэмъёс". Озьы верамзы зэм. Сыӵе муртъёс одӥг-кык ар уло выль интыын но ваньзэ тодӥськом ни кожало. Нош калыклэсь улонзэ, сюлэм малпанъёссэ тодон понна, со пӧлын дасо аръёс ортчытыны кулэ. Мыным кельшогес депутатэ сыӵеосыз кандидатъёс, кин калык понна нуналмысь тырше. Ӵапак сыӵе луэ Владимир Васильевич Тойдоров. Со кивалтэ улон юртъёсты возёнъя но тупатъянъя 20-тӥ предприятиен. Та ЖРП-лэн ужан улосэз пыре 17-тӥ Холмогоров быръён округе. Та предприятие пыре 80 улон юрт. Мукет сямен вераса, 7800 квартира, яке 555 сюрс кв. Метр улон инты. Ӵапак ӝыны Сарапул мында луэ со. ЖРП пӧртэм юрттэт сётэ 30 сюрслэсь уно адямилы. Владимир Тойдоров вордскиз 1964 арын Ува районысь Сухая Видзя гуртын дышетӥсьёслэн семьяязы. Школаын дышетскыкуз ик анай-атайтэк кылиз, улон сюрессэ огназ ӵогоно луиз. Дышетскиз Сарапулысь радиотехникумын, собере армие мынӥз. Службазэ ортчытӥз Казахстанын, квартираосты утёнъя-возёнъя частьын. Отысь бертэмез бере, 1989 арысен азьвыл дышем удысаз тырше: нырысь-валысь кык ар ӵоже городысь жилуправленилэн юртъёсты возёнъя участокеныз кивалтэ, бӧрысьгес 20-тӥ предприятилэн кивалтӥсез луэ. Мыным туж яра солэн тодон-валанзэ ялан будэтыны тыршемез. Ужезлэсь люкиськытэк дышетскиз Москваысь жилищно-коммунальной техникумын. Туала вакытэ солы техникумын гинэ дышетскон ӧз тырмы: мургес тодэмез потӥз экономикаез. Кыдёке ӧз мыны ни: пыриз сельхозакадемилэн экономической факультетаз. Али со ньылетӥ курсын. Дышетскемез мултэс ӧз луы. Радиотехникаез ӟеч тодэмез юрттӥз компьютерлы ӝог дышыны. Али солэн ужан кабинетаз компьютер сылэ. Ньӧмыз понна уг. Владимир Васильевич кулэ луись вань документъёсты, лыдпусъёсты визьмо машиналэн "йыраз" возе. Котьма - син азьын. Зэмзэ вераса, компьютерен ужась кивалтӥсез мон Ижысь нырысьсэ пумитай. Тойдоровлэн кивалтэмез улсын тырше куинь сюлэсь уно адями - валтӥсь инженер бордысен кутскыса, азбаръёсты утялтӥсьёс дорозь. Котькыӵе адямиен лякыт вераське. Ачиз мыло-кыдо, уно тырше бере, ужасьёсызлэсь но сюлмо тыршемзэс вите. Пусъем ужъёссэ, маке со сӥземъёссэ уг вунэты, котькудзэ быдэстыны тырше. Огдыре городын но, солэн предприятияз но коньдонэн югдур секыт луиз. Ужзэ валаса быдэсъямез, экономикаез мур тодэмез, ужпумез мур эскерыны, лыдъяны-чотаны быгатэмез юрттӥз кивалтӥсьлы эркын шокчыны. Табере предприятиез азьпал радын. Владимир Тойдоров округын улӥсьёслэсь кулэяськонъёссэс туж умой вала. Кивалтоно юртъёсысьтыз унозэ калыкез нимын-тулын тодэ. Ӟеч вала покчи нылпиосты, егитъёсты. Кулэ дыръяз школаослы техникаен юрттэ. Солэн малпамезъя, бюджетысь коньдонэз тросэнгес сётоно вылэм калыкез дышетон, тазалыкез утён, шуген улӥсь пенсионеръёсты но инвалидъёсты утён удысэ. Депутатэ кандидат малпаське ужлы ёрмисьёс сярысь но, тодэ, кызьы сыӵеослэсь лыдзэс кулэстыны луоно, кызьы выль ужан интыос кылдытоно. Валаса ортчытэмын луысал ке улон юртъёсъя реформа, ёрмисьёслы, тужгес ик егитъёслы, кема дырлы кредитъёс висъяллясалзы ке, улон инты витисьёслэн но лыдзы кулэсмысал. Соин валче городын но предприятиосын выльысь мед ужасал калык контроль, шуэ со. Владимир Тойдоров сюлмаське калыкъёслэсь кусыпъёссэс юнматон сярысь но. Азьвыл аръёсы кылдэм ӟеч сямъёсты одно ик утёно но азинтоно. Нош куд-ог политикъёс али ваньзэ ӵушыны выро. "Семьяямы ми,- шуэ Владимир Васильевич,- кузпалэным котьку удмурт сямен вераськиськом. Озьы, кыкез ик 4 но 11 аресъем нылъёсы, городын улыса но, ӟеч дышизы ни вордскем кылмылы". Владимир Тойдоров ужан интыяз но уг кепыра, ӟучен ӟуч сямен, удмуртэн удмурт сямен вераське. Со зэмос кузё, ужасьёсыз сое гажало но депутат луыны мылкыд каро. 12 апреле мон но куараме сёто Ижысь Думае депутатэ кандидат Владимир Тойдоров понна. Сыӵе адямилы оскыны луэ. Со асьме понна ваньзэ лэсьтоз. Анатолий УВАРОВ, писатель. КЫРӞА-ВЕРА, АРГАНЭ! Играысь "Нефтяник" культура юртын та ӝытэ жингыр! вазиз. Зал тыр люкаськизы калык кырӟанъёсты яратӥсьёс, арганчиос. Мылкыд лӧптэмын! Кемалась уго ӧй вал ни таӵе шулдыръяськонъёс. Нош му вӧй поттӥсьёс пӧлын кыӵе но "зарни пырыос" вылӥллямтэ. Учкисьёс жалятэк кисьтӥзы соослы кичабонъёссэс. Арган куара я бӧрӟытэ, я эктытэ, я сьӧраз кырӟаны ӧте. Арганчиос вошъясько. Кӧня вылэм соос Играысь НГДУ-ын - шумпотымон но данъяськымон: Вениамин Андреевич Стрелков, Николай Павлович Князев, Евгений Николаевич Шумихин, Александр Рудольфович Тронин, Леонид Николаевич Корепанов... Чузъясько удмурт, ӟуч, бигер гуръёс. Празднике пыриськиз пичиез но, пересез но, быдэс семьяен но сцена вылын эктӥзы- кырӟазы. Шутэтскон ӝыт удалтӥз. Сое быгатыса радъязы культура юртын ужасьёс. З. СЕМЕНОВА. 02 ЙЫРУЖЪЁС КУЛЭСМИЗЫ Тулыслэн кутсконэз, кылем арен ӵошатыса, туэ умойгес ортчиз. Март ӵоже пусъемын 1833 йыруж но йыртэман учыр, 1997 арын сярысь, 14 процентлы ӧжыт. Туннэ нуналлы шараямын 70 процентэз. Со пӧлын - 12 адями виён учыр, 22 - секыт сӧсыртон, 18 - нылкышноосты эриктэман, 10- автомототранспорт лушкан но мукет. Ульчаосысь октэмын-калтэмын 9 сюрс пала кудӟемъёс, 5500-лэсь ятырез келямын сазьтӥськоннниосы. Административной ответственность улэ кыскемын ог 2,5 сюрс адями. Уг чалмо семья куспын жугиськон-керетон учыръёс. Милицилы 1,5 сюрслэсь ятыр вазиськонъёс вуизы. Эрказмемъёс кин кытчы келямын, "буйгатэмын". Сюресъёс вылын 79 пол шудтэм учыр пумиськылӥз, отын быриз 5 мурт, 80-эз шуккиськиз. Тылӝуын сутскемын 11 мурт, 8-эз яраос басьтӥз. Толэзь ӵоже шаерамы 177 пол тылӝу потаз. Ю. БАЙБЕКОВ, Удмурт Республикаысь МВД-лэн пресс-службаысьтыз референт. СЮЛЭМ ПУТЭ... Адямиез кивалтон удыс воштэ, пе. Кинэ кызьы, вылды. "Удмурт дуннеос" Геннадий Семеновичез тодо Селта но Дэбес райкомъёсъя но, Удмурт обкомъя но. Республикаысь вылӥ кивалтонэ сюрыса но со кылиз таза мылкыдо, котькин понна усьтэм сюлэмо. Огшоры адямиослэсь сюлмаськонъёссэс аслаз кадь ик лыдъяса, дыр, сюлэмыз ӵогъяны ӧдъяз. Висеменыз сэрен дырызлэсь вазь пенсие потыса, Геннадий Семенович калыклэсь ӧз палэнскы. Газетчиосын кемалась тупатэм эшлыко кусыпъёссэ азинтыса музэн, кыл кутыны ӧдъяз Москваысь "Известия" газетэз Ижын печатлан но Удмуртие вӧлмытон понна. Шер дыръя, секыт висьылыкуз, шӧдске, Геннадий Семенович лулскылӥз: мон нокинлэн но ӧвӧл. Предприятиос но организациос кытӥяз огазе люкалляло уга доразы ужамъёсты. Нош компартия аслэсьтыз ветеранъёссэ ыштӥз. Отӥяз Геннадий Шишов луиз милям, "Удмурт дуннелэн". Кивалтыны ӧдъяз "Твой дом и сад" газетмес дасянэн но поттонэн. Удысэзлэсь ӧрзэ шедьтӥз кадь. Удмуртиысь ӟуч газетъёслэсь данзэс (рейтингзэс) эскерисьёс ТДС шуонмес вылӥ дунъяллязы. 7-тӥ апреле нуназе вуон азьын Геннадий Семенович редакцие жингыртӥз дорысьтыз. Кенешим Селтала, куке-соку ужам районаз, тросгес "Твой дом и сад" газетэз келяны. Собере магазинэ потам, сиён-юон басьтэм, дораз пырем, сумказэ пуктэм но пограм. Гуртаз нокин вылымтэ. Сюлэм путэ... Сюлэм уг оскы... Редлакциысь эшъёсыз. Кун Кенешлэн сессияз Валлян Кун Кенешлэн дас сизьыметӥ сессиез эскериз но юнматӥз 1998 арын Удмурт Республикалэсь социально-экономической азинсконэзъя программазэ. Та ужпумъя кутэмын нимысьтыз постановление. Собере кыл сётэмын вал коньдон ужпумъёсъя министрлы Владимир Бельтюковлы. Со депутатъёсты "1998 арлы Удмурт Республикалэн бюджетэз сярысь" Законлэн инъетэныз тодматӥз. Отчы данак воштонъёс но ватсанъёс пыртэмын вал. Ӵектэмын бюджетлэсь доход люкетсэ 1724073 сюрс манет юнматыны, расход люкетсэ - 2634 794 сюрс манет. Бюджет сярысь вераськон дыръя депутат Анатолий Салтыков пусйиз Ижевск городлэсь коньдон ужпумъёссэ. Со ӵектӥз бюджет чотын, капитальной лэсьтӥськон удысын ужасьёслэсь уждунзэс будэтыны, пӧртэм бюджетъёсы городлэсь тыронъёсызлэсь быдӟалазэс юнматыны. Депутат Владимир Агашин мадиз согласительной комиссилэн ужамез сярысь. Со лыдэ басьтэм 98 ӵектонэз. Бюджет сярысь Законлэн инъетаз валтӥсь инты басьтэ социальной удысысь, гурт хозяйствоысь, промышленностьысь ужпумъёсты быдэстон. Сессия документэз кутӥз но азьланяз закон бордын ужан радэз юнматӥз. Толон депутатъёс ужзэс азланьтӥзы. Кун Кенешлэн пресс-службаез. Шунды Удмуртлык пыӵамын вирам - Удмуртиын улӥсь егитъёслы куд-ог дыръя чылкак паймоно. Тяп-тяп удмуртъёс городэ вуо но ӟуч сямен шенгыль-пенгыль вераськыны ӧдъяло,- шуэ Башкириысь Нефтекамск педучилищеысь удмурт кылъя но литературая дышетӥсь Татьяна Фархатовна Глимзянова. - Ми дорын, Башкортостанын, азьвыл аръёсы удмурт кылэз дышетон секытэнгес мынэ вал ке, туэ югдур тупатскизгес. Педучилищеямы но кыкетӥ арзэ удмурт группа ужа ни. Егит специалистлэн сюлмаськонъёсыз трос гинэ. Но одӥгез тужгес шумпоттэ Татьяна Глимзяноваез: удмурт кылэз дышетонэ гижысь-пиньысь басьтӥсько ни будӥсь пиналъёс но. Туннэ нуналлы Башкортостанысь 48 школаын анай кылзэс дышето. - Ижысь Удмурт кун университетын ужлэсь вис карытэк дышетскыкум, ӵем гинэ Удмуртие вуылӥсько вал,- шуэ Татьяна. - Котькыӵе ужрадъёсы но пыриськылӥ. Оло, соин но Удмуртия вордскем шаере кадь дуно потэ. Ӟырдыт мылкыдыз но чупрес сямыз Татьяна Глимзяновалы сюрес усьтӥз удмуртъёслэн ВИ Ӧтчамазы, со делегатэ быръемын вал. Выль пумиськонъёс, выль малпанъёс, азьланьын быдэстоно ужъёс, ваньмыз со нылмуртэ эшшо но бурдъяз. Аслэсьтыз тодон-валанъёссэ но быгатонлыкъёссэ со уката но тыршыса кузьмалоз дышетскись пиналъёслы, сьӧраз валтоз будӥсь егитъёсты. Лулыныз-сюлмыныз удмуртлык борды бурмыса, Татьяна Глимзянова лёгем сюрес вылысьтыз кожон сюресъёс уз утча. В. КУТУЗОВА. Туспуктэмез В. КАМАШЕВЛЭН. Уродзэ лэсьтэмлэсь кышкано ӧвӧл Алигес шаерамы вуылӥз Канадаысь тодмо гожъяськись Макс Дойз. Солэн тросэз ужъёсыз сӥземын ӟуч политикаез сэрттон-пертчонлы. Гожтэм книгаосыз пӧлысь одӥгзэ, "Спаренный рейс" шуыса нимаськисьсэ, со Удмурт факультетлэн журналистикая отделенияз студентъёслы кузьмаз. Нош ми кунгож сьӧрысь гожъяськисьлы кӧня ке юанъёсын вазиським. - Ижевске тӥ нырысьсэ вуиды. Кыӵе потӥз со тӥледлы? - Котькуд городлэн шулдырез отын улӥсь адямиослэн мылкыдзы бордысь потэ. Татын зӥбыт, синмаськымон калык улэ. Ижевскын трос чебер интыос вань. - Кин луиськоды национальностьтыя? Кызьы учкиськоды национальной ужпум шоры? - Мон Канадаысь еврей луисько. Нациоссыя адямиосты уродлы но умойлы люкыны уг луы. Лыдъясько, Инмарлы оскон юрттоз калыкъёслы валаны ог-огзэс но, асьсэдыз но. - Маин пӧртэмесь луо Россиысь но кунгож сьӧрысь кышномуртъёс? - Россиысь кышномурт ужась, тыршись. Семья сярысь сюлмаськонъёс со вылэ погыльтэмын. Ми палась кышномурт ненеггес. - Ма тужгес но сюлмаськытэ Канадаысь туала егитъёсты? - Ужтэк кылён. Егитъёс пӧлын 25 процентэз али нокытын уг ужало. - Кызьы мытӥд нуналдэ, озьы ик со ортчоз шуо калыкын. Тӥ мар бордысен кутскиськоды, дырды пайдаё мед ортчоз шуыса? - Арняяз кык-куинь ӵукна спортзалэ ветлӥсько. Гужемзэ нюлэскын калгисько. - Луэ-а ӵошатыны писателез но журналистэз? - Писатель но журналист - пӧртэмесь. Но соиз но, таиз но герӟаськемын гожъяськонэн. Ужед тунсыко но данъяськымон мед пӧрмоз шуыса, вань лулдэ сётыса тыршоно луэ. - Ма сӥзьысалды журналистэ дышетскисьёслы? Ӝоггес асьсэды шедьтыны улонын. Соку гинэ адями мае ке выльзэ вераны быгатоз, соку гинэ адямиосты нуыны вормоз. Кышкано ӧвӧл уродзэ лэсьтэмлэсь. Кырсьысь потэм адями, отчы пырамтэезлэсь трослы умойгес луэ. Но со дэриысь одно потыны тыршоно... С. Петрова, В. Куликова, О. Семенова, Удмурт кун университетысь студентъёс. Быръёнъёс азьын малпанъёс Бюллетеньёсын улонэз уд вошты Туэ 3 январе потэм статьяяз "Удмурт дунне" газетлэн редакторез А. Шкляев гожтэ, гуртын улӥсьёс демократъёслы пемит, нош городын улӥсьёс коммунистъёслы пумит луо шуыса. Сыӵегес югдур туннэ быдэс Россиын. Малы бен гуртъёс выль улонлы пумит мыно? Туала улонзэс социализм дыръя улонэнызы ӵошатыса, гуртоос номыре ӟечсэ уг адӟо: колхозъёс но совхозъёс пайда поттытэк ужало, заводъёс сыло, выль техника басьтыны луонлыкъёс ӧвӧл. Демократъёс ик туртто крестьянъёсты музъемтэк кельтыны. Мар умойзэ бен сётӥз гурт калыклы колхозын дэмен ужаса улон? Кызьы тодӥськом, Удмуртиын музъемъёс котьку начаресь вал. Куазь но адямиосыз ӧз шумпоттылы: я зоро-кото, я кӧс возиськылӥз. Соин ик та палъёсы помещикъёс но ӧз выжыяське, шутэтскон нуналъёцты тодытэк, пӧсяса-котмыса ужаса гинэ луэ вал музъемлэсь пайдазэ поттыны. Озьы ужалляз огшоры калык. Куд-ог гуртъёсын школаос вал ке но, начаръёслэн нылпиоссы отын толалтэ гинэ дышетскыны быгатылӥзы, мукет дыръёсы пиналъёс мӧйыосын ӵош ужаллязы. Тодӥсько революцилэсь азьло мынам огез апае пичи дыръяз ик сюрлоен кизэ вандӥз. Солэсь зэмос ужась уз ни пӧрмы шуыса, атаез сое дышетскыны ыстӥз. Тӥни озьы солы шуд усиз дышетскем мурт луыны. Ӟеч музъемъёс ӧз тырмылэ. Соин ик бускельёс, семьяос куспын ялан керетонъёс пуромылӥзы, ог-огзэс виылӥзы но. Совето власть вуэмен гинэ адямиослэн улонзы умой пала берытскыны кутскиз. Быдӟым Отечественной войналэсь азьло ик Советской Союзын пуктэмын вал кӧня ке трактор заводъёс. Комбайнъёс лэсьтыны кутскизы Ростов-на-Дону, Таганрог городъёсын, автомобильёс - Москваын, Горькийын, Гомельын. Трос дауръёс ортчыса гинэ музъемъёсты нырысьсэ гырыны-кизьыны кутскизы машинаосын. Война ӟеч азинсконъёсмес куспетӥ кариз. Выльысь ужано луим валъёсын, сюрлоен, герыен. Нянь но мукет сиён ӧз тырмылэ. Ноку уг вунэты 1943-тӥ арез. Висьыны усьыса, больницае сюри. Отын пичиен-пичиен ке но зэмос нянен сюдылӥзы. Дорав бертӥ но, анае ӝӧк вылэ пуктӥз пушнерен пӧзьтэм шыд но тӧдьы ӝуйлэсь но беризь куаръёслэсь пыжем нянь. Нош дышетӥсе ваиз пичи юдэс гинэ ӟег нянь. Сомында аръёс ортчизы ини, но со няньлэсь шӧмзэ та дырозь ымпушкам возисько. Война бере колхозникъёсты пумен мозмытыны кутскизы секыт налогъёслэсь. 50-тӥ аръёслэн шорозязы котькуд колхозниклэн семьяез государстволы сётыны кулэ вал быдэн 40 килограмм сӥль, 9 килограмм скал вӧй, 110 курег пуз, 800 грамм пала ыжгон. Со сяна, тыроно на вал сельхозналог, кужмысь гожтӥськытылӥзы заёмлы. Нечернозёмной зонае пырись гуртъёсты ӝутон понна 1969 арын нимысьтыз постановление кутэмын вал. Со бере СССР-лэн дас улосвылосъёсызлы бадӟым саклык висъяськыны кутскиз. Трос ужъёс чакламын вал музъемлэсь но пудолэсь ӟечлыксэс но пайда сётонзэс ӝутон понна. Соку ик кылдылыны кутскизы техникаез ӟечгес ужатонъя но тупатъянъя мастерскойёс. Кылсярысь, Ижевскын тупатъяллязы сельхозтехникаез, Нылгаын - легковой машинаосты. Колхозъёсы но совхозъёсы тырмыт вайылӥзы минеральной удобрениос. Чакласа возьылӥзы, кӧня торф но кыед поттэмын бусыосы. Табере демократъёслэн кивалтэменызы, музъем сярысь сюлмаськон быриз. Тросэз колхозъёс но совхозъёс воксё кынартэм кылизы. Техника, удобрение басьтыны луонлыкъёс ӧвӧл. Демократъёслы кылиз на крестьянъёслэсь музъемзэс гинэ басьтыны. Соин ик гурт калык понна соос тушмонъёс луо. Милемыз дышетылӥзы, рабочий класс тужгес но кужмогес, азьмынӥсез но оскымонэз класс шуыса. Табере со сярысь уг верасько ни, со класс пазьгемын. Демократъёслэн агитацизы улэ сюрыса, шахтёръёс 1989-тӥ - 1990-тӥ аръёсы совето властьлы пумит кӧня ке стачкаос ортчытӥзы. Озьы соос Ельцинлы юрттӥзы власть басьтыны. Со понна шахтёръёс данъяськыны кулэ, дыр. Но кызьы ӵем дыръя луэ улонын, власть басьтӥсьёс ас юрттӥсьёссэс бӧрысь лёгаса кельто. Озьы ик ӧз-а луы шахтёръёсын но. Выль власть соос сярысь вунэтӥз, шахтёръёс али секыт югдуре шедемын. Профсоюзъёслэн кивалтӥсьёссы но реформаторъёс пала шоналскизы. Асьсэды эрико кичӧлтӥсьёсын лыдъяло. Зэмзэ но, эрикоесь. Эрикоесь калыклэсь, солэн кулэяськонъёсызлэсь. Быръёнъёс асьме улонамы туж трос вал ини. Кызьы тодмо, быръёнъёс - со политической нюръяськонлэн огез амалэз. Но котьма ке но, урнае бюллетеньёс куштыса гинэ властез уд вошты. Со сярысь тодаз вайытылӥз В. Ленин но. Матэктӥсь быръёнъёс азьын со сярысь, оло, мултэс ӧй луысал малпаськыны но. Экономикаын но политикаын кылдэм югдурысь потон понна одӥг гинэ сюрес вань - меӵак но кышкатэк нюръяськоно сыӵе власть пумит, кудӥз странамес вуттӥз куашкан калэ. С. Воронцов, историк. Политика БУСЛЭН ВАКЫТЭЗ ВАКЧИ Берло аръёссэ гинэ асьме шаерын, быдэс Россиын сямен, олокӧня пӧртэм социологической эскеронъёс ортчытэмын ни. Ма сётӥзы та юалляськонъёс? Ма сярысь соос верало? Нырысь интыын - калыклэн азьпал улонэзлы осконзэ ыштон, демократия шуон амалэз но рынокен экономикаез адӟонтэм карон. Кыкетӥ интыын - "туала политической властьлэсь ӟечсэ возьманэз ӧвӧл" шуыса малпан, тросэз витё "кужмо властьлэсь" вуэмзэ. Та чуръёсты лыдӟыку тодэ лыкто Н. Карамзинлэн верам кылъёсыз: "История - со калыкъёслэн священной книгазы; соослэн улон-вылонзылэн синучконэз; кыдёкысь ӵыжы- выжыосмылэн ортчем сюрессы но малпанъёссы". Кыӵе улон соос асьмелы сӥзизы, малэсь утиськыны косылӥзы? Кыӵе вакытъёсы меда вордскем музъеммы шудбурен палькаськылӥз но сяськаяськиз? Таӵе но трос мукет юанъёслы валэктон шедьтэм потэ туннэ, ХХ даур йылпумъяськыку. Россилэн историезлэсь ӵужектэм бамъёссэ берыкъяку, сюлэме тужгес но зол йӧтэ Запад азьын йыбыртъян сяммы. Эксэй-а со, огшоры чиновник-а - шунды пуксён палан улӥсьёс азьын котьку но пыдчиньы йылазы ветлыны тыршылӥзы: соос сямен вераськыны, соос сямен дӥсяськыны, соос сямен возиськыны. Огзэ пусъём: Россия ас музъемез понна юн сылӥз, самой секыт вакытъёсы но тушмон азьын ӧз пыдесъяськылы. Со эшшо огпол пусъе на: мукетъёсызлэсь бере кылемед уг ке поты - биньгозыдэ кияд зол возь, сопалась та пала эн шонаськы. 1973 арын Латинской Америкаысь огаз государствоын, Чилиын, ортчиз военной переворот. Уг ваты: властез киязы кутэм бере, военнойёс вакчи дыр куспын странаез поттӥзы рынокен экономикае. Пиночет 18 ар ӵоже кивалтытозь, Чили трос удысъёсъя кужмо государствоос радэ шедиз. Офицеръёс котькинлэсь ӝог валазы: странаын кулэ порядок. "Сисьмем демократилэсь палэнскон сюрес одӥг - военной диктатура пыр демократической порядок" - таӵе амалэз бырйизы Латинской Америкаысь тросэз государствоос. Со ик луиз шуг-секытысь потон но азинскон амал. Уг ваты: туала демократъёс, властез киязы кутыса, атай музъеммы сярысь сокем ик уг сюлмасько. Соослы дуногес зӧк кисыё адямиослэн политиказы. Огшоры калыкез поромытӥзы ваучеръёсын, эрик, музъем сётон сярысь чебересь сӥзёнъёсын. Валасез валаз, куд-огез туннэ но оске на со "льӧль буслы". Нош рыноке выжон экономика ужзэ быдэстӥз: огъёсыз син куспын начармизы, мукетъёсыз со чотын узырмизы. Обществоез люкыны, кивалтӥсьёс тыршемен, амал ӝог сюриз. Кызьы гожъяз ас вакытаз француз Пьер-Жозеф Прудон: "Узыр мурт - со лушкаськись яке лушкаськисьлэн пиез". Ӟеч сямъем разбойникъёс но законъёсты быдэсъясь воръёс пумиськыло выжыкылъёсын гинэ. Туала реформаосты ортчытӥсьёс тае ӟеч тодо. Кынем синмын но адске ук: вакчи дыр куспын гинэ Россиын кӧня миллиардеръёс "вордскизы"! Страналэн 75 процент пала ваньбурезлы кузё луизы чиньыен лыдъямон выль узыръёс. Сыӵеос киын табере калыкмылэн пӧсям курыт вуэныз ӝутэм экономика. Выльдӥськонэ нуись сюрес асьмеды, Россиын улӥсьёсты, кыдёке берлане сэрпалтӥз. Мукет странаосын ӵошатыса, со зэмен но озьы. Россия шедемын тужгес но мур, тужгес но секыт кризисэ. (Война аръёсы но таӵе адӟонэз ӧм адӟе!) Промышленной вузъёсты поттон, 1991 арен ӵошатыса, миым 38 процентозь сяна ӧз ӝутскы. Югдур, оло, тупатскоз выль Правительство вуэмен? Огзэ пусъём: асьмелы асьмеос ке ӧм юрттэ, кужмо Россия нокинлы кулэ ӧвӧл. История тае огпол гинэ ӧз возьматъя ни. Странаез азьлане валтон понна, кулэ визьмо, кужымзылы оскись йыг-йыг муртъёс. Эксэй вакытэз ке басьтоно, ӵошатэ ай: кинлэн нимыз туннэ нуналозь калыклэн сюлэмаз улэ? Солэн, кин быгатӥз Россей государствоез утьыны, юнматыны, золъёсыз пӧлы пыртыны. Жаляса верано, таӵе адями "правойёс" пӧлын но, "левойёс" пӧлын но али ӧвӧл. Калыкез сайкатыны, валтыны нокинлы. Но улон колёса интыяз уг сылы - быгатэмезъя ялан азьлане питра. Вуттоз на со ӟеч вакытъёсы. Ӵукна усем бус сямен, калыкез пӧясь политика но кема уз возиськы. И. ОБРАЗЦОВ, история наукаосъя кандидат. Бырйисьёсын пумиськонъёс Арня сяна ӧз кыльы ни Ижысь Думае депутатъёсты быръён нуналозь. Соин ик али кандидатъёс ӵем пумиськыло калыкен. Алигес одӥгез сыӵе кенешон ортчиз "Удмуртия" кинотеатрын. Отчы люкаськылӥзы 11-тӥ но 14-тӥ округъёсысь бырйисьёс но депутатъёсы ӵектэм муртъёс. Вераны кулэ: та округъёсъя кыкез удмурт нылкышноос но дэмламын Думае бырйыны. Огез - Земфира Борисовна Петрова - ужа Октябрь ёросысь администрациын, мукетыз - Алевтина Ивановна Поткина - "Удмуртмелиоводхоз" управленилэн кивалтӥсезлэн воштӥсез. Кыкез ик та нылкышноос туж тупало Думае. Соос ӟырдыт мылкыдоесь, усто ӧнерчиос, трос сюлмасько городысь калыклэсь улон-вылонзэ умоятон сярысь. Думае ӵектэм кандидатъёсын пумиськонэ люкаськылӥзы ӟучъёсыз но, удмуртъёсыз но бырйисьёс. Кандидатъёслэн оскем муртъёссы калыкез пыр-поч тодматӥзы З. Б. Петроваен но А. И. Поткинаен, бырйисьёс соослы пӧртэм юанъёс сётъязы, дэмланъёссэс веразы. Соослэн одӥгез бадӟым куронзы - Подоборенка шур кузя улон интыосты ӝикыт но чылкыт утялтыса возён, городын огъя культураез ӝутон, порядокез юнматон. Ӵектонъёс вал удмыртлыкмес уката кужмоятон ласянь но. Пумиськонэз шулдыртӥзы "Инвожо" ансамбльысь артистъёс. Отчы дас ар ӵоже ветлэ ни угось Думае дэмлам одӥгез шаплы кышномурт Алевтина Поткина. Со кема ужамын шаерысьтымы Министръёслэн Советазы но. Кузпалэныз ӵош ик мылысь-кыдысь пыриське самодеятельносте, быръемын удмурт культурая "Дэмен" огазеяськонлэн кивалтоназ. Нош Земфира Петрова, Октябрь ёросысь адяминистрациын ужам сяна, быгатыса кивалтэ "Удмурт кенеш" огазеяськонлэн та ёросысь ёзэныз. Кенеш пыр но ӵем пумиськылэ калыкен, сюлмаське огшоры адямиослэсь куронъёссэс умойгес быдэсъяны. Ижысь 11-тӥ но 14-тӥ округъёсысь бырйисьёс 12 апреле соос понна мед сётысалзы куаразэс. Оскисько: Дума пыр та чырткем нылкышноос быгатозы уката бадӟымесь ужъёсты быдэсъяны. С. Ильин, Удмурт культурая "Дэмен" огазеяськонлэн кивалтоназ быръем инженер. Оло, зэмзэ но Кириенко Кылем субботае Игорь Флярковский РТР каналын мынӥсь "Подробности" передачаяз пумиськылӥз Сергей Кириенкоен, премьер-министрлэсь ужъёссэ быдэсъясен. Правительство отставкае кошкем дырысен, та адямилэн нимызтэк одӥг газет но уг поты, телевидение но радио нуналаз олокӧня пол поттыло сое. Журналистъёс но, политологъёс но - ваньмыз тунало: луоз-а, уз-а С. Кириенко Правительстволэн кивалтӥсез. Огъёсыз шуо, укыр егит на, пе, кивалтон опытэз туж ичи, куашкатоз государствоез. Мукетъёсыз соослы пумит луо: егит, етӥз, визьмо, урод кусыпъёсын но кескич "шудонъёсын" саптаськыса ӧз вуы на. Вылтӥ-вылтӥ гинэ учконо ке, соосыз но, таосыз но шонер кадь верасько. Мынам но кылем субботаозь кык пӧртэм таӵе малпанъёсы вал. Но мон юнме ӧй мыты вераськонме И. Флярковскийлэн передачаез бордысен. Мон нырысьсэ адӟи сокем вылӥ кивалтон ёзысь улэп адямиез. Оскисько, кин учкиз передачаез, монэным соглаш луоз. Та дырозь ваньмыз сямен вылӥ кивалтӥсьёс бетон памятникъёсты, я кескич ӟичыосты тодэ вайыто вал. Таиз асьме кадь, огшоры пияш. Вылаз ик, туж визьмо, валантэм кылъёс сьӧры уг ватскы (шуом, Е. Гайдар сямен). Нокинэ но уг кышкаты, чурыт киын порядок тупато шуыса (шуом, В. Черномырдин сямен). Уг ушъяськы, уг буйгаты, экономика ӵуказе ик чутрак ӝутскоз но калык узырмыны кутскоз шуыса (шуом, А. Чубайс сямен). Уг, Сергей Кириенко лад-лад маде, кызьы со адӟе шуг-секытысь потон сюресъёсты. Тужгес но пусйымонэз: со уг ваты солэн вань удысъёсын вормонъёс сӥзись огъя программаез ӧвӧл шуыса. Озьы ик уг ваты, вань экономикаез вить чиньызэ кадь тодымтэзэ. Со ӵектэ эстӥськон поттон но энергетика удысъёс бордысен кутскыны. Мар бен, ӵапак та удысъёсын С. Кириенко бадӟым специалист. Вылаз ик (мар тужгес но пусйымонэз), кызьы ваньмызлы тодмо, эстӥськон поттон но энергетика - вань калык хозяйстволэн инъетэз, нянез луо. Озьыен, ачиз улон косэ та удысъёс бордсен кутскыны. Оло, соин но Президент Кириенкоез премьер-министре ӵектэ? Премьер-министрез юнматыны кулэ Кун Дума. Кириенколы пумит луэмзэс меӵак верало коммунистъёс гинэ. Паймонэз ӧвӧл: правительствоен кивалтыны соослэн асьсэлэсь адямизэс пуктэмзы потэ. Г. Зюганов С. Кириенколы пумит номыр выльзэ уг вера: "Егит, опытэз ӧвӧл". Озьы ке, малы В. Черномырдинлы бадӟым арлыдыз но солэсь но бадӟым опытэз ӧз юрттэ экономикаез куашканлэсь утьыны? Озьыен, арлыд но опыт бордын, шонергес вераса, соос бордын гинэ ӧвӧл. Передачаез учкем бере, С. Кириенколы оскон мылкыд кылдӥз. Таиз но пӧяз ке, кинлы оскомы на? Г. Тихонов. Сӥзем кышетъёс Выльысь быръёнъёс ялэмын, Выльысь нюръяськон тыломе. Выльысь Тӧрое ӵектӥськись Ассэ ушъяны ыломе. Ӵуше азьвылзэ со, сьӧдма, Ассэ гольтырес чеберма. Бырйись йырберзэ ни корма: Янгыш нош уз лэсьты меда? Азьвыл но тӧро луонзы Тазьы ик потаз калыке. Бусьтыр тыр улон сӥзьыса Вализ вал мамык тушакез. Шуиз вал: "Монэ бырйыса, Улон коркады шулдырмоз. Уд ни векалэ ёрмыса, Шудбур пыраклы ӟыгыртоз..." Сӥзён кышетъёс та вие Быдэс элямы тӧлало. Оском на-а, ум-а - оло, Выльысь кылёмы шузие?.. СТАНОКЪЁС УЗ БЕРГАЛЭ Странаысьтымы тросаз улосъёсын февральлэн кутсконаз калык ужаны ӧз пота, пумитъяськон ужрад ортчиз. Мугез одӥг - ужаса улӥсьёс уждунзэс куро. Куд-ог интыосын трос толэзьёс ӵоже адями уксёез уг адӟы. Соку Удмуртиысь предприятиосын ужасьёс кенешыны но республикаысь кивалтӥсьёсын пумиськыны гинэ люкаськылӥзы, ужзэс ӧз уретылэ. Кивалтӥсьёс калыкез оскытӥзы, та дырысен уждун тырон уз ӝега шуыса. Ортчиз кык толэзь, нош югдур сыӵе ик кылиз. Тросэз адямиос выль уксёез но ӧз адӟе на, коньдонтэк пуко. Табере 9-тӥ апреле Удмуртиысь Эрико профсоюзъёслэн федерацизы (ФНПР) пумитъяськон ужрадэ пыриськыны соглаш луиз. Озьыен, та нуналэ тросаз заводъёсын станокъёс уз бергалэ, школаосын пиналъёс парта сьӧры уз пуксе. Профсоюзъёслэн ӧтемзыя, городысь ужась калык Ижысь Центральной площаде Правительстволэн юртэз вадьсы митинг ортчытыны люкаськоз. Н. ВОЗИСОВ. АЛЕКСАНДР ВОЛКОВ - ФЕДЕРАЦИЛЭН КЕНЕШАЗ Федерацилэн Кенешезлэн ортчем заседаниосаз ужпумъёсты эскеронэ пыриськиз Удмурт Республикаысь Кун Кенешлэн Тӧроез Александр Волков. Европалэсь интыысь аскивалтонъя хартизэ юнматонъя ужпумез эскерыку, удмурт парламентлэн кивалтӥсез ӵектонзэ вераз, та документэз кутонэн дыртоно ӧвӧл шуыса. Александр Волков пусйиз тани мае: 1988 арысен 28 кун гинэ хартиез юнматӥз, тросэз азьмынӥсь странаос куд-ог мугъёсъя озьы ӧз лэсьтэ на. Интыысь аскивалтонэз азинтоно, солы юрттоно, шуиз Александр Волков, но сое ӟеч радъян понна Россия Федерациын законодательство ляб на. Азьмынӥсь государствоослэн Конституциосазы пусъемын: ужпумъёссэс быдэстэм понна интыысь аскивалтонъя ёзъёс, калык азьын гинэ ӧвӧл, кун властьлэн ёзъёсыз азьын но кыл куто. Россия - дуннеын одӥг гинэ кун, кудӥзлэн Конституцияз юнматэмын, интыысь аскивалтон кун властьлэн радлыказ уг пыры шуыса. Губернаторъёслэн но мэръёслэн тупамтэоссы, Ленинск-Кузнецкын но Нижний Новгородын ортчем быръёнъёс, куке кивалтонэ вуо осконтэм адямиос, юнме шорысь уг кылдо, шуиз Александр Волков, сыӵе югдурлы инъетъёс вань федеральной законодательствоын. Россиысь парламентлэн вылӥ палатаез Европалэсь интыысь аскивалтонъя хартизэ юнматон сярысь мылкыдзэ вераз, со дыре ик Удмурт Республикаысь Кун Кенешлэн Тӧроезлэсь ӵектонъёссэ умоен лыдъяз. Федерацилэн Кенешезлэн Улосвыл политикая но Конституционной законодательствоя комитетъёсыз азе ужпум пуктэмын интыысь аскивалтонъя ёзъёслэсь ужзэс но кун властьлэн ёзъёсыныз кусыпъёссэс радъянъя законодательство бордын ужаны, со пумысен ӵектонъёс дасяны. Пусйыны кулэ, федеральной законодательствое сыӵе воштонъёсты пыртонлэсь кулэлыксэ юнмато Европалэн интыысь аскивалтонъя хартиезлэн положениосыз но. Соосъя интыысь аскивалтонъя ёзъёс кун властьлэн ёзъёсыз азьын кыл куто. "Бюджет удысысь организациосын ужасьёслэсь уждунзэс радъянъя" Законлэсь инъетсэ эскерон дыръя Александр Волков вераськиз та документэз ӝегатскытэк кутон сярысь. Кылсярысь, Кун Кенешлэн Тӧроез пусйиз: социальной удысын тыршисьёслэн уждунзы, мукет удысъёсын ужасьёслэн уждунэнызы ӵошатыса, трослы ӧжыт, арлы быдэ югдур эшшо уродме, 1997 арын дышетӥсьёслэн шор уждунзы 500 манет вал, нош егит специалист 200 манетлэсь но трос ӧз басьтылы. Александр Волков пусйиз: бюджет удысын ужасьёслы уждун будэтон сярысь законэз гинэ ӧвӧл, Россия Федерациын уждун тыронэз радъян сярысь законэз но кутыны дыр вуэмын ини. Туннэ Россимы курадӟе бере, шуг-секытъёсты ваньмылы люконо. Ӵапак со закон ик чакланы кулэ, таӵе вакытэ кыӵе уждун басьтыны кулэ кивалтон удысын ужась. Куд-огез соос телепередачаос пыр ушъяськыса верало 10, 20 сюрс долларъем уждунъёссы, нош ми со дыре ик гордэктӥськом но шуиськом: шуг-секытъёсын валче дышетӥсьёслы но врачъёслы уждунзэс будэтон сярысь законэз кутыны ум быгатӥське - вераськон мынӥз Удмурт Республикаысь Кун Кенешлэн Тӧроезлэн выступленияз. Александр Волковлэсь социальной удысын ужасьёслэсь уждунзэс будэтон сярысь мылкыдзэ умоен лыдъязы Россия Федерациысь субъектъёслэн тросэз кивалтӥсьёссы. Федерацилэн Кенешез законопроект бордын ужзэ азьланьтон сярысь решение кутӥз, документэз улонэ пыӵатыны коньдон кулэ луоз. Кылдытэмын нимысьтыз ужась группа. Александр Волковлэн ӵектэмезъя, отчы пыртэмын Удмурт Республикаысь Правительстволэн Тӧроез Павел Вершинин. Удмурт Республикаысь Кун Кенешлэн пресс-службаез. Культура удысын Артист кадь ик... Любовь Николаевна Рогожниковаен мон нырысьсэ тодматски Пироггуртысен. Татысь "дэменчиос", кырӟаны-эктыны яратӥсь мӧйы нылкышноос, доразы ӧтиллям асьсэ районысь ик Постол гуртысь артистъёсты. Пумиськонзы паймымон шуныт пӧрмиз. Ижысь лыктэм кунооссэс но, Пироггуртысь азьвыл тодмооссэс но постолъёс воксё паймытӥзы. Кырӟанъёссы но, эктонъёссы но туж чебересь. Уката ик йӧно, шаплы адскиз кивалтӥсьсы. Удмурт кылын но, ӟуч сямен но эркын, вольыт вераське, кырӟа. Эктыны но - чечег кадь. - Таиз, - лушкемгес юасько артэ пукись кышномуртлэсь, - зэмос артист, дыр? - Ӧвӧл, - валэктэ вӧзысьтым тодмое. - Ну, иське, выжыязы кин ке артистсы вань, дыр? - Ӧвӧл. Аиз - механизатор, мумиз - скал кыскись. - Соку, оло, культурая училищеез йылпумъяз? - Бен, йылпумъяз. Но дышетскемын библиотекаре... Пайми. Бӧрысьгес ваньзэ валай ни. Люба дас ар гинэ ужам библиотекаын. Собере юнматӥллям Постолысь культурая юртлы кивалтӥсе. Нош отын , кырӟаны-эктыны уд ке пӧрмытӥськы, мар ужанэз? Тӥни озьы Любовь Николаевна гуртысь усточиосын ӵош волятӥз быгатонлыксэ, каньылля луиз чебер кырӟась но эктӥсь. Вордскемын Л. Н. Рогожникова Пичи Пурга ёросысь Абдэс-Урдэс гуртын. 1986 арысен улэ ини Постолын. Егит кивалтӥсь соку ик синйылтӥз шаплы эктӥсь-кырӟасьёсты. Соосты ас котыраз люкаса кылдытӥзы "Егит даур" ансамбль. Культура юртлэн кивалтӥсез мӧйыослэсь но уг палэнскы - ялан юрттэ, соосын котьку шедьтэ одӥг кыл. Пересьёслэн кытӥ-отӥ куаразы чугдэ ке, пӧлазы султэ но, жин-жин кисьто яратоно удмурт гуръёсты. Культура юртлэн кивалтӥсез нырысь ик сюлмаське калыкен ужанзэс кужмоятон сярысь, данзэс ӝутыны тырше. Со директор люкэм бере, культура юртсэс кыкетӥ категорие выжтӥзы ни. Админицтрациен, мӧйыослэн кенешенызы, дышетӥсьёсын, егитъёсын огкылысь радъя ваньзэ ӝытъёссэ, ужрадъёссэ. Культура юрт берло дыре гинэ тямыс пумиськон ортчытӥз пӧртэм интыосын. Озьы вераны гинэ капчи. Котькуд учыре сояз яке таяз гуртэ потаны утчано автобус, пичи коть коньдон. Ваньмыз понна бызьылоно луэ аслыз директорлы. Нош "Егит даур" ансамбль берло толэзьёсы Завьял но Пичи Пурга ёросъёсын дас концерт возьматӥз ини. Кылем арын татысь артистъёс ёросазы нырысетӥ интыез басьтӥзы. "Гербер" празднике но мылысь-кыдысь пырисько. Эсьмаса, Москвалэсь мэрзэ Ю. Лужковез но пумитаны соослы оскемын вал. Азьланезлы планъёссы-малпанъёссы уката бадӟымесь. Берлосьёсаз куиняз пумиськонъёсазы мон ачим но ветлӥ. Алигес, кылсярысь, куинь гуртысь мӧйыосты люкаса, туж пайдаё кенешон ортчытӥзы культура юртын. Отын пенсиосты выль сямен тырон но пересьёслы юрттон сярысь пыр-поч валэктӥзы Завьялысь калыклы мерлыко юрттэт сётонъя отделын ужась О. А. Веселкова но мӧйыослэн кенешсылэн тӧроез Л. Н. Вахрушева. Бускель гуртысьтызы кылбурчи, Удмурт радиосысь корреспондент Ольга Ведрова, люкаськемъёсты тодматӥз Ашальчи Окилэн улэм-вылэменыз, солэн жильыртӥсь кылбуръёсыныз. Мон вакчияк вераськи К. Герд сярысь. Лыдӟи кӧня ке кылбуръёс. Киоссэс туж юн чабизы. Та ӝытын ик люкаськемъёс Любовь Николаевна Рогожниковазэс одно ик районысьтызы кенешазы депутатэ быръём шуизы. Кандидатэ сое эшъёсыныз ӵош ӵектэм Зинаида Александровна Кузнецова. Мед вормысал гуртысь шаплы артист, усточи,. Малы ке шуоно, быдэс районъя культура удысын тыршисьёс пӧлысь со огназ дэмламын райсоветэ. Музонъёсыз пӧлын тросгес кивалтӥсьёс, фермеръёс, ужбергатӥсьёс, ӧнерчиос. Культураез ке вунэтӥм, чеберлыкмы, ӟеч сямъёсмы, жингрес кырӟан-эктонъёсмы - ваньмыз куасьмоз ук. Постолын ке улысал, мон ачим но Любовь Николаевна понна бюллетеньме урнае лэзьысал. Кирилл Ломагин, писатель. Компьютерен ӵош Алигес Ижевскысь Национальной библиотекаын ортчиз "Время-98" адӟытон. Люкаськемъёс тодматскыны быгатӥзы пӧртэм пумо компьютеръёсын, нош соосын ужась специалистъёс Максим Девятов, Виктор Любимов, Дмитрий Кротов, Алексей Проничев семинаръёс радъязы. "Время" огазеяськон Удмуртиен нырысетӥ кусыпъёссэ юнматӥз 1994 арлэн кутсконаз. Компаниын ужасьёс асьмелы вакчи дыр куспын но дунтэм дунын вылӥ ӟечлыкен гинэ компьютеръёс вутто. Со сяна, компьютерзэс вить ар эскерыса-чакласа возё. Миым гужемысен "Время" огазеяськонлэн вуттэм компьютеръёсыныз Интернет огъя сетен меӵак герӟаськыны но луэ. Али дыре "Времяен" ӟеч кусыпъёс возё городысь Октябрь но Ленин районъёс, ИжГТУ, УдГУ, ИжГСХА, Удмурттелеком, Ижевскысь Почтамт но трос мукетъёсыз. Компьютерлэсь кулэлыксэ шӧдӥзы ни районъёсысь кивалтӥсьёс но. Кусыпъёс юнматӥзы Ува, Вавож, Сюмси районъёсысь администрациын ужасьёс. В. Андреева. Туспуктэмез В. Камашевлэн. Кореяысь бертӥз делегация Павел Вершинин: "ПРАВИТЕЛЬСТВО НОМЫРЛЭСЬ УГ ПАЛЭНСКЫ" Туала улонмы тодмо: экономика лябзе, калык куанерме. Соин ик Удмурт Республикаысь Правительство вис карытэк утча ваньбур поттонэз будэтыны амалъёс. Сыӵе сюлмаськонэн ик алигес Южной Кореяе ветлӥз Правительстволэн делегациез. Соин кивалтӥз премьер- министр Павел Вершинин. Шунды ӝужан палась кунэ озьы ик ветлӥзы Кун Кенешлэн Тӧроезлэн нырысетӥ воштӥсез Владимир Агашин, мукет кунъёсын кусыпъёсъя министр Виктор Викулов, Ижысь но Глазовысь куд-ог промышленной предприятиослэн кивалтӥсьёссы, "СБС-АГРО" банковской группалэн вице-президентэз но мукетъёсыз. - Вераськон каньыл ӧз мыны,- пресс-конференциез усьтӥз Павел Николаевич.- Делегация азьын одӥг ужпум сылӥз: яке мыноно, яке ӧвӧл Южной Кореяе. Малы ке шуоно, сюрес вылэ потэммылэсь азьло Кореяысь гожтэт вуиз, странаын секыт югдур кылдэмен валче, пе, тӥледын кусыпъёс тупатыны ум быгатэ. Озьы ке но, делегацилэн ветлэмез юнме ӧз луы. Кенешон нуонын гуньдон калэ но вуылӥм, но чиданмы тырмиз, кутэмын огкылъёс но тупанкылъёс. - Кыӵе документъёс гожтэмын пумиськонъёс дыръя? - Удмурт Республикаысь Правительствоен но "Хёндэ корпорэйшн" фирмаен кусыпъёсъя тупанкыл; - "Ижмаш" АО-ен но "Хёндэ мотор" фирмаен кусыпъёсъя тупанкыл. Со сяна, меморандумъёс кутэмын мотоциклъёс ("Ижмаш"), тазалыкез утёнъя техника ("Аксион"), аккумуляторъёс (Глазов, ЧМЗ) поттонъя но андан ӵыжатонэз умоятонъя ("Ижсталь"). Али котькинлы валамон, республикаямы автомобиль поттонэз выльдоно но улӟытоно. Со понна кулэ трос коньдон но юрттӥсьёс. "Хёндэ" арлы быдэ 2 выль моделен машина поттэ ке, асьмеос одӥг "Орбитаез" 20 ар бичаськом ни. Кызьы сое умоен лыдъялод? Соин ик "Ижмаш", та фирмаен сяна, вераськонъёс кемалась нуэ ни "Форд" (США) но "Фиат" (Италия) фирмаосын. "Хёндэ" со сярысь тодытэк уг улы. Солы та вакытэ аслыз но капчи уг йӧты, озьы ке но, асьмелы юрттыны басьтӥське. Меӵак вераса, дорамы туэ 3 сюрс "Акцент" машина бичаны, 10 сюрс двигатель вузаны но сое "Орбитае" радъяны-тупатыны чакламын. Мукет моторъёсын ("Тофаш") ӵошатыса, со дунтэмгес но, умойгес но. "Ижмашлы" коньдон висъяны басьтӥське "СБС-АГРО" банк. Со кредитэз утьыны кыл сётэ Правительство. Павел Вершининэз сюлэмшугъяськытэ "Ижмашавто" ДОАО-ын секыт югдур. Татын машина поттон унолы кулэсмиз, миым 8 сюрс ужасен 8 сюрс автомобиль бичамын. Али солы валтӥсь директор но уг шедьто. Акциосын огазеяськон понна кыл кутыны но производствоез вырӟытыны кулэ акционеръёс. Но Правительство та ужлэсь уг палэнскы, со угось герӟаськемын калыклы уж сётонэн, улон-вылонмес умоятонэн. Правительство автозаводын кенешсэ одӥг пол ортчытӥз ни. Матысь дыре нош ик вуылыны, вань лэчыт ужпумъёсъя вераськыны чакла. Кылсярысь, Кореяын коньдон ужпумъя секыт югдур кылдэмен, президентсы вань калыклы вазиськиз, юрттэт курыса. Соку ик юрттыны мылкыд карисьёс шедизы. Павел Николаевич шуэ, мон но, пе, Удмуртиын улӥсьёслы вазиськыны быгатысал, но асьмеос Россиын улӥськом, законъёс но куронъёс вошъясько, адямиосты пӧяме уг поты. - Ми трос предприятиосы вуылӥм,- ватсаз Владимир Иванович.- Адӟим автомобильёс, мотоциклъёс, буёлъёс поттон заводъёссэс, андан ӵыжатонъя комплекссэс но мукетсэ. Котькытын паймытэ чылкытлык, планъёс лэсьтон, ужась муртэ данъян но музонэз. Предприятиоссы бадӟымесь, котькудаз шорлыдын 28-30 сюрс адями ужа. Кивалтӥсьёссы рабочийёсын уг пумиськыло, уж сётъясь ӧвӧл. Кореяын вань умойзэ асьмелэсь басьтӥллям. Котькытын шутэтскон комнатаоссы. Отын сяськаос, ву фонтанъёс, шахматэн, доминоен шудон ӝӧкъёс пуктылэмын. Бен, нимысьтыз пусъем потэ, Правительство номырлэсь уг палэнскы. Миым, бурд улаз басьтыса, предприятиослы 100 миллиард манетлэсь уно кредит висъяз, со пӧлысь ӝыныез - "Ижмашлы". Юрттэт озьы ик вуиз Ижысь радиозаводлы, "Буммаш", "Аксион" АО- ослы. Но сётэм уксёез кызьы кутэмез но эскерыны кулэ. Огъя вераса, автозавод вырӟыны кулэ. Али асьмелы Уфа 1000 мотор сётыны дасяз ни. Соин ӵош ик тросгес поттоно выль мотоциклъёс, воштос ёзъёс. 30 сюрс двигатель ВАЗ сётыны кулэ. Нош мукет ласянь, "Хёндэ" поттэм 200 автомашинаез вузан чидантэм урод мынэ, басьтӥсьёс сое дуно каро. Асьмелы озьы ик бичано фургонэн "Орбита" машина. Солы кулэяськисьёс вань. Калык тае "каблучок" шуэ. Со усто маке. Тӥни озьы, секыт ке но, азьланезлы, Правительстволы оскон вань. Г. РОМАНОВ. КАЛЫКЛЫ - 500 ТОННА ЧАБЕЙ Берло ньыль ар ӵоже Селта районын котькуд гектарысь 10 центнер ю-нянь басьтэмын. Со тырме кидыслы, фуражлы, гурт калыклы сётыны, но вузаны ичигес кыле. Соин ик селтаос ялан сюлмасько ю тысь будэтонзэс умоятон но музъемлэсь удалтонзэ ӝутон сярысь. Тани миым вань хозяйствоос тросгес кизизы чабей но гектарысьтыз шорлыдын 14 центнер пала кутсазы. Озьы гуртын улӥсьёслы 500 тонна чабей висъямын. Кинлэн бен буй-буй ческыт чабей нянь сиемез уг поты? Крестьянин табере ачиз нянь но пыже. Г. ВАСИЛЬЕВ. Алексей ШКЛЯЕВ Египетысь чуръёс ВАШКАЛА СИНПЕЛЬЁС Ньыль час куспын Москваысь самолёт вуэ Горд зарезь дурысь Хургада городэ. Татысен Каирозь, туала шоркарозь (столицаозь) 500 иськем, Луксорозь (вашкала столицаозь) - 300. Милемды нуллӥзы сояз но, таяз но, музон интыосы но. Нуналлы быдэ уно паймымон макеосты адӟыса, йыр жонгетэмысь уг дугдылы. Куддыръя номырлы уд абдраськы ни. Пирамида но огшоры кирпич юрт кадь потэ. Милемлы, газетчиослы, пыд йыламы нырулыны уг яра. Пельпум сьӧрамы уло кадь уно сюрс лыдӟисьёс. Арабъёслэн мадемзы пеляд уг ке пыры ни, диктофондэ лэзь. Бертыса кылзод но ваньзэ тодад ваёд. Африкаысь тужгес бадӟым Каир городын вамышлы быдэ мечетьёс. Мыным укыр валантэм соос. Уно сюрс ар талэсь азьвыл египетъёс оскылӥзы асьсэ инмаръёссылы. Таосызлэсь нимъёссэс быдэс дунне тодэ. Амон (Амон-Ра) - шунды-инмар, Осирис - ӟеч мылкыдэн но кулонэн кузёяськись инмар, Анубис, Хор, Исида. Кызьы соосты вормем ислам? Амалтэк тодэ лыктэ: ӟучъёслэн но, удмуртъёслэн но вашкала инмаръёссы вал. Христианствое пырыса, соосты кӧня ке вунэтӥзы. Ӟеч-а, урод-а озьы - ченгешонъёс туннэ но бырымтэ. Египетын улон-вылон озьыгес ик кошкем. Асьме вакытлэсь (эралэсь) азьвылгес отчы пыӵам вылэм христианство. Асьме вакытэ 632-тӥ арын - ислам. Вашкала инмаръёс пумен вунӥллям, городъёсын мечетьёс ӝутскиллям. Египетын тужгес данъясько Мохаммед Али мечетен. Кылдэмез но паймымон. Грециын 1769-тӥ арын вордскиз албан пи Мохаммед Али (эн суралэ Америкаысь туала боксёрен). Огшоры солдатэз мукетъёсыныз ӵош келязы Египетэ, Наполеонлэсь армизэ улляны. Пумен вылӥе ӝутскыса, Али 1801-тӥ арын кивалтыны ӧдъяз Египетэ лыктэм быдэс албан армиен. 1805-тӥ арын египетъёс омырскизы асьсэлэн вице-король шуонзы вылэ. Мохаммед Али пуксиз со интые. Азьло кузёосты вииз но 43 ар кивалтӥз (кулӥз 1849-тӥ арын). Мечете пыриськом пыдкуктэк. Кышноосты но лэзё. Отын огдыре 5 сюрс мурт вӧсяськыны быгатэ. Шор вадьсыз (куполэз) 52 метрын. Бур палан - Мохаммед Алилэн коросэз (гробницаез). Со вӧлэмын тӧдьы мраморлэсь, шобыртэмын зарнивуам пужыосын. Автобусмы лыктэ национальной музей доры. Таиз усьтэмын 1902-тӥ арын, Египетэн тунсыкъяськись тодосчиос (учёнойёс) кичӧлтэмъя. Нырысетӥ директор вал Гастон Масперо. Музее пырыкуд, тонэ сӥсъялозы рентген сиосын. Видеокамерадэ сьӧрад басьтӥськод ке, тыр 100 фунт (200 манет), фотоаппарат понна - 20 фунт. Ӟуч кылын лабыртӥсьёс трос гинэ, ваньзы сямен мылкыд каро видео= но фотосуредъёс лэсьтыны. Маиз но ӧвӧл татын! Излэсь лэсьтэм фараон шоры пичи фонарен югдыто но, со улэп адями кадь "учкыны" ӧдъя. Синмыз мраморлэсь но хрустальлэсь инъямын. Пумен матэктӥськом дано Тутанхамон пала. Шонергес вераса - солэн арбериосыз пала. Гожъяй ни: Тутанхамон кулӥз 18 арес дыръяз тодмотэм муген. Сое ватӥзы Каирлэсь ог 700 иськеме, Луксор (грек сямен Фивы) доры. Мугорыз али но кылле отын ик, Эксэйёслэн нёжалысьтызы гурезьын. Дуно арбериосыз ваемын Каирысь музее. Тутанхамон ӟуч матрёшкаос музэнгес ватэмын вылэм куинь коросэ (саркофаге). Вылӥыз - зарнивуам пуллэсь (туннэ но ворекъя). Кыкетӥез - сыӵе ик пуллэсь но пиялалэсь. Куинетӥез, пичиезгес но дуноез - зарнилэсь. Ӝуждалаез 180 сантиметр, секталаез 200 килограмм. Кинлы меда шуд усьылэ кык центнер зарни юдэсэз адӟыны? Бордаз ворекъяло ляпис-лазурь, бирюза но сердолик. 1922-тӥ арын Говард Картер музон археологъёсын ӵош гробницаез усьтӥз но зарни арбериос пӧлысь адӟиз куасьмем сяська тугокоез. Тутанхамон вӧзы сое понэм кышноез. Дыр жалям сяськаосты но. Борддорын ошемын Тутанхамонлэн 28 килограммъем зарни маскаез. Милемды оскытӥзы: со лэсьтэмын кулэм фараонлэн ымнырыз вылысь. Тодам лыктэ маскаез Москвае вайылэмзы. Билетлэсь дунзэ вунэтӥ ни. Ӝыны нунал черодын сылыса но сое адӟыны ӧй быгаты - сокем трос калык вал. Татын, музейын, нокин уг ӵашеты но уг донгаськы. Жаль, кема сылыны дыр ӧвӧл. Адӟоно на Тутанхамонэз вандылэм ӝӧксэс (вылаз вир вишты но кылемын), Нефертитилэсь арбериоссэ (короназэ Берлинэ нуиллям), обезъянлэсь мумизэ, лыдтэм-чоттэм дуно котыръёсты. х х х Пирамидаосты учкеммы бере васькиськом нёжалэ. Тани со - олокӧня книгаосысь адӟылэм сфинкс. Арабъёс сое нимало абу-эль-хол (дэймытонлэн атаез). 73 метръем лев мугор но адями йыр. Куд-огез лыдъяло: йыр - Хефрен фараонлэн ымнырыз - возьма Хефренлэсь пирамидазэ. Дауръёс ӵоже сфинксэз уно пол согылӥз луо. Куддыръя кыре кыльылӥз йырыз гинэ. Вань таӵе мадён. Тутмос нимо узыр адями уг быгаты вал фараон луыны. Атаез гожтэм уга: кулэме бере кунын мукетыз ӵыжы-выжые мед кузёяськоз. Огпол Тутмос адӟем паймымон вӧт. Дораз инмар вуэм но шуэм: сфинксэз тузон улысь мозмытӥд ке, фараон луод. Тутмос кылзӥськем. Со историе кылиз фараон Тутмос ИВ нимын. 18-тӥ даурлэн пумаз но 19-тӥ даурлэн кутсконаз Египетын кузёяськизы Наполеонлэн солдатъёсыз. Сфинксэз соос мишеньлы пӧрмытзы но пыӵалъёсын ыбылӥзы. Озьы тушез но нырыз куашказы. Туш отӥяз вуэм Англиысь Британия музее. Олокӧня аръёс ӵоже вераськонъёс мыно ни сое Египетэ берыктон сярысь. Англиос мылкыд каро выль тушез пуллэсь вӧлыны но сфинкслэн ымныраз ошыны. Египетъёс соглаш уг луо: кулэ, пе, зэмос туш. Нош огшоры адямиос дышизы ни туштэм сфинсклы. Амалтэк тодэ ваиськод: Россиысь куд-ог кивалтӥсьёсмы мыддоринскытозязы черекъяло, война бере Германиысь ваем суредъёсты отчы чалякгес келяно шуыса. Янтарь комнатамес яке солэсь дунзэ берыктон сярысь "вунэто". Англилэн нокыӵе правоез ӧвӧл кадь сфинкслэсь тушсэ дораз возьыны. Но сётыны уг дырты.Таӵе ужпумъёсын но асьмеос быдэс дуннеез абдратӥськом. Сфинкс дорысь кошкыкуд, сюлэмыд амалтэк шымырске. Та нёжал - адями визьлэн кылдэм интыез. Дунне вылысь котькыӵе паймымон арбериез адӟыкуд но уд вунэты: сфинкс кадьзэ нокытысь уд пумита ни. Малпа ай: татысен кутскиз ук асьме цивилизация. Удалтоз на меда сыӵе дано шаере вуылыны? Уз ни, вылды. Улон дауред, оло, сю ар кыстӥськоз на, нош такем бадӟым учыред уз луы. х х х Ӵошатэлэ та городъёсты. Каирын улэ ог 12 миллион мурт. Кыткем вал Луксор вамен потэ ӝыны часкын. Но таиз - Египетлэн азьло шоркарез (столицаез). Арабъёс оскыто: кин Луксорын ӧй вал - со Египетын ӧй вал. Луксоре ми лыктӥм пятницае, 13-тӥ мартэ. Сыӵе нунал но лыдпус огазе тупало ке, шудтэм учырез вить, шуо. Вылаз ик, милемды нуизы Дэйр-эль-Бахари нимо храм доры. Таизлэн "данэз" кышкыт. Миым 17-тӥ ноябре храм сьӧрысь куать пиос потӥзы но туристъёс шоры вылӥысен автоматэн ыбылыны ӧдъязы. Ватскыны нокытчы - котырак кӧльыё ӵошал. Ог 60 муртэ виизы но сӧсыртӥзы. Полиция вань террористъёсты быдтӥз. Соос Египетысь ик вылӥллям. Ӵыжы-выжыоссы сьӧськабъёслэсь шӧйёссэс ӧз басьтэ. Соосты ватӥзы ни кун чотын. Берлогес та учырез герӟазы Израилен но Америкаен. Соос, пе, турттӥзы Египетэ ветлӥсь адямиослэсь лыдзэс кулэстыны. Малпамзы кӧня ке пӧрмиз. Миленымы ӵош Дэйр- эль-Бахари дорын сокем уно калык ӧз юмша. Храм вӧзын кылем сӥзьыл шумпотымон учыр но вал. Матын ик - Тутанхамонлэн гробницаез. Сое 1922 арын усьтэмлы миым тырмиз 75 ар. Соин валче ӵапак та нёжалын возьматэмын вал Италиысь Джузеппе Верди композиторлэн "Аида" операез. 5 сюрслэсь трос адями учкиз. Милям гидмы, Болгариысь чебер нылкышно Таня, туж данъяськыса вераз: отын, пе, кырӟаз Болгариысь но хор. Кенешемын арлы быдэ сыӵе ужрад ортчытъяны. Дэйр-эль-Бахари вашкала дырысен герӟаськемын кышномуртэн. Тутмос И фараон кулэм бере, со интые ӧз сюры кунэн кивалтыны ярамон пиосмурт. Египетлэн историяз нырысьсэ но берпуметӥзэ кузё луиз Тутмос И-лэн Хатшепсут нылыз. Карттэк кыльыса, аслыз туган каре Сенмут нимо министрзэ - архитекторез. Нёжал пуме, гурезь выжые, таиз ӝутӥз улыно-вылыно храм. Кышномурт сямыныз Хатшепсут ӧз яраты ожмаськыны, юнгес сюлмаськиз культураез азинтыны. Атаезлы сӥзьыса, ӝужытэсь юбоос ӝутъяны висъяз туж уно зарни, со вакытэ гожъямъя - тысен мешокъёс мында. Луксорын вамышлы быдэ история. Дворецлы кельшись липеттэк храм доры вуыса, гид Ахмед Саид, Москваысь Ломоносов нимо университетэз йылпумъям маке, милесьтым юаз: - Тани кык борддор. Маин соос пӧртэмесь? Номырзэ ӧм синйылтэ. Пӧртэмез сыӵе гинэ вылэм: огез ӝутэмын 3 сюрс арлы вазьгес. 30 даурлы азьлонгес! Бератаз дугдӥськом ог метр кузьда излэсь вӧлэм скарабей вӧзы. Удмурт сямен вераса, скарабей - кыед бӧчы (боздоро). Вашкала Египетын туж вылӥ (священной) лыдъяськылӥз. Уно сюрс муртъем войско со азьын дугдылӥз, палэнскемзэ возьмаса. Бозго уг ке вырӟылы, воинъёс кожыса кошко. Из скарабей котырын туннэ но трос калык. Гид оскытэ: - Со котыртӥ куинь пол котырскид ке, чебер малпанэд быдэсмоз, дас пол ке - шуддэ шедьтод. Ваньмыз сямен дас пол берытско. Урдлые чигемын вал бере (тазэ берлогес мадё), куинь пол сяна котырскыны кынары ӧз тырмы. Лякыт ик адямиез шудо карыны. Египетэ вай, кыед боздоро котырын эктыты но - ужез быриз. Серекъятэк верано ке, котькудмы сокем шудоесь, макем шудоен лыдъяськом асьмеды. * Тутанхамонлэн зарнилэсь кисьтэм "ымнырыз". * Дано сфинкс - адями ымныро лев. * Одӥгез липеттэм храм. Автор тау каре "Москва-тур" фирмалы, материал люканы юрттэмез понна. 12 АПРЕЛЕ - ПУЧЫ АРНЯ Та нуналэ Иисус Христос Иерусалим городэ вуиз. Солэсь азьвыл Инмарлэн пиез Вифаниын Лазарез улӟытӥз - солэн шӧйыз сисьмыны кутскем вылэм ини. Озьы Ииусус возьматӥз, кулэмысь улӟыны луоно шуыса. Иерусалимысь калык сое шумпотыса пумитаз. Одӥгъёсыз дӥсьсэс кыльылӥзы но Иисус азе музъем вылэ вальылӥзы, мукетъёсыз пальмалэсь вайёссэ пыд улаз куязы. Иисуслэн гинэ сюлэмыз кайгуэн пачылмемын вал. Инмарлэн верамысьтыз со тодэ вал, кык нунал ортчыса, та калык ик сое синазькыль кароз шуыса. Азьланьын сое витё Голгофа гурезь, кирос, кулон но улӟон. Берекет МУШ ВОРДОН - ПАЙДАЁ УДЫС Туж кема аръёс талэсь азьло ик удмуртъёс муш вордыса улӥллям ни. Нырысь ик соос нюлэсъёсысь кыр мушъёсты кутылӥллям. Со понна асьсэос кор люкетлэсь гырк лэсьтылӥллям яке бун курлэсь, кыз суллэсь, муш кутон йӧндырыса, кыз=ъёсы, пужымъёсы ӝутъялозы вылэм, отчы пыртозы вылэм муш семья. Берлогес ини колодочной умортоос лэсьтыны кутско (1-тӥ суред) но бакчаосазы яке нимысьтыз пасекаосын возё. Таӵе умортоосыз рамаоссы сюсь лэсьтыны ӧй вал на. Вылӥяз кечат лэсьтэм кык пул борды мушъёс асьсэос сюсь кыско вылэм. Та амалэн муш вордонлэн йӧно-башо пайдаез л: сюсь но тус-тас луэ, муш семья но ӵемысь бырыны шеде. Янгышен мушлэн мумыез ке быре, быдэс семья но уг улы. Собере ини удмуртъёс, мукет калыкъёс сямен ик, рамаен умортоосын муш возьыны кутско. Нырысь ик лэсьтылӥзы "левицкой" умортоос (2-тӥ суред). Соослэн утчан- утялтон ӧссы мышказы вылэм. Мушез та ӧсэтӥ гинэ утялтылӥзы. Талэн умоез тани ма бордын - основной карез (со умортолэн шор вадьсаз луэ) уг исаськы, бертӥз гинэ чечыен рамаоссэ вошъяло вал. Отӥяз "дадан" (3-тӥ суред) умортоос лэсьтыны кутско. Али но соос сыеесь. Таӵе умортолэсь вылӥзэ копак усьтыса, рамаоссэ басьяно-утялтоно. Муш воён туж пайдаё удыс луэ. Чечы бичакузы, мушъёс юосты, будосэз опылять каро но ӟеч урожай басьтыны юртто. Чечы сяна, эмъюмлы мынӥсь мушсир (прополис) но люкало. Муш туж тыршись-ужась маке. Туж умой ужась адямиосты юнме уг верало муш кадь тыршись шуыса. Со дыре ик муш яратэ чылкытэз. Ыж гонлэсь вурем дӥськут соослы уг яра - отчы пыдъёссы ӵемто. Уг ярато пӧртэм кӧш зынъёсты. Мылкыд карисьёс, басьтӥське та уж борды, уд жалялэ. В. ЛЕБЕДЕВ, Ижевскын улӥсь. Художник пальпотэ. Суредъёсыз Д. Полухинлэн. ШАРАЯНЫ ЛЭЗЕМЫН ӦЙ ВАЛ 1948 ар: сютэм тулыс Туннэ соос губырскемын, пересьмемын ни - секыт война пыр потэм нылкышноос но пиосмуртъёс, пельпум вылазы гурт хозяйствоез ӝутэмъёс. Секыт ож йылпумъяськем бере, калыклэсь чиданзэ эшшо огпол кутскыса сэстӥз на инкуазь: кизем ю-нянь ӧз удалты. Нош сётэм планэз быдэстоно! Кызьы, кин чотын? Война бере куинь арзэ Удмуртия та ласянь сётэм кылзэ дыраз быдэсъяз. 1945, 1947 аръёсы тысё культураос ӟеч потӥзы, нош 1944, 1946, 1948 аръёсы куазь асьмеды ӧз жаля - чутрак няньтэк кельтӥз. 1948 арын ноябре ортчем ХИХ областной партийной конфренциын пусъемын вал гурт производстволэн шӧдскымон куашкамез, соин ӵош "кивалтон удыслэн лябӟемез". Колхозник трудодень понна нянь но, уксё но ӧз басья. Калык куанермиз. Кин быгатэ - колхозысь кошкиз. Сыӵе вал югдур интыосын. Нош Москвае, "советской калыклэн быдӟым вождезлы, эшезлы но дышетӥсезлы" И. В. Сталинлы Удмуртиысь музъем ужасьёслэн нимынызы 1947 арын кошке чылкак мукет гожтэт: "Кылем арен ӵошатыса, тусё культураос 40,6 процентлы ятыр кутсамын, ӟег бусыосты паськытатӥм 15 сюрс гектарлы... государстволы ю-нянь вузанъя обязательствомес дыраз быдэстӥм. Миым арен ӵошатыса, 1937 сюрс пудлы тросгес келямын". Со вакытэ Удмуртиысь крестьянъёс, уката но республикалэн уй палаз улӥсьёс, сютэм кылизы. 1948 ар, тулыс. Мар вал 50 ар талэсь азьло? Со сярысь верало историе кылем чуръёс - ВКП(б)-лэн Удмурт обкомезлэн нимысьтыз ёзэзлэн шарае потэм документъёсыз. Соос кылемын архив ӝажыосы. 1948 арын 23 мартэ УАССР-ысь Министръёслэн Советсылэн Председателез А. В. Тронин но партилэн обкомезлэн секретарез А. П. Чекинов вазиськоно луо СССР-ысь Министръёслэн советазы "тужгес но ёрмись" колхозникъёс понна ссуда чотын 5 сюрс тонна нянь висъяны курыса. Г. М. Маленковлы ыстэм гожтэтысь чуръёс: "Ӟег уд быремен, вазь кизем юосты йӧ-зор шуккемен но кынтэмен, уй пал районъёсысь хозяйствоос ю-няньтэк кылизы, соин валче колхозникъёслы люкыны номыр. Тросаз хозяйствоосын аванс чотын калыклы висъямын 1947 арын кутсамез. Арлы йылпумъянъёсъя трудоденьлы быдэ ю тысь 191 колхозын усиз 0,2 килограмм, 735 колхозын - 0,2 килограммысен 0,5 килограммозь. Одӥг грамм но нянь люкемын ӧвӧл 1226 колхозъёсын (республикая со вакытэ 3400 коллективной хозяйство лыдъяськиз). Сютэм улэмен валче, трос гуртъёсын вӧлмемын висёнъёс, адямиос жуммемын". 1948 арын март, апрель толэзьёсы ВКП(б)-лэн областной комитетаз партийной кивалтӥсьёслэсь огез бӧрсьы мукетыз вуо юрттэт курыса шугъяськытӥсь гожтэтъёс. ВКП(б)-лэн Карсовай райкомезлэн (туала Балезино но Кез районъёс) секретарезлэн Л. Олейниковлэн гожтэмысьтыз: 2 мартэ 1948 арын Шараяно ӧвӧл "... 1947 арын тысё культураос удалтымтэен, нош картофка мерттэмын вал туж ӧжыт, ваньзэ 105 гектар, таиз но кынмыны шедиз - куд-ог колхозъёсын калыклы воксё сётыны номыр. Районлэн юрттыны луонлыкез ӧвӧл. Адямиос пумен тросгес но тросгес висё, уката но пиналъёс. Школаын дышетскисьёслэн лыдзы кулэсме, колхозникъёс музон интыосы улыны кошко. Туж зол жуммемъёс пӧлын - 48 мурт. "Красная звезда", "Пызепь", "Динамо" но мукет колхозъёсын улӥсьёс пӧлын трос тӧрнам муртъёс. Парта сьӧрын пукисьёслэн лыдзы кулэсмиз 92-лы. 1947 ар ӵоже колхозъёсысь кошкемын 91 хозяйство. Куд-ог нылкышноос нылпиоссэс куштыса пегӟо..." ВКП(б)-лэн Юкаменск райкомезлэн секретарезлэн А. Жвакинлэн гожтэмысьтыз: 12 апреле 1948 арын. Шараяно ӧвӧл "Трудоденьлы быдэ колхозникъёслы люкемын быдэн 470 грамм ю тысь, нош 43 колхозын - 300 граммозь, 28 колхозын - 300-400 грамм... Трудоденез такем улӥ дунъямен но 1946-1947 аръёсы картофка быремен, калык туэ сютэм кылемын. 121 пинал дышетсконзэ куштӥз, сиёнлы, дӥськутлы ёрмыса. Та лыдпус нуналмысь будэ. Колхозникъёс висё. 50 интыем районной больницаын туннэ нуналлы кылле 80 мурт. Висисьёс дугдылытэк йыло. 6 мурт кужымзэ ыштыса кулӥз ни, куинез соос пӧлысь - сюрес вылын. Ёрмон калэ вуыса, калык лушкаськыны кутскиз... Куд-ог колхозъёсысь (Новобезум, Тылыс, Тришино, Жувам но мукет) семьяен-семьяен улыны кошко мукет районъёсы... Ыстӥсько райздравотделэн кивалтӥсьлэсь Бегишева эшлэсь мыным гожтэм докладной записказэ..." А. Н. Бегишевалэн гожтэмысьтыз: 5 апреле 1948 арын "... гуртъёсын туж трос пыд вылазы султыны кужымзы тырмытэк кыллисьёс. Кесшур, Кынмем, Малые Сюрзи, Куняново палъёс чылкак сютэм кылемын. Колхоз но, колхозникъёс но октябрь дырысен пыжем нянь ӧз адӟылэ ни, пызен суралтэт - февральысен, картофказы быдэсак кынмиз. Шыд пӧзьто кубиста кочонэн, килен, клеверен, беризь сулэн. Тае ик сиё пиналъёссы но. 129 колхоз пӧлысь 76-яз югдур туж секыт. Семьяос пӧлысь 78 процентэз кылемын пудотэк но юртъертэк - ваньмыз сямен соос - пизэс яке кузпалзэс фронтэ ыштэм нылкышноос. 50-аз колхозын гинэ калык умойгес улэ на..." ВКП(б)-лэн Яр райкомезлэн секретарезлэн С. И. Зайнаковлэн гожтэмысьтыз: 21 апреле 1948 арын Шараяно ӧвӧл "... Районысь кивалтӥсьёс ваньзэ лэсьтозы, государстволы нянь вузанэз дыраз быдэстон понна. ... Колхозъёслэн правлениоссылы ас мылкыд каремзыя пудо сиёнлы но колхозникъёслы ю тысь люкыны лэзьымтэ. Куд-ог хозяйствоосын трудоденьлы быдэ висъямын 250-600 грамм нянь. Валамон, соин гинэ, картофкатэк кыльыса, вуоно урожаёзь улыны уд чида. Никольской, Нижне-Чуринской, Удинской сельсоветъёсын улӥсьёс юртъер котырзэс, пудооссэс вузало ни, нылпиоссэс калык вылэ кураськыны ысто. Таӵе югдуре вуэмын 18- 20 гурт..." Сютэм кылемъёслы юрттон вылысь, республика ласянь пӧртэм ужрадъёс кутэмын вал. Кужмогес хозяйствоос пунэмен сётъязы ю-нянь, картофка, сӥль, пиналъёсты школаосын, яслиосын кӧт тырымон сюдыны тыршылӥзы, тысё культураосъя ссуда висъяллязы. Но со туж ӧжыт вал. Тӥни малы 1948 ар Удмуртилэн историяз сьӧд пытьы кельтӥз. Война бере сютэм улон вайыса, тросссэ адямиосты сопал дуннее нуиз. Елена УШАКОВА, Удмурт Республикаысь ЦНДИ-лэн отделэзлэн кивалтӥсез. Правительствоысь иворъёс Удмурт Правительство али пыр-поч ужа матысь дырлы, 1998-тӥ - 2000-тӥ аръёслы, республикалэн социально-экономической азинсконэзъя программалы инъет дасян бордын. Министерствоослы косэмын котькуд предприятиын продукция поттонъя, уждун тыронъя план-графикъёс лэсьтыны. Та ужпум эскеремын луоз Правительстволэн кенешаз. Озьы ик бадӟым инты висъяське выт (налог) бичанэз умоятонлы, угось берло дыре со кун бюджетэ ичи вуэ, нош расходъёс будо. *** Таяз арняе республикаысь организациослы но учреждениослы уждун сётыны 20 миллион манет висъямын луоз. Январь понна уждун тыронъя юрттэт сётэмын Воткинск но Сарапул районъёслы. Правительство азьло сямен ик сюлмаське нылпи пособие сётонэз умоятон сярысь, но сое нырысь ик басьтозы куанер улӥсьёс но пиналзэс огназы будэтӥсьёс. *** Куать апреле ортчиз Правительстволэн кенешез. Со нырысь ик учкиз Правительство, Удмуртиысь Профсоюзъёслэн федерацизы но уж сётӥсьёслэн огазеяськонзы куспын 1998-тӥ - 1999-тӥ аръёслы тупанкыллы инъетэз. Ужрадыз пусъемын вал документын лыдэ басьтоно туала югдурез, луонлыкъёсмес но законодательствоез. Тупанкыл мед юрттоз тэргаськонъёсты быдтыны яке отысь умоен потыны огкыл шедьтыны. Правительство сётэм кылзэ котьку быдэсъяны кулэ, пусйизы люкаськемъёс. Тупанкыллы инъет бордын уж мыноз на. Удмурт Республикаысь Правительстволэн Тӧроезлэн, секретариатысьтыз пресс-центр. Берекет Тӥледлы, кибашлыос ПУЖЫЯТСКОН АМАЛЪЁС Суредъёс вылын сётэмын киын пужыятскыны кӧня ке пумо вурысъёс. Мылкыд карись мурт та пужыосты уже кутыны быгатоз, аслэсьтыз но нылпиосызлэсь дӥськутсэс, корка пушсэс чебертоз. 1-тӥ пужы нимаське козлик шуыса. 2-тӥ пужы бирды пасез вуронлы тупа, соин ик петельной нимаське. Туспуктэм вылын та пужылэн мукет вариантъёсыз а, б букваос вадесын сётэмын. 3-тӥ пужы - тамбурной, таиз вӧзын но а букваен мукет пумо вурыс лэсьтыны суред сётэмын. Суредъёслэн урдэсазы пуктэм куать пужыос (соос ньылез - 4 лыдпусвыллапалан, кыкез а буква вадесын сётэмын) петелька но полупетелька нимасько. Таосыз но бирды пасез вуронлы тупало. Пӧртэмез со гинэ: таӵе вурысэн пужыос лэсьтӥсько басма шортӥ. 5-тӥ пужы герд кылдытэ, озьы ик нимаське но. Л. ВАСИЛЬЕВА. Удмурт Республикаысь Кун Кенешлэсь дас укмысэтӥ сессизэ мукет дырлы выжтон сярысь Удмурт Республикаысь Кун Кенешлэн Президиумезлэн Постановлениез Удмурт Республикаысь Кун Кенешлэсь дас тямысэтӥ (азьло чакламтэ) сессизэ ортчытэмен валче, Удмурт Республикаысь Кун Кенешлэн Президиумез пуктэ: Удмурт Республикаысь Кун Кенешлэсь дас укмысэтӥ сессизэ ортчытон дырез 1998 арын 21 апрельысь 28 апреле выжтоно. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 9 апреле. � 467-И. Кин чеберина? Удмурт нылъёслэн асьсэлэн "Чеберина" конкурссы (толон солэн берпум, йылпумъян люкетэз вал), нош со сяна, шаерамы ортчиз на "Краса Удмуртии" конкурс. Ӟуч нылъёс гинэ таяз пыриськизы шуим ке, янгыш вералом, дыр, малы ке шуоно, 600 мурт пӧлын нокызьы ог выжыысь, одӥг нациысь нылъёс гинэ луыны уз быгатэ - асьмелэн уго вашкала дырысен ӵыжы-выжос сураськыса кошко ни. Чаклалэ ай: городэн выжыяськем удмурт анай- атайёслэн нылпиоссы маин ке пӧртэмесь шат ӟучъёслэсь (шонерзэ ке, пӧртэмесь но, дыр, но таиз ини мукет вераськон). "Краса Удмуртии" конкурс ортчытэмын озьы ик куинь люкетэн. Берпум люкетэз, финалэз вал 4 апреле. Отын ӵошатскизы 20 кузя кылем нылъёс. Тросэз туж егитэсь, пиналэсь ай, школаысь парта сьӧрын пукисьёс. Асьсэды туж йӧно адӟытыны турттэмзы куддыр маскарагес адӟиське: вылӥ манеръёслы уго кӧня ке нуналскын гинэ уд дышы (таӵе ик суред ӧвӧл-а асьме "чеберайёсынымы" но). Королева луиз Наташа Лебедева. Со Ижевскысь, но Вячеслав Зайцев дорын Москваын модель луыса кык арзэ ужамын ни. Ваньмон дыръяз, кызьы шуэ Наташа, яратэ мотоциклэн ворттлыны. Т. Николаева. Наташа Лебедева. Туспуктэмез А. Горбуновлэн. Шӧкыч Паймод но, куалектод но Кинэн ӟыгыръяськи, туннэ но уг тодӥськы Ӟечбур, гажано редакция! Гожтӥсько юмоке витьымтэ шорысь шедеме, мукет сямен, гондыр кие вуылэме сярысь. Соку серекъямон ӧй вал ке но, гуртам бертыса, мадисько нылылы. Синву потытозь горимы. Нылы, жадьыса, ӝог гинэ умме усиз. Но та югдур шоры мукет ласянь учкиськод ке, бӧрдон калэ вуиськод. Ужпум тазьы вал. Ог ӝытэ эше дорын кемагес ӝегатскыны шедьтӥ. Учкисько - педлон пеймыт ни. Милям, нылкышноослэн, угось олома но вераськон шеде. - Бертоно ни, нылы огназ, - шуисько. - Я, бен, ӟеч берт, албастыос шоры эн ӝымы, - келяз эше. Ӧссэ йыг! пытсаз. Зӥбисько лифт бирдыез. "Уробо" ак но, бак но уг вазьы. Ижысь тросаз коркаосын угось кемалась ни лифтъёс уг ужало. Юрт возисьёслэн коньдонзы ӧвӧл. Но быръёнъёс азьын куд-ог интыосын, гажано мэрмы А. И. Салтыков косыса, шӧдске, лифтъёссэс "улӟытӥллям" ик шуо. Со дыре ик отын но татын азьвыл ужасьёссэ дугдытӥллям. Тубатлэсь кутӥськон пулзэ, синтэм мурт кадь, кийыгыриеным утчаса, дӥсьтыса но дӥсьтытэк вамыштӥсько улӥе. Одӥгаз ӧс вадьсын коть мед ӝуалоз вал "Ильичлэн лампочкаез". Тём-тём. Зуп! мырӟиськисько кин ке борды. - Ух!... - ыме тэронтэм кылъёсын кеськиз кыӵе ке воргорон. - Гань-гань бушатскыны уз сётэ! Нырме киыным ӵоксаса, нош ик каллен васькисько. Таяз учыре пыды маке небыт боды мырӟиськиз но кезьыт выж вылэ сапкиськи. Соку ик монэ кин ке кык киосыныз ик бордаз кыскыны кутскиз. Жин! вазиз пияла шуккиськем. Буль-буль вияны кутскиз кыӵе ке ву. Вӧлмем зынъя валай - бушатымытэ ӟенеликысь аракы кисьтӥськиз. Мон ӵыжаськисько, киосыным донгаськисько. Мозмытскыны уг быгатӥськы. Ма, ма адӟон та, гондыр-а, мар-а ӝабыртӥз. - Ы-ы, ы-ы! - ӝуштэ курадӟытӥсе. Валатски: пограм мурт вӧзаз адями вуэмез шӧдыса сайкатскем. Кышноез кожа дыр ай. Вылам кечырскыны выре. Кесяськыны турттӥсько - куарае уг поты. Ньылоны кӧсамын, мугоры дыр! куалекъя. Кызьы но озьы палэнски. Йыр ке йыр, пыд ке пыд, дуласа кадь бызи улӥе. Ӧс доры вуи. Кызьы ульчае потэмме ӧй вала. Ярам, коть, татын сюрес ке но укноосысь тыл пиштэмъя адӟиське ик. Кожи частной сектор шуонысь юртэ доры. Татын но шыртыл кадь ке но лампочка мед ӝуалоз вал. Бер уйин калык кӧлыны выдэм бере татчы вуэм мурт ӵукнаозь лымы коласа ветлоз, потон инты уз шедьты. Но, ма карод на шуыны гинэ кыле на. Улонмы но угось пеймыт уй кадь шимес луиз. Ваньмыз йыромемын, кытчы мынэммес, ма лэсьтэммес ум валаське. Югытэ потон сюрес нокызьы ум шедьтӥське. Нош кинлы ке со туж яра, шӧдске, - калыкез пеймытын возьыны. Быръёнъёслы дасяськыку, депутатэ кандидатъёс таяз учыре но макем кӧё-вӧё вераськизы. Соизэ лэсьтом, таизэ улӟытом. Тылобурдо йӧлын гинэ шат сюдом шуыны ӧзгес дӥсьтэ. Но мон бурдъёсме лэзьыны уг дыртӥськы на: Оскисько - яркыт шунды асьмелы пиштоз. Эрико, шудо улон со милем усьтоз. Тӥ эн сётске пеймытлы, гажано эшъёс, Ӝуатэ сюлэмъёстэс. Мед котьку югыт луоз! С. Федулова, Ижкар. "Италмас" - сяська ӧвӧл, со ческыт бакча сиён Ӝӧк вылын картофкалэсь пӧрам сиён ӧвӧл ке, маке уг тырмы кадь йӧтэ. Зэмзэ но, та бакча емышлэсь трос сиён-юон пӧраны луэ. Нош кык сю ар талэсь азьло удмуртъёс сое уг но тодо вал. Ма, Россие но картофкаез Петр И 1720-тӥ арын гинэ Голландиысь ваиз ук. Нырысь сое чебер сяськаез понна будэтылӥзы. Южной Америкаысь государствоосын: Чилиын, Перуын али но со кырын пушнер но люгы сямен пушъяське, чебер сяськаяськыса. Али Удмуртиын ог дасо пумо картофка мертто. Котькуд аре 50 сюрс гектарлэсь трос. Гуртын улӥсьёс гинэ ӧвӧл, городын улӥсьёс но сад-бакча возисьёс но нырысь ик та ческыт будос сярысь сюлмасько. Картофкаез выжыезлэсь (емышезлэсь) будэто, нош сортэз умоятон понна, кидыссэ но кизё-мертто. Адямилы но пудо сиёнлы мынон сяна, со озьы ик промышленностьын но паськыт кутӥське. Спирт, крахмал, патока, декстрин, глюкоза, каучук - ваньмаз картофкалэн но люкетэз пыре. Та чебер будос шоро-куспо омырез яратэ, музъем 20 градуслэсь пӧсь ке, урод будэ. Мерттыку быръёно югыт интыез, ышыгын солэн пудэз ӵужектыны кутске. Сяськаяськыкуз трос ву киськано. Удалтытӥсь сылалъёс пӧлысь тросгес калий но азот кулэ, фосфор - ӧжытгес. Музъемын калиез тырмымон ке, картофка крахмалэн узыр луэ. Картофкаез бугыр-бугыр дасям музъеме мерттоно. Соку со минерал сылалъёсты капчиенгес басьтэ, выжыяз емышез но тросгес луэ. Мерттэмлэсь азьло картофкаез 10-14 нунал югыт азьын удато, озьы со чаляк будэ, емыш но уно сётэ. Чуръёсы картофкаез 6-8 сантиметрлэсь мур мерттоно ӧвӧл, кусыпсы 25-30 сантиметр мед луоз, нош чуръёслэн виссы - 60-80 сантиметр. Музъем 6-8 градуслэсь кезьыт ке, картофка уг поты. Соин кезьыт муэ мерттэмлэн пайдаез ӧвӧл. Удмуртиысь гурт хозяйствоя научно-исследовательской институтын (азьвыл опытной станция) лаборатория ужа. Отын картофка пырылэсь пробиркаын выль выжы будосъёс алято. Соос нокыӵе висёнлы но нымы-кибылы уг сётско. Кӧня ке ар талэсь азьло татын выль сорт кылдытӥзы солы "Италмас" ним сётэмын. Со зэм ик яркыт ӵуж пушко, Италмас сяськалы укша. Таӵе картофкаез табере уно хозяйствоос будэто ни. Лабораториын ужасьёс "пушкинец", "ранний жёлтый", "свитанок", "киевский", "луговской", "невский", "жуковский ранний", "весна", "романо" сортъёсты но умоятӥллям ини. Картофка бордын тыршись тодосчиос фермеръёслэн 10-тӥ конференциязы дасо пумо умоятэм сортъёслэсь емышсэ возьматӥзы. Кенешон ортчем бере ваем картофказэс кузьмазы пӧртэм районъёсысь лыктэм фермеръёслы. Озьыен, "Италмас" но мукет выжы картофка быдэс шаерамы вӧлскоз, ческыт шӧмыныз но чебер тусыныз уно калыкез шумпоттоз. Н. Возисов, агроном. Туспуктэмез В. Камашевлэн. Сюлмаськытӥсь югдур Кузётэм гурт - куштэм гурт Ижевскысь Воткае мыныку, бур кие кыле Смирново гурт. Тракт дурысен кыдёкын ик ӧвӧл ке но со, тыро-пыдо уг адӟиськы: сокем возъямын "Удмуртнефтьлэн" но тачак мукет предприятиослэн производственной юртъёсынызы. Зэмзэ вераса, учкыны но татын номырзэ. Син шоры соку ик йӧто мызъеме пырем, куашканы дась, начар коркаос, жуг- жаген, силёен тырмем урамъёс, пограм кенеръёс... Мӧзмыт адӟыны таӵе суредэз, мылкыд куашка. Нош куке-соку та гуртын ӟеч-ӟеч коркаос сыло вал, ульчаос писпуосын, садъёсын вожектӥзы. Но дыр отчемъя, ваньмыз воштӥське угось, умой пала котьку ик уг. Смирново кызьы ке али, озьы ик азьвыл но "Машиностроитель" совхозлэн ёзэз вал. Пусйыны кулэ, тужгес но кужмоез. Сюосын ӟеч выжы скал вордӥзы, кунян, парсь. Соосты сюдыны асьсэлэн пудо сиёнзы котьку сямен тырмылӥз. Трос гинэ техника но возизы, вал бадӟым, со дыре вожъяськымон мастерскойзы. Али отделениын одӥг гид кылемын. Отын - 140 йыр скал, ветыл но кунян. Мастерской мырдэм века. Гуртын азьвыл аръёсы ужазы клуб, магазин, почта, школа, медпункт. Али со пӧлысь номыр ӧвӧл. Огшоры вераса, Смирново та вакытэ - куштэм, пашмем гурт. Тросэз татын улӥсьёс мӧйы адямиос, пенсионеръёс. Кызьы бен соос татын уло? - Ма, озьы ик улӥськом, - шуэ отделенилэн азьвыл кивалтӥсез, табере пенсионер Александр Григорьевич Пивоваров. - Кин кызьы быгатэ, озьы ик улэ. Оскиськомы асьмелы гинэ. Юрттэт витьыны нокытысь но нокинлэсь. Быдэс гуртлы кык гинэ ву колонкамы. Но тужгес но секыт эстӥськон ласянь. Пу угось ваёно - утча машина, олокӧня дун тыр. Собере со пуэз вандоно, пильылоно. Нош кытын пересьёслэн кужымзы, коньдонзы? Вуттэмын газ гурт пумозь ик, нош гурт кузя кыскыны, коркаосы пыртаны нокинлы. Мар шуод на, вунэтӥзы милемды совхоз но, солэн кузёез "Ижмаш" но. Зэм но, мар шуод, ветеранлэн ӝож кылъёсыныз соглаш гинэ луыны кыле. Но со дыре ик лыдэ басьтыны кулэ, дыр, "Ижмашын" кылдэм туж секыт югдурез. Мон шонере поттыны уг турттӥськы отысь кивалтӥсьёсты, кулэ соос отделениязы улӥсьёс сярысь сюлмаськыны. Но котьма кар но, ӧвӧл али соослэн со понна луонлыкъёссы. Табере вералом гуртлэн кыкетӥ кузёез сярысь. Со - город. Кӧня ке ар талэсь азьло Смирновоез пыртӥзы Устинов районэ. Городлы угось лэсьтӥськон понна туж кулэ луиз гуртлэн музъемез. Мар гинэ ӧз сӥзе городлэн кузёосыз гуртоослы. Вакчияк вераса, тӥляд, пе, город улӥсьёслэн кадь ваньмыз луоз. Оскизы мискиньёс, табере тӥни курадӟыса уло. Нокинлы но соос кулэ ӧвӧл - городлэн атайёсызлы но, "Ижмашлы" но, "Удмуртнефтьлы" но. Ватсаса вералом на: Устинов районын гинэ эшшо куинь сыӵе куштэм гурт - Ярушка, Октябрь но Тонково. Г. Тихонов. Берекет Тӥ юады вал КЫЗЬЫ БЫДТОНО КИРЕНЬ ВЫЖЫЕЗ Гажано редакция! "Берекетты" пыр валэктон сётэ вал кирень выжыез быдтон пумысен. Бакча шорамы ик бадӟым интыын со копак алямын. Мургес копаса, со интыетӥ сылал но мар кисьтаса быдтыны выри - номыр уг юртты. Картофка но татысь ӧжыт люкаське. Г. Чукмарев, Можга районысь Выль Бия гуртын улӥсь. Кызьы валэктӥзы агрономъёс, киренез (озьы ик мур выжы лэзись мукет жаг турынъёсты - пунысюлэз, кечйӧлэз (осот), пырейтурынэз но мукетсэ) бакчаын будыны сётоно ӧвӧл. Гужембыт уроно. Озьы, выжыяз модос кузя сиён вуытэк, киреньлэн азьланьын будыны кужымез уз ни тырмы. Зэм, одӥг гужемзэ тӥледлы секытгес йӧтоз, нош мукетъят аре ужды трослы капчиялоз, кирень сокем трос уз ни поты. Озьыен, амал одӥг гинэ - уроно, нокыӵе сылалъёсын, ядъёсын выронэз ӧвӧл. Л. ХРУЛЕВА, "Берекет" бамез нуись. Тодматске: выль кырӟан МОН КОТЬКУ ИК ТОНЭН Кылъёсыз Л. Хрулевалэн Крезьгурез П. Кузнецовлэн Вожъяськисько-а мон? Вожъяськисько. Вожъяськисько чебер вожъяськонэн. Соин, вылды, котьку ик тыршисько Сюлмысь быдэстыны вань ужъёсме. Синмаськисько-а мон? Синмаськисько. Синмаськисько чылкыт синмаськонэн. Соин, вылды, котьку ик тыршисько Чылк-чылк дунматыны лул-сюлэмме. Данъяськисько-а мон? Данъяськисько. Данъяськисько удмурт данъяськонэн. Соин, вылды, котьку ик шуисько: "Удмурт шаер, мон котьку ик тонэн!" Некролог "Удмурт дунне" газетын ужасьёс куректэмзэс верало азьло ответственной секретарьлы Николай Филиппович СТРЕЛКОВЛЫ, кузпалыз Людмила Ивановна кулэмен валче. Тау карон Кун Кенешлы, Правительстволы, "Удмурт дунне" газетлэн редакциезлы, кинъёс пыриськизы кузпалмес, атаймес, песятаймес Г. С. Шишовез ватонэ. Шишовъёслэн семьязы. Куӟебай Гердлэн но Ашальчи Окилэн вордскемзы дырысен -100 ар УӴЫПИОС 1. Быдӟым удмуртлэн Куӟебай Гердлэн вордӥськемез дырысен сю ар тырмонэз пусйыса, кунооссэ алигес гинэ келяз вал Марий Эл. Мари-Турек ёросысь Бадӟым Карлыган гурт сюлмысь буре ваиз та адямиез. Малыез валамон: Киров улосысь вашкала Малмыж карын калыкез дышетонъя ёзлэн удмурт люкетэныз кивалтыкуз, Кузьма Павлович трос пол вуылӥз та пала. Карлыган калыклэсь юалляськыса люказ уно кырӟан-веран. Мусо удмуртъёссэ лулысь-сюлмысь дышетылӥз визё-буро луыны. Таяз учыре Удмурт шаерысь лыктэмъёсты лулысь-сюлмысь пумитаз Бигер элькунысь Балтач ёрос. Куинь нунал ӵоже та музъем вылын мынӥзы Куӟебай Гердлэн но Ашальчи Окилэн вордӥськемзы дырысен сю ар тырмонлы сӥзем ужрадъёс. Вуон нуналамы, кызь куинетӥ южтолэзе, уно калык люкаськылӥз Лӧзя гуртэ. Данъян ӝытэз усьтӥз Драмая удмурт кун театрысь актёр, Россия Федерациысь искусствоосъя дано ужась Леонид Романов. Трос пол кылзыса но та адямилы паймемысь уг дугдӥськы: Куӟебай Герд сярысь верано кылыз пумтэм-йылтэм. Таяз радэ но Леонид Григорьевич люкаськем калыкез абдратъяз туж кыло-буро луэменыз, быдӟым удмурт сярысь трос ӟечсэ вераны быгатэменыз. Куӟебай Герд кадь ик шаплы но визьмо вал нырысетӥ удмурт нылкышно кылбурчи Ашальчи Оки. Критик, литературовед Алексей Ермолаев уно аръёс ӵоже ини эскере та адямилэсь улэм-вылэм но ужам сюрессэ. Поэтессалэн вордӥськемез дырысен сю ар тырмонлы сӥзьыса люказ но поттӥз кылбуръёсыныз "Чыртывесь" книгазэ. Бадӟым кузьым луоз со удмурт кылбуретэз яратӥсьёслы. Нош ачиз Алексей Афанасьевич поэтессалэн улонысьтыз данак тунсыко учыръёсын тодматӥз на. Таӵе ӝытъёсты, валамон ни, зол чеберъя жингрес кырӟан-веран. Пор музъем вылэ татысь калыкез шулдыртыны вуылӥз вал Пичи Пургалась "Зарни шеп". Таяз учыре устолыкенызы мальдытӥзы Бобья-Уча гуртысь нылкышноос-арганчиос. Та чебер адямиос пӧлысь котькудӥз вань сюлмысьтыз яратэ аслэсьтыз мусо но дуно эшсэ - арганэз. Пӧртэм удысъёсын тыршо соос: скал кыско, кунян сюдо, лыдъяло-чотало, калыкез выль иворъёсын тодмато... Нош ваньзэс огазея одӥгез - удмурт крезьгурез яратон. Кырӟало-верало гинэ шат мусо апокъёс? Со вискын ик калыкез шулдырто серемес веросъёсын. Арганэз но удмурт крезьгурез яратӥсь эшъёссэ одӥг бугоре биня Россия Федерациысь культура удысысь дано ужась Екатерина Антонова. Солэсь одӥг но бере уг кылё Екатерина Трофимова, Галина Васильева, мукет усточиос. Ансамбльын одӥгез арлыдоез луэ Евдокия Фаресова. Та етӥз адями егитъёслэсь ляб ӧвӧл: соос музэн ик кырӟа, эктэ, тунсыко веранъёсыныз паймытэ. Культура юртэ люкаськемъёс лулзы пытсаськытозь ик чабизы солы. Со вискын кырӟанъёсызлэсь чебер сузьет кылдытъяз Удмурт Элькунысь дано артист Геннадий Бекманов... 2. Ӵуказеяз, кызь ньылетӥ южтолэзе, сюрес вуттӥз Чаддя (Ципья) палъёсы. Малмыжын ужакуз, Куӟебай Герд трос пол вуылӥз та пала. 1919-тӥ арын 5-тӥ толшоре та вашкала удмурт черкогуртын (азьвыл нимыз Тыло) нырысьсэ возьматэмын солэн "Югыт сюрес вылэ" драмаезъя спектакль. Отӥяз та уж инъет луиз быдэс удыслы: "Югыт сюрес вылэ" драмая спектакль бере ик вордскиз, шуыны луоз, Удмурт театр. Культура юртын ӝыт кутскемлэсь азьвыл вуылӥмы Сизьньӧр гуртэ. Чаддя вылысь одӥгез вашкала удмурт гурт но сьӧрлось лыктэмъёсты вите ни вылэм. Музон интыосын сямен ик татын но пумитазы дэра ӵушкон вылэ вӧлдэм буй-буй сукыри нянен. Зэм, кырӟан-веран оглом сыӵе ик. Но тапалан со шер чузъяське бере, адямиослы яра. Ӝытазеяз укыр трос калыкез люказ Чаддя черкогуртысь культура юрт. Тани актёр Леонид Романов нош ик мытэ веранзэ. Со бӧрсьы сцена вылэ пото Бобья-Учалась, Гужношурысь (таиз но Пичи Пурга ёросэ интыяськемын) чебер апокъёс. Леонид Григорьевич Романов азьвыл вакытэз тодаз вайыса серектылэ: "Ашальчи Оки кылбуръёсаз котьку сямен возьматылӥз ултӥям кышномуртэ. Туэ дӥсьтод на меда: уть кыӵе йӧноесь но чебересь". Асьсэос но, Чаддя вылысь удмуртъёс, сюлмысь дасяськиллям та ужрадлы. Ӝытэз мылысь-кыдысь нуизы Лӧзя но Ӟаны (Шор Кушкет) школаосысь дышетӥсьёс Ольга Сапожникова но Виктор Камаев. Куӟебай Гердлэн но Ашальчи Окилэн улэм-вылэмзы но ужамзы сярысь тунсыко ивортонъёс дасяллям Сэръялась дышетӥсь, "Тюрагай" нылпи садлэн кузёез Леонид Сапожников но Чаддя школаысь дышетӥсь Ирина Жукова. Макем мусоесь вал Ӟаны (Шор Кушкет) школаысь покчиос но быдэ вуись пиналъёс. Та палась удмуртъёслэн дӥсенызы соос яркыт сяська кылдытӥзы пумиськон дыръя. Тупалан но туж трос усточиос. Сю ар тырмонлы сӥзем ӝытэз вань мылкыдзэ сётыса шулдыртӥз Туръя починкаысь дышетӥсь Василий Никитин. Балалайка триньгетэм улсын чузъяськем чебер гуръёс котькудӥзлэсь сюлэмзэ вырӟытӥзы, луоз. Удмурт Элькунысь Писательёслэн огазеяськонзылэн тӧроез прозаик Олег Четкарёв, критик, литературовед Алексей Ермолаев, журналист, кылбурчи Анатолий Демьянов, Удмурт Элькунысь Культурая министерствоысь валтӥсь ужась Людмила Жуковская асьсэлэсь верано кылъёссэс выльысь но выльысь герӟаллязы та быдӟым удмуртъёслэн нимъёсынызы. Куӟебай Герд но, Ашальчи Оки но та палан ужазы бере, ветлонъямы весь тодыны тырши: вань на-а татын та адямиосты тодӥсь муртъёс? Ӝожомыса верано луэ: Куӟебай Гердэз но, Ашальчи Окиез но адӟем калык ӧвӧл ни. "Югыт сюрес вылэ" драмаез пуктэм труппа но таркаськемын. Зэм, Ашальчи Оки сярысь вераны быгатӥсьёс вань. Соос но - кинлэсь ке кылыса гинэ. Лӧзя гуртын вордскиз но будӥз мукетыз дано удмурт гожъясь - Григорий Медведев. Куӟебай Гердэн трос пол пумиськылӥз, луоз. Но ӧз кылды таизлы но югыт дунне вылын кема улыны - даурез укыр вакчи вылэм. Григорий Сергеевичез буре вайыса, Удмурт шаерысь вуэмъёс гожъясьлэн юртэз борды итэм пул вылэ улэп сяськаос понӥзы. Удмурт Шаеръюртын ужась Светлана Гаврилова калыкез тодматылӥз Куӟебай Гердлэн улэм-вылэмезлы но ноку вунонтэм ужъёсызлы сӥзем адӟытонэн. Таяз учыре но милемын ӵош вал Пичи Пурга ёросысь Вуж Монья гуртысь усточиос. Любовь Имполитова но Станислав Перевощиков быдэс короб тыр киужъёссэс ваиллям. Ӝуткам но лякиё шобрет, куэм айшет, ыж гон чулка, сарба, тусьты-пуньы, сюмык кие туж кутымон но учкымон. Нош басьтӥсь ӧвӧл. Малы? Дуно, шуо. Нош ӟеч-ӟеч чаклано ке, озьы меда? Куэм айшет, кылсярысь, сылэ кык сю манет. Зэм, дунтэм ӧвӧл. Нош кӧня нюлам вуэн пылатэмын!.. 3. Бордазы маин сокем кыско тупал удмуртъёс? Нырысь ик - та палан куно пумитаны, сое сюдыны-вордыны быгато. Асьмелэн ӝӧк вылмы малы ке котьку начаргес луэ. Нош тупал удмуртъёс сярысь озьы уд шуы: ӝӧк выл ӧжыт гинэ уг някырскылы котькыӵе сиён-юонлэсь. Ватка сьӧрысь бускельёсмы золгес сюлмасько кивоштӥсьёссы сярысь. Сое ӟеч валаны луэ таӵе суредъёс вылысь но. Вылын Ушма гуртын йыг-йыг сылэ нылпи сад. Вылыз но, пушкыз но выль ай. Ваньмыз тылтэк ворекъя. Таӵе юртын визьнод люкаса, покчиослэсь ӟеч адямиос гинэ мед пӧрмысалзы. Чаддя черкогуртын сылэ тужгес ӟеч школа. Юртэ пырон вадьсысь сюресэз уин югдытэ туж яркыт тыл. Пиналъёслы, ӟеч дышетскон понна, котькыӵе луонлыкъёс кылдытэмын. Котькуд класс нимаз кылиське-дӥсяське (котькуд ӧс вадьсын - синучкон). Выж вылын - мрамор, борддорын - мрамор. Одӥгаз сэргын сыло дуно компьютеръёс... Удмурт шаер таӵееныз ушъяськыны уз быгаты. Асьмелэсь мылкыдмес гинэ сӧро ликыр- лякыр сылӥсь школаос, соослэн чильпырась липетъёссы, ӟечырась выжпулъёссы, туссэс- буйзэс ыштыны кутскем борддоръёссы... Пиналъёс гажало выжызэс. Чаддя школаын дышетско удмуртъёс, бигеръёс, поръёс,чувашъёс, ӟучъёс, полякъёс. Син шоры тужгес йӧто бигер пиналъёс. Аслыксэс сокем юн утьыны сюлмасько - урокын дышетӥсьлэсь верамзэ кылзо, йыразы тэбетэй изьыяса. Асьмелэн югдур чылкак музон. Та ужпумез, гуртъёсы потыса, юри эскерыны малпады ке, куд-ог интыосысь гинэ пумиталоды чын чебер удмурт кылын вераськыны быгатӥсь пиналъёсты. Школаосы юри вуылӥды ке, нокытысь уд шедьтэлэ удмурт дӥсен шоголляськись пиналъёсты. Та палан быгато котьмае утьыны. Чаддя черкогуртысь синпель юрт (музей) узыр но аспӧртэмлыко. Одӥгез тунсыкоез, дыр, со та улосын. Вашкала тӥрлыкъёсын артэ интыямын туалаосыз. Татын ик - вашкала но туала Чаддя. Одӥгаз сэрегын шӧдскымон инты висъямын Куӟебай Гердлы но Ашальчи Окилы. Агаен сузэр кадь соос - сокем мусоесь, сокем матын ог-огзылы. Асьмелэн ичи таӵе юртъёсмы. Асьсэлэн байлыкенызы данъяськыны быгатозы алнашъёс, можгаос, дэбесъёс гинэ. Тупал удмуртъёс доры вуылыкуд паймиськод эшшо огезлы: укыр етӥзэсь соос. Ас выжызылэн ӵуказе нуналыз сярысь вис карытэк сюлмасько. Удмуртъёс уз быре, пӧламы луизы ке Леонид Сапожников, Александр Кунаев, Василий Никитин, Иван Ермаков кадь адямиос. Лӧзя гурт кенешлэн тӧроез Анатолий Мухин ӟуч. Синмаськымон но вожъяськымон адями: аслэсьтыззэ сяна, ӟеч тодэ удмурт, бигер кылъёсты. Асьме дорысь таӵеоссэ пумиталод меда? Уд. Куд-ог удмуртъёс меӵак палэнтӥсько вордэм анайзылэсь. Зэм, вераськыны ӧдъяло ке, кык кылэз ваче герӟаны уг быгато. Паймиськод эшшо мукетызлы. Асьме кивалтӥсьёс таӵе ужрадъёсын кема пукыны уг чидало.Тупалан югдур чылкак мукет. Балтач ёрос кивалтэтлэн тӧроезлэн воштӥсез Гарифзян Мухаметшин но татысь культура удысэз валтӥсь Радик Михайлов куинь нунал ӵоже сьӧрысьтымы ӧз кыльылэ (таӵе учыръёсты, зэмзэ но, шер пумиталод). Нош жадемзы пумысь ӝожтӥськемзэс огпол но ӧм кылэ. х х х Куӟебай Гердэз но, Ашальчи Окиез но улон ӧз жаля: сэстӥз но жугиз, бышказ но чепылляз. Куӟебай Герд но, Ашальчи Оки но меӵак трос пол пумиськылӥзы кулонэн, но кыӵесэ ӧз пыре - чидазы. Удмурт уӵыпиос весь оскизы ӟеч улонлы. Нош со пӧяз соосты, чималиен шудӥз... Удмурт уӵыпиос чирдэмысь ӧз дугдэ. Али но кырӟало. Елена ВИНОГРАДОВА. Гожтӥсьлэн туспуктэмъёсыз. БЫДӞЫМ ГОРОДЫН - БАДӞЫМЕСЬ УЖЪЁС Международной Восточно-Европейской университет ас дораз пӧртэм куноосты ӧтьылэ. Татчы вуыло Россиысь тодмо политикъёс, юристъёс, экономистъёс, тодосчиос, писательёс. Кылем арняе отын пумиськон ортчиз Новгород областьлэн вице- губернатореныз Валерий Иванович Трофимовен. Котырес ӝӧк сьӧрын вераськонэ ӧтемын вал Кун Кенешысь, мэриысь депутатъёс, предприятиослэн но фирмаослэн кивалтӥсьёссы, журналистъёс. Кызьы уже паськытгес кутоно инвестициосты - таӵе ужпум сэрттэмын-пертчемын вал пумиськонын. Мукет улосвылъёсын ӵошатыса, Новгород областьын инвестициосын ужан умойгес радъямын. Таӵе лыдпус: кунгож сьӧрысь вуэм коньдонэн ужась предприятиос Россиын 13 процент гинэ, Новгород областьын - 83 процент. Нош дуннеысь странаосын ке ӵошатоно, инвесторъёсты кысконъя Россия 78-тӥ интыын сылэ. Татын ик юан кылдэ: маин бен бордаз кыске кунгож сьӧрысь инвесторъёсты быдӟым Новгород? Ваньмыз кутскиз Россиын путч ортчем бере, шуиз В. Трофимов. Новгородлэн Думаяз быръёнъёс выль сямен ортчизы. Соослэсь азьвыл таӵе валтӥсь курон пуктэмын вал: быръёно ас ужзэс ӟеч тодӥсь-валась адямиосты. Бен, со понна милемыз туж зол алӥзы партиын ужасьёс, вераз В. Трофимов, но улон возьматӥз: ми шонер сюрес вылын. Туннэ законодательной собранимы Россиын огез азьмынӥсез луэ. Вице-губернаторлэн верамезъя, Новгородлэн Думаяз 27 мурт ужа. Соос пӧлын ӝыныез - ужбергатӥсьёс, сомындагес ик - пӧртэм удысъёсын кивалтӥсьёс, куинез гинэ - врач, дышетӥсь но общественной ужен вырись. Огъя вераса, областьын политической югдур умой. Москваысь кивалтӥсьёс но ужаны уг люкето. Озьы бере, кунгож сьӧрысь ужбергатӥсьёс но татысь предприятиосы коньдонзэс кышкатэк висъяло. Мукетыз тодмет: инвестициосты паськыт уже кутон понна татын пӧртэм льготаос тупатэмын. Кылсярысь, предприятие, пыд йылаз султытозь, вань налогъёслэсь мозмытэмын. Бюджетъя законын (24-тӥ ёзэт), сыӵе предприятиослы юрттон вылысь, нимысьтыз фонд усьтэмын. Валамон, ужбергатӥсьлы ужзэ ӟеч-ӟеч радъян понна, дыр сокем трос уг висъяськы, шуом, 3-6 ар. Сыӵе юрттэт басьтыса, предприятиос областьлэн бюджетаз коньдон чалякгес пыртыны сюлмасько. "Кыӵе со власть, налогъёс бичаны уг быгаты ке!" - шуиз В. Трофимов. Али Новгород областьын 200 пала предприятие кунгож сьӧрысь инвестициос чотын ужа. Соин ик ужтэк кылисьёсын ужпум но лэчыт ӧвӧл. Уждунэн ӝеганъёс туж шер луыло. Татын нош ик тодэ лыктӥз одӥг депутатмылэн верамез. Новгородын, пе, дышетӥсьёс пумитъясько, мугез: уждунзэс куинь нуналлы ӝегатӥллям. Умой соиз но: Новгород интыяськемын Москва но Санкт-Петербург вискын - поттэм вузъёсты меӵак нуыны луэ та бадӟым городъёсы-рынокъёсы. Татын кемалась уг верасько ни музъем пумысен. Вузано-а, ӧвӧл-а сое? Вузано! Таӵе малпанэ вуэмзы бере, вань музъемзэс лыдъязы-дунъязы. Асваньбурлы (недвижимость) чурыт налог тупатӥзы. Табере уг кышкало: музъемзы тус-тас уз луы. Палэнысь кузё кие сюрыса но, нырысь ик бюджетсылы пайда ваёз. Куд-ог дыръя "Новгородын эксперимент" сярысь кылоно луэ. Но асьсэос кивалтӥсьёс со сярысь вераськыны уг дырто. Вице-губернатор но меӵак шуиз: "Пӧртэм пумо презентациослы ми пумит". Зэм, соосты валаны луэ. Кӧня ӟеч мытэм ужъёс асьме Россиын азинскытэк быро. Я вожъяськиськом, я соку ик пыд пуктӥськом. Азьпала учкыны быгато Новгородысь кивалтӥсьёс. Кызьы тодмо, соос ас ужан, улон амалъёссэс, шедьтонъёссэс кыре ӧз поттэ. Ижевск городэн ӵошатоно ке, Новгородын куинь поллы ӧжытгес калык улэ. Асьме Правительствоын инвестициосты уже кутонъя программа дасяське гинэ ай. Соин ик Новгород областьысь вице-губернаторлэн В. Трофимовлэн асьме доры вуылэмез пайдатэк уз ортчы. Т. БАННИКОВА. Пиналъёс азьланьтозы "Кытын вордскид, отын ик ярад", - шуэ калык. Та кылъёс пырак Михаил Никандрович Попов сярысь кадь верамын. Шаерысьтымы гурт хозяйствоын ужасьёс пӧлын со тодмо адями. Можга ёросын администрацилэн тӧроезлэн нырысетӥ воштӥсез луыса дас куать ар ужа ни. Со одӥгеныз секыт удысэн - гурт хозяйствая управлениен кивалтэ. Нош можгаос ю-нянь будэтонъя, сӥль-йӧл поттонъя республикаямы азьпал радын мыно. Шонерак вераса, отын Михаил Никандровичлэн но тыршемез вань. Со вордӥськем палъёсысьтыз мукет азе кык пол гинэ кошкылӥз: армие но Ижысь гурт хозяйствоя институтэ. Михаил Попов агрономия факультетэз горд дипломен йылпумъяз. Со дырысен быдэс улонзэ гурт хозяйствоен герӟаз. Оштолэзе солы куатьтон ар тырме . Вордскемын Александрово гуртын. Пычасысь шор ёзо школаез йылпумъяса, кык ар ас гуртаз "Красная Знамя" колхозын ужаз, собере куинь ар армиын вал. Гурт хозяйствоя институтэз быдтэмез бере, Можгинской Совхозысь отделениен кивалтӥз. Отын ю-нянь но сад но, пудо но будэтон сярысь сюлмаськиз. Трос тодон- валанэз юрттӥз гуртысь вань удысъёсты азинтыны. Районысь кузёос валазы Михаил Никандровичлэсь быдэс хозяйствоен кивалтыны быгатонзэ. Нырысь сое бере кылись "Гигант" колхозэ ыстӥзы. Куать ар ӵоже хозяйство ӝутскиз, трос гидъёс, кеносъёс лэсьтэмын вал. Техника но выльдӥськиз. Азинскон сюрес вылэ "пуктоно" луиз на "Красный путь" колхозэз но. Таяз хозяйствоын Михаил Попов тямыс ар тыршиз. Гурт калыклы, татысь инкуазьлы дышиз, нокытчы мынэмез уг пот ни вал. Зол кивалтӥсез районысь тӧроос кемалась син шоразы возизы, дыр вуиз но ёрослэн кивалтэтаз ӧтизы. Ныши-Каксиысьтыз кошкон шуг ке но "етӥз", люкам тодон-валанзэ быдэс районэ вӧлмытыны но уже кутыны соглаш луиз. Нош кӧня ке дыр ортчыса, солэн тыршемез адӟиськиз ни. Район ю-нянь будэтонъя но пудо вордонъя республикаямы азьпал радэ вуиз. Озьы ик лэсьтӥськон ужъёс туала секыт аръёсы но ӧвӧл дугдытэмын. Гуртын улӥсьёслы пӧртэм материалъёс, техникаен юрттэт сётӥське. Михаил Попов вордскем музъем вылаз чебер пытьы кельтэ. Михаил Никандровичлэн быгатыса ужамез Трудовой Горд Знамя орденэн но медальёсын пусъемын. 1985 арын Удмурт Республикаысь гурт хозяйствоын" Дано ужась" ним сётэмын, нош ортчем арын Россиысь Федерацияя таӵе ик дано ним басьтӥз. Михаил Попов колхозъёслы быдтонлы пумит луэ, оске, соос ас быгатонлыксэс быдэсак ӧз возьматэ на шуыса. Тани миым районысь хозяйствоосын котькуд гектарысь 21,5 центнер ю тысь, 115 центнер картофка, 267 центнер бакча сиён басьтэмын. Нош одӥг скаллэсь 2879 килограмм йӧл кыскемын. Тужгес но умой ужало "Заря" (кивалтӥсез Валерий Иванов), "Россия" (кивалтӥсез Аркадий Вершинин), "Красный Октябрь" (кивалтӥсез Иван Бабкин) колхозъёс. Михаил Никандровичлэн быдэс семьяез гурт хозяйствоез пыр-поч тодэ. Кышноез но кык нылыз но, Ижысь Гурт хозяйствоя институтэз йылпумъямын, покчиез но Татьяна татын ик дышетске (али со гурт хозяйствоя академия нимаське). Озьыен, дано агроном шутэтскыны потӥз ке но, солэсь ужзэ азьланьтозы пиналъёсыз. Ачиз но Михаил Попов задор мылкыдын гурт хозяйство удысын тырше на, улоназ трос ӟечсэ лэсьтоз ай. Н. Возисов. Дэри шоры учкытэк Ижысь 79-тӥ школаын ужаз бырйисьёсъя куинь участок. Тани отысь потэ ненег мугоро мӧйы воргорон. Гордалэс тушез, сюбег синъёсыз но мукет тодметъёсыз возьмато удмурт луэмзэ. - Ӟечесь-а, атай! Удмурт кыллы паймыса, лэся, песятай шуак луиз: - Умой ай, умой... Тодматскиськом. Коробов Илья Михайлович, 70 арес. Вордскемын но улэмын Сюмси ёросысь Выселок гуртын. Пересьмыса вуиз Иже. - Загайнов пала кариськи, - тушсэ маялтыса вера воргорон. - Газетъёсын гожъязы, укыр ӟеч адями шуыса. Озьы, дыр. А депутатэ кинэ бырйи - уг тодӥськы ни. Вунэтӥ... Тани тодмое лыктэ. Тожо пенсионер ни. Валамон, соку ик юасько кинлы дурбасьтэмез сярысь. - Только Салтыков, - киыныз омырез вандэ Фёдор Николаевич Сальников. - А тодкод-а малызэ? Таиз жугемын ни, озьыен, пыремын. Нош пырем мурт ньыль арзэ чидалоз на... Ортчисько участокъёстӥ. Ваньмыз огсыр ортче. Син шоры йӧтэ чакласькисьёслэн трос луэмзы гинэ. Азьло аръёсы сыӵеос ичигес вал. Нош али котькудӥз кандидат аслэсьтыз адямизэ участоке ыстэм, шӧдске. Татысь ик пумитасько Валерий Кузьминэз, Ижысь администрацилэн кивалтӥсезлэсь воштӥсьсэ. Лыктӥ, пе, учкыны, кызьы радъямын вузкарон. Ӝытлань ортчи на мукет школаостӥ! 69-тӥ школаысь потӥсьёслэсь юалляськыса валай: уноез бырйисьёс куаразэс сёто нылпи врач Татьяна Брызгалова понна. 19-тӥ школаын но чакласькисьёс трос вал. Ми отын дыръя вуиз вице-мэр Галина Ахророва. Мылкыдыз умой. Городъя, пе, ӝыныез пала бырйисьёс куаразэс сётӥзы ни. Тӥни сыӵе вал арня нунал Буммашын. Уно праздникъёс шоры учкытэк, калык быръёнъёсы пыриськонлэсь ӧз палэнскы.Ӧз кышкаты сое дэри но. Озьыен, адямиос асьсэлэсь улонзэс киязы возьыны тыршо. Урод шат? И. Лебедев. Ӟеч улон понна 12 апреле Ижын улӥсьёслы городлэн Думаяз 30 депутат быръёно вал. Со капчи уж ӧвӧл, уката ик отчы быръёно ке 200 мурт пӧлысь. Ижысь Думае быръёнъёс матэктэмъя, депутатэ кандидатъёс ӵемгес пумиськылӥзы ас бырйисьёсынызы. Нош куд-огез сыӵе пумиськонъёс ӧз ке но ортчытъя, калыклы ачиз сярысь ивортылӥз пӧртэм листовкаос пыр. Бырйисьёсты ас бордазы кыскон понна котькуд кандидатлэн аслаз амалъёсыз вал. Со амалъёслэн пайдазы ӟеч адӟиськиз ни быръёнъёс нуналэ. Вератэк уг луы сое но: куд-ог кандидатъёс ог-огзэс олокызьы но сьӧдманы выризы. Нош вань калык али одӥг ужпумен ёрмемын: кызьы потоно кылдэм курадӟонысь? Кин солы самой оскымон сюрес ӵектоз? Депутатэ кандидатъёсын ортчылэм пумиськонъёсы вуылыса, монэ туж паймытылӥзы куд- ог адямиослэн таӵе малпанъёссы: "Я, азьвыл мэрмы понна ик, дыр, куараосмес сётомы. Выльзэ бырйимы ке, со нырысь ик аслыз капыръяны кутскоз, улонмы уката но уродмоз. Нош азьлоез сокем сьӧраз уз ни ортчы - мар солы кулэ, ваньмыз вань ни..." Таӵе малпанъёссэс куддыръя шараяллязы дышетскем муртъёс но. Со ик тужгес но вожез поттэ. Озьы малпаськыны кулэ меда зэмос гражданинлы?! Сыӵе мылкыдын асьмеос бырйыны кутскимы ке котькуд кивалтӥсез (мэрез, депутатэз), ноку ӟеч ум улэ. Уно аръёс ӵоже адямиос дышетэмын ини: кулэ бере - мыноно. Котькудӥз ачиз тодэ кин понна куаразэ сётыны. Ижевскысь Устинов районысь Родниковской округын улӥсьёс (Автозаводской, Барамзина, Петров, Коротков нимо урамъёс) куараоссэс мыло-кыдо сётӥзы "Иммар" предприятилэн егит кивалтӥсезлы Олег Геннадьевич Краснопёровлы. Мукетъёссэ депутатэ кандидатъёсты со сайяз ӟеч лэсьтэм ужъёсыныз. Калыкен туж ӵем пумиськылӥз. Быгатэмезъя юрттылӥз. Малпасько, со понна куараоссэс сётӥзы трос нылпиё анайёс, огназы нылпиоссэс будэтӥсь анайёс, атайёс, ужтэк кылемъёс. Быръёнъёсъя 24 номеро Ворошиловской округын городлэн Думаяз депутат луон понна сизьым адями нюръяськиз. Мыным шуд усиз татын чакласькись (наблюдатель) луыса ужаны. Законъя котькуд кандидатлы лэземын ас участокъёсаз эскерисьёссэ ыстыны. Законэз тӥян учыръёс татын ӧй вал. Та округын бюллетеньёсты лыдъям бере тодмо луиз: С. Щукин мэре ӧз ортчы, но Думае сюрон понна куараос трос бичаз. Соин ӵош озьы ик трос куараос басьтӥз "Продторг" АО-лэн кандидатэз Валерий Суркин. Быръёнъёсъя участокъёсын ужасьёсты паймытӥз адямиослэн бюллетеньёсын ужаны быгатымтэзы. Шӧдӥське, та ласянь калык пӧлын тырмыт валэктон уж нуымттэ шуыса, уката но егитъёс пӧлын. Ворошиловской округлэн котькуд участоказ быдэн 40-60 ярантэм бюллетеньёс шараямын. Озьыен, сомында адямиос быръёнъёсы юнме гинэ ветлӥзы. Куд-ог бюллетеньёс пушкын сюрылӥзы бырйисьёслэн гожтэтъёссы но. Огез сӥземын В. Загайновлы: "Кин косӥз тонэ Ижевске Якубовичез ӧтьыны? Мэр луид ке, нокинлэсь эн кылзӥськы". Лек гожтэтъёс пӧлын вал таӵеез но: "Нокинлы уг оскиськы - ваньзы лушкаськисьёс". Но данак гинэ сюрылӥзы ӟеч мылыкыдын гожтэмъёсыз но. Куд-огез малпам - бюллетень пыр ас куронъёсыныз но вазиськыны. Но мыным кельшиз таиз гожтэт, кудӥз сӥземын вал вань кандидатъёслы: "Лэсьтэ милемлы ӟеч улон. Инмар мед утёз тӥледыз со понна". Т. Банникова. АСЬМЕЛЭНЪЁС ӦЗ ШЕДЕ Быръёнъёсъя комиссия газетэз печате сётон дырозь ивортыса ӧз вутты Ижысь Думае шедем адямиослэсь нимъёссэс. Озьы ке но, куд-огез сярысь вераны луоно ни кадь. Жаляса пусйиськом, "Удмурт кенешлэн" кандидатъёсызлы мандат ӧз сюры. Со сярысь ивортӥз Илья Байметов. Кин бен депутат луоз? Сергей Светлов ("АиФ Удмуртии" газет), Сергей Чикуров ("Город" фирма), Василий Шаталов ("Альва" телекомпания), Евгений Богомольный ("Удмуртнефть"), Виктор Хорошавцев ("АСПЭК"), Константин Глухов ("Известия Удмуртской Республики" газет), Ольга Муллагареева ("Энергогарант"), Ольга Гурина (Медакадемия)... Нырысетӥ йылпумъянъёс азьланьын юнмазы ке, таос но мукетъёсыз ньыль ар ӵоже кивалтозы шоркарлэн улонэныз. Ижысь ваньмызлэсь депутатъёслэсь нимъёссэс вералом ни вуоно номеръёсын. О. МАРКОВ. Визьмаським-а? Бырйисьёсты уд пӧя ни. Сое туж яркыт возьматӥзы валлян, 12 апреле, Ижын ортчем быръёнъёс. Шоркарлы мэр луон понна 5 мурт нюръяськиз. Кыӵе гинэ амалъёс соос ӧз кутэ, калыкез ас палазы берыктон вылысь. Тани валэктон уж кутскем бере, быдэс городмы "чеберскиз" "Калык мэр Солуянов", "Милям мэрмы Солуянов" гожъямъёсын. Кенеръёс, заборъёс, вузкарон лавкаос-палаткаос, улон юртъёс, учреждениос сыӵе ӧтёнъёсын тырмемын вал. Трамвайёсын, троллейбусъёсын но автобусъёсын Солуяновлэн чибориё туспуктэмаз шуэмын: "Егит, задор, кышкасьтэм". Но калыклэсь йырвизьзэ номыр ӧз сура. Кылсярысь, быръён нуналэ но А. Солуянов но В. Загайнов котькуд быръён округе асьсэлэсь трос адямиоссэс ыстӥллям. Тани быръёнъёсъя 2 номеро Тимирязевской округъя одӥг участоклэн тӧроез Сергей Иванович Иванов шуиз: - Дорамы 12 адями эскерисьёс лыктэмын. Соос пӧлысь данакез вал Солуяновлэн но Загайновлэн. Туннэ ум вералэ ни, кыӵе "валэктон" уж нуизы иворъёсты вӧлмытӥсь ёзъёс. Калык сое валаз но али ужась мэр пала кариськиз. Анатолий Салтыков ваньзэ шара вераз: мар лэсьтӥз, мар быдэстытэк кылемын на. Бырйисьёс сое пелязы понӥзы, одӥг кылын вераса, калык возьмаськиз, кырсь амалъёсын ужась кандидатъёс понна куаразэ ӧз сёты. Иж нош ик улоз но ужалоз Анатолий Салтыковен. Г. Романов. ИШАН Франс Пресс агентство ивортэмъя, Австралиысь Хампти Ду городысь огаз коркан улэ ишан. Юртлэн кузёез валэктэмъя, та палан ик улӥсь егит пияш январе автокатастрофае сюрыса кулэм, нош феврале солэн ишанэз югыт дуннее берытскем. "Тӧдьы адями" укноосты пильылэ, пуртъёсты лобатэ, сюрес вылэ кӧльы тырыса, оломар но гожъя, коркась арбериосты пазя. Таӵе шукырес выремезлы юртлэн кузёосыз дышиллям ини, кышкамысь но дугдӥллям, сьӧраз утялскыса жадим шуыса ӝожтӥсько гинэ на. Городысь баӵко коркаез 5 пол чылкытатэм ини, молитваос лыдӟыса. Пайдаез луымтэ. Святой отец малпамъя, тае учыръёс Австралиын улӥсьёслэсь инмарлы оскемысь но черке ветлэмысь дугдэмзэс возьмато. МАЛПАНЗЫ ОДӤГ - ИЖЕЗ ЮНМАТОН Быръёнъёс азьын ортчиз на Ижевскысь городской Думалэн нырысетӥ созывезлэн 36-тӥ сессиез. Берло кенешазы депутатъёс эскеризы калыкез уже интыянъя туэ арлы программаез, инкуазез утёнэн герӟаськем ужпумъёсты. Кызьы пусйиз сессия, кылем арен ӵошатыса, ужтэк кылемъёслэн лыдзы кулэсмиз 23 процентлы. 843 мурт, соос пӧлын офицеръёс, армиысь бертэм егитъёс, трос пиналъем мумы-бубыос, сӧсыр кылемъёс, пытсэт улысь потэмъёс. Промышленной предприятиос пӧлысь али тужгес но секыт югдур кылдэмын автозаводын. Уже интыянъя центре татысь сётэмын 4 сюрс рабочиез мозмытон сярысь заявка. Кытчы соос мынозы? Валамон, адямиос сярысь сюлмаськыны кулэ город, солэн кивалтӥсьёсыз. Ижевск понна эшшо огез лэчыт ужпум - чылкыт омыр понна нюръяськон. Али 63 процентсэ "ӵындэ" автотранспорт. Тужгес но секыт шоканы Удмуртской, Клубной, К. Либкнехт, Азин ульчаосын улӥсьёслы. Уен-нуналэн кошкись транспорт ас ужзэ лэсьтэ. Городэз усыкмытӥсь ӵынъёслэсь утён вылысь, матысь аръёсы чакламын Воткинск пала нуись сюресэз но Можга трактэз Ижевск сьӧртӥ герӟаны. Берпуметӥ сессиязы депутатъёс эскеризы пӧртэм выжыысь калыкъёсын ужанъя Консультативной совет кылдытонъя ужпумез. Юнматэмын нимысьтыз положение. Со юрттыны кулэ городысь калыклы одӥг семья кадь улыны - ог-огдэ гажаса но валаса, керетонъёстэк но вожвылъяськонъёстэк. Вань чакламзэ табере улонэ пыӵатоз ни городлэн выль Думаез. Оскон вань, вужезлэсь ляб со уз ужа шуыса. Л. МЕДВЕДЕВА. Мыноз-а дуннелэн пумаз удмурт нылкышно? Та кышномуртэн пумиськеме далай гинэ луиз ини. Гожтэме соку ик ӧз пӧрмы. Кема бергатӥ йырам верам муртэлэсь вамышъёссэ. Нырысь тазьы но малпаськи: вань анайёс пиоссэс армиысь ке берыктӥзы, мар луоз армиен? Валентина Петровна Князева вордӥськемын Пичи Пурга ёросысь Шор Кечёл гуртын. Солэн егит дырыз тупаз азьланяз ӟеч, майбыр улонлы осконэн. Соку анайёс но пизэс армие келякузы шуылӥзы: "Кылзӥськы комадиръёслэсь". Таӵе мылкыд пыӵатыса ик кык пиоссэ будэтӥз Валентина Петровна но. Огез но армилэсь палэнскыны ӧз выры. Арлыдзы вуэмъя пиосыз кошкизы, Россиез утьыны присяга сётӥзы. Бадӟымзэ армие басьтӥзы 1991 арын. Ӵапак со аре куашкатэмын вал Совето Союзмы. Анай сюлэм шӧдӥз: калыкъёс понна со ӟечен уз берытскы. Кӧня ке улыса, зэмзэ ик, тодӥз: Сергеез Душанбее келямын. Таджикистанын ожъёс сярысь иворъёсты кылыса, анай сюлэм ӧз ни чида. Валентина Петровна кузь сюрес вылэ потӥз. Война... Та кышкыт кылэз кылыса ик сюлэм позырске. Уноезлэн таӵе дыръя суй пыдыз юскиське. Нош Валентина Петровна нюръяськыны кутскиз - пизэ быронлэсь утьыны ӝутскиз. Сергейзэ шедьтӥз, утиз, берыктӥз. Пиез улэп кылем понна курлалод шат анаез. Возьдаськоно шат со понна анайлы? Государствомылы возьыт мед луоз аслэсьтыз солдатъёссэ утьыны быгатымтэез понна. Таджикистанын, ожмаськонъёс кутскем бере, отысь Россие 1992 арын 72 сюрс 556 адями пегӟиз. Кыкетӥ пиез пона Валентина Петровна сокем ӧз сюлмаськы. Армие мынэмезлэсь азьло Аликез кышнояськыны вуиз. Соин ик солдат дӥсез Чайковский город вӧзысь частьын дӥсяз. Пиезлэсь кыдёкын ик уг улы вал ачиз но Валентина Петровна - картэныз люкиськем бере, улон сюресэз сое татчы вуттӥз. Алик арнялы быдэ дораз бертылӥз. Нош огаз арня нуналэ со ӧз вуы. Кышномурт, оло, номыре уродзэ ӧй но малпасал, армия со армия, но умойтэм уйвӧт адӟиз: сылалтэм чорыг ӟечлы уг луы. - Та уйвӧтэз ке ӧй адӟысал, сюрес вылэ но, дыр, ӧй потысал, - маде нылкышно. - Январь, туж кезьыт. Пиме утчаны военной городоказы потӥ. Но автобус ӧз вуы. Ӵуказеяз ини пыдын кошконо луи. Сюрес вылын пумитай погонэн муртэ. Тани, пе, нырысетӥ партизэ солдатъёсты Самарае келязы, табере мукетъёссэ нуыны лыктӥсько. Самараысен ваньзэсты Чечняе келялозы, шуэ вал тодмое. Вуи солдатъёслэн городоказы. Пиме пумитай пырак Чечняе келян нуналазы. Тае тодыса ини, кызьы чидалоз анай сюлэм. Но таяз учыре Валентина Петровна аслаз пиез понна гинэ ӧз, Чечняе келям данак пиосмылы юрттоно кариськиз. Соин ӵош Чечняе мыныны кӧня ке солдат анайёс бурдъяськизы. Но кыдёке, тодмотэм дунне пыдсы вуыны ӟигарзы тырмиз кыкезлэн гинэ. Озьы ке но, ваньзы, кин быгатӥз, та кышномуртъёслы кузь сюрес вылэ потыны юрттӥзы. Ӧз палэнскы Чайковскысь горисполком но. Быдэс автобус тыр люкамын вал эмъюмъёс, изьыос, шуныт носкиос пӧртэм сиёнъёс. Быдэс район пыриськиз та уже. Ӟеч мылкыдын люкам ваньбур нырысь Перме вуиз. татын нылкышноосты алӥзы на: чидалоды-а? Чидазы. Паймоно кадь но, Валентина Петровна пизэ утчаны потэм нуналысен ик ялан сюлмыныз шӧдылӥз солэсь артэ луэмзэ. Казармаын данак солдатъёс кӧло, кытысь тодод кытын тынадэз. Но со валаз: пиез татын, Чечняе келямтэ на, шедьтӥз сое пиезлэн шокамезъя. Таӵегес ик учыр бӧрысь луиз Моздокын но. Кинотеатре интыямын асьме солдатъёс, татын ик выж вылын кыллё сӧсырмем пиосмы. Соос доры ялан пыралляло офицеръёс, бумага выэ пусйыло ожын быремъёсты, ивортэк ышемъёсты. Кышномуртлэн шудэз вылэм. Сюлмыныз шӧдӥз но шедьтӥз пизэ улэп кылемъёс пӧлысь. Асьме Удмуртиысь Чечняын ожмаськиз 2050 адями, 49-ез быриз, 21-ез сӧсырмыса бертӥз. "Мон ути пиосме", - тазьы меӵак вера удмурт нылкышно. "Уте тӥ но пиостэс, анайёс", - тазьы со вазиськиз радио но телевизор пыр асьме нылкышноослы Чечняысь бертэмез бере. Мар пумит вералод меда сыӵе дыръя? Кӧшкемыт ожъёсты но пиосмылэсь быремзэс адӟемез анайлы сыӵе луонлык сётэ, дыр. Мыноз-а бен дуннелэн пумаз удмурт нылкышно? Дуно нылпизы, картсы, яратонзы сьӧры Валентина Петровна кадьёсыз мынозы. Но ваньмыз уз. Уз, кызьы вань декабристъёс сьӧры каторгае ӧз мынэ кышнооссы, анайёссы. Я шуг-секытъёслэсь кышказы, я данзэс наштамзы ӧз поты. Удмуртъёс сярысь шуо востэмесь, дӥсьтӥсьтэмесь. Эшшо шуо каллен, дыртытэк улӥсесь. Ваньмыз с шонер. Но котьку-а меда данъяськоно сыӵе сямъёсынымы? Кулэ дыръяз но интыысьтымы вырӟыны кышкаськом. Марысь мар ке мылкыдмес бугыръямлэсь палэнскиськом. Соин ик паймытэ та удмурт нылкышнолэн дӥсьтонлыкез ас пиосыз понна нюръяськемез. Сыӵеос ӧжыт. Ӟуч государстволэн Кавказын улӥсь калыкъёслы пумит политикаез Россиез уг данъя. Озьыен, бырыны кулэ-а отын асьмелэн пиосмы. Тазьы учкыса, та анаез нокин янгыше уз уськыты. Т. БАННИКОВА. В. П. Князева. Туспуктэмез Г. Юсаевлэн. Нырысетӥ вормон Тупаны но кулэ ук: Ижысь футболистъёслэн "Газовик" командазы чемпионатлэн кутсконаз нырысетӥ лигаысь самой кужмоосыныз нюръяськоно луэ. Со вылэ ик командаямы ӝыныезлэсь уноез спортсменъёс нырысетӥ арзэ шудо. Нош кызьы валаськоды, коллектив кылдэ - юнма дыр ортчемъя гинэ. "Газовик" нырысетӥ шудонъёссэ куноын келяз. Нижний Новгородысь "Локомотивез" вормонлы но оскон ӧй вал. Миым та конманда вылӥ лигаын шудӥз. Футболиистъёссы ӧз пазьгиське, ваньзы доразы кылизы. Туэ та конманда выльысь вылӥ лигае потыны малпа. Нош малпамъя гинэ уг луы, шудон - пумиськонын ворме кужмоез. 8-тӥ апреле "Газовикысь" футболистъёс зол тыршизы - пӧсязы. Шудон но таяз учыре лымы вылтӥ нискыламлы укшаз. "Локомотивлэн" тренерз но та вылэ чӧлскиз: быгатэмез возьматыны, пе, луонлыкъёс ӧй вал. "Газовик" 3:2 лыдын вормыса, нырысетӥ 3 очко басьтӥз. Кӧс нуналэ Центральной стадионэ калык Тулаысь "Арсеналэз" учкыны люкаськиз вал. Та командаын, уго, Бразилиысь футболистъёс но шудо. Но "висисьёслэсь" мылкыдзэс лапкомытӥзы: куазь урод улэмен шудон интыын пудесозь выйымон сыръясь дэри кылле. Соин ик пумиськонэз мукет вакытэ выжтӥзы. Табере "Газовик" шудоз Саратовын но Махачкалаын, 18 но 21 апреле. Г. Иванов. СЮЛЭМАМЫ УЛОЗ Пӧламы ӧвӧл ни Апполинария Александровна Поздеева - толон сое берпум сюрес вылэ келям. 93 аресаз мынэ ни вал со... А. А. Поздеева - филология наукаосъя кандидат, Россия Федерациысь но республикаысьтымы наука удысын дано ужась. Вань улытозяз со ужаз Удмурт кун пединститутын (али университет), доцент, факультетлэн деканэз, удмурт кылъя но литературая кафедралэн кивалтӥсез вал. Со ик удмурт кылэз дышетонъя трос учебникъёслэн авторзы луэ. Апполинария Александровналэн сайкыт тусбуез син азязы кылёз ваньмызлэн, кин дышетскиз со дорын 1932-тӥ - 67-тӥ аръёсы, озьы ик сое ӟечен гинэ тодазы возёзы вань эшъёсыз, тодмоосыз. Шунды Правоя урокъёс ЙЫРТЭМАД - КЫЛ КУТ Ваньмызлы тодмо, дыр, обществоын, калыкын возиськись сямъёслы, куронъёслы пумит султыны уг яра. Кылсярысь, дышетӥсьёслы, анай-атайёслы, бадӟымъёслы мытылыны, ораськыны. Калык пӧлын асьсэды урод возисьёс шоры ваньмыз кырыж учко. Сыӵеос асьме пӧлын ӧжыт ӧвӧл. Ай соос ик данъясько на дӥсьтӥсь луэменызы, учке ай, пе, ми кызьы быгатӥськом, кин мар карыны дӥсьтоз. Бен, законъя сыӵеосты кыл уд кутыты. Асьсэды умойтэм возисьёсты алон - адямиослэн гажатэк учконзы. Мукетыз учыр. Шуом, кивалтӥсь асьлэсьтыз ужасьсэ "шузи" шуиз. Со адямиез ултӥян луэ. Таяз учыре закон кивалтӥсез кыл кутытыны быгатэ - штраф тыроно яке кӧня ке дыр пытсэт сьӧрын пуконо луоз. Государствоын кутэм законъёс ужаны кулэ адями понна. Соин ик котькудӥз тодыны кулэ законъёсты но аслэсьтыз правооссэ, пинал муртъёс но. Вунэтоно ӧвӧл кыл кутон сярысь но. Россия Федерацилэн Конституциез вылэ пыкъяськыса, странаямы кутэмын трос пӧртэм законъёс - Уголовной кодекс, Гражданской кодекс, Административной кодекс, Ужан сярысь законъёсын кодекс но мукет. Законэн чаклам куронъёслы пумит мынэм понна, йыртэман учыръёс дыръя адямиос кыл куто. Та ужпумъёсты эскеро ини кун властьлэн ёзъёсыз яке та удысысь ужасьёс - милиционеръёс, инспекторъёс... Тужгес но вылӥез кыл кутытӥсь ёз - суд. Быдэ вуымтэос закон азьын кыл куто 14-16 аресысен. Пичиосызлэн пиналъёслэн йыртэмамзы понна кыл куто анай-атайёс. Та югыт дуннее йыртэмась луыса нокин но уг вордӥськы. Но тросэзлэн улон сюрессы кырыжаса кошке. Кин отын янгыш: семья, школа, эшъёс, улон, общество, государство? Котькудӥз ачиз быръе аслыз сюрес. Нош тӥ, пиналъёс, малпаськиды ни-а со сярысь? Ойдолэ ӧжыт шудом - кӧня ке юанлы валэктонъёс сётом. Но пӧяськытэк. 1. Нокин уз адӟы шуыса тодысал ке, лушкасал-а мон ӵош дышетскись эшелэсь одӥг пачка сыскиськонзэ? 2. Кин ке но монэ туж зол обидиз ке, пунэмзэ берыктон понна урдӥськысал-а шораз мыжыкъёсын? 3. Тырытэк кельтысал-а государстволы налог, ӧй ке тодысалзы 100 сюрс манет коньдон басьтэме сярысь? 4. Нокин уз шарая шуыса тодысал ке, луонлык кылдыку, вузан понна лушкасал-а кинлэсь ке мотоциклзэ? 5. Машинаос ӧвӧлтэм дыръя, светофорлэн горд тылыз ӝуаку, бызьыса потысал-а сюрес вамен? Асьмеос вераським вал, вань юанъёслы астэ пӧятэк шонер валэктонъёс сётоно. Озьы- а? Табере учке, кыӵеесь валэктонъёс тросгес сётӥды - бен яке ӧй. Ваньмызлы ик яке тросэзлы юанлы пумит луымтэдэс верады ке, дэмласько улон сюресты пумысен ӟеч-ӟеч малпаськыны. Малы ке шуоно, тросэз вуоно йыртэмасьёс но сыӵе ик валэктонъёс сётъязы та юанъёслы. Нош йыртэман сюрес вылэ султон мугзы пумысен соос шуылӥзы, пинал дыръямы, пе, со сярысь милесьтым нокин ӧз юалля, вераськон ӧз ӝутылы, соин ик ми номыр сярысь ӧм малпаськылэ. Нош туннэ мон тӥледлы вазиськисько, ӧжыт ке но малпаськоды шуыса. Л. ФАЗЛЕЕВА, Ижевскысь Устинов ёросысь "Семья" центрысь юрист. Лыктэлэ ми доры, лицее Туэ "гимназия", "колледж", "лицей" кылъёсын асьмеды уд паймыты ни. Азьвыл школаос интые таӵе дышетсконниос котькытын ик усьтылэмын. Тани милям но Иж карысь Шишкин урамысь Гуманитарной лицеймы азьло 44 номеро школа вал. Школа но школа. Нош ог тямыс ар талэсь азьвыл кутскыса, дышетсконэз воксё ти мукет ӧретӥ нуыны малпамы. Валамон ни, соку ик ваньмыз ӧз пӧрмы, уно шугъяськонъёс, утчаськонъёс вал. Нош Михаил Петрович Черемных кивалтэм улсын уноез шуг-секытъёс вормемын, дышетон программаос выльдэмын. Табере лицеймылэн аслаз ымнырыз, тусбуез адӟиське ни. Пиналъёсмы дышетско нимаз муртлы чаклам (индивидуальной) расписаниея. Мар со сыӵе? Котькудӥз дышетскись ачиз аслыз быръе тодон-валан басьтон сюресъёс, амалъёс. Дышетӥсез но ас мылкыд каремзыя бырйыны быгато. Тросэзлы кельше финно-угроведение: удмурт, финн, эстон, венгер кылъёс, литература, этнография, вашкала удмуртъёслэн историзы. Та борды кыстӥсько ни лицейысь ӟуч пиналъёс но. Удмурт нылъёслэсь, пиослэсь данзэс ӝутыны юрттэ фольклор ансамбльмы, кивалтэ соин шаерысьтымы искусство удысын дано ужась Р. А. Анкудинова. Та аръёс куспын кытчы гинэ ӧз вуылэ ни усточиосмы: Таллиннэ но Будапештэ, Сыктывкаре но Саранске, Казане но асьме дорысь пӧртэм районъёсы. Со сяна, лицеямы ужало эктонъя, кырӟанъя, гитараен шудыны дышетсконъя, психологияя но мукет кружокъёс, студиос. Милемлы мылысь-кыдысь юртто Удмурт кун университетысь тодосчиос. Тани, кылсярысь, Е. Я. Трофимова, этнограф, история наукаосъя кандидат, кемалась ужа ини милемын ӵош. Нылпиосмылы со, нимаз прграммая лекциос лыдӟем сяна, научной реферат гожтыкузы валэктэ, кызьы радъяно но уже кутоно калык пӧлысь люкам материалзэс. Елена Ясоновна пыриське пӧртэм ужрадъёсамы. Ваньмыз тодо на али, кыӵе ческыт вал макен рулет одӥгаз Венгрилы сӥзем ӝытамы. Нош научной конференция дыръя этнография секциын тужгес но тунсыко, мур пуштросъем докладъёссы луо милям лицеистъёсмылэн. Вить ар талэсь азьло ми вуылӥм Казане Волга котырысь калыкъёслэн нылпи фестивалязы. Отчы пыриськизы милям фольклор ансамбльмы но асьсэ докладъёсынызы кӧня ке нылъёсмы- пиосмы. Уг вунэтӥськы отысен тодосчиослэсь верамзэс: "Учке ай, асьмеос али гинэ та сярысь вераськыны кутскиськом, нош Удмуртиын тӥни макеме вуиллям ни!" Йошкар-Олаын ортчизы удмурт нылпи литературалы сӥзем нуналъёс. Отчы ми вуылӥмы Г. А. Ходыревен но Гайдар нимо библиотекаысь ужасьёсын ӵош. Бадӟым куноосыз сямен пумиталлязы соку милемыз. Отысен пор нылпиосын тодматскимы. Карлыган школаен эшлыко кусыпъёс герӟамы. Соку ик нылпи библиотекаенымы но эшъяськонмы юнмаз. Бадӟымесь ужрадъёсты табере котьку ӵош ортчытъяськом. Бен, нылпиослы "улэп" уж кулэ, мед пыриськозы, мед бергалозы, уж ачиз дышетэ, шуо калыкын. Милям одӥгез бадӟым удысмы - финн-угор дуннеысь егитъёсын эшъяськон. Та ласянь юрттыны басьтӥськизы Нациосын ужанъя но Егитъёсын ужанъя комитетъёс, эшлыко мылкыдзэс возьматӥзы С. К. Смирнова но Г. А. Юсупова. Соос ик тодматӥзы милемыз "Шунды" огазеяськонэн но. Ноку быдэсъямтэ ужез оген ӝутыны секыт. Нош куке таӵе команда кылдэ, уж берга ини. Озьы дасямын вал нырысетӥез научной конференцимы - финн-угор старшеклассникъёслэн слётсы. Бадӟымъёс но, пичиос но соку одӥг малпанэн люкиськизы: таӵе пумиськонъёс ог-огмес тодыны юртто, эшъяськон мылкыдэз ӝуто, ог-огедлэсь культурадэ тодэм потонэз пуромыто, таӵе дыръя визьмыныд валаськод, сюлмыныд шӧдӥськод, асьмеос зэмзэ но ӵыжы-выжыос шуыса. "Одно ик азьланьтоно та ужез. Вуоно гужем нош пумиськом. Ӟеч луэ!" - шуизы нылпиос люкиськыкузы. Куноосмы кошкизы, нош ми соку ик кыкетӥ слёт сярысь малпаськыны кутским. Уг тодӥськы, асьсэос нылпиос валазы-а, ӧз-а, нош мон со гужем адӟи: лэсьтэм ужед мукет муртъёслы пайда сётэ ке, пельпум сьӧрын бурдъёс кылдо. Кыӵе чебересь, мусоесь, визьмоесь потӥзы соку нылпиосмы! Соослэн ас быгатэмзылы осконзы юнмаз, нош идеяос егит йыре котьку паймымон ӝог лыкто. Ар куспын выль эшъёсмылэсь трос гожтэтъёс басьтӥм, Таллиннэ вуылӥм (со сярысь "Инвожоысь" лыдӟиды, луоз), Сыктывкарысь гимназие куное ветлӥм. Кыкетӥ слётлы дасяськыку но кӧня книга лыдӟемын вал, кӧня кагаз быдтэмын, чебер легенда малпаса! Кин ке тодаз ваиз, макем усто пӧрмиз вал толалтэ Вожо дырмы - соку милемлы бадӟым юрттэт сётӥз тодосчимы Т. Г. Владыкина. Таяз учыре но со дэмлаз: "Инвожо толэзь - со но вожо дыр. Умоез но уродэз, уй но нунал, кезьыт но пӧсь пумисько та вакытэ. Та темаез бергатыса утчалэ, пӧрмыны кулэ." Зэмзэ но, фольклорен тужгес но тунсыкъяськись нылъёсмы, Настя Петрова но Лена Иванова, инвожо сяська сярысь легендая быдэс спектакль дасязы. Пеймыт уйшоре сьӧд шур дурын соку сылэмъёс пӧлысь огез но ӧз вунэты, дыр, кызьы удмурт батыр сюбег но кузь выж вылтӥ муспотон пичи пор нылэз пельпум вылаз пуктыса поттӥз. Озьы соос инвожо сяськамес утизы - озьыен, эшъяськонмы азьланяз но сяськаялоз! Милям дышетскисьёсмылы та зэмос школа луиз. Соос газет поттыны но, куноосты пумитаны но, шулдыръяськон ӝытъёс, пӧртэм визь сынан ужрадъёс, ӵошатсконъёс ортчытъяны но дышизы. Собере но, котырес ӝӧк сьӧры пуксьыса, трос пол кенешылӥм, кытысь но кӧня куно ӧтиськомы, кыӵе выль ужпумъёс чакласькомы, кытын но ку ортчытӥськомы вуонозэ слётмес. Пумен дышим, лэся, пӧртэм кулэ бумагаос гожъяны, ӧнерчиос но тодосчиос пӧлын эшъёсмылэн лыдзы будӥз. Светлана Константиновна Смирнова тужгес визьмоосызлы но быгатӥсьёсызлы дышетсконзэс азьланьтыны юрттӥз, соос пӧлысь куд-огеныз, оло, валче ужаны кылдоз али. Лицейын арлы быдэ маке вылез, паймымонэз лэсьтӥське: я выль кружок, клуб усьтӥське, я тунсыко спецкурс ялэмын, я кыӵе ке шутэтскон ӝыт яке вуоно улонмы сярысь малпаськон-вераськон ортче. Ялонъёсын доска дорын котьку гуж вазе. Тани огез дышетӥсьмы Санкт-Петербурге мыныны группа люка. Мукетыз вазиське крезьгурез яратӥсьёслы. Нош таиз ялон выль спектакльын шудыны мылкыд карисьёсты люка, соин артэ - походэ ветлыны яратӥсьёсты ӧтён. Тани "Эшкар" клублэн ялонэз: "Кинлэн мылкыдыз вань "Финляндилэсь нуналъёссэ" радъяны, люкаськелэ..." Таиз ини милям улонмылэн эшшо одӥг тодметэз: котькыӵе ужез дэмен лэсьтӥськом, котькудаз бадӟым яке пичи ужрадэ ваньзэ ӧтиськом - лыкты, кылзӥськы, визькенеш сётод-а, суредаськыны юрттод-а, кырӟалод, эктод-а - тыныд уж сюроз. Шумпотӥсько соизлы, финн-угор специализациын дышетскисьёсмы асьсэос гинэ тодон-валан уг люкало - котырысь мукет нылпиослы но валаны юртто, кыӵеесь соос, удмуртъёс: тыршисесь, лачмытэсь, кырӟасесь, котырысьтызы калыкъёсты гажасесь. Малпасько, таӵе пиналъёс калыкмылэсь данзэ уьыны быгатозы асьме шаерын но, палэнын но. Ватсаса ивортӥсько на: та нуналъёсы лицеймы вуоно арлы дышетскисьёссэ люка ни, эскеронъёс ортчытэ. Вуоноез пумиськонмы луоз кӧс нуналэ, 18 апреле.. Лицейысь нылъёсмес куноято Таллиннысь эшъёссы. Азьпал радын - Ирина Решетникова но солэн эстон эшез Маре Май. Яак Прозес ӟечкыла кунооссэ. Таллинн, 1994 ар, коньывуон. А. Решетникова, Гуманитарной лицейысь дышетӥсь. Быръёнъёс бере Шуккет, эшшо шуккет... Быръёнъёсъя йылпумъянъёслы куазь но паймиз, лэся - кутскиз но котырысьтымы вань кырсез юг-юг тӧдьы лымыен шобыртӥз. Кыре потэм дэри, листовка юдэсъёс, тамак пумъёс но бушатэм ӟенеликъёс син шорысь огдырлы ышизы. Мар-о луиз меда апрель шорын, куке та вакытэ куд-ог аръёсы крестьян калык кизьыны потэ ни вал? Оло, куазь сыӵе аспӧртэмлыко амалэн асьмелы кылдэм югдурез дунъяны но малпаськыны ватсаса луонлык сётэ? Кин тодэ на... Ойдолэ лыдпусъёс но нимтулъёс бордысен кутском. Городысь быръёнъёсъя комиссилэн ивортэмезъя, А. Салтыков понна куаразэ сётӥз 113412 мурт. Участоке лыктэм но кин ке понна пус пуктэмъёс пӧлысь со 44,4 процентэз луэ. В. Загайнов пала 64584 адями кариськиз (25,3 процент). А. Солуянов бордаз кыскиз 36315 муртэ (14,2 процент). С. Савичевлы дурбасьтӥз 11012 адями (4,3 процент), С. Щукинлы - 8860 (3,4 процент). Тӥни сыӵе суред. Мар паймымонэз? Валамон ни, А. Салтыков пала кариськемъёслэн лыдзы. Одӥг политолог но, Кун Кенешысь кудӥз ке кивалтӥсь но 12 апрелёзь ӧз малпалля, дыр, азьло мэрлэн данэз сокем вылӥе ӝутскоз шуыса. Бен, вормоз шуыса вераллязы, но азьпала сыӵе чутрак вамыш лэсьтыны быгатонэз сярысь ӧз поттылэ. Та учырлэсь мугъёссэ политикъёс но специалистъёс сэрттыны-пертчыны кема вырозы на ай. Мар вераны ми быгатӥськом? Малпан кылдэ, валтӥсь мугез мэрлэн ӧвӧл, Кун Кенешлэн уженыз герӟаськемын шуыса. Асьме депутатъёсын кутэм законъёсты судын умойтэмен лыдъян туж быдтӥз парламентлэсь данзэ. Басьтом ёросъёсын кун власть кылдытонэн герӟаськем документъёсты ик. Сомында дыр, кужым, коньдон быдтэмын ни вал, отын 12 апреле быръёнъёсты ортчытонэз радъян понна. Ваньмыз ик дась ни вал кадь. Ялэм вакытлэсь кӧня ке нуналлы азьло Кун Кенеш шуэ: дугдэ, эшъёс, дугдэ быръёнъёсты гужемлы выжтом, дорады ас коже кивалтон ёзъёсты кельтом... Кин вераны быгатоз, кӧня "шуныт" кылъёс чузъяськизы со решениен валче асьме элькунамы?.. Соин ик бырйисьёс пӧлын Кун Кенешлэн, оло, зэм но туж шонер луись мылкыдъёсыз ӧз выжыяське, солэсь но ортчыт, адямиос, ӧчкарыса сямен, вылӥ властьлэн кандидатъёсызлы юри пумит кариськыны малпазы. Кыкетӥез муг "перегиб" шуон бордысь потӥз. Ма, со нырысетӥеныз меӵак герӟаськемын. Кун власть понна луись кивалтӥсьёс, ӟеч лэсьтӥськом шуыса, урод каризы. Мон верасько В. Загайнов пумысен уж нуэмез. Политикаез чакласьёс соку ик шӧдӥзы ук солэсь кытысь но кин луэмзэ. Лыдӟисьмы милемыз но та ласянь пыкылыны быгатэ. Шонер лэсьтэ. Мукет изданиосын ӵошатыса, "Удмурт дунне" городын быръёнъёслэсь юромо палэнскыны тыршиз. Кӧня ке материал поттӥм ке но, городысь ӟечсэ но адӟытэк ӧм кельтэ. Музон депутатъёсты но ӧм палэнтэ. Озьы ке но, кун газетъёсын , кызьы шуо, тупез одӥг капкае ӵыжазы. Соин вылӥысь чиньыен возьматэм мурт шоры лэзем боды зэмос бумеранглы пӧрмиз - властез ик шуккиз. Ай эшшо ке газетъёслэсь но отын ужасьёслэсь данзэс куашкатӥз. Но, мон малпасько, визьмо лыдӟись югдурез шонер вала. Быръёнъёсын газетлэн интыез сярысь вераськон потӥз бере, ватонэз ӧвӧл, дыр, аслэсьтым мылкыдме но. Меӵак шуисько: мон А. Салтыков понна куараме ӧй сёты. Ижен со тямыс ар кивалтэ ни. Кин кызьы малпа, вылды, мынам та дырозь шӧдэме ӧвӧл Анатолий Ивановичлэсь выжы калык сярысь зэмос сюлмаськемзэ. Удмуртиын вордскыса- улыса, солэн шоркараз нырысетӥ "ымныр" луыса, уг быгаты вал шат со, шуом, удмурт кылэз дышетыны но озьы асьмелы матэгес кариськыны? Яке национальной театрлы выль юрт пуктон понна вань луонозэ лэсьтыны? Яке паськыт удысэн ӧръяськем приватизация ортчытон вакытэ ӵектон сётыны: ойдолэ, гажано эшъёс, тазэ я созэ чебер юртэз удмуртъёслы сётом, мед отын табань пыжозы, бӧлякъёсынызы пумиськылозы, куноосты пумиталозы? Кылем сӥзьыл Ӧтчаммес ортчытонэ-радъянэ пыриськемзэ но К. Гердлы памятникез Центральной площаде пуктыны дэмланзэ лыдэ уг басьтӥськы. Та ужъёс вуоно быръёнъёс понна лэсьтэмын вал ни. Я, ӧжытак палэнским. Кутскем веранэз пумаз вуттон понна чӧлскем потэ "Комсомольская правда" газет вылэ. Нижний Новгородын мэре азьло пукем муртэ А. Климентьевез быръемзы пумысен гожтыса, та издание пусйиз губернаторлэсь И. Скляровлэсь кызьы ужамзэ. Со турттэ вал город йыре аслэсьтыз адямизэ интыяны. Отӥ- татӥ коллективъёстӥ ветлыкуз, та кивалтӥсь кӧбератэк шуылӥз, солэн ӵектэм муртэз али ик мэр ни шуыса. Макем со юнгес зӥбиз та ласянь, сокем кужмояз огшоры адямиослэн вожпотонзы. Кызьы йылпумъяськиз быръён - тӥледлы тодмо. Асьме дорын но югдур сыӵе сюрестӥ кошкиз. Кун Кенеш нош ик шуккет басьтӥз. (Ма, шонерзэ вераса, парламентмы та "мажес" вылэ нырысетӥзэ ӧз султы ни. Тодады вае ай удмуртъёслэсь куатетӥ Ӧтчамзэс). Нош малы кулэ вал А. Гороховлы Воткинскын мэре кандидат луыны? Адямилэн заводысь лабораторилэн кивалтӥсезлэсь вылӥе (али Кун Кенешын ужамзэ вератэк) ӝутскылэмез ӧвӧл, депутатъёс пӧлын но туж ик уг висъяськы.... Соин ик калыклэн куара сётэмезлы но паймонэз ӧвӧл. Азьлоез мэр Фридрих пала 80 процентлэсь ятырез бырйисьёс кариськизы. А. Гороховлэн быръёнъёсы пыриськемез Кун Кенешлы но, отысь коммунистъёслэн фракцизылы но, солы аслыз но ватсаса дан ӧз сёты кадь. Мар табере кароно? Ижын улӥсьёс кылем арняе быръёнъёсъя участокъёсы лыктыса возьматӥзы асьсэлэсь мылкыдзэс. Кельше-а со кинлы ке, уг-а - табере асьмелэсь созэ юась ӧвӧл. Калык оскиз бере, ньыль ар ӵоже улоно-ужано луиськом А. Салтыковен. Кужымзэ шӧдыса, со али уката юнгес кутскоз шоркармылэсь кулэяськонъёссэ утьыны. Озьыен, Тӧдьы юртысь кузёосын ченгешон уз быры, эшшо но паськытгес пуромоз. Кызьы соку ӵогоно кылдэм гердэз? Вань-а амал вожвылъяськонлэсь мозмытскыны но азьлане уртче мыныны? Та выллем уно юанъёслы валэктон шедьтыны капчи ӧвӧл. Оскон солы гинэ: асьме республикаысь политикаын "куазь" лэсьтӥсьёс ортчем быръёнъёслы йылпумъянъёсты йыркуръяськытэк, котыр ласянь дунъялозы но кыӵе ке ӟеч сюрес вылэ потозы. Озьы мед луоз. Ченгешыса улонэз шаерысьтымы калык чиданы азьланьын уз быгаты ни, дыр. Иван Лебедев. Шунды Эн сётскы, Академик! Ӧйтод, кызьы мукет районъёсын, нош алнашъёслэн кушем нимын вераськонзы сямазы пыӵамын ни, лэся. Алигес лымшор районысь Кузёбай гуртэ вуылыса шуд усиз тодматскыны Академикен, Патронэн, Лимонэн, Писэен, Японэн но трос мукетъёсыныз. Гуртлэн огпалаз кизьнын шедьтӥд ке, мукет палаз но кылозы. Удмурт дуннеослэсь Кузёбае вуэммес гуртоос но тодӥллям. Клубын ужасьёсын вераськыса сылонъямы шаплы кышномуртсы ӧсэтӥ пырыкуз ик жингрес куараеныз вазиз: "Мыным кен кулэ!" Огдырлы ымамы ву ӟузем кадь луимы, ма, вузкарыны шуыса но ӧм потэ вал кадь. Бӧрысь валатскем ини кышнояськымтэ пиосын тужгес но бай гуртэ вуэммес. Кузёбайысь егит пиосыз лыдъяны кутскид ке, куать муртлэн киысьтыз чиньыосыз уз тырме, шуизы. - Школаяды пиос гинэ дышетско шат? - Уг. Ма, бызьымтэ нылъёсмы гуртамы но вань, - шуо клубын ужасьёс. - Эшъёссы ӧвӧлэн соос доразы пуко, нош городын дышетскись нылъёсмы шутэтскон нуналъёсы сяна уг бертало. Озьы улонъязы город пала ик выжы но лэзё. Гуртын нылъёслы но, пиослы но мӧзмыт потэ. Алнаш районысь егитъёсын ужанъя отделлэн кивалтӥсез Владимир Соловьев котькуд колхозысь егитъёсын кенешылӥз но бадӟымесь гуртъёсын та отделлэсь ёзъёссэ усьтон сярысь кылпум поттылӥз. Кузёбай гуртысь егитъёс но соглаш луизы Владимир Михайловичлэн малпанъёсыныз. Гуртысь егитъёслэсь ужзэс радъяны оскизы Можга педучилищеез соку гинэ йылпумъям пияшлы Леонид Кузьминлы. - Ӝыны ар ужатозям, пӧсьсэ но кезьытсэ но шӧмъяны вуи ни, - шуэ егитъёслэн азьветлӥсьсы. - Нырысетӥ шутэтскон нуналэз (мон понна нырысетӥ ужан нуналэз) капчи мылкыдын ортчытӥ. Ӧй но шӧды гужемлэсь ортчемзэ. Студентъёс выльысь городазы кошкизы, нош кузёбай пиосмы мӧзмонэ усизы. Озьы ке но, егит пиос нырзэс ӧз оше. Быгатэмъязы улонзэс шулдыртыны тыршо. Гуртооссылы кырӟаны-вераны быгатэмзэс но возьматӥллям ни. Жаляса верано, пиослэсь нырысетӥ шумпотонзэс, лушкем возем быгатонлыкъёссэс нокин но синйылтымтэ. Нош кыӵе потэ вылэм учкисьёслэсь шуныт кылзэс яке тау каремзэс кылэмзы. Концерт пуктэмзылэсь азьло кема малпаськизы соос, коньдонэн-а, коньдонтэк-а возьматоно шуыса. Кин ке берпуметӥ нуналозяз коньдон бичаны ӵектӥз. Магнитофон басьтыны коньдон,пе, луоз. Нош егитъёслэн гуртооссылэсь, анай-атайёссылэсь, ӵыжы-выжыоссылэсь коньдон бичаны мылкыдзы ӧз сузьы. Зэм, Кузёбай гуртысь клубын номыр но ӧвӧлтэмлэсь бильярд шудонзы кылдылӥз ик. Куинь арня шудыса вуттӥллям но, шаръёсыз оген-кыкен ышылыны кутскиллям. Ма вераны паймемысьтызы егитъёс серекъязы гинэ: "Ӟазег пузаны кутскиз ук, улпузлы басьтӥзы, луоз". Огшоры нуналъёсы но гуртысь пиос ог-огенызы адскыны клубе поталляло. Пичигес гинэ кабинет шуоназы (кабинет шуыны луоз ке сое) тамак пурккето, крезьгур кылзӥсько, ма но со улон сярысь кенешо. Егитъёслэн клубазы ӧвӧл йӧнала магнитофонзы, кассетаоссы. Вань нергеез но пиослэн дорысьтызы поттэмын. Субботаосы дискотека шуон ортчытъяло, пӧртэм конкурсъёс радъяны йӧндыро. Кылсярысь, пиос куспын "А ну-ка, парни!" орчытӥллям. - Тямыс март азьын нылъёс понна но конкурс радъяны малпамы вал, - веранзэс азьланьтэ Лёня. - Ӧз пӧрмы. Нылъёсмы керпотӥзы, лэся. Гуртамы "чеберина" ортчытом шуиськом вал, нош ӧм быгатэ нылъёсмылэсь мылкыдзэс лӧпкытыны. Шуг соосын одӥг кыл шедьтыны, со ласянь пиосын ик капчигес вылэм ужаны. Шумпотоно кузёбай пиослэн нырысетӥ вамыш лэсьтэмзылы. Вань ужрадъёссэс асьсэ кужыменызы ортчытыны тыршо. Нош одӥген мыныса, кыдёке вуод-а меда? Умойгес ӧй луысал-а колхозысь яке школаысь кивалтӥсьёсын кенешыса ужаны. Озьы, оло, йыртэмасьёслэн но, омырез юнме ӵыжаса ветлӥсьёслэн но лыдзы ӧжытгес луысал. Зэм, палэнысь лыктэм муртлы косъяськыны но, куаретыны но капчигес. Озьы ке но, мон малпамъя, куатьтонлэсь ятыр казак пиосын быдэс гуртэз выльдыны луоно. Нош кузёбайёс нылъёссэс озьы ик палэнэ келязы ке, оло, гуртсы азьланяз чылкак куасьмоз? Кивалтӥсьёслы но та пумысен малпаськоно вылэм. Пиосъёслы толэн-гужемен мастерскойын уж сюроз, нош нылъёс кытын ужалозы меда? Лымшор районысь Кузёбай гуртэз кунгож сьӧрын улӥсьёс но ӟеч гинэ тодо, вылды, соинтэк-а арлы быдэ пӧртэм куноос вуыло. Оло, та уже егит нылъёсты кызьы ке кыскыны луысал. Вашкала сямъёсты-йылолъёсты мур-мур тодӥсьёс, лад-лад валэктыны быгатӥсьёс арлы быдэ ӧжыт но ӧжыт кылё. Егит нылъёс мӧйыос вӧзын тодон-валанзэс будэтысалзы ке. Соос азьланьтысалзы анай-атайёссылэсь ужзэс. Удмуртлыкез гажасьёс, шаерысьтымы пӧртэм школаосын дышетскисьёс Кузёбай гуртэн, вашкала куалаен тодматскыны ветлысалзы. Аръёс но нуналъёс ӝог ортчо. Туала егитъёс тросэз дасез вылын ворттылыны дышемын ни, ӵем дыръя кинлэсь ке косэмзэ витё, лэся. Егитъёслэн мылкыдзы асгынме. Нош син азяды пуктэ ай, ма луоз, кызь, куамын ар ортчыса... Уз жингыртэ нылпи куараос, улонмес уз шулдыртэ кышномурт пальпотонъёс. Пурысь ӵын пушкы выёзы огназы кылем воргоронъёс. Малпаны ик кӧшкемыт. Сюлмаськытэк кияд сюрем шуддэ но ныр ултӥд келялод, шуо. Оло, кузёбай пиослы сьӧр гуртъёсысь егитъёсын эшлыко кусып юнматыса, пумиськонъёс, тодмасткон ӝытъёс ортчытъяно вылэм. Шуом, Кияса районысь уддядиосын я сальяосын, Грах районысь эграосын... Оло, кинъёс ке асьсэос но мылкыд карысалзы кузёбайёсын эшъяськыны. Шудон-серектон сямен кин ке семья но кылдытысал. Лёня серекъяса шуиз: - Али мон Академик гинэ, азьланяз Президент луыны малпасько. Кин тодэ, оло, егитъёслэн улонзы воштӥськоз. Тамак пурккетон кабинетсы бадӟымгес луоз но отын пӧртэм пумо кружокъёс ужалозы. Мон шумпотысал, чебересь малпанъёссы улонэ пыӵасалзы ке. В. Кутузова. Лёня Кузьмин, малпасько вуоно ӝыт сярысь! Туспуктэмез В. Камашевлэн. Шунды "Кызьы улӥськод, пионер?" конкурсэ Тодон люкамы, йырвизьмес сынамы Шаркан ёросысь Мувыр школаын ортчизы Куӟебай Гердлэн вордскемез дырысен 100 ар тырмонэзлы сӥзем ужрадъёс. Отчы пыриськизы 5-тӥ - 11-тӥ классъёсын дышетскись пиналъёс. Котькудӥз класс лэсьтыны кулэ вал Куӟебай Гердлэн улон-вылон сюресэзлы сӥзем йыртӥян. Нырысетӥ йыртӥян дасямын вал дас одӥгетӥ классын дышетскисьёсын. Соос борды мылысь-кыдысь итӥськизы мукетъёсыз но. Вань йыртӥянъёсыз коридорысь борддоре интыязы. Пиналъёс котькуд переменае одӥгезлы ке но юанлы валэктон сётыны тыршылӥзы. Та ужрадэн кивалтӥз школаысьтымы удмурт кылъя но литературая дышетӥсь Ольга Кузьмовна Малых. Ольга Кузьмовнаез вань пиналъёс сюлмысь ярато. Со котькытчы вутске но сётэм кылзэ одно ик быдэстыны тырше. Та дышетӥсьлы ик пиналъёс сётъязы йыртӥянъёслы валэктонъёссэс но. Котькуд шонер валэктон нимысьтыз дунъямын вал. Со сяна, удмурт арняе ортчиз Куӟебай Гердлэсь кылбуръёссэ лыдӟонъя конкурс. 5 "а" классын дышетскисьёс "Гондыръёс" поэмая вакчияк сценка пуктӥзы, нош 11-тӥ классын дышетскись нылъёс эшшо огпол тодматӥзы на Гердлэн улэм-вылэм сюресэныз, творчествоеныз. Соос ик ужрадэз йылпумъяса кырӟазы "Поръялоз, поръялоз" кырӟанэз, кудзэ кылдытэм Куӟебай Гердлэн анаез. Огъя конкурсын вормисе потӥзы 5 "а" но 7 "б" классъёсысь пиналъёс. Соос ветлӥзы Ижевскысь удмурт драмтеатре но краеведческой музее. *** Пиналъёслэсь йырвизьзэс сынан понна ыстӥсько К. Гердлы сӥзем йыртӥянме. 1. Учительской семинария, кудаз 1912 арысен К. Герд дышетсконзэ азьланьтэ. 2. Вордскем гуртэз. 3. Гердлэн псевдонимез. 4. Кырӟанлэн нимыз. 5. Тодмо ӟуч писатель. Гердлэн ВЛХИ-ын ӵош дышетскем эшез. 6. Историен но географиен яратоно дышетӥсез. 7. Ӟуч писатель, кудӥз юрттӥз поэтлы. 8. Кылбур сборникез. 9. Ӟуч кылын потэм кылбурез. 10. Газет, кудӥз нырысетӥ номераз печатлаз "Зарни шунлы ӝужалоз" кылбурзэ. 11. Фольклор произведениос вылын гожтэм поэмаез. Валэктон: 1. Кукарской. 2. Покчи Вуко. 3. Эмезь. 4. "Школае". 5. Бородин. 6. Пашин. 7. Горький. 8. "Лёгетъёс". 9. Вечер. 10. "Гудыри". 11. "Гондыръёс". Оля Широбокова. Мувыр школа. Шаркан район. Гожтэт ӧтиз сюрес вылэ Тодмет: ветыл ке ыше, "Волга" шеде Редакцие вуиз гожтэт. Алнаш районысь "1 Май" колхозысь, Кузёбай гуртысь. Зэмзэ вераса, газет берло аръёсы ушъяськыны уг быгаты узыр почтаеныз. Гожтэт келян угось, ваньмыз сямен ик, трос коньдонэз кулэ каре. Соин ик лыдӟисьёсмы туж бадӟым муген гинэ вазиськыло на ми доры, куке шуг югдурысь потыны мукет амалъёс уг кылё ни. Таиз учыр ӵапак сыӵеосыз пӧлысь, шӧдске. Зэм, гожтэтлэн авторез аслсэьтыз фамилизэ гожтымтэ. Туала законъя, анонимкаез лыдэ басьтытэк но кельтыны яра. Но таяз гожтэтын сокем бадӟым ӝожтӥськон, сое эскерытэк кельтыны нокызьы но уг луы. Соин ик - сюрес вылэ. *** Гожтэтын трос гинэ колхозлэн кивалтӥсьёсызлы пумит пыкылонъёс. Лыдӟисьёсмы понна валамонгес луоз, соосты тупен-тупен, радызъя сэрттӥм-пертчим ке. Кызьы интыяз шараяськиз, куд-огез пыкылонъёс чиньыысь сюпсемын, шуыны луоз. Тани гожтэтлэн авторез колхоз тӧроез янгыш каре тыметъёсты сузян борды басьтӥськемез понна. Медъяз, пе, та уже "Агропромхимиез", тачак уксё куштӥз солы. Бен, гуртысь тыметъёс воксё ӵыкмемын вал ини, сюен куртэмые. Вуэз отын, кызьы шуо, куреглы пыласькымон гинэ кылиз на. Кенакъёслы дӥськут гылъяны гинэ но (тылпу сярысь уг вераськы ни, инмар мед утёз ) ӝоген нокытын луысал. Котькуд ласянь учкы, но тыметъёс сокем ик колхозлы яке солэн тӧроезлы Владимир Степановлы кулэ ӧвӧл, макем гурт калыклы. Гожтэтлэн авторез сельсовет вылэ чӧлске: мед, пе, со тыметъёсты тазатоз (озьы верасько Кузёбайын). Но кинлы тодмо ӧвӧл, асьме сельсоветъёс вань улытозязы котькинлэсь но начар шуыса. Нош коньдон сярысь ке верано, со чик но юнме куштэмын ӧвӧл. В. Степанов та уж борды шуак-дуак ӧз басьтӥськы, азьвыл ваньзэ лыдӟиз-чотаз. Тымет пыдесысь дэриез ваньзэ бусые поттӥзы. Кин ӧжыт коть агрохимиен тодмо, со умой тодэ, макем зол узырмытэ мулэсь зумытсэ тымет дэри. Агрохимия наукаын та удобренилы нимыз но вань - сапропель. Таин валче кӧня ке лыдпусъёс. Шуом, одӥг тыметэз сузяны 100 миллион манет быдтэмын. Нош отысь поттэм сапропельлэсь пайдазэ ӵошатыны луоз 200 миллион манет тыр басьтэм минеральной сылалэн. Кыӵе ыштонъёс сярысь вераськыны луоно татын? "Агропромхимиез" медъяны сярысь ке верано, таиз но пыкылон юнме. Колхозлэн угось ноку но ӧй вал но, ӧвӧл но тыметъёсты сузяны нимысьтыз техникаез, шуом, нюр вылын ужаны чаклам экскаваторез ик. Озьы ик вераны луоз сенаж дасян пумысен но. Кызьы гожтэтын верамын, колхоз та пудо сиёнэз дасяны РТП-ез медъям, нош асьсэлэн машинаоссы, пе, тэк сылӥзы. Сокем ик шонер ӧвӧл со. Кылем гужем колхоз турын турнан комбайнтэк кылиз: вужъёсыз сӧриськемын, выльзэ басьтыны, котькинлэн сямен ик, коньдон ӧвӧл. Соин ик секыт югдур гинэ РТП-е вазиськыны косӥз. Колхоз машинаослэн тэк сылэмзы сярысь вераським но кыл пӧръям гинэ, соос но октонын ужазы, пудо сиён но ворттӥзы. Нош ик коньдон сярысь ке верано, колхоз РТП-лы ускёен 1 миллион манет гинэ тыриз. Кылемзэ дунзэ нянен, вӧйын, кытӥяз сӥлен пыриз. Тодмо ӧвӧл ай, кызьы, кыӵе дунын хозяйство вузаны быгатысал та продукцизэ. Нош татын меӵак пайда. Вылаз ик, колхоз быдэс толлы тырмыт но вылӥ ӟечлыко пудо сиён дасяны быгатӥз. Сотэк шат али но хозяйствоын скаллы быдэ 10 килограммлэсь ятыр йӧл кыско. Тросэз-а пудо вордӥсьёс тулыс нуналъёсы таӵе йӧлэн ушъяськыны быгатозы? Гожтэтын бадӟым инты висъямын колхозын ортчем быръёнлы. Гожтэтлы осконо ке, Степанов председателе кескич амалъёсын, законэз тӥяса пырем. Но колхозын котьку но одӥг закон вал ук - солэн уставез. Уставлэсь вылӥын - огъя собрание. Калык ик чакланы кулэ, быдэсъяське-а устав яке уг-а. Котьма ке но, председателез быръён - со колхозникъёслэн асьсэлэн пуштрос ужзы. Газетлы та уже нырзэ месыны, небытгес вераса, сокем ик чебер уз луы. Выжом мукетыз чагиськон борды. Таиз но уксёен герӟаськемын. В. Степанов, пе, нокинэн вераськытэк-кенешытэк машина возён азбарез бетон заборен котыртыны кутскем. Та начар улон вакытэ соин йырин ӧвӧл, гожтэ автор. Собере аслыз ачиз ик пумит вераса йылэтэ: "Нош машина но, трактор но частной луэмын". Механизаторъёс но шофёръёс техникаез, нокинлэсь юатэк-вератэк, ас тодэмзыя куто шуыса валано луэ та кылъёсты. Мукетсэ уд но витьы, азбаре котькуд ласянь котькыӵе техникаен пыраны- потаны луэ бере. Сое заборен котыртӥд ке, капка доры возьмаськись пуктӥд ке, эрикез мыдлань валасьёс соку гинэ лапкалозы. Лӥятыса пайдаез узгес ик луы, дыр. Соин ик валаны луэ В. Степановез, куке со шуэ: котькыӵе, пе, секыт мед йӧтоз но гаражез одно ик котырто заборен, отын одно ик порядок луоз. Тани тазьы ик председательлы дурбасьтыса гинэ йылпумъя вылэм вераськонэз, но уг луы. Владимир Александровичлэн угось умоез вӧзын сьӧлыкъёсыз но тырмыт гинэ. Тужгес но синмаськыны уг луы солэн ассэ шонере поттыны турттэмезлы. Тани басьтом вал гид лэсьтэмзэс. Сое пуктыны кутскиллям колхозысь лэсьтӥськисьёс. Кисьтӥллям фундамент, ӝутӥллям борддоръёссэ. Собере ужзы могӟем. Кызьы В. Степанов шуэ, огъёсыз, пе, асьсэ понна турнаны кошкизы, мукетъёсыз асьсэлы яке ӵыжы-выжыоссылы юртъер лэсьтыны кутскизы. Соин ик председатель лэсьтӥськонэз азьланьтыны лымшор палась "кибашлыосты" медъяно луэм. Но кыӵе соослэн "зарни киоссы" - ваньмызлы тодмо ини. Вакчияк вераса, "сьӧдъёслэн" ӝутэм висъетсы со араз ик куашказ. Бервылзэ колхозникъёслы октоно-калтоно луоз. Та пумысен эриктэк юан кылдэ: ӧй луысал шат соослы ик вань ужез йылаз-пумаз вуттыны? Владимир Александрович, тӥ кин- о, кузё-а, ӧвӧл-а колхозады, калыктэс ужатыны уд быгатӥське бере? Кузё ик, дыр, мукетсэ учырез эскероно ке. Кылем сӥзьыл председатель косэм валтӥсь быхгалтерлэн воштӥсезлы М. Г. Кудрявцевалы кассаысь 6 миллион манет сётыны. Ӧвӧл, кредит но, юрттэт но ӧвӧл со. Мария Григорьевналэн но солэн картэзлэн басьтымтэ уждунзы сомында люкаськем. Сӥзьыл соос машина басьтыны малпаллям, нош уксёзы уг тырмы. Председатель юрттоно кариськем. Мар бен, номыр но умойтэмез ӧвӧл отын, котькуд адямилэн правоез вань ужам уждунзэ басьтыны. Но та правоез котькинлэн вань ук. Нош колхозын толэзьёсын уксё уг басьто. Озьыен, шонер шат со, куке одӥгезлы машина басьтыны миллионъёсын сёто, нош мукетъёсызлэн эмъюм но басьтыны уксёзы ӧвӧл. Котьма шу но, таӵе югдурез ушъяны ым уг пыры. Яке тани фермалэн кивалтӥсезлы З. С. Алексеевалы уждунэз чотын скал сёто. Со дыре ик одӥгез шофёр (нимзэ шарае поттытэк кельтыны куриз) пиналэзлы дӥсь басьтыны 200 сюрс манет курем. Председатель пумит луэм: касса, пе, буш. Кызьы адями ӝоже уз усьы? Вандэм ветылэн герӟаськем югдурез тумошо шуыны луысал, сюлэмшугъяськытӥсь ке со ӧй луысал. 17 декабре, З. С. Алексеевалэн косэмезъя, вылӥ фремаын ветыл вандо. Фермалэн кивалтӥсез сӥлез ӝытазе кладовкае ӵогаса кельтэ. Ӵукнаяз сӥль фермаын уг луы ни. Колхоз складэ но со уг вуылы. Сӥлез кытчы келям-вузам сярысь бухгалтериын нокыӵе накладной ӧвӧл. Кытчы бен сӥль луиз? Вандэм ветыл пыдъяськыны быгатоз но пегӟоз шуыса оскыны шуг. В. Степанов шуэ: со вакытэ, пе, мон колхозын ӧй вал, номыре уг тодӥськы. Тужгес но паймымонэз - валтӥсь бухгалтер А. Н. Бикмаев но юанлы пумит киоссэ гинэ вӧлъя. Номыр уд шуы, вот таиз бухгалтер ке бухгалтер ини. Мон малпамъя, бухгалтер возьмаськись пуны выллем котькуд копейказэ син улаз возьыны кулэ. Нош со тӥни быдэс ветыллэсь ышемзэ уг шӧды. Ӧйтод, прокуратуралы та учыр тунсыко уз поты меда? Тужгес но серемес кылӥське кивалтӥсьёслэн ветыл сярысь номыр но тодымтэзы. Председатель но, бухгалтер ышем сӥль сярысь нырысьсэ корреспондентлэсь тодэм амал карисько. Нош колхозникъёс контораын но огъя собраниын та сярысь вераськон ӝутъязы вал ини. ... "Волга" автомашина пумысен мур лулӟоно гинэ луэ. Берпуметӥ модель, ӵыжак выль ГАЗ-3110 али колхоз складын сылэ. Документъёсыз но ӧвӧл на, дуныз но тырымтэ на. Но ваньмыз лэсьтэмын луоз, кызьы шуэ машиналэн вуоно пассажирез В. Степанов. "Жигули" машинае, пе, туннэ-ӵуказе куашкалоз ини, сюрес вылэ потыны ик дӥсьтоно ӧвӧл, кулэ выльзэ. Нокин но пумит уз луы, кызьы кивалтӥсьлы машинатэк. Но малы одно ик "Волга"? Маин уг яра, шуом, УАЗ яке "Нива"? Вылаз ик, таосыз урод сюреслэсь но уг кӧберало. Ӧвӧл, одно ик "Волга" кулэ. Маин алама бускель тӧроослэсь Владимир Александрович? То-то угось. Зэм но, Алнаш районысь данакез председательёс "Волгаосын" ворттыло. Миым но туэ гинэ витез соос таӵе лимузинъёс басьтӥзы. Со пумысен районысь прокурор Н. Микишев кунэрскыса серекъяз: председательёсмы, пе, Б. Немцовлэсь "Волгае" пуксьыны ӧтемзэ туж ӟеч валазы но умоен лыдъязы. Алнаш кивалтӥсьёс понна "Волга", шӧдске, паласькись висён выллем луиз. Нош уждун тыронъя пунэме одӥг хозяйство гинэ кылемын ӧвӧл. Я кызьы валалод та председательёсты: калык паймемын кызьы, маин улыны, нош соос ӵошатскыса выль машинаос басьяло. ... "1 Май" колхозын вить толэзь ӵоже ини уждун уг басьто. Хозяйство аслаз ужасьёсызлы 205 сюрс манетлы пунэме кылемын. Бен колхозлы палэнысь организциос 37 сюрс манет тырыны кулэ. Но ачиз со сыр лэсьтон заводлы 60 сюрс манетлэсь ятыр тырыны кулэ. Вылаз ик, ватсаськоз на "Волга" понна тыриськон. ... Ӵок, редакцие вуэм гожтэтэн ваньмыз ласянь соглаш кариськыны уг луы ке но. Но тросэз отын верам малпаськонэ уськытэ. Жаляса верано луэ, таӵе выллем югдур Кузёбайын гинэ ӧвӧл, данаказ хозяйствоосын. Кивалтӥсьёс вожмаськыса выль машинаос басьто, асьсэлы дворецъёс выллем юртъёс пукто, нылпиоссэс "шуныт" интые интыяло, нош огшоры калыкез кылэм-адӟем но уг каро ни. Ӟуч сямен вераса, со сьӧд чер дыръя юондыр шуиське. Г. Коряков. Шунды "СТУДЕНТЪЁСЛЭН ТУЛЫССЫ-98" Глазовын ортчиз студентъёслэн творчествозылы сӥзем республиканской фестиваль. Егитъёс возьматӥзы сценкаос, кырӟаны, эктыны быгатэмзэс. Сценказы тужгес но умоен лыдъямын вал УдГУ-ысь "Скифы" командалэн. Кыкетӥ интыез озьы ик басьтӥз УдГУ-ысь "ФСКА", куинетӥ интыын луиз ИГМА-ысь "СТОМА". Кырӟасьёс пӧлын нырысетӥ интыын - Лев Емельянов (Глазов пединститут). Куинь кыкетӥ интыосты басьтӥзы Лилия Гафеева (Глазов пединститут), Михаил но Александр Збар (ИжГТУ), Игорь Шилин но Татьяна Левченко (УдГУ). Эктонъя пусъемын вал УдГУ-ысь "Экзотика" ансамбль, оригинальной жанръя - Глазов пединститутысь "Народное техно". Вормисе потэмъёс ваньзы ик пыриськозы студентъёслэн региональной фестивалязы, ортчоз 21-23 апреле Оренбургын. "Студентъёслэн тулыссы-98" фестивалез котьку сямен ортчытыны юрттӥз Удмурт Республикаысь Егитъёсын ужанъя кун комитет. Удмурт Республикаысь Кун Кенешлэн аппаратэз мур куректэмзэ вера Кун Кенешлэн пресс-службаяз ужась Александр Валерьянович Черновлы но солэн ӵыжы-выжыосызлы но матысь муртъёсызлы, анаез Чернова Нина Яковлевна улонысь вазь кошкемен валче. Удмурт Республикалэн Конституцияз пыртыны дэмлам воштонъёсты но ватсанъёсты печатламен но та пумысен Удмурт Республикаысь Кун Кенешлэн Тӧроезлэн А. А. Волковлэсь Вазиськонэныз валче Удмурт Республикаысь Кун Кенешысь депутатъёслэн "Удмуртиысь коммунистъёс" фракцизылэн Заявлениез 1998 арын 19 мартэ иворъёсты вӧлмытӥсь кун ёзъёсын печатламын Удмурт Республикалэн воштонъёсын но ватсанъёсын Конституциез. Сое дасяз депутатъёслэн комиссизы, но со Кун Кенешлэн сессиЯз юнматэмын ӧй вал. Конституцилэсь проектсэ печатламен валче Кун Кенешлэн Тӧроез А. а. Волков депутатъёслэн группазылэн нимыныз вазиськиз калыклы. Вазиськоназ со "Удмуртиысь коммунистъёс" фракцие пырись депутатъёслэсь малпанъёссэс но ӵектонъёссэс мыдланьтӥз. А. А. Волковлэн Удмурт Республикаысь гражданъёслы Вазиськоназ пусъемын, "Удмуртиысь коммунистъёс" фракциысь депутатъёс та ужпумез эскерыны но соин калыкез тодматыны пумит луизы шуыса, озьы, пе, соос куара сётонэз уретӥзы. Кун Кенешлэн Тӧроез зэмлыкез уката но кырыжтӥз, коммунистъёс калыкен кенешыны пумит луо шуыса вераллякуз. Республикаысь вылӥ должностен муртлэн таӵе верамъёсызлы ми пумит, соин ик калыклы малпанъёсмес ивортӥськом. Соос Удмуртиысь уноезлэн бырйисьёслэн малпанъёссылы тупало. Республикалэн туала кивалтӥсьёсыз тыршо Удмуртилэн валтӥсь законаз ватсанъёс пыртыны, республикалэсь конституционной стройзэ воштон, Удмуртиез, парламентской республика интые, президентской карон, республикалэн кивалтӥсезлы паськыт луонлыкъёс сётон понна. Асьме калыклы сыӵе воштонъёс но ватсанъёс кулэ-а? Куинь ар талэсь азьвыл юалляськон ортчытыку, со шуиз: президент кулэ ӧвӧл. Берло аръёсы ортчем ужрадъёсын калык решенизэ эшшо огпол юнматӥз на. Со решениез лыдэ басьтӥськом ми, депутатъёс- коммунистъёс. Ми дасямы "Удмурт Республикалэн Конституцияз воштонъёс но ватсанъёс пыртон сярысь" Удмурт Республикалэн Законэзлэсь инъетсэ, Удмурт Республикалэсь Конституцизэ Россия Федерацилэн Конституциезъя тупатон понна, Россия Федерациысь Юстицияя министерство но Удмурт Республикаысь Прокурор куремъя. Конституция пумысен референдум ортчытонлы ми пумит ӧвӧл. Нош Кун Кенешлэн Тӧроез А. А. Волков вазиськоназ та сярысь ӧз поттылы. Удмурт Республикаысь Кун Кенешысь депутатъёс-коммунистъёс калыклэсь куронъёссэ азьланяз но быдэсъяны тыршозы. Малпаськом, али Конституциез воштонэн вырыны кулэ ӧвӧл, кун властьлэсь но интыысь аскивалтонлэсь кужымзэс кутоно экономикаез, калыклэсь улонзэ умоятыны инъетэз, ӝутонэ. Депутатъёслэн "Удмуртиысь коммунистъёс" фракциенызы кивалтӥсь А. Г. Бегунов. Шунды ИНВИСЭ ВАМЫШЪЁС Можгаысь педагогической училищеысь студентъёс асьсэлэсь газетсэс поттыны кутскизы. Солы ним сётон понна дышетскисьёс пӧлын нимысьтыз конкурс ялэмын вал. Трос нимъёс пӧлысь дугдоно кариськизы "Горизонт" вылэ. Потӥз ни газетлэн кык номерез. Студентъёс отын верало асьсэлэн улэм-вылэмзы сярысь, тодмато дышетӥсьёсынызы но дышетскисьёсын, серекъяло, маскаръясько, ог-огзылы пайдаё дэмланъёс сёто. Вань кылбуран но гожъяськон удыслы сӥзем бамзы. Кыкетӥ номераз бадӟым саклык висъямын жилищно-коммунальной хозяйстволэн муниципальной предприятиезлэн директореныз вераськонлы. Кызьы али тодӥськом ни, Игорь Николаевич Семеновез Можгаысь калык бырйиз городлы мэре. Газетэз поттыны юрттэ Можгаысь педагогической училище кылъя но литературая дышетӥсьлэн Татьяна Михайловна Кибардиналэн кивалтэмез улсын. Пичи быдӟалаен но куать бамъем "Горизонтлэн" тиражез 1000 экземпляр. Печатла сое Можгаысь полиграф предприятие. Газетлэн дуныз эрико. Л. КИМОВА. КУН КЕНЕШЫН Валлян, 14 апреле, ортчиз Кун Кенешлэн Президиумезлэн кенешез. Отын учкемын Кун Кенешлэн вуоно 19-тӥ сессияз эскероно ужпумъёс. Соос пӧлын валтӥсез луоз Правительстволэн отчётэз. Валамон, парламент Правительстволы дунъет сётоз республикалэн миым кызьы ужамезъя, кӧня ваньбур поттэмъя, калыклэсь улон-вылонзэ умоятэмъя но музон лыдпусъёсъя. Мукетыз ужпум герӟаськемын республикаямы туэ кун заём поттонэн. Со кӧня ке юрттоз кун бюджетын тырмымтэ коньдонэз (дефицитэз) пытсаны. Кенешын озьы ик рос-прос учкемын "Строительно-монтажное акционерное общество-93" ОАО-лэсь акциоссэ вузаны лэзён пумысен Правительстволэн постановлениез, Ижысь полиграфической комбинатлэсь вуттымтэ складзэ аукционын вузаны лэзён, "Воткинский винзавод" ОАО-лэсь огшоры акциоссэ Удмурт Республикалы кун ваньбуре басьтон сярысь ужпумъёс но мукет. Красногорск районысь Валамаз посёлоклы азинскыны ӟеч условиос кылдытон сярысь вераськон кемалась мынэ. Президиумын та ужпумъя нимысьтыз положение юнматэмын. Г. ВАСИЛЬЕВ. ӞЕЧКЫЛАЗ ПРАЗДНИКЕН Православной Черк та нуналъёсы самой бадӟым но сӥё-дано праздниксэ - Пасха но Христос Улӟыса Султон праздникез - пусъе. Соин валче Удмурт Республикаысь Кун Кенешлэн Тӧроез Александр Волков Ижевск-Удмурт епархилэн кивалтӥсезлы Николай Архиепископлы ӟечкылан ыстӥз. "Инмарлы оскисьёс понна бадӟым шумпотонэн югдытэм нунал,- верамын Кун Кенешлэн Тӧроезлэн гожтэтаз,- матын но дуно котькуд адямилы, кин оске ӟечезлэн но зэмлыклэн лек, ваньзэ куашкатӥсь кужымъёсты вормемзылы. Лул-кужым, яратон, тупаса но ог-огдэ валаса улон утчан понна, пумен уногес адямиос черке сюрес быръё. Ӵапак со сюрес ик ӟеч творческой малпанъёсты, калыклэсь традициоссэ, солэсь культура удысысь узырлыкъёссэ улӟытон но утён сярысь сюлмаськонлэн огъясь инъетэз луэ". Александр Волков Николай Владыкалы тазалык, шуд но Удмурт Республикаысь калык понна выль ӟеч ужъёс сӥзиз. Удмурт Республикаысь Кун Кенешлэн пресс-службаез. Алексей ШКЛЯЕВ Египетысь чуръёс ДУНЪЁС НО МУКЕТ "ЧЫРЫ-ПЫРЫОС" Кинэ кызьы, вылды, нош монэ жуммытӥзы ни Египет сярысь чуръёс. Лыдӟисьёсты буйгатыны дыртӥсько: таиз веранэ - берпуметӥез. Отчы тэрытыны вырисько ни ваньзэ азьвыл гожъямъёсам сюрымтэ учыръёсты. Мадёнмес кутском инкуазь бордысен. Тол сярысь татын уг тодо. Уин 10 градус шуныт, нуназе 30-40 градус пӧсь. Куд-ог емышъёс араз куинь пол кисьмало. Египетэз нырысь ик сюдэ Нил. Со вӧзысь нёжалъёсын воргоронъёс губырскыса тыршо. Будэто банан, виноград, манго, чабей, рис. Нил вӧлскыку, отысь вуэз кыско бусыосы но, колдэчъёсы но. Маин, шуоды? Насосъёсын? Тодазы ик ӧвӧл. Уно сюрс ар талэсь азьвыл сямен ик, шурез но колдэчез герӟало пу гумыосын (дырдыосын). Вуэз "улляло" ведраосын. Горд зарезь - Нил ӧвӧл - кузьыт вуэныз уг тэлеӟыты будосъёсты. Маин улӟытоно турын-куарез? Арабъёс куто канализацие люкаськем вуэз. Кызьы отысь палэнто сылмем майталэз но музон изъяно макеосты? Тазэ тодыны ӧйлась. Нил - дунне вылысь тужгес кузез шур - 6 сюрс 671 иськем. Угандаысен кутскыса, быдэс Египет пыртӥ уй пала бызе но Средиземной зарезе усе. Али та шурын крокодилъёс ӧвӧл ни. Асуан тымет ӝутскем бере, соосты вордо нимысьтыз фермаосын. 50-60 сантиметрозь вуттыса вузало. Горд зарезь (Красное море) луоен сэрен пиш-пиш горд кожаськомы вал. Нимыз герӟаськемын уга отысь горд вутурынэн. Етӥн сяська кадь лыз-чагыр вылэм. Шораз акулаос уяло, пе. Ми ӧм аддӟе. Пыласькыку пыдъёс борды мырӟиськыло дасоосын чорыгъёс - векчиесь но кузесь. Уин милемды зарезе пыраны ӧз лэзе. Акулаосын сэрен ӧвӧл. Пеймыт дыръя, пе, ярдур пала кыстӥсько ву ӵушъялъёс но мукет улэп макеос. Соосты лёганы уг яра. Луо нёжалъёсын улэп макеос чик ӧвӧл кадь. Сак синъёс оскыто: отын будо бышкись турынъёс, пӧлазы адскыло, пе, кыйёс. Саксаул но кион сярысь кылылэмзы ик ӧвӧл кадь. Ӟичыез адӟылӥллям. Ми пумитэ нокыӵе пӧйшур ӧз поты. Пустыняын синйылтӥм мукетсэ. Бедуинъёс доры мыныкумы, гурезь пала вуим но чагыр виштыез адӟим. Вырйыл вамен потод но лыз-лыз ты доры вуод кадь. Ширтӥськом - ву весь пегӟе. Со ик вылэм мираж шуон - ӧвӧлтэм ты. Зорылэ араз одӥг-кык пол ог вить минут ӵоже. Миым одӥг интыетӥ асфальт сюрес ик гылтэмын вал. Пӧсез чиданы секыт ӧвӧл. Горд зарезь вӧзын весяк тӧл пельтэ. х х х Ужлы ёрмисьёс 8 процент, пе. Зэм, уж шедьтыны луэ. Лэсьтӥськон будэ, отчы дунтэм кужым кулэ. Куд-огезлэн ужамез уг поты, шуо. Кураськисьёс одӥг-ог сяна ӧвӧл - мечетьёс но черкъёс вӧзын. Египетын 96 процентэз музъем - луовыл. Озьы ке но, отын лэсьтӥськон зэмен ик паськыта. Трос интыысь адӟиськом йылпумъямтэ из юртъёсты. Улӥяз уло ни кадь. Вылӥяз омыре мертчиськемын арматура езъёс но из юдэсъёс. Дыды-гид Таня валэктэ: - Озьы сыло дас-кызь ар. Пумаз вуттымтэ юртъер понна налог ичигес тыроно. Озьыен, налоглэсь пеган ласянь татын но утчало кескич амалъёс. Макем матынэсь асьмеос - египетъёс, ӟучъёс, удмуртъёс... Музъем но ужась кужым дунтэм бере, юртъеръёс но дуноесь ӧй вал. Али, курортъёслэн данзы будыса, огинтыын возиськись ваньбур (недвижимость) 100-150 пол дуногес луиз. Гамаль Абдель Насер кивалтыку, Египетын кылдытэмын вал социализмлэн инъетъёсыз. Куд-огез али но кылемын. Ужаса улӥсьёслы кун висъялляз квартираос, дунзэс 20 ар ӵоже тырон вылысь. Тазалыкез утён но дышетон - дунтэк. Арабъёс понна. Нош мукетъёсызлы? Горд зарезетӥ катерен уякумы, мон кырысен ӝомо-югдо азе пыри но выж вылысь люке уси. Ӝытазе ӟырдай. Врачез ӧтизы. Кӧтурдэсме юрдыса кадь маялляз но ваньмыз умой, шуиз. Басьтӥз 100 фунт (200 манет) одӥг укол пуктэмез понна. Иже бертыса но ойгетыса мынӥ больницае. Урдлые чигемын, пе. Валамон ини, мистер Шкляев табере уз утча мистер арабез-врачез. Эмъям понна дунэз висисьлы берыктыны кулэ Россиысь огез страхкомпания (Шкляев бумагаос люканы быгатӥз ке). Нош Египетысь тазалыкез утёнлэн данэз мон азьын бездӥз одӥг сук сямо врачен йырин. х х х Куд-ог музон дунъёс таӵеесь (манетэ берыктыса): табань - 10 коньы, килограмм помидор - 2-5 манет, курег - 10, сӥль - 20-40 манет, 1 грамм зарни (750-тӥ проба)- 80 манет. Банкын коньдон возись арабъёс 2,5 процентсэ арлы быдэ висъяло куанеръёслы но мечетьёслы. Юн вӧлмемын "чайлы" коньдон сётон. Гостиницаысь улон интыдэ утялтӥсьлы но, мечеть вӧзын сылӥсьлы но, сумкадэ нуисьлы но ӧжытсэ 1 фунт (2 манет) кельтоно. Вылаз ик, арабъёс вамышлы быдэ тэбинё, авторучкадэ, доллардэ, музон кузьымдэ портыса. Туннэ Египет - Африкаысь огез азинскем страна. Президент Анвар Садат СССР-ен эшъяськон сярысь огкылэз (договорез) дугдытӥз но США-лы матэ кариськиз. Солэсь гожзэ азьланьтэ СССР-ын дышетскем туала президент Хосни Мубарак. Озьы ке но, асьме странаез татын шуныт кылын верало. Ӟечбуръяськыку потто Горбачев но Ельцин фамилляосты. Тодо асьмелэсь кема быдэтскон сяммес но. Кытчы ке мыноно ке, пумиськон дырез ӟучъёс понна юри ӝыны часлы вазьгес тупато. Котькуд верамам мон тау карылӥ "Москва-тур" фирмалы. Малы? Солэн кивалтӥсез Евгений Шведов но Россиысь Журналистъёслэн союззылэн тӧроез Всеволод Богданов кемалась тупатӥзы эшлыко кусыпъёс. Туэ ог сю муртлэсь делегация кылдытӥзы но ысъязы Египетэ. Россиысь тросгес адямиос мед тодозы, пе, вашкала дунне сярысь но, "Москва-тур" фирма сярысь но. Мар бен, данакезлы удмуртъёслы шуд уг усьы на сокеме ветлыны. Быгатӥ-а, ӧй-а, но Египет сярысь тӥледлы яркытгес мадьыны выри вал. Иж - Москва - Хургада - Каир - Луксор - Москва - Иж. Владимир Мининлэн хорезлы - 25 ар Коллективлэн кивалтӥсез тазьы гожъялляз: 25 ар ӵоже ни Крезьгурез данъямы, вань сюлэммес поныса, малпанъёсмес, осконъёсмес солы сӥзьыса. Юбилей азьын концертъёс хорлэсь азинскон сюрессэ возьмато. Та сюрес вылын колектив уно шуг-секытъёсын пумиськиз, соос пӧлысь куд-огзэ вормиз, кылемъёссэ - ӧз, выльзэ утчаны тыршиз, шудбурез но шумпотонэз шӧдӥз. Вормонъёслэсь шӧмзэс валаны юрттӥзы хорлэн дышетӥсьёсыз но эшъёсыз: государство; хормейстеръёс но концертмейстеръёс; артистъёс, кудъёсыз хорлы сюлэмзэс но быгатонлыкъёссэс сётыса пӧртэм вакытъёсы ужазы; композиторъёс, кудъёсыз чебересь крезьгуръёс гожтӥзы; телевидение, радио, газетъёс, кудъёсыз кырӟасьёслэсь творчествозэс калыке вӧлмытӥзы; филармониослэн директоръёссы, кудъёсыз концертъёсы, фестивальёсы ӧтьылӥзы; крезьгурез яратӥсьёс, кудъёсыз кужым пыӵатӥзы, оскон кузьмазы. Экономикаысь ужпумъёс КУШТӤСЬКЕМ МУЗЪЕМ НО СЯСЬКАЯ огпол со зэмос кузё кие вуэ ке Михаил Давыдович Копотев 20 ӵоже ужаз дышетӥсь луыса. Кунамы выльдӥськон кутскыса, улон сюрессэ чутрак воштоно кариськиз... Ӧй, та мадёнме мон чебер кылъёс понна тазьы ӧй нима. Татчы вуиськод - син мальдэ. Кырӟанын кадь ик, котыр-котыр - лыз, ӵуж, льӧль, курень сяськаос. Нимъёссы нош... Тросмылэн кылылэммы но ӧвӧл, дыр, - бархатцы, дельфиниум, космея но мукетъёсыз. Сад-бакчаысь пичи убоосын луысалзы ке, ярам вылэм. Лыдъянтэм соос. Кинлы, марлы кулэ тамында сяська? Базаре, шуом, поттоно ке, ваньзэ вузаса но уд быдты. - Сяська - со ӝӧк котырез, корка пушез шулдыртон маке гинэ ӧвӧл,- шуэ Михаил Давыдович. - Со - асьмелэн улонмы. Сяська яратонэз, семьяез юнматэ, азьланезлы ӟеч оскон сётэ, тазалыкмес уте, шырыт сюлэмо луэммес возьматэ. Юнме-а гажано адямиосмылы, шуд но бур сзьыса, одно сяська кузьмаськом. Мынам малпамея, котькытын но котьку тазьы мед луоз вылэм. Тӥни соин та чебер будосъёсты быдэс удмурт улосамы вӧлмытон понна кужымме жалятэк сюлмаськисько. Огшоры кылъёс ӧвӧл со. Михаил Давыдович Копотев 20 ар ӵоже ужаз Ижысь 18 номеро школаын биолог луыса. Табере валады, луоз, малы солэн мылкыдыз сокем кыстӥське ненег будосъёс (соос гинэ-а), шаерысьтымы ӵыдонтэм инкуазь котыре. Кунамы "выльдӥськон" кутскыса, Михаил Давыдович но улон сюрессэ чутрак воштоно кариськиз. Фермер луэмез потӥз. 1992 арын Игра ёросысь Колюшево гурт дорысь кӧня ке музъем басьтӥз. - Паймод адямилы,- киоссэс гинэ вӧлъяллязы гуртоос.- Ма шедьтэм со татысь. Нюк но гоп. Со но кырыж-мерыж писпуосын, пушнерен алямын. Огъя вераса, куштӥськем музъем. - Бен, интылы удалтӥз уд шуы,- нялтас луэ Копотев.- Гырыны-кизьыны ярасез музъем 2 гектар ёрос сяна ӧй вал. Отчы мон нырысь араз ик кизи эмъюм турын-куаръёс, картофка, 0,5 гектарзэ кельтӥ сад улэ. Мерттӥ сутэр, вишня, крыжовник, эмезь но мукетсэ. Отӥыз музъеме - турнан но пудо возьман интыос. - Михаил Давыдович,- вазиськисько,- асьтэос семьяеныды улӥськоды Ижевск дорысь Медведево гуртын. Огпала гинэ мынонды ог сю иськем ук. Сокемын хозяйство воземды дуно уг усьы-а? - Ужпум коньдон бордын гинэ ӧвӧл,- пальпотэ воргорон.- Музъемез зэмос яратӥд ке, дунне пыдсын но со тыныд рай интыын луоз. Собере пиосме но гурт уже кыскеме потӥз. Мед тодозы, кызьы ӝӧк вылэ вуэ нянь. Улон шоры, оло, мукет синмын учкыны кутскозы. Михаил Давыдович, кызьы шуо, ачиз гинэ тодэ, кӧня нюлано, уйёсты кӧлытэк ортчытылоно луиз, аръёсын кӧлэм музъемез улӟытон понна. Басьтӥз куинь вал. Уно коньдонзэ быдтӥз, оло, быдэс республикаысь куштыны вуэм яке кемалась ни сыномись герыос, усыос, аран-турнан машинаос но мукетсэ люкаса. Ваньзэ сое ас киыныз выльдӥз-тупатъяз. Табере валэн гыре, кизе. Трактор яке машина кулэ ке, артысь совхозэ, мукет хозяйствоосы вазиське. Коньдон тырись муртлы юрттыны шерез пумит луэ. - Толзэ улӥсько Медведевоын,- шуэ Копотев. - Гужемлы кошкисько Колюшевое. Кузпалы бен радыз понна, лэся, куддыр даллаше. Но мон ведь вордскемея - Козерог. Таӵеос, пе, космосэн кусып возё. Озьыен, кужым мыным,- Михаил Давыдович киыныз возьматэ инме,- отысь вуэ. Юртто пиосы. Кузпалы но, отчы вуэ ке, вань таркаськонзэ вунэтэ. Мон сое Играын валэн пумитасько, улон-ужан интыям азьвыл барыняез сямен вуттӥсько. Туала музъем ужын, кужым но тазалык сяна, тодэм-валам кулэ на. Ас дыраз Сарапулысь механизацияя училищеез йылпумъям Копотев сельхозакадемиын нимысьтыз курсъёсын дышетскиз на. Татысь, УдГУ-ысь но мукет интыосысь тодосчиосын юн кусып тупатӥз. Сое ӟеч тодо но котьку юртто Воткаысь "Чайковский" нимо совхозын, Ижысь гурт ужъёсъя научно-исследовательской институтын, пӧртэм пумо станциосын но уно мукетаз. Синмаськымон соиз но. Фермер 18 номеро школаен кусыпъёссэ али но уг уреты. Азьвыл пиналъёсты доска дорын дышетӥз ке, табере - музъем вылын. Гужем ӵоже ог кызё нылъёс но пиос уло но ужало, пӧртэм опытъёс ортчытъяло Копотевлэн хозяйствояз. Асьсэос сиён дасяло, вареньяос, джемъёс пӧзьто, губи сылалто. Шудыны-серектыны но вуо. Анай-атайёс шумпото: пиналъёссы оскымон адями бордын. - Мон соосты пӧртэм емышъёслэсь но будосъёслэсь шыд пӧзьтыны, юонъёс парыны, уно пумо эмъюмъёс дасяны дышетӥсько. Ваньмыз со котырамы ачиз будэ яке нимысьтыз мерттӥськом. Огъя вераса, ма сиыны ёрмыса ум улӥське. Ужало мон дорын гуртысь пиналъёс но. Соослы мон, совхоз сярысь, ог дасо пол тросгес уждун тырисько. Пичиысен мед валалозы: ужез макем золгес яратӥд, сюлэмдэ сётӥд, азьланьын сокем тырогес но каньылгес луоз улонэд. Бен, туннэ Колюшево дорысь куштӥськем музъемез уд тодма ни. Котькуд тулысэ со, улосэ ӵыдонтэм ческыт зын вӧлмытыса, сяськаен шобырске, нош сӥзьыл синмез шумпоттыто тыр емышъёс. Кызьы верай ни, Михаил Давыдович ачиз сярысь гинэ уг сюлмаськы. Самой ӟеч, асьме палъёсын тужгес удалтӥсь будосъёсызлэсь, емышъёслэсь кидыс уськытэ. Пӧртэм интыосын вуза соосты, кулэ карисьёслы дась почта пыр но ыстыны. Ог аре Воткаысь пенсионеръёслы дун басьтытэк люкылӥз. Уката но умой, дыр, соиз: та кидысъёс будэтэмын, тазалыклы кышкыт луисьтэм сылалъёсты но вуосты кутытэк. Ваньзэ сое, нош озьы ик музъем ужъёсъя пӧртэм научной литература фермер вуза на Ижысь "Деметра" магазинын. Дунзы, мукет вузчиослэн сярысь, шӧдскымон кулэсгес. Кенэм, помидор, перец, узы, огреч, ӵуж кушман, кӧжы, арбуз, сугон но уно мукетыз - ваньмыз со вань Михаил Давыдовичлэн. - Аналтэм музъемез адӟыса, мынам пушкы тыре,- шуэ фермер.- Тани городын улӥсьёслы сад-бакча радъяны инты висъяло. Куд-огез ведь сое дуно дунын вузан но кисызэ зӧкомытон понна гинэ басьтэ. Мукетыз отчы чуртнаське калык сьӧры уиськыса. Но ӝоген вала, та уж со понна ӧвӧл шуыса. Таӵеосты музъем котыре лэзёно ӧвӧл. Соку гинэ уз луэ йӧныен но люгыен шобырскем бакчаос но бусыос. Эшшо одӥг бадӟым малпанэз вань Копотевлэн. Вавож районысь Улӥ Адам-Учи гуртысь фермерен Иван Дмитриевич Векшинэн ӵош со басьтӥське Куӟебай Гердлэсь вордскем гуртсэ Малиновкаез, со быремын ни шуыны луысал, выльысь улӟытон борды. Татчы кӧня ке семьяос каръяськизы ни. Копотев но Векшин, выль интые пуксисьёслы юрттэм сяна, татын шулдыр сад кылдытон борды басьтӥсько. Со луоз удмурт калыклэн дано пиезлэн улэм-вылэмезлы, ужезлы бадӟым дунъет, солэсь нимзэ пырак азелы сӥлы карон. - Мынам туж бадӟым куронэ вань Игра районлэн тӧроезлы Галина Сергеевна Вишневскаялы,- мадёнзэ йылпумъяса вера Михаил Давыдович.- Ужпум со бордын. Усиз бадӟым электрокужым ваись-сётӥсь юбо-опора. Электро быриз. Совхозлэн юбоез ӝутыны коньдонэз ӧвӧл. Район но югдурез тупатыны уг дырты. Ваньмыз со возьматэ, та ужез фермер вылэ погыльтыны туртто шуыса. Соку мон номыртэк кылё. Гажано Галина Сергеевна, вае ваньмы ӵош утчалом секыт учырысь потон амал. Нош асме ке верано, мон, асьтэос тодӥськоды, сюсьтылэн яке лампаен но пукыны быгато. Оскем потэ, Копотевлэсь куронзэ районын лыдэ басьтозы шуыса. Уг яра, дыр, сётыны, секытэн ке но, гурезе ӝутскись хозяйстволы выльысь уллане лэзькыны. Солы котьма ласянь юрттыны кулэ. Таӵе сюлмаськон ӧвӧлэн ик республикаысь кӧняез ни крестьян хозяйствоос куашказы. Н. ДОЛГОВ. Шӧкыч ВЫЛТӤЯСЬКОН-ШУЗИДЭ ВОЗЬМАТОН Юмореска Пумиськизы кык эшъёс, кык эшъёс - пӧртэм сямъёс. - Бызи ке, мынам котьмаи луоз,- ушъяське егит ныл востэм эшез азьын.- Нырысь ик, картэлэн луоз машинаез, кыкетӥез - ньыль комнатаен квартираез, куинетӥез - кисы тыр коньдонэз, ньылетӥез... - Бадӟымесь ик вордскымтэ скалэдлэн вераез,- меӵкытӥз востэм ныл. - Нош тон ялан техничкаяд ужалод,- пунэме ӧз кыльы нырысетӥез ныл. - Ну бен, кылыд,- кырыж пальпотӥз кыкетӥез.- Ужаны ке йӧныд ӧвӧл. - Мон? Ужа-аны?! Монэ картэ сюдоз-вордоз. Ортчиз ар. Азьвыл эшъёс нош ик пумисько. - Мон бызи,- шуиз востэмез ныл. - Сад-бакча, машина басьтӥм. Квартирамы ӟеч. Ачим анай луыны дасяськисько. - Нош ужаськод кытын? Озьы ик техничкаын-а? - Дышетсконме пырпотыса, архивариус луи. - Ну, сётӥськод! Монэ нош алдазы.- Кунэрскиз етӥз нылаш. - Номыртэк кыли. Табере базарысь павильонэз утялтӥсько. Тӥни озьы. Вылтӥяськон сӥ-бур ӧвӧл - ас шузидэ возьматон. В. АГБАЕВ. ИЖЕВСК-УДМУРТ ЕПАРХИЛЭН КИВАЛТӤСЬ АРХИЕРЕЕЗЛЭН НИКОЛАЙ АРХИЕПИСКОПЛЭН БЫДӞЫМНУНАЛЭН (ПАСХАЕН) ӞЕЧКЫЛАН ГОЖТЭТЭЗ "Тынэсьтыд Улӟыса Султондэ, Христосэ Утисе, Кылчинъёс инмын данъяса кырӟало. Милемыз но музъем вылын Чылкыт сюлмын Тонэ данъяны ярамон кар" (Быдӟымнуналлэн кырӟанэз) Бадӟым шумпотонэн, шулдыр мылкыдын улэ туннэ быдэс дунне: ин но музъем, кылчинъёс но адямиос - Христос улӟыса султӥз! Кыӵе муртлэн сюлмыз шумпотонэн пачылмыса уз куалекты, уз бугырскы, бырисьтэм улонлэн вормемез сярысь иворез кылыса. Туннэ улон кужым басьтэ, нош кулон возьытэ вуттэмын. Христос улӟыса султӥз но, ад вормемын: "Кулон! Кытын тынад шиед? Ад! Кытын тынад вормонэд? .. Христос кулэмысь улӟыса султӥз но Солы оскись котькудӥз мурт бырисьтэм улон басьтӥз. Христос кулэмысь улӟыса султӥз но, нокин но пумтэм вапумлы гробе ӧз ни кыльы; уго Христос кулэмысь улӟыса султӥз но вань кулэмъёслы бырисьтэм улонлэсь ӧссэ усьтӥз". Кузё-Инмарлэн Пасхаез асьмеды сьӧлыклэн ляльчиез-ужасез луонлэсь мозмытэ но Христосэн огазе каре. Котькуд христиан калык понна та быдӟымлэсь но быдӟым, данлыко нуналэ кыӵе ӝоже усёнъёс, куректон-кайгуос мылкыдмес сӧрыны быгатозы?! Христослэн Улӟыса Султонэз вань улон даурмылы оскиськон, шумпотыса улыны кужым сётэ. Туннэ кулонысь Улӟыса Султон нунал, ваелэ шумпотонэн пачылмем сюлэмен огмес огмы ӟыгыртоме но шуоме: "Агай-вынъёс, сузэръёс! Кулонысь Улӟыса Султон понна, ваелэ асьмемыз адӟонтэм карисьёслы сьӧлыкъёссэс простить кароме". Христослэн Черкысьтыз оскиськымон нылпиос, лыктэлэ но, ваелэ ӵош йыбырттоме Христослэн Улӟыса Султонэзлы. Кузё-Инмар бордысь гажано атайёс, агай-вынъёс, сузэръёс! Ваньдэс сюлмысьтым ӟечкыласько Инлэн но музъемлэн быдӟым шумпотон нуналэнызы, Христос Инмармылэн данлыко, пиштӥсь праздникеныз, Кузё-Инмармылэн Быдӟымнуналэныз! Сӥзисько тӥледлы шумпотоно, каньыллыко, тупаса улон нуналъёс, вань улон сюресты мед югдытскоз Утисьмылэн музъем вылэ ваем дэлетэныз. Христос кулэмысь улӟыса султӥз - тӥ но Соин ӵош султэлэ; Христос данлыкен пиштыса улэ - тӥ но Солэн данлыказ пырелэ. Христос Инме ӝутӥськиз - тӥ но сьӧлыклэн жильыез улысь мозмытскелэ. Кулонэз вормись, улон сётӥсь Инмармес данъяса, гажаса-яратыса, пачылмем шумпотонэн одӥг кылысь-ымысь ваелэ тазьы кырӟаломе: "Христос кулэмысь улӟыса султӥз, кулэменыз кулонлэсь кужымзэ быдтӥз, кулэм муртъёслы но улон сётӥз" (Быдӟымнуналлэн тропарез). Кулэмысь улӟыса султэм Иисус Христос Кузё-Инмармылэн бакель каронэз, дэлетэз, гажан-жалянэз тӥ вылын мед улоз. Аминь. Ижевск-Удмурт Епархилэн кивалтӥсь Архиереез Архимандрит Николай Архиепископ. Христослэн Пасхаез 1998 ар Иж кар. Коньдон дуннеын Киыныд сётод, пыдыныд утчалод Ортчем арын 23-тӥ июле Респбликаысьтымы Национальной банк "Ижладабанклэсь" куд- ог ужъёссэ дугдытӥз, калыклэсь уксёзэ кутыны ӧз лэзьы ни. Бӧрысьгес сентябре эскерисьёс "Ижладабанклэн" ужысьтыз трос шекъёссэ шедьтӥзы. Нош 17-тӥ куар усёнэ банк ужамысь дугдӥз, шуыны луоз. Жаляса верано луэ, та дырозь отысь кивалтӥсьёс ужзэс умоятон ласянь номыр ӧз лэсьтэ. Соин ик али Россиысь Центральной банк азьын "Ижладабанклэсь" лицензизэ берлань басьтон сярысь ужпум пуктэмын. Та банк государство киын ӧвӧл, сое кылдытӥзы акция возисьёс, соин пӧям вкладчикъёс азьын нырысь ик солэн кивалтӥсьёсызлы кыл кутоно луоз. Озьы ке но, калыклэн куремезъя, республикаысь Кун Кенеш но Правительство ужлэсь уг палэнско, пӧям адямиослэсь сюлмаськонзэс ас вылазы басьто. Ӝыны ар пала выро ини та тугаськем гердэз серттон-пертчон бордын. 1997 арын сентябрьлэн пумаз "Ижладабанкез" пыд йылаз возён понна, солэн кенешезлэн председателез Александр Федоров но президентэз Сергей Бобогло воштэмын вал. Соослэн интыосазы пуксизы "Удмуртнефтьлэн" кивалтӥсез Евгений Богомольный но Дмитрий Якушев. Сергей Бобоглолэн ас интызэ озьы гинэ сётэмез ӧз поты, судъёстӥ ветлэмез бере куинь толэзь ортчыса нош ик "Ижладабанклэн" президентэз луиз. Выль кивалтӥсьёс пайдаё ужаны ӧз быгатэ. Уксё сётӥсьёс ар ӵоже люкам коньдонзэс уг басьто ни, угось, банклэн кассаяз одӥг манет но ӧвӧл. Асьме калык чидась ке но, чиданлэн пумыз вуэ. Озьы 10-тӥ апреле "пӧям" калык "Ижладабанклэн" юртэз доры люкаськиз. Адямиослэн тодэмзы потэ, ку быгатозы сётэм уксёзэс басьтыны. Татчы лыктӥзы Кун Кенешлэн Тӧроез Александр Волков но солэн воштӥсез Владимир Агашин. "Ижладабанклы" уксёзэ 14 сюрс адями оскиз. Соос пӧлын Прибалтикаын, Москваын, Санкт-Петербургын, валамон ини, Удмуртиын улӥсьёс но. Али банклэн 29 миллиард манет тыронэз, солэсь но трос Удмурт Национальной банклы. Та ужъюгдурез рос-прос сэрттыны-пертчыны бадӟым комисситэк уд быгаты. Кун Кенешлэн Тӧроез Александр Волков верамъя, али пӧям адямиослы юрттон понна Кун Кенешын фонд кылдытэмын. Отысь уксё нырысь ик куанер вкладчикъёслы мыноз. "Ижладабанклэсь" ваньбурзэ Евроазиатской банк басьтоз. Озьы, тужгес кулэяськись муртъёслы коньдонзэс матысь дыре берыктыны луоз. Та ужпумез Кун Кенеш ас вылаз басьтэ. Со сярысь оскытӥзы Александр Волков но Евроазиатской банклэн кивалтӥсез Валерий Богатырёв. Евроазиатской банк али пыд йылаз султэ, соин ик оскон вань, пӧям адямиос уксёзэс шедьтозы шуыса. Н. Возисов. УЖЕНЫЗЫ ТОДМАТО Шаерамы покчи ужбергатон удыс паськыта, шуыны луоз. Туэ гинэ ог дасо фирмаос кылдӥзы ини. Поттэм ванбуренызы калыкез тодматон понна, ужбергатӥсьёс адӟытонъёс ортчытъяло. Февраль но март толэзьёсы Ижысь автозаводлэн "Мир" культура юртаз возьматӥзы корка пушкын кулэ луись но лэсьтӥськон арбериосты. Нош али "Аксион" культура дворецын мукет выставка усьтӥськиз. Татын ӝыныез экспонатъёс туристъёслы сӥземын. Н. ВОЗИСОВ. Удмурт Элькунысь Культурая министерство Удмурт кун филармония Удмурт Кивалтэт юрттэмъя 20-тӥ апрельысен 28-тӥ апрелёзь ортчыто П. И. Чайковскийлэн вордӥськемез дырысен 158 ар тырмонлы сӥзем фестиваль Отчы пырисько: Москваысь государственной академической камерной хор Чеберлыкъя кивалтӥсез - СССР-ысь калык артист СССР-ысь Кун премилэн лауреатэз Владимир Минин Санкт-Петербургысь балетъя государственной академической театр Чеберлыкъя кивалтӥсез - СССР-ысь калык артист СССР-ысь Кун премилэн лауреатэз, профессор Аскольд Макаров Ленин премилэн лауреатэз, СССР-ысь калык артист Анатолий Соловьяненко (Украина) "Вивальди-оркестр" Чеберлыкъя кивалтӥсез но дирижёрез - Россиысь калык артистка Светлана Безродная Удмурт Элькунысь государственной духовой оркестр П, И. Чайковский нимо международной конкурсэ пыриськись егит усточиос Удмурт Элькунысь государственной симфонической оркестр Дирижёрез - международной конкурсъёслэн лауреатсы Николай Роготнев Операя но балетъя кун театрысь солистъёс Удмурт кун филармониысь солистъёс Пётр Ильич Чайковскийлэн вордӥськемез дырысен 158 ар тырмонлы сӥзем фестиваль Удмурт Элькунысь Культурая министерство Удмурт кун филармония Туспуктэм вылын: Москваысь государственной академической камерной хор Чеберлыкъя кивалтӥсез - СССР-ысь калык артист Владимир Минин. Туспуктэмъёс вылын: Санкт-Петербургысь балетъя государственной академической театр. Кивалтӥсез - кун премиослэн но орденъёслэн лауреатсы но кавалерзы, СССР-ысь калык артист, профессор Аскольд Макаров. Концертэ пыриське кузпалыз но, Н. Петрова - театрысь валтӥсь балетмейстер. Туспуктэм вылын: Ленин премилэн лауреатэз, СССР-ысь калык артист Анатолий Соловьяненко (Украина), Пуччини - "Тоска" Туспуктэмъёс вылын: "Вивальди - оркестр", чеберлыкъя кивалтӥсез но дирижёрез - Россиысь калык артистка Светлана Безродная. П. И. Чайковскийлэн вордӥськемез дырысен 158 ар тырмонлы сӥзем крезьгуро фестивальлы программа. 20-тӥ апрель Операя но балетъя кун театр, Иж кар "Вивальди-оркестр". Чеберлыкъя кивалтӥсез но дирижёрез - Россиысь калык артистка Светлана Безродная 20-тӥ апрель "Юбилейный" культура юрт, Воткинск Удмурт Элькунысь государственной симфонической оркестр. Шор куара - СССР-ысь калык артист Анатолий Соловьяненко 22-тӥ апрель "Россия" культура дворец, Глаз кар (Глазов) Удмурт Элькунысь государственной симфонической оркестр. Шор куара - СССР-ысь калык артист Анатолий Соловьяненко 21-тӥ апрель Операя но балетъя кун театр, Иж кар Удмурт Элькунысь государственной симфонической оркестр. Шор куара - СССР-ысь калык артист Анатолий Соловьяненко 23-тӥ апрель "Юбилейный" культура юрт, Воткинск Москваысь государственной академической камерной хор. Чеберлыкъя кивалтӥсез - СССР-ысь калык артист Владимир Минин 24-тӥ апрель "Металлург" культура дворец, Иж кар Москваысь государственной академической камерной хор. Чеберлыкъя кивалтӥсез - СССР-ысь калык артист Владимир Минин 25-тӥ апрель Удмурт кун филармонилэн концерт залэз, Иж кар П. И. Чайковский нимо конкурсэ пыриськись егит усточиослэн концертсы 26-тӥ апрель "Металлург" культура дворец, Иж кар Санкт-Петербургысь балетъя государственной академической театр. Кивалтӥсез - СССР-ысь калык артист Аскольд Макаров. Программаын - "Шопениана", "Спартак" одӥг актъем балетъёс 27-тӥ апрель "Юбилейный" культура юрт, Воткинск Санкт-Петербургысь балетъя государственной академической театр.Кивалтӥсез - СССР- ысь калык артист Аскольд Макаров. Программаын - "Шопениана", "Спартак" одӥг актъем балетъёс 28-тӥ апрель "Металлург" культура дворец, Иж кар Санкт-Петербургысь балетъя государственной академической театр.Кивалтӥсез - СССР- ысь калык артист Аскольд Макаров. Программаын: Адан - "Жизель" (кык люкетэн). Концертъёс кутско 19 часын. Пусйымон, данъямон Якшур-Бодья ёросысь Старые Зятцы гуртэ выль больницаез усьтыны лыктэм куноосты кырӟанэн пумитазы, чильк-вальк кисьтаськись юртэн тодматӥзы. Выль больницаын 50 муртэз огдыре эмъяны луоз, татын вань нылпиослы палата, операциос лэсьтыны зал, нылпи вордон палата. Больницалэсь юртсэ кема пуктӥзы. Дас ар кулэ луиз, кылем даурысь корка вӧзы выль борддоръёс ӝутон понна. Больницаез огъя кужымен лэсьтӥзы. Юрттӥзы му вӧй кыскисьёс но ужбергатӥсьёс, школаос но лесничество, ёросысь организациос. Ас кужымзэс сётӥзы Геннадий Вахрушев кивалтэм улсын Якшур-Бодья ёросысь администрациын ужасьёс но, Игра, Ува ёросъёсысь бускельёссы но... Больницаын ужасьёсты, куноосты шуныт ӟечкылаз Удмурт Республикаысь Кун Кенешлэн Тӧроез Александр Волков. Со шуиз: "Туннэ асьме понна зэмос праздник. Со туж бадӟым ӧвӧл ке но, выль больницаез усьтон - ёрос но республика понна пусйымон учыр, со сярысь ваньмызлы верано. Малы ке шуоно, мае ке выльзэ лэсьтон - со улон, азинскон, соин ик мон оскисько, Старые Зятцы гурт выльдӥськоз шуыса, нокыӵе шуг-секытъёс шоры учкытэк. Дыр ортчемъя, татын сюрес но, выль коркаос но, мукет юртъёс но кылдозы. Нош республикалэн кивалтӥсьёсыз ӟеч малпанъёстэс улонэ пыӵатыны котьку но юрттозы". Кун Кенешлэн пресс-службаез. "Инвожо" нош ик пиштоз Ортчем сӥзьыл "Инвожо" ансамбль кылдэм дырысеныз дас ар тырмемзэ пусйиз. Отысь арганчи Михаил Журавлёв - коллективын тужгес гажано адями. Дас ар талэсь азьло коллективе лыктӥз. Бӧрысь кырӟан гур но гожъяны кутскиз. Соин ӵош гожтэм "Инвожо" кырӟанмы ансамбльлэн шорсюлмыз луиз. Коллективлэсь юбилейзэ пусъён вакытэ Михаил Павлович республикаысьтымы культура удысысь сӥё-дано ужась луиз. 23- тӥ апреле 18 часын "Ударник" кинотеатрын солэн творческой ӝытэз ортчоз, отын "Инвожо" ансамбль бадӟым концерт возьматоз. Н. Возисов. Кизён матэктэ Туэ тулыс бусы ужъёс бергес кутскозы - Гурт хозяйствоя но сиён-юонъя министерствоысь специалистъёслэн чакламзыя, майлэн ӝыныяз гинэ. Хозяйствоос солы дась-а ни? Озьы шуыны уг луы. Кидыс тырмыт кисьтэмын ке но, ӝыныез гинэ со И но ИИ классозь вуттэмын. Каллен мынэ тракторъёсты но прицепной мехникаез тупатъян, тужгес но - усыосты. Али котькуд районын кылдытоно машинно-технологической станциос (МТС-ёс). Соос ляб хозяйствоослы бадӟым юрттэт сётозы. Туэ, оло, зэмзэ но кӧс гужем луоз. Соин ик тулыс кысык ужъёсты дыраз но ӝог быдэсъяно. "Удмуртнефтепродукт"гурт хозяйствоослы 7,2 сюрс тонна эстӥськон висъя, нош "Сайгас-Холдинг" - дизель эстӥськон. Со тырмымон. Гурт хозяйстволы 5,5 миллион манет кредит сётӥське. Но "Удмуртпродконтракт" ёзлэн кивалтӥсез В. Ануфриев ивортэмъя, 10 процентэз хозяйствоос ӧз берыктэ на азьло басьтэм уксёзэс. Соин ӵош ик элькунамы вузамтэ на 1996-тӥ - 1997-тӥ аръёсы басьтэм ю тысь (ваньмыз сямен ӟег). Туэ сиён-юонлы мынӥсь юэз вузанъя задание уз луы. Но, жаляса верано луэ, Сарапул район 10-12 сюрс тонна чабей но йыды вузаны быгатэ, нош солэсь басьто 1,7-2 сюрс тонна. Туж ичи, со. Туэ луонлык вань шаерамы етӥн бусыосты кык пол паськытатыны. Но кидыс уг тырмы. Соин ик "Етӥн" кун программаез быдэстонын шуг-секытъёс кылдо. Татын ас интызэ шедьтыны кулэ Гурт хозяйствоя выль удмурт научно-исследовательской институт но солэн опытно-производственной хозяйствоосыз (ОПХ-осыз). Г. Васильев. Излэсь - ӟиры, куролэсь - дэрем Шаерамы трос гинэ педучилищеос. Кин ке дышетске Ярын, кин ке - Сарапулын. Шош тужгес мӧйыез но сӥё-даноез луэ, дыр, Можга педагогической училище. Сое удмурт интеллигенциез кыдатонлэн ӟырдыт ужась кебитэз шуи ке, уг янгыша, вылды. Елабугаын 1918 арын чылк-чылк удмурт пиналъёслы учительской семинария усьтэмын вал. Собере выжизы Можга селое, отысь - Можга городэ. Шумпотымон, педучилищеез пырпотэм удмуртъёс та вие тросэз быдэс шаермылы тодмо луо. Аръёс ортчемъя, училищее тросгес но тросгес пыртылыны ӧдъязы ӟучъёсты. Гуртъёсысь удмуртъёс керпотон, возьдаськон сямзылы луыса, дышетскыны пырытэк ик кыльылӥзы. Тодон-валан басьтон удысын ужасьёс ваньзэ пыр-поч чаклазы но 1966 арын нимысьтыз удмурт отделение кылдытӥзы. Со дырысен ортчизы ини уно аръёс. Педучилищеын но воштӥськонъёс кылдӥзы. Кызьы тодӥськомы, берло аръёсы школаын дышетскисьёслэн лыдзы кулэсме, со вакытэ ик, дышетӥсьёслэн лыдзы йылэ. Училищеосты йылпумъям егит нылъёсты но пиосты ӵем дыръя уже кутэмзы уг поты, вылӥ дышетскемзы ӧвӧлысь. Соин сэрен, тросэз специалистъёс ужтэк кылё, нош ар, кык ортчыса, чылкак мукет сюресэ выжоно луо. Озьы, оло, вуоно ӟеч специалистъёс но азгынмо. Педучилищеысь кивалтӥсьёс таӵе югдурысь но потон амал шедьтӥзы: дышетскисьёслэсь специальностьсэс паськытатоно. Лев Афанасьевич Смирнов, та училищеысь директорлэн дышетон ужъёсъя воштӥсез, шуиз: "Дасяно сыӵе специалист, кудӥз ужаны быгатоз покчи но бадӟым классъёсын". Вань верамъёсты лыдэ басьтыса, мургес дышетыны кутскизы математика, ӟуч кыл но литература, суредан, немец кыл но музыка предметъёсты. Дышетсконзэс йылпумъяса, егитъёс басьто кык специальность. Пусйыны кулэ, татысь выпускникъёс ик уже но капчиенгес интыясько. Со сяна, 1997 арысен Можга педучилищеын выль группаос кылдытэмын. Л. А. Смирновлэн верамезъя, нырысь группа пыр-поч дышетоз, пе, география, история, этнография, литература но искусство предметъёсты. Шаермес ӟечгес тодыса, та студентъёс краеведениез нуыны быгатозы школалэн палэназ но. Ньыль ар ӵоже дышетскытозязы поталозы гуртъёсы. Калык вераськемъёсты, сямъёсты-йылолъёсты магнитофон лента вылэ, видеокассетае гожтыса кельтозы. Со сяна, вуылозы Можгалась промышленной предприятиосы но шаермылэн пӧртэм сэрегъёсысьтыз музейёсы. Огъя вераса, краеведениез соос котыр ласянь шӧмъялозы. Кыкетӥяз группаын дышетскисьёс луозы менеджеръёс. Шаерысьтымы мукет училищеосты азьпалтыса, Можга педучилище туж дӥсьтыса басьтӥськиз та уж борды. Малпасько, ньыль ар ортчыса, та группаысь 15 кузя нылъёс но пиос улонын зэмос кивалтӥсьёс луозы. Можга педучилищелэсь азинсконъёсыз понна шумпотоно. Оскем потэ, татын дышетскемъёс улонын но чупрес луозы, излэсь ӟиры лэсьтозы, куролэсь дэрем вурозы шуыса. В. Кутузова. Нюръяськон 1998 арын мартэ Удмурт Республикаысь Кышкытлыклэсь утиськонъя федеральной службалэн управлениез (УФСБ) МВД-лэн ёзъёсыныз ӵош шараяз Воткинскысь заводъёсысь буёло металлъёсты лушкасьёсты. Кылсярысь, радио-технической оборудование но газовой аппаратура поттӥсь заводъёсысь 70 сюрс манетлы 700 кг висмут поттэмын вал. Дуно корт заводлы берыктэмын. Мукетъёсыз лушкаськисьёс "Воткинский завод" предприятиысь 33 нефтяной задвижка поттӥллям, заводлэн азбараз 2300 килограмм алюминий ватӥллям - ваньмыз ӧвӧлэз 97 сюрс манетлы. Та кык ужпумъя уголовной ужъёс ӝутэмын. Куинь адями пытсэт сьӧры келямын, кыксэ утчало. Заводъёслэн кивалтӥсьёссы, дуно кортъёсты утьыны луонлыкъёс кылдытымтэзы понна, кыл кутӥзы. Пусйыны кулэ, УФСБ-лэн ужасьёсыз та выллем йыружъёсты азьвыл но шараяллязы вал ини. Кылем арын, кылсярысь, уголовной кыл кутон улэ кыскемын "Воткинский завод" предприятиысь дуно кортъёсты лушкасьёс. Предприятилы берыктэмын 2800 килограмм титановой заготовкаос но 1500 килограмм нихром. Россиысь УФСБ-лэн пресс-службаез. Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Культура удысын вормонъёсыз но уно аръёс ӵоже сюлмысь тыршемез понна "Россия Федерациысь культура удысын дано ужась" сӥлы карон ним сётоно Чувыгин Николай Александровичлы - Кизнер ёросысь "Родники" калык театрлэн режиссёрезлы. Россия Федерацилэн Президентэз Б. Ельцин. Москва, Кремль, 1998 арын 30 мартэ. � 329 Чемпионъёс Шунды ӝужан палась Европаын улӥсьёс западысь бускельёссылэсь тросгес аракы юо, ивортэ "Рейтер" агентство. Соос пӧлысь котькудӥз арскын 6,2 литр кудӟытӥсь вуэз нош Западной Европаын улӥсь - 1 литрлы ичигес. Нырысетӥ инты басьто Эстония, Словакия, Белоруссия, Украина но Литва - татын улӥсьёс адямилы быдэ 10 литр аракы юо. Нош Чехия сур юонъя чемпион. Котькудӥз чех, вож нуныосты но лыдэ басьтыса, арскын 161 литр сур шӧмъя. *** Осконлэн кужмыз "Скриппс Хауэрд" агентство ивортэмъя, Индиысь огез монах 11 толэзь ӵоже сютэм улэ ини. 64 аресъем Сахамуниджи Махарадж кылем арын 1-тӥ майысен кӧс уте. Нуналаз одӥг кружка ву гинэ юэ. 35 килограммлы восьмем ке но ини, май вуытэк сиськыны уг малпа. Таӵе амалэн со мугорзэ чылкытатэ. Монахлэсь тазалыксэ эскерись врач валэктыны уг быгаты, ма чотын со улэ. Огшоры адями сиськытэк 2 толэзь чида, юытэк - 3 нунал пала. Махараджлэн нуналыз тазьы ортче: 3-4 час кӧлэ, 2 чассэ медитацилы сӥзе, собере вӧсяське но дораз лыктэм адямиосын пумиське. Махарадж джайнитъёслэн сектаязы пыре. Та сектаысь муртъёс йӧл-сӥль уг сиё, кулэсь пыдкутчан уг нулло, ымныразы маска поно, нымы-кибыосты ньылонтэм вылысь, но туж эскериськыса вамышъяло, пыд улысь улэп макеос медам лёгиське шуыса. Россиысь Журналистъёслэн союзазы Быръён но коньдон Туэ ортчизы но ортчозы трос интыосы быръёнъёс. Соосын валче пресса азе пуксё данак ужпумъёс. Калыкез тодматоно кандидатъёсын но соослэн программаосынызы, быръёнъёсъя комиссиослэн ужаменызы, та удысъя законъёсын. Интыосын быръёнъёсты ӟечгес возьматон вылысь, Россия Федерациысь Быръёнъёсъя валтӥсь комиссия но Журналистъёслэн союззы 1-тӥ мартэ ялӥзы ӵошатскон. Со мыноз туэ 31-тӥ декабрёзь. Комиссиысь но союзысь адямиос ӵошатсконлы йылпумъян лэсьтозы 1999-тӥ арын 1-тӥ мартозь. Соос нырысь ик учкозы таӵе ужпумъёсты "югдытэмез": демократиез азинтон, калыкез кунэн кивалтонэ кыскон, быръён правоез кутыны сюресъёс усьтон. Ӵошатсконэ журналистъёсын ӵош пыриськыны быгато прессаен меӵак герӟаськымтэ муртъёс но. Вормисьёслы чакламын пӧртэм премиос: 5 сюрсысен 17 сюрс манетозь. Соосты Москваын сӥё-дано сётозы. Кекатозы-а, уз-а? Кызьы тодмо, Россиысь Журналистъёслэн союззы кылдӥз 1990-тӥ арын. Ортчем дыр куспын вить пол люкалляз ӧтчам (съезд). Куатетӥез луоз 22-23-тӥ мае. Пресса али шуге-леке шедемын. Сое кузёос (кун властьлэн ёзъёсыз, фирмаос, узыр муртъёс) пыдес йылаз пуктыны выро. Россиысь Правительство малпаське изданиослы экономика ласянь азьвылгес сётэм куд-ог льготаосты быдтыны. Налогъёсъя кодекслы проект но чакла ивор вӧлмытӥсьёсты кекатыны. Зэм, чиновникъёс та вакытэ оскытыны выро: печать, пе, секыт учырысь потӥз ни. Кызьы? Солэн тиражез, 1990-тӥ арен ӵошатыса, ог 13 процент гинэ. Россиысь огъя пресса 94 процентсэ лыдӟисьёссэ ыштӥз. "Ивор вӧлмытон ёзъёс сярысь" Законлэн 3-тӥ ёзэтэз (статьяез) алэ цензура тупатонлэсь. Нош законэ Кун Дума пыр пыртэм воштонъёс сое берен улӟыто. Кулэ дыръяз амал сюроз редакциез ворсаны но. Таӵе но мукет ужпумъёс сэрттэмын-пертчемын луозы куатетӥ ӧтчамын. Руцкой ӧте, эккой Арлы быдэ Россиысь журналистъёс люкалляло асьсэлэсь фестивальзэс. Валля арын со вал Волгоградын, миым - Новосибирскын. Куинетӥ фестивалез ас доразы ӧтизы Курск но Иж. Курск областьысь тодмо губернатор Александр Руцкой та пумысен вазьгес телеграмма ыстӥз но аспӧртэм нюръяськонын вормиз. Фестиваль ортчоз 30-тӥ мае - 6-тӥ июне. Со сӥземын луоз Курск дорын ожмаськонлэн 55 ар тырмонэз но фронтысь корреспондентъёслэн подвигзылы. Бадӟым ужрадэ нырысьсэ лыктыны дасясько Белоруссиысь но Украинаысь куноос. Отчы ӧтемын нимаз журналистъёс, газет но журнал поттӥсь юртъёс, издательствоос, телерадиокомпаниос, рекламаен вырисьёс. Вань печатласьёс, огазеяське! Чагыр экран уз вошты книгаез, журналэз, газетэз. Озьы оскыто ке но, типография удысын югдур туж секыт. Россиысь типографиос али 30 процентсэ гинэ кужымзэс куто. Данакез журналъёс но газетъёс печатласько кунгож сьӧрын. Кытчы со вуттэ? Асьме издательёс музон сямен кунъёсысь полиграфилы 1994-тӥ арын тыризы 156 миллион доллар, валля арын - 423 миллион, миым - ӝыны миллиард долларлэсь ятыр. Россиысь полиграфпредприятиос - кунлэн асваньбурез (собственностез). Озьы ньӧмыз поннагес лыдъясько. Котькудӥз типография пырске ас понназ, кунлэсь тырмыт юрттэт басьтытэк. Югдурез тупатон вылысь, Россия Федерациын али кылдэ данак полиграфъёсты герӟась огазеяськон (холдинг). Отчы пырыны мылкыд каро ни бускельёсмы но таӵе предприятиос: Пермьысь "Звезда", Кировысь "Вятка", Курскысь "Зауралье", Екатеринбургысь "Уральский рабочий" но мукетъёсыз. Нош Ижысь типография но политграфикомбинат? Холдинге пыриськисьёс пӧлын соос ӧвӧл на. Оло, пырозы ай. Огазеяськон юрттысал коньдон люканы, акциос поттыны но вузаны, предприятиосысь тӥрлыкез выльдыны. Руссо туристо! Тодмо Шура Балаганов верамъя, ас вакытазы огинэ кариськизы Карл Маркслэн ӧвӧлтэм нылпиосыз но, Фридрих Энгельслэн ӵыжы-выжыосыз но, Анатолий Луначарскийлэн вынъёсыз но. Огъя кыл ӧз шедьтэ Шмидт лейтенантлэн пиналъёсыз но туризмен герӟаськем журналистъёс гинэ. Зэм, берло дыре Россиын туризмъя прессаысь адямиос но валчеяськизы. Огазеяськонзэс гильдия шуизы. Таиныз кивалтозы правление но президент. Выль огазеяськон юрттоз туризм сярысь ӟечгес но уногес гожъяны, со понна фестивальёс, ӵошатсконъёс, лотереяос радъяны, мукет кунъёсын кусыпъёс тупатыны. Малпан кылдэ: выль гильдия эшъяськоз, вылды, "Москва тылъёс" тур агенствоен но. Таиз Россиын улӥсьёсты мылысь-кыдысь ӧте Испание. Чебер пресса Чеберайёсын дуннеез уд паймыты. Новосибирскын, Россиысь прессалэн фестиваляз, миым кужымзэс мертазы журналистика удысысь нылъёс но. Уноезлы кельшиз Ижысь "Инфо-панорама" газетлэн редакцияз ужась Наталья Дресвянникова. Ӵошатскон Сибирьын ортчиз вал бере, валамон ини, "Мисс-преса" нимез со ӧз басьты. Туэ но сыӵе ужрад ортчоз. Отын пуктэмын таӵе ужпум: журналистикаез возьматоно тужгес тунсыко но ӟеч удысэз сямен. Соку дунъялозы визез но ужаны пӧрмытэмез, вераськемез но адямиосын огкыл шедьтэмез, маскаръяськемез но чеберлыкез. Нюръяськонэ пыриськыны быгато Россиысь но СНГ-ысь ивор вӧлмытонъя котькыӵе ёзысь нылкышноос. Фотосуредъёсъя быръёзы 40 муртэ, собере пумен-пумен шедьтозы тужгес чеберзэ но визьмозэ журналистэз. Вормисьёсты витё кузьымъёс. Устоосыз ветлозы кунгож сьӧры яке быгатэмзэс кӧня ке волятозы Москваысь кудаз ке редакциын. Немцов, Лужков, Каткова... Люкаськылӥз Россиысь интыосысь газетъёслэн редакторъёссылэн клубзылэн советэз. Отын эскеремын пӧртэм ужпумъёс. Валтӥсь редакторъёс (пӧлазы вал "Удмуртская правда" газетлэн редакциеныз кивалтӥсь Николай Нестеренко) пумиськизы Москваысь данак тодмо адямиосын. Клублэн советэз чакла Россиысь прессаез азинтонэ рос-прос пыриськем муртъёсты нимысьтыз пусэн данъяны. Со нимаськоз тазьы: "Четвертая власть. За заслуги перед прессой". Нырысетӥ пусъёс сётэмын Россилэн Правительствоеныз вице-премьерлы Борис Немцовлы, Москвалэн мэрезлы Юрий Лужковлы, клублэн советэзлэн тӧроезлэн воштӥсезлы, "Удмуртская правда" газетлэн азьвыл редакторезлы Любовь Катковалы но мукетъёсызлы. А. Шкляев. Кулэ ужпум Ӝутскоз-а Воткинскын таӵе завод? Газет ивортылӥз ни вал, СССР но США куспын Огкылэз быдэсъяса, Россиысь Правительство миым решение кутӥз Воткинскын чурыт эстӥськонэн ужась ракетаослэсь двигательёссэс быдтонъя завод пуктыны. Соин валче алигес республикаямы кӧня ке нунал улӥз Америкаысь бадӟым делегация. Отын вал "Локхид Мартин", "Бектел", "Рейтеон" но "ТМС" компаниослэн адямиоссы. Делегациен кивалтӥз "Локхид Мартин" фирмаысь Джозеф Биаджони. Со радъя завод пуктонэз, луэ та программалэн тӧроез. США-ысь куноос мукет кунъёсын кУсыпъёсъя министерствоын пумиськизы журналистъёсын. Соос лыктэмын завод ӝутонлы инты бырйыны, подрядчикъёс шедьтыны но мукет ужпумъёсты быдэстыны. Куноосмы озьы ик пумиськылӥзы субподрядчикъёслэн кивалтӥсьёсынызы. Нош 10 апреле США-ысь делегациен пумиськиз Удмурт Правительстволэн Тӧроез Павел Вершинин. Шаерамы завод-установка ӝутонъя Америкаын конкурс ортчытӥзы. Вормисе потӥз "Локхид Мартин" фирма. Со ӵектӥз ракетаосты быдтонъя самой чылкыт, усто технология но инкуазез кырсьмытӥсьтэм амал. Америкаысь делегацилы дэмламын вал завод пуктонъя ньыль инты. Кудзэ соос быръёзы, али тодмо ӧвӧл. Но проектно-сметной документъёс дасян мынэ. Та программаез быдэстыны коньдон висъяло США-ысь военно-морской кужымъёс (ВМС), нош Россия уксё сётоз сюресъёс, улон но ужан юртъёс но мукетсэ лэсьтыны. Вераны кулэ, Америкаын таӵе завод ужа ни. Со ӝутэмын Лос-Анджелес (Калифорния штат) дорын. Туж чылкыт завод, инкуазез уг кырсёмыты. Ваньзэ чакласа возе. Воткинскын яке мукет интыын таӵе установка пуктӥм ке, отын 2003 арозь быдтэмын луозы чурыт эстӥськонэн ужась СС-24 но СС-25 916 ракетаослэн двигательёссы но 319 корпусъёссы. Кызьы бен со радъямын луоз? Ракетаез азьло сямен пуштытыса уз быдтэ. Сое бадӟым пытсам гурын сутозы, сонлозэ усьтыса, одӥг ракеталэн эстӥськонэз 10 минутскын ӝуаса быроз. Озьы калыклы но инкуазьлы изъян уз луы. Но Удмурт Правительство экологиез чакланъя нимысьтыз ужась группа кылдытӥз. Со ваньзэ син азьын возёз. Лыдэ басьтэмын луоз лэсьтӥськонлэн химической составез. Эстӥськонэз сутэм бере кылё алюминий но тӧдьы буёл. Берлоез мыноз бумага поттон промышленносте. - Нош "Локхид Мартин" фирма, доразы сыӵе завод пуктыку, калыкен кызьы ужаз? Оло, асьмелы но адӟем карымонэз вань? - Калыклэсь номыре ватыны уг яра, - валэктӥз Джозеф Биаджони. - Мае ке шараямысь дугдӥськод ке, со оскемысь дугдэ. Ми мар пуктэммес возьматӥм, али но отчы экскурсиос ветло. Озьы калык милемлы оске. - Ку завод пуктыны ӧдъялоды? - Гужем шорын нырысетӥ кирпич поном,18 толэзьскын вуттыны малпаськом. - Кӧня адями отын ужалоз? - Лэсьтӥськон вакытэ ичизэ 300-400 луыны кулэ, завод ӝутэм бере, кык пол ӧжытгес тыршозы. - США-ын экология ласянь кыӵеесь куронъёс? - Туж юнэсь но котькуд штатын пӧртэмесь. Тани Калифорниын сӥлез (шашлыкез) эгырен пыжыны уг лэзё. Г. Романов. Ӧтиськомы вузкарыны Шуныт нуналъёс вуэмен, Ижевскын шӧдскымон йылоз вузкарисьёслэн лыдзы. Пичиоссэ но бадӟымъёссэ рынокъёсты вераса, али соос ог 20 пала лыдъясько. Матысь дыре таосыз борды ватсаськозы бакча сиёнэн, емышен, сиён-юон но промышленной вузъёсын вузкарон интыос. Ленин районын: Клубной ульча, 107 ("Меркурий" кафе дорын); Гагарин ульча, 27 ("Железнодорожник" ДК дорын); О. Кошевой ульча - Клубной ульча ("Керамблоки" дугдылон инты); Клубной ульча, 60 ("Олимпия" ТОО вӧзын); Гагарин ульча, 49 ("Нечерноемагропромтехпроект" институтлы висъям территориын); Первомай район: К. Либехт урам ("Пинал летчикъёслэн школазы" дугдылон инты); Октябрь район К. Маркс ульча ("Глазовский" магазин дорын); 7-тӥ Подлесный ульча (Юпитер" магазин дорын). Л. Дмитриева. Азьпалан - егитэз Таӵе мадиськон: огез секыт, мукетыз капчи, нош кужымзы огкадь. Ма со? Вераськон мынэ мандат сярысь. Ижысь быръёнъёсъя комиссия шараяз городысь Думае быръёнъёслы йылпумъянъёсты. Озьы тодмо луиз котькуд кандидат понна сётэм куараослэн лыдзы. Ваньмызлэсь "секыт" мандатэз Олег Красноперовлэн - солы дурбасьтӥз 6371 адями. Нялтас пусйыны кулэ: та депутат Думаын ваньмызлэсь егитэз, солы 28 арес, кивалтэ йӧллэсь сиён-юонэн вузкарон предприятиен. 4520 куара люкаса, кыкетӥ интыын луиз Сергей Чикуров (вордскемын 1965 арын). Та аспӧртэмлыко ӵошатсконын куинетӥ интыез басьтӥз "АиФ Удмуртии" газетлэн редакторез Сергей Светлов. Депутатэ шедем муртъёс пӧлын котькинлэсь ичи куара басьтӥз Сергей Беляев. Со пала кариськиз 1450 бырйись. Округын уго 11 кандидат вал. Тужгес но мӧйыез депутат Виктор Тарасенко (64 арес) понна голосовать кариз 2309 мурт. Та лыдпус - шоро-куспоосыз пӧлысь. Адямиосты ас палаз берыктыны быгатэменыз паймытӥз юрист но журналист Константин Глухов (вордскемын 1967 арын). 12 "ожмаськись" пӧлын со азьпала потӥз, 2252 куара люкаса. Та округын кыкетӥ луэм кандидат Владимир Байметов понна 949 мурт луиз. Тӥни сыӵе кусыпсы. Удмуртъёслэн дэмлам адямиоссы сярысь верано ке, пусйымонэз ӧвӧл. Асьсэ округъёсын соос шоро-куспо яке солэсь но улӥын луэмын. Мандат басьтыны луонлыкез вылэм шуод ни табере Ижысь гурт хозяйствоя академиысь проректорлэн Александр Любимовлэн. Депутат Сергей Городилов сое азьпалтӥз 53 (!) куаралы. Тӥни сыӵе югдур. Котьма ке но, сӥзём ни Думае быръемъёслы шудо аръёс. Соослэн тыршеменызы, оло, улонмы ӧжыт ке но капчиялоз. И. ЛЕБЕДЕВ. ЧАКЛАСЬКЕ! ЛЕМТЭЙ САЙКАЗ Нюлэскын юг-юг лымы кылле на, нош лемтэй ас вакытсэ вала. Республикаысь санэпидемстанцие со сярысь нырысетӥ ивор вуиз ни. Киясово районысь 10 аресъем нылэз лемтэй куртчем. Озьыен, нюлэс дортӥ ветлыку, сакгес кариськоно ни. Гуждор вылын шудыны яратӥсь пиналъёс понна но таӵе пумиськон номыр ӟечсэ уз сёты. И. ПЕТРОВА. Улонлэн мыддорин палыз БЫШКИСЬ ЕЗ СЬӦРЫН КОЛхоз? ония Зэмзэ вераса, бышкись ез ласянь кӧня ке пӧръямын ик, вань сьӧлыке. Но та хозяйствоез огшоры колхоз яке совхоз но нокызьы уд шуы. Ваньмаз мукет гуртъёсын контораос ке, татын - штаб. Ваньмаз мукет хозяйствоосын директоръёс но председательёс ке, татын - начальник, вылаз ик, погонъёсын. Ми вуимы Завьялово районысь Бадӟым Кияик гуртэ. Татын интыяськемын Удмурт Элькунысь Югдурез утёнъя министерстволэн колониез-поселениез яке, кызьы документъёсын гожто, 11-тӥ исправительно-трудовой колониез (ИТК-11). Начальникез витён куспын штабын ужась нылкышнолэсь мар но со юалляськоно кариськи. Кӧня, пӧй, тӥляд "арестантъёсты-колхозникъёсты". Каньыл сямо, вераськись нылкышно пальпотонзэ соку ик кысӥз: "Вуоз начальник, со ик ваньзэ вералоз, мае кулэен лыдъялоз". Озьы, иське, ма. Дисциплина, шӧдске, колхозын кадь ӧвӧл татын. Ӝоген штабе йыг-йыг вамышъяса пыриз "колхозлэн" начальникез. Тодматскиськом. Сергей Александрович Трефилов, майор, 36 арес. Вордскемын но будэмын Ижевскын. Йылпумъямын внутренней войскоослэсь Новосибирскысь командной училищезэс. Гуртын ноку но улэмын но ужамын ӧвӧл. Кияике ыстэмын кылем сӥзьыл. Юасько, секыт ӧвӧл-а, пӧй, выль удысын дышымтэ вылысь. - Кинэ со сюлэмшугъяськытэ, секыт-а, капчи-а. Ми служивой адямиос, кытчы ысто, отчы ик мынӥськом, мае косо, сое ик лэсьтӥськом. Собере мон ачим но вань улонме улӥсько таӵе мылкыдын: урод ужамлы муг утчатозь, ӟеч ужаны капчигес но умойгес. Майорлэн "колхозаз" 160 (?) адями - суд пыр потэмъёс, 70 адями - татысь ик гуртоос. Малы мон ИТК-ез ялан колхоз шуыны турттӥсько? Ма, вань вылтусыз но, пуштросэз но солэн зэмос колхозлэн кадь угось. Огшоры хозяйствоын сямен ик, татын вань скал но парсь фермаоссы, итымзы, кеносъёссы, гырон-кизён машинаоссы, кебитсы, вукозы, силос гуоссы но ваньмыз мукетыз, мае адӟыны луэ котькуд гуртысь. Веранэз ӧвӧл, сюлмаськонъёссы но огвыллемесь: ю-нянь будэтон, пудо куайытон, йӧл кысконэз йылэтон. ИТК-ын 2030 гектар гыроно-кизёно музъемзы. Будэто йыды, сезьы, ӟег, кӧжы, кизем турын, бакча сиёнъёс но картофка. Фермаосазы вордо 150 йыр кысконо скал, 150 йыр сюро таза пинал пудо, 300 йыр парсь. Ваньзэ сӥльзэс но йӧлзэс мукет колониосы келяло. Отчы ик - бакча сиёнъёссэс но картофказэс. Валамон, асьсэлы но сиськыны кельто. Кылемез бусыын будэтэмез пудо сиёнлы кыле. Бускель председательёслэн сямен ик, Трефиловлэн али нырысь сюлмаськонэз - тулыс бусы ужъёслы дасяськон. Солэн но та виын керӟегъяськыны мугъёсыз тырмыт гинэ. Нырысь ик, техника пумысен. Кылем арын технической эскеронэз чылкак одӥг автомашиназы гинэ потэм. Туэ апрельлэн пумозяз "колхозлэн" начальникез 90 процентсэ техниказэ "строе" поттыны чакла. Зэм, кызьы ачиз шуиз, сюлэмаз малпан возе 100 процентсэ ик дасяны, но военной адямилы, пе, дырызлэсь вазь ушъяськыны чебер ӧвӧл. Но ваньзэ техникаез дасяса но со уз тырмы. Та вакытэ хозяйстволы кулэ на 3 гусеничной но питранэн 4 трактор, пудо сиён утялтӥсь одӥг коть комбайн, юосты арась-кутсась одӥг коть выль комбайн (али соос куинез ик мырдэм "шокало"). Воштос детальёс сярысь тодэ ваёнэз ик ӧвӧл ни. Куспетӥ вераса, Трефилов бускельёсызлэсь та ласянь но пӧртэм ӧвӧл. Кулэ арбериосты ӵем дыръя аслаз поттэм ваньбуреныз вошъя. Бартер... Озьы ик майорез сюлэмшугъяськытэ машинаослы эстӥськон. Кизёнлы со дасямтэ на. Зэм, МВД-ысь кивалтӥсьёс оскыто, матысь дыре та ужрадлы 80 сюрс манет висъялом шуыса. Оскон осконэн, но бензинэд, соляркаед азбарад ке ини, соку гинэ буйгатскод. Котьма ке но, Трефиловлы улыны, бускельёсыныз ӵошатыса, капчигес ик. Солэн вань меӵак кивалтӥсь ёзэз - Наказаниосты быдэстонъя управление, вань МВД. Марысь мар ке, бырыны уз сётэ, огназэ уз куштэ. Со сяна, солэн мукет колхозъёсын ӵошатонтэм трос но оскымон амалъёсыз калыксэ ужатыны. Кыӵе ке "арестант" азьтэмъяськыны ӧдъяз ке, сое син куспын интыяз пуктозы. Кулэ луиз ке, штрафной изоляторе но пытсалозы. Мон азьын ик майорлы жингыртӥзы: одӥгез фермаын ужась скал сюдон интые малы ке но скал пиятон корпусын, пе, поръя. Трефилов ӝот-ӝот косӥз: - Али ик солэсь объяснительной басьты, собере мыным рапорт гожты, ӝытазе кылзэ юалом. Нош эрикысь медъям адями ваменъяськыны ӧдъяз ке? Номыр но кышкытэз ӧвӧл. Сое ужысь палэнтозы яке воксё но уллялозы. Ужасьлы уз ёрме, арестантъёс тырмо. Вот уллям адями кытысь уж шедьтоз на, шуг вераны. Соин ик эрикоосыз но, судить каремъёсыз но дисциплинаен шудыны уг дӥсьто. Огъя учконо ке, малы меда МВД-лы аслаз "колхозъёсыз" (Кияикын кадь колония- поселение Ува районысь Каркалайын но вань) кулэ луизы? Соосты кылдытӥзы кык муген. Нырысетӥ мугез экономикаен герӟаськемын. 80-тӥ - 90-тӥ аръёс вискын, кызьы тодмо, ваньмызлы - веньысен кутскыса нянёзь - туж лэчыт ёрмон вуиз. Эрикысь калык кӧтсэ тырыны луонлыкъёс озьы-тазьы но шедьтыны быгатэ ке вал, пытсэтэ шедемъёс маин улысалзы? Соин ик МВД аслыз сиён-юон поттон удыс кылдытоно луиз. Зэм, солэн продукциезлэн асдуныз туж бадӟым вал. Али но со пичи ӧвӧл, зэмзэ вераса. Но берло дыре ялан кулэсме. Тани Бадӟым Кияикын одӥг килограммез парсь сӥльзы 20 манет тыр усе. Нош ӝыны ар талэсь азьло 30 манет вал. Тӥни озьы, милиционеръёс но кузё сямъёслы дышо. Мукетыз муг герӟаськемын пытсэтэ шедемъёсты тупатонэн, соосты эрикын улонлы дышетонэн. Ваньмы тодӥськом, тросэз пукемъёс, эрике потыса, нырысь нуналъёсаз ик асьсэды думетысь мозкем пуны выллем возё, котырысьтызы ваньзэ пазяны дась, нокыӵе кортнэтсы ӧвӧл. Учкиськод но, толэзь юмша, оло, уг, нош ик пытсэт сьӧры шеде. Соин ик МВД-ын малпазы пукисьёсты пумен выльысь дышетыны эрико улонлы. Колония-поселение та ласянь ӟеч луонлыкъёс сётэ. Валамон, татчы котькудзэ уг басьто. Лыдэ басьто, кыӵе статьяя, кӧня дырлы пуктэмын, кыӵе ассэ пытсэтын возе, кызьы ужа, кӧня дырзэ пукиз ини. Валамон, тросэз пукисьёс уйвӧтазы но адӟо, дыр, режимен "колхозэ" сюремзэс. Татын угось соос эрикын ини, шуыны луоз. Нокин но уг чакла котькуд вамышсэс, нокин соосты автоматэн уг возьма, котыразы ӧвӧл бышкись езэн заборъёс но вышкаос. Котькудзылэн кисыязы коньдонзы вань, магазинысь мар кулэ басьты, столовойын мар потэ си. Уло аспӧртэмлыко "колхозникъёс" общежитиын. Вань библиотеказы, клубзы, медпунктсы. Соос доры котьку но котькӧня пол ветлыны быгато ӵыжы-выжыоссы. Соосты отпуске доразы лэзьяло. Эрике но ваньмыз сямен дырызлэсь вазь пото. Но! Режимез тӥяд ке, тонэныд нырысьсэ чурыт вераськозы гинэ, алозы. Ӧд ке вала, штрафной изоляторе шедёд (со татын зэмос колониын кадь ик - камера). Собере но укылтэмъяськид ке, вождэ эн вай, мын, кытысь вуид - огъя, кужмоятэм яке чурыт режимен зонае. Пук пытсэтын кылем дырдэ, ӟечез уд ке валаськы. Со сяна, татысь "колхозникъёслы" пытсэт сярысь тодазы вайытэ общежитиын улонзы но. Соосты ӝытазе но уин нокытчы но потаны уг лэзё. Милям водительмы пукисьёс пӧлысь витьымтэ шорысь бӧляксэ пумитаз. Соиз портыса- портыса юалляське вордскем гуртсы, огъя тодмооссы сярысь, маде, кызьы татын ачиз ужа, улэ, кыӵе возё, сюдо. Витямы шуэ: - Туж ӟеч сюдо шуиськод, но малы сокем восьмемын ачид, лы вылын ку ук. Бӧлякез мур лулӟе: - Сиён бордын гинэ ужпум луысал ке. Котькызьы учкы но, ми думемын кадь ук ай. Уй но нунал йырын секыт малпанъёс бергало, сюлэмез зӥбо. Доре, семья пӧлы бертэм потэ, эрике кыске... ... Скал кыскисьёс нуназезэ пудозэс сюдо. Куинез - гуртысь нылкышноос, ньылетӥез - шоро-куспо арлыдо воргорон, "арестант". Тусьёсы силос тырон висказ со ас югдаз нукыръя: - Я всегда во все светлое верил, например, в наш советский народ... Г. КОРЯКОВ. ФЕДЕРАЦИЛЭН КЕНЕШАЗ 22 апреле Удмурт Республикаысь Кун Кенешлэн Тӧроез Александр Волков Федерацилэн Кенешезлэн ужаз пыриськиз. Россиысь парламентлэн вылӥ палатаез даслэсь трос ужпумъёсты эскере, соос пӧлын - подсобной хозяйствоос сярысь, кун луисьтэм пенсионной фондъёс сярысь законъёслэн инъетъёссы. Россия Федерациысь отчётноё палата 1997 арын ужамезлы йылпумъянъёс лэсьтоз. Со сяна, оборонаен герӟаськем комплекслы пунэмъёсты берыктон сярысь, дышетӥсьёслы уждун но отпускнойёсты тырон сярысь ужпумъёс эскеремын луозы. Кун Кенешлэн пресс-службаез. ЗАВОД - СО ГУРТЫН НО ЗАВОД Ортчем ӟеч вакытъёсы журналистъёс ӵем но ӝутскем мылкыдын гожъяло но верало вал Грахысь вал вордон завод сярысь. Таӵе предприятие угось шаерамы одӥг гинэ. Республикамы данъяськиз соин. Татын туж тодыса-валаса будэтӥзы, вордӥзы ӟеч выжыысь валъёсты. Грахысь валъёсты пумитаны луэ вал быдэс Союзысь пӧртэм ипподромъёсын но конезаводъёсын. Одӥг-огзэ кунгож сьӧры но вузаллязы. Валамон, завод но, казна но валъёс чотын ӧжыт пайда ӧз басьтэ. Асьтэос чаклалэ: одӥг рысак понна поттэм коньдонэн гусеничной трактор басьтыны луэ вал. Одӥг вал понна - сизьымдон вить вал кужым. Завод ас выллемъёсыз пӧлын кӧсыт уг адӟиськы вал. Грахысь валъёс пӧртэм ӵошатсконъёсын вормисе потылӥзы. Директорлэн кабинетаз али но ошемын 1983 арын ортчем Всесоюзной конкурсын басьтэм ИИ степенё диплом. Соку заводлы диплом вӧзы сётӥзы "Москвич" автомобиль. Нош вал вордӥсьёс кыӵе ке муген шуге-леке вуо ке вал, государство котьку соослы юрттылӥз. Ма, ачиз но завод государственной шуыса нимаське ук вал. Али уд вала ни, кинлэн со. Шонер луоз, дыр, завод асьсэлы гинэ вал вордӥсьёслы кулэ шуид ке. Али заводын 170 йыр вал - ӟуч тяжеловозъёс, орловской но ӟуч рысакъёс. Со пӧлын 56 кобла, 11 ужпи но кык пони. Кылемез - чуньыос но толэсъёс. Вал вордон удыс заводлэн кассаяз 5 процент гинэ пайда сётэ. Кылемез - йӧл но сӥль чотын. Валъёсты басьтӥсь ӧвӧл ни, тӥни мар борды ваньмыз пыкиське. Сокем ӟеч выжы понна соос дуно ик ӧвӧл ке но- одӥг йыр 3-3,5 сюрс манет сылэ. Азьвыл со рысакъёсты мылысь-кыдысь басьто вал республикаысьтымы но, сьӧрлось но колхозъёс но совхозъёс. Котькудӥз сямен ассэ гажась но хозяйствоеныз данъяськись кивалтӥсь тырше вал кӧня ке коть рысак возьыны. Кызьы шуо, крестьян сюлэмез шунтыны, шумпоттыны. Котькыӵе кужмо, йӧно машина мед луоз, но со корт ик кылёз, лултэм маке. Али сюлэм шумпотонэн йырин ӧвӧл ни. Ваньмы тодӥськом угось, кызьы уло та вакытэ колхозъёс но совхозъёс. Зэм, завод вордосъёссэ чик уг вуза, шуыны луоз. Соосты одӥг-ог басьто ик, ӵемгес - нимаз адямиос, ужбергатӥсьёс но фермеръёс. Басьто бигеръёс. Вал вордӥсьёслэсь данзэс - сӥльлы. Та сярысь веракуз, заводлэн директорез Владимир Вахрушев, укное мӧзмыт тусын учкыса, мур лулӟиз. Вить ар талэсь азьло завод секыт шуккетэз чидано луиз. Валъёслы кытысь ке но вир висён паласькиз. Соин сэрен заводын карантин тупатӥзы. Озьы грахъёс вить ар ӵоже ӧз быгатэ валъёссэс вузаны но, ӵошатсконъёсы но поттылыны. Кылем сӥзьыл гинэ карантинэз куштӥзы. Сотэк но предприятие шуген улэ вал, вылаз ик, сыӵе эзель вуиз на. Ярам коть, заводлы быгатэмезъя ялан юрттӥз но юрттэ Ижысь ипподром, нырысь ик, солэн кивалтӥсьёсыз Анатолий Ажмяков (нялтас вераса, ачиз но грах пи, конезаводын но ужамын) но Алексей Евтушенко. Соос эмъюм но пудо сиён вӧзы пӧртэм ватсанъёс ӵем гинэ вутто. Со сяна, али Грахысь кӧнязэ ке валъёсты ипподромын котыр ласянь эскеро, ӵошатсконъёслы дасяло. Ӟеч выжыысь валъёсты вордон дунтэм уг усьы. Соосты куроен уд сюды ук, одно ик сезьы кулэ. (Ярам коть, завод ачиз тырмыт пудо сиён будэтэ). Со сяна, валъёсты бызьылытон дыръя, ужпиослы курег пуз но сахар сётъяло. Серемес ке но кадь, яратон уж но ужпиослэсь трос кужымзэс кулэ каре вылэм. Вал гидэ мыныкумы, Владимир Вячеславовичлэсь юасько: - Вал вордон удыс пайда уг вайы бере, оло, воксё быдтоно сое? Директор визьтэм пичи пияш шоры кадь учке: - Мар тӥ, мар тӥ?! Мон сыӵе кылпум собраниын поттӥ ке, монэ трибуна сьӧрысь сэрпалтозы. Ми колхоз но, совхоз но ӧвӧл - ми - конезавод. 1942 арысен, куке правительство косэмъя, фронтлы валъёс вордон вылысь кылдытэмын вал заводмы. Валъёс - милям сюлэм висёнмы ке но, со ик данмы но. Тани мон ачим валъёс котырын уг бергаськы, дышетскемея механик, атае но ӝыны даурзэ тракторын ортчытӥз. Озьы ке но, мон конезаводын быдэсми, вань улонэ соин герӟаськемын. Озьы ик гуртысьтымы котькуд улӥсьлэн но. Соин ик валъёсты быдтон сярысь малпан мынам йырам матэ но уг вуылы. Вылаз ик, мынам осконэ вань, матысь дыре югдур ми понна умоялоз шуыса. Вахрушев ӧз ваты со лушкем осконзэ: - Техника но эстӥськон туж дуно, асьтэос тодӥськоды. Соиз но, таиз но дунтэмалоз шуыса шуг вераны. Озьыен, гурт кузёос, яра-а, уг-а соослы но, машина интые, вал кытконо луозы. Пудо сиён угось гуртын котьку но шедёз. Зэм, котькуд хозяйствоын асьсэлэн валъёссы вань. Но со начар пудоез ӵошатод шат 600-700 килограммъем уробоез нуллӥсь милям батыръёсынымы? Соин ик соос кулэ луозы шуыса малпасько. ... Вал уллёез туспуктыны ми беромимы. Конюхъёс валъёссэс гидэ пыртыны вуиллям ини вылэм. Ярам, коть асьсэос интыязы вал на. Фотокорреспондентмылэн куремезъя, Александр Казнонов соглаш луиз одӥгзэ валзэ азбаре поттыны. Со 6 аресъем Табель доры пыриз гинэ но, соиз йырзэ урдӥз, пиньёссэ ӟар поттэ. Изьвер кадь, ява, дораз матэктыны ик кышкыт. Конюх кузё куаразэ боз-боз поттэмез бере гинэ ӧжытак лапкомиз. Азбарысен нош ик ваменъяськыны ӧдъяз. Урдскылэ, гырдалля, азь пыдъёсыныз лымыез бугыръя, юсьлэн выллем чыртызэ золъя, куасалля. Ачиз ӝужыт, веськрес, кузь пыдъёсыз вӧлэмын кадь. Кужмо но чебер ик, албасты! Номыр уд шуы, валаны луэ татысь вал вордӥсьёсты - соослы вань маин данъяськыны. Оскем потэ, секыт дыръёс ортчозы, улон ӧраз пыроз, Грахысь вал вордон заводлэн данэз выльысь паськыт вӧлмоз. Г. ТИХОНОВ. Гердэ КИНЛЫ КУЛЭ ДЫРТОН 17 апреле люкаськылӥзы "Удмурт кенешлэн" исполкомаз быръем эшъёс. Эскеремын пӧртэм ужпумъёс. Вице-президент Нина Малых ивортӥз нырысетӥ кварталлы пусъем ужрадъёс но матысь толэзьёсы ужан план сярысь. Чаклам ужъёс ваньмыз сямен быдэстэмын. Вуоноосыз сярысь верано ке, нимысьтыз пусйыны кулэ таӵеоссэ: ёрос кенешъёсты кылдытонэз йылпумъян, школаез йылпумъясь удмурт егитъёс пӧлын дышетсконзэс азьланьтон сярысь валэктон ужез радъян, июне "Гербер" огъя праздникез ортчытон но мукет. Озьы ик чакламын Кун кылъёс сярысь законлы инъет бордын ужаны. Кыкетӥ ужпумъя вераськиз Валентин Тубылов. Со тодматӥз Удмурт Элькунлэсь Конституцизэ воштон пумысен малпанъёсыныз. Та ужен дыртыны кулэ ӧвӧл, пусйиз Валентин Кузьмич, азьло аръёсы лэсьтэм ӟеч вамышъёсты палэнтыны уг яра. Исполком та пумысен нимысьтыз вазиськон кутӥз. "Удмурт дуннеын" потӥсь "Герд" бамлы общественной редколлегия быръемын. Отчы пыртэм эшъёс ужалозы огазеяськонмылэсь "куаразэ" юнматон бордын. Кизнеръёс огазеясько Кизнер ёросын вордӥськем, улэм яке ужам муртъёс огазеяськыны малпазы. Кызьы тодӥськом, сыӵе огазеяськонъёссы - аспӧртэм бӧлякъёссы вань ини шаркан, алнаш, можга, пичи пурга выжыослэн, соослэн шоркарамы ӝытъёссы но ортчылӥзы. Кизнеръёс но огазеяськысамалпало аспалъёссылэсь кусыпъёссэс юнматыны, ог-огзылы но вордӥськем районзылы кулэ юрттэт сётыны. Та ужез радъясьёс оско, бӧлякъёссы 29 оштолэзе (апреле) 18 часын Иж карысь филармонилэн юртаз мыло-кыдо люкаськозы но кенешозы, ог-огенызы ӟечгес тодматскозы но шулдыръяськозы шуыса. В. Ванюшев. Кӧня ке чурен Куӟебай Гердлэн вордскемез дырысен 100 ар тырмонэз умой пусйизы Завьял ёросын. Та ужрадэ мылысь-кыдысь пыриськизы дышетскисьёс но. Соос удмурт калыклэн дано пиаезлэн улэм-вылэмез но творчествоез сярысь бадӟымесь рефреатъёс но гожъяллям. Аспӧртэм конкурсын-ӵошатсконын вормисьёслы - куатьтонэзлы пиналъёслы - писатель Н. Кузнецов, дуно кылъёс гожтыса, азинсконъёс сӥзьыса, аслэсьтыз книгаоссэ кузьмаз. *** Кылем арня куспын шаерысьтымы удмурт культурая "Дэен" огазеяськонлэн кивалтоназ быръем эшъёс, огинэ люкаськыса, рос-прос эскеризы Удмурт Республикалэн Конституцияз воштонъёс но ватсанъёс пыртонъя ӵектонъёсты. Кун Кенешысь депутатъёс соосты юнматӥзы ке, республикамы, оло, огшоры улослы гинэ пӧрмоз на. Выль ӵектонъёсъя шаерысьтымы калыклэн правоосыз но шӧдскымон сюбегало. Кенешыны лыктэмъёс Конституциямы троссэ дэмланъёсты пыртыны огмылкыдын пумит луизы. Со пумысен ас малпанъёссэс дэменчиос ивортозы "Удмурт кенешлы" но Кун Кенешлы. *** "Дэменэ" пыриськемъёс, "Чайка" клубе люкаськыса, туэ нош ик огазьын пусйизы будӟыналэз. Сиён-юонъёссэс веръямзылэсь азьло соос азьын нырысь ик вераськиз шаерысьтымы калык художник, профессор, "Удмурт вӧсьын" ужась Семён Николаевич Виноградов. Со тупен-тупен мадиз, кызьы вашкалаосмы пусйыло вылэм та бадӟым праздникез. Пайдаё но шулдыр ортчиз 19 апрель. Сыӵе ик мед луысал туэ вань улонзы "Чайкае" люкаськылэмъёслэн. Вань удмуртъёслэн "Удмурт кенеш" огазеяськонзылэн исполкомезлэн ВАЗИСЬКОНЭЗ Туэ 19 мартэ ивор вӧлмытӥсь ёзъёсын печатламын Удмурт Республикалэн Конституцияз Кун Кенешысь депутатъёслэн группаенызы дэмлам воштонъёс но ватсанъёс. Та ужпумъя Кун Кенешлэн сессиез нокыӵе но решение ӧз кутылы. Ӵектэм воштонъёсты огшоры тупатонъёсын лыдъяны нокызьы но уг луы, уго соосты кутӥзы ке, республикалэн конституционной инъетэз воштӥськоз. Кылсярысь, Конституцилэн 1-тӥ ёзэтысьтыз дэмламын "суверенно" ("ас эрико") кылэз палэнтыны. Со возьматэ, асьме республикалэн Россия Федерациын удмурт калыклэн кун кылдос луыса улонэз быроз. "Поправка" нимаськись ӵектон чик но лыдэ уг басьты Удмурт Республикаысь Вылӥ Кенешлэсь "Удмурт Республикалэн кун суверенитетэз сярысь" 1990 арын 20 сентябре кутэм постановленизэ но "Россия Федерациысь кун властьлэн федеральной ёзъёсыз но Россия Федерацие пырись ас эрико республикаосысь властьлэн ёзъёсыз куспын быдэсъяно удысъёсты но полномочиосты люкылон сярысь" 1992 арын 31 мартэ кутэм Федеративной Огкылэз. Та ӵектонэз ми юромо мыдлань лэсьтэм ужен лыдъяськом. Кин но малы турттэ республикаысь калыклэсь но депутатъёслэсь йырзэс поромытыны, ятвылтыны гинэ кыле на. 13-тӥ ёззэтэз тазьы воштыны чакламын: Удмурт Республикаын музъем но мукет инкуазь сётосъёс уже кутӥсько но утисько, республикаысь калыклэн улон инъетэз луыса. Нош али ужась Конституциын гожтэмын, музъем но инкуазь сётосъёс Удмурт Республикаысь калыклэн узырлыкез луо. Федеративной Огкылын та пумысен уката но мургес валэктыса гожтэмын: "Музъем но солэн сётосъёсыз, вуос, будос но улэп дунне республикаосын улӥсь калыкъёслэн узырлыксы (ваньбурзы) луо". Ми чутрак пумит луиськом 13-тӥ ёзэтэ кыӵе ке коть воштонъёс пыртыны. Депутатъёс республикалэн главаезлы (президентлы) нимаз институт, Конституцияя суд но ёросъёсын кун властьлэсь ёзъёссэ кылдытыны ӵекто (учке 10-тӥ статьяез). Но соин ӵош лыдэ уг басьтӥсько 1994 арын ортчытэм юалляськонлы йылпумъянъёс, куке 68 процентэз бырйисьёс республикаын президент пост кылдытонлы пумит луизы. Кун Кенешлэн кивалтӥсьёсызлэн городъёсын но ёросъёсын ас коже кивалтонэз быдтыны турттонъёссы ӧз пишме. Пусъем воштонъёсты пыртонлэн юридической но экономической мугъёсыз валэктэмын ӧвӧл. Ми куриськом 116-тӥ статьяез азьло сямен ик кельтыны. Со уте милесьтым правомес. Сыӵе решение кутэмын "Удмурт кенеш" огазеяськонлэн куатетӥ съездаз, соин ик выжы калыклэсь мылкыдзэ санэ басьтытэк кельтыны уг яра. Лыдъяськом, туала югдурын али ужась Конституцие воштонъёс но тупатонъёс пыртыны кулэез ӧвӧл шуыса. Кутэмын 1998 арын 17 апреле исполкомлэн заседанияз. Кулэ-а президент? Берло дыре трос вераськонъёс мыно, кулэ-а республикамылы президент шуыса. Мон сямен, асьмелы со кулэ ӧвӧл. Президент бырйим ке, солы трос ужасьёс кулэ луозы. Аппарат возьыны кӧня уксё кошкоз, нош пайдаез луоз-а, уз-а, сое шуг вераны. Озьы ик кулэ кабинетъёс, гараж, автомашинаос но музонэз. Сотэк но кун бюджетын социальной удысъёслы уксё уг тырмы. Соин ик культура, тазалыкез утён, калыкез дышетон мырдэм возисько. Али ужась кун чиновникъёс асьсэлэсь уждунзэс арысь аре будэто, черодын сылытэк выль, вӧл-вӧл квартираос басьто, кунгож сьӧры шутэтскыны, куное ветло. Со дыре ик огшоры ужась калык быдэс арен, трос толэзьёсын уждун уг басьты. Юан кылдэ, мар умойзэ Российской Федерацие президент быръён сётӥз? Ӝӧк вылмы буш, тросэз калык вужмем дӥськутэн ветлэ, куям жуг-жаг пӧлысь сиён-юон утча. А. Замятин. Гердэ КУЗЁОС - АСЬМЕОС "Удмурт кенешлэн" исполкомез туэ мартэ, кызьы ивортылӥм ни, Пичи Пургаын ужаз. Соку рос-прос вераськон мынӥз асьме элькунысь гуртъёсын аскивалтонэз муромытон сярысь. Ӧтчам но гурт кенеш сярысь валатон печатламын вал "Герд" бамын (учке 26 феврале потэм номерез). Исполкомлэн интые потаса ортчытэм заседаниосаз эскеремын пӧртэм ёросъёсын но гуртъёсын люкам опыт. Пургаос сяна, гурт улонэз радъянъя схемаос ӵектӥзы можгаос, глазовъёс. Ми дэмласьком Брангуртысь ас коже кивалтон радэн тодматскыны. 1989 арын "Ижмаш" культура дворецлэн залаз ортчиз удмуртъёслэн кенешсы. Со конференциысь ми, пичи пургаос, чылкак бурдъяськыса бертӥм. Но ужпум Выль ар азьын вал, соин, лэся, нырысетӥ ужрадмы ӧз пӧрмы. Ми ӧм буйгатске, калык пӧлы потӥм, нимысьтыз радъясь комитет бырйим. Озьы март пумын огазе люкаськыны быгатӥм. Отын 25 пала ужпум эскерим. Туннэ, тямыс ар ортчем бере, тазьы шуыны быгатӥськом: соку пусъемез пӧлысь ваньмыз сямен малпанъёс алилы быдэстэмын ни. Тани басьтом, кылсярысь, сизьыметӥ пунктэз: сюлмысь ужано ӟеч калык сямъёсты улӟытон-азинтон бордын. Пӧрмытӥм кадь. Трос лэсьтӥм но ни, азьланьын но со ужлэсь ум палэнске. Озьыгес ик мукет ужпумъёсъя. Мынам малпамея, асьме удысын котьмалэсь кулэез - гурт калыкез ӝутон. Ма бордысен ми кутским? Кылсярысь, кенеш-концерт ортчытон азьын гурт кибашлыослэн ужъёсынызы адӟытон радъям. Уд оске: отчы кык сюлэсь ятыр адямиос пыриськизы. Ма но ӧз вае, ява. Соин но, оло, кенешын вераськон умой ӧръяськиз. Кызё мурт пала ас малпанзэ вераз. Концерт дыръя тямыстон адями сцена вылэ потаз. Бӧрысь ми со программамес дас тямыс гуртын возьматӥм. Шулдыръяськемен ӵош соку ми калыкен валэктон уж но нуим ук. Возьматӥм, асьме улонэз асьмеос умоятыны кулэ шуыса. Культура удысысь озьы пумен мукетъёсаз но выжыны ӧдъям. Тани больницамы куашкан калэ вуэ вал ни. Вазиським кивалтӥсьмылы, депутатмылы Валерий Николаевич Барановлы. Рос-прос уж нуим ульчаосты, азбар котыръёсты чылкыт возён ласянь. Сокугес ик кылдӥз пенсионеръёслэн советсы, порядокез тупатонын со йыг-йыг кылзэ вералляны кутскиз. Бадӟым но туж кулэ ужен лыдъяны луоно гуртлэн историез бордын тыршеммес. Тодэ ваим бӧлякъёсмес, дано удмурт пиосты, шедьтӥм но люкам пӧртэм арбериосты, ваньзэ соосты музее интыям, отчы куноосты ӧтьылыны ӧдъям. Умой сямъёсмес-йылолъёсмес утёнын музейлэн интыез туж шӧдскымон. Муг тупаз бере, кӧня ке верано асьме Ӧтчамъёс сярысь. Нырысетӥяз синвумес кисьтӥм, кыкетӥяз вылэгес тубим, куд-ог ужпумъёсты пыр-поч эскерим, нош куинетӥяз, кудзэ куатетӥ шуыса нимамы, мынам малпамея, асьмеос музъем вылэ ваським. Берлоез Ӧтчам азьын но, со бере но йырамы весь таӵе малпан бергаз: "Буколы" гуртын ӟоскытгес луиз кадь. Мар кароно? Тазьы кенешим: ойдолэ удысмес паськытгес ӧръялом. Кичӧлтӥсьёс укмыс пол люкаськылӥзы, калыкен ужазы, мӧйыосын вераськизы, егитъёсты бордазы кыскыны тыршизы. Умой соиз: ми вань ужъёсты гуртысь администрациен уртче быдэсъям. Озьы ик кылмы тупа совхозлэн (али племзаводлэн) кивалтӥсьёсыныз. Вераським тазьы: кылдытоно нимаз секциос. Уго шуг-секытъёс трос, соосты комъяны уг яра. Басьтом егитъёсты ик. Комсомол ӧвӧл ни, городын "Шунды" пиштэ, шуо, ми доры солэн тылсиосыз ӧз вуэ на. Озьыен, егитъёс огазеяськыны, азязы сылӥсь ужпумъёсты быдэсъяны кулэ. Яке учком ваньбур поттонэн герӟаськем комиссиез. Кулэ ӧвӧл шат со? Туж кулэ. Уго котькуд семья производствоен герӟаськемын. Нош кыӵе югдур порядокез утёнын, тодмо ваньмызлы. Олокинъёс бакчаостӥ ветло, мак сяська ишкаса. Солэсь но ортчыт: тулыс, пе, соос бакча бертӥ ортчо, кидыс пазяса, гужем пумын "урожайзэс" утялтыны вуо. Кызьы тае чидалод? Участковой табере огназ ӧвӧл, солы юртто уноез гуртоос, тужгес но - порядокез утёнъя комиссие быръемъёс. Споръяськон, лушкаськон, ченгешон но мукет валантэм учыръёсы ас кылзэ вераны тырше административной комиссия. Нылкышноослэн но трос сюлмаськонъёссы. Соос уж борды рос-прос басьтӥськизы. Школаен юн кусып тупатӥзы. Тӥни озьы пумен-пумен кылдӥз гурт кенеш. Туннэ шуиськом: со ас интызэ шедьтӥз, кулэлыксэ возьматӥз. Но ми ум вераське, одно ик таӵе схемаез ваньмаз гуртъёсы вӧлмытыны кулэ шуыса. Пичиесь гуртъёсын со уз тупа, отын маке мукет чаклано- шедьтоно. Гурт кенеш ужа нимысьтыз планъя. Малпаськом, милям люкам опытмы кинлы ке яралоз. Мылкыд карисьёслы быгатэммыя юрттыны тыршом. Уго асьмелэн кужыммы дэмен ужаммы бордын. ПИЧИ ПУРГА ЁРОСЫСЬ БРАНГУРТЫСЬ АСКИВАЛТОНЛЭН РАДЭЗ 645 мурт - СХОД - ӦТЧАМ - 225 ХОЗЯЙСТВО ГУРТ КЕНЕШ - 60 мурт СТАРОСТА - 9 мурт (староста + секциослэн кивалтӥсьёссы) ПРЕЗИДИУМ СЕКЦИОС Нылкышноослэн кенешсы Ветеранъёслэн кенешсы Огъя правопорядовез утёнъя секция Удмурт культурая огазеяськон Егитъёсын ужанъя комиссия Административной комиссия Ваньбур поттонъя комиссия Социально-бытовой комиссия В. БАЙСАРОВ, Пичи Пурга ёросысь Брангуртысь удмурт культурая "Буко" обществолэн кивалтӥсез. Лыдӟись вера малпанъёссэ ЯЛАН-А ВОЖВЫЛЪЯСЬКОМ? Лыдӟисьёс тодматскизы, дыр, ини Г. Вахрушевлэн "Удмурт дунне" газетлэн 12 мартэ потэм номераз печатлам гожтэтэныз. Гожтэтлэн нимыз "Кулэ-а калыклы Президент?" Лыдӟи та чуръёсты кутсконысеныз пумозяз. Нош гожтэтлэн пумаз вуи но шара верай: "Кулэ!" Таӵе вераськон туннэ но, толон но ӧз кутскы. Выль Конституцилэсь инъетсэ эскерон дыръя ик со пумысен ченгешон потылӥз. Кин кытчы кыске. Огезлы Президент кулэ, мукетыз пурт кадь ваменске. Бен, ваньмыз ӧз. Президент быръён понна дурбасьтӥсьёс но ӧжыт ӧй вал. Озьы Конституцие Президент быръён сярысь верано кылъёс гожтытэк кылизы. Али та ужпум выльысь ӝутскиз. Республикамылэн Вылӥ Законаз ватсанъёс пыртон сярысь ӟырдыт кенешон мынэ. Зэм, туннэ но тӧл вошъяське, я огпала, я мукет пала пельтэ. Г. Вахрушев асьме элькунмылы Президент быръёнлы чылкак пумит луэмзэ вера. Со выльзэ уг пусйы ни. Озьы верамын телевидение, радио пыр, газетъёсын гожъямын Президент быръёнлы пумит луисьёсын. Гожтэтлэн авторез мултэс шугъяськыса вера, Президентлэсь аппаратсэ возьыны трос коньдон кулэ луоз шуыса. Бен, коньдон кулэ луоз. Нош солэн пайдаез мултэсэн берытскиз ке? Тани бускель республикаос Татарстан но Башкортостан асьме элькунмылэсь шӧдскымон умойгес уло. Соослэн президентъёссы асьсэ республикаосын вань ужез ӟечгес радъяло, Москва азе но мур малпам, чаклам куронъёс, дэмланъёс пуктыны быгато. Президентлэсь аппаратсэ возён сярысь сюлмаськыса, Г. Вахрушев гожтэ: "котькудӥз пенсионер, заводын ужась, котькудӥз адями, колхозник, дышетӥсь яке врач ас уждунысьтызы... толэзьлы быдэ сю манет висъяны соглаш луизы ке, соку Президентэз но бырйыны быгатозы". Озьы ик ӧвӧл, дыр. Шат мукет республикаосын губернатор но президент бырйизы калык чотын? Республикалэн вылӥ кивалтӥсезлэсь аппаратсэ возёнэз дунтэматон понна амалъёс шедёзы, дыр. Г. Вахрушев эш уг вера, кызьы умойгес луоз кивалтонэз умоятыны, али сямен-а яке мукет амал вань-а? Президент кулэ ӧвӧл но тӥни! Шаермы бадӟым ик ӧвӧл. Асьмелэнлэсь данаклы пичиосызлэн но Президентъёссы вань. Котькытын кивалтӥсь-кузё луыны кулэ. Ужез азинтон, республикамес азьмынӥсьёс радэ поттон, котькуд адями улонэз вылэ ӝожтӥськытэк вамышъяны мед быгатоз, тӥни со понна кивалтонэз выльдоно. Мед луоз Президентмы, со пыр вормыны луонтэмзэ но вырӟытыны мед быгатом. Нош кин луыны кулэ Президент? Со сярысь но трос верамын, гожъямын ни. Республикамылы Удмурт ним сётэмын географической карта вылэ гожтон, пӧртэм бумагаос вылэ печать пуктон, учреждениосты, организациосты удмурт кылын ниман понна гинэ ӧвӧл, солэн вылӥ кивалтӥсез но удмурт луыны кулэ. Ӟуч кылэз яке мукет кылэз тодӥсь удмурт воргорон, нылкышно, Президент доры пырыса, сюлмысь ас кылыныз вераськыны мед быгатоз. Кивалтӥсьлэн ӧсэз доры вуыса, кепыраменыз медам берытскы. Вал асьмелэн удмурт кивалтӥсьёс пӧлын но асьсэ кылынызы вераськисьтэмъёсыз. Зэм, соослэсь нимъёссэс ум поттылэ ни, соос улонысь кошкемын ни. Президент быръёно ке, со мед быгатоз чылкыт удмурт кылын вераськыны. Гуртэ-а, городысь удмурт коллективе-а лыктоз, сюлэме пырись чылкыт удмурт кылын мед вераськоз. Вань-а сыӵе мурт? Ма, кызьы уз луы. Советской аръёсы но берло дыре трос удмурт пиос но нылъёс институтъёсты, университетъёсты быдтӥзы. Тросэн лыдъямон ини тодосчиосмы но. Удмуртъёс пӧлын быгатӥсь, тодӥсь адямиос ӧвӧл шуон - выжыкыл гинэ со. Умой-умой малпаськымтэ, чакламтэ, адямиосты тодымтэ бордысь потэ со. Нош Президент кулэ, со пумысь ялан вожвылъяськонлы пум пононо ини. В. СМИРНОВ. Сюлмаськытӥсь югдур "МОН ТОНЭ ОТЧЫ ӦЙ ЫСТЫ..." Жаляса верано луэ, таӵе валэктон куддыръя кылоно луо Чернобыль станциын пуштон бервылъёсты утялтонэ пыриськем адямиос. Воштӥсько аръёс, воштӥсько чиновникъёс, нош шуг-секытъёсты палэнтонын ужам муртъёслэн сюлмаськонъёссы уг кулэсмо. Чернобыль АЭС-ын дас кык ар талэсь азьло луэм шудтэм учырез тодэ вайыса, ми вазиським Ижысь Ленин ёросысь "Союз-Чернобыль" обществолэн кивалтӥсезлы Б. Д. Берестовлы. - Борис Дмитриевич, трос мукетъёсыз сямен, Тӥ но со кышкыт интые военкомат пыр шедиды, дыр? - Бен. Вуттӥзы повестка, озьы но озьы, кулэ, пе, сыӵе-сыӵе специалистъёс, номырлэсь эн кышкалэ - берытскоды но азьло сямен ик дорады улоды-ужалоды. "Есть" шуим но кошким. Визьтэмъёс... Со вал 1986 арын сӥзьыл, авария бере кӧня ке толэзь ортчыса. Мыным, лесокомбинатысь мастерлы, соку гинэ ньыльдон тырмиз вал. Чернобыльын косӥзы транспортъя ёзэн кивалтыны. Ма, котьмаин ик выроно луиз кадь. Ай ми, ог-огмы азьын ушъяськыса, лэся, косэмзылэсь трос но лэсьтыны тыршим. Нокин ик ӧз малпа уго, со адскисьтэм чер - радиация - мугорамы пыраклы пыӵалоз шуыса. Украинаысь бертыса, аслам яратоно предприятиям кӧня ке арзэ ужаны чидай ик на. Отӥяз тазалыке нуналмысь шальтраны ӧдъяз. Туннэ мон - кыкетӥ группаысь куать аръем стажен инвалид. Воргорон уж сярысь веранэз ӧвӧл ни - кисыысьтым эмъюм уг бырылы. - Тӥ луиськоды республикаысьтымы Чернобыле ветлэмъёсты огазеясьёс пӧлысь одӥгез. Туннэ кивалтӥськоды ёрос обществоен. Кӧня мурт пыре союзады? - Пӧртэм шуг-секытъёсын пумиськыса, зэмзэ но, ми огазеяськыны кутским, уго тупатэм правоосты огнын уже кутыны туж секыт. Милям огазеяськонамы али ог 300 мурт. 240-эз соос пӧлысь - Чернобыле ветлэмъёс, 31-ез пыриськемын "Маяк" предприятиын ортчем ужъёсы, кылемъёсыз - радиациен уродмытэм зонаысь татчы улыны выжемъёс. Люкаськылӥськом ӵем, куд-ог эшъёсмылы пумиськонэ лыктыны гинэ но шуг ини ке но. Эскероно ужпумъёс ичи ӧвӧл. Уноез соос герӟаськемын законэн чаклам капчиятонъёсты (льготаосты) быдэсъянэн. Адямиос государстволэн куремезъя-косэмезъя тазалыксэс быдтӥзы, табере курадӟоно луо. Куддыр кузёослэсь сыӵе но верамъёссэс кылӥськод: "Акыльтӥды ни тӥ куронъёсыныды, мар-о татӥ ветлӥськоды? Авария луон вакытэ мон татын уг ужаськы на вал..." Бен, али шудтэм учыр понна янгыш луисьёсты шедьтыны шуг ни, но адямиос кышкыт интыын ужазы ук, озьыен, соослы табере кызьы ке но юрттоно. Телефон пуктон, эмъюм утчан, мукет улосъёсысь эшъёслэсь опытсэс эскерон - таӵе но мукет ужъёсын выроно луэ нуналмысь. Трос дыр быре квартираос ласянь бызьылонэн. Правительствомы туэ Ижысь чернобылецъёслы ог куамын квартира сӥзе. Мед пӧрмысал... - Нош кыӵе адскиськом асьмеос, бускельёсын ӵошатыса? - Алигес Чебоксары городэ ветлӥм. Шонерзэ вераса, трос выльзэ тодӥм. Россиын кутэм куд-ог документъёс ми дорозь кыӵе ке муген вуиллямтэ вылэм. Соосъя, кылсярысь, мыным компенсация алилэсь кык пол уногес сётыны кулэ. Чувашиын ми кадь шудтэмъёслы улон инты висъянэн но югдур ӟечгес. Мон уно пол ветлӥ ни асьме мэр доры, озьы но, тазьы но валэктӥ. Ум, юрттыны ум быгатӥське, шуо. Коньдон, пе, ӧвӧл. Ма, Россиын трос ӟеч амалъёс шедьтэмын ни ук та ласянь. Басьтом Челябинск, Свердловск улосъёсты, Москваез. Отын тазьы каро: город кузёос, пӧлазы архитектор но землеустроитель, улон юрт лэсьтыны висъям интыез, шуом, милям выллем общество кие сёто. Со вакытэ ик кыӵе ке узыр коммерсантъёслэн лэсьтӥськыны уксёзы вань, нош интызы ӧвӧл. Мэриын шуо: мынэ чернобылецъёс доры, шедьтэ соосын огкыл. Озьы мылкыд карисьёс инты басьто, инвалидъёс - кӧня ке выль квартира. Урод шат? Ужпумез быдэстыны луэ, бюджетысь коньдонэз кутытэк. Мон малпасько, таӵе но мукет ужан амалъёсты асьме дорын но кутыны луоно. Мылкыд гинэ мед окмоз. Эшшо верам потэ уж сярысь. Пӧламы вань сыӵеосыз, кин быгатысал на маке со лэсьтыны. Соослэн ужамзы, асьсэлы но семьязылы коньдон поттэмзы потэ. Та удысын но кивалтӥсьёс милемлы ӟечгес юрттыны кулэ. х х х Ленин ёрос администрациын общественной огазеяськонъёслы висъям кабинетын вераськонмы куспын татчы трос гинэ калык люкаськиз. Адямиос Борис Дмитриевичез витё. Мон сое ӧй ӝегаты ни. Улонлэсь курытсэ шӧмъям муртъёс эшсылы оско бере, умой ук. Озьыен, "Союз-Чернобыль" выллем обществоос асьмелы туж кулэ. Озьы ик кулэ соослы асьмеос, кин понна тазалыксэс сётӥзы та адямиос. И. ЛЕБЕДЕВ. Оскон Улон-вылон Россиын калыкез улон-вылонын утён удыслы 26 апреле тырме 80 ар. Удмурт Республикаысь Правительстволэн Тӧроезлэн секретариатысьтыз пресс-центр та нуналлы сӥзем журналистъёсын пумиськонъёсты палэнэ потаса ортчытӥз. Калыкез улон-вылонын утёнъя министрен Николай Бессогоновен ӵош журналистъёс тодматскизы та удыслэн Воткинск городын азинскеменыз. Ортчизы пӧртэм интыосын пумиськонъёс. Кизёд ӟеч тысь, аралод ӟеч кыл Воткинск городлэн мэрез Валерий Фридрих Ижевскысь куноосты возьма ни вылэм. Мӧйыос, шуге-леке сюремъёс сярысь сюлмаськон Воткинскысь администрация понна кылын шудон ӧвӧл. Та городын сяна, республикамы мукет нокытын ӧвӧл кылдытэмын Калыкез улон-вылонын утёнъя управление, кудӥз ас котыраз огазея пенсиосъя, нимаз адямиослы но семьяослы юрттэт сётонъя вань службаосты. Кивалтэ та управлениен Александр Гурьянов. Заводъёслы капчи мед луоз шуыса, город ас вылаз басьтӥз соослэсь но социальной юрттэт сётон удысъёссэс, табере гужемзэ тросгес нылпиос шутэтскыны быгатозы лагерьёсын. - Шуге-леке сюремъёслы нимысьтыз саклык кулэ, соин ик калыклы юрттэт сётон удысэ ужасьёсты кутӥськомы конкурсъя, - шуэ Валерий Леонидович. - Нырысь интые пуктӥськомы адямиен ужаны, сое валаны быгатонлыкез. Трос лыкто вылӥ дышетскон заведениосты быдтэмъёс. Ужан сяменызы, дышетсконзэс азьланьто быръем удыссыя. Таяз арын калыклы юрттэт сётон удысын ужасьёсты нимысьтыз формаен дӥсяны чакласьком, коньдон со понна шедьтомы. Берло дыре республикаямы пенсиос тыронэн югдур шугомиз. Пенсионеръёслы кызьы ке но юрттон понна Воткинскын таяз учыре но амалъёс утчазы. Нимысьтыз ветлӥзы Ульяновске, соослэн ужаменызы тодматскыны. Озьы пенсионеръёслы сиён-юон кредит амалэн сётъяны кутскизы. Нылпи пособиос но кылем арын сентябрь толэзьлы тыремын ни, заводъёсын взаимозачётъёс лэсьтыса. Администрация ӧз вунэты тужгес но шуге-леке сюремъёс сярысь, кинлы номырин улыны. Со понна город бюджетысь таяз арлы 145 сюрс манет висъяны чакламын. Туннэ нуналлы сыӵе юрттэт сётӥське ни. Шуг-секытъёс кылдӥзы вал эмъюмъёсын. Солы но 60 сюрс манет коньдон шедьтӥзы. Юрттэт возьманы нокытысь ваньмыз сямен лэсьтӥське город бюджет чотын. Кылем арын вань удысъёсъя республика Воткинсклы чакламлэсь трослы ӧжыт коньдон висъяз - дотациос уретэмын вал 23 миллиард манетлы. Озьы ке но, калыклы улон-вылонын юрттэт сётӥсь учреждениос номыр шоры учкытэк ужало но выльдӥсько. Арысь аре администрация шуге-леке сюремъёсты утёнъя программа кутэ. Чигиськем пушъетъёс Быдэ вуымтэ нылпиослы приют кылдытыны воткинскъёсты ачиз улон косӥз. Асьсэос адямиос но вазиськылӥзы кивалтӥсьёслы, нылпиос, пе, подъездъёсын, подвалъёсын, кытын шедем кӧлало. Озьы одӥгзэ бушам нылпи садэз приютлы пӧрмытӥзы. Ужа ни со арлэсь кема, городын ӧжытгес луизы куштэм, калгись нылпиос. Приютын 3 аресысен 18 аресозь нылпиослы огдырлы 50 инты чакламын. Кылем арын татчы вуылэм 235 пиос но нылъёс пӧлысь 184-ез выльысь семьяосазы берытскизы, 23-зэ интернатъёсы интыяно луиз. Приютлэн директорез Татьяны Васильевна Трефилова маде: - Тросэз нылпиос дорамы асьсэос лыкто, эшъёссылэсь верамзэс кылыса яке куке но татын улӥзы ни. Тани кык толэзь талэсь азьло вуиз укмыс аресъем нылаш, куриськон гожтӥз, мон, пе, гуртам уг улы, интыялэ приютэ. Нылашез дораз зол жугиллям, нош песянаез виёнэн кышкатэм. Мукетъёссэ, куать но сизьм аресъем сузэр-вынъёсты, анайзы доразы ворсаса кельтэм, кӧня ке нунал ӵоже нылпиос сютэм улӥллям. Приютэ соосты вуттӥзы бускельёссы, корка пырон ӧссэс тӥяса. Озьы но лкэ, анайёс асьсэос нылпиоссэс ваё. Котькытчы, пе, интыялэ, милемлы базарын тысь вузаса пукыны кулэ. Анай-атайёссы вань вылысь пиналъёс семьяен улонэз уг адӟо, уг тодо марлы мисьтаськыны кулэ, мар со ванна, вить-куать аресъем нылпиос вераськыны гинэ но уг быгато. Тросэз уг тодо мар со сыӵе курег, чечы, сӥль. Одӥгезлэн песянаез юа, тӥледыз, пе, татын сӥльын сюдо-а. Уг, шуэ соиз, комитет гинэ, пе, сииськом. Зэмзэ но, та приютысь сюлмо но ӟеч апайёслы луыса, пиналъёс кӧлыны выдо кӧтсы тырыса - нуналаз куинь пол сюдо. Соос татын дӥсямын-кутчамын, эскеро врачъёс, психологъёс. Бадӟымъёсыз школае дышетскыны ветло, пичиосыныз татын ик пӧртэм занятиос ортчо. Ас киосынызы лэсьтэм яке суредам ужъёссы шоры учкыса пиналъёс данъяськыны ик кутско. Комнатаын соос укмыс но, дас куинь кузя но уло - пичиосыз бадӟымъёсын ӵош. Асьсэос ик утялтӥсько, ог-огзылы юртто. Котькуд группалы быдэ ванной комната вань. Нылпиос приютын кык но, куинь но, куать но толэзь уло. Пиналъёсын ужам сяна, юрттэт сётӥсьёс семьяосазы вуыло. Берло но куинь толэзьёс пала чакласа возё на пиналлэсь семьяяз кызьы улэмзэ. Та юртын ик 1997 арын январь толэзьысен ужа семьялы но нылпиослы юрттэт сётонъя ёз. Юрттэтлы кулэяськыса вазиськиз ни 127 семья. Шуге-леке сюрем нылпиослы массаж лэсьто, уколъёс пуктыло, эмъяло, ужало педагогъёс но психологъёс. Огазе люкаськыса, ныдпиос озьы ик тодматскыны быгато ог-огенызы. Приют возиське город бюджет чотын. Нимаз адямиос но, организациос но юртто дӥськут бичаны, быгатӥсьёсыз дуно кузьымъёсын лыкто. Анай-атайёслэн нылпиоссы сярысь сюлмаськымтэзы дунтэм уг усьы городлы - нылпилэн приютын улэмез нуналаз 130 манет тыр луэ. Улон борды кырмиськон Воткинскысь психоневрологической интернат пуктэмын 1974 арын. Нырысь со чакламын вал мӧйыослы но инвалидъёслы гинэ. 1994 арын сое паськытатӥзы, пуктӥзы выль кӧлан юрт. Али татын улэ 505 мурт, 195 мурт ужасез. Трос аръёс ӵоже интернатэн кивалтэ ни Олег Юрьевич Новичков. Со ик тодматӥз Ижевскысь лыктэмъёсты аслаз бадӟым но туж аспӧртэмлыко хозяйствоеныз. Улӥсьёс понна ужало выль оборудованиен эмъян кабинетъёс, вань спортивной залзы, черке гинэ но асьсэ доры ветло. Быгатӥсьёсыз мылкыд каремзыя ужало. Интернатлэн вань 10 гектар музъемез. Ӝӧк вылзэс узырмытон понна улӥсьёс асьсэос ик бакча сиён но картофка будэто. Араз со 200 сюрс манет тыр пайда сётэ. Одӥгаз мурӝолазы вож сугонлы нимысьтыз инты висъязы, табере быдэс ар ӵоже сугонэн но утялтӥськозы. Вордо парсьёсты. Азьло сӥльлы гинэ шуыса будэтӥзы ке, табере пасрьпиосты городын улӥсьёслы но вузало. Та вакытлы гидын 87 парсь вордо, ужасез - ньыль мурт. Таиз удыссы араз 40 сюрс манет тыр пайда сётӥз. Вань вуриськон, столярной но механической мастерскойёссы. Но материал тырмымтэен, котькуд дыре ик уж уг луы. Интернатын улӥсьёслэсь шутэтскон дырзэс но пӧртэм сямен радяъны туртто. Ортчыло праздникъёс, шулдыръяськон ӝытъёс, шудонъёс, ӵошатсконъёс. Семья кылдытыны мылкыд карисьёслы пумит уг султо, но кузпалъяськемзылэсь азьло малпаськыны дыр сёто. Озьы интернатын ньыль семья кылдӥз ни. Уло соос нимаз комнатаосын. Мукетъёсызлэн но улон интызы ӟоскыт ӧвӧл уло кык-куинь кузя. Сиськем понна 70 процентэз пенсизы кыле интернатэ. Юрттэт уг лу дантэм Котькудаз сямен городын но районын али усьтылэмын калыклы улон-вылонын юрттонъя центръёс. Вань со Воткинскын но, кивалтӥсез Людмила Викторовна Крушина. Журналистъёс пыр-поч тодматскизы таизлэн но учрежденилэн кызьы ужаменыз но улэм- вылэменыз. Шутэтскыны лыктэм песянайёс но песятайёс (таосыз туж ӧжыт) пырыкумы кырӟаса пуко вал. Журналистъёсты туж мыло-кыдо пумитазы, ушъяськизы центрзылэн но ужасьёслэн ӟеч ужаменызы. Одӥг ӝожтӥськонзы вал, ӧжыт, пе, интыез, куамын муртлы гинэ чакламын. Но Валерий Фридрих оскытэм, центрез азьланяз паськытатын озьы шуыса. Сиськемзы понна нуназе шутэтскисьёс толэзяз 132 манет тыро, черод татын уг ик бырылы. Та юртын ик вань улон интылы ёрмись песянай-песятайёслы тямыс интыен станционар. Таяз ини шуге-леке сюремъёс, толэзяз 226 манет тырыса, куать толэзёзь улыны быгато. Та куспын центрын уужасьёс соослы улон инты утчало, семьяосынызы верасько. Центрын ик вань адямиослэн доразы ветлыса юрттэт сётӥсь куать ёз, та дырлы 635 мурт кулэяське пӧртэм юрттэтлы. Ужа ӝог юрттэт сётонъя службазы но. Кылем арын отчы вазиськиз 928 мурт. Дун тырыса юрттэт сётонлэсь пайда басьтӥзы 34,9 сюрс манет тыр. Центрлэн ужез ӧжыт капчиялоз, май праздникъёс бере Ветеранъёслэсь юртсэс усьтыса. Отын одӥг но кык комнатаен 53 квратира. Улыны пырозы матысь ӵыжы-выжыоссытэк кылем кузпалъёс, чылкак огназы улӥсь песянайёс но песятайёс. Татын соослы пӧртэм юрттэт сётозы, оген улонзэс шулдыртозы. Мӧйыосты юртэ интыянъя ужа нимысьтыз комиссия, дасямын положение, сое кутыны кулэ на Воткинск городысь дума но Калыкез улон- вылонын утёнъя министерство. Л. Малых. Пумиськонъёс дыръя. Туспуктэмъёсыз А. Поздеевлэн. Шӧкыч Пельысь пеле Кызьы кылӥськиз, город тӧроос эшшо огпол яркыт возьматӥзы начар улӥсьёс сярысь сюлмаськемзэс. Тодӥськоды на, луоз, кемалась ик ӧвӧл лавкаос котырын макем бадӟымесь черодъёс люкаськылӥзы, вӧй, сӥль, аракы, вузан дырзы кемалась ни ортчем колбаса, тушёнка басьтон понна. Туннэ калыклэсь та кузь "быжъёс" чиптэм-чаптэм быризы. Котькин, котьма утчась адями тонмед луод, коммерсант яке бизнесмен, жуг- жаг люкан интыосысь буш ӟенелик бичась яке вокзал котырын улӥсь-кӧлась-а, котькуд вамышысь нокин люкетытэк басьтыны быгатоды чорыг мызь, банан яке гранат, ӵынатэм сӥль, кынтэм кальмар. Табере тани толэзьысь толэзе коньдон вылэ вуисьтэмъёслы но сётэмын право нокыӵе черодтэк басьтыны вӧл-вӧл квартира, чильк-вальк ворекъясь машина, йылсо липетъёсыныз инме мертчиськем коттедж. Тужгес но ӝог басьтыны луэ "Мерседес", "Форд", "Тойота" выллем лимузинъёсты. Дыртэлэ, эшъёс, магазинъёсы. *** Медикъёс юн сюлэмшугъяськонэ вуизы, берло дыре шудтэм учыръёслэн лыдзы шуак йылэмен сэрен. Рос-прос эскерем бере шараяськиз: кӧняез ке предприятиос рабочийёссылы уждун дыраз сётӥллям. Кема дыр ӵоже ву но нянь вылын пукем куд-ог адямиослэн шумпотыса сюлэмзы путэм. Таӵе шимес югдуре нош ик шедёнтэм вылысь, город но завод тӧроос уждунэз азьвыл сямен ик ӝегатыса тырыны пуктӥзы. *** Городлэн "кисыез" ялан бушамен, матысь дыре ваньзэ луонозэ но, луонтэмзэ но коньдон поттон уже кутыны чаклало. Кыре шупам иворъёсъя, тӧроослэн син шоразы нырысь ик йӧтӥзы тодмо ӧвӧл кин понна но малы сюрес вамен музъем ултӥ выжон интыос. Отын, пе, ӝоген усьтозы уин ужась клубъёс, казиноос, дансигъёс но мукетъёссэ. Татчы лыктӥсьёс ас мылкыд каремзыя ваче син пумиськыны быгатозы йыр вандӥсьёсын. Коньдон тырытыса, ас мугоренызы вузкарись нылкышноосын но воргоронъёсын, йырзэс эмъюмен шузимытӥсьёсын, ваньбур таласьёсын, жугиськисьёсын. Ну бен, шулдыр ке шулдыр луоз! А то ведь, берло дыре музъем ултӥ ортчыны гинэ ӧвӧл, пырыны дӥсьтӥсез ик ӧвӧл ни. *** Асьме кун котьку но данъяськиз трос ныло-пиё семьяосыныз. Но улон шур ву кадь ик интыяз уг сылы. Арысь аре пересьмиськом. Нош ульчаосын вуоно кивоштӥсьёсмылэн жингрес куараоссы ялан ӟарытомо. Утчаськод ке, татын амал шеде вылэм. Шуо, матысь дыре (8 март, оло, 1 апрель бере) военной училищеосын дышетскисьёслэн улоназы шумпотымонэсь воштӥськонъёс луозы. Соосты, пе, бышкись ез сьӧрысь казармаосын пытсаса уз возе ни, нылкышно общежитиосы нимаз-нимаз этажъёсы интыялозы. Озьыен, гажано нылъёс, дыртэлэ та ӵош улонниосы ӝоггес каръяськыны. Сюресты мед удалтоз... Профсоюзъёс кенешо Удмуртиысь профсоюзъёслэн Федерацизылэн Кенешезлэн Исполкомез заседанизэ ортчытӥз. Со эскериз туэ гужем нылпи лагерьёсын шутэтсконэз радъянъя ужпумез. Исполкомлэн талы сӥзем постановленияз пусъемын, анай-атайёслэсь путёвка понна кӧня коньдон басьтоно, лагерьёсын нылпиосты кӧня манетлы сюдоно, шутэтсконзэс, эмъяськонзэс кызьы радъяно, ваньмызлы талы кытысь уксё шедьтоно. 1998-тӥ арын 15-тӥ апрельысен 15-тӥ маёзь Россиын ортчо экологической кышкытлыклэсь утиськонлы сӥзем нуналъёс. Профсоюзъёслэн Федерацизылэн Кенешезлэн Исполкомез профсоюзной организациосты, предприятиосын ужасьёсты соосты ортчытонэ пыриськыны ӧте, кылсярысь, предприятиосын, котырысьтызы урамъёсын, улосъёсын утялскыны-чылкытатыны. Со сяна, эскеремын кылем арын профбюджетэз быдэсъянъя но 1998-тӥ арлы бюджет кылдытонъя ужпум. П. Иванов. Берекет Кибашлыос Пулэз лулъясь Туспуктэм вылысь адӟиськоды Сергей Васильевич Степановез но солэсь ужъёссэ. Та кибашлы воргорон ужа Пичи Пурга районысь Вуж Моньялась кибашлыослэн юртазы мастер методист луыса. Мылкыд карисьёсты усточи дышетэ пуллэсь арбериос чеберманы. Вандӥськон-вӧлӥськон ужъёслы со пичиысен дышиз атаезлэсь но солэн агаезлэсь. Кыксы но вынъёс устоесь плотникъёс вал. Суредаськон но Улын Юри гуртысь пияшез пичиысен бордаз кыскиз. Соин азьпал сюресэз сярысь солы трос малпаськоно ӧз луы, сюрес вуттӥз Чайковскийысь профессионально-технической училищее. Художник- оформитель луиз. Та профессиез Сергей Степановлы юрттӥз армиын дыръяз но: пӧртэм адӟытонъёсы пыриськылӥз, комнатаосты чебермалляз. Кык арзэ ужаз Якшур-Бодья районын, табере тани нош ик вордӥськем палъёсаз аслэсьтыз быгатэмзэ нылпиослы сётэ, чеберез валаны гинэ ӧвӧл. Сое асьсэ киосынызы лэсьтыны но дышетэ. - Эскизъёс но ваньзэ ачим малпасько, - шуэ зарни киё мастер. - Та ужен уг ке выриськы, сюлэм интыяз ӧвӧл кадь. Озьы быгатӥсь муртлэн ки улаз огшоры пул "луло" арберилы пӧрме, тани кутоз но чорыг вуэ тэтчоз, юсь лобыса кошкоз, шыкысысь зарни но азвесь пырыос пазьгиськозы. Быгатӥсь мурт котькытын усто луэ шуэмзыя, Сергей Васильевич но кырӟаны но быгатэ, гармошкаен но, баянэн но шудыны яратэ. Со озьы ик ӟеч кузпал но атай. Туспутэмъёсыз В. Камашевлэн. Экран пыр эмъясь Йылпумъянъёс лэсьтэмын Россиысь пӧртэм интыосын ужась телестудиослэн фестивальзылы. Отчы кӧня ке ужъёсыныз пыриськиз Удмурт телевидение. "Домашний доктор" передачаез нуись врач Мансур Гиллязетдинов сюриз усто авторъёс пӧлы. Озьы ик умоен пусъемын Александр Шерстневлэн но Алексей Сергеевлэн "Прощание славянки" ужзы. Шӧкыч Эх, улон-вылон Нырысь кирос тыризы, быдтӥзы кирос поныса. Куд-огез ӝожтӥське, асьме удмурт шаерамы,пе, ӧжыт историен герӟаськем памятникъёс. Шонер ӧвӧл со. Элькунамы, вашкала дырлэн гинэ ӧвӧл, туалаезлэн но мудрон тодметъёсыз пумтэм. Тани Алнаш ёросысь Кузёбай гурт. Номырин но уг висъяськы кадь со мукетъёсызлэсь. Но озьы потэ вылэм нырысь учкыса гинэ. Вань, татын но вань учкымонэз-адӟымонэз, улонмылэн вамышъёсыныз тодматскымонэз. Син азяды пуктэ таӵе суредэз. Кузёбае отысь тужгес шулдыр, сюлэмез бордазы кыскись интыосын тодматскыны дышетӥсенызы ӵош вуо сьӧрлось пиналъёс. Кожо гуртлэн урдсаз. - Учке, пиналъёс, - вазиське Мариванна, - асьмелэн таӵеез ӧвӧл на. Та городысь дворец кадь юрт - национальной школа-музей, шонергес вераса, этнографияя, экологияя национальной заповедник. Сое пуктон сярысь постановление 1992 арын 17 сентябре кутӥзы Удмурт Республикаысь Министръёслэн кенешсы но Вылӥ Кенешлэн Президиумез. Асьме калык понна со туж бадӟым ужрад. Татын дышето вуоно учёнойёсты, врачъёсты, инженеръёсты. Ваньзы соос луозы асьме удмуртлыкмес, йылолъёсмес, культурамес, кыллыкмес утисьёс но уката азинтӥсьёс. - Мариванна, - одӥгез пияш кизэ ик син вадьсаз карыса учке кыр бусые. - Мон нокыӵе дворецез уг адӟиськы. Пиналъёс но ӧвӧл. - Сидоров, тон ку кыл вискы пыремысь дугдод?! - могак каре дышетӥсь. - Пианлъёсты татын асьмелэн вашкала но туала историенымы тодмато, пӧртэм ужъёслы, улонын шуг-секытысь потон амалъёслы дышето. Огъя вераса, асьмелэн кадь огшоры школаосын сомында тодон-валан ноку уд басьты. Мариванна пиналъёсты пыртэ липыны вуттымтэ корка. Сюлэмез нёркак поттыса, инме шур! ӝутско дасо тылобурдоос. - Та быдӟа куака кар пуктӥллям! - нош ик пайме Сидоров. - Сидоров! - кеське Мариванна. - Та куака кар шуонэдлэн нимыз коттедж. Тодыса ул: асьме кунмы нырысь ик сюлмаське ужась адями сярысь. Тӥни малы татын но котьмалэсь азьло ӝутӥзы дышетӥсьёслы коркаослэсь борддорзэс. - Нош кызьы укнотэм, ӧстэм, липеттэм юртъёсын улозы соос? Мариванна ма вераны ӧз шедьты ни. Пиналъёсты ӝоггес валтӥз гуртоослэн шуныт коркаоссы доры. Тазьы ик ма вераны уг шедьто туннэ лицей лэсьтонэз радъясьёс но. Юртъёс пуктон борды соос нырысь-валысь вань мылкыдзэс сётыса, песятайёсмы сямен, кирос тырыса кутскизы ке, табере лэсьтӥськон вылэ кирос понӥзы. Мугез вератэк но валамон. Коттедж борддоръёс ӝутскизы - коньдон быриз. Ма кароно табере, тодӥсь ӧвӧл. Вуттымтэ юртъёсты вузаны туртто вал. Дунзэ мултэс ӧз куре ке но, кулэ карись ӧйлась. Уз но шедьы, дыр. Татчы ас дыраз вуттэм кирпичъёсты кин но со киултӥз ни. Табере борддоръёсты сэрттон борды уз кутске, меда? Кузётэм макеос кинлы кулэ... В. Кутузова. Туспуктэмез В. Камашевлэн. 02 ивортэ "Граждан ож" Мукет сямен та югдурез уд нима: апреле 19 нунал ӵоже гинэ республикаямы 12 мурт виемын, 17-ез сӧсыртэмын яке луло шӧй карыса куштэмын. Данакез йыружъёс ортчизы семья куспын. Воткинской шоссе урамысь огаз коркан улӥсь кузпалъёс - 38 аресъем Василий но солэсь куинь ареслы егит Мария кышноез - ӵош юыса пукизы. Кыл бӧрсьы кыл, отӥяз картэз кияз пурт кырмиз. Адями вир кисьтӥськиз... Та нуналэ ик Устинов районын картсэ вандӥз 40 аресъем Светлана. Воргоронэз врачъёс утьыны ӧз вуэ ни. 19 апреле Сарапулын кышномурт кузпалэзлэн кӧтаз пурт донгиз. Со ик луиз даллашыса улонзылэн пумыз. Маин валэктод семья куспысь шимес адӟонъёсты? Малы одӥг липет улын улӥсьёс ог- огзэс сокем адӟонтэм, сокем синазькыль каро? Юон, даллашон вылэ гинэ ваньзэ уд погыльты. 11 апреле утемез-вордэмез понна анаезлы "тау" кариз Можга районысь Бадӟым Уча гуртысь 26 аресъем пиез. Ӝытазе 9 час котырын кудӟем йырын гуртаз вуыса, 65 аресъем кышномуртэ со выж вылэ погыртэ но чыртызэ пыд улаз лёге. Вераны кыл уг шедьы: кызьы аслэсьтыд самой матысь, самой дуно адямидэ - мемидэ виёд?! Бӧрысьгес та кык пыдо изьвер валэктыны выриз на, муминым, пе, кемалась керетысагес улӥм ни. Шонер: юись муртэ кин-о лӥятыса, вешаса возёз? 18 апреле Алнаш районысь Казак гуртын аиынз но пиеныз куспын даллашон потӥз. Арлыдо воргорон соизэ куаретӥз, вылды. Суд улэ шедьылэм 20 аресъем муртлы атаезлэн визьмамез ӧз кельшы. Пурт кутыса, парсез сямен вандӥз. Сыӵе вылэм тау каронэз вордэм пизылэн. Ю. Байбеков. КОНЬДОН ЙЫБЫРТЪЯТЭ Бюджет чотын коньдон басьтӥсьёс пӧлы пыро дышетӥсьёс но. Туннэ соослэн улон- вылонзы ушъямон ӧвӧл. Вунэтӥзы ни, луоз, методической литература понна берлозэ коньдон басьтэмзэс. Ярано коть, гуртоослэн пудозы, сад-бакчазы вань. Озьыен, сютэм уд кулы. Со сяна, тросаз районъёсын уждун но дыраз басьтыны быгато. Та ласянь секытгес югдур городъёсын. Татын вамышлы быдэ коньдон кулэ. Ярано вылэм, гуртын улӥсь ӵыжы-выжыед вань ке. Солы быгатэмъяд юрттыса, кӧттэ картошкаен ке но "пӧясалыд" ни. Городысь тросэз дышетӥсьёс пу юртъёсын уло. Жаляса верано, пулы но электрокужым понна нокыӵе льготаоссы ӧвӧл. Вылаз ик, гуртысь дышетӥсь сярысь, 25 процентлы ичигес уждун но басьто. Соин валче дышетӥсь нуналлы быдэ коньдонзэ чотано луэ. Тужгес но курадӟо егит специалистъёс. Соослэн уждунзы няньлы но чайлы сяна уг окмы. Сыӵе дыръя кыӵе мылкыдын ужа меда сютэм дышетӥсь? Ижевскысь тросаз школаосын уждун басьтӥзы январь толэзь понна гинэ. Уно сюлмаськонъёсын сэрен школаын ужась ӵемгес лулсэр висёнэн висе, мукет чер но со борды шаплыгес аля. Куд-ог дыръя анай-атайёс трос нылпи вордо но соосты будэтыны кынарзы уг ни тырмы. Ас понназы шуо, лэся, ми вордӥм, школа будэтоз али. Пиналлэн шаян луэмезлы нош ик янгыше уськыто дышетӥсез. Мае гинэ чидано уг луы дышетӥсь? Узыръёслэн машинаосын гинэ ворттылэмзылы, йӧно но тузӥ дӥсяськемзылы котькудӥз вожъяське, луоз. Нош кыӵе соослэн нылпиоссы? Дышетскон тодазы ӧвӧл ни, уг кышкало "чебер" кылъёс но вераны. Востэм дышетӥсьёс ваньзэ чидано луо. Кышкасагес но дӥсьтытэкгес соос но забастовкаосы потало. Кытчы пырод на, дышетӥсьлэн но сиемез потэ ук. Коньдон ваньзэс йыбыртъятэ. В. ВАСИЛЬЕВ, ужысь ветеран. Ижевск город. Вакчияк Россиысь иворъёс СНВ-2 огкылэз Дума юнматӥз ке, Россиялэн кужмыз уз тырмы сое быдэстыны, малпа "Сегодня" газет. Малы ке шуоно, таӵе учыре ядерной ож тӥрлыкез 2 поллы ӝоггес быдтоно луоз, нош Россия туала графикез мырдэм быдэсъя. Ядерной оружиез быдтонлы США асьмелы 90-тӥ аръёслэн кутсконазы 90 миллиард доллар висъяз. Та коньдонлэн 60 процентэз уже кутэмын ини. Но ужпум мукетыз бордын: ож тӥрлыкез быдтыны кулэ луись коньдонлэсь ӝынызэ гинэ Америка висъя, кылемзэ Россия ачиз шедьтыны кулэ. *** Туннэ Россиын 40 миллион пала вкладчик пӧямын, гожтэ "Новые Известия" газет. Финансовой пирамидаосы кугӟам уно триллионъёсты государство берыктыны уг быгаты. Калык таин валче нош ик бугыръяськыны медаз кутскы шуыса но адямиослэсь вожпотонзэс небӟытон понна, кылдытэмын Вкладчикъёсты акционеръёсты утёнъя федеральной фонд. *** "Огонёк" журнал печатлаз Джохар Дудаевлэн национальной гвардиеныз азьвыл кивалтӥсьлэсь, нош али "Матросская тишина" изоляторын пукисьлэсь Бислан Гантемировлэсь интервьюзэ. Со верамъя, Чечняын ожмаськон кутскемлэсь азьвыл ик Дудаевлэн правительствоезлы но, солы пумит оппозицилы но коньдон, ож тӥрлык вуылӥзы Россиысь. Будёновскын виркисьтонэз Россиысь власть понна нюръяськисьёс кенжытӥзы. Озьы соос Еринэз отставкае келян но со интые Куликовез юнматон понна муг утчазы, валэктэ Гантемиров. "РОССИЫСЬ ГУРТЫСЬ НЫЛКЫШНООСЛЭН ОГАЗЕЯСЬКОНЗЫЛЭСЬ" Удмурт республиканской организацизэс кылдытонъя конференциысь делегатъёслэн ВАЗИСЬКОНЗЫ Гажано нылкышноос, эшъёс! Шунды гужем пала берытскиз, озьыен, инкуазен валче шумпотыны кулэ кадь. Но малпаськиськод но - шумпотыны номырлы. Макем кузьгес но сайкытгес луэ нунал, сокем мургес адӟиське крестьян адямилэн курадӟонэз, син азе яркытгес пуксе гурт улонлэн начармемез. Тӥни сыӵе куашкам аграрной производстволэн "емышез". Гуртын улӥсьёс туж умой валало: соосты ултӥяса но пӧяса возён потэ странамылэн туала кивалтӥсьёсыз бордысь. Калыкез ултӥям ӧвӧл шат со, куке государство вань асьмелэнэз шоры сюранай музэн учке, сиён-юон бордысен кутскыса но искусство удысын кылдытэм произведениосты басьтыса. Гуртоос табере валаны кутско ини, мар бордысь пото соослэн курадӟонъёссы. Соос адӟытэк уг уло, кызьы зӧк кисыё дядяйёс асьме музъеммес гуртъёсынымы валче ик басьтыны дасесь. Но гурт нылкышно сыӵе кузё азьын ноку уз пыдесъяськы, картсэ но со вылэ ужаны уз лэзьы. Малпаськом, асьмеос кыдам но валам ини, быръем муртъёслэсь ӟечсэ возьманэз ӧвӧл. Нюръяськоно кышкатэк, асьме сямен, таяз учыре нылкышно сяменымы. Вань гуртъёсмес утён понна, огазе кариськоно. Сыӵе нюръяськонэ ӧте асьмеды улон. Гуртын улӥсьёсты мыскылляса воземзэс чиданы уг ни луы. Государство гурт калыклэсь копак палэнскиз. Вунэмын тазалык, дышетон, культура сярысь сюлмаськон. Ӝегаса тырисько уждун, нылпи пособиос, пенсиос. Ӟеч огазеяськыса, гурт нылкышноос быгатозы пумитъяськыны туала реформаторъёслы. Ми ум ӧтиське баррикадаосы, Россиез азинтонъя мукет, визьмо амалъёс шедьтыны луэ. Нылкышно огазеяськон ас азяз таӵе валтӥсь ужпумъёс пуктэ: крестьянъёсты мозмытоно социальной но экономической зӥбетлэсь, умоятоно ужан условиоссэс; утёно анайлыкез но нылпи дырез; сюлмаськоно адямилэн чеберлыкез сярысь; юнматоно семьяез но утёно солэсь данзэ; гурт нылкышнолы юрттоно обществоын аслэсьтыз интьызэ шедьтыны. 1998 арын 20 мартэ Удмуртилэн 19 ёросысьтыз лыктэм делегатъёс пыриськизы "Гурт нылкышноослэн Россиысь огазеяськонзылэн" Учредительной конференциезлэн ужаз. Ми, та ужрадлэн делегатъёсыз, вань гуртъёсысь нылкышноосты ӧтиськом огазе кариськыса нюръяськыны. Учредительной конференциысь делегатъёслэн нимынызы РССЖ-лэн Удмуртиысь ёзэзлэн Советэзлэн Президиумез. Берекет Тӥ юады вал КУБИСТА БУДЭТОН СЯРЫСЬ Гажано редакция! Оломар сярысь но гожъяськоды, лыдӟисьёслэсь куронъёссэс быдэстыны тыршиськоды. Оло, мыным но юрттэт сётоды. Куронэ туж огшоры: кубиста будэтон сярысь гожтэ вал. Гуртын улӥсь понна со картофкаен артэ сылэ. М. ПЕТРОВА. Игра район. Кубиста ӟеч но витаминэн узыр сиён луэ шуыса ум ни вералэ. Соиз ваньмызлы кемаласен тодмо, дыр. Кубиста 70-лэсь трос пӧртэм луэ. Салатлы тужгес умой вазь вуисьёсыз: "июньская", "грибовская-147", "скороспелая". Толйытыны соос уг мыно, но сылалтыны луоз. Июле сиыны вуо ини. Шоро-куспо вуисьёсыз пӧлын: "слава-1305" (сылалтыны яра, 2 толэзьлэсь кема уг возиськы), "белорусская-455" (февралёзь выль кадь улэ, сылалтыны тужгес умойёсыз пӧлы пыре), "подарок" (март толэзёзь возиське). Сентябрь толэзе соос вуо ни. Бер вуисьёссэ утялто октябрьлэн кутсконаз. Тужгес бадӟым йыръяське "московский поздний" - 10-15 килограммозь вуо. Толйытыны уг мыны, нош сылалтыны яра. "Амагер-611", "зимовка" сортъёс кыллё ӝыны ар пала, со куспын шӧмзы уката умоя. Тӧдьы йыро кубиста сяна, кудӥз асьме палъёсын паськыт вӧлмемын, вань на пӧртэм пумоосыз. Басьтом горд йыро кубистаез. Со мынэ салатъёсы но, сылалтыны но. Мариновать карыку уг ышты буёлзэ, туж узыр луэ пӧртэм витаминъёсын. Утялтонэз тӧдьы йыро кубисталэн кадь ик. Савойской кубисталэн куаръёсыз пинё-пинёесь, сылалтыны уг мыны. Йыръёсыз пичиесь. Утялтонэз мукет кубистаослэсь пӧртэм ӧвӧл. Брюссельской кубисталэн пичиесьгес йыръёсыз кылдо модосэз борды. Йыръёссэ утялтон азьын 15 нуналлы азьло йылзэ вандоно. Мынэ сылалтыны, пӧзьтыны, мариновать карыны. Цветной кубистаез мерттоно вазьгес. Утялтонэз пӧртэм ӧвӧл. Кочонэз тӧдьы мед луоз шуыса, саюл азегес мерттоно. Сылалтыны уг мыны, пӧзьтоно, табаын пыжоно. Кольрабилэн емышез куаръёстэм, тӧдьы яке горд луэ. Сиёно ыльын, кӧмзэ паласа. Куаръёсыз горд кушманлэн кадесь. Кубиста будэтӥсьёс тани мае тодыны кулэ. Та будос яратэ ӧжытак чырсгес но щелочен (пенен) узыр музъемез. Помидор но огреч бервылын соослы усто инты луоз. Ортчыт чырс музъем вылын уг йыръяськы, дэесь луэ. Нюр музъем но солы уг кельшы, соин убоез ӝутыны кулэ. Кубиста - кезьытлы чидась будос. Кырын 10 градус шуныт луэ ке, удэз убое мерттыны яра ни. Вазьгес мерттэмзэ ичигес изъянто нымы-кибыос, пыӵъёс. Котькуд удэз ог- огзылэсь 50 сантиметр кеме мерттоно. Гутёе пононо 1 сузь сисьмем кыед яке гыбед, 2 спичка коробка мында пень. Собере 2 литр пала ву кисьтоно. Удъёсты сюе согоно улӥ куаръёссы дорозь. 5-6 нунал ортчыса, котырысьтыз музъемзэ небӟытоно, нош 15 нунал ортчыса, будосъёсты мудыны - котырысьтызы музъемез ӝутыны луоз ни. Со юрттоз удлы юнгес выжыяськыны. 20 нунал ортчыса, выльысь мудоно. Улӥ куаръёссэ ишкано ӧвӧл. Ву кисьтано куасьмемезъя. Солэн выжыез музъеме одӥг метр кеме но кошке. Кубистаез толэзяз 2-3 пол сюдыны кулэ скал кыедэн яке тылобурдо кыедлэн суретэныз. Одӥг ведра суретлы кулэ луоз на 1,5-2 стакан пень. Нымы-кибыос изъянтэмлэсь котькуд будосэз кисьтано тамаклэн, курытпотлэн (полынь), пӧсьтурынлэн суретэнызы яке пенен пызьнано. Кубиста кидысъёсты ӧвӧл на ке киземын, али кизьыны кулэ ни, бер уз луы. Вазь вуисьёссэ апрель толэзьлэн кутсконаз ик кызё ни. Удъёс медаз кынме шуыса, ӟеч шобыръяно. 18 май котырын кыре мерттыны луоз ни. Л. ВАСИЛЬЕВА. Берекет Вашкала йылолъёс но сямъёс Курег йыр сиён Урамысен Марьяен Дарья пумисько но ог-огзылэсь юаллясько-выжыято. Дарья эшезлэсь юа: - Ма, кытчы-о озьы, кума, толон ӝыт быдэс семьяеныды ветлӥды? - Ма, марым, кума, Даняпал ураме, Тарас Микаляос доры, курег йыр сиыны. Кылымтэ, тодымтэ мурт нырысь-валысь копак паймоз, кызьы озьы, пе, быдэс семьяен курег йыр сиыны ветлод. Курег йыр одӥг муртлы но сиымон ӧвӧл ук. Табере рос-просгес мадё ини курег йыр сиён йылол сярысь. Таӵе сям Пичи Пурга палъёсын возиськиз. Матысь-а, кыдёкысь-а выжы-кумыос луо яке огшоры гажано муртъёс-а, огазьын сиён- юон, мукетызлы выль ӟеч выжы пудо уськытыны юрттон вылысь, вылды, ог-огзылы кузьмаллязы пинал пудо. Узыръёсызгес кузьмаллязы чуньы, кунян, ыжпи, парсьпи, кечпи. Тросгес сётъяллязы курег, ӟазег, ӵӧж, курка. Азьло аръёсы базарын ӟеч пудо-живот выжыез ӧз вузаллялэ: кибервыл, пе, луоз яке секыт киё муртлы вузаны шедьтод но ачид ик пудотэм кылёд. Соин шер дыръя улэп пудоез вузаны вандыса нуыны тыршылӥзы. Адямилэн кузьмам пудо-животэз удалтӥз, сӥзьыл вуыса, вань мае, ӝӧк вылэ пуктыны, куно утялтыны. Озьы ар яке кык ар ортчыса, пудо кузьмась муртэ быдэс семьяеныз шумпотыса куное ӧтё ни. Шулдыргес мед луоз шуыса, бускельзэс но уг кельто. Ӟазегез копаксэ пӧзьто, нош курегез - кыксэ яке атасэз. Со вӧзы эшшо мар но со пӧрало на. Нош пӧраськыны удмуртъёс быгато. Озьы ӝӧк вылын луэ шыд но, ӝук но, сӥль но, пыжиськемъёс но, четвертен яке бекчеен векчи виятэмез но. Нырысь-валысь ваньзы ик султо но вӧсясько, кулэм муртъёсыз буре ваё. Отӥяз Инмарлы сюлворо, выжы кельтэм пудозы изъян медаз луы, ӟеч мед толъёз но выжы мед пушъёз, гидазбар тыр пудоен мед шумпоттоз шуыса. Собере ӝӧк сьӧры ӧтё. Нырысь пиосмуртъёсты утялто, собере ини кышномуртъёсты пукто. Ӝӧк сьӧрысь потэмзы бере но вӧсясько на милям сием-юэммы, пе, берекетлы медло, Инмар кыктэн-куинен ятырзэ мед сётоз, ваньмызлы тырмымон мед луоз. Куноос уйшор берозь но пуко, улон-вылон сярысь верасько, кулэмъёсты тодазы ваё. Мар но уг сюры вераны! Ӝӧк сьӧры берло уг пуксьыло ни. Кошкон азязы киязы мар но со сиён сётъяло на, ӵукна, пе, макмыр медаз йӧты. Вандослэсь йырзэ одно ик кузьмась муртлы - пиосмуртлы - сиыны сёто, нош чыртызэ сӥньысэн чыртыяз ошыса лэзё. Кышноезлы ӟенеликен векчи виятэмзэ сёто. Тӥни озьы мусояськыса сиизы-юизы, ог-огзылы юрттыны тыршылӥзы вашкалаосмы. Р. Яковлев. Берекет МЕӴАК НО МОГАК Чурыт верам кыл пурттэк вандэ. Узыр но зарниез уг си, куанер но изэз уг йырйы. Ӧвӧллэсь уг витё, ваньлэсь ик возьмало. Курисьлэн тыбырыз кокыр, сётӥсьлэн нырыз чатыр. Сусек тыр уксёед мед луоз, ноку но уз тырмы. Ужаса шедьтэм уксё берекето (кык даур улэ). Уксё - губи: туннэ вань, ӵуказе ӧвӧл. Кионлы гидын эн оскы. Плотниклэн ужам уксёез - шелепез бырытозь. Пайда басьтэм: сапегзэ кутэн воштэм, манетсэ коньыен вузам. "Удмуртнефтьлы" - 25 МУЗЪЕМ ПУШКЫ - МУЗЪЕМ ВАЛЛИН Куамын ар талэсь азьло вордскиз кабзэ выль удыс - му вӧй поттон. "Удмуртнефть" огазеяськон кылдӥз 1973 арын. Отысь ветеранъёс пӧлын нимысьтыз инты басьтэ бадӟым специалист, туннэ профессор но академик Валентин Кудинов. Али со "Удмуртнефть" АО-лэн директоръёсызлэн советэнызы кивалтэ. Валентин Иванович кивалтэмъя пыӵаз выль амал - музъем валлин портэм гумыос кузя му вӧез кыскон. Республикаямы нефть поттон арысь аре паськыта. Зэм, асьмелэн му вӧймы сокем ӟеч ӧвӧл: сераез трос, со юн лякиське. Музъем улысь ӝутыны шуг. Нош Валентин Кудинов шуг-секытъёс шоры учкытэк тырше. "Удмуртнефть" миым 6 миллион тонна му вӧй кыскиз, кылдэм дырысеныз - 180 миллион тонна. Ветеранъёслэсь кутскем ужзэс оскымон нуо егит нефтяникъёс. Вакыт секыт ке но, туэ нырысетӥ кварталэ планлэсь вылтӥ 30 сюрс тонна му вӧй поттӥзы. Туннэ "Удмуртнефть" АО огазея 23 филиалэз, 4 управлениез, "Удмуртнефтестрой" трестэз, "УдмуртНИПИнефть" институтэз но мукет ёзъёсты. Отын туннэ ужа 17500 мурт. Со пӧлысь 40 процентэз егит специалистъёс, вань наукая докторъёс но кандидатъёс, кун премияя лауреатъёс, Кун Кенешлэн депутатъёсыз. Удмуртиысь нефть кыскисьёслэн ужзы пусъемын дуннеысь 22 наградаен. Мар бен сётэ "Удмуртнефть" республикалы? Туннэ кун бюджетэ 25 процент налог вуэ, куд-ог районъёсын - 80-90 процент уксё пыре. "Удмуртнефть" али пыре "Сиданко" компание. Отын но, быдэс Россиын но одӥгез оскымон предприятие. Удмурт нефтяникъёс музъем валлин му вӧй кыскон амалэз пыӵатӥзы но, котькуд скважина кык пол ӝоггес, 2-3 ар ӵоже, пайда сётыны кутске. Тазьы 12 процентсэ нефтез потто ни. Толон, 24 апреле, Операя но балетъя театрын нефтяникъёслэн сӥё-дано ӝытсы ортчиз. Шаерысьтымы вань му вӧй кыскисьёсты юбилеенызы ӟечкылазы республикаысь вылӥ кивалтӥсьёс. Г. РОМАНОВ. Югыт дуннее укно Люкаськылӥз Печатья но иворъёсъя министерстволэн кенешез. Туала ужпумъёсты кызьы возьматэмзы ярысь ивортӥзы Кизнерысь, Якшур-Бодьяысь но Каракулиноысь райцентръёслэн директоръёссы Наталья Рылова, Фёдор Бедерин но Николай Гребенв. Прессалы али коньдон ичи висъяське. Озьы ке но, районъёсысь гачетчиос улонлэн ӧраз вамышъяныы туртто. Калык али Москваысь но Ижысь изданиосты трос уг басьто. Данак интыосын радио уг вераськы. Кизнере Удмурт телевиденилэн тулкымъёсыз уг вуо. Соин ик интыысь газетъёс гуртысь калык понна пӧрмизы югыт дуннеез возьматӥсь аспӧртэм укно. Пумиськонын шараямын шуг-секытъёс но. Газет поттонэ каллен пыӵало выль амалъёс. Коньдон тырмымтэен шуг шедьтыны ӟеч ужасьёс. Каракулиноын тани фотокорреспондент но ӧвӧл. Югдурез тупатон вылысь, коллегия пусйиз ужрадъёс. Эн вожвылъяське! Пӧртэм ужпумъёс эскеремын республикаысьтымы Журналистъёслэн союззылэн президиумаз: Россиысь журналистъёслэн ӧтчамзылы (сьъездзылы) но Россиысь прессалэн фестивалезлы дасяськон, пӧртэм изданиос куспын вожвылъяськонъёсты быдтон но мукет. Журналистъёслэсь ужзэс но улон-вылонзэс умоятон пумысен вазиськыны чакламын республикаысь но Ижысь, озьы ик мукет городъёсысь но районъёсысь кивалтӥсьёслы. Соос азе пуктэмын луозы тужгес лэчыт ужпумъёс редакциослы ужан инты но адямиослы квартираос висъян. А. Петров. "Ми пумит..." Озьы шуэ Кун Кенешлэн депутатэз Валентин Тубылов, Удмурт Республикалэсь Конституцизэ воштон пумысен вераса. Газетъёсын печатлам проект сессиын эскерымтэ, сое умоен лыдъям депутатъёс пӧлы кызьы ке но шедиллям "Элькун" депутат группае пырись эшъёс но. Куриськом соослэсь гожтӥськемъёссэс зэм луисьтэмен лыдъяны, пусъе Валентин Тубылов "Элькун" группалэн нимыныз кутэм вазиськонын. Нылпиос - улон пушъетъёс Нылпиосты кубиста пӧлысь уг шедьто, аист но бурд вылаз соосты уг вайы. Пиналъёс вордӥсько анай-атайёслэсь. Лыдпусъёс верало: шаерамы лыдъяське 426 сюрс семья; 270 сюрсэз - 17 аресозь нылпиос будо; 30 но ӝыны сюрсэз семья вордэ куинь но солэсь ятыр нылпи; 35 сюрсэз семья одӥг анаен яке атаен. Нош ваньмыз нылпиос шаерамы лыдъясько 455 сюрс. Семьялэн улон-вылонэз герӟаськемын странамылэн, шаермылэн азинсконэз бордысь. Кыӵе луоз та нылпиослэн улон сюрессы? Со сярысь ваньмы ӵош малпаськыны кулэ. Туспуктэмъёсыз В. Камашевлэн. Улмопу выжые палэзьпу медаз буд 1997 ар ЮНЕСКО-ен ялэмын вал гуртлы саклык висъян но юрттон арен. Кызьы ивортылӥмы ни, шаерысьтымы Нылкышноослэн кенешсы нимысьтыз саклык висъяно кариськиз гуртысь кышномуртлэн тазалыкезлы. Республикаысьтымы Тазалыкез утёнъя министерствоен одӥг кыл шедьтыса, Нылкышно кенешлэн азьветлӥсьёсыз пӧртэм удысысь врачъёсын- специалистъёсын, озьы ик кивалтон удысъёсын ужасьёсын ӵош калыке потазы. Гуртысь нылкышнолэн тазалыкезлы сӥзем конференциосы шаерысьтымы вань районъёс пыриськизы, 600 муртлэсь ятыр адями. Конференциосты ортчытыны бадӟым юрттэт сётӥзы ёрос администрациос. Ёросъёсын ортчем конференциослы йылпумъянъёс лэсьтыса, озьы ик азьланяз эскероно ужпумъёсты сэрттон-пертчон вылысь, апрельлэн шораз Ижевскын ортчиз гуртысь нылкышноослэн кенешсы. Радъяз сое шаерысьтымы Нылкышно кенеш, кудӥныз кивалтэ "Сактон" фабрикалэн директорез Зоя Степнова. Гуртысь нылкышноослэн городысь эшъёссылы сюлэм висёнзэс кисьтон гинэ ӧй вал со. Кенешлэн ужаз пыриськизы Удмурт Республикаысь Кун Кенешлэн Тӧроез Александр Волков; Удмурт Правительстволэн Тӧроез Павел Вершинин но солэн воштӥсез Антонина Лисина; Кун Кенешысь Социальной ужпумъёсъя, ужъя, тазалыкез но инкуазез утёнъя ялан ужась комиссилэн тӧроез Светлана Андреева но Наукая, дышетонъя, культурая но егитъёсын ужанъя ялан ужась комиссилэн тӧроез Алла Еременко. Республикаысьтымы вылӥ кивалтӥсьёслы гуртысь нылкышноослэн трос гинэ ӝожтӥськонъёссы вал асьсэлэн улонзы вылэ. Кылзӥськод соосты но малпаськод: гуртоос понна уг пишто ни, лэся, шунды тылсиос, яке пишто ке но, шунтыны уг вормо. Гурт калыклэн улон-вылонэз пумен улӥе лэзиське. Юон, нылпиос пӧлын кулон учыръёс, висись нылпиослэн вордӥськемзы, пӧртэм палась висёнъёс - тӥни кинъёс кузёясько гуртын. Берло дыре улӥсьёслэн лыдзы но трос нылпиё семьяос чотын уг буды, сое йылэтыны юрттэ юись семья. Со гинэ ке луысал. Уждун ӧвӧл - семьяез сюдыны номырин, нылпиос школаын сиськыны уг быгато. Нылпи вайыны дасяськись анайёс но витамин тырмымтэен висьыны усё. Кыӵе вераськон мыноз на таза нылпи вордон сярысь? Коньдонзы ӧвӧлэн, гуртысь нылкышноос озьы ик нылпи шедёнлэсь утиськыны уг быгато - эмъюмъёс дуноесь. Кызьы потоно та секыт югдурысь? Тэк пукыса ӟечсэ уд адӟы, шуизы кенеше люкаськемъёс, вань нылкышно огазеяськонъёслы одӥг кылысь ужано. Городысь но гуртысь нылкышно кенешъёс ог-огзылэн ужан амалъёсынызы тодматскозы. Нош тужгес но валтӥсез ужпум - куронъёссэс вуттоно республикамылэн вылӥ кивалтон ёзъёсаз, эскерыса возёно соослэсь быдэсъяськемзэс. Вераны кулэ, Вылӥ Кенеш но Правительство нылкышноослэсь куронъёссэс син шоразы возё, куд-ог ужпумъёсъя мар но со лэсьтӥське ни. Кылсярысь, гуртысь нылпиосты вылӥ дышетскон заведениосы пырыны юрттон ласянь Ижевскысь 56 номеро школаын усьтэмын интернат. Но анайёслэн нылпиоссэс кыдёке лэземзы уг поты. Соин ик, райцентръёсын усьтӥськозы лицей классъёс. Пиналъёсты дышетыны ветлозы вузъёсысь преподавательёс. Нылпиосты семья улонлы дышетон ласянь но республикаысьтымы Тазалыкез утёнъя министерство но Калыкез дышетонъя министерство выль программа дасязы. Вераськон мынэ котькуд районын усьтӥськись кризисной центръёслы специалистъёсты дасян ласянь. Ужпумъёс трос, соосты озьы гинэ уд быдэсты. Улпому выжые палэзьпу медаз буд шуыса, гуртоослы асьсэлы но дэмен басьтӥськыны кулэ шуг-секытъёсты палэнтон борды. Л. Малых. ОСКЕМ ПОТЭ Выль арез пумитаку, котьку оскем потэ заводъёс, фабрикаос тросгес ваньбур поттыны кутскозы шуыса, нош нырысетӥ йылпумъянъёс уно аръёс ӵоже ини мылкыдэз уг буйгато. Туэ нырысетӥ кварталэ республикаысьтымы предприятиос 3860 миллион манет тыр ваньбур поттӥзы. Ортчем арен ӵошатыса, со 0,5 процентлы гинэ будӥз. Шӧдскымон йылӥз эмъяськон техника лэсьтон (1,9 пол) но пызь но комбикорм изон (1,4 пол). Ялан уллань лэзиське лэсьтӥськон материал поттон (15 процентлы), капчи промышленность (4,2 процентлы), пулэсь ваньбур дасян (3,7 процентлы), му вӧй кыскон (3,4 процентлы). Андан ӵыжатон оглом кулэсмиз 7 процентлы, но сыномисьтэм андан дасян 1,9 поллы йылӥз. Кылем арен ӵошатыса, автомобиль 25 процент гинэ поттэмын, мотоцикл, радиоприёмник - ӝыныез, магнитофон - 79 процент, корт вӧлӥсь станок, пылесос - 125 процент, мисьтаськон машина - 152 процент. Сиён-юон поттонын аракы но сур дасян 23 процентлы будӥз. Шӧдскымон тросгес пызь, вӧй, йӧллэсь сиён-юон, колбаса, чорыг но пӧртэм консерваос дасямын. Нянь пыжон, макарон но кеньыр лэсьтон кулэсмиз. Озьыен, тужгес трос пайда ваись машина лэсьтон ялан синэ. Та удыс ӧз ке улӟы, бюджетмы котьку "пась" луоз. Миым та дырен ӵошатыса, быдэс лэсьтӥськон 10 процентлы сюбегаз, улон корка ӝутон гинэ кӧня ке будӥз. Ваньзэ 184 квартира вуттэмын, со 32 процентлы тросгес. Одӥг квадратной метрлэн дуныз 2310 манет усиз. 4,7 иськем чагыр тыл (газ) нуись гумы музъеме понэмын. Можга районын 600 интыен клуб ужаны кутскиз. Озьы ик гуртъёсын кӧня ке кеносъёс но гидъёс пуктэмын. Я, коть промышленностьын но лэсьтӥськонын ужъёс ӧжытак ке но мыно, пырак ӧвӧл дугдэмын. Та удысъёс ӝоглыксэс матысь дыре мед будэтозы вылэм. Пӧрмоз-а со ИИ кварталэ, кин тодэ? Оскем потэ. Н. ВОЗИСОВ. СЁТЭМАН МАНДАТЪЁС Ижевск городысь Дума понна кылем пятница нунал вунонтэм кылёз: кыкетӥ созыве быръем депутатъёс мандат басьтӥзы. Со понна нюръяськон уго зол гинэ мынӥз. Табере ужа но ужа гинэ, вань ӟеч малпанъёстэ калыкед понна быдэстыны сюлмаськы. Та ӝытэ ик "Аксион" культура юртын ортчиз Анатолий Салтыковез Ижевсклы мэре сӥё- дано юнматон. Ӟечкыланъёс, сяськаос, шумпотон кылъёс - ваньмыз тырмыт вал. Городлэн администрациезлэн кивалтӥсезлы ӟеч мылкыд но ужаз выль вормонъёс сӥзизы трос куноос. Соос пӧлын - Удмурт Правительстволэн Тӧроез П. Н. Вершинин, Кун Кенешлэн Тӧроезлэн нырысетӥ воштӥсез В. И. Агашин. Л. МЕДВЕДЕВА. Спорт ШАХМАТ Пермьын ортчиз шахматэн шудонъя Ураллэн первенствоез. Отчы ветлӥзы Екатеринбургысь, Челябинскысь, Уфаысь но куд-ог мукет городъёсысь 64 кужмо спортсмен. Пӧлысьтызы ӝыныез - спортэ мастеръёс но гроссмейтеръёс. Ӵошатсконъёсы асьме шаерысь 3 мурт пыриськиз. Жаляса верано, огез но вормисьёс радэ ӧз шедьы. Мастере кандидатъёс, Удмуртилэн трос пол чемпионъёсыз Владимир Гребенкин ("Прометей") но Владимир Федосеев ("Темп") 11 очко пӧлысь 6 очко гинэ люканы быгатӥзы. Ӧз удалты таяз пумиськонын международной классэн мастерлы Александр Филипенколы но ("Металлист"). Со басьтӥз 4,5 очко. М. ВЕЛЬТМАНДЕР. "СЬӦД ЗАРНИ" ПОТТӤСЬЁСЛЫ СӤЗЬЫСА Кызьы ивортӥм ни вал, кылем пятницае Ижын нефтяникъёслэн сӥё-дано ӝытсы ортчиз. Со сӥземын вал республикаямы му вӧй поттонлы 30 ар но "Удмуртнефтьлэн" кылдэмез дырысен 25 ар тырмонлы. Операя но балетъя театр нимысьтыз чеберъямын. Люкаськемъёс шумпотыса но данъяськыса кылзӥзы АО-лэн директоръёсызлэн советсылэн тӧроезлэсь, академиклэсь Валентин Кудиновлэсь докладзэ. Со тупен-тупен пусйиз ортчем сюрессэс, басьтэм азинсконъёссэс, дано адямиоссэс но выль ужан амалъёссэс. Бадӟым праздникен ӟечкылазы, дано нимъёс но почёт грамотаос сётъязы Кун Кенешлэн но Правительстволэн Тӧрооссы Александр Волков, Павел Вершинин но мукетъёсыз. Г. ВАСИЛЬЕВ. Вакыт но сямъёс КОНЬДОНЛЭН ЛЯЛЬЧИЕЗ Котькинлэн но аслаз улон сюресэз. Одӥгъёсызлэн со вӧй вылтӥ кадь ортче, мукетъёсызлы курадӟоно луэ. Вань сыӵеосыз но, кудъёсыз бусьтыр улон понна номырлэсь но уг палэнско. Ӵапак соос пӧлысь одӥгеныз шӧдтэк шорысь пумиськи. Ижевскысь "Отдых" ресторанын кофе юыса пукыкум, вазись луиз: - Тӥ доры пуксьыны луоз-а? - Бен, бен, ӵапак огнам пукисько,- шуи мон, вӧзам сылӥсь ӝужыт мугоро воргорон шоры учкыса, 185-190 сантиметр пала луоз ӝуждалаез. Ӝӧк сьӧры мыным пумит пуксиз со. Суд йырсиё, кузялэс ымныръем. Егит на, 22-23 аресъем. Аслыз со одӥг ӟенелик "Белый аист" коньяк но лимон куриз. Куронзэ кема возьмано ӧз луы. Со ог вить минутскын ваньмиыз ӝӧк вылын вал ини. Егит пиосмурт кык чаркаосы коньяк лэзиз. - Ойдо, тодматскоме. Мынам нимы Володя,- шуиз но бур кизэ сётӥз. - Нош мон Артём,- мон но киме мычи. - Тодматскеммы понна юыны но сьӧлык ӧвӧл, дыр,- чарказэ ӝутӥз Володя. - Вождэс эн вае. Но мон курыт юонъёслэсь куштӥськи,- тодмотэм адямиосын юон сямы ӧвӧл бере, пумит луи. Володя номыр но ӧз вазь, чарказэ бушатыса, лимон юдэсэн куртчиз но мон шоры мыр- мыр учкыса, шуиз: - Иське, берло дыре тӥляд улонды но умой, дыр? - Улонэлы ӝожтӥськеме ӧвӧл. Одӥгзэ гинэ жалясько: спортсмен луэме потэ вал. Школаын но институтын дышетскыкум, куас вылын ӝог бызьылӥ. Ӵошатсконъёсы пыриськылӥ, вормисе но поталляй. Нош одӥг пол бызьылыкум кынмыны шедиськем. Черлай. Кема гинэ виси. Йӧнатскеме бере врачъёс спорт сярысь вунэтыны косӥзы. Уг тодӥськы, малы мон тае ваньзэ Володялы верай. Кӧтӝождэ кыре ке поттӥськод, сюлэмлы каньылгес луэ, шуо. Соин, дыр. - Валай мон тӥледыз, Артём,- лулӟиськиз Володя, - валасько малы юонлэсь куштӥськемдэс но. Но тӥ шудо ке но ӧвӧл, сьӧлыктэм. - Ойдо сьӧлыкъёс сярысь вунэтом, Володя. Ваньмы но асьмеос та дуннеын сьӧлыкоесь. - Бен, бен, ваньмы но сьӧлыкоесь. Кинлэн ке но сьӧлыкез пичи, нош кинлэн ке но туж бадӟым,- шуиз Володя, собере чаркаяз коньяк лэзьыса, бушатӥз но шӧдтэк шорысь ас улонзэ вераны кутскиз. - Школаын парта сьӧрын пукыкум ик азьлань улонме туж шудо-буроен адӟылӥ. Нош улонэ тыпак мукет луиз. Школаез йылпумъяме бере, мон бадӟым будӥ ни кожай. Анай- атайёслэсь эрико луэме, палэнын улэме потӥз. Соин ик Москвае университетэ дышетскыны пыри. Стипендия ичи вал, сиськыны но уг окмы. Нош мынам эшъёсы кадь ик чебер дӥсяськеме потӥз. Анай-атайёс коньдонэн юрттыны ӧз быгатэ- уждунзы пичи, кыксы но заводын ужало. Кыӵе ке но уже интыяськыны малпай. Озьы уж утчаса ветлыкум, син азям одӥг ялон сюриз. Гожтэмын, одӥг фирма 20 аресозь егит пиосты ужаны ӧте. Мыноно кариськи. Ужаны мылкыд карисьёс трос гинэ люкаськиллям. Ваньмес, одӥг радэ султытыса, ужлы яранооссэ бырйыны кутскизы. Монэ но кутӥзы. Уж сярысь берло валэктӥзы. Зӧк кисыё нылкышноосты "яратон" уж вылэм со. Коньдон трос сётом шуэмысьтызы, ӧй пумитъяськы, ужаны кыли. Нырысь милемды умой сямъёслы но нылкышноосты кызьы яратонлы дышетӥзы. Бӧрысь радиотелефонъёс но презервативъёс сётъязы. Кивалтӥсьёсмы кулэ дыръя милемлы жингырто вал но ми "ужаны" потӥськом. Яратылӥмы ужбергатӥсьёслэсь 25-40 аресъем кышнооссэс. Зӧк кисыёос коньдон сьӧры уиськыса, кышнооссы сярысь чик но уг малпасько ни - вунэто. Вань узыр нылкышноос но. Куд-огеныз соосын ми чик ӧм кӧлалэ, ресторанэ яке театре гинэ ветлӥмы. Но милемын одӥг час ортчытэмзы понна соос фирмалы 50 доллар тыро вал. Со пӧлысь 35 процентэз милемлы кыльылӥз. Озьы мон трос гинэ коньдон люкай. Университетэз йылпумъяса, Ижевске бертӥ, одӥг комнатаем квартира басьтӥ. Ужаны интыяськи. Азьло ужме вунэто кожай вал, но пумен-пумен мӧзмыны ӧдъяй. Ялонъя ик Ижысь но Москваын выллем фирма шедьтӥ. Нош анай-атайёсме пӧяй, мукет уже, вневедомственной охранае, интыяськи шуыса. Озьы тӥни, мӧзмыса улӥсь нылкышноос Ижевскын но ӧжыт вылӥллямтэ,- веранзэ йылпумъяз пиосмурт. - Володя, дунне вылын паласькись висёнъёс уно гинэ: сифилис, гонорея, СПИД. Соослэсь уд кышкаськы-а? - ӧй чида мон юатэк. - Ма, мон презервативъёсын вырисько. Собере "Мирамистин" мазь но вань. Нылкышноосты яратэмелэсь азьло но собере "пичи эшме" мон соин зырасько. Арняяз одӥг пол эмчиос доры эскериськыны ветлӥсько. Со сяна, фирма тодмо нылкышноосын гинэ выре. Кышкытлыкез бадӟым ик ӧвӧл. - Нош кӧлан ужлэсь уд жадиськы-а? - Кызьы уд? Жадисько. Сыӵе дыръя мыным шутэтскыны дыр сёто. Воргорон кужымме ӝутон понна, физкультураен вырисько. Озьы ик белокен узыр кӧйтэм сӥль, чорыг, йӧлвыл, кӧжы, соя но мукет сиёнъёсты сиисько. Кеньыръёс пӧлысь туж юртто сьӧдчабей но рис. Озьы ик массаже ветлӥсько. - Нош кинъёс, нылъёс яке пиос, дуногес сыло? - Пиос (серекъя). Малы ке шуоно, соос та удысын нылъёслэсь ӧжытгес. Со куспын жингыртэм куара кылӥськиз. Володя дипломатысьтыз радиотелефонзэ поттыса, маке вераськиз. - Ярам, ӟеч лу. Монэ ужаны ӧтё,- озьы шуыса, ӝӧк вылэ коньдон кельтӥз но ураме дыртӥз. Мон но кема ӧй ӝегатскы ни, доре вамыштӥ. Володя сярысь малпан йырысьтым уг кошкы. Малы со сыӵе луэмын? Оло, со Дон Жуан выллем воргоронъёс пӧлысь одӥгез? Ӧвӧл. Володя - коньдонлэн ляльчиез. Уксё понна кӧла со нылкышноосын, нош сыӵеосты альфонс шуо. Сыӵе дыръя малпаськод на ке шат яратон, семья кылдытон сярысь? Инмар сётэм ик Володялы кужым. Оло нош, со аслэсьтыз лябыт сямзэ озьы ватыны турттэ? Но кемалы меда тырмоз егит муртлы со кужымез? Отӥяз мар возьма сое? А. НИКИТИН. РОССИЯ ФЕДЕРАЦИЛЭН КУН НАГРАДАОСЫНЫЗ ПУСЪЁН СЯРЫСЬ РОССИЯ ФЕДЕРАЦИЛЭН ПРЕЗИДЕНТЭЗЛЭН УКАЗЭЗ Энергетика удысын вормонъёсыз но уно аръёс ӵоже сюлмысь тыршемез понна "Россия Федерациысь дано энергетик" сӥлы карон ним сётоно Азимов Анатолий Васильевичлы - ячеистой бетонъя заводысь валтӥсь энергетиклы. Россия Федерацилэн Президентэз Б. Ельцин. Москва, Кремль, 1998 арын 15 апреле. � 393. Социальной удыс Куанермиськом Берло дыре социальной удыс сярысь трос вераськонъёс мыно. Со юнгме ӧвӧл. Угось ужпумъёс туж уно. Соос сярысь номыре ватытэк, шара кенешон вал Правительствоын. Журналистъёсын пумиськиз Правительстволэн Тӧроезлэн воштӥсез Анатонина Лисина. Асьме улонамы котьку сямен ик бадӟым инты басьтэ социальной удыс. Со уго люконтэм герӟаськемын калыкез дышетонэн, тазалыкез утёнэн, культураез азинтонэн адямиослы юрттонэн но мукетыныз. Кызьы бен со туннэ шока? Татысь 7 сюрс учреждениосын 152 сюрс мурт тырше. Миым кӧня ке умояз демографической югдур: кулэсмиз кулӥсьёслэн лыдзы, тросгес вордӥсько нылпиос. Арлы быдэ шорлыдын 20-лэсь уно выль юртъёс (школаос, больницаос, культура учреждениос) ӝутске. Вань удысъёсъя кутэмын заокнъёс. Со юнме шорысь ӧвӧл. Улонмы уродмемен та удыслы нырысь ик юрттэт кулэ. Туэ егит специалистъёслы общежитиын улэмзы понна толэзьлы быдэ 150 манет коньдон сётыны учкемын, нош дошкольной учреждениосын нуналаз одӥг пол дунтэк сюдыны уксё висъямын. Город выллем посёлокъёсын улӥсьёслы кема ар ужамзы понна ватсаса уждун уг сётӥськы вал, нош туэ кун бюджетын со понна 6 миллион манет чакламын. Та ужпумъя но социальной удысын ваньбурез люконъя нимысьтыз законъёс кулэ на. Оглом шаерамы улон-вылон уродме. Лябӟе калыклэн тазалыкез, тужгес но ужась адямиослэн. Пиосмуртъёс 16 арескысен 59 аресозь гинэ ужаны быгато, кышномуртъёс - 54 аресозь. Азьланьын тазьы ик улӥм ке, туала егит калык ӝыныез гинэ 60 аресозь улоз. Берло дыре ӵемгес пумиськыло ужын шуккиськон но шудтэм учыръёс. Ужасьёсты утён ёз куашкатэмын. Али одӥг ужась мурт кык пенсионерез сюдэ-возе. Соин ик ачиз но ужась дыраз басьтыны кулэ уждун, нылпиос понна пособие но мукетсэ. Социальной удысын тыршисьёслы уждунзэс будэтыны чакламын (производствоен ӵошатыса, со угось шӧдскымн ичи). Кун думае сое умоен лыдъяз, нош Федерацияя Кенеш (Вылӥ Палата) пыр со уг ортчы. Правительство вань калык сярысь огкадь сюлмаськыны кулэ, нош куанеръёсты уката умойгес утёно. Нылпиослы пособмие понна коньдон висъяське федеральной бюджетысь. Нош Москва сое дыраз уг ысты. Соин ик шаерысьтымы Правительств кылем ар понна пособие сётонэз ас вылаз басьтӥз. Уксё Сбербанке понэмын озьы тк процентэз мынэ, нош сётъялозы сое вуоно арын гинэ, нырысь ик куанер улӥсь семьяослы. Толэзьлы быдэ улэп уксёен пособие вуоз огназы нылпи буджтӥсьёслы, алимент басьтӥсьтэмъёслы, армиын служить карисьёслэн нылпиоссылы, трос нылпиё семьяослы но музонэзлы. Калыкез улон-вылонын утён удыслы туэ 80 ар тырме. Нош солэн самой ляб интыез луэ интернатъёсты возён. Пересьёс отын берло аръёссэс ортчыто. Соин ик юн секыт йӧтэ интернатъёсын ужасьёслы. Вылаз ик уждунзы но пичи. Умойтэм мынэ пенсиосъя реформа. Куамын процентэзлэн гинэ мӧйыослэн пенсизы будэтэмын. Вузъёсын дышетскем аръёс ужам дырен лыдъямтэ. Озьы ик веннослужащийёслэн кышнооссылэн доразы нылпиосын пукемзы ужамтэен лыдъямын. Шонер ӧвӧл со. Эшшо но тырмымтэос вань на. Туэ 1 февралёзь шоро-куспо уждун 760 сюрс манет лыдъямын, нош соку Россиын уждун бадӟымгес вал, пенсиосты будэтонтэм вылысь юри озьы лэсьтэмын. Шаерамы пусйымонэз но вань. Туэ вуттэмын луозы 360 интыен онкологической, наркологической но кардиологической диспансеръёсын диагностической центръёс. Озьы ик чаклаське нылпиосты эмъянъя наркоцентр пуктыны. Отын ик луоз анай-атайёсынызы ӵош улыны гостиница но. Як.-Бодья районысь Ст.-Зятча черкогуртын выль больница ӧсъёссэ усьтӥз. Кизнерысь чугун сюрес больница потаз умой юрттэ. Нош кыӵе бен югдур кадръёсын? Тазалыкез утёнын врачъёс, медсестраос тырмо, нош калыкез дышетон пересьме, егитъёс татчы уг лыкто. - Антонина Михайловна, кызьы учкиськоды вылӥ школаез выльдон шоры? - Та реформалы мон пумит. Выльдӥськон кулэ, но таӵеез медаз луы. Асьмелэн кытын коньдон быре, отын реформа кутске. Сыӵе выльдӥськон нокинлы кулэ уз луы. Секыт ке но, ми вузъёсты кутон планэз ум кулэстӥське. Япониын азьло специлаистъёс дасязы, собере рынокен экономикае выжизы. Россиын ваньмыз мыддорин лэсьтӥське. Кыкетӥез ужпум, специалистъёслэсь тодон-валанъёссэс ялан выльдоно-будэтоно. Вунэтыны уг яра дошкольной воспитаниез но. Студентъёслэн стипендизы но пичи, йылэтыны кулэ. Огъя вераса, ялан куанермиськом. Берло дыре со уката ӟечгес шӧдӥське, син шоры йӧтэ. Г. Романов. Кытын шутэтскозы нылпиос Матэ вуэ гужем. Соин ик анай-атайёс, асьсэос но нылпиос малпасько ни, кытын соос гужем каникулзэс ортчытозы? Та ужпумез Правительство но ялан син азяз возе. Туэ дышетскись пиналъёслэсь тазалыкзэс юнматыны кун бюджетысь 15 миллион манет уксё висъямын. Но со ӝыныез гинэ, кылемзэ Социальной страхованиея фонд но анай-атайёс ватсалозы. Лагерьёсын шутэтскозы школаосын но профессионально-технической училищеосын дышетскисьёс. Азьло аръёсы сямен ик город сьӧрын 29 шутэтскон лагерь усьтӥськоз. Соос озьы ик ужалозы котькуд школа, спортъя клубъёсын но обществоосын. Огъя вераса, 270 сюрс нылпи (ваньмыз пӧлысь 70 процентэз) тазалыксэ юнматоз. Та лыдпусъя шаермы Россиын нырысетӥ вить умойёсыз пӧлы пыре. Малы ке шуоно, республикаямы ӧм быдтэ пионерской лагерьёсты. Предприятиослы соосты возьыны государство юрттэ. Соин ик одӥг-кыкез гинэ лагерьёс пытсаськизы. Котькинлэн тодэмез потэ путёвкаослэсь дунзэс но кызьы соос сётъяськозы? Кызьы тодӥськоды, вань путёвкаослэн дунзы пӧртэм, 900 манетысен 3 сюрс манетозь. Но анай- атайёс со дунлэсь одӥг витьмос люкетсэ яке 20 процентсэ гинэ тырозы. Путёвкаос нырысь ик сётӥськозы анай-атайтэк кылем нылпиослы, алимент басьтӥсьтэмъёслы, куанер улӥсьёслы, трос нылпиё (4 но солэсь уно) семьяослы, военнослужащийёслэн нылпиоссылы но музонэзлы. Вань кабзэ дунтэк путёвкаос но, быдэсак дун тыроноез но. Путёвкалэсь ӝыны дунзэ сётэ Социальной страхованиея фонд. Шутэтскон лагерьёсты выльдыны Москва но кӧня ке коньдон келяз. Анай-атайтэк кылем пиналъёс тазалыксэс юнматозы "Варзи- Ятчи", "Ува", "Металлург" санаторийёсын. Соин ӵош ик отын луозы анай- атайёсынызы огазьын шутэтскисьёс но. Республикалэн палэназ лагерьёс луозы-а? Одно ик. Удмуртиысь дышетскись пиналъёс арлы быдэ тазалыксэс юнмато Анапаын, Краснодар крайын но мукет интыосын. Мугез тодмо. Вань сыӵе висёнъёс, кудъёссэ эмъяны луэ зарезь дурын но лымшорын гинэ. Нош кинлэн луонлыкез вань нылпизэ кунгож сьӧры келяны, путёвкаос луозы Болгарие, Кипре но мукет кунъёсы. Г. Васильев. КОНКУРС "ШУНДЫКАР-98" Тӥледлы, пиналъёс "Шунды" дэменлык Егитъёсын ужанъя Кун комитетэн ӵош туэ гужем 6-тӥ июльысен 17-тӥ июлёзь нош ик "Шундыкар-98" лагерь ортчытэ. Лагерьын шутэтскон понна конкурсэ пыриськыны ӧтиськомы 5-11-тӥ классъёсысь удмурт пиналъёсты, "Шунды" но "Родники" огазеяськонъёсысь "Шаер" программая ужась дышетскисьёсты. Конкурс ортчытӥське таӵе удысъёсъя: суредан; архитектура; литература; калык но эстрадной крезьгур; театр; тележурналистика; прикладной искусство но калык киужъёс; азьветлӥсь (лидерство); лингвистика. Конкурсэ пыриськыны мылкыд карисьёс асьсэ сярысь гожтыны кулэ, со сяна, быръем удыстыя таӵе ужъёсты лэзёно: Суредан (5-тӥ-8-тӥ класс) - "Мусо шаере" темая 3 суред (суредан амалъёсты асьтэос бырйыны быгатӥськоды); Архитектура (9-тӥ-11-тӥ класс) - "Вань мынам выжыкыл дуннее" темая живопись яке графика ужъёс; Литература (5-тӥ-11-тӥ класс) - 10 кылбур яке 1-2 верос, яке 2 легенда, зарисовкаос но удмурт калыклэн туннэ но ӵуказе улонэз сярысь сочинение; Калык крезьгур (5-тӥ-8-тӥ класс), эстрадая (9-тӥ-11-тӥ класс) - крезьгуро инструментъёсын яке соостэк гожтэм удмурт кырӟанъёсты аудиокассетае яке видеокассетае гожтоно; Прикладной искусство но калык киужъёс (5-тӥ-11-тӥ класс) - Декоративно-прикладной искусствоя но калык киужъёсъя ёрос центрен гожтэм характеристика но 10һ5 см быдӟалаен ужъёсыныды 5 туспуктэм; Азветлӥсь (9-тӥ-11-тӥ класс) - "Мон кивалтӥсь" темая сочинение; Лингвистика (5-тӥ=11-тӥ класс) - "Почему я хочу изучать удмуртский язык" темая ӟуч кылын сочинение; Театр (7-тӥ-11-тӥ класс) - лыктоно Удмурт драмая театре - 10 куартолэзе (мае). Учкытэк вераны дасяно удмурт кылын басня, кылбур яке школа улонысь сценка; кырӟано яке эктоно; Тележурналистика (9-тӥ-11-тӥ класс) - "Удмурт егит адями улонын" телепередачалы сценарий гожтоно. Конкурсэ вуэм ужъёсты эскерозы берло кык арзэ "Шундыкар" лагерьын ужам удысчиос. Конкурслы йылпумъянъёс "Удмурт дунне", "Ӟечбур" газетъёсын печатламын луозы июньысен кутсконаз. Ужъёстэс ыстоно таӵе адресъя: 426051, Ижевск, Советской урам, 1-тӥ юрт, "Шунды" дэменлыке. Телефонэз: 51-07-96. Пумиськонъёс но малпанъёс Толлоез ыштэмын - туннэез шедьтымтэ Вуж Бодьяе ми ӵапак нуназеян вакытэ вуимы. Сельсовет пытсамын. Корказьын кӧня ке воргоронъёс сыло, Кизнерысь колбаса витё. Уждун чотын, пе, сётъялозы. Тодмо югдур: али котькытын озьы, татын но пӧртэм ӧвӧл. Кизнерысен веразы вал, татысь хозяйство, Ленин нимо колхоз, районын тужгес но начарез луэ, куашкан калэ вуэмын ини шуыса. Озьы ке но, гуртлэн тусыз сыӵе малпанэ уг вутты. Конторалэн юртэз, клуб, нылпи сад, магазин, школа, кык квартираен улон юртъёс йыг-йыг сыло, горд но тӧдьы кирпичлэсь ӝутэмын. Ма, быдӟым вождьлэн контора азьын сылӥсь статуяез но юг-юг тӧдьы, курмемын, пилиськемын ӧвӧл. Со но возьматэ, татын зэмос кузёос уло шуыса. Но колбаса витись пиосъёс таӵе малпанэз ӝог гинэ суразы. Нырысь ик, колхозын миым быдэс ар ӵоже уждун сётъяллямтэ. Техникаез выльдон, яке лэсьтӥськон сярысь малпанэз ик ӧвӧл. Тани али но куинетӥ нуналзэ ини ваньмыз машинаос но, тракторъёс но сыло. Трактор пускачъёсы гинэ но бензинзы ӧвӧл. Быдэс колхозын кыкез гинэ машина ворттылэ - председательлэн но йӧл нуллӥсез. Таосызлы бензин берпум коньдонэн басьто. Кытысь, кыӵе эстӥськонэн тулыс кизёнзэс ортчытозы - нокин уг тоды. Паймоно кадь, но выль тодмоосылэн со пумысен сюлэмшугъяськемзы туж ик уг шӧдӥськы кадь. Кызьы шуиз одӥгез, эстӥськон, пе, ӧз ке луы, бусыосмы буш кылёзы. Тужгес но паймымонэз, таӵе малпанзэ веракуз, мӧйы колхозник чик но уг керӟегъяськы, уг пӧсекъя. Вераськон солэн колхозэз, музъемез сярысь уг мыны, кожалод, сокем капчи, тырттэм мылкыдын бӧтьыртэ. Мар со сыӵе? Воштӥськонъёслы берпум оскондэ ыштон? Шуг- секытъёс зӥбем улсын асгынмон? Ярам, огшоры калык юнмам социализм аръёс ӵоже огъя уж сярысь малпаськытэк улыны дышиз. Нош кивалтӥсьёс мар? Мӧйы колхозник та юанлы но валэктон ӝог шедьтӥз: - Мар нош кивалтӥсьёс? Соос предэ пуксё, кык-куинь ар ужало, асьсэлы юртъер пукто но ӟеч луэ шуо... Э, тӥни сельсоветмы лыктэ, солэсь ик юалляське. "Сельсоветсы" - Юлия Аркадьевна Иконникова, мусо ымныро, визьмо но сайкыт синмо, шоро-куспо арлыдо нылкышно. Тодматскеммы бере кабинетаз пырыны ӵектӥз. Отын ик азьланьтӥм вераськонмес. - Юлия Аркадьевна, тӥ дасэтӥ арзэ ини сельсоветэн, табере тани администрациен кивалтӥськоды. Озьыен, гурт улонлэсь пуштроссэ ӟеч тодӥськоды. Кыӵе огъя дунъет сётысалды туала гурт улонлы? - Вань гуртъёс сярысь вераны мон уг быгатӥськы, соиз валамон. Верало асмелэнъёсыз сярысь гинэ. Секыт улӥськом, мар шуод на. Котькытын сямен ик, ваньмызлы ёрмиськом. Колхозникъёслы уждун уг тыро шуыса тодӥськоды, луоз. Войсковой частьын ужасьёс гинэ йӧназ басьто ик кадь. Но милям вань на ай 30 пала ужтэк кылемъёсмы. Маин калык улэ? Ма, кин кызьы быгатэ. Ваньмыз сямен бакчаез но гидкуазез чотын. Колхозысь но маке- маке шеде: сахар, пызь, колбаса, ю-нянь... Кылпумысь вераса, данакез гуртоосмы доразы нянь пыжо ини. Кин тодэ, оло, дэра куыса, дӥсь но асьмеос вуром ини, кут но куталом. - Таӵе секыт улон гуртоослэсь сямъёссэс уг сӧры-а? Шуом, юон, лушкаськон, керетон-жугиськон... - Инмар мед утёз, отчыозь ӧм вуэ на (чиньы ёзвиеныз ӝӧк пулэ йыга). Калыкмы азьвыл кадь ик востэм, зӥбыт. Кызьы отӥяз луоз, кӧнялы чиданзы тырмоз - вераны шуг. Тодӥськоды-а, маизлы мон тужгес но паймисько? Колхозникъёслы арлэсь кема ини уждун уг тыро, мукетъёсыз таӵе улонэз чидатэк юысалзы доразы кылльысалзы ини. Нош милям воргоронъёсмы нокыӵе кариськытэк нуналысь нуналэ колхоз уже пото. Ярам, мӧйыоссэ дасо аръёс ӵоже сюлэме, вире пыӵам сям кыске. Нош егитъёсты кин косэ? - Юлия Аркадьевна, тӥ пумит ӧвӧл ке, мон та пумысен куд-ог малпанъёсме верасал. Вань мынам одӥг тодмое, туж кибашлы лэсьтӥськись, мӧйы ини воргорон. Солэн управлениез куашкам бере, со куинь арлэсь кема ужтэк пукиз, нокытчы но интыяськыны ӧз быгаты: арлыдоосты угось уже кутыны мылкыд карисьёс туж ик ӧвӧл. Так вот со шуэ вал: оскод, оло, уд но, кытӥяз, пе, кыӵесэ пырем потэ, сокем асме ачим мултэсэн, нокинлы но кулэтэмен шӧдӥсько. Ӧз, сиёнлы-юонлы ёрмыса ӧз улы со, семьяез но ёрмонэз ӧз адӟылы. Семон агайлэн киыз котьмалы мынэ бере, тулысысен сӥзьылозь нимаз адямиослы лэсьтӥськыса, ар ӵоже улыны тырмымон коньдон поттэ вал. Нош толзэ эриктэк тэк пуконо луылӥз. Та дыр ӵоже ужатэк улыса воксё куасьме вал. Чидан, пе, уг тырмы дорын пукыны, нуналысь нуналэ ужа, калык пӧлы сюлэм кыске. Оло, тӥляд но колхозникъёстылэн озьы ик. Асьсэос уг но валало, дыр, но пуштроссы кышка тэк улонлэсь, соин герӟаськем позыръясь малпанъёслэсь. Со ик уже ыстэ, луоз. - Мар бен, соглаш тӥледын, озьы ик вань, дыр, со. - Нош администрация, тӥ асьтэос номыр но-а лэсьтыны ӧй быгатысалды меда, гуртысь югдурез ӧжытак коть капчиятон понна? Шуом пичильтык ке но производство усьтыны... - Маин, кыӵе кужымен но коньдонэн, вералэ ай?! Администрацилэн одӥг мултэс копейкаез но ӧвӧл ук. Колхоз но номырин но юрттыны уз быгаты, ачиз векаса улэ. Кызьы тулыс бусы ужъёсты ортчытозы, воксё паймисько. Ма, кин ке тодэ меда сое? Колхоз сярысь кылпум поттӥ бере, азьланьто ини веранме. Сельсоветамы табере куинь хозяйство пыре. Яна потыса кылдӥзы "Новый путь" но "Рассвет". Таосызлэн ужъёссы огсыр мыно, продукция но потто, коньдон но лэсьто. Нош Ленин нимо колхозамы эстӥськон но, минеральной сылал но, коньдон но ӧвӧл. Инмарен каргам мактал, ява. Малы со озьы пӧрмиз, нокызьы но уг валаськы. Специалистъёс но туж ӟечесь, калык но ужась, музъем сокем ик удалтытӥсь ӧвӧл ке но, со понна тырмыт. Кызьы та веднам эгесэз чигтоно меда? - Юлия Аркадьевна, демократия вакытэ интосысь кивалтӥсь ёзъёслы бадӟым власть сётэмын ук. Оло, вань луонлыкъёстэс уд тодӥське, яке соосты уже кутыны уд быгатӥське? - Э-э, мар сярысь тӥ вераськоды? Кыӵе луонлыкъёс, кыӵе власть? Коньдонэд ке ӧвӧл, котькыӵе ялэм кужымед но, властед но бумага вылын гинэ кылёз. Кин киын коньдон, со киын ик власть но. Меӵак вераса, вылӥ кивалтӥсь ёзъёс киын ми шудон интыын яке азё-беро уробо мактал. Тани одӥг вакыт гуртысь культура удысэз возьыны коньдон сельсоветъёсы сётъяллязы. Собере берен районэ талазы. Мон малпамъя, ми вань социальной удысъёслы висъям коньдонэз трослы шырытгес но пайдаёгес кутыны быгатысалмы. Азьлань улонмес но кызьы радъяны чакласалмы. Нош али туннэ нуналэн гинэ улӥськом. Кызьы но озьы ортчиз ке со - ярам ини. Ма, тани пусъем но ортчымтэ быръёнъёсын мар пӧрмиз? Гурт калыкез мыскыллям ӧвӧл шат со? Нош тӥ шуиськоды - власть... Ӧвӧл милям властьмы но, кужыммы но, ӟечезлы осконмы но. *** Юлия Аркадьевналэсь берло кылъёссэ кылзыны тужгес но секыт. Вераськыны ик номыр сярысь кадь луиз, юалляськыны но умой ӧз поты ни. Сыӵе секыт мылкыдын кошки мон гурт кивалтӥсь дорысь. Вестибюльын син шоры малы ке но йӧтӥзы буш стендъёс: "Социалистической ӵошатскон", "Партийной, комсомольской но профсоюзной организациослэн органзы", "Комсомольской улон" но мукет. Толло нуналлэн тодметъёсыз... Вуж Бодья, тросэз мукет гуртъёс сямен ик, толло нуналзэ ыштӥз, нош туннэ нуналзэ ӧз шедьты. Оло, нош одӥгзэ талазы но интыяз мукетсэ ӧз сётэ? Гурт улон сярысь малпаськыку, син азе таӵе ӝожмыт суред пуксе. Сюрес урдсын начармем пересь вал вайыжъёс вискын тӥяське, курадӟе, уробозэ вырӟытыны уг вормы. Сыӵе ик начар кузёез валзэ я сюлоен шобыртэ, я тэльмыре - пайдаез ӧвӧл. Вӧзтӥзы паськыт, вольыт сюрес вылтӥ ширто чильк-вальк кисьтаськись машинаос. Куд-огез дугдэ, воргоронлэн вӧзысьтыз дунтэм дунын мар но со сиён-юон басьтэ. Сюрес вылын сӥльвирез юнматоно угось, улонлэн выль кузёосызлы тырмыт кужым кулэ. Г. Коряков. ЛЫДПУСЪЁС ВЕРАЛО Арысь аре республикаысьтымы транспорт вужме, нош соосты выль машинаосын воштыны уксё уг тырмы. Соин ик ваньбур нуллон но пумен кулэсме. Статистикая кун комитет ивортэмъя, ортчем арын ӵошатыса, туэ нырысетӥ кварталэ ваньбур вить процентлы нуэмын-ваемын. Калык тросгес трамваен, троллейбусэн но автобусэн ветлыны кутскиз, Чугун сюресэтӥ мынӥсьёслэн лыдзы азьло мындагес ик кылиз. Самолётэн лобасьёс 12 процентлы кулэсмизы. Калыклы юрттэт сётонзэ почта паськытатӥз, телеграмма но посылка гинэ ӧжытгес лэземын. Выль арысен кутскыса, квартираосы сюрс телефон пуктэмын. Али республикаямы 263,5 сюрс телефон аппарат ужа. Нырысетӥ кварталэ республикаысь магазинъёсын вузъёс котькыӵе пӧртэмесь но тырмыт вал. Соос калыклы 2023 миллион манет тыр вузамын, ортчем арен ӵошатыса, 16 процентлы тросгес. Вузам ваньбур пӧлысь 52 процентэз сиён-юон луэ. Республикаын улӥсьёс тужгес уно сӥль но вӧй басьтӥзы, сакыр но кӧс вӧй ӧжытгес. Озьы ик калык 4 процентлы тросгес аракы но сур басьтӥз. Магазин ӝажы вылын куиньмосэз товар кунгож сьӧрысь ваемын. Магазинъёсы кызь процентэз сиён-юон но мукет вуз урод ӟечлыкоез шеде. Госторгинспекция та ужпумез чакласа возе. Н. ВОЗИСОВ. Шӧкыч Тодматӥсько егит юрттӥсьёсылэн выль ужъёсынызы ПУНЫЛЭСЬ НО ОРТЧЕМЫН (юмореска) Гуртлэн пумаз вуыса, ланьырскем пичи коркаез адӟиды ке,- со Горд Ондӥлэн юртэз. Тазьы учкиськод ке - воргорон ке воргорон кадь, суй но, пыд но бордаз. Одӥгез умойтэм - Насьта кышноезлэсь зол яратэ "вож кыез". Нунал ке вордске, коркась корка гыже. Тазьы быдэс гуртэз ортчыны дась. Уг пӧрмы. Кышноез уг сёты. Кӧня ке бӧлякъёсыз доры пыраны вуэ - вирӟектэм син азяз кылдэ ни Насьтаез. Оло инмысь усе. Тыбыраз, сылал мешоке сямен, топ-топ! мыжгаса валтэ доразы. Нош Ондӥлы ма, урам тыр кырӟаса лашкиньтэ. Усе, ӝуштыса ӝутске. Тани вуиз сӥзьыл. Шунды сиос пумен сӥялско. Усиз ни нырысь лымы. Тӧдьы мамыкен шобырскизы корка липетъёс, лысо писпу вайёс. Кинлы ке со шумпотон, Ондӥлы - куректон. Табере угось Насьтӥезлэсь пегӟыны уз быгаты ни, пытьыезъя шедьтоз. Вамышъя, йырберзэ корка воргорон. Вуиз огназ улӥсь Ориналэн юртэз вадьсы. Ма, кызьы уд кожылы?! Татысь Ондӥ "пайдатэм" ӧз кошкы на. Таяз учыре но ӝӧк вылэ соку ик вуиз тыр ӟенелик. Таӵе дыре тодмо ини: сябась карисьёс улонзы вылэ ӝожтӥсько, бускельёссылэсь лысьӧмзэс "гылъяло". Пумен... бекыръяло. Ондӥ пумен кудӟе, нош йырыз ужа. Тани-тани вуоз кышноез. Ӟенеликез ӝоггес бушатыса, "тӧлӟоно" кариськиз. Бакчаетӥ мукет ураме потӥз. Насьта, пе, картэзлэсь пырем пытьызэ адӟыса, ялан Орина дорын пуке на мед кожалоз. Нош Ондӥ, кык нылкышноос ченгешытозь, эшшо кӧня ке корка пыраны вуоз на. Кытын, пе. Матысез корка доры ӧз вуы - Насьтӥез сое сильсьӧртӥз суч! кыскиз. Сюлтыр-калтыр вуттӥз дораз. Ӵуказеяз Ондӥ, ачиз малпамъя, уката но кескич амал шедьтӥз. Ориналэн ӟезьыез доры мышлань вамыштӥз. Ну, табере пӧяло ке, пӧяло ни, кизэ посэ воргорон. Выль ӟенелик ӝӧк вылэ пуксиз гинэ, шлач! вазиз капка пуньет. "Тьфу, лешак! - кышнозэ адӟыса, сюлмысьтыз сялӟиськиз Горд Ондӥ.- Та чатранлэсь нокытчы но уд пегӟы. Пунылэсь но ортчемын, му пыдсысь шедьтоз". Елена ПЕТРОВА, УдГУ-ысь студентка. Кун Кенешлэн сессияз ПЫКЫЛЫНЫ ЛЯКЫТ, НОШ ЮРТТЫНЫ... Кун Кенешлэн дас укмысэтӥ сессиез трос ужпумъёсты учкиз. Но валтӥсез - Правительстволэн отчётэз. Парламент сое нырысь нуналаз ик эскериз. Правительство оглом урод ӧз ужа. Кун Кенеш сое аслаз постановленияз но пусйиз. Озьы ке но, тырмыт ӧз юртты промышленностьлы, районъёслы но городъёслы. Правительстволэн Тӧроез Павел Вершинин шуиз: - Югдур уг умоя автомобиль поттонын. Трос шуг-секытъёс кылдӥзы гурт хозяйствоез азинтонын но куд-ог мукет ёзъёсын. Бере кылиськом азьмынӥсь амалъёсты кутонын но основной фондъёсты выльдонын. Ужпумез эскеронэ уно депутатъёс пыриськизы, умоесь дэмланъёс сётӥзы. Куд-огез пыкылыны но ӧз вунэтэ. Соин ӵош ик амалтэк юан кылдэ: трос-а бен ачиз Кун Кенеш но солэн депутатъёсыз юрттӥзы Правительстволы? Ушъямонэз трос ӧвӧл. Правительство законъёслы ӟеч проектъёс дасялляз, нош депутатъёс сое палэнтылӥзы. Тани туннэ но умоен ӧз лыдъялэ тарифъёсъя но дунъёсъя комитет кылдытонэз. Ӝегало му вӧй (нефть) кысконэз выль сямен радъян, пыӵал тӥрлыкъя федеральной центр кылдытон, наукаез но техникаез азинтонъя фонд усьтон, кун ваньбурез лыдэ басьтон. Элькунамы дасямын коньдонэз пайдаё удысъёсы "кытконъя" проект. Нош соос улонэ уг пыӵало. Гуртэз выльдонын но бере кылиськом. Татын ас интызэс ӧз шедьтэ на Гурт хозяйствоя но сиён-юонъя министерство но та удысысь научно-исследовательской институт. Малы бен выльдӥськон гуньдэмын? Нырысь ик, урод мынэ кун ваньбурез уже кутон. Кыкетӥез, ум шедьтӥське узыр инвесторъёс. Таоссэ уг утё законъёсмы но кышкатэ удмурт законодательстволэн Россиысь законодательстволы тупамтэез. Троссэ сюлэмшугъяськытэ асьме вуз поттӥсьёсты утён. Кылсярысь, нянь пыжон заводъёс пызь палэнысь басьто, нош дорамы изэмзэ уг адӟо. Ӵапак сыӵе югдур мебелья. Куинь ар выриськом ни Москваын вузкарон юрт усьтыны. Матысь дыре Правительстволы бадӟым инты висъяно му вӧй поттон интыосты ӝоггес уже кутонлы, автозаводэз улӟытонлы, тулыс бусы ужъёслы но мукет туж кулэ ужпумъёслы. Шаерамы озьы ик кужмоятоно калыклы газ но телефон кысконэз. Та ласянь республикамы бускельёслэсь бере кыле. Сессия та ужпумъя постановление кутӥз. Собере парламент учкиз шаерамы кун заём поттонэз. Матысь дыре 500 миллион манетлы сыӵе заём дасяны чакламын. Соя закон нырысь лыдӟем бере инъетлы кутэмын. Сессия толон ужаз на. Удмурт Республикаын югдур сярысь доклад лэсьтӥз Кун Кенешлэн Тӧроез Александр Волков. Г. РОМАНОВ. Одӥг гол но куинь очко Валля Ижысь "Газовик" ас дораз Омскысь "Иртышен" пумиськылӥз. Миым Сибирьысь футболистъёс асьме командаез кык пол "канжатӥзы", "Газовик" соку дораз но вормыны ӧз быгаты. Таиз но шудон секытэн ортчиз. Ярам коть, ӟезьылэн юбояз шуккиськем тупез ӵыжиз Фещенко. Та гол ик "Газовиклы" вормон ваиз. Вуоно пумиськонъёссэ "Газовик" дораз ортчытэ. 1 мае со шудэ Томскысь "Томь" командаен. Нош 5 мае кужымзэ мерталоз Тулаысь "Аресанлэн". ОГКЫЛ ШЕДЬТӤЗЫ пичиесь ботьыртонъёс Пичи Коли гуртаз сётэм уроксэ папаез йылаз-пумаз вуттыны быгатымтэен сэрен керетэ: "Папа, дурак ук тон. Умед чылкак ӧвӧл". - Мар-мар шуиськод, пие? - дӥсьтӥсьтэм пилэн яратоно нылыныз нырысьсэ пумиськыкуз кадь ӵыжектӥз воргоронлэн бамыз. - Потому что тон не ӟуч, не удмурт сямен вераськыны но, гожъяськыны но уд быгатӥськы. - Мыным, мӧйы муртлы, ярам ни, пие. Кызьы быгатӥсько, озьы вераськисько. Суро- пожо ке но, ӟучъёс но, асьме выжыос но верамме валало кадь. -О-о, угось. Нош кызьы валано бускельмылэсь юамдэ: "У тебя визя нету ли чё ли?" - Нош кызьы ӟучъёс "визь" кылэз шуо? Пияш дол учкиз атаез шоры, ма вераны ӧз шедьты. х х х Математика урокын пиналъёс "Единицы времени" темаез сэртто-пертчо. Ваньмызлы валамон мед луоз шуыса, дышетӥсь ӟуч кылын вера: "Итак, мы назвали пять дней. Им можнго дать и такие определения: позавчера, вчера, сегодня, завтра, послезавтра..." Одӥгез пияш ӧз чида, интыысьтыз султӥз но шуэ: "Малы "позавчера"? Со ог нунал берлань луэ ук. Соин ик "перед вчера" шуоно..." Надежда АГЕЕВА, Дебэс педучилищеын дышетскись. ТУННЭ - ПӦРАСЬ, ӴУКАЗЕ - АРТИСТ Фестиваль, смотр-конкурс - со котьку праздник. Учкисьёс понна но, артистъёс понна но. Котькуд тулыс таӵе шулдыр нуналъёсты ортчытъя элькунысьтымы Культурая министерстволэн калык творчествоя центрез. Туэ "Театральной тулыс" смотр-конкурс ортчиз Шаркан ёросысь Быги гуртын. Ёросъёсысь ньыль театрысь артистъёс возьматӥзы отын быгатэмзэс. Серекъянэз но, сюлэмез чепыльтӥсез но, туннэ нунал сярысь сюлмаськытӥсез но вал пуктэм спектакльёсын. Веранмес мытомы смотр-конкурсэз доразы ортчытыны мылкыд каремъёс - Быги калык театр бордысен. Солэн режиссёрез Нина Беляева та праздниклы быръем Владимир Котковлэсь "Кырӟамтэ кырӟан" пьесазэ. Пуштросэз вакчияк таӵе: Ольга кенаклэн Гири пиез гуртын ужа, кылбура но кырӟан кылдытъяны йӧндыре. Солы синмаськемын татысь ик егит нылаш, почта нуллӥсь Лиза. Но Гирилэн мылкыдыз мукет ныл вылын: со кылбура Надя понна. Гуртазы бертэ Гирилэн егит дыр эшез, али городын улӥсь Борис. Таиз дышемын капчиен коньдон поттыны: гыжкалъёсын кушласькыса, мотоциклъёсты ворало но соослэсь ёзъёссэс вузало. Борис Надяез городэ ӧте, капчи улонэн палёмытэ. Нылашлэсь вордскем нуналзэ пусйыны ресторанэ Гириез но ӧтё. Малпало, пӧлазы кыскыса, со пыр воштос ёзъёс вузаны. Гирилэн пумит луэменыз, жугиськон кутске но, Гири мыжгем бере, огез пи погра, умойтэм шуккиськыса кулэ. Мар луоз азьланяз? Пияшлэн Надяен ӵош кырӟаны гожтэм кырӟанэз чузъяськоз на-а? Кемалы-а со чусомиз? Оло нош куке но Гири сое Лизаен ӵош мытоз на? Секыт дыре Лиза гинэ солы дурбасьтӥз ук. Кылбурчилэн Владимир Котковлэн драматургия удысын лэсьтэм ужъёсыз ӧжыт ӧвӧл ни. Удмурт национальной театр но, Алнашысь калык театр но солэн пьесаосызъя спектакльёс пуктылӥзы ини. "Кырӟамтэ кырӟан" пьеса но мур пуштросъем пӧрмем. Быгиысь артистъёсын ӵош учкисьёс туннэ улонысь лэсянтэм тырмымтэос шоры мукет синмын учкизы: синкыли пыр серекъязы но, мур малпаськонъёсы но выйылӥзы. Вотка ёросысь Кукуи удмурт гуртысь калык театр 1993-тӥ арын кылдэмын. Кема быръёно луиз пьеса: отын рольёсыз но трос медаз луэ, калык но ӟеч мед пумиталоз. Озьы басьтӥськизы Вячеслав Ар-Сергилэн "Кирень" ужез борды. Серемес трагедия яке выжыкыл, сое автор нимысьтыз Удмурт радио понна гожтӥз вал. Отын суредъёс ӵем вошъясько, катанчи ӵем ке ворсаськылэ, акылесгес луэ учкисьлы: гуртысь усточиослы та бордын ужаны кулэ на вылэм. Пичи Пурга ёросысь Бобья-Уча калык театрен кема аръёс ӵоже ужаз режиссёр Анатолий Митрофанов. Та коллективлы кылдэмез дырысен туэ куамын ар тырме ини. Тросэз артистъёссы кема аръёс ӵоже татын шудыса уг быгато ни сценаен люкиськыны, вӧзазы егитъёс но султо ни. Механизаторъёс но пудо утисьёс, врач но библиотекарь, киномеханик но повар, нылпи садын ужась - пӧртэм удысъёсын тыршо соос. Туэ смотр- конкурсэ ваиллям земляксылэн Никвлад Самсоновлэн "Пиртэш кизилиос" нимо драмаезъя спектакльзэс. Сюлэмез позыртӥсь сценаосыз ӧжыт ӧвӧл татын. Пудо эмъясьлэн Антон Павловичлэн Катюш кузпалыз нылпи вите. Но нылпизы ӧлексы вордске: вылӥ ымдурыз ямсыз. Картэз косэмен, Катюш пиналзэ больницае кельтоно луэ: мумы- бубыоссылы кулэмез сярысь иворто. Озьы улэп луллэсь ньыльдон уйзэ ортчытыку, ваньмыз шарае потэ. Бобья-Учалась тросэз артистъёс шудоно образъёссэс туж ӟеч усьтыны быгатӥзы татын. Нош Катюшлэсь рользэ шудӥсь Ольга Яковлевалы смотр- конкурсысь устоез шудӥсь ним сётэмын. - Жаль, Анатолий Андреевич Митрофанов дорамы вуылыны уг ни быгаты: ужез лачак,- шуэ Ольга Яковлева.- Но туж бадӟым тау солы. Режиссурая курсъёсты кузпалы ортчиз, ӵош ик пьесаос но бырйиськом. Таӵезэ, Катюшлэн выллем ролез шудӥ вал ини, соин ик капчиенгес сётскиз кадь. Котькуд театрлэн аслаз сюресэз но арлыдыз. Озьы ик ужъёссы но пӧртэм сямен пуктэмын. Можгаысь театр оштолэзе пусйиз витьтон арессэ, вуоно арын ньыльдон ар тырмоз калык ним нуллэмезлы. Нырысь-валысь можгаос ӟуч театр возё вал, нош удмурт режиссёр Мария Михайловна Иванова ужаны кутскем бере, сцена вылын асьме кылын спектакльёс чузъяськыны ӧдъязы. Туэ смотр-конкурслы соос дасяллям Джон Патриклэсь англи кылысь берыктэм пьесазэ - "Странная миссис Севидж" - "Тӧдьы куака" ужзэ. Жюри кулэ вал труппалы быдэ одӥг усто ролез пусйыны, но сыӵе ӟеч шудӥсьёс пӧлысь (огкадьгес усто шудӥсьёс пӧлысь) бырйыны капчи ӧй вал. Соин ик Можгалась артисткаосты - Марина Никифороваез, Татьяна Кибардинаез но Анна Романоваез - пусъёно луиз. Жаляса верано луэ: смотр-конкурсэ туэ пыриськыны ӧз быгатэ Алнаш калык театрысь артистъёс. Ӵапак со шутэтскон нуналъёсы татын ортчиз мукетыз элькун ужрад - крезьгурчиослэсь быгатонлыксэс эскерон. Кык театрысь усто рольёсты шудэм артистъёслэсь нимъёссэс верамы ни. Соос борды ватсаломы на Быгиысь Владимир Кожевниковез но Кукуиысь Елена Прокопьеваез. Нош нырысетӥ степенё диплом сётэмын Бобья-Уча калык театрлы. Вл. МИХАЙЛОВ. Берекет Тодӥськоды-а Дунне вылын самой бадӟым шормуӵ - Гренландия (Северной Америка), быдӟалаез 2175,6 сюрс квадратной километр. Мукожъёс пӧлысь самой бадӟымез - Аравийской (Азия), 3 миллион квадратной километр пала. Самой ӝужыт гурезь - Джомолунгма (Эверест). Со интыяськемын Азиын, Непалэз но Китаез висъя. Солэн йылыз 8848 метр кемын. Музъем вылын самой ӝужыт вулкан - Тупунгато. Интыяськемын Южной Америкаын, Аргентинаез но Чилиез висъя. Ӝуждалаез 6800 метр кыстӥське. Мамонтовлэн пещераез (Северной Америка, США) - самой кузь - 361,6 иськем. Сахара (Африка) - дуннеысь самой бадӟымез пустыня. Со 7 миллион квадратной километрлэсь ятыр музъемез басьтэ. Музъем вылысь самой бадӟымез йӧ шобыр - Антарктида, 12 миллион квадратной километрлэсь но бадӟым интыез быдэсак йӧэн шобыртэмын. Тодады возе Холодильникысь кӧш зынэз быдтыны луэ сьӧд нянен. Ӝажыос вылэ кӧня ке юдэс понэ но холодильниктэс эн усьялэ - кӧня ке час дыр ортчем бере, зыныз быроз. Холодильниклэн, мисьтаськон машиналэн вылъёссы выль дыръязы кадь чилялозы, таӵе суретэн ке зырады: 50 грамм пинь сузян порошокез 20-25 грамм нашатырь спиртэн огинэ суралэ но газет бумагаез коттэ. Тӥни самой со бумагаен ӟеч-ӟеч зыралэ - арбериостылэн вылъёссы чиляны кутскозы. Нянь возён интые ыль картошка юдэс яке сылалэн посуда понэ ай - нянь кема дыр ӵоже уз вужмы. Шыд пӧзьтӥды. Со кузьытгес луэм. Эн сюлмаське. Чылкыт марляе рис понэ но керттыса шыд пушкы лэзе, быректытэ: рис кузьытэз ас бордаз кыскоз. Электро но газ конфоркаосты чылкытато шуныт дыръязы кот ӟустариен. Секыт арбериосты - мебелез - интыысь интые воштӥськоды. Кукъёссы улэ йӧл пакет юнматэ: выжды но уз кормаськы, кужым но сокем трос кулэ уз луы. Пыдкутчанлэсь пыдэссэ толэзьлы одӥг пол етӥн вӧен зырады ке, со пӧсьтыны узгес сётскы. Котмем пыдкутчанэз куасьтыны умой, пушказ газет поныса но дӥськутэз дэмӟытонэн (прищепкаен) гозы борды юнматыса. Берекет ТА ДУННЕ ВЫЛЭ ЛЫКТӤ МОН Кылъёсыз И. Бобровлэн Крезьгурез Р. Шкляевалэн Та дунне вылэ лыктӥ мон Учкыны шунды шоры, Паймыны чагыр инлы но Дыртыса бызись шурлы. Та дунне вылэ лыктӥ мон Кам шурез ӟыгыртыны. Гурезен эшъяськыны но Лудъёсын кенешыны. Та дунне вылэ лыктӥ мон Шаерен данъяськыны, Одӥг пол синмаськыны но Ваче ки вамыштыны. Та дунне вылэ лыктӥ мон Ӟеч ужен эшласькыны, Вань пӧсьсэ сюлэмысьтым ик Кузьманы калыкелы. Берекет Милям дэмланъёсмы Сад-бакча возисьёслы Кизён азьын ӵуж кушман кидысъёсты кык суткалы бинылтэ кот ӟустарие, куасьмемез бере суралэ луоен (1:5). Редис кидысэз кот ӟустариын удатыса, емышез сиыны вуоз ини толэзь ортчыса. Горд кушманэз будэтоно югыт азьын, саюлын солэн буёлэз бездыт луоз. Кидысэз музъеме кезьыны тыршоно мажсам бере, собере вылтӥз векчигес гинэ шобыртоно гыбедэн. Бакчаяды тросгес будэтэ бобы выжыысь будосъёсты. Соос бервылын музъем зумыто, удалтытӥсь луоз. Мерттоно картофка 100 граммозь кыскыны кулэ. Бадӟымъёссэгес вандылоно, котькуд юдэсаз 2-3 синмыз мед луоз. Вандэм картофкаез мерттоно 5 нунал ортчыса, вандэм интыосаз шупаса мед вуттозы. Помидор пудъёслэсь сяськатэм вайёссэ вандылыны кулэ, 1-2 сантиметр кельтыса. Вандоно лэчыт пуртэн яке качыен, выльысез та интые уз ни поты. Витетӥ яке куатетӥ куар выллапалысьтыз модос йылэз чепыльтыса, кырын будэтоно огречлэн урдэсказ потэм вайёсы трос кылдо тысё сяськаос. Озьыен, емыш но ӟечгес удалтоз. Сетка вещания радиостанций "Ингур" (ГТРК "Удмуртия") и "Радио России - Ностальжи" на УКВ ЧМ диапазоне на частоте 70,4 МГц и третьей программе городского проводного вещания Понедельник - пятница 6.00 - 8.10 - Новости, музыка, реклама "Радио России - Ностальжи". 8.10 - 11.00 - Новости, музыка, реклама радио "Ингур". 8.17 - Информационно-аналитическая программа. 9.25 - "Гость студии" или авторская программа. 10.14 - "Криминальные новости". 10.25 - Литературно-музыкальная программа. 11.00 - 13.00 - Новости, музыка, реклама "Радио России - Ностальжи". 11.40 - "Советы Алисы". 12.30 - "Не очевидное, но вероятное". 13.00 - 15.00 - "Ингур" радиоын иворъёс, крезьгуръёс, ялонъёс. 13.25 - "Улон вирсэр" - меӵак эфирын пумиськонъёс. 14.25 - Удмурт радиолэн фондысьтыз. 15.00 - 6.00 - Новости, музыка, реклама "Радио России - Ностальжи". 15.20 - "Доля правды". 16.40 - "Шарм". 17.10 - "О чем поют французы". 19.03 - "Музыкальный автомат". 20.40 - "Советы Алисы". 22.03 - "Музыкальный бар". 23.20 - "Астрологический прогноз". Суббота, воскресенье 9.00 - 13.00 - Новости, музыка, реклама "Радио России - Ностальжи". 11.32 - "Киносеанс по выходным". 12.35 - "Шарм". Суббота 13.00 - 17.00 - Тематические передачи, музыка, реклама радио "Ингур". 13.00 - "Тазалык". 13.15 - "Тӥляд куремдыя...". Концерт. 14.00 - "Чингылиос" - нылпиослы радиоверан. 14.20 - Удмурт радиолэн фондысьтыз. 15.00 - "Неслучайные встречи". 15.30 - Концерт по заявкам радиослушателей. 16.15 - "Субботний калейдоскоп". 16.45 - "Субботея". Воскресенье 13.00 - 18.00 - Тематические передачи, музыка, реклама радио "Ингур". 13.00 - Концерт. 13.15 - "Арня ӵоже" - иворъёсын но валэктонъёсын радиоверан. 13.45 - Радиолыдӟонъёс. 14.05 - Удмурт радиолэн фондысьтыз. 14.35 - Крезьгуро радиоверан. 15.00 - "Мир музыки". 15.35 - "Спорт-экспресс". 16.00 - Молодежная программа. 17.00 - "Юлдаш" - передача на татарском языке. 18.00 - 9.00 - Новости, музыка, реклама "Радио России - Ностальжи". 21.32 - "Ломберный столик". 24.03 - "Разные люди". _____________________________________________________________________ Примечание: Круглосуточно в эфире в начале каждого часа - выпуски новостей. Реклама выходит 4 раза в час, в том числе местная реклама - каждую 28-ю и 58-ю минуту часа. Телефоны для рекламодателей: 76-60-15, 78-58-05. Тел. Прямого эфира: 512-512. Адрес: г. Ижевск, ул. Коммунаров, 216. Шӧкыч Серем пыр Кык тордосъёс автобусын мыно. Мырдэм сыло пыд йылазы. Одӥгез водительлэсь юа: - Та автобусын мон базарозь вуо-а? - Уд. - Нош мон? - юа мукетыз. *** Зарезьчиосты дасян училищеын дышетскись экзамен сётэ. - Табере вералэ ӟуч флотысь самой сӥё-дано куинь адмиралъёслэсь нимзэс, - куре экзаменатор. - Ушаков, Нахимов, - валэктэ курсант эш, - нош....тӥляд фамилиды кызьы вал ай, генерал эш? Люказ Г. Вахрушев. "Террорист" Кылем арын сентябре Глазовын городлэсь нуналзэ пусйыку, огаз автобусын граната шедьтэмын вал. Сое автобуслэн ӧсаз ошем ачиз водитель. Талэсь азьвыл сое, Лялинэз, ГАИ руль сьӧрын кудӟемен кутэм. Правооссэ талалозы шуыса кышкаса, Лялин автобусэзлэн ӧсаз граната ошем, бӧрысь сое "шедьто" но милицие сёто кожаса: оло, пе, соку администрация но правоез утись ёзъёс, терактэз шараямез понна, солы тау карозы но правооссэ берыктозы. Малпанъёсыз аслыз пумит берытскизы. 1998 арын 23 апреле Глазовысь суд Лялинэз 2 арлы эриклэсь люкыны приговор ялӥз, пыӵал тӥрлыкез законъёсты тӥяса басьтэмез, воземез но нуллэмез понна. Удмурт Республикаысь Кышкытлыклэсь утиськонъя федеральной службалэн управлениезлэн пресс-службаез. Берекет Тодэмды ке потэ КИНЛЭН КӦНЯ УЛОНЭЗ Писпуос: Кыз, пужым, ньылпу - 1000 арозь Беризь - 1200 ар Тыпы, каштан - 2000 ар Чорыгъёс: Камбала - 60-70 ар Чипей - 100-150 ар Карп - 100-175 ар Тылобурдоос, пудоос: Ужась муш но муш мумы - 2-7 ар Нюлэс кузьыли - 7 ар Луд кеч, кролик - 7-8 ар Ӟольгыри, тюрагай - 13-14 ар Пужей, койык - 20 арозь Коӵыш - 28 арозь Пуны, кион - 30 арозь Тури - 40 ар Уӵы - 45 арозь Вал - 50-60 ар Ӟазег, юсь - 70-100 ар Луд ӟазег - 80-100 ар Куака - 70-120 ар Попугай - 90-120 ар Душес - 100-120 ар Шӧкыч Нылкышно: "Мар-о, пиосы, "Мадьяськыны" сокем вазь кутскиды? Нош ик азьло дыръёс, коммунизме мынон вакытъёсмы берытскизы шат?" Воргорон: "Милемлы, бабуш, туннэ но, ӵуказе но, усьсэ но - Нырысетӥ май. Кизьыны кидыс ӧвӧл, тракторъёсты тупатыны номырин, колхоз канаын тӧл шула. Гуляй дерёння" Суредэз Л. Прозоровлэн. ГАЗЕТЪЁС ИВОРТО Великобританиысь политикъёс но инкуазез утисьёс "урановой сделкалы" пумит, гожтэ "Таймс" газет. Матысь дыре самолётэн Грузиысь Шотландие 5,5 килограмм уран ваемын луоз. Собере Доупри городын уранысь радиоактивной изотопъёсты поттозы, ракен висисьёсты эмъян понна. Сомында килограмм уран атомной бомба лэсьтыны тырмоз. Нош Грузилы матысь Чечен Республикаысь но быдэс Кавказысь шурдыт югдурез лыдэ басьтоно ке, кышкытлык эшшо но будэ. Ас вакытаз та уранэз вайыны Россия, США, Франция пумит луизы вал. Инкуазез утисьёс курдало, та учыр бере мукет кунъёс но радиоактивной кылем-мылемъёссэс Шотландилы "кузьмалозы" шуыса. х х х ООН "Егитъёс СПИД-лы пумит" программа дасяз, ивортэ "Ассошиэйтэд Пресс" агентство. Та программа Восточной Европаысь кунъёсын улонэ пыӵалоз, малы ке шуоно, матысь дыре СПИД татын тужгес но алялоз. Лыдпусъёс кӧшкемытэсь: ВИЧ-инфекция паласькем муртъёслэн лыдзы, 1994-тӥ арен ӵошатыса, 6 пол йылӥз, али сыӵеос 190 сюрс адями. Быдэс дуннеын СПИД 10-24 аресъем 5 егитлы минутлы быдэ палаське. СПИД-лэн шимес бурдъёсыз улэ 30 миллион адями сюремын. Соос пӧлысь одӥг куиньмос люкетэз - егитъёс. х х х Тверьысь вагон лэсьтон заводын Россиысь Президентлы поезд лэсьтэмын, ивортэ "Комсомольская правда" газет. Вагонъёсыз нимысьтыз кортлэсь, борддоръёсыз броняен юнматэмын, питранъёсыз кужмоятэмын. Пушкыз дуно писпуослэсь, малахитлэсь но кораллъёслэсь арбериосын чеберъямын. Гидромассажен сауна но вань. Таӵе поездлэн дуныз - 12 миллиард манет, вуж коньдонэн вераса, х х х Магнитогорскысь милиция 101 килограмм гашиш шедьтӥз. Наркотик лимонъёсын ящике ватэмын вылэм. Сое Таджикистанысь ваиллям. Гашишлэн кузёез 3 миллиард манет (вуж коньдонэн) пайда басьтысал, гожтэ "Челябинский рабочий" газет. Эскерон палатаын "Удмурт Республикаысь Кун Кенешлэн Эскерон палатаез сярысь" Законэз лыдэ басьтыса, Эскерон палата бюджетлэсь быдэсъяськемзэ, Удмурт Республикаысь Правительстволэсь та ужпумъя нормативной актъёсты кутэмзэ эскере, бюджетысь коньдонэз кызьы кутэмез чакла. 22 апреле Эскерон палата сэрттӥз-пертчиз 1996 арын бюджетэз быдэстэм сярысь ужпумез. Талэсь азьвыл Коньдон ужпумъёсъя министерство коньдон кутэмез ляб эскере шуыса шараяськиз. Та сярысь министерстволы но, Правительстволы но гожтэтъёс пыр ивортылэмын вал. Но Правительство вань учыръёсы кулэ ужрадъёс ӧз куты. Вазенгес Эскерон палата кунлэн оскем муртъёсызлэн акциосын огазеяськонъёсын ужамзы сярысь ужпумез сэрттӥз-пертчиз. Соку тодмо луиз, кунлэн представительёсыз Россия Федерацилэсь законъёссэ тӥяса ужало шуыса. Эскерон палата Правительствоез та пумысен ужрадъёс кутэмез сярысь ивортыны но палаталэн заседанияз докладчик ыстыны куриз вал. Ивор дыраз ӧз вуы, нош Правительстволэн Тӧроезлэн воштӥсез Касихин С. П. - палаталэн заседанияз лыктэм мурт - югдурез валэктэмлэсь палэнскиз. Эскеронъя палатаез янгыш уськытӥз, озьы кенешлэсь ужзэ уретӥз. Та учыр "Удмурт Республикаысь Кун Кенешлэн Эскерон палатаез сярысь" Законэз тӥя. Та пумысен ужрадъёс кутыны курыса, Эскерон палата Кун Кенешлэн Тӧроезлы А. А. Волковлы, Правительстволэн Тӧроезлы П. Н. Вершининлы, Удмурт Республикаысь Прокурорлы вазиськиз. Тодмо нунал Туала дыре газет-журнал лыдӟытэк улӥсьёсты син азе пуктыны ик секыт. Зэм, берло аръёсы почтальонлэн сумкаез трослы капчияз, ӧжытгес гожтӥськемын яратоно изданиосмылы. Мугзэ но ӟеч тодӥськом: мыддоринскиз улон-вылонмы. Дыраз уг сётъяло уждун, нылпиослы пособиосты, сӧсыръёслы, пересьёслы пенсия коньдонзэс. Озьы ке но котькуд семья тырше яратоно газетэзлы гожтӥськыны. Куддыръя газетлэн эшъёсыз, киязы ручка кутыса, ас малпанъёссэц, сюлэм ӝожъёссэц лыдӟись доры вуттыны тыршо. Удмурт семья басьтыны тырше "Удмурт дунне" газетмес, пиналъёс яратыса лыдӟо "Ӟечбурмес", выль иворъёсын тодмато на ёросъёсын печатласькись газетъёс но. Газетлэн лыдӟисьёс доры вуон сюресэз сярысь мон воксё ӧй малпаськылы вал кадь. Нош "юнкор", "военкор" (службаын дыръям), "селькор" кыл-валанъёс пӧлы "зумиськыса" потэме бере валатски: макем секыт газетчилэн ужез, кӧня тыршоно луо журналистъёс... Газет баме вакчияк ивортон сётон понна но быгатонлык, ас кылдэ гажам кулэ. Котькуд изданилэн трос юрттӥсьёсыз - селькоръёсыз, юнкоръёсыз... Соос, шурез тыр возись ошмесъёс музэн, выль визыл кузьмаса уло редакциослы. Нош кӧня газет-журналъёс?! Кӧняез отчы гожъяло?! Чик керпотытэк вераны луоно кадь: Печатьлэн нуналыз ваньмы понна сӥё-дано карыса пусйымон нунал. Туэ коньывуон толэзьлэн берпуметӥ нуналаз асьме гажано "Удмурт дунне" газетмылы потыны кутскемез дырысеныз 80 ар тырмоз ни. Алабго карын, Трофим Кузьмич Борисовлэн кивалтэмез улсын, "Гудыри" нимын тодмо луиз со удмурт калыклы. Та аръёс ӵоже ма сярысь гинэ ӧз гожъя меда газет?! Кинъёс гинэ ӧз гожъялэ отчы?! Азьвыл аръёсы печатьлэсь нуналзэ пусйылӥмы куартолэзьлэн 5-тӥ нуналаз. Владимир Ленинэн кылдытэм "Искра" ("Правда") газетлэн нырысетӥ номерезлэсь потэмзэ чакласа. Улон азинскемъя Печатьлэн нуналыз но воштӥськиз. Табере сое пусйиськомы 13-тӥ толшоре. Нош малы та нунал быръемын, маин со тодмо луиз? Та нуналэ 1703 арын Российской печатьлы кутскон сётӥсь луиз ӟуч кылын "Ведомостьёс" газетлэн югыт дунне вылэ "вордскемез". Та ужын кичӧлтӥсь вал Пётр- 1. Эксэй нырысь ачиз учкылэм но тупатъянъёс, ватсанъёс пыртылэм та газетлэн бамъёсаз. "Ведомостьёс" вылӥллям пичи книгаос выллемесь: быдӟалаезъя 16 но 10 сантиметрьем. Бамъёсызлэн лыдзы ялан вошъяськылэм: кыкысен кызь кыкозь. Тиражез - 30 экземплярысен 4 сюрсозь. Та изданилы редакторе юнматӥллям Печатья юртлэсь кивалтӥсьсэ, историкез но литераторез Фёдор Поликарповез. Изданилэн печатласькыны кутскемез дырысен ӵапак туэ тырме 295 ар, ӝоген 300 ар тырмонзэ но пусъёмы. Ӟуч но удмурт изданиосмылэсь дано лыдпусъёссэс лыдэ басьтэмен валче, газетэ гожъясь эшъёсме но вань журналистъёсты ӟечкыламе потэ Печатьлэн нуналыныз. Яратоно газет- журналъёсмы эшшо но мед чеберскозы, усто кенешчи, визьмо эшмы медло. Тросгес мед луозы шумпотон, яратон, улонамы оскон кузьмась, тырмымтэлыкъёсты ӵушкась чуръёсты. "Удмурт дуннелэн" кема аръёс ӵоже лыдӟисез но авторез Николай Никифоров. Тудвутэк тулыс уг ортчы. Туэ со вуиз шыпытак, востэм улэ аналскыса кадь. Мунчогуртысь тымет тае гинэ витиз: ӵыпетсэ кырыса, думетысь москем ужпи кадь, Июль шуре кошкиз. Завьялово но Воткинск районъёсты герӟась выж ӝыныез куашказ. 4 часэ ӵукна отӥ мынӥсь "Москвич" бугыръяськыса бызись вуэ выиз. Умой коть, адямиос ӧз быре: тэтчыны вуизы. Патрульно-постовой службаез нуись водитель Александр Ложкин (туспуктэм вылын) ӧжытак шуккиськиз. Вӧзаз пукись пассажирлэн Валерий Бедренецлэн сӧсырмиз ымнырыз. Сое ӝегатскытэк келязы больницае. Машиназы выиз. Кин татын янгыш? Тудву-а, 1969 арын пуктэм выж-а? Туспуктэмез В. Камашевлэн. УДМУРТ РЕСПУБЛИКАЛЭН КУН НАЦИОНАЛЬНОЙ ПОЛИТИКАЕЗЛЭН КОНЦЕПЦИЕЗ СЯРЫСЬ Удмурт Республикаысь Кун Кенешлэн Постановлениез Удмуртиысь калыкъёслэсь кулэяськонъёссэс котыр ласянь чаклан но кун национальной политикаез быдэсъяку Удмурт Республикаысь кун властьлэн ёзъёсызлы но интыысь аскивалтонлэн ёзъёсызлы валче ужаны луонлыкъёс кылдытон понна, Удмурт Республикаысь Кун Кенеш пуктэ: 1. Удмурт Республикалэн кун национальной политикаезлэсь концепцизэ юнматоно (сётӥське). 2. Нациослэсь кусыпъёссэс радъянъя ужпумъёсты быдэсъяку, озьы ик республикаын но интыосын нациосты азинтонлы но калыкъёслэсь кусыпъёссэс юнматонлы сӥзем программаосты кылдытыку кун властьлэн ёзъёсыз но интыысь аскивалтонлэн ёзъёсыз лыдэ басьтыны кулэ Удмурт Республикалэн кун национальной политикаезлэсь концепцизэ. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 6 феврале. � 584-И. Удмурт Республикалэн кун национальной концепциез Удмурт Республикалэн кун национальной политикаез - туала принципъёслэн но приоритетъёслэн радлыксы, кудӥз Удмуртиын улӥсь калыкъёслэсь национальной кулэяськонъёссэс лыдэ басьтэ, соослэсь сямъёссэс но ог-огенызы огкадь правоен луыса кусып воземзэс азинтэ но котькуд калыклэсь историен сётэм кужымзэ кутыны чакла трос калыкъем Удмуртилэн дэлетэз но кулэяськонъёсыз понна. Концепция Россилы огъя но быдэслыко луыны, отысь калыкъёслэсь огъя государственной кулэяськонъёссэс матэ карыны, соос куспын котыр ласянь эшъяськонэз юнматыны, калыкъёслэсь кылъёссэс но культураоссэс азинтыны луонлык кылдытэ. Удмурт Республикаысь кун властьлэн но интыысь аскивалтонлэн ёзъёссы кун национальной политикалэн концепциез вылэ пыкиськыны кулэ нациосты азинтонъя но нациослэсь кусыпъёссэс радъянъя, Удмурт Республикалэсь кунлыксэ но Россилэсь кунлыксэ юнматонъя, федеративной кусыпъёсты азинтонъя ужпумъёсты быдэсъякузы. Удмурт Республикалэн кун национальной политикаез лыдэ басьтэ Адямилэн правоосызъя огъя декларациез, дуннеысь праволэсь мукет нормаоссэ, Россия Федерацилэсь Конституцизэ, Федеральной Огкылэз но Россия Федерациысь кун властьлэн ёзъёсыз но Удмурт Республикаысь кун властьлэн ёзъёсыз куспын быдэсъяно удысъёсты но полномочиосты люкон сярысь огкылэз, озьы ик лыдэ басьтэ Удмурт Республикалэсь Россия Федерацие кун луыса пыремзэ, Удмуртилэн кунлыкез историен юнматэмын, удмурт калык но Удмуртиысь калык самоопределенилы правозэ быдэстыса, Удмурт кун калыклэн утиськемез но солэсь сямъёссэ азинтэм понна кыл кутэ. Та Концепция кылдытэмын, Россия Федерацилэн кун национальной политикаезлэн концепциез вылэ пыкиськыса, кудӥз юнматэмын Россия Федерацилэн Президентэзлэн Указэныз 1996 арын 15 мае, сое быдэсъян вылысь. И. Удмурт Республикаысь калыкъёс но политика Удмурт Республика - Россия Федерацилэн трос калыкъем субъектэз. 1989 арын СССР-ын калыкез гожъямъя, республикаын 70-лэсь трос калыкъёс уло, соос пӧлысь 58,9 процентэз - ӟучъёс, 30,9 процентэз - удмуртъёс, 6,9 процентэз - бигеръёс, 3,3 процентэз - мукет калыкъёс (0,8 процент - украинецъёс, 0,5 процент - поръёс, 0,3 процент - башкиръёс, белорусъёс, немецъёс, чувашъёс - быдэн 2 процент, еврейёс, Кавказысь калыкъёс - 0,2 процентлэсь ичи). Удмурт Республикаын огинын улӥсь калыкъёслэн (бесермянъёс, поръёс, ӟучъёс, бигеръхёс, удмуртъёс, чувашъёс) асьсэлэн кылзы но вӧсьлыксы, со сяна, соослэн материальной но духовной культуразы, ас улон- вылонзы, социально-профессиональной структуразы котькудӥзлэн ас сяменызы азинско. Россилэн историяз но котькудӥзлэн аслаз интыез. Удмуртъёсын ӵош табере мукет калыкъёс уло, соос пӧртэм инмаръёслы оско. Нош Удмурт Автономной Область кылдэм дырысен Удмурт Республикалэн кунлыкез азинскыны кутскиз. Сое азинтонэ пырисько шаерысьтымы вань калыкъёс. Россия Федерацие пырись Удмурт Республикалэн кунлыкез азинскоз, малы ке шуоно, та процессэ пыриськись калыкъёслэн вань огъя Родиназы - Россия но Удмуртия, со сяна, ваньмыз валало, солэн дэлетэз "кужым пӧртэмлык бордын" принципез быдэсъянэн герӟаськемын шуыса. Та принцип Удмурт Республикаысь вань калыкъёслэсь, гражданъёслэсь, кыӵе нациысь но расаысь луэмзы, кые инмарлы оскемзы шоры учкытэк, огкадь правоен луэмзэс кулэ каре. Нациослэсь кусыпъёссэс юнматон но Удмурт Республикаысь калыкъёслэн валче тыршыны мылкыдъёссы герӟаськемын ӟуч калыклэн тазалыкеныз, малпанъёсыныз но история азьын кыл кутэменыз, удмурт но мукет калыкъёслэсь кулэяськонъёссэс лыдэ басьтэменыз, солэсь ужпумъёссэ дыраз быдэстонэн. Странаямы бадӟымесь воштӥськонъёс ортчыку, республикаысь калыкъёслэн кусыпъёссы вылын шӧдӥсько: - Удмуртиысь калыклэн кунлыксэ азинтыны тыршемез но калыкъёслэн социальной удысын, экономикаын матэктэмзылэн объективной процессъёссы; - Удмурт республикалэн ас кожаз улыны тыршемез но Россиын кунлыкез юнматыны кулэлык; - социальной удысын, экономикаын реформаосты ортчытон но Удмуртиысь калыкъёслэн соослы пӧртэм сямен дась луэмзы но отчы соосты ортчытонэ пӧртэм сямен сямен пыриськемзы, со пӧртэмлыкъёс герӟаськемын калыкъёслэн исторической но культурно- хозяйственной аспӧртэмлыкъёсынызы; - удмуртъёслэсь но шаерысьтымы мукет калыкъёслэсь культуразэс, сямъёссэс утьыны но азинтыны тыршон но Россиысь но быдэс дуннеысь духовно-нравственной дунъетъёс вылэ пыкиськон. Калыкъёслэн эшъяськоназы историлэн выжыосыз шӥсько, отын Удмуртиысь калыкъёслы валче ужаны но улыны инъет кылдӥз, отысь утчано удмурт нацилэсь азинскон йылолъёссэ. Соос луонлык кылдытӥзы Россие пырись Удмуртиын нациослэсь, кунлэсь улонзэс радъянын, экономикаын, культураын, наукаын, дышетонын ХХ дауре вормонъёс басьтыны. Мукет ласянь, Россиысь вань калыкъёслы изъян ваизы Советской властьлэн зӥбетэз, калыкъёсты улоно интыосысьтызы уллян но репрессиос, уно национально-культурной дунъетъёсты куашкатон но огвыллеммытон. Бадӟымесь промышленной предприятиосты пуктон, оборонаен герӟаськем комплексэз азинтон странамылэн улосъёсысьтыз, республикалэн гурт ёросъёсысьтыз ужась киосты кулэ каризы. Таин валче социально-демографической но этнической югдур воштӥськиз: туннэ республикаын улӥсьёс пӧлысь одӥг куиньмос люкетэз удмуртъёс. Азьвыл вакытъёсы кылдэм шуг-секытъёс туннэ но вормымтэ. Соос гуртъёслэн социально-этнической структуразылы но инфраструктуразылы азинскыны люкето. Таин валче калыклэн дышетскыны, культуразэ, сямъёссэ азинтыны луонлыкъёсыз туж сюбегесь. Ваньмыз та юн шӧдӥське Удмуртиысь калыкъёслэн улоназы, соослэн кун власть ёзъёслэн ужазы но Удмурт Республикаысь экономикаен кивалтонэ пыриськемазы. Россия Федерациысь вань калыкъёслэн, озьы ик Удмурт Республикаысь но калыкъёслэн асваланзы трослы воштӥськиз, общество чутрак воштӥськонъёслы дась ӧвӧл - ваньмыз та нациослы азинскыны, нациослэсь кусыпъёссэс юнматыны, калыкъёслы эшъяськыны люкето. Перестройкалэн но реформаослэн шуг-секытъёссылы, социальной удысын, экономикаын но политикаын тырмымтэослы этнической буёл пыӵатӥське, национализм но шовинизм ӝужало. Озьы ик нациослэн кусыпъёссы вылын шӧдӥсько гражданъёсты улон-вылонын но право ласянь утёнлэн лябӟемез, ужтэк кылён, куанермон. Таӵе улонэз эскерем-чаклам бере валамон луиз, республикаысь этнополитической югдурез выль сямен дунъяно но ужпумъёсты быдэстыны выль амалъёс утчано шуыса. СССР куашкам бере, Россилэн кунлыкез азинскиз. Россия Федерацилэн 1993 арын кутэм Конституциезъя, кун озьы радъямын, федеративной кусыпъёс демократической принципъёс вылын мед азинскозы шуыса. Со демократической принципъёс лыдэ басьто калыкъёслэсь огкадь правоен луыны но ас кожазы улыны, сямъёссэс утьыны но Россилэсь огъя кунлыксэ азинтыны, нормаосты, вылӥ дунъяло адямилэсь кыӵе нациысь луэмез но кытын улэмез шоры учкытэк, правооссэ но эрикъёссэ, утё пичи калыкъёсты но нациосты. Россиысь обществолэн берло вакытэ кылдэм ужпумъёсыз пӧртэм этносъёслэн улоназы пӧртэм сямен шӧдӥське. Та кулэ каре республиканской концепциосты но программаосты кылдытонэз, Россия Федерацилэн кун национальной политикаезлэн огъя концепциез вань ке но ини. Туала вакытэ быдэстоно ужпумъёс: - Удмуртилэсь кунлыксэ юнматон, федерализмлэсь демократической принципъёссэ лыдэ басьтыса, малы ке шуоно, соос республикалэн ас кожаз улэмезлы но Россия кунлэн быдэслыкезлы инъет огдыре кылдыто, Удмуртиысь калыкъёслы, Россиысь вань калыкъёслы, ог-огенызы кусып возьыны луонлык кылдыто; - национальной политикалэсь правоя инъетсэ умоятон, Удмурт Республикаысь гражданъёсты право но политика ласянь утён, нацизы но вӧсьлыксы шоры учкытэк, соослы огкадь правоос сётон, кун властьлэн но кивалтонлэн ёзъёссылэн ужазы пыриськытон; - Удмурт Республикаысь калыкъёслэсь национальной культураоссэс но кылъёссэс азинтон, республикаысь но Россия Федерациысь калыкъёслэсь валче улыны мылкыдъёссэс юнматон; - Удмуртилэн палэназ улӥсь удмуртъёслэсь сямъёссэс-йылолъёссэс утён, соослэн Россиысь мукет калыкъёсын кусып воземзы; - Удмуртиысь калыкъёслэсь азьвыл вакытъёсысен улон интыоссэс, этноэкологической радлыкез утён но азинтон, социально-демографической югдурез умоятон но йырзэс быдтӥсьёслэсь лыдзэс кулэстонъя ужрадъёс ортчытон; - Удмурт Республикаын улӥсь калыкъёслы котыр ласянь азинскыны но эшъяськыны ӟечгес луонлыкъёс кылдытон, калыкъёслэн ог-огенызы кусып возён амалъёссы вылӥ культуралэн куронъёсызлы мед тупалозы; - калыкъёслэсь ог-огзылы оскемзэс юнматоно, шовинистической но националистической мылкыдъёсты вормоно. Удмурт Республикаысь туала югдур но шаермес азинтонъя ужрадъёс кулэ каро выль амалъёсты, улон шоры выль сямен учкемез, нырысь ик валано, обществолэн трос калыкъем луэмез - со Удмуртиысь калыкъёслы азинскыны но мае ке выльзэ кылдытыны амал шуыса, национальной ужпумез политикалэн конъюнктураяз пыртыны но власть понна нюръяськонэ кутыны уг яра. Та принципез быдэсъяку, нациосты азинтонъя но калыкъёслэн кусыпъёссыя программаосты кылдытыку, калыклэсь мылкыдзэ лыдэ басьтоно, наукалэн вормонъёсыз, кутэм решениослэн кытчы вуттыны быгатэмзы пумысен прогнозъёс но со решениослы дунъетъёс вылэ пыкиськоно. Национальной политика улонэ пыӵаны кулэ, азьланяз сое лыдэ басьтоно, со Удмурт Республикаысь калыкъёслы огкадь луонлыкъёсын азинскыны но вань удысъёсын кусып возьыны юрттыны кулэ. Республикаысь кун властьлэн но интыысь аскивалтонлэн ёзъёссылэн, пӧртэм политической но общественной огазеяськонъёслэн та пумысен малпанъёссы огкадь луыны кулэ. ИИ. Кун национальной политикалэн принципъёсыз Та концепциын сётэм валтӥсь малпанъёсты, нормаосты но нырысь ик быдэстоно ужпумъёсты кун властьлэн но интыысь аскивалтонлэн ёзъёссы лыдэ басьтыны но улонэ пыӵатыны кулэ. Удмурт Республикаын национальной политикалэн валтӥсь принципъёсыз: - калыкъёслы огкадь правоос сётон, лыдзы шоры учкытэк, адямилэсь правооссэ но эрикъёссэ гажан, ас быгатонлыкъёсыз но этнослэн культураеныз герӟаськем сямъёссэ шараяны луонлыкъёсты гажан, расаез, кылыз, вӧсьлыкез, социальной положениез но кытын улэмез шоры учкытэк; - котькудӥз гражданин быгатэ ас кожаз, нокин косытэк бырйыны но возьматыны, кыӵе нациысь луэмзэ но кыӵе кылын вераськемзэ; - гражданъёслэсь правооссэс но эрикъёссэс сюбегатыны уг луы, кыӵе кылын вераськемзыя, социальной положенизыя, вӧсьлыксыя, нацизыя но расазыя, социальной группае яке общественной огазеяськонэ пыремзыя; - калыкъёслэсь пӧртэм общественной организациосы огазеяськыны правозэс гажан, Россилэн но Удмуртилэн кунлыксы утисько ке; - гражданъёслэн иворъёс басьтыны быгатэмзы; - калыкъёс куспын тупанэз но огкылысь луонэз утён, Удмурт Республикаысь вань калыкъёслы азинскыны но кусып возьыны огкадь луонлыкъёсын мед быгатозы шуыса; - республикаысь калыкъёслэсь национальной кулэяськонъёссэс дыраз лыдэ басьтон, Удмуртилэсь многонациональной калыксэ азинтон, тупаса, ог-огедлы юрттыса, валче тыршыса; - калыкъёс но пӧртэм выжыысь адямиос куспын кылдэм тэкшеронъёсты валче кужмын, кенешыса кысон; - Удмуртиысь национальной культураослы но кылъёслы азинскыны юрттон; - Удмуртилы кышкытлык ваись, расаос, калыкъёс но пӧртэм инмаръёслы оскисьёс куспын тупамтэосты пурӟытӥсь общественной огазеяськонъёсты кылдытыны но соослы ужаны ӧвӧл лэзёно; - шаермылэн палэназ Удмурт Республикалэн гражданъёсызлэсь правооссэс но кулэяськонъёссэс утён, Россия Федерацилэн Конституциезъя, Удмурт Республикалэн Конституциезъя, дуннеысь праволэн нормаосызъя; - Удмурт Республикалэн палэназ улӥсь удмуртъёслы, соослэн национально-культурной огазеяськонъёссылы вордскем кылзэс, дышетскемзэс, сямъёссэс-йылолъёссэс утьыны но азинтыны юрттон. Удмурт Республикалэн национальной политикаезлэн инъетэз - вордскем музъемез яратон но калыкъёс куспын эшъяськон, шаерысьтымы вань калыкъёслэсь кулэяськонъёссэс, Россия Федерациысь вань калыкъёсты азинтонъя ужпумъёсты лыдэ басьтон но чаклан. ИИИ. Кун национальной политикалэн кулэлыкез но валтӥсь ужпумъёсыз Удмурт Республикалэн национальной политикаез Удмуртиын улӥсь калыкъёслэсь кулэяськонъёссэс ог-огзылы матэгес карыны, соослы республикалэсь политиказэ, социальной удыссэ, экономиказэ, культуразэ, нациоссэ азинтонэ огкадь правоосын пыриськыны луонлыкъёс кылдытоз. Удмурт Республикалэсь национальной политиказэ улонэ пыӵатон таӵе ужпумъёсты быдэстонэз кулэ каре. Политикаын но государственно-правовой удысын: - Удмурт Республикаез - Россия Федерацилэсь субъектсэ, кудӥз Удмуртиысь вань калыкъёслэсь правооссэс но кулэяськонъёссэс огкадь уте,- азинтон но юнматон; - Удмурт Республикаысь кун властьлэн ёзъёссылэн но кун властьлэн федеральной ёзъёссылэн кусыпъёссылэсь правовой инъетсэс юнматон; - республикаын, озьы ик интыосын но, национальной политикаез быдэсъяны луонлык сётӥсь правовой инъет кылдытоно; - кун властьлэн но кивалтонлэн вань ёзъёссылэсь, республикаысь общественно- политической огазеяськонъёслэсь но конфессиослэсь кужымзэс валчеян, нациос куспын тупан понна, пӧртэм выжыысь калыкъёслэсь но пӧртэм инмаръёслы оскисьёслэсь огкадь правоен луэмзэс улонэ пыӵатон, ог-огдэ валанэз, эшъяськонэз юнматон вылысь; - калыкъёслэсь национально-культурной куронъёссэс лыдэ басьтонэзз но быдэсъянэз, республикаысь национально-культурной огазеяськонъёслы юрттонэз радъян, право ласянь луонлыкъёс кылдытон но коньдон висъян; - Удмуртиысь вань калыкъёслы республикалэн палэназ улӥсь ӵыжы-выжы калыкъёсын кусып тупатыны но кусып возьыны юрттон; - Россия Федерацилэн субъектъёсыныз, кунгож сьӧрысь кун но административно- территориальной образованиосын, озьы ик сыӵеосыныз но, кытын уло финн-угор выжыысь калыкъёс, кусып возён, экономикаез, наукаез но культураез азинтон понна; - Удмурт Республикаын нациослэн кусыпъёссы пумысен иворъёсты люкан но эскерон, фундаментальной но прикладной исследованиосты радъян; - калыкъёслэн кусыпъёссы кызьы азинскыны быгатэмзы пумысен прогнозъёс но модельёс дасян; - нациос куспын тупамтэосты но законъёсты но правопорядокез таин валче тӥян учыръёсты алонъя ужрадъёсын радлык кылдытон; нациос куспын тэкшеронъёсты палэнтон но кысон пумысен законъёсты но мукет нормативной актъёсты кылдытон но кутон; - вань уровеньёсысь властьлэсь закон кылдытӥсь но быдэсъясь ёзъёссэ кылдытонъя механизмез умоятон, кудӥз луонлык сётэ гражданъёслэн но калыкъёслэн кулэяськонъёссы пумысен кун решениосты кутыку соослэсь мылкыдзэс лыдэ басьтыны; - Удмурт Республикаысь гражданъёслэсь, кыӵе калыкысь луэмзы шоры учкытэк, национальной данзэс но достоинствозэс утёнъя кун политикаез нуон, калыкъёс куспын ог-огдэ ултӥян, синазькыль карон мылкыдъёсты вӧлмытӥсь национализмен но шовинисмен нюръяськон. Социальной удысын но экономикаын: - Удмурт Республикалэсь экономиказэ азинтонъя программаосты кылдытон, республикаысь вань калыкъёслэсь кулэяськонъёссэс, хозяйствоез нуон амалъёссэс но ужаны быгатонлыкъёссэс лыдэ басьтыса; - социальной удысын, экономикаын тыршемлы дурбасьтон, со Удмурт Республикаысь калыклы ӟечгес улыны, республикаын наукаез, культураез азинтыны, иворъёсты вӧлмытонэз паськытатыны юрттэ ке, Удмуртиысь калыкъёслэсь культураенызы но хозяйствоез нуон амалъёсынызы герӟаськем кужымзэс кутыса; - Удмуртилэсь хозяйственной луонлыкъёссэ, культурной, этнотерриториальной, научно-технической но кадровой кужымзэ, инкуазь но этнокультурной узырлыкъёссэ пайдаё кутон; - республикаысь городъёслэсь но ёросъёслэсь экономикаын, социальной удысын азинсконзэс ӵошкатонъя ужрадъёс ортчытон; - Удмуртиын Россиысь хозяйственной структураослы, экономикаын азинсконъя но кусып возёнъя межреспубликанской но межрегиональной корпорациослы но ассоциациослы азинскыны юрттон, соос Удмурт Республикаысь но быдэс Россиысь калыкъёслэсь социальной удысъя, экономикая матэктэмзэс муромыто но юнмато; - республикаысь коммуникационной но иворъёсъя радлыкъёсты - Россия Федерацилэсь экономикая, иворъёсъя, культурая, дышетонъя огъя пространствоезлэсь люкетъёссэ азинтон; - Удмуртиысь калыкъёслэсь кемалась вакытысен улоно интыоссэс утёнъя нимысьтыз программаосты кылдытон но быдэстон, калыкез эмъянэз умоятон но республикаысь демографической югдурез тупатон. Малпанъёс-мылкыдъёс удысын: - калыкъёсын эшъяськон, тупаса улон, культуралэн куронъёсызъя кусып возён малпанъёёсты юнматон но вӧлмытон, Россиез яратон, трос калыкъем Родинаен, Россиысь калыкен данъяськон мылкыдъёсты пыӵатон; - вис карылытэк национальной дышетонлэсь радлыксэ - нылпи садысен вылӥ учебной заведениозь - кылдытон но азинтон, сыӵе дышетон республикаысь вань калыкъёслэсь сямъёссэс-йылолъёссэс утьыны но азинтыны, выль поколениослы ас калыксылэсь но мукет калыкъёслэсь национальной узырлыкъёссэс но культуразэс гажаны, Россиысь калыкъёслэсь культураоссэс но сямъёссэс ог-огзы чотын узырмытыны тыршон мылкыдъёсты пыӵатыны юрттоз; - Удмуртиысь калыкъёслэсь историын пытьызэс, культураын вормонъёссэс утён но азинтон, соослэн толло но туннэ нуналзы сярысь зэмос иворъёсты вӧлмытон, соослэсь вормонъёссэс гажан мылкыдэз обществолы пыӵатон, славянской, финн-угор, тюрк но мукет выжыосысь калыкъёслэсь уно дауръёс ӵоже кусып воземзэс азинтон, огъя евразийской этнокультуральной пространствоын; - семьяез юнматыны, семья куспын калыклэсь сямъёссэ кутыны луонлыкъёс кылдытон но нылпиослы калыклэсь сямъёссэ пыӵатонын, мукет выжыысь калыкъёсын кусып возьыны, культуралы дышетонын семьялы бадӟымгес инты висъян; - ӟуч кылэз - быдэс кунын но нациос куспын вераськонын кутӥськись кылэз, удмурт кылэз - Удмурт Республикаысь огзэ кун кылэз, озьы ик республикаысь мукет калыкъёслэсь кылъёссэс азинтыны луонлыкъёс кылдытон; - Удмуртиысь кемалась вакытъёсысен кылдэм вӧсьлыкъёсты утён; - республикаын адямиослэсь малпанъёссэс, мылкыдъёссэс ултӥямлы, зӥбемлы пумитъяськон. Мукет улосъёсын кусып возёнын: - Россия Федерациысь субъектъёсын дышетон, культура, иворъёс, нациосын кусып возён, социальной удысын, экономикаын кусыпъёсты юнматон пумысен двусторонней но многосторонней огкылъёсты но тупанкылъёсты кутон; - Удмурт Республикалэн палэназ улӥсь удмуртъёсын но мукет калыкъёсын социальной удысын, экономикаын, наукаын, дышетонын, культураын, иворъёсты вӧлмытонын кусыпъёсты юнматон; - Федерацилэн мукет субъектъёсысьтыз, матысь кунсьӧр кунъёсысь вуэм беженецъёс но улон интызэс воштоно луэмъёс сярысь, кылсярысь, Удмуртиын вордскемъёс сярысь, сюлмаськон. ИВ. ФЕДЕРАТИВНОЙ КУСЫПЪЁСТЫ УМОЯТОН НО УДМУРТ РЕСПУБЛИКАЛЭСЬ КУНЛЫКСЭ АЗИНТОН Туала вакытэ федеративной кусыпъёсты умоятон но Удмуртилэсь кунлыксэ азинтон кулэ каро сыӵе ужрадъёсты ортчытонэз, кудъёсыз кун властьлэн федеральной ёзъёсыз но Удмурт Республикаысь кун властьлэн ёзъёсыз куспын, Удмурт Республикаысь кун властьлэн ёзъёсыз но интыысь аскивалтонлэн ёзъёсыз куспын быдэсъяно удысъёсты но полномочиосты, обязанностьёсты но кыл кутонэз ӟечгес люкозы, Удмурт Республикаын улӥсь калыкъёслэсь ваньзэ национальной но культурной кулэяськонъёссэс лыдэ басьтоз. Федеративной кусыпъёсты умоятон но Удмурт Республикалэсь кунлыксэ азинтон ужпумъёс быдэсъясько: - федерацилэсь радъяськемзэ умоятыса, Удмурт Республикалэсь татын улӥсьёс азьын калыклэсь куронъёссэ быдэсъямез понна кыл кутэмзэ но со куронъёсты ас кожаз быдэсъяны быгатонлыкъёссэ будэтыса, Россия Федерацилэсь быдэслыксэ но огъялыксэ утёнын Удмурт Республикалы бадӟымгес инты висъяса; - Удмурт Республикаысь гражданъёслэсь кулэяськонъёссэс утьыса но быдэсъяса, Удмурт Республикаысь кун властьлэн но интыысь аскивалтонлэн ёзъёссылэсь ужзэс умоятон пыр, обществоен кивалтонэз пайдаёгес карон, Удмурт Республикаысь калыкъёслэсь эшлыко мылкыдзэс утён понна; - Россия Федерацилэсь но Удмурт Республикалэсь ог-огзы азьын правооссэс, обязанностьёссэс, кыл кутонзэс, быдэсъяно удысъёссэс юнматӥсь законъёсты кылтыдыса но кутыса; правительствоос куспын огкылъёсты юнматыса, кудъёсыз Удмурт Республикаысь кун властьлэн ёзъёсызлы вань удысъёсысь полномочиоссэс быдэсъяны юрттозы; - пӧртэм национальностен муртъёслы кун властьлэн, кивалтонлэн но интыысь аскивалтонлэн ёзъёссылэн ужазы пыриськыны огкадь луонлыкъёс сётӥсь правовой инъетъёсты кылдытыса; - нациосты азинтонъя но Удмуртиысь калыкъёслэсь кусыпъёссэс юнматонъя ужпумъёсты дыраз быдэстон понна, республикалэн но интыысь аскивалтонлэн бюджетъёсысьтызы коньдон висъяса, мукет амалъёсын уксё шедьтыса; - Экономикалэсь валтӥсь удысъёссэ азинтыса, инкуазь узырлыкъёсты кутыса, Удмуртиысь калыкъёслэсь кулэяськонъёссэс лыдэ басьтыса, экосистемаез но калыкъёслэсь кемалась вакытъёсысен улоно интыоссэс утьыса; - пӧртэм национальностен муртъёслы Удмурт Республикалэсь выль экономиказэ ӝутонын огкадь луонлыкъёс кылдытыса; - экономика, коньдон ужпумъёс, социальной удыс, культура, нациосты азинтон пумысен политикаез быдэстонын Удмурт Республикаысь кун властьлэн ёзъёсыз но интыысь аскивалтонлэн ёзъёсыз валче тыршыса; - Удмурт Республикаын адямилэсь но гражданинлэсь правооссэ но эрикъёссэ быдэсъяса, расаез, нациез, вӧсьлыкез шоры учкытэк. Удмурт Республикалэсь нимысьтыз кулэяськонъёссэ быдэсъян, солэсь правоя, экономикая, культурая, иворъёсъя но этнокультурая пространствозэ утён понна кун властьлэн федеральной ёзъёсыз но Удмурт Республикаысь кун властьлэн ёзъёсыз ялан кенешыса, ог-огзылы огкадь луонлыкъёс сётыса тыршыны кулэ. Удмуртиысь вань калыкъёслы огкадь правоос сётон понна, Удмурт Республикалэн Конституциезлэсь валтӥсь валатонъёссэ азинтоно. Кылсярысь, республикалэсь кадровой кужымзэ кутонъя ужпумез быдэстоно, калыкъёслы кун властьлэн ёзъёссылэн, республикаысь, городъёсысь но ёросъёсысь кивалтэёслэн ужазы огкадь правоен пыриськыны луонлыкъёс кылдытыса. Нациослэн азинсконзыя но Удмурт Республикаысь калыкъёслэн кусыпъёссыя кун программаосты кылдытыку но быдэсъяку, лыдэ басьтоно калыкъёслэсь но улосъёслэсь экономика но социальной удыс ласянь кызьы азинскемзэс, малы ке шуоно, сыӵе аспӧртэмлыкъёс нациослэн кусыпъёсазы шӧдӥсько. Ваньзэ тае лыдэ басьтоно Удмурт Республикаысь калыкъёслэн кун, экономика, этнополитика, социальной удыс, культура удысъёсын азинскемзы но кусып воземзы пумысен федеральной но республиканской программаосты быдэсъяку, коньдон, валюта, кредит ужпумъёсъя политикаез, таможня, налогъёс пумысен политикаез радъяку, озьы ик республикалэсь фондъёссэ кылдытыку но кутыку. Удмурт Республикаысь но Россия Федерациысь кун властьлэн ёзъёссылы ӵош быдэсъяно удысъёсты юнматон юрттыны кулэ экономикаез озьы радъяны, куке производительной кужымъёс пайдаё кутӥсько, инкуазез утён ужпумъёсты лыдэ басьтыса, озьы ик юрттыны кулэ Удмурт Республикаысь городъёсын но ёросъёсын выт бичанэз ӟечомытыны, инкуазез утьыны, калыклэсь культураеныз, сямъёсыныз, улон-вылонэныз герӟаськем кулэяськонъёссэ быдэсъяны. Национальной политикаез нуон кулэ каре Удмурт Республикаысь вань ёросъёслэсь аспӧртэмлыкъёссэс лыдэ басьтонэз, ваньбурез огазеянэз но выльысь люкылонэз, Удмурт Республикаын экономикалы, политикалы, нациослэн кусыпъёссылы азинскыны луонлыкъёс кылдытон понна. В. УДМУРТИЫСЬ КАЛЫКЪЁСЛЭН АС СЯМЪЁССЭС, КУЛЬТУРАЗЭС АЗИНТЭМЗЫ НО ОГ-ОГЕНЫЗЫ КУСЫП ВОЗЕМЗЫ Удмурт Республикалэн национальной политикаез Удмуртиысь вань калыкъёслэсь кулэяськонъёссэс лыдэ басьтэ, соослэсь куронъёссэс быдэсъяны дуннеысь праволэн нормаосыныз, Россия Федерацилэн Конституциеныз, Удмурт Республикалэн Конституциеныз сётэм луонлыкъёсты улонэ пыӵатыны инъет кылдытэ, калыклэсь огазеяськыны но кун кылдытыны мылкыдзэ лыдэ басьтыса. Ваньмыз та калыкъёслы ог-огенызы тупаны, кулэяськонъёссэс шараяны но быдэсъяны, валче ужаны, соос куспын тэкшеронъёсты алыны юрттоз. Удмурт Республикаысь гражданъёс, национально-культурной объединениосы огазеяськыса, таӵе правооссэс быдэсъяло, кытын улэмзы шоры учкытэк: - кун властьлэн ёзъёсызлэсь но интыысь аскивалтонлэн ёзъёсызлэсь юрттэт басьтыны, калык сямъёсты, кылэз но культураез азинтон понна; - кун властьлэн ёзъёсаз, интыысь аскивалтонлэн ёзъёсаз национально-культурной кулэяськонъёс пумысен вазиськылыны; - иворъёсты вӧлмытӥсь кун ёзъёслэсь луонлыкъёссэс кутыны яке иворъёсты вӧлмытӥсь ёзъёсты ас кожазы кылдытыны Россия Федерациысь законодательствоен юнматэм радлыкъя, иворъёсты вордскем кылын басьтыны басьтон но вӧлмытон понна; - калыклэсь историын но культураын пытьызэ утьыны но узырмытыны, калыклэсь культурной узырлыкъёссэ кутыны; калыклэсь сямъёссэ, йылолъёссэ быдэсъяны, калыклэсь ки ужен выремзэ улӟытыны но азинтыны; - дышетонъя но наукая, культурая учреждениосты кылдытыны но соослы ужаны луонлыкъёс сётыны Россия Федерацилэн но Удмурт Республикалэн законодательствозыя; - правительственной луисьтэм организациослэн ужазы пыриськыны оскем муртъёс пыр; - кунгож сьӧрысь кунъёсысь калык огазеяськонъёсын, гражданъёсын гуманитарной кусыпъёс тупатыны, Россия Федерацилэн законодательствоез вылэ пыкиськыса, но кусыпъёс возьыны нокыӵе ултӥянъёстэк. Национально-культурной огазеяськонъёсты кылдытон мукет калыкъёслы изъян вайыны кулэ ӧвӧл. Огазеяськонъёслэн валтӥсь ужпумъёссы пӧлысь одӥгез - Россиысь вань калыкъёсын эшъяськонэз но творческой кусыпъёс возён понна ас азязы кыл кутон. Национально-культурной огазеяськонъёсты кылдытонын но азинтонын бадӟым инты басьто интыысь аскивалтонлэн ёзъёсыз, кудъёсыз интыосын национальной политикаез нуисьёс пӧлын луыны кулэ. Гражданъёс быръемъя кылдытэмын бере, соос интылэсь но татын улӥсь калыкъёслэсь аспӧртэмлыкъёссэс лыдэ басьтыны, национально-культурной огазеяськонъёсын валче кусып возьыны кулэ, огкылъёс вылэ пыкиськыса но. ВИ. РЕСПУБЛИКАЛЭН КУН НАЦИОНАЛЬНОЙ ПОЛИТИКАЯ ЦЕЛЕВОЙ ПРОГРАММАОСЫЗЛЭН ВАЛТӤСЬ УДЫСЪЁССЫ Удмурт Республика кун национальной политикаез быдэсъяку целевой программаосты кутэ, малы ке шуоно, соос кун властьлэн ёзъёсызлэсь, интыысь аскивалтонлэн ёзъёсызлэсь но национально-культурной общностьёслэсь но огазеяськонъёслэсь кужымзэс валчеяны луонлык кылдыто, огъя ужпумъёсты быдэстон понна: Удмурт Республикаын улӥсь калыкъёслэсь национально-культурной куронъёссэс лыдэ басьтыны но быдэсъяны, улонзэс умоятыны, ог-огенызы кусып возьыны, одӥг калыкез мукет калыкъёслэсь люконтэм вылысь луонлыкъёс кылдытыны. Республикалэн кун национальной политикаезлэн валтӥсь удысъёсыз - Удмуртиысь калыкъёслэн политика но право, социальной удыс но экономика ласянь, национально- культурной, духовно-нравственной, физической азинскемзы но кусып воземзы пумысен программаосты кылдытон но соосты республикаын но интьыосын быдэсъян, Удмурт Республикалэн палэназ улӥсь удмуртъёслы юрттон. Та программаос культураосты, кылъёсты, калык сямъёсты утён но азинтон, 02 Кужмысь уд яратыты Тулыс вуэмен, пумен ӵемгес но ӵемгес пумисько нылъёсты, нылкышноосты эриктэман учыръёс. Куд-ог дыръя асьсэос но соос янгыш: я тодмотэм мурт вӧзы машинае пуксё, я берозь юмшало, котькинлы оско. Можга районысь Кватчи гурт вӧзысь автозаправочной станция дорын уйшор бере 2 час котырын куинь егит пиос эриктэмазы 18 аресъем нылмуртэ. Амалтэк юан кылдэ: малы та егит нылаш сыӵе бер отӥ юмша вылэм? Сое уе ик Глазов районысь Татарские Парзи гуртын куинь пиос эриктэмало 20 аресъем нылмуртэ. Эрказмемъёс пӧлысь огзэ, суд улэ шедьылэм 25 аресъем муртэ, милиция соку ик ӝегатӥз. Кыдёке ӧз пегӟе мукетъёсыз но. Мурт кышноосты яратӥсь воргоронъёс вылӥллям Кез палан но. Верхняя Дырпа гуртысь Ч. Сергей, гуртоез доры юон утчаны лыктэм мурт, коркалэсь кузёзэ К. Иванэз магазинэ ыстӥз. Со вискын ачиз тэбиньыны кутскиз кузё кышно борды. Нылкышно юэм воргоронлы сётскыны ӧз но малпа. Бутылкаен бертӥсь картэз, мазэ-созэ валатэк, ӧс куспысен ик кышномуртэ тыбыр кузяназ гур суранэн шуккиз. Собере, пурт кутыса, куноезлэн гадяз бышкалтӥз. Воргоронъёсты люкизы: огзэ келязы больницае, мукетсэ - милицие. Кык нылпиен пиосмуртэ ма меда таӵе вамыше кыскиз: тулыс мылкыд-а яке чебер нылкышно-а? Зэмзэ ке верано, валэктонэз одӥг: шузимытозь юон, адямилыктэ ыштон. Воргоронъёсмы, йыразы картуз ке но нулло, кемалась асьсэлэсь пиосмурт сямзэс ыштӥзы ни кадь. Сотэк-а одӥг нылмурт борды куинь кузя кутско? Озьыен, огназы кышкало. Воткинскысь сыӵе макеос, куиньназы ик суд улэ сюрылэмъёс, эриктэмазы 19 аресъем нылэз. Асьсэды кужмысь ке но яратытэмзы потӥз, вылды, та юлтошъёслэн. Ю. Байбеков. Геройёс - асьме вӧзын УЛОН КЕСЭГЪЁС - ЛЯКИЁ ШОБЫР Очерк Гожтоно герое - Быдӟым ож тылӝу пыр потэм, вань улонзэ калыклэсь тазалыксэ утён удысэн герӟам мурт. Со Шаркан районысь Вуж Пашур гуртысь огшоры удмурт крестьян семьяын вордӥськем но будэм пи - Николай Яковлевич Никитин. Азькыл интые Гажано лыдӟисьёсмы, син азяды пуктэ ай пичиесь кесэгъёслэсь-юдэсъёслэсь вурем лякиё шобырез. Кыӵе со чебер адӟиське. Аспӧртэм кылдытэм пужыос огъя синмаськымон бадӟым суред кылдыто. Кибашлы муртлэн уженыз данъяськиськод, шумпотӥськод, вожъяськиськод. Со выллемгес ик мылкыд кылдэ, Николай Яковлевичлэсь 70 арлэсь кема улон сюрессэ (73 аресэз тырмоз туэ 23-тӥ июле) син азе пуктыса, улон кесэгъёсты, лякиё шобыре музэн, ваньзэ огинэ валчеяськод ке. Та ӝужыт, восьтэт мугоро, пужмертэм йырсиё, котьку каньыл мылкыдо, адями шоры капчи вазиськись ужысь но ожысь ветеран сярысь мыным гожтыны каньыл. Сое мон пинал дырысеным тодӥсько, Шаркан районысь Малый Казес (Вортча починка) гуртамы со "милям доктормы", "Яколич", самой гажано, нимо-дано адями вал. Кусыпъёсмес али но ӧм ыштэ, Ижевскын одӥг урамын улӥськом, коркаосмес но ульча гинэ висъя. Мукет ласянь - секыт. Быгато-а та синмаськымон адями сярысь газет бамын потӥсь материалын (книга но гожтыны ӟеч луысал) кулэезъя возьматыны? Кыӵе ке кылын вӧсь карыны уг шедьты-а войнаын сӧсыр муртлэсь сюлэмзэ? Адямие потон сюрес - Я, пие, школадэ быдтӥд, азьланяз кин луыны малпаськод? - юа одӥг пол Яков Александрович Коляезлэсь. Пумитаз ваземзэ ӧз возьма, ужын сюрмем киоссэ пиезлэн пельпум вылаз лэзиз но ӵогыса кадь куштӥз: - Одно ик дышетӥсе мын. Йырад кеньыред тырмыт, шумпотӥсько тон понна. Документъёстэ дася но матысь дыре Бӧтё Коляен (Чазов Николай) сюрес вылэ потоды. Со тыныд ямщик интыын луоз. Бодьялан педучилище вань, азьло отчы пыралэ, ӧз ке пӧрмы, Иже шонтоды. Вераны кулэ, семьязы бадӟым вал. Тямыс пиналъёс пӧлысь куинез пичиысен кулылӥзы. Коля бадӟымез пизы вал бере, гурт котырын но, колхозын но уж тырмылӥз. Пиналъёсты семьяын эркияса ӧз будэтэ. Я. А. Никитин нырысьёсыз пӧлын пыриз колхозэ, ужаз старшой конюх луыса, бригадаен но кивалтӥз, председателе но бырйылӥзы. - Ӝыт куспын кут кута но бызьылы, кӧня мылыд потэ,- ӝотрак вераз одӥг пол, пиезлэн эшъёсыныз ӵош кырын бызьылыны дасяськемзэ шӧдыса. - Мон кут кутатозь, уйшор вуэ ини но кытчы-о потод на,- пальпотэ али мӧйы воргорон.- Улон ачиз ужлы дышетӥз. Вакытъёс секытэсь вал. Гужем ке вуэ, колхозын ужаськом. Шеп октонын ик вожмаськыса бызьылӥськом вал. Кызьы-о, пе, сотэк. Ӟеч ужаммы понна быдэн одӥг кампет сёто вал ук. Кыӵе ческыт потылӥз со милемлы. Тау карисько тятялэн сыӵе ӝот-ӝот луэмезлы, гуртын но, колхозын но зэмос кузё луэмезлы. Суронысь сизьым классъем школае гуртысьтымы нырысь-валысь 10 кузя ке ветлӥськомы вал, ваньзы ӝыныё кошкылӥзы. Нош мыным шуд усиз сое йылпумъяны. Азьланьын дышетскон сярысь но тятя кылпум поттылӥз ай эшшо. Атаезлэсь верамзэ пеляз ке но понӥз, Колялэн сюлэм пирсэкъя. Ассэ со адямиосты эмъясь интыын адӟе. Тани сузэр-вынъёсыз кулӥзы, гурт калык уноез висе, трахома адямиосыз сукыр кельтэ, пӧртэм палась висёнъёс турнаса кадь кушто. Сюрес вылэ ӵош потэм мӧйы эшезлы ас сюлэм висёнзэ усьтытэк ӧз чида. - Докторе мын, Коли, докторе, адямие потод,- меӵак вераз пияшлы воргорон. - Нош кызьы тятялы вералом, со тодоз ук, дышетӥсе ӧй мыны шуыса,- кышкатскиз пинал пи. - Эн сюлмаськы, экее, отчыозь мар ке но малпалом,- буйгатӥз соиз. Валзэс Якшур-Бодья пала ик кожытӥзы. Педучилищее вуыса, пушказ пыремъяськиз ик Коля. Кема сылӥз абдраса, мар, пе, кароно, кельтоно-а, ӧвӧл-а документъёсты? Та дырозь со мумиз-бубизлэн "ымазы учкыса" улӥз, пумит номыр ӧз лэсьтылы. Нош туннэ тани Коля ас сюлэмызлэсь кылзӥськиз - сюрес вуттӥз Ижевскысь Свобода урамысь медучилищее. Ӟуч сямен шенгыль-пенгыль вераськыса, аслаз кутам кутэныз, мумизлэн куэм но сьӧдмам дэра штаниеныз но дэременыз восалэс ымныро, восьтэт мугоро, чиль- чилясь сьӧд йырсиё пияш аслэсьтыз дышетскыны мылкыд каремзэ вераз, документъёссэ кельтӥз. Таӵе лушкем ужзэс Ижевске ветлэмъёс нырысь-валысь ӧз ке но шараялэ, дышетскыны кутэмзы сярысь бумага вуэм бере, ваньмыз кыре потӥз. Нош берлань чигнаны бер вал ини. Озьы война кутскон аре Николай Никитин медучилищеысь студент луиз. Гудыри но война Гудыри но война. Война но гудыри. Та кык кылъёс Николай Яковлевичлы одӥг кадь кышкыт но кӧшкемыт валатон сёто. Пичи дыръям, шуэ, туж кышкасько вал гудырилэсь, солэсь гулбече ватскылӥ. Ваньмыз потэм одӥг учыр бордысен. Август. Пичи Коли сузэреныз мумизлэн аран удысаз. Нылкышно сокем дыртэ, нылпиоссэ чакланы но дырыз ӧвӧл. Кызьы ке шуак выллане учкем но, кыдёкын сьӧд пилемъёс люкасько. Анай сюлэм шӧдӥз: юн зороз, нылпиос котмозы, кынмозы. - Нуныкае,- лякытэн вазиз Мария Николаевна пиез шоры,- Лизаез ныпъя но ӝоггес гуртэ бызь. Зорлэсь азьло вуоды на, дыр. Мыным туннэ та аран удысме быдтыны кулэ. - Сузэрме ӟыгыртӥ но бызисько. Жадемме но уг валаськы. Собере шӧдтэк шорысь югак луиз - чилектэмез ӧй вала - но туж юн гудыртӥз. Отӥяз мар луиз монэн, уг ни тодӥськы. Гуртэ бызись пинал малы ке выльысь мамалэн удыс дураз вуиськем. Ачим, пе, копак юг-юг тӧдьы, сузэре киосыным кискачен кадь юн ӟыгыртэмын. Дас тямыс арес но тырмымтэ студентэз кыкетӥ курсысен 1943-тӥ арын январь толэзе Омскысь пулемётной училищее басьто. Шаермы вадьсы кышкытэсь сьӧд пилемъёслэн возъяськемзылы, кӧшкемыт чилекъям-гудыръямлы, пуля зорен ваньзэ ӵушкаса-сутыса быдтэмлы пумыз но, йылыз но ӧвӧл угось. Эрикмес утьыны солдатъёс кулэ. Вить толэзь дышетэмзы бере, Николай Никитин шеде Карелие - Северной фронтэ. - Мон кадь ик мыйыктэмесь солдатъёс одӥг вакытэ трос вуимы. Мон асьме палась ик Петыргуртысь эшеным Шкляев Женяен ӵош кемдӥ. Выль пополнение вуиз шуыса, немецъёслы разведка-а ивортӥз, кыӵе ке мукет муг-а вал - одӥг ӝыт фрицъёс самолётысен тырттэм бекчеосты куяны кутскизы. Соос сыӵе зол пушто - оло, гудырилэсь но юн шуккиське. Пичи дырысьтым со кӧшкемыт юн кылӥськем гудыри куара но бекче пуштылэмъёс йырам огинэ сураськизы. "Мама!" - кеськемме но ӧй шӧды, огдырлы, оло, йырсазьме но ыштӥ. Женя, шуисько, оло, бырон дырмы вуиз, лэся. Солэн но синвуосыз потӥллям. Шӧдӥсько, кинъёс ке, пыдтӥмы кыскыса, окопе нюжтӥзы. Бекчеосты куямзы бере, самолётысен туж улӥетӥ вистэм-вожтэм ыбылонъёс кутскизы. Та нырысетӥ ожмаськонын ик кӧняез выль вуэмъёс пыраклы ож лудэ кылизы. Озьы кутскиз Николай Никитинлэн бекчеос гудыръянэн, пуля зорен нырысетӥез ожмаськонэз. Нош соос азьланьын пумтэм-йылтэм вал. Нырысетӥ Белорусской фронтын одӥгаз артиллерийской полкын со приборист-электрик вал. Но тани одӥг ожмаськон дыръя 1944-тӥ арын октябрь толэзе артиллерист секыт сӧсырмыны шедиз, соку ик контузить но каремын вал, осколок йыраз йӧтэм. - Эшъёсылэн верамзыя, сопал дуннеысь, пе, улӟытӥмы ини. Копак сюй пушкын вылӥськем. Пыдтӥм кыскыса поттӥллям,- со вакытэз син азяз пуктыса, лэся, котьмае чидам-адӟем воргоронлэн бамъёсыз вылтӥ синвуосыз питырскизы. Госпитальын вить толэзь ӵоже эмъяськемез бере, ас частяз ик куриськиз. Солы оскизы санитарной ужез. Медицинской службаысь старшой инструктор кӧня меда солдатъёслэсь улонзэс утиз война ӵоже?! Вал-а кышкан? Вал. Но со сярысь солдат ӧз малпаськылы. - Тыбыр вылад сӧсыр мурт ке, солы ӝоггес юрттэт сётон сярысь сюлмаськиськод. Аслыд ачид шуиськод: "Азьлань! Со тынад калык азьын, Родина азьын долгед!" - тазьы огшоры валэктэ кышкыт ож пыр потэм солдат. Сьӧсь убиръёслэн асьме вылэ ожалскемзы, эрико музъеммес кырсь сапегъёсынызы лёганы кутскемзы дырысен Быдӟым Вормон нуналозь ньыль ар пала кыстӥськиз. Сяськаясь тулыс - 9-тӥ Май - шаермылы гинэ ӧвӧл, трос мукет кунъёслы но эрик ваиз, секыт зӥбетлэсь мозмытӥз. Со дыр куспын уно миллион калык быриз, трос вир кисьтӥськиз. Фашистъёсты асьме шаерысь тузыса, Николай Никитин Кенигсберг дорозь вуиз. Война йылпумъяськымтэ ке но вал, гвардейской артиллерийской полк 1945-тӥ арын апрель толэзе кошкиз ини шунды ӝужан пала. Нош август толэзе Южной Сахалинэз Японилэсь мозмытонэ пыриськиз. Тойозора (табере Южносахалинск) город понна ожмаськонын Н. Никитин нош ик сӧсырмыны шедиз. Старшой лейтенант дор палаз вуиз ини 1948 арын гинэ. - Сомында дыр ӵоже нуналлы быдэ сямен кулон но улон вискын улӥды. Луло кылёндылы осконды вал-а? - юасько. - Котькыӵе дыръёс вал. Нош мон ялан мамаме тодам вайылӥ, малы ке но весь сое син азям пуктылӥ. Мыным со штани кисыям кирос но гур сюй вурӟыса келям. Гур сюйзэ валаса ӧй вутты, нош киросэз ялан бордам нуллӥ. Пыласькыку кылиськоно луэ ке, сое ымам понӥсько вал. Медаз шӧдэ-адӟе, пӧй. Сыӵеен вырисьёсты умоен уг учко вал со вакытэ. Али малпамея, со мынам утисе вал, лэся. Бертэме бере мон со киросэз мамалы аслыз берыктӥ, нош со кулон азяз нош ик милемлы вайыса кельтӥз. "Милям доктормы" Кыӵе шумпотӥз гурт калык но со котырын улӥсьёс, дорамы фельдшерско-акушерской пункт усьтэмзы бере. Солы заведующие юнматӥзы война бере выльысь азьло дышетскыны пырем медучилищезэ ик йылпумъям но кӧня ке аръёссэ Нижний Казесын ужам егит специалистэз - Николай Яковлевич Никитинэз. Пенсие потытозяз татын тыршиз. Калык сое, пичиез но, бадӟымез но, "милям доктормы" шуэ вал, медпунктэ мынонзэс "яколиче" ветлоно вал, шуо. Аслыз кивоштӥсь будэтӥз. Таӵееныз тросэз-а меда специалистъёс ушъяськыны быгатозы? Ачиз ик дэмламъя, гуртысьтымы Лидия Ивановна Перевозчикова (кузпалызлэн сузэрез) Ижевскысь медучилищеез йылпумъяз, кема аръёс ӵоже ӵош ужазы. Кызьы Николай Яковлевичлы оско вал, али но гуртоос Лидия Ивановна доры дырто. Оско, со вань луонозэ но луонтэмзэ лэсьтоз озьы, кызьы вал, Н. Я. Никитин ужаку. Гурт калык но со котырын улӥсьёс понна "доктормы" югыт тыл кадь вал шуи ке, уг янгыша. Ӧйтӧд, ку гинэ меда та коркан изьылӥзы. Кӧлонзэс кӧня пол милям 8 нылпиен семьямы ик ӝыныё карылӥз. Сузэр-вынъёсы висьыку но, атае уродмылыку, юрттэт курыса но мон гинэ, оло, вить-куать пол уйшор уин Николай Яковлевичез ӧтёно луылӥ. Тани 5 аресъем Надя сузэрмы уин юн ӟырдэктӥз. - Дыдые,- сайкатэ монэ анае,- Яколичез ӧтёд-а, мар-а. Надимы юн ӟырдэктэмын, шокамез ик уг луы ни. Ӵукнаозь возьманы кышкасько. Фонарь кут, со чуланын. Та сӥзьыл куазе, коть синмад донгы, номыр уг адӟиськы, - пумен монэ индылэ сюлмаськись мемие.- Ферма дортӥ мын. Отӥ гидъёс котырын коть тылъёс пишто. Выж вамен чакласа пот, вуэ эн усьы, мар-а. - Кинлы, мар луиз? - Николай Яковлевичлэсь куаразэ кылӥсько. Шӧдӥсько, пумен дӥсяське ини. Таӵелы семья дышемын. Бӧрдонэ ым пумам, шок-пуль шокасько, иськемлэсь ятыр сюресэз бызьыса сямен ортчи. - Люси, тон-а? - куараме валаса вазе пумитам. Атаеным эшъясько вал. Фронтовикъёслы вань мар сярысь вераськыны.- Буйгатскы, али ик юрттом сузэредлы, ӵуказе ик дыдыды номыр луымтэ кадь бызьылыны кутскоз. Сыӵе шунытэсь, оскытӥсь, буйгатӥсь кылъёс мылкыдэз кыӵе каньыл каро. Зэмен но оскиськод: ваньмыз умой луоз. Участоказ 1500 пала улӥсьёс ке пыро вал, кӧня сюлмаськонъёсыз, изьымтэ уйёсыз пырпотэмын фельдшер (ужамезъя мон сое врач но шуысал, тодон-валанэз тырмыт вал) гуртамы ужатозяз гинэ. Тужгес бадӟым инты висъялляз со санитарно-просветительной ужлы. Бадӟым опытэн специалист участокысьтыз вань семьяослэсь улон-вылонзэс, кулэяськонъёссэс ӟеч тодылӥз. Фельдшерлэсь куронзэ, дэмланъёссэ котькудӥз умой быдэсъяны сюлмаськылӥз. Медицинской ужасьёс трос тыршемен, шӧдскымон ӝутскиз производственной культура но. Нош пиналъёс нырысетӥ классысен ик санитарной культураен тодматско ини. Со вакытэ Красной Крестлэн школаын первичной организациез кылдытэмын вал. Ӟеч радъязы донорской ужез. Дасо аръёсын нылпиос пӧлын кулон учыръёс ӧз пумиськылэ. Нош таиз понна тужгес но зол кыл кутоно луылӥзы медикъёс. Скарлатина, дифтерия но мукет со выллем палась висёнъёс гуртамы кемалась выжытэм быдтэмын. Ма, ваньзэ вераса быдтод- а фельдшерлэсь ӟеч ужъёссэ. Вакчияк вераса, гурт калыклэсь тазалыксэ утёнын бадӟымесь азинсконъёсыз понна Н. Я. Никитин трос наградаос басьтӥз. Соос пӧлын Удмурт АССР-ысь Верховной Советлэн Президиумезлэн Данъян грамотаез, "За трудовую доблесть" медаль. 1970-тӥ аре эшшо одӥг - юбилейной (Ленинской) медаль ватсаськиз на. 1960-тӥ арын Удмуртиысь ньыль делегат пӧлын Н. Я. Никитин но вал медицинской ужасьёслэн Всесоюзной совещаниязы. Солэн нимыз озьы ик пыртэмын Шаркан районысь медицинской ужасьёслэн Данъян книгаязы. Ваньмыз со вера, фельдшерлэсь ас удысаз тодыса-валаса, быгатыса тыршемзэ. "Горд атасэз" кортнан Кык орденэз но 18 медалез пӧлысь Николай Яковлевич нимаз висъяса вераз на "За отвагу на пожаре" медалез сярысь. Мукетыз, оло, со интыын мар карыны ӟудысал, нош со тылэн гомась корка пушкы кышкатэк пыриз. - Та семьяын пичи пиналъёс вань шуыса тодӥсько вал,- маде Николай Яковлевич.- Нош гуртын озьыгес луэ. Пиналъёсты ӵогаса кельто но асьсэос уже мыно. Номыр сярысь малпаны дыр ӧй вал ни, валме ӝогак думи но (нуназе ёрсын мукет гуртысь ужме быдтыса бертӥсько вал) укноез сӧрыса корка пыри. Койка улын бӧрдэм куараос кылӥсько. Кык пиналэз кутӥ но поттӥ, вуэм калыклы вераны быгатӥ на, Шарканысь пожарное но мед ивортозы на шуыса. Койкаын кылльымон ӧй сутскы ке но, кин ке но "Сельской жизнь" газетэ но та учыр сярысь ивортыны вуэм. Газетын потэм бере, уно гожтэтъёс вуылӥзы палэнысь ӵош ожмаськем эшъёсылэсь но. Озьы Николай Яковлевич кык нылпилэсь улонзэс утиз, "горд атасэз" лапкатыны дыраз юрттэт вуиз. Тылпу потэм вылэм анайлэн янгышеныз. Пӧсь гур вӧзы етӥн куро куасьтыны ошем вылэм кышномурт. Партилэн ветеранэз Коммунистъёс шоры али пӧртэм синмын учко. Соос вылэ пож ву но киськаны уг кӧберало. Нош Николай Яковлевич данъяське партиын аслаз улэм аръёсыныз. Мон, пе, партилэн ветеранэз но луисько. Али партилэн радъёсаз ӧвӧл ке но ни, партбилетме утисько, сюлэмыным мон соосын артэ. Мон сое валасько. Самой тылэ пырон кадь, кын корт куртчон кадь аръёсыз партиен, солэн сюлмаськонъёсыныз герӟаськемын вал угось. Со понна пичи но уждун ӧз басьтылы, солы оскем общественной ужез быдэсъяз. Дас кык ар ӵоже Н. Я. Никитин "Ким" колхозысь (али "Мишкинский" совхоз) партийной организациен кивалтӥз. Со вакытэ колхоз азьмынӥсьёс радын ветлӥз. Колхоз председателен Захар Иванович Широбоковен ӵош "кӧня пуд сылал сиизы" меда. Одӥг кадь кыл кутоно луо вал угось калык, район азьын кызьы хозяйстволэн кивалтӥсез, озьы ик парткомлэн секретарез но. "Ким" колхоз соку ёросын гинэ ӧвӧл, республикаын но ӟеч ужъёсыныз тодмо улӥз. Тӥни озьы, ортчем аръёсты ваньзэ одӥг кабе пыртыны, одӥг мертэтэн мертаны уг луы, ӟеч тысез уродэныз ӵош юнме куштыны уг яра. Кӧня кужымзэ понӥз, калык пӧлын валэктон уж нуиз вордӥськем кылын газет- журналъёсыз вӧлдон вакытъёсы но. "Удмурт дуннелэн" матысь эшез куатьтонэтӥ аръёсы ик та газетэз (соку "Советской Удмуртия") котькуд семья доры сямен вӧлмытыны юрттӥз. Усто пропагандист вала вал угось ас кылыныд верам кыллэсь кужымзэ. Со дырысен гуртамы та газет арысь аре тросаз хозяйствоосы вуэ. Та ужез понна "Советской Удмуртия" аслэсьтыз юрттӥсьсэ кык пол нимысьтыз грамотаен но дуно кузьымъёсын шумпоттэ. Синмаськымон артист луэмзэ но пусйытэк кельтэме уг поты. Кӧня спектакльёс шудэмын та котькытчы мыло-кыдо вутскись воргоронлэн кивалтэмез улсын. Гуртысь вань интеллигенциез ас котыраз бинялтыны быгатэ вал угось со. Со вакытэз али ке но гуртоос ӵемысь тодазы вайыло. Чебер, веськрес мугоро воргоронлы котьку оско вал пьесаысь главной геройлэсь рользэ. Пушъетъёс Пукиськом Н. Я. Никитинлэн одӥг комнатаен улон интыяз. Городмылэн мэрез А. И. Салтыков ветеранлы, ожын сӧсырмем муртлы та квартираын улыны ачиз ордер сётӥз. Быдӟым Вормонлы 50 ар тырмонэн валче. Макем бадӟым шумпотон вал со кузпалъёс Никитинъёс понна. Пенсие потэмзы бере (Николай Яковлевич 55 аресозь ужаз, тазалыкез лябен пенсие вазьгес потоно луиз) пиналъёссылы матэгес - Ижевске лыктӥзы, Алязылэсь но Валязылэсь нылпиоссэс чаклано вал. Озьы кузпалъёс 1985-тӥ аре городэ вуизы. Дасо арзэ нылъёссы бордын возькизы. Нош выль квартираязы ӵошен улыны кема ӧз кылды: 45 ар ӵоже валче, огкылысь, тупаса улэм муртъёсты кулон эзель пыраклы люкиз. Математикаен яратоно дышетӥсьмылы, Раиса Ивановна Никитиналы, арня гинэ 70 аресозь улыны ӧз кылды. Шудтэм учыр (ачиз-а усиз, кин ке йыраз-а шуккиз, табере нокин но вераны уз тоды ни, милициын ужасьёслэн та ужез йылаз-пумаз вуттыны кынарзы ӧз тырмы) чебер улонзэ куспетӥ кариз. Озьы Николай Яковлевичлы кыкетӥ тулыссэ огназ пумитано луэ ни. Бен, меӵак озьы шуыны умойтэм луоз. Кык нылъёссылэн но Коля нимо ик пизылэн быдэн кык нылъёссы но пиоссы будо. Шумпотэ атай, пиез но аслаз лёгам сюресъёсыз вылтӥ ветлӥз шуыса. Николай Николаевич Никитин Яролславльысь командной зенитно-ракетной училищеез йылпумъяз. Офицер-связист службазэ ортчытӥз Дальний Востокын. Куинь ар ӵоже семьяеныз Лаосын улӥз. Татын соку огыр-бугыр вал. Удмурт пилы отын военной советниклэсь ужзэ оскизы. Таӵеез тросэзлы ик военной специалистъёслы дан уг усьы. Кузпалэз - немка. Сталин косэмъя, Волга дурысь Сибире келям немецъёслэн нылзы. - Коляелэсь удмурт луэмзэ ӧй но валалля,- серекъяса вера Катя, загсысен гинэ, пе, шараяськиз, оло, ӧй но бызьысал. - Али таӵе кузпалэлы тау гинэ карисько. Отставкае потэм капитан али "Буммашын" ужа, Катя - экономист. Лаосын улэм, одӥг арзэ гуртын улыса удмуртомем Наташа нылзы 10-тӥ классэ ветлэ, тодон-валанъёссэ пумен будэтэ Ижевскысь государственной технической университетын. Пичиезлы - Анялы - куать арес ай. Нылъёсызлэн но пиналъёсынызы данъяське песятай. Валиелэн Сашаез, пе, песянаез выжые, лэся, мынэм, 5-тӥ классын дышетскись маке математикаен пӧртэм олимпиадаосы пыриське. Шумпотэ Аляезлэн Сергей пиез понна но. Со али армиын. Радиотелеграфист Китай кунгож дурын сак уте асьме шаермес. Тазьы котькудӥз сярысь песятай мар ке но умойзэ вераны шедьтэ. Озьы угось, ӟеч выжылэн пушъетъёсыз но ӟечесь, адӟем карымонэсь. Николай Яковлевич али чидатэк возьма шуныт луэмез. Укно вылаз будэтэм помидор удъёссэ со сад-бакчаязы нуоз, емышъёслэсь быгыльскемзэс возьмалоз, нылпиосынызы ӵош выль вордскем нуналлы шумпотоз. Мазэ ватонэз, пумен ӧжыт но ӧжыт кылё фронтэ ветлэмъёс. Азьло "Ким" колхозысь но ньыльдоно мурт бертэмъёс пӧлысь куинез сяна ӧвӧл ни. Ветеран аръёслы уг сётӥськы. Гуртын сямен ик, кызьы шуо, со уж пӧлы выемын. Ялан со калык пӧлын, школаосы вуылэ, медучилищеысь (али колледж) студентъёсын пумиськылэ, аслаз ортчем сюресэныз, Советской Союзысь Героенымы Ф. Пушинаен тодматэ (ӵош дышетскиллям, Н. Никитин нырысетӥ курсын, Ф. Пушина куинетӥын вылэм). Гожтоно героелэн вань улон сюресэныз данъяськисько но та шундыё тулыс нуналэ музозь йыбырттӥсько дунне вылын Н. Я. Никитин кадь синмаськымон адямиосын, зэмос ӧрӟиосын эрикмы утемын, йыр вадьсамы чагыр инбам пиштэ шуыса. Людмила ХРУЛЕВА, Удмурт Республикаысь культура удысысь сӥё-дано ужась. Туспуктэмез В. КАМАШЕВЛЭН. Спорт Баскетбол Ӵуказеысен кутскыса 10-тӥ маёзь Ижевскын ортчоз баскетболэн шудонъя международной фестиваль. Отчы пырисько 1986-тӥ-1987-тӥ аръёсы вордскем пиос. Пусйыны кулэ, таӵе бадӟым пумиськон дорамы нырысьсэ ортче. Сӥземын Быдӟым Вормон нуналлы. Ӵошатсконъёсы лыктэмын Россилэн пӧртэм городъёсысьтыз командаос. Фестивале нырысьсэ пыриськыны мылкыд каризы Каунас городысь (Литва) пинал баскетболистъёс. Шудонъёс мынозы "Металлург" культурно-спортивной комплексын. Кутскозы 7 мае 12 часын нуназе. Нош 8-10 мае спортъя "Ишмаш" дворецын ортчоз Россиысь пинал уясьёслэн "Весёлый дельфин" ӵошатсконзы. Л. Дмитриева. Пишто, ворекъяло... 26-тӥ оштолэзе нуназе дас кык часын Удмурт кун филармонилэн юртаз пичи пиналъёс понна концерт ортчиз. Сое радъяны юрттӥзы Удмурт телевидение но Удмурт радио, Егитъёсын ужанъя кун комитет, удмурт егитъёслэн "Шунды" огазеяськонзы, Удмурт Элькунысь Калыкез дышетонъя министерство но Нылпи утёнъя фонд. Пичи Пурга, Завьял, Воткинск, Ува, Яр, Вавож ёросъёсысь но Иж карысь удмурт нылъёс но пиос асьсэлэсь усто быгатонлыкъёссэс возьматӥзы. Концертэз нуизы Удмурт радиоысь журналист Надежда Степанова (Надя апай) но Россиысь дано артист, Удмурт Элькунысь калык артист Александр Перевощиков. Залэ трос калык люкаськылӥз. Тужгес но уно вал пичиос но анай-атайёс. Ульчаын сылӥзы автобусъёс. Озьы ке но, ваньмыз, лыктыны малпасьёсыз, Иж каре вуыны ӧз быгатэ. Сюлэмез буйгатӥсь уно удмурт кырӟанъёс чузъяськизы та нуналэ. Иж карысь нылъёс но пиос туж чебер эктыны быгато вылэм. Синъёс ик мальдо, соослэн капчи выросъёссы, яркытэсь дӥсьёссы шоры учкыса. Кылбуръёс но лыдӟыны ярато пиналъёс. Балалайкаен, домбраен, баянэн, крезен шудон но покчиосты тунсыкъяськытэ. Пичи Пурга ёросысь Андрей Смагин маскаръяськыны но, кырӟаны но усто вылэм. "Сцена вылын уг кышкаськы, - шуэ Андрей. - Кырӟамъя кырӟаме потэ". Паймод но бырод мусо нылоклы Ирина Яковлевалы. Мар но карыны уг быгаты со: чебер кырӟаны, пересь муртлэсь рользэ но шудыны. Сцена вылын ассэ возьыны пӧрмытэменыз, учкисьёсты паймытӥз. Пичи Пурга ёросысь ик Баграш-Бигра гуртысь Валерий Чибышев серекъятӥз быдэс залэз. Кыкетӥ Ушаковлы кельше, ява. Пичи гинэ нылаш, Ольга Кабышева но, юн жингрес куараеныз воксё абдратӥз. Соосты бадӟым кузьым возьмаз - магнитофон. Таӵе ик дуно арбери утӥзы Воткинскысь крезьгуръя оркестр (кивалтэ Владимир Корепанов), Ува ёросысь "Вуюись" ансамбль (кивалтэ Виктор Шиляев), Завьял ёросысь Ожмос гуртысь Юлия Павловна Байсарова но солэн пиналъёсыз, Пичи Пургалась "Кизилиос" (кивалтэ Павел Кириллов), Иж карысь "Настроение" ансамбль (кивалтэ Ольга Синкевич). Тазьы сюлмаськизы шаерысьтымы Культурая министерство но Егитъёсын ужанъя кун комитет. "Шунды" огазеяськон но та ужрадлэсь палэнэ ӧз кыльы. Соос но нылпиосыз кузьымъёсын шумпоттӥзы. Со сяна, Фома коӵыш (Александр Перевощиков) учкисьёсын конкурсъёс но ортчытъяз. Кылсярысь, кин усто быгатоз тылобурдо сямен шуланы (залын шулдыр куараос вӧлмизы). Пӧрмытӥсьёслы ГТРК ручкаос кузьмаз. Собере чузъяськиз гур. Тодоно вал, кыӵе веран соин кутске. Учкисьёс но кырӟась-эктӥсь пиналъёс шулдыр мылкыдо кылизы. Эшшо шулдыръяськысалзы на, оло. Сцена вылын но эктӥзы-кырӟазы на. Учкисько но паймисько мон туала покчиослы: кыӵе шаплыесь, пиштӥсесь, туж тыршисесь но мыло-кыдоесь. Соослы инкуазь туж бадӟымесь быгатонлыкъёс кузьмам. Удмуртлэн возьдаськонэз но, оло, уг шӧдӥськы ни. Ваньзы ик соос - вуоно кизилиос. Азьланьын но дунне тазьы ик яркыт мед пиштоз! Ӟеч сюрес тӥледлы, пиналъёс! Лариса Орехова, Удмурт кун университетын дышетскись. ДЫШЕТСКИЗ ЯПОНИЫН Кызьы ивортӥм ни вал, шаерысьтымы 53 специалист тодон-валанзэ будэтоз кунгож сьӧрысь азинскем странаосын. Удмуртиысь нырысь ик Японие ветлӥз "Ижнефтемаш" АО- ысь валтӥсь бухгалтер Павел Данилов. Нырысь ик сое кутӥзы Японилэн Москваысь посольствояз. Со пумиськонэ ветлӥз Борис Немцов но. - Тодон-валанме будэтӥ Япониысь дышетскон центрын,- шуиз Павел Данилов.- Улӥм Токиоын. Шутэтскон нуналъёсмы чик ӧй вал, шуыны луоз. Суббота-арняосы предприятиосы но культура учреждениосы нуллӥзы. Татын туж бадӟым инты висъяло ужась адямилы, солэсь быгатонлыксэ ӝутонлы. Егит специалистъёслы уж сёто, соосты котыр ласянь эскерыса. Нырысь ик лыдэ басьто визьзэ, малпаськыны быгатэмзэ. Котькытын зол радъямын ваньбур поттон. Предприятие пайдаё уг ужа ке, сое туж ӝог банкрот каро. Нокытын эскерисьёс-контролёръёс ӧвӧл. Рабочийёс асьсэос ог-огзэс чаклало. Г. ВАСИЛЬЕВ. Юбилеен ӟечкылазы 1918-тӥ арын 4-тӥ мае Калык комиссаръёслэн Советэнызы Приволжьеын военной округ кылдытэмын вал. Солэн ёзъёсыз Россилэн 14 улосаз интыяськемын. Вань асьме шаерын но. Туэ военной округлы 80 ар тырме. Ожгарчиосыз ӟечкыланы ветлӥзы Правительстволэн Тӧроез Павел Вершинин, республикаысьтымы военной комиссар Геннадий Барсков, "УНГС - "Город" ОАО-лэн генеральной директорез, Кун Кенешлэн депутатэз Сергей Чикуров, Кышкытлыклэсь утиськонъя кенешлэн секретарез Александр Ярославцев. Удмурт Республикаысь Правительстволэн пресс-центрез. Волковлэн докладэз - 3 Кун ёзъёслэн ужысьтызы одӥгез бадӟым люкет - социально-экономической азинсконэз кун ласянь радъян. Нырысь-валысь чакламъя, 1997 арын зэмос коньдон доходъёслэн быдӟалазы, ортчем вакытэн ӵошатыса, 103 процент луиз. Адямилы быдэ лыдъяса, 1997 арын толэзьлы быдэ коньдон доходъёс 680 сюрс манет лыдъяськизы. Шоро-куспо уждун будӥз, солэн зэмос быдӟалаез 6 процентлы тросгес луиз. 1997 арын январе-декабре коньдон доходлэн но улыны пичи уждунлэн тупамтэзы, азьвыл арен ӵошатыса, 13 процентлы будӥз. Соин ӵош республикалэн коньдон ласянь шуг-секытъёсыз ужаса улӥсьёслэн доходъёсынызы герӟаськем ужпумъёсты кулэезъя быдэстыны уг сёто. Уждунэз тырон ӝега. Калыклэн улон-вылонысьтыз мукет лэчыт ужпумъёс но быдэсмытэк кылё, кылсярысь, ваньбурзыя но доходъёссылэн быдӟалазыя ужаса улӥсьёс ог-огзылэсь пумен золгес висъяськыны кутско. Кема дыр ӵоже ини уг буды бюджет чотын тыршисьёслэн нырысетӥ разрядзылэн ставкаез. Жаляса верано, ставкаосты будэтыны чаклась закон Россиын та дырозь кутэмын ӧвӧл на. Ужаса улӥсьёс лекъясько нылпи пособиосты тыронэз, льготаосын эмъюмъёс сётонэз ӝегатэм но семьялэн бюджетэз вылын шӧдӥськись мукет социальной ужпумъёс пумысен. Туала вакытэ кылдӥз сыӵе югдур, куке ваньмыз сямен ужаса улӥсьёс компенсациос, льготаос, дотациос басьто. Таӵе социальной политика кема улыны уз быгаты, дыр вуиз ини калыкез улон-вылонын утён удысэз выльдыны, со мед юрттоз тужгес кулэяськись гражданъёслы. Луыны кулэ социальной стандарт, семьяысь адямилы быдэ шоро-куспо доходлэсь пичи лыдпуссэ юнматоно, сое мед тыроз государство, нош ваньмыз кылемез герӟаськемын луыны кулэ продукцилэн ӟечлыкеныз но производстволэн пайда поттыны быгатэменыз. Таӵе механизм котькуд гражданин понна валамон луыны кулэ. Та радлыке выжыны амал чотын, Удмурт Республикаысь Правительство чакла нылпи пособиосты сётонэз семьялэн доходэныз герӟаны но соосты люконъя нимысьтыз черод тупатыны. Та арын валтӥсь ужпум луэ бюджет чотын ужасьёслы уждун дыраз сётон, предприятиосын уждун тырон но ӝеганъёсты палэнтон. Татын котькудӥз ик кыл кутыны кулэ: городъёсысь но ёросъёсысь администрациос - уждунлы 35-50 процентсэ доходъёссэс ыстыны кулэ; предприятилэн кивалтӥсьёсыз - тырмыт но дыраз коньдон тырыны мед быгатозы. Нош Правительство сюлмаське республикалэн бюджетэз чотын ужасьёс сярысь, юнматэм протоколъя дыраз целевой дотациос ыстэ. Правительстволэн одӥгез бадӟым ужпумез али но луэ пенсиосты дыраз тырон. Пумен улонэ пыӵа пенсия тыронъя реформа, солэн пуштросэз таӵе - пенсиосты выль сямен, адямилэсь ужамзэ лыдэ басьтыса лыдъяно-чотано но тыроно. Кун властьлэн но аскивалтонъя ёзъёслэн ужазы бадӟым инты басьтыны кулэ ужъя рынокын югдур. Администрацилэн кивалтӥсезлэн ужез дунъяськыны кулэ соя, кызьы со быдэсъя калыкез уже интыянъя ужпумъёсты. Кылем ар ӵоже ужтэк кылем но лыдэ басьтэм муртъёслэн лыдзы шӧдскымон кулэсмиз. Со дыре ик ужтэк кылён сяме пыӵа ни. Ужтэк кылемъёс вань ужась калыклэн 5,8 процентэз мында лыдъясько. Со, Россиен ӵошатыса, 2 поллы тросгес. Уж утчан уж ӵектонлэсь 28 поллы уногес. 53,2 сюрс муртлы уже интыяськыны юрттэмын, вань вазиськем адямиосты лыдэ басьтоно ке, уже интыяськемъёс 63 процентэз луо. Быдэстэмын ужтэк кылем гражданъёсты огдырлы уже интыянъя программа. Кылдытъямын общественной ужъёсъя интыос, юрттэт сётэмын ужбергатонлы но ас кожазы ужасьёслы. 6,3 сюрс пала ужтэк кылемъёс выль профессилы дышетскыны ыстэмын. 1997 ар ӵоже уно калыкез ужысь мозмытонэз алонъя но дугдытонъя уж мынӥз: уж ӵектӥсьёс ивортӥзы вал 11,5 сюрс муртэз мозмытон сярысь. Дыраз кулэ ужрадъёс ортчытыса, ужтэк кылиз 3,2 сюрс адями. 1998 арын калыкез уже интыяны юрттонъя валтӥсь направлениос чаклало уже интыянлы экономика ласянь юрттонэз но ужаса улӥсьёслэсь ужбергатонъя кичӧлтонъёссэс, со пӧлын: - ужан интыосты утён но выльёссэ кылдытон; - огдырлы ужан интыос кылдытон но общественной ужъёсты радъян; - ужасьёссэс утьыны тыршись кивалтӥсьёслы юрттон; - пичи ужбергатонэз азинтон; - ужась кужымлэсь ӟечлыксэ будэтон, республикаын ужъя рыноклэсь куронъёссэ лыдэ басьтыса, кулэяськонъёсты чаклан но специалистъёсты дасянэз радъян. Экономикаын выль кусыпъёсты азинтонъя ужпумъёслэн социальной барометрзы выллем луэ котькуд гражданинлы улыны но ужаны кун ласянь гарантиос сётон. Тӥ тодӥськоды на, луоз, куинь ар талэсь азьло ми та направленилэсь идеологизэ юнматӥм. Тодады вайыто, солэн пуштросэз нырысь ик герӟаськемын социальной удысъёсын материально- технической кужымез утёнэн но азинскыны выль ресурсъёс люканэн. Та удысын Правительство Удмурт Республикаысь Кун Кенешен валче ужаз, нырысь ик социальной удысъёслэн азинсконзылы стратегиез юнматӥсь нормативно-правовой инъет кылдытонъя. Туннэ вераны луэ ни, кылдытэмын ваньбурен кужым, кудӥз кулонлэсь улӟон тактика бордысь азинскон стратегие выжон сярысь вераськыны луонлык кылдытэ. Кылем арын пусъемын социальной удысысь куд-ог ёзъёслэн ӟеч ужамзы. Соин ӵош Правительство нырысь ик быдэстыны тыршиз бадӟымъёссэ ужпумъёсты, кудъёсыз герӟасько быдэс удысысь югдурен. Азьланьзэ чакласа, нимысьтыз ужан - тазьы ниманы луоз та удысэз. Кылсярысь, тазалыкез утён удысын юнмазы но азинскизы республиканской учреждениос: республикаысь онкологической диспансер; республикаысь клинической кардиологической больница; республикаысь клинической офтальмологической больница, со бордын кылдытэмын близорукостез эмъянъя республиканской центр. 15 миллиард манет тыр ёрос больницаослы эмъянъя но диагностикая туала тӥрлык басьтэмын. Нош 1998-тӥ - 1999-тӥ аръёсы райцентръёс сыӵе тӥрлык 40 миллиард манет тыр (вуж сямен) басьтозы, пусйыны кулэ, та коньдон республикалэн бюджетысьтыз висъямын уз луы. Берло аръёсы республикаын вордскисьёслэн лыдзы нырысьсэ будэ, кулӥсьёслэн лыдзы кулэсме, озьы ик - вож нуныос но ӧжытгес куло. Калыклэн лыдыз но будыны ӧдъяз. Калыкез дышетон удысысь кун стандартъёсты быдэсъяса, Правительство со дыре ик утьыны тыршиз сыӵе направлениосты, кудъёсыз нылпиослы тодон-валан люканы условиос кылдыто, ӵапак со пиналъёс ик азьланьын республикалэн интеллектуальной кужымез луозы. Усточи нылпиос понна школаос, вылӥ уровенен школаос, вуоно педагогъёслэн республиканской классы, профессиональной училище - вуз классъёслэсь лыдзэс будэтон - та выль амалъёс ваньмыз ӧвӧл на. Ӵапак соос визё-буро, быгатӥсь пиналъёслы азинскыны луонлыкъёс кылдыто городын но, гуртын но, но гурт нылпиос понна туж ӧжыт лэсьтэмын ай. Таӵе амаллэсь ӟеч луэмзэ возьматэ тани ма но: пумен тросгес школаосысь дышетскисьёс олимпиадаосын асьсэды умой возьматэмзы понна льготаосын вузъёсы пырон сярысь гожтэтъёс басьто. Озьы школалэн но вузлэн кусыпсы матэктэ, республикаысь калык хозяйство понна специалистъёсты дасянъя кун заказ кылдэ. Шаерамы утемын вылӥ но профессиослы дышетонъя радлык. Рыноклэсь куронъёссэ лыдэ басьтыса, вузъёс но техникумъёс дышетонъя услугаоссэс шӧдскымон будэтӥзы, выль специальностьёс усьтӥзы. Вузъёслэн, техникумъёслэн, Удмурт Республикаысь Правительстволэн кивалтӥсьёссылэн дэмен тыршеменызы, ваньмаз ик 5 вузэ но 15 техникуме федеральной бюджетысь коньдон вуэ, со сяна, коньдон лыктэ на республикалэн бюджетысьтыз но. Наука бадӟым инты басьтыны кутскиз вузъёсын. ИжГТУ-ын но УдГУ-ын кылдытэмын технопаркъёс, вуоно инновационно-технологической центрлэн инъетэз чотын. Прикладной эскеронъёс нуон удысын вузъёслэн вань азинсконъёссыя инвентаризация ортчытэмын, республиканской реестр кылдытэмын. Тужгес устоосыз ужъёс, конкурс пыр поттыса, федеральной научно-технической программаосы ӵектэмын. Азьланезлы бадӟым оскон кылдыто биотехнологияя удысъя, пыӵал тӥрлыкез быдтонъя, машиностроениын технологиосъя, сиён-юон дасянъя, му вӧй поттонъя проектъёс. Туала вакытэ секыт югдуре шедемын егитъёс. Соослы тодон-валан но специальность сётыса, государство туннэ пумозяз быдэстыны уг быгаты уже интыянъя, улонэ нырысетӥ вамышъёс лэсьтыны юрттонъя ужпумъёсты. Пиослы но нылъёслы обществоысь кусыпъёсы пырыны юрттонъя ужпумъёсты быдэстонлы кутскон сётӥз "Удмурт Республикаын егитъёсын ужанъя кун политика сярысь" Закон. Вераны кулэ, ми та процессъёсты радъян понна ӟеч, улонлы тупась радлык кылдытыны быгатӥм, республикаысь городъёсын но ёросъёсын кусып возён амалъёсты чаклам. Быдэ вуымтэосты но егитъёсты улон-вылонын утёнъя структураын 10 госучреждение, нылпиослы но быдэ вуымтэослы юрттонъя 36 социальной служба. Егитъёсын ужанъя кун комитетлэн реестраз - 9 общественной огазеяськон. Озьыен, асьмелэн кужмо организационной инъетмы вань ини, сое ужатоно егитъёслэсь ужпумъёссэс быдэстон понна. Социальной удыслы кун юрттэт сётӥське нырысь ик обществолэсь кулэяськонъёссэ быдэстон понна. Культура удысэз верано ке, вань ужаса улӥсьёс огкадь мед быгатозы культурая узырлыкъёсты уже кутыны, творческой ужлы условиос кылдытоно, егит усточиослы юрттоно но кадръёсъя резерв кылдытоно. Театральной искусстволэн, калык художественной творчестволэн пӧртэм специальностьёссылы огкылъёсъя-контрактъёсъя витьтонлэсь ятыр мурт тодон-валан люка Россиысь дышетскон заведениосын. 1997 арын искусствоосъя школа-интернатлы нимысьтыз юрт ӝутэмын, отын республикалэн ёросъёсысьтыз сюлэсь трос нылпи дышетске, озьы ик Национальной музейлэн комплексэз ужаны кутскиз, азинтӥське "Арсенал" комплексэз тупатъян но выльдон уж. Кужымез тужгес кулэ направлениосы ыстон принцип кутэмын вал физической культурая но спортъя удысын кун политикаез быдэстонын но. Кылем арын утемын нылпи спортъя школаос, отчы ветлӥсьёслэн лыдзы но будӥз. Улонамы юн пыӵазы гурт физкультурной движенилэн сямъёсыз но йылолъёсыз. Профессиональной спортлэн вань удысъёсызлы юрттыны кужыммы ӧз тырмы ке но, ми утьыны быгатӥм сыӵе направлениосты, кудъёсыз азьло но шаерамы кужмоосыз вал: биатлон, куасэн бызьылон, хоккей, футбол. Со ласянь учкыса, кыкетӥ улон басьтӥзы, шуыны луоз, спортъя Йӧ дворец, "Зенит" центральной стадион, биатлонъя комплекс. Нош гурт спортивной ӵошатсконъёслы дасяськыку, райцентръёсын ӵыжак выль спортивной база кылдытӥське. Коньдон ялан уг тырмы ке но, куд-ог ёросъёслэсь социальной азинсконзэс ӝогомытонъя ужпум быдэсъяське (1997 арын пуктэмын 7 выль школа, больницаос, нылпи юрт но изён корпусъёс). Удмурт Республикаысь улосвылъёслэсь пӧртэм сямен азинскемзэс, экономикаын азинсконъёсынызы гинэ ӧвӧл, этнополитической пӧртэмлыкенызы но валэктыны луоз. Татысь котькуд ёрос, город ас сяменыз аспӧртэм. Нациослэн тупаса улонзы, ог-огзылы осконзы но эшъяськонзы - ваньзэ сое асьмеос азинтӥм но юнматӥм. Та ужпумъёсты быдэстонлы сӥземын национальной политика удысысь научной эскеронъёс, этнополитической югдуръя мониторинг. Юн кусыпъёс тупатэмын национально-культурной огазеяськонъёсын, соослы метолдической, юридической но финансовой юрттэт сётэмын. Одӥг кылын вераса, асьмеос басьтӥським Удмурт Республикаын Кун национальной политикая Концепциез быдэстон борды. Кун озьы ик гарантиос сётэ гражданинэз утён ласянь. 1996-тӥ -1998-тӥ аръёсы правопорядокез юнматонъя но экономикаын кышкытлыклэсь утиськонъя республиканской целевой программаез быдэсъян юрттӥз ӟырдам оперативной югдурез сӥятыны. Йыружъёслэн лыдзы 10 сюрс адямилы быдэ 177-ысен 151-озь кулэсмиз. 1,7 процентлы будӥз преступлениосты шараян. Удмуртиысь вылӥ законодательной собраниысь депутатъёс азьын кыл кутыку, мон ӧй малпа югдурез чеберъяса суреданы. Тӥ умой тодӥськоды, кыӵе ужпумхъёсын улэ социальной удыс. Соос лэчытэсь, нош куддыръя воксё чидантэмесь, соосын туж юн герӟаськемын обществоысь политической югдур. Валаны луэ лекъяськонэз но, солэн инъетэз - адямиослэн нуналлы быдэ улонысь ужпумъёсты быдэстыны быгатымтэзы. Жаляса верано луэ, бюджетын коньдон тырмымтэен, туж кулэ ужпумъёсты гинэ быдэстыны луэ. Та ужмылэн валтӥсь пуштросэз гинэ ӧвӧл, та ужмылэн вераны луонтэм секытлыкез. Кризисысь потонъя секыт условиосын экономикаез юнматон понна, коньдон тырмымтэ дыръя, налогъёс ӝегаку но ог-огедлы пунэм тыронъёсын - финансовой политика кун властьлэн ужаз одӥгез бадӟым направление луэ. Кун финансовой политикае пыро бюджетъя, налогъёсъя но денежно-кредитной ужъя, кунлэсь пунэм тыронзэ быдтонъя, фондовой рынокез инвестициосын азинтонъя куспазы герӟаськем направлениос. Туала вакытэ бюджетъя политикалэн валтӥсь ужпумъёсыз луо: оскымон прогнозъёс, туала методологической но нормативной база вылэ пыкиськыса, доход люкетэз кылдытон; целевой бюджет коньдонэз кутонлэсь пайдазэ будэтон, бюджетлэсь расход люкетсэ быдэстымон карон; бюджет сетьын но бюджетысь коньдон басьтӥсьёс пӧлын инвентаризация ортчытон; кивалтонъя но планированиея огъя бюджетно-инвестиционной система кылдытон. 1997 арын Удмурт Республикалэн бюджетэзлэн доход люкетэз 4,6 триллион манетлы быдэстэмын, со пӧлын аслаз доходъёсыз планъя 103,8 процентэз люкаськизы. 30 ёрос но город пӧлысь ас доходъёсын планзэ ӧз быдэсты 3 улосвыл (Сарапул ёрос, Ижевск но Глазов городъёс). Бюджетэз быдэстон вакытэ Правительство федеральной бюджетысь взаимозачёт чотын басьтӥз на 646,5 миллиард манет. Федеральной бюджетысь вуэм коньдонлэн быдӟалаез Удмурт Республикалэн бюджетысьтыз доходъёслэн 26,4 процентсы мында луиз. Дефицитэз быдтон понна Правительство Кун Кенешлэн кивалтӥсьёсыныз ӵош федеральной бюджетысь бюджет ссудаос, Коньдон ужпумъёсъя министерстволэсь вексельёссэ, коммерческой банкъёсысь кредитъёс басьтӥз на. 1997 арын 1994-тӥ - 1996-тӥ аръёс понна нылпи пособиос быдэсак тыремын, соин ӵош Ижевск городын 1996 ар понна 9,7 миллиард манетлы тыронъёс кылемын на. Республикалэн бюджетэз чотын тазалыксэ юнматӥз 106 сюрслэсь ятыр пинал, со пӧлысь 2,5 сюрсэз анай-ата йтэк будӥсь нылпиос, 596 ӧлексы пинал, бадӟым яке сюдӥсь- вордӥсьтэк семьяосысь 17 сюрслэсь ятыр пинал. Асьме республика кня ке улосъёс пӧлын "Ветеранъёс сярысь", "Россия Федерациын ӧлексыосты улон-вылонын утён сярысь" Законъёсын чаклам валтӥсь льготаос сётэ. 1997 арын бюджет расходъёслэн быдӟалазы 4,9 миллиард манет люкаськиз яке планъя 106,3 процент. Озьы ке но, ар куспын 97,7 миллиард манетлы республикаысь городъёслэн но ёросъёслэн бюджетъёсазы пунэм тырон будӥз, нош республикаысь бюджетэ пунэм тыронъёс кулэсмизы 15,5 миллиард манетлы. Удмурт Республикалэн финансовой политикаез социально-экономической азинсконъя ужпумъёсты быдэстонын валтӥсь инты басьтэ бере, дыр вуиз ини кун властьлэн ёзъёсызлы пайдаё амалъёсты уже кутыны, капиталэз ужатыны, сое люканы но экономикалэн ваньбур поттон люкетаз кыскыны ӟеч условиос кылдытон понна. Кредитной политикалэсь валтӥсь направлениоссэ кун гарантиосын но залогъёсын герӟаса чаклано. Таӵе ужпумъёсты быдэстон сярысь та дыре сюлмаське Удмурт Республикаысь Правительство. "Удмурт Республикаысь Правительство сярысь" Законъя Правительстволэн валтӥсь ужпумез луэ Удмурт Республикаысь калык хозяйствоен но социально-экономической лэсьтӥськонэн кивалтонэз радъян, со вылын тыро улонэз, культураез но калыкез улон- вылонын утёнэз азинтон. Та ужпумъёсты бюыдэстон трослы герӟаськемын вань министерствоосысь, кун комитетъёсысь, ведомствоосысь, городъёсысь но ёросъёсысь властьлэн ёзъёсысьтыз кивалтӥсь кадръёслэн ужаны быгатэменызы, соослэн ӵош тыршеменызы, озьы ик соин, кызьы асьмеос ӝог дышом быдэстоно ужпумъёс кутыны, соосты дунъяны но ӝегатскытэк быдэстонооссэ пусйыны, озьы кивалтонъя концепциос, программаос, системаос шонер кылдытыны, кусыпъёс но эскерон-чаклан вылэ пыкиськыса. Ми лыдъяськом, республикаын кивалтон уж системной амаллэн позициосыныз герӟаськемын луыны кулэ. Со тужгес но кулэ, Правительстволэсь валтӥсь ужан направлениоссэ чаклаку. Правительство саклык висъя кун кивалтонъя ёзъёслэн ужзылэсь пайдалыксэ будэтонлы, организационной но кадръёсъя ужез выльдонлы. Республикаысь быдэсъясь властьлэн ёзъёсызлэсь структуразэс умоятонъя, решениосты кутыны но быдэстыны ӟечгес механизм кылдытонъя ужрад кутэмын. Эскеремын но кутэмын Кун Кенешысь депутатъёслэн 28 куронъзыя но 300-лэсь ятыр вазиськонъёссыя, ӵектонъёссыя но дэмланъёссыя кулэ ужрадъёс. 1997 арын Правительствое вуиз 7600-лэсь ятыр документ, со пӧлын - 5455-ез - пӧртэм учреждениослэсь, организациослэсь но должностен муртъёслэсь, 750-эз - гражданъёслэсь. 800-лэсь ятыр мурт Удмурт Республикаысь Правительствоын кутэмын вал. "Удмурт Республикаын кун служба сярысь" Закон кутэмен, кун службалы огъя правово й инъет, кун властьлэсь быдэс радлыксэ кылдытонъя уж кутскиз. Со герӟаськемын, огласянь, визьмо но сюлмо специалистъёсты кун службае быръён, кыскон но юнматон понна условиос кылдытонэн но, мукет ласянь, кун служащийёслэсь кыл кутонзэс, соосты возьыны коньдонэз чакланэз юнматонэн. Бадӟым уж кутэмын нормая документъёсты Россилэн законодательствоезъя тупатыны. Аскивалтонлы кун юрттэт сётонъя ужрадъёс юнматэмын, Правительство но городъёсысь но ёросъёсысь администрациос куспын ӵош ужан сярысь тупанкыл гожтэмын, республикаысь ведомствоосын кивалтонэз но ӵош ужанэз выльдонъя юрттэт сётэмын. Городъёсы но ёросъёсы потыса ужрадъёс ялан ортчыло, специалистъёсты дышетон радъямын. 629 мурт, со пӧлын гурт но посёлок администрациослэн ваньмыз сямен ик кивалтӥсьёссы, квалификацизэс будэтӥзы. Ми нимысьтыз бадӟым инты висъяськом властьлэн но иворъёсты вӧлмытӥсь ёзъёслэн кусыпъёссылы, угось кутэм решениос сярысь ивортон, соослы дунъет сётон но валэктон республикаысь гражданъёс доры одно ик вуыны кулэ. Аслэсьтыз организаторской ужзэ Удмурт Республикаысь Правительство радъя, властьлэн вань ёзъёсызлэсь кусыпъёссэс юнматыса, та уже общественностез паськыт кыскыса. Ми дышим ини ортчись событиосты кулэезъя тупатыны, республикалы но солэн калыкезлы кулэ луись социально-экономической процессъёсты улӟытыны, пуктэм ужпумъёсты быдэстон вылысь, вань кужымъёсты огазеяны. Со дыре ик вераны кулэ, Удмурт Республикаысь Правительстволэн ужаз тырмымтэос но ляб интыос вань на, вуись событиосты шӧдыны-чакланы ӧм дыше на, со люкетэ республикалэн улонысьтыз урод процессъёсты палэнтыны, выжыеныз поремын ӧвӧл на кун чиновникъёслэн бюрократизы. Азьланяз умоятоно Удмурт Республикаысь Правительстволэсь быдэсъясь властьлэн федеральной ёзъёсыныз кусыпъёссэ. Тӥ тодӥськоды, экономической, финансовой, налоговой, кредитно-денежной, инвестиционной политика быдэсак сямен юнматӥське федеральной центрен. Со солэн ужез. Но татын асьмеос но шаплыгес луыны кулэ. Уката ик али, куке Россия Федерациын выль Правительство кылдэ, ӵапак али быдэсъясь властьлэн федеральной ёзъёсызлэн ужазы тупатонъёс пыртӥськозы, соос герӟаськозы, кызьы шуиз Россия Федерацилэн Президентэз, экономической реформаослэсь секытлыксэс улосъёсы выжтонэн. Та тенденциез лыдэ басьтыса, Удмурт Республикаысь Правительство таӵе валтӥсь ужпумъёс юнматӥз: Экономика удысын: экономикалэсь куашканзэ алыны, экономикаез ӝутыны но ваньбур поттыны условиос кылдытон; системной но программно-целевой подходъёсты уже кутыса кун стратегической планированилэсь но хозяйствоез рынок амалэн нуонлэсь кусыпъёссэс тупатон; кун экономической политикаез лыдэ басьтыса, хозяйство нуонэз, право но экономика ласянь радъянлэсь пайдаё амалъёссэ уже кутон. Промышленность удысын: предприятиосын выльдӥськонэз ортчытон но республикаын ӟеч, конкуренциын вормыны быгатӥсь ваньбур поттӥсь комплекс, производство удысын асваньбур кусыпъёслэсь пайдаё радлыксэс кылдытон; промышленной производствоез ӝутон, ог-огедлы пунэм тыронъёсты быдтон, предприятиослэн пунэм тыронъёссылэсь структуразэс выльдон; автомобиль но пыӵал тӥрлык поттонэз, му вӧй поттон удысэз азинтонъя целевой программаос (базовой бизнес-проектъёс) но республика понна мукет туж кулэ луись программаос лэсьтон. Кивалтон удысын: кун кивалтонлэсь вертикальзэ огъя кивалтон методология, решениосты быдэстон, быдэсъясь кун властьлэн, аскивалтонлэн, хозяйствоез нуисьёслэн ӵош ужанзы пыр кылдытон. Закон кылдытъян удысын: Удмурт Республикаысь Правительстволэсь стратегизэ быдэстон понна экономической но социальной азинсконъя удыслы законодательно-нормативной документъёсын сузьет кылдытон (со ог-огзылэсь висъяськись документъёс медаз луэ, мед луоз нимысьтыз сузьет). Калыкез улон-вылонын утён удысын: республикаысь ужаса улӥсьёслы тыро улыны условиос кылдытон, социальной стандартъёсты, валтӥсь ужпумъёсты ӝегатскытэк быдэстон; уждунэз, нылпи пособиосты, пенсиосты дыраз тыронъя, уже интыянъя. Бюджетной политика удысын: республикаысь бюджет сетьын но бюджетысь коньдон басьтӥсьёс пӧлын инвентаризация ортчытон; республикалэсь бюджетсэ кылдытонъя методологической но нормативной базаез умоятон; азинсконъя бюджетэз кун экономической политикаен герӟаса кылдытон. Инвестиционной политика удысын: республикалэн социально-экономической азинсконаз но экономика ласянь будон вакытаз огазеясь огъя инвестиционной система кылдытон. Гажано депутатъёс! Кызьы адӟиськоды, туж секытэсь ужпумъёс пуктэмын, кысӥсьтэм финансовой кризис дыръя укыр бадӟымесь, шуыны луоз. Но соосты одно ик быдэстоно. Татын кулэ луоз республикаысь властьлэн вань ёзъёсызлэн тыршемзы, уката ик быдэсъясь властьлэн. Берло аръёсы Удмурт Республикаысь Правительстволэсь но Кун Кенешлэсь ӵош ужан опытсэс лыдэ басьтыса, асьмеос вераны быгатӥськом, пуктэм ужпумъёс быдэстэмын луозы. Тау кылзӥськемды понна. Тӧр шорын - тележурналист Георгий Грязев. Сугон куректон но кирень куректон Вордскиз но будӥз Ува ёросысь Туймат гуртын. Ньыль пи пӧлысь пичиез. Вазь люкиськоно луиз анай-атай шунытлэсь. Гера ньылетӥ классын дышетскыку кулӥз атаез, тямысэтӥ классын - анаез. 1981 арын йылпумъя Удугучин шор ёзо школаез. Аттестатаз ньыль "ньылез": удмурт кылын, геометриен, черчениен но трудэн. Кузпалыз Люда "Ингур" радиоын ужа. Маша нылыз нырысетӥ классын дышетске. Гуртазы вордо сиам выжыысь коӵышез... - Гера, кытысен кутскиз журналист сюресэд? - Ньылетӥ классын дышетскисько вал соку. Дышетӥсьмы Пётр Васильевич Куликов (али "Кенеш" журналлэн валтӥсь редакторез) удмурт кылъя одӥгаз урокын выжыкыл гожтыны косӥз. Кинлэн, пе, ваньмызлэсь ӟеч пӧрмиз, "Дась лу!" газетэ лэзём. Мынэсьтым тӥни поттӥзы. Нош нырысетӥ информация анае сярысь вал. Война вакыт ужамез понна медаль сётэмзылы сӥзи. - Вузъёсын дышетскыкуд, кык "куинед" сяна вылымтэ, лэся? - Нырысь мон Львовысь военно-политической училищее пырисько вал. Экзаменме "куиньлы" сётӥ но берлань бертӥ. Собере УдГУ-ысь кылтодонъя факультетэ пыри. Ньыль курсэз йылпумъяме бере, лэзизы Ленинград университетлэн журналистикая факультетаз дышетскыны. Куинетӥ курсаз пыртӥзы. Татысен ик со кык "куиньёс" тыр "ужай". Нырысь "Введение в журналистику" предметэн, собере стилистикаен пуктӥзы. Курсъёсъя но диплом ужме туж умой гожтӥ. Аспирантурае кельтыны туртто вал. Тумошо пӧрмиз: диплом басьтыкум ик армие повестка но сётӥзы. Мынам наукаен кивалтӥсе ымзэ усьтыса ик кылиз. Армилэсь кельтон вылысь, военкоматэ но ветлӥзы... 24 аресысен службае кошки. - Армия кельшиз-а? - Мар кельшонтэмез. Школаысен ик мон куасэн но пыдын бызьылонъя ёрос, элькун ӵошатсконъёсы пыриськылӥ. Куасэн - нырысетӥ, нош капчи атлетикаен кыкетӥ разряд вал. Соин капчи потӥз, дыр. Люда кузпалы "Советской Удмуртилэсь" котькуд номерзэ гожтэтэн мыным келялляз. Армиысь бертыкум, Ленинградысен Вася Богдановез пумитай. Соин ӵош Москвае Геннадий Красильниковлэн ӝытаз мынӥмы. Военной дӥсен ветлӥсько. Ӝытысен Семён Карповез но Леонид Гусевез адӟи. О-о, пе, Гера бертэм, ми доры ужаны лыктод, шуизы. - Нош телевидение кызьы шедид? - Нырысь радиое ужаны мынӥсько вал. Инты ӧвӧл, шуизы - ӧз басьтэ. Мон журналистикая факультетлэсь газетъя люкетсэ йылпумъяй ведь. Телевиденилы сӥзем занятимы чылкак одӥг час гинэ вал. Тани, пе, монитор, камера шуыса возьматӥзы. Камера азе пуктылӥзы. Мон Галина Кулакова сярысь верай кадь соку. Телевидение сярысь та вань тодэме вал. Одӥг ӵукна телевидение ӧтизы. Эшъёс, тодмоос люкаськизы. Ушъяло, кӧяло, вӧяло монэ. Чай-мар юим но, вае, шуисько, бумагадэс - куриськон гожто! Али кадь тодӥсько со нуналэз - 2-тӥ январе 1990-тӥ арын. - Кыӵе вал нырысетӥ вамышед? - Монэ иворъёсъя отделэ пуктӥзы. Угось телевидениын ужась мурт иворъёс пыр потэ ке, со трос тодэ ини, троссэ быгатэ, шуом, кыӵе материалэз кызьы гожтоно, кыӵе камераен но кызьы ужано. Кивалтӥсьёс тумошо малпаллям. Арня ужаса вуттӥ но - меӵак эфрие потод, шуизы. Потӥз ке, пе, потоз, ӧз ке - уз. "Шаерез" нуи. Пӧрмиз кадь. - Огвакыт Глазове но кошкыны малпалляд... - Вал сыӵе дыр. Одӥг ар ужаса вуттӥ. Семьяе вань, нылы вордскиз ини. Нош квартирае ӧвӧл. Апае дорын улӥм. Со вакытэ Глазовын "Иднакар" газетсы кылдӥз. Редакторез Надежда Золотарёва жингыртэ. Лыктыны куре, солы воштӥсе. Одӥг комнатаен квартира, пе, сётом. О-о, мон кошкисько! Озьы вераме генеральной директорлэн Олег Шибановлэн пель сьӧраз кылӥськем. Толэзь ортчыса, мыным кык комнатаен квартира сётӥзы. - Тон-а "Улон-вылонлэн" атаез луиськод? - Озьы-а, мар-а. Азьвыл та выллем "Шаермылэн вамышъёсыз", "Чибори" нимо передачаос потылӥзы. Вылезлы туж кема ним малпаны вырим. Сое шедьтӥз Василий Федорович Михайлов. "Улон-вылон" передачамы милям огшоры гурт калык понна лэсьтӥське. Вераськон нуиськом ужась сярысь. Татын вань политикаез но, экономикаез но, культураез но. Таӵе передача удмурт кылын одӥг гинэ. Жаляса верано луэ, коньдон уг тырмы. Соин передачалэсь дырзэ кулэсто. Азьвыл со арнялы быдэ ӝыны часъем потэ вал. Нош али кык арнялы одӥг пол кызь минутэн лэсьтӥськом. Огвакыт толэзь ӵоже 34-тӥ каналын потӥз. Гуртын улӥсьёс уг адӟо ни вал. Кин понна передача лэсьтӥське. Учкисьлы-а, кивалтӥсьёслы-а? Соин нюръяськоно луэ. Удмурт передачаосын рекламаез ӧвӧл, соос уксё уг ваё. Соин ик кивалтӥсьёс передачаослэсь лыдзэс кулэсто. Сизьымдонлэсь витьтон кельтӥзы. "Улон-вылон" сярысь ке верано, рос-прос режиссёрмы ӧвӧл. Кивалтӥсьёсмы рейтинг ортчытъян ярато. Гуртын улӥсьёслэсь юало ке, рейтинг вылӥын, кыӵе ке комиссия лыктэ ке, передачалэн рейтингез куашка. - Удмурт телевиденилэн директорез но вал... - Толэзь но ӝыны вал. Мазэ-созэ валаса но ӧй вутты. Секытгес ик йӧтӥз. Кивалтон но, творчество но одӥг азе огазеяськизы. Малпасько вал, удмурт кылын передачаос 30 проценлэсь ӧжыт медаз луэ шуыса. Та вакытэ соос куддыр 10 процент гинэ уг луо. - Кошкемедлэн мар мугез? - Огез: кивалтӥсьёсын ӧй тэры. Передачаос, уж шоры мукетгес учконэ вал. Собере ачим но егитгес на. Вуом ай, кивалтыны умой дыръёс лыктозы на (серекъя). - Журналистэз пыдыз сюдэ, шуо. Со ялан сюрес вылын. Нуналаз семьяеныд ӵош кӧня минут улыны вуиськод? - Ӵемысь луэ озьы: ужысь бертӥсько - нылы изе ини, ӵукна кошкыкум кӧлыса кыле. Командировкае кошкисько ке, 2-3 нунал уг адӟиськы. Мынам кузпалы журналист, ог-огмес валаськом. Ныллэн будэмез но дышетскемез пырак со киын. Маши дышетске умой. Эктыны бугатэ. Иж карлэн спортивной бальной эктонъя ӵошатсконъёсаз пыриськиз. Ас аресъёсыз пӧлын куатетӥ инты басьтӥз. Маке малпа ке, одно ик пумозяз вуттыны тырше. - Тынад яратоно сиёнэд? - Рис. Яратӥсько ачим пӧраны. Машие шуэ: тон, пе, мамалэсь но ческыт пӧраськод. - Мар тон понна тужгес но дуно? - Семья, дыр. Мар луоз на солэсь дуногес но бадӟымгес. Пичи дыръям ӧзгес тырмы анайлэн шунытэз, верам кылыз. Табере мон сое ас семья пӧлысьтым шедьтӥсько. Басьтымтэзэ басьтӥсько шуод-а, мар-а? - Сюлэм висёнэд? - Удмурт передачаос. Телевидение али калыклы туж матэ луэ. Котькуд коркан телевизор вань. Газетъёс но журналъёс дуно луэмен, ваньмыз гожтӥськыны уг быгато. Жаляса верано луэ, Москваысь но олокытысь басьтэм киноосты возьматӥськом, нош удмурт передачаос ӧвӧл. Бигеръёслэн асьсэлэн каналзы вань, нош асьмелэн 34-тӥ канал быдэсак сямен ӟуч. - Вася Богдановен ӵош футбол учкыны ветлӥськоды. Кыӵе команда понна дурбасьтӥськод? - Конечно, "Газовик" понна. Нош Россиез басьтоно ке, Волгоградысь "Ротор" понна. Хоккеез но яратӥсько. Ачим но футболэн шудӥсько. - Астэ писатель шуиськод-а? - Куддыр мон асме журналист шуыны но кышкасько. Писатель шуыны кыл уг пыры. Мар-о со одӥг книга поттэм? 60 аресозь улыса, 5-6 книга поттӥ ке, Писательёслэн союзазы пыртӥзы ке, соку яке шуо (серекъя). - Кызьы вордӥськиз "Кирень куректон" книгаед? - Школаын ик ож удыс бордаз кыскиз. 23-тӥ февральлы, Афганистанын быремъёслы сӥзьыса, сюжет лэсьтӥсько вал. Пукисько, быремъёс сярысь буклетэз учкыса. Рядовойёс, сержантъёс... Учкисько - майор, лётчик, удмурт. Солэсь ӵыжы-выжыоссэ утчаны кутски. Ижын кузпалыз улэ вылэм. Шарканэ анаез-атаез доры ветлӥ. Виктор Вахрушев сярысь очерк гожто шуыса малпай. "Инвожо" журналэ сётыны турттӥсько вал. Собере очерке ӧръяське но ӧръяське. Озьы повестьлы пӧрмиз. - Кытысь ним шедьтӥд? - Викторлэн анаез вераськыкумы шуиз: калыкын тазьы, пе, шуо: "Кузпалыд кулэ ке - сугон куректон, нош пиед быре ке - кирень куректон..." - Выль книга уд гожтӥськы-а? - Книга поттон али дуно усе. Машинкаен печатлам понна 600 сюрс манет тыри. Гонорар одӥг миллион манет гинэ басьтӥ. Эшшо ке аслэсьтым сю экземпляр книгаме асме ик басьтыны косӥзы. Налог тыроно на. Куддыр очеркъёс гожъясько. Чечняын бырем пиос сярысь. Али но тани материлэ вань. Игра ёросысь Факел гуртысь пияш Чечняын быре. Анай-атаез пизэс кык толэзь утчало. Сое мукет вить пиен ӵош чечен кышномуртъёс бензинэн пазьгыса сутӥллям. Грозный шорын ик зынмыса кыллё вылэм соос. Копаллям соосты.. Поттӥллям, но лы сяна кыльымтэ ини. Пӧртэм экспертиза ортчытӥллям. Солэн йырвекчиез бадӟым вылэм, будэмезъя рос- прос ворсаськымтэ. Озьы тодмаллям, Шкляевъёс гуртазы пизылэсь лыоссэ гинэ ваё на... Ростове ветлэмзы понна, пизэс коросэн берыктэмзы понна солдатлэн анаез но атаез ёрос кивалтӥсьёслэсь уксё куро. Ёрос кенешлэн сессиез сётоно шуэ. Нош Игра администрацилэн кивалтӥсез пумит луэ. Куректонлы чидатэк песянайзы кулэ. Сузэрез институтсэ куштэ... Асьмелэн уг дунъяло адямиез. Кенешиз Алексей Андриянов. "Ашальчи" - нылкышноослы журнал "Таӵеез журналмы ӧй вал на", - шуизы 27 апреле Национальной библиотекае презентацие лыктэмъёс. Вераськон мынӥз удмурт нылкышноослэн "Ашальчи" нимо выль журналзы сярысь. Зэмзэ ик, та издание мукетъёсызлэсь пӧртэм: чилясь, вольыт кагаз вылэ печатламын, турлы буёло туспуктэмъёсын узыр - ваньмыз 52 бам. Журнал вылысь асьме шоры пальпотыса учке удмурт ныл, со быдэсак "шунды пырыосын" - унябейёсын котыртэмын. Татчы ик поттэмын журналысь тужгес син шоры йӧтӥсь статьяослэн нимъёссы: "Дурбасьтон кыл", "Кык Акилинаос, кык Окиос", "Дэмен ке - дэмен", "Гуртысь джентльменъёс" но... городысь "джульеттаос". Статьяослэн авторъёссы - писательёс Анатолий Перевозчиков, Петр Кубашев, Кирилл Ломагин, егит гожъясьёс Елена Панфилова, Вера Бикузина, Надежда Шкляева, Ирина Лукина, Валентина Кутузова но мукетъёсыз. Нылкышноослэн воргоронъёсын оградын вамышъяны правооссы сярысь гожтэ тодмо радиожурналист Милитина Гаврилова. Мае быгатэ удмурт нылкышно - тазэ усьтэ тодмо суредась Семен Виноградов. Гуманитарной лицейлэн инвисъёсыныз тодматэ дышетӥсь Ангелина Решетникова. Ижевскысь медициная академилэн туннэ нуналыз, нылпиосты эмъян амалъёс сярысь вера профессор Иван Гришкин. Огъя вераса, журнал пӧртэм-пӧртэм ужпумъёслы сӥземын. Тани куд-ог статьяосысь малпанъёсты-предложениосты басьтом. "Социологъёслэн верамзыя, ЪЪИ даур нылкышноослэн даурзы луоз". "Школаын дышетскыкумы, тон куке анай луод шуыса валан сётӥсь ӧй вал. Ужаны гинэ дасязы асьмедыз". "Майтал шукы выллем операосты"-сериалъёсты уг учкиськы ни - дыр быдтон гинэ. Лыдӟиськисько". "Егит нылъёс! Оген кылиськомы шуыса, ноку но тӥледыз яратӥсьтэм пилы эн бызе...." "Гуртын нылъёс уг тырмо. Соин ик тросэз пиос кышнояськытэк кылё. Калыкын юнме уг верало, дыр: "Котькыӵе ӟеч пиосмурт но кышнотэк сӧриське". "Кытысь гинэ уг шедьто мискиньёсты: мурӝолысь, корка сигысь, нош огез пияш, инспекторъёс верамъя, писпу вылэ аслыз кар лэсьтэм". "Врачъёс нылпилэсь таза яке ӧлексы луэмзэ анай кӧтпушкысен ик валало. Озьы ке но, дасо аръёсын ини шузи, висись пиналъёс вордско но вордско..." "Туж ӟырдыт яратон - со висён... Солэн но ас тодметъёсыз вань. Сыӵе дыръя адями кельше уйбыртӥсь муртлы..." "Адямилэн лул чеберлыкез трослы дуногес. Солэн кыӵе луэмез ымныре но потэ. Макем чебергес, вылынгес малпанъёсыд, сокем тон вылтусыдъя но мусо адскиськод". Журнал "Ашальчи" нимамын бере, валамон ни, татын трос бамъёсыз сӥземын нырысетӥ удмурт нылкышно кылбурчимылы. Печатламын солэн кылбуръёсыз, веросъёсыз, туспуктэмъёсыз (аслаз но семьяезлэн), ас гожъям кибервылыз, Куӟебай Гердэн кусыпъёсыз сярысь гожтэмъёс, трахомаез эмъянын но фронтын жадёнэз валасьтэм луэмзэ возьматӥсь чуръёс. "Тылӝуэн" ӵушкам яратон" нимаське Ижевскын улӥсь Валентина Еремеевна Аронова сярысь статья. Войнаез ӵош пырпотэм яратонэзлэсь, ышем-бырем эшезлэсь со огнуналэ (ӵапак сюанэз дыръя) басьтэ... ньыль гожтэт. "Эх, сюан одӥг нуналлы бергес карысалмы ке", - кайгыре со вань улытозяз. Ӵужектэм туспуктэмъёс адямилэсь вань улонзэ усьтыны быгато. Та сярысь вера Анна Георгиевна Ивановалэн статьяез: кызьы Быдӟым ож бере кылдылӥзы удмурт писательёслэн но журналистъёслэн семьяоссы. Журналысь ик шедьтыны луоз: пӧраськонъя но эмъяськонъя визькенешъёсыз. Ас доразы ӧтё Ижевскысь маммологияя, озьы ик косметологияя но пластической операцияя центръёс. Журналэз дасян бордын ужазы Татьяна Чернова, Татьяна Корнилова, Юрий Лобанов, Марат Шакиров но мукетъёсыз. Коньдонэн юрттӥз Удмурт Элькун кивалтэт. Озьыен, гажано нылкышноос, "Ашальчи" журналлэсь нырысетӥ номерзэ тӥ кияды кутыны быгатоды ни. Со понна вазиськоно элькунысьтымы Национальной библиотекалэн краеведениея отделаз, "Удмуртия дунне" газетлэн яке "Инвожо" журналлэн редакциосазы. Т. Николаева. Спорт Ижын - бразиль футболистъёс Бен, таӵезэ но адӟод вылэм. Куноослэн командаязы, Тулаысь "Арсеналын", 9 шудӥсьсы лымшор Америкаысь ваемын. Валамон, одӥгез но Марадонаез уз вошты, озьы ке но пыӵал но самовар лэсьтӥсьёслэсь данзэс утись бразиль спортсменъёс атакаын лэчыт шудо, ӝог бызьыло, техника ласянь но быгатонлыксы вылӥын. Асьме футболистъёсмы тросгес сюлмаськизы капказэс утён сярысь. Гол пыртыны кынарзы ӧз тырмы ни. Ма соиз но вань: ӟезьы дорын тяпайто, шудонэз ас вылазы басьтӥсьёс уг шедё. Пумиськон 0:0 лыдын йылпумъяськиз. "Газовик", 11 очко люкаса, турнир таблицалэн шораз интыяськиз. "Арсеналэн" шудон ортчыны кулэ вал вазьынгес. Но куазь йӧнтэмъяськемен, стадионын сыръясь дэри пукемен та пумиськонэз 5 Мае выжтӥзы. Вылаз ик Футболъя Россиысь федерация "Газовик" клуб вылэ 10 сюрс манет штраф сётӥз. Г. Иванов. Удмурт Республикаысь Правительстволэн 1997 арын ужамез сярысь но 1998 арлы ужпумъёсыз Отчётэзъя сярысь Удмурт Республикаысь Правительстволэн Тӧроезлэн П. Н. Вершининлэн докладэз Гажано депутатъёс, Правительстволэн муртъёсыз, ӧтем куноос! Правительстволэн ужамез сярысь та отчётын мон возьматыны турттӥсько республикаямы кылдэм зэмос югдурез, кун властьлэсь ёзъёссэ но интыысь аскивалтонэз, ваньбур поттӥсьёсты, общественной огазеяськонъёсты, профсоюзъёсты, иворез вӧлмытон удысъёсты одӥг кужыме огазеяса, вань эскероно ужпумъёсты пайдаё быдэстон понна. Туннэ асьмеос валаськом ни, пӧртэм кивалтон ёзъёслэн ог-огенызы кенешытэк ужамзы республикамылэсь экономиказэ ӝутонын пыкет выллем луэ. Реформаослэн азинсконзы - кивалтон удыслэн пайдаё ужамез но гражданъёслэн сое быдэстонэ мыло-кыдо пыриськемзы. Удмурт Республикаысь Правительстволэн валтӥсь ужпумез - республикаямы ортчись выльдӥськонъёсын политической, экономической но социальной улонэз кулэезъя радъян, кудъёсыз тупалозы гражданъёслэн кулэяськонъёссылы но куронъёссылы, озьы ик демократической правовой обществолы. Правительстволэн ужамезлы дунъет сётон пыр Кун Кенеш пусйиз со ужпумъёсты быдэстон сюресъёсты но. Россия быдӟымесь ыштонъёс адӟиз, рынокен ужанэз государство ас кожаз лэземен, экономика ужпумъёслэсь со ассэ ачиз палэнтӥз, шуыны луоз. Россия Федерацилэн Президентэз гожтэтаз юнме шорысь ӧз вера: "Асьме обществоын, кун аппаратын та дырозь валамон ӧвӧл на демократия но рынокен ужан вакытэ экономика удысын государстволэн кулэлыкез". Республикаысьтымы политикая но экономикая югдурлэсь азинсконзэ ми адӟиськомы рынокен герӟаськем кусыпъёсты правоя но экономика ласянь юнматыса. Удмурт Республикаысь Кун Кенешын эскерыны сояз арын сётэмын вал нормативно- правовой актъя 40 пала проект, тросэз соос пӧлысь кутэмын но улонэ пыӵало ни. Социальной стандартэз, бюджетэн чаклам кема дырлы юрттэтэз, налогъя выль кодекслэсь улонэ пыӵамзэ лыдэ басьтыса, выльысь берытсконо калык хозяйстволэсь валтӥсь удысъёссэ кема дырлы чаклам планъя ужатонэ, со бордысь Правительство адӟе государстволэсь социальной удыслы но экономикалы одӥгзэ юрттэтсэ. Гажано депутатъёс, туннэ асьмелы эскероно луоз Социальной удысъя но экономикая 1988-2000 аръёслы чаклам азинскон программаез. Ми дась кылзыны алонъёстэс но дэмланъёстэс, кулэ дыръяз тупатонъёс пыртыны. Удмурт Республикаысь кун властьлэн ёзъёсызлэн но хозяйство нуись субъектъёслэн тыршеменызы экономика удыслэсь ужзэ радъян выль сямен кутскиз. Со юрттоз производствоез азинтыны но мукетъёсыныз ог радэ султыны. Соин валче зэмос югдур возьматэ, дуннеысь азинсконэн ӵошатыса, технология ласянь вань удысъёсъя сямен бере кылиськом, наукалэсь азинсконъёссэ уже кутӥсь производство, валтӥсь фондъёс пумен уллане лэзисько. Производство удыслэн инвестициослы кулэяськонэз трослы бадӟым республикаысьтымы экономикалэн быгатонлыкъёсызлэсь. Соин ик Правительство юрттыны басьтӥськоз но вакчи дыр куспын капитальной вложениосты берыктыны луонлык кылдытӥсь ӟечлыко проектъёслы. Инвестициосъя кун юрттэт - Правительстволэн одӥгез валтӥсь ужпумез. Странаысьтымы валтӥсь специалистъёсын ӵош дасямын Удмуртиысь коньдон рыноклэн азинсконэзъя концепция, матысь дыре ми сое улонэ пыӵатыны дась. Россия Федерацилэн Правительствоеныз юнматэмын Удмурт Республикалэн Социальной удысъя но экономикая 1997-2000 арозьлы Федеральной целевой программаез. Республикалэн улос вылаз быдэсъясько пӧртэм федеральной целевой программаос. Кутэмын электросвязья, сюрес лэсьтонъя, жилищно-коммунальной хозяйствоез выльдонъя но мукет республиканской программаос. Быдэсъясько ни социальной удысъя республиканской программаос, соос пӧлын: "Удмуртиысь егитъёс", "Инвалид-нылпиос", "Нылкышнолэн тазалыкез но семья улонэз радъян". Сояз ар куспын Удмурт Республикаысь Правительствоен кутэмын ваньбур поттӥсьёслэсь производствоын азинлыксэс ӝутонъя но кулэяськонъёссэс быдэсъянъя пӧртэм ужрадъёс. Кылсярысь, кудӟытӥсь юонъёслэсь бергамзэс кун ласянь эскеронэз юнматон республикамылэн казнаяз 79 миллиард манет пала берыктӥз. Кун кулэяськонъёслы кулэ луись ваньбур, вуз конкурс амалэн басьтӥськоз, уж нуиське естесственной монополистъёслы субсидиос сётонэз дугдытонъя. Тыллы, газлы, связьлы но калыкез нуись-ваись транспортлы тарифъёсты кулэстонлы ми азьланяз но бадӟым саклык висъялом. Соин валче кулэен лыдъяськомы Удмурт Республикаын тарифъя но дунъёсъя кун комитет кылдытонэз. Кылем арын Удмурт Республикаысь Правительство коньдонэн юрттӥз нылпи ясли-садъёсты муниципалитетлэн ки улаз сётон ужрадъёслы. Улон юртъёсты но социально-культурной объектъёсты возёнъя Россия Федерациысь Коньдонъя министерствоен одӥг триллион манетлы пала взаимозачёт лэсьтэмын. Куд-ог предприятиослэн пения но штрафъёсъя тыронъёссылэн структуразы 52 миллиард манетлы выльдэмын, хозяйство нуись субъектъёслы кредит басьтыны Правительствоен гарантия сётэмын 150 миллиард манетлы. Тыронъёслэсь структуразэс выльдон, ог-огедлы тыронъёсты берыктон ужпумъёс Правительстволэн ужаз валтӥсь инты басьтозы. Куд-огзэ соос пӧлысь депутатъёслы эскероно луоз ни таяз сессиын. Удмурт Республикаысь Правительство бадӟым уж нуиз странамылэсь оборонной промышленностья концепцизэ кылдытонъя но кутонъя, республикаысьтымы предприятиослэсь кулэяськонъёссэс лыдэ басьтыса. Матысь дыре асьмелэсь быдэстоно ужпуммес ми адӟиськом обороная кун заказлы коньдонэн юрттонэз ӝогомытон бордысь, Россия Федерациысь Экономикая министерствоен ӵош эскероно ужан мощностьёсты, тыронъёслэсь структуразэс выльдонъя нимысьтыз ужрадъёс кутоно. Кун властьлэн ёзъёсызлэн но хозяйство нуись субъектъёслэн огъя ужзы сизьым ар ӵоже нырысьсэ пайда сётӥз. Валля арен ӵошатыса, промышленной производство будӥз, одӥг процентлы йылӥз огъя ваньбур поттон. Промышленностья ньылез удысъёс кылем аръя показательёсэс будэтӥзы:машина поттон, сьӧд металлургия, сиён-юон поттон но химической промышленность. Секыт югдурзы капчи промышленностья предприятиослэн. Производстволэн быдӟалаез улӥе лэзиське эсктӥськонъя но энергетикая комплекслэн. Воштӥськиз промышленной производстволэн будэмезлэн структураез но: машина поттонлэн но металлообработкалэн будэмзыя лэзиськиз мукет валтӥсь удысъёслэн азинлыксы. Со дыре ик эсктӥськонъя но энергетикая комплекслэн предприятиосыз тужгес но азинлыкоосыз но пайда ваисьёсыз пӧлы пыро, промышленностьын ӝыныез пала ваньбур соосын поттэмын. Удмурт Республикалэсь бюджетсэ кылдытонын но соос бадӟым инты басьто. Геолого-технической ужрадъёс чотын но нефть сётӥсь интыосты выль методъя ужатэмен, 8 миллион тонналэсь тросгес нефть поттэмын. Нефтез азьло мында но солэсь тросгес поттон понна Правительство пӧртэм ужрадъёс кутэ выль интыосты но скважинаосты ужатонъя. Вераны кулэ, та вакытлы нефтен узыр 12 инты конкурс пыр ӧз ортчы. Вань ужпумъёсты йылаз-пумаз вуттэмзы бере, та интыос нефть поттонъя конкурсэ выльысь пыриськозы, нош Быгиысь, Черновскойысь но Забегаловоысь нефтен узыр интыос, конкурс пыр ортчытэк, оло, сётэмын луозы республикаысьтымы нефть поттӥсь предприятиослы. Правительство азьланяз юнгес эскерыны чакла хозяйство нуись субъектъёсты. Кылем арын кӧняез ке гинэ промышленной предприятиос быдэстыны быгатӥзы чаклам планъёсты. Соос пӧлын: "Чепецкой механической завод" АО, "Ижевскысь электромеханической завод" ГП, "Ижевскысь радиозавод" АО, "Удмуртнефть" АО, "Воткинскысь машиностроительной завод" ГП. Азинлыксы тужгес но улӥын "Инвис" АО-лэн (Глазов), "Сарапулысь электрогенераторной завод" АО-лэн, кудӥзлы тросэз пӧлысь одӥгезлы коньдонэн юрттэт сётэмын вал, налогъя кредитлы инвестициос висъяса. Экономика ласянь югдур уродмемен, "Ижевскысь литейной заводлы", "Ижевскысь подшипникъёсъя заводлы" "Редуктор" ПО-лы юнматэмын вал арбитражной кивалтӥсьёс. Рынокен экономикалэсь куронъёссэ ӧз вормы "МЭКон" АО (Можга), со лыдъямын банкротэн, ваньбурез вузамын луоз, кредитъёсъя тыронъёссэ берыктон понна. Рынок азинске конкурентъёс ужан чотын. Нырысьёсыз пӧлын сое валазы сиён-юон поттонъя но переработка удысын ужасьёс. Поттоно продукцизылэсь ӟечлыксэ, лыдзэ но ассортиментсэ трослы будэтӥзы "Ижмолоко" АО, Сарапулысь кондитерской фабрика, Сарапулысь сурзавод, Глазовысь сиён-юон поттонъя комбинат, "Гамбринус" АО но трос мукетъёсыз. Жаляса верано, шӧдскымон азинсконъёссы ӧвӧл сӥль поттон удысын. Туж секыт югдуре шедиз "Ювента" АО (Глазовысь сӥль поттон комбинат), ужан мощностьсы отын одӥг процентэз гинэ кутӥське гурт хозяйствоысь производительёсын - сырьё сётӥсьёсын кусыпъёссы ышемен. Зарнилы но нефтьлы дунъёс улӥе лэзиськемын ӵош берло дыре дун будэ нюлэс узырлыкез уже кутӥсь промышленностьлэн продукциезлы. Сое лыдэ басьтыса, матысь дыре та предприятослэсь техниказэс выльдоно. Адӟем карыны луоз "Увадрев" предприятилэсь татын дасямын дуннеысь рыноклэн куронъёссызлы тупась паськыт фанераез поттонъя бизнес-план. Огъя но нимаз предприятиос кылдытонын кунгож сьӧрысь капиталэз уже кутыку, кивалтон ёзъёс пыдзэс пуктыны ӧвӧл кулэ, кылсярысь, "Харви- яр" выллемъёслы. Республикамылэн висись но будӥсь яраез - автомобиль поттон. Шонерак верало, заводысь коллективлы бадӟымесь шуг-секытъёс пыр ортчоно луоз. Инвестициос сётонлы сюрес усьтон понна, "Ижмашлы", оло, ужпум кутоно луоз автопроизводстволы ватсаса полномочиос сётонъя. Тае лыдэ басьтыса вераны луоз, "Ишмаш" ОАО-лэн генеральной директорезлэн но Удмурт Республикаысь Правительстволэн ужзылы дунъет луоз, нырысь ик, "Москвичлэн" азьвыл данэзлэн будэмез. Бюджетэз кылдытонын валтӥсь мерттэт - промышленной производстволэн быдӟалаез. Деноминациез лыдэ басьтыса, таяз арын солэн быдӟалаез 5,4 процентлы будыны кулэ, со кылдытэ 17,2 миллиард манет. Та показательёс быдэсмозы, рабочийёс но заводлэн директорез ужзы борды мыло-кыдо басьтӥськозы ке. Асьмелэсь ужпуммес ми адӟиськомы со бордысь но, трехсторонний договоръя, уж сётӥсь нырысь ик мед тыроз али сётоно уждунэз но сояз арлы люкаськем тыронъёсты мед берыктоз. Котькуд предприятиысь кивалтӥсьлэн ужез дунъяськоз ужасьёслы уждун тыремезъя но поттэм продукцизэс макем трос басьтэмзыя. Экономикая политикаын одӥгез валтӥсь ужпум - агропромышленной комплексэз выльдон, Гурт хозяйствоя вань производительёслы азинлыко ужан условиос кылдытон вылысь, хозяйствоен кивалтон амалъёс пӧртэмесь ке но луизы. Удмурт Республикаысь Правительство азьло аръёсы юрттэт сётӥз вань гурт хозяйствоя предприятиослы, ужанзинлыкъёссы шоры учкытэк. Туала вакытэ сыӵе политика вылэ пыкъяськыны уг ни луы, малы ке шуоно, ваньбур поттӥсьёслэн асьсэ понна азинскыны но ужзэс радъяны быгатонлыкъёссы озьы быдэсмытэк кылё. Туннэ юрттыны кулэ, кинлэн ужамез потэ но умой ужа. Азьлане мыныны уг яра ни, производствозэс куашкатыса, улонзылы ӝожтӥськисьёслэн валтэмзыя. Модалэн куронъёсызъя ӧвӧл, ужез азинтон понна асьмеос сюресъёс утчаны кулэ ыштонъёс ваись хозяйствоослэсь ужзэс выль сямен ӧръянъя. Крестьянъёс асьсэос мед бырьёзы азьлань улонзэс. Соин ӵош шӧдскымон юрттэт сётыны кулэ кун властьлэн ёзъёсыз но интыысь аскивалтон. Тырмымтэосмес вераса пусйыны кулэ, та ужпумъёсты быдэстон понна тодӥсь-валась специалистъёс ӧз шеде интыосын но, Удмурт Республикаысь Гурт хозяйствоя но сиён-юонъя министерствоын но. Туала вакытэ бадӟым саклык висъяны кулэ кадръёсты быръёнлы но уже интыянлы. Матысь дыре Правительство ужпум кутоз, хозяйствоен кивалтыны палэнысь лыктэмъёслы улон корка пуктонъя кун юрттэт сётон сярысь. Аграрной удысэн кивалтонэ лыктыны кулэ сьӧразы валтыны быгатӥсь но ужез валась специалистъёс. Гурт хозяйствоын продукция поттон кылем арын будӥз 1,2 процентлы. Удмуртиын ю тысь тужгес но ӟег удалтӥз 1986 арын, кылемез ар ю тысь басьтонъя кыкетӥ интыын луиз. Ю тысь, курег пуз басьтон будӥзы, пудо вордон продукцилэн усёнэз кулэсмиз, озьы ке но, республикаысь хозяйствоос коньдон ужпумъёсъя туж секыт югдуре вуэмын. Соин ик Удмурт Республикаысь Правительство ужпум кутӥз элитной кидысъёсты, мерттӥськон материалэз, ӟеч выжыысь пудо-животъёсты, минеральной удобрениосты но вӧйёсты басьтыны юрттэт сётонъя. Республика ас вылаз басьтӥз 1996 арын гуртъёслы кредит сётонэз берыктон ужпумъёсты. Та дырлы йылпумъясько ю тысез аранъя вылӥ ӟечлыко комбайнъёсты лизинг амалэн басьтонъя СБС-АГРО-ен вераськонъёс, нош со понна та арня вискын быдэстоно машинно-технологической станциосты кылдытон ужъёсты. Тулыс бусы ужъёсты быдэстон понна, банкысь капчиятэм кредитъёс 50 миллион манетлэсь ятыр басьтэмын но гуртэ келямын ни. Пусйыны кулэ, туннэ нуналлы луонлыкъёс усьтӥськизы гурт хозяйстволэсь продукцизэ переработать карон удысэ, гуртэз техникаен узырмытонэ инвестициос сётон понна. Со нырысь ик висъяськоз пудо вордон промышленносте, теплица комбинатъёсы, кобикормъя промышленносте азьмынӥсь технологиез вӧлмытон понна. Удмурт Республикаысь Правительстволэн, хозяйство нуись субъектъёслэн та вакытлы валтӥсь ужпумзы - кылдытоно туала рыноклэсь инфраструктуразэ, азьланьтоно музъемъя реформа бордын ужанэз. Быдӟымесь музъем площадьёсмы вань вылысь, гуртысь ужтэк кылемъёслэсь лыдзэс нокызьы будэтыны уг яра. Государство, интыысь кивалтон ёзъёс, общественность бадӟым саклык висъяны кулэ фермеръёслэн, нимаз хозяйствоослэн азинсконзылы. Фермеръёслы, нимаз хозяйствоослы юрттӥсь кооперативъёсты кельтыса, ыштонъёс адӟись фермаосысь пудо-животэз договоръёсъя кышкатэк сётоно нимаз хозяйствоосы. Гуртэз рынокен ужанэ выжтон понна, экономикая но правоя нимысьтыз ужрадъёс кутоно, нош со Удмурт Республикаысь Правительстволэн ужез но тӥляд, гажано депутатъёс. Бадӟымесь луонлыкъёсыз пичи но шор ёзо ужбергатонлэн. Та вакытлы асьме дорын ужзэс азьланьто 7,5 сюрс пала пичи предприятиос, кудаз пыриськемын 10 процентэз ужась калык. Пичи предприятиослэн продукцизылэн быдӟалаез ар ӵоже люкаськиз 2 триллион манет пала. Соослэн асьсэ коже ужаны быгатэмзы ужъя рыноклэсь тудӟемзэ кулэстэ. Ремесленникъёслы нимысьтыз юрттэт сётыны кулэ интыысь аскивалтон ёзъёс. Нош Удмурт Республикаысь Правительство коньдон висъялоз пичи предпринимательстволы азинскыны, выль ужан интыос кылдытыны юрттӥсь городъёслэн но районъёслэн администрациоссылы. Приватизацияя йылпумъянъёсты эскерыса вераны луоз, республикаямы кылдытэмын экономикая выль ёз, кудаз трослы воштӥськиз кун секторлэн кулэлыкез но интыез. Экономика кун луисьтэм сектор валтӥсь интыын луиз. Правительство азьвыл бадӟым саклык висъя ке вал приватизацилы, табере басьтӥськиз кун ваньбурез кутон борды. 1997 арын приватизацилэсь басьтэмын 7 миллиард манетлэсь ятыр коньдон. Приватизация улэ шедись котькуд предприятия нимысьтыз уж нуоно, Правительство ласянь кун ваньбурен кивалтон ужпумъёсты эскеронэз юнматыса. Приватизация сярысь закон вылэ пыкъяськыса, приватизациын кутӥськозы выль амалъёс: кун ваньбурез вклад интые пыртоно хозяйство нуись обществоослэн уставной капиталзы; кун предприятиосты акциосын огазеяськонъёсы пӧрмытоно, кудъёсызлэн 100 процентэз акциоссы кун асваньбуре пыро. Республикалэн экономикаезлэн одӥгез будон сюресэз - регионъёсын но мукет кунъёсын кусыпъёсты юнматон, вузкаронлэн но бытовой юрттэт сётонлэн азинсконэз. Республикамылэн мукет кунъёсын вузкаронэз кылем арын будӥз 12,6 процентлы, со 800 миллион доллар пала люкаськиз. Кунгож сьӧрын вузано сырьёлэн огъя люкетэз улӥе лэзиське, нош машинаосты но оборудованиез вузан 3,4 пол йылӥз. Мукет Кунъёсын вузкарон удысын валтӥсь инты басьтэ кун сьӧрысь инвестициосты кыскон. Озьы республикамылэн экономикаяз 10 миллионлэсь ятыр доллар кыскемын, 1996 арен ӵошатыса, со ньыль поллы будӥз. Коньдон тужгес но трос висъямын связез, лэсьтӥськонэз азинтонэ, медицинаын кутӥськись техникаез поттонэ. Регионъёсысь хозяйствоослэсь структуразэс выльдонъя но азинлыксэс ӝутонъя мукет кунъёсын кусыпъёсты юнматон понна кутэмын Удмурт Республикалэн мукет кунъёсын кусыпъёсты тупатонъя 1998-2000 аръёслы но 2005 арозьлы программа. Мукет кунъёсын вузкаронлэсь умой палзэ пусйыса, вератэк уг луы куд-ог предприятиосысь кивалтӥсьёслэсь ужъя партнёръёсты нимысьтыз чаклам планъя утчаны тыршымтэзэс. Куд-ог дыре сыӵе вамыш предприятилы, республикалы изъян вае. Асьмелы нуналысь нуналэ будэтоно республикамылэсь данзэ, со понна уже кутоно мукет кунъёсын экономика но политика ласянь кусып возись ведомствоослэсь, соослэсь кунгож сьӧрысь представительствооссылэсь луонлыкъёссэс. Дыр вуиз ни Россилэн опытэзъя республикаямы вузкаронъя но экономика удысъя мукет кунъёсын кусып возись комиссиос кылдытыны, озьы ик Удмурт Республикаысь министерствоос но ведомствоос юнгес ужаны кулэ Россия Федерацилэн Правительствоысьтыз Консультативной Советэн, кудӥз кунгож сьӧрысь инвестициосты кыскон бордын ужа. Регионъёсын кусыпъёс но трос дыръя йылпумъясько правительствоос куспын тупан гожтонэн. Та ласянь пыр-поч лэсьтэм ужзы уг адӟиськы Вузкаронъя но бытовой юрттэт сётонъя министерстволэн, мукет министерствоослэн. Уже ляб кыскемын ужбергатон ёзъёс. Берло аръёсы вузкарон удысын умоесь воштӥськонъёс ортчизы. Калыклы кулэ луись вузъёсты вузанлэн огъя быдӟалаез 1,7 процентлы будӥз. Дӥськут, сиён-юон, созэ но тазэ вузась рынокъёсын, 1996 арен ӵошатыса, вуз кошкемын 25 процентлы тросгес. Республикаысьтымы рынокъёсын вузъёслэн бергамзы будэмен валче, Правительство матысь дыре чакла соослэсь ужзэс умоятыны. Со бордын али ужа специалистъёслэн бадӟым группазы, Удмурт Республикаысь Югдурез утёнъя министрлэн кивалтэмез улсын. Социальной политикаын одӥгез тужгес но кулэез ёз - калыклы улон юртъёс пуктон. Берло аръёсы лэсьтӥськон ужъёс йылӥзы. 1996 арен ӵошатыса, кылем арын улон юртъёс 12 процентлы тросгес сётэмын, 43 процентлы йылӥз нимаз улон коркаос пуктон. Центральной банклэн рефинансированиезлэн будэмез шоры учкытэк, Удмурт Республикаысь Правительство кылем арын чаклам условиосъя ик капчиятэм кредитъёс сётэ асьсэлы улон коркаос пуктӥсьёслы. Сюресъёс лэсьтэмын 20 процентлы тросгес, газопровод - 7,8 процентлы. Квартираосы кизертэм газ сётонэз природноеныз воштон борды басьтӥськиз Воткинск администрация, соослэсь адӟем карыны кулэ мукет администрациослэн кивалтӥсьёссылы но. Природной газэ выжемен валче, республика кылем арын 1 миллиард манет коньдонзэ шыръяз. Таяз арын капитальной вложениосты азьло мында ик кельтыны чакламын. Бадӟым уж нуоно луоз жилищно-коммунальной хозяйствоез выльдонъя. Та ужен дыртыны уг яра, кызьы шуо: сизьым пол мерта, одӥг пол но эн ванды. Калыклы уг кельшы транспортлэн, "Удмурттелекомлэн", газ сётӥсь организациослэн, энергетикъёслэн ужамзы. Татын шуг-секытъёс кылдо тыронъёсты ӝегатэмен, но со нокудзэс но шонере уг потты. Калыклы улыны ӟеч луонлыкъёс сётонъя туала радлык кылдытоно, нош предприятиослэн кивалтӥсьёссылэн кулэяськонъёссы туала улонлэн куронъёсызлы куд-ог учыре уг тупало. "Республика" ("Элькун") ощественно-политической огазеяськон кылдытон сярысь тупанкыл Ми, та документ улэ гожтӥськемъёс, Удмурт Республикаысь общественно-политической движениослэн но партиослэн оскем муртъёссы, "Республика" ("Элькун") общественно- политической огазеяськон кылдытон сярысь тупанкыл кутӥм. Общественной организациосты, вань ёзъёсысь депутатъёсты, вань гражданъёсты, кин дурбасьтэ: - экономикаез но политикаез юнматонлы; - республикаын тупаса но огкылысь улонлы, правовой кун кыдытонлы но законъёс кылдытӥсь, быдэсъясь о судебной властьёсты ӟечгес люконлы; - властез калыклэсь мылкыдъёссэ, малпанъёссэ лыдэ басьтыны но властьлэсь ужамзэ зэмзэ но эскерын быгатӥсь гражданской обществоез кыдытонлы; - асваньбурез кутонлэн пӧртэм амалъёсызлэн огкадь правоен луэмзылы, рынокен экономикалы, кудӥз монополиослы пумит законодательствоен утемын мед луысал, уж вылын выжонлы, кун асваньбурез нимаз адямиослы люкылонэз пыр-поч эскеронлы; - ужаны быгатӥськемъёсты, пенсионеръёсты, ветеранъёсты, ӧлексыосты, бюджет чотын ужасьёслы, ужтэк кылемъёсты, студентъёсты социальной удыс ласянь утёнлы, анайёсты но нылпиосты утёнлы; - республикаын улӥсь калыкъёслэн огкадь правоен луэмзылы, соослэсь сямъёссэс, культуразэс, кылъёссэс утёнлы но азинтонлы, калыкъёслэсь данзэс гажанлы, огазеянлэсь кулэлыксэс валаса. "Република" ("Элькун") огазеяськон парламентлэн ужаз, законъёсты кылдытӥсь, быдэсъясь но судебной властьёслэн ёзъёсазы но интыысь аскивалтонлэн ёзъёсаз быръёнъёсты дасянэ но отчытонэ пыриськоз, ас кандидатъёссэ ӵектыса но соослы юрттыса, агитационной уж нуыса. Ми ас азямы таӵе ужпумъёс пуктӥськом: интыысь администрациослы киывалтӥсьёсты, республикалэн Кун Кенешаз но интыысь аскивалтонлэн ёзъёсаз депутатъёсты бырйыку кандидатъёсты дасян, быдэсъясь но судебной ёзъёсын ужаны вылӥ быгатонлыкен специалистъёсты дышетон, озьы ик республикаын экономикаен, социальной удысэн но политикаен герӟаськем реформаосы ортчытонлэсь вуж законодательной инъетсэ тупатон но ваньзэ сыӵе инъетэз кылдытон. Кенешыса ужан понна, ми кылдытӥськом "Республика" ("Элькун") огазеяськонэз отчы пыриськись котькудӥзлэсь организациослэсь одӥг муртсэ делегат карыса но солы решение кутыны правоен куара сётыса. Милям малпанъёсмылы, ужпумъёсмылы дурбасьтӥсь гражданъёс, мукет общественной огазеяськонъёс "Республика" ("Элькун") огазеяськонэ пырыны быгато. Вань удмуртъёслэн "Удмурт кенеш" ассоциацизылэн нимыныз - В. К. Тубылов Удмурт культурая "Дэмен" огазеяськонлэн нимыныз - А. И. Поткина Удмурт нылкышноослэн огазеяськонзылэн нимыныз - Г. А, Никитина Бигер центрлэн огазеяськонэзлэн нимыныз - М. В. Гаратуев "Одо Мари Умем" огазеяськонлэн нимыныз - Н. Д. Телицина Удмурт Республикаысь писательёслэн союззылэн нимыныз - П. В. Куликов. РОССИЯ ФЕДЕРАЦИЛЭН КУН НАГРАДАОСЫНЫЗ ПУСЪЁН СЯРЫСЬ РОССИЯ ФЕДЕРАЦИЛЭН ПРЕЗИДЕНТЭЗЛЭН УКАЗЭЗ Кун азьын бадӟымесь вормонъёссы, уно аръёс ӵоже сюлмысь тыршемзы но калыкъёс куспын эшъяськонэз юнматэмзы понна пусъёно Почёт орденэн Богомольный Евгений Исааковичез - акциосын "Удмуртнефть" огазеяськонлэсь генеральной управляющийзэ, Дружба орденэн Изибаев Арсентий Каминовичез - акциосын "Удмуртнефть" огазеяськонлэн буровой ужъёсъя управлениысьтыз бурильщикез, Шайхутдинов Равиль Талгатовичез - акциосын "Удмуртнефть" огазеяськонлэн генеральной управляющиезлэсь воштӥсьсэ - буровой ужъёсъя управленилэсь кивалтӥсьсэ, "За заслуги перед Отечеством" орденлэн ИИ степенё медаленыз Булдакова Нэля Михайловнаез - акциосын "Удмуртнефть" огазеяськонлэн нефть но газ поттонъя "Ижевскнефть" управлениысьтыз нефть но газ поттонъя операторез, Насыров Амдах Мустафаевичез - акциосын "Удмуртнефть" огазеяськонлэн нефть но газ поттонъя "Ижевскнефть" управлениезлэсь кивалтӥсьсэ, Попов Олег Ивановичез - акциосын "Удмуртнефть" огазеяськонлэн Играысь нефть но газ поттонъя управлениезлэсь кивалтӥсьсэ. Му вӧй но газ поттӥсь промышленностьын вормонъёс басьтэмзы но уно аръёс ӵоже сюлмысь тыршемзы понна "Россия Федерациысь нефтяной но газовой промышленностьын дано ужась" сӥлы карон ним сётоно: Аверкиев Валентин Абрамовичлы - акциосын "Удмуртнефть" огазеяськонлэн нефть но газ поттонъя "Ижевскнефть" управлениысьтыз операторлы; Головин Иван Никитовичлы - акциосын "Удмуртнефть" огазеяськонысь отделэн кивалтӥсьлы; Дударев Михаил Ильичлы - акциосын "Удмуртнефть" огазеяськонлэн Играысь нефть но газ поттонъя управлениысьтыз депарафинизационной установкалэн машинистэзлы; Костенко Александр Ивановичлы - акциосын "Удмуртнефть" огазеяськонлэн Воткинскысь нефть но газ поттонъя управлениезлэн кивалтӥсезлы; Кузнецов Владимир Кондратьевичлы - акциосын "Удмуртнефть" огазеяськонлэн Воткинскысь нефть но газ поттонъя управлениысьтыз мастерлы; Курдюков Александр Аркадьевичлы - акциосын "Удмуртнефть" огазеяськонлэн буровой ужъёсъя управлениысьтыз мастерлы; Максимов Герман Максимовичлы - акциосын "Удмуртнефть" огазеяськонлэн Сарапулысь нефть но газ поттонъя управлениысьтыз валтӥсь геологлы; Сальников Виктор Сергеевичлы - акциосын "Удмуртнефть" огазеяськонлэн производстволы юрттэт сётонъя центральной базаысьтыз слесарь-электромонтажниклы; Сыртланов Эрот Ибрагимовичлы - акциосын "Удмуртнефть" огазеяськонлэн Сарапулысь нефть но газ поттонъя управлениысьтыз цехен кивалтӥсьлы; Швецов Виктор Николаевичлы - акциосын "Удмуртнефть" огазеяськонлэн Воткинскысь нефть но газ поттонъя управлениеныз кивалтӥсьлы. Лэсьтӥськон удысын вормонъёсыз но уно аръёс ӵоже сюлмысь тыршемез понна "Россия Федерациысь дано лэсьтӥськись" сӥлы карон ним сётоно Тимошин Виктор Алексеевичлы - акциосын "Удмуртнефть" огазеяськонлэн генеральной управляющиезлэн воштӥсезлы. Гурт хозяйство удысын вормонъёсыз но уно аръёс ӵоже сюлмысь тыршемез понна "Россия Федерациысь гурт хозяйство удысын дано ужась" сӥлы карон ним сётоно Добровольский Рудольф Георгиевичлы - акциосын "Удмуртнефть" огазеяськонлэн гурт хозяйствоя отделэныз кивалтӥсьлы. Россия Федерацилэн Президентэз Б. Ельцин. Москва, Кремль, 1998 арын 16 апреле. � 397. Книга ӝажыяды Кык нимо кузьым Удмурт нылпиос пӧлын ужасьёс ӧз вунэтэ на Надежда Лопатиналэсь "Кылъёсын шудон" книгазэ. Сое "Удмуртия" издательство поттӥз 1990-тӥ арын. Отын печатламын йыртӥянъёс, кроссвордъёс, чайнвордъёс, кроссчайнвордъёс. Валамон ини, соосын тунсыкъяськись пиналъёс амалтэк учконо луо пӧртэм книгаосты, журналъёсты, газетъёсты, юаллясько дышетӥсьёслэсь но анай-атайёслэсь. Историез, биологиез, географиез мургес тодэм сяна, покчос кылзэс волято. Книгалэн авторез йылпумъямын Можгаысь педагогикая училищеез но Удмурт кун университетлэсь удмурт кылъя но литературая люкетсэ, ужамын "Дась лу!" ("Ӟечбур!") газетлэн редакцияз но книга поттоно ини. Нылпиослы гожъям кылбуръёсаз ӵемысь пыртылӥз кукетӥ пуштрос шуонъёс - аспӧртэм йыртӥянъёс. 1994-тӥ арын асьмелы кузьмаз шудонъёсын-ӵшатсконъёсын "Буква вӧзы буква..." книгазэ. Нырысез сямен ик, таиз но издание бадӟым юрттэт сётэ школаын, библиотекаын ужасьёслы удмурт кылъя ужрадъёс дасяны, покчиослы - тодон-валанзэс будэтыны, ваньмон дырзэс пайдаё ортчытыны. Ачиз Надежда Лопатина гожтэ: "Йырез тӥясь аспӧртэм ужъёс малпаллян... удыс монэ магнит сямен бордаз кыскиз, словарьёсын, книгаосын бугыръяськыны дышетӥз. Нуналысь нуналэ паймыны кутски удмурт кылмылэн узыр, тунсыко, чебер, жингрес, омыръяса быдтонтэм пӧзись ошмес кадь луэмезлы. Озьы кылдӥзы "Кылъёсын шудон" но "Буква вӧзы буква..." книгаосы". Кыкетӥ книгаезлэсь ог люкет тиражзэ вӧлмытонэ автор ачиз пыриськиз. Городъёсысь но райцентръёсысь дышетӥсьёс соку лулскылӥзы: эх, малы меда сыӵе издание ӧвӧл ӟучомем пиналъёс понна? Сыӵе вераськонъёс тубизы Калыкез дышетонъя министерствое , Правительствое, Кун Кенеше. Кун Кенешлэн Тӧроезлэн воштӥсез, Ижысь Технической университетысь профессор Владимир Пономарёв дэмлаз таӵе книгаез кык кылын дасяны. Малпамын вал одӥг бамын артэ печатланы удмурт но ӟуч кылъёсын текстъёсты, йырын возён вылысь, ӵем пумиськылӥсь куд-ог кылъёсты нимысьтыз пусйыса сётыны. Кылбуръёсты ӟуче берыктӥз Владимир Созонов. Суредъёсын чеберъяз удмурт пи Владимир Коркин. Со, трос художникъёс сямен, ас шаераз заказъёстэк улӥз. Аспӧртэмлыко суредъёссэ синйылтӥзы но тунсыкъяськыны кутскизы Москваысь книга поттӥсьёс. Ужъёс сётъяны ӧдъязы "Росмэн", "Малыш" но мукет издательствоос. Вазенгес ай, ньыль-вить ар талэсь азьло, Надежда Лопатина вазиськем солы вуоно книгазэ суредан пумысен. В. Коркин соглаш луэмзэ верам. Верамын бере - лэсьтоно, быдэстоно. Нош сётэм кылэз куинь ар возьмано, шуо. Та книга но потонзэ сомындагес ик возьмаз. Озьы ӟучомем нылпиос понна вордскиз кык нимо кузьым - "Буквы в прятки разыгрались... - Чимали букваос". Ӝоген со вуоз лыдӟисьёс кие. Кызьы пумиталозы книгаез дышетӥсьёс но пиналъёс, али шуг ай вераны. Оскем потэ, юн шумпотозы шуыса. Книга сярысь шунытэсь кылъёс верам сое потэмезлэсь азьло лыдӟем мурт, республикаысьтымы кун премилэн лауреатэз, калыкез дышетонысь дано ужась но отличник А. Н. Журавлёва. Автор, пе, кылэз умой шӧдэ, кык кылэз дышетӥсь нылпиос понна таӵе литература шер пота. Мед шедьтоз книга аслэсьтыз лыдӟисьёссэ, мед яратозы сое пичиос. А. Петров. Лыдӟисьёслы вазиськон УЖАЛОМЫ-А УРТЧЕ? Калыкен пумиськонъёсын но редакцие вуэм гожтэтъёсын милемды, "Удмурт дуннелэн" редакцияз ужасьёсты, ӵем гинэ пыкыло: таиз но, пе, газетады уродгес, созэ но удысэз ляб возьматӥськоды, мукетыз сярысь воксё уд гожъяське. Тросэз пыкылонъёс шонересь. Кытчы пырод, ваньмаз ум вуиське, кытӥяз, оло, тодон-валанмы но уггес тырмы, куддыръя умой ум тодӥське лыдӟисьёсмылэсь кулэяськонъёссэс. Но ми котьку дась адямиослэсь верам мылкыдзэс лыдэ басьтыны, янгышъёсмес тупатыны, тырмымтэосмес палэнтыны. Тани берло аръёсы ӧжытгес гожъяськом выль законъёсты утён, улонэ ӟеч сямъёс пыӵатон сярысь. Соин ик редакциын решение кутэмын выль отдел кылдытыны. Нырысь чакламмыя, со шуиськоз тазьы: законъя но сямъёсъя отдел. Валаськомы, нимыз сокем ик ӟеч ӧвӧл шуыса. Отӥяз, лыдӟисьёслэсь ӵектонъёссэс лыдэ басьтыса, оло, умойзэгес шедьтом. Маин выроз выль отдел? Солэн удысаз тужгес бадӟым инты басьтоз йыртэманэн нюръяськон. Соиз яке таиз бадӟым йыруж сярысь ивортонъёсын гинэ буйгатскыны ум малпаське. Одно ик тыршомы солэсь мугъёссэ но выжыоссэ шараяны. Газет бамъёсын та пумысен вераськозы пӧртэм специалистъёс - законъёс кылдытонын, сое быдэсъянын но правоез утёнын ужасьёс, юристъёс-тодосчиос (учёнойёс), психологъёс, педагогъёс, кун ёзъёсысь кивалтӥсьёс. Ялан возьматъяны тыршом МВД-лэсь, ФСБ-лэсь, судъёслэсь, прокуратуралэсь но мукет эскерись органъёслэсь нуналмысь ужамзэс. 1972-тӥ арын газетамы "Валэктэ юрист" сэрегмы вал. Пӧртэм мугъёсын сэрен, берло вакытэ со начармиз. Сэрегмес выльысь улӟытӥськом. Калыклэн угось законъёс сярысь тодон-валанэз ӧжытгес ай. Котькуд юанъя юрисконсультлы яке нотариуслы вазиськоно ке, дуно усе. Кыдёкысь гуртъёсын улӥсьёс сыӵе специалистъёс доры сюрес но шуак уг шедьто. Соин ик газет котьку дась луоз тӥледлы ӝегатскытэк но дунтэк валэктон сётыны. Туннэ печатласькись "Валэктэ юрист" сэрегмы матынгес, дыр, городын улӥсьёслы. Оскелэ: отӥяз ми гурт калыкен одӥг омырен шокалом. Жаляса верано луэ, куд-огез азгынмем кивалтӥсьёс огшоры адямиез вӧсь каро, ӝоже уськыто. Соослэн озьы дауртэмзы уголовной яке гражданской правоез тӥянозь ӵем дыръя уггес вуы. Озьы бере, укылтэмъёслэсь кылзэс судын уз юалэ. Нош газетын соослэсь кырсь ужъёссэс но нимъёссэс шара веран - кыл кутытон ӧвӧл шат со? Соин ик, гажано лыдӟисьёс, шуге-леке вуиды ке, одно ик вазиськелэ редакцие, кӧт ӝождэс пушкады эн возе. Нош ми одно ик тыршом юрттыны, котькуд сураськем югдурез сэрттыны-пертчыны. Гожтэтъёс пумысен вераськонэз азьланьтоно ке, котькыӵе удысэз басьты, но лыдӟисьёсын матысь кусып возьытэк, соослэн юрттэтсытэк газет бамъёсмы бездытгес адӟисько. Соин ик юн оскеммес вераськом, выль удысмес тунсыкогес, пайдаёгес карон понна, тӥледын, гажано лыдӟисьёсмы, уртче ужалом шуыса. Геннадий КОРЯКОВ, законъя но сямъёсъя отделлэн редакторез. Шӧкыч СЕРЕМ ПЫР Юнме ветлӥзы Йыгаськись пумитэ ӧссэ усьтыса, кузё кышно адӟе мычем йырын куинь пиосты. - Рэкетиръёсты тӥ-а ӧтиды? - Ӧм. - Хм. Соку юнме лыктэммы понна тыре 10 сюрс манет. Кышкыт ӧвӧл - Милиционер эш, вералэ пожалуйста, та ульчаетӥ оген ветлыны кышкыт ӧвӧл-а? - Кышкыт ке луысал, мон татын ӧй сылысал. "Жигули" ӵектӥзы Судлэн залаз. - Адӟись, тӥ тодӥськоды, ма возьма тӥледды учырез мыдлань валэктэмды понна? - Бен-бен, тодӥсько. "Жигули" ӵектӥзы. Пегӟоз кожаз Нылкышно сантэмазы шуыса вазиське милицие. - Валэктэ, кызьы вал ужпум. - Со монэ мышлань кырмиз но сантэмаз. - Малы нош ӧд кесяське? - О-о, кесяськод, пе. Со ялан кышкатӥз: "Кесяськод, мон соку ик пегӟо!" Шудо воргорон Вагонын верасько кык воргоронъёс. - Ну, удалтӥз ке удалтӥз мыным кышнолы - ангел но тӥни. - Бен, шудо маке тон. Мынамез ялан улэп на. Дышетӥз Лушкаськись вожомыса дышетэ пизэ. - Йӧлвылэз лушкем сиемед понна мон тонэ уг жугиськы - банка борды чиньы пытьыостэ кельтэмед понна... Вормон нуналэн! Ожысь но ужысь ветеранъёс, Удмуртиын улӥсьёс! Витьтон куинь ар талэсь азьвыл 1945 арын 9 мае странамылэн, быдэс дуннелэн историяз зарни букваосын гожтэмын вал - Вормон! Калыкмы понна со дуно йӧтӥз - уно миллион адямиос быризы, тросэзлэн улонзы йырчукин берытскиз, со вакытысь нылпиос пинал дауренызы вазь люкиськизы. Сыръясь кот интыосын, лымыен шобырскем бусыосын но тэльёсын, шундылэн сутӥсь тылсиосыз улын степьёсын мынӥз тушмонэн шимес жугиськон. Нош станокъёс но герыос сьӧрын сылӥзы солдатъёслэн кышнооссы но анайёссы, вазь быдэ вуэм пиоссы но нылъёссы - ваньмыз. кин фронт сьӧрын ассэ жалятэк ужаз, вормонэз матэктон понна. Быдӟым оже пыриськемъёс асьме пӧлысь нуналлы быдэ кошко. Республикаысь кивалтӥсьёс туала секыт вакытъёсы ваньзэ лэсьто, ветеранъёслэсь улонзэс капчиятон понна. Жаляса верано, туала югдур. "Ветеранъёс сярысь" Законэз тырмыт быдэсъяны луонлык уг сёты, но асьме шаерын та законлэн валтӥсь льготаосыз быдэсъясько. Гажано ветеранъёс, Удмурт Республикаысь ужаса улӥсьёс! Быдӟым Вормонлы 53 ар тырмемен тӥледыз! Йыр вадьсады инбам чагыр мед луоз, ужады азинсконъёс, юн тазалык, шудбур тӥлед но, матысь муртъёстылы но! Праздникен! Удмурт Республикаысь Кун Кенеш Удмурт Республикаысь Правительство Шӧкыч Вал тазьы. Но... Тушмонлы пумит лек ыбылӥськем бере, окопын кыллё кык боецъёс. Одӥгез сӧсырмемын, мӧля вылаз вир орсмемын. Ӝуштэ: - Мыкола, ыб монэ. Немец вуоз - эшшо зол курадӟытоз. - Уг быгатӥськы, патронъёсы быризы. - Мынам вань, одӥгзэ вузало. *** Роталэн командирез радэн ошылэм автоматъёс пӧлысь шедьтэ одӥгзэ сузямтэ-вӧятэмзэ. Йыркуръяськыса юа: - Кинлэн та автоматэз? - Ижысь конструкторлэн Калашниковлэн! - сэзь вера одӥгез солдат. *** - Рядовой Хабибуллин! Ма со вордскем дунне? - Шуръёс, нюлэсъёс, бусыос... - Ӧвӧл, Хабибуллин! Вордскем дунне - со тынад анаед. Валад-а? - Валай, командир эш! - Мае валад? - Вордскем дуннее мынам анае луэ шуыса. - Рядовой Петров! Ма со вордскем дунне? - Хабибуллинлэн анаез. - Петров, вордскем дунне - со тынад но анаед. Валад-а? - Валай, командир эш! - Мае валад? - Мон Хабибуллинлэн выныз луисько шуыса. *** Командир - солдатлы: - Учкисько ке, тон мултэс визьмо луэмед. - Кин, мон-а? - Бен, тон, ачим сярысь уг вераськы. Куартолэзь Ваньмыз вожектэ, пушъе, сяськаяны кутске мае. Соин ик удмуртъёс тулыслэсь та берло толэзьзэ куартолэзь шуыса нималлям. Мон ватсасал на: сяськаясь, ужась. Тулыс нунал арез сюдэ шуэмзы ӵапак та вакытлы тупа. Пичи но ӝеганы уг яра. Ваньзэ дыраз мерттыны-кизьыны сюлмаськоно. Али тыршемед сӥзьыл ӟеч емышен шумпоттоз. Шуныт, шундыё нуналъёслы шумпото тылобурдоос. Вазь ӵукна ик "концерт" возьмато: лулпуосын, бадьпуосын - уӵыос, куак пушкын - пислэгъёс, корам интыосын - ӵужйыръёс (овсянка), котырак кикыос но ӟиллёос (зяблик). Чебересь тулыс май нуналъёслы шумпотэмзэс кыре поттыны дырто писпуос. Улмопуос, чияпуос, льӧмпуос синмез мальдытӥсь югыт дӥськутэн пӧрмытско. Выль кенъёс но тӥни! Я, кызьы, пе, уд учкы соос шоры. Мылкыд пиналме, вань сюлмаськонъёстэ вунэтӥськод кадь, та чебер шоры учкыса. Льӧмпу сяськаян вакытэ кезьытъёслэсь вуэмзэс но вунэтоно ӧвӧл. Соку, емышо садэз утён понна, пичиесь тылскемъёс лэсьтоно, ӵын мед утёз писпуосты кынмемлэсь. Нырысь тулыс зорен йырез котто, йырси, пе, мед будоз озьы ик ӝог, кызьы ӝутске май толэзе турын-куар. Май толэзен трос калык веранъёс герӟаськемын. Май нюлэсэз вожектытэ, гужемез куное вите. Мае потэм турын сютэм муртэ но катьялоз. Мае усем лысву валъёслы сезьылэсь но ӟеч. Мае усем зор ю-няньлы ӝутскыны юрттэ. Май кезьыт ке, ю-нянь удалтоз. Дэремен гыро, шубаен кизё. Куартолэзьлэсь вошъяськемзэ мон чорыгъёс вылын чакласа улӥ. Тани ву пыдэсысь нӧдын улӥсь сом, кылсярысь, куазь уродмон, гудыръян, зор-кот усён азьын выллань ӝутске. Аквариумысь гордкӧтул (голец) куазез самой ӟеч тодӥсьёс пӧлы пыре шуи ке, уг янгыша, дыр. Ву пыдсын чус кылле - куазь туж сайкыт, чебер. Аквариум борддор вӧзтӥ уя, быжзэ выретэ - учкы укное, озьыен, пилемъёс инбамез возъяло. Шузимыса сямен уллань-выллань ӝутске-лэзьке - зор азьын. Туэ кезьыт кема возиське ке но, тулыс аслэсьтыз лэсьтоз - вуттоз шуныт дыръёссэ, вожектоз гуждор, сяськаялозы будосъёс, шумпоттозы емышъёсын. А. Сутулов. Репортаж КЫК ШУР ВИСКЫН - 44 ар ӵоже татын улытозямы, собыдӟа вуэз ӧм адӟылэ на, - шуо Пичи Пурга районысь Малая Бодья гуртысь Викуловъёс.- Норьялась тыметсы кыриськыса, Постол шур олокызьы гинэ будӥз, пудоосмес но утялтыса ӧм вуэ. Эрказъяськыса бызись ву уин вуиз. Тужгес но зол шуккиз артэ сылӥсь кык Викуловъёслэсь хозяйствооссэс. Александр Николаевичлэн быризы курегъёсыз, вуын сылмиз тонна ёрос пудо сиёнэз, тысез но мукетыз. Гулбечысь картофказы быдэсак вуэн шобырскиз. Скалзэс, ыжъёссэс, кунянзэс турын сиге тубтӥзы. Шуге-леке сюрем гуртоосты утёнын уен-нуналэн кык сутка ӵоже тыршизы сюресъёсты тупатонын ужасьёс. Соос ик ворттӥзы сюен тырмытэм мешокъёсты. Ульча шортӥ кошкись трактэз утизы, куашканы ӧз сётэ. Бодьяла вуыкум, Постол шур ӧраз пыремын вал ини. Но шукыръяськем бервылыз озьы гинэ уз куасьмы. - Ми дорын ай чидамон, ву кошкиз ни. Яганын югдур кышкыт: Постол ке ӧз, Иж шур соосты пачкатоз, - шуизы бодьяос. Яган посёлок артэ. Дыртӥськом отчы. Кыдёкысен адске зарезь кадь пасьтана вӧлскем Постол шур. Нёжал интыос - котырысь нюлэс, улыге пуксем ульчаос - ваньмыз вуэн котыртэмын. - Ӵапак 1 мае нуназе котырын шур вӧлскыны ӧдъяз,- шуо быдэсак вуэ шедем Токаревъёс.- Ярам коть, ваньмыз ныылпиосмы гуртэ кемлазы. Пудоосмес поттыны вуим. Постол шур таяз учыре интыен-интыен кык метрозь ӝутскиз. Улыно-вылыно коркаосын улӥсьёс улӥ этажъёсысь эвакуировать каремын вал. Куд-огъёсыз али берытскизы ни. Ву метр ёрослы кулэсмиз. Озьы ке но, лодкатэк ульчае уд поты на. Яган кышкытгес интые пуксемын. Тракт та пала пуксемъёсыз шедё Постол улэ, сопаласез - Иже. Таиз но кык-куинь иськем ёрос тудӟемын ни - дол-дол сылэ. Вите аслэсьтыз дырзэ. Посёлокез утёнъя ужрадъёс куто ке но, эрказмем кужымез озьы гинэ уд сермета. Яганын улӥсьёс нуналлы, часлы быдэ кылзо вулэсь куашетэмзэ. Нош Постол шурлэсь таӵе адӟонэ вуттэмзэ валэкто выль выж пуктэмен. Ву кошкон ӧрыз солэн пичи кельтэмын. Кинлэн ке лэсьтэм янгышез табере гурт калыкез арысь аре кышкатыса возёз-а? Бодьяос, яганъёс мукет сюлэмшугзэс но верало: кин берыктоз соослы тамында ыштонъёссэс? Л. МЕДВЕДЕВА, В. КАМАШЕВ (фото). Ӵуказе, 9 Мае, Ижевскын 8 час 30 минутэ. Ялан ӝуась тыл дорын буре ваён ожын быремъёслы. 11 часэ. Тупаса улонлы сӥӟем эстафета. Старт сётӥське Центральной площадьынсен. 14 часэ. Городысь ваньмаз кинотеатръёсын ожысь но ужысь ветеранъёс понна возьматӥське художественной фильм. 15-17 час. Духовой музыкалы сӥзем ӝыт (Егитъёслэн юртсы). 17-21 часэ. Праздниклы сӥзем концерт (Центральной площадь). ШАХМАТ "Ижпланета" клубын пумиськылӥзы Ижевскысь шахматистъёс. Ӵошатсконэ пыриськиз 74 воргорон но 4 нылкышно. Нырысетӥ пумиськонын ик кужмо луэмзэ возьматз мастере кандидат 15 аресъем Алексей Пименов, 6 номеро нылпи спортивной школаын дышетскись. Укмыс пол шудыса, 8 очко люказ. Бадӟым опытэн шахматистъёс пӧлын егит пилэн вормемез - туж ӟеч ини! Та выллем учыр Ижевскын берлозэ вал 25 ар талэсь азьло - городлэн чемпионэз соку луиз 15 аресъем Сергей Хлусевич. Туннэ со - гожтэт пыр шахматэн шудонъя международной гроссмейстер. Алексей Пименовлы быдэн одӥг очко келязы спортъя мастере кандидат Алексей Баранов, Александр Абашев но Вячеслав Пикуль. Нылкышноос пӧлын 9 очко пӧлысь 6 очко люказ 6-тӥ нылпи спортивной школаысь тренер Светлана Ильинская. Нимысьтыз кузьымен пусъемын 13 аресъем Егор Васильев (67-тӥ школа), пенсионеръёс пӧлын - Жан Рыков но Петр Палсуев. Ваньзы соос быдэн 5 очко люказы. И. ВЕЛЬТМАНДЕР. Дышем сямъя данъяськы, семья 15 мае быдэс дунне данъялоз Семьялэсь нуналзэ. Удмурт Республикаын та нуналэз пусъё ни 1994 арысен. Семьялэн нуналэзлы бадӟым саклык висъяло республикаысьтымы кун ёзъёс, общественной но религиозной огазеяськонъёс. Асьсэлэсь нуналзэс пусйытэк уг кылё шаерысьтымы нимаз семьяос но. Семьялэсь нуналзэ республикаямы пӧртэм сямен ортчыто. Но вань ни арысь аре выжись сямъёс. Кылсярысь, дышетӥсьёслэн но анай-атайёслэн пумиськонъёссы, "Мынам семьяе" темая сочинениослы но суредъёслы конкурсъёс, фотографиосын выставкаос, семьяослэсь концертъёссэс ортчытон. Та нуналэ музейёсы, концертъёсы, выставкаосы но мукет шулдыръяськон но шутэтскон ӝытъёсы семьяос дунтэк пырыны быгато. Йылпумъянъёс ортчо "Арлэн семьяез" конкурслы, устоосызлэсь но адӟем карымон семьяослэсь нимъёссэс районъёсысь Данъян книгаосы гожто. Шаерысьтымы семьяос быгатэмзэс возьмато спортъя ӵошатсконъёсын но. Та нуналэ нимысьтыз ужрадъёс дасяло районъёсысь "Семья" центръёс - ӧсъёссы соослэн усьтэмын котькуд семья понна. Пусйыны луысал трос мукет ужрадъёсты но. Матэктэ Семьялэн нуналэз. Нош кызьы меда пумитаны малпа та праздникез "Удмурт дунне" газетэз лыдӟисьёслэн бадӟым семьязы? Асьтэлэсь шумпотонъёстэс, вормонъёстэс, оло нош шуг-секытъёстэс милемлы но ивортоды? Л. Малых. СОЛДАТ Трос миллион нылъёсмы но пиосмы улонзэс сётӥзы, дуннеез Гитлерэсь утён понна. Соос пӧлын - удмуртъёс но. Та туж секыт оже, Курск дорын вир кисьтонэ, пыриськиз Завьялово районысь Люлли гуртын вордскем Константин Камаев. Сизьым классэз быдтэмез бере, атаеныз ӵош колхозын ужаз, малпа вал агроном луыны. Но дышетскыны ӧз кылды, кутскиз Быдӟым Отечественной война. Шаермес утьыны кошкизы солэн атаез Андрей Петрович но ӵужмуртэз Петр Петрович. Кыкназы ик быризы. 1942 арын гужем Костялы но повестка вуэ. Райвоенкомат сое ыстэ пулемётчикъёсты дасянъя курсъёсы. Отысен келяло лейтенантэ дышетскыны. 1943 арын мае младший лейтенант Камаев вуэ Западной фронтэ, соку ик пукто стрелковой взводлы командире. Ачиз но еж, боецъёсыз но. Соос ортчизы секыт сюресъёсты, йӧнатскизы госпитальёсын. Ялан дышетскизы ожмаськыны, танкъёсты быдтыны. Озьыен, азьпалан - Курской дуга? Вератэк но валамон вал: дотъёс но дзотъёс трос гинэ дасямын. Нырысь ожъёсын ик Камаевлэн взводысьтыз кӧняез ке пиос бырыны, сӧсырмыны шедизы. Витетӥ августэ мозмытӥзы Орёлэз. Дас нунал ортчыса, Карачев город дорын Камаев сӧсырме, келяло дивизилэн медсанбатаз. Кык арня ортчыса, нош ик берытске аслаз взводаз. Быремъёс интые выль боецъёс лыктӥзы, азьлооосыз пӧлысь кылиз на укмысэз гинэ. 1 сентябре кутскиз Брянск областез мозмытон. Сож шурез выжыку, Камаев нош ик секыт сӧсырме. Сое Москваысь госпитальын йӧнато, кӧня ке нуналлы отпуск сёто. Йӧнамез бере мукет часте сюре. Отын ожмаськыны ӧз кылды ни. Война йылпумъяськиз. Егит, йӧно мугоръем командир гуртаз бертӥз. Ужаз школаын физрук луыса, Завьяловоысь райвоенкоматын. Куамын арлэсь кема тыршиз "Металлург" подсобной хозяйстволэн кыкетӥ отделенияз. Ужаз плотник, бригадирлэн юрттӥсез луыса. Кызь ар ӵоже парторганизацилы секретаре бырйылӥзы. Константин Андреевич али но гуртоосыз пӧлын гажано адями. В. ЧЕРНОВ. Берекет Тодматске: выль кырӟан ОЙ, ТЫРОС Крезьгурез П. Н. Кузнецовлэн Кылъёсыз Куӟебай Гердлэн Ой, тырос ук, ой, уно ук Удмуртлэн куректонэз, Кам шурлэсь но туж паськыт ук, Туж бадӟым ук бӧрдонэз. Синкылизэ люкасал ке, Быдэс зарезь луысал, Куректонзэ люкасал ке, Гурезь ӝужда тырмысал. Оло, соин удмурт калык Губырмемын, зӥбемын? Оло, соин музъем борды Бурмемын, пачкатэмын. Оло, соин уг лу солэн Чальгес, ӝоггес султэмез, Оло, соин уг лу солэн Выль нунал вордытэмез? МАР-О КАРОД? Крезьгурез П. Н. Кузнецовлэн Кылъёсыз Куӟебай Гердлэн Мар-о карод малпаськемен, Чик нокинлы верамтэ бере? Мар-о карод гожъяськемен, Чик нокинлы лыдӟымтэ бере? Мар-о карод бадӟым визьмын, Чик калыкез визьмамтэ бере? Мар-о карод туж пӧсь сюлмын, Ас калыктэ гажамтэ бере? Берекет ТОДАДЫ ВОЗЕ * Мерттэмлэсь азьло огреч кидысэз йӧл пушкын котыса возе ай, емышъёсыз аспӧртэм шӧмоесь но жалемесь луозы. Нош чечы вуын ке возиды, ческытэсь луозы. * Йӧлвылэ ӧжытак гинэ йӧл ватсады ке, со шыдын но, соусын но люкен-люкен уз висъяськы, огъя вӧлскоз. * Картофка трослы ческыт луоз, вуэ кӧня ке укроп яке 3-4 пилет чеснок ватсаса пӧзьтӥды ке. * Ӵуж кушманлэсь, картофкалэсь, мукет бакча сиёнъёслэсь кие кылдэм виштыосыз кошкытын луэ пинь сузян пастаен. * Холодильникысь кӧш зынэз ас бордаз кыскоз йырын сугон ( сое вандылыса тыроно). * Жарить карон дыръя нӧкы вӧй уз сьӧдэкты, табаез азьло кӧс вӧен зырад ке. * Тюльлэсь укно возъетъёсты миськемлэсь азьло сылало шуныт вуын котыса возёно. Озьы со ӝог но чылкыт кошке. * Крахмаллэсь ӵужектэм утюгез уксусэн коттэм ӟустариен зырано, собере кӧс небыт ӟустариен ӵушылоно. НУНАЛЛЭН ТОДМЕТЭЗ Та вакытэ музъем ужасьёс туж витё шуныт тулыс зорез: нуналмысь ӝутске вож ненег турын, кужым люканы кутске ӟег уд. Вуиз сьӧдчабей кизён дыр. Уллёен-уллёен вуо чирдӥсь тылобурдоос. Сурсвузэ виятэ кызьпу, соин утялто висисьёсты. Вашкала календарья 10, 11 числоосы пусъё Семонлэсь, Максимлэсь, Ясонлэсь праздниксэс. Та нуналъёсы вордскем пиналъёслы сёто вылэм Василий, Глафира, Стефан, Семен, Иосиф, Мария, Марфа, Сусанна, Виталий, Кирилл, Максим нимъёсты. Та нуналэ... ар талэсь азьло 8 мае 1945 арын гожтэмын фашистской Германилэн капитуляциез сярысь акт. Озьы йылпумъяськиз 1418 уй но нунал ӵоже мынэм Быдӟым Отечественной война. 9 мае 1945 арын СССР-ысь Верховной Советлэн Президиумезлэн Указэныз 9 май нунал ялэмын Вормон праздникен. 10-11 мае 1945 арын 192-тӥ Оршанской Краснознамённой стрелковой дивизилэн частьёсыз (соос кылдӥзы 1942 арын Ижевск дорын) Яр - Глазов - Балезино - Кез чугун сюрес кузя кошкизы Дальний Востоке, милитаристской Японилы пумит ожмаськыны. Шӧкыч ТРИЗ-БРИЗ - КОНЦЕРТ БЫРИЗ (Кызьы пиналъёс ожгарчиез пӧязы) Ми, куинь пиналъёс, Тэшкыли кушем нимын самой лапегез эшмы, Равка но мон кылӥмы: пакгаузэ (борддоръёстэм липет улэ) бушато, пе, быдэс вагон кыӵ (жмых). Ми дыбыр! отчы. Матэ но уг лэзё. Ужзэс быдтэмзы бере, отчы кельтӥзы возьмаськисез - пыӵалэн солдатэз. Ог час котыр сылыса, солы акыльтӥз, лэся, оть-тать ветлыны ӧдъяз. Милемлы со ик кулэ. Тэшкылимы вамыштӥз часовой доры. Со туж умой эктыны быгатэ, кӧт вылаз но, йыр вылаз но берга, чиган пи но тӥни. - Дядя, мон тыныд концерт возьматӥ ке,- вазиськиз Тэшкыли,- кыӵтэ сюпсьыны ке но сётод-а? - Сёто, сёто, давай валяй... - Тани, учкы. Оп! Оп! Оп! Татын ожо, отын гоп! Э-э, бен кутскиз ук Тэшкылимы. Киоссэ чабке, кӧт урдсаз вутске, йырыз вамен берытскылэ. Тань тазьы тэтча бака, Тань тазьы лоба куака, Зумба-квин, зумба-ква-а, Зумба, зумба, зумба-ква! Солдатмы ымзэ усьтыса сылэ. - Вот молодец, вот умой! Эшшо, давай, эшшо. Со вие ми кык пол ини пул кадь паськыт кыӵъёсты лушкаса ватӥмы вуж пот пӧлы канавае. Куинетӥзэ мыныны кышкамы. Тэшкылимы но жадиз ни угось. Кыдёкысь солы киынымы шонаськом: "Тырмоз, кошкы азьысьтыз". - Триз-бриз! концерт, дядя, быриз,- солдат вадьсын кык-куинь пол тэтчиз на эшмы. - Вай ужаса поттэм кузьымме. Солдат Тэшкылилы мычиз кикур пасьта ӵуж юдэс. Вань кыӵмес нуим гуртэ анайёсмылы. Нош ог арня ортчыса, 9-тӥ мае нуназе бере 4 часын вуиз ивор: фашистъёс пазьгемын, война быриз. Анае шумпотэменыз пушкыз тырыса вазиськиз: - Пиналъёсы! Мон тӥлед туннэ эксэй шыд пӧзьто. Ачиз потӥз чуланэ мынам ваем кыӵелы. Со нуналэ милям нырысьсэ кӧтмы тыриз нап шыдэн но, ноку вунонтэм Вормон нуналэн но. Г. КАСИМОВ. Кин со Маннергейм? Кезьыт тулыспал нуналъёсы мон Юкаменск но Красногорск ёросын Вооружённой Кужымъёслы 80 ар тырмемлы сӥзем лекциос лыдӟи. Гуртын улӥсьёслы но пиналъёслы Финляндиен "тол ожъёс" сярысь вераме яраз. 1939 арын ноябрь толэзе Горд Армия "Маннергеймлэсь линизэ" тӥяны-чигтыны кутскиз. Мур гопъёс, лыдӟонтэм минаос, бетонэн-кортэн юбоос - со Маннергеймлэн линиез". Отын, музъем пушкын, улон интыос лэсьтылэмын вал, кытын шутэтсконни, изённи, сиськонни, ву нуись гумыос, электротыл ваись ёзъёс "ужазы". "Финнъёс туж зол "кыдамын" вал, нош асьме солдатъёс лябесь, номырлы дышемын ӧвӧл, мылкыдзы соослы пумит ожмаськыны ӧй вал", - озьы вераз Играысь Емельян Касаткин, кинлэн гадь вылаз Отечественной войнаын ожмаськемез понна куинь орден бырттэмын. Мур лымы нюръёс, солдатъёсты четлык (капкан) кадь "кутылӥзы", тушмонлы соосты быдтыны чик секыт ӧй вал. Писпуосын пукись "кикыос" асьме ожгарчиосты сюэн-сюрсэн быдтылӥзы. Со сярысь тодаз ваиз Шаркан ёросысь Сосновка гуртысь Василий Шамаев. Ньыльдон вить асьме дивизиос сю куатьтон сюрс солдатъёссэс "ыштыса", трос толэзь ожмаськыса, "Маннергеймлэсь линизэ" быгатӥзы ик тӥяны. "Тол ожъёс" асьмеды зол дышетӥзы, - вералляз калыкмылэн писателез Степан Широбоков. - Со но юрттӥз, дыр, толалтэ Москва дорын но Сталинград вӧзын немец фашистъёсты вормыны", - ватсаз на 313-тӥ ньыль ордено Петрозаводской дивизиын ожмаськем Степан Павлович. Быдӟым удмурт писатель но югдытӥсь Куӟебай Герд ожъёслэсь азьло та палась музъемын ик быдтэмын вал, соку татын "Маннергеймлэсь линизэ" кутскизы лэсьтыны. Кин со Маннергейм? Фельдмаршал но Финляндилэн президентэз, ачиз немец выжыысь, вордӥськиз та музъемын 1867 арын. Япониын война дыръя ожмаськиз ӟуч армиын, полковник луиз. Со пыдын но вал вылын трос странаостӥ ортчиз. Тани шуом, Кушкаысен Тибетозь (14 сюрс иськем) ӝыны арскын вуиз. Со сярысь книга но гожтӥз. Финляндия эрико страна луэм бере, Карл Маннергейм вордскем шаераз берытскиз, кӧня ке улыса президентэ быръемын вал. Визьмо политик, 1941-1944 аръёсы СССР-ен но Германиен эшлыко кусыпъёс возьыны турттӥз, соин ик суоми музъеме Герман но Горд армиысь ожгарчиос ӧз пыре. Военной но калык куспо ужъёсыз фельдмаршаллэн 124 орденэн но медален пусъемын. В. Поздеев, запасысь капитан. Визь люкад - шулдыръяськы Удмурт кун университетысь котькуд факультетын арлы быдэ научно-практической конференциос ортчо. Студентъёс лыдӟо курсовой ужъёссэс, тодон-валан люкало. 29 оштолэзе сыӵе конференция ортчиз удмурт филологияя но психолого-педагогической факультетъёсын. Докладъёс лыдӟем сяна, студентъёс Короленко нимо драмая театрын шулдыръяськон ӝытэ пыриськизы. С. Петрова. Вожатойёслы конкурс Кызьы ивортылӥм вал ини, егитъёслэн "Шунды" огазеяськонзы ортчытэ пиналъёслэсь гужем шутэтсконзэс радъянъя лагерь. Милемлы кулэ дышетскисьёсын ужаны быгатӥсь, шутэтскон дырзэс тунсыко радъянъя валась вожатойёс. Кинлэн сюлэмыз кыске пиналъёсын "Шундыкар-98" ужаны ӧтиськомы пыриськыны вожатойёслэн конкурсазы. Куронъёс: 1) вожатойёс ӟеч тодыны кулэ удмурт кылэз; 2) возьматыны кулэ пиналъёслы ужан амалъёссэс дасяно пӧртэм ужрадъёсты ортчытъян программа; 3) сямзыя капчи мылкыдо, пиналъёсын огъя кыл шедьтыны быгатсь, котьку юрттыны дась луись. Кин ассэ лыдъя куронъёслы тупа шуыса пыриське конкурсэ, со ортчоз егитъёслэн "Шунды" огазеяськоназы 15 куартолэзе 10 часын (Ижкар, Советской ульча, 1, УМОО "Шунды"). А. Айманова. Валерий КОРЕПАНОВ ТУЛЫС Ческыт-ческыт кӧлэм бераз Нош ик сайказ тулыс. Суренъяськись кезьыт толэз Улляз вань кужмыныз. Со шундыез ӝутӥз вылэ, Пилемъёсты пазяз, Толлэсь люкам гурезьёссэ Быдтэ ни син азьын. Лымы улын измем муэз Тани-тани со небӟытоз, Укно улысь чияпумес Вожак пуштырскытоз. Ас киын гожтэмез Геннадий Красильниковлэн Иж карысь музей-юртаз вуыло солэн эшъёсыз, ӵыжы-выжыосыз, тодмоосыз, озьы ик творчествозэ эскерисьёс - студентъёс, тодосчиос. Туэ южтолэзе но писателез буре вайыса татчы ветлӥзы Завьялын улӥсь сузэрез М. Д. Ишматова, Удмурт университетысь дышетӥсь Л. П. Федорова но мукетъёсыз. Усто сямлы пӧрме ни писателез тодэ ваён час ортчытъян но музейлы литератураен герӟаськем кыӵе ке но синпель, документ, автографен книга кузьман. Кылем арын татчы ваемын вал Г. Красильниковлэн ас киын гожтэм автобиографиез, нош туэ - А. Клабуковлэн егитъёслы гожтэм 200-лэсь ятыр гожтэтъёсыз. Таяз пумиськонэ М. Ишматова мадиз агаезлэн нимыныз герӟаськем куд-ог документъёс сярысь, кудъёсыз ӧвӧл на музейын. Н. Сергеева. Вормонлэн тулкымъёсыз Бусы вадьсын, ог интыяз веттаськыса, шулдыр гурзэ кисьтэ тюрагай. 53-тӥ тулыссэ уг бугыръяло ни асьмелэсь музъеммес снарядъёс но бомбаос, уг сутско сяськаяськись садъёс, гуртъёс но городъёс. Со понна музъемозь йыбырттоме Быдӟым Отечественной войнае ветлэм - песятайёсмылы, песянайёсмылы. Вормон нунал - вань калыклэн праздникез. Быремъёсты буре вайыса, Ялан ӝуась тыл доры лыкто егитэз но мӧйыез, улонысь кошкем солдатъёслэн нылпиоссы но соослэн пиналъёссы. Чал-чал сыло соос, излэсь ӝутэм монумент дорын. Улэп сяськаос... Синвуос.... Тодэ ваёнъёс... Ваньмыз со - Вормон праздник. Ижевскын та нуналэ ортчиз митинг. Люкаськемъёс азьын вераськизы Кун Кенешлэн но Правительстволэн, городлэн кивалтӥсьёссы. Спортэз яратӥсьёс пыриськизы Тупаса улонлы сӥзем эстафетае. Шумпотоно, соослэн радъёссы арысь аре йыло, Ветеранъёсты вошто егитъёс. Уг воштӥськы огез гинэ: Ялан ӝуась тыл дорысь 1 номеро Пост. Сылэ со тол но гужем, ӟырт кезьытэн но жаль зорыку. Священной долгзэс нуо вуоно солдатъёс, атыкай музъеммес утисьёс. Туспуктэмъёсыз В. Камашевлэн. "Гердэ" Кырӟанъёсыз даурлы кылемын Та толэзе ми, трос калыкез люкаса, сӥё-дано пусйимы туж усто удмурт кылбурчимылэсь Александр Вотяковлэсь вордскем нуналзэ. Солы туэ тырмысал 70 арес. Но секыт висён дырызлэсь вазь уретӥз солэсь улонзэ, чигтӥз кырӟась сюлэмзэ. Александр Дмитриевичлэн творчествоез туж яркыт, кысонтэм, мылкыдъёсмес бурдъясь. Но, тодэмея, куд-огез сое вунэтыны но ӧдъязы ини. Кулыкуз но котыраз эшъёсыз кӧня ке гинэ вылэм, ватӥсьёсыз но ичи люкаськиллям. Кудӥз-огез тодытэк но кылиллям весяклы кошкемзэ. Озьы ке но, удмурт калык та ӟырдыт сюлэмо кылбурчиез ноку но уз вунэты, ялан тодаз возёз. Сое вунэтыны уз сётэ туж чебересь кырӟанъёсыз, кылбуръёсыз, поэмаосыз. Жаль, улэп дыръяз солы сётӥллямтэ нокыӵе дано ним но, ӧй вал кутэмын Писательёслэн огазеяськоназы но. Котьма мед луоз но, калык туж яратэ Александр Вотяковез. Котькинлэсь золэз кырӟась уӵымы, кылбурчимы шуыса сётысал мон солы дано ним. Малпаське ай: кык сюлэсь ятырез кылбуръёсыз кырӟанъёслы пӧрмемын! Ӟучъёслэн но сыӵе авторъёссы ӧвӧл. Эсьмаса, Сергей Есенинлэн но сомында гожъямъёсыз, туж золэсь кылбуръёсыз, кырӟанъёс музэн, вӧл-вӧл ӧз бурдъяське, калык пӧлы туж вӧлмизы ке но. Огез куномы писатель Николай Кузнецов меӵак шуиз: "А. Вотяковлэн кык сюэзлэсь ятырезъя кылбуръёсызъя кырӟанъёс кылдытэмез Гиннеслэн книгаяз но, оло, пыртыны луысал, дыр". Тӥни сыӵе адями вордскиз но будӥз Завьял ёросысь Подшивалово гуртын. Дышетскиз Ижысь крезьгуръёсъя школа-интернатын, собере - ужась егитъёслэн школаязы. Дас классэз йылпумъяса, кема ужаз "Советской Удмуртия" (али "Удмурт дунне") газетлэн редакцияз, Удмурт радиоын. Калык пӧлын тыршемез, уно адямиосын пумиськылэмез ик солы юрттӥз, малпасько, кырӟанъёслы пӧрмымон кылбуръёс гожъяны. Вылаз ик, со юн эшъяськем тужгес устоосыныз композиторъёсынымы - Николай Шкляевен, Герман Корепановен, Геннадий Корепанов-Камскиен. Эшшо одӥгзэ ӟеч удыссэ Александр Вотяковлэсь пусъеме потэ на. Ӵапак со гожтэм "Тулыс зор", "Тӧдьы юсь", "Яратонэ татын", "Жингрес сӥзьыл", "Тӧдьы лымы" пьесаосъя постановкаосты сцена вылын яркытгес возьматон вылысь, туж чебересь кырӟанъёслы кылбуръёс! А. Вотяковлы сӥзем пумиськонмы культура юртын нуназе ке но ортчиз, калык трос люкаськиз. Со но возьматэ кылбурчиез яратэмзэс. Ӧтем куноосмы но ваньзы лыктӥзы. Ӟеч вераськизы. Бадӟым тау. Александр Дмитриевичлэн творчетсвояз туж мур пыӵамын угось удмуртлыкмы. Соин ик пумиськонмы шумпотымон ортчиз. Отын чузъяськизы дано пимылэн трос кылбуръёсыз. Кылсярысь, милям усто лыдӟисько дышетскисьёсмы А. Охотникова, С. Мушегова но мукетъёсыз. 5-тӥ "а" классысь пиналъёс куноосмылы но калыкмылы возьматӥзы "Гондырпи Иши" выжыкыл-пьесаысь одӥгзэ суредэз. Соослэн ваньмыз сокем ик вольыт уг пӧрмы на ай, но дуно ни кутскемзы, тыршемзы. Дышетӥсьёсмы сюлме пыӵамон кырӟазы А. Вотяковлэсь "Нырысь яратон", "Эн вера тон" но музон кырӟанъёссэ. Валамон ини: чузъяськиз "Нэнӥлы" кырӟан но. Гуртоосмы люкаськемъёслы, куноослы веразы А. Вотяков сярысь тодэ ваёнъёссэс, котыр ласянь усьтӥзы ӟеч сямъёссэ. Яратоно аиз сярысь туж шуныт вераськиз Александр Дмитриевичлэн Светлана нылыз. Собере кыл сётӥм куноосмылы - А. Вотяковен ӵош ужам журналистъёслы, кылбурчиослы Леонид Фёдоровлы, Семён Перевощиковлы, Кирилл Ломагинлы. Соос котыр ласянь усьтӥзы дано пимылэсь сямъёссэ, мылысь-кыдысь ужамзэ, гожъяськон амалъёссэ. С. Перевощиков кузьмаз кӧня ке книгаоссэ но. Пумиськонмес зыл-зыл шулдыртӥз асьме палась ик усто артист Геннадий Бекманов. Та нуналэ ми эшшо огпол валамы на: Александр Вотяковлэн кырӟанъёслы пӧрмем кылбуръёсаз туж зол пыӵатэмын удмуртъёслэн ӟеч сямъёссы - вордскем шаердэ, анай-атайдэ, но калыктэ яратон, шудлы оскон, матысь муртлэсь мӧзмон, бадӟым яратонэз витён, чебер инкуазьмы. Огкылын вераса, ваньмыз со - удмуртлыкмы. Дано кылбурчимылэсь гожъямъёссэ ми ялан утёмы, сюлмамы возёмы. Пумиськонэз радъяны ӟеч юрттӥз директормы Татьяна Михайловна Петрова. Тау солы. Е. Матвеева,Завьял ёросысь Подшивалово школаысь директорлэн воштӥсез. НЫЛПИ ПОННА ТОЛЭЗЬЛЫ БЫДЭ СЁТӤСЬКИСЬ КУН ПОСОБИОСТЫ 1998 АРЫН ТЫРОН СЯРЫСЬ Удмурт Республикаысь Правительстволэн Постановлениез 1998 ар 30 апрель Ижевск город � 326 "Удмурт Республикалэн 1998 арлы бюджетэз сярысь" Удмурт Республикалэн Законэзлэсь 27-тӥ ёзэтсэ быдэсъян вылысь, Удмурт Республикаысь Правительство пуктэ: 1. Удмурт Республикаысь Калыкез улон-вылонын утёнъя министерство нылпи понна толэзьлы быдэ сётӥськись кун пособиосты тырыны таӵе рад юнматыны кулэ: гражданъёслы, кудъёсызлэн семьяысьтызы котькуд муртлы быдэ огъя доходзы улыны тырмымон коньдонлэсь (прожиточный минимум) ӧжыт; гражданъёслы, кудъёсызлэн семьяысьтызы котькуд муртлы быдэ огъя доходзы улыны тырмымон коньдонлэн одӥг яке одӥг но ӝыны быдӟалаез мында луэ; гражданъёслы, кудъёсызлэн семьяысьтызы котькуд адямилы быдэ огъя доходзы улыны тырмымон коньдонлэн одӥг но ӝынылэсь тросгес. 2. Нылпи понна толэзьлы быдэ сётӥськись пособиез юнматон но тырон понна, семьяысь котькуд адямилы быдэ доходэз лыдъян рад сярысь положениез кутоно. 3. Семьяысь котькуд адямилы быдэ огъя доходлэсь быдӟалазэ лыдэ басьтыса, нылпи понна толэзьлы быдэ сётӥськись пособиез юнматон но тырон рад сярысь положениез кутоно. 4. Удмурт Республикаысь Коньдон ужпумъёсъя министерство Удмурт Республикаысь Калыкез улон-вылонын утёнъя министерствоен ӵош радлык кылдытыны кулэ, кудӥзъя республикалэн бюджетэз, нылпилы толэзьлы быдэ сётӥськись кун пособиос чотын вузъёсты но юрттэтъёсты сётӥсь предприятиос но организациос, коммерческой банкъёс ог-огзылы тыронъёссэс тырозы. 5. Удмурт Республикаысь Калыкез улон-вылонын утёнъя министерство городъёсысь но ёросъёсысь администрациосын ӵош луонлыкъёс кылдытыны кулэ, семьяысь котькуд адямилы быдэ огъя доходэз лыдэ басьтыса, нылпилы толэзьлы быдэ сётӥськись кун пособиосты 1998 арын 20 маёзь тырон понна. Удмурт Республикаысь Правительстволэн Тӧроез П. Н. Вершинин. П. И. Чайковскийлы сӥзем 41-тӥез крезьгуро фестиваль Бурдъясь но шуэрес Ижевскын балетэз тужгес ярато. Операя но балетъя кун театрлэн спектакльёсаз ветлӥсьёс шӧдскымон трос луо. Нош палэнысь артистъёс лыкто ке, соку ини кык полэс шумпотон. Таяз крезьгуро тулысэ асьме дорын вал Санкт-Петербургысь балетъя кун академической театр. Коллективен кивалтэ СССР-ысь калык артист, СССР-ысь кун премилэн лауреатэз, профессор Аскольд Макаров. Ачиз со асьме доры лыктыны ӧз быгаты: Ваганова нимо хореографической училищеын ӵапак выпускной экзаменъёс тупазы. Журналистъёсын пумиськиз солэн кузпалыз, валтӥсь репетитор Нинель Александровна Петрова. - Алигес ми Испание гастрольёсын потамы, - шуиз со. - Отын возьматӥм "Шахерезадаез" но "Спартакез". Таиз спектакльмы нырысьсэ пуктэмын вал 1956-тӥ арын, учкисьёслы туж яраз. Али люкетъёссэ гинэ возьматӥськом. Аскольд Анатольевич театрамы ӧтьылэ пӧртэм балетмейстеръёсыз, нош тужгес тупаса ужазы соос Л. Якобсонэн. "Спартакез" сяна, пуктӥзы Д. Шостаковчилэсь "Клопсэ", кытын адӟиськом В. Маяковскиез но солэсь ӵушкано геройёссэ. Зэм, Мариинской театрлэн (вуж нимыз) репертуараз туалаез вань ке но, классика бадӟым инты басьтэ. Тодмо постановщикъёслэсь, шуом, Фокинлэсь, Петинолэсь хореографизэс выльдыны соослэн "кизы уг пыры". Асьме учкисьёс нырысьсэ уг адӟо ни "Жизелез" но, "Шопенианаез" но, "Спартакез" но. Нош котькудӥз театр ас тусбуйзэ вае ук... "Шопениана". Та одӥг актъем балет дунне вылын огез чеберез луэ. Пинал пияш котыртэмын ас малпанъёсаз кылдытэм лэйкыт-капчи поръясь нылъёсын, куддыр соос огинтыязы "кынмыло"... Та балетэз Ф. Шопенлэн крезьгуръёсызъя кылдытӥз Михаил Фокин. Асьме даурлэн кутсконаз со ӟуч балетлэсь данзэ вылэ ӝутӥз Парижын но, быдэс дуннеын но. "Спартак". А. Хачатурянлэн одӥгез кужмо произведениез. Возьматӥське Италиын асьме эралэсь азьло вылэм югдур. Гладиаторъёслэн школаысьтызы пегӟе Спартак, со оже ӝутэ уно сюрс (лыдъямзыя 70 сюрс пала) ултӥям рабъёсты. Римской армия Красс кивалтэм улсын соосты пазьге. Тӧлпериё-сильтӧло крезьгур воштӥське сюлэмез позыртӥсь визыло гурен. Фригия яратонэзлэн лултэм мугорыз вадьсын кулымоназ ик чигтӥське... Та образ бордын туж тыршем балерина Анна Подлесная. Мариинской театрлэн балетъя труппаяз туж быгатӥсь егитъёс ужало. Тросэз соос "Жизель" спектакльын усьтӥськизы. Альбертлэсь партизэ эктӥз Андрей Иванов, со Гран-при басьтӥз вал Хельсинкиын, Киевын ортчем конкурсъёсын. Ваганова нимо хореографической училищеын дышетскемзы бере татчы кылизы, Н. А. Петровалэн верамезъя, ньыль япон балеринаос, Россиен люкиськемзы соослэн уг поты. Нош "Жизель" балет нош ик вуттӥз асьмеды паймымон чебер, но шуэрес дуннее. Бен, огдыре ик бурдъясь, но сопал дуннее вуттыны быгатӥсь учыр. Француз композиторлэн Аданлэн "Жизель" балетэз та вылӥ искусстволы нырысьсэ романтизм шӧм пыӵатӥз, шуыны луоз. Пуктэмын вал со 1811-тӥ арын Парижын, нош 1887-тӥ арын тодмо балетмейстер Мариус Петино солы выль улон сётӥз. Та сценической редакция али но утиське, сое нош адӟимы Ижевскысь "Металлург" культура дворецлэн сцена вылысьтыз. Р. С. Жаляса верано, гурт ёросысь учкисьёсмы таӵе вылӥ чеберлыкез туж ӧжытэз адӟо. Билет дунъёс но уго соос понна "куртчиськисесь": 50 манетысен 100-озь. Нош Удмурт кун филармонилэн администрациез сюлмаське гуртысь мылкыд карисьёс понна билет дунъёсты кулэстыны. Таяз фестивале озьы ветлӥзы Воткинск но Игра ёросъёсын улӥсьёс. Т. Чернова. "Шопениана", "Жизель" но "Спартак" балетъёсысь суредъёс. Туспуктэмъёсыз В. Камашевлэн. Удмурт Республикалэн Кун наградаосыз сярысь положение ватсанъёс пыртон сярысь Удмурт Республикаысь Кун Кенешлэн Президиумезлэн Постановлениез Удмурт Республикаысь Правительстволэсь "Удмурт Республикаысь дано эколог" сӥлы карон ним юнматон сярысь дэмланзэ эскерыса но инкуазез утён ужпумъёслы тросгес саклык висъян понна, Удмурт Республикаысь Кун Кенешлэн Президиумез пуктэ: Удмурт Республикалэн Кун наградаосыз сярысь положение, кудӥз юнматэмын 1995 арын 18 июле Удмурт Республикаысь Кун Кенешлэн 36-И номеро постановлениеныз, таӵе ватсанъёс пыртоно: 12-тӥ пунктлэн "б" подпунктаз "Удмурт Республикаысь физической культураын дано ужась" кылъёс бере пыртоно "Удмурт Республикаысь дано эколог" кылъёсты; 13-тӥ пунктэ таӵе абзац ватсано: "Удмурт Республикаысь дано эколог" - инкуазез утёнъя ёзъёсын, пердприятиосын, организациосын, учреждениосын ужасьёслы но общественной огазеяськонъёсысь муртъёслы, инкуазез утёнын, инкуазь узырлыкъёсты шыръяса но пайдаё кутонын, утёнын но умоятонын бадӟымесь вормонъёс басьтэмзы понна. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 23 апреле, � 512-И. Удмурт Республикаысь Кун Кенешлэсь кызетӥ сессизэ люкан сярысь Удмурт Республикаысь Кун Кенешлэн Президиумезлэн Постановлениез Удмурт Республикаысь Кун Кенешлэн Президиумез пуктэ: Удмурт Республикаысь Кун Кенешлэсь кызетӥ сессизэ люкано 1998-тӥ арын 16-тӥ июне Ижевскын. Удмкрт Республикаысь Кун Кенешлэн Тӧроез А. А. Волков. Ижевск город, 1998 арын 6 мае. � 513 - И Сессиын эскериськозы Кун Кенешлэн законъёсты кылдытонъя 1999-тӥ арын мартозь планэз, му вӧй поттӥсь удысэн, кун асваньбурен герӟаськем ужпумъёс. Ижлэн уставез эскериське Удмурт Республикаысь Кун Кенешлэн Президиумез заседаниез эскерз Ижевсклэсь Уставзэ пусъён сярысь ужпумез. Кенешем беразы, Президиум Ижевсклэсь валтӥсь документсэ мукет дыръя пусйыны решение кутӥзы. Угось Уставлэн куд-ог люкетъёсыз Россия Федерацилэн но Удмурт Республикалэн законодательствозылы уг тупало. Сыӵе тупамтэосты палэнтон понна, кылдытэмын нимысьтыз комиссия. Отчы пыризы Кун Кенешлэн кунэз радъянъя комиссиысьтыз, Удмуртиысь Юстицияя министерствоысь, Ижевсклэн Думаыстыз, Кун Кенешысь но городлэн администрациысьтыз правоя управлениосысь муртъёс. Кун Кенешлэсь Кунэз радъянъя, калыкъёс куспын политикая но интыысь аскивалтонъя комиссизэ косэмын Удмуртиысь Ёросъёслэсь но городъёслэсь Уставъёссэс пусъёнъя полоджениез толэзь куспын кылдтыны. Арня ортчыса, Кун Кенешлэн Президиумез Ижевсклэсь Уставезлэсь выльдон инъетсэ эскероз. Заседаниез нуиз Кун Кенешлэн Тӧроез Александр Волков. Удмурт Республикаысь Кун Кенешлэн пресс-службаез. Ашальчи Окилэн вордскемез дырысен - 100 ар СЮЛЭМЫЗ ЧЕБЕР КРЕЗЬ ВАЛ... Удмурт радиоын валтӥсь редактор луыса ужакум, туж ӵем уг, но кытӥ-отӥ ёросъёсы командировкаосын вуылӥсько вал. 1972-тӥ арын гужем, аран вакытэ, потӥ Алнаш ёросэ. Нырысь ик вуылӥ Варзи-Ятчи курортэ но магнит плёнка вылэ трос верамъёсты гожъяй. Бӧрысь радио пыр чузъяськиз бадӟымос передача. Мон трос кылылӥ алнашъёслэсь отын улӥсь сӥё-дано кылбурчи Ашальчи Оки сярысь верамъёссэс, лыдӟылӥ солэсь сюлмысьтыз потэм кылбуръёссэ, пичиесь веросъёссэ. Ас поннам малпасько: одно ик пумиськоно соин но гожтоно сыӵе дано адямилэсь верамзэ магнит плёнка вылэ. Но Алнаш ёросын вордскемъёс но Удмурт радиоын мон азьынгес ужам тодмо писательёс Петр Кубашев но Анатолий Уваров мыным вераллязы: Ашальчи Оки куаразэ радиое гожтыны пумит луэ. П. Н. Кубашев но, А. Н. Уваров но - алнашъёс, кыксы ик отын дышетскемын но ужамын. Ашальчи Окиен но пумиськылэмын. Нош мынам со дано адямиен ноку но пумиськылэме но, вераськылэме но ӧвӧл ук! Кызьы пумиталоз со монэ, потоз-а тодмотэм муртэн вераськемез, соглаш луоз-а куаразэ магнит плёнка вылэ гожтыны?.. Мон сьӧры Алнашаз адӟиськыны лыктӥз Борис Ефремович Саушкин но. Со мыным шуиз: - Мон тодӥсько Лина Григорьевналэсь картсэ, Иван Иванович Карачевез. Со райисполкомын ужа. Ойдо асьмеос нырысь соин вераськом. Со ик тодматоз кузпалэныз. Озьы ик лэсьтӥм. Иван Иванович милемыз дораз нуиз. Тодматӥз Ашальчи Окиен. Со мыло-кыдо пумитаз. - Шумпотыса кылзӥсько Удмурт радиолэсь веранъёссэ,- тодматскеммы бере шуиз Лина Григорьевна.- Тужгес но ярало литературалы сӥзем веранъёсты, удмурт крезьгуръёс но мукетъёсыз. - Оло, тӥ но, Лина Григорьевна, вералоды радиолы асьтэлэн улон сюресты, улон- вылонмы пумысь малпанъёстэс? - Мон ачим сярысь вераны но, гожъяны но уг яратӥськы. Мукет адямиослэсь номырин уг висъяськиськы. Ваньмыз сямен ик дышетски, собере ужай, врач луыса оже ветлӥ, сӧсырмемъёсты госпитальёсын эмъяй. - Оло, соку, Лина Григорьевна, кыӵе ке веростэс лыдӟоды радио кылзӥсьёсмы понна? - Яралоз. Лыдӟо "Боко" пичигес веросме. Сое мон гожтӥ 1968-тӥ арын. Уноез шуо: нылпиослы гожтэмын. Нош ачим лыдъясько: "Боко" - со бадӟымъёслы пичиос сярысь верос. Мон шуысал: психологической этюд. Вероссэ лыдӟемез бере, мон магнитофонме кысытэк юалляськыны кутски. Лина Григорьевна нырысь мылысь-кыдысь вераны кутскиз ачиз сярысь. Собере валаз, магнитофон ужа шуыса. - Тӥ ведь, Леонид Петрович, верамме гожъяськоды? - Уг, уг, Лина Григорьевна. Отын плёнкаез быриз ини. - Туж жаль: мынам вераме потэ вал Казаньын дышетскеме, удмурт писательёсын пумиськылэмъёсы сярысь. - Ма, плёнкае вань на таяз кассетаын но, гожъямтэез но шедёз на. Иське, вераськом на, Лина Григорьевна. - Плёнкадэс арам карыны жаль уг поты ке, ойдолэ, бергатэ машинадэс,- серектӥз Лина Григорьевна. Кык час пала вераським на визьмо но мылкыдо адямиен. Тани Ашальчи Окилэн верамез пӧлысь куд-ог интыосыз (гожъям плёнка возиське Удмурт радиолэн фондаз). х х х - Казане дышетскыны кошкемелэсь азьвыл монэ келяны лыктӥз атаелэн сузэрез но, киросанае. - Ойдо, Линӥ, кузь сюрес вылэ потонмы азьын инмарлы вӧсяськом,- шуиз со. - Тон вӧсяськы, мон - уг. Малы ке шуоно, инмар ӧвӧл,- пумит луи. Али валасько: ӝожомытӥ соку киросанайме. Пичи дыръя со сярысь уд малпаськиськы уго. Малы мон инмарлы уг оскиськы шуи? Одӥг пол библиотекаысен ки улам шедиз "Библия социализма" пичигес книга. Мон сое лыдӟи но удмурт кылэ берыктӥ. Отын верамын вал черкез государстволэсь люкон сярысь. Берыктэмме нимаз брошюраен поттӥзы. Ас поннам малпай, бадӟым уж лэсьтӥ шуыса... Казане ми лыктӥм курсъёсы. Пӧламы вал дышетӥсьёс но библиотекаосын ужасьёс. Вал отын кык секция. Огаз дышетскизы школаын ужасьтэмъёс, кыкетӥяз - библиотекаосын но клубъёсын тыршисьёс. Мон клубной секциын дышетски. Артистъёс милемыз дышетӥзы. Туж яра вал Казаньысь драматической театрысь Славянова артистка. Со милемыз дышетӥз веросъёсты, кылбуръёсты быгатыса лыдӟыны. Трос пол театре ветлылӥм. Курсъёсыз йылпумъяммы бере, дышетсконмес азьланьтэммы потӥз. Бертэммы уг поты. Эшъёсы шуо: - Ойдо педагогической институтэ пыром. Но огез эше почта дорысь ялонэз лыдӟем. Отын гожтэмын: Казань университетын усьтӥське рабочий факультет. Отын дышетозы рабочийёслэсь но крестьянъёслэсь нылпиоссэс, институтъёсы пырон вылысь. Тӥни озьы ми, куинь эшъёс, 1919-тӥ арын пыримы соку гинэ кылдэм рабфаке. Нуназеосы дышетскимы университетлэн аудиториосаз, нош ӝытъёсы огез театральной училищее, мукетыз музыкальное ветлӥзы. Мон музыкальное ветлӥ. Ведь дворянъёслэн нылпиоссы азьвыл дышетскизы отын. Нош ми маин уродэсь соослэсь? Адями котькуд ласянь дышетскыны кулэ. Ӝытъёсы пӧртэм лекциосы но ветлӥськом вал. Валаськомы-а, ум-а - сёровно пукиськом. Пӧртэм кенешъёс луыло вал соку. Отчы но вуылӥ. Тужгес но ӟырдыт ортчылӥзы инмарлы оскон пумысен ченгешонъёс. Огаз сыӵе диспутамы тэкшеронъямы поп ӧз чида: сюлмыз путыса, сылон интыяз ик кулӥз. Рабфакын дышетскыкум но, солэсь азьло но мон ма но со гожъясько вал ини. Нош нокинлы но со сярысь ӧй поттылы. Зэм, рабфакын гожъям сочинениосме классамы шара лыдӟылӥзы но ушъяллязы. Рабфак трос выльзэ сётӥз. Но монэ бордазы кыско вал литература, история, гуманитарной шуон наукаослы дышетскеме потэ вал. Педагогической институт сярысь малпаськыны кутски. Но Казаньын университет но ужа ук. Пединститут шуэм сярысь, университет шуэм вылӥгес но йӧногес чузъяське. Ас поннам малпаськисько: университетын ведь дышетскизы Владимир Ленин но, Лев Толстой но. Но рабфакын ӵош дышетскем эше Ольга Кузьминична Андреева (тодмо удмурт тодосчилэн Кузьма Андреевлэн нылыз - Л. Е.) монэ сельскохозяйственной институтэ дышетскыны ӧтиз. Отын ведь вылӥ математикаез дышетоно луоз. Нош мон сое уг яратӥськы. Семьяямы но математикаез нокин уг яраты вал. Ярало вал гуманитарной наукаос. Сельхозинститутэ ӧй мыны. Мукетыз эше, Анна Федорова (со Алнаш ёросысь, Васса Виноградова артисткалэн апаез вал) монэ университетысь медициная факультетэ ӧтиз. Пырим отчы. Но шонерак верало: уг яра вал мыным отын. Басьтом со анатомиез ик. Адямилэн лыосыз сомында - ваньмызлэсь нимъёссэ тодыны кулэ. Тросэз латынь кылын. Вот дышетыса пукиськод со нимъёсты. Туж акыльтӥз со мыным. Куинь ар дышетскеме бере пегӟыны но малпасько вал ини. Но чидано луиз. Весь тодам вайылӥ рабфакын ортчылэм историяя, литературая урокъёсыз. Ведь милемыз со предметъёсъя дышетӥзы тодмо профессоръёс. Университетысен рабфаке но лекциос лыдӟыны вуыло вал. Ботаника но - туж тунсыко наука. Гербарий люкаськом вал пӧртэм будосъёслэсь. Нош татын - ме! тыныд: акылес анатомия!.. х х х Лина Григорьевналэн медицина сярысь малпанъёсыз сыӵеесь вал ке но, бӧрысь со усто врач луиз но уно юрттӥз аслаз удмурт калыкезлы. Тужгес но - синишкон (трахома) висёнэз бурмытонын но сое вормонын. Нош Быдӟым Отечественной ож аръёсы Векшина кӧня солдатъёслы, офицеръёслы улонзэс берыктӥз... Ашальчи Оки мыным вераз удмурт писательёсын пумиськылэмъёсыз сярысь но. Алнашын улӥсьёсыныз со ӵемгес кенешылэм. Тужгес но - Геннадий Дмитриевич Красильниковен, Семён Тарасович Шихаревен, Герман Алексеевич Ходыревен, Петр Николаевич Кубашевен, Николай Васильевич Васильевен. Вераз Иж каре писательёслэн люкаськоназы ветлэмез сярысь но: - Ми соку улӥськом вал Юкаменск черкогуртын. Мыным гожтэт вуиз Писательёслэн союзысьтызы, Иж каре люкаськоназы ӧтьыса. Соку ведь нырысь Юкаменскысен Глаз каре мыноно вал. Отысен Иж каре поездэн Москва яке Свердловск пыр гинэ вуыны луэ вал. Ӵап соку кузпалме, Иван Иванович Карачевез, Юкаменск райисполкомын ужасез, Иже командировкае ыстӥзы. Ми соин валэн лыктӥмы. Соку писательёслэн бадӟым люкаськоназы мадьяр калыклэн сӥё-дано пиез, Мате Залка писатель но, вуылӥз. Куӟебай Герд но вал люкаськонын. Михаил Петровен, Михаил Коноваловен но мукет тодмо удмурт писательёсын пумиськылӥ. Удмурт литературамы сярысь отын ӟырдыт вераськон мынӥз. Собере мон Лина Григорьевналэсь юай на Алнашысь больницаын ужамез сярысь. - Алнаше ми лыктӥмы 1932-тӥ арын,- тодаз ваиз Векшина.- Больницаын соку ужало вал одӥг врач, кык фельдшер. Врач луыса тыршиз Зернов, фельдшеръёс вал Соловьев но Зернов. Больница соку интыяськемын вал Советской урамысь волостной правленилэн юртаз. Собере отын райком но вал. Нош ваньмыз кык корка вал. Пичияз юртын - врачлэн квартираез, бадӟымаз - больница, стационар. Кӧня койкамы вал отын? Кызь вить вал кадь. Ваньмыз отын вал: нылпи ваён люкетэз но, мукетъёсыз но. Кема ужай мон со юртын. Берлогес ини больницалы мукет интые выль корпусъёс ӝутӥзы. Алнаш черкогуртын удмурт калыклэн сӥё-дано нылыныз Лина Григорьевна Векшинаен тӥни сыӵе, ноку вунонтэм пумиськон ортчиз 1972-тӥ арын гужем. Куаразэ плёнкае гожтыны пумит луиз вал нырысь. Нош собере туж мыло-кыдо, вераськиз, кытӥяз верамез бере серекъялляз но. Вераськонмес йылпумъяммы бере, со шуиз: - Ужды пӧрмиз кадь. Табере кунояме потэ. Вае пичи курытсэ но веръяломы. - Бадӟым тау, Лина Григорьевна,- вази мон пумитаз.- Но мыным ужано на: вераськемын эшшо кинэн но соин пумиськыны. - Умой та удмурт сяммы. Нош кытӥяз ӟучъёс кадь но луыны кулэ, дыр. Алигес мон доры вуылӥзы Свердловск киностудиысь ужасьёс. Ужзэс быдэстэмзы бере, асьсэос сиён- юон куризы. Нош тӥ ӵектыса но пумит луиськоды,- серектӥз Ашальчи Оки. Оскыны туж секыт вал, но 1973-тӥ арын Лина Григорьевна асьме дорысь пыраклы кошкиз. Ачиз ӧвӧл ни ке но, гожъямъёсыз, жингрес кылбуръёсыз дауръёс ӵоже но уз кысэ. Леонид ЕМЕЛЬЯНОВ. Дышетон удысысь ужпумъёс Дышетсконо-а, кӧттыр утчано-а? Йылпумъяське дышетскон ар. Школаосысь дышетӥсьёс, училщеосысь, техникумъёсысь, вузъёсысь преподавательёс понна со капчи ӧй вал. Я отын, я татын пумитъяськон ужрадъёс ортчылӥзы. Бугыръяськон мылкыдъёс али но уг дугдо. Тани 20 мае ас куронъёсынызы забастовкае потыны малпало дышетскон заведениосысь студентъёс но преподавательёс. Калыкез дышетон удысын кылдэм ужпумъёсъя вераськиськом Кун Кенешысь Наукая, дышетонъя, культурая но егитъёсын ужан политикая комиссилэн кивалтӥсеныз А. В. Еременкоен. - Алла Васильевна, та дырозь асьмеос данъяськылӥм зӥбыт, кылзӥськись студентъёсын. Но Екатеринбургысь егитъёслэн урамъёсы потэмы возьматӥз, соослэн чиданзылы но пум вуэмын ни шуыса. Сыӵе учыр республикаямы но луыны уг быгаты-а? Мар лэсьтӥське студентъёсмылы юрттон понна? - Зэм, югдур туж секыт. Студентъёслэн стипендизы туж пичи, со сиськыны гинэ но уг тырмы. Преподавательёслэн но уждунзы кылем арын 80 процентэз гинэ тыремын. Нош туэ, кызьы ивортӥз Россиысь Правительство, вузъёсын ужасьёслэн уждунзы 40 процентлы кулэстэмын ини. ИжГТУ-ысь преподавательёслэн кичӧлтэмзыя, Россия Федерациысь Правительстволы Кун Кенеш нимысьтыз вазиськон ыстӥз вузъёслы коньдонэн юрттэт курыса. Нош азьланяз Россиысь но Удмуртиысь правительствоос куспын вузъёсмылы коньдонэн юрттон сярысь ӝегатскытэк огкыл гожтоно. Сотэк весяк кураськыса улоно луомы. Бугыръяськонъёсты азьвыл ик алон вылысь, вузъёсын али валэктон уж мынэ. Студентъёслэн куронъёссы эскерисько но луэмезъя быдэсъясько. - Дышетскон интыос вузъёсын, училищеосын кулэстэмын уз луэ-а? - Россиысь Правительство ӵектэ дунтэк дышетскон интыосты туэ 15 процентлы кулэстыны. Но асьме республика - дунтэк дышетсконэз утьыны тыршоз. Кылем арын вузъёсамы коньдон тырытэк дышетскыны 5 400 пала студентъёс кутэмын вал. Туэ но та лыдпус озьыгес ик кылёз. Пыдйылазы сылӥсь училищеосмы но ваньмыз сямен ик ужалозы. - Россиын дышетскон удысэз выльдонъя выль концепцилэн инъетэз дасямын. Тросэз дышетӥсьёс солы пумит. Нош кызьы сое тӥляд комиссиды дунъя? - Туж урод мылкыдын. Отын чаклам воштӥськонъёсты улонэ пыӵатыны нокызьы уг яра. Тани азьло аръёсы дышетон удыслы коньдон висъялляз Россиысь Правительство. Табере та секыт ныпъетэз республикаослэн пельпумъёссы вылэ погыльтыны чакламын. Нокыӵе юрттэт учкемын ӧвӧл ӧлексы, мумы-бубытэк кылем нылпиослы. Вунэтыса кельтэмын национальной школаос. Огъя вераса, концепцилэн инъетэз быдэсак пумит луэ дышетон сярысь республикаямы кутэм законлы. Россилэн парламентаз та ужпумъя ӝутэм вераськонын асьме республикаысь но озьы ик мукет улосвылосъёсысь адямиос пумит луэмзэс веразы. - Вакчияк вералэ вал, кыӵе югдур та вакытэ нылпи садъёсын? - Соосты утён сярысь 1995 арын ик Кун Кенеш нимысьтыз постановление кутӥз. Со дырысен удыслы ялан саклык висъяське. Воспитательёслэн уждунзы будэтэмын. Туэ нылпи садын ужасьёслы сиськон понна компенсациос тупатэмын. Ичи уждунлэн быдӟалаез вань удысъёсъя али будэмын ини. Но дышетӥсьёслэн, воспитательёслэн ставкаоссы малы ке та дырозь лыдъясько азьвыл тупатэм ичи уждунлэн быдӟалаезъя. Со шонер ӧвӧл. Малпасько, та тырмымтэос палэнтэмын луозы. Россия Федерацилэн ёзъёсаз куронъёс ыстэмын ини. - Ӝоген кутскозы гужем каникулъёс. Быдэ вуымтэос уже интыямын луозы-а? - Мылкыд карисьёсызлы уж мадёз. Коньдон висъямын ини. Озьы ик ужалозы нылпи лагерьёс. Соос пӧлысь огез нимысьтыз усьтэмын луоз гуртысь абитуриентъёс понна. Нош али вань кужыммес сётоно дышетскон арез умой йылпумъян понна. Т. Банникова. Дэриысь "субтропикын" Татчы тол уг вуылы - быдэс ар кузёяське гужем. Календарья педлон май, соослэн - июль шор. Кык метрлэсь ятыр ӝутскемын помидор, ореч модосъёс. Котькудаз шальк-шальк удалтэмын емышез. Синэз уд вошты. Омыр окыт. 28 градус. - Ӵуказе "куазьмы" эшшо но пӧсь луоз, 35-ёзь ӝутскоз, - шуэ Татьяна Аркадьевна Фурзикова, "Завьяловский" тепличной комбинатысь агроном. - Ӟеч урожай басьтон понна, зорез но, шундыез но тырмыт мед луоз. Татын киземын "Красная стрела" выжыысь помидор. Удалтонлыкез вылӥын. Куинь сюрс квадратной метръем убоосты быгатыса утялтэ куинь нылкышно: Надежда Шушакова, Людмила Галкина но Татьяна Михайлова. Кисьманы кутскем помидоръёсты нуналлы быдэ окто - мартысен магазинъёсы, базаре келяло ни. Туннэ нуналозь тепличной комбинат вузаз 700 тонна пала вож сиён. Ижевскен артэ вӧлскем плёнка улысь ужасьёс бакчаын быдэс ар ӵоже ӝӧк выламы вутто укроп но салат, огреч но помидор. Праздникъёсы гажано адямиосмылы кузьмаськом татын будэтэм роза сяськаосты. Вазь вуись бакча сиёнлы дорамы палэнысь но лыкто - нуо Первоуральске, куд-ог дыръя - Москва пала но. Огреч будэтӥсьёс пӧлысь ушъяло Зоя Елизороваез, Роза Саттароваез, Людмила Шамшуринаез. Соос куиньназы ик теплицае вуизы 13 ар талэсь азьло. Мукет азе кошкон сярысь уг малпало. Туала вакытэ, зэмзэ ке верано, ужзэ воштыны кин меда дӥсьтоз на? Туг кадь биниськыса вылӥе ӝутскись модосъёс котырын бергало мушъёс. Сяська вылысь сяська вылэ лобаса, асьсэлы мӧль окто - огречлэсь удалтонлыксэ будэто. Таӵе шулдыр бакчаысь кезьыт азе потэм уг пот. - Дорамы вуисьёс ужмылэсь одӥг палзэ гинэ адӟо, - шуэ агроном. - Тросэз уг тодо, кыӵе секытэн ӝӧк вылэ вуэ соиз яке таиз емыш, кӧня сюлмаськоно, кӧня сюез бугыртоно, тоннаосын урожай будэтон понна. Но ми шумпотӥськом, калыклы ваньмыз кельше шуыса. Будосъёс улысь муэз, висёнъёсты, мултэс нитратъёсты нуналлы быдэ сак эскеро лабораториын. Татын 1979 арысен ужа ни Валентина Михеева, Ижевскысь сельхозинститутлэн выпускницаез. Усто специалист. Газетмылэн матысь эшез. Комбинат сярысь оглом ке верано, со шедемын секыт югдуре. Тросэн люкаськемын тыл но шуныт понна тыронъёсыз. Воштӥськиз кивалтӥсез. Оско умоезлы. - Адямиос юало: малы, пе, Татарстанысь вуттэм огреч, помидор, асьмелэнлэсь дунтэм? - шуэ Т. А. Фурзикова, та вакытэ валтӥсь агрономлэсь ужзэ быдэсъясь. - Валэктонмы одӥг: тыл понна отын 4-5 поллы ӧжытгес коньдон тыро. Со бордысь ик потэ ваньмыз. Л. Медведева. Туспуктэмез В. Камашевлэн. Семьялэн нуналэныз! Асьме шаерамы, быдэс Россия Федерациын сямен ик, 15 мае Семьялэсь нуналзэ пусъён ӟеч сямлы пӧрмиз ини. Туалаез праздник ортче "Семья адямилэн правоосыз пумысен визьнод сётэ" ӧтён улсын. Та ужпум уката но лэчытоме, Россиысь Президент та арез Адямилэн правоосызъя арен ялэмен валче. Удмурт Республикаын бадӟым уж нуиське, кунлэсь семья пумысен политиказэ быдэсъян понна. Экономика секыт югдуре шедемын ке но, кун властьлэн ёзъёсыз луонлык шедьто, анайёслэсь но нылпиослэсь тазалыксэс утён, нылпиослэсь шутэтсконзэс радъян понна. Тужгес но бадӟым саклык висъяське котькудӥзлы куанер семьялы юрттон ужпумлы. Вань дауръёсы семья адямилы оскон кузьмалляз, озьы ик луоз азьланяз но. Со нуналмысь ужаны, бадӟымесь вормонъёс басьтыны кужым сётэ. Семьяен улонды шудбуро мед луоз, сӥзиськом тӥлед юн тазалык, дэлето улон. Котькуд семьяын тупан но ог-огдэ гажан мед кузёяськозы, мед будозы шудоесь нылпиос, соослэн пиналъёссы. Семьялэн нуналэныз тӥледыз, гажано эшъёс! Удмурт Республикаысь Кун Кенеш Удмурт Республикаысь Правительство Семьялэн нуналэзлы Тыршисесь, шаплыесь, данъямонэсь Кияса ёросысь Вуж Салья шор ёзо школаын ортчизы трос нылпиё семьяос куспын ӵошатсконъёс. Отчы пыриськизы Мария Григорьевна Андреева Лида нылыныз (семьяязы куать нылпи), Александра Ефимовна Беспалова Галя внучкаеныз, Ираида Фроловна Петрова Таня нылыныз. Ваньзылэн нылпиоссы покчи классъёсын дышетско. Та семьяос куспын пӧртэм ӵошатсконъёс радъязы Вуж Сальяысь нылкышно кенешен кивалтӥсьёс - дышетӥсь Светлана Даниловна Фёдорова но киномеханик Марина Исаковна Морякова. Соослы юрттӥзы библиотекарьёс Валентина Александровна Зыкова но Валентина Николаевна Черняева. Кыӵе гинэ киужъёс адӟытэмын ӧй вал та ужрадын: гын сапегъёс, ньӧръёслэсь кутам киужъёс, пужыятскемъёс, вуриськемъёс. Ӵошатсконэз дунъясь дышетӥсьёслы Виталий Николаевич Пудовлы, Семён Сергеевич Вахитовлы, Виктор Николаевич Сергеевлы капчи ӧй вал устозэ семьяез бырйыны. Озьы ке но, котькинлэсь шаплы вал А. Е. Беспалова Галя внучкаеныз (Лена нылызлэн будо вить нылъёсыз). Трослы ик бере ӧз кыле Петровъёс но Андреевъёс. Та семьяосты, озьы ик киужъёсын вормисе потэмъёсты Кияса ёросысь нылкышно кенешлэн тӧроез Ирина Николаевна Шихова кузьымъёсын пусйиз. Нош висъяз соосты республикаысьтымы Нылкышно огазеяськон ёрос администрацилэн кивалтӥсезлэн Надежда Дмитриевна Шатровалэн тыршемез улсын. Люкаськемъёс азьын быгатэмзэс возьматӥзы "Кубо" огазеяськонэ ветлӥсьёс. Кивалтэ соин ӟуч кылъя но литературая дышетӥсь Надежда Витальевна Бочкарёва, баянэн шудӥз солэн картэз крезьгуръя дышетӥсь Владимир Леонидович Бочкарёв. Ӵошатсконъёс йылпумъяськем бере, анайёс асьсэ пӧрамъёсынызы чай юизы, эктӥзы но кырӟазы. Куноятыны юрттӥӟ "Василёк" магазинысь ужбергатӥсь Фёдор Иванович Охотников. Анайёс капчи мылкыдын гуртазы бертӥзы. Таӵе огыр-бугыр вакытэ улонзы капчи ӧвӧл трос нылпиё семьяослэн, пичильтык юрттэт но саклык соос понна бадӟым шумпотонни. Н. Михайлова. Губернатор ватӥз пизэ Кемеровоын толон ватӥзы Андрей Тулеевез - Кузбасысь губернаторлэсь Аман Тулеевлэсь шудтэм учыре шедьыса бырем пизэ. 10 мае Андрей Тулеев вал Ташкентын. Калыкъёслэн эшъяськонзы проспектэтӥ машинаен ортчыкуз, мукет автомобилен шуккиськиз. Руль сьӧрын пукись Андрей Тулеев бырыны шедиз. Мукет автомашиналэн водителез но кӧня ке пукисьёсыз шуккиськыса больницае келямын. Ташкентысь югдурез утись ёзъёс шудтэм учыръя эскеронъёс нуо. Кызьы ивортэ Иворъёсъя национальной служба, сюреслэн та ёзаз машинаен ветлӥсьёс понна кышкытлык бадӟым ик ӧй вал. Кунгож сьӧрын КИТАЙЫСЬ СЮРЕСЪЁС ВЫЛЫН Китайын кылем арын сюресъёс вылын 74 сюрс адями быриз. Дуннеын со котькытынлэсь трос. Таин валче Китайын сюресъёс вылын кышкытлыклэсь утиськонъя кампания нуиське, гожтэ "Чайна дейли" газет. Кылсярысь, радъямын фотовыставка. Туспуктэмъёс возьмато, кытчы вуттыны быгато сюресъёс кузя чакласькытэк ветлон, машинаен кудӟыса ворттылон. Выставкалэн пайдаез туж бадӟым, угось адямиос улонлэсь сьӧд палзэ адӟыны дышемын ӧвӧл: властьёс косэмъя, "уродэз" сярысь ивортонъёс вань иворъёс пӧлын 30 процентлэсь уногес луыны уг быгато. Таяз учыре законэз тӥятэк ӧйлась, малы ке шуоно, Китайын автомобильёс трос ӧвӧл ке но - куамын адямилы быдэ одӥг машина - соосын герӟаськем шудтэм учыръёс укыр трос. Пыдын но велосипедэн ветлӥсьёс транспортлэсь кышкытлыксэ уг валало на. Нош водительёс правилоосты кылэм-адӟем ик уг каро. Адямиез лёгам понна шофёрез 4800 доллар штраф тырыто яке кык толэзьлы пытсэт сьӧры келяло. Озьы дунтэмгес усе. Угось машина шуккыса ӧлексы кылем муртлы водитель улытозяз пенсия тыре. Соин ик тросэз шофёръёс машиназы улэ сюрем адямиез эшшо огпол лёгало на. Кулытозяз. Америкаын лобась тэркыосты данъяло Америкаысь Нью-Мексико штатвысь Ацтек городын улӥсьёс дасясько лобась тэркылэн вуэмез дырысен 50 ар тырмонэз пусйыны, ивортэ "Ю-Эс-Эй Тудей" газет. Татчы лыктэм куноос карнавалэ, инсьӧрысь вуэмъёслэн дӥськутсыя конкурсэ пыриськозы, НЛО-лэн модельёсыныз но лобась тэркы вуэм интыен тодматскозы. Татын улӥсьёс оско, 1948 арын город котырысь пустыняын 16 инопланетянинэн НЛО пазьгиськиз шуысап. Правительство инсьӧрысь "куноосты" но корабльзэс лушкем лабораторие келязы. Та учыр бере пустыняе бетонлэсь лэсьтэм туж бадӟым плита кылиз. Нокин уг тоды, кызьы но малы со татчы вуиз. Кылем арын та выллем праздник Росвелл база котырын ортчиз. Отчы 48 сюрс адями пыриськиз. Ацтекын улӥсьёс табере сюлмасько, со мында куноосты кытчы интыялозы шуыса, угось татысь гостиница 75 адямиез кутыны быгатоз. Гурт улон КИЫН УД КИЗЬЫ Туэ нырысетӥ кварталэ республикаямы пудолэн лыдыз кулэсмиз. 1-тӥ апреле шаерамы сюро таза пудо вал 534 сюрс йыр, миым та дырен ӵошатыса, 5 процентлы ӧжыт. Парсьёс но ыжъёс 7 процентлы синӥзы, скалъёс вань районъёсын кулэсмизы, нош парсьёс - кызь районын. Йӧл кыскон 6 процент пала будӥз, курег пуз - 10 процентлы. Азьло сямен ик ӝыныезлэсь тросэз ваньбур поттӥське колхозъёсын но пудо вордон комплексъёсын, кылсярысь, курег пуз - 92 процентэз, йӧл - 68-эз, сӥль - 66 процентэз. Туннэ-ӵуказе луд ужъёс кутскозы, нош техника данакез тупатъямтэ на. Эстӥськон, кылем арен ӵошатыса, уногес ваемын, бензин сяна. Озьы ке но, тулыс бусы ужъёсты быдэстыны со тырмыт ӧвӧл. Кизён туэ бероме, инкуазь дыр сётэ солы умойгес дасяськыны, но дыртыны кулэ. Дасям кидысэз киын уд кизьы ук. Н. ВОЗИСОВ. КЫЛЭЗ ТОДӤСЬКОД - ВИЗЬМОГЕС ЛУИСЬКОД Укмыстонэтӥ аръёсы, выльдӥськон пуромем бере, огшоры удмуртъёслы но кунгож сьӧръёсын кусып тупатыны, соослэсь тодон-валанзэс асьме палан уже кутыны, асьсэды возьматыны сюрес усьтӥськиз. Огласянь - шумпотыны кулэ кадь сыӵе ӧр усьтӥськемлы. Мукет ужпум: со тодон-валанэз улонамы пыӵатыны быгатомы-а? Татын трос гинэ шуг- секытъёс кылдо. Кусып но куддыръя тупатыны каньыл ик ӧвӧл. Удмурт кун университетысь кылтодон наукаосъя кандидат доцент Виктор Леонидович Шибанов 1997-тӥ арын Финляндие кык пол потаз. Отысь выль литература сярысь тодон-валан ваиз. - Виктор Леонидович, трос-а документъёс дасяно, кунгож сьӧры потон понна? - Нырысь ик кулэ кык дэмлан. Одӥгзэ ӵемгес асьсэос финнъёс гожто, кыкетӥзэ - университетысьтымы тодосчиос. Мон кык пол потай бере, сыӵе документ кык пол ик лэсьтэмын вал. Кык полаз ик дэмлазы профессор В. К. Кельмаков но Сара Хянникяйнен. Кыкетӥез - ас куронъёстэ лад-лад радъяса но валэктыса вазиськоно Хельсинкиысь М. А. Кастрен нимо огазеяськонэ. Собере соос, финн-угор кафедраосысь профессоръёс но министерстволэн кивалтэтэз, люкаськыса чаклало со куронъёсты, быръё тужгес тунсыко проектъёсты но вормисьёслы ӧтён ысто. - Асьтэлэн куронъёсады кыӵе ужпумъёсты ӝутылӥды? - Нырысетӥез уже бадӟым вал - одно ик урокъёсы ветлоно, финн кылэз ӟечгес тодо но соя экзаменъёс сётоно. Малы ке шуоно, Финляндия коньдон ӵапак ми кадьёслы висъя, кылэз дышетон понна. Со сяна, тунсыкъяськисько финн литератураен. Озьы мон ас азям таӵе ужпум пуктӥ, тросгес финн кылбуръёсты берыктоно удмурт кылэ, соосъя нимысьтыз радиоверанъёс дасяно, журналъёсын печатласьконо, нош азьланяз нимысьтыз антология печатлано. Кыкетӥез бадӟым ужпум - доктор диссертация гожтыны дасяськыса, культурологиысь но литератураысь выль амалъёсын тодматсконо. Асьмелэн социализм вакытэ литератураез эскеронын валтӥсь амал вал соцреализм. Культура шоры выль сямен учкыны тыршиськомы ке но, пуштроссэ валаны умгес быгатӥське на. Европаысь вуись выль тулкымъёсты умой гинэ шӧдыны луэ Хельсинкиысь библиотекаосын. Соос ог-огенызы герӟаськемын но одӥг сӧзнэт (система) кылдыто - ХЕЛКА. Таиз тужгес но секытэз но кулэез вал, дыр, мон понна. Секыт соин: туала бадӟым литература но литературая методикаос пото англи кылын. Тужгес умойёссэ финнъёс туртто соку ик асьсэ кылэ берыктыны но печатланы. Мон англи кылэз нимаз дышетэмын ӧвӧл.Финн кылъя но ӧй вал на сокем мур тодонъёсы. Мар ватонэз, ӟуч кылын потылэмъёссэ но лыдӟыны шуг. Нош выль методикаосъя (уката ик тодмотэм кылын ке) котькуд кылэз словарьысь учконо луэ ке... Быдэс наукамы ӟуч культура пыр гинэ выльзэ басьтыны тыршемын. Нош табере тэтэ каремысь дугдоно ни. Бадӟымгес но эрикогес кариськоно. - Удмурт литература сыӵе ӧр шедьтыны быгатоз-а? - Асьмелэн данъяськымонэз вань. Со сярысь тыршим С. Ф. Васильевен "Под тенью зеркала" книгаямы но вераны. Озьы ке но, кунгож сьӧрысь бертэме бере, удмурт литературамы мон понна эшшо куинь-ньыль поллы, дыр, узыргес потӥз на. Азьло мон но тросэз удмуртъёс сямен ик сюлмаськыса улӥсько вал: кызьыгес учконо, шуом, Михаил Коноваловлэн "Вурысо бам" романэз, Филипп Кедровлэн "Катя" повестез шоры. Табере таӵе сюлмаськон быриз. Мукет ласянь ке, туала удмурт культура (сое чаклало вылэм финн тодосчиос - соос трос ӧвӧл ке но) озьы ик паймымон тунсыко. Зэм, финнъёс троссэ ай Эстония пыр чаклало но. Отын али трос финн-угор дышетскисьёс. Эстонецъёслэн кусыпъёссы Россиысь финн-угоръёсын золгес. Кылсярысь, Петр Захаровлэн "Эбга" драмаеныз но, Сергей Матвеевлэн "Шузи" романэныз но тунсыкъясько вылэм. Россиысь финн-угоръёс (комиос, поръёс, удмуртъёс) пумен матынгес но матынгес луо огъя Европаысь тулкымлы - постмодернизмлы. Та тулкымлэн одӥгез люкетэз этнофутуризм луэ. Та кыл пӧрмемын этно (калык) но футуризм (вуоно вакыт) кылъёслэсь. Оглом та юан секыт ай. Сое мур-мур эскероно, статьяос, дипломъёс гожъяно но трос мукет ужъёс лэсьтоно. - Кыӵе сямыз та выль тулкымлэн? - Постмодернизм трос культураослэсь огинэ сураськемзэс кулэ каре. Асьмелэн шаерамы ӵапак озьы ик луиз: шунды пуксён но шунды ӝужан, миф но модерн, гурт хозяйство но военной комплексъёс - ваньмыз огазе сураськемын. Кылсярысь, Лидия Нянькиналэн гожъямъёсыз - со гуртлэн но городлэн, мифдуннелэн но туала авангардлэн огинэ пӧлэстӥськемзы. Озьы ик та учыр шӧдӥське Петр Захаровлэн, Сергей Матвеевлэн гожъямъёсазы. Гурт культура вылэ гинэ пыкиськыса, туала Европалэн куронъёсыз сьӧры уиськыны уд вуы. Озьы ке но, гурт культураез быдтыны уг яра - со сярысь вера этнофутуризм кылысь этно люкетэз. - Кыӵе шуг-секытъёс пумисько, кунгож сьӧры кема дырлы потоно ке? - Нырысь ик - шутэтсконэз радъяно. Меӵак вераса, отын шутэтскон ӧвӧл - угось ялкарыку но туж трос ужано (берыктоно финн кылысь, пуштроссэ валан понна). Кыкетӥез - англи кылэз тодымтэен валче шуг. Финляндие лыктэм тросэз адямиос финн кылэз уг тодо. Соин ик тунсыкоосыныз пумиськыны ӧй быгаты. Куинетӥез - компьютер техникаез туж урод валаме но юмоке вуттэ. Соин ик котькуд ужлы кык-куинь поллы тросгес дыр быдтылӥ, та визьмо машинаез ӟеч тодӥсьёс сярысь. Вераськиз Светлана ПЕТРОВА, Удмурт кун университетын дышетскись. Нырысетӥ вамышъёс Котькытын сямен ик, Алнаш ёросын но бусы ужъёс ӝегало. Озьы ке но, лымшор районысь тыршисьёс бусы ужъёсты мытӥзы ни. Туннэ нуналлы ёросын кын улэ кельтэм муос 12 процентэз усыямын, трос аръем турынъёс - 32 процентэз. Ужъёссы ӟеч мыно "Кама", "Красное Знамя", "Родина" колхозъёсын. Пусйыны кулэ, ёросъя кысык вакытлы ваньмыз сямен техника дасямын вал. Та вакытэ 90 процентэз луд вылын ужа ни. В. Андреева. Улонын аслад интыед Кинлы кызьы удалтэ, ява. Атайтэк кылем Алевтинаез нокинлы дышетыны кадь. Анай утялтэ музон нылпиоссэ. Песятайлэн юрттэмез потэ - моӵез ӧвӧл ни. Ярам коть, Можгалась медициная училищеын стипендия тыро. Умой дышетскиськод ке. Нош кызьы вормоно меда та секыт анатомиез? Физкультураен дышетӥсьёс чаляк синйылтӥзы чупрес сямо нылашез. Пыдын но куасэн бызьылэ. Уя но велосипедэн ворттылэ. ДОСААФлэн тираз нуизы но, винтовкаез дӥсьтыса кырмиз. Оло, ыбылӥськемез вань ини? Мар бен дауртэ? Малы пыӵалзэ паллян кияз возе? Малы паллян синзэ уг, бурзэ кыне? Кинэз сое татчы лэзем? Валамон ини, сыӵе мыдланес ныллэн пуляосыз "йӧлэ" мертчизы. Мудрон выремезлэн мугез но шараяськиз. Алевтина паллян вылэм, нош паллян синзэ кынемез уг луы. Вылаз ик, винтовкаез нырысьсэ кутэм. Куалекъясь ки но кырыж син шуыса исамзылэсь ӧз курда. Кышкам гинэ ӧвӧл, кельшиз ыбылыны. Выльысь куриське тире. Озьы нылмурт ветлыны ӧдъяз спортъя секциосы. Солы сётӥзы дӥськут но сиськон талонъёс. Та ласянь вуоно фельдшерлы удалтӥз шуыны луоз. Удалтэ, ӵошатсконъёс сярысь вунэтӥськод ке. Огпол нылъёсты нуизы Иже. Ӵошатсконзылэн нимыз мудрон - гужем миноборье. Бызьылыны но граната лэзьяны бен Алевтина дышемын. Нош бассейнэ пырамез ӧвӧл. Стартэ султыны косӥзы но, со васькиз улӥе, вулы матэгес. Эшъёсыз, вылӥысен лобӟыса, топедаос кадь кошкизы. Можгаысь дыды кылиз. Пичиысен тыметысь потамтэ маке эшшо огпол валаз: туала спортын техника шуонтэк кыдёке уд мыны. Зэм, улон косӥз тазэ но малпанзэ кӧня ке воштыны. Огпол можгаосты нуизы Вологдае, куасэн бызьылонэ. Тренировкае потыса адӟизы: кузёос кельшо трос сюдэм толэсъёслы. Сокем зол дасяськиллям: лымы сюрес вылтӥ бызизы ке, тузон пурӟоз кадь. Асьме тренеръёс буйгато: эн куалекъялэ, асьтэлэн вормондылы оскиды ке, ваньмыз умой луоз. Верамзы зэмаз. Удмурт нылъёс вологдаосты азьпалтӥзы. Огзэ усто спортменкаез кутӥзы "Спартак" обществолэн Удмурт Республикаысь советэзлэн командаяз. Алевтина утёно луылӥз медучилищелэсь но, Можгалэсь но, Удмурт шаерлэсь но данзэс. Кышномуртлэн огъя улонэз кузь, эрико улонэз вакчи. Диплом басьтӥз - медсестра луиз, бызиз - анай луиз. Кытын табере тренировкаос но Вологдаос, сборъёс но "спартакъёс"? Тодэ ваёнъёсын гинэ. Тодэ ваёнэ (шонергес - буре ваёнэ) кылиз картэз но. Поезд улэ сюрыса быриз. Алевтина вуиз Бадӟым Учае. Сюлмысьтыз яраез бурмыса бызиз кыкетӥзэ. Сюрес лёгиз дано "Радуга" спортклубе. Больницаын сменаен ужа бере, дыр шедьтэ зарядкалы но, тренировкалы но. Кырыж учкисьёс но вань: - Малы бызьылӥськод? Ужед ӧвӧл-а? - Ойдо тон но. Нюлэскытӥ ортчод но, сюлэмыд копак буйгалоз. - Керпотӥсько. - Малы? - пайме Алевтина. - Кӧй тоӵко шуозы. Кызьы, кызьы куд-огез уг валало, кӧез, физкультураен сяна, номырин уд кушты шуыса? Со понна нокыӵе эмъюм но гипноз малпамын ӧвӧл на. Реклама юнме ӧрекчаське. Ӵок, бызьылыса сокем ӧд восьтэтмы ке. Мылкыдыд ӝутскоз, шоканэд радъяськоз, куректонэд вуноз. Ма, кырын куасалъяськыны возьдаськиськод ке, мын ук спортзалэ. Алевтина пизэ кутэ но отчы дыртэ. Педлон тол кузёяське. Нош татын, шуныт азьын, волейболэн шудо. Пиез палэнын, висъет сьӧрын, пырске ас понназ. Туплэсь Алевтина Борисова нырысь курда вал. Нош винтовка борды чаляк дышемзэ тодаз вайыса, таиныз но эшъяськиз. Учалась командаос пӧлын нюръяськонын со ке ӧз, кин-о пыриськоз больницалэсь данзэ утёнэ? Спортклуб уг кыльы улонлэсь. "Буран" машина басьтӥз но котькыӵе куазен куас сюрес возьыны ӧдъяз. Алевтина ар пала дышетскиз эрико (коньки) амалэн бызьылыны. Кыӵе ӝоглык! Макем ӧжытгес кужым быре! Уд вамышъяськы - лобиськод! Валамон ини: Алевтина табере уз луы Россилэн но дуннелэн чемпионказы. Спортъя мастере кандидатлэн арлыдыз вань ини. Котькуд адями сюлмаськыны кулэ улонын аслэсьтыз интызэ шедьтыны. Алнаш ёросысь Асанын, республикаысь гуртъёсын улӥсьёс пӧлын ӵошатсконъёсын нырысетӥ интые потӥд - шумпот. Можга районысь командаед "Удмурт дунне" газетлэсь кубоксэ утӥз - данъяськы. Вылаз ик, Можгалась сэзь спортсменъёс пӧлын ӝыныез пала - бадӟым учаос. Пиед физкультурае институтын дышетске. Мар тынад ӧз пӧрмы, оло солэн пишмоз ай. А. Шкляев. Берекет Пужыятскисьёслы Сяська тугоко Пужыятскыны мылкыд карисьёслы дэмласьком сяська тугоко пужы. Сӥньыс быръе асьтэлэн чакламдыя но луонлыктыя. Та пужы аспӧртэм но чебер кароз нылпиостылэсь дэремзэс, сарафанзэс. Тужгес тупалоз кисыосты чеберманы. Юнгес басма вылэ пужыятыса, борддоре но ошыса усто адӟиськоз. Быдэстоно гладь амалэн. Л. Широбокова. Берекет ПЫРЫОС-ВИЗЬЛЮКЪЁС Бумазей (фланель) но ыж гон дӥськут миськем бере чебер тусо адӟиське, гылтон вуэ кӧня ке глицерин ватсаса. 10 литр вуэ 1 сиськон пуньы тырме. Искусственной буртчинлэсь но ыж гонлэсь дӥськутэз утюген ӵем волятыны кулэ ӧвӧл. Озьы со ӝог уродме. Таӵе дӥськутэз нюромытэм щёткаен сузяно но шунды йӧтонтэм интые ошоно. Кильымъёс озьы шонерало, ӧжытак гинэ утюген волятонэз кыле на. Утюген волятыку, искусственной буртчинлэсь дӥськутэз вуэн уг пызъё - виштыос кылёзы. Крахмалам бельёез волятыку, со утюг борды медаз кутскы шуыса, крахмал суретэ кӧня ке шапык спирт ватсано. Гур азь палась пӧраськыку кылдэм кӧш зынэз быдтыны луэ тазьы. Плита вылэ пуктоно ӧжытак гинэ уксус ватсам ву. Посудаез пытсатэк ик вуэз быректытоно но корка пушез тӧлатоно. ОСКЫМОН КИВАЛТӤСЬ НО ЭШ Тани соос - Петроваос. Кизнер районын соос вылын возиське удмуртлык. Елизавета Владимировна (бурысез) - ёрос администрацилэн кивалтӥсезлэн нация ужпумъёсъя воштӥсез. Ӵуказе Вуж Кармыж (Бызара) гуртысь шор ёзо школалэн директорез Серафима Петровна (паллянысез) вордскем нуналзэ пусъёз. Ми но сое ӟечкыласькомы. Дышетӥсь, колхозэн кивалтӥсь, партилэн райкомаз ужась - таӵе ужан-кивалтон ныпъетъёсты вормылӥзы кышномуртлэн пельпумъёсыз. Кин ялан ужа, нюръяське, сыӵе адями пересьмонлы уг сётскы - озьы шуо калыкын. Со шонер, вылды. Серафима Петровналэсь арлыдзэ йырсиосыз но, мугорыз но меӵак шараяны уг дырто ай. Со туж егит адӟиське. Ужаны мылкыдыз, кынарыз кемалы тырмоз на. Соин ик ми но солы уно вормонъёс, азинсконъёс сӥзиськомы. Кармыжысь Петровъёслэн ньыль нылпизы. Куинез вылӥ тодон-валан басьтыса ужало ни. Покчиез Удмурт кун университетын дышетске на. Анай-атаезлэсь адӟем карыса, дышетӥсь луыны малпаз. Кузпалыз Леонид Алексеевич - усто дышетӥсь. Кибашлы луэмез азбарысен ик шӧдӥське. Синмаськоно мудрон амалэн лэсьтэм ӧсъёслы, шкафъёслы, но тужгес - мунчолы. Мунчое пырон понна кыре потонэз ик ӧвӧл, корказе пот но тӥни. Сое эстон понна пу но, эгыр но кулэ ӧвӧл - ваньмыз лэсьтӥське электрокужым чотын. Школалэн коллективеныз Серафима Петровна туж быгатыса кивалтэ. Мар гинэ уг будэто школа бакчаязы! Будэтэм емышъёссы асьсэлы ик барышен берытске. Серафима Петровна ялан калык пӧлын. Кивалтӥсь ке но, солэсь уг курдало - адямиос пӧртэм юанъёсынызы, малпанъёсынызы вазисько. Оско: со одно ик юрттоз. Т. МИРОНОВА. Туспуктэмез М. ЕГОРОВЛЭН. Шӧкыч Ымдэ ӟубис эн возь (Юмореска) Аръян шуккон вышкы ӝужда Ондӥ сьӧр гуртысь егит пиез акыляк луымоназ нерад каре. Мотояд, шуэ, ворттылыты. Тыныд, пе, кема-а со. Нош соиз котьку амал шедьтэ: мотор "кизьнылэ", бензин ӧвӧл. Кема чидаз Ондӥ, берло йӧнзэ шедьтӥз. - Туннэ но-а уд ворттылыты? - юаз со. - Тон понна ваньзэ лэсьтысал. Только, вот, аккумлятор.... Ондӥ пумитаз номыр ӧз вазьы. Ӝожомыса, йырзэ ошиз но палэнскиз. Егитъёс юмшаку, пиёк кема бергаз мотоцикл котыртӥ. Собере кутӥз мотоцикллэн бензин баказ кык кырым луо пызьназ. Палэнэ кариськиз. Возьма, ку сьӧр пи мотозэ "жургетытоз". Соиз ӝутскем мылкыдын вуиз, машина моторзэ лэзиз. Кыдёке кошкыны ӧз вуы, мотоцикл гуньдӥз. Аслаз гуртозяз машиназэ пи ӵукнаозь донгыса нуиз. Нош ӧндӥ со вакытэ, валесын гань-гань кыльыкуз, мыньпотыса малпаз: "Ми пинал ке но, мае но сое валаськом". Соиз но озьы. Пичи мурт шоры ӧстэ ялан ӟубис эн возьы. Виталий Агбаев. Художник пальпотэ. - Ӵуж, ӵуж, ӵужонэ.... Суредэз В Богорадлэн. "Куд-ог улосъёсын пересьёслэсь, ӧлексыослэсь, висиьёслэсь коньдонзэс кыскон кескич амал шедьтӥзы. Пенсизэс ырыку, соослы эриктэм чуртнало дунзы бадӟым луэмен киоскъёсын нокин басьтытэк кыллись журналъёсты но газетъёсты. Озьы, пе, косэмын вылӥысен. Кин косӥз, кинлэн нимыныз пӧяло пересьёсты, таизэ валэктӥсь ӧвӧл..." ("Шӧкыче" вуэм гожтэтысь) - Остэ, нылы, сёросам мынам сотэк но кагазэ трос. Тыро-пыдо лыдӟиськеме но уг луы ни, синмы но бус пыртӥ адӟе. Эсьма ватсаса колды нянь басьтысал... Югдур Гурт калык шуиз: Виктор янгыш ӧвӧл! Посёлоклэн адӟонэз Ог вить-куать ар талэсь азьло, Посёлокын улӥсьёс вылэ секыт зӥбет вуиз. "Зӥбетлэн" нимыз вал Сергей Борисов*. Пытсэт сьӧрысь кыкетӥзэ потыса, со Посёлоке улыны лыктӥз, татысь ик совхозэ уже интыяськиз. Кема ӧз ужа: калгемез, юэмез понна ӝог гинэ тузӥзы. Но Сергейлы ужзэ ыштыны туж ик бадӟым ыштон ӧз луы. Со угось ассэ Посёлоклэн "кузёеныз", "Эксэйеныз" ялӥз. Нош татын улӥсьёсты - аслаз ляльчиосыныз. Борисов малпамъя, "ляльчиос" асьсэлэсь "эксэйзэс" сюдыны-сектаны, коньдон зорен пылатъяны кулэ вал. Кин пумит - солы тыш. Та нуналысен Посёлок калыклэн огсыр улонэзлы пум вуиз. Борисов нырысь пумиськемзэ ик юонлы, коньдонлы ёртоз, яке воксё нокыӵе мугтэк но жугоз, ултӥялоз. Уноез гинэ воргоронъёс но егит пиос трос вӧсь луонэз адӟизы вирюисьлэсь. Нош нылкышноос но пиналъёс пеймыт дыръя ураме потыны ик уг дӥсьто вал. Нош кытчы учкизы властьёс, милиция? Асьмеос ЪЪ даурлэн пумаз-а яке пещераос вакытэ-а улӥськом? Эхма, ваньмыз сокем огшоры гинэ луысал ке! - Борисов угось адямиосты туж зол кышкатыны быгатӥз. Ӝугем "ляльчиоссэ" котьку алӥз: "Милицие чагиськид ке, яке ачид улӥсь уд луы, яке нылпидэ ноку но уд адӟы ни, яке кышнодэ ас азяд "яратозы"". Уж вылын но одӥг пол гинэ ӧз возьматъя, кылъёссэ тӧл вылэ уг куя шуыса. Ас кадяз ик бандитъёсты сьӧраз вайыса, трос пол гинэ кылзӥсьтэмъёсты "визьмалляз". Но солэн сьӧсьяськемез сярысь пыр-почгес азьланяз мадём ай. Котькыӵе чиданлэн пумыз вань 1993 арлэн пумаз Борисов чиптэм-чаптэм ышиз. Со вакыт сое милиция утча вал ини. Соин ик калык малпаз, милицилэсь пега, ватскыса улэ шуыса. Ар но, кык но ортчиз, "кузё" дораз но ӧз вуы ни, милициын но ӧз шараяськы. Мар бен, ышиз ке ышиз, кин куректоз со гыжкал понна. Тужгес но ӟечез - Посёлок "эксэй" зӥбетлэсь мозмиз, улон азьвыл ӧраз пыриз. Нош кылем тулыс Посёлокын сайкыт инмын гудыртэм кадь чузъяськиз: Борисовлэсь шӧйзэ, пе, шедьтӥллям. Виисьёсыз но тодмо ини - Посёлокысь ик егит воргоронъёс, куать кузя. Калык пӧлын вань шуон - веран та сярысь гинэ вал. Кызьы котьку луэ сыӵе дыръя, олокыӵе чыры-пырыоссэ но тодӥсьёс шедизы. Борисовлэн мыгорыз, пе, автоматэн ыбылыса, пуж кадь каремын, нош сисьмыны чик сисьмымтэ, пленка мешокын улэп кадь кылле. Ӝоген пиосъёсты арестовать каро. Кӧня ке улыса, витьсэ берен мозмыто. Кельто Коновалов Викторез гинэ. Со угось Борисовез вием. Кызьы, мар понна? Борисовез Коновалов нырысьсэ адӟиз уж дурысен. Пытсэтысь вуыса, Борисов но угось фермае трактористэ интыяськиз вал. Викторлы, сюлмо, ужась муртлы, Борисов аслаз укылтэмъяськеменыз нырысь нуналысеныз ик ӧз кельшы. Соин ик выль ужасьлэсь палэнынгес возиськыны тыршиз, ваче пумит вуыны муг ӧз утча, ассэ кышкась уд ке но шуы. Кызьы шуо сыӵе дыръя, кышкамзэ но, гажамзэ но ӧз возьматъя. Нош Борисовлы сыӵе ас эрказ улӥсь воргорон ярамтэ, шӧдске. Ӝоген лексэ поттыны муг но шедиз. Укылтэм тракторист тракторзэ юэменыз фермалэсь палэнэ сюрес вылэ куштыса кельтэм. Коноваловез кивалтӥсьсы со тракторез гараже вайытэм. Борисов вожомем: кызьы тракторме, пе, кин ке исаны дӥсьтэм?! Со ӝыт ик со выныныз ӵош Коноваловез "визьманы" мынэ. Викторез шедьтытэк, вань йыркурзэ чик янгыштэм мурт вылэ кисьтэ. Нош ӵуказеяз Викторез но шедьтэ: тракторме нуэмед понна, пе, 300 сюрс манет тырод. Валамон, Коновалов пумит луэ. Со ӝытэ ик Викторез нырысьсэ жуго. Борисов юн алэ: уксё ӧд ке вайы, таин гинэ уз тырмы - кышнодэ эриктэмалом, нылпиостэ нуом. Виктор 50 сюрс манет сётэ. Нош курадӟытӥсез вылаз ик мыскыл каре на: "Молодец тон, озьыен, нылпиостэ жаляськод, кышнодэ яратӥськод. Ӵуказе улыса, нош ик дася коньдондэ". Викторлэн улонэз, улон ке шуод на сыӵе улэмез, табере пумтэм курадӟонлы пӧрмиз. Эшшо одӥг пол 50 сюрс сётэмез бере, воргорон пумит луиз вирюисьлы сётъяськыны. Сое нош ик жуго. Вить бандитъёс, аслаз подъездаз ик. Таяз учыре больницаын кылльымон сӧсырто, нырзэ но чигто. Больницаысь потэмез бере, сое шедьтэ Борисов. Нырысетӥ юанэз ик: "Мар верад врачъёслы сӧсырмемед пумысен?" Виктор шуэ: ачим, пе, сӧсырми шуыса верай. Борисов ушъя: "Шонер лэсьтэмед. Тодыса ул: чагиськид ке ментъёслы, ӵуказеяз ик тодо но соку ик вань семьядэ быдто. Нош али кылемзэ тыриськондэ вай татчы". Виктор одӥг манет но ӧз сёты ни. Ма, семьяяз уксёез но ӧй вал угось. Мар карыны ёрмыса, со кема малпаськемез бере, милицие заявление гожтэ. Ӵапак со нуналъёсы Борисов больницае шеде. Со Посёлокысь одӥгаз квартирае пырыса, укылтэмъяськыны, кузёяськыны кутскем. Кузё кышно картэзлы ужан дораз жингыртэм. Соиз ури-бери дораз бертэ. Борисовез улля, нош соиз пумитъяське, жугиськын турттэ. Соку квартира кузё (нялтас вераса, Борисовен ӵош ужам маке) сьӧраз ортчем албастыез пуртэн бышкалтэ. Созэ больницае келяло. В. Коноваловлэн следовательлы верамысьтыз: "Мон со вакыт уй но нунал но вӧсяськыса улӥ: мед инмар октоз-калтоз вал со юрӟымез. Ӧз, жаляз луоз". Борисов йӧнам гинэ ӧвӧл, больницаысь пегӟыса сямен кошке. Зэм но, кызьы вераз вал, Коноваловлэн чагиськемез сярысь со туж ӝог тодэ. Кызьы, кытысь? Та юанъёс пумысен вераны кулэ мукет учыр сярысь но. Со вакытэ Борисов Викторез гинэ курадӟытыса ӧз возьы. Тросэз Посёлокын улӥсьёс но солэсь эшъёсызлэсь мыжыкъёссэс "веръязы". Уголовной ужын гинэ гожъямын куать адямиез жугемзы сярысь, куд-огзэ - кык пол но, куинь пол но. Нош кӧня сьӧсьяськемзы шарае потытэк кылиз? Посёлокын улӥсьёс, Борисовлэн эрказъяськеменыз пумаз вуыса, милицие ик вазиськоно кариськизы. Ог кызь мурт люкаськыса, РОВД-е мынӥзы. Кудӥз ке заявление гожтӥз, кудӥз ке кыл вылын гинэ ӝожтӥськонзэ вераз. Нош Борисов ӵуказеяз ик ини ваньзэсты чагиськисьёсты кышкатъяса ветлӥз. Нош ик юан кылдэ: кытысь, кинлэсь со таяз учыре но тодӥз соослэн милицие чагиськемзы сярысь? Оло, кызьы малпа судья Е. Дементьев, солэн, зэмзэ но, милициын аслаз адямиез вал? Озьы ке ӧвӧл, маин валэктод Борисовлэсь дырыз дыръя милицилэсь ватскыны быгатэмзэ но? Виктор, оло, ӧй но дӥсьтысал заявление гожтыны, но берло жугыкузы, со туж умой валаз: адями туссэс ыштэм бандитъёслы нокыӵе йыруж но кышкыт ӧвӧл. Соос Викторез, ымаз спирт кужмысь кисьтыса, куинетӥ этажысь куштыны туртто вал. Ӧз быгатэ, соослы люкетӥсь луиз. Коноваловен ӵош заявление гожтӥз Шудегов но. Тазэ но бандитъёс кык пол жугылӥзы, огпалаз - йырсазьзэ ыштымон. Собере гинэ милиция Борисовен тунсыкъяськыны ӧдъяз. Нош соиз, кызьы верамын вал ини, лушкем кариськиз, "ву пыдсы лэзиськиз". Зэм, милиция понна гинэ. Со понна уйлы быдэ сямен Посёлоке эшъёсыныз ӵош машинаен вуэ вал. Ялан турттӥз Коноваловез кырмыны. В. Коноваловлэн следовательлы верамысьтыз: "Мон со вакыт одӥз уйзэ коть умме усьылӥ-а меда, уг тодӥськы. Кӧлай, пӧйшуран пыӵалме вӧзам поныса. Котькуд машина куараез кылыса, зуркак луисько вал. Лушкем гинэ укноетӥ учкисько. Озьы ик вань: укно улын яке горд "москвич", яке сьӧд "волга". Пушказ монэ утчасьёс пуко. Ӵукна нылпиосме садике одно ик калыкен ӵош келясько. Кышноме но озьы ик. Ачим уже лушкаськись сямен ватскыса мынӥсько. Одӥг пол укноетӥ но потыса кошкеме вань. Кызьы меда мон ӧй визьтэммы со нуналъёсы, уг тодӥськы". Коноваловлэн но Шудеговлэн юалляськемзылы милициын буйгатӥзы гинэ: Эн шугъяське, ми утчаськомы преступникез. Одно ик шедьтомы". Но кӧня чидалод тылӝу вылын улыны? Котькыӵе чиданлэн пумыз вань ук. Коноваловлэн чиданэз быриз 1993 арын декабре. Ог ӝытэ со матысь эшъёсызлы тэльмыриз: "Ойдолэ асьмеос утчалом Борисовез, милицие сётом". Эшъёсыз юрттыны соглаш луизы. Потӥзы куать кузя, машинаен. Кытысь но отысь тодо вал, кытынгес ватскыса улыны быгатоз Борисов. Шедьтӥзы Ижевскысь одӥгысьтыз общежитиысь. Завьяловое, милицие, нуыны туртто вал но, машиназы осконтэмен, Посёлоке участковой доры, мыноно кариськизы. Соиз яке дораз ӧй вал, яке бер ӝыт усьтэмез ӧз поты. Мар кароно? Следствие дыръя, одӥгъёсыз шуо, Борисовез, пе, ӵукнаозь машинаын возьыса, участковойлы сётыны малпам. Мукетъёсыз шуо, Борисовен "пиосмурт кылын", пе, вераськоно кариським. Котькызьы мед луоз но, "арестантсэс" пиос тэле нуо. Сюрес вылысен но, интыязы вуыса но Борисов пиосъёсты жоб кылъёсын шобыртэ, оген-оген вандо шуыса кышкатэ. Машинаысь потэмзы бере, Коноваловлэн ымныраз мыжыкеныз но кык пол вутске. Собере нюлэскы пегӟыны ӧдъя. Коновалов, машинаысь пыӵалзэ кутыса, сьӧраз уиське. Сьӧраз пыӵал кутэмзэ Виктор тазьы валэктэ: Борисов, пе, трос пол ушъяськылӥз, пистолетэз вань шуыса куд-огез пиос адӟылӥллям но). Ӝоген Борисов дугдэ но, улвай кутыса, Коновалов шоры лыктэ. Соиз ыбе, кык гумыысьтыз ик ӵош. Борисов погра... ...Пиос кулэм муртэ лымыен но улвайёсын сого но машинае пуксьыса берто. Ужзэс но чал-чал лэсьто, сюрес вылын но пал кыл но уг куарето. Кӧшкемыт ужзы сярысь куспазы азьланяз но уг верасько. Зэм, ӝыны ар ортчыса, соос, Борисовлэсь шӧйзэ мукет интые нуыса, сюе сого. Нош 3,5 ар ортчыса, ваньмыз кызьы ке но шарае потэ. Кин тодэ, оло, кин ке но адӟисез шедиз но берло ини со сярысь ивортӥз, оло, асьсэос ик пиос кудзы ке шӧдтэк кылизы. Котькызьы мед луоз но, Завьяловоысь прокуратура уголовной уж ӝутэ, следствие мытэ. Со вакытэ вань Посёлок бугыртэм кузьым карлы укша вал. Ваньмыз - пиналэз но, мӧйыез но - дурбасьтӥзы Коноваловлы но солэн эшъёсызлы, каргазы вием бандитэз. Тросэз табере шара тодазы ваизы Борисовлэсь соосты мыскыллямзэ, жугемзэ, коньдон таламзэ. Ӝоген прокуратурае гожтэтъёс вуизы. Викторлэн ӵош ужась эшъёсыз, Посёлокын улӥсьёс Коноваловлы ӟырдыт дурбасьтэмзэс верало, "милемды но, нылпиосмес но кык пыдо сьӧсьлэсь утиз" шуыса гожто. Совхозлэн директорез, Кун Кенешлэн депутатэз, прокурорлы куронэн вазиське. Борисовлэн кышноез гинэ но Коноваловез жаляны куре. Суд кык нунал ӵоже кыстӥськиз. Залын, пе, тачак калык вал. Ваньмыз вераськисьёс Коновалов сярысь умойзэ гинэ вераллям. Нокин но ӟеч кылын тодаз вайымтэ Борисовез. Суд Коноваловлы куинь ар условно сётӥз вал но амнистиен валче, та кыл кутонлэсь но мозмытӥз. Нимысьтыз пусйыны кулэ судлэсь югдурез сэрттэм-пертчемзэ. Азьвыл аръёсы асьме судъёс кыӵе ке лултэм-сюлэмтэм машиналы укшало ке вал, табере соос ялан ӵемгес но ӵемгес адями пала берытско, котькуд югдурез пӧртэм но нимаз мерттэтъёсын дунъяло. Чебер кылъёсын верано ке, врачъёс сямен ик "изъян гинэ эн вайы" шуэм улсын ужало. Тани мар шуэ эскерем ужез пумысен ачиз судья Евгений Аркадьевич Дементьев: - Законэз меӵак кутоно ке вал, Коноваловлэсь улэмзэ но кыӵе югдуре шедемзэ лыдэ басьтоно ке ӧй вал, сое трос арлы пуктыны луысал: котьма ке но, адями виемын угось, урод-а, умой-а но. Но кинлы таӵе вамышлэсь пайда луысал? Викторлы? Обществолы? То-то угось. Со сяна, Виктор виемез потыса вылысь шат вииз Борисовез? Со гинэ шат янгыш? Йылпумъян кыл интые Кин янгыш? Вашкала юан, номыр уд шуы. Но кӧня таӵе выллем юанъёс кылдо, сомында ик валэктон но. Котькуд юанлэн аслаз валкэтонэз, вань ке со дунне вылын. Зэмзэ но, луысал меда мадем югудрез адями виёнтэк тупатыны? Луысал ке, кин сое тупатыны кулэ вал? Котькуд ласянь чакла но, эшшо одӥг вашкала юан шоры пыкиськисько: кытчы учкиз милиция? Соку ик син азе пуксе милицейской кивалтӥсьёслэн пӧсекъяськемзы. Котьку сямен ик, соослэн машинаоссы, калыксы, кужымзы уг тырмы, уждунзы пичи, сое но уг тыро, ужъёс вормонтэм трос, калык соослы уг юртты. Нош кинлы туала дыре капчи, кинлы тырмыт но дыраз уждун тыро? Котьма ке но, милиционеръёс, мукетъёсыз сярысь, чидамонгес ик уло ай. Пыкылон понна уг, ӵошатон понна гинэ верасько: кытын ужасьёс милиционеръёс мында асьсэ понна машина возё? Калык уг юртты милицилы, соиз зэм. Уз но юртты туала милицилы. Калык кышка солэсь. Кышка вӧсь каремезлэсь, ултӥямезлэсь, пӧямезлэсь, камерае куштэмезлэсь. Калык адӟе ук, милиционеръёс бандитъёслэсь ӵем дыръя кышкало шуыса, нош огшоры адямиез чыры- пыры янгышез понна яке воксё номыртэм понна пумозяз шымыртозы. Калык милицилы уг оскы. Кызьы преступник вылэ чагиськод яке свидетель кариськод, милиция со преступниклэн пунэмзэ берыктэмезлэсь асьмеды утьыны уг быгаты бере? Ярам, асьмелэн куреммыя, бандитэз кырмо но пытсало ке. Но куд-ог дыръя сое кутыны яке уг быгато, яке уг дырто, яке уг но малпало ке? Тани басьтом Посёлокын луэм учырмес ик. Участковой милиционер пӧсекъя, кызьы, пе, мон со Борисовез пытсалом, заявление гожтыны ваньмыз кышкало бере? Нош тӥ, милиционер эш, заявление гожтэмъёсты утьыны быгатысалды-а Борисовлэн эшъёсызлэсь? Шуг оскыны. Нялтас вераса, заявление котьку но одно ик кулэ но ӧвӧл. Милиционер шуге-леке вуэмъёслэн кылъёссы вылысь рапорт кивалтӥсьёсызлы гожтыны быгатэ: озьы-тазьы сыӵе кылдэм югдуръя ужрадъёс кутыны курисько. Ярам, Борисов вылэ заявлениос но гожтэмын вал ини, мын но керттылы бандитэз. Ӧз, милиционеръёс, оло ӧз быгатэ, оло ӧз ваньме сое кырмыны. Яке "машиназы, кужымзы ӧз тырмы", луоз. Шуге-леке шедемъёслы асьсэлы ик асьсэды утён сярысь сюлмаськоно луиз. Соос бандитэз шедьтыны но, кырмыны но быгатӥзы. Оло, быдтӥз но бандитэз Коновалов, ассэ но семьязэ утьыны мукет амал но кужым адӟытэк? Мукет валэктон шуг шедьтыны. Пересьёс верамъя, азьвыл гуртъёсын йыртэмасьёсын сьӧсьяськисьёсын властьёслэсь нюръяськемзэс туж ик уг витё вылэм. Асьсэ кужымен гинэ визьмало вылэм гурт улонэз пожасьёсты. Мар бен, вашкала улонэ берытскиськом. Г. Коряков. * Гуртъёслэн но адямиослэн нимъёссы воштыса гожтэмын. И. М. ДАНИЛОВ "Удмуртия" телерадиокомпания, Удмуртиысь Писательёслэн огазеяськонзы мур куректыса иворто: 13-тӥ мае сюлэмыз жугиськемысь дугдӥз тодмо удмурт журналистлэн, писательлэн Иван Михайлович Даниловлэн. И. М. Даниловлэн выжыосыз Можга ёросысь Чужьем гуртысь, нош вордскиз со Тюмень улосын. Ижысь машина лэсьтон заводын ужамен огдыре дышетскиз ӝыт ужась школаын, собере тодон-валанъёс басьтӥз Белоруссиысь театрально-художественной институтын. Иван Михайлович кема аръёссэ режиссёр луыса ужаз - нырысь Удмурт драмтеатрын, отӥяз Удмурт телевидениын. Сое весь бордаз возиз театр удыс, гожъяськон. Удмурт но, ӟуч но кылын гожъяз нылпиослы, озьы ик мӧйыослы пьесаос, выжыкылъёс. Пӧртэм аръёсы потӥзы "Ватос утчасьёс", "Отзовись, родник", "Дышетӥсь", "Купанча шаер" но "Мельник Аким, Сергей и ведьма Куака" книгаосыз. Иван Михайлович 5-тӥ мае гинэ тырмытӥз вал ай 69 арессэ. Толон сое берпум сюрес вылэ келямы. Ас геройёсызлэн кадь кескич пыр учкись синъёссэ, пальпотӥсь тусбуйзэ, лякыт сямзэ, ӟеч ужъёссэ ми ноку ум вунэтэ. Берекет Ваньмон дыръяды ЙЫРТӤЯН Паллянысен буре: 6. Пӧраськон арбери. 7. Гурт тылобурдо. 9. Пу пильылыны юрттӥсь арбери. 10. Бакча сиён. 11. Электрокужым. 13. Беризьлэн "куэз". 14. Крезь ез. 15. Кузь гоно пудо-живот. 17. Толэзь ним. 18. Эстӥськон. 19. Нюлэс. 20. Пыран-потан инты. 22. Государство. 24. Мугор люкет. 25. Лымшор палась пудо-живот. 29. Удмуртиысь потэт, тодосчи. 30. Тыбырысь тыро ошет. 31. Паньтэм. 34. Зӧк модосо ядо турын. 36. Туспуктэм. 38. Ненег будос. 40. Шудонын самой бадӟым карта. 41. Юон. 42. Нюлэскысь писпутэм инты. 44. Гурт пудо-живот. 46. Шеплэн мертчись люкетэз. 47. Шуккиськем инты. 48. Кислоо-кусло. 50. Трос аръем бадӟым, зӧк будос. 51. Киров областьысь Пажма шурлэн притокез. 52. Укно синэз возён арбери. 53. Лымшор пал шаеръёсын улӥсь адями. Вылӥысен улӥе: 1. Чорыг. 2. Гурт пудо-живот. 3. Кеньыр. 4. Воргорон ним. 5. Закон. 6. Тылобурдо. 8. Чорыг. 9. Тылобурдо. 12. Пыдкутчан. 14. Эстӥськем бервыл. 16. Вукоысь арбери. 18. Ӵыжы-выжы. 21. Чорыганэ кутӥськись арбери. 23. Ву вылын уян мар ке. 26. Тодон-валан басьтон инты. 27. Ӵыжы-выжы. 28. Погыртэм писпу. 32. Сю ар. 33. Куак емыш. 35. Дышетскись. 36. Сурон. 37. Ас куэм "басма". 39. Нота. 41. Тылобурдо, пӧйшур кутылон мар ке. 43. Тук. 45. Чугун сюрес вылысь арбери. 46. Нискылан мар ке. 47. Кылбур гожтон амал. 49. Куд-ог пӧйшуръёслэн, тылобурдоослэн "корказы". 51. Государство. Шонер валэктонъёс Паллянысен буре: 6. Таба. 7. Атас. 9. Тул. 10. Редис. 11. Ток. 13. Кур. 14. Си. 15. Як. 17. Май. 18. Пу. 19. Сик. 20. Ӧс. 22. Чили. 24. Ымныр. 25. Ишак. 29. Поздеев.30. Котомка. 31. Адаш. 34. Кекон. 36. Кадр. 38. Уд. 40. Туз. 41. Ву. 42. Куш. 44. Ош. 46. Кы. 47. Яра. 48. Рак. 50. Пипу. 51. Юма. 52. Рама. 53. Араб. Вылӥысен улӥе: 1. Гордсин. 2. Вал. 3. Тари. 4. Вася. 5. Кат. 6. Тур. 8. Сом. 9. Тури. 12. Ката. 14. Су. 16. Кӧ. 18. Пи. 21. Си. 23. Лодка. 26. Школа. 27. Кен. 28. Кор. 32. Даур. 33. Шу. 35. Курсант. 36. Ку. 37. Дэра. 39. До. 41. Вы. 43. Шар. 45. Шпал. 46. Куас. 47. Ямб. 49. Кар. 51. ЮАР. Шӧкыч Паймод но, куалектод но КУНДЭ КУАШКАТОД - КИСЫДЭ ТОРДЫТОД Сыӵе туннэ куд-ог куд-ог адямиослэн ужан амалзы Асфальт сюресъёс вылтӥ "Москвичъёсты", "Запорожецъёсты" питран улын костаськись пуныосты сямен лёганы дась кадь ширто "Хондаос", "Мерседесъёс", "Фордъёс". Кинъёс соосты валто? Эн но вералэ, шуиськоды-а... Бен, шонер валаськоды. Нош кинъёс со городлэн огпал пумысеныз мукетаз, автобусэ яке трамвае пуксьыны кышкаса, пыдын вамышъясь егит таза мугоро адямиос?.. Зэм вераськоды. Таяз учыре но ӧд янгышалэ. Но эн дыртэ таосты жаляны. Куанеръёс, троллейбусын билетлы коньдон шедьтӥсьтэмъёс пӧлы шедемзы понна асьсэос янгыш. Соос но, йырысьтызы кеньырзэс ӧжытак ке но сураны-бугыръяны быгатысалзы ке, кемалась пырысалзы ни рынок шуонлэн ӧраз.Кыӵе ке мерслэн руль сьӧраз пуксьысалзы. Соослэн тодазы уг лыкты, туала узыръёслэн но кутскон сюрессы азьвыл ик пильысэн шщобыртэмын ӧй вал шуыса. Таосыз соку ик валазы: кисыдэ ӝоггес тордытон понна, кутсконо кундэ, калыклэсь ог-огезлы осконзэ куашкатон бордысен. Огъёсыз басьтӥськизы кун ваньбурен асьсэлы коттеджъёс но дачаос пуктон, машинаос басьтон но вузан борды, мукетъёсыз пӧрмизы ужатэк коньдон поттӥсьёслы - рэкетиръёслы, куинетӥосыз луизы завод, фабрика котырез качасьёс... Куд-огез быгатӥз но быгатэ, нырысь учкыса, странамес юнматыны чаклам законъёсты, постановлениосты ас вылаз ужатыны. Приватизация шуонэн ик тани кӧняез ни зарнияськыны вуиз. Кыдёке ветлонэз ӧвӧл. Кызьы тодмо луиз, сьӧд ужъёслэсь уг палэнскы вылэм Удмурт Республикаысь Асваньбуръя кун комитет но. Кивалтэ соин господин Касихин С. П. Алигес татын кызьы но ма ужамзэс сэрттӥз-пертчиз УР-ысь Кун Кенешлэн Эскеронъя палатаез. Шараяськиз куалектымон югдур. Асваньбуръя комитетын приватизация чотын вуэм коньдонэз ас тодэмзыя уже куто, мукет сямен вераса, меӵак асьсэлэнэн лыдъяло. Соинтэк-а Касихин асьсэ ужасьёссылы, валамон ни, уг обидьы ассэ но, пигоныз вырӟытэк премиос тыре "...розничной дунъёсты будэтэмен валче", "...Удмурт Республикаын асваньбурен кивалтонэз ӟеч радъям", "...огъя российской аукционъёс ортчытэм" но трос мукетыз понна. Озьы, калыклэсь улон-вылонзэ умоятыны, предприятиослэсь ужзэс улӟытыны чакласа, приватизация чотын поттэм коньдон ӧръяське кӧня ке адямиослэн кисыязы. Озьы луиз УР-ысь Правительство, Коньдон ужпумъёсъя министерство вылӥ верам комитетлэсь ма лэсьтэмзэ чылкак эскерымтэен. Ма шуозы меда отын табере, чиданы луонтэм тырмымтэос шараяськем бере. Кызьы адӟиськом, узырмыны сокем ик шуг вылымтэ. Та понна одӥг гинэ курон вань, бамыд суронэн ке ӧвӧл, кышкан-возьытлэсь утись мукет маин ке шобыртэмын мед луоз; туж умой, тон кык яке куинь пол тюрьмаын пукыса йыртэманъя бадӟым школаез ортчемын ке; юн кусып тупатоно вылӥ кивалтӥсьёсын, соослэн кабинетазы ӧсэз пыдын ӵыжыса пырыны мед быгатод; эшъяськоно йыр вандӥсьёсын но мукет со выллем гыжкалъёсын, тонэ соос ӧз ыбе ке, утёзы. Соку тӥ кышкатэк басьтӥськыны быгатоды кунмес куашкатон борды. Кыл кутытӥсь но, юась-верась но уз луы. Та валэктонъёс меӵак вылӥын верам нимын, Инмар мед утёз, герӟаськемын ӧвӧл. Но тросэз туала ужбергатӥсьёс кисы тордытонзэс ӵапак со бордысен кутскизы. Н. ДОЛГОВ. Берекет Тодэмды ке потэ КЫЗЬПУ НО ТУГОКО Вашкалаосмылэн май толэзен олокыӵе но йылолъёссы герӟаськемын вылэм. Соос пӧлысь тужгес пусйымонэз луэ кызьпуэ турын-куарлэсь тугоко керттон. Нылъёс чебер дӥськутъёссэс дӥсяса мыно вылэм нюлэскы. Пумен кырӟаса, пинал кызьпуослэн вайёсазы турын-куарлэсь тугоко керттылӥзы. Озьы, пе, писпулэн будон кужымез музъеме пыӵа, солэсь удалтонлыксэ будэтэ. Артэ будӥсь кык кызьпулэсь йылзэс валче думо, вож капка выллем лэсьто. Нылъёс со ултӥ ваче ки кутскыса пото но ог-огзэс чупало. Та йылолэн нылъёс ог-огзэс яратэмзэс, кусыпъёссылэсь юн луэмзэс возьматыны тыршылӥзы. Вал на эшшо таӵеез но аспӧртэм йылолзы. Шуом, егит пияшлы ныл кельше ке, со нылмуртлэн корказяз льӧмпу вай дэмӟытыса кельтэ. Нылмурт тодытэк-валатэк уз кыльы, кинлэсь со салам, сюлэмызъя ке, одно ик ивор сётоз - асьсэлэн корказь баляссы (перилазы) борды буёло лента ошоз. Л. Яковлева. ЧИДАСЬТЭМ СЮЛЭМ Та нуналъёсы визьмо удмурт воргоронлы Егор Петрович Степановлы 70 арес тырме. Уно аръёс ӵоже со гожъя ни милям газетамы (ӝоген лыдӟись доры вуоз калыкмылэн историезлы сӥзем мур материалэз), мыло-кыдо пыриське удмуртлыкмес ӝутон уже. Степановез юн гажало бӧлякъёсыз - Татарстанысь Кукмор ёросын улӥсьёс. Шуд но тазалык тӥледлы, гажано эшмы! "Удмурт дуннеын" ужасьёс. Туспуктэмез В. КАМАШЕВЛЭН. Бырйы: яке уждун тыр, яке - штраф Правительстволэн Ужъя комитетаз котькуд четверге люкаськылэ уждун дыраз тыронэз эскеронъя кун комиссия. Берлояз заседание ӧтемын вал 228 номеро строительно- монтажной поездысь, Играысь корка лэсьтон заводысь, "Радий" огазеяськонысь но Сарапулысь 1 номеро МСО-ысь кивалтӥсьёс но валтӥсь бухгалтеръёс. Берлоысьтыз организациысь кивалтӥсьёс комиссилэсь куиньзэ ӧтемзэ кылымтэ-адӟымтэ кариллям ини. Ӧз вуэ таяз учыре. Соин ик Ужъя комитетлэн тӧроез С. Фефилов, заседаниез валтӥсь, ӵектӥз "Радиысь" кивалтӥсьёслы 10 пичи уждун мында штраф сётыны. Мукетъёсыз ӧтемъёс шугысь-лекысь капчиен потӥзы, шуыны луоз. СМП-ын куинь толэзь ӵоже 432 сюрс манет тыр уждун ӝегатэмын ини. Сыӵе югдур кылдэмын чугун сюрес лэсьтӥсьёслы ужамзы понна палэнысь организациос но 13 миллион манетлы пунэме кылеменызы: кылсярысь, Воткинскысь машина лэсьтон завод - 3 миллион манетлы. Зэм, "оборонка" берло дыре выльысь лулъяське ини кадь. Тани воткаослы но коньдон висъяллям кадь ини. Озьыен, завод пунэме кылемзэ ӝоген берыктоз. Соин валче поездлэн кивалтӥсез Ф. Валеев люкаськемъёсты оскытӥз, уждун тыронэн бере кылён 1 июлёзь быдтэмын луоз шуыса. Озьы ик кыл кутонозь ӧз вуэ Сарапулысь МСО-лэн кивалтӥсьёсыз но. Татысь лэсьтӥськисьёслы но уждун дыраз уг тыро пунэме кылемъёсын сэрен, шонергес вераса, Сарапул городлэн но районлэн кивалтӥсьёссы сэрен. Соос но кыл сёто матысь дыре пунэмен тыронзэс быдтыны. Озьыен, татысь лэсьтӥськисьёс но уждунзэс ӝоген басьтозы. Паймытӥзы играос, заводысь ваньзэсты вылӥ кивалтӥсьёсты ужысьтызы толлояз мозмытӥллям, бырйиллям выльёссэ. Нош туннэ комиссие лыктӥлям вужъёсыз валтӥсь инженер но бухгалтер. Валамон, соосын вераськонлэсь нокыӵе пайдаез ӧз луысал. - Заседаниосмы котьку ик таӵе вольыт но гань-гань уг ортчо, - валэктэ комиссилэн тӧроезлэн воштӥсез Сергей Фефилов. - Туэ 54 предприятиысь югдурез эскеримы. Куд-ог кивалтӥсьёслэсь кылзэс чурыт юамы, штраф тырытӥмы. Милям правомы вань 100 пичи уждун мындаозь штраф сётыны. Г. Тихонов. Берекет Милям дэмланъёсмы Пияла чылкыт кошкоз Синучконъёсты, шкаф пиялаосты, укно синъёсты миськыны трос дыр но кужым кулэ луэ. Нош ужез валаса радъяськод ке, номыр шугез ӧвӧл. Кырсь пиялаез нырысь ӵушылоно ыж гон ӟустариен. Укно пиялаосты миськыку, куазь тӧло но, пӧсь но медаз луы. Уже кутоно нашатырь спиртэз. Одӥг литр вуэ сое кык сиськон пуньы тыр ватсано. Та суретэн коттоно ӟустариез яке губкаез но ӝог гинэ ӵушылоно пиялаез (рамаосты, янакъёсты) но соку ик небыт ӟустариен яке газетэн кӧсатоно. Озьы ик лэсьтоно укно синъёслэсь мукет палзэс но. Асьтэос паймоды, ӧжыт вуэн макем чылкытэсь но чилясесь луозы укно синъёс. Етӥн вӧйды ке вань (суредасьёслэн магазиназы но вузало), эшшо но ӟечгес луоз. Укно синэз кӧс небыт ӟустариен ӵушылэ, собере етӥн вӧен ляб гинэ коттэм пичильтык ӟустари юдэсэн зыраса ортче. Кӧсатэ ыж гон яке басма ӟустариен (бумага салфеткаен). Укно пиялаос туж ке кырсесь, уже кутоно хлор изваскаез. Одӥг литр вуэ со 50 грамм мынэ. Шкафысь пиялаосты, синучконъёсты чылкытатыны умой луоз крахмал суретэн. Одӥг литр вуэ сое ватсано одӥг сиськон пуньы тыр. Л. Васильева. 02 ивортэ "ГОРД АТАС" УРДСКИЗ МОЖГАОС ВЫЛЭ Куазь кӧс но тӧло улэмен йылӥз тылпу потон учыръёслэн лыдзы. Кылем арня вис тужгес "пӧсь" йӧтӥз можгаослы. 14 мае 2 часын уин тылпу пуромиз Бадӟым Уча черкогуртысь вал но кунян вордон гидын. Сутскиз 2 сюрс манет тыр ваньбур. Ярано, отысь пудо-животэз дырыз дыръя поттыса вуизы, но гид тупатъяны-выльдыны луонтэм ӝуаз. Тылпу потӥз шунтӥськон арбериосты чакласькытэк уже кутэм бордысь. Эшшо 3 сюрс манет тыр ваньбур быриз 14 мае 21 часын Пычас посёлокысь школа- интернатын потэм тылпуын. 5-тӥ классын дышетскись пияш эшъёсыныз ӵош шудонъязы син куспын отысь гаражез но вал гидэз сутӥзы. Кыӵе мугъёсъя 14 мае 5 часын ӵукна тылпу пуромиз Можга городысь 33 номеро СПТУ- ысь слесарьёслэн ужан интыязы, али тодмо ӧвӧл на. Таяз учыре сутскемын 1,5 сюрс манет тыр ваньбур. Ыштонъёс трос. Маиныз кельшиз меда Можга ёрос "горд атаслы"? Тылпу потонлэсь ӟеч-ӟеч утиськымтэенызы. Соин ик ми эшшо одӥг пол куриськом: чаклаське! Утиське! "Горд атас" нокинэ уг жаля. Н. ИЛЬИН. Тылпулэсь утиськонъя кун инспекция. Одӥг выжыысь пушъетъёс ШУТЬ НО КОНЁН Гуртмылы, Якшур-Бодья ёросысь Якшурлы, туэ 320 ар тырме. Нырысьсэ переписе шедем 1678-тӥ аре, Шаркан селоен огарлыдо луэм. Якшурлэн юбилеезлы дасяськыса, отысь вашкала выжыосты утчано кариськи. Туж тунсыко уж вылэм. Тани одӥгзэ выжыез Конёнъёс шуо. Фамилизыя ваньзы Широбоковъёс, соин азьланяз гожтоно геройёсме нимын-тулын гинэ верало. Малы Конёнъёс? Конон ним бордысь, дыр, малпай вал... Та выжысь одӥгез гожтоно муртэ, Геннадий Гаврилович, бӧрысьгес тазьы мадиз. Песятайзы бускеленыз туж эшласько вылэм. Но одӥг пол юон дыръя кылзы ӧвӧл тупам. Максим аслэсьтыз эшсэ усьтэм укноетӥ, чыртытӥз кыскыса, педло поттыны кутскем. - Ты что, шутишь?",- шуэ, пе, Иван. Сое Максим Шуть шуыны кутскем. Нош ачиз, чыртыяз ошыса коньдонэн пуйы нуллэ вылэм. Эшез Максимлы "нош тон - коньдон..." шуыны ӧдъям но "нош тон - конён"... пӧрмем. Озьы гуртамы Шуть но Конён выжыос кылдӥллям. Архивысь шедьтэм документъёсъя Конёнъёслэн выжызы Иван Филимонович но Ксения Васильевна бордысен кутске. Вордӥськем Иван 1826 арын. Кузпалэныз вордӥллям куинь пи: Матвей 1864 арын вордскем, Максим - 1867 арын, Семен - 1871 арын. Матвей Ивановичлэн Васса Спиридоновнаен Павол пизы вордӥськем, но солы кема улыны кылдымтэ. Со сяна пиналъёссы вылымтэ. Максим Иванович Татьяна Федоровнаен куать пинал адӟылӥллям, но пересьмытозь куинез гинэ улӥзы: Гавриил, Василий, Григорий. Но Григорий Максимович, заводын тыл шорын ужаса, синтэм луэм. Максим пелляськыны быгатэ вылэм. Ӵем гинэ кылыны луэ вал: "Конён Максим пелляса бурмытэм". Семен Иванович но Евдокия Ивановна куать пинал вордӥллям. Гавриил Максимович но пиналъёсыз Якшурын сое Конён Гавирло шуо вал. 1908-тӥ арын кузпалъяськем Чекерысь Евдокия Ермолаевнаен. Тазэ шуылӥзы Конён Чекер. Каньыл сямо, лякыт вал со, пиналъёссэ, кенъёссэ яратылӥз. Кыкназы ик - крестьянъёс, колхозын ужаны вуизы на. Укмыс кузя пиналзы вылэм. Соос пӧлысь Михаил, Савелий, Геннадий, Владимир -тодмо адямиос. Михаил Гаврилович колхозын бухгалтер но бригадир луыса ужалляз, гуртысьтымы лавкаын вузкарись но вал. Кузпалэныз Наталия Харитоновнаен сизьым нылпи будэтӥзы. Ваньмыз пиналъёссы умоесь. Михаил Гаврилович соос азе юнэсь куронъёс пуктылӥз. Наталия Харитоновна сярысь нимысьтыз вераме потэ. Инкуазь солы бадӟым быгатонлык сётэм. Олокызьы озьы туж быгатыса, валаса будэтӥз сомында пиналъёссэ. Каньыл куараен гинэ вералоз, валэктоз, косоз. Римми, Жени, Фаи шуыса гинэ вазьылоз шоразы. - Вань-а мамадылэн лекъяськемез? - юай огпол Риммалэсь. Ӧвӧл, шуэ, чарс ваземез гинэ, пе, вань. Азьло дыръя, ай витьтоно ар талэсь азьло гинэ, котьма быдӟа семья мед луоз, одӥг бадӟым тусьтыысь сисько вал. Нош Наталия Харитоновна соку но котькуд пиналэзлы нимысьтыз тусьтыен сиён сётэ вылэм. Со сярысь асьме гуртысь ик одӥг мурт туж данъяськыса вераз. Сыӵе аръёсы ик, пе, пиналъёссэ ӝӧк сьӧрын "культурно" пукыны дышетэм ини. Сыӵе лулчеберлыкез валамез шоры, пе, паймыса учки. Озьы тӥни ӝикыт, чылкыт улыны дышизы пиналъёссы. Наталия Харитоновна дӥсяз-кутчаз но соосты ас киыныз: вуриськиз, керттӥськиз. Али но тэк улонэз уг тоды ай, кияз ялан ужез вань. Муртъёс но дораз мыно вал, дӥсь вурыны курыса. Вурылӥз. Будӥзы но нылъёсыз асьсэос вуриськыны, керттӥськыны дышизы. Ньылез пиналзы вылӥ тодон-валан басьтӥз. Нырысь ик Римма Пермьысь университетын математикая факультетэз йылпумъяз. Собере ачиз Степанлы, Тамаралы, Риталы дышетскыны юрттӥз, мамаезлы-тятяезлы, дышетэмзы понна тау карыса, озьы пунэмзэ берыктӥз. Римма Михайловна вань ужан аръёссэ Ижысь механической институтын дышетӥз. Женяен Феликс ас гуртазы уло, колхозын ужало. Фаялэн кузпалэз офицер бере, солы дуннеез тросгес котыръяны кылдӥз. Рита семьяеныз Котельничиын улэ, отчы ыстӥзы институт бере. Тамара семьяеныз - Ягулын. Михаил Гавриловичлэн но Наталия Харитоновналэн али дас тямыс кузя внуксы вань ини. Гавриил Максимовичлэсь пиналъёссэ мон математикъёс шуисько. Зэмзэ но, Михаил Гавриловичлэн ужъёсыз лыдъяськонэн герӟаськемын вал. Солэн нылъёсыз но Степан пиез институтъёсысь математикаен герӟаськем факультетъёсын дышетскизы. Савелий Гаврилович математикаен дышетӥсь вал (роноен но кивалтӥз). Туж жаль, улонысь вазь кошкиз сыӵе визьмо адями. Геннадий Гаврилович но Владимир Гаврилович пичиысен колхозын ужазы. Геннадийлэн кузпалэныз Ольга Ивановнаен вить кузя пиналъёссы вордӥськизы. Аля улэ но ужа Ижевскын, кык пиналзы вань. Катя но городын, кык пизы будэ. Ирина - Якшур клубысь методист. Таосызлэн но кык кивоштӥсьсы вань ини. Витя - гуртысь электрик. Иван егитысен улонысь кошкиз. Владимирлэн куинь кузя пиналыз, укмыс внукез. Надя - бухгалтер, Катя - медсестра, Валентин колхозын ужа. Надялэн Оксанаез ужа но дышетске Ижевскысь огаз университетын, Катялэн Ленаез - технической университетын. Валентинлэн Варяез Ижысь усточиослэн школа-интернатазы крезьчи луыны дасяське. Мукетъёсыз школаын дышетско. Василий Максимович но пиналъёсыз Гуртамы сое Конён Мико шуо вал: мунчо нимыз, пе, озьы вал. Та дырозь Николай ик кожаса улӥськиз. Трос вераськись ӧй вал, но семья пушказ серекъяськись вылэм. Гуртамы кӧня ке вузкарисьын ужаз, колхозын бригадир вал, тэльын ужаз, аэродром лэсьтыны но вуылэм, бусыостӥ кизён кудыен но ичи ӧвӧл ортчем. Василий Максимович 1913 аре Ӵошкытысь Мария Ивановнаен кузпалъяськем. Конён Ӵошкыт ним сётӥллям солы якшуръёс. Вордскем куать пиналзы пӧлысь ньылез тодмоесь, но Игнат (Иннакей) войнаын быриз. Петр Васильевич но оже ветлӥз. Шудэз вылэм - гуртаз берытскыны удалтӥз. Елена Прокопьевнаен куать пинал будэтӥзы. Ваньмыз ужаны сюлмоесь. Галина Петровна секретарь-машинистка луыса кӧня ке роноын ужаз. Тэк пуконэз уг тодылы вал. Кӧнялы ке вис луэ ке, уж куре ини. Самой пичиез Алексей пизы инженерозь дышетскиз но ас гуртаз ужа. Вань пиналъёссы ас семьяосынызы уло, нылпиоссы будо. Петр Васильевичлэн Елена Прокопьевнаен дас куать внуксы но одӥг правнучказы вань ини. Мария Васильевна Чеки Степанлы бызиз. Степан Семеновичен одӥг пизы вордскыны вуиз, егит кузпалъёсты война висъяз, люкиз пырак азелы. Степанлы фронтысь берлань вуыны ӧз кылды ни. Марья вань улонзэ огназ ортчытӥз но Петя пизэ будэтӥз. Ой, бен яратэ, уте ук вал, нимыныз вазьылэмез но вань меда шораз: нуныясь, небыт куараен пие шуыса гинэ вераллямзэ кылэме вань. Петя тятязэ фотоосызъя гинэ тодэ на. Бӧрысьгес Мария Васильевна Лида нылзэ будэтӥз на. Елизавета Васильевна кык ныл будэтӥз. Табере кыксылэн ик семьяоссы вань ини. Татьяна Владимировна мумиз бордын улэ, нылпи садын завхоз луыса ужа. Кузпалэныз бадӟымос туж чебер корка лэсьтӥзы. Вань юртъерзэс выльдӥллям, шыкыс кадь азбарзы чылкыт, ӝикыт утялтэмын. Ай Таня ачиз ныл кадь егит на, нош будо ини нылызлэн но пиезлэн пичиоссы. Алёна университетын удмурт но ӟуч кылъёсъя дышетӥсе дышетске. Наташа туэ 10-тӥ классэ ветлэ. Таиз но визьмо, сэзь будэ. Олимпиадаосы ветлэ. Тани туэ "Чеберина" конкурсэ пыриськиз. Туж умой адскиз, но жюриысь кинлы ке ӧвӧл ярам, финалэ ӧз пот. Валентина Владимировна Игра ёросын улэ, таиз но песянай луэм. Озьы Лиза мамазэс прабабушка каризы ини. Семен Иванович но пиналъёсыз Семен Иванович солдат вылэм. 23 аресаз кузпалъяськем Дарья Петровнаен, куать пиналзы вордскем. Нылъёссы бызизы, вылды, Алексей но Степан пиоссы мӧйымытозь улӥзы, семья кылдытӥзы. Степан вордскем 1892 арын. 1915 арын кузпалъяськем Анастасия Поликарповнаен. Туж капчи мылкыдо вылэм та кышномурт, тужгес но яратылэм пиналъёсты исаны. Та кузпалъёслэн ньыль пиналзы пӧлысь одӥгез сяна ӧвӧл кылем. Александр Степанович 1923 арын вордскем. Степан Семенович вазь кулэмен, Анастасия Поликарповна Кенеровае бызем. Ожысь бертыса, Александр Степанович но отчы кошкем. Кошкиз ке но, Якшурысь яратоно нылыныз Татьяна Григорьевнаен ик кузпалъяськиз. Апае верамъя, Таня но сое туж яратыса витем армиысь вуэмзэ. Кыксы ик дышетӥсьёс. Александр Степанович трос аръёс ӵоже сельсоветлэн тӧроез вал, колхозлэн председателез но луылӥз. Татьяна Григорьевна вань аръёссэ Кенеровай школаын дышетӥз. Вить пи будэтӥзы кузпалъёс. Семен Ивановичлэн Алексей пиез 1900 арын вордскем. Конён Олексей 1919 арын Евдокия Ивановнаен кузпалъяськиллям. Но кузпалъёслэн нылпизы ӧвӧл вылэм. Мурт нылпиез будэтыны шуд усем. Веразэс вордӥзы, будэтӥзы. Чебер, каньыл мылкыдо вал Верка. Яратӥсько вал соин огазьын каникулъёсы ужаны. Котькуд учырлы мар ке но серемессэ веран шедьтэ, туж вазиськись. Верка Мушкие бызиз, куинь пинал будэтӥзы. Табере соос асьсэос пинал утё ини. Я бен, кӧня пушъетъёсыз луизы ай Иван Филимоновичлэн но Ксения Васильевналэн? Куинь кузя пизы, дас кык внуксы, дас укмыс правнуксы, куамын куать праправнуксы. Прапраправнукъёссэс лыдъяны но уг шедьты ваньзэс, но куатьтон куинез шедизы ик. Вань ни табере ньыль полэс правнукъёссы. Шедемъёсыз люкаськизы 133 мурт. Озьы та бадӟым семья (писпу) будӥз 172 ар ӵоже. В. ШИРОБОКОВА, Якшур-Бодья ёросысь Якшур гуртын вордскем но будэм мурт, дышетӥсь. Национальной библиотекалы - 80 Люка, маде, ивортэ... Удмурт шаерысьтымы Национальной библиотека кылдӥз 1918-тӥ арын 15 мае, Ижысь кык библиотекаез огазеяса. Огез нимаське вал Нагорной (кылдытэмын 1899-тӥ арын), мукетыз - Заречной (кылдытэмын 1901-тӥ арын). Библиотека ужаз рабочийёс понна. 1936-тӥ арын со луиз шаермылэн библиотекаез. Сётэмын вал быдӟым ӟуч кылбурчилэн А. С. Пушкинлэн нимыз. Нош 1958-тӥ арын - В. И. Ленинлэн нимыз. 1963-тӥ арын библиотека луиз научной. 1989-тӥ арын - Национальной (Россия Федерациын - нырысетӥез). Туннэ со луэ иворъёс вӧлмытӥсь, наукалы, ваче кусыпъёс возьыны юрттӥсь одӥгез туж кулэ ёз. Национальной библиотекалэн фондэз 1. 300 000-лэсь ятыр. Отчы пыро ӟуч, удмурт, финн, мадьяр, эстон, англи, немец, француз но мукет кылъёсын книгаос, газетъёс, журналъёс, кинофотофонодокументъёс, плакатъёс, открыткаос, картаос, нотаос но мукет изданиос. Библиотекалэн лыдӟисьёсыз 25 000-лэсь трос. Нуналлы быдэ ветлӥсьёслэн лыдзы - ог 900 пала. Библиотекалэн тужгес шер пумиськылӥсь люкетэз вань. Со нимаське шаермес тодонъя- эскеронъя но финн-угор литератураосъя отдел. Сое Удмурт Элькунысь вашкала гожъямъёслэн синпель юртсы но шуыны луоз. Малы ке шуоно татчы люкасько шаермес тодонлы, эскеронлы сӥзем но национальной изданиос. Ваньмыз сямен соос печатласько асьме республикаын. Отделлэн фондэзлэн лыдыз - ог 50 000. Библиотекаръёс сюлмаськыса но данъяськыса утё революцилэсь азьвыл потэм изданиосты, 20-тӥ - 30-тӥ аръёсы печатлам книгаосты но мукет ужъёсты. Соос пӧлын - "Ватка губерниысь арнуналъёс (календарьёс) но синпельлы кельтэм книгаос", 1860-тӥ арысен кутскыса потӥсь книгаос, Г. Е. Верещагинлэн, Н. Г. Первухинлэн, И. С. Михеевлэн, Куӟебай Гердлэн, Ашальчи Окилэн улэп дыръязы печатласькем ужъёссы. Данъяськиськомы тодмо кылчиосмылэн В. И. Алатыревлэн, И. В. Таракановлэн, А. А. Поздеевалэн люкам дано иворъёсынызы. Тунсыко рукописьёсын фонд. Отчы пыро Удмуртиысь крезьгурчиослэн нотаосын текстъёссы, тодмо адямиослэн тодэваёнъёссы, азьмынӥсь тодосчиосмылэн печатламтэ научной ужъёссы, диссертациоссы но мукетъёсыз. Вис карытэк потӥсь изданиосын фондэ люкамын шаерысьтымы вань газетъёс но журналъёс Тужгес вужез, "Войнаысь ивор", потэмын 1917-тӥ арын. Туннэ отделэ вуо 15 пумо пӧртэм журналъёс, Ижын но вань ёросъёсамы печатласькись газетъёс. Ӧжыт ӧвӧл ини финн-угор литературамы. Со юрттэ лыдӟисьёсмылэсь выжы кумыосмы сярысь тодон-валанзэс будэтыны. Нош дышетскон книгаос юртто финн-угор кылъёсын но тодматскыны. Библиотекалэн отделъёсыз пӧлысь одӥгез валтӥсез луэ национальной библиографияя отдел. Татын ужасьёс дасяло пӧртэм указательёс. Соос пӧлын тодмоосызгес - "Удмурт Республикаысь печатьлы летопись, календарь", "Шаерысьтымы тодмо нуналъёс, лыдпусъёс" (соос арлы быдэ пото). Выльёсыз пӧлын таӵеосыз: "Куӟебай Герд", "Ашальчи Оки", "Мултан уж", "Удмурт шаерысь библиографилы сӥзем ужъёсын тодматӥсь". Туннэ милемлы бадӟым юрттэт сёто компьютеръёс. Кылдо ивор сётӥсь выль ёзъёс. Та уж борды нырысетӥен кутскизы национальной библиографияя отделысь ужасьёс. Соос пӧлын - отделлэн кивалтӥсез Л. И. Егорова но летописез дасясь Л. И. Фролова. Соослэн чупрес тыршеменызы валче, национальной но шаермес тодонлы но эскеронлы сӥзем фонд пыртэмын ни электронной каталоге. Со юрттэ озьы ик Интернет пыр мукет кунъёсысь библиотекаослэсь иворъёс басьтыны. Н. Лимонова, Национальной библиотекаысь шаермес тодонъя-эскеронъя но финн-угор литератураосъя отделлэн кивалтӥсез. Туспуктэмъёсыз В. Камашевлэн. Война аръёсы гожъям дневникысь Меӵак кожонъёс Кузь-а, вакчи-а адямилэн улон сюресэз, со ӵем дыръя азьвыл чаклам ӧретӥ уг мыны. Солэсь но ортчыт, куд-ог вакытэ, со меӵак мукет пала коже. Кыӵе ке кужым адямиез нуэ олокытчы, солы пумитъяськыны кынар уг тырмы. "Адӟонэз сыӵе, дуоз", - шуо улоназ меӵак кожонъёсы шедем адями сярысь. Сыӵе меӵак кожонъёс вуо шӧдтэк-шорысь, музъем зуркан сямен. Одӥгез со - война. Ӵапак со миллионъёсын адямиослэсь улон сюрессэс чутрак воштӥз, азьпаллы малпанъёссэс сураз-тугаз. Трос сыӵе кожонъёс, "адӟонъёс" вал мынам улон сюрес вылам но. Малпаськод озьы, нош кыӵе ке палэнысь кужым, тынад "адӟонэд", улондэ берыкто мукет пала. 1. Нырысез кожон Я, дышетскон аръёс ортчизы, табере - уж борды. Сыӵе малпанэн ми, Можга педучилищеез йылпумъямъёс, 1941 арын 22 июне вазь ӵукна бертӥськом шулдыръяськон ӝытысь. Дышетӥсьёсмы сӥзизы выль интыосын милемлы бадӟымесь азинсконъёс. Милям малпанъёсмы нош лобо школаосы, нылпиос доры. Тӥни озьы лӧптэм мылкыдын общежитиямы бертыкумы, ез юбо борды юнматэм репродуктор пӧсь вуэн пылатӥз кадь: война! Озьы егит дышетӥсьёслэн соку гинэ мытӥськем улон сюрессы меӵак кожиз мукет пала... Нокин но тодыны-малпаны ӧз быгаты соку: кинлэн кыӵе адӟонъёсыз луозы азьпалан. Тросэз малпам эшъёсы толэзь-кык отрчыса ик басьтэмын вал ни армие. Школаын одӥг нунал но дышетыны ӧз вутты одӥг парта сьӧрын пукем эше Вася Никитин но. Монэ кыӵе ке муген "жалязы" на. Дышетскон арез мытӥ Пичи Пурга районысь Улын Юри школаын. Арня-кык ортчыса, пиосмурт дышетӥсьёс пӧлысь школае ми директорен кыкнамы гинэ кылимы. Одӥгаз шутэтскон нуналэ, 5 октябре 1941 арын, директормы Луковников монэ сьӧраз ӧтиз ӵӧжаны. Мынонэз кыдёкын ӧй вал: гурт сьӧретӥ бызись Юри шур вылын луд ӵӧжъёс соку трос гинэ уяллязы. Нуназеозь ми кык ӵӧжъёсын берытскыны вуимы ини. Мон соку улӥсько вал асьме гуртысь кышномурт дорын патерын. Кунокуа кышномуртэ ӵап кошкиз Ижевске, армие басьтэм картэз доры. Директорен вераським мон дорын ик ӵӧжъёсмес пӧзьтыны. Юрттӥськыны со ӧтиз школаысь техничкамес, нош мыным шуиз: "Ма, ӵӧжъёс кӧс азетӥ уг уяло но...". Мон соку ик валатски, гурт пумысь магазинэ кошки. Одӥг бутылка вина басьтыса тубисько школа пала. - Михайлов, кытчы ветлӥд? Пыр али, ивор вань, - кеськись луиз сельсоветлэн усьтэм укноысьтыз. Мон пыри. Сельсоветлэн секретарез бумага мыче. - Тани тыныд повестка вань. Уин 12 часэ Можгалась военкоматын луоно ини. Мон кызьы потэмме но ӧй вала. Бизьыса сямен вуи дорам. Бумагаме возьматӥсько директорлы. Солэн но мылкыдыз сӥялскиз, лэся. - Война... Со нокинэ палэнэ уг кельты. Мон ӵӧж пӧземез возьмаса ӧй улы ни. Мыным ӟеч сюрес сӥзьыса, директор быдэн рюмка лэзиз. Собере кисыысьтыз сю манет поттӥз. - Уждун но басьтыса ӧм вуттэ. Тани тыныд аванс. Кылемзэ сузэредлы сётом. Сузэре соку школаын ик техничкаын ужаз вал, шутэтскон нуналлы гуртэ бертыса вуттӥз. Мон кулэ котырме усьтыр-табыр тыри но бертыны потӥ. Выль Моньяозь ньыль иськем, дыртоно. Юри сьӧры гинэ потыса вуттӥ, зорыны кутскиз. Быдэс сюресме жаль зор ултӥ бертӥ. Анай-атае паймизы. Сузэрелы верай, таяз шутэтскон нуналэ уг бертылы шуыса. - Армие кошкисько, - шуи мон вакчияк гинэ. - Уйшорозь Можгала вутсконо. Анае куалектэменыз мар борды кутскыны ик уг тоды ни. Сузэре солы юрттэ сюрес вылэ мар но со тырыны. Ачим бускельёсы доры ӝыны черык виназэс пунэманы, ӵыжы-выжыосмылы ивортыны ветлӥ, атае вал кыткыны кошкиз. Ӝыт пал ми сюрес вылын вал ини. Военкоматын мыным пакет сётӥзы но шуизы: - Эшъёсыд кошкемын ини. Тани тыныд адрес, со часте вуод но та пакетэз сётод. Атае монэ вокзалозь келяз, ӟеч сюрес сӥзиз: - Я, бен, ӟеч ветлы. Агаед, Митя, витетӥ арзэ ини флотын, война ке ӧй луысал, туэ бертысал ни. Табере тани тон кошкиськод. Секыт йӧтоз ни анаеныд милемлы. Синпумъёссэ саесэныз ӵушкылтыса, со гурт пала гонӟыртӥз, нош монэ поезд нуиз Казане. Казаньын ожъёс ӧвӧл ке но, войналэн шокамез шӧдӥське. Тушмон самолётъёслэсь утиськыса, укноос возъямын но кечат-вамат бумага лентаосын лякылэмын. Адямиос но куспазы лушкемен верасько кадь. Ваньмыз кыӵе ке но кышкыт учырез пумитаны дасяськиллям. Нялтас машинаосын мон нунал куспын вуи аслам частям. Кузовысь васькыса, каллен гинэ вамышъясько азьпалан адскись юртъеръёс пала. Кыр интыын солдатъёс строен ветлыны дышетско. Одӥгезлэн вамышъямез туж тодмо потӥз. "Неужто со?" - малпасько поннам. Озьы ик вань. Матазыгес вуи но валай: Никитин ик вань! Ми ӟыгырским. Озьы Вася Никитинэн нош ик огинэ луим. 2. Кыкетӥез кожан Кема ӧз кылды милемлы ӵош служить карыны. Никитинэз лыжной батальонэ ыстӥзы, нош монэ кӧня ке мукетъёсыныз ӵош берлань гуртамы келяны чаклазы. Сюрес вылэ сиён-юон паёк басьтыса, ми кошкимы станцие. Строе султытыса, старшой лейтенант милемыз эшшо огпол нимын-тулын эскериз на. - Келяськом тӥледыз асьтэ военкоматъёсы, - шуиз со. - Соос тодозы ни, мар кароно тӥледын: дорады лэзёзы яке мукет частьёсы. Со виын старшой лейтенантэз ӧтизы телефон доры. Ми витиськом. Ог дас вить минут ортчыса, со берлань вуиз но вазиськиз. - Кылзэлэ сак! Кинлэн средней образованиез вань, одӥг вамышлы азьпала потэ! Огез, кыкез, куинез... Мон но потӥ. Трос гинэ люкаськизы сыӵеос. - Тӥ мыноды 42-тӥ запасной учебной дивизионэ, - шуиз со милемлы. - Али поездэн келялом Суслонгер станцие. Со Марийской республикаын. Отынгес ик интыяськемын дивизион но. Озьы милям сюресмы мукет пала кожиз, таяз учыре - Суслонгере. Отысен кык иськем пыдын мынӥмы на. Кыкна ласянь нюлэсэн котыртэм кыралын барак выллем кӧня ке коркаос адско. Милемлы валэктӥзы: артиллерийской учебной дивизионын кык толэзь дышетозы но фронтэ келялозы. Котькуд учебной взвод аслыз землянка лэсьтыны кулэ. Ми Суслонгер станциысь коръёс нуллӥмы пельпум выламы. Кык иськемысь! Куазь кезьыт, вылаз ик, ялан зоре. Зор улын ик сиськиськом. Котёлокысь шыдэз омыръяса быдтоно ӧвӧл, ялан зор вуэн ватсаське. Озьы но сиён уг тырмы. Лумбыт кырын занятиос дыръя кынмиськод, кӧт ялан сюма, пыдъёс но уй ӵоже шунаса уг вутто. Уката урод луиз куазь кынтэм бере. Политинформация сяна, занятиос озьы ик кырын луыло. Нош милям тактикамы дышетскон дыръёсмы кытӥяз ортчыло палэнын, ог дас-кызь иськемъёсы вал вылын мыноно. Машинаос угось фронтлы но уг тырмо. Соин ик фронт мышкын соосты вошто валъёс. Озьы кезьытэн пыдъёс ботинкаосын валче энер лёгетъёс борды лякисько кадь. Ӵем дыръя бамез, киез но пыдэз кынтылон учыръёс луизы. Соку ини жалямзэс эн возьма. Монэн таӵе учыр луиз. Одӥг уе монэ ыстӥзы вал гидэ дневальное. Валъёсты сюдэм- люктам но возьмам сяна, гидысь кыедэз но утялтоно. Нош кырын 51 градус кезьыт! Киосын куинь чиньыё кезьыт пӧзьёс, пыдъёсын - ботинкаос, вылэ дӥсямын бушлат, йыре изьямын шлем. Уйбыт сямен лопаткаен но мажесэн ужаса но мон кыксэ но киосме кынтӥ. Лымыен зыраса ӧз юртты. Амалтэк мыноно луиз медпунктэ. Татын кутскизы эмъяны. Со виын шӧдэк шорысь пыриз дивизионлэн командирез. "Мар луиз?" - юа фельдшерлэсь. "Киоссэ кынтэм", - шуэ соиз. "Эмъям беразы 10 суткалы гауптвахтае!" - кеськиз, мон пала берытскыса. Медпунктысь потэм бере мон взводлэн командирезлы верай со сярысь. Но кызьы ке ортчиз, гауптвахтае ӧз пуктэ. Со понна политзанятие дыръя монэ олокӧня пол пыкылӥзы киосме "оло, юромо" кынтэме понна. Зэм, вал сыӵе учыръёс. Куд-огез, тужгес но Средней Азиысь вуэмъёс, фронтэ медаз келялэ шуыса, асьсэды юромо сӧсыртыло вал: я лэсьтӥськыкузы кизэс ӵогыны шедьто, я, мае ке юыса, кӧтпушсэс сӧро. Куд-огез со понна военной трибуналэ но сюрылӥзы. Дышетскимы ми декабрь шорозь. Милемлы сётӥзы младшой сержант ним. Сётӥмы военной присяга. Собере егит командиръёсты люкылӥзы маршевой батареяосы. Татын милемлы асьмелы дышетоно луиз ини выль басьтэм солдатъёсты. Нош ӝытъёсы, кортгур котыре пуксьыса, тэйёсмес пыжылӥмы. Вукылэс потымон акыльтӥз сыӵе служба. Ку-о ини фронтэ келялозы? Татын номырлы ӝожтӥськыны уг луы, соку ик шуо: "Фронтын уката секыт". 3. Куинетӥез кожон Зэм, улон сюреслэн таиз кожонэз витьымтэ шорысь ӧй вал. Со сярысь тросэз малпаса улӥзы. 1942 арын 15 январе милемыз строе султытӥзы. Укмыстон муртэ, пе, келяны кулэ алигес гинэ ожысь потэм артиллерийской полке. Кинлэн аслаз мылкыдыз вань, одӥг вамышлы азьпала потэ. Ми артэ сылӥськом одӥг эшеным, москвичен. Кезьыт тӧл ымнырез чепылля. "Ойдо, - шуисько, - потом, татын номыр ӟечез ӧвӧл". "Таӵе кезьытэн, - шуэ, - фронтын бырод". Мон одӥг вамыш азьпала потӥ, нош со интыяз ик кылиз. Укмыстон мурт, ас мылкыд каремзыя фронтэ куриськыса, азьпала вамыштӥзы. Озьы ми потӥм сюрес вылэ. Сиён-юон басьтоды, пе, Казаньын. Поезд туж каллен мынэ, нош сием потэ ини. Ӵукаезяз кыӵе ке станцие дугдӥм. Казанёзь кыдёкын на. Вагонэ ческыт нянь зын вуиз. Укное кечырским. Оло, пе, сиён ваё ини. Кин ке тодэм, линия сьӧрын нянь пыжон завод, пе, вань. Ми куинь кузя отчы бызим. Отын ужась кышномуртъёс одӥг колды сяна сётыны ӧз дӥсьтэ. Нош кинлы гинэ сое люкод? Ортчимы Казанез уин. Нокыӵе сиён-юон ваись но, сётӥсь но ӧз луы. Кӧт, кызьы шуо, сюрлы борды бурмиз ини. Тани Муроме но вуим. Келясь командирмы, кӧня ке муртэ басьтыса, сиёнлы кошкиз. Ми чидатэк витиськом. Ог кык час ортчыса, соос тыр мешокъёсын вуизы. Вагонъёсын огыр-бугыр луиз. Люкылӥзы быдэн ньыль юдэс сукари но кӧня ке кусок сакыр. Я, бен, кулэмлэсь утем ини со. Котёлокъёсын быректэм ву вайыса, пуксимы сиськыны. "Сиёндэс куинь-ньыль поллы люкылэ, - индылэ командирмы. - Интыямы вуытозь, сиён ум басьтэ ни. Собере, кема сютэм улыса, шуак трос сиыны уг яра". Нош поезд туж каллен мынэ. Сое азьпалтыса кошко фронтэ дыртӥсь военной эшелонъёс. Соосты дугдытытэк ӝог келяло. Куинетӥ суткаяз ми вуимы Ярославль городэ. Вагонысь васькыса адӟисько: одӥг ларёкын нянен вузкаро. Нош милям коньдонмы ӧвӧл. Суслонгерын дыръямы мон гуртысь быдэс пуйы тамакен посылка басьтӥ вал. Тӥни сое вокзалын пукисьёслы одӥг спичка коробказэ вить манетэн вузай но, кык колды нянь басьтӥ. Сое тужгес лябӟем эшъёсылы сётӥ, ачим но кӧтме тыри. Табере интыямы вуытозь чидало ини. Ӵуказеяз вуимы Ростов городэ. Неро ты дуре пуксем та чебер город ЪИИ-ЪВ дауръёсы вал со дыре кужмо Ростовской княжестволэн центрез. Соин ик татын трос исторической памятникъёс, музей-заповедник, Кремль, успенской собор, черкъёс но монастырьёс. Но милемлы городэн пыр-поч тодматскыны дыр ӧй вал. Ожысь потыса, татчы шутэтскыны но выль кужым люканы интыяськем 768 номеро артиллерийской полклы ӝоген нош ик ожмаськыны кошконо. Тӥни та полкын монэ юнматӥзы орудилы командире. Тодматскисько расчётэным. Куинез - азьвылъёсыз, ож пыр потэмъёс, гадь вылъёсазы пишто орденъёс: Горд Знамя, Горд Кизили, "За отвагу" медаль. Куинез - выльёсыз. Ваньзы сямен арлыдоос. Мон гинэ - дас тямыс аресъем пияш. Сизьым мурт пӧлын - быдэс интернационал: кык ӟучъёс, украинец, таджик, башкир, бигер но удмурт. Мон туж сюлэмшугъяськи, кызьы тыл пыртӥ потэмъёсыз мынэсьтым кылзӥськозы шуыса. Но соос расчётын самой оскымонъёсыз, визь-нод сётӥсьёсыз вал. Соос юрттэмен ик милям расчётмы кык толэзь пала дышетскытозямы полкын азьмынӥсез луиз. Москваын мунчое пырыса, выль дӥськут, пыӵалтӥрлык, 76 миллиметръем пушкаос басьтыса, ми кошкимы фронтэ. Со вакытэ асьме войскоос фашистъёсты Москва дорысь улляса кыдёке чигнатӥзы вал ини. Милям полкмы пыриз 3-тӥ армие но нырысь ик интыяськиз Угра шур дуре, Калугалы ог кызь иськеме. Татӥ соку ортче вал асьмелэн оборонительной линия. Сиён-юонэн азьло кадь ик секыт. Калугае ыстэм машинаос, куазь жобаськемен, отчы арня пала ветлӥзы. Сиён утчаны мынӥм Петровка гуртэ. Пичи пиналъёс ураме йӧ гурезь лэсьтӥллям но, кынмем немецлэн шӧй мугорыз вылэ пуксьыса нискылало. Одӥг коркась пересь воргоронэз шедьтӥм. Со вераз, гурт пумын, пе, картофка бусы вал, оло, отысь мар ке шедьтоды. Зэм, ог ведра мында кынмем картофка бичам. Солэсь кӧмечъёс пыжыса, сылалтэк но мар гинэ сиим. Озьы тӥни, машинаос берытскытозь, сютэм улоно луиз. Фронт туж матын ке но ӧй вал, снарядъёс но минаос татчы но вуылӥзы. Ми дышетскимы шонер ыбылӥськыны, разведкалэн ивортэмезъя ыбылӥмы немецъёслэн люкаськем интыосазы. Апрель пумын быдэс фронтын асьме войскоос выжизы оборонае. Кулэ вал кужым люканы, выль наступленилы дасяськыны. Соин ӵош ик лыдэ басьтоно тушмонлэсь кужымзэ, малпанъёссэ. Соин ик ми азе пуктэмын вал таӵе ужпум: музъеме мур гудӥськыса, позициосты юнматоно, нокыӵе тушмон кужымъёс тон доретӥ ортчыны медаз быгатэ. Ми уй но нунал гудӥськимы, муресь траншеяос, танкъёслы потыны быгатонтэм пӧртэм инженерной сооружениос лэсьтылӥм. Танкъёсты ыбылыны чаклам пушкаосмес, кутсаськон машинаослэн приводъёссы вылэ пуктылыса, самолётъёсты но ыбылыны луоно каримы. Нош тушмонлэн самолётъёсыз соку трос на вал, йыр йылэтӥ ик лобаллязы. Ми вылэ пӧртэм листовкаос, кышкатон понна трос пасё бекчеосты куяллязы. Соос тон вылэ шимес жиетыса васько, амалтэк окопе ватскиськод. Огпол вуж плуг борды думылыса евреез куштӥзы, тани, пе, тӥледлы колхоз председатель. Немецъёслэн но асьмелэн окопъёсмы вискын бакча емышъёс возён йӧгуос вал. Отчы ми но, соос но емышъёслы ветлӥмы. Тужгес но кельшизы котэм улмоос. Куазь пеймыт луэм бере нюжтӥськыса мынӥськод но ваиськод вал. Огпол милям повармы ӵукна пал мынэм. Куазь ӟардэ вал ини. Кытӥ ке ӧй вал, со вадьсы тушмон самолёт вуиз. Повар я огпала, я мукет пала бызе, самолёт - со сьӧры. Дырын-дырын ыбылэ. Куакъёс пӧлы ватскыны вуэмез бере гинэ самолёт палэнскиз. Озьы нуналлы быдэ сямен тушмонэн ваче ыбылӥськонъёс, разведкае ветлонъёс луылӥзы. 1942 арын 18 июле мыным старшой сержант ним сётӥзы. Полкмы луиз истребительно- противотанковой, выль, 100 миллиметръем пушкаос басьтӥмы. Озьы асьме войскоос выль кужым люказы наступление выжон понна. 4. Ньылетӥез кожон 23 августэ эшъёсы монэ ӟечкылазы 19 арес тырмеменым. Нуназе бере шунды шорын ялкарыса пукиськом. Тӥни соку батареялэн командирезлэн связноез вуиз. Тонэ, пе, старшой лейтенант ӧте. Бызьыса кошки со доры. Расчёттэ, пе, кельты Поповлы, нырысетӥ наводчиклы, ачид мын полклэн штабаз. Отын, шуэ, вералозы марлы ӧтемзэс. Штабозь ог вить иськем луоз. Ӝыт пал отчы вуи. Штаблэн начальникез киям пакет сётӥз. Тонэ, пе, ыстӥськом дышетскыны. Ӵукна 7 часозь вуоно 3-тӥ армилэн штабаз, валэктӥз, кызьы сое шедьтоно. Уйбыт вамышъяй мон кызь иськем пала сюресэз. Тужгес но шимес потылӥз, сутскем гуртъёс пыр ортчыку. Нялтас но, пумитам но мынӥсь-ветлӥсьёс ӧвӧл. Озьы ик вуи штабе огнам. Но отын мукет частьёсысь лыктэмъёс вал ини. Ог дасо мурт. Милемыз султытӥзы строе, нимтулмыя эскеризы кин вань, кин ӧвӧл. Собере одӥгез офицер вазиськиз. - Кин артмастерын ужамын яке пыӵалтӥрлыкез ӟеч тодэ - одӥг вамышлы азьпала потэ! Ньыль мурт потӥз. Мон артмастер ӧй вал бере, интыям ик кыли. Азьпала потэмъёсты келязы Ленинградысь артиллерийно-технической училищее. Кытчы шуоды? Ижевске. Нош милемлы сюрес усиз Уфае, Севастопольысь зенитно-артиллерийской училищее. Озьы ми, куинь арлы чаклам программаез дас толэзьскын ортчыса, зенитчикъёс луимы, младшой лейтенант ним басьтӥмы. Милемыз, егит офицеръёсыз, келязы пӧртэм частьёсы. Ми вить кузя шедимы 37-тӥ зенитно-артиллерийской дивизие. Сое фронтэ келяны дасязы Москва дорысь Красногорск городын. Ми Назаров Васяен одӥг батареяе шедимы, 1404-тӥ полке. Та полкен ӵош мон ож сюресъёсы ортчи, война йылпумъяськытозь, отын ик служить кари на 1947 арын март толэзёзь, татын ик пумитай аслэсьтым яратонме! Ожын луэм учыръёс, эшъёсылэн батыр ужъёссы, вунонтэм пумиськонъёс сярысь мон "Удмурт дуннее" гожъяй ини. Улон сюрес вылын витёнтэм шорысь луэм чутрак кожонъёс, кудъёсыз сярысь мон вылӥын верай, луылӥзы на берло но: армиын но, война бере аръёсы но. Сыӵе кожонъёс-адӟонъёс вискысь нимаз кесэгъёслэсь вуремын кадь котькуд адямилэн улон книгаез. Кыӵе страницаосыз со книгалэн, тросгес - ӟеч ужъёсын узырмытэмъёсыз-а яке тырттэмъёсыз? Со бордын тынад вань улон сюресэдлы дунъет. В. Михайлов, ожысь но ужысь ветеран. МУЗЪЕМЕЗ ЯРАТОД - ЧЕСКЫТ СИЁД Гуртын улӥсьёслэн кысык вакытсы вуиз. Бусыын гуретыны ӧдъязы трактор куараос. Нош кинъёс ужало меда соин? Мон малпамъя, тросэз воргоронъёс механизаторъёсты дышетонъя училищеосты йылпумъямын шуыса. Сыӵе дышетскон интыос шаерамы трос гинэ, нош туннэ нимысьтыз верасал тужгес но мӧйыез дышетскон училище сярысь. Со - Можга городысь 33 номеро СПТУ. Азьвыл аръёсы училищеын тросгес дышетскизы алнашъёс, можгаос но вавожъёс, грахъёс но кизнеръёс. Пӧлазы данак нылъёс но тодон-валан люкаллязы. Уго выльвылъёсты ӝутон аръёсы гуртын воргоронъёс туж ӧжыт кылемын вал. Секыт ужез быдэсъяно луизы нылкышноос. Бӧрысьгес таӵе югдур тупатскиз. Нылкышно трактористъёсты выльысь воргоронъёс воштӥзы. Училищеын дышетскись нылъёслэн лыдзы арысь аре кулэсмиз. Берлоосыз тямыстонэтӥ аре дышетскизы, пе. Та вие училищеын Алнаш но Можга районъёсысь вить сю пала пиос визь-кенеш люкало. Грахысь, Кизнерысь но Сюмсиысь Можга СПТУ-лэн азьвыл филиалъёсаз училищеос усьтӥзы. Можга СПТУ-ез йылпумъямъёс, мукет механизаторъёсын ӵошатыса, котьку сямен висъяськылӥзы ас ужан удыссэс ӟеч тодэменызы. Нокыӵе шугъяськонъёстэк сӧриськем трактор-машинаосыз тупатъяло. Нош умой тодон-валан басьтыны юртто дышетӥсьёссы, тужгес но Василий Михайлович Завалин. - Глазовысь техникумез йылпумъяса, Сарапулэ ужаны ысто вал,- шуэ Василий Михайлович.- Берпуметӥ нуналаз малпанъёсы чутрак воштӥськизы но, Можгалась механизаторъёсты дышетонъя училищее вуи. Кызь арес гинэ вал бере, малы ке туж кышкалляй дышетонлэсь. Юнме вылымтэ со малпанъёсы. Группаысь дышетскисьёс куд-огез аслэсьтым дас - дас вить ареслы бадӟымесь вал. Егит специалистэз шуг-секытъёсты вормыны дышетӥз Михаил Николаевич Шутов. Со ик, дышетӥсьёс висьыны усьыку, соосты воштыны косылӥз. Ялан индылоз вылэм: "Пӧртэм урок нуыны быгатэмед аслыд ик азьланяз кулэ луоз". Дышетӥсезлэн верамез юнме ӧз луы. 1978-тӥ - 1985-тӥ аръёсы Василий Михайлович ужаз директорлэн дышетонъя но ужанъя воштӥсез луыса. - Трактористэ котькин но дышетскыны быгатоз шуыса малпало вал азьло,- шуэ В. М. Завалин.- Соин но, вылды, ми доры ӵемгес лыктылӥзы ляб дышетскисьёс. Куд-ог дыръя соосты школаосысь кужмысь но та училищее ыстылӥзы. Нош берло аръёсы югдур воштӥськиз. Училищеямы шедён понна, пиос бадӟым конкурс пыр потоно луо. Тужгес секыт йӧтэ 9-тӥ классэз йылпумъямъёслы. Ньылетӥ арзэ ини соосты электрике дышетӥськом. Огдыре В, С категориен водительлэсь правозэ но басьто. Арысь аре йылэ "витьлы" гинэ дышетскисьёслэн лыдзы. Шаерамы ортчись олимпиадаосы пыриськыса, Можга СПТУ-ысь пиос химия но математика предметъёсын вылӥ интыосты басьтӥзы. Шумпотымон, тросэз выпускникъёс дышетсконзэс азьланьто Гурт хозяйствоя академиын яке военной училищеосын. Азьвыл аръёсы СПТУ-ын тросгес дышетскизы гуртысь пиос. Городысь пиос конкурсъя капчиенгес дышетскыны пыро. Жаляса верано, тросэз соос быръем профессизыя уж уг шедьто. Гырон-кизён дыръя пиос практикае пото колхоз бусыосы, нош толзэ училище котырысь 5 гектар музъемын нуналлы быдэ "бугыръясько". Чурыт лёгам лымые пиос картофка мерттылӥзы. Ужзэс дунъямзы бере со емышсэс асьсэос ик октылӥзы, выльысь мукетъёсызлы мерттон понна. Озьы нуналлы быдэ. Училищеын 42 ар ӵоже ужатозяз, Василий Михайлович оломае но адӟоно, чидано луылӥз. Коллективын со сярысь гажаса верало: "Азьветлӥсьмы, визь-кенеш сётӥсьмы..." Ӟеч ужъёсыз пусъемын Трудовой Горд Знамя орденэн но трос пӧртэм вылӥ наградаосын. Механизаторъёсты дышетонъя училищеысь воргоронлэн сад-бакчаез но ваньмызлы адӟем карымон. Удалтэ улмо садэз, помидоръёсыз... Музъемез гажамез Василий Михайлович Завалинлы котьку ческыт сиёнэн берытске. В. КУТУЗОВА. * Фермер группаын дышетскисьёс А. ОБУХОВ, П. СОРОКИН но С. ДМИТРИЕВ сак кылзо В. М. ЗАВАЛИНЛЭСЬ валэктэмзэ. * Олимпиадаын вормисе потэмъёс Алексей ОБУХОВ но Андрей КИСЛУХИН. Туспуктэмъёсыз В. КАМАШЕВЛЭН. Чиганъёсыз адӟоды Туэ Ижевскысь Операя но балетъя кун театрын учкисьёс адӟизы ини кык премьера: Д. Пуччинилэсь "Флория Тоска" операзэ но В. Ильинлэсь, В. Лукашовлэсь "Дамских дел мастер" музыкальной комедизэс. Нош тани театрысь артистъёслэн берлоез выль ужзы - "Алеко" одӥг актъем опера, гожтэмын со А. С. Пушкинлэн "Цыгане" поэмаезъя. Та постановка сӥземын кык юбилейёслы: Сергей Рахманиновлэн вордскемез дырысен 125 ар тырмонлы но вуоно арын Александр Пушкинлэн вордскемез дырысен 200 ар тырмонлы. Алеколэсь валтӥсь партизэ операын кырӟало Удмуртиысь искусствоосъя дано ужась Ювеналий Осипов но артист Александр Стрелков. Земфираез калык син азе поттыны дасясько республикаысьтымы дано артистка Татьяна Силаева, калык куспо конкурслэн лауреатэз Римма Вальтер, артисткаос Тамара Камашева но Любовь Куликова. Спектаклез пуктэ режиссёр Виктор Гончаренко, крезьгуръя кивалтӥсез Сергей Раденков. Сценаез чеберъян бордын ужа художник Владислав Анисенков. С. Рахманиновлэсь "Алеко" операзэ, озьы ик романъёссэ учкыны но кылзыны быгатоды театрын 21-тӥ но 22-тӥ мае. Со сяна, режиссёр малпа та операез возьматыны тылскемъёс дурын уин но. Таӵе амалэз В. Гончаренко уже кутӥз ни вал Псков областьын Пушкинлы сӥзем фестивальын. Театрлэн сезонэз йылпумъяськоз 29-тӥ мае Россинилэн "Севильский цирюльник" операеныз. В. Лагунов. "ШУНЫТ ЮРТЫН" ШУНЫТ ПУМИСЬКОН 9 Майлы но Семьялэн нуналэзлы сӥзьыса, Удмуртиысь Нылкышно огазеяськон но Ижевскысь нылкышно кенеш кылем арня вискын пумиськон ортчытӥзы ожысь но ужысь данэ потэм нылкышно ветеранъёсын. Городъёс куное ӧтчазы Пичи Пурга районысь оже ветлэм нылкышноосты Екатерина Дмитриевна Борисоваез но Прасковья Антоновна Байсароваез; Як.-Бодья районысь ожын картсэ ыштэм Мария Александровна Анисимоваез но оже ветлэм Вера Матвеевна Вахрушеваез. Шуныт мылкыд, пӧсь чай но война вакытысь кырӟанъёс люкаськемъёсты уката но матэ каризы. Та ӝытын пумиськизы войнае ветлэмъёс, война вакытэ но собере вордӥськемъёс но туала пинал нылъёс. Ветеранъёс мадизы ож сюресъёссэс, пиналысен секыт уж борды кыстӥськемзэс. Соослэсь мылкыдзэс кӧнялы ке но шунтон понна, Нылкышно огазеяськонлэн но "Сактон" фабрикалэн кивалтӥсез Зоя Ивановна Степнова но "Ирисс" фирмалэн кивалтӥсез Людмила Николаевна Бочкарева пичильтык кузьымъёс дасяллям. Нош пумиськон ортчиз Индустриальной ёросысь нылкышноосты секыт югдурысь утёнъя "Шуныт юртын" (Кризисной центрын), кудӥныз кивалтэ Зоя Николаевна Боршова. "Шуныт юртын" шуныт пумиськон - озьы шуыны луысал та ужрад сярысь. Л. МАЛЫХ. БЫГАТЭМЗЭС ВОЗЬМАТӤЗЫ МОСКВАЫН Москваысь Конгресс-центрлэн юртаз дышетскон удыслы сӥзем бадӟым выставка ортчиз. Отчы пыриськизы Россиысь данакез университетъёс, школаос, лицейёс, издательствоос, агентствоос. Усьтэмын вал пӧртэм темаосъя люкетъёс: "Россиысь вузъёс - быдэс дуннелы", "Мультимедиа тӥрлыкъёс - калыкез дышетонын", "Психология юрттэ дышетонлы", "Егит поколенилэн книгаосыз", "Киужъёсын вырон" но мукет. Адӟытонние пыриськизы шаерысьтымы шӧртчиос но. Удмурт кун университетысь Технопарк пичи бизнесын "берганы" быгатэмзэ возьматӥз. Киужъёсъя люкетын ужазы Ижевскысь "Ирина" но Завьяловоысь "Нина" огазеяськонъёс. Бисерен бичам чыртывесьёс, лакен шобыртэм пичи сандыкъёс, борддор панноос ваиллям соос. "Торнадо" нимаз предприятие пӧйшуран тӥрлыкъёссэ возьматӥз. Нош А. Пилинлэн модая театрезлы Центральной телевидение но синмаськем. Выставкаын ӟеч ужамез понна Удмурт кун университет дипломен пусъемын. М. СЕЛЬЧЕНКОВА. ПИНАЛЪЁСМЫ СЯРЫСЬ СЮЛМАСЬКЫСА Россиысь Калыкез дышетонъя министерстволэн апрель пумын ортчем коллегияз эскеремын шаерысьтымы пиналъёслэн ватсаса тодон-валан басьтыны быгатэмзы. Ижевск городлэн бюджетысьтыз 25 процентэз коньдон кошке дышетон удыслы. Ужа "Ижевскысь нылпиос" программа. Та программая бадӟым саклык висъяське ӧлексы но сирота кылем пиналъёслы, визьпогъёслы. Городын ужало эстетикая, экономикая, математикая нимысьтыз школаос, усьтэмын изостудиос, киужъёсъя юртъёс, будӥсь морякъёслы, лётчикъёслы чаклам клубъёс. Коллегия туж умоен лыдъяз 83-тӥ номеро школаын пиналъёсты балет искусстволы дышетэмез. Вераськонэз йылпумъяса, Удмурт Элькунысь калыкез дышетонъя министр В. У. Пушкин но Ижевсклэн мэрез А. И. Салтыков Ижевскез дышетонъя экспериментальной базалы пӧрмытыны дэмлазы. Коллегие люкаськемъёс тросэз соглаш луэмзэс веразы. М. СЕЛЬЧЕНКОВА. Плутоний но уран ужзэс воштозы Челябинск областьысь Озёрск городын "Маяк" химкомбинатын радиоактивной материалъёсты утьыны хранилище лэсьто, ивортэ "Урал-пресс" агенство. Толэзь талэсь азьвыл, Инкуазез утёнъя кун комитет косэмъя, сое пуктэмысь дугдӥзы вал. Инкуазез утӥсьёс выль юртлы экспертиза ортчытыны кризы. Эскерон возьматӥз, радиоактивной материалъёсты таӵе хранилищеын возён инкуазьлы изъян уз вайы шуыса. Сое лэсьтонэ СШАысь но Россиысь правительствоос коньдон висъязы. Выль юртэ уно плутоний но уран интыямын луоз. Соос азьвыл ож тӥрлык лэсьтонын кутӥськизы, нош табере атомной электростанциослы ужаны юрттозы. Дышетскисезлы уж шедёз Новосибирскын ужтэк кылемъёслэн лыдзы трослы сӥниз, ивортэ "Сибирьысь радио". Май толэзе ужъя биржаын 7 сюрс адями пусъемын - 2 сюрслы ичигес, кылем арен ӵошатыса. Татын шӧдӥське уже интыянъя службалэн пайдаё тыршемез. Со уно лэсьтэ, ужтэк кылемъёсты выль профессилы дышетон понна. Службае вазиськемъёс пӧлысь 730 адями берло толэзьёсы выль профессия басьтӥз. Аръёс но адямиос ТӦДЬ КЫШЕТЭН САЙКЫТ МАДЁНЪЁС ЛЫКТО Уй палась удмурт кышномуртэз соку ик тодманы луэ тӧдьы кышетэзъя. Тани та арлыдо кышномурт но, со доры пырисьёслы ӧссэ усьтэмез бере, чаляк гинэ кытчы ке ышылӥз но ми доры потӥз ини чылк-чылк тӧдьы кышетэн. Озьы уй пал удмуртъёс возьмато адямиез гажамзэс. Лидия Тимофеевна Корепанова быдэс улонзэ ортчытэмын Балезино районын. Арлыдыз вань ни ке но, тодаз возе уй пал удмуртъёслэсь данак сямъёссэс. Тани али но син азяз кадь адӟе, кызьы Верх-Туга гуртын улӥсьёс тӧдьы дэремъёсын нюлэскы, вӧсяськон интыязы, васько. Ӵуж мильымъёссэс, сурзэс поттыса, утисьсылы-вордӥсьсылы тау каро. Пересьлэн мадемезъя, та пал удмуртъёс вина пӧзьтыны уг быгато вылэм. Та сямез сьӧразы вайылӥллям армия пыр потэм воргоронъёс. Мынам дядяе но армиын 25 ар ӵоже вылэм, соку ик та ужлы дышем, маде Лидия Тимофеевна. Аракы пӧзьтылӥзы, нюлэскы ватскыса. Эх, нюлэс, сьӧд нюлэс... Кӧня умойзэ но, ӟечсэ но вераны луэ со сярысь. Уй пал удмуртъёс понна нюлэс шуг-секытъёслэсь ватскон инты но, калыкез сюдӥсь но вал. Пересь тодэ на ай, кызьы граждан ож дыръя удмуртъёс валъёссэс нюлэскы ватылӥзы, кызьы, чугун сюрес лэсьтыку, сикын ужазы. Табере та интыын Люк станция кылдэмын. Нюлэс котырын улӥсьёс шур кузя келяллязы коръёсты. Та ужлэсь секытсэ ас пельпум вылаз шӧдӥз Лидия Тимофеевна но. Отын ужаме понна агае мыным ката но басьтӥз вал, шуэ кышномурт, но шумпотонэ кема ӧз кыстӥськы, со кузьымез но кин ке вораса нуэм. Война вылтӥ егит ныллы уката но секыт йӧтӥз. Одӥг гинэ агаез вал - со но бырыны шедиз. Ивортэк быриз яратоно пиез но. Пересь нэнэеныз ӵошен кылиз. Ӧйтӧд, выльысь улоно луысал ке, оло, мукет сямен улысал... бызьысал, аслаз семьяез, картэз луысал. Но соку курасьёс вал ке но, улонзэ воштыны ӧз дӥсьты - анайзэ жаляз. Вань яратонзэ, сюлэм шунытсэ будӥсь пиезлы сётӥз. Али мӧйы муртлы огназ улыны секыт, мӧзмыт йӧтэ ке, толалтэ пиез доры Ижевске лыктэ. Собере нош ик гужемлэсь вуэмзэ возьма - сюлмыз кыске вордскем палъёсаз, сьӧд нюлэсъёс котыре. Т. БАННИКОВА. Туспуктэмез В. БЕЛОМОРСКИХЛЭН. АПРЕЛЬ ЙЫЛПУМЪЯСЬКИЗ МАЕ 14 мае апрельлы пенсия быдэс республикая тырыса быдтэмын, табере сое май понна сётъяны кутскозы (Ижевскын улӥсьёслы пенсия тырыны ӧдъязы 16 майысен). Гуртысь пенсионеръёслы коньдон нырысь ик висъялозы Пенсиосъя фондэ тыронъёссы люкаськымтэ районъёсы. Россиысь вань регионъёсын сямен пенсиос ӝегаса сётъясько. Кылсярысь, 15 майлы Башкортостанын апрельлы пенсия 70 процентэз тыремын, Курган, Челябинск, Свердловск областьёсын - 80 процентэз. Пермь область гинэ азьпалтӥз Удмуртиез - тыронъёссэ йылпумъяз 12 мае. Тыронъёс будо, пенсионеръёс возьмало Россиысь Пенсиосъя фондлэн Удмурт люкетэз иворъёсты вӧлмытон ёзъёс пыр одӥг пол гинэ ӧз вазиськылы ни городъёсысь но районъёсысь администрациослэн кивалтӥсьёссылы налогъёссэс тырон пумысен. Мар но со интыосын лэсьтӥське ик. Пунэме кылем предприятиослэсь кивалтӥсьёссэс комиссие ӧтчало, дэмланъёс, валэктонъёс сёто, резолюция гожто. Кӧня ке люкетэз тыронъёс берыктӥсько, но югдур озьы ик умойлы уг воштӥськы. Кызьы бен тыронъёссэс берыктозы кураськон калэ вуэм гурт предприятиос, администрациослэн кивалтӥсьёссы соослы юрттыны уг быгато ке. Районъёсысь бюджет чотын улӥсь организациослэсь но пенсионеръёс азьын пунэме кылемъёссэс берыктыны уг быгато. Таяз арын куинь толэзь куспын гинэ Алнаш, Балезино, Вавож, Дэбес, Кизнер, Сарапул, Шаркан, Юкаменск, Яр районъёсысь интыысь бюджетъёс пенсионеръёссы азьын тыронъёссэс шӧдскымон будэтӥзы. Нош Завьял районысь бюджет организациослэн (администрацилэн кивалтӥсез Г. В. Баталова) тыронзы кык поллы йылӥз ни. Бюджетъя тыронъёссы будӥзы Ижевсклэн (27,6 миллион манетысен 30 миллион манетозь) но Сарапуллэн (14,3 миллион манетысен 14,9 миллион манетозь). Экономика ласянь Удмуртиысь вань районъёс одӥг кадь секыт югдурын, но Кияса районын (А. А. Шадрин) но Воткинск городын (В. Л. Фридрих) та арлэн нырысетӥ кварталаз Пенсиосъя фондэ бюджетысь тыронъёссы кулэсмизы. Нош республикаысьтымы куд-ог городъёслэн но районъёслэн бюджетсы одӥг копейка но тырыны кулэ ӧвӧл: Можга город (И. Н. Семенов), Глазов (Г. П. Чеченин), Игра (Г. С. Вишневская), Каракулино (В. Н. Капин), Кез (В. А. Полев), Красногорск (М. Н. Матушкин), Можга (В. В. Максютин), Ува (С. Г. Иконников), Як.-Бодья (г. В. Вахрушев) районъёс. Пенсиосъя фондэ интыысь бюджетлэн тыронэз 1 январьлы 70,9 миллион манет ке вал, 1 апрельлы со 78 миллион манет тыр луиз. Кызьы адӟиськом, тыронъёс будӥзы 7,1 миллион манетлы. Нош со тырмысал Вавожысь, Грахысь, Киясаысь, Красногорскысь но Пичи Пургаысь вань пенсионеръёслы одӥг толэзьем пенсизэс тырыны. Кызьы курод предприятиослэсь кивалтӥсьёссэс налог тырыны, ачиз быдэсъясь власть тыронъёс пӧлы выемын ке? Россиысь Пенсиосъя фондлэн Удмурт ёзысьтыз пресс-служба. АЛЕКСАНДР ЛЕБЕДЬ - ГУБЕРНАТОР СНН ивортэмъя, Красноярск крайын улӥсьёс асьсэлы губернаторе генералэз Александр Лебедез бырйизы. Со понна 56 процентэз бырйисьёс куаразэс сётӥзы, нош мукетыз кандидат, Красноярск улосвыллэн азьвыл губернаторез Валерий Зубов, 39 процент куара люказ. Лебедь калыклы налогъёсты синтыны но Москвае ичигес коньдон ыстыны кылзэ сётӥз вал.Бырйисьёслы таӵе мылкыд кельшиз, лэся, угось кыдёкысь провинциын улӥсьёслы Москвалэн сяськаямез но отысь политикъёслэн странаын кивалтон амалъёссы уг ярало. Арня нуналэ Лебедь ивортӥз журналистъёслы, Красноярск Россилэн политической шоркарезлы пӧрмиз шуыса. Генерал чик ӧз ваты Россилы президент луыны мылкыд каремзэ. Красноярскын экономикаез ӝутыны быгатӥ ке, шуиз со, 2000 арын президентэз быръёнэ пырисько. "Кизили"- нылпи сюлэмъёсын Пермь улосысь каръёс пӧлын Удмурт Элькунмылы тужгес но матысез луэ Чайковский. Интыяськемезъя но, нимызъя но, калыкезъя но. Отын улӥсьёс Ижевске, Перме сярысь, ӵемгес ветло, дыр. Соослы асьме шоркарамы сюрыны капчигес но, ӝоггес но. Чайковский карысь но ӵем пумиталод элькунысьтымы адямиосты. Шуом, суредасез Василий Мустаевез. Учке ай, картина галереяе пырон азьын ик солэн нимыз гожтэмын: В. Мустаевлэсь суредъёссэ возьматон усьтӥське, пе. - Василий Геннадьевич но солэн творчествоез ми понна туж матын. Дышетскиз со милям улосысьтымы Кунгур училищеын. Милемын кемалась эшъяське. Галереямылы кӧня ке суредъёссэ но кузьмаз ни. Ми но быгатэммыя та суредасьлы юрттыны тыршиськом. Тани куинетӥзэ ни радъямы солэсь суредъёссэ возьматон, - вера галереялэн директорез, Россиысь культура удысысь сӥё-дано ужась Антонида Камашева. Зэмзэ но, картина галереяын ужасьёс Василий Мустаевлэсь суредъёссэ, иллюстрациоссэ учкисьёс доры вуттон понна, рос-прос сюлмаськиллям. Котькуд ужез чеберлыклэн куронъёсызъя радъямын. Номыр мултэсэз ӧвӧл. Суредасен ӵош выжыкыл дунне кылдытӥллям, кожалод. Паймымон соиз - картина галерея ваньзэ сое ас кужыменыз лэсьтӥз, суредасьлэсь одӥг манетсэ но ӧз куры. Туала вакытэ таӵеез шер пумиськылэ. Оскисько, Василий Мустаевлэсь ужъёссэ учкыны Чайковский карысь уно пиналъёс, мӧйыос вуозы. Соос пӧлын одно ик луозы удмуртъёс но, В. Мустаевлэсь суредъёссэ учкыса, "Кизили" журналэз но асьсэлы эш мед карозы вылэм. Али, жаляса верано луэ, Пермь улосын улӥсь ог 30 сюрс удмуртъёс пӧлысь укмысэз (?!) гинэ "Кизили" журналэз басьто. Зэм, удмурт гуртъёс та улосын трос ӧвӧл, Куеда ёросэ гинэ интыяськемын. Отын но анай кылзэс дышетыны пумит карисько ни, озьы шуыны луоз Бадӟым Гондыр но Кипчак школаос сярысь. Малы озьы меда? Оло, ӟучъёс пӧлын улэмзы анай кылзы шоры мукет синмын учкыны косэ? Юнме шорысь таӵе юанэ ӧз кылды. Киров, Свердловск но мукет ӟуч улосъёсын улӥсь удмуртъёс но асьсэ кылзэс уг дышето, та ласянь нокыӵе выльдӥськон уг шӧдӥськы. Ватонэз ӧвӧл, ог дас ар талэсь азьло ӧжыт лыдъем калыкъёс ласянь кун политика мукет вал. Зэм, берло дыре та удысын умой пала воштӥськонъёс вань. "Удмурт кенеш", "Шунды" но мукет общественно-политической организациослэн но кужымзы шӧдӥське ни. Удмурт кылын выль газет-журналъёс, программаос но кылдӥзы. Озьы ке но, асьме изданиосмы пичи тиражен пото. Уноез соосты басьтыны уг быгато. Коньдонзы уг тырмы. Колхозникъёс пӧлысь уноез уждунзэс кӧня ке толэзьлы ӝегаса басьто. Удмурт телевидениын асьме кылын мынӥсь передачаослэн лыдзы воксё кулэсмиз. Озьы тӥни телевиденилэсь бадӟым кужымзэ асьмеос уже ум кутӥське. Радиолэсь вакчи тулкымъёсын ужась станцизэ кужмоятыса, отын тросгес удмурт кылын вераськоно вылэм. Удмурт изданиос, телевидение, радио ог-огзылы юрттыса, дэмен ужазы ке, уноез ужпумъёс капчиенгес быдэсмозы, калыкмылэн асваланэз но будоз. Соку удмурт изданиосты басьтӥсьёс но тросгес луозы. Али, шорлыдын вераса, котькуд 31-тӥ удмуртлы гинэ одӥг экземпляр удмурт издание вуэ. Та лыдпус сокем урод ӧвӧл, дыр. Но улонын тазьыгес луэ: одӥгъёсыз быдэн куинь-ньыль удмурт газет-журнал басьто, мукетъёсыз (сыӵеосыз уно сюрс люкасько) одӥгзэ но уг лыдӟо. Монэ тужгес но сюлэмшугъяськытэ уно сю пиналъёслэн газет-журналъёсын эшъяськыны быгатымтэзы. Соослэн киязы коньдон ӧвӧл, нош анай-атайёссы удмурт газетлы яке журналлы гожтӥськын "вунэто" я мар. Гуртъёсын ӵемысь таӵе учыръёс пумиськыло на: кинлэн удмурт изданиез лыдӟемез потэ, солэн коньдонэз зэмзэ но уг тырмы, нош кин узыргес улэ, со газет, журнал басьтон сярысь уг малпаськы. Мынам нокинэ янгыш кареме уг поты. Но ӟеч улонэз инмысь витёнэз ӧвӧл. Ваньзэ асьме кужымен лэсьтоно. Кузьылиос сямен, тупаса улоно, дэмен ужано. Котькудӥзлэн аслаз сюресэз, интыез. Нош "Кизили" журналлэн интыез - нылпи сюлэмъёсын. Ульфат Бадретдинов, "Кизили" журналлэн валтӥсь редакторез. Шара вераськон Капчи улон инмысь уг усьы Та чебер, йӧн-йӧн мугоро нылашлы туэ тырмиз 19 арес. Но школаез йылпумъяны со турттэ гинэ ай. Ар но ӝыны талэсь азьла дышетсконзэ куспетӥ кароно луиз. Ӧвӧл, |ляб дышетскемез яке висемез сэрен ӧвӧл. Люкетӥзы мукет мугъёс. Сомында дырзэ юнме быдтэмез пумысен Нина Хомутова (нимтулыз воштэмын) али ассэ гинэ янгыше уськытэ. Мар бен луэм та удмурт выжыысь потэм нылашен? - Нина, мынам валамея, тӥ Болгарие шутэтскыны шуыса вуылымтэ. Кызьы тӥ, школаын дышетскись адями, сыӵе кузь сюрес вылэ потыны дӥсьтӥды? - Ой, кызьы кутскыны но уг тодӥськы. Школаын кылзӥськисьтэм вал, дышетӥсьёсын кылы ӧз тупалля. Пумен урокъёсме но келляны кутски. Тӥни сыӵе шузи-мази вакытам ик одӥг тодмо нылаше ужаны ӵектӥз. Но татын ӧз, Болгариын. Сое отчы озьы ик кыӵе ке тодмоез кемалась ӧте ни вылэм. Озьы люкаським вить нылъёс. Ваньмы малпамы, кунгож сьӧрын ми кыӵе ке магазинын яке реклама удысын ужаломы шуыса. - Но сыӵе кыдёке потон понна трос коньдон но, нимысьтыз паспорт но кулэ ук. Кытысь сое ваньзэ шедьтӥды? - Вань та ужъёсты ас вылаз басьтӥз тодмо воргоронмы. Со милемыз кунгож сьӧры нуыны кулэ вал. Та адями ик "пӧраз" документъёсты. Но алӥз: дунэз берыктоды вуоно уждунысьтыды. Болгарие вуэммылэсь азьло кӧня ке улӥмы Турциын, кыӵе ке отельын. Соку гинэ валатским, кыӵе уже милемыз медъяллям. Но бӧрысь озьы луыса кошкиз: эшъёсме кельтӥзы Турцие, нош монэ келязы Болгарие. Табере ми асэнымы кузёяськыны ум ни быгатӥське вал. Ми - вузамын. - Кӧня дунын? - Эх, адӟысалмы ке ми со коньдонэз. "Уждунмы" быдэсак кошкылӥз "кузёмылы" сутенёрмы. Со ик "сюлмаськылӥз" милемыз сюдон, улӥ дӥськут, чеберъяськон-буяськон арбериос басьтон сярысь. Турциын Россиысь нылъёс дуногес сыло, одӥг уй понна 100 доллар пала тырылӥзы. Татын милемыз ӧз обиделэ. Мар бордысь со потэ, уг тодӥськы, но ӟуч нылъёсты "сьӧд" воргоронъёс мар ке понна гажало ук. Болгариын асьме нылъёс туж дунтэм сыло, уй ӵоже 50 доллар но, дыр, ӧз усьы. Россиысь ваем нылъёсты чиганъёсын ӵошато, синазькыль каро. Милемды пытсаса возьылӥзы. Омырен шоканы уин, калыктэм дыръя гинэ поттылӥзы. Нуо машинаен, сю метрлы кошкыны лэзё, собере пуныез сямен ӧте, машинае пукто но выльысь пытсэт сьӧрын возё. Туж ӵем жугылӥзы. - Мар понна? - Воргоронъёс олокыӵеесь но сюрылӥзы: шушесь, пересесь. Соослэсь воргорон мылкыдзэс буйгатэмед уг ке поты, йӧтоз тыныд. "Кузё" лыз-вож луытозь жугылӥз. Уката но мыным йӧтылӥз. Кылзӥськыны дышетӥсьёслэсь но ӧй быгатылы бере, "кузёелы" но ялан пумитъяськыны выри. Озьы ик эрике понна нюръяськысал на, дыр, но вордскем палъёсам, анае доры, бертэме туж потӥз. Нош сӧсырми марай ке, кызьы мон бертом на, кинлы мон кулэ луом. Тазьы уката но зол малпаськыны кутски, одӥг нылаш кулэмез бере. Кошкем одӥг клиент шуонэн, нош ӵуказеяз шӧйзэ шедьтӥллям жуг-жаг куян гуысь... Тӥни озьы но луылӥз. - Нина, нош анаед тонэ ӧз-а ышты? - Сотэк мон али татын ӧй луысал на, дыр. Кытчы кошкемме анае тодэ вал, мон солы верай, куинь толэзь ортчыса берто шуыса. Болгариысен солы жингыртӥ, "кузёе" лэзьемъя. Но кыӵе ужен выремме анае ӧз тодылы. Алигес гинэ ваньмыз шараяськиз. - Кызьы? Ачид-а ваньзэ верад? - Тодӥз полиция пыр. Мае ке уродзэ шӧдыса, лэся, анае, монэ утчаны курыса, милицие вазиськем. Асьме милиция герӟаськем Болгариысь полициен но консульствоен. Монэ шедьтӥзы. Эшшо Украинаысь одӥг нылашен милемыз та странаысь келязы. Веразы вал, мыным билет Москваозь басьтозы шуыса но Украинаозь гинэ басьтӥллям. Отысен котькызьы кошкы, коньдонэ ӧй вал. Полициез но бен валаны луэ: Болгариын мон кадь "ужась" нылъёс данак, ваньзэсты депортировать карыны кӧня коньдон кулэ. Украинаысен мар карыны уг тодӥськы. Полицейской ик дышетӥз. Мын, пе, Москвае кошкись поездлэн начальникез доры, куриськы. Удалтоз шуыса осконэ ӧй ке но вал, озьы ик кари. Начальник шорам учкиз, мур лулскиз. "Эх, кӧня бен тӥ сыӵе ӟуч нылъёс", - шуиз но пуктӥз. Москваысен Ижевскозь бертон понна нош ик коньдон кулэ. Зарни жильыме вузано луи. Тӥ, вылды, малпаськоды, ас мугорзэ вузаны дышем ныллы коньдон поттыны нокыӵе секытэз ӧвӧл шуыса. Бен, вокзалысен мынам сыӵе луонлыке вал - одӥг воргорон дортӥм бергаз. Но мон Болгариысен ик аслым кыл сётӥ: котькызьы мед ёрмо коньдонлы, та юрӟым уже ноку уг басьтӥськы ни. Воргоронъёслэсь палэнскыса кошкисько. - Кызьы пумитазы тонэ ӵыжы-выжыосыд, эшъёсыд? - Анае, песятае бӧрдӥзы, шумпотӥзы. Соос азьын мыным возьыт, сомында сюлмаськонъёс ваи. Али гинэ валаны кутски, макем секыт вал анаелы. Атае кулӥз, сузэре но улонысь шӧдтэк шорысь кошкиз. Эшъёсылы номыре уг мадиськы. Ижевскысь монэным кошкем нылъёс кылем арын ик пегӟыны быгатӥллям. Нош огез сокем уг куректы, лэся, ас мылкыд каремезъя али но кунгож сьӧрын ужа на. Мугорзэс вузасьёс пӧлын котькыӵеез вань ук. - Азьпала улонэд сярысь мар малпаськод? - Нырысь ик тани школаез йылпумъяло. Собере училищеын дышетскыны малпасько. Анае сямен пӧраськись луэме потэ вал, но со та ужлэсь алэ. Зэмзэ но, пӧраськыны мон пичи дырысеным быгатӥсько ини, кӧня ке гуртын но улэмын. Удалтӥз ке, секретарь- референтлы дышетско. Дышетӥсьёсы шуо: быгатод. Бызён, семья кылдытон сярысь али уг малпаськы, уката но ваньзэ адӟеме-тодэме бере. Но оскисько, куке но яратонэ луоз. *** Та нылашлэн секыт югдуре сюрылэмез сярысь мон жаляса но, солы дурбасьтыса но ӧй гожты. Ӧтем потӥз мур малпаськыны мумы-бубыосты но егит нылъёсты. Капчи, коньдоно улон палэнысь дуннеын но шуак инмысь уг усьы. Т. Банникова. . КОТЬКУДӤЗ "ӜУКСЭ ПӦЗЬТЭ" НИМАЗ... Школаосын али трос выльдӥськонъёс мыно. Берло вакытэ пумен бадӟым инты басьтэ пиналъёсты вордскем шаеренымы тодматон но. Краеведение пыр дышетӥсьёс вуоно кивоштӥсьёсмылы пыӵато атай музъеммес яратон мылкыд, соосты тодмато удмуртъёслэн но музон калыкъёслэн историенызы, культураенызы, литератураенызы, наука но ваньбур поттон удысъёсысь азинсконъёсын. Омыръяса быдтонтэм луонлыкъёсыз та предметлэн. Ӵапак сое возьматӥз Ижевскысь краеведъёслэн Некрасов нимо библиотекаын кенешонзы но. Устинов но Октябрь ёросъёсысь удмурт классъёсы ветлӥсь нылпиослэн пичильтык концертсы бере соос ог- огзэс тодматӥзы ужан амалъёсынызы, веразы ӵектонъёссэс, кӧтӝожъёссэс. Нылпиослы муресьгем тодон-валанъёс сётон вылысь, дышетӥсьёс олокыӵе но ужрадъёс ортчытъяло, ялан выльзэ утчало. Тросэз устоесь кусыпъёс тупатӥзы Дышетӥсьёслэсь тодон-валанзэс будэтонъя институтэн, музейёсын, библиотекаосын, доразы ӵем ӧтчало тодмо учёнойёсмес, шаерчиосты, вуыло архивъёсы, дэмен потало экскурсиосы. - Ми нылпиосынымы ветлӥмы Марина Цветаевалэн шайгу вылаз,- ивортэ огез дышетӥсь. - Ми юн чакласа-эскерыса возиськом инкуазез,- вера кыкетӥез.- Кылдытӥмы "Инкуазьлэсь ӝожтӥськон книгазэ". - Нош ми ортчытӥм шаерчиен Феликс Кравцовен пумиськон. Нылпиосмылы туж яраз. - Школаямы усьтӥмы удмурт литературалы сӥзем музей. Вуылэ дорамы, эшъёс... Шумпотӥськод сыӵе иворъёслы. Тани одӥгаз школаын К. Гердлы сӥзем темая гинэ 13 урок ортчытӥллям! Мукетаз школаын тодматскиллям Ижевсклэн архитектураеныз, куинетӥяз, Национальной музее дэмен ветлыса, рос-прос семинар радъяллям. Та пумиськонэз нуиз Ижевск администрацилэн калыкез дышетонъя кивалтэтысьтыз методической юрттэт сётонэз радъясь ӧнерчи М. В. Ельцова. Тӥни солы дышетӥсьёс веразы но нимысьтыз гожтыса кельтӥзы ваньзэ куронъёссэс, дэмланъёссэс. Соос огымысь сямен куро краеведъёслэсь огазеяськонзэс кылдытыны, асьсэ удыссыя тросгес книгаос поттыны, уката ик удмуртъёссэ. Озьы ик ӵекто та предметлы уногес дыр висъяны, огъя семинаръёсы ӵемгес люкалляны. Котькудмы нимамы "ӝук пӧзьтӥмы" ке, пусйизы кенешонэ лыктэмъёс, огъя ужмы ӝог уз азинскы. Люкаськемъёс азьын пыр-поч вераськиз Национальной библиотекаысь вордскем шаермыя люкетэн кивалтӥсь Н. П. Лимонова. Дышетӥсьёсты со тодматӥз удмурт калыклэн историезъя, культураезъя, этнографияя вашкала дырысен туннэ нуналозь поттэм книгаосын. Кенешонэ ветлӥзы Национальной музейын ужасьёс но. Соос краеведъёсты тодматӥзы тужгес бадӟымесь экспозициосынызы. Огез сӥземын Быдӟым Вормонлы, кыкетӥез - Куӟебай Гердлэн но Ашальчи Окилэн юбилейёссылы. Куд-ог урокъёсты меӵак ас доразы ортчытъяны дэмлазы. Мар бен, таӵе вамышъёс туж юрттысалзы нылпиослы ватсаса тодон- валанъёс сётыны. Нош огазеяськон сярысь ке верано, вуоно дышетскон арлы со одно ик кылдоз шуыса оскон вань. Алигес та ужпумъёсъя бадӟым кенешон-семинар ортчиз уго Можга педучилищеын но. Ижевскмес ке басьтоно, краеведъёслэсь огъя ужзэс радъяны-пӧръяны А. Салтыков мэрмы одӥг адями коть висъяны быгатоз, вылды, уждун тырыса ик. К. ЛОМАГИН. Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Гурт хозяйство удысын вормонъёссы но уно аръёс ӵоже сюлмысь тыршемзы понна сӥлы карон нимъёс сётоно "Россия Федерациысь дано агроном" Кайшев Александр Ильичлы - Удмурт Республикаысь Можга ёросысь "Россия" колхозлэн валтӥсь агрономезлы, "Россия Федерациысь гурт хозяйство удысын дано ужась" Баранов Валерий Николаевичлы - Удмурт Республикаысь Пичи Пурга ёросысь УАССР-лы 10 ар нимо племзаводлэн директорезлы, Миненков Борис Ивановичлы - Ижевскысь тылобурдо вордон фабрикалэн директорезлы. Сиён-юон поттон удысын вормонъёсыз но уно аръёс ӵоже сюлмысь тыршемез понна "Россия Федерациысь сиён-юон поттон удысын дано ужась" сӥлы карон ним сётоно Иванов Владимир Валерьевичлы - акциосын "Ижевский хлебомакаронный комбинат" огазеяськонлэн генеральной директорезлы. Наукаын ӟеч тыршемзы понна сӥлы карон нимъёс сётоно "Россия Федерациысь наукаын дано ужась" Добровольский Владимир Ивановичлы - технической наукаосъя докторлы, профессорлы, Ижевскысь кун технической университетысь кафедраен кивалтӥсьлы, "Россия Федерациысь вылӥ школаын дано ужась" Пономарев Карл Александровичлы - Дышетӥсьёслэсь тодон-валанъёссэс будэтонъя Удмурт институтысь кафедраен кивалтӥсьлы. Культура удысын вормонъёссы но уно аръёс ӵоже пайдалыко ужамзы понна "Россия Федерациысь культура удысысь дано ужась" сӥлы карон ним сётоно Корнилов Станислав Васильевичлы - культурая "Россия" центрлэн Глазовысь культурая учреждениысьтыз духовой оркестрлэн дирижёрезлы, Кузнецов Виктор Ивановичлы - акциосын "Ижмаш" огазеяськонлэн культурая "Ижмаш" юртэзлэн директорезлы. Россия Федерацилэн Президентэз Б. Ельцин. Москва, Кремль, 1997 арын 31 декабре. Наталья Менеичева Кышкасьтэм сяськаос Выжыкыл Одӥг песянай пичигес бакчаяз тулыслы быдэ тюльпан сяськаос будэтылӥз. Соосты базарын вузалляз. Тюльпан бурдъёс дырызлэсь вазь медаз усьтӥське шуыса, сяськаосты резинкаен пачкатылӥз. Валамон ини, керттылэм но кезьыт интые пуктылэм сяськаослы ӝож но вӧсь вал. Песянай базарысен тюльпан йыръёсысь керттэтъёсты октэм бере, лулосъёс вӧзысьтызы данак музон чеберокъёс сямен ик капчи шокчизы. Тюльпанъёс вӧзы дугдӥз кияз портфелен йӧно воргорон. Со туж сак лыдъяз кисыысьтыз манетъёссэ. - Роза басьтыны уг тырмы, - шуиз со ас понназ, очкиосыз пыр тюльпанъёсты синйылтыса. - Нош таоссэ мон ваньзэс кузьым каро. Дораз бертыса, йӧно пиосмурт тюльпанъёсты нылызлэн валес вылаз понӥз. Нылыз кемалась висе ни, ураме но уг пота. Чебер сяськаослы пичи мурт вераны луонтэм шумпотӥз. Со вакытэ ик нылашез паймыз сяськаослэн малэсь ке кышкаса кадь шымырскемзылы: "Атай, малы соос сыӵеесь?" - Дырызлэсь вазь медаз усьтӥське шуыса, соосты кезьыт азьын возё, - нылызлы валэктӥз атаез. - Ой, макем соос мыным жаль пото. Ул ай ворсам ымын! Атаез сяськаосты вазае пуктӥз но ачиз висъет сьӧры ышиз. Нош нылаш тюльпанъёс шоры жальмаз. Ӵуказе ӵукна ваньзэс сайкатӥз яркыт шунды. - Шунды! - шумпотӥзы тюльпанъёс но сяська бурдъёсынызы шуныт пала сётӥськизы. - Мар тӥ?? Кылӥды ук, ма шуиз толон горд роза! Шунды пала берытским ке, асьмеос кулом! - куалектӥз сузэръёс пӧлысь одӥгез. - Мар бен, кулом ке, кулом. Нош макем шумпотоз та пичи дыды, усьтӥськеммес адӟыса. Тӥни ук кыӵе зол кайгыриз со асьмеды кезьытын воземзы пумысен, - ваменскизы мукетъёсыз. Сяськаосты адӟыса, висись нылашлэн мылкыдыз ӝутӥськиз: - Атай, учкы ай, макем чебересь соос! Тюльпанъёслы луыса ик, дыр, Шунды но коркамы пыриз! Тюльпанъёс йырзэс эшшо но вылэгес ӝутӥзы - иське, ми зэм чебересь. Шӧдӥзы: соос шонер лэсьтӥзы, Шунды пала йыръёссэс карыса. Оло, табере висись нылаш пыд йылаз султоз? Кӧня ке нунал ӵоже тюльпанъёс вазь ӵукна бурдъёссэс Шунды пала усьтылӥзы, нош уйлы ворсаллязы. Соос туж данъяськизы налышлы шумпотон кузьманы быгатэменызы. Нош арня пумын сяськаос шӧдӥзы: ӟигарзы бырем. Та нуналэ тюльпанъёс берлозэ шумпоттӥзы на пичи дыдыез. Ӵуказеяз ӵукна нылашлэн атаез сайказ но туж юн паймиз: нылызлэн валесэз буш. Собере нылызлэсь бӧрдэмзэ кылӥз. Нылаш ӝӧк улын пуке вылэм. Солэн кырымпыдэсаз - ӵуж но горд сяська бурдъёс. - Атай, соос кулӥллям. Малы? Толон гинэ яркыт ӵуж но горд бурдъёсынызы мыным шоназы. Нош туннэ... - нылаш пыд вылаз султӥз но бубиз доры матэктӥз. - Эн бӧрды, нылы. Тюльпанъёс кема уг сыло. Нош таосыз уть макем ӧз куасьме. Соос озьы тыныд бурмыны юрттӥзы. Со сяна, Шундылы но чеберлы шумпотыны дышетӥзы, - нылызлэсь ӵуж йырсизэ маялтӥз атаез. Тӥни таӵе выжыкыл. Оло нош зэм учыр? Котьма мед луоз, нош нылаш та учыр бере пыраклы яратӥз инкуазез. Табере со будосъёсты чакла, уте - ноку уг ишка: кемагес, пе, улэп мед сылозы. Ӟуч кылысь берыктӥз Римма Лаптева. КЕЗЪЁС НО ГЫРО-КИЗЁ НИ Куазед мырдэм-мырдэм ас ӧраз пыриз кадь. Бусы ужъёссэс мытӥзы уй пал районъёс но. Та нуналлы кизьыны-гырыны потӥзы Кезысь вань хозяйствоос. Соос пӧлысь тужгес чупресъёсыз - "Искра", "Победа", "Труд" колхозъёс. Гуртоос оско, бусы ужъёс ас вакытаз ӟеч йылпумъяськозы шуыса. Шуг-секытъёссы ваньмызлэн кадь ик: медаз гинэ "чуты" вужмем техника, медаз быры эстӥськон. Н. ЛИПИНА. ЛЫДӞИСЬЁСЛЫ ВАЗИСЬКОН Гажано лыдӟисьёс, кин "Удмурт дуннелы" быдэс ар понна гожтӥськыса ӧз вутты - дыртэлэ! Кыкетӥ паларлы гожтӥськон азьланьтӥське 20 июнёзь. Газетлэн ӝыны арлы дуныз: 33 манет (индексэз - 54400). Суббота номерлэн дуныз: 15 манет (индексэз - 54402). Гожтӥськыны луоз Ижевскысь "Информпечатьлэн" но райцентръёсысь почта связьлэн киоскъёсыз пыр. Дуныз - 18 манет. Ижевскын улӥсьёс вазиськыны быгатозы редакцие, газетэз отысь басьян понна. Дуныз - 12 манет. Шунды Балезиноос иворто УЖА НО ШУТЭТСКЫ Егитъёслэн улэм-вылэмзы ялан сюлэмшугъяськытылӥз районысь кивалтӥсьёсты - арлы быдэ йылӥз ужтэк кылемъёслэн, йыртэмасьёслэн лыдзы. Тае лыдэ басьтыса, районын кылдытӥзы егитъёсын ужанъя отдел. Тужгес кулэ удысэн лыдъяське пиналъёсты но егитъёсты уже интыян. Сое сэрттон-пертчон понна районамы усьтӥськиз шаерысь Егитъёсты уже интыянъя биржалэн филиалэз. Лыдэ басьтэмын егитъёслэсь ваньмон дырзэс радъян но. Карсовай но Сергино селоосын усьтэмын спортклубъёс, нош Балезиноын - "Егитъёслы мода" клуб. Пусйыны кулэ, Глазовын ортчем модая республиканской конкурсэ пыриськыса, балезино нылъёс дипломантъёс луизы. Егитъёсын ужанъя отдел юн кусып возе семья отделэн. "Егит семья" республиканской центрын ужась специалистъёс кылем толэзе бадӟым классъёсын дышетскисьёс, дышетӥсьёс но анай-атайёс понна семинар радъязы. Арлы быдэ февраль толэзе афганецлэсь нуналзэ, апреле - армие мынӥсьлэсь нуналзэс ортчытъяськом. Со сяна, районысь егит семьяос куспын пӧртэм конкурсъёс радъяськом. Туэ со ортчиз Каменное Задельеын. Отчы пыриськизы Карсовайысь Тебеньковъёслэн, Эркешевоысь Наговицынъёслэн, Каменное Задельеысь масленниковъёслэн, Сергиноысь Макаровъёслэн семьяоссы. Берлоосыз Вероника но Алексей Макаровъёс 30-31 мае районмылэсь данзэ утёзы Ижевскын. Бадӟым классъёсын дышетскисьёс мылысь-кыдысь дышето немец кылэз, соос шумпотыса пырисько "Санта-Лингва" огазеяськонлэн конкурсъёсаз. Арысь аре балезиноос мур тодон-валанъёссэс возьмато но вылӥ интыос басьто. Лингвистикая лагерьын соос дунтэк шутэтско, капчиен пыро вылӥ дышетскон заведениосысь иностранной факультетъёсы. Ар ӵоже трос ужрадъёс ортчытэмын, азьланяз эшшо но тунсыко ужрадъёс витё на районысь егитъёсты. Л. ИВАНОВА. Шулдыр гуртын - мӧзмыт Нюлэс пушкы ышемын кадь Оросово гурт. Гужемзэ татын вераны луонтэм шулдыр луэ, нош сӥзьыл-тулыс - мӧзмыт. Тросэз егит нылъёс дышетсконзэс йылпумъяло но сьӧрло кошко, бызё. Пиос улонзэс ас понназы шулдыртыны выро ик, но азгынмо ини соос. Ярано коть, Оросово гуртын укмыс классъем школа вань на. Дышетскисьёсын ӵош гуртмылэсь улон-вылонзэ но шулдыртыны выриськом. Клубын шутэтскон ӝытъёс, кружокъёс ужало. Бадӟым праздникъёслы концертъёс, спектакльёс пуктӥськом. Оросовоысь пичигес клуб куашкан калэ вуэмын. Уждун тырыкузы ӧз шедьы тыро-пыдо ужась, нош али ужаны мылкыд карисьёс вань - но коньдон уг тыро. Малы меда ваньмыз йырин-чукин берытске? Районысь кивалтӥсьёслы пичи ке но саклык висъяно вылэм ни гуртамы школа пуктонлы но. Йыг-йыг школа, спортивной зал луысал ке, оло, нылъёсмы но палэнэ кошкыны ӧй дыртысалзы. Т. ВЕРЕТЕННИКОВА. Бӧляксэ но пумитаз Удмурт Республикаысь Правительстволэн Тӧроез Павел Вершинин кылем арняе кык нуналлы ветлӥз Японие. Ньыль мукет эшъёсыныз ӵош со пыртэмын вал Федерацияя Кенешлэн делегацияз. Россиысь улосъёслэн кивалтӥсьёссы пумиськизы Парламентысь советникъёслэн палатазылэн Тӧроеныз, депутатъёсын, МИД-ын но посольствоын ужасьёсын. Вераськон мынӥз культура, дышетон, наука, инкуазез утён но мукет удысъёсын валче ужаны азинтон сярысь. - Асьме Президентлэн Японие алигес ветлэмез бере, ми Россиысь нырысетӥ официальной адямиос луимы, - кыдёкысь странае вуылэмез сярысь вераса пусйиз Павел Вершинин. - Пумитазы ӟеч, возьматӥзы кызьы ужамзэс. Кылсярысь, ветлӥм быдэс дуннелы тодмо "Сони" фирмае. Номыр уд шуы, синмаськымон предприятие. Шӧдӥське, адямиос рос-прос ужан сярысь малпанэн уло шуыса. Удмуртилэн луонлыкез вань Россия но Япония куспын юнматэм программаосты быдэсъянэ пыриськыны. Кылсярысь, Япония турттэ асьме странаысь военно-служащийёслы улон инты лэсьтонэ коньдон висъяны. Та странаын улӥсьёсты туж шугъяськытэ быдэс планетаын берло аръёсы куазьлэн пумен шунытгес луэмез. Тае лыдэ басьтыса, японецъёс пӧртэм ужрадъёс кутыны дась. Соос чаклало Россилы 40 арлы кык миллиард долларлы нимысьтыз кредит висъяны. Со коньдон кутэмын луоз энергия поттӥсь предприятиосын эгырез газлы воштонэ, химической ож тӥрлыкез быдтонэ, вуэз чылкытонэ но инкуазез утёнъя мукет ужрадъёсы. Павел Вершининэн та Япониын пумиськыны мылкыд карем "Мицуи" фирмалэн ыстэм муртэз. Соин вераськон кӧня ке час ӵоже кыстӥськиз. Та фирма "Ижмашлы" машина кузовъёсты буянъя туала тӥрлык сётэ. Контрактлэн огъя дуныз пӧлысь 15 процентэз тыремын ни. Кенешемын на матысь нуналъёсы ик та пумысен пумиськон Москваын ортчытыны. Эшшо огзэ верам потэ на. Асьме Правительстволэн кивалтӥсез Япониын бӧляксэ пумитам. Можгалась воргорон кивалтэ Россилэн вузкаронъя представительствоеныз. Соиз вӧзын но асьме палъёс вань на. Кин тодэ, оло, таӵе пумиськон но юрттоз Удмуртилэсь кунсьӧр кусыпъёссэ юнматыны. И. Лебедев. ЖАЛЯЛЭ КУАНЕР ДЫШЕТӤСЕЗ "Берыктэ уждунмес!" Таӵе куронъёсын кивалтӥсьёс азе али потало, дыр, Россилэн пӧртэм сэрегъёсаз. Тужгес но шукрес бугыръясько шахтёръёс. Соослэсь адӟем каро ни бюджетысь коньдон басьтӥсьёс но. Республикаямы май толэзе тужгес но бадӟым пумитъяськон ужрад ортчытӥзы "Ижмаш" акционер огазеяськонын ужасьёс. Нош толон асьсэлэсь мылкыдзэс веразы элькунысьтымы калыкез дышетон удысын ужасьёс. Соос профсоюзъёслэн юртазы пумиськылӥзы Правительствоысь кивалтӥсьёсын. Озьы ик асьме делегация со нуналэ пыриськиз Россиысь Правительстволэн юртэз азьын радъям ужрадэ. Ужзэс огдырлы уретылӥзы Воткинск городысь но ёросысь дышетӥсьёс. Ваньмаз сямен районъёсын калыкез дышетон удысын ужасьёс пумиськылӥзы ёрос администрациоссылэн кивалтӥсьёсынызы. Ижысь технической университетысь студентъёс Россиысь ректоръёслэн кенешсылы вазиськон кутӥзы. Дышетӥсьёслэн куронъёссы одӥг: дыраз тыроно уждунэз но отпуске потэм понна коньдонэз, нылпиослы луонлык сётоно дунтэк ӟеч тодон-валан басьтыны. Н. СЕМЕНОВ. Шунды Нылпи движенилы - 75 ар ПИНАЛЪЁС - ӜУАСЬ СЮЛЭМЪЁС Ортчеменыз пумиськон Удмуртиысь нылпи движенилы 17 мае тырмиз 75 ар. Но туннэзэ толлоеныз уд ӵошаты ни. Нылпиос понна азьвыл пионеръёслэн огазеяськонзы гинэ ке вал, туала вакыт трос воштонъёс пыртӥз. Мылкыд каремзыя, нылъёс но пиос табере пӧртэм огазеяськонъёсы пырыны быгато. Туннэ республикаямы, нимаз городъёсын но районъёсын трос дасо сыӵе огазеяськонъёс лыдъясько ни. Со яркыт адӟиськиз нылпи движенилы сӥзем бадӟым праздникын но. Быдэс шаерысьтымы дас кык сюрс пала пиос но нылъёс пыриськизы шествие. Советской но Пушкинской урамъёстӥ тубыса, Центральной площадьын соосты возьма вал Ижевскысь тужгес но устоосызлэн нылпи коллективъёслэн концертсы, Шуриклэн (Александр Додинлэн) кивалтэмез улсын. Ох, и быгатэ вылэм со пиналъёслэсь мылкыдъёссэс лӧпкытъяны. Нылпиосты шумпоттытӥсь мукетыз кузьым вал "Ижйӧл" АО-ен дунтэк висъям мороженой. Эктыны яратӥсьёссэ но кезьытлэсь кышкасьтэмъёссэ возьмаз на дискотека. Толлоез узыр, туннэез данъяськымон Вераны кулэ, бадӟым лыдпусэз пусйыны одӥг нуналэн гинэ тырмыт ӧй вал. Та нуналлы шуыса, шаерысьтымы котькуд городын но районын нимаз-нимаз ужрадъёс ортчизы на. Нош Ижевскысь Нылпи творчествоя дворецын куинь нунал ӵоже ужгуръёс ӧз чалмылэ. 14 мае усьтӥськиз туала нылпи движенилы сӥзем выставка. 15 мае нылпиос бадӟым концерт возьматӥзы пионер огазеяськонлэн ветеранъёсызлы. Нош 16 мае дворецын ортчиз праздникез сӥё-дано усьтон. Огинэ люкаськизы шаерысьтымы азьвыл вакытысь пионеръёс- ветеранъёс но туннэ нуналысь нылпиослэн но егитъёслэн огазеяськонъёссылэн азьветлӥсьёссы. Нош кыӵе праздник ӟечкыланъёстэк, наградаостэк луоз меда? Удмурт Республикаысь Кун Кенешлэн но Правительстволэн нимынызы пусъемын вал тросэз ветеранъёс. Палэнэ ӧз кыле нылпиослэн туала азьветлӥсьёссы но, Россиысь Егитъёсын ужанъя кун комитет устооссэ данъян грамотаосын пусйиз. Кызьы шуиз Удмурт Республикаысь Правительстволэн тӧроезлэн воштӥсез Антонина Лисина, ми узыресь асьмелэн толло нуналэнымы, но азьланез асьмелэн данъяськымон. Зэмзэ но, куке сцена вылэ одӥгез бӧрсьы мукетыз пото асьсэды котыр ласянь умоен возьматэм, нылпиос но егитъёс понна трос пайдаёзэ лэсьтэм огазеяськонъёслэн кивалтӥсьёссы но азьветлӥсьёссы, сыӵе оскон кылдэ. Соос пӧлын "Шунды" но "Иман" огазеяськонъёс, шаерысьтымы Дышетскись егитъёслэн ассоциацизы, усточи но быгатӥсь нылпиослэн "Солнцеворот" огазеяськонзы, "Санта-Лингва", "Долг", "Родники" но мукет огазеяськонъёс. Та нуналэ ик асьсэлэсь быгатонлыкъёссэс возьматӥзы шаерысьтымы пӧртэм районъёсысь вожатойёс но нылпиосын ужась методистъёс. Лызо-гордо галстук нуллӥсьёс Нылпиослэн праздниксы - со пиналъёсын ужась вожатойёслэн, методистъёслэн но праздниксы. Нош куке районысь вань школаосысь дышетскисьёс пионер огазеяськонэн огдырлы но ӧз люкиськылэ, со эшшо данъяськымон. Со ласянь пусйыны луоз Шаркан районысь вань школаосты. Бен, выльдӥськонъёстэк ӧз луы. Азьлозэ пионер огазеяськонэз воштӥз "Родники". Со аслэсьтыз ужзэ радъя сизьым пӧртэм ёзъёсъя. Нош гуртысь пиналъёс тужгес но эшъясько "Шаер" программаен. Быги шор ёзо школаын дышетскисьёс ваньмыз сямен ик лызо-гордо галстук нуллӥсьёс. Вераськисько школаысь вожатоен Галина Николаевна Несмеловаен. - Пионеръёслэн асьсэлэн думазы вань, кивалтэ соин Шамаева Ольга. Котькуд классысь отчы быдэн одӥг мурт быръемын. Кин спорт понна кыл кутэ, кин дышетскон понна - ваньзылэн асьсэ удысъёссы вань. "Родникие" пыреммы дырысен куатетӥ арез мынэ ини. Школамы быдӟымгес саклык висъя шаерез тодонлы. Асьмелэн музеймы вань. 75 ар тырмон нуналлы сӥзьыса, 15 мае районамы пионеръёслэн слётсы ортчиз. Отчы ӧтемын вал ветеранъёс но. Котькуд школа аслаз ужезъя рапорт лэсьтӥз, дасязы концерт номеръёс. Школаос куспын радъямын вал ньыль ёзъя ӵошатскон: туризм но шаерез тодон; ваньмон дырез ортчытон; шуг-секытэ шедемъёслы юрттон; экология. Вормисе потӥз Порозысь школа. Отысь дышетскисьёслы ик шуд усиз та бадӟым празднике лыктыны. Быги школаысь ньылетӥ классын дышетскись 23 пиналъёсты матысь нуналэ возьма бадӟым шумпотон - соосты пыртозы пионере. Галстук басьтыны шугъяськиськом ке но, таосызлы шедьтыны сюлмаським. Оскон ноку уз кыс Нылпи праздникез ортчытыны юрттӥзы Удмурт Республикаысь Егитъёсын ужанъя кун комитет но Ижевскысь Калыкез дышетонъя управление, Удмурт Республикаысь Правительстволэн Тӧроезлэн воштӥсезлэн Антонина Лисиналэн кивалтэмез улсын нимысьтыз комиссия кылдытэмын вал. Трос кужымзэ но дырзэ сётӥз ужрадэз ортчытонлы республикаысьтымы "Родники" пионер огазеяськонлэн кивалтӥсез Надежда Веретенникова. Та огазеяськон шаерамы тужгес но бадӟымез, 25 сюрс пала дышетскись пиналъёс отчы пыро. "Родникилэн" кивалтӥсь органэз - парламент - мукет огазеяськонъёсысь нылпиослы, огъя луись ужпумъёсты эскерон пумысен, вазиськон дасяз. Удмурт Республикаысь Кун Кенеше но Правительствое вазиськон дасязы пионер движенилэн ветеранъёсыз но, празднике 150 мурт лыктэмын вал. Соослэн сюлмаськонъёссы нырысь ик герӟаськемын будӥсь кивоштӥсьёссылэн, нылпиослэн азьлань улонэнызы. Озьы ик, школаын ужась вожатойёслы дышетӥсьёсын оград льготаос тупатыны куро. Туж ӟеч малпан вань, 1999 арлы нылпи движенилэн историезъя календарь поттыны. "Родникиысь" пионеръёс солы материал люкан борды басьтӥськизы ни. Но быдэсмоз-а со малпан, шедёз-а сое поттыны коньдон, али шуг вераны. Шаерысьтымы пиналъёс, соослэн бадӟым эшъёссы азьланезлы осконэн уло, со понна уго соос пионеръёс. Л. МАЛЫХ. * Надежда ВЕРЕТЕННИКОВА, шаерысьтымы "Родники" пионер огазеяськонлэн кивалтӥсез. * Фаина Михайловна КУДРИНА вань улонзэ сӥзиз нылпиосын ужанлы. Трос аръёс ӵоже со вал Пионеръёслэн дворецсылэн директорез. Ветеранлэн ӟырдыт сюлэмыз али но тэк пукыны уг вала - со котьку нылпиос пӧлын. Туспуктэмъёсыз В. КАМАШЕВЛЭН. УДМУРТ РЕСПУБЛИКАЫСЬ ПРАВИТЕЛЬСТВОЛЭН 1997 АРЫН УЖАМЕЗ ПУМЫСЕН ОТЧЁТЭЗ СЯРЫСЬ Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: 1. Удмурт Республикаысь Правительстволэсь 1997 арын ужамез сярысь отчётсэ лыдэ басьтоно. 2. Ужамлы йылпумъянъёсты дунъянъя таӵе ужпумъёсты быдэсъянын Удмурт Республикаысь Правительство тырмыт ӧз тыршы шуыса лыдъяно: - промышленностьын продукция поттонэз йылтон; - ёросъёслы но городъёслы дотациосты висъян. 3. Удмурт Республикаысь Правительстволэн ужамезлы йылпумъянъёсты дунъя мертэтъёсты юнматоно, приложениез лыдэ басьтыса. 4. Республикаысь интыысь аскивалтонлэн быръем ёзъёсызлы дэмлано интыысь аскивалтонлэн быдэсъясь ёзъёсызлэсь ужамзэс дунъянъя мертэтъёсты кутыны. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 28 апреле. � 622-И. Удмурт Республикаысь Правительстволэн ужамезлы йылпумъянъёсты дунъяны 1998 арлы мертэтъёс Дунъяны мертэтъёс Удмурт Республикаын социальной удысэз но экономикаез азинтонъя 1998 арлы программая 1. Шаерын поттэм огъя продукцилэн быдӟалаез (дунъёслэсь вошъяськемзэс лыдэ басьтыса) 102 % 2. Промышленностьын продукция поттонлэн (юрттэт сётонлэн) быдӟалаез 1998 арлэн дунъёсызъя 17 200 миллион манет 3. Промышленностьысь производстволэн физической быдӟалаезлэн индексэз, 1997 арлэн вакытъёсыныз ӵошатыса 105,0 % 4. Гурт хозяйствоын поттэм продукцилэн быдӟалаез, кылем арлэсь дунъёссэ лыдэ басьтыса 100,3 % 5. Лэсьтӥськонэ уксё висъян, коньдон шедьтонъя вань источникъёс чотын 3 960 миллион манет 6. Республикалэн бюджетэзлэсь доходъя люкетсэ зэмос быдэстон 100 % 7. Ужтэк кылемъёслэсь пусъем лыдзэс кулэстон 5 % 8. Бюджет чотын ужасьёслы уждунзэс дыраз тырон республикалэн бюджетэз чотын 9. Ёросъёслы но городъёслы дотациос висъян 100 % 10.10 сюрс адямилы быдэ йыружъёслэн лыдзы 1997 арлэсь трос ӧвӧл 11. Йыружъёсты шараян 1997 арлэсь ичи ӧвӧл 12. Валтӥсь демографической лыдпусъёс: вож нуныос пӧлын кулон учыръёс; кулэмъёслэн огъя лыдзы 1997 арлэсь трос ӧвӧл ПУСЪЕМЫН ПРЕМИОСЫН Наука но техника удысын бадӟымесь азинсконъёссэс пусйыса, Россиысь Правительстволэн 1997 ар понна премиосыз сётэмын "Удмуртнефть" акциосын обществоысь Директоръёслэн советсылэн тӧроезлы В. И. Кудиновлы, та обществолэн ик генеральной управляющиезлы Е. И. Богомольныйлы, "Нефтяная компания "Роснефть" акциосын обществолэн нырысетӥ вице-президентэзлы М. Б. Кимлы но элькунысьтымы "сьӧд зарни" кысконэн герӟаськем мукет ужасьёслы. Озьы вылӥ дунъямын соослэн пластмассаослэсь но пиялаослэсь кизер эстӥськон ӧръян гумыос кылдытон но производствое пыӵатон уже мылысь-кыдысь пыриськемзы. Н. ФЕДОРОВ. Дискотека - егитъёслэн дуннезы Дискотека... Та кылэз кылӥсько ке, син азям пуксе ӵуж, горд, лыз, вож тылъёсын ворекъясь, егит нылъёсын но пиосын тырмем зал, пель сьӧрам чузъясько туала кырӟанъёс, егитъёслэн капчи мылкыдын серекъям куараоссы. Дискотека - егитъёслэн аспӧртэмлыко дуннезы. Эрико шаер, кудаз уд шӧдӥськы анай-атайёслэсь эскеремзэс, уд кылӥськы соослэсь индылэмзэс, пыкылэмзэс. Туала вакытэ нылашлы яке пияшлы 13-14 арес тырме но, со клубе потаны кутске. Нош мар соосты кыске дискотекае? Сундур гуртысь егитъёслэн верамзыя, эктэм, шулдыръяськем - капчияськем потэ. Нош мылкыд кырӟано-эктоно кадь уг луы ке? Куд-огез гуртысь егитъёс шедьтӥллям капчияськон амал - аракы. Но ваньмыз сярысь озьы вераны уг луы. - Винаен туж ик уг эшъяськиськы, - шуэ гуртысьтымы одӥгез пияш, - капчияськыны сотэк но быгатӥсько. Дискотекалэн шӧмаз гинэ пыроно. Бен, котькыӵеез вань Сундурысь егитъёс пӧлын. Котькуд кӧснуналэ гуртамы радъямын луэ эктон ӝыт. Трос быдэ вуымтэосты люка со котыраз, эграос но дорамы васько. Нокин нокинэ уг обидьы, жугиськись-марась ӧвӧл, ӵашетон-керетонэз шер адӟылод. Шутэтскы, экты - нокин уз люкеты. Но тани мар сярысь верам потэ на. Берло дыре В. М. Корепанова, клублэн художественной кивалтӥсез, дискотекаосы культура пыӵатыны малпаз, эктон ӝытъёсты городын кадь ортчытон понна. Диджейёс, дискотекаез кыӵе ке темая ортчытон, кырӟанъёсты гожтыса курон. Эсьмаса, дискотекаез нуисьёс Запад манеръя асьсэлы аспӧртэмлыко кушем нимъёс но шедьтӥллям: Ден, Скелетон, Цасе. Огшоры адямилы та нимъёс номыр уг верало, нош диджейёслэн улоназы но ужазы со бадӟым инты басьтэ, лэся. Одӥгезлы юанэн вазиськи, малы аслыд Скелетон (Скелет) ним басьтӥд шуыса. Милям ваньмылэн нимъёсмы асьмелэн иммиджмыя, пе, валэктон валэктӥз со. Диджейёслэн интызы - со исантэм (священной) сэрег, соослы люкетыны уг яра. Кырӟан курыса укно доразы мынӥськод ке, биополезы, пе, сӧриське, соин ик гожтыса вазиськыны косо. Бен, оло, огласянь со умой но. Валериклэн, кырӟан лэзьясьёс пӧлысь одӥгезлэн, верамезъя, укное кечырскыса, егитъёс асьсэлэн куронэнызы акыльтыто. В. М. Корепанова лыдъя, диджейёс дискотекаосын культураез вӧлмытыны кулэ, асьсэды но умоен гинэ мед возьматозы. Нош али со сярысь малпаськыны гинэ кыле, кыдёкын ай гуртысь егитъёслы отчыозь. Куронъёс но котьку ик уг быдэясъясько, нош "пась" доры матэктӥд ке, ӟуч сямен кытчы ке кыдёке келяны турттӥсьёс но шедёзы. Мар шуод, луылэ сыӵеез но. Гуртысь эктон ӝытэ потыса, куд-ог дыръя таӵе малпанэ но вуиськод: "Кулэ-а меда егитъёслы городын сямен радъям таӵе эктон ӝытъёс?" Ӧвӧл, шӧдске, соос отчыозь будӥллямтэ на. Зэмзэ вераса, пиналъёс "сялало" ваньмыз та выль воштӥськонъёс вылэ. Гожтыса кырӟан курисьёс но ӧвӧл, диджейёс шоры но гажаса уг учко. Юра, одӥгез быдэ вуымтэ пияш, шуиз: - Малы со кулэ? Город ӧвӧл ук татын. Огшоры дискотекаос трослы умойгес, мынам малпамея. Огшоры бордын ик чеберез но. Трослы капчигес, укно доры мыныса, каньылэн гинэ кыӵе ке кырӟан курыны. Нош "пожалуйста" кылэз уг ке валало, диджейёс асьсэос янгыш". Данакез гуртоосы али таӵе малпанэн уло. Зэмзэ но, малы дышем сямъёсты кужмысь сӧрыны турттод, гуртлы тупасьтэм макеосты пыӵатод, со вылез егитъёсты бордаз кыскыны уг быгаты ке, кулэ уг ке каро сое? Тӥни сыӵе малпанъёсын но мылкыдын уло Сундур гуртысь туала егитъёс. Нош кыӵе омырен шокало меда туннэ нуналэ Ижевскысь егитъёс, кызьыгес ортчо соослэн эктон ӝытъёссы? Вераськонэ пыриськизы Саша, Денис но Алеша, ваньзы Ижевскын улӥсьёс. Дискотека соос понна шутэтскон но астэ возьматон. Пиослы кельше яркыт буёло тылъёслэн ӝуамзы. Кызьы бен дӥсясько городысь егитъёс эктон ӝытъёсы, кызьы шутэтско, кыӵе кырӟанъёсты кулэ каро? Та юанэн вазиськисько пиослы. - Городын улӥсь егитъёс крезьгурлэн стилезъя люкисько пӧртэм гурппаослы, реперъёслы, гопъёслы, хиппиослы, пацифистъёслы, - валэктӥз Саша. - Котькуд стильлэн аслаз дӥсяськон сямыз. Реперъёс, кылсярысь, дӥсяло кус уллапалтӥзы возиськись паськыт штаниос, кузь дэремъёссэс вылтӥз лэзьяло. Йыразы толалтэ "чулок" изьыяло, гужем - картуз, пыдъёсазы кроссовкиос кутчало. Реперъёсты мукет сямен пофигистъёс шуо на. Соослы пӧсь но, кезьыт но ӧвӧл дӥсяськемзы пумысен мукетъёсызлэн малпанзы. Одӥг кылын вераса, реперъёслы ваньмыз "пофиг". Дискотекаын кырӟан лэзьяло соизлэн яке таизлэн группалэн куремезъя. Кинлы ма, реперъёслы - реп, металлистъёслы - металика, гопъёслы - ТЕХНО. Шутэтско "на полную катушку", шуэм сямен. Быдэс дсикотека ӵоже эктыса жадёнтэм понна, егитъёс пӧлысь куд-огез ЛСД наркотик таблеткаосты ньылыло. Тросэз вина юо. Эшезлэсь веранзэ будэтыса, Денис йылтӥз на: - Куд-огез "экстази" сиё. Кужым сётэ, шуо. Аслам шӧмъяме ӧвӧл, уг тодӥськы. Сыӵе ымнырыз Ижевскысь егитъёслэн эктон дуннезылэн. Мынам малпамея, со чик но адямилыко ӧвӧл, угось городысь гурппировкаос ӵем дыръя куспазы уг тэро, керетон, жугиськон ӝуто. Вылаз ик, йырсазьзэс сура наркотик - туала вакытлэн тужгес но кышкыт тушмонэз. Инмарлы тау, гуртэ та сьӧд омыр ӧз вуы на. Сундурысь вань егитъёс дӥсясько ӧдӥг выллемгес, ог-огзылэсь висъяськытэк, огшоры. Нош татчы но вуизы ке мылкыдэз бурдъятӥсь таблеткаос, крезьгур стилья люкиськон сям, "чулка" изьыос, пась пыдэсо джинсаос? Сундуръёс ыштозы асьсэлэсь ымнырзэс, ӝужалозы ог-огеныд керетонъёс, ӝугиськонъёс, пинал сюлэмъёс измозы ук, сьӧдмаськозы. Кытысь азьланяз тӧл пельтоз - дыр возьматоз. Нош али со пельтэ шунды пуксёнысь, трос уродзэ но кырсьсэ вайыса. Андрей Климентьев, Удмурт кун университетысь студент. ДУРБАСЬТӤСЬ Кызьы тодмо, 1994 арын кутэмын вал "Басьяськисьёслэсь правооссэс утён сярысь" Закон. Со дыре ик котькуд ёросын кылдытъязы басьяськисьёслэсь правооссэс утёнъя отделъёс. Адямиос капчиен шокчизы: табере ческыт сиён вӧзы ватсаса сисьмем чорыг уз сётэ ни, шекен басьтэм пальтодэ ӟеченыз воштозы яке дунзэ берыктозы. Зэм но, отделъёс кылдэм бере, нырысь нуналъёсаз ик отчы калык ӝожтӥськонъёсыныз вуыны кутскиз. Селта ёросын сыӵе ӝожтӥськонъёсты сэрттэ-пертче Наталья Гайрайхамовна Галиахметова. Мон солы кӧня ке юанъёсын вазиськи. - Кыӵе сюлмаськонъёсынызы вазисько тӥледлы адямиос? - Котькыӵеез вань. Али трос юанъёссы герӟаськемын коммунальной юрттэт понна дун тыронъёсын. Яке тани ӵемысь базарысь басьяськиськом бере, дӥськутмы я уг тупа, я шекен сюре. Ма кароно - берен кутозы-а, уз-а? Ӵошен мынӥськом вузкарись доры. Кылем арын вазиськиз кык воргорон - Кезысь 4 миллионэн турнан машина басьтӥллям. Толэзь ужаса, со тӥяськем. Машинаез вузасезлы ик берыктыны быгатӥм. Пӧям басьяськисьёс зынмем чорыген но сэзъяса лыкто. - Магазинъёсты, базаръёсты сяна, мае ке чакласькоды на-а тӥ? - Банкъёсты сяна, ваньзэ. Коммунальной, бытовой юрттэт сётӥсь но мукет организациосты, кудъёсыз калыкен ужало. Одӥг пол чагиськизы: "Бакчаямы, кыед интые, сюй кисьтӥзы. Ми кыед понна дун тырим". Ветлӥм, эскерим: зэмен но, тросаз сюй. Интыяз кыед вайыны косӥм. Апреле кӧня ке нунал ӵоже Кыйлудын вузы ӧй вал - кивалтӥсьсы пытсам. Отчы потаммы бере, югдур тупатскиз. Чагиськонъёс вал бытовой юрттэт сётонъя предприятиысь телевизоръёсты тупатъясьёс вылэ.Тупатъян борды арен уг басьтӥсько вал. Квитанциос шонер гожъямын ӧвӧл, кыӵе дыр ӵоже тупатоно пусйымтэ, соин ик уг вырӟо. Кивалтӥсенызы вераськем бере, соос чырткемгес ужаны кутскизы. - Чагиськонъёсты сэрттыкуды-пертчыкуды, тӥ кузёосын керетоно луиськоды. Уд кышкаське-а синазькыль каремзылэсь? - Уг. Мон адямиослэсь кулэяськонъёссэс быдэсъясько, соослы юрттыны тыршисько. Милям куронъёсмы законъя. - Кулэсмизы-а басьяськисьёслэсь правозэс тӥян учыръёс закон кутэм бере? Тодо-а адямиос асьсэлэн правооссы сярысь? - Азьло нимысьтыз информационной нунал ортчытъяськом вал: калыкез законлэн пуштросэныз тодматылӥм. Со бере телефонмы ӧз чалмылы. Вузкарисьёс али тыршо законъя ужаны, дышетско басьяськисез гажаны. Солэсь правооссэ тӥян учыръёс шергес луо ни. - Городын дасо кукей понна но судэ вазиськыны дасесь. Со уксё поттон амаллы пӧрме. Вал ни-а тӥляд чагиськисьёстылэн судэ вазиськемзы? - Ӧм, судозь ми ӧм вуэ на. Та дырозь кызьы ке ваньмыз куспамы вераськыса пӧрме. Калык ужаммылы уг ӝожтӥськы. Наталья Гайрайхамовна азьло райпоын товаровед луыса ужамын. Ӟеч тодэ вузкарон удысэз но, огшоры калыклэсь куронъёссэ но. Соин ик ӝегатскытэк сэрттэ-пертче котькуд вазиськонэз. Ёросысь басьяськисьёслэн со нырысетӥ дурбасьтӥсьсы. З. РЯБИНИНА. Гурезьлэсь ӝужытсэ тубыса валалод Шаерысьтымы школаос пӧлын куинетӥ арзэ ини ӟырдыт нюръяськон мынэ "Школа года" ним басьтон понна. Нош куд-ог районъёсын сое нырысетӥ арзэ радъязы, кылсярысь, Кизнерын. Районысь тужгес но устоез лыдъямын Вуж Бодья шор ёзо школа. Аспӧртэмлыко школа Бодья школаез адӟыса, сокем ӧм пайме вал, нош пушказ пырыса абдрамыгес. Коридорын пӧртэм пумо шудонъёс сыло, кудъёссэ школаосын удгес пумита. Урокъёс вискын пиналъёс шашкиен, шахматэн, бильярдэн шудо, армреслинген выро (суй кужымзэс эскеро), телевизор учко яке магнитофон кылзо. Школаын нимысьтыз дышето валеология предметэз. Нуэ сое Лидия Николаевна Макарова. Валеология - тазалыкез лул-мылкыдэз утьыны, калыкен улыны дышетӥсь наука. - Валеологиез туж ӧжытэз дышетэ - городъёсысь куд-ог школаос гинэ, - шуэ Лидия Николаевна. - Нырысь асьмеос тыро-пыдо дышетским, Ижевске ветлыса. - Ужаны, улыны мылкыдмы выльысь ӝутскиз кадь, - мукетъёсыз дышетӥсьёс вераськонэ итӥсько. - Огвыллем улон ӝог акыльтэ, вылаз ик, уждун ӝегато, методической литература понна коньдон уг тыро ке. Нош табере выльзэ утчаськом быдэс коллективен. Пӧртэм тестъёсъя тодон-валанмес эскериськом, кулэезъя муромытӥськом но. Эсьмаса, урокъёсы но капчи мылкыдын ветлоно. Дышетӥсьёсты сюлэмшугъяськытэ пиналлэн школазэ йылпумъямез бере улонэз. Азьвыл аръёсы ог 50 процентэз выпускникъёссы вылӥ дышетскон заведениосы пырыло вылэм, нош али? Бен, бодьяос Москва, Глазов, Ижевск городъёсысь вузъёсын дышетско ик, но арысь аре ӧжытоме соослэн лыдзы. Куд-ог студентъёс, вань шуг-секытсэ ортчыса, выльысь гуртазы берытско. Пиналлы секытэн сётско нырысетӥ аръёсыз. Таӵе валантэм бугырес улон дыръя ваньмыз йырын-чукин берытске. Пурысь ӵын пӧлы, егитэз гинэ ӧвӧл, мӧйы адями но йыромыны шеде. Оло соин но, гуртысь егитъёс ӵем дыръя нокинлы кулэ ӧвӧл кадь. Дышымтэ на тӧллы пумит вамышъяны, асьсэ данзэс утьыны, шуге-леке сюремысь потыны, гуртлэн палэназ асьсэ понназы улыны. Бен, гуртоослы туннэ котыр ласянь секыт. Уждун дыраз басьтымтэен, тросэз воргоронъёс аракы бекчее выемын, нылкышноос - гурт уже. Пиналлэн улонэз быдэсак школа вылэгес погыльтэмын кадь. Арысь аре уродме пиналъёслэн тазалыксы. Школаын дышетскисьёс ог 10 процентэз гинэ нокыӵе висёнъёстэк йылпумъяло. Ваньзэ лыдэ басьтыса, Кизнер районысь Вуж Бодья школаысь дышетӥсьёс юн кусып возьыны ӧдъязы Медициная академиысь Лариса Сергеевна Исакова профессорен. Уго валеологиез дышетон тужгес кулэ каре медицинаен эшъяськемез. Профессорлэн юрттэмез улсын котькуд пиналлэсь тазалыксэ эскерыса, нимысьтыз карточка усьтӥзы. Котькуд классын одӥг часлы йылэтӥзы физкультура урокез. Программая кык час кулэ ке, куинетӥзэ валеолог ортчытэ. Пиналъёс, висёнъёссэс чакласа, группаен-группаен люкасько но нимысьтыз упражнениос лэсьто. Мукет дышетӥсьёс но мылысь-кыдысь пырисько. Кылсярысь, кыкетӥ, ньылетӥ но куатетӥ урокъёслэн 18-20 минутъёсаз коридоретӥ ортчись чингыли куара дышетӥсьёслы тодаз вайытэ физкультминутка ортчытон сярысь. Школаын вань на эмъян кабинетсы, чаклало усьтыны тазалыксэс юнматонъя зал. Нялтас верало на, гриппен висисьёс та школаын туэ туж ӧжыт вылэм. Тазалыксэс юнмато на парем чаен. - Ужамы нырысетӥ инты басьтэ тазалык, - шуэ валеолог. - Ӵемысь ӧтьылоно луэ Ижевскысь но эмъясьёсыз. Анай-атайёс со шоры пӧртэм сямен учко, валэктон уж нуиськом ке но. Малпало, лэся, вакчи дыр куспын висись пиналэз йӧнатом шуыса. Бен, одӥг нуналскын висисез уд эмъя. Соин ик ми тыршиськомы пиналлэсь тазалыксэ утьыны, солэсь психиказэ валаны, аслыз осконзэ юнматыны. Шумпотоно, огыр-бугыр улон бодьяосыз уг кышкаты. Шуг-секытъёс пумисько ке, палэнскыны уг дырто. Быдэсто ваньзэ кенешыса, котыр ласянь эскериськыса гинэ. Огкыл шедьтыса ужамзы ваньзылы пайдаен берытске: пиналлы но, дышетӥсьлы но. Тыршод - ванё луод Шаерысьтымы тросэз школаос куашкан калэ вуэмын, коньдонзы уг окмы гожъяськон мел басьтыны гинэ но. Зэм, куд-ог агрошколаос, оло, асьсэды сюдыны быгато ик, нош огшорыосыз ӵем дыръя кураськоно луо. Кин юрттоз - колхоз, роно?! Бодьяос шудлэсь инмысь усемзэ ӧз вите, нокин дортӥ йыбырттыса но ӧз ветлэ. Вылаз ик, колхоззы куашкан калэ вуэмын. Соин асьсэос уж борды басьтӥськизы но ванё луизы. - 39 гектар музъеммы вань, - шуэ школалэн директорез Антонина Юрьевна Шитова. - Со милям сюдӥсьмы но, вордӥсьмы но. Олома но будэтыса ум курадӟиське, картофкаен коньдон поттыны тыршиськом. Азьло аръёсы будэтэм емышмес капчиен но дуноен вузаны луэ вал. Ӵемысь Сибире келяллямы, коньдон но дыраз басьтыны быгатылӥм. Соку ик школалы трактор но, машина но басьтӥм. Ма, туэ но ужаммылэн пайдаез шӧдӥськытэк ӧз кыльы. Картофкамес вузамы психиатрической больницае, Кизнер посёлокысь нылпи садъёсы но столовойёсы, нош ӝынызэ асьмелы сиыны но кидыслы кельтылӥм. Ушъяськем кадь медам лу вылэм но, ми асьмеды асьмеос сюдыны быгатӥськом. Кутскем ужзы борды бодьяос котьку гижысь-пиньысь басьтӥсько. Со быдӟа музъемзэс, куинь-ньыль нунал куспын яке тужгес троссэ арня ӵоже окто-калто, пе. Кожалоды, школаязы пиналъёссы укыр уно яке комбайнэн ужало? Ӧвӧл. Соос гызмыльтыны уг ярато, кылзылы но зэмос кузё луо, сӥзьыл картофка вузаса, 17 сюрс манет тыр барыш поттӥзы. Школалы буёло телевизор басьтӥзы. Кизнер район столицамылэсь кыдёке интыяськемын. Пиналзэс кытын ке дышетон понна, анай-атайёслы трос коньдон кулэ сюрес дунлы гинэ. Таяз учыре но бодьяос мукет амал шедьтӥзы. Пиос школаын дышетскыса, профессиональной училищеын сямен ик трактористлэсь правозэ басьто, нылъёс - нылпи садын ужасьлэсь свидительствозэ. Гуртысь школаын ужзы ӧръяськемын, нош азинсконъёс басьтыны юрттэ, луоз, дышетӥсьёслэн пиналъёсын кенешыса ужамзы, Антонина Юрьевналэн быгатыса кивалтэмез. Ог-огзылэн тодон-валанъёсынызы тодматско но эшлыко кусыпъёс возё Можга районысь Бадӟым Кибья но Пичи Пурга районысь Гожня школаосын. Пукись ву пыкме шуо. Туннэ нуналлы ачид ваньбур поттыны ӧд тыршы ке, нокин тонэ уз жаля, нош инмысь дасьсэ витид ке, сютэм но кылёд. Ванез уд паймы кытчы карыны, ӧвӧлэзлы ӟудоно. В. Кутузова. Вуж Бодья школа. Валеолог Л. Н. Макарова. Школалэн директорез А. Ю. Шитова. Урокъёс вискын. Туспуктэмъёсыз В. Камашевлэн. АЛЕКСАНДР ВОЛКОВ - МОСКВАЫН Кун Кенешлэн Тӧроез Александр Волков Москвае кошкиз. Со пыриськоз Россия Федерациысь Федеральной Собранилэн Федерацияя Кенешезлэн ужаз. Россиысь парламент вылӥ палатаяз 19 ужпум эскероз. Соос пӧлын федеральной законъёс - "Россия Федерациын бюджет кусыпъёсты выльдон сярысь", "Музъем сярысь кодекс" но мукетъёсыз. Кун Кенешлэн Тӧроез вылӥ кивалтӥсьёсын пумиськыны чакла. Удмурт Республикаысь Кун Кенешлэн пресс-службаез. КИБАШЛЫОСМЫ МОСКВАЫН ЮНЕСКО-лэн ӵектэмезъя, Москваын май толэзьлэн кутсконаз "Калыкез дышетон-98" конгресс ортчиз. Пумиськонын пыр-поч вераськон мынӥз пӧртэм странаосын калыкез дышетон удыслэн азинскемез сярысь. Соин ӵош ик радъямын вал пӧртэм ужрадъёс но. Адӟытонэ аслэсьтыз ужъёссэ нуллӥз Удмурт кун университетысь искусствоосъя факультет. Ветлӥз "Модаосъя театр", нуллэмын студентъёслэн дипломъёссылы дасям, озьы ик та факультетысь преподавательёслэн ужъёссы. Огкылын вераса, возьматэмын шаермылэн декоративно-прикладной искусствоез. Асьме ӧнерчиос та пумиськонын ӟеч кусыпъёс тупатыны сюлмаськизы финн-угор странаослэн - Финляндилэн, Венгрилэн но Эстонилэн - Москваысь посольствоосазы ужасьёсын. Асьме выжыысь калыкъёс выставкае ваем ужъёслы умой дунъет сётӥзы. Татын ик кенешемын вал: Удмурт университетысь кибашлыослэн ужъёсынызы адӟытон матысь дыре усьтӥськоз Венгрилэн Москваысь культурая центраз. Б. НИКИТИН. Политикаын ужпумъёс Россияе пыӵалоз-а капитализм? Дас арлэсь кема асьмеос выжыны выриськом ни рыноке но капитализме. Нош югдур тупен уродме. Большевикъёс кивалтон дыръя, экономикаын выль политика (НЭП) вакытэ, Россия вормыны быгатӥз дуннеысь войналэсь но граждан ожлэсь кӧшкемыт бервылъёссэс, калыклэсь улон-вылонзэ умоятӥз кунлэн историяз ноку вылымтэ ӝоглыкен эксэй кузёяськон дырез но, туала аръёсты но басьтыса. Мар луэ туннэ? Огъя ваньбурез киултон Дуннеын кыкетӥ тылож (война) йылпумъяськыса, Германия вить ар куспын улӟытӥз куашкатэм хозяйствозэ но султӥз экономиказэ чутрак ӝутон сюрес вылэ. Совето Союз но таӵегес вакытэ бурмиз. Туннэ, солэсь ӧжытгес дыр быдтыса, музон югдуре выжо ни Европаысь социализм лэсьтӥсь азьло кунъёс но Прибалтика. Асьме страна гинэ, тужгес - узырез но визьмо калыкоез. СНГ-ысь сыӵегес ик сямо вынъёсыз-сузэръёсыз музэн, весь выё. Кивалтӥсьёсмы уродэсь-а? Нош выльдӥськон кутскем бере, кӧняез воштӥськизы ни! Люкетӥз Вылӥ Совет - уллязы, патронъёсты но снарядъёсты жалятэк. Люкетӥз властез люкылон, парламент - быдтӥзы, Конституциез тӥяса. Люкетӥз коньдонлэн дунтэмамез (сое кортан но - ӝутском, коньдон шедьтом) - зӥбизы инфляциез, со понна дугдӥзы уждун но пенсия тыремысь, куашкатӥзы тазалык утёнэз, дышетонэз, наукаез. Правительствоез берлогес курдатэк "сётӥзы" Чубайслы. Озьы ке но, экономика весь шальтра. Германиысь "Райнише пост" газет оскытэ: выльдӥськонэз куашкатӥз Россиысь Правительство. Со кунэн кивалтыны быгатымтэзэ возьматӥз дуннеысь тужгес узыр странаез пыд йыл кельтӥз. Озьы луыны кулэ ӧвӧл? Кунын тупатэмын ке улыны быгатӥсь радлык (строй), нокыӵе правительство странаез уг тарка. Улыны быгатӥсь котькудӥз радлык амал шедьтэ кивалтонлэсь висъяськыны но ассэ утьыны. США-я но Канадая институтлэн директорез Сергей Рогов юа: Россиялы тупа-а Америкалэн радлыкез? Асьме реформаторъёслэн кыӵе сюрес быръемзы шоры учкытэк, дыр луиз та выллем юанэз чутрак мургес пуктыны: Россияе пыӵалоз-а капитализм? Тупамон-а Россия капитализм понна? Таӵе юанъёслы валэктон понна чаклано туж огшоры кусыпез. Социализм лэсьтӥсь азьвыл странаосын капитализм каньылъя выжы лэзе. Маин бен соос Россиялэсь пӧртэмесьгес? Син шоры соку ик йӧтэ: асьме дорын кылдытэмын туж кужмо секыт промышленность, соос дорын ӧвӧл. Кызьы бен сое нимаз кузёослы визьмо (приватизация ортчытоно)? Укыр бадӟым коньдоно адямиос ӧвӧл. Со понна вань музон пӧртэмлык юн азинскем кивалтон ёзъёс - номенклатура. Таиз чаляк ятвылтӥз: капитализме выжон - астэ утён. Со ӧз лэзьы приватизациез кыкетӥ сюрестӥ ӧдъяны - огъя ваньбурез ужась коллективлы сётыны. Номенклатура дунъёсты эркынак лэзе, калыклэсь коньдонзэ огшоры бумагалы пӧрмытэ - кулаке поттыса тарка кадь. Озьы адямиосты палэнэ акциосты басьтон понна нюръяськонлэн. Вылаз ик, дунъёс будэм чотын узырме на. Собере кун предприятиосъя ваучеръёс но акциос поттэ, кунлэн ик коньдонэныз соосты басьтэ, приватизацие сюрем ваньбурлэсь дунзэ кулэстыса. Озьы огъя ваньбур киултэмын йыртэмаса сямен. Кивалтӥсьёс соку ог-огзэс сайязы. Министерствоосысь но комитетъёсысь адямиос озьы ик асьсэ предприятиоссылэсь акциоссэс лушказы. Соку приватизация интые пӧрмиз номенклатура ласянь коллективизация мактал. Сыӵе югдурын госаппарат но экономика сюро йыртэмасьёс улэ, монополия (огнын кузёяськон) юнма. Вожвылъяськон (конкуренция) быре. Монополиос номенклатура пыр огазеясько кун властен но вормонтэм золало. Номенклатура тужгес тунсыкъяське музъем узырлыкъёс поттонэн. Малы ке шуоно, татын вузкарыса, уногес валюта жильдыны луэ. Музъем узырлыкъёсты ужатонэн (разработкаен) вырись промышленностез номенклатура но кун ас эрказ лэзё. Соку коньдон лекос чаляк дунтэма - гиперинфляция пуроме. Ваньбур поттон кулэстон вакытэ инфляциез зӥбыны луэ, уждунэз но пенсиез сётытэк, кунлэсь куронъёссэ (заказъёссэ) быдэсъян понна дун тырытэк. Кун пушкысь замок куашка. Россиын капитализм султэ зэмос капитализмлы пумит. Кун пушкын замок кулэ ӧвӧл ни бере, со капитализм шат? Озьы огазеясько социализмлэн но капитализмлэн тужгес урод "сямъёссы". Социализмлэсь кылемын таӵеосыз: чиновникъёс ласянь котькытын кузёяськон, ӧвӧл предприятиослэн зэмос кузёоосы, вожвылъяськон но эрик рынок. Капитализмлэн: котькыӵе амалэн барыш поттон, ужасьёсты лек зӥбон, инкуазь узырлыкъёсты таркан, культураез но ӟеч сямъёсты быдтон. Номенклатуралы власть бордысь люкемын ӧй вал бере, Россия выжыны кулэ вал ӵапак таӵе сюресэ. 1991-тӥ арын сое зӥбыны луысал, властьлэн вань ёзъёсаз быръёнъёс ортчытыса. Нош тазьы лэсьтыны ӧз лэзе Борис Ельцин но вӧзысьтыз номенклатура. Тазэ власть бордысен палэнскыса, луонлык кылдысал предприятиосты но коммерциен вырись учреждениосты ужась коллективъёслы вузаны. Соку азинскысал мукет, капитлаизмен герӟаськымтэ радлык (строй), демократия юрттысал нимаз адямиослэсь удысъёссэс азинтыны. Капитализм лэсьтон амал зӥбиз шонерак вераса - кекатӥз (налогъёс, бандитъёс, чиновникъёс но инфляция пыр) ваньбур поттонысь но лэсьтӥськонысь пичи предприятиосты. Соин сэрен кылдэ шор класс шуон, таизлэн огсыр азинскись капитализм. Вылаз ик, сыӵе классэз быдтӥз Егор Гайдарлэн дунъёсты ас эрказы лэземез. Соку векчи ужбергатӥсьёс (предпринимательёс) куашказы. Капитализмлы Россиын азинскыны уг юртто куанересь крестьянъёсмы но. Соос юнэсьгес но тросгес луысалзы ке, огыр-бугыр вакытэ секытэсь шуккетъёсты небӟытысалзы асьсэ пӧлысь ӝутысалзы узыр фермеръёсты но ужбергатӥсьёсты, паськытатысалзы шор классэз. Калыклы "думем" улон Али мадим Россиысь экономикалэсь но улон-вылонлэсь аспӧртэмлыкъёссэс. Соос ик юн люкето капитализмлы азинскыны. Но вань ук мукет пӧртэмлыкъёс - историен но адями сямъёсын герӟаськемъёсыз. Тодады ваелэ таӵе учыръёсты. Эксэй Россиын капитализм кузёяськиз ог 30 ар гинэ. Со куспын вуттӥз кык революцие - 1905-тӥ арын но 1917-тӥ арын октябре. Отчыозь капиализм азинскиз пӧртэм интыосын, но отын солы такем ӧз пумитъяське. Россиысь адямиослы капитализм уг тупа вылэм. Малы? Кемалась дырысен татын вал общинаос, артельёс, кооперативъёс. Капитализм котьку герӟаське властен, сюлмаське вылӥос сярысь. Нош таосыз Россиысь калыкен котьку тушмонъяськылӥзы. Федерациысь соку гинэ ӵогиськем старанын ӧй вал шор класс но крестьянъёс. Россиыс 80 процентэз адямиос улӥзы сютэм, курадӟизы музъемтэк. Данакезлэн предприятиослэн кузёоссы кунгож сьӧрысь вал. Соос барышъёссэс отчы выжтылӥзы. Сыӵе капитализмлэн Россиын пыкетэз ӧвӧл. Калык сое мурт но синазькыль карылӥз. Отрчем 70 ар ӵоже адямиос капитализмез копак вунэтӥзы но ӧз яратэ. Соос малпазы социализмез калыклы матэгес но "адямиез яратӥсь" карыны, улон-вылонзэс умоятыны, социализмлэсь яркытэсь ӧтёнъёссэс зэмос улонэ пыӵатыны. Мон верасько огшоры ужасьёс сярысь. Калык борды капитализмез "думизы" кужмысь, мукет сюресъёс пумысен кенешытэк но референдум ортчытытэк. Рос-прос учконо вал огзэ коть ужпумез - кун предприятиосты но учреждениосты ужась коллективъёслы сётонэз. 1990-тӥ арын СССР-ын кылдӥз Ужась коллективъёслэн союзазы (ужъёсаз мон но пыриськылӥ). Со огазеяз быдэсак сямен секыт промышленностез но вӧзысьтыз наукаез, 70 процентсэ устооссэ но визьмооссэ инженеръёсты но ужчиосты (рабочийёсты). Ваньмыз веразы: предприятиосты но наукая учреждениосты сётоно ужась коллективъёслы, отчы демократия амалэн тупатоно аскиватон (самоуправление). Али, 90-тӥ аръёслэн пумазы. Огазеям Нациослэн Организациосьтызы но мукет интыосысь социологъёслэн эскеронъёссы возьмато: Россиысь 3 пӧлысь 2-ез пумит луо рыноклы. Малы? Соослэн валамзыя, рынок - со капитализм. Малы Россиысь калыклы уг кельшы капитализм? Ужбергатонэ пыриськемъёс но, вылӥын реформаосын вырисьёс но лыдъяло: капитализм сётэ капыръянлы эрик. Адямиос оско Советъёс вакытэ империализмлы сӥзьыса лэсьтэм суредъёслы: отын кузёясько, коньдон но сьӧсьёс. Сыӵе капитализме выжон, валамон ини, куашкатӥз данаксэ ӟеч сямъёсты. Ӵошатом югдурез. Эксэй вакытысь фабрикантъёс но вузчиос (купецъёс) сокем адӟем карымонэсь ӧй вал. Нош соос тушмонъёссэс палэнтон вылысь ӧз медъяллялэ рэкет шуонъёсты, адями виисьёсты, "липетъёсты" но музон шырмачъёсты. Россиысь чиновникъёс котьку лушкаськылӥзы но кузьым портылӥзы. Но йыртэмасьёсын меӵак ӧз герӟаськылэ но миллиард манетъёс ӧз люкаллялэ. Асьме чиновникъёслэсь но капиталистъёслэсь сямъёссэс яркыт возьмато "Известия" газетын печатлам лыдпусъёс. Азинскем кунъёсысь йыртэмасьёс пыр поттӥське 8-10 процентэз ваньбур. Россиысь Югдурез утёнъя министерство ивортэмъя, асьме дорын та лыдпус вуэ 40-60 процентозь. Газет оскытэ: сыӵе экономика быдэс кунлы кышкытлык кылдытэ. Мон ватсало: капитализме выжыны вырон сыӵе урод югдуре вуттӥз - зэмос капитализмез палэнтӥз но Россие капитализм уз пыӵа шуыса возьматӥз. Ум вунэтэ: ӟеч сямъёсын ӵош быре визь но. Туала югдурез чакласа курдано: элита шуонэ пырисьёсмы уллёен-уллёен шузимо кадь. Сое валан понна, странаысь дырын-дырын кошкылоно но югдурез ӵошатоно. (Алигес курдатъяськизы ядерной оружиез нырысь ик кутонэн). Сыӵе аспӧртэм висён уродмытэ ӝужась капитализмез но, улон-вылонэз но. Асьмелы дыр вуиз тани мае валаны. Ваньмыз туала шугадӟонъёс но гижлоос, шудтэм учыръёс, тырмымтэос, выльдӥськонлы люкетӥсь шуг-секытъёс - ваньбур поттонэз кулэстон, уждунэз ӝегатон, Ельцинлэн ачимъяськемез, наукаез, армиез но культураез куашкатон - котьма возьматэ: Россия но отын улӥсьёс уг тупало капитализмен, капитализм уг тупа соосын. Тодады ваелэ ай азьвылгес, кужмо черекъясьёсмес: ойдолэ берлань, быдэс дуннеез валтӥсь югыт сюрес вылэ! Али чалмизы. Малы ке шуоно, Россия сюриз сыӵе кӧшкемыт югдуре - дэймымон уйвӧтын но уд адӟы. Аскивалтонэз пыӵатон Мон уг оскытӥськы, ӟучъёс ас выжызыя капитализмен уг тупало шуыса. Татын нырысь инты басьто страналэн аспӧртэмлыкъёсыз. Со интыяськемын шунды ӝужан но шунды пуксён вискын, чидаз монголъёслэсь зӥбемзэс феодализмез, палдурес капитализмез. Пусъём созэ но: али азинскись кунъёс озьы ик капитализмен уг эшъясько. Вьетнамын, Китайын, уй пал Кореяын, Кубаын социализмез утё. Вьетнамын но Китайын азинто. Мар бен кыдёке ветлонэз? Лымшор Италилэн нокызьы потэмез уг луы ёрмонысь но йыртэмась дуннеысь. Уй пал Италиын кылдӥз ни лымшор Италилэсь люкиськонъя огазеяськон но. Лымшор Италия секыт гира музэн ошиськемын кун борды. Бере кылемезлэн мугъёсыз тодмоесь, Россиын кадесь: отын кема кузёяськизы муртъёс но феодалъёс. Капитализмлэн шекъёсыз шараясько... азинскем капитализмын но. Аристотель бере 23 даур ортчыса, Френсис Фукияма ялӥз: капитализм - историлэн пумыз. Озьы веран лекос мыдланес ук! Капитализм историлэн пумызлы пӧрмоз одӥг учыре гинэ - музъем вылысь вань адямиосты быдтӥз ке. Фукияма пала дурбасьтӥсьёс шуо: капитализм котькудлань воштӥськыны пишмытоз. Япониын но Америкаын со чылкак пӧртэм ук. Азинскем кунъёсын со пӧрмиз капитализм бере кылдэм радлыклы (стройлы). Борис Немцов кылпум ӝутэ ни адями ымныро но калык капитализм сярысь. Ваньмыз со пӧяськон яке астэ алдан. Капитализм котькытын но котьку утиз но утёз кык аспӧртэмлыксэ - медъяса ужатонэз но узырлык понна вожмаськонэз. Соку быдтыны яке ньылыны выроз рынокысь вожвылъёяськонъёсты но ӵошатсконэз, котьмалэсь вылӥе ӝутоз узырлык люканэз, адямиез но инкуазез лыдъялоз барыш поттон тӥрлыкен. Медъяса сямен ужатылӥзы социализм вакытэ но. Но таӵе социализм матын вал зэмос капитализмлы, госкапитализм шуонлы, уката ик Сталин кулэм бере. Вошъяське-а шунды пуксёнысь (западысь) капитализм? Берло 30-40 ар ӵоже пумен юнгес кузёяське нимтэм (кинлэн луэмзэ валантэм) узырлык. Сое азьмынӥсь но адямиез жалясь шуыны туж шуг! Мар бен воштоз капитализмез но туала социализмез? Солы ним шедьтон - кыкетӥ сюлмаськон. Нырысь ик шонер дунъет сётоно Октябрь революцилэн историын интыезлы, пуштросэзлы но асьмелэн капитализмен тупамтэмылы. Азьпаламы кык гож - ужез мозмытон но демократиез азинтон. Куке соку кузёяськиз рабъёсын радлык (строй). Ужась кужым - раб но солэн ужаса поттэм емышез - кузёлэн ваньбурез. Сыӵе радлык уно дауръёс ӵоже утиськиз но ноку куашкантэм вал кадь. Тазэ воштӥз феодализм. Кузёлэн ваньбурез-ваньбур поттон тӥрлык, музъем, ужась киос но медоослэн ужам емышсы. Россиысь феодализм матын вал рабстволы, крестьянъёс - рабъёслы. Вуиз капитализм. Ваньбур поттон тӥрлыклэн кузёезлы кылиз на медоослэн ужзылэн емышез гинэ. История солань-талань шонаськиз ке но, адями но уж пумен эрикоесьгес луизы. Дуннеын нокин но уз шедьты сыӵе муртъёсты, кудъёсыз дугдытылсалзы таӵе мозмытсконэз. Куке-соку кылдыны кулэ таӵе радлык: ужлэн емышез луоз ужасьлэн асваньбурез, соку быроз медъяса ужатон, адями копак эрик басьтоз. Сыӵе муртлэсь ужам емышсэ нокин но киултыны уз быгаты. Уж лэсьтэмын ке мукетызлэн яке кунлэн тӥрлыкенызы, адями сыӵе кузёослы тырыны кулэ аренда понна яке тӥрлык пӧсьтэм (амортизация) понна дун. Емыш луоз сое кылдытӥсьлэн исантэм асваньбурез. Асваньбурлэн пуштросэз озьы ик воштӥськоз. Тыршыса поттэм ваньбурен ӵош мукет кие выжыны кулэ тӥрлык но. Тазэ выльдозы ук тыршисьёслэн коньдонзы чотын. Шунды пуксёнын кылдэ ни ужаса улӥсьёслэн огъя асваньбурзы. Предприятиын яке учреждениын ялан ужасьёс пӧрмо солэн кузёосызлы. Озьыгес ик азинскоз демократия но. Нырысь со вал ичи адямиос понна. Собере - ваньбуро муртъёс понна. Отӥяз - воргоронъёс понна. Берлогес - кышноос понна. Али бырйыны правоез вань ваньмызлэн сямен калыклэн. Нокыӵе мугъёс уз люкетэ демократиез азинтыны. Со пыӵаны кулэ ужась коллективе но. Татын власть люкиськоз. Коллективлэн советэз - законъёс кылдытӥсь власть. Администрация - ужез быдэсъясь власть. Ревизиосъя но эскеронъя комиссия - судъясь власть. Озьы юнмалоз демократия амалэн ужась аскивалтон (самоуправление). Зэм, озьы пӧрмоз, асваньбур но ужаса поттэм ваньбур ваньмызлэн (группалэн) луизы ке. Со кунлэн политикаяз но экономикаяз выль пуштрос пыӵатоз. Кылсярысь, быръёнъёсын. Законъёс кылдытӥсь но ужез быдэсъясь властез адямиос сак эскерыны быгатозы. Экономикаын нырысь интыын уз луы ни ваньбур люкан. Сое воштоз котькуд адямилэсь улон-вылонзэ умоятон. Тазьы азинскон герӟалоз капитализмлэсь но социализмлэсь вань умой палъёссэс. Сое Андрей Сахаров таза конвергенция шуыса нимаз. Дунне но Россия Ойдолэ отчы-татчы шонаськытэк учком дуннелэсь азинскемзэ. 1917-тӥ арын Россиын пуромем революция турттӥз капитализм вамен выжыны. Бере кылем странаын бугырскон вуттӥз капитализмез чылкак палэнтон югдуре. Нимыз асваньбур интыын - кун асваньбур, рынок интыын - план, барыш (прибыль) интыын - поттэм ваньбур (вал), демократия интыын - диктатура (пролетариатлэн ӧвӧл - солэн нимыныз кузёяськись партилэн но вождьлэн). Утопизм но, марксизм-ленинизм но азьвылзэ быдтыса куштылӥзы. Сыӵе радлык (строй, формация) кема улыны уг быгаты, воштӥськыны ӧдъя. Россиын озьы вордскиз экономикаын выль политика (нэп). Соку капитализм пала огшоры чигнан гинэ ӧй вал. 1926-тӥ арозь 70 процентэз крестьянъёс огазеяськизы ас кожазы кивалтӥськись эштосъёсы (товариществоосы) но кооперативъёсы. Таосыз, нимаз адямиос сярысь, 30 процентлы тросгес барыш поттылӥзы. Кооперативъёс кылдылӥзы городъёсын но. Нялтас пусъём: Ленин но солы дурбасьтӥсьёс ӧз алдалэ крестьянъёсты - сётӥзы музъем но сое, мае ӧз но сӥзе вал - хозяйствоез нуыны эрик но рынок. Соос пӧязы ужчиосты (рабочийёсты), ӧз сётэ фабрикаосыз. Бухарин "Узырме!" дано ӧтёнзэ сӥзиз крестьянъёслы гинэ. Палэнэ кельтӥз ужчиосты но музонъёссэ. Таосыз узырмыны быгатысалзы, предприятиосты но учреждениосты нимаз группаослэн асваньбурзылы пӧрмытыса. Озьы луысал ке политикае демократия пыӵасал. Сталин нэпез ӧй кекатысал ке, странаез феодализме, госфеодализме ӧй берыктысал ке. Малы улон тазьы кошкиз? Бадӟымез муг таӵе: Россия дась ӧй вал ваньзэ выльзэ аслыз карыны. Азьлозэ палэнтыны гинэ капчи. Шӧдӥськиз кунлэн бере кылемез но. Дуннеын ӧй вал ӟечсэ гинэ огазеясь радлык, сое кылдытон но ужатон амал. Сыӵе учыре котькугес сюре сюрес лёгись страна. Сталин нэпез палэнтыса ӧтиз промышленностез ӝутыны. Мугез тодмо вал: котырак курдатъяськиз капитализм. Брежнев дыръя улӟиз буржуйёслэн контрреволюцизы. Кузёяськись власть но номенклатура огазеяськизы лушкемак йыртэмась бизнесэн. Сыӵе герӟет шара азинтӥськиз но йылпумъяськиз Ельцин вакытэ. Тодмо: уноез революциос йылпумъяськизы контрреволюциен. Соос, Россиын музэн ик, кема кыстӥськылӥзы, тусбуйзэс вошъязы, нырысь ӧтьылӥзы революцие, берло - копак мукет пала. Озьы ке но, контрреволюциос ноку уг пӧрмыто историез дугдытыны, куке-соку куашкало. Малы ке шуоно, вуж радлыкез выль улонлы тупамон карыны уг быгато. Асьме дорын но контрреволюциЯ кема уз возиськы шуыны луысал. Нош калыкмы лекос чидась ук. Со куасалтэмын, пумозяз жуммытэмын, ёрмонэн но аракыен уйжомытэмын. Туала контраос коросэ пырытозязы йыбырттыны кулэ Сталин эшлы. Со ук дурбасьтӥсьёсыныз ӵош калыкез люкиз огазеяськыны турттонлэсь но ас кужмызлы осконлэсь. Соос ке ӧй сюлмаськысалзы, капитализмез лэсьтонлы кемалась пум вуысал. Нош али пум вуыны быгатоз аслыз Россилы. Мон верасько калыклэн быремез сярысь - арлы быдэ кулЫЛЭ миллионлэсь уноез. Кун куашка, куинЕтӥ дунне шуон пала матэктэ, музонъёсыз улэ сюре. Тужгес кышкытэз - инкуазь но атом пуштон. Мукет сямен вераса, яке Россия палэнтоз капитализмез, яке капитализм - Россиез. Капитализмез палэнтон вуттоз-а граждан оже? Уз кадь. Туала кузёос ортчыт кырсесь но кышкасесь. Соослы дурбасьтӥсьёс туж ичи. Калык зэмен ик сайказ ке, солы йӧн-йӧн пумитъяськись уз луы. Йылпумъяса пусйыны кулэ: шунды пуксёнын берло 30-40 ар ӵоже шӧдскымон азинско капитализм бере кылдоно радлыкен тодметъёсыз - ужась коллективъёслэн предприятиоссы (медъям ужтэк!) но соослэн огазеяськонъёссы. Ваньбур поттонзэс сыӵеос будэто, барыш жильдон понна лекос уг вожвылъясько. Зэм, матысь дыре ик паськыт вӧлмозы шуыса оскон ӧвӧл на. Люкето туж бадӟымесь концернъёс но азгынмем сям. Дуннеын азинско шугадӟонъёс - инкуазь но солэн узырлыкъёсыз ласянь, калыклэн лыдыз йылэм ласянь. Соосты дугдыны капитализм уз пӧрмыты - ӝоггес быгатоз вань калыкез быдтыны. Асьме странаын ваньзэ умойзэ гинэ огазеясь радлык ӝогомытысал быдэс дуннелэсь азинсконзэ но утьысал вань калыкез. Озьы Россия азьын сылэ кык ужпум: юрттоно яке вань адямиосты утьыны, яке быдтыны. Вадим Белоцерковский. ДУНАЙ ШУР ДУРЫСЬ САЛАМ Та арлэн кутсконаз Гурт ужъёсъя удмурт научно-исследовательской институтысь тодосчиос ветлӥзы Венгрие. "Пеннон-Трейд" фирмаысь но куд-ог мукет организациосысь эшъёсынызы пумиськыса, Будапештын соос гурт хозяйствоез азинтон удысын ӵош ужанъя кӧня ке тупанкылъёс гожтӥзы. Табере дыр вуиз бумагае гожтэм малпанъёсты уж вылын быдэсъяны. Та нуналъёсы Иже вуылӥз Венгриысь делегация. Вылӥ верам фирмалэн кивалтӥсез Арпад Брани, докторъёс Гергей Кальмар но Ева Биро, асьме институтлэн ужаменыз куинь нунал ӵоже тодматскем сяна, трос дырзэс ортчытӥзы меӵак бусыосын. Ӵапак соос учкем-валэктэм улсын институтысь ю будэтонэн герӟаськем тодосчиос но рабочийёс Дунай шур дурысь вуттэм кык пумо чабей кизизы. Вордскем палъёсазы та юос гектарысьтыз 28-ысен 50-70 центнерозь (куазь удалтэм дыръя) тысь сёто. Табере элькунысьтымы учёнойёс сюлмаськозы та будосъёсты Кам котырысь куазьлы "дышетон" сярысь. Соос медаз кышкалэ асьме кезьытъёслэсь, кӧс яке мултэс зоро гужемлэсь. Отӥяз вылӥ удалтӥсь ю вуоз колхозъёслэн, совхозъёслэн но фермеръёслэн бусыосазы. Сӥзьыл венгр эшъёсмы вуттозы на эшшо одӥг пумо ЭКО-10 чабейзэс. Сое кын улэ кизёзы. Таиз но 70 центнерозь тысь сётэ. Нимысьтыз ик пусйыны кулэ на: вылӥ верам юослэсь вылӥ ӟечлыко пызь пӧрме. Отын белокез 20 процентозь люкаське, уно аминокислотаосыз. Соин ик, трос дасо пумо нянь, булкаос но мукетсэ пыжонын сяна, та пызез колбасаос но мукет та выллем сиёнъёсты дасянын кутыны луэ. Венгриысь но Удмуртиысь тодосчиос вераськизы кусыпъёссэс арысь аре юнматыны. Гужемлэн пумаз ик ини венгръёс нош ик лыктозы Иже, соос дорысь вуттэм но татын будэтэм юосты октон-утялтон ужъёсты радъян-юрттон вылысь. Н. ФЕДОРОВ. Картофка мерттыны кутскозы Берло нуналъёсы куазь чебер улэмен, бусы ужъёс но ӝогомизы. Туннэ нуналлы Вавож ёросысь хозяйствоос ӝыныезлэсь унозэ бусыоссэс кизизы ни. Соин ӵош ик мынэ трос аръем турынъёсты усыян, минеральной ватсэтъёс сётон. Районын эстӥськонэн ӝеганъёс уг луо. Сое басьто йӧл вузам чотынгес. Кызьы ивортӥз милемлы "Удмуртия" кооперативлэн тӧроез Аркадий Юшков, кизёнмы туннэ-ӵуказе йылпумъяськоз ни. Соку ик кутском картофка мерттыны. "Кыкетӥ няньмес" туэ будэтом 120 гектар вылын. Зэм, азьмынӥсь хозяйстволы но туала вакыт коньдонэн капчи ӧвӧл. Кылсярысь, Уваысь нянь басьтон предприятие та хозяйстволы кылем арын ю тысь вузамез понна 430 сюрс макет уксё берыктыны кулэ. Б. Сергеев. УДМУРТ РЕСПУБЛИКАЛЭН КУН ЗАЁМЕЗ СЯРЫСЬ УДМУРТ РЕСПУБЛИКАЛЭН ЗАКОНЭЗ 1-тӥ ёзэт. Социальной удысын но экономикаын ужпумъёсты быдэстыны но Удмурт Республикалэн экономикаяз инвестициосты кыскыны бюджетэ пырисьтэм коньдонэз кутон понна, 1998-тӥ- 1999-тӥ аръёсы поттоно Удмурт Республикалэсь кун заёмзэ - 500 000 000 (вить сю) миллион манет тыр облигациос. Соосты поттоно эмиссилэн проспектэныз юнматэм куронъёсъя но радъя, кудзэ пусъе Россия Федерациысь Коньдон ужпумъёсъя министерство. 2-тӥ ёзэт. Заёмлэн облигациосыз Россия Федерацилэн дуно кагазъёсыз луо, Россия Федерацилэн валютаеныз лыдъясько. Удмурт Республика обязательствоосызъя кыл кутэ Удмурт Республикалэн бюджетысьтыз коньдонэн но мукет кун ваньбурен (мукет активъёсын), кудӥз солэн асваньбураз пыре но кун предприятиос но учреждениос борды хозяйствоез нуон но ӝегатскытэк кивалтон правоен юнматэмын ӧвӧл. Облигациосты интыяса поттэм коньдонлэсь 50 процентсэ инвестициосъя программаосты но проектъёсты быдэстонэ ыстоно, соослэсь лыдзэс Удмурт Республикаысь Правительство юнматэ. 3-тӥ ёзэт. Удмурт Республикаысь Правительство ужрадъёс кутэ, Удмурт Республикалэсь кун заёмзэ поттон, интыян, бергатон но соосъя пунэмез одно ик нырысь берыктон понна, республикалэн бюджетэзлэн доходъя люкетэз чотын, Россия Федерациын поттэм вузъёслэн но юрттэтъёслэн ватсам дунзылы налогъёсты но предприятиослэн но организациослэн табышсылы налогъёсты пыртыса. 4-тӥ ёзэт. Удмурт Республикаысь Правительство облигациосын кун заёмез поттэм но сое вузаса люкам коньдонэз кутэм сярысь отчётсэ Удмурт Республикаысь Кун Кенешлы сётэ ӝыны арлы огпол яке ӵемгес. 5-тӥ ёзэт. Удмурт Республикалэсь кун заёмзэ поттоно, "Республикалэн 1998 арлы бюджетэз сярысь" Удмурт Республикалэн Законэныз юнматэм сюбегатонъёсты лыдэ басьтыса. 6-тӥ ёзэт. Та Закон кужыме пыре сое печатлам нуналысен. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 29 апреле. � 624-И. Туннэ бусыосын КЫРӞАЛО ТЮРАГАЙЁС, ЛУД ВЫЛЭ ӦТЁ СООС Куазь кезьыт ке но улэ, шаерамы бусы ужъёс нуналмысь кужмояло. Нош дыртыны мугез вань: туэ но, миым сямен ик, тулыс 1,5 - 2 арнялы бергес вуиз. Со кӧня ке дыр сётӥз гуртысь механизаторъёслы кизёнлы ӟечгес дасяськыны. Озьы ке но, котькытын кысык бусы ужъёсты огкадь умой ӧз пумиталэ. Республикаямы одӥг куиньмосэз техника выльдымтэ на. Хозяйствоосын арысь аре вужмо тракторъёс, комбайнъёс но прицепной техника, нош воштос ёзъёс басьтыны уката секыт луэ: нянь будэтӥсьёслэн уксёзы ӧвӧл. Тужгес но зол сюлэмшугъясько вал скаллы быдэ кык сюрс килограммлэсь ичи йӧл кыскись хозяйствоос. Но Правительство соослэсь ӧз палэнскы (сыӵе хозяйствоос угось трос гинэ люкасько), 3,5 миллион манет кредит сётӥз. Сое берыктонэз ас вылазы басьтӥзы районъёсысь администрациос. Ляб хозяйствоослы со кылын верантэм бадӟым юрттэт луиз, уката ик эстӥськон, вӧйёс но музонзэ басьтыны. Кызьы бен элькунамы кысык бусы ужъёс мыно? Котькинлэсь азьло валэс юоссэс кизьыны кутскизы Можга, Вавож, Алнаш но Пичи Пурга районъёс. Татын одӥг куиньмос ёросэз кидыс музъеме согемын ни. Уй пал районъёсты вератэк, валэс юоссэс кизёнэн уг дырто Киясово, Сарапул, Каракулино но Камбарка районъёс. Гурт хозяйствоя но сиён-юонъя министерствоысь валтӥсь специалист Сергей Руденко ивортэмъя, шаерамы 18 маёзь 10 процент ёрос валэс юос киземын ке, вылӥ верам ёросъёсын - 5-6 процент гинэ. Трос аръем турынъёссэс но узьымзэс усыян умой мынэ Можга, Алнаш, Киясово но Завьялово районъёсын. Та удысын бере кылё кизнеръёс но грахъёс, кезъёс но яръёс, сюмсиос но селтаос. Нош камбаркаос ӟег удзэс усыяны ик ӧз кутскылэ на. Кын улэ гырем муоссэс усыяса быдтӥзы ни Пичи Пурга, Алнаш, Можга, Киясово но Ува ёросъёс. Та ужен тяпайто Камбарка, Кез но Сюмси районъёс. Кизем турынъёслы подкормка сётонэн азьпала потӥзы Глазов, Пичи Пурга, Завьялово но Балезино районъёсысь нянь будэтӥсьёс. Лябгес тыршо Красногорск, Кез, Глазов но куд-ог ёросъёс. Тӥни озьы, беромыса ке но, шаерамы ӟырдыт бусы ужъёс ялан паськытало. Г. РОМАНОВ. Шӧкыч Серем пыр Воргоронэз котыр ласянь эскерыса, доктор вазиське солэн кышноезлы: - Асьме куспын вераса, картты мыным малы ке уг кельшы. - Мыным но, доктор. Но нылпиосмы сое юн ярато. *** Туала ужбергатӥсь - докторлы: - Тодӥськоды на-а, доктор, ужлэсь шутэтскон понна, тӥ мыным дэмлады вал чебер апайёс котырын кӧня ке гожеръяны. - Бен, ӧй вунэты. - Вералэ соку, кызьы мыным выльысь ужам берытсконо. *** Чидасьтэм воргорон нылпи вордон юртын: - Вань улытозяз ӝегатске. Шуиз укмыс толэзь ортчыса. Укмыс толэзь ортчиз. Табере кык час мултэссэ возьмасько ни. *** Атай индылэ пизэ: - Пие, кытчы тон сокем дасяськиськод? - Кытчы кулэ, отчы ик дасяськисько. - Нош ку берытскод? - Дыр вуоз - берытско. - Мотри мынам, одӥг минутлы но эн ӝегатскы! *** - Валлэн кӧня пыдыз? - урокын юа дышетӥсь. - Тямыс, - вазе Петя. - Кытысь сомында? - пайме Марьванна. - Кык азяз, сомында ик бераз, быдэн кыкез нош бур но паллян палаз. 02 ивортэ МИЛИЦИЛЫ ЮРТТО НЫЛПИОС НО Ӝыны толэзь ӵоже Удмуртиын 1217 йыруж лэсьтэмын, 933-ез шараямын ни. Соос пӧлын - 12 адями виён, 23 муртэ секыт сӧсыртон, 7 кышномуртэ эриктэман, кужмысь ваньбур талан, 8 автомотранспортэз лушкан учыр, 72 - йыртэман. Милициын ужасьёс ульчаосысь 5110 кудӟем муртэз октӥзы-калтӥзы, 2360-эз соос пӧлысь медвытрезвителе келямын вал. 1630 муртлы асьсэды умойтэм воземзы понна штраф сётэмын. Милициын ужасьёс 350 семьяе керетӥсьёсты-жугиськисьёсты буйгатыны потазы. Ӝегатэмын сюрес вылын мынон-ветлон правилоосты 1603 тӥясьёс, сюрес вылын 72 шудтэм учырын 7 мурт бырыны шедиз, 80-эз сӧсырмиз. 105 пол тылпу потаз, 4 мурт быриз, 16-ез сутскыны шедьыса больницаосы келямын. Кӧня ке мадём берло нуналъёсы кылдэм югдур сярысь: егит нылкышноослэн вож нуныоссэс виылэмъёссы йырсиосты пежырскыто. Пазелы гуртысь 25 аресъем Елена Е. пиналзэ виыса оранжерейной комплекс сьӧры сэрпалтэ. Аслаз бакчаяз куштэ соку ваем нунызэ Селта ёросысь Колесур гуртысь 20 аресъем Люба С. но. Мынэ следствие. Сарапулын ӝегатэмын Г.-лэсь квартиразэ кужмысь, кышкатыса асьсэлы карыны турттӥсьёс. Кыкез соос пӧлысь нылкышноос вылэм. Нуназе котыр Ижысь Баранов ульчаысь 58-тӥ коркась огаз квартирае лушкаськисьёс балконэтӥ пыриллям. Тодмотэм муртъёслэсь умойтэмен ветлэмзэс шӧдыса, азбарын шудӥсь нылпиос милицие жингыртӥллям. Суд азьын азьвыл кыл кутылэм Алексей К. но Рудольф Л. Ленин РОВД-ысь вневедомственной охранаын ужасьёсын интыязы ик кырмемын вал. Милициын ужасьёсын ӝегатэмын автозаводысь водитель 19 аресъем Юрий з. Со мукет "вугалтэмъёсын" ӵош 7 мае Автозаводской ульчаысь огаз коркалэн подвалаз нылмуртэ эриктэмаз вал. Ижысь 9-тӥ Январь ульчаын ӝегатэмын 46 аресъем Сергей Г. Бордысьтыз 28 мл "Первитин" наркотик шедьтэмын. Уголовной уж ӝутэмын. Аракызы вожмо луэмен, "эшъёс" ӵашетыны кутско, ог-огзэс пуртэн ӵогъяло. Сыӵе учыръёс вал Селта, Дэбес ёросъёсын, Ижысь "Ижмаш" АО-ын. Тулыс нуналъёс шумпотон гинэ уг ваё вылэм. Адӟон пыд улысь потэ. Игра ёросысь Удмурт Лозае нуись сюрес вылын ӵашъемлэсь бырыны шеде 25 аресъем Алексей М. Улӟоз на-а "Ижмаш"? Нырысь ик кӧня ке лыдпусъёс. Туэ куинь толэзь ӵоже та огазеяськонын поттэмын 36 станок, 6 сюрс 880 мотоцикл но 879 автомобиль. Автозаводын ар ӵоже 30 сюрс машина бичаны чакламын. "Ижаш" ялан данъяське вал "Планета" но "Юпитер" мотоциклъёсыныз. Та машинаос котькулэсь но трос поттэмын 1990 арын - 390 сюрс. Собере кутскизы реформа шуонъёс но коньдонэн "шудонъёс". Куать ар ортчыса, мотоциклъёсты бичан усиз 26 сюрсозь, яке 15 поллы кулэсмиз. Мукет сямен вераса, котькуд мотоез поттонлэн асдуныз, сое вузан сярысь, одӥг но ӝыны поллы дуногес усьыны кутскиз. Озьы тӥни, лыдпусъёс асьсэос возьмато "Ижмашын" кылдэм югдурез. В. Сергеев. БУСЫ УЖЪЁС 19 августлы Районъёс Арамын юос (процентэн) Яр 8,4 Глазов 18,3 Юкаменск 15,7 Балезино 32,6 Красногорск 39,9 Кез 24,3 Дэбес 34,4 Игра 45,1 Як.-Бодья 54,5 Шаркан 30,7 Селта 36,8 Сюмси 35,8 Ува 38,1 Вавож 48,3 Кизнер 44,1 Можга 48,7 Грах 30,4 Алнаш 40,1 Пичи Пурга 32,0 Кияса 27,0 Каракулино 29,2 Завьялово 34,3 Воткинск 27,6 Сарапул 22,6 Камбарка 35,4 ___________________ Республикая 32,4 Туэ юос ӧз удалтэ. Кылем арын одӥг гектарысь республикаын шорлыдын 17 центнер люкаськиз ке, таяз аре 9,4 центнер гинэ кутсаськом. Дас центнерлэсь трос басьто балезиноос, шарканъёс, уваос, вавожъёс, пичи пургаос, завьялъёс. Нош Красногорск, Кизнер, Грах районъёсын одӥг гектарысь ог 5-6 центнер гинэ люкало. Бусы ужъёс, кылем арен ӵошатыса, умойгес мыно. Та дыре ортчем аре утялтэмын вал 13,3 процентэз юос, нош туэ 33 процентэз. Куазь чеберскиз, кулэ вань будэтэм юэз кеносэ пыртыны. Н. ВОЗИСОВ. Жингыртэ, юалэ! 1998 арын 25 мае Удмурт Республикаысь Правительстволэн Загслэн ужъёсызъя комитетэз ортчытэ меӵак вераськон. Со сӥземын луоз семья кусыпъёсты право ласянь радъяны, загсъёслэн ужамзылы. Тӥляд юанъёстылы пыр-поч валэктоз комитетлэн тӧроез Лукинская Лариса Викторовна. Жингыртоно 51-56-44 телефонъя. Ижевсклэн Уставез котырын Кызьы гожъямы вал ини, Кун Кенешлэн Президиумез Ижевск городлэсь выль Уставзэ пусйыны пумит луиз, малы ке шуоно, солэн куд-ог статьяосыз Россиысь законодательстволы уг тупало. Уставысь шекъёссэ палэнтон понна кылдытэмын нимысьтыз комиссия. Таин валче городлэн выль быръем Думаысьтыз депутатъёс Кун Кенешлы вазиськон ыстӥзы. Ижевскысь кыкетӥзэ ӧтчам Думалэн депутатъёсызлы Удмурт Республикаысь Кун Кенешлы Вазиськонзы Гажано эшъёс! Ижевск городлэсь Уставзэ юнматэмлэсь азьвыл, соглаш кариськонъя комиссилэсь дэмлам воштонъёссэ отчы пыртэм бере, тани мае лыдэ басьтыны куриськом. 1998 арын 6 мае городлэн кыкетӥзэ ӧтчам Думаезлэн нырысетӥ сессияз 12 депутат дэмлаз солэсь статьяоссэ Думаын огдырлы комиссия кылдытыны, Ижевсклэн Уставысьтыз шекъёсты палэнтон но солэсь сатьяоссэ Россилэн но Удмуртилэн законодательствозыя тупатон понна. Озьы ке но, мэр депутатъёсты оскытыны быгатӥз, воштонъёс бадӟымесь ӧвӧл бере, соосты нуналмысь ужаку пыртыны луоз шуыса. Удмурт Республикаысь Кун Кенешлэн Президиумезлэн соглаш кариськонъя комиссия кылдытон сярысь решениез возьматӥз, милемлы но, городын улӥсьёслы но, Уставлэн тырмымтэосыз шӧдскымонэсь шуыса. Таин валче малпаськомы, соглаш кариськонъя комиссилэсь воштонъёссэ городлэн Уставаз пыртон но сое Кун Кенешлэн Президиумаз юнматон, городлэн Думаезлэн сессияз эскерытэк но юнматытэк, законлы туж ик уз тупа. Мылкыдмес лыдэ басьтыны но, законэз быдэсъяса, городлэсь Уставзэ соглаш кариськонъя комиссилэн воштонъёсыныз валче городлэн выльысь быръем Думаяз ыстыны куриськом, со бордын ужан но сое юнматон выльысь. Гажаса городлэн кыкетӥзэ ӧтчам Думаезлэн депутатъёсыз: Гурина О. Ю., Муллагареева О. Г., Кавалай О. П., Глухов К. А., Кутдузов Р. Н., Тарасенко В. Д. ПОП-ГУРЧИ Светлана Яковлеваез пыртыны луоз удмурт поп-музыкаез кылдытӥсьёс яке азинтӥсьёс пӧлы. Солэн нырысетӥ концертэз ортчиз "Строитель" культура юртын. Зэм, та ужрад дыртысагес дасямын кадь потӥз, ачиз артисткаез но возьдаське на сценалэсь. Но учкисьёслы, оло, со ик яраз - калыкысь потэм, нимысьтыз сценалы дышетскымтэ егит артистка сыӵе-сыӵе кырӟаны но эктыны быгатэ вылэм. Залэ люкаськемын вал трос эшъёсыз, ӵыжы-выжыосыз. Соосты но люканы быгатэм кулэ. Номеръёсыз огкадесьгес, со понна кыӵе пӧртэмесь дэремъёсыз! Гуръёссэ но кылъёссэ ачиз ик гожтэм. Шудэ гитараен но, арганэн но. Кырӟа-гожъя удмуртсэ но, ӟучсэ но кырӟанъёсты. Ма бен, солы уд паймы, Светлана "Чипчирган" ансамбльысь потэмын. Отын ик вал солэн дышетӥсез, Розита Анкудинова. Ваньмыз паймизы Светланалэн бигер эктонэз эктэмезлы. Кытысь быгатэ? Сыӵе юанэлы Светлана пальпотыса шуиз: - Школаын дышетӥм вал. Светлана - шулдыр мылкыдо нылаш. Сцена вылын возьдаськонэз ортчоз. Юлия ДАНИЛОВА, 44-тӥ лицейысь финно-угор классын дышетскись. Подпись к рисунку Шӧкыч - Кума! Тон, лэся, ук. Кытчы ай конгыляськод озьы? - Дорады мынӥсько. Оло, тӥляд, пӧй, одӥг ӝутэт коть куроды пунэмен шедёз. - Ма, мон но тӥ доры со муген ик вамыштӥсько ук... Суредэз Л. ПРОЗОРОВЛЭН. Берекет Милям дэмланъёсмы Пыдкутчан кема чидалоз Пыдкутчанэз дырын-дырын зыралляло бензинэн коттэм ӟустариен, тужгес но куасалскон интыостӥз. Кремен зыраны кулэ шуыса веранэз ик ӧвӧл ни. Тросэзлэн пыдкутчанъёслэн, тужгес но туфлиослэн, сандалиослэн пыдберзы чурыт луэ. Пыдэ понӥськод но, пыд пумен нярӟе, вӧсь луыны кутске. Мар карыны луоз? Выль дыръяз ик пыдэ кутчамлэсь азьло туфли пыдберез спиртэн зыралэ но пыдады понэ. Ӧз ке небӟы, кӧня ке эшшо тазьы лэсьтылэ на. Сайкыт пыдкутчанэз буёлтэм кремен интые ымныре кутӥськись кремен но зыраны яралоз. Ӝыны час ортчыса, небыт ӟустариен - бархат юдэсэн зыралэ. Лакен шобыртэм туфлиос выль дыръязы кадь чилялозы, соосты сугон йыр вандэтэн ке зырады. Эн вунэтэ, 4 градусозь кезьытын лак пилиськыны, куалдыны кутске. Ӟукыртӥсь пыдкутчанэз уйлы кот ӟустари вылэ пуктэ - "кырӟамысь" дугдоз. Замшалэсь пыдкутчанэз куасьтэ но, кӧня ке минут ӵоже ву пар вылын возьыса, кырсьсэ щёткаен сузялэ. Собере ӵушылэ вуэ нашатырь спирт ватсам суретэн (кыксэ но одӥг мында пононо), куасьтэ но щёткаен зыралэ на. Л. Яковлева. Репортаж Данъяськиськом! Ӟечкыласьком! Венгриысь Балатонфюред городын ортчиз нылпи хоръёслэн куинетӥез калык куспо фестивальзы. Пинал усточиослэн Ижевскысь школа-интернатысьтызы пияшъёслэн "Ингур" капеллазы отысь зарни дипломен берытскиз. Москва палась лыктӥсь поезд каллен гинэ вокзал азе дугдӥз... Вагонъёсысь огез бӧрсьы мукетыз пото пассажиръёс. Тани адӟиськом асьмелэсь покчи артистъёмес но. Ваньзы соос муспотонэсь, жадем тусъёссэс ватыны туртто кадь кепырась пальпотонэнызы. Пияшъёс котыре соку ик люкаськизы интернатысь дышетӥсьёссы, журналистъёс, анай- атайёс. Фестивальын вормисьёсты пумитаны лыктӥллям Удмурт Правительствоысь тӧролэн воштӥсез Антонина Лисина, мукет кивалтӥсьёс. Тани Тамара Воронцова Костя пизэ пумитаны Шаркан районысь вуэм. - Капеллалэн нырысетӥ инты басьтэмез сярысь радио но телевидение пыр кылӥ ни вал. Туж шумпотӥсько пие понна, эшъёсыз понна. Федя Федоров капеллае вуиз Можга районысь. - Федя, кыӵе мылкыдын бертӥськод Венгриысь? - Туж кельшиз кунгож сьӧрын. Отын котькытын чылкыт, инкуазь чебер. Экскурсиен ветлӥм Будапештэ но, синмаськи Балатон тылы. - Фестивале лыктэм коллективъёсын но эшъяськиды, луоз? Кинъёсын кусыпъёс тупатӥды? - Польшаысь пиналъёсын. Туж шаплыесь соос, вераськисесь. Собере ӟуч кылэз но, мукетъёсыз сярысь ӟечгес, тодо. Нош Иван Поповский сюрес вылын жадемзэ ӧз ваты. - Гуртам вуэм берам ик пыласько но - кӧлыны выдо. Тани ачиз Валерий Митрофанов но, "Ингур" капеллалэн кивалтӥсез. Шумпотэмзэ со уг ваты: - Данъяськисько аслам пиосыным, шумпотӥсько. Фестивале 8 коллектив пыриськиз. Со сяна, мадьяр пиналъёслэн одӥгез коллективзы конкурс чотэ пыриськытэк кырӟаз - кузё луэменызы валче. Ваньмыз 4 кунысь кырӟасьёс ветлӥзы: Румыниысь, Польшаысь, асьсэос венгръёс но ми. Сцена вылэ котькинлэсь берло потӥм. Юнэсь куронъёс пуктэмын вал фестивальын, но соку ик шӧдӥм: учкисьёслы кырӟаммы кельше. Шуланы, кесяськыны, киоссэс чабыны кутскизы, ява. Удмурт кырӟанъёсмес сяна, сьӧрамы нуллӥм ӟуч, венгер, эстон кылын крезьгуръёсты. Кузёос-венгръёс милемды туж сӥё-дано, асьсэлэн кадь карыса пумитазы. Бадӟым тау соослы! Ватсаса вералом на, таӵе фестиваль куинетӥзэ гинэ ортчиз ай. Оскиськом, азьланяз таӵе пумиськонъёс эшшо но паськытгес ӧръяськозы шуыса. Мар бен, ӟечкыласьком "ингуръёсты", данъяськиськом! Э. Кумачева. Туспуктэмез В. Камашевлэн. ДВОРЖАК, РОГОТНЕВ, КУАДРИНИ... Удмурт кун национальной театрлэн сцена вылаз ӝутӥсь, бурдъясь, ӧтись крезьгур чузъяськиз куартолэзьлэн 18-тӥ нуналаз, республикаысьтымы кун симфонической оркестрлэн выступлениез дыръя. Быдэс дуннелы тодмо крезьгуръёс шудэмын вал татын. Тани, кылсярысь, А. Дворжаклэн виолончельлы гожтэм концертэз. Со сярысь музыковед Юрий Толкач шуиз: "Виолончельлы концертсэ Дворжак кылдытӥз, тодмо Витетӥ симфонизэ сямен ик, Америкаын улыкуз. Соин но, дыр, чех композиторлэн крезьгураз пӧлэстӥськыса кадь пыро американ гуръёс. Брамс та произведенилы синмаськемзэ тазьы вераз: "Малы мон азьло ӧй тоды, виолончельлы тазьы концерт гожтыны луэ шуыса? Тодысал ке, кемалась ни гожтысал". Антонин Дворжак но Петр Ильич Чайковский. Соос улон шоры учкемзыя туж матынэсь луо ог-огзылы, тодматскизы Прагаын, бӧрысь кема гинэ ог-огзылы гожтэт гожъязы. Дворжаклэн та произведениез сӥземын Чайковскийлы, со куинь люкетлэсь: нырысетӥез - романтико-героической лирика, кыкетӥез сӥземын композиторлэн нырысетӥ яратонэзлы, тодэ ваёнъёсызлы, куинетӥез - эктон фольклор. Произведенилы кужмо, чебер чузъяськыны бурдъёс сётӥз, виолончелен валтыса шудӥз Екатеринбургысь Сергей Котунов. Оркестрен кивалтӥз асьмелэн тодмо дирижёрмы, калык куспо конкурсъёслэн лауреатсы Николай Роготнев. Со кивалтэм улсын ик театрын чузъяськиз на Дворжаклэн 8 номеро Славян эктонэз. Кунгож сьӧрысь музыкантъёс лыктэмлы асьмеос сокем ум паймиське ни. Таяз учыре ӧтемын вал тодмо итальян дирижёр Леонардо Куадрини. Солэн кивалтэмез улсын асьме оркестр шудӥз П. Чайковскийлэсь "Ромео и Джульетта" произведенизэ, Итальянской каприччиозэ. Вераны кулэ, татын шуг вал висъяны, кытын шуккиське итальян крезьгур тулкым, кытын ӟучез - соос озьы ик аспӧртэм сураськыса кошко. Леонардо Куадрини шумпотон ивор вераз: асьме симфонической оркестрысь музыкантъёсты туэ гужем Италие ӧтё. Ма бен, сыӵе эшъяськон пайдаен берытскоз: удмурт дирижёр но солэн эшъёсыз лулчеберлык ласянь узырмыса бертозы. Нош 25-тӥ мае абонементэн концертъёсы пыриськемъёс понна луоз на Бразилиысь культуралы сӥзем ӝыт. Е. КУДРЯВЦЕВА. Вакчияк ОГЕЗ БӦРСЬЫ МУКЕТЫЗ Кин вераз, куанер улӥськом шуыса? Эн оске. Кызьы мукет сямен валэктод арнялы быдэ сямен выль изданиослэсь кылдэмзэс? Алигес гинэ вордскиз "Ашальчи" журналлэн нырысетӥ номерез. Кӧня ке нунал ортчиз но, Ижын улӥсьёсты шумпоттӥз мукет выль журнал - "Отдыхай!" Сое поттэ "КАПИК" агентство. Нимызъя ик валано, таиз издание шутэтскисьёслы сӥземын шуыса. Отын сётэмын шоркарысь театръёслэн репертуаръёссы, вуоно программаос премьераос сярысь гожтэмъёс, искусство удысын ужасьёслэн сюлмаськонъёссы пумысен веранъёс, серемес чуръёс. Нош та нуналъёсы лыдӟисьёс кие вуиз сыӵе ик трос буёло мукет журнал. Таизлэн нимыз "Отечественное строительство". Солэн кылдытӥсез "Эллинг" фирма. Валтӥсь редакторез Михаил Зайцев (тодмо луэ "Транспорт и Мы" газетъя). Журналэз вӧлмытыны чакламын Уралысь но Волга котырысь сизьым улосын. Выль издание тодматэ лэсьтӥськон удысысь иворъёсын, Ижысь ужбергатӥсьёсын. Вуоно номерын вераськон мыноз "Хрущёвка" шуоно юртъёсты выльдон амалъёс, Башкортостанын ортчем адӟытон, Удмуртиысь кибашлыос сярысь. Журналлэн редакциез интыяськемын Печатья юртын. И. КРИЧЕВ. ГУРТ ОМЫРЕН ШОКЧОЗЫ 24-тӥ мае, арня нуналэ, Можга ёросысь Быдӟымсурд гуртын гужем гастрольёссэ кутске Удмурт кун национальной театр. Гурт калыклы учкыны дэмламын В. Котковлэн пьесаезъя "Пинал мылкыд - юмал йӧлпыд" спектакль. Режиссёрез - Россиысь искусство удысын дано ужась, Удмуртиысь калык артист Леонид Романов. Соин ӵош сюрес вылэ потӥзы Россиысь дано артистка Валентина Загуляева, шаерысьтымы калык артисткаос Валентина Меняйло, Ольга Чужанова, Августа Лазарева, артистъёс Римма Николаева, Людмила Егорова, Валерий Мадзеков, Владимир Ельцов. Быдэс июнь толэзе но, июльлэн кутсконаз но соос та спектакленызы вуылозы, Можга сяна, Кизнер, Грах, Алнаш, Сюмси, Вавож но Ува ёросъёсы. Мукетыз труппа "Бызьыны вуэм песяйёс" спектаклен потэ уй пал районъёсы. Таяз шудо Россиысь дано артистъёс Вероника Садаева, Геннадий Соловьев, калык артисткаосмы Галина Владыкина, Фаина Будина, артист Кадим Галиханов но мукетъёсыз. Со сяна, матысь дыре шаермылэн палэназ - Татарстанэ, Башкортостанэ, Пермь улосэ концертъёсын поталозы тодмо артистъёсмы, кырӟасьёсмы Геннадий Бекманов, Ольга Зорина но мукетъёсыз. Вуылозы соос Юкаменск, Красногорск палъёсы но. Вунэтэмын ӧвӧл пинал учкисьёс. Школаосын усьтӥськись лагерьёс понна дасямын выль спектакльёс-выжыкылъёс: "Анчутка", "Вредный витамин", "Жили-были две лисички" но "Мымрёнок". Озьыен, Удмурт драмтеатрын ужасьёс ӝоген шокчозы эркын гурт омырез, нош бусыосын, фермаосын ужасьёс нош ик шумпотыса пумиталозы гажано артистъёссэс. Т. НИКОЛАЕВА. Шӧкыч Гожъяло егит юрттӥсьёсы АКИМ АГАЙ ЭМЪЯСЬКЕ Вань милям гуртамы одӥг пересь. Ми сое Аким агай шуиськом. Яратэ курытсэ веръялляны. Со гужем ӝытэ но Аким агай огназ бушатэм быдэс ӟенелик тӧдьызэ. Иназ мынымтэ. Уродмем. Сюресэз мырдэм мертаса но ӝуштыса вамыштоно луэм гуртысь эмъясь доры. - Гыдыке, юртты,- вазиське пересь.- Пушкы тылын ӝуа, шокаме уг луы. Сюлэме кин ке венен бышка кадь. Воргорон шулӟектэмын, быдэс мугорыз куалекъя. Пыд вылаз султэ - йырыз поромыса тани погралоз. Кышказ эмъясь. Нуоно кариськиз нимысьтыз эмъяськонние. Тӧдьы дӥсен адями Аким агайлэн кус улысьтыз небыт интыяз эмъюмо венен кӧня ке пол бышкалтӥз, мычиз кыӵе ке таблетка. - Тазэ, песятай, кыл улад сылмытозяз возь,- валэктӥз со.- Сюлэмыд ӵогъямысь дугдоз. - Кытын возь шуиськод? - кизэ пель вадьсаз карыса, Аким агай йырзэ врач пала мыкыртӥз. - Кыл улад, шуисько... - золгес вераз врач. - Э-э, валай, валай, нылы. Аким агай дэремзэ ӝутӥз, таблеткаез дырекъясь киыныз кунулаз донгиз. - Ма, песятай, кылыд тынад отын шат?! - серектӥз врач. - Ачид отчы пононо шуид ук,- синъёсыныз лопыръя Аким агай. - Кыл улад, шуисько, кыл улад возь,- врач пересьлы пеляз вераз... Пальышатӥсь чуръёс Ӝыт сиськыны пуксьыкузы, атай пиезлы вазиське: - Нырысь кидэ миськы. - Ма, мон киме ӵукна ик миськи ук ини. х х х Кышномурт магазинын сукари басьтыны дасяське. Вузкарисьлэсь юа: - Небытэсьсэгес уд-а бырйы? Екатерина БАТАЛОВА. Игра ёрос, Лонки-Ворцы гурт. Амалтэк синмаськод Та вакытэ гуртъёсын ӵем-а пумиталод бытъя юртъёсты. Азьвыл котькуд колхозъёсын вал, дыр, нош 1990-тӥ аръёсы тросэз ворсаськиз. Алнаш районысь "1 Май" колхозын но югдур ушъямон ӧй вал, озьы ке но, туннэ но юрт ужа. Гурт калыклэн куремезъя, отысь кибашлыос дэрем яке изьы вуро, йырси ӵышко. Эшъёссы пӧлысь тужгес но егитэз луэ Галина Матвеева. Мусо, чебер нылашлы амалтэк синмаськиськод, нош киужъёссэ адӟиськод ке - эшшо но. Галина пичи дыръяз ик мунёезлы пӧртэм дэремъёс сӧзна вылэм, нош быдӟымгес будыса, аслыз но дӥсь вурыны ӧдъяз. Со сяна, чебер пужыятӥське, нош гужемзэ аслаз чильпам сарафанэныз ветлэ. Киужлы дышетскиз со Можга но Ижевск городъёсысь профтехучилищеосын. Ваньмон дыръяз гитараен шудэ, шулдыр кырӟанъёс кырӟа. Галина Матвеева но солэн киужъёсыз. В. Кутузова. Туспуктэмъёсыз В. Камашевлэн. Космосэ сюресъёс кутско Удмуртиын Ма ватонэз: Россия та дыре ушъяськыны быгатэ усто пыӵал тӥрлыкеныз но космосэз эскеронын басьтэм азинсконъёсыныз гинэ. Та удыслы азьланяз но бадӟым саклык висъяськоз. Соин валче ик Россилэн Президентэз туэ январь толэзе ракетно- промышленной удысэз уката но азинтон сярысь указ кутӥз. Та документъя Россиысь Экономикая министерствое пырись куд-ог предприятиос но организациос сётӥськозы Россиысь космосъя агентстволы. Указэз Указэз уж вылын быдэсъяса, Россиысь Правительство алигес постановление кутӥз. Табере та агентствое пырозы странаысьтымы 40-эз кун предприятиос но организациос. Соос пӧлын "Воткинский завод" огазеяськон но. Россиысь космосъя агентство ужалоз ракетно-космической промышленность удысын. Со огазеяз боевой ракетной но ракетно-космической техника поттӥсь предприятиосты но институтъёсты. Та удысын тыршозы Россиысь 20 акционер огазеяськонъёс. Пӧлазы озьы ик Ижысь радиозавод, "Аксион-холдинг" мотозавод но "Прикампроект" институт. Б. Никитин. Туннэ буыосын Бакча сиён вае коньдон Музъем ужасьёслэн пӧсь дырзы вуиз. Тани Завьялово районысь акциосын "Правда" огазеяськонысь бакча сиён будэтӥсьёс ӟеч ужъёсынызы кемалась тодмо ни. Та удысэз уно аръёс ӵоже быгатыса нуиз Надежда Байрамова. Но мукет уже выжеменыз валче, интыяз кылиз Галина Ускова. Со бакча сиён будэтӥсьёслэн бригадирзы луиз. Кубиста, ӵуж но горд кушман буыосы потӥськод ке, сюлэм шумпотонэн пачылме. Чуръёс, сӥньысэн шуккем сямен, шонересь лэсьтэмын. Ведь котькудӥз ненег уд Галина Усковалэн бригадаысьтыз ужасьлэн небыт ки пыртӥз потэмын. Плёнка улын удъёс (рассада) будэтон капичен уг сётӥськы. Но котькудӥз ас ужзэ юн яратэ, мылысь-кыдысь тырше. Туэ тулыс куазь кезьыт улӥз, соин ик трос сюлмаськоно луиз. Кыӵе сортъёс бен будэто? Пӧртэмесь. Сортъёс быръё агрономъёсын ӵош. Тани туэ 95 гектар кубиста мерттозы. Будэто вить сорт: "трансфер" но "июньский" (вазь вуэ), "слава" но "колобок" (шоро-куспо вуэ, сылалтыны умой) но "амагер" (бер вуэ, ӟеч толъе). Одӥг гектар ёрос "майский" но "тополёк" огреч будэто. Сое мертто, кубиста удэз бусые тырем бере. Июньлэн пумаз сиыны вуоз ни. Бакча сиён будэтӥсьёслэн ужъёссы син азьын кужмояло. 20 маёзь соос быдтӥзы 20 гектар вылэ ӵуж кушман кизёнзэс. Ӝыныез, 10 гектар вылэ киземын ни горд кушманзы. Бакча сиён будэтӥсьёслэн тыршемзы тыр берытске. Кубиста но музон бакча сиён будэтон хозяйстволы арысь аре пайда сётэ. Та удысэз азинтон сярысь трос сюлмасько ОАО-лэн директорез Борис Лубнин, коммерцияя воштӥсез Лидия Агафонова, валтӥсь специалистъёс- агрономъёс но отделениослэн кивалтӥсьёссы. Хозяйствоын мукет кысык ужъёс но умой мыно. Та нуналъёсы йылпумъязы сезьы, йыды, кӧжы но чабей кизёнзэс. Валэс юоссы ваньмыз сюрс гектар пала. Дыраз усыязы трос аръем турынъёссэс но узьымзэс. Ненег будосъёслы ватсаса сиён (подкормка) сётӥзы. Муосты дасянын (культиваторен небӟытонын, усыянын но гыронын) тужгес но усто тыршизы трактористъёс В. Филиппов, С. Игнатьев, В. Синцов, А. Корепанов, Г. Малышев, Л. Аввакумов, А. Монашев но мукетъёсыз. Нош юосты кизёнын азьпала потӥзы А. Вахрушев, Н. Филиппов но В. Шубаков. "Правда" ОАО азьланезлы оске. Сыӵе мылкыдын уло но ужало бакча сиён но ю-нянь будэтӥсьёс. Г.Романов. Шӧкыч Оло вал, оло ӧй вал "КУТЧАЗЫ" ВЕДЬ, ОДНАКО Нырысетӥ апрель кемалась ни ортчиз ке но, со кемалы тодам кылёз. Та нуналэ кин кызьы быгатӥз озьы ик маскаръяськиз-пӧяськиз. Монэ но нуназеозь трос пол "кутчаны" выризы - ӧз пӧрмы. Шумпотӥ ни вал!.. Трамвае пуксьыса, университетысь бертӥсько улон интыям, Металлургъёслэн городоказы. Вагонэ пыриз ӟеч дӥсен ӝужыт воргорон. Билет эскерисьёслэн выллем маке документсэ поттыса, зӧк куараен ялӥз: "Эшъёс, куриськом, вождэс эн вае. Нырысетӥез вагон али кожоз Буммаше, кыкетӥез - Металлурге..." Ма карыны ёрми. Дыртӥсько нырысетӥ вагонэ. Мукетъёс но интыысьтызы тэтчылӥзы. Огыр-бугыр луиз. Кин кытчы бызе. Выль интыям пуксеме бере гинэ валатски: кызьы ай та вагонъёс люкиськозы?!. Вот, шайтан, "кутчазы" ведь, однако... Елена ПЕТРОВА, УдГУ-ысь студентка. Журналистъёсын пумиськонъёс Луысал ке дипломе? Рыноклэн куронъёсыз чурытэсь. Со кулэ каре ӟеч, тодӥсь-валась специалистъёсты. Берло дыре дипломлэн данэз нош ик ӝутскиз, вылӥ дышетскон заведениосы конкурс шӧдскымон будӥз. Та нуналъёсы егитъёслэн ӟырдыт вакытсы - одӥгъёсыз нюръясько ӟеч аттестат басьтон понна, мукетъёсыз витё ини дипломъёссэс. Мар вылез луоз туэ вылӥ дышетскон заведениосы кутонын? Вань-а воштӥськонъёс? Со пумысен журналистъёслы ивортон лэсьтӥз Удмурт кун университетысь дышетон ужъя проректорез Владимир Байметов. Нырысь ик, кӧня ке лыдпусъёс. Туннэ нуналлы 18 факультетын 42 пумо специалистъёс сёто. Дышетскыны пырисьёсты кутонын ма но со вылез вань, пусйиз Владимир Александрович. Та нуналъёсы гинэ Москваысь документ вуиз. Табере котькудаз вылӥ дышетскон заведениосы мукетъёсыныз ӵош пырыны быгатозы кызьы ке Россия Федерациын, озьы ик СНГ-е пырись государствоосын улӥсьёс но. Соосызлы но, таосызлы но куронъёс огкадесь луозы. Ӵектон сётэмын, ог куамын процентсэ студентъёсты туэ кутыны Правительстволэн дэмланъёсызъя (направлениосызъя). Кӧня ке кыл льготаос сярысь. Нырысь ик, соос сётӥськозы школаез медален йылпумъямъёслы, шор ёзо дышетскон заведениосты горд дипломен быдтэм специалистъёслы. Университетэ конкурстэк кутозы Афганистанын но Чечняын ожъёсы пыриськемъёсты, Чернобыле шудтэм учырлэсь бервылъёссэ быдтонэ ветлэм адямиос, сӧсыръёсты, анай-атайтэк кылем егитъёсты. Пӧртэм олимпиадаосын вормисе потэмъёсты но университетэ капчиенгес кутозы. Нимысьтыз вераны кулэ тани ма сярысь но. Табере абитуриент котькудзэ экзамензэ сётыны быгатэ вордскем кылыныз. Но та ласянь асьмелы кыдёкын на. Уго математикаез но, физикаез но, мукет предметъёсты но школаосамы вордскем кылын уг дышето. Удмурт абитуриентъёс понна кыле на одӥгез: ӟуч кылын сочинение интые соос гожтозы изложение. Куд-огез егитъёс документъёссэс огдыре сёто 2-3 вузэ. Соин ик комиссиос аттестатъёслэсь копиоссэс одно басьтыны кулэ. Нош дышетскыны кутон сярысь приказ поттон азьын одно ик ваёно аттестатлэсь подлинниксэ. Берло дыре, веранзэ азьланьтӥз Владимир Байметов, куд-ог газетъёс но телекомпаниос умойтэм реклама сётъяло. Удмурт университетын, пе, мукет странаосын кусыпъёс возёнъя специалистъёсты дасяны кутскозы. Ӧвӧл сыӵе факультетмы, уз но луы. Нош кытчы интыясько университет бере егит специалистъёс? Кызьы тодмо, азьвыл соосты ужаны ыстылӥзы нимысьтыз направлениосъя. Туэ уноезлы асьсэлы сюрес бырйыны луонлык сётэмын. Но таӵе амал умоен уг берытскы. Студент дышетске государство чотын, нош ужа мукет удысын. Кылем арын, кылсярысь, англи кыллы дышетӥсьёс школаосы вуизы 10-12-ез гинэ. Сыӵе ик югдур суреданы но черченилы дышетӥсьёсын. Соиз умой: вузэз йылпумъямъёс ужасьтэмъёс пӧлын уг лыдъясько. Университетын вань ужбергатонъя но менеджментъя факультетъёс. Соос но дышетско казна чотын. Проректорлэн малпамезъя, отын дышетскисьёслэсь лыдзэс кулэстоно. Куд- огез гуртысь лыктэмъёс дышетско "Технология но предпринимательство" фаультетын. Уноезлэн вордскем палъёсазы бертэмзы потэ. Нош сыӵе специалистъёсты гуртын кулэ уг каро. УдГУ-ын студентъёс та вакытэ кыклы люкисько - бюджет чотын но коньдон чотын дышетскисьёс. Нуназе дышетскись студентъёслы араз 11 сюрс 200 манет кутӥське, заочной амалэн дышетскисьёслы висъяське 4700 манет. Университетлы азинтӥськыны трос коньдон кулэ но бюджетысь со тырмыт уг вуы. Кыкетӥ кварталэ, кылсярысь, висъям коньдонлэн 57 процентэз гинэ вуиз. Соин ик азьланяз но коньдон тырыса дышетскон амал кутӥськоз на. Йылпумъяса, дышетскыны пырисьёслэсь документъёссэс кутон пумысен. Университетын тӥледыз витё 10-тӥ июньысен 15-тӥ июлёзь. Н. Байтеряков. Шӧкыч Николай Никифоров Кылбурась мусур Пышкылон - Амал шеде-а бен ялан Нунал пиялаез тырмытыны? Оло... оло, со буш яла, Толо-валля сюкась отын? Кинлэн потоз бен юэмез Пыды чырс сюкасез токма? - Кумышкалэн, пе, кужымез Кема пукетыса юнма. Анатолий Перевозчиков. Нунал пиялае тыртэм. Ӧй тод: бен кин-о бушатэм? Лушкаллям ук ваньбурме. От, албасты! Кылем на пыдэсаз Чырс пыды. Кинлэн потоз-о юэмез, Таӵе шакшы, чырс сюкасьме? Уз ю, дыр, критик, Уз ю литературовед, Кыръя-буръя тӧлӟоз кунояме. Уй пиялаез, оло, тырмотоно? Я проза гожтоно, Яке кылбурано? Кумышкалэн кадь медло кужымез, Пыд йылысьтыз мед погыртоз ошез. *** Кытын тӥ, куноос? Пышкылон Маке кемалась Уг вуыло ни эшъёсы Мон доры, - Капка азьысьтым лымыез Дугдӥ ни чылк-чылк мечемысь. Коньы Толя. Маке уг вуыло эшъёс, Жади ини мон витьыса. Кытын, кытын тӥ, куноос? Суре вуэ ни чырсаса. Воже потоз ке тӥледлы, - Уг чылкытат капка азез. Эрик луоз лымыедлы Мед ӵоксалоз сюресъёсмес. Пумен лапас улын кыштыр, Лэсьто беризь лопатаос. Лыктӥды ке, пырто уж пыр, Кулэ ӧвӧл дась сиисьёс! *** Ветло губияны Пышкылон Уд тыры кӧттэ кылбурен, Уд басьты чилясь выль дэрем... Кысод тон ӝуась лул-пуштэ, Гожтӥд ке выльзэ Кылбурдэ... Сӥзем ке мыным инмаре Сике ветлыны кылбурлы, Уг вожъяськы мон... Зоя Трухина Гожъясько кагазэ, кесясько, Лумбыт мон кылбуръёс пӧрасько. Нош уг вуы Ижысь гонорар, Инмаре! Ма каром ни, ой, мар? Уйёсы толэзе учкыса, Сютэмен пукисько вузыса. Тань посьтӥз ни чилясь дэреме, Сюанлы, кузпаллэн басьтэмез. Ӵок, кошко кудыен вож сике. Кӧт тыроз, тӧдь губи сии ке. Мултэссэ базарын вузало, Выль дэрем басьтыса дӥсяло. 28 мае Ижевскын Туэ 80 ар тырме Россиын пограничной войскоос кылдытэмлы. Та дыр ӵоже шаерысьтымы 50 сюрслэсь ятыр пиосмы утизы бадӟым кунмылэсь кун гожзэ, кӧняез ке али данъяськымон нуо асьсэлэсь службазэс. Соос понна, соослэн семьяоссы но эшъёссы понна Ижевск городлэн администрациез, Запасысь пограничникъёслэн "Патриоты границы" огазеяськонзы тунсыко программа дасязы. Шулдыръяськон ӝыт кутскоз 15.00 часын Ялан ӝуась тыл дорын. Отчы люкаськем калык Наговицын урам кузя, Центральной площадь пыр васькоз тымет дуре. 16.00 часысен 17.00 часозь Калыкъёслэн эшъяськонзы монумент дорын кырӟалозы- вералозы нылпи самодеятельной коллективъёс. 17.00 часын пограничникъёсты-ветеранъёсты вите М. Горький нимо парк. Отын радъямын луозы спортивной шудонъёс, дискотека. Шудоз духовой оркестр, ужалозы пӧртэм пумо аттракционъёс, буфетъёс. Э. Кумачева. Экономикаысь ужпумъёс ЮРТТОМ ГУРТЭЗ ВЫЛЬДЫНЫ оскыто Гурт ужъёсъя удмурт НИИ-ысь тодосчиос Иж урдсысь Первомай посёлокын трос аръёс ӵоже ужаз гурт хозяйствоя опытной станция. Та дыр ӵоже со трос ӟечсэ, пайдалыкозэ лэсьтӥз. Лабораториосын но бусыосын пӧртэм опытъёс ортчытъяса кылдытӥз-вордӥз асьме палъёсысь куазьлы тупась но бадӟым пайда сётӥсь ю но бакча сиён кидысъёс, емышо писпуос. Уно ужаз пудо-животлэсь выжызэ умоятон бордын. Но туннэ, калыклэн курон-кулэяськонъёсыз ялан будэмен валче, азьвыл азинсконъёсын буйгатскыны уг луы ни. Уката золгес утчано но пыӵатоно выльзэ, азьмынӥсьсэ, наукаез эшшо но мургес герӟано меӵак гурт ужен, сое матынгес кароно музъемлы но пудо вордон удыслы. Огазеяно таин вырись учёнойёслэсь кужымзэс. Ваньзэ тае лыдэ басьтыса, кылем арлэн пумаз вылӥ верам станцилэн инъетэз вылын усьтӥськиз Гурт ужъёсъя удмурт научно-исследовательской институт. Со дырысен посёлоклы но выль ним пыӵаз, отын улӥсьёс табере сое данъяськон мылкыдын академгородок шуыса нимало. Кыӵе ужпумъёс пуктэ ас азяз выль организация? Валамон ни, нырысь ик со азьланьтоз азьвыл станцилэсь удыссэ. Но ваньмыз та ужъёс юн герӟаськемын луозы наукаен. Паськытгес кутозы мукет улосъёсын люкам опытэз. Соин ӵош ик институт рос-прос басьтӥськоз трос выль удысъёс борды. Кылсярысь, ужалоз гурт хозяйствоен кивалтонэз юнматон-ӟечомытон, биологилэсь азинсконъёссэ уката паськыт кутыса, музъемлэсь пайда сётонзэ чутрак ӝутон, гырон-кизён но мукет техникаез умоятон, пудо-животлэсь выжызэ выльдон но сое сюдон-утялтон амалъёс кылдытон, гуртлы тодӥсь-валась кивалтӥсь кадръёс дасян но уно мукетыз бордын. Юн оскон кылдэ, институт азяз пуктэм куронъёсты азинлыко быдэсъялоз шуыса. Али татын ужало наукаосъя сизьым доктор, куамынлэсь трос кандидатъёс, ас удыссэс ӟеч тодо меӵак музъем но пудо котырын ужасьёс но. Та дыре ваньзылэн соослэн сюлмаськонзы одӥг - научной ужъёсты паськыт ӧръян вылысь кылдытоно кужмо производственной база. Выльдоно техникаез, юнматоно лабораториосты. Палэнэ уз кыльы калык сярысь сюлмаськон но. Тани берло вить аръёс ӵоже посёлокын лэсьтӥськон дугдэмын шуыны луоз. Пуктоно улон коркаос, егитъёслы шутэтскон интыос. Со луонлык сётоз кадръёсты ялан выльдыны-ӟечомытыны. Институт нырысь вамышъёссэ лэсьтэ бере, бадӟымесь азинсконъёс сярысь вераны шуг на. Али тани тодосчиос кужымзэс жалятэк ужало скал но парсь выжыез умоятон бордын.Татын но соос муртлы йыбыртъяны уг чаклало. Ужрадъёс куто, асьсэ дорын тырмымон пудо сиён дасян вылысь. Удмуртиысь тодосчиос, кызьы ивортэмын ни вал газетын, юн кусып тупато Венгриысь эшъёсынызы. Алигес Иже вуылӥзы "Теннон-трейд" фирмаысь учёнойёс. Соос юрттӥзы институтлэн музъемъёсаз доразы кылдытэм ӟеч выжы чабейзэс кизьыны. Азьланьын сое асьме шаерамы вӧлмытон вылысь. Кык пумо та юос вордскем палъёсазы гектарысьтыз 28- 70 центнер тысь сёто. Институтэ ӵем вуыло фермеръёс, колхоз но совхоз кивалтӥсьёс, отысь специалистъёс. Татын соосты шумпотыса пумитало но тодон-валанзэс будэтыны юртто. Лыкто татчы озьы ик нимаз адямиос - гурт хозяйство, сад-бакча возисьёс. Басьто ӟеч выжы кидысъёс. "Юрттом туала гуртэз выльдыны, калыклэсь ӝӧк вылзэ тыр карыны,- шуо учёнойёс.- - Ӵапак со понна кылдытэмын выль институт, со понна ми ужаськом татын". Н. ДОЛГОВ. Тӥледлы, пӧямъёс! Редакцие трос гинэ адямиос вазисько "Русский Дом Селенга" огазеяськонлэн тыриськонъёсыз пумысен. Удмуртиысь но калыкез ӧжыт ӧвӧл пӧям та коньдон пирамида. Та дырозь ми номырин но, нокыӵе валэктонэн но юрттыны ӧм быгатэ шуге-леке шедемъёслы. Но тани республикаысьтымы Дуно бумагаосъя но фондъёсъя рынокъя комитетысь вуиз кема возьма ивор. Волгоград областьысь арбитражной суд акционеръёслэсь "Русский Дом Селенга" ("РДС") огазеяськонзэс 1997 арын 15 июле банкротэн лыдъям. Солы конкурсной кивалтӥсе пуктэмын А. М. Зелепухин. Кызьы чакламын законын, пунэме кылем азе курон пуктыны луэ сое банкротэн ялэм сярысь ивортон бере кык толэзь ӵоже. Таӵе ивортон сётэмын вал "РФ-ысь Вылӥ арбитражной судлэн вестниказ" 1998 арын 9 апреле. Удмуртиын улӥсьёс, "РДС" огазеяськонэ сётэм коньдонзэс берен курыса, 1998 арын 9 июнёзь вазиськыны кулэ таӵе адресъя: 105037, Москва, Е-37, городок им. Баумана, Южный корпус, 1-ый этаж, Зелепухину А. М. Вазиськон мед луоз эркын формаен. Сое вань документъёсын ӵош ыстоно заказной гожтэтэн. Мултэс уз луы уведомление но курыса. Вазиськонэн ӵош келяно таӵе документъёсты: 1. Селенг сярысь огкыллэсь (договорлэсь) подлинниксэ яке нотариусэн юнматэм копизэ; 2. Операционной книжка яке солэсь нотариусэн юнматэм копизэ (кинлэн вань); Келяно озьы ик мукет документъёсты но, вань ке соос: 1. Исполнительной лист, судебной приказ яке решение; 2. Ваньбурез яке коньдонэз киысь кие сётон сярысь договор; 3. Вкладэз наследовать карон сярысь документъёс; 4. Селенг пумысен договорез паевой инвестиционной фондэ сётэм сярысь квитанция; 5. Документъёслэсь подлинникъёссэс Федеральной ликвидационной комиссие сётэм сярысь квитанция; 6. Сберегательной книжкаысь (вань ке со) выписка (банкез нимзэ, солэн отделениезлэсь но лицевой счётлэсь номеръёссэс вераса); 7. Быдӟым Отечественной войнаысь инвалидъёслы, ужысь инвалидъёслы, Быдӟым Отечественной войнаын ожмаськемъёслы, Ленинградын блокада дыръя улэмъёслы, ужысь ветеранъёслы, репрессиос улэ шедемъёслы, фашистской лагерьёсын возем пиналъёслы, Чернобыльской АЭС-ын шудтэм учырлэсь бервылзэ быдтӥсьёслы, ядерной оружиез эскеронэ пыриськемъёслы - льготаоссы сярысь документъёслэсь копиоссэс; Кредиторлэн "РДС-эн" кӧня ке договорез, ваньзэ одӥг вазиськонэ огазеяно. Управляющийлэн А. М. Зелепухинлэн Москваын телефонэз: (095) 164-96-57. Сопал дуннее гожтэт Улонысь учыр Надя быдэс арнязэ школае уйжомем кадь ветлэ ни. Син азьысьтыз уг кошкылы ӝожмыт суред. Ӧвӧл, дыр, талэсь шимесэз, куке яратоно адямидэ берпум сюрес вылэ келяськод. Курыт синкылиос, кулэм мурт сярысь беромем шуныт кылъёс. Дораз бертыса, нылаш соку куараен бӧрдӥз. Шай вылысен гадь тыраз люкаса возем бӧрдонэз кужмо тудву сямен ӧръяськиз. - Эзелез сыӵе вылэм, нылы, - сокем чигиськемзэ адӟыса буйгатэ анаез, - уть, адӟонэд пыд улысь потэ, туннэ улэп, ӵуказе... - Ӧвӧл, анай, озьы ӧвӧл, ваньмыз со асьме бордысь потэ. Улонмы ог-огенымы герӟаськемын, ог-огмес гажаны, валаны, яратыны ум быгатӥське. Соин кинлэсь ке улонзэ жалятэк ишкалтӥськомы. - Соиз но шонер, дыр, нылы. Тани Томаедлы анай-атайёсыз вылысьтыз вылаз чебер дӥсь басьяло, нош созы пересь анайзы шоры черекъя, пе, доразы но номыр уг юрттӥськы. Каньылэз вылын улон сюлэмез куасьтэ, уго сыӵе адями нокинэ уг жаля ни. Анаезлэн верам кылъёсыз полэстӥськизы бам вылтӥз питырась синкылиосын. Син азяз весь адӟисько на дышетӥсьсылэн корос дораз тэтчаса бӧрдӥсь вить но сизьым аресъем нылыз но пиез. Куректон-кайгуэн гуньдэм кузпалыз. Нина Антоновна, классэн кивалтӥсьсы, сюлэмыз кутыса кулӥз. Шӧдтэк шорысь. Шуак. Гудыритэк чилектӥз, ӵашйиз. Быдэс гуртэз паймытӥз.... Нина Антоновналы школаысь самой аляк классэз, Надяослэсь, сётӥзы. Азьвылэз куштӥськиз, ӟигары, пе, быре ини ужаны турттыса. Педсоветын пумтэм вераськонъёс пайда ӧз вае - "2"-ёсъя но дисциплиная та класс нырысетӥ интыосын вал. Нина Антоновналэн вуэмез ӧжыт ке но воштӥз класслэсь улонзэ. Пумтэм сьӧд зарезьысь тӧдьы парусэн, пеймытын пиштӥсь яркыт кизилиен ӵошатъяз дышетӥсьсэ Надя. Шумпотыса но гажаса шораз учкылӥз классной часъёс дыръя. Туж тунсыко ортчылӥзы соос. Аляк пиос гинэ но вунэтылӥзы асьсэлэсь "ужано" ужъёссэс. Озьы ке но, выль кивалтӥсьсылэсь чиданлыксэ эскерылыны ӧз вунэтылэ. Тани ук со ваньмыз туннэ кадь ик син азьын, сюлэме мертчыса кылемын... Ӟуч кыллы но литературалы сӥзем арнялы быдэс школаен дасяськизы. Туннэ, урокъёс бере, котькуд класс паймытоз аслаз быгатонлыкъёсыныз. Нина Антоновналэн но мылкыдыз умой. Урокъёс быризы. Гырлыен ӵош класс тыр чузъяськиз Славалэн черектэмез: - Пиос, пегӟом ке шат? Литературатэк но улыны быгатомы. - Кызьы озьы, Слава, дасяськимы ук. Собере мукет классъёсты но учкомы. Тани адӟод, аслыд ик тунсыко потоз, - валэктыны выризы Надяен Оля. - Тӥ тӧдьы куакаос ук, чеберъяськемды потэ, тӥ ик кыле, нош ми пегӟомы, - пумитазы вазиз Тома. - Со интые лучше видик учкод. Мынӥм ми доры, толон папа городысь ваиз. Во! Классно! - пӧлы пумзэ мычыса вераз сьӧдкысъем Коля. - Чеберъяськеммы потэ оло уг, нош мон литератураез яратӥсько, мыным возьыт тӥ понна, - вератэк ӧз чида Надя. Урокъёс бере Нина Антоновна классэ пыриз, Надяез но Оляез гинэ адӟыса, ымнырысьтыз пальпотонэз ышиз-быриз, гуньдыса кадь сылӥз, номыр ӧз юа. Вератэк но уго ваньмыз валамон вал. Киноын сямен, Надялы син азяз огез бӧрсьы мукетыз суред пуксе. Тани Слава дышетӥсьлэн ӝӧк вылаз кыӵе ке бинялтэт понӥз. Эн, пе, кутылэ, учком, ма луоз урокын. Дышетӥсьсы туж куалектӥз, бинетысь мозмытскем шыр пырак вылаз тэтчыку... Та ивор вуиз Нина Антоновналэн кулн нуналаз. Ветлӥзы милициысь. Классысь куд-огез пиос вина юыса, кӧс нуналэ клубын маке но дауртӥллям. Классэн кивалтӥсез милицие ӧтё. Нош со тӥни мукет азе кошкиз. Пыраклы. Семьяезлы, ӵыжы-выжыосызлы вормыны луонтэм куректон-кайгу келтыса. Классын но шыпыт луиз, пиналъёс урокъёсын йыръёссэс ӝутъятэк пуко, переменаосы чус-чус. Дырын-дырын кинлэн ке викышъямез гинэ кылӥськылэ... Классэнызы шай вылэ ветлӥзы ке но, Надя эшшо мынӥз на. Пыдъёсыз асьсэос нуизы кадь. Выль гуэз нырысь усем лымы шобыртэм. Котырак юг-юг. Нош мар та? Лымы вылын розаос пишто. Кинлэн? Оло, Слава? Бен, бен, тани ук тодмо пытьыос. Таӵе суредэн дэри бервылэз Слава ачиз ик утялтӥз вал. Эшшо ке дышетӥсьсылэн ӵушылыны косэмезлы пумитъяськиз. Мар понна, пе, дежурнойёс миськозы ай. Кема ик сылэмед, лэся, Слава, пытьыосыд ик йӧӟектыса кылиллям. Ма сярсь малпаськид меда? Уть, горд розаос ваемед. Озьыен, ӧд вунэты походэ ветлыкумы Нина Антоновналэсь серекъяса верамзэ: "Дунне вылысь самой юн яратӥсько пиналъёсты но горд розаосты". Йӧӟектыны кутскем розаосты тупатыкуз, Надялэн син шораз йӧтӥз бумага юдэс. "Вождэс эн вае, мусо но дуно дышетӥсьмы. Ваньмыз понна простить каре". Со куспын кытысь ке кужмо тӧл потӥз но гожтэтэз питыръяса ик нуиз гуос вылтӥ, ӝоген со син шорысь ышиз. Оло, сопал дуннее вуиз? М. Никитина. Пичи Пурга ёрос, Вуж Монья гурт. Россия Федерациысь Правительстволы Вазиськон Удмурт Республикаысь Кун Кенеш профессиослы дышетӥсь вылӥ но шор ёзо учреждениосы уждунлы, стипендиослы, электрокужым но коммунальной юрттэтъёс понна тыронъёсты уксё кулэезъя но дыраз висъямтэен валче сюлмаськемзэ вера но пунэмез берыктыны но, коньдонэз тырмыт висъяны куре. Удмурт Республикаысь тросаз вылӥ учебной заведениосын 1995-1997 аръёс понна уждун тырымтэ на, Россия Федерациысь Правительстволэн вылӥ школалы сӥзем постановлениосыз уг быдэсъясько. Удмурт Республикаын 1998 арлэн нырысетӥ кварталаз федерацилэн учебной заведениосаз уждунъя пунэм 14 процент люкаськиз. 1998 арын апреле уждунлы коньдон 40 процентлы ичигес висъямын. 1997 арын электрокужым но коммунальной юрттэтъёс понна тырон 40,6 миллион манет (выль коньдонэн) люкаськемын. Таӵе югдур калыкез сюлмаськытэ. Со сярысь верало апреле но мае ортчем пумитъяськон ужрадъёс, Россиысь городъёсын студентъёслэн урамъёсы потэмзы, дышетӥсьёслэн профсоюззылэн 20 мае ортчоно ужрадзы. Федерацилэн учебной заведениосызлы коньдон висъянъя ужпумез быдэстон понна дэмласьком юнматэм сметаосъя но висъям лимитъёсъя авансъёс но кредитъёс сётъяны Федерацилэн Удмурт Республикая казначействоез пыр. Оскиськом, дышетон учреждениослы тырмыт коньдон висъян пумысен ужпумез берлолы кельтон Удмурт Республикалэсь экономиказэ, политиказэ, культуразэ азинтонын урод ласянь шӧдӥськоз шуыса валанын огъя кыл шедьтомы. Удмурт Республикаысь Кун Кенеш косэмъя Удмурт Республикаысь Кун Кенешлэн Президиумез. Удмурт Республикаысь Кун Кенешлэн Президиумез умоен лыдъяз 1998 арын 6 мае. КЫДЁКЫСЬ ГУРТЫН Кияса районысь Кады-Сальяез аналтэмын уд шуы. Татын уж пӧзе, улон азинске. Ӝутско чебересь, шыкыс кадь ӝикытэсь улыно-вылыно коркаос. Гурт син азьын воштӥське. Бен, тыр улон инмысь уг усьы. Кады-сальяос котькуд удысын лулысь-сюлмысь тыршо но умоесь азинсконъёс басьто. Нош байлык люконтэм герӟаськемын музъемен: кызьы соин ужалод, озьы ик бусьтыр улод. Ю-нянь будэтӥсьёс пӧлысь туннэ нимысьтыз пусъем потэ механизаторъёсты Владимир Чухланцевез но Дмитрий Бурдинэз. Владимир Николаевич 27 ар гыре-кизе ини, мукет ужъёсты но дыраз но оскымон быдэсъя. Азьмынӥсь механизатор техникаез ӟеч уте-чакла. Соин ик тӥяськон учыръёссэ тодӥсь ӧвӧл. МТЗ-80 тракторзэ выль уд шуы, воштос ёзъёсын но секыт, озьы ке но, кылем арын нормалэсь кык пол трос зуродэ куро люкалляз. Ӟеч ужамзэ колхозын адӟытэк ӧз кельтэ, пусйизы. Премия чотын гинэ 2,5 тонна ю тысь сётӥзы. Арлыдо эшезлэсь адӟем каре Дмитрий Бурдин. Т-150 трактореныз 10 ар азинлыко ужа ни. Армиысь бертэмез бере, Дмитрий кытчы гинэ ӧз ветлы: Сарапулэ, Казахстанэ, но 5- 7 толэзь ӵоже гинэ ужаны чидалляз. Кады-Сальяын ик шудзэ шедьтӥз. Табере, пе, нокытчы уг кошкылы ни. Али аслыз выль корка пуктыны дасяське. Колхоз лэсьтӥськыны мылкыд карисьёслы нюлэс но, транспорт но сётэ. Зэм, Куӵосын (гуртлэн удмурт нимыз) ӟеч ужасьёссы ичи ӧвӧл. Соослэн тыршеменызы, "Рассвет" колхозын кады-сальяос арысь аре удалтэм ю-нянь будэто но тырмыт пудо сиён дасяло. Миым но котькуд гектарысь 19 центнер пала ю тысь люказы. Нош муоссэс уд ушъя, данакез - горд сюй. Берло дыре минерал сылал но ӧжыт вуэ. Но колхозысь валтӥсь агроном Анатолий Шаньгин но бригадир Валентин Глезденев тыршемъя- сюлмаськемъя, вань ужъёссы валаса радъясько. Пумен матэкто тулыс бусы ужъёс. Механизаторъёслэн но сюлэмшугъяськемзы шӧдӥське ни. Токма шорысь озьы уг шуиськы. Ю-нянь будэтӥсьёс берло дыре кысык дырлы, кизёнлы, тыро-пыдо, азьло кадь дасяськыны уг быгато: я соиз, я таиз уг тырмы. Ляб мынэ техникаез выльдон, эстӥськон, вӧйёс, тукъёс басьтон но мукетыз. Колхозын азьпал радын мыно Куӵосысь скал кыскисьёс но. Соос пӧлысь уката синмаськымон тырше Людмила Стрельцова. Миым быдэс фермая скаллы быдэ 2600 килограмм йӧл люказы ке, Людмила Николаевна - 3100 килограмм. Кады-Сальяын таӵе ужасьёссы трос. Гуртын соос гажано адямиос. Туннэ кӧняез ке сярысь гинэ верам. Ермолаево администрацилэн тӧроез Мария Коренева Куӵосэ ӵем вуылэ, калыкез ӟеч тодэ но со сярысь шуныт кылъёс гинэ вера. Озьы ик бен со вань. Г. РОМАНОВ. * Механизаторъёс Владимир ЧУХЛАНЦЕВ, Дмитрий БУРДИН но солэн пиез. * Доярка Людмила СТРЕЛЬЦОВА. * Шофёр Николай СТРЕЛЬЦОВ. * Ермолаевоысь тӧро Мария КОРЕНЕВА. Туспуктэмъёсыз В. КАМАШЕВЛЭН. Наталь Луод мултэс -шедёз липет Тросаз районъёсын берло дыре усьтӥськемын семьялы юрттэт сётонъя центръёс. Адямиос вазиськыны быгато психологъёслы, юристъёслы. Нош куке картэз кышнозэ но нылпиоссэ зор-кот, кезьыт шоры учкытэк коркась поттэ? Куке нылпи вайыны даяськись быдэ вуымтэ нылашез анай-атаез дораз ик пырыны уг лэзё, нылпизэ куштыны косо? Та учыре ини шуге- леке сюремъёслы мукет юрттэт кулэ. Со ласянь Ижевскын улӥсьёслы удалтӥз, шуыны луоз. Кылем арын август толэзе городын усьтӥськиз "Шугъяськись семья" ("Кризисной семья") учреждение. Интыяськиз со Индустриальной районысь одӥгаз бушам нылпи садэ. Нылпиен анай-атайёслы, шуге-леке сюрем пинал нылъёслы юрттэт сётонъя таӵе центр кылдытон сярысь вераськонъёс 1995 арын ик ӝутскылӥзы. Индустриальной районысь администрацилэн семья отделэныз кивалтӥсь кивалтӥсь Лира Николаевна Петровна трос гинэ сюлмаськоно луиз, та малпанэз уж вылыны быдэстон понна. Выль учреждениез кылдытон но солы юрттон ужъёсты ас вылаз басьтӥз Ижевск администрациысь Семьялэн, нылкышноослэн ужпумъёссыя но калыкез улон-вылонын утёнъя комитет. Нош кивалтыны солы оскизы Наталья Рудольфовна Бакакиналы. Учреждение кылдытэмын. Отын ужасьёс солы ним но шедьтӥзы "Шуныт корка". Туннэ нуналлы та юртын бадӟым лэсьтӥськон ужъёс орчытоно на. Огдырлы улон липет утчасьёслы татын чакламын дас комната усьтыны. Дас тямыс аресозь нылпиен анайёс но быдэ вуымтэ анайёс та юртын улыны быгатозы одӥг толэзёзь, тужгес секыт учыръёсы - куинь толэзёзь но. Пинал нылъёсты сюдозы дунтэк, нош нылпиен анайёс ласянь котькуд югдур нимаз эскериськоз. Шуге-леке сюремъёсты та юртэ интыяны юрттозы городысь семья отделъёсын ужасьёс, нылкышно консультатциос, роддомъёс, югдурез утёнъя отделъёс. Нылкышноос, нылъёс асьсэос но вазиськыны быгатозы. Но кызьы шуиз учрежденилэн кивалтӥсезлэн юрттӥсез Зоя Николаевна Борисова: - Юртмылэсь кытчы интыяськемзэ ми калыклы ум ивортӥське, юрттэт курыса вазиськыны луоз районъёсысь семьяен ужась отделъёсы яке нылкышно кенешъёсы. Нылкышноослэн "пурӟем" картъёссылэн кузё луэмзэс возьматэмзы, оло, потоз. Котьма ке но луозы юртэз возьмасьёс. Но телефонмес ми вераны быгатӥськом: 24-21-31. Юрттэтлы кулэяськисьёсын ужалозы пӧртэм специалистъёс: психолог, психотерапевт, юрист, социальной ужась. Эмъялозы но, буйгатозы но, семьяын кылдэм югдурзэс но тупатыны юрттозы, азьлань улонзэс чаклалозы. Выль кылдэм учрежденилы кык отделение луоз - нуназе ужась но станционар. Станционар сярысь верай ни, со али выльдӥськонъёсты возьма. Нош нуназе ужась отделение калыкен ужа ни. Юрттэтлы кулэяськись семьяослы, быдэ вуэмтэослы "Шуныт юртысь" юрттэт сёто. Пусйыны кулэ созэ но. Шуг-секытэ сюрем семьялы юрттэт сётӥсь таӵе учреждениос Россиын усьтэмын дас кык городъёсын гинэ, Ижевск но соослэсь адӟем кариз. Секыт югдуре шедемъёслы юрттэт сётон юртъёс районъёсын но азьланяз усьтӥськозы. Со пумысен ужрадъёс нуиськон. Одӥгзэ верам потэ, калыкез улон-вылонын утён удыс но, семья отделъёс но, егитъёсын ужанъя отделъёс но - та ужпум борды ваньзыт ӵош мед басьтӥськысалзы. Л. Малых. ЛЬӦЛЬ СЯСЬКА Поэт но прозаик, драматург но критик, фольклорист но этнограф, педагог но музыковед, лингвист но актёр, переводчик... Ваньмыз со - Герд. Та быдӟым адямилэн улон сюресэныз тодматскыку тодэ лыктэ М. Покчи-Петровлэн "Кык сяськаос" кылбурез. Отын вераське вазь тулыс ӝужам будосъёс сярысь. Нырысетӥез ваньмызлэсь ик азьло ӝутӥськем но усьтӥськем. Тол бере рос-прос сайканы вуымтэ котырез огназ яркыт бурдъёсыныз шулдыртэм, ассэ, вань чеберзэ быдэс дуннелы кузьмам. Та будосэз, пе, "вож куакысь уӵыпи но данъяз". Со вие ик ас понназ будэм мукетыз сяська. Ваньмыз сямен, шыпытак будэм, номырин но висъяськымтэ: модосэз но турын-куарлэнэн огӝужда, сяськаяськем но дырыз дыръя. Зэм, тусбуйзэ уноез ӧз адӟе. Турын пӧлы ышем сяська льӧль чебереныз нокинэ ӧз шумпоттылы, нокинлэсь мылкыдзэ ӧз ӝутылы... Нош востэм сяська сыӵе ужъёс ӧз лэсьтылы. Зэм, ваньмыныз огкадь луись будослэсь нокинлы пӧсь но, кезьыт но ӧй вал. Кылбур йылпумъяськыку тодӥськом: льӧль сяськаез пужмер ӝог куасалтэ, нош востэмзэ турын-куар шобыртэ. Кылбурысь чебер льӧль сяськаен, мон малпасько, ӵошатыны луэ Куӟебай Гердэз. Со но вылӥе ӝутӥськиз но пушйиз. Турын-куар пӧлы ӧз ватӥськы, валаз улонлэсь куронзэ: "Вамыштоно ке, мед кылёз пытьы..." Ноку, номырин согонтэм пытьы кельтӥз Куӟебай Герд ас бӧрсяз. Солэн сюлэме пыӵамон произведениосыз, удмурт культураез сяна, быдэс дунне вылысь огъя культураез узырмытӥзы. Герд, востэм сяська сямен, ас понназ шыпытак ӧз улы, тыршиз адямиос понна. Вань сюлэмзэ но быгатэмзэ сётӥз выльзэ, умойзэ ас калыкез доры вуттонлы. Со луиз вордэм калыкезлэсь мылкыдзэ усьтӥсь, солэсь шумпотонзэ но куректонзэ суредась, ас калыксэ "иземысь сайкатӥсь шунды". Дас куинь - дас ньыль ар куспын гинэ печатласькизы ог 400 мында кылбурез, 11 поэмаез, 2 повестез, 50-лэсь трос веросэз, 3 пьесаез, 100-лэсь трос научной статьяез, школаын дышетскон книгаосыз. Соос, оло, тросгес но луысалзы. Но, чебер льӧль сяськаез лек пужмерлэн куасалтэмез сямен, Гердэз но быдтӥз аспӧртэмлыко пужмер - репрессия. Пытсэт сьӧрын кутскиз Кузьма Павлович понна кӧшкемыт адӟон. Чик янгыштэм муртэ сьӧлтазы, кортназы. Чылкыт йырыз вылэ олокыӵе но жобез, пожез кисьтӥськиз. Трос курадӟонэз адӟыса кысӥз кылбурчилэн бадӟым тылыз, сӥялскиз пӧсь мылкыдыз, вӧлак усьтӥськем, курдасьтэм сюлэмыз дыректӥз, кышкан пачкатӥз сое. Озьы зӥбизы-быдтӥзы бадӟым талантэз. Нош сое витё вал ай трос ужъёс. Кӧня малпанъёс, луоз, быдэсмытэк кылизы. Унозэ лэсьтыса ӧз вуы ке но та быдӟым адями, калык сое ноку но уз вунэты. Гердлэн кизилиез котьку ӟырдыт но яркыт пиштоз. М. Покчи-Петровлэн кылбураз востэм сяськаез шимес адӟонлэсь котырысьтыз турын- куар утиз, юрттӥз солы сяськаяськыны. Инкуазьын ваньмыз чакламын: огез - ваньмыз понна, ваньмыз - огез понна. Нош улонын? Куӟебай Гердэз быдтӥзы вӧзысьтыз ик адямиос. Ӧз юрттэ солы, палэнскизы. Трос урод сямъёс люкето улонын льӧль-льӧль сяськаяны, пушйыны, будыны. Малы меда озьы?.. Зэм, льӧль сяська озьы гинэ уг безды, чеберзэ кузьма сюлэмъёслы. Соин ик улон мынэ азьлань. Куӟебай Герд, зэм но, льӧль сяська. Нокыӵе пужмер сое ӧз вормы! Татьяна ПАНТЕЛЕЕВА, Пичи Пурга ёросысь Вуж Монья школаын дышетскись. Югдур Уя-а чорыг "Арлетьын"? Тямыстонэтӥ аръёсы ёростӥ вераськонъёс вӧлмизы: Кейлудын, пе, рай луоз. Гуртэ асфальт кыскозы, Арлеть шур дуртӥ тыметъёс луозы. Отын - омыръямон чорыгез. Гуртын луозы бадӟым школа, нылпи сад, пудо утисьёслы шутэтскон юрт, клуб, эшшо оломар но. Гуртоос нырысь ӧз оскылэ. Но гурт кузя маке мертаса ветлӥзы сюрес лэсьтӥсьёс. Укно азьысь кенеръёсты тӥяно луоз шуылӥзы - татӥ асфальт ортчоз! Ми, соку школаын дышетскисьёс, лӧптылӥмы - городэ дышетскыны кошкимы ке, пырак корказьысен городозь - туфлиен. 7 иськеме школае дэриез но лымыез коласа жадиськиз ни уго. Татчыозь кытчы ке школалы, бадӟым сюреслы матэгес кошкыны малпаськылӥсьёс но ӧжыт буйгазы. Кытысь потӥзы вал со вераськонъёс? Элькунамы ваньмызлы тодмо, дыр, Вотка ёросысь "Пихтовка" чорыг хозяйство. Со ӟеч гинэ пайда сётэ. Тӥни ӵапак со выллем хозяйство кылдытыны малпамын вал Селта ёросысь Арлеть шур дурын. Гурт хозяйствоя но сиён-юон поттонъя министерствоын проект чакламын вал. Сое дасянэн кивалтӥз Кун Кенешысь депутат Владимир Константинович Мурашов. Предприятие кун чотын улоз шуыса чакламын бере, коньдон пумысен сюлмаськонъёс но кун вылэ усьыны кулэ вал. Хозяйствоез кылдытыны кутскизы, государствоямы ваньмыз йырин-чукин луыны кутскем бере. Кейлуд-Зюнья, Юмга-Омга, Чибирь-Зюнья гуртъёсты "Селтинский" совхозлэсь люкыса кылдытӥзы "Арлеть" рыбхоз. Воткаын ыстӥзы специалистъёсты. Кивалтыны кутскиз Мосичкин эш. Вуыкуз ик калыклы шуиз: "Гурт хозяйствоез мон уг валаськы, юрттэ асьтэос. Нош чорыген уно пайда поттом". Одӥг тымет лэсьтӥзы, карп лэзизы. Солы сяна, кун коньдон висъяны ӧз быгаты ни. Выль кылдытэм хозяйство, пайда басьятэк ик, куашканы ӧдъяз. Кивалтӥсь мар карыны паймиз. Оло, тылобурдо вордоно? Губи-а будэтоно? Но ӟудэм ужасьёсыз пумитаз мар вазьыны паймизы. Улытозямы улом шуыса, огдышемен скал кыскизы, лудъёсты гыризы-кизизы. Мосичкин кошкиз. "Гурт калык йыркуръяськыны кулэ ӧвӧл" малпаз, дыр: мон вуыкум ик верай, пудо утёнын номыре уг валаськы шуыса. Калык шуиз: узырмиз ни, мар кулэ на? Кузё утчаны кутскизы асьсэ пӧлысь ик. Но асьмеос, удмуртъёс, кивалтыны ум вордскиське, лэся. Кузё луиськом ке но, кивалтыны я моӵмы уг тырмы, я ас калыкенымы косъяськыны умой уг поты. Эшшо кык кузё воштӥськиз, хозяйство эшшо улэ лэзиськиз. *** Кылем арын март толэзе ыстӥзы ёросысь кивалтӥсь - Галина Михайловна Пластининаез. Калык нош паймиз - кызьы кивалтоз гурт хозяйствоез ноку адӟылымтэ-вӧталлямтэ адями? Татчыозь со ёросын гражданъёслы паспорт сётылӥз ук! Галина Михайловна дисциплина ласянь зол кивалтӥсь вылэм. Аналскем ужасьёсызлэсь кылзэс зол юа. Нош хозяйство изъян вае ке, со янгыш ӧвӧл - рыбхозлэн пирданэз сыӵе. Кызьы ӝутод хозяйствоын ужасьёс юо, уже уг потало, трактор-машинаосты укно улазы кӧлато ке! Кутсконо дисциплина бордысен. Уже уг пото - штраф! Тракторез дырыз дыръя гараже уг пырто - штраф! Озьы уждун басьтонзы но кулэсме. Калык дышиз штрафъёслы. Кылиз одӥг амал - азьтэм ужасьёсты 33-тӥ статьяя улляны. Адямиос туж ӧз куректэ - мар пӧртэмез: рыбхозын но, биржаын но уксё уг сётъяло. Биржаын коть ужаны уг косо, толэзяз огпол пусйиськыны ветлы но - ужед быриз. Но рыбхозысь потон сярысь куриськон гожъяны кутскизы ужась, юисьтэм воргоронъёс. Малы? "Сюлоен шукке, преник уг сёты", - шуо соос. Со понна али Селталась ужасьёс ветло. Кык машинаен. Нош кейлудъёс, тудвутӥ, дэриетӥ пыдын. 8 часлы ужан интыяд лу. Ку гуртысь пудодэ утялтод - аслад ужед. Ӟардонысен ӟардонозь ужам понна уждун ке, пе, дыраз сётысалзы. Сое татын ӵемысь ю- тысен сёто. Но нылпиез юэн уд сюды ук. Вылазы но маке дӥсяны, пыдазы но кутчаны кулэ. Зэм, пыдкутчан сярысь ке, кивалтӥсез ушъяны кулэ, дыр. Алигес уждун чотын резина сапег вайылӥз. Пудо сюдӥсьёслы ужаны ик ветлыны номырин вал ини. Ваньмыз сямен басьтӥзы. Но адямиослэн ужждунзэс уксёен басьтэмзы потэ. Хозяйствоя шорлыдын басьтоно ке, со 200 манет котыр усе. Созэ но кварталлы огпол 10 процентсэ сяна уг адӟыло. Кылемзэ ӧйтӧд ку, ӧйтӧд кӧня процент сётозы. Уждун сётъяны али хозяйстволы 120 сюрс манет шудьтоно, связистъёслы, тыл сётӥсьёслы тырыны - 368 сюрс, медицинской страхованиея, Пенсиосъя но Калыкез уже интыянъя фондъёсы эшшо 500 сюрслэсь уно. Нылпи вордӥськем понна пособиосты гинэ но кейлудъёс, но юмгаос арен возьмано луо. Кытысь шедьтоно коньдон? Кивалтӥсь малпа: "Пудо вандоно". Кутскизы сӥль вузаны. Ошпиосты, ветылъёсты гинэ вузаса, коньдон пунэмъёсты берыктыны, гырон-кизён ужъёсты ортчытыны уд тырмыты. Кейлудын ферма вань, отысь кысконо скалъёсты келяно - Кейлудын пудо возьыны туж шуг - сюрес отчы ноку уг луы. Кыскем йӧлэз но кытӥяз поттыны номырин луэ. Огпол ӟырт кезьытэ трактор ӧз вуы. Дыр нуназе бере 3 час ни, йӧл келямтэ. Бригадир Пластининалы жингыртэ. Соиз урмиз: - Коть вылады поттэ. Вал шедьтэ. - Сӥес - тӥрлыкмы ӧвӧл. - Кур Черновлэсь, Рябинин Витялэсь... Фермадэс быдтом! Бригадир гурт кузя кошкиз. Кинэ косод? Вылэм ик ай кылзӥськисез - ас валэнызы йӧлэз Юмгаозь поттӥзы. Выль ар азьын скал гид, зэм но, бушаз. Хозяйствоысь специалистъёс, экономист но зоотехник шуо, солы, пе, мукет мугъёс но вал: "Гид сисьмыны кутскемын. Вӧзаз эшшо одӥгез вань на - азьвыл отын ошпиосты сюдӥзы, но сое йӧл кысконолы тупатъяны трос уксё кулэ. Собере кейлудъёс асьсэос аналскизы - одӥг гидысь пудоез сюдыны мылзы ӧз поты - сиён пыртылӥсь ӧз шедьтэ". Ферма пытсаськемен, гуртысь бригада но быриз. Табере гуртэ толалтэ сюрес чик уз мычиськылы ни. Кылем толалтэ машина возисьёс куремен, 2 пол мычизы ик. Со понна быдэн 50 манет бичазы. Рыбхозлэн аслаз бульдозерез ӧй вал бере, райцентрысь куразы. Нош озьы дуно усе, 50 манет тыр гинэ уг. Тол куазь уг учкы уго,жоба но жоба. Ужбергатӥсьёс машинаоссэс Юмгалан возизы. Отчыозь - кин пыдын, кин куасэн, кин валэн. "Скорой" но Юмгаозь сяна уг вуы. Хозяйстволэсь казназэ узырмытыны штрафъёс юртто ик. Кейлудъёслэн пудооссы кылем гужем кизем вылтӥ ветлӥзы. Кунянъёс, валъёс понна тырон лэсьтӥзы. Гуртоослэн нокызьы соглаш кариськемзы уг поты валъёссы понна тыриськонэн. Ми, пе, гужембыт вал возьмасьлы уксё тыриськом, со ик мед тыроз. "Но нокыӵе огкыл кутэмын ӧвӧл, соин ик сыӵе штрафлэсь мозмытэммы уг луы", - валэктӥз хозяйствоысь экономист Е. Чувашова. Тулыс бичаны кутскизы ву понна дун. Рыбхозын ужасьёслэсь сое уждунысьтызы кельтӥзы, пенсионеръёс асьсэос коньдонэн сётыны кулэ вал. Палар понна сётӥзы. Кудӥзлы 55-60 манет тыроно луиз. Кӧня ке улыса, мукет палар понна тыроно ни, пе. Но пенсия ӧз вуы ай - мае тырод? Галина Михайловна кема ӧз малпаськы, 17 апреле Кейлудысь вуэз пытсаз. Ӵап Пасха азьын. Адямиос мунчое дасясько - ву ӧвӧл! Гуртысь покчи пиналъёс сярысь но, кыӵе ке чер вӧлмон, тыл потон (Инмар медаз кушты), ӧз ик малпа, шӧдске. Ёрмем адямиос лымыез шунтыны кутскизы. Но ву ӧвӧл ӵуказеяз но, ӵуказе улысаяз но. Калыклэн чиданэз быриз. Татын кык ар пала кыед ву юыса улӥзы ни: пасяськем гумыосы скал гидысь отчы сюрыса, колонкаосы вуылӥз. Адямиос сое сӥсъяса витьылӥзы. Но вуэз быректэм бере но, зыныз кыльылӥз. Саниэпидемистанцие гожтэт ыстӥзы. Валтӥсь врач Г. Н. Шиляева паймиз. Кызьы озьы? Комиссия люкаса, гуртэ потӥзы. Югдурез эскерыса тодмо луиз - тӥямын "Калыкез алясь висёнъёслэсь утён сярысь" Законысь 9-тӥ ёзэтысь 1, 3, 4, 6, 8 но 15-тӥ ёзэтысь 1, 2, 3 пунктъёс, "Басьясьёскисьлэсь правозэс утён сярысь" Законысь 10-тӥ ёзэт Гуртэ чылкыт ву сётыны косӥзы, Пластининалэсь валэктон куризы. 24 апреле ёросысь санэпидемистанцие со таӵе валэктон сётэ: "... гуртэ ву сётыны уг луы, малы ке шуоно, вуэз пытсам дыръя кин ке ас тодэмъяз насосэз ужатыны вырем озьы двигатель сутскемын. Сое воштон вылысь, хозяйстволы 3 сюрс манет кулэ. Сыӵе луонлык шедьтӥм ке, ву лэземын луоз". Г, Н, Шиляева та учыръя бумагаосты прокуратурае келяз. Ӵуказеяз ик Кейлудэ рыбхозлэн кивалтӥсез ву лэзьыны косыса жингыртӥз. Ачиз ӧз ветлы. Колонкаосы чылкыт ву вуиз. Иське, нокыӵе двигатель сутскемын ӧй вал? Вераны кулэ, дыр, созэ: Юмгалан (посёлокын) ву понна али но куд-огезлэн уксёзы тырымтэ на, но отын вутэк ӧз улэ. Кивалтӥсьсылы ӝожтӥсько огшоры ужась муртъёс. Специалистъёс кузёзэс уг курлало. Солы луыса, дисциплина но радъяськиз, кылем арын пудо сиён но умой дасязы. Туэ тани йӧлзы йылӥз: рыбхозъя скаллы быдэ 1. 600 килограмм кыскыны чакламын вал, арлетъёс 2000-озь вуттӥзы. 64 процентсэ нырысетӥ сортэн келяло. Тулыс кизёнлы ёрос 15 сюрс манет проценттэк ссуда висъяз. Кык машиналы эстӥськон басьтыны тырмоз. Выль арозь 50 процентсэ, оло, "кысыны" быгатозы ай. Туэ гырон-кизён ужъёссы умой мыныны кулэ. Со понна нимысьтыз бригада кылдытӥзы, огкыл гожтӥзы. Дыраз вуттӥзы ке, 10 сюрс манет уждун висъямын луоз. Ужасьёс мыло-кыдо басьтӥськизы. *** Селта ёрослэн йырыз В. И. Шиляев та хозяйствоя ас малпанъёссэ вера: "Али та хозяйство ёросъя тужгес лябез луэ. Пайда поттэмез уг луы. Кызьы потоно сыӵе шуг- секытысь? Ужано Кузёлы. Калыкен огкылысь ужано. Штрафъёсын калыкез уд вормы - адями озьы уката аналскоз. Со понна вань амал: бригадаосын огкыл гожтыса ужаны. Дисциплинаез но ачиз лэсьтэ. Гуртъёслы кулэ зэмос кивалтӥсь. Сьӧрлось лыктэм адямиослэн-а висёз сюлэмзы бырись гурт пала? Кейлудэ сюресъёс ноку ӧй вал, но татчыозь улӥзы, йӧлэз но поттылӥзы. Ас музъем вылаз будэм адями гинэ умой-умой кивалтыны быгатоз. Но сыӵеос ӧвӧл. Ум дышетӥське, ум дӥсьтӥське. Кошкоз таиз, лыктоз мукетыз. Мар воштӥськоз. Зэм, Галина Михайловна гурт хозяйствоя специалист ӧвӧл. Но кин ке но кивалтыны кулэ ук! Сотэк хозяйство тус-тас луоз. Калыкен огкыл шедьтысал ке, ужаны, оло, каньылгес луысал. Галина Михайловна ас кожаз выре. Мыным туж умой ӧз поты, куке Пудо утисьлэн нуналаз мон 5 часлы ӵукна Юмгала фермае вуи. Пумитаз зоотехник Т. И. Веселкова. Вераським гурт калыкен, пырай медпунктэ, библиотекае, нош кивалтӥсьсы лыктонме тодэм вылысь но ӧй вал. Ёросамы 12 хозяйство. Витяз нылкышноос кивалто. Куд-огаз азинсконъёс вань ни. Нош куд-огаз адямиосын кыл шедьтытэк, соку ик "сюлоен жуго". "Милемын кенешемез уг поты. Огпол но кызьы каром ай шуыса вазиськемез ӧвӧл. Конторае шер пыра (соиз умой - кионэз пыдыз сюдэ. Мон ветлон нуналэ но Галина Михайловна ужезъя, кизён техникалы воштон ёзъёс басьтыны кошкемын вал - авт.. Мар малпа, сое лэсьтэ, калыклэсь уг юа. Куддыр чабкиськыса кылиськом", - шуо специалистъёсыз но. Оген венез но ӝутыны секыт, шуо калыкын. Та югдуръя со ӵап тупа. Пунэмъёсты берыктыны, сюрес мычыны коньдон кулэ. Но калыкен кусып тупатон, ужась муртэ гажан сямез миллионэн но уд басьты. Куддыр ӟеч кыл гинэ но иназ мынэ. З. Вахрушева. Бере эн кыле "Шундыкар-98" лагере шедён понна, школаын душетскись усточи но быгатӥсь пиналъёс пӧлын ялэмын вал конкурс (печатламын "Удмурт дунне" газетлэн 55-тӥ номераз). Тодазы вайытӥськом, пиналъёс, ужъёсты конкурсэ ыстоно 1 июнёзь. Бере эн кыле, кӧня ке нунал гинэ кылиз на. Н. Пантелеева. ПИНЬ ЭМЪЯМЕД ПОТЭ КЕ... Пичи Пурга районысь Бураново черкогуртын кема аръёс ӵоже ужа ни пинь эмъян кабинет. Азьло аръёсы татчы йӧнатӥськыны ветлӥзы матысь Кечово, Аксакшур гуртъёсын улӥсьёс но. Но, кызьы вера Бурановоысь стоматолог Антонида Николаевна Васильева, висисьёс тырмо асьсэ дорын но. Гуртсы Ижевсклы матэ интыяськемын, соин валче эмъяськонние отысь но трос калык ветлэ. Мугез валамон, городысь стоматологической больницаосын дунъёс туж бадӟымесь. Наркоз понна гинэ 20 манетозь кисыез бушатоно луэ, пломба пуктон понна ӧжытсэ 6 манет тыроно, троссэ - 35 манет котыр. Ӵошатэ: Бурановоысь больницае нырысьсэ лыктыку 5 манет тыроно, отӥяз дунтэк ветлыны луэ. Вӧсь луонэз "небӟытон" понна татын новокаинзы сяна ӧвӧл, солэн кужымез сокем зол ӧвӧл. Но тросэз висисьёс аптекаысь асьсэ коньдонэн либокаин препарат басьтоно луо. Со дуно ӧвӧл - 50 копейка. Жаляса верано, гуртъёсысь пинь эмъян кабинетъёс но ӝоген городысьёсызлэсь адӟем кароно луозы, дыр. Сотэк эмъюм басьтэмзы уг луы. Сыӵе ини со, туала улон: табере тазалык но коньдонэн мертаське. Э. КУМАЧЕВА. Югдур Мар зарнилэсь но дуно? Уж! Али республикаямы 50 сюрс пала адямиос уж утчало. Быдэс Россиын сыӵеос - ужаны быгатӥсьёс пӧлысь 2,5 процентэз, Удмуртиын - ог 5 процентэз. Бордазы эшшо ватсаны кулэ на уж сётонъя центръёсы вазиськымтэосты. Малы бен сокем трос? Одӥгез валтӥсь муг ваньмызлы тодмо: ож тӥрлык поттӥсь предприятиос куашкан калэ вуэмын. Республикаямы поттӥськись ваньбур пӧлысь 80 процентлэсь уноез сыӵе вал. Табере данакез соос акциосын огазеяськонъёс луизы, ужасьёссэс возьыны уг быгато. Кыкетӥ мугез герӟаськемын лэсьтӥськонэн но мырдэм шокась куд-ог мукет удысъёсын. Улон коркаос но предприятиос пуктон берло дыре чидантэм синӥз. Шуге-леке сюризы кирпич шуккисьёс но нюлэс корасьёс. Ужтэк кылемъёсъя Удмурия быдэс Россиын улӥысен 8-тӥ инты басьтэ. Асьемос "азьпала" потӥм Уралысь бускельёсмы пӧлын. Ужтэк кылемъёслы пособие тырон 14 толэзь ӝега ни. - Со али 20 толэзь луысал ни, - шуэ калыкез уже интыянъя кун комитетлэн тӧроез Евгений Роганов, - бартер амалэз ке ӧй кутысалмы.Предприятиосын кусыпъёсмес умоятыса но ужтэк кылемъёслэн мылкыд каремзыя соослы пособие чотын висъяськом магнитофонъёс, пызь, сахар, мукет арбериос но сиён-юон. Калык сое басьтэ, улыны кулэ ук. Куд-огез мотоцикл но куре. Зэм, военно-промышленной комплекслэн (ВПК-лэн) чутэмез вань калыклы уродэн берытске. Сое выльдыны висъям коньдонэз тыро-пыдо кутыны ӧм быгатэ. Соин но выль ужан интыос кылдытымтэ. Кин бен туннэ мултэс кыле? Нырысь ик, шоро-куспо арлыдо но дышетскем кышномуртъёс. Соос кошкизы предприятизы урод ужамен но уждунзэс дыраз сётъямтэен. Собере - егитъёс. Училищеосты быдтэмъёслы инты уг сюры, выль профессилы дышетсконо луэ. Ватонэз ӧвӧл, вылӥ дышетскон завдение бере но ваньмыз инты уг шедьто. Тросэзлэн 30- 50 кын корт куртчон вакытсы. Пӧлазы вань туж усто специалистъёс но кибашлыос. Берло дыре кӧня ке йылӥз пенсие потон азязы ужтэк кылемъёслэн лыдзы (2 процентлы). Уноез хозяйствоос мырдэм возисько. Музъемъёс уг паськытало, фермаос пичияло, пудоослэн лыдзы синэ. Техника вужме, выльзэ басьтӥсь ӧвӧл. Ужан интыос нош ик быро. Вылаз ик, музъем ужасьёс но пудо утисьёс туж ичи уждун басьто. Соин ик куд-огез, пособие понна юри пыре ужтэк кылемъёс пӧлы. Уж утчасьёс радын дисциплинаез тӥямзы понна уллямъёс - 3,8 процент, ужысь кужмысь поттэмъёс - 12,5, военной службаысь мозмытэмъёс - 1,2, шоро-куспо школаез быдтэмъёс - 4,1, тюрьмаысь потэмъёс - 2,2, профтехучилищеосты йылпумъямъёс - 2,6 но мукет мугъёсъя мозмемъёс - 16,2 процент. Дышетскемъя кылдэмын таӵе суред: шоро-куспо школаез быдтэмъёс 40,3 процентэз уж уг шедьто, нырысь профессия басьтэмъёс - 20, техникумъёсты но училищеосты йылпумъясьёс - 14,4 нош вылӥ образованиен 4,4 процентэз. Одӥг витьмосэзлы ужасьтэмъёслы 16-24 арес гинэ тырмемын, 10 процентэзлы - 25-30 арес. Одӥг куиньмосэз быдэс арлэсь кема уж уг шедьто ни, сомындаез ик - 4 толэзь. Кызьы бен ужало районъёсысь но городъёсысь уже интыянъя центръёс? Котькыӵеез вань. Умойёсыз пӧлы пыро Ижевск, Завьялово, Дэбес, Шаркан, Яр, Пичи Пурга, Воткинск, Алнаш но мукетъёсыз. Ваньзэ уг лэсьто на Грахово, Селта, Сарапул, Каракулино но куд-ог мукет районъёс. Ужтэк кылемъёс тужгес но трос Красногорск районын (12,3 процент), Кизнерын (11, 6) но Камбаркаын (11,5). Калыкез уже интыянъя ёзъёс трос ужрадъёс ортчытъяло: ужан интыосты возьматонъёс, выль профессиослы дышетон, оскон телефон пыр кенешон. Озьы ке но, туэ ньыль толэзьскын, миым та дырен ӵошатыса, ужлы ёрмисьёслэн лыдзы 5 процентлы йылӥз, яке 2,3 сюрс муртлы. Туэ 16 сюрс ужан инты (вакансия) кылдылӥз вал. Данакез "пытсамын" ни. Ужасьтэмъёсын ӵошатыса, со 20 пол ичи. 1 маёзь ваньзэ-ӧвӧлзэ 2,5 сюрс ужан инты кылиз на. Туж ӧжыт. Тӥни таӵе асьмелэн туннэ улонмы. Арысь аре калыклы секытгес луэ уж шедьтыны, но азьланьын умоесь воштӥськонъёслы оскыны кулэ. Геннадий Романов. "02" ивортэ Машинаосты табере потто люкетэн гинэ Ижевскысь автозавод табере машинаос уг потты ни, шуыны луоз, ӟигарыз ӧвӧл. Но машина ёзъёсты "шӧртчиос" азьвыллэсь но етӥз потто предприятилэн азбарысьтыз. Татын ужась З. Анатолий но В. Сергей одӥг уе 22 (!) кардан вал поттӥллям. Ярам коть, милиция табышсэс таланы вуиз. Эшъёссы - адӟем кариллям З. Сергей но О. Николай. Таосызлэн но пайда поттонзы уретэмын вал милициын ужасьёсын. Али соос шонерто лушкам ваньбурлэсь дунзэ. Одӥг сюрс манет гинэ со уз луы, дыр. Огъя учконо ке, кылем шутэтскон нуналъёс но арнялэн кутсконэз удалтӥзы лушкаськонъёс ласянь. Тани Ижевскын кык часэ уйшор бере ГАИ-ысь ужасьёс ӝегато Б. Алексеез но Ш. Андреез. Егит воргоронъёс одӥг беромем нылкышнолэсь дӥсьсэ талаллям вылэм. Озьы ик кырмемын огназ кельтэм машиналэсь автомагнитола лушкась - 24 аресъем Л. Святослав. Балезиноын вуриськон мастерскойын "кузёяськиллям" П. Вадим но К. Виктор. Нялтас вераса, кыкназы но егитъёс судэн тодмо ини. Глазовысь милиционеръёс ӝегатӥллям 32 аресъем К. Алексеез. Судэз азьвыл адӟылэм "Робин Гуд" П.-лэсь 9 сюрс манетсэ таланы турттэ вылэм. Кызьы шуо, сьӧд ӵукна ик, 6 часэ, Ижевскын улӥсь Х-валэн квартираяз, тупась усьтон шедьтыса, куинь пиос пыриллям. Кузё кышноез жугыса, солэсь басьтӥллям 130 манет уксёзэ, 1 сюрс манет тыр валес котырзэ но басмазэ. Одӥгез йыртэмась кутэмын ини. Бадӟым ыштон (яке вузкарисьёс понна ӧвӧл-а?) адӟизы Удмуртпотребсоюзысь кивалтӥсьёс. Соослэн юртысьтызы 9,5 сюрс манет тыр оргтехника лушкамын. Возьмаськисьёс но люкетӥллямтэ йыртэмасьёслы укноысь решёткаез тӥяны но пиялаез сӧрыны. Вуиз гужем, пӧсь, тӧло куазь. Соин ӵош тылпуос но. Вотка тракт дурысь "Квант" массивын ӝуаз одӥгез корка. Тылпуын бырыны шедиз 34 аресъем Т. Иван. Яр районысь Дизьмино посёлокын сутскиз улыно-вылыно юрт но кык кузёлэн гидкуазез. Селта районысь Эшметьгуртын сутскиз юртъер но пудо. Бырыны шедиз 62 аресъем С. Зинаида. Игра районысь Кушья станциын тылпу быдтӥз ньыль юртъерез. Ыштон лынъямын 100 сюрс манетлы. Сак луэ, мумы-бубыос! Куазь шуныт луыса, пиналъёсты чидантэм бордаз кыске ву. Соосты чаклась ӧз ке луы, кема ик ӧвӧл шудтэм учырозь но. Шаркан районын чорыган висказ выиз 10 аресъем Е. Саша. Озьы ик пыжысь усьыса быриз Алнаш районысь Ш. Альфред. Йылпумъяса арсенал сярысь. "Ижсталь" огазеяськонлэн куштӥськем корт люкан азбараз шедьтэмын кӧня ке снарядъёс но граната. Кышкыт ватос полигонэ пуштытыны нуэмын. Кытысь, кызьы со вуиз корт пӧлы, али созэ шараяны туртто. ТАИЗ АР - АШАЛЬЧИЛЭН НО ГЕРДЛЭН "Удмуртия" издательство, 60-тӥ аръёсысен кутскыса ини, гожъясьёсмылэн улэмзы но творчествозы сярысь "Удмурт писательёс. Удмуртские писатели" сериен альбомъёс поттэ. Нырысь соос удмурт кылын гинэ пото ке вал, али - удмурт но ӟуч сямен (К. Герд, С. Самсонов). Туэ асьмеос Куӟебай Гердлэн но Ашальчи Окилэн вордскемзы дырысен 100 ар тырмонэз пусйиськом. Соосты сӥлы карыса, издательство поттӥз Гердлэсь "О ней я песнь пою..." но "Зарни кылчуръёсы", озьы ик Ашальчи Окилэсь кылбуръёсын "Чыртывесь. Ожерелье" книгаоссэс. Тани ӝӧк вылам сигнальной экземпляр... Янгышъёсыз ӧвӧл ни-а шуыса, сое эскерозы на типографиысь но издательствоысь кивалтӥсьёс, художественной редактор, редактор, корректор. Ваньмыз умой ке, быдэс тиражзэ печатланы кутскозы... Таиз выль книга нимаське "Ашальчи Оки. Улэмез но творчествоез. Жизнь и творчество". Дасяз сое тодмо литературовед, Ашальчи Окилэсь кельтэм ужъёссэ эскерись А. А. Ермолаев. Та выллем книгаосты дасяны капчи ӧвӧл. Автор туж умой тодыны кулэ писательлэсь творчествозэ, улэм-вылэмзэ, архивысь но музейысь документъёс, иллюстрациос утчано. Алексей Афанасьевичлы трос бызьылоно луиз. Нош тодмо художник В. В. Рубцов быдэс уй чырым но карытэк макет лякылыса пукиз (ӝоггес поттыны тыршим). Мон туж шумпотӥсько таӵе книгалэн потэмезлы. Лыдӟисьёслы, тужгес ик дышетӥсьёслы, студентъёслы (соослы шедёз меда?), пиналъёслы кулэ со. Книгаысь трос тунсыкозэ шедьтоды, Ашальчи Окилэн пиезлэсь тодэ ваёнъёссэ лыдӟоды... Пиез сярысь кӧня ке вераме потэ. Валерий Иванович Карачёв улэ Владивостокын. Висеменыз анаезлэн юбилеяз сокем кыдёкысь лыктыны ӧз быгаты. Со туж шумпотэ но пайме анайзэ сыӵе сӥлы каремлы. Тодаз вае (ми соин ог-огмылы гожтэтъёс гожъяськом): концертъёсын, пе, ялан кырӟанъёсыз чузъясько вал, нош нимзэ уг поттыло. Валерий Иванович бадӟым тау карон кылъёссэ вера Алнашысь Ашальчи Окилэн музеяз ужасьёслы, озьы ик Алексей Ермолаевлы, Петр Поздеевлы, Петр Черновлы, Александр Шкляевлы но Петр Кубашевлы анайзэ буре ваемзы понна. Адӟысал ке со, кыӵе шуныт ортчытӥзы Лина Григорьевналэсь юбилейзэ Алнашын, Грахын но Ижевскын! Нош асьмеос ялан лыдӟом Ашальчи Окилэсь сюлме пырись кылбуръёссэ. Валентина УРАЗАЕВА, "Удмуртия" издательствоысь редактор. 02 ивортэ Чаклаське ву вылын! Кылем шутэтскон нуналъёсы республикаямы 74 йыруж лэсьтэмын: 3 ваньбурез кужмысь талан, 11 лушкаськон учыръёс, йыртэмасьёс но мукет. Сюрес вылын 18 мурт шуккиськиз, 47 тылпу потаз - одӥг мурт тылын быриз. - 22 мае Воткинскын уйшор бере 1 часэ тылпу потыса, ньыль квартираем корка ӝуаз. Улон интытэк 8 семья кылиз. - Селта ёросысь Эшмедьгуртын корказ сутскиз 62 аресъем Зинаида С. Ӝуаз гидысь пудо но. - 23 мае Сюмси ёросысь Сюрекын теплотрасса вылын шудыкуз электропровод борды йӧтӥськыса кулӥз 10 аресъем Саша. - Лушкаськисьёс табере сад-бакчаосы кошкемез возьматэк ик ӧсэтӥ пыро. Динамовской ульчаысь 83 коркась огаз квартирае усьтон тупатыса, лушкаськисьёс 6 часын ӵукна пыриллям. Кузё кышноез тышкаса, 130 манет коньдон валес котыр но портьераослы басма лушкаса кошкиллям. Но "ӵук куноослы" чылкыт валес вылын кӧланы уз кылды, огез лушкаськись тодмо ни, сое милиция утча. - Пӧсь нуналъёс вуэмен, шудтэм учыръёс йылӥзы. 24 мае Шаркан ёросын чорыгакуз выиз 10 аресъем Саша Е. - Со нуналэ ик пыжен уякуз, Алнаш ёросын вуын бырыны шедиз 7 аресъем Альфред. Вазиськиськом анай-атайёслы: нылпиостэс ву дуре мӧйыостэк эн лэзе. Тыметъёсын пичиослэн ас кожазы шудэмзы шудтэм учыре вуттэ. Чаклаське. Бордаз кыске пыӵал тӥрлык Асьсэды гажась бандитъёс туала дыре сьӧд ужъёссэс пуртэн яке зырен кемалась уг лэсьто. Сёт соослы пистолет, автомат, граната. Кытысь шедьто сыӵе пыӵал тӥрлык? Данаксэ армиысь но заводъёсысь. Туэ гинэ Россиын шараямын пыӵал тӥрлыкен герӟаськем 46,4 сюрс преступление. 16,5 сюрс йыружын пыӵал тӥрлык кутэммын вал. Арлэн кутсконысеныз пӧртэм мугъёсын ышемын 3104 пыӵал, со пӧлын - 977 пистолет, 944 автомат но 324 гранатомёт. Ваньзэ верано ке, али Россиын утчало 34,1 сюрс единица ож тӥрлыкез но техникаез. Со пӧлын - 9 ракетной установка, 12 пушка но миномёт, 959 гранатомёт, 1112 пулемёт, 7294 автомат, 3138 карабин но винтовка, 19,4 сюрс пистолет но револьвер. Со шарае потэмез гинэ. Мар кароно, та быдӟа арсенал адями быдтон понна медам кутӥськы, аслаз кузёосыз доры мед берытскоз шуыса? Кызьы алоно азьланяз ож тӥрлыкез лушканэз-таланэз? Таӵе ужпумъёс эскеремын вал Ижевскын ортчем межведомственной научно-практической конференциын. Татчы люкаськылӥзы Волга но Урал вискысь республикаосысь но областьёсысь правоохранительной ёзъёсын ужасьёс, учёнойёс но пыӵал тӥрлык поттӥсьёс. Малы одно ик Ижевскын - ваньмызлы валамон, дыр. Ӧжытэз город ушъяськыны быгатоз "ож тӥрлык поттӥсь кебит" нимыныз. Но та "кебитэн" герӟаськемын йыружъёс но. Тани туэ гинэ ини правоохранительной органъёс талазы 250 пӧртэм пыӵал тӥрлык, 76 сюрс патрон, 3 граната, 5 килограмм взрывчатка. Конференция дыръя тунсыко докладъёс лэсьтӥзы асьсэ удысъёссыя бадӟым специалистъёс - А. Коновалов, Ю. Антонов, Р. Абызов, В. Триголосов, В. Мичкасов но мукетъёсыз. Люкаськемъёс пӧлысь тросэз лэсьтӥзы вакчияк ивортонъёс, веразы эскероно ужпумъёс пумысен асьсэлэсь малпанъёссэс. Оскем потэ, пыӵал тӥрлыкез законэз тӥяса бергатонэн нюръяськонын та конференция бадӟым пайда сётоз шуыса. Малы ке шуоно, котькудӥз специалист эшъёсызлы юрттыны быгатӥз аслаз опытэныз, визьнодэныз, ачиз но мукетъёсызлэсь дышетскиз. Конференциез котыр ласянь ӟеч дасяллям РФ-ысь МВД-лэн Юридической институтэзлэн Ижевскысь факультетысьтыз кивалтӥсьёс, дышетӥсьёс но учёнойёс. Г. Тихонов. ӜУАТСКОЗЫ-А ВЫЛЬЁСЫЗ КИЗИЛИОСМЫ? Асьмелэн Данкомы шуысал мон Куӟебай Гердэз. Кызьы М. Горькийлэн героез, аслэсьтыз ӝуась сюлэмзэ вылэ ӝутыса, калыкезлы пеймыт нюлэскысь югыт азе потыны сюрес возьматӥз, сыӵе ик кужмо но яркыт адӟиське асьмелэн но Гердмы. Туж ӟеч пусйимы асьмеос солэн вордскемез дырысен 100 ар тырмонэз. Ашальчи Окилэсь но юбилейзэ озьы ик пусйим. Та кык кизилиосмылэн яркыт пиштэмзы асьмелы али но юртто на ай мылкыдъёсмес бурдъяны, осконъёсмес кужмоятыны. Тодосчиосмы туж шонер лэсьто, та кык писательмылэсь ортчем сюрессэс, творчествозэс сэрттыса-пертчыса. Но, мон сямен, соин огдыре ик азьветлӥсьёсмы мур-мур мед малпаськозы вал ӵуказелы сюресмес югдытон сярысь. Ортчемзэ укыр трос бугыръяса, мар ке выльзэ ӝог лэсьтыны пӧрмытомы-а? Малы уг кенжо выльёсыз кизилиосмы? Чаклаське ай умойгес: асьмеды куд- ог калыкъёс азьпалто ни! Бере кыльыны нокызьы но уг яра. Мон сямен, "Удмурт дунне" газетысь "Герд" бамез одно ик паськытатоно. Сое эшшо но кужмогес кароно, выль кужымъёсын ӧръяно. "Герд" пыр мед шедьтомы асьме калыкмылэсь зэмос валтӥсьсэ, югыт визьмо, ваньмес ас котыраз люканы быгатӥсь атаймес. Визьмо адямиосмы асьмелэн трос, но кытысь, кин соос пӧлысь зэмос сюрес лёгисьмы? Я, шуом, туннэ В. К. Тубыловмы вань ке, ӵуказе кин воштоз сое? Та вакытэ, шуо, фольклорен, кырӟаса-вераса гинэ азьлане уд вамышты. Кутсконо, пе, политика бордысен. Но Куӟебай Герд, фольклорез люкаса, калыкмылэсь чеберлыксэ вылэ ӝутыны быгатӥз, огазеяз асьмеды. Оло, быдэс дуннелы возьматӥз удмуртлэсь кужымзэ, данзэ, сюлэмзэ. Яке басьтомы финн-угор дуннеысь асьмелэсь ӵыжы-выжыосмес - эстонъёсты. Соос асьмелэсь унолы ик ятыр ӧвӧл, нош кырӟан праздниказы сю сюрсъёсын люкасько, одӥг ымысь кадь дэмен кырӟало, быдэс дуннеез паймытыса. Кырӟанлэн куараез зол угось. Кылзӥське, эшъёс, Куӟебай Гердлэн ӟырдыт сюлэмыз кесяське: Султэ! Вырӟе, эшъёсы, Сайкатэлэ калыкез, Возьматэлэ тӥ солы Югыт, зарни сюресэз. Оскисько: та кылъёс но юрттозы выль кизилиосмес ӝуатыны, огазеяськыны, азьланезлы осконмес кужмоятыны. А. СТЕПАНОВ, Ижысь рабочий. ӞЕЧКЫЛАН Сюлмысьтымы ӟечкыласьком яратоно но дуно апаймес Алнаш районысь Карабай гуртысь Лидия Матвеевна Савельеваез вордӥськем нуналэныз. Сӥзиськом шудбур, тазалык но кема улон. Котьку улон сюресэд мед сяськаялоз, йыр вадьсад шунды мед пиштоз. Гажаса Ижевскын но Завьялын улӥсь Савельевъёслэн семьяоссы. Республикаын национальной кадръёсты дасян сярысь "Удмурт кенеш" ассоциацилэн исполкомезлэн решениез Юнматэмын 1998 арын 20 мае. "Удмурт кенеш" ассоциацилэн вице-президентэзлэсь Н. И. Малыхлэсь ивортэмзэ кылзыса, исполком пусъе, республикаын удмурт национальной кадръёс ляб дасясько, та ужпумъя кун программа кылдытымтэ, удмурт егитъёслы "Дышетскон сярысь" Россия Федерацилэн Законэзъя, "Калыкез дышетон сярысь" Удмурт Республикалэн Законэзъя но Удмурт Республикалэн Кун национальной политикаез пумысен концепциезъя вылӥ профессиональной тодон-валанъёс басьтыны тырмыт луонлыкъёс кылдытэмын ӧвӧл. Удмуртъёс пӧлысь вылӥ образование 3,5 процентэз басьтэмын, шор ёзо профессиональной образование - 6,6 процентэз, ӟучъёс пӧлын - 5,5 процентэз но 7,6 процентэз, нош бигеръёс пӧлын та лыдпусъёс таӵеесь - 4,4 процент но 7,5 процент. Озьы ке но, Ижевскысь гурт хозяйствоя кун академиысь (37,5 процент) но Глазовысь педагогикая кун институтысь удмурт студентъёслэн (40,2 процент) гинэ лыдзы шаерысьтымы удмурт калыклэн лыдызлы (32,2 процент) тупа. УдГУ-ын 19,5 процент удмурт студентъёс, ИжГТУ-ын - 10,6 процент, Россия Федерациысь МВД-лэн юридической институтэзлэн Ижевскысь факультетаз - 8 процент, Ижевскысь медициная академиын - 28,8 процент. Гурт школаосты быдтэмъёс, тросэз соос пӧлысь - удмуртъёс, конкуренциын вормыны уг быгато. Кылсярысь, УдГУ-ын тужгес вылӥ дунъяськись специальность басьтӥсьёс пӧлын удмурт студентъёслэн лыдзы таӵе: коммерция - 6,7 процент, дуннеысь экономика - 4,3 процент, коньдон ужпумъёс - 5,1 процент, менеджмент - 4,7 процент, экономика но ужлэн социологиез - 5,2 процент, правоя бакалавр - 6,8 процент, юриспруденция - 9,1 процент. Ижевскысь технической кун университетысь приборостроительной факультетысь 797 студент пӧлын одӥг удмурт но ӧвӧл, информатикая но вычислительной техникая факультетысь 821 студент пӧлын 84 удмурт (10 процент), менеджментъя но маркетингъя факультетысь 1229 студент пӧлын 79 удмурт (6,4 процент). Глазовысь пединститутын крезьгуръя факультетын 100 студентъёс пӧлын 11 удмурт (11 процент). Таӵе югдур кулэ каре Удмурт Республикаысь Правительстволэсь 1997 арын 10 феврале кутэм "Удмурт Республикалэн кулэяськонъёсызъя вылӥ но шор ёзо профессиональной образованиен специалистъёсты федеральной бюджет чотын дасянъя 1997-2000 аръёслы кун заказ сярысь" 133 номеро постановленизэ быдэсъямез. Та постановлениея квотаен юнматэм уноез интыос гуртысь абитуриентъёслы сётӥськыны кулэ. Озьы ик городысь школаослэсь интернат классъёссылэсь лыдзэс будэтоно, гуртысь пиналъёсты дышетон понна. Странаысьтымы но кугож сьӧрысь тодмо вузъёсы выпускникъёсты келян лушкеменгес ортче. Правительстволэн кадръёсын ужанъя комиссиосаз "Удмурт кенеш" огазеяськонлэн муртъёсыз ӧвӧл. Вузъёсын удмурт преподавательёс ичи. Соин ик удмурт аспирантъёслэсь лыдзэс будэтоно. Республикаысьтымы аспирантъёс пӧлысь 17 процентэз удмуртъёс, Удмурт кун университетын - 10,3 процентэз, Ижысь технической университетын - 6,9 процентэз. Министерствоысь но ведомствоосысь кадръёслэсь кытын ужамзэс эскерыса, валамон луэ, удмуртъёс тросэз кыкетӥ должностьёсын ужало шуыса. Министерствоослэн, кун комитетъёслэн но комитетъёслэн справочной материалъёсазы 98 кивалтӥсь но солэн воштӥсез пыртэмын. Соос пӧлысь 16-ез удмуртъёс (16,4 процентэз). "Удмурт кенеш" огазеяськонлэн исполкомез пуктэ: 1. Удмурт егитъёслы вылӥ профессиональной тодон-валанъёс басьтыны Конституциен сётэм гарантиосты быдэсъян понна, Удмурт Республикаысь Правительствоез куроно удмурт егитъёслы квотаос тупатыны вузъёсы но шор ёзо специальной дышетон заведениосы экзаменъёс сётыку, удмуртъёслэсь огъя лыдзэс (32,2 процент) чакласа. 2. Республикаын национальной кадръёсты дасянъя но соосты кытын ужатонъя радлык кылдытон понна, национальной кадръёсты дышетонъя кун программаез дасяно. Сое кылдытонэ "Удмурт кенеш" огазеяськонлэн исполкомысьтыз но комиссиосысьтыз муртъёслы чырмыт пыриськоно. 3. Удмурт Республикаысь Правительствоез куроно Удмурт Республикаысь Правительстволэсь 1997 арын 10 феврале кутэм "Удмурт Республикалэн кулэяськонъёсызъя вылӥ но шор ёзо профессиональной образованиен специалистъёсты федеральной бюджет чотын дасянъя 1997-2000 аръёслы кун заказ сярысь" 133 номеро постановленизэ быдсъямез эскерыны но сое, улонэ пыӵатон вылысь, ужрадъёс кутыны. Министерствоос, ведомствоос, городъёсысь но ёросъёсысь администрациос, вузъёслэн ректоръёссы, шор ёзо профессиональной учебной заведениослэн директоръёссы специалистъёсты контрактъя дасяку, нимысьтыз саклык висъяны кулэ удмурт выпускникъёслы. 4. Гуртысь дышетскисьёслэсь лябгес луэмзэс лыдэ басьтыса, таяз арын городысь школаослэн интернат классъёссылэсь лыдзэс будэтоно, гуртысь пиналъёсты дышетон понна. 5. Удмурт выпускникъёс пӧлысь тужгес золъёсызлы "Удмурт кенеш" огазеяськонлэн нимыныз рекомендациос сётъяно, "Удмурт кенеш" огазеяськонлэн городъёсысь, ёросъёсысь ёзъёсыз ӵектэмъя. 6. Экзаменъёсты сётыку но абитуриентъёсты кутыку, вузъёсы но шор ёзо профессиональной учебной заведениосы "Удмурт кенеш" ассоциацилэсь муртъёссэ ыстоно. Та учебной заведениослэн кивалтӥсьёссылы гожтэтъёс-ивортонъёс дасяно. 7. "Удмурт кенеш" огазеяськонлэн исполкомысьтыз муртъёс, огазеяськонлэн городъёсысь, ёросъёсысь ёзъёсыныз кивалтӥсьёс школаез быдтӥсьёсын пумиськонъёс ортчытыны кулэ но Правительстволэн 1997 арын 10 феврале кутэм "Удмурт Республикалэн кулэяськонъёсызъя вылӥ но шор ёзо профессиональной образованиен специалистъёсты федеральной бюджет чотын дасянъя 1997-200 аръёслы кун заказ сярысь" постановлениеныз, странаысьтымы но кунгож сьӧрысь тодмо вузъёсын дышетскыны куронъёсын, озьы ик исполкомлэн та решениеныз тодматыны кулэ. 8. Республикалэн кадръёсъя политикаяз пыриськон понна, Кун Кенешлэн Тӧроезлэн но Правительстволэн Тӧроезлэн Кадровой политикая кенешъёсазы делегат чотын ыстоно "Удмурт кенеш" огазеяськонлэсь президентсэ В. К. Тубыловез но вице-президентсэ Н. И. Малыхез. "Удмурт кенеш" огазеяськонлэн президентэз Тубылов В. К. Россиысь пограничной войскоослы - 80 ар Куноын- "Границаын" "Граница" военно-спортивной клубысь пиналъёс доры куное ветлыны малпанмы кылдӥз пограничной войскоослэн праздниксы азьын. Уго соослэн дырзэс пайдаё ортчытэмзы сярысь азьвыл ик трос кылылӥм. Россиысь та выллем клубъёс пӧлын, "Граница" одӥгеныз устоеныз лыдъяське. Жаляса верано, та клуб интыяськемын Ижевсклэн одӥгаз ышыг интыяз - кыдёкысь татар базар районын. Соин ик отчы шедён понна, нырысь ик трос дырмес быдтоно луим. Ӧз удалты мукет ласянь но, отчы вуыкумы, клубын пиналъёс ӧй вал, ваньзы школаын дышетско на. Но мылысь-кыдысь пумитаз милемыз "Граница" клублэн директорезлэн воштӥсез А. В. Иванов. Александр Владимирович ачиз ортчем сюресэн узыр адями. Азьвыл порганичник, Львовысь политической училищеез йылпумъямез бере - Средиземной пограничной округысь офицер. Со одӥг пол гинэ ӧз вуылы Таджиско-Афганской гож дуре, Афганистанэ. Афган музъем вылысь асьме солдатъёсты поттыку но Удмуртиысь офицер отын вал. "Границаын" Александр Владимирович витетӥ арзэ ужа. Соин ик клублэн кыдамез солэн син шораз ортчиз. "Граница" военно-спортивной клуб кылдытэмын 1990 арын, будӥсь пиналъёсты военной службазэс нуыны дасян вылысь. 300-лэсь ятыр школаын дышетскисьёс урокъёс бере дырто татчы. Клубын нуиськись пӧртэм кружокъёсын соос ёзвиоссэс кыдато, ыбылӥськыны, "шонер" нюръяськыны дышетско. Пиос тужгес ярато вольной борьбае секциосы ветлыны. Сыӵе секциос татын 4 пумо усьтэмын. Ас ужзэс тодӥсь-валась дышетӥсьёс-тренеръёс ужало отын. Соинтэк-а тросэз пиналъёс республикаямы сяна, Россиын ортчись ӵошатсконъёсы но ӵемысь пыриськыло. Тани алигес "Границаысь" Тахир Хузягалеев вольной борьбае Россилэн первенствоез понна ӵошатсконъёсын кыкетӥ интые потӥз. Тахирез синйылтӥз Россиысь сборной командалэн тренерез, ас дораз басьтон сярысь кылпум поттылӥз. Али Москваысь ӧтён вите. Клубен радъям кружокъёсы ветло нылъёс но. Таосыз тужгес ярато эктонъя, спортивной аэробикая занятиосты. "Границае" ветлӥсь пиналъёс азьланьын одно пограничной войскоосы шедьыны кулэ ӧвӧл, но татын басьтэм тодон-валанъёссы, быгатонлыкъёссы мукет интыын пайдаё луозы. Но 60-тӥ номеро школаен ӵош усьтэмын нимысьтыз военной класс. Отын дышетско пиналъёс, кудъёсыз азьпал улонзэс герӟаны малпало пограничной войскоослэн сюресэнызы. Та классэ шедён понна, нылъёс но пиос азьвыл сётыны кулэ экзаменъёс. Азязы пуктэм куронъёс чурытэсь: визьзы сяна, тазалыксы юн луыны кулэ. Уго азьланяз соослы быдэс Россилэн улонэз оскемын луоз. Гож дурын ӵемысь пумисько сыӵе учыръёс, куке огшоры солдат-пограничниклэн ассэ воземез бордысь потэ кунмылэн азьпал сюресэз. Военно-спортивной клубен радъям классын дышетскись пиналъёслы вань малы шумпотыны. Азьланяз соос татын басьтэм тодон-валанъёссэс будэтыны быгатозы Подмосковьеысь Голицино городысь военной институтын. Со институтэн "Граница" огкыл гожтӥз. Арлы быдэ отысь преподавательёс лыкто Ижевск, асьсэлы вуоно студентъёс быръё. Тужгес ӟеч дышетскисьёссэ доразы вступительной экзаменъёстэк куто. "Граница" клублы эшшо вань маин данъяськыны. Татысь пиналъёс арлы быдэ ветло Сьӧд зарезь дурысь Анапа городэ, толэзь ӵоже "кунояло" отысь воздушной пограничникъёслэн одӥгаз частязы. Иське, пиналъёс ас синмынызы адӟыны быгато, мар со сыӵе военной служба. Азьвыл аръёсы клуб аслэсьтыз пиналъёссэ келялляз Забайкальеысь военной округе, уго Удмуртиысь пиосты ӵемгес отчы басьто. Жаляса верано, берло дыре секыт луиз коньдонэн. Байкал котырын ортчытэм дыръёссы сярысь тодэ вайыны гинэ кылиз на. Вань на-а республикаямы та выллем клубъёс юанмылы Александр Владмирович вераз, филиалзы ужа на Завьялово районысь Подшивалово гуртын шуыса. Кивалтэ соин егит пияш, алигес гинэ Армиысь бертэм мурт Александр Осотов. Алигес таӵе клуб усьтӥськиз Алнашын. Вань оскон, соос но ас ӧрзэс куке шедьтозы шуыса. Йылпумъяса пусйыны кулэ "Граница" военно-патриотической клуб юнэсь кусыпъёс возе запасысь пограничникъёслэн "Патриоты границы" огазеяськеменызы, отысь ветеранъёсын. Соосты ӵемысь доразы куное ӧтьыло. Ӵошен ортчытъяло пӧртэм спортивной ужрадъёс яке огшоры шутэтскон ӝытъёс. Огкылын вераса, татысен пиналъёс ас вылазы шӧдо ни, кинъёс со - зэмос пограничникъёс. Кулэ луиз ке, азьланьын улонзэс уз жалялэ, эшъёссылэсь, ӵыжы- выжыоссылэсь чалмытэсь уйёссэс утён понна, кызьы 1993 арын Таджикско-Афганской гож дурын ассэ ӧз жаля Россилэн Героез Сергей Борин. Сергейлэсь нимзэ нуллэ "Граница" военно-патриотической клуб Э. Кумачева. Кышкыт югдур Кузёяське "горд атас" Шаерамы туэ тылпуосъя секыт югдур кылдӥз. Выль арысен 913 пол тылпу поталляз ни. Миым та дырен ӵошатыса, 11,7 процентлы трос. Отын 75 мурт быремын, 47 процентлэсь уно. Изъянэз 30 процент пала йылӥз ни. Тужгес но трос тылпу потэ улон коркаосын. Тылпу уката уно ӝутске Ижевск, Воткинск, Камбарка городъёсын, Глазов, Грахово, Каракулино, Пичи Пурга, Сарапул но Шаркан районъёсын. Правительствоысь тылпулэсь утиськонъя комиссия апреле югдурез эскериз ке но, тырмыт кулэ ужрадъёс ӧз куты. План лэсьтэмен но сое министерствоослы но ведомствоослы ивортэмен буйгатскиз. Берло дыре куазь пӧсь кариськемен но тӧласькемен, ньыль нуналскын 87 тылпу вал гуртъёсын но 34 нюлэскын. Сутскемын 15 улон корка, 105 юртъер но 31 семьялэн ваньбурез, 1 мурт быремын но 3-ез сӧсырмемын. 11 пол тылпу поталляз сад-бакчаосын. Мугъёсыз тодмо: адямиос тылэн кызьы мылзы потэ озьы выро, электроезъёссэс дыраз уг эскеро но нылпиоссылы спичкаен шудыны лэзё. Можга районысь Карамбай разъездын 21 мае одӥг хозяйствое тыл понӥзы. Сутэмын 2 улон коркаос но юртъер котырзы. Тыл понӥсь кутэмын но уголовной уж ӝутэмын. Игра районысь Кушъя станциын кӧшкемыт тылпу потӥз. Лек тӧл ӝутскыса, 4 улон корка, юртъерзы но ваньбурзы пеньлы пӧрмиз. Нош Воткинскын ӝуаз улыно-вылоно 4 квартираен кык юрт но улӥсьёслэн ваньбурзы. 12 семья улон интытэк кылемын. 23 мае Глазовын тылпу ӝутскиз куинь квартираен улон коркан. Лек тӧл потыса, "горд атас" кык хозяйствоос вылэ выжиз. Сутскемын куинь улон корка, юртъерзы но 5 семьяослэн ваньбурзы. Сарапул районысь Усть-Сарапулка гуртын ӝуамын 11 гидъёс, кеносъёс, нош Ижысь Машиностроитель посёлокын - 32 пу возён липетулъёс. Ижын уин сутэмын "Уют" магазин. Сутскемын вузъёссы но мукет ваньбурзы. Тыл понӥсьсэ утчало. Тамак пумлэсь ӝуало балконъёс но лоджиос. 24 мае тылпу потӥз Ижысь 2 номеро хлебоприёмной предприятиын. Тӧл ӝутскыса, син куспын ӝуаны ӧдъяз 1200 квадратной метр липет. Тыл потыны быгатысал мукет складъёс но юртъёс вылэ. Но таӵе учыре 3 номеро ӧтён сётэмын вал. Соя ватсаса ваемын вал 8 автоцистернаен ву, техника но калык. Озьы тылпу кысэмын нуназе 12 часэ 51 минутэ. Та учыр бер шараямын но ивортэмын вал. Но со нуналэ куазь пӧсь но тӧло улӥз. Озьы юртлэн липетэз куашказ складысь 13 кубометр лэсьтӥськон материал ӝуаз. Нырысь лыдъямъя, изъянэз 3,9 сюрс манет луиз. Тылпу потэм электрокабельын, замыкание луэмен. Тылпу кысонэ пыриськизы 19 автоцистеранос, 6 нимаз техника, Ижевск станциысь тылпу кысон поезд но 78 пожарной. Гурт удысын но югдур капчи ӧвӧл. Фермаос котырысь куро утялтымтэ. Ю тысь возён складъёсын но тылпулэсь утиськонъя правилоосты уг быдэсъяло. Тани Пичи Пурга районысь "Юж-Пурга" колхозын 80 тонна курозы ӝуаз. 300 пудо йыр гидысь поттэмын вал. Малы ке шуоно, тыл отчы шедьыны быгатэ вал. Гуртын тылпуен нюръяськонлы туж ичи инты висъяло. Та ужъя дышетэм адямиоссы ӧвӧл, дежурство тупатымтэ. 460 хозяйствоос пӧлысь, 190-ез тылпу кысон техника кабзэ уг возё. Данак интыосын кысэмын телефонъёс. Город котырысь сад-бакчаосын но мотопомиаоссы ӧвӧл, тылпуез чаклась постъёс кылдытымтэ. Соин ик отысь коркаос пеньлы пӧрмо. Республикаямы таӵе югдурез чакласа, районъёсысь но городъёсысь администрациослы улон коркаосты, гуртъёсты утёнъя ӝегатскытэк ужрадъёс кутыны косэмын. Котькытын мед луоз уй но нунал дежурство. Республикаямы тылпуосъя кышкыт югдур ялон сярысь 26 мае правительствоын журналистъёслэн пресс-конференциязы ивортӥз Тылпуэн нюръяськонъя кун управленилэн кивалтӥсезлэн воштӥсез Николай Пашенцев. Таӵе решение кутэмын луиз ке, нюлэсъёсы пырон порядок золомытэмын луоз. Г. Васильев. КЫЛДО ВЫЛЬ МОТООС Ижын лэсьтэм "Планета" но "Юпитер" мотоциклъёс тросгес кутӥсько вал интые. Соосын турын но, пу но вортто. Нош городысь ульчаостӥ ворттылыны чылкак мукет машинаос кулэ. Сыӵе мотоциклъёсты кемалась потто ни Япониын, Чехиын, Германиын но куд-ог мукет кунъёсын. Выль машинаос поттыны дасясько "Ижмаш-Мото" заводын но. Та вакытэ конструкторъёс ужало "Чоппер" класслы тупась мотоциклъёс бордын. Вылтусызъя со луоз лапег, рулез вылӥын, бакез кельшоз ву шапыклы, уно кутӥськозы хромлэсь ёзъёс. Ӵапак та мото тупалоз городэтӥ ширъяны. Выльзэ утчасьёс чаклало на "Эндуро" классъем машина кылдытыны. Таиз ини тужгес кельшоз спортэз яратӥсьёслы. Мотоциклъёсы пуктӥськозы "Юпитерлэн" двигательёсыз. Табере моторез сӥятыны юрттоз ву. Таӵе амал заводын кутӥське нырысьсэ. Н. СЕМЕНОВ. "Удмурт кенеш" огазеяськонэ берло дыре трос гожтэтъёс вуыны ӧдъязы. Одӥгез сюлэмшугъяськонзэ вера, мукетыз тау каре, куинетӥез ӟечкылан ыстэ. Туннэ дэмласьком кыкеныз гожтэтэн тодматскыны. КЫРӞАСА ГИНЭ УД УЛЫ Арысь аре кулэсме удмурт калыклэн лыдыз представительной но законъёс бордын ужась органъёсын. Али ортчем быръёнъёс но сое возьматӥзы. Удмурт калыклэн шоркарысьтыз Думае одӥг удмурт но ӧз шедьы. Сыӵегес ик югдур Кун Кенешын но - отын но асьмелэнъёс чиньыен лыдъямон. Соин ик Кун Кенешын удмурт калыкез утись законъёс уг кутӥсько. Татчыозь тани юнматымтэ на кылъёс сярысь кат, та сярысь 6-7 ар вераськиськом ни ке но.Озьы удмурт калык палэнтӥське закон дасян ужлэсь. Марлы удмурт кандидатъёс ӧз потэ депутатэ? Али уго тросэз мандат басьто коньдонэн. Кандидатъёслы калыкен ужан понна кулэ трос уксё, сотэк уд быгаты калыкез радио, телевидение но газетъёс пыр ас палад берыктыны, программаеныд тодматыны. Нош асьмелэн ӧвӧл узыр ужбергатӥсьёсмы, ӧвӧл коньдон сётӥсьёсмы. Соин ик агитация нуыны рос-прос ум быгатӥське. Мон сямен, воштоно быръёнъёсъя законодательствоез. Юнматоно выжы калыкъёслы квота, со понна быръёнъёсты ортчытоно национальной округъёсъя. Яке Кун Кенешез кык палатаен кароно. Национальной палатае карыны луысал "Удмурт кенешлы" матын луись адямиосты. Маке но лэсьтоно, тазьы улыны уг яра ни, Госсовет азе пуктоно чурытэсь куронъёс. Тырмоз ни удмурт калыкез ултӥяса возьыны. Малы депутатъёслэн тае валамзы уг поты? Озьы соос калыклэсь кусыпъёссэ лэчытомыто. Ку, кылсярысь, чакламын Кун Кенешын учкыны кылъёс сярысь законлы инъетэз? Яке со воксё пыртэмын ӧвӧл-а та арлы планэ? Калыкын шуо, кыллись из улэ ву уг бызьы, "Удмурт кенешлы" соин ик пуктылоно куронъёс вылӥ кивалтӥсьёс азе. Мыноно соос доры быдэс делегациен, удмурт калыклэсь куронъёссэ быдэстыны курыса. Мукет калыкъёс озьы ик лэсьто ук. Нош асьмеос ялан кышкаса улӥськом. Кытчы ватскыса уло асьмелэн тодмо учёнойёсмы В. Е. Владыкин, В. В. Туганаев, куд-ог мукетъёсыз визьмо адямиос, малы соослэн куаразы уг кылӥськы? Политикае рос-прос пыриськытэк кырӟаса но эктыса гинэ улыса, калыклэсь улонзэ ум быгатэ воштыны. Верам потэ удмурт телепередачаослэн дырзы сярысь но. Соос туж ичи, дырзэс одно ик будэтоно, сотэк уд азинты аслэсьтыд кылдэ но, культурадэ но. Арысь аре кулэсме удмурт студентъёслэн лыдзы. Асьме пиналъёслы вузъёсын инты уг шедьы. Мукет республикаосын нимысьтыз квота вань ук. Асьмеос куинь пол кылим ни ӟуч калыклэсь вылӥ дышетскем адямиослэн лыдзы ласянь, озьы ик, вылды, мукет калыкъёслэсь но. Кӧня вераськиськом удмурт кылэз садикъёсын но школаосын дышетон сярысь. Югдур укыр каллен воштӥське. Кивалтӥсьёс та ужез рос-прос уг радъяло. Соослы та ужын азинсконъёс кулэ но ӧвӧл, калыклэн ӟучомемезлы соос шум гинэ пото, лэся. Ялан шуо: коньдон, пе, ӧвӧл. Озьы меда? Кӧня ке кыл Конституцие воштонъёс пыртон сярысь. Со воштонъёс эшшо но сюбегато удмурт калыклэсь правооссэ но государственностьсэ. Нош али кӧня ке кыл "Удмурт кенешлэн" ужамез сярысь. Соин В. К. Тубылов кивалтыны кутскем бере, огазеяськонмылэн ужъёсыз умой пала воштӥськизы, сое калык но шӧдэ ни. Соин ик Валентин Кузьмичлы сӥзем потэ туж бадӟым тазалык но шудбур. Мед ужалоз аслаз калыкез понна, элькунэз понна. Гожтэтме йылпумъяса, тани ма сярысь вераме потэ на. Ӵемгес ортчытъяно, дыр, меӵак эфирын пумиськылонъёс, соосты калык яратыса кылзэ- учке. Умой луысал, телевидениын "Удмурт кенеш" сярысь нимысьтыз передача кылдытысалзы ке. Асьме огазеяськонлэн азьло кивалтӥсьёсыз ӧз быгатэ лэсьтэм ужзэс калык доры вуттыны, ӧжыт пумиськылӥзы адямиосын, шер вераськизы радио, телевизор пыртӥ. Тае мед лыдэ басьтысал туала исполком. А. ШИРОБОКОВ, Игра посёлокын улӥсь. Гердэ КЫТЧЫ ЫШИДЫ ТӤ, БӦЛЯКЪЁС? Тодам лыктэ на ай: кӧня ке ар талэсь азьло "Дэменэ" но "Удмурт кенеше" огазеяськемъёс, пӧртэм ёросъёсын улӥсь бӧлякъёссэс люкалляса, туж устоесь ужрадъёс ортчытъяло вал Ижын. Нырысь ик кутскон сётӥз кадь та ӟеч амаллы Пичи Пурга ёросысь крезьгурчилэн Виталий Шоркинлэн "Бӧлякъёс" ансамблез. Таӵегес амалэн трос пумиськонъёс радъялляз Владислав Кириллов. Эсьмаса, ӟучъёс но пыриськылӥзы ӝытъёсы. Культурая "Октябрь" дворецын, кылсярысь, лыдӟисьёсын туж пайдаё, ӟеч вераськиз Павел Куляшов. Уно гинэ вал выль кырӟанъёсын тодматсконъёс. "Дэменэн" Петр Чернов кивалтыку но "Октябрьын" шулдыр ӝытъёс ӧз чалмылэ. Бӧрысь бӧлякъёсын ужанзэс удмуртлыкмес ӧръясьёс вунэтӥзы кадь. Зэм, алнашъёс, шарканъёс, пургаос кӧня ке пол огазе люкаллязы на ай Ижевскын улӥсь землякъёссэс. Шарканъёс машина лэсьтӥсьёслэн культура дворецазы, оло, ӝыны городмес огазеяллязы. Татын ик Як.-Бодья ёросысь усточиос но жин-жин шулдыръяськизы. Вунонтэмесь вал алнашъёсын Киров нимо паркын пумиськон, пургаосын Егитъёслэн юртазы шулдыръяськон. Дэменчиос умой радъязы "Октябрьын" Татьяна Четкаревалэсь нырысетӥ концертсэ. Огез но та ужрадъёс пайдатэк ӧз кыле. Сыӵе пумиськонъёс юртто вал асьмелэсь огазеяськонмес кужмоятыны, удмуртлыкмес муромытыны. Малы палэнским ӟеч ужмылэсь? Кытчы ышизы-пазьгиськизы бӧлякъёс? Удмуртъёслэн ВИ Ӧтчамзы азьын куд-ог ӵектонъёс кылӥськылӥзы вал, бӧлякъёсын ужанэз выльысь азинтоно шуыса. Малпай вал, ӞеЧ амал борды одно кутскозы шуыса. Вырӟытӥсь ӧйлась, лэся. Ма, умойгес ке малпаськоно, али но бӧлякъёсты выльысь сайкатыны луоз, дыр. Зэм, кыдёкысь ёросъёсысь Иже мынон-ветлон туж дунояз. Но со шоры ке учконо, ваньзэ ӟечсэ весяклы ӝог куашкатод ук. Мыным туж жаль пото уйшор пал ёросъёсмы. Соос уката шер пумиськыло бӧлякъёсынызы, ӵыжы-выжыосынызы. Мӧзмыт уло. Нош учконо ке, котькуд районын вань данэ потэм адямиоссы. Басьтом, кылсярысь, Яр ёросэз. Алигес тодмо эшеным лыдъяса пуким, отӥысь кӧня визьмо адямиос быдэс шаермылы тодмоесь ни. Котькудӥзъя нимаз ӝыт но радъяны луысал, ваньзэс огазеяса но рос-прос кенешон уката пайдаё пӧрмысал. Верало куд-огзэ гинэ Яр палась адямиосты. Татын вордскемын калык артистка Галина Владыкина. Солы бӧлякъёсыз пӧлын ассэ рос-прос усьтыны быдэс ӝыт но ичи потоз. Кыкетӥез - Алексей Ельцов, кылбурчи, дано журналист. Солэн кылбуръёсызъя туж трос кырӟанъёс гожтэмын ини. Алигес кутэмын Писательёслэн огазеяськоназы. Нимаз ӝытэз ӧй вал на кадь одӥг пол но. Татӥын вордскыса, дано сюрес вылэ йыг-йыг потӥз Георгий Ефимович Данилов - медициная академилэн азьвыл ректорез. Соин пумиськонын калыкез эмъянысь кӧня бадӟымесь ужпумъёсты сэрттыны-пертчыны луысал. Автозаводлэн поликлиникаяз озьы ик ужа профессор Кутявин. Эшшо ватсаны луысал на Удмурт драмтеатрысь артистъёсыз Елена Сунцоваез, Владимир Ельцовез. Удмурт телевидениын ужа Галина Плетенева. Ӧжыт-а сюлэмшугъяськытӥсез та удысын но? Эсьмаса, Надежда Уткина но Мосеевоын вордскемын, шуо, бӧрысь Пичи Пургала выжемын. Егитъёс пӧлын но данэ потӥсьёсыз уно ини. Люкано, одно ик одӥг пол ке но Яр ёросысь бӧлякъёс пумиськыны кулэ. Мынам малпамея, Флор Васильевлэн кылбуръёсызъя но вераськыны мугъёс трос. Кытын пумиськыны ке ёрмо - ачим ик инты но верало. Ижевскысь В. Азин нимо библиотекаен кемалась ни кивалтэ Яр ёросысь Чонпи гуртысь усто нылкышно Нина Учанова. Одӥг ӝытлы ке но кунокае дораз кенешыны бӧллякъёсызлы инты одно ик сётысал, вылды. Ӝоген асьме Кун Кенешамы выль депутатъёс бырйыны дасяськыны кутском. Та бадӟым ужрадэ но бӧлякъёсын огазеяськыса, кенешыса пыриськыны кулэ вылэм. "Удмурт кенеш" но "Дэмен" огазеяськонъёс та ӵектонме пелязы мед понозы, сюлмазы мед бинялтозы вал. О. ДАНИЛОВА, Ижевскын улӥсь. Россия Федерациысь федеральной Собранилэн Федерацияя Кенешаз Удмурт Республикаысь Кун Кенешлэн Тӧроезлэн Александр Волковлэн верамысьтыз (1998 арын 20 мае) "Россиысь экономикаын, социальной удысын, политикаын туала югдур шугоме. Вуэ сыӵе дыр, куке забастовкаостэк, сютэм улонъёстэк, мукет пумитъяськон ужрадъёстэк адямиос уждунзэс басьтыгы уг быгато ни. Туннэ государство Россия Федерацилэсь Конституцизэ тӥясьёс пӧлын нырысетӥез. Дыр вуиз рыночной реформаосты ортчытонэ Федерацияя Кенешлэн паськытгес пыриськемез сярысь вераськонъёсы берытскыны. Россиысь Правительство дэмламъя кылдытэмын промышленностья, оборонаен герӟаськем предприятиослы пунэмъёсты берыктонъя куинь ёзо комиссия. Уж та ласянь уг нуиськы. Ми адӟиськом, Удмуртиысь ож тӥрлык поттӥсь предприятиосын уждун арлы ӝегатэмлы кун янгыш шуыса. Сое возьматӥз "Ижмашын" ужасьёслэн кылем арняе ортчем забастовказы. Кун та предприятилы гинэ поттэм продукция понна 100 миллион манет берыктыны кулэ. Гажано эшъёс! Малпасько, Федерацилэн Кенешаз Правительствоысь муртъёсты, Правительстволэсь Тӧрозэ гинэ ӧвӧл, Президентэз ӧтьыны дыр вуиз, шара вераськон понна. Тодэ-а Президент солы сётъям докладъёсысь, кыӵе зэмос югдур Россия Федерациын? Асьмелы, Федерацияя Кенешысь муртъёслы, йылпумъянъёс лэсьтоно. Россиын тазьы ужан но Россиысь кунлэн калыкез ултӥямез йыруж кадь ини". Удмурт Республикаысь Кун Кенешлэн Тӧроезлэн ӵектонэз понна кудӥз Федерацияя Кенешлэсь, Экономической реформаосы ортчытонын кунлэн интыез сярысь постановленизэ быдэсъянэн герӟаськемын, куара сётыны дэмламын вал. Россиысь парламентлэн вылӥ палатаез Александр Волковлэсь ӵектонзэ огкылысь юнматӥз. Удмурт Республикаысь Кун Кенешлэн пресс-службаез. АЛЕКСАНДР ВОЛКОВ: "КАЛЫКЕН ПУМИСЬКОНЪЁС КУЖЫМ СЁТО" Шаерысьтымы Кун Кенешлэн Тӧроез Александр Волков 27 мае Ува районэ ветлӥз. Со вуылӥз "Урал" эштосэ, "Туклинский" парсь вордон комплексэ, "Ува" санаторие, "Увадрев" ОАО-е, озьы ик ёросысь кивалтӥсьёсын кенеш ортчытӥз. Александр Александрович рос-прос тодматскиз бусы ужъёсын, парсь вордон комплексын кылдэм югдурен, пул пилисьёслэн выль продукциенызы, санаторийлэн алигес пуктэм грязелечебницаеныз, шутэтскисьёсты кызьы эмъяменызы но музон ужпумъёсын. "УРАЛ" ЭШТОСЫН Нылга котырысь вӧл-вӧл паськыт бусыосын шулдыр ужгур чузъяське. "Урал" эштосысь нянь будэтӥсьёс дырто. Тулыс бер вуэмен, гырон-кизён ужъёсын ӝегало угось. Александр Волков Красное черкогурт дорысь лудын пумиськиз музъем ужасьёсын. Механизаторъёслэн сюлэмшугъяськонзы одӥг - техника вужме, туж ӝог тӥяське. Эштослэн егит, задор мылкыдо кивалтӥсез Сергей Лыткин ивортэ, вить ар талэсь азьло, пе, одӥг выль трактор басьтӥм. Озьы ке но, суй-пыдзы уг юскиськы. Туэ тросгес кизизы ни ӟеч сорт чабей но йыды. Кылем арен ӵошатыса, татын но, мукет интыосын но узьым начаргес. Соин ик гуртысь нянь будэтӥсьёслэн валэс юослы осконзы бадӟым. Кун Кенешлэн Тӧроез механизаторъёслэсь юалляськиз туннэ улэм-вылэмзы сярысь. Гуртын улӥсьёслы капчи ӧвӧл: пичи уждунзэс но юн беромыса сёто, озьы ке но, асьсэлы улон коркаос ӝуто, пудо вордо но бакча возё. Сергей Яковлевич но татысь, Кыйлудысь лыктэмын. Гуртооссэ умой вала, котьмаин юрттыны дась. Лэсьтӥськисьёслы транспорт но, нюлэс но сётэ. Красноее лыктэмезлы 12 июне вить ар тырмоз. Ваньмыз понна сюлмыз висе. Лизингъя, пе, "Кировец" трактор коть басьтоно вал. Соин милям бусыосамы ужаны умой. Нош ю тысь октыны немец комбайн (эштослы, пе, ӵекто) выль коньдонэн 300 сюрс манет сылэ. Кытысь ми сомында уксё шедьтом? Ведь "Нива" комбайнмы урод ӧвӧл, шат сое ӧжыт дунтэмгес вузаны уг луы? Чик валантэм. Москваысь кузёос гурт хозяйствоез быдэсак пачкатыны выро, нош ми ялан возиськиськом на, шуэ эштослэн тӧроез. Рябиновка фермаын чал-чал. Дояркаос, пудооссэс сюдыса, доразы бертӥллям. Кыед поттон транспортёрлэн али гинэ ужам бервылыз адӟиське. - Кӧня бен али йӧл кыскиськоды? - юа Александр Волков. - Миым скаллы быдэ 2500 килограммлэсь уно люкаськиз. Со бен трос ӧвӧл. Но али пумен тросгес потэ ни. Йӧлмес сӥятыса (пастеризовать карыса), полиэтилен пакетэ лэзьяськом, - валэктэ Сергей Яковлевич.- Алигес сыӵе оборудование басьтӥм. Со умоен берытске. Вузаськом Ижевскын но, "Ижмолокое" но сётӥськом. Со милемлы дыраз улэп коньдон вуттэ, "Увамолокоен" уд ӵошаты. Бен, эштосын уногес йӧл кыскыны луонлыкъёссы вань. Сиёнлы уг ёрмо. Умоятоно пудо выжызэс но ӟечгес нюръяськоно висёнъёсын - лейкозэн но мукетыныз. Соку ваньбур поттон но йылоз, асдуныз но синоз. Пачкатӥзы электрокужым сётӥсьёс Уваысь парсь вордон комплексэ кӧня делегациос кытысь гинэ дышетскыны ӧз ветлэ. Со вал республикаямы выль амалэн парсь сӥль поттонъя одӥгез ӟеч предприятие. Вань ужъёсты, сюдонэз но, автоматъёс быдэсъязы. Хозяйство арысь аре пайдаё ужаз. Али комплекс пытсам амалэн ужась акциосын огазеяськон луиз. Нимазы "Туклинский" шуыса. Но рынокен экономикае выжон кутскем бере, свинокомплекс син азьын куашканы ӧдъяз. Мугез тодмо. Электрокужым дун ӝутскиз. Нош комплекс тае туж трос кутэ вал, автоматъёс электрокужымен бергазы. Табере жаляса верано луэ, усто техника гуньдэмын, парсьёсты киын сюдо-утялто. Азьло одӥг оператор 2000 парсез утялтӥз. Нуналаз 450-500 грамм привес басьто но рентабельностьсы 40-50 процент вал. Нош али улонзы мыддорин берытскиз. - Комплекс огдыре 12 сюрс пала парсь вордыны чакламын ке, али ӝынызэ возиськом,- секыт мылкыдын шуэ директор Александр Козырев.- Миым калыклы 8 сюрс парсьпи вузам, туэ - 2,6 сюрс. Соин трос изъян адӟиськом. Но номыр уд кары, хозяйствоос пумен ичи парсь вордо. Адямиослы сӥль будэтоно ук. Комплекслы 20 ар тырмиз ни. Музъемез озьы ик кылемын. Асьсэлэн будэтэм ю тысьсы кык толэзьлы гинэ тырме. Со сяна, дасяло на жалем сиёнъёс, турын, картофка но музон вож сиёнъёс. Али 1,5 сюрс парсь куайыто. Комплексын ваньзэ-ӧвӧлзэ 170 мурт ужа. Адямиос мумы парсьёсты утялтонын но, куайытонын но лулысь-сюлмысь тыршо. Данакез комплекс усьтӥськем дырысен татын. Тани лабораторизы но синмаськымон. Ветврачъёс асьсэос усто биопрепаратъёс дасяло, палэнэ но вузало. Одӥг укол пуктӥськод ке, солэн кужымез, пайдаез парсь мугорын кема возиське. Ветеринаръёслэсь ужзэс со данаклы капчиятэ. Комплекслэн кузёез Александр Анатольевич Кун Кенешлэн тӧроезлы вазиське, электрокужымлы дунэз, пе, кызьы ке пичиятоно вал. Сое кутэм понна тыронъёсмы туж трос люкаськемын. "Удмуртэнерго" АО-лэн кивалтӥсеныз Юрий Боровикен ӵем вераськиськом но, пумиськылӥськом но. Со монополист луэ. Но югдурез умоятон вылысь, мар ке малпалом, одно ик кенешом,- шуиз А. Волков. Александр Александрович парсь вордӥсьёсты озьы ик пыкылӥз, переработкаен вырымтэзы, колбаса, консерва поттон цех лэсьтымтэзы понна. Ватонэз ӧвӧл, "Восточный" парсь вордон комплекслы переработкаез зол юрттэ. Колбаса, консерваос, оло, ӧй ке поттысал, куашкан калэ вуысал ни. Нош лабораториязы автоклав, термостат басьтыны юрттэт сётыны кыл сётӥз. Одӥгзэ комплексэз мукетыныз ӵошатыны уг луы. Но куке кунгож сьӧрысь сомында, 35 процент сиён-юон вутто, малпанэ вуоно: рыноке шедьыны асьмелы но ӟеч вузъёс поттоно. США-ысь курег макесъёсты калык сокем, азьло кадь яратыса уг басьты ни. Сыӵе ик югдур колбасаен но музон сиён-юонъёсын. Сое лыдэ басьтоно. Соин ик уваослы, веранэз ӧвӧл, асьсэлы переработка кулэ. Соин соглаш луизы комплекслэн кивалтӥсьёсыз но отысь специалистъёс. Уваын кенеш - Мыным таӵе пумиськонъёс котьку бадӟым кужым сёто,- кенешын веранзэ кутскиз Александр Волков.- Миым июле дорады ветлӥ вал. Тани нош ик вуи. Воштӥськонъёсты вань. Со шумпотымон. Но кизёнэн бере кылиськоды. Калыкен, интыысь кивалтӥсьёсын пумиськонъёс сярысь юнме уг вераськы. Республикаысь кузёослы но Россилэн Президентэныз но Правительстволэн кивалтӥсеныз кенешыны кулэ. Федерацияя Советын ӵектонме умоен лыдъязы. Отӥяз Кун Кенешлэн Тӧроез люкаськемъёслы мадиз федеральной бюджет сярысь. Туэ шаермылы туж ичи, 617 миллион манет гинэ, трансферт чотын уксё висъяське. Вылаз ик, Кизнерысь химической ож тӥрлыкез быдтонлы висъям коньдонэз 113 миллион манетлы вандӥзы-кулэстӥзы. Республикаямы ужъёсмы сокем урод уг мыно, нош Россия ялан лябӟе, куанерме. Выль Правительство кылдытэмез но Александр Волков умоен уг лыдъя. Тани Россилэн бюджетэз, 1990-тӥ арен ӵошатыса, 10 поллы пичияз ни. Кызьы сое валано? Манетлэн кужымез калыклэн кисыез чотын возиське. Асьмеос арысь аре куанермиськом. Нош республикаямы та дыр ӵоже ваньбур поттон 40 процентлы кулэсмиз ни. "Ижмашлы" государстволэн тыронэз 100 миллион манет люкаськемын, нош Глазовысь ЧМЗ-лы - кык пол трос. Югдур одӥг но уг умоя. Тӥни соин ик предприятиос дыраз уждун тырыны уг быгато. Соин сэрен ӝегало пенсиос. Бюджет удыс сярысь вераса, дышетӥсьёсты но мукетсэ ум вунэтӥське. Ӝоген 200 миллиард манет федеральной бюджетысь кредит басьтом. Люкаськемъёс Александр Александровичлы уно юанъёс сётъязы. Районысь кивалтӥсьёс но сюлэмшугъясько автозаводлэн гуньдыса кадь ужамез пумысен. Тросэзлэн куронзы вал интыысь куд-ог сюресъёсты "Удмуртавтодорлы" сётонъя но малы, пе, "Удмуртнефтепродукт" милемлы дуно эстӥськон вуза. Кылсярысь, дизтопливо литрез сылэ 98 копейка, нош гуртэ со вуэ 1,76 манетэн. Кин со чотын узырме? Малы сыӵе дуноен вузало? Александр Александрович та ужпумез эскеро, Николай Сычёвен ("Удмуртнефтепродукт") верасько, шуиз. Калыклэн, зэмзэ но, йырыз кур Татарстанын, Пермь областьын водительёслэсь уксё бичамзылы. А. Волков М. Шаймиевен вераськыны кыл сётӥз, куспамы огкылмес но тодаз ваиз. Кенешын озьы ик ужпумъёс ӝутэмын вал книга поттонъя, палэнысь, кунгож сьӧрысь но, вузъёс но сиён-юон ваёнъя, поттэм продукцимылэсь ӟечлыксэ ӝутонъя, электрокужым сётонъя но солы дун тупатонъя, вексельёсъя, тэль коранъя, мебель лэсьтонъя, нюлэс посёлокъёсты утёнъя но мукетызъя. Бер ӝыт Александр Волков тодматскиз Ува лесокомбинатлэн выль продукциеныз. Со поттыны кутске выль амалэн фанера (шпон) но ДСП (древесно-стружечной плита). Ваньмыз со мебель лэсьтӥсьёслы усто материал луэ, кунгож сьӧрысезлэсь урод ӧвӧл. х х х Кун Кенешлэн Тӧроезлэн Александр Волковлэн одӥг ужан нуналэз Ува районлы сӥземын вал, со пайдаё ортчиз. Вылӥ законодательной органлэсь ужзэ умоятонын со зэмос юрттэт луоз. Александр Александрович юнме уг шуы: "Калыкен пумиськонъёс бадӟым пайда но кужым сёто". Геннадий РОМАНОВ. Берекет Пырыос-визьлюкъёс Тэшкам курег пуз уз вия, сое шундыберган (кӧс) вӧйын яке сылал вуын пӧзьтӥды ке. Курег пуз пӧзьыкуз медам пилиськы шуыса, паськыт (бадӟым) палзэ венен пасяно. Пӧзись йӧл уз уртчы, кастрюлялэсь дурзэ вӧйын зырады ке. Йӧл возем посудаез нырысь гылтоно кезьыт вуэн, собере - пӧсеныз. Йӧллэсь шӧмзэ ческыт возён понна, посудаез ворсано. Шыдлэсь лымзэ ческыт карон понна, нырысь пӧзьтыны кутсконо бадӟым тыл вылын. Вуэз быректӥз ке, пичиятоногес, нош пумаз - пичи тыл вылын. Кеньыро шыдэ бакча сиёнэз кубикен вандылыса тыроно, нош лаиськеменаз - кузялэс. Валэктэ юрист Дано ужасьлы мар сётозы? Сэрегез нуэ адвокат Лилия Шкляева Миым ноябре кузёе (картэ) потӥз пенсие. Колхозын валтӥсь инженер вал. Азьвылгес сётӥзы гурт хозяйствоысь дано ужась ним. Кыӵе ке льготаос чакламын-а солы? Ю. Борисова. Можга ёросысь Пазял гурт. Жаляса верано луэ: туала законъёсын та ласянь номыр чакламын ӧвӧл. Но пыд йылазы йыг-йыг сылӥсь хозяйствоос асьсэ ужасьёслы сыӵе ним понна уждунзэс 30 процентлы ватсало. Та сярысь верамын медло предприятилэн (хозяйстволэн) положенияз яке уставаз. Тӥ ӧвӧл гожтӥллямды: зол-а колхозды, ужа-а картты та вакытэ, колхозлэн уставаз маке верамын-а дано ужасьёс сярысь? Соин ик меӵак кыӵе ке валэктон сётыны шуг. Ю. Борисовалэн эшшо кык юанэз вань на. Соослы валэктонъёс печатлалом вуоно номеръёсын. Чуръёс, чуръёс... ТӦЛӞИЗ ГУРТЛЭН ШУЛДЫРЕЗ Ас вакытаз шулдыр вал Вавож районысь Вуж Бия гурт. Умортоысь мушъёс выллем гужласа ужаз гурт калык, котыр веттаськизы ю бусыос, возь вылъёстӥ калгизы тыр пудоос, пачыласа бызиз Сьӧдмуртча шур. Нош али? Вуж Бия гуртын чал-чал. Шер кылем коркаос чигем мажес пиньёс кадь адско. Урамъёсты уг шулдырто нылпи куараос, уг гурето тракторъёс. Бадӟым мур шурмы но куреглы пыласькымон сяна ӧз кыльы ни. Огъя вераса, гуртмылэн шулдырез тӧлӟиз. Сизьымдонэтӥ аръёслэн кутсконазы пашмыны ӧдъяз Вуж Бия гуртмы. Тросэз пиналъёс городэ я бускель гуртэ улыны кошкизы. Бен, вордскем интыосысь кужмысь ӧз уллялэ ке но, улон ачиз со калэ вуттӥз. Пудо-живот возён гидъёс вужмизы, нош выльёссэ ӧз пуктэ ни. Куашкан калэ вуэменыз ваньзэ Зямбайгуртэ выжтӥзы. Табере вуж бияос сьӧрло ужаны но магазинысь сиён-юон басьяны ветлоно луо. Оскем потэ вылэм, гуртэ кылем пенсионеръёс но витё-куатё мында ужасьёс гуртмылэсь данзэ азьланяз но утьыны быгатозы на шуыса. А. ЗАЙЦЕВ. Вераське Можга (Пичи Пурга, Грах) Люкаськылӥз Печатья но иворъёсъя министерстволэн кенешез. Со эскериз Можгалась, Пичи Пургалась но Грахысь радиоредакциослэсь ужамзэс. Ивортӥзы соослэн кивалтӥсьёссы Елена Утехина, Юрий Дударев но Михаил Васильев. Можгаын передачаос чузъясько куинь кылын. Бадӟым инты висъяське культуралы, литературалы, тазалыкез утёнлы, егитъёсын ужанлы. Палэнэгес кылё политикаысь но экономикаысь ужпумъёс. Сыӵегес ик югдур Пичи Пургалан. Грахын ужало удмурт, ӟуч, пор (мари), чуваш но бигер ылъёсын. Передачаосты дасянэ пырисько ожысь ныциональной движениослэн кивалтӥсьёссы. Кутӥсько пӧртэм жанръёс. Коллегия пусйиз передачаосты умоятонъя сюресъёс. Куинь районысь администрациослэн кивалтӥсьёссылы вазиськемын луоз радиоредакциослы компьютеръёс басьтыны куронэн. Вотка городысь типографилэн директорез Валентина Феофилактова ивортӥз ужын шудтэм учыръёслэсь утиськон бордын ужамзэс. Калленгес умоен лыдъяз солэсь амалъёссэ. Мылкыд каремын соосты музон интыосы вӧлмытыны. А. Сидоров. Кун Кенешлэн Президиумаз Кун Кенешлэн Президиумез эскериз Кун Кенешлэн сессияз поттоно документъёсты. Соос пӧлын Кун Кенешлэн законъёсты кылдытонъя планэз, му вӧй кысконэз радъян пумысен законъёс, юридической лицоослэн республикалэн бюджетэз азьын пунэмъёссылэсь структуразэс воштон сярысь закон но мукетъёсыз. Сессилэн повесткаез юнматэмын луоз 2 июне Депутатлэн нуналаз. Президиум огкылысь юнматӥз Правительстволэсь Балезино посёлокын спиртзавод пуктыны инвесторъёсты шедьтон пумысен постановленизэ. Правительстволэн Тӧроезлэн воштӥсез Владимир Зенин ивортӥз тулобурдо вордонъя "Удмуртская" фабрикалэн ужамез сярысь. Правительство та ужпумъя постановление кутӥз. Та постановлениея фабрикалэн пунэмъёсызлэн структуразы воштэмын луоз, та кун предприятие акциосын огазеяськонлы пӧрмоз, солэн ваньмыз акциосыз кун асваньбуре пырозы. Президиумлэсь заседанизэ нуиз Кун Кенешлэн Тӧроез Александр Волков. Кун Кенешлэн пресс-службаез. ВЫЛЬ ДЫШЕТСКОН КНИГАОС Калыкез дышетонъя министерство кутскиз удмурт литературая вань классъёслы выль учебникъёс дасяны. Лэсьтэмын ни соослы проспектъёс. Та учебникъёсы пырозы трос выль произведениос, кудъёсыз вунэтэмын яке палэнтэмын, яке кулэезъя дунъямын ӧй вал. Соос пӧлын, кылсярысь, И. Михеевлэн "Эн лушка" пьесаез, И. Яковлевлэн "Янтамыр- батыр" но "Вормонтэм-батыр" поэмаосыз, К. Гердлэн "Матӥ" повестез но трос мукетъёсыз. Выль учебникъёсы пыроз мукет финн-угор калыкъёслэн но чеберлыко литературазы. Учебникъёсты дасясь коллективен кивалтэ Удмурт кун университетысь удмурт литературая но Россиысь литератураосъя кафедралэн доцентэз Л. П. Федорова. Н. СЕРГЕЕВА. Берекет Матрон апай ӵектэ Гажано редакция! Газетты пыр валэктэ вал курег пуз тӧдьылэсь шуккем (крем) лэсьтыны. Малы ке милям уг пӧрмы, нош лэсьтӥськом кадь озьы ик - электромиксерен. Небытысьтыз торт вылэ сяська лэсьтэммы уг луы. Н. Широбокова. Мувыр гурт, Шаркан район. Курег пуз тӧдьылэсь шуккем Кулэ луоз: ньыль курег пузлэн тӧдьыез (белокез), стакан сакыр-песок, кӧня ке пыры лимон кислота. Лэсьтыны луоз кык сямен: 1. Курег пуз тӧдьыез шукконо, шукы луытозь. Ужамъя ик калленэн гинэ кисьтоно сакыр-песоклэсь лэсьтэм пӧсь но нап сироп (ӝыны стакан). Суретэз шукконо на сӥятозяз. 2. Курег пуз тӧдьыез миксерен шукконо, кӧня ке пыры лимон кислота йылтыса (озьы белок юнгес луэ но капчиенгес шукыяське). Сакыр-песок будэтоно но пырыосыз бырытозь шукконо. Крем дась. Ватсало на, кремен лэсьтэм сиёндэс ӵуж луытозяз выльысь духовкаын пыжемды луоз на. В. Андреева. МАТЫСЬ ДЫРЕ - "ФЕДРА" Ӟуч драмая В. Г. Короленко нимо кун театр понна таиз ар шудо вал. Дас сизьыметӥ мае возьматэмын берпуметӥез уж - А. Галинлэн "Сирена и Виктория" пьесаезъя спектакль. Шудӥзы артистка Н. Николаева, Удмурт Элькунысь дано артистка Г. Аносова. Со сяна, туэ покчиос понна дасямын вал А. Ольшанскийлэн "Принцесса Кру" выжыкылэзъя спектакль, мӧйыос понна - С. Давлатовлэн ужъёсызъя "Чемодан" комедия. Та ужен валче, кызь ар ортчыса, сцена вылэ выльысь потӥз Владимир Сафонов, сизьымдонэтӥ аръёсысь одӥгез тодмо актёр. Евгений Минуллинэн ӵош со возьматӥз ассэ Довлатовез. Чылкак дась ини туала драматурглэн Никита Вороновлэн "С приветом из Мехико" пьесаезъя каламбур но американецлэн Артур Копитлэн "Папа, папа, бедный папа, ты не вылезешь из шкафа, ты повешен нашей мамой между платьем м пижамой" фарс. Таизлэн пуштросэз таӵе: нылкышно сьӧраз ялан нуллэ вием картэзлэсь шӧйзэ... Зэм, та ужъёсты возьматыны чакламын пичи сцена вылын (сое али лэсьто). Со дыре ик азьланьто А. Толстойлэн "Царь Федор Иоаннович" пьесаез бордын ужанзэс. Сое татчыозь адӟытыны ӧз быгатэ (трос шудӥсез, декорациез но дӥсез). Театр малпа матысь дыре Ж. Расинлэсь туж тодмо "Федра" трагедизэ пуктыны. Та ужен усьтӥськоз вылез ар. Сергей Балыков режиссёр тылпулэсь утиськонъя управление куремъя дася "горд атасэн" нюръяськонлы сӥзем спектакль. Укмысэтӥ мае артистъёс вуылӥзы Алабгое (Елабугае). Возьматӥзы "Принцесса Кру", "Сирена и Виктория", "Василий Теркин" спектакльёссэс. Гужем потаны чаклало гуртъёсы - Каракулино, Сарапул ёросъёсы, пиналъёслы чаклам спектакльёсын - пионерлагерьёсы. 21-тӥ майысен 28-тӥ маёзь театрын мынӥз Москваысь егит кизилиослэн фестивальзы. Отчы пыриськизы "Дебют-центр", актёръёслэн А. Яблочкина нимо юртсы. Татчы ветло асьсэ театрын яратоно рользэс шудыны быгатӥсьтэм егит артистъёс. Со дыре ик татын ӧвӧл ялан ужась труппа, режиссёръёс. Театрлэн ялонъёсаз озьы ик адӟиськыло ини Россиысь туала драматургъёслэн ужъёссы. Соос пӧлын - Е. Исаевалэн "Абрикосовый рай", Е. Наришлэн "Двое поменьше", А. Найденовлэн "Гусиные лапки", Е. Греминалэн "Сахалинская жена" пьесаоссыя спектакльёс но классика - "Генрих ИХ" но "Месяц в деревне" (кылдытӥсьёссы - Л. Пиранделло но И. Тургенев). В. ЛАГУНОВ. Берло дыре куке но пыд вылазы йыг-йыг сылӥсь колхозъёс но чылкак куашкан калэ вуэмын. Ужзы шумпотон уг вайы туннэ Грах районысь "Прибой" колхозын улӥсьёслы но. Нянь будэтӥсьёс ньылетӥ арзэ ни уг адӟо уждунзэс. Азьланьын но озьы ик луиз ке, художниклэн Леонид Прозоровлэн синмыныз учкыса, гуртоослы кема ӧвӧл шедьыны таӵе югдуре но. Шӧкыч Паймод но, куалектод но Огезлы - йӧлвыл, мукетызлы - йӧлпыд яке малы кин но сокем яратэ бирдыен шудонэз. Мар со сыӵе бирдыен шудон, шуиськоды-а? Ма, кызьы уд тодӥське? Ӧвӧлтэм аръёсы ай, гурт калык кутэн ветлон вакытэ, пиналъёс, ог-огзы доры люкаськыса, ваньмон дырзэс таӵе шудон дурын ортчытылӥзы. Гожъёсын пусъем кагаз вылэ сьӧд но тӧдьы бирдыос тыро но... азьлань! Кин тушмонэзлэсь бирдыоссэ ӝоггес ӵогылӥзы - со ик вормись. Табере валады, луоз: шашкен шудон со. Кин малпаз со дыре, шашки котырын куке-соку мукетыз, коньдон мешокен герӟаськем бадӟым шудон пуромоз шуыса. Ваньмыз тодо, кылсярысь: Удмуртилэн столицаяз кемалась ӧвӧл ортчиз дуннелэн но Россилэн международной шашкиосъя чемпионатэз. Со дыре ик туж ӧжытэз тодо, макем со узыр радъямын вал. Ужрадлы, "висисьёс" отын чиньыен лыдъямон вал ке но, огшоры зал клуб ӧз яра, басьтӥзы Ижысь самой устозэ "Металлург" дворецез но Операя но балетъя театрлэсь юртсэ. Валамон ни, та но асьсэды шудӥсьёсты, судьяосты, куноосты сюдэм-вордэм, пӧртэм оборудованиез уже кутэм понна йыр поромымон коньдон тыремын сотэк но куанер бюджетысь. Малпаны кулэ, отысь ик куалдытэмын дуннелэн чемпионатаз нырысьсэ бирдыез ӵогисько миллион но берпуметӥзэ палдытӥсьлы кык миллион манет. Таосыз Первомай но Ленин районъёсысь кивалтӥсьёслэн кузьымзы. Уг, дуннелэн трос пол чемпионатэзлэсь Алексей Чижовлэсь но солэн нырысетӥ тренерезлэсь Рудольф Чебышевлэсь бадӟымесь вормонъёслэсь, Ижмылэсь данзэ ӝутэмзэс нокин но вунэтыны уг туртты. Но бюджетысь, мукет сямен вераса, ужась калыклэн кисыысьтыз потэм коньдонэз озьы чакласькытэк кутыны уг яра, дыр. Малы озьы луэ? Республикаысь газетъёс спортысь ветеранъёслэн нимынызы гожъяллязы ни Рудольф Чебышевлэн коньдонэз мултэс яратэмез, ассэ гинэ тодыны турттэмез сярысь. Туннэ нокин но тыро-пыдо вераны уз быгаты, ог дыре со кӧня ужын лыдъяське. Шашкиосъя Удмуртиысь но городысь федерациослэн тӧрозы, "Ижпланеталэн" шашкиосъя клубысьтыз тренер, 40 номеро школаысь воспитатель. Пенсие потонэз вуэм адямиез кемалась ни куро ужан песьтэрзэ кӧня ке коть восьмытыны. Кылэм-адӟем уг кары. Городысь администрация но Ижысь спорткомитет чиньыос пыр учкемен, Чебышев бюджет коньдонэз но ас тодэмезъя кутэ. Со кузё кариськыса, республикаын радъя тодмо "бирдычиослэсь" шудонъёссэс. Нош али кутскисьёсыз... Таосыныз вырыны дыр ӧвӧл. Отын уксё уг зоры. Тӥни малы мукет ӵошатсконъёс, тужгес но пиналъёс пӧлын, немыз понна гинэ, шуыны луоз,ортчыло. Чебышев шашкиосъя чемпионатъёсын валтӥсь судья луыса уг возьдаськы шудонъёсын пуктэм куронъёсты тӥяны но. Мултэс яратэ озьы ик кун сьӧрын "ужаны". Солэсь кыдёкысь странаосы бюджет коньдон чотын вуылэмзэ лыдъясь уд быдты. Огназ ке ветлысал, оло, чидасалыд ай. Тодӥськоды на луоз, Чебышев кичӧлтыса, Голандие дуннелэн чемпионатаз Ижысь кивалтӥсьёсын быдэс делегация кунояз. Таиз понна но нокыӵе спонсоръёс одӥг манетсэс но ӧз висъялэ. Гужем чакламын дуннелэсь чемпионатсэ нош ик Ижын ортчытыны. Таяз учыре но меда тӧлъя-буръя лэзёзы калыклэсь коньдонзэ?.. Павел Коновалов. Тазалык сярысь сюлмаськыса Калыклэсь тазалыксэ утён, котыр инкуазез чылкытатон сярысь сюлмаськыса, 80-тӥ аръёсы Тазалыкез утёнъя дуннеысь огазеяськон ӵектӥз "Здоровые города" программа. Туннэ нуналлы соя ужало дуннеысь данакез городъёс. Соос пӧлын - Ижевск но. 20-лэсь ятыр нимысьтыз специалистъёс тыршо программаез улонэ пыӵатон бордын. Табере ӟеч тодӥськом, адямилэсь висьыны кутскемзэ возьмано ӧвӧл, со сярысь азьвыл ик сюлмаськоно шуыса. Нылпи садъёсын, школаосын тросгес саклык висъяно физкультурая урокъёслы, спортъя секциослы. Нылпи площадкаос, залъёс лэсьтонлы висъям коньдон азьланьын одно пайдаен берытскоз. Калыклэн тазалыкез потэ юон вулэн чылкытэз бордысь но. Та ласянь асьмеос ушъяськыны ум быгатӥське на. Туннэ нуналлэн эшшо одӥгез висёнэз: ужтэк кылемъёслы йылэмзы. Соин валче семьяын пӧртэм ченгешонъёс-керӟегъяськонъёс пото. Озьы аляло лулсэр висёнъёс. Соосын нюръяськон вылысь кылдытъя но психологической юрттэт сётонъя центръёс. Э. Васильева. КУАШЕТОЗ ВЫЛЬ НЮЛЭС Куинь толэзь ӵоже ужтэк пукизы Селта ёросысь "Сельхозлес" кооперативын ужасьёс. Но май толэзе уж ӟырдыт ӧръяськиз. Соку 20 гектар вылэ 100 сюрс кыз мерттӥзы. Ужзэс йылпумъязы 5 нунал куспын. Озьыен, будосъёс согиськизы мускыт музъеме. Районын али 17 сюрс гектар межхозяйственной нюлэсъёс лыдъясько. Берло аръёссэ соосты выльдон ужъёс ӧз ортчылэ вал, шуыны луоз. Нюлэс адямилы ваньбур сётэ, табере аслыз но юрттэт вуэ. А. ЛИСИЦЫН. МАИН КЫСКО БОРДАЗЫ? Берпум аръёсы рыноке выжемен валче, кинотеатръёс шуг-секытъёсын пумиськизы. Электрокужымлы, шунытлы но вулы дун будэмен, кино учкыны но дунъёс йылӥзы. Но умой фильмъёс вайыкузы, залъёсы тросгес калык люкаське. Озьы Иж карысь "Россия" кинотеатрын "Титаник" фильмез возьматон кема гинэ мынӥз. Собере "Человек в железной маске" картинаез учкыны мылкыд карисьёс трос вал. Малы та фильмъёс адямиосты бордазы кыско? Шонерак вераса, соосты пуктӥсьёслэн сюлмысь тыршеменызы. Газетъёслэн гожъямзыя, Голливудысь режиссёор Джеймс Кэмерон "Титаник" фильмез пуктыны 200 миллион доллар быдтӥз. Картинаез учкыса валаськод: та лыдпуслы паймонэз ӧвӧл. Бадӟым корабль выйыку, тросэзлэн учкисьёслэн синкылиоссы ик потӥзы. Соку бырыны шедем Европаысь Америкае мынӥсь 20 ӟуч но. Соос начар улӥсьёс вал, куинетӥ классъем каютаын зарезь сьӧры шудзэс утчаны потӥллям. Бырем ӟучъёслэсь нимъёссэс "Экспресс-газета" нырысьсэ печатлаз. Та кинофильмын туж яркыт возьматэмын егит суредасьлэн Джек Доунсонлэн Роуз нимо узыр нылэн яратонзы. Соосты шудӥзы артистъёс Леонардо Ди Каприо но Кейт Уинслет. Корабль айсберг (йӧ гурезь) борды шуккиськыса, Роузэз мозмытыкуз, Джек быре - вуын кынмыса кулэ. Нош соослэн чылкыт, чебер яратонзы табере уно миллион учкисьёслэн сюлэмазы кылиз. "Человек в железной маске" фильмын Леонардо Ди Каприо шудэ корольлэн вынызлэсь рользэ - ӵапак со пуке тюрьмаын корт маскаен. Та фильмез кылдытӥсьёс уже кутӥллям А. Дюмалэсь "Три мушкетёра" произведенизэ. Людовик ХИВ Франциын (1643-1715 аръёсы) кивалтыкуз, данъяськыса вералляз: "Государство - со мон". Корольлэн юртэз выжиз Парижлы 18 иськеме лэсьтэм Версаль двореце. Татын туж чебер, син мальдымон вал. Балъёс но пӧйшуранъёс куспын король аслэсьтыз малпанъёссэ кунлэн законъёсызлы пӧрмытылӥз. Солэсь мылкыдзэ быдэсъязы чиновникъёс. Людовик ХИВ кивалтыку, 40 сюрс мурт быдтэмын вал. Францилэсь кужымзэ юнматон понна, король ӝыны миллионъем армиеныз вис карытэк ожъёс нуиз. Фильм яркыт возьматэ, кыӵе улонэ вуэ государство, одӥг мурт гинэ нокинлэсь кылзӥськытэк кивалтэ ке. Со асьме туала улонын но таӵеезлэсь утиськыны ӧте кадь. Нош Леонардо Ди Каприолэн нимыз али киноез яратӥсьёслэн кыл йылазы берга, олокӧня сюрс миллион нылъёслэн сюлэмазы солэн тусбуез лякиськемын. Маин бордаз кыске та артист? Чагыр-чагыр синъёсыныз гинэ-а? Яке кышкасьтэм но пинал ненег сюлэмо романтической геройлэсь образзэ кылдытэменыз? Озьы-а, тазьы-а, но Леонардо Ди Каприо али "гурезе" тубе. Малпа Голливудын аслыз корка басьтыны - 15 секундъем рекламной ролик понна японецъёс солы дэмлало 4 миллион доллар. "Титаник" фильмын шудэмез понна одӥг приз но басьтымтэ Кейт Уинслет сярысь ке верано, со аслэсьтыз данзэ ӝутыны малпа дунтэм британской фильмын - ӵапак та учыр сое киноолимп вылэ ӝутоз шуыса осконэн. В. ЧЕРНОВ. Политика ЧУБАЙСЪЁС ВОШТӤЗЫ ТЕЛЕФОН НОМЕРЗЭС Кылем толэзе Россиысь премьер-министре кандидат Сергей Кириенко ялӥз: Анатолий Чубайс уз кивалты Россиысь огъя энергосистемаен. Кириенко луиз Правительстволэн Тӧроез, Чубайс - "ЕЭС России" акциосын обществолэн президентэз. Озьы калыклэн одӥгез синазькыль адямиез выльысь сюриз шуныт интые. Уноез ӧз вунэтэ на 1996-тӥ арын январез. Анатолий Чубайс соку тыриз налог - 515 миллион манет. Валэктӥз: бадӟым коньдон басьтӥз пӧртэм лекциосын-конференциосын. Ваньмыз оскизы: ваучерлэн но кык нылпилэн атайзы пайда басьтӥз туж чылкыт амалэн. Сьӧлыкез луысал ке, Кремльысь сое кемалась тузысалзы ни кырсь ӵужонэн. Чубайс уг выйы бере, яке-яке... Яке со кинлы ке туж кулэ, яке сьӧд ужъёсын уг выры. х х х Ньыльдон кык арлэсь кемаласьгес Белоруссиысь Борисов райцентрын, Минскысен 70 иськемын, огшорыгес учыр вал. ЗАГС-ысь журналэ гожтӥзы таӵе кылъёс: Анатолий Борисович Чубайс вордскиз Борисов карын 1955-тӥ арын 16-тӥ июне. Анаез - Чубайс Борис Матвеевич, анаез - Сагал Раиса Хаимовна, Зэм, анай малы ке куре ассэ Раиса Ефимовна ниманы. Борис Матвеевич Чубайс вордскиз Москваын 80 ар талэсь азьвыл. Аспӧртэм фамиллязы сярысь бадӟымез Игорь пиез тазьы валэктэ: со, пе, потэмын Балтика дорысь Чубайтес фамиллялэсь. Соослэсь выжы-кумъёссэс Россие Петр И ӧтем. Могилёв городын вордскем кышно луонэныз Борис тодматскиз дасэтӥ классын. Соос огъёзъёс. Ӝоген кузпалъяськизы. Военной училище бере Борис Чубайс сюриз Литва но Польша вискысь кунгож дуре. 1941-тӥ арын 22-тӥ июне танкист-лейтенант котыртэме шедиз. Асьмелэнъёс доры ӝыны толэзь выжыны выриз. Быдэс война пыр потӥз. Кышноеныз ӵош улӥз вормем Германиын. 1947-тӥ арын Берлинын вордскиз Игорь пизы. Офицерез улон отчы-татчы сэрпалля. Чубайсъёс вуизы Борисовысь военнойёслэн Лядищи городоказы. Улӥзы офицеръёслэн юртазы. Куинь комнатаен коммунальной шуиськись квартираысь огаз комнатаын. 1936-тӥ арын пуктэм маке, оло, огпол но выльдэмын ӧвӧл. Отын адямиос ӵем вошъясько бере, туалаослэн Чубайсъёс сярысь кылылэмзы ӧвӧл. Анатолий Чубайс Россиысь Правительствое вуэм бере, эрико Белоруссиысь куд-ог шӧртчиос утчаны ӧдъязы приватизациез радъясен герӟаськем учыръёсты. Отчы пыриськиз Кунэз кышкытлыклэсь утёнъя комитет (КГБ) но. Шуг вал та уж. Ог люкетэз архивъёс кылиллям Белоруссие, мукетъёсыз - Россие. Пересьёс но тодазы ӧз вае ни Чубайс офицерез: замполит оло зампотех, майор оло лейтенант. Нырысетӥ классэ Толик пыриз 1962-тӥ арын Одессаысен. 1967-тӥ арын Чубайсъёс вуизы Ленинградэ. Отын Анатолий мынӥз витетӥ классэ. Ӟуч кылын но литератураен дышетӥсь Антонина Николаевна Медведева маде: - Со умоесь кусыпъёс возиз ваньмыныз. Вылӥ классъёсысь укылтэмъёс но пияшез гажаллязы. Мон сое ноку но Толька ӧй шуылы. Кылы озьы ӧз берытскылы. Толя аслэсьтыз дунзэ тодэ вал. Чубайс зэмен ик тодэ дунзэ. Возьдаськытэк вера сое. Кремль Чубайсэз огдырлы палэнтэм бере, куд-ог фирмаос дась вал солы арлы быдэ миллион доллар уждун тырыны. Ужбергатӥсьёс (предпринимательёс) Анатолий Борисовичез укыр дунтэмен басьтыны малпаллям, шӧдске. Ӵектонзэс кулэ ӧз кары. Виктор Черномырдинлэн воштӥсез дыръяз Чубайс шара вераз уждунзэ - вуж коньдонэн 7 миллион 500 сюрс манет. Ӟеч карт ваньзэ сётэ кышноезлы. Анатолий Борисович нырысьсэ уг пусйылы ни: таӵе коньдонэн ӟеч уд улы. Оло, солэн ӧз быры на 700 сюрс долларез? Чубайс эшъёсыныз ӵош кылдытӥз нимаз асваньбурез (частной собственностез) утёнъя фонд. Таиз ик уте, дыр, Чубайсэз. Школаын Анатолийлэн эшез вал - Саша Блинов. Акаез (тётяез) сяна, нокинэз ӧвӧл. Чубайсъёс сое асьсэлэн кадь каризы. Школаысь вуэм Толяез но Сашаез Раиса Ефимовна сюдэ. Пиос гуртэ ужзэс лэсьто. Ӝытазе ваньзы Сашаез дораз келяло. Чубайсъёс но Блиновъёс туннэ но эшъясько, пе. Зэм, Москвае кошкыкуз, Анатолий шуиз Сашалы, ӵем жингыртылыны уг быгаты ни. Яратоно урокез ӧй вал Чубайслэн. Вылӥ дунъетъёс сьӧры ӧз уиськы, куиньёсыз ӧй вал. Соку ик быгатэ вал малпанъёссэ но мылкыдъёссэ ватыны. Кивалтӥз октябрёнокъёсын но пионеръёсын. х х х 1972-тӥ арын Чубайс пыриз Ленинградысь инженерно-экономической институтлэн машина лэсьтон факультетаз. Лекциос, сессиос, картофка, стройотряд. Дышетӥсьёсты нерад карылӥз пӧртэм юанъёсын. Эшъёсыз верамъя, Чубайс юылӥз, эсэпсэ валаса. Ӧз кыскы. Маскаръяськылӥз. Куинетӥ курсысен наука пала кыстӥськиз. Институтэз йылпумъяса, Анатолий ужаны кылиз татчы ик. Инженере, толэзяз 100 манетэн. Отын туннэ но утиське солэн личной делоез. 1977-тӥ арын пыриз компартие. 1981-тӥ арын "Спутник" турбюролэн ысъямезъя ветлӥз Польшае но ГДР-е. 1983-тӥ арын утиз кандидатской диссертацизэ. 1988-тӥ арын уждунэз пичи ӧвӧл ни - 320 манет. 1990-тӥ арын Чубайс институтысь кошкиз. Сое басьтӥзы быръем уже - Ленинградысь горисполкоме. Анатолий Борисович луиз председательлэн нырысетӥ воштӥсез. Институтлэн ректорез сое куать пол куриз вузлы ватсаса инты висъяны. Юнме. Чубайс сярысь урод кылъёс верало институтын но (али академиын), быдэс Россиын но. Со, пе, ваньзэс алдаз ваучеръёсын. Аслаз но тазьы шуэмез вань: весь юаллясько, пе, одӥг ваучерлы кык "Волга" басьтон пумысен. Куд-огез выризы шудон машина кузьманы. Выльысь берытском солэн институтаз. Доцент дыръяз со весь ветлӥз пештырскем йырсиен. Соку проректор, али ректор Александр Михайлушкин ялан пыкылӥз: - Тӥ сыӵе гажано дышетӥсь. Малы сыӵе сапырес ветлӥськоды? - Ярам-ярам. Берлогес Михайлушкин доры лыктӥз Чубайслэн наукая кивалтӥсез профессор Пузыня: - Кылзы ай, эн тэбиньы Чубайс котыре! Йырсиеныз сэрен тон сое зӥбид ни. Анатолий Борисович соку ӧз тупатскы. Йырсизэ вольыт нуллыны ӧдъяз институтысен горисполкоме кошкыса гинэ. х х х Анатолий Чубайс но Людмила Григорьева тодматскизы стройотрядын. Кузпалъяськыса улӥзы бадӟым коммуналкаысь 15 метръем сюл кадь кузь комнатаын. Бускельёссы лякыттэмесь вал, нош Чубайсэз гажазы. Ог-огзэс курдатъязы: эн етӥзъяськы, Толялы верало. 1980-тӥ арын вордскиз Алексей, куинь ар ортчыса - Оля. Огвакытэ Чубайс кивалтӥз институтысь проектъёсъя группаен. Татчы ик Ленинградысь университет бере вуиз егит экономист Мария Вишневская. Горисполкоме выжыса, Анатолий люкиськиз Людмилаен, кузпалъяськиз Марияен. Людмилалэн но азьвыл картэзлэн кусыпъёссы ӧз сӧриське. Кышномурт али огаз фирмаын бухгалтер. Нылпиоссэ атайзы вылэ уг узатъя. Москвае кошкыкуз, Анатолий азьло кышноезлы кельтӥз вуж "Запорожецсэ". Руль сьӧры пуксьыса, Людмила ортче вал Невский проспект кузя. Машина мырӟиськиз. Куара-ланга пуромиз: Анатолий Чубайсэз, пе, виыны медо вылэм. Тодмо луиз: кышномурт - лябыт шофёр. Супыльтонъёс чалмизы. Россилэн шоркараз (столицаяз) Чубайс вуиз вужалэс "витетӥ" "Жигулиен". Та автомобиленыз люкиськемез уг поты вал, "Мерседесэ" пуксьыса но. "Судзуки" басьтыса, соку ик ӧз дӥсьты "Жигулизэ" вузаны. Анатолий Борисович - ӟеч шофёр но механик. Машиналэсь шексэ шарая куараезъя ик. Сестрорецк дорын арлы быдэ ортчыло экономикая кенешонъёс. Отчы котьку сямен лыкто Анатолий Чубайс но Егор Гайдар. Ужало, губияло, чорыгало. Огпол соос пуксизы огшоры "рафике". Меӵ кожонтӥ ӝог ширтӥсь пичи автобус чукинскиз но кык питран вылэ ӝутскиз. Чубайсэз возьмаса, мышказ мукет машинаен мынӥсьёслэн йырсиоссы пештырскизы, вылды. Машина ӧз погра. Нош возьмаськисьёс одӥг вамышлы но ӧз кыльылэ ни. Кузё мыкырске гинэ, соос отын ни: - Эн сюлмаське, ми асьмеос ишкалтом губиез! х х х Экономика наукаосъя кандидат Мария Вишневская кошкиз наукаысь. Дун басьтытэк ужа "Хоспис" огазеяськонын - гижлоен висьыса, кулон калэ вуэмъёсты эмъян интыын. Анатолийлэн но Людмилалэн Алексей пизы дышетскиз кунгож сьӧрысь огаз дано школаын - Милфиндын. Соин ӵош вал Борис Ельцинлэн внукез но солэн администрациеныз кивалтӥсьлэн Валентин Юмашевлэн нылыз. Али Алексей тодон-валанзэ будэтэ Экономикая вылӥ школаын. Раиса Ефимовна но Борис Матвеевич 1996-тӥ арын выжизы Москвае. Атай, отставкаысь полковник но профессор, марксистско-ленинской философилы дышетӥз Ленинградысь военной вузъёсын. Тодмоосыз верамъя, марксизмлы юн дурбасьтэ. Ачиз Анатолий Чубайс но уг ваты: - Шер пумиськылӥсь адямиос музэн ик, атае сюлмысьтыз оске Совето властьлы, коммунистъёслэн партизылы, Сталинлы. Куд-огез лыдъямъя, пичи Чубайс кивалтон манереныз туж кельше атаезлы, Улон шоры пӧртэм сямен учко ке но, выросъёссы огкадесь. Раиса Ефимовна дышетскемын экономистэ. Картэныз ӵош гарнизонъёстӥ ветлыса, гуртысь уж-пӧрен но нылпиосын выриз. Пересьёс уло городлэн шорысьтыз шыпыт интыын, Центробанклэн тӧроеныз Дубининэн но тодмо политикен Рыбкинэн одӥг юртын. Зэм, Арбат вӧзысь пичи ульчаосын чус уд шуы. Корка шоры кык пол ыбылӥзы. Кызьы луэ ни, йыртэмъясьёсты ӧз шедьтэ. Мӧйы Чубайсъёс журналистъёсын уг пумиськыло. Огез газетчи, соин сэрен вожзэ вайыса, пересьёслэсь телефонзэс печатлаз. Соослы пичи пизылэн ужъёсыз сярысь малпанзэс вераны турттӥсьёс тачак вылӥллям. Чубайсъёс воштоно луизы телефон номерзэс... "Толя сярысь трос тунсыкозэ" мадьыны мылкыд каризы вал эшъёсыз но тодмоосыз. Бератаз пӧртэм ньӧмын пумит кариськылӥзы. Соин ӵош дышетскем кышномурт гинэ мугзэ ватыны ӧз быгаты: "Монэ алӥзы!" Кин но малы алӥз - ятвылтонэз гинэ вань на. Геннадий ШАЛАЕВ. "Собеседник" газетысь. Правительствоысь иворъёс Пичи ужбергатон Та егит удыслы Удмурт Правительство вис карытэк бадӟым инты висъя. Со потэ нырысь ик Павел Вершининлэн сюлмаськемез бордысь. Пичи ужбергатон угось люконтэм герӟаськем выль ужан интыос кылдытонэн но. Государство та удысэз азинтонлы котьку юрттэ. Шаерамы тая нимысьтыз программа кутэмын. Удмуртиын али 7,5 сюрс пичи ужбергатонъя 7,5 предприятие лыдъяське. Отын 63 сюрс мурт ужа, яке бадӟымесь но шоро-куспо предприятиосысь ужасьёсын ӵоштыса, 11 процентэз. Берло дыре пичи ужбергатӥсьёс тросгес ваньбур поттыны ӧдъязы. Соос озьы ик вузкаро но музон услугаос сёто. Республикаямы та удыс ВВП-лэсь (валовой внутренней продуктлэсь) 11 процентсэ басьтэ. Шаерысьтымы 29 городъёсын но районъёсын пичи ужбергатонлы юрттонъя интыысь (муниципальной) программаос кутэмын но 20 администрация бюджетысь коньдон висъя. Кылем арын кун бюджетысь та удыслы 2 миллиард (вуж коньдонэн) коньдон сётэмын. Лэсьтӥськон кужмоялоз Рос-прос учкемын "Удмурт Республикаын улон юртъёсты лэсьтонлы коньдон висъян сярысь" Законлы инъет. Со сярысь ивортӥз Архитектурая но лэсьтӥськонъя кун комитетлэн кивалтӥсез Геннадий Батищев. Докладчик пусйиз, та уж кун бюджетэ уксё пыртоз. Со юрттоз лэсьтӥськись предприятиослы азинскыны но нимаз коркаос ӝутонэз кужмоятыны. Законэз быдэсъяны кутским ке, улон юртъёс лэсьтонэ бюджетэ пырисьтэм фондъёсысь 90 процентэз коньдон вуоз. Вить ар ортчыса, со пайда вайыны кутскоз. Законлы инъетэз волятэмзы, ӵектонъёсты пыртэмзы бере, сое правительстволэн кенешаз учкозы на. Выль аукцион Республикаямы му вӧй поттон интыосты вузанъя туэ выль аукцион ортчытыны решение кутэмын. Отчы пыриськозы Удмуртиысь предприятиос. Но соослэн мед луоз та ужъёсты быдэсъяны лицензизы но инкуазь узырлыкъёсты кутыны правозы. Али аукционэ пыриськыны 40 куриськон вуэмын ни. Конкурсэ поттэмын луозы 20 му вӧй поттон интыысь скважинаос. Удмурт Республикаысь Правительстволэн Тӧроезлэн секретариатысьтыз пресс-центр. ӜОГЕН БЫРЪЁНЪЁС Толэзьлэсь кемагес кылиз на ёрос кивалтэтэ депутатъёсты быръёнъёс дырозь. Удмурт Республикаысь Кун Кенешлэн постановлениезъя, районъёсын ас коже кивалтон органъёсы быръёнъёс ортчыны кулэ туэ 5-тӥ июле. Квлем кӧс нуналэ уин йылпумъяськиз депутатэ кандидатъёсты ӵектон. Нош кызьы мынэ быръёнъёслы дасяськон элькунамы? Центральной комиссилэн лыдъямезъя, 29-тӥ мае ӵукналы югдур таӵе вал. Республикаямы кылдытэмын 746 округ. Депутат луыны мылкыд каре 1480 кандидат. Соос пӧлысь 75 процентэз ӵектэмын бырйисьёсын, 14-ез ассэ ачиз ӵектӥз, 11 процентсэ дэмлазы бырйисьёслэн огазеяськонъёссы. Котькуд округъя шорлыдын быдэн 2 кандидат лыдъяське. Но куд-ог интыосын 4-5 адями но пусъемын. Нош кызьы ивортӥзы Селтаысь быръёнъёсъя комиссиын ужасьёс, районын кылдытэмын одӥг мандатэн 31 округ. Депутат луыны мылкыд кариз 83 мурт, пусъемын 33-ез. Округъёсъя одӥг инты понна нюръяськозы пӧртэм лыдын кандидатъёс. Тросгес 3-4 адямиен округъёс. Чылкак одӥгезъя гинэ кужымзэ 1 кандидат мерталоз. Но сыӵе дыръя быръёнъёсы пыриськыны кулэ 50 процентэз адямиос. Кандидатъёсты пусъён (регистрация) йылпумъяське 4 июне. Б. НИКИТИН. ТУСЛЫ-БУЙЛЫ, КИБАШЛЫ Ижевскысь кибашлыослэн юртазы асьсэлэсь киужъёссэс возьмато быдэс шаермылы тодмо куиськисьёс Мазитовъёс. Апайёс Зоя Алексеевна но Мария Алексеевна Мазитоваос, Зинаида Алексеевна Артанова, Екатерина Алексеевна Тукаева, Анна Алексеевна Мерзлякова но соослэн нылпиоссы татчы ваиллям куэм шобыръёссэс, выж лёгетъёссэс, пужыятэм ӵушконъёссэс, чалмаоссэс, чильпам ӝӧккышетъёссэс но мукетсэ. Анна Алексеевна сянаез, ваньзы соос уло Кияса ёросысь Уддяди гуртын. Татчы соос доры кыстӥсько, шаерысьтымы гинэ ӧвӧл, дуннелэн пӧртэм сэрегъёсысьтыз лыктэм куноос, удмурт чеберлыкез дунъяны быгатӥсьёс. Та нылкышноослэсь киужъёссэс тодо ни Финляндиын, Эстониын но мукет кунъёсын улӥсьёс, уката ик Ольга Ильинична Мазитоваез асьсэлэсь сузэрзэс кадь матын каро. Мазитова апайёслэсь адӟем каро, дышетско нылпиоссы. Тани Светлана Николаевна Гаврилова Национальной музейын ужа, туж усто пӧрмытэ куиськыны, солэн сузэрез Елена Николаевна, Нырысетӥ республиканской больницаысь медсестра, керттӥське но, пужыятске но. Университетысь нырысетӥ курсын дышетскись Дима Бронников бадьпу ньӧрлэсь корзинаос пӧрмытэ. Огъя вераса, туслы-буйлы, кибашлы адямиос та выжыын. Соос, кин гинэ быгатӥз, люкаськылӥзы выставкаез усьтонэ. Трос шуныт ушъян кылъёсыз кылӥзы, асьсэос но кылазы-буразы, кырӟазы, ческыт пӧрамъёсынызы но куноятӥзы. Т. НИКОЛАЕВА. * Зоя Алексеевна МАЗИТОВА но Зинаида Алексеевна АРТАНОВА. * Кибашлыосыз котыртӥзы тодмооссы, тодосчиос. В. КАМАШЕВЛЭН туспуктэмъёсыз. АКЦИОСЫН ОГАЗЕЯСЬКОНЪЁСЫН, ПРОМЫШЛЕННОСТЬЫСЬ ПРЕДПРИЯТИОСЫН, УЧРЕЖДЕНИОСЫН НО ОРГАНИЗАЦИОСЫН УЖАСЬЁСТЫ РОССИЯ ФЕДЕРАЦИЛЭН КУН НАГРАДАОСЫНЫЗ ПУСЪЁН СЯРЫСЬ Россия Федерацилэн Президентэзлэн Указэз Кун азьын бадӟымесь вормонъёс басьтэмзы, уно аръёс ӵоже сюлмысь тыршемзы но калыкъёс куспын эшъяськонэз, валче ужамез юнматэмзы понна пусъёно: "За заслуги перед Отечеством" орденлэн ИИ степенё медаленыз Борисова Нина Григорьевнаез - акциосын "Ижевский радиозавод" огазеяськонысь радиоаппаратурая монтажницаез, Булдаков Владимир Петровичез - акциосын "Ижевский радиозавод" огазеяськонысь механосборочной ужъёсъя слесарез, Дудина Надежда Викторовнаез - акциосын "Ижевский радиозавод" огазеяськонысь бюролэсь кивалтӥсьсэ, Семдянов Александр Николаевичез - акциосын "Ижевский радиозавод" огазеяськонысь космической связья валтӥсь конструкторез, Шабалин Александр Ивановичез - акциосын "Ижевский радиозавод" огазеяськонысь инженерно-технической центрлэн отделэныз кивалтӥсез. Сётоно дано нимъёс: "Россия Федерациысь дано машиностроитель" Сенюгин Михаил Александровичлы - акциосын "Ижевский радиозавод" огазеяськонысь цехен кивалтӥсьлы, "Россия Федерациысь дано конструктор" Старовойтов Владимир Гавриловичлы - акциосын "Ижевский радиозавод" огазеяськонысь инженерно-технической центрлэн отделэныз кивалтӥсьлы. Россия Федерацилэн Президентэз Б. Ельцин. Москва, Кремль, 1998 арын 11 мае. � 538. Печатьын, радиоын но телевидениын ужасьёсты Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Культура но печать удысын вормонъёс басьтэмез, уно аръёс ӵоже сюлмысь тыршемез понна "Россия Федерациысь культура удысын дано ужась" сӥлы карон ним сётоно: Ившин Вениамин Никоноровичлы - Удмурт Республикаысь "Удмуртия" книжной издательстволэн валтӥсь редакторезлы. Россия Федерацилэн Президентэз Б. Ельцин. Москва, Кремль, 1998 арын 6 мае. � 496. ЗАКОНЭЗ ПЫӴАЛЭН УТИСЬЁСЛЭН ЛЫДЗЫ ЙЫЛЭ Кылем арын ноябре Россиын кутэмын вал "Судебной приставъёс сярысь" но "Исполнительной уж сярысь" законъёс. Соиз но, таиз но документ данакезлэн калыклэн улоназ нокызьы но ӧз шӧдӥськы, соосты, юристъёс сяна, тыро-пыдо синйылтӥсез но ӧз луы. Малы бен кулэ луизы выль законъёс? Кыӵе воштӥськонъёс ваизы соос правоез утён ёзъёслэн ужазы? Таӵе но мукет юанъёслы валэктон сётэ Удмуртиысь юстицияя министрлэн нырысетӥ воштӥсез, валтӥсь судебной приставлэсь ужъёссэ быдэсъясь, юстицияя ИИИ классэн государственной советник Геннадий ЯКОВЛЕВ: - Нырысь ик, кин со сыӵе судебной пристав? Соос кык пӧртэмесь - огшоры судебной пристав но судебной пристав-исполнитель. Кыкетӥосызлэсь ужзэс та дырозь быдэсъязы судебной исполнительёс. Нош огшоры судебной приставъёс выллем служба воксё ӧй вал, туж кулэ но вылысь, малы ке шуоно, судын, заседание мыныку, отын одно ик порядокез утёно, нокин но медам люкеты судьяослы ужзэс быдэсъяны. Нош асьмелэн судын ӵашето но, керето но, укылтэмъясько но... - Верандэс куспетӥ каро, Геннадий Алексеевич, вождэс эн вае. Тани ӵапак толон- валлян гинэ одӥг судья кытӥяз серем пыр но, кытӥяз йыркурен но мадиз адвокатъёслэсь судын маскаръяськемзэс. Одӥгез, пе, прокурорез ерпечка шуэ, мукетсэ защитникез вӧзысьтыз палэнтыны куре, соизлэн котырысьтыз зын потэ шуыса мыскылля. Таиз нош пумитаз "ымдэ пытса" шуыса вазе. Дунтэк спектакль, со сяна номыр уд шуы. - Вот-вот, ӵапак сыӵе выллем учыръёсты ик алыны но дугдытыны кулэ судебной приставъёс. Со сяна, соос эскеро но возьмало судлэсь юртъёссэ. Судэ ӧтемъёс отчы лыктонлэсь аналско ке, соосты кужмысь ваё приставъёс ик. Соос озьы ик котьку дась судын котькыӵе йыртэманэз но дугдытыны. Со понна приставъёслы тырмыт право но кужым сётэмын. Нялтас вераса, соослы уж дуразы пистолетэн ветлыны лэземын. Валамон, кулэ луиз ке, (инмар мед утёз) сое уже но кутыны быгатозы. - Нош малы кулэ луизы приставъёс-исполнительёс, вал ук ини судебной исполнительёс? - Судебной исполнительёс лыдъясько вал судлэн ужасьёсыныз. Соос ужазы судъёслэн но, юстицияя органъёслэн но кивалтэмзы улсын. Кемалась тодмо, кык кузё вылэ ужам - со ужам ӧвӧл ни. Приставъёсын-исполнительёсын табере кивалто юстицияя органъёс гинэ. Со сяна, приставъёслэн асьсэлэн но властьсы пичи ӧвӧл. Куд-ог бадӟым ужъёсын гинэ соос арбитражной яке огъя судлэсь соглаш луэмзэс юало. Приставъёс-исполнительёс быдэсъяло судъёслэсь решениоссэс, шонергес вераса, соосты улонэ пыӵатыны луонлыкъёс кылдыто. Приставъёслэн ужзы, азьвыл судебной исполнительёслэн сямен ик, гражданской ужъёсын герӟаськемын. Нырысь ик, коньдонэз но ваньбурез киысь кие сётонэн, штраф тыронэн, тыриськоно адямиосты яке соослэсь коньдонзэс (банкысь счётъёссэс) но ваньбурзэс утчанэн, куд-ог дыръя таланэн но. Судлэн решениез - со ӝыны уж гинэ ай. Сое улонэ пыӵатон - тӥни мар берпуметӥез ужпум. Тужгес но кулэез но ӵем дыръя секытэз ужпум. Приставъёс туж матысь кусыпъёс возё милициен, налоговой органъёсын но банкъёсын. Ӵем дыръя соослы следователь но, сыщик но луыны кылдэ. - Азьвыл аръёсы судебной исполнительлэн ужез туж ик гажаноосыз пӧлын ӧз лыдъяськы. Бадӟым дышетскемез но, нимысьтыз быгатэмез но кулэ ӧз карылы, уждунэз но сыӵегес ик вал. Соин ик отын тросгес нылкышноос ужазы. Али югдур воштӥськиз-а? - Туж ик бадӟымесь воштӥськонъёс сярысь вераськыны вазьгес ай. Приставъёс луизы азьвыл исполнительёс ик. Зэм, соосты выль должносте юнматон вылысь, аттестация ортчытӥм. 104 пристав пӧлысь 6-ез гинэ воргорон. Ма, ми вуж ужасьёсмес выльёсыныз воштыны но ӧм тырше. Умоесь-а, уродэсь-а соос, но ужан опытсы вань ини угось, удысмес тодо. Вуоно арозь приставъёслэн лыдзы 200-озь вуоз. Кутом котыр ласянь эскерем адямиосты гинэ. Котьма шу но, приставъёс законлэн нимыныз ужало угось. Вылаз ик, пыӵал тӥрлык киязы... Жаляса верано луэ, ужасьёсмес бадӟым уждунэн шумпоттыны ум быгатӥське ай. Правительство умоесь окладъёс тупатӥз ке но, соосты тырыны бюджетысь коньдон тырмыт висъямын ӧвӧл. Соин ик приставлэн али уждунэз 500 манетлэсь уг ортчы. Зэм, приставъёслы луонлык сётэмын оклад вӧзы ватсаса пайда поттыны. Кызьы гожтэмын "Исполнительной уж сярысь" Законын, судлэсь косэмзэ (решенизэ) быдэстэм пристав берыктэм коньдонлэсь яке ваньбурлэн дунызлэсь 5 процентсэ басьтыны быгатэ. - Та вераськеммы сярысь гожтэмез лыдӟыса, куд-огез лыдӟисьёсмы, оло, мылкыд карозы приставе интыяськыны. Соин ик кӧня ке пыр-почгес вералэ вал приставлэн ужез сярысь. - Кызьы верай вал ини, судебной пристав судын порядокез эскере, уте. Номыр но, нокин но медам люкеты заседаниез нуыны. Валамон ини, залын луыны кулэ ӧвӧл ваче пумит вуон яке ог-огдэ ултӥян учыръёс. Веранэз ӧвӧл ни суд улэ кыскем адямиослэсь пегӟонзэс алон сярысь. Судебной приставъёс-исполнительёс тросгес ужано луо документъёсын. Соин ӵош ик соос эскеро судэн тыриськыны косэм адямиослэсь яке организациослэсь коньдонзэс (банкысь счётсэс) но ваньбурзэс. Кулэ дыръяз созэ но, тазэ но арестовать карыны, утён понна огдырлы басьтыны, таланы но вузаны. Озьы ик тыриськыны косэм адямиосты но соослэсь ваньбурзэс утчан сярысь ялыны. Тӥни сыӵегес ужъёс. Йылпумъяса тани мае пусйысал. Пристав луыны быгато шор ёзо образованиен, умой тазалыкен, 20 арессы тырмем но суд улэ шедьылымтэ гражданъёс. Г. ТИХОНОВ. Завод вузамын луоз Челябинскысь тракторъёсты поттӥсь завод банкротэн ялэмын. Туэ сӥзьыл со вузамын луоз, ивортэ "Урал-пресс" агентство. Арскын 3 сюрс трактор поттыны быгатӥсь завод 900 миллион манетэн вузамын луоз. Сое басьтыны мылкыд каро "Газпром" РАО, "ЕЭС Россия" РАО, акциосын "Транснефть" но "Лукойл" огазеяськонъёс, кунгож сьӧрысь предприятиос. "Дюкон" но "Химпром" Америкаысь "Дюпон" корпорация Чувашиын химической промышленностез азинтыны коньдон висъялоз, ивортэ "Бизнес-Среда" газет. Вазенгес "Дюпон" корпорация Чебоксарыысь "Хипром" предприятиын урод нымы-кибыосты быдтонъя препаратъёс гинэ поттыны малпа вал, нош али со республикаысь мукет предприятиосын эмъюмъёсты, анилиновой буёлъёсты поттонэз радъяны мылкыд каре. Корпорацилэн муртъёсыныз пумиськонэ пыриськиз Чувашилэн президентэз Николай Фёдоров, пусъе газет. Европаысь нюлэсъёс юрттэт куро Дуннеысь Инкуазез утёнъя фонд ивортэ, Европаысь 2 процентэз гинэ нюлэсъёс утисько шуыса. Кылемез тэльёс бырон калэ вуэмын, отысь пӧйшуръёс кадь ик. Фонд малпамъя, таӵе югдур кылдэмын, политикъёс, кивалтӥсьёс нюлэс хозяйствоез азинтыны но тэльёсты утьыны сюлмаськымтэен. Европаысь 15 кун пӧлысь нюлэсъёс сярысь ӟечгес сюлмасько Швейцариын, Финляндиын но Австриын. Шаерзылэн чеберез сярысь уг малпасько Даниын, Бельгиын но Испаниын. Со сяна, Инкуазез утёнъя фонд ялӥз, Германия амурской тигръёсты утёнэ 300 000 доллар ыстоз шуыса. Али та пӧйшуръёслэн лыдзы 435-400 йыр гинэ лыдъяське. Берло вакытэ тигръёс гурт пудоос но адямиос вылэ урдӥськыло. Талэн мугез адямиослэн векчи пӧйшуръёсты - тигрлэсь сиёнзэ - быдтэмзы бордын. Пӧсез пӧйшуръёс но уг чидало Индиын пӧсьлэсь сю кызьлэсь трос адями быриз ини, ивортэ "Рейтер" агентство. Тужгес пӧсь Раджастан штатын вал, татын термометр 52 градус возьматӥз. Улонысь ньыльдон тямыс адями кшкиз. Дхолпур городын улӥсьёс та нуналъёсы ураме ик ӧз поталэ. Нош зоопаркын ужасьёс пӧйшуръёсты сутӥсь шунды улэ кельтӥзы. Слонъёс, носорогъёс, антилопаос, куд-ог мукет пӧйшуръёс саюл инты шедьтӥллямтэ но быриллям. Ваньбур поттон удысысь Асьсэ кужымен Воткинскысь "Завод РТО" огазеяськон ачиз пуктӥз сприт поттон завод. Предприятиысь конструкторъёс ваньзэ асьсэос малпазы, кибашлыос оборудование лэсьтӥзы. Кызьы шуо, тӧдьы бумага бордысен кутскыса, спирт поттонэз йылаз-пумаз вуттӥзы. Али со АО-лэн цехез лыдъяське, нош азьланьын заводлы пӧрмоз. Матысь дыре татын 96,5 градусэн чылкыт спирт виятозы. Со тазалыкез утён удыслы но яралоз. Воткинскысь медикъёслы но со трос кулэ. Табере выль продукцилы сертификат басьтон кылиз на. - Спирт поттон технологимес Москваын утим, - валэктэ заводлэн директорез Вячеслав Мерешкин. - Производствоез радъянлы 7 миллион манет коньдон быдтӥм. Азьло тодматским Алнашысь но Балезиноысь лэсьтӥськись спиртзаовдъёсты. Азьланьын предприятие мукетъёслы но таӵе завод лэсьтыны кутскоз. Куронъёс вуо. Поттэм продукцимес нырысь ик сётом городысь тазалыкез утён удыслы, аракы поттӥсь заводлы, нош кылемзэ палэнэ келялом. Али 8 заказчикъёсмы вань ни. Заводамы 37 мурт ужа. Валтӥсь специалистъёс луо Сарапулысь сиён-юон промышленностья техникумез быдтэмъёс. Выль заводлэн пайдаез син азьын АО-лэн валтӥсь ёзэз со уг ке но луы, кылдытэмын ватсаса ужан интыос. Со сяна, туж бадӟым юрттэт луоз районысь музъем ужасьёслы. Чабеймы, йыдымы нянь пыжыны уг мыны бере, ю тысь спирт лэсьтыны яралоз. Кыкетӥ паларе завод умой-умой ужаны кутскоз, нуналлы быдэ одӥг декалитр спирт виятоз "Завод РТО" АО-лы кредит сётэ шаерысьтымы "СБС-АГРО" банк. Г. Васильев. "Ингурлы" - зарни диплом Пинал усточиослэн Ижысь школа-интернатысьтызы нылпиослэн "Ингур" капеллазы быдэс Россиез но, Удмуртиез но данъяз. Со нылпи хоръёслэн кунетӥ международной фестивалязы вормисе потӥз, зарни диплом но кубок басьтӥз. - Венгрие туж кышкаса мынӥм вал, - Правительствоын журналистъёсын пумиськоназы шуиз капеллалэн кивалтӥсез Валерий Митрофанов. - Нош бертӥм вормыса. Ми вить кылын кырӟам. Учкисьёс шуныт пумитазы. Чебер дӥсь вуриз "Удмуртбытсервис". Ветлыны юрттӥзы Правительство, му вӧй но газ поттӥсьёс. Соослы тау кариськом. Жаляса верано луэ, туннэ та усто коллективез шаерамы ичи тодо. Солы ӵемгес потано интыосы. Ижын 18 апреле отчёт концертэн, "Сосновый" профилакторие но "Металлург" санаторие ветлэмен буйгатскыны уг яра. Г. Васильев. КИНО БЕРЫТСКОЗ ГУРТЪЁСЫ Вавожысь культурая отдел алигес кибашлыослэсь ужъёссэс возьматон центр кылдытӥз. Со юрттыны кулэ вашкалаослэсь узыр быгатонлыксэс улӟытыны, солэн историеныз тодматыны, выставкаос радъяны. Озьы ик культурая отдел узырмиз на мукетыныз но. Ёросысь киносеть табере солэн ёзэтэз луиз. Тазьы валче ужан юрттыны кулэ гуртъёсын кино возьматонэз выльысь ӝутыны. Н. СЕМЕНОВ. ВАЛЕРИЙ МЕДВЕДЦЕВ БАДӞЫМ СПОРТЫСЬ ЧЫЛКАК УЗ КОШКЫ Валерий Медведцев ялӥз бадӟым спортысь кошкемез сярысь. Соин валче "Ижмаш" культура дворецын шуныт ӝыт радъямын вал. Дуннелэсь ньыль пол чемпионзэ, спортысь дано мастерез ӟечкыланы лыктӥзы матысь эшъёсыз, ӵыжы-выжыосыз, спортсменъёс. Ас вакытаз Валерий спортысь одӥгез яркыт кизили луиз. СССР-лэн огъя командаяз со 1985 арысен пыртэмын. Та дырысен Удмуртиысь биатлонист дано утиз солы оскем интызэ. Азьланьын Валерий спортысь чылкак кошкыны уг малпа. Пыр-поч басьтӥськоз со тренер уж борды. Кужымзэ мерталоз на, оло, куасэн бызьылонын. Э. ВАСИЛЬЕВА. "02" ивортэ Кылем толэзь ӵоже республикаямы 1890 йыруж лэсьтэмын. Соос пӧлын - 17 адями быдтон, 36-сэ секыт сӧсыртон, 14 эриктэман, 356 лушкаськон, адямиослэсь ваньбурзэс кужмысь талан, йыртэман но мукет. Сюрес вылын шудтэм учыре шедьыса, 13 мурт быриз, 182-ез сӧсырмизы. 251 пол тылпу потаз, 10 мурт бырыны шедиз, 23-ез сутскемъёсын больницаосы келямын вал. Толэзь ӵоже 2415 мурт вытрезвителе шедьылӥз. Кӧня ке пыр-почгес кылем шутэтскон нуналъёсы лэсьтэм йыружъёс сярысь: 29 мае 4 час котырын Центральной рынокын вузкарись "вушйылыкуз", 34 аресъем Сергей С. солэн нырулысьтыз 2,3 сюрс манетэн коньдон пуйызэ басьтыса кошкиз. ГАИ-ын ужасьёсын со ӝегатэмын вал. Бадӟым ыштон адӟиз Ува ёросысь Булай гуртысь "Дружба" СХТ. Уин тунгонъёссэ тӥяса поттэмын вал 4 фляга чечы, 9 мешок сахар, 60 кг сӥль но 111 кг ядохимикатъёс - ваньмыз 24 сюрс тыр. СХТ-ез чаклась ӧй вал. Балезиноын адясмиез виемез понна ӝегатэмын азьвыл суд азьын кыл кутылэм 21 аресъем Людмила Б. 30 мае 4 часын ӵукна Ижысь Степан Разин ульчаысь огаз корка пӧяса пыризы маскаен муртъёс. Пистолетэн кышкатыса, Т-лэсь талазы "Айва" музыкальной центрзэ, кык чассэ, 1 сюрс долларзэ но зарни арбериоссэ. ВАЗ-21093 машиназэ ульчае чаклатэк кельтэмез сярысь туж жаляз берло К-ов. Машинаысьтыз 4,9 сюрс доллар, паспорт но водительлэн удостоверениез ышизы. Игра ёросысь Зураысь 32 аресъем Галина картэзлэн вожамезлы чидатэк, соизлэн кӧтаз пуртэн бышкалтэ. Картэз больницае келямын. Зӥбломоз меда вожанэз табере Владимирлэн? Ӝыт 31 мае Ижысь Молодёжной ульчаын чаклатэк кельтэм "Газель" машинаысь лушкамын.... томатной соусэн коробка. "Соусэз яратӥсь" 26 аресъем Алексей ӝегатэмын. Ижевск-Нылга сюрес вылтӥ ВАЗ-2103 машинаеныз мыныкуз Леонид К. пумит полосае потэ но ваче шуккиське ВАЗ-21043-эн. Кыкез но водительёс бырыны шедизы. Леонидлэн 8 аресъем нылыз но 10 аресъем пиез шуккиськизы, больницае келямын. Кызьы уд пусйы 60 аресэз Анатолий Андреевич Митрофановез тодматэк но тодмалод. Шорад вазиз ке бозгес чебер куараеныз, соку ик шуод: сое ӵем кылӥськом Удмурт радио пыр. Зэм, литературно- драматической редакцилэн ужаз со кемалась дырысен мылысь-кыдысь пыриське. Нош ӝытъёсы та агай котыртэмын луэ "Ижмаш" дворецысь калык театрлэн репетицияз ветлӥсь нылъёсын но пиосын. 70-тӥ аръёсы кутскыса, кӧня спектакльёс пуктӥзы ни соос ӵош. Режиссёр берло аръёссэ директор но луэ: кивалтэ Удмурт кун национальной театрен... Огъя вераса, таӵе быгатӥсь адямилэсь ӟеч ужъёссэ вераса уд быдты. Юнме шорысь ӧвӧл, дыр, сётэмын Анатолий Андреевичлы К. Герд нимо национальной премия, Россия Федерациысь культура удысын сӥё-дано ужась, Удмурт Элькунысь искусство удысын дано ужась нимъёс. Нош тани Анатолий Митрофановлы тырме 60 арес. Соин валче 10 июне "Ижмаш" культура дворецын луоз юбилярез ӟечкылан ӝыт. Солэн кивалтоно коллективез возьматоз "Дыдыкъёс" спектакльзэ. Ӝыт кутскоз 18 часэ. Т. Николаева. Ми доры лыктозы куноос... Кырӟанысь та чуръёс ӵапак тупало Вавож ёросын ортчытоно ужрадлы. Отын 13 июне Куӟебай Гердлэн вордскемез дырысен 100 ар тырмонлы сӥзем праздник ортчоз. Та нуналэ ик луоз "Чебер" шулдыръяськон но. Вавожъёс трос куноосты витё. Лыктозы республикамылэн кивалтӥсьёсыз, писательёс, артистъёс, вань районъёсысь делегациос, вуозы калык творчествоя но финн-угор калыкъёслэн ВИИ фестивальёсазы ветлэмъёс. Ёросын та ужрадлы дасяськон кемалась мынэ ни. Ми кылем арня пумын вуылӥм Гурезь- Пудга гуртэ. Отысь школаын дышетскиз вал Куӟебай Герд. Одӥгаз юртаз усьтӥськыны кулэ музей. Сое дасяны коньдон кемалась висъямын ни. Но дыр ӝог ортче. Музеез дасян борды басьтӥськизы Вавожысь лэсьтӥськисьёс. Но соос малы ке ӝегаса ужало. Куд-ог вераськонъёсъя висъям коньдонлэн кӧня ке люкетэз мукет интые но тӧлӟем. Собере ёросысь кивалтӥсьёс но та уж шоры чиньы пыртӥзыгес учко, шӧдске, сюлмаськемзы сокем уг шӧдӥськы. Нырысетӥ июньлы музейлэн юртэз дась луыны кулэ вал ини. Ӧйтӧд, вуттозы меда 13-тӥ июнёзь но? Бадӟым тау карыны кулэ школалэн директорезлы Анатолий Егоровлы. Вань ужъёсты со ас вылаз басьтӥз. Статусэзъя музей национальной луыны кулэ. Экспозициосты дасян бордын ужало национальной музейысь специалистъёс. Кысык вакыт али школаосын. Кутскизы экзаменъёс. 11 классэз туэ йылпумъя 8 мурт, 9- тӥез - 30 ныл но пи. Соос пӧлысь тросэз мылкыд каро сельхозакадемие пырыны, кыкез пиос дасясько офицер луыны. Озьы ик егитъёс документъёссэс сётозы техникумъёсы, колледжъёсы, училищеосы. Вукогурт доры пуктӥзы вал стелла. Но со озьы ик кылиз. Уд вала - оло со кыӵе ке вырйыл, оло дано пус? Праздник матэктэ. Оскем потэ, вавожъёс куноос азьын ӵыжектоно уз луэ шуыса. Н.БАЙТЕРЯКОВ. 1. Школалэн кузёез Анатолий Егоров. 2. Таӵе луоз Куӟебай Гердлэн музеез. 3. Шедёз- а шудо билет? В.КАМАШЕВЛЭН туспуктэмъёсыз. МОТООС НО ТАКАОС Можга районысь "Россия" колхоз сярысь кылылымтэ адями ӧвӧл, дыр. Быгато отысь адямиос ӟеч ужаны но, пайдаё шутэтскыны но. Ми кӧня ке юанъёсын вазиськылӥм хозяйстволэн председателезлы Аркадий Вершининлы. Кузёлэн верамезъя, али тросгес саклык висъяське пудоосты утялтонлы. Соосты али лагерьёсы потто. Колхоз нуналаз 15 тонна йӧл вуза. Котькуд скаллэсь со шорлыдын 11 кило пала люкаське. Озьы ик мынэ бусыосы кыед поттон, кыдёкысь гуртъёсы газ кыскон, сюресъёсты лэсьтон,аран машинаосты тупатъян. "Дасяськом дӧдьыосмес но",- пусйиз на Аркадий Николаевич. "Россия" колхоз арлы быдэ ортчытъя мотоциклэн ворттылонъя ӵошатсконъёс. Туэ соосты ортчытыны чакламын 13-тӥ инвожое. Нош вормисьёсты витё такаос. Н. ЕФРЕМОВ. Коньдон дунне МАНЕТЛЭН БЫРОНЭЗ СЯРЫСЬ ВЕРАСЬКОНЪЁС ТРОСЛЫ ПӦРЪЯМЫН Сергей Кириенколэн Правительствоен кивалтыны кутскемез дырысен уг чалмо Россиысь экономикалэн выльысь улӟыны луонтэм куашканэз сярысь вераськонъёс. Соин валче нуналысь нуналэ вӧлмо манетлэн туннэ-ӵуказе ӝоканэз сярысь, яке, экономистъёслэн верамзыя, девальвация сярысь. Оло, зэмзэ но, таӵе чер вите асьмеды матысь дыре? Шонерзэ вераса, огшоры калык со сярысь уг но малпаськы, данакез уг но тоды, мар со сыӵе девальвация но кызьы, кудпала воштыны со быгатоз улонэз. Дунъёслэсь будэмзэс грамотной кылын инфляция шуо, чутрак, кутыны луонтэм будэмзэс - гиперинфляция. Девальвация - соиз коньдонлэн дунтэмамез, пумозяз ке - воксё огшоры бумагалы пӧрмемез. Валамон ини, гиперинфляция но девальвация - со, кызьы ӟучъёс шуо, одӥг медальлэн кык палыз. Та кык "сузэръёс" государствое вуо ке, уксёен номыр но вузаны но, басьтыны но уг луы ни, экономика куашка, калык мурт странаослэн экономической зӥбетсы улэ шеде. Таин валче тодэ лыктэ ог куинь ар талэсь азьло кылэм вераськон. Гуртысь воргоронъёс куспазы бӧтьырто дунъёслэн будэмзы сярысь. Одӥгез пӧсекъя бензопилалы цепь туж дуно луэм пумысен. Мукетыз философ музэн пумитаз гань-гань вазе: - Ойдо, котькызьы мед шудозы со дунъёсын. Всё одно крестьян калыклы йыбырттозы, нянь курыса. Ми городъёстэк улом, нош соос гурттэк сютэм бырозы. Тани бакча возиськом, пудо вордӥськом, аракы пӧзьтӥськом. Сиён асьмелы но тырмоз, город вузъёсын но воштыны шедёз. Городъёс быризы ке, дӥсьлы етӥн кизём, вукоосмес, кебитъёсмес улӟытом, валъёсмес йылэтом. Уломы ай каллен, ум быре. Мӧйы ке но ини воргорон, мур малпаськытэк, капчи визьмын вераське. Зэм, гиперинфляция но девальвация огшоры калыкез шымыртоз ке но, соку ик воксё уз пачкаты. Адямиос азьвыл люкам ваньбуренызы но кӧня ке улозы. Нош отӥяз кызьы? Нокыӵе запас но пумтэм ӧвӧл ук. Воргорон, пичи мурт кадь, оске бакчаезлы, пудоезлы, кебитлы, вуколы но мукетызлы. Мукет сямен вераса, вашкала улон амалъёслы. Ӧйтӧд, тросэз-а меда быгатозы кемалась ортчемаз берытскыны, вунэм амалъёсын, сямъёсын улыны. Шуг оскыны, туж шуг. Ярам, со воргорон умой-а, урод-а, но быгатоз ик улон радэ кыльыны. Но кемалы-а? Со кыӵе ке сузёнтэм шормуӵын уг улы ук, калык пӧлын ик. Озьыен, сое нокин но уз утьы сютэм но гольык кылем городъёслэсь но, аслаз бускельёсызлэсь но. Тӥни кытчы вуттоз девальвация. Та экономической нимкыллэн шимес пуштросэз. Мукетыз ужпум - вань-а солэн али асьмелы зэмос кышкытлыкез, кызьы курдато калыкез пӧртэм "тодосчиос". Зэмос экономистъёс но финансистъёс оскыто, девальвация уз луы, луыны ик уз быгаты шуыса. Тани Центробанклэн кивалтӥсез С. Дубинин но Правительстволэн тӧроез С. Кириенко озьы ик оскыто. Одно ик шонертыны кулэ: соослэн оскытэмзы идеологилы (со ӧвӧл ни) дурбасьтон, яке асьсэды чеберен возьматыны турттон ӧвӧл. Огъя экономикаын но коньдон удысын (сюбеггес учконо ке) берло аръёсы кылдэм югдур возьматэ, девальвация уз луы шуыса. Марысь мар ке, государстволэн та нуналлы тырмыт валютаез но, зарни запасэз но. Кызьы шуиз С. Дубинин ик, 14 миллиард доллар. Нош тани кыӵе малпанъёссэ та пумысен вера Удмуртиысь Национальной Банкысь экономической анализъя отделлэн кивалтӥсез Сергей Дерюгин: - Экономикаез но коньдон удысэз "серметын" возён понна, одно ик зарни запасэз кутыны воксё кулэез ӧвӧл. Ма, валютаез но туж бадӟым шуг-секыт дыръя гинэ государство уже кутэ ук. Нош али сотэк но амалъёс тырмыт. Тани басьтом со ГКО-осты ик. Ма, ӧжыт шат асьмелэн мукетъёсыз но уже кутымтэ ваньбурмы. Малпаськыса, котыр ласянь чакласа-мертаса соин кузёяськид ке, нокыӵе гиперинфляция но, девальвация но кышкыт уз луы. Зэмзэ верано ке, мон малпамъя, таӵе кышкытлык сярысь вераськонъёс юнме супыльтон гинэ. Веранэз ӧвӧл, Сергей Викторович аслаз удысаз берпуметӥез специалист ӧвӧл, дыр. Но мон соглаш ӧвӧл солэн девальвация сярысь вераськонъёслы сыӵе дунъетэныз. Соос супыльтон ке но, юнме шорысь ӧвӧл. Та супыльтон С. Кириенколы но солэн Правительствоезлы пумит мынӥсьёслэн политиказылэн одӥгез ёзэз луэ. Финансовой олигархъёс туала правительстволы пумит нюръяськемзэс туж ик ватыны уг но тыршо. Соослы кулэ власть. Власть сётэ узырлык понна нюръяськыны луонлык. Нош сыӵе нюръяськонын олигархъёс нокыӵе амалъёслэсь но уг юрдо. Калыкез девальвациен кышкатон - сыӵеосыз пӧлысь. Г. КОРЯКОВ. Удмурт фольклористлэн, этнографлэн, Иоанн Васильевлэн вордӥськем дырысен - 140 ар Лул-сюлэмъёсты югдытӥсь Калыкез югдытӥсьёс пӧлысь троссэ тодӥськом ини. Соос - Григорий Верещагин, Иван Михеев, Иван Яковлев, мукетъёсыз. Трос гинэ туспуктэмъёссы но шедьтэмын. Нош Иоанн Васильевич Васильевлэн улэмез, ужамез сярысь тодӥсьёс ӧжытгес. Та дырозь ӟеч-ӟеч тодмо ӧвӧл на солэн кулэм арез но (адямиослэн верамзыя гинэ). Иоанн Васильевлэсь тусбуйзэ но кема тодытэк улӥм. Нош одӥг учыр юрттӥз. Михаил Атаманов диаконлы, кылтодон наукаосъя докторлы кӧтӝожме огпол верай: "Туж кемалась утчасько ни Иоанн Васильевлэсь туспуктэмзэ. Нокызьы но уг шедьтӥськы. "Писатели Удмуртии" справочникын но, 1989-тӥ арын печатламаз, тусбуезтэк потӥз". - Мынам вань: черке ветлӥсьёсмы алигес ваизы, - шуиз со ӟеч мылкыдын. Валамон ини: туж бадӟым шумпотон вал со мон понна. Фольклорист но этнограф Иоанн Васильевич Васильев Пичи Пурга, Юськи, Бран черкогуртъёсын дышетӥсь но священник, собере - Сарапул уездын окружной миссионер луыса ужамын, нош берло аръёссэ Шарканын удмурт нылкышно монастырен кивалтэ. Иоанн Васильевич Васильев вордӥськемын Казань губерниысь Мамадыш уездысь Вуж Юмья гуртын. Атаез Казане улыны кошкемен но семьязэ отчы нуэмен валче солы крещённо- татарской школаын Н. И. Ильминскийлэн кивалтэмез улсын дышетскыны шуд усиз. Та школаез пырпотыса, 1874-тӥ арын пыре учительской инородческой семинарие но 1878-тӥ арын сое йылпумъя. Со дырысен калыкез югдытон ужын вис карытэк тырше. Юськи черкогуртын Николай Ивановен (Мункачилы удмурт калык кылосэз люканы юрттӥсен) ӵош ужан дыръяз, соос доры 1887-тӥ арын вуылэ Россилэн столицаысьтыз тодмо этнограф Пётр Богаевский. 1888-тӥ арын поттэм статьяяз ӟуч тодосчи вылӥ дунъя та югдытӥсьёслэсь ужзэс (Иоанн Васильев священник вал, Николай Иванов - дышетӥсь), вера удмуртъёслэн соосты мур гажамзы сярысь. Та ужаз Богаевский пыртэм удмурт куриськонъёсты но кырӟанъёсты. Соосты ӟуч кылэ паймымон усто берыктӥллям Иоанн Васильев но Николай Иванов. Иоанн Васильев трос кужымзэ но дырзэ сётэ, ас фольклорзэ но этнографизэ тодон понна. Тужгес но - калыкмы вылэ юнме узатэм Мултан уж бере. Уката ик тодмо луиз солэн "Обозрение языческих обрядов, суеверий и верований вотяков Казанской и Вятской губернии" ужез. Та гожтэмез немец кылын Хельсинки городын азьвылгес, 1902- тӥ арын, потыны вуиз, нош ӟуч кылын печатламын вал Казаньын 1906-тӥ арын гинэ. Та ужез нимысьтыз ик висъяське калыклэн улон-вылон сямъёсыз шоры лэчыт но шонер синмын учкеменыз, соосты уно аръёс ӵоже эскеременыз. Иоанн Васильев, ас ужзэ мур тодӥсь адями, удмуртъёс но соослэн лулчеберлыксы сярысь янгыш малпанъёслы пумит султэ. Книгаяз пыртэ удмурт фольклорысь тужгес но аспӧртэмлыко произведениосты. Юнме шорысь уг вера со азькылаз, та ужез священникъёслы сӥземын шуыса. Угось со аръёсы черкысь тросэз ужасьёс удмуртъёсты ултӥяса гожъязы. Иоанн Васильевлэн ужез вылӥ дунъямын вал. Даурлэн кутсконаз ик со трос лыдӟисьсэ шедьтӥз кунгож сьӧрын. Удмурт калыкез социально-исторической, художественно-философской амалъёс пыр ӟеч возьматыны быгатӥз. Удмурт кылын духовной литература тырмытгес луэмен валче, ХХ-тӥ даурлэн кутсконаз вордскем кылыныз службаос нуыны луонлык кылдӥз. Россиысь зӥбем калыкъёс сайкан вакытэ Вяткаысь инородческой миссионерской курсъёсын черк хоръёсын кырӟаны дышетскись нылъёс Павел Глезденёв но Иоанн Васильев священникъёслэн кивалтэмзы улсын арлы быдэ ортчытъязы удмурт кылын миссионерской экскурсиос. Гурт калыклы валамон вордскем кылыныз лыдӟылӥзы проповедьёс, сюлмазы пыӵамон кырӟаллязы молитваос. 1910-тӥ арын сюрессы таӵе вал: Кез-Дэбес-Шаркан- Сосновка-Якшур-Бодья (200 иськемлэсь уно). Та палан улӥсь удмуртъёс ноку но ӧз но адӟылэ, ӧз но кылылэ вал вордскем кылынызы таӵе чебер, сюлэме пыӵамон духовной кырӟанъёсты, проповедьёсты. Соин ик соослэн котькуд пумиськонзы вунонтэм кылылӥз. Со сярысь ивортэмын вал "Вятские епархиальные ведомости" газетын 1911-тӥ арын 3-тӥ мартэ: "...Службае люкаськиз трос адями. Уката ик уно вал нылкышноос. Экскурсантъёс, татысь калыклэсь мылкыдзэ тодыса, вань сюлэмзэс сётыса, быгатонзэс возьматӥзы. Чылкыт, чебер, дыртӥсьтэм куараен молитваез чирдон но кырӟаны кутскон кылзӥсьёсты соку ик чал-чал кариз. Удмурт кырӟан но ектения (кема нёжтыса кырӟан-куриськон) ваньмызлы валамон кариз молитваез, ӟечкыланэз, тау каронэз. Ваньмыз пӧрмиз паймымон, муспотымон. Чебер гужем ӝыт, шулдыр, сӥё-дано кырӟан, паймымон уж лэсьтӥсь вылӥ вордскем кылъёс синтэм удмурт кышнолы но валамон вал. Ваньмыз со котькудӥзлэн пушказ мур пыӵаз. Люкаськем калык пӧлын тросэз кымин уськытӥськылӥзы, кудӥзлэн бамъёсыз синвуэн котмылэмын вал, кудӥзлэн ымныраз молитва чирдэм куаралэсь но кырӟанлэсь данъяськон пиштӥз... - Кыӵе паймымон, чебер тынад вераськемед, туж мыло-кыдо ветлысалмы службаяд, кытын тон улӥськод? - вазиськиз одӥг удмурт кышномурт Л. (Ляльшур гуртын), отец Иоанн вераськон дыръя. Экскурсия сярысь тазьы вера Мари нимын гожъясь (Павел Глезденёв, пор югдытӥсь. Ӟеч тодэ вал удмурт кылэз но. Удмуртъёс понна грамматика но кылдытӥз. Поръёс но удмуртъёс пӧлын миссионер луыса ужаз). Иоанн Васильевич Васильев вань улытозяз тыршиз этнографияя ужъёс гожъян бордын. Соосты печатлаз "Вятские епархиальные ведомости" журналын но "Известия общества изучения Прикамского края" нимо сборникын. Татчы пыризы "Понятие о вотских мыжах", "О значении вотских слов Од и Уд, Орт и Урт и происхождение слов удмурт и вотяк", "Языческие имена вотяков", "Мистерия вотяков" но мукет статьяосыз. Иоанн Васильевлэсь ужъёссэ кемалась ни вылӥ дунъязы кунгож сьӧрын но. Туала дыре но сое гажаса верало тодмо мадьяр тодосчи Петер Домокош но мукетъёсыз. Анатолий Уваров. Иоанн Васильев. Солэсь священникын но миссионерын куамын ар ӵоже ужамзэ сӥлы карыса, 1915-тӥ ар котырын удмурт но ӟуч кылын листок поттэмын вал. Удмуртиысь метеорологилы - 100 УСЁЗ-А ГУЖЕМ ЛЫМЫ? Куазьлэн ӵуказе кыӵе луонэныз тунсыкъяськисьтэмъёсыз ӧвӧл, дыр. Сое чаклатэк, адямиос выль уж борды но уз басьтӥське, сюрес вылэ но уз потэ. Нош сюресчиосты, аэрофлотын ужасьёсты куазь воксё ляльчиын возе. Но инкуазез чакласьёслы котьку оскыны уг луы: туннэ пильмаськоз-зороз шуо - одӥг шапык но уг усьы, шулдыр луоз шуо - жаль! кисьтэ. Туэ тани куазьмы 1979-тӥлы туж тупа шуизы, шимес тудвуэн кышкатӥзы, но ваньмыз огсыр ортчиз кадь. Ваньзэс паймытӥз апреле Москваын луэм учыр. Азьвыл та вакытэ шуръёс ӧръясько ни ке вал, толэзь ӵоже люкаськымон лымы кык нуналскын усиз. Валамон, город солы дась ӧй вал. Мэр Лужков лекъяськиз, нимаз метеослужба кылдыто шуыса кышкатӥз, Гидрометеоцентр шыпыт улӥз. Но ма карод: куазьлэн но, асьмелэн сямен ик, мылкыдыз ӵем вошъяське. х х х Туэ Удмуртиысь Гидрометеоцентрлэн ужамезлы 100 ар тырме. 1898-тӥ арын Ижын пичигес гинэ метеорологической площадка лэсьтэмын вал. Бӧрысьгес - Глазовын, Можгаын, Селтаын, Уваын, Вавожын... Берло дыре пичи станциосты коньдон тырмымтэен ворсаллязы. Кельтӥзы Глазовысь, Можгаысь но Селталась гинэ. Селталась метеостанциын 25 ар ӵоже тырше ини Павел Петрович Мелендин. Москваысь метеорологической колледжез йылпумъяса, со татчы лыктӥз. Кема аръёс ӵоже усто ужамез понна сётэмын "СССР-ысь гидрометслужбалэн отличникез" дано ним. Али Павел Петрович татысь метеостанциен кивалтэ. Селтала ветлыкумы, ми солэн ужан интыяз вуылӥмы. - Павел Петрович, республикаямы райцентръёсысь метеостанциосты (пунктъёсты) быдтӥзы. Кызьы тӥледлы туннэ нуналозь ужаны шуд усе на? - Милям ёросмы Удмуртилэн ӵап шунды пуксён палаз интыяськемын. Инкуазез эскеронын одно чакланы кулэ котькуд полюс котырысь вошъяськонъёсты. Тани Глазовын но Селталан куазь воксё пӧртэм луэ. Ма, одӥг ёросын но огаз гуртын зоре, мукетаз - уг. Собере, Селта вадьсытӥ Кирове но Санкт-Петербурге самолётъёс лобо. - Калык тӥледды ӵем тышкаське шонертэм прогноз сётэмды понна. Кызьы сое валэктысалды? - Зэм, куддыр шонер тышкасько. Милемлы "алдаськеммы" асьмелы но умой уг поты. Но инкуазьлэсь кыӵе луонзэ быдэсак тодыны шуг - 12 процент пала янгышаны луэ. Со сяна, гуртъёс кудӥз вырйылын, кудӥз улыгын сыло. Улыгаз салкымгес но луэ, мускыт но кемагес улэ. Нош давление вырйылын улынгес луэ. Котьку ик шонер тодӥськом музъем кынтэмез. - Тӥляд метеостанциды 1935 арысен ужа ни. Шӧдскымон-а воштӥськиз ужды со дырысен? - Бен, али каньыл луиз. Эскерон арбериосмы али номыр ик ӧвӧл. Радиолокаторъёсъя тодӥськом, кыӵе тӧл луоз. Котырак 200 иськемысь пилемъёслэсь ӝуждалазэс, гудыръяса зоронэз дистанционной приборъёс возьмато. Вань чакламъёсмес телетайп пыр Нижний Новгородэ келяськом. Отчы люкасько быдэс Волго-Вятской улосвылысь эскеронъёс. Компьютер куазья географической суред лэсьтэ, час улыса, со ивор Иже вуэ. Азьло чакламъёсмес телеграф пыр келяськом вал, соин сэрег прогнозын трос янгышъёс луылӥзы. Ужаськом ми куинь часъя: огез час возьматэ Гринвичъя дырез, мукетыз - Москваез, куинетӥез - интыысь. Чакламъёсмес Гринвичъя лэсьтӥськом (суткаяз 8 пол, котькуд 3 час ортчем бере). Соин ик, уйшор-а, ӵук-а, ӟырт кезьыт-а, жаль зоре-а - кырын сылӥсь приборъёс доры потоно. Музъемлэсь кынмемзэ, лымылэсь кӧня усемзэ эскериськом 3-5 иськемын бусыын но. Отчы куасэн ветлӥськом. Огпол мынӥсько малпаськыса, котыр юг-юг лымы чиля, шыпыт. Азям шуак туррак! луиз, ымнырам кин ке юри лымы пазьгиз кадь. Куалектӥ. Кыр сяла лымы улысь озьы лобӟыса потэ вылэм. - Тӥледлы уксё государство висъя. Ёрмыса уд улӥське, дыр? Озьы ке но, мар кулэ службалы, ужзэ умоятон понна? - Уждунмы туж пичи ке но, дыраз басьтылӥмы ай. Центрын (Ижын) милемды пыкылэмзы потэ ни - асьтэос, пе, коньдон поттэ. Но кызьы? Колхозъёслэн, ёрос газетлэн милесьтым иворъёсмес басьтыны уксёзы ӧвӧл. Али ӵемгес калык чакланъёсъя уло ни. Ум быгатӥське ужасьёсмес дышетыны, азьвыл тодон-валанзэс будэтыны Ростове, Москвае ысъяло вал. - Нош асьтэос оскиськоды-а калык чакланъёслы? Тупало-а соос приборъёстылэн возьматэм лыдпусъёссылы? - Пудо уллёын нырысь сьӧд скал мынэ ке, зороз шуэмъёслы - уг. Нош вань аръёсын эскерем чакланъёс: толэзь котыртӥ круг ке кылдэ - зороз, лымыялоз, тӧл шунды ӝужан палась пилемъёсты ке вае - трос лымы усёз... Кызьпу куаръяське - картошка мерттоно, палэзьпу сяськаяське - гужем вуэ. - Асьтэлэсь чакламъёстэс гожъяса уд кельтӥське-а? - Куинь ар талэсь азьвыл "Уральские нивы" журналын печатласьки. Гожъяй Толэзьлэн циклъёсызлэн куазь, адями вылын кызьы шӧдӥськемзы сярысь. Тани выль толэзь дыръя куазь укыр ӵем вошъяське, нош тыр толэзь дыръя (куазьлэн котькыӵе дырыз умой шуо ке но), адями ӝог жаде, керӟегъяськись луэ, мылкыдыз усе. - Туэ гужем кыӵегес куазь луоз? - Инвожое котькыӵе луыны быгатоз: шулдыр но, зоро но. Нош 1979-тӥ аръя ке чаклано, лымы но усёз. Июль - шулдыр, пӧсь. Бакча возисьёс куазез медаз тышкаське бер мерттӥськемысьтызы. Макем кема сюйын мускыт улэ, сокем ӟеч будосъёслы. Емышты одно ик дыраз кисьмалоз. З. РЯБИНИНА. Правительствоын Учкемын инъетъёс Удмурт Правительстволэн Президиумезлэн ужан арняез кутскиз законъёслы уно инъетъёсты учкон бордысен. Кылсярысь, эскеремын адямиосты гожтонъя ас коже кивалтон ёзъёслы полномочиос сётон, Удмурт Республикалэн Конституцияз ватсанъёсъя ӵектонъёсты пыртон рад, республикаямы асваньбурез вузанъя законэ воштонъёс пыртон но мукет ужпумъёс. Вылӥ верам законопроектъёсы ватсанъёс пыртэм бере, соосты эшшо шара учкозы на Правительстволэн кенешаз. "Улон инты" программа Шаерысьтымы Архитектурая но лэсьтӥськонъя кун комитет "Улон инты" кун программалы инъет дасяз. Со 2005 арозь чакламын. Госстройлэн тӧроезлэн верамезъя, республикаямы али 72 сюрс семья улон условиоссэ умоятыны возьма, соос лыдэ басьтэмын. Та программа быдэсмиз ке, 52 сюрсэз улон интызэс умоятозы. Со понна, туэ арысен кутскыса, 3,23 миллион квадратной метр квартира ӝутоно яке арлы быдэ - 404 сюрс. Та ужлы кулэ луоз 9 миллиард манет коньдон. Данакез, 95 процентэз, висъямын луоз бюджетэ пырисьтэм фондъёсысь, со пӧлысь 21 процентсэ калык сётоз. Бюджетысь висъям уксё кӧняез ке берыктэмын луоз, нош 12,5 процентэз кылёз. Жилищно-коммунальной хозяйствоез изъянтэк ужанэ выжтэмен валче, программаын нимаз инты висъямын куанер улӥсьёсты утёнлы. Документ эскеремын луоз на Кун Кенешлэн сессияз. Кышкыт югдур ялэмын Правительстволэн Президиумез кутӥз "Удмурт Республикаын кивалтӥсьёсъя реестр сярысь" постановление но учкиз "Сэмсон Интернэшнл, Лтд" компаниен шаерамы музъем узырлыкъёсты кутонъя тупанкыл гожтонэз умоен лыдъянтэм сярысь ужпумез. Туэ 1 июньысен республикаямы ялэмын тылпуосъя кышкыт югдур. Постановление печатламын луоз. Республикаямы поттэм аракы ӟенеликын пусэз (маркаез) ӧвӧл ке, сое вузаны уз лэзе. Водкая со кужыме пыроз 1 августысен, нош 1 декабрьысен - виная, коньякъя но мукет винаосъя. Огъя вераса, Удмуртиын вузаськись вань аракылэн луыны кулэ ӟечлыкезъя пусэз. Кылдытэмын выль комитет Удмурт Республикаысь Правительство туэ 18 мае 379 номеро постановление кутӥз. Соя кылдытэмын Тарифъёсъя но дунъёсъя выль комитет. Отын 7 мурт ужалоз. Та нуналэ но комитетлы тӧро юнматэмын Олег Михайлович Белобоков. Али со Асваньбуръя кун комитетлэн кивалтӥсезлэн воштӥсез вал. Ас мылкыд каремезъя Калыкез дышетонъя министр Владимир Устинович Пушкин ужысь мозмытэмын. Соя Правительство туэ 27 мае нимысьтыз распоряжение кутӥз. Нырысь ик - дышетӥсьёслы Правительстволэн Тӧроез ивортӥз, туэ 29 майысен кык арнялы бюджет удысъёслы коньдон висъян дугдытэмын. Кун бюджетэ вуэм вань уксё мыноз калыкез дышетон удыслы. Со сярысь ивортэмын интыысь администрациослы, но Павел Вершинин соку ватсаз, интыосын кутэм тупанкылъёсъя, Правительство бюджет удысъёслы уждун тыронъя сётэм кылзэ быдэсъялоз. Озьы ик ужаны кулэ интыос но. Правительстволэн Тӧроез вераз коньдонэз шыръяса кутон сярысь. Али куд-ог ёзъёс, пе, мултэс ужасьёс возё ни. Нош соос кун служащийёс уг луо, уждун бюджетысь басьто ке но. Учкемын тупанкыл Правительствоын 29 мае ортчиз городъёсысь но районъёсысь администрациослэн кивалтӥсьёсынызы кенешон. Отын валтӥсь ужпум вал Правительство но интыысь ёзъёс куспын бюджетъёсъя ужанын тупанкыллы инъетэз учкон. Со герӟаськемын Россилэн Президентэзлэсь "Кун коньдонэн ужанэз умоятон но бюджет удысын тыршисьёслы уждун сётонъя ватсаса ужрадъёс кутон сярысь" 495 номеро Указзэ быдэсъянэн. Кенешын коньдонъя министр Владимир Бельтюков пусйиз администрациослэн дыраз уждун сётон но бюджетъёсазы уксё пыртон сярысь тырмыт сюлмаськымтэзэс. Россиысь Центробанклэн рефинансированиея ставказэ будэтэмез бере кыӵе ужрадъёс кутэмзы сярысь вераз Павел Вершинин. Кенешонъёс ортчытэмын Национальной банклэн но Казначействолэн, бадӟымесь промышленной предприятиослэн кивалтӥсьёсынызы но юристъёсын. Ведь туэ Правительство бурд улаз басьтӥз вал данак предприятиослэсь кредитсэс. Со кун бюджетэз быдэстонъя ватсаса шуг-секытъёс кылдытэ. Озьы ке но, Президентлэсь Указзэ улонэ пыӵатыса, Правительство но интыысь быдэсъясь органъёс ваньзэ лэсьтозы, одӥг семьялэн но бюджетэз медаз уродмы шуыса. Та понна ик сыӵе тупанкыл кутӥське, со 15 июнёзь гожтэмын луоз. Эскеремын мукет ужпумъёс но. Быръёнъёслы дасяськонлэн, бусы ужасьёслэн мынэмзы но тылпуосъя югдур сярысь ивортонъёс лэсьтӥз Быръёнъёсъя комиссилэн кивалтӥсез Афанасий Тубылов, Правительстволэн Тӧроезлэн воштӥсез Владимир Зенин но МВД-ысь Тылпуосъя управленилэн кивалтӥсез Михаил Камалетдинов. Кенеше пыриськиз Кун Кенешлэн Тӧроез Александр Волков. Удмурт Республикаысь Правительстволэн Тӧроезлэн секретариатысьтыз пресс-центр. Вакчияк Чаклаське: лемтэй! Майлэсь шулдыр кутсконзэ ӧжытак сӧризы кадь лемтэйёс. Праздник нуналъёсы республикаысьтымы лабораториосы 1800 мурт вазиськиз. Азьло аръёсын ӵошатыса, со шӧдскымон тросгес. Санэпидстанциысь ужасьёс али кутскизы ни нюлэсъёсы, шутэтскон интыосы нимысьтыз препорат пазяны. Та ужрадлэн пайдаез шӧдӥськыны кулэ. Кылем арын лемтэйёс пумысен сыӵе вазиськонъёс ӧй вал. Туэ ужпум пыкиське коньдон борды. Правительство 50 миллион манет висъяз ни, но кулэезлэсь со ог витьтон люкетэз гинэ ай. Пока Вершинин лемтэйёслы пумит нюръяськонэз ӝегатскытэк быдэстоно ужпумен лыдъяз но санэпедстанциын ужасьёслы юрттыны мылкыд каремзэ вераз. И. Петров. ШУДОНЪЁСЛЫ ДАСЯСЬКО Гурт спортсменъёслэн гужем шудонъёссы туэ Красногорское черкогуртын ортчозы. Кыдёкысь уй пал райцентрын та нуналъёслы ӟырдыт дасясько ни. Урамъёсты асфальт шобретэн вольытато. Ӝоген йылпумъялозы школа но стадион котырын лэсьтӥськон ужъёсты. Районын ортчем субботникез но шудонъёслы дасяськон ужрадъёс пӧлы пыртыны луоз. Черкогурт син шорын чеберске. В. ЧУВАШОВА. ПРАВИТЕЛЬСТВО УДМУРТСКОЙ РЕСПУБЛИКИ ПРИГЛАШЕНИЕ К УЧАСТИЮ В ПРЕДВАРИТЕЛЬНОМ КВАЛИФИКАЦИОННОМ ОТБОРЕ ПО ПРОВЕДЕНИЮ КОНКУРСА НА ПОСТАВКУ АВТОБУСОВ ДЛЯ ГОСУДАРСТВЕННЫХ НУЖД Приглашаем всех желающих принять участие в квалификационном отборе поставщиков для последующего участия в конкурсе на поставку 20 автобусов марки ПАЗ-3205, необходимых для культурного обслуживания граждан в сельских районах республики. Срок поставки: второе полугодие 1998 года. В предварительном квалификационном отборе могут принимать участие юридические лица и индивидуальные предприниматели (далее "поставщики"). Поставщики могут обратиться за документами предварительного квалификационного отбора в Министерство культуры Удмуртской Республики по адресу: 426051, г. Ижевск, ул. М. Горького, 73, тел. 78-27-64. Заявки на участие в предварительном квалификационном отборе должны быть поданы в запечатанных конвертах, которые доставляются посыльным или заказным письмом по адресу: 426051, г. Ижевск, ул. М. Горького, 73, Министерство культуры УР; на них должно быть указано: "Заявка на участие в предварительном квалификационном отборе на конкурс по поставке автобусов". Заказчик оставляет за собой право принять или отклонить заявки, поданные с опозданием. На конверте должны быть указаны наименование и почтовый адрес поставщика. Дата окончания приема заявок - 19 июня 1998 г. Спорт "САТУРН" ТАЯЗ УЧЫРЕ ӧЗ ПИШТЫ Россилэн футболъя чемпионатаз нырысетӥ дивизионын шудӥсь "Газовик-Газпром" команда ас дораз пумиськиз Москва вӧзысь Раменское городысь "Сатурнэн". 12 шудон ортчытыса, татысь спортсменъёс одӥгзэ но ӧз келяллялэ на вал, куинез гинэ нокин вормытэк йылпумъяськиз. Озьы 30 очко люкаса, та команда дивизионын азьпалан мынӥз. Асьме футболистъёслэн вал 16 очкозы но 11-тӥ интызы. Озьы ке но, газовикъёс куноослэн кужымзылэсь ӧз шурдэ. "Сатурнлэн" капкаез дорын соос огез бӧрсьы мукетсэ кышкыт учыръёс кылдытъязы. Шацких но Семенов, кылсярысь, кык пол поталлязы вратарен ваче син. Нырысяз учыре туп штангаен артэ ортчиз, кыкетӥяз - вратарь утьыны быгатӥз капказэ. Нош голъёс "Сатурнлы" пыртӥзы Дмитрий Нежелев но Андрей Глухих, кыксэ ик шудонлэн нырысетӥ люкетаз. Пумиськонлэн пумаз гинэ куноос шудонзэс ӟечгес радъяны быгатӥзы. Но та нуналэ соослы пиштыны кылдымтэ вылэм. Пунэмзэ одӥг гол сяна сётыны ӧз быгатэ. Озьы "Газовик-Газпром" "Сатурнэз" котькинлэсь азьло канжаськытӥз. 2-тӥ июне асьме спортсменъёс шудӥзы Читаысь "Локомотивен". Таяз учыре но ижъёс вормизы. Пумиськон йылпумъяськиз 4:1 лыдын. "Газовик-Газпром", дас куинь шудон ортчытыса, 22 очко люказ но кӧня ке командаосты азьпалтыны быгатӥз. Н. ФЕДОРОВ. СТАДИОНЫН - МИЛИЦИЫН УЖАСЬЁС Удмуртиысь милицилы сӥзем нуналъёс асьме дорын нырысьсэ уг ортчо ни. Соос зэмос праздниклы пӧрмо. Туэ но та ужрад азьвыл аръёсы кадь ик усьтӥськиз 1-тӥ июне, Пиналъёсты утён нуналэ. "Россия" кинотеатр азьын возьматӥськиз тылпу кысӥсьёслэн но автомобильной инспекциын ужасьёслэн техниказы. Пиналъёс понна радъямын вал пӧртэм адӟытонъёс, ӵошатсконъёс, шудонъёс. Шор площадьын шудэ оркестр. Калык пумен тросгес люкаське. Лыкто милициын ужасьёс, пинал спортсменъёс, Россиысь МВД-лэн Юридической институтэзлэн Ижысь факультетаз дышетскисьёс. Праздник кутскиз. Сое усьтэ элькунысьтымы югдурез утёнъя министр милициысь генерал-майор Владимир Щербаков. Люкаськемъёсты ӟечкыла Ижлэн мэрез Анатолий Салтыков. Собере асьсэлэсь быгатэмзэс возьмато пинал каратистъёс, милициысь вуоно офицеръёс. Милицилэн пӧртэм ёзъёсаз ужасьёс шаплы луэмзэс возьмато эстафетаын. Тямыс команда пыриськиз отчы. Котькинлэсь сэзь луэмзэс возьматӥзы элькунысьтымы радъям йыружъёсын нюръяськонъя управлениын ужасьёс. Толон но валлян Югдурез утёнъя министерствоысь кивалтӥсьёс пумиськылӥзы ужась коллективъёсын. Толон ик Россиысь МВД-лэн Юридической институтаз дышетскисьёс куспын радъямын вал КВН. Нош тужгес но тунсыкоез ужрад ортчоз туннэ, республикаысьтымы Центральной стадионын (азьвыл "Зенит"). Со кутскоз ӝытазе 19 час 30 минутэ. С. БОРИСОВ. Снимокъёс вылын: * Праздник дыръя. Туспуктьэмъёсын В. КАМАШЕВЛЭН. Адӟем карыса Телевизорысь адями ошемез адӟыса, Ливанысь кык пичи пиос озьы ик дауртоно кожам, гожтэ Великобританиысь "Дэйли Телеграф" газет. Огез, Ливанлэн шунды ӝужан палан улӥсез, тямыс аресъем нылашез ӧжыт ӧвӧл ошем - гозыез чигем. Нош лымшор палась Котерийяд ар-Роз городысь куать аресъем пийкез эшез кыӵесэ донгем. Ярам, озьы "шудэмзэс" анай-атайёссы шӧдӥллям но пияшез кыӵесысь поттӥллям. Пересьёс уг ӝожтӥсько Америкаысь уноез пенсионеръёс улонлы уг ӝожтӥсько, гожтэ "Ю-Эс-Эй Тудей" газет. "Берло кызь ар куспын улонды воштӥськиз-а?" юанлы 65 арессэс тырмытэм американецъёс пӧлысь 37 процентэз валэктӥзы, ӟечгес улыны кутскизы шуыса. 38 процентэзлэн улоназ номыр воштӥськымтэ. 25 процентэз гинэ шуиз, азьвыл шулдыргес но капчигес вал шуыса. Ужатыны амал Иркутск областьлэн губернаторез Борис Горин интыысь властьлы областьлэн бюджетысьтыз коньдон висъямысь дугдӥз, ивортэ "Телеинформ" агентство. Со косэмъя, областьысь властьлэн ёзъёсаз ужасьёслы нырысетӥ июньысен уждун тыремысь дугдозы. Социальной удысын ужасьёслы уконьдон тырытозь, соос уждунзэс уз адӟе. Чорыгез сузяло быжысеныз "Сегодня" газет гожтэмъя, Борис Немцовлэн вылӥ чиновниклэсь доходъёссэс шараяны но эскерыны луоз шуыса малпанэз улонэ ӧз пыӵа. Али валамон луиз ини, декларациослэсь зэм луэмзэс эскерыны амал ӧвӧл шуыса, угось со понна нимысьтыз процедура кылдымтэ. Правительство мукет гражданъёсты налоговой законодательствоез тӥямзя понна юнгес шымыртыны косӥз. Россилэн котьку озьы: чорыг йырысеныз сисьмыны кутске ке но, сузяно сое быжысеныз, гожтэ газет. Нуныос но аракы Англиысь вож нуныос аракылэсь шӧмзэ тодо, гожтэ "Таймс" газет. Ноттингем университетысь социолог егит анайёслэсь юалляськыса тодэм, соос пӧлысь куамын процентэз нылкышнооссылы курыт ву сётъяллям ини. Малы? Нылпи мед буйгалоз но умме усёз шуыса. Кудӟем нылпилэсь кызьы но мар каремзэ тодон понна (серем ук!). Огез анай вераз, тямыс толэзьем нылыз сур но сидр юыны яратэ, пе. Врачьёс анай-атайёс пӧлын та пумысен валэктон нуыны малпаллям. Огез шумпотэ, гожтэ газет, нуныос анайёссылэсь визьмогес карисько - пакись вуэз сялӟо. Пекляез - яхталы Америкаысь Флорида штатысь Санкт-Петербург городын улӥсьёс огысьтыз газетысь ялонэз лыдӟыса чылкак дэймиллям. Куатьтон куинь аресъем Джон Кертис пеклязэ яхтаен воштыны дэмлам. Пересьмыса, воргорон зарезен "висьыны" кутскем, лэся. НО городысь властьёс ялонзэ законъёслы тупасьтэмен лыдъяллям но пенсионерез та выллем дэмланъёслэсь возиськыны косӥллям. Пересь пумитъяське, "пекляе мынам, мар кареме потэ, каро" шуэ со. ёКАМ СЬӦРЫ ВУЫЛОЗЫ Кылем вордӥськонэ люкаськылӥз "Удмурт кенеш" огазеяськон. Пумиськонэ ветлэмъёс эскеризы данак ужпумъёсты. Огазеяськонлэн тӧроез Валентин Тубылов ивортӥз Дэбес ёросэ вуылэмез, Сибирь сюреслы кык сю ар тырмонэз пусъён сярысь. Кенеше лыктэмъёс лулысь-сюлмысь эскеризы "Удмурт дунне" газетын печатласькись "Герд" бамез. Вань люкаськемъёс вуизы одӥг малпанэ: "Гердлэсь" быдӟалазэ паськытатоно, пуштроссэ узырмытоно, бамез дасянэ сюлмысьгес пыриськоно. Тӧроез воштӥсь Нина Малых тодматӥз матысь дыре быдэстоно ужпумъёсын. Соос таӵеесь: удмурт егитъёсты вузъёсы келянэз ӝогомытон, Куӟебай Гердлы сӥзем конференцилы дасяськон, ёрос кенешъёслэсь ужзэс радъян. "Удмурт кенеш" матысь дыре люкалоз ёрос кенешъёслэсь пумиськонзэс. Со сӥземын луоз ёросъёсын ортчоно быръёнъёслы но будӥсь егитъёсты дышетонлы. Валентин Тубылов, городысь удмуртъёслэн йырзы Илья Байметов, мукет адямиос матысь поталозы Кам сьӧрысь удмуртъёс доры - Башкирие. Отын пумиськылозы Калтасы ёрослэн кузёосыныз, вуылозы та палась удмурт гуртъёсы. Кенеше лыктэмъёс вераськизы вуоно Гербер сярысь. Со ортчоз 13-тӥ июне вавож музъем вылын. Городысь удмуртъёслэн гужем шулдыръяськонзы луоз 21-тӥ июне Киров нимо паркын. Кенешын эскеремын мукет ужпумъёс но. Е. РОМАШОВА. КУ? КЫТЫН? Инвожо толэзь узыр ик пӧртэм праздникъёсын. 12-тӥ июне пусйиськом Россия Федерациын кун суверенитет басьтэм сярысь декларация кутон нуналэз. Соку шутэтскон нунал ялӥське. 12-тӥ июне ик пусъём городмылэсь нуналзэ. Соку шоркарамы ӵукнаысен бер ӝытозь шулдыръяськонъёс ортчозы. Нош праздник азьын, 11-тӥ июне, Короленко нимо азьвыл библиотекаын (ВЛКСМ-лы 40 ар нимо ульча, 56-тӥ юрт) усьтӥськоз тодмо конструкторлэн Михаил Калашниковлэн музеезлэн нырысетӥ экспозициез. 13-тӥ июне шулдыръяськозы гуртоос. Тулыс бусы ужъёсты йылпумъямлы сӥзем Гербер праздник туэ ортчоз Вавож ёросын. Ӵуказе быдэс дуннеын пумиталозы котырысь инкуазез утёнлы сӥзем нуналэз. Соку Ижысь Киров нимо паркын сое утялтон-сузян ужъёс кутскозы. Отчы пыриськыны кулэ городысь ваньмыз предприятиос но учреждениос. Н. СЕРГЕЕВ. Вужередлэсь уд пегӟы Удмурт калык сярысь читыр-чутыр малпанъёс "Удмурт дунне" туж тунсыкъяське "Удмурт кенешлэн" ужаменыз. Солы сӥзьыса, (я ушъяса, я курласа) статьяос поттэ. Куд-огъёсыз мыным кельшо, мукетъёсыз ужлы гинэ люкето кадь. Кылем арын, февраль толэзе вал, лэся, газетлэн бамысьтыз лыдӟи М. Гришкина профессорлэсь кылъёссэ: "Удмурт кенешлы" тӧрое котькинэ, пе, бырйы, нокин но ужаны уз быгаты. Нош малы ужаны уз быгаты, валэктон ӧз сёты. Со интые мон курадӟо али валэктыны. М. Шишкин, Р. Яшина, И. Гришкин но мукетъёсыз ужаны быгатӥсьтэмесь ӧй вал. Уно дышетскем, калык пӧлын дано луэм, ужез яратӥсь муртъёс. Ужано но ужано вал. Но ӧз луы! Мугез? Кивоштӥсьёссы, исполкоме быръемъёс кулэ дыръя тӧрооссылы ӧз юрттэ. Ай юрттэм гинэ ӧвӧл, трос дыръя люкетӥзы. Соос "тыршемен", дыр, одӥг тӧромес лушкаськись шуыса "данъямы", мукетсэ монъяськись шуыса "мусоямы", куиньметӥезлы но сьӧдмась кылъёс шедьтӥмы. Асьсэдыз гажась калыкъёс тӧролы вань кужымзэс поныса юртто. Тани асьмелэн одӥгез урод сяммы - ас калыкмес, ас тӧроосмес ум гажаське! Табере валэктэме потэ, кызьы таӵе сяммы асьмелэн кылдӥз, вирамы пыӵаз. Сое тодон понна эскерыны кулэ ортчем улон сюресмес, историмес. *** Финн-угор выжыос, куать сюрс ар талэсь азьло интыяськизы туала Татарстанлэн музъемаз. Кык сюрс аръёс улӥзы, государство ӧз кылдытэ, городъёс ӧз лэсьтэ, кыӵе ке музон калыкъёсын ожмаськемзы сярысь ивор ӧз кельтэ. Отӥяз соос пазьгисько. Кӧняез ке кошко вылӥе Кам кузя, дугдо туала Сарапул но Елабуга котыре. Музон выжыос соосты весь улляло, нимаз кунзэс кылдытыны люкето. Асьме дауре туж лябомыса вуизы. Нош вал-а феодализм? Мон сямен, ӧй вал со но. Веранэз ӧвӧл, удмуртъёс пӧлын вань вал ужез, вузкаронэз йӧндырисьёс, ваньбурез капитал карыны быгатӥсьёс. Но сыӵе мурт соку ик исламе потылӥз, булгаре я бигер луылӥз. Сыӵе адямилэсь, оло, бӧрысь пӧрмылӥз рабовладелец яке феодал но удмурт со ӧй вал ни. Мукетъёс классъёсъя люкиськылӥзы ке, асьме сярысь озьы шуыны уг луы. Удмуртлэн котьку вал ӟибем классэз, но ноку но ӧй вал зӥбись классэз. Тани кытын, мон сямен, асьмелэн аспӧртэмлыкмы. Зӥбем калыклэн культураез, наукаез адями радъя ноку но уз азинскы, асваланэз вылӥе уз ӝутскы. Сыӵе калык ассэ гажаны уг дышы, солэн ляб луэ лул кужымез. *** Асьмелэн азинсконмы дугдӥз кытын ке дасэтӥ дуарэ. Эскере али кылмес ик. Адямилэсь анатомизэ валэктӥськом быдэсак удмурт кылъёсын: йыр, сюлэм, пекля, ты, мус но мукет. Озьыен, мон сямен, мугормес, пушмес кемалась валам. Табере учком дӥськут нимъёсты: кут, оштыр, дукес, ката, дэрем, пась (шуба). Собере мыно ини бигер яке ӟуч кылъёс: штан, чалбар, чулка, сапег, ботинка но мукет. Ӧй вал асьмелэн мануфактурамы, таӵе арбери лэсьтӥсьёсмы. Соин ик нимъёс но ӧм понэ. Озьы ик уж тӥрлык: тӥр, мажес, сюрло, пурт. Собере ини мыно бигер но ӟуч кылъёс: уробо (арба), буко (быкэ), туртто (тарта), такл (такл, рубанок), саник (сэнэк), бичкы (печке), кусо (коса). Таиз валамон кадь ини. *** Арча удмуртъёс сярысь. Куд-ог тодосчиос меӵак оскытыны туртто калыкез: удмуртъёслэн азинсконзы, пе, дугдӥз Иван Грозный Казанез басьтэм бере. Талы но валэктон сётыны кулэ. ЪВИ даурын Арчаен кивалтӥсьёс пӧлын ваньмыз бигере но исламе потэмъёс яке потон сюрес вылэ султэм удмуртъёс вал. Соос удмурт калык сярысь вӧтазы но ӧз сюлмаське. Крестьянъёслы улыны туж шуг вал. Нюлэс сайкыса, гырон-кизён дасяса уг вутто, нош солы кулэяськисьёс вуо ини - бигере потэм удмуртъёс. Сыӵе шуг- секытъёслы чидатэк, Ӟумня выжыысь адямиос, кылсярысь, кемалась ини (Грозныйлэсь азьвыл) Арча палъёсты куштӥзы, вуизы Ципъя пала, нош 1450-тӥ -1460-тӥ аръёсы лыктӥзы туала улон интыязы - Кукмор котыре. Тае валасьтэм мурт удмурт калыклы туж бадӟым изъян вае, сое кырыж, мыдлань сюресэ пыртэ. Историмес тодыны кулэ карымтэен, кылдо сыӵе муртъёс, кудъёсыз удмуртлэсь шуге-леке кылемзэ погыльтыны тыршо ӟуч калык вылэ. С больной головы на здоровую, шуо сыӵе дыръя. Вить сюрс вить сю аръёс ӵоже (ЪВИ-тӥ даурозь) калыкмы йӧназ азинскыны ӧз быгаты. Та аръёсы удмуртъёслэн кылдӥзы, виразы, йырвизязы пыӵазы кулэтэм сямъёс но йылолъёс. Луоз-а со сямъёслэсь но йылолъёслэсь мозмыны? Яке, ньыль даурзэ ӟучъёсын артэ улыса, соослэсь сямъёссэс но йылолъёссэс асэстыны? Йӧназ ум малпаськиське та сярысь, отысен кылдэ асьмелэн мукет сяммы - куатаськон. Куатаськиськом мукет, вӧӟамы улӥсь калыкъёслы. Нош со вуттэ яке вуттыны быгатоз умойтэме. *** Тани киям 1997 арлэн 29 июле потэм "Удмурт дунне" Отын вань В. Осиповлэн "Адями ас калыкезлэсь люконтэм" нимо статья. Автор юнме шорысь, мон сямен, куатаськем быдэс ӟуч калыклы, табере пӧртэм амалъёсын тырше сое ултӥяны. Солэн сюлмыз висе татаро-монголъёслэн ӟучъёсты быдтыны быгатэмтэзы понна. "Нош ӟуч князьёслэн Зарни орда улын улэмзы ӧз поты ук!" - зар бӧрдэ азьветлӥсьмы. Муртлы гу эн гуды, ачид усёд. Но тодыны улон пытьымес кулэ. Соку оло юнме уд но куатаськы. Сюрсэн-сюрсэн аръёс ӵоже удмуртъёслэн но ӟучъёслэн азинскон луонлыкъёссы одӥг кадь вал. Скифъёс - вуоно ӟучъёс - улӥзы шор Азиын но Сьӧд зарезь вӧзын. Угро- финн выжыос - туала Татарстан музъемын. Со сяна, соос трос вал Сибирьын. Та калыкъёс ог-огзэс шӧдытэк, ог-огзылы люкетытэк улӥзы. Ӟучъёс трос миллионъем калыклы пӧрмизы, бадӟым государство кылдытӥзы, наукаез, техникаез азинтыны быгатӥзы, космосэ тубизы. Кин гинэ ӟуч калык вылэ ожен ӧз вуылы, ӟучъёс весь вормылӥзы. Удмуртъёс ӧз быгатэ азинскыны. Соослэн лыдзы дарысь дауре кулэсмиз, мукет выжые потэмен. Экономика ӧз буды, тодон-валан ӧз азинскы, малы ке шуоно, тодон-валан басьтыны малпаськись удмуртъёс мукет выжые потӥзы. Удмуртъёс, мон сямен, ӟучъёсын "тодмаськыны" кутскизы Зарни Орда ки улын . Ӟучъёс куашкатэмын, кужымзы лябӟиз. Казанской ханствоысен пӧртэм отрядъёс кошкылӥзы ӟуч городъёсы, гуртъёсты сутыны, тус-тас карыны. Та отрядъёсын трос вал удмуртъёс - бигере потэм яке потӥсь муртъёс. Но тужгес но тодоно асьмелы тани мае: удмуртъёс пӧлын вал пӧртэм адямиос. Х-тӥ даурысен кутскыса ини удмуртъёс кыклы люкиськизы. Одӥгез бигере потэ но удмуртъёсыз ик кекатыны кутске. Мукетыз музъемзэ, улоннизэ куштыса, выль интые кошке. Удмуртэ кылемъёс нош но нош выль интыос утчало, кошко нюлэсъёсы, выль бусыос, возьёс кылдыто. Ӟумня калык, кылсярысь, Кукмор палась кошкыса интыяськиз туала Алнаш, Ува котыре. Со дауръёсы ик ӟучъёс но вамышъязы дуннеетӥ. Историез мыдланьтыса, Осипов эш гожтэ: "Удмуртъёс... ваньзэ киултӥсь ӟуч эксэйлы пумитъякылӥзы, соин ожмаськылӥзы". Кыӵе ожмаськонэз тӥ тодады ваиды меда? Одӥг тодмое - дышетӥсь - кылем арын дорам пыриз но кӧня ке лист кагаз мычиз. Тани, пе, лыдӟы али, та "Вордскем шаер" предметлэн программаез. Мон сое лыдӟи. Отын вань тема: "Участие удмуртов в восстании Е. Пугачева". Тодмо дышетӥсьлы соку шуи: та программая дышетӥд ке, Ӟумня калыклы изъян гинэ ваед. Малы озьы? Е. Пугачев одӥг минут но ас улоназ ӧз малпаськы калыклэсь улонзэ умоятон сярысь. Со улоназ лушкаськись вал, нош пеймыт калыкъёсты ӝутыса, тросгес таланы тыршиз. Историез тодӥсьтэмъёс сое вылэ ӝутыны, герой карыны туртто. Но мынам вераме потэ, кызьы удмуртъёс Пугачев дорын ожмаськизы. Пугачев Ижысен Агрыз, Елабуга, Мамадыш вамен ортчиз Арчае. Ӟумня удмуртъёс шӧдӥзы сое, уго ивор котыр вӧлмиз. Кылӥськиз, Пугачев, пе, крестьянъёсыз зӥбе, валъёссэс, мукет пудо-животсэс ожгарчиоссэ сюдыны бушын октэ. Оштормо-Юмья крестьянъёс пудозэс соин ик сьӧд нюлэсэ ватӥзы. Али но пересьёс тодо со пудо ӟортэтэз (загон). Тӥни кызьы, гажано тодосчиос, удмуртъёс (ожмаськизы) эксэйлы пумит. Но соин уг быры Пугачевлэн историез. Ӟумня гуртысь крестьянъёс пудозэс ватыса ӧз вуэ. Пугачевлэн муртъёсыз трос "трофей" нуизы татысь. Бен, вал одӥг-ог учыръёс. Мынам кыдёкысь ӵужатае Пугачевлэнармияз мыныса, Казань улын эксэй армиен ожмаськиз. Но сое Пугачевлэн армияз эриктэм келязы. Яке валъёстэ сётӥськод, яке одӥг пидэ ыстӥськод, шуизы Пугачевлэн муртъёсыз ӟумня воргоронлы. *** Шӧдӥсько, мынэсьтым та кузь веранме, сюлэм висёнме лыдӟисьёс шонерен уз лыдъялэ шуыса. Мед. Мон ас азям таӵе ужпум пуктӥ - кема дасо аръёс ӵоже малпанъёсме тӥ дорозь вуттыны, дыртӥд-вуттӥд йылпумъянъёс лэсьтонлэсь но мукет каылкъёсты урод карыны турттонъёслэсь утиськыны. Егор Степанов, Татарстанысь Кукмор посёлокын улӥсь, историлы азьло дышетӥсь. Редакцилэсь. Автормылэн малпанъёсыз туж аспӧртэмлыкоесь. Солэн верамъёсызъя кема гинэ споръяськыны но луоно. Озьы ке но, ми та гожтэтэз печатлано кариським. Маке веранды кылдӥз ке, тӥледлы но газетамы шедьтыны тыршом. Быръёнъёс азьын КЫЛИЗ НА ТОЛЭЗЬ Ӵапак одӥг толэзь кылиз на ёросъёсын ас коже кивалтон ёзъёсы депутатъёсты быръён дырозь. Али кутскиз бырйисьёс пӧлын валэктон уж нуон. Кандидатъёс ужазы кутыны быгато ёросъёсын потӥсь газетъёсты но интыысь радиоез. Со понна котькудӥзлы банк пыр 100 манет коньдон висъямын. Кызьы дасясько быръёнъёслы вавожъёс? Югдурен тодматыны юрттӥз ёросысь быръёнъёсъя комиссилэн тӧроез Василий ШЕРСТОБИТОВ. - Витетӥ июле районын ӧсъёссэ усьтоз быръёнъёсъя 24 участок. Депутат луыны мылкыд кариз 78 мурт (нош быръёно 33-зэ). Одӥгаз, Вавожысь Киров округын, мандат понна нюръяськоз вить адями, куиняз - быдэн ньыль, куатяз - одӥг. Вуоно депутатъёс пӧлын трос кивалтӥсьёс. Дас одӥг мурт тырше калыкез дышетон удысын, куатез кандидат - ужтэк кылемъёс. Шоро-куспо арлыдзы - 40-45 арес. Огъя вераса, быръёнъёслы дасяськон туэ ӟырдытгес мынэ. Тросгес пырисько егитъёс. Депутат луыны мылкыд карисьёс пӧлын зэмос нюръяськон пуромыны медэ. 33 депутат, куаразэс лушкем сётыса, бӧрысь асьсэ Кенешсылы тӧро но ёрос администрацилы кивалтӥсь быръёзы. Кин вормоз? Соиз ини тодмо луоз 5 июль бере. Н. БАЙТЕРЯКОВ. Чуръёс, чуръёс... СЯСЬКА НО ТӦЛӞЕ, ДАУР НО ОРТЧЕ Асьмелэн вань улонысь кошкемъёсты буре ваён нуналъёсмы. Соку шайвылэ калык тросэн ветлэ. Но котькытын ик транспорт уг висъяло, ваньмызлэн мынэмзы уг луы. Нош милям, Пугачёвоын, калык тужгес трос люкаське 9 Мае, одӥг шайгу но вуныса уг кыльы, дыр. Но ас вордскем гуртам бӧрсьысь кык ар бертылыса, оже ветлэмъёсты, ожын быремъёсты тодэ ваись ӧй вал. Туэ одӥгнам ветлӥ, аслам синъёсылы ик ӧй оскы. Нош шайвылын сыӵе шулдыр, лымы но, дэри но ӧвӧл. Туж ӝож потӥз гурт калыке понна, бӧрдыса кошки. Одӥгезлы туж шумпотӥ: Пургалась радио пыр ивортӥзы, автобус калыкез шайвылэ нуоз- ваёз, пе. Ӵок, агайёсмы, атайёсмы асьсэлэсь улонзэс мурт улосвылын сётӥзы ке, музъеммы асьмелэн одӥг ук. Соослэсь шайгузэс асьмеос ноку но ум шедьтэ ни, со понна матысь шайвылэ ветлыны одно ик кулэ, дыр. Улонысь кошкемъёсты буре ваён нуналэ ӧвӧл вунэтоно вылэм мукет но ӵыжы-выжыосмес, тодмоосмес, луонлык шедьтоно шайвылэ потаны. А. АБРАМОВА. Пичи Пурга район, Пугачёво посёлок. Сюлэмшугъяське Мункачи. Туннэ но ӧжыт лэсьтӥз кадь потэ. Пусъем дырызъя вуымтэзэ шӧдыса солы юрттӥськыны басьтӥськиз кемалась дырысь эшез Давид Фокош Фукс. Лякыт но кепыр ваись сямо Давид, Бернат Мункачилэсь кызь вить ареслы егит маке, наукаын вань сюлэмзэ но мылкыдзэ сётыса тыршиз, чалмыт гинэ адями гурезьёсыз берыктылӥз. Пиналысен, студент дыръяз ик синмаськиз удмурт кыллы. Бернат Мункачилэсь "Удмурт калык поэзилэн традициосыз" книгазэ ӵемысь лыдӟылӥз, отысь куд-ог кырӟанъёсты ас сяменыз кырӟалляз но. Университетэз йылпумъян азяз гожтӥз покчи доктор диссертация. Темаез таӵе вал: удмурт кылын интыез возьматӥсь обстоятельствоос. Отӥяз, удмурт музъем вылэ, мыныса, удмурт калык кылос бордын ужамез потӥз. Вазиськиз Бернат Мункачилы. Мункачи соку Шор но шунды ӝужан пал Азиез эскеронъя международной обществолэн Венгриысь комитетаз секретарь вал. Ветлэмын удмуртъёс но мансиос доры. Трос книгаос гожтэмын. Сӥё-дано адями. Бернат Мункачи соку ик шӧдӥз зӥбыт Фокошлэсь шугъяськемзэ. Сюлэмызлэн жугиськемез ик кылӥське. - Туж усто малпан! - вӧзаз пуксьыса, кизэ Давидлэн пельпум вылаз понӥз Мункачи. - Нош тон, эше, тодӥськод-а, удмуртъёслэн тужгес но матысь вынъёссы, комиос, чик но умой-умой эскеремын ӧвӧл на шуыса? Мансиос доры ветлыкум, мон комиосын тырмыт гинэ пумиськылӥ. Кыӵе тупало соос удмуртъёслы тусын-буйын но, сямъёсын но, вераськон манерен но. Отын ик асьсэлэнэз но вань. Ветлы отчы - выль дуннеез усьтод! Озьы Бернат Фокошлы матысь эш, сюрес возьматӥсь но визь-кенеш сётӥсь луиз. Нош табере Фокош Фукс, гимназиын немец но латынь кылэз дышетӥсь, немец кылэ берыктон ласянь воштонтэм адями луиз. Мункачи кемалась шӧдэ вал ини сюлэмызлэсь висемзэ но ӧз сётскылы. Ӧжыт ваньме ке, соку ик пуксе яратоно удмурт кылъя, фольклоръя, калык сямъёсъя ужез борды. Улӥз юн мылкыдын, азьланезлы оскыса. Акшан дыре шутэтскылыкуз, малпанэз котьку одӥг вал: дыртоно, вуттоно ужез... Кӧня кыстӥське ни... Гужем со пӧсь но окыт Будапештысь кошкылӥз чылкыт но сайкыт нюлэсо, зарезё, гурезё интыосы. Азьвылгес кунгож сьӧрысь Тренчин выллем сӥё-дано курортъёсын тазалыксэ юнматылӥз ке вал, табере пичи шур дурысь бамалэ интыяськем Зуглигетэ гинэ - дачае - ветлӥз. Кык толэзь ӵоже дун тырыса улӥз та чебер но вож шаерысь огаз коркан. Отысь со али гинэ вуиз. Дачае берлогес люкаськылӥзы Ӧрнӧ пиез но кенэз, соослэн нылъёссы - Мария но Магда. Дораз Мункачи туж ӟеч мылкыдын бертӥз. Нылпиосыз отчы ик кылизы на. Будапештын соос атайзы вӧзын ик нимаз квартираын уло. Анайзэс ватэмзы дырысен ог сизьым ар ортчиз ни. Атайзэс соос синчеберзэс кадь утё. Улон интызэ чылкыт возьыны юртто. Докторлэн косэмезъя. Мункачи бордаз медсестра возе. Соиз туж юн чакла, кыӵе шуккиськылэ ни пересь учёнойлэн вирсэрез, кыӵе вирзӥбетэз, ку эмъюм юоно, ку сиськоно, шутэтсконо. Туннэ ӵукна Мункачи утись нылзэ ог уйзэ гуртаз кӧлыны лэзиз. Кошкон азяз нылаш почтальонлэсь ваем бандерользэ ужан кабинетаз пыртыса кельтӥз. "Москваысь!" - шумпотӥз учёной, бандеролез усьтыса. Книгаосме куро библиотекаязы. Россиысь кӧняеныз меда учреждениосын, адямиосын кусып возьылӥз со? Нырысь ик - Казаньысь ӟуч учёнойёсын Николай Иванович Ильминскиен, Иван Николаевич Смирновен, Николай Иванович Аддерсонэн, Н. А. Бобровниковен,, Казаньысь ик профессорен-хакаесэн Николай Федорович Катановен, Глазовысь Николай Гаврилович Первухинэн. Первухин солы "Эскизы преданий и быта инородцев Глазовского уезда" нимо ньыльзэ ик ужзэ ыстӥз но куриз со пичпесь книгаосызлы дунъет сётыны, Европаысь кыӵе тодмо журналэ рецензия гожтыны. Мункачи быдэстӥз куронзэ. Малпаськонъёс, малпаськонъёс... Зэм, соос азьлань уг лобо ни, ветлэм сюресъёсыз, лэсьтэм ужъёсыз котыртӥ бергало. Тодэ ваёнъёс гинэ ӧвӧл со, аслыд дунъет сётон, куддыръя - шумпотон, куддыръя - ӧпкелён. Но тросгес шумпотон. Уйвӧтъёсаз со котьку сямен ассэ адӟе егитэн, кытын ке, сюрес вылын. Нош акшан карыкуз, малпанъёсаз чилектэм кадь вуэ Казане, отын пумиське Николай Иванович Ильминскиен, со Бернатлы дэмла семинариысь дышетскисьёссэ, ыстэ удмуртъёс пӧлы. Отӥяз Мункачи мынэ чувашъёс доры, нош собере, вуоно аръёсы - хантыос но мансиос пӧлы. Муш палэп кадь бергало малпанъёсыз. Пумен кылбур чуръёслы пӧрмо. Но соос уг кисьтӥсько тӧдьы кагаз вылэ. Пинал дыръяз со трос кыбур гожъяз, нош мӧйымемезъя лулыныз-сюлмыныз гинэ пыраклы кылбурчи луыса кылиз, йырез лыктэм чуръёссэ тылыен-пероен ӧз гожъя, ас понназ гинэ шыпыртылӥз, нокин но кылонтэм вылысь. Али но тани, сюлэмыз каньыл луыку, мылкыдыз ӝуатскиз, егит дыр кылбурез тодаз лыктӥз. Со кылдӥз вал удмурт шаере лыктон азяз. Тон - сюресчи! Вань ултозяд Дугдылытэк азьлань мынод, Канжатӥсед ке вань азяд, Уд чигна тон, сое вормод. Меӵ гурезьёс, пеймыт тэльёс Тонэ уз дугдытэ ноку. Тонэ уз кышкатэ шуръёс, Тулыс йӧос тӥяськыку. Ас кунэдлы, Европалы Кам шаерез матэктытод. Бӧрсяд мынӥсь сюресчилы Удмурт эле тон ӧс усьтод. Дугдылытэк тон мын азьлань, Сюлмад ӟырдыт тылыд ке вань. "РОССИЕ ДЕМОКРАТИЯ ӦЗ ВУЫ НА..." Озьы шуиз Москваысь корреспондентлы Александр Солженицын. Ӵапак ньыль ар талэсь азьло писатель Россие берытскиз. Бертон сюресэз быдэс страна пыр ортчиз. Соку со трос выльзэ тодӥз, Россилэсь выль висёнъёссэ шӧдӥз. Писатель али но котьку сюрес вылын. Мар малпа Солженицын та улон-вылон сярысь? Кызьы со учке, шуом, эгыр поттӥсьёслэн бугыръяськемзы шоры? - Президентлэн верамысьтыз тодӥськом, рельсаос вылын пукон Конституцилы пумит луэ шуыса. Зэм, Конституциын сыӵе кылъёс гожтэмын ӧвӧл. Но отын 14 толэзь ӵоже уэдунэз ӝегатон сярысь но верамын ӧвӧл. Котькуд азинскем странаын, уждунэз толэзьлы ке но ӝегатӥзы, правительство соку ик сэрпалтэмын луоз. Соку ик Президентлэсь юам потэ: нош тупа-а Конституцилы уждунэз аръёсын ӝегатон? Кызьы валэктоно сое? Шахтёръёслэн чиданзы чигемын. Соос уг тодо ни, ма кароно, кинлы осконо. Вылӥысен юрттэмзэс уг ни витё, уг но оско ни. - Адямилэн правоосызъя уполномоченное Кун Дума коммунистэз Олег Мироновез юнматӥз. Кызьы учкиськоды со учыр шоры? - Таиз ласянь дырдэс юнме эн быдтэ. Адямиос лыкто но, кошко но. Тодады вае ай: тямыс ар талэсь азьло куд-ог эшъёслэн нимъёссы нуналлы быдэ кылӥськылӥзы. Нош туннэ соосты вунэтӥзы ни. Улонлэн кызьы мынэмез сярысь, странамы сярысь малпаськоно. Сюлмаськоно соиз сярысь: вуомы-а куке-соку демократия дорозь, ум-а? Кыӵе сюресэтӥ отчы мыноно, быгатоз-а куке но калык ачиз кивалтыны? Туалаез власть - быръемез но, быдэсъясез но - калыклэн кивалтэмезлэсь кышка. Калык ачиз кивалтыны кутскиз ке, кузёосмы ужтэк кылёзы уго. - Тӥляд малпамдыя, асьме дорын ӧз кутскы-а вашкала режимез выльдон? - Кудзэ режимез выльдон? Коммунистъёслэсьсэ ке верано, малы сое выльысь улӟытод? Шонерзэ вераса, асьмеос солэсь кыдёке ик ӧм кошке на. Туалаосыз кивалтӥсьёсмы пӧлысь ӝыныез пырак коммунистъёслэн кивалтоно партиысьтызы потэмын-лыктэмын. Соос туж дыртыса коммунистической билетъёссэс куштӥзы но 24 час куспын асьсэды демократъёс шуыса нимазы. Но соос нокыӵе демократъёс ӧвӧл. Демократия соку кылдэ, куке аслаз улонэныз ачиз калык кузёяське. Нош али азьло сямен ик асьмемын кин ке кивалтэ. Кызьы ужа вал коммунистъёслэн правительствозы? Ваньмыз лушкемен лэсьтӥськиз, нош тӥ пукиськоды но витиськоды кыӵе ке указэз яке законэз. Нош алиез правительствомы кызьы ужа? Озьы ик - лушкемен, калык ялан кыӵе ке указ яке закон витьыса улэ. Аръёс ортчо но ортчо, нош асьмемын весь со адямиос ик кивалто. Пӧртэмлыкез сыӵе - соос пукон интыоссэс гинэ вошъяло. Кинэ ке интыысьтыз сэрпалто, кинлы ке коньдон сёто, кинлэсь ке талало яке ваче пумит луо. Вань со кырсь ужъёсты возьмато газетъёс но телевидение. Вужзэ выльдон понна, маке чылкак вылез кулэ. Нош со асьмелэн ӧвӧл. Россие демократия ӧз вуы на. "Общая газеталэн" гожъямезъя. ЧАСТНЫЕ ОБЪЯВЛЕНИЯ Продается 2-х комнатная кв., благоустроенная, 35-40 млн. 427780, с. Алнаши, ул. Пушкинская, 21, кв. 6. Дом 4 х 4 с сенями на слом, холодильник "ЗиЛ" и "Бирюса", оба в хор. состоянии. Тел. 76- 43-21, после 19 ч. Квартира в 2-х кв. деревянном доме (газ, вода, баня, сад, погреб, хозпостройки) или меняется на ВАЗ-09. 427780, с. Алнаши, ул. Алнашская, 10, тел. 2-19-20. Авторезина с дисками в сборе для а/м "Нива" Р-16 2 шт., авторезина новая Р-16 2 шт., авторезина новая Р-15 1 шт., отопительная печка УАЗ, ГАЗ, РАФ. 1 шт., мосты ГАЗ-69, цветн. телев. "Рубин"" в хор. сост. Цены невысокие. Тел. 21-25-79. Дом с усадьбой 30 соток. Шарканский р-н, д. Пашур-Вишур. Тел. (236) 6-11-53. С/о 10 сот. На массиве "Черемушки" пос. Италмас по Вотк. шоссе без построек и посадок. Тел. 21-25-79, утром, вечером. Паркет штучный (береза) и телевизор ч/б б/у. Тел. 36-51-42. Левая передняя дверь к а/м "Москвич" недорого. Тел. 29-72-16. Куплю Семена сои. Тел. 22-55-27. Трактор Т-25. Тел. 21-47-62. Монеты и купюры СССР 1921-91 гг. Каталог вышлю. От вас конверт с обр. Адресом и это объявление. 140203, Московская обл., г. Воскресенск-3, а/я 40-М. Меняется Разное Научу избавиться от пьянства (корень копытня). Отвечу всем, вышлю корень. От вас: конверт с обр. адр. и купон б/о и это объявление. 140203, Московская обл, г. Воскресенск-3, а/я 40. Высылаю семена кабачка-лагенарии, спаржевой фасоли "Вична", люффы-мочалки с огорода, саженцы морозостойкого винограда, черной малины и полукарликовых яблонь. От вас запрос + конверт с обр. адресом. 140160, Московская обл., г. Жуковский, а/я 135, Петров Ю. В. Обучаю вязанию на вяз. машине. Тел. 25-86-69. Предлагаю работу на дому. Место жительства значения не имеет. От вас заявка, купон б/о, конверт с обр. адресом. 427445, Шарканский р-н, дер. Зар.-Вишур. Широбоков В. М. Нылпиослы конкурс "ЭКОЛАГЕРЬ-98" 8-тӥ - 10-тӥ классъёсын дышетскись нылпиос понна удмурт егитъёслэн "Шунды" дэменлыксы радъя экологияя лагерь. Со ортчоз 20-тӥ июльысен 31 июлёзь Пичи Пурга ёросын. Инкуазен тодматскем но шутэтскем сяна, нылпиос трос тодон-валан басьтозы экологиен герӟаськем пӧртэм ужпумъёсъя, асьсэос эскерон ужъёс нуозы, тодматскозы будосъёсын но лулосъёсын. Нылпиосын ужалозы республикаысьтымы инкуазь но экология ужпумъёсын вырись специалистъёс. Кинэ сюлмаськытэ гуртэзлэн, улосэзлэн, шаерезлэн экология ужпумъёсыз но кинлэн шутэтскемез потэ та лагерьын, куриськомы конкурсэ пыриськыны. Валэктонъёс сётоно таӵе юанъёслы: 1. Экологиен герӟаськем кыӵе валтӥсь ужпум сюлмаськытэ гурттэс, райондэс? 2. Пыриськылӥды-а инкуазез утёнъя кыӵе ке но ужрадъёсы? Пыриськылӥды ке - кыӵеосаз? 3. Мар возьмаськоды экологияя ужпумен вырись лагерьлэсь? Эн вунэтэ пусйыны кытын улэмдэс, нимтулдэс, кыӵе классын дышетскемдэс. Гожтэтъёстэс ыстэ 30 июнёзь таӵе адресъя: 426051, Ижевск город, Советской урам, 1 номеро юрт, УМОПО "Шунды" - "Эколагерь-98". В. КАПИТОНОВ. ЭСКЕРОН ПАЛАТА ШЕКЪЁСТЫ ШАРАЯ Кун Кенешлэн Эскерон палатаез сэрттӥз-пертчиз "Удмуртавтодор" кун предприятилэсь ужамзэ: кызьы со сюресъёсъя улосвыл фондлэсь коньдонзэ кутӥз, налогъёсъя законодательствоез быдэсъяз. Уно шекъёс шараяськизы. Кылсярысь, "Удмуртавтодор" предприятие быдэстоно ужъёслэсь дунзэс Правительствоен кенешытэк юнматэм. Предприятиысь кивалтӥсьёсты возёнэ, техника басьтонэ, ужасьёслы юртъёс пуктонэ коньдон висъям ачиз тодэмъя. Казань - Малмыж - Пермь - Екатеринбург сюресэз лэсьтонэ вуэм уксёлэн 776 миллион манетэз Уваын но Сюмсиын кык коттедж пуктонэ кошкемын. Премиос тыремын, законъёсты тӥяса. Мукет та выллем учыръёс шараямын. Эскерон палата та пумысен вань материалъёсты Удмуртиысь Правительстволы ыстӥз. Правительство ужрадъёс кутӥз но со сярысь Эскерон палаталы ивортӥз. Али "Удмуртавтодор" предприятие шекъёсты тупатон бордын ужа. Кылсярысь, сюресъёсты тупатъянъя но возёнъя нормативъёс кылдытэ. Коттеджъёсты пуктонэ кошкем коньдон быдэсак берыктэмын Удмуртиысь Сюресъёсъя улосвыл фондлэн уксёез чотын. Эрекчаса тырем премиос 1997 арлы сметаысь куштэмын. Пичи Пургаысь Сюресъёсъя управленилэсь кивалтӥсьёссэ штраф тырыны косэмын, коньдонэз тус-тас каремзы понна. Эскерон палата 29 мае ортчем заседанияз пусйиз, сюресъёсъя улосвыл фондлэсь коньдонзэ умойтэм кутон герӟаськемын нормативной документъёслэн ӧвӧлэнызы но Удмурт Республикаысь Правительстволэн "Удмуртавтодор" предприятилэсь ужамзэ эскерымтэеныз. "Удмуртавтодор" кун предприятилэн ужамез азьланяз но чакламын луоз. П. ИВАНОВ. ТРОИЧА Троича - Иисус Христослы оскисьёслэн быдӟым праздниксы. Со сӥземын апостолъёслэн Святой Духен пумиськемзылы. Иисус Христослэн улӟемез бере витьтонэтӥ нуналэ солэн дышетскисьёсыз, апостолъёс, но Инмарлэн Анаез Иерусалимын вӧсясько вылэм. Шӧдтэк шорысь инбамын куашетэм кылӥськем, зол сильтӧл потыку кадь, но тылгизьыос апостолъёс вылэ пазяськиллям. Святой Дух соос пушкы пырем, но апостолъёс уно кылъёсын вераськыны кутскиллям, Инмарлэн улонэныз, ужъёсыныз тодматыса. Озьы Святой Дух апостолъёслэсь осконзэс юнматэм, Иисус Христослэсь верамъёссэ тодазы вайытэм. Быръёнъёс азьын ТУЛЫС ТРОСГЕС ВАЛ Кызьы ивортӥз милемлы Киясовоысь быръёнъёсъя ёрос комиссилэн кивалтӥсез Юрий Иванов, 5 июле татын быръёзы 35 депутат. Мандат понна нюръяськонэ пыриське 71 мурт. Соос пӧлын тросгес кивалтӥсьёс но специалистъёс, ужбергатӥсьёс. Вань одӥг пенсионер но. Пусйымон соиз. Оло гужем кысык ужъёсын сэрен, оло быръёнъёс акыльтэмен, таяз учыре калыклэн политикае пыриськемез туж ик уг поты кадь. Кылсярысь, тулыс вылтӥ депутатэ кандидатэ 94 мурт ӵектэмын вал, табере - данаклы ичигес. Умойлы-а, уродлы- а со, тодом ни, ӵапак толэзь ортчыса. О. МАРКОВ. Валэктэ юрист Сэрегез нуэ адвокат Лилия Шкляева КОЛХОЗЫСЬ ПАЙ Вордски 1936-тӥ арын. 1952-тӥ - 1972-тӥ аръёсы ужай колхозын. Ас мылкыдыя выжи Госстрахе, отысен потӥ пенсие. Колхозлэн правленияз вазиськи, ваньбурен (имуществоен) пайме курыса. Со пумысен закон ӧвӧл, пе. Шонер-а валэктӥзы? Ю. Борисова. 1992-тӥ арын 4-тӥ сентябре Россия Федерациысь Правительство юнматӥз "Агропромышленностья комплексысь предприятиосты но организациосты нимаз кузёослы вузан (приватизация) но выльысь радъян (реорганизация) радлык сярысь" постановление. Отын тупатэмын колхозъёсын, совхозъёсын но гурт хозяйствоысь кун предприятиосын та ужез нуон положение, адямиослы музъем но ваньбур (имущество) висъян амалъёс. Котькудаз выльысь радъяськись (реорганизацие сюрись) колхозын но совхозын тупатӥсько музъемъя но ваньбуръя пайёс. Ваньбур басьтыны правоё муртъёс пӧлы (перечене) положениысь 14-тӥ пункт пыртэ: а) хозяйствоын ужасьёсты; б) бадӟым (уважительной) муген огдырлы кошкемъёсты; в) хозяйствоысь пенсионеръёсты. Ужась коллектив аслаз решениеныз сыӵе перечене кутыны быгатэ хозяйстволэн улосвылаз (территорияз) интыяськем социальной удысъя объектъёсын ужасьёсты, хозяйствоын азьвыл ужамъёсты, нош озьы ик хозяйствоысь 1992-тӥ арын 1 январь бере ужысь кулэстэмъёсты. Ваньбурлэн котькудӥзлы висъяно быдӟалаез тупатӥське огъя ваньбурез кылдытонэ пыриськемезъя. Сое чотан амалэз быръе ачиз коллектив, соку лыдэ басьто яке уждунэз, яке ужлэсь секытсэ-капчизэ но мукетсэ. Социальной удысын тыршисьёслы пай озьы ик тупатэ ужась коллектив. Асьтэ ужпумдыя, Ю. Борисова эш, тӥ гожтэтэн (заявлениен) вазиськелэ колхозлэн правленияз. Отын кулэ решение кутыны но ваньбур люконэ пыриськонъя тӥлесьтыд правоостэс валэктыны. ВОРДСКЕМ ГУРТЭ ӦТЕ... Тани мон нош вордскем гуртам, Тани ӧте тодмо урам... Уллапал, Выллапал, Ӟучпал, Итым пролка, Мунчо урам... Ува ёросысь Выль Вамья гуртын улӥсьёслы но отысь потэмъёслы туж тодмо та нимъёс. Ас иськавын-бӧлякъёссэс, ӵыжы-выжыоссэс, гольык пыд бызьылэм эшъёссэс соос инвожо толэзьлэн 12-тӥ нуналаз ӧтё ас гуртазы юмшаны-шулдыръяськыны. Люкаськоно ӵукна 10 часлы. *** Тӥледлы дуно ке вордскем гуртты, тодады возиськоды ке пинал дыръяды бызьылэм интыосты, ваньдэсты витиськом Ува районысь КОСОЕВО гуртын 12 июне 14 часын. ВАВОЖЫН НО ВАНЬ БАЗАР Берло дыре вань Россия - бадӟым базар, шуо. Вавож черкогурт Россилэн люкетэз бере, озьыен, со но бадӟым базарлэн пичи юдэсэз. Татын вузкарон Вавилонзы интыяськемын... шонер, гуртлэн шораз. Зэм, со ӧжыт кельше зэмос базарной площадьлы. Быдӟым классикен гожъям Сорочинской ярмаркаозь но уггес сузьы. Гурт кузя уг чузъяськы етӥз вузкарисьёслэн ушъяськыса черекъямзы, арган шудэм, атас чоръям, пудо бӧксэм но мукет базар куара. Ма, вузъёс но синмез бордазы сокем уг кыско. Ваньзэ сое адӟыны луэ мукет интыосысь но, магазинъёсысь но ларёкъёсысь. Гурт базар ке но, татысь уд шедьты карнанэз ик, яке тусез, яке чечы, яке парсьпи... Оло, умойтэм дыре-а ми тупамы? Бусы ужъёс быремын ӧй вал на угось. Оло нош, гуртоослы "базар висён" паласькыса ӧз вуы на? Котьма ке но, Вавож но калык радысь кылемын ӧвӧл: бездытгес ке но, солэн но аслаз базарез вань. Г. ТИХОНОВ. В. КАМАШЕВ (туспуктэмез). Ярато ик ӝоглыкез "джигитъёс" Таӵе суредэз адӟиз журналистсъёсын бригадамы кылем пятницае Нылга дорын . "Жигули - шестёрка" ез юбое мырӟиськем. Со азьын кӧня ке пол погыльскем. Юболэн пыкетэз чигемын. Мар машиналы луэмын, снимок вылын умой адӟиське. Ӝоглыкез "Жигулилэн" пичи вылымтэ, шӧдске. Кузёосыз, Вавожын улӥсь азербайджанецъёс, больницае келямын. Машиназэс но кылем вуззэс (улмо) возьмаса пуке мукет машинаысь эшсы, со но Вавожысь ик азербайджан пи. Со ик лэзиз снимок лэсьтыны, со понна тамак курыса. Г. Столбов. Тодмо кылбурчи, кылчи, кылтодон наукаосъя кандидат Анатолий Уваров та нуналъёсы пусъе куатьтон вить арессэ. Огшоры ӧвӧл та адями - ортчем дыр ӵоже бадӟымесь гурезьёсты берыктӥз. Лыдӟисьёс кие вуттӥз быдӟым удмуртъёс сярысь "Югдытӥсьёс" книгазэ, сюлмысь тыршыса люказ быдэс дуннеысь калыкъёслэсь тужгес ӟеч куинь сю куатьтон выжыкылзэс, дасяз но поттӥз мадьяр литературалы сӥзем антология. Со сяна, Анатолий Николаевич шаерамы но, кунгож сьӧрын но лулысь-сюлмысь пыриськылэ финн-угор кылтодонлы сӥзем ужрадъёсы. Лыдӟисьёс тодматскизы ни кун сьӧрысь тужгес тодмо адямиос - Бернат Мункачи, Петер Домокош, Жан-Люк Моро, Геза Кепеш, Инкери Кильпинен, Райл Бартене, Сара Хайникяйнен, Иштван Козмач - сярысь гожъямъёсыныз. Матысь дыре вуттыны малпа тодмо тодосчиос Энико Сий, Ева Тулуз сярысь мадёсъёссэ. Куатьтон вить арес тырмеменыз ӟечкыласа, та адямилы эшшо кужмогес луыны мылкыд кариськом. Ноку эн вамышъялэ тӧлъя! Анатолий УВАРОВ МАДЬЯР ШАЕРЫСЬ СЮРЕСЧИ Повестьысь люкет Бернат Муканчи ӧз ик шӧдылы ӝомыт луэмез. Гожъяськон ӝӧкез сьӧрысь султӥз но, тыл ӝуатытэк, укно дорысь креслояз пуксиз. Азьвыл со ноку но таӵе ӧз жадьылы. Шудӥсь, задор мылкыдын ӝог гожтылӥз монографиоссэ, статьяоссэ, капчиен вазиськылӥз пумтэм вуись гожтэтъёслы. Нош сизьымдон сизьыметӥ аресаз потэм бере, кема пукыны ӧз быгаты ни: ӟигартэм-катьтэм пуксьылӥз укно дуре, учкылӥз Будапештлэн ӵыдонтэм чебер ульчаяз утцае, Байза сюрес сьӧрысь Петёфи юрт шоры. Акшан вуыку, кырын чалмытоме, ӵужектыны кутскем сентябрь писпуос но шильыртэмысь дугдо. Инкуазь туэ понна быдэстӥз ни ас ужзэ: тысьёс-мульыос сётӥз. Нош Мукачи кӧняетӥ сӥзьылзэ тырше ни берпуметӥзэ зэмос емышсэ, вуттон вылысь... Озьы но солы весь ӧжыт на. Ӝӧк вылаз - машинкаен печатлам ог сюрс вить сю бамъем ужез. "Фольксбройхен унд фолькдихтунг дер вотякен" нимаське со. Кык даур вискысь удмуртъёслэн визьбурзы, улонзы-вылонзы сярысь аспӧртэм энциклопедия луыны кулэ та уж. Татын люкамын соослэн улон сямъёссы, вашкала мадьёссы, куриськонъёссы, осконъёссы, выжыкылъёссы, кырӟанъёссы, юриськонъёссы-каргаськонъёссы, визькылъёссы, лэчыт веранъёссы, мадиськонъёссы. Ваньмыз со артысь артэ удмурт кылын но, немец кылэ берыктыса но. Нош кӧня на чыры-пыры эскеронъёс. Эх, мед луоз вылэм вӧзаз одӥг ке но удмурт адями! Нош али со быдэстонтэм малпан. Вань удмуртъёс, военнопленнойёс, кемалась ас доразы бертылэмын. Венгрие кылемъёссэ уд но шедьты ни: фамилиоссэс гинэ но вошъязы. Нош ужез печатлано бере, ӵог быдэстыны куро. Финляндиысь дыртытыса олокӧня гожтэтъёс вуизы ни. Мункачилэн таиз ужез берпуметӥез - юсь кырӟанэз луоз, дыр. Берло вакытэ со ӵемысь висьылэ, ачиз но шӧдэ ни лябӟемзэ. Вань улытозяз тыршиз венгер кыллэсь выжыоссэ утчан бордын. Соос кыстӥсько вылэм туж кыдёке - вашкала дауръёссы, пурысь Урал но Волга вискысь Кам выллэн инбамез вадьсын пиштӥсь кизилиос улэ, отын улӥсь калыкъёс доры. Венгръёс дас вить даур талэсь азьло улэмын Быдӟым Кам котырын, сӥё-дано Югралэн пӧзись пуртыяз, мансиосын, удмуртъёсын артэ. Венгръёслы кылъя тужгес но матысьёсыз ӵыжы-выжыос - мансиос, собере удмуртъёс. Та малпанэз понна, со сюлмысь тыршиз удмурт, берлогес манси кылэз, фольклорез, калыклэсь улон- вылонзэ тодон бордын. Яратэ со Кам котырысь калыкез. Берло ни, ӟырдыт гажаменыз но ӟеч лэсьтыны тыршеменыз, эсьма, куддыръя пыкылыса но, соосты мынам мусо удмуртъёсы шуыса веран сямлы пӧрмиз. Сыӵе йылолыз кемалась кылдӥз, луоз. 1880-тӥ арын Казаньын потӥз Борис Гаврилович удмурт фольклор но калык сямъёс сярысь книгаез. Та ужез лыдӟемез бере ик кызь куинь аресъем Бернат гожтӥз: "Удмурт - ужез яратӥсь, капчи но лякыт сюлэмо адями, кыланы-бураны но мыло-кыдо". Нош со дырысен кӧня ву бызиз, кӧня сӥзьыл куашетыса ортчиз ни! Кемалась-а пусйизы вал солэсь сӥё-дано, сизьымдон арес тырмон юбилейзэ?.. Вордӥськем нуналэныз данъязы Венгриысь Тодонлыкъёсъя академилэн президентэз Альберт Берзевици, Мадьяр этнографияя обществолэн кивалтӥсез Йожеф Балашше. Баллаше ик кичӧлтӥсь луиз, Мункачиез ӟечкылан вылысь, синпель книга поттон ласянь. "Мадьяр кылэз утён" журналлэн одӥг номерез быдэсак сямен сӥземын вал юбилярлы. Мункачилэсь улон сюрессэ, ужамзэ вылӥ дунъязы финн-угор кылъёсты эскеронъя дуннеысь тужгес но сӥё-дано учёнойёс - Финляндиысь Эмиль Нестер Сетеля, Юрьё Вихманн, Франциысь Аурелиен Саувагеот, Германиысь Эрнс Леви, СССР-ысь коми учёной Василий Лыткин но мукетъёсыз яркытэсь визьёс. Нош кӧня меда вал ас дорысьтыз, Венгриысь, ӟечкыланъёс? Ӧжыт уд шуы. Кин быгатӥз - ваньмыз сӥлы кариз. Нырысь ик - матысь эшез но кивоштӥсез, коми но удмурт кылъя кылъёсъя специалист Дэвид Фокош-Фукс, собере - пор кылэз эскерись, удмурт фактъёсты но уже кутӥсь Ӧдӧн Беке, вал на Аладар Бэн - дуннеысь литературая 1911-тӥ арын ньыль томъем история кылдытӥсь но поттӥсь. Солэн куремезъя, отчы удмурт литературая пичи люкет Мукачи но гожтӥз. Усто адями Аладор Бан: эстон кылысь "Калевипоэт" эпосэз венгер кылэ берыктӥз. Юбилеяз лыктӥз капчи мылкыдо эшез - Бела Викер. Со калык музыкаез эскере, кылбуръёс но гожъя, "Калевала" финн эпосэз но венгер кылэ берыктӥз. Ваньмыз та ортчем дырысь. Нош али - 1937-тӥ ар. Пересез но, пиналэз но Мукачиез гажало, сыӵе арлыдын но ужамез понна. Вань улытозяз, со кык полэс тыршоно луиз. Куамын арес дыръяз ик вал ини Венгриысь Академилэн член-корреспондентэз, Финляндиысь Академилэн сӥё-дано членэз. Ма, нимыз пиштӥз, нош нимызъя уж сётон сярысь ӧз но малпаське университетын. Венгриын 1919-тӥ арын Советской власть вормем бере гинэ сётӥзы финно-угристикая кафедра. Но кафедраен кивалтӥз Мукачи. Советской власть 133 нунал улытозь гинэ. Собере азьлоез ик власть вормиз, реакция кутскиз, кафедразэ талазы. Вылаз ик - толэзь пала кысказы. Коммунистъёсын кусып воземзэ утчазы. Но ӧз шедьтэ. Кыӵе партиысь тон, Мукачи, шуыса юамзылы, со валэктылӥз: мынам вань улонэ герӟаськемын гуманизмен". "Осконтэм! Сыӵе партия ӧвӧл!" - кесяськылӥзы допрос нуисьёс. Хорти дыръя возьытэз, зэмлыкез валан, адямиез гажан но ас дандэ сярысь вераськыны быгатылӥзы полицейскойёс но выль режимез утисьёс-чакласьёс гинэ. Мукет нациысь, религиысь, начар выжыысь ӝутскем учёнойёсты ултӥяллязы. Тодазы ваизы, дыр, куанер еврей калык пӧлысь потэмзэ но. Озьы со вань улытозяз быдэсъяно луиз ачиз кадь ик ултӥям еврей пиналъёслэн школаоссыя инспекторлэсь ужзэ. Со сямен ик семьязэ возиз, куинь нылпизэ будэтӥз. Нош зэмос, яратоно ужзэ, наукаез", "гыриз" квартираысьтыз та комнатаын, ужен кабинетаз. Борддоръёс валлин радэн сыло ӝажыос, шкафъёс. Ваньзы соос тырмытэмын дуннеысь вашкала но туала книгаосын, уноез кыскемын сурон вылэн, зарнивуам букваосын шуккемын. Кытын но ку гинэ печатламын ӧвӧл соос! История, социология, философия, право, религия, чеберлыко литература, фольклор - ваньмыз герӟаськемын Мукачилэн уженыз - этнологиен но лингвистикаен, калыкъёслэсь улон-вылонзэ но вераськон кылзэс тодонэн. Трос кылъёсын лыдӟиське Мукачи. Бен книгаосыз но со сярысь ик верало: мадьяр, иврит, латынь, турок, ӟуч, немец, француз, иран, манси, удмурт кылъёсын соос. Удмуртъёслы сӥзем книгаосыз пӧлын аслаз вордэм-утем, люкам-бичам но югыт дунне вылэ поттэм макеосыз но вань: удмурт кылын печатлам макеосыз гинэ куать том. Куать книга... Ай статьяоссэ гинэ вератэк. Нырысез ужез Борис Гавриловлэн книгаезъя "Удмурт кылъя эскеронъёс" нимаське. Кыкетӥез, удмуртъёс доры 1885-тӥ арын ветлэмез бере, кык ар ортчыса печатламын "Удмурт калык кылбуретлэн традициосыз" нимын. Собере, 1890-тӥ - 1896-тӥ аръёсы потӥз ньыль томен удмурт-венгер кыллюкамез. Нош тани печатланы инты шедьтытэк, кызь ар пала кылле ни бадӟым ужез - "Удмурт калык сямъёс но калык поэзия" (удмурт-немец кылын). Та узыр кылбурет люкамын вал 1915-тӥ - 1917-тӥ аръёсы нырысетӥ мировой война вакытэ пленэ сюрем удмурт солдатъёслэсь. Нырысь ик, валэктонъёс но берыктонъёс лэсьтэмын венгер кылын. Нош потоз-а книгаез, уз-а - осконъёс кыдёкетӥ лобазы. Табере тодмо: печатлалозы сое Хельсинкиын, Финн-угор обществоын. Та ласянь юрттӥзы кун кусыпъёсыз: 1936-тӥ арын гужем сое утчаса шедьтӥз финн кылъя сӥё-дано тодосчи Артур Каннието. Со лыктэм Будапештысь университетлэсь куинь сю аръем юбилейзэ пусйыны. Ачиз финн-угор обществолэн тӧроез луэ. Таиз туж шумпотымон ивор. Нош тросэз мед валалозы шуыса, берыктоно немец кылэ. Сыӵе угось наукаын сям: немец кылэз лыдъяло дуннеысь учёнойёсты герӟась кылэн. Нош зэмзэ верано ке, азьпалан англи кыл вормоз, дыр. Финн-угристика, финно-угристика... Ас странаязы кивалтӥсьёс сӥё-дано мадьярлык но солэн сяськаяськонэз сярысь трос верасько ке но, со тырттэм шалтыртон но чеберъяськон гинэ кадь потылӥз Мункачилы. Миклош Хорти, Венгрилэн 1918-тӥ арысен диктаторез, зэмос наукаез азинтон сярысь ӧз ик малпаськылы. Ма, калык азьын сюлмаськемъяськиз ик, культуралы, наукалы шуыса, юртъеръёс но лэсьтылытӥз. Нош сӥлы карылӥз сыӵеоссэ учёнойёсты, кудъёсыз ымысьтызы шукы потымон ушъязы быдӟым фашист Германиен огазьын азьлане йыгмыт мынонэз. Тонэ вите гуртэд Дышем сямъя инвожо толэзьлэн нырысетӥ ӝыныяз ортчыло гурт праздникъёс. Вордӥськем палъёсазы бӧлякъёсынызы пумиськыны вуо элькунмылэн пӧртэм сэрегъёсаз улӥсьёс. Уноез пумиськонъёс туэ ортчозы вуоно шутэтскон нуналъёсы. 12 июне, кылсярысь, люкаськыны малпало Якшур-Бодья ёросысь Ӟеглуд гуртын вордскем-будэм муртъёс. Ӵуказеяз пумиськозы районысь ик Курчум гуртысь потэмъёс. Вашкала сямез улӟытыны малпазы туэ вуж затчыос. Куке но соку Старые Зятцы черкогуртын Пасха бере укмысэтӥ пятницае бадӟым базар ортчытъяло вылэм. Отчы, пе, Малмыжысь, мукет интыосысь но вузчиос вуыло вал. Азьлозэ тодэ вайытон вылысь, 12 июне гуртын бадӟым праздник ортчытыны туртто. Гуртоос витё доразы уно куноосты. Шулдыръяськонэз радъянэ Якшур-Бодьяысь кивалтӥсьёс, специалистъёс но пыриськозы. И. КРИЧЕВ. Кылисько тонэн, гуртэ! Пичи Пурга районысь Брангуртын механизаторъёсты та вакытэ секыт шедьтыны. Бусыын соос кык сменаен, бер уинозь ужало. Егит трактористэз Алексей Глуховез пумитам ДТ-75 корт "эшсэ" тупатъян-вӧян висказ. Усыян ужъёссэ йылпумъяса, со кизем бӧрсьы музъемез лапкатыны дасяське. Кызьы вера Алексей, эстӥськонэн шуг-секытъёс татын уг кылдо. Тахника вужмемын, соиз зэм. Уг тырмо тупатъян корт тӥрлыкъёс, тужгес секыт "эмъяны" гусеничной тракторъёсты. Озьы ке но, "10 лет УАССР" нимо совхоз сокем куанер шуыны уг луы. Таӵе вакытэ но со немец маркаен кык комбайн басьтыны быгатӥз. Шумпоттэ мукетыз но. Татысь механизаторъёслэн шор арлыдзы 35-40 арес котыр луэ - кын корт куртчон вакытсы. Вань гуртэ кылись егитъёс но. Тани Алексей но Армиысь кылем арын гинэ бертӥз. Школазэ йылпумъямез бере, совхозын слесарь луыса ужаны кутскиз вал, табере трактор сьӧры пуксиз. Городэ кошкыны со ноку ӧз малпалля. Иське, гурт кивоштӥсьёслы уз ёрмы. Со улоз, ужалоз. Э. Кумачева. Туспуктэмез В. Камашевлэн. Бускельёсмы дорын Ӵемтон "Удмурт дунне" газетысь журналистъёс 1993 арын сӥзьыл дорамы вуылӥзы вал. Соос пыр-поч тодматскизы удмурт гуртъёсын. Ас синъёсынызы адӟизы улэм-вылэммес. Журналист Елена Виноградова "Тупалъёс мӧзмо та палъёслэсь" материалаз пусйиз: "...Поска гурт - "Рассвет" акционер эштослэн ёзэз. Муосыз начаресь: пыд улын - одӥг луо. Зэм, со нокыӵе изъян уг вайы - гуртоос будэто таза ю тысь..." Со дырысен ортчиз ни ньыль ар. Маке воштӥськиз меда та палъёсын? Кыӵе уло-выло удмуртъёс али? Та юанъёс ик вуттӥзы монэ огпол но вуылымтэ улосэ. Нюлэсъёс, лудъёс, нёжалъёс сьӧры пуксемын Покчи Гозек удмурт гурт. Солэсь кытчы интыяськемзэ тросэз уг тодо, дыр, Кильмезь ёросын но. Райцентрлы но матын ӧвӧл, 35 иськем. Сюрес шуыны но уд дӥсьты сое. Тэльмырон, курадӟон инты. Кужмо машина но шуген ортче. Татӥ гӧп, буран бере ортчон сярысь эн ик малпа. Нош тулыс-сӥзьыл воксё дэрие выёд. Асьсэ эштоссылэн бульдозерез гинэ но ӧвӧл. Пельскем бере лымыез Сюрек леспромхозлэн тракторез чылкытатэ. Нюлэс ке ӧй нуллысалзы, та удмурт гурт толалтэлы воксё люкемын луысал югыт дуннелэсь. Таӵе интые пуксемын "Маяк" эштослэн гуртъёсыз. "Маяк" кылдӥз 1996 арын. "Рассвет" эштослэсь люкиськыса, нимаз хозяйство кылдытӥзы вал. Та эштосын ог 160 мурт улэ, нош ужасез - 60 адями. Бусыос, минерало сылалъёс шедён аръёсы но сокем узыр ӧз улэ: гектарысь 6-8 центнер ю тысь люкаськылӥз. Зэм, люкиськытозязы бадӟым хозяйство араз 80-90 тонна сӥль, 300 тонна йӧл вузалляз. Табере "Маяк" век-век гинэ шока на. Ортчем арез 130 миллион (вуж дунын) ыштонэн йылпумъяз. Со сяна но трос гинэ тыронъёсыз. Ужась калыклы 32 миллион манетлы пунэмаськемын. Уждунзы сокем вылӥ ӧвӧл, котькуд ужасьлы толэзяз 181,7 сюрс манет гинэ усе. Кызьы-о азинскоз колхоз, тырмоз-а кужымез йӧн-йӧн пыд йылаз султыны? Та сярысь юасько колхоз предлэсь Владимир Иванович Рыжеволосовлэсь. Со колхоз кылдэм дырысен кузё. Секыт лулске егит воргорон. Вузаны пудооссы ӧвӧл ни. Фермаязы кылемын кык ветыл но кык ош. Ярам ай, парсь лыдзэс тямысысен кызь укмысозь йылэтыны йӧндыризы. Кыӵе сӥль, йӧл поттон, вузан сярысь веарськонэз? 880 гектар кизёно музъемзы вылысь но кылем аре 60 гектаре валэс юос, сомында ик ӟег кизизы. Кылемез буш кылиз, отын табере выль нюлэс ӝужа ни. Ярам ай, туннэ нуналлы нюлэс сюдэ-вордэ. Сое вузаса, 180 миллион манет пыриз ик вал колхоз кассае. Басьтылӥзы эстӥськон вӧй, трактор-машинаослы кулэ ёзъёс. Покчи Гозекын но, Черпа гуртын но семьяос пичиесь ӧвӧл. Котькудаз 5-7 мурт. Кызьы-о улэ ужась калык? Туж куанер. Уждун уг шедьы бере, пенсия басьтӥсед ке ӧвӧл, туж секыт. Таяз учыре но юрттэ нюлэс. Кызьпу вайёсты тӥяса дасяло ӵужон, сое огзэ 500 манетэн вузало. 3-4 иськеме, салазкиен нуналаз 5-6 пол ветлы ай. Огпол ваемысь 15 ӵужон пӧрме. Куд-огъёсыз ӝожтӥсько: "Нянь пыжымон пызьмы гинэ но ӧвӧл. Колхоз басьтыны уг быгаты. Соин ик пудо сюдоно фуражез пуж пыр пужныса нянь пыжиськом". Алигес газет печатлаз вал Куӟебай Гердлэсь 1920 арын гожтэм "Вина юон - удмурт калыклы бырон" нимам статьязэ ("Удмурт дунне" �32). Автор гожтэ: "...Мынэ ай удмурт гуртъёстӥ. Котьку тӥ отысь шедьтоды кудӟем муртъёсыз. Юон удмуртъёс пушкын вӧлдӥськемын. Юон быдтэ ачме удмурт калыкез". Та кылъёсты тодам вайыса ик юан сётӥ вал колхоз кивалтӥсьлы. Киыныз шонтӥз: "Юо, визьзэс ыштымон юо. Тросэз дораз кумышка пӧзьтэ". Тани та ик луэ бадӟым сьӧлтаськон муг. Та юн сьӧлтэт адямилы азьлане вамышъяны эрик уг сёты ни. Кудӟемъёслы пумит нюръяськыны Владимир Ивановичлы огназ секыт. Юисьлы чурыт кыл ке вера, коньдонэн ке штраф тырытэ, со вылэ ик чагиськонъёс, ӝожтӥськонъёс пӧраса гожъяло. Бен, вань ай солы юрттӥсьёс, сэзь ужасьёстэк воксё ӧвӧл гурт. Соос ик дурбасьто, азьпаллы осконлык кузьмало. Районысь кивалтӥсьёслы но вунэтоно ӧвӧл вылэм палэнэ, нюлэсъёс пӧлы интыяськем Покчи Гозек гурт сярысь. Нырысь-валысь ӟеч сюрес лэсьтыны юрттоно, дыр. Сотэк, кин ке висьыны ке усиз, тылпу ке ӝутскиз, эсьмаса, Кильмезьысь машина гинэ но лыктыны уз быгаты. Пересьёс, пиналъёс, ужась калык янгыш ӧвӧл ук таӵе пеймыт сэрегын вордскемзылы. Мед югдоз вылэм "Маяк". Ляб югдытӥсь тылсиез коть тёпак кысыны медаз шедьты. Н. Никифоров. Киров область, Кильмезь район. ШУМПОТТОМ БУСКЕЛЬЁСМЕС Коми-пермякъёс кылмыя асьмелэн самой матысь ӵыжы-выжыосмы луо. Лыдзыя соос ичи, культуразэс но науказэс азинтонын специалистъёссы уг тырмо. Соин валче округлэн администрациез юрттэт курыса вазиськиз Удмурт университетэ. Асьме дорын коми- пермякъёс быгатозы экономистлэсь, финансистлэсь, художниклэсь специальностьёссэс басьтыны. Со пумысен огкыл гожтэмын. Июнь пумын Кудымкарын ортчоз финн-угор конференция. Отчы дасолэсь трос удмурт тодосчиосмы но мынозы. Финнъёс тунсыкъясько удмурт вӧсяськонэн Алнаш районысь Кузёбай гурт - аспӧртэмлыко оазис. Татын исатэк кылемын вашкала вӧсяськон сямъёс, инты. Соосын тунсыкъясько пӧртэм кунъёсысь этнографъёс. Арня пала татын улӥзы Финляндиысь профессоръёс: Хельсинки университетысь Анна-Леена Сиикала но Йоуэнсу университетысь Пекка Хакамиес. Анна-Леена Сиикала университетысь удмурт студентъёслы "Калевала" сярысь лекция лыдӟиз. Быръёнъёс азьын Пӧртэм выжыысь потэмъёс Якшур-Бодья ёросын депутат луыны туртто пӧртэм выжыысь потэмъёс. 94 кандидат пӧлын вань мордвин, пор, коми-пермяк, молдаванин. Ёрос комиссия озьы ик пусйиз куать бигерез. Ваньмызлэсь трос, валамон ни, удмуртъёс но ӟучъёс. Нырысетӥосыз, кылсярысь, 48 мурт. Пӧлысьтызы кин меда мандат басьтоз? Со тодмо луоз вуоно толэзе. Та сярысь милемлы ивортӥз, быръёнъёсъя ёрос комиссилэн кивалтӥсез Валентина Иванова. О. МАРКОВ. ПАРК ЧЕБЕРСКЕ Ижысь Киров нимо парклэн кырсёмемез сярысь берло дыре трос вераськиськом. Табере со, оло, выльысь улӟоз-чеберскоз. Ортчись арня быдэсак сӥземын сое утялтонлы. Таӵе аспӧртэмлыко кузьым дасяз городысь администрация, Ижевсклэн нуналэзлы сӥзьыса. Э. ВАСИЛЬЕВА. ШАХМАТ Пермьын ортчиз шахматэн шудонъя Россилэн кубокез понна нюръяськонлэн одӥгез этапез, отын кужымзэ мертаз Россиысь пӧртэм городъёсысь 80 шахматист. Ӵошатсконъёсы пыриськизы Ижысь но спортсменъёс: Андрей Быков, Владимир Гребенкин но Максим Озолин. Пӧлысьтызы тужгес удалтӥз УдГУ-ысь студентлы Андрей Быковлы. Егит спортсменъёс пӧлын со одӥгез усто шахматист вал. Нош огъя ӵошатсконъёсын Андрей 17- тӥ интые потӥз, 9 пӧлысь 5,5 очко люкаса. Удмуртилэн чемпионэз Владимир Гребенкин 9 очко пӧлысь 5-сэ люказ. Вераны кулэ, со урод ӧвӧл. Угось солы нюръяськоно луиз 4 гроссмейстерен. И. ВЕЛЬТМАНДЕР. Инкуазь но адями Тӧдьы кызьпу но Тӧдьы ошмес Милям гуртмы котыр ласянь нюлэсъёсын, гурезь бамалъёсын котыртэмын. Лыктӥсь мурт соку ик синйылтоз - гуртмы пурты пыдэсын кадь адӟиське. Урам валлин но гурезь вань на. Сое ми Выльгурт шуыса нимаськом, нош уллапалаз интыяськем урамъёсыз - Вужгурт. Быдэсакыз со Гондыргурт луэ. Пӧртэм нимъёссы гурезь бамалысь вырйылъёслэн но. Шонерак школае тубон палзэ Сергей гурезь шуо. Гуртмылэн выллапалазгес Петыр гурезь вань. Выльгуртэн Вужгурт вискытӥ, гурезь выжыын ик, шур бызе. Со кыклы люке Гондыргуртмес. Та пичи шурмы вамен - Чимошур шуо сое - дауръёс ӵоже бызе ни дун чылкыт ошмес. Потэ со кызьпу выжыысь, шур сопалась. Кибашлы воргоронъёс сюлмаськиллям ошмесэз шур тапала выжтыны. Витьтон метр кузьда пу дырды лэсьтӥллям, ӝутэмын со 20-30 метр ӝуждалае. Озьы ошмес ву кынмыны но, кырсёмыны но ӧз сётӥськылы. Ӝог бызись кезьыт дун ву юри лэсьтэм тусе вияз. Ку со лэсьтэмын, кыӵе аре - нокин но вераны уг тоды ни. Аръёс отчемъя, дядяйёсмы выль амал шедьтӥзы. Пу дырды бырыны, сисьмыны шӧта угось. Малпазы сое корт гумыосын воштыны. Тӥни озьы ошмес ву табере корт гумы кузя лыктэ, уй но нунал, гужемен толэн огдырлы но вис карытэк. Тямыстон куать аресъем Анна Савватеевна Охотниковалэн (Аннуш апайлэн) верамезъя, ошмесэз нырысь ик лэсьтэм Афин Григорьевич Виноградов. Нош куд-огез малпало, Даут но Ларифон Панков выжыос но вылӥллям лэсьтӥськонын. Ошмес син азьын ик, котыртэм пушкын часовняез вылэм. Нош кызьпу выжыын - оброс, отын вӧсяськылӥллям. Тӧдьы ошмес дорын шур валлинысь возь вылын дэра гужато вылэм. Ошмес вуэн одно ик пылатылӥллям выль кенэз. Нырысь выль кен дораз ведра-карнанэн ву вае, нош собере со вуэн ик ассэ пылато. Выль улон интыяз вань семьяезлы но, аслыз но шуд сӥзе. Ошмес вуэн ик вань пиналъёсыз пылато вылэм. Со дырысен ортчизы трос аръёс. Кивалтӥсьёс вошъяськемъя, Гондыргурт ёросын но югдур пӧртэм луылӥз. Улон вакыт чида. Пересьёслэсь йылолъёссэс но пумен вунэтыны кутскизы. Озьы ке но, асьсэлэсь сюдӥсь-сектасьсэс - Тӧдьы ошмесэз адямиос ӧз куштэ, чакласа, тупатъяса возизы. Бусыын ужасез-а, сюрес вылтӥ кошкисез- а, пудоез-а - ошмес ваньзэс секта. Кытчы гинэ уг мыно, отысь вуэз сьӧразы басьто. Гуртамы трос гинэ ошмесъёс, куйыос вал, соос ваньмыз кырсёмизы, жуг-жаген согиськизы урамъёсы, капка доры ву сётӥсь колонкаос пуктылэмен. Но солы котьку оскыны уг луы, сӧриське яке электрокужым уг сёто. Соку ми тыпак вутэк кылиськом, но котьку сямен милемлы Тӧдьы ошмес юрттэ. Кыдёкын ке но, ошмес вулы ветлӥськом. Огпол ошмеслэн эшез, тӧдьы кызьпу, лек сильтӧлэн пограны шедиз. Тӧдьы ошмес сое выльысь улӟытӥз - пушйиз мукетыз вайыз. Табере со кызьпу азьлоез кадь ик лабрес луиз. Озьы кык яратӥсь сюлэмъёс музэн, Тӧдьы кызьпу но тӧдьы ошмес вань улэпезлы шуд ваё, ортчемзэ тодэ вайыто. Гуртысьтымы егитъёс Леонид Спасскихлэн кивалтэмез улсын ошмесэз выльысь выльдӥзы: ву виян интыяз выль тусь лэсьтӥзы, тӧл но зор пыремлэсь лапас липизы. Тӥни озьы егитъёс сак утьыса возё песятйёссылэсь оскемзэс. Иван Мики. Алнаш район, Удмурт Гондыргурт. Академилы - 55 ар Ижысь Гурт хозяйствоя академилы туэ 55 ар тырме. Соин валче отын радъямын вал сӥё- дано пумиськон. Ужрадэ пыриськизы республикалэн кивалтӥсьёсыз Александр Волков, Павел Вершинин, Василий Жуйков, Михаил Кошкин но мукетъёсыз. 55 ар ӵоже академиын (азьвыл Гурт хозяйствоя институтын) дышетскизы 30 сюрслэсь ятыр егитъёс. Зоотехник, зооинженер, инженер-механик, инженер-электрик, экономист но мукет специальностъёс басьтыса, тросэз соос, республикаямы сяна, быдэс Россилы тодмо адямиос луизы. Ужало татын вылӥ тодон-валанъёсын академикъёс, профессоръёс, наукаосъя докторъёс но кандидатъёс В. В. Соколов, В. П. Ковриго, Р. С. Трикоз, Е. В. Собенников, С. Н. Ижболдина, Н. И. Гусев но трос мукетъёсыз. Туннэ академия республикаысьтымы одӥгез валтӥсь дышетскон заведениен лыдъяське. Пӧртэм шуг-секытъёс шоры учкытэк, татын усьтӥсько выль факультетъёс: ветеринарияя, нюлэс хозяйствоя но мукет. А. СУТУЛОВ. АЗЬВЫЛ УЛОНЛЭН БЕРВЫЛАЗ Кукуе ми нялтас гинэ пырим вал, пудо вордӥсьёслэсь берло ужъёссэс тодон вылысь. Но мар тамаша та куке но ушъян-данъян комплексын? Кыӵе сильтӧл ортчем фермаетӥ? Одӥгез гид кесямын, мукетыз но буш, аналтэмын. Пудо утисьёслэн юртсы но весовой адӟисько музъем зуркам бере кадь. Азбарын костаське кирпич, корт, кыӵе ке оборудованилэн кылем-мылем ёзъёсыз, тӥям пулъёс, пияла... - Быре ини, быре колхозмы,- шуэ фермалэн кивалтӥсез, со ик валтӥсь зоотехник, со ик бригадир Лидия Аркадьевна Лебедева.- Тани комплексамы ӟеч дыръёсы кысконо скалъёсмы гинэ сюрс пала вал, али ваньмыз-ӧвӧлэз сюро таза пудомы 380 йыр. Ужасьмы 17 мурт. Колхозамы 50 адями коть люкаськоз на-а, мар-а. Кытчы бен луизы колхозникъёс но пудо? Пудоез тыриськыны быдтӥзы, колхозникъёс нимаз кузёос кариськизы. Соос но, колхозысь потыкузы, пайзэс пудоен но басьтӥзы. Озьы ик колхоз бушаз. Али хозяйствоез эскерыса возе Арбитражной судэн ыстэм управляющий. 22 июле та суд ик чаклалоз, "Мир" колхозэз банкрот кароно-а, ӧвӧл-а. Таӵеез Воткинск районын гинэ ӧвӧл, быдэс Удмуртиын ӧй вал на. Сыӵе тӥни ужъёс. Нош пудо утисьёс кыштыр ужало. 24 мае ик скалъёссэс возь вылэ поттӥзы. Отчыозь нуналаз йырлы быдэ 5-6 килограмм йӧл кыско ке вал, али даслэсь уно. Матысь дыре скалъёссэс лагере уллялозы. Йӧл эшшо но йылыны кулэ. Озьы ик уло но ужало азьвыл улонлэн бервылаз. Г. ТИХОНОВ. Редакцилэсь. Ми одно ик берытском на ай та хозяйствое, Воткинск районысь "Мир" колхозэ. Мадёмы, маин быроз суд, кызьы радъяськоз гуртлэн улонэз. Коньдон дуннеын "Ижладабанк" но калык: нюръяськон кыстӥське, нокин уг вормы Уксёзэс "Ижладабанке" понэм адямиос кылем пятницае нош ик люкаськылӥзы банклэн Ижевскысь юртэз доры. Уг тодӥськы, кӧня вал соос азьвыл таӵе выллем ужрадъёсын, нош таяз учыре лыктӥз ог 200 мурт. 14 сюрс пӧям вкладчик понна туж ик трос уд шуы. Но ӵашетон таосызлэсь но тырмыт луиз. Собрание (яке митинг-а шуод сое?) кутскон азьын люкаськемъёс пӧлын вӧлмытэмын вал вкладчикъёслэн Удмуртиысь Правительстволы протестсылэн проектэз. Отын Правительство азе чурыт курон пуктэмын "чик ӝегатскытэк, матысь дыре ик югдурез тупатон вылысь кулэ ужрадъёс кутыны". Нош таиз пумаз ини. Но кутсконаз верамын, котькыӵе республикалэн страналэн правительствоез порядокез но аслэсьтыз гражданъёссэ но соослэсь правооссэс утьыны кулэ. Соиз озьы, пумит уд луы. Лыдӟом отӥяз: "Лыдъяськомы Удмурт Республикалэн Правительствоез "Ижладабанкен" герӟаськем югдур понна котькинлэсь юн кыл кутыны кулэ шуыса". Таиныз ини шуггес соглаш луыны. Малы одно ик Правительство? "Ижладабанк" солэн ӧвӧл ук. Оло, вкладчикъёс умойтэм малпанэ вуэмын, "Ижладабанклэсь" районысь ёзъёссэ (филиалъёссэ) "Евразия" банклэн басьтэменыз валче? Бен, со Правительстволэнбанкез-агентэз луэ, но таяз учыре со вылӥ кивалтэтлэсь уг юаськы. Басьтӥз, "Ижладабанклэсь" ёзъёссэ аслыз пайда басьтон понна, пӧям вкладчикъёссэ утён вылысь ӧз. Таосызлы нялтас удалтӥз гинэ, витьымтэ шорысь шуд усиз. Ӧйтӧд, мар ке пайдаез луоз меда вылӥ верам протест шуонлэсь. Калык пӧлын озьы ик вӧлмытэмын вал Кун Кенешын 3 июне ортчем совещанилэн решениосыныз бумага. Соосты малпаськыса, рос-прос лыдӟиськод ке, пӧлысьтызы куд- огез осконтэм мылкыд кельто. Кылсярысь, "Ижладабанклэн" акционеръёсызлы ӵектэмын расчётно-кассовой ужъёссэс та банк пыр ортчытъяны, отчы коньдон мед вуоз шуыса. Кызьы мон валасько, куашкам банкын коньдонзэ бергатыны соглаш луоз ассэ ачиз быдтыны малпам предприятие гинэ. Яке тани Ижевсклэсь Администрацизэ, пе, муниципальной предприятиослэсь бюджетной но расчётной счётъёссэс "Ижладабанке" выжтыны куроно. Та Администрациез ик косоно банклэсь вкладчикъёслы пунэме кылемзэ коммунальной юрттэт сётон чотын берыктонъя Программа дасяны (озьы гинэ уд но вала, ява). Ӟуч кылысь берыктыса, ваньмыз со серемес луысал, сокем ӝожмыт ке ӧй луысал. Одӥгез коть решение улонлы матынгес ик адӟиське: "УР-ысь Прокурорлы но Югдурез утёнъя министрлы пусъем уголовной ужез меӵак асьсэлы эскерыса возёно но вкладчикъёслэсь ыштонъёссэс берыктон вылысь, тырмыт ужрадъёс кутоно". Зэм но, кылдэм югдурез тупатыны быгатозы но, кулэ но тупатыны правоез утись органъёс. Банкын коньдон вал, ас кожаз со вӧй кадь ӧз шуна, кытын ке но, кин ке киын ке но, со али но вань. Лушкамын-а, ышиз-а, но кин ке но янгыш ук со понна. Озьыен, янгыш адямиосты но, ышем коньдонэз но утчан - прокуратуралэн но МВД-лэн ужзы. Нош Правительствоез но Кун Кенешез гульымтӥзы кырмыны турттон - пайдатэк но кулэтэм уж. Ярам, соос вкладчикъёслы бадӟым процентъёс ке сӥзьысалзы яке коньдонзэс "Ижладабанке" нуыны ке ӵектысалзы. Ӧй вал ук соиз но, таиз но. Котьку сямен ик, асьмелэн омырысь барыш басьтэммы потӥз. Кӧня пол улон возьматъяз ини, дунтэк сыр четлыкын гинэ луэ шуыса. Нокызьы но ум валаське. Собере кинэ ке но муртэз янгыш кариськомы, асьмеды ноку но ум. Тани мон люкаськемъёс пӧлысь адӟи мӧля вылаз тачак орденской колодкаосын воргоронэз. Мар, пӧй, песятай, трос-а коньдондэ ыштӥд? 12 миллион, пе. Уксёез Сбербанкын вылэм но 2 процент тыремзы ӧжыт потэмен, со отысь коньдонзэ басьтыса, "Ижладабанке" понэм... миым 9 сентябре! Калык вань дунне тыр ӵашетыку ини. Тӥни мын но вала адямиез. Ваньмызлы сямен ик, мыным но жаль пото пӧям вкладчикъёс, валаны луэ соосты. Но вожзэс медаз поттэ: соос нырысь ик асьсэос янгыш уксёзэс ыштэмзы понна. Республикаысь кивалтӥсьёслы тэльмырыса яке каргаса соосты, пайдаез уз луы, дыр. Югдурез ӧжыт коть тупатыны юрттозы правоез утись органъёс гинэ. Соос но вкладчикъёслы вань коньдонзэс берыктыны уз быгатэ ни. Сыӵе угось аспӧртэмлыкоесь но жалянэз тодӥсьтэмесь коньдон дуннелэн законъёсыз. Одӥг пол вандэмедлэсь азьло сизьым пол мерта шуэм татын котькытынлэсь но зэм. Банклэн президентэз Д. Якушев собраниысен ивортӥз, Ижевсклэн Администрациез "Новый регион" телекомпанилэсь ("Ижладабанк солэн кузёосыз пӧлын лыдъяське) 12 процентсэ акциоссэ басьтэ шуыса. 600 сюрс манет коньдон банке матысь нуналъёсы ик вуоз ини. Нош кылемез кытысь? Вуиз на ке... Г. КОРЯКОВ. Кун асваньбур - выль кузёослы Кун асваньбур выль сямен люкемын луоз, гожтэ "Комсомольская правда" газет. Тросэз кун предприятиос берло вакытэ чылкак куашкало. Соин ик соосты вузано. Та рад заводъёсты но фабрикаосты улэп коньдонэн вузалозы, ваучеръёсын уз, гожтэ газет. Президент малпаське Борис Ельцин куинетӥзэ президент луон сярысь решение ӧз куты на. Та сярысь ивортӥз солэн пресс-секретарез Сергей Ястржембский. Борис Ельцин ачиз та сярысь малпаськоз но Конституцияя судлэсь решенизэ лыдэ басьтоз. Али Конституцияя суд эскере, вань-а Борис Ельцинлэн президентэ ӵектӥськыны правоез. Сергей Ястржембский малпамъя, сыӵе луонлык вань, угось Борис Ельцин президентэ нырысетӥзэ быръемын вал Советской Союзлэн Конституциезъя Бигеръёслэн куронзы Татарстанысь Кун Кенеш Президентлы но Россиысь обороная министрлы вазиськыны чакла. Та республикаысь парламентарийёс куро Россилэн армияз службазэс ортчись мусульманъёслы вӧсьлыкенызы герӟаськем йылолъёсты ортчытъяны лэзьыны. Али тодмо ӧвӧл на, кызьы Россиысь мусульманъёслэсь куронъёссэс уж вылын быдэстыны луоно, гожтэ "Известия" газет. Умой адямиос "Кубо" огазеяз калыкез Вуж сальяос кемаласьгес ини ӟеч кусып возё Пичи Пурга ёросысь Аксакшурысь гурт калыкен. Азьвыл ог-огзы доры вуылӥзы концертъёсын но, гырон быдтонэз но ӵош ортчытъязы. Надежда Витальевна Марковалэн улон сюресэз озьы ик герӟаськиз кадь. Глазовысь пединститутэз йылпумъямез бере, егит дышетӥсез ыстӥзы Вуж Салья шор ёзо школае. Нырысь урокъёс ваизы солы шумпотон но, куректон но, кытӥяз угось ваньмыз ӧз пӧрмылы малпамезъя. Нош ужась эшъёсызлэн юрттэмзыя, мылысь-кыдысь тодон-валанъёссэ будэтон борды кутскиз. Трос гинэ бугыръяськоно луиз солы журналъёсысь, книгаосысь, дышетон амалъёссэ узырмытон понна. Нырысетӥ ортчытэм урокъёсаз ик пыр-поч сюлмаськиз тодыны котькудӥзлэсь дышетскисезлэсь выросъёссэ, дышетскыны мылкыд пыӵатылӥз соослы. Ӝытъёсы ӵем гинэ вуылӥз нылпиослэн доразы. Анай-атайёсын ӵош ужаса гинэ дышетонлэн ӟеч емышез луоз уго. Кытчы ке палэнэ кошкон сярысь Надежда Витальевна малпаськыса ӧз улы. Аслэсьтыз шудзэ та гуртысь ик шедьтӥз - улонзэ герӟаз Володя Бочкаревен. Владимир Леонидович Можга педучилищеез йылпумъямез бере дышетскиз на Глазов пединститутлэн крезьгуръя ёзаз. Кузпалъёслэн табере будэ кык нылзы - Ирина но Маша. Школаын дышетэм сяна, Надежда Витальевна но Владимир Леонидович Бочкарёвъёс ӵошен гожъяло кырӟан. Надежда Витальевналэн гожтэм кылъёсызъя чебер крезьгурен кырӟанъёс чузъясько ёросамы но республикаямы ортчылӥсь фестивальёсын. Кытчы гинэ ӧз вуылы ини дышетӥсьёслэн "Тайвади" ансамбльзы, котькытын соосты шуныт пумитало. Ирина нылзы но паймытэ адямиосты кырӟаны, эктыны быгатэменыз. Кузпалъёс ваненыз гинэ уг буйгатско, ужазы ялан выльзэ пыӵато. Ог вить ар талэсь азьвыл кылдытӥзы "Кубо" огазеяськон, солэн ужаз пырисько Надежда Витальевналэн классысьтыз нылпиос, соослэн анайёссы но гуртысь мӧйы кышномуртъёс. Огазеяськон пӧртэм ужрадъёс ортчытъя, вашкала сямъёс вылэ пыкиськыса. Кылсярысь, школаез йылпумъям пиосты школа юртын ик армие келяло, чук шуккыса ик. Армиысь бертэм беразы пиос чуксэс асьсэос ик ишкалто. Выль ар азьын Охотниковъёс дорын выль корка пырем ортчытӥзы. Март толэзе школаямы пумиськонэ ӧтчазы кылбурчиосты Любовь Тихоноваез, Анатолий Перевощиковез но писателез Кирилл Ломагинэз. Куноосты "Кубоос" сылалэн- нянен, кырӟанъёсын пумитазы. Уно тунсыкозэ тодӥзы та нуналэ пиналъёс гожъяськисьёс сярысь. Школаысь но гуртысь библиотекае куноос кузьмазы книгаоссэс. Надежда Витальевналэн одӥгез ӟеч малпанэз - дышетскисьёслы гожъяськон мылкыд пыӵатоно. Оло, ми палась но потозы тодмо писательёс но кылбурчиос? Трос нылпиё семьяос куспын ӵошатсконъёс дыръя но усто концертэн шумпоттӥзы гуртоосмес "Кубоос". Надежда Витальевналэсь тыршемзэ адӟытэк уг уло сальяос. Ёросъёсын матэктӥсь быръёнъёсы ӵектӥзы депутатэ кандидатэ. Кузпалъёс Бочкарёвъёс быгато огазеяны калыкез асьсэлэн быгатонлыкенызы но капчи мылкыдынызы. Шумпотоно, данъяськоно таӵе адямиос понна. М. Морякова, Кияса ёросысь Вуж Салья гуртысь киномеханик. 02 ивортэ СЬӦЛЫКАЛО АДВОКАТЪЁС НО Кылем шутэтскон нуналъёсы республикаямы 106 йыруж лэсьтэмын: кык мурт виемын, кыксэ секыт сӧсыртэмын, 290 кудӟем мурт медвытрезвительын кӧлӥз, 160 муртлы йыртэмамзы понна тыриськон сётэмын. Уг кулэсмо лушкаськонъёс, сюрес вылын мынон- ветлон правилоосты тӥянъёс. 15 пол тылпу потаз, 1 адями бырыны шедиз. 6 июне 10 час котыр Пичи Пургалан ӝегатэмын 45 аресъем шӧмаськем воргорон. Дӥсь улаз узыр ватосэз вылэм: кык ТОЗ-101 но РС-22 пистолет, 4 патрон но 4 ыбылэм гильза.Табере воргоронлы валэктытэк уз луы, кытчы сыӵе тӥрлыкен мынэ вылэм со ӵукна ик. Ува ёросысь Мульшур фермаысь уин 350 ӟазег тютю лушкамын вал. Ыштон 10,6 сюрс тыр луиз. Тылобурдоосты чаклась ӧй вал. Завьял ёросысь Сизьгуртысь 20 аресъем пиосмурт, мынӥсь тракторысьтыз тэтчыса, гусеница улэ сюре. Мар со - шудтэм учыр яке астэ ачид быдтон? Сюзы укыр куасьмыны кутскем уин Сарапулысь 18 аресъем Юрий В.-лэн но 22 аресъем Евгений М.-лэн. Вузкарисез пистолетэн кышкатыса, ларёкысь кык ӟенелик сур поттӥзы. Но кӧтсы тырымон юыны милициын ужасьёс ӧз сётэ. Сарапулысь ик огысьтыз частной магазинысь, вузкарисез пуртэн кышкатыса, таламын 400 манет. Ӝегатэмын 30 аресъем Валерий но ... Нефтекамскысь адвокат. Уйбыт чакласькыса жадемез вылэ ӵукпал тӧлатскыны малпаз драмтеатрысь сторож. Кема малпаськытэк, ВАЗ-2107 машинае пуксе но театрлэн азбарысьтыз лобатэ. Чакласькисьлы кема ворттылыны ӧз кылды, милиция машинаез кузёезлы берыктӥз, нош азьло но законэз тӥяллям Ильяен табере чурытгес вераськозы. Чупчи дурын чорыгаса пукыкуз, дамба вамен вуэ усьыса выем 34 аресъем Олег Н. Мугорыз шедьтымтэ на. 7 июне уйшор котыр Уваысь Вавоже нуись сюрес вылын М-2141 машинаеныз куать егитъёсты шуккиз 39 аресъем Юрий К. Огез нылмурт больницае келямын, мукетъёсыз укыр юн ӧз шуккиське. "Москвичлэн" кузёез кудӟемын вал. Шӧкыч ЙЫРТӤЯНЪЁС Нырысетӥез Выль шуон ӟучлэн пуныез Джек нуналлы быдэ сие 1,5 килограмм сӥль, пенсионер Пахомыч - арняскын 200 грамм. Юан: шумпотэ-а Пахомыч пуны интые адями вордскемезлы? Кыкетӥез Макмыров ужаз куинь минутлы бере кыле. Табере малпалэ: возьмалозы-а сое бригадаысь эшъёсыз яке вань аракызэс сотэк юозы? Куинетӥез Петр Иванович ужысьтыз азьвыл сярысь 15 минутлы вазьгес вуэ. Кышноез ӧс дорын кыӵе ке воргоронэз чупаса келя. Валэктэ: мае адӟысал Петр Иванович, гуртаз ог 40 минутлы вазьгес берытскысал ке? МЕД СУРЕДАСЬКОЗЫ НЫЛПИОС Нылпиосты утён калык куспо нуналэ соослэн куараоссы юнгес кадь жингыртӥзы шаермылэн пӧртэм сэрегъёсаз. Котькытын ик пӧртэм ужрадъёс ортчытэмын вал, асьме кивоштӥсьёсты шудо, таза будэтонлы сӥзьыса. Россиысь Наукаосъя Академилэн Урал отделениысьтыз историяя, кылъя но литературая Удмурт институтын ужасьёс но та нуналэз нимысьтыз пусйизы. Татысь профсоюзлэн комитетэз (кивалтӥсез Л. Н. Долганова) асфальт вылэ суреданъя но нылпи киужъёсъя конкурс-адӟытон ортчытӥз. Та ужрадэ нырысь ик пыриськизы институтын ужасьёслэн нылпиоссы. Син шоры йӧтымон пӧрмиллям Света но Айно Кирилловаослэн киужъёссы: вурем дӥсьёссы, лякиё миндэр пуйызы, чильпам пужыоссы, небыт шудонъёссы. Кирилл Долганов ваем уно суредъёссэ, кытын возьматэмын улонысь пӧртэм учыръёс. Павлуша Личенко туж чеберен адӟытэм анайзэ. Нош Даша Аймашева синэз кыске "Сяськаос" аппликациеныз. Мед суредаськозы нылпиос: котыр инкуазез, сяськаосыз, тылобурдоосыз. Улонмы шулдыргес луоз. Кызьы шуиз кылбурчи, кияз сяськаез возись адями уродзэ лэсьтыны уз быгаты. Е. БРОННИКОВА. Удмурт калыклэн быдӟым пиезлы Кузёбай Гердлы но Герберлы сӥзем ужрадъёс 9.00-9.30 - Куӟебай Гердлэн вордӥськем гуртаз, Покчивукоын, кылбурчилэн атай юртэз интыын стела усьтон. Вераськозы Кун Кенешлэн Тӧроез Александр Волков, Вавож ёрослэн йырыз Владимир Рябов, Куӟебай Гердлэн вынызлэн пиез Юрий Чайников. 9.45 - Куӟебай Гердлы сӥзем музей-юртэз усьтон, музей-юртэн тодматскон. Верасько Удмурт Кивалтэтлэн Тӧроез Павел Вершинин, тодосчи Фома Ермаков, Вавож ёросысь Гурезь-Пудга школалэн директорез Анатолий Егоров, Куӟебай Гердлэн вынызлэн пиез Юрий Чайников. Люкаськемъёсты шулдыртоз "Италмас" ансамбль. 10.30 - Волипельга гурт палась возь вылын шулдыръяськонъёс. 11.00 - Гербер шулдыртӥськонэз усьтон. Верасько Кун Кенешлэн Тӧроез Александр Волков, Удмурт Кивалтэтлэн Тӧроез Павел Вершинин, "Удмурт кенеш" огазеяськонлэн йырыз Валентин Тубылов, Вавож ёрослэн кузёез Владимир Рябов. Чузъяськоз та йылоллы сӥзем крезьгур, луоз вӧсяськон (Инмарлэсь куриськон). Котькытын кылӥськоз шулдыр удмурт крезьгур. Со сяна, радъямын луозы пӧртэм ужрадъёс. Удмурт кун университетысь кылтодонъя (филологияя) факультетлэсь удмурт люкетсэ 1988-тӥ арын йылпумъямъёс ӵош дышетскем эшъёсынызы 20-тӥ июне пумиськон отчыто. Лыктоно 11 часлы университетлэн кыкетӥ юртэз (корпусэз) доры. ШАЙТАНГУРТЛЫ - 300 Алнаш ёросысь Шайтангуртлы тырме 300 ар. Соин валче 13-тӥ инвожое гуртоос пумиськон ортчытозы. Праздникез радъян бордын трос адямиос тыршо. Валамон ини, та ужлэсь уг палэнскы со гуртын вордскем адями, калык суредасьмы, живописья нырысетӥез профессор Семен Виноградов но. Со нуналэ художник гуртаз бадӟым выставказэ ортчытоз. Шайтангуртъёс доразы витё уно куноосты, асьсэ палъёсазы вордскем но будэм адямиосты. Праздник кутскоз 10 часэ. Н. СЕРГЕЕВ. Шӧкыч Отысь-татысь Фабрикаямы керттоно нылкышно чулкаосмылэн ӟечлыксы вылэ трос ӝожтӥськонъёс вуо. Тужгес но пыкыло кунчиоссэс мултэс сюбег лэсьтэммы понна. Со валамон. Улонмы уродмемен валче, нылкышноослэн пыдзы пумен векчиоме. Но ми оскытӥськом: талы пумит ужрадъёс одно кутом. (Басьяськисьёсын пумиськонысь) Складысь вузъёсты магазинэ келякум ӧз тырме скал йыр но сюлэм. Кытчы пыриз йыр, уг тодӥськы. Нош сюлэмез лушканы нылкышноослы сяна нокинлы. Малы ке шуоно, со дыре складын мон но пурысь кобла гинэ вал. (Валэктон гожтэтысь). Гражданъёс-улӥсьёс! Таракан понна коньдон тыремъёсты ЖЭК-е лыктыны ӧтиськом пияла банкаен. (Ялон). Бускелелэсь парсьсэ виеме понна янгыш ачиз парсь. Мерттэм бакчаме нырсась мае ке мон асламез кожай. (Судын валэктонысь). Тазалык ЫМНЫРЕЗ САПТАСЬ Кынманы шедем бере ымдуре ма потэ? Шонер, пӧсьлул - куректӥсь яке лыдӥсь яра. Зелёнкаен яке спиртэн зыраськом но киынымы шонтӥськом: ортчоз ай! Юнме озьы малпаськом, угось яраослэн кылдэмзы возьматэ, адямилы пӧсьлуллэн (ӟуч сямен - герпеслэн) вирусэз паласькемын шуыса. Яраос, ымдуре сяна, ым пушкы, ныре, синме, половой органъёсы пото. Пӧсьлул аля соку, куке адямилэн иммунитетэз - висёнъёсты вормыны кужымез - лябӟе, та чер нервной системаез, психикаез сӧре. Паласькон амалъёсыз Пӧсьлуллэн вирусэз мугоре пӧртэм амалъёсын пыре - омырысь дыльды шапыкъёс пыр, чупаськыку, висисьлэн арбериосыз пыр, шуом, тусьты-пуньыез, ӵушконэз, вордӥськоно нылпилы анаезлэсь, нылкышноен воргорон матысь кусып возьыку. Огпол пырыса, вирус нервной системае пыраклы кыле. Туала медициналэн сое отысь "тузгытыны" кужмыз уг тырмы на. Пӧсьлуллэн вирусэз 90 процент адямиослэн мугоразы улэ. Но соос ваньмыз уг висё. Семьяын гинэ но огез черла, мукетыз - уг. Талэн мугез адямилэн висёнъёслы сётскымтэез бордын. Инкуазен сётэм кужым лябӟе ке, кылсярысь, висёнъёс, кынмам, шуге-леке шедьылэм бере, пӧсьлул шарае потэ. Огпол ке, весяклы Яра кылдон интыын азьло куректэ, бышка яке лыдэ. Кӧня ке нунал яке час ортчыса, гордэктэм интые ву пульыос кылдо, соос пасясько но оломар мында вирусъёсты эрике лэзё. Та вакытэ адями тужгес но кышкыт. 4-5 нунал ортчыса, яралэн кӧмыз куалдэ, лыдэмысь, куректэмысь но дугдэ. Адями огдырлы йӧна кадь. Но кӧня ке дыр ортчыса, яраос нош кылдо. Куд-огез арскын 4-5 пол висе но туж уг курадӟы, нош мукетъёсызлэн температуразы ӝутске, соос чылкак катьтэммо, я кынмо, я пӧсяло. Тужгес кышкыт, куке пӧсьлул синме вуэ, соку адями сукыр кыльыны быгатэ. Соин ик ымдурысь ярае йӧтскылэм бере, киосты син котыре ик вуттылыны уг яра. Ымдурын гинэ ке луысал Яраосыз бурмем бере, адями ассэ висисен уг лыдъя ни. Пӧсьлуллэсь вируссэ нуллӥсьёс но висемзы сярысь уг тодо. Соин ик шуг вераны, Россиын улӥсьёслы кӧняезлы та чер паласькемын. Нош США-ын лыдъяллям ини: 10-20 миллион адями пӧсьлул вирусэз нуллэ. Котькуд ар сыӵеослэн лыдзы ӝыны миллионлы йылэ. Пӧсьлул половой органъёсы но потэ. Яраос бышкаса висё яке лыдо, 5-10 нунал куспын соос бурмо. Куд-ог дыръя йыр висе, температура ӝутске... Таӵеез пӧсьлул палаське, воргоронэн кышномурт матысь кусып возьыку, висись муртэн одӥг ӵушконэн ӵушиськыса, мунчоын одӥг мучолоен зыраськыса, киос пыр. Кӧня ке дыр ортчыса, нылпи кылдытон мугор люкетъёс висьыны кутско (воспаление луэ). Пиосмуртъёслэн нервной системазы сӧриське. Кышномуртъёслы эшшо но секытгес йӧтэ. Соос нылпи вайыны уг быгато яке нылпизы туж висись вордӥське. Эмъяськоно! Таӵе кышкыт иворез кылэм бере кылдэ юан: ма кароно? Зэм, та вирусэз вормись эмъюмъёс ӧвӧл на. Но котькудӥз адями ас кужыменыз соин нюръяськыны быгатэ. Пӧсьлул арскын ньыль поллэсь ӵемгес пота ке, соку йырды висе, температурады ӝутске, ӟигарды быре ке, врачлы вазиськоно. Эмъюмъёс пӧлысь юрттоз ацикловир - таблеткаос, укол пуктылыны инъекциос, синлы мазь, куэз зыраны крем. Ацикловирез басьтыны луэ аптекаысь врачлэн рецептэзтэк. Эн вунэтэ, ву пульыос туж ӝог кылдо, соин ик кремен зыраськоно бышканы, зубектыны кутскем бере ик. Малэсь "сайка" пӧсьлул? Пӧртэм висёнъёслэсь, соос пӧлын - пыэд. Стрессъёслэсь. Кӧлон тырмымтэлэсь. Нылпи вордонъёслэсь, абортъёслэсь, половой органъёсын операциослэсь. Иммунитетэз кужмоятон понна Витаминъёс тырмыт сиёно. Спортэн выроно, зарядка лэсьтоно. Кысконлэсь но юонлэсь куштӥськоно. Мугорез кыдатоно, шуом, кезьыт вуэн пыласькыса. Шутэтсконо, тырмыт кӧлоно. Л. ВОРОБЬЕВА, СПИД-эн но паласькись висёнъёсын нюръяськонъя центрысь врач. Шӧкыч СИЗЬЫМ ПОЛ ЭСКЕРЫ... Кулэмысь улӟиз Улонысь учыр Надя укноысь укное дугдылытэк учкылэ, керӟегъяське: "Ма, кытчы пыриз та? Кыкетӥ нуналзэ ни ӧвӧл, оло, му ньылӥз..." Ӝамдэ пуксе. Нош султэ. Чиданэз быремын. Ӵыжы-выжыоссылы, тодмооссылы жингыртэ - нокин уг тоды. Кудӟемъёсты сайкытон интые шедиз шуоно ке, отын та кема уз возе. Собере, кырын юыны уг яраты. "Моргъёсы шат вазиськоно ни",- кышномуртлэн йыраз урод малпан вуиз. - Чирков Слава, картэ мынам... - ангесыз дырекъяса вераз Надя. - Вань. Дорамы кылле. Нылкышноез йыраз нушыен васькытӥзы кадь. Мырдэм быгатӥз на юаны: - Николаевич-а? - Бен, Николаевич. Лыктэ но нуэ шӧйдэс. Надя гуньдӥз, жӧлмаса пуке. Куаретэмез но уг лу, синвуэз но уг поты. Пель сьӧраз витьымтэ шорысь кылӥськиз нылызлэн кеськыса бӧрдыны кутскемез. Ваче ӟыгырскизы. "Э, Славик, Славик, тынэсьтыд умой адями ӧй вал, огпол но урод кылдэ кылэме ӧвӧл. Кыӵе убир мар кариз тонэ? Кинлы кельтӥд тон милемды?" Но котькӧня бӧрд - кулэм муртлы уд юртты ни. Надя нылыныз мынӥзы "Ритуалэ" ватон пумысен вераськыны. Ивортӥзы ӵыжы-выжыоссылы. Соосыз но шуак луизы. Оскытӥзы: огнадэс, пе, ум кельтэ, юрттом. Гуртазы берытскизы - квартираязы пыремзы уг луы. Ӧс пушласянь пытсамын. Кайгу огназ уг ветлы, шуэмзы сямен, ӧвӧлмес тодыса, йыртэмасьёс пыризы, дыр, ай, йыраз чилектӥз Надялэн. Кылӥськиз пыд куара. Ӧс вӧлак усьтӥськиз но, нылкышноос ӧжыт гинэ ӧз погралэ. Вадьсазы сылэ Слава. Вылаз ул дӥсь, быдэс шулӟектэмын. Нылзы, валатскемез бере, чир! кесяськыны кутскиз. "Ишанлэсь" кышкаса, тубат кузя усьтыр-табыр бызиз улӥе. Нош Надя олокытысь кужым шедьтӥз на картэзлэн чыртыяз ошиськыны... - Мар луиз тӥледын? - номырзэ валатэк, синкашъёсыныз лопыръя Слава. - Сазьтӥськон интыын кӧлтэмзы понна-а, мар-а, ӟыгыръяськод сокем? Берло валазы кузпалъёс, Славалэн но моргын кыллисьлэн нимтулзы одӥг кадь вылэм шуыса. Тӥни озьы: таӵе дыре югдурез сизьым пол эскерытэк ӵаш эн потты. З. РЯБИНИНА. Оскон АДӞОН СИНТЭМ - УГ ВАЛА ЖАЛЯНЭЗ Выльдӥськонлэсь азьвыл аръёсы сӧсыръёслэн ужпумъёссы шоры возъет пыр сямен учкылӥзы. Лыдъяллязы, сӧсыръёс асьмелэн ӧвӧл. Шуге-леке вуэм адямиос но асьсэлэсь сюлэм висёнъёссэс шарае поттыны ӧз дӥсьтылэ, ватӥськыса сямен улӥзы. Кытчы бен потод, тонэ кылӥсь-адӟись ӧвӧл ке? 80-тӥ аръёслэн пумазы ужпум интыысьтыз вырӟиз. Странаямы кылдылыны кутскизы сӧсыръёслэн огазеяськонъёссы. Удмурт Республикаысь Правительстволэн Постановлениеныз валче 1988 арын 23 июне шаерысьтымы инвалидъёслэсь огазеяськонзэс кылдытонъя конференция ортчиз. Со дырысен ортчиз дас ар. Мон вераськисько республикаысьтымы инвалидъёслэн огазеяськонзылэн кивалтӥсеныз Владимир СКОВОРОДНИКОВЕН. - Дас ар ӵоже огазеяськон будӥз. Ӝужан вакытаз 3365 мурт лыдъяське ке вал, туннэ нуналлы обществое пыремын 15697 адями. Дас ар талэсь азьло гинэ шаерамы инвалидъёс 40 сюрс пала вал, туэлы со лыдпус 55 сюрслэсь ятыр луэмын ни. Туннэ нуналлы котькуд районын вань огазеяськонмылэн ёзъёсыз, но куд-ог учыре кивалтӥсь быръёнэн шугъяськоно луэ. Тани али Глазов но Каракулино районъёсын огазеяськонъёс "йыртэк" кылемын. Ужзэс ӟечен пусйыны луысал якшур-бодьяослэсь, адӟем карымон тыршо Глазов но Воткинск городъёсын, мукетъёсыз сярысь но озьы вераны луысал. Огазеяськонлэн нырысетӥ кивалтӥсез вал Юрий Иванович Малков, со бӧрсьы вить ар ӵоже кивалтӥз Геннадий Николаевич Татарских. 1996 арысен та ужез мыным оскизы. Нимысьтыз пусъеме потэ Ижевскын улӥсь нырысетӥ группаен инвалид нылкышноез Нина Валерьяновна Лопаткинаез. Шаерамы огазеяськон кылдытонлы кичӧлтон со сётӥз. - Владимир Иванович, нош кин юрттэ огазеяськонлы пыд йылаз сылыны? - 1993 арозь обществолы коньдон висъяськылӥз кун бюджет чотын. Отӥяз Россия но, Удмуртия но нимысьтыз инвалидъёслы шуыса бюджетысь коньдон ӧз висъялэ ни. Соин ик басьтӥськоно луиз асьмелэсь производствомес кылдытон борды. Туннэ нуналлы кылдытэмын но ужа 37 предприятие, кудъёсаз куинь сю пала инвалидъёс тыршо. Ужан удысъёс пӧртэмесь. Кин лэсьтӥське, монтажной ужъёсын выре, чеберлыко киужъёс кылдытъя. Вань дӥськут, валес котыр вурисьёсмы, бытовой техникаез но оборудованиез тупатъясьёсмы. Вузкарон, басьяськон удыс борды но куд-огез басьтӥськизы. Предприятиослэн поттэм коньдонзы чотын ӧжытэн ке но юрттыны быгатӥськомы ни шаерысьтымы инвалидъёслы, тужгес но шуге-леке вуэмъёсызлы коньдон висъяськом. Юрттэт сётӥськом поттэм вузъёсын но - дӥськутэн, валес котырен. Предприятиосмылы улыны но возиськыны юртто Россилэн но Удмурт Республикалэн законодательствоеныз чаклам налогъёсъя льготаос. Со налогъёсты азьланяз но кельтон ласянь бадӟым уж нуиське Россиысь но Удмуртиысь правительствоосын. Милесьтым сюлмаськонъёсмес валазы но юрттон борды басьтӥськизы Россиысь Кун Думае быръем депутатъёсмы А. В. Солуянов, Н. И. Сапожников, М. П. Кошкин. - Кызьы пумитаны дасяськиськоды инвалидъёслэн огазеяськонзылы дас ар тырмон нуналэз? - Шаерамы гинэ ӧвӧл, Россиысь огазеяськонлы но тырме дас ар. Россиысь инвалидъёслэн огазеяськонзылэн (ВОИ) правлениез интыосын кылдытэм ёзъёсыз азе ужпум пуктӥз, котькытын ик ортчытоно дас ар тырмонлы сӥзем ужрадъёс. Ми азьын но сыӵе ик ужпум сылэ. Но праздникез ортчытон понна кулэ коньдонэн юрттэт. Удмурт Республикаысь бюджетын та ужрадлы коньдон висъяны чакламын. Дыр ортче, нош коньдон али ке но киямы ӧз вуы на. Оскем потэ вылэм, Правительство милемды палэнэ уз кельты, ужрадмес ортчытонъя но радъянъя быгатэмезъя юрттоз. Шуге-леке вуэмъёс понна та праздник кык полэс но, куинь полэс но шумпотонэн берытскоз угось: адямиос асьсэлы оскыны кутскозы, мукетъёсызлы кулэ луэмзэс шӧдозы, ог-огенызы пумиськозы. Праздник ортчоз Ижевскын. Отчы ӧтемын луозы районъёсысь инвалидъёслэн огазеяськоназы пырем муртъёс. Чакламын ортчытыны спортъя ӵошатсконъёс, асьсэлэсь быгатэмзэс возьматозы инвалидъёслэн художественной самодеятельностья смотразы вормисе потэм коллективъёс, луоз чеберлыко киужъёсты адӟытон но соосын вузкарон. Шумпотысалмы, ужрадъёсмес ортчытонэ пыриськысалзы ке шаерысьтымы коньдоно адямиос. Л. МАЛЫХ. ӞЕЧКЫЛАСЬКОМ Россия Президентлэн Борис Ельцинлэн пуктэмезъя, литература но искусство удысын 1997 ар понна Россия Федерацилэсь Кун (государственной) премиоссэ сётон сярысь Указ кутэмын. Шумпотыса ивортӥськом: соос пӧлын вань республикаысьтымы адямиос но. Дизайн удысын спортивной но пӧйшуран пыӵалтӥрлыкъёсын коллекцизы понна вылӥ премиен пусъемын "Ижмаш" акционер огазеяськонысь конструкторъёс Николай Безбородов, Евгений Драгунов (кулэмез бере), Михаил Калашников, Азарий Нестеров, Геннадий Никонов, Владимир Стронский, Владимир Суслопаров но технолог Владимир Фарафошин. Ӟечкыласьком! Али та эшъёс Москвае кошкемын. Кун премиосты соослы сётыны кулэ туннэ, Кремльын. Б. НИКИТИН. ӞЫРДЫТ ОРТЧОЗ Туэ 17-тӥ июне ортчоз Россиысь вылӥ учебной заведениослэн ректоръёссылэн съездзы. Бен, туэ вылӥ "школаослы" капчи уг йӧты. Соослы коньдон висъян унолы кулэсмиз. Соин ик Москваын кенешон ӟырдыт ортчыны ӧдъя. Озьы ке но уноез вузъёсмы кызьы ке но улыны-ужаны тыршо. Вань азинсконъёс но. Туэ, кылсярысь, Франциысь промышленникъёслэн ассоциацизы Россиысь кыксэ медициная академиосты, Ижысь но Кемеровоысь, нырысьсэ пусйиз калык куспо наградаен. Со сётӥське рыноке выжон вакытэ экономикаез ӝогомытонын азинсконъёссы понна. С. ПЕТРОВ. ИНЭЗ ПЫКЪЯЛОЗ ГАЛИХАНОВ 16 июне Удмурт Республикаысь художникъёслэн огазеяськонзылэн Пушкин урамысь залазы усьтӥськоз тодмо удмурт архитекторлэн Касим Галихановлэн адӟытонэз. Выставкалэн нимыз - "Ин юбо". Отысь адӟыны луоз кибашлы воргоронлэсь графиказэ, скульптураоссэ, мукет ужъёссэ. Адӟытон усьтонлы сӥзем ужрад кутскоз 17 часын. О. МАРКОВ. "ВАЙ, ОШМЕСЭ..." Удмуртиысь калык поэтлэн Николай Байтеряковлэн та кылбурезъя кылдытэм кырӟан котькинлы тодмо. Туэ Николай Семеновичлы вордскемез дырысен 75 арес тырмысал. Но солы юбилей дырозяз улыны ӧз кылды ни - кылем арын, март толэзьлэн пумаз, кема висемез бере кулӥз. Нош азьвылгес, гужем, Байтеряковлэн Алнаш ёросысь гуртоосыз, Варзи-Ятчиын улӥсьёс, кылбурчилэсь ошмессэ усьтон ужрад ортчытӥзы. Кулон азяз поэтлы аслыз но отчы вуылыны кылдӥз на. Та нуналъёсы Ӟатчалан Николай Байтеряковез буре ваён ужрад ортчиз. Люкаськемъёс нырысь ик вуылӥзы солэн ошмес дораз, собере чебер возь вылын чузъяськизы Николай Семеновичлэн кылбуръёсыз, кырӟанъёсыз. Соосты быдэстӥзы, гуртысь но культурая ёрос юртысь артистъёс. Та ужрадэ ӧтемын вал кылбурчилэн ӵыжы-выжыосыз. Соос газет пыр бадӟым тау каремзэс вераны куризы вань гуртоослы, библиотекаын ужасьлы Вера Кононовалы, эштослэн кивалтӥсезлы Юрий Зиновьевлы, ёрос администрацилэн тӧроезлэн воштӥсезлы Нина Образцовалы, кылбурчилы Иосиф Бобровлы но мукетъёсызлы. Николай БАЙТЕРЯКОВ, Николай Семеновичлэн вынызлэн пиез, газетлэн корреспондентэз. Шӧкыч "Калыклы толэзьёсын уг тыро уждунзэс, ӧвӧл пиналъёслы пособиос, ӝегато пенсиосты. Со дыре ик я отын, я татын нуналлы быдэ сямен ортчыло пӧртэм симпозиумъёс, пумиськонъёс, презентациос. Тросэзлэн виразы пыӵаз ни, шӧдске, учрежденизылы я предприятизылы 5, 10... ар тырмонэз паськыт пусъён. Ваньмыз со йылпумъяське аракыен пыласькись ӝӧк сьӧрын шулдыръяськонэн. Ма коньдонэз меда отын жильдо? Соин ик бюджетмы ялан уг начармы-а?" Шӧкычлы гожтэтысь. - Гажано эшъёс, нимысьтыз ӧтьыса лыктэмъёсты кенеш бере та пурты котыре люкаськыны курисько. Суредэз В. ШИЛОВЛЭН. Шӧкыч Гожъяло егит юрттӥсьёсы Руль сьӧры "манитэк" эн пуксьы Шофёръёс пӧлысь кинэн гинэ уд вераськиськы, ваньмыз соос ГАИ-ысь инспекторъёслэсь тыллэсь кадь кышкало. Сюрес урдсын сылӥсь лыз гожо но липет вылаз чилектылӥсь тылын машинаез адӟыса ик, пе, сюлэмзы бырк-бырк! тэтчаны кутске. Мон кадь правотэм адямилэн валамезъя, ма курданэз кадь отын. Машинаед эскеремын-утялтэмын, ачид куронъёсты уд тӥяськы ке, ГАИ-лэн постэз вадьсытӥ кырӟаса коть ортчы. Но уж вылын со озьы гинэ вылымтэ ай. Тае мон ӟеч валай элькунысьтымы одӥгез райцентре пырон дорысь постын ог час ёрос дырме погонэн адямиосын ӵош ортчытыса. - Праводэ таласьком, номерзэ аслыд гожтыса кельты, - вазиз инспектор сьӧраз вуттэм чиед мугоро воргоронлы. - Лейтенант эш, мон али гинэ соосты тӥни отысен пуктӥ, - сюлворе шофёр, - гурезь вылэ гинэ тубтыны куризы. - Машинадэ резина туп кожад-а? - уг сётскы инспектор. - Ньыль пассажир интые, куатьсэ пуктӥськод. - Тани татчы гожтӥськы, - лейтенант бамыз ву шапыкъёсын шобырскем воргоронлы мыче акт. - Правоме таламен уг тырмы, - водительлэн киосыз уката зол дырекъяны кутскизы, - штраф тырытӥськоды на. Маин быриз вераськон, уг тодӥськы. Мон кыре потӥ. Адӟись каремзылэсь кышкай, шӧдске. Кӧня ке минут ортчем бере, воргорон будкаысь потӥз но мултэс пассажиръёссэ кельтыса дыртӥз "Орбитаез" доры. Ӝоггес, пе, татысь тӧлӟоно. - Кызьы водителез правотэк лэзиды? - юасько лейтенантлэсь. - Пумитаз шедем нырысь гаишникъёс ик нош дугдытозы ук сое. - Уз, - пальпотӥз инспектор. - Правозэ берыктон понна со кык полэс штраф тыриз. Таизэ ини ӧй вала. Тазьы лэсьтыны вылӥысен нимысьтыз косэмын-лэземын яке со куд-ог автоинспекторъёслэн асьсэлэн кичӧлтонзы? Соку зӧк кисыё муртъёслы со туж умой ук. Юыса ворттылэмлэсь но кышканэз ӧвӧл. Тордэм янчиктэ возьматӥд - тыныд вож сюрес. - Ӵем-а луыло али гинэ кык полэс штраф тырем муртэн кадь учыръёс? - нош ик вазиськисько лейтенантлы. - Ӧжыт ӧвӧл... О, эшшо одӥгез вуэ, - горд виштыё бодыеныз шонтӥз офицер ми пала лыктӥсь машиналы. - Нош таиз мар умойтэмзэ лэсьтӥз? - юасько. - Тӥни отын, - сюрес урдсы возьматӥз лейтенант, - огдырлы одно дугдылыны косӥсь знак сылэ. - Ма луоз табере водителен? - Штраф. Штраф, штраф, штраф! Нырысь лыдъяны выри, кӧня муртэ та понна будкае пыртазы. Сураськи, ӧй шедьты ни лыдзэ. Ог куинез - ньылез гинэ водительёс кисызэс берыкъятэк кошкыны быгатӥзы. Дугдытӥзы, кылсярысь, вож "Жигулиез". Мугез одӥг гинэ вылэм. Али гинэ лушкамын таӵе ик машина. Таизлэсь но руль сьӧрын пукисьлэсь алигес басьтэм уждунзэ кулэстыны амал шедьтӥзы. Автомобиль питранэзлэн протекторъёсыз пӧртэмесь вылэм. Та нуналэ пост дорын сылыса, мон умой валай: туннэ водительлы, кыдёке яке матэ-а со мынэ, сюрес вылэ "манитэк" потыны уг луы. Тынад валамед-тодэмедъя машинаед котькыӵе ӟеч мед луоз, ГАИ-ос одно шедьтозы шексэ. Тэрег Такъян Суредэз И. Кийколэн. УДМУРТ РЕСПУБЛИКАЫН ТЫЛПУОСЛЭСЬ УТИСЬКОНЪЯ НИМЫСЬТЫЗ РАДЛЫК ЯЛОН СЯРЫСЬ УДМУРТ РЕСПУБЛИКАЫСЬ ПРАВИТЕЛЬСТВОЛЭН Постановлениез 1998 ар 1 июнь Ижевск город � 457 Россия Федерацилэн 1994 арын 21 декабре кутэм Тылпуослэсь утиськон сярысь 69-Ф3 номеро Законэз но Россия Федерациысь Правительстволэн 1995 арын 5 ноябре кутэм "Кышкыт югдуръёсты алонъя но быдтонъя кун радлык сярысь" 1113 номеро постановлениез вылэ пыкиськыса, Удмурт Республикаысь Правительство ПУКТЭ: 1. Удмурт Республикаын 1998 арын 1-тӥ июньысен ялоно тылпуослэсь утиськонъя нимысьтыз радлык. 2. 1998 арын 1-тӥ июньысен Удмурт Республикаын калык но автотранспорт нюлэсъёсы шергес пыраны кулэ (нимысьтыз распоряжение потытозь). 3. Удмурт Республикаысь Правительстволэн Тылпуослэсь утиськонъя комиссиез экономикалэсь объектъёссэ, учреждениосты но организациосты, калыклэсь улон интыоссэ но республикаысь нюлэсъёсты тылпуослэсь ӟечгес утён сярысь ужпумез эскерыны кулэ. 4. Министерствоос но ведомствоос должностен муртъёслэсь ведомствоослэн объектъёсазы уен-нуналэн дежурствозэс радъяны кулэ, городъёсысь но ёросъёсысь быдэсъясь властьлэн ёзъёсыз - предприятиосын, учреждениосын но организациосын, озьы ик калык улон интыосын. 5. Городъёсысь но ёросъёсысь быдэсъясь властьлэн ёзъёсызлы ӵектоно: ёрос центръёсты но калык улоно интыосты тылпуослэсь утёнэз радъян понна, азбаръёсты, ульчаосты ӝуаны быгатӥсь кылем-мылемъёслэсь чылкытатон, котькуд юртъерын тылпу потон арбериосты возён пумысен калык пӧлын валэктон ужез радъяно но нуоно; предприятиосын, организациосын но учреждениосын кылдытоно вылӥ дасьлыко механизированной отрядъёсты, тылпуосты кысон но кышкыт югдуръёслэсь изъянтэмзэс быдтон понна; городъёсын, калык улон интыосын, сад-бакчаосын, нюлэсъёсын, гыбед интыосын, чугун сюресъёс но автомобильной сюресъёс валлин тылскылыны но корам бервылъёсты сутыны уг яра; штатэ пырисьтэм механизированной отрядъёслэсь техниказэс тылпуосты дыраз кысыны но мукет кышкыт югдуръёслэсь изъянтэмзэс быдтыны дась возёно; калык улон интыосын тылпуэз дыраз шараян понна, калык пӧлын урамъёс кузя чакласькыса ветлонэз но производствоысь объектъёсты сторожъёс ласянь эскеронэз радъяно. 6. Предприятиослэн, организациослэн но учреждениослэн кивалтӥсьёссылы ӵектоно 1998 арын 10 июнёзь: предприятиос котырын но соослы юнматэм улон интыосын ӝуаны быгатӥсь арбериосты утялтыны; нюлэсъёс, фермаос, нюлэс пунктъёс котыртӥ гырыны. 7. Удмурт Республикаысь Югдурез утёнъя министерство сакгес эскерыны, тылпуосты ӝегатскытэк шараяны но мугъёссэ шедьтыны кулэ. 8. Удмурт Республикаысь Нюлэс хозяйствоя министерство диспетчерской службалэсь уен-нуналэн ужанзэ радъяны кулэ, нюлэсъёслэн но гыбед интыослэн ӝуамзы сярысь дыраз тодон но соосты кысонэ нюлэсъёсты тылпулэсь утись формированиосты келян понна. 9. "Удмурттелеком" АО-лэн генеральной директорез С. М. Фомичев луонлыкъёс кылдытыны кулэ республикаысьтымы калык улон интыосын телефон пыр ӝегатскытэк герӟаськыны мед быгатоз шуыса. 10. Удмуртиысь Гидрометеорологияя но инкуазез чакланъя центрлэн кивалтӥсез Тылпуослэсь утиськонъя кун правленилы но Удмурт Республикаысь Правительстволэн Граждан оборона ужпумъёсъя но кышкыт учыръёслэсь утиськонъя комитетэзлы куазь сярысь ивортылыны кулэ нуналлы быдэ 8 часлы. 11. Иворъёсты вӧлмытонъя ёзъёслэн кивалтӥсьёссы тылпуослэсь утиськонын но кышкыт учыръёсты алонын ужпумъёсты но тырмымтэосты ялан но лэчыт возьматыны кулэ. 12. Та постановленилэсь быдэсъяськемзэ эскерозы Удмурт Республикаысь Югдурез утёнъя министерство но Удмурт Республикаысь Правительстволэн Граждан оборона ужпумъёсъя но кышкыт учыръёслэсь утиськонъя комитетэз. Удмурт Республикаысь Правительстволэн Тӧроез П. Н. Вершинин. ВОЖДЭС ЭН ВАЕ, ДМИТРИЙ ВЛАДИМИРОВИЧ Алигес мыным муг усиз республикаысь прокуратурае ветлыны. Журналистъёсын кусып возьыны татын нимысьтыз адями возё. Кемалась ик ӧвӧл ай, та уже юнматӥзы Дмитрий Владимирович Шумковез, егит ке но, ӝог будӥсь юристэз. Постовой милиционер Шумков доры пырыны ӧз лэзьы: азьвыл, пе, аслэсьтыз юало. Ӝоген берытскиз: Шумковлэн тӥледын пумиськыны дырыз ӧвӧл. Валэктыны турттӥ ик вал но, одӥг минутлы гинэ, пӧй, пырало шуыса, лейтенант кремень кадь кылиз: вождэс эн вае, юрттыны уг быгатӥськы. Тодэм потэ вылэм: табере вань прокуратура-а журналистъёсын постовой милиционеръёс пыр кусып возе яке Шумков господин гинэ-а сыӵе порядок тупатӥз меда? Жаляса верано луэ, журналистъёс сыӵе ик дунын пунэмзэ берыктыны уг быгато, милемды угось милиция уг возьма. Но прокуроръёслы юанмес-веранмес вуттыны, Инмарлы тау, мукет луонлыкмы вань: газет бам но меӵак эфир. Тани али одӥгзэ уже кутӥськом. Таӵе амал уг ке кельшы, Дмитрий Владимирович, вождэс эн вае. Геннадий КОРЯКОВ, законъя но сямъёсъя отделлэн редакторез. ИЖ ВАДЬСЫН - ВЫЖЫКЫЛ 12-тӥ июнь быдэс Россиын улӥсьёс - понна бадӟым праздник. Соку асьмеос пусйиськом Россия Федерацилэсь кунлыкезлэсь вордӥськем нуналзэ. Нош Ижын улӥсьёс понна со кык полэс праздник. Таяз учыре элькунмылэн шоркарез пусйиз 238 ар тырмонзэ. Городмылэсь нуналзэ пусъён арысь аре умойгес радъямын луэ. Сое дасясьёс ялан пӧртэмесь амалъёс утчало, маке выльзэ пыртыны тыршо. Тани туэ кӧня калык люкаськиз Александр Невскийлэн соборез доры. Отын зыл-зыл чузъяськизы черк кырӟанъёс но гуръёс. Шоркармылэн пӧртэм интыосаз шулдыръяськиз калык та нуналэ. Бер уёзь чузъяськизы кырӟам-серектэм куараос. Нош 23 час бере Иж вадьсы выжыкыл дунне вуиз, кожалод.Пӧртэм буёло фейерверк инбамез уно пумо сяськаосын пужъятӥз кадь. Мар бен, праздник удалтӥз! Вуоно арозь табере, яратоно Ижмы! Азинсконъёс но вормонъёс тыныд! С. НИКИТИН. * Иж карлэн ульчаосаз туннэ праздник. В. КАМАШЕВЛЭН туспуктэмез. Коньдон дуннеын ВЕКСЕЛЬ - СО ТЫРОНЪЁСТЫ БЕРЫКТОН-ПЫТСАН АМАЛ Кылем арын Экономической азинсконъя Евроазиатской банк-агент ("Евразия") Удмурт Правительствоен ӵош вексельёсын ужанъя программа кутӥз. Солэн мугез тодмо: вексель луэ республикаямы тыронъёсты берыктон-пытсан амал. "Евразия" ОАО-лэн огшоры векселез, кудӥз сётӥське мукет банклы, бумага вылэ гожтэм коньдон выллем берга. Со вузаське кызьы ке предприятиослы, озьы ик нимаз адямиослы. Вексель уже кутӥське вузъёс басьтэм но услугаос сётэм понна. "Евразия" Правительстволэн банк-агентэз луэ бере, со юрттэ кун бюджетэ тыронъёсты пытсаны. Со понна миым кутэм Правительстволэн 15 декабре кутэм 1113 номеро постановлениезъя "УДМ" сериен 50 миллион манетлы огшоры вексельёс поттэмын. Со кутӥське кун бюджетэ налог тыронын. Нош город бюджетъя ужа туэ 13 январе поттэм "ИЖ" сериен вексель. "Евразилэн" та сяна вань 3, 6 но 9 толэзь ӵоже бергась вексельёсыз. Соос 7 миллион манет тыр лэсьтэмын. Вексельёс ужбергатӥсьёслы юртто ваньбурзэс шыръяны. Соос бергало кӧня гожтэм дунзыя. Вексельёсын мыло-кыдо ужало "Удмуртэнерго", "Удмурттелеком" но куд-ог ужбергатӥсь ёзъёс. Вексель банклы номыр уг сёты, 12 процент изъян гинэ вае. Быдэс дунне таӵе амалэн ужа бере, асьмеос но дышетскыны кулэ. Нош опытмы 1-2 ар гинэ ай. Кин бен вексельёсын ужаны быгатэ? Котькуд предприятие, ужбергатӥсь, вексель басьтон вылысь, нырысь ик налогъёсъя инспекциысь справка басьтыны кулэ. Отын возьматӥське, кӧня солэн тыронъёсыз. Г. ВАСИЛЬЕВ. ВЫПОЛНЯЕТ МОНТАЖ: - металлоконструкци ; - технологического оборудования; - трубопроводв; - газопроводов; - тепловых сетей. ИЗГОТОВИТ И СМОНТИРУЕТ: - котлы мощностью от 0,48 Гкал до 2 Гкал; - металлоконструкции различного назначения; - водонапорные башни объемом от 15 куб.м до 300 куб.м; - емкости под воду и нефтепродукты объемом от 10 куб. До 1000 куб.м; - нестандартное оборудование различного назначения; - газоочистки для асфальтобетонных заводов и окрасочных камер. УСТАНАВЛИВАЕТ И ЗАМЕНЯЕТ ДЫМОВЫЕ ТРУБЫ. ВЫПОЛНЯЕТ РЕКОНСТРУКЦИЮ КОТЕЛЬНЫХ. ИЗГОТОВИТ: - киоски и торговые павильоны; - котлы для частных домов и коттеджей. ТОВАРЫ НАРОДНОГО ПОТРЕБЛЕНИЯ Наименование Размеры, м Вес, кг Цена (руб) Теплица 2,6х6,3һ,8 380 1370 Печь для бани 430хх450х920 115 770 Бак для воды В=1 куб м 160 580 Ворота для гаража 2,5һ,9 356 1280 Кессон 1,6һ,6һ,8 680 2500 Кессон 2х2һ,8 880 3170 ПО ВСЕМ ВОПРОСАМ ОБРАЩАТЬСЯ ПО АДРЕСУ: г. Ижевск, ул. Пушкинская, 175. Тел. 75- 22-84, 75-52-97 (факс). ЛЫКТОЗЫ КУЖМООСЫЗ. ВОРМОЗЫ -? Красногорское черкогурт кунооссэ пумитаны дась. Гурт спортсменъёслэн 7-тӥ гужем шудонъёссы туэ ортчозы татын. Ӵошатсконъёс кутскозы 18 июне, йылпумъяськозы 21 июне. 18 июне 16.00. Делегациосты пумитан. 16.00. Волейбол (воргоронъёс, нылкышноос). 16.00. Спортивной семьяослы эстафета. 17.00. Футбол. 17.45. 800 метре бызьылон (нылкышноос). 18.45. 1500 метре бызьылон (воргоронъёс). 19.00. Триатлонлы дасям сюресэз эскерон. 19.00. Винтовкаысь ыбылӥськон (ёросъёслэн кивалтӥсьёссы). 19.30. Судьяослэн коллегизылэн кенешез. 20.30. Вормисьёсты ӟечкылан. 19 июне 9.00. Футбол. 10.00. Волейбол (нылкышноос). 10.00. Винтовкаысь ыбылӥськон (ёросъёслэн кивалтӥсьёссы). 10.00. Бызьылон сюресъёсты эскерон. 10.00. Гиря ӝутъясь спортсменъёсты ӵошатсконъёслы дасян (60, 65, 70 кг). 11.00. Гиря ӝутъянъя но армспортъя ӵошатсконъёс. 11.00. 100 метре бызьылон (нылкышноос). 11.30. 100 метре бызьылон (воргоронъёс). 11.30. Кузьдалае тэтчан (нылкышноос). 12.00. Кузьдалае тэтчан (воргоронъёс). 12.00. Бызьылон. Спортивной семьяос. 13.00. 3000 метре бызьылон (нылкышноос). 13.30. 5000 метре бызьылон (воргоронъёс). 15.00. Командаослэн парадэ дасяськонзы. 16.00 7-тӥ гужем шудонъёсты сӥё-дано усьтон. 17.30. Футбол. 18.00. Триатлонъя ӵошатсконъёс. 19.30. Судьяослэн коллегизылэн кенешсы. 20.00. Вормисьёсты ӟечкылан. 20 июне 7.00. 70 иськемез вал вылын ортчисьёслы старт. 9.00. Футбол. 10.00. Волейбол (воргоронъёс, нылкышноос). 10.00. Ёросъёслэн кивалтӥсьёссылэн городкия ӵошатсконъёссы. 10.00. Гиря ӝутъясь спортсменъёсты дасян (80, 90, 90-лэсь ятыр кг). 11.00. Гиря ӝутъянъя но армспортъя ӵошатсконъёс. 11.00. 400 метре бызьылон (нылкышноос). 11.30. 400 метре бызьылон (воргоронъёс). 12.00. 1500 метре бызьылон (нылкышноос). 12.30. 3000 метре бызьылон (воргоронъёс). 13.00. Спортивной семьяослы эстафета. 13.30. Футбол. 14.30. Мылкыд карисьёслэн 1998 метре бызьылонзы. 16.00. Судьяослэн коллегизылэн заседаниез. 21 июне 9.30. 100 метре бызьылон. 10.00. Эстафета 400 х 300 х 200 х 100 м. 10.45. Эстафета 800 х 400 х 200 х 100 м. 12.00. Вормисьёсты ӟечкылан. 12.30. 7-тӥ гужем шудонъёсты сӥё-дано ворсан. Правительствоын Пунэмен-пунэмен Коньдон ласянь югдур лэчытомемен валче, Правительстволэн Тӧроез П. Н. Вершинин тодматӥз куд-ог лэчыт ужпумъёсын. Россиысь Обороная министерство но республикаысьтымы ож тӥрлык поттӥсь предприятиос кусып лэсьтэмын вал келям ваньбур понна дун тырон сярысь тупанкылъёс (соглашениос). Кышкытлык вань, соос уз быдэсме шуыса. Мугез таӵе: Россиысь Правительство сыӵе тупанкылъёсты аслаз постановлениеныз ӧз юнматы. Озьы республикалы пунэмен тырон 522 миллион манетозь вуиз. Котькудӥз берыктымтэ манет регионлэн бюджетэзлы 4 манет тыр ыштон вае. Пунэмен тырон ӧй луысал ке, уждун сётонын секытъёс ӧй кылдысалзы. Татын ачиз кун (государство) янгыш, меӵак пусйиз Павел Николаевич. *** Миым декабре Россиысь Правительство ялӥз: уждун тырон сылоз нырысетӥ интыын. Кылем арез куд-ог азинсконъёсын йылпумъяммы бере, 1998-тӥ ар умойгес луоз кожамы. Туннэ валамон: пусъем ужрадъёс уз быдэсме. Куд-ог предприятиослы уждунэз дыраз сётъяло ке но, "Ижмашын" но лэсьтӥськон организациосын югдур секыт. Бюджетысь уждун тырон ласянь Удмуртиысь Правительстволэн нимысьтыз план лэсьтӥз. Дотация басьтӥсь городъёсын но районъёсын 10-тӥ толэзёзь сётоно ни июне отпуске потэм понна коньдонэз - 15 миллион манетэз. Отчыозь уждун уз луы. Кун Кенешлэн, Правительстволэн, министерствоослэн аппаратъёсазы ужасьёслы. Ижын, Сарапул но Вотка районъёсын уждун быдэсак тыремын ӧвӧл мартлы но. Администрациослэн кивалтӥсьёссы мед ужалозы со понна "улэп" коньдон люкам ласянь. Июле отпуске потӥсьёслы кулэ луоз 10 миллион манет. Районъёсысь но городъёсысь сое келяно 5-тӥ июлёзь. Апрель но май понна уждунэз городъёсысь но районъёсысь администрациосын ӵош тыроно 1-тӥ сентябрезь. Югдур секыт Ижын. Кредитэн басьтэмын ни 70 миллион манет, нош март понна уждун быдэсак сётымтэ на. Та нуналъёсы Ижысь администрация эшшо кредит басьтоз. Сое "кысоно" луоз трансфертъёс (вылӥысь вуэм юрттэт) понна ссуда пыр. *** П. Н. Вершинин ивортӥз гуртэн герӟаськем югдур сярысь. Удобрениос, эстӥськон, вӧй сётэмын вексельёс пыр. Дыр вуоз соосты "кысыны" но дунзэс берыктыны. 1996-тӥ ар понна пунэмен тырон пӧрмытэмын облигациослы. Гуртлы кытӥяз юрттӥськом бюджетэн герӟаськем ужъёс чотын но. Нылпи пособиос сётонлы черод радъямын улыны ичизэ кулэ луись дунын (минимумен). Соосты нош ик вузъёсын тыронэ берытском. Мукет интыосын но озьы лэсьто. Башкириын, кылсярысь, нимысьтыз чекъёс пыр трос юрттэт сёто, - парикмахерскойын, жилкомхозын, транспортын, кусып возёнын (связьын), электрокужым висъямын. *** Алигес Павел Николаевич берытскиз Федерацияя Советлэн кенешысьтыз. Со кичӧлтэмъя отын эскеризы огзэ лэчыт ужпумез - наукалы но дышетонлы пунэмен тыронэз берыктонын югдурез. Республикаысь дышетон заведениосысь кивалтӥсьёс али ваньзэ рос-прос лыдъяны кулэ. Сотэк 1-тӥ июль бере Минфин тазьы шуыны быгатоз: дыр ортчиз, ваче чотан (взаимозачет) уз луы. Озьы ик дасяськоно Россиысь Правительство но Удмуртиысь Правительство куспын бюджет кусыпъёсты радъянъя тупанкыл гожтонлы. Федерацияя Советысь огаз комитетын учкемын Россиысь телерадиокомпания сярысь ужпум. Президент та пумысен указ поттӥз: регионъёсын кенешытэк. Удмуртия чаклалляз аслэсьтыз телерадиокомпанизэ юнматыны. Россилэн бюджетаз со понна коньдон уз окмы. Россиысь телерадиокомпанилэн кивалтӥсез Михаил Швыдкой сыӵе малпанэн соглаш кариськиз. Ужрадъёс пусъемын автозаводэз улӟытон вылысь кредитъёс басьтон ласянь, "Удмуртнефтьлэсь" кӧня ке барышсэ республикае кельтон ласянь, пенсиос сётонэз умоятон ласянь. *** Куд-ог юанъёслы озьы ик валэктонъёс сётӥз коньдонъя министр В. В. Бельтюков. Аэропортын вераськозы удмурт сямен Ньыль ар талэсь азьвыл, 1994-тӥ арын 14-тӥ июне, Удмурт Республикаысь Министръёслэн Советсы кутӥз таӵе нимын постановление: "Удмурт кылэз но Удмурт Республикаын огинын улӥсь калыкъёслэсь кылъёссэс утёнъя но азинтонъя кун программа сярысь". Солэн кызьы быдэсъяськемез алигес эскеремын Правительствоын ортчем кенешонын. Та удысын ужпум сярысь ивортӥзы министерствоосысь но ведомствоослэн кивалтӥсьёс Ю. И. Медведев, С. К. Смирнова, А. Т. Христофоров, Э. И. Кожевников, институтъёслэн кивалтӥсьёссы К. И. Куликов, Г. А. Поздеев, Г. Ф. Березин, З. В. Суворова, мукет адямиос. Данакез пусъем ужрадъёс улонэ пыӵатэмын, куд-огез вунэтэмын. Автовокзалын автобусъёс кошкон сярысь ӟуч но удмурт сямен ивортыло ни ке, чугун сюрес вокзалын но аэропортын удмуртэз палэнэ кельтэмын. Ужан (трудовой) книжкаосы удмурт кылэз пыртон, сюрес вылысь гурт нимъёсты кык кылын гожъян, музон ужрадъёс кулэ каро, пе, трос коньдонэз. Сыӵе тупамтэосты палэнтыны дыр тупатэмын яке, Правительстволэн тӧроезлэн воштӥсез - калыкез дышетонъя министр А. М. Лисина верамъя, гуртэ уж сётэмын, сое быдэстыны кулэ. "Гуртэ уж" но быдэсак программа бордын кызьы ужам сярысь ужпум эскерыны чакламын Правительстволэн Президиумезлэн огаз кенешаз. Кенешонлэн ужаз пыриськиз Правительстволэн аппаратэныз кивалтӥсь М. А. Григорьев. А. СИДОРОВ. ОДӤГ КВАДРАТНОЙ МЕТР ПОННА - 7 МАНЕТ Россия Федерациысь Правительство Постановлениеныз улон инты но коммунальной юрттэтъёс понна тыронъёслэсь выль радлыксэс юнматӥз. 1998 арын асьмеос вань коммунальной юрттэтъёслэн огъя дунзылэсь 50 процентсэ тыром. Со дыре ик та тыронъёслэн быдӟалазы семьялэн огъя доходаз 18 процентлэсь тросгес люкетсэ басьтыны кулэ ӧвӧл. Со сяна, постановление квартиралэн одӥг квадратной метрезлэсь дунзэ юнматэ Россиысь котькуд улос понна нимысьтыз. Асьме Волго-Вятской улосын со 6,9 манет тупатэмын. ДУНЪЁС КУЛЭСМОЗЫ? Зэмзэ но, таӵе юан котькинэ паймытоз, дыр. Нош Россия Федерациысь чугун сюресъёсъя министр Николай Аксененко ивортӥз: туэ 15-тӥ июньысен музъем эгыр но му вӧй нуэм- ваем понна тарифъёс 25 процентлы кулэстӥськозы. Азьланьын чакламын кыдёке мынӥсь поездъёсын билетъёслэсь дунзэс но кулэстыны. Наталь Сюлэмшугъяськытӥсь югдур Тӥр но пурт улын улӥ Дас сизьым ар ӵоже бам вылысьтым синвуэ ӧз куасьмылы на. Улӥ мон тӥр но, пурт улын, ляльчи интыын. Умой муртлэн пуныез но медам адӟы сыӵе адӟонэз, шуисько. Картэ монэ кышно басьтэм ултӥян, вӧсь карон понна гинэ, ӵужапаез понна озьы пунэмзэ берыктэмез потӥз, лэся. Мынам бадӟымез апае солэн ӵужапаезлэн нырысетӥ картэзлы бызем уго. Со сярысь тодӥ трос аръёс ортчыса гинэ, картэ аслаз ӵыжы-выжыосыныз кусып возьыны ӧз лэзьылы. Олокызьы но алдаса, ултӥяса возиз. Бызьыкум картэлэн номыриз но ӧй вал, вылаз дӥсян дӥськутэз гинэ но. Дас сизьым ар ӵоже мон солэсь одӥг копейка но коньдонзэ ӧй адӟылы, кассае тыре вылэм. Нылпиослы вордскем нуналазы одӥг пол коть кузьым басьты вал. Кытын, пе? Нош мынэсьтым уждунме чакласа улӥз - кӧня басьтӥсько, кӧняез кылиз на. Кызьы мон улӥ, мар сии, мар нуллӥ - со сярысь тодо вал бускельёсы но ужысь эшъёсы гинэ. Мон вӧзын картэ райын кадь улӥз: кытчы мынэмез потэ - мынэ, мар юэмез потэ - юэ. Куинь ужын ужаса но уг тырмытӥськы вал солэн ньылоназ. Бадӟымез нылы одӥг пол маде, атаез, пе, артысь кафеысь адӟи, кыӵе ке кышномуртэн ӵош пуко, ӝӧк вылэ бутылка, салат, пельнянь пуктэмын. Коньдон курем атаезлэсь, нош соиз пумитаз вазем: "Мын, анаедлэсь кур". Нош милям одӥг копейка но коньдонмы ӧвӧл. Пызез кизер гинэ шуккисько, яке картофка пӧзьтӥсько. Озьы сиськыса улӥмы. Нылпиослы пинал дырзэс но умоен малпаны номырезэ. Кӧласьком вал садикын, подъездъёсын, мурӝолын, одӥг полаз черкын но уйзэ ортчытэммы вань. Пимылы дас тямыс арес тырмиз но, атаез солы шуиз, тон, пе, анаеныд кӧласькод. Пие ӧз чида таӵе ултӥянэз, уйшор уин дорысь кошкиз. Берло ини тодӥ, уже интыяськем. Собере улонмы эшшо но шимес луиз. Картэ котькуд уй но нунал жугиське вал, вань сиськон тӥрлыкъёсты сӧрылӥз, ӧсъёсты пильылӥз. Коркась поттэ вал монэ но нылъёсмес. Ачиз нокытчы но дорысьтымы кошкыны уг малпа. Нош кыӵе быгатэ вал со калыкен ӟичыяськыса вераськыны. Берло дыре аслам ужаса басьтэм квартираям пырыны ик кышкасько ни вал, олокинзэ но доре пыртэ угось. Уксё ӧвӧлэн, ньыль комнатаен квартираме вузано кариськи. Дунтэм дунын сётоно луиз, сокем шӧтэм каремын вал улон интымы. Со коньдонмы тырмиз вужгес гинэ корка басьтыны. Картэ мукет азе улыны кошкиз, милесьтым ик уксё куриз на. Озьы ке но, туж кышкаса улӥсько, ураме но, уже но огнам потыны уг дӥсьтӥськы. Весь кышкатыса улӥз угось виёнэн. Ӵужапае, пе, кулӥз, нылпиосыз анайтэк кылизы, тынад но пиналъёсыд со адӟон пыр мед потозы. Сюлэмы тырмыса гожтоно кариськи аслам улэм-вылэме сярысь. Ваньмызлы кылымон вера вылэм картэлэсь нимтулзэ, мед тодозы солэсь кыӵезэ. Кышкасько. Аслэсьтым но нимме газетэ эн поттэ вал. Е. П., Ижевскын улӥсь. Редакцилэсь: Таӵе сюлэмшугъяськытӥсь гожтэт вуиз редакцие. Кышномурт жингыръяз на - юрттэт но куремез потэ, кытчы ке вазиськыны но кышка. Кылдэм югдур пумысен ми вазиським Ижевскысь "Кризисной семья" муниципалитет учреждениысь специалистъёслы. Адямиез ултӥян, вӧсь карон ужпумъёсъя соос бадӟым вераськон ӝутӥзы, кудзэ сётӥськомы туннэ "Наталь" бамын. Юрттэтлы кулэяськись та кышномуртэз соос возьмало ас доразы, вазиськоно таӵе телефонъя: 24-21-31. Лыдӟись эшъёслы но вазиськем потэ: семья улонады кыӵе ке шуг-секытъёсты кылдӥзы, юанъёстылы валэктонъёс уд шедьтӥське - гожтэ редакцие. Гожтэтъёсыныды ми тодматом "Кризисной семья" центрын ужась специалистъёсты. Газет пыр яке меӵак асьтэлы вазиськыса, соос тӥледлы юрттыны тыршозы. БАДӞЫМЕСЬ АЗИНСКОНЪЁС ТӤЛЕДЛЫ! Красногорское черкогуртын туннэ шунды ик вазьгес сайказ кадь. Ёрос ньыль нуналлы огазеялоз быдэс элькунысьтымы спортсменъёсты. Асьсэлэсь командаоссэс ыстыны мылкыд каризы ваньмыз ик районъёс. Спортлэн пӧртэм удысъёсызъя кужмо но сэзь луэмзэс эскерозы ог сюрс пала адямиос. Гуртъёсысь спортсменъёслэн гужем шудонъёссы туэ ортчозы ини 7-тӥзэ. Тодады вайытӥськом: кылем арын таӵе ӵошатсконъёс вал Якшур-Бодьяын. Отын вормисьёс луизы Завьялово, Можга но Игра ёросъёсысь командаос. Спортлы сӥзем таӵе праздникъёсты ортчытон капчи уж ӧвӧл. Коньдон но уно гинэ кулэ, кужым но. Но со дыре ик сыӵе ужрад огазеяськыны юрттэ. Нош огазеяськон вань секытсэ ворме. Кудӥз-огез, оло, малпа, коньдон юнме тус-тас луэ шуыса. Ӧвӧл. Котькудӥз манет ӝикыт кутӥське. Шат ёрослэн кужымез тырмоз, шуом, выль стадионъёс ӝутыны, бызьылон сюресъёс дасяны, спортзалъёсты выльдыны? Ӵапак шудонъёсты ортчытон ик юрттэ ваньзэ сое быдэстыны, ӟеч сямъёсты утьыны. Син азьын воштӥськиз Красногорское селолэн вылтусыз но. Ёрос администрацилэн кивалтӥсез Михаил Матушкин вань кужымзэ сётӥз та ужъёсты радъян понна. Селоын улӥсьёс но быгатэмзыя пыриськизы ӵошатсконъёслы дасяськонэ. Огъя кужымен ӝутэмын стадион. Тупатъямын куашкан калэ вуэм школа но спортзалъёс, нылпи садъёс. Котькытын утялтэмын жуг-жаг. Огъя вераса, татын улӥсьёслы куноослы азьын возьыт уз луы. Гурт шудонъёсты радъясьёс коньдонэн юрттэмзы понна тау каремзэс верало "Удмуртия" страховой фирмалы, "Ижмолоко" но "АСПЭК" огазеяськонъёслы. Мар бен, ӵошатсконъёс кутскизы. Бадӟымесь азинсконъёс тӥледлы, гуртъёсысь спортсменъёс! Н. БАЙТЕРЯКОВ. ШУЛДЫР КУАЗЕН КАПЧИ МЫЛКЫД Гужемлэн кутсконаз Завьяловоысь культура удысын ужасьёс пӧртэм ужрадъёс ортчытъяло. Тани алигес удмурт фольклорлы сӥзем фестиваль бере Завьялово черкогуртлэн нуналэз вал. Ӵошатскон гинэ тямыс пӧртэм люкаськиз. Ӝытазе, дискотека сяна, куамын арлэсь ортчемъёслы нимысьтыз эктонъёс радъямын вал. Н. РОМАНОВ. ФИНЛЯНДИЫН ПУМИСЬКОН Июньлэн кутсконаз Кун Кенешлэн Тӧроез Александр Волков но "Евразия" банклэн президентэз Валерий Богатырев Финляндилэн шоркараз Хельсинкиын пумиськылӥзы Финляндилэн Правительствоысьтыз Промышленностья но вузкаронъя министръёсын, Кунсьӧр ужъёсъя министрлэн экономической кусыпъёсъя нырысетӥ воштӥсеныз. Вераськонъёс вал Удмуртиын коньдонэн ужанъя югдур но Финляндиысь но шаерысьтымы предприятиослэн ог- огзылы юрттэт сётонъя луонлыкъёссы сярысь. Соин ӵош ик веразы мылкыдъёссэс но ог- огзэс валазы. Выль кусыпъёс тупатонэ пыриське "Евразия" банк но. "Евразилэн" пресс-службаез. Кильмезь ёросысь иворъёс ЫШЫЛО УЙШОРЕ Кильмезьысь сюрес тупатъясьёслы пӧсь йӧтӥз ни берло дыре. Татысь сюресъёслэн "кузёоссы" потӥллям, шӧдске. Кильмезьысь Нема пала мыныку, ялан "сурасько" иськемъёсты возьматӥсь пусъёс. Моторки но Пестерево гуртъёс вискын кык пол ышылӥзы яке номырлы ярантэм луылӥзы сюрес вылысь вань пусъёс. Сэрттыны кутскиллям татын кирпичлэсь лэсьтэм автобус дугдылонниосты гинэ но. Азьланьын но та йыртэмасьёс ӧз чалмытске ке, иське, отчы возьмаськисьёсты пуктоно луоз. КЫТЧЫ МЫНЭ ГУРТ? Киров областьысь Статистикая кун комитет таӵе лыдпусъёс вераз. Котькытын сямен ик, татын но куэсме вордоно пудо-животъёслэн лыдзы. Берло вить ар ӵоже ыжъёслэн но кечъёслэн уллёзы 49 процентлы синӥз, таза сюро пудоослэн - 30, парсьёслэн - 26 процентлы. Гурт калык ас хозяйствояз соосты вордэ ик на, нош колхозъёс но совхозъёс та ужлэсь палэнтӥсько. СИНВУАСЬКИЗ... МУДОР Паймымон учыр луиз кылем ар пумын Вятской Поляныысь Никольской соборын. Одӥгез вӧсяськон дыръя, мудор йылысь Николай Чудотворецлэн бам вылтӥз синвуосыз васькыны ӧдъязы. Та мудор гожтэмын туж кемалась, ог 150 ар талэсь азьло. Верало, вотка музъем вылын таӵеез ӧй вал на. Табере черке ветлӥсьёслэн лыдзы шӧдскымон йылӥз. Отчы вӧсяськыны вуыло кильмезьёс но. ПОРЪЯЗ УРАМТӤ ВУЧАЙЫ Тунаны гинэ кылиз на, кытысь Кильмезь посёлоклэн урамаз вуиз вучайы пӧйшур. Оло, кинлы ке йырыз кур вылэм. но районысь охотовед сое кутыку, пӧйшур туж лекъяськиз. Борысьгес тодмо луиз, та витьымтэ куно татчы вазьгес вуэм вылэм ни. Азьвыл нуналаз со урдскиз кышномурт вылэ. Таиз больницае вазиськоно луиз. Н. НИКИФОРОВ. АЗЬПАЛАЗ - ДЕПУТАТЛЭН ХОЗЯЙСТВОЕЗ Вуиз пӧсь гужем. Пудо поттэмын возь вылэ, кӧняез ке - лагерьёсы. Июньлэн нырысетӥ нуналъёсаз Пичи Пурга районын пуж-пуж йӧл кыскизы. 20 хозяйствоос пӧлысь ваньмызлэсь уно продукция поттӥз "Мир" эштос. Татын скаллы быдэ нуналаз 13 килограмм йӧл люкало вал. Солэн кузёез, Кун Кенешлэн депутатэз Анатолий Ешкеев вань ужъёсты угось туж быгатыса радъяз. Но берло дыре куазь юн пӧсь улэмен, кечёвоослэн но йӧл люканзы кӧня ке синӥз. Г. ВАСИЛЬЕВ. Витьтон вить арес тырмиз кылбурчилы Иосиф Бобровлы. Та адямилэн нимыз лыдӟисьёслы ӟеч тодмо: Иосиф Петрович удмурт кылбуретэз яратӥсьёсты шумпоттӥз ни кӧня ке книгаен. Туннэ печатласькись ужъёсаз гожъясь суреда бадӟым яратонэз, сюлэмшугъяськыса вера туала улонмылэн пӧськыосыз сярысь, адӟе чебер инкуазез, мӧзме алнаш музъемезлэсь. Ваньмыз со - кылбурет дунне. Кылэмды вань-а? Бер вуэм яратондэ Улляны тыршид тон. Чидасьтэм пӧсь сюлэмдэ Кырмыны вырид на. Вожектоз ай тулысэд, Сяськаен пиштоз ай. Бугыртоз ай уйвӧтэд, Чик маза уз сёты. Уг, уг вала та сюлэм, "Эн" кылэз уг тоды. Алыны уг лу вылэм, Гажамысь уг дугды. Лушкаськем кадь пумиськон - Оло со уйвӧт-а? - Уз, уз вайы шумпотон, Сюлэмез исан та. Пож кыллэсь уд пегӟы тон, Возьытлэсь уд кышка. Гажано муртэд понна Улондэ сётод кадь. "Азӥллям" шуо муртъёс. Синазькыль каро ни. Яратон со, кенакъёс, Кылэмды коть вань-а?! *** Кошкизы, кошкизы, кошкизы, Сюлэмме сьӧразы нуизы... Бурдъёссэс мӧзмылэс сэзъяса, Тазалык но шудбур сӥзьыса. Сылӥсько, сылӥсько, сылӥсько... Шоканы дӥсьтытэк учкисько. Тани нош сылмизы ни соос, Инбаме сылмизы ӝож гуръёс. Келясько, келясько, келясько, Одӥгнам, дыр, огнам кылисько. Сӥзьылэз суредась бурдоос, Тӥ понна погыльско синвуос. Ой, шыпыт. Туж шыпыт ук, шыпыт. Я, малы такем буш но мӧзмыт? Туриос но мӧзмо, дыр, сьӧрлон... Лушкемен викышъя кадь улон... Тулыс зор Куазед но зоре ни, зоре. Миське ни ӝужась гуждорез. Берпум лымыез пызьыртэ, Паймем нюлэсэз ӟыгыртэ. Ненег тӧл веша ымнырме, Сюлэм крезьгурен ни тырме. Сюлэм ни кыре куриське, Сюлэм дыртыса жугиське. Льӧльмыт тусбуез кызьпулэн. Тани усьтӥськоз ни вожен. Куаръёс-турынъёс ни дырто, Вожен дуннеез шобырто. Сюлэм нош тырме выль шудэн. Сюлэм нош кырӟа но шудэ. Сюлэм бурмыса усьтӥське. Сюлэм гажаны куриське! Мӧзмон Быдӟым Куалэсь но Вожойлэсь, Сям Вырйыллэсь но Четкерлэсь, Искальтонлэсь но мӧзмисько, Бертон дырме ни возьмасько. Аслам мусо кызьпуэлэсь, Школа вӧзысь топольёслэсь, Сад бакчаысь уӵыослэсь Куараоссэс мон утчасько, Ой, мӧзмисько ук, мӧзмисько! Та четлыкысь пегӟон понна, Чагыр бурдъёс будэтысал. Лыз инбаме дыдык сямен Малпаськытэк мертчиськысал. Я, кытын тӥ, Алнаш палъёс? Мусо возьёс но нюлэсъёс? Калыкеным вераськыса, Лулме ырак мон лэзьысал... *** Пельёсы дугдо ни кылэмысь. Куараос кошко ни мон дорысь. Та тӧдьы палата, Та тӧдьы халат но Нокызьы ӧз алэ кошкемысь. Туж кема, кема ни эмъязы, Номырлы ӧз яра тыршемзы. Пересьмон, шуо, тонэ вормем, Висёндэ уг улля ни сюлэм. ... Уӵыос туэ но лыктозы. Шур дурын уйбыт кырӟалозы. Тюрагай тубоз-тубоз инме, Крезьгурен тырмоз паймем дунне. Мон доры уз вуэ ни соос, Шумпотон уз вае куараос. Та улос шыпыт-шыпыт кылёз, Та лулы кызьы бен чидалоз? Кызьы инкуазен мон вераськом? Улыны кытысь кужым каром? Льӧмпуос пӧлтӥ вамышъясько, Осконме татысь ик утчасько... Ӟыгырты Я бен, кошкы вӧзысьтым, Адӟеме уг пот. Шат кутод тонэ дусым? Бурдъёсыд ик кот! Пӧрмостэм тон, толыктэм, Ыльӟектэм шунянь. Мар меда сокем востэм? Чылкак ведь кунян! Шат таӵе, пе, луоно Удмуртлы ялан? Шаплыгес кариськоно, Мерсконо азьлань! Марысь мар ке - сылоно Ас данэд понна. Синмазы кут кутано! - Долӟеме мынам... Эх, тонэн, уг луы, уг! Вот ӵушни-пашни... Ой-ой! Весь маке лул шуг. - Ӟыгырты ини! Юртты, арганэ! Арганэлы верало ай Инӧслэсь усьтӥськемзэ. Со гинэ, дыр, валалоз ай Мылкыдылэсь лӧптэмзэ. Арган, арган, арган, Мусо эше, туганэ! Крезьгурен мыным юрттод, Синмаськемме валэктод. Сюлэмме уг шӧдо чик но, Чик уг адӟо асьмемыз. Арганчи со - алданчи, пе, Пӧялля, пе, нылъёсыз... Эх, арганэ, арганэ, Эн кожылы паллянэ! Ваньзэ тон быгатӥськод, Шӧдӥськод но валаськод. Ӧй, ӧй тодылы ачим но Огпол тазьы луонзэ. Дӥсьтытэк но мӧзмыса мон Ветлӥсько ни кык арзэ... Ой, арганэ, арганэ, Валаоз-а туганэ? Ӧвӧл вылэм алданчи Одӥгез но арганчи! Наталь Керетонлы - кортнэт Семья кылдытыкузы тросэз малпало огкылысь но тупаса улон сярысь. Но ваньмызлэн озьы уг пӧрмы. Керетонъёс семьяын пуромо пӧртэм мугъёсъя. Кылсярысь, коньдон уг тырмы, мултэссэ юон, семьяысь кинлэн ке одӥгезлэн кыӵе ке сямыз мукетызлы уг кельшы, кузпалъёслэн пӧртэмесь тунсыкъяськонъёссы. Огез но мукетыз керетӥсьёс (картэз - кышноез, анай-атай-нылпиос) ог-огзэс олокыӵе но кылъёсын жуго, ултӥяло, тышкасько. Кизэс но вуттыны уг кепырало. Таӵе кусыпъёс ӟеч улонэ уз вуттэ. Кылсярысь, керетэм бере нылпи яке бадӟымъёс пӧлысь кудӥз ке больницае сюре, ужаны уг быгаты ни яке йырыз висьылэ, тазалыкез лябӟе. Психологъёс ассэ ужазы пӧртэм сыӵе учыръёсын пумиськыло. Шуом, анай-атаез керетэмен йырин нылпи висьыны усе (пуш ёзвиосыз лябӟо яке ку висён аля). Сыӵе учыре анай-атайёслы одно ик вазиськоно психолог доры, со юрттоз асьсэлы кузпалъёслы секыт югдурысь потыны, нылпи но ӝоген йӧналоз. Нош мур выжыяськем керетон жугиськонэ, адями бырон учыръёсы но вуттэ, кудӥз ачиз улонэн люкиське. Озьыен, семья куспады кыӵе ке но секыт югдур кылдӥз яке ӵемысь керетӥськоды, утчалэ та учырысь потон амалъёс. Мар кароно, семьяяды секыт югдур кылдӥз ке? Нырысь ик, асьтэлэсь мылкыддэс, шӧдондэс кыӵе ке но одӥг кылын вералэ, - кылсярысь, со - "кышкан", "ӝожомон", "мӧзмон", "сюлмаськон", "янгышан" но мукет. Со кылэз шедьтыны быгатоды асьтэлы асьтэос таӵе юан сётӥды ке: - Мар мон али шӧдӥсько? Юанлы валэктонэз гожтыса кельтыны луоз тетраде яке дневнике. Шедьтэ сыӵе дыр, ку семьяын кылдэм керӟегъяськон ӧжытак зӥбломоз, кылсярысь, шутэтскон нуналэ, ӝыт сиськем бере. Вералэ семьяостылы пуш малпанъёсты, сюлэмшугъяськонъёсты сярысь (кышкамды, сюлмаськемъёсты, ӝоже усемды сярысь но мукет). Ваньмыз мед тодозы тӥлесьтыд сыӵе мылкыддэс. Та вераськон дыръя ултӥяны эн шедьтэ карттэс, кышнодэс, нылпиостэс. Сётэ соослы малпанъёсты пумысен асьсэ кылзэс вераны. Эн дыртэ. Кӧня ке минут вераськыса гинэ семьяын кылдэм секыт югдур уз тупатскы. Дышетске чиданы. Кӧня ке нунал яке арня ортчыса, выльысь берытскемды луоз та вераськонэ. Сётэ асьтэлы юан: - Мар мон али карисько? Валэктондэс нош ик гожтыны луоз. Куке тӥ асьтэлэсь юаськоды: "Мар мон карисько?", "Мар сярысь малпасько?", асьтэлэн выросъёсыныды кивалтыны кутскиськоды, верам кылъёстэс чакласькоды, мар каремды сярысь малпаськиськоды. Ваньзэ малпаса, валаса лэсьтоно, адями мед тодоз мар солы аслыз кулэ. Пыдло ватэм малпанъёсты, сюлмаськонъёсты семьяостылы но валамон луизы ке, вераськондэс азьланьтыны луоз. Янгыш луэмдэс вералэ, берло керетонды дыръя ог-огдэс урод кылъёсын вӧсь карем понна. Собере юалэ асьтэлэсь: - Мар мыным кулэ? Валэктондэс гожтэ. Шугъяськиськоды ке та юанлы валэктон сётыны, тодады вае быдэс улон сюрестэс. Гожтэ, кыӵе вал тӥляд со дыре кулэяськонъёсты, малпанъёсты, нош али кыӵеесь. Бадӟым список кылдоз. Со пӧлысь быръёно быдэстыны луонооссэ гинэ. Озьы пичиен-пичиен малпанъёсты улонэ пыӵаны кутскозы, семьяды но шудогес луоз. Керетонды кытчы ке палэнэ кылиз ке, кусыпты кӧня ке арнялы, толэзьлы тупалоз. Но азьланяз со выльысь кылдыны быгатоз. Пуромыны турттӥсь керетонэз шӧдыны но дырыз дыръя дугдытыны кулэ. Ма вылысь сое валаны луоз? Шуом, дышем сямъёсты воштӥсько, доре бер вуиськоды, керӟегъяськиськоды, мае ке но уродзэ возьмаськоды. Кусыпъёстэс умоятон понна, тӥледлы дышетскыны кулэ: - мукетсэ кылзыны; кин ке вераськыку чалмыт улыны (карт, кышно, нылпи); пуш мылкыддэс кылын вераны; асьтэлэсь малпандэс мукетызлэн малпанэныз оградэ пуктыны; бырйыны; малпаськыны. Мукет сямен вераса, трос амалъёс пӧлысь шедьтоно асьтэлы тупасьсэ. Со сяна, семья кусыпъёстэс тупатыны турттон мылкыд кулэ. Керетон - со усьтымтэ луонлык. Соин ик, вазиське психолог доры. В. Гайда, психолог. КЫЛЫТ, ГЕРБЕР, КАЛЫК... Герд но Гербер. Туэ та кылъёс ог-огзылы матынэсь луизы. К. Гердлэн вордскем дораз солы сӥзем стела но музей усьтэм бере, калык вырӟиз Кылыт (Кылт) шур дуре - Гербер шулдыръяськонэ... Кызьы ортчиз та праздник туэ? Со сярысь пӧртэм малпанъёс. Кылбурчи: - Мыным ӧз яра: Гердэз но Герберез герӟазы, воксё пӧртэм макеосыз. Собере - кин кытчы нуэ, валтэ, кин кытчы мынэ - валаны уг луы... Но мыным инкуазьын шутэтскыны кельшиз. Артист: - Ярам, туж умой концерт вал. Калык огазьын шулдыръяськиз, ӝук сииз. Нош со вискын ик пӧртэм шудонъёс, ӵошатсконъёс луыны кулэ вал кадь. Калык отчы-татчы пазьгиськиз. Ӧй вал азьветлӥсь, валтӥсь адямиос. Нош мар со Гербер? Инмарлы дэмен вӧсяськон, шуд-дэлетсэ мед сётоз шуыса. Ваньзэ умой, чакласа лэсьтысал ке, оло, куазь зорысал ни. Концертэз нуись: - Кыӵе, пе, мон понна шулдыръяськон... Шунды шорын пыжыса, температурае 39,5 градусозь ӝутскиз... Герберез радъясьёс пӧлысь огез, РНМЦ-ын ужась (киыныз шонтыса): - Мар юанэз, асьтэос адӟиды... Вылӥысен ке учконо, адӟыны луысал туриос лобӟон сюрес кадь суредэз. Огпал радын, шур кузя, пуртыослы матэ но кыдёке люкен-люкен интыяськем калык, концерт возьматон площадка... Мукет палаз, олокытчы палдурскем вузкарисьёс: сурен, книгаен, кассетаен, киужъёсын... Та вайяськем радъёс куспын - буш, кыр инты (пӧртэм шудонъёслы чакламын вал, дыр). Возь укыр ӧз лёгаськы (но жагтӥськиз, луоз) - калык туэ ӧжытгес люкаськиз: кинлэн коньдонэз ӧвӧл, кинлы автобус ӧз сётэ, кин ке пӧсьлэсь кышказ. Уй пал ёросъёс шуизы, дыр: кыдёкын. Лымшор палъёслы Инмарлэсь дэмен куриськемзы юрттӥз, луоз: ӵуказеяз ик ёрос вылтӥзы гудыриё зор ортчиз. Нош трос интыосын ӵынэн кадь ӵоктаськыса улэ инбам - зорыны уг вала... Вунэтӥм ини вӧсяськонэз, инты но бырйыны ум быгатӥське, куалаосмы ыштэмын. Инмар сётоз-а "ӟечкын-бурен шуныт, небыт зоръёссэ", тыр шепен кисьмась ю-няньзэ, выжыосынымы кутэм улон радэз, сям-нергеосыз ум чаклаське бере? Гербер шулдыръяськонэз дасясьёс - Культурая министерствоысь калык творчествоя но шутэтсконэз радъянъя научно-методической центр (РМНЦ), "Удмурт кенеш" огазеяськон, Вавож ёрос администрация. Куинь кивалтӥсь ке, одӥг но кузёез ӧвӧл шуыса кошке. Инты дасян, котькуд чыры-пырызэ малпан - интыысь кивалтӥсьёслэн ужзы. Калыкез нуон-ваён, вӧсез радъян-ортчытон понна нырысь ик "Удмурт кенеш" кыл кутэ, луоз. Шулдыръяськон люкетэз, пӧртэм фольклор но мукет коллективъёсты люкан - РНМЦ- лэн сюлмаськонэз. Нош кинлэн ужез меда вал, кияз мегафон кутыса, вань калыклы радлыкез (кытын, ку, мар) ивортылыны, вашкала шудонъёсыз выльдыны, спортъя ӵошатсконъёсыз радъяны, нош озьы ик - Гербер сярысь тодон визь пырыосыз калык пӧлы вӧлмытыны (шуом, нимысьтыз листокъёсын)? Таиз ласянь соку ик куаретӥсь луоз: кытын ай, пе, коньдон... Тӥни со борды ик пыкъяське вань улонмы. Со муген ик Герд но Гербер валчеямын вал, Вавож ёросысь хозяйствоосын Гырон быдтон праздникез но та нуналэ ортчытоно кариськизы. Соин ик вавожъёс асьсэос Герберез ӧз адӟе, шуыны луоз. Со понна тросаз гуртъёсын улӥсьёс учкыны быгатӥзы шаерысьтымы тужгес устооссэ эстрадной, хоровой, фольклор коллективъёсыз, нимаз кырӟасьёсыз, арганчиосыз. Пӧсьлы чидасьтэмъёс Кылыт шурлэн дыртӥсь вуаз жомбыль тэтчо... Нош сцена (площадка) гурвыл кадь ӟырдамын. Эктӥсьёслэн пыдпыдэсъёссы улын кызьы со ӧз гомӟы! Ваньмыз бӧрсьы потӥзы на "танокъёс" - тӧлпери кадь зӥр бергало. Артистъёс понна кезьыт но, пӧсь но номыр кадь ӧвӧл. Быръемын устоосыз 17 коллективъёс. Соос ӝыт Вавожысь стадионын гала-концерт сётӥзы на. Кужмо, чебер, паськыт калык кырӟан-эктон тулкым! Со пӧлын РНМЦ-лэн аслаз но йырыз поромиз, дыр. Кытын на шудонъёс сярысь малпаны... Ёрмон, ёрмон, шуиськом... Нош калык со ёрмонэз "сюртӥз" кырме, куаса, уката золомыса потэ. Кырӟан визылмы куасьмонтэм. Нош солэн ошмесэз - вӧсь гуръёс но медаз вунэ вылэм. Т. ЧЕРНОВА. КУН КЕНЕШЛЭН СЕССИЯЗ ВЫЛЬЁССЭ НО УЧКОЗЫ Валлян, 16 июне, усьтӥськиз Кун Кенешлэн кызетӥ сессиез. Парламент кызьлэсь уно ужпумъёсты эскерыны басьтӥськиз. Но туннэ кун властьлэн асваньбурез уже кутонэн но люконэн герӟаськем полномочиосыз сярысь кык ужпумез депутатъёс учконлэсь палэнскизы. Та ласянь ас кылзэс меӵак веразы Николай Сычев но Александр Бегунов. Берлоез солэсь нимзэ ик воштыны куриз. Но депутатъёс сое умоен ӧз лыдъялэ. Соин ӵош повесткае пыртӥзы Му вӧй поттонъя удмурт компанилэсь акциоссэ басьтон. Валентин Кудиновез ужаз берыктон ("Удмуртнефть" АО-лэн директоръёссылэн советсылы тӧрое).АПК-лы юрттонъя фонд сярысь но мукетсэ. Нош пӧртэм ужпумъёсъя люкетаз Правительстволэн Тӧроез Павел Вершинин парламентлы ивортӥз бюджет удысын тыршисьёслы уждун, пенсиос но нылпиослы пособиос тырон сярысь Павел Николаевич пырак шуиз, дышетӥсьёслы, пе, отпуске потэмзы понна коньдон сётом, нош апрельлы но майлы уждун сентябре луоз. Та ласяь тужгес но секыт югдур кылдэмын Ижевскын. Соин но Правительство шоркарлы 7,7 миллион манет кредит висъяз. Депутатъёс нырысь ик юнматӥзы судьяосты. Собере учкизы туэ но вуоно арын март толэзёзь кыӵе законопроектъёс кутыны малпало. Планэ куд-ог выль ужпумъёс ватсазы. Кылсярысь, депутат Валентин Тубылов ӵектӥз куинетӥ яке ньылетӥ кварталэ "кылъёс сярысь" Законлы инъетэз учкыны. Азьлояз сессиын депутатъёс эскеризы вал предприятиослэсь тыронъёссэс берло дырлы кельтон сярысь ужпумез. Со уго люконтэм герӟаськемын ваньбур поттонэз будэтонэн. Нош тыронъёссы киязы, пыдазы шукко, берлань кыско. Ваньбур поттӥсьёслы со бадӟым юрттэт луоз. Тая закон кутэмын. Нуназе бере парламент рос-прос учкиз му вӧй поттонъя ужпумъёсты. Тани Пибаньшур, Пызем, Кулига, Полом, Дэбес, Шадбегово но Бураново нефть кыскон интыос, конкурс ортчытытэк, Удмурт Республикалы сётэмын. Вылӥ верам интыосысь "сьӧд зарниез" поттоз Удмурт национальной кампания. Толон кун кенешлэн кызетӥ сессиез ужаз на. Г. РОМАНОВ. Умой адямиос Небыт кылыныз но эмъя Алнаш районысь Шадрасак-Кибья гуртын вордскем егит нылкышно Мария Ивановна Горшенина ужа республиканской больницалэн пульмонологической отделенияз. Ӧй шуысал, та кышномурт бадӟымесь ужъёсыныз дуннеез паймытӥз шуыса. Но со улонлы осконзэс ыштэм висись адямиослы котькуд нунал шумпотон, оскон но шуныт мылкыд кузьма. Лякыт куараеныз мылкыдэз буйгатэ, небытэсь киосыныз ӝог шедьтыны быгатэ кышкаса ватӥськем вирсэръёсты. Мазэ ватонэз, висисьлэн вань мылкыдыз сӥньысэн кадь герӟаськемын луэ тонэ эмъясь медсестраен. Кема чакласа улӥ Мария Ивановнаез. Ас поннам малпасько, кин-о тон: удмурт-а, ӟуч- а, бигер-а? Котьмар медло, вази удмурт сямен. Ӧй янгыша, сюлэмы ӧз алда. Шумпотӥсько, калыклэсь тазалыксэ утён удысын трос удмуртъёс ужало шуыса. Анаез нылызлы, Мария Ивановналы, кузьмам дунне вылысь самой ӟеч сямъёсты. Ижевскысь медучилищеез йылпумъямез бере, М. И. Горшенина 16 ар ужа ини та больницаын. Та дыр ӵоже со кӧня висисьёсыз эмъяз, сюлэмызлэсь шунытсэ кузьмаз. Мария Ивановна - ӟеч кузпал, усто анай. Картэз асьсэ гуртысь ик - Михаил Никитич Горшенин. Шудо кузпалъёс, шуысал мон та выль тодмоосы сярысь. Ог-огзэс валаса но юн гажаса будэто кык пизэс. Ваньмон дыръязы ветло Удмурт культурая дэменлыклэн "Чайка" клубаз. Татын удмуртъёс огазьын пумитало праздник нуналъёсты, мыло-кыдо пырисько пӧртэм ужрадъёсы. Мария Ивановналэн зарни киосызлы, сюлэм шунытэзлы бадӟым тау карон кылъёс гинэ вераме потэ. Вамыштоно сюресэз котьку вож-вож мед луоз, нош будӥсь кивоштӥсьёсыз шумпотон гинэ мед ваёзы. В. ВАСИЛЬЕВА. Бускельёсмы дорын ЧУПЧИ ПАЛАСЬ - ТАНЫП ДУРЕ Чупчи но Танып шуръёс ог-огзылэсь кыдёкын. Озьы ке но, соослэн вуоссы, кузь сюресъёсты ортчыса, ог-огенызы пумисько, собере одӥг ӧретӥ - Кам шуртӥ - бызё, Волгаен ӵош бадӟым зарезёзь вуо. Нош Камен пумиськытозязы, Чупчи усе Ваткае, Танып - Агидель (Белая) шуре. Уно сю иськемъёсты сьӧразы кельтыса, олокыӵе но иворъёсты кылыса, тунсыко суредъёсты адӟыса, пӧртэм ошмесъёсысь потэм вуос азьпала дырто. Эх, вуослэсь кылзэс мед тодысалмы. Кӧня даур ӵоже бызё ни меда Чупчи но Танып шуръёс - созэ мон уг тодӥськы. Огез тодмо: кыксы но Пермь улосысь пото. Та шуръёс дуре интыяськем гуртъёсысь, каръёсысь (котькыӵе улосын) улӥсьёс котьку данъяськыса верало: "Милям шурмы!" Танып дуре пуксем гуртъёс пӧлысь одӥгез - Алтау. Отын удмуртъёс уло. Алигес, сабантуй (гырон быдтон) праздник азьын, Алтауэ ӟеч ивор вӧлмиз: Удмурт Элькунысь артистъёс концерт возьматыны лыкто. Кыӵе коллектив меда? Ижевскысь яке мукет интыысь-а? "Шулдыр ӝыт", "Инвожо" ансамбльёсты, Удмурт драмтеатрез, Геннадий Бекманов, Владимир Возняков, Владимир Котков кырӟасьёсты алтауос умой тодо ни. Соослэн кырӟам-верамзы, спектакльёс возьматэмзы гуртоосылэн сюлэмъёсазы аспӧртэм пытьы кельтӥзы. Али но дырын-дырын шумпотыса тодазы вайыло Удмурт шаерысь куноосты. Гурт калыклы тужгес но вунонтэм кылиз Удмурт драмтеатрлэн нырысьсэ ветлэмез. Спектакль возьматыны лыктэмъёс пӧлын вал Алтау гуртын вордӥськем но будэм егит пи Кадим Галиханов. Клубын сылон инты но соку ӧз кыльы. Куазь пӧсь. Клублэсь вань укно рамаоссэ утялтӥзы, янак вылын но адямиос пукизы. Со нуналэ тужгес но секыт йӧтӥз Кадимлы. Ас гуртэз азьын егит артист экзамен сётӥз, шуыны луэ. Уноез алтауос соку нырысьсэ адӟизы Кадимлэсь спектакльын шудэмзэ. Ролез усто пӧрмиз. Таяз учыре Алтауэ вуизы Удмурт Элькунлэн уй палысьтыз - Чупчи дуре пуксем Глаз карысь "Иднакар" ансамбльысь артистъёс. Зэм, быдэс коллективзы ӧз лыкты. Гурт калыкез шулдыртӥзы арганчи Андрей Чупин, кырӟасьёс Лидия Михайлова но Елена Нуриахметова. Чылкак куинь кузя гинэ. Но соослэн жингрес куараоссы, ӟеч мылкыдзы алтауосты лӧпкытӥз. Котькуд номерзэс (кырӟамзэс, сценказэс, мадемзэс) клуб тыр люкаськем адямиос кужмо кичабонъёсын пумиталлязы. Самодеятельной артистъёс асьсэос но паймизы гуртоослэн сыӵе шуныт мылкыдзылы. - Малы Бекманов, Ганьков но мукет удмурт артистъёс Башкирие мыныны тыршо меда? Та юанэлы мон валэктон шедьтӥ: та палан зэмос удмуртъёс уло вылэм. Пичи гинэ тэшкылиос анай, атай шуыса вазисько, чылкак удмурт сямен верасько. Соосты кылзыса, сюлэм ик олома луэ,- маде кырӟась Лидия Петровна Михайлова. Башкирие со нырысьсэ вуэм. Озьы ке но, учкисьёс понна та кышномурт кемалась тодмо адями кадь йӧтӥз. Ваньмызлы яраз. Та ӝыт-концерт тужгес но вунонтэм кылёз, дыр, гуртысьтымы Андрей Гайниевлы. Со нуналэ егит пияшлы дас тямыс арес тырмиз. Кыдёкысь лыктэм куноос армие мыныны дасяськись пиез сцена вылэ ӧтизы, вордӥськем нуналэныз ӟечкылазы, солы сӥзьыса, кырӟанъёс кырӟазы. Андреез ӟечкылан ласянь клублэн кивалтӥсез Ираида Шарафутдинова но азьвыл ик сюлмаськем. Тӥни озьы, Чупчи шур дурысь удмуртъёс, кузь сюресэз вакчи карыса, камсьӧр (тупал) ӵыжы-выжыоссылы сабантуй азьын усто кузьым вуттӥзы но сюлэмъёсазы ас шунытсэс, кужымзэс кельтӥзы. Зэм, "Иднакар" ансамблез Удмурт шаерамы ӟеч тодо. Со Венгрие но ветлӥз ни. Табере Башкириын улӥсь удмуртъёс доры но сюрес лёгиз. Алтау калык та коллективлы азинсконъёс, вольыт сюресъёс сӥзе. Котькытын сое шуныт, ӝутскем мылкыдын мед пумиталозы. Мукет удмурт кырӟасьёс, эктӥсьёс но Башкириысь бӧлякъёссэс дырын-дырын мед шумпоттылозы вылэм. Мар ватонэз, отысь удмуртъёслэн улонзы капчи ӧвӧл. Тани Алтауысь колхозникъёс но куинь ар ӵоже уждун уг басьто ни. Озьы ке но, ӟеч куноосты шуныт мылкыдын пумитаны, дунтэк сюдыны-сектаны, кӧлытыны одно ик быгатозы. Артистъёслэн, ансамбльёслэн кивалтӥсьёссы дуно дунын билет вузан сярысь гинэ медаз сюлмаське. Пичиен но трос люканы луэ. Ульфат БАДРЕТДИНОВ, журналист. 1941-тӥ арын 22 июне кутскиз Быдӟым Отечественной аойна ТОДМОТЭМ ТУСПУКТЭМЪЁС Вуноз меда куке Быдӟым Отечественной ожмаськон? Уз! Удмурт шаермылэсь кыдёкын ке но гудыръяз со война, шокамез шӧдӥськиз та палан но. Асьме музъем вылын но мынӥз Горд Армилы солдатъёсты дасян. Ми, со вакытэ пичиос, вожъяськыса учкылӥм боецъёс но командиръёс шоры. Гордармеецъёс гудӥзы окопъёс но траншеяос, маршен ветлыны дышетскизы, бызьылӥзы. Нош Ижысь Александровской шай дорын сылӥзы зениткаос. Туж адӟеммы потэ вал воинской частьёсты. Тужгес но эшъёсылэн, Женя Лазаревлэн но Вова Ивановлэн. Мыным гинэ шуд усиз Офначей агаелэн Иж пуме интыяськем землянкаяз пыраны. Со вал 1942 арын тулыс. Нош ротаезлэн командирез старшой лейтенант Кондауров командирской "кубикъёс" но кузьмаз. Историен тунсыкъяськонэ вуттӥз монэ Подольске. Иж но Пироггурт вӧзын кылдытэм 112-тӥ стрелковой бригада сярысь мон тодӥ ини кызь ар ортчыса, СССР-ысь Обороная министерстволэн архивысьтыз. Орловско-Курской кульчо дорын ожъёс кутскон азьын, Удмуртиысь вуэм соединение 192-тӥ стрелковой дивизия луиз. Нош вормон аре со ини 192-тӥ Оршанско-Хинганской Краснознамённой стрелковой дивизия шуыса нимаськиз. Соку ик архивысь тодӥ на: кышкыт 42-тӥ аре Пичи Пургаын кылдытэмын вылэм 108-тӥ стрелковой бригада, нош 110-тӥ бригадалы кутскон сётэмын вылэм Бемыжын но Кизнерын. 1942-тӥ арын май толэзьлэн нырысетӥ нуналъёсаз Удмурт АССР-ысь Вылӥ Кенешлэн Президиумез соединениослэн командованиоссылы Горд знамяос сётӥз. Кӧня ке нунал ортчыса, боецъёс Москва дорын ожмаськизы ни. Нырысьсэ оже пыриськизы августэ. Кышкатэк нюръяськизы, тушмонлы Родинамылэн столицаез доры сюрес пытсамын вал. Нош 43-тӥ арын тулыс Брянской фронтлэн 61-тӥ армиеныз огазеямын вал 108-тӥ но 110-тӥ стрелковой бригадаос. Озьы кылдӥз 97-тӥ стрелковой дивизия. 55 ар талэсь азьло, 1943-тӥ арын 5 июле, кутскизы тыл кульчоын ожъёс. Нош 12-тӥ июле соединениысь частьёс Орловской областьын ожмаськыны ӧдъязы но пичигес Болхов городэз мозмытӥзы. Соку тушмон аслэсьтыз 5 сюрс солдатсэ но офицерзэ ыштӥз. 1943-тӥ арын йылпумъяськиз Харьков город понна ожмаськон. Со мынӥз 55 уй но нунал ӵоже. "Моторъёслэн" ожазы вормиз Горд Армия. Быдӟым Отечественной войнаын кутскиз выль вакыт. Уралысь рабочийёслэн кыдатэм броняоссы, Крупплэн заводъёсаз кисьтэмъёсыз сярысь, юнэсьгес вылӥллям. Кышкасьтэм луэмзэс возьматӥзы Удмуртиысь потэм 97-тӥ дивизиысь боецъёс но. Соос соку ӧз тодылэ, ӵапак 10 толэзь ортчыса, 1944-тӥ арын 23 июне, Белоруссиез мозмытонъя "Багратион" бадӟым операцие пыриськозы шуыса. Отӥяз уката но кужмо ожъёс вал Витебщинаын. Солдатъёслэн геройлыко ожмаськемзы понна Верховной Главнокомандующийлэн И. В. Сталинлэн приказэзъя, дивизилы сётэмын вал "Витебской" дано ним. Нош капитанъёс Леонид Камаев но Григорий Злобин Горд Кизили орденъёс басьтӥзы. Краснознамённой 97-тӥ Витебской дивизия ожъёсын ортчиз Прибалтикаез, вуиз Восточной Пруссие но кузь сюрессэ йылпумъяз Балтийской зарезьлэн ярдуръёсаз. Войналэн берпуметӥ нуналъёсаз, апрель толэзе, офицер Л. В. Камаев соку син азяз пуктӥз, луоз, вордскем Ежево селозэ. Интыяськемын со Лекма шурлэн чебер ярдураз. Нош Лекма аслэсьтыз югыт вузэ Укан пыр нуэ бадӟым Чупчи шуре. "Милям Юкаменск районамы огкылысь уло но ужало удмуртъёс, ӟучъёс, бигеръёс, бесермянъёс",- ӵемысь мадьылӥз Леонид Васильевич ӵош ожмаськись эшъёсызлы, Камаевен ӵош вордскем палъёссэс тодазы ваизы, дыр, Красногорск районысь Григорий Злобин, Тыловайысь Ефим Первушин, Играысь Емельян Касаткин... ... Эшелон дыртытэк гинэ мынэ шунды ӝужан пала. 1945-тӥ арын 9 мае, вазь ӵукна, 233-тӥ Неманской Краснознамённой полкысь боецъёс но командиръёс вуизы Кам дурын сылӥсь Сарапул городэ. "Вормон!" - отысен тодӥз та шумпотымон но кема витем иворез дано полклэн командирез майор Григорий Лазаревич Злобин - Горд Знамя орденлэн куинь пол кавалерез. Озьы йылпумъяськиз фашистской Германиен секыт война, кудӥз кыстӥськиз 1418 уй но нунал. Куинетӥ Белорусской фронтысен 97-тӥ дивизия вуиз Приморьее, нош 192-тӥез - Читае. Куинь толэзь ортчыса, Дальний Востоке но Забайкальее интыяськем войскоосмы басьтӥзы приказ: выжоно кунгож вамен. Генерал-полковниклэн Николай Крыловлэн 5-тӥ Краснознамённой армиез 97-тӥ дивизиен ӵош Маньчжуриын нюръяськыны кутскизы Япониысь самурайёслы пумит. Нош ож сюрессы йылпумъяськиз 1945-тӥ арын 2 сентябре Харбин дорын, 192-тӥ Краснознамённой дивизилэн - Порт-Артурын. Та вал кыкетӥ мировой войналэн берпуметӥ нуналэз. Нош кутскиз вал со 1939-тӥ арын 1 сентябре. Вормонлы 30 ар тырмонэз пусйыку, Ижысь 5-тӥ номеро ӝыт школаысь дышетскисьёс но дышетӥсьёс доры дуно адямиос вуылӥзы. Ми сак кылзӥмы 97-тӥ Витебской Краснознамённой Суворов но кыкетӥ степенё Кутузов орденъёсын пусъем стрелковой дивизиысь офицеръёслэсь Г. Л. Злобинлэсь но Л. В. Камаевлэсь тодэ ваёнъёссэс. Удмуртилэн пиосызлэн дано ожмаськемзы сярысь аслаз "Навстречу победе" мемуаръёсаз гожъяз Советской Союзлэн Маршалэз Николай Иванович Крылов. Отысь чуръёсын тодматӥз полковник Григорий Лазаревич, со пусъемын куать наградаосын. Нош соин ӵош ожмаськем эшез Леонид Васильевич уно фотографиосты возьматӥз. Но, палэнгынгес пукеменым, соосты умой-умой адӟыны ӧй быгаты. Кыкез фронтын пуктэм фотографиос кызьы ке школаямы кылиллям. Нош кинъёс отын - тодмо ӧвӧл. Табере улэпесь ӧвӧл ни Г. Л. Злобин но, Л. В. Камаев но. Соос сярысь мон гожтӥ потоно "По местам боевой славы" книгаям. Соин ик, оло, кин ке тодмалоз та пуспуктэмъёс вылысь адямиосты? Вазиське. Виктор ПОЗДЕЕВ, 192-тӥ Оршанско-Хинганской Краснознамённой дивизиысь почётной воин. Снимокъёс вылын: тодмотэм туспуктэмъёс. Шӧкыч ОЛО, КУТОДЫ? Ужтэк кылемлэн гожъямъёсыз Туннэ нуналысен мон ужтэк кылем адями. Тодмоосы дэмлазы: чик ӝегатскытэк мын уже интыянъя центре. Быдэс ар ӵоже пособие басьтыса улод. Первомай ёрослэн центраз чебер апай документъёсме берыктӥз но шуэ: - Нырысь ик, паспортады выль фотодэс лякелэ. Собере берло тыршем интыысьтыды уждундылэн быдӟалаез сярысь справка ваелэ. Кутскиз городэтӥ бызьылон. Отчы но, татчы но коньдон кошке. Трамвай-автобусэн но дунтэк уд ветлы. Кондукторъёс кырныжъёс музэн поръяло. Арня пала дыр юнме ортчиз. Биржаын сётӥзы свидетельство. Толэзяз кык пол пусйиськыны ветлод, пе. Нош тӥляд специальностьтыя уж дэмласьёс ӧвӧл. Асьтэос утчалэ. Тани сизьыметӥ толэзьзэ утчасько ни. Пособизэс но ӧй адӟылы на. Сое, пе, адямиос ар но ӝыны пала витёно луо. Алигес биржалэн ялонъёсын пулысьтыз гожъямъёсын тодматсконо кариськи. Адӟиськоно интыын - центрлы пунэм тыроно предприятиослэн списокъёссы. Уксёзэс висъяны уг дырто "Ижмаш" но "Аксион" акционер огазеяськонъёс, Горькийысь чугун сюреслэн Ижысь ёзэз, Лэсьтӥськонъя 18 номеро управление но трос мукетъёсыз. Уноез ужтэк кылемъёс пособиоссэс сиён-юон чотын берыктыны мылкыд каро. Нош мар ӵекто соослы? А-а! Нырысетӥ сортъем пызь... Мешокез 115 манетэн. Одӥг толэзьем пособиелы 6 мешок усе. Но ма каром мон со мында пызен? Вузкарыны уд поты. Сыӵеос али котькуд сэрегын сыло. Дэмлало на пыргытэм рис. Килоез 2 манет но 40 коньыен. 700 манетлы кӧня кило усе ай, басьтоно шат? Рисэд пенсие потытозяд тырмысал ук. Синъёсы мукет ялонъёс шоры мертчизы. Аслэсьтыз вузъёссэ ӵектэ механической завод. Емыш ву пызьыртон машина, кофе изон вуко, перфоратор, рубанок, пила. Мар бен, таосыз вузъёс ярамонэсь кадь. Та предприятиысь ик 22 номеро цех сётыны быгатэ бетон, раствор, борддоръёслы но фундаментлы плитаос, ӵектэ автотранспортсэ но. Серемез ик поттэ кыӵе ке "Буревестник" фирмалэн вузъёсыз. Вань, лэся, нылкышноослы модаысь кемалась потэм дӥсьсы-кутсы. Басьтыны мылкыд карись гинэ ӧвӧл. Гужем вуэмъя, уже интыянъя центре ветлӥсьёслэн лыдзы пумен кулэсме. Ӟеч-а, урод- а, уж шедьто водительёс, вузкарисьёс, сварщикъёс, лэсьтӥськисьёс. Кин ке коньдон поттыны быгатэ сад-бакча коркаос, коттеджъёс лэсьтыса. Нош монэ уже нокин уг басьты. Оло, тӥ кутоды? А? К. УЖТЭМОВ. БЫРЪЁНЪЁС АЗЬЫН Депутатэ ӵектӥське... Кызьы мынэ 5 июле ортчоно быръёнъёслы дасяськон Селта районын? Таӵе юанлы телефон пыр тыро-пыдо валэктонъёс сётӥз районысь быръёнъёсъя комиссилэн секретарез Капиталина Павловна Воронцова. Районын кылдытэмын 31 округ. Депутатэ кандидатэ юнматэмын 81 адями. Со пӧлысь 10- эз асьсэос ӵектӥськизы, мукетъёссэ бырйисьёс дэмлазы. Ас адямиоссэс тужгес но мыло- кыдо ӵектӥллям гурт хозяйство удысын ужасьёс - 18 мурт. Бере ӧвӧл кылиллям дышетон (16 мурт), производство (12 мурт) удысъёсын ужасьёс. Депутат луон понна нюръяськонэ озьы ик пырисько ужбергатӥсьёс, милициын, эмъяськон удысын ужасьёс. Вань пенсие потэм муртъёс но. Кандидатъёс пӧлын тросгес воргоронъёс. Нош кыӵе выжыысь потэмзыя учконо ке, таӵе суред кылдэ: 32-ез удмурт, 46-ез ӟуч, 2-ез бигер, огез - армянин. Ачиз со улэ Селта черкогуртын, нош ас мылкыд каремезъя депутатэ кандидатэ нюръяське Пожгурт округъя. Кыӵе партиослы дурбасьто кандидатъёс шуг вераны, угось сыӵе тодмет таяз быръёнъёсын валтӥсь интыын уг сылы. Со шонер, дыр. Вуоно депутат оскымон адями но улонэз валась, ужаны быгатӥсь гинэ медло. Соку гинэ калыклэн улонэз ӟечгес радъяськыны быгатоз. Т. БАННИКОВА. Чуръёс, чуръёс... ДЫРТӤСЬКЕММЫ Ми, андан ӵыжатӥсьёслэн городоказы улӥсьёс, шумпотӥмы, куке Ижысь кивалтӥсьёс городлэн нуналэзлы пӧсь ву сётом шуыса оскытӥзы. Татын уго туэ тулыс но, гужем но тыро-пыдо пӧсь ву ӧз сётъялэ на. Но шумпотонмы вазьгес на вылэм. Праздникъёс азьын ВЛКСМ-лы 50 ар урамысь 51 номеро юртысь вуж сыномем гумы бызись вуэз ӧз чида, пась луиз. Та суредэз адӟыса, аварийной службае жингыртӥ. Отын оскытӥзы, гумыез тупатом шуыса. Ортчиз нунал, номыр ӧз воштӥськы. Выльысь 002 номерез бичай.. Татын косӥзы 52-41-42 номеръя вазиськыны. Ог 4 час ортчыса, слесарьёс вуизы. Усьязы куйыез, одӥгез отчы васькылӥз но. Озьы ик пӧсь ву сётӥсь гумыез ворсатэк кошкизы. Арня нуналэ гинэ винтилез пытсазы. Али ум тодӥське, ку та вуж гумыез тыро-пыдо кышъялозы яке выленыз воштозы. Ведь милям юртамы пӧсь ву кыскыкузы, трос интыосын вуж гумыосыз кутӥзы. Нош выльёссэ одӥгезлэн улӥсьмылэн мурӝолаз ик кельтӥзы. Слесарьёс соосыз, оло, вузаны малпало вал? Но, басьтӥсь шедьтымтэенызы, гумыосыз кулэ ӧз каре ни, отчы ик кылизы. Слесарьёс нош чик возьыттэк мукет юртъёсы пӧсь ву кыскыны шонтӥзы. В. ЧЕРНОВ. ТА НУНАЛЭ... АР ТАЛЭСЬ АЗЬЛО 20 июне 1944 арын Ижевскын кылдытэм 313-тӥ дивизия тушмонъёслэсь мозмытӥз Карелиысь Медвежьегорск городэз но Железнодорожной станциез. Ӵапак отчы 1937 арын ноябре ватэмын Куӟебай Герд. 20 июне 1987 арын Устинов выльысь Ижевск шуыса нимаськыны кутскиз. Ӟичы вуттӥз архиве "Мон ватос тодӥсько!" - кӧняетӥ арзэ оскытэ ни Якшур-Бодья ёросысь Селычкаын улӥсь Евгений Вахрушев. Но та дырозь оскытыны ӧз быгаты на. Солэн верамезъя, шедьтӥз сое Евгений 1964 арын. Со вакыт Венгриын Болотон ты палан службазэ нуиз. Огпол Хаймашнер пала командировкае келязы. Со дырозь Евгенийлэн со быдӟа полигонэз адӟылэмез ик ӧй вал ай - ог 60 иськем кыстӥське. Ыбылӥськем куараос ӧз чалмылэ, пельёс ӵоктаськылӥзы. Татчы вуттэмзы бере, командир алӥз: - Солдатъёслы кыдёке кошкылыны уг яра, нош командирлэсь приказзэ тӥясьёс жаляно луозы. Солдатъёс валазы - нырзэс олокытчы но чуртнаны ӧз выре. Куд-огез эшъёссы ышылӥзы уга, Евгений шофёр вал. Соин ик эрикез но паськытгес. Огпол нюлэскын командирзэ возьмаса сылонъяз ӟичыез адӟиз. Сьӧраз уиськыны кутскиз. Пӧйшур солдатэз нюлэскы пыдло пыртӥз. Син шораз йӧтылӥзы казематъёс, кытӥ-отӥ крематорий гуръёс. Война вакыт немецъёслэн концлагерьзы вылымтэ меда татын? Евгений вырйылогес азьысь кыӵе ке ӧсэз синйылтӥз. Ӧс пыдло музъеме нуэ. Отын эшшо дасо ӧсъёс - кудӥз решёткаосын ворсамын, кудӥз ӝыныё усьямын. Тыраз ик лач тыремын журналъёс. Огзэ басьтӥз, усьтӥз. Кыӵе ке кунгожсьӧр нимъёсын список. Тросэз фамилиос горд карандашен гожмамын. Солдат вала архиве сюремзэ, мар фамилиос со. Туж тросэз фамилиос горд карандашен гожмамын. Таосыз ӵап со гуръёсы сюрылэмъёс, дыр. Евгений юзрак луиз. Эшшо бугыръяськемез потэ на вал: Оло, кудаз ке журналын ӟучъёс, асьме выжыос? Но кемалы ышемзэ шӧдӥськизы-мар ке... Кык журналэз басьтӥз но дыртыса машинаез доры берытскиз. Малы басьтӥд шуыса юамлы, со шонерак уг валэкты. Сьӧросэ, пе, понӥ, бумага ӧй вал. Но отчы пырасьёс огез но ӧз валатске шат, мар список со? Адӟемзэ солдат нокинлы ӧз вера, эшъёсызлы гинэ но - со номыре ӧз адӟылы. Маин берытсконзэ ӟеч тодэ вал уго. Бумага ӝог быриз. Табере куке но архив шараямын луиз ке, та списокъёсысь муртъёсты ноку уз шедьтэ ни. Соос "ивортэк быремын" войнаын. Табере ышизы архивысь но. Ар улыса, службаез быриз. Адӟемез-тодэмез пушказ возиз. Витё ар талэсь азьло гинэ шараяны малпаз. Вазиськылӥз военкоматэ, ФСБ-е, поисковой отрядъёслы, писательлы Юлиан Семёновлы. Но пайдаез ӧз луы. Тунсыкъяськытыны быгатӥз СНГ-ысь поисковой отрядъёслэн ассоциациысьтызы Валентин Зоринэз. Зорин вазиськылэ Удмурт Правительствое, пайдаез ӧз луы. Туэ вазиськиз Москвае. Соос уж борды кутскыны косӥзы. Евгений Вахрушевез Венгрие келяны поисковикъёслы шугез уз луы. Но зэмалозы-а фактъёс? Шедьтыны луоз на-а со интыез? Шараямтэ ик-а со 34 ар ӵоже? Евгений шуэ: мон сяна тодӥсь ӧвӧл. Нош бумагаос уз изъянме - соос туж ӟеч интыын, нокыӵе зор-кот но, сильтӧл но уз шедьты. Уката ик архив чакласькыны кулэ вал. Солэн малпамезъя, отын али ке но мадьяръёслэн артскладъёссы интыяськемын. Архивысь меӵак интызэ Вахрушев шонер портыса но уг вера. Поисковикъёс валче ужаны ӵектӥзы ке, шараяло шуэ. Со интыын эшшо кӧня миллион "ивортэм быремъёслэн" нимтэм шайгузы. Отын луыны быгатозы асьмелэн ӵыжы-выжыосмы но. Сыӵе шедьтоссэ Евгенийлэн аслаз возьматэмез потэ. Пумит ӧвӧл ӟеч коньдон но жильдыны - созэ со уг ваты. Сыӵе уж дунтэм уг сылы. З. РЯБИНИНА. Шӧкыч СЕРЕМ ПЫР Висись йӧнатсконниын умме уськытыкузы синйылтыны вуттӥз на хирурглэсь кечтакалэн кадь тушсэ гинэ. Операция бере сазьтӥське но адӟе: азяз сылэ таба быдӟа тушен воргорон. - Доктор, тушты со быдӟа будытозь кыстӥськиз шат операция? - Тон мар, дорамы шузимыса вуид-а, мар-а? Мон апостол Петр. х х х Стюардесса бызьылэ самолётэтӥ. Эскере, ваньзы-а бырттӥллям утиськон езэс. - Валлян аэропортэ пуксьыкумы,- индылэ со,- думиськымтэ пассажиръёслэсь йырзэс- пыдзэс лыдъяны ӧм быгатэ ни. - Нош дуимськемъёсыз? - юа воргорон, езэ бырттыса. - Таосыз чылкак улэп кадь интыязы пукизы. х х х Дышетӥсь: Маин тужгес тодмо луэ 1870 ар? Дышетскись: Вордскиз Владимир Ильич Ленин. Дышетӥсь: Нош 1873 ар? Дышетскись: Ленинлы тырмиз 3 арес. х х х Гуртын гужем. Корка азяз потэ воргорон. Кема назьылъяське, вушйылэ. Толло шулдыръяськемзы бере йырыз висе, пушкыз ӝуа. Адӟе: доразы дыртэ бускельзы. - Тить мать! - кесяське кыдёкысен ик.- Пуныды нош ик курегъёсмес уйылӥз, быжтэм кельтӥз. Мон судэ вазисько! Макмырам воргорон кема малпаськиз. "Кеньырез" ӧжытак ужаны кутскем бере валэктӥз: - Рекс янгыш ӧвӧл! Курегъёстэ думетын возь! ЭМЪЯН УДЫСЫН УЖАСЬЁСЛЭН НУНАЛЗЫ АЗЬЫН Висись медицина Эмъясьёслы праздниксы азьын шунытэсь сюлмысь потӥсь тау карон кылъёс гинэ верам потэ. Но Ижевскысь кыкетӥ клинической больницалэн валтӥсь враченыз, Удмуртиысь дано врачен Валентин Васильевичен АЛАБУЖЕВЕН вераськонмы шумпотонэн ӧз тырмы - эмъян удыслэсь ужпумъёссэ, висёнъёссэ, шараяз. Нырысетӥез висён: врачлэн уждунэз - Городысь кыкетӥ больница Ижевскын Октябрь ёросын улӥсьёсты эмъя. Соос пӧлын 40 сюрс пенсионеръёс но 20 сюрс студентъёс - ваньмыз улон-вылонын юрттэмез кулэ каро. Кураськон калэ вуэмын ини асьсэос эмъясьёс но. Малпалэ ай: нырысетӥ аръёссэ ужась врачлэн уждунэз - 270 манет, медсестра басьтэ 200 манет пала, нош санитаркалэн 100 манет но уг люкаськы. Сое но соос толэзьлы быдэ уг басьто. Врач со быдӟа уждунэныз нылпиоссэ, ужтэк кылем картсэ сюдэ на ке... Нош ачиз операция лэсьтыкуз йырсазьзэ ӧжыт уг ышты, сютэм улэменыз. Висисьлы тыро-пыдо юрттэт сётон сярысь вераськонэз ик ӧвӧл на! Али врачъёс эмъяны мылкыдзы ванен гинэ ужало: Геппократлэсь клятвазэ вераса, соос висисьлы юрттыны кылзэс сётӥзы. Со сяна, кытчы соос кариськозы, Россиысь вань больницаосын югдур огкадь бере. Медсестраос, санитаркаос бадӟым уждун басьтӥськом шуыса азьвыл но ӧз ушъяськылэ. Соин ик 5-10 ар талэсь азьвыл соос ӧз тырмылэ. Нош али, ужтэк кылемъёслэн лыдзы будэмен, котькудӥз дась ужаны, пичи уждунлы ке но. Соин сэрен гинэ кадръёслы ум шугъяськиське. Кыкетӥез висён: больницалы коньдон висъян - Туэ больницамылы тырме 60 ар. Огез но солэн юртэз юри больницалы шуыса лэсьтэмын ӧй вал: я общежитилы, я эшшо малы ке. Соин ик отӥзэ но татӥзэ туж ӵем тупатъяно луиськом. Кык-куинь ар талэсь азьвыл югдур туж шуг вал: ремонтлы но, висисьёсты эмъяны но, оборудование басьтыны но коньдон чик ӧй вал. Стационарын кыллисьёс эмъюм асьсэос басьяллязы. Али бадӟым юрттэт сётэ республикаысьтымы медицинской страхованиея фонд. Отчы уксё висъяло предприятиос, нимаз адямиос, медицинской полиссы вань ке. Уждунлы, тыл, шуныт, ву понна тыронъёслы коньдон басьтӥськом городлэн бюджетыстыз. Озьы ке но, уксё уг тырмы. Таӵе улонын пичи шумпотон но сюлэмез шунтэ. Тани кылем арын стационарлэсь липетсэ кышъяны быгатӥм но ушъяськиськом ини: висисьёс палатаосын зонтикъёс улын уг пуко, операционнойын тусьёс уг сыло. Куиньметӥез висён: геноцид? - Тодӥськоды на луоз, Советской власть вакытэ лозунг вал - "Здоровье - общегосударственное достояние". Табере тодэ: тазалык - кунлэн ӧвӧл, нимаз адямилэн узырлыкез, кудӥз сётӥське солы огпол гинэ. 70 ар ӵоже асьмеос дышимы, кун тазалыкмы сярысь сюлмаське шуыса, дун басьтытэк эмъя, санаторийёсы путёвкаос висъя... Государство та выллем сюлмаськонъёсыз сярысь кемалась вунэтӥз ини. Нош калык тае ӧз вала на, вылӥысь юрттэт весь возьма. Адямилэн тазалыкезлэн 15 процентэз гинэ медицина герӟаськемын, кылемез сярысь ачиз но кун сюлмаськыны кулэ. Кун тазалыкез утён сярысь тодон-валанъёсты вӧлмытонэ, спортэз пыӵатонэ, нылпиослэсь шутэтсконзэс радъянэ ньӧмыз понна гинэ пыриське на. Со вакытэ ик Россиысь Тазалыкез утёнъя министерство кышкатэ: вуоно даурлэн кутсконаз Россиын 20 миллион гинэ улӥсь кылёз на, пе. Та сярысь малпаськиськод но куалектӥськод: оло, ваньмыз та лэсьтӥське, нациез пашмытон понна... Тани берло дыре калыкмылэн аракы юыны коньдонэз ӧвӧл ни, лэся. "Троя" нимаськись ву борды кутскиз. Солэн черык бордаз гожтэмын: алкоголез вань, кутӥське юртъер котырын. Сое юыса, адямилэн кӧт пушказ висьыны кутске сопал дуннее но кошкыны быгатэ. Сыӵе 2"висисьёс" ми доры нуналлы быдэ вуо, соосты пыд йылазы султытыны кӧня коньдон кошке! Нош наркотикъёсты мултэс пуктыса кӧняез ми доры вуэ. Лыдъянтэм! Соосты урод сямызлэсь эмъян, мукетъёссэ черламлэсь утён сярысь кун сюлмаськоз кожаськоды-а? Уз. Кызьы висёнъёсты вормоно, яке Ӵуказе быгатомы-а дунтэк эмъяськыны? - Больницамы ачиз коньдон поттыны тырше (кытчы пырод, уксё уг тырмы), юрттэтъёс понна коньдон басьтыса, медосмотръёсты дунын ортчытыса. Валамон, эмъяськисьёслэсь азьланяз коньдон ӵемгес но ӵемгес куроно луомы. Куд-ог больницаос, оло, дунтэк чик уз эмъялэ ни. Но... Кыӵе коньдонэн эмъяськозы 40 сюрс пенсионеръёсмы, 20 сюрс студентъёсмы, ужтэк кылемъёс? Озьыен, шимес висёнъёс - СПИД, туберкулёз, сифилис, гепатит В - кужымзэс ӧръялозы? уродэзлы оскем уг пот. О. ВАХИТОВА. Люкиськон "Адямилэн улон нуналэз турын-куар кадь, бусыын будӥсь сяська кадь, озьы со сяськая. Со вылтӥ тӧл пельтэ но - со ӧвӧл ни, солэн интыез уз тодма ни сое". Псалтирь книга, 102-тӥ псалом. Мика Аршень... Арсений Николаевич Крестьянинов... Аршень... Грах ёросысь Эгра вылын сое тодӥсьтэмез ӧй вал, гажасьтэмез но ӧй вал. Малы меда? Даурзэ колхозын ужамын, пенсионер, нокыӵе но начальник но ӧй вал. Кулӥз но, быдэс гурт келяны лыктӥз, шайвыл тыр калык люкаськиз, соин берпумзэ люкиськыны ветлӥз. Вань выжы-кумыосыз бертӥзы, лыктӥзы яратоно атаенызы, ӵужмуртэнызы, дадаенызы, кырсиенызы, эшенызы люкиськыны. Кытысь но ӧй вал - Грах, Пичи Пурга, Ува, Менделеевск, Елабуга ёросъёсысь, городъёсысь, Иж карысь кӧня вал... Кулэмезлэсь вить нунал азьло Ижысен Коля пиез дорын берпумзэ пумиськимы но ог кык час пала вераськыса пукимы, валче улон нуналъёсмес, выжы-кумыосмес тодамы ваимы. Одӥг мурт сярысь но со уродзэ ӧз вера, ваньмыз сярысь умойзэ гинэ тодаз ваиз. Ноку но Аршень дадаелэсь (вань улытозяз мон сое озьы шуи, мукет сямен ниманы кылы уг берыктӥськы) нокин сярысь но уродэн верамзэ ӧй кылы. Со вордӥськемын вал ӟечсэ веран, ӟечсэ лэсьтон понна гинэ. Мыным но тау кариз, Инмарез данъян сюрес вылэ султэме понна. "Кулӥ ке, берт", - шуиз - Вӧсяськыны". Юай: "Инмарлы пумитъяськыса ӧд улы-а, асьмелэн даурмы атеизм вакытэ ортчиз бере, олокыӵе но дыръёс вал ук?" - "Ӧй, - шуиз, - мынам анае оскись вал". Кирос кариз (кирос каремзэ улытозям нырысьсэ адӟи, дыр). Люкиським чупаськыса. Та вал берпум адӟиськеммы. Быдэс нунал синкылие вияса улӥз: трамвае пыри - трамвайын но, черке пыри - черкын но, гуртам бертӥ но - гуртам но. Адӟи, шӧдӥ уго улонысьтым туж дуно, матысь, яратоно адямие кошке шуыса. Удмурт калык пӧлысь зарни адями, дунне адями. Секытлэсь но секыт аръёсы ортчиз пичи пинал дырыз. Граждан ожлэн яраосыз трос адямиослэн сюлэмъёсазы бурмытэк, вир поттыса улӥзы на. Та семьяын но озьы ик вал. Анаез, Сидор Палагей, зӥбыт, востэм нылмурт, доръёсыз кадь ик, бай семьяе быземын вал, но яратоно картэныз. Опоня Илляен (со мынам атаелэн бадӟым дадаез вал) улыны ӧз кылды: граждан ож дыръя Казаньысен тӧдьыос штыкен бышкаса вииллям (та сярысь Ижысен кулон араз Аршень дадае вераз, Лякоп Микой, пе, ачиз адӟем та шудтэм учырез, эшъёс вылӥллям, ожын огазьын вылӥллям). Бадӟым анае (грах палъёс атайзылэн агайёсызлэсь кышнозэс бадӟым анай шуо) Ондрей нуныеныз бызёно луэм Аршень дадаелэн атаезлы - Микалы (Микалэн кышноез кулэм, кык пичи нылыз кылем). Бадӟым анаелэн Мика картэныз куинь нылпиез вордӥськем на. Секыт аръёс. НЭП. Колхоз кылдон. Огпол гуртысен Ёрги дадаеным Аршень дадаелэсь пинал дырзэс тодазы ваемзэс кылзӥськыса пуки: сыӵе, пе, секыт аръёс вал: сиыны нянь ӧвӧл, дӥсяны дӥськут ӧвӧл. Школае ке мыноно, пыдэ кутчаны кут но ӧвӧл (атаез соку кулэмын вылэм, дыр ни): сюй жон-жон кынмемын ни, куттэмпыд (гольык пыд), пе, школае мынӥськом. Бадӟымгес луиллям но, нюлэс кораны, собере - Иже ФЗО-е келяллям. Отын но кӧттыро улон вылымтэ. Ёрги дадае (кулэмын ни, Аршень дадайме соин артэ ватӥзы) шуэ, пегӟыса кадь, Ижысь бертӥсько. Сиеме потыса, йыры пороме ни. Тэремшуре вуи но - урам шоразы, пе, пограськем. Родняосмы, валэн келяса, гуртаз ваиллям. Аршень дадайлэн егит дырыз Быдӟым ожлэн тылпу пӧлаз ортчиз. Улыны шудэз вылэм на, дыр: шунды пуксён пал фронтэ ӧз басьтэ (аресэз вуэмын ӧй вал на), келязы шунды ӝужан пала - японэн жугиськонэ. Инмар утиз: сизьым ар ӵоже ож тылӝуын пыласькиз, гуртэ, анаез доры, бертӥз. Дадаез, Ондрей, кылиз Хабаровске улыны. Отчы ик кулӥз. Герман оже келям ёзъёсы гуртэ ӧз ни вуэ - быризы. Яратоно Эгра гуртаз ньыльдон тямыс ар талэсь азьло вуэм солдатлы кышнолы дэмлазы бускель Татариысь Тэремшур гуртысь ужась, кибашлы, йӧно-йӧно, чебер нылмуртэз - Педор Катяез. Туж ӟеч тодӥсько на сюаназы мынэммес. Анай-атайме бадӟым анае тӧре пуктӥз. Выныным кыкнамес ик анаеным атае сьӧразы басьтӥзы. Кӧня шумпотон вал! Валэн толалтэ тулуп улын кыдёкысь-кыдёкысь родня гуртэ мынон! Пичи дыръям Тэремшур, Эгра, Вандэмо самой яратоно гуртъёсы вал. Кышноез но, Катя апай, Ӟуння ласянь абие (песяе) пыр, роднямы луэ. Кӧня тодӥсько, бадӟым анаеным, солэн нылпиосыныз весь родняяськыса, валче улӥмы. Вань сиён-юонмы огазьын луэ вал. Азьлон, телевизор, радио потэмлэсь азьвыл, адямиос ог-огзылы матын уло, ог-огзы доры куное, пукыны ветло вал. Ӝыт ке вуэ, ми но Ганя выныным (ми кыктоос) анайме-атайме ёртӥськомы вал: "Ойдолэ бадӟым анаосы, Аршень дадаосы доры пукыны". Мон, пичи мурт, чылкак паймисько вал Аршень дадайлэн дунне вылын ортчись югдурез тодэмезлы: со нуналлы быдэ колхоз конторае, фермае вуись газетъёсты одӥгтэм лыдӟе вал. Кышномуртъёс пуко, киуж ужало: кин черсэ, кин керттӥське, ми пичи нылпиосынызы шудӥськомы, но ваньмы туж сак кылзӥськомы вал Аршень дадаелэсь дунне вылын, асьме кунын ортчись учыръёс сярысь лад-лад верамзэ. Али ке но тодӥсько тазьы вожъяськемме: бадӟым ке будӥ, мон но Аршень дадай кадь ик визьмо, трос тодӥсь мед луом вал! Катя апае но кыӵе чебер, йӧно лякыт адями потэ вал, кыллы но, ужлы но салят: дышетскемез ке луысал, визьмо дипломат пӧрмысал солэсь. Огкылысь ужаса, улыса, соос сизьым нылпи будэтӥзы: одӥг ныл но куать пи. Син медаз усьы, но таӵе визьмо нылпиосты туж шер шедьтод. анайзылэн, атайзылэн кадь ик соослэн но нокинлы уродэн ваземзы ӧвӧл, дыр. Одӥгзылэсь одӥгзы умоесь, но мынам вераме потэ бадӟым пизы. Миша сярысь. Куатетӥ классын дышетскыкум вордскиз со. Атайме нуны сюанысен киросатае пуктӥзы, нош чукындырыны (пылатыны) Гора черке монэ лэзизы - колхозын уж азьло уг быры вал, атае ӧз ваньмы. Озьы мон солэн киросатаез (законноез) луи. Малы Мишаез верасько? Соин: со - милям Эгра вылын гажано адями - "Родина" колхозлэн тӧроез. Нош колхозмы огшоры ӧвӧл - азьмынӥсь! Быдэс Удмурт Элькунамы таӵе йыг-йыг улӥсь, толэзьлы быдэ уксё басьтыса улӥсь колхозникъёсты туж шер пумиталод. Гуртъёсмы выльдӥсько. Излэсь, кирпичлэсь улыно-вылыно коркаос пуктыло Ӵошатскыса, вожмаськыса пуктӥсько. Таяз бертакум но вуж юртамы, ӵужмуртам иськавынъёсы Бекмат, Базак, Куяра - доры пырай но пайми, шумпотӥ адямиослэн таӵе ӟеч улэмзылы. Трос комнатаен, чылк-чылк буям, импортной шпалерен лякем борддоръёс, импортной мебель, телевизор, вуюись кадь чебер катанчиос. Гурт урамтӥ ортчыку но паймоно: я отын, я татын пуктӥсько, лэсьтӥсько кирпич, из, кор дасямын выль юрт пуктыны. Арми бере Аршень дадаеным ӵош колхозын ужай: мон зоотехник вал, со - колхоз фермалэн кивалтӥсез. Туж капчи, мыло-кыдо вал соин ужаны. Но колхозмы лябӟемын вал, малы ке шуоно, колхозлэн тӧроосыз - палэнысь лыктэмъёс, соос ӧжыт сюлмаськизы калык сярысь, асьсэлэн кисызы асьсэлы матэгес луиз. Нош куке Аршень дадаелэн, Катя апаелэн бадӟым пизы, инженер, колхозэн кивалтыны кутскиз, улон шӧдскымон умой пала берытскиз. Михаил Арсентьевич нырысь ик кутскиз асьме палан вордскем, дышетскем специалистъёсты ас котыраз люканы. Али соос ваньзы егитэсь, асьме колхозын вордскемъёс, удмуртъёс. Вань сюлэмзэс поныса тыршо. Азинсконъёс син азьын. Ӟунняос, вожойёс, ӟатчаос, йырашъёс уксё арен-арен уг ни басьто, нош татын апрель (али нош, оло, май) толэзьлы но уждун тыремын ни. Котыр улосысь гуртъёс, быдэс Россиын кадь ик, мырдэм но кызьы векаса, куашкаса уло, нош Грах ёросысь Эгра выл (Инмарлы тау!) улыно-вылыно коркаос, машинаос, дуно мебель басьтыса улыны быгатэ на. Татын но визьмо анай-атайлэн кибервылзы, сюлэм шунытсы, сюлэм чеберзы, адямиез гажан-жалянзы шӧдӥське. Кин ке кулэ ке, Михаил Арсентьевич дыртэ ини та семьяе буйгатон кылъёс вераны; коньдонэн юрттэ, тугоко вае. Атае кулыку но ӵукна ик бухгалтереныз ӵош Пангуртэ атайме келяны вуизы, тугоко ваизы. Адямилы саклык висъяло ке, секыт нуналъёс но шумпотонлы пӧрмо. Аршень дадайлэн ньылез пиосыз гуртын уло, асьсэлэн семьяоссы, чебересь юртъеръёссы, визьмоесь нылпиоссы. Марлы шумпотоно: ваньзы соос туж-туж ярато, гажало, туж кылзо анай-атайзылэсь верамзэс, куремзэс, косэмзэс. Та семьяысь ноку но мон каршонэз, керетонэз-куашетонэз ӧй кылы (котьку но озьы мед луысал: юртты, Инмаре!) Улмопу выжые улмопу ӝужа... Дунне вылын шонер, визьмо улэмез понна, визьмо нылпи будэтэмез понна, ужаса- тыршыса, калыкен тупаса, кузёослэсь кылзӥськыса, тэрытскыса улэмез понна, кулэмез бере Аршень дадайлы Инмар чебер, шундыё нуналзэ сётӥз: быдэс дунне сяськая - Улёк дурысь арамаын льӧмпу, бакчаын улмопу, палэзьпу, сирень сяськаяське; ву дурысь садын уйбыт вожмаськыса чирдо уӵыос; пичи но тӧл ӧвӧл, шуныт уй, шундыё шуныт нунал... Эгра гуртмы кык иськем кыстӥське, но Аршень дадайлэсь мугорзэ пыр ки йылазы гурт пумозь нуизы, ялан кырӟазы: "Святой Инмар, Святой Кужымо, Святой Кулонтэм жаля милемыз!" Пуклёысь Инмарез яратӥсь, чирдыны усто Сандӥ апай лыктӥз, пыр урам кузя, ӟуч сямен но, удмурт сямен но чирдыса нуизы. Татысен, машинаосы пуксьыса, Грах черке вӧсяны нуимы. Азьвыл дышетӥсь, школа директор (Кизекгурт пи), отец Геннадий Филиппов туж мыло-кыдо молебен служить кариз, пумаз удмурт кылын сюлме пырымон проповедь вераз. Култэмезлэсь азьвыл Аршень дадайме но Геннадийлэн пиез, районысьтымы ик Новогорской черкогуртысь священник, отец Андрей, причастить кариз. Эгра вылын та дырозь туж шер муртэ тазьы - причастить карыса, черкын вӧсятыса - сояз дуннее келяло. Калыкмы каллен-каллен Инмар пала кариськыны тырше ини. Таиз ини дунне вылысь вань байлыкъёслэсь-узырлыкъёслэсь шумпотымонэз луэ. Шайвылэ вуимы но - тыраз калык. Малы пайми - гу гудыны оло 25, оло 30 пиос лыктӥллям. Одӥгзы но чик юэмын ӧвӧл, ватэм бере но шайвылын вина поттӥсь сектаськись ӧй вал. Таиз но туж шумпотымон: уго али дунне вылын, уката ик Россиын, трос калык вина пӧлы выемын. Аршень дадайлэсь вина басьтыса юэмзэ адӟеме ӧй вал. Инмарлэн ӟеч эрикеныз, дунне вылын шонер улыны тыршем Аршень дадае ватэмын вал Иисус Христослэн Инме тубонэзлэсь (вознесенялэсь) азьло. Со ӟеч тодмет. Быдӟым нуналысен (Пасхаысен) (Вознесениозь ин ӧсъёс усьтӥськемын, кулэм муртъёслэн лулзылы инме ӝутскыны капчи. Кулонзэ со тодыса кулӥз, висиз, ӧжыт ке но курадӟиз - таиз но зэмос христиан адями понна ӟеч тодмет: уго музъем вылын, таяз дуннеын, адямилы трос курадӟонъёсты, шуг-секытъёсты чидано луэ, Инмысь бырисьтэм юртэ, Инмарлэн пиштӥсь данлыказ сюрон понна. Гажано агай-вынъёс, сузэръёс! Малы ваньзэ тае верасько? Соин: дунне вылын майбыр, каньыл улыкумы, кулон сярысь тодамы ум ваиське; Инмарез данъяса, тау карыса ум улӥське. Нош кулон бӧрсямы сьӧрысьтымы кыльытэк ветлэ. Одӥгез но вордскем мурт кулытэк уг кыльы. Мугормы кулэ но сюе пыре - Инмар сое сюйлэсь ик лэсьтӥз уго, нош лулмы Инмар доры мынэ - лулэз Инмар сётӥз. Шонер, чылкыт сюлмын ужаса-тыршыса, Инмарен тэрыса, вӧсяськыса, адямиосын тупаса, ӟеч лэсьтыса улӥсьёслэн лулзы рае - пумтэм вапумъёс ӵоже шумпотыса улон интые мынэ, нош кин мыдланьяськыса, Инмарлы пумитъяськыса, сьӧлыкаса улӥз, солэн интыез - ад, курадӟон инты, пумтэм вапумъёс ӵоже кысылӥсьтэм тыл. Инмар асьмемыз кылдытӥз, вӧсяськон книгаос, курон-косонъёс, закон сётӥз. Вӧсяськелэ, ӟеч ужъёс лэсьтэлэ, шонер сюлэмоесь луэ. Аршень дадаелэн улонэз трос ласянь адӟем карымон. Кыӵе ке сьӧлыкъёсыз вал ке, Инмар простить мед кароз шуыса, асьмеос вӧсяськыны кулэ, уката ик - 40 уез вуытозь. "Эй, Христос Инмармы, кулэм муртъёсыдлэсь - Арсенийлэсь, ваньмызлэсь - таисьтыз дуннеысь кошкем анай-атайёсмылэсь, выжы-кумыосмылэсь, иськавынъёсмылэсь, эшъёсмылэсь-матысьёсмылэсь, атай музъемез утьыса ожын быремъёслэсь - ваньмызлэсь кулэм православной христианъёслэсь лулзэс дунсьӧлыктэмъёсын огазе интыя, кытын ӧвӧл висён но, куректон-кайгу но, лулӟылӥськон-викышъян но, нош вань пумтэм вапумъёс ӵоже каньыллыко улон". Михаил Атаманов, черкын ужась, филологи наукаосъя доктор. Шӧкыч Луткам курег. Сурыкмем ката. Нием коньы. Шальтрам уробо... Визьмо ик вылӥллям асьмелэн песятайёсмы но песянайёсмы. Соосын малпам та лэчыт ӵошатонъёс лап-лап тупало туннэ нуналмылы но. Мукет сямен вералод шат милям Дэбес котырысьтымы эштосъёслэн гырон-кизён но нуон-ваён техниказы сярысь? Районысьтымы самой "егитэзлы" трактормылы, кылсярысь, сизьым ар ни. Паймиськом, кызьы лулзы возиське на. Шӧкычлы гожтэтысь - Ну, блин, сётӥськоды. Та тушо бокодылы ма понна гажано Брежневмылэсь но трос кизилиос бырттӥды? - Эн сюлмаське, сизьыметӥзэ сётом на ай. Пересь "валмы" борозноын али но уг йыромы на. Женьшень юрттэ... Суредэз Л. Прозоровлэн. ЧЕПЫЛЛЯСЬ ТӦЛЛЫ ПУМИТ! Куатьтон арес тырме тодмо тодосчилы Геннадий Афанасьевич УШАКОВЛЫ. Та визьмо но чупрес воргоронэз улон трос пол куасаз ини, нош со уг сётскы - чепыллясь тӧллы пумит вань кужымзэ огинэ люкаса вамышъя. Та гожтэтмы тодматэ Геннадий Афанасьевичлэн ортчем сюресэныз, туала ужез, улон- вылон пумысь малпанъёсыныз. - Куатьтон арес - улонлэн пумыз ӧвӧл ай. Мар вераны быгатысалды азьвылэз сярысь? - Шурысь трос ву бызиз ни Глазов педучилищее 1952-тӥ арын дышетскыны пыреме дырысен. Бӧрысь вить ар дышетски Удмурт пединститутлэн историко-филологической факультетысьтыз удмурт отделениын. Кыксэ ик йылпумъяй "горд" дипломен. Трос пӧртэм удысъёсын ужай: журналист но вал, ёросъёсысь школаосын но дышетӥ. Армия азьын ВЛКСМ-лэн райкомезлэн секретарез луи. Бӧрысь та удысме райисполкомлэн тӧроезлэн кивоштӥсез луыса азьланьтӥ 1968-тӥ - 1970-тӥ аръёсы (та дыр ӵоже Г. А. Ушаков диктантъёсын сборник но 5-тӥ класслы удмурт литературая хрестоматия поттыны вуиз - А. К.). 1972-тӥ - 1975-тӥ аръёсы - НИИ-лэн аспирантэз. 1975-тӥ арын ути кандидат луонъя диссертациме. Бӧрысь вал Удмурт кун университетысь удмурт но финн- угор кылъёсъя кафедралэн доцентэз, кивалтӥсез. 1989-тӥ арын бырйизы дышетон ужъя проректоре. 1991-тӥ арын ути доктор луонъя диссертациме. Нош 1994-тӥ арын проректорлэсь ужзэ пӧртэм мугъёсъя кельтоно луи. Собере одӥг ар кивалтӥ на туала удмурт кылъя кафедраен. - Малы кошкиды университетысь? - Вылӥынгес верай ни трос удысъёсын ужаме сярысь. Малы ке ялан озьы луэ вал: кык- куинь ар ужасько но, тросэз валамон ни кадь. Азьлань мынэме потэ. Мукетыз мугез таӵе: удмуртъёс пӧлын но вожъяськись адямиос трос. Соослэсь ӧжытак вылӥегес ӝутскиськод ке, кинлэн ке быж вылаз лёгиськыны шедьтӥськод кадь. Ӵапак озьы луиз монэн но. Ньыль ар ӵоже ми ректорен туж тупаса улӥмы - мыным оске вал. Но витетӥ араз ректоратын маке уродгес луиз. Мынам сямы нош сыӵе: маке уг яра ке, синмазы меӵак верасько. Тужгес уг кельшо вал нуналаз олокӧня пол кылэм оскытонъёс. Лэсьтом, быдэстом шуо, нош асьсэос сётэм кылзэс вунэто. Мудрон выреме ректоратлы туж ик ӧз яра. Озьы мон палэнэгес кыльыны кутски. Проректоратысь кошкеме бере, ар ӵоже кафедраен кивалтӥ. Бӧрысь отысь но куштӥзы: валче ужанъя огкылыд, пе, кужымзэ ыштӥз ни. Контракт выльысь ӧз ни гожтэлэ. Тодосчиослэн кенешазы аспирантураме кулэтэм луэменыз ворсаны ӵектӥсьёс но вал. Асьмелы, пе, кулэ ӧвӧл ляб методистъёс. Соку мон меӵак куаретӥ: адямилэн визьмыз ӧвӧл ке, солы нокин уз ни юртты. Нош трос тодыны-валаны турттӥсь мурт дышетскемысь кулытозяз уз дугды. Шорам сяламзэс ӧй ни чида. Собере аспирантураме но ворсай. - Собере ужаны кутскиды Восточно-Европейской университетын. Татчы кызьы вуиды? - Университетысь кошкеме бере усьтӥ тодон-валанэз йылэтонъя институт. Вить толэзь ужаса вуттӥ но, кык ӵектон вуиз: Р. Ф. Березин ӧте аслыз наука ужъя кивоштӥсе, Э. С. Гордон - дышетон ужъя проректоре. Таяз удысэ мыныны нырысь курдайгес. Нош институтын тырши ни бере, ужзэ тодӥсько: мынӥ отчы. Вить толэзь куспын ньыль аспирантура усьтӥ - методикая, история, литературоведениея, педагогикая. Быдэс Россиын али дышетӥсьёслэсь тодон-валанзэс будэтонъя институт куать гинэ. Соос пӧлысь одӥгез Ижын. Р. Ф. Березин дорын али но ужасько на: вань аспирантурае, удмурт кылъя но литературая кафедрае, лекциос лыдӟисько. Восточно-Европейской университет сярысь ке верано, татын уже трос. Адямиос кожало: быдэс юрт - университетлэн. Зэм, со озьы ӧвӧл: татчы интыяськемын мукетъёсыз но. Милям вузмы куинь: университет, Урал школалэн асваньбурез кие басьтонъя но ужбергатонъя люкетэз, вылӥ юридической колледж. Ваньмыз соос нимаз. Мон куиняз ик дышетон ужъя проректор луисько. Со сяна, эшшо - педагогикая но психологияя кафедралэн кивалтӥсез но Кылъя, литературая но историяя Удмурт институтын. - Кудаз вузын ужаны умойгес: кун яке кун луисьтэмаз? - Шуг вераны. Татын секытгес, дыр, соин валче ик тунсыкогес но. Малы ке шуоно, луэ выль удыс но усьтыны, выль амалъёс но пыӵатыны. Нош отын, Москваен кенешытозяд, трос аръёс ортчо. Выльзэ но пыртыны туж шуг (но трос малпанъёсме быдэстыны быгатӥ: университетэз йылпумъям бере, уже интыянэз эрикогес карон сярысь сюлмаськи, огдыре кык удысъя тодон-валан басьтыны луонлык кылдытӥ). Уждун ласянь но милям ӟечгес: адямиез ужезъя дунъяськом. - Университетады тодматылӥськоды культура удысысь выль учыръёсын... - Бен, милям адямилы сӥзем кафедрамы вань. Солэн кивалтӥсез - кылбурчи, "Юность" журналлэн валтӥсь редакторезлэн воштӥсез Натан Злотников. Трос аръёс ӵоже улэмын Воткинскын - отчы шедем Быдӟым тылож дыръя. Кафедраямы вуыло туж тунсыко адямиос. Ветлӥзы ни кунсьӧр ужъёсъя азьвыл министр Андрей Козырев, тодмо кинорежиссёр Савва Кулиш, тодмо адвокат Андрей Макаров. Али ми дорын куноын Житовский художник. Со куамынэтӥ аръёсы юнме шорысь янгыше уськытэмын вылэм. 1962-тӥ арысен нокыӵе выставкаосыз вылӥллямтэ. Ужъёссэ возьматылэм кунгож сьӧрын - Англиын, Италиын, Германиын. Лекциоссэ лыдӟыны вуылӥз ни Сарапулэ, Воткинске. Али книгазэ поттыны турттӥськом. Тросэз суредасьёс татын адӟытонъёссэс радъялляло. Литературалы сӥзем ӝытъёс луыло. Валче кыл шедьтыса ужа милемын Зоя Алексеевна Богомолова. Ваньмыз со студентъёслы пайда вае. Соос поннагес тыршиськом. - Кык ардэс сӥзиды журналистикалы. Кытын ужады? - Соку та газет "Советской Удмуртия" шуиське вал. Зэм, кык арлэсь тросгес ужай: Ува, Сьӧлта, Сюмси ёросъёсъя собкоре юнматылӥзы. Шер-шер поталляй вавож палъёсы но. Туж яраз та удыс. Али но пушкам журналист пуке кадь: куд-ог дыръя редакцие материалъёс вуттылӥсько. Татын милям ӟуч кылын "Карьера" газет потэ: солэсь одӥг кылзэ но эскерытэк уг кельтӥськы. - Туала егитъёсъя, соосты дышетӥськоды бере, малпанъёсты кыӵеесь? - Мон гажасько соосыз. Ӵем дыръя жалясько. Вакытсы капчи ӧвӧл али. Берло дыре ыштӥзы ни асьсэлэсь трос правооссэс но. Туала нылъёс-пиос дышетэмын ӧвӧл туала улонлы, валало ке но солэсь висёнъёссэ. Но мон оскисько соослы: бордазы угось асьмелэн кужыммы. - Гороскопъя тӥ Эгызоос луиськоды. Тупаськоды-а? - Мон Эгызоос но Кисло-Кусло вискын луисько. Кыкназылэн ик сямзы умой. Но Рак кадь ваменскыны но быгатӥсько.Мыным сотэк туж шуг луысал адямие потыны. Куинь аресысен ик атайтэк кыли - войнаын быриз. Кошкон азяз милемыз анаен ӵош дораз, Юкаменск ёросэ, вайыса кельтӥз. Отын ик будӥ 1941-тӥ арысен. Педучилищее пырыны секыт ке но вал, ӧй сётскы - дышетски. Институт бере но али трос гинэ канжаськылонъёс пумиськылӥзы. Мыным номыр капчиен ӧз сётскы. Ваменэс сямы ӧй юрттысал ке, оло, аналтӥськысал но, дыр. - Азьвылзэ выльысь берыктыны ӵектысалзы ке?.. - Ӧй ни берыктысал, дыр. Пинал дыръям ик трос курадӟи. Выльысь шугадӟеме уг поты ни - ӧй ни берыктысал сютэм аръёсты. Зэм, таӵе малпанэн уло ас интызэс шедьтымтэос. Мон педучилищее кинэ дасямзэс тодытэк вуи ке но, чик ӧй жаля. Али ке но тодам лыктылэ одӥг учыр. Эшелэн агаез дышетскыны пырон вылысь, экзаменъёс сётэме бере юа ини: "Кин луыса потод отысь?" Тазэ мон ӧй юа, шуисько. Али малпасько: шонер сюрес бырйиськем. Дышетон - сӥё-дано удыс. Отын шӧдӥськод аслэсьтыд кинлы ке ӟеч лэсьтыны быгатэмдэ. Нош со - тужгес кулэез. Кенешиз Анна КУЗНЕЦОВА, Удмурт кун университетын дышетскись. * Тусбуйзэ пуктӥз Владимир КАМАШЕВ. Красногорскын йылпумъяськизы гуртысь спортсменъёслэн гужем ВИИ шудонъёссы. Огъя зачётын вормисе потӥз Завьяловоысь команда. Кызьы ортчизы та ӵошатсконъёс, тодозы, вуоно номерез лыдӟыса. В. КАМАШЕВЛЭН туспуктэмъёсыз. Выль книгаос Газет пыр алигес ивортӥ вал Куӟебай Гердлэн но Ашальчи Окилэн "Удмуртия" издательствоын потэм книгаоссы сярысь. Соин валче мукетъёссэ но пусъеме потэ. Милям но, котькытын кадь ик, коньдонэн югдур капчи ӧвӧл. Озьы ке но, удмурт писательёслэсь ужъёссэс печатласьком. Издательство 1988-тӥ арысен "Зарни крезь" = "Золотые гусли" сериен удмурт но ӟуч кылын чебер, тунсыко книгаос печатланы кутскиз. Соосты дасязы фольклорист Т. Г. Перевозчикова но этнограф В. Е. Владыкин, суредъёссэ лэсьтӥз художник М. Г. Гарипов. Та сериысь нырысетӥез "Инву утчан гур" - "Мелодия небесной росы" книга понна издательстволы Москваын ортчись "Искусство книги" выставкаысен сётэмын данъясь диплом. Кыкетӥез нимаське "Айкай", куинетӥез - "Ӟег нянь" - "Черный хлеб", ньылетӥез - "Гыдыке" "Сизый голубочек", витетӥез - "Эшъёс-юлтошъёс" - "Человек силён друзьями". Туэ потӥз куатетӥез - берпуметӥез - "Калыкын верало" - "В народе говорят". Гожтӥз тае туж тодмо автор - тодосчи но кылбурчи В. Е. Владыкин. Аслэсьтыз улон но кулон, инкуазь но адями, калыкъёслэн валче улэмзы яке ог-огзэс валамтэзы сярысь малпанъёссэ ивортэ со. Лыдӟыса шуоды: мон но озьы малпасько. Яке: мон соин огкылысь ӧвӧл. Туэ, пӧсьтолэзе, гажано, дано Г. Д. Красильников прозаиклы вордскемез дырысен тырмысал 70 арес. Та юбилейлы сӥзьыса, ӟуч кылын "Ненароком" книгаез потоз. Дасяз сое егит тодосчи Л. П. Фёдорова. Книгае пырозы "Начало года" ("Арлэн кутсконэз") роман но веросъёс. Малы удмурт кылын ӧвӧл шуиськоды-а? Мукет выжыосысь калыкъёслэн но удмурт авторъёслэсь книгаоссэс лыдӟемзы потэ ук. Озьы ик печатласькыны кулэ Е. Г. Афонинлэн, трос аръёс ӵоже "Советской Удмуртия" газетын ужам журналистлэн, тодэ ваёнъёсын "Йырмурт" книгаез. Отын автор вера ГУЛАГ сярысь (та темаез исась ӧй вал на асьмелэн). Син шоры яркыт пуксё тюрьмаын пукемъёс. Трос курадӟем, ултӥям адями, озьы ке но, умой улонлы оске. Собере потозы Г. А. Ходыревлэн но А. А. Ельцовлэн книгаоссы. Шӧдӥды, луоз: тросэз авторъёс куке но ужазы яке ужало удмуртъёслэн яратоно газетазы. Гожъяськыны визьзы лэчыт мед луоз. Нош издательстволэсь поттэм книгаоссэ дунтэменгес басьтыны луэ ми дорын. В. УРАЗАЕВА. Гуртын улэ адями Уин но ӧтё Кады-Салья гуртын чипы-курегез но тодэ Элионора Шаньгинаез. Калык сое гажа, дораз осконэн лыктэ. Данэз инмысь ӧз усьы. Сальяос ӝог шӧдӥзы фельдшерзылэсь адямиос сярысь сюлмаськемзэ, котьку юрттыны тыршемзэ. Куддыръя адями мырдэм медпунктэ вуэ, нош кошке отысь чылкак бурмыса кадь, висёнзэ вунэтыса. Эмъюм гинэ ӧвӧл, фельдшерлэн небыт, лякыт кылыз котькудӥзлэсь мылкыдзэ ӝутэ. Элина (гуртоосыз шораз озьы гинэ вазё), зэмзэ но, калыкез эмъяны выллем вордскемын. Со "уг" шуонэз уг тоды. Кызьы шуо, висён уг юа, котькыӵе дыре кутске. Соин ик фельдшерез уин но доразы ӧтё, юрттэмзэ витё. Кызьы бен сотэк. Киясае озьы гинэ уд шедьы, Куӵос (гуртсэс тазьы нимало) райцентрлэсь кыдёке интыяськемын, 30 иськемлэсь уно луоз. Соин ик Элионора Шаньгина вань улӥсьёслэн: арлыдоезлэн но, егитэзлэн но, пиналэзлэн но самой матысь юрттӥсьсы луэ. Медпунктын сяна, Элина коркась корка ветлэ, пичи нылпиослэсь, тужгес но куинь арес тырмымтэосызлэсь, тазалыксэс чакла. - Гуртмы пичи ӧвӧл, - шуэ фельдшер. - Сизьымдон пала семья, ваньмыз 212 мурт улэ. Али 8 вож нунымы, соослы арес но тырмымтэ ай, нош 7-езлы - кык-куинь арес. Соосты ялан син азям возисько. Марысь мар ке, транспортлы уг ёрмиськы. Ермолаевоысь участковой больницаысь ӝог юрттэт сётӥсь машиналэн водителез гуртамы улэ. Со котьку юрттэ. - Берло дыре калык маин ӵемгес висе? - юасько Элионоралэсь. - Уноез курадӟе остеохондрозэн, гипертониен но кынман висёнэн (пыэд, ОРЗ). Грипп но палэнэтӥ уг ортчы. Элина Сальяе вуиз Дэбес палась. Вордскемын Сюрногуртын. Татын тямыс классэз быдтыса дышетскыны пыриз Сарапулысь медицинская училищее. Кады-Сальяе куное ветлэ вал кенакез доры. Ӵапак соку тодматскиз вуоно кузпалэныз Анатлий Шаньгинэн. Али со колхозын валтӥсь агроном. Медучилищеез йылпумъямез бере, Элина куинь ар ужаз Ермолаевоысь участковой больницаын, нош 1974 арын Кады-Сальяысь медпунктэз оскизы. Озьы со татчы выжы лэзиз, 24 ар, вис карытэк, калыкез эмъя ни. Элина но Анатолий 4 нылпи будэто: куинь ныл но пи. Одӥгез нылзы пӧрась-технолог луыса ужа Ижысь "Ошмес" кафеын. Алигес со быдтӥз вузкаронъя но коммерцияя училищеез. Шаньгиналэн медпунктэз интыяськемын пудо утисьёслэн азьвыл шутэтскон юртазы. Калыклы ветлыны кыдёкынгес ке но, номыр уд кары. Ужаны интыез тырме. Кышномуртъёсты учкыны-эмъяны креслоез но вань. - Но выльдӥськон кутскем бере, секытгес луиз, - валэктэ фельдшер. - Эмъюмъёс басьтыны но уксё ӧжыт висъяло. Куддыръя ватае но, бинтэ но уг луы. Котькуд кварталэ 180 манет гинэ коньдон сёто. Аслам уксёеным басьтӥсько тӧдьы халат, тетрадь, ручка, альбом, ватман бумага но мукетсэ. Сотэк валэктон уж кызьы нуод? Нош нылпиосты дышетоно ук. Медпунктын озьы ик басьтоно вылэм физиоаппаратура, кардиограф но холодильник. Вакцинаосты али аслам холодильникам дорын возисько. Бен, гуртысь фельдшерлы капчи уг йӧты: Элиналэн сюрес вылын но нуны кутэмез вань. Но ваньмыз умой ортчылӥз, нош кӧня сюлмаськонэз, - сое нокин уг тоды-адӟы. Соин но, вылды, гурт калык фельдшерзэс юн гажа, со сярысь шуныт кылъёс гинэ вера но тау каре. Гуртысь кышномуртлы кык полэс секыт йӧтэ. Вань гуртоос сямен ик Шаньгинъёс но скал, парсь, ыж, ӟазег, курег вордо, нош гужем Элина кузпалзэ уг адӟылы, шуыны луоз. Валтӥсь агрономлэн ужез сыӵе, нош толалтэ дораз ваньзэ лэсьтэ-бергатэ, собере пиналъёссы но Элинаез уг вунэто, котьку вӧзаз, маин ке но юртто. Улэ Куӵосын огшоры кышномурт, мукетъёсызлэсь номырин уг висъяськы. Нош со калыклы кулэ: небыт киосыныз, капчи ваземеныз, капчи мылкыд капчи мылкыдыныз. Нош ужаны ӧдъяз со Вуж Сальялан. Кутсконэз каньыл ӧй вал. Училищеын басьтэм тодон-валанъёсыз юрттӥзы. Огдыре со ужаз Кумырса гуртын но. Котькыӵе куазен: зоре-а, лымыя-а, пельске-а, пӧсь-а, кезьыт-а, Элина котьку яратоно ужаз дыраз вуылӥз. Сыӵе со Кады- Сальяысь фельдшер Элионора Всеволодовна. Г. Романов. Элионора Шаньгина. Туспуктэмез В. Камашевлэн. "02" ивортэ УЖАСЬТЭМЪЁС ЮО, ЖУГИСЬКО, ЙЫРТЭМАЛО Ортчем шутэтскон нуналъёсы республикаямы 98 йыруж лэсьтэмын, 67-ез соос пӧлысь сэрттэмын-пертчемын ини. Секыт йыружъёс но урамын йыртэман ӧжытгес ке вал, со понна трос вал доразы етӥзъяськисьёс. Соосты "буйгатыны" милиционеръёс 110 пол потазы. Котькудаз сямен "удысын" "азьветлӥсьын" ветло ужасьтэм муртъёс. Тани одӥгез соос пӧлысь, Можгаысь 30 аресъем М. Юрий атайзэ кулымоназ жугем. Сыӵе ик нокытын ужасьтэм О. Виктор 77 аресъем апайзэ йыраз тӥрен шуккем но чай юон сервиззэ, тусьты-пуньызэ, пальтозэ но чассэ лушкам. Пӧрмостэм Раскольников ӝегатэмын. Милиционеръёс кырмизы С. Трофимез, К. Игорез, Я. Русланэз но А. Константинэз адямилэсь 5 сюрс манет уксёзэ таланы турттыкузы. Ижевскысь Союзной ульчаын одӥгысьтыз квартираысь ӧссэ донгыса, поттэмын 2 сюрс манет тыр ваньбур. Таин валче ӝегатэмын 22 аресъем Дмитрий Х. Со но нокытын но уг ужа. Озьы ик мурт квартираез Дзержинский ульчаын сузяллям Игорьёс П. но З. но Дмитрий К. .Таосыз "ӟечгес" тыршиллям - 19,4 сюрс манет тыр. Нош Игра районысь Юлайгуртысь магазинын кузёяськемъёсты утчало на. Соос 1 сюрс манет тыр вузъёсты "пыдъяллям". Озьы ик ӧвӧл на шедьтэмын "Удмуртгазстройлэн" гароажысьтыз 3 пыж моторъёсты (огъя дуныз - 35 сюрс манет) лушкасьёс. ДУННЕ БЕРГА Ӵуказеез лэсьтӥське туннэ Туэ апреле "ЛУКойл" му вӧй поттӥсь кампанилэн (НК-лэн) но "Интеррос" группалэн кивалтӥсьёсыз ӵош ужан, кусыпъёс тупатон сярысь мылкыдзэс шара веразы. Ӵапак соку, ОНЭКСИМ Банклы кылдэмез дырысен 5 ар тырмыку, В. Потанин со сярысь нырысьсэ ивортӥз. Озьы со Алекперовен одӥг кыл шедьтӥз. "Интерросэн" эшъяськонзы пайдаё луоз "ЛУКойлы" но, ОНЭКСИМ Банклы но. "Интеррос" группае пырись предприятиосын ужан "ЛУКойлы" луонлык кылдытоз дуннеысь банкъёсы сюрес лёгыны, кредит шедьтыны. Нош ОНЭКСИМ Банк "Интеррос" группалэн юн инъетэз но странаысь одӥгез кужмо банк луыса, "ЛУКойлы" уно пӧртэм услугаос сётыны быгатоз. Веранэз ӧвӧл, озьы ик пайда басьтоз "Интерросэ" пырись предприятиос, компаниос но банкъёс. Соос ог-огзылы юртто. Шуом одӥгез ёз юнма ке, со умоен берытске мукетызлы но. "ЛУКойл" НК зэмзэ но лыдъяське одӥгез золэз, юнэз му вӧй поттӥсь компания. Россиын солэн данэз вылӥын. Отын кивалтон туала куронъёсъя радъямын. Со нефть кыскон удысын трос юрттэ юн кулэ проектъёсты быдэсъяны. Озьыен "Интеррос" группалэсь коньдонзэ уже кутон умоен гинэ берытскоз, пайда сётоз. Му вӧй поттонын валтӥсь компания луэменыз но ӵуказеезлы зол осконэныз, "ЛУКойлэз" герӟаз, матэ кариз, "Интерросэн". Нош ОНЭКСИМ Банк но "Интеррос" куспазы валаса, ог-огзэс пӧятэк ужаны дасясько. Россиын вал ни кык яке тросгес нефть компаниослэн ӵош ужаны огазеяськыса продукция поттыны мылкыд каронъёссы. Но солэн одӥг бадӟым тырмымтэез вал - кивалтӥсьёссы куспазы огкыл ӧз шедьтылэ. Кылсярысь, ЮКОС но "Сибнефть" малпало вал огазеяськыны но кужмо монстр - ЮКСИ кылдытыны. Но со ӧз вордӥськы. "ЛУКойл" но ОНЭКСИМ Банк ӵош ужаны дасяськыса одӥгез но уг чакла шобретэз ас палаз кыскыны. Малпанзы одӥг - ог-огзылы юрттон гинэ. Нош "ЛУКойлы" НК-лэн но ОНЭКСИМ Банклэн ваньбурзы, кужымзы ЮКСИ-лэн номырин ӵошатонтэм бадӟым. Таӵе ёз кылдытон кивалтӥсьёссылэсь рользэс но ответственностьсэс ӝутэ. Нош "ЛУКойл" умоесь кусыпъёс возе бере РАО "Газпромен", "Интеррос" группаысь предприятиос "Газпромлы" уката матынгес луо, пайдаё кусыпъёс возьыны луонлыкъёс усьтӥсько. Г. ВАСИЛЬЕВ. Татьяна Пантелеева Паймымон тулыс сюлэмме воштӥз * * * Нюлэс кушетӥ Поръяло туннэ. Чуп карылозы Кыз вайёс бамме. Чебер кырӟало Юн куараеным. Кизэс чабозы Кыз вайёс мыным. Нош бертон азям Берытско, учко... Нош ик кыз вайёс - "Ӟеч лу"!" - шонасько. *** Тӧл! Чаль поръялом Шулдыр возь вылтӥ. Отын - горд узы. Вай, ветлом отӥ. Шуак тӧл ышиз. Луиз туж шыпыт. Ой, усьыны кутскиз Шатыр-р! зор шапык. *** Льӧмпу сяськаяське! Мылкыд - пуромемын. Ӝыт. Пукисько огнам Садысь скамья вылын. Уг возьма нокинэ, Оген шулдыр мыным: Льӧмпу сяськаяське! Мылкыд - пуромемын. *** Липет йылысь Чуз-з Кыстӥське нюжа. Зор ву ассэ Азвесь нюжа Кожа. *** Тугоко пуно Лыз сяськаослэсь - Шудзэ ишкалто Узыр возьвыллэсь. Со кылёз, куанер, Жальмыт учкыса, Шудме чигемме Тодаз вайыса. *** Паськыт тыэ Учке пилем: Вуюисьсэ - Сынзэ ыштэм. Ӟуг йырсизэ Пунэм каре. Лусьтро Ветлоз со Табере. *** Азвесь шортъёсын Улос бинемын - Сӥзьыл узырлык Кылдэ инбамын. *** Юи, юи Ошмес вуэз, Сюэ куасьмиз Шуыса. Поръяй, поръяй Возь вылъёстӥ, Тонэ адӟо Кожаса. Егит сюлэм Тонэ гажа, Туж утча, Нош синъёсысь Киське, киське Бӧрдон - кырӟан. *** Кыӵе тон? Мар тон? Кин тон? Ӵош луонлы Кытын оскон? Ӧвӧл ни со. Бездӥз, быриз. Но - пальпоты, Соку улӟо, Юг дыдыкен Инме лобӟо. Кин тон? Кытын? Вазь мыным... *** Яркыт буёлъёсын Эктэ вина Мурт кӧтъёсын. Азям - Кымам чарка. Питыр-питыр Синъёсыным Утчаськисько котыр. "...Фу-у, тордосъёс!" Быдэс коркан Кузёяське! Быдӟым Макмыр. "СКАЛ" Жагтурын Выж бордын, Корез сием - Вылэ ӝутскем. Жагтурын Пыд дорын, Бичатэ, Гочатэ: Си монэ!.. Пиньёсы Сыскисько: Жаг-турын ...сиисько. Му-у! . ӦС КУСЫП ВАМЕН ДӤСЬТЫСАГЕС ВАМЫШТОЗЫ Тросэз егит адямиос али улонамы йыромемын. Школаез йылпумъяса, асьсэдыз кытчы карыны уг тодо, уж уг шедьто. Кызьы соослы юрттоно, улонын асьсэды кузёен адӟыны но шӧдыны мед быгатозы, шуыса? Та ласянь сюлмаськонэз кӧня ке но ас вылазы басьто ёросъёсысь уже интыянъя центръёс. Ижевскысь Первомай ёросын быдэ вуымтэос но егитъёс понна нимысьтыз занятиос радъямын вал - "Профессия доры вамыштон". Пайдаё луиз юристэн пумиськонзы. Со пыр- поч валэктӥз, кызьы, ку но кытчы уже кутӥськоно быдэ вуымтэос, законъя кыӵе куронъёс пуктыны быгато уж сётӥсь азе, кудаз кагазъёс вылэ гожтӥськыны луэ, кудаз - уг. Тодмотэмзэ сэрттыны юрттӥз профконсультант но. Со вераз, учётын сылӥсьёс биржа юрттэмен, кыӵе ке ужлы дышетскыны быгато шуыса, тодматӥз со удысъёсын. Пиналъёс инсценировка но возьматӥзы, сое киноплёнкае пуктӥзы: кызьы егит адями "уже интыяське". Быдэ вуонэ вамышъёс лэсьтэмын. Уже интыянъя центрысь Светлана Тимофеевна Попова но мукетъёсыз юрттэмен, егитъёс тодмотэм ӧс кусып вамен дӥсьтысагес ортчозы. А. БРОННИКОВА. Экономикая кенешон Кылем арняе Санкт-Петербургын ортчиз экономикаысь ужпумъёсты эскеронлы сӥзем бадӟым кенешон. Симпозиуме пыриськизы Федерацияя Кенешлэн Тӧроез Егор Строев, Россиысь Правительстволэн Тӧроез Сергей Кириенко, улосъёслэн кивалтӥсьёссы, СНГ-ысь ыстэмъёс, валтӥсь экономистъёс. Асьме республикалэн нимыныз отын вераськиз Александр Волков. Шыръян но выт бичанэз умоятон чотын гинэ асьмеос ӟечгес улыны ум кутске, пусйиз со, одно ик кулэ ваньбур поттонэз йылэтыны, экономикаез ӝутон сярысь рос-прос сюлмаськыны. Кун Кенешлэн Тӧроез кивалтӥз симпозиумысь одӥгеныз валтӥсь ёзэн - со шуиз финансово-промышленной группаосъя "котырес ӝӧк" сьӧрын вераськонэз. Бадӟым кенешонлэн ужаз пыриськиз Белоруссилэн президентэз Александр Лукашенко. Экономикаен кун ласянь кивалтон та странаын ӟеч емыш сётэ. Пумен будэ ваньбур поттон, государство котыр ласянь юрттэ аслаз ужасьёсызлы, соин ик отын кунгож сьӧрысь вуттэм вузъёс но трос ӧвӧл. Александр Волковлэн верамезъя, асьме республикалы Белоруссиен нимысьтыз огкыл кутыны ужпум пуктоно. Туннэ Кун Кенешлэн Тӧроез пыриське Россиысь Правительстволэн паськытатэм заседанияз. И. КРИЧЕВ. ЭСКЕРОН ПАЛАТАЫН "Агропромпроект" производственной кооператив Кун Кенешлэн Эскерон палатаяз вазиськиз вал, Проектной институтэз утьыны но "Агропромпроект" институтлэсь ваньбурзэ кооперативлы выжтыны курыса. Эскерон палата та ужпумез 26 мае эскериз но решение кутӥз. Нырысь ик, чакламын Удмурт Республикаысь Гурт хозяйствоя но сиён-юонъя министерстволы "Агропромпроект" кооперативен ӵош институтлэн кузёосыныз конференция ортчытыны, акциосын огазеяськон кылдытон но институтлэсь ваньбурзэ тус- тас каремлэсь утён понна. Институтлэсь ваньбурзэ вузанлэсь утён, специализацизэ паськытатон, азинскыны луонлыкъёс кылдытон вылысь, институтлэн кузёосызлы дэмламын акциоссэс Удмурт Республикаысь Архитектурая но лэсьтӥськонъя кун комитетлы сётыны. Ваньбурез арендае сётыса поттэм коньдонэз дэмламын проектно-сметной документациез дунтэматонэ яке "Агропромпроект" институтлэн проектной ужъёсыз понна тыронъёсы висъяны. Республикаын гурт хозяйствоез ӝутон но "Агропромпроект" кооперативлэсь кужымзэ но быгатонлыкъёссэ пайдаё кутон понна, Удмуртиысь Правительстволы дэмламын, кооперативез инъет карыса, "Агропромпроект" ЗАО" институт кылдытыны. Выль институт проектной ужъёсты быдэсъяны, архивез, библиотекаез, оборудованиез, техникаез, лабораториосты утьыны кулэ. М. ШИШКИН. Селта выльысь улӟе, пушъе Туала шуг-секытъёс пумысен, ӵем гинэ вуӵкетӥськом ке но, та улонын но ваньмыз ик сокем урод ӧвӧл, шӧдске. Яке куд-ог интыосын гинэ-а меда одӥг-ог югыт пиштылэ на? Озьы ке, Селта - сыӵеосыз пӧлысь одӥгез. Сыӵе малпан йыре лыктэ, та вашкала черкогуртэ вуыса. Ӟеч кылысь берыктыса верано ке, туала дыре коть улэп кыльыны тыршоно, гыльк-кольк улонэн йырин ӧвӧл. Селтаос вӧй пӧлын уг пыласько но номыр ик уг уло кадь. Райцентре пырыку, синмез шумпотто асфальтэн шобыртэм паськыт ульчаос, сяськаё палисадникъёсын выль улон коркаос. Нош гуртлэн шораз югыт пурысь кирпичлэсь ӝутэм сбербанк, калыкез уже интыянъя Центр, культура юрт, школа, магазинъёс... Зэм, ваньмыз со берло дыре гинэ лэсьтэмын ӧвӧл. Но гуртлэн шулдыр тусыз йылаз-пумаз вуттэмын ӵапак алигес. Нош берло лэсьтэмысьтыз нимысьтыз пусйыны луоз куинь магазинэз, автовокзалэз, сбербанкез. Озьы ик кыскемын газопровод, выльдэмын школалэн юртэз. Лэсьтӥськонэ кутэмын республикалэн бюджетысьтыз коньдон. Куд-огез шуоз, оло: дась коньдонэн котькудӥз но быгатоз лэсьтӥськыны. Но дась коньдонэз но визьмын кутыны быгатоно ук. Селтаослэн со пӧрме. Котькыӵе юрт мед пуктозы, но одно ик чаклалозы, кызьы со адӟиськоз гуртлэн огъя вылтусаз. Соин ик кемалы син азе кылё татысь чылкытэсь, вож- вож, сайкыт но шулдыресь ульчаос. Т. Тихонов. В. Камашев (туспуктэмъёсыз). БЫРЪЁНЪЁС АЬЫН Азьпалто удмуртъёс Кык арня кылиз на ёросъёсын ас коже кивалтон ёзъёсы выль депутатъёслы быръёнъёс ортчытон дырозь. Кызьы ивортыло районъёсысь быръёнъя комиссиослэн тӧрооссы, али депутатэ кандидатъёс мыр-мыр бырйисьёс пӧлын ужало, калыкез ас малпанъёсынызы тодмато, адямиослэсь пӧртэм ӵектонъёссэс, куронъёссэс лыдэ басьтыны туртто. Но ваньмаз ик районъёсын югдур огкадь ӧвӧл. Быръёнъёслы дасяськонын кыӵе ке но пӧртэмлыкез вань. Глазов ёрос. Калыклэн мылкыдыз вылын туж зол шӧдӥське уждунэз ӝегатон. Со сэрен уката но лек вожпотэмзэс верало бюджет удысын ужасьёс. Соин но вылды быръёнъёсъя списокъёсын тодматскон каллен мынэ. Депутатэ кандидатэ 56 мурт юнматэмын, со пӧлысь 39-эз удмуртъёс. Ваньмыз кандидатъёс ӵектэмын бырйисьёсын. Одӥг мурт гинэ ассэ ачиз ӵектӥз. Нюръяськонэ пырисько 7 нылкышноос но. Быръёнъёсъя комиссие куинь участокъёс куронэн вазиськизы 5 июле быръёнъёсты кык часлы вазьгес кутскыны. Балезино ёрос. Татын депутат луон понна туж мыло-кыдо нюръясько нылкышноос, 82 юнматэм кандидатъёс пӧлысь 24-ез - кышномуртъёс. Мукет ёросъёсын ӵошатыса, татын трос гинэ асьсэдыс ӵектэмъёс но -соос 9 кузя. Ужан удыссыя учконо ке, ас понназы нюръяськыны дӥсьтэмъёс пӧлын вань врач, слесарь, контролёр, бухгалтер, заводлэн директорез. Калыклэсь мылкыдзэ туж огыр-бугыр кариз вал быръёнъёсты ортчытон нуналэн шудон. Ярам, али адямиос буйгазы ни кадь, быръёнъёсъя комиссие со пумысен нокыӵе ӝожтӥськонъёс уг вуо ни. Пичи Пурга район. Быръёнъёсты ортчытон туж кысык вакытлы тупаз. Гуртъёсын кутскиз пудо сиён дасян. Соин ик бырйисьёсын туж шуг ужаны. Озьы ке но, татын 70 процентэз бырйисьёс кандидатэ депутатъёс понна куаразэс сётыны дась ини. Татын соос 83 кузя: 16 ӟуч, 61 удмурт, 5 бигер, 1 армянин. Зэм, таяз быръёнъёсы, огъя верано ке, чырмыт пырисько гурезё палъёсысь лыктэмъёс. Кандидатъёс пӧлын вань грузинъёс, азербайджанъёс, таджикъёс. Но шумпоттэ соиз но: куд-ог районъёсын кандидатэ депутатэ ӵектэмъёс пӧлын трос гинэ удмурт выжыысь потэмъёс. Т. БАННИКОВА. Лыдӟись вера малпанзэ Инмарен сётэм инты тырттэм уг луы Кемалась ик ӧвӧл асьме страна дуннеын самой лыдӟиськисен лыдъяськылӥз. Со вакытэ котькуд семья ньыль-вить , нош тросэз ог дасо газетъёслы но журналъёслы гожтӥськылӥз. Соослэн тиражзы дасо миллионъёсын вал. Нош мар луиз берло? Шаерысьтымы улӥсьёс кылем арын центральной газетъёсты сю мурт пӧлысь витез гинэ басьтӥллям, нош республиканской но районной газетъёсты - сюрс мурт пӧлысь - 118-ез. Азьвыл ваньмыз сямен газетъёс ар понна пото вал 300 но солэсь ятыр номерен. Нош али арняяз 1-2 пол потӥз ке, ярам. Озьы калык лул-сюлэмезлы кулэ луись сиётэк кыле, лыдӟиськон мылкыдыз но пумен кысэ. Газетъёслэн тиражзы арысь аре кулэсме. Тани "Удмуртская правда" газетлэн тиражез кӧня ке ар талэсь азьло 80 сюрс пала вылэм, нош туэ - 25 сюрс сяна ӧвӧл. Озьыгес ик луыса кошке "Удмурт дунне" газетэн но. Но мон меӵак верасал, таиз ассэ ачиз быдтэ. Берло дыре та газетэз словарьтэк лыдӟыны ик уг луы. Ярам коть, Шаркан, Алнаш, Пичи Пурга районын котыр сюрс но солэсь ятыр семья та газетэз туэ но басьтэ, нош Камбарка, Грах, Каракулино палан улӥсьёс 4-6 экземплярен гинэ. Абдрамон: ма, та районъёсын воксё-а, мар-а удмуртъёс уг уло? Реформаос кутскемлэсь азьло Россиын гинэ улӥсезлы быдэ котыр 12 книга потылӥз, нош али чылкак 3 книга. Калыклэсь йырзэ шузимыто Западын поттэм детективъёс, боевикъёс, капчи яратонлы сӥзем книгаос. Берло 7-8 ар ӵоже одӥг ярамон книга но лыдӟеме ӧвӧл али ушъямон ӟуч писательёсмылэсь. Пото ке но, кыӵе ке мемуаръёс, пасквильёс. Арлы быдэ олокыӵе но кинофестивальёс, симпозиумъёс, презентациос ортчо, но экран вылэ но кинотеатръёсы одӥг умой кино но ӧз на вуы. Котькытын "мыльной" шуон операос, американской боевикъёс, порнография но эротика. Собере юаськом, кытысь пото юисьёс, наркоманъёс, йырвандӥсьёс, егит нылъёс пӧлын пинал ваён, пинал куштон но мукет учыръёс. Лыдӟиськон туала вакытэ туж дуно луиз. Газетъёс азьвыл 2-5 копейка ке сылӥзы, журналъёс - 20-50 копейка. Нош али районын потӥсь пичи гинэ газет сылэ 2 манет, центральнойёсыз солэсь но дуно, нош журналъёс сярысь вераськонэз ик ӧвӧл. Вот озьы асьмеос калыкез дышетӥськом лыдӟиськытэк улыны. Ми асьме семьяямы газет-журнал басьтӥськом вал, котькудӥзлэсь арлыдзэ но кулэяськонъёссэ чакласа: "Правда", "Партийная жизнь", "Здоровье", "Крестьянка", егитъёслы но покчиослы "Комсомольская правда", "Пионерская правда", "Мурзилка" журналъёс но газетъёс. Со сяна, гожтӥськылӥмы республикаямы но районын поттӥсьёсызлы. Ваньзэ сое басьтыса но семьямылэн бюджетэзлы секыт ӧз йӧты. Туэ но бен, секыт ке но, басьтӥськом "Удмурт дунне", "Правда России", "Трибуна" но "Вестник" газетъёсты. Со сяна, киоскысь одӥг-одӥг бичасько на "Российская газетаез", таяз пото ваньмыз выль законъёс. Азьвыл фермаосысь горд сэрегъёсын, мастерскойёсын, гаражъёсын, колхозъёслэн контораосазы библиотекаосын пӧртэм газетъёслэн подшивкаоссы вал. Нош али со сярысь малпаськыны гинэ кылиз на. Тани милям подъездамы улэ тямыс семья, нош газетъёс басьтэ куинез гинэ. Валамон малы тазьы луиз : калык туж пичи уждун басьтэ, сое но дыраз уг сётъяло, пенсиос но ушъяськымон ӧвӧл. Организациослэн, предпрятиослэн озьы ик коньдонзы ӧвӧл. Таӵе дыре газетъёс сярысь малпаськод на шат. Но мон сямен, вань мукетыз но. Туала кивалтӥсьёслы кулэ ик ӧвӧл лыдӟиськисьёслэсь лыдзэс будэтон. Пеймыт адямиен кивалтыны капчи ук. Сое туж валаны луэ телевидениысь пӧртэм каналъёсъя программаосты учкыса но. Книгаослэсь, газетъёслэсь, журналъёслэсь палэнтыса, телевидение ас палаз кыскыны быгатӥз ни троссэ егитъёсты. Ма бен сётэ туала телевидение учкисезлэсь лул-сюлэмзэ, визьзэ узырмытон понна? Котьку дыре ужаты телевизорез - шедёд реклама вылэ. Малпанэ вуиськод: вань калык странаямы кариесэн курадӟе, ымнырзы пӧськыесь, йырсизы килен тырмемын, нош кышноослэн вань малпаны - кызьы йырсизэс утялтоно но виркошконлэсь утиськоно. Странаямы экономика ласянь шуг-секытъёс кылдэмын, адямиос сиён-юонлы, дӥськутлы ёрмо, нуналлы быдэ сямен бадӟымесь катастрофаос, адямиез быдтон учыръёс, нош со вакытэ телевидениын шудонъёс, шудонъёс: "Поле чудес", "Счастливый случай", "Угадай мелодию", "Лотто-миллион", "Зов джунглей", "Веселая квампания", "Эти забавные животные", "Золотая лихорадка" но трос мукет. Нош мае возьмато выль иворъёсын? Ваньмаз сямен каналъёсын нуаллы быдэ ог дасо пол одӥг учыр сярысь ик верало. Отын но нырысь интыын адями виёнъёс, пуштылонъёс, тылпуос, нош Президентлэн, Правительстволэн ужамезлы туж ӧжыт дыр висъяло. Кун Думаез серем карыса гинэ возьмато. Инмарен сётэм инты тырттэм уг луы, шуо ӟучъёс. Ӧвӧл бере сюлэмлы но йырвизьлы ярамон сиён, сое вошто наркотикъёс, вина, капчи яратон, гольтыръяськыса улон. Тӥни озьы, телевидение - со туала политикъёслэн кивалтоссы. Номыр сярысь эн малпаськы, тон понна сюлмаськоз Президент. А. Вахрушев. "ИЖСТАЛЬЛЭН" ДАНЪЯСЬКОНЭЗ 22 июне 1941 арын, Быдӟым Отечевтвенной война кутскыку, нокин ӧз тоды, кӧня со кыстӥськоз. 1418 нуналъёс но уйёс мынӥз вир кисьтон ож. Быдэс Советской Союзысь ужасьёсын ӵош, асьме шаерысь но пиос, нылъёс султӥзы тушмонлы пумит ожмаськыны. Сюлэсь тросэз соос Советской Союзлэн Героез луизы. "Ижсталь" огазеяськонлэн дуриськон цехысьтыз борддорын мемориальной пул вылын гожтэмын: "Та цехын ужаз Советской Союзлэн Героез В. М. Обухов". Василий Михайлович вордскиз 1909 арын Ижевскысь огшоры ужасьлэн семьяяз. Со пичиысен анай- атайтэк кылиз. Городын Советской власть кылдэм бере, мылысь-кыдысь пыриськиз общественно-политической уже. Дурисьлэн специальностеныз тодматскыса ужаз "Ижсталь" заводын. Соин ӵош ик тодонлыксэ будэтӥз авиашколаын. Азьланьын Василий Обухов летчик-инструктор луиз. 1941 арын феврале Василий Михайловичез Горд Армие басьтӥзы. Татын со лобанъя полкын инструктор вал. Война кутскем бере Ил-4 самолётэн тушмонлэсь городъёссэ пазьгылӥз. Солэн кивалтоно звеноез бомбаос куяз Кенигсберге, Данциге, Плеештые. Война ӵоже солэн звеноез 166 пол ӝутскылӥз инме но куинь толэзь ӵоже экипажысьтыз одӥг адямизэ но ӧз ышты. 1944 арын март толэзе В. М. Обуховлы сётӥзы Советской Союзлэн Героез ним. В. ЧЕРНОВ. БЫРЪЁНЪЁС АЗЬЫН Куаразэс сёто ни Кызьы толон ивортӥз Быръёнъёсъя элькун комиссилэн кивалтӥсез Афанасий Тубылов, бырйисьёс интыысь аскивалтонъя ёзъёсы депутатэ кандидатъёс понна куаразэс 20 июньысен сётыны быгато ни. Дырызлэсь вазь голосовать карыны мылкыд карисьёс трос ӧвӧл ке но, кӧня ке мурт сыӵе луонлыкез уже кутӥз ни. Кысык вакытэз лыдэ басьтыса, туэ лэземын быръёнъёсты 6 часын кутскыны. Та дырозь элькун комиссие вить ӝожтӥськон вуэмын. Котькудӥзъя ужрадъёс кутэмын. А. Тубыловлэн верамезъя, быръёнъёс радзыя ортчозы. Гурт калык югдурез шонер вала, кулэ ужрадлэсь уг палэнскы. О. МАРКОВ. КУЗЁТЭМ СЮРЕСЪЁС Асьме кунысь сюресъёсмылы кунгож сьӧрысь лыктэм куноос пӧлын паймымтэез ик ӧвӧл, луоз. Угось пулёсир кадь наштаськись-кыстӥськись дэриосты, машинаос кугӟамон нюк- гопъёсты, утялтымтэ лымы люкъёсты асьме сюресъёс вылысь гинэ пумиталод. Тодам ваисько на, сельхозтехникумын дышетскыкум, Татарстан но Киров улосысь гож доры вуыса, ог сизьым иськемез шугомыса ортчоно луылӥз. Уго, котькуд районысь сюресэз чылкытатӥсьёс асьсэлэн ёросазы пырись гурт сюресъёсты чылкытато вал, нош кык улос куспысь сизьым иськем сюресэз чылкытатытэк кельто. Кузётэм сюрес, пе, таиз. Татарстанлы но мултэс, Киров улослы но... Та нуналъёсы Кильмезьысь автобус дугдылонние кожаны тупаз. Татчы трос автобусъёс дугдыло. Районысь маршрутъёсъя ветлӥсьёсыз сяна, вуыло Киров, Ижевск, Малмыж каръёсысь но. Автостанция интыяськемын люкыт юртэ. Татын тол нуналъёсы но шер адӟылод тыл югытэз. Одно ик укноос пильылӥськемын, лампочкаос лушкамын. Тыл югдэ ке, билет вузасьлэн висъетаз гинэ пиштэ. Выж вылын жуг-жаг, куд-огез,чик керпотытэк, татын ик тамак ӵындэ. Трос кудӟемъёс. Скамьяос вылэ интыяськем сюресчиос та шоры синпумтӥзы гинэ учко кадь. Нокин уг шугъяськы, куара-ланга ӝутӥсьёс но ӧвӧл. Автобусын но югдур сыӵегес ик: толалтэ нуналъёсы отын ӟонгыралод, гужеме - ӝокалод. Нош салонъёсын кырсь луэмлы асьмеос, сюресчиос, ик янгышесь ӧвӧл меда? Тае уката шӧдыны луэ, Иж каре ширтыку. Кильмезьлэсь кӧня дасо иськем кошкыса вуиськод-а, уд-а, автобус пуш сиськоннилы пӧрме кадь. Кин ке ческыт чапкетыса сие колбасаен бутерброд, кудӥз куажыртэ улмоен, вань сема тысь куадасез но. Я автобус укноетӥ кыре, я выж вылэ лобӟо бумага юдэсъёс, шундыберган кӧмъёс, конфет бинялтэтъёс... Огезлэн но тодаз ӧвӧл, лачак бинялтыса, сумкаяз поныны. Уз, кугож сьӧрысь дядяйёс лыктыса асьме сюресъёсмес уз тупатъялэ. Сюрес вылын астэ адями сямен возьыны но уз дышетэ. Ку дышомы меда асьмеос сюресчиослэн культуразылы? Дыр вуэмын ӧвӧл меда? Н. НИКИФОРОВ. Киров область. "Удмурт дунне" газетлы - 80 НЮЖАЕН-НЮЖАЕН ЛЮКАМ УЛОН ПЫРЫОС КИСЬТӤСЬКЫЛӤЗЫ ГАЗЕТ ЧУРЪЁСЫ "Советской Удмуртия" газетэн шӧдтэк шорысь эшъяськи. Редактор Василий Михайлович Михайлов куремъя, статьяос гожъяны кутски. Озьы, ачим но валатэк, рабселькоръёслэн радъёсазы пыри. Со дырысен ньыльдон арлэсь трос дыр ке но ортчиз ни, гожъямъёсы бордын пӧсямме-курадӟемме али но тодӥсько на. "Етӥн будэтонын" (1958-тӥ ар) - озьы нимай нырысетӥ материалме. Солэсь газетэ потэмзэ кышкаса но, шумпотыса но возьмай. Кызьы дунъялозы гожтэмме егитъёс? Ваньзэ- а шонер суредай? Соку мон Сюмси районысь комсомолецъёслэн кичӧлтӥсьсы вал. Бӧрысь но етӥн будэтон сярысь ӵем гинэ гожъялляй. Озьы вань гожъяськисьёс пӧлын етӥн будэтон темая пумен огез валтӥсь специалист кадь луи. Троссэ тодӥсько ни вал, кызьы дасяно етӥн кидысэз, маин "сюдоно" музъемез, ку бусыосы поттоно тылобурдо кыедэз но пенез. Син азям ялан ӵошатыса возьылӥ звеноослэсь ужамзэс. Етӥн будэтонъя республикаямы вормисе потӥз Сюмси районысь "Борец" колхозысь Нина Пекиналэн звеноез. Солы ик шуд усиз ВДНХ-лэн ужаз пыриськыны. Тӥни озьы адямиослэн ужын басьтэм вормонъёссы удмурт газетъёслэн бамъёсазы но сюрылӥзы. Газетэн кусыпъёсме али но уг ыштӥськы. Мынам малпамея, вашкалаосмылэсь сямъёссэс но йылолъёссэс быгатыса уте газетлэн "Берекет" бамыз. Кылем арын мынэсьтым статьяме но отын поттӥзы. Со пумысен лыдӟисьёс но жингыртӥзы, мылкыдме ӝутӥзы. Азьло аръёсы "Советской Удмуртия" туж зол пыкъяськылӥз внештатной корреспондентъёс вылэ, соос котькуд сэрегъёсы вуылӥзы, озьы газетын пӧртэм районъёсысь калыклэн улонэз-вылонэз адӟиськылӥз. Оло, соин но "Советской Удмуртиез" лыдӟисьёс данак вал. Удмурт кылын вераськыны ӧй ке но быгатылы, редакцилэн коллективез монэ котьку ӟеч мылкыдын пумиталляз, али но тодам ваисько отделъёслэсь кивалтӥсьёссэс но журналистъёсты А. Васильеваез, Д. Леконцевез, Н. Евсеевез, А. Кузнецовез, В. Ивановез, Е. Афонинэз. Шумпотӥсько, удмурт журналистикалэсь ӟеч сямъёссэ али мыло- кыдо азинто егитъёс. Газетлэн юбилеез азьын пумиськылыны кылдӥз валтӥсь редакторен А. Шкляевен. Соин вераськылыса, таӵе малпанэ вуи: уг, уг ышты газет азьвыл сямъёссэ, улон нюжаоссэ. Азьло аръёсы сямен ик тонэ татын сак кылзозы, юалляськозы, мар ке сярысь гожтыны дэмлан сётозы. Сӥё-дано нуналзы азьын "Удмурт дунне" газетын ужасьёслы сӥзисько выль вормонъёс, котькуддылы шудбур но семьяостылы тыро улон. В. ЛОГИНОВ, ужысь ветеран. ЮАЛЭ - ВАЛЭКТОМ Нылпиед вань? Гожтӥськы черодэ Калыкез улон-вылонын утёнэн герӟаськем ужпумъёс котьку но лыдӟисьёсмес сюлмаськытӥзы. Со сярысь верало редакцие вуэм гожтэтъёс но. Ваньзэ сое лыдэ басьтыса, меӵак герӟаськоно кариським республикаысьтымы Калыкез улон-вылонын утёнъя министерствоен. Туннэез ӝутоно ужпуммы - нылпи пособиосты тырон. Юанъёслы валэктонъёс сётэ Наталья КУЗНЕЦОВА, калыкез улон-вылонын утёнъя министрлэн воштӥсез. - Нылпи пособиосты тыронын туэ воштӥськонъёс луизы. Маин со герӟаськемын? - Таяз арлэн кутсконаз нылпи пособиосты тыронъя Удмурт республикаысь Правительствоен кык постановление кутэмын вал. Россия Федерациысь Правительстволэн 1997 арын августэ кутэм постановлениезъя 1998 арын 1 январьысен Россиысь вань улосъёс нылпи пособиосты тыронэз сётыны кулэ калыкез улон-вылонын утёнъя ёзъёслы. Удмурт Республикаысь Правительстволэн 2 феврале кутэм "Нылпи понна толэзьлы быдэ сётӥськись пособиез юнматон но тырон радэз воштон сярысь" Постановлениез нылпи пособие тыронэз калыкез улон-вылонын утён ёзъёслы выжтонъя нимысьтыз радлык тупатӥз. Соя нылпи пособиез выль сямен тыронэ 1 январьысен выжыны кулэ быдэс республика, Глазов но Ижевск городэз вератэк. Калыкез улон-вылонын утён ёзъёс пыр нылпи пособие татын тыриськыны кутскоз 1 июльысен. Нош Игра, Як.-Бодья, Воткинск но Каракулино районъёс 1999 арын 1 январьысен гинэ пособиосты выль сямен тырозы, отчыозь со сётӥськоз интыосысь бюджет чотын, калыкез улон-вылонын утён ёзъёс пыр пособие басьтӥсьёсты вератэк. Та постановлениез кутэмлэсь азьло нылпи пособие басьтӥсьёс кык категорилы люкемын вал: калыкез улон-вылонын утён ёзъёс пыр басьтӥсьёслы (нылпизэс огназы будэтӥсь анайёс, ужтэк кылем анай-атайёс но мукетъёсыз) но ужан интыысьтызы басьтӥсьёслы. Кызьы верай ини, 1998 арын 1 январьысен нылпи пособие ваньмызлы сётӥськыны кулэ калыкез улон-вылонын утён ёзъёс пыр. Но нылпи пособиосты ваньмызлы огдыре сётыны республикамылэн луонлыкъёсыз ӧвӧл. Та арын ик 30-тӥ апреле Удмурт Республикаысь Правительство кутэ "Нылпи понна толэзьлы быдэ сётӥськись кун пособиез 1998 арын тырон сярысь" Постановление. Соя тупатэмын вал нылпи пособиосты тыронъя черод. - Наталья Федоровна, та берлоез кутэм постановление Россия Федерацилэн нылпи пособиосты выль сямен тыронъя постановлениезлы пумит уг луы-а? - Зэмзэ но, тросысьтыз газетъёсысь мынам лыдӟеме вань, Удмурт Республикаысь Правительство нош ик ас сяменыз карыны турттэ. Тросэзлы уг кельшы справкаос бичан. Нылпи пособие басьтӥсьёсты куинь категорилы люкыса, Удмурт Правительство номыр умойтэмзэ ӧз лэсьты. Вераськон уг мыны ук нырысетӥ категорилы гинэ коньдон тырон сярысь. Тупатэмын черод, кудӥзъя нылпи пособиез нырысь ик басьтыны быгатозы тужгес но кулэяськисьёсыз. Мар ватонэз, тросэз семьяос али та пособие чотын гинэ уло, нош коньдоно муртъёслы со 67 манет нокытчы уз шӧдӥськы. Ӧй ке луысал вань быдэ вуымтэ нылпиослы пособие тырон сярысь закон, тросэз сое кулэен ик ӧй лыдъясалзы. Нош али Россиын постановление вань семьяосты одӥг радэ пуктэ. Рынокен экономикае улыны выжиськом бере, нылпи пособиосты тыронэз но выль сямен радъяно. Кемалась вераськон мынэ ни нимаз-нимаз семьяослы (адресной) юрттэт сётон ласянь. Тани Татарстанын нылпи пособие сётӥське коньдонлы тужгес но кулэяськись семьяослы гинэ. Россия Федерацилэн постановлениезтэк республикамылэн сыӵе амалэ выжемез уз луы. Но вераськон мынэ ни Россиысь вань улосъёсын нылпи пособиез шуге-леке сюрем семьяослы тырон сярысь. - Кинъёс но кинъёс пыро со куинь категориосы? - Нылпи пособие коньдонэн тыриськоз, луэмезъя ӝегатонъёстэк, кинлэн семьяысь котькуд улӥсьлы огъя доходэз улыны чаклам дунлэсь (прожиточной минимум) ӧжыт луэ - Удмурт Республикаысь Ужъя Комитет 1998 арын 1 январьлы улыны чакланы дун тупатӥз 402 манет 31 копейка. Семьялэн доходэз 402 манет яке солэсь ӧжыт луиз ке, со пыроз нырысетӥ категорие. Кыкетӥ категорилэн огъя доходэз луыны кулэ 402 манет но 31 копейкаысен 607 манетозь. Шуом, та категорие пырись куинь муртлэсь семьялэн огъя доходэз луыны кулэ 2 сюрс манет пала. Нылпи посбие та семьялы сётӥськоз: вань ке, коньдонэн, ӧвӧл ке - вузэн, мукет кыӵе ке юрттэтэн. Куинетӥ категорие пырись семьялэн огъя доходэз 607 манетлэсь тросгес луыны кулэ. Пособие сётӥськоз вузэн яке кыӵе ке мукет юрттэтэн, коньдон ке вань - коньдонэн. Нылпи пособие басьтон понна черодэ пуктӥсько ваньмыз, калыкез улон-вылонын утён ёзъёс пыр азьвыл басьтӥсьёс но. Таосыз нылпи пособиез туэ февраль понна басьтӥзы ни ке, огъя доходзэс лыдъялозы ни мартысен. Ужантӥысьтызы коньдон басьтӥсьёслэсь доходзэс лыдъяны кутскозы 1 январьысен, постановление кутэмын ке но 30 апреле, черод тупатӥське та нуналысен. - Кызьы лыдъяське семьялэн огъя (совокупной) доходэз? - Лыдэ басьтӥське семьялэн ваньзэ кӧня коньдон басьтэмез. Нырысь ик, отчы пыро уждун, премиос, дотациос, коньдонэн юрттэт. Озьы ик лыдэ басьтӥсько: нылпизылы яке асьсэлы анай-атайлы сётӥськись пенсия, банкын возиськись коньдонлэн люкаськем процентъёсыз, акциослы басьтэм дивидендъёс, юртъерез яке мукет мае ке бадӟымзэ вузам коньдон. Огъя доход люкиське семьялэн лыдызлы. Отчы пыро: анай-атайёс (кузпалъёс ке но уг луо ни, пыртос мурт), 18 аресозь быдэ вуымтэ нылпиос. Доходэз лыдъяку лыдэ басьтӥське кие басьтэм коньдон гинэ, сётымтэ уждун отчы уг пыры. Соку гражданъёслы сётӥськыны кулэ кӧня уждун басьтэмзы сярысь справка, налогъёсты но куштыса. Доход сярысь справкаосты сётоно 1997 ар понна, июльысен декабрь толэзёзь. Котькуд ӝыны ар ортчыса, соосты выльдоно луоз. - Адямиос асьсэос вазиськыны кулэ райсобесъёсы яке ваньмыз лэсьтӥське ужан интыосын? - Глазовын но Ижевскын документъёсты но уждун сярысь справкаосты дасяло асьсэос предприятиос но организациос. Нош кин нылпи пособие басьтэ вал калыкез улон-вылонын утён ёзъёс пыр, соос асьсэос вазиськыны кулэ райсобесъёсы. Гуртъёсын но озьы ик. Вераны кулэ созэ но, кыӵе ке но документъёс ӧз тырме ке яке нылпи пособие басьтӥсь мурт чик но ӧз вазиськылы райсобесэ, сыӵе семья куинетӥ категорие пыртэмын луоз. - Шуом, кинлэн ке но аслэсьтыз доходзэ ватэмез потоз? - Мылкыд карисьёслы сыӵе луонлык сётӥське, но со соку ик куинетӥ черодэ выжоз. Нош 1-тӥ категорие пырись мурт ке ватэ аслэсьтыз доходъёссэ, милям луонлыкъёсмы вань котькудзэс эскерыны, чакламъя сое быгатӥськом выжтыны 2-тӥ яке 3-тӥ категорие. Нялтас верало на, нылпи пособие вань басьтӥсьёс пӧлысь ӝыныезлы документъёссы райсобесъёсы ваемын ни, туж тросэз соос пӧлысь 1-тӥ категорие пыро. Л. МАЛЫХ. СӤЗЕМЫН ГАЖАНО АДЯМИОСЛЫ Национальной библиотекалэн Удмурт шаермыя но финн-угор литературая отделаз куинь адӟытон радъямын. Одӥгез сӥземын лыдӟисьёсыз Кун Думае быръем депутатъёсын тодматонлы. Мукет выставкаос верало шаерысьтымы туж тодмо но гажано адямиос сярысь. Одӥгезлы таяз толэзе тырмиз 65 арес, мукетызлы - 66. Валады ини луоз, кинъёслы сӥземын адӟытонъёс. Одӥгез тодматэ Анатолий Николаевич Уваровлэн литература но наука удысын ужаменыз, мукетыз - Петр Николаевич Кубашевлэн ужъёсыныз. Лыдӟисьёс тодозы на та дано адямиослэн книгаоссы сярысь, эшъёссылэн тодэ ваёнъёсынызы тодматскозы. Дорамы ӧтиськомы вань мылкыд карисьёсты. Лыдӟиськон юртмылэн ӧсъёсыз усьтэмын котькуд нунал (кӧс нуналэз но арня нуналэз вератэк) 10 часысен 18 часозь. Гажано Анатолий Николаевич но Петр Николаевич! Вордскем нуналэныды ӟечкыласа, асьтэдыз но витиськомы. Верам кылды но ужмес адӟемды-дунъямды милемлы туж дуно. Библиотекаын ужасьёслэн нимынызы - Надежда ПЧЕЛОВОДОВА. КУН КЕНЕШЛЭН СЕССИЯЗ Ваньзэ ӧз учке Кызь ньылетӥ июне одӥг нуналлы люкаськылӥз Кун Кенешлэн 20-тӥ сессиез. Парламент урод ужаз шуыны уг луы, но вань чаклам ужпумъёсты учкыса ӧз быдты. Вуоноезлы кельтэмын жилищно-коммунальной хозяйствоез выльдон, статистикаез умоятон программаос но химической ож тӥрлыкез быдтонэн герӟаськем ужпум. Депутатъёслы но сессие лыктэмъёслы нырысь ик ивортон лэсьтӥз Кун Кенешлэн Тӧроез Александр Волков. Со вакчияк мадиз Санкт-Петербургын ортчем экономической кенеш но Россиысь Правительстволэн выль ужрадъёсыз, шуг-секытысь поттонъя но коньдонъя программаез сярысь. Кылсярысь, матысь дыръя чаклаське электрокужымлы, газлы, чугун сюрес вылын но транспортын услугаослы тарифъёсты кулэстыны. Соя уно законопроектъёс дасямын но Кун Думае эскерыны сётэмын. Пусйыны кулэ, таиз сессия бадӟым инты висъяз шаерамы му вӧй поттонэз умоятонлы. Тани экономикая министр Евгений Аверьянов вераз нефть кысконын инвестициосъя проектъёсты быдэсъян сярысь. Собере парламент "Удмурт Республикаын тарифъёсъя но дунъёсъя Кун Комитет кылдытон сярысь" постановление кутӥз. Правительстволэн Тӧроезлэн воштӥсез Владимир Зенин депутатъёслы ивортӥз, "Удмуртская" тылобурдо вордон фабрикаез но Глазовысь комбикорм изӥсь заводэз выльдон сярысь" Кун Кенешлэсь постановленизэ кызьы быдэстэмзы пумысен. Со умоен лыдъямын. Нош "Химической ож тӥрлыкез быдтон сярысь" федеральной законэз республикаямы уже пыӵатонъя пӧртэмлыкъёсыз сярысь постановление инъетлы кутэмын. Малы ке шуоно, Россиысь одӥг куиньмосэз хими ож тӥрлык шаерамы интыямын. Сое быдтон Удмут Республикалы кӧня ке пайда но сётыны кулэ. Парламент умоен лыдъяз туэ пичи ужбергатонлы юрттэт сётонъя программаез. Нош "1997-2000 аръёсы. Удмуртиысь егитъёс" нимаз кун программае эшшо 6 пичиесь программаос ватсамын: Соос пӧлысь - "Егит семьялы юрттон", "Патриотической воспитание", "Кунгож сьӧрысь егитъёсын кусыпъёс тупатон" но мукетыз. Сессилэн пумаз республикаямы социально-экономической югдур, уждун, пенсиос но пособиос тырон сярысь вераськиз Удмурт Респуликаысь Правительстволэн Тӧроез Павел Вершинин. Оглом югдур секыт ке но, шаерамы дышетӥсьёслы отпуске потэмзы понна 5 июлёзь коньдон сётэмын луоз. Соин валче Иж городлы ватсаса уксё висъямын. Нош интыосын уждун вуоз правительствоен кутэм огкылъёсъя гинэ. Россия туэ, миым та дырен ӵошатыса, 21 процентлы ичигес уксё сётӥз. Вылаз ик, му вӧйлы дун юн зол усемен, "Удмуртнефть" кун бюджетэ налог тырыны уг быгаты. Ож тӥрлык поттӥсь предприятиос, "Автозавод", "Мотозавод" но мукетъёсыз мырдэм возисько. Кун Кенешлэн кызетӥ сессиез таин ужзэ йылпумъяз. Г. РОМАНОВ. Быръёнъёс азьын КАЛЫКЕН УЖАНЫ ЕГИТЪЁС НО ЮРТТО 5 июле ёросъёсын тодмо луозы аскивалтонъя ёзъёсы быръем депутатъёслэн нимъёссы. Нош али, со дырозь кылем нуналъёсы, быръёнъёсъя комиссиос но, кандидатъёс но сюлмаськонъёсын уло. Грах ёросын пӧртэм выжыысь потэм калыкъёс уло. Соин ик татын, удмуртъёс но ӟучъёс сяна, депутатэ кандидатэ ӵектэмын бигеръёс, чувашъёс, поръёс. 78 кандидат пӧлын удмуртъёс но ӟучъёс огмында - 29. Та ёросын быръёнъёсъя округъёс пичиесь, соин ик тросэз депутатэ кандидатъёс бырйисьёсынызы коркась корка ветлыса ужало. Куд-огез калыкен "вераське" радио, газет пыр. Но газетлы оскон ӧжытгес, угось таӵе кысык пудо сиён дасян вакытэ ужасьёс газетэз киязы шергес кутыло. Калык пӧлын валэктон уж нуон понна, районын кылдытэмын концертъёс возьматонъя нимысьтыз бригада. Со ужа "Удмуртиысь егитъёс" программа улсын, но нялтас юрттэ кандидатэ депутатъёслы но. Вуоно депутатъёслы адямиос таӵе сюлмаськонъёссэс верало. Выль коркаосы пыртэмын луозы-а чагыр эстӥськон но ву? Кема-а возьмано луоз на нылпи пособиосты? Вань та юанъёс улонысь потэмын, шуыны луоз. Берло аръёсы Грах черкогуртын выль урамъёс кылдӥзы. Солы шумпотоно кадь. Озьы ке но, вутэк но чагыр эстӥськонтэк семьяослы туж секыт йӧтэ. Нылпи пособиосъя ке верано, Грах район Можга районэн ӵош эскерон ортчытонэ кутэмын вал: нылпи пособиосты вань анайёслы кылем арысен райсобес пыр тырыны кулэ вал. Но дыраз коньдон висъяны Правительство коньдон ӧз шедьты, лэся. Озьыен, пособиослы туж кулэяськись 97 семья али но коньдонзэ басьтытэк улэ. Калыклэн табере одӥг осконэз: оло, выль быръем депутатъёс та ужпумъёсты йылаз-пумаз вуттозы. Ӟечезлы оскыса та нуналъёсы ужа районысь быръёнъёсъя комиссилэн тӧроез Валентина Михайловна Савина но. Вань бырйисьёс куараоссэс сётыны дасесь ни. Берлояз ортчем быръёнъёсын но Грах район, быръёнъёсы пыриськемъя, мукет районъёслэсь туж зол висъяськиз. Т. БАННИКОВА. Шунды ШАРА ВЕРАСЬКОН Яратон - синтэм - Мон пумиськылӥсько пияшен. Со монэ яратӥсько шуэ. Зэм-а со, кызьы сое тодоно? - Мон синмаськемын, оло нош яратӥсько. Кытысь сое тодоно? - Кызьы эскероно аслэсьтыд яке нылашедлэсь яратэмзэ? Троссэ быдэ вуымтэ нылъёсты но пиосты та выллем юанъёс сюлэмшугъяськыто. Огшоры валэктон солы уд шедьты. Вашкала дырысен адямиослэсь йыръёссэс со юанъёс поромыто ни. Астэ ачид но, мукетсэ но пӧяны, ултӥяны медаз шедьты шуыса, дышетсконо яратонэз синпӧетлэсь висъяны. Нош кытысь шедьтоно вадэктонъёс? Эскере асьтэды яке синмаськоно мурттэс таӵе юанъёсын. - Мар тон карыны быгатод яратоно муртэд понна но яратондэс ыштонтэм понна? - Дась-а тон яратоно муртэд понна аслэсьтыд сямъёстэ, улон шоры учкондэ, кулэяськонъёстэ воштыны? - Дась-а тон котьку дыре юрттыны яратоно муртэдлы, сюлмаськыны со сярысь, куд-ог учыръёсы соя кариськыны, нош янгышъёсыз понна вожпотондэ пыдло ватыны? Юанъёслы валэктонъёс ӧжытак ке но юрттозы куспады кылдэм гожлэсь муртдалазэ валаны, янгышъёслэсь утьыны яке азьланезлы оскондэс юнматыны. Валэктонъёс сётонэн соку ик эн дыртэ. Валамон, ӵош луон понна синмаськем мурт малпаськытэк тӥя кариськоз. Сыӵе дыръя ми шуиськом - яратон синтэм. Мылкыдъёс кескич сюрес вылэ султо, визез сураса, зӥбыса. Юанлы соку ик валэктон но шеде. Соин ик, ӧжыт ке но астэ чакланы дышетсконо, астэ асэныд ӵошатоно - кыӵе вал тон валлян, толон, туннэ. Кин тон сыӵе? Калык син азьын ӧвӧл, ортчем сюресэдлэн тубатъёсыз вылын. Нош со понна тыршон но нимысьтыз кужым кулэ. Ачид шоры учкон туж ик шулдыр вылымтэ. Озьы ик капчи ӧвӧл аслад ужъёсыд, выросъёсыд шоры, вань мылкыдъёстэ палэнтыса, мурт синмын выллем учкыны. Со понна тодады вае берло нуналъёсы кинэн ке но тупамтэдэс, керетэмдэс (школаын, анай-атаеныды, эшъёсыныды) но син азязы пуктэ, кызьы ваньмыз со шоры учкысалзы эшъёсты, дышетӥсьты, матысь адямиосты. Янгыш муртэ татын утчаны ӧвӧл тыршоно, со сярысь малпамысь ик дугдоно. Нырысь ик, адӟыны турттоно, мар тон сярысь малпало мукетъёсыз, кызьы учко тон шоры. Быдэс классэн одӥг пияшлы яке нылашлы синмаськон, кылбуръёс, гожтэтъёс гожъян, ӟыгыръяськон, чупаськон зэмос тӥ ужам яратон ӧвӧл на. Тон озьы бадӟыме потыны турттӥськод, выль улонэ вамышъёс лэсьтыса. Та вакытэ ик тросэзлэн йыразы малпанъёс берганы кутско: "Кӧня арескын нылашен (пияшен) тужгес но матысь кусып тупатоно?" Котькудӥз ачиз валэктон шедьтыны кулэ та юанлы, анай-атайёс но, эшъёс но, дышетӥсьёс но, уката ик тодмотэм адямиос, тӥледыз зӥбыны ӧвӧл кулэ асьсэлэн малпанъёсынызы, визь-кенешъёсынызы Одӥгзэ вунэтоно ӧвӧл, котькудӥз ассэ гажась адями, аслэсьтыз улонзэ пуктыны кулэ озьы, соин йырин мукет адямилэн улонэз медаз сӧриськы, озьы ик аслаз но. Котьмалэн аслаз дырыз. Емышлэсь но кисьмамзэ возьмаськом ук, собере гинэ сое сииськом. Малпаса лэсьтэм вамышъёс гинэ ӵуказе нуналлы шумпоттон ваё. И. ЧЕРНОБРОВКИНА, Ижевскысь "Кризисной семья" центрысь социальной педагог. Лемтэйлэсь ке кышкано - тэле ӧвӧл пырано Тэльын узы-боры кисьма. Калык ӝоген нюлэскысь уз ик пота ни. Нош отын, музъемлэсь одӥг метра кемын куакъёс но турын пушкын, сюресъёс дурын, сак возьмасько лемтэйёс. Дӥськут борды дэмӟыса, лемтэй адямилэсь тужгес небыт ку интыоссэ утча но кунулаз, чыртыяз ӵемгес куртчиське. Пуныос, коӵышъёс борды лякиськыса, сяська керттэт пушкы ватскыса, адямилы матэгес кариськыны тырше. Лемтэйёс юн яратӥллям Селта, Дэбес, Игра, Балезино, Кез, Яр, Як.-Бодья, Завьял ёросъёсысь нюлэсъёсты. Татын 10-17 процентэз лемтэйёс висё, ас висёнзэс - клещевой энцефалитэз - адямилы "кузьмало". Лемтэез ишкалтон понна, куртчем интыез кӧс вӧен яке зол зыно арбериен - керосинэн, бензинэн, камфорной вӧйын - зырано. 15 минут ортчыса, лемтэй ачиз ке ӧз поты, сое пинцетэн поттоно яке йыр котыртӥз сӥньыс керттыса, каллен кысконо. Лемтэй куртчылӥськем интыез спиртэн, йодэн яке зелёнкаен зырано. Ассэ лемтэез мертчиськемез бере куинь нунал куспын вуттоно Ижевскысь Госсанэпиднадзорлэн лабораторияз (Ленин ульча, 106) яке Воткинскысь, Глазовысь, Сарапулысь, Можгаысь, Играысь, Уваысь лабораториосы. Татын эскерозы, лемтэйды висе- а, уг-а. Ӧз ке удалты (лемтэйды висе вылэм ке), иммуноглобулин асьтэ коньдонэн басьтоно (3 дозаез 200 манет пала сылэ) но пуктоно луоды. Иммуноглобулинэз йодантипиринэн воштыны луэ. Таиз эмъюм трослы дунтэм. Пиналъёслы 18 арес тырмытозязы иммуноглобулин дунтэк сётӥське нылпи поликлиникаын. Шутэтскон нуналъёсы Ижевскысь пиналъёслы та пумысен юрттэт сётозы травматологияя поликлиникаын ("Искусство" магазин сьӧрын). Лемтэй куртчиськемлэсь утиськон амалъёс ваньмызлы тодмо, дыр. Но эшшо огпол соосты тодэ вайыны мултэс уз луы шуыса малпаськом. Нюлэскы мыноно югыт дӥськутэн, лемтэйёсты капчиенгес синйылтон понна. Дэремез брюки улэ пачкатоно, брюки пумъёсты носкиос улэ яке сапегъёсы тыроно. Воротникъёсты, саесъёсты лачак бирдыяно. Часлы быдэ эскероно астэ но, эшъёстэ но. Дӥськутэз "Претиксэн" зырано яке "Перманон", "Тайга" выллем аэрозольёсын пызйылоно. Лемтэй висёнлэсь туж умой уте прививка. Сое пукто арлы быдэ кык пол: сӥзьыл но тулыс. Йылпумъяса эшшо одӥг алон: кеч йӧлэз пӧзьтытэк гужем юыны уг яра. В. СИНЦЕВА, врач-эпидемиолог. УӴЫОС ӦЗ ЧАЛМЕ НА Кылем арня нуналэ жингыр-жин вазиз Можга ёросысь Вуж Какся гуртын. Бӧрсьысь вуизы татчы автобусъёсын пычасъёс, нышаос, тракторъёс, пичи сюгаос, пазялъёс но мукетъёсыз. Чибориё удмурт дэремъёс синэз ик мальдыто, вашкала удмурт дӥсьёссэс поттӥллям сибыос, бияос, быдӟымсурдъёс... Фольклор коллективъёс сӥзьыл но люкаськылӥзы ни вал, нош таяз учыре ӵошатскыны малпазы: кин вормисе потоз. Котькудӥз ас гурт калыкезлэсь, выжыосызлэсь шудон- шулдыръяськон сямзэ возьматэ, куд-огез концерт программаоссэс дэмлало. Дас куать коллектив люкаськиз, пӧлазы ӟучъёсыз но вань. Жюри огкылысь пусйиз: тужгес устоен асьсэды возьматӥзы Выль Бияысь самодеятельной артистъёс. Нош ик бере ӧз кыле Бадӟым Сибыысь кенакъёс: ӵаж-ӵаж кырӟаса лэзизы асьсэ гуръёссэс. Пазялысь фольклор ансамбль но умой дасяськем: турнаны потонэз, выль кен пылатонэз возьматӥзы. Та коллектив сӥзьыл гинэ кылдӥз ке но, юнме шорысь вормисе ӧз поты: 60-тӥ аръёсысь усто кырӟасьёс Зоя Кузнецова, тамара Блинова, Раиса Кузнецова, Ольга Антонова, Юлия Борисова но Юлия Суворова уӵы куараоссэс та дырозь утиллям. Т. НИКОЛАЕВА. Шӧкыч ОСТЭ! КИНЪЁСТЫ БУДЭТӤСЬКОМ! Адӟисьёс озьы шуизы но укнозэс ӝоггес пытсазы Газетъёс, радио но телевидение нуналлы быдэ сямен ивортыло: нюлэсъёсын бадӟым кышкытлык кылдэмын тылпу потонлэсь. Чакласькытэк куштэм сигарет пумлэсь, кысытэк кельтэм тылскемлэсь быро дауръёсын сылэм писпуос, сьӧд эгырлы пӧрмо вожектӥсь арамаос. Но "горд атас", кызьы тодмо, тужгес яратэ адямиослэн улон котыразы лопыръяськыны. Кылемаз шутэтскон нуналъёсы гинэ, кылсярысь, республикаямы 25 тылпу вал. Калык хозяйстволы, нимаз адямиослы уно миллион манет тыр изъян ваемын. Калык шуэ: адӟон пыд улысь потэ. Но та верам котьку ик-а меда шонер? Котьку ик-а асьмеос вамыштэммылэсь азьло пыд улмес учкиськом, эрказмеммылэсь кытчы вуттэмзэ чакласьком? Тӥни со бордын, нырысь ик, кайгу вуонлэн мугез. Ижысь 72 номеро школалэн садо азбараз кылдӥз ог кык-куинь адями тэрымон куа. Сое куштӥськем пулъёслэсь, кортъёслэсь но картонлэсь лэсьтӥзы ужтэк но улон интытэк кылем макеос - бомжъёс. Кӧлан интылы сяна, куа соку ик пӧрмиз юон, жугиськон, нылкышноосын тодматскон интылы. Кызьы ке татчы кожыны шедьтӥз, вылӥ верам школаез быдтыса, йыртэмасьёсын герӟаськем Дима Назаров но. Отын сое возьмась вылымтэ. Ёросысь бомжъёслэн "тӧроенызы" Генкаен, кушем нимыз Щербатый, кылзы ӧз тупа. Димаез кырсь кылъёсын но мыжыкъёсын улляса лэзизы. Ма, чидалод шат таӵезэ? Назаров ымнырысьтыз, мугорысьтыз вир виштыоссэ миськыса берытске сое "сантэмасьёс" доры. Куа вылэ кисьтэ бензин, понэ тыл. Отын вормемзэс Щербатыен ӵош сябась карисьёс, шузимем кадь кесяськыса, кин кытчы вуэм пазьгисько. Назаров таӵе вамыш лэсьтэмезлэсь азьло пыд улзэ рос-прос эскерысал ке, валасал, дыр, эрказъяськемезлэсь кытчы вуттэмзэ. Тылпу кысӥсьёс гинэ "горд атаслы" бурдъёссэ уката паськыт вӧлъяны, школа, артысь улон коркаос котыре вуыны ӧз сётэ. Таӵе ик шимес югдурлэсь утиськыны тылпу кысӥсьёс юрттӥзы мукет учыре но. "Культбаза" шуон микрорайонысь сизьым аресъем Саша Егошин кисыяз котьку нуллӥз тылпоттон. Малы со кулэ йырыз али гинэ ӝӧк улысь адскем пияшлы? Адӟем кариз тамак кыскись эшъёсызлэсь но мӧйыослэсь. Соосын оградын луэмез потӥз. Ма паймонэз? Та понна сое кыл кутытӥсь но, юась но ӧй вал. Гуртаз тылпоттон котьку син азяз, мӧйыос сое уг но вато, уг но лыдъяло. Кӧня кулэ - басьты. Кызьы ке Саша вуиз шуныт сётӥсь трасса дорын шудӥсь пиналъёс доры. Соку та трассаез тупатъяло, пияла пырыё ватаен шобыръяло вал. - Ӝуа меда та? - оло аслэсьтыз, оло Сашалэсь юаз куатетӥ классын "кыкъёслы" дышетскись Сергей Гаврилов. - Ойдо эскером,- шумпотыса вазиськиз Саша.- Мынам тылпоттонэ вань. Вата, пуштӥсь арбери кадь, соку ик лдопыръяськыса ӝуаны кутскиз. Пияшъёслэсь йӧнтэмъяськемзэс адӟытэк ӧз кыле артэ сылӥсь улон коркаослэн укно доразы пукись пересьёс. Тросэз соос "Остэ! Кинъёсты будэтӥськом!" шуыса, укнозэс ӝоггес пытсазы. Марысь мар луиз ке, Инмар мед утёз, адӟисе кыскозы. Милицие ветлыса катьыд быроз. Таӵеослэн тодазы ӧз лыкты, тылпу кысӥсьёс дыраз ӧй вуысалзы ке, "горд атас" соослэн квартираязы чоръяны быгатысал, ваньзэ пеньлы но эгырлы пӧрмытысал шуыса. Та адямиос озьы ик шып улысалзы меда, асьсэлэн но нылпиоссы но внукъёссы тылын шудыны кутскысалзы ке? Вае бен ӵемгес чаклаломе асьмелэсьсэ но, муртлэсьсэ но ма лэсьтэммес. Соку, оло, улосамы ӧжытгес бугыралозы сьӧд ӵынъёс. А. ЕМЕЛЬЯНОВ. Кызьы улӥськод, фермер? Ю-НЯНЬ НО, ЙӦЛ НО... Куазь кӧс улэмен, гуртын улӥсьёслэн сюлмаськонъёссы будӥзы. Уката ик шуге-леке шедемын фермеръёс, соослэн уго, ас хозяйствозылы сяна, номырлы оскыны. Юос но мукет будосъёс ӧз удалтэ ке, кытысь коньдон поттод, маин пудоез сюдод? Сыӵе сюлмаськонъёсын алигес быдэс республикаысь фермеръёс люкаськылӥзы Воткинск районысь "Июльское" учхозэ. Та ёросын трос фермеръёс. Одӥгез пайдаё ужасез - Александр Коробейников. Со улэ но ужа Июльское черкогуртэн артэ - Фоминоын. Александр Семенович 1990 арысен туж быгатыса выриз роман выжы ыжъёсты вордонэн, нош бӧрысь, кыӵе ке чер шедиз но, та удысэз аналтоно луиз. Табере хозяйствояз вить мумы ыж гинэ кылемын на. Со сяна, кык скал возе. Али Александр Коробейников выжиз картофка, кубиста, ӵуж кушман будэтон борды. Та ческыт бакча сиёнъёсыз солэн удалто. Соосты Ижын но Воткинскын вузаса, со пайда басьтэ. Республикаысь ог сю фермеръёс та нуналъёсы солэн хозяйствоеныз тодматскизы, быгатыса ужась фермер дорын тодон-валанзэс будэтӥзы. Кызьы тодмо, "Июльское" учхоз республикаямы тужгес бадӟым но пайдаё ужась хозяйство. Со Ижысь Гурт хозяйствоя академилэн дышетскон хозяйствоез. Татын сизьым сюрс гектарлэсь трос юос кизё, одӥг гектарысь шорлыдын 25-30 центнер ю-нянь басьто, нош кылем арын 33 центнерлэсь уногес люказы. Хозяйстволэн кивалтӥсез Александр Шадрин татын кемалась ужа ини, нош валтӥсь агроном Леонид Смоленцев солэсь но трос - 26 ар. Та дыр куспын со котькуд вамыш музъем юдэслэсь "сямзэ" рос-прос валаз ни, шуыны луоз. Со валанъёсыз урожаез будэтыны юртто. Туэ но хозяйствоын трос ужъёс лэсьтэмын, музъемлэсь но пудолэсь пайдазэс будэтон понна. Вань юос дыраз но агротехникаез чакласа киземын, пудоослы дыраз но тырмыт сиён сётӥське. Быдэс толэзь одӥг шапык но зор ӧз усьы, куд-ог интыосын юос ӵужектыны кутскизы. Фермеръёс азьветлӥсь хозяйстволэн лудъёсаз но потазы. Юос пӧлын жаг турынъёс ӧвӧл, музъем умой бугыръямын. Соос али зорез гинэ чидатэк витё на. Леонид Петрович лад-лад вераз музъем бордын ужамез сярысь. Со ачиз ик кизён агрегат тупатэм. Машина, одӥг мынэмъяз, музъемез но бугыртэ, удалтытӥсь сылал но пазя, кизе но. Озьы трос эстӥськон шыръяське, машина ӧжытгес пӧсьтэ. АККОР-лэн кивалтӥсезлэн Рудольф Максимовлэн верамезъя, семинар-люкаськон пайдалыко ортчиз, фермеръёс трос выльзэ тодӥзы-адӟизы. Али соослэн киязы 72 сюрс гектар музъем (вань муос пӧлысь 4 процентэз). Государстволы асьме шаеръя вузам ю тысь пӧлысь 17 процентэз - нимаз ужась крестьянъёслэн. Фермеръёс озьы ик трос йӧл но сӥль потто. Но соосты туж сюлэмшугъяськытэ поттэм ваньбурзэс вузан. Уноезлэн будэтэм ю-нянез али но кеносаз кылле. Соослэн туж секыт югдурзы техника ласянь но, со 70-80 процентлы вужмемын. Та секыт вакытэз вормон вылысь, фермеръёс тросаз ёросъёсын огазеяськыса тыршо ини. Пыд йылазы юн-юн султэм пичи хозяйствоослэн чик мылкыдзы ӧвӧл ни колхозъёсы пырыны, соос дышизы ас понназы, нокин шоры учкытэк ужаны. Н. ВОЗИСОВ. Кин кузёяськоз телевидениен? Президентлэн Борис Ельцинлэн Указэзъя, Всероссийской государственной телевизионной но радиовещательной компания (ВГТРК) ас киулаз басьтыны кулэ Россиысь ваньзэ студиосты. Та ужпумез эскерон вылысь, толон элькунамы вуылӥз ВГТРК-лэн кивалтӥсез Михаил Швыдкой. Со пумиськылӥз Кун Кенешлэн но Правительстволэн тӧроосыныз Александр Волковен но Павел Вершининэн. Москваысь кивалтӥсь озьы ик кенешиз "Удмуртия" телерадиокомпаниын ужасьёсын. Б. НИКИТИН. ВОЗЬВЫЛЫН ГУРЕТО МОТООС Тулыс бусы ужъёсты йылпумъянлы сӥзем праздникъёсты республикаямы улӥсьёс пӧртэм сямен ортчытӥзы. Кылсярысь, Можга ёросысь "Россия" колхозын та эштослэн но Россиысь оборонно-спортивной обществолэн Удмурт Республиканской советэзлэн (РОСТО- ДОСААФ) призъёсыз понна мотоциклъёсын ворттылонъя ӵошатсконъёс радъямын вал. Гуртоосысь ӵош нюръяськизы Ижысь, Уваысь, Воткинскысь, Камбаркаысь но Сарапулысь мотоспортсменъёс, ваньмыз 8 команда. Ӵошатсконъёс вал 5 пӧртэм классъем машинаосын, 50-ысен 350 кубической сантимертъем мотоциклъёсын. Спортсменъёслэн но арлыдзы пӧртэм вал - 5 но ӝыны аресысен мӧйы арлыдозь. Самой покчиосыз пӧлын вормизы Ижысь Кирилл Трофимов, Антон Зернов, Миша Брюхов. Мукет классъем мотоциклъёсын нырысетӥ интыосты басьтӥзы Евгений Ураков (Ижевск), Евгений Сухов (Камбарка), Андрей Гричус (Ижевск), Сергей Белоусов (Воткинск), Игорь Губин (Сарапул). Ӵошатсконэз радъясьёс коньдонэн поттэмзы понна тау каремзэс верало "Удмурт Правительстволы, "Россия" колхозлэн правлениезлы но судьяослы. В. КАМАШЕВ. Россиысь оборонно-спортивной обществолэн Удмурт Республиканской Советэзлэн кивалтӥсезлэн воштӥсез. Эх, улон-вылон НЮЛЭСЪЁСМЫ БУЙГАТО КУНГОЖСЬӦРЪЁСТЫ Кильмезь ёросэ нырысьсэ вуэм адями чылкак пайме пумтэм-йылтэм кыстӥськись нюлэсъёслы. Толалтэ но, гужем но ас чеберлыкенызы паймыто уго соос. Узырлыксы но ушъяськымон: кырӟась бурдоос но, чупрес пӧйшуръёс но, лыдтэм емыш-губиез но... Таин валче тодам лыктэ одӥг учыр. Туэ, пӧйшуран дыр усьтӥськем бере, Бураши гурт урамысь чылкак тодмотэм машинаез адӟыны кылдӥз. Эсьмаса, номеръёсыз гинэ но воксё мукет, соку ик валатскиськод: кунгож сьӧрысь! Вераськемзыя тодмай: немецъёс. Вӧзысьтызы егитэз палэнскиз но чылкыт ӟуч кылын юалляськыны кутскиз. "Кудпала пӧйшураны мыныса умойгес луоз? Кытын туръёс ортчытъяло ас сюанъёссэс?" Тодматским. ФРГ-ысь лыктэм пӧйшурасьёслэн кыл берыктӥсьсы вылэм со, нимыз Костя, Кировысь студент. Машинаысь потӥз куинь таза егит немец.Ӵапак соку дорамы вуиз гуртысьтымы одӥгез усто пӧйшурась. Вераськон-кенешон эшшо но ӟырдаса кошкиз. Нош мон котькинлэсь котьма юалляськыны дышем сямыя Костялэсь, куноослэсь выжыятӥсько ни. Хорст Ратцель лэсьтӥськон фирмаен кивалтӥсь вылэм. Солэн эшез Дитрих Кнопф - эмъюмъёс вузан фирмалэн ужбергатонъя директорез. Куинетӥез пӧйшурась - Хайнрих Кох, ассэ нима юрт возисен. Возисько, пе, пичияк гостиница, ресторан. Куинез ик воргоронъёс кема аръёс ӵоже пӧйшурало ни. Вуылэмын Чехие, Африкае, Венгрие, Австралие... Нош Россие ваньзы лыктэмын нырысьсэ. Соин ик тодэме потӥз, маин паймытӥз Россия, маиз кельшиз яке ӧз. Огкылысь шуо: - Москва милемды сокем ӧз паймыты. Огшоры европейской кар но тӥни. Но Ватка музъем вылэ вуыса трос абдрамонзэ адӟыны вутским ни. Огез гуртысен мукетыз дорозь трос иськемъёсты ортчыны кулэ. Гуртын туж ичи улӥсьёсыз, гуртъёс пичиесь. О-о, нош со понна кыӵе вӧл-вӧлэсь бусыос, возьёс, нюлэсъёс! Нимаз ик сюресъёстэс пусйытэк амалмы ӧвӧл. Кировысен Немаозь асфальт вылтӥ ширтӥм вал.Нош Кильмезь пала матэктэмъя сыӵе нюк-гопъёс шедьылыны кутскизы. Малпамы: "Капут машина! Дугдыны кулэ". Сотэк кыӵе ке курадӟонэ шедёмы. Нош кыл берыктӥсьмы буйгатӥз: "Россиысь шофёръёс таӵе сюресъёслы дышемын ни. Машинадылы но номыр уз луы. Азьлань!" Немецъёслы туж кельшиллям нюлэсъёсмы, калыкмылэн куно пумитан сямъёсыз. Чидалод шат сиытэк пельнянь, гуляш, шашлык, губилэсь шыд?.. Ӝутскем мылкыдын кошкизы куноосмы, немец пӧйшурасьёс. Угось удалтэм соослы. Буш киосын уг кошко Кильмезь ёросысь. Пӧйшур куос, ыбем тылобурдоос нуозы. Монэ мукетыз паймытӥз: сьӧрамы, пе, соос кӧня ке кырныжъёсты кутыса нуомы. ФРГ-ын таӵе бурдоос ӧвӧл. Мугзэ ӧй но юа. Ӧй но валэкты: маин кӧтсэ тыре та тылобурдо? Немецъёс чылкытлыкез, ӝикытлыкез яратӥсь калык. Кытысь-о кӧттырон шедьтоз отын кырныж? Огласянь данъяськоно кадь инкуазь узырлыкенымы. Мукет ласянь - йыркур: татын но "иностранецъёс" кузёясько. Н. НИКИФОРОВ. Кильмезь ёрос, Киров улос. Шунды "Шунды" дэменлыкысь иворъёс "МЕРВӦСЬ" Кылемаз шутэтскон нуналъёсы удмурт егитъёслэн "Шунды" дэменлыксы пыриськиз Кияса ёросын ортчем фольклорлы но этнографилы сӥзем "Мервӧсь" празднике. Ужрад азьын нырысетӥ сылӥсь ужпумъёс вал мӧйыос пӧлын возиськись сямъёсты-йылолъёсты, шудонъёсты возьматон, егитъёслы вашкала сямъёсты пыӵатон. Со озьы ик сӥземын вал пӧртэм выжы калыкъёслэн эшъяськонзылы. Туж трос калык люкаськиз Лутоха сьӧрысь Колошур гурт доры. Жингрес кырӟанъёсын, сылалэн-нянен пумитазы но усьтӥзы ужрадэз "Ашальчиос" но "Купанчаос". Ёросысь но гуртысь администрациослэн тӧрооссы люкаськемъёсты ӟечкылазы та праздникен. Соос вӧзы итӥськиз "Шунды" дэменлыклэн кивалтэтэзлэн тӧроез Татьяна Мазитова но. Фольклор коллективъёслэн фестивальзы - озьы шуыны луысал та праздникез. 10 коллектив пӧлысь котькудӥз кыӵе ке но йылолэз возьматӥз: "Трочинь", "Куно пумитан", "Быдӟым нунал пуконъёс", "Вӧй дыр", удмурт, ӟуч но бигер эктонъёс, кырӟанъёс, шудонъёс. Шумпотымон тани ма: ужрад огазеяз егитъёсты, мӧйыосты но песяйёсты. Вуж Сальяын вань ини куинь поколениез герӟась кырӟанъя но эктонъя ансамбльзы. Мынам малпамея, та ужрад - нырысетӥ вамыш егитъёслэн вашкала йылолъёсын эшъяськон выжы лэземазы. Туж бадӟым тау шуэм потэ вань фольклор коллективъёслы, тужгес ик Киясаысь "Ашальчилы" но Дубровскысь "Купанчалы". Удмуртъёс сяна, ужрадэ пыриськизы бигеръёс но ӟучъёс, кудъёсыз верасько удмурт кылын. Люкаськемъёс мыло-кыдо учкизы бигер кырӟанъя "Чулпан" ансамблез, Пичи Пургаысь егитъёслэсь ансамбльзэс. Нош данъян грамотаен пусъемын вал Атабаевоысь "Журавушка" ӟуч ансамбль, пичиослэн "Ручеёк" фольклор коллективзы, "Купанча", Байсарысь бигер но Вуж Сальяысь фольклор коллективъёс. Нимысьтыз пусъемын вал Колошур нылпи садысь пичиос, соослы кузьмазы магнитофон. Фольклор коллективъёслэн адӟытонзы бере ваньзэ люкаськемъёсты ӧтизы шыд-ӝук сиыны. Ческыт пӧрало вылэм Кияса палъёсын. "Шунды" дэменлыклэн нимыныз бадӟым тау шуэммы потэ Лутохаысь гурт администрацилэн тӧроезлы Игорь Викторович Николаевлы, егитъёсын ужанъя отделысь Евгений Эммануилович Ластухинлы, комплексной бригадаысь бригадирлы Герман Николаевич Никоновлы, Лутоха шор ёзо школалэн директорезлы Вера Романовна Владыкиналы, Удмурт культурая дэменлыклэн Кияса ёросысь ёзэзлэн тӧроезлы Надежда Викторовна Пахомовалы. Бадӟым тау ваньмызлы, кин уйёссэ ӧз кӧлы та ужрадэз ортчытон понна. Оскем потэ, "Мервӧсь" но, "Шундыкар" лагерь сямен ик, "Шундылэн" сямаз пыроз, кутскем уж таин уз йылпумъяськы. Т. ПРОКОПЬЕВА. Удмурт Республикаын му вӧй поттон удыслэсь инвестициосъя проектъёссэ быдэсъян сярысь Удмурт Республикалэн Законэз Та Закон кутэмын, Россия Федерацилэсь, Удмурт Республикалэсь законодательствозэс инвестициосын ужан удысын азинтон понна, со радъя Удмурт Республикаын углеводородной сырьёез поттонэ коньдон висъяку кылдэм кусыпъёсты. 1-тӥ ёзэт. Та Закон кутӥське му вӧй поттон удысысь организациос пумысен, соос улосысь (республикаысь) месторождениосын музъем узырлыкъёсты поттыны право басьтӥзы, Удмурт Республикаын пусйиськизы ке но (яке) уставной капиталазы Удмурт Республика пыриське ке, выль месторожениосын ужан вакытэ. 2-тӥ ёзэт. Му вӧен узыр интыос сётӥсько отын ужан понна Удмурт Республикаысь Правительствоен юнматэм куронъёсъя, со куронъёсты интыысь аскивалтонлэн быръем ёзэз но Удмурт Республикаысь Кун Кенеш юнматыны кулэ. Куронъёс пӧлы пыро инвестициосъя проектэз быдэстон рад, налогъёслэн но тыронъёслэн быдӟалазы, мукет куронъёс, кудъёсыз законодательствоен юнматэмын. 3-тӥ ёзэт. Та Законлэн кутӥськемез федеральной бюджетэ налогъёслэсь но бюджетэ пырисьтэм фондъёсы тыронъёслэсь люкетсэс уг йӧтылы. 4-тӥ ёзэт. Та Закон кужыме пыре сое печатлам нуналысен. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 24 июне. � 651-И. ЧИДАЗЫ ПӦСЬСЭ НО, КУЗЬЫТСЭ НО Гурт спортсменъёслэн 7-тӥ гужем шудонъёсазы, Красногорск черкогуртэ мыныны шуд усиз Завьялово районлэн командаеныз ӵош. Автобусэ пуксён азьын ик ини спортсменъёслэн вормон мылкыдзы шӧдӥськиз. Со озьы ик луиз. Та бадӟымесь но секытэсь шудонъёсын завьялъёс куатетӥзэ ини вормисе потӥзы. 1995 арын гинэ соос кыкетӥ интые кылизы вал. Завьяловоос сьӧрын можгаос, куинетӥ интые потӥзы уваос. Кыкетӥ группая вормисьёс луизы Красногорск, Алнаш но Яр ёросъёсысь командаос. Озьыен, Завьяловоысь команда 344 очко люказ, Можга - 319 но Ува - 303. Малы интыос люкылэмын кык группая? Татын лыдэ басьтӥське районын улӥсьёслэн лыдзы. Ӵошатсконъёс йылпумъяськизы. Мае соос возьматӥзы? Нырысь ик, республикамы дышиз ини таӵе бадӟымесь нюръяськонъёсты радъяны. Спортъя специалистъёслэн малпамзыя, асьме доры ӧтьыны возьыт уз луы ни быдэс Россиысь спортсменъёсты но. Зэм, капчи ӧвӧл таӵе праздникъёсты ортчытыны. Коньдон но трос кулэ, кужым но. Гужем шудонъёсты радъянын но солы дасяськонын трос ужано луиз Красногорскысь ёрос администрацилы, районысь предприятиослы но организациослы. Огъя кужымен вакчи дыр куспын ӝутэмын вал стадион, тупатъямын спортзалъёс, бызьылон сюресъёс, нылпи садъёс. Озьыен, районлэн табере аслаз спортъя базаез кылдӥз. Оскем потэ, со ӟеч пушъетъёс сётоз но та уй пал ёросын спортэз ӝутыны юрттоз. Сюрслэсь уно куноосты пумитаз вашкала село. Ваньзэ кулэ вал сюдыны, кӧлан интыос висъяны, шутэтскон дырзэс пайдаё радъяны. Таиз ласянь но ваньмыз малпаськыса дасямын вал. Котькуд командалэн аслаз шефез вал. Куд-огезлэн, оло, верамез но потоз: "Кинлы кулэ таӵе дыре ӵошатсконъёс?" Бен, секыт вакытэ улӥськом ке но, таӵе праздникъёс гурт калыклы одно ик кулэ. Ведь кышкыт война аръёсы но калык шулдыръяськыны быгатылӥз. Покровской храмлэн настоятелез отец Сергий шуиз: - Кулэ калыклы таӵе праздникъёс, одно ик кулэ! Татын сяна, кытын возьматод на сэзь но кышкасьтэм луэмдэ, быгатонлыктэ. Спорт огазеяз семьяосты но, кивалтӥсьёсты но, пиналъёсты но. Туэ ӵошатсконъёсын ма но со вылез но вал. Мылкыд карисьёс понна радъямын вал огъя бызьылонъёс. Чебер адӟиськизы вал вылын ӵошатсконъёс. Завьяловоысь спортсменъёс тужгес но асьсэды умоен возьматӥзы капчи атлетикая нюръяськонын, ыбылӥськонын. Тунсыко ортчизы кивалтӥсьёс пӧлын ыбылӥськонъя ӵошатсконъёс. Татын ваньзэсты паймытӥз Завьял ёрос администрацилэн кивалтӥсез Галина Баталова. Воргоронъёс пӧлын огназ ке но вал, нюръяськиз чик кӧбератэк. Галина Васильевна ёросаз спортэз азинтыны но сюлмаське, ачиз но та удыслэсь уг палэнскы. Трос учкисьёс вал городкиен шудӥсьёс дорын. Татын вормисе потӥзы Красногорскысь спортсменъёс. Командазэ азьмынӥсьёс радэ поттыны юрттӥз администрациысь кивалтӥсьлэн воштӥсез Юрий Вотинцев. Трос пӧсяно луиз спортивной семьяослы. Соос таяз учыре 25 вал. Нош вормыны шуд усиз Сарапулысь Валеевъёслы. Данак учкисьёс котыртылӥзы гира ӝутъясь батыръёсты. Ваньзы сямен воргоронъёс сӥлё-вироесь. Гираосын тупъёсын кадь шудо, ява! Укмыстон килолэсь секыт гираосты ӝутъясьёс пӧлын ваньзэсты паймытӥз Изгуртысь (Завьялово) Николай Мамонтов. Со бур киыныз но, паллянэныз но гираез быдэн 75(!) пол ӝутӥз. Озьы бӧрсьысь бӧрсьы гуртысь спортсмен та шудонъёсын сизьыметӥзэ чемпион луиз. - Николай, ку дыр шедьтӥськод ӵошатсконъёслы дасяськыны? - Юромо уг дасяськиськы, - шуиз со, - ваньмон дыр шеде ке, гираосы борды кутскисько. - Нош вуоно арын оскиськод на-а, вормод шуыса? - Ма, малы уд оскы. Вормемед ке потэ, котьку осконэд мед луоз... Вераны кулэ на мукетыз чемпион сярысь но. Со Пичи Пургаысь Николай Семенов. Таиз но гужем шудонъёсын гира ӝутъянъя сизьыметӥзэ чемпион луиз. Кык спортсмен - Мамонтов но Семенов гинэ - быгатӥзы ваньмаз шудонъёсын чемпион луыны. Со - Удмуртилэн рекордэз луэ, шуыны луоз. *** Али футболэн шудонъя дуннелэн чемпионатэз мынэ ке но, гуртысь спортсменъёсты но учкыны трос калык ветлӥз. Нокин ӧз малпа вал, Балезиноысь футболистъёс вормозы шуыса. Со огшоры команда, нокыӵе чемпионъесын нюръяськемын ӧвӧл. Вакчи дыр куспын кылдытӥзы команда. Дасяськизы рос-прос. Соин ик вормизы. Кыкетӥ интые потӥзы уваос, куинетӥын - можгаос. Таосыз шудонъёс возьматӥзы тани мае но. Вормисьёс радэ нырысьсэ потӥзы выль нимъёс, выль ёросъёс. Озьы шуыны луоз Красногорск, Грахово, Юкаменск но куд-ог мукет районъёсысь спортсменъёс сярысь. Озьыен, мукет интыосын но спортлы бадӟым саклык висъяны кутско. Умой со. Сизьыметӥосыз гурт шудонъёс туэ ортчозы шуыса, шуг вал оскыны. Асьтэос тодӥськоды, коньдонэн уго али котькытын секыт. Тани ма шуиз та пумысен Удмурт Республикаысь спортъя комитетлэн кивалтӥсез Анатолий Касихин: - Туэ та ӟеч кутсконмылы вис сётысалмы ке, шуг оскыны, азьланяз гужем шудонъёс ортчылысалзы на шуыса. Тау Правительстволы, тау ваньмызлы, кин быгатэмезъя юрттӥз гуртысь спортэз ӝутонлы! Гужем шудонъёс ортчизы. Табере малпаськоно ини вуоноосыз сярысь. Нош кудӥз район пумиталоз 8-тӥ шудонъёсты - тодмо ӧвӧл на. Спортъя комитет со понна ёросъёс пӧлын конкурс ортчытоз. Районлэн мед луоз кужмо спортивной базаез, мукет луонлыкъёсыз но кужымез. Н. БАЙТЕРЯКОВ. Снимокъёс вылын: секытэн ик лыктэ вормонэд; пӧсьлы чидасалыд ай но; гира ӝутъян - шудон уж ӧвӧл. В. КАМАШЕВЛЭН туспуктэмъёсыз. ПӦЙШУРЪЁС ВОРДО Таӵе фермаосты трос хозяйствоосысь уд адӟы. Кӧня ке ар талэсь азьло Ува районысь "Дружба" колхозын куашкан калэ вуэм пудо гидзэс выльдӥзы. Чылкак паймымон, йӧспӧртэм тупатъязы. Пушказ кролик, песец (полярной ӟичы), норка (чайы), хорёк (мувыр чайы) вордон висъетъёс (клеткаос) инъязы. Тросэз соос кортлэсь лэсьтэмын. Огпал борддорез кабзэ ӵоксамын, мукетаз пась кельтэмын. Озьы пӧйшуръёсты тӧл уг шуккы, нош пӧсь куазен отын салкым улэ. Нош толалтэ соос кезьытлэсь чик уг кышкало. Ваньзэ соосты кык кузя утялто. Фермалэн кузё кышноосыз - Елена Аверьянова но Надежда Мурашова. Елена Семеновна 8 ар татын тырше ни. Вань ужъёсты валаса радъя. Пудо вордон фермаосысь кылем-мылем, адямиослы сиыны ярантэм сӥль татчы вуэ. Сое электромясорубка пыр лэзё. Озьы хозяйствоын номыр уг куштӥськы. Нош пӧйшур куосты гурт калык шумпотыса басьтэ. Нош азьмынӥсьёслы соос дунтэк вуо. Г. ВАСИЛЬЕВ. Эн вунэтэ милемыз Ми, Набережные Челны городын улӥсь удмуртъёс, ар талэсь азьло вазиськимы вал тӥляд газетты пыр удмурт калыклы, юрттэт курыса. Туннэ вераммы потэ бадӟым шумпотонмес - туж пайдаё ортчиз армы. Соин ик малпамы ваньмызлы, кин милемлы юрттӥз, гожтэтэн тау карыны. Нырысь ик йыбырттэммы потэ Кардапольцев Александр Васильевичлы, Игра посёлокысь калык творчествоя юртлэн директорезлы. Со сярысь ми лыдӟимы "Клуб" журналысь. Озьы тодӥм Москвае ветлэмзы, кызьы-мар ужамзы сярысь. Дӥсьтытэк гинэ гожтэт лэзимы, куное ӧтимы, выставка ортчытыны дэмламы. Сыӵе кыдёкысь, вань ужзэс куштыса, играос быдэс коллективенызы лыктӥзы ми доры. Сьӧразы ваиллям на мукет эшъёссэс но. Челны калыкез асьсэлэн выставкаенызы, быгатыса лэсьтэм ужъёсынызы воксё паймытӥзы. Туж бадӟым тау тӥледлы, Александр Васильевич! Тазалык, шудбур, азьланьын но коллективады трос зарни киосты мед луозы. Соку ик вуылӥзы Ижысь но дано куноос. Ӝот-ӝот удмурт кылын лэчыт верамъёсыныз серекъятӥз но шумпоттӥз "Удмурт дунне" газетлэн рекдаторез А. П. Шкляев. Озьы ми дорын вал А. Т. Малков, Удмурт Республикаысь Кун Кенешлэн ялан ужась комиссиезлэн тӧроез. Аркадий Трофимович тодматӥз люкаськем калыкез Удмуртиысь иворъёсын, туж умой валэктӥз но вераз республикалэн кун тодметъёсыз сярысь. Кылем арын ортчытӥмы удмурт общинаенымы тодматон, кызьы шуо али - презентация. Вазиськонмес лыдӟыса ми доры вуизы трос бандерольёс но гожтэтъёс. Тау кариськомы ваньмызлы, кин мылкыд кариз милемлы шуныт кылъёс вераны, маин ке юрттыны. Тужгес бадӟым тау кареммы потэ Лидия Михайловна Симаковалы. Милемлы со удмурт библиотеказэ ӵектӥз. Иже мыныса, ваим солэсь трос книгаоссэ, дун но ӧз басьты. Табере со книгаос туж юртто милемлы урокъёс нуыны, пиналъёслэсь тодон-валанзэс муромытыны. Кема мед улоды, шудо-буро мед луоз улонды, ноку медад висе, юн тазалык тӥледлы, Лидия Михайловна! Туэ "Удмурт дуннелы" но гожтӥськыны быгатӥмы, шумпотыса лыдӟиськомы котькуд номерзэ, отысь умойёссэ статьяосты кутӥськомы урокъёсамы. Удмурт община кылдытэммылэсь азьло мон шумпотӥсько вал ульчаысь удмурт номерен машинаез гинэ но адӟыса - сыӵе мӧзмыса улыны бигеръёс пӧлын. Туж трос малпаськылӥ, малы асьмеос, удмуртъёс, ум быгатӥське асьмемыз гажаны, малы асьмеос асьмемыз ултӥяськом. Бигеръёс уг сёто ук асьсэдыз урод карыны. Челныын али трос национальной общинаос но воскресной национальной школаос. Мон малпасько, со школаос бигеръёслы луыса усьтӥськемын. Татариын мон 12 ар улӥсько. Лыктыкумы нылылы кык арес вал. Сётӥмы садике сое. Отын дышетыны кутскиз бигер кылэз. Мынам йырам малпан шуккиз: "Нылы бигер кылэз дышетоз, ӟуч сямен чебер вераськоз - туж умой, нош удмурт кылзэ вунэтоз, дыр". Тае валаса кенешим: семья куспамы одно ик удмурт кылын вераськоно, нылпиос медаз ыштэ анай-атай кылзэс. Соин ик, дыр, мылысь-кыдысь басьтӥськи удмурт община кылдытон, арняосы ужась удмурт школа усьтон борды. Ар ӵоже трос сюлмаськонъёс но луылӥзы. 6000 удмуртъёс пӧлысь 80 адями гинэ гожтӥськиз ай огазеяськонэ. 40 мурт ветлэ школае. Шумпотыса вераме потэ: соос пӧлын витез гинэ чылкак уг вала удмурт кылэз, мукетъёсызлэн анай-атайёссы быгатӥллям удмурт сямъёслы но удмурт кыллы гажан пыӵатыны. Куд-ог удмуртъёс верало: "Ой, чик уг валало пиналъёсы удмурт кылэз. Уз ветлэ школаяды..." Таӵе анай-атайёс шоры жаль потыса учкисько. Уг валало сыӵеос, ӟуч кылэз коть туж ӟеч мед тодозы нылпиосмы но соос шоры ай та ӟуч адями шуыса уз учке. Одӥг мыным тодмо ныл пумитам ӟуч пиез, яратӥллям ог-огзэс, бызён дырыз вуыса, туганэз, пе, шуиз: "Тон эшшо ӟуч но ӧвӧл?" Сюлмыз вӧсь луыса, со ныл вераз йыркурзэ, визьмо ӟуч адями озьы ӧй шуысал, дыр, зэмзэ но яратысал ке. Асьмелы одно ик тыршоно зэмос удмурт луыны. Тросгес тодыны турттоно асьме калыкмылэсь сямъёссэ, культуразэ, кылзэ, литературазэ, тросгес визьмо удмурт адямиосын тодматсконо. Асьмемыз асьмеос дышимы ке гажаны, нокин но уз быгаты ултӥяны ноку но. Ӟеч луэ, ӟеч улэ! Лидия Фиофанова Семеновна, арня нуналэ ужась Набережные Челны городысь удмурт школалэн кивалтӥсез. Быръёнъёс азьын 5-ТӤ ИЮЛЬ МАТЭКТЭ Ялан ӧжытгес дыр кыле ас коже кивалтон ёзъёсы депутатъёсты быръён дырозь. Соин валче Красногорскысь быръёнъёсъя ёрос комиссие уно адямиос пырало. Юанъёссы пӧртэмесь. Кылсярысь, тодэмзы потэ - быръёзы-а, пе, туэ сӥзьыл сельсоветъёсы депутатъёсты. Уз, уз быръе. Сельсоветъёслэн управляющийёссы, райсоветэ депутатэ быръемын луизы ке, ужан интыосазы юнматӥськозы райсоветлэн сессиеныз. Нош депутат луисьтэм адямиосты ӵектыны быгатэ ёрос администрацилэн кивалтӥсез, бӧрысь соосты юнмато на райсоветлэн сессияз. Сыӵе юан но сёто - райсоветлы председателе но ёрос администрацилы кивалтӥсе кандидатураосты кин ӵектыны быгатэ? Таиз но ужпум оскемын райсоветысь депутатъёслы. Соос ик асьсэ кенешазы вуозы огъя малпанэ. Депутатэ кандидатъёслэн шоро-куспо арлыдзы 45 арес. 25 инты понна нюръяськоз 66 мурт. Со пӧлысь 36-ез вылӥ образованиен, 18-эз удмурт, 12-ез - нылкышно, куинез кандидат 30 ареслэсь егитгес. Огъя верано ке, пӧлазы пӧртэм удысъёсын ужасьёс луозы. Нош кызьы быръёзы ёрос администрацилы кивалтӥсез? "Удмурт Республикаын ас коже кивалтон сярысь" Законъя, озьы ик отчы пыртэм ватсанъёсты но воштонъёсты вераса, ёрос администрацилы кивалтӥсь юнматӥськоз райсоветлэн сессиеныз, бюллетеньёс пыр лушкем куара сётыса. Законын чакламъя, районын кык кивалтӥсь луоз - администрацилэн тӧроез но райсоветлэн председателез. Администрацилэн кивалтӥсез райсоветлэн депутатэз но луытэк быгатэ. Бырйисьёс пӧлын валэктон уж йылпумъяське 3 июле. Соин ик, вуоно депутатъёс, дыртэлэ та ужен. Нош бырйисьёсты участокъёс витё туэ 5-тӥ июле. С. АЛАЛЫКИН, Красногорск ёросысь быръёнъёслы дасяськонъя но ортчытонъя кыл кутӥсь мурт. Герд * Соос валто калыкмес (Екатерина СПИРИДОНОВА - "Удмурт кенешлэн" Сарапулысь ёзэзлэн кивалтӥсез, тодосчи но кылбурчи Владимир ВЛАДЫКИН но Нациосын ужанъя комитетын ужась Лариса БУРАНОВА, Инбам улысь музейлэн кивалтӥсез Борис БОТАЛОВ но Алнашысь режиссёер Вячеслав БУЛДАКОВ.) Фотооссы М. ЕГОРОВЛЭН НО В. КАМАШЕВЛЭН. ГУЖЕМ МЕДАЗ ВАЙЫ КАЙГУ Туэ гужем шаерысьтымы шуръёсын но тыметъёсын уно адямиос быризы ини. Солы асьсэос пыласькисьёс но, Адямиосты быремлэсь утён понна кыл кутӥсь организациос но янгыш. Югдурез тупатон понна, Удмуртиысь Правительство "Удмурт Республикаысь шуръёсын но ву интыосын кышкытлыклэсь утиськон но адямиослэсь улонзэс утён ужрадъёс сярысь" постановление кутӥз но ужрадъёсын план юнматӥз. Гужемлэн тужгес пӧсь толэзез азьын чакламын шуръёсын, тыметъёсын пыласькон интыосты дасяны, ву вылын быремлэсь утёнъя станциослы кулэ луись оборудование висъяны. Со понна кыл куто городъёсысь но ёросъёсысь администрациослэн кивалтӥсьёссы, Пичи судноосъя кун инспекция, Россиысь Калыкез ву вылын быремлэсь утёнъя общество (ВОСВОД). Школаосын, нылпи лагерьёсын пиналъёсты уяны дышетоно, шур дурын но пыласькыку астэ шонер возён правилоосын тодматоно. Чакламын на уно мукет ужрадъёс. Валамон, соосты коньдонтэк уд ортчыты. Соин ик Пичи судноосъя кун инспекцилы но Граждан оборона ужпумъёсъя но кышкыт учыръёслэсь утиськонъя комитетлы быдэн 60 сюрс манет висъямын. Та коньдон пайдаен мед берытскоз но вань ужрадъёс дыраз но кулэезъя мед ортчозы шуыса, Удмуртиысь жилищно-коммунальной хозяйствоя производственной объединение Пичи судноосъя кун инспекциез выжтоз Инкуазь узырлыкъёсъя но инкуазез утёнъя министерстволы. О. ВАХИТОВА. Быръёнъёс азьын ЕГИТЭЗЛЫ 24 АРЕС ГИНЭ Аскивалтон ёзъёсы ортчоно быръёнъёс турнан вакытэн тупазы. Шаркан районын сое азьло ик лыдэ басьтӥзы. Калыклэсь куронъёссэ быдэстыса, тросаз участокъёсын быръёнъёс одӥг часлы вазьгес кутскозы. Шуггес вал вань участокъёсты телефонъёсын герӟаны, но табере та ласянь но ваньмыз лэсьтэмын ни. Депутатэ кандидатъёс пӧлысь 64-зэ ӵектӥзы бырйисьёс, 18 муртэз - "Народно- патриотический союз России", нош 13-ез нюръяськонэ ас кожазы пырисько. Котькуд округын депутат луон понна кӧня ке мурт нюръяське, нош куиняз - быдэн одӥг кандидат. Мар бен, таӵе кылдэм югдур но быръёнъёсъя законлы пумит уг луы. Вань кандидатъёс пӧлысь туэ нырысьсэ таӵе ужрадэ 11-ез пыриське, отӥосыз депутат луыса ужаллямын ни. Бере уг кылё нылкышноос но, калык гажамзэ вера врачъёслы, дышетӥсьёслы, валтӥсь специалистъёслы - та удысъёсын берло аръёсы кышномуртъёс уката но трос луизы. Депутат луыны малпасьёс пӧлын 70 процентэз вылӥ образованиен. Нош самой егит кандидатлы 24 арес гинэ ай. Со Ардашев Дмитрий Александрович - Карсашур школалэн директорез. Котькыӵе нюръяськон адямиез кужмогес каре. Озьыен, егит мурт понна но та быръёнъёс пайдатэк уз луэ, вылды. Т. МИРОНОВА. ЮАЛЭ - ВАЛЭКТӤСЬКОМ Асьтэлы ик дуногес усёз Печатьын, радио но телевидение пыр ӵем гинэ ивортыло, Россиын улӥсьёслы выль паспортъёс сётъяны кутскизы шуыса. Табере одно ик ваньмыз вужзэ документсэс выленыз воштыны кулэ-а? Яке яра азьвылэз но? Ф. Касимова, Глаз кар. Та юанлы валэктон сётыны куронэн ми вазиським Первомай районысь РОВД-лэн паспортъёсъя но визаосъя службаезлэн (ПВС) кивалтӥсезлы Ф. Х. ПЕТРОВАЛЫ. Тани ма вераз со. - Паспорт адямилэсь кин но ма луэмзэ возьматӥсь документъёс пӧлысь тужгес кулэез луэ. Тӥни малы асьтэ куронъёсыныды тӥ кытчы гинэ уд вазиськиське яке кыӵе предприятие но организацие уд мынӥське, нырысь ик куро горд выло "книгадэс". Меӵак Касимовалэн вазиськонэзъя валэктӥсько: Россия Федерацилэн гражданинэз луэм сярысь 1974 арын потэм паспортэз уже кутэмысь дугдытонъя нокыӵе нимысьтыз дыр тупатэмын ӧвӧл. Озьыен тӥ сюлмаськытэк улыны быгатӥськоды вуж документъя. Адями одӥгзэ гинэ вунэтыны кулэ ӧвӧл - 25 но 45 арес тырмем бере паспортаз со выльзэ, та дырлы тупасьсэ, фотографизэ ПВС пыр лякыны кулэ. Дыраз тазьы лэсьтэмын ӧйлась ке, таӵе паспортэн нокытын но уз лыдъяське. Адямиез уз кутэ уже, со уз быгаты кинэн ке яке кинъёсын ке тупамкылъёс гожтыны, коньдон ужпумен но мукетыныз вырыны. Та борды валэктоно на: выль фотографиез паспортэ пыртон дас нуналлэсь кема кыстӥськыны кулэ ӧвӧл. Ми доры ӧжыт ӧвӧл паспортсэс ыштэм сярысь вазиськисьёс. Соослэн верамзыя, ваньмызлэн таӵе шуге-леке шедемъёслэн мугзы огвыллемесь: документсэс поттӥзы транспортын мынон-ветлыкузы, кудӟем дыръязы яке маке муген возьматыкузы вунэтыса кельтэмзы. Та вылэ чӧлскем - со аслэсьтыд чакласькисьтэм луэмдэ возьматон. Соин ик "горд книгазэ" ачиз янгышен ыштэм мурт кыл кутыны кулэ. Нош паспорттэк кылёно луиды ик ке, выльзэ басьтон сярысь куронэн вазиськоно улон интыысьтыды паспортъёсъя отделэ. Ужпум эскеремын луыны кулэ толэзьскын, нош кыӵе ке юан-моганъёс кылдӥзы ке - кык толэзьскын. Нимысьтыз пусйыны кулэ: Россилэн гражданинэз луэм сярысь документэз кулэезъя утьымтэ-возьымтэ адямиос понна асьсэлы ик дуногес усёз. Паспортсэс ыштэмъёс, отчы ас тодэмзыя воштонъёс пыртӥсьёс но мукетсэ лэзьымтэзэ лэсьтӥсьёс, выль паспорт басьтон понна, кулэ кагазъёс люкан вылысь "бызьылэм" сяна, штраф тыроно луозы. ИНТЫОС НО ДЫР Спортысь семьяос пӧлын эстафета: 1. Валеевъёс (Сарапул) 2. Овчинниковъёс (Киясово) 3. Вахрушевъёс (Якшур-Бодья) Спортысь семьяослэн 400х300һ00 метре эстафетазы: 1. Овчинниковъёс (Киясово) 2. Валеевъёс (Сарапул) 3. Саламатовъёс (Красногорск) Кросс. Нылкышноос (3000 метр): 1. Промышленникова Нина (Сюмси) 11.34 2. Рогожникова Оля (Завьялово) 11.56 3. Хохрякова Оксана (Дэбес) 12.00 Кросс. Воргоронъёс (5000 метр): 1. Машев Иван (Пичи Пурга) 16.09 2. Балтачев Александр (Игра) 16.17 3. Григорьев Василий (Завьялово) 16.26 Капчи атлетика. Кышномуртъёс (400 метр): 1. Потапова Анна (Завьялово) 1.00,8 2. Корепанова Лена (Игра) 1.01,2 3. Булычева Светлана (Завьялово) 1.01,4 Кышномуртъёс (800 метр): 1. Емельянова Анжела (Игра) 2.18,8 2. Семакина Елена (Дэбес) 2.19,2 3. Промышленникова Нина (Сюмси) 2.22,2 Воргоронъёс (1500 метр): 1. Машев Иван (Пичи Пурга) 3.53,9 2. Болтачев Александр (Игра) 3.57,8 3. Краснов Александр (Алнаш) 3.59,4 Кышномуртъёс (1500 метр): 1. Промышленникова Нина (Сюмси) 4.47,1 2. Рогожникова Ольга (Завьялово) 4.52,8 3. Хохрякова Оксана (Дэбес) 4.52,9 Воргоронъёс (400 метр): 1. Худяков Игорь (Пичи Пурга) 49,1 2. Коробейников Саша (Воткинск) 51,5 3. Кулемаллин Анатолий (Сарапул) 51,6 Кузьдалаезъя тэтчан. Воргоронъёс: 1. Мухамадиев Илья (Завьялово) 6,55 2. Логинов Евгений (Яр) 6,45 3. Вершинин Алексей (Пичи Пурга) 6,42 Кузьдалаезъя тэтчан. Кышномуртъёс: 1. Удмуртова Оксана (Грахово) 5,38 2. Овчинникова Ольга (Киясово) 4,93 3. Трефилова Ксения (Юкаменск) 4,72 Гира ӝутъян. Секталаезъя 60 килограммозь: 1. Вахрушев Сергей (Шаркан) 175 2. Кобелев Александр (Кизнер) 131 3. Калинин Иван (Воткинск) 128 Секталаезъя 65 килограммозь: 1. Якимов Андрей (Можга) 182 2. Каркушин Григорий (Алнаш) 152 3. Боталов Николай (Шаркан) 139 Секталаезъя 70 килограммозь: 1. Семенов Николай (Пичи Пурга) 231 2. Прокофьев Герман (Можга) 185 3. Комаров Николай (Пичи Пурга) 166 Секталаезъя 80 килограммозь: 1. Королев Сергей (Яр) 250 2. Каратаев Сергей (Шаркан) 156 3. Щербаков Сергей (Можга) 148 Секталаезъя 90 килограммозь: 1. Кокорин Александр (Вавож) 180 2. Тихомиров Александр (Воткинск) 144 3. Емельянов Михаил (Игра) 143 Секталаезъя 90 килограммлэсь ятыр: 1. Мамонтов Николай (Завьялово) 190 2. Булдаков Филипп (Завьялово) 185 3. Титов Валерий (Шаркан) 152 Дуатлон. Командаос: 1. Завьялово 1,34,43 2. Можга 1,37,14 3. Шаркан 1.37,27 Дуатлон (40 аресозь): 1. Лекомцев Д. (Игра) 45,30 2. Григорьев А. (Завьялово) 45,56 3. Збитнев П. (Пичи Пурга) 46,62 Волейбол. Кышномуртъёс: 1. Завьялово 2. Ува 3. Игра Волейбол. Воргоронъёс: 1. Завьялово 2. Можга 3. Сарапул Городкиен шудон: 1. Красногорск 2. Можга 3. Ува Ыбылӥськон (районъёсысь кивалтӥсьёс): 1. Завьялово 2. Можга 3. Алнаш Кышномуртъёслэн 400х300х200һ00 метре эстафетазы: 1. Завьялово 2. Игра 3. Шаркан Воргоронъёслэн 800х400х200һ00 метре эстафетазы: 1. Пичи Пурга 2. Можга 3. Игра Огъя ӵошатсконъёсын вормизы Нырысетӥ группая: 1. Завьялово 2. Можга 3. Ува 4. Игра 5. Пичи Пурга 6. Сарапул 7. Балезино Кыкетӥ группая: 1. Красногорск 2. Алнаш 3. Яр 4. Юкаменск 5. Селта 6. Вавож 7. Дэбес Журналистъёсын пумиськонъёс КИН ПОННА ВЫЛЬДЭМЫН ВЫЛӤ ЗАКОНМЫ? Кун Кенешысь Законъёсты быдэсъямез чакланъя, калыкез кышкытлыклэсь утёнъя но гражданъёслэн правооссыя ялан ужась комиссилэн тӧроез А. Борзенков ивортӥз, йыртэмасьёсын нюръяськонъя республикаямы югдур капчи ӧвӧл шуыса. Ӝыны ар куспын адями виёнэн герӟаськем йыружъёс понна уголовной уж улэ 107 адями кыскемын. Йыртэмасьёслэсь 5 килограмм пала пуштӥсь арбериос но 19 пӧртэм ож тӥрлык таламын. Озьы ик шараямын экономика удысысь 60 пала "сьӧд ужъёс". Шараям "ужъёсъя" государстволы 208,4 миллион манет коньдон берыктэмын. Адямилы бадӟым изъян ваё тылпуос но. Соослэсь нокызьы но утиськыны уг луы, лэся. Туэ "горд атас" 81 адямилэсь улонзэ нуиз ни, со пӧлын 6 нылпи. А. Борзенков куд-ог йылпумъянъёс лэсьтӥз Кун Кенешлэн 20-тӥ сессиезлэн ужамезлы.Пӧям вкладчикъёсъя кутэмын нимысьтыз постановление. Кузёослы вузам кун асваньбурысь (приватизациысь) 5 процентэз коньдон табере вкладчикъёслы но акционеръёслы юрттонъя фондэ кошкоз. Пӧям вкладчикъёслы коньдонзэс берыктон понна али 4 миллион манет кулэ, но кызьы валэктӥз А. Борзенков, та лыдпусэ пыртэмын ӧвӧл "Ижладабанклэн" вкладчикъёсыз. Соослэсь ыштэм коньдонзэс берыктон вылысь кулэ луоз на 30 миллион манет. Та банкез куашканлэсь утьыны выро али Ижысь мэрилэн кужыменыз но мукет банкъёслэн юрттэменызы. Монэ туж сюлмаськытэ выльдэм Конституцимес эскерон, шуиз Александр Семенович. Кыӵе тупатонъёс но ватсанъёс отчы пыртэмын тросэз адямиос уг тодо. Вань бырйисьёс пӧлысь 4 процентэз сяна Конституцилэн пуштросэныз тодматскемын ӧвӧл. Татын соку ик юан кылдэ: малы бен депутатъёсмы сомында дырзэс, кужымзэс быдтӥзы, Вылӥ Законмы калыкмылы сокем ик кулэ ӧвӧл ке? Т. БАННИКОВА. Роза Яшина Веросъёс Цоос - сиротаос Вуиз тулыс. Куазь шунытгес луиз. Мемимы гурзэ огпол гинэ эстылыны кутскиз: сютэмгес пиналъёслы секытгес луиз тупалась пу бадӟым салазкиен нуллыны - тырмылӥз пиченыз но. Табере нуналаз быдэн куинь картошка но кык кешыр гинэ сётъяз нэнӥмы, со понна кушман сиимы - кӧня мылкыд карылӥм. Но со трос ик уг мыны вал - укыр курыт. Ӵӧжы йӧлэз чидатэк витимы. Ӵуклы быдэ, сайкам бере ик, Володя выны юа вал: "Кунянзэ скалмы ваиз-а ни? Ӵӧжызэ сётоз-а?" Малы меда, кӧт такем сюмаку, скалмы кунянэныз бероме? Умгес валаське вал песянайлэсь валэктэмзэ: "Нырысь ветлэмъяз бачкымтэ (шедьымтэ) на, луоз. Бӧрысь ветлэм на, луоз". Кытчы ветлэм? Малы беромем? - Ма, порозэн... Уд валаськы-а, мар-а? - серем кариз апаймы. Жаль потэммылы чидатэк, меми песянайлэсь юа: - Бен мерттыны кельтэм картошмес вандыса утчалом ни-а, мар-а? Юн-а шуялоз меда? - Ма, ванды, мерттӥськытозь нылпиос тӧрнаны кутскозы я мар... Удэз кылёз ук, будоз. Ваньмы сютэмесь ук! Нэнэ гулбече пырыны турттэ вал ини. Вот, кӧня ке картош юдэссэ курыса, ӝуась корт гур вылын пилетэн-пилетэн пыжом! Ым пушкын нош нюромиз. Ӵапак та вакытэ ӟезьы ӟукыртӥз но, корка пушкы ми ёзъемесь ик нылпиос куинь кузя пыризы. - Кинъёс тӥ? Ма вералоды? - паймыса юаз меми. - Дэбесысь, детдомысь ми, - ӟуч сямен шугенгес вазиз огез. - Сиён-юонмы быриз но, ваньмы пӧртэм гуртъёсы кураськыны потӥм. Люкалом, кин мар сётоз... - Э-э, калтакъёсы-мискиньёсы, асьмеос но туж сютэмесь. Немыр сётыны, - вераны дыртӥз песянаймы. Анай нош, номыр вазьытэк, гулбече ышиз. - Кытысь, кинъёс луиськоды ай тӥ? Вераськонды музонгес кадь? - юанъёссэ азинтэ бабуш. - Литва пиналъёс ми..., эвакуированнойёс. Кыкетӥ арзэ Дэбесын улӥськом ни. - Анай-атайды Литвае кылизы-а? - Кудӥзлэн фронтын быремын, кудӥзлэн - бомбёжка улын, нош мынэсьтым мемиме Германие келязы, - нылашлэн бамтӥз синкылиос питыразы. - Я, корт гур вӧзы пуксьыса коть шунтӥське али, - пичи ӟусэз гур вӧзы пуктӥз песянай. - Оштолэзь ке но, ӵукъёс кезьытэсь ай. Дӥськутты начар. Шайтан мед басьтоз вал та войнаез, - лулске со. Со куспын меми гулбечысь потӥз но нылпиослы быдэн кык кешыр сётъяны кутскиз: - Тани, морковь сяна, номырмы ик ӧвӧл. Асьмеос сютэмесь. Аслам тани ньыль пиналы... Весь сиён куро. Кӧттэс ӝож эн каре. Милем но, шорамы жальмыт учкыса, быдэн кешыр сётӥз. - Соослы ке - быдэн кык, милем - одӥг, - викышъяны кутскиз Ладимы. - Соос сиротаос ук! Сиротаос... Тӥляд мон но бабушты вань, кулыны ум сётэ, - ӝот- ӝот вераз но картошсэ вандыны кутскиз меми. - Тани та бускельмы доры одно ик пыре. Отысь кузё кышно глубинка складын ужа - няньзы котьку вань, - дэмлан сётэмъяськи мон. - Можот, зэм но, сётоз, пыраса утчалэ, - вожзэ мыным ӧз потты мемимы. Ӵуказеяз ӵукна нэнӥмы ӟеч иворен сайкатӥз: - Султэ ӵӧжы сиыны. Уин скалмы кунян ваем. Мес, туж мусо. Пыд вылаз юн сылэ, уз кынмы, дыр. Гидэ куро вӧлдӥ на. Огпол со арын кунянмес корка пушкы шунтыны ӧм пыртылэ - куазь шуныт кариськиз. Школаысь нуназе котырын бертыкумы, почтальон валзэ дугдытӥз но милем атайлэсь фронтысь ӟеч иворен гожтэтсэ сётӥз. Атаймы ивортэм Смоленскез мозмытэмзы сярысь, дас нуналлы отпуск сётэмзы сярысь... *** ..Трос аръёс ортчизы. Огпол "Комсомольская правда" газетысь лыдӟи Литваысь калык артисткалэсь Фролакаслэсь статьязэ. Отын со тодэ ваёнъёссэ гожтэм. Дэбес улослы тау карон кылъёссэ верам, соосты война вакытэ утемзы понна. Гожтэм анаймы сярысь но: трос нылпиё одӥгез кышномурт, пе, асьсэос сютэм улыса но ӧз жаля куать кешырзэ. Макем, пе, ӟеч сюлэмо адями. Кыӵе жаляй мон, та кылъёсты анае уз лыдӟы, уз кылы ни шуыса. Со дыре ар уйзэ но пусйим вал ини... Озьыен, куинь Литва нылъёслэн сюлэмъёсазы со вунонтэм гизьы уськытэм. Одно ик мед дышетскоз Каникулэ милемды лэзьылӥзы тудву дыръя. Сьӧр гуртъёсысь нылпиос угось ветлыны ӧз быгатылэ. Тужгес - тупалась. Возьмано луылӥмы тудвулэсь лапкамзэ. Укно улысьтымы канаваез мырдэм кыримы - кужым но, ӟигар но ӧй вал ни. Пыдъёссэ коттэменыз, апай висьыны усиз. Мон но пыдъёсме мырдэм кыскасько вал. Вынмылы но пичи сузэрмылы меми йӧл тросгес сётъяз - ас пайзэ (укыр сьӧдунмозы, пе, висьыны кутскозы). Куинетӥ четверть бырон азьын мон школае дасяськи вал: сумкаям книга-тетрадь тыри но - ӝутыны ӧй вормы. Йыры берганы кутскиз но - выж вылэ усиськем, гырпумме вӧсь кариськем. Бабушмы, ӝутыны вормытэк, нэнӥмес педлось ӧтем - мырдэм сазьтӥськытӥзы. - Школаен йырин ӧвӧл ни - таиз но мед кыллёз! Сютэм улыса катьтэммем. Оло, висьыны усем-а шуыса, монэ валесэ выдтӥзы. Школае вынмы гинэ кошкиз. Кӧты сюмамен ӝожме вормытэк, мон зар-зар бӧрдыны кутски (школаын фронтэ кошкемъёслэн нылпиоссылы быдэн пичи тусьтыен ке но пӧсь шыд сётыло вал - соизлы но мынэме ӧйлась!). - Тонэ дышетӥсед юаз. Математикаен контрольноез, пе, нокин ӧз лэсьты. Мар луиз, пе, апаедлы. Сиён ӧвӧлысь катьтэммиз, шуи. Вот! Со туннэ пырыны медэ, султы, уть! - кузёяськемъяське Володьмы. Ӝыт пал, зэм ик, корка пырись луиз. - Мар-о луиз? Самой ӟеч дышетскисе школае ӧз вуы. Тани, Петровна, ӝыны ведра картофка но ӝыны сукыри ваи - сюд нылъёстэ. Бадӟымзэ нылдэ таки аналтӥськод ни, кыкетӥзэ коть школалэсь эн люкы. Со одно ик мед дышетскоз: йырыз умой ужа. Вить минутскын вань контрольнойёсыз быдэстэ. Сюд но, ӵуказе ик мед лыктоз, ява! Зоя Александровна котьку сыӵе косъяськись куараен вераське - кема гинэ дышетӥсьын ужа, дышем ни. Мыным возьыт потӥз - ымнырыным борддор пала кариськи но кӧлэм улэ аналски. - Нылыд изе, лэся. Я, ӵок, уг сайкаты ни... Берто ни, уже лачак, - дышетӥсьмы потӥз. Анай, тау карыса, келяны кошкиз. Мырдэм султыса, мон няньлы сузьтӥськи. Шӧмзэ ик валатэк, кӧня ке сии но собере, зэмзэ ик, умме уси. - Эй, султэ ни, меми шыд пӧзьтӥз! - кыкнамес черодэн зуркатӥз вынмы. Картошкаен шыд пӧлы нэнэ ог сузь ёрос пызь понэм (мешокъёсыз, пе, куртки), сугон но кешыр юдэм. Дышетӥсен ваем нянез векчи шормаса люкылӥз но, соин ми шыдэз туж ческыт потыса сиим. Ӵуказеяз мон школае мынӥ. Дышетӥселы, нянь сётэмез понна, тау кари. Со нуналэ мыным шыд тросгес сётытӥз... ...Каникулъёс бере школалэн но сиёнэз ӧй вал ни - ваньмыз бырем. Скалмы йӧло вал бере, ми сьӧд пот нянез соин сиылӥм. Куар потон толэзе пушнерен шыд пӧзьтылӥм, ӝыныяз йӧл поныса. Толэзь пумын каникулэ лэземзы бере, ми Зязьгорысь песятай доры пызьлы кошким. Бултыр кышноез милемды улляса лэзиз ке но, Петыр агай (атаймылэн выныз, чут маке) гурт пумын милемды пызен но нянен возьма ни вылэм. Сусекысь лушкем тырем но, бакча сьӧртӥ поттыса, гурт пумын возьмам. Пызез дас кило ёрос вылэм, нянез - кык сукыри, номырин но сурамтэ. Люкиськыкумы, монэ но вынме вешаса, агай нэнэлы вераз на: - Та пиналъёстэ кызьы ке дышетыны сюлмаськы, кенак. Аняед но витетӥ классэ выльысь мед мыноз. Туэ бордад пу ворттӥсе кельтӥ шуид - сӥзьыл озьы эн кары ни. Оло, валэн дорады ветлыса юрттэме луоз. Тӥни озьы ми Анна апаеным сӥзьыл витетӥ классэ ӵош пуксим одӥг парта сьӧры. Математика солы шугенгес сётӥськиз - валэктоно луылӥ. Уполномоченнойёс Инвожо толэзьлэн одӥг нуналаз ми ӝӧк сьӧрын пукиськом вал, нош ик пушнерен шыд сиыса. Шуак ӟезьы вазем куара кылӥськиз. Азбар пал укное учкыса, Володямы вераз: "Солдатъёс, кык солдатъёс пыро!" - Ма, кинэз нош ик ӟезьыез пуннятэк кельтэм? - мемилэн вожез потӥз. Берло дыре со тодмотэм воргоронъёслэсь кышкасагес улэ - кылпум потэм, Пыхта волокын беглойёс- дезертиръёс уло шуыса. Тани тодмотэмъёс ӧсэз усьто но корка пыро ини. Меми гур азь пала бызьыса кошкиз но отысь ухватэн потӥз. Пырисьёс, зэм ик, вож гимнастёркаосын, галифеосын, нош малы погонъёссы ӧвӧл? Алигес гинэ дышетӥсь-военрук вераз вал, армиын нош ик погонъёс вань шуыса. - Ӟечбуресь, - ӟуч сямен вазе одӥгез. - Вождэс эн вае, ми - армиысь уполномоченнойёс. Сиён-юон люкаса ветлӥськом. Мады вань - сётоно луоды! - Номырмы ӧвӧл ни угось, тани нылпиос пушнерен шыд ӟузьыло! - кеськиз меми. Ми ваньмы ӝӧк сьӧрысен соос шоры чорк! учкиськом. - Ма, бакча сиёнды ке но вань, дыр? - Куинь ведра вандэм картошкамы сяна, номырмы кыльымтэ ни. - Ӝынызэ сётоно луоды, собере азбарад кӧня ке курегъёсты бызьыло вал - кыксэ ке но басьтоно луом! - ӝужытэз гур азь пала вамыштӥз, гулбече пырон ӧсэз усьтӥз. Кыксы ик соос атаймылэсь ӧжытак пиналгес. Шӧдӥське: юн проворесь. Паймеммес куалектон воштӥз: ма, зэм ик, картошмес но кыксэ курегмес нуизы ке, мае сиыса улом, кык сяна, уз кыльы ни ук? - Вот сурон бамъёс- возьыттэмъёс! - кеськиз меми ӟуч сямен. - Уд адӟиське-а, мар-а - вить муртэ огнам сюдоно луисько. Паёк ке луоно ӧй вал, кемалась сютэм кулысалмы ни. Али но со картошка гинэ сиёнмы. Шыдэ поныны нуналаз кык-куинь курег пуз пыртӥсько. Милямез фронтын. Нош тӥ пиналэсь ук - сиён бичаса ветлӥськоды! - мемилэн вожез потэ ке, кышкан сярысь воксё вунэтэ. Тани али но скамья улысь пичи тӥрез поттӥз, ящикысь - молотэз но киямы донгаз. Марысь мар ке, пе, дэмен урдском. - Документсэс юано, меми! - кеськи мон. - Уполномоченнойёс сельсоветысь адямиен яке предэн ветло ук! - Нокыӵе уполномоченнойёс ӧвӧл таос, фронтлэсь пегасьёс та! - кеськиз меми но ухватэныз урдскиз кыкетӥез шоры. Со, возьмаськыса сямен, котыр чакласькыса сылэ вал. Нырысетӥез но гулбечысь потӥз но немножко картошки - и та дряная шуыса, кыкетӥезлы ӧс пала возьматӥз. Ми котыракгес султӥм но дась луэммес возьматӥм. Песянаймы но йыр вадьсаз табурет ӝутэм. - Мар ӝомо-югдо, акшан дыръя тазьы ветло! Уполномоченнойёс трос нылпиё семьяосы уг ик пырало! - весь кесяське анай. - Ужтэк калгисьёс, грабительёс! Тани йырады сёто! - шонаське ухватэныз. Ми но тӥрен-молотэн шонам кариськом. - Сумасшедшая баба! А ну пошли, а то ещё влипнем! - кеськиз огез но, кыксы ик, бызьыса сямен, ураме потӥзы. Ӟезьы вазем бере, анай но потӥз, ӟезьыез кортназ но, понназ ӟурыса, берен пыриз. - Сьӧлык шедьтонъёс! Сьӧлык шедьтонъёс! Ку дышоды ӟезьыез пытсаны! - ачиз весь дыр-р! куалекъя на. - Уть ай, курег соослы кулэ луэм, азьтэм парсьёслы! - Петровна! Дорад уполномоченнойёс пыразы-а? - кӧня ке улыса, забор сьӧрысь бускельлэн куараез кылӥськиз. - Мынэсьтым кык ведра картошме ӝоктыса нуизы! Сукыри няньме но куризы на! - Нокыӵе уполномоченнойёс ӧвӧл соос! Пегасьёс! Пу йыр тон! Мынэсьтым пиналъёсме кӧт вылазы гинэ бакчаяд ужатӥд. Соослы ке нянь но сётэмед! Кемыз тыныд! - анайлэн вожпотонэз али но ортчымтэ на. Куинь нунал ортчем бере, ми та уполномоченнойёсты ураметӥ нуыкузы адӟим. Киоссы думылэмын, сьӧразы мыно вал военкоматысь ужасьёс но пал суй Ондыръян. Та учыр бере анаймес уката гажаны кутским. Шутэтскон вискын Кыӵе мон водитель Али машина руль сьӧрын пукисьёс городын но, гуртын но лыдъянтэм. Но вань соос пӧлын ас шуонъёс но, педальёсты гинэ зӥбылыны быгатӥсьёс но. Асьтэлэсь кыӵе водительёс пӧлы пыремдэс тодэмды потэ ке, тӥледлы ми туннэ вазиськиськом таӵе юанъёсын - тестэн. Дась (А, Б, В,) валэктонъёс пӧлысь быръелэ одӥгзэ, тӥледлы тупасьсэ. 1 Быгатӥськоды-а машинадылэсь пичияк сӧриськем интызэ асьтэос тупатыны? А Со понна вань автосервис Б Быгато В Тыршо, сокем секыт ӧвӧл ке. 2 Пуксиськоды-а руль сьӧры мылкыдды алама яке маке пумысен лекъяськон-уродъяськон дыръя? А Буйгатскем бере гинэ Б Пуксисько В Берлолы кельтӥсько 3 Ӵем-а ветлӥськоды окулист доры синсаклыктэс эскерыны. А Араз огпол Б Арлы быдэ В Уродгес адӟыны кутскыкум 4 Машинадэс валтыны люкетэ-а вӧзады пукисьёслэн вераськемзы? А Люкетэ Б Уг В Куке-соку 5 Сюрес урдсын сылэ тӥяськем машиналэн водителез, юрттэт куре. Юрттоды-а? А Мылкыды ӟеч луиз ке Б Уг В Юртто 6 Яратӥськоды-а руль сьӧрын тамак кыскыны? А Яратско Б Луылэ В Ноку но уг 7 Двигателез "улӟытэмлэсь" азьло котьку-а учкиськоды эскерись-лыдъясь приборъёслэсь возьматэмзэс? А Котьку но Б Дыры вань ке В Уг 8 Шурдыт интыын кизэ ӝутыса сылэ нылкышно. Сое пуктон вылысь дугдоды-а отын? А Учкымон маке ке Б Дугдо В Шурдыт сюресэз ортчем бере гинэ 9 Сюрес вылэ потыкуды котьку-а эскериськоды моторысь вӧйлэсь кӧнязэ? А Уг эскериськы Б Котьку но В Куке-соку 10 Ӵем-а чакласькоды машиналэсь питранъёссэ? А Куке-соку Б Лэзем питран адӟиське В Котьку Та таблицая лыдъялэ кӧня бал люкамдэс 1 2 3 4 5 6 7 8 9 10 А 1 3 5 1 3 1 5 3 1 3 Б 5 1 3 5 1 3 3 1 5 1 В 3 5 1 3 5 5 1 5 3 5 21 но солэсь ӧжытгес балл. Машина нуллэмды лябытгес пӧрме, "куиньлы" сяна дунъяны уг луы. Тодады возе: урод водитель, аслыз гинэ ӧвӧл, вӧзаз пукисьлы но, мынӥсь-ветлӥсьлы но кышкытлык кылдытэ. 22-42 балл. Тӥ быгатоды усто автомобилист луыны. Люкетэ правилоосты чакламтэды. Вылаз ик тӥ соосты рос-прос уд тодӥське. 43 но солэсь трос балл. Руль сьӧрын тӥ зэмос профессионал. Машинаез быгатыса валтӥськоды. Ушъямон шуге-леке шедем муртлы юрттыны дась луэмды но. Дасяз С. Яковлева. "Отдохни" журналысь. ОЙ, КРЕЗЬЁСЫ Крезьгурез Пантелей Кузнецовлэн Кылъёсыз Куӟебай Гердлэн Ой, крезьёсы, крезьёсы, чебер, шулдыр крезьёсы, Кин тӥледыз саптыктоз, дэри пӧлы уськытоз? Начар, пеймыт котыре - зӥбыт удмурт шаере - Тӥ ӝутскиды, кылдӥзы, мак сяська кадь луиды. Паськыт ӵуж-ӵуж бусыын тӥ улкоды пиштыса. Вож-вож чебер возь вылын горд тылъёс кадь ӝуаса. Эн чалмытске, крезьёсы, чебер нуныкаосы,- Шудэ, тӥ, дугдылытэк, весь кырӟалэ жадьытэк! ӞОЛЬГЫРИОС Крезьгурез Пантелей Кузнецовлэн Кылъёсыз Куӟебай Гердлэн Ӟольгыриос укно йылэ Туж шуныт кар лэсьтӥллям. "Ӟильыр, ӟильыр! Ӟильыр, ӟильыр!" - Куать пи поттӥллям. Шунды ӝужа, шунды пуксе, Ӟольгыриос кесясько. "Ӟильыр, ӟильыр! Ӟильыр, ӟильыр!" Шуса сюлмасько. Мумиз ымаз нумыр вае, Аиз кибыли вае... "Ӟильыр, ӟильыр! Ӟильыр, ӟильыр!" - Ваньзэс сюдылэ. Ӵуж ымдуро пиналъёссы Кутско каллен будыны. "Ӟильыр, ӟильыр! Ӟильыр, ӟильыр!" - Шуса куаретыны. Тани соос карысьтызы Йырзэс ваньзы поттыло. "Ӟильыр, ӟильыр! Ӟильыр, ӟильыр!" - Лобӟом шуыло. Тыпылэсь меда, бадярлэсь меда... Тодосчи, кин сярысь вераны медӥсько, улэ Иж карын, ужа Удмурт кун университетын. Ас вакытаз дышетскиз Удмурт пединститутын. Профессор но доктор луон понна - Эстониысь Тарту университетлэн аспирантураяз. Чебер вераське кызьы ке удмурт, озьы ик бигер кылын. Малы ке шуоно, вордӥськиз но быдэ вуиз Татариысь Бавлы ёросысь Урсыгуртын. Ӟеч тодэ на немец, финн, эстон кылъёсты но. Ӵем пыриськылэ калык куспо конференциосы. Туж тыршыса но азинлыко ужа удмурт кылмес ӝутон бордын. Трос гинэ шуныт кылъёс вераны луоз на та адями сярысь. Но ӟечгес луоз, дыр, асэныз Иван Васильевичен кенешыса. - Иван Васильевич, дышетон удысамы югдур али секыт: кыӵе кылын дышетоно нылпиосыз гурт школаын - анай кылынызы яке - музон кылын? Тӥ школаын дышетскыку, кызьы радъямын вал удмурт кылэз дышетон? Эшшо ик Татариын? Кыӵе предметэз тужгес но сӥлы карылӥзы? - Математика но, физика но, ботаника но, зоология но - ваньмыз нуиське вал удмурт кылын. Озьы дышетскимы 7-тӥ классозь. Пиналъёслы но валамонгес вал. Дышетӥзы но милемыз егит кышномуртъёс: угось тодон-валан басьтон дыры война вакытэ тупаз. Пиосмуртъёс кошкизы фронтэ. Дышетскыкум тужгес яратылӥ историез, географиез. - Школаез пырпотэмды бере, кызьыгес радъяськиз улон сюресты? - Война вылтӥ дышетӥсьёс уг тырмо вал. Соин ик, 8-тӥ классэз йылпумъяме бере, ӟечгес дышетскисьёссэ (монэ но эшеным ӵош) басьтӥзы асьме школае ик. Дышетыны. Ужай 2-тӥ, 3-тӥ, 4-тӥ классъёсын. Егит нылъёслэн-дышетӥсьёслэн дисциплиназы уг луы вал классын. Нош мынэсьтым кылзӥсько вал пиналъёс. Бадӟым-а, пичи-а - пиосмурт ини. Куд-ог дыръя нылпиосты либатыны ӧтьылӥзы бадӟымгес классъёсы но. Школаын ужатозям, оломаиз но вал, дыр. Дышетыны, пиналъёсты киям кутыны быгатэмме адӟыса, луоз, ронолэн кивалтӥсез но ушъяз собере мон, юри со ужлы дышетскымтэ адями, люкаськем дышетӥсьёс азьын огпол урок но сётӥ на. Ньыль ар ужаме бере кошки Бугульмае. Педучилищеын дышетскеме бере, выльысь берытски школаям. - Тӥ верады, историез, географиез гажаськоды вал шуыса. Нош Удмурт пединститутэ кызьы вуиды? - Бавлы школаын одӥг ар ужаса вуттӥ. Огпол Ижевскысь эше гожтэт лэзем. Мыным ивортэм: лыкты пединститутэ - калыкез уг тырмы. Со вал 1948-тӥ арын. Кызь куинь адями интые, чылкак дас ньыль кузя гинэ люкаськимы. Озьы нокыӵе экзаменъёстэк дышетскыны пыри. Удмурт отделение гинэ вал ай бере, дышетӥсьёс но ӧжыт вал. Но милемлы ӟеч тодон-валан басьтыны юрттӥзы соку философияя нырысетӥ кандидат Анна Николаевна Зимина, удмурт кыллы дышетӥсьмы Апполинария Александровна Поздеева но мукетъёсыз. - Али студентъёслэсь улонзэс туж ик шулдыр уд шуы. Тӥляд со ласянь кызьы вал? - Ми туж шулдыр улӥмы. Мыным дышетскыны кылдӥз дано гожъясьёсын Даниил Яшинэн, Евгений Самсоновен ӵош. Группамы туж шаплы вал бере, асьмеос ик "Азьлань" нимо альманах дасяллямы. Та журналмы потылӥз 1978-тӥ арозь. Собере малы ке аналтӥськиз. Котькуд ар экспедициысь бертыса, люкам материалъёсмес радъяса ортчытъяськом вал фольклор ӝытъёс. Татын мадьылӥм гужем ӵоже ужаммы сярысь, эшъёсмы азьын гуртысь ваем кырӟанъёсмес, эктонъёсмес, мадёсъёсмес возьматъяллямы. Озьы ик палэнысь нокин юрттытэк ортчылӥзы литературно-творческой ӝытъёсмы. Отын котыр ласянь, пыр-поч эскерылӥм котькуд писательлэсь выль ужзэ. Со сяна но пӧртэм пумо ужрадъёс ортчытъяськом вал. - Нош аспирантура... - Пединститутэз йылпумъяме бере, монэ ӧтё вал "Советской Удмуртия" газетэ. Оло малы пегӟыса кадь кошки. Одӥг ар ужай ас гуртам, Бавлы шор ёзо школаын. Собере нош ик Иж карысь, табере ини - Удмурт научно-исследовательской институтысь (УдНИИ), курон лэзизы: удмурт кылъя кафедрае ужаны лыкты, пе. Татын кык арзэ тырши. Эстониысь Тарту университетлэн аспирантураяз дышетскыны пыри 1955-тӥ арын. Нош 1958-тӥ арын выльысь берытски УдНИИ-е. Татын поттӥм орфографияя но ӟуч-удмурт кыллюкамъёс. - Мурт шаере кошкыса, кылэз пичи но тодытэк, туж секыт вал, дыр, ук дышетскыны. - Бен, капчи ик уд шуы. Нырысь ик, аспирантурае пырон понна, тодыны кулэ вал кыӵе ке кунсьӧр кылэз. Ми сое йӧналаз ӧм дышетэ бере, мыным немец кылэн ас поннам выроно луиз. Уката ик, нимысьтыз пособиос ӧвӧлэн, трос ужъёсты оригиналзыя лыдӟоно луылӥз. Берыктылӥ финн, немец кылысь. Татын дышетскыкум ик нырысьсэ тодӥ репрессиос сярысь. Аспирантура бере кандидат луонъя диссертациме ути 1959-тӥ арын гинэ: газет- журналъёсын печатлам материалъёсы тырмыт ӧй вал на. Ужелэн нимыз таӵе вал: "Бавлы диалектлэн удмурт кылын фонетикая аспӧртэмлыкез" 1960-тӥ арын Иван Васильевичез ӧтё Удмурт пединститутэ. Татысь кылтодонъя факультетын удмурт люкетэз усьтӥськемен валче, дышетӥсьёс-тодосчиос кулэ луизы. Удмурт кылъя но литературая кафедра соку туж пичи вал: чылкак ньыль гинэ ужасез. Со адямиос - ачиз Иван Васильевич, Даниил Александрович Яшин, Валентин Кельмакович Кельмаков но Роза Ивановна Яшина (ӵошатон понна: али удмурт кылтодонъя факультетын - витьтон одӥг ужасез, нош 1985-тӥ арын кылъя но литературая кафедраосты люкизы). Кулэ вал пӧртэм пумо выль планъёс. Соосты асьсэос ик пӧрмытӥзы: Тарту университетлэсь ужамзэ учкизы, мазэ но созэ басьтӥзы Пермь но Казань вузъёсысь, кулэ луиз на мордваослэсь но адӟем карыны. Нош быдэс планзылы инъет луизы комиослэн но поръёслэн ужъёссы. Иван Васильевичлэн кивалтэмез улсын лэсьтӥськиз удмурт кыллэн лексикологиез, исторической грамматикаез (али В. К. Кельмаков ужа исторической грамматикаез выльдон бордын). Удмурт кылмес юнматон бордын ужам сяна, Иван Васильевич Тараканов сое вӧлмытонын но сюлмысь тырше. Ветлӥз азьвыл кунамы ортчылӥсь вань конференциосы. 1960-тӥ арысен ортчыло ини калык куспо финно-угор конгрессъёс. Иван Васильевич но 1970-тӥ арын - Таллиннын, 1975-тӥ арын - Будапештын, 1980-тӥ арын - Тартуын, 1985-тӥ арын - Сыктывкарын, 1990-тӥ арын - Дебреценын, 1995-тӥ арын - Ювяскюляын пӧртэм докладъёс лыдӟылӥз. - Иван Васильевич, мон кылӥ вал, тӥ кыӵе ке сборник дасяськоды шуыса? - Бен, мон сое вуттӥ ини. Ӝоген потыны кулэ. Сӥземын юбилеелы. Татчы пыртэмын шаермылэн, Россилэн палэназ печатласькем статьяосы. Кылсярысь, Тарту университетын потӥсь "Труды", Таллиннын арлы быдэ эстон кылын потӥсь "Известия" журналъёсысь ужъёсы. Сборнике сӥземын удмурт кылэз быдэсак эскеронлы. Гожтэме потэ на аслам диалектэ сярысь. Малпасько: со туж тунсыко луоз. Собере лэсьтоно огъя исторической грамматика. Тросгес ужано луоз удмурт лексикология бордын. - Лексика кылэз поттэмды бере, юатэк кельтыны уг быгатӥськы туала югдур сярысь. Тӥ сюлмысь пыриськиськоды выль кылъёс кылдытъян уже... - Мон луисько Кун Кенешлэн термино-орфографической комиссиезлэн тӧроезлэн воштӥсез, татысь шонер гожъяськонъя секцилэн председателез,. Татын ужаськом куать кузя: Валентина Михайловна Ившина, Серафим Васильевич Соколов, Тамара Алексеевна Пояркова но мукетъёсыз. Куинь ар ӵоже тыршеммылэн емышез но вань ини. Туэ поттыны быгатӥм, нырысетӥ бичет. Отчы пыртӥмы та ӧри сярысь документъёсты, научной статьяосты, ӧрилэсь нырысетӥ ужъёссэ (пичияк кыллюкам). - Ваньмон дырды сюрыку, мар кариськоды? Яке тӥляд со чик но уг луылы-а? - Дыр сюре. Егитгес дыръям туж яратӥсько вал пӧйшураны - луд кеч, луд ӵӧж кутылӥ. Берпуметӥ кык арзэ гинэ ӧй пота ни. Толалтэ йӧ вылын чорыганы яра. Гужем тэлетӥ губи бичаса ветлӥсько. Вань аслам сад-бакчае. Кузпалыным, Люция Васильевнаен, утялтӥськом-учкиськом. - Люция Васильевна кин луыса ужа? Кыӵе шаерысь со? - Кузпалы Игра палъёсысь. Со ӟуч адями. Дышетскиз пединститутын. Пичи но могатэк вераське удмурт кылын. Школаын дышетӥз ӟуч кыллы но литературалы. Али пенсиын - шутэтске. - Туала студентъёс сярысь мар вераны быгатоды? - Студентъёс али ляб ужало. Ӟечгес тыршысалзы ке, мылзы потыса ужасалзы ке, тросгес тодысалзы, мынам вакытысьтым аспирантураын дышетскись сярысь. Иван Васильевич Тараканов сярысь веранмес тазьы йылпумъямы ке, шонер уз луы, дыр. Удмурт кун университетысь огъя но финн-угор кылтодонъя кафедралэн кивалтӥсез, профессор, кылтодон наукаосъя доктор пусъемын пӧртэм медальёсын но данъян гадьпусъёсын: Быдӟым Отечественной война вылтӥ ужамез понна сётэмын "За трудовое отличие" медаль, 1989-тӥ арын - "Удмурт Элькунысь наука удысын сӥё-дано ужась" ним, 1997-тӥ арысен - "Россия Федерациысь наука удысын сӥё-дано ужась"... Ваньзэ вераса уд быдты. Кемалась ик ӧвӧл Удмурт шаерамы кылдытэмын Наукаосъя академия. В. К. Кельмаковен ӵош татчы пыртэмын И. В. Тараканов но. Та дано адями сярысь веранме йылпумъяме потэ тодмо кырӟанысь кылъёсын: Тыпылэсь меда, бадярлэсь меда Вордӥськид, пияш, тон дунне вылэ... Надежда Прокопьева, Удмурт кун университетын дышетскись. Мударис Менладшинлэн туспуктэмез. Тылпуос уг кулэсмо Ортчем арня куспын шаерамы 45 пол тылпу потаз, изъян адӟемын 248 сюрс манетлэсь унолы. Тылын быриз одӥг адями. Тылпу ӵемгес пота эскериськымтэ бордысь, пиналъёслэн тылын шудэменызы, газ плитаосты но электрооборудованиез чакламтэен. 23 июне тылпу ӝутскиз Ува районысь Удугучин селоысь Тарасовалэн юртъераз. Солэн улон интыез вакчи дыр куспын пеньлы пӧрмиз. Тӧлэн сэрен тылгизьы Берестовлэн юртъераз но вуиз. Сутскизы 6 парсьпи, 2 кунян но курегъёс. Тылпулэн мугез тодмо - 13 аресъем Павел тамак пумзэ кысытэк куштэм. 24 июне Можгалась Киров нимо ульчаын улӥсь газ плита вылаз олифа шунтэ вылэм. Тыл гомӟыса солэн юртъер котырез ӝуаз, ачиз воргорон зол сутскыны шедиз. 28 июне ог 2 часэ уин тылпу ӝутскиз Завьял ёросысь "Бисарки" сад-бакчаын. Ӝуаз кузёлэн мунчоез, ачиз но Ханов М. Х. тыл пушкы йырыныз быриз. "Горд атас" ӝутскем кузёлэн юэм йырыныз чакласькытэк тамак кыскеменыз. 28 июне 15 часын тылпу ӝутскиз Ижысь М. Горький ульчаысь улыно-вылыно ньыль квартираен пу юртын. Кыкез квартира ӝуаз. Тылпу кутскем телевизор бордысен. Кызьы адӟиськоды, тылпулэн мугъёсыз пӧртэмесь. Соин ик ваньмыз потэ асьмелэсь эскериськымтэмы бордысь. Чаклаське! Удмурт Республикаысь МВД-лэн тылпуосын нюръяськонъя управленилэн ивортэмезъя. Ахматова кырӟаз Яратонэз Анна Ахматовалэн вордскемез дырысен 112 ар тырмиз Со вал паймымон чебер, йӧно, йӧтскыны дӥсьтонтэм. Со ӧз сураськылы калыкен, улӥз аслаз дуннеяз. Йӧно ветлэменыз, йырзэ юсь музэн воземеныз со кыӵе ке скульптуралы укшалляз - бадӟым классической искусстволы матэктылӥз. Кузь дэремен веськрес мугорзэ шобыртылӥз бадӟым кышет. "Астэ королева эн кожа!" - ӵем шуылӥз солы Лёва пиез. Ахматова тыршылӥз огшорыгес луыны, но ӧз быгаты. Со та дуннее Королева луыса вордскемын вал. Кезьытысь пырыса, Мон няськай тыл дурын. Сюлэмме вунэтӥ, Лушказы со куспын. 1914 ар. Матысь эшез Ахматоваез тодматэ Борис Антрепен. Кутскиз шукрес роман. Антреп туж яратӥз Ахматоваез. Соин пумиськон понна пӧртэм мугъёс утчалляз. Но огпол, ӟырт толшор нуналэ, Антреп Ахматовалы Англие кошкон сярысь малпамзэ вераз. "Мыным сюлэмыя ӧвӧл та политикаен усыкмытъян" - шуиз Антреп. Соос люкиськизы. Кызь одӥгетӥ. Уй. Понедельник. Город бус пыр адӟиське. Та дуннеын кин ке но малпам ук Яратонэз. Солы котькин оске. Та бӧрсьы Ахматова ӧжыт буйгалляз, сазьтӥськылӥз, вунэтыны тыршылӥз. 1923-тӥ арын нош гожъяз: Со дырысен ортчиз ни сизьым ар. Октябрь ӵуж куаръёсты музэн Ӵужиз туж трос улонъёсты. Эшме нош берпуметӥез корабль Ӝуась Дорез палась нуиз туж кыдёке. Ахматова понна Антреп сузёнтэм Яратонлы пӧрмиз. Солы сӥземын тросэз кылбуръёсыз. Борис Антреп кунгож сьӧрын луиз мозаикая тодмо художник. Анна Андреевна аслаз матысь эшъёсызлы возьматъяз Национальной галереялэн выж вылысьтыз мозаикаез. Со вал Ахметовалэн портретэз. 1966 арын, Анна Ахматоваез Оксфордын данъякузы, соос пумиськизы. Ог-огзы шоры ваче син учкыны ӧз дӥсьтэ - асьсэды янгышен лыдъязы. Соослы уг яра вал люкиськыны, Яратонэз виыны! Кин тодэ, мар сярысь малпаськылӥз Ахматова мӧзмыт кузь ӝытъёсы. Кин тодэ... Туннэ мыным гожтэт ӧз вуы. Жингыр вазе азвесь тулыс. Лэйка-лэйка ву вылын пыж. Туннэ гожтэт мыным ӧз вуы. Анна АХМАТОВА Ӧс кылиз ӟубис Сяськая беризь... Чиньыё пӧзед Ӝӧк вылам вунӥз. Ӵуж лампа но мон. Чус. Оло, кожод? Малы кошкемдэ Валало кожад? Ӵуказе ӵукед Луоз сайкытгеМ. Та улон ӟугез Пертчылы, сюлэм. Малы ке жумгес Жугиське уйлы со. Мон туннэ лыдӟи: Лулъёсмы уг кысо. *** Кикылэсь юай мон: Кӧня ар уло? Куалектӥз пужым но, Ӝиптӥськиз ожо. Пумитам уг вазьы - Юри, дыр, иса. Ӟырдам кымесме Салкым тӧл веша. Берыктӥз З. Рябинина. Быръёнъёс азьын Кинлы оскоз гурт калык? Берло аръёсы пӧртэм кивалтон ёзъёсын быръёнъёс ортчылӥзы. Калыкен юнматэм муртъёс тыршо Россиысь Кун Думаын, республикаысьтымы Кун Кенешын. Бен, ужаса улӥсьёс куаразэс сётӥзы соиз яке таиз кандидат понна, нош бӧрысь быръем адямизэс тросэзлы адӟыны но, кылыны но ӧз кылдылы ни. Та ласянь чаклано ке, ас коже кивалтон ёзъёсын ужась мурт бырйисьёсызлы тужгес но матын луэ. Со угось кытчы ке палэнэ, шуом, Москвае яке Ижевске уг кошкы, улэ но ужа отын ик, кытын сое бырйизы, кытын солы оскизы. Пичи Пурга ёросысь Депутатъёслэн кенешазы кандидатъёс пӧлын - УАССР-лы 10 ар нимо кун племзаводысь валтӥсь ветеринарной врач В. Г. Логов но юрист Ю. М. Никитин. Кыӵе ужпумъёсты быдэстыны кулэ депутат, кыӵе солэн интыез туала гуртын, маин вырыны кулэ районысь Депутатъёслэн кенешсы но администрация - ӵапак та пумысен депутатэ кандидатъёсын кенеше газетлэн корреспондентэз. Владимир Логов: дуннез сюдэ-вордэ музъем ужась - Владимир Григорьевич, быръёнъёсы пыриськыны мылкыдды шӧдтэк шорысь ӧз кылды, дыр? - Зэм, сыӵе вамыш лэсьтыкуз адями валаны кулэ: табере со ачиз понна гинэ кыл кутоно уз лу ни, кыл кутоз вань бырйисьёсыз, округысьтыз гуртъёс, быдэс ёрос понна. Мар шуод, хозяйствоысь ужаса улӥсьёсты ӟеч тодӥсько, соослэсь ужпумъёссэс валасько, калыкен ужан опытэ люкаськиз ни, соин ик быръёнъёсы пыриськоно кариськи. Берло дыре тани мае умой шӧдӥ: гурт калык сюлмаськонъёсыз сярысь ас понназ вераське, нош соосты быдэстон, вылӥ ёзъёсы вуттон понна тыршись уг шедьы. Ӵапак та ужез быдэстон ик депутатлэн сюлмаськонэз луэ. Солы бырйисьёс оскизы, со понна куаразэс сётӥзы, табере депутатсылы сюлэмвисёнъёссэс мед вералозы. - Гуртысь ужпумъёс сярысь верано ке, кыӵеоссэ тӥ нырысетӥ интые пуктысалды? - Ачим гурт хозяйство удысын ужасько бере, нырысь ик тани мае пусъеме потэ: ваньбур поттӥсь, шуом, скал кыскись яке нянь будэтӥсь, кураськись радэ кельтэмын. Со пӧсятозяз тырше, нош удам ужезлэсь пайдазэ уг ик адӟы, продукцизэ туж дунтэмен вузано луэ. Со понна узырмо переработчикъёс. Тани милям хозяйствомы ик йӧлзэ "Ижмолоко" огазеяськонэ келя. Туж дунтэм дунын. Сое будэтон понна нокин но номыр но уг лэсьты. Хозяйствомылэн кивалтӥсьёсыз шоры учкиськод но малпанэ вуиськод, оло нош соослы ӟечгес поттэм продукцимы дунтэмен кошке шуыса. Ужась муртлы уждун тырмыт но дыраз уг тыро, мӧйыослы пенсия, пиналъёс понна пособиос дыраз уг вуо - ваньмыз со депутатлэн сюлэмвисёнэз луыны кулэ. Мукетсэ ужпумез пусйытэк кельтыны уг луы. Пичи Пурга ёросын Бураново палъёсы гинэ чагыр эстӥськон вуттэмын ӧвӧл на. Нош адямиос эстӥськон утчаны туж курадӟо, угось нюлэсъёс та палан ӧжыт ни. Раз кыскон понна кичӧлтӥсьёс шедё, но та вакытэ вань вераськон вераськонэн ик кыле. Улонамы уно аръёс ӵоже таӵе сям пыӵамын, лэся, - гуртысь адями кин ке понна но ялан ужа-ужа, нош ачиз сярысь сюлмаськись уг шедьы. Тазьы чаклано ке, шаерысьтымы азьмынӥсь хозяйствоосын ик югдур чылкак мукет. Кытын калыклы улыны но ужаны умой условиос кылдыто, сыӵе интыосын ик вормонъёс но лыкто. Тани басьтом Вавож ёросысь Мичурин нимо колхозэз ик. Отын ваньмыз адями понна лэсьтӥське. Нош колхозник ас сярысь сюлмаськемез шӧдэ ке, ӟечгес тырше, сыӵе мурт азе курон но, ужпум но пуктыны луэ ни. Валамон ини, хозяйствое одӥг гурт гинэ пыре ке, солэсь ужзэ радъяны капчи, нош милям племзаводамы - кӧня ке гурт. Центральной усадьбамы - Яган-Докья, со сярысь весяк тросгес сюлмаськылӥзы, мукет гуртъёс кулэезъя ӧз азинске. Ӵапак озьы шуыны луоз Бураново сярысь но. Нош со эксэй вакытъёсы ай волостьлэн шорсюлмыз вал, адямиос асьсэ коньдонэнызы татчы черк пуктӥзы. Мон ачим татын ӧй вордскы ке но, сое аслам гуртэным лыдъясько ни. - Вакчияк вералэ вал улон сюресты сярысь. - Вордски но будӥ Вавож ёросысь Водзимонье гуртын. Школаез йылпумъяме бере дышетскыны мынӥ Можгаысь ветеринарной техникуме. Собере ужаны ыстӥзы татчы, Бурановое. Казаньысь ветеринарной институтэ пыри ини армия бере. 1987 арысен ужасько племзаводын валтӥсь ветеринарной врач луыса. Лыдъясько: гуртысь адями сюдэ странамес, со вордэ дуннеез, соин ик со сярысь кулэезъя но тырмыт сюлмаськыны кулэ. *** Юрий Никитин: кыл кутонлэсь пегӟоно ӧвӧл - Ма муген депутат-кандидат луыны малпады? - Мон тазьы малпасько, гуртысь яке ёросысь калык ас улонзэ ачиз лэсьтыны кулэ. Нокыӵе американецъёс но, мукетъёсыз но дорамы уз лыктэ, улонмес кулэезъя уз радъялэ. Асьмемын герӟаськемын ук, кызьы али улӥськом, кыӵе луоз ӵуказе нуналмы, ма кельтом нылпиосмылы. Тае малпаса ик, мон мылкыд кари быръёнъёсы пыриськыны. - Юрий Михайлович, ёросысь Депутатъёслэн кенешсылэсь ужзэ ма ласянь выльдысалды? - Владимир Григорьевич, соглаш луэмме верасько тани ма пумысен: калык аслаз сюлмаськонъёсыныз улэ, шуом, сюресъёс уродэсь, газ ӧвӧл, ульчаостӥ кузётэм пуныос бызьыло. Ваньзэ та ужпумъёсты интыысь власть эскерыны-быдэсъяны кулэ. Но тани ма син шоры йӧтэ: ужаса улӥсьёслэн но депутатъёслэн кусыпъёссы чик но ӧвӧл. Юри мынэ ай кудаз ке гуртэ, юалляське адямиослэсь, тодо-а соос депутатсэс. Мон оскисько, уноезлэн сое кылэмзы-адӟемзы но ӧвӧл. Тӥни озьы луэ ни: Конституцияя власть калык киын луыны кулэ, нош зэмзэ югдур чылкак мукет: кивалто хозяйствоослэн йыръёссы, должностен муртъёс, чиновникъёс. Соин ик та удысэ уногес калыкез кыскыны тыршоно. Адями медаз кышка, туннэ со кылзэ вералоз но, ӵуказе сое ужысьтыз уллялозы шуыса. Калык ачиз ужпумъёс пуктыны но быдэстыны, ачиз кыл кутыны кулэ. Шуом, ӧтчаме люкаськемъёс сюрес лэсьтон пумысен огъя малпанэ вуизы, бӧрысь лэсьтӥзы но валазы, сюрессэс мукет интытӥ лэзёно вылэм. Кин со понна янгыш? Ачиз гурт калык. Решение угось дэмен кутэмын вал. Веранме азьланьтыса пусъеме потэ: калык депутатсэ райсоветэ быръе. Собере со сярысь вунэтэ. Таӵе ик югдур Кун Кенешысь, Кун Думаысь депутатъёсъя но. Нокин но уг тоды, маин выре соиз яке таиз быръем адями. Соин ик странаямы но ваньмыз чукин- бекин бекырскемын, дыр. Ёросысь депутат бырйисьёсызлы матын луыны кулэ. Кинлы усьтоз на адями сюлмаськонъёссэ, депутатэзлы ӧз ке вера, шуом, кинлэн ке пиез армиын бырыны шедиз, огназ улӥсь мӧйы муртлы юрттэт кулэ, кинэ ке милициын ултӥязы. Райсоветлэн депутатэзлэн правоез вань, кылсярысь, РОВД-лэсь кивалтӥсьсэ ик ӧтьыны но югдурез валэктыны курыны. - Нош ёрос администрацилэн ужаз кыӵе воштонъёс пыртысалды? - Огнамлэн гинэ таӵе малпанэ ӧвӧл: ёрос администрацимы ляб ужа. Ойдолэ одӥг тодметэз гинэ чаклалом. Ма со сыӵе кивалтон? Классикъёс верамъя, зэмос кивалтон кылдэ таӵе люкетъёслэсь: план лэсьтон, ужез радъян, ужлэсь быдэсъяськемзэ эскерон но дунъет сётон. Нош уж вылын ма пӧрме: ёросын уждун уг тыриськы, пособиос ӝегало, сюресъёс уг лэсьтӥсько... - нош юась-верась но, кыл кутӥсь но ӧвӧл. Мукетыз ужпум: администрацимы кадръёс сярысь чик уг сюлмаськы. Вераськон мынэ ужасьёслэсь квалификацизэс будэтон но кивалтон удысэ ӟеч дасям специалистъёсты кыскон сярысь. Мукет ужпумъёс сярысь верано ке: вань Пичи Пургаын тымет, со быдэсак кырсёмемын. Нош жуг-жаг кисьтало асьсэос гуртоос ик. Гурт администрация но, ёрос администрация но буйгатскыса уло, югдурез тупатыны уг тыршо. Шуом, та дырозь жуг-жаг кисьтась одӥг мурт но кыл кутон улэ кыскемын ӧй вал на. Сюресъёс сярысь ке верано, та ужпум Пичи Пургалэн гинэ ӧвӧл, быдэс Россилэн ужпумез. Уно аръёс ӵоже ини райцентрын эмъяськон комплекс лэсьтӥське. Должностен муртъёс кӧня пол оскытъязы, тани-тани больницаез вуттом. Нош пайдаез ӧвӧл. Со кивалтӥсьёс ик али но ужало, уждун басьто, нош сётэм кылзэс быдэстымтэмзы понна ужысьтызы кошкон сярысь уг ик малпало. Паймымон югдур кылдэмын вузкарон но лэсьтӥськон удысъёсын. Мон сямен, Пичи Пургаын ужаны ӟеч условиос кылдытэмын лымшор палась лыктэмъёслы гинэ. Нош умой луысал ук, шуом, лэсьтӥськонын ик вожвылъяськон (конкуренция) кылдытыса. Кыӵе ке объектэз лэсьтон понна мед нюръяськозы кӧня ке организациос. Футболэн шудыны бумага вылын уг дышетско ук. Озьы ик лэсьтӥськыны но, вузкарыны но асьме адямиос быгатысалзы, дыр, ужась кизэс волятысалзы. Кыӵе бырйисьёсмы, сыӵе ик депутатъёсмы. Туала улонмы понна ваньмы кыл кутыны кулэ. Пичи шапыкъёслэсь кылдэ шур. Котькудмы ёросмы, гуртмы понна ӧжыт ӟечсэ лэсьтыны тыршим ке, шӧдом, улонмы кӧнялы ке тырогес, шулдыргес луиз шуыса. Ю. АЛЕКСАНДРОВА. Кема возьмам диплом 24 июне Удмурт кун университетэз йылпумъям студентъёс капчияк шокчизы: та нуналэ сослэн киязы вуизы кема возьмам дипломъёс. Егит специалистъёсты ӟечкылаз удмурт филологияе факультетлэн деканэз А. В. Ишмуратов. Шудо сюрес сӥзьыса, соослы кырӟазы финн-угор группаын дышетскись нылъёс. Дипломъёсты сётӥз УдГУ-лэн проректорез В. А. Байметов. Ӟеч кылзэс веразы дышетӥсьёс но. Куатез егитъёс горд диплом басьтӥзы. Тросэз егитъёс мылкыд каризы тодон- валанъёссэс аспирантураын будэтыны. Соос пӧлын: Л. Осипова, К. Арафолова, А. Коновалова. Мар бен, выль азинсконъёс но вормонъёс тӥледлы вуоно ужады но дышетсконады. Г. САВИНА. Кутскиз "Удмурт дунне" газетлы 1999 ар понна гожтӥськон. Дунъёс июле (толэзь ӵоже гинэ) таӵеесь: 54 манет - газет тӥ доры быдэс ар ӵоже арнялы быдэ куинь пол вуоз. Толэзяз огпол - "Твой дом и сад" приложение. Индексэз - 54400 48 манет - газет озьы ик вуоз, но тамында гинэ тырыны луонлык сётӥське гуртын улӥсьёслы, пенсионеръёслы, студентъёслы. Индексэз - 14402 42 манет - таиз лыдпус Быдӟым Отечественной войнае, Афганистанын но Чечняын ожъёсы пыриськемъёслы, Чернобыльын пуштонлэсь бервылъёссэ утялтонэ ветлэмъёслы, ляб адӟись инвалидъёслы, трос нылпиё анайёслы. Индексэз 14400 21 манет - тамында тырыса, телепрограммаен газетмес басьтоды ар ӵоже арняяз огпол. Индексэз 54402 Гожтӥськон радъямын шаерысьтымы почта ёзъёсын. Дыртэ, вуоно толэзе югдур воштӥськоз! Кызьы палэнсконо жуг-жаглэсь Ижысь мэриын толон ужаны кутскиз калык куспо семинар. Нош сӥземын со кылем- мылемъёсты быдтон ужпумлы. Возьматӥськозы туала оборудование но выль технологиос. Ужрадэз радъяло Удмурт Республикаысь Мукет кунъёсын кусыпъёс возёнъя министерство, Ижлэн администрациез но Австриысь "Оско" фирма. Таӵе семинар юнме шорысь асьме дорын уг ортчы. Уго Удмуртилэн котькуд сэрегез тодмо луэ жуг-жаг куян интыосын. Собере кылем-мылемъёсты сутон тазалыкмылы бадӟым изъян вае на. Семинарлэн ужаз пырисько пӧртэм фирмаос но предприятиос. Н. СЕРГЕЕВ. Тон - мыным, мон - тыныд Арлыдоос понна пенсия басьтон тужгес но сюлэмшугъяськытӥсь ужпум. Ма, соос понна гинэ ке луысал. Тросэз ужтэк кылем семьяос песянайёссэс но песятайёссэс ки вылазы возьыны дась. Угось соослэн берпум осконзы - мырдэм векась пересьёслэн пенсизы. Нош пенсиос ӝегало. Мар муген? Малы коньдон уг вуы? Пенсиосъя фондэ предприятиос дырыз дыръя уксё уг тыро. Кызьы ивортӥз милемлы Россиысь Пенсиосъя фондлэн Удмуртиысь ёзэтэзлэн кивалтӥсез В. М. Моряков, туннэ нуналлы шаерамы пунэм тыронъёс одӥг миллиард манетлэсь (выль уксёен вераса) ортчизы ни. Жаляса верано, тросэзлэн предприятиослэн пунэм тыронзэс быдтыны луонлыксы ӧвӧл. Лыдпусъёс толэзьлы быдэ йыло. Тужгес но кӧшкемыт югдур "Ижмаш" акционер огазеяськонын. Солэн тыриськонэз ар кутсконысен 30 миллионлы будӥз но туннэ нуналлы 104,4 миллион манетозь вуиз. Бадӟым пунэмзы Ижысь механической заводлэн (77,9 млн.), Лэсьтӥськонъя 18-тӥ управленилэн (38,6 млн.), радиозаводлэн (24,3 млн.), "Спецгазавтотранслэн" (32 млн.). Пусъем потэ тазэ но. Глаз карысь механической заводлэн ар кутсконын 33,9 миллион манет пунэмез ке вал, июнёзь со кык поллы кулэсмиз. Озьы ке но, 17,4 миллион - со туж трос на. Ма бен, секыт югдур. Предприятиос куашкало, мискинь пенсионеръёсмы, быдэс даурзэс чебер улон лэсьтыны тыршыса, кӧс нянь вылын кыллёно луо. Кызьы та югдурысь потоно? Кинэ тышкаськоно? Валамон огез: улонамы ваньмыз ог- огеныз герӟаськемын. Туннэ мон тыныд пунэмме уг берыкты, ӵуказе тон шуге-леке вуттод мукет эштэ. Кыӵес медаз золтӥськы шуыса, нырысетӥ гердэз ик пертчоно - пенсия фондэ пунэмъёсты берыктоно. Елена ПАНФИЛОВА. ПАРСЬ ПЕЛЬ Улонысь учыр Кызьы ке мынӥ черктэм Кезэ гуртаны. Кӧлыны пыри Аполос уроме доры. Ӵуказеяз урам кузя ӵошен вамыштӥськом. - Бигеръёсты трос на-а? - юасько. - Ог кык сюос вань на шуо кадь,- валэктэ эше.- Ӟеч адямиос. Ог-огзы понна гурезь кадь сыло. Номырлэсь уг кышкало. - Озьы ик уг кышкало,- пыӵкылӥсько Аполосэз.- Вай ай огзэ улаз куашкатымон шурдытом. - Давай,- шумпотӥз уроме.- Тӥни одӥгез юри ӧтем кадь лыктэ. Аполослы валэктӥсько, кызьы но ма кароно. Ачим ватскисько писпу сьӧры. Ваче вуэмзы бере, эше бигерлы вазиське: - Ӟечбур, уроме! Кытчы озь сокем мур малпаськыса дыртӥськод? - Бускеле доры уж сярысь кенешыны потӥ ай. - Бускеле шуиськод бере, тонэ со таиныз но утялтоз, вылды,- Аполос, кескич пальпотыса, бигерлы киыныз "парсь пель" возьматӥз. Валаса ӧй вутты, ку бигер Аполослэн гадяз мыжыксэ вуттӥз но музъем вылэ сапкытӥз. - Тьфу, синазькыль! - сялӟиськиз со.- Тон ачид парсь! Эштэ исамес кариськод. Тонэн, чатранэн сэрен, табере сюресэ уз удалты.- Котыраз тэбинись кутъёсты уллям сямен шонаськыса, бигер гуртаз дыртӥз. Ӵуказеяз солы кема валэктоно луиз, ваньмыз понна мон янгыш луисько шуыса. Мон, пӧй, Аполосэз озьы лэсьтыны дышетӥ. - Озьы ке, буди,- буйгатскиз бигер.- Ма карод на тӥледын, шузиосын. Г. КАСИМОВ. Ӝутско коркаос Булае вуиды ке, чылкак паймоды. Огез вӧзын мукетыз ӵыжак выль улон коркаос пуксемын. Тросэз соос улыно-вылыноесь. Нош "Дружба" эштослэн административной юртэз азьын зэмос площадь кылдытэмын. Таӵезэ быдэс Ува районысь уд шедьты, дыр. Эштосын, Булай гуртын гинэ ӧвӧл, лэсьтӥсько вамьяос, видзаос но мукетъёсыз. Берло вить ар ӵоже татын 26 семья аслыз юрт ӝутӥз. Али 11-ез лэсьтӥське. - Эшшо 10 мурт юрт пуктыны мылкыд каре на,- шуэ интыысь администрацилэн секретарез Тамара Гореева.- Лэсьтӥськисьёслы эштос но, ми но юрттӥськом. Тани механизатор Николай Калашников коркаезлы инъет кисьтӥз, нош куд-огез музъем басьтӥз ни. Интыысь администрация пыр адямиос кредит басьто. Кылсярысь, 1994 арысен 1997 арозь 15 семьялы 7 процентэн ссуда сётэмын. Сое дас арскын гинэ берыктоно. Самой трос, быдэн 6 семьялы, коньдон висъямын миым но 1994 арын. Берлоосызлэн кредитсы 7 сюрс манетозь (выль коньдонэн) вуттэмын. Г. ВАСИЛЬЕВ. Тодосчимес данъяса Элькунысьтымы но Россия Федерациысь сӥё-дано ужасьлы, Удмурт Республикаысь наукаосъя академиысь академиклы И. В. Таракановлы 70 арес тырмемен валче, Удмурт кун университетын кылъя но литературая научной конференция ортчиз. Тодмо тодосчиез ӟечкылазы но конференцилэн ужаз пыриськизы Москваысь, Венгриысь, Финляндиысь куноос. Е. ПАНФИЛОВА. Гуртлы - 17,5 миллион манет Удмуртиысь Правительстволэн Президиумезлэн кенешаз эскеремын пытсэт сьӧрын пукисьёслы ужаны луонлык сётон пумысен программалэн инъетэз. Жаляса верано луэ, эриклэсь люкемъёс пӧлысь ӝыныезлэсь тросэз ужтэк пуко. Научно-исследовательской но опытно-конструкторской ужъёсъя конкурслы йылпумъянъёс лэсьтэмын. Дас кык уж пӧлысь улонэ пыӵатыны дэмламын "Воткинский завод" кун предприятилэн, акциосын "Аксион" огазеяськонлэн, "Ижробо" технопарклэн но "НИОТК" фирмалэн сизьым ужзы. Куинез ужпум му вӧй поттонэн герӟаськемын вал. Зотовской, Нефёдовской, Потаповской му вӧй поттон интыосын ужан понна аукцион ортчытыны чакламын. "Сэмсон" фирмаен ваче кусыпъёс возён пумысен ужпумъёс сэрттэмын-пертчемын. Мынэ толалтэлы пудо сиён дасян, ӝоген ю-нянез октоно-калтоно луоз. Эстӥськон басьтон понна чакламын 17,5 миллион манет висъяны ю тысьлы дотациос чотын. Правительстволэн Тӧроез Павел Вершинин ӵектӥз та уксёез кыклы люкыны: 5,5 миллионзэ гуртоослы июль толэзе сётыны, кылемзэ - августэ. Президиум ортчем нуналэ ик Павел Вершинин Москвае кошкиз. Татысь Россия Федерациысь Правительство но Удмурт Республикаысь Правительство куспын "Кун коньдонэз юнматон но Удмурт Республикалэн бюджетэзлы федеральной бюджет чотын коньдонэн юрттон сярысь" Огкыл кутыны чакламын. Правительстволэн Тӧроезлэн Секретариатысьтыз пресс-центр. Юрттозы-а? Удмуртиысь "Росвооружение" компанилэн делегациез ужаз. Та компанилэн валтӥсь директорезлэн воштӥсез Владимир Рябихин, солэн юрттӥсез Игорь Белоусов, Кун Кенешлэн Тӧроез Александр Волков, Правительстволэн Тӧроез Павел Вершинин, республикаысь предприятиослэн кивалтӥсьёссы Удмуртиысь оборонаен герӟаськем промышленностьлы юрттэт сётон пумысен кенешизы. Кун Кенешлэн пресс-службаез. Александр Лукашенко: "ВЫЛЬДӤСЬКОНЭЗ РАДЪЯНЫ КУЛЭ ГОСУДАРСТВО" Кызьы ивортэмын вал ини, 17-20 июне Санкт-Петербургын кыкетӥзэ ини ортчиз экономика ужпумъёслы сӥзем люкаськон-кенешон. Солэн ужаз бадӟым инты басьтӥз но люкаськемъёслы тунсыко потӥз Белоруссилэн Президентэзлэн докладэз. Туннэ ми вакчиятыса сётӥськом А. Лукашенколэсь верамзэ. СНГ-е пырись государствоослэн тросэз ужпумъёссы но сюлмаськонъёссы огвыллемесьгес. Соос ваньмылы тодмо бере, мон соосты рос-прос сэрттыса-пертчыса уг улы. Ваньмы, огъя учкыса, валаськомы кадь, кызьы улыны кулэ. Нош кыӵе ке нимаз ужпумез басьтоно ке, ӟудӥськомы, кызьы, кыӵе амалэн сое быдэстоно. Выиськомы огъя кылъёс пӧлы. Тани реформаос сярысь кин но кытын гинэ туэ уг вераськы. Нош кызьы ми соосты валаськомы? Мон сямен, реформа - со дасо аръёс ӵоже кылдытэм но али но ужась экономической инъетэз умоятон, азинтон. Ӧвӧл, чылкак воштон яке чутрак куашкатон ӧвӧл, сое ӵапак пумен, чакласькыса выльдон. Кыкетӥез. Та воштӥськонъёс вакытэ ми чутрак пумит государствоез экономика бордысь палэнтонлы. Зэмос государство вань кужымзэ сётыны кулэ калыксэ экономикаез воштонэн герӟаськем шуг-секытъёслэсь утёнлы. Со мед ачиз радъялоз но эскерыса возёз воштӥськонъёсты. Веранэз ӧвӧл, асьмеос ӟеч валаны кулэ кытчы мынӥськомы но мае витиськомы воштӥськонъёслэсь. Ми али тыршиськомы пӧртэм пумо государственной гинэ ӧвӧл, экономической модельёс кылдытыны. Мон малпамъя, СНГ-е пырись государствоос котькудӥз аслаз сюрестӥз али азьлань мынэ. Белорус калык но аслэсьтыз сюрессэ бырйиз. Жаляса верано луэ, ми но Советской Союз куашкам бере, нокинэн но, нокызьы но чакланы луонтэм рынок шуонэ выйыны кутским вал. Ярам коть, дырыз дыръя валамы янгышъёсмес но быдтӥмы экономикаен шудонэз. Дыраз шедьтӥмы шонер сюрес - азьвыл лэсьтэмзэ куашкатытэк умоятон. Ми валамъя, рынок кусыпъёсты государство радъяны кулэ. Радъяно солань-талань сэрпалъяськытэк, рос-прос чакласа, планъя. Котьма ке но, государство экономикаен кивалтыны кулэ. Но чурыт косъяськытэк, котькуд чыры-пырые пыриськытэк, Тужгес но чакласа возьыны кулэ валтӥсь удысъёсты. Тани али асьме государствоосты туж сюлмаськытэ сиён-юон поттон удыс. Белоруссиез ӵем дыръя пыкыло, гурт хозяйствое рыночной амалъёсты пыӵатымтэез понна. Адӟем карыны косо азинскем странаослэсь, кудъёсаз, пе, бадӟым возёсъёслэсь куштӥськыса, фермерствое выжизы. Но озьы-а со? Тани Чехиын, Словакиын, Венгриын, Германиын но Китайын гурт хозяйство кооперативной инъет вылын возиське. Та странаосты бере кылисьёс пӧлы пыртод шат? Белоруссия но ӧз куштӥськы кема аръёс ӵоже эскерем амалъёслэсь. Кооперация гинэ юрттӥз гурт хозяйствоез куашканлэсь утьыны. Бадӟым эштосъёсын гинэ пайдаен уже кутыны луэ туала кужмо техникаез но азинлыко технологиосты. Соин ӵош ик республикаямы пыӵатӥське фермерской хозяйствоосты азинтонъя программа. Фермеръёс сыӵе ик юрттэт басьто, кыӵе колхозъёс но. Ми ноку но ум берытске ни ортчемез доры, кужмысь ум огазеялэ музъем ужасьёсты. Но кужмысь ум быдтэ колхозъёсты но. Нялтас верало музъемез нимаз адямиослы люкон-вузан сярысь. Куд-огез пӧсекъя, сое, пе, ӝегатскытэк нимаз ваньбур кароно. Гурт хозяйство азьын кыӵе ужпум али сылэ? Шонер, тырмыт но ӟеч сиён-юон поттон. Но та ужпумез быдэстон понна одно ик шат музъемен ӝегатскытэк вузкарыны кутсконо? Ӧвӧл. Ми соглаш вузаны музъеммес, та ужрад экономикае коньдон ваемен-сётэмен герӟаськемын ке. Инвестор малпа ке завод пуктыны, со понна музъем ми вузаломы. Нялтас вераса, ми ар но ӝыны талэсь азьло музъемен вузкарон пумысен референдум ортчытӥм. 90 процентэз пала калык пумит луиз сое нимаз ваньбур каронлы. Соин ик ми кулэтэм сюлмаськон утчаса ум улӥське. Таин валче вераме потэ ваньбурен герӟаськем мукет ужпумъёс сярысь но. Белоруссиын уг сурало приватизациез но "прихватизациез". "Прихватизация" шуон ми дорын дугдытэмын, самой чурыт амалъёсын быдтэмын, шуыны луоз. Калыклэсь улонзэ начармытон понна государственной ваньбурез вузан милемлы кулэ ӧвӧл. Со дыре ик нокин уг люкеты ужбергатонлы. Кылсярысь, та удыс миым республикаысь промышленностьын 40 процентсэ ваньбурез поттӥз. Пумен кужмоя пичи но шоро-куспо ужбергатон. Огъя вераса, рыночной экономика азинске. Но выльысь верасько на, азинске государство радъям улсын, законъёсты чакласа. Быръем сюресмы шонер шуыса возьматэ калык хозяйстволэн берло аръёсы азинскемез. Экономикаын ӟеч воштӥськонъёс луонлык сётӥзы социальной удысэз но умоятыны. Со котькуд коркан, котькуд семьяын шӧдӥське. Милям странаямы дыраз сётъяло бюджетникъёслы уждун, пенсиос, пособиос но стипендиос. Миым 30 процентлэсь трослы кулэсмиз ужлы ёрмисьёслэн лыдзы. Туж шер луэ ваньбур поттон удысъёсын уждун ӝегатон. Ваньмыз со потэ экономикаез азинтон бордысь, государстволэн ас тодэмезъя косъяськемез бордысь уг. Страна ужа но улэ огсыр, керӟегъяськытэк, огыр-бугыр выронтэк. Белоруссиысь кивалтӥсьёс но, калык но азьвыл сямен ик мылкыд каро котыр ласянь юнматыны Россиен кусыпъёсты. Белорус калык ас улонзэ весяклы герӟаз Россиен. Со асьмелэн азинсконмылэн аспӧртэмлыкез шуыны луоз. Советской Союзын республикаос котькудӥз ас удыссэ валтыса но ог-огзылы юрттыса улӥзы. Али но сое лыдэ басьтоно, уг яра куштӥськыны азьвыл ӟеч сямъёслэсь, амалъёслэсь. Юнме супыльтон со: Белоруссия но Россия ог-огзы чотын, котькудӥз аслыз нимаз пайда поттыны турттэ шуыса вераськонлы. Асьме странаос куспын вузкарон арысь аре паськыта. Соин ӵош ик огазьын быдэсъясько экономической, социальной, научной но культурной программаос. Странаослэн кусыпъёссы паськытало регионъёслэн меӵак кусыпъёссы чотын но. Соос оскымон инъет кылдыто кема дыр ӵоже уртче ужанлы. Кык-куинь ар талэсь азьло ми Россиысь ӧжытэныз субъектъёсын кусып возимы вал. Табере - 50-лэсь уно регионъёсын. Тачак нимаз предприятиос но меӵак кусыпъёс тупато ини, кылдо валче компаниос, финансово-промышленной группаос. Соос пӧлын - "Формаш", "Гранит", "БелРусАлто". Туэ чакласькомы кылдытыны валче ужась эшшо ньыль компания - "Белорусский автобус", "Радионавигация", "Развитие электронных отраслей" но "Межгосмитис". Со ик вань зэмос уртче ужан, кудӥз сётэ огъя пайда. Мон сямен, дыр вуиз ини малпаськыны куд-ог быдэс удысъёсты огазеяны но соосын кивалтонъя огъя союзной органъёс кылдытыны. Асьмелэн огъя экономической азинсконмы трослы потэ со бордысь, кыӵе югдур кылдэ СНГ-ын. Ватонэз ӧвӧл, туннэ солэн экономической но политической пуштросэз туж ляб. Содружество, жаляса верано луэ, синпӧетлы укша. Пумиськылӥськом, вераськиськом, кенешиськом, нош пайдаез уг шӧдӥськы. Котькудӥз ас сярысьтыз гинэ малпаське. Оскем уг поты вылэм, СНГ кужымзэ, возьматыса вуытэк ик, ыштӥз шуыса. Мон малпамъя, со политикъёслэн янгышсы, нош ыштонъёс адӟе огшоры калык. Паймоно кадь югдур пӧрме: дуннеын СНГ-е пырись странаосын рос-прос уг лыдъясько, нош странаослэн кивалтӥсьёссы сое кылымтэ-адӟымтэ карисько. Ярам, соос кӧня ке дыр ӵоже эркын улозы ик. Но отӥяз одно ик кужмо государствоослэн зӥбет улазы шедёзы. Огнад, эшъёстэк, туала дуннеын кема уд возиськы. Соин ик асьмелы уртче возиськоно, огинын асьмелэн кужыммы. Советской Союз куашкамен валче калыкъёсмылэн дауръёсын юнмам кусыпъёссылэн быремзы туж вӧсь кариз миллионъёсын адямиосты. Со люкиськон кунгожъёсты гинэ ӧз, адямиослэн сюлэмъёстӥзы ортчиз. Умой валаськомы кадь сое, но со дыре ик ӧжыт ужаськомы огазеяськон понна. Али котькудӥз но юа, дыр, аслэсьтыз: мар меда кароно вал странаын югдурез ӧжыт коть умоятон понна? Кызьы быдтоно ужлы ёрмонэз, уждун ӝегатонэз, дугдытоно экономикалэсь куашканзэ? Нырысь ик, утёно рынокез, дурбасьтоно предприятиослы. Одно ик радызъя тупатоно Западэн вузкаронэз, миллиард манетлы отысь вуз басьтӥд - сомындалы ик аслэсьтыдзэ солы келя. Трос верасько эркын рынок сярысь. Нош Запад асьмеды квотаосын пачкатэ. Соос котькӧня асьме дорын мед вузкарозы, нош тон мултэссэ эн ик дӥсьты. Кыӵе со эркын вузкарон? Умойтэм югдур со. Политикаын но, экономикаын но ваньмызлэн огкадь правооссы но луонлыкъёссы мед луозы. Со понна асьмеос ваньмы огазьын нюръяськыны кулэ. Малпасько, та форум выль кужым сётоз асьме странаосмылэсь кусыпъёссэс юнматонлы но азинтонлы. * Кӧня ке чурен Шурдыт ивор вуиз Балезиноысь. Отын нефтебазаын тупатъян ужъёс мыныку пуштӥз бензинэн цистерна. Шудтэм учыр дыръя кык мурт сутскыны шедиз. Одӥгезлэн мугорыз зол ӝуаз. Сӧсыръёслы юрттэт сётыны вертолётэн ожоговой центрысь специалистъёс вуизы. х х х Та нуналэ ик тодмо луиз мукетыз шудтэм учыр. Москваысь радиолэн ивортэмезъя, аслаз дачаяз виемын Россиысь Госдумалэн депутатэз генерал Лев Рохлин. Л. ПЕТРОВ. Редакциын пумиськон Та нуналъёсы редакциын пумиськон ортчиз СБС-АГРО Банковской группалэн Удмуртиысь ёзэзлэн директореныз Игорь Евгеньевич Останинэн. Кызьы тодмо, та банк туннэ нуналлы одӥгез пыд йылаз йыг-йыг сылӥсез - СБС-АГРО пыре странаысьтымы вить тужгес но бадӟым банкъёс пӧлы. Нимаз адямиослы, предприятиослы, организациослы пӧртэм пумо юрттэт сётэм сяна, СБС-АГРО-лэн Удмуртиысь ёзэз ӵош ужан пумысен огкыл гожтӥз Удмурт Республикаысь Правительствоен. Валче ужамлэн емышъёсыз туннэ нуналлы шӧдӥсько ни. Газетлэн матысь номераз лыдӟисьёсты пыр-поч тодматом СБС-АГРО-лэн Удмуртиысь ёзэзлэн ужаменыз. Л. МАЛЫХ. Ву - эш, ву - тушмон Котькуд гужем тыметъёсы но шуръёсы уно адямиос выё. Али но югдур кӧшкемыт. Таяз аре гинэ вуын ньыльдон пала адями быремын. Соос пӧлысь тросэз пиналъёс. Ортчем арняе ик вуэ куинь мурт выиз. Тыметъёс татчыозь чылкытатымтэ. Соослэн пыдэсъёссы сузямын ӧвӧл. Коньдон ӧжыт висъямен, уг окмы шудтэм учыръёслэсь утён тӥрлык. Правительствомы туэ кутӥз вал Калыкез ву вылын утёнъя огазеяськонъёс кылдытон сярысь постановление. Соос Воткинскын но Каракулино ёросын сяна усьтэмын ӧвӧл. Мукет службаос но рос-прос дасямтэ. Та ласянь югдур тужгес но секыт Дэриын но Иж карын. Сарапулын таӵе служба кык ар уг ни ужа. Уго вылӥ классъем водолазъёслэн уждунзы туж ичи - 120 - 180 манет гинэ. Лариса ОРЕХОВА. Кытын меда пыдэсыз? Син азямы куашка Россилэн экономикаез, нуналысь нуналэ уродме калыклэн улон- вылонэз. Россиысь Правительстволэн котыр ласянь чакламтэ реформаосыз уллане кыско ваньзэ сямен улосъёсты но. Югдур пӧртэм ӧвӧл Удмурт шаерамы но. Кызьы потоно та шуг-секытысь, кудзэ сюресэз быръёно, ма кароно азьланяз калыкмылы? Таӵе секытэсь юанъёслы валэктонъёс сётоно луиз Кун Кенешлэн Тӧроез Александр Волков 1-тӥ июле Камбаркаын ортчем пумиськонъёсыз дыръя. Элькунмылэн кивалтӥсез одӥг юанлэсь но ӧз палэнскы, ваньзэ валэктӥз шонер, валамон, номыре ватытэк. Ассэ шонере поттыны ӧз тыршы. Кам дурын сылӥсь Камбарка город сярысь табере быдэс дуннеын тодо ни, луоз. Нош "данэ" потӥз со отысь складъёсын возиськись кышкыт химической ож тӥрлыкен - люизитэн. Сое быдтон пумысен вераськонъёс кемалась мыно. Государство ласянь кутэмын ни кӧня ке программаос, постановлениос. Огкылын вераса, люизитэз быдтонлы дасяськон ужъёс мыно. Мыно, но туж ляб. Тырмыт уг висъяськы на коньдон. Собере завод пуктэмлэсь азьло та ужлы ачиз город но дась луыны кулэ. Нырысь ик, химической оружиез быдтон кышкытлык медаз кылдыты котырысь инкуазьлы, адямилэн тазалыкезлы. Сыӵе технологиос дасян бордын али ужало странаысьтымы институтъёс, военнойёс. Но тужгес но бадӟым саклык висъяны луоз городэз дасянлы: улон интыос лэсьтонлы, газ но ву, мукет коммуникациос кысконлы но трос мукетызлы. Александр Волков нырысь ик пумиськылӥз ёрос больницаын ужасьёсын. Огъя Россиын но Удмуртиын югдурен тодматскыса, со пусйиз: - Котькудӥзлэн адямилэн сюлэмыз одӥг кадь висе. Мон ӟеч тодӥсько тӥлесьтыд висёнъёстэс. Со - ӝегатыса уждун тырон, пенсиос но пособиос дыраз сётъян, ужан но улон интыос висъян. Россилэн Президентэз Борис Ельцин, алигес телевидение пыр вераськыкуз шуиз вал, странаямы нокыӵе кризис ӧвӧл. Кызьы ӧвӧл? Котькудӥз семья, котькудӥз адями шӧдэ ук ялан куашкаськомы шуыса! Россилэн Правительствоысьтыз егит реформаторъёс ма но уг даурто. Нош улонмы ялан уродме гинэ. Малы коньдон уг тырмы шуиськоды? Малпалэ асьтэос: Правительство асьмелэсь бюджетмес алигес 15 процентлы "вандӥз". Манетъёсын ке верано, со трос коньдон. Со юн шуккет сётоз асьмелы. Шуиськомы, экономикамес рынок амалэн лэсьтӥськомы. Со матаз но ӧвӧл. Тазьы ужаса асьмеос кыдёке ум вуэ. Асьмелы трос вузъёс поттоно. Юрттэт курыса, Россия ялан йыбыртъя Западлы. Но со коньдонэз асьмеос сиыса-юыса быдтӥськомы. Али 40 процентсэ сиён-юонэз кунгож сьӧрысь ваиськом, мукет вузъёсты - ог 60 процентсэ. Нош асьмелэн предприятиосмы сыло. Россия азьло аръёсы мынды ик вуза нефтьсэ но, газзэ но. Нош кытын со коньдон? Озьыен, коньдон кытӥ ке берга, кӧня ке дасо муртэ узырмытэ. Сыӵеос сюлмаськозы шат огшоры адямиос сярысь? Россиез ӝутон понна кулэ нимысьтыз национальной программа. Собере Александр Волков пумиськиз лэсьтӥськисьёсын. Соослэн но юанъёссы лэчытэсь вал: ку ужаны кутском? Ма кароно мултэс адямиосын? Ку тырыны кутскозы уждун? Али Камбарка ёросын улӥсьёс пӧлын 11 процентэз ужтэк кылемен лыдъяське. Но строительёс ужтэк воксё уз кыле, дыр. Тани али городын пуктӥське 60 квартираен корка, общежитие. Кызьы пусйиз Александр Александрович, Госсовет но Правительство уртче ужало, республикаез шуг-секытысь поттон понна. Россиысь улосъёс пӧлын экономикаын азинскон ласянь Удмуртия 1996-тӥ арын мынэ вал 32-тӥ интыын, кылем арын со 25-тӥ интые ӝутскиз. Но туэ вить толэзьскын республикаямы вузъёс поттон 3 процентлы кулэсмиз. Элькунмылэн кивалтӥсез озьы ик пумиськылӥз предприятиослэн, организациослэн но учреждениослэн кивалтӥсьёсынызы. Ужан нуналзэ Александр Волков йылпумъяз 136-тӥ войсковой частьын.Ӵапак отысь солдатъёс но офицеръёс возьмало люизитэн складъёсты. Служить карисьёс но соослэн семьяоссы трос юанъёсын вазиськизы лыктэм куноослы. Соос но герӟаськемын туннэ- ӵуказе улон-вылон ужпумъёсын. Озьы ик Александр Александрович пумиськылӥз Швециысь химической ож тӥрлыкез быдтон ужпумъёсъя специалистъёсын. Александр Волковен ӵош пумиськонъёсы пыриськизы Камбарка ёрос администрацилэн тӧроез Владимир Коняшин, "Удмуртавтодор" кун предприятилэн кивалтӥсез Александр Соловьев, химической ож тӥрлыкез быдтонъя федеральной программалэн кивалтӥсезлэн воштӥсез армиысь генерал-майор Владимир Ульянов, мукет адямиос. Н. БАЙТЕРЯКОВ. Снимок вылын: Александр ВОЛКОВ Камбаркаын улӥсьёсын пумиськонъёс дыръя. Н. ГЛУХОВЛЭН туспуктэмез. Ӵуказе тодмо луоз Кызьы тодмо, Завьялово районын куатьтон процент пала удмуртъёс уло, соин ик паймонэз ӧвӧл аскивалтонъя ёзъёсы депутатэ кандидатъёс пӧлысь ӝыныез асьме выжыысь ӵектэмлы. Тани Ягул палан но тросгес удмуртъёс. Депутатэ ӵектэмъёс пӧлысь одӥгез удмурт воргорон. Со гыбед дасянъя "Сокол" предприятилэн кивалтӥсез Владимир Вахрушев. Та йӧно пиосмурт туж шаплы. Сокол посёлокын сое ваньмыз гажало: удмуртъёс но, ӟучъёс но, бигеръёс но. Владимир Аркадьевич котькинэн одӥг кыл шедьтэ, соослэсь сюлмаськонъёссэс вала. Мукетыз кандидат Сергей Клабуков - ӟуч. Со исправительной колонилэн директорез. Ӵуказе тодмо луоз ни, кин пала калык дурбасьтоз. Н. ВОЗИСОВ. ВИТЁ СЮРЕСЪЁС Берпуметӥ гырлы куараос люкизы пиналъёсты школаен, яратоно дышетӥсьёсынызы. Мынам но адӟеме потӥз та шулдыръяськонэз: сюрес вуттылӥз Алнаш ёросысь Варзи-Ятчи школае (ачим но татын дышетски но будӥ). Люкиськон ӝытлэн кутсконаз ӟечкыланъёс вал. Пиналъёслы аттестат сётъязы. Уно ӟеч кылъёс веразы егитъёс яратоно дышетӥсьёссылы. Нош бамъёсты пылатъязы ӧтьымтэ синвуос. Собере быдэс ӝыт шулдыръяськон вал. Дас одӥг час бере нылъёс но пиос шур дуре мынӥзы. Котькудзы чебер но мусо адскизы. Школалэн директорезлэн, немец кыллы дышетӥсьлэн Ольга Михайловна Сорокиналэн верамезъя, туэ дышетсконзэ йылпумъяз куамын куинь адями. Соос пӧлысь дас сизьымез "ньыльлы" но "витьлы" дышетскиз. Куинезлэн (соос - нылъёс) аттестатаз одӥг гинэ "ньылез". Пиналъёс туж тыршисесь. Туала синмын учко улон шоры. Асьсэлы асьсэос оско. Дышетсконын Варзи-Ятчи школа ноку бере уг кыльы - ёросын котьку кыкетӥ интыын луиськом. Школазэс йылпумъяса, одӥгъёсыз малпало журналист луыны, мукетъёсыз - историяя, биологияя, суреданъя дышетӥсь. Пиос пӧлысь тросэз ярато техникаез. Куд-огез нылъёс туртто вуриськись луыны. Котькуд пинал школае шумпотыса мед лыктоз. Доразы кадь, шулдыр, ӝикыт, капчи мед луоз татын - со сярысь туж сюлмаськиськом. Дышетӥсь но матысь эш мед луоз. Урокъёсын керетонъёс медам кылдылэ. Нылпиос сярысь туж сюлмаське директорлэн дышетон удысъя воштӥсез Людмила Семеновна Китова. Пиналъёсын вераськеме бере ик шӧдӥ: туж юн сямо адямиос вылӥллям соос. Шуг- секытъёслэсь уг кышкало. Нош азьланяз егитъёсты вите аспӧртэмлыко улон. Ӟеч сюрес тӥледлы, нылъёс но пиос. Котьку оскелэ ас кужымдылы! Лариса ОРЕХОВА, Удмурт кун университетын дышетскись. ЙӦЛ ШУР ВИЗЫЛА Машина возисьёс йыркурен кадь верало "Удмуртавтодор" огазеяськон сярысь: налогъёсын пачкатыса возё, копак узырмизы ини. Озьыез озьы, дыр, но "Удмуртавтодорлэн" "узырез" кинлы ке ӟечен берытске. Со, кылсярысь, кӧня ке арзэ юрттэ ни Пичи Пурга ёросысь "Дружба" эштослы. Соин ик та эштослэн кивалтӥсез Владимир Григорьевич Марков, тау карон мылкыдзэ ватытэк, "чиньыяз тыре" сюрес лэсьтӥсьёслэсь но кивалтӥсьёссылэсь Александр Васильевич Соловьёвлэсь ӟеч ужъёссэс. - Кылем арын "Удмуртавтодор" пудо сиёнэз векчиятыны полощадка лэсьтӥз. Вӧлдозы на кыед люканы асфальтлэсь площадка, сю квадратной метръем. Туэ "автодоръёс" ДТ- 75 трактор кузьмазы, 30 тонна кизер эстӥськон сётӥзы (дунтэк), электрокужым понна 80 сюрс манет тыронмес "кысӥзы". Автодорожникъёс ик ӝыны гектар тыметмылы инты донгазы-сузязы. Гуртын улӥсьёс карп но мукет чорыгъёслы шумпото ни. Собере эштос тӧро нимысьтыз пусйиз: - Ӵапак туннэ нырысь "емышъёссэ" сётэ йӧллэсь сиён-юон поттон (молочно- перерабатывающий) цех. Кык тонна йӧлэз пырпоттыны чакламын. Нош азьланяз суткалы быдэ вить тонна йӧлмес уже кутозы. Ӵапак таӵе учыр кемдӥз бере, кызьы, пе, выль цехе кожатэк? Гурт пумын (Аксакшур сярысь вераськон мынэ) пурысь мастерскоен артэ ӝикытак гинэ сылэ тӧдьы буям из юрт. Со "Удмуртавтодорлэн" "Дружба" эштосын пуктэм выль цехез. Пушказ пыриськод - жур вазе, котыр бадӟым но пичи ӵанъёс, гумыос, кӧня ке тӧдьы халатэн ужасез адӟиське. Тодматскиськом Глазовысь акциосын "Оскон" огазеяськонысь технологен Наталья Юрьевна Сувороваен. Дас кык мурт татын ужалоз, шуэ со, нырысь-валысь ӝыны ар пала дышетскизы. Милям огазеяськонмы вань тӥрлыкез, оборудованиез пуктон, герӟан ужен выриз. Тани туннэ ужмес-пӧрмес эскерыса утчалом ни, 700 литр йӧлэз кузятом. Сертификацилы дасяськиськом. Ачиз Наталья Юрьевна чырсатон висъетын маке "ӵын поттэ" (отчы пал синмын гинэ учкыны лэзё). Но котыр цехез возьматыса валэктӥз: - Тани йӧлэз басьтон, чылкытатон (пастеризовать карон) участок, сепараторъёс (соос ӵашето) йӧлвылэз вуттон-чырсатон ваннаос, кузятэмез возён бадӟымесь ӵанъёс, вӧй шуккись, фасовать карись автоматъёс... Озьыен, валаны луэ, татын поттозы пакетъёсын йӧл, йӧлвыл, нӧкы вӧй, кузятэм (творог) но, кызьы шуизы, азьланяз адыгей сыр луоз на. Эштослэн кивалтсез В. Г. Марковлы ке осконо, гуртлы тазьы юрттэмез "Удмуртавтодор" понна нокыӵе пайдаен ӧз берытскы на. Нош хозяйстволэн ваньмыз сямен поттэм йӧлэз мултэс сюлмаськонъёстэк, ыштонъёстэк татчы вузаськоз. Ваче кусыпъёссэс - пайдазэ но, аламазэ но - кивалтӥсьёс асьсэос умой тодо. Нош гурт калыклы усьтӥське адӟылымтэ суред: "йӧл шур" пӧрме чылкыт йӧлэн, йӧлвылэн, вӧен, твороген, сырен пуйыослы но бинетъёслы. Т. Петрова. КУСЫПМЕС ГЕРЗАСЬЁС Газетчиосты но лыдӟисьёсты герӟало почтаын ужасьёс. Газетъёслы гожтӥськон ялэмын ке, редакция одно ик соос доры юрттэтэн вазиське. Таяз шутэтскон нуналъёсы Федерациын почта кусыпъёсъя нимаз служба кылдытэм дырысен тырме вить ар. Зэм, со трос ӧвӧл ай. Управление выль сямен нимаськыны кутскиз алигес гинэ. Но почталэн кылдэмез дырысен трос дасо аръёс ортчизы ини. Почтальонъёс али но ялан сюрес вылын, соос лыдӟись дорын котьку дуно куноос луо. Праздник азьын ми вуылӥм та управленилэн Завьял ёросысь Изгуртысь (Каменное) почтаяз ужасьёс доры. Ӵапак та отделение пырись гуртъёсын улӥсьёс быдэс ёросъя ваньмылэсь трос басьто "Удмурт дунне" газетмес. Газетэз вӧлмытыны ӟеч юртто Валентина Патракова, Ирина Егорова, Екатерина Пестерева, Антонина Захарова. Чупрес нылкышноосын кивалтэ Татьяна Гущина. Почтаын ужасьёс оско, туэ но "Удмурт дуннеез" лыдӟисьёслэн лыдзы уз кулэсмы шуыса. Уждунэз но пенсиез гинэ дыраз мед тырысалзы. Таин валче тодады вайытӥськом, гажано лыдӟисьёсмы, вуоно ар понна газетмылы гожтӥськон кутскиз шуыса. Гожтӥськон радъямын шаерысьтымы вань почта ёзъёсын. Ми ӟечкыласьком почтаын вань ужасьёсты нырысетӥ пичильтык юбилеенызы. Кусыпмы уката но матын мед луоз! Н. Байтеряков. Газетъёс вуизы. Лыдӟись доры дасясько Антонина Захарова но Валентина Патракова. Почталэн кивалтӥсез Татьяна Гущина но почтальон Ирина Егорова. Дас скал интые - одӥг! Лымшор Африкаысь Западной Кейн улосысь Людвиг ван Девентер бадӟым куректонэ усемын: кулӥз солэн данъяськоно скалэз - "Суперзвезда 9405". Кылем арын сӥзьыл та ветыл шуак трос йӧл сётыны ӧдъяз. Нуналаз 100 литрлэсь трос люкаськылӥз. Скаллэн кузёез сюлмаськыны ӧдъяз, угось бускелезлэн фермаяз скалэз, 90 литр йӧл сётэм бераз, сюлэмыз путыса кулэм. Соин ик Людвиг ван Девентер, "Суперзвездаезлэсь" йӧлзэ кулэстон понна, дуно пудозэ ӧжытгес сюдыны ӧдъяз. Скал нуналаз 35 килограмм концентрат но люцерна сие ке вал, ваньзэ тае 10 процентлы кулэстӥзы. Но... йӧл ӧз ичиёмы, ялан будӥз но будӥз... Нош одӥг пол паймымон скал 124 литрлэсь ятыр вылӥ дунлыко йӧл сётӥз. Озьы дуннеысь рекорд 10 литрлы азьпалтэмын вал... Таӵе скал асьмелэсь 10 скалмес воштысал ук! Гажано эшъёсмы! Вуоно арняысен кутске "Удмурт дуннелы" Ижысь киоскъёс пыр 1999 арлы гожтӥськон. "Информпечатьлэн" вань киоскъёсаз тӥ быгтӥськоды та ужез быдэстыны. Дунъёс таӵеесь: 30 манет - газетэз басьтоды ар ӵоже арняяз куинь пол. Толэзяз огпол тӥледлы сётозы "Твой дом и сад" приложенимес. 12 манет - котькуд пятницае басьтоды телепрограммаен газетмес. Туэ нырысетӥзэ ялӥм "Твой дом и сад" газетлы нимаз гожтӥськон. Дуныз бадӟым ӧвӧл - 12 манет. Юанъёсты кылдӥзы ке, жингыртэ редакцие. Тыршом юрттыны. Шокыӵ Палёмод но тӥни - Вася, коньдонэд жаль ӧвӧл-а, мар-а? Малы сокем дуно сиськон посуда басьтод? - Мон, юлтошекыдёке учкисько. Монэ табере кышное посуда миськон котыре кожаны уг лэзьы. *** - Доктор, мон улэп кылё-а? - Нош ма пайдаез... *** Кудӟем мурт пуке автобусын. Дораз вуэ пал пыдо адями но вазиське: - Пие лэзь вал интыяд пуксьыны. Мынэсьтым пыдме 43-ын вандӥзы. - Эн пӧяськы. Мон али гинэ 43-тӥ автобусысь васьки. Ӧвӧл отын тынад пыдыд. Шӧкыч Палёмод но тӥни - Техник эш, мон куинетӥзэ ни вазиськисько тӥледлы вӧлдэтысьтымы ву вия шуыса. - Тон мар, - техник азь чиньыеныз бергатӥз пельдор котыраз, - таӵе-а, мар-а? Синдэ золгес усьты, педлон куинетӥ нуналзэ ни зор кисьтэ. *** - Вася, малы мылкыдыд урод кадь? - Толон квартирамес качаллям. - Трос-а нуиллям? - Телевизормес, видеомагнитофонмес, кышноелэсь зарни арбериоссэ поттӥлям. Таосыз сокем жаль ӧвӧл. Куректӥсько кышноелэсь ватэм макмыр веськатон коньдонэ понна. ДУНЪЁС КУЛЭСМОЗЫ Котькинлы тодмо: палэнысь воштос ёзъёсын бичам автомашинаослэн но мотоциклъёслэн дунзы трослы вылӥын луэ. Дунъёсты кулэстон вылысь, "Ижмаш" акционер огазеяськонын ма но со лэсьтыны ӧдъязы ни. "Ижмаш-Мото" заводлэн 452-тӥ цехаз та дыре ог 16 деталь потто ни. Со пӧлын ИЖ- 2126 автомобильлы барабан, раздаточной коробка, мотоцикллы модульёс но мукетыз. Конструкторъёс но технологъёс выль ёзъёс дасянъя ужъёссэс азьланьто. Б. Никитин. Сюрес жадьытэ ке но... Операя но балетъя кун театрысь артистъёс инвожо толэзе ӵем потазы сюрес вылэ: 5 июньысен 28 июнёзь спектакльёссэс возьматъязы Воткинск, Сарапул но Глазов городъёсын. Куд-ог нуналъёсы кык спектакльёс но сётоно луылӥз. Нылпиос шумпотӥзы "Белоснежка и семь гномов" выжыкыллы. Учкисьёслы кельшизы "Бабий бунт" музыкальной комедия, "Марица" но "Летучая мышь" опререттаос. Сарапулын но Глазовын улӥсьёс адӟизы театрлэсь выль ужъёссэ но - Делиблэсь "Копелия" балетсэ, В. Ильинлэсь но В. Лукашовлэсь "Дамских дел мастер" музыкальной комедизэс. Со сяна, Селта но Сюмси ёрос центръёсын пуктэмын вал "Бабий бунт" спектакль. Сюрес жадьытэ ке но, учкисьёсын пумиськон выль мылкыд но сётэ. Операя но балетъя театрысь артистъёс кутскизы Г. Корепанов-Камскийлэсь "Чипчирган" опера-балетсэ дасян борды. В. Лагунов. Кытын тӥ, "выль удмуртъёс"? Секыт вакытэз чидано луо али удмурт искусствоын но культура удысын ужасьёс. "Туэ милям гастрольёсмы ӧвӧл," - шуэ "Италмас" ансамбльлэн кивалтӥсез, Россиысь но Удмуртиысь калык артист Анатолий Мамонтов. Зэмзэ но, туэ чиньыен лыдъямон гинэ концертъёс возьматэмын. Кылсярысь, "Италмас" Вавоже вуылӥз Куӟебай Гердлэн вордскемез дырысен 100 ар тырмонэз пусъёнэ. Ветлӥз Кезэ, Зурае, Завьяловое. Мар луоз отӥяз - шуг вераны. Дано коллективез гуртъёс чидатэк витё. Нош ансамбльлэн котькытчы вутскыны луонлыкъёсыз ӧвӧл. Коллектив бадӟым, кулэ автобусъёс, бензин. Нош коньдон ӧвӧл. - Кунгож сьӧры потаны мон воксё уг малпаськы ни,- веранзэ азьланьтэ Анатолий Васильевич.- Нош ӧтисьёс трос. Вуо соос Франциысь, Португалиысь... Ма карод, сюлэмъёсмес гожтэтъёсын гинэ буйгатыны кыле на. Ӧвӧл удмуртъёс пӧлын узыр ужбергатӥсьёс, банкиръёс. Л. ПОСТНИКОВА. МАИН ЭМЪЯНО СУТСКЕМЕЗ? "1997 арын нылылэн 9 толэзьем пиез пӧсьвуаськыны шедиз. Городысь сутскемъёсты эмъян центрын 5-6 нунал возьыса, сое доре лэзизы. Гуртын мар карыны паймиськом - макесъёсысьтыз бинетъёссэ вошъяно ке, чир-р бӧрдэ. Соку тодам лыктӥз гуртысьтымы ик Лизапайлэн эмъян амалэз. Мунчо эстыса, пимес веникен пыртыны нуим. Асьмеос ум дӥсьтӥське, но талэсь урод уз ни луы шуыса, сутскем интыоссэ чылкыт кутэтэн шобыртыса, выль веникен пыртӥ. Пичи пимы буйгаз, уйзэ но шӧдылытэк кӧлӥз. Собере нуналлы кык пол мунчое нуллӥм. Пимы ӝог бурмиз. Сутскемез эшшо тазьы эмъяны луэ на: одӥг пуньы нӧкы вӧез курег пуз тӧдьыен сураса шукконо. Со суретэн сутскем бервылъёсты зырано". Л. Тепина. Завьялово черкогурт. Редакцилэсь. Людмила Андреевналэн эмъян амалъёсыз сярысь газетэ гожтон азьын ми врачен кенешим. Тани мар шуиз та пумысен 1-тӥ республиканской больницаысь сутскемъёсты эмъянъя отделенилэн кивалтӥсез Михаил Семенович ГОРДОН: - Людмила Андреевналэн эмъян амалъёсаз номыр сокем кышкытэз но, ушъяськымонэз но ӧвӧл. Но калыкын вӧлмем амалъёс мур сутскем интыосты ляб бурмыто. Озьы эмъяны луэ нырысетӥ, кыкетӥ степенё сутскемъёсты гинэ. Нош зол сутскемъёсты бурмытыны быгатозы хирургъёс гинэ - операацитэк нокызьы уз йӧналэ. Соку висе быдэс сӥль-вир, лябӟе сюлэм, пуш ёзъёс. Соин ик, сутскемез сяна, эмъяно быдэс мугорез 1989 арын мон Уфаын эмъяй шудтэм учыре шедем муртъёсты (соку кык поезд ваче шуккиськыса, трос адями бырыны шедиз, тросэз сӧсырмизы, сутскизы). Тӥни соку туно-пеллёос митингъёс люкаллязы, висисьёсты эмъяны асьсэлэсь амалъёссэс ӵектӥзы. Калыкез буйгатон понна6, лябгес сутскемъёсты эмъяны соосты лэзьылӥзы.Маин но эмъяны ӧз выре - кин чаен, кин курег пузэн, кин кыӵе ке кӧйёсын-вӧйёсын. Но зол сутскемъёсты соос нокызьы но эмъяны уз быгатэ. Соин ик тыршонэз но овӧл висисез дорын эмъяны: со яке кулоз, яке сӧсыр кылёз. - Нош больницаын ваньзэ утьыны быгатӥськоды-а? - Ум. Араз 20-30 мурт кулэ. Кудӥз эгыр кадь вуэ ми доры - сыӵеоссэ утьыны уг луы ни. Но кудӥз чида, бурме - тани али огезлэн висисьмылэн мугорыз 80 процентэз сутскемын - возиське. - Кыӵе нырысетӥ юрттэт сётоно сутскем муртлы? - Сутскемез бурмытыны мунчо нокызьы но уз юртты. Верам учырын пинал ӟигарыз быремысь зӥбломиз, буйгаз. Сыӵе дыръя висёнэз зӥбломытӥсь эмъюм сётоно, сутскем вылэ кезьыт, кот ӵушкон пононо. Лябгес сутскем ачиз бурмоз, нокыӵе эмъюм но (али реклама пыр туж трос ӵекто пӧртэм мазьёсты, бальзамъёсты), бурмонэз ӝогомытыны уг юртты. Вераськиз З. Рябинина. НУНЫ ПУШКЫН НУНЫ Кылем арын Испаниысь одӥг крестьян кышномуртлэн Кончита Кресполэн Роза Мария нылыз вордӥськиз. Вож нунылэн укыр бадӟым кӧтыз врачъёсты паймытӥз. Пичи дыдыез УЗИ-е эскерыны нуизы. Нылашлэсь "бадӟым кӧто" луонэзлэсь мугзэ тодыса, эмъясьёс воксё шулӟектӥзы. Розалэн кӧтаз пичи гинэ адями вылэм на. Нылашлы соку ик операция лэсьтӥзы, кӧтысьтыз пичи комоксэ, нырысь будон толэзьёсаз ик кулэм сузэрзэ поттӥзы. Удмуртиын - Германиысь ужбергатӥсьёс Шаерамы 9 но 10 июле улӥз Германиысь Экономикая федеральной министерстволэн бадӟым делегациез (30-лэсь трос). Соин кивалтӥз татысь экономикая министрлэн воштӥсез Др. Ханс Шилль. Делегациын вал пӧртэм удысъёсысь но предприятиосысь ужбергатӥсьёс, бизнесменъёс, банкиръёс, журналистъёс но мукетъёсыз. Огъя вераса, дорамы ветлӥзы "Крупп", "Алькатель", "Ферростаал", "Филиис", "Сименс", "Тиссен" фирмаосысь адямиос. Кыдёкысь куноосмы тодматскизы республикаен, ветлӥзы промышленной предприятиосы, пумиськизы Удмурт Правительстволэн Тӧроеныз Павел Вершининэн, "котырес ӝӧк" сьӧрын вераськизы Удмуртиысь ужбергатӥсьёсын но предприятиосысь коммерческой ужен вырись кивалтӥсьёсын. Асьме доры лыктэмлэсь азьло делегация вуылӥз Архангельске, Норильске но Уфае. Кивалтӥсьсылэн ивортэмезъя, тӥляд шаереныдыми ми кемалась кусыпъёс возиськом но ӵош ужанмес уката паськытатыны чакласьком. Кылсярысь, миым Германия но Удмуртия куспазы 56 миллион долларлы вузкаризы. Со пӧлысь 51 миллион импорт (отысь вузъёс ваемын) луиз, нош экспорт (отчы келямын) - 5 миллион долларлы. Республикаямы али Германиен ӵош (СП) 9 предприятиос ужало. Соос пӧлысь тодмо ни "Ижтел", "Сименс", "Гюнтер- Иж" но мукетъёсыз. Берлоез СП поттэ теплообменникъёс. Тае радъяны инвестор "Ганс Гюнтнер" 1 миллион немец марка коньдон висъяз ни. Азьланьын Германиен кусыпъёсмы уката юнмалозы шуыса, осконмы бадӟым ӧвӧл. Соос дорамы вуылӥзы шаеренымы мургес тодматскыны. Вылаз ик, Удмуртиысь. Мукет кунъёсын кусыпъёсъя министерство делегацилэсь ужзэ пайдаё радъян сярысь тырмыт ӧз сюлмаськы. Я бен, улыса адӟом. Г. РОМАНОВ. ВАЛЭКТЭ ЮРИСТ Сэрегез нуэ адвокат Лилия Шкляева Шонере поттозы-а пукем муртэз? Песянае 1951-тӥ - 1953-тӥ аръёсы пукиз РСФСР-лэн Уголовной кодексэзлэн 4-тӥ ёзэтэзъя (статьяезъя) - кунлэсь (государстволэсь) ваньбурзэ лушкамез понна. Сое шонере поттыны (реабилитировать карыны) али луоз-а? И. ГРИГОРЬЕВА. 1991-тӥ арын 18-тӥ октябре кутэмын Россия Федерацилэн та ужпумъя 1761-1 номеро Законэз. Со нимаське тазьы: "Политикаын репрессиос дыръя вӧсь карем адямиосты шонере поттон сярысь". Со юрттыны кулэ 1917-тӥ арын 25-тӥ октябрьысен умойтэме уськытэм муртъёслы. Законысь 3-тӥ ёзэтъя шонере поттыны кулэ политикаен герӟаськем мугъёсын сэрен янгыш карем таӵе адямиосты, кинъёс: а) кунлы пумит но музон йыртэмамъёссы понна судэ вуттэмын; б) судлэсь ужзэ быдэсъясь ВЧК пыр, ГПУ - ОГПУ, УНКВД - НКВД пыр, МГБ, МВД, прокуратура но солэн коллегиосыз пыр "комиссиос", "нимысьтыз кенешъёс", "двойка" но "тройка" шуонъёс но музон ёзъёс (органъёс) пыр уголовной ужъёсъя вӧсь каремын; в) административной радлыкъя (порядокъя) ссылкае, высылкае, нимысьтыз висъям интые (поселение) келямын, эрикез шымыртыса кужмысь, соос пӧлын "НКВД-лэн ужась колоннаосаз" ужатэмын, правоос но эрикъёс ласянь музон ласянь шымыртэмын; г) судъёслэн но судъясьтэм (внесудебной) ёзъёслэн решениосынызы йырин психбольницаосы кужмысь эмъяны келямын; д) юнме шорысь уголовной кыл кутон улэ кыскемын но ужъёссы дугдытэмын реабилитациен герӟаськымтэ мугъёсъя; е) политикаен герӟаськем мугъёсъя лыдъямын обществолы кышкыт муртъёсын но судъёслэн но судъясьтэм ёзъёслэн решенизыя люкемын эриклэсь, келямын ссылкае но высылкае кыӵе ке преступление лэсьтэмзы пумысен янгыше уськытытэк. Вылӥ верам законысь 4-тӥ ёзэт шонере поттыны уг лэзьы сыӵе адямиосты, кинъёс пуктэмын кулэезъя, йыртэмамзы пумысен зэмос учыръёсъя. И. Григорьевалэн песянаез зэмен ик лушказ ке кун ваньбурез, сое шонере уз поттэ. Нош со ассэ нокыӵе мугтэк вӧсь каремын лыдъя ке, ачиз, мукет муртъёс яке организациос гожтыны кулэ шонере поттон сярысь курон (заявление). Сое сётоно умойтэм решение кутэм интыысь яке вӧсь карем муртлэн улон интыысьтыз прокуратурае яке югдурез утёнъя отделэ (милицие). Куронэз учкыны кулэ 3 толэзьскын. Шӧкыч ПАЙМОД НО, КУАЛЕКТОД НО Бомжъёслэсь пуныос но кышкало. Зол ик сюлмаськонъёссы яке висёнзы, шуод-а, та воргоронъёслэн. Нырысь шузимо машина басьтымон коньдон утчаса. Нош собере, корт "валзы" кылдэ ик ке, уг валало, кызьы сое йыртэмась-лушкаськисьёслэсь утёно. Та ласянь котькудӥзлэн аслаз амалыз. Тани Ижлэн одӥгаз сэрегаз улон коркаослэсь кӧня ке вамышын гинэ сыло корт гаражъёс. Татӥ ортчыку, я одӥгез, я мукетыз ӧс сьӧрысь кылӥсько лек пуныослэн утэмзы. Машина возьмась ньыль пыдоос уен-нуналэн пытсэтын, шундылэсь ӝужамзэ но пуксемзэ адӟылытэк пуко. Мынам чакламея, сиён но соослы дыраз уг сюры. Бускельмылэн Анатолийлэн но гаражез отын ик. Машиназэ уте кунян быдӟа пуны. Котыраз ветлыны кышкыт. Пурем гинэ ӧвӧл, кесяса куштоз. Лэчыт пиньёссэ ӟар возьматыса, куаразэ поттэ ке, пыдъёс либырало. Ог шутэтскон нуналэ Анатолий, семьяеныз, сад-бакчае мынон вылысь, машинаезлы вамыштӥз. Маке умойтэмзэ шӧдыса кадь, сюлэмыз бырк-бырк! тэтча. Озьы ик вань. Кыдёкысен адӟиз воргорон: гараж ӧсъёс вӧлак усьтэмын. Адямиез кезьыт вуэн пылатӥзы кадь, дыр куалекъяны кутскиз. Гаражез доры кызьы вуэмзэ ӧз вала. Но ма адӟон та? Машина, кызьы валлян пуктӥз, озьы ик интыяз сылэ. "Мазэ ке качазы ке шат?" - номырзэ уг вала Анатолий. Ӧвӧл. Питранъёс но бордазы, мотор котыръёс но ёзнамтэ. "Рекс! - шуэрскиз Анатолий. - Рекс лушкаськисьёсты улляз, луоз. Пиньзэ гинэ бордазы медаз вутты вал, юнме шорысь кыл кутоно луод..." "Рекс, Рекс! Мон доры!" - кесяське Анатолий. Куаразэ кылыса, воргорон доры вуизы гаражъёс котырын ватскыса шудӥсь пиналъёс. "Юнме ӧтиськоды, - вазиз тугаськем йырсиёез пияш. Киыныз возьматӥз гурезь кадь люкам жуг-жаг пала. - Йырыз но пыдъёсыз тӥни отын". "Кызьы?!" - ма вазьыны ёрмиз Анатолий. "Гижлоӟем бамо но бадӟым тушо кык дадайёс сое толон ӝыт вандӥзы, - ог-огзэс азьпалтыны турттыса валэкто пиналъёс. - Эшшо ке милесьтым юазы, кузётэм пуныос но коӵышъёс уг адӟисько-а шуыса. Собере, Рекстылэсь куаразэ кылыса, гараж ӧстэс маин ке бералляса усьтӥзы..." Соку гинэ валаз Анатолий. Толэзьёсын мисьтаськымтэ но мычиськымтэ, котырысьтызы кӧш зын пакись бомжъёслэсь пуныос но кышкало ни, шоразы урдскыны уг дӥсьто. "Эх, Рекс, Рекс! - пыдъёсыз шальтрамен, борддор борды пыкъяськиз воргорон. - Озьыен, сӥльлы пӧрмытӥзы тонэ". З. Рябинина. Г. Д. Красильниковез буре вайыса... 7-тӥ июле 70 арес тырмиз удмурт литературалэн классикезлы Геннадий Дмитриевич Красильниковлы. Солэн улонэз юн герӟаськемын Алнаш черкогуртэн. Татын со вордскиз. Татчы берытскиз, Москваысь литературной институтэз йылпумъяса, Алнашын ик гожтэмын вал тросэз произведениосыз. Соин валче 5 июле та черкогуртын Геннадий Дмитриевичлэн вордскем нуналэзлы сӥзем ужрад ортчиз. Та пумиськонэ ветлӥзы писательёс Олег Четкарев, Анатолий Уваров, Петр Чернов, Геннадий Красильниковлэн сузэрез Мария Дмитриевна Ишматова, наука но культура удысын ужасьёс, писательлэн ӵыжы-выжыосыз, матысь эшъёсыз но Алнашын улӥсьёс. Лыктэмъёс тодазы ваизы Геннадий Дмитриевичен пумиськылэмъёссэс. Котькудӥз вераськись пусйиз солэсь либыт, ужез яратӥсь луэмзэ, туннэ нуналлы тупась ужпумъёсты ӝутэмзэ. Мария Дмитриевна шуныт кылъёс вераз Алнашын музей кылдытӥсьёслы, тодаз ваиз агаезлэсь пичи дырзэ. Ужрадэз дасясьёслэн тыршемзыя, лыктэм куноос кылзыны быгатӥзы писательлэсь пленка вылэ гожтэм куаразэ, кылбуръёссэ. Лыдӟемын вал "Тонэн кылисько", "Вуж юрт" книгаосысь люкетъёс. Алнашысь ветеранъёслэн хорзы быдэстӥз Геннадий Дмитриевичлэсь яратоно кырӟанъёссэ, кудъёсыз ӵемысь кылӥсько вал солэн юртаз. Та юбилейлы ик сӥзьыса, 6-тӥ июле Геннадий Красильниковлэн Ижысь музей-квартираяз ортчытэмын вал пумиськон. Люкаськылӥзы писательёс, тодосчиос. Нош Национальной библиотекалэн краеведениея люкетаз усьтэмын выставка. Учкисьёс тодматско Красильниковлэн книгаосыныз, критикъёслэн со сярысь гожъям ужъёсынызы но газетъёсысь-журналъёсысь писательлы сӥзем материалъёсын. Лариса Постникова. Журналистъёсын пумиськонъёс ЮГДУР КЫШКАТЭ - ГЕНЕРАЛЪЁС НО БЫРО Странаын югдур али туж секыт - сое ваньмы ас выламы шӧдӥськом. Но кызьы меда та югдурез дунъя политолог, Кун Кенешлэн депутатэз но Удмуртиысь коммунистъёслэн огез кичӧлтӥсьсы Юрий Валерианович СЕМЕНОВ. Кун Кенешлэн юртаз соин алигес пумиськылӥзы журналистъёс. Россилэн Президентэз но правительствоез туала югдурез тупатыны уз ни быгатэ, шуиз Ю.Семенов. Сӥзьыл уката но секыт луоз. "Ельцинтэк Ельцинлэсь политиказэ нуон" - таӵе амалэн кивалтонэз воштыны туртто власть борды кырмиськем адямиос. Озьыен, улонамы мар ке воштӥськоз шат? Кин пумитъяське сыӵе политикалы, соосты быдто. Кун Думалэсь депутатсэ, генерал Л. Рохлинэз быдтон - со туала режимлэн эшшо огез сьӧд ужез. Со ужъёс пӧлы ик пыртоно 1993 арын Россилэсь Вылӥ Кенешсэ автоматъёсын ыбылонэз. Кун Думалэн вить депутатъёсыз виемын ни. Но та учыръёсъя нокыӵе ужъёс уг нуисько. Малы виемын вал Л. Рохлин, следствие ас малпанъёссэ верлоз, дыр, но мынам малпамея, шуиз Ю. Семенов, Л. Рохлинэз быдтӥзы патриотической кужымъёслы зол шуккет лэсьтон понна. Кызьы тодмо, та толэзе запасысь офицеръёс, шахтёръёслы дурбасьтыса, правительстволы пумитъяськон ужрад ортчытыны дасясько вал. Та учыр секыт югдуре вуэммес уката но зол возьматэ. Т. Банникова. КИН ЁРОСЭН КИВАЛТОЗ? Элькунысьтымы ас коже кивалтон ёзъёсы депутатъёсты быръем дырысен ортчиз ни дас нунал. Та нуналъёсы депутатъёс нырысетӥ сессиосазы люкаськыло. Отын ик соос ёрос администрацилы но ёрос кенешлы кивалтӥсь быръё. Кылсярысь, Дэбес администрацилэн кивалтӥсез луиз Борис Урасинов, Воткинск ёросын Владимир Варламов. Толон асьсэлэн сессиосазы люкаськылӥзы Завьял но Юкаменск ёросъёсысь депутатъёс. Н. Лялин. КОТЬКУ ВОРМЕ Булайёс Ува районын трос пудо вордӥсьёс пӧлы пыро. Али эштослэн 800-лэсь уно скалэз. Соос 4 уллёлы люкемын. Нош дояркаос звеньевой амалэн ужало. Пудооссылы али но ӝытазе сурет (силосэз валэс куроен вандыса) сёто. Возьман интыосын ӟоскыт ке но, али быдэс эштосъя котькуд скаллэсь нуналаз 12 килограммлэсь уно йӧл люкало. Дояркаоссы уг вошъясько. Данакез соос 15-18 ар скал кыско ни. Нош туннэ нимысьтыз пусъем потэ Валентина Абрамоваез. Республикаысьтымы дояркаослэн ӵошатсконазы (со ортче Завьялово районысь "Россия" эштосын) Булайысь азьмынӥсь доярка котьку вормисе потэ. Миым солы "Вятка" мисьтаськон машина кузьмазы, нош азьлоысьтыз микроволновой гурен бертӥз. Валентиналэсь бере уг кылё Елена Петрова но Наталья Архипова. Туэ вить толэзьскын соос скаллы быдэ 1900 килограмм йӧл кыскизы, нош "Дружба" эштосъя - 1600 килограмм. Эштослэн тӧроез Василий Гореев, валтӥсь зоотехник но агроном Алевтина Смирнова, Татьяна Слобожанина пудо вордонэз азинтон, пайдаё удыс карон сярысь трос сюлмасько. Гыроно-кизёно муоссы (5300 гектар) трос ӧвӧл ке но, тырмыт но ӟеч пудо сиён дасянлы бадӟым инты висъяло. Трос аръем турынъёссы 1500 гектар киземын. Алигес "дымковский" сорт клевер басьтӥзы, нош миым - 1500 килограмм "козятник" турын. Берлоез, пе, ичизэ 12-15 ар урожай сётэ, клеверен но люцернаен уд ӵошаты, 4-5 пол кема возиське. Туэ 200 гектар кукурузазы но одӥг аръем турынъёссы тырмыт. Г. ВАСИЛЬЕВ. Выльысь улӟиз Сюмси ёрос котьку базаръёсын данъяськылӥз. Вань гуртъёсын уробо-дӧдьы, сиес тӥрлык, пӧртэм дӥсь но кут лэсьтӥсьёс улӥзы. Одӥг вакытэ базар быремын вал ини. Кытын ке сюрем бакча сиён но нюлэс емыш вузасьёс гинэ адскылӥзы. Берло аръёсы югдур воштӥськиз. Котькуд пятницае Советской урам быдэсак базалы пӧрме. Мар гинэ татын уг вузало. Учкид ке, паймод. Кутъёсты, кудыосты, песьтэръёсты шергес адӟоно ини, нош мукет ваньбур "кӧттырмон" вань. Кисыед буш ӧвӧл ке, котьмае басьтыны быгатод. Базаре быдэс республикаысь калык вузаськыны-басьяськыны ветлэ, кожалод. Вузаськон палаткаос гинэ сюлэсь ятыр. Сюмсиын улӥсьёс бадӟым празднике мында люкасько. Ваньмыныз вузкарисьёсын тодматскыны быдэс нуналскын но уд вуы. Мон синйылтӥ туж чебер, веськрес мугоръем кышномуртэз. Тодматски. Со трос ик вераса ӧз вутты - кузпалыз вуиз. Ирина но Роман Вотяковъёс татчы Ижысь лыктӥллям. Соос трос аръёс ӵоже Германиысь фирмаосын кусып возё ини. Отысь аудиовидеотехника, пӧртэм сиён-юон, тусьты-пуньы, дӥськут ваё но быдэс шаерамы вузало. Тыршемзы ӟеч пайда вае. Асьсэлэн тузӥ автомашиназы вань. Татысь ик ас апаелэсь нылзэ, Алевтинаез, пумитай. Со но вузкаронын кемалась ужа ини. Вузъёс Польшаысь но Украинаысь вае. Ужаны солы сузэръёсыз юртто. Удмуртъёс пӧлын шаплы адямиос ӧжыт шуиськом ке но, сыӵеос вань ик. Но тани мар син шоры йӧтэ. Удмурт вузчиос пӧлын ужбергатонын тросгес нылкышноос, нош воргоронъёс уноез ӟенелик борды "кырмиськемын", шӧдске. Кыӵе кужым меда пиосты сазёмытоз? Н. ВОЗИСОВ. "Выт тырисьёслэсь лыдзэс радъянъя ужрадъёс кутон сярысь" Удмурт Республикалэн Законаз воштонъёс пыртон 1-тӥ ёзэт. Удмурт Республикалэсь "Выт тырисьёслэсь лыдзэс радъянъя ужрадъёс кутон сярысь" Законэзлэсь 6-тӥ ёзэтсэ тазьы лыдӟоно: "6-тӥ ёзэт. Нотариальной ужъёсты нуыны оскем органъёс но ас кожазы ужась нотариусъёс интыосысь выт бичанъя ёзъёсы ивортылыны кулэ ваньбуръя лэсьтэм ужъёссы сярысь, Россия Федерацилэн законодательствоеныз тупатэм радлыкъя. 2-тӥ ёзэт. Закон кужыме пыре сое газетэ печатлам нуналысен. Удмурт Республикаысь Кун Кенешлэн Тӧроез А. Волков. Ижевск город, 1998 арын 24 июне 644-И �. МОСКВАЫН ПУМИСЬКОНЪЁС Кызьы ивортылӥм ини, Удмурт Республикаысь Кун Кенешлэн Тӧроез Александр Волков 7-9 июле вуылӥз Москвае. Со пыриськиз Федерацияя Советлэн Экономикая комитетэзлэн ужаз но Федеральной Собранилэн Федерацияя Советэзлэн кнешаз. Со сяна, Удмуртиысь кивалтӥсь пумиськонъёс ортчытӥз, кудъёсыз сярысь со тазьы ивортӥз: "Федерацияя Советлэн валтӥсь комитетэзлэн ужаз пыриськеме бере, мон вуылӥ "Регионы России" фондлэн попечительской Советэзлэн кенешаз, - со губернаторъёслэн клубзы выллем. Солэн ужаз озьы ик пыриськиз Правительстволэн Тӧроезлэн воштӥсез Виктор Христенко. Солэсь вазьгес мыным пумиськыны кылдӥз Россиысь химической ож тӥрлыкез быдтонъя программалэн кивалтӥсеныз генерал-лейтенантэн Валерий Канашинэн. Соин эскеримы та программалэсь Камбарка но Кизнер люкетъя быдэсъяськемзэ. Куд-ог коньдон ужпумъёсъя огкылэ вуимы, кылсярысь, Камбаркаын но Кизнерын лэсьтэм ужъёсъя тыронъёсты берыктон сярысь. Озьы ик вераським туэ Бемыжын выль больницаез лэсьтыны кутсконэн. Отын нырысетӥ ужъёс лэсьтэмын ини, но дыр кошке, со ужъёсты йылаз-пумаз вуттоно. Пумиськылӥ Белоруссилэн посолэныз. Вераськон мынӥз Удмуртия но Белоруссия куспын экономикая тупанкыл гожтон сярысь. Со Удмуртилы но, Белоруссилы но пайда вайысал. Азьло аръёсы Белоруссиысь предприятиосын асьмелэн кусыпъёсмы уродэсь ӧй вал. Туннэ со кусыпъёсмес выльдыны быгатӥськом. Та пумысен июль-август толэзьёсы умой ужано луоз. Малпасько, ваньмыз умой радъяськиз ке, сентябре валче ужанъя огкылъёс гожтыны луоз ни. Мукетыз пумиськон - "Сиданколэн" кивалтӥсеныз Борис Волковен. Му вӧй поттон удысын туннэ ужпумъёс данак, "Удмуртнефтьлэн" ужаз но туннэ секыт югдур шӧдӥське, кылсярысь, уждун тыронъя. "Сиданкоен" кивалтӥсьёслы мон эрик сётыны уг малпаськы. Кылдэм югдурез пыр-поч эскерим, куд-ог ужрадъёс кутӥм. Со дыре ик Борис Волков монэ куриз дурбасьтыны шахтёръёслэн но "Сиданколэн" куронъёссылы, кудъёсыз герӟаськемын Правительствоен. Вераськон мынэ сыӵе куронъёс сярысь, кудъёсыз асьме ваньбур поттӥсьёслы азинскыны луонлыкъёс сётысал. Му вӧй поттӥсьёслэн ужпумъёссы ӝутэмын вал Федерацияя Советын но. Та ужпумъёсты сэрттонэ мон азьланяз но пыриськыло. Туж умой пумиськон ортчиз "Росгосцирклэн" президентэныз Людмила Япроваен. Вераським Ижевскысь циркез лэсьтон пумысен. Жаляса верано, циркозь киосмы уг вуо. Та ужпумъя кык амалъёс ӵектэмын. Нырысез - вуж цирк интые выльзэ пуктоно. Валамон, та ужез чаляк уд лэсьты. Соин ик "Росгосцир" таӵе амал ӵектэ: капчи конструкциослэсь 1200 интылы цирклы юрт лэсьтон. Со понна ӝыны ар гинэ кулэ. Сыӵе юртлы "Росгосцирк" 700 сюрс доллар висъясал. Табере огкылэ вуоно Россилэн Правительствоеныз, угось сыӵе конструкциосты кунгож сьӧрысь таможня пыр ваён понна пошлина тыроно. Цирке шуныт пыртыса, сое толалтэ но ужатыны луысал. Кызьы луиз тодмо, та амалэз асьмелы ар талэсь азьло ик ӵекто ни вылэм. Но та ужпумез асьме Правительствомы, Культурая министерство малы ке пумозяз вуттӥллямтэ. Мукет пумиськонъёсысь висъясал "Онексим-Банклэн" кивалтӥсьёсыныз кенешонэз. Вераськон мынӥз "Евроазиатской банклы" кредит висъян но му вӧй поттон удыслы юрттон сярысь. Юрий Лужковен пумиськон дыръя но нырысь вераськон мынӥз Удмуртиысь национальной нефтяной компанилэн ужъёсыз сярысь. Москвалэн мэрез та удыслы 5 миллиард манет висъяз. Вераським 20 июль котыре нош пумиськыны но гожтэм огкылмылэсь быдэсъяськемзэ эскерыны". Удмурт Республикаысь Кун Кенешлэн пресс-службаез. Лек сильтӧл бере Быдэс дуннелы тодмо луиз Москваын ортчем сильтӧл. Солэн шимес бервылъёсыз сярысь трос гожъямын ни. Тӥяськемын юртъёс, вӧсь луэмын но быремын адямиос. Калыкын вераськыны ӧдъязы: "Россиысь урод югдурез инкуазь но шӧдэ, лэся. Ваньмыз куашка..." Но Москваын улӥсьёс шуг-секытлы уг сётско. Кужмо сильтӧллэсь бервылзэ утялтон- тупатон ужъёс ялан мыно на, 193 ульчае но 905 коркаосы электротыл лэземын ни. Ваньзэ ӧвӧлзэ 147 километр эклектро ез тупатэмын. Озьы ке но, уж трос гинэ ай. Сильтӧлэн погыртэм писпуос но жуг-жаген тырмем ульчаос быдэсак утялтэмын ӧвӧл на. Кык арня ӵоже городысь 120 сюрс погыртэм писпуос поттэмын. 1999 арын Москваысь вань бадӟым садъёсты но скверъёсты выльдыны малпамын. Нош сӥзьыл 75 сюрс писпу мерттэмын луоз. Со туж ӧжыт на. Но, оскем потэ: город аслэсьтыз чеберзэ уз ышты, ӝужыт из коркаосын артэ вожектозы на шулдыр садъёс... Е. ПАНФИЛОВА. ЧАЙ ЮЫНЫ - ТОЛЭЗЕ! "Луна-Хилтон" - тазьы нимаськоз Толэзьысь нырысетӥ отель. ИМА-Пресс агентство ивортэмъя, сое пуктыны чакла США-ысь "Хилтон-интернешна" компания. Лэсьтӥськон сярысь малпан кылдӥз планетаысь ву шедьтэм бере. Отельын 5 сюрс комнатаез, аслаз пыласькон интыез, бассейнэз но фермаез луоз. Интернет сетьысь басьтэм иворъёс. Инкуазь гердъёс ПӦСЬТОЛЭЗЬ Каньсырам сяська йыръёс, Тӧлъёс но сьӧлтамын, дыр, кытын ке. Татчы уг пырало зоръёс, Ӟырдам инбам гинэ весь адӟиське. ...Арлэн быдэ вуон дырыз Та пӧсьтолэзь ветлэ шаеретӥ. (Флор Васильев). Туэез инвожо толэзь воксё паймытӥз асьмеды. Чик шугъяськытэк пӧсь толэзен ниманы луысал, дыр. Но... малы-о дыртонэз? Тани ук ачиз пӧсьтолэзь ни юмша шаерамы. Инкуазез эскерисьёс верало: таиз, пе, самой пӧсь дыр, та толэзе чик кышканэз ӧвӧл на пужмеръёслэсь. Нош газетъёс гожъямъя, 1968 арын Московской областьын йӧспӧртэм луиз: 12 июле пужмераз но картофка модосъёсты, помидоръёсты, кияръёсты ӵужырак куасьтӥз. Нош 1996 арын Оренбург улосын 30 см ӝуждалаем лымы усиз, тросэтӥ йӧ зоръёс но вал. Пӧсьтолэзез гудыриен узыр толэзь шуыса верало. Угось инбаметӥ ӵемысь Илья пророк ас валэныз гырдалляса ворттылэ. Синоптикъёс верамъя, 1940 арын июль толэзе асьме ёросын 15 нуналэ, пе, гудыръяз. Сыӵе дыръя ӵашъемлэсь но кышкыт. Нош калык кемалась пусъем ни: ӵашъён тужгес "яратэ" тыпыез, кызэз, пужымез. Куд-ог дыръя исалля- сӧсыръя кызьпуосты. Воксё уг иса шуыны луоз сирпуэз, пашпуэз, тополез. Та толэзе куакаос но шырчикъёс люкаськыло ни уллёосы: дышето нылпиоссэс кема но жадьытэк лобаны. Азьпалан соосты кузь сюресъёс витё. Нуюлэсъёсын трос ни губиос, пӧртэм емышъёс. Кудызэс кутыса ульчае потэмъёс ӵемысь инбаме учко: "Зороз-а, уз-а?" Куазез тылобурдоосъя но, пунысюлъя но тодыны луэ. Пилемо куазен но сяськазэ ке волъям - озьыен, уз зоры. Гуукто дыдыкъёс - куазь чеберскоз. Ӝытлань ӟозъёс кужмо ке чиккето - ӟеч куазьлы. Куазьлэсь чебер возьскемзэс шара вералозы вылӥетӥ лобась ваёбыжъёс но. 12-тӥ июле Петр но Павель апостолъёслэн нуналзы. Ми палан (Татарстан, Балтась ёрос) улӥсь удмуртъёс та нуналэ одно ик пыжисько. Така я ыжпи вандыса, выль шыд пӧзьто. Нуназеяз одно ик пыштурын, узы-боры бичаны нюлэскы ветло. 21-аз - Казанской юондыр. Азьвыл аръёсы та нуналэ ӟегез, пе, араны кутскыло вылэм. Кылем аре воксё паймымон учырен пумиськи. Пӧсьтолэзе ни льӧм сьӧд-сьӧд кисьмамын. Со дыре ик, кӧня ке улвайёсаз тӧдь-тӧдь сяськаосыз пуштырскиллям. Ма но уг луы та инкуазьын. Н. Никифоров. ДЫШЕТСКЫ ГИНЭ Туэ Ижын Глазовысь В. Г. Короленко нимо кун институтлэн ёзэз усьтӥськиз. Интыяськемын со 88-тӥ номеро школае. Егитъёс татын историяя но филологияя специальностьёс басьтозы. Озьы ик дасялозы менеджеръёсты, нылпи садын ужасьёсты, начальной классъёсын дышетӥсьёсты. Экзаменъёс кутскизы ни. Но докуменъёсты кутозы на август толэзе но. Л. Орехова. Театр ӧз вунэты учкисьёссэ Драмая удмурт кун театр котькуд гужем потаны тырше гуртысь учкисьёсыз доры. Туэ гастрольёсын ужало ньыль труппаос. Одӥгез сыӵе валтӥсь труппа, кытчы пыро Россиысь но Удмурт Элькунысь дано артистъёс Леонид Романов, Валентина Загуляева, Валентина Меняйло, Августа Чиркова, гастрольёссэс кутскизы ини 24-тӥ мае. Вуылӥзы Можга, Грах, Кизнер, Алнаш, Сюмси, Селта районъёсы. Возьматӥзы В. Котковлэн пьесаезъя "Пинал мылкыд - юмал йӧлпыд" спектаклез. Концертъёс возьматӥсь коллективен кивалтэ Удмуртиысь дано артист Геннадий Бекманов. Соин ӵош гурт калыкез шулдырто Ольга Зорина, Валентина Бекманова, Алевтина Корепанова, озьы ик егит актёръёс Вячеслав Красноперов но Андрей Карпов. Удмуртиын сяна, соос кырӟало-шудо Татарстанын, Башкортостанын но Пермь улосын. Калыкын тодмо луиз "Бызьыны вуэм песянайёс" спектакль. Сое уй пал ёросъёсын возьматӥзы Россиысь калык артистка Вероника Садаева, Удмуртиысь калык артисткаос Фаина Будина, Галина Владыкина, Раиса Нефёдова, Россиысь дано артист Геннадий Соловьев но Кадим Галиханов. Театр уг вунэты пичи учкисьёссэ но. Артистъёс вуылӥзы элькунысьтымы шутэтсконъя центръёсысь пиналъёс доры. Та труппа куинь спектакль возьматэ: "Жили-были две лисисчки", "Вредный витамин", "Мымрёнок". Л. ПОСТНИКОВА. ТЫРМИЗ 5 АР Россиысь почталы тырмиз 5 ар. Та удысын тыршисьёслы но табере ужзэс выль сямен радъяно луэ. Газетъёсты но журналъёсты вӧлмытонэн гинэ трос коньдон уд потты. Соин ик городъёсысь но гуртъёсысь почтаосын вузкарон но радъямын. Кылем арын со 42 миллиард манет пайда ваиз. Н. Сергеев. СПИД-ЛЭСЬ НО КЫШКЫТГЕС... 2020 арын сюресъёс вылын шуккиськыса туж уно адями быроз. Та лыдпус ожъёсын, туберкулёз но СПИД висёнъёсын кулэмъёслэсь ортчоз. Горд Кирос федерацилэн президентэз Астрид Ноклебук Хейберт пусъе, "Арлы быдэ сюрес вылын ӝыны миллион пала адяии быре". 1896 арысен ( соку нырысетӥ шудтэм учыр пусъемын) асьме дырозь авариослы луыса 15 миллион адями ӧлексы кылемын яке кулэмын. Тужгес но шурдыт ужпум Эфиопиын Непалын, Мексикаын но Индиын. Интернет сетьысь басьтэм иворъёс. А. Волков - кичӧлтӥсь Кызьы ивортылӥм ини, Удмурт Республикаысь Кун Кенешлэн Тӧроез Александр Волков 9 июле пыриськиз Федерацияя Советлэн 35-тӥ кенешаз. Солэн ӵектэмезъя эскеремын Россия Федерациысь Правительстволэн Тӧроеныз Международной валютной фондэн Меморандум гожтэм сярысь ужпум. А. Волковлэн малпамезъя, со документ Россия Федерацилэсь законъёссэ тӥя, нырысь ик, бюджет сярысь законэз но асьме ваньбур поттӥсьёсты утёнъя кутэм законъёсты. Меморандумын учкемын трослы кулэстыны бюджетлэсь расходной люкетсэ, озьы ик со 30 процентысен 20 процентозь кулэстэ пошлинаосты кунгож сьӧрысь ваем вузъёслы. Александр Волков куд-ог малпанъёссэ вераз странаез секыт югдурысь поттонъя кутэм программаос пумысен. Выльысь эскероно Федерацияя Советлэн кылдытэм кризисысь потонъя программазэ. Малы асьмеос ужаны кулэ одӥг, правительствоен дасям программая, гинэ шуиз со. Малпасько, Федерацияя Советлы аслэсьтыз данзэ вылӥегес ӝутоно, кулэ дыръя йӧн-йӧн кылэз но верано. Россиысь парламентлэн вылӥ палатаез умоен лыдъяз А. Волковлэсь эшшо одӥг кичӧлтэмзэ. Федерацияя Советлэн нимыныз Президентлы Вазиськон кутэмын "Обороная промышленностез куашканлэсь утёнъя ӝегатскытэк ужрадъёс кутон сярысь". Солэн пуштросэз газетъёсын печатламын луоз. Удмурт Республикаысь Кун Кенешлэн пресс-службаез. АЛДАЙ, ЛУШКАЙ - ЛУИ БАЙ... "Улэмед ке потэ - берга",шуиськом. Та веран тросэзлэн лулаз-сюлмаз пыӵаз ни, лэся. Мукетыз ужпум: кин кызьы сое вала. Кемалась ик ӧвӧл Иж карын пумиськи азьвыл тодмоеным, 20 аресъем Николаен. Пияш туж шаплы луэм, вераськон висказ йырзэ кызьы ке аспӧртэмлыко сэзъялляны дышем (ас поннам пусйи: чылкак "выль ӟуч" шуонъёс кадь быгатэ). Милиция адямиез зол ик воштэ вылэм шуыса малпай. Но Коля милициын ар но ужаса вуттымтэ. Ачиз шуэмъя, со ӟечгес уж шедьтӥз - ужбергатонэ зымиз. Мыным тунсыко потӥз: кызьы но мар меда ужа егит коммерсант. Тани мар мадиз Николай: "Ми - 12 кузя вузкарисьёс. Москваысь ваем вузэз кузёмы быдэн-быдэн люкылэ. Ӵемысь со корка пушкын кутӥськись техника, калькуляторъёс, магнитофонъёс... Ваньзэ сое ми коркась корка дэмласа но вузаса ветлӥськом. Ну, пичияк алдаськоно луэ. - Коля лушкем серекъя. - Шуиськом: кыӵе ке рекламной агентствоысь лыктӥм, юри дунтэм дунын, реклама чотын вузаськом. Яке кыӵе ке мальдытӥсь кузьымъёсын палёмытӥськом на. Мар-о, адями соку ик зэмос дунъёсты тодон понна, базаре мыноз шат? Туннэ "Эльдорадолэн" нимыныз ветлӥськом, ӵуказе - "Планалэн", собере нош кыӵе ке валтӥсь фирмалэсь данзэ уже кутӥськом. У-у, басьто, ява! Кылыд гинэ мед мыноз. Лицензия ласянь ке, мынам со вань. Шеф сюлмаське. Уждун толэзяз 1-6 миллион потэ. Быгатонлыкед ӟеч ке, нунал ӵоже но сомында люкаськоз. Кызьы милям шуо: "Алдай, лушкай - луи бай!" А улонын ведь ваньмыз уксё вылын лэсьтӥське. "Манӥед" ке вань, нылъёсын но кусыпъёс капчиесь - "купи-продай", со вӧзы ческыт вина... Вераськыкуз Колялэн кылъёсыз кӧй вылтӥ кадь вольыт гылӟыса кошко, синъёсыз шудо. "Зэм ик-а улонэд сокем майбыр? - юасько. "Вить ар улыса "Орбита" машинаен вуо, - пальпотэ пияш. - Зэмос "выль удмурт" луо". Толэзь ортчыса тодӥ: кыӵе ке йыртэманъёсыз понна егит пиез милиция басьтэм. Судэз, пе, луоз. Вот тыныд шулдыр улон, нылъёс, вина - тюрьмаысь чурыт койка вылын... Кудӥз-огез шуозы, вылды: "Малы та сярысь гожъянэз? Ӧжыт-а сыӵе учыръёс..." Кулэ, одно ик кулэ гожъяны! Угось берло дыре алдаськон но лушкаськон модае пыриз ни, лэся. Тае пусъё Москваысь магазинъёсын вузкарисьёс но. Туала вакытэ алдаськытэк улыны тыршись муртэ серем гинэ карозы на... Таӵе сям тужгес но юн паласькыны ӧдъя егитъёслы. Нылъёс но пиос коньдон понна котьма лэсьтыны дась луо. Уг ик малпасько: умой-а со, урод-а... Ма, мукетъёсыз но озьы уло бере - озьыен, умой. Школаын ӟеч сямъёс сярысь вераськемзы - со чебер выжыкыл... Гуртын уж ӧвӧлэн, мӧзмыт луэмен, нылъёс но пиос городэ кошко. Бен, татын уж шедьтыны капчигес. Котькуд юбо вылын сямен ик ялонъёс лякылэмын. Но асьтэос адӟиськоды, кытчы вуттыны быгато лушкем ужъёс. Кин янгыш? 20 аресъем егит пияш? Нош Колялэн, котьма ке но, шудо гинэ луэмез потэ вал ук. Телевизорын кадь чебер улэмез! Тодэ лыкто солэн вал. Адямиос коркаоссэс тунгонамен возиллям. Э-эх, куке берытском на меда со чебер (осконтэм чебер!) выжыкылэ... ӞЕНЕЛИКЛЭН ТЫЛГИЗЬЫОСЫЗ КЫДЁКЕ ПИШТО Можгаысь ӟенеликъёсты поттӥсь "Свет" акционер огазеяськон туннэ Удмуртиын гинэ ӧвӧл, быдэс Россиын яркыт кизилиен пиштэ. Нимызъя гинэ ӧвӧл - ужъёсызъя но. Туэ Москваын 23-27 июне ортчем адӟытонын "Свет" ОАО пусъемын вал "Упаковка - звезда России-98" зарни медален. Озьы вылӥ дунъямын вал сурлы поттэм курень ӟенеликъёс. Нош аракылы сьӧд ӟенеликъёс понна предприятилы Почёт грамота сётэмын. Предприятилэн кивалтӥсез Владимир Александрович Мохначёв валлян "Арлэн адямиез" луиз. Таӵе вылӥ дунъетъёс юнме шорысь уг сётӥсько. Витьымтэ куноослэсь но, юри ӧтемъёсызлэсь но татын, шӧдске, уг курдало. Журналистъёслэн вуэмзы но ӧз паймыты. Вань ӟечез син азьын адӟиське, уката ик адямиослэн выросъёссыя. Шугъяськыса тур-пар бызьылонъёс уг шӧдсько. Владимир Александрович валтӥсь инженерен Александр Сергеевич Рябовен ӵош милемыз цехъёслэн ужаменызы тодматӥзы. Котькытын чылкыт, борддорын лыдпусъёсын возьматэмын адямиослэн ужамзы. Адӟиське журналистъёс азьын ушъяськон понна гинэ соос лэсьтымтэ - ваньмыз со ӟеч кивалтэмлэн-радъямлэн "емышез". Директор луыса та предприятиын Владимир Мохначёв тямысэтӥ арзэ гинэ ужа. Кивалтыны кутскемез бере номырзэ но татын йырин-чукин ӧз берыкты, кызьы луылэ ӵем дыръя. Кык адямиослэсь мозмытскем сяна, одӥг специалистэз но ужысьтыз ӧз улля. Шонерзэ верано ке, ас азяз со сыӵе ужпумъёс ӧз но пуктылы. Йыраз ялан одӥг валтӥсь ужпумез возьылӥз: кызьы утёно вашкала заводлэсь йылолъёссэ но азинскыны амалъёс шедьтоно. 1842 арын кылдытэм заводлэн ӟеч кутсконъёсыз туннэ азинско но шумпотто. 1994 арысен кутскыса, ӟенеликъёсты поттон арлы быдэ 5,2 процентлы йылэ. "Свет"-лэн ӟеч ужамез сярысь верало коньдон ужпумъёс но: бюджетэ но пӧртэм фондъёсы пунэм тыронъёсыз ӧвӧл, уждун толэзяз кык пол тыриське. Огшоры ужасьёслэн уждунзы 1 сюрс 500 манет , специалистъёслэн - 2 сюрс 500 пала. Кызьы бен таӵе секыт вакытэ но предприятие возиськыны, азинскыны быгатэ? Нырысь ик, татын кышкатэк пумитазы рыноке выжонэз. 1991 арысен, предприятиын бадӟым воштӥськонъёс кутскизы. Выль директорлэн вуэмез но туж дыраз луиз. Рыноклэсь куронъёссэ чакласа, вошъяны кутскизы ӟенеликъёссылэсь вылтусъёссэс но. Коньдон курыса, нокытӥ ӧз ветлэ, ваньзэ радъязы барышсы чотын. Нош отӥяз продукцизы но йылӥз, коньдонзы но тросгес люкаськиз. Али татын 50 пумо ӟенеликъёс потто ини, сурлы гинэ - 12 пумо. Табере Можгаын поттэм ӟенеликъёсы лэзё быдэс Россиын тодмо суръёсты: "Довгань", "Афанасий", "Красный Восток". Нош телевизор учкыкуды синйылтӥськоды-а тӥ кыӵе ӟенеликъёс пуктылэмын луо Президентлэн ӝӧк вылаз? Зэм, "Сарона" нимын минеральной ву лэземын Можгаын поттэм аспӧртэмлыко ӟенелике. Сое юон понна нокыӵе пуртъёс, мукет усьтон арбериос кулэ ӧвӧл - ӟенеликлэн пытсэтэз лякытэн киын гинэ усьтӥське. Ӟенелик поттӥсьёслэн Чикагоын ортчем ӵошатсконазы та посудалы сётэмын вал зарни медаль. Ар ӵоже предприятиын 240 миллион ӟенелик потто. Нимаз заказъёс но кутӥсько. Вераны кулэ, Россиын поттэм вань ӟенеликъёс пӧлысь 13 процентсэ лэсьто "Свет"-ын. Предприятилы азинскыны умой луонлыкъёс сётӥзы выль технологиосты, инвестициосты кутон маркетингъя службаез кылдытон. Умой кусыпъёс возё акционеръёсынызы. "Свет"- лэсь 25 процент акциоссэ возе Удмурт Республикалэн Правительствоез. Татын туж умой валало: ужасьёсты гажатэк, соос сырысь сюлмаськытэк, одӥг вамыш но азьлань уд лэсьты. Столовойын туж ческыт но дунтэм сюдо. Вань мылкыд карисьёс шутэтскыны быгато профилакториын. Вань культурая юртсы, музейзы. Данъясько футбол командаенызы. Дисциплинаез тӥян учыръёс туж ӧжыт луыло. Сыӵе учыръёсы но адямиез капка сьӧры уг келяло, кышкатыса уг возё. Адямиослэсь правооссэс юн чакласа возе профсоюззы. Ужысь ас мылкыд каремзыя кошко пенсие потэмъёс но висьыны усемъёс. Пӧсь цехъёсын ужаны зол тазалык кулэ. Туж паймытӥз: предприятие азьын, цехъёслэн борддоръёсаз бадӟым букваосын гожъямын тодмо писательёслэн Толстойлэн, Купринлэн адями сярысь верам кылъёссы. Со верамъёсын - коллективмылэн идеологиез, валэктӥз В. А. Мохначёв. Можгаысь предприятилы ӟеч ужаны юрттэ Урал гурезьёс котыре матэ интыяськемез но. Ӟенелик поттыны отысь ваньзэ шедьтыны луэ. Зэм, сырьё туж дуно усе. Соин ик татын басьтыны кутскизы сӧриськем ӟенеликъёсты, пияла посудаосты. Нырысьсэ сыӵе ужрад ортчытӥзы туэ май толэзьлэн пумаз. Одӥг арня ӵоже адямиос татчы 88 тонна сӧриськем посуда вайиллям. Одӥгезлы тужгес но удалтэм: кулэтэм ӟенеликъёсты татчы ваемез понна солы 700 манет сётӥллям. Тӥни озьы арня куспын город но чылкытгес луэм, заводлы но, адямиослы но пайда ваиз. Та уже туж мыло-кыдо пыриськиллям ужтэк кылемъёс. Одӥг тонна пиялалэсь дунзэ туннэ ӵошатыны луысал одӥг тонна му вӧйлэн дуныныз. Предпритилэн коллективез ялан ӟечезлы осконъёсын улэ. Малпанзы вань пияла бордын ужась кибашлыослэсь огазеяськонзэс кылдытыны. Со герӟасал Россиысь но Уралысь та удысын ужась усто специалистъёсты. Оскымон ужась коллективен ӵош ужан сярысь мылкыдзэс веразы ини Роосиысь но СНГ- ысь данак предприятиос. Т. Банникова. Кин юнгес черектоз? Японилэн уйпалаз Аомори префектураын тужгес но юн кесяськыны быгатӥсьёс пӧлын ӵошатскон ортчиз. Отчы пыриськизы нимысьтыз сиёнэн, чеснокен но пузэн, сюдыса возем 75 атасъёс. Эскериськизы бурдоослэн макем кемагес, макем чебергес черекъяны быгатэмзы. Паймытӥз ке паймытӥз... "Эхо Москвы" радиостанция верамъя, Америкаысь Арканзас штатын 16 аресъем школаын дышетскись нылашлэн 4 дыдыосыз вордскизы. Тужгес но пичиез соос пӧлысь 200 грамм кыске, нош тужгес бадӟымез - 1 килограмм 800 грамм. Егит нылаш быземын ӧвӧл на, но атайзы, 19 аресъем егит пияш пусйиз: сюанлы пӧрмытсконъёс мыно ни. КИН ЮРТТОЗ АННАЛЫ? Ивор кылӥськиз: задор-чебер кырӟасьмылы, крезьгурчимы Анна Плотникова Геннадий Заволокинлэн "Играй, гармонь" конкурсаз пыриськем но лауреат луэм. Алнаш ёросын, Улын Котнырын улэ бере, Аняез чаляк адӟыны ӧз кылды - Ижевске вуыса но, "Ингур" радиостанциын вераськемез бере, Играла шонтоз, шуизы. Зэм, шаплы мурт туннэ татын, ӵуказе отын, - сотэк вуысал меда Москва улосысь Иваново каре. Анна Плотниковалэн "Ӟечбур" газетын ужась апаез Антонина Ермолина шуиз: "Играй, гармонь" конкурсэ ветлон понна, Аня ачиз коньдон люказ, концертъёсын поттыса. Мар бен, алнашъёслэсь шаплы луэмзэс та учыр вылысь но эшшо адӟиськод. Но Анна Плотникова ас ёросаз гинэ сюресъёсыз ӧз котыръя ини - сое быдэс шаерамы туж умой тодо. Иж карамы но кыӵе ке концерт-а, творческой ӝыт-а - Аняез ӧтё но, кунулаз баянзэ кутыса, со бурдъяське, сцена вылын шулдыртэмез понна кыӵе ке дун пызьыртыса уг улы. Арган (баян) "кӧрыкеныз" шокчылэ ке шокчылэ шорамы - кезьыт вироез но ӟырданы кутске, дыр. Мусо ымнырыз шудолэсь но шудо луэ, синъёсыз тылгизьыос пазяло, чиньыосыз олокызьы гинэ бызьыло баян бирдыос вылтӥ. "Яратӥ мон тонэ... уг вунэты таре..." "Но тани, но тани, но тынад пыд куараед тани..." "Куддыръя мылкыдыд шунды кадь ик лякыт, куддыръя нош луэ сьӧд уй кадь ик секыт..." Анна Плотниковалэсь кырӟанъёссэ "аслыз кариз" ни "Катанчиысь" артист Андрей Ураськин. Та эшъёсын ӵош Аня трос пол концертэн поталляз. Куке "арганчиосын" ("Арганчи" ансамблен) но эшъяськиз вал. Мылкыдъёсыз отчы но, татчы но кыстаськылӥзы, малпанъёсыз вылэ кыстӥськылӥзы. Нош озьы но... 1990 арын Ижевскысь культпросветучилищеез йылпумъямез дырысен пуке вордскем Котныраз. "Пуке" шуоно ке, шонер-а меда луоз? Берга, тӧлпери кадь отчы но, татчы но вутске - гуртысь клубен кивалтэ, школаын но, садикын но нылпиосты крезьгурлы дышетэ. Нош аслыз... эшшо дышетсконо вылэм на. Та малпан весь ӵабъяське гадь пушказ. Куддыръя азэм пӧськы кадь луэ. Уката ик тани - чорто, лӧпкыто, ушъяло ке... Сое уго табере Ивановолэн сьӧраз но ӧтё. Утчаммес тодыса, Аня жингыртӥз. Тани ма со шуиз: - "Играй, гармонь" фестиваль туэ Россиын витетӥзэ ортчытӥськиз, со кык арлы огпол, пе, луылэ. Ивановоын со вал 9-13 числоосы июне, отчы 300 мурт пала пыриськиз - кырӟасьёс, арганэн, баянэн шудӥсьёс, ансамбльёс. Центральной телевидение снимать кариз, сентябре возьматозы, дыр. Нырысь куинь нуналзэ котькудмес кылзӥзы, эскеризы, ньылетӥ нуналаз пӧртэм интыосын кырӟамы-шудӥмы, витетӥ нуналаз гала-концерт вал. Паймизы, кызьы мон шудӥсько, мехез сыӵе ӵем кыскаса. Таӵезэ кылэммы-адӟеммы ӧй вал, шуизы. Монэн ӵош вал на Красногорскысь Николай Волков но Ижевскысь Тамара но Алексей Стерховъёс. Лауреат огнам луи. Анна Плотникова ас сярысьтыз чик данъяськытэк, ушъяськытэк, кӧсалэс гинэ вера, мылкыдыз солэн уртче сцена вылын. Нош али... ваньмыз со ӵашетон кадь ортчемын, али солэн сюлмаськонэз мукет ӧретӥ кошке. Аръёс ортчо, маке но кароно - дышетсконо яке... - Асьтэ пӧлы ӧд кутысалды-а Аняез? Яке нылъёсмурт шуыса "кышкаськоды"? - юано кариськи эстрадая "Катанчи" театрысь пиослэсь. - Кутысалмы, - вакчияк шуизы соос, - но Ижын улон интыез ӧвӧл ук. Анна Плотникова эшъяське Надежда Уткинаен но, "Шундыкар" лагерьын ӵош ужазы. Соин ик Надаялэсь юано кариськи, кыӵе дэмлан сётысалыз. - Ӧйтӧд, малы со мыным берло дыре ӧз ни вазиськылы, - шуиз Н. Уткина. - Кылем арын ик малпа вал ни ук дышетскыны пырыны. Нош тани туэ но дыр ортчиз, шуыны луоз, экзаменъёс мыно. Вӧзаз вералом: ачиз Надежда Уткина кылем арын дышетскыны пыриз Россиысь театральной искусствоя академие, эстрадая режиссёр луыны малпа. Анна сярысь ке верано, со вазиськылэм вылэм "Удмурт кенеш" огазеяськонэ. Татын шуизы: - Солы ми дэмлан (рекомендация) сётыны быгатӥськомы вал, но нырысь ик вазиськыны курим асьме Культурая министерствое. Анна ми доры Ивановое мынон азяз пыраз, собере ӧз ни вуылы. Таиз вӧзы ватсалом: "Удмурт кенеш" Культурая министерствоен валче туэ сыӵе дэмллан сётӥзы но Петрозаводскысь музыкая Финн-угор академие ыстӥзы Ижевскысь культурая училищеез йылпумъям Ирина Пчеловодоваез. Озьыен, малпан кылдэ ни, Анна ачиз дышетскыны пырон сярысь сюлмаськымтэ, яке кышкам, яке дыр шедьтымтэ шуыса. Зэмзэ ик уго, гуртын улӥсьлы капчи ӧвӧл ӝутскыны: юртъер котырын берганэз но вань, сизьым аресъем пиез но будэ. Таӵе дыръя уката кулэ луэ ӝуткась, ӧтись, юрттӥсь... Ас малпанзэ вераз на Удмурт кун филармонилэн художественной кивалтӥсез Валерий Митрофанов: - Гуртысь кырӟась нылъёсмы пӧлысь Аня тужгес етӥзэз. Бен, СОЛЫ ДЫШЕТСКОНО ВЫЛЭМ ОДНО ИК, ШУОМ, КУЛЬТУРАЯ ЯКЕ ИСКУССТВООСЪЯ ИНСТИТУТЫН. Куаразэ пӧртэмъян, вӧлмыт карон луонлыкез солэн вань. Нош творческой мастерское дышетскыны ыстыны али ум быгатӥське ни, Санкт-Петербургын но со табере ӧвӧл. Асьме дорын но бен сыӵе эстрадая мастерской усьтоно вылэм (кырӟась егит нылъёсмы трос гинэ люкасько: Вавожысь Наталья Матвеева, Алнашысь Татьяна Ишматова, Киясаысь Марина Галичанина, Воткинскысь Ольга Васильева...) Хорын кырӟасьлэн творческой ымнырыз сокем уг усьтӥськы - эстрадаын кырӟаны нимысьтыз рос-прос дышетсконо. Али асьмелэн эстрада сьӧдун парсьпи кадь куштэмын ини, таосыз но коллективъёсмы мырдэм возисько (коньдон ласянь), асьсэ поттэм дун чотын гинэ уло. Котьма ке но, нимысьтыз студия, мастерской усьтон сярысь малпаськоно луоз. Кызьы меда малпасько вылӥынгес, Культурая министрествоын пукисьёс?.. Нош редакциямы кыкетӥзэ ни жингыртэ Юрий Андреевич Чайников, Куӟебай Гердлэн вынмуртэз, бадӟым но пичи "кизилиос" сярысь сюлмаськыны дышем адями. - Быдэс Удмуртиямы Анна Плтникова огназ сыӵе - пӧртэм палъёсыныз кисьтаськись- ворекъясь дуно из кадь. Но со волятымтэ-сузямтэ на - котькудӥз кутыны, йӧтскыны выроз. Аня ваньмызлы ассэ адӟытэмез потэ. Дыр ортче - ыштом, уськытом, ӵакмытом пиштӥсь измес (талантмес). Кызьы ке но юрттоно солы! Собере бер луоз. Филармоние яке кытчы ке уже интыяно, дышетоно, улон инты утчано. Ӧвӧл шат нокыӵе луонлыкъёсмы? Татьяна ЧЕРНОВА. 02 ИВОРТЭ ГАРАЖЫСЬ ТАМАК НО ЛУШКАЛО Табере гаражъёсы машина лушканы гинэ уг пыро. Куд-огез кузёос гаражъёссэс складъёслы пӧрмытъязы уго. Но мурт синъёс машинаез гинэ уг адӟо вылэм. Уин 10 июле Ижысь "Строитель" автокооперативлэн огысьтыз гаражысьтыз 17 миллион тыр пыдкутчан но выл дӥсь поттэмын. Нош Кирпичной урамысь огаз гараже нокытын ужасьтэм Дмитрий тамак лушканы пырем вылэм. Тамак пурккетыны яратӥсез интыяз ик кырмизы милициын ужасьёс. МУРТЛЭНЭН КЫДЁКЕ УД ВУЫ Гуртысь бускельёслэн ог-огзылэсь ваньбурзэс таланы кутскемзы паймытэ. Алнаш ёросысь Удмурт Тоймобаш гуртысь быдэ вуымтэ Николай гуртысьтызы ик Е.-лэсь мотоциклзэ лушкам. Но ворттылыны кема ӧз кылды - кутӥзы. Мотоцикл кузёезлы берыктэмын. ЧИЛЯСЬ КЕ НО, ЗАРНИ ӦВӦЛ 11-тӥ июле ӝытазе 6 час котыр Ижысь Труд урамын кышномуртэз тышкаса, солэсь ӵуж пель угыоссэ но чассэ талаз 25 аресъем Федор. Азьвыл но суд азьын кыл кутылэм пиосмуртэ таяз учыре золгес "дышетозы", дыр. Шутэтскон вискын Сяська но писпу - эмчиос Адямилэн гинэ ӧвӧл, котькуд писпулэн но будослэн биополеез вань. Со сярысь маде Ижевскысь калык амалэн эмъясь (знахарь) Ольга Алексеевна Тихомирова. - Куд-ог куаро писпуослэн (топольлэн, бадьпулэн, палэзьпулэн, пипулэн, льӧмпулэн, лулпулэн) алама (отрицательной) кужымзы вань. Соин сыӵе писпу борды йӧтскыны кулэ: куинь минут ӵоже бордаз сылытозяды, кайгудэс палэнтоз, давленидэс кулэстоз. Соин но, дыр, вашкала дыръёсы пипу писэз йыр улазы возизы, нош пыдъёс висьыку - пыд улазы. Калыклэн чакламезъя, пипу сул син усемлэсь но тушмонъёслэсь уте, пе. Сое сьӧразы но нуллылӥллям. Умой (положительной) кужымен тырмемын куаро писпуос - кызьпу, пашпу, тыпы, беризь, ясень. Юнме-а юрт но пуктылӥзы таослэсь, пӧртэм посудаос но лэсьтылӥзы. Куке но беризь Лада инмар-анайлэн писпуэз лыдъяськылӥз. Корка капчи мылкыд но тупаса улон пыртылӥз. Тыпылэн но кужымез бадӟым. Жадем бере, висьыку (анемия дыръя но), мунчое пыро тыпы веникен. Огшоры кужымен писпуос но вань. Кылсярысь, чияпу - со удалтон ваись писпу. Чияпулэсь, горд палэзьпулэсь но сьӧд сутэрлэсь парем чай сюлэмез, вирлэсь ужамзэ юнматэ. Лысо писпуосыз кипарисэз, туез но ньылпуэз коркан возьыны уг яра. Соосыз куректон ваись писпуос шуо. Выль арез пумитаку гинэ вож кызмы шуд вае. Со сяна, Быдӟым нуналэ бичам бадьпу вайёс но быдэс арлы тазалык "кузьмало". Соосыз вӧсяса оброс азе поно. Нош Великой четверге (мукет Пасха вуыку) соосыз суто. Пиналды висьыны усиз ке, вӧсям пучылэн вайёсыныз ӵынатыны луоз. Кужымдэс юнматэмды луоз на, инкуазен вераськыса. Быръе асьтэлы гинэ тупась писпу, кудӥз доры сюлэмды золгес кыске, ӟечъяське, вераське, эшъяське соин. Секыт висьыкуды но со юрттоз тӥледлы. Сыӵе дыръя, алама кужымо писпу доры мыныса, сюлэм- шугъяськонъёстэс вералэ. Бӧрысь ӟыгыртэ умой кужым сётӥсь писпуэз. Озьы огдырлы висёнды но вуноз, мылкыдды но капчи луоз. Писпуосын артэ будо пӧртэм пумо сяськаос. Соослэн но ас кужымзы вань. Лилия сяськаез, кылсярысь, огнын улон сяська шуыло. Одӥг дыре Европалэн шунды пуксён палаз розаез но сыӵеен ик лыдъяллязы. Гладиолусэз но пионэз пиосмурт сяська шуо. Пиослы соосыз кузьмало ке - удалтэ. Зангариос корка пушез шулдырто но пичияк ӝож мылкыд кузьмало. Трос калык пӧлын уго соос кема уг уло, чаляк шуяло. Астра ("кизили" шуыса берыктӥське) - удалтон, ужъёсын пайда вае. Тӧдьы сяська (ромашка) - шулдыръяськон, италмас - куректон сяська. Берлоез удмуртъёслэн яратоно сяськазы луэм но сое бичаны уг яра. Со кайгу, шудтэм учыр вайыны быгатоз. Озьы ик корка пуштэс куасьмем сяськаосын но бессмертникен чеберъяны уггес яра. Соос урод мылкыд пыӵато. Коркан будӥсь сяськаос азьланьзэ возьмато. Соос кузёзылэсь мылкыдзэ валаны, шӧдыны быгато. Укно дур сяськаос чебер пушъё, корка кузёлэн сямъёсыныз тупаку. Адями висьыны усе ке, сяська но шымырске. Лякыт но зӥбыт адямиослэн корка будосъёссы котьку но чебересь луо. Соос но яратэмез, гажамез шӧдо. Герань но бальзамин лядъясько "куанер" сяськаосын. Соосыз умойгес балконын возьыны. Корка пуштэс пальма чебертэ ке - со узырлыклы но капчи, шулдыр улонлы. Котькуд коркан мед будоз алой. Тазалыкез эмъяны туж кулэ маке. Бегония эксэй сяська луэ. Вылтӥяськись но керӟег муртъёслы тупа. Компанелла семьялы шудо улон вае. Со понна та сяськаез кык пумозэ (тӧдьызэ но сиреньзэ) возьыны тыршоно. Изён сэрегады фикус, олеанд, монетеру но мукет бадӟым куаро, зол зыно сяськаос эн возе: соосын сэрен йырды висьылоз, иземды но уз луы. Малы ке шуоно, будосъёс бордысь кислород нуназе гинэ потэ, уин - уг. (Басьтэмын "АИФ Удмуртии" газетысь). Шӧкыч Оло вал, оло ӧй вал Турын сӥгысь шузи Ӝытозь котыръяз йыромем пӧйшурась сьӧд нюлэсэз. Куд пала гинэ уг мыны, кӧня ке дыр ортчыса нош ик вуэ азьвыл интыяз. Уйлы ӝужыт кыз улысь ӝуй вылэ интыяськыны турттэ ни вал. Ӝытпал нюромем омырын витьымтэ шорысь шуккиськиз музъем пыдсысь кадь пуны утэм куара. Ӝоггес, ӝоггес вамыштоно отчы. Ӧжыт-а, трос-а мынӥз, потӥз веськрес пужымъёс сьӧры ватскем куше. Шораз сылэ вить сэрего корка. Кузёосты кышкатонтэм вылысь, каллен гинэ йыгаз ӧсэ. Потӥз кияз конгро бодыен нылкышно. - Песянай, вождэс эн вае, - вазиськиз пӧйшурась. - Йыроми, кытчы мыныны уг валаськы. Бер но ини. Кӧлыны ӧд лэзьысалды-а? - Кӧл, кӧл, пие, - нёжтӥз пересь. - Но милям койкамы кык сяна ӧвӧл ук. Огаз ачим кӧласько, мукетаз - внучкае. Ачид бырйы, дуное, кудаз выдод. - Эн сюлмаське, песянай, - шумпотӥз воргорон. - Мыным турын сӥг но яралоз. Юзмыт омыр, возь выл куар-сяська зын... Ӵукна сайкаса, пӧйшурась мисьтӥськоно но тау карыны вамыштэ корка доры. Адӟе: сеникын сылэ кӧлон дӥсьсэ воштыны вуттымтэ нылаш. Уммез тырымтэ маке вушйылэ, ческыт назьылскылэ. Воргорон долкаса учке шораз. Ӧз чида ни, юаз: - Кин тон? - Мон-а? Мон Марья песянайлэн внучкаез луисько. - Нош мон турын сӥгысь шузи, - ма верамзэ ӧз вала пӧйшурась. Интыысь власть Волятэм сюрестӥ вамыштозы Дас витетӥ июле асьсэлэн нырысетӥ сессиязы люкаськылӥзы Можга ёросысь ас коже кивалтон ёзэ быръем депутатъёс. Ваньмыз соос 20 кузя. Пӧлысьтызы котькудӥз ньылетӥез гурт хозяйство удысын тыршись луэ. Мукетъёсыз - медицинаын, калыкез дышетонын, калыклы вузъёс поттонын ужасьёс. Быръемъёс пӧлысь 35 процентэз удмуртъёс, ӟучъёс - 45 процент. Мукетъёсыз - бигеръёс но украинец. Сессие пыриськизы ӧтем куноос но. Соос пӧлын - В. С. Осипов, Удмурт Республикаысь югдурез утёнъя министрлэн нырысетӥ воштӥсез, В. А. Соловьев, Кун Кенешысь ялан ужась комиссиен кивалтӥсь, В. К. Тубылов, "Удмурт кенешлэн" тӧроез, но мукетъёсыз. Нырысетӥ люкаськемазы депутатъёс куинь ужпумез сэрттӥзы-пертчизы. Тупен-тупен ужан радзэс эскеризы, воштылонъёс пыртылӥзы. Та ужын умой быгатонъёссэ возьматӥз азьло ёрос Думалэн тӧроез И. В. Окулов. Шӧдӥське, со рос-прос вала сессиын ужан радэз. Соин но, дыр, дас витез депутатъёс ӵектӥзы Иван Вилорьевичез ёрос Думалы тӧрое. Соос пусйизы Окуловлэсь калык понна тыршемзэ. Берло дыре ёросын ас кивалтонъя программа дасямын. Тросаз гуртъёсын кылдытэмын гурт кенешъёс, быръемын старостаос. Аслаз кандидатлэн кылъёсызъя, таиз ӵектон со понна кивалтон удысаз дас витетӥез экзамен луэ ини. Уго Иван Вилорьевич быдэсъяз ини администрациен кивалтӥсьлэсь, Думалэн тӧроезлэсь, Вылӥ Кенешысь депутатлэсь ужъёссэс. - Со милям Тубыловмы, шуыны луоз, - пусйиз одӥгез депутатъёс пӧлысь одӥгез. Ачиз Валентин Кузьмич но дурбасьтэмзэ вераз Иван Вилорьевич пала. "Мон сое кема дыр ӵоже тодӥсько ини, шонер луоз, Окулов понна куарадэс сётӥды ке", - шуиз со. Пумит верасез ӧй вал. Окулов эш пусйиз: - Мыным ӧжыт чурытгес луоно вылэм. Туала кивалтӥсьлы сотэк уг луы... Ёрос Думае тӧрое одӥг гинэ кандидат ӵектэмын вал. Шутэтскыны ялэм дыр куспын нимысьтыз комиссия лыдъяса вуиз сётэм куараосты. И. В. Окуловлы осконзэ вераз 18 адями. Пумит луиз кыкез. Жаляса веарно луэ, малпанъёссэс ӧз усьтэ пумит луись депутатъёс. Шара верам тырмымтэос юрттысалзы уго выль быръем тӧролы янгышъёссэ тупатыны. Кылиз на берпуметӥез ужпум - ёрос администрацилы кивалтӥсь быръён. 15-тӥ июлёзь та ужез быдэсъяз Владимир Максютин. Дас куатез депутат ӵектӥз та уже сое ик кельтыны. Та кандидат сярысь малпанзэ нырысь ик шараяз Аркадий Вершинин, "Россия" колхозлэн тӧроез. Со пусйиз бюджет чотын ужасьёслы дыраз коньдон тыремез. "Ёрос администрация сокем уг зӥбы гурт хозяйствоосты налогъёсын", - шуиз со. Дурбасьтыса вераськиз Анатолий Комаров но, соин ӵош пусйиз, национальной движенилы но гурт хозяйствоын ужасьёслы тросгес саклык висъяно шуыса. Ушъян кылъёссэ вераз Виталий Соловьев. "Мон данъяськисько Можгаысь кивалтӥсьёсын, - шуиз со. - Можга ёрослэн ӧвӧл пунэм тыронъёсыз газ но электрокужым понна. Бен, котькуд адямилэн шекъёсыз вань. Тае валаны луэ Галеев депутатлэн кылъёсысьтыз. Рифнур Фаттаковичлэн верамезъя, Владимир Викторович ӧжыт пумиськылэ гурт калыкен, уката ик вунэтэмын пичи гуртъёс, нош соослэн кивалтӥсьёслы уно гинэ юанъёссы. Бюджетын ужасьёс сяна, вань на колхозникъёс но. Нокыӵе юрттэт уг басьто феремеръёс. Туннэ нуналлы соос районын 174 кузя лыдъясько. 1995-тӥ арысен фермеръёс кредитъёс басьтыны уг быгато. Чиптэм-чаптэм ышиз 1994-тӥ арын соос понна чаклам коньдон но. Ас малпанъёссэ вераз В. К. Тубылов но. Солэн малпамезъя, куд-ог депутатъёс, кылдэм югдурез пыр-поч эскерытэк, пумит куразэс верало. Максютин но Окулов - кыдам кивалтӥсьёс ини. Куке тодмо ӧвӧл - мар луоз 2-3 толэзь улыса, кивалтӥсьёсты воштон визьмо уж уз луы. Бен, соиз озьы но дыр. Котькыӵе ужлы дышыны кулэ, но, мынам малпамея, тырмымтэосты но шараятэк уг луы. Оло, соос ик юрттозы калыклы но кивалтӥсьёслы ог-огзэс валаны, пусйиз "Удмурт кенешлэн" президентэз. Бюллетеньёсты урнае куштэмлэсь азьло вераськиз на Владимир Максютин: - Гурт хозяйстволы быгатэммыя юрттыны тыршимы. Мукет удысъёсты но син азямы возимы. Кылсярысь, секыт югдурез чидано шуо Черемушки посёлокын улӥсьёс. Уноез соос пӧлысь етӥн сэстон заводын ужало. Нош берло дыре етӥнэн секыт югдур кылдэмын. Барышез луымтэен, уноез хозяйствоос та культуралэсь палэнско. Таӵе югдурез тупатон понна, туэ 500 сюрс манет ватсаса висъямын вал етӥн кизёнлы. Секыт ке но, бюджет чотын ужасьёслы выль интыос кылдытэмын. Ӝыны ар куспын гурт калыклэсь ог 500 тонна йӧл бичамын. Мылкыдъёссэс верамзы бере, депутатъёс бырйизы ёрос администрацилы кивалтӥсь. Таяз учыре но одӥг гинэ кандидат ӵектэмын вал. Максютин эш понна куаразэс сётӥзы 14-эз депутатъёс, куатез пумит луиз. Озьыен, можгаос азьло кивалтӥсьёссылы ик осконзэс веразы. Мар бен, волятэм сюрестӥзы капчиен мед вамыштозы. Л. ПОСТНИКОВА, газетлэн корреспондентэз. Шӧкыч ВАЛЭКТЭ ДОКТОР - Валаськоды-а, доктор, ӵукналы быдэ мон сайкасько нырысь атас чортэм бере ик, ужасько вал кадь, сиисько кион мында, нош тазалыке ялан уг тупа. - М-да... - вазе врач.- Тӥледлы умойгес луоз, дыр, ветеринарлы возьматскыса. х х х - Тӥ юн кызӥськоды,- шуэ врач висисьлы.- Ӝегатскытэк дугдэ кыскемысь но, юэмысь но. - Озьыен тӥ лыдъяськоды, мыным кызыны гинэ кулэ на? - юа висись. х х х - Тӥ - студент, дышетскем адями,- йыркуръяське доктор.- Мар малпаса мынӥды туно- пеллё доры? Валамон ни, олома но кулэтэмзэ ӵектӥз, луоз. - Тӥ доры мыныны косӥз, доктор. х х х - Тӥ мултэс жадемын, Петр Петрович. Соин йырды но висе, сюлэмды но курадӟе. Ӝытъёсы кӧлыны вазьгес выдэ. Курегъёсын ӵош. - Кӧняеныз, доктор? Туннэ андан пӧзьтӥсьёслэн нуналзы Кужым кужымысь потэ Кык пудъем гиряез капка вылтӥ, шарез сямен, салляса, Василий Черных кышноезлы шуиз: "Женямы мынэсьтым кужмогес луоз!" Егит анай соку ик мукет малпанзэ вераз: "Пимы дышетӥсь луоз!" Зэм, кин бен азьло аръёсы дышетӥсь луон сярысь ӧз малпаськылы - гуртын сое тужгес но гажамон адямиен лыдъяллязы ук. Но азьпала улонэз туж шуг тодыны вылэм - Черныхъёслэн 1931-тӥ арын вордӥськем пизы тодмо андан пӧзьтӥсь луиз, нош бӧрысьгес - Социалистической Ужысь Герой. *** Кызлэн выжыез дӥняз усе, шуо калыкын. Озьы ке учконо, Евгенийлэн выжыяз ноку но заводын ужасьёс ӧй вал. Шонергес луысал, дыр, со дышетӥсьлэн семьяяз вордӥськиз шуыны. Анаез Анисья Фёдоровна Сюмси шор ёзо школалэн директорез луыса ужаз. Солэсь атайзэ но, песятайзэ но гуртоос туж гажаллязы визьмо луэмзы понна. Атаез усто валъёс вордылӥз. Музъем ужъёс бырем бере, валъёссэ кыткыса Вятка но Москва пала адямиосты нуллылӥз. Сюрес вылын кыӵе гинэ визьмо, тунсыко адямиосын ӧз пумиськылы. Женялэн пинал дырыз атаезлэн Василий Андреевичлэн юртаз ортчиз. Тямыс сэрго тып- тып пуктэм корка Сюмсилэн шораз ик сылӥз. Бӧрысь со интые кирпичлэсь юрт пуктӥзы, али отын Сюмси ёрослэн администрациез интыяськемын. Война вакытысь мукет нылпиослы сямен ик, Женялы но вань секытсэ чидано луиз. 1940- тӥ арын атайзэ армие басьтӥзы. Гуртысь кошкемез пыраклы луиз. Война кутскон арын ик Великие Луки город дорын ивортэк быремез сярысь гожтэт вуиз. Ортчем аръёсты али син азяз пуктыса, Евгений Васильевич котьку но шуныт кылъёсын тодаз вае улонысь вазь кошкем анайзэ, чиптэм-чаптэм ышем атайзэ. Анисья Фёдоровналы туж секыт ке но йӧтылӥз, кык пиосыныз сюлмысь вераськыны дыр шедьтылӥз. "Дышетске, улэ адямиосыз яратыса", - ялан шуылӥз анайзы. Мусо анайзэс гажаса но жаляса, Женяен Рудикен туж кылзӥськись будӥзы. Дышетскыны но ӧз аналскылэ. Соослэсь тыршемзэс адӟыса, нэнэлэн сюлмыз огдырлы буйгалляз. 33 аресаз карттэк кыльыса, кӧня со куректылӥз. Ивортэк бырем картсэ ялан возьмаса улэменыз ик, оло, сюлмыз ӧз чида - ньыльдон аресозь гинэ улӥз. Егит атайзылэн верам кылъёсыз быдэсмизы - Евгений Васильевич Черных, зэмзэ но, солэсь кужмогес луиз. *** "Ижсталь" заводысь андан пӧзьтӥсьлэн Евгений Васильевич Черныхлэн нимыз быдэс республикамылы тодмо. Солэн ӟеч ужан амалъёсыз сярысь туж трос гожъямын но ини. Но ӵем дыръя озьы луыса кошке: уж сьӧрысь ум адӟиське адямиез. Ум малпаськиське, кызьы со ассэ дораз возе, кыӵе эш луэ. Та сярысь малпаськыса ик гажано адямиелэсь куд-ог сямъёссэ возьматэме потэ. Маин со монэ бордаз кыске? Нырысь ик, усьтэм сюлэменыз но оломае но тодэменыз. Куд-ог дыръя воксё паймиськод: кытысь со ваньзэ тодэ? Юанлы валэктон шедьтӥськод, дораз вуылыса: быдэс борддор кузя - книга ӝажыос. Книгаос сярысь вераськыны кутскиз ке, уз ни дугды. Городысь вань книга люкасьёсты тодэ, Евгений Васильевич тужгес но яратэ историлы сӥзем книгаосты, нош писательёс пӧлысь ноку акыльтытэк выльысь но выльысь лыдӟоз А. Пушкинэз но В. Маяковскиез. Ялан чакласа возе выль книгаослэсь потэмзэс. Со сярысь шуи ке, тодон-валан басьтон мылкыдыз кӧт сюманэз но ворме шуыса, уг янгыша, дыр. Калыкен но государствоен вылӥ дунъям адями асэныз йӧнъяськонэз уг тоды. Кӧня чаклалляй ини: асьсэды озьы огшоры возьыны быгато зэмос визьмо, умой адямиос гинэ. Евгений Васильевич котькинэн вераськыны огкыл шедьтоз. Мыным туж кельше, кызьы со кылбуръёс лыдӟе, удмурт кылын потэм книгаос сярысь вера. Усто атай, песятай но кузпал - озьы шуо со сярысь матысь эшъёсыз. Кузпалэныз Нина Павловнаен одӥг ныл но кык пи будэтӥзы. Пиналъёссы, куать внуксы корка тыр люкасько ке, пересьёс лӧптэм мылкыдзэс возьыны уг ни быгато. Семьяын кин ке но кузё луыны кулэ, шуо. Но таӵе веранэн Евгений Васильевич соглаш ӧвӧл. Кузпалэныз котьку ог-огзыя кариськыса уло. Ваньзэ ӵош малпаськыса лэсьтӥськомы, шуэ воргорон. Сюлмаськонъёсын но шумпотонъёсын улэм аръёс соосты ог- огзылэсь уг палэнты, уката но матэ каре. Кемалась ӧвӧл пумиськылӥ бадӟым пизылэн кузпалэныз Людмилаен. Евгений Васильевич сярысь со шуиз: "Оло уд но оске, оло кинлы ке паймымон но потоз, вылды, но атаймылэн нокыӵе тырмымтэосыз ӧвӧл". Тӥни озьы. Черныхъёслэн семьязы вань праздникъёсты нылпиосынызы но матысь эшъёсынызы ӵош пусъё. Соос доры вуэм куноослы ноку мӧзмыт уг луы, угось Нина Павловна но Евгений Васильевич кыксы ик чебер куараен кырӟало. Нош арлыдо воргорон "яблочко" эктонэныз паймытэ на - солы дышиз вал Севастопольын, флотын службазэ нуыку. Евгений Васильевичез кемалась тодӥсько ке но, кыкнамы Сюмси палъёсысь, аслым ачим ялан юан сётӥсько: кытысь со котькытчы вутскыны кужым шедьтэ? Собере ачим ик валэктӥсько: ӟеч выжыысь потэмез, дыр, юрттэ. Али шуысалзы генъёсыз, пе, сыӵе. Дано андан пӧзьтӥсь кыӵе гинэ ужъёсы ӧз пыриськылы. Ужаз профсоюзлэн, тупаса улонъя комитетлэн, ожысь но ужысь ветеранъёслэн советсылэн ёзъёсаз, озьы ик обороная промышленностьлэн комитетаз. Кызь ар пала ужаз партилэн Ижевскысь комитетаз, огдыре ик кивалтӥз цехысь парткомен, пыриськылӥз пӧртэм пленумъёслэн, кенешъёслэн, активъёслэн ужъёсазы. Палэнын пукыса гинэ ӧз, пыриськылӥз, югдурез валаны турттыса но умой дэмланъёс ӵектыса. Тӥни озьы пӧсь гурезлэсь люкиськыса, Евгений Васильевич Черных мукет пӧсь ужъёсы выйылӥз. В. ЛОГИНОВ. Кудӟытэк но луэ шулдыръяськыны Шунды улӥе лэзькем бере гинэ жадьыса вуизы гуртоос турнан но мажсаськон дорысь. Но ужзы доразы но быронтэм. Выроно возь вылысь али гинэ вуттэм пудоос котырын, сӥге ӝутъяно тракторен яке валэн ваем кӧс турынэз. Сюдоно семьяез. Ӝомо-югытэн ини бускель азбарысь витьымтэ шорысь кылӥськиз нылкышно кырӟам. Со борды ватсаськизы кыкетӥез, куинетӥез. Итӥськизы воргорон куараос. Бакча берысь азвесен ворекъясь тымет вадьсытӥ кыдёке жингыра сюлэмез позыртӥсь вашкала удмурт гур. Таиз бӧрсьы мукетъёсыз - пыдъёсыз асьсэос эктыны ӝутӥсь туала кырӟанъёс. Чылкак паймытӥзы вӧсь гуръёс. Кытысь тодо, йыразы кызьы возё на соосты тямыстон ар ӵоже черклэсь палэнтэм адямиос? Тазьы пумитазы кылем субботае гербер (Петров нунал) праздникез Шаркан ёросысь Малиновка гуртын улӥсьёс. Герберез гинэ-а? Озьы огазе люкаськыса пусъё гуртоос 1 Май праздникез, Вормон нуналэз, Миколаез, Троицаез, Вознесениез... Куд-огез шуозы: юыны муг шеде бере, пе, малы таӵе ӧтчанъёс уд ортчытылы? Ужпум соин герӟаськемын ӧвӧл. Бырыны вуэм, 15 корка гинэ кылем гуртын ӧвӧл клубзы. Азьвыл куд-ог дыре вал гидысь возьмаськон интыын яке фермаысь "Горд сэрегын" пумиськылозы вал ке, табере соиз но, таиз но быремын. Нош адямиос, кызьы тодӥськом, секыт яке капчи-а улонзы, котьку но ог-огзы борды кыстӥсько. Тӥни малы вылӥ верам праздникъёсы, гуртын али улӥсьёсыз сяна, одно вуо татын вордскем, нош бӧрысь палэнэ каръяськем муртъёс но. Та ужрадэз, озьы шуид ке, шонергес луоз, радъянэ мылысь-кыдысь пырисько ветфельдшер Зоя Тимофеевна Галичанина, пенсионеркаос Юлия Петровна Корепанова, Наталья Григорьевна Иванова, Серафима Степановна Васильева, Мария Ильинична Осотова... Азбаре, нош куддыр меӵак ульчае пуктылэм ӝӧк сьӧрын адямиос тодазы ваё эшъяськыса ӵош будэмзэс, кенешо улон-вылонзы сярысь. - Ӵемысь синкылиосмес ӵушылыса пукиськом, - шуэ Таисия Владимировна Максимова. - Нимысьтыз ноку но ум дасяськиське, кин ма быгатэ, сое ик ваиськом. Озьы, азьланяз но тазьы мед уломы шуэм сямен, уртче сииськом-юиськом. Таяз учыре но люкаськемъёс азбарысь ульчае потӥзы. Чылкак егит дыръязы сямен кырӟаса ваче ки бергазы. Ӵукна куинь час котырын гинэ кыстӥськизы асьсэ коркаоссы пала. Нокин но ӧз кудӟы, нокин но, сюмык бичаса, юртысь юртэ калгыны ӧз поты. Угось шунды ӝужалоз гинэ, соос нош ик киязы кутозы кусоос, мажесъёс но лопатаос. Уг, уг вуно удмурт гуртын ӟеч сямъёс. Со но та секыт аръёсы адямиослы юрттэ, дыр, мылкыдзэс чылкак куашканлэсь утьыны. Н. ДОЛГОВ. Улонысь учыр Сильтӧл-пери Со вал 1987 арын 26 июне. Дас арлэсь кема ни та луэм "ужлы". Нош нокызьы но йырысь но, сюлмысь но уг поты со кышкыт учыр. Ӵапак та нуналэ ми дасяським выпускной вечер ортчытыны. Та нуналэ мон берпуметӥ классме улонэ келяй. Ӝыт, сизьым час котыре, мынӥсько школае. Али гинэ, дорысь потыкум, куазь туж чебер, шундыё, шуныт вал. Тымет вылтӥ мыныкум учки азьлане. Школа сьӧртӥ, Кӧс Сибы гурт вылтӥ но бусы вадьсытӥ лыктэ сьӧд пилем. Пеймыт гинэ ӧвӧл, сьӧд-сьӧд со. Мон школае матэгес вуисько ини, пилем но матэктӥське. Быдэсак лэзиськем кадь ини со бусы вылэ. Котыр туж шыпыт. Одӥг тылобурдо куара но уг кылӥськы, писпулэн но одӥг куарез но уг вырӟы. Соос но, маке умойтэмез шӧдыса, шокатэк кадь сыло. Быдэс дунне кыӵе ке кышкыт ужез пумитаны дасяське, оло. Шуак инкуазь уин кадь пеймыт луиз. Бызьыса пыри школае. Нылъёс ӝӧк вылэз чеберъяллям ини. Бадӟымесь, олокыӵе но сяськаосын лэсьтэм тортъёс пуктылэмын, вазаосын шоколад конфетъёс, чебересь пияла тэркыосын яблокъёс но пӧртэм мукет сиёнъёс. Эшшо но чебер каро ӝӧк вылэз сирень, льӧмпу сяськаос, италмасъёс. Ӝуатӥллям электротыл. Югыт пишто лампочкаос. Ваньмыз дась ини вечерез ортчытыны. Пуксимы ӝӧк сьӧры. Нокин но номыр вераса ӧз вутты - туж зол гудыртӥз, быдэс школамы зурказ, укноос жингыртӥзы. Эшшо вылысьтыз вылаз шатрак-шатрак вазиз. Секундлэсь но вакчи дыр куспын шальк! усьтӥськизы кортэнызы пытсам укноос. Кызьы со ворсэтъёс пезьдӥзы? Эшшо вылысьтыз вылаз кӧня ке пол шимес гудыртӥз. Кышкаменым синъёсме ик кыниськем... Усьтӥ синъёсме. Ма со сыӵе выж вылэ юг-юг люкаськемын?! Йӧ пырыос ук со! Йӧ зорем, укноетӥ пырем. Кудӥз-огез йӧ пырыос кукей ӵуж быдӟаесь. Тӧл нош весь кузёяське на: быдэс школаысь укноос, ӧсъёс шыльк-шальк усьтӥсько, ворсасько. Секунд куспын нош ик туж чалмыт луиз, шокам куараез но, кутлэсь лобӟемзэ но кылод. Ваньмы столовойысь потӥм школа коридоре, эскериськом классъёсты, ворсаськом усьтӥськем укноосты. Котькытын выж вылын куакакеньыр, йӧ пырыос - гылӟыса но кошконо. Укноос кызьы ке сӧриськиллямтэ, быдэс кылиллям. Школамес пушкытӥз котыр ортчим но кыре потӥм: вылласянь маке луымтэ меда. Инкуазь котыр пеймыт на, но шыпыт. Вож гуждор вылын но интыен-интыен юг-юг куакакеньыр. Школа дорысен ог 200-300 метр кемын лошъясько корт листъёс, кирпич пырыос. Школалэн дышетскон корпусэз сярысь спортзал кык-куинь метрлы ӝужытгес вал. Спортзаллэн со выль ӝутэм борддорез но куашкатэмын, липетэз но ӧвӧл ни. Ӵуказе ӵукнаяз тодмо луиз: сильтӧл куд-ог коркаослэсь но липетсэс, укно рамаоссэс куям. Сильтӧллэн самой секыт кужымез йӧтэм Гартча нюлэсмы борды. Кышкыт вал учкыны та нюлэсмы шоры, сильтӧл кошкем бере. Вань писпуос погыртэмын. Кудӥз зӧк кызъёс шортӥз ик куаӵак тӥялтылэмын, кудӥз куинь-ньыль метр кузьда пилиськылэмын. Погыртэм писпуос кужен-вамен усьылэмын, йыл, дӥнь сураськемын, кудӥзлэн выжыез ожоен но сюен валче ӝутӥськемын. Чуак-чуак кытын но отын кылемын на суй зӧкта кузь будэм кызъёс но ньылпуос. Анай-атайтэк кылем сирота нылпиос кадь адско соос. Кудӥз-огез буко кадь куасалтӥськиллям но йылзы музъеме пырем, нош чигиськыны сётӥськИллямтэ. Кыӵе пери татын кузёяськем?! Ӟучъёс шуэм сямен, Соловей-разбойник-а яке кузь тушо Черномор-а татын сьӧд ужзэс лэсьтӥллям. Мыныны татӥ номырин но уз луы: пыдын но, нокыӵе тракторен но. Кышкыт учкыны нюлэс шоры, сильтӧл кошкем бере... Нош кыӵе шимес вал, дыр, татын, тӧлпери кузёяськыку! Кыӵе куара сётӥзы сыӵе зӧкесь кызъёс, ньылпуос, куаӵак чигыкузы но усьыкузы, улонэн люкиськыкузы?! Тӧлпери кузёяськиз кӧня ке секунд гинэ, нош соос ваньзы ӵош усизы, дыр, ук. Кык иськем мында луоз пасьталаез но кузьдалаез та пограм нюлэс интылэн. Ярам нош, адями нокин тупамтэ татчы, улэп нокызьы ӧй кыльысал, дыр. Ноку но ӧй кылылы пересьёслэсь, ачим но ӧй адӟылы талэсь азьло таӵе шимес учырез. Нош бератаз таӵе кышкыт кужымзэ инкуазь ӵем гинэ возьматъяны кутскиз кадь ини. Ар-а, кык-а ортчыса, тӧлпери кошкиз Пуӵо (Почешур) гурт но Можга город вылтӥ, соберегес Выль Бия гуртэ пыраз но возьматӥз аслэсьтыз кужымзэ. (Тӥ палан но оло со выллем учыръёс вал? Гожтысалды ке газетэ, тунсыко луысал, дыр.) Туэ сыӵе шукырес сильтӧл ортчем Москва город вылтӥ. Уно изъянтэмез сярысь газетъёс гожъязы ни. (Алигес сильтӧл-пери шукыръяськиз Пичи Пурга ёросамы но - Ред.). Инкуазьлэн уродъяськеменыз валче таӵе малпанэ но вань мынам. Оло, со шонер но ӧвӧл, но верано кариськи. Со сильтӧл бере ар ортчыса, школаямы диспансеризация вал, эскеризы тазалыкмес - дышетскись пиналъёслэсь но, дышетӥсьёслэсь но, вирмес но басьтылӥзы. Мон берпуметӥез вир сётӥсь вал. Мынэсьтым азьло кабинетысь потӥз пинал дышетӥсь. Мон дӥсяськисько. Врачъёс но кошкыны дасясько ини, пробиркаоссэс интыяло, куспазы верасько: "Ма, таослэн таӵе - дышетскись пиналъёслэн но, дышетӥсьёслэн но - вирзы огкадь умойтэмесь?" Вазись ӧй вал. Мон гинэ кылӥ со верам кылъёсты. Берло но со сярысь нокытын, нокыӵе вераськон ӧй вал. Нош аръёс ортчыса, вирлэн умойтэмез бадӟым куректон но ваиз ини. Туж тыршыса ужась пинал дышетӥсьмы улонысь кошкиз, вирыз умойтэм луыса, белокровие шуизы. Мукетызлэн дышетӥсьмылэн пичи пиез висе. Гурт калыкмы туж куректӥз, тодмо луэм крезьгурчимы Евгений Батуев таӵе ик муген улонысь кошкем бере.... Нош мон малпасько: со сьӧд пилем, со тӧлпери ӧз-а вайы ми доры инкуазез саптась секыт зор? Е. ПАВЛОВА, Можга ёросысь Бадӟым Сибы гуртысь дышетӥсь. Редакцилэсь. Таӵе малпанлэсь шонер луэмзэ эскерон вылысь вазиським медициная профессорлы Арсений Михайлович Загребинлы. Со шуиз: "Инкуазь явлениослэн адямилэн тазалыкез вылэ кызьы шӧдӥськемзы умой-умой эскеремын ӧвӧл на. Котырамы, инкуазьын, дуннеын туж трос валантэмез, тодмотэмез. Верам учыр зэм но луыны быгатоз". Правительствоын НЯНЬЛЭН ДУНЫЗ УЗ БУДЫ Калыклэсь улонзэ ялан утьыса возёно начармемлэсь - сыӵе валтӥсь ужпум ас азяз пуктыны кулэ котькуд правительство. Таӵе мылкыдын кенешон ортчытӥзы нянь пыжись предприятиослэн кивалтӥсьёсынызы Правительстволэн Тӧроез П. Вершинин но солэн воштӥсез В. Зенин. Отын пусъемын вал асьме магазинъёсын кӧня ке аръёс ӵоже ини няньлэн дуныз, Уралысь мукет улосвылъёсын сярысь, дунтэмгес луэ шуыса. Со дунъёсты озьы ик возён понна, ваньбур поттӥсьлы ӟеч ужаны луонлыкъёс кылдытон пумысен закон кутоно. Озьы гинэ луоз тырмыт ю тысь, фураж дасяны. Ваньбур поттӥсьлэсь но вузкарисьлэсь ужан кусыпъёссэс меӵак тупатэм огкылъя радъяно. Удмурт РеспубликаысьПравительстволэн Тӧроезлэн секретариатысьтыз пресс-центр. Лушкамын ...тепловоз Архангельск областьысь Лойга посёлоклэн чугун сюрес станциысьтыз уин лушкамын вал ... чаклатэк кельтэм быдэс тепловоз. Тепловозэз Вологодской областьысь Щевелевская гурт вӧзысь шедьтӥзы. Та сярысь ивортӥз Архангельской областьысь УВД-лэн пресс- службаез. Милицилэн малпамезъя, йыртэмась - Щевелевская гуртысь 30 аресъем пиосмурт. Бускельёсыз дорын кемагес кунояськем бераз, воргорон дораз тепловозэн бертоно кариськем. Та вие ик чугун сюрес вылын пумит мынӥсь поезд шедьысал на ке, бадӟым авария луыны быгатысал. "Удмурт дунне" мынам улонам ДЫШЕТӥСЕ НО, ЭШЕ НО Та газетын мон кык пол ужай. 1959-тӥ арын, механической институтын дышетсконме висеменым куспетӥ карыса, академической отпуск басьтӥ. Стипендия табере ӧвӧл ни - маин улод? Лыктӥ "Советской Удмуртие". Со вал 2-тӥ феврале. Монэ кутӥзы литературая ужасе. Соку кыӵе ке но быръёнъёс вал - иворъёсъя отделэ ӵапак ватсаса адями кулэ луэм. 16-тӥ мартозь ужай мон. Редактор соку П. М. Яшин вал, нош иворъёсъя отделэн кивалтӥз В. И. Иванов. Василий Иванович туж лякыт адями вал: куаразэ ноку но ӧз ӝутылы, котьку лачмыт гинэ вераськылӥз. Чиданэз туж бадӟым вал. Татын ужаны кутскытозь малпалляй: ивор шедьтонлэн нокыӵе секытэз ӧвӧл, дыр - кутскид но гожтӥд. Нош ас вылам вуиз но, валай: макем секыт вылэм та уж. Мон туж тыршыса гожтӥсько но, Василий Иванович "гыре" ук - кык-куинь кылыз гинэ интыяз кыле на. Солэсь тупатъямзэ лыдэ басьтыса, отӥяз выль сямен гожтыны турттӥсько ини. Табере пӧрмиз кадь, малпасько, кивалтӥсе кизэ но уз йӧтты ни. Кытын, пе, со! Нош ик гожма... Сюлэм ик олокыӵе луэ. Но мон вожме уг поттӥськы - визьмам бинялтӥсько. Озьы, Василий Ивановичлэсь адӟем карыса, вакчи дыр куспын газетэ гожъяны дыши. 1974-тӥ арын гужем "Советской Удмуртие" ужаны лыктӥ но, нырысетӥ материалме ик сокем ӧз ни гожмалэ. Соку редактор вал В. М. Михайлов, нош гурт улонъя отделэн, кытчы мон интыяськи, кивалтӥз К. Е. Ломагин. Кирилл Егоровичлэсь но трос дышетски на. "Удмурт писательёс гурт сярысьгес гожъяло. Тынад татчы пыремед туж умой",- шуэ вал со Газет мыным, зэм но, трос выльзэ сётӥз. Татын ужакум, возьмамтэ шорысь тодматски Селта районысь Ленин нимо колхозлэн председателеныз - Н. Ф. Соловьёвен. Сое тросэз писательёс но журналистъёс тодо вылэм ини, но гожъяны дӥсьтӥллямтэ. Соку та колхоз районын огназ миллионер ке но вал, председательзэс, Николай Фомичез, райкомын уг ярато вылэм. Малы ке шуоно, со кивалтӥсьёслэсь сокем ик кылзӥськылымтэ, кусозэ ас сяменыз шерылэм. Райком уг косы бере, сое ушъяны дӥсьтӥллямтэ. Нош мон отчы пыраса ӧй улы - материал люкай но нырысь радио пыр сётӥ, собере гинэ газетэ ваи. Радио пыр вераськемме колхозникъёс синвуаськыса кылзӥллям. Газетын но материалме кык номерын сётӥзы. Н. Ф. Соловьёвлэн данэз ӝутскиз, райкомын со шоры мукет синмын учкыны ӧдъязы, Ленин орден но сётӥзы. 1977-тӥ арын та колхоз сярысь очеркен "Кильмезьысь батыр" книга поттӥ. Кирилл Егоровичен ми Шаркан районысь Быги гуртын газетэз лыдӟисьёсын пумиськон ортчытӥм. Калык клуб тыр люкаськиз. Таӵе вераськон ӝутӥмы: малы гуртын ужъёс урод мыно? Вераськонмы ӟырдыт пӧрмиз. Шарае потӥз тани ма: гуртын адямиосты кузё луыны уг дышето, асьсэ визьмынызы малпаськыны уг лэзё, дась косэмез гинэ быдэсъятыса возё. Нош крестьян калык музъем вылын кузё луыны кулэ - сыӵе малпанэ вуимы ми. Вань кылэммес-адӟеммес газетын быдэс бам сётӥмы. Материалмес ушъязы. 1975-тӥ арын Вормонлы 30 ар тырмемен валче Эгра палась Порвай гурт сярысь озьы ик быдэс бам материал поттӥ. Дыр ӧжыт ке но сётӥзы, вакытаз вуттӥ. Редколлегилы таиз но гожъяме яраз. Но газетын мыным ар сяна ужаны ӧз кылды - авторъёслэсь правооссэс утёнъя агентствое - ВААП-е - басьтӥзы. Нош ма но со али ке но гожъясько на: татын монэ котьку шумпотыса пумитало. Пенсие потэме бере дорын пукыса мӧзмисько ке, пыдъёс редакцие кыско. Озьыен, та газет мынам дышетӥсе но вал, эше но со. Фёдор ПУКРОКОВ. Удалтоз-а куке но удмуртъёслы? Ог дас ар талэсь азьло Ижысь андан ӵыжатӥсьёслэн городоказы выль кинотеатр ӝутскиз. Солы ним быръён вакытэ городысь кузёос ӵошатскон усьтӥзы. Удмуртъёс но пыриськизы та ужрадэ. Соос кинотеатрез "Андан" шуыса ниманы ӵектӥзы. Уго отын андан ӵыжатӥсьёс уло, собере та ним чебер но кужмо кылӥське. Ӟучъёс "Аврора" ним дэмлазы. "Аврора" вормиз! Куать ар ӵоже ини удмурт политикъёс учёнойёсын ӵош тыршо асьме кылъя законэз кутыны. Таӵе закон котькуд национальной республикаын кутэмын ни. Со гинэ ӧвӧл. Коми шаерын коми калыклэн съездэзлэн государственной кун статусэз но законэз кутэмын. Нош ми ум быгатӥське. Нош ик ӵошатскон мынэ. Кин асьмелэн кунамы тужгес но золгес зӥбемын? Шумиловъёс но Кокоринъёс, кудъёссэ тужгес но ярато официальной газетъёс, шуо: ӟучъёс, пе, татын воксё зӥбемын ни, соосты татын нокин уг утьы, вань уродэсь ужрадъёс кылдэмын удмуртъёслэн кивалтэменызы. Таӵе учыръёсыз туннэ тодэ но вайыны кулэез ӧй вал, дыр. Но сыӵе малпанэ вуиськиз, нош ик соосын пумиськем бере. Евро-азиатской банклэн Глазовысь филиалэз потӥз туж умой ӵектонэн - со аслэсьтыз юртсэ сётыны дась "Иднакар" музъемлы. Та юрт юромо таӵе музей тупатыса кадь лэсьтэмын. Сылэ со нимаз интыын, вылтусызъя но архитектураезъя туж чебер но кельшымон. Фондъёсты возьыны шуыса кадь вань нимысьтыз интыез но. Отын умой луысал возьыны но утьыны тужгес но дуноесь арбериосты, пыӵал тӥрлыкез. Быдэсак юртэз лушкемен адӟыны но эскерыны быгато 19 видеокамераос, отысь туспуктэмъёс вуо нимысьтыз пультэ, пуктэмын сигнализация. Но самой ӟечез но пусйымонэз со бордын: та юртлэн коридоръёсыз котыресэсь, юромо экспозициосты возьматыны дасямын кадь. Со ик ӵапак тупа музейлэн куронъёсызлы. Сыӵе ӟеч ӵектон вал бере, та юртэз "Иднакар" музейлы курыса ми вазиським Кун Кенеше но Правительствое. Но та органъёсысь кивалтӥсьёс шуизы: ужпумез, пе, Глазов кар администрациысь кивалтӥсьёс мед сэрттозы-пертчозы. Нош отысь кузёос сое библиотекалы сётыны малпало. Музей пумысен вераськонъёсты кылэм-адӟемзы но уг поты. Но ведь татын лыдэ басьтыны кулэ вал тани мае но. Нырысетӥез. Кутэм постановлениея "Иднакар" луыны кулэ элькунысьтымы музей- заповедник. Соин ик, республикалы аслыз кулэ вал, дыр, та пумысен сюлмаськыны. Кыкетӥез. Та музей луыны кулэ туж но туж аспӧртэмлыко. Сыӵе музей одӥгаз но финн- угор республикаосын ӧвӧл, уз но луы, малы ке шуоно, шор дауръёсысь таӵе памятник нокытын шедьтэмын ӧвӧл на. История наукаосъя докторлэн, профессорлэн М. Г. Ивановалэн Иднакарын 25 ар ӵоже бадӟым уж нуэмез ик луонлык сётӥз сыӵе памятник кылдытыны. Та дыр ӵоже со 22 сюрслэсь уно вашкала арбериосты сётӥз ни. Но милемыз тужгес сюлэмшугъяськытэ тани ма: кортлэсь, ыргонлэсь но азвесьлэсь арбериос пумен куашканы но сылмыны кутско. Музъем пушкысь шедьтосъёс омырен герӟаськыса вылтуссэс ыштыны ӧдъяло, мынэ химической реакция. Сое дугдытон понна ӝегатскытэк кулэ ужрадъёс кутоно. Соосты "эмъяно" но консервировать кароно. Соку гинэ та арбериос музейын возьматоно экспонатъёс луыны быгатозы. Сюлэм ик вирен кисьтӥське, куке номырин дунъянтэм, калыкмылэсь вашкала улон-вылонзэ но культуразэ возьматӥсь арбериос син азьын сылмо. Соос чиптэм-чаптэм бырыны но быгатозы. Ми куанер бюджетысьтымы висъям коньдонысь кӧня ке манетъёссэ ке но та кулэ ужлы висъяны тыршиськом ик. Асьме кужыменымы выльдэмын ни сюрслэсь трос вашкала шедьтосъёс - пуртъёс, тӥръёс, пукыӵ ньӧлъёс, чеберъянъёс. Котькуд арберилы гинэ 30 манетлэсь уно коньдон кулэ. Но азьланяз та ужъёсты быдэстыны кужыммы уз тырмы ни. Удмурт Правительствомы таяз паларе бюджетысь 517 но ӝыны сюрс манет висъяны кулэ ке вал, ӧз вуы одӥг копейкаез но. Соин валче ик табере книгаос но поттыны ум быгатӥське ни. Валаськом: правительство сётэм кылзэ уз быдэсты. Но юн оскиськом вал, "Иднакар" музейлы юрт висъялозы шуыса. Нош со луысал ке, ми азьланьтыны быгатысалмы кутскем ужмес. Соку вазиськыны быгатысалмы Россия Федерацилэн правительствоезлы, странаысьтымы Культурая министерствое. Курыны луысал "Иднакар" музеез Россилэн статусаз, ЮНЕСКО-лэн списоказ но Президентлэн программаяз пыртыны. Куинетӥез. Иднакар кылдытӥське ас ужзэ яратӥсь, быдӟымезлы оскон но азьланьзэ валан мылкыдо адямиосын. Та памятник удмурт калыклэсь историзэ чылкак мукет тусын возьматысал. Та памятникез усьтон бордын 25 ар ӵоже ужатозяз тодосчи Маргарита Иванова возьматыны быгатӥз: удмуртъёслэн вашкала дауръёсы но, Россиен огазеяськемезлэсь азьло ик, туж вылӥын вылэм политической огазеяськонзы, культуразы, котьма ласянь быгатонлыксы, кибашлы луэмзы. Озьы ик улӥын вылымтэ мукет калыкъёсын кусыпъёс возёнзы, вузкарон уж нуэмзы. Азьвылгес куд-ог газетъёс гожъяллязы, удмуртъёс, пе, революцие выжизы, кызьы шуо, первобытно-общинной стройысен. Нош Маргарита Иванова татын зэмос подвиг лэсьтӥз шуыны луоз. Со ик макем бадӟым уж лэсьтӥз музеез кылдытонын. Уно аръёс ӵоже люкам дуно арбериоссэ, соос бордын огназ ужаса, шедьтосъёссэ сётэ музейлы. Мукетъёсыз учёнойёс сыӵе дуно арбериосынызы озьы гинэ ӧй люкиськысалзы. Отысь бадӟым барыш поттыны тыршысалзы. Экспедициосты ортчытон - капчи уж ӧвӧл. Шедьтэм арбериосты соку ик сузяно, тупатъяно, консервировать кароно, утёно. Нош асьме Правительстволы со кулэ ӧвӧл. Та экспонатъёс Россиысь Наукаосъя академилэн ваньбурез луо. Ми удмурт калыклэсь историзэ возьматон но юнматон понна тыршиськом. Со арбериосыз нокыӵе дун курытэк Удмурт кунмылы сётӥськом. Но ведь адямилэн патриотической но ӝутскем мылкыдыз ялан огкадь уз возиськы, пумтэм-йылтэм уз луы. Чидан но чиге, шуо. Нош дыр ортче. Ми пересьмиськом. Мон меӵак вераны быгатӥсько, оскисько юн: та юрт музейлы сётэмын ке ӧз луы, со луоз музейлэн быронэз но пумыз! Ми бере лыктэмъёслы со кулэ уз луы ни. Туала егитъёс коньдонзэс музейлы ноку уз сётэ. Соослы со кулэ уз луы. Озьы лэсьтӥськыны быгатоз шимес преступление. Экспонатъёс сылмозы, музей пашмоз. Нош соку маин данъяськыны быгатоз на удмурт шаермы? Пыӵал тӥрлыкъёсын музеен-а, выль лэсьтэм черкъёсын-а, кудъёсызлы калыклэсь ваньбурзэ таласьёс сьӧлыкъёслэсь мозмытскон понна коньдонзэс сётӥзы, яке уй но нунал сэзъяськись качалкаосын-а, кудъёсыз асьме музъемысь му вӧез "Сиданко" но мукет кунгож компаниослы келяло. Нош данъяськыны кулэ вал, дыр, зэмос дано историенымы но культураенымы, кудзэ яркыт кизили кадь возьматэ "Иднакар". К. КУЛИКОВ, история наукаосъя доктор, профессор. Берпум сюрес Та нуналъёсы Петербургысь Петропавловской крепостьын выльысь ватӥзы азьвыл эксэйлэн Николай ИИ-лэн семьяезлэсь лысьӧмъёссэс. Ӟуч эксэйлэн семьяезлэн быремезлы 80 ар тырмон азьын та шимес учыр сярысь трос гинэ гожъязы. Берпуметӥ эксэй Николай ИИ кивалтыны кутскиз 1894 арын, атаез Александр ИИИ кулэм бере. Соку солы 26 арес тырмиз. Пинал дырзэ со анай-атаез вӧзын ортчытӥз. Укмыс арес тырмемез бере дышетскыны кутскиз. Пӧртэм предметъёсын тодматскем сяна, со бадӟым саклык висъяз на военной удыслы. Экономикая но финансовой ужпумъёсъя солы лекциос лыдӟиз тодосчи, берло - Министръёслэн Советсылэн тӧроез С. Витте. Озьы ик солэсь тодон-валанзэ будэтыны тыршиз Сенатысь обер-прокурор, юрист К. Победоносцев, отставкае потэм генерал-адъюдант Г. Данилович но мукетъёс. Николай ИИ кышно бысьтӥз Гессенской герцоглэсь нылзэ Алиссаез. Православие выжеменыз, сое нимазы Александра Фёдоровна, "Святоез" Григорий Распутинэз доразы воземен но солэсь кылӟиськыса улэмез понна, Александра Фёдоровнаез ӟуч дворянство но калык ӧз яратэ. Эксэйлэн семьяяз ньыль нылъёссы но одӥг висись пизы вал. Эксэйлы корона сётон ортчиз 1896 арын. Кунгож сьӧрысь уно монархъёс азьын Николай ассэ быдэс Россилэн императореныз ялӥз. Но сыӵе ужрад ортчыку ик маке но урод луон шӧдӥськиз: солэн Андрей Первозванной орден нуллон секыт жильыез пельпумысьтыз музэ усиз. Выль эксэез учкыны но кузьымъёс басьтыны Москваысь Ходынка бусые трос калык люкаськиз. Югдурез чакламтэен, ог-огзэс пачкатыса но лёгаса трос адями быриз. Япониен ожмаськон кутскем бере, тросэз рабочийёс, тужгес но гуртысь лыктэмъёсыз, "эксэй батюшкалы" оскизы, со Россиез шуг-секытысь поттыны быгатоз шуыса. Петербургысь жандармъёс, сое лыдэ басьтыса, асьсэлэн агентэнызы Гапон священникен кылдытӥзы "Санкт-Петербургысь ӟуч фабрично-заводской рабочийёслэсь кенешсэс". Гапон рабочийёсты ялан оскытылӥз: эксэй калыклэсь курадӟонзэ тодэ. Сыӵе валэктон уж калыкез кӧня ке гинэ буйгатӥз. 1905 арын 3 январе Путилов заводысь куд-ог рабочийёс ужысьтызы куштэмзы понна, куашетон ӝутӥзы. Соослэсь адӟем каризы мукет интыосысь рабочийёс но. 8 январе Петербургысь вань рабочийёс потӥзы стачкае. Ужамысь дугдӥзы уноез бадӟым предприятиос. Ӧз потэ газетъёс. Гапонлэн ӵектэмезъя, 9 январе рабочийёс ас куронъёынызы Зимний дворец доры мынӥзы. Но соосты Дворцовой площадьын соладтъёс пыӵалъёсын ыбылыса пумитазы. Та "горд арняе" быдтэмын но сӧсыртэмын вал ог 5 сюрс мурт. Рабочийёс йырзы курен пыӵалъёс кутӥзы, баррикадаос лэсьтӥзы но войскоослы пумит султӥзы. Бырем адямиосты буре вайыса, данак городъёсын, большевикъёслэн кичӧлтэмзыя, урамъёслы 9 январь ним сётэмын вал. Николай ИИ шӧдӥз страналэсь куашкан калэ вуэмзэ, нош ма карыны ӧз тоды. 1906 арын тулыс ортчизы нырысетӥ государственной Думае быръёнъёс. Дума бадӟым инты висъяз гуртъёсысь ужпумъёслы. Правительстволы ӧз кельшы депутатъёслэн-трудовикъёслэн музъемез вузан сярысь куронъёссы. 1906 арын эксэй Думаез быдтӥз. Правительство калыкез шымыртыны кутскиз. Озьы ке но, репрессиосын, военно-полевой судъёсын, карательной экспедициосын экэсй правительство революциез вормыны ӧз быгаты. Забастовкаос ӧз дугдылэ. 1917 арын 2 октябре Николай ИИ кивалтонзэ Михаил вынызлы сётэ. Но мукет нуналаз ик Михаил тронлэсь куштӥське. Азьвыл императорез но солэсь семьязэ кырмо но Царской селое келяло, нош собере Сибирьысь Тобольск городэ ысто. Кӧня ке дыр ортчыса, ВЦИК-лэн мандатэзъя комиссар Яковлев Романовъёсыз Екатеринбурге ваиз. Николаез семьяеныз интыязы Н. Ипатьев инженерлэн корказ. Уралысь облсоветлэн косэмезъя, 1918 арын уин 16-ысен 17 июле Н. Романов семьяеныз ӵош Ипатьевлэн юртаз ыбемын вал. Та учыр Россилэн историяз огез тужгес но шурдытэз луыса кылёз. Малы кулэ на вал, эксэйлэн тронэзлэсь куштӥськем бере, ар но куать толэзь ортчыса, Николай Романовлэсь быдэс семьязэ быдтыны? Та юанлы валэктон шедьтымтэ на. В. ЧЕРНОВ. БУМАГА-А УТЁЗ ПИНАЛЭЗ? 11-тӥ классын дышетскись пияш лейкомиен реанимацие сюриз. Ӝегатскытэк вир кулэ. Вир группазы, резуссы тупась ӵыжы-выжыосыз, тодмоосыз сётыса но уг тырмы. Ивортӥзы школаяз но. Пияшлэн дышетӥсез тодэмез бере ик, бызьыса мынӥз вир басьтон станцие. Группаез, резусэз тупа, пыэдэн сяна, нокыӵе висёнэн висьылэмез ӧвӧл - коть литрзэ мед басьтозы. Пограз ке, одӥг нунал кыллёз но жумез ортчоз. Но озьы гинэ уг лу вылэм. Анализ сётыны пуксиз но, паспортсэ юазы. - Пропискаед ӧвӧл, вирдэс ум басьтэ. - Но мон ялан одӥг интыын ужасько, уж дурам телефон но вань. - Ум, ум быгатӥське. - Ми котькуд донормес компьютерной банке пыртӥськом, марысь- мар ке, кытысь ми тӥледыз утчалом? Та учырез бӧрдыса вераз мыным эше. Вир лэзьянъя станцилэн кивалтӥсез А. А. Зараев та пумысен юаськемелы, лаборантъёс шонер лэсьтӥллям шуиз. Милям, пе, асьмелэн инструкциосмы вань. Ужпум тазалык бордын ке, уката юн чакласьконо. Ӝытаз "Иворъёс" передачаын ИИ группаё вир кулэ шуыса ялон сётӥзы. Висись муртлэн ӵыжы-выжыосыз бӧрдыса утчало тупась вир. Шедьто ке, инструкциосъя басьтыны уг луы. ...Нош со дыре каллен кулэ пинал. З. Рябинина. ОСКОН БЫРЫМТЭ АЙ Лымшор районъёс пӧлысь тужгес но палэнысез Кизнер ёрос. Шер вуыло отчы вылӥ кивалтӥсьёс но, журналистъёс но. Кизнеръёс гинэ уг адӟо Удмурт телевидениез, куд-ог гуртъёсын уг кылзо радиоез но. Оглом вераса, кизнеръёс музон шаерын улэм кадь пото асьсэлы. Удмуртиын ортчись ужрадъёсты троссэ кылытэк-адӟытэк ик кылё. Но ёросын трос гинэ верамонэз вань. Татын, кылсярысь, кылдытэмын пӧртэм нациосты азинтонъя центр. Милям корреспондентмы вераськиз солэн кивалтӥсеныз Елизавета Владимировна ПЕТРОВАЕН. - Кизнер районын кӧня удмуртъёс уло туннэ нуналлы? - 1989-тӥ арын ортчытэм переписья, районын улӥсьёс пӧлысь 46 процентэз удмуртъёс лыдъясько. Жаляса верано, зэмос удмуртъёсыз ӝыныез мында гинэ. Будӥсь нылпиос ӟучомыны вуо. Районысь куд-ог школаосын радъямтэ на анай кылмес дышетон. - Кыӵе кусыпъёсты районады улӥсь мукет калыкъёсын? - Вань улӥсьёс пӧлысь тужгес трос ӟучъёс - ог 45 процент, бигеръёс - 6 процент, поръёс одӥг процент мында гинэ люкасько. Культура удысын тыршисьёс ас ужзэс ӟеч быдэсъяло. Озьы ке но, пӧртэм нациосын герӟаськем ужпумъёс палэнэгес кыльылӥзы. Та центрмес кылдытыса, уж ӧръяськиз кадь. Али дыре кылдытэмын но ужало удмурт, ӟуч но бигер культурая клубъёс. Котькуд нациен пӧртэм ужрадъёс ортчытъяськом. Кылсярысь, азьвыл аръёсы Бемыж селоын Куарсур (Троица) нуналэ ӟучъёс "Ӟазег уллян" шулдыръяськон ортчытъяло вылэм. Ортчемзэ тодамы вайыса, та праздникез выльысь радъямы. Туэ со быдэс район понна Ягулын ортчытэмын. Районамы одӥг гинэ пор гуртмы - Мари-Сарамак. Кылем гужем пусйимы гуртлэсь нуналзэ, куное ӧтьылӥмы Грахово районысь Мари-Возжай гуртысь усточиосыз. Огъя вераса, калыклэн мылкыдыз ӝутскемын: Кизнерын но "йӧ" вырӟиз ни, лэся. - Елизавета Владимировна, нош ма верасалды удмурт культурая клублэн ужамез сярысь. - Соин кивалтэ Алевтина Вениаминовна Алексеева. Синяр-Бодья гуртын гырон быдтон, Куӟебай Гердлэн но Ашальчи Окилэн юбилейзылы сӥзем ужрадъёс ортчытӥм. Сцена вылэ тубаз 150 пала усточи. Со-а шумпотон ӧвӧл? Данъяськиськомы Кизнерысь "Шуныт омыр" коллективен, кивалтӥсез В. Ю. Дубовцев, лака-тыжмаосын. НО ШУЛДЫРЪЯСЬКОНЭ КАЛЫКЕЗ Ӝутыны капчи ӧвӧл. Ялан вожъяськиськомы можгаослы, пургаослы, алнашъёслы... Кыӵе ке сыӵе ми но ужаны йӧндыриськом, соослэсь адӟем карыны тыршиськом. Но ӧвӧл на Кизнерамы азьветлӥсьёсмы, огъ< уж понна рос-прос сюлмаськисьёс. - Кыӵе малпанъёсты азьланезлы? - Кизнер районлы январь толэзе 60 ар тырмоз. Палэнын улӥсьёсты быгатэмъямы данъяны тыршиськом ик, нош асьме дорысьёссэ ум быгатӥськегес. Ужась адямилэсь мылкыдзэ ӝутоно, шуныт кылъёс верано вылэм улэп дыръяз. Котьку данъяськиськом Асинер гуртэн. Уго та гуртысь трос гинэ врачъёс, дышетӥсьёс потэмын. Малпаськиськомы посёлокысь ӟучомем пиналъёсын умойгес ужаны. Соослэн анай- атайёсынызы пумиськыса кенешим ни азьланяз быдэстоно ужъёсмы сярысь но. Юн кусып возиськомы районысь удмурт кылъя дышетӥсьёсын. Соос ик милям нырысь юрттӥсьёсмы но луо. Оскисько, Кизнерысь удмуртъёс но куке-соку азьветлӥсьёс луозы шуыса. В. КУТУЗОВА. Экономика пыдесъяське... Ортчем арня пумын журналистъёсын пумиськиз Удмурт Республикаысь коньдон ужпумъёсъя управленилэн кивалтӥсез В. А. Наумов. Со пусйиз: "1998 ар понна бюджетэз радъяку, экономикамы пыд йылаз ӝутскыны ӧдъялоз шуыса, оскытон ӧз зэма. Предприятиослэн пунэм тыронзы ялан будэ но будэ". Зэм но, лыдпусъёс шӧдскымон вылэ тэтчизы. Кӧшкемыт югдур "Ижмашын", "Аксионын". Валтӥсь предприятиос тыриськонзэс аналто бере, мукетъёсыз но солэсь адӟем каро, лэся. Нырысетӥ январьлы предприятиослэн тыронзы 201 миллион манет вал ке, туннэ нуналлы со 275 миллионозь ӝутскиз ни. Бюджет коньдон ӧвӧлэн банкъёсысь кредит басьяно луэ. Но берло дыре банкъёс туж бадӟымесь процентъёс курыны ӧдъязы, кылсярысь, "Россия кредит" банк ставказэ чылкак 60 процентозь вуттӥз. Нылпи пособиос, компенсациос ласянь ке, "Ижмашын" 1996 но 1998 ар понна пичи-пичи тырон мынэ ик, но 1997 ар кемалы кынтэмын... Урод югдур кылдӥз эмъян удысын. Дунтэк но дунтэм дунын вузам эмъюмъёс понна туннэ нуналлы 7 миллион манет пала тыриськон люкаськиз. Пунэмен тыронъёсты быдтон вылысь, городысь аптекаослы арнялы быдэ 250 сюрс манет висъяллям луоз. Шуг вераны, кызьы берытскоз та югдур азьланяз. Угось Россия Федерациын вераськон мынэ льготаосты кулэстон сярысь. Но тужгес но ляб, асьсэды асьсэос утьыны быгатӥсьтэм адямиосыз зӥбыса, экономикаез пыдес йылысьтыз султытыны быгатод шат? Юрттоз-а меда сыӵе вамыш? Е. ПАНФИЛОВА. Толлы пумит Куазьлэн чеберез шумпоттытэ гуртын улӥсьёсты. Али угось отын ӟырдыт мыно пудо сиён дасян ужъёс. Ӵукнаысен ӝытозь жин! вазе кусо куара Кияса районысь "Рассвет" колхозын но. Татын тэк пукисез али уд шедьты. Пенсие потэмъёс турын люкало асьсэ пудолы. Соослы мылысь-кыдысь юртто внукъёссы. Колхоз но жадёнэз валатэк сюлмаське толлы ӟеч-ӟеч дасяськон сярысь. Али бусые но возь вылэ поттэмын ваньмыз турын погыртон но утялтон техника. Люкамын ни 600 тонна турын. Та лыдпусэз гуртоос сюрсозь вуттыны чаклало. Дасямын 1200 тонна сенаж. Со толлы тырмымон. Нялтас вераны кулэ: "Рассветын" али скалзылэсь шорлыдын 11 литр йӧл кыско. Н. Федоров. Сцена но Люба - люконтэмесь Михаил Ворончихин, Надежда Уткина, Геннадий Бекманов, Галина Платонова, Геннадий Ганьков, Валентина Пудова - асьме удмурт сцена вылын ваньмызлы тодмо нимъёс. Но тани эстрадае тӧлпери выллем пыриз егит кырӟась Любовь Быкова. Со аспӧртэмлыко буёл пыртӥз крезьгуро дуннее. Пӧртэм синмын учке туала калык та шаплы, сцена вылын ассэ капчи но эрико возись нылмурт шоры. Одӥгъёсыз ӵыдытэк кылзо, мукетъёсыз... Кинлы мар. Шунды но ваньмызлы огкадь мусо ӧвӧл. Кин ке яратэ котэз, нюрез, пеймытэз... Нош Любовь Быкова удмурт эстрадаын усьтӥськись сяська шуыса ум янгышалэ, дыр. Куинь ар куспын солэн кырӟанъёсын кык бичетэз (сборникез) потӥз ини: "Та уе мон огнам" но "Ӵошен ӧвӧл". Матэгес тодматскон понна, ми Любаен асэныз пумиським. - Нырысь ик, кытын тӥ вордскиды? - Кияса ёросысь Вуж Салья гуртын. - Кытын дышетскиды? - Культпросветучилищеын, режиссёръёсты дасян люкетаз. - Кызьы кырӟаны кутскиды? - Кырӟасько мон кемалась, школаын дышетскыкум ик. Концерт пуктыса ветлӥськом вал фермаостӥ, мукет школаостӥ но гуртъёстӥ. Туж зол потэ вал кырӟаме. Ижысен ини газетысь шедьтӥ ялон: дискотекаосын кырӟасьёсты утчало вал. Со бордысен ик кутски. - Вылӥе тубон понна, трос шуг-секытъёс, могӟетъёс пумиськыло. Кызьы-о тӥ соосты вормиськоды? - Нырысь ик, сыӵе могӟетъёсын пумиськылытэк тыршисько. Шедисько ке, кӧня ке керӟегъяськисько но, мыным каньыл луэ. - Гороскопъёслы оскиськоды-а? - Уг, туж ик уг. Инмарлы оскисько. - Инмарды юрттэ-а шуг-секытысь потыны? - Юрттэ. Культпросветын, ньылетӥ курсын вал со учыр. КПСС-лэн историезъя экзамен ныр улын, нош мон быдэс ар сое ӧй дышеты - ӧй яраты. Ӵукна туж вазь султыса шуисько: "Остэ, Инмаре, юртты, пожалуйста". Собере туж каньыл билет сюриз. Пайми. Мон соку аслым шуи: "Экзамен бере одно ик черкын пылатӥсько". Кыӵе бӧрдыса курылӥ, кырӟаме потэ шуыса. Телевизорысь "Утренняя звездаез" учкылӥ, мон но сыӵе быгато, малпалляй. Малпанэ быдэсмиз. Осконэ юрттэ, дыр. - Кырӟанъёслы кылъёс кылбурчиослэсь басьтӥськоды яке асьтэос гожъяськоды? - Матысь кусыпъёс возисько С. Пушина-Благининаен, Т. Чернова мыным гожъя. Куддыр ачим но кылъёссэ гожтӥсько. Кылъёсыз тупало-а, уг-а рифмая, но сюлмысь пото, кырӟан луо. - Кин поннагес кырӟаськоды? Егитъёслы-а, арлыдоослы-а? - Егитъёслыгес тыршисько. Мед кылозы соос монэ, удмурт пиос но нылъёс медаз возьдаське анай кылынызы вераськыны, асьсэзыз улӥе медаз пуктэ. Куке но мон ачим студент вал, удмурт сямен ӧй вераськылы. Туж шер кылылӥ городын удмурт кылэз. Нош али студентъёс ӵаш! поттыса ик верасько ас кылынызы. Ас поннам куддыр малпасько: кин тодэ, оло, мынам но та ласянь пичильтык юрттэтэ вань. - Городысь но гуртысь егитъёс пӧртэмесь-а? - Пӧртэмесь. Собере гуртын но котькыӵеез вань. Тани Алнашысь егитъёс мукетъёсыз сярысь дӥсьтӥсесьгес, асьсэзыз эркын возё. Гуртъёсын егитъёс востэмесь, эктыны потыны возьдасько. - Кырӟанъёсады героиняды весяк огназ. Маин со герӟаськемын? - Мон тыршисько озьы - кырӟанме мед быгатоз быдэстыны пи но, ныл но, егитэз но мӧйыез но. Тани "Вордӥськем нуналэз" басьтом, яке - "Та уе мон огнам". Сыӵе мылкыдзы луэ нылъёслэн но, пиослэн но. Огнам - со традиционной тема... - Нырысетӥ яратон сюлэмын кема улэ. Нош тӥляд? - Одӥг-ог тодам лыктылэ. Но солы кырӟан, кылбур гожъяны - сыӵеез ӧвӧл. Мон романтик ӧвӧл-а, мар-а. - Кыӵе сямо карт утчасалды? - Куд-огез пиосмуртъёс пӧлысь чебер, но йыраз номыр ӧвӧл. Чебер шузи, шуэм сямен. Мон шоро-куспо чебер ымныро но вераськыны быгатӥсь, визьмо воргоронъёсты дунъясько. Егит дыръя, конечно, чеберзэ утчаське. Нош аръёс ортчыса, сыӵе мылкыд воштӥське. Мед гажанэд валалоз тонэ, шуг-секытъёсы мед пельпумзэ пуктоз - сыӵе мынам пиосмурт идеалэ. - Сыӵезэ ӧд на-а шедьтэ? - Ӧй на. - Нош бызён-кузпалъяськон сценаен герӟаськем адямилы люкетэ-а? - Люкетэ. Мон трос тодӥсько творческой адямиосты но семьяосты, кытын кышноен картэн пӧртэм интыосын ужало, ог-огзэс уггес валало. Ну, шуом, бызё мон (сыӵе луонлыке вал). Тросгес саклык висъяло картэлы, гур азь палан бергало, сиён пӧра, мисьтасько. Аслыд дыр уг ни кыльы. Собере картэ кутскоз: отчы эн мыны, татчы эн ветлы, репетициосын эн беромы. Соин ик матысь дыре кузпалъяськон сярысь уг малпаськы. - Нылкышнолы арлыдыз сярысь вераны умой ӧвӧл, шуо. Нош тӥ уд ватӥське. - Уг ватӥськы. Малы ватод - паймисько. Бен, мыным 27 арес. Ужпум арлыд бордын ӧвӧл, творческой азинскон, вормонъёс бордын. Мон эктӥсько-кырӟасько, асме пинал возисько, соин ик мынам со аресъёсы вань коть ӧвӧл. - Мар кариськоды ваньмон дыръяды? Кызьы тӥ сое ортчытӥськоды? - Али ваньмон дыры тросгес. Книга лыдӟисько, куддыръя бассейнэ ветлӥсько, но тужгес яратӥсько мультфильмъёс учкыны. Собере эктон секыт мылкыдэз улля. Куддыръя ужысь жадьыса бертӥсько, ӵогаськисько, кыллисько но малпанъёсме интыяз пуктӥсько, малпасько, мар азьланяз карыны. - Трос ужын ужаса секыт, дыр? - Секыт. Дышиськод ке бен капчигес йӧтэ. Али, кылсярысь, одӥгез уже ӧвӧл, мар карыны уг тодӥськы. Школаын пиналъёсты дышетыны туж кельше. Отын керӟегъяськод но, отын ик басылскод но. Студиын но тани кырӟан уг ке пишмы, мылкыд секыт луэ. Куинетӥез уже - гастрольёс, концертъёсын гуртъёсы потаськом. - Кырӟан сяна, мукет тунсыкъяськонъёсты вань-а? - Спортэн эшъяськисько. Кырӟась ке ӧй луысал, спортсмен луысал яке театре мынысал. Школаысен ик куасэн бызьылӥсько, волейболэн, баскетболэн шудӥсько. Настольной теннис но волейбол - самой яратоно шудонъёсы. - Удмурт семья пушкын валтӥсез луэ, шуо, кышномурт. Тӥ кызьы малпаськоды? - Удмурт кышноос пӧлын али котькыӵеез вань. Кинлы витьтонлэсь ятыр ини, соос небытэсь, возьдаськисесь, мынам малпамея. Туала вакытэ чурыт сям но потаны кулэ. Тӥни сыӵе кышномуртъёс асьме калык пӧлысь кивалтӥсе но ӝутско. Небыт сямын гинэ кивалтӥсь уд луы, малпасько. Мон зол сямо кышномуртъёс пала. Соос сюлоен но дышетозы, небыт кылынызы, пӧсь сюлэменызы но шунтозы. - Ӟуч эстрадаысь кырӟасьёс сярысь калык пӧлын котькыӵе мадиськонъёс ветло. Нош тӥляд, Люба, асьтэ сярысь мар ке но уродзэ кылэмды вань-а? - Уг тодӥськы. Но огзэ кылэме вань. "Выскочка" шуэмзэс... Аслым но огпол веразы: "Тӥ вуэз пӧсятӥськоды, тӥлед секыт луоз". - Гуртысь калык тӥледыз телевизорысь адӟе но куд-огез шуэ: "Та Любовь Быкова ассэ вульгарно возе, вылтӥяське". Калыкен пумиськыса, таӵе учкос воштӥське-а? - Бен, телевизор туж мыдланьтэ ук. Нош лулоен адӟиськод ке, малпан воштӥське. Милям трос сыӵе учыръёсмы. Нырысь-валысь "фу, гольык" шуо. Концерт азьлань мынэмъя, пальышась ымныро луо, кужмо кичабонъёсын сого. - Тӥледыз ӵемгес сьӧд дӥсен адӟоно... - Сьӧдэн? Ма, ӧйтӧд. Мынам турлы дӥськутэ кадь. Сцена вылэ пӧртэм буёло потаны тыршисько. - Туала вакытэ эктон ӝытъёслэн репертуаразы мур выжы лэзиз ТЕХНО. Егитъёс таӵе гурез кулэ каро. - Бен, ми али та бордын тросгес ужаны малпаськом. Куинетӥ сборникамы, кудӥз потыны кулэ гужемлэн пумаз, куинез кырӟанмы ТЕХНО луоз. Али ми кырӟась пиез утчаськом. Туала пияш, пельугыен, сцена вылын ассэ капчи возьыны, эктыны мед быгато. Шедьтыны ум быгатӥське. - Кырӟанъёслы крезьгур асьтэос гожтӥськоды яке дасьсэ-а басьтӥськоды? - Дасьсэ басьтӥськом. Аранжировкаез Александр Козырев, продюсере, лэсьтэ. Ужамы тужгес но кунсьӧр кырӟанъёсты кутӥськом. - Газетъёсын но, радиоын, телевидениын но тӥледыз ӵем дыръя удмурт Мадонна шуо. - Мон асме удмурт Мадоннаен ноку но ӧй лыдъялля. Но, зэмзэ вераса, Мадонна вал мынам валтӥсь кизилие, со шоры учкыса, мон асме "лэсьтыны" тырши. - Зал тӥледын кивалтэ, яке тӥ сое сьӧрады валтӥськоды? - Зал капчи ке, со монэным кивалтэ, секыт - мон калыкез сьӧрам ӝутӥсько. Куд-ог интыосын калыкез туж капчи шулдыртыны, нош вань секытэсь ёросъёс, гуртъёс, возьдаськись калык. Мыным туж тыршоно луэ, калыклэсь мылкыдзэ сайкатон понна. - Озьыен, сцена но Любовь Быкова - люконтэмесь? - Люконтэмесь. - Мар бен, паськыт творческой сюрес тӥлед, Люба. Тросэз удмурт нылашъёс али тӥ шоры учко, кызьы тӥ учкиды вал Мадонна шоры. Осконзы мед зэмалоз. Вераськиз Андрей Клементьев, Удмурт кун университетын дышетскись. Туннэ - школа, ӵуказе - гимназия Берло аръёсы мыным пӧртэм интыосын улӥсь удмуртъёс доры вуылыны кылдӥз. Одӥгысьтыз командировкаысь шумпотыса, мукетысьтыз ӝожомыса вуоно луэ. Тужгес но секыт мылкыдын бертӥсько, асьме кылмес палдурес карись удмуртъёс доры ветлыкум. Соос куноосты ӟеч пумитало - удмурт сямъя кырӟан-веранъёсын, пыжиськемъёсын, вань сюлэм шунытсэс поныса утялто. Нош нылпиоссэс анай кылзылы, кырӟанъёссылы дышетон сярысь вераськон потэ ке, ӵогем кадь шуо: "Удмурт кыл туала улонын азбарысь потэм бере кулэ ӧвӧл ни. Нылпиослэн сюрессы мукет". Сыӵе дыръя мылкыд ӝожоме на соин но: огшоры калык пӧлысь сыӵе кылъёсты трос уд кылы, пумитъясько дышетскем удмуртъёс. Алигес монэ сюрес вуттӥз Татариысь Кукмор ёросын улӥсь удмуртъёс доры. Ёросын улӥсьёс пӧлын котькудӥз куатетӥез удмурт луэ. Соослы усьтэмын куать удмурт школа. "Нылкышно кенеш" огазеяськонлэн нимыныз сюрес вылэ потӥмы куинь кузя: Галина Аркадьевна Никитина (та огазеяськонлэн тӧроез луэ), Зоя Витальевна Суворова (солэн воштӥсез) но, мон. Озьы ми вуимы Оштормо-Юмья гуртысь Иван Степанович Михеев нимо школае. Малы одно ик татчы? Та школа ньыль ар ӵоже ини туж ӟеч кусып возе Ижысь дышетӥсьёслэсь тодон-валанзэс будэтонъя институтэн, берло кык арзэ - Удмурт Элькунысь дышетон удысын национальной ужпумъёсты тодон-эскеронъя институтэн но. Кутсконэз тазьы вылэм. Оштормо-Юмья школалэн дирекорез Владимир Петрович Иванов дышетӥсьёслэсь тодон-валанзэс будэтонъя институтэ Рудольф Федорович Березин доры лыктэм. Тодматскем потэ вал, пе, национальной школаосын дышетонысь выль амалъёсын. Рудольф Федорович Владимир Петровичез тодматэм Фома Кузьмич Ермаковен но Зоя Витальевна Сувороваен. Ужпумез куинь кузя сэрттӥллям-пертчиллям. Кылзы тупам. Учёнойёс та школалы огъя методической тема тупатӥзы: "Бадӟым классъёсын гуманитарно-педагогической воспитание". Та программая нимысьтыз бадӟым саклык висъямын вордскем кыллы, литературалы, калык йылолъёслы но сямъёслы. Озьы ик школалэн дышетон планаз пыртэмын таӵе выль предметъёс: "Основы педагогического мастерства", "Основы психологии и этнопсихологии", "Риторика", "Логика". Школалэн таӵе планэныз соглаш луизы Кукмор роноын но. Озьы Ф. Ермаковлэн но З. Суворовалэн юрттэмзыя, трос лэсьтэмын Оштормо-Юмья школаын дышетонлэсь пуштроссэ воштон ласянь. Пиналъёс выль курсъёсты кылзыны кутскизы, дышетӥсьёсын ортчытэмын вал семинаръёс, педсоветъёс. Ужамзыя пумен эшшо выль малпанъёс но кылдӥзы. Дышетон удысысь туннэ нуналлэсь куронъёссэ мургес быдэсъян вылысь, школалэн методической темаез паськытгес луиз: "Калык педагогика - национальной школалэн одӥгез ӝутскон, выльдӥськон кужымез". Ньыль ар куспын Оштормо-Юмьяысь котькуд дышетӥсь ачиз люказ на дидактической, методической, краеведческой материал. Историяя, кылъя но литературая, географияя, биологияя но мукет предметъёсъя дышетӥсьлэн огъя программаез бордын вань на аслаз программаез но. Озьы Кукмор ёросын улӥсь удмурт пиналъёс тодматскыны быгато удмурт, бигер но ӟуч калыкъёслэн историенызы, литератураенызы, йылолъёсынызы. Кылсярысь, географиез дышетыкузы, нылпиос тодматско Татарстанлэн но Удмуртилэн аспӧртэмлыкъёсыныз. Литератураез дышетыкузы, дышетӥсь герӟаса валэктыны тырше, шуом, ӟуч, бигер, удмурт писательёслэсь творчествозэс. Таӵе уж палэнын улӥсь удмуртъёслэсь асваланзэс, ӝутыны удмурт калыклэсь историзэ но культуразэ ӟечгес тодыны, шӧдыны, гажаны юрттэ. Соин ик, вылды, та школаысь пиналъёс мур тодон-валанъёсынызы капчиенгес пырыны быгато Удмурт университетэ, Глазов пединститутэ, Иж, Можга педучилищеосы. Бадӟым оскон вань, татысь пиналъёс ас калыксэс, кылзэс гажасесь будозы шуыса. Басьтэм тодон-валанъёссэс пӧртэм дышетсконниосын азинтыса, будӥсь нылпиосыз но озьы ик дышетозы. Али бадӟым нуиське Оштормо-Юмья школаез Михеев нимо гимназия карон ласянь. Иван Степанович татын вордскемын но будэмын, собере дышетӥсе, тодосчие потэмын. Кукмор роно но та ласянь юрттэт сётыны малпа. Ваньмыз та бадӟым уж ӧй азинскысал, калыкез дышетонъя асьме министерство но ӧй юрттысал ке. Озьы ӵош, огазьын ужаса гинэ асьме секыт вакытэ вормонтэмзэ но вормыны луэ вылэм. Оштормо-Юмья школаын таяз пумиськонэ лыктӥллям Кукмор ёросысь вань школаысь (бигеръёс но, удмуртъёс но, ӟучъёс но) директоръёс но удмурт кылъя дышетӥсьёс - ог ньыльдон кузя. Соос азьын "Выль пуштросъем школаын национальной кыллэн дышетон удысын быгатонлыкъёсыз но луолыкъёсыз" темая вераськиз Зоя Витальевна Суворова, Кузёбай Герд но Ашальчи Оки быдӟым писательёсмылэсь 100 ар тырмонзэс пусйыса, соослэн улон сюрессы но творчествозы сярысь - Галина Аркадьевна Никитина но мон. Лыктэмъёс ог-огзэс тодматӥзы "Удмурт кенеш", "Нылкышно кенеш" азьын сылӥсь ужпумъёсын. Школаын ортчизы биологияя, ӟуч но удмурт литературая, немец кылъя паськытатэм урокъёс. Дышетскись пиналъёс возьматӥзы "аллак корка" ("Корка пырон") нимо асьсэ пал йылолзэс. Лыктэм куноос трос выльзэ, асьсэлы кулэзэ басьтӥзы. - Тӥляд но милям Габдулла Тукай, Муса Джалиль кадь быдӟым адямиосты вылӥллям, - пумиськон бере паймемзэс веразы бигеръёс. - Юнме уг шуо, дыр: котькуд калыклэн вань аслаз Ломоносовез но, Пушкинэз но. Нош Кукмор роноысь дышетон литературая методист Альфия Равиловна Садикова удмурт газет-журналъёслы гожтӥськон, книгаос сярысь юамелы тазьы вераз: - Али коньдон ласянь милям но секыт. Озьы ке но, котькуд удмурт школае "Ӟечбур!" газет, "Инвожо" журнал гожтӥськом. Нош удмурт дышетӥсьёс ӝожтӥсько, учебникъёс ӝегаса вуо, чеберлыко литература но ӧжыт вуэ шуыса. Туэ тани ог дасо гинэ книга вуиз. Милям татын одӥг пор школа но вань. Соослэсь куронъёссэс курыса ми вазиськиськом Марий Элэ, отысь соку ик ваньмыз ӝегатскытэк дунтэк вуэ. Нош Удмуртиысь малы медам озьы ӧвӧл? Чеберлыко удмурт литератураез бастыны али луонлыкъёс ӧжыт, соин ик сое Казань пыртӥ мукет книгаосын, шуом, бигеръёсыныз воштыса татчы вуттыны луысал ук. Тӥляд ведь бигеръёс трос уло. Мон йырме гинэ мыкыръяй, туала ӝог кошкись дауре дыртӥсьтэм, вырӟисьтэм сяммес воштоно ни вылэм шуыса малпай. Котьма ке но, Кукмор ёросысь ӝутскем мылкыдын кошким. Бигеръёс но удмуртъёс татын ог-огзэс валаса, юрттыса уло-ужало. Оскем потэ, ӟеч кидыс одно ик таза, кисьмам емыш сётоз. Малы ке шуоно, со усе зумыто музъеме. Огъя вераса, таиз ветлэме мыным ӟеч мылкыд сётӥз. Галина РОМАНОВА. "ТЫШКАЗ" ГРОССМЕЙСТЕРЪЁСТЫ НО Нижней Новгородын ортчизы шахматъя ӵошатсконъёс. Отын нюръяськиз 78 шахматист, уноез соос пӧлысь - гроссмейстеръёс но спортъя мастеръёс. Россиысь спортсменъёсын артэ нюръяськизы Германиысь, Аргентинаысь, Узбекистанысь, Азербайджанысь но куд-ог мукет странаосысь шаматистъёс но. Та ӵошатсконъёсы ветлӥзы Ижысь физкультурая "Прометей" коллективысь Владимир Гребенкин но "Темп" спортъя клубысь Владимир Федосеев. Кыкназы но туэ тулыс гинэ спортъя мастеръёс луизы. Та турнирын Владимир Гребенкин 9 луоноез пӧлысь вить но ӝыны очко люказ. Со калык куспо мастерлэсь нимзэ басьтыны луонлык сётэ. Но со понна эшшо кык таӵе шудонъёсын вормыны кулэ. Гребенкин шудӥз куать гроссмейстерен, куиняз вормиз, кыкез пумиськон нокин вормытэк ортчиз. Владимир Федосеевлэн ньыль но ӝыны очкоез. И. Вельтмандер. ГУРТЭ УЛЭ Сюмси ёросысь Калмез шур дорысь Вылынгуртлэн улонэз ноку капчи ӧй вал, но калык ӧз сётскы секытэзлы, ӧз куасалскы. Уноез бускель гуртъёс быризы. Вордскем Вылынгуртэ улэ. Оскисько, со уз быры, аръёс ортчыса, уката чеберскоз-будоз. Со угось бадӟым Сибирь сюрес доры но паськыт-чылкыт Калмез шурен артэ пуксемын. Калык курадӟытэк котькытчы мыныны-ветлыны быгатэ. Али татысь Парин нимо колхозлы каньыл ӧвӧл. "Новый путь" колхозэн огазеяськылыкуз, со зол начармиз. Ваньмыз усто техника, ӟеч выжы пудо Сюмсие нуэмын вал. Яна потыкузы, Вылынгуртэ ваньбур ичи шедиз, соин ик Парин нимо колхоз ог дасо ар ӵоже пыд йылаз султыны уг быгаты ни. Та дыр куспын уно кивалтӥсьёс вошъяськизы, тросаз лудъёсын жаг турын но писпу будыны кутскиз. Вылынгурт палан котькуд интылэн нимыз вань. Пислэгнюк, Сяланюк, Ягонюр, Тарбей котыртэм, Моконюр, Куар бусы... Туйымтыло доръёсын арлы быдэ ю яке турын зол удалтоз вал. Берло аръёсы лудъёс удалтытӥсь сылалэз, кыедэз, гыбедэз уг адӟо ни, соин соослэн кужымзы кулэсме. Туэ колхозын ӟег туж урод потэмын, со шер но вакчи. Йыды но, сезьы но сыӵегес ик. Ю-нянь гектарысь ньыль-вить центнер сяна уз шедьы, дыр. Кулэ-а меда сомында урожай понна куать сю гектар лудъёсты юосын кизьыны? Трос аръем турынъёс тросгес пайда вайысалзы, дыр, нош соос куинь сю гектар гинэ киземын. Палэнысь лыктэм кивалтӥсьёс колхоз но отын улӥсьёс сярысь ӧжыт сюлмаськылӥзы, соин но хозяйство курадӟыса улӥз. Алигес председателе та палан будэм мурт Иван Исупов быръемын. Солы калык зол оске. Берло дыре ужан дисциплина но ӝутскиз. Та хозяйствое пырись гуртъёсын улӥсьёс умойгес мылкыдын ужаны кутскизы. Сяськаяськись возьёс вылын али ӵем зорылэ ке но, калык пудо сиён дася. Н.Возисов. Гырись геры уг сыномы Гурт калык понна кысык вакытэ ортчизы интыысь ас коже кивалтон ёзъёсы быръёнъёс. Озьы ке но, адямиос соослэсь палэнэ ӧз кыле. Ӵапак сое возьматӥзы Пичи Пурга ёросын ортчем быръёнъёс но. Отчы 44,28 процентэз бырйисьёс пыриськизы. Ваньмаз сямен округъёсын кык но солэсь тросгес кандидатъёс нюръяськизы. Озьы ёросысь Депутатъёслэн кенешазы куамын мурт быръемын вал. Кылем арня вискын соос нырысетӥ сессиязы люкаськылӥзы. Отын ивортэмын вал: кенешын данак удмуртъёс, ваньмыз 23 мурт; ужан удысъёсъя ке верано, трос кивалтӥсьёс, вань ужбергатӥсьёс, дышетӥсьёс, тазалыкез утён удысын тыршисьёс. Арлыдзыя ке учконо, мӧйы депутатъёсын артэ ужалозы егитъёс. Кенеше быръемын кык нылкышно. Сессилэн кутсконаз мылкыд кылдӥз вал, со ӟырдыт ортчоз шуыса. Вылӥ ёзъёсын сямен ик, татысь куд-ог депутатъёс но люкетъёс (группаос) кылдытӥллям. Тани одӥгез "Законность но правопорядок" нимаське. Озьы ёросысь Депутатъёслэн кенешсылы кивалтӥсе кык мурт ӵектэмын вал. Лушкем быръёнъёсын вормиз М. А. Рублё. Ньыль ар ӵоже солэн кивалтэмез улсын ужалозы депутатъёс. Соослэн кутэм решениоссыя улоз но азинскоз ёрос. Нош быдэстоно ужпумъёс данак котькытын сямен ик - "чутэ" экономика, "секыт шока", соцкультбыт, толэзьёс но мукет. Сессиын ӟырдыт споръяськонъёс ӝутскизы, нунал ӵоже ужан радэз юнматон пумысен. Кыказ ӵектонъёсын кӧня ке ужпумъёс пусъемын вал, кылсярысь, "Законность но правопорядок" люкет мылкыдзэ вераз ёрослэн Уставаз воштонъёс пыртон пумысен. Уго депутатъёс малпанэ вуизы: та нуналэ быръёно ёрос администрацилы кивалтӥсь гинэ. Ӵектэмын вал одӥг мурт: ёрос администрацилэн азьвыл кивалтӥсез М. И. Назаров. Кызьы сессиын вераз Удмурт Республикаысь Правительстволэн Тӧроезлэн воштӥсез А. М. Лисина, Михаил Иванович та удысын уно аръёс тырше ини, ужзэ, калыкез умой тодэ, шуг- секытъёс трос ке но, ваньбур поттон уг кулэсмы. Антонина Михайловна пусйиз, Пичи Пурга удмуртъёслэн кыкетӥ шоркаразы выллем луэ, кылсярысь, отысь самодеятельной коллективъёс удмурт шаермес дуннелэн пӧртэм сэрегъёсаз возьмато, солэн узырлыкъёсыныз тодмато. Со сяна, люкаськемъёс вуоно кивалтӥсьлы дэмланъёссэс но веразы, кылсярысь, кадръёсын ужан пумысен ик. Соос сярысь сюлмаськон уг шӧдӥськы. Уноез кивалтӥсьёс интыосазы ньӧмыз понна пуко. Соосты воштыны луысал ӟырдыт мылкыдо, быгатӥсь муртъёсын. Сыӵеос ёросын вань. Куараосты лушкем сётыса, администрацилы кивалтӥсе нош ик быръемын М. И. Назаров. Кызьы вераз одӥгез депутат, таӵе секыт вакытэ, пе, кивалтӥсьёсты воштон ӟече уз вутты. Оло, зэмзэ но, со шонер. Гырись геры угось уг сыномы. Сессие озьы ик пыриськизы Кун Кенешлэн депутатъёсыз В. К. Тубылов, А. Н. Ешкеев. Со ужзэ азьланьтоз вуоно покчи арняе. Ю. АЛЕКСАНДРОВА. "ГЕРД" КУЖЫММЫ - КАЛЫК БОРДЫН Вань удмуртъёслэн "Удмурт кенеш" огазеяськонзылэн куатетӥ Ӧтчамеы люкаськем дырысен ортчиз ни сизьым толэзьлэсь кема. Мар лэсьтэмын та дыр ӵоже, кыӵе воштӥськонъёс луизы ассоциацилэн ужаз? Ӵапак со ужпумъёс ик сэрттэмын-пертчемын вал "Удмурт кенешен" радъям пресс-конференциын. Пусйыны кулэ созэ: та пумиськонэ удмуртъёс сяна, уно гинэ ветлӥзы ӟуч кылын ужась журналистъёс но. Озьыен, соос но тунсыкъясько та огазеяськонлэн азинсконъёсыныз. "Удмурт кенешлэн" берло дыре лэсьтэм вамышъёсыныз тодматӥз солэн тӧроез Валентин Тубылов. Кызьы пусйиз Валентин Кузьмич, али огазеяськонлэн ёзъёсыз кылдытэмын Россилэн 16 улосъёсаз. Алигес гинэ соос усьтӥськизы Башкортостанысь Калтаси ёросын но Татарстанысь Набережные Челны городын. Кызьы тодӥськом, удмуртъёслэн бадӟым съездзы куинь арлы одӥг пол люкаське. "Удмурт кенешлэн" исполкомаз быръемын 22 мурт, пичи кенеше огазея 105 адямиез, пӧртэм удысъёсъя ужа тямыс комиссия. "Кенешен" ӵош валче ужало удмурт культурая "Дэмен" огазеяськон, егитъёслэн "Шунды" дэменлыксы, "Удмурт вӧсь" но мукетъёсыз. Огазеяськон трос лэсьтыны тырше ёзъёсызлэсь кужымзэс уката муромытон ласясь. Со понна, кызьы пусйиз президент, нырысь ик юнматоно интыосын ас коже кивалтонэз. Котькуд ёросын, котькуд гуртын кенешъёс кылдытъяса, удмуртъёслэсь улонзэс асьсэ сямен радъяса ӧръяно. Адӟем карымон ужало ни гурт кенешъёс Пичи Пурга, Можга, Глаз ёросъёсын. Гуртъёсын пумен юнгес шӧдӥське старостаослэн куаразы. Умой дышетскон семинар радъямын вал Пичи Пурга районысь Бураново гуртын. Отысь калыклэн улэм- вылэменыз тодматскыны ветлӥзы быдэс республикаысьтымы куноос. Югдур татчыозь уг тупатскы кадръёсты дасян ласянь. Та бордын "Удмурт кенешлы" туж зол ужано луоз на. Малпалэ ай асьтэос. Элькунысьтымы 15 министр пӧлысь ньылез гинэ удмурт, 20 комитет пӧлысь куатеныз гинэ удмуртъёс кивалто, 8 ведомствоен кивалтӥсьёс пӧлын одӥгез гинэ удмурт. Ёрос администрациосын кивалтӥсьёс пӧлын но асьме адямиос трос ӧй вал. Оло, югдур берло ортчем быръёнъёс бере воштӥськоз. Сюлэмшугъяськытэ Кун Кенешысь депутатъёслэн лыдзы, удмуртъёс отын чылкак 16 процент гинэ. Нош Россиысь Кун Думаын одӥг удмурт но ӧвӧл. Валамон ини, гуртысь егитъёслы университетъёсы-институтъёсы пырыны но, отын дышетскыны но секыт. 80 процентэз удмуртъёс гуртъёсын уло. Школаез йылпумъям егитъёс вузъёсын конкурс пыр ортчыны уг быгато. Зэм, гурт школаез городысеныз ӵошатыны матын но уг луы. Соин ик, гуртоосты умойгес дасян понна, кыӵе ке ӟеч амалъёс шедьтоно. Вылӥ дышетскон заведение пырисьёсты дасянъя курсъёс-а радъяно луозы, яке егитъёсты лицейёс но колледжъёс пыр поттоно-а - тазэ уж вылын чаклано ни. Гуртъёсысь потэм студентъёслэсь лыдзэс 25-30 процентозь вуттон сярысь Правительстволэн та ласянь нимысьтыз постановлениез но вань. Но солэн "ужамез" уггес шӧдӥськы. Культурамес, кылмес утён - со быдэс калыкмылэсь азьланьын улонзэ утён. Озьы гинэ быгатом азьланяз удмурт кунлыкмес утьыны но азинтыны, пусйиз Валентин Кузьмич. Удмурт Элькунлэсь Конституцизэ кутэм дырысен ортчиз ини ньыль ар. Отын кун кылъёсын лыдъямын удмурт но ӟуч кылъёс. Но Конституцилэсь кун кылъёс сярысь 9-тӥ ёзэтсэ быдэсъян амалъёс сярысь верамын ӧвӧл. Кемалась дасямын ни "Удмурт Элькунысь кун кылъёс сярысь" Законлэн инъетэз. Но со та дырозь асьме парламент пыр ортчыны уг быгаты. Котьма ке но, асьме калык элькунмылэн политической улоназ лябгес пыриське, тужгес но гуртын улӥсьёс. Оло соин но кивалтон ёзъёсы но, Кун Кенеше но удмуртъёс ӧжытгес шедё. Татын быдэстоно ужъёс трос на. Та ласянь тужгес но вылӥын луыны кулэ интеллигенция, уката но - быръёнъёслы дасяськон но ортчытон вакытэ. Тани 5-тӥ июле ортчизы интыосын ас коже кивалтон ёзъёсы депутатъёсты быръёнъёс. Солы дасяськон вакытэ "Удмурт кенеш" но трос гинэ ужаз - гожтӥськемъёс люканы юрттӥз, валэктон уж нуиз. Вань удмуртъёслэн ВИ Ӧтчамзылэн постановленияз пусъемын: "Удмурт Кенешлэн" исполкомезлы дасяно но Кун Кенеше сётоно "Удмурт калыклы кун ужъёсын кивалтыны Конституциен сётэм правоосты быдэсъяны луонлыкъёс кылдытон сярысь" Законлы проект, тыршоно кык палатаен парламентэз кылдытыны. Кызьы тодӥськоды, пусйиз Валентин Тубылов, Кун Кенеше вуоноосыз быръёнъёс ортчыны кулэ кайта тулыс. Солы дасяськон пумен кужмоя ни. "Удмурт Кенеш" но та ужрадлэсь бере уг кыльы. Нырысь ик еч-ӟеч дунъет сётыны кулэ ортчем быръёнъёслы: кытын вал янгышъёсмы, мае лыдэ басьтоно азьланяз, кызьы умойгес радъяно валэктон ужез? "Удмурт кенешлэн" тӧроезлы трос юанъёс сётъямын вал. Вал туж лэчытъёсыз но. Ӟуч журналистъёс та ласянь котьку шӧртчи выро, уката ик, вераськон удмурт движение сярысь мынэ ке. Но Валентин Кузьмич вань юанъёслы рос-прос, номыре ватытэк, умояк гинэ валэктон сётӥз. Соин но, лэся, ӟуч газетъёсын пресс-конференциысь ивортонъёс умоен гинэ гожтэмын. - Валентин Кузьмич, - юаз одӥгез журналист, - тӥ вуоно арын элькунлэн кивалтӥсез луон понна нюръяськонэ пыриськоды-а? - "Удмурт кенеш" дэмлаз ке, мон нюръяськыны дась, - шуиз Валентин Тубылов. Н. Байтеряков. Кылдытэмын выль департамент Россия Федерациысь Ужъя министерстволэн косэмезъя, Удмурт Республикалэн калыкез уже кутонъя комитетэз выльдэмын. Табере со нимаськоз, калыкез уже кутонъя федеральной кун службалэн департаментэз шуыса. Солэн кивалтэмез улсын ужалозы городъёсысь но районъёсысь уже кутонъя центръёс. Таӵе решение кутэмын, уже кутонъя ёзъёсты федеральной законодательстволэн куронъёсызъя ужатон вылысь. Выль департаментлы кивалтӥсе юнматэмын Евгений Викторович Роганов. Кызьы ивортӥз солэн юрттӥсез, выльдӥськон ортчытэмын луоз, штатэ мултэс адямиосты кутытэк. Т. МИРОНОВА. Кыӵе вордӥсьскод пиналъёсмес, Америка? Воткинскысь Нылпи юртэ шедем нылпиос пӧлысь 8-эз али будо Америкалэн Соединённой Штатъёсаз. Соос нуэмын вал "Гифт Ор Лайф Адопшн Сервис" пыр. Та фирмалэн директорез Владимир Гелфанд ӧтемъя, зарезь сьӧры келям пиналъёслэсь улэм-вылэмзэс эскерон вылысь, отчы делегация ветлӥз. Соос пӧлын вал городысь калыкез дышетонъя отделысь инспектор Л. Ю. Поварницына но. Ветлэмъёс верамъя, нылпиос умой семьяосы интыямын, соослэсь тазалыксэс эскерыса возё, дышетскыны устоесь луонлыкъёс кылдытэмын. Озьыен, шугъяськыны мугез ӧвӧл. Огез гинэ вань: нош Россилы пичи адямиосыз малы меда мултэс луизы? Америкае угось Воткинскысь гинэ нылпиос келямын ӧвӧл. Бамъёссэ вӧлъям книга Чиль-вор ворекъясь удмурт дэремъёсын, кырӟаса, сылалэн-нянен пумитазы дуно кунооссэс выль бияос. Иж но Можга палась кожонысен ик чидатэк возьмазы соос, сутӥсь шунды шоры учкытэк. Тани гуртсы кузя но вӧлдӥське ни куно пумитан кырӟан: "Кытӥ меда лыктӥды, ӟечесь-а тӥ вуиды..." Выль Бия гуртэ калык люкаськиз дано пизылы Удмуртиысь калык писательлы Трофим Архиповлы синпелет (стела) усьтыны. 1908 арын пӧсьтолэзьлэн 26-тӥ нуналаз татын, бадӟым, куанер крестьян семьяын, вордскиз но огназ, сирота кыльыса, калык вылэ потыса, курадӟыса быдэсмиз Трошка (гуртын али но озьы нимало сое пересьёс). Вынмуртэз (племянникез) Семен Тихонович Осипов син азяз умой пуктыны быгатэ на со дырез. Нош гуртысь огез нылкышно, пудо утёнын ӟеч тыршемез понна трос полэс данъям адями, Альбина Николаевна Кириллова, кыло-буро мылкыдзэ таӵе кылъёсын кисьтӥз: ___________ Удмурт шаерамы мукет интыын таӵеез ӧвӧл на. Нош "Пычасский" совхозын, аспал писательзэс данъяса, кыкетӥзэ памятник усьтӥзы ни (1995 арын сӥзьыл Акаршурын тазьы данъязы Михаил Коноваловез). Соин ик гурт калык но, куноос но дурыстэм шумпотэмзэс, тау каремзэс веразы совхозлэн директорезлы Сергей Георгичевич Чаузовлы. Таяз учыре солы юрттыны сюлмаськиз "Удмурт кенеш" огазеяськонлэн кивалтӥсез Валентин Кузьмич Тубылов, синпелетэз усьтонэ но со лыктэм. Писательлэн улэм корка бервылаз сьӧд юбо-пыкъет вылын бамъёссэ вӧлъям книга, со вадьсын - "зарни тылы"- перо (Можгаысь суредасьлэн Наталья Зайцевалэн но юрттӥсезлэн Владимир Илемковлэн ужзы). Ар бӧрсьы ар ортчоз - писательлэн югыт тусбуез калык син азьысь уз кысы, синпелет доры йыбырттыны лыктозы выль но выль егитъёс, нош ик воректозы татын улэп сяськаос... Памятникез усьтэм бере, калык вырӟиз клубе. Та юрт пулэсь, пичи, вуж ни ке но, татчы тэрем на библиотека. Соку ик син шоры йӧтӥз Трофим Архиповлэн книгаосыныз выставка. Нош борддорын - Пычас палась потэм писательёсыз данъясь стенд (М. Коновалов, М. Архипов сяна, та палан вордскемын А. Леонтьев, Ю. Байсарова). Татын ини адӟиське Михаил Александрович Новосёловлэн кибервылыз. Ветеранъёс пӧлын но со бадӟым уж нуэ, будӥсь пиналъёс ас котырзэс, ёроссэс мед тодозы шуыса но сюлмаське, Пычасысь музеен кивалтэ. Залын тыраз калык. Трофим Архипов сярысь трос шуныт кылъёс дасяллям Можга ёрос библиотекаын ужасьёс Светлана Сидорова но Надежда Бурина. Огез бӧрсьы мукетызлы писательлы кыл сёто. Кирилл Ломагинлэн верамысьтыз тодмо луиз, мӧйы писатель сое ас пизэ кадь гажа вылэм, берпум нуналъёсаз но адӟиськыны мылкыд карем шуыса. Леонид Емельянов вераз, кыӵе куронэн вазиськоно луиз Трофим Архиповичлы, Ижевскез Устинов каремзы бере... Галина Романова мадиз писательлэсь улэп дыръяз берпум книгазэ люкан бордын ужамез сярысь. Кыӵе инты басьтэ Трофим Архипов тынад улонад? Та юанлы веразы Вячеслав Ар-Серги, Петр Сергеев но мукетъёсыз. Выль бияослэн нимысьтыз дуно кунозы луиз Трофим Архиповлэн пиез Станислав (со али пенсиын ни, мотозаводын конструктор вал). Станислав Трофимович кузпалэныз Тамара Германовнаен пумтэм тау каремзэс веразы таӵе секыт дыре но атайзэс такем сӥлы карыны быгатэмзы понна. - Со мон понна атай гинэ ӧвӧл - дышетӥсь но вал, - шуиз С. Т. Архипов. - Дышетӥз улонын шуг-секытъёсыз вормыны. Визьмо верамъёссэ уг вунэтӥськы... Тани ньыль арлэсь кема ӧвӧл ни со вӧзамы, нош квартираямы котьма со сярысь тодэ вайытэ. Тани пуке кадь со гожъяськон ӝӧк сьӧраз, ки улысьтыз чуръёс бызьыса кошко, произведениосы ӧръясько. Нош мон пукисько вӧзаз, азьвыл сямен, визь-кенеш курыса... Писатель - уй но нунал вис каронэз тодытэк тыршись, ужысь герой, батыр. Солэн быдӟалаез улэп дыръяз ик адӟиське ини. Нош ӧвӧл ни ке со асьме пӧлын, ас сярысьтыз вера синпельлы кельтэм книгаосыныз. Мукет ласянь, асьмеос ӝутыны кулэ солы синпелет, памятник - кизили медаз сайяськылы пилемен, со котьку мед пиштоз, ас бордаз кыскоз. Можга ёросын Вало шурлэн йылысеныз, шуыны луоз, кутске со "кизили сюрес". (Тодамы ваём Бадӟым Сибы гуртэз, кӧня гожъясьёсмы отысь потэмын. Сергей Чаузовлэн ӟеч лэсьтэмез мукетъёсыз понна адӟем карымон мед луоз вылэм. Соку, оло, кунсьӧръёс но мылкыд карысалзы та сюресэнымы тодматскыны. Таӵе малпанзэс веразы Выль Бия гуртын кунояськем адямиос. Нош клубын калыкез шулдыртӥзы на Нынекысь капчи мылкыдоос... ТАТЬЯНА ЧЕРНОВА. Трофим Архиповлы синпелет - бамъёссэ вӧлъям книга; писательлэн пиез Станислав Трофимович, калык вырӟе памятникез усьтонэ; вераське Альбина Кириллова. ВЛАДИМИР БЕЛОМОРСКИХЛЭН туспуктэмъёсыз. Шумпотон - ӝыны гуртлы Алнаш. Ёросысь тросаз гуртъёсын чагыр эстӥськон кыскемын ни, нош "1 Май" колхозысь Кузёбайын та уж борды алигес кутскизы. Лэсьтӥськон удыс оскемын Алнашысь "Друж" ТОО- лы (кивалтӥсез И. Н. Колпаков). Газ кыско ке но, ог люкетсэ гуртоосты со уз шумпотты на. Проект ӧвӧлэн ужъёс кайталы, пе, кельтэмын луозы. Нош ӝыны гурт понна бадӟым шумпотон - пу дасяно уз луы. Кузёбае газ кыскисьёс асьсэ ужзэс ӟеч быдэсъяло. Шекъёсты палэнтон вылысь, гумыосты пыр-поч эскеро. Али куинь бригада тырше, нош "Друж" ТОО-лэн мукет ужасьёсыз - Сизьгуртын но "Родина" колхозын. Алигес ортчем быръёнъёсын "Друж" ТОО-лэн кивалтӥсез И. Н. Колпаков но "1 Май" колхозлэн председателез В. А. Степанов ёрос кенешлэн депутатъёсыз луизы. Соин кузёбай калыклэн газ кыскон ласянь осконэз эшшо но юнмаз кадь. Г. САВИНА. "Буммаш" - азьпал радъёсын Дуннеысь одӥгез бадӟым "Таймс" журнал "Лучшие достижения года в факусе" рубрика улсын 1998 аре потэм материалъёсъя Европаысь промышленностьлы йылпумъянъёс лэсьтэм. Ас уженыз но дасям арбериосыныз троссэ паймытэм асьмелэн "Буммаш" огазеяськонмы. Шумпотоно, тазьы дунне тросгес тодматске предприятиен но отысь вузъёсын. В. СЕНЧЁНОК. Ӝӧк сьӧрын пукон шырыт мед луоз Кызьы тодмо, странаысь экономикаез юнматон но огъя югдурез умоятон понна, С. Кириенко кык сюрес бырйиз - выт бичанэз кужмоятон но бюджет удысъёс чотын коньдонэз шыръян. Берлозэ ужпумез быдэстон вылысь, Москва косӥз ваньзэ бюджетной организациосты вылӥысен улӥёзь "сэзъялтыны": ӧвӧл-а кытын ке мултэс ужасьёс. Шедизы ке сыӵеосыз, чик ӝегатскытэк улляно. Сыӵе ик ужпум пуктӥз асьме Правительстволэн но Тӧроез Павел Вершинин республикаысь кивалтӥсьёс азе. Кинъёс бен нырысь ик мозмытэмын луозы? Кинэ кулэтэмен лыдъялозы? Тани мар вера та пумысен Вячеслав Толчин, Правительстволэн аппаратысьтыз ужез радъянъя, государственной службая но кадръёсъя управленилэн кивалтӥсез: - Ужасьёсты одно ик кулэстон сярысь вераськон уг мыны. Соосты мултэссэ возись ӧвӧл, дыр. Собере, адямиез ужысь мозмытон со котьку но вӧсь карон ук. Соин ик улонмес шырытгес карон вылысь утчано мукет амалъёсты. Вылаз ик, Москва но вера бюджет удысэз шырытгес карон сярысь, одно ик пичиятон сярысь уг. Мон сямен, сотэк но тырмыт луонлыкъёс вань ай. - Кылсярысь? - Басьтом служебной машинаосты ик. Меӵак вералом: эсэпезлэсь трос соос. Нош кулэезъя соос уг кутӥсько, ведомствоосын ужасьёс соосты асьсэ кулэяськеменызы ворттыло. Тани одӥгез уже кутымтэ луонлык, озьы-а? Басьтом телефонъёсты. Куд-огезлэн кивалтӥсьлэн соос ӝӧк выл тыраз, кытӥяз ачиз ик уг вала, кудӥз жингыртэ. Малы кулэ со мында, одӥгез но тырме бере ужаны. Телефон понна дун чыры-пыры кадь, но манет копейкаослэсь люкаське ук. Басьтом мукетсэ. Кыӵе гинэ министерствое яке комитетэ эн пыры, паймоно луэ таӵе югдурлы. Вань отдел, вань солэн кивалтӥсез, нош со улын ужасез одӥг, ну, кык мед луоз. Штатъя ведь озьы, мар уката но паймоноез. Яке вань сектор, вань солэн кивалтӥсез, нош ужасез ӧвӧл, нокинэн кивалтыны. Юри со озьы малпамын, ӝӧкен кивалтӥсьёслы бадӟымгес уждун тупатон понна. Веранэз ӧвӧл, таӵе югдурлы пум пононо. Отделын ньыль адями, секторын (со зэмзэ но кулэ ке нялтас вераса) кык-куинь адями ужаны кулэ. Куинетӥез: тодӥськоды, оло, уд но али котькудаз сямен министерствоын но ведомствоын тодон-валанъёсты будэтонъя курсъёс яке комбинатъёс вань. Ужасьёсызлэсь быгатонлыксэс палэнтон сярысь сюлмаськон урод ӧвӧл со, валамон. Но со дыре ик, сыӵе ик курсъёс выллем шор ёзэн яке вылӥ ёзэн дышетскон заведениос республикаямы вань ук. Шуом, культура удысын культурая училище, калыкез дышетон удысын - пединститут но университет. Отын но луэ ук радъяны специалистъёслэсь тодон-валанзэс будэтонзэс радъяны. Тани нош ик коньдон "ватос". - Вячеслав Иванович, тани азьвыл вакытэ Правительстволэн юртаз пуко вал, ачиз Правительство сяна, партилэн но комсомоллэн обкомъёссы, Верховной Совет, ньыль-а, вить-а министерствоос... Кызьы ке но ваньмыз тэро вал. Али, Пушкинлэн верамезъя, огъёсыз ӧвӧл ни, мукетъёсыз кыдёкын. Нош юртады буш кабинетъёс уг адӟисько. Правительствомы туж бадӟым луиз шат, республикалэн быдӟалаез ӧз кадь воштӥськы ке но? Яке калыкмы кык-куинь пол йылӥз-а?- Тунсыко юан, туж тунсыко. Бен, Правительство бадӟымгес луиз. Но калык чырты сьӧрын тросгес чиновникъёсты-дась комакъёсты возён понна, со ӧз бадӟыма. Тӥ озьы ведь малпаськоды? Кылдӥзы выль министерствоос, ведомствоос но службаос. Соос но, кивалтӥсьёслэсь лыдзэс будэтон понна ӧвӧл кылдытэмын. Регионъёслэн троссэ удысъёсты ас киязы басьтэмен валче выль кивалтон ёзъёс но кылдытоно луиз. Тани асьмеос азьвыл ӧм выре вал сьӧрлось калык кусыпъёсын. Табере со понна нимысьтыз министерство кылдытоно луимы. Нош кӧнязэ улонын воштӥськонъёс сьӧразы ваизы. Асваньбуръя кун комитет, нациосын ужанъя комитет, музъемъя комитет, ужбергатонъя комитет... Мукетыз вераськон - котьку-а соос ас кулэзы быдӟа? Соин ик али ваньзэ та ёзъёсты улысен вылысен эскером мултэссэ шараян вылысь. Но выльысь верасько на: вераськон ужасьёсты кулэстон сярысь сокем уг мыны, макем кулэтэм интые, эсэпсэ валатэк ваньбурез но коньдонэз кутон сярысь. Котькытын, котьмае шыръяно. - Тани котькыӵе контора доры матэктыса ик тодманы луэ кивалтӥсьлэсь кабинетсэ укноысьтыз кондиционеръя, нош мукетъёсыз укноос бушесь. Кабинетын одно ик компьютер сылэ. Кузёез ӵем дыръя уг но быгаты соин ужаны. Быгатэ ке но, ерпечка сямен шудыны гинэ быгатэ. "Шудон" нош сюрсъёсын сылэ. Озьы ук, Вячеслав Иванович? - Ну, кондиционеръёс пумысен куасалтӥдыгес ини. Нош компьютерен ужаны одно ик быгатыны кулэ туала кивалтӥсь. - Ярам, йылпумъялом ини, дыр, та "лэчыт" вераськонмес, вераськонмылэсь кивалтӥсьёсмылэн бусьтыр улэмзы сярысь люкетсэ. Кин тодэм, оло, соослэсь небыт креслооссэс пу пуконэн вошъянэ но вуом, шӧдытэк кыльыса. Ку кутскозы бюджет коньдонэз шыръяны чаклам ужрадъёс? - Кутскизы ини. 17 июльысен кивалтон ёзъёсы одӥг выль адямиез но уг куто ни. Нош ваньмыз чаклам ужрадъёс августэ-сентябре быдэстэмын луозы. - Йылпумъян интые. Асьмеос тодэммыя, ӝӧк сьӧрын ужасьёслэсь лыдзэс кулэстон, соосты возьыны коньдонэз шыръян кампания таиз нырысетӥез ӧвӧл ни. Ваньмыз сямен соос чиновникъёсты огдырлы гинэ кышкатъязы. Собере ваньмыз ас ӧраз пыре вал, ӵашетон чаломе. Чиновникъёс кызьы пукизы шуныт интыосазы, озьы ик кылизы. Таиз но ужрад соин ик уз-а йылпумъяськы меда? Г. КОРЯКОВ. ТУННЭ ЧУГУН СЮРЕС УДЫСЫН УЖАСЬЁСЛЭН НУНАЛЗЫ Поездлэн питранъёсыз вуоно дауре дырто ни. Быдэс даур ӵоже чугун сюрес вылын бадӟымесь воштӥськонъёс ӧй вал. Паймоно кадь: кызьы меда ужаны луэ 100 ар талэсь азьло тупатэм куронъёсъя? Но со озьы вылэм. Та удысын ужасьёслэн тарифъёсты тупатонъя нырысетӥ съездзы 1890 арын ортчем. Тӥни со дырысен нокыӵе воштӥськонъёс вылымтэ. Сомында аръёс ортчыса, туэ май толэзе нырысьсэ Москвае тарифной политикаез воштон пумысен люкаськылӥзы чугун сюрес удыслэн кивалтӥсьёсыз. Ужрадэ пыриськиз Горьковской чугун сюреслэн Ижевскысь ёзэзлэн кивалтӥсез Клементий Антонович РОГОВЕЦ. Со алигес журналистъёсын пумиськылӥз. Вашкала тарифъёсъя ужаны уг ни луы, шуиз К. Роговец. Угось лыдэ уг басьтӥсько улосвылъёслэн пӧртэмлыксы, кыдёке мынӥсь вузъёслэн дуноямзы. Кылсярысь, поездэн келям нюлэслэн дуныз сокем вылӥе ӝутске - сое басьтӥсь ик уг ни луы. Ваньзэ тае лыдэ басьтыса, вуоно арысен чугун сюрес вылтӥ вузъёсты нуон-ваён понна, выль дунъёс тупатэмын луозы. Клементий Антонович верамъя, пассажиръёслэн лыдзы арысь аре огкадь возиське, но лыдпусъёсъя ке учконо туэ 14 процентлы кулэсмиз. Озьы ке но, лыдпус югдурез шонер уг возьматы, угось берло дыре туж трос луизы билеттэк ветлӥсьёс. Пассажиръёсты нуллон быдэс дуннеын пайдатэм луэ. Соин ик чугун сюрес возёнэз котькытын ас вылаз государство басьтэ. Россилэн бюджетысьтыз та удыслы дотациос ӝегатскытэк висъясько, соин ик оскон вань, азьланяз билет дунъёс уз будэ шуыса. Удыслэсь ужамзэ выльдонъя али дасямын ни нимысьтыз программа, 2003-тӥ арозь сое улонэ пыӵатыны чакламын. Рыноке выжемен валче, удыслы нокызьы палэнскыны уз луы приватизация шуонлэсь. Нимаз кузёослы вузамын луозы вагонъёсты тупатъянъя, воштос ёзъёсты поттонъя предприятиос. Лэсьтӥськон но вузкарон организациос. Чугун сюреслы специалистъёсты дасясь техникумъёс но институтъёс сярысь сюлмаськонэз ас вылаз государство басьтэ. Огъя вераса, чугун сюрес удыслэн огъя кузёез государство ик кылёз, но куд-ог удысъёсъя кылдытэмын луозы акциосын огазеяськонъёс. Та удыслэн ужез озьы радъямын дуннеысь мукет государствоосын но. Чугун сюреслэн ужамез вылын берло аръёсы туж зол шӧдӥсько предприятиослэн тэк сылэмзы. Удмуртиысь предприятиос пӧлысь грузъёсты нуон-ваёнзэ ӧз кулэсты "Ижсталь" гинэ. Горьковской чугун сюреслэн Ижевскысь ёзъя управлениез мукет республикаосын ужа соослэн правительствоосынызы гожтэм огкылъёсъя. Умоесь кусыпъёс кылдэмын Татарстан, Башкортостан республикаосын, Свердловск областен. Но куд-ог улосвылъёс ваем вузъёс понна тыронъёссэс ӝегато. Туннэ нуналлы чугун сюреслы 109 миллион манет коньдон берыктымтэ на. Соин сэрен Удмуртиын ворсан калэ вуэмын электрокужымен ужась вить станциос пӧлысь кыкез. Сыӵе югдур кема ке возиськиз, оло, куд-ог пригородной поездъёсты но ужамысь дугдытоно луоз. Но огъя югдур асьме чугун сюрес вылын, мукет удысъёсын ӵошатыса, сокем урод ӧвӧл на ай. Адямиос ужало, поездъёс ветло. Т. БАННИКОВА. ЗЭМОС СОЛДАТЪЁС Армия сярысь туэ олома но верасько. Нош будӥсь пиналъёсмы озьы ик кыстӥсько военнойёс котыре. Ижевскысь 6575 войсковой частьлэн "Патриот" лагеряз та нуналъёсы гинэ шутэтскизы шаерысьтымы ог 100 пиналъёс. Арлыдзыя соос 11-17 аресозь, огазея военной ужез яратон мылкыдзы. Вералом на, пӧлазы нырысьсэ "службаез" ортчо куинь нылъёс - Завьялово районысь "Граница" клубе ветлӥсьёс. Жадемзэс уг возьмато, секытъёс пыр мылкыдзэс кыдато. Лагерен кивалтэ "Ожгарчи" клублэн директорез И. И. Римский. Ӵукнаысен ӝытозь пиналъёс дышетско шонер ыбылӥськыны, нюръяськыны, нюлэскын пеймыт уен но сюрес шедьтыны, ог-огдэ шуге-леке шедемлэсь утьыны. Улонын со ваньмыз кулэ луоз ай. А. Лунина. ТУЛКЫМ Визь-лул быртыкъёс Ижевскысь "Тодон" издательство поттӥз Александр Лаптевлэсь "Хи-хи" нимо книгазэ. Отчы пыремын солэн 1980-тӥ арысен туннэ нуналозь гожтэм веросъёсыз но визь-лул быртыкъёсыз (чакланъёс, визь пырыос). Автор, кылсярысь, гожтэ: "Калыкын адями пумысен таӵе веран но ветлэ: "дӥсезъя пумитало, визезъя келяло". Тазьы ик шуыны луоз выль книга сярысь. Мон Александр Михайловичен тодматски "Ӟечбур" газетлэн редпкцияз, со литературая люкетэн кивалтыны кутскем бере. Нырысь пумиськемъёсам ик кельшиз мыным Алнаш ёросысь Юртошур-Какси (Куашкам) гуртын вордскем пи. Герман Ходырев кадь ик мусо потӥз. Александр Лаптев но али бадӟым юрттэт сётэ егит гожъясьёслы. Соин ик мон ӧй паймы, солэн нырысетӥ книгаезлы дунъет сётӥсьёс Герман Ходырев но Ульфат Бадретдинов шуыса. Автор "Хи-хи" веросаз пыр-поч возьматэ Горшковлэсь огинъюртъёсын костаськемзэ. Сое лыдӟыса, мынам но тодам лыктӥз ремесленной училищеын дышетскыкум но сое быдтэме бере общежитиосын улэме. Писательёслэн монъяськыны яратэмзылы, куспазы тупатэк улэмзылы сӥзем "Урбо" вероссэ нокыӵе удмурт издание печатланы ӧз басьтӥськы. Отын возьматэмын уго "Сюрло" литературно- художественной журналын огыр-бугыр ортчем ужъёс. Редактор (авторлэн героез) Алексей Николаев рукописьёсты учкыса малпа: "Кыӵе акыльтӥськиз ни, та жуг-жаг гожъямъёссэс лыдӟыса, кӧня синмез быдтӥськиз ни соин сэрен". Но малы ке ӧз кельшы мыным авторлэн советской писателез горд партиен огазе колӟамез. Зэм, партия ас дыраз трос янгышъёс лэсьтӥз. Тани, кылсярысь, Ижевскын Печатьлэсь юртсэ но городлэн пумаз пуктӥз, куд-ог писательёслы, мукет сӥё-дано адямиослы уродэсь квартираос сётъяны "юрттӥз". Азьвыл дырысен визьмо адямиосыз ӧз яратэ, али но туж ик уг гажало. Малы ке шуоно, улонэз зэм палыныз усьто, выльзэ но умойзэ пыӵатон понна нюръясько. А. Лаптевлэн но нырысетӥ сборниказ вань шуг-секыт югдурысь потыны малпанъёсыз. Книгаысьтыз котькуд чурзэ со сюлэм пыртӥз поттэм. Книгалэн тиражез сюрс экземпляр, мылкыд карисьёс сое шедьтыны быгатозы. В. ЧЕРНОВ. ВАССА ВАСИЛЬЕВА Вордӥськи улонэз валаны Ортчо аръёс Мыным туннэ, эшъёс, Куатьтон арес тырмиз. Нош сюлэмы мынам Малпанъёсын тудӟиз. Кытчы меда дырто Инмысь лыз пилемъёс? Малы меда ортчо Та чебересь аръёс? Усись кызьпу куарлэн Пайми дыртэмезлы, Пинал даурелэн Пайми ортчемезлы. Усем куар интые Гуждор потоз выльыз, Ортчем пинал даур Уз берытскы выльысь. Басьтӥз пужмер Погыльске ымныр вылтӥм Пӧсь курыт синву. Бугырес мӧйы сюлмын Йӧӟектэм тудву. Чик ӧй малпа - дуннеын Вань каргам висён. Ӧй но малпа - улонам Трос на курадӟон. Ӵук пужмер басьтӥз, лэся, Льӧль сяськаосты. Сьӧд кужым ворме, лэся, Ӟеч малпанъёсты. Кык пол ке луысал? Чик мылзы поттэк, каллен Усьыло сӥзьыл куаръёс. Шултыса лек тӧл выллем Ортчыло бугрес аръёс. Вал али гинэ пичи, Бадьпу ньӧр кадь туж векчи, Ма вискын мон пересьпи, Валатэк сое кыли. Йыр йылтӥм но лобӟизы Гурласа кыр туриос, Сюлэмме вырӟытӥзы Лыз инмысь ӝож куараос. Ортчонтэм ке луысал Гужемлэн шулдыр дырыз... Нош кык пол ке луысал Улонлэн пинал дырыз? Быдэсмиз-а малпам ужъёсыд? Дуннее вордӥськи улыны, Ужаны но нылпи вордыны, Вордӥськи улонэз валаны, Дуннелэсь чеберзэ адӟыны. Туж шулдыр, ӵыдонтэм та дунне, Номырин но уд вошты сое. Улонлэн пум палаз ке адске, Чик юась но ӧвӧл ни тонэ. Быдэсмиз-а малпам ужъёсыд? Будэмын-а вордэм нылпиед? Соослэсь тон адӟид-а ӟечсэ, Коркаез шулдыртӥсь нылпизэс? Я, вуид ке созэ но тазэ Лэсьтыса, адӟыса улонад, Кынь соку синъёстэ шугатэк, Ас улэм даурдэ жалятэк! Кин кызьы вала Кин кызьы, дыр, гожъя кылбурез, Кин кызьы, дыр, вала улонэз... Адӟисько мон сое ӵуж но вож, ӟарыт-лыз, Нош куддыр со потэ мыным копак пурысь. Адӟыса мон вуи инкуазьлэсь чеберзэ, Ас вылтӥм погыльтӥ войналэсь секытсэ. Веръялляй улонлэсь кузьытсэ но шӧгзэ, Адӟылӥ, пуж пыртӥ кадь, пичи шудбурзэ. Нош али улонэ пум палаз матэктэ, Кыдёкын азьпалам пурысь бус лӧсъяське. Жалясько мон ваньзэ, нош тужгес - даурме, Та вакчи улонэз валатэк улэмме. Кам дурысь Думаын Та нуналъёсы Сарапул городысь Думалэн кенешез ортчиз. Тужгес но ӟырдыт вераськон мынӥз коньдон ужпумъёсъя. Сарапулысь администрация Думае вазиськиз вал, калыклы технической юрттэт сётонъя предприятиез выт тыронъёслэсь мозмытыны курыса. Та ужпум умоен лыдъямын. Улон интытэк но улыны коньдонтэк кылем адямиослы юрттон понна, городын кыдытэмын нимысьтыз комиссия. Со сентябрьлэн шорозяз дасяны кулэ нимысьтыз ужан план. Улон интыосты чагыр эстӥськонэн шунтыны выжтэмен валче чакламын ватсаса коньдон шедьтыны но та уже калыклэсь уксёзэ кутыны. Сарапулысь ас коже кивалтон ёзъёсын воштӥськонъёс ортчытэмен валче юнматэмын административной комиссия. Со ужалоз котькуд арнялы одӥг пол. Н. СЕРГЕЕВ. Снимокъёс вылын: Сарапулысь Думалэн юртэз. Кенешо городлэн Думаяз ужасьёс. В. Камашевлэн туспуктэмъёсыз. Калыклы ӧз яра Воткинск. Городлэн кивалтӥсьёсыз, Удмурт Республикаысь Правительстволэсь постановленизэ быдэсъяса, нырысьёсыз радын коммерческой автобусъёсты ульчаос кузя лэзизы вал. Выль кутскон кемалы ӧз чида. Радъямез но калыклы пумит луиз угось: коньдонэн ужась рейсъёс усьтэмын вал пассажиръёсын пачылмем маршрутъёсын. Городын улӥсьёслэсь мылкыдзэс санэ басьтыса, мэрлэн косэменыз Воткинск ульчаысь коммерческой автобусъёс али огдырлы палэнтэмын. Соос ужалозы огшоры маршрутъёсъя. Л. Дмитриева. Кезысь элеваторлы - 60 Кык сю пала кунооссэ люказ та ӝытэ жадёнэз валатэк ужась пичигес предприятие. Пызь изонысь, комбикорм дасянысь берло аръёссэ со пӧрмиз ни пӧртэм пумо сиён-юон поттонъя заводлы. Кезысь гинэ басьтод ӵужъем но аспӧртэмлыко шӧмъем шундыберган вӧй. Татын - асьсэлэн сурзы, чечызы, сӥльзы, бакча сиёнъёссы. Элеватор, секыт вапумъёс шоры учкытэк, ялан азинске. Кыӵе улон коркаос пуктэмын ужасьёсыз понна! Тани туннэ но районной центрлэн шораз ӝутэ улыно-вылыно юрт. Отчы интыяськоз магазин. Ушъяськонлы медаз пӧрмы, но умойзэ умоен верам потэ. - Элеватормы пусъе сӥё-дано юбилейзэ - 60 ар тырмонзэ. Но со егит ай. Ужасьёсмылэн шоро-куспо арлыдзыя ке верано - 37 арес, - шуиз предприятилэн туала кивалтӥсез Валерий Аркадьевич Семенов. Куноос пӧлын - элеваторез лэсьтыны кутскемъёс, быдэс даурзэс татын ортчытэмъёс. Соос султыса буре ваизы улонысь дырызлэсь вазь кошкем эшъёссэс. Тросэз быризы фронтын. Вань репрессия улэ шедемъёсыз но 1938 арын тушмон радэ пыртыса ыбылэмын вал заготзернолэн кивалтӥсез Егор Николаевич Косарев, бухгалтер Петр Васильевич Поздеев, техрук Федор Алексеевич Фомин. Арестовать каремзы бере, 20 час ортчыса, приговорез воштон сярысь решение вуэ. Но - бер вал ини: янгыштэм муртъёсты соку дыртыса быдтылӥзы. Заготзерно вылэ таӵе сьӧд адӟон лыктӥз, тысез изъянтӥсь кибыосты шедьтэмен. Чагиськисез но шедиз уга. Ортчемез сярысь тодэ вайыса, ужысь ветеранъёс нимысьтыз пусйизы выльвылэз ӝутон аръёсты. Самой соку Кезысь элеваторе но вуиз ноку адӟылымтэ урожай. 50-70 вагон пӧсектыны кутскем чабеез утён вылысь, уен-нуналэн ог-огзэс вошъяса 4 сменаен ужазы. Предприятиен соку кивалтӥз Александр Семенович Наговицын. Веранэз ӧвӧл - адямиослы секыт йӧтӥз. Но самой та дырез ик данъяськыса тодазы ваё: няньлэсь дунзэ курыт пӧсям вуэн суро шӧмъязы. Элеваторе лыктэмъёс пӧлысь шерез татысь музон интые кошке. "Улэп" энциклопедия шуо Анна Ивановна Донскова сярысь. Улонысьтыз 40 арзэ со герӟаз ужано коллективеныз. Туннэ но люкиськемез уг поты на. Та радэ ик пыртыны луоз Владимир Александрович Яговкинэз, Лидия Никоноровна но Александр Андреевич Отмаховъёсты, Анна Васильевна но Георгий Петрович Леонтьевъёсты... Туннэ соосты вошто ни пиналъёссы. Юбилей ӝытэ трос ӟеч кылъёс верамын вал Геннадий Аркадьевич Назаров, Нина Трофимовна Трефилова, Владимир Вячеславович Селиверстов но трос мукетъёсыз сярысь. Соос вылын возиське но юнма элеватор, республикаысь хозяйствоослы вылӥ ӟечлыко продукция дасяса. Таӵе мылкыдын ужалэ азьланяз но! Л. МЕДВЕДЕВА. ГУРТ УЛОН Выртэк выр уз луы Туала вакытэ ыж вордон удысын табыш поттыны туж секыт. Соин ик, 90-тӥ аръёсын ӵошатыса, республикаямы та пудо-животъёслэн лыдзы 50 поллы кулэсмиз. Нош Пичи Пурга ёросысь "Молния" эштосын - куинь поллы гинэ. Малы бен татын удыс борды сокем-сокем "кырмисько"? Кылем арын гинэ хозяйство ыж вордонлэсь 106 сюрс манет тыр ыштонъёс адӟиз. Озьы ке но, ыжъёслэсь лыдзэс кулэстон интые, татын сое 100 йырлы будэтӥзы на. Таӵе паймымон югдурен ӵем ик уд пумиськылы. Ма, юри тросгес ыштонъёс адӟон понна озьы ужало шат? Нош ужпум туж огшоры вылэм. Огшоры но - шуак-дуак радъяны луонтэм. Кызьы ивортӥз валтӥсь зоотехник Н. А. Артемьев, эштосын, пе, племенной ыжъёсты вордо, предуральской типъем цигейской выжы. Со бордын 20 ар пала тыршиллям. Али, секыт югдурлы сётскыса, ыжъёсты быдтоно ке, тодосчиослэн уно ар ӵоже тыршемзы юнме луоз. Соин ик, Гурт хозяйствоя но сиён-юонъя министерство юрттэмъя, ыжъёсты возьыны тыршо. Трос ыштонъёс ваемен, эштослэн та пудоез вордыны мылкыдыз ӧвӧл ни. Мӧзмыт ветло возьёс вылтӥ ыжъёс. Дунзыя соосты басьтӥсь ӧвӧл. Берло вить ар ӵоже одӥг ыж но вузамтэ. Нош сокем ӟеч выжыез дунтэм дунын сётод шат? Укыргес луоз, дыр... Уллёлэсь лыдзэ возён понна, куд-ог такаосты вандо. Озьы племенной ыжъёс шашлыклы мыно. (Зол улӥськом!) Кык тонна пала ыж гон кылем арысен складъёсын кылле ни. Н. А. Артемьев пусъемъя, вераськон мынӥз 3-4 колхозъёсты огазеяса куиськон цех усьтыны. Но уж интыысьтыз ӧз вырӟы. Калыкын юнме уг шуо: выртэк выр уз луы. Цех усьтон сярысь малпанэз уж вылын быдэстон понна, трос бызьылоно, коньдон утчано луоз. Нош та ужен али нокинлэн выремез уг поты, шӧдске. Нунал бӧрсьы нунал ортче. Эштос улэ, ыж вордэ, чебер нуналъёслы оске. Тӧлъя-буръя коньдон кошке. Асьме ваньбурмес утялтыны валатэк сисьтӥськом, уно долларъёс тырыса, ыж гон кунгож сьӧрысь ваиськом. Е. ПАНФИЛОВА. Сазьгес, юнгес, кужмогес Туннэ физкультурниклэн нуналэз. Зэм, азьвыл аръёсы сямен сое паськыт ум пусйиське ни. Озьы ке но, физкультура но спорт улэп на. Алигес городъёс но ёросъёс куспын та удысэз азинтонъя конкурслы йылпумъянъёс лэсьтэмын. Районъёс пӧлын вормисе потӥзы пичи-пургаос, городъёс пӧлын азьпалан Глазов. ВЛАДИМИР РОМАНОВ Ошмеслэн кырӟанэз Бызисько бадӟым шуре, Зарезе вуон понна. Ӵогисько чебер сюрес, Тыршисько уен-нунал. Мон соин ик Позырес, Читырес-чутырес. Выль вуме Вите зарезь. Ну сэзьгес, Кузь сюрес! Луыны чупыресгес, Шундыен вераськыны Умойлэсь но умойгес Кырӟанэ юрттэ мыным. Чузъяське со Жингырес, Жильырес-жальырес. Шулдыртэ Вань котырез Жильк азвесь Крезьгурез. 1986 ар *** Нош ик - сюрес, Нош ик - Шаркан. Нош кылӥсько мон: - Вуид-а, шайтан! Сучырмемед ук... Юрттоз ай пӧсь чай! Пыштурындэ мон Бичай ке, бичай! Ю кеч йӧлын, Ю чечыен! Аныкаед нош Уг вись-а, пие?.. Кунокуатӥ Аннапай бызьылэ. Йӧл но, чечы но Азям пуктылэ. Юалляське. Вера. Малпаське. Выжыятэ. Пайме. Кушетске. Кин мон солы? Пуксеттэм сюресчи. Ӟеч тодмало монэ Ва но Чупчи. Нош ӟеч куно кадь Дораз пукисько, Ӟеч сямызлы мон Дышетскисько. Эх, Аннапай, Сюлмаськись Аннапай, Кӧня ини тон сярысь, Тон сярысь мон малпай. Тон семьятэм, Но уд шуы шудтэм. Сюлмаськонэд Шумпоттэ но шунтэ. Нош ранӟыто ке Малпаськытэк, Чик тон уд возьматы Вӧсь луэмдэ... Нош ик сюрес. Ӟеч лу, Шаркан! Нош кылӥсько мон: - Эн вунэт, шайтан! 1988 ар Яратон сярысь баллада Ярато вал ог-огзэс. Соослы кырӟаз ошмес. Гӧгӧрсин - соос киын, Лыз дыдык - соос вадьсын. Ярато вал ог-огзэс... Батырез ӧтиз сюрес. Возь вылъёс, шуръёс вамен - Оло нош, дунне пуме! Нош отын - мукет ошмес. Мукетгес гужла нюлэс. Нылъёссы паймымонэсь - Ой, берыктозы йырез! Зэм ик но, шурзы дурын Вань йырберыктон турын. Нылъёслэн куремзыя, Одӥг пол со сяськая. Батырез келян дыръяз Мусоез солы вераз: - Ишкалты дыдыксинэз - Тон уд вунэты монэ. Мурт эльысь сюрес урдсын, Ой, векчи ук гӧгӧрсин. Нош йырберыктон сяська Зарни вӧт кадь кисьтаське. Тӥялтӥз сое батыр, Ныл доры вуиз утыр. Егит ныл но казакпи Вамышто ни ваче ки. Казакпи мынэ етӥз, Ваньзэ, ваньзэ вунэтӥз. Тутыгыш - мусо нылаш Сюлэмзэ, лэся, талаз... Ошмес ву юэ батыр. Ой, чагыр та ву, чагыр! Ин отчы кымаськемын. Лыз дыдык со лыз инмын. Мар луиз тонэн, батыр? - Мугорыд - юзыр-кезьыр. Ву-а долкатӥз пиньдэ? Я, тодад ваид дордэ? Лыз дыдык... Ой, дыдыке! Оло нош, со - гыдыкез?!. - Малпаськись луиз батыр, Лулӟылэ ини утыр. Ох, сьӧрлось будос пӧяз! Малы бен соку тӥяз Зарни вӧт кадь сяськаез? Вунэтӥз дыдыксинэз! Бен, чебер сьӧрлось нылаш. Только мукетыз - сюлмаз. "Тутыгыш, эн вай вождэ! Дыртоно мыным гуртэ..." Дыдыксин ик мусогес, Гыдыкез ик дуногес... Уть, йырберыктон сяська Со киын ини куашка. Лыз дыдык сьӧры батыр Дор палаз кошкиз дыбыр. Возь вылъёс, шуръёс вамен - Вордӥськем гуртэз пуме. Гурт пумын � кырӟась дырды. Со вылын - тӧдьы дыдык. Гыдыкез капка азьын. Йырсиез - пурысьтамын. 1985-1986 аръёс. *** Кызьы-о, нылаше, Ыштӥд сокем коштан пель угыдэ? Ӧвӧл ни ке эшез, Та кылемез но пель бордысь кирдэ. Озьы ик тӧдьы юсь, Ӧвӧл ни ке солэн лул-гажанэз, Уз шумпоты ни, уз, Со пазьгиськоз - малы на улонэз! Я утча, нылаше, Я шедьты со ыштэм пель угыдэ!.. Юсьлэн мусо эшез Медаз ышы � сотэк улон бездэ. 1985 ар. КИВАЛТӤСЬЁС КАЛЫК ПӦЛЫН Ваньбур потэ, нош коньдон уг люкаськы Удмурт Правительстволэн Председателез Павел Вершинин кылем средае ужан нуналзэ ортчытӥз Можгаын. Берло вить нунал куспын солэн таиз калык пӧлы потамез кыкетӥез ини. Матысь нуналъёсы но таӵе ужан амал азьланьтэмын луоз. Правительстволэн пресс- службаяз ужасьёслэн верамзыя, премьер талэсь азьвыл ноку но сокем ӵем, вылысьтыз вылаз ӧз поталля районъёсы. Маин бен валэктыны луоз П. Вершининлэсь районъёсын сокем ӵем "куноямзэ"? Валамон, А. Волков шутэтскыны кошкемен валче, Павел Николаевичлэн сюлмаськонъёсыз йылӥзы. Но таин гинэ уд, дыр, валэкты Председательлэсь республикаетӥ кузяназ но, ваменаз но ворттылэмзэ. Районъёсын пумиськонъёссэ сакгес эскериськод но таӵе малпанэ вуоно: Правительство кыӵе ке но бадӟымесь ужрадъёс кутыны дасяське. Но солэсь азьвыл быдэс республикаысь экономика удысысь югдурез рос-прос тодыны тырше. Тани Можгаысен но Павел Вершинин, одӥг минут но вис карытэк, пумиськон вылысь пумиськон ортчытъяз. Одӥгаз но огъя супыльтон, кыл шерон ӧй вал. Вань вераськонъёс экономикаысь ужпумъёс котырын бергазы. Премьер нырысь ик вуылӥз "Красная звезда" огазеяськонэ. Солэн генеральной директорез Р. Абашев ӝутскем мылкыдын мадиз, кызьы выльысь улӟыны кутскиз предприятие. Продукцизэс, пе, табере басьто Москва (40 процентсэ), Молдавия, Казахстан но СНГ-ысь мукет странаос. Пулэсь лэсьтэм дышетскон арбериосын но шудонъёсын тунсыкъясько Прибалтикаысь вузкарисьёс. Огазеяськонлэн Германиын ортчытъяськись бадӟым выставкае пыриськемез бере, луонлыкез кылдэ аслаз вузэныз Европае но потыны. Веранэз ӧвӧл, макем сак кылзӥз та иворъёсты Правительстволэн Председателез. Собере директорлэсь ушъяськемзэ куспетӥ карыса кадь шуиз: - Продукция ӟеч поттӥськоды. Нош вузкарыны удгес быгатӥське ай. Тӥляд вань пунэмен тыриськонъёстэс быдтыны луонлыкъёсты вань ук. Утчаське, бергалэ. "Дубитель" кадь завод Удмуртиын мукетыз ӧвӧл ни. Шонергес вераса, азьвыл "Дубитель" кадь. Та предприятие республикаысь банкротъёс пӧлын, оло, самой нырысетӥез но. 1996 арын ик со шаерысьтымы предприятиослэн реестрысьтызы поттэмын. Заводлэн юртъёсыз пунэмен тырон чотын сётэмын "Можгинское МСО" АО-лы. 30-тӥ аръёсы ӝутэм корпусъёсын мар ке но тыро-пыдо производство радъяны луоз шуыса оскисез ик ӧй вал. Но зэмос кузё буш интыысь но пайда поттыны быгатэ. Таяз учыре зэмос кузё - МСО- лэн генеральной директорез Раил Муфтахов, паймоно кадь етӥз, мыло-кыдо воргорон. Аналтэм заводын со радъяз ини холодильникъёсты но дӥсь миськон машинаосты тупатъянэз, нянь пыжонэз. Али татын ужгур пӧзе вуко лэсьтонын, Асьсэос ик пызь изозы, асьсэос ик солэсь нянь пыжозы. Нялтас вераса, Р. Муфтахов районын будэтэм ю тысьлы оске, кыдёкысь ворттэмез уг поты. Заводын потто бетон кисьтыны корт опалубка. Лэсьтӥськонын сое кык воргоронъёс ваче но быгатозы бичаны но, сэрттыны но. Уже кутыны луоз сыномыса пырдытозяз. Туж пайдаё арбери, специалист луисьтэмлы но валамон. Кызьы шуиз П. Вершинин, таӵе продукцилы ӟеч реклама гинэ кулэ на - басьяськисьёс ёртозы. Со озьы ик синмаськиз кроватьёслы но диванъёслы корт ёзъёслы. Но вылӥ куноез (яке эскерисез-а?) лӥятыны шуг вылэм. - Уждун? Кызьы уждун тыриськод? - шымыртэ со Р. Муфтаховез. - Ог люкетэз июнь понна тыремын. Пунэме кылемъёсты шуггес сэзъяны. Зэм но, заводлэн пень пӧлысь кадь ӝутскемез шӧдӥське. Но со понна тачак коньдон кулэ ук. Кытысь сое поттэ МСО? Можгаысь администрацилэн кивалтӥсез И. Семенов валэктэ: - Городысь вузкаронэз ӝынызэ кияз возе Муфтахов. Нош лэсьтӥськон удыс быдэсак солэн, шуыны луоз. "Дубительысь" кошкиськом ёрос больницае. Сьӧрамы мынэ Р. Муфтахов но, "ауди" машинае пуксьыса. Номыр уд шуы, начар "контора" ӧвӧл, шӧдске, та МСО... Больницаысен П. Вершинин тодматске хирургия корпусэз лэсьтонэн. Нялтас вераса, сое но пуктэ МСО ик. Юртлэн витез ик этажез ӝутэмын ини. Ужъёс тачак на. Нош хирургия отделение больницаын али уг ужа, шуыны луоз, операциос лэсьтыны нокытын. Мар со сыӵе город понна - веранэз ӧвӧл. Соин ик П. Вершинин лэсьтӥськисьёс азе ӝот-ӝот курон пуктэ: объектэз вуттыны кулэ кайта 5 августлы, ӵапак ар ортчыса. Со дыре ик ӟеч лэсьтоно, тупатъянлы коньдон куяно медаз луы. Председательлы пумит кариськись ӧз луы. Можгаын ваньмыз ик пумиськонъёс вольыт ортчизы шуыны уг луы. Тани басьтом "Конус" огазеяськонэз, азьвыл машзаводэз. Татын 35 процентэз продукцизы номырлы ярантэм, брак потэ. Цехъёсын ӝокыт, тузон, су, оборудование дасо аръёсын уг вошъяськы. Производство пайда интые изъян вае. Но вераны кулэ: ужасьёслы уждун тыронэн туж ик бере уг кылё. Со дыре ик кивалтӥсьёс уг тодо (!), кӧня коньдон толэзяз кошке уждунлы, кыӵе шоро-куспоез. Татын ӧвӧл производствоез но пунэмен тыриськонэз (со 1 миллион манетлэсь ятыр) радъянъя планзы. 5 номеро школаын павел Николаевичез сэргы шымыртӥзы, шуыны луоз. Татын одӥгзэ юртэз быдэсак выльдо, сэзъяло (нош ик МСО!). Мукетсэ но, куашкамезлэсь кышкаса, пытсазы. Тупатъян понна кулэ 150 сюрс манет. И. Семенов но школалэн директорез Н. Буторина кызьы гинэ ӧз ёртэ П. Вершининэз. Пумаз вуыса, бӧляк луэмзэ но тодаз вайытӥзы. Павел Николаевич синвузэ ӧз потты: - Мон тӥледды туж гажасько. Но монэ но валалэ: ӧвӧл республикаын коньдон. Тӥни озьы, премьер Можгаын но нырысь ик премьер, собере ини бӧляк. Но Павел Николаевич вунэтымтэ со 150 сюрс манет манет сярысь куронзэс. Администрациын вераськон дыръя со ачиз ини выльысь берытскиз та ужпум борды: - Республика аслаз бюджетысьтыз тӥляд ЖКХ-дылы 10 миллион манет сётыны кулэ. Со чотын ик 150 сюрс басьтэмды луоз. Валамон, ЖКХ-ын шыръяно луоды. Соглаш? Можгаос лулӟизы но огкылысь кариськизы. Со нуналэ ик ортчиз городысь активлэн бадӟым совещаниез. Отын эскеремын вал администрацилэн нырысетӥ паларе ужамез но шуг-секытысь потонъя ужрадъёс. Правительстволэн Председателез городысь кивалтӥсьёслэн ужамзылы, огъя вераса, таӵе дунъет сётӥз: - Умой ужаськоды, быгатӥськоды ужаны. Нош коньдон люканы, сое шыръяны уд быгатӥське. Пум пононо таӵе югдурлы. Люкаськемъёс соглаш луизы таӵе дунъетэн. Соос озьы ик умоен лыдъязы, куд-ог ватсанъёс пыртыса, бюджетэ тросгес коньдон люкан вылысь ӵектэм ужрадъёсты. Кызьы быдэсмозы со ужрадъёс, тодмо луоз матысь дыре ик. Г. КОРЯКОВ. ШӦКЫЧ "ВЫЛЬ УДМУРТ" Милям гуртамы вань аспӧртэмлыко адямимы. "Выль удмурт" нимаськомы. Туж тунсыко маке со. Дӥсяське мотор! Пурысь пиджакен, югыт-ӵуж штаниен, горд ботинкаосын. Йӧно атас но тӥни. Нош машинаез! Ноку сыӵезэ ӧй адӟылы на. Дуннеысь, пе, самой ӝог ворттылӥсез, чеберез. Мыным сыӵезэ басьтытозям 256 ар ужаны кулэ шуыса чотай. Бускелез дорозь гинэ но машинаеныз мынэ, мон, пе, колхозник ӧвӧл пыдын калтыртыны. Алигес кырӟанлы конкурс ортчытӥзы. Нырысетӥ интые потӥсьлы, пе, - 3 сюрс манет тырозы. Калык клубе люкаськиз. Огез бӧрсьы мукетыз быгатэмзэ адӟытэ. Берпуметӥез кырӟась потӥз но, абдраменымы, ӧжыт гинэ пукон уламы ӧм питыралэ: самой соо "выль удмуртмы" - Сидорьян Оверьяныч. Ӝӧк вылэ 5 магнитофонзэ пуктӥз. Ваньзэ бӧрсьысь бӧрсе лэзьяз. Кыӵе гинэ гур уг кылӥськы: пыдъёс асьсэос эктыны ӧдъяло. "Ну, - шуэ, - пеймыт нюлэс, кудӥз-о кельшизгес? Чебер-а кырӟасько?" Тани тӥледлы 10 сюрс манет, вазиське коонкурсэз нуисьлы, - соо понна монэ нырысетӥ интые пукты. Та учыр бере "выль удмуртмы" нош ик милемыз паймытӥз. Музей, шуэ, кылдытӥ. Отчы пырыны 100 манет, пе, кулэ. Мыноно кариськимы. Пырим гинэ - бодыез ньылэм кадь луим: сопаллан но, тапалан но машина гинэ. "Запорожец" вылын гожтэмын: "Сидорьянлэн нырысетӥ валэз. Берпуметӥез, кызетӥез, чебермамын зарни букваосын: "Сидорьян Оверьянычлэн самой гажано тачкаез..." Ӧжыт гинэ ымнырмы йырберамы луыса ӧм потэ. Кӧдэктмы, ява. Алигес "выль удмуртмы" яратонэзлы гожтэт лэзем. Соиз, лыдӟыны быгатытэк6 мон доры вуиз. Одӥг кылыз но янгыштэк гожтэмын ӧвӧл. Ма, тани учке ай асьтэос. "Яратоно 100 ку-пу-ра-е мынам! Туннэ пейжеред 3 пол пипкетӥз ке, балконад потыса учкы фонтан пала. Отын сылоз мынам "каталкае". Лыкты отчы но пыр пушказ. Ачим француз сиськонние нуо. Тынад гажано телевизоред яке Сидорьян Оверьяныч. Жанна Рыбакова. Курег гурт, Пичи Пурга ёрос. НИКОЛАЙ БАЙТЕРЯКОВЛЭН ВОРДСКЕМЕЗ ДЫРЫСЕН - 75 АР Тодам ваисько агайме Арлэсь кема ӧвӧл ни дуно агае, Николай Семенович Байтеряков, ми пӧлын. Гудырес аръёс пыр ортчыса, кыдаса, сюлэмыз измыны ӧз сётскы - сыӵе ик кылиз, ненег сюлэмо кылбурчи... Таӵе ик со син азям, ӵош будэммы, ваче пукыса кенешылэммы... Ми анаймылэсь кылим пичиысен, со секыт висеменыз вазь кулӥз. Атаймы мукет кышно ваиз, ми будӥм ини сюранай вӧзын. Будӥм секытэн, сиён но дӥськут йӧназ ӧй вал. Атаймы колхозэ пырем дырысен фронтэ кошкытозяз конюхын ужаз, дорез но, милемыз но учкыны дырыз ӧй вал. Колхозын трудодень понна кӧня ке грамм нянь (ю тысь) сётылӥзы, со сиыны но уг тырмы вал, нош 1936 арын, сютэм аре, куазь кӧс улэмен, ю-нянь ӧз удалты, кидысэз но ӧз берыктӥськы, пудомес вандылоно луим. 7 классэз быдтыса, агае пыриз вал Можга педучилищее, но пумозяз дышетскемез ӧз луы, тазалыкез лябӟиз, берытскиз колхозэ, ужаз валэн. Собере ыстӥзы Воткинск районысь Болгуры карьере кӧльы поттонэ, ужаз на Алнаш-Голюшурма сюрес лэсьтонын. Собере - армия, фронт. Немецкой фашистъёсын ожмаськон. Со вал миномётчик, знаменосец, танкист. Война бере Николай дышетскыны пыриз Ярославльысь военно-политической училищее. Отысь бертэмез бере ужаз Ӟатчалан партийной организацилэн секретарез луыса. Алнаш но Пичи Пурга райкомъёслэн секретарьзы но вал. Берло аръёссэ тыршиз Можга райгазетлэн редакцияз. Куинетӥ классын дышетскыкуз, "Дась лу!" газетын потӥз Николай Байтеряковлэн нырысь веросэз. Отын верамын вал 29-тӥ Азинской дивизия сярысь, кудӥз ожмаськиз тӧдьыослы пумит. Та ожъёсы пыриськиз милям атаймы но. Собере но агае гожъялляз "Дась лу!" газетэ. Нош берлогес эшъяськиз "Удмурт коммунаен". Варзи-Ятчи школаын ужа вал литературной кружок, отын агаелэсь заметкаоссэ, кылбуръёссэ лыдӟо, кылзо, дунъет, визь-кенеш сёто вал. Со кружокен кивалтӥз школаысь удмурт кылъя но литературая дышетӥсь Елизавета Игнатьевна Ефимова, та кышномуртлы 1938 арын Ленин орден сётэмын вал. Тодӥсько на: туж сӥё-дано ортчиз со ӝыт, люкаськизы школаысь дышетӥсьёс, пиналъёс, гурт калык, Алнашысь но республикаысь кивалтӥсьёс. Агае но весь ӟеч кылын вералоз вал Елизавета Игнатьевна сярысь, трос валэктӥз, дышетӥз, литератураез яратон мылкыд пыӵатӥз, шуылӥз. Армиын дыръяз со монэ курылӥз удмурт газетъёс лэзьяны, мон трос пол ыстылӥ "Удмурт коммуна" газетэз. Кылбуръёсызъя но валаськом: Николай Байтеряков туж яратэ вал инкуазез, чорыганы ӵем ветлӥз. Мурнюкын вал шаплы ошмес, али, учкись ӧвӧлэн, вуэз азьло кадь уг поты ни. Весь ветлоз вал со ошмес дуре, пуксе, кема пуке малпаськыса, нош отысь малы ке но ӝож тусъем кошке. Со ошмес дурын эшъёсыныз Федор Сапожниковен, Михаил Абрамовен но мукетъёсыныз пуктылӥзы спектакль. Соос шудо - ми адӟисьёс. Конечно, сцена ӧй вал, возьмато возь вылын. Катанчи интые тыро писпу вайёсыз. Берлогес спектакль возьматъяны кутскизы клубын. Со ошмесэз малпаса ик Николай Байтеряков кылдытӥз кылбурзэ, кудӥз ке луиз кырӟан: "Вай ошмесэ, я вай юо мон тынэсьтыд юзмыт вудэ..." "Топольёс" кылбурзэ озьы ик улонысь басьтыса гожтӥз. Выль урамын, кудӥз вӧзтӥ кошке Варӟи шур, будо топольёс. Азьло со урамын вож-вож гуждор луэ вал, машинаос ӧз пырылэ, пиналъёс отчы шудыны ветлӥзы. Одӥг кылбурез нимаське "Анныкей". Со кышномурт милям бӧлякмы вал, туж лякыт, вераськись. Милемын, пичиосын, будэм берамы но кузямы ветлылӥз. Зэм, агаелэн вань кылбуръёсыз, веросъёсыз, очеркъёсыз улонэз зэмлыко возьмато. Тросэз гожтэмъёсыз ӝожмытэсь. Матысьёсызлэсь адӟонзэс но калыклэсь улэм-вылэмзэ, курадӟемзэ сюлэм пыртӥз поттылӥз агае. Со тодаз вайылоз вал Суриков поэтлэсь гожтэмзэ: "Кому на свете как дышится, живется, такова и песня у него поется". 1932 арын, анаймы вань дыръя ай, Ӟатчала ветлӥз Москваысь кун университетысь учёной-этнограф Агнесса Ивановна Пинт, удмурт калыклэсь улэм-вылэмзэ эскерыны. Улӥз ми дорын. Соку со милесьтым семьямес фотое уськытӥз. Но со туспуктэмез ӧм шедьтэ ни. Москваын литературной институтын дышетскыкуз, агае Пинтлэсь адрессэ шедьтэ. Та мӧйы кышномурт сомында ар утем фотомес. Выльысь пуктыса, агае мыным но сое ваиз, анаймылэн мукет туспуктэмез ӧй вал. Уг вунэтӥськы ай, кызьы Варзи-Ятчи черклэсь колокольнязэ но куползэ кесязы. Агае сельсоветэ мынӥз но шуиз: черкез ворсаськоды ке ворсалэ, но малы вашкалаослэсь сыӵе чебер кибервылзэс кесятӥськоды. Мед со улоз, архитектура памятник выллем, Николай Семеновичлы шуизы: тынад ужед ӧвӧл. Агаелэн вань на ас киыныз гожъяса кельтэм кылбуръёсыз. Тросэз удмурт кылын, но пӧлаз ӟуч сямен гожъямез шедьылэ. Мон сямен, со кылбуръёс огез но печатьын поттэмын ӧвӧл. Яра вылэм, кин ке басьтӥськысал ке, со рукописьёссэ люкаса, кытын ке но печатланы. Мон со кылбуръёссэ лыдӟи, туж кельшиз. НИКИТА СЕМЕНОВИЧ БАЙТЕРЯКОВ. Алнаш ёросысь Варзи-Ятчи гурт. 1987 ар. Удмуртиысь писательёс Тула городын. Паллянысен ньылетӥез - Николай Байтеряков. М. ЕГОРОВЛЭН туспуктэмез. Дышетӥсьёслэн дышетӥсьсылы - 60 Та лыдпусэз адӟыса, дышетон удысын ужасьёс тросэз малпалозы, дыр, Рудольф Фёдорович Березинэз. Угось солэн дышетэм пиналъёсыз-студентъёсыз республикаямы сюрсъёсын лыдъясько ини. Школаысен кутскыса, Дышетӥсьёслэсь тодон-валанзэс будэтонъя институтозь - тӥни сыӵе Р. Ф. Березинлэн дышетон удысын лёгем сюресэз. Вордӥськиз со Вавож ёросысь Зязлуд-Какся гуртын. 1953 арын дышетскыны пыре Ижевскысь педучилищее. Ар ортчыса, училищеез пытсало, соин студентъёс выжоно луо Можгаысь педучилищее. Ижысь пединститутлэн историко-филологической факультетаз дышетскыса, Рудольф Федорович та педучилищеын ик 1952 арысен ужа, ӟуч но удмурт кылъёсъя, литературая урокъёсты нуэ. 1966 арын Р. Березинэз училищеын соку гинэ усьтӥськем удмурт отделениен кивалтыны куро. Тани ма со сярысь вера ачиз: - Нырысь ик, мынам мылкыды вал удмурт группаосысь егитъёслэсь улонзэс аспӧртэмгес, шулдыргес карыны, соин ӵош ик удмурт кыллы но литературалы дышетонэз вылэгес ӝутыны, культурамылэсь бадӟымесь луонлыкъёссэ кутыны. Педучилищеын драмкружок кылдытӥм. Дасямы "Улэм потэ" пьесая спектакль, асьмеос пуктӥм "Италмас" поэмаез-легендаез. Училищелэн грузовой машинаез вал. Соин ветлӥмы котырысь гуртъёстӥ, спектакльёсмес возьматыса. - Асьтэос но шудӥды-а? - "Улэм потэ" спектаклямы шудӥ комсомоллэн секретарезлэсь рользэ. Мон тыршисько вал рольлы тупамон адямиосты шедьтыны. Нырысь ик сюлмаськи, егитъёс дӥсьтӥсьгес мед луозы, асьсэзыз сцена вылын возьыны мед быгатозы шуыса. Р. Ф. Березинлэсь быгатонлыкъёссэ адӟыса, Калыкез дышетонъя министерство куре сое Дышетӥсьёслэсь тодон-валанзэс будэтонъя институтэ лыктыны. 1967 арлэн пумаз со директорлэн дышетон удысъя воштӥсез луэ, нош 1976 арысен туннэ нуналозь - 22 ар - та институтлэн директорез. Та дыр куспын кӧня уж лэсьтэмын, кӧня книгаос поттэмын. Нош кутскиз вал со ваньмыз тазьы: - Татчы выжеме бере, туж трос ужпумъёсын пумиськоно луи. Удмурт кылэз но литератураез дышетон понна, асьмелэн ӧй вал учебникъёсмы, пособиосмы, диктантъёсын но изложениосын сборникъёсмы, грамматикая таблицаосмы. Ваньзэ тае лыдэ басьтыса, Удмуртиысь калыкез дышетонъя министрен М. В. Горбушинэн ми рос-прос кутским та уж борды. Нырысь ик, мон комплексной план лэсьтӥ. Отын чакламын вал котькуд класслы нимаз учебникъёс, приложениос, пособиос поттыны. Шуг-секытъёс трос гинэ сюрылӥзы. Вить ар куспын 30-40 изданиос поттоно вал. Котькудӥзлы тупась автор утчано. Авторъёс тырмымтэен, ачим но басьтӥськоно кариськи та уж борды. Нырысетӥез книгае дышетӥсьёслы пособие вал - "4-тӥ-6-тӥ классъёслы удмурт кылъя творческой но орфографической ужъёс". Собере В. Г. Широбоковен ӵош, одӥг толэзь куспын, шуыны луоз, дасям 3-тӥ класслы лыдӟон книга, собере ик - "3-тӥ классын лыдӟон урокъёс" пособие. Г. А. Ушаковен ӵош лэсьтӥм 10-тӥ но 11-тӥ классъёслы удмурт литературая хрестоматиос. Кӧняез ке материалъёссы потылӥзы центральной изданиосын, кылсярысь, "Народное образование" журналын. Педучилищеос понна дасяй удмурт кылэз дышетонъя программаос. (Та авторлэн ваньмыз ужъёсыз кызьлэсь ятыр лыдъясько, уноез трос переизданиосты чидазы ини). Ваньмыз, мар гожтэмын - со шутэтскон нуналъёсы, уж бере, ӝытъёсы, отпускъёсы. Мон одӥг пол но творческой отпуск ӧй басьтылы. Угось, директорын ужан - творческой уж гинэ ӧвӧл, татын ремонт но, организационной люкетэз но. - Рудольф Фёдорович, нош малы одно дышетӥсьлэсь ужзэ быръёно кариськиды? - Нырысь ик, та мылкыдэз мыным пыӵатӥз нырысетӥ дышетӥсе Анна Андреевна Чайникова. Али со улэп на, улэ Зязлуд-Какся гуртамы. Собере ми пичиысен, школае мынэмлэсь азьло ик, дышетскыса шудылӥмы. Дышетӥсь азьло гуртъёсын гажано адямиен лыдъяськылӥз, со шоры вожъяськыса, мукет синмын учкылӥзы. Мынам со ваньмыз син шорам йӧтӥз. - Тодӥськоды на-а нырысетӥ урок сётэмдэс? - Нырысетӥ урокме мон сётӥ Можга педучилищеын математикая. Нырысетӥ вить минутъёссэ кызьы ортчытэмме ик уг тодӥськы. Со уроке понна мыным "4" пуктӥзы вал. Бератаз толэзь ӵоже практикаме ортчытӥ Вавож ёросысь Гурезь-Пудга школаын. Татын ужме "5"-лы дунъязы. Предметъёс пӧлысь мыным тужгес но ярало вал математика но ӟуч кыл. - Рудольф Фёдорович, 60 ар улытозяды мае ӧд вуэ на кадь лэсьтыса, мар сюлэмшугъяськытэ тӥледыз туннэ? - Институтмы выль юртэ потэм бере, мынам йырам туж трос малпанъёс бергазы. Мылкыд вал, лекциослэсь пуштроссэс золгес карон понна, татчы телецентр кылдытыны, котькуд аудиторие телеустановкаос пуктыны. Огкылын вераса, туала техникалэсь луонлыкъёссэ рос-прос уже кутыны. Но малпанэ ӧз быдэсмы, мугез одӥг - уксё ӧвӧл. Кыкетӥез малпанэ быдэсмиз, шуыны луоз, дыр. Туннэ нуналлы институтын ӟеч коллектив тырше, ужасьёсмы школаысь дышетӥсьёслы быгато квалифицированной юрттэт сётыны. Соиз шумпотымон. Ваньмыз ужасьёсмы институтын сюлэсь ятыр. Соос пӧлысь укмысэз профессоръёс, тодосчиосмылэн лыдзыя ми Россиын азьпалан мынӥськом. Мукет дас институтъёсын ӵош милемлы луонлык кылдытӥзы, профессор, доцент ним сётыны дэмласа, вылӥ аттестационной комиссие вазиськыны. 92 таӵе институтъёс пӧлысь куатяз гинэ али аспирантураоссы вань. Соос пӧлы ми но пыриськом. - Рудольф Фёдорович, кызьы малпаськоды, маин висъяське туала дышетӥсь, азьло аръёсы ужамъёсыныз ӵошатыса? - Азьло дышетӥсьёс данъясько вал профессиенызы. Сюлэмзэс сётыса ужазы. Берло дыре школалэн, дышетӥсьлэн данэз сокем ӧвӧл ни. Татын пӧртэм мугъёсыз, дышетӥсь гинэ янгыш ӧвӧл. Сое сыӵе каре экономика удысын кылдэм югдурмы но. Вань удысчиос пӧлысь дышетӥсь тужгес ичи коньдон басьтэ. Институтэз йылпумъям специалистлы самой бадӟымзэ 11-тӥ разрядъя уждун тырыны луэ - 150-200 манет. Тӥни озьы дунтэматӥськом дышетӥсез. Озьы ке но, республикаямы пинал калык дышетскыны турттэ, конкурсъёс арысь аре йыло. - Ар куспын кӧня дышетӥсьёс ортчо тӥляд институтты пыр? - Ог 6000-эз курсъёсын гинэ дышетско. 4000 мындаез ми доры пӧртэм юрттэт курыса пыро. Берло дыре милям луонлыкъёсмы уката паськытазы на, малы ке шуоно, усьтӥськизы кыкетӥ профессия сётонъя курсъёс, отын дасяськом логопедъёсты, психологъёсты, экономистъёсты, иностранной кылъёсъя дышетӥсьёсты. - Кыӵеен адӟиськоды ЪЪИ даурысь школаез? - Али шуг вераны. Туж потэ вылэм, президентлэн нырысетӥ указэз мед быдэсъяськоз шуыса. Та указъя бюджетысь 10 процентэз коньдон дышетон удысэ кошкыны кулэ. Туннэ нуналлы та лыдпус 3 процентлэсь ӧжыт гинэ ятыр. Та удысын асьме кадь куанер странаос, Африкаез лыдъятэк, ӧвӧл ни, дыр. - "Ачид ке умой, адямиос но умоесь", - шуо калыкын. Ӵош ужась эшъёсыз но Рудольф Фёдоровичез ӟечен гинэ верало. Галина Григорьевна Масленникова, директорлэн дышетон удысъя кивоштӥсез, шуиз: - Ми укмысэтӥ арзэ ӵош ужаськом ини. Рудольф Фёдорович трос сюлмаське специалистъёсты будэтон сярысь. Адӟыны быгатэ егитъёслэсь ӝужамтэ быгатонлыкъёссэс, тырше соосты усьтыны, пушйытыны. Со уно лэсьтэ гуртысь школаос понна. Тыршеменыз институтамы усьтэмын национальной малокомплектной школаос понна кабинет. Та адямилэн паймоно кадь йырсазез. Со тодаз возе вань дышетэм пиналъёссэ. Кулэ ке, вераны быгатоз соизлэсь яке таизлэсь анай-атайзэ, кыӵе гуртысь луэмзэ, кыӵе дышетскемзэ, кытчы лэземын вал училище бере, кӧня отын ужаз но кызьы солэн улон сюресэз кошкиз. Тӥни сыӵе бадӟым сюлэмо адями со, Рудольф Фёдорович Березин. Солэн тыршемез пусъемын "За трудовую доблесть" медален, "Отличник просвещения СССР", "Отличник народного образования" значокъёсын, уно гинэ данъян грамотаосыз. 1991-тӥ арын солы сётэмын доцент ним. Умой дышетӥсь, кивалтӥсь сяна, Рудольф Фёдорович ӟеч кузпал. Кышноез солэн Антонина Спиридоновна, Калыкез дышетонъя министерствоын национальной школаосъя валтӥсь специалист. Солэсь юано кариськи, кытысен соос ог-огзэс пумитазы, кыӵе вал Рудольф Фёдорович пинал дыръяз? - Ми 1962-тӥ арысен ӵош улӥськом. Пединститутын но огазьын вал. Мугорыз ӝужыт, векчи вал, гимнастикаен вырыны яратылӥз. Котьку ӟеч дышетскиз. Милям одӥг нылмы вань, кык внукъёсмы. Семья куспамы ваньмыз умой. Яратэ ик Рудольф Фёдорович внукъёссэ. Данъяськыса возьматӥз мыным Дималэсь но Никиталэсь туспуктэмъёссэс. Мар бен, вордскем нуналады гинэ ӧвӧл, вань улытозяды котырады ӟеч адямиос мед луозы, Рудольф Фёдорович! ЛАРИСА ПОСТНИКОВА. ШӦКЫЧ Ышемзэ эн утча ни Бен, вал улонамы умоесь дыръёс но. Шуисько, городысь транспортэн дунтэк ветлон сярысь. Азьло уго копейкатэк но трамвае яке автобусэ пуксьыны луэ вал. Табере тани нош ик кондукторъёс потӥзы. Ну бен лекесь ке лекесь ук! Синъёсынызы пыртӥ ик потыны дасесь. Алигес нырысетӥ номеро троллейбусын мынӥсько вал. Ӵапак кондукторъёслэн правооссы сярысь гожтэм таблица син шорам йӧтӥз. Отын таӵе чуръёсыз но вань: "Салонэ вунэтыса кельтэм арбериез кондуктор сётыны кулэ диспетчерлы". Маке осконтэм кадь потӥз таӵе ялон. Ӵапак ведь тупаны но кулэ: троллейбусэ кин ке горд зонтиксэ кельтэм. Мар бен, сое мон кондукторлы берыктӥ. Гадь вылаз жетон номераез 0684 вал. Малпасько, берыктоз меда кузёезлы? Жингыртӥсько диспетчерлы. - Шедиз-а ни зонтлэн кузёез? - Кыӵе зонт? Номыре уг тодӥськы. - Ма, мон сое 0684 номерен куондукторлы сётӥ вал... Телефонэз шлач! Гинэ сэрпалтӥзы. Табере троллейбусъя управление жингыртӥсько. Воксё абдразы кадь отысь апайёс. Номерезъя бен кондукторлэсь нимзэ-тулзэ тодӥ ик - Р. Д. Валеева вылэм. Нош берыктӥз меда со зонтэз кузёезлы - уг тодӥськы? Ма, соиз ини мынам уже ӧвӧл. З. БИЛЕТОВА. ГАЗЕТЛЫ - 80 АР Оскем ужез быдэстон 1975 арын тулыс вал со. Удмурт универститетысь (азьлогес - пединститутысь) филология факультетын кема аръёс ӵоже Д. А. Яшинлэн кивалтэмез улсын ужась литературно-творческой кружоке ветлӥсь эшъёсы дэмлазы новелламе "Советской Удмуртия" газетэ ӵектыны. Дӥсьтыса но дӥсьтытэк туби Пастухов урамысь 13 номеро юртлэн куинетӥ этажаз (соку редакция отын интыяськемын вал). Литературая но культурая отделлэн соку кивалтӥсез Роман Григорьевич Валишин туж лякыт пумитаз. Уката ик паймытӥзы писательлэн синъёсыз: пальпотыса, со вакытэ ик ваньзэ тодыны тыршыса, пыртӥ сӥсъяса кадь учко. Кема ик дыр ӧз ортчы - новелламе газет бамысь адӟи. Макем шумпотӥ но бурдъяськи соку! Гожъяськон мылкыды уката пачылаз. Газетэн но матэгес луэме потӥз. Озьы вуоно араз гужем каникулъёсы дыръя редакциын ужаны мылкыд кареме сярысь юанэн вазиськи валтӥсь редакторлы В. М. Михайловлы. (4 инвожое потэм списокын мон 1986 арын стажёр вал шуыса шонертэм пусъемын. Лыдӟыны кулэ: 1976 арын стажёр, нош 1986 арысен - улонме пыраклы герӟай журналистикаен). - Мар бен, гужем вакытэ милям тросэз ужасьёсмы отпуске потыло. Соин ик удыс шедьтом. Тани али информация отделамы Николай Байтеряков огназ кылемын. Солы юрттӥсь кулэ, - шуыса Василий Михайлович приёмнойын пукись секретарьзэ ӧтиз. Клавдия Григорьевна Малых ( озьы нимало вылэм та чебер нылкышноез) ивортӥз: редактор, пе, тонэ стажировкае басьтэ но толэзяз 100 манет уждун тупатэ. Студент понна со туж бадӟым коньдон вал, соин ик мон асме шудолэсь но шудо кожай ни. Со вакытэ корреспондентэ нылкышноосты кутэмзы уггес поты вал, угось семьязы, нылпиоссы ванен соос командировкаосы потаны, пе, уг быгато. Воргоронъёс пӧлын мон юн борддор выллем сылӥсь лысо нюлэскы йыромем чиндыр-вандыр будӥсь палэзьулы укшай, дыр. Соин но, оло, кивалтӥсе Николай Никитич Байтеряков мукет отделъёсын ужась пиосмуртъёслы маскаръясьскыса ялӥз: - Милям кабинетамы тамак пурккетыны но, былама кылъёсын вераськыны но уг яра. Кин та куронэз ӧз быдэсъя, со 10 копейка штраф тыроз. Серекъяны яратӥсь, капчи мылкыдо, лэчыт кыло но визьмо пиосмуртъёсын артэ ужаны кылдӥз шуыса куддыръя ӧй но оскылы кадь. Серекъям-маскаръяськем сяна, ужаны но туж проворесь вылэм удмурт газетчиос. ... Гужем каникулъёс туж ӝог ортчизы. Нош сӥзьыл милемды, УдГУ-ын журналистикая специализациез ортчисьёсты, выльысь редакциме практикае ыстӥзы. Таяз учыре но информация отделэ сюри. Табере ми куинь кузя луимы: отделэн кивалтӥсь А. П. Шкляев, корреспондент Н. Н. Байтеряков но мон. Алексей Петрович уката но шӧртчи газетчи вылэм. Ачиз но вал кадь "гыре", мукетъёслы но тэк улыны маза уг сёты. Огпол мыным шуиз: - Туннэ ӝыт "Ижсталь" хоккеен шудэ. Ветлы - ӵуказе номере ивор сётоно. Вераны куэ: со вакытэ хоккей учкыны яратӥсьёс укыр лачак вылӥллям - кассаын билетъёс, пе, ӧвӧл ни. Нош Йӧ двореце одно ик пыроно - сотэк сётэм ужез уд быдэсты. Йырме вылэ урдӥ но йӧн-йӧн "Служебный вход" гожтэм пала вамыштӥ. Ярам, нокин удостоверениме ӧз юа, угось газетчи шуыса верась нокыӵе документэ мыным соку ӧй вал на. Йӧ доры матэ пуктэм пуконъёс пӧлысь огаз ланьырски, блокнотме поттӥ. Ачим мар со шайба но клюшка но рос-прос уг тодӥськы. Нодтэм луэмме вӧзысьтым воргорон синйылтӥз, лэся: мон, пе, тыныд юртто - гожъя гинэ... Ӝытбыт пуки та информация бордын. Ӵуказеяз ӵукна Алексей Петровичлэн ӝӧк вылаз кагазме понӥ. Со "пӧрамме" тодманы луонтэм тупатъяз но соку ик машинисткалы сётӥз. Ӵуказеяз газетын информацие Костенков фамилиен потӥз - аслам гожтэме шуыса ик ӧз оске, лэся, бадӟым эшъёсы. Со вакытэ угось Костенков эш мылысь-кыдысь юрттылӥз спортъя иворъёс бичаны. Соин ик таиз но солэн ужез кожазы, вылды. Котьмар ке но, кӧтме ӝож ӧй кары: тужгес кулэез - соскем ужез быдэстон. Улонысь котькудӥз учыр малы ке ик дышетэ. Газетын ужаме мыным зэмос школа луиз. Соку ик ӟеч валай: газетчилы пырыны луонтэм интые но сюрес шедьтоно, озьы ик та дырозь тодымтэзэ тодыны тыршыса, нуналмысь визь песьтэрдэ узырмытыны сюлмаськоно. "Советской Удмуртия" газетлэн редакцияз ужаса басьтэм тодон-валанъёсы туж юртто али ужам но, озьы ик огшоры улонын но. РИММА ЛАПТЕВА, "Инвожо" журналын ужась. ЛЫДӞИСЬ ВЕРА МАЛПАНЗЭ Ма возьма СНГ-ез? СНГ-ысь странаослэн кивалтӥсьёсцы шер уг пумиськыло кадь, нош вераськонъёслэн пайдазы зол уг шӧдӥськы. Ма возьма СНГ-ез азьланьын? Куд-ог политикъёс шуо, со берпум "кылзэ" ӧз вера на, нош мукетъёсыз шуо, содружество пумен быроз, пе. Али тросэз валало ини, Совето Союзэз Россия ачиз быдтӥз шуыса. Литва, Грузия, Узбекистан но мукет азьвыл республикаос со понна янгыш ӧвӧл. Россия уно дауръёс ӵоже мукет улосъёсты ас бордаз люказ, нош кӧня ке ар талэсь азьло ассэ эрико (независимой) государствоен ялӥз. Валамон ини, со Борис Ельцинлэн кивалтон понна нюръяськемысьтыз потӥз. Россия али но азьвыл СССР-е пырись республикаосын "пичи вынъёсыныз" кадь вераське, соин ик соос странамылэсь палэнскыны туртто. Выль кылдэм государствоос пумен матысь кусыпъёс США-ен, Япониен но мукет азьмынӥсь странаосын тупато, нош Россия арысь аре палэнэ кыле. Тани али Центральной Азиысь но Азербайджанысь му вӧез Европае келяны мукет странаос пыр гумыосты кыскыны ӧдъяло, нош учконо ке, Россиетӥ му вӧй "сюресэз" лэзьыны капчигес луысал. Озьы луиз ке, странамы трос ыштонъёс адӟоз. Люкиськем республикаослэн инкуазьзы но музъемзы туж узыр. Соин ик экономиказы но соос чотын азинске. Музъем узырлыкъёссэс кунгож сьӧры вузан пумысен азьвыл эшлыко республикаос огкылэ туж шуген вуо, тужгес ик Россия, Украина, Азербайджан, Казахстан но Узбекистан. Палурдэс азинскись экономика та странаослэн кивалтӥсьёссылы яра, угось пӧртэм ваньбур поттон уногес "йырез висьытэ". СНГ-е пырись странаослэн кивалтӥсьёссы эрико улонлэсь шӧмзэ "веръязы" ини, соин но соос огазеяськыса, валче ужанлы пумит луо. Нош улон возьматэ: ӵош ужан амалъёс (интеграция) гинэ странаослы азинскыны ӝоггес юртто, трос миллион калыклэсь улонзэ капчигес каро. И. ОБРАЗЦОВ, история наукаосъя кандидат, Можга педучилищеысь директорлэн воштӥсез. Музъем понна налоглэсь быдӟалазэ воштон сярысь Росция Федерацилэн Президентэзлэн Указэз Музъем понна налог басьтэмлэсь уногес коньдон поттон но музъемъёсты ӟечгес кутон вылысь пуктӥсько: 1. Юнматоно Россия Федерациысь Правительстволэсь музъемез уже кутымтэ яке кулэезъя кутымтэ понна музъем налогез кык поллы уногес басьтон но озьы ик музъем понна налоглэсь быдӟалазэ воштон сярысь ӵектонзэ но музъем понна налоглэсь быдӟалазэ: 2 пол будэтоно городысь (посёлокысь) музъем участокъёс понна, отын улон юртъёс, нимаз муртъёслэн яке кооперативной гаражъёс сыло ке; 4 пол будэтоно мукет категорие пырись музъемъёс понна. 2. Россия Федерацилэн Правительствоезлы, музъем понна налоглэсь быдӟалазэ туэ 1 сентябрьысен воштон вылысь, кулэ ужрадъёс кутоно юнматэм радлыкъя. 3. Указ кужыме пыре сое печатлам нуналысен. Россия Федерацилэн Президентэз Б. Ельцин. Москва, Кремль, 1998 арын 18 июле. � 854. Нырысетӥосыз уг вуно Котькуд ар улонамы маке вунонтэмзэ, пусйымонзэ вае. Сыӵе вал 1997-тӥ ар Алнаш ёросысь Вуж Утчан шор ёзо школа понна. Архивысь документъёс верамъя, 1897-тӥ арын Елабуга уездысь Вуж Утчан гуртын усьтэмын вал кык классъем начальной школа. Озьыен, 1997-тӥ арын Утчан школамылы тырмиз сю ар. Быдэс даур ортчиз ни солэн кылдэмез дырысен. Та дыр ӵоже воштӥськиз гуртмылэн тусыз, воштӥськизы адямиос но. Нош уг вуно нырысетӥ дышетӥсьёслэн дуно нимъёссы. Соос номырин согонтэм пытьы кельтӥзы дышетэм нылпиоссылэн сюлэмъёсазы. Сыӵе адямиос пӧлы нырысь ик пыртыны кулэ кузпалъёслэсь Ивановъёслэсь нимъёссэс. Николай Иванович Иванов - РСФСР-ысь сӥё-дано дышетӥсь, Анна Илларионовна Иванова - УАССР-ысь сӥё- дано дышетӥсь. Трос аръёс ӵоже ужазы соос Вуж Утчан школаын. Ивановъёслэн дышетэм нылпиоссы али но туж шуныт кылъёсын тодазы ваё асьсэлэсь сӥё-дано дышетӥсьёссэс. Анай-атайзылэн лёгем сюрестӥзы вамыштӥзы нылпиоссы но - сузэръёс Ивановаос: Ольга Николаевна, Раиса Николаевна но Тамара Николаевна трос аръёс ӵоже (куамын арлэсь ятыр) тыршизы Вуж Утчан школаын, анай-атайзылэсь визьнодамзэс тодазы весь возьыса. Табере асьсэлэн удысъёсазы тыршо ини Ивановъёслэн нылпиоссылэн нылпиоссы но. Соос но азинто ӵужанайзылэсь но ӵужатайзылэсь кутскем ужзэс. Ольга Николаевналэн нылыз дышетӥсь луыса тырше Алнаш ёросысь Техникум школаын, Раиса Николаевналэн нылъёсыз ужало Ижевскысь 14 номеро гуманитарной лицейын но Вуж Утчан школаын. Озьыен, Ивановъёслэн мытэм удыссы азинске. 1936-тӥ арын начальной школа пӧрмытэмын вал сизьым классъем школалы. Сое усьтыкузы, школаын дышетске вал 175 пинал. Соос пӧлын - удмуртъёс но, ӟучъёс но, поръёс но. Школалэн нырысетӥ директорез вылэм Николай Александрович Попов. Бӧрысь 1963-тӥ арын, сизьым классъем школа пӧрмытэмын шор ёзо школалы. Ас вакытаз 400-лэсь ятыр пиналъёс дышетско вал школаямы. Ветлӥзы пӧртэм гуртъёсысь: Ильинскысь, Колтымакысь, Дроздовкаысь, Богородскысь, Выль но Вуж Утчанысь, Карйылысь, Серпысь но мукет гуртъёсысь. Улон воштӥськемъя, тросэз гуртъёс быризы. Школаысь нылпиослэн но лыдзы кулэсмиз. 1978-тӥ арын, Выль Утчан гуртэ школа пуктэмзы бере, Вуж Утчан школа тямыс классъем школалы пӧрмиз. Юртэз вужмиз, ыштӥз азьвыл чеберлыксэ. Нош туннэ пиналъёс дышетско выль кык этажъем школаын. Со сылэ гуртмылэн шораз, мукет юртъёс пӧлын тӧдьы юсь сямен висъяськыса. Нош пушказ пырид ке, выжыкылэ вуид, кожалод: борддоръёс пӧртэм буёлъёсын чебермамын, кабинетъёс бадӟымесь, югытэсь. Тросэз та воштӥськонъёс ортчизы, директормылэн Удмурт Элькунысь сӥё-дано дышетӥсьлэн Евгения Анатольевна Кардапольцевалэн тыршеменыз валче. Нылпиос, дышетӥсьёс, анай-атайёс али но тодо на, макем шулдыр но вунэтонтэм вал 1991-тӥ ар 29-тӥ ноябрь: соку выль школамы нырысьсэ усьтӥз аслэсьтыз ӧсъёссэ. Солэсь быдэс даур ӵоже ортчем кузь но дано сюрессэ верано ке, пусйытэк кельтыны уг луы та школаын ужам йӧно но трос тодон-валанэн дышетӥсьёсты. Соос вань улонзэс сётӥзы асьсэлэн ужзылы. Сыӵеесь - Н. А. Судаков, Н. А. Трепалина, М. А. Но М. Я. Анисимовъёс, С. А. Алексеев. В. П. Красильникова, М. Т. Ксенофонтова, В. И. Трепалина, В. П. Борисов но мукетъёсыз. Али но ми дорын ужало синмаськымон дышетӥсьёс В. Н. Королев, В. И. Конникова, М. П. Постникова. Соос асьсэос но Вуж Утчан школаын дышетскизы. Табере ини куамын арлэсь ятыр котькуд ӵукна дырто яратоно удысазы. Вылӥ верам дышетӥсьёслэн будэтэм, дышетэм нылпиоссы пӧлысь но тросэз синмаськымон, данъяськымон адямиос луизы. Вань артистъёс но, врачъёс но, дышетӥсьёс но, инженеръёс но, кылбурчиос но, нянь будэтӥсьёс но, пудо утисьёс но. Ваньзэ вераса но уд быдты. Соос: А. В. Борисова - Удмурт АССР-ысь сӥё-дано врач, В. Н. Иванов - Удмурт АССР-ысь сӥё-дано врач, В. П. Байков - Удмурт АССР-ысь калык артист, Ю. И. Медведев - Удмурт Элькунысь печатья но иворъёсъя министр, И. П. Бобров - тодмо удмурт кылбурчи, Г. Н. Красильникова - Ленин комсомоллэн пермиезлэн лауреатэз но трос мукетъёсыз. Т. Н. БУСЫГИНА, Вуж Утчан школаысь дышетӥсь. КИВАЛТӤСЬЁС КАЛЫК ПӦЛЫН Калыкетӥ ветлод... Песьтэрдэ тырмытод? Республикамес секыт югдурысь поттыны пумен шуггес но шуггес луэ. Ужатэк сылӥсь предприятиосысь налогъёс бюджетэ туж ӧжыт люкасько. Соин сэрен, Удмуртия Москвае но кулэезъя коньдон келяны уг ни быгаты. Озьыен, азьланяз кышкытлык кылдэ, Москва республикамылы дотациос но трансфертъёс келямысь дугдоз шуыса. Секыт югдурысь потонъя сюресъёс утчан вылысь, та нуналъёсы Правительствомылэн Тӧроез П. Вершинин вуылӥз районъёсы. 6 августэ Павел Вершинин Сарапулын вал. Пыр-поч эскериз жилищно-коммунальной хозяйствое пырись предприятиослэсь ужамзэс. "Благоустройство", "Электрические сети", "Водоканал", "Теплосети" предприятиослэн кивалтӥсьёссы, лыдпусъёс вылэ чӧлскыса, ас югдурзэс возьматыны тыршизы. Уждунъя ӝеганъёссы вань ке но, солэн шоро-куспо быдӟалаез одӥг сюрс манет пала возиське, нош "Электрические сети" но "Теплосети" предприятиосын солэсь но вылӥын. ЖКХ-ын коньдонээз шыръян амалъёс шедьтыны луэ на, шуиз П. Вершинин. Та предприятилэн кивалтӥсьёссылы со пумысен умой-умой малпаськыны премьер куинь нунал дыр сётӥз на. "Водоканаллэн" кивалтӥсезлы меӵак шуиз: квартираосы мынӥсь вулэсь дунзэ 1 манет 90 копейкаозь вуттоно. Али татын 2 манет 40 копейка тупатэмын. Вераны кулэ, вань районъёсын сямен тыре. Ижын, кылсярысь, 1 манет 22 копейка тупатэмын. ЖКХ-ын ужасьёслэсь лыдзэс но, оло, кулэстоно луоз, малы ке шуоно али городын улӥсьлы быдэ 40 коммунальщик усе. Кызьы со луэ мукет городъёсын, лыдъямын ӧвӧл на. ЖКХ-лэсь та выллем но мукет ужпумъёссэ депутатъёс сэрттыны малпало сентябре ортчоно сессиязы. Уждунъя люкаськем пунэм тыронъёслы коньдон уз луы, шуиз П. Вершинин. Но учконо, кызьы сое адямиослы берыктыны луоз вузъёсын яке сиён- юонъёсын. Со дыре ик предприятиослэн но организациослэн кивалтӥсьёссы 15 августозь уждун но налогъёс тыронъя чурытэсь графикъёс тупатыны кулэ. Правительстволэн Тӧроез та нуналэ ик вуылӥз акциосын "Лесокомбинат" огазеяськонэ. Али со ӝутскыны выре, американецъёсын валче ужась предприятие кылдытыса. Но ужасьёс кылем ар понна но уждунзэс адӟылымтэ на. Бен, Правительстволэн Тӧроезлы татысь кивалтӥсьёс веразы ик сентябрь толэзьысен уждун тырыны быгатозы шуыса, но солы оскод шат. Америкаысь кузёос визьтэмесь ӧвӧл ук. Соос уждунлы уксё висъялозы, пе, отчы 50 процентэз нюлэс ваньбур вуэм бере гинэ. Мукетыз предприятие, кытчы вуылӥз П. Вершинин, - машзавод. Татын арняяз куинь нунал гинэ ужало. Премьер заводлэн шутэтскон нуналаз кемдӥз. Но куд-ог ужасьёс ас интыосазы вал ик. Соос верамъя, туэ уждун кык пол сётъяллям, директор Н. Макаров верамъя - укмыс пол. Но кызьы валамон луиз, укмыс пол сётъяллям уждунлы чекъёс гинэ. Машзаводлэн ужаны луонлыкъёсыз вань. Со сярысь вера таӵе лыдпус но: ваньбур поттон 123,6 процентлы йылэм. Городлэн бюджетаз коньдон дыраз тыро. Вераны кулэ, быдэс Россиын та заводын гинэ му вӧй поттӥсьёслы долото лэсьто. Но вузаны уг быгато, долотолэн дуныз (20 сюрс манет пала) кышкатэ. Тӥни озьы вузамтэ вузэн валче выж вылын уждун но "кылле". Сарапулын пумиськылонъёс дыръя Правительстволэн Тӧроез таӵе малпанзэ вераз: бюджет бордын депутатъёс интые профессионалъёс ужаны кулэ, соку коньдонэн сыӵе секыт югдур уз луылы. Со шонер, дыр. Угось бюджет дасяку, котькуд депутат шобретэз ас палаз гинэ кыскыны турттэ. Озьы куд-ог удысъёс воксё палэнэ кылё, нош мукетъёсыз валантэм азинскыны кутско. Вуоно арлы дасям бюджетын инмысь басьтэм лыдпусъёс ӧжытгес мед луозы вылэм. Т. БАННИКОВА. Гожтӥськон-99 Ми бырйиськом "Удмурт дуннеез" Гажано эшъёс, гожтӥськиды ни-а "Удмурт дунне" газетлы? Луонлыкты вань ке, та ужен эн ӝегалэ, дунъёс воштӥськыны быгатозы. Гуртын улӥсьёслэн секыт югдуре шедемзэс валаса, Федерациын почта кусыпъёсъя Удмурт Республикаысь управлениез но "Удмурт дунне" газетлэн редакциез август толэзьлы но гожтӥськон дунъёсты азьвыл мында ик кельтыны чаклазы. Одӥг номерез почта пыр нуон ваён али 26 копейка ке, азьланьын со 31 копейкаозь будоз. Озьыен, малпаське, бускельёстылы, тодмоостылы но ивортэ. Вуоно арлы удмурт газетлы гожтӥськытэк эн кыле. Кин тодэ, оло, Пичи Пургаёросысь Иван Демаковлы сямен тӥледлы но "Удмурт дунне" шуд ваёз. Ошпиен ке ӧвӧл, мукет дуно кузьымен. "Удмурт дунне" газетлы гожтӥськемъёсты туэ но возьма лотереяен шудон. Газетлы ас юрттэтсэ дэмла (юрттыны кариськиз) мотоциклет поттӥсь "Ижмаш-Мото" завод. Мукет ласянь, газет но аслэсьтыз куд-ог материалъёссэ сӥзёз та коллективын ужасьёслы, возьматоз соослэсь сюлмаськонъёссэс, конструкторъёслэсь утчанъёссэс-шедьтонъёссэс. "Удмурт дуннеез" басьтыны мылкыд карисьёслы "Ижмаш-Мото" завод дэмла Удмуртилэсь данъяськонзэ - кужмо, чебер, ӝог ворттӥсь корт вал - мотоцикл! Кин тоэ, оло, та ӟеч кичӧлтон вӧзы итӥськыны мылкыд карозы эшшо мукет предприятиос, организациос, нимаз ужбергатӥсьёс. Эшлыко кусыпъёс тупатыны редакция котьку дась. Озьыен, троссэгес лыдӟисьёсмес но шумпоттыны быгатом. Л. МАЛЫХ. ЮРТТЭ КЫРӞАН НО Ортчиз эшшо одӥгез дышетскон ар. Вакчи улонам со кызетӥез. Вань адӟемъёсы сярысь малпаса, тазьы шуэме потэ: шуг-секытъёс монэ кыдатӥзы. Мон, историяя дышетӥсь, мургес валаны кутски дышетоно предметме, золгес яратыны кутски нылпиосты, аслым гинэ тупась улон ӧретӥ вамыштӥсько. Ужасько пичи гинэ школаын: класслы быдэ сизьым- дас нылпи. Та пичи лыдпусын умоез но, уродэз но вань. Но со пумысен малпанъёсме али уг гожты. Выль школа юртамы вуылӥзы ини пӧртэм куноос. Соос пӧлын вал ини асьме Можга ёросысь школа директоръёс но, историяя дышетӥсьёс но. Мынэсьтым ужме вылӥ дунъязы. Ас вылам шӧдӥсько: ӟеч кыл адямиез бурдъя. Мон понна со дуногес пӧртэм грамотаослэсь но дано нимъёслэсь. Кемалась тодмо ини таӵе визьмо веран: улон - дышетскон. Мукет веран но вань: дышетӥсь дышетӥсь луэ ачиз дышетскыку гинэ. Мон али дышетскисько асме дунъяны но данъяны. Ньыль ар куспын категориме кык пол будэтӥ. Али нырысетӥ категориен дышетӥсь луисько. Кылем арын пыриськи "1997-тӥ арлэн дышетӥсез" нимо конкурсэ. Будон сюрес вылын мыным туж юрттэ анай кылы. Историяя урокам ӵемгес но ӵемгес пыртӥсько удмурт кылэз. Удмурт Элькунмылэсь ассюрессэ кемалась верано вылэм ини анай кылын. Ужам пыртӥсько удмурт радиоверанъёсты. Соос пӧлысь одӥгез - история наукаосъя докторлэн М. В. Гришкиналэн "Удмурт батыръёс" нимо веранэз. Соосты мон кельтӥсько, магнит плёнка вылэ гожтыса. Нош кыӵе юрттэ дышетонын удмурт калык кырӟан! Соин ик калык кырӟанъя книгаос котьку ки улам. Котькуд адями, тужгес но дышетӥсь, данъяськыны кулэ быгатонлыкеныз но аспӧртэмлыкеныз. Та ужпумез быдэстон понна, мукет школаосын ортчытъяны кутски творческой урокъёс. Кылем дышетскон ар ӵоже ортчытӥ дас урок: Пычас школаын - удмурт, ӟуч но англи кылъёсын, Можга гуртысь школаын - одӥг урок, Можга педучилищеын - кык урок. Выль Бия гуртам но ортчытӥ кык пумиськон - вордӥськем нуналме аслам школаям пусйи, пичи бенефис карыса. Ваньмыз та пумиськонъёс ваё мыным выль кужым. Улон воштӥськемен, история шоры мукетгес синъёсын учкемен, ужын выль амалъёс утчано луэ. Туж кулэ выль книгаос. Бен, вань выль чебер книгаос, нош ӧвӧл элькунмылэн ассюресэз сярысь удмурт кылын учебник. Уже кутоно луисько вужъёссэ. Нош туннэ кыӵе зол ужъёс дасяло гажано удмурт тодосчиосмы М. В. Гришкина, К. И. Куликов, М. Г. Иванова, В. Е. Владыкин но мукетъёсыз. Кылӥ ини, выль учебник потоз шуыса. Нош ку вуоз со школае? Я, шуом, учебник луоз, нош поттозы-а пӧртэм выль суредъёс, аппликациос, диафильмъёс? Ведь, историен герӟаса, кыӵе паймымон суредъёс кылдытэ Валентин Белых! Мыным, вылӥ тодон-валанэн дышетӥсьлы но, соос осконтэм пото: таӵе дуннеын улӥллям шат вашкала удмуртъёс? Нош ку вуозы та ужъёс школаосы? Кыӵе вожъяськыса но мылпотытэк возьматӥсько нылпиослы Египетлэн, Грецилэн, Римлэн ассюрессылы сӥзем пӧртэм чебер суредъёсты! Нош асьмелэн, удмуртъёслы гинэ ӧвӧл, ӟучъёслы но сӥзем суредъёс туж ӧжыт. Яке чик ӧвӧл. Вазиськеме потэ "Удмурт кенеш" огазеяськонэ: юрттэлэ тодосчиослы та ужез азинтыны. Малпасько: та мынам гинэ куронэ ӧвӧл. Сюлэм бӧрдэ, адӟиськод ке, кызьы пинал калык мыскылля вордӥськем шаерзэ но сое будэтэм калыксэ. Эшшо одӥг куронэ вань "Удмурт кенешлы". Тодӥськоды: дышетӥсьёс - кылзӥськись адямиос. "Удмурт кенеш" мед пуктоз ми азе чурытэсь куронъёс. Котькуд удмурт дышетӥсь мед тыршоз пиналъёслы удмуртлыкмес, вордӥськем шаермес яратон мылкыд пыӵатыны. Соку удмурт кыллы дышетӥсьёс такем уз курадӟе ни нылпиосынымы. Огазеяськыса асьмеос котьку кужмоесь вал. Николай ЕМЕЛЬЯНОВ, Югдытӥсьёслэн сюрестӥзы Тодмо кылчи Василий Иванович Алатырев пырак азелы вунэтонтэм кылиз удмурт кылтодонъя, кыллэн историезъя, кыллы дышетонъя ужъёсыныз, визьмо дышетӥсь но ӟырдыт оратор луэменыз. Филологъёс пӧлын сое тодӥсьтэмез ӧй вал. Писательёсын но юн кусыпъёс возьылӥз. *** Мукет интыосын сямен ик Татарилэн Бавлы районысьтыз Урсыгуртысь (Покрово- Урустамак) удмуртъёс но выжыысь выжые тазьы улӥзы: анай-атайзы ужын дыръя нылъёс ӵукна ик пӧран котырын бергало, черсо, вурисько, керттӥсько яке пужыятӥсько, пиос пичиысен валъёсты утялто, усыяло, гыро, юрт кузё луыны дышетско. Алатырев Иван но пиналъёссэ озьы ик будэтӥз. Солэн тужгес бадӟым сюлмаськонэз таӵе вал: кытӥ азь питран кошке, отӥ ик мед мынозы бер погылянъёс но. Вася семьяязы бадӟымез вал бере, сое атаез сьӧрло келяны ӧз малпалля. Пиезлэсь книга лыдӟемзэ адӟылыкуз, лек куараен индылӥз: "Подъясь луэмед потэ-а? Удмуртлэн ужез - геры!" Покрово-Урустамак начальной школаын соку дышетэ вал тодмо удмурт югдытӥсь, "Беглой" балладалэн авторез Михаил Григорьевич Можгин. Со амалтэк пыриськоно луиз Алатыревъёслэн семья куспазы. Школае ветлыны кутскемез бере ик Алатырев Васяез бурд улаз шунтӥз Михаил Григорьевич. Пияш солы туж яраз котьмае рос-прос тодыны-валаны турттэменыз, лыдӟиськыны яратэменыз. Дышетӥсез солы ас библиотекаысьтыз я созэ, я тазэ книгазэ сётэ. Лыдӟемезъя Вася пайме: ой, кӧня книгаез дышетӥсьмылэн! Тужгес мылысь-кыдысь лыдӟылӥз со удмурт кылынъёссэ. Бератаз ӟуч кылынъёсыз но тунсыкоесь потыны кутскизы. Алатырев тужгес но синмаськылӥз Михаил Григорьевичлэн ӟуч, бигер, пор, чуваш кылъёсын, удмурт сямен усто вераськемезлы, лыдӟиськемезлы. - Удмуртъёс пӧлын, - шуылӥз Михаил Григорьевич, - туж ӧжыт ӟеч-ӟеч дышетскем адямиос. Улон азьланьын тыпак мукет луоз. Сыӵе адямиос котькыӵе ужын кулэ луозы. Тон, Вася, дышетскы. Тынад визьмыд сэзь. Дышетскид ке, тон одно ик бадӟым адями луод. Мынам адӟеме потэ профессор луэмдэ! Нош кытчы мыноз Вася, атаез уг лэзьы бере? Гуртаз со пиналысен гыре, усыя, турна. 1924 арын пияш комсомолэ пыре. Чырмыт но визьмо эшсэс гуртысь егитъёс секретаре быръё. Комсомол ужез ӟырдыт сюлмын бергатӥз Василий. Зэм, ужъёс умой мыно ке но, Алатыревлэн сюлэмыз соин гинэ уг буйга. Солэн дышетскемез потэ. Озьы одӥг нуналэ, анаезлы но атаезлы вератэк, лушкемен кошкиз Бугульмае одӥг ёзо совпартшколае. Ар ӵоже ӧз бертылы дораз. Пиезлэсь кытынзэ тодыса, атаез буйгатскиз, дышетсконлэсь ӧз алы ни. Гужемъёсы бертылыкуз, Алатырев ужалляз сельсоветын секретарь луыса. Отысь басьтэм уждунзэ атаезлы сётылӥз. Атаез валаны кутскиз пиезлэн дышетскемезлэсь пайдазэ, сюлэмаз шумпотон, данъяськон мылкыд пыӵаз. Собере Васяез ысто Казане кыкетӥ ёзо совпартшколае дышетскыны. Сое йылпумъямез бере, Василий Ивановичез кельто Казане комсомол уже. Отысен ини мынэ Кукмор районысь Оштормо-Юмья ШКМ-ен кивалтыны но обществоведенилы дышетыны. Василий Ивановичлы татын кема ужаны ӧз кылды. Комсомоллэн райкомез ыстӥз Казаньысь пединститутэ, татысь философияя факультетэ. Отын дышетскыкуз, шуд усиз Казаньысь удмурт дышетӥсьёсын И. С. Михеевен но И. В. Яковлевен пумиськыны. Соослэн методикая, удмурт но ӟуч кылъя лекциоссы бурдъязы тросгес но тросгес тодон-валан басьтон понна тыршыны. Ар гинэ дышетскыса вуэ но, дышетӥсьёс тырмымтэен, сое нош ик ысто ШКМ-ен кивалтыны. Косэмлы пумит луылӥсьтэм студент таяз учыре ас малпамезъя кариськиз. Тол куазен капчи плащ коже пырак Ленинградэ кошкиз. Интыяськиз пересь кышномурт доры кунокуае. Улӥз подвалын: отчы шунды но уг йӧты, укноосыз инэз кикур пасьта сяна уг возьмато. Ӝытъёсы но уйёсы грузчик луыса ужа портысь Бадаевской складъёсын, чугун сюрес станциын. Нуназе ветлэ А. И. Герцен нимо пединститутэ: вольнослушатель вал. Татын дышетско вылэм ини удмурт пияшъёс Агафон Вахрушев но Андрей Бутолин. В. И. Алатыревлэсь тыршемзэ но юн мылкыдзэ соку синйылтэ тодмо удмурт учёной, доцент, кафедраен кивалтӥсь Яков Ильич Ильин. Егит пияшлы со юрттэ литературной факультетэ пырыны но общежитие интыяськыны. В. И. Алатырев вань сюлэмзэ но мылкыдзэ сётыса дышетскиз. Удмурт кылъя но ӟуч кылъя докладъёс лэсьтылӥз. Литературая ужпумъёсты но эскерылӥз. Институтэз йылпумъямез бере, В. И. Алатыревез кельто Ленинградысь университетлэн аспирантураяз. Со татын мылысь-кыдысь эскере финн-угор кылъёсты. Диссертациезлы быръе "Удмурт кылын сложносочинённой кылъёс" темаез. 1937 арын филологической наукаосъя кандидат учёной степень басьтӥз. Ужаны Ленинградысь университетэ кельтӥзы. Татын со лыдӟе языкознаниея лекциос, нош финн но мордва студентъёсын туала удмурт кылъя занятиос ортчытъя. Дышетэменыз ӵош ик ужа СССР-ысь Наукаосъя академилэн кылъя но мышлениея Н. Я. Марр нимо институтаз. Ар ортчыса, В. И. Алатыревез ысто Петрозаводскысь пединститутэ ӟуч языкознаниея кафедраен кивалтыны. В. И. Алатырев ноку но дышетӥсь гинэ луыса ӧз ужа: Карелиын но, 1950 арысен Удмурт пединститутысь ӟуч кылъя кафедраен кивалтыкуз но ялан поттылӥз научной ужъёс но школаослы учебникъёс. Наукаын ӝыны даур ӵоже ужатозяз печатлаз 150-лэсь уно исследование. Трос кужымзэ сётӥз удмурт кылын шонер гожъяськонэз радъянлы, удмурт кыллэсь фонетиказэ, морфологизэ, синтаксиссэ но лексикологизэ эскеронлы. Нимысьтыз ик пусйыны кулэ удмурт кыллэн историез бордын ужамзэ. Берло мылысь- кыдысь тыршиз удмурт кылъя этимологической словарь дасян бордын. "Кылъёслэсь, грамматической формаослэсь выжызэс, кызьы кылдэмзэс эскерон мынам тужгес но яратоно уже луэ, - шуылӥз В. И. Алатырев. - Та удыс кулэ каре дугдылытэк ужамез но трос тодэмез. Соин ик мон, ӟуч кыллы сяна, дышетски бигер, немец, финн, коми, вашкала грек но латынь кылъёслы". 1-тӥ августэ тодмо удмурт учёнойлы-лингвистлы, Удмурт АССР-лэн наукая дано ужасезлы но Хельсинкиысь финн-угор обществолэн почётной членэзлы В. И. Алатыревлы тырмысал 90 арес. Мыным, та чуръёслэн авторзылы, В. И. Алатыревен трос вераськоно луылӥз наука но литература пумысен. Монэ паймытылӥзы солэн мур тодонъёсыз, философиын, логикаын кужмо луэмез, полемикаын вормонтэм юн нюръяськыны быгатэмез. Одӥг пол вераським тодмо кылчи Н. Я. Марр сярысь. Маррлэсь умойтэм палъёссэ гинэ вераменым, со лякытак гинэ мадиз учёнойлэн данак ӟеч ужъёсыз сярысь но. Соку валай: вылэм Маррлы пумит мынӥсьёсын солы дурбасьтэменыз сэрен ик Алатырев кужмо тэкшеронэ пыриське. АНАТОЛИЙ УВАРОВ, филологической наукаосъя кандидат. Туспуктэм вылын: егит Алатырев (бур паласез) аслаз дышетӥсеныз М. Г. Можгинэн. Гуртоослы секытгес йӧтӥз Ижысь "Ижпланета" клубын Удмуртилэн шахматэн шудонъя чемпионатэз йылпумъяськиз. Со ӵошатсконъёслэн аспӧртэмлыксы тани ма бордын вал - шахматэн шудыны дыр туж ӧжыт висъяськиз, котькуд партилы 25 минут. Нюръяськонэ ветлӥз 9 команда, котькудаз вал быдэн 5 воргорон но 1 нылкышно. Ӵошатсконъёсы вуылӥзы Глазовысь, Сарапулысь но гуртъёсысь огазеям командаос. Чемпионатын нырысетӥ интые потӥз физкультурая "Прометей" коллектив. Та командалы куинь ар гинэ тырмиз ай, отын "Удмуртнефтегазстрой" огазеяськонын ужасьёс шудо. Туэ отысь коллективлы 25 ар тырме. Соин ик соос вормонзэс юбилейзылы сӥзё. Одӥг очколы гинэ бере кыльыса, кыкетӥ интые потӥз Удмуртилэн кылем ар понна чемпионэз - "Металлист" клуб. Куинетӥ инты сётэмын Удмурт госуниверситетысь но Технической университетысь студентъёслэн огазеям командазылы. Нимаз ӵошатскисьёс пӧлын вормиз Технической университетын дышетскись, спортъя мастере кандидат Елена Кычанова. Со 8 партизэ ик утӥз. Воргоронъёс пӧлысь пусйыны кулэ Глазовысь спортъя мастере кандидатэз Николай Щуклинэз. Удмуртиысь кужмоосыныз шахматистъёсын нюръяськыны секыт йӧтӥз гуртъёсысь лыктэмъёслы. Но ӟечесь азинсконъёс возьматыны быгатӥзы Якшур-Бодьяысь Сергей Горбунов но Завьял ёросысь "Викинг" клублэн тренерез Любовь Созонова. И. ВЕЛЬТМАНДЕР. АРМИЫСЬ ПЕГӞЕМЪЁСЛЫ - АМНИСТИЯ Россиысь Главной военной прокуратура ивортэмъя, 20 март бере военной прокуратураосы армилэсь пегась ог 5300 военнослужащиq вазиськиз. Данакез соос пӧлысь пӧртэм мугъёсъя шонере поттэмын но наказание сётонлэсь мозмытэмын. Та вакытэ эшшо 12 сюрс пала солдат служба нуонлэсь палэнскт на. Государство таосызлы но дурбасьтыны дась. Туэ 24 июньысен ужаны кутскиз Россия Федерациысь Кун Думалэн армилэсь пегасьёслы амнистия ялонъя Постановлениез. Та документ улэ шедё 1998 арын 24 июнёзь нокыӵе мугтэк воинской службалэсь палэнскем пиос. Верам дыр ӵоже соос кыӵе ке умойтэм уж лэсьтыса вуизы ке но, уголовной ответственность улэ кысконлэсь мозмытэмын луозы. Кин оске амнистилэн кужымезлы но ӝоггес улонлэн ӧраз пыремез потэ, утчамзэс витьыса улоно ӧвӧл. Амнистия ялэм сярысь Постановление ӝыны ар гинэ ужалоз. Та дыр ӵоже службалэсь палэнскись муртлы аслыз лыктоно воинской часте, военной комендатурае, милицие, прокуратурае. Тодады вайытӥськом: ӵыжы-выжыостылэн, тодмоостылэн ветлэмзы уз юртты. Азьвыл сямен ик, Главной военной прокуратура закон азьын кыл кутонлэсь мозмытоз шуге-леке шедьыса армиысь нырысьсэ пегӟем солдатъёсты. Оскон вань, государственной учреждениос, общественной организациос, калык пӧлы ивор вӧлмытонъя ёзъёс та ужлэсь палэнэ уз кыле шуыса. Кин луоно: врач яке дышетӥсь? Та учыр школазэс йылпумъям трос егитъёс понна туж вожъяськымон но адӟем карымон. Нош Завьялово ёросысь Ожмос гуртын улӥсь Наташа Байкова шаерысьтымы ас ёзъёсыз азьын данъяськыны быгатоз. Солы угось Ижысь кык бадӟым вузын огвакытэ дышетскыны шуд усиз: Удмурт кун университетысь химико-биологической но Ижысь медициная академиысь эмъянъя факультетъёсын. Озьы луыны уз быгаты шуиськоды-а? Ныллэн анаеныз ӧй вераськысал ке, мыным но, оло, со осконтэмгес потысал. - Университетэ пырыны ачим дэмлай вал, - шумпотэмзэ ватыны уг быгаты Валентина Васильевна . - Нош нылы врач луон сярысь тросгес малпаськылӥз кадь. Тӥни озьы, документъёсмес кык интые вуттӥмы. Кудаз ке одӥгаз пырыны быгатоз шуыса осконэ вал ик. Сояз но, таяз но тырмыт балл люкаменыз паймытӥз. Аслэсьтыз но золгес мон шумпотэмын. Кык "ньыль"- басьтыса, школазэ зарни медальтэк йылпумъям Наташа Байкова врач луыны мылкыд кариз. П. ВИШУРОВ. Д. С. Васильев-Буглай но удмурт кырӟан Энциклопедической словарьёс Дмитрий Степанович Васильев-Буглай сярысь, огломак верано ке, тазьы иворто: ӟуч советской композитор, хоровой музыкая мастер, калык кырӟанъёсты люкась, РСФСР-ысь искусствоосъя дано ужась (1947), СССР-ысь Кун премилэн лауреатэз (1951). Ас вакытаз та туж тодмо композиторлэн вордскемез дырысен кылем толэзьлэн пумаз тырмиз 110 ар. Россия Федерациысь информацияя центръёс сое 100 арессэ сямен ик туж ик сӥё-дано карыса ӧз пусъе. Малызэ меӵак вераны шуг. Но озьыгес валаны луэ кадь: укыр "туала" адямиос табере сое "совковой" шуыны туртто ини, дыр. Шодытэк уд улӥське, луоз: солэсь Демьян Бедныйлэн "Првроды" ("Как родная меня мать") кылбурезъя кылдытэм кырӟанзэ но концертъёсы пыртылэмысь дугдӥзы ни. Ярам коть, огшоры шуоно адямиос та кырӟанзэ асьсэ понна шулдыръяськылыкузы, поездъёсын, автобусъёсын отчы- татчы ветлылыкузы, азьло кадь ик ӟеч мылкыдын тодаыз вайыло на. Удмурт калык Д. С. Васильев-Буглайлэн нимыныз ассэ юн-юн герӟаз 70 ар пала талэсь азьло, али верам кырӟанзэ Куӟебай Герд "Гудыри" газетын 1926 арын удмурт кылын печатлам бере. Ачиз но Дмитрий Степанович удмурт калыкез матысь ӵыжы-выжы кадь кариз. Куамынэтӥ аръёсы со кошкылытэк улӥз но ужаз Иж карын, соку гинэ ӝужась удмурт профессиональной искусстволы будыны но юнманы юрттӥз. Татысен ӟеч-ӟеч эшъяськиз тужгес тодмо удмурт писателен-тодосчиен Кедра Митреен. Патерын но со та писатель дорын ик улӥз. Удмуртиен таӵе кусыпъёс возиз Дмитрий Степанович 1932 арысен 1936 арозь. Солэн нимысьтыз сюлмаськытӥсь малпанэз та аръёсын таӵе вал: удмурт кырӟанлы СССР-ысь мукет калыкъёслэн кыранъёссы пӧлын ас иинтызэ шедьтыны юрттон. Ас азяз пуктэм та ужпумзэ Д. С. Васильев-Буглай кутскиз удмурт калыклы ас кырӟанъёсыныз выль вакытлы тупась репертуар кыдытон вылысен, со понна быдэсакетӥз Удмуртиетӥ кырӟан люкаса ветлонысен. Дмитрий Степанович Удмуртие лыктӥз, Россиысь композиторъёслэн союззы ӵектэмъя, калык кырӟан люканъя экспедициоссэ ортчытӥз Удмурт научно-исследовательской институтлэн командировкаосызъя. Удмурт калык кыранъёсты люканъя нырысетӥ экспедицизэ композитор ортчытӥз 1932 арын Алнаш, Вавож, Можга, Балезино, Глазов, селта но Юкаменск ёросъёсысь гуртъёсын, кыкетӥ экспедицизэ - 1934 арын Селта, Шаркан, Якшур-Бодья ёросъёсысь гуртъёсын, куинетӥ экспедицизэ - 1936 арын Глазов, Пичи Пурга но кез 1росъёсысь гуртъёсын. Люкамъёсыз пӧлысь кӧня ке люкетэз печатласькиз "Удмурт кырӟанъёс" (Ижевск, 1933), "Удмурт калык кырӟанъёс") Москва, 1937) нимаз изданиосын. Удмурт кырӟан СССР-ысь вань калыкъёслэн кырӟанъёссы пӧлын ас интызэ шедьтӥз шуыса зэмзэ ик возьматӥзы удмурт калык крезьгуръёслэн Д. С. Васильев-Буглай пыр "Хоровое творчество народов СССР" антологиын (Москва, 1936, вып. 1; редакторъёсыз А. Гуменник но Д. Житомирский) но 1938 арын Москваын 14 удмурт калык кыранъёслэн грампластинкаен нырысьсэ потэмзы. Аслаз люкам калык гуръёсыныз, бадӟым тодэм-валаменыз но быгатонлыкеныз Д. С. Васиьев-Буглай дунъяны луонтэм бадым юрттэт сётӥз Удмурт радиокомитетысь хорлы, Удмурт АССР-лэн кырӟанъя но эктонъя кун ансамблезлы (кылдӥз 1936 арын, али сое "Италмас" ансамбль шуиськомы). Удмуртиысь кивалтӥсьёс азе Д. С. Васильев-Буглай ужпум пуктыса ик Иж карысь театрально-художественной техникумын 1933 арын кылдытэмын вал музыкая люкет. Та техникум бератаз ворсаськиз, нош музыкая люкетэз пӧрмиз нимаз дышетсконнилы - республиканской музыкальной училищелы. Нялтас верано на, дыр, тани ма сярысь но. Театрально-художественной техникумын музыкалы нырысь-валысь дышетӥз Дмитрий Степанович ачиз. Солэсь макем усто дышетыны быгатэмзэ тырмыт валаны луоз, малпасько, Михаил Бывальцевъя: со уго ӵапак та вакытэ ӟырдыт басьтськиз удмурт калык крезьгурез люкан борды. 1941 арын ини Москваысь П. И. Чайковский нимо кун консерваториез йылпумъяз но музыкая нырысетӥез удмурт ӧнерчи луиз. Зэм, сыӵе-сыӵе адямилы улыны ӧз кылды: со арын, сӥзьыл, калык ополчениен ӵош Москваез фашистъёслэсь утьыку, чиптэм-чаптэм ышиз ачиз кадь ик усто музыкант, выныз - Николай Бывальцев сямен ик. Асьмеос ӵемысь шуиськомы: Удмурт пера кыдытон сярысь нырысьсэ малпаськыны дӥсьтӥз Герман Корепанов. Бен, "Наталь" - нырысетӥез удмурт опера, Герман Афанасьевичлэн кылдытэм произведениез. Но ортчем вакытъ1слэн пыдлозязыгес учкоео ке, опера жанр удысын, удмурт опера кылдытонын кичӧлтӥсь вал Д. С. Васильев-Буглай ик. Со опералы таӵе ним сётэмын вылэм - "Кезьыт ошмес". Тазьы нимам пьесаезъя солы либретто гожтэм вылэм ачиз ик Игнатий Гаврилов. Малы та либретто та дырозь печатламтэ - уг тодӥськы. Москваысь Д. С. Васильев-Буглайлэн гожъямъёсыз пӧлысь операезлэсь дась люкетъёссэ но утчаны яра вылэм... Туж бадӟым тау Россиысь наукаосъя академилэн Урал люкетысьтыз Историяя, кылъя но литературая удмурт институтлы. Та институт сюлмаськемен, 1992 арын асьме кие нырысьсэ вуиз син азе вӧтача но кылдылымтэ книга - "Удмуртская народная песня в творчестве Д. С. Васильева-Буглая". Д. С. Васильев-Буглайлэсь люкам кырӟанъёссэ отын печатланы дасям Виктор Красильников, валэктонъёс гожтӥллям: текстъёсъя - Татьяна Владыкина, гуръёсъя - Марина Ходырева. Книгае пыртэмын 390 гур (пырак калык кыл йылысь гожъямъёсыз). Пумаз сётэмын композиторлэн кыраны яке крезьёссын (музыкальной интсрументъёсын) шудыны тупатъямъёсыз - 30 гур. Куӟебай Гердэз 1932 арын пытсэт улэ басьтэмен валче, пыд улэ чик мугтэк куштэм удмурт калык кырӟанэз Д. С. Васильев-Буглай выльысь сӥё-дано кариз. Малы озьы шуисько-а? Вань удмурт калыклы огъя кырӟан репертуар кылдытӥз Куӟебай Герд. Ассэ "калык тушмон" каремзы бере солэсь кырӟан книгаоссэ но, кырӟалям кырӟанъёссэ но национализм шӧмоесь шуыса дунъязы. Д. С. Васильев-Буглай сюлмаськемен ини тросэз со кырӟанъёс соку ик "дэритэмесь" луизы. Шудэд вылэм ик тынад, удмурт кырӟан. Шуг дыръя тыныд сыӵе ӟеч утись сюлмаськись сюрем. Я, бен, котьку сыӵе ик каньыл но шудо-буро улыны-вылыны ммед кылдоз тыныд, удмурт кырӟан, мынам ӟече, мусое но быдтыр яратонэ. Дунне вылысь калыкъёс азьын удмурт кыранлэсь дунзэ но данзэ сокем-сокем утьыны, уката вылӥегес ӝутыны сюлмаськемез понна, Д7 С. Васильев-Буглайлы вань улытозяз выльысь но выльысь тау карылӥз нырысетӥ удмурт опералэн, симфонилэн но трос сю кырӟанъёслэн авторзы, нырысетӥез удмурт композитор-классик Г. А. Корепанов. Тазьы ик тодаз вайылӥз сое егитэзгес удмурт композитор но - Г. М. Матвеев, Москваысен пумиськемзы бере, Геннадий Николаевич композицияя нырысетӥ ужзэ - "Ой, эсьмаса, эсьмаса" кырӟанзэ (кылбурез Степанида Ивановалэн) - быдэ вуттӥз ӵапак та ӟуч композиторлэн сётэм визь-кенешъёсызъя. Удмурт калык ноку уз вунэты Д. С. Васильев-Буглайлэсь дунъяны луонтэм ниимзэ но ӟеч ужъёссэ. Нырысетӥ удмурт опера кылдытыны но со ик басьтӥськиз вал. Куамынэтӥ аръёслэн шор вадесъ1ёсазы быдэсаказ шаерамы улон огыр-бугыр луэмен, солэн та кичӧлтонэз йылаз-пумаз вуытэк кылиз. Музыкаез эскерисьёс-дунъясьёс солэсь архивзэ Москваысь кызьы ке но шедьтыны мед тыршозы вылэм. Соку, оло, дась люкетъёсыныз элькунысьтымы музыкаен тунсыкъяскьисьёсты но тодматыны луысалыз, Сюрысалзы на, дыр, УдНИИ-е сётытэк кылем удмурт калык гуръёсыз но. Мынам чакламея, солэн калыкысь люкам крезьгуръёсыз 500 гинэ ӧвӧл, 1000-лы матын яке ятыргес луыны кулэ. Печатлано туспуктэмез лэсьтэмын Удмуртиын ужан вакытаз. ПЁТР ПОЗДЕЕВ. МАЛПАН Кема-а сюдоз МВФ? Манетмылэсь дунзэ утён вылысь, валютаосъя калык куспо фонд (МВФ) Россиез нош ик жаляз, лэся. Со асьмелы али гинэ пунэмен уно миллиард доллар сётӥз. Озьыен, огдырлы капчиенгес шокчыны быгатӥськом - манетмылэн кужмыз уз усьы. Выль арозь ке но. Но быгатомы-а сое шырыт кутыны, уз-а тӧлӟы сиыса-юыса гинэ? Котькинлы тодмо: та вакытэ Россие сиён-юон но, мукет вузъёс но уноез палэнысь вуо. Асьме дорын соослэн дунзы трослы будэ, кылсярысь, сиён-юонъёслы 1,5-2,2 поллы, телевизоръёслы, мисьтаськон машинаослы, электроен ужась вузъёслы - 2,0-3,5 поллы, посудалы - 2,3-4,0 поллы. Ӵапак со дунъёс ик возьмато манетмылэсь зэмос кужымзэ. Но со дыре ик асьмелэн предприятиосмы интыязы йыг-йыг сыло. Бен, сылонзэ сыло ик, но вузъёс уг потто. Обороная комплекслы азьвыл ужась предприятиос быгатысалзы японецъёслэн кадь ик устоесь телевизоръёс но поттыны, пӧртэм ӧй луысал бытовой техника но. Но магазинъёс тырмытэмын ни кунгож сьӧрысь ваем вузъёсын. Кызьы шуо, асьмелэн рынокмы кекатэмын. Соин ик, предприятиосмы мед улӟозы шуыса, со вузъёсты ваён сюресэз огдырлы-а яке воксёлы-а пытсаны кулэ, дыр. Юн шуккет сётӥз предприятиосты кузёослы дунтэмен вузан но (приватизация). Соос мукет киосы сётэмын, дунъёссэс 3-4 поллы кулэстыса. Вылаз ик, дасямын ни вал Россия Федерациын кун узырлыкъёсты кузёослы вузанъя кун программа сярысь законлэн инъетэз. Ярам, Россиысь Лыдъян палата сое умойтэмен лыдъяз. Нош Чубайс чакламъя, отын туж шӧдӥське МВФ азьын йыбыртъян. Нош валютаосъя фонд Россиез вакчи дыр куспын вузаны косэ ог 550 компаниослэсь государство кие кылем акциоссэс. Ӵектэмын вакчи дыр куспын тужгес но кужмо кун предприятиосын приватизация ортчытыны. Котькудӥз нимысьтыз пусъемын. Соос пӧлысь уноез луо национальной безопасностьмес но странамес утёнын бадӟым инты басьтӥсь предприятиос. Правительство та куронэз туж дыраз быдэстӥз. Озьы туэлы приватизация ортчытонъя "Прогнозный перечень" шуыса нимам программа кутэмын вал. Отын меӵак пусъемын 28 огазеяськонлэсь акциоссэ вузан сярысь. Соос пӧлын ик "Ижмаш" но. Лыдъян палата дунъямъя, со документын "Ижмаш" акционер огазеяськонлэсь акциосын пакетсэ 518 миллион манетлы кулэсэнгес вузаны чакламын. Нош государство киын возиськись акциосын пакетъёслэсь туэ вузано дунзэс Россиысь правительство кулэстэм 15,7 миллиард манетлы. Таӵе шудонъёс бере уз-а шеде асьмелэн предприятиосмы Западысь кредиторъёс кие? Ведь дунтэк нокин уг сюды. Пунэмъёсты но асьмелы ик тыроно луоз. Н. БАЙТЕРЯКОВ. КЫШКЫТ УЧЫР Вуж Сальяын - дизентерия Та нуналъёсы Киясово районысь Вуж Салья гуртын кышкыт висён - дизентерия (кӧтвиян) - вӧлмиз. 120 адями висьыны усиз, со пӧлын - 56 нылпи. 44-ез больницае эмъяны понэмын, со пӧлын - 25 нылпи. Кытысь бен сыӵе кышкыт висён потӥз? Республикаысьтымы валтӥсь санитарной врачлэн воштӥсезлэн Геннадий Сулеменевлэн ивортэмезъя, ву басьтон интыос (башня, колодчаос) кемалась сузямтэ, утялтымтэ, нош гуртысь тымет выллапалан пудо лагерь интыяськемын. Вераны кулэ, та учырез дыраз ӧз шараялэ, кулэезъя дунъет ӧз сётэ районысь санэпидемстанция но УР-ысь Правительстволэн Граждан оборона ужпумъёсъя но кышкыт учыръёслэсь утиськонъя комитетэз. Али ужрадъёс кутӥсько ни. 23-ез колодча но ву басьтон башня сузямын-чылкытатэмын ни. Соин ӵош ик бактериофаг эмъюм но хлорен препаратъёс басьтыны ичизэ 90-100 сюрс манет коньдон кулэ луоз. Сое, пе, АПК-лэн нимаз фондэз пыр сётоно. Али одӥгез сюлмаськытэ, та кышкыт висён медаз вӧлмы. Со понна тырмыт ужрадъёс чаклано. Г. РОМАНОВ. Куӟебай Гердлэн вордӥськемез дырысен - 100 ар КУАСАЗЫ, СИРПУЭЗ МУЗЭН Кызетӥ-куамынэтӥ аръёсы Куӟебай Герд вылэ пумтэм-йылтэм урттылӥськизы кас сюлэмо адямиос. Со сярысь ялан ивортыло на архивын утиськись гожтэтъёс. Кылбурчиез ултӥян тужгес кужмоям кызетӥ аръёслэн пумазы. Кас кужымъёслэсь утиськон вылысь, 1928-тӥ арын июль толэзе прокурорлы вазиськоназ Герд гожтэм: "Гудыри" газетын пумтэм-йылтэм печатласько пож вуэн пачылмем ужъёс. Монэ янгыше уськыто, удмурт калыке пала дурбасьтэме понна. Куд-огез шуо: литератураез ляб тодэ (удмурт гожъясьёс трос луозы шуыса ӧй оскылы шат?) Удмурт кырӟанъёсты дасяй, соослэсь аспӧртэмлыксэс юри кельтыса (озьы куре наука). Куд-огез шуыны турттылӥзы: огъя литература кыллы пумит мынӥсько. Валэктон сётыса ыстэм гожтэтъёсы "Гудыриын" малы ке ӧз печатласькелэ. Мукетъёсызлэн ужъёссы потылӥзы, туж кулэстылыса. Нош мыным пумит ыстэм корреспонденциосты интыяллязы тужгес адӟиськымон азе... Таӵе югдурез чиданы уг луы. Газет тэргаськон но керетон понна кылдытэмын ӧвӧл - эрико мылкыдъёсты нокин медаз шымыръя. Удмурт кыллы но культуралы сӥзем вераськон асьмелы кулэ югыт кадь, омыр кадь. Иське, малы кенешонэз культура удысын кыӵе ке воштӥськонъёс ортчытон сярысь?.." 1929-тӥ арлэн кутсконаз Герд вадьсы сьӧд пилемъёс ӵемгес люкаськылыны кутскизы. Азьвылгес сюлэмшугъяськыса гожъяз кылбурчи удмурт литературалы сӥзем куд-ог ужъёс сярысь. Солы пумит мытылыса кадь, 17-тӥ октябре "Ижевская правда" газет (озьы нимаськиз соку "Удмуртская правда") пусйиз: "... Гердлы выльысь учконо аслэсьтыз ортчем сюрессэ. Ӟеч-ӟеч малпаськоно азьланез сярысь: ВКП(б)-лэн кивалтэмез улсын - пролетариатэн но начар улӥсь крестьянъёсын ваче ки кутскыса яке - гуртысь но городысь узыръёсын?.." Гердэз со вакытэ тужгес пыкылӥз улосысь калыкез дышетонъя отделлэн тӧроез, ВКП(б)-лэн обкомезлэн пропагандая но культурая отделэзлэн кивалтӥсезлэн воштӥсез Трофим Иванов. "Ижевская правда" газетын 1928-тӥ арын ноябрь толэзе, Интерн кушем ним улэ ватӥськыса, со лекос ӵушказ Гердлэсь удмурт мадиськонъёс сярысь кылужзэ. Нош со бордын Кузьма Павлович дас куать ар тыршем. 1928-тӥ арын немец кылын печатласькемез бере, вылӥ дунъет сётӥллям кунгож сьӧрысь тодосчиос-этнографъёс но. 1929-тӥ арын 9-тӥ декабре Рабоче-Крестьянской инспекцилы куриськоназ Герд гожъяз: "Туэ сӥзьылысен кутскыса ини "Ижевская правда" газетлэн редакциез ялан печатла мон сярысь юрӟым мылкыдын тырмем статьяос. Соосты гожтӥсьёс вурӟылыны турттылӥзы мыным юри малпам нимъёс..." Удмурт улосын кылдэм югдур Гердлэн азьпал улон сюресэз вылын бадӟым могӟет луиз. Москваын Шунды ӝужан палась калыкъёслэн институтсылэсь аспирантуразэ йылпумъямез бере, Куӟебай Гердлы вылӥ дунъет сётылӥзы странаысьтымы валтӥсь этнографъёс. Азьпал улонэз туж синмаськымон вал. Зэм, шудо малпанъёсызлы быдэсмыны кылдымтэ вылэм. 1929-тӥ арын 8-тӥ декабре РСФСР-ысь Рабоче-Крестьянской инспекцилы куриськоназ Герд гожъяз: "1928-тӥ арын Ленинградысь А. И. Герцен нимо пединститутын усьтэмын удмурт люкет. Отын валтӥсь инты басьтылӥзы удмурт кыл но литература, удмуртъёслэн ассюрессы. Кылдэмез дырысен кӧня ке ар ортчиз ни - нош татын али ке но ӧвӧл на удмурт дышетӥсьёс но наука удысын ужась удмуртъёс. Кыкетӥ арзэ ини ужа пичи калыкъёсъя люкетэз. Солэн секретарез Баушев эш ӧтьыны малпа монэ удмурт калык кылосъя но литературая дышетӥсе. Зэм, вераськонъёслэн нокыӵе но пайдазы ӧвӧл... Удмурт педтехникумъёс понна дасяй удмурт кылъя но литературая программа (литературалы дышетскем удмурт мон гинэ ай али), соя дышетско ини вань удмурт педтехникумъёс. Литератураез дышетон амалъёсы та программаын лад-лад ивортэмын кадь. Кин ке малы ке юри ӝегатэ монэ та удысэ юнматон сярысь ужпумез. Куд-огез та борды ватсало на пӧртэм ченгешонъёсты. Мыным чутрак пумит луо ВКП(б)-лэн обкомезлэн пропагандая но агитацияя отделаз ужасьёс..." Гердлэн сюлэмшугъёсыз зэмазы: партилэн обкомез та ужпумез кулэтэмен лыдъяз - Кузьма Павлович Чайников дышетӥсе юнматэмын ӧй вал. Та вакытэ ик Герд кутэмын СССР-ысь Наукаосъя академие аспирантэ. Зэм, ӝоген Иже ӧтё но областной советско-партийной школае огшоры дышетӥсе интыяло. Берлогес, 1931- тӥ арын сӥзьыл, Куӟебай Гердэз озьы ик ӧз юнматэлэ Удмурт пединститутысь дышетӥсе. Со дырысен кылбурчилэн йыр вадьсысьтыз чагыр инбам пильмаськемысь ӧз дугдылы. ВуАРП-лэн 1930-тӥ арын 1-тӥ январе ортчем нырысетӥ конференцияз Гердлэн ужъёсыз юн курламын вал. Татын ик ялӥзы: "гердовщинаез" азьланяз чиданы уз луы. Кытӥ-отӥ Гердэн "кивалтыны" но дэмлаллязы. Партилэн обкомезлэн кылкутӥсь секретарез Василий Егоров шуылӥз: "Туж шумпотысалмы, мукет конференциын Гердлэсь гожъямъёссэ музон сямен дунъясалзы ке. Солэн мукет кылэ берыктэм ужъёсыныз тодматскыса гинэ но шӧдӥ: Куӟебай Герд - быдӟымлэсь быдӟым адями. Соин ик туж чакласькыса дунъяно. Азьланяз Герд мед кылдытысал туж адӟиськымон, бадӟым чеберлыко уж. Соин, оло, берыктысал весь вань янгышъёссэ..." Талы ик туж оскылӥз Иосиф Наговицын но. "Гражданину Герду" тодмо гожтэтаз (печатламын "Ижевская правда" газетын 1931- тӥ арын 6-тӥ мартэ) Иосиф Алексеевич оскыса вераз: "кыдёкын ӧвӧл ни со вакыт - кылбурчи асьмемын ӵош луоз но кырӟалоз, куаразэ жалятэк". Вуиз 1932-тӥ ар. Феврале ВуАРП-лэн кыкетӥ конференцияз удмурт литератураын "гердовщинаен" нюръяськон валтӥсь ужпумен ялэмын. 1932-тӥ арын 14-тӥ феврале ортчем конференциын та адямиез тужгес курлаз ВКП(б)- лэн Удмурт обкомезлэн кыкетӥ секретарез Сергей Ельцов. Гердлэн "Мон - удмурт" кылбурез сярысь шуиз: "Та кылбураз со оглом данъя удмуртэз. Нош асьмеос тодӥськомы ук: удмуртъёс пӧлын но пӧртэм сямен улӥсь но малпаськись адямиос вань. Вань кулакъёс, вань кенеш, вань вузчиос, мукетъёсыз. Со шуэ: мон удмурт - мон шудо. Октябрь революция мыным, удмуртлы, эрик ваиз. Али мон шудолэсь но шудо... Кылбур пичи гинэ ке но, валамон: Герд данъя кулакез. Мукет ласянь ке учконо, ӟучъёслы, партимылы пумит мынэ..." Кузьма Павлович конференциын кыл куриз. Но малы ке ӧз сётэлэ. Ельцов вераськем бере ик 15-тӥ феврале ВКП(б)-лэн советско-партийной школаысь ячейкаяз куриськон гожтэ. Отын шуэмын: "... Мон выльысь ӟеч-ӟеч малпаськи улон сярысь, "гердовщина" шуон сярысь. Та вакытэ со удмурт улосын тужгес бадӟым кышкытлык кылдытэ. Соин ик ВКП(б)-лэн обкомезлэсь нюръяськемзэ умоен лыдъясько. Литератураен герӟаськем сюресме но выльысь учкыса тодӥ: лэсьтӥськем кӧня ке янгыш. ВКП(б)-лэн обкомез шонер кивалтэмен, соос дыраз шараямын. Али куриськонъёс гожъяса гинэ уз тырмы. Туннэ нуналлэн куронъёсызъя улыны кулэ ӧвӧл мон, пролетариатлэн ӟеч но оскымон эшез мед луом..." Ӝожомыса верано луэ: Гердлэн ассэ шараямез нокинлы кулэ ӧй вал ини. Кӧня ке нунал ортчыса, 18-тӥ феврале, ВКП(б)-лэн обкомез пыр дораз ӧтиз сое ОГПУ-ысь следователь А. Д. Антоновский. 1932-тӥ арын март толэзе кутскемын трос кайгу ваем "СОФИН" уж. Куд-огез соку ик кыл вӧлдӥзы: та аспӧртэмлыко огазеяськон Удмурт улосэз СССР-лэсь висъяны турттэ. Гердэз нимазы сое кылдытӥсен но огазеяськонлэн кивалтӥсеныз. 1932- тӥ арын май толэзе Кузьма Павловичез пытсазы, 1933-тӥ арын янгыше уськытӥзы, 1937- тӥ арын ноябре ыбизы... Зэм, улон отӥяз ваньзэ ас интыяз пуктылӥз. Гердлэн чылкыт нимыз берыктэмын! Е. УШАКОВА, ЦДНИ-ысь отделэн кивалтӥсь. УДМУРТИЫСЬ ГОСАРХИВЛЫ - 75 АР Тузон уз пуксьы Уен-нуналэн берга улон, огез мукетсэ воштэ. Озьы ортчо аръёс но дауръёс, воштӥсько вакытъёс но поколениос. Кин вералоз на, мар вал та нуналэ 10, 30, 100 ар талэсь азьло. Вералозы архивын ужасьёс. Соос утьыса но ялан выльдыса возё историлэсь шыкысъёссэ. Удмуртиысь Центральной госархив кылдытэмын вал 75 ар талэсь азьло 1923 арын октябрь толэзе Вотской автономной областьлэн исполкомезлэн решениеныз. Кивалтӥсе юнматӥзы азьвыл красногвардеецез, Ижевскысь ревграждансоветэ быръем муртэ Андрей Иванович Галановез. Солы оскемын вал шаерысьтымы вань архивъёсты огазеяны, документъёсты утьыны. Бадӟым юрттэт та ласянь сётӥз Вятской губернилэн архивез. Туала архивлэн ӝажыосаз люкамын 1713-1996 аръёсысь пӧртэм пумо материалъёс. Соос герӟаськемын политика, калык хозяйство, наука, культура удысъёсын. Дыр ортчемъя, бумагаос ӵужекто, пырдо, бездо. Улэп макеосты выллем утялто соосты тузон, нюр-кот шедемлэсь, шунды сиослэсь, векчи нымы-кибыослэсь. Ваньмыз та сюлмаськон нуналмысь нуналэ усе архивын ужасьёс вылэ. Коллективмы - 53 мурт. Ваньмыз вылӥ образованиен. 60-тӥ арысен кутскыса, госархив басьтӥськиз бадӟым научно-исследовательской уж борды, документъёсъя дасяськом нимысьтыз сборникъёс, поттӥськом газет бамъёсын. Али ужаськом Удмуртиысь городъёслэн но гуртъёслэн историзы бордын. Узыр материал шедиз Ижевскъя, Сарапаулъя, Глазовъя. "Удмуртия" издательствоын ӝоген потозы Воткинск сярысь исторической веранъёс. Туннэ нуналлы кызё пала документъёсын сборникъёс дасямын ни. Дорамы нуналлы быдэ кулэ материал утчаса вазисько пӧртэм организациосын, учреждениосын ужасьёс, учёнойёс, студентъёс, краеведъёс. Пумен трос адямиос вуо ас ӵыжы-выжызэс, йылолъёссэс утчаса. Со понна архив кусыпъёс тупатӥз черкъёсын. Утчаськон-бугыръяськон сямен Вотка заводлэн Благовещенской соборысьтыз шедиз Петр Ильич Чайковскийлэн вордскемез сярысь гожтэм чуръёс. Берпуметӥ осконэн ми доры вазисько репрессия улэ кыскем но чиптэм-чаптэм улонысь ышем муртъёслэн ӵыжы-выжыоссы, нылпиоссы. Кылем арын гинэ 6 сюрс та выллем юан вуиз. Быгатэммыя котькудӥзлы юрттыны выриськом. 1973 арысен архивын кылдытэмын микрофотолаборатория. Тужгес но дуно документъёсты плёнка вылэ пуктӥськом. Огъя вераса, архивлэн ужез туж трос. Нош кӧня на шедьымтэ бумагаос! Соосты утчан вылысь усьтэмын информационно-поисковой отдел. Шаермылэн историез узыр. Архивын ужасьёс бордысь но потоз: кыӵеен адӟозы солэсь ортчем сюрессэ вуоно поколениос. Ваньзэ лэсьтоно, тузон пӧлы медаз ыше шуыса. И. ЗАЙЦЕВА. Удмурт Республикаысь Центральной госархивлэн отделэныз кивалтӥсь. Брангуртысь усточиос "Удмурт кенеш" котыре огазеяськемъёслы кемалы тодазы кылёз туэ тулыс вылтӥ Пичи Пурга ёросысь Брангуртэ ветлэмзы. Отын радъямын вал исполкомлэн интые потыса кенешонэз. Вераськон мынӥз гурт кенешъёслэсь ужзэс кужмоятон сярысь. Валамон ни, быдэс элькунысь куноослы брангуртъёс рос-прос дасяськизы. Соос возьматӥзы сцена вылын шулдыръяськыны быгатэмзэс, утялтӥзы ческыт сиён-юонэн, тодматӥзы школаын усьтэм музеен. Лыктэмъёслы туж тунсыко потӥзы музее люкам арбериос но документъёс. Солэн кивалтӥсез дышетӥсь Николай Петров та нуналэ юанъёслы валэктыса воксё жадиз кадь. О. МАРКОВ. Туспуктэмъёсыз В. Камашевлэн. ФЕРМЕР ВЫЖЕ КЫЗЬ ОДӤГЕТӤ ДАУРЕ... 1991-тӥ арын Россиысь Правительство фермер хозяйствоосты азинтыны 1 миллион манет коньдон висъяз вал. Сыӵе юрттэтэз шӧдыса, нимаз ужаны мылкыд карисьёс йылӥзы. Республикаямы 1992-тӥ арын фермеръёс 1500 пала вал. Туннэ нуналлы та лыдпус 4897- озь вуиз. Соос 73523 гектар музъемез утялто, 7000-лэсь ятыр скал вордо. Со сяна, нимаз хозяйствоен улӥсьёс парсь (4500), ыж (3500), вал (450), тылобурдо (17000) возё. Туэ ӝыны ар куспын гинэ 5000 центнер сӥль, 44600 центнер йӧл, 790000 курег пуз, 2 тонна ыж гон сётӥзы. Но татын но ваньмыз вольыт, шуыны уг луы. Фермеръёс али но туж курадӟоно луо на. Техникаен, воштос ёзъёсын, эстӥськонэн шуг-секытъёс борды трос выт тыронъёс ватсасько на. Соин сэрен ужам ужлэн табышез но ӧжыт. Шаерысьтымы гурт хозяйство удыслэн поттэм продукциез пӧлысь туннэ нуналлы фермеръёс 3-8 процентсэ сёто. Та лыдпус трослы будыны быгатысал. Нош мукет ласянь учконо ке, гуртын поттэм сиён- юонэз калык доры вуттыны туж секыт. Бадӟым шуккет сёто кунгож сьӧрысь ваем вузъёс. Озьы тросэз фермеръёс, табыш поттыны быгатытэк, ужзэс аналтоно луо. Кышкасьтэмъёсыз, пӧртэм югдуръёсы берганы быгатӥсьёсыз гинэ асьсэ хозяйствозэс пумен ӝуто. Соос ик луозы, дыр, кызь одӥгетӥ дауре выжись зэмос музъем кузёос... Е. Панфилова. Аръёс, аръёс - тӧдьы но сьӧд валъёс... Удмурт кун университетысь тодосчилы, кылтодон наукаосъя кандидатлы, доцентлы Серафим Васильевич СОКОЛОВЛЫ куатьтон арес тырмиз. - Котькуд арлыдлэн чеберлыкез аслаз. Зэм, луэ шугъяськытӥсез но. Кыӵе сюлмаськонъёсын пумиськоно луиды шутэтскыны потон азяды? - Сюлэмшугез трос. Нырысетӥез - пенсия пумысен. Законъёсты вошъяло котькуд нунал. Соин ик кӧня басьто азьланяз - уг тодӥськы на. Кыкетӥез - уж ласянь. Мынам тунсыко малпанъёсы вань. Этимологилы сӥзем пичи кылбугорме йылпумъяй. Табере мукет уж - ниман амалъёс борды басьтӥськоно. Бурдоосъя, чорыгъёсъя соос вань ини, нымы-кибыосты, улон-вылонэз, сиён-юонэз, пыдкутчанэз, дӥсез, лэсьтӥськон арбериосыз но ниман амалъёсты эскереме потэ. - Иське, вань кужымдэс наукалы сётоды? - Та удыс туж тунсыко ук: наукалы сётӥ но сёто весь вань кужымме. Этимологилы сӥзем кылбугор бордын куать ар ужай. Наукалы сӥзем кылуже али сизьымдон одӥг. - Кызьы вуиды наука удысэ? - Сизьым классэз йылпумъяса мынӥ Можга педучилищее. Зэм, отын малпанэ воштӥськиз. Мугез таӵе. Тодмо гожъясьмылэн Михаил Коноваловлэн апаез, Екатерина Алексеевна Коновалова, удмурт кыллы но литературалы дышетэ вал. Чупрес тыршиз, ужзэ яратӥз. Со литератураез яратон мылкыд пыӵатӥз кадь... Куинетӥ курсысен пумиськи Михаил Петровен, Афанасий Лужанинэн, Аркадий Клабуковен. Собере гожъяськон мылкыд монэ бордаз кыскиз. Нырысетӥ иворе школьникъёслэн турын люкан бордын ужамзы сярысь вал. "Советской Удмуртия" газетын печатласькиз со. Собере "Пинал куараос" рубрика улын нылпиослы туж трос веросъёсы потаны кутскизы. Одӥгез понна премия но сётӥзы. Собере чылкак серемес веросъёс борды выжи. Котькуд номераз сямен "Шӧкычын" поталлязы. - Ма кулэ, зэмос гожъясь луон понна? - Адямилэн вираз ик мед луоз ини кыӵе ке быгатонлыкез. Инмар ӧз сёты ке, зэмос гожъясь ноку но уд луы: солы мон юн оскисько. Нош ачим, наукае вамыштӥ ке но, чеберлыко литературалэсь быдэсак ӧй куштӥськы: али но печатласькисько шаерысьтымы журналъёсын. - Вакчияк вералэ вал ортчем сюресты сярысь. - Вордски мон (кагазъя) Вавож ёросысь Итчи-Дӧкъя (Бадӟым Кион) гуртын. Нош зэмзэ верано ке, та ёросысь ик Кобла гуртын. Анае дор палъёсаз адскыны бертэм вылэм - отын ик вордскиськем. Озьыен, мон Кион пи ӧвӧл, Кобла пи. - Кинъёс вал анай-атайды? - Колхозникъёс. Мемие одӥг букваез но ӧз тодылы, одӥг нунал но дышетскымтэ. Колхозын ю тысь сётъякузы, кирос гинэ пуктылӥз. Зэм, дышетскымтэ ке но вал, котькуд ӵукна, школае мынон азьын, мынэсьтым но, ӵужодӥг вынылэсь но урокъёсмес эскерылӥз. Ми солы кышкаса вераллямы, нош со номырзэ но уг вала вал кадь. Атай азьло ужаз колхозын, собере Горд Яр сельпоын товаровед луыса тыршиз. Зэм, йылпумъям сизьым классэз гинэ. Война кутскем бере, фронтэ кошкем. - Нош кызьы улӥды-вылӥды? - Туж начар. Одӥг дыре сиёнмы но ӧй вал. Мон усыямысь бертӥсько, валъёсты нуназеез понна сюдӥсько. Корка пыратэк, кӧтме бакча сиёнэн гинэ тырисько. Озьы, сютэм ветлыса, одӥг пол йырсазьме ыштӥськем. Бусыын кылльыкум шедьтӥллям но гуртэ келяллям. Одӥг пол чорыганы мынӥ. Отысен дядяе чылкыт, сурамтэ тӧдьы пызьлэсь пыжем одӥг шорем нянь но векчи вандэм кӧй сётӥз. Мон сое сии но кудӟыса умме уси. Сайкай но учкисько: шунды пуксе ини. Озьы гуртэ чорыгатэк бертӥ. - Кытысь солэн сыӵе нянез? - Со дядяе - Фома Кузьмич Ермаков - вукоын ужа вал. Изыку пызь пурӟыса пуксе ук быдэс юрт пушкы. Сое сузяса, чылк-чылк, потэн, пул пызен сурамтэ нянь пыжыны луэ... - Асьтэос сыӵе курадӟыса будӥды бере, студентъёсты но соин ик туж жаляськоды, дыр?.. - Уг валаськы, кытысь потэ со жалян. Сыӵе вордскемын, дыр: вирсэръёсам ветлэ со. Зэмзэ но, жалясько: "кык" туж шер пуктылӥсько. Нош пуктӥсько, студент чылкак пал кыл но уг вера яке экзаменысь султэ но кошке ке. Вераны тырше, программая мукет билет куре ке, соку тодэм-валамзэ урод уг дунъяськы. - Вылӥе ӝутскон сярысь малпаськылӥды-а? - Йырам сыӵе малпан ноку но ӧз лыктылы. Уз но лыкты ни. - Но тӥ декан луыса но ужады кадь ук?.. - Ужай. Вить ар котыр. Калыкен вераськыны, кусыпъёс тупатыны быгатӥсько кадь. - Кыӵе муген кошкиды та удысысь? - Нырысетӥез таӵе вал. Борис Николаевич Шульга ректор дыръя туж зол эскерылӥзы документлэсь дырыз дыръя вуэмзэ. Асьмелэн факультетмы та ласянь берегес кыле вал. Нош тодон-валан басьтонын но огъяулонниосын ӝикытлык тупатонын нырысетӥ интые потылӥмы. Со бумагаосын сэрен весь пыкыло вал. Но зэмос мугез, мон сямен, таӵе. Ижевскез Устинов каремзы бере, факультетысьтымы студентъёс, со нимез выльысь воштон вылысь, гожтӥськемъёс люкаллям. КПСС-лэн ЦК-езлы пумит ужаллям шуыса, ректор мыным выговор ялӥз, дисциплинаед ляб шуиз... - Туала улонэз кызьы дунъяськоды? - Оглом яра. Воштӥськонъёс пӧлын уродэз но, ӟечез но вань ке но. Куд-ог дыръя шорзэ шедьтыны ум быгатӥськелэ, яратӥськом куасалтылыны. Туала егитъёс асьсэды эрико возьыны быгато - соиз туж яра. Азьло сямен, нокин но кужмысь уг косы. Партбюро музэн уг кырмы. Но улонлэсь ӧрзэ шедьтыны кулэ. - Асьтэлэсь нылпиостэс но сыӵе амалэн будэтӥды, луоз? - Мынам одӥг гинэ пие. Со Удмурт кун университетлэсь художественно-графической факультетсэ йылпумъяз. Али одӥг фирмаын суредась луыса ужа... Мон котьку пумит вал пиналэз чабкылыса будэтонлы. Соин сэрен ӵем дыръя кышноен керетон но поталляз. Урод кылъёс, сэреге пуктылон нылпиез сӧро. Сыӵе дышетонлы мон пумит. Кенешиз Светлана ПЕТРОВА, Удмурт кун университетын дышетскись. ДУННЕ СЮЛМАСЬКОН Зэм ик-а ваньмыз быроз? 118 ар ӵоже ни дуннеысь инкуазез эскеро нимысьтыз адямиос - синоптикъёс. Та сярысь ивортэ "Фссобшэйтед Пресс". Америкаысь инкуазез эскерисьёслэн пусъемезъя, 1998 арлэн нырысетӥ люкетэз, ортчем аръёсын ӵошатыса, тужгес но шунытэз луэ. Западной Европаын сое шӧдыса но валаса ӧз вуттэ на, дыр. Но котькуд толэзь ӵоже омырлэн но зарезьлэн ӟырдамез, азьло вакытъёсын ӵошатыса, трослы йылӥз. Климатолог Том Карл пусъе: 1997 ар тужгес но шунытэз вал. Нош туэ ӝыны ар куспын ик ми шӧдиськом ни куазьлэсь эшшо но пӧсьгес луэмзэ. Вань та чакланъёс верало инкуазьлэн пумен-пумен воштӥськемез сярысь. Ӧвӧл, шуоз куд-огез, - Тихий океанын куазь кезьытгес луиз. Бен, та верам шонер. Но со огъя югдурез уг вошты. Инкуазьлэсь шуныт луэмзэ герӟало омыре трос углекислой газ, ӵын потэмен. Газъёсын сэрен музъем котырысь омыр ӟырда, шундылэн пӧсез берен космосэ уз кошкы ни. Озьы пумен-пумен "парниковой эффект" шуон кылдыны быгатоз. Соку быдэс дунне пӧсьлы чидатэк, сутскыса быроз. Музъеммылэн тупатонтэм шуге-леке сюронэз зэм шат? Шунытгес - байгес Сыӵе ӝожмыт адӟон сярысь малпанэз куд-ог тодосчиос шонерен уг лыдъяло. Америкаысь Деннис Эйвери, кылсярысь, пусъе: "азьло компьютеръёс возьмато вал, температура туж юн ӝутскоз шуыса. Выльёсызгес компьютер модельёс адӟыто: огъя температура 2 градуслы сяна уз буды". Эйверилэн верамезъя, куазьлэн та выллем шуныт луылӥз ни шор дауръёсы. Со номыр уродзэ ӧз вайы, адямиос понна умоен гинэ берытскиз. Куазь воштӥськем бере тӧлъёс небытгес луозы, гужемъёс - пӧсьгес. Соин сэрен будосъёс кемагес сяськаяськыса но емыш сётыса улозы. Ӵемгес зорылоз, лымыялоз. Бадӟым сильтӧлъёслэн лыдзы кулэсмоз. Со сяна, нюлэсъёс ӟечгес будыны кутскозы. Талы юрттоз омырын йылэм углеродлэн двуокисез, кудӥз писпуос понна нимысьтыз "подкормка" луэ. Эйвери нялтас пусъе на: Арктикалэсь йӧссэ шунтон понна температура 6-9 градуслы будыны кулэ. Сыӵе пӧсь уз кариськы. Ӵем зорылоз, музъем кӧсаса, пильылӥськыса уз улы. Биологъёслэн чакламзыя, омырлэн кык градуслы шунытгес луэмез пӧйшуръёслэн улоназы номыр выльзэ уз вайы. Углеродлэн двуокисез йылэмен, бусыын нянь но ӟечгес потоз, емыш бусьтыр луоз. Эйверилэн кадь малпанэз Гуверов институтысь Гейл Мурлэн но. Гейл пусъе: куазьлэн шунытгес луэмез уйёс вылын шӧдӥськоз. Уй небытгес луоз. Вуоно даурлэн пумаз чаклано температура США-ын али ик луысал ни ке, соку корка шунтонлы ар понна висъям коньдон 12,2 миллиард долларлы шыръяськысал. Гейл Мурлэн малпамезъя, музъем вылын шунытгес луиз ке, дуннеысь калыклэн тазалыкез юнмалоз. США-ын гинэ ар ӵоже 40 000-лы ӧжытгес адями кулоз (арлы быдэ тамындаез страналэн сюресъёсыз вылын быре). Озьыен, кулэ ӧвӧл, "парниковый эффект" шуонэн нюръяськонлы трос коньдон кисьтыны. "Шунытгес, озьыен умойгес, - вера Гейл Мур, - узыргес бере - тазалыкогес, али кыӵе ке ужрадъёс кутыны тыршон - шузие кылён". Турциын уз вуы ананас Вылӥын пусъем эскеронъёс институтын ортчытъямын. Тодосчиослэн малпанъёссы ваче пумит вуо. Кин шонер? Шуг вераны. Нош кыӵе мылкыдын уло меда шаерысьтымы куазез эскерисьёс. Иж карысь Инкуазез эскеронъя но гидрометеорологияя центрлэн кивалтӥсезлэн воштӥсез Фаина Иосифовна Тимганова пусъе: "Куазьлэн пӧсь возиськемез герӟаськемын температуралэн ялан вошъяськеменыз. Али татын пӧсь улэ, нош Западной Европаын, Москваын ӵемысь зорылэ. "Парниковый эффект" сярысь со чик но уг вера. Бен, адями инкуазез пичи-пичи воштыны быгатэ. Йӧ зор, сильтӧл ваись пилемъёсты реогентэн ыбыло. Соку зор палэнтӥгес кошке. Но инкуазен ӵошатыса, адямилэн кужымез туж пичи. Кылсярысь, одӥг пол гудыръяса зорем ӵоже сомында энергия потэ, кӧня со быре дуннеысь вань гидроэлектростанциосын. Озьыен, инкуазь понна адямилэн кужымез номыр кадь ик ӧвӧл". Фаина Иосифовналэн верамезъя, куазьлэн пӧсь возиськемез умойлы гинэ. Та ласянь со быдэсак дурбасьтэ Гейл Мурлы. Со сяна, шаерысьтымы валтӥсь гидрометеоролог пусйиз на: "Удмуртия вож помидоръёслэн шаерзы шуэм туэ уз зэма. Асьмеос бакчаысьтымы ӵыж-ӵыж помидоръёсмес сиём. Нош Турциын таиз ар кезьытгес. Отын уз вуы ананас..." "Малпаськы яке кулыны дасяськы! Кытын ке уз вуы ананас, кытын ке помидор... Солы луыса гинэ калык уз быры. Но огъя ужпум, шӧдске, мургес кошке. Писатель но эколог Ричард Уайтфорд инкуазез утёнъя ужрадъёсты нырысь радэ ик пуктэ. 21-тӥ даурысь адямиослы, пе, малпаськоно асьсэ улонзы, котыр улоссы, музъемзы сярысь яке кулыны дасяськоно. Туннэ нуналлы 2500-лэсь трос валтӥсь тодосчи Музъемлэсь бадӟым шуг адӟонъёсы сюремзэ пусъе. Тодосчиослы пумит луэ 2000 пала экономист. Заводъёслэн но валтӥсь предприятиослэн кивалтӥсьёссы Музъем вылысь инкуазьлэн воштӥськемез ласянь адямиосты суран но алдан рекламаос понна 13 миллион доллар пала коньдон кисьто. Уайтфорд пусъе: "парниковый эффект" шуонэз дугдытыны луоз экономикалы бадӟым изъян вайытэк но. Бен, куд-ог удысъёслэн ыштонъёссы йылозы. Но мар ӟечгес: миллиардъёсын адями улонъёсты шуге-леке вуттон яке куд-ог адямиослэн барыш поттыса улэмзы? Нош инкуазьмылэн воштӥськемез, зэм но, шӧдӥське ни. США-ысь 3 университетын ужасьёслэн эскеронъёссы возьматӥзы: даур ӵоже музъем вылысь тужгес но пӧсь вакыт 1990, 1995 но 1997 аръёсы вал. Кызьы пусъе Масачусет университетысь одӥгез тодосчи Майкл Мэнн, история тодӥз пӧсь но, кезьыт но дыръёсты, но 20-тӥ даур пумын шуак шуныт луонэз номырин но ӵошатыны уг луы. Инкуазез шунды но вулканъёс гинэ уг вошто. Берло дасо аръёсы валтӥсь инты басьто омыре потэм газъёс. Соос ик "парниковый эффект" шуонэ вуттозы. Антарктида быроз Антарктида - йӧосын шобыртэм паймымон шаер. Куазь воштӥськемен, со быдэсак шунаны быгатоз. Соку музъеммы ву улэ ышоз... Осконтэм кадь "сомында йӧэз шунтыны луоз шат? Но 1998 ар февраль пумын спутникысь басьтэм иворъёс сюлэмшугъясьскыто. Ларсен-В нимо ледник бордысь 200 квадратной километр йӧ бусы пилиськем. 4 ар талэсь азьло Ларсен-А бордысь 1000 квадратной километръем йӧ мозмытскиз но кӧня ке нунал ӵоже гинэ шунаса быриз вал. Озьы сюрсо даур ӵоже кынмыса улэм чебер йӧ дунне бырыны ӧдъя. Одӥг-кык ар ортчыса, Ларсен-В бордысь 10000 квадратной километръем йӧ пилиськыны быгатоз. Азьланяз но тазьы ик луиз ке, Антарктидаысь вань йӧ быроз. Мар возьма Музъеммес? Оглом вераса, инкуазь воштӥське, шунытгес кариське. Нош умойлы-а со, аламалы-а? Та юанъя вожвылъяськонъёс ӟече уг вутто. Оло, зэм но, кыӵе ке ужрадъёс кутэмлэсь азьло, кӧня ке возьмано, чаклано на. Соку выль эскеронъёс вылэ пыкиськыса, югдурез но ӟечгес валаны луысал. Кин тодэ, мар возьма Музъеммес вуоно дауръёсы: ӝуаса, ву пушкы ышыса бырон яке шуныт азьын мултэс сюлмаськонъёстэк, узыр улон... ЕЛЕНА ПАНФИЛОВА. "ГЕРД" Ваче ки кутскыса Кызьы ивортӥмы вал ини, Ижевскын ортчиз финн-угор дуннеысь егитъёслэн кенешонзы. Дорамы ветлӥзы пӧртэм кунъёсысь ӵыжы-выжыосмы. Соос куиньмой ӵоже тупен-тупен сэрттӥзы-пертчизы егитъёс азьын сылӥсь ужпумъёсыз. Ижевскын ик ортчиз финн-угор выжыысь егитъёслэн огазеяськонзылэн (МАФУН-лэн) котырес ӝӧкез. Семинарлэн ужрадъёсаз пыриськиз "Герд" бамез дасясь писатель Кирилл Ломагин но. Куноос пӧлысь куд-огезлы со юромо вазиськиз, та страницае печатлан вылысь, ас малпанъёссэс, дэмланъёссэс вераны курыса. Туннэ вакчияк сётӥськом соосты. И - Одно ик кулэ калык университет! - озьы мытӥз веранзэ Кронид Корепанов, Татарстанысь Альматьевскысь муниципальной университетысь тодосчи, философия но социальной наукаосъя кафедраысь профессор, социологияя лабораторилэн кивалтӥсез, США-ысь Национальной георгафической обществолэн дано профессорез. - Удмурт госуниверситетын ужасьёс ӝоже медаз усе. Мон тодӥсько соослэсь трос ӟеч ужъёссэс, тау егитъёсты визьмо, усто будэтонэ вань кужымзэс сётэмзылы. Но УдГУ пуштросэзъя но, дышетон программаезъя но быдэсак тупа Россия Федерацилэн куронъёсызлы, нош Удмуртилэсь, удмуртлыклэсь кулэяськонъёссэ тырмыт уг быдэсъя кадь. Зэм, кыказ ёзэтъёсаз удмурт егитъёсыз асьсэ кылын ужаны дышето ик. Но со туж ичи. Чаклано ке, валтӥсь удысъёсын, кивалтонын удмурт ӧнерчиос туж ӧжыт. Соин ик, мынам малпамея, туж кулэ калык университет. - Тӥляд чакламдыя, кыӵе факультетъёсыз отын мед луысалзы? - Удмуртъёслэн, татын улӥсь музон калыкъёслэн ужпумъёссы туж трос. Туала улон ялан выль но выль куронъёс пуктэ. Мон тазьы малпасько: калык университет югдытыса мед возьысал улон-вылонмылэсь вань ёзъёссэ-удысъёссэ, сэрегъёссэ. Экономикаез но, политикаез но, культураез но. Пыр-поч мед эскерысал ортчем сюресмес но, азьлане вамышъёсмес но. Медам лэсьтылэ ни бадӟымесь янгышъёс. - Меӵак ӧй верасалды-а со факультетъёсыз? - Куд-огзэ али ик нимасал. Мукетъёсыз сярысь малпаськыны но кулэ на, дыр. Нимаз факультетъёсын мед эскерысалзы таӵе ужпумъёсыз: финн-угор эшъяськонлэн выжыосыз, герӟетъёсыз, государство но аскивалтон; финн-угор кылъёс но литература; финн-угор кылъёс но литератураос, философия но социальной наукаос, журналистика, тужгес но удмуртъёссэ гожъясьёсты дасян, этнология, фольклор, маркетинг но менеджмент, искусствоез эскерон, экономика но коньдон ужпумъёс, юриспруденция но мукет. Калык университет пыр ик ик эскерыны но выльысь берыктыны луысал бырем но юри быдтэм гуртъёслэсь нимъёссэс, ӟеч-ӟеч сэрттыны-пертчыны быгатысалмы выжыосмес, кытысь кылдэммес, туж пыдлось историмес. Выль университетын котыр ласянь дасяны луысал Россиысь но дуннеысь вань удмуртъёслы азинскыны юрттӥсь бадӟым программа. Со пыр ик ӟечгес утьыны быгатысалмы, дыр, пӧртэм-пӧртэм интыосын огазьынгес улӥсь удмуртъёслэсь кылзэс, культуразэс, ӟеч сямъёссэс, кырӟан-веранъёссэс. Бигеръёс тани ӟеч амалъёс возьмато та ласянь асьмелы. - Огъя егитъёсъя нош мар веранды вань? - Сюлмаськытӥсез трос. Югдур уродмемен, выльдӥськонмы мыдлане ӧръяськемен но мукет мугъёсын сэрен, уноез егитъёс туж курадӟо. Дышетскемзы но тросэзлэн йӧнала уг луы ни, ужтэк но кылё, тазалыксы но лябӟе, гылыт сюрес вылэ но султо. Будӥсь кивоштӥсьёсмес утись законъёс ӝоггес кутоно вылэм. Правооссэс утёно, медаз шеде наркоманъёс, лушкаськисьёс но мукетъёсыз радэ. Вылаз ик, мынам малпамея, со массовой культура шуонзы, кунгож сьӧръёсысь эрказъяськыны, адямиосты виылонэз, юмшанэз но музон урод сямъёсты возьматӥсь олокыӵе но фильмъёс асьмелэсь будӥсь пушъетъёсмес сӧро! Неушто кыӵе ке законэн кортнаны уг луы со кӧшкемыт, урод тулкымез? Монэ озьы ик туж сюлмаськытэ удмурт кыллэн каллен азинскемез. Та ласянь эшшо зол- зол малпаськоно на. Кылдытоно, мынам малпамея, кужмо, ужась группа. Собере Интернет сете но сэзьгес потоно ини. Валасько: капчи уз луы та вакытэ калык университет кылдытыны. Но тырмоз ини лулӟылыса, весь ултӥяськыса выллем пукыны. Нокин но ӧз ке басьтӥськы будон сюресмес паськытатон борды, озьы ик ялан векалом. Бен, калык университетлэсь кужымзэ туала улӥсьёс уз шӧдылэ ни, дыр. Но выль будэмъёс капчиен шокчозы, ӝоггес азьлань вамыштозы, асьмелы тау карозы. Сыӵе ужпум пуктоно туннэ. ИИ - Ваньдылы синмаськи, - тодматскеммы бере ик шуиз Александр Попов, Сыктывкарысь крезьчи, кырӟась. - Куинь нуналскын мон татын быдэс йырлы будӥ, узырми кадь. Удмуртъёс пырак матысь ӵыжы-выжыосы кадь пото. Уно выль эшъёс шедьтӥ. Мон ачим кырӟанъёс но гожъясько. Огзэ тӥляд самой чебер дыдыды Надежда Уткина но кырӟаз ни монэным ӵош. - Кырӟанъёсты бен трос-а ни? - Ӧвӧл ай, дас куинь гинэ. Но таӵе пумиськонъёс, бадӟым эшъяськон монэ выль гуръёс кылдытыны бурдъяло. Бен, сюлэмшугъёс уно. Асьмелэн каллен азинске культурамы, кылмы, бадӟым кивалтӥсьёс радэ но туж ичиез шедиськом. Но та семинарын выллем кенешонъёс азьланяз ӝог азинсконмылы оскон пыӵато. Уката ик тазьы, ваче ки, дэмен эскерылӥм ке могӟетъёсмес, уртче пусйылӥм ке сюресъёсмес. - Эшшо мар ласянь яраз на семинар? - Удмуртъёс туж ӟеч программа дасяллям. Мӧзмыны чик дыр ӧй вал. Кенешем сяна, туж тунсыкоесь ужрадъёс, пумиськонъёс вал. Суредасьёсын тодматскеме бере ик монэ утыр нуллӥзы Можга ёросысь Гербер праздниксэс пусйисьёс доры. Туж но туж яраз. Кырӟанъёсме но кузьмай гурт калыклы. Огкылын, бадӟым тау кенешонмес-дышетсконмес радъясьёслы. Финн-угор дуннеысь егитъёслэн огъя шундызы, центрзы, "Шундыды" сямен ик, татын, Ижевскын, мед луоз. Будӥсь ӵыжы-выжыосмы ӵемгес мед вуылозы милям шаерамы но! Выль кивалтӥсьёс тодон-валан люказы Удмурт Республикаысь Правительствоын кык нунал ӵоже дышетскизы районъёсысь но городъёсысь выль быръем кивалтӥсьёс. Соос пыр-поч тодматскизы Правительстволэн ёзъёсыныз, Аппаратэн но данак министерствоослэн ужаменызы. Нош кенешез усьтыса, Правительстволэн Тӧроез Павел Вершинин шуиз: - Шаерамы социально-экономической югдур уг умоя. Шуген мынэ дышетӥсьёслы, тазалыкез утён удысын тыршисьёслы но мукетъёсызлы уждун, нылпи пособие но пенсия тырон. Озьы ке но, ӝыны арлы ужаммылы йылпумъянъёс лэсьтыса, азьланьын коньдон ужпумъёсты умоятонъя ужрадъёс кутоно. Сое котькуд районын но городын быдэстоно. Бадӟым инты висъяно ваньбур поттонлы, промышленной но переработкая предприятиосты улӟытонлы. Республика азьын лэчытэсь ужпумъёс сыло. Я, бен, ваньмыз-а сокем лябӟемын ни? Быдэсак озьы шуыны уг луы. Тани Воткинск ужа ук, кык предприятие (кирпич шуккон но радиотехнологической оснащениея завод) гинэ али бере кылё, изъян адӟо. Таоссэ но ӝутонъя ужрадъёс чакласько. Татын зол шӧдӥське городысь мэрлэн Валерий Фридрихлэн тыршемез-сюлмаськемез. Солэсь адӟем кароно, ужаны дышетсконо. Озьы ик шуыны луоз вавожъёс сярысь. Соослэн музъемен ӟеч ужамзы туэ нош ик син азьын. Гужем пӧсь ке но улӥз, ю тысь кутсанъя вань ёросъёсты но азьпалто ни. Чылкак пӧртэм югдур Сарапул городын. Татын югдурез тупатон вылысь, социально- экономической азинсконъя программа дасяно луоз. Кенешын озьы ик вераськон вал толлы, выль дышетскон арлы дасяськон, бусы ужъёслэн мынэмзы, кун властьлэн но интыысь ас коже кивалтонлэн кусыпъёссы но музон ужпумъёс сярысь. Кыкетӥ нуналаз кивалтӥсьёс тодматскизы Тазалыкез утёнъя, Экономикая, Улон-вылонын калыкез утёнъя, Калыкез дышетонъя, Культурая, Гурт хозяйствоя но сиён-юонъя министерствоослэн но Архитектурая но лэсьтӥськонъя комитетлэн ужан амалъёсынызы. Толон, 12 августэ, кенеш ужзэ йылпумъяз. Г. РОМАНОВ. Кышкытлыклы пумит Туала Россиын улӥсьёс пӧлысь 3-7 процентэз наркотикъёсын "эшъясько" (дуннеын - 1-2 процентэз). Соос пӧлысь ӝыныезлы ВИЧ-инфекция паласькемын. Наркотикъёсын визьтэммыса бырись муртъёслэн лыдзы арысь аре йылэ. Таӵе югдурлэсь кышкытлыксэ валаса, Удмурт Республикалэн Правительствоысьтыз наркотикъёсты вӧлмытонэн нюръяськонъя комиссия нимысьтыз постановление юнматӥз. Чакламын йырсазез усыкмытӥсь арбериосты вӧлмытонэн но бергатонэн нюръяськонъя программа кылдытыны. Городъёсысь но ёросъёсысь администрациос ужрадъёс ортчытыны кулэ, калык пӧлын валэктон уж нуон, кулэ дыръя юрттэт сётон понна. Соин ик ёросъёсын наркоманъёсты эмъянъя центръёс кылдытыны дэмламын. Калык пӧлын валэктон уж нуонлы озьы ик бадӟым саклык висъяны кулэ газетъёс, журналъёс, телевидение но радио. Локусалу бере - Сыктывкар Йошкар-Ола, Эспо, Эгер, Локусалу... Кутскон сётӥзы 1989 арын поръёс, собере, котькуд кык ар ортчем бере, финн, мадьяр, эстон каръёсын ортчылӥзы финн-угор писательёслэн ӧтчамъёссы. Эстониын люкаськылэм бере, тани нош ик кык ар ортчиз... Редакциямы жингыртэ Финн-угор писательёслэн огазеяськонзылэн кивалтӥсез тодмо эстон гожъяськись Арво Валтон (со Удмуртие кык пол вуылӥз ни): - 19-22 августэ Сыктывкарын, Коми Республикаын ортчоз финн-угор писательёслэн В калык куспо конгрессы. Возьмаськом удмурт эшъёсмес но... Кызьы тодмо луиз, та конгрессэ ӧтемын тодмо литераторъёсмы Фома Ермаков Анатолий Уваров, Виктор Шибанов но Олег Четкарев. Пӧртэм секциосын ужаса, соос пыриськозы таӵе темая вераськонэ: "Финн-угор литература: огъяез но аспӧртэмлыкоез". Арво Валтон шумпоттӥз на: ӝоген Эстониын потыны кулэ ньыль удмурт нылкышно кылбурчиосмылэн (А. Кузнецовалэн, Л. Кутяновалэн, Г. Романовалэн но Т. Черновалэн) удмурт но эстон кылын огъя кылбур сборниксы. Презентацие дорады одно лыкто, оскытӥз Арво Валтон. Т. НИКОЛАЕВА. ЭКОНОМИКА УДЫСЫСЬ Маял вылын кадь шуак ӝутскиз Котькытын кузёяське чылкытлык Дас ар талэсь азьло Сарапулысь сур но дрожжи поттон завод берпум нуналъёссэ векаса кадь улэ ни вылэм. Татчы вуылэм эскерисьёс завод сярысь таӵе гожъямъёссэс кельтӥллям: валтӥсь корпуслэн кирпичъёсыз пилиськылэмын, куашкам борддоръёс адямиослэн улонзылы кышкытлык кылдыто, столовоез ужатыны уг ни луы, вентиляция уг ужа, складъёс музъеме пыремын. Зэмзэ но, таӵе завод ворсаськысал ке, со сярысь куректонэз ик ӧй луысал, угось солэн ужан вакытэз кемалась ортчемын ни: заводлэн сур поттон юртъёсыз 1832 арын лэсьтэмын, маял (дрожжи) поттонъя - 1898 арын. Ужасьёсыз но бен сыӵегес гинэ вал: юисьёс но пытсэт сьӧрын пукемъёс. Но вашкала заводэз утьыны выризы. Оскизы, оло, мар но со пӧрмоз на. Воштӥзы кивалтӥсьёссэ. Ӵапак 10 ар талэсь азьло татчы валтӥсь инженер луыса ужаны ыстӥзы егит, мыло-кыдо воргоронэз Анатолий Александрович Быковез. Директоре юнматӥзы Николай Петрович Юшковез. Табере заводлэн азьвыл вылтусыз сярысь верало туспуктэмъёс гинэ. Ӧйтӧд, кинлэн йыраз малпан кылдэм сыӵе альбом лэсьтыны, но со туж ӟеч возьматэ заводлэсь азинскемзэ. Заводлэсь выльдӥськемзэ возьматӥсь снимокъёс сьӧрын, валамон ини - коллективлэн берло аръёсы сюлмо ужамез. Предприятиослэн тэк сылэмзылы али уд ни паймиськы. Республикаысьтымы сюлэсь ятыр предприятиос пӧлысь уждун дыраз тыриське кызё пала предприятиосын гинэ. Огез соос пӧлын - Сарапулысь сур но дрожжи поттон завод. Предприятие интыяськемын городлэн шораз ик. Яркыт буёлъёсын чебермам корпусъёс суред вылын кадь адӟисько. Нош заводлэн азбараз пырыса ми, газетчиос, нырысь дол-дол сылӥмы. Туала улонысь шуак кыӵе ке чебер выжыкылэ кадь пыримы. Ӵужем-миськем азбарын олокӧня пумо сяськаос будо. - Кин соосты утялтыса возе? - паймыса юасько Анатолий Александровичлэсь. - Ваньмы, - шуиз со. - Вань подразделениос куспын чылкытлыкъя, чеберлыкез возёнъя ӵошатскон радъямын. Зэм, быдэс заводын кузёяське чылкытлык. Огез корреспондентмы тамак пумзэ кытчы куштыны ёрмыса, кема гинэ утчаськиз. Озьы ик татын ужасьёслэн но табере кизы уг ни ӝутӥськы выж вылэ яке азбар шоры кыӵе ке жуг-жаг куштыны. Тӥни озьы заводлэн выль кивалтӥсьёсыз ас ужзэс мытӥллям ужасьёссылы вылӥ культуарез пыӵатон бордысен. Табере татысь 340 пала ужась уг ни паймы чилясь агрегатъёслы, тӧдь-тӧдь ӵушконъёслы, ялан ужась сауналы. Ӟечезлы дышыса, адямиос ужзы понна юн возисько. - Юисьёс но ӧвӧл, ужысь улляны нокинэ, - серекъяса вера валтӥсь инженер. - Нош кызьы нюръяськиськоды лушкаськисьёсын? - Сыӵе учыръёс туж шер луыло. Кин сюре - ачиз куректэ. Ужтэк кылемлэсь кышкало. - Ма, неужто заводысь сур но, маял но уг потто? - Огпол кутӥм сыӵе муртэз. Ужысь ӧм уллялэ. Но со интые быдэс бригадаез кыл кутытӥм. Собере тазьы малпаськоно ке, кинлэн дунтэм сур яке маял понна коньдоно ужзэ ыштэмез потоз. Нош кинлы ке сокем кулэ ке, вазиськыны гинэ кулэ - сётӥськомы. Ческыт сур но умой маял поттон понна данак амалъёс вань. Анатолий Быковлэн верамезъя, продукцилэн ӟечлыкез вылын сю пумо муг шӧдӥське. Дисциплинаез но культураез юнматон - со сю пӧлысь ӧжытэз гинэ. Тросэз потэ на ог-огедлы оскыса, эшъяськыса ужан бордысь но. - Озьы ужан понна нокыӵе профсоюз кулэ ӧвӧл, - шуэ Анатолий Александрович. - Огпол ваньмы ӵош люкаськыса кенешим: мар кароно, мӧзмыт улонмес зуркатон понна. Малпамы спортъя ӵошатсконъёс ортчытъяны. Утялтӥмы жуг-жаг куян интыез, отчы лэсьтӥмы площадка. Ортчытӥм ни баскетболэн шудонъёс, али тани ӵошатскиськом футболэн шудонъя, бӧрысь луозы теннисэн, шахматэн шудонъёс. Ваньзы пырисько, директор но, мон но командаосын шудӥськомы. Ужасьёс сярысь сюлмаськон нуналлы быдэ мынэ. Татын быгато ӧжытак ке но азьпала учкыны. Шӧдӥзы: азьланяз квартираос сётъяны уз быгатэ. Соин ик квартиралы кулэяськисьёслы ас вакытаз ссудаос сётъязы. Пырим огаз цехе. Чал-чал. Ужасьёс уг адӟисько. Малы? - Сылӥскьом, электрокужымез шыръян вылысь, - валэктэ Анатолий Александрович. - Дас нунал рос-прос ужаськом, 5-7 нунал шутэтскиськом. Озьы ужаса, туж трос шыръяны луэ вылэм вуэз, шунытэз. Соин ик со понна тыронъёсмы но ӧжыт люкасько. Кылсярысь, одӥг тонна дрожжи поттон понна азьло аръёсы 150-170 кубометр ву кошкылӥз. Нош одӥг сутка ӵоже 15-18 тонна маял поттыны луэ. Озьыен, кӧня солы ву, тыл быре. Ваньзэ шыръяса ужаны кутскеммы бере, табере одӥг тонна маяллы ик 70-80 кубометр гинэ ву кулэ. Шыръяса ужамлэн пайдаез шӧдӥське уждун вылын - шорлыдын вераса котькуд толэзе адямилы быдэ 800 манет усе, со Удмуртиысь предприятиослэн шоро-куспо уждунзылэсь ӧжыт ӧвӧл. Сур - кудӟытӥсь юон "Предприятиын укмыс пумо сур потто. Асьсэос ужасьёс вылӥгес дунъяло вылэм "Жигулёвскойзэ". Малы? Та юанлы валэктон понна Анатолий Александрович кӧня ке бутылкаосысь пивоез шӧмъяны лэзиз. Озьы ӵошатыса эскерыку гинэ валаны луэ вылэм пӧртэм суръёслэсь шӧмзэс: огез курытгес, мукетыз кизергес, куинетӥез укыр нап. Тани "Портер" пиво мукетъёсызлэсь висъяське тём-курень буёлэныз, напеныз - гуртын пӧзьтэм сурлыгес кельше. Со, пе, нылкышноослы золгес кельше. Дуныз но, мукет суръёс сярысь, кык поллы бадӟымгес. Кызьы валэктӥз Анатолий Быков, таӵе сурез дасяны кӧня ке пумо ӵужъем (солод) мынэ, нош йылаз-пумаз вуттон понна 90-100 нунал кулэ. "Жигулёвскоез" лякытгес дасяське, 28 нунал куспын вуэ ини. Сур кудӟытӥсь юонъёс пӧлы пыре. Но сое юыса гинэ, нокыӵе аракыосын суратэк, ноку тяп-тяп уд кудӟы - тазьы лыдъяло тросэз татын ужасьёс. Эмъясьёслэн ыстэмзыя, татчы сурлэсь маялзэ басьтыны шуыса ӵем вуыло кӧтпуш, пекля, мус висёнъёсын курадӟисьёс. Кемалась тодмо ини: сур выльдэ, егитомытэ мугорлэсь клеткаоссэ, поттэ ядъёсты. Соин ик сурез юыны ӵекто макмырен курадӟисьёслы. Пайдазэ будэтон понна, татын пӧртэм эскеронъёс мыно, кылсярысь, малпало сур пушкы бифидумбактериосты лэзьыны. Соку сыӵе сурен кӧтпуш висёнъёсты чалякгес эмъяны луоз. Та ужез заводысь микробиологъёс учёнойёсын но эмъясьёсын ӵош нуо. Азьланяз, оло, "курдӟытӥсь" сурлэн тазалыклы пайда ваемез мукет ласянь но шараямын луоз на. Тӥни озьы берло аръёсы выльдӥськыны быгатӥз та пичи завод. Котьма ке но, коллективлэн ужаны быгатэмез потэ кивалтӥсь бордысь. Адямиосты гажан, соос сярысь сюлмаськон вань ке, ӟеч ужан амалъёс но вормонъёс асэрказы кадь лыкто. Т. БАННИКОВА. Заводысь валтӥсь инженер А. Быков. Лабораториын ужасьёс О. Кузнецова, С. Розенштейн, Н. Ткачева. Туспуктэмъёсыз В. Камашевлэн. Мылкыдме сӧризы... Арлыдын мон егит ӧвӧл, соин, лэся, "горд" праздникъёсы дышем сямыя ялан ветлӥсько митинге. Туэ ужрадын монэ одӥг флаг туж сюлэмшугъяськонэ уськытӥз. Со улсын сыло вал школаын дышетскись пиналъёс. Соосын таӵе вераськон кылдӥз: - Мар флаг та? - Российской империлэн. - Со - ортчем история. - Ми выльысь ӟучъёслэсь империзэс берыктомы. - Кыӵе луоз со? - Прибалтикаысен Курилозь, уй паласен лымшорозь. - Озьыен, инвис сьӧры учкиськоды? - Озьы. Южанъёсты шымыртомы, Дальней Востокысь китаецъёсты кужмысь улляломы. Ми ӟучъёс - бадӟым калык. - Кинэн артэ ӵошатыса. Дунне вылын котькудӥз ньылетӥез - китай калык. - Нош тӥ, асьтэос кытысь луиськоды? - Татысь. Удмуртиысь. - Атайды, песятайды?.. - Соос но татысь. Озьы бере, малы тӥледлы инвис сьӧры учконо?! Юанъёс, юанъёс. Удмурт шаерамы му вӧез вузало, нюлэсмес тус-тас корало. Экономикамы но гурт хозяйствомы куашкамын. Табере Москва шуэ, музъеммес, пе, вузаломы. Тани мар сярысь сюлмаськоно вылэм туала пиналъёслы. Вӧзтӥзы солань-талань адямиос ветло, татын ик милиция но - нокин но соосты уг адӟы кадь. Демократия?... Ӧвӧл! Демократилэн вань золэсь куронъёсыз. Эрказъяськыны уг яра. Туннэ имперской флаг ӝутозы, ӵуказе - фашистъёслэсь. Гожтӥсько, социализмез, коммунизмез ушъятэк. Тӥни озьы митингысь урод мылкыдын бертӥ. А. СТЕПАНОВ. Спорт улоз! Озьы шуыны луоз республикаысь нылпи спортлэн азинскемезъя. Ижевскъя верано ке, татын валтӥсь интые потэмын 46 пумоез. Соосъя ар ӵоже 200 пала ӵошатсконъёс чакламын, ӝыныезлэсь ятырез ортчиз ни. Пусйыны кулэ футболэн шудӥсьёсты. "Кожаный мяч" приз понна нюръяськонын Ижевскысь команда шедиз зональной ӵошатсконъёсы. Матысь дыре соос ортчозы Ивановоын, берпуметӥ нуналаз вормисьёс шудозы Москваысь "Москвич" стадионын. Нылпи спортлы Ижевск городлэн администрациез бадӟым инты висъя. Со сярысь журналистъёслы вераз Т. А. Пензина, мэриысь физкультурая но спортъя комитетлэн кивалтӥсез. Москваын ортчем Всемирной юношеской шудонъёсысь 2 азвесь медален бертӥз Сергей Мокрушин. Пусйыны кулэ велосипедэн ворттылӥсьёсты. Соос 7 награда: 2 зарни, 3 азвесь но 3 бронза басьтӥзы. Кыкез нылъёсмы - Мария Феклистова но Александра Колясьева, Россилэн сборнояз шедьыса, странамылэсь данзэ утёзы 2000-тӥ арын Сиднейын ортчоно Олимпийской шудонъёсын. Л. ДМИТРИЕВА. "Улон-питран" - Финляндиын Пӧсьтолэзе егитъёслэн "Катанчи" театрзы аслаз быгатэменыз паймытӥз финн калыкез: татысь артистъёс шумпотыса пыриськизы Финляндиысь Нурмес городын ортчем театр фестивале, ӵыжы-выжыосмылэн музъемзы вылын пумиськизы пӧртэм кунъёсысь дас сизьым театрысь эшъёсынызы. Нош Россилэсь данзэ утиз "Катанчи". "Улон-питран" моноспектакльзы пумысен артистъёслы трос шуныт кылъёс веразы. Сюлмысь шуизы: "Тӥляд ужды пыр, зэмзэ но, адӟоно удмуртъёслэсь улэм-вылэмзэс. Пуштросэз туж валамон но тунсыко". Нош асьсэос егитъёс данъяськыса выллем верало: "Катанчи- ысь" артистъёс бордысь зэмос пиосмурт кужым вуэ учкисьёс доры. Артистъёс фестивальысь мукет ӧтён но ваизы ини. Вуоно арын соосты возьмалозы Финляндиын ик ортчись мукетаз фестивальын. - Кылем пумиськонысь трос кулэзэ но, паймымонзэ но басьтӥмы ми асьмелы, - пусъё артистъёс. - Аслаз аспӧртэмлыкеныз паймытӥз финн театр. Ӵыжы-выжыосмы нюлэскын нокыӵе декорациостэк спектакль пуктӥзы, Сое учкеммы бере, ми малпаськонэ усимы": "Асьмелэн но вань, дыр, ук таӵе интыосмы". Кунгож сьӧры потамзы бере, соиз но син шоры йӧтэм: та дунне вылын улӥськод бере, одно ик тодыны кулэ кӧня ке кыл. Тужгес ик - англи яке немец кылъёсты. Финн музъем вылэ вуэмзы бере ик кыл нырысетӥ могӟетсы луэм. Финнъёс коньдонэн юрттӥллям. "Катанчиысь" артистъёс кунгож дорозь но доре выльысь бертон сюрес понна гинэ тыроно луиллям. Мукетсэ быдэсак ас вылаз басьтэм Финляндия (таӵезэ та вакыт туж шер пумиталод). Со сяна, театрез выль кузьымен но ӟечкыланы луоз. Фестиваль кузёос удмурт пиосмылы барабанъёссэс куасьтон арбери сётӥллям. Оскон кылдэ: сыӵе йӧно воргоронъёслэн азьпал улонзы эшшо но ӟечгес луоз. Кыдёкегес кылӥськоз барабанзылэн куараез. О. ЧЕРНЫШЕВА. "Катанчиысь" быркытъёс. Чебер ик тон, удмурт кышномурт. Удмурт бусыосын - "немецъёс" Бусы ужъёссы туэ адӟем карымон мыно Вавож ёросысь хозяйствоосын. Огъя югдурез валэктыны курыса, ми толон телефон пыр вераським районысь администрацилэн тӧроезлэн нырысетӥ воштӥсеныз Геннадий ШУБИНЭН. - Туннэ нуналлы ёросамы гектарлы быдэ шорлыдын 12 центнер ю тысь кутсаськом. Зэм, котькуд эштосын лыдпусъёс пӧртэмесь. Тани, кылсярысь, Мичурин нимо, "Удмуртия" но "Колос" колхозъёсын 17 центнер усе, нош Киров нимо, "Авангард", "Лыстемский", "Рассвет" эштосъёсын - 4-5 центнер гинэ. Районамы Германиысь ньыль комбайн ваемын. Номыр уд шуы, азинлыко ужало соос. Выль машинаос тыршо тужгес удалтэм ю бусыосын. Югдур секытгес эстӥськон ласянь. Вуж техника сярысь веранэз ик ӧвӧл ни. - Маингес аспӧртэмлыко вал таиз гужем? - Вераны кулэ тани мае. Туэ районмы быдэс элькунъя кизёнзэ котькинлэсь вазь йылпумъяз. Но солэн кык пумыз вылэм. Нырысь ик, бергес кизем валэс юос ӟечгес удалтӥзы. Уродгес тысязы вазь вуись юос. Собере туэ ӟеглэн кидысэз туж векчи кылиз. Соин ик кизьыны тыршиськом мимала кидысэн. Кизён сярысь вераськон мытӥмы бере, кӧня ке кыл со пумысен. Та дырлы киземын ни 20 процентлэсь уноез толйись юос. "Риск" но "Лыстемский" эштосъёсын со уж йылпумъяське ни. - Нош пудо сиён дасян но йӧл вузан ласянь кыӵегес югдур? - Туэ куазь кӧсгес улӥз бере, кӧс турын, кылем арын сярысь, ӧжытгес люкамын. Сенаж тырмыт луоз. Нош силос дасян мынэ на. Ӟеч жалем сиён сётыны кулэ кукуруза. Йӧлмес, кылем арын сярысь, тросгес вузаськом, нуналлы быдэ сое 11 тонналэсь уно келяськом. Н. ЛЯЛИН. Шайгу пазясьёс Асьме шаермы археологической памятникъёсын узыр. Та сярысь комиослэсь но удмуртъёслэсь историзэс эскерись тодосчиос сяна, гинэ уг олокыӵе лушкаськись- вузчиос но тодо вылэм. Пермьын вашкала арбериосын вузкаро шуыса, кылылӥм вал ини. Но татчыозь со милемыз туж ӧз шугъяськыты. Нош 1998 ар пыд йылысь ӧжыт ӧз погырты Можга ёросын лушкамын гыркаса лэсьтэм тыпы корос лы сьӧмыныз валче; Глазов котырысь Иднакар шуиськись интыез (татын улӥллям вашкала удмуртъёс) копаса, вашкала синпелетъёс лушкамын. Нош июнь толэзе тодмотэм муртъёс иномаркаен вуиллям Дэбес ёросысь Варни гуртэ, асьсэды археологъёс шуиллям но татысь трактористэз Александр Наумовез косӥллям В-ЪИ дауръёсысь шайвылэз сузяны, ужамез понна 50 манет тыриллям. 40 шайгуосты усьтыса, ужан, пыӵал, вӧсяськон тӥрлыкез лушкаллям. Удмуртилы но Россилы кӧня изъян ваемын, шуг вераны. Огез тодмо: та арбериослэн дунзы уно миллион манетэн лыдъяське. Та лушкаськисьёс ик Тольон шайвылэз копаллям. Оло, Пермь областетӥ но кырныж сямен котыръясько. Та сярысь милемлы ивортӥз Пермь пединститутысь учёной А. М. Белавин. Паймытэ лушкаськисьёслэн эрказъяськемзы. Соос Варни дорын кӧня ке нунал улӥллям, гурт нылъёсын шулдыръяськиллям. Одӥг мурт но шӧдскымтэ, зэмос археологъёс асьсэды озьы уг возё шуыса. Ми вазиським прокуратурае, та ужпумъя уголовной уж ӝутыны курыса. Дэбес ёросысь криминальной милицилэн кивалтӥсез старшой лейтенант С. Касаткин ивортӥз, лушкаськисьёс тӧдьы буёло "АУДИ" машинаен вылӥллям, номерез 39 лыдпусэн быре шуыса. Озьы тодмо луиз: иномарка Калининградысь вуэмын. Калининград быдэс Россиез та выллем иномаркаосын тырмытӥз ини, асьмелэн улонлэсь бергамзэ валасьтэм пинкертонъёсмы гинэ кожало, лушкаськисьёс шаерамы Россилэн сопал пумысьтыз вуизы шуыса. Валамон, соиз но: вашкала арбериосын вузкарисьёс кунгож сьӧрен кусып возё. Соин ик Удмуртиысь но Россиысь прокуратураос, таможня ужрадъёс ӝегатскытэк ортчытыны кулэ. Удмурт Республикаысь Правительстволы но вазиськем потэ, учёнойёслы, экспедициосты ортчытонэ коньдон висъяны курыса. Нош али малпан кылдэ, кивалтӥсьёсмы историлэсь дунзэ уг валало шуыса(тазьы шуыны уг луы лушкаськисьёс сярысь), уг тодо, кыӵе изъян ваемын калыклы но государстволы. Малпалэ ай: 1998 арын историяя, кылъя но литературая институтлы бюджетэн чаклам 35 сюрс манетысь одӥг копейкаез но ӧз вуы на. Табере берлоез, куинетӥез. Ми ум быгатэ лушкаськисьёслы, историез ултӥясьёслы пумит нюръяськыны, котькудмы асьмеос, Удмуртиын улӥсьёс, узырлыкмылы, музъеммылы кузё ӧм кариське ке, осконтэм муртъёслэн озьы яке тазьы выремзы сярысь прокуратурае яке милицие ӧм ивортылэ ке. Йыруж лэсьтӥсьёсын валче кужымен нюръяськоно. К. КУЛИКОВ, исторической наукаосъя доктор, Удмутиысь Историяя, кылъя, литературая институтлэн директорез. Ӧтиськом куное Ижевскысь Кировлэсь нимзэ нуллӥсь парк огез вашкалаез луэ. Та нуналъёсы пусъе 64 ар тырмонзэ. Шулдыръяськон ортчоз 23 августэ, кутскоз нуназе шорын 12 часэ. Люкаськемъёсты шулдыртозы артистъёс, чакламын спортивной ӵошатсконъёс, городысь художникъёслэсь выставказэс возьматон, дӥськут вуронъя "Фиалка" центр тодматоз сӥзьыл куазьлы тупась модельёссэ. Пиналъёс понна дасямын шудонъёс, конкурсъёс. Вордскем нуналзэ пусъёнэ парк ӧте вань мылкыд карисьёссэ. О. ТИМОФЕЕВ. "Дэменлэн" дэмланэз луоз Мари Эллэн шоркараз Йошкар-Олаын туэ 19-21 шуркынмонэ ортчоз "Финн-угор дуцнне но ЪЪИ даур" калык куспо симпозиум. Отын эскеремын луозы финн-угор дуннеысь пӧртэм- пӧртэм ужпумъёс: социально-культурной удысэз азинтон, туала секыт югдурысь потон амалъёс утчан, ог выжыысь потэм калыкъёслэсь кунлыксэс радъян, дышетонэз туала куронъёсъя выльдон, калык сямъёсты-йылолъёсты утён но мукет. Удмурт культурая "Дэмен" огазеяськонлэн правлениез алигес та симпозиумлэсь программазэ эскериз. Финн-угор калыкъёслэсь кылзэс, культуразэс утён но азинтон вылысь, Россиысь, Венгриысь, Финляндиысь но Эстониысь калыкез дышетонъя но культурая министерствоос куспын меморандум дасяське. Симпозиумез радъясьёс куро солы проектэ дэмланъёс ыстыны. "Дэмен" огазеяськон вылысь ас эшъёссэ люка 18-тӥ августэ. Т. ПЕТРОВА. ВАЛЭКТЭ ЮРИСТ Сэрегез нуэ адвокат Лилия Шкляева Кызьы тыриське уждун? Мон ужасько Пичи Пурга ёросысь нылпи садын, сиён пӧзьтӥсько 1973-тӥ арысен. Няняос но сӥён дасясь азьло одӥг кадь уждун басьто вал. 1996-тӥ арысен соослэн шӧдскымон будӥз, мынам кылиз озьы ик. Нянялы сёто 330 манет, мыным - 170. Ужасько 8 часысен 16-ёзь. Выж миськисьёс 2-3 часлы ветло. Окладзы мынэсьтым ятыр. Малы сиён пӧзьтӥсьлэн сыӵе ӧжыт уждунэз? Е. Шапошникова. Жаляса верано луэ: тӥ ӧвӧл вераллямды нылпи садлэсь кузёзэ. Мукет сямен ке, кыӵе асваньбурен (собственностен) со ужа? Тае тодытэк, меӵак валэктон сётыны шуггес. Россия Федерациысь Уж сярысь законъёсын кодекслэн 80-тӥ ёзэтысьтыз (статьяысьтыз) 2-тӥ люкет таӵе юанлы оглом тазьы валэктэ. Предприятиос, учреждениос, организациос уждун тырон амалъёсты, тарифъя ставкаосты, окладъёсты, пермиосты но музон тыронъёсты, соослэсь пӧртэм ужасьёс понна быдӟалазэс тупато ас кожазы, соосты юнмато коллективной договоръёсын но музон актъёсын. Соин ик тӥ вазиськыны кулэ нылпи садысь яке солы кузё луись ёзысь коллективной договорен яке уждун тырон сярысь положениен. Уждунэз ваньмызлы яке кинлы ке гинэ будэтон сярысь учыръёс озьы ик пусйисько нормативной актын, юнматӥсько кивалтӥсен. АНДРЕЙ БУТОЛИН Серем пыр Чебершур но пожву Чебершур... Чильырак чильыра, Дун вуэз синучкон кадь чылкыт, Гучыкен юымон - туж ческыт. Вож возьёс, сяськаос котыраз. Шукырес сильзорез но адӟе Чебершур, Со уг кышка солэсь. Уката чылкытгес со бызе - Уйёсы пылаське юг толэзь. Саптаськем пукись ву тыметысь Ӟизыра кырсь пожву сумедэн, Уката пожаське со зорен. Чебершур визылэз со турттэ Саптаны жуг-жаген. Ушъяське, йӧнъяське. Шур уг сётскы солы, Мозмытске кырсь вуэз сумедлэсь, Чильыра чиль сайкыт визылэн, Шумпотон со вае калыклы. Пожвуос озьы котьку пото Саптаськем пукись ву тыметысь. Кырсь кылъёс но озьы ик кылдо Эгырӟем но пыкмем сюлэмысь. *** Сиресь лӥял ялан ушъяськылэ: - Мон музъемлэн юн гогыез. Нокин уг вормы порыны со лӥялэз. Зол ӝабырскем солэн кузь выжыез. Дэмлан: сюрес вылад ке со лӥял шедиз, Оло, ортчод палэнэтӥз, Лӥял бере лӥял ни со - мед сисьмоз ачиз. Одӥг писательлы Малпаськод тон ас кожад: "Мон кадез ӧвӧл поэт". Гений тон астэ кожад,- Со - оскисьлы синпӧет. Уногес мултэс кожад Градусъёс доре. Ворме тонэ табере Творческой пыэд. *** Малы ваньзэ курласькод, Кин сыӵе бен тон? Вань малпанэд - анекдот, Лек кылын шудон. Мар меда ӵектом тыныд, Оло, витёд шуныт кыл? Ӵок бен, шуд тон кылыныд, Шуд! Лытэм ведь кыл... Тӧлъя-буръя кошке Удмурт шаермылэн инкуазь узырлыкъёсыз пӧлы пыре Кама шурысь луо но кӧльы. Но сое утён но поттон кулэезъя радъямтэ. Кылсярысь, Правительстволэн Тӧроез Павел Вершинин ивортэмъя, Каракулино дорын земснаряд луо но кӧльы миське, нош кинлэн со - нокин уг тоды. Кытчы лэсьтӥськон материал кошке, верась-юась ӧвӧл. Озьыен, предприятие инкуазь узырлыкез поттэм понна нокыӵе выт но уг тыры. Тӥни озьы но коньдонмы тӧлъя- буръя кошке. Г. ВАСИЛЬЕВ. Висисьёслы юрттэт Воткинскысь аптекаосын июньлэн пумаз дунтэк но дунтэм дунын эмъюмъёсты вузан дугдытэмын вал. Мугез валамон: бюджетлэн куанермемез. Та нуналъёсы тужгес но лек висисьёслы юрттон амал шедьтэмын. Соин ӵош будӥзы городлэн но аптекалэн тыронъёсыз. Югдурез тупатыны юрттоз "Фармаимпэкс" ТОО-лэсь выль аптеказэ Воткинскын усьтон. Матысь дыре со ужаны кутскоз. ПРАВИТЕЛЬСТВОЫСЬ ИВОРЪЁС "Ростекстиль" - Удмуртия Удмурт Республикаысь Правительство но акциосын "Ростекстиль" огазеяськон кусып возён сярысь огкыл гожтӥзы. Концерн чакла "Сактон" но "Шаркан-трикотаж" фабрикаосын ваньбур поттонэз выль сямен радъяны. Со сяна, "Ростекстиль" выль технологиос но обрудование басьтоз, Удмуртиын поттэм вузъёсты Москваын но кунгож сьӧрын вузалоз, кун заказ понна коньдон тыроз, куиськон промышленностез ӝутон понна, конверсия улэ шедем предприятиослэсь кужымзэс кутоз. Документ возьматэ, Удмуртиысь Правительство куиськон промышленностез юнматон сярысь сюлмаське шуыса. Удмурт Республикаысь Правительстволэн Тӧроезлэн секретариатысьтыз пресс-центр. ТОЛЛЫ ДАСЯСЬКОН Вань-а эстӥськон? - Вань, - Правительствоын журналистъёсын пумиськон дыръя шуиз "Удмуртлестоппром" кун предприятилэн валтӥсь тӧроез Анатолий Перевозчиков. - Республикалы тол азелы ичизэ 170 сюрс тонна музъем эгыр но 1,5 миллион кубометр пу кулэ. Июле шаерамы 15 сюрс тонна эгыр вуттэмын, нош августэ 20 сюрс тонна вайыны малпаськом. Эстӥськон сётӥсьёс милемды валало, коньдон вуытэк но эгыр келяло на. Эгыр Кузбассысь басьтӥськом, ӟечлыкез но урод ӧвӧл, данаклы дунтэмгес но усе. "Чугун сюрес вылын ожмаськон" (музъем эгыр поттӥсьёслэн пумитъяськонзы) милемлы ӧз люкеты на. Одӥг куиньмоссэ пу асьмеос дасяськом. Нош азьло леспромхозъёсыз акциосын огазеяськонъёс луизы но "Удмуртлестоппромен" огкыл гожтыса ужало. Маин бен та ёз выре? Предприятие азьын одӥг ужпум сылэ - калыклы но коммунально- бытовой предприятиослы эстӥськон сётон. Калыклы со дунтэмгес (ӝыны дунын) вуза. Транспорт но озьы ик висъя интернатъёслы, клубъёслы, библиотекаослы, медпунктъёслы но мукет учреждениослы эстӥськон дыраз вуттэ. Соин ӵош ик предприятие ачиз пу дася, мебель лэсьтэ, сад-бакча возисьёслы корка бугроос ӵыпе но мукет. Но эстӥськон сётӥсьёслэн ваньмыз ӟеч, шуыны уг луы. Соос но нимаз шормуӵын ӧвӧл. Туала улонлэн шуг-секытъёсыз та удысын но шӧдӥсько. Туэ ӝыны арскын 2,5 миллион манет тыр изъян адӟизы, нош ваньмыз 4,5 миллион манет люкаське ни. Озьы ке но, предприятилэн кивалтӥсез оске арез тыронъёстэк но пайдаё йылпумъянлы. Али нош кык толэзь беромыса уждун сётъяло. Г. РОМАНОВ. 01 Нош ик нянь ӝуа Тылпу потон учыръёсты чакласа, одӥгзэ верало: 95 процентаз янгыш луэ адями. Чаклатэк кельтэм газ плита, утюг, ӝуась гур, пиналъёс киулэ шедем спичка - ваньмыз со кышкыт адӟонэ вуттэ. Пень вылэ кылемлэсь азьло малы меда асьмеды асьмеос утьыны ум быгатӥське? Зэм, тылпу ласянь республикаямы гинэ таӵе югдур ӧвӧл, быдэс дуннеын со арлы быдэ 5 процентлы йылэ. Мукет сямен вераса, азинлыко ужась страналэн одӥг ужан нуналэз араз быдэсак сьӧд ӵынлы пӧрме. Малпаны кышкыт: кӧня миллиардлы сутске ваньбур, улон интыос, техника... Нош маин мерталод ӝуаса бырем адямиослэсь, пичи пиналъёслэсь улонзэс? 10 ар ӵоже Удмуртиын тылпу потон будӥз 10 процентлы, 4 поллы йылӥз ваньбур ыштон. 1987 арын тылӝуын сутскиз 76 мурт, 1997 арын та лыдпус вуиз 122-озь. Адями понна тылпулэсь кышкытэз тушмон ӧвӧл. Юнме шорысь уг шуо ук: лушкаськись, пе, кӧс борддорез ке но кельтоз, нош тыл ваньзэ пушказ ньылоз, пыд йылад поттоз. Ӟеч кузё котькуд ласянь ассэ утьыны амал шедьтоз. Но, жаляса верано, тросэз уло, инмар утёнлы оскиськыса. Озьы сутске улон юртъерзы, сад-бакчазы, аръёсын люканы вырем ваньбурзы. Нош ма вералод юисьёс, тамак кыскисьёс сярысь? Соосын сэрен гинэ кӧня ыштон адӟемын ни! Бусыосын мынэ ю-нянез утялтон. Быгатом меда вань будэтэмзэ кеносъёсы вуттыны? Ум, дыр, малы ке шуоно, отын но татын тылпу потон учыръёс пумиськыло ни. Киясово районын, кылсярысь, ӝуаз фуражлы шуыса дасям 8 тонна ю тысьсы, сутскыны шедиз техниказы. Та районын ик тылпу потӥз тысь куасьтон агрегат пушкын, 200 килограммез сутскиз. Кизнерын МТЗ-80 тракторзы но тонна пала курозы изъянмиз. Таӵегес ик учыр пусъемын Балезино но Як.-Бодья районъёсын. Йӧскадь тупатъямтэ, эскерымтэ техника шуге-леке вуттэ самой кысык вакытэ - пудо сиён дасяку, аран-кутсан мыныку. Соин ик адямиез, тракторез, комбайнэз утён вылысь, тылпу потон ласянь умой-умой чакламтэ машинаосты гаражысь ик поттыны уг яра. Шӧдтэк шорысь потэм тылгизьы, кысытэк сэрпалтэм тамак пум, турынэз-куроез сюрес дуре люкан - ваньмыз со - тылпулы "сиён". Н. ИЛЬИН, Удмурт Республикаысь Тылпуэн нюръяськонъя управлениысь старший инспектор. Лыдӟись адӟоз-а журналэз? Лыдӟисьёсмылэсь, тужгес но удмурт кылъя но литературая дышетӥсьёслэсь куронзэс лыдэ басьтыса, туэ кутскимы вал журналмес толэзьлы быдэ поттыны. Татчыозь уго "Вордскем кыл" кык толэзьлы одӥг пол печатласькылӥз. Но... радъяськем ужлэн бугорез шӧдтэк шорысь чигиз. Куартолэзе печатлано журналмес куспетӥ дугдытӥзы. Быдэс Россей музъем вылын сямен ик, татын но мугез одӥг - коньдон ӧвӧл. Печатлам журналъёс понна но дунъёс тыремын ӧй вал уго. Нош коньдон - со шокан омыр выллем. Ӵапак со ик ворсамын. Туэ понна, "Вордскем кыл" журналэз сяна, лыдӟисьёс 4 номер гинэ басьтӥзы "Кизили" но "Инвожо" журналъёсты но. Но али элькунамы мынэ ни вуоно ар понна газет-журналъёслы гожтӥськон. Али удмурт изданиосын ужасьёсты тужгес но сюлэмшугъяськытэ та ужпум: кызьы радъяськоз со? Гожтӥськись луоз на-а? Дун тырем журналъёссэс но басьтыны уг быгато бере, азьланезлы осконзэс тыпак уз ыштэ-а? Нош журналмы мар сётэ дышетӥсьёс, нылпи садын ужасьёс, удмуртлыкез гажасьёс понна, сое коньдонэн уд чота ук?! Но адями осконзэ уг ышты, шуо. Озьы ик луыны кулэ со! Сотэк уго ӧвӧл туннэез но, уз луы ӵуказеез но. Оскиськом, журнал номеръёсмы, ӝегаса ке но, лыдӟисьёссэс шедьтозы. Соин ик, гажано лыдӟисьёсмы, тӥляд но оскон гизьыды медаз кысы. Ӵуказе нуналлэн ӟечезлы оскон! Р. ХАЙДАР, "Вордскем кыл" журналлэн валтӥсь редакторезлэн воштӥсез. БИБЛИОТЕКАОСЫН Юрттэ гурт калыке Гожтэме потэ аслам лыдӟисьёсы сярысь. Глаз ёросысь Кечпигуртмы пыре "Коммунар" колхозэ. Татысь калык туж яратэ лыдӟиськыны. Николай Михайлович Поторочинэз, Аркадий Александрович Невоструевез, Василий Михайлович Ларионовез котьку шумпотыса пумитасько. Та адямиос ик ветло фольклор ансамбле. Репетициос котьку сямен библиотекаын ортчыло. Семьяослы сӥзем праздникъёс дыръя но нырысь ик соослы вазиськисько. Владимир Афанасьевич Блинов, Павел Павлович Бабинцев сярысь но туж шуныт кылъёс верам потэ. Библиотекае лыкто ке, олокыӵе но юанъёс сётъяло соос. П. П. Бабинцев яратэ удмурт писательёслэсь книгаоссэс. 1994-тӥ арын библиотекаямы усьтӥськиз удмурт литератураез вӧлмытонъя центр. Котькыӵе ужрадъёс ортчытъяны тыршиськом. Удмурт писательёсын пумиськылӥськом. Кӧня ке адями люкаськыса ветлӥз бускель Киров улосысь Уни ёросысь Печкезь гуртысь удмуртъёс доры. Татын вашкала удмуртъёслэсь улэм-вылэмзэс возьматӥсь туж ӟеч музейзы вань. Дӥсьсы но аспӧртэм. Пересьёс солэсь али но уг люкисько. Мукет дыръя татысь калыкез асьмеос пумитамы библиотекаямы. Печкезь гуртысь удмуртъёс паймизы татысь удмурт кылын гожъямъёслы: асьсэос удмурт кылэз кемалась уг ни дышето. Удмурт телевидениез но учкыны уг быгато. Туж ӝожомо, гуртазы удмурт кылын вераськись ик ӧвӧл ни шуыса. Али но лыдӟисьёс ӵемысь юало: кыӵе ке пумиськон уз лу на-а? Куронзэс одно ик быдэстыны тыршо. Лия КАРКИНА, Глаз ёросысь Кечпигуртысь библиотекарь. Уралын кин байгес улэ? Статистика верамъя, июле улон дуногес вал Екатеринбургын (тужгес но кулэ сиён-юон басьтыны, услугаос понна тырыны адямилы быдэ толэзяз кулэ вал 345 манет 63 копейка). Самой дунтэмез - Уфаын (260 манет 50 копейка). Ижевскын та лыдпус 295 манет 79 копейка. Ӵошатэ дунъёсты: Уфа Ижевск Курган Пермь Екатеринбург Челябинск Скал сӥль 13,85 16,89 14,16 16,64 19,38 15,63 Курег сӥль 15,39 16,09 16,09 17,40 16,00 16,69 Колбаса (пӧзьтэмез) 20,91 21,32 21,09 21,18 22,57 24,07 Колбаса (ӧжытак ӵынатэмез) 30,21 29,89 31,03 31,75 32,93 29,11 Кынтэм чорыг 9,05 11,63 6,03 9,51 9,14 10,89 Нӧкы вӧй 20,22 18,03 21,21 23,33 25,13 22,35 Будос вӧй 9,60 8,14 9,37 9,73 10,90 11,11 Маргарин 11,85 11,12 13,28 11,75 12,20 11,97 Йӧл (1 л) 3,07 2,29 2,68 3,39 3,46 3,50 Йӧлвыл (кг) 14,31 10,06 12,98 12,48 15,91 16,10 Сыр (кг) 25,38 24,80 28,33 28,44 28,70 30,61 Курег пуз (10-эз) 3,63 4,75 4,18 4,58 4,95 4,26 Сахар пызь (кг) 3,68 3,84 3,91 3,68 3,78 3,93 Ӟег нянь (кг)3,59 2,91 2,97 3,15 3,73 3,63 Удмурт кылбуретлэсь данзэ ӝутӥсь Ӟуч писательлы Владимир Емельяновлы - 50 арес Владимир Иванович Емельянов - визьмо, мур малпаськись кылбурчи. Солэсь гожъямъёссэ пумозяз лыдӟытэк куштӥськыны уг луы. Сыӵе ик солэн прозаез но. Кылбуръёссэ ог кызь ар талэсь азьло лыдӟеме бере, асэныз но тодматски. Пинал ке но, улонэз, дуннеез адӟемын, лякыт, ӟеч, адямиез гажась юморен, ирониен вераськись, дунне шоры туала европейской пасьталаен учкись ӟуч воргорон. Солэн усто малпанъёсыз визьме пыӵало, адямилэсь кӧтсэ ӝож уг каро, оскон мылкыд кылдыто. Владимир Иванович Емельянов вордскемын 1948-тӥ арын 19-тӥ августэ Ставрополь крайысь Армавир городын. Дышетскемын Ейскысь педучилищеын, А. М. Горький нимо Литературной институтын. Ужамын Тюмень тайгаын сир бичанын, Армавирын, кислород станциын, аппаратчик луыса, шор ёзо школаын дышетӥсьын, Ижевскын - газетъёслэн редакциосазы, Удмуртиысь Писательёслэн союзазы председательлэн кивоштӥсез луыса. Кылбур гожъяны но печатласькыны кутскиз дас арескысен - ужъёсыз адӟиськылӥзы "Армавирская правда" газетын. Нырысетӥ книгаез потӥз "Удмуртия" издательствоын ("Память о вечном", 1979-тӥ арын). Собере "Родство" сборниксэ печатлаз "Современник" издательствоын, Ижевскын "Солнечный день" кылбур книгазэ, пиналъёслы "Топтышка" повестьсэ, "Дела и люди" документальной повестьсэ, "Риск" но "Савелий и Левиафан" романъёссэ, "Розы для Тамары" очерксэ ("Физкультура и спорт" издательствоын). Нош Москваын потӥсь журналъёс, антологиос, литературной газетъёс сярысь верано ке, со ваньмаз сямен печатласькылӥз. Писательёслэн союзазы пыртэмын 1981-тӥ арын. Всесоюзной литературной конкурсын "Егит авторлэн нырысетӥез усто книгаез" ӵошатсконлы лауреат луиз. "Республикаысьтымы культура удысын сӥё-дано ужась" ним басьтӥз. Али Владимир Иванович ӟуч кылын печатласькись "Луч" нимо журналын ужа бере, азьло ик вера аслаз кылдытэм, будэтэм "вордосэз" сярысь. - Милям журналмы Выль Россия кылдэм бере ик вордӥськиз - 1991-тӥ арын. Али, улон- вылон секыт ке но, ас ӧрзэ шедьтӥз ини. Номермес куинь-ньыль толэзьлы вазьгес дасяськом. Озьы но осконмы ӧвӧл, журналмы дыраз потоз шуыса. Газетъёс реклама чотын уло ке, милям поттонмы ӝегамен, реклама сётӥсьёс ӧвӧл. Но ми шедьтӥм мукет амал: дасяськом заказъёсъя нимысьтыз номеръёс. Соин типографилы расходъёсмес ке но тырыны быгатӥськом. Озьы ке но, авторъёслы гонорар понна коньдонмы уг кыльы: журналлэн асдуныз вылӥынгес. Нырысетӥ номеръёсамы устоесь авторъёслэсь-фантасъёслэсь произведениоссэс, озьы ик - детектив жанрен гожъясьёсты печатланы малпамы вал. Но та малпанлэсь куштӥським. Милесьтым сюресмес ӵоктазы узыресь книга поттӥсьёс: соос та жанръя ик томен-томен туж устоесь чеберъям книгаос поттылыны кутскизы. Нош юрттэт вуиз мукет ласянь: тросгес выль авторъёсмы будыны кутскизы. Со ик луиз выль сямен ужаны кутконмылэн кыкетӥ мугез. Калык но милемыз умойгес валаны ӧдъяз. Али гожъясьёс ласянь шуг-секытъёсмы ӧвӧл ни. Верало одӥг учырез. Ми ялӥмы конкурс. Уд оске: толэзь куспын авторъёс 152 рукописьсэс ыстӥзы. Отын вить сюлэсь уно произведение - кылбуръёс, веросъёс, повестьёс но вал. Ӟечлыксы-кужымзы ласянь учконо ке - соиз мукет ужпум. Кудӥз шуэ: "тани, пе, азвесь даур кутскиз". Удмуртиысь ӟуч писательёслэн азвесь вапумзы выльдӥськон аръёс бере ӧз кутскы, вазьгес вал - 70-тӥ аръёслэн пумазы но 80-тӥ аръёслэн кутсконазы. Соку кылдӥзы тужгес но тунсыко гожъясьёс: Герасим Иванцов - кылбурчи, Валерий Болтышев - прозаикъёс пӧлысь кужмоез, Россиысь тодмо кылбурчи Олег Хлебников, данак книгаос поттӥз Владимир Парамонов. Берлоосыз, Сарапулысь Владимир Фролов кадь устооосыз кылбурчиос, азвесь даурен сайкатэм гожъясьёс. Уката ик шӧдскымонэз - фантастикалэсь куштӥськон мугмы луиз берыктэм ужъёсты печатлам. Кутскимы коми но финн кылбурчиосты берыктон бордысен. Но тросэн тыршиськом удмуртъёсты печатланы: соос котькуд номерын мед луозы шуыса сюлмаськиськом. Тужгес но удалтӥз кылбур антологиен - солы "Грамматика любви" ним сётӥм (Бунинлэн кылбурезъя). Татчы, ӟуч кылбурчиосты сяна, тросгес пыртӥмы усто удмурт кылбурчиосты: Герд бордысен кутскыса, туннэ нуналозь. Ваньмыз со туж синмаськымон луиз. Ми жалямы, тиражзэ бадӟым ӧм каре шуыса. Вузано номермы толэзь куспын быриз. Собере, кӧня ке ар ортчыса, удмурт веросъя антология поттӥм. Но таиз номермы ӧз удалты, ӧз вӧлмы. Мар бордын мугез? Нырысь ик, удмурт верос лябыт на. Та удысын юн пыӵам сямъёс ӧвӧл. Мон уно ужай "Между Волгой и Уралом" сборникъёсты дасян бордын. Удмурт прозаез трос лыдӟи. Тодӥсько: Удмуртиын повестьёс умой пӧрмо. Устолыксыя мукет республикаосты но ортчо. Лыдӟелэ али психология амалэн кыӵе гожъяло та жанрез кылдытӥсьёс (син шоры йӧто О. Четкарёв, Вячеслав Ар-Серги, уката ик Генрих Перевощиковлэн берло гожъямъёсыз). Азьланьын малпаськомы, ӟуче берыктыса, пичиесь повестьёсын антология поттыны. Нош веросъёс уггес пӧрмо. Лыдӟисьёслы веросъёсын югдуръёс тодмоесь, лэся (ма, книгаос потыло ук). Веросъёс, кылбуръёсын ӵошатыса, улӥынгес, тунсыктэмесьгес. Кадырлыксы - менталитетсы ласянь-а, мар-а. Кылбуръёс ӝог вӧлмо, нош прозаез басьтӥсь ӧвӧл. Мынам тодэмея, унояз ӟуч улосъёсын поэзилэсь киынызы-пыдынызы пыкисько, нош татын кылбуръёсты шумпотыса басьяло. Веросъёсын этнографизм люкетэ шуо ке, татын мон сое уг но шӧдӥськы. Ӟуч лыдӟисьлэн синмыныз учкисько но уг адӟиськы сыӵе гожъяськон амалъёсты, кудъёсыз возьмато, тае удмурт гожтӥз шуыса. Нош национальной палзэ мукет нациосысь адямиос яркытгес адӟыны быгато ук. Басьтом Николай Шундиклэсь "Белый Шаман" книгазэ ик. Кыӵе зол возьматэмын чукчалэн мылкыдъёсыз, малпанъёсыз. Асьме веросчиослэн риториказы тросгес, бӧрсьысь бӧрсе мынӥсь югдуръёсты мадё, нош мылкыдэз возьматонзы ӧжыт. Но ваньмыз сыӵе шуыны уг луы. Г. Красильников бере лыктэм Роман Валишин сярысь верано ке, со туж тунсыко веросчи. Озьы бере, гожъясьёс пӧлын кужымъёс уло. Егитъёс пӧлын но вань. Тани Вячеслав Ар-Серги ик. Сое ми журналамы уно пол печатламы ни. Веросъёслы матын Генрих Перевощиковлэн но берло повестьёсыз ("Ыш- ыш-ыш", "Ӧб-ӧб-ӧб", "Эх-ма-а-а!"). Мон сое романист шуыса тодӥсько. Али со монэ паймытӥз тунсыко вакчиесь но пезьгытэсь арбериос кылдытэменыз. Солэн али котькуд гожтэмаз идеяез, сюлмаськытӥсь малпанэз вань. Озьыен, берло дыре верос пезьгытгес, тунсыкогес луэ. Малпан кылдэ туала веросъёсын антология кылдытон сярысь. Но азьвыл ик сюлмаськоно луоз сое вӧлмытон сярысь. Вераськоно школаосын. Милям "Школалы библиотека" рубрикамы вань. Отчы печатласьком шаерчиослы туж кулэ луись материал но чеберлыко литература. Али ми дасяськом ӟуч литературалэн азвесь вапумезлы сӥзем выль номер. Со асьмелэн чылкак вунэтэм дыръёсмы. Малпаськом, сое поттыны коньдон шедьтомы шуыса. Витем потэ ӟечсэ: куке но адямиослы уждунзэс азьло сямен ик дыраз сётылозы, журналъёс но азьло сямен ик ӟеч улозы, соосты басьялозы. В. Емельянов берыктон бордын трос ужа. Ӟуч писательёс пӧлысь огез но писатель сомында кужымзэ уг сёты удмурт писательёсты берыктон удысын. Аслаз лыдъямезъя, тужгес но удалтӥз Ф. Васильевлэсь, П. Захаровлэсь, В. АР-Сергилэсь, В. Ившинлэсь кылбуръёссэс но калык поэзиез берыктонын ("Ялыке", "Айкай", "Эшъёс-юлтошъёс", "Италмаслы" кырӟанъёс но мукетъёсыз). - Берыктон бордын мон ужаны кутски, Флор Васильевен тодматскеме бере, - шуэ со. - Литобъединениын кылбуръёсме эскерыкузы, со мон доры лыктӥз но егитъёслэсь кылбуръёссэс берыктыны ӵектӥз. Озьы ик аслэсьтыз но кӧнязэ ке дэмлаз. Мон пыкиськисько вал, но со монэн огкылэ вуыны йӧнзэ шедьтӥз. Собере соосты берыктӥ, "Горизонт" сборнике печатлай, газетъёсы поттӥ В. Романовез, В. Ванюшевез, А. Кузнецоваез, В. Ившинэз. "Север" журналын Флорлэсь кылбуръёссэ печатлазы 1978-тӥ арын, но соосты со ачиз ӧз адӟы ни. Верало тунсыко учырме. Берыктыны кылдӥз Семен Самсоновез но. Эн малпалэ, пинад дыръяз гожъямъёссэ шуыса. 1974-тӥ арын, тодмо прозаик дыръяз, Флор сое монэн тодматӥз, "Молот" журналлэн редакцияз пыракум. Флор шуэ: "Тани тыныд берыктӥсь". Ачиз кошкиз. Семен мылкыдтэк пуке. Азяз ог кык сю кылбурен папка. Флор солы сборниксэ поттонтэм рецензия сётэм. Гожъя, пе, проза, тынад, пе, умойгес пӧрмо веросъёсыд, повестьёсыд. Семенлэн кӧтыз ӝож луэм: "Я бен, ӵок. Но мон гожъясько повесть. Отын валтӥсь героез луоз кылбурчи". Мыным подстрочникъёсссэ сётӥз. Соосъя мон ог кык сю чур берыктӥ. Куд-ог кылбуръёссэ, отысь люкетъёссэ берло "Голуби с пути не сбиваются" романаз пыртӥз. Ог сю чурзэ. Валтӥсь героез поэт ӧз луы, ас понназ гожъясь гинэ. Нош берыктон уж борды умой-умой кутски азьлогес - литературной институтысен. Мынам берыктэмея книгаоссэс печатлазы Анатолий Старостин (якут), Леонид Дранько-Майсюк (белорус), Гретель Варданян (армянин), Раиса Ахметова (чеченка). Кунгож сьӧрысьёсыз но вал: Саломея Нерис (Литваысь), Райнер Рильке (Австриысь), Жан-Люк Моро (Франциысь), Валакази (зулус). Берлогес берыктӥ на Алик Гутяксулов (черкес) кылбурчиез. Николай Старшинов кивалтӥз кылбуръя семинаренымы. Со берыктон уж борды ӝот-ӝот басьтӥськыны косӥз. Сыӵе вал огез ужан амал. Берыктонын эскериське кылбурчи. Быдэс книга тыр берыктӥ литва кылбурчиез Саломея Нерисэз, немец кылъя дышетӥсьмы но немец кылын берыктон сётӥз Австриысь туж тодмо Райнер М. Рильке кылбурчиез, солэсь сонетъёсын книгазэ быдэсак берыктӥ. Но со вал дышетскон гинэ. Трос ужай Раиса Ахметовалэсь кылбуръёссэ чечен кылысь берыктон бордын. Мынам варматае-варманае Грозныйын улӥзы. Бускельзы вал Раиса Ахметова. Отысен соин тодматски. Быдэс книга дасяй вал ини. Поттыны ӧм вуэ. Секыт дыръёс вуэмен, ултӥяменызы но со висьыны усиз но ӧз чида ни, кулӥз. Нош татын, Удмуртиын, берыктон бордын ужаны кутски 1974-тӥ арысен. Ф. Васильевлэн, В. Романовлэн, Н. Васильевлэн кылбуръёссы бордысен. Собере ужамы Ф. К. Ермаковен. Солэн инмарез Герд вал ке, со монэ моин тунсыкъяськытӥз, берыктыны мылкыдме ӝутӥз, трос подстрочникъёс лэсьтылӥз. Мон берыктӥ пиналъёслы "Гондыръёс" выжыкыл-поэмазэ, кылбуръёссэ. Соос пичиен потылӥзы. Нош 1984-тӥ арын Герд сярысь шара но кужмо вераськон кутскиз. Мон Герд борды умой-ймой басьтӥськи. А. Уваровлэсь Гердъя подстрочникъёссэ (ог 15 сюрс чур) лыдӟеме бере, мон пайми: мар понна Гердэз зӥбыса возизы, тушмонэн лыдъязы? Нокыӵе криминалэз ӧвӧл. Москваысь берыктӥсьёслы гинэ азьвыл Гердэз сётылӥзы (соос визьмогес берыктозы шуыса-а, мар-а). Берлогес ини ӵектыны кутскизы О. Хлебниковлы, Г. Иванцовлы но мыным. Я, берыктонмес берыктӥм, котькыӵеез вал. Олег Хлебниковлэн граждан мылкыдо кылбуръёсыз ("Царь уехал на войну", "Окно мое очень низко") удалтӥзы. Герасим Иванцовлы Гердлэн лирикаез мылкыдызъя луиз. Мыным кылемзэ, басьтымтэзэ, берыктоно луиз: "Завод" (конструкциезъя шуг поэма). Собере - поэма выллем кузесь кылбуръёс: "Акилина - секретарь", "Моя смерть", "Удмуртская песня". Удалтӥз "Шайтан уллянэз" берыктэме. Мон сое ӵемысь калыкен пумиськонъёс дыръя лыдӟылӥ. Гердэз лыдӟемъёс вераллязы, ритмикаез но, образъёсыз но туж тупало шуыса. Тунсыкоесь луизы "Парсь" но "Аэроплан" кылбуръёс. Соос фигураосын лэсьтэмын, озьы ик пӧрмизы берыктыса но. Озьы тӥни Герд вань улытозямлы мылкыдме берыктон уж борды кыскиз. Гердлэн "Удмуртия" книгапоттонниын печатлам сборникезлэн кык-куиньмосэз мынам берыктэмея потӥз. Данак кылбуръёсыз печатламын но ӧвӧл на. Табере мынам ки улам уно сюосын кылбуръёс: Флор Васильевлэн яркытэсь, юн сюлэмын гожтэмъёсыз, Александр Белоноговлэн малпаськытӥсь поэзиез, В. Романовлэн паймытӥсь образъёсын кылбуръёсыз, Алла Кузнецовалэн, Галина Романовалэн, Людмила Кутяновалэн, Л. Черновалэн, Михаил Федотовлэн, Анатолий Уваровлэн, Анатолий Леонтьевлэн, Василий Ванюшевлэн, Владимир Котковлэн, Анатолий Комаровлэн, Даниил Яшинлэн, Николай Байтеряковлэн, Пётр Поздеевлэн, Геннадий Камашевлэн, Алевтина Аникиналэн кылбуръёссы. Владимир Емельянов ужа удмурт лирикая но удмурт поэмаосъя антологиос кылдытон бордын. Прозаез берыктон удысын но сюлмысь тырше. Семен Самсоновлэсь "Вужер" повестьсэ берыктӥз (вакчиятыса). Берыктӥз Генрих Перевощиковлэсь "Йӧвалег", "Тӧдьы куака" романъёссэ, пичиесь повестьёссэ ("Ыш-ыш-ыш", "Ӧб-ӧб-ӧб", "Э-эх-ма!"), Роман Валишинлэсь дневникъёссэ но веросъёссэ. Аслаз выль гожъямъёсыз но ӧжыт ӧвӧл. Ӝоген потыны кулэ "Русская зима" кылбур книгаез. Югыт дуннее потон черодзэс витё кык романэз ("Плотогон" но "Второе пришествие"), покчиослы - "Палэсмурт" нимо повесть-выжыкыл. Туж аспӧртэмлыко, синмаськымон солэн иронической лирикаез. Сое огазея огъя героез Ефим Самоварщиков. Та жанреныз уно кылбуръёссэ печатлаз ни Владимир Емельянов. Я бен, сӥзёмы Владимир Ивановичлы шудбур но тазалык, азьланьын но тазьы ик кужмоесь но визьмоесь кылбуръёс мед гожъялоз, ӟеч мед берыктоз! Удмурт кылбуретлэсь данзэ вылэ мед ӝутоз, кыдёке мед вӧлмытоз. АНАТОЛИЙ УВАРОВ Будэтэмзэ утялтоно Туннэ нуналлы кизем юос пӧлысь республикая утялтэмын витьмосэз. Кызьы шуизы Гурт хозяйствоя министерствоын ужасьёс, мимала арен та вакытэн ӵошатыса, аран-кутсан ужъёс туэ ӟечгес мыно. Азьпалан - Вавож, Можга, Алнаш, Игра, Камбарка, Якшур-Бодья районъёс. Татысь хозяйствоос ӝынызэ юоссэс утялтӥзы ни. Бере кылё Сарапул, Каракулино, Киясово. Секытгес югдур Яр, Глазов, Юкаменск палъёсын. Урожай сярысь ке верано, кылем арын сярысь, со кык поллы ӧжытгес. Таизэ коть дыраз утялтоно. Эн сяла Шундыберган тысен вузкарисьёс городысь ульчаосын - вамышлы быдэ. Ӝоген соослэн лыдзы чутрак кулэсмоз, малы ке шуоно, Ижевсклэн мэрияз кутэм решениен тысь, сигарет вузасьёслы табере одно ик кулэ луоз вуззылы сертификат, медицинской книжка. Кидысэн, кысконэн ӵош вӧлмыны быгатозы пӧртэм висёнъёс. Алэмын юдылэм арбузэн, дыняен вузкарон но. Л. ДМИТРИЕВА. Гол, гол, гол... 5-16 августэ Ижысь "Торпедо" но "Динамо" стадионъёсын кужымзэс мертазы 18 ареслэсь егит футболистъёс. Отын нюръяськизы Читаысь, Ярославльысь, Тюменьысь, Томскысь, Омскысь, Москваысь но Ижысь командаос. Россилэн чемпионатэзлэн финалаз потӥзы Ижысь "Газпром" (1-тӥ инты) но Москваысь "Локомотив" (2-тӥ инты). "Газпромысь" Дмитрий Кудряшов шаплы луэменыз висъяськиз: 6 гол пыртӥз. Нырысетӥ лигаысь командаос чемпионатын нюръяськонзэс азинто. Ижысь "Газовик- Газпром" пумиськылӥз Омскысь "Иртышен". Шудон йылпумъяськиз 1:1 лыдын. С. ПЕТРОВА. "УДМУРТ ДУННЕ" ГАЗЕТЛЫ - 80 Тылӝуысь - тыл уже... Та адямилэн но газетмылэн аръёссы огвакытэн: тодмо журналистлы Василий Никитинлы сизьымдон вить арес тырме та нуналъёсы,, "Удмурт дуннелы" тямыстон - октябрь толэзьлэн пумаз. Василий Никитичлэн нимыз калыклы тужгес тодмо ож аръёс сярысь гожтэм ужъёсыныз. Газетмес лыдӟисьёс вань сюлмысьтызы ӟечкылало юбилярез вордскем нуналэныз. Ӟырдыт веранъёс борды итӥсько "Удмурт дунне" газетмылэн редакциямы ужасьёс но. Можга ёросысь Вылын Вишур гуртын вордскем Василий Никитич Никитинлэн улон сюресэз быдэсак сямен газет поттон ужен герӟаськемын шуи ке, уг янгыша. Вишурын но Можга черкогуртын дышетскыкуз ик пияш мылысь-кыдысь гожъяны кутскиз элькунысьтымы нылпиослэн "Дась лу!" газетазы. Пичиесь гинэ заметкаос бордысен кутскыса, аслаз гожъямъёсаз школазылэн но пионер огазеяськонзылэн ужъёсысьтызы аспӧртэмлыко но лэчытэсь ужпумъёсты ӝутылыны ӧдъяз. "Дась лу!" газетэз лыдӟисьёс, тужгес но - отчы гожъясь пиналъёс, синйылтӥзы Вася Никитинлэсь нимзэ. Дасоосын гожтэтъёс вуылыны кутскизы Вишурысь пияшлы. Гожъямъёссэ яратыса но выль темаоссэ витьыса, гожтэтъёс ыстылӥзы Пичи Пургалась Вася Михайлов, Шарканысь Миша Воронцов, Можгалась Максим Димитриев, Вавожысь Вася Смирнов, Нылгалась Гриша Симаков, Алнашысь Коля Байтеряков, Бадӟым Учалась Вася Беляев но гожъяськыны яратӥсь уно мукет пиналъёс. Вылӥ верам адямиос ваньзы сямен бӧрысь луизы элькунысьтымы тодмо журналистъёс но писательёс. Нош куинез Васяос - Никитин, Михайлов но Беляев - ӵош дышетскизы Можга педучилищеын но йылпумъязы сое 1941-тӥ арын инвожо толэзе. 21-тӥ инвожое егитъёс басьтӥзы диплом но бер ӝытозь шулдыръяськизы школаосы ужаны кошкон азязы. Ӵуказеяз егит дышетӥсьёслэсь чылкытэсь малпанъёссэс сураз-пожаз со уе немец фашистъёсын кенжытэм кӧшкемыт ож сярысь ивор. Нылпиосты дышетэм интые, куинь Васяос но киязы ож тӥрлык басьтоно луизы. Тылӝуэ шедемез бере ик сюлмаз пичиысен пыӵам газетэ гожъян сямзэ Василий никитин вормыны ӧз быгаты. Тушмонэн ожмаськон куспын пичи ке но висъёс луылыку, эшъёсызлэн батыр ожмаськемзы сярысь ивортылӥз дивизиязы потӥсь "Защита Родины" газетын. Кӧняез ке гожъямъёсыз печатласькем бере, Василиез редакцие ужаны ӧтизы. Аслаз дивизионкаеныз удмурт пияш ортчиз кузь ож сюресэз - Калугаысен кутскыса Восточной Пруссиозь, Кёнигсберг городозь. Кӧшкемыт ожлэсь шӧмзэ, отчы пыриськем солдатъёслэсь, офицеръёслэсь, кулонлэн синмаз нуналлы быдэ учкисьёслэсь сюлэм малпанъёссэс, мылкыдзэс валан понна, фронтысь газетчилы весяк соосын артэ луоно вал. Сотэк кызьы возьматод ож сярысь зэмлыкез газет бамъёсын? "Защита Родины" газетын ньыль ар пала печатлам материалъёссэ огазе люкасалыд ке, уно томъем книга пӧрмысал. Ма, Василий Никитич озьы ик лэсьтэ. Ӵош ожмаськем эшъёсыз, ож пумысь аслаз малпанъёсыз сярысь со трос гожъяз ини Можгалан но Иж карын потӥсь газетъёсы но журналъёсы, вералляз радио пыр. Быдӟым Вормонмылы ӝыны даур тырмон аре куинь Васяос - Никитин, Михайлов но Смирнов - "Таӵе со война" нимо огъя книгазэс поттӥзы. Мар шуод, Быдӟым Отечественной война сярысь эшшо одӥг зэмлыко уж кузьмазы куинь удмурт пияшъёс асьме лыдӟисьёсмылы. Калыклы дуно со. Гожтӥзы ож тылӝу пыр ортчем адямиос. Жаляса верано луэ: таӵе батыръёслэн лыдзы арысь аре кулэсме но кулэсме. Нош котькудӥзлэн гожъямез, верамез табере ини дуно но номырин воштонтэм документъёс луозы. ... Ож йылпумъяськем бере но гвардиысь капитан Никитин кӧня ке ар тыршиз на аслаз дивизионкаяз. Нош армиын службазэ йылпумъяса, Можга ёросаз берытскиз. Уж сярысь кема малпаськыса ӧз пукы, ӧжытак шутэтскемез бере кутӥзы "Ленинское знамя" ёрос газетэ. Нырысь юнматӥзы редакторлы воштӥсе, нош ӝоген кутскиз редакторлэсь ужзэ быдэсъяны. Герое сярысь мултэс ушъятэк шуо: ог дас ар ужатозяз, Василий Никитин Можга ёрос газетлэсь данзэ вылӥе ӝутӥз но элькунысьтымы усто газетъёслэн радазы пыртӥз. Редакциын со аръёсы мыло-кыдо ужазы лыдӟисьёслэн пӧртэм огазеяськонъёссы: егит но пинал гожъясьёслэн школазы, литератураез яратӥсьёслэн кружоксы, ожгарчиослэн клубзы, калык контрольлы юрттӥсьёслэн клубзы но мукет огазеяськонъёс. Литератураез яратӥсьёслэн кружоказы вуылӥзы туж сӥё-дано писательёс - Михаил Петров, Геннадий Красильников, Семен Самсонов, Николай Байтеряков, Герман Ходырев но уно мукетъёсыз. Котькызьы пыкылы асьме вакытэ азьвыл кивалтӥсь органъёсты - умой ужасьёсты соку синйылтӥзы. Можга редакторлэсь но ӟеч ужъёссэ адӟытэк ӧз кельтэ. Ӝоген сое Иж каре - элькунысьтымы печатен, радиоен но телевидениен кивалтон удысэ басьтӥзы: луиз партилэн обкомысьтыз печатья секторлэн йырыз. Тросэз редакторъёс, мукет газетчиос ӟеч кылъёсын тодазы ваё Василий Никитичен ӵош ужам аръёссэс. ... Никитинъёслэн семьяязы осконтэм но туж тунсыко учыр луиз. Сыӵеос сярысь гожъямъёсты газетъёс печатлало "Юри но уд малпа" рубрика улын. Нош ужпум тазьы вал. Никитинлэн бадӟымез пиез, Павел, газетчи луон сярысь ӧз но малпаськылы: пичиысен техникаез яратӥз. Воткинскысь огаз технической училищеын дышетсконзэ йылпумъямез бере, городысь военкомат сое армие басьтӥз но келяз... Кытчы малпаськоды? Калининградэ (азьвыл Кёнигсберг городэ), атаезлэн службазэ ортчытэм дивизияз. Нош отын интыязы "Защита Родины" газетлэн типографияз. Яраз егит солдатлы службазэ газет поттон ужын ортчытон. Каньылля ачиз но заметкаос гожъяны ӧдъяз. Татысен Павел Никитин сюрес лёгиз бадӟым журналистикае. Армиысь берытскыса, корреспондент луыса ужаны кутскиз егитъёслэн ужезлэсь "Удмуртиысь комсомолец" газетазы. Газетчилэн вань тубатъёссэ ортчыса будӥз валтӥсь редакторозь. Усто журналистлэсь материалъёссэ синйылтӥзы "Советская Россия" газетлэн редакцияз ужасьёс. Ӝоген юнматӥзы сое Курск улосъя нимысьтыз корреспондентэ. Мон али но тодам ваисько Павел Никитинлэсь партилэн Курск обкомезлэн урод ужамез сярысь лэчыт статьязэ. Визьмо, югдурез ӟеч валаса гожтэм ужын зол гинэ йӧттэмын вал улослэн кивалтӥсьёсызлы. Али Павел Васильевич ужа быдэс дуннелы тодмо "Огонёк" журналын. Кемалась ик ӧвӧл шумпотыса лыдӟи, Чечняын ож пуромем бере, Москваысь но Ичкериысь кивалтӥсьёслэн сьӧд ужъёссы сярысь лэчыт интервьюзэ. Шумпотӥ удмурт газетчилэн ужаны быгатэмезлы. Нош мӧйыез Никитин понна со кыӵе бадӟым дан! Арлыдоез Никитин шутэтскыны потэмез бере но тымет дурын чорыгаса но сад-бакчаяз гудӥськыса улыны ӧз чида - сюлэмыз кыскиз журналистика удысаз ик. Сое бырйизы элькунысьтымы Журналистъёслэн огазеяськоназы кылкутӥсь секретаре. Лэчыт визьмо но улонэз ӟеч валась адямилы ӵапак киыз но пыдыз луиз. Журналистъёслэн огазеяськоназы творческой ужез радъямен ӵош ожысь но ужысь ветеран ӵем вуылэ школаосы но егитъёслэн ужан интыосазы. Василий Никитич быгатэ армимылэн ож аръёсы батыр ужъёсыз но вормонъёсыз сярысь яркыт но валамон вераны. Соинтэк-а газетчиез бырйизы ожысь ветеранъёслэн элькунысьтымы комитетсылэн тӧроезлы воштӥсе? Соин ӵош ик со тырше шаерысьтымы Ветеранъёслэн кенешысьтызы печатен, радиоен но телевидениен кусып возись комиссиын. Куать ар ӵоже потэ ини ветеранъёслэн но пенсионеръёслэн "Долг" газетсы. Солэн бамъёсысьтыз но Василий Никитичлэсь усто очеркъёссэ, статьяоссэ но корреспонденциоссэ ӵем адӟылод. Уг, уг буйга мӧйы газетчилэн сюлэмыз, газетъёсын эшъяськытэк, соосын юнэсь кусыпъёс возьытэк. Ми, соин ӵош ужась эшъёсыз но газетэз лыдӟисьёс ӟырдыт ӟечкыласьком Василий Никитич Никитинэз 75 арес тырмемен. Сӥзиськом юн тазалык, шудбур, ноку сынӥсьтэм лэчыт перо! Л. Емельянов, Удмурт Элькунысь Ветеранъёслэн кенешысьтызы президиумлэн членэз. Н. Кочневлэн туспуктэмез. КНИГА ӜАЖЫЯДЫ Аспӧртэмлыко энциклопедия "Удмуртия" издательство лыдӟисьёссэ берло аръёсы шумпоттылэ туж аспӧртэмлыко, куддыр чылкак витьымтэ ӟеч ужъёсыныз. Сыӵе луэ таиз но - тодмо тодосчилэн Людмила Христолюбовалэн "Учёные-удмурты" книгаез. Та адямилэн нимыз кемалась ӟеч тодмо быдэс кунысьтымы финно-угроведъёс но этнографъёс пӧлын. Трос аръёс ӵоже ини со мылысь-кыдысь эскере удмурт калыклэсь этнографизэ. Соин ик шугъяськытэк вераны луэ: Людмила Степановна Христолюбова гинэ быгатысал но быгатӥз таӵе бадӟым но вылӥ ӟечлыко уж кылдытыны. Татчы люкамын вань удмурт тодосчиос сярысь иворъёс. Тодыны луэ Григорий Верещагин, Михаил Ильин, Яков Ильин, Иван Михеев, Куӟебай Герд, Иван Яковлев сярысь. Со сяна, тужгес егитъёсыз но синйылтэмын ини. Ваньмыз - ньыль сюлэсь ятыр нимтул. Кулэ иворъёсты чырыен-пырыен люкан вылысь, кӧня сюлмаськоно луиз, дыр, та ужез кылдытӥсь адямилы!.. Биобиблиографияя вань материал ӝикытак радъямын наукалэн кӧня ке удысъёсызъя. Медицинаез быръем 74 адями, кылтодонэз - 63, техника удысэз - 60, историез - 56, педагогикаез - 32, физикаез но математикаез - 27, гурт улонэз - 27, экономикаез -23, биологиез - 15, философиез - 13, химиез - 9, искусствоведениез - 7, географиез - 6, психологиез - 5, юриспруденциез - 4, ветеринариез - 3, богословиез - 2, геологиез, минералогиез но архитектураез быръем быдэн одӥг адями. Одӥг кылын вераса, справочник ивортэ 50 доктор, наукаосъя 331 кандидат но нокыӵе вылӥ нимтэк 15 доцент сярысь. Вакчияк верамын котькудӥзлэн улон сюресэз, тужгес адӟиськымон ужъёсыз, ачиз адями сярысь. Гожтэмъёсты уката чебермало на туспуктэмъёс. Книгалэн азькылаз вакчияк но яркытак валэктэмын удмурт наукаын кылдэм югдур сярысь. Тунсыко соиз но - визьлюкъёсмы вордӥськемын пӧртэм интыосын: 43 адями - Ижын, 39- эз - Алнаш ёросын, 30-эз - Глазкарын но ёросаз, 27-ез - Балезино районын, 22-ез - Можгалан но ёросаз, 22-ез - Кез районын, 21-ез - Эгра (Игра) районын, 20-ез - Якшур- Бодья ёросын, 20-ез - Ува районын, 19-эз - Шаркан районын, 19-эз - Дэбес ёросын, 15- ез - Пичи Пурга районын... Одӥг кылын вераса, Людмила Степановна Христолюбовалэн "Учёные-удмурты" книгаез аспӧртэмлыко энциклопедия выллем. Со пыр-поч вера наукалэн Удмурт шаерын азинскемез сярысь. Таиз возьматэ удмурт калыклэсь лэчыт визьзэ. Оскем потэ: азьланяз та уж инъет луоз шаермы, кунмы, быдэс дунне понна тыршем быдӟым тодосчиосмы сярысь нимаз ужъёс кылдытонлы. АЛЕКСЕЙ ШЕПТАЛИН, история наукаосъя кандидат. Иванов Майор агай Осто инмаре! Бадӟым инмаре! Ю-вӧсь понна вӧсяськиськом. Пазьгем юэ куатьтон пушъетэн мед пушъёз. Камыш кадь юн куроё. Азвесь шепен, зарни тысен кисьматы Кизем ю-няньмес. Осто инмаре! Шуныт, небыт зоръёстэ сёт, Сильлэсь-тӧллэсь, Тыллэсь-пулэсь, Висёнъёслэсь-черъёслэсь Уть вал, инмаре! Пудоен-животэн, кыткон валэн, Кыскон скалэн улыны Тазалык сёт, инмаре! Гурт калыклы, удмурт калыклы, Ныллы-пилы тазалыктэ сёт Инмаре! Осто. Ваньзэ вераны ӧй шедьты, дыр, Уть, инмаре! Вӧсяськемме кабыл басьты. Осто инмаре! Тӥни озьы йыбыртто вылэм вашкала удмуртъёс инмарлы, ю-нянь, пудо-живот я эшшо мае ке удалтонэз курыса. Юри вӧсяськон интыоссы но вылӥллям - гурт сьӧрысь чылкыт, чебер интыез шедьто но кенерен котырто. Огшоры нуналъёсы отӥ ветлыны уг яра. Юри быръем нуналъёсы гинэ вуылӥзы сьӧразы такаен, ӟазеген я ӵӧжен. Таиз инмарлы дасям сётонзы вылэм. Вашкала йылолъёс вуныны кутскизы дыр ортчемен но эшшо ке удмурт калыкез христиан осконэ кужмысь выжтэмен йырин. Кытӥ-отӥ вуж осконэн кылемъёс вӧсяськыло ик вал. 1917 арын ортчем революция бере сыӵе итыосы адямиосты ветлыны ӧз лэзе ни. Инмар ӧвӧл, пе - вӧсяськыны уг яра. Эшшо ке кытӥяз-отӥяз тюрьмаен но кышкатъяллязы. - Озьы ке но, лушкемен вӧсяськылӥзы ук адямиос, - шуэ Алнаш районысь Кузёбай гуртын улӥсь Майор агай. - Дӥсьтыса но дӥсьтытэк, ог-огзылы гожтэтэн вазиськыса, вӧсь дуре ӝытазе поталозы вал. Иванов Майор - Кузёбай гуртын огез вӧсясь. Угось татын вашкала йылолъёс возисько на. Шонерзэ вераса, берпуметӥ сизьым-тямыс аръёс ӵоже выльысен ӝутӥсько. Али Кузёбай гуртын куинь тужгес но пусйымон вӧсьсы вань. Со Быдӟым куала, Булда куала но Луд куала сяна, эшшо вань на ю-вӧсь понна вӧсяськон интызы но Акташ шуон. Акташе, пе, сӥзиськемъёс ӵемысь вуыло. "Сӥзиськем" кыл татын ӧжыт валантэмгес, соин Майор агай сое валэктыны выриз: - Адямиос сӥзисько, марзы ке мед удалтоз, умой луоз шуыса. Тани, шуом, кинлэн ке пиез армие кошке ке, со сӥзиське: ӟазегме я такаме вандо, пие умоен берытскиз ке. Яке кинлэн ке кышноез юн висьыны усиз, соку но сӥзиськыны яра. Собере, пиез умоен армиысь бертэм яке кышноез йӧнам бере, сӥзиськем мурт одно ик вӧсь доры пудозэ вандыны нуэ, инмарлы тау каре. Сӥзиськем сярысь вунэтыны уг яра шуо, со, пе, умойтэм. Нош мукет куинь вӧсь сярысь Майор агай тросгес мадиз. Котькуд вӧсе пӧртэм выжы- кумъёс пырисько. Ачиз Майор агай Булда выжыысь. Котькуд вӧсе пӧртэм дыре вуыло. Быдӟым куалае араз куинь-ньыль пол ветло ӵӧжен. Булдае куинь арлы одӥг пол вуыло такаен я ӟазеген, нош Лудэ арлы быдэ така ваё. Вӧсяськыны пусъем нуналлы адямиос кема дасясько. Така басьтоно бере, быдэс гуртысь пичиен коньдон люкало. Соку ог- огзылэсь юало: кинлэн вузано такаез вань? Со одно тӧдьы луыны кулэ, сьӧдэз но месэз уг мыны. Нош быдэс гуртысь тӧдьыез уг шедьы ке, басьто сьӧдзэ, нош йыртышказ тӧдьы пусэз мед луоз. Вӧсь дуре лыктыса, азьлогес дасям интые тыл поныны кулэ. Азьло со понна кӧс пу борды уродалэс басмаен зыраллям, али спичкаос но зажигалкаос кутӥсько ни. Собере вӧсясь инмарлы сӥзем кылъёссэ сипыртыны кутске. Пересьёс но мӧйыос котыраз карисько, егитъёс но пиналъёс кенер сьӧры интыясько. Кирос нуллӥсьёсты воксё уг лэзё вӧсяськон дуре. Вӧсясь вошъяськыны быгатэ, угось котькуд люкаськыкузы пус чӧлто: кин вӧсясь, тусьты-пуньы миськись, така вандон тӥрлык ваись, ӵужись луоз. Вӧсясь, ас ужзэ лэсьтэмез бере, такаез вандэ. Йырзэ-пыдзэ такалэсь куяло тыл пушкы - вӧсяськемзы-куремзы ӵынэн валче инмар дорозь мед тубоз. Нош сӥльыныз пӧзьто ӝук. Тазэ одно ик котькудӥз веръя. Вӧсяськисьёс потало Быдӟым нунал, Трочин но мукет дыръя. Озьы ик Герберез пусъё. Укмыстонэтӥ аръёсы республикаын нырысетӥ Гербер Кузёбайын ортчиз. Майор Ивановичез, тодӥсь-валась шуыса, вӧсясе пуктӥзы. Собере, Герберез пусйыку, Майор агаез одно ӧтчаллязы мукет ёросъёсы но. Майор Ивановичлэн ужез огшоры гинэ вылэм - пудо сюдӥсь но пудо возьмась. Кызьы дано вӧсясе сюрем? Вордӥськем 1940-тӥ арын. Кузёбай гуртын, азьло сямен - Варзи-Омгалан. Семьяязы куать нылпи вылэм. - Атаелэн огшорылэсь но огшоры нимыз вал - Иванов Иван Иванович, - серекъя Майор агай. - Оло соин милемлы мудрон нимъёс тырылӥз - Руфина, Ангелина, Ираида. Май толэзе вордӥськи бере, монэ Майор шуиллям. Дышетскемез Майор агайлэн вить класс. - Уллязы ук школаысь, - лулӟе со. - Укыр укылтэм, шпана кадь вал пичи дыръям. Огпол нылъёсты рогаткаен ыбылӥ но, соос дышетӥсьлы чагиськиллям. Соку ик монэ директор доры валтӥзы. Рогаткаме ватыны вуттӥ ик, кисыысьтым тамакме сэрпалтыны вунэтӥськем. Соин монэ улляно кариськизы. Собере Майор колхозэ ужаны пыриз. Гужем вал возьмаса улӥз, нош толалтэ пудолы сиён вайылӥз Гминурмаысь спирт поттон заводысь. Куддыръя атаез сьӧры ветлӥз вӧсяськон интые. Война вакытэ вань пиосъёс кошкемен йырин вӧсяськемысь дугдылӥзы. Майорлэн атаез оже мыныкуз сӥзиськем: улэп кыли ке, одно Булдае така нуо. Ожысь бертӥз. Выжы- кумъёссэ вӧсь дуре поттӥз. Со дырысен гурт калык лушкемен вӧсяськылыны кутскиз. Мае но сое пияш адӟыса вуттӥз ик. Зэм, атаез вазь кулӥз. Майорлэн армие мынонэз матэктӥз. Десантнике басьтӥзы. - Армиын монэн тумошо учыр луиз, - маде Майор Иванович. - Одӥг пол ачиз генерал честь сётӥз мыным. Паймыса бырисько вал ини. Малы-о честь сётӥськоды шуыса юаны дӥсьтӥ. Со шуиз: милемлы майор луон понна олокӧня пӧсяно, пе, нош тон вордӥськем дырысьтыд ик майор луэмед. Армия бере Иванов кышнотэк кема улэм. Нырысь-валысь, сузэръёссэ бызьытоно луиз. Одӥг пол эшезлы ныл кураны бускель Кузьымгуртэ мынӥзы. Отысь огезлы егит нылашлы ачиз синмаськиз. Майор Ивановичлэн но Антонина Матвеевналэн дас куинь ар виссы. Сюанзэс 1971-тӥ арын лэсьтӥзы. Ӵапак та аре Майор Иванович доры пересь кышноос вуизы. Кемалась, пе, пус чӧлтӥм вал ини: тон вылэ усиз, соин вӧсясь луод. Тӥни озьы дӥсьтытэкгес, адямиослэсь кепырасагес Майор Иванов вӧсь дуре ветлыны ӧдъяз. Со дырысен трос ар ортчиз ини. Али Майор агаез олокытчы но ӧтчало. Дораз олокинэз но ветлэ. Университетъёсысь лыкто вашкала вӧсяськонъёсъя диссертация гожъясьёс. Огпол пырак Америкаысь вуылӥллям. Ачиз Майор агай туж сэзь на - выль корка пуктэ, али укно но ӧс янакъёсын выре. Синмыз но лэчыт адӟе. - Мон бен мар, - шуэ Майор агай, - анае мынам пересь дыръяз ӧрӟи кадь адӟе вал. Тямыстон арес дыръяз ай мыным сӥньысэн венез бырттыса сётъяз. Тазалык тыныд, Иванов Майор агай. МАРИНА КОСТЫЛЕВА. Г. Юсаевлэн туспуктэмез. ДЫШЕТСКОН АР АЗЬЫН Кыӵе мылкыдын мыномы школае? Кылем арняе Калыкез дышетонъя министерстволэн паськытатэм коллегиез ортчиз. Со сӥземын вал одӥг ужпумлы: кызьы школаос выль дышетскон арлы дасямын. Ужрадэз нуиз Удмурт Республикаысь Правительстволэн Тӧроезлэн воштӥсез но калыкез дышетонъя министрлэсь ужзэ быдэсъясь Антонина Михайловна Лисина. Туннэ нуналлы нылпиосты пумитаны дасесь ни вань школаос пӧлысь 90 процентэз. Дышетон учреждениосты тупатъян ужъёс йылпумъямтэ на Дэбес районын (4 школа), Кизнер районын (7 школа), Сарапул районын (4 школа), Селта районын (3 школа). Школаосты выльдыны туэ туж секыт, соин ик 40 процентэз тупатъямын мумы-бубыослэн но дышетскисьёслэн юрттэмзы чотын. Нош Воткинск, Сюмси, Балезино районъёсын кӧня ке арзэ ини школаосты выль дышетскон арлы дасяло капитальной лэсьтӥськонъя отделъёс. Арысь аре уно сюлмаськонъёс кылдыто кезьыт школаос, нырысь ик со герӟаськемын котельнойёслэн ужаменызы. 300 котельной пӧлысь та вакытэ 21-ез тупатъясько на, сомындаяз ик, коньдон вуымтэен, та ужъёс кутскымтэ на. Озьыен, куд-ог школаосы шуныт дыраз уз вуы, кылсярысь, Юкаменск, Яр районъёсысь школаосы. Правительстволэн постановлениезъя школаосын али ик кык толэзьлы азьпала эстӥськон дасямын луыны кулэ. Та пумысен югдур урод Грах, Кияса районъёсын, озьы ик республикаысьтымы вань педучилищеосын. Со ласянь гинэ-а бен? Кызьы пусъемын вал кенешын, берло аръёсы педучилищеос котьмар ласянь школаослэсь начаргес луизы. Кылем арын сямен ик куд-ог школаос шунытлэсь, тыллэсь кысэмын луыны быгатозы, коммунальщикъёслы тыронъёс люкаськемен. Та ужпумез валче сэрттоно-пертчоно, ёросъёсысь администрациослэн кивалтӥсьёсынызы вераськыса, шуиз А. Лисина. Администрациос, роноос но коммунальной удысын ужасьёс куспын ӵош ужанъя огкылъёс гожтоно. Нош усьтӥськозы-а меда туэ выль школаос? Нырысетӥ сентябрьлы усьтӥськоз одӥг выль школа - Усть-Сарапулка гуртын, нош быдэс дышетскон ар ӵоже усьтэмын луоз 10 школа. Дышетӥсьёслэн лыдзы арысь аре будэ ке но, соос уг тырмо. Туннэ нуналлы школаосы 278 дышетӥсь кулэ на, со пӧлысь 99 дышетӥсь - гурт школаосы. Дышетӥсьёслы уг кулэяськы 11 район, нош Балезино, Глазов, Кез районъёсын соос мултэс но луо. А. Лисина верамъя, туэ школаосы паськытгес кутоно 5-тӥ курсын дышетскись студентъёсты яке заочной амалэн дышетскисьёсты, уката ик ужъя но англи кылъя урокъёсты нуон понна. Со пумысен ректоръёсын вераськемын ини. Нош пенсионеръёсты-дышетӥсьёсты пумен уже кутэмысь дугдоно. Кызьы валэктӥз Антонина Михайловна, тросгес сюлмаськоно егит дышетӥсьёс сярысь. Ужтэк кылемъёс пӧлын али 628 дышетӥсь лыдъяське. Коллегиын ӟырдыт вераськон мынӥз дышетскыны ветлӥсьтэм пиналъёс сярысь но. Кызьы ивортэмын вал, кылем арын нырысетӥ классэ дышетскыны мынытэк кылем 378 нылпи. Валамон, со нылпиос ӟеч семьяосысь ӧвӧл. Но юись, ужтэк пукись мумы-бубыоссы понна нылпиос янгышесь шат? Кытчы учке школа? Котькуд сыӵе учыр понна зол кылзэс юано дышетӥсьёслэсь, шуиз А. Лисина. Умоен уг возьмато дышетӥсьлэсь ужзэ таӵе учыръёс но: кылем дышетскон арын 11-тӥ классысь, дышетсконзэ аналтыса, 60 нылпи кошкем. Нош ваньзэ вераса, ар ӵоже дышетсконзэс аналтӥллям 319 адями. Тужгес но трос сыӵе учыръёс вылӥллям Сюмси, Каракулино, Воткинск, Юкаменск районъёсын. Лицейской классъёс усьтэмен, трос синвуоссэс кисьтоно луэ нылпиослы но, мумы- бубыослы но, угось берло аръёсы вӧлмиз таӵе сям: нырысетӥ классэ мынӥсь нылпиез лицее басьто экзаменъёс сётэмез бере гинэ. Сыӵе куронъёс нокытын тупатэмын ӧвӧл, лек вераз Антонина Михайловна. Соин ик сыӵе сямлэсь куштӥськоно. Нырысетӥ классэ вань пиналъёсты огкадь кутоно. Ар ӵоже быгатонлыкъёссы шараяськозы, тӥни соку ик нылпиосты люкыны но луоз ни. Кенешын А. М. Лисина палэнэ ӧз кельты сирота но аналтэм нылпиослэсь ужпумъёссэс. Республикаямы соос 3542 сюрс лыдъясько. Кылем арын интернатъёсысь но нылпи юртъёсысь улонэ 461 мурт келямын вал. Сыӵе выпускникъёслы, улонэ потыкузы, законъя сётыны кулэ коньдон (ичи уждунлэсь кык быдӟалазэ) но дӥськут. Вань интыосын со кулэезъя уг быдэсъяськы вылэм. Озьы ик толэзьлы быдэ котькуд сирота нылпилы висъяськыны кулэ 625 манет, но таиз но курон куд-ог дыръя быдэсмытэк кыле. Та куронъёсты тӥямъёс пумысен судэ кылем арын 117 пол вазиськылэмын. Тужгес но трос сыӵе учыръёс Кез, Глазов районъёсын. Секыт улонмы понна йыркурмес буйгатоно ӧвӧл мискинь нылпиос вылын, алӥз роноослэсь кивалтӥсьёссэс А. Лисина. Туэ нош ик шуг-секытъёс кылдозы учебникъёс пумысен. Вань дышетскисьёслы соосты дунтэк сётыны уз луы. Соин ик котькуд семьяя та ужез нимаз нуоно луоз. Туж ёрмисьёсызлы дунтэк сётоно. Учебникъёсты вузанэн туэ дас фирма выроз. Озьы ик школалы кулэ луись арбериос 18 августысен вузаськозы Ижысь "Металлург" дворецын. Коллегиын ӝутэм ужпумъёс каллен но керӟегъяськытэк сэрттэмын-пертчемын вал. Министрлэсь ужзэ быдэсъясь вань юанъёслы тырмыт валэктонъёс сётӥз. ТАТЬЯНА БАННИКОВА. Улонлэн сьӧд виштыез Врачъёс чакламъя, ляб визьем вордскись пиналъёслэн лыдзы арысь аре йылэ. Та ласянь пӧртэм ӧвӧл Ижевск но. 47-тӥ школа витетӥ арзэ ужа ни нимысьтыз программая, туэ со сярысь шара верамын. Дышетӥсьёс-дефектологъёс дышетскизы курсъёсын. Первомай районысь ог 200 нылъёс но пиос татын тодон-валан люкалозы. Соосты нуналаз кык пол дунтэк сюдозы, книгаос понна но мумы-бубыоссылы уксё тыроно уз луы. Та сюлмаськонъёс усё государство вылэ. Школа ужа нылпи садлэн юртаз, Восточной ульчаын. Интыез ӟоскытгес. Соин ик вань мылкыд карисьёссэ, татын дышетонооссэ пиналъёсты, кутыны уг быгато. Жаляса верано, сыӵеос арлы быдэ пумен трос луо. Вис карытэк юон, пӧртэм черъёсын висён кытчы ке но йӧто ук. А. ЛУНИНА. Улонэз ву басьтэ Кыкетӥ арзэ ини Сьӧд зарезьын, Украина котырысь вуосын, чорыгасьёс чиптэм-чаптэм ышыло,- гожтэ "Новые известия" газет. 1996 арын сентябре Лукулл шормуӵ дорын выиз куать чорыгась. Кӧня ке толэзь ортчыса, эшшо огез пыж ыше. Тямыс чорыгась сярысь али ке но номыр тодмо ӧвӧл. Огез гинэ, зарезе чорыганы нырысьсэ потэм мурт, улэп кылемын. Сьӧд зарезьысь "Бермудской треугольниклэсь" "сямъёссэ" эскерон бордын ужа Украинаысь правительстволэн нимысьтыз комиссиез, пусъе газет. Президент но яратон Дуннеысь газетъёс бадӟым саклык висъяло США-лэн президентэзлэн Билл Клинтонлэн но Моника Левинскилэн кусыпъёссылы. Кылсярысь, Франциысь "Дерньер Нувель Д" Альзас" газет малпамъя, та учыр детективлы кельше. Президентлы синмаськем егит практикантка ивортэ, соин матысь кусыпъёс тупатӥ шуыса, собере кылъёссэ берлань басьтэ, собере та ужпумез нош ик ӝутэ. Мед оскозы шуыса, возьматэ дэремзэ: Клинтонэн ӵош дыръям тазьы дӥсяськемын вал, пе. Президент присяга улын кылзэ сётӥз, Моника Левинскиен матысь кусыпъёс ноку ӧй возьылы шуыса. Америка! Номыр уд шу! Билл Клинтон алдаське шуыса тодмо луиз ке, Тӧдьы юртысь кошконо луоз. Котьма ке но, кызьы возьмато юалляськонъёс, калык президентсэ гажа, кышноме гинэ яратӥсько шуэмезлы уг ке но оскы. Дано анай Чилиысь газетъёс ивортӥзы дуннеысь тужгес но трос нылпиё анайлэн улонысь кошкемез сярысь. Леонита Эспиноза витьтон сизьым пинал вордӥз, тросэз соос кыктоос но куиньмоос. Пиналъёсыз солы эшшо но бадӟымгес кузьым лэсьтӥзы - сю нылпи ваизы. Чилиысь кышномуртлэн нимыз Гиннеслэн книгаяз пыртэмын, угось дуннеысь огез но нылкышно сомында нылпи вордыны быгатэменыз ушъяськыны уг быгаты. Эспиноза котьку шуылӥз: "Мон данъяськисько нылъёсыным но пиосыным. Ми куанер адямиос. Озьы ке но, тау Инмарлы, соос ужез ярато, анай-атайзэс гажало". (Басьтэмын Интернет пыр). Улозы Дунне вылэ вордскозы сизьым кузя чакламтэ вож пиналъёс. Соослы улон кузьмазы Ижевскысь семья ужпумъяёсын вырись комитет но "Ураллэн югытэз" христианской благотворительной миссиен вырисьёс. "Эн виы!" нимаськись акциен нюръясько нылпи куштонэз кулэстон понна. Миссилэн кивалтӥсез Михаил Белоглазов верамъя, валэктон уж калык пӧлын туж секытэн мынэ. Нылпи будэтон та вакытэ угось капчиен уг сётскы. Выль адями дунне вылэ вордскоз-а, уз-а - потэ врач бордысь но. Миссиен вырисьёс Ижевскысь 11 больницаосы вуылӥзы, отын кыллись нылкышноосын вераськизы. Нылпизэс куштыны дасяськемъёс пӧлысь сизьымез та малпанзылэсь алӥськизы. Озьыен, сюлэм улазы нуллоно пичи комокъёслы югыт дуннеез адӟыны кылдоз. Нош кӧняез быроз? М. И. Белоглазов верамъя, данакез нылкышноос вордсконо пиналзылэсь алӥсько, сютэм улонлэсь, ёрмонлэсь кышкаса. Соиз валамон. Мусо, чебер кылын гинэ луло мае ке уд сюды, уд дӥся. Л. ДМИТРИЕВА. Городлэн атаез Адями син шоры йӧтэ ке, со сярысь одно ик калык азьын шара верам потэ. Сыӵеос пӧлын - Воткинск городлэн мэрез Валерий Леонидович ФРИДРИХ. Вакчияк: вордскемын 1 декабре 1940 арын, ӟуч. 1959 арын йылпумъяз Сызраньысь нефтяной техникумез, 1970 арын - Ленинградысь электротехнической институтэз. 3 ар служить кариз Советской Армиын. 1970-тӥ-1988-тӥ аръёсы ужаз Воткинскысь машиностроительной заводын, инженер-конструктор, собере группалэн кивалтӥсез луыса. 1994 арысен - Воткинск городлэн мэрез. 1 Ужан нуналэз пусъемын минутэн-минутэн: кутске 7 час котырын, йылпумъяське 21 час бере. Сямызъя ӝикыт, шырыт, туннэлы чакламзэ ӵуказелы уз кельты. Чупрес, визьмо, лэчыт кылъем, дӥсьтӥсь. Таӵе дунъет сёто воткаос городзылэн кивалтӥсезлы. Юнме шорысь мэре кыкетӥзэ ӧз быръе, дыр. Пумиськон сярысь Валерий Леонидовичен азьвыл ик ӧм кенеше. Соин но, ужан графиксэ тӥянтэм вылысь, ӧтиз сьӧраз, городысь предприятиосы. Водителезлы "путёвка" сётӥз: - Али мыном газовой аппаратура поттонъя заводэ, отысен - кирпич шуккисьёс доры. Нялтас пыралом выль муниципальной рыноке. 10 час 45 минут. Заводэ мынон мугмес сюрес вылысен валэктӥз: - Юрттоно поттэм продукциез келяны. Та сюлмаськонлэсь ог люкетсэ ас вылаз басьтыны выре городысьтымы "Импэкс" АО-лэн генеральной директорез С. В. Машинников. Вераськом пырак интыяз, мар пӧрмоз. Заводлэн валтӥсь инженерез вакчияк тодматӥз кылдэм югдурен. Предприятие ӝыны кужымен гинэ ужа, тросэз цехъёс гужембыт сыло ни. Тыронъёссы трос, берпуметӥ уждунзы сётэмын миым ноябре. Сыӵе улонэ вуэмын Воткаысь газ плита поттӥсьёс. Ӵошатон понна: ӟеч вакытъёсы завод ужаз 2-3 сменаен, араз 167 сюрс плита келялляз, туэ 5 толэзь куспын поттэмын 15 сюрс. Таизэ но нуись ӧвӧл. Улон юртъёсты пуктон кынмиз бере, гурлы кулэяськон но быриз. Вань мукетыз но. Европа выжиз ни электроплита вылэ, чагыр эстӥськон адямиослы кышкытлык но ты висён вае шуыса. Рыноклэсь куронъёссэ чакласа, Воткинскысь газ аппаратура поттонъя завод но 1999 арысен дасяны кутскоз выль модельем плита. Со понна кусып тупатэмын ни Донецк областьысь заводэн. Умой соиз: предприятие шуге-леке ке но вуэмын, валтӥсь специалистъёслэн суйзы- пыдзы юскиськемын ӧвӧл. Соос ялан утчасько. Басьтӥськизы эмален шобыртэм чебер посуда, пыжиськон гуръёс борды. Тани-тани кутскозы машинаослы газ баллон поттыны. Со воштоз бензинэз, уз сапта инкуазез, дунтэмгес усёз. Эскерон вылысь, кӧня ке баллон поттэмын ни. Али мыно испытаниос машзаводлэн 29-тӥ цехаз. Басьтӥсьёслы выль вуззэ дэмламлэсь азьло, завод аслэсьтыз машинаоссэ газ вылэ выжтэ. Кутскизы "Газель" бордысен. Со чагыр эстӥськонэн ужа ни. Россиын выль амал ӝог пыӵаз Тюмень-Сургут автотрассаын. Специалистъёс лыдъямъя, Удмуртилы 160 литръем баллон 10-20 сюрс кулэ луоз. Воткае туннэ ик заказъёс вуо ни, кылсярысь, Аргентинаысь но куд-ог музон интыосысь. Али мытэм удыс, тупатэм кусыпъёс выжозы табере ЪЪИ дауре. Озьыен, завод улоз но ужалоз. Таӵе мылкыдзы предприятиысь кивалтӥсьёслэн но городлэн мэрезлэн. Кирпич завод. 11 час 30 минут. Директорезлэн Г. А. Кормышевлэн мылкыдыз мӧзмыт. Поттэм кирпичсэс басьтӥсез ӧжыт. Завод капка дорын шал-шал буш, одӥг машина но ӧвӧл. - Азьло уен-нуналэн черод ӧз бырылы, али калыклэ коньдонэз ӧвӧл, - предприятизэ шонере поттыны вырыса валэктэ директор. В. А. Фридрихлэн мукет учконэз: - Завод уз ворсаськы. Городлы та вакытэ туж кулэ облицовочной кирпич. Кулэ керамической плита. Бетон сярысь со юнгес, сюрес вӧлдонэ кутыны туж умой луоз. Ӟеч вузэз Удмуртилэн палэназ но келялом. 800 сюрс кирпич азбарын кылле. Завод гуръёс кысэмын, тупатъян ужъёс мыно. Пунэмен тыронзы 2 миллионозь вуэмын. Со понна ик куинетӥ нуналзэ газтэк пуко. Предприятие тыро-пыдо уг ужа бере, калыклы Предприятие коньдон сётыны номыре: куинетӥ арзэ сиён-юонэн алдало. Ма шуод, сютэм мурт таин но буйга ни. "Импэкслэн" кивалтӥсез кирпич вузанэз ог люкетсэ ас вылаз басьтэ. Но со понна поттэм продукциез плёнкаен бинялтоно, озьы гинэ кирпичез басьтӥсь доры быдэсэн вуттод. Тюменёзь поддонъёс вылын келяса эскеризы вал - сюрес вылын супыр-супыр пырдӥиз. С. В. Машинников ик дэмлаз: - "КамАЗ"-эн, чугун сюрестӥ келян дуно ке усе, Кам кузя вузкароно. Удмуртиын но Татарстанын шуккем кирпич дунтэмгес, юасьёс вань Москва, Ленинград, Тюмень, Северной Кавказ палъёсысь. Нош завод, рынокын ас интызэ шедьтытэк, продукцизэ ялан кулэстэ. 1992 арын поттэмын вал 22 миллион 300 сюрс, миым - 5 миллион, туэ - 3 миллион. Чигнаны нокытчы. Утчано выль амал. 12 час 20 минут. Муниципальной рынок. Городлэн кивалтӥсез данъяськыса возьматэ выль базарез. Таӵеез Удмуртиын ӧвӧл на. Вузкарисьёслы сётэмын городысь валтӥсь предприятилэн ӵыжак выль ӝутэм корпусэз. Солэн кузёез, Г. М. Хасаншин, егит, чупрес воргорон, ӝогак тодматэ пичиесь магазинъёслы люкем павильонэн. Татын вузкаро нимаз адямиос, организациос, предприятиос. - Ларёк котькудӥз ас понназ пуктэ. Инты понна коньдонзэ касса пыр толэзьлы быдэ тыре: огшоры нуналэ - 6 манет, субботае но арняе - 13. Потребсоюзлэн рыноказ - 15. Татын толалтэ но шуныт: тӧл уг шедьты, зор-кот уг вия. Муниципальной рынок кык ар ужаз ни. Городлэн бюджетаз со ӟеч барыш сётэ, заводэз но липет улаз лэземез понна уг обидьы. Огъя вераса, ужбергатӥсьёс чотын Воткинсклэн вылтусыз син шорын егитоме, чеберске. Огзэ пусъём: городлэн администрациез "выль" ӟучъёсты быгатэ калык понна пӧсятозязы ужатыны. Рынокен артэ буш сылэ на эшшо одӥг юрт. Отчы ӝоген выжоз милиция. *** Мэрие берытским 12 час 35 минутэ. 13 часын - адямиосын пумиськон. 16 часын - Удмурт Республикаысь Правительствоын совещание. Та - одӥг ужан нуналлэн пичи люкетэз гинэ. Городысь экономической югдурез ялан син шорын возён понна, котькуд толэзьлэн берпуметӥ пятницаяз предприятиослэн директоръёссы люкаськылозы мэр доры. Ӵош кенешыса, ог-огедлы юрттыса, каньылгес луоз производствоез ӝутыны, бере кылисьёсты сьӧрад валтыны. Пусъём на: Воткинсклэн улыны быгатэмезлы синмаськыса кошкиз республикаысьтымы Правительстволэн Тӧроез но. Данакез коллективъёс пайдаен ужало, выль но выль продукция потто. Газетлы, радиолы, типографилы - одӥг кузё? Люкаськылӥз Печатья но иворъёсъя министерстволэн коллегиез. Отчы озьы ик ӧтемын вал городъёсысь но районъёсысь газетъёслэн редакторъёссы, типографиослэн кивалтӥсьёссы, газет-журнал вӧлмытӥсьёс. Министр Юрий Медведев тодматӥз экономика удысын кылдэм югдурен. Коньдон окмымтэен сэрен данакез газетъёс но журналъёс бере кыльыса вуо лыдӟись доры. Шуг радъяське вуоно арлы гожтӥськон. "Удмуртская правда" газетэз басьтыны мылкыд карем ни ог 2 сюрс мурт, "Удмурт дуннеез" - 1500, "Известия Удмуртской Республики" газетэз - 400, журналъёсты - туж ӧжытэз. Юрий Иванович ӵектӥз бюджетысь висъям коньдонэз туж шыръяса кутыны, кӧня ке газетлэсь быдӟалазэ но татын ужасьёслэсь лыдзэс кулэстыны, реклама чотын уногес барыш поттыны, интыосысь газетъёслэсь редакциоссэс, радиоез но типографиосты огазеяны. Вылӥ верам ужрадъёс шукко "Удмурт дуннеез" но. Газетлэсь быдӟалазэ пичиятыны ӧз косэ (чигнаны нокытчы ни), нош ужасьёсмес кулэстоно луом. Коллегилэн ужаз пыриськиз Правительстволэн Тӧроез Павел Вершинин. Югдурез тупатон вылысь, со кӧня ке дэмлан сётӥз. Оло, интыысь газетъёслы администрациосын ӵош кузё (учредитель) кариськыны быгатысалзы предприятиос но хозяйствоос? Уг луы-а кулэстыны газет-журнал нуллэм понна дунэз? Ижысь полиграфкомбинатын чалякгес инъяно Германиысь ваем "Унисет" машинаез, соку газет печатлан чарак дунтэмалоз. Павел Николаевич валэктӥз данак юанъёслы. Ӵектонъёсты лыдэ басьтыса, коллегия юнматӥз югдурез тупатонъя ужрадъёсын программа. А. ПЕТРОВ. Тодматскон сэрег Аб. 243. Оген кылем воргорон, 62 арес, улӥсько гуртын, вань аслам хозяйствое. Тодматскысал гуртын улыны мылкыд карись оген кылем 60 аресозь кышномуртэн. Аб. 244. Воргорон, 33 арес, ӝуждалаея 170 см, гороскопея Близнец. Улӥсько гуртын апаеным ӵош. Сямы лякыт, юылӥсько праздникъёсы гинэ, кыскисько. Семья кылдытон вылысь тодматскысал лякыт сямо удмурт нылкышноен, пумит ӧвӧл пичи нылпиезлы. Аб. 245. Пиосмурт, 24 арес, 186/80, улӥсько гуртын, анай-атаеным ӵош. Яратӥсько инкуазез, губияны, чорыганы. Тодматскысал ас ёзо, капчи мылкыдо удмурт нылкышноен. Нылпиез вань ке, юрттӥсь луоз. Редакцилэсь. Лыдӟисьёсмылэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, - ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен чылкыт конвертэ понэ - ыстомы кулэ адресъя "Я+Я" Та служба ужа Юкаменскын. Тодматскемды потӥз ке, гожтэ таӵе адресъя: 427630, Удмурт Республика, п. Юкаменское, а/я 10 "СЗ" аб. �... Куронъёссы милям кадесь ик - гожтэттэс маркаен чылкыт конвертэ понэ - ыстозы кулэ адресъя, янгышаса "Удмурт дунне" газетэ эн лэзе. Абонентъёслэн ваньзылэн одӥг куронзы вань: пытсэт сьӧрын пукылэмъёс медаз вазиське. Аб. � 0382. Удмурт кышномурт, 40/154/56, гороскопея Овен-Петух, дышетскеме средне- специальной, ужасько, улӥсько ас квартираям кык пиналэным. Люкиськемын. Яратӥсько лыдӟиськыны, бакчаын берганы, нюлэскы ветлыны. Тодматскысал ужез гажась 39-47 аресъем воргоронэн. Аб. � 0385. Оген кылем удмурт кышномурт, 38 арес, лякыт сямо, аслам квартирае вань. Тодматскысал 35-45 аресъем воргоронэн. Аб. � 0432. Удмурт кышномурт, 31/158/59, гороскопея Рыба-Лошадь, вылӥ образованиен бухгалтер. Картэным люкиськемын, улӥсько ас юртам 8 аресъем нылыным. Улон интыме воштыны соглаш. Аб. � 0434. Удмурт нылаш, 21/168/69, гороскопея Козерог-Дракон, бухгалтер. Курень синмо, пеймыт йырсиё, капчи мылкыдо, яратӥсько лыдӟиськыны, керттӥськыны. Аб. � 093. Удмурт нылаш, 25/165/68, улӥсько гуртын, ужасько бухгалтерын. Ваньмон дыръям киужен вырисько, пӧраськисько но лыдӟиськыны яратӥсько. Аб. 736. Пиосмурт, бесерман, 24/170/60, гороскопея Козерог, механизатор, лякыт сямо, ужез гажась. Тодматскысал 18-24 аресъем веськрес мугоро нылашен. Аб. � 655. Писомурт, бигер, 22/172/58, улӥсько гуртын, ужасько скал кыскись луыса, яратӥсько юртъер котырын берганы. Тодматскысал бигер яке удмурт нылашен. Пумит ӧй луысал одӥг нылпиезлы. ИНТЫЫСЬ ВЛАСТЬ Гудырилэсь утись Интыосын быръёнъёс ортчем бере, куд-ог районъёсын кивалтон удысэ нылкышноос султӥзы. Тани Каракулиноысь ёрос кенешлы тӧрое быръемын дышетӥсь Эльвира Александровна ТРЕФИЛОВА. Соин тодматскон азьын йырын олокыӵе но юанъёс бергазы. Кызьы адями ас сюрессэ быръе? Шӧдтэк шорысь-а яке со понна кыӵе ке сям луыны кулэ- а? Малы огзэ адямиез уж вылӥе ӝутэ, мукетсэ - куасалтэ? Мар бордысь со ваньмыз потэ? Нылкышноен вераськонмы ӧръяськиз, та юанъёслы кыӵе ке валэктонъёс шедьтон вылысь... - Малы монэ Кенешлы тӧрое бырйизы? Зол сямы-а юрттӥз. Ӧз. Аслэсьтым сямме мон кужмо ӧй шуысал. Тодӥськоды-а, малы монэ та удысэ бырйизы? Адямиос туж ӟеч тодо на КПСС-лэн райкомаз идеологияя секретарь луыса ужамме. Соку нуналлы быдэ вазь ӵукнаысен бер ӝытозь калык пӧлын вал. Сямы сярысь ке верано, мон нюръяськись адями ӧвӧл, ваньзэ дыртытэк, каллен но пыр-поч малпаськыса лэсьтыны вырисько. Адямиослы юрттыны тыршисько - тӥни соин ик, оло, бырйизы. Куд-ог адямиослэн улоназы бадӟым инты басьто малпамтэ шорысь кылдэм учыръёс. Эльвира Александровна ас сюрессэ ас сяменыз берыктыны быгатэ. - Вордӥськи шаермылэн самой уй пал сэрегаз - Кулига гуртын. Дышетски Глазовысь пединститутын. Сое йылпумъяме бере ужаны куриськи Каракулино районэ. Киям карта кутыса, ачим отчы пус пуктӥ: тани татчы, Голапово гуртэ, ужаны мыно. Эшъёсы паймизы. Малы сокем кыдёке, тодмотэм интые? Егит мылкыдылы со ик, лэся, кулэ вылэм. Вылаз ик, бордаз кыскиз на та гуртлэн Кам дурын сылэмез. Голапово школаын ӟуч кылъя но литературая дышетӥсез, кӧня ке дыр ортчыса, завуче пукто, бӧрысь выжто роное - семьяосын но быдэ вуымтэосын ужанъя инспекторе, нош собере Каракулиноысь школа-интернатэ директоре юнмато. Малы интыысь интые кыскаллязы та кышномуртэз? Аслэсьтыз улонзэ сэрттыса-пертчыса, Эльвира Александровна тазьы шуэ: - Куддыръя асме гудыри шукконлэсь утись арбериен ӵошатӥсько. Адямиосын ноку уг керетӥськы, уг косъяськиськы. Малы со кулэ? Мукет сямен но вераськыны луэ ук. Соин но, вылды, озьы ужаны быгатэмме адӟыса, секыт учыръёсы монэ тодэ вайылӥзы: завуч но, директор но луи. Тэшкам коллективъёсты, зэмзэ но, куашкамлэсь утьылӥ. Ас поннам малпай: астэ дунъян понна шедьтоно ук сыӵе кылъёс - гудыри шукконлэсь утись. Сямызлы гинэ ӧвӧл, быдэс мугорызлы меӵак дунъет сётэмын кадь: сыӵе ӝужыт, паськыт пельпумо кышномуртъёсты туж ӧжыт пумиталод, уката ик удмуртъёс пӧлын. Школа-интернатысь кошкон сярысь ӧз малпаськылы, аналтэм нылпиосын ужаны капчи ӧй вал ке но. Тямыс ар ӵоже коллективен ӵош сомында шуг-секытъёс вормемын. Ужа но ужа гинэ вал, йырын уно малпанъёс, быдэстымтэ ужъёс. Но соосты йылаз-пумаз вуттон уж мукет директорлэн пельпум вылаз усиз ни. Эльвира Александровнаез выль уже выжтӥзы: партилэн райкомаз, идеологияя секретаре. Кема ужаны ӧз кылды: выльдӥськон кутскиз. - Пушкам маи ке но чигиз кадь. Райкомъёсты пытсазы, милемыз уллязы, калыклэсь тушмонъёссэ сямен. Кӧня ке нуналъёс ӵоже йыромыса сямен ветлӥ. Нош али тани, быръёнъёс ортчем бере, милемыз, администрациослэсь но Кенешъёслэсь выль быръем кивалтӥсьёссэс, Кун Кенешлэн юртаз ӧтьылӥзы. Быръем муртъёсты адӟи но шумпотӥ: тросэз соос ракомъёсын азьвыл ужамъёс. Озьыен, калык соослы али но оскемзэ вера бере, адямиос азьын янгышесь ӧвӧл. Партия куашкам бере, Эльвира Александровна буйгатскон инты нош ик школаын шедьтӥз. Аслыз ачиз юн шуиз: "Школаысь табере нокытчы но уг кошкы ни. Татын мынам интые!" Озьы нылкышно понна кутскиз выль улон. Дышетыны басьтӥз покчи классъёсты. Ачиз но ӧз валалля: оло ужаны, оло шудыны ветлэ. Тӥни мар со лякыт улон вылэм - уже но лобыса сямен мынӥськод, ужысь но капчи мылкыдын бертӥськод. - Ой, кыӵе жади,- тазьы ӝожтӥськемзэс дышетӥсьёслэсь кылӥсько ке, паймисько. Луэ шат жадьыны, школаын шудыса сямен ужаськод ке? Сизьым ар кыстӥськиз сыӵе ужан-шудон. Со дырзэ тодаз вайыкуз, дышетӥсьлэн синъёсыз нюромизы. - 5 июле ортчем быръёнъёс мынэсьтым улонме чутрак воштозы шуыса ӧй но малпаськылы. Бен, депутатэ кандидатэ ӵектыкузы ӧй пумитъяськы. Бырйизы ке, ужало, райсоветын ужаме вань ини, малпай. Но уйвӧтам но ӧй адӟылы, монэ ёрос Кенешлы тӧрое быръёзы шуыса. Кышкатски. Кызьы учком нылпиослэн синъёсазы? Мар шуом анайёссылы? Быръёнъёс бере ини пумитай огзэ дышетскисьме, Ильюшаез. Йырзэ ошыса, шорам учкытэк юаз, тӥ, пе, мукет уже кошкиллямды? Аслаз тани-тани синвуосыз потозы. Юасько, нош тон, Ильюша, кызьы учкиськод сыӵе вамыше шоры? Урод, шуэ, мыным тӥледын котьку умой вал. Оскылӥ тӥлед... Валасько, монэ та кивалтон удысэ калык бырйиз. Озьы ке но, сюлэмме ялан позыртыса возе таӵе малпан: нылпиослэсь осконзэс ӧй-а меда чигты? Пие буйгатыны выре. Эльвира Александровналэсь пизэ адӟыны ӧз кылды, анаезлэн верамезъя, со, пе, Каракулиноын самой таза но ӝужыт пиосмурт. Оло, сюрес вылын пумиськоды. Армиысь бертэмез бере ГАИ-ын ужа. Анайзэ кивалтӥсе быръемзы бере, егит пияш шумпотыса ивортэм, со но табере институтын дышетскоз шуыса. Мар ватонэз, коньдонтэк али уд дышетскы, валэктэ югдурзэ кышномурт, дышетӥсьлэн уждунэныз гинэ улыны но, дышетскыны но секыт йӧтысал. Но татын мукет секыт мугез но вылэм. Нокыӵе люкетись мугъёс ӧй ке луысалзы, кышномурт одӥг гинэ пизэ кызьы но озьы дышетыны быгатысал, дыр. Кӧня ке ар талэсь азьло, висьыны усьыса, улонысь кошкем Эльвира Александровналэн одӥг гинэ сузэрез. Вить нылпиез чылкак огназы кылё - атайзы вазьгес ик кулэм ни вылэм. Пыд йылазы ӝутымтэ нылпиос понна быдэс дунне вылын одӥг гинэ тодмо мурт - апайзы. Вань секытэз йӧтӥз ни Эльвира Александровналы. Но со сярысь, инмар сяна, нокин но уг тоды, угось кышномуртлэн ӝожтӥськон сямыз ик ӧвӧл, ачиз ваньзэсты карттэк ке но будэтӥз. - Чылкак одӥг семья кадь улӥмы. Табере вань пиналъёсмы ужало ини, Максиммы гинэ школаын дышетске на. Тӥни озьы улон сое трос нылпиё анайлэсь ужзэ но быдэстыны косэм. Пиналъёссэ али но со пӧртэм шуг-секытъёслэсь утьыны выре, гудырилэсь утись выллем. Адямиен пумиськемлы быдэ кыӵе ке но тодэ ваёнъёс, мылкыдъёс кылё. Мынам йырам кылёзы та кышномуртлэн верам кылъёсыз но паймымон малпанъёсыз: "Мон туж шудо кышномурт". "Синкылиос умоен берытско". "Ужасько, шудыса сямен". "Улыны секыт, но улон одӥг, быгатоно сое шулдыртыны". "Берлань уг берытско" - тазьы со шуиз вордскем палъёсаз берытскон пумысен юамелы. Нош тазьы - адямиос сярысь: "Котькытын ӟеч адямиос уло - монэ нокин но ӧз вузалля на". "Нюлэсо палъёсын, Кезын, калыкъёс ужасесь, каньылэсь, татын, Каракулино палъёсын - эрикез яратӥсесь". Кема вераським на район азьын сылӥсь ужпумъёс сярысь, котькытын сямен ик соос огкадесьгес. Эльвира Александровна юн оскемзэ вераз выль депутатъёслы. Соослэн кужыменызы уно шуг-секытъёс вормемын луозы. Нырысь нуналысен ик ужано, вуоноез сярысь сюлмаськыса. Дасяно ӟеч кадръёсты. Таӵе ужпумен пумиськи, шуиз нылкышно. Советамы туж кулэ граждан ужъёсын вырись юрист. Юристъёс данак кадь, нош тупасез ӧвӧл. Калык пӧлын со мед ужаны быгатоз вылэм. Пумиськонмы йылпумъяськиз яратон сярысь вераськонэн. Сюлмын улэ ке яратон, адямиосыз яратон, нокыӵе шуг-секытъёс кышкыт ӧвӧл, шуиз Эльвира Александровна. Соин ик ӝӧк сьӧрын эшъёсыным пумиськылыны кылдэ ке, котьку сямен ик нырысетӥ но берпуметӥ сюмыкмес ӝутӥськом яратон понна. Лякыт мылкыдын потӥ та кышномурт дорысь. Интыысь власть оскымон киын. Вань юанъёсылы валэктонъёс шедьтӥ. Кинэ калык быръе, зэмзэ ик, адями бордысь потэ: кыӵе солэн сямъёсыз, осконъёсыз. Эшшо котькуд адями малпаськыны кулэ на калыклы пунэм тыронъёссэ берыктон сярысь. Куд-огез сое вунэтэ, аслыз басьтон-капыртон сярысь гинэ сюлмаське. Нош вунэтоно вылымтэ. Соку калык тыныд сётэ туж бадӟым кужымзэ но кузьымзэ - осконзэ. Татьяна БАННИКОВА. Вакчияк * Туала Воткинск - Удмуртиысь огез валтӥсь промышленной центр. Ижевскозь - 62 иськем, Кам шур дорозь - 12. Заводъёс пӧлысь валтӥсез - "Воткинский машиностроительный завод" производственной объединение. * Городлэн кылдон нуналэз - 3 апрель 1759 ар, "кирос бубиз" - П. И. Шувалов граф, корт кисьтонъя заводлэн кузёез. 4 ар ортчыса, выт тырымтэез понна, завод казналы сётэмын вал. Лэсьтӥзы якорьёс, корт арбериос. Санкт-Петербургысь Петропавловской соборлэн шпилезлэн инъетэз но кисьтэмын Воткаысь кибашлыосын. * Заводлэн кивалтӥсьёсыз пӧлысь огез - И. П. Чайковский. Солэн семьяяз 1840 арын 5 мае вордскиз быдэс дуннелы тодмо композитор. Петр Ильич Чайковский Воткинскын улӥз 8 аресозяз. Пыртэмын Благовещенской соборын (со интыын али В. И. Ленин нимо культура юрт). * 1918 арын 1 мартэ интыысь Совет, Ижевсклэсь адӟем карыса, Вотка посёлокез городэн ялон сярысь решение кутэ. Та решение юнматэмын вал 1935 арын гинэ. 1924 арын Советэ быръемъёс огкылысь кизэс ӝуто Воткалы Азинлэсь нимзэ сётон сярысь (посёлокез тӧдьыослэсь В. М. Азинлэн дивизиеныз мозмытэм дырысен 5 ар тырмонлы сӥзьыса). Выль ним городлы ӧз пыӵа. КЫТЫН ТЫНАД КЫШНОЕД, КАЗАКПИ? Колхозын мон усто ужась, Ваньмыз ушъяло. Нылъёс гинэ уг ярато, Весь серекъяло... Улонын та кырӟанын сямен, оло нылъёс пиосты уг ярато, оло пиос нылъёсты уг адӟо, ог люкетэз кузтэк-палтэк ик пересьмо. Милям Кузёбай гуртамы сыӵе пиос тырмыт гинэ. Мыным тунсыко потӥз: малы соос озьы кылё? Тае тодон вылысь, сыӵеос пӧлын аспӧртэм юалляськон радъяй. Зэм, куд-огез шӧмо вал. Шонер верало: сазезлэн йыраз, юэмезлэн - кыл вылаз. Векчи виятэмзэ шӧмъяло ке, сюлэмзэс ӟечгес усьто, востэмезлэн но кылыз ӧръяське верантэмез но кыре потэ. Таин валче гажано лыдӟисьёс, эн малпалэ, мон соосты ачим сектай шуыса. Малы уд кышнояськиськы? Семья кылдытыны малпад ке, ку но кыӵезэ аслыд кузпал ваёд? Таӵе юанэн мон вазиськи гуртысь казакпиослы. Коля (арлыдзэ ӧз иворты, мон тодэмъя, 30-эз ортчемын): - Мон туннэ ик кышнояськысал. Но нылъёс шорам уг учко. Нылъёс пельынызы ярато, пиос - синмынызы, пе. Та верам шонер ӧвӧл. Чебер кылъёс туж верасал. Нош соос уг кылзо мынэсьтым, кык метр палэнтӥськыса кӧчо. Синучкон азе уг султылӥськы ке, сюлмы ӧжытак ганякгес кылле, аслым сокем шуш уг потӥськы.- - Галя, тон коть городысь эштэ монэн тодматыны вай ини. Туж-туж чеберзэ кулэ ӧвӧл. Но паллянэ медаз кожа. Ачид кадез но яралоз. Аркаш (40 арес), - Туала арын кышно ваёнэд но со порма. Егитсэ басьты вал, берло ачид ӧпкелёд. Соос уго йыр йылад тубыса эктозы, серемзы но уз поты. Нош ымныр туссэс уд ик тодма, кӧня ке полэс штукатурка лякемын. Дӥськутсэс веранэз ӧвӧл: уд вала, оло паськыт е, оло сюбег юбка вылазы. Лом ньылэм кадь куасалляськыса ветло, ӵуказеяз, чиган сямен, кузь дэременызы сюресэз ӵужо. Ачиз со куспын мынэсьтым дӥсьме учке, ярано, мон спортивной брюкиен вал. - Собере кышно ваёно ке, сое заказтоно ай. Мынамез вордӥськемын но ӧвӧл на, - азьланьтэ Аркаш. - Кызьы вордӥськемын ӧвӧл на? Тыныд ньыльдон шуккиз ни. - Мар вераськиськод, мыным туэ 17 гинэ тырмиз. Витя (35 арес): - Малы егит кышно утчалом? Со мыным кулэ ӧвӧл. Астэ сюдод-а, кышнодэ дӥсялод-а? Кузпалъяськоно ке, пенсионеркаез басьто. Со сютэм кулыны уз сёты, пенсиеныз улом. - Нош ӧз ке сёты? Коньдонзэ чулкаяз люкаса возёз, я нылпиосызлы лэзьялоз. - Кышнояськи ке, кытчы-о пыроз? Семьяын карт - кузё. Нылпиосыз ласянь ке верано, басьто нылтэм-питэмзэ. Миша (30 арес): - Малы сюреслэн огпал пумысьтыз мукет палаз вамышъясько? Мылкыд урод, тракторе сӧриськиз. - ...Кышнояськы ини, юыса эн ветлы. Пересьмид ке, огнад мӧзмыт луоз. - Тани адӟись мед луоз (пичи пи шоры возьматэ), как юонме кушто, сразу кышно ваё. Котькыӵезэ басьтыны дась, жугиськись гинэ медаз луы. - Нош ку куштӥськод юонлэсь? - Как кӧты тыриз, сразу. Кытӥяз ведь вина шоры чик учкем уг поты. Нош юытэк уг луы, эшъёс нерад каро. Толя (30 арес): - Уг тодӥськы, ку кышноясько, кыӵезэ басьто. Ӧй малпаськы со сярысь. Колхозэз али ӝутӥсько ай. Бӧрысьгес, оло, быръё кыӵе ке шоро-куспозэгес. Визьмо но визьтэм но медаз лу, туж шуш но чебер но... Володя (28 арес): - Мон чик уг кышнояськы, дыр. Эсьма косъяськисез, керетӥсез, кылме юасез уз луы. Ваня (24 арес): - Мон дась ӧвӧл ай семья кылдытыны. Собере мукет ужпумъёс но вань. Тани агае аслаз семьяеныз яна потӥз ке, соку ик мон но кышноясько. Сергей (20 ареслэсь ортчемын): - Одӥгзэ вайыны медӥсько вал. Анайлы ӧз яра - со уго мынам мировой кышномурт. - Анаедлы одӥг нылаш но ӧз кельшы ке, чик уд кышнояськы-а? Кузпалэныд тыныд улоно ук. - Кык нылкышноос йырсияськизы ке, мыным но ческыт уз поты, дыр. Собере мон пересь ӧвӧл на, оскисько: туж-туж кельшиз ке, анайлэсь уг кылзӥськы, ваё. Юра (24 арес): - Али ик уг кышнояськы ай, вазьгес. Басьто сыӵезэ, кельшисьсэ. Машинаен- квартираен сюриз ке, малпаськытэк ваё! Вася (19 арес): - Кышноелэн мугорыз чебер мед луоз. Нош ымнырыз, хе-хе, мар мыным. Пеймытын вань коӵышъёс пурысесь. Саша (20 арес): - Кузпалъяськыны вазь на, нош кышно басьто чеберзэ но востэмзэ... - Нош визьмоез но ужасез кулэ ӧвӧл-а? - Туж визьмо ӧз ке но луы, яралоз. - Малы ке тросэз озьы шуо, чебер но визьтэм, пе, мед луоз кышное. Визьмо кузпалзы вӧзын картъёс асьсэды шузиен лыдъяло шат? Мон сямен кышномурт сокем амало луыны кулэ: визьмыз мед тырмоз кытӥяз шузи улэ аналскыны. Озьы ӧвӧл-а? - Ӧйтӧд, ӧйтӧд, кинлы кызьы ведь...Собере узыр мед луоз на. - Машинаен, коркаен мед луоз-а? - Ӧвӧл, коркае аслам вань. Машина но асьмеос ик басьтом, коньдон люкам ке. Витя (20 ареслэсь ортчемын): - Дорын визьтэм каризы ини, кышнояськыны косыса. Одӥг нуналэ нылашез келяськод - ӵуказеяз анай кытысь ке тодэ (сарафанной телефонзы ужа, лэся). О-о, усто нылаш шедьтэмед, шуэ. Ӵуказеяз мукетсэ келясько, таиз эшшо умой, оло, кенлы ваём, пе. Ачим киям зундэс поныны уг дыртӥськы. Быж думиськоз уго. Егит дыръя калгем потэ. Озьы вераськыса сылонъямы Толялэн анаез ӵап вуиз. - Бен, Валяпай, малы кен уд ваиське на? - Э-э, туж вайысал, нылы, пиос уг дырто ук. Туннэ ик ныл кураны мынысал. Оло, Галя, тон бызёд пиелы? - Уг, Валяпай, монэ кенлы ке пыртӥды, асьтэос нерад луоды. - Малы? - Мон юрт котырысь гурт ужез лэсьтыны уг быгатӥськы, азьтэме но бадӟым. Сыӵе кенэн тӥ кадь ужась кышномурт улыны уз чида. Собере мыным дышетсконо ай. Мисьтаськем яке скал кыскем интые книга лыдӟыса пуки ке, туж уз кельшы, дыр, тӥледлы. Тӥни озьы, трос пиослэн анайёссы туннэ ик кен пыртысалзы, дыр. Та вакытэ ик городысь нылъёс асьсэлы тупась пи уг шедьто. Лыктэлэ Кузёбае! Милям умой пиосмы трос. Колхозэз но ӝуто, кышнояськыса юонлэсь но куштӥськыны кыл сёто. Галина Савина, Удмурт кун университетысь студентка. Алнаш ёрос. ОЖ ТЫЛӜУ ПЫР ПИЧИ ДЫРЪЯ КИСЬТЭМ СИНКЫЛИОС УГ ВУНО Ӵем дыръя тазьы луэ улонын: вӧзамы улэ-ужа адями, нош со сярысь номыр ик ум тодӥське. Тани Василий Николаевич Терновскийлэн пичи дыръяз немецъёслэн концентрационной лагерязы анаеныз ӵош курадӟемез сярысь ӵош ужась эшъёсыз Быдӟым Вормонлы 50 ар тырмон дыръя гинэ тодӥзы. Секыт аръёсыз сярысь со ачиз мадиз. Кылзӥсьёслэн синъёссы амалтэк нюромизы. Уго пушкын кема возем чидан но адӟон асьсэос кыре куриськизы. Азьвыл та сярысь вераны гинэ ӧвӧл, малпаны но кышкыт вал. Пленэ шедьылэмъёсты Родиналэн тушмонъёсыныз лыдъяллязы. В. Н. Терновский вордӥськиз Брянск улосысь Кокаревка посёлокын. Секыт вал солэн улон сюресэз. Атайзэ уг тоды ни. Сое 1939-тӥ арын басьтӥзы финн оже. Эшъёсызлэн верамзыя, июль толэзе мукет солдатъёсын ӵош сое ыстӥллям выжез пуштытыны. Косонэз быдэстӥллям, нош асьсэос берен вуиллямтэ ни: оло пленэ шедиллям, оло быриллям. Озьы Вася кылиз анаеныз но агаеныз гинэ. Кутскиз Быдӟым Отечественной война. Тушмон огез бӧрсьы мукетсэ басьтылӥз городъёсмес но гуртъёсмес. Ӝоген Брянск область но немецъёс кие шедиз. Василийлэсь вордскем посёлоксэ быдэсак сутӥзы. Кытын улод на? Вань калык нюлэсъёсы, партизанъёс доры, кошкиз. "Смерть немецким оккупантам!" шуыса нимаськись отрядэ гуртоосынызы ӵош Терновскийёс но лыктӥзы. Асьсэлы улыны землянка гудӥзы, вылзэ сулэн, вайёсын шобыръязы. Сиён пӧразы тылскем вылын. Гужемзэ губиен, емышъёсын кӧтсэс тырылӥзы. Картофка но мерттӥзы вал, но октыны ӧз быгатэ, со музъемын ик толйиз. Тулыс ини сисьмем картофкалэсь табань пыжылӥзы. Озьы ортчиз тол, тулыс... 1943-тӥ арын гужем, Орёл но Курск котырын лек ожъёс мыныку, партизанъёс немецъёсты зол гинэ "куртчылӥзы". Тушмон тае ӧз чида ни. Солэн ки улаз "Смерть немецким оккупантам!" но шедиз. Партизанъёсты отысен ик ыбылӥзы, нош пыӵалтэм адямиосты планэ басьтӥзы. Соос пӧлын ик Терновский вал. Пленэ сюремъёсты вуттӥзы Локоть посёлоке. Отчы интыяськемын вал бышкись езэн котыртэм фильтрационной лагерь. Пӧртэм калык шедиз отчы. Терновскийёс адӟемпотостэм каризы немецъёслы вузаськем адямиосты. Соос пӧлын вал надзирательлэсь ужзэ быдэсъясь кышномурт. Нималлязы сое Ленка-укротительница шуыса. Со немецъёслэсь но золгес лекъяськыны быгатӥз. Пичигес янгышам понна но надзиратель адямиез кулытозяз жугыны быгатэ вал. Со ӧз учкылы, пичи пинал-а со азьын, кышномурт-а яке пересь-а. Татысен Терновскийёс ыштӥзы песятайзэс. Сое, мукет пересьёсты сямен ик, вал интые кыткылӥзы, музъемез гырытӥзы. Собере ваньзэсты виылӥзы. Та лагерьын куинь толэзь возьыса, кезьытъёс вуэм бере, пленэ сюремъёсты выльысь сюрес вылэ поттӥзы. Озьы соос воштоно луизы трос лагерьёсты. 1944-тӥ арын гужем пленэ сюремъёсты Белоруссия но Латвия пыр келязы Германие. Лиепая портысен ваньзэсты пуктӥзы военной корабле. Куинь нунал ортчыса вуизы Польшаысь Гданьск городэ. Каньыл ӧй вал ву сюрес. Корабльзы вылэ асьмелэнъёс бомбаос куязы, кышкытлык кылдытъязы подводной лодкаос. Василий Николаевич умой тодэ на та куинь шимес нуналэз, адямиослэсь кышкам куараоссэс, бӧрдэмзэс... Гданьск городысен пленэ сюремъёсты выльысь лагерьёсы келязы. Терновскийёсты чугун сюрес кузя Дрезден городэ ваизы. Татысен соос нош пытсэтэ сюризы. Калыклэн одӥг малпанэз вал - сиён. Ярам коть, пиналъёсты анайёссылэсь ӧз люке. Мӧйыосты котькуд нунал ужаны поттылӥзы, пиналъёс огназы кыльылӥзы. Немецъёс соосты серем карылыса шудонъёс сётъяллязы. Но со мунёос, гондырпиос, машинаос, куректон гинэ вайылӥзы. Одӥгъёсыз синтэк кыльылӥзы, мукетъёсыз - чиньытэк, китэк. 9-тӥ Маез та семья пумитаз Дрезденын. Вормон нунал азьын лагерь вадьсытӥ трос американской самолётъёс лобазы. Соос Берлин вылэ бомбаос куяло вылэм. Бератаз зона пыртӥ ортчизы американской солдатъёс. Собере ваньмыз чалмиз. Котыр чус-чус. Нокин уг улля, уг йӧнтэмъяськы надзиратель. Озьы ке но, одӥг адями но лагерьысь ӧз пегӟы. Ма, кытчы мынод? Но тани лагерь котырысь улос выльысь улӟиз кадь. Танкъёслэн гуретэмзы кылӥське. Со вал Советской Армия. Кӧня возьмазы мозмытӥсьёсты пленэ сюремъёс. Война аръёс ӵоже соослэн ымныръёссы нырысьсэ пальышазы. Кема витем шумпотон вуиз та каргам лагере но. Май толэзьлэн шор вадесаз лагерьысь калыкез вордскем интыосазы келяны кутскизы. Кокаревка посёлоказы вуон понна, Терновскийёслы трос иськемъёсты ортчоно луиз. Август толэзе гинэ сооос доразы вуизы. Улон инты ӧвӧлэн, гуртоос пичиесь коркаос пуктылыны кутскизы. Секыт вал, но тушмон вормемын, семья дораз берытскыны быгатӥз. Улон выльысь улӟыны кутскиз. 1961-тӥ арын В. Н. Терновский Ижевске 23-тӥ номеро училищее ужаны лыктэ. Бератаз татын ик мастер луыса ужаз. В. Лагунов. Подпись Улонлэн шорсюлмыз, шуыны луоз та нуналэз, угось вань улытозь со сюлмын возиське. Льӧльпырась сяськаосын, муспотон кылъёсын со тодэ лыктэ дасо аръёс ортчыса но. Кышнояськон-бызён - со мумы-бубыос, ӵыжы-выжыос азьын кыл сётон. Нош Можга педучилищеын дышетскись Светлана Курочкина но та городысь ик "Свет" заводын ужась Алексей Кудрявцев Инмар азьын но кыл сётӥзы улон даурзэс валче ог-огзэс гажаса- яратыса улыны. Г. ЮСАЕВЛЭН туспуктэмез. Павел Вершинин пумиськиз Голландиысь ужбергатӥсьёсын Удмурт шаерамы лыктэмын Голландиысь гурт хозяйствоя специалистъёс-ужбергатӥсьёс. Соос дорамы улозы 26 августозь. Та нуналъёсы Правительстволэн Тӧроез Павел Вершинин куноосын пумиськиз. Соосын пайдаё вераськон вал. Голландиысь ужбергатӥсьёс тунсыкъясько гурт хозяйствоен. Пумиськонын уно ужпумъёс ӝутэмын вал. Кылсярысь, соос сӥземын пудо вордонэз, сӥль переработкаез но тепличной хозяйствоез азинтонлы. Палэнэ ӧз кыле пудо сиён дасянэн, сӥль-йӧлэз вузанэн, бизнес-планъёс лэсьтонэн но азьмынӥсь амалъёсты дышетонэн герӟаськем ужпумъёс. Кызьы тодмо, Удмуртиысь гурт хозяйствоос кыдёкысь Голландиен кемалась кусыпъёс тупатӥзы ни. Тани отчы ветлӥзы ни Пичи Пурга районысь фермеръёс, удыссыя эшъёссылэн ужан амалъёсынызы пыр-поч тодматскизы. Голландиысь специалистъёслэн республикае лыктэмзы кусыпъёсмес юнматыны уката юрттоз. Куноос басьтӥсько фермеръёсмес дышетыны но Гурт хозяйствоя но сиён-юонъя министерстволы та удысэ выль амалъёсты пыӵатыны. Али соос пумиськыло АПК-ысь ужасьёсын но фермеръёсын. Дорамы лыктэмын "Кооперациен кивалтонъя Нидерланд программалэн" - НМЦП-лэн радъясез (координаторез), пудо вордонъя, сӥлез переработать каронъя, пудо сиён дасянъя, сӥль-йӧл вузанъя, теплицаосъя специалистъёс. Ваньмыз соос НМЦП-лэн консультантъёсыз луо. Г. РОМАНОВ. Бурдъяськизы Балатон зарезь дурын Удмурт шаермылэн историяз нош ик ватсаськиз кӧня ке чур. Республикаысьтымы усточиослэн школа-интернатысьтызы пиослэн "Ингур" капеллазы Венгриысь Балатонфюред карын ортчем калык куспо хоровой конкурсын вормисе потӥз. Со вал ни туэ дышетскон ар йылпумъяськон азьын, куартолэзе. Но бадӟым мае ке, шуо, кыдёкегес мыныса адӟиськод. Сыӵе усто ужрад сярысь, кӧня ке дыр ортчем бере, пӧсекъяськытэк, мур малпаськыса, зэмос дунъет сётыса вераськыны умойгес, дыр. Нош кыӵе дунъет сётэ меда ачиз капеллалэн кивалтӥсез, Удмурт Республикаысь искусство удысын дано ужась Валерий Яковлевич Митрофанов? - Калыкъёс куспын ортчытӥськись конкурсын вормон - со котькуд творческой коллектив понна туж бадӟым дан. Нош уката данъяськымон, куке со вормон нырысетӥез. Нырысетӥез вал кыдёкысь кунгож сьӧры потон но. Эшшо но данъяськымонгес, куке вормисе пото асьме удмурт пиос, гуртъёсысь, ёросъёсысь огинэ люкам но дышетэм зэмос удмурт усточиос. Кылсярысь, асьме республикаысь одӥгаз но нылпи хоровой коллектив та дырозь ӧз пыриськылы на сыӵе конкурсъёсы. Бен, азьло аръёсы фестивальёс вал. Нош нокыӵе самой бадӟым фестивалез но уг луы ӵошатыны конкурсэн. Конкурс - со зэмос творческой нюръяськон, кытын вормисе потэ одӥгез гинэ, кытын коллективлэсь быгатонлыксэ дунъя нимысьтыз жюри. Соин ик "Ингур" капеллаысь пиослэсь быдэстэм ужзэс, вормонзэс асьме шаер понна туж пайдалыко, бадӟым ужрадэн лыдъяны луэ. - Табере тӥ кыӵе ке ӝуждалаысен ини ортчем сюрестэс адӟыны быгатӥськоды. Кызьы капелла люказ кужым? - Вуоно аре капелламылы тырмоз ни дас ар, кылдӥз со 1989 аре. Нырысь одӥг класс гинэ вал. Пумен-пумен, арысь аре люкаськиз зэмос творческой коллектив, усто быдэстыны быгатӥз ни дышетскон но концерт ужъёсты. Нырысь аръёсы - 1993 арозь соин кивалтӥз А. М. Щербаков (али "Удмуртия" ГТРК-лэн академической хоровой капеллаезлэн кивалтӥсез). Собере та капеллаен ужаны шуд усиз ни мыным. Со дырысен "Ингур" ӵемгес вуылыны кутскиз концертъёсын асьме шаермылэн пӧртэм сэрегъёсаз. Соку ик кылдӥзы ни малпанъёс республикалэн палэназ но потаны. Одӥгез сыӵе малпан быдэсмиз 1995 аре, куке "Ингурлэн" концертэз ортчиз Москваысь П. И. Чайковский нимо концерт залын. Соку коллектив пыриськиз "Русская зима" но Д. Кабалевскийлэн вордскемез дырысен 90 ар тырмонлы сӥзем фестивальёсы. 1996 аре капеллалэн концертъёсыз туж усто ортчизы Марий Эл республикалэн шоркараз, Йошкар-Олаын. Вуоно араз капеллалы шуд усиз Эстоние вуылыны. Отын пиос пыриськизы егитъёслэн эктонъя но кырӟанъя тямысэтӥ праздниказы. Таиз вал нырысетӥез Россилэн кунгож сьӧраз вуылэммы. Со аръёсы ик "Ингурлэн" концертъёсыз ортчылӥзы Чайковский но Набережные Челны городъёсын, удмурт каръёсын но ёросъёсын. Концертъёсын узыр вакытэ юнмаз капеллалэн репертуарез, классической произведениос пӧлын ас интызэс шедьтӥзы удмурт но финн-угор крезьгурчиослэн гуръёссы, удмурт но ӟуч калык кырӟанъёс. Ог ньыльдон пӧртэм хоровой произведениос пыро али капеллалэн репертуараз, тямыс кылын чузъясько соос. Кылсярысь, удмурт но ӟуч кылын сяна, пиос кырӟаны быгато ни финн, эстон, немец, англи, латин, итальян, венгер кылъёсын. Программаын туж ичи огшоры, капчи кырӟанъёс. Репертуарысьтымы тросэз произведениос гожтэмын, зэмос академической хоръёслы чакласа. Куддыръя асьме республикаысь нылпи хоръёсын кивалтӥсьёс шуыло: сыӵе шуг программаез, кудзэ кырӟа "Ингур", ӧвӧл нокудӥзлэн но нылпи коллективлэн. - Иське, тӥ понна Балатонфюредэ сюрес волятэмын ни вылэм... - Венгер Республикаын ортчыло трос пӧтэм конкурсъёс. Нош Балатонфюредысь конкурс егит на - ортчытӥськиз куиньметӥзэ. Капеллалэн мылкыдыз вал со конкурсэ 1996 арын ик пыриськыны, нош соку ӧз луы шедьтыны коньдон. Малпаськыны кутским вуоноез конкурс сярысь. Умой кусып возим Москваысь Венгер культурной центрын ужасьёсын. Соос пыр ик вазиським венгер эшъёсмылы Балатонфюредэ. Ыстӥм вань документъёсмес но магнитофон кассетае гожтэм программамес. Дасяськонын ваньмыз кадь пӧрмиз: коньдон шедиз, программа дась. Озьы потӥмы бадӟым сюрес вылэ. Куинь сюрслэсь уно иськем ортчоно луиз Балатонфюредозь. Москваысен мынӥмы арендае басьтэм нимысьтыз автобусэн. Ньыльдон часлэсь ятыр кыстӥськиз отчы мынонмы. Со дыре орчимы Белоруссия, Польша, Словакия но ӝыны Венгрия пыр. Мае гинэ ӧз адӟе пиос, малы гинэ ӧз пайме. Синъёссы туж паськыт усьтэмын кадь вал. Соиз но валамон: куд-огезлэн анай-атайёссы но, оло, асьме шаерлэн палэназ ӧз на вуылэ, нош пиос адӟо ини ӝыны Европаез. Бен, бадӟым шуд усиз соослы. Валазы-а меда сое соос, ӧз валалэ-а. Ӧз ке но валалэ, ваньмыз кылёз соослэн син азязы. Кема аръёс ортчем бере но уз вуны со. Балатонфюред - туж чебер, пичи гинэ курорт город. Милемыз отын чидатэк витё ини вылэм. Пумитазы шуныт, самой матысь эшъёссэс кадь. Туж усто гостиницае интыязы. Сётӥзы милемлы кык переводчицаосты. Вуэм нуналамы ик ортчытыны быгатӥм репетиция, со залын, кытын луыны кулэ вал конкурс. Ӝыт пал ортчытӥм на одӥг репетиция гостиницаын. Собере пиналъёсты кужмысь кадь ик выдтӥм ини кӧлыны, кужымзы мед люкаськоз шуыса - ӵуказе кутскыны кулэ ни конкурс. Со нуналэ, 16 мае, хоровой коллективъёслэсь кивалтӥсьёссэс ас дораз люказ но нимысьтыз приём ортчытӥз Балатонфюред администрацилэн кивалтӥсез. Ми делегацимылэн нимыныз сётӥмы солы Удмуртиысь кузьым. Отысен ик мынэсьтым интервью басьтӥз городысь телевидение. - Вормисьлэн шумпотонэз - кизилиё минутъёс... Со сярысь пыр-почгес вералэ вал. - Иське, радызъя. Калык куспо конкурсэ пыриськизы тямыс хоровой коллективъёс: Венгриысь, Польшаысь, Румыниысь но "Ингур" капелла. Соос пӧлын вал нылъёслэн, пиослэн, суро составен коллективъёс. Зол ик дасяськилляи конкурслы. Ваньмыз усто кырӟазы одно быдэстонозэ венгер произведениез, асьсэлэсьсэ но. Кылзӥсьёс котькудзэ ик умой пумитазы. "Ингур" кырӟаны потӥз самой берло. Пумитазы милемыз, зол чабыса. Паймизы кадь пиослэн чеберзылы но йӧнозылы. Котькуд произведениез ми быдэстӥмы усто, чылкыт - ноку но кадь озьы ӧм кырӟаллялэ на вал. Кызь минут ӵоже возьматӥмы тямыс произведениез, кырӟамы вить кылын: немец, удмурт, ӟуч, венгер но эстон кылъёсын. Кылзӥсьёс котьку ик зол чабизы - зал чылкак воштӥськиз кадь... Конкурс йылпумъяськиз. Жюри кошкиз кенешыны. Витим куамын минут. Туж кема кадь кыстӥськизы со минутъёс. Жюри ялэ ини вормисьёсты. Нырысь ик пусъё куинетӥ но кыкетӥ интые потэмъёсты. Милемыз уг но поттыло. Малпаськом - оло, нокыӵе приз но ум басьтэ, оло... оло, вормисе потӥськомы. Тани яло зарни дипломез но зарни кубокез басьтӥсь коллективез. Со коллектив луиськомы... ми! Ми мырдэм оскимы со ялонлы. Ми - вормисьёс!!! Мар бен, шумпотонмес но ватыны ӧм быгатэ ни. Ура! Ура! Ура! Ваньмыз милемыз ӟечкылало, ушъяло, данъяло. Тросэз кылзӥсьёс лыкто дорам, киме кырмо, тау каро. Нокинлэн но кадь залысь кошкемез но уг поты ни, ваньмыз люкаськизы ми котыре. Ми понна со вал кизилиё минутъёс. Собере жюри ваньзэ хормейстеръёсты люказ но котькудӥныз кема вераськиз, ваньзэ сэрттӥз-пертчиз. Милемлы соос трос дэмланъёс но сётыны ӧз курадӟе. Шуизы: тӥ милемлы ярады ваньмыныз. Ми тӥледыз огъя кылын пуктӥмы нырысетӥ интые. Зэм, тужгес чылкыт кырӟась луэм "Ингур" капелла. Самой усто кырӟам венгер конкурсной произведениез. Тужгес шуг репертуарез но самой узыр, аспӧртэмлыко программаез капеллалэн. Ваньзэ огазеяса, "Ингур" потӥз вормисе. Вань кылзӥсьёсты но жюриын ужасьёсты паймытӥзы удмурт пиос-усточиос. Озьы йылпумъяськиз конкурс. Ӵуказеяз Балатонфюредысь протестант черкын ортчиз лауреатъёсты данъян ужрад. Отысен милемлы сётӥзы зарни диплом но зарни кубок. Отын ик шуд усиз на кырӟаны. Со нуналэ ик, нуназе сиськем бере, "Ингур" но Польшаысь хор ас программазэс быдэстӥзы Тихань полуостровысь католической черкын. Милемлы веразы: со черкын кырӟан муг озьы ик лыдъяське ини нимысьтыз приз кадь. Соин ик конкурсэ пыриськем тямыс хор пӧлысь сыӵе шуд усиз кыкезлы гинэ. Быдэс черк тыр люкаськем туристъёс - Германиысь, Норвегиысь, Венгриысь - кылзӥзы милемыз. Ми но кырӟамы отын уката ӝутскем мылкыдын - сокем усто акустикаын ми кырӟамы нырысьсэ. Ӵуказеяз, 18 мае, вуиз бертон нунал. Ӵукна ми пырамы юрттӥсьёсмы доры школае. Отын но кырӟамы быдэсак кадь программамес. Туж шып, сак пукизы. Асьме палан, огшоры школаосын, уг быгато озьы хоровой искусствоез кылзыны но дунъяны. Берпуметӥ произведениез - венгер конкурсной кырӟанэз, ми кырӟамы со школаысь хорен ӵош. Люкиським дуно эшъёсын синву пыр кадь. Быдэс нунал ӵоже ми тодматским на Будапештэн. Учкимы вань памятникъёсты, ветлӥмы вашкала ульчаостӥ. Экскурсия порма кадь пыраллямы вузкарон интыосы. Собере потӥм ини гурт пала... Тӥни озьы - ми гуртын. Шум потӥмы, милемыз Ижевскын вокзалын сомында пумитасьёс вань шуыса. Нимысьтыз дыр висъяса пумитаны лыктӥзы асьме Правительствоысь но Культурая министерствоысь кивалтӥсьёс, трос кузя корреспондентъёс. Соку ми нош ик валамы: милям вормонмы - быдэс Удмурт Республикалы данъяськымон ужрад. - Кыӵе мылкыдды табере, сыӵе бадӟым конкурсэ пыриськемды бере? - Пайдалыко луиз трос толэзьёс ӵоже тыршеммы, сюлмаськеммы. Емышо луиз капеллалэн кивалтӥсьёсызлэн ужамзы. Нимысьтыз пусъем потэ хормейстеръёсты Ольга Густенёваез но Татьяна Шамшуринаез, концертмейстерез Лия Сеняшинаез. Та вормонын - соослэн пӧсям вузы, тыршемзы, быгатонлыксы. Соостэк огназ гинэ кивалтӥсь трос лэсьтыны ӧй быгатысал. Малпасько, та ужъёслы дунъет сётыны быгатоз на Культурая министерство, школа-интернатлэн кивалтӥсез. Оло, асьме республикаысь Правительство но кызьы ке пусйыны быгатысал сыӵе усто тыршись адямиосты. Бадӟым тау карем потэ ваньмызлы пиослы, кудъёсыз ветлӥзы конкурсэ. Нокинэ но висъятэк, ӟеч кыл мон верасал Коля Вахрушевлы, Алик Кочуровлы, Толя Добряковлы, Саша Кулышевлы, Саша Бияновлы, Сергей Кельдибековлы но Володя Власовлы. Соослы уката шуг вал потыны кунгож сьӧры: азьпалан - тулыс сессия (крезьгуръя училищеын дышетско). Со сяна куд-ог дышетӥсьёс но пумит вал соослэн капеллаын кырӟамзылы. Бен, озьы луэ: куд-огез уг валало, макем пайда сётэ та коллектив школа-интернатлы но, училищелы но. Оскиськом, азьланяз та югдур воштӥськоз на. Нош али пиослы бадӟым тау. Соос валало: со школаен, кудӥз поттӥз соосты бадӟым, искусствоен герӟаськем сюрес вылэ, кусыпез ыштоно ӧвӧл. Матэктэ выль дышетскон ар. Воштӥськоз капеллалэн составез. Лыктозы гуртъёсысь выль кырӟасьёс, соосты туж кема дышетоно луоз. Кин йылпумъяз школа-интернатэз, оло, уз дӥсьтэ капеллае ветлыны, озьы ик соосты зӥбыса, кышкатыса ке возизы училиещын. Но, одно ик, секыт ке но луиз, пыдъёсмес сьӧлтаны но ке турттӥзы, ми ум лэзе киосмес, ум буйгатске туннэ нуналэ вормонъёсын. Тыршом, сюлмаськом етӥз, мыло-кыдо, йӧно удмурт пиосты нош ик поттыны республикалэн палэназ. Возьматыны: улэп на удмурт калык, вань на солэн кужымез, вань ке солэн сыӵе пиосыз, усточиосыз. Нош выльдом программамес, дышетыны малпаськом мукет финн-угор калыкъёслэсь хоровой произведениоссэс. Кылсярысь, ӧвӧл на милям репертуарамы пор, мордва, коми, карел кырӟанъёс. Нош мылкыд вань программаын огазеяны ваньзэсты та вынлыко калыкъёсты. Таӵе капелла ӧвӧл ке мукет финн-угор калыкъёслэн, ми ик со дано секыт ужез басьтыны кулэ ас выламы. Мед гинэ милемыз валасалзы, азьланяз но юрттысалзы - коньдонэн-а, ӟеч кылын-а, мукетыныз-а. Удмурт Республикаысь Правительство сяна, кыкетӥ арзэ милемлы коньдонэн юрттэ ини акциосын "Удмуртнефть" огазеяськон. Дышетскон ар ӵоже кӧня ке но юрттэт сётылӥзы "Спецгазавтотранс", "Аспэк". Тау соослы. Пумаз вазиськем потэ на вылэм. Вань ке гуртъёсын чебер кырӟась пичи пиос - ваелэ ми доры, Иж карысь искусствоосъя школа-интернатэ. Соослэсь быгатонзэс пушйытон, сяськаятон вылысь, ми сюлмаськом. Пӧсь гужемед люкиськыса Сётӥз на ай эшшо кузьым. Ягъёс пӧлын вожмаськыса Ӝужа губи. Пушъе узьым. Н. ЛЯЛИН. ШӦКЫЧ "Телефонэ ӟырдаз ини..." Тодмо кырӟасьмылэсь Геннадий Бекмановлэсь ӟырдам телефон сярысь кырӟамзэ кылӥсько ке, оломалы воже потыны ӧдъя. Ӧвӧл Бекмановлы уг. Телефон пыр лушкаськисьёслы мылкыды ӟырдамын. Дуно ик уго усе туала вакытэ телефон возён. Соинтэк-а уноез вераськись аппаратлэсь но куштӥсько ни. Но тужгес но трос коньдон кошке мукет городъёсын вераськем понна. Алигес Алнашысь одӥгез тодмое юрттэт курыса вазиськиз. Почтае мынӥ но, пе, абдрай: телефонэн вераськеме понна туж уно коньдон тыроно! Нош "вераськиськем" Москваен, Ижен, Уфаен но мукет городъёсын. Туж умой тодӥсько, отчы но, татчы но ӧй жингырты шуыса. Но телефон номерез мынам пусъемын бере, нокытчы уд пыры. Тыроно луиськиз. Бӧрысьгес ини телефон воръёсты шедьтӥ, ява! Гуртоосы мон интые вераськиллям. Колхоз телефонэ пуксё но мынэсьтым счётме верало вылэм. Но ведь Алнашысь связъя ёрос узелысь телефонисткаос заказ басьтэмзы бере кузёослэсь номерзэ эскерыны кулэ вал, дыр. Мылзы уг поты. Соин ик, табере коньдон тыроно луиз ке, АТС-эз одно судэ сёто. С. ИВОРКИН. Адями, висьыса шуге-леке вуыкуз, телефон доры кыстӥське: тӧдьы халатэн адямиез вите. Уй-нунал но куазь шоры учкытэк ширто соку горд киросэн машинаос тылпуэ сямен ик. Тӥни озьы 25 арзэ ни ож лудын сямен тырше Нина Егоровна КУЗНЕЦОВА. Можга городын но ёросын сое тодӥсьтэмез ик ӧвӧл кадь. Нош ваньмон дыръяз сюлэмзэ нылкышно сад-бакчаяз мушъёсыз пӧлын буйгатэ. Туспуктэмез Г. ЮСАЕВЛЭН. ШӦКЫЧ "Коммерсант" Улонамы туж ӝог пыриз "коммерция" кыл. Пӧяськыса, будэтэм дунын вузкарисьёс табере ваньзы коммерсантъёс луизы. Вань на коммерческой шуон дунъёс но лавкаос, уно мукет чыры-пырыос. Табере тани адӟисько ни коммерческой автобусъёс но. Нош маин бен пӧртэмесь соос огшорыосызлэсь? Валамон ини, коньдон "сэзъяны" быгатэменызы. Государствомы коньдон люкан сярысь кема уг малпаськы. Постановление кутэ но вань ужез. Нош коньдон котькытысь потты. Пӧламы льготаосын ветлӥсь-мынӥсьёс али трос гинэ? Зэм, вань пӧлазы зӧк кисыен адямиос но. Умой гинэ уждун басьто депутатъёсмы, судъёсын, прокуратураын, милициын ужасьёс. Нош чаклам законъя соос котькыӵе транспортэн дунтэк ветлыны быгато. Озьы ик билеттэк яке ӝыны дунын ветло вал ожысь но ужысь ветеранъёс, пенсие потэмъёс, висисьёс но сӧсыръёс. Табере тани вылӥын выль кагаз "пӧразы". Вань льгота шуонъёс быризы. Кылдӥзы коммерческой маршрутъёс. Вань-а, ӧвӧл-а коньдонэд - трос уз вераське. Тодэмзы уз поты пенсиед сярысь но, уждунэд сярысь но. Калык юнме вожзэ медаз потты шуыса кескич амал но шедьтӥзы. Басьтом, кылсярысь, 142-тӥ маршрутэз ик. Со -"Нефтяник-Кены" сад-бакчаозь ветлэ вал. Со котырын эшшо сизьым массивъёс интыяськемын на. Калыклэн коньдонэныз ӟеч асфальт сюрес кыскизы. Автобус лэзизы. Ваньмыз умой вал кадь ини. Нош арня талэсь азьло ивор кылӥськиз - урод сюресэн валче та маршрутъя автобус уз ветлы ни. Паймод, ява, татчыозь сюрес умой вал, табере уродмем. Озьы тазэ автобусэз воштӥз коммерческой маршрут. Машина со автобазаысь ик. Сюрес но сыӵе ик. Но коньдон огкадь тыроно ваньмызлы. Нокыӵе льготникъёслы интыос ӧвӧл. Шофёр уксёзэ басьтыны басьтэ, нош билет сётыны тодаз но уг лыкты. Мынӥсь-ветлӥсьёслэн лыдзы чутрак кулэсмиз. Ма, пенсия но дыраз уг сёто бере. Ведь али сад-бакчаосын пӧсь вакыт - огречез , помидорез, мукет бакча сиёнъёсты но емышъёсты утялтоно. Но ваньзэ сое тыбыр вылад уд нуллы ук. Нош "коммерсант" куанеръёсын трос уг вераськы. Б. НИКИТИН. Россилэн сюресэз-а: выльдӥськон, путч, рынок?.. 1991 арын августэ асьме странаын ортчиз путч. Историлы тодмо сыӵе бугыръяськонъёс, кылсярысь, фашистъёслэн, военнойёслэн путчъёссы. Нош таиз вал коммунистъёслэн. Малы бен государствоямы сыӵе югдур кылдӥз? Социализмлэн законъёсыз азинскись улонлэн куронъёсызлы пумен тупамысь дугдӥзы. М. Горбачёв 1985 арын ялоно луиз выльдӥськон политика. Шедьтэмын вал кризисысь потон амалъёс. Экономикаын пыӵаны кутскиз хозрасчёт, дисциплинаез тӥясьёсын но юисьёсын нюръяськон. Политикаын валтӥсь инты басьтӥзы гласность но демократизация, пӧртэм партиослы сюрес сётон, идеологиын - вашкала психологимес воштон но сталинизмлэсь куштӥськон. Сыӵе воштӥськонъёс, паськыт ӧръяськыса, адямиосты пумен мукет малпанъёсы но вуттӥзы. Малы уг луы предприятиосты но музъемез нимаз кузёослы вузаны? Оло, дыр вуиз ни КПСС-эз быдтыны? Малы куд-ог республикаослы эрик сётонтэм? Валамон, таӵе малпанъёс, социализмез выльдон политикаен нокызьы герӟаськемын ӧй вал ни. Соос кышкатыны кутскизы социализм понна дурбасьтӥсь коммунистъёсты- кивалтӥсьёсты. 1991 арын 19 августэ соос выль реформаторъёсты странаен кивалтонлэсь палэнтыны малпазы. Но "социализмез берыктон" ӧз удалты. Со дырысен государствомы чутрак мукет сямен азинскыны кутске. Августэ ортчем событиос бере выльдӥськон политика йылпумъяськиз, шуыны луоз. Сое кичӧлтӥсьёс М. Горбачёвен ӵош политикаысь кошко. КПСС быре. Литва, Латвия, Эстония Совето Союзлэсь люкисько. Экономикаын кутске рыноке выжон. Озьы ке но, путч бере аръёс калыклы номыр ӟечсэ ӧз на вае. Странамы мургес но мургес секыт югдуре вые. Соин но, вылды, макем тросгес дыр ортче путч бере, сокем тросгес луо солы дурбасьтӥсьёс но синмаськисьёс, макем Россия золгес адӟем карыны турттэ Западлэсь, США-лэсь, сокем со золгес куашка но зӥбет улэ сюре. Соин ик та быдӟа государство, нокинэн ӵошатскытэк, аслаз сюрестӥз гинэ мыныны кулэ, дыр. Ку меда шедьтом со сюресмес? Т. БАННИКОВА. Кун Кенешын Августэ уноез депутатъёс шутэтско ке но, Кун Кенешын кызь одӥгетӥ сессилы дасяськон мынэ. Сентябре ортчоно сессиын 17 ужпум эскеремын луоз, уноез соос экономикаын кылдэм но коньдонэн герӟаськем ужпумъёслы сӥземын луозы. Быръёнъёслы дасяськыса 26 августэ ортчоз Кун Кенешысь Кунэз радъянъя, калыкъёс куспын политикая но интыысь аскивалтонъя комиссилэн заседаниез. Эскеремын луозы Удмурт Республикалэн Конституцияз пыртыны чаклам воштонъёсты кутон сярысь, Кун Кенеше депутатъёсты быръён сярысь законъёслэн инъетъёссы. Та ужпумъёсты эскерон герӟаськемын Кун Кенеше депутатъёсты быръён сярысь законэз федеральной законодательствоя тупатыны кулэлык кылдэмен. Выль законлэн инъетэз чакла быръёнъёслы коньдон висъянэз, быръёнъёсъя фондъёсты кылдытонэз, ӧтён-ӝуткан ортчытонэз, депутатъёсты ӵектонэз выль сямен радъяны. Улон выль куронъёс пуктэ Кун Кенешысь Законъёсты быдэсъямез чакланъя, калыкез кышкытлыклэсь утёнъя но гражданъёслэн правооссыя ялан ужась комиссилэн тӧроез та вакытэ шутэтске ке но, августэ со "Ижладабанклэн" вкладчикъёсыныз кык пол пумиськылӥз ини, Россиысь Сбербанклэн Удмурт ёзэныз кивалтӥсьёсын кенешиз. Вераськон мынӥз "Ижладабанклэсь" акциоссэ утён но "Новый регион" телекомпанилэсь акциоссэ "Ижладабанклэн" вкладчикъёсызлы сётон сярысь. Та комиссилэн вуоно кенешаз чакламын прокуратуралы, судлы, Югдурез утёнъя министерстволы но юстицилы ужасьёсты дасян сярысь ужпумез эскерыны. Та удысъёсын ужасьёс азьын туала вакыт выль куронъёс пуктэ: соос пыӵал тӥрлыклэн бергаменыз, наркотикъёсын вузкаронэн, компьютерлэсь луонлыкъёссэ кутыса лэсьтэм йыружъёсын нюръяськыны быгатыны кулэ. Правоез утись ёзъёсын ужасьёслэсь тодон-валанзэс но быгатонлыксэс будэтон понна, Правительстволы ӵектэмын Удмурт кун университетлэн Правоя, социальной кивалтонъя но кышкытлыклэсь утиськонъя институтаз криминалистикая вылӥ школа усьтыны. Бюджетлэн быдэсъяськемезлы - саклык Эскеронъя кун комитет августэ ортчоно кенешезлы дасяське. Отын эскеремын луозы агропромышленной комплекслы юрттонъя фондысь коньдонэз кутэм сярысь, Гурт хозяйствоя но сиён-юонъя министерстволэн бюджетысь коньдонэз кызьы но кытчы висъямез пумысен ужпумъёс. Эскеронъя кун комитетлэн коллегиез январе та ужпумъя постановление кутӥз вал ини. Али та юан нош ик ӝутэмын, постановленилэсь кызьы быдэсъяськемзэ эскерон понна. Азьланяз Эскеронъя комитет эскероз, кызьы кутӥське жилищно-коммунальной хозяйствоез толлы дасянэ висъям коньдон. Та комитетлэн ёзъёсыз Можга, Игра но Ува ёросъёсын кылдытэмын, городъёсысь но ёросъёсысь быръем ёзъёсын валче ужан сярысь огкылъёс кутэмын луозы. Выль законъёс Кун Кенешлэн сентябре ортчоно сессияз депутатъёс эскерозы Удмурт Республикаысь социальной удысэз но экономикаез азинтонъя 1998-тӥ - 2000-тӥ аръёслы программалэсь инъетсэ. Кун Кенешысь ялан ужась комиссиос али та документэн тодматско, ӵектонъёс сёто. Сессилэн повесткаяз эшшо 3 ужпум пыртэмын на: Удмурт Республикалэн кун асваньбурез кузёослы вузанэз ортчытон сярысь, Удмуртиысь кун властьлэн ёзъёсызлэн кун асваньбурен кузёяськонъя, кутонъя полномочиоссы сярысь, Удмурт Республикалэн кун асваньбурезлэн мукет кузёлы выжтоно объектъёсыз сярысь. Сарапул ёросысь администрацилэн ёрослэсь социальной удыссэ но экономиказэ азинтыны, ёрослэсь но республикалэсь бюджет пумысен кусыпъёссэс юнматыны тыршемез алигес эскеремын вал. Та ужрадъя нимысьтыз постановление кутыны чакламын. Сарапул ёросысь администрацилы ӵектэмын калыкен ӵемгес кенешыны, пумиськонъёслэн йылпумъянъёссыя ужрадъёс чакланы. Та документ косэ Удмуртиысь Правительствоез 1998 арлэн И но ИИ кварталэз понна нылпи пособиосты 1-тӥ сентябрёзь тырыны, культура удысын ужасьёслы ссуда висъяны, улон инты басьтон вылысь. Культура но дышетон Та нуналъёсы ӟырдыт ужа Кун Кенешысь Наукая, дышетонъя, культурая но егитъёсын ужан политикая комиссия. Со дася дышетӥсьёслэсь 21-тӥ - 26-тӥ августэ ортчоно конференцизэс, сэрттэ-пертче выль дышетскон арлэн кутскеменыз, театръёслэн сезонзэс усьтэменызы, культурая юртъёсты но школаосты толлы дасянэн герӟаськем ужпумъёсты. Операя но балетъя театрын ужасьёс Эскеронъя комитетэ гожтэтэн вазиськизы вал, театрын секыт югдур кылдэмлы ӝожтӥськыса. Таин валче комиссия совещание ортчытӥз. Отчы пыриськизы Правительстволэн Тӧроезлэн воштӥсез Антонина Лисина, культурая министрлэн воштӥсез Сергей Мутерко, театрын ужасьёс. Ӵектэмын та ужпумез Правительстволэн Президиумезлэн кенешаз эскерыны, нош культурая министрлы Геннадий Чайниковлы дэмламын театрез толлы дасяку юрттэт сётыны. Эскеронъя комитет театрлэсь ужамзэ эскероз. Тазалык - нырысетӥ интыын Улон-вылонэз радъян политикая, ужъя, тазалыкез но инкуазез утёнъя комиссия тырше "Химической ож тӥрлыкез быдтон сярысь" Федеральной законэз Удмуртиын кутон сярысь закон но "Вирлэсь биопреператъёс" программа бордын. Соос озьы ик эскериськозы Кун Кенешлэн сессияз. Берлозэ документэз ӟечгес дасян понна, 14 августэ Тазалыкез утёнъя министерствоысь специалистъёс но "Вирлэсь биопрепаратъёс" программаез кылдытӥсь учёнойёс пумиськон ортчытӥзы. Предприятиослэн но кунлэн кусыпъёссы Промышленностья, инфраструктураез азинтонъя, вузъёсын но юрттэтъёсын рынокез кылдытонъя комиссия бадӟым саклык висъя "Электрокужымез шыръян но эстӥськонэз но электрокужымез пайдаёгес кутон сярысь" но "Удмурт Республикалэн промышленностьын кун политикаез сярысь" Законъёслы. Кызьы тодмо, электрокужымлэн 60 процентэз Удмуртие палэнысь вуэ. Промышленностьын ваньбур поттон, 1990 арен ӵошатыса, 45 процентлы кулэсмиз ке, эстӥськонэз но электрокужымез кутон - 13 процентлы гинэ. Специалистъёс малпамъя, Удмуртилэн электрокужымез но эстӥськонэз пайдаёгес кутыны луонлыкъёсыз вань. Соосты улонэ пыӵатонлы сӥземын нырысетӥез закон. Кыкетӥез документ кунлэсь промышленностьын политикаезлэсь ужпумъёссэ, быдэсъян амалъёссэ пусъе, предприятиослэсь куроно лыдпусъёсты юнматэ. Собере та лыдпусъёсъя кун власть предприятиослы гарантиос, налогъёсъя льготаос сётоз. Етӥн будэтон - валтӥсь удыс Агропромышленной комплексъя, музъем кусыпъёсъя но инкуазь узырлыкъёсты кутонъя комиссия ӵектӥз Удмурт Республикаын етӥн будэтонэз азинтон сярысь программаез сессиын эскерыны. Программа етӥн будэтонэз гурт хозяйство понна валтӥсь удысэн лыдъя. Комиссия ӵектэмъя, Правительство сессиын ивортоз пудолы сиён дасянлэн но ю-нянез утялтонлэн мынэмзы сярысь. Кун Кенешлэн пресс-службаез. ВАЛЭКТЭ ЮРИСТ Сэрегез нуэ адвокат Лилия Шкляева Ваньбурез уин возьмаськом... Туж шимес луысал, дыр, "Удмурт дуннетэк" улон. Тани али но, юрттэт курыса, отчы вазиськисько. Ми кык кузя возьмаскисьын ужаськом уин - ӝытазе 17 часысен ӵукна 7 часозь. Оген кыльыны кышкыт бере, нуналлы (уйлы) быдэ потано луиськом. Чакласьком гидъёсты, валъёсты, ньыль складэз, вукоез. Кык кузя гинэ-а татын ужаны кулэ? Кӧня уждун тыроно милемлы? П. Казынбаев. Завьялово ёросысь Вылӥ Женвай гурт. Гожтэтын вераны кулэ вал, кыӵе асваньбур (собственность) луэ ужан интыдылэн инъетэз. Сое тодытэк, меӵак валэктон сётыны шуг. Возьмаськисьёслэн лыдзы но уждунзы пусъемын медло штатъя расписаниын, сое юнматэ кивалтӥсь. Расписание лэсьтыку, лыдэ басьто кылдэм югдурез, юристъёс верамъя, разумностья но целесообразностья принципез. Соя арняяз ужан дыр 40 часлэсь кема медаз кыстӥськы. Озьы ужам понна уждун медаз луы законэн тупатэм лыдпуслэсь пичигес, кивалтӥсьёс но ужасьёс куспазы котькызьы мед кенешозы, пичигес уждунлы соглаш кариськизы ке но. 1997-тӥ арын юнматэмын та пумысен закон. Со косэ ичизэ 83 сюрс 490 манет тырыны. Наркотикъёстэк улон понна Удмурт Республикаысь Егитъёсын ужанъя кун комитетлэн юрттэмезъя, Камбаркаысь егитъёсын ужанъя отдел 22 августэ ортчытэ крезьгурлы сӥзем "Музыкальный остров" нимо фестиваль. Со сӥземын егитъёслы. Ужрад ортчоз "Наркотикъёстэк улон понна" ӧтён улсын. Фестивале пыриськыны мылкыд каризы Ижевскысь "Дисциплина", "Глюкоза", "Сны", "Анри", Воткинскысь - "Торментор", Нефтекамскысь - "Черное и белое", "Тени", Камбаркаысь - "Кредо", "Среда обитания" коллективъёс. Л. КИМОВА. Шудэз уг витё, шуд понна нюръясько Ӵуказе 75 арес тырме РСФСР-ысь культура удысысь дано ужасьлы Василий Михайлович МИХАЙЛОВЛЫ. - Василий Михайлович, Красильниковлэн "Тонэн кылисько" повестезлэсь кутсконзэ тодӥськоды на-а? Отысь Алёша Курбатов атаезлэсь "Кытысь потэ Чурай шурмы?" шуыса юа. Соиз валэктэ-валэктэ но юа: - Валад-а? Алёша шуэ: - Валай. - Вало йылэ вуид-а? - Вуи. - Тӧдьы кечез адӟид-а? - Ӧй! Атаеныды озьы сюлмысь вераськиськоды-а вал? - Атаен тазьы артэ пуксьылыса кенешылон дыръёс трос уг луыло вал. Малы ке шуоно, со весь ужын. Собере ньыль классэз йылпумъяса, сьӧрло дышетскыны кошки. Со туж сюлмаське вал монэ дышетон сярысь, со пумысен ик ӵемысь кенешылӥм. Школае уг ке мынӥськы, атаелэн туж вожез потылӥз, одно мугзэ выжыятоз вал. Трос тодон-валан басьтыны косэ вал. - Соин атайдылэн индылэмезлы луыса вуиды, дыр, Вало шур йылэ но тӧдьы кечпиез адӟиды? - Пичи дыръям Вало шур йылэ вуылыны ӧй быгаты кадь. Улон сюрес олокытчы но вуттылӥз. Тӥни соку мургес валаны кутски улонэз но. Синъёс паськытгес усьтӥськизы. Адямилэн котьку но котьмае тодон-валан сямыз луыны кулэ. Кылдэмын ни ке йырад но сюлмад малпан, ас азяд пуктэм уждэ валан, сое быдэстыны тыршоно. Вормыны кулэ шуг- секытъёсты. - Кыӵе амалъёсын тӥ вормиськоды шуг-секытъёсты? - Шугъяськон кылдэ улонын, адямилэн ӵуказелы осконэз ке ӧвӧл. Али со ласянь котькин сюлмаське ни, дыр. Мылкыд ласянь верано ке, котькыӵе секыт учыръёсы мылкыдэз куашкатыны уг яра, малы ке шуоно, со тыныд уз юртты висёндэ вормыны но, ванё-буро улонэз шӧмъяны но. Соин ик йырдэ ошоно ӧвӧл. Астэ ултӥяны ӧвӧл сётоно. - Василий Михайлович, Удмуртиын тӥледыз тодӥсьтэмез ӧвӧл, дыр. Кудӥз тодэ ожгарчиен, мукетыз дышетӥсен, куинетӥез журналистэн, министрен яке депутатэн. Тӥ нош ма шуысалды асьтэ сярысь? - Пичи классъёсын дышетскыкум ик мон гожъяны кутски газетэ. "Дась лу!" газетэ пичиесь заметкаос, собере кылбуръёс но ысъялляй. Нош Можга педучилищеын дышетскыкум, 1938-тӥ - 1941-тӥ аръёсы, мылкыды уката бугырскиз. Война аръёсы фронтын газетэ гожъяны ӧз кылды, та ужме азьланьтӥ ини армиысь бертэме бере. Одӥг ар дышетӥ Ильинск школаын. Собере одӥг ар Пичи Пурга ёрос газетлэн редакторез луыса ужай. Берлогес дышетски Свердловскысь партийной школалэн газетчиосты дасян люкетаз. 1951-тӥ арын сое йылпумъяса лыктӥ "Советской Удмуртие". Ньыль арзэ "Культура но быт" отделэн кивалтӥ, собере редакторлэн воштӥсез луыса ужай. Та вакытэ ик Москваысь Вылӥ партийной школалэн журналистика факультетаз тодон-валанме йылэтӥ на. Собере нош ик "Советской Удмуртие" берытскыса, кыл кутӥсь (ответственной) секретарь луыса ужай. 1959 арын ужаны басьтӥзы Культурая министерствое, министрлэн воштӥсез вал. Ар ортчыса, министре юнматӥзы. 1965 арын ужаны ыстӥзы "Удмуртская правда" но "Советской Удмуртия" газетъёслэн редакторзылы воштӥсе. 1967 арын та газетъёслэн редакцизы люкиськиз но монэ юнматӥзы "Советской Удмуртилы" редакторе. 20 арзэ татын тырши, пенсие потытозь. Собере ужай на "Пропагандист и агитатор" журналлэн кыл кутӥсь секретарез луыса. 1963-тӥ арысен 1990-тӥ арозь 6 пол пӧртэм округъёсъя Вылӥ Кенеше депутатэ бырйылэмын вал. Но газетъёсы гожъяны ӧй вунэтылы. Журналист луон мылкыды ноку но ӧз кысылы, мукет сюресъёсы кожылоно луиз ке но. - Тӥ малпамъя, кыӵе луыны кулэ зэмос журналист? - Вань журналистской этика. Со туж умой возьматэ, кыӵе луыны кулэ журналист. Нырысь ик, туж шонер возьматыны кулэ гожъяно югдурез, ноку но аслад кылыныд медад сантэма мукет адямиез. Кин сярысь гожъяськод, сое гажано. Чакласькись луоно. - Со сямъёслы дышетскыны луэ-а? - Улонын котькыӵе учыръёсын, адямиосын пумиськылӥськод, со ик тонэ дышетэ, кызьы шуо, пыд азьдэ чакласа вамышъяны, аслэсьтыд янгышъёстэ но соку валаськод. - "Советской Удмуртиын" редактор луыса ужакуды шӧдӥськоды-а вал партилэн обкомезлэсь кивалтӥсь кужымзэ, кыӵе куронъёс пуктэ вал со газетъёс азе? - Газет партилэн обкомезлэн, республикаысь Вылӥ Кенешлэн, правительстволэн органзы вал бере, соос эскеро но юнмато вал редакторлэсь ужан планъёссэ. Ялан индылыса, косъяськыса татын уг уло вал. Кулэ дыръяз дэмланъёс сётылӥзы. Туж сак эскеро вал янгышъёсты. Собере редакциын ужась адями тодыны кулэ, кыӵе ужпумъёс сыло асьме республикамы, калыкмы азьын. Но тужгес но пусъем потэ: тон ас азяд но, лыдӟись азьын но зэмлыко мед луод. - Василий Михайлович, кыӵе вакытэ асьтэдыз пыртысалды? - Милемлы пичиысен ик адӟыны кылдӥз Быдӟым Отечественной ожез. Отӥяз войналэсь бервылъёссэ быдтоно, куашкам хозяйствоез ӝутоно вал. Мон сямен, мынам ёзъёсы калык азьын возьытэ ӧз усе, егитъёслы но адӟем карымонэсь. - Оже туж егит дыръяды мынӥды, выпускной ӝытысь. Ма малпаса? "1923 арын вордскемъёс... Сюэз пӧлысь одӥгез гинэ берытскиз ожысь. Одӥгез гинэ сю пӧлысь! 20-тӥ, 21-тӥ но 22-тӥ аръёсы вордскемъёслэн сыӵе ик шудтэм пуссы. Но 23- тӥосыз тужгес но шудтэмъёсыз! Дас тямыс аресъемъёс. Дасэтӥ класс. 22-тӥ июнь азьын выпускной ӝытъёс. Одӥг-кык арлы бадӟымъёсызгес ож ужлы армиын дышетылэмын ни вал. Нош таосызлэн мылкыдзы но солдат рад азьпала куинь вамыш лэсьтыны кулэ шуыса осконзы гинэ вал. Владимир Еременко. "Юность", 82,5". - Школаын но, собере Можга педучилищеын но военной ужлы дышетӥзы. Пичиысен ик милемлы аслэсьтыд вордскем шаердэ яратон, сое утьыны дась луон мылкыд пыӵатӥзы. Странаын секыт югдур кылдӥз бере, тушмон асьме вылэ урдскиз бере, калыкез, странаез утён сяна, нокыӵе но мукет малпан ӧй вал ни. - Али воштӥськизы-а со пумысен малпанъёсты? - Ӧз. Но али туж сюлэмшугъяськытэ тани мар: телевидение но радио, газетъёс но кинофильмъёс пыр асьмеды оскытыны тыршо, нокыӵе кышкытлыкъёс ӧвӧл ни шуыса. Улонмы но мукет ӧре кожиз, котькуд адями ачиз сярысьгес сюлмаськыны кутскиз. Малы со озьы луэ? Тани, шуом, ужез вань ке, адями ужа, нош со понна уждун басьтыны уг быгаты. Со малпаськыны кутске: "Кызьы ай та югдурысь потоно?" Тӥни татын солы ӟеч-ӟеч валэктоно, малы асьмеос таӵе улонэ вуимы, кин янгыш со понна, мар со ачиз лэсьтыны быгатоз улонзэ воштон понна. - Кызьы? - Егитъёсты, пиналъёсты пичиысен ик дышетоно аслэсьтыд странадэ яратон, сое возьманы котьку дась луон мылкыдын. Соку гинэ асьмеос быгатом азьло басьтэм вормонъёсмес утьыны. Тани реформаос ортчытыны кутскемзы дырысен дас ар ортчиз ини. Пичи пиналъёс азьлозэ номыре но уг тодо ни. Нош азьланьын улонмы соос киын ук. - Котькуд калыклэн, адямилэн кадь, аслыз гинэ тупась сюресэз, аспӧртэмлыко адӟонэз вань. Маиныз висъяське удмурт калык, кылыныз сяна, мукетъёсызлэсь? - Удмурт калык туж ужась, тыршись. Ассэ вылэ пуктон, вылтӥяськон сямыз солэн ӧвӧл. Но котькуд калыкын сямен ик, асьме пӧлын но вань урод сямо адямиос. Тани интеллигенция пӧлын куд-огез эшезлэн кыӵе ке азинсконэзлы, шуом, книга гожтэмезлы, шумпотэм интые, вожъяськыны, солы пыдзэ пуктыны кутске. Со урод сям юн огазеяськонэ уз вутты. - Удмурт культурамес ӝутон понна, тӥ сямен, мар карыны кулэ? - Тросгес ужано вылэм калык пӧлын общественной организациослы, кылсярысь, "Удмурт кенешлы" но. Тани республикаямы пӧртэм калыкъёс уло. Соослэн но вань асьсэлэн кенешсы. Котькудӥз ас калыкез пӧлын ужам сяна, валче но ужано на. Нимаз- нимаз люкиськон - со ноку ӟече уз вутты. - Котькуд адямилэн улон сюрес вылаз тӧдьы но сьӧд гожъёс шедё. Тӥ сямен, адями соосын кивалтыны быгатэ-а яке со адӟон-а? - Калыкын вань сыӵе веран: адямилэн улоназ мар ке витёнтэмез учыр луэ ке, адӟонэз сыӵе, дыр, шуо. Адями малпа одӥгзэ, нош улон меӵак берыктэ мукет пала. Валамон ни, сыӵе дыръя синдэ кыньыса эн мыны, тэльбугодэ кияд юн кырмыса возь. - Котькудӥз нырысетӥ яратонзэ тодаз возе, дыр. Дырын-дырын со яратон егит дырысь ненег малпанъёсты сьӧраз ӧрак вайылэ. Кыӵе со вал тӥляд? - Дышетскыкум яратонэз умой-умой тодыса ӧй вутты. Бен вал, дыр, синмаськон дыръёс... Нош кышноеным тодматски фронтын. Война бере, 1946 арын Венгриын служить карыкумы гожтӥськыны ветлӥмы Австрилэн столицаяз, Вена городэ. Соку отын вал Союзной контрольной комиссилэн советской люкетэз. Тӥни со дырысен ӝыны даурлэсь кема ӵош улӥськомы. - Кин вал атайды? - Атае но песятае крестьян калыкъёс вал. Но кибашлы адямиос. Атай - гуртын туж усто гур пуктӥсь, лэсьтӥськись вал. Котьма ласянь киыз мынӥз. Пие но сыӵегес. - Василий Михайлович, кызьы шутэтскиськоды? - Быдэс нунал. Пенсие потэм адямилэн ӵукнаысен ӝытозь сюлмаськонэз одӥг: тазалыкез медаз лябӟы, сиён-юонэз мед луоз. Нокыӵе пумиськылонъёс ӧвӧл ке, радио но телевизор пыр интересной передачаосты учкылӥсько, книга-газет лыдӟылӥсько, одӥг-ог гожъяськисько. - Кыӵе книгаосты выльысь кутскылыса лыдӟыны яратӥськоды? - Ӟуч но удмурт классикаез. - Нош крезьгурез? - Туж шумпотӥсько, куке Бадӟым театрысь оперной кырӟасьёсты возьмато. Уг яратӥськы капчи, тырттэм кылъёсын кырӟанъёсты. Соос борды сюлэм уг лякиськы. - Ас дыраз тӥ, газетэ сяна, нимаз сборникъёсын веросъёс, очеркъёс но публицистической статьяос поттылӥды. Азьланяз кыӵе творческой малпанды? - Берло аръёсы гожъямъёсме поттылӥ газетъёсын, "Луч", "Инвожо", "Кизили" журналъёсын. Печатланы дась луэмзэ но али ӵем дыръя поттыны уг быгато. - Кема улӥсь муртэ дуннеын вашкала дырысен гажало. Ма кароно, адями кема но таза мед улоз шуыса? - Котькинлэн кема улэмез потэ. Но арлыд будэмъя, матысь адямиосыдлы, ӵыжы- выжыедлы акылес медам луы, соос улонысь кошкемдэ возьмаса медам улэ шуыса, астэ котьма ласянь кияд возёно. Тани мон кема аръёс ӵоже спортэн вырылӥ, стадионэ бызьылыны ветлылӥ (али шергес ветлӥсько ини) - собере быдэс нуналлы тон таза. Больницаостӥ ветлыны мон уг яратӥськы, кытӥяз амалтэк мыноно луэ ке но. - Шуд, тазалык тӥледлы, кема аръёс улэ на калыклы юрттӥсь луыса. Вераськиз С. ПЕТРОВА. Сюлэмыз чылкыт вал Удмурт кылбурчиен но пиналъёслы телепередачаос дасясь журналистэн Александр Титовен мон нырысьсэ пумиськи 1974-тӥ арын. Соку телецентрын осветитель (югдытӥсь) луыса ужасько вал. Нырысетӥ командировкае потаны шуд усиз Игра ёросысь Чутырь черкогуртэ. Саша кытысь ке кылэм: отын дышетэм койык но луд кеч уло. Сюрес вылэ бадӟым бригадаен потӥм - журналист Александр Титов, режиссёр Егор Загребин, кинооператор Олег Чирков. Вал на звукорежиссёр, осветитель но шофёр. Вуэммы бере ик тодматскимы передачаысь вуоно геройёсын - пӧйшуръёсын но пиналъёсын. Авторъёс син куспын сценарий пӧразы. Соку ик кино дасяны кутскизы. Койык оператор доры матэгес мед лыктоз шуыса, пӧйшурез нянен сюдоно луим. Собере нянь быриз. Табере Олег Чирков, нянь интые, сисьмем пу мычиз. Койыкмылы со ӧз яра, лэся. Омырскиз ук пӧйшур оператор вылэ. Олег, кинокамеразэ ик куштыса, куакъёс пӧлы пегӟиз. Бӧрысь озьы ӧз пӧяськы ни. Передача дасясьёс Чутыре эшшо кӧня ке пол вуылӥзы на. Озьы пӧйшуръёслэн улэмзы сярысь усто фильм кылдӥз. Али со Удмурт телевиденилэн зарни фондаз кылемын. Командировкаосы потаку, бригадаен котьку кивалтэ вал редактор. Александр Титов сьӧры котьку трос адямиос куриськылӥзы. Со уго котькинэн лякыт вераськылӥз. Кӧлон инты но, бер уин кӧттырон но котьку шедьтэ вал. Со вакытэ удмурт кылын передачаос, тужгес но - пиналъёслы сӥземъёсыз, сокем ик трос ӧз луылэ. Нош Сашалэсь ужзэ учкисьёс трос гинэ вылӥллям. Сое гурт пиналъёс умой тодмало вал. Собере редактор данъяськыны быгатылӥз ыстэм гожтэтъёсын. Соос Титовлэн ӝӧк вылаз гурезьёсын люкаськылӥзы. Редактормы кылбурчи но шуыса кылылэммы вал. Но со кылбуръёссэ милемлы ноку ӧз лыдӟылы, гожъяськемзэ но ӧм адӟылэ. Алнашысен гинэ огпол кыӵе ке пумиськонын нырысьсэ тодматӥз аслаз чуръёсыныз. Малы ке тужгес но уно вал яратонлы сӥземъёсыз. Соос азьын гожтэмын: "Сӥзисько Н. Ч.-лы". Бӧрысь гинэ ини тодӥ ог-огзэс ӟырдыт яратӥсь адямиос сярысь. Сашалэн яратоно нылмуртэз али но Алнашын улэ. Александр Алексеевичлы туннэ нуналозь улыны кылдысал ке, со туж кужмо кылбурчи луысал. Вал солэн кужымез, вал чебересь малпанъёсыз. Нош сюлэмыз чылкытлэсь но чылкыт вал. Н. БАЙТЕРЯКОВ. Потребительской кооперациын ужасьёсты кун наградаосын пусъён сярысь Россия Федерацилэн Президентэзлэн Указэз Потребительской кооперациез азинтыны трос кужымзэс сётэмзы, уно аръёс ӵоже сюлмысь тыршемзы понна но Россия Федерациысь Потребительской огазеяськонъёслэн центральной союззы кылдэм дырысен 100 ар тырмемен валче пусъёно "За заслуги перед Отечеством" орденлэн ИИ степенё медаленыз Баитова Татьяна Анатольевнаез - Яр райполэн нянь пыжонъя комбинатысьтыз нянь пыжисез. Сётоно сӥлы карон нимъёс: Россия Федерациысь вузкарон удысысь дано ужась Мушина Юлия Николаевналы - Шаркан райполэн кенешеныз кивалтӥсьлы; Смердягина Елена Георгиевналы - Можга райполэн кенешеныз кивалтӥсьлы; Шкляева Надежда Апполосовналы - Игра райполэн Зура селоысь 45 номеро магазинысьтыз вузкарисьлы. "Россия Федерациысь дано экономист" Князева Зинаида Афанасьевналы - Красногорск райпонысь валтӥсь бухгалтерлы. Россия Федерацилэн Президентэз Б. Ельцин. Москва, Кремль, 1998 арын 8 августэ. � 929. Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Сиён-юон поттон удысын вормонъёс басьтэмез но уно аръёс ӵоже сюлмысь тыршемез понна "Россия Федерациысь сиён-юон поттон удысысь дано ужась" сӥлы карон ним сётоно Пальмов Владимир Александровичлы - акциосын "Ижевский хлебозавод �3" огазеяськонлэн генеральной директорезлы. Россия Федерацилэн Президентэз Б. Ельцин. Москва, Кремль, 1998 арын 8 августэ. � 930. Журналистъёслы конкурс Россиын пресса удысын ужасьёс понна ортче"Кылдытэмын Россиын" конкурс. Та ужрадэ пыриськыны быгатозы газетъёслэн, журналъёслэн редакциоссы, радио, телевидение, нимаз журналистъёс, экономика, наука, техника, культура но искусство сярысь мур пуштросъем материалъёс гожъяло ке. Конкурсэ ыстоно ужъёсын бадӟым саклык висъяно Россилэн азьпал улонэзлы, данъяно ужаны быгатӥсьёсты, выльзэ кылдытӥсьёсты. Озьы ик гожтыны дэмламын пичи ужбергатон сярысь, угось со тужгес но кулэяське пресса удысын ужасьёслэн юрттэмзылы. Кунгож сьӧръёслэн вуззылы ялан синмаськиськом, нош маин пӧртэм асьмелэнъёсыз? Соин ик конкурслэн эшшо одӥгез ужпумез - асьме кунын поттэм вузъёсын, кылдытэм технологиосын тодматон, асьмелэнзэ дунъяны но данъяны дышетон. "Кылдытэмын Россиын" конкурс кыстӥськоз 2000-тӥ арозь. Вормисе потэмъёс пусъемын луозы ВВЦ-лэн, Россия Федерациысь Торгово-промышленной палаталэн, Россиысь но Москваысь Журналистъёслэн союзъёссылэн дипломъёсынызы но дуно кузьымъёсын. Со сяна, вормисьёсты витё на ВВЦ-лэн зарни медалез но, бордаз вить сюрс манет коньдон но, азвесь медалез но куинь сюрс манет коньдон. Конкурсэ пыриськон понна ужъёстэс ыстоно 15 сентябрёзь ВВЦ-лэн пресс-центраз таӵе адресъя: 129223, Москва, ВВЦ, пресс-центр (конкурсэ), телефонъёс: 181-93-61, 181-65- 29 (факс). Газет-журналэ потэм материалъёсты (удмурт кылын гожтэмын ке, ӟуче берыктэмез но мед луоз) ВВЦ-лэн пресс-центраз ыстоно, нош теле- но радио редакциос конкурсэ ыстыны кулэ видео- но аудиокассетаосты. Пусъёно на газет-журналын, эфирын потэм дырзэ, редакцилэсь, редакторлэсь но асьтэлэсь быдэсак ним-тулдэс но адрестэс, телефондэс. Дорогой, мон дорогой!.. Малы адямилы сокем вакчи улон сётэмын? Тужгес но ӝож, улонысь дырызлэсь вазь кошке ке. Озьы ик луиз, шуоно, дыр, Борис Александрович Безумовен но. Ведь солы та нуналъёсы гинэ ай 70 арес тырмысал. Борис Александрович Безумов Удмурт государственной национальной драматической театрын ужаны кутскиз 1951-тӥ арын, Ленинградысь театральной институтэз быдэстэмез бере. Берпум нуналозяз вань сюлэмзэ, быгатэмзэ сётыса тыршиз ас калыкез понна. Мон соин пумиськи но умой-умой тодматски 1963-тӥ арын. "Уӵыос чирдон дыръя" спектаклез дасяку. Та пьесаез гожтӥз Игнатий Гаврилов. Мон нырысетӥ вамышъёсме лэсьтӥсько вал Удмурт театрлэн сцена вылаз. Уже шуген сётӥське. Кырӟанъёсыз, эктонъёсыз вань (крезьгурзэ гожтӥз Геннадий Корепанов- Камский, режиссёрез Геннадий Веретенников вал). Адӟиськом ми, егит артистъёс, кызьы, кыӵе капчиен сётӥське ваньмыз Борис Безумовлы. Серем пыр гинэ эктэ но кырӟа, маскаръяське. Ми, егитъёс, соку ик синмаським но яратӥм та артистэз. Со дырысен мынам эше бадӟым юрттӥсь луиз ужам но улонам. Вуоно гужем потӥмы та спектаклен лымшор палась районъёсы. Одӥг учыр тодэ лыктэ. Спектакльмес возьматӥськом ю возён, чылкытатон лапас улын. Котыр учкись калык. Пӧлазы одӥг-ог юмшасез но вань. Одӥг воргорон весь милям егит чебер артисткаосмы - Валяен Галя - борды няняськыны выре. Мынэ спектакль. Артисткаос рольысьтызы медам потэ шуыса уг улляло со шӧмаськем, люгы кадь воргоронэз. Мон милиционерлэсь рользэ шудӥсько. Борис Безумов мыным шуэ: "Мын ай со кудӟем муртэ кышкаты". Мон воргорон доры лыктӥ но шуисько: "Следуйте за мной!" Таи копак котмем курег кадь луиз. Сьӧрам мынэ. Лапас сьӧры поттӥ но шуисько: 50 манет штраф. Яке ӝогак берт дорад но изь. Бызьыса кошкиз. Та сценаез учкыса, вань калык лапас тыр гор-гор серектӥз. Ог куамын ар ӵош ужатозямы, кыӵе но учыр ӧй вал. Но ваньзэ та пичи газет бамын Россиысь быдӟым, дано артистлэсь туссэ-буйзэ, ужзэ но улонэз яратэмзэ возьматыны уд быгаты. Тани лыктӥз театре Дэбесысь тодмо кылбурчи но драматург Степан Широбоков. Мынам сое адӟеме ӧй вал на. Пукиськом репетициосъя классын, витиськом. Пыро Геннадий Веретенников но наш-наш удмурт ымныро воргорон. "Та ик вань Степан Широбоков", - шуэ Геннадий Васильевич. Со, пе, лыдӟоз асьмелы выль пьесазэ. Ну, артист вылэм Степан Павлович. Кыӵе лыдӟиз со: вань артистъёс, ымзэс усьтыса, сак кылзо. Ас понназы мыняло. Кудӥз-огез гор-гор серектэ. Чик возьдаськытэк, туж кужмо серекъяз Борис. Шораз учкисько но паймисько: ассэ кыӵе кӧбератэк, кадырлы возе. Куддыръя авторлэн лыдӟон куспаз но пыриське: мон, шуэ, Степан Павлович, та пьесаысьтыд Дорогойдэ шудо. Тон ведь сое мыным, мон понна гожтӥд. Шонер-а верасько? Туж шонер, шуэ автор. Мон трос рольёсме гожтӥ юри тӥледлы, тӥледыз тодыса-валаса, тӥляд мылкыддыя. Нош пинал рольёсты - созэ асьтэос чаклалоды, учкоды режиссёрен ӵош... Со вал кылбурен гожтэм "Ой, чебер нылъёс" пьеса. Борис Безумов - Дорогой, мон - Гирой, Галеев - Тимок. Спектаклез пуктӥз Г. В. Веретенников. Пӧрмиз-а, мар-а. Учкись калыклы театрлэн та выль ужез туж яраз, шуыны луоз. Гуртъёсы вуылыкумы, али ке но верало: о, тӥни Гиройзы но лыктэм. Милемыз озьы ик нимало вал: Дорогой, Гирой но Тимок, дӥсьтӥсьтэм Тимок. Солэсь но дуно дунъет артистлы ӧвӧл, дыр! Тау учкисьёслы, уг вунэто, гажало, юало. Кин ӧвӧл ни, сюлэм ӝожзэс, яратэмзэс верало. Телевидениын 70-тӥ аръёсы уг быгато вал на лента вылэ гожтэм спектаклез эфире сётъяны. Соин ик та муген "Ой, чебер нылъёс" спектаклез, калык куремъя, ми возьматӥм, куинь пол. Огползэ, берлозэ, пырак гуртысен. Изгуртын мынэ спектакль. Нош телевидение сое возьматэ быдэс Удмурт шаерлы. Борис Александрович ӟуч вал. Но будэмын удмурт гуртъёс котырын - Шаркан ёросысь Сосновка гурт палась пичигес Михайловка ӟуч починкаын. Будӥз удмурт пиналъёсын ӵош. Дышетскиз но соосын валче. Удмурт кыллы пинал дыръяз ик дышиз. Шугенгес ке но вераське вал, куддыръя юалля вал милесьтым шер пумиськылӥсь удмурт кылъёс сярысь. Шуом, мае возьмато ӝотрак, ӵапак шуэмъёс но трос мукетъёсыз.Рольдэ ӟеч, пыр-поч дасян вылысь, кулэ угось авторен гожтэм вань кылъёсты сэрттыны-пертчыны, пуштроссэ возьматыны. Сизьымдонэтӥ-тямыстонэтӥ аръёсы ӟуч кылын трос спектакльёс пуктылӥмы. Отын образъёсаз "пылаське" вал ини Борис. Тодам лыктэ таӵе учыр. Со яратэ вал импровизациос лэсьтыны. Авторлэсь, пьесалэсь ӧжытак гинэ кожыса но спектакльлэн ӧрысьтыз потытэк. Огпол шудӥськом "Арлы быдэ кызь сюан" спектакльын Эгра (Игра) ёросысь селоын. Борислэн мылкыдыз умой, пачыл потэ. Малы ке шуоно, кышноез, яратоно Алевтина Архиповнаез, Игорь пиеныз адӟиськыны лыктӥзы (мӧзмон вань ук). Вот, мынэ спектакль. Котьку сямен ик калык шуныт пумита. Ми сцена вылэ потонмес возьмаса сылӥськом кулиса сьӧрын. Кылзӥськом репликамес (потоно дырмес). Иван Кудрявцев но Василий Пеервощиков кылӥллямтэ репликазэс. Нош Борис арганэн шудэ сцена вылын, азяз эктэ Клава Полякова (егит нылаш вал милям актрисамы). Вань кылъёс верамын - потӥсь ӧвӧл. Нош ма дауртэ Борис! Ас кылъёссэ, авторен гожтымтэзэ вера, пумен ачиз арганэн шудэ. "Клавочка, почеши мне за ухом", - вазиське егит актрисалы. Ачиз мыньпотэ. Пуктылэм зарни пиньёссэ возьматыса, кулиса шоры учке. Клава шуэ: "Да ну тебя". Соку гинэ валазы янгышсэс Иван Иванович но Василий Яковлевич. Со гужеме ик ми Зура селое вуим. Борислэн кышноез кошкиз городэ, пизэ, Игорез, кельтӥз, Нинна Петровна Бакишевалэн Миша пиеныз ӵош. Соос бызьыло, шудо - ми спектакль пуктӥськом клублы пӧрмытэм черкын. Шуак кылӥськиз чир-р! кеськем куара. Собере вуттӥзы Борислэсь зар-зар бӧрдӥсь ог тямыс-дас аресъем пизэ. Шудонъяз лёгиськем со пилиськем пияла вылэ. Йылсо маке кеды пыр мертчем. Игорьлэн пыдтышказ, отысь вир ӟуз-з вир - дугдытыны уг лу. Борис яратоно пиезлэсь вирзэ сюпсе но шуэ: "У-у, фашист, кин юиз со винаез но бутылказэ пезьдытӥз черк из борды?! Адӟе вал тӥ со дыре Безумовлэсь куректэмзэ... Аръёс ортчыса, Игорь кышнояськиз. Борислэн внукез вордскиз - нимазы сое Стас. Огпол Борис Александрович ог вить-куать аресъем макеез театре ӟуч кылын выжыкыл учкыны ваиз. Пыризы гримёрное, кылиськизы но мар... Табере юаськом со пичи пилэсь: "Кто ты, как тебя зовут?" Со лад-лад вера: "Зовут меня генералом. А это мой дедушка - дядя Боря. А я его солдат, т. е. Внучек. Вот и всё!" Ми ак но, бак но шуыны ӧм тодэ. Кылмы быриз, пумиз. Али милям генералмылы ог дас куинь-дас ньыль арес ини. Алигес адӟылӥ мон сое - уд но тодма. Ярам, вӧзаз песянаез, Алевтина Архиповна, вал. Юасько: "Та генерал-а?" Нош со пияш, Стас, шуэ: "Бен, мон Генерал". Ачиз мыня. Чылкак дядя Боря сямен. Театрын берло ваньмыз артистъёс Безумовез дядя Боря шуылӥзы. Со туж капчи мылкыдъем луылӥз, эшъёсын пумиськылыку. Кырӟаны, эктыны, гитараен, балалайкаен шудыны быгатылӥз, маскаръяськыны яратылӥз. Тӥни сыӵе ӟеч адямиез, усто артистэз асьме удмурт калык дырызлэсь вазь ыштӥз. Улонысь кошкыкуз, солы 60 арес гинэ тырмиз. Пенсиме вуттӥзы ке, ящик водка басьто, ваньдэс сектало, нош ачим уг юы ни. Солэсь номыр ӟечез ӧвӧл, шуиз вал - ӧз кылды. Удмурт театрын артистъёс пӧлын нокинлэн машинаез ӧй вал на - нырысь ик со басьтӥз. Умой-умой сиськытэк но юытэк, коньдонзэ люкаса. Кӧня тодӥсько, артистын сяна, монтировщикын ужаз (декорация пуктылӥз сцена вылэ). Весь коньдон люказ машиналы. Басьтӥз, нош ворттылыны трос ик ӧз кылды... Борис Александрович Безумовез буре вайыса, ойдолэ выльысь но выльысь тодамы ваёме яратоно артистмес. Дорогой, не дорогой... Геннадий Соловьёв, Россиысь дано артист. Борис Безумов егит дыръяз. "Лымы тӧдьы" спектакльысь оглюкетэз. Борис Александрович Безумов - паллянысен куинетӥез. МИЛИЦИЛЭН УЖЫСЬТЫЗ Оскымон пиос Огазеяськем преступной группаос йылэмен, Россиысь Президентлэн приказэныз 1992 арын 8 октябре МВД-ын кылдытэмын вал нимысьтыз отдел - СОБР - интые ӝегатскытэк потонъя нимысьтыз подразделение. Со азе пуктэмын одӥг ужпум: вакчи дыр куспын ӝегатоно йыруж лэсьтӥсьёсты, ортчытоно следствие, талано пыӵал тӥрлык, боеприпас ватосъёсты, наркотикъёсты. Удмуртиын выль ёз кылдӥз вить ар талэсь азьло 5 августэ - самой та нуналэ отделын ужасьёс асьсэлэсь дась луэмзэс возьматӥзы но МВД-лэсь дано символзэ - горд беретэз - нуллыны право басьтӥзы. Ватонэз ӧвӧл: йыруж лэсьтӥсьёс киын - туала оружие, телефон, транспорт. Ваньмыз со люкамын лушкам коньдонэн, наштаськемын адями вирен. Эрказмем муртъёслы закон но, мукетыз но кӧшкемыт ӧвӧл - ваньзэ зӧк кисыос пыд улазы лёгаса кельто. Соин ик СОБР- ысь боец дась луыны кулэ котьмалы, нырысь ик, тушмонэзлэсь визьмын но, кужмын но - вылӥынгес. Татчы куто офицеръёсты гинэ. Отделэ кутэмлэсь азьло котькудзэ кандидатэз 6-9 толэзь ӵоже уж вылын эскеро. Та дыр ӵоже вуоно собровец шонер ыбылӥськыны, котькыӵе транспортысь (омырысь но) быгатыса тэтчыны дышыны кулэ, тодоно пуштытон но сапёр ужез, быгатоно ватскыса, нюжтӥськыса кулэ интыозь вутскыны. Вылӥ квалификациен комиссия пуктэ музон но куронъёс. 5 ар ӵоже СОБР 2296 тужгес но секыт ужрадъёсы пыриськиз, трос адямиослэсь улонзэс, ваньбурзэс утиз. 1994 арын июле кырмемын вал 2 милиционерез быдтэм, быдэс городэз кышкатыса возем преступник. Та арын ик ӝегатэмын медъяса ужась убиръёс. Соосын виемын 8 мурт, пӧлазы милициысь полковник Н. А. Перевощиков но. 1995 арын июле нимаз хозяйствоен улӥсь муртлэн гаражысьтыз шедьтэмын 21 автомат. 1997 арын апреле Удмуртиысь но Татарстанысь милициен ӵош ӝегатэмын асьме доры наркотикъёсты келясьёс, сюрессы пытсамын. Таламын 200 килограмм марихуана, 7 килограмм гашиш. Котькудӥз операция, бадӟым-а со, пичи-а - кулэ каре ӟеч дасяськемез. Озьыен, нуналлы быдэ мугордэ ужатоно, лябӟыны сётсконо ӧвӧл. Сое умой возьматӥзы Чечняе командировкаос. СОБР-ысь пиосмы отчы 4 пол ветлӥзы. Жаляса верано, огез соос пӧлысь, Юрий Малых, бырыны шедиз. Пусъемын Мужество орденэн. Ваньзэ верано ке, та подразделениысь 39 муртлы правительственной награда сётэмын. Огез но со ас кожаз ӧз лыкты: басьтэмын кинлэсь ке улонзэ кулонлэсь сайяса, тушмон пумитэ кышкатэк вамыштыса. Ю. БАЙБЕКОВ. ИСТОРИЫСЬ ЧУРЪЁС Гужемез пӧсь вал Курск дорын ожмаськонлы 23 августэ тырме 55 ар. Быдӟым Отечественной войналэн историяз со пыриз ӟуч пыӵал тӥрлыклэн кужмо луэменыз, военной полководецъёслэн азьпала адӟыны быгатэменызы. Сюосын, сюрсъёсын отчы, адями сӥль коранэ, шедемын вал асьмелэн но землякъёсмы. Тросэз быризы, улэп кылемъёсыз пӧлысь но данакез улонысь кошкизы ни. Озьы ке но, 23 августэ огазе люкаськозы на шурдыт тылӝу пыр потэмъёс. Тодазы ваёзы ортчем сюрессэс, буре ваёзы бырем эшъёссэс. Курск кульчоын ожмаськон - войналэн историысьтыз огез бадӟымез вир кисьтон. Кык палласянь но отчы кыскемын вал 4 миллионлэсь ятыр солдат, ог 70 сюрс пыӵал-тӥрлык, 13 сюрслэсь ятыр танк, ог 12 сюрс пала самолёт. Сталинградысь чигнамзы бере, фашистъёс уката урмизы. Малпазы Орёл город дорысен Белгородозь чигтыны луонтэм кульчо кылдытыны, Курск дорысь Центральной но Воронежской фронтъёсты пазьгыса, выльысь Москва пала мыныны. Советской командование тушмонлэсь планзэ шараяз но шуккет сётонын азьпалтӥз: ожез 2 часлы вазьгес мытӥз... 1943 арын 12 июле Прохоровка село дорын ваче пумит султӥзы танковой частьёс. Югыт куазен сьӧд-сьӧд бугырскись ӵын ворсаз яркыт шундыез, пилемтэк гудыръяз, ӵашйылӥз уен-нуналэн. Нырысь ожын ик тушмонлэн 400 танкез, 10 сюрслэсь уно солдатэз но офицерез быдтэмын вал. 5 августэ фашист улысь мозмытэмын Орёл но Белгород. Солы сӥзьыса, Москва салют сётӥз. 23 августэ немецъёс уллямын Харьковысь. Таин йылпумъяськиз Курск кульчоын ожмаськон. Тушмон понна со берыктыны луонтэм пезьдэт луиз. Курск музъеме пыраклы кельтӥз 500 сюрс улэп кужымзэ, 1500 танкъёссэ, 3000 пала пушкаоссэ но миномётъёссэ. Советской Армилэн вормонэз - вань советской калыклэн, быдэс СССР-лэн вормонэз. Бадӟым юрттэт вуиз партизанской огазеяськонъёс пыр. Быгатэмзыя соос уен-нуналэн быдтӥзы Курск пала Германиысь вуись эшелонъёсты. Та бадӟым оже тросэн шедизы Удмуртиысь но пиосмы. Пӧлысьтызы 250-эз али уло Ижын. Курск понна ожмаськыкуз, секыт сӧсырмиз стрелок А. И. Запольских, Нылга районысь Бараново гуртысь воргорон. Эшъёсыз сое кулэмъёсын ӵош вато. Нош вордскем палъёсаз вуэ похоронка. Солдатлэн шудэз вылэм на - муре ватӥллямтэ. Дырыз сыӵе вал уга. Кулэмъёсты ватӥсь командаысь пиос, ӝутъяськись сюез адӟыса, Запольскихлы кыкетӥзэ улон кузьмазы. Госпиталь бере землякмы выльысь войналэн тылӝуаз шеде. Эшшо кык пол сӧсырме на. Озьы ке но, эзель сое ӧз вормы. Но фашист пуля быдтӥз Александр Ивановичлэсь бубызэ но вынзэ. Соос, мукет трос миллион боецъёсынымы ӵош, весяклы кылизы ож бусые. Аръёс дыртыса кошко, историлэсь питранъёссэ бергато, куд-ог интыоссэ ӵушыса кельто. Но Курск дорысь пӧсь нуналъёс ноку уз вунэ. В. ЧЕРНОВ, ужысь ветеран. Куд-огезлы медаль но ӧз юртты Вылӥ дышетскон заведениосы абитуриентъёсты кутонъя экзаменъёс 1998 ар понна йылпумъяськизы. Удмурт кун университетэ ваньзэ сётэмын вал 4233 куриськон. 1330 абитуриентлы гинэ шуд усиз студент луыны. Со пӧлысь ӝыныез Ижысь - 755 мурт. Ӟеч тодон-валанъёссэс возьматӥзы Ува, Пичи Пурга, Игра, Завьялово, Алнаш, Можга районъёсысь, Воткинск, Сарапул городъёсысь егитъёс. Ӧжыт вуо Яр, Юкаменск, Красногорск, Сарапул, Камбарка но Глазов районъёсысь выпускникъёс. Дышетскыны пыремъёс пӧлын - школаез медален йылпумъям 366 мурт. 264-езлы со ӧз юртты. Городъёсысь абитуриентъёсты вератэк, трос медалистъёс лыктэмын вал Завьялово, Пичи Пурга но Ува районъёсысь. Выль студентъёс пӧлын - 872 ӟуч, 326 - удмурт но 96 - бигер. Трос удмуртъёс пыремын Ижевскысь - 94, Алнашысь - 23, Пичи Пургаысь - 21, Завьяловоысь - 19, Шарканысь - 13, Играысь - 12. Зэмос нюръяськон мынӥз психология, дизайн, информационной системаос, прикладной математика, инкуазез уже кутон, картография, биология, муниципальной но государственной кивалтон, журналистикая (ӟуч люкетэз) но общественностен кусып возён специальностьёсъя. Нош удмурт-венгер кыл, документоведение но городысь хозяйствоосын кивалтон специальностьёсъя одӥг мурт но конкурс пыр ӧз поты, тодон-валанзы ӧз тырмы. Трос медалистъёс пыремын психология, английской филология но юриспруденция факультетъёсы. Тужгес трос, 106 мурт, юрист луыны мылкыд кариз. Соос пӧлысь 80-эз - ӟуч, 10-эз - удмурт, 13-ез - бигер. С. ПЕТРОВА. ТЕАТР Улӟоз-а "Дарт"? Егитъёслэн удмурт-ӟуч "Дарт" театрзы республикаямы ӟеч тодмо ини. Печатьын но со сярысь трос гожъямын. Театрез 1991-тӥ арын кылдытӥз режиссёр но киноактёр Александр Блинов. Александр Андреевич йылпумъямын Ленинградысь театръя, музыкая но кинематографияя кун институтэз. Быдтӥз актёрской но режиссёрской факультетъёсты. Аслэсьтыз кужымзэ эскериз киноын. Шудӥз сизьым картинаын. Самой тодмоез - Михаил Шолоховлэн веросэзъя "Донская повесть" фильм. Сотникез шудыны мылкыд карисьёс куать кузя вал. Пӧлазы - дано актёр Олег Видов (али Америкаын улэ но ужа). Нош бырйизы удмурт пияшез. Собере Блинов ужаз Свердловскысь огаз театрын валтӥсь режиссёр луыса. 1973-тӥ арын сое ӧтизы Удмуртие. Но трос ужаны ӧз кылды режиссёрлы дор палаз. Котыраз ченгешонъёс но вожвылъяськонъёс пуромизы. Ӧз чида Александр Андреевич, кошкиз. Ужаз Ивановоын, Казахстанын, Читаын. 1989-тӥ арын Блинов нош ик Удмуртие бертӥз. Вордӥськем палъёс бордазы кыско ик вылэм. Одӥг арзэ ужаз Сарапулын. Собере Иже вуыса малпаз выль театр кылдытыны. Угось республикаын нимысьтыз егитъёслы театр ӧй вал. Соин сыӵе ужрад борды Блинов мылысь-кыдысь басьтӥськиз. Культурая министерствоын Александр Андреевичлэсь малпанзэ нырысь-валысь сокем шумпотыса ӧз пумиталэ. Но выль театрез оскытэкгес ке но усьтыны лэзизы. Зэм, нимысьтыз юрт но, труппа но ӧз висъялэ. Выль кивалтӥсь ар куспын артистъёсты люказ. 1992-тӥ арын театр усьтӥськиз венгер драматурглэн Дердь Шпиролэн "Куриные головы" пьесаезъя спектакльысен. Сое учкисьёс шуныт пумитазы, тужгес ик егитъёс. Собере театр эшшо дас одӥг спектакль пӧрмытӥз на. Репетициос ортчылӥзы улон коркалэн гулбечаз. Министерство театрлы туж ичи коньдон висъялляз. Озьы ке но, ужъёс мынӥзы. Дартъёс мырдэм но кызьы тырмытыса шедьтылӥзы декорациос, костюмъёс но аренда понна коньдон. Кылем арын "Дартлы" вить ар тырмысал. Но... Культурая министерство лыдъяз: театр вань кужымзэ сётыса уг ужа. Туж ичи, пе, спектакльёс пуктэ, учкисьёс ӧжыт. Бен, спектакльёс трос ӧй вал. Но ванез но аслаз труппаезтэк но сценаезтэк лэсьтэмын ук. Озьы-а, тазьы-а, культурая министр Геннадий Чайников вазиськиз правоез утись органъёсы аспӧртэм куронэн: "Дарт" театрын хозяйствоез нуонын но коньдонэз кутонын бадӟымесь тырмымтэос. Куриськом соосты эскерыны но А. А. Блиновез кыл кутытыны. Министерство лыдъямъя, соин кенешытэк, А. А. Блинов пӧртэм договоръёс лэсьтылэм. 1996-тӥ арын театр министерстволэсь юатэк ветлэм Львове, "Золотой Лев" фестивале. Билетъёс вузан умойтэм радъямын. Тросэзлэн ужасьёслэн разрядъёссы укыр бадӟыматэмын. Спектакльёсъя планъёсты коллектив быдэсъямтэ. - Югдурез кема сэрттыны-пертчыны выризы, - шуэ Александр Андреевич. - Нырысь- валысь аслым но кӧшкемыт потӥз, со быдӟа янгышъёс лэсьтӥськем шуыса. Пӧртэм справочникъёсын но кодексъёсын бугыръяськоно луи. Следовательлэн вань юанъёсызлы рос-прос валэктӥ. Со кутӥз уголовной ужез дугдытон сярысь постановление. *** Огыр-бугыр вакытэ министерствое одӥг заявление вуиз. "Дарт" театрын ужась Иванова (фамилиез воштэмын). Со ӝожтӥське тани малы. Одӥг пол сое министерствоын ужасьёс доразы ӧтчаллям. Асьсэлэсь нимтулъёссэс вератэк, кыӵе ке кабинетэ пыртӥллям но кутскиллям допрос мактал нуыны. Курдамзэ шӧдыса косӥллям А. А. Блинов сярысь умойтэм кылъёс вераны. Соослэсь кышкаса, Иванова куд-ог учыръёсты мыдланьтыса верам. *** Уж пытсамын. Вань янгыше уськытонъёс шонертэмен лыдъямын. "Дартлэн" кивалтӥсез капчигес лулскиз. Пукты вал ини спектакльёс. Нош министерство миым 4-тӥ декабре 692 номеро приказ поттӥз. Отын верамын: бюджетысь коньдонэз шыръян вылысь, егитъёслэсь театрзэс юнматоно "Егитъёслэн юртсы" борды. Коллективен та юртысь кивалтӥсьёс кузёяськозы, соин ик театрысь художественной кивалтӥсьлэсь должностьсэ кулэстоно. Та ужрадъёсын валче ортчытӥзы министерстволэн коллегиезлэсь кенешсэ. Выльдӥськон пумысен кутӥзы постановление. Зэм, отчы Блиновез ӧз ӧте. Таӵе иворез тодыса, Блиновлы дурбасьтӥсьёс трос гинэ луизы. Театрысь коллектив уно куронъёс ысъяз Александр Волковлы, Павел Вершининлы, таизлэн воштӥсезлы Антонина Лисиналы, Россиысь Кун Думалэн депутатэзлы Андрей Солуяновлы. "Дартлэн" учкисьёсыз 900 кинюртэм люкаллям, Александр Андреевичлы дурбасьтыса. Александр Блинов судэ вазиськиз. Со куриз театрез "выльдонъя" приказэз но ассэ ужысь куштэмзэс умойтэмен лыдъяны, ассэ азьло ужаз берыктыны, ачиз янгыштэк ужтэк пукемез понна уждунзэ нр мораль ласянь изъян адӟемез понна дунзэ тырыны. Берлогес Александр Андреевичлэн эшшо одӥг куронэз кылдӥз на: пуктэм спектакльёсыз понна гонорар тыроно. Ижысь Октябрь районысь суд Александр Андреевичлэсь одӥг куронзэ быдэстыны дась - спектакльёсыз понна гонорар тыронэз. Сыӵе решениен А. А. Блинов соглаш луэ ке, кылем вить куронэзлэсь куштӥськыны кулэ. Александр Андреевич талы дась ӧвӧл. Малы ке шуоно, тодмо ӧвӧл, мар луоз "Дартэн". Соин вазиськиз Вылӥ судэ. Али Александр Андреевич ужасьтэмен лыдъяське. Солы дэмлазы ик куд-ог интыос: Удмурт национальной театрын режиссёр, ӟуч драмтеатрын режиссёр но "Егитъёслэн юртазы" режиссёр. Со соглаш уг кариськы. Та нуналлы "Дартлэн" коллективез пазьгемын. "Егитъёслэн юртазы" малы ке кутэмын кӧня ке мурт гинэ. Техперсонал шуон. Одӥг актёр но пӧлазы сюремын ӧвӧл. *** Газет - судья ӧвӧл. Вылӥ суд 3-тӥ сентябре учкоз та ужпумез. Ма меда возьма "Дартэз"? Улӟоз-а со? МАРИНА КОСТЫЛЕВА. Утёз чеберез валан Удмурт Кивалтэтлэн юртаз журналистъёсын пумиськылӥз Удмурт Элькунысь Суредасьёслэн огазеяськонзылэн тӧроез Петр Елкин. Таяз учыре со мадиз "Бадӟым Волга" выставка но куд-ог мукет ужпумъёс сярысь. Суредасьёслэн тӧрозылэн ивортэмезъя, выставка радъямын Нижний Новгородын. Отын возьматӥсько турлы пумо ужъёс. Асьсэлэсь быгатэмзэс шараяло пӧртэм выжыосысь усточиос. Соос пӧлын - удмуртъёс, чувашъёс, бигеръёс, поръёс, Астрахань, Саратов, Самара, Ульяновск, Волгоград улосъёсысь но Волга котырысь музон интыосысь усточиос. Удмурт шаерысь быръемъёс - ньыльдон укмыс адями. Выставкаын возьматӥське укмыстон одӥг уж. Устолыкез яратӥсьёсты асьсэлэн визьмынызы но быгатонлыкенызы шумпотто Менсадык Гарипов, Вячеслав Михайлов, Василий Морозов, Анатолий Русских, Валерий Кононов, Федор Матанцев, Валерия Любарец, Вячеслав Костылев, Генрих Верещагин, мукетъёсыз. Таос пӧлысь куинез - Василий Морозов, Вячеслав Костылев, Владимир Лузин - табыдӟа ужрадэ нырысьсэ пырисько. "Бадӟым Волга" интыяськемын Нижний Новгородысь ярмаркалэн павильоназ. Сое вылӥ дунъяло Москваысь лыктэм адямиос но. Таӵе ужрадъёс котьку шараяло выль нимъёсты. Котькудӥз сямен ик таиз но куд-огезлы юрттоз азьланяз нимо-дано суредась луыны. Соиз но валамон: та выллем возьматонъёслы бадӟым саклык висъяны кулэ вылӥ кивалтӥсьёс. Удмурт шаерысь суредасьёслы, ас кужымзэс кулэезъя возьматон вылысь, коньдонэн юрттӥз Удмурт Кивалтэт. Таӵе выставкаос ик данаксэ вутто отӥяз Россиысь Суредасьёслэн огазеяськоназы. Петр Елкинлэн ивортэмезъя, берлоез адӟытон радъямын вылэм тямыс ар талэсь азьло - 1991-тӥ арын. Чеберлыкез кылдытӥсьёс пӧлын но со дырысен пӧртэм воштӥськонъёс ортчиллям. Россиын туннэ сокем уг дунъяло ни та удысысь усточиосты. Югдур азьланяз но таӵе ик луиз ке, адямиос ужан интыоссэс но, тӥрлыкъёссэс но вузаны кутскозы. "Бадӟым Волга" ужа на. Мылкыд карисьёс соин тодматскыны быгатозы. Отӥяз тӧро ивортӥз: - Москваын алигес ортчиз Россиысь Суредасьёслэн огазеяськонзылэн пленумез. Со эскериз данак ужпумъёсты. Соос пӧлысь одӥгез - огазеяськонлы выль ним утчан. Кайта, тулыспал толэзе, шоркарамы радъямын луоз Россиысь суредасьёслэн адӟытонзы. Соку ик ортчоз бадӟым ӧтчам но. Кенешез Петр Елкин аспӧртэмлыко йылпумъяз: - Тодмо ӟуч гожъясь Федор Достоевский куке но шуиз: чеберлык дуннеез утёз. Быдӟым визьпоглэн Николай Рерихлэн верамезъя, чеберлыкез валан утёз дуннеез. Е. РОМАШОВА. Ӵошатскозы телекизилиос Матысь дыре СНГ-е пырись странаослэн 1-тӥез Межгосударственной телефорумзы ортчоз. Отчы шедён понна ялэмын вал нимысьтыз конкурс. Ужъёссэ ыстӥз 89 телекомпания. Ӵошатсконъёс ортчозы дас удысъя. Жюрилэн уженыз кивалтэ Владимир Познер. Россиысь телекомпаниос пӧлын та форумын нюръяськыны шуд усиз Ижысь "Новый регионлы" но. Иворъёсын передача нуисьёсын ӵош кужымзэ эскероз та телекомпаниысь ик Оксана Микрюкова. Кин вормоз отын - кылзэ вералоз ини жюри. Н. НИКИТИН. КНИГА ДУННЕЫН Библиотека - клуб Ижевск, Саратовская, 38. Выль юртлэн вылӥ этажаз интыяськемын Пушкин нимо библиотека. Куатетӥ арзэ ужа ни библиотека-клуб. Та вакытэ 25 сюрс пала книга люкаськемын ни, арлы быдэ кык сюрс мында лыдӟисьёсыз-эшъёсыз пырало. Сабырлы удмурт кышномурт Елена Валерьевна Листровая котькуд лыдӟись доры лыктоз но лякытак гинэ юалоз-вералоз. - Ужан интымы оглом библиотека-клуб лыдъяське,- шуэ Елена Валерьевна.- Юн кусыпъёсмы пинал техникъёслэн станциенызы. Школаын дышетскисьёс понна куинь кружок ужа: авиамоделья, интеллектуально-творческой шудонъя но технической творчествоя. Со сяна, бигер кылэз но культураез гажасьёс понна нимысьтыз зал ужа на. Выль дышетскон ар вуэмен, библиотека-клубын тросгес чузъяськыны кутскизы нылпи куараос. Озьыен, ар ӵоже татын ужасьёслы мӧзмыт уз луы. Адӟытон Ижевскысь Некрасов нимо библиотекаын гужем ӵоже пӧртэм конкурсъёс ортчытъяло. Городын улӥсьёс тросэз та ужрадъёсы мылысь-кыдысь пырисько. Кылсярысь, "Каминной" залын выль книгаосты эскерон, кылбурез но крезьгурез яратӥсьёсын пумиськылон ӝытъёс ортчыло. Арлыдоосыз но палэнэ уг кельто. Усточи нылпиослэн "Солнцеворот" огазеяськонзылэн конкурсаз вормисе потэмъёслэн суредъёсынызы адӟытон быдэс гужем ӵоже вал. Г. КАЛИМУЛЛИНА. Буре ваён ӟус Улонысь кошкем муртэ сӥлы карон понна, ма кароно? Памятник пуктоно-а яке солэсь нимзэ городлы сётоно-а? Англиын та юанлы валэктон сётӥзы ини, гожтэ "Таймс" газет. Кӧня ке дасо аръёс ӵоже ини татын, кулэмъёсты сӥлы карыса, соослы сӥзем ӟусъёс лэсьто. Син азяды пуктэ ай: калтыртӥды, жадиды, огез юрт дорысь ӟус вылэ шутэтскыны пуксиды, сюлэмды каньыл луиз. Учкиськоды но, ӟусты кыӵе ке Джон Смитэз буре вайыса пуктэмын вылэм. Та муртэз уд ке но тодӥське вал, шуныт кылъёсын солы тау кароды. Лондонын кулӥсез трос гинэ, соин ик кытчы пуксьыны уд шугъяськы. Та ӟеч сям уг быры - арысь аре ульчаосын, паркъёсын ӟусъёслэн лыдзы йылэ. Вань на сыӵе адямиос, кудъёсыз малпало: кинлы ке ӟечсэ лэсьтон понна, улонысь одно ик кошконо ӧвӧл. Кылсярысь, Хемпстед прудлэн ярдураз сылэ ӟус, вылаз гожтэмын: Альберт Томас-Смитлы сӥзьыса, улэп, тазалыкез юн. (Басьтэмын Интернет пыр). ГУРТЫСЬ КИЗИЛИОС Писпу пужы, кылбур пужы я крезьгур пужы Куд-огез оломалы тазьы лыдъя: творчествоен вырон - капчи удыс, отчы пырисько азьтэмгес муртъёс. Соос ас ужзэс сяна, котырак номыре но уг адӟо ни. Ма, сыӵе адями сярысь книгаосысь лыдӟыса но син азе ӵемгес одӥг тусбуй суредаське: котьку кытчы ке дыртӥсь, ас югдаз улӥсь, пилемъёс пӧлтӥ уясь но юрт котырысь ужъёсты вунэтӥсь. Сыӵе малпанэ чутрак воштӥськиз, тодмо крезьгурчиен Николай Постниковен пумиськеме бере. Николай Елисеевич отпускын вылэм. Сое клубысь шедьтытэк, дораз мыноно луиськиз. Монэ пумитаз пила пызесь дӥськутэн пиосмурт. Чырткемъяськи но весь уг на оскиськы: зэмзэ но-а та Постников? Тусбуезъя кельше кадь. Капчиен лулски куаретэмез бере: - Бен, Элесь Коля мон. Отпускын дыръям коркае борды кутски ай. Наличникъёс лэсьтӥсько. Татын дас одӥг ар улӥськом ини, нош укно котыре киос уг сузё. Тӥни сыӵе аспӧртэм пӧрмиз пумиськонмы. Николай Елиссевич туж лякыт сямо пиосмурт вылэм. Ачиз сярысь вераны пумит ӧз кариськы, дырыз ке но ӧй вал. Угось наличник вандон арберизэ солы ӝытозь гинэ сётӥллям. - Тазьы ик отпуске но быре ини, - шуэ Николай Постников.- Кышное но нылпиосы кошкизы шутэтскыны. Мон тани корка котырын вырисько. Корказь улэ аслым мастерской выллем пӧрмытӥ. Эшшо йӧгу гудыны кулэ на. Вужаз ву пырыны ӧдъям. Николай Постниковлы ньыльдон ӧвӧл на. Вордскиз Блатгуртын, Алнаш дорысен ньыль иськемын. Атаезлэн котьмалы но киыз мынэм - ужам дурисьын, плотникын, столярын. - Атайлэсь дыши, дыр, ини пу бордын но ужаны,- шуэ Николай Елисеевич. Постниковъёслэн семьяязы ньыль нылпизы вылэм - кык пи но кык ныл. Николай самой пичиез - шумес пыдэс. Коля ньыль пӧртэм школаын дышетскем - Блатгуртын, Кучыранын, Алнашын, Можгаысь автошколаын. Армиын сюрем Саратов пала. - Отысь бертэмме туж витё вал дорын,- шуэ Николай Елисеевич.- Апайёсы бызиллям, агае кышнояськем. Мон понна колхозын шофёрлы инты дасяллям, юрт утисе возьмаллям. Нэнӥе но атае уксё люкаллям вылэм мотиклы. Нош мон дышетскыны пыроно кариськи Ижевскысь музыкая училищее. - Нош малы одно музыкальнойзэ бырйиды? Кызьы мон валай, тӥледлы та удыс тодмотэм вал. - Бен, нимысьтыз дышетскеме ӧй вал, нош арганэн шудыны быгатӥ. Ки улам "Советской Удмуртия" газет сюриз. Отысь ялонэз адӟи. Музыкая но культурая училищеосы куто, пе, музыкальной школаез быдтымтэосты но. Мынам мылкыды ӝутскиз. Соку ик медпунктысь кык справка басьтӥ - огаз ӧй ке пыры, мукетаз мыно шуыса. Тӥни озьы музыкая училищее пыри. - Николай Елисеевич, нош кин тӥледыз арганэн шудыны дышетӥз? - Милям семьяямы нокин ӧз шуды. Ӵыжы-выжыосылэн арганзы вал. Соос доры дӥсьтыса но дӥсьтытэк ветлылӥ, мар но со выри шудыны. Собере одӥг классын дышетскись эшелы арган кузьмазы. Ну, мон но кутски нэнӥме ёртыны. Ми соку начаргес улӥськом вал - ньыль нылпи, уксё уг тырмы. Нэнӥе шуылӥз: "Чида ини, пие. Кучыран школае ветлӥсь апайёсыдлы велик басьтоно азьвыл". Быдэс ар ёртэме бере, атае сётӥз ик выль арганлы уксё. Соку ми нэнӥеным Алнаше мынӥм. Нэнэй октӥськемзэ арган футляре тыриз. Мон арганме киям пырак гуртозь нуи. Соку куинетӥ классын дышетски. Шумпотэмелэн пумыз ӧй вал - кемалась возьмам выль "шудонэлэсь" секытсэ но ӧй вала кадь. Самой шудоен асме лыдъяй та нуналэ. Собере шудыны дыши нотаостэк гинэ. Мае кылӥсько - сое йӧндырисько. Николай Елисеевич ньыль ар дышетскиз Ижевскын. Собере солы городын ик ужаны дэмлазы. Сӥзьыл котыр вал со. Пинал пияш куриськем гуртаз анай-атаезлы картошка копанын юрттыны. Угось атаезлэн пал пыдыз ӧвӧл, анаез но инвалид. Дораз бертылӥз но кошкемез ӧз поты ни. Документъёссэ басьтӥз но Алнаш клубе ужаны интыяськиз. Ӵапак соку баянистсы вылымтэ. Тӥни со дырысен ини Николай Постников одӥг интыяз ужа. Туэ сентябре дас ньыль ар тырмоз. - Николай Елисеевич, егит дыръяды нылъёс уллёен сьӧрады ветло вал, дыр, арганэн шудэмдэс кылыса. - Сыӵеез но вал, о-о. Арганчиосты нылъёс кызьы ке синйылто-а, мар-а. Бен арганчи шуыса монэ клубе но ӵемысь чортылӥзы. Эшъёсме нош кытӥяз ӧз лэзьылэ. Сюанъёсы но ӵемысь ӧтчаллязы монэ. Куддыръя гуртамы кык-куинь но сюан нуналаз карылӥзы. Котькудаз но чорто. Одӥг пол, Ижын дышетскыкум на, гуртам юри ӧй берта, кыли, кудаз ке сюанэ ӧй мыны ке, уродэ кылё шуыса. - Нош кытысь кузпалдэс пумитады? Оло, мурт сюанысен ик? - Мынам Валентинае ачиз Гаргаысь, татӥ ик кыдёкын ӧвӧл ӟуч гурт вань. Со, культурая училищеысь хореографияя люкетэз быдтыса, берен Алнаш пала берытскиз. Алнаш клубын ужаны кутскиз, отысен ик тодматским. Али Валентина пионеръёслэн юртазы ужа, ансамблен кивалтэ, 200 пала нылпи дораз ветлэ. Асьмелэн куинь нылпимы будэ - Антоша, Наташа но Алёша. Ваньмыз "ша"-ен быре. - Николай Елисеевич, ку-о кырӟанъёс гожъяны кутскиды? - Ма, училищеын дышетскыкум ик. Нылъёсты тямысэтӥ мартэн ӟечкыласа, мар но со малпай вал. Собере ини кутски кадь кырӟанъёс борды. "Малпасько тонэ" кырӟанэ - нырысетӥез калык пӧлы потэмез. Кыкетӥ арзэ-а, мар-а соку клубын ужасько вал. Алла Кузнецовалэн сборникез ки улам сюриз. Ма, ассэ поэтессаез но мон уг тодӥськы на вал ай. Тӥни озьы, книгазэ огшоры берыкъяса, кельшымон кылбурзэ синйылтӥ. - Нош кызьы тӥ кырӟанъёстылы кылбуръёс бырйиськоды? - Бен котькуд кылбурлы гур пуктыны луэ, дыр, но котькудӥз чебер уз пӧрмы ук. Соин утчаськод ини сюлэмлы матынзэ. Куддыр заказъя кырӟанъёс гожтоно луэ, куддыр - кыӵе ке юбилейлы. Тани туэ мон, Ашальчи Окилы сӥзьыса, кык кырӟан гожтӥ - "Одӥг пол но", "Даур". Оло ярасалзы, оло ӧй соос аслыз кылбурчилы. Табере кин но со гожтэтэн ысъя кылбуръёссэ. Валамон ини, ваньмызлы гур уд пукты: я кылбур сюлэмыя ӧвӧл, я дыр уг шедьы. Огпол дорам одӥг автор вуиз но меӵак юа: малы мынам кылбуръёсыя кырӟан уд гожтӥськы? Кызьы но озьы валэктыны турттӥ ини: уг ваньмиськы. Вань мынам аслам гожтэм кылбуръёсы, нош кырӟанъёс ӵемгес пӧрмытъясько мукет авторъёслэн чуръёссыя. Соин ик, учыр тупаз бере, ваньзылы тау кареме потэ. - Кыӵе кылбуръёс кырӟанлы ӵемгес пӧрмо - ӝожмытъёсыз я шулдыръёсыз? - Оло улон таӵеен, оло эшшо малы ке кылбуръёс но кырӟанъёс тросэз ӝожмытэсь. Берло дыре нылкышноосмы сыӵе кылбуръёс пӧрало. Веранэз ӧвӧл, шулдыресь кырӟанъёс тросгес кулэ, ӝожмытъёсыз тырмыт ни. - Николай Елисеевич, тросэз быдӟым композиторъёс вуоно гурзэс уйвӧтазы адӟылӥзы. Нош тӥляд сыӵе учыръёсты вал-а, я гурды мукет сямен йыре лыктэ? - Ма, олокызьы но луэ. Кык пол ини уйвӧтам таш-таш удмурт гур кылӥ. Ӵукна пал сайкалляй но уг вунэты малпай, нош султэме бере номырзэ но уг тодӥськы ни. А так гур олокызьы но кылдэ. Куддыръя малпамтэ шорысь, куддыръя, юри киям арган кутыса. - Николай Елисеевич, тӥ асьтэос но кылбур гожъяськоды. Кызьы-о кутскиды кылбураны? Тросэзлэн пиослэн чебересь чуръёссы яратыкузы кылдо, тӥляд озьы ӧй вал- а? - Оло, озьы ик вал. Училищеын дышетски ай соку. Малы ке сюлэмам мӧзмыт вал. Гуртэ ӧй берты. Кырын зоре. Озьы, укно дурын огнам пукыкум, чуръёс кылдӥзы: Пичи укноям пырыны турттыса, Кема йыгаське ни зор. Уг вала, лэся, ворсамын шуыса, Котме но котме борддор. Усё, пазьгисько бадӟымесь шапыкъёс, Гылӟо дыртыса уллань. Сюлмам люкаськем секытэсь малпанъёс Асме но зӥбо солань. Эн потты вождэ, пырыны лэзьытэк, Кырын возисько тонэ. Потӥд ке ачид но уйдэ изьытэк Соку валалод монэ. - Николай Елисеевич, мар азьланяз ужаны малпаськоды? - Али хорлы кырӟанъёс борды кутски. Кемалась ик ӧвӧл "Кырӟась сюлэмъёс" хорелы ӟуч кылбуръя "Россия" кырӟан гожтӥ. Азьланяз но сыӵе кырӟанъёсын выро, дыр. Озьы ик потэ вал кылбуръёсъя самодеятельной коллективъёслы тупамон кырӟанъёс гожтыны. - Нош малы-о тӥ Иже улыны ӧд кариське? Тодмо адямиос городэ кыстӥсько ук. - Бен, тодмо луэме нокытынам но уг йӧты. Асме телевизор пыр куинь-а, ньыль-а пол гинэ адӟи ай. Милям татын Удмуртиысь каналэз уггес куты, Иже кошкеме уг поты. Вордскем палъёс бордазы кыско, гурт улон мыным матынгес луэ, эшшо нэнэез, атаез чаклалляно. Тӥни озьы улэ дано композитор, дас ньыль ар ӵоже ини ужа Алнаш клубын, кивалтэ "Алнаш мылкыд" ансамблен но "Кырӟась сюлэмъёс" хорен. - Номыр сярысь но уг жаляськы,- шуэ Николай Постников.- Улонлы уг ӝожтӥськиськы - маиз кулэ, ваньмыз вань. Тазалык гинэ мед инмар сётоз кырӟанъёсы бордын ужаны. Марина КОСТЫЛЕВА. * Г. ЮСАЕВЛЭН туспуктэмез. Сюрс доллар кузьмазы Удмуртиын улӥсьёс пӧлысь тросэз тодо ни финнъёслэсь "Тиккурила" фирмазэс. Со вузкаре лакен но буёлъёсын. Филиалъёсыз усьтэмын Россиысь 43 городын. Кусыпъёссы сярысь ке верано, соос тужгес но шуныт пӧрмизы кадь Завьялово районысь Пироггуртын улӥсьёсын. Финнъёслэн ас синмынызы адӟемзы-кылэмзы потӥз удмуртъёслэсь улэм-вылэмзэс, кырӟам-верамзэс. Ижевск вӧзысь ик тыпак удмурт гуртын соосты утялтӥзы перепечен но табанен, асьсэ пӧзьтэм юонэн. Возьматӥзы ньылен эктонэз но. Куноослы туж яраз. Ми, пе, таӵе каньыл сюлэмо адямиосты ӧм пумиталлялэ на. Синвуаськизы но. Томск, Иркутск палан калык мукетгес. Финнъёс синмаськыса учкизы вашкала вӧсяськон интыез. Соос паймо: малы удмуртъёс туж ӝог пересьмо? Одӥг кадь арлыдъем нылкышноос Финляндиын трослы егитгес возисько. Асьсэос ик юанзылы валэктон но шедьтӥзы: улонзы секыт вал, дыр. Куноятӥсьёссылы финнъёс ӟеч кузьым кельтӥзы - сюрс доллар. Со берегес ик Пироггуртэ вуылӥзы немецъёс. Таиз но пумиськон умой ортчиз, но - мукетгес. Ӵыжы-выжы луон адямиосты матэгес каре вылэм. С. БЛАГИНИНА. Нуназеяны-шутэтскыны пуксем воргоронъёс вӧзы милициысь капитан В. Е. Колесников но интыяськиз. Гуртоос мурт уг каро (ачиз но татын вордскемын), со но вылтӥяськись ӧвӧл. Вуж Юбералась, чипыен-куреген шуэм сямен, пичизэ но, бадӟымзэ но тодэ. Нош тазьы сюлмысь вераськиськод-кенешиськод ке, гуртысь югдурез эшшо но умойгес шӧдоно- валано. Со ик кулэ Владимир Егоровичлэн ужаз. В. Е. Колесников - Можга районысь Александровоысь сельсоветэ пырись 5 гуртъёсты чакла-эскере, йыртэман но правоез тӥян мукет учыръёсын нюръяське. Нош кырсь ужъёсты алонэз участковой нырысетӥ интые пуктэ. Туспуктэмез Г. Юсаевлэн. Ньыльдон ар - театрын 1958-тӥ арын апрель толэзе Шестаковъёслэн егит семьязы Иже крезьгуръя фестивале лыктӥз. Уло вал Глазкарын. Кыкназы ик тыршизы ЧМЗ-ын. Галина Александровна мотористка вал, Анатолий Петрович ужаз тазалыклы изъян ваись цехын. Кыкназы но кырӟазы-веразы. Галина Шестакова понна крезьгурчи Геннадий Матвеев юри гожтӥз нимысьтыз кырӟан. Ас быгатэмзэ нылкышно возьматӥз Ижын фестивальын. Галина но солэн кузпалыз Анатолий дипломантъёс луизы. 1958-тӥ арын ик усьтӥськиз крезьгуръя но драмая театр (туэ солы ньыльдон ар тырме). Та фестивальысен тужгес устооссэ татысь балетэ, хоре басьтыны мылкыд каризы. Директор Анастасия Алексеевна Добровольская Шестаковъёсты театре ӧтиз. Кузпалъёс, ужзылэсь мозмыса, Иже лыктӥзы. Егит семьялы пичи гинэ сэрег висъязы. Со вие театрлэсь юртсэ но тупатъяны кутскизы. Репетициос ортчылӥзы Дзержинский нимо клубын. Шестаковъёс концертъёсын потазы ёросъёсы. Галина Александровна сцена вылын ужаз куамын кык ар, кузпалыз Анатолий Петрович, балетысь артист, кызь одӥг ар. Театрысь артистка вал ке но, тыр улон вылысь, нылкышнолы мукет ужъёсты но быдэсъяно луиз. Вал дӥсь дасясь, утялтӥськись, администратор, труппаен кивалтӥсь, режиссёрлэн юрттӥсез. Режиссёр со вакытэ вал Геннадий Васильевич Веретенников, баянист - Николай Егорович Шкляев. Театрлэн нырысетӥ ужез вал "Мечтатели" спектакль. Сое пуктӥзы Машина лэсьтӥсьёслэн культура дворецазы. Собере вордскизы мукет крезьгуро спектакльёс. Отын но Г. А. Шестакова устолыксэ возьматылӥз. Хорын гинэ ӧз кырӟа со, эктӥз но, кыӵе ке учырен герӟаськем рольёсты но шудылӥз. Быгатонлыксэ ӵемысь эскерылӥз покчиослы чаклам выжыкылъёсын но удмурт спектакльёсын. "Живая музыка" ужын возьматӥз Луд Кечез, "Кошкин дом" спектакльын - Коӵышпиез. Тодэ кылиз Павел Бажовлэн "Серебрянное копытце" спектакльысьтыз Дарёнка. Та ролен герӟаськемын Галина Александровналэн улонэз. Анай-атайтэк кыльыса, ож вакытэ но собере будӥз со нылпи юртын. Ассэ ӵемысь Золушка кожалляз. Но Дарёнка матынгес вылэм. Таизлэн ӵыжы-выжыосыныз улэмез туж потэ вал. Выжыкыл адямилы ӟечсэ гинэ кузьма. Сцена вылысен но Галина Александровна ассэ ӵемысь Дарёнка малпалляз. "Любушка" опереттаын Г. А. Шестакова кырӟаз Алёнкалэсь партизэ, "Летучая мышь" опереттаын - Лотталэсь партизэ. "Веселая вдова" ужын солы кылдӥз Японилэсь посолзэ возьматыны (со понна юри фрак вуриз). "Свадьба в Малиновке" комедиын возьматӥз Трындычихаез. "Вуж Мултан" спектакльын шудӥз Онисез (режиссёрез Михаил Покчи-Петров вал). "Холопка" опереттаын эктӥз. "Барышня и хулиган" балетын возьматӥз лушкаськисез. 1968-тӥ арын вуылӥзы Казане. Отын соку ужаз опереттая Москваысь театр. Ижысь артистъёс москвичъёслэсь трослы ӟечгес вал. Берло тямыс арзэ Г. А. Шестакова юрттэ валтӥсь режиссёрлы. Та ужзэ но ӟеч быдэсъя. Театре спектакль кутскемлэсь азьвыл ик - одӥг но ӝыны часлы вазьгес лыктэ. Режиссёрлэн юрттӥсез котьку капчи мылкыдо луыны кулэ. Тазьы ик улыны дышетэ со артистъёсты но. В. ЛАГУНОВ. Уноезлэн чиданэз чиге Экономикаын секыт югдур кылдэмен улонысь кошкон учыръёс берло дыре кулэсмо, гожтэ "Труд" газет. Страналэн шуг-секытъёсыныз герӟаськем мугъёс интые вуо адямилэн ас улонэныз герӟаськемъёсыз. Улонысь ӵемгес кошко, одӥгез адями мукетсэ уг яраты, семьяын шуг-секытъёс кылдо, кузпалъёс пӧлысь огез палэнэ кожа ке. Та мугъёсъя асьмеос Западэз сутӥськом ини. Нош зэмзэ верано ке, йырзэс быдтӥсьёслэн лыдзы Россиын трослы уногес, Европаысь мукет кунъёсын ӵоштоно ке. Кылсярысь, Англиын арскын 100 сюрс адямилы быдэ укмысэз улонысь кошке, асьмелэн - куамын тямысэз. Пӧсь толэзь 1998-тӥ арын июль толэзь берло 100 аръёс ӵоже Музъем вылын тужгес но пӧсез вал, ивортэ "Ассошиэйтед Пресс" агенство. Америкаысь учёнойёс эскеремъя, планетамы вылын шоро-куспо температура та толэзе 16,5 градус возиськиз - азьвылэзлэсь 0,7 градуслы тросгес. Озьыен, музъем вылын пумен шунытгес луэ. Таин валче Америкаысь конгресс Киото городын (Япония) кутэм огкылэз юнматыны малпа. Та огкылъя 2010-тӥ арлы азинскем кунъёс омыре пӧртэм газъёсты омыре лэзёнэз 5 процентлы кулэстыны кулэ, угось со газъёс музъем котырысь омырез шунто. (Басьтэмын Интернет пыр). Киыз шуныт, сюлэмыз небыт Пичи нылъёс но пиос шур дурын шудо, серекъяло. - Алёнӥ, бадӟым будӥд ке, кин-о луод? - Артистка. - Нош тон Дима? - Мон ке - лётчик, инметӥ лобало. - Светиклэн нош кин луэмез потэ? - Врач... Вал-а, ӧй вал-а сыӵе вераськон , кин табере тодэ на. Котькуд адями пичи дырысеныз ик улонысьтыз аслэсьтыз интызэ, яратоно ужзэ шедьтыны тырше. Аръёс ортчемъя воштӥсько мылкыдъёс, но пичи дыр малпанъёс сюлэмлэн сэрегаз уло на. Дырын-дырын соос выльысь улӟыло. Егит нылэз улон трос гинэ бергатӥз, азяз могӟетъёс пуктылӥз, озьы ке но пичи дыр малпанэз быдэсмиз. Та вакытэ, Светлана Сергеевна ВАХРУШЕВА - врач, хирург, зӧк сюлэз эмъянъя валтӥсь специалист, нырысетӥ республиканской больницаысь проктологической отделениен кивалтӥсь. Удмурт Республикаысь дано врачлы нуналаз куинь-вить секыт операция лэсьтоно луэ. Кемалась ик ӧвӧл та чырмыт удмурт кышномуртлы, сётэмын "Россиысь дано врач" ним. - Светлана Сергеевна, котькуд адями аслэсьтыз улон сюрессэ ачиз радъя яке солы кизилиос юртто-а? - Мон малпасько ас улонзэ адями ачиз ик умой-умой малпаса, чакласа радъяны кулэ. Со вакыт ик адӟонлы но оскисько. Врач луыны мыным Инмар гожтэм, дыр. Вордски 1945 арын Игра ёросысь Шор Шадбег гуртын. Вить пинал пӧлысь мон бадӟымез. Атае дышетӥсь вал, монэ но ялан педучилищее пырыны косылӥз. Но дышетӥсь ӧз пӧрмы мынэсьтым. Математикаен тунсыкъяськемысьтым радиотехническое пырыны ӧдъяй. Таяз радэ но ӧз удалты. Бӧрысь дэмлазы Москвае, журналистикае мыныны. Но... жаляса верано луисько, одӥгез но сюлэмъям ӧй вал, ас поннам гинэ малпалляй врач луыны. Паймоно кадь, 1963 арын туж капчиен мединститутэ пыри Мыло-кыдо дышетски. Ужаны Бурятие лэзё вал, кыли Удмуртие ик - Ижысь нырысетӥ республиканской больницае. Зӧк сюлъя висисьёсты чылкак огнамелы эскероно луылӥз. Огсыр ужанъям ик бордам быгатӥсь, валась адямиосты люканы тырши. Тросэз соос пӧлысь удмуртъёс. Туж шаплыесь, ужасесь. Со кабен кылдӥз проктологической отделение. Хирургъёсмы М. Н. Климентов, В. П. Шумихин, В. Л. Лебедев, Э. А. Копысов, матысь юрттӥсе Л. С. Ворончихина. Вань ужасьёсмы тыршисесь. Яратӥсько котькыӵе ужез дырыз дыръя быдэсъяны. Лыктӥз ке висись, сое соку ик эскероно но кулэ луись ужрадъёс кутоно. Со ми доры койка вылын кылььыны уг вуы ук, эмъяськыны шуыса лыктэ. Озьы бере, солы пыд йылаз султыны юрттоно. - Мар бордын ужа отделениды? - Милям ужмы туж секыт - зӧк сюлэз эскерон. Сюлысь пӧртэм азонъёсты, пыктосъёсты вандылӥськом. Дорамы вуэмъёслэн висёнзы ӵемысь зол алямын луэ ини. Уноез асьсэ кожазы свечаосын, турын-куаръёсын эмъяськыны выро. Возьдаськеменызы сэрен быдэсак зӧк сюлэз вандыса куштоно луэ. Яке беромеменызы юрттэммы уг луы ни. - Висисьёстылэн радазы сюронтэм вылысь, мар кароно? - Раклэсь кылдэмзэ тыро-пыдо валэктӥсьёс ӧвӧл на. Одӥгез гинэ зэм: пыктослэн кылдэмез герӟаськемын инкуазьлэн кырсёмеменыз но адямилэн шонертэм сиськеменыз. Мон дэмласько ӧжытгес сӥль, тросгес бакча емыш сиыны. Нырысь вакытаз та кышкыт висёнэз озьы гинэ валаны уг луы. Но марысь-мар умойтэмзэ шӧдыны кутскиды ке - соку ик эмъясь доры мынэ. - Рак - эмъяны луонтэм висён. Нуналлы быдэ адӟиськоды кышкыт черен курадӟись адямиосты... - Бен, рак висён йӧнатыны луонтэм шуыса лыдъяське. Но ваньмыз адями бордысь потэ. Операциын зӧк сюлэз басьтоно луэ. Ваньзы кышкало. Кулэ ӧвӧл куректыны, таин улонэ йылпумъяськиз ни шуыса пукыны. Сыӵе ӝожмыт мылкыдын кема улыны уд чидалэ. Одӥг учыр сярысь вераме потэ. 40 аресъем пиосмуртлы операция лэсьтӥм. Ваньмыз ӟеч ортчиз. Капчи мылкыдо, чидасьтэм воргорон больничнойын но улымтэ, соку ик ужаны потэм. Ветлэм кунгож сьӧры, ужбергатӥсьёсын пумиськонъёс радъям, висёнэз сярысь воксё вунэтылэм. Со пиосмуртлэн али но ваньмыз умой. Ялан мар ке ужа, кытчы ке ветлэ. Тӥни озьы, рак - со улонлэн пумыз ӧвӧл на, ужано, котыр улосмес яратоно, капчи мылкыдо луоно, ӵуказе нуналлы осконо. - Геннадий Красильниковлэн "Арлэн кутсконэз" романаз хирург Световидов шуэ: "Врачлы котькуд висисен ӵош кулыны уг яра". - Мынам озьы уг луы. Улонысь котькуд кошкись адямиен ӵош сюлэмысь кыӵе ке сие чиге, ачим но чутрак луисько кадь. Мон малпасько: врач висёнэз гинэ адӟыны кулэ ӧвӧл, адямилэсь мылкыдзэ но. - Вал-а сыӵе дыръёсты, куке висисьлэн улонысь кошкеменыз тӥ асьтэдыз янгышен лыдъялляды. Оло, мар ке лэсьтыны луысал на... - Котьку но тыршиськом вань луонозэ лэсьтыны. Тодам лыктэ на одӥг учыр. Кулӥз адями. Висёнэз туж пыдло пыремын ни вал. Нош мон ялан малпасько: оло мар ке лэсьтыны луысал на, оло адями йӧнасал... Алям висёнэз палэнтыны ӧм быгатэ ни. - Тӥ шуиськоды мылкыд бордысь ваньмыз потэ. Туж секыт, ӝож вакытъёс но луо ук. Соку номыр лэсьтэм уг поты... - Мынам сыӵе дыръёсы уг луо. Ӝожомонлы, мылкыд куашканлы мон уг сётскиськы, асме юн карыны тыршисько. Врачъёслэн ужзы шахтёръёслэн выллем. Но со уг вера на висисьёсты палэнтыса забастовкае потоно шуыса. Висисьсэ куштэм врач - врач ӧвӧл ни. Со доры оскыса лыкто ук. Вылӥын пукись кивалтӥсьёслы но милемыз валано вылэм. - Мон тодӥсько, тӥляд кузпалды - профессор. Секыт ӧвӧл-а кык бадӟым, мон шуысал, удалтэм удмурт адямиослы ӵош улыны? - Чик но ӧвӧл. Картэ Яков Максимович Вахрушев Ижевскысь медицииная академиын ужа, профессор. Ми ог-огмылы котьку но юрттыны тыршиськом, ог-огмес валаськом. (Яков Максимовичен телефон пыр кенешыку тодӥ на: со туж яратэ но гажа аслэсьтыз кышнозэ, сӥзе солы бадӟым-бадӟым тазалык - Е. П.). - Светлана Сергеевна, эмъясьлэн ужез туж секыт. Куддыръя ваньзэ вунэтыса шутэтскем потэ, дыр. Ваньмон дырдэс (вань ке со) кызьы ортчытъяськоды? - Ужаса (серекъя). Мынам одӥг нунал но уж сярысь малпаськытэк улэме уг луы. Жингыртӥсько больницае: кыӵе мар ни отын висисьёс, операция лэсьтэм адямилэн тазалыкез? Выльысь вордӥськыны луонлыке кылдысал ке, врачлэсь ик сюрессэ бырйысал. - Улон сюрес кузя вамышъякуды, ма малпаськоды? - Котькыӵе ужез умой быдэстоно, ваньмызлы ӟечсэ гинэ сӥзёно. *** Кӧня кыстӥськиз Светлана Сергеевнаен шуныт вераськонмы: 30 минут? Одӥг час? Ӧйтӧд. Лякыт удмурт кышномурт дорысь кошкем ик уг поты вал. Хирурглэн кабинетаз турлы-турлы сяськаос, инкуазез возьматӥсь суредъёс, туспуктэмъёс. Татын пукыса вунэтоно кадь вань куректонъёстэ, сюлмаськонъёстэ. Коридор кузя дыртыса ветло тӧдьы дӥсен адямиос. Кинлы ке , дыр, та вакыт операция лэсьтыны дасясько, кинлэн ке улонэз понна нюръяськон мыноз... Тани чидасьтэм телефон жингыртӥз. Светлана Сергеевна дыртӥз висись доры. Ульчаын яркыт шунды пиштэ, синъёсты эриктэм но кыньыртоно. Азям кышномурт вамышъя, пичи пиез вӧзаз бызьыса мынэ, вераськемысь ик уг дугдылы: - Анай, тодӥськод-а кин мон луо будӥ ке? - Кин? - Врач. Соку песятайлы ноку висьылӥсьтэм сюлэм пукто. Елена ПАНФИЛОВА. * Светлана Сергеевна Вахрушева. * Операционнойын. Туспуктэмъёсыз В. КАМАШЕВЛЭН. СЕМЕН АЛЬТОВ Палян яке бур? Сценка Шудӥсь муртъёс: Постовой. Шофёр. Пиосмурт. Сюрес вожын. Постовой шула. Шофёр потэ. Постовой. Сержант Петров! Документтэ вай. Шофёр. Ӟечбуресь! Постовой. Праводэ вай! Шофёр. А?! Постовой. Пельыд секыт-а, мар-а? Шофёр. Золгес вера! Постовой. Тон правилоез сӧрид. Праводэ вай. Шофёр. Шонер вераськод. Туж пӧсь. Тани мон воксё шульыкми ни. Нош тон? Постовой. Мар-о тон, пельтэм-а, мар-а? Иар отын ошемын? Кыӵе знак со? Шофёр. Кытын? Постовой. Ма, тӥни ук, вылӥын. Шофёр. Адӟисько, мон пельтэм ӧвӧл. Постовой. Гордэн но ӵужен знак - малы со ошемын? Шофёр. О-о уго, вылӥын маке но ошемын, куштыны кулэ сое, туж люкетэ, сюресэз учкем интые, отчы син кыске. Постовой. Умой учкы али, копакыз ӵуж, нош шораз горд. Мар-о со? Шофёр. Золгес вера, туж пӧсь. Постовой. Пельыд ляб-а, мар-а? Шофёр. Синмы лябгес. Постовой. Пельтэм но, синтэм но-а, мар-а? Шофёр. Уг кылӥськы. Постовой. Кызьы тон руль сьӧры пуксид? Шофёр. Тау, мон уг кыскиськы. Постовой. Кызьы тон машинаен ветлӥськод?! Шофёр. Эн сюлэмшугъяськы, тӥни ук машинаын эшшо кыкез пуке на. Одӥгез адӟе, мукетыз кылэ, нош мон руль сьӧрын пукисько. Постовой. Бур пала возьматӥсь стрелка ӵушемын. Вера али, малы ӵушемын? Мар-о куараед быриз-а? Шофёр. Тон но пельтэм-а, мар-а? Ӵушемын, шуиськод? Бен, нырысь лэсьтӥллям но куараед быриз-а? Постовой. Тон мае ке валаськод-а, уд-а? Ӵушемын бере, иське, бур пала кожыны уг яра. Шофёр. Кин тыныд озьы шуиз? Постовой. Мон визьтэм-а, мар-а? Шофёр. Нош мон кытчы кожи? Постовой. Бур пала. Шофёр. Ма-ар?! Мон паллянэ кожи. Тон мукет сямен сылӥськод. Постовой. Ой, инмаре! Возьматы али паллян палдэ. Шофёр. Тани мынам паллян палы. Тани паллян киы, нош таиз бурыз. Нош тынад? Постовой. Та ки ноку но паллян ӧй вал на. Шофёр. Мар шузи кадь? Сое тодыны кулэ ук. Тани паллянэз, тани бурыз ки. Неужели сое но уд тодӥськы? Эшшо ке регулировщик. Тон отын шонер уд сылӥськы. Постовой. Тьфу! Тӥни кин ке но лыктэ, солэсь юалом. Тау инмарлы, ваньмыз визьтэмесь ӧвӧл на дунне вылын. (Пиосмурт пыре.) Вера али, эше, кудӥз ки бур, кудӥз паллян? Пиосмурт. Азаматов. Постовой. Мон тынэсьтыд фамилидэ уг юаськы. Кудӥз ки бур, кудӥз паллян? Пиосмурт. Нырысьсэ кылӥсько. Постовой. Сарданысь пегӟиллям кадь таосыд. Возьматы паллян кидэ, собере бурзэ. Пиосмурт. Мынам тани таиз киы бур, таиз палян. Оло, туннэ нуналысен мукет сямен шат ини? Шофёр. Нош тон, сержант, уд оскиськы вал, тани ук милям киосмы соин одӥг кадесь, тынад сураськемын. Постовой. Номырзэ уг валаськы. Пиосмурт. Кошкыны яра-а мыным? Постовой. Мынэ, мынэ! Пиосмурт. Кытчы? Постовой. Кытчы синмыд адӟе, отчы ик мын. Пиосмурт. Тьфу! Мон кык час пала вамышъясько ини. Нош кытчы мынэмме уг валаськы вал. (Кошке.) Шофёр. Киосыд ласянь тыныд, сержант, малпаськыны кулэ. Мон нокинлы но уг вера та учыр сярысь, но уж дорад юмоке медад сюр вал. Постовой. Мон но тон сярысь нокинлы уг вера. Али паллян пала кожид ке... Ма, тон бур пала кожод ини, отчы кожыны уг яра, отын меӵ яр. Ма, ӵок, тыныд отчы но яралоз! Ӟуч кылысь берыктӥз МАРИЯ ИВАНОВА. "Прогресс" осконэн улэ Бусы ужъёсъя Алнаш ёросысь "Прогресс" колхоз котьку сямен азьпал интыын мынэ. Колхозлэн тӧроез Серапионов Петр Матвеевич туэ нырысетӥ арзэ гинэ кивалтэ ай, но удыссэ оскымон нуэ. Та вакытэ вань пунэмаськонъёссы тырыса быдтэмын. Зэм, ужасьёсызлы коньдон сётонэн ӝегаса мыно. 1997 ар понна но быдэсак сётъяса быдтымтэ на. Но калыклэн мылкыдыз уг усьы. Пудо сиён тырмыт дасязы, уката но Вишурын. Секытгес югдур аранын. Гектарысьтыз 10-12 центнер сяна тысь уг лыкты. Тракторъёсын но курадӟо. Вишурысь музъем ужасьёс ӝожтӥсько автотракторной парксы пичигес шуыса. Центральной бригада пичи гуртъёсты туж ик уг учкы. Ваньмыз ӟечесь агрегатъёс но техника Туймыйылын, нош Вишурлы кылем-мылемез гинэ донгиське ни. Озьы но татысь нянь будэтӥсьёс чиданзэс уг ышто. Мукет бригадалы но юрттыны вутско на. С. НИКИТИНА. Одӥгез усто автормы Елена ПАНФИЛОВА ӵуказе семьязэ кылдытэ. "Удмурт дунне солы сӥзе шудбур но зарни перо. Эн экты - куашкалоз Шаркан. Ляльшурысь но со котырысь гуртъёсысь егитъёс шутэтскыны но эктыны ветло "бар" шуонэ. Отын буфетэз вань. Со пайда поттон, нош экто татын дунтэк. Туж дэри дыръя гинэ, пол миськисьлы тырон понна, одӥг манетэн окто. Вуж клубзы кемалась куашкан калэ вуэмын. Соин ик мукет амал шудьтӥзы. С. В. Стрелкова, клубын ужасе дышетскем бераз, гуртысьтыз кошкемез ӧз поты, кылем сӥзьыл бар усьтыны спонсор шедьтӥз. Верещагинлэн дауръёсаз пуктэм школа, собере кема аръёс ӵоже колхоз столовой юртэз ӧжытак тупатъязы. Нош сисьмем выж одӥг пол эктӥсьлэн пыдыз улын чигиз. Гужемзэ нош ик выльдӥзы. Табере чидалоз, дыр, ини. Сокем зол тэтчаны гинэ уг яра. Кин тодэ: итэм-пуктэм маке куашкалоз но. С. ПЕТРОВА. ПОЛИТИКА Тупатоз-а югдурез Виктор Черномырдин? Туннэ таӵе юанлы валэктон нокин уз сёты. Малы ке шуоно, Россия секыт югдуре (кризисэ) шедемын: экономика, юнмам интые, уката лябӟе, ваньбур поттон оглом куашка. Табере со вылэ ватсаськиз коньдонэн секыт югдур, манетлэн кужымез пумен кулэсме. Экономикаын законъёс ас сюрестӥзы азинско, Президент верамъя, солэн мылкыдызъя уг кошко. Борис Ельцин калыкез буйгатӥз ке но, манетлэсь капчиямзэ малы ке дугдытыны ӧз быгаты. Долларлэн дуныз нуналмысь ӝутске. Россилэн шуг улонэз, зэмзэ но, али гинэ ӧз кутскы. Тодамы ваёмы Вииктор Степановичен кивалтон дырез. Асьмеос ведь выльдӥськон кутскем вакытысен арысь аре берлань чигнаськом, уллань гылӟиськом, сыръясь нюр вылын кадь улӥськом. Оло, юнме вераськонъёс уг мыно, Россия Западлэн, США-лэн косэмзыя азинскон сюрес быръе, вылӥ кивалтӥсьёс отысь косэм-верамъёсты котьку санэ басьто, пелязы поно. Нош Москвалэн ялан шуэмез потэ, реформаос улонэ каллен пыӵало. Нош соослы кин люкетэ, соос понна кин кыл кутыны кулэ? Шат улосвылъёс (регионъёс) питранэ боды поно, пыдзэс пукто. Озьы шуыны чик ым уг усьтӥськы. Кыкетӥез ужпум люконтэм герӟаськемын выльдӥськонлэсь (реформаослэсь) ӧрзэ воштонэн, калык пала берыктонэн. Сое кемалась куро ни коммунистъёс (КПРФ) но интыосысь кивалтӥсьёс. Нош Россилэн Президентэзлэн администрациез но Правительство сое чик кылэм-адӟем уг каро. Оло, зэмзэ но, соос Дуннеысь Валютной фондлэсь (МВФ-лэсь) кылзӥсько. Амалтэк сыӵе малпанэ вуиськод. Виктор Степановичлэсь кивалтонын быгатонлыкъёссэ чик но уг пичиятӥськы. Со тодмо кивалтӥсь, опытэз бадӟым. Но калыклы но, мыным но али ке но валантэм, кӧня ке толэзь талэсь азьло Президентлэн Виктор Черномырдинэз палэнтэмез но табере со борды выльысь берытскемез но 2000-тӥ арын ас интыяз кельтыны малпанэз. Шат Россиысь калык аслыз президент уз бырйы, мылкыдзэ вераны уз быгаты ни? Отчыозь ведь дыр трос на, кык ар пала. Туннэ кылдэм секыт югдурез Виктор Черномырдин тупатыны быгатоз-а? Солы вань-а оскон? Шуг вераны. Дуннеысь котькуд странаын правительствоосты палэнто, выльдӥськонъёс ортчыто, калыклэсь улон-вылонзэ умоятон понна. Нош асьмелэн малы ке озьы уг луы, мукет пала берытске. С. Кириенко кӧня ужаз, одӥг пол но, нокытын ӧз вера (мон ӧй кылылы) производствоез азинтон, экономикаез юнматон сярысь. Туж трос куашетӥзы налогъёс (вытъёс) бичан но музонэз сярысь. Нош ваньбур поттытэк, кызьы бен ӟеч улонэ вуод меда? Со уката зол паймытэ. Выль правительство (премьерез озьы шуыны уг луы) сое валаз, производство пала берытскиз ке, улонмы воштӥськыны кулэ. Виктор Черномырдин дорамы, Удмуртие ветлӥз ни. Но пытьыез малы ке сокем уг шӧдӥськы. Нош Юрий Лужков вуылэм бере, мар но со лэсьтӥське, Москваен кусыпъёс юнмало. Но асьме республика бордысь но тросэз потэ. Тани удмурт калыкез сюлэмшугъяськытэ Камбаркаысь но Кизнерысь химической ож тӥрлык. Сое быдтонъя Россиысь Правительство нимысьтыз постановление кутӥз, нош Виктор Степановичлэн юрттэмез уг адӟиськы, коньдон али ке но уг висъяськы. Ваньзэ сое син азе пуктоно ке, Россиын быдэстымтэ, туж кулэ бадӟымесь ужпумъёс одӥг уробое уз тэре. Быгатоз-а Виктор Черномырдин соосты улонэ пыӵатыны, югдурез тупатыны? Со бордысь потоз солэн президент луонэз но. Но азьланьзэ тунан - со ӟеч уж ӧвӧл, шуо визьмо политикъёс. Соин ик улом, адӟом, дыр ваньзэ интыяз пуктоз, котькудӥзлы зэмос дунъет сётоз. Г. РОМАНОВ. ШУНДЫ Экты-кырӟа, шуд-серекты 14 июле Алнаш ёросын усьтӥськиз пинал усточиослэн лагерьзы. Алнаш, Грах, Можга, Вавож, Селта, Пичи Пурга, Кияса, Воткинск - тямыс ёросысь пиналъёс шутэтскизы, тодон-валан басьтӥзы, ньыль пӧртэм секциосы ветлыса, кудъёсыныз кивалтӥзы: Россиысь Писательёслэн союзазы быръем мурт, Удмурт Республикаысь кудьтура удысысь дано ужась И. З. Иванов; Алнашысь калык хорлэн хормейстерез Л. М. Березкина; Алнаш ёросысь Удмурт Тоймобаш гуртысь клубын ужась хореограф И. С. Иванова; Удмурт Республикаысь культура удысысь дано ужась, Алнашысь калык агитбригадалэн режиссёрез В. М. Булдаков. Лагерьын шутэтскиз 60 нылпи, куинетӥ классысен дас классозь. Соос люкемын вал куинь отрядлы. Секциосъя занятиос ортчылӥзы 9 часысен 12.30 часозь. Нош шутэтскон вакытазы пӧртэм ужрадъёс ортчылӥзы: шудонъёс, конкурсъёс, дискотекаос, учкылӥзы видеофильмъёс. Оглом вераса, мӧзмыса улыны дыр ӧй вал. Со понна вожатойёс трос гинэ сюлмаськоно луизы. Тани мар верало лагерь сярысь асьсэос нылпиос. Света АРОСЛАНОВА (Селта ёрос): - Мон ветлӥ литературно-творческой секцие. Трос выльзэ тодӥмы ми татын, редакциен но типографиен, отын ужасьёсын тодматским. Нырысетӥ удмурт нылкышно кылбурчиез Ашальчи Окиез, калык кылбурчиез Герман Ходыревез но писателез Семен Шихаревез буре вайыса, шайвылэ ветлӥм. Кылбуръёс но веросъёс гожъям, собере янгышъёссэ учкылӥмы. Ваня РЕШЕТОВ (Кияса ёрос): - Нош ми, драматической секцие ветлӥсьёс, пумиськылӥмы Драмая кун национальной театрысь артисткаен Римма Николаеваен. Со тодматӥз милемды творчествоеныз. Со сяна, дышетскимы сценкаос пуктыны, сцена вылын асьмеды возьыны. Эктонъя секциын дышетылӥзы туала но калык эктонъёсты. Кырӟасьёс но выль кырӟанъёсын тодматскылӥзы, шонер кырӟаны дышетскизы. Лена ИЛЬИНА (Алнаш ёрос): - Шутэтскон дырмы сярысь ке верано, со туж шулдыр ортчылӥз. Кельшиз мыным Алнашысь самодеятельной композиторен Николай Постниковен но пинал кырӟасен Татьяна Ишматоваен пумиськон. Яраз пӧртэм шудонъёсын шудыны: "Разведшкола", "Аукцион", "Еще раз про любовь". Регина МУЗИЯНОВА (Вавож ёрос): - Мыным туж кельшиз "Выиграй шапку лидера" нимо шудон. Татын олокыӵе но ужъёсты быдэсъяно вал. Милям куинетӥ отрядмы вормисе потылӥз, изьы ми кие ик кылиз. Котькудӥз отряд концерт номеръёс дасяз на. Умойёссэ бырйыса, пересьёслы концерт возьматӥм. Концертэн озьы ик ветлӥмы нылпи юртэ, Асан гуртысь клубе. Сурадж НАГИБОВ (Грах ёрос): - Лагерьын ортчылӥзы дискотекаос, Алнашысь культура юртэ но эктыны ветлылӥм. Нош кошкон азями ӵукнаозь ик шулдыръяським. Ми ваньмы туж эшъяським, люкиськыны туж секыт луоз ни. Пиналъёслы озьы ик туж кельшиз Туймы гурт вӧзы, Туймы дуре, походэ ветлэмзы. Кемалы тодазы кылёз, дыр, Елабугае ветлэмзы. Городэн тодматскем сяна, краеведческой музее но И. И. Шишкинлэн музей-юртаз пыразы. Нылпиос тодматскизы Ашальчи Окилэн но Геннадий Красильниковлэн Алнашысь музейёсынызы. Тӥни озьы, ӵукна зарядка бордысен кутскыса, ӝыт шудыса-серекъяса ортчылӥзы нуналъёс. Шӧдтэк шорысь кадь вуиз люкиськон. - Ӟеч лу, "Лира"! Ми ум вунэтэ тонэ, вуоно аре но лыктом! - сыӵе кылъёсын доразы бертӥзы пиналъёс. Оскем потэ, пинал усточиослэн лагерьын люкам тодон-валанъёссы уз кысэ. Таӵе пумиськылонъёс азьланяз но мед луозы. Гуртысь нылпиос понна со одно ик кулэ. Н. БУДРИНА, Алнашысь егитъёсын ужанъя отделысь специалист. ЛЫДӞИСЬ ВЕРА МАЛПАНЗЭ Кин утёз выись муртэ? Одӥг пол дорамы пыраз тодмо кышномурт. Пересь ини со. Улэ пиеныз. Нылыз -нимаз, аслаз семьяеныз. Пенсиез ичи, сётэмзэс возьматозь, кӧт сюмаса улоно. Пиез, уж шедьтымтэысьтыз, юон вылэ чӧлскем. - Кызьы бен улыны малпаськоды ни азьланяз, марлы оскиськоды? - юай мон. - Ма, оло, улон умоялоз ай, оскон инмарлы гинэ на, - шуиз со, мур лулӟыса. Тӥни озьы, пересьёслэн но туала властьлы осконзы ӧвӧл ни, нуналлы огпол ке но кӧттыр сиськыны быгатымтэ бере. Ма, куд-огез кивалтӥсьёсмы но улонмес йӧногес сюрес вылэ поттон понна инмарлы гинэ оско на, лэся. Тани алигес Удмурт телевидение пыр вераськиз Кун Кенешлэн депутатэз. Бырйисьёс азьын аслаз долгеныз, нырысь быдэстоно уженыз со лыдъя селоысь черкез ӝоггес тупатъяса вуттонэз. Озьыен, со но малпа: сютэм калык улонзэ воштыны быгатоз вӧсяськыса гинэ. Озьыен, вань оскон инмарлы гинэ кылиз на? Депутат номыр ӧз поттылы куашкам производствоез ӝутон, кивалтонэз выльдон, котькуд адямилы уж сётон, ужасезлы дыраз уждун тырон, висисезлы кулэ юрттэт сётон но мукет сыӵе "чыры-пыры" ужпумъёс сярысь. Ӧз поттылы со, малы та калэ вуимы, кин кыл кутыны кулэ улонмес куашкатэм понна. Бен, вылӥын верам пересь кышномуртлэсь куректонзэ- адӟонзэ, со кадь миллионъёсын начар улӥсьёслэсь малпанъёссэс уг тоды-вала, луоз. Ачиз уждун тыремзэс витьыса уг улы, дыр, уждунэз но синкыли быдӟа гинэ уз луы. Тӥни озьы, асьмелэн тросэз туала кивалтӥсьёсмы, вылӥысьёсызлэсь адӟем карыса, калык киосын уно дасо аръёс ӵоже кылдытэм ваньбур чотын узырмизы но табере со калык шоры кӧбератэк учко. Мон уг шуиськы, со депутатмы сюлмысьтыз тыршиз ке, асьме улонмес кызьы ке воштыны быгатоз. Уз. Малы ке шуоно, туала улон сюресмы кыӵе ке партиен но, президентэн но, правительствоен но пусъемын ӧвӧл. Асьмеос мынӥськом со сюрестӥ, кудзэ возьматӥзы кунгож сьӧрысь "дядяйёс" Международной валютной фонд пыр. Соинтэк-а интыысьтыз али гинэ гылӟем премьермы Сергей Кириенко Международной валютной фондлэсь кивалтӥсьсэ оскытӥз: "Мон дась, Меморандумын пусъем экономической программаез котькуд ласянь быдэстон понна, ваньзэ лэсьтыны, со ужпумъёсты быдэстон вылысь, кулэ ужрадъёс кутыны". Нош асьмеос тодӥськом ини, кыӵе экономической программа дасяллям со "дядяйёс". Ваньмыз чакламын, странамес пумозяз куашкатон, сое азинскем капиталистической страналы сырьё сётӥсь колонилы пӧрмытон вылысь. Кивалтӥсьёсмы оскытыны выро, реформаос улон-вылонмес выльдозы шуыса, соин ик, пе, соосты ӝогомытыны кулэ, нош асмьеос интыямы лёгаськиськом. Ма, чылкак шузиос гинэ уз валалэ на, дыр, со реформаосын сэрен таӵе улонэ вуэммес. Россиез колонилы пӧрмытон понна, калыкез 50 миллионлэсь трос медаз кыльы, шуо капиталистической странаосысь кивалтӥсьёс. Быдӟым Отечественной война аръёсы соос ӧз быгатэ сыӵе малпанзэс быдэстыны. Странаысьтымы вань калыкъёс, одӥг мыжыке кырмиськыса, кужмо шуккет сётӥзы тушмонъёслы. Табере асьме кивалтӥсьёсмы сюрес усьтӥзы соослы. Озьы куашкатэмын вал Советской Союз. Нимаз люкем республикаосты капчигес луиз лябӟытыны. Заводъёс но фабрикаос дугдэмын, соос тырмыт продукция уг потто ни. Асьмелы кунгож сьӧрысь келяло кулэтэм вузъёссэс, кӧшомем сиёнъёссэс но юонъёссэс. Со ик вуттэ калыклэсь тазалыксэ лябомытонэ, аляло пӧртэм палась висёнъёс. Алигес Центральной телевиденилэн "Тазалык" программаяз веразы, кутэт интые ваем памперсъёс, пе, будӥсь пиослэсь атай луыны быгатонлыксэс быдто. Озьыен, соин сэрен но калыклэн лыдыз кулэсмоз. Кыдёке адӟыса лэсьто вылэм кунгож сьӧрысь "юрттӥсьёсмы", нош асьме пӧлысь тросэз соослы оско, сыӵе "юрттэтлы" шумпото. - Мар но ӧвӧл табере магазинъёсын, - шуэ куд-огез. Нош уг малпаськы, кыӵе изъян лэсьто тазалыклы кунгож сьӧрысь ваем вузъёс: сиён-юонъёс, эмъюмъёс, нылпи шудонъёс но дӥськут миськон порошокъёс, майталъёс, мебель но мукетыз. Пересьёсты но пиналъёсты пӧртэм висёнъёсын черлатыса но сютэм возьыса, егитъёсты но мӧйыосты наркотикъёсын но винаосын усыкмытыса быдтэм сяна, соос тыршо адямилэсь визьзэ сураны-пожаны, сюлэм осконъёссэс быдтыны, ӟеч сямъёссэс мукет пала берыктыны. Та малпанъёссэс быдэстон понна ик чакламын калыкез дышетон, тазалыкез утён, социальной юрттэт сётон но мукет удысъёсъя реформаос, телевидение пыр возьматъяськись трос сериосын кинофильмъёс но мукетыз. Учке ай тани: котькуд фильмын сямен пӧяськон, лушкаськон, адямиез ултӥян, виылон но мукет сыӵе учыръёсты возьмато. Со сяна, экран вылын нуналлы быдэ пӧртэм лотереяос, шудонъёс возьматӥсько: "Поле чудес", "Колесо истории", "Эти забавные животные", "Угадай мелодию", "Золотая лихорадка", "Кроссворд" но мукет со выллем. Адямиосты оскытыны выро: учке ай, шудэд ас кияд, кылдӥз ке - тон но утод. Чик ужатэк трос коньдон яке дуно кузьым басьтод. Бен угось туннэ быдэс странамы сыӵе шудон-лотерея выллем. Но "шуд" усе пӧяны, капыртыны быгатӥсьёслы гинэ. Алигес "Советской Россия" газетын печатламын вал куд-ог кивалтӥсьёслэн узырлыкъёссы сярысь ивортон. Тани А. Чубайслэн арскын доходэз 1714 миллион манет, Б. Ельцинлэн - 243 миллион манет, И. Рыбкинлэн - 576 миллион манет, С. Ястржембскийлэн 189 миллион манет. Озьы ик мукетъёсыз но узырмиллям. Со сяна, туж бадӟымесь квартираоссы, дачаоссы, музъем участокъёссы, иномаркаоссы. Сыӵе ик узыресь ӧвӧл шат правительствоысь мукетъёсыз чиновникъёс, интыосысь кивалтӥсьёс. Оло, соос калык понна уен-нуналэн ужаса сыӵе узырмизы? Кин оскоз солы! Узырмизы-тордӥзы соос, калыкен кылдытэм ваньбурез лушкаса но асэстыса, странамылэсь узырлыксэ вузаса. Табере шуо ини: уждун, пенсиос но пособиос тырыны коньдон ӧвӧл. Калык сярысь пичи ке но сюлмаське ке, малы Президент но Правительство уг быгато кунгож сьӧрысь банкъёсы арлы быдэ уно миллион манетъёсын келям кондонэз берыктыны? Со табере 300 миллиард долларозь вуиз ни. Со тырмысал ваньмызлы уждун но, пенсиос но тырыны, калык хозяйствоез азинтонэ но висъяны. Но кызьы берыктод, аслад но сьӧлыкед вань бере. Нош Президент Борис Ельцин присяга сётӥз вал ук: "Кыл сётӥсько адямилэсь но гражданинлэсь правооссэс но эриксэс гажаны но утьыны". Озьы ик верамын Россилэн Конституцияз но: "Адями, солэн правоосыз но эрикъёсыз луо котьмалэсь вылӥ узырлык". Нош кызьы-о валэктод соку тросэзлэсь ужтэк, сютэм улэмзэс, кулылэмзэс, палась висёнъёслэсь вӧлмемзэс, мукет урод учыръёсты. Озьы бере, асьме кивалтӥсьёс калык сярысь уг сюлмасько, со чотын узырмемъёслы дурбасьто, кунгож сьӧрысь "крезьчиослэн" шудэмзыя экто. Тани табере Правительство кыӵесэ кадь шедиз: арлы быдэ октэм пунэмъёсты берыктоно, бюджетын чаклам кулэяськонъёслы коньдон висъяно, пенсиос тыроно... Нош кытысь коньдон шедьтоно? Производство синэ, сое ӝутон пумысен туала Правительстволэн программаяз пал кыл но верамын ӧвӧл. Амал одӥг - начармем калыклэсь берпум копейказэ кысконо. Со понна чакламын выт тыронэз будэтыны, пенсиосты быгатэмъя гинэ сётъяны, ужасьёсты кулэстыны но мукет. Узыръёсты исаны уг дӥсьто, нош ик Международной валютной фондлэсь тэльмыро. Нош солэн кивалтӥсьёсыз меӵак шуизы: коньдон куриськоды ке, милесьтым вань дэмланъёсмес быдэсъялэ. Со "дэмланъёс" пумысен мон вылӥын верай ини. Ватсалом на: табере качано но вузано страналэсь берпум узырлыкъёссэ - огъя энергосистемаез, "Газпромез", мукетсэ. Нимаз-нимаз люкылоно чугун сюрес транспортэз. Правительстволэн кивалтӥсьёсыз ялан индыло: улоно кӧня коньдон люкамедъя. Юан кылдэ: странаын толэзьлы быдэ уждун но пенсиос, нылпиослы пособиос тырымон но коньдон уг тырмы бере, кызьы меда уло туннэ Президент но Правительствоысь чиновникъёс, мар чотын соос возё сомында охранникъёс, дачаос, машинаос... Оло, соос но табере кӧтсы тырымон сиськыны уг быгато? Улон-вылон ялан уллань гылӟе, кызьы шуо, пеймыт гуысь потыны сюрес ик уг адӟиськы. Нуналлы быдэ асьмеос кылӥськом мылкыдэз куашкатӥсь иворъёсты: фермаез электротылтэк кельтӥзы, заводэ газ лыктэмысь дугдӥз, селоын секыт висён вӧлмемын, нюлэскын тылпу, нюкысь адями шӧй шедьтэмын... Сыӵе туннэ улонмылэн тодметъёсыз. Кӧшкемыт. Нош ку-о кыломы на выль юртъёс ӝутэм, ӟечлыко вузъёс поттэм, чебер клуб усьтэм но мукет со выллем иворъёсты, кудъёсызлы асьмеос дышемын вал азьло? Шат асьме калык ужаны уг ни быгаты? Малы со суйзэ-пыдзэ юскиз? Со выллем юанъёс котькинлэсь сюлэмзэ сюпсё, луоз. Нош кытысь солы валэктон шедьтоно? Мон сямен, калык укыр оскиськыса улэ туала властьлы. Нош со возьматӥз ни улонмес умой ласянь воштыны быгатымтэзэ, оло, сое юромо куашкатыны тыршемзэ. Котьма ке но, ваньмыз понна калык асэныз быръем президентлэсь но правительстволэсь юаны кулэ. Котькудӥз кивалтӥсь ас удысаз югдур понна кыл мед кутоз. Нош асьмелэн кызьы луыса кошке? Телевидение, радио но газетъёс пыр нуналлы быдэ ивортыло калык ваньбурез тус-тас карисьёс но лушкасьёс сярысь, бюджетысь висъям коньдонэз асьсэлы капыртэмзы сярысь. Нош кинэ-о со понна кыл кутытӥзы, пытсэт сьӧры келязы но лушкам ваньбурез берыктытӥзы? Соиз яке таиз вылэ уголовной уж ӝутэмын шуыса иворто но соин быре. Маин йылпумъяськиз со "уголовной уж" - ум ни тодӥське. Ӵем дыръя янгыш луисьёсты шонере потто яке амнистия улэ шеде шуыса мозмыто. Озьы соослы сюрес усьто выльысь йыртэманы. Зэм, та шимес учыръёслы пумит нюръяськыны, чукинскем улон-вылонмес умоятыны адями огназ уз быгаты. Со понна кулэ ваньмызлэн огазе кариськемез. Сыӵе кужымлэсь асьме кивалтӥсьёс юн курдало. Малы ке-а туала властьлы пумит ӝутскем, улон-вылонзэс умоятыны курись шахтёръёслы пумит Правительство чурытэсь ужрадъёс кутыны кутскиз. "Соослы странамес куашкатыны ум лэзе!" - шуиз вице-премьер (кызьы нимало соос асьсэды) Борис Немцов. Озьыен, странамес куашкан калэ вуттӥзы шахтёръёс? Собере улон-вылонмес сурась-пожасьёс пӧлы пыртозы ужаса поттэм коньдонзэс дыраз сётыны курись дышетӥсьёсты, врачъёсты, лэсьтӥськисьёсты но мукетъёссэ, огъя вераса, вань ужась калыкез, малы ке шуоно, нимаз-нимаз адямиос сяна, табере нокин но дыраз уждун уг басьты ни. Малы ке-а алигес радио пыр одӥг кышномурт, нылпи садлэн азьвыл кивалтӥсез, передачаез нуисьлэсь меӵак юаз: "Шахтёръёсты янгыше уськытӥськоды, нош малы странамы таӵе югдур понна меӵак янгыш луись Президентлэсь нокин кылзэ уг юа, со кӧбератэк шутэтскыса улэ?" Калык ас улонэзлы ачиз кузё кариськыны кулэ. Нокин но солы - инмар но, эксэй но, батыр но - уз юртты. Калык пӧлын ик вань кивалтыны быгатӥсь визьмо, нодлыко адямиос. Соослы сётоно тэльбугоез. Ӟуч кылын вань туж визьмо веран: "Выись муртэ утён аслаз выисьлэн ужез". Тӥни озьы, инмарлы гинэ оскыса ум улэ. В. МИХАЙЛОВ, ожысь но ужысь ветеран. Корефейёс шуо вал соосты "Советской Удмуртия" газетлэн редакциезлэн бадӟымаз кабинетаз кык отделъёс интыяськемын вал: партийной улонъя но пропагандая. Нырысеныз кивалтӥз Дмитрий Назарович Леконцев, мукетыныз - Григорий Матвеевич Перевощиков. Доразы кемдыса, мон сояз но, таяз но ужаны вутскылӥ. Приказъя нош партийнояз гинэ лыдъяськи. Туннэ кадь ик син азям: ӝӧк сьӧрын губырскыса пукись, кымыс улысьтыз лек тусын учкись но ӟазырес куараен вазьылӥсь адями мынам кивалтӥсе луыны кулэ. "Леконцевлэн лек сямыз нимтулаз ик ӝабырскыса кылем, шӧдске..." - озьы малпай вал мон нырысь- валысь Дмитрий Назарович сярысь. Нош макем бадӟым янгыше усьысал мон соку, шораз лекатӥсь синъёсын учкысал ке! Ӝоген валай: мон азьын пукись адямилэн тылтусыз сюлэм пуштросэзлы нокызьы уг тупа! (Таӵе учырез вань улытозям уг вунэтӥськы, кыӵе ке адямиен нырысьсэ пумиськыку чакласькисько.) Туннэлы-ӵуказелы уж сётэмезлэсь азьло Дмитрий Назарович мынэсьтым юаз: кыӵе-мар, пе, мылкыдыд, кытын сиськиськод, кытын кӧласькод? Коридорын кӧласько шуыса вераме бере, ӝӧк вылэ мыжгиз. "Безобразие! Тӥни озьы асьмеос нырысьсэ егит специалистмес пумитаськом вылэм! Туннэ ик, ужмес быдэстэм бере, мыном дорам, выль квартираям". Тӥни озьы ми, кык кышнояськымтэос, кӧня ке толэзь ӵоже кӧлам одӥг валес вылын, сиським одӥг ӝӧк сьӧрын. Дмитрий Назаровичен ужаны но капчи вал. Со республикаысь вань кивалтӥсьёсты, бадӟымъёссэ но, пичиоссэ но,нгимтулзыя гинэ ӧвӧл, арлыдзыя, партийной стажзыя тодылӥз. Мон та эшъёс доры аслам тодмоосы доры кадь ик вуылӥ. Вунонтэм кылиз таӵе учыр. Удмурт музъем бадӟым ӧвӧл ке но, солэн пӧртэм палъёсаз куазь пӧртэмгес луылэ. Соку, 50-тӥ арын, Каракулино районын ю-нянь, зоръёс ӧжыт усьылэмен, пыдесозь гинэ будыса, мырдэм но кызьы шепаськиз. Нош Кулига районысь колхозъёсын пумтэм зоръёс умой будэтэм ю-няньзэс утялтыны люкето. Лымшор палысез но, уй палысез но райкомъёс, котькуд шепез утён вылысь, вань активистъёссэс пыд йылазы ӝутӥзы. Каракулиноос вань комбайнъёссылэсь пуртъёссэс уллань лэзьылӥзы, нош кулига палъёс котмем культооссэс нимысьттыз лэсьтэм лапасъёсын куасьтылӥзы. Коммунистъёслэн валтӥсь луэмзы газетын лыдӟымон но адӟымон возьматэмын вал. Гуртын будэм адями Дмитрий Назарович городъёсысь партийной улонэз но рос-прос возьматыны тыршылӥз. Парткомъёслэн секретарьёссы но отделамы ӵемысь куноос вал. Монэж, со дыре комсомолецез, Дмитрий Назарович заводъёсы ыстылӥз егитъёслэн бригадаосынызы тодматскыны. Ӟеч дунъет сётӥз тодмо бригадир Володя Скотников сярысь очеркелы. Отделын ужъёс ас радызъя мыно, азинско... Улонын но кыӵе ке вамыш лэсьтоно. Редакциысь эшъёсмы милемлы, кышнотэмъёслы, пумит "чурытэсь ужрадъёс" кутыны малпаллям. Соослэн ӵектэмзыя, милемыз ӧтизы редакцилы матысяз школае эшъяськон ӝытэ. Отын дышетӥсь луыса ужа вылэм Дмитрий Назаровичлэн тодмоез Анна Ильнична. Солэн эшъёсыз трос гинэ люкаськиллям. Сюмыкъёсмес ӝутъяку, мон валаны кутски мазэ-созэ. Оглом вераса, та ӝытэ, нокыӵе загсэ ветлытэк, Дмитрий Назарович но Анна Ильинична кузпалъёс луизы. Мыным но эш быръемын вылэм. Ритаен ми кемалы тодмоесь кылим. Редакциын ужан нунал йылпумъяськем бере, Назарыч, мон но эшъёсмы ӵемысь люкаськылӥм куноятыны яратӥсь кузпалъёс Перевощиковъёс доры. Григорий Матвеевич туж яратэ но быгатэ вал шахматэн шудыны. Спортлэн та визьмо удысысьтыз тодмо адямиослы но "мат" пуктылӥз. Малы ке шат ми соин вожвылъяськыны ӧм дӥсьтылэ. Кечат-вамат пул сьӧрын пукись эшмылэсь "фокусъёссэ" паймыса учкылӥм. "Слонъёсын", "ладьяосын" но мукет фигураосын солань-талань ветлыса, дуннеысь вань политикалэсь туннэ пуштроссэ сэрттоз-пертчоз вал. Одӥгезлы фигуралы, шуом, Сталинлэсь нимзэ сётылӥз, мукетызлы - Рузвельтлэсь, куинетӥезлы - Черчильлэсь, ньылетӥезлы - Гитлерлэсь... Ваньзэс соосты историын басьтэм ас интыосазы тып-тып пуктылӥз. Ортчем дырысь гинэ ӧвӧл, туалаосызлы но кивалтӥсьёслы кулэезъя дунъет сётылӥз. "Советской Удмуртия" газетын статьяосаз но Григорий Перевощиков туннэ нуиськись политикалэсь пуштроссэ лыдӟисьёслы валамон валэктылӥз. Ӧз вунэтылы калык кусыпъёсын герӟаны Россилэсь но Удмуртилэсь улонзэс. Григорий Матвеевичлэн быгатонлыкез улонлэсь пӧсьсэ но кезьытсэ адӟемез бордын луэ. Нокыӵе иськемъёсын уд мерта солэсь фронтовой сюресъёсты ортчемзэ. Ужан удысысь эшъёсыз гинэ тодылӥзы, макем секыт вал Григорий Матвеевичлы редакциысь юртлэн кыкетӥ этажаз нуналлы быдэ ӝутскылыны. Кӧня ке ар ӵоже со одӥг протезен ветлӥз. Но, гангрена шуон басьтэмен, хирургъёс кыкетӥзэ но пыдзэ вандоно луизы. Табере вань кужмыз киосаз кылиз. Григорий Матвеевич квартираысьтыз потаны ӧз быгаты ини, нош редакциен кусыпсэ ӧз ышты, солэн нимтулыныз статьяос газетын, шергес ке но, поталлязы. Аръёс ортчо, одӥген-одӥген люкаськыса, дасоослы пӧрмо. Дмитрий Назаровичен но Григорий Матвеевичен ӵош "Советской Удмуртиын" ужам эшъёсты туннэ редакциысь уд шедьты ни. Улонэн ӵош воштӥськиз газетлэн нимыз но. Егит журналистъёс выль ужпумъёсты быдэсъяло. Соослы но данъяськон мылкыд пыӵатэм потэ: газет улэ нуналъёс ӵоже гинэ, нош соя лэсьтӥське история! Леонид ДАНИЛОВ. Кунгож сьӧрысь утчанэз ӧвӧл Та нуналъёсы Удмурт Республикаысь Правительствоын журналистъёсын пумиськиз республикаысьтымы егитъёсын но нылпиосын ужась ёзъёссэс радъясь кенешлэн тӧроез Равиль Гатаулин. Люкаськемъёслы со мадиз та удыслэн ортчем сюресэз но туала шуг- секытъёсыз сярысь. Кенеш (Совет) огазея 11 общественной огазеяськонэз. Соос пӧлын удмурт егитъёсын ужась "Шунды" ёзмы но. Равиль Мансурович ивортэмъя, котькинлы сямен ик секыт йӧтэ коньдонэн, нош одӥг ужрадэз но сотэк уд ортчыты. Кенеш егитъёсты дышетэ спортэз гажаны, кылсярысь, трос лэсьтэмын ни планерен лобан удысъя. Та ласянь асьмелэн азинсконъёсмы но вань. Кенеш юнэсь кусыпъёс возе шор ёзо школаосын, котьку пыриське егитъёслэн дуннеысь фестивальёсазы. Равиль Гатаулин озьы ик пусйиз егитъёсын но нылпиосын ужан амалъёсты. Куддыръя, пе, сыӵе опытэз утчаськом кунгож сьӧрысь кунъёсын, нош асьмелэсьсэ ум адӟиське. Та ужен вырисьёсты сыӵе малпанэ вуттэ берло дыре Германие, Нидерландые ветлэмзы но мукетыз. Ведь тросэз потэ асьсэос егитъёс бордысь. Урамъёсын юнме медаз калге шуыса, соосын ужанлы нуналмысь саклык висъяно. Сыӵе ужпум сылэ Егитъёсын ужанъя комитет но кенеш азьын. Огъя верано ке, совет 49 сюрс муртэз огазея. Г. ВАСИЛЬЕВ. Выль книгаос Берло дыре "Удмуртия" издательствоын поттэм выль книгаосты магазинъёсысь ялан шергес пумиталод. Тужгес но секытэн "вордско" асьме кылын печатламъёсыз. Валамон ини, мугез одӥг - уг тырмы коньдон. Вылӥ дышетскон заведениосын дышетскисьёслы бадӟым кузьым луоз кылтодон наукаосъя докторлэн, профессорлэн Иван Таракановлэн "Исследования и размышления об удмуртском языке" статьяосын сборникез. Отысь тодыны быгатоды удмурт кылъя уно тодосчиос сярысь. Дано писательмылэн Геннадий Красильниковлэн вордскемез дырысен 70 ар тырмонэзлы сӥзьыса поттэмын солэн "Ненароком" книгаез. Отчы пыртэмын прозаиклэн "Арлэн кутсконэз" романэз но пӧртэм аръёсы гожтэм веросъёсыз. Авторез соосты ваньзэ ик ачиз ӟуч кылэ берыктэм. Книгаез поттыны дасяз педагогика наукаосъя кандидат Любовь Федорова. "Вирсэр" - "Пульс". Озьы нимаське улонысь вазь кошкем кылбурчилэн Михаил Федотовлэн удмурт но ӟуч кылын выль книгаез. Соосты берыктэм Владимир Емельянов. Книгае пыртэмын нимаз книгаосын потылымтэ кылбуръёс. Озьы ик сётэмын Михаил Федотовлэн эшъёсызлэн поэт сярысь тодэ ваёнъёссы. Со сяна ик потӥзы Анатолий Леонтьевлэн "Кырӟамысь тон эн дугды, сюлмы", Алексей Ельцовлэн "Урт" кылбур сборникъёссы. Вячеслав Ар-Серги ӟуч кылын поттэм выль книгазэ "Сквозь очищающий огонь" шуыса нимам. Берыктӥсез Владимир Емельянов. Нылпиослы кылбуръёсын но шулдыресь суредъёсын усто кузьым дасям Алнашысь Иосиф Иванов. Авторлэн пиналъёслы таиз витетӥез книгаез луэ ни. Суредъёссэ лэсьтэм Ирина Хомич. Та книгаосты магазинъёсысь ӧд ке шедьтэ, соосты басьтыны быгатоды издательстволэн магазинысьтыз. Со интыяськемын Ижысь Пастухов ульчаысь 13-тӥ номеро юртын (куинетӥ этаж). Н. ЛЯЛИН. ЛЫДӞИСЬ ГОЖТЭ Выль Сӥзён - удмурт кылын 1997-тӥ арын сӥзьыл Иж карын Вань удмуртъёслэн ӧтчамазы пумиськи Ижевск-Удмурт епархиысь диаконэн кылтодон наукаосъя удмурт докторен Михаил Атамановен. Библилэсь Выль Сӥзён люкетсэ со выльысь берыктэм удмурт кылэ. Одӥгзэ мыным кузьмаз. Пачылмем мылкыдын кутӥ сое киям, ортчыт шумпотӥ. Инмарлы оскисьёслы, вӧсяськисьёслы, вань удмуртъёслы туж кулэ луись книга та. Выль Сӥзёнэз лыдӟыса, котькин валалоз Иисус Христослэсь дышетэмзэ. Туж бадӟым но кулэ уж потэмен валче, асьме калык дуннеысь мукет калыкъёсын ӵош одӥг радэ султӥз. Ваньмылы кулэ та книгаен тодматскыны. Мукетъёсызлэсь бере кылёно ӧвӧл. Азьвылгес, 1847-тӥ арысен 1912-тӥ арозь, Выль Сӥзён потылӥз ини. Нырысь ик печатлаллязы Матфейлэсь но Марклэсь евангелиоссэс. 1904-тӥ арын Кузонын - Матфейлэсь, Марклэсь, Лукалэсь, Иоаннлэсь гожъямъёссэс. 1912-тӥ арын та книгаез выльысь потто. 1973-тӥ арын, 1912-тӥ арын поттэмезъя, Швециын печатлало. 1992-тӥ арын Библиез берыктонъя институт евангелиез туала литература кылэ берыктэ но Ӟеч Ивор нимын поттэ. Сизьым сю сизьымдон куинь бамъем ужез дасязы кылтодон наукаосъя доктор Михаил Атаманов, Библиез берыктонъя институт, Ижевск-Удмурт епархиен кивалтӥсь Николай архиепископ бакель каремъя. Тодмо финн тодосчи Марья Картано та книгалэн богословияя редакторез луэ. Выль Сӥзён дас сюрс экземплярен поттэмын. Со ӧжыт. Асьмелы кулэ сю сюрс мында. Ӝӧк выл книгалы мед пӧрмоз со. Н. ЯКОВЛЕВ. Тюмень. ШУНДЫ Йырлы - шутэтскон, нош киослы - уж Арлы огпол луэ гужем. Шулдыр нуналъёсты котькудӥз ас сяменыз ортчытыны тырше. Кин ке Сьӧд зарезь дурын шутэтске, кин ке Краснодар шаерын емыш, бакча сиёнъёс бича, нош уноез, мон малпамъя, вордскем палъёсазы ик гужемзэс ортчыто. Шаерысьтымы егитъёсыз уже интыянъя центрын тыршисьёслэн та вие сюлмаськонъёссы лачак. Огъя югдурен тодматэ та центрын ужась специалист Наталья ВЛАДИМИРОВА: - Милям ёзъёсмы сизьым районын усьтӥськемын - Можгаын, Сарапулын, Сюмсиын, Воткинскын, Глазовын, Балезиноын но Дэбесын. Пусйыны кулэ, куд-ог районъёсын уже интыяны луонлыксы вань быдэс ар ӵоже, кылсярысь, можгаослэн. Соос юн кусып возё керттӥськон фабрикаен. Отын кылдытэмын, шуыны луоз, пичи бизнес. Со сяна, можгаос ик кролик вордо на. - Гужем ӵоже та центре вазиськем пиналъёс тросэз-а уже интыямын вал? - Июне но, июль толэзе но огъя лыдпус 4500 котырын бергаз. Мукет сямен вераса, районъёсын улӥсь пиналъёс пӧлысь, кин вазиськиз милемлы, 80 процентэз уже интыямын вал, Ижевскын - 20 процентэз гинэ. Городын тросэз заводъёс ужтэк сылэмен, пиналъёсты но уже интыяны секытгес вал. - Басьтом Ижевскез ик. Кинъёс тросгес вазисько: нылъёс, пиос? Кытын ужазы? - Ӵемгес вазисько трос нылпиё, анайтэк яке атайтэк кылем семьяосысь пиналъёс. Одӥг семьяысь кык-куинь кузя лыктӥсьёс но вань. Тросэз утялтӥськисьын ужазы, кылсярысь, "Динамо" но "Зенит" стадионъёсын, чугун сюрес вокзалын, библиотекаосын, музейын. Пиналъёс нуналаз ньыль час ужало. Тыршемзыя коньдонзы но. Толэзьлы уждунзы 90 манет котыр люкаське. Жаляса верано, выль дышетскон ар вуэ ини, нош нылпиос коньдон ӧз басьтэ на. - Ӝоген 1-тӥ сентябрь. Пиналъёс парта сьӧры пуксёзы. Кыӵе ке малпанъёсты ӧвӧл-а соосын азьланяз но ужаны? - Малпанъёс лачак гинэ, соосты быдэсъяны коньдон уг тырмы. Озьы ке но, туэ эксперимент выллем ортчытыны чакласьком. Оло, городын улӥсь студентъёс, бадӟым классъёсын дышетскисьёс, кудъёсыз ярато кырӟаны-вераны, милемлы вазиськысалзы. Нимысьтыз группа кылдытыса, шулдыр ӝытъёс ортчытъясалмы нылпи садъёсын но школаосын. ШУНДЫ "МИ АРТИСТЪЁС- СЮРЕСЧИОС", шуо асьсэ сярысь Селталась культура юртын ужасьёс. Татысь художественной коллектив быдэс ёроссэс шулдыртэ уго. Гуртын кысык ужан вакытэ соос агитбригадаен гуртъёсы потало. Пудо утисьёслэсь, бусыын тыршисьёслэсь жадем мылкыдзэс веськато. Артистъёссы ваньзы егитъёс, трос ӝутканэз ӧвӧл. Концерт сётоно луэ ке, отпускысь но пото. Туэ Сарапулын шаерысьтымы агитбригадаослэн смотрзы вал. Отын селтаос вормисе потӥзы. Нош Ангелина Воронова "Ӝужась кизилиос" конкурсысь И степенё Дипломен бертӥз. Геляез ёросын тодӥсьтэмез ӧвӧл - пичи дырысеныз ик анай-атаеныз, вынъёсыныз ӵош сцена вылын кырӟа. Эшеныз Галя Ивановаен культура юртын соос ӵошен гинэ удмутъёс бере, ёросын ортчылӥсь удмурт ужрадъёсты ас вылазы басьто. Радиокорреспондентэн Петр Коробовен ӵош удмурт кылын передачаос лэсьтыны малпало. Нылъёслэн сюлэмзы висе тапалъёслэн ӟучомемзылы. Асьсэлэн задор мылкыдэнызы но жингрес кырӟаменызы, оло, сайкатозы соос аспалъёссэс. И. АРТЕМЬЕВА. ТАЗАЛЫК Юртты аслыд ачид Валамон ини, кӧткылез врач эмъя. Но та висёнэн нюръяськыны турын-куаръёс но юрттозы. Кылсярысь, медицинской наукаосъя доктор А. Ураков дэмла тыпы сулэз, льӧмез, кудымульыез, вирсузясь турынлэсь (кровохлёбка), гондырпытьылэсь (девясил) выжыоссэс, чуньыбыжлэсь (конский щавель) кидыссэ, эмезь куаръёсты, лыз эмезез, кӧткыльтурынэз (зверобой), лулпу гурыосты кутыны. Та турынъёс пӧлысь огзэ 1-2 бадӟым пуньыен термосэ пононо, вылаз пӧзись ву 1 стакан кисьтоно, 20-30 минут пукетоно, сӥсъяно. Юоно нуналскын 3-4 пол ӝыны стаканэн. Сюлъёсысь микробъёсты быдто водкаен пукетэм турынъёс, емышъёс. Ӝыны литръем ӟенеликлэсь 3/4 люкетсэ тырмытоно льӧмен, вылаз йылтоно водка. Пукетоно коркан 3-4 нунал. Собере та суретэз сӥсъяно но юоно нуналскын 3-4 пол 1-2 бадӟым пуньыен сиськемлэсь азьвыл. Эн вунэтэ: кӧтвисёнэз тазьы эмъямдылэсь азьвыл кенеше врачен. Оло, та турынъёс мукет эмъюмъёсын уг тупало. ВАЛЭКТЭ ЮРИСТ СЭРЕГЕЗ НУЭ АДВОКАТ ЛИЛИЯ ШКЛЯЕВА Курдато ужысь куштонэн... Кивалтӥсьёс монэ пыкыло: уждэ урод быдэсъяськод, пе. Курдато: ужасьёслэсь лыдзэс кулэстон пумысен вылӥысь бумага вуиз ке, нырысь ик тонэ мозмытом. Тодэм потэ вылэм: кыӵе законъёс радъяло та секыт ужпумез? Т. ЯКОВЛЕВА, Ижын улӥсь. Бен, адямиез ужысь мозмытыку, янгыш лэсьтыны кема ӧвӧл. Малы ке шуоно, соин герӟаськем законъёсты ӵемысь уг тодо кивалтӥсьёс но, огшоры ужасьёс но. Пӧртэм пумо ваньбурен ужась организациос но предприятиос кылдытыса, выль кузёос законлэсь котькуд кылзэ санэ уг басьто. Соин йырин асьсэос ик дуно дырзэс судъёсын ортчытоно луо. Сыӵе учыръёслэсь утиськон вылысь, нырысь ик сак учконо Россия Федерациысь Уж сярысь законъёсын кодексысь 33-тӥ, 34-тӥ, 35-тӥ, 40-2-тӥ, 40-3-тӥ ёзэтъёсты (статьяосты). Ужасьёслэсь штатсэс но лыдзэс кулэстон сярысь гожтэмын 33-тӥ ёзэтлэн 1-тӥ люкетаз. Кивалтӥсьёс (администрация) ужан сярысь огкылэз (договорез) соку уретыны быгато, со (огкыл) лэсьтэмын ке, кӧня дырлы чакламез вератэк. Нош дыр пусъемын ке (шуом, одӥг яке куинь толэзь), договорез дугдытыны луэ та вакыт ортчемлэсь азьвыл но, югдур косэ ке ужасьёслэсь лыдзэс ичигес карыны. Штатэз яке ужасьёслэсь лыдзэс администрацилэн кулэстэмез луэ аслаз чакламезъя таӵе мугъёсын валче: уждун тырыны коньдон шыръян вылысь, ужась коллективез тужгес визьмо но быгатӥсь адямиосын юнматон вылысь. Ужасьёсты ичиёмытыку быдэстоно кӧня ке ужрадъёсты. Нырысь ик поттоно адямиез мозмытон сярысь приказ. Сое таин тодматоно ужан сярысь огкылэз уретэмлэсь ӧжытсэ кык толэзьлы вазьгес, адямилэсь кинюртэмзэ (подписьсэ) басьтыса. Шонергес вераса, приказ улын мед луозы таӵе кылъёс: Приказэн тодматэмын, мозмытон нунал вуытозь, ичизэ кык толэзьлы вазьгес. Документъёс ӵемгес ӟуч сямен лэсьтӥсько бере, со тазьы луоз: С приказом ознакомлен не менее чем за 2 месяца до указанного в приказе дня увольнения. Куддыръя адями пумитъяське приказ улэ кизэ нюртыны. Соку администрация кылдытыны быгатэ ужасез кулэстон ужпумъя комиссия. Отчы пырем адямиос лэсьто ужамзы сярысь протокол, пусъё, адями приказ улэ ӧз гожтӥськы шуыса. Шуом, кылдӥз таӵе югдур. Адямиез кык толэзьлы вазьгес тодматӥзы приказэн, нош сомында дыр ортчиз - ӧз мозмытэ. Берлогес нош ик кулэ луиз ужасьёсты кулэстыны. Адямиез выльысь алоно но кык толэзь витёно-а? Ӧвӧл. Кодексысь 40-2-тӥ ёзэт тупатэ таӵе дыр: ичизэ кык толэзь. Озьыен, алэм бере мозмытытозь тросгес но дыр ортчыны быгатоз. Малы кулэ кык толэзь? Организациын мукет уж ӧвӧл ке, яке вань но уг кельшы ке, адями мукет уж утчаны быгатэ. Та дыр ӵоже шедьтэмез луэ выль документъёс но мукет бумагаос, солэн, музон адямиосын ӵошатыса, вуж интыяз кыльыны тросгес правоосыз вань шуыса возьматон вылысь. Кыкетӥ ужрад - штатъя выль расписаниез юнматонъя приказ дасян. Со лэсьтӥське нырысетӥ приказэн ӵош. Ужасьёслэсь лыдзэс ичигес карыкуз, администрация нырысь мед кулэстоз нокинэн басьтымтэ должностьёсты (вакансиосты), собере гинэ - зэмос ужасьёсын басьтэм интыосты. Сотэк кызьы шыръялод уждун тырон фондэз? Таин ӵош лэсьтоно куинетӥ ужрадэз. Администрация, бумагае гожтыса, адямиез мед тодматоз организация пушкысь солэн специальностезлы но квалификациезлы тупась буш должностьёсын. Таосыз ӧвӧл ке - улӥгес квалификациен интыосын. Сыӵе должностьёсты дэмланы луэ уно пол, алэм дырысен мозмытон вакытозь. Ӵектэм интыослэсь куштӥськемез сярысь адями озьы ик гожтыса вераны кулэ. Озьы лэсьтыны пумит ке, комиссие пыртэм муртъёс тае пусъё протоколэ. Ньылетӥ ужрад. Шуом, организациын буш интыос ӧвӧл ни. Адямиез мозмытэмлэсь кык толэзьлы вазьгес администрация герӟаське калыкез уже интыянъя ёзэн (органэн), отчы ивортэ ужтэк кылёно муртлэсь нимтулзэ, профессизэ, специальностьсэ, квалификацизэ, уждунзэ. Та учыр сярысь мед тодоз ачиз адями но. Администрация адямилы юрттыны кулэ мукет азьысь выль инты шедьтыны. Коллективлэн огкылаз (договораз) озьы чакламын ке, котьку сяменгес ик, арняяз одӥг нуналлы кошкылыса, со утчаны быгатэ палэнын уж, уждунзэ быдэсак басьтыса. Кинлэн бен уже кыльыны бадӟымгес правоез вань? Нырысь ик - вылӥгес ужазинлыкен но квалификациен адямилэн. Та ласянь огкадь муртъёс пӧлын юнгес утемын таӵеосыз: - семьяен адямиос - кык яке ятыргес сюдоно-вордоно муртсы вань ке; - семьяен адямиос, пӧлазы ӧвӧл ни нимаз уждунэн муртъёс; - татын вис карытэк кема тыршемъёс; - татын ужакузы шуккиськемъёс яке профессиенызы герӟаськем висён кутэмъёс; - квалификацизэс ужаменызы ӵош вылӥ но шор дышетскон заведениосын будэтӥсьёс; - войнаысь инвалидъёс, СССР-ез утьыкузы бырем яке ивортэк ышем военнослужащийёслэн но партизанъёслэн семьяосысьтызы адямиос; - изобретательёс; - запасэ яке отставкае потэм военнослужащийёс, прапорщикъёс, мичманъёс яке офицеръёс пӧлысь ужасьёс, соос тыршо на ке службаысь кошкемзы бере пырем интыязы ик; - Чернобыльын пуштонэн валче кышкыт сиосын сэрен висисьёс, инвалид луэмъёс, улыны ярантэм интыысь музон азе выжтэмъёс. Организациысь профсоюзэ адями пыремын ке, администрация профкоме кулэ луись документъёс сётыса вазиське, сое мозмытыны соглаш луэмзэ яке луымтэзэ вераны курыса. Профком таӵе куронэз дас нуналскын эскерыны кулэ. Адямиез мозмытыны соглаш ке, солэн решениез ас кужымзэ уг ышты одӥг толэзь ӵоже. Куддыръя администрация ужысь кулэстоно муртлы дэмла кошкон сярысь заявление гожтыны. Организациын адямиез зэмен ик кулэсто ке, документъёсын ӵапак озьы пусъемын медло. Ас мылкыдъя кошкемъёслы кун уг сёты льготаос но компенсациос. Кыӵеесь соос? Ужасьёслэсь лыдзэс яке штатэз кулэстыку мозмем муртлы сётӥське толэзьем уждун мында юрттэт. Мукет уж утчатозяз, со басьтэ шоро-куспо уждунзэ.Та дыр кык толэзьлэсь кема медаз кыстӥськы, уждун пӧлы пыре вылӥ верам юрттэт но. Шоро-куспо уждун куддыръя утиське куинетӥ толэзяз но. Сыӵе решение кутэ уже интыясь ёз (орган), адями дырыз дыръя (кык арня куспын) отчы вазиськиз но уже интыямын ӧй вал ке. Ужанын вис куинь толэзьлэсь уно уг люкаськы ке, ужан стаж уретымтэ лыдъяське. Уж сярысь законъёсын кодексысь 170-тӥ ёзэт ужысь мозмытыны уг лэзьы нуны витись но куинь аресозь нылпиен кышноосты, нош анай пиналзэ огназ будэтэ ке - таизлы дас ньыль арес тырмытозь, нылпиез ӧлексы (инвалид) ке - дас куать арес тырмытозь. Вылӥ верам кышномуртъёсты мозмытыны яра, предприятие, учреждение, организация быдэсак бырыку гинэ, но соосты одно ик уже интыяны кулэ. Вылӥ верам куронъёсты администрация ӧз быдэсты ке, ужысь мозмытэм мурт одӥг толэзьскын судэ вазиськыны быгатэ, азьло ужаз кельтыны но ужтэк пукемез понна дун тырыны курыса. Сое судын мозмытозы пошлина тыронлэсь. ШӦКЫЧ Кутчало, однако... Бен, бен, вамышлы быдэ кадь кутчало али куанер адямиосты. Отчы манеттэ куштӥськод, татчы кыксэ кельтӥськод. Собере учкиськод но, кисы буш ини. Зэм, кисыосмес бушатӥсьёс та вакытэ уно гинэ. Но кытӥяз, узырмыны тыршон сяменымы, асьмеос ик ӵемысь пӧяськонэ кылиськомы. Басьтом Ижысь базаръёсты ик. Кӧня меда коньдон берга отын! Ужаса поттэмез но, лушкаса капыртэмез но. Сыӵе учырен пумиськыны кылдӥз Буммашысь трамвай дугдылон интыын. Базар нерге вань отын. Ньылё-витё егит пиос самой ӟеч интые султӥллям но быдэс ульча тыр кесясько. - Манет куштӥськод - кык басьтӥськод! Витьсэ сётӥськод - дассэ кисыяд понӥськод! Сюзэ кельтод - кык сюлы узырмод! Лыктэ, кожелэ, кепыр эн ваелэ! Зэмзэ но, барабан шалтыр берга, кубикъёс шарккето, кулэ лыдпус возьмато. Копейкаос но манетъёс киысь кие вуо. Уноез шумпотыса кисыязы коньдонэн кошко. Кӧня ке дыр ортче но, со "шудоос" выльысь лотерея шуонэн шудыны кутско. Валамон, асьсэ адямиос ик калыкез озьы пӧяса ӧтё вылэм. Но ужатэк узырмыны турттӥсьёс но трос гинэ шедё. Кызьы шуо, урмытӥсь шудон берпуметӥ копейкаез но ньылэ. Мон азьын ик одӥгез кышномурт, келям коньдонзэ берыктон понна, зарни пель угыоссэ кельтӥз. Воргорон суйпосын нуллон чассэ "кузьмаз"... Трос мурт озьы пӧяськеме шедиз. Нош милиция? Ӧз, одӥг милиционер но ӧз вуылы коньдон позыртӥсьёс доры. Соку ачим эскероно кариськи лотерейщикъёсты. Аслам сиинъёсылы уг оскиськы - куинь печатен зэмос лицензия мычизы. Отын гожтэмын: "634819 номерен В сериен лицензия сётэмын туэ 27 июле Ижевскысь администрацилэн лицензиосъя комитетэныз, кудӥз луонлык сётэ "Новигр" лотереяен шудонъёс ортчытыны". Нош сое басьтэм Ижысь Октябрь ёросысь ӧлексыослэн "БЛЭК-РЭД" огазеяськонзы интыяськемын Карл Маркс ульчаысь 431-тӥ юртэ. "БЛЭК-РЭД" ООО-лэн директорез В. П. Калмыков эш, Россиысь Президентлэн 955 номеро Указэз вылэ пыкиськыса, таӵе куриськон пӧрам: "Сӧсыръёслы но ӧлексыослы юрттон вылысь куриськом городлэн пӧртэм интыосаз "Новигр" лотереяен шудонъёс ортчытыны". Мар бен, лицензия сётэмын. Табере, чик кепыратэк, коньдон поттыны луоно. Валамон ини, налогъёс тырон сярысь веранэз ик ӧвӧл. Нош Октябрь ёросысь инвалидъёс тодо меда соос сярысь сюлмаськисьёс вань шуыса? Ӧйтӧд... Соин ик, кисыяды мултэс коньдонды вань ке, шудэлэ "Новигр" лотереяен! Но кутчалозы, дыр, однако... Н. ЛЯЛИН. Удмурт Республикаысь Кун Кенешлэсь кызь одӥгетӥ сессизэ люкан сярысь Удмурт Республикаысь Кун Кенешлэн Президиумезлэн Постановлениез Удмурт Республикаысь Кун Кенешлэн Президиумез пуктэ: Удмурт Республикаысь нырысетӥзэ ӧтчам Кун Кенешлэсь кызь одӥгетӥ сессизэ люкано 1998 арын 29 сентябре 10.00 часын Ижевск городын. Удмурт Республикаысь Кун Кенешлэн Тӧроезлэн нырысетӥ воштӥсез В. И. Агашин. Ижевск город, 1998 арын 25 августэ. � 563-И. Кун Кенешлэн кызь одӥгетӥ сессиез эскероз кун асваньбурен кузёяськон, налогъёсъя законодательствое воштонъёс пыртон, промышленностьын кунлэсь политиказэ нуон, электрокужымез шыръян пумысен законъёслэсь инъетъёссэс, озьы ик 1998-2000 аръёсы республикалэсь экономиказэ но социальной удыссэ азинтонъя программалэсь инъетсэ. Шӧкыч Кӧня "юоно" руль сьӧрын? Лыдпусъёсын таӵе таблицаез асьсэос медикъёс дасязы. Водительёс ӟеч тодо, дыр, юэмез возьматӥсь гумыез. Сое Шинкаренколэн трубкаез но шуо на. Озьы тӥни: медикъёс сое ас вылазы эскериллям - юо аракы, собере кӧня ке дыр ӵоже витё, эскеро. Но берло дыре инспекторъёс ужан амалзэс воштӥзы. Вина зындэс шӧдӥзы ке, соку ик экспертизае нуозы. Отын омырдэс уз басьтэ ни, вирдэс эскерозы! Табере учке но тодады возе, кӧня но ку юоно, кӧня дыр ортчыса тӧлӟе йырысь аракы, кӧня возиське со мугорын? Юон Кӧня юэмын (граммен) Кӧня возиське шокчем омырын (часэн) 40 градусъем кабак вина 50 1,0-1,5 100 3,0-3,5 200 6,5-7,0 250 8,0-9,5 500 15,0-18,0 Коньяк 100 3,5-4,0 Шампанской 100-1,0 Коньякен суро шампанской 100-150 4,0-5,0 Портвейн 200 3,0-3,5 300 3,5-4,0 400 4,4-5,0 сур: 2,8 градусъемез 500 уг возьматы 3,4 500 уг возьматы 6,0 500 20-45 минут Тӥни сыӵеесь лыдпусъёс. Нош штрафлэсь быдӟалаез тодэ ини автоинспектор гинэ. Н. СЕРГЕЕВ. "Удмурт дунне" газетлэн редакциез мур куректэмзэ вера Тебетеев Николай Николаевичлы кузпалыз Тебетеева Людмила Ильинична улонысь кошкемен валче. Шӧкыч Нюлэс омыр шат кудӟытӥз? Вань сыӵе пӧллиськон. Инспектор туж юн споръяське водителен. Таиз валэктэ ини, мон, пе, часаз 60 иськем ӝоглыкен гинэ мынӥсько вал, нош постовой шуэ - 100! Усьтӥське машиналэн бур ӧсэз, потэ шофёрлэн кышноез: - Картэ кудӟемын ке, соин споръяськыны пайдаез ӧвӧл. Та вӧзы ма ватсалод на? Юо Россей муъемамы, усыкмытозязы тордо. Вылаз ик, руль сьӧры пуксё на. Россиын кылем арын ог 1 миллион 600 сюрс юэм водительёс ӝегатэмын вал. Уно сюрс адями соослэн питран улазы быриз. Югдур пӧртэм ӧвӧл асьме дорын но. Туэ ӝыны ар ӵоже гинэ юыса вить сюрслэсь трос шофёр ӝегатэмын. Соосын сэрен 93 шудтэм учыр лэсьтэмын. Кемалы вунонтэм кылёз, дыр. Сюмси ёросысь Пумси лесничествоысь водительлы Виктор Телицынлы руль сьӧрын кабак юэмез. Алигес гинэ вал со учыр. Калыкез нуллон автобуслэн кузёез отпуске кошкем. Ма кароно? Соку лесхозлэн кивалтӥсьёсыз уже кутоно кариськизы ЗИЛ-131 автомобилез. Зэм, со калыкез нуыны-вайыны чакламын ӧй вал. Супыр-сапыр гинэ фургонэ ӟусъёс пуктӥзы. "Автобус" дась! Телицын нюлэскын ужасьёсты тэле ӝог гинэ вуттӥз. Соос кошкем бере, со азьвыл ик басьтэм ӟенеликсэ буль-буль! Кариз но супыр-супыр умме усиз. Тани ужан нунал но йылпумъяськиз, гуртэ бертон дыр вуиз. Нош Виктор агайзылэн ымзэ но бераллямез уг луы. Ярам, водитель интые правоен адямиез пуктӥзы. Но таизлэн Сюмсие мынэмез ӧз пот, Пумсие васькыса кылиз. Телицын табере нош ик кузё интые кылиз. Машинаяз эшшо кызь муртэ пуктӥз но ширтӥз ук Сюмси пала! Ог ньыль иськем гинэ ортчиз но, оло сюрес шоры учкыны вунэтӥз, оло нош ик ӟенелик тодаз лыктӥз. Син куспын машина сюрес урдсы бекмыльскиз. Озьы сизьымзэ пассажирез больницае келяно луиз, 11-езлы интыяз ик юрттэт сётӥзы... Одӥг гинэ ӟенелик! Таяз учыре со Виктор Телицынлы дуно ик усёз, дыр. Н. ЛЯЛИН. Шӧкыч Шӧкычлэн телетайп лентаысьтыз "Уг луы шыпыт улэме" Кызьы ивортӥз Россиысь телевидениея но радиовещаниея федеральной службалэн кивалтӥсез Михаил Сеславинский, телевещанилэн историяз нырысьсэ лицензиез басьтэмын Ижевскысь "Альва" телекомпанилэн. Сыӵе ужрад кутэмын, законэз тӥяса, фильмъёсты возьматэмез понна.... ИТАР-ТАСС-лэн ивортэмезъя. Но "Альвалэн" кивалтӥсезлы Василий Шаталовлы Москваысь кышкатон нокыӵе ик уг поты, лэся. Телекомпания уен-нуналэн бергатэ аслэсьтыз пурысь передачаоссэ, лушкам фильмъёссэ. "Альвалы" пумит прокуратура но милиция уголовной уж ӝутыны кулэ. Ӧйтод, пӧрмоз меда"? "Не могу молчать" передачалэн авторез, Иж городысь думалэн депутатэз Шаталов уго вуысь котьку кӧсын потыны быгатэ. Суредэз В. ПАХОМОВЛЭН. ТАЗАЛЫК Чылкыт улод - таза луод Та кылъёсты асьмеос улытозямы сокем ӵем кылӥськом, пуштроссы сярысь ум ик малпаськиське ни. Кожаськом, тазалыкмы юн, висёнъёсты вормоз. Нылпимылы миськымтэ улмо сётӥськом но вылаз ик серекъяськом на: тазагес будоз. Серекъяськом юнме. Угось калыклэн тазалыкез берло дыре трослы лябӟиз, озьы бере, висёнъёсын нюръяськон кужмыз но кулэсмиз. Со сяна, асьмеос тазалыкмы сярысь сюлмаськыны дышемын ӧвӧл-а яке культурамы уг тырмы-а. Собере йӧспӧртэм висёнъёсын черласьком но паймиськом: кытысь? малы? Кӧткылен (дизентериен) ӵемгес висё августэ но сентябре. Солэн микробез адямилэн сюлаз каръяське. Нылпиосты но пересьёсты туж "яратэ", таосты вормыны капчигес шуыса. Мугоре пыре кырсь киос пыр, сиёнэн, вуэн. Кӧтпушкын туж чаль йылэ, яд вӧлмытыса. Таин валче ӝутӥське температура, кӧт чутыръя, висись ӵемысь педло пота, секыт учыръёсы - вирен. Адями пушкысь потыса, микроб котырысь арбериосы интыяське. Кылсярысь, бакча сиёнъёсын, няньын 11 нунал улэ, дӥськутын - 20 нунал, музъемын - 3 толэзь. Кӧткыль паласькем бере висьыны кутскытозь, 1-7 нунал ортче. Куд-ог дыръя адями висемзэ уг шӧдылы яке капчи висе (шуом, температуратэк). Валамон, уг эмъяськы. Соку висён пыдло выжыяське, адями улытозяз соин курадӟе, черзэ котырысьтыз муртъёслы паласькытэ. Кӧткыль медаз йӧты шуыса: киосты чылкыт возёно. Сиськыны пуксемлэсь, сиён пӧрамлэсь, нылпиосты сюдэмлэсь азьвыл, пудоез сюдэм, коӵышен яке пуныен шудэм, педло потам бере киосты майталэн миськоно; пичи нылпиосты кырсь выж вылэ лэзьыны уг яра, шудонъёссэс миськоно. Гижыоссэс чылкыт возёно, ялан вандылоно; бакча но сад емышъёсты бызись вуэн, собере пӧсь вуэн миськоно. Вуэз но йӧлэз быректыса юоно. Вандэм яке пилиськем арбузэс, дыняез басьтыны уг яра. Ӝӧк вылэ понэмлэсь азьвыл соосты майталэн пыр-поч миськоно. Магазинысь басьтыкуды но гуртады возьыкуды чаклалэ: котлетэз 12 часлэсь кема возьыны уг яра, бакча сиёнлэсь салатъёсты - 12 часлэсь кема, йӧллэсь сиён-юонэз - 20 час; нянез, бакча но сад емышъёсты огазьын нуллыны уг яра. Ваньзэ нимаз пакетъёсы тыроно, тужгес но нянез; гужем сиён-юонэз кутъёслэсь ватыса возёно, кылем-мылемъёсты, пырыосты ӝӧк вылысь чылкыт утялтоно. Куяськон интыосты, гуосты, сёросъёсты хлорной известен пазяно. Номыр но вылез ӧвӧл кадь, озьы-а? Вань дэмланъёс туж тодмоесь. Ужпум мукетыз бордын: быдэсъяськом-а асьмеос соосты? А. Малюгина, паласькись висёнъёсты эмъянъя республиканской больницаысь врач. Ӵын но пень Жаляса верано, сыӵе секытэн люкам ваньбур син шорын кӧс пеньлы пӧрме, троссэ семьяосты пыдйылчие кельтэ. Ӝуаны шедемъёслы азьвыл но выльысь кутскыса юртъер пуктыны капчи ӧй вал, али веранэз ик ӧвӧл ни. Лыдпусъёс шурдытэсь. Таяз арын гинэ 7 толэзь куспын республикая 1,5 сюрс пол тылпу потаз. Кылем арен та вакытэн ӵошатыса, со 3,4 процентлы ятыр. 13 миллион манетлы 01 ваньбур быремын. Тылпуын сутскемын 106 адями (миымлэсь 36-лы трос), пӧлазы - 8 пинал (1997 арын 7 толэзь ӵоже та лыдпус 2 гинэ вал). Шуккиськемын 81 мурт. 588 юрт, 288 тонна турын-куро, 372 йыр пудо - ваньмыз эгырлы пӧрмиз. Изъянмыны шедиз 60 пала машина, трактор, гырон-кизён инвентарь. Нош маин мерталод улон интытэк кылем адямиослэсь куректонзэс? Тылпу пӧлысь 70 процентэз ӵапак отын лопыръяське ук, 40 процентэз - нимаз юртъер возисьёс дорын. Шуге-леке шедемъёслы юрттон тужгес но секытэн сётске трос квартираем пу коркан но вылӥ этажъёсын улӥсьёслы. Туннэ котькудӥз куинетӥез тылпу потэ тамак кыскисьёс бордысь. Трос кайгу ваё пиналъёс, юэмъёс. Берлоосыныз сэрен туэ гинэ 198 шимес учыр пусъемын. Кудӟем йырын 64 мурт быриз. Шӧдтэк шорысь тылпу ӝутскыса, уката но уин, адямиос ма карыны паймо, ӵем дыръя сайкаса но уг вуо. Гуртын улӥсьёс пӧлысь ӵын пӧлы усыкмыса кулӥз 60 мурт, Ижевскын - 21. Арлыдоос, пиналъёс, тылпу потэмез адӟыса, куд-ог дыръя уг но валало, ӝегатскытэк 01 телефонъя жингыртоно шуыса. Ас кожазы кысыны вырытозязы, тыл пумен юнгес гома, быдэс юртэз басьтэ. Дыраз ке ивортысалзы, юрттэт ӝог вуысал. Тылпулэн лыдыз туэ йылӥз 13-яз районын, городъёс пӧлын та ласянь югдур уродмиз Ижевскын, Воткинскын, Можгаын но Камбаркаын. Гуртын та вакытэ - кысык дыр: мынэ ю-нянез утялтон. Веранэз ӧвӧл, дыр, кыӵе секытэн сётӥське урожаез будэтон. Озьы ке но, татын но ыштонтэк уг ортчы. 14 пол тылпу ӝутскылӥз ни тысь куасьтон но куро люкан интыосын. Югдурез эшшо но уродмытэ телефонъёсты кысон. Туннэ нуналлы Удмуртиысь 260 гурт та муген дуннелэсь люкемын, шуыны луоз. Озьы быриз Завьялово районысь Бахилы гуртысь воргорон. Эстӥськонэн тырмытэм бак пуштыса, со ӝуаны кутскиз. Ивор сётыны, юрттэт курыны мыноно 11 иськеме. Телефон ке луысал, оло, улонзэ утьыны быгатысалзы на. Ӝоген кезьытъёс вуозы, соин ӵош - гуръёсты эстон дыр. Шунскон понна, кин но, кыӵе но амал уг малпа, нош пумыз одӥг - тылпу. Шуге-леке вуон учыръёс кылдозы пыдйылчиос ласянь но. Соос, подвалъёсы, корка сигъёсы каръяськыса, тамак кенжытозы, юозы. Та выллем учыръёс ӧжыт ӧй вал ни. Соин ик котыр ласянь улон интыосты утялтыса возёно, мурт пыремлэсь чаклано. Асьсэ хозяйствоен улӥсьёслы тодазы вайытэм потэ: куазь шуныт сылыку эскере муръё котырдэс, гурдэс, электропроводъёстэс. Дыр солы трос ик кулэ ӧвӧл, нош кышкыт адӟонэз бордысьтыды палэнтоды. Сыӵе ик курон эштосъёсын, колхозъёсын кивалтӥсьёслы: та бордысен кутске калык ваньбурез утён. Соин ик вань луонозэ лэсьтоно, ужам ужез ӵынлы но пеньлы пӧрмытонтэм понна. НИКОЛАЙ ИЛЬИН, Удмурт Республикаысь Тылпуэн нюръяськонъя управлениысь старшой инспектор. Газет гожъям бере 1998-тӥ арын 9-тӥ июле ыстэм 6-136/430 номеро гожтэтты но 1998-тӥ арын 30-тӥ июне "Удмурт дунне" газелэн 83-тӥ номераз потэм статья пумысен ивортӥськом, 77 номеро нылпи сад 1971-тӥ арысен ужа шуыса. 1986-тӥ арын сое пыр-поч тупатъямын вал, но ЦГСЭН-лэн 1998-ӥ арын 27-тӥ мае юнматэм 2 номеро предприясаниещъя (1 номеро приложение) 77 номеро нылпи садэз тупатъяны косэмын. Выльдоно юрт котырысь кенерез, воштоно укноосты но ӧсъёсты, выльдоно ву гумыосты но канализациез, сиён пӧран тӥрлыкез. Ивортӥськом тӥледлы, 77 номеро нылпи садэз ворсамен валче, удмурт группаосты кылдытонъя ужпум быдэстэмын. 50 но 112 номеро нылпи садъёсын кылдытэмын 3 удмурт группа. 77 номеро садлэн удмурт культураез азинтонъя люкам опытэз ыштэмын уз луы. Выльысь кылдытэм группаосын нылпиос удмурт культураез гажаны дышетскозы. Азьланяз та нылпи садъёс удмурт нылпиосты дышетыны быдэсак кутӥськозы. Т. С. АНДРЕЕВА, Ижевскысь Покчиосты дышетонъя но визьноданъя управленилэн кивалтӥсез. Банклы - 300 миллион доллар Та нуналъёсы СБС-АГРО банковской группалэн Удмуртиысь ёзаз шумпотымон ивор вуиз. Европаысь азинсконъя но выльдӥськонъя банк (ЕБРР) СБС-АГРО-лы 300 миллион доллар юрттэт висъяны дэмлаз. Сыӵе решение юнме шорысь кутымтэ. Дуннеысь та одӥгез кужмо банк СБС-АГРО-лы кизэ сётэ оскымон кредитор луэмез понна. ЕБРР-лэн коньдонэз мыноз гурт хозяйстволы, пичи ужбергатӥсьёслы но куд- ог промышленной предприятиослы. Со юрттоз та удысъёслы огсыр ужаны но калык хозяйствоын секыт югдурез тупатыны. Кылем арня вискын СБС-АГРО-лы Россиысь Центробанк юрттэт сётӥз вал. Со кутэмын банкъёс куспын кредитэз пытсаны. Та ужрад ортчытэмын Центробанклэн чакламез улсын. СБС-АГРО-лэн пресс-службаез. ТАЗАЛЫК Пиналды уин уг "чида" ке... Анай сюлмаське: нылылы 3 арес тырмоз ни, нош со уйёсы ӵемысь улаз кызя на. Маин ке сое валэктыны луоз-а? Эмъясьёслэн эскеремзыя, 2,5-3 аресозь куд-ог пиналъёс уин кызьзэс возьыны уг быгато на. Таӵе югдурез шуак уд дугдыты, куддыръя 3 аресъем пинал но кот валесын сайка. Озьы луэ нылпиды уйлы трос ву юиз ке, яке бугрес мылкыдын умме усиз ке. Энурез сярысь (куке пинал умн кызьзэ возьыны уг быгаты) сюлмаськоно ини 3,5-4 арес бере. Угось со ӵемысь нервной висёнъёс, кызьпуйы котыръёс висемен сэрен кылдэ. Соку нылдэс-пидэс одно ик эмъясьёс доры нуллэ. Вӧсьмоно 1-тӥ январьысен Америкаын чиедомыны юрттӥсь эмъюмъёсты рецептъёстэе вузаны лэземын ӧвӧл ни. Со паймымон эмъюмъёсты юэмзы бере, адямиослэн тазалыыксы лябӟе гинэ, эмез уг луы. Тросэз сыӵе эмъюмъёс асьме дорын нокыӵе биохимической эскеронъёс ортчемын ӧвӧл. Вузкарисьёслэн восьмыны юрттӥсь ушъяно чайёссы - огшоры, кӧтэз виятӥсь турын- куар. Адями ӵемгес педло потаса, зэм, оло, чиедомоз, но шлакъёсын ӵош мугорысь мукет кулэ луись веществоос кошкозы. Нырысь ик кенеше врачен - тодэ куаемдылэсь мугзэ. Нош врач доры, мынэмды ке уг поты, ӧжытгес сиське, тросгес ветлэ. Правительствоысь иворъёс ЖКХ-ез выльдон Правительстволэн Тӧроезлэн воштӥсез Юрий Питкевич ортчытӥз жилищно-коммунальной хозяйствоез выльдонъя комиссилэсь заседанизэ. Эскеремын жилищно-коммунальной хозяйстволэн юрттэтъёсызлы дунъёс тупатон сярысь ужпум, кылзэмын Воткинск но Камбарка городъёсысь администрациослэн та удысын тыршемзы сярысь ивортон. Соослэсь люкам опытсэс лыдэ басьтыса, комиссия мукет администрациослы дэмланъёс сётоз. ЖКХ- лэн юрттэтъёсызлы дунъёс Правительстволэн Президиумаз эскеремын луозы. Жилищно-коммунальной хозяйствоез выльдонлы но толалтэ ужаны дасяськемезлы сӥземын вал администрациослэн кивалтӥсьёссылэн кенешсы. Кенеш мукет ужпумъёсты но эскериз, кылсярысь, уждунъя пунэмез берыктон но нылпиос понна пособиосты тырон, городъёсын но ёросъёсын секыт югдурез тупатон. Постановлениос бордын ужан Правительстволэн Президиумез эскериз "ЕЭС России" РАО но "Газпром" куспын огкыллэсь инъетсэ. Огкыл чакла Удмуртиысь энергосистемаез азинтыны, электрокужымез поттӥсьёслэсь но кутӥсьёслэсь кусыпъёссэс радъя. Проектлэн инъетэз бордын ужаны дэмламын на. "Удмурт Республикаын вуэз коньдон тырыса кутон сярысь" постановленилэн но инъетэз юнматэмын ӧй вал. Постановление чакла ву понна дунэз кулэстыны. Гуртоос понна госзаказ Техникаез бусы ужъёслы дыраз дасян но воштос ёзъёс вуттон понна, Гурт хозяйствоя но сиён-юонъя министерстволы косэмын воштос ёзъёсъя заявка дасяны. Та госзаказ республикаысьтымы предприятиослы сётэмын луоз. Правительстволэн Тӧроезлэн секретариатысьтыз пресс-центр. Тимошкина Елена Михайловна Кема но секыт висемез бере 27-тӥ августэ улонысь кошкиз милям эшмы, Удмурт радиоысь корреспондент Елена Михайловна Тимошкина. Сояз дуннее кошкись котькуд адямиен люкиськон сюлэмез чепыльтэ. Сюлэм эшшо но ӝожгес луэ, улонэн люкиське ке егит мурт. Туэ Леналы 26 арес тырмиз. Алнаш ёросысь Кузьымгуртын вордскем нылаш, Удмурт кун университетэз йылпумъяса, ужан сюрессэ мытӥз Удмурт радиоын. Нуналысь нунал солэн быгатонлыкез юнмаз, куараез быдэс шаермылы тодмо луиз. Егитъёс но мӧйыос соин ӵош "Арня ӵукна" ӝӧк сьӧрын мылысь-кыдысь чай юизы, "Визылын" выль иворъёсын но адямиосын тодматскизы, "Амезь" радиоверанын элькунысьтымы гуртъёсысь улон-вылонэн тунсыкъяськизы. Удмурт радиоын ньыль ар тыршытозяз, Ленаез ӵош ужась эшъёсыз гинэ ӧвӧл, пумиськылэм адямиосыз но, чик тодмотэм муртъёс но яратӥзы. Востэм но сабырлы, ужез яратӥсь удмурт нылаш йыг- йыг султӥз пыд вылаз. Москваысь ВГТРК-лэн тодон-валанъёсты будэтонъя институтаз дышетскыса, туэ гинэ кыкетӥ дипломзэ басьтӥз. Нокин но ӧз малпа, улонэз яратӥсь нылмурт борды сьӧд чер мерскоз шуыса. Эшъёсыз но, эмъясьёс но вань кужымзэс, сюлэмзэс сётыса, Леналы юрттыны выризы ке но, кулонлэн гижыосыз улысь мозмытыны ӧз быгатэ. Гажано эшмес буре вайыса, сюлмысьтымы тау кариськомы ваньмызлы, кин, куронмылы вазиськыса, Лена понна уно вирзэ сётӥз, мукет сямен но юрттӥськиз. Леналэн сайкыт тусбуйыз ялан милям сюлэмамы улоз, солэн зарни фондэ кельтэм радиоверанъёсыз чузъяськылозы на Удмурт радио пыр. Мур кайгыреммес вераськомы Леналэн анай-атаезлы но вань ӵыжы-выжыосызлы, нылзы, сузэрзы-апайзы кулэм пумысен. Удмурт радиоысь корреспондентэз Елена Тимошкинаез берпум сюрес вылаз келялозы вордскем гуртысьтыз, Алнаш ёросысь Кузьымгуртысен 29-тӥ августэ. Удмурт радиоысь эшъёсыз. ТАЗАЛЫК Тодӥськоды-а тӥ? Асьме даурлэсь азьло ик ини Индиын туж секыт операциос лэсьтылыны быгатылӥзы. Инди хирургъёс визьмоесь но кышкасьтэмесь вылӥллям. Соос пекляе, кызьпуйые кылдэм из комокъёсты поттазы, дэез (грыжаез) вандылӥзы. Со сяна, ымныр вылын туж усто операциос лэсьтылӥзы, ишкалскем ныръёсты, ымдуръёсты, пельёсты интыязы пуктылыны быгатылӥзы. Та ласянь Европа трослы бере кылиз. 18 дауре гинэ европеецъёс инди хирургъёслэсь визьзэс, быгатэмзэс уже пыӵатыны ӧдъязы. ШӦКЫЧ Тамак но кампет Эк-эк-эк... Секыт ик, дыр, туала вакытэ зэмос кивалтӥсь луыны! Кызьы нош сотэк? Производствоед но медаз сылы, уждун но дыраз мед тыриськоз. Вот таиз ласянь котькытын ик шуггес, дыр. Но кызьы тодмо луиз та нуналъёсы, али, пе, Россиын шоро- куспо уждун выль дунъёсъя 1 сюрс 100 манет усе. Тани басьтом гуртоосты ик. Котькинлэн верамез потэ, соос вань сиён-юонзэс асьсэос будэто-вордо шуыса. Соиз бен озьы. Но кыӵе секытэн со сётске, гурт калык ачиз гинэ тодэ ини. Но ведь сиён-юон сяна, мукетыз но кулэ - дӥсез-кутэз но, ведра-тазэз но... Тани вуоно пуксёнэ пиналъёсмы но школае мынозы ни. Нош ик кулэ портфелез-костюмез, книгаез-тетрадез, катаез-ручкаез... Трос, трос кулэ. Дунъёссэ коньдонэн веранэз ик ӧвӧл ини. Уждунэз арен-толэзен уг тыро бере, умой луысал адӟем карыны Игра ёросысь "Зуринское" эштосын кутэм амалэз. Отын котькуд ужасьлы быдэ нуналаз 2 колды нянь, пе, сёто. Нош воргоронъёс та вӧзы ватсаса басьто на быдэн одӥг пачка тамак. Уго кысконтэк пиосъёслэн ужазинлыксы туж усе, шуо. Нылкышноос но ужазинлыксэс ӝутыны мылкыд каризы вал. Кузёзылэсь кампет курыны пыразы. Ӧз удалты. Ӧз висъялэ. Оло дуныз бадӟымгес, оло бартерзы ӧзгес пӧрмы... Б. НИКИТИН. Правительствоын Кезьыт нуналэ медам "пӧсялэ" Дыр ӝог ортче. Гуртын ӟырдыт бусы ужъёс мыно, нош жилищно-коммунальной удысын ужаське толлы дасясько. Соин валче та нуналъёсы Удмурт Республикаысь Правительствоын бадӟым кенеш ортчиз. Отчы ветлӥзы городъёслэн но районъёслэн кузёоссы. Ужрадэз усьтыса. Правительстволэн Тӧроез Павел Вершинин меӵак шуиз: - Толэз асьмелы ӟеч пумитано. Котькуд корка мед вуоз шуныт, газ, пӧсь но кезьыт ву. Адямиослэн улоназы нокыӵе шуг-секыт учыръёс медаз кылдылэ. Та ужпумъя кенешын ивортон лэсьтӥз Правительстволэн Тӧроезлэн нырысетӥ воштӥсез Юрий Питкевич. Со югдурез рос-прос возьматӥз. Кызьы бен мынэ музъем эгыр дасян? Оглом урод уг. Но куд-ог районъёс (Сюмси, Грахово, Алнаш, Красногорск) эгыр ворттонэн уг дырто. Со дыре ик кӧня ке интыос толлы дасяськонъя трос лэсьтӥзы ни. Кылсярысь, улон юртъёсты выльдонъя умой ужало Можга, Шаркан, Алнаш, Завьялово но музон районъёс. Но туннэ нимысьтыз пусъем потэ Воткинск городэз. Татысь коммунальщикъёс ваньмызлы адӟем карымон тыршо. Соос азьпал радын мыно теплосчётчикъёс пуктылонъя но. Со юрттэ ваньбурез шыръяны. Жаляса верано луэ, озьы шуыны уг луы данак ёросъёс но каръёс сярысь. - Ми асьмеос город понна котельной ӝутӥськон, - вера Воткинск городлэн мэрез Валерий Фридрих. - "Удмуртэнерго" огазеяськонлэсь номыр ум куре ни, милям ваньмыз асьмелэн луоз. Али ми ваньмызлэсь ичи, одӥг гикокалорий шуныт понна 118 манет басьтӥськом, нош республикаын со шорлыдын 140-150 манет возиське. Малы мукет интыос озьы ужало? Чик валантэм. Кенешын куд-ог районъёслэн кивалтӥсьёссылэсь кылзэс зол-зол юазы. Шаерамы секыт югдур кылдэ газ сётонэн. Мугез тодмо: "чагыр эстӥськон" басьтӥсьёс дун уг тыро. Али "Газпромлы" ичизэ 1,4 миллиард манет тыронмы люкаськемын, нош республика ар ӵоже газ басьтэм понна 880 миллион манет коньдон тыре. Куд-ог районъёс но городъёс асьсэ бюджетысьтызы та удысэ юн ичи уксё висъяло. "Удмуртэнерго" берло дыре электрокужым поттэ, газ интые, музъем эгырен эстыса. Валамон, со дуно усе. Нош кызьы выльдӥське улон коркаосты возён но коммунальной удыс? Та уж шуген мынэ. ЖКХ-ез выльдон сярысь трос вераськиськом, нош али ке но тодмо ӧвӧл на, кӧня дун тырыны кулэ квартира возись. Та ласянь, жаляса верано луэ, юн шонаське жилищно-коммунальной хозяйстволэн кивалтӥсез Валерий Загайнов. Озьыен, со бордысь тросэз потэ. Куке бадӟым кивалтӥсь уг тоды ас азяз сылӥсь ужпумъёсты, собере мар меда вераны быгатод на? Мукетыз герӟаськемын коммунальникъёслэн асьсэды урод воземенызы. Ижын улӥсьёс ӧз вунэтэ на "Горкоммунсеть" интыысь огазеяськонысь кивалтӥсьёслэсь укылтэмъяськонъёссэс, кун ваньбурез тус-тас каремзэс. Соин ик туннэ малпан кылдэ, та удысын вань луонлыкъёс кутымтэ на. Ведь вань секытсэ ужаса улӥсьёс вылэ гинэ погыльтыны уг яра. Россиысь законъёсъя семья улон интыез понна ӝынызэ, 50 процентсэ тырыны кулэ ке, асьмеос солы дась ӧвӧл на. Тани правительство интыысь кивалтӥсьёс азе ужпум пуктэ, музъем эгырез 1 яке 5 сентябрёзь ворттыны. Шат сое городъёслэн но районъёслэн тӧрооссы чик уг валало. Нош шаерамы югдур таӵе: али 18 сюрс тонна музъем эгыр вуэмын, нош со 4 сюрсэз гинэ басьтэмын. Кызьы сое умоен лыдъялод? Интыос но удысъёс висъямзэ но эстӥськонэз нуллыны уг дырто. Бен, куд-ог ёросъёсты валаны луэ, али пӧсь бусы ужъёс мыно, нош Камбарка (куинь хозяйствоез), Глазов, Сарапул но Можга городъёс сярысь озьы шуыны уг луы ук. Тӥни озьы та ужпум нош ик герӟаськемын интыосысь кивалтӥсьёслэн калык сярысь сюлмаськеменызы. Котьмар шу, но кезьыт тол вуоз, солы котькытын ӟеч-ӟеч дасяськоно. Правительство но сыӵе ик курон пуктэ. Г. РОМАНОВ. Азьланьтӥське шашкаиен шудонъя дуннелэн чемпионэз луон понна ӵошатскон. Вить пумиськон нокин вормытэк йылпумъяськиз. Вакчи партиосын нюръяськыса, азьпала потыны быгатӥз Алексей Чижов. Туспуктэмез Г. Юсаевлэн. ТАЗАЛЫК АНАЙ-АТАЙЁСЛЫ Инкуазь пунэмзэ берыктэ... Кызь ар талэсь азьвыл 10-15 процентэз нылпиос та висёнэн курадӟизы, али - 20-30 процентэз, азьло соин висизы городысь пиналъёс гинэ, али гуртын но городын огкадь висё. Со - аллергия, кызетӥ даурысь тужгес "модной" чер. Солэн вӧлмемез пумысен кенешиськом Любовь Павловна КРАСИЛЬНИКОВАЕН - нылпиосты эмъянъя республиканской больницаысь аллергологен. - Кызьы валаны луэ, нылпилэн аллергия кутскиз шуыса? - Пиналлэн бамъёсыз, киосыз я быдэс мугорыз, чик нокыӵе мугтэк, кожалод, горд виштыосын шобырско. Сыӵе амалэн адямилэн мугорыз возьматэ: сием сиёнэ ӧз кельшы. Озьыен, нылпилы яке анайлы (нуны нонтэ ке) соизэ яке таизэ сиёнэз сиыны уг яра. Сыӵеос пӧлы нырысь ик пыро кофе, какао, шоколад, апельсин, мандарин, лимон, чечы, курег пуз, курег сӥль, губи, мульы, зарезь чорыг... Нонтӥсь анай, нылпи та сиёнъёслэсь куштӥськизы ке, горд виштыос ас йӧназы ортчозы. Нош аллергие вуттӥсь сиёнъёс мугоре ялан шедизы ке, виштыос интые ву пульыос кылдо, соос пасясько, яра интыос пилиськыло, лыдо, тужгес - уин. Одӥг кылын вераса, экзема луэ. Экземаен висё 3-6 аресъем нылпиос. Бадӟымъёсызлы экзема интые нейродермит луэ. Таяз учыре ку кӧсэктэ, ым, синъёс котырысь, гырпумысь, пыдесъёсысь ку чурытоме, зӧкоме. Куд-ог дыръя аллергической реакция ортче ныр пушкын - аллергической ринит, синмын - аллергической конъюктивит, бронхъёсын - бронхиальной астма. Аллергия ас понназ туж кышкыт ӧвӧл. Курдыт мукетыз: со иммунитетэз - висёнъёсын нюръяськон кужымез - лябӟытэ, нервной системаез быдтэ. Соин ик аллергиен курадӟись нылпиос лябесь, висисесь будо. Соосты антибиотикъёсын эмъяно луэ. Нош та эмъюм сюлысь ӟеч бактериосты быдтэ, соос интые уродъёсыз йыло. Та висёнэз дисбактериоз шуо. Собере урод бактериос (кылсярысь, стафилококк) асьсэос аллергия сёто. Соин ик тод ини: аллергия эмъяса но, диета возьыса но уг ортчы ке, мугъёссэ утча кӧт пушкысь: бурмыны яке дисбактериоз люкетэ, дыр, яке муслэн, ӝушлэн висёнъёссы. - Кыӵе мугъёсыз та висёнлэн? - Нырысь ик, аллергия выжыысь выжые "палаське". Шуом, анаен-атай кыкназы аллергиен висиллям ке, пиналзы 80-90 процент учыре аллергиен вордӥськоз, огез гинэ ке - 50 процент учыре. Кыкетӥез, вуоно анай секытэн дыръяз мар сиемез потӥз но кӧня сиемез потӥз сииз, аракы юиз, тамак кыскиз ке. (Кыӵе сиёнъёс аллергилы инъет кылдыто шуыса верам вал ини.) Со сяна, солэн секыт токсикоз вал ке, нылпизэ секытэн вордӥз ке. Куинетӥез. Нуныез нонтӥсь анай диетаез уг чакла ке. Луэ озьы но: анайлэн йӧлыз уг тырмы яке чылкак быре. Соку нылпиез скал йӧлын, пӧртэм смесьёсын сюдо, ӝук, шыд дырызлэсь вазь сёто. Нош нуны соосты сиыны дась ӧвӧл на. 1-3 аресъем нылпиослы аллергия сиёнлэсь луэ, солэсь бадӟымъёсызлы - оломарлэсь но: тузонлэсь, коӵыш, пуны гонлэсь, сяська зынъёслэсь, тополь мамыклэсь... - Гуртъёсын вож нуныосты котьку но скал йӧлын сюдылӥзы, пиналъёс сиылӥзы мае мылзы потэ, коӵышъёс, пуныос адями вӧзын улӥзы... - Асьмеос котырысь улосмес улыны ярантэм кырсёмытӥм. Кыӵе омырен шокаськом, кыӵе вуэз юиськом, кыӵе музъем вылтӥ ветлӥськом? Тани Москваысь учёнойёс лыдъямъя, Удмуртиысь муосы нитратъёс 9 метр кеме пыӵамын. Озьы инкуазез ултӥяськом. Нош со асьмелы пунэмзэ берыктэ. Сое асьсэ вылазы нырысь ик шӧдо нылпиос, кылсярысь, аллергия пыр. - Вань висёнъёс нерваослэсь, шуо. Нылпиос но аллергия пумысен озьы вераны луэ-а? - Кызьы сотэк! Нылпи анаеныз, атаеныз туж юн герӟаськемын. Семьяын эчешонъёс пурӟо, кузпалъёс ог-огзы сярысь урод верало яке малпало гинэ но ке, нылпизылэн иммунитетэз лябӟе. Угось пичи пинал анай-атаезлэсь урод кужымзэс ас вылаз кыске. Нылпиез кужмысь карем но аллергие вуттыны быгатэ. Шуом, нылпиез садике сёто но, солэн шӧдтэк шорысь экзема кутске. Мугъёссэ утчаны кутскиськод но валаськод: со мукет нылпиослэсь кышка, воспитательлэсь возьдаське. Вылаз ик, анаез весь малпаське: садикын пиналъёс трос, воспитатель мынэсьтымзэ учкыса уг вуы... Солэн садиклы пумит мылкыдыз нылпиезлы выже. Аллергиез мед ортчоз шуыса, таӵе пиналэз яке садике нуллэмысь дугдоно, мылкыдзэ воштоно. Одӥг кылын вераса, аллергиен висись пиналъёслы, мукет пиналъёслы сярысь, тросгес эрик кулэ. Сётэ солы эрик! - Эрикен эмъян сяна, кыӵе амалъёсын аллергия ортче? - Диетаен. Аллергие вуттӥсь сиёнъёс нылпилэн ӝӧк вылаз 3 ар ӵоже медаз адскылэ. Кыӵе сиёнъёс солы уг кельшо шуыса тодон понна, анай дневник нуыны кулэ толэзь ӵоже. Отчы гожтоно, кыӵе нуналэ мае сииз нылпиды, горд виштыос потӥзы-а. Потӥзы ке, со сиёнлэсь куштӥськоно. Нылпиды йӧл сиыны уг ке быгаты, ӝукъёсты вуэн пӧзьтоно, жарить карем сиёнъёсты ӧвӧл сётоно, шӧг пӧрано. Горд виштыос яке ву пульыос потэм дыръя нылпиды пӧсяны медаз шедьты - эшшо но зол кормаськоз, яраос кылдытоз. Искусственной материалъёслэсь дӥсен нуллыны уг яра. Пылатоно арняскын ньыль пол, яра пушнер, шырбыж (подорожник), кӧткыльтурын (зверобой), ромашка, ыжлюгы (череда), чучытурын (чистотел), бутник (мята) вуэн. 3 литр вулы 3 бадӟым пуньыен турынъёс кулэ. Чаклаське! Та турынъёс пӧлысь котькудӥз аллергия сётыны быгатоз. Соин ик нырысь-валысь котькудзэ нимаз эскероно, одӥг турынэн вуын гинэ пылатоно. - Оло, аллергия - со инкуазьлэн воштӥськонъёсызлы дышон амал, ӟуч кылын вераса, адаптация. Соин ик соос тужгес юн адямиос ӧвӧл меда... Нош нылпиоссы тазалыксы вылэ уз но ӝожтӥське, оло... - Озьы но, вылды. Тани учёнойёс али но уг валало, малы аллергиен висись нылпиос тужгес визьмоесь, юн йыр сазёесь будо, соос ӟеч дышетско, эшъёссы трос луо. Инкуазь соослы вылӥ быгатонлыкъёс кузьма. О. ВАХИТОВА. Куазь Таяз шутэтскон нуналъёсы пильмаськылоз, интыен-интыен ӧжытак зорылоз. Тӧл шунды пуксён палась секундскын 4-9 метре пельтоз. Шаерамы уин 6-11, нуназе 14-19, Иж карын уин 8-10, нуназе 16-18 градус шуныт возиськоз. Юомы-а чылкыт ву? Ваньмы тодӥськомы, Ижысь улон интыосамы лыктӥсь ву туала куронъёслы уг тупало шуыса. Ма, городамы гинэ ӧвӧл, мукет интыосын но югдур сокем ушъямон ӧвӧл. Тодады вае ай Киясово ёросысь Вуж Салья гуртын алигес луэм учырез. Отын кырсь вуэн сэрен уно адямиос кӧткыль висён кутӥзы. Вуоно арын 1-тӥ апрельысен элькунамы ужаны кутскоз "Санпин" программа. Москваысь "Квок" научно-исследовательской институт юоно вулэсь ӟечлыксэ эскероз 65 пумо куронъёсъя. Но та ужлы Ижысь ву сётон ёзэтъёс дасесь ӧвӧл на. Урод ужало городысь вуэз чылкытатӥсь сооружениос но. Соин ик, таяз арлэн пумаз городлэн администрациез "Чылкыт ву" программа юнматыны кулэ. Со чакламын кӧня ке аръёслы. Коньдон тырмыт висъяськиз ке, оло, асьмеос но куке-соку чылкыт ву юыны кутском. Н. ПЕТРОВ. КЫЛЭМЫН НО МАЛПАМЫН А-ысен я-озь Адямиез адямилык адями каре. Адямиез ӟеч кыл бурдъяськытэ. Адямилы быдэ милиционер пуктыса но югдур урод луыны быгатоз. Алама адями сяськаосын тырмем убоысь но жаг турын утчалоз. Аслад эркын улэмед потэ ке, муртъёслы эркын улыны эрик сёт. Аслыд ачид прокурор но судья, милиционер но адвокат лу. Ачид алама ӧд ке луы, эшъёсыд но алама уз луэ. Бадӟым йырын но пичи визь луыны быгатоз. Басьтыны яратӥськод ке, сётыны но быгаты. Вӧзад оскымон адямиос вань ке, шудбур бадӟымгес, кайгу пичигес потэ. Вӧзаз куасьмем, сисьмем писпу ке сылэ, вож-вож писпулы но шулдыр уг поты. Дӥсез воштыса гинэ сямез воштыны уг луы. Егитъёслэсь задорлыксэс, мӧйыослэсь зӥбытлыксэс басьты. Ӟеч мылкыдо адями гинэ ӟеч мылкыд кылдытӥсь кылъёс вераны быгатоз. Ӟеч мылкыдо адями мукетъёслэсь но ӟечгес адӟоз. Ӟеч мылкыд кылдэ, вӧзын ӟеч адямиос луыку. Ӟеч сямъёс ӧжытлы гинэ лябомо ке, уродэз трослы кужмоя. Ӟечез уродэз вӧзын умойгес адӟиське. Йырсиосты аръёс уг, адямиос пурысьтато. Кайгуо синвуостэ муртлы эн адӟыты, шумпотон синвуостэ ваньмызлы возьматы. Кинлы ке мултэссэ сётӥд ке, мукетызлэсь кулэстоно луоз. Матысьёсыдлы кулэ луэмед - со шудбур, мукетъёслы но кулэ луэмед - кык полэс шудбур. Мӧйыослэсь но кылзы, егитъёслэсь но кылзы, малпанэдлэсь но быдэсак эн куштӥськы. Огез улонлэсь воззэ кыске, мукетыз со возь вылэ пуксьыса мынэ. Осконтэк кылем адями улонын кудпала мыныны уг тоды. Пальпотон пересь адямиез но пиналмытэ. Сюлэме ваньмыз тэре ке но, со одӥг алама кыллэсь пуштыны быгатоз. Тодон-валанэз луымтэ но визь басьтымтэ адями тысез луымтэ мульы кадь. Трос пӧяськисьлэн шонер верамезлы но уг оско. Улонлэсь курытсэ веръямтэ адями солэсь ческытсэ уг шӧды. Ӵуказе сярысь малпась адями туннэ ик ини тэк уг кылльы. Шонер сюрестӥ мыныкуд, одӥг-кык вамышлы гинэ палэнэ кожемед но азьлань мынондэ дугдытыны быгатоз. Эшъёсыд верамедлы серекъялозы, аслад серемед потӥз гинэ ке. Эшъяськон нюжаос сӥньыс кадь ӧвӧл - чигизы ке, керттылыны уг лу. Ялан сюлояса визьмо валэз но дыг карод. АНДРЕЙ ГИЛЬМАЕВ. Возьмам куно котьку дуно Таӵе мылкыдын витиськом шуо "Кизили" журналэз покчи но арлыдо лыдӟисьёсмы. Валамон ини, солы ми туж шумпотӥськом. Но шумпотонэн ӵош куректӥськом но. Угось берло дыре журналмы лыдӟись доры ӝегаса вуылэ. Тани туэ нырысетӥ номеръёссэ но тулыспал толэзе гинэ печатланы кутскизы. Ньыль номерзэ дасязы но типографиос милесьтым палэнскизы. Ӧвӧл коньдон. Озьы мукетъёсыз но удмурт журналъёс потэмысь дугдӥзы. Со вал куартолэзе. Ортчиз ини инвожо но, пӧсьтолэзь но, гудырикошкон но. Журналъёс озьы ик уг пото. Типографилэсь кивалтӥсьсэ валаны луэ. Отысь ужасьёс но уждун дыраз уг басьтыло, уг тырмо буёлъёс, плёнка, мукетыз. Алигес Удмурт Правительстволэн юртаз шаерысьтымы иворъёсты вӧлмытон удысын ужасьёсты люкаллязы. Ӵапак та шуг-секытъёс пумысен ик ӟырдыт вераськон мынӥз отын. Но тросгес кенешизы газетъёс, радио, телевидение сярысь. Удмурт кылын потӥсь журналъёс пумысен тыро-пыдо валэктон ӧй вал. Та кенешон бере кык арня пала ортчиз ни. Газетъёс огсыр печатласько, вераське радио, адӟытэ телевизор. Нош "Кизили", "Инвожо" но "Вордскем кыл" озьы ик уг пото. Та журналъёс политикаен уг выро, шуо, лэся. Возьмалозы ай. Ярам, ми возьмалом. Нош пиналъёс? Кивоштӥсьёсты будэтон но соосты шонер сюрес вылэ султытонлэсь бадӟымгес политика вань на шат?!. Улонлэн тазьы ӧръяськемез редакциослы туж бадӟым шуккет сётэ. Озьы ке но, "Кизилилэн" зэмос эшъёсыз милемыз уг аналто. Кин гожтэтэн, кин телефон пыр, кин редакцие вуылыса буйгатэ, азьланезлы оскон пыӵатэ. Зэм но, тӥтэк, гажано лыдӟисьёсмы, журналмы улыны уз быгаты. Тӥледлы но яратоно журналдытэк мӧзмыт луоз. Ойдолэ соку ог-огмес валаса, ог-огмылы юрттыса уломе. Возьмаса жадиды ни ке но, чиданды медаз чигы. Возьмам куно уката дуногес луэ. Ми тӥлесьтыд возьмамдэс но, чидамдэс но кулэезъя дунъялом. "Кизили" журнал тӥ доры матысь дыре одно ик йыгаськоз. Солы ӧстэс усьтыны эн вунэтэ. Эн вунэтэ вуоно арлы но гожтӥськыны. Тӥлесьтыд куронъёстэс лыдэ басьтыса, дунзэ ӧм воштэ. Почта пыр арлы гожтӥськон 24 манет сылэ, редакция пыр - 12 манет. Алексей ЕЛЬЦОВ, "Кизили" журналлэн валтӥсь редакторезлэн воштӥсез. Гурт улон Квардавозь-а, куар но возь-а? Котькин но, дыр, араз огпол шутэтскон вакытаз ке но, вордскем палъёсаз вуылыны тырше. Мон но август толэзьлэн кутсконаз, отпуск басьтыса, гурт палъёсам бертылоно кариськи. Мугез но уго бадӟым вал: 8 августэ анаелы Валентина Тихоновна Агафоновалы 70 арес тырмиз. Ми, солэн 5 нылпиез, кузпалъёсынымы но нылпиосынымы ӵош вордскем нуналаз одно ик бертыны тыршиськом, ӝӧк сьӧр тыраз люкаськиськом. Таяз учыре арнялы вазьгес бертоно кариськи: эшъёсме но адӟыны, Ита шурмылэн мускыт вуаз но пыласькыны, малпанэ вал на собере, оло, эшъёсы, гуртэ сярысь но газетамы, пӧй, маке гожто шуыса. Уго газет бамысь тросгес лыдӟоно луэ Алнаш, Можга, Пурга но Завьял палъёс сярысьгес, нош мынам вордскем Игра, Зура палъёсы сярысь гожъясь малы ке ичи. Вордскем Квардавозь гуртэ (Куар но возь вал, дыр, азьло нимыз) бадӟым ик ӧвӧл, 23 хозяйство гинэ, Зураысь 5 иськем палэнын. Азьвыл бадӟымгес вал. Колхозмылэн шор сюлмыз вал гуртамы, вал начальной школамы но. Отчы кык гуртысь пиналъёс ветлӥзы. Озьы ик вал на медпунктмы, клубмы, библиотекамы, вукомы, скал, вал но кунян гидмы но. Куке пичи колхозъёсты быдтыса, бадӟымесь хозяйствоос кылдытъяны кутскизы, милесьтым но куинь пичи колхозмес "Зуринский" совхозэ огазеязы. Соин валче гуртысьтымы ваньзэ выжтӥзы Зурае, кельтӥзы на одӥг магазинэз но фермаез гинэ. Калык пумен кин Зурае, кин Играе кошкылыны кутскиз. Озьы артысь Сьӧдойлуд (Сьӧд луд вал, дыр,) но быриз, али отчы кык корка гинэ кылиз на. 80-тӥ аръёсы гуртэ бертылыку ульчае потӥськод но, одӥг нылпи но уг адскы, пинал куара но уг кылӥськы вал. Улон воштӥськемен, егитъёс гурт палъёсазы берытскылыны кутскизы. Али учкисько но, адямиос йӧн-йӧн каръясько, улыно-вылыно коркаос пукто, ульчаын пиналъёс но тачакгес ни. Но табере ӧвӧл ни школазы но, библиотеказы но, мукетыз но. Озьы пиналъёс нырысетӥ классэ палэнэ Зурае, ветлоно луо. Котькыӵе куазен вить иськемез солань- талань ортчоно луо. Асьсэ гуртысьтызы ик дышетӥсьсы, Глазовысь пединститутэз быдтэм мурт но, пиналъёсын ӵош Зура школае ужаны ветлэ. Мумы-бубыослэн школа пуктыны курыса куараоссы ӟазырес луизы ни, дыр, но со куронъёсты кылэм-адӟем карись ӧвӧл. Квардавозь, Люквыр, Каргурезь но Зура пыро "Зуринское" эштосэ. Туэ тулыс директорзэс воштӥзы. Али хозяйствоен кивалтэ Елена Михайловна Чиркова. Секыт ик йӧтэ, дыр, кышномуртлы шальтрам хозяйствоез ӝутыны. Ужась калык но тани уждунзэ кык ар ӵоже уг адӟылы ни. Озьы ке но, котькуд нунал ужаны пота. Ветлон нуналам механизаторъёс техниказэс араны поттыны дасяло вал. Воштос ёзъёссы ке но ӧвӧл, ӧвӧллэсь но вань карыны тыршо. Квардавозь отделениын али куинь кутсаськон комбайнзы кылемын на, соос но вужесь, шальтрамын. Комбайнеръёс борды юрттӥсе юнматэмын Играысь СПТУ-ын дышетскись пиналъёс Василий Корепанов, Александр Агафонов, Сергей Корепанов. Секыт ик йӧтоз пиналъёсылы, 500 гектарлэсь ятыр муос вылысь юосты утялтыны. Кема ик ужаса ӧз вуэ. Я огез, я мукетыз комбайнзы тӥяськыса сылэ. Нош бератаз воксё бусыысь ик кошкизы. Ӟегзы вакчи будэмен, сое октыны, пе, уг луы. Вань осконзы валэс юослы. Али быдэс хозяйствоын силос утялтон кык комбайнзы ке, одӥгез гинэ ужа. Ужа соин пичиез братэ Алексей Агафонов. Нырысь Зураын силос дасязы, собере - Квардавозьын. Мон доразы ветлон нуналэ таиз но комбайнзы тӥяськем, котыраз машинаос ужтэк сыло, водительёс кин кӧлэ, кин тамак кыске, кин комбайнэз тупатъяны юрттэ. Юанъёсылы валэктонъёс сокем ик, капчи мылкыдоесь ӧй вал. Кытӥяз "мать" но каро, уго таӵе шулдыр куазен тэк сылон со уж ӧвӧл ини. Собере вылаз ик пӧсь куазен радиаторын ву но пӧзьыны кутске на. Соин ик уин 3 часэ ужаны потыса, нуназе пӧсь луытозь ужало. Тӥни озьы уло но ужало Квардавозьысь гуртоосы. Нош кыӵе луоз ӵуказеяз нунал, нокин но уг тоды, дыр. Р. КОРЕПАНОВА. ИРИНА САМИГУЛОВА Садам пушйиз тӧдьы сяська... *** Дырто вордскем гуртам - Тӧдьы кызьпу улэ. Вордскем корка сэргам Мунё возьма монэ. Пеймыт уин пишто Яркыт кизилиос, Татын котьку уло Лушкем сюлмаськонъёс. Татын сылэ огназ Шыпыт гинэ прудмы, Солэн тулкымъёсаз Калге уй толэзьмы. Гитара шудылэ Ӝожмыт крезьгуръёссэ, Гуртэ нош нырулэ, Кылзылыса сое. Татын мыным тодмо Котькудӥз ик сюрес, Юос мыкыръяло Пумитаса йырзэс. Шунды тылсиосын Монэ со шунтылэ, Татын гольык пыдын Пичи дыры ветлэ... *** Вань ужъёсме кельтыса, Дорад нош мон дыртӥсько, Тыныд гинэ оскыса, Анае, мон бертӥсько. Кырӟаломы, бӧрдомы но Уйшорозь нош ик пуком. Вань уродзэ вунэтом но Нош ӵошен шудо луом. Лек кылъёс мыным уд вера, Уродзэ ноку уд сӥзь. Яке вазь-а, яке бер-а - Нош тылэд яркыт пиштӥз. Выль ар ӝыт, монэ малпаса, Сюсьтылдэ тон ӝуатод. Мон понна шудбур курыса, Инмарлы тон йыбырттод... *** Вамышто возь вылэ вазь ӵукна - Лысвуэн мон отын мисьтасько, Шат соку кин ке но адӟыса Малпалоз: макем нош мон шудо! Уӵые, лыктэмме шӧдыса, Крезьгурзэ шулдыргес ни кисьтоз, Тӧдьы бус, шур вылтӥ вӧлскыса, Йырсазьме мынэсьтым суралоз. Сьӧлталоз вож турын пыдъёсме, Мугорме но соку сьӧлталоз. Мынэсьтым сӧсырмем малпанме Ас кезьыт омыраз со кыскоз. Мон луо, дыр, соку сьӧлыктэм, Мон луо, дыр, синтэм но ымтэм, Шур вылэ мон каллен лэзисько, Ву вылын уйшорозь лэйкало. Кылӥсьтэм, адӟисьтэм, сьӧлыктэм но шудо Нырысьсэ мон соку, дыр, луо! *** Кӧня курадӟисько ни, инмаре, Кӧня пӧртмаськисько! Кӧня ини нунал но уй ӵоже Поннам шыпыртӥсько. Уг пӧрмы гур, ӧвӧл ини кылбур - Сюсьтыл гинэ ӵындэ... Ӝуась кагаз, яркыт гомась тылпу Чиньыосме сутэ. *** Садам пушйиз тӧдьы сяська - Котыр улос но югытаз! Тӧдьы сяська, тӧдьы сяська Шунды шорын ялан югаз... Ӵукна тылси сое вешаз, Уин толэзь нош шунтылӥз, Ыркыт тӧлэд сое пелляз, Шуныт зоред нош миськылӥз. Мынам лулы но весь артэ Шумпотыса соку улӥз, Тӧдьы сяська выллем туннэ Гужем шорын со пиштылӥз. Шӧдтэк шорысь пеймыт пилем Вань инбамез сайяз, ӵоксаз, Кезьыт тӧлэд но йӧзоред Тӧдь сяськаме сюлмысь тӥяз. Тӥяз солэсь ненег куарзэ, Модосъёссэ но ишкалляз, Нуиз солэсь со мугорзэ, Кошкиз мынам лулы сьӧраз... Куке садам будӥз тӧдьы сяська... *** Пумтэм-йылтэм ортчо пеймытэсь уйёс, Нош ик урамын шӧтэмесь кылъёс, Нош ик кин ке но шимес кесяське, Нош ик подъездын пичи пи бӧрдэ... Нош ик ӵукнаозь юмша кӧрыше*, Нош ик, нош кезьыт городэ учке - Акыльтӥз ни город, сюлэм куриське Кошкыны ӝоггес, бертыны гуртэ. Бен, отын уз луэ шӧтэмесь кылъёс, Кырӟалоз уӵы, быдэс уй чирдоз, Уй инмын толэзь но лякытгес учкоз, Гуртэлэн тусыз но мусогес потоз. *кӧрыш - бускель Классъёс кулэсмо Ижевскысь дышетскисьёс понна туннэ нунал пӧрмоз-а шумпотон ваись праздниклы? Нылпиос понна со озьы ик луоз, дыр. Мӧйыослэн мылкыдзы музонгес. Кызьы вераз городысь калыкез дышетонъя управленилэн кивалтӥсез А. И. Капинов, вань быгатоноез лэсьтэмын, школаосты выль дышетскон арлы дасян понна. Бадӟым юрттэт сётӥзы мумы-бубыос. Секытгес югдур 2-тӥ школа-интернатын, 64 номеро школаын. Соосты тупатыны коньдон ӧвӧл. Дышетӥсьёслы уждун тырон ласянь берло нуналъёссэ югдур воштӥськиз. Отпуск понна июньлы-июльлы ваньмыз сямен пунэмъёс пытсамын, апрель но май толэзьёсъя уждунзэс басьтозы сентябрь шорозь. Улонмылэн тодметэз - син шорын. Арысь аре кулэсмо начальной классъёс, 1-тӥ классэ мынӥсьёс. Йыло школаысь пегасьёс. Кылем арын парта сьӧрын ӧз пуке вал 7,4 процентэз пиналъёс. Туэ понна лыдпусъёс тодмо луозы октябре. А. И. Копинов верамъя, куд-огез нылпиос книгатэк но, оло, кылёзы. Бюджетэ шедьымтэен, городъя коньдон учебникъёслы туэ арлы висъямтэ. Табере котькуд семьялы со пиналлы быдэ 450-600 манетлы усёз. Дышетскон ар кутскиз. Нош дышетӥсьёс тырмыт-а? Александр Иванович верамъя, 7611 инты туннэ нуналлы огез но буш ӧз кыльы. Зэм, со пӧлысь 820-ез - пенсие потэмъёс. Л. ДМИТРИЕВА. КАЛЫКЕН БЫРЪЕМЪЁС Выль ар - 1-тӥ сентябре Али гинэ педучилищеысь вуэм нылмурт вылэ олокӧня ныпъет ошизы. Дышетэм но классэн кивалтэм сяна, пионервожатой луиз. Нинаез озьы ик синйылтэм Азин нимо колхозэн кивалтӥсь Николай Иванович Резунов. Оло, кивалтод, пе, хозяйствоысь комсомолецъёсын но? Егитъёс но, нылпиос но татӥын трос. Тямыс классъем Чемошур-Куюк школаын 360 кузя дышетско. Эшшо ке - кык сменаен. (Кин малпалляз, 30 ар улыса, соослэн лыдзы 100-озь кулэсмоз шуыса?) Адямиос улӥзы, тыршизы, пинал вордӥзы, дышетскизы. Дас одӥгез дышетӥсь тодон-валанзэ будэтӥз заочной амалэн. Пӧлазы - Нина Андреевна Образцова. Институтъёсы кошко ке, урокъёссэс нуо арлыдо эшъёссы. Юлия Петровна Курбатова егит эшезлы ноку уг шуы: тазьы лэсьты, Нина. Лякытак гинэ валэктэ: - Урок - дышетонлэн инъетэз. Сое дунъяно но пайдаё кутыны быгатоно. Мон урокме тазьы-тазьы радъясько. Учкы, оло, тыныд но кельшоз. Егитъёслэсь азьветлӥсьсэс ӧтьыны ӧдъязы комсомоллэн райкомаз уже. ВЛКСМ-лэн данэз вал ке но, Нина Андреевна соглаш ӧз кариськы. Кыксэ дышетӥсез, сое но Римма Ивановна Гирбасоваез, ӝутказы Алнаш детдоме. Татын Образцова луиз директорлэн воштӥсез. Римма Ивановна выль интыын но сое индылэмысь ӧз дугды. Хозяйствоез нуон но коньдонэн вырон туж кулэ маке. Соосты валан ноку но мултэс ӧвӧл, азьланяз одно яралоз ай. Детдомын юртъеръёс но музон ваньбур ӟеч уд шуы. Но, алнашъёс сямен вераса, со алама чот ӧй вал. Данзэ эшшо ӝут на вылэм - Нина Андреевнаез выльысь лӧпкытъяны шӧтазы. Таяз учыре - партилэн райкомаз. Мын вал - азьло интыяз шуг-секытлэсь шимид шуозы кадь. Пыкиськиз. Райкомлэн секретарез, Анна Васильевна Беляева, бератаз ӝабыр-ӝабыр басьтӥськиз Образцова борды: тон кивалтод райисполкомысь калыкез дышетон отделэн. Нина Андреевна куалектӥз. Со одӥг нунал но директор гинэ но ӧй вал. Нош районын укмыс шор школа, сизьым - 8 классъемез. Отысь кузёос, йӧно адямиос, опыттэм муртэ кивалтӥсь чот карозы меда? Аслыз Анна Васильевналы умой. Калык пӧлын ужаны дышемын. Адямиосын котькуд пумиськонэзлы рос-прос дасяське. Школаын дышетӥсьёс азьын вераськоз одӥг кылын, гаражын - мукет манерен, правлениын шедьтоз копак музон ӧр. Нош макем сак чакла докладъёсты. Коть аслыз, коть вылӥгес кивалтӥсьлы лыдӟыны дасямын медло, одӥг мугыль-магыль интызэ но волятытэк уз кельты. Образцова вуиз роное. Партилэн райкоменыз соку кивалтӥз Юрий Семёнович Зайнаков. Интыосы потаса люкалляз тройка шуонэз - колхозлэсь председательзэ, партбюролэсь секретарьзэ, школалэсь директорзэ. Эскероно ужпум одӥг: кызьы юрттоно нылпиослы. Собере кыл бордысь - уж вылэ. Мар но ӧз лэсьтӥськы 1981-тӥ-1991-тӥ аръёсы! Алнашын та дас арез али но мур лулскыса тодэ ваё. Коммунизм бен ӧзгес вуы, нош солэсь куд-ог тодметъёссэ адӟыны быгатӥзы. Бадӟым но пичи гуртъёсын усьтӥськизы нылпи садъёс. Тачакез дышетӥсьёс корка пырон лэсьтӥзы. Выльмизы школаос, интернатъёс но столовойёс. Алнашъёслы трос юрттӥз Россиысь Вылӥ Советлэн соку депутатэз Виталий Александрович Соловьёв. Проект дасяно-а, школа юрт инъяно-а - солэн кибервылыз шӧдӥське. Данак интыосы соку вуизы выль машинаос. Роноын умме уд усьы. Дышетӥсьёс трос лыдӟисько, дуннеысь но, гуртысь но югдурез ӟеч валало. Соослэсь бере кылёнтэм понна, аслыд но весь выльзэ утчатэк уг луы. Ӟеч дасяськиськод ке, кыӵе усто пӧрме дышетскон арез пумитан! Август пумын котькуд директор ивортэ ма но ма лэсьтэмзэ, азьланьын быдэстоно ужрадъёссэ. Соин но, вылды, Нина Андреевна понна 1-тӥ сентябрь укша 1-тӥ январьлы. Выль дышетскон ар со выль ар ӧвӧл шат? 1983-тӥ арын партия косӥз школаез выльдыны. Пыриськоно сиён-юон поттонъя программаез быдэсъянэ. Школа аслыз кулэзэ ачиз вордыны-будэтыны мед сюлмаськоз. Тани бускельёс-бигеръёс таза кушман люканы дышиллям. Ветлоно но учконо. Колледж усьтоно ке, Москвае вуылытэк уз луы. Ма, асьме шаерын но адӟем карымонэз ӧжыт шат? Дышетонъя но воспитание сётонъя данак планъёссэс куспазы усто герӟало глазовъёс но уваос. Аспӧртэм уроклы пӧрме калыкез дышетонъя министрен Антонина Михайловна Лисинаен пумиськон. Кенешын воргорон музон чурыт-чурыт юа: тазэ вера ай, созэ ку лэсьтод. Арлыдоосты но, егитъёсты но школаын музэн индылэ: - Ручкадэс кутэлэ но кылэмдэс-адӟемдэс пусйылэ. Ваньзэ быдэстыны уд пӧрмытэ. Но бертыкуды сюрес вылын малпалэ на, мар тӥледлы кулэгес но кытчы кужымдэс ӧръяно. Бен, коммунизм ӧйгес вал соку. Керетон потылӥз, Алнаш черкогуртын нылпи садэ интыос окмымтэен. Нош отӥяз мар луиз? Кышноос кыкетӥ нуны вайыны уг дӥсьто. Вордскемзэ но нылпи садэ уг ваё, дун тырыны немаин. Озьы ворсасько огез яслиос, садъёс, комбинатъёс. Школае трактор курон сярысь вератэк ни, буёллы но коньдон ӧвӧл. Эх, улон... 1991-тӥ арын Нина Андреевнаез бырйизы райисполкомлэн председателезлы воштӥсе. Школалэсь татын но ӧз люкиськы. Со киын - ваньмыз "куанермем" удысъёс: дышетон, культураез азинтон, калыкез эмъян. Луэ-а вал соосты такем секыт учыре сюремлэсь утьыны? Шуг вераны. Калык ӧз дугды ужамысь но дышетскемысь, кырӟамысь но спортэн эшъяськемысь. Азьвыл сямен ик Алнаш валтӥсь инты басьтэ литературалы, культуралы но музон удысъёслы кибашлыос дасянын. Удмуртлыкез ӝутонын Образцовалэн тыршемез музон кивалтӥсьёслы аспӧртэм "образец" луэмын. Нина Андреевна буйгатсконэз уг тоды. Детдомын ужакуз ай сое бырйылӥзы Алнаш сельсоветэ депутатэ. Дасо ар талэсь азьвыл та ёз ньӧмыз понна кылдытэмын вал бере, кышномуртлэн мылкыдыз ӟеч ӧз кыльы. Ачиз верамъя, номыр пусйымонзэ ӧз но лэсьты кадь. Калыкен быръем муртъёслэн данзы табере чарак будӥз. Нина Андреевналы но туэ дэмлаллязы кужымзэ эскерыны. Сямыз чырмыт ке но, соку ик ма вераны ӧз тоды. Исполкомын дас сизьым ар пукиз ни. Уз шуэ-а: ма ӟечсэ ваид калыклы? Малы сокем курадӟонэ усим? Одно ик депутатэ кариськоно ке, вань устогес амал. Алнаш черкогуртысь сэзь калыклэсь шиё кылъёссэ кылонтэм понна бырйы кыдёкысь гуртэз. Отын сокем уг дӥсьто на кивалтӥсьёслы меӵкытъяны. Малы-о вордскем палъёсаз мынонтэмез мандат понна? Образцовалэн чималиен шудэмез ӧз поты. Кужымзэ эскерыны малпаз ӵапак татын, Алнашын. Южной посёлоке лыктӥз егитъёслэн азьветлӥсенызы Владимир Соловьевен ӵош. Таиз мыньпотэ: - Экзаменэ мынӥсь нылашлы кельшиськоды, Нина Андреевна. Дышем сямызъя Образцова таяз учыре но инметӥ ӧз лоба, лэсьтонтэмзэ ӧз сӥзьы. Тырмымтэос сярысь кылпум потыку, тушмонъёсты ӧз утча, ассэгес янгыше уськытӥз. Районын 28 депутат бырйизы. Сизьымзэ - Алнашын. Озьы Нина Андреевна но мандат басьтӥз. Адямиос ог-огенызы кемалась тодмоесь бере, огез но мыдыз дэмланы ӧдъязы: районысь Советэн тон кивалтыны кулэ, Нина Андреевна. Бен, азьлоез председатель депутатэ ӧз поты, интыяз мукетыз кулэ. Сессиын кин ке дэмлаз куара лыдъянэз шара ортчытыны: - Образцовалэсь устозэ тӧро ум шедьтэ. Удмурт Правительстволэн татчы лыктэм Тӧроез Павел Вершинин шонертӥз: - Уставады куремын лушкемен лыдъяны, сое эн тӥялэ. 28 пӧлысь 27-ез дурбасьтӥз Нина Андреевналы. Со луиз районысь Кенешлэн тӧроез. Воштӥсе юнматӥзы районысь фермер но крестьян хозяйствоослэсь йырзэс Виктор Бобровез. Депутатъёс кылдытӥзы пӧртэм комиссиос. Али соос люкало но радъяло адямиослэсь куронъёссэс. Наказ кыл берло дыре вунӥз вал. Нош сотэк азьлане учкыны шуг. Котькуд округын тодоно калыклэсь кулэяськонъёссэ, нимаз-нимаз люконо матысь дыре но берлогес быдэсъяно ужпумъёсты, юнматоно со понна кыл кутӥсьёсты. Депутатъёслы луэмезъя пичигес ке но дун тырозы бере, тӧролэсь сямен ик, соослэсь но кылзэс юаны кулэ. Алнаш - бадӟым город ӧвӧл, депутатъёс куспазы сокем уг вожвылъясько. Тэргаськонъёс ӧвӧл тон ӟуч-удмурт-бигер-пор шуыса. Коммунистъёслэн кивалтӥсьсы, депутат, кыӵе ке ужрад дася - юрттозы. Поръёс шулдыръяськыны медо - малы палэнскод? Ачиз Нина Андреевна кемалась пыриське ни "Удмурт кенеше". Кельше солы Валентин Кузьмич Тубыловлэн лад-лад ужан сямыз. Востэм калыкмы пумен дӥсьтӥсьгес луэ. Палэнысь Алнаше вуэмъёс кемалась-а кадь паймылӥзы: ма, тӥляд райисполкомады но удмурт сямен лабырто шат? Администрациен удмурт воргорон кивалтэ ке, малы абдранэз. Нина Андреевна тӧдьы вожъяськонэн учке пичи пургаос шоры. Город вӧзын улыса но удмуртлыксэс уг ышто. Макем сюлмасько усто кивоштӥсьёс дасян сярысь! Мар бен, улон одӥг интыын уг сылы. Ӟукыртыса ке но, азьланьскыны выре. Солэсь бере кылемез уг поты Нина Андреевналэн но. Образцоваез котькуд ласянь "образец" уд шуы, вылды. Солы но йыркуръяськисьёс вань, дыр. Котькудӥз понна ӟеч луыны шуг. Тужгес ик - аспӧртэм юн сямо кышномуртлы. АЛЕКСЕЙ ШКЛЯЕВ. Г. Юсаевлэн туспуктэмез. КЫРӞАСЬКО АС ПОННАМ Крезьгурез Николай УТКИНЛЭН Кылъёсыз Зоя ТРУХИНАЛЭН Кылисько ке огнам, Кырӟасько ас поннам, Учкисько инбаме, ураме. Шундые ке пиштэ, Сюлэмы бурдъяське, Кайгуэ но кошке кырӟанэн. Ӵок, ортчиз ке дыры, Ӵок, ӧз усьы ке шуд Калыклы кырӟаны-вераны. Кырӟасько ас поннам, Куарае но потэ, Весь кыске азьлане кырӟаны. Туж потэ вал мынам Кырӟаме-вераме, Но уг быдэсмы ӟеч малпанэ. Кылисько ке огнам, Кырӟасько ас поннам, Бен, сыӵе, дыр, мынам шудбуре. Возьматэ ОРТ Пичи Пурга районын алигес ужазы Общественной российской телевидениысь (ОРТ) журналистъёс. Соос "Крестьянские ведомости" передачалы сюжетъёс дасязы. Кылем арня нуналэ возьматэмын "Родина" сельхозкооперативын лизингъёсын ужамзы но Германиын "Клаас" комбайнъёсын юосты октэмзы-калтэмзы сярысь. Ваньмызлы валамон мед луоз шуыса валэктом на: лизинг со кыӵе ке дуно арбериез басьтэм понна пунэмзэ бӧрысь кӧня ке ар ӵоже тырон амал. Таяз арня нуналэ передачаын вераськон мыноз "Арама" эштосысь колбаса поттон цехлэн ужамез сярысь. А. НИКИТИН. Кыӵе куараен гырлы жингыртоз?.. Выль дышетскон ар кутскон азьын ортчиз республикаысьтымы дышетӥсьёслэн кенешонзы. Котькуд аре сямен ик вераськон мынӥз ӟечез но уродэз сярысь... Но туэ та педсоветын ӧжытгес вал юнме супыльтонъёс. Ваньмызлы валамон: пӧсекъям мылкыдэз эшъёсыд азьын кисьтыса гинэ югдурез уд ни тупаты. Зэмзэ ик, улон уката но секытгес луиз. Соин ик Россия Федерациысь Правительство, государстволэсь доходъёссэ шыръян понна, нимысьтыз ужрадъёс кутон сярысь 600 номеро поставновление юнматэ. Ваньзэ лыдъяса-чотаса ужано луоз дышетӥсьёслы но. Калыкез дышетонъя министрлэсь ужзэ быдэсъясьлэн А. Лисиналэн докладэз быдэсак та ужпумлы сӥземын вал. Шыръяно! Мае, кызьы? Огшоры улӥсьёсты та ӧтёнэн уд ни паймыты. Кемалась улӥськом, ӧвӧлтэм коньдонмес шыръяса. Нош кызьы меда ӧвӧлзэ вань карыны быгатозы дышетон удысын ужасьёс? Быгатомы, шуиз А. Лисина, асьмеос туж узыресь! Уд-а оскиське? Но школаослэн вань ук музъемъёссы, техниказы, мастерскойёссы. Ужез ӟеч радъяд ке, улыны луэ. Нылпиос ас киосынызы мар но со лэсьтыны йӧндыро ке, вузаны поттоно. Кылем дышетскон арын та ужез ӟеч радъяллям Ижевскысь 1, 5, 8, 9, 17, 31 номеро училищеосын. Нош выль школаос пӧлысь 80 процентэз ваньбурзэс ӟеч утьыны быгатӥллям. Соослэсь материально-технической базазэс выльдон сярысь туэ малпаськонэз ик ӧвӧл ни - дышетон удыс пунэм тыронъёс пӧлы выемын - 285 сюрс манет тыронъёс люкаськемын, со пӧлысь 119 сюрсэз - коммунальной удыслы, 3 сюрсэз - "Удмурттелекомлы". Мукетыз ӧтён, кудӥз сярысь ивортӥз А. Лисина, тазьы чузъяське: эшшо но кулэстоно куронъёсмес. Сое тазьы, дыр, валано: вунэтэ небыт пуконъёс, креслоос, диванъёс, чибориё телевизоръёс, видеомагнитофонъёс басьтон сярысь. Бен, школаосын азьвыл аръёсы но соос трос ӧй вал, табере, иське, уз но луэ ни. Нош мар меда кароно школа-интернатъёслы, нылпи юртъёслы но нылпи садъёслы, отын небыт мебельтэк нылпиосты возьыны уг яра. Антонина Михайловна верамъя, сыӵе юртъёсын небыт мебельлы тупатэм нормаос уг быдэсъясько. Кылсярысь, нылпи садын одӥг пиналлы небыт мебель 92 манет тыр луыны кулэ ке, усе 5 манет 30 копейка, школа-интернатын одӥг дышетскисьлы тупатэмын 1055 манет, усе - 225 манет. Табере азьланьын мар луоз? Нош кыӵе кулэяськонъёс пӧлы пыре меда мел? Мон сямен, дышетӥсьлэн со валтӥсь ужан тӥрлыкез кемалась валтӥсь кулэяськонъёс пӧлысь поттэмын ни. Тӧдьы-тӧдьы мел интые школаосы али вутто пурысь но котмем мел гинэ, соин гожъяськыны уг луы. Нош школаосы кыӵе ке амалъёсын вуэ ке умой мел... соку сое дышетӥсь пиналлы урок азьын сётэ, оже мынӥсь солдатлы патронъёс сямен. Озьы ӵошатӥз югдурез Якшур-Бодья школалэн-гимназилэн директорез С. Кудрявцев. Соин соглаш кариськыса, залын пукисьёс директорлэсь верамзэ кичабонъёсын пумитазы. Зэмзэ но луэ, дыр, мултэс кулэяськонъёсмес кызьы но озьы кулэстыны. Но малы ке йырын бергало социализм вакытэ ялэм ӧтёнъёс: "котькудӥзлэсь - быгатэмезъя, котькудӥзлы - ужамезъя" яке "котькудӥзлэсь - быгатэмезъя, котькудӥзлы - куремезъя". Озьыен, чигнаськом, эшъёс, чигнаськом. Кытын коньдон кылле на? Утялтытэк но ужатэк сылӥсь пионерлагерьёсын, нылпи садъёсын. - Таӵе учыръёсын пумиськылӥсько, - шуиз Воткинск городлэн мэрез В. Фридрих. - Пионерлагерь кемалась пытсамын ни, нош отын дас ар ӵоже "ужа" на возьмаськись. Солы уждун тыриське. Нош мае со возьма, ваньмыз тус-тас каремын ни бере?! Урамын гумыысь шуккыса ик ву кошке - нокин уг "адӟы". Но мултэс ву кошкем понна асьме кисыысь ик собере коньдон кыско ук. Озьы ик нокин эскерыса уг возьы, кызьы школаез яке мукет кыӵе ке юртэз тупатъяло. Сыӵе ремонт шуон улсын кӧня ваньбур кошке. Мон али но уг валаськы, малы школаосамы быдэн вить-тямыс завуч луиз. Тӥни озьы суп-сап ужаммы сэрен кӧня коньдонмес ыштӥськомы. Кызьы ивортӥз В. Фридрих, та учыръёслы пум понон вылысь, Воткинск городлэн Думаяз нимысьтыз комиссиос кылдытэмын, эмъяськон, дышетскон но ЖКХ удысъёслэсь ужамзэс эскерыса возён понна. Соин ик, лэся, татын дышетӥсьёслы но коньдон шедьтӥллям, пумен сюре эмъясьёслы но. Дышетӥсьёслэн уждунзы тыремын май понна. Мукет интыосын туж бере кылё - оло утчаськыны уг быгато, оло ас шекъёссэс шараямзы уг поты. "Вить арскын дышетӥсьёс тырмозы!" - оскыса шуиз А. Лисина. Нош туэ нырысетӥ сентябрьлы шаерысьтымы школаосын 304 дышетӥсь уг тырмы. Курадӟозы нылпиос. Лябгес тодозы физикаез, географиез, математикаез, иностранной кылъёсты. Куд-огез уз ветлы физкультурая урокъёсы. Кызьы потоно югдурысь? Одӥгез амал: кулэстоно министерствоысь но ведомствоосысь ужасьёсты. А. Лисина верамъя, туэ министерствовын кулэстэмын луоз 28 мурт, та удысэ пырись мукет ёзъёсын -170 адями. Тӥни кызьы но луэ на вылэм республикамылэсь уксёзэ шыръяны. Но татын нош ик юан кылдэ: школаосы-а меда мынозы со адямиос? Кызьы валамон луиз, нырысь ик кулэсмозы роноослэн нылпи садъёсын вырись отделъёссы. Мар понна? Нылпи садъёсты нимаз кузёослы вузаны юрттэмзы понна. Кун Кенешлэн но Правительстволэн огъя постановленизэс лыдэ басьтытэк, республикая 29 нылпи сад ыштэмын: Ижевскын - 8, Можгаын - 4, Глазовын - 3. Уз, уз мынэ, дыр, кулэстэм муртъёс школаосы, малы ке шуоно, Калыкез дышетонъя министерствооын чакламын усьтыны выль отделъёс, кылсярысь, технической надзоръя но шуккиськон учыръёслэсь утиськонъя, дышетон правоя но хозяйственной ужпумъёсъя. Кадръёсты дасянын, зэмзэ ик, йыртӥянъёс тырмо ай. Училищеосты йылпумъям егит специалистъёс берло дыре школаосы туж лябесь вуо. Кулэ-а меда гуртысь школаосы дышетӥсьёс-менеджеръёс? Сыӵе специалистъёсты но малы ке гуртъёсы ысто. Туж трос луизы психологъёс, со дыре ик быдэ вуымтэос пӧлын йыртэмасьёс но, наркоманъёс но арысь аре йыло. Нылпиосты будэтонын али кутӥськись амалъёсмы зэмзэ-а меда умоесь, та ужын минаос бышкам бусыетӥ кадь ум-а меда мынӥське? Шумпотымон ивор Гужем ӵоже дышетӥсьёс бугыръяськизы. Кылӥськиз: дышетӥсьёслы, пе, классэн кивалтэм но тетрадьёс эскерем понна коньдон уз тыриськы. Сыӵе вераськонъёс потӥзы, шуиз А. Лисина, Россиысь Правительство 600 номеро постановление кутэм бере. Соку ик тросэз малпаськонэ усизы, кызьы со уже кутӥськоз. Уксёез шыръян амалъёсты утчаны кутскимы. Бӧрысь С. Кириенколэн нимысьтыз гожтэтэз вуиз: дышетӥсьёслы тупатэм тарифъёс, дотациос но ватсанъёс азьло сямен ик кылёзы. Та иворез дышетӥсьёс кичабонъёсын пумитазы. П.С. Дышетӥсьёслэн бадӟым педсоветсы 21 августэ ортчиз. Правительстволэсь премьерзэ С. Кириенкоез 23 августэ Президент ужысь мозмытӥз. Табере кужыме кылё на меда азьвыл премьермылэн кутэм постановлениосыз но косонъёсыз? Педсовет йылпумъяськиз. Огъя верано ке, дышетонъя министрлэсь ужзэ быдэсъясь А. Лисина сое ӝутскем мылкыдын нуиз. Сыӵе мылкыдзэ со пыӵатыны выриз залын пукисьёслы но. Нош ӟеч мылкыд сётыны али туж секыт - дышетон удыс, школаос, быдэс Россия сямен ик, туннэ сюрес вожын сыло. Озьы ке но, Нырысетӥ сентябрь луоз, гырлыос жингыртозы, со вакытлы школаосмы тыллэсь кысэмын ӧз ке луэ. Татьяна БАННИКОВА. Удмурт Республикаысь Правительство мур куректэмзэ вера ӵыжы-выжыосызлы но матысь муртъёсызлы Можгаысь етӥн заводлэн директорез Лузин Павел Андреевич улонысь дырызлэсь вазь кошкемен валче. Гажано авторъёс! Ми бадӟым тау кариськом тӥледлы газетамы лулысь-сюлмысь гожъямды понна. Туэ, "Удмурт дуннелы" 80 ар тырмыку, тӥляд чуръёсты уката ик дуноесь. Кызьы тӥ тодӥськоды, газетын печатлам материал понна пичияк дун тыро. Конвертлы со тырме оло уг, нош коньдон ужпумъёсын вырись ёзъёс (органъёс) милемды документъёсамы пусйыны куро котькуд авторлэсь фамиллязэ, нимзэ, бубы нимзэ, улон интызэ, почта индекссэ, паспортэзлэсь номерзэ, сое кин но ку сётэмзэс. Соин ик редакцие гожтэт ыстыкуды эн вунэтэ вылӥ верам куронъёсмес. Лыктозы Европаысь кужмоосыз Вуоно арын, февраль толэзьлэн кутсконаз, асьме дорын ортчытыны чакламын биатлонъя Европалэсь чемпионатсэ. "Строитель" комплекслэсь дасьлыксэ эскерон вылысь Удмуртие вуылӥз дуннеысь биатлонистъёслэн огазеяськоназы ужась ӧнерчи. Огъя комплекслы умой дунъет сётэмын. Ӵошатсконъёсты ортчытыны кулэ луоз 1 миллион 800 сюрс манет. Оскон вань коньдонэн Россиысь физкультурая но спортъя кун комитет но юрттоз шуыса. Секытгес югдур электронной табло басьтонэн. Н. СЕРГЕЕВ. Эшмес буре вайыса Мон соин ӵош ужай Леонид Емельяновлэсь туэ 8-тӥ июле "Удмурт дуннеын" потэм "Пинал дырысеныз газетчи" статьязэ лыдӟыса, мон но верано кариськи улонысь вазь кошкем журналист Н. Н. Евсеев сярысь. Николай Николаевичен ӵош мыным ог дасо ар ӵоже ужано луиз Удмурт телевидениын. Соку со отын директор вал. Ужаны кутскемез бере ик Николай Николаевич котькинлы яраз. Солэн ӵектэмезъя ик кылдӥз иворъёсын "Нунал бӧрсьы нунал" программа но. Ма ватонэз ини - со аръёсы Удмурт телевиденилэн нимыз гинэ удмурт вал. Ог 70 процентэз передачаос мынӥзы ӟуч кылын. Иворъёсын выль программаез усьтэмлэсь азьло ми В. И. Косаревен ӵош нуиськом вал 30-40 минутъем "Гуртъёсын улон" передача. Куд-огез мӧйы учкисьёс али но со передачаосмес умоен тодазы вайыло на, малы, пе, быриз шуыса юало. Зэмзэ но, берло аръёсы "Удмуртия" ГТРК-ын гуртлы сӥзем одӥг удмурт передача но уг адӟиськы. Бен, вань на дас минутъем "Шаер" программа. Но солы туж ӧжыт дыр висъяське ук. Али ачим пенсие потэмын ни ке но, ӵемысь гожъясько ёросамы потӥсь "Рассвет" но "Ошмес" газетъёсы. Уг вунэтӥськы "Удмурт дуннеез" но. Нош гожъяськыны мылкыдме котьку ӝутъя вал Николай Евсеев. Тодам лыктэ одӥг учыр. Со вал 1980 арын июне. Мынам дасям программаям вераськыны кулэ вал Шаркан районысь "Путь Ильича" колхозысь азьмынӥсь механизатор. Трактористэ ныр вылысьтыз сьӧд очкизэ синмы мальдэ шуыса басьтыны пумит луиз. Соку Н. Евсеев "геройме" камера азе поттыны пумит луиз. Мар шуод: механизатортэк передача бездытгес пӧрмиз. Зэмзэ но, экран азьын сьӧд очкиен адями чебер уг адӟиськы. Синъёсыз но мылкыдыз ышо кадь. Николай Николаевич вералля вал: адями учкисьёс азе чылкыт ымынырын гинэ меда потоз. Мукетсэ но вераме потэ на: Евсеевлэсь азьло телевидениен кивалтӥз В. П. Ложкин. Со аръёсы иворъёсын "Арня куспын" шуыса нимам передача потылэ вал. Соку программаысь ӝыныезлэсь уноез иворъёс ӟуч кылысь берыктӥськылӥзы. Озьы, Евсеев вуэмен, передачаос удмурт шӧмоесь луизы. Нылпиослы передачаосты жингыртӥсь кариз журналист Семен Карпов. Учкись куремъя, "Гуртъёсын улон" передачамес кык пол но возьматылӥм. Удмурт драматургъёслэн пьесаоссы бордын мылысь-кыдысь ужазы режиссёръёс Иван Данилов но Василий Иванов. Удмурт телевидениын соку нырысьсэ чибориё плёнка вылэ гожтэмын вал "Сюреслэн пумыз ӧвӧл" телеспектакль. Нош пьесазэ гожтӥз Николай Евсеев. Николай Николаевич чидасьтэм сюлэмо, ялан выльзэ, умойзэ утчась адями но журналист вал. Одӥг пол, со вал 1980 арын сӥзьыл, "Гуртъёсын улон" бадӟым передача дасяй. Дасяны дасяй, нош сое нуись адями ӧвӧл. Диктормы Полина Ухова шуак висьыны усиз. Зэм, кытӥяз сое воштылӥз артистка Валентина Загуляева. Но таиз соку ӵапак уг ваньмы вал. Одӥг кылын вераса, программа "ӝуа". Соку кин ке Евсеевлы поттылэм, азьло, пе, Евгений Николаев передачаоссэ ачиз нуылӥз шуыса. Со мон доры пыриз но шуэ: - Евгений, тон передачаостэ ачид нуылэмед, лэся. Давай-ко, "тряхни стариной" ачид ик. Оло, пӧрмоз? Вераськы ай жинграк удмурт сямен. Только эн дырты, дыртон сямыд вань. Вера ичигес, самой кулэзэ, важнойзэ гинэ. Валад-а? Озьы аслым ик эфире потоно луиз. Передача пӧрмиз кадь. Но усто режиссёръёс ужелы "куиньлэсь" вылӥ дунъет ӧй сётысалзы. Та передача бере телекамера азе ачим ӧй пота ни. Николай Николаевич пырак шуиз: "Тон журналист бере, тынад ужед - усто информация гожтон. Гожты озьы, со котькинлы валамон мед луоз. Адямилэсь усто ужзэ ке возьматӥськод, возьматы озьы - мукетъёсыз но адӟем мед карозы солэсь. Курласькод ке, возьыт мед луоз! Кыл ведь со - пияш, туж лэчыт но кышкыт маке. Николай Николаевичлэн та кылъёсыз али ке но пель сьӧрам чузъясько на. Соос та вакытэ но ялан юртто мыным гожъяськон ужам. Тау солы. Е. НИКОЛАЕВ, журналист, ужысь ветеран. Якшур-Бодья ёросысь Селычка посёлок. Нылпиослы юрттэт - сиён-юонэн Та ужпум выль ӧвӧл. Со сярысь азьло но гожъям. Но берло дыре пиналъёс понна пособие сётонын куд-ог воштӥськонъёс ортчытэмын. Азьло анай-атайёс сое ужан интыязы ке басьто вал, табере юрттэт тыриське Калыкез улон-вылонын утёнъя министерство пыр. Нош мукетыз ужпум герӟаськемын коньдон тырмымтэен. Соин али, анай-атайёслэн мылкыд каремзыя, пособиез сиён-юонэн но вузъёсын сётъяны лэземын. Та ужез умой радъязы Вавож, Завьялово, Ува районъёс, Сарапул, Воткинск городъёс но куд-ог мукет интыос. Промышленной предприятиослэн, Зладокомбинатлэн, мясокомбинатъёслэн кун бюджетэ выт тыронёссы вань. Со чотын соос продукцизэс висъяны быгато. Кылсярысь, "Аксион"-холдинг (азьвыл "Мотозавод") радиоприёмникхёс но мукет вузъёс сётыны быгатэ, нош мукетъёсыз, шуом, пызь, сахар, сӥль но музон сиён-юон. Та ужлэсь палэнэ уг кылё "Сактон", "Зангари" огазеяськонъёс. Соос ӵектыны быгато дӥсь, Сарапулысь "Сарабелла" - пыдкутчан. Туннэ нимысьтыз пусъем потэ Воткинскысь администрацилэсь ужамзэ. Та ужез ӧръяны нимысьтыз комиссия кылдытӥзы. Соин кивалтэ мэр Валерий Фридрих. Комиссия умоесь кусыпъёс тупатӥз предприятиосын но школаосын. Нырысь-валысь кивалтӥсьёс та ужлэсь кулэлыксэ ӧзгес валалэ. Табере югдур воштӥське. Комиссия озьы ик чакла вузъёслэсь но сиён-юонлэсь дунъёссэс. Малы ке шуоно, куд-ог интыосын дунъёсты будэтыны тыршо. Умойтэм со. Анай-атайёс озьы ик дась нылпиослы пособизэс квартира тыронэн но мукет услугаосын (телефон, радио но электротыл) басьтыны. Г. РОМАНОВ. "Пӧсь" интыосы Та нуналъёсы элькунысьтымы Югдурез утёнъя министерство нимысьтыз отряд кылдытэ. Со ужалоз Дагестан но Чечня кунгож вылын. Отчы мынозы куамын куать егит пиос. Али соос кузь сюрес вылэ дасясько ни - дышетско ыбылӥськыны, мина пуштытъяны, нырысетӥ медицинской юрттэт сётыны, картаен ужаны. Тужгес бадӟым саклык висъяське наркотикъёсты шараян-эскерон ужлы. Дышетсконзы бере отрядэ шедёзы самой оскымонъёсыз гинэ. Пиос Кизляре вуыны кулэ 7- тӥ сентябре. Удмуртиысь отряд Россилэн "пӧсь" сэрегъёсаз ужалоз кык толэзь ӵоже. Б. НИКИТИН. Бомж Черк ӟезьылэн урдэсаз бомж Ӵукна ик вӧсяське туж ӝож. Вера со адӟонэз сярысь, Со тэльмыре лулысь-сюлмысь: - Улон, улон, тон мар турттӥд? Ужысь улляд, юрттэм кельтӥд, Губырмытӥд, пурысьтатӥд, Ӟустариез музэн куштӥд, Мон пумитэ ӝутӥд сьӧд тэль, Отчы дасяд мыным эзель, Малпанъёсме ӵокта пеймыт, Сюлмам тылпу гома кышкыт... Инмар, тон адӟы вал монэ, Монэ эн кары палэнэ, Сёт куарадэ, сёт визь-кенеш, Ачид кадь ик оскымон эш, Луэ ке, сёт на шуд-дэлет, Ӟечлык ваньлы чебер оскет. Черк тубатлэн лёгетаз бомж Пуке на ӝытазе но ӝож. Лултэм уксё югыраса Шер-тур кылле изьы пыдсаз. Петр ПОЗДЕЕВ. Спорт Шашки Кылем арня вискын Ижевскын йылпумъяськиз шашкиен шудонъя Россиысь кужмоосыз радэ шедёнъя нюръяськон. Шудонэ пыриськиз 23 аресозь 9 воргорон но 5 нылкышно. Огъя турнирын 11,5 очко люкаса (13 пӧлысь) вормиз Казаньысь спортъя мастер Дмитрий Цинман. Нылкышноос пӧлын, 10 очко басьтыса, нырысетӥ интые потӥз спортъя мастер, 100 клеткаем шашкиен шудонъя дуннелэн чемпионкаез Тамара Тансынкужина (Башкирия). Удмуртиысь 6 спортсмен пӧлысь умой шудӥзы спортъя мастере кандидат Ижевскысь 41-тӥ школаысь Денис Кудрявцев, 81-тӥ школаысь Сергей Иванов, 30-тӥ школаысь Сергей Миронов. И. ВЕЛЬТМАНДЕР. Шахмат Ижевскысь Октябрь районысь спорткомитет но 6 номеро нылпи спортивной школа ортчытӥзы шахматэн шудонъя пумиськон. Со сӥземын вал школалэсь азьвыл директорзэ но жадёнэз валасьтэм тренерез Виктор Васильевич Емшановез буре ваёнлы. Ӵошатсконъёсы пыриськизы спортъя мастер, спортъя мастере 5 кандидат но нырысетӥ разрядэн 6 егитъёс. Шудон куинь арня мынӥз. Вормисе потӥзы МВД-ын ужась Артур Арзамасцев (11 пӧлысь люказ 8,5 очко), Удмурт госуниверситетысь Андрей Витвинов но "Удмуртнефтегазстрой" АО-ысь инженер Юрий Клейменов, Ижевскысь технической университетысь Денис Карпицкий. И. ВЕЛЬТМАНДЕР. Жингыртӥз 100-этӥзэ Завьялово районысь Якшур шор ёзо школа туэ пусъе даур тырмонзэ. Солы сӥзьыса, кылем субботае ортчиз сӥё-дано пумиськон. Туала дышетскисьёсын ӵош линейкае султӥзы 20, 30, 40, 50 ар талэсь азьло школаез йылпумъям выпускникъёс. Тодэ ваёнъёс, ӟечкылан кылъёс - ваньмыз та нуналэ огинэ вуизы. Нимысьтыз дан - дышетӥсьёслы, вань улонзэс яратоно ужзылы сӥземъёслы. Соос пӧлын Перевозчиковъёс: Софья Григорьевна но Григорий Карпович, Федосья Семеновна Иванова, Нина Васильевна Файвлевич, Елизавета Ивановна Скобелева, Ираида Григорьевна Сосунова... Кӧня нылъёслы но пиослы улон сюрес бырйыны юрттӥзы, кӧня тодон-валан сётӥзы - номырин уд мерта. Огзэ вералом - интыязы кельтӥзы оскымон кивоштӥсьёс. Юбилейлы сӥзем празднике ӟеч сямъя вуизы куноос: Завьялово районлэн, "Путь Ильича" колхозлэн, бускель "Восточный" совхозлэн кивалтӥсьёсыз. Школаез дышетскон арлы дасянын соос но быгатэмзыя юрттӥзы. Зэм, юбилярлы но али капчи ӧвӧл: коньдон августлэн пумаз гинэ вуэмен, тупатъян-выльдон ужъёс туннэ но мыно на. Озьы ке но, пиналъёслэн мылкыдзы ӟеч, сӥзьыл куазен пиштӥсь шунды кадь. Нош школалэн зэмос праздникез ортчоз октябрь толэзе. Соку татчы куное вуозы вань дышетэм нылъёсыз, пиосыз. Озьыен, выль пумиськытозь! Л. МЕДВЕДЕВА. Печатлалоз "Унисет" "Унисет" - со Германиын лэсьтэм газет печатлан машина. Сое бичаны кутскизы Ижысь полиграфкомбинатын. Вань ужъёс чакламъя мынӥзы ке, 111 тонна кыскись машина дась луыны кулэ ни, дас арня ортчыса. "Унисет" трослы вылӥе ӝутоз газет-журналъёслэсь ӟечлыксэс, кулэстыны юрттоз изданиослэсь асдунзэс. Н.ПЕТКЕЕВ. Ольга Александрова понна Ферд городын (Норвегия) тазьы пумиталоды шуыса, Удмуртиысь вуэм Ольга Александрова ӧз малпа вал. Юромо солы шуыса, Калык крезьгыръя фестивальлэн директорез Ингебьерг Эрикстад ӝутыны косӥз Россилэсь Норвегиысь посольствоын национальной флагзэ. "Ми туж шумпотӥськом, туэ милям фестивалямы Фердын Россиысь адями ассэ сыӵе возьматӥз шуыса, - ИТАР-ТАСС-лэн коррепондентэзлэн шуиз Эрикстад. - Таяз учыре ми нырысь интые пуктӥм дуннеысь пичи калыкъёслэсь культуразэс. Ольга туж быгатыса возьматӥз ас калыкезлэсь устолыксэ". Гужем Норвегиын, Уй пал Европаысь мукет странаосын - Швециын, Финляндиын сямен ик, луо пӧртэм фестивальёс. Соос ортчытӥсько бадӟым индустрия центръёслэсь палэнын. Соосын сыӵе фестивальёс: классической операысен кутскыса, кыӵе ке ёрослэн калык эктонъёсыз дорозь. Но вань соос пӧлын асьсэдыз кемалась умоен гинэ возьматӥсьёсыз, отчы пыриськон понна, нимысьтыз ӧтё. Норвегиын сыӵе одӥгез бадӟым фестиваль луэ Фердын артистъёслэн люкаськонзы. Та калык крезьгуръя фестивале ветлӥзы 22 странаосысь 230 артистъёс. Ольга Александрова возьматӥз "Куинь сюан гуръёс" спектакльзэ, кудзэ со нырысьсэ 1994 арын Финляндиын пуктӥз но вань калыкез паймытӥз вал. Фердын О. Александрова озьы ик Индиысь, Бутанысь но Финляндиысь артистъёсын ӵош пыриськиз "Калейдоскоп" спектакле, сое пуктыны юрттӥз Европейской союз. ИТАР-ТАСС. Сюресты вольыт мед луоз! Нырысетӥ сентябрь - котькудӥз семья понна нимысьтыз нунал, со тодэ ваёнъёсамы пыраклы кыле. Угось ваньмы асьмеос - школалэн нылпиосыз, со асьмеды, анай сямен ик, бадӟым улонэ поттӥз, тодон-валанъёс сётыса, шаермес, Атыкай музъеммес яратыны дышетыса. Тодон-валанъёслэн нуналзы сюлэмез ӟечезлы осконэн, дуннеез валаны тыршемен тырмытэ. Школае нырысьсэ мынэм пиналъёс улон книгалэсь нырысетӥ бамъёссэ туннэ усьтозы, нош вуоно выпускникъёс выль пуштросэныз тодматскозы. Соин но, вылды, вылез дышетскон ар сӥзьыллэн нырысетӥ нуналаз сюрессэ мытэ. Дышетӥсьёс но, анай-атайёс но нылпиоссылы тунсыко, шудбурен пачылмем улон сӥзё, шуг-секытъёслэсь утьыны тыршо. Ми тодӥськом, умой вакытъёс вуозы, нош вань сюлмаськонъёс вунозы гырлы жингыртэм улсын. Праздникен тӥледыз, гажано дышетскисьёс но студентъёс, дышетӥсьёс но анай-атайёс! Юн тазалык тӥледлы, ужады азинсконъёс, выль вормонъёс, вань малпанъёсты мед быдэсмозы. Тодон-валанлэн дуннеяз сюресты мед удалтоз! Удмурт Республикаысь Кун Кенеш. Удмурт Республикаысь Правительство. КОНЬДОН ДУННЕЫН Огазеяськизы куинь банкъёс Россиын коньдонэн секыт югдур кылдэмен валче, шуге-леке усемын банкъёс но. Кема-а таӵе вакыт кыстӥськоз? Вераны шуг. Тани 25 августэ Москваысь валютая биржаын долларлэн кужымез 10 процентлы синӥз но 7,86 манет луиз, нош 26 августэ 8,26 манетозь ӝутскиз. Тӥни озьы доллар я будэ, я кулэсме. 17 августэ доллар йылыны кутскемен, адямиос банкъёсысь коньдонзэс басьтыны но долларе берыктыны ӧдъязы. Югдурез тупатон но вкладчикъёсты утён вылысь, куд-огез банкъёс огазеяськыны кутскизы. Кылсярысь, ОНЭКСИМ банк, "Менатэп" но Мост-банк ӵош кариськон сярысь мылкыдзэс веразы. Нырысь-валысь банковской холдинг кылдэ. Отчы котькудӥз банк быдэн 51 процент акциоссэ сётэ. Огазеяськон туэ ар пумын йылпумъяськоз. Холдинглэн директоръёсызлэн советазы котькуд банклэн 3 адямиез пыроз но 9 мурт луоз. Холдинглэсь ужзэ радъялоз ОНЭКСИМ банклэн правлениезлэн кивалтӥсез Михаил Прохоров. Директоръёслэн советсылы тӧро быръёзы, "Менатепен" но Мост-банкен кенешыса. Россиысь куинь бадӟымесь банкъёс огазеясько, коньдон кризисысь капчиенгес потон вылысь. РФ-ысь Центробанк холдинг кылдытонэз умоен лыдъя. Нош "Евразия" банкмы ОНЭКСИМ банклэн оскымон юрттӥсез луэ. Вылаз ик, вкладчикъёсты утён ласянь ОНЭКСИМ кусып тупатӥз Россиысь 12 бадӟым банкен. "Евразия" банклэн пресс-службаез Аръёс но адямиос Солдат понна - чималиен шудон?.. Ваньмызлы тодмо Ленинградлэн Быдӟым Отечественной война дыръя котыртэмын (блокадаын) улэмез. Но тросэз уг тодо тани мае: финнъёслэн армизы уй паласен лыктыса огазеяськыны турттэ вал немецъёслэн армиенызы. Соку город кык полэс котыртэме сюрысал. Озьы финнъёс асьмелы пунэмзэ берыктыны малпазы "финнской кампания" понна. Кызьы тодмо, СССР-ысь Правительствоез, уй пал границаоссэ паськытатон но юнматон вылысь, 1939 арын Финляндилы ожмаськон ялӥз вал. Карел фронтлэн Военной Советаз ужам мурт Г. Куприянов со сярысь тазьы тодаз вае: "Карелилэн лымшор палаз туж секыт вал. Финнъёс ялан кышкатыса возизы Карелилэсь столицазэ Петрозаводскез. Со сярысь Вылӥ Главнокомандующийлы телеграмма лэзи. Басьтӥ таӵе валэктон: чидатске, ӝоген тӥледлы юрттыны вуоз Ижевскысь 313-тӥ стрелковой дивизия". Бӧрысь та дивизилы, кужмо ожмаськемез но Ленинградэз финн армилэсь утемез понна "Петрозаводской" ним сётэмын вал. *** Быдӟым ожмаськонын миллионэн адями быриз, тросэз отысь мугорзы, лулзы сӧсырмыса бертылӥзы. Ӧз жаля со медсестраосты но. 313-тӥ стрелковой дивизилэн медсанбатысьтыз медсестра А. Федорцова-Парфёнова наркотизаторлэсь ужзэ быдэсъяз. Бен, вал сыӵе уж, угось сӧсырмем солдатъёслэсь вӧсь луэмзэс наркотикъёсын сяна номырин буйгатыны вал. "Наркотикъёслэн зынзы мон бордысь туж кыдёке вӧлскылӥз, - гожтэ кышномурт. - Куддыръя огкутскемен мон 300 пала сӧсырмем муртъёсты зол эмъюмъёсын усыкмытылӥ. Бӧрысь ачим но "кудӟыса" йырсазьме ыштылӥ. Эшъёсы монэ сазьтӥськыны ураме выдтылӥзы. Сайкатыса выльысь ас уже борды кутскылӥ. Гдыня город понна ожмаськыкумы, дивизия мозмытӥз концлагерьысь пленнойёсты. Соос пужыен (сыпняк) висё вылэм. Мон но висьыны кутски. Дугдӥ ветлэмысь, вераськемысь, бӧрысь пери шуккиз на. Тӥни озьы берытскиз мон понна Вормон нунал - пыраклы инвалид луи". *** Карелиын али но шедьтыло на 1942 арын бырем солдатъёслэсь шайгуоссэс. "Веналайста" ("Ӟучъёс") кылын гожтэмын соос вылын. Ӵапак со вакытэ татын ожмаськиз Удмуртиысь 313-тӥ стрелковой дивизия. Огаз сыӵе шайгуын - 90 мурт, мукетаз - 180 ватэмын. Ваньзы соос ивортэк бырем солдатъёс. Но татын ик вань мукет шайгуос но. Отын ватэмын асьме командиръёсын быдтэм солдатъёсмы. Одӥг учырез верало. Петрозаводск котырын ожмаськыку, 32-тӥ армилэн командующиез ыбиз врачез-лейтенантэз, мумы-бубыосызлы война сярысь ваньзэ шонерзэ гожтэмез понна. Нош зэмлык сыӵе вал: 313-тӥ дивизия ожмаськыны воксё дасямтэ вылэм. Винтовка но котькуд тямысэтӥез солдатлы гинэ сётылӥзы. *** Бырыны кышкыт. Войналэн нырысетӥ нуналъёсаз яке Вормон азьын-а быриз солдат, пӧртэмлыкез ӧвӧл. Адями кулэмын, сое уд берыкты ни. Но кӧнязэ быронлэсь утьыны луысал, командиръёс солдатъёс сярысь сюлмаськысалзы ке...Лев Аланне, стрелковой полклэн огез комсоргез, быриз Вормонлэсь сизьым гинэ нунал азьвыл. Трос пол фронтэ куриськылэмез бере - удалтӥз, басьтӥзы. Сюриз 313-тӥ дивизие. Командиръёслэн приказзыя басьтыны косэмын вал Балтийской зарезьысь Воллин шормуӵез. Нош музъемысен со дорозь 1200 метр. Куазь кезьыт, тӧлаське, зарезь ӝужытэсь тулкымъёсын бугыръяське. Вань солдатъёс валало: таӵе куазен ву вамен уд выжы. Командиръёс но валатэк уг уло, дыр. Но соослы чалякгес дыртоно ивортыны вылӥ командованилы ӟеч операция лэсьтэм сярысь. Сыӵе "геройлыко" ужъёс ӵемгес быдэсъяськылӥзы горд праздникъёс азьын. Соку но озьы луиз. Ву вамен выжон кыстӥськиз час пала, со дыр ӵоже немецъёс ялан ыбылӥзы. Мыным шуд усиз улэп кыльыны, нош эше быриз. Солы сопал ярдуре вуытозь, 300-400 метр кылем вылэм. Озьы ӵем дыръя солдатъёсмылы секыт югдурысь потыны нокыӵе сюресъёс ӧз кыльылэ. *** Малы асьмелэн сомында ивортэк бырем солдатъёсмы? Тазьы малпасько. Солдатлэсь ваньзэ ватыны тыршылӥзы. Ӵем дыръя соос ӧз тодылэ командирзылэсь нимзэс, кыӵе частьын ожмаськемзэс, кытчы мынэмзэс. Тодылӥзы киязы шӧдтэк шорысь тушмонлэн листовкаосыз сюрем бере гинэ. Тодэмзэс но ог-огзылы ӧз шараяллялэ. Малы кулэ вал сыӵе чималиен шудон? А. КУЗНЕЦОВ, 313-тӥ стрелковой дивизилэн ветеранэз. Тодон-валан дуннелэн сюресъёстӥз нылпиосты сьӧраз валтэ дышетӥсь. Нош кыӵе сюлмаськонъёсын, малпанъёсын, мылкыдъёсын со улэ туннэ? Школалэн ӧсъёсыз усьтӥськон азьын Шаркан ёросысь дышетӥсьёс, нимаз-нимаз предметъёсъя огазеяськемъёс, ог- огенызы кенешонъёс ортчытъязы. Огазе люкаськыса, азязы сылӥсь ужпумъёссэс эскерыны но кылем арын ужамзылы йылпумъянъёс лэсьтӥзы ёросысь удмурт кылъя но литературая дышетӥсьёс но. Пусйымонэз со, нылпиослэн вордскем кылъя тодон-валанъёссы, кылем аръёсын ӵошатыса, вылӥынгес. Ёросысь дышетӥсьёс но нылпиос озьы ик туж мыло-кыдо пыриськизы Куӟебай Гердлэсь но Ашальчи Окилэсь юбилейзэс пусъёнэ. * Удмурт Кылъя но литературая дышетӥсьёс Ольга Николаевна ВАСИЛЬЕВА (Ляльшур школа), Ольга Васильевна ЛОПАТИНА (Порозово школа) но Оксана Анатольевна НАРИНА (Ляльшур школа). Г. ЮСАЕВЛЭН туспуктэмез. Сентябре гинэ "Удмурт дунне" газетлы гожтӥськемъёс быгато ДУНТЭК куинь ялон сётыны, озьы ик кинэ ке газет пыр ӟечкыланы, "Тодматскон сэреге" ялон сётыны. Сентябрь - дунъёсты воштон вакыт Удмуртилэн бюджетаз газ понна дунъёслы дотациос чакламын ӧвӧл. Таин валче Удмурт Республикаысь Тарифъёсъя но дунъёсъя кун комиссия калыклы сётӥськись газлэсь дунзэ будэтӥз. Нырысетӥ сентябрьысен чагыр эстӥськонлэн одӥг кубометрез 22 копейка сылоз. Азьвыл дунъёслэсь со 16,1 процентлы уногес. Кылсярысь, городысь квартираын улӥсьлэсь толэзьскын газ понна 1 манет 60 копейка басьто ке вал, али со 1 манет 76 копейка тыроз. Калыклэн пельпумаз ошем ныпъет, озьыен, эшшо но секытомиз. Нош промышленной предприятиослы та ласянь удалтӥз, шуыны луоз. Соослэсь электрокужым понна басьтӥськись дунъёс кулэстэмын. 750 кВт-лэсь уногес мощностен электрокужымез кыскись предприятиос нырысетӥ сентябрьысен 1 кВтч понна 16,5 копейка тырозы, 750 кВт-лэсь ичигес мощностен электрокужымез кутӥсь предприятиос - 33 копейка. ТУЛКЫМ "Зорайёс" Та нылъёс ӝоген нош ик огазе люкаськозы. Соос дышетско Ижевскысь Шишкин нимо урамысь Гуманитарной лицейын. Пӧртэм наукаосыз "йыръем" сяна, соос тодматско удмуртъёслы матэ луись калыкъёслэн сямъёсынызы, йылолъёсынызы, кылынызы. Ваньмон дыръязы кырӟало фольклор ансамбльын. Соин кивалтэ Удмурт Республикаысь искусство удысын дано ужась Розита Анкудинова. Бен, лицейысь "Зорай" ансамбль - "Чипчирганлэн" покчи сузэрез. В. КАМАШЕВЛЭН туспуктэмез. "Аран-98" Шаркан ёросысь егитъёсын ужанъя комитет гурт ужъёсъя кивалтэтэн ӵош егит комбайнёръёс пӧлын "Аран-98" конкурс ялӥзы. Солы йылпумъян лэсьтозы гуртъёсын ужасьёслэн нуналзы азьын. Та вакытэ унояз хозяйствоосын аранзы йылпумъяське ни. Тужгес но ӟеч ужало "Родина", "Восход", "Нива", "Дружба" эштосъёсын. С. ПЕТРОВ. Тодмо нимъёс но нуналъёс Сентябрь 6. - Вордскемез дырысен 110 ар тырме Иосиф Алексеевич Наговицынлы (1888-1937), профессиональной революционерлы-большевиклы, советской деятельлы. Вордскемын Глазов уездысь Лудошур волостьысь Туктым гуртын. И. А. Наговицын кивалтӥз Удмурт комиссариатэн (1918-тӥ арысен), Удмурт областной ревкомен (1921-тӥ арысен), 1921-тӥ - 1925-тӥ аръёсы ужаз рабочийёслэн, крестьянъёслэн но гордармеецъёслэн депутатъёссылэн областной Советсылэн председателез луыса, 1926-тӥ арысен - РСФСР- ысь калыклы социальной юрттэт сётонъя калык комиссар. 8. - 65 ар талэсь азьло (1933) Воткинскын улӥсьёс учкизы нырысетӥзэ вераськись "Встречный" художественной фильмез. 14. - Вордскемез дырысен 75 ар тырме Вениамин Николаевич Егоровлы (1923-1943), Советской Союзлэн Героезлы. Вордскемын Глазовын. В. Н. Егоров ожмаськиз Курской дугаын, Десна но Днепр шуръёс вамен выжонын, Киевез фашистъёс улысь мозмытонын. Бырыны шедиз 3 ноябре. Ротаен кивалтыса, та нуналэ со 25 тушмон солдатэз быдтӥз на. 17. - Вордскемез дырысен 215 ар тырме Надежда Андреевна Дуровалы (1783-1866), нырысетӥ Отечественной войналэн кавалерезлы, "Записки кавалерист-девицы" книгалэн авторезлы. Егит дырыз ортчиз Сарапулын. 1806 арын, ассэ А. А. Александров дворянинлэн пиез шуыса, Н. А. Дурова мынэ армие но шеде конно-уланской полке. Ожмаськиз Фридландын (Смоленск), Бородиноын. Отставкае потӥз 1816 арын. - Вордскемез дырысен 90 ар тырме Семен Акимович Завьяловлы (1908-1963), Советской Союзлэн Героезлы. Вордскемын Камбарка районысь Верх-Армязь гуртын. 1942 арын солэсь пулемётной расчётсэ Новгород областьысь Сычево гурт дорын 200 ёрос гитлеровецъёс котырто. 60-зэ быдтӥзы, быризы асьме боецъёс но. Ньылетӥзэ сӧсырмемез бере, расчётлэсь командирзэ санитаръёс нуизы. 18. - 75 арес тырме Надежда Петровна Кралиналы (1923), филология наукаосъя кандидатлы, литературоведлы, переводчиклы, фольклористлы, УАССР-ысь Кун премилэн лауреатэзлы. 1952-тӥ -1963-тӥ аръёсы Н. П. Кралина кивалтӥз УдНИИ-ысь литературая но фольклоръя секторен, 1963-тӥ -1985-тӥ аръёсы - УдГУ-ысь доцент. Со гожтӥз 50 ёрос научной статья, фольклор произведениос, книгаос. Н. П. Кралина ӟуч кылэ берыктӥз Т. Архиповлэсь, Г. Перевощиковлэсь, С. Самсоновлэсь но мукет удмурт писательёслэсь ужъёссэс. - 25 ар талэсь азьло (1973) Ижевскын ужаны кутскиз инкуазез утёнъя калык университет. 19. - Вордскемез дырысен 75 ар тырме Афанасий Афанасьевич Русскихлы (1923-1945), Советской Союзлэн Героезлы. Вордскемын Балезино районысь Оросово гуртын. Ож сюресэз сое вуттӥз Волгаысен Польшаозь. Герой ним сётэмын 1945 арын январе Висла дорын ожмаськон дыръя. - 45 ар талэсь азьло (1953) Глазовын ужаны кутскиз пионеръёслэн юртсы. - 15 ар талэсь азьло (1983) Ижевскысь медициная кун институт наградить каремын Эшъяськон орденэн. 23. - 35 ар талэсь азьло (1963) Сарапулысь радиозавод поттыны кутске "Космос" пичи приёмник. 29. - 55 ар талэсь азьло (1943) Удмуртиысь школаосын но училищеын 200 дышетскись ас мылкыд каремзеъя кошкиз Донецк областьысь Макеевка городысь металлургической заводлэсь электростанцизэ лэсьтонэ. Кыкетӥез отряд, 300 мурт, мынӥз татысь ик Зуевской электростанциез ӝутонэ. Соос куашкатэмын вал немецко-фашистской оккупантъёсын. Та толэзе ик: - 65 ар талэсь азьло (1933) кылдӥз Удмурт радиолэн хорез. - 20 ар талэсь азьло (1978) Сарапулысь "Электробытприбор" заводлэн конвейерысьтыз потӥз кыкетӥ миллионэтӥез "Кама-7" мисьтаськон машина. Дасяз Елена УШАКОВА, Удмурт Республикаысь ЦДНИ-ысь отделлэн кивалтӥсез. Котыр сюрес - вӧй сюрес?.. Матысь дыре Москва-Минск автострада кузя Смоленск пала ширтӥсь водительёслы кисыязы зӧк коньдон пуйы нуллытэк уз лу ни, вера "Новые известия" газет. Азьвылгес чакламын вал Москва- Санкт-Петербург сюрес лэсьтыны но со кузя ворттылӥсьъёслэсь дун басьтыны. Но уж ӧз пӧрмы... проект куашказ. Табере коньдон поттыны чакламын Москва-Минск трассаысь. Уксёзэ жалясьёслы котыр сюрес ӵектэмын. Басьтэмын Интернет пыр. Возьматозы можгаос Октябрь толэзьлэн кутсконаз Можгаын ортчытыны чакламын городысь предприятиослэсь вузъёссэс возьматон выставка. Сое радъян сярысь кичӧлтон сётӥз городлэн администрациез. Можгаысь вань предприятиос сяна, отчы лыктыны кулэ кызьы ке Удмуртиысь, озьы ик бускель улосвылъёсысь вузкарись организациос. Возьматонэз ортчытыны чакламын "Дубитель" культура юртын. Н. ЕФРЕМОВ. КЫСЫК ВАКЫТ Юоссэс утялтӥзы Шуг-секытъёсты чидано-вормоно луизы туэ Шаркан районысь "Родина" колхозысь механизаторъёс но. Котькытын сямен ик ичи вал эстӥськонзы, вужмемын техниказы. Озьы ке но, вань ю - няньзэс дыраз октӥзы-калтӥзы. Котькуд гектарысь (ю бусызы 1000 гектар пала) 17 центнер ю тысь люказы. Та нуналъёсы хозяйствоысь музъем ужасьёс кын улэ гыро, юоссэс шерто-куасьто, кидыс дасяло, техниказэс тупатъяло. Колхозлэн алигес гинэ быръем председателез Николай Широбоков сюлэмшугъяське ни: кытчы кароно мултэс ю нянез. Вузан инты утчаса ветлӥд ке, тросгес ыштонъёс адӟод. Нош палэнысь лыктэм басьяськисьёсты, вузчиосты возьмано ке - лыктозы меда. Тӥни озьы ванез но шумпотон сяна, сюлмаськон но вае. Секыт верс (удыс) бере, капчияк шокчыны но луоно, но огшаплы гинэ... азьпалан ужъёс уно на. Механизатор Андрей Семёнов гужем юосты утялтэ, тол вылтӥ вукоын ужа. Сергей Семёнов - комбанеръёслэн оскымон юрттӥсьсы. Сергей Широбоков ю кутсанын азьпала потӥз. Г. Юсаевлэн туспуктэмъёсыз. Спорт Нокин ӧз вормы Алексей Чижов но Александр Шварцман куспын шашкиен шудонъя берло пумиськонъёс кыкез но нокин вормытэк йылпумъяськизы. Ньылетӥ партиын лэсьтэмын вал 46 ход. Пусйыны кулэ, солы асьмелэн землякмы 38 минутлы ӧжытгес дырзэ быдтӥз. Витетӥ партия йылпумъяськиз 1 сентябре бер ӝытазе гинэ. Оскон вал, чемпионъёс пӧлысь кин ке но одно ик вормоз шуыса. Озьы ӧз луы. Шудон нош ик нокин вормытэк быриз. Толон соослы ватсаса куать партия (быдэн 20 минутъем) шудыны луонлык сётӥзы. Гроссмейстеръёс пӧлысь кин кужмогес - туннэ вераны секыт, малы ке шуоно, кыксы но соос - быдэс дуннелы тодмо адямиос. Л. ДМИТРИЕВА. Оло осконо, оло ӧвӧл Музъемлэн "вогъяськонэз" Мон ӧй оскы соку аслым ачим. Ортчытӥ репетиция, жади кадь. Вазьгес выдӥ валес вылэ, ӝыт 10 час котырын вал, дыр, со. Умме но уси вал кадь ини, но шӧдтэк шорысь сайкай, шӧдӥсько: кӧлон койкае улам выре кадь. Сак-сак кариськи: сыӵе учыръёсты мон эскерылӥ вал ини. Сӧриськем моторен машинаын пукем выллем со: то мотор ужаны кутске но вырӟытэ машинаез, то шуак дугдэ но шӧдтэк шорысь нош кыске. Кема уг кыстӥськы - кӧня ке секунд гинэ... Нырысьсэ сыӵе паймоно мае ке мон шӧдӥ, Ижевскын больницаын кылльыкум. Одӥг палатаын йӧнатскись эшъёсылэсь юасько: - Ураметӥ бадӟым машина кошке-а, мар-а, маке мынам койкае ик зурка кадь? Гур-р гинэ серектӥзы эшъёсы, малпазы, лэся: талэн йыр йылысьтыз липетэз гылӟем, дыр, ини. Ма, зэмзэ но, милям эмъяськон корпусмы сюреслы кыдёкын сылэ, нокыӵе машинаос отӥ уг ветло. Малпаськи на ас поннам, но нокызьы валэктыны ӧй быгаты, мае мон озьы шӧдӥ. Трос аръёс ортчизы, со учыр сярысь вунэтӥ вал ни. Нош ик со выллем шӧдон луиз пастухын дыръям. Шундыё пӧсь нуналэ вал со. Сыӵе куазен ыжъёс нуназе кема гинэ шутэтско салкымын. Котыр туж шыпыт. Ми но эшеным музъем вылэ выдыса шутэтскиськом. Нуназе шорын векчи сиисьёс но ичиомизы. Учкисько вӧзысьтым турын-куар шоры, паймисько, кӧня пӧртэм соос мон котырын гинэ но. Тани вылӥе кыстӥське тӧлтурын, бус пыръем кадь ситурын ӧжыт гинэ выре, соос пӧлын ик куартэк модос вылэ ӝутӥськем ӵуж сяська, отӥязгес нош лемлеталэс тӧдьы сяськаё векчи куаро клевер быдэс семьяеныз интыяськем... Сяськаё чебер но небыт шобрет вылын кадь кыллисько. Учкисько гинэ, номыр сярысь малпаськем но уг поты кадь. Нош вылӥын туж чылкыт чагыр ин. Но тани шуак монэ нуись музъемлэн пушкысьтыз моторез кадь сӧриськиз, рос-прос шӧдымон - кӧня ке пол дыго-мого выриз со мон улын, туж кыдёкысь музъем пыдсысь лыктӥз кадь со вогъяськон. Собере туж чаляк ортчиз, быриз. Огшоры дыръя асьмеос музъемез ум шӧдӥське, соин огкадь азьлане дыртӥськомы, берыктӥськиськом шор бодыез котыртӥ, уез нуналэн вошъяса, берыктӥськиськом музъемен ӵош шунды котыртӥ, тулысэз гужемен воштыса, сӥзьылэз - толэн. Озьы чик дугдылытэк котыръяськиськом быдэс улытозямы. Соку мынам йырам малпан лыктӥз: музъеммылэн сыӵе дыго-мого выронэз луэ, дыр, землетрясение луон вакытэ. Кыӵе кужым озьы зуркатэ быдэс музъеммес, тэтчатэ, куашкатэ коркаосты, гурезьёсты, воштэ соослэсь интызэс. Пилиське, ымзэ усьтэ, вогъяське музъем. Бадӟым ыштонъёс но куректон вае калыклы. Зэм ик шуэмзы: из но, му но пилиське, пыд улысь музъем кошке. Озьы гинэ асьмеос музъемлэсь кошкемзэ ум шӧдӥське, нош землетрясение дыръя шӧдыны луэ вылэм. Яке со сӧриськем мотор ужам кадь мынэ, яке дыг валлэн уробоез кыскемез выллем: шуак вырӟе, шуак дугдэ кӧня ке дырлы, собере нош ик вырӟе. Но ваньмыз ик со туж чаляк ортче. Аслэсьтым шӧдэмме но со сярысь малпаськемме вераны мынӥ эше доры. Со палэнынгес шутэтске вал. Юай: - Тон али кылльыкуд шӧдӥд-а музъемлэсь выремзэ? - Ма кызьы музъем выроз? - серектӥз со пумитам. Мон тупен-тупен валэктӥ эшелы аслэсьтым шӧдэмме но со сярысь ма малпамме. Собере шуи на: - Ӵуказе кылзӥськыса утча али радиоез, уз куаретэ меда кытын ке музъем зуркан сярысь. Ӵуказеяз эше мыным шуиз: - Маке тумошо тынад верамед. Набережной Челны палан пичи землетрясение ортчем шуыса ивортӥз радио. Мон ачим но кылӥ со сярысь. Кӧня ке дыр ортчыса, мон нош ик шӧдӥ музъемлэсь малы ке пумитъяськемзэ, уин 12 час котырын вал со. Дырез но учки соку, аслым но тумошо потӥз ини. Нош ӵукна радио ивортӥз: уин кык час котырын Украинаын землетрясение вал. Музъем зурканлэн пичи тулкымез Москваын но шӧдӥськиз. Ӵукна мынӥ эше доры. Со нош серекъяз гинэ монэ, шуиз: - Тонэ, землетрясениез шӧдӥсь приборез сямен, музъем борды лякыса возёно ини. Зэм но серемес, дыр, мынам та выреме. Но мон малпамъя, самой вакытаз котькин но быгатоз шӧдыны музъемлэсь дыбыр выремзэ. Кудӥз-огез пудоос вазьгес но шӧдо, лэся. Тужгес но верало комакъёс, пуныос, ыжъёс сярысь. Соос, пе, мукет сямен асьсэдыз возьыны кутско. Мон со учыръёсты ваньзэ шӧдылӥ малпамтэ шорысь гинэ. Самой нырысьсэ больницаын шӧдыку, Армениысь бадӟым землетрясение вылэм со. Нырысь чуръёсам гожтэме нош, радио верамъя валай: Афганистанын музъем зуркан вылэм. Мукет нуналаз но луэм на отын сыӵе учыр - созэ мон ӧй шӧды. Бен, ваньзэ валаны уг луы. Уг шӧдӥськы ужакум, пыд йылам бергакум, телевизор учкыкум, радиоез кылзыкум. Шӧдоно сое, туж шыпыт кылльыку гинэ. Утчалэ али тӥ но музъемез туж сак кылзӥськыса, оло, мон сярысь но умойгес шӧдоды, кыӵе сыӵе асьмелы валантэм кужым зуркатэ та бадӟым музъеммес. Е. ПАВЛОВА, Можга ёросысь Бадӟым Сибы гуртысь дышетӥсь. Улонэз шукы ӧй вал Та нуналъёсы 75 арес тырмиз одӥгезлы мӧйы журналистлы, ужысь ветеранлы, азьвыл фронтовиклы Евгений Афонинлы. Евгений Григорьевич та дано юбилейзэ пумита задор мылкыдын, азьланяз умоезлы осконэн, ноку сынӥсьтэм пероеныз. Газетын али тыршись журналистъёс но азьвыл ӵош ужам эшсэс ӟечкылало та бадӟым нуналэныз. Сӥзё шудбур, тазалык, озьы ик чидатэк витё Евгений Григорьевичлэсь выль но выль чуръёссэ. Удмурт лыдӟисьлы Евгений Афонинлэн нимыз тодмотэм ӧвӧл. "Советской Удмуртия" газетлэн сяськаян вакытаз (60-70-тӥ аръёсы со ог 25 сюрсозь лыдын потылӥз) отысь номерлы быдэ сямен адӟылыны луылӥз та журналистлэсь нимтулзэ. 1923 арын Глаз ёросысь Выльгуртысь ӟуч семьяын куинетӥ пиналзы вордскыку, юрт вадьсын шудтэм кизили ворекъяз, вылды. Пичиысен атайтэк кылён, сютэм улон, котьмалы ёрмон... Афонинлэн улон сюресэз - быдэс странамылэн та дауре векамезлэн ог люкетэзлы тупа. Солы ваньзэ веръяно-шӧмъяно луиз: горд пионер галстук но выль усьтӥськись заводъёс понна шумпотонэз, фашистъёсын сэрен вуэм шуг-секытъёс понна куректонэз, гуртоослэн азинсконъёсынызы данъяськонэз, властьёслэн возьыттэм луэмзы понна керпотонэз... 1941 арын июле Евгений Григорьевич ас мылкыд каремезъя кошке Горд Армие. 25-тӥ гвардейской танковой бригадаен ӵош пыриське Орша, Витебск, Минск городъёсты мозмытонэ, Восточной Пруссиын сӧсырмыны шеде. Афонин кык пол ӝуалляз танкын. Но шудэз вылэм на, улэп кылиз. Кышкатэк ожмаськемез понна солы сётэмын "За отвагу" тужгес но дано луись солдат медаль. Война бере ужаз комсомолын, бӧрысь сое кутӥзы "Советской Удмуртия" газетлэн редакцияз. Нырысь вал корректор, бӧрысьгес выпускающой редактор луиз. 1949 арын Евгений Григорьевичез Пичи Пургаысь райгазетэн кивалтыны ыстӥзы. Сокугес ик ужзэ куспетӥ карытэк дышетскыны кутскиз Удмурт пединститутлэн историяя люкетаз но Свердловскысь партийной школаын. Но ӧз кылды егит воргоронлы ожын сӧсыртэм интыоссэ бурмытыны но шудо улон лэсьтыны. 1951 арын 9 мае (Вормон нуналэ - !) Госбезопасностья министерствоысь "гыжкалъёс" сое кортназы. Быдэс ар ӵоже копаськыны выризы. 58-тӥ статьяя суд улэ донгизы. Озьы Афонин калыклэн тушмонэз луиз, пытсэтысь сое 1955 арын гинэ мозмытӥзы - "янгыш луымтэез понна". Сыӵе ГУЛАГ бере уж шедьтыны капчи ӧй вал ке но (кинлы кулэ на бен наштам адями?), Евгений Григорьевич выльысь вуэ гожъяськон удысэ. Вал ӟучысь берыктӥсь, Вуж Зятцыысь ёрос газетлэн редакторез. Бӧрысь улон сюрес ӟуч адямиез вуттэ удмурт газетэ. "Советской Удмуртиын" Афонин гурт улонъя отделын ужаз. Вань меда элькунамы одӥг ке но хозяйство, кудаз со ӧз вуылы? Али ке но йыраз возе на гурт кузёослэсь, агрономъёслэсь, инженеръёслэсь нимтулъёссэс. Удысэз ӟечгес тодон вылысь, газетын ужакуз йылпумъяз Ижысь сельхозинститутлэсь зоотехникая факультетсэ. Евгений Григорьевич туж кема аръёс ӵоже нокинлы но ӧз мадьылы кечат-вамат укно сьӧрын курадӟемзэ. Весь серекъян, вуоноезлы оскон мылкыдын улӥз. Оло выльдӥськон вуэмен, оло арлыдзэ шӧдэмен, 80-тӥ аръёслэн пумазы малпаз со тодэ ваёнъёссэ кагаз вылэ кельтыны. Та книгаын солэн ужъёсыз пӧлысь одӥгез гинэ - чекистъёслэн пытсэтазы ортчытэм вакытлы сӥзем повестез. Али Афонин ужа "Шукы" книгаез бордын. Отын возьматэмын луоз туала улонмылэн пӧртэм палъёсыз. И. ЛЕБЕДЕВ. Удалтӥз асьмелы Красильниковен Азьвыл гожъямъёсы пӧлысь шедьтӥ Геннадий Красильниковлы сӥзем блокнотме. Учкисько - сое мытэме но йылпумъяме дырысен куамын ар пала луэ ни. Соку мон Москваын Наукаосъя Академилэн Дуннеысь литературая институтаз аспирант вал. Огнуналэ витьымтэ шорысь телефон доры ӧтё: "Литературная Россия" газетысь, пе, Ильгиз Каримов. "Анатолий, - шуэ, - вань ужъёстэ кушты но, Геннадий Красильников сярысь очерк гожты. Ми сӥё-дано писательёслэсь литературной портретъёссэс сётылӥськом: Расул Гамзатов, Кайсын Кулиев но мукетъёсыз сярысь поттӥмы ни. Нош тӥляд тужгес но тодмоез усто гожъясьты - Геннадий Красильников. Эн пумитъяськы... Гожты". Мон ӧжытак куаляк луи. Собере басылски. Малы гожтонтэмез? Со мынам аспал адямие, пичи дырысен тодӥсько. Собере, зэмзэ, со кадь адӟем карымон писатель но ӧй вал. Соку ик басьтӥ блокнот. Гожъяны кутски, мазэ тодӥсько, маиз сярысь верамтэ на литератураын. Шугъяськисько: тодэме ӧжыт. Нош юрттӥз учыр. Огнуналэ, юри тупатэм кадь, Рижской вокзал дортӥ ортчоно луи. Витьымтэ шорысь пичиослэсь удмурт кылын чингыли кадь вераськемзэс кылӥ. Матазыгес кариськыса учки но пайми: ма, со Геннадий Красильниковлэн пиез но нылыз вылӥллям ук! Нош тӥни вӧзазы ик ачиз Геннадий Дмитриевич но Зинаида Степановна кузпалыз. Юан-веран... - Кытчы-о вырӟизы та алнашъёс быдэс семьяен? - Балтий зарезь дуре, Дубултые. - Туж умой. Гань-гань шутэтскоды ни, номыр сярысь малпаськытэк. - Ужано но луоз. - Мар бордын ужаськод ай? - Повесть бордын. - Кызьы-о нимыз? Геннадий Дмитриевич кескич пальпотэ: - Вордӥськымтэ нунылы ним уг сёто на. Мон солы верай "Литературная Россиялэсь" заказзэ, Дубултыысь бертыкуз пумиськон сярысь поттылӥ. Нош Геннадий Дмитриевич шуиз: "Вань одӥг ӵектонэ: мынам татын ВПШ-ын Маша сузэре дышетке. Ай толэзь но ӧвӧл на отчы пыремез. Мон сярысь тодымтэзэ тодэмед потэ ке, юалляськы солэсь". Зэм но, Мария Дмитриевна мыным трос вераз агаезлэн пинал дырыз, улонысьтыз пумтэм шугез-лекез вормылэмез сярысь. Валай созэ но, писатель егит дырысьтыз уно учыръёссэ "Тонэн кылисько", "Вуж юрт" книгаосаз пыртэм шуыса. Валамон ини - луэмезъя, тупамезъя. Уно сюресъёс вожын, огыр-бугыр Москваын, удмурт гожъясьёслэн тӧроенызы, депутатэн пумиськонъёсы трос вал на. Нош таиз пумиськон тодам вайытӥз кык шуръёс вискы интыяськем Алнашез. Атае редакциын но радиовещаниын ужамен, мынам пичи дыры райцентрын ортчиз. Тани ми, начальной школаын дышетскисьёс, гурт пуметӥ бызьылӥськом. Отын тракторен ужа ӝужыт мугоро, востэм пияш Геннадий. Со мынэсьтым вить ареслы гинэ бадӟым ке но, воргорон кадь адӟиське ни. Ужысь бертыкуз, ожын бырем атайёслэн семъяоссылы липетъёссэс тупатъя, ёмырам кенеръёссэс шонертыны юрттэ... Пыраськом МТС-э - отын капчи мылкыдо, лэчыт визьмо Геннадий плакатъёс, "молниос", "крокодилъёс" гожъя. Сыӵе тыршемез понна сое гажало. Мылкыдтэк ужасьёс кепыраны кутско. Лэчыт ке лэчыт ик верасько алнаш палъёсын. Соос огшоры дыръя но кыл куспазы одно ик маскара веранъёс пырто, кинэ ке серекъяло ке, ас вылтӥзы лэзё: "Ма, ми соин одӥг кадесь". Нош "монэ алдазы" шуэм интые "монэ кутчазы" шуо... Шудонпӧлъёсын шулдыр луэ вал, тужгес ик - Геннадий отын ке. Сюанъёс вунонтэмесь ортчылӥзы, вашкала маскаръяськон кырӟанъёсты бызись-басьтӥсьлы выль сямен тупатыса, небыт юморен карыса лэзьылӥзы. Татын но Геннадий мастак вал. Алнаш школаын гинэ ӧвӧл, быдэс ёросын тодмо вал солэн сочинениос гожъяны быгатэмез. Геннадий Красильниковлэсь "Алнаш базар" сочиненизэ районысь вань егитъёс тодо вал, дыр. Укыр уго син азе пуктымонэсь пӧрмылӥзы солэн улонысь басьтэм персонажъёсыз - вузкарисьёс, соослэн выроссы, вераськон манерзы. Мыным туж удалтӥз, шуыны луоз: "Художественное своеобразие удмуртской сатиры" книгаме, диссертациме гожъякум, Геннадий Красильниковлэн Чупыргы Вася сярысь веросъёсыз потӥзы. Азьвыл удмурт литератураын комической геройёс дед Щукарь выллем пересьёс гинэ луо ке вал, 60-тӥ аръёсы мыло-кыдо персонаж кылдӥз: Чупыргы Вася. Собере со пыриз писательлэн "Тӧлсяська" романаз. Учконо ке, тунсыко ик удмурт сатиралэн историез: 20-тӥ-30-тӥ аръёсы тодмо луэмын П. Усковлэн Пересь Шамарданэз, соберегес - П. Блиновлэн Омель агаез, 40-тӥ-50-тӥ аръёсы - Т. Архиповлэн - пересь Кимиез, 60-тӥ-70-тӥ аръёсы - Г. Красильниковлэн Чупыргы Васяез (комической герой "пиналмиз"). Соос пыр писательёс туж аспӧртэмлыко возьмато ас вакытысьтызы улонэз. Геннадий Красильниковлэн романъёсыз мур социальноесь, авторлэн улон шоры учкемез йыгмыт, нош гожъямезлэсь пуштроссэ уката но лэчытомытэ сатира амалъёсты уже кутэмез. Нош гожъяськонэзлэсь устолыксэ учконо ке, со быдэсак эскерымтэ на. Котькудӥз сямен малпанэз, веранэз - метафора. Сое мон валай берлогес. Огпол Венгриын дыръям, Дебрецен университетысь удмурт кылъя дышетӥсь Антал Кишш монэ плёнка вылэ гожтыны малпаз. Лыдӟы, пе, Красильниковлэсь "Тонэн кылисько" повестьысьтыз люкетсэ. Лыдӟисько но лыдӟемъям паймисько: метафора вылын метафора. Огшоры уд лыдӟы, яркыт гожтэмын, озьы бере, яркыт ик лыдӟоно. Кема пуконо луиз микрофон азьын. Москваысен ик, мукет дыръя пумиськыкумы, Геннадий Красильников юаз, кудӥз книгаез мыным тужгес яра шуыса. Мон верай: "Олексан Кабышев сярысь дилогиед". - "Нош аслыд кудӥз яра?" - юасько мон. Со шуэ: "Тонэн кылисько" книгае. Табере мон валасько ни, малы та гожтэмез солы аслыз кельше вал. Со сӥземын егит дырлы, ас ёзэзлэн будон вакытэзлы, Быдӟым ож бере ӝутскон аръёслы. Егит муртлэн зэмос адями луонэзлы, вордскем шаерез, калыкез яратонлы. Геннадий Красильников пиналысен калык пӧлын ужаз, тракторен-комбайнэн тыршиз, колхозын плотниказ. Нылпи юртын воспитатель вал, "Алнаш колхозник" райгазетын - литработник. Собере "Советской Удмуртия" газетын тыршиз. Татысен солы сӥё-дано Михаил Петров литературной институтэ пырыны ӵектэ. Кытын гинэ уг ужа - ачиз сярысь ӟеч малпанъёс кельтэ, мыло-кыдоесь, устоесь эшъёсыз кылдо. Улытозяз Красильниковлы уно прототипъёсыныз пумиськоно луиз. Соос пӧлын вал вуж куанер улонысь калык радэ ӝутскем Макар Кабышев, чупрес, узырмыны тыршись, сук Гирой Самсонов, соя ик будэм нылыз Глаша, аслыз вылэ тубон понна нокинэ жалясьтэм егит врач Световидов, калыкез ыжъёс интые лыдъясь 30-тӥ аръёсысь "философ" Матвеев, котьмае чидась, юн граждан сямо, чылкыт сюлмо пересь врач Соснов... Ачиз но писатель уно чидамын, берло аръёсы вылӥ кивалтӥсьёсын но ултӥямын. Нош солэн трос вал на Москваын эшъёсыз, сое гажазы, нёпое донгыны ӧз сётэ. Геннадий Красильниковлэн вордскем дырысеныз 60 ар тырмон нуналлы Семен Самсонов мыным ӵектӥз литературной газет поттыны (мон соку "Кенеш" журналын валтӥсь редактор вал). Та уж борды ми, "кенешъёс", мылысь-кыдысь басьтӥським. Газетэз кык кылын поттӥм. Писательлэн архивысьтыз шедьтӥмы кулон азяз ӟуч кылын гожтэм берпуметӥ новеллазэ. "Прерванные сны" нимам сое авторез. Новелла пичи гинэ, нош макем кужмо возьматэмын сӥё-дано адямилэн "улон-поездэз" - висьыны кутскемез бере, солэсь палэнскемзы, солэн "васькон станциезлэн" матэктэмез но отысен буш дуннее, кынтӥсь тӧл шоры потон сярысь. Кезьыт сюлэмоос кылё - соослэн сюрессы кыдёкын но кузь на. Г. Красильниковлэн берпуметӥ "юсь кырӟанэз" вера солэн туж бадӟым но мур талантэз, вань улытозяз адямилэсь адямилыксэ возьматэмез сярысь. Ачиз но уго со Бадӟым, сюлмысь потонтэм адями вал. АНАТОЛИЙ УВАРОВ, писатель. Бигер гимназия усьтӥськиз Ленинской районысь азьвыл 20 номеро школа интые. Вуж юрт гужем ӵоже син шорын тодон-валанъя дворецлы пӧрмиз. Котькудӥз класс - аспӧртэмлыко зал. Уд но оскы, туала вакытэ тазьы мыло-кыдо ужаны быгатӥсьёс вань на шуыса. Гимназилэсь юртсэ выльдӥз "Иж-3" ООО (кивалтӥсез Геннадий Давитян). Кызьы тодмо, Ижевскын улӥсьёс пӧлысь котькуд витетӥез - бигер. Но пиналъёс тросэз анай кылзэс уг тодо ни. Гимназия та тырмымтэосты палэнтон бордын ик ужалоз. Дышетозы, дун тырытэк. Педагогической коллективен кивалтэ 30 ар та удыслы улонзэ сӥзем Гульзира Флюновна Ахметшина. Ӵош ужан вылысь, выль коллектив кусып тупатӥз ни Казаньысь 2 номеро классической гимназиен. А. ЛУНИНА. Пужымъёс улын ошмес дорын Удмуртлыкез утён сярысь сюлмаськисьёс умой тодо "Крезь" ООО-лэсь кивалтӥсьсэ Владислав Якуповез. Дас ар пала со рос-прос пыриське ини асьме калыклэсь асваланзэ ӝутон ужрадъёсы. Владислав Аксямовичлэн фирмаезлэн уксёеныз ортчытэмын уно вашкала удмурт праздникъёс, калыкмылэн пӧртэм люкаськонъёсыз, кенешъёсыз, ужрадъёсыз. Шуген поттэм коньдонзэ калыкмы понна со ноку уг жаля. Алигес милям корреспондентмы солы кӧня ке юанэн вазиськиз. - Владислав Аксямович удмуртъёс пӧлын рос-прос ужась ужбергатӥсьёс али вань-а? - Соос вань пӧртэм удысъёсын: гурт хозяйствоын, промышленностьын, вузкаронын. Асьме ужбергатӥсьёс, республикаямы сяна, уло Башкириын, Татарстанын, Москваын, Волгоградын но мукет улосъёсын, потто трос пумо ваньбур. - Кӧня ке ар талэсь азьло удмурт предпринимательёс огазеяськон кылдытӥзы вал. Кызьы-о со ужа? - Кык пол сяна ӧм люкаськылэ. Куд-огез малпа вал, ог-огмылы уксёен юрттом шуыса. Мон малпамъя, сыӵе юрттонлэн пайдаез трос ӧвӧл, умойгес луысал визь-кенешен но ваньбурез вошъяса (бартер) ог-огедлы юрттыны. Котькудӥз угось пӧртэм удысын тырше. - Тӥ одӥгез удмурт ужбергатӥсь. Кызьы али ужды мынэ, ма бордын тыршиськоды? - Ужмы урод уг радъяськы, табере котьма карыны дышим ини. Тросгес тыршиськом лэсьтӥськон удысын но вузкаронын. - Мар малпаськоды матысь дыре удмуртлыкез утён понна лэсьтыны? - Сюмси ёросысь Вылынгуртын но Чашка гуртын Вӧсяськон лудъёсты (Керемет) выльдоно. Сӥзьыл Ижевскын удмурт вӧсяськисьёсты дасян курсъёс усьтоно. Сыӵе адямиос котькуд районын мед луысалзы, - Тӥ трос ужады-сюлмаськиды "Удмурт вӧсь" огазеяськон кылдытон сярысь. Кызьы со али ужа? - Люкаськылӥськом котькуд арня куспын четверге ӝытазе. Авангардной урамысь Кызьпу арамаын чакласьком удмурт культурая но религияя центр лэсьтыны. Татын инкуазь но солы туж тупа пужымъёс, кызьпуос, кызъёс будо, гурезь бамысь чылкыт ошмес потэ. Пересьёслэн верамзыя, ӵапак татын вашкала дыръя удмуртъёслэн вӧсяськон интызы вылэм. Тӥни озьы "Удмурт вӧсь" ассэ уг ышты, ужа. - "Удмурт вӧсь" огазеяськон кылдыку, шуг-секытъёс но вал. Солэн кык ваез луиз. Умой-а со? Кык-куинь вӧсь огазеяськонъёс кылдӥзы ке, со уката умой, соку соос рос-просгес ужалозы, асьсэлэсь данлыксэс вылэгес ӝутыны турттозы. Ми ог-огмес дасо аръёс пала тодӥськом ини. Ӵош пыриським удмуртлыкез ӝутонэ (национальной движение). Та бордын шӧдскымон вамыш лэсьтэмын вал 1988 арлэн кутсконаз. Соку январь толэзе кылдытэмын удмурт культурая огазеяськон. Владислав Якуповлэн капчи мылкыдыныз но уксёеныз трос ужрадъёс ортчытэмын. Туж тунсыко вал Кам шур дурын вӧсяськон, Пазял шурлэн кутсконаз Гуждор праздник, Карлуд шур дорын Гербер, Ижысь Кызьпу арамаын Удмурт культурая центрлы но куалалы нырысь кирпич понон. *** Азьпалан солы сӥзем потэ синмаськымон азинсконъёс: ужбергатон удысын но, калыкмылэсь асваланзэ ӝутон удысын но. Н. ВОЗИСОВ. "Оло, тон разведчик?" - юазы Валерий Батуевлэсь Чечняын Удмурт шаерысь Писательёслэн огазеяськоназы со тужгес егитэз. Россиысь Писательёслэн огазеяськоназы кутӥзы Москваысен ик, Иже кожатэк. Соку солы кызь вить вал, али - кызь укмыс. Книгаосыз ӧй вал на - печатлам но печатламтэ кылбуръёсыз гинэ. Йылпумъя ни вал МГУ-лэсь журналистикая факультетсэ. Али - солэн аспирантэз. Кемалась ик ӧвӧл аслаз сэрегез вал: "Аргументы и факты" газетлэн корреспондентэз Валерий Батуев азбар ӵужӥсь (дворник) луыса ужаз. Туннэ со сюлмысь тырше "Московский комсомолец" газетлэн редакцияз. Огшоры ӧвӧл удысэз - валтӥсь редакторлэн воштӥсез. Табере вань ни кык кылбур книгаез (печатласькизы 1995-тӥ - 1996-тӥ аръёсы) - удмурт кылын - "Гольык" но ӟуч кылын - "Тень моей жизни". Кыкетӥезлэн азькылаз кылбурчи Римма Казакова гожтӥз: "Эрик Батуев - выль сямен малпаськись удмурт поэт. Солэн лирикаез ӵемысь кылдэ аспӧртэмлыко образъёс вылын. Соин ик тунсыко но бордаз кыскись". Валерий печатласькылӥз "Юность", "Смена", "Луч" журналъёсын, "Книжное обозрение" газетын. Кылбуръёссэ ӟуч кылэ берыктылӥзы Николай Старшинов, Римма Казакова, Арсений Конецкий, Анатолий Демьянов. Ачиз но та ужен куддыр выре. Вордӥськиз Дэри палъёсын (Завьял ёросын). Вордскем гуртэз сярысь гожтӥз: Пушнерен ӝутӥське бырем гурт, Улэплэсь вылтырзэ со ӵушка. Мон солы луиськем ини мурт - Ым "Ӟечбур!" шуыны но кышка. Пушнерен ӝутӥське бырем гурт - Нуныез гуждорен вешатэк. Мон солы луиськем ини мурт. Ойдо кошкы берен. Шыпытэн! Зэм но - кин со сыӵе - укыр пинал но укыр дӥсьтӥсь Валерий Батуев? "Аргументы и факты" газетэ пиёк гожъяз Чечня сярысь. Тодматӥз Галина Кулаковаен. Огпол келязы Иже - "Буммаше". Эскероно-тодоно: Россиысь кыӵе-сыӵе предприятиын уждун дыраз тыро на? Азьвыл со но ӵемысь печатласькылӥз вань удмурт газетъёсын-журналъёсын. Со сярысь но тросаз гожъязы. Нош "Инвожо" журналлэсь вылбамалзэ али но чеберма Римысь Иоанн Павел ИИ папаен ваче кырмем киоссэс возьматӥсь туспуктэм. Вераллязы: Италие сое, оло, ачиз Чиччолина ӧтем. Туж шунытэсь, пе, Римма Казаковаен кусыпъёсыз но... Лулысь-сюлмысь вера чечен музъемен герӟаськем данужъёсыз сярысь. Котыртэмысь поттыны быгатэм Камбаркаысь пияшез. Паймымон соиз: та адями мурт шаере ожмаськыны ӧвӧл, чечен музъеме соин юри тунсыкъяськыны лыктэм вылэм... Та ужпумен Валерий малпамтэ шорысь пумиськем - юрттэм нырысь-валысь пудо эмъясе (ветеринаре) дышетскемез. Та удысъя тодон-валан люкам Можгалась веттехникумын (али колледж). "АиФ"-ын нырысетӥ вамышъёссэ лэсьтыкуз, газет печатлам таӵе туспуктэм: куинь ӵогем йыр (чеченъёслэн, пе), вылаз гожтэмын: тазьы даурто котыртэме шедемъёсты мозмытыны юрттӥсь чеченъёсын. Пудо эмъясьлы Батуевлы та йыръёс малы ке осконтэм потӥзы. Сюлмыз шуген жингыртӥз тодмо чечен кышномуртлы СССР-ысь Вылӥ Кенешлэн азьвыл депутатэзлы Сажи Умалатовалы. Озьы ик вылэм: фотомонтаж. Чеченъёс кулэм муртъёссэс нунал но уг возё. Соку ик вато, лулыз медаз курадӟы шуыса. Чечня сярысь нырысьсэ гожтыкуз, пиёк кыл сётӥз: "Зэмлыкез гинэ иворто". Нырысь чуръёсыз удалтэм бере, политика удысысь мукет ужпумъёс борды но басьтӥськыны малпаз. Таиз но малпамтэ шорысь пӧрмиз. Редакциын куризы - палэнтӥськыны ӧдъяз. Оскытыны выриз тазьы: политикаез уггес валаськы. "Нош милемлы сыӵеез ик кулэ",- вазизы пумитаз. Вакчи улонэз ӵоже Валерий Батуев армиын но вал, рок-крезьгурлы сӥзем редакциын но ужаз, аслэсьтыз альбомзэ но поттӥз (татысь кырӟанъёс чузъяськизы Удмурт радио пыр). Ваньмыз со укмыстонэтӥ аръёслэн кутсконазы вал - удмурт кылын рок соку гинэ ай ӝужаны ӧдъяз. Валералы со лябгес потӥз - ӟечлыксэ ӧжытак ӝутыны малпаз. Кырӟанъёсыз чузъяськылӥзы балалайкаен, арганэн, пуньыосын шудэм улсын. Ачиз гожъяз, ачиз ик кырӟа но шудэ вал. Сокем зол пӧрмытъяны кутскиз - "Рок-энциклопедие" шедиз. Отӥяз шунды пуксён палась рок-музыкантъёс сярысь куинь ужзэ но печатлаз. Вераськыны турттэ удмурт сяменгес: анай кылызлэсь мӧзме, лэся. Сое нырысь ик армиысен ятвылтӥз. Вордӥськем музъемезлэсь люкиськем бере, соку ик валаз огназ кылемзэ. Пичи дыръяз пиёк артист луон сярысь но малпаськылӥз. Сизьым-тямыс аресказ солэсь улон-вылонзэ, зэмзэ но шӧмъяз: укно янак вылэ султыса, гуртоосыз азьын эктылӥз- кырӟалляз, маскаръяськылӥз. Катанчиен но возъяськылӥз. Зэмос театрез но нырысьсэ соку адӟиз - ӵапак лыктӥзы Удмурт театрысь артистъёс. Та учыр толалтэ вал бере, пичи экеез тужгес зол паймытӥз сцена вылысь пень люк. Адӟемез потыса ӧз чида - анаез юри катанчи сьӧры нуллӥз. Печатласькыны кутскиз 1986-тӥ арын. 1994-тӥ арын бордаз басьтӥз "АиФ"-лэн редакцияз ужась Людмила Новикова (мукетъёсыз палэнтӥськизы малы ке). Отӥяз кивалтӥсез луиз Наталья Желнорова. Таиз огпол ыстӥз Виктор Шейнис депутат доры ("Аргументы и факты" - яратоно газетэ: Москваын потӥсь вань мукет газетъёс пӧлысь солы гинэ гожтӥськисько. Нош Наталья Желнорова - яратоно гожъясе. Валера огпол сое Желнорович шуыны шедьтӥз. Мон малпай: кушемнимыз, дыр. Озьы вылымтэ. Табере тодӥсько: мынам яратоно журналисткае Желнорович вылэм): гожтыны кулэ вал Кун Думае вуоно быръёнъёс сярысь. Шейнис алӥз: татын одно ик кулэ луоз тыро-пыдо валэктон. Практикант жингыртэ аслаз кивалтӥсезлы. Таиз нодъя: - Гожты ук. - Кызьы? - Кызьы быгатӥськод. Но тунсыко мед луоз. Кивалтӥсь трубказэ куштӥз. Соку Батуев малпаз таӵе амал: оло, юри аслыз Кун Думае депутатэ кандидат кариськыса утчано? Со дырысен зымиз бадӟым политикалэн мур кожаз.Сокем пыдло пыриз - куд-ог ужъёссэ печатламысь но дугдӥзы. Валэктылӥзы тазьы: малпанъёсыд огшоры лыдӟисьлы дуноесь ӧвӧл ни. Соин валче ик югыт дуннеез адӟымтэ вылэм Чечня пумысь кык ужез (мултэсгес луэм, пе). Одӥгаз кенешемын вал Джохар Дудаевлэн премьер-министреныз, мукетыз сӥземын вылэм ӵапак солы - Камбаркаын вордӥськем, быдэ вуэм но Чечняын котыртэме шӧдтэк шорысь шедем пияшлы. Чечняын Валерийлэн эшъёсыз но вань ини. 1994-тӥ арын Кышкытлыклэсь утиськонъя департаментлэн полициезлэн начальникез (республикае вуылыкуз, котьку пумиськыло) шымыртӥз: - Уд луиське-а тӥ Россилэн разведчикез? Отӥяз гожъяз Азербайджан сярысь - та республикаын пӧртэм разведкаослэн ужамзы пумысь. Адӟеме бере ик ӧй оскы вал Римысь папалэн но солэн туспуктэмзылы. Тазьы вылэм со. Та адями доры Валерий шедем егит журналистъёсын ӵош. Отын туспуктылыны уг яра вылэм. Нош дась мае ке вузало, пе, Ватиканлэн пресс-службаысьтыз адямиос. Вань шумпотон сылэ вить доллар. Италие Чиччолина ӧтьымтэ (уин ужась клубын кырӟакуз пумиськылэм ке но соин). Европаысь Журналистъёслэн огазеяськонзы ортчытэм егит гожъясьёслэсь ӵошатсконзэс. Отын вормемъёсты ыстӥллям Италие - та удысъя тодон- валанзэс будэтыны но ӟеч-ӟеч дышетыны. Валералы таӵе дан лыктӥз Чечня сярысь устоесь гожтэмъёсыз понна. Пумиськеммылэсь азьвыл ик кылӥ ни вал Италиысь оло кышно луонэз, оло лулгажанэз сярысь (егит адями та учыр сярысь ӝутскем мылкыдын вера). Нош ваньмыз тазьы вылэм. Шулдыръяськонысь уин бертӥсь пияш ӵапак ӝимем тылскемъёсын пачылмем ульчае (толалтэ вылэм). Нырысь-валысь номырзэ йӧндырымтэ. Валатскем калгись нылмурт (путана) уӵы куараен ӧтем бере гинэ. Таиз пиёклэсь юам: яра-а штан бирдыостэ пертчыны? Егит адями возьдаськеменыз му пыр вияны дась вылэм, куронэзлэсь палэнтӥськем, СПИД-лэсь кышкам. Эшшо кезьыт вылэм. Чебер апок соку юам: - Нош мар кариськод татын бер уин? - Мон поэт: кылбурасько. - Лыдӟелэ соку мыным кылбуръёстэс... Пиёк ӧръяськем... Озьыен, нокыӵе яратон ӧвӧл татын. Вылаз ик, Италиын... Нош Москваын со тазьы шутэтске. Отын но мылкыд карисьёс понна куддыр ортчытъяло кылбуретлы сӥзем ӝытъёс. Одӥгаз Римма Казакова кема лыдӟем йӧно чуръёссэ. Собере кыл сётӥллям солы, пинал удмурт пилы. Таиз ӧръяськем. Кылбурез могдос (тунсыко) вылэм. Пуштросэз таӵе: дэриысь ӵӧжпиез кутӥ но ваннаын майталэн миськи. Киысьтым лэзи гинэ - ӵӧжпие нош ик кырсь ини. Ӝыны минут ӵоже зал шып улӥз. Нош кылбурчи ӧз тодылы: яраз-а, ӧз-а? Шуак ваньмыз туж зол горыны ӧдъязы. Нош кылбурчи ялан лыдӟе. Удмурт кылэз кылэмзы потыса куризы асьме сямен но - тунсыкогес, чебергес, дыр, шуыса... Очеркме выльысь йылпумъяло Римма Казаковалэн кылъёсыныз: - Эрик Батуев - пинал удмурт кылбурчи. Ужъёссэ эшъёсыз ӟуч кылэ быгатыса берыкъяло. Мон ачим но пыриськи та удысэ - Батуевен ӵош ваче ки мынӥ солэн кылбур дуннеетӥз. Мынам берыктэмъёсы но мукетъёсызлэн берыктэмъёссы, куддыр, оло, уг но пӧрмо. Озьы ке но, та адямилэн кылбуръёсыныз пумиськыса, соослэсь дунзэс золгес шӧдӥсько. Ӟеч, быгатыса берыктэмъёс ӧз бездытэ удмурт кыллэсь чеберлыксэ. Таӵе усто книгалэн одӥгез ӟеч тодметэз, дыр, со. Кылбуръёсаз номыр мултэсэз ӧвӧл. Котькудӥз - аслаз вирыз. Удмурт пияш Эрик Батуев вордскиз но будӥз ӟеч му вылын, укыр возьдаськись, укыр востэм, кырӟаса вераськись, кырӟаны яратӥсь, чылкыт сюлэмо но оскымон адямиос пӧлын. ... Со нош ик дыртэ Чечняе. Марысь мар ке, анаез пумысь гинэ кайгыроз. Журналистъёслэн огазеяськоназы пыриз соин гинэ: марысь мар ке - татысь адямиослы тыро кызь вить миллион манет. Мынам шӧдӥсь сюлмы алэ: медаз ветлы вал ни со отчы... Серафима ПУШИНА-БЛАГИНИНА. 1� � � а=Р/яя 2 А! 8 Ё9Р Р Ортчемзэ тодэ вайытэ Кыкетӥ мировой война Россиын улӥсьёслэн адӟемзы пыр адӟытон та нуналъёсы США-лэн столицаяз ортче, вера "Вашингтон Пост" газет. 500 экспонат пӧлын - аслаз Гитлерлэн арбериосыз, сое утись отрядлэн флагез, Рейхстаг йылысь свастикаен ӧрӟи но советской солдатъёсын ӝутэм Вормон знамя. Гитлерлэн канцеляриысьтыз глобус вылын али но адӟисько на ас киыныз гожтэм кылъёс - Россилэн картаез вылын - "Мон лыктӥсько!", Америкалэн картаез вылын - "Мон татчы ӝоген вуо!" Кремльысь коллекция сярысь верано ке, экспозицие пыртэмын Сталинлэн ӝӧк вылысьтыз арбериос, озьы ик картаос, соос вылын пусйылэмын ожъёслэн мынэмзы. Возьматэмын тылож вакытысь уно документъёс, ӧтёнъёс, солдатъёслэн гожтэтъёссы. Куд-ог экспонатъёс, кылсярысь, Гитлерлэн глобусэз ик, хранилищеосысь ноку но поттылымтэ но возьматъямтэ. Пусйыны кулэ, экспозициез дасян бордын трос тыршизы Флоридаысь историяя музейлэн президентэз Уикс но Вооружённой Кужымъёслэн Москваысь Центральной музейзылэн директорез Александр Никонов. Выставка учкисьёслы туж кельшиз. Сое радъясьёс ужзэс азьланьтон сярысь кенешо, гожтэ газет. Чаклало экспозициез утьыны но США-ысь мукет городъёсын возьматыны. (Басьтэмын Интернет пыр.) � � ъ у $ р ӟ о � л � � q : q q q $ q п q ь q ӟ q � q ё яя - �ь<ьг - ИА�.яя Ҥ6 ы Е ?Р Р И( 8 9 яяяя Тимес Неw Роман Цыр ХелветицаУЦД Сюлэмъёстэс вырӟытозы Шаерысьтымы изобразительной искусствоосъя музейын усьтӥськиз ӟуч но Западной Европаысь живописьлы но скульптуралы сӥзем адӟытон (выставка). Суреда ЪВИИИ даурез - ЪЪ даурлэсь кутсконзэ. Адӟытон алэ: утелэ пиналъёсты но пӧйшуръёсты. Мукетыз эскпозиция тазьы нимаське: "Россиысь чеберлыкез валаны дышетӥсь калык киужъёс". Хохлома, городец, гжель, Павлов-Посадысь кышетъёс, Дымковоысь шудонъёс, Жостовоысь пужъятэм арбериос та удысъёсты дунъясьёслэсь сюлэмъёссэс вырӟытытэк уз кельтэлэ. Музей интыяськемын Ижевскысь Киров ульчаысь 128 номеро юртэ. Вуылэ чеберлыкъя дуннеен тодматскыны. Е. СТЕРХОВА. Куатьтон ар талэсь азьло 1938 арын 17 октябре юнматэмын "За отвагу" но "За боевые заслуги" нырысетӥосыз боевой медальёс Солдатлэн мылазяз медаль СССР-ысь Вылӥ Советлэн Президиумезлэн Указэзъя нырысетӥосыз медальёс кылдытэмын вал Атай музъеммес утёнын данэ потэм воинъёсты пусъён понна. Куамынэтӥ аръёслэн пумазы тодмо луизы диверсантъёсын, шпионъёсын но мукет тушмонъёсын ожмаськем боецъёслэн но командиръёслэн нимъёссы. Хасан ты дорын япон агрессоръёсты вормисьёс, кызьы шуэмын вал Указын пусъемын "За личное мужество и отвагу" медальёсын. Быдӟым Отечественной война дыръя медаль басьтӥсьёслэн лыдзы трослы йылӥз. Соос пӧлын уно гинэ Удмуртиысь боецъёс но. Ваньзы ик та солдатъёс ожмаськизы 97-тӥ Витебской стрелковой дивизиын (отчы пыризы вал асьме шаерамы кылдытэм 108-тӥ но 110-тӥ отдельной стрелковой бригадаос). Секыт ожъёс соку мынӥзы белорус музъем вылын, тушмон пумитъяськиз, лек ожмаськиз котькуд гурт понна. "За отвагу" медален пусъемын: ГЛАВАТСКИХ ЛЕОНИД НИКИТОВИЧ (младший сержант, пулемётной расчётлэн командирез, вордскемын 1919 арын, удмурт, Кез район, Пижман сельсовет). "1944 арын 3 феврале тушмон артиллерилэн кужмо ыбылэмез улын со кышкатэк азьлань мынӥз но тушмонлэн контратакаосызлы пумит ожмаськиз. Станковой пулемётэныз фашистлэсь кык пулемётной точказэ но сизьым немецкой солдатэз быдтӥз. ВЛАДЫКИН ФЕДОР ИВАНОВИЧ (сержант, отделенилэн командирез, вордскемын 1919 арын, удмурт, Юкаменск район, Ежово сельсовет). "Витебск областьысь Писаревщина гурт понна ожын 1944 арын 22 июне отделениеныз кышкатэк ожмаськиз. Тушмонлэсь контратаказэ пазьгон дыръя, куать немецкой солдатэз но одӥгзэ офицерез быдтӥз". СУНЦОВ АНДРИЯН ЯКОВЛЕВИЧ (рядовой, санитарной ротаысь ездовой, вордскемын 1901 арын, удмурт, Дэбес район, Ариково гурт. "За отвагу" медален кыкетӥзэ пусъемын ини). "Наступление дыръя 1944 арын 22 июньысен 5 сентябрезь ож лудысь сӧсырмемъёсты кышкатэк поттылэмез понна но валъёссэ умой утемез понна".. СТРЕЛКОВ ДМИТРИЙ МИХАЙЛОВИЧ (3-тӥ батареяысь орудийной номер, рядовой. Вордскемын 1898 арын, удмурт, Зура районысь Котечур гурт). "Высочная но Куртенки гуртъёс понна ожын орудилэн расчётэныз ӵош быдтӥз 8 пулемёт точкаез но одӥг миномётной батареяез чалмытӥз". ОПАРИН АНДРЕЙ ИВАНОВИЧ (ефрейтор, транспортной ротаысь ездовой, вордскемын 1903 арын, удмурт, Дэбес район, Лесогурт). "Витебск областьысь Б. Выдраевской районын наступление дыръя, 1943 арын 23-ысен 29 декабрёзь вис карытэк ож мынон интые боеприсасъёс, пыӵал тӥрлык но продфураж вуттылэмез понна. 24 декабре Жерновский гурт дорысь ожмаськон лудысь куинь сӧсырмемъёсыз пыӵал тӥрлыкъёсынызы поттэмез понна но соку ик ас мылкыдыныз тушмонлэн контратакаез дыръя оже пыриськемез понна". ОПАРИН А. И. (табере ини со младшой сержант, старшой ездовой. Кыкетӥзэ таӵе медален пусъемын. Нош талэсь азьлогес солы сётэмын вал "За боевые заслуги" медаль. "Кышкатэк но решительной действиосыз понна. Полклэн наступательной ожъёсыз дыръя 1944 арын 22 июньысен 5 сентябрёзь тушмон авиациялэн бомбаосыз улын ик Лучеса, Суходревка, Березина, Вилейка но Вилия шуръёсты выжон дыръя ӝог но дыраз боевой гурзъёсты вуттылэмез понна". "За боевые заслуги" медален пусъемын: ЕЛЬЦОВ ФЕДОР НИКИТОВИЧ (красноармеец, ездовой 45 мм пушкаослэн батареяысьтызы, вордскемын 1913 арын, удмурт, Пудем район, Байрам сельсовет, Том гурт), "Восточной Пруссилэн кунгожез вылын тушмонлэсь обороназэ тӥян понна, ожын кышкатэк ожмаськиз. Огаз ожын, асьме частьёсмы азьлань мыныкузы, немецъёс шӧдтэк шорысь контратакае выжизы, соку Ельцов орудизылы туж ӝог боеприсасъёс вуттӥз. Тушмонлэн контратакаез пазьгемын вал". БОБРОВ ПЕТР АЛЕКСАНДРОВИЧ (красноармеец, обозно-вещевой снабжениысь старшой вуриськись. Вордскемын 1898 арын, удмурт, Алнаш район, Бокай гурт). "Обмундирование вуронъя умой специалист луэмез понна. Оборонаын но наступление дыръя секытэсь условиосын но ужзэ со вылӥ ӟкчлыкен быдэсъяз но вуриськонъя но ремонтъя нормаоссэ мултэсэн тырмытъяз". ЛЕКАНЦЕВ АЛЕКСЕЙ ЕГОРОВИЧ (красноармеец, 3-тӥ стрелковой батальонысь снабжениея взводысь ездовой. Вордскемын 1895 арын, удмурт, Зура район, Пежвай гурт). "Витебской областьысь Б. Выдринской районысь Шумшино гурт дорын ожмаськон дыръя тушмонлэсь артиллериен но миномётъёсын туж зол ыбылэмзэ чаклатэк, боевой порядокъёсы вис карытэк, боеприсасъёс вуттылэмез понна". Ӧжытэзлэсь гинэ медальёсын данъям асьме палась солдатъёслэсь нимъёссэс верай мон та гожтэтам. Но мон соос сярысь гожтӥсько нырысьсэ. Уг тодӥськы кыӵе адӟонзы вал вылӥ верам солдатъёслэн, кылдӥз-а соослы войнаысь бертыны. Нош бертымтэосызлэсь нимъёссэс та гожтэтысьтым ӵыжы-выжыоссы шедьтозы шуыса малпасько. Мынам аслам но кызь ньыль правительственной наградаосы пӧлын (медальёс но орденъёс) "За отвагу" (кык) но "За боевые заслуги" медальёсы. Самой дуноез луэ нырысетӥез наградае - "За отвагу" медаль. Сое мыным, дас укмыс аресъем лейтенантлы, сётӥзы вал Кавказын лек ожъёс дыръя тушмонлэн минаос пуктылэм бусызы вамен разведчикъёсмылы сюрес сузяме но минаосты октылэме понна. Вормон нуналъёсы войнаысь бертэм солдатъёслэн мылазьысьтызы та медальёсты адӟыны ке кылдӥз, тодэ - солдатъёс данъяськыса нулло медальёссэс. Котькудӥз уго солдатлы сётэмын ожмаськон лудын подвиг лэсьтэмез понна. Владимир ГОЛУБЕВ, отставкаысь полковник. Москва. *** Гажано эшъёсы! Та гожтэтам мон ӧжытэзлэсь гинэ медален пусъем солдатъёслэсь нимъёссэс верай. Списоке бадӟым - куамын ньыль мурт. Уг тодӥськы, кызьы мон сое быдэсак шараяны быгато. Туэ кык гожтэт ысто на, дыр: 8 ноябре Слава орденлы 55 ар, сӥзьыл ик Днепр понна ожмаськонлы но со мында ик тырме. Асанъёс нянё луозы Бусыосын азинске ю-нянез утялтон, туннэ-ӵуказе кутскоз картофка октон. Районъёс пӧлысь умой ужало та вакытэ Алнаш районысь хозяйствоос. Вань киземез пӧлысь туннэ нуналлы арамын-кутсамын 83 процентэз. Удалтонлыкез, азьвыл аръёсын ӵошатыса, улӥынгес. Шорлыдын вераса, гектарезлы быдэ 10,5 центнер люкаське. Кык поллы ӟеч урожайзы Асанын. Совхоз-техникум та ласянь котьку висъяськылӥз. Туэ но, кӧс куазь шоры учкытэк, музъемлэсь кужымзэ быгатыса кутӥзы: гектарысьтыз 22 центнер ю кутсало. С. БОРИСОВ. Коньдонэз шыръян амал Берло дыре бюджет чотын ужась удысъёсын югдур пумен уродме. Сое тупатон сярысь сюлмаськыса, Удмурт Республикаысь Правительство кивалтон но социальной удысысь 465 муртэ кулэстыны чаклаз. Озьыен 5,8 миллион манет тыр кун бюджетысь уксё шыръяськыны кулэ. Мукет удысъёсъя ке верано, калыкез дышетонын 200 адямиез кулэстоно, культураын - 120, иворъёсты вӧлмытонын - 48. Таин ӵош ик социальной удыслы бюджетлэн 15 процент (ваньмыз пӧлысь) тыронэз люкаськемын. Бюджетникъёслы уждун тырон сярысь Россилэн Президентэзлэн Указэз вань ке но, со улонэ тыро-пыдо уг пыӵа. Асьме правительство городъёсын но районъёсын тупанкылъёс гожтӥз ни, нош быдэсъяськемзы умой-умой уг шӧдӥськы. Туэ 10 августэ правительство, профсоюзъёс но уж сётӥсьёс куспын тупанкыл кутэмын. Таиз но документ, коньдонэн секыт югдур кылдэмен валче, кулэезъя улонэ уг пыӵа. Г. ВАСИЛЬЕВ. ЖУРНАЛИСТЪЁСЫН ПУМИСЬКОНЪЁС "Ваче пумит ум пуктӥське",- шуэ Антонина Лисина Кылем вторнике, 1 сентябре, журналистъёсын пумиськиз Удмурт Правительстволэн Тӧроезлэн воштӥсез Антонина ЛИСИНА. Люкаськемъёслы со мадиз выль дышетскон арлэн кутскемез но удыс азьын сылӥсь ужпумъёс сярысь. Нырысетӥ сентябрь арлы быдэ зэмос праздник кадь луэ дышетӥсьёс но дышетскисьёс понна. Кин бен уг тоды тодон-валан дуннее нырысетӥ вамыш лэсьтэмзэ. Соин ик Правительство, городъёсысь но районъёсысь администрациос трос лэсьтӥзы та нуналэз умой пумитан вылысь. - Туннэ шаерысьтымы ваньмыз школаос, одӥгзэ-кыксэ вератэк, ӧсъёссэс усьтӥзы,- ватсаз Антонина Михайловна.- Кизнер районысь Бемыж шор ёзо школа гинэ нылпи садын ужаны кутскиз, но кык толэзь ортчыса, школа дась луоз. Дышетӥсьёсын югдур урод ӧвӧл. Куд-ог интыосын гинэ уг тырмо иностранной кыллы, физкультуралы дышетӥсьёс. Со валамон. Одӥгъёсыз кылысь кылэ берыктӥсьёс луизы, нош мукетъёсыз - коммерческой ёзъёсын возьмаськисьёс. Кызьы бен мынэ школаос лэсьтон? Берло дыре ушъяськыны уг луы. Азьло арлы быдэ 9- 10 сюрс дышетскон инты лэсьтӥське ке вал, али чылкак 1,5-2,0 сюрс. Туэ но сыӵе ик югдур. 1250 дышетскон интыен выль школа вуттэмын Глазовын, Сарапул районысь Усть- Сарапулка черкогуртын но кык пичи школа. Толлы дасяськон сярысь верано ке, тямыс процентэз школаос тупатъямтэ на. 300 пала котельной пӧлысь куамынэз вуттымтэ, нош ньыль район тырмыт ваиз ни музъем эгыр, оглом, ӝыныез эстӥськон школаосы ворттэмын ни. Та ужен уг дырто Дэбес, Кияса, Пичи Пурга но куд-ог мукет районъёс. Правительство ужпум пуктӥз 15 сентябрёзь ваньзэ йылаз-пумаз вуттыны. Школаосын кызьы радъямын луоз дышетскисьёсты сюдон? Гуртысь данакез школаос асьсэос будэто бакча сиён, картофка но музонзэ. Соин ик отын пиналъёсты сюдон, городъёсын сярысь, 2 пол дунтэмгес усе. Вылаз ик, городысь ӝыныезлэсь но ӧжытаз унояз школаосын пӧсь сиён пӧрало, нош гуртын 78 процентаз школаосын сюдо. Туэ дыраз ортчизы книга-тетрадь вузан ярмаркаос но базаръёс. Кун бюджетысь учебникъёс басьтыны 5 миллион манет коньдон висъямын, нош юрттэт (дотация) басьтӥсьтэм районъёслы - 400 сюрс манет. Но та лыдпусъёс туж пичиесь. Дунтэк учебникъёс вуозы ӧлексы но куанер улӥсь семьяосысь нылпиослы. Туэ шорлыдын одӥг книга 16 манет усе. Котькинэ сюлэмшугъяськытэ уждун. Та нуналъёсы апрель понна дышетӥсьёслы 21,7 миллион манет висъямын. Со келямын ни городъёсы но районъёсы. Ижевсклы, кылсярысь, 4,5 миллион манет сётэмын, Сарапуллы - 1,5, Шарканлы - 1,1, Балезинолы - 1,0, Алнашлы - 0,8, Вавожлы - 0,55 миллион манет. Озьы ке но, Антонина Лисина ивортэмъя, Ижысь, Сарапул, Завьялово, Вавож но куд-ог мукет районъёсысь дышетӥсьёс 2, 3, 4 сентябре пумитъяськон ужрад ортчытыны чаклало. Сыӵе вазиськонэн потӥз вал уго Россиысь профсоюзъёслэн федерацизы. Журналистъёс Антонина Михайловналы трос юанъёс сётъязы. - Кыӵе югдур нылпи юртъёсын но школа-интернатъёсын? - Оглом урод ӧвӧл. Кун бюджетысь уксё висъяськом. Тани Алнашысь нылпи юртлы 971 сюрс манет сётыны чакламын ке, 691 сюрс манет висъямын ни, яке 71 процент. Таӵегес ик югдур музон интыосын но. Играысь юртлы гинэ ӝыныез вуттэмын. - Кызьы ужа Ижысь калыкез дышетонъя управление? - Ас азяз сылӥсь ужпумъёсты быдэсъя. Но капчи уг йӧты, кивалтӥсез Александр Копинов улэп коньдон поттон амалъёс но утча. - Нош кыӵе югдур тазалыкез утисьёслы уждун тыронъя? - Ми нокинэ тоно-моно ум кариське, ваче пумит ум пуктӥське. Дышетӥсьёслы, медикъёслы но социальной удысын тыршисьёслы огдырегес уждун висъяны выриськом. Но туэ тулыс дышетӥсьёслы шутэтскемзы понна Москва нимысьтыз 50 миллион манет коньдон висъяз. Сое мукет удысъёслы сётыны лэзьымтэ вал. Соин югдур палдуресгес луиз. - Али дышетӥсьёс школаосысь кошко на-а? - Озьы шуыны уг луы, тужгес но гуртысь дышетӥсьёс сярысь. Туннэ та удысын 700 дышетӥсь-ветеран ужа. Соослэн опытсы бадӟым, шоро-куспо уждун 550 манет басьто ке но, ужысьтызы уг кошко. Пенсиосъя выль законодательство мар вералоз, али тодмо ӧвӧл на. - Методической литература басьтон пумысен мар верасалды? - Школаосысь библиотекаосы литература басьтыны 3,9 миллион манет висъяны учкемын, нош газетъёслы гожтӥськыны - 400 сюрс манет. - Игра районысь Зура шор ёзо школа куашкан калэ вуэмын. Трос-а сыӵе школаосмы? - Трос уд шуы, но вань. Отчы ми потам ни, эшшо ветлом на, районысь выль кузёен со ужпумез быдэстон борды одно ик басьтӥськом. - Шаерамы кӧня пичи школаос? - Миым 105 вал, туэ 95 кылемын. Соос ужало кыдёкысь пичи гуртъёсын, лесопунктъёсын. Собере журналистъёс азьын вакчияк вераськиз Правительстволэн аппаратысьтыз отделлэн кивалтӥсез Александр Хайдаров. Со ужпум пуктӥз 2000 арозь шаерамы выль туала компьютеръёс басьтон ласянь. Г. РОМАНОВ. Вылезлы - выль школае Нырысетӥ сентябре Кун Кенешлэн Тӧроез Александр Волков вуылӥз Глазове. Татын 1296 нылпилы выль школа усьтӥськиз. Берло дыре таӵе пусйымон ужрадъёс Глазовын но, быдэс республикаын но шер ортчыло. Соин но, вылды, 1-тӥ сентябрьлы сӥзем линейкае сюрслэсь уно адями люкаськиз: анай-атайёс, нылпиос, дышетӥсьёс, школаез лэсьтӥсьёс, журналистъёс. Люкаськемъёс азьын вераськиз Александр Волков. Со, кылсярысь, шуиз: та вакытэ шуг-секытъёс сярысь верам уг поты. Соос укыр трос, соосты эскерим городлэн администрацияз, азьланяз но соос сярысь ум вунэтэ. Туннэ ваньмыз валало: шаерамы вуз поттӥсьёслы ӧм ке дурбасьтэ, тазьы ик курадӟыса улом. Оскеме потэ, матысь дыре югдур тупатскоз шуыса, Россиысь Правительство чырмыт ужаны кутскоз, экономикаез, социальной удысэз азинтоз, Россиын калыклэсь улонзэ капчиятон вылысь сюлмаськоз. Нош али пурысьтам йырсиё ветеранъёс азьын возьыт, дышетӥсьёс но врачъёс, бюджет чотын ужасьёс азьын керпотоно, уго соос чидало, асьсэды жалятэк ужало пичияк уждун понна. Озьы ке но, асьмеос туннэ пусйиськом тодон-валан нуналэз. Со асьмелы оскон мед пыӵатоз, дуннеын асьме школалэсь, дышетӥсьёсмылэсь ӟечъёсыз ӧвӧл ни шуыса. Тау тӥлед шуныт сюлмо, капчи мылкыдо луэмды понна. Асьмеос ваньмы сюлмаськиськом нылпиосмы понна, соос - улонмес азьланьтӥсьёс. Пиналъёсты улыны дышетӥм, гажам ке, соос шудоесь луозы, тазалыксы юнмалоз, сюлэм косэмъя улозы. Мон ӟечкыласько школае нырысьсэ лыктэмъёсты но берпуметӥ арзэ дышетскисьёсты, вань пиналъёсты, дышетӥсьёсты но та школаез лэсьтӥсьёсты, городлэсь администрацизэ праздникен но выль юртэ - выль школае потэмен. Сюресты вольыт мед луоз! Кун Кенешлэн пресс-службаез. ОСКОН Тон ке яратӥд, тонэ но яратозы Александр Семенович Каракуловез Якшур-Бодья ёросын тодӥсьтэмез ик ӧвӧл, дыр. Со кивалтэ ёросысьтызы инвалидъёслэн огазеяськонэнызы. Шаерысьтымы шуге-леке сюрем адямиослэн ёрос огазеяськонъёссы пӧлысь як-бодьяос - одӥгъёсыз устоосыз. Адямиосты ас котыраз огазеяны быгатэменыз гинэ мукет ёросъёслы адӟем карымон ӧвӧл та огазеяськон, ёросысь калыклы бытовой юрттэт сётон удыс но со вылын возиське. Мар бордысь бен пото азинсконъёс? Со пумысен мон вазиськи аслыз Александр Семеновичлы. - Шаерысьтымы инвалидъёслэн огазеяськонзы кылдэм дырысен туэ дас ар тырмиз. Та дыр куспын мар ушъяськымонэз кылдӥз тӥляд ёросады? - Республикаысьтымы инвалидъёслэн огазеяськонзы кылдэмен ӵош ик, милям ёросамы но солэн ёзэз усьтӥськиз. Но нырысь кык аръёссэ отчы пырыны мылкыд карись ӧй вал. 1990 арын кивалтон удысэз мыным оскизы. Отысен ужмы вырӟиз, шуыны луоз. Ёросамы шуге-леке сюремъёс али дыре ваньмыз 978 мурт лыдъяське ке, 640-эз со пӧлысь огазеяськонамы пыремын. Палэнэ кылемын ӧвӧл одӥг гурт но, огазеяськонмы пушкын дас вить пичи ёз кылдытэмын на. Калыклэн бордамы кыстӥськемезлэн мугез туж огшоры - кутскимы котькудӥзлы нимаз-нимаз юрттэт сётон бордысен. Шуныт кылын вазиськем но аслэсьтыз ужзэ лэсьтӥз. Адямиос висёнъёссэс ик вунэтыны кутскизы кадь. Но коньдон инмысь уг усьы, радъяны кулэ вал асьмелэсь ужмес. Нырысь ик усьтӥм пыдкук тупатъян мастерской. Ужмы соку ик вырӟиз, калык дорамы лыктыны ӧдъяз. Асьмелэсь коньдон люкаса, кык вуриськон машина басьтӥмы на. Кутӥмы гуртазы вуриськыса пукись ужасьёсты. Вурыны кутскимы валес котыр, нуллоно дӥськут. Шуг-секытъёс вал интымы ӧвӧлэн, туж курадӟыса улӥмы. 1993 арын милемлы сётӥзы куашкан калэ вуэм вуж автостанцилэсь юртсэ, ми сое тупатъямы. Туж тау ёрос администрацилы, быгатэмезъя со милемлы котьку но юрттэ. Гуртъёсы потан понна калыкез нуоно-ваёно автомашина висъяз. Калыклы бытовой юрттэт сётӥсь комбинат ужамысь дугдэмен усьтӥмы асьмелэсь пичильтык мастерскоймес. Куинь мурт пыдкук тупатъя, вань на час тупатъясь мастермы, озьы ик йырси ӵышкисьмы. Йырси ӵышкыны селоямы мукет азьын но луэ, но калык тросгес лыктэ дорамы. Вераны кулэ, вань та юрттэт понна инвалидъёслы дунъёс дас процентлы кулэстэмын. Азьланьын фотография усьтыны чакласьком. Гуртазы ужаса пукисьёслэсь но ужзэс ӟечгес радъяно вал. Инты ласянь нош ик шуг-секытъёс кылдӥзы. Но ми оскиськом, азьланьын эшшо но паськытгес ӧръяськом шуыса. Малпаськом на вуриськонъя но бытовой техникаез тупатъянъя мастерскойёс усьтыны. - Тросэз огазеяськонъёс вузкарон удыс борды басьтӥсько. Тӥ та ужлэсь ӧд палэнтӥське-а? - Бен, милям огазеяськонмылэн но кык магазинэз вань. Инвалидъёс понна пызь, песок, кеньыръёс, ю тысь дунтэмгес вузаськом. Базар дунэн но, селоысь мукет магазинъёсын но ӵошатыса, вузъёс милям магазинамы дунтэмесьгес. Няньмы тани 20 копейкалы ӧжытгес. Соин ик калык дорамыгес лыктэ. - Удысты паськыт, озьыен, ужасьёсты но вань гинэ? - Ужасьёсмы ваньмыз 24 кузя, 16-ез соос пӧлысь инвалидъёс. Секытгес, пыд йылын ужано интые тазаоссэ адямиосты кутӥськом. Но нырысь ик уже интыяны турттӥськом инвалидъёсты. - Александр Семенович, вераськонады поттылӥды шуге-леке сюремъёслы нимаз-нимаз юрттэт сётон сярысь. Кыӵегес со юрттэт? - Кыллись, пукисьёсты эскерыны доразы потаськом. Машинамы вань бере, котькуд гуртэ потаны тыршиськом. Быгатэммыя коньдонэн юрттӥськом. Кылем арын тани, инвалидъёслэн нуналзылы сӥзьыса, месячник ялэмын вал. Гуртъёсын ёзъёсмы кылдытэмын ке, одӥгаз но вуылытэк ӧм кыле. Ваньмызлы инвалидъёслы 12 сюрс манет пала юрттэт сётӥм. Со сяна, ӝӧк сьӧрын пумиськонъёс ортчытъям. Милям асьмелэн ансамбльмы вань. Шумпотыса кылзылӥзы концерт номеръёсмес, асьсэос но кырӟазы. Инвалидъёслэн огазеяськонзылы дас ар тырмонэз но сӥё-дано пумитам. - Таӵе секыт вакытэ огазеяськондылы огназлы секыт, дыр, возиськыны. Кин ке юрттӥсьёсты вань-а? - Ми котьку но огкыл шедьтыны турттӥськом ёрос администрациен, огкылысь ужаськом ветеранъёслэн кенешенызы. Вазиськиськод ке, спонсоръёс но шедё. "Ижторф", "Удмуртнефть" юрттэ, райпо но, налоговой инспекция но, лэсьтӥськисьёс но пумит уг луо. Кин маин быгатэ, пичи ке но юрттыны тырше. - Мукет ёросъёсысь огазеяськонъёсты басьтоно ке, тросэз малы ке но чутогес. Маин сое валэктыны быгатысалды? - Мон малпасько, милям ужамы туж сюлмо, мыло-кыдо луоно. Астэ адӟытэк, тодоно кинэн тон улӥськод. Шуом, вӧзад ик улӥсь адями кыӵе курадӟе, юрттэт возьма. Котькудӥз шуге-леке сюрем мурт доры вуттӥськоно, вераськоно, сое гажаса но яратыса. Кызьы тон яратӥд, озьы ик калык тонэ яратоз. Нош ӟеч лэсьтэм ӟечен ик берытске. Собере, ӟучъёс шуэмъя, кыллись из улэ ву уг бызьы. Л. МАЛЫХ. В. Камашевлэн туспуктэмез. Тонэн кылисько, вордӥськем гуртэ Машинамы Быги гуртэ пырыса вуттӥз гинэ, азями вал уллясь сюриз, уробоез мешокъёсын тырмытэмын. - Таосыдлэн туннэ уждун сётъян нунал, лэся,- нокыӵе кариськытэк вазиз вӧзам пукись эше. Зэмзэ но, марлы паймод на кадь туала вакытэ, Ижевскысь радиозаводын гинэ но тани уждун интые талонэн буханка нянь висъяло ни ке. Нош паймыны вань вылэм марлы. Шаркан районысь "Восход" колхозлэн ю тысь возён склад дораз вуыса, празднике шедем кадь потӥз. Кин трактор уробое, кин вал уробое - резь-куаж гинэ ӝутъяло ю тысен тырмытэм мешокъёсты. Озьы колхоз гурт калыклы йыды люке вылэм. Милям, гуртлэн туннэ маин улэменыз тодматскыны потэм муртъёслэн, пыр-почгес тодэммы потӥз та колхоз сярысь. Шаркан администрациын но "Восходэз" ӟеч кылъёсын гинэ ушъязы угось. Нош мынам сюлмам одӥг пыдлось малпанэ вал на - гожтоно Ангелина Венедиктовна Протопопова сярысь. Ужлы чырмыт та нылкышноез мон кызь арлэсь ятыр тодӥсько ни. Тямыс класс бере артысь Вортча починка гуртысь пиналъёс дышетсконзэс азьланьтылӥзы Быги школаын. Ӵапак соку ик тӥни нырысьсэ адӟи Ангелина Венедиктовнаез. Егит специалист соку ужа вал колхозын агрономын, со вакытэ ик школаысь бадӟым классъёсысь нылъёс пӧлын агрономияя урокъёс нуиз, пиос дышетскизы механизаторе. Ачиз но трос тодэ вал, дышетскисьёс азе но куронъёс пуктылӥз. Оскизы бере, ужано, шуылӥз, дыр. Мынам син азям со сыӵе ик кылиз: мултэс уз супыльты, нош ужано ке, вань сюлэмзэ поныса тыршоз. Быгие вуыкумы, нунал ӝытлань вуэ ни вал. Нош Ангелина Венедиктовнаез озьы гинэ уд шедьты вылэм. Али гинэ со складын вал кадь, учкиськод но - конторае вуэм ни, нош отысь - гараже. Тӧлпери кадь лобаса ветлэ, сьӧраз вуттӥськыны но уг луы. Машинаенымы корка дораз кожимы ни. Колхоз ужен тырмытэм ныпъетсэ пельпумысьтыз куштыса, кышномурт юрт котырысьтыз ужъёссэ ныпъяны вуттэм ни вылэм - шутэтсконэз но, жадёнэз но уг тоды, лэся. Бен, сюлмаськонъёсыз солэн та вие дораз но трос гинэ. Нылпи вайыкуз, нылзы ӧжыт гинэ улэп кылем. Ярам, вань кышкытэз палэнэтӥ ортчиз. Но нылпиос сярысь сюлмаськон анай сюлэмысь нокытчы уз ышы, бурдъяськыса асьсэлэсь семьязэс кылдытӥзы ке но. Ангелина Венедиктовна но Николай Валентинович Протопоповъёс кык ныл будэтӥзы. Тани табере пичи внуксы аслэсьтыз куаразэ сётэ ни. Солэн, озьы ик гуртысь мукет нылпиослэн азьланьын улонзы сярысь но малпаськытэк уг луы. Мар возьма соосты азьпалан, кырыж-конгыль вамышъёсын кытчы мынэ та улонмы? Та пумысен но йырыз висе колхозысь экономистлэн но валтӥсь бухгалтерлэн Ангелина Венедиктовналэн. Сюлмаз тымиськыса улэм малпанъёсыз кисьтӥськизы. Вера но вера, ми шып гинэ пукиськом на, малпанзэ куспетӥ медам каре шуыса, одӥг-ог юанъёс сётъяськом. Нош учконо ке, малпанъёсыз солэн вылесь ӧвӧл, быдэстонтэм но уд шуы соосты: ваньбур шоры, музъем шоры кузёяськись синмын ӧвӧл, кузё синмын гинэ учкыны быгатоно, калыкез вунэтоно ӧвӧл на. Но трос учыре колхозысь валтӥсь специалист валантэм югдурен, кожаз лэзем ужен пумиськоно луэ. Со ик бышке сюлэмзэ. Кӧтыз уг тыры Воткинскысь сӥль комбинатлы но. - Телевидение пыр вань калыклы возьматоно вылэм ужамзэс. Машинаез пуктыны нокытчы, сомында адями лыктэмын, коньдонлы шуыса. Котькытын черод, шоре ик кесяськозы на. Ярам, колхоз кызьы но озьы чидалоз, шуисько. Колхозникъёс понна туж ӝож. Тани милям но колхозысь ик одӥгез скалзэ 2100 манетлы вузаз, нош коньдонзэ басьтыны турттыса вить пол ветлӥз ни. 200 манетэн буйгато. Сюрес дунлы гинэ кӧня коньдон кошке. Кытчы кароз ужась мурт сӥльзэ? Амалтэк доразы вазиськоно луэ. Колхозысь сӥлез келям понна но сётэ вал соос туннэ одӥгезлы сизьым сюрс манет, ӵуказе - мукетызлы. Ваньмызлы сюрсэн яке ӝыны сюрсэн сёто, ветлы собере со понна оглань-талань. Районысь кивалтӥсьёс но асьсэлэсь ужзэс выль сямен радъяны кулэ. Азьвыл кызьы вал? Гурт хозяйствоя управлениысь валтӥсь инженер ваньзэ син азяз возиз - кытын кӧня воштос ёз, кыӵе дунын, кытысь басьтоно. Тани, зортэк улэмен. музъем чурыт луиз, лемехъёс котькуд нунал сямен тӥясько, собере ӟечлыксыя но сыӵеесь гинэ. Огысьтыз магазинысь басьтӥськом, нош мукетаз со ик дунтэмгес. Соин ик, валтӥсь инженерлы ваньзэ сое чакласа возёно. Компьютеръёс вань, ужа но ужа гинэ. Сыӵе ик югдур заготовительёсын. Милям колхозамы парсь вордон комплекс бере, пудоез ялан кытчы ке келяно. Нош кытчы? Нокин но уг тоды вераны. Гурт хозяйствоя управлениын кыӵе ке но график луыны кулэ ук. Котькудӥз ас интыяз аслэсьтыз ужзэ кулэезъя быдэсъясал ке, гурт хозяйство такем секыт югдуре ӧй вуысал. Тани Чайковскийысь сӥль комбинатэ ми 40 сюрс манетлы сӥль нуим, коньдонзэ соку ик сётӥзы. Шарканын, Воткинскын, Ижевскын гинэ но озьы ӧвӧл. Удмуртия понна одӥг Сарапул ужа тупатэм графикъя. Милемлы шуо, лэсьтэ экономической программа, мед со ӝутоз колхозэз. Мар бен, ми бумага вылын гожъялом. Но бумага милемды уз сюды ук, со заготовительёс ик келям продукцимы понна дун ӧз тыре ке. Шаерысьтымы сӥль комбинатъёслы льготаен кредит сётоно вал. Соку милям продукцимы соос кие мынысалзы, нимаз ужбергатӥсь кие кошкытэк. Отысь ик государстволы налог но тыриськысал. Нош али кызьы луэ? Лыкто дорамы ужбергатӥсьёс, куто но нуо сӥльмес, собере кытын ке отын вузало ни. Малпаськоды, ваньмыз понна соос налог тыро-а? Троссэ поттэм дунзэс ватыса кельто. Государство озьы аслэсьтыз ачиз пукон вайзэ ӵоге. Мукет ужпум но туж сюлэмшугъяськытэ. Гурт хозяйстволы бюджетысь туж ӧжыт коньдон висъяське. Но мед сётозы вал сое кытчы кулэ. Туж тау, эстӥськонлы дотация басьтӥм. Тулыс кизьыны но, араны но со бадӟым юрттэт вал милемлы. Но малы со дотацилы дунтэмгес эстӥськон уг утчало? Кытын ке республикаын самой дуно эстӥськон, отчы ик со коньдон кошке - Воткинскысь нефтебазае. Валэктӥзы, со конкурсын вормисе потӥз. Нош гурт калыклы талэсь капчи луиз шат? Со эстӥськон ик дунтэмгес но тросгес мед луоз вал, таиз сярысь нокин уг малпаськы. Умоезлы осконмы куддыр быре. Весь пыдесъяськытыны туртто милемды. Кызьы ке но переработкаез пыд йылаз султытоно ик вылэм. Со ке умой ужаз, гурт хозяйство быгатоз ӝутӥськыны. Алигес тани Менделеевскысь жингыртӥзы, 600 манетэн, пе, удобрение сётом, нош ми сое тулыс 1200-эн басьтӥм. Колхозмылы 140 сюрс манет пунэм тыронъёссы люкаськизы ни. Со коньдон киямы вуысал ке, мар гинэ ӧй басьтысалмы. Эстӥськон но 1 манетлы кӧня кулэ вайысалзы. Нош ми сое али Кварсаысь 1600 манет дунын ваиськом, сӥль комбинат но йӧл завод пыр. Таос кызьы ке но басьто ук. Малы уг луы со эстӥськонэз ик меӵак колхозлы сётыны. Одно кулэ кин ке пыр лэсьтыны, бергатыны кытын ке. Нокызьы но киямы дунтэмен медам ву. Оло, со юри озьы лэсьтӥське? Ангелина Венедиктовналэн сюлэмыз висе уждун пумысен но. Со малпамъя, вань лыдъян- чотан бумагаосын уждун нырысетӥ графаын сылыны кулэ. Кызьы адямилы тырид ужамез понна, сокем со сюлмаськоз но. Та пумысен быгиослы номырлы ӝожтӥськыны кадь, колхоз кивалтӥсьёс ужасьёссы понна сюлмасько. Озьы ке но, А. В. Протопопова лыдъя: - Таӵе секыт югдурын колхозмы ӧй вал на, пунэмъёссэс берыктымтэен, колхозникъёслы уждун тыреммы уг луы. Июнь понна уждун быдэсак сётъямын ни, июль понна 200 сюрсэн ке но висъяно ик вылэм. Нош коньдон ӧжыт уг басьто ужасьёсмы, шоро-куспо уждунзы 500 манет усе. Ужась калык специалистъёслэсь трос басьтэ. Пудо сиён дасянын туэ гужемзэ 1500 манет тыр уждунзы луиз. Нокин но уг косы ужаны укмысозь яке дасозь, складын но ӵукнаозь нокинэ уг пукето, котькудӥз ачиз тодэ аслэсьтыз удыссэ. Дисциплина милям нырысетӥ интыын. Марысь мар ке, интыяз ужась ӝог гинэ шедёз. Кылем арын парсь фермаын югдурмы урод вал. Ужасьёс пӧлын воштонъёс ортчытэмын. Таӵе вамыш пайдаен берытскиз. Туннэ ум валаське кытчы карыны парсьпиосмес. Ялыны малпаськомы ни районэ: кинлэн басьтэмез потэ - мед лыктозы. Колхозникъёслы мында тупатэм дунын ик вузалом. Парсь сиёнмы тырмыт вал, гужембыт вож сиён улӥз. Сутка ӵоже 500 граммлэсь ятыр будӥзы. Йӧл кысконъя но районын бере ум кылиське. Ужасьёсч, скал кыскисьёс 1 сюрс манет пала уждун басьто. Со потэ йӧллэн ӟечлыкез, кӧня кыскем бордысь но. Ӟеч ужамзы понна колхозникъёс котькуд толэзь премия басьто. Одӥг ӟеч кылын гинэ кыдёке уд мыны угось туала вакытэ. Гурт калыклы озьы ик висъяськом ю тысь. Кинлэн басьтэмез потэ - 200 килограммен ӟег люкимы ни. Колхозникъёслы пичигес дунын сётӥськом. Интеллигенциез, пенсионеръёсты, ужтэк кылемъёсты но палэнэ ӧм кельтэ. Дышетӥсьёслы тани уждунзэс ӝегато. Маин тырозы соос? Куке быгатоды, соку ик тыроды, шуиськом. Кылем арын укмыс толэзь тырыны выризы. Йыды, чабей люкомы на. Тазэ учкомы ни кинлэн кӧня ужамезъя. Ваньзэ сое огъя кенешын эскеро специалистъёс. Озьы ик сётӥськоз на кӧжы, фураж. Шуиськом, пыр-поч ужась адями тонна ёрос ю тысь мед басьтоз. Котькудӥз пудо вордэ угось. Со сяна, котькуд мехавнизатор тонна пала дунтэк ю тысь басьтэ на. Мылкыдзы механизаторъёсмылэн туэ умой. Гектарысьтыз 18 центнерлэсь ятыр ю тысь басьтӥм. Пудо утисьёс пӧлын озьы ик натуроплата лэсьтыны выриськом. Мукетаз кенешамы со ужпумез эскерыны чакласьком. Уждунзы ӧжыт ӧвӧл ке но, возьмало кунян-а, парсь-а. Пастухъёсын озьы ик огкыл гожтэмын. Специалистъёссы "Восход" колхозын золэсь - ваньмыз сямен асьсэ гуртысь потэмын, ваньмызлэн сямен вылӥ образованизы. Хозяйствоен туж быгатыса кивалтэ Анатолий Григорьевич Хохряков. Ангелина Венедиктовналы, экономистлэсь но валтӥсь бухгалтерлэсь ужзэ оскыса, ӟеч гинэ лэсьтӥзы кадь. Огназлы кык муртлэсь ужзэ быдэсъяны капчи ӧвӧл ке но (уждун басьтэ одӥг ставка), кышномурт со пумысен уг ӝожтӥськы. - Тазьы ужаны капчигес но. Кыӵе гинэ колхозэз эн басьты, кык специалист куспын валамтэос кылдо. Со выже ужасьёс вылэ но. Экономист уждун лыдъя, нош бухгалтер со коньдонэз утчаны кулэ. Мон сыӵе уждун лыдъясько, кудзэ туннэ шедьтыны быгатӥсько. Ангелина Венедиктовна йылпумъяз Сарапулысь совхоз-техникумез. Куинь арзэ заочно дышетскиз на Ижевскысь гурт хозяйствоя институтын, но ваньмыз тодмо ни вал бере, мӧзмыт потӥз солы отын дышетскыны. Собере егит специалистлы ӵектӥзы вылӥ партшколаын дышетскыны. Татын басьтэм тодон-валанъёсыз но колхозын ужам аръёсыз солы туннэ ужаз туж бадӟым школа. 15 ар ӵоже со вал парторганизацизылэн секретарез. Улонлы но калыклы матын луон понна ялан выльзэ утча, тодон-валанъёссэ будэтыны тырше. - Одно ик учкисько телевизорысь "Время" программаез. Вань ужме кушто со понна. Пиналъёсы серекъяло: "Мама адями ватонэз но берлолы кельтоз, но "Времяез" учкоз". Кызьы бен сотэк? Мыным ӵуказеяз калыкен ужано, мар вералом соослы, мар ке сярысь тодытэк кыли ке. Нош юамзы оломар но потэ. Мон адямиослы аслэсьтым малпанме гинэ вераны ӧвӧл кулэ. ваньмыз со законэ мед пыкъяськоз. А. В. Протопоповалэсь быгатонлыкъёссэ районын адӟытэк уг кылё. Партилэн райкомаз кыкетӥ секретаре но ӧтё вал, гурт хозяйствоя управление но кураны турттылӥзы. Нокытчы ӧз вырӟы. Али но тани "Колос" колхозысь кивалтӥсьсэ воштыны туртто. Нош ик малпаськы, шуо. Вань улытозяз татын ужамын бере, гуртэзлэсь люкиськыны уг быгаты. Лия МАЛЫХ. ШӦКЫЧ Кин кинлэсь кышка? Йӧтылӥз ас вакытаз Никита Сергеевич Хрущевлы. Ма понна шуиськоды-а? Ма, самой со кукуруза понна. Кивалтон вакытаз уго СССР-лэн но партилэн кузёез быдэс странаямы вӧлмытыны вуиз та пудо сиёнэз. Американецъёслэсь адӟем карем шуизы, лэся. - Никита аслэсьтыз кукурузазэ уй пал полюсозь но кизьытэ! - вожзы потылӥз одӥгъёсызлэн. - Кыедэз гинэ укыр трос люкаське со будосэдлэн! - кесяськылӥзы куинетӥосыз идеологъёс. Зэм, сыӵе вераськонъёс потылӥзы асфальт вылын улӥсьёс пӧлын гинэ. Нош музъем ужасьёс умой валазы кукурузалэсь пайдазэ. Жалем вож сиёнэз но уно гинэ люкаське. Кукуруза плантациоссы туэ умой ӝужазы Иж кар вӧзысь опытной станциын. Одӥгез гинэ паймытэ: бусыын кык пыдоос калго, ява. Кык метр ӝуждалаем будосъёс пӧлын тычыр- тачыр! вазе. Озьы адямиос кукуруза йыръёсты ишко вылэм. Валамон ини, вузаны. Уго сылал вуын пӧзьтэм ӵуж кукуруза ческыт сиён луэ. Соин али Ижысь котькуд сэргын сямен вузкаро ни. Ижен Тяма гурт пала мынӥсь-ветлӥсь автобусъёс кукуруза лушкасьёсын тырмытэмын. Соиз гинэ уг тырмы - вуо машинаосын, мотоциклъёсын. Ӧйтӧд, скалъёслы маке кылёз на меда озьы? Пудоослы гинэ ӧвӧл, ӝоген калыклы но номыре уз кельтэ ни. Бусыосысь лушкало картофкаез, сад-бакчаосысь кайпалто огречез, ӵуж кушманэз, помидорез, яблокез... Ульчаосысь вузкарисьёсын пумиськыны кылдӥз ке, тодэ - соос пӧлысь уноез лушкам ваньбурен коньдон потто. Зэм, улонэз но али сыӵегес уга... Нош малпалляз меда куке-соку Никита Сергеевич, солэн вӧлмытэм кукурузаез адямиослэсь но кӧтсэс тыроз шуыса? Ӧз, дыр. Но мон ялан таӵе суредэз адӟисько. Кукуруза вӧзтӥ скалъёс ортчо но тазьы бӧксо кадь: - Му-у-у, кык пыдо изьверъёс! Милесьтым паймес куасалтӥськоды! Озьы бере, уз луы тӥледлы йӧл но, вӧй но. Ӵок ини скалъёсын. Соосты пастухъёс будосъёс вылэ уз лэзе. Нош адямиосты кин возёз? Кин сютэм калык вылэ кизэ ӝутыны дӥсьтоз? - Эх-эх-эх! Мар улон та... А. АЛЕКСАНДРОВ. ЕГИТ ДУННЕ Лулэз эмъяны - монастыре? Вашкала летописьёсъя нырысетӥ монастырьёс Русьын усьтэмын вал ай ИЪ даурын: Пустынно-Николаевской Киевын но Вознесенской Менскын (вашкала Минск). Монастырьёслэн лыдзы будӥз христианство пыӵамен валче. Летописьёсысь тодмо, ЪИ даурын соос 22 вылӥллям ини, нош ЪИИИ даурын - 120, пӧлысьтыз 24-ез - нылкышноос понна. Даурысь дауре монастырьёслэн лыдзы вошъяськылэм. Озьы, 1917-тӥ арлы Россиын 1242 монастырь вылэм, нош отысь адямиослэн лыдзы - 100 сюрс котыр. Туала вакытэ но трос монастырьёс ужало. Пӧламы ик вань отчы мыныны дасяськись адямиос. Нош маиныз меда кыске монастырь? Кинъёс, кыӵе адямиос отчы мыно? Серафима Пушина-Благининалэн "Кылиз на мыныны... монастыре гинэ" материалаз ("Инвожо", 1996 ар, �4) таӵе чуръёсыз вань: "Огпол лекциысен митрополит Питирим юанлы - мар пӧртэмез мирянин (черке ветлӥсь) но монах куспын - вераз: "Монах сыӵе ик адями, кыӵе мирянин, но солэн улытозяз огпол ке но ӟечгес луэмез потӥз, соин лыктӥз монастыре". Нош мар меда малпало та пумысен асьме пӧлын улӥсь егит нылъёс? Кыске-а соосты бордазы нылкышно монастырь? Маша, 17 арес: - Мон уг валаськы, кудъёсыз егитысен монастыре кошкись адямиосты. Аслам пичи но монахиня луэме уг поты. Мон пинал на. Мынам яратэме потэ, монэ мед яратозы. Нош инмарен матынгес кусып возён пумысен ке... Вань ук черкъёс - отчы ӵемысь ветлыны луэ, дорын оброс азьын вӧсяськыны луэ... Монастыре мыныны дасяськись эшъёсы ӧвӧл. Ольга, 27 арес: - Мынысал-а мон монастыре? Ӧйтӧд... Ог 40-50 аресъёсам, оло, лэсьтысал но таӵе вамыш, нош али - ӧй. Мон малпамъя, монастыре мыно сыӵе адямиос, кудъёсызлэн та улонын вань малпанъёссы быдэсмизы ини. Соослэн ӧвӧл ни нокыӵе но мугор мылпотонъёссы. Лулзы, оло, маке но куре на... Света, 32 арес: - Пиосмуртъёс пумысен ма вераны шугъяськисько. Но кыӵе кышномурт син азяз уг пукты меда таӵе суредэз: тани со пыдесъяськыса инмарлы вань сьӧлыкъёссэ шарая, лэсьтэмъёсыз понна ӧпкеле. Яке, улон сюресэз пумын со огназ улэ шыпыт гинэ обительын. Черкын кырӟась хор, ымныр кӧдэктэмез эшшо но зол возьматӥсь сьӧд монах дӥсь - ваньмыз та романтика гинэ ук! Мон малпасько, тросэзлэн нылкышноослэн черке ветлэмзы но, вӧсяскьемзы но юн герӟаськемын соослэн романтика мылкыдъёсынызы, сентиментальной луэменызы. Монашество кыдёкысен гинэ ас бордаз кыске, дыр. Малпамея, отчы мыно улонлэн пумаз вуэм нылкышноос. Кызьы югыт тыл висись синъёс понна - курадӟон соос, понна улон но - сыӵе ик курадӟон. Наташа, 24 арес: - Матысь эше училищеез быдтэмез бере ик монастыре кошкиз. Монэ но сьӧраз чортэ вал. Но мон ӧй мыны. Малы? Монахиня луон - туж секыт уж. Монахиня луон понна туж зол оскыны но чидась луыны кулэ. Тросэзлэн кужымзы уз тырмы. Мон но ӧй чидасал, дыр... Света, 35 арес: - Монастырь - со адямиослэсь пегӟон. Нош мон адямиосты яратӥсько. Яратӥсько улонэз вань шумпотонъёсыз но шуг-секытъёсыз понна. Мынам солэсь пегӟеме уг поты. Елена Китова, Удмурт кун университетысь студентка. Шӧкыч Мынам телевизоре Тани соос - Шарканысь кык базаръёс - вылез но, вужез но. Соисьтыз но, таисьтыз но, асьме дорын поттэм, асьме музъем вылын будэтэм вузъёсты ӧм адӟе. Котькытын сямен ик ананас, тампекс, банан но мукетъёсыз... Г. ЮСАЕВЛЭН туспуктэмъёсыз. ПРАВИТЕЛЬСТВОЫСЬ ИВОРЪЁС Ӵуказезэ чакласа Кызьы нюлэс промышленностез шуг-секытысь поттоно? Та ужпум эскеремын Удмурт Республикаысь Правительстволэн Президиумезлэн кенешаз. Вераськон мынэ удысэз 1998- тӥ-2003-тӥ аръёсы выльдонъя но азинтонъя программалэн инъетэз сярысь. Отын чаклам ужрадъёс юрттозы удыслы уно луонлыкъёссэ уже кутыны но ӟеч продукция поттыны. Сое кунгож сьӧрын но басьтозы. Программа Кун Кенешлы эскерыны ыстэмын. Эскерон юрттэ Буёло кортэз лушкасьёс йыло. Али 116-ез кырмемын ни, соос судын кыл кутозы. Огъя вераса, 30 умойтэм уж шараямын. 390 сюрс манетлы изъян берыктэмын, нош ньыль организацилэсь сьӧд но буёло кортэн ужаны лицензиоссы таламын. Правительстволэн Президиумез, югдурез тупатон но эскерон ужез кужмоятон вылысь, ужрадъёс чаклаз. Быдэс улонэз ӵоже "Налог тыронэз радъянъя но умоятонъя ужрадъёс сярысь" Удмурт Республикалэсь Законзэ быдэсъяса, 800 сюрс мурт налог тырисьёс лыдэ басьтэмын луозы. Котькуд адямиез лыдъян вылысь, али огъя амалъёс дасясько. Та уж кутскоз туэ 1 октябрьысен. Налог тырисьлэн номерез адямилы быдэс улонэзлы сётӥське. Законлы инъет "Удмурт Республикаын интыын (муниципальной) служба сярысь" Законлы проект ӝоген учкемын луоз Правительствоын. Сыӵе решение кутӥз вылӥ быдэсъясь ёзлэн президиумез. Законопроект бордын ужалозы на. Сертификат басьтон азьын Басьяськисьёслэсь правооссэс утён но соослы вылӥ ӟечлыкен бытовой юрттэт сётон вылысь, та удысысь организациослы одно ик сертификатъёс сётъяны учкемын. Соин валче Праивительство постановление кутӥз. Отын юнматэм положениея организациослы сертификатъёс сётъялозы. Валамон, ваньмызлы уз. Со сярысь положениын верамын. Премиос пумысен Промышленностьын, лэсьтӥськонын но гурт хозяйствоын туэ бадӟымесь азинсконъёс басьтэмзы понна Правительстволэн Премиезлэн лауреатэз луыны ужъёсты кутэ Удмурт Республикаысь Правительствзлэн премиосъя кенешез. Материалъёсты ыстоно 1 октябрёзь та адресъя: 426007, Ижевск город, правительстволэн юртэз, 164 номеро комната, юалляськыны луоз телефонъёсъя: 52-49-95, 75-67-92. Удмурт Республикаысь Правительстволэн Тӧроезлэн секретариатысьтыз пресс-центр. Шӧкыч Суралтэт Чылкак рай но рай! Вамышлы быдэ магазинъёс, сэреглы быдэ вузкарисьёс. Нош лавкаосы пыриськод ке, синъёс ик палёмо, ява! Мар но ӧвӧл отын! Уката ик паймиськод вина-кабакъёслэн аспӧртэмлыксылы. Амалтэк тодэ ваиськод Горбачёв кивалтон вакытэ улэм аръёсты. Соку уго талонэн толэзяз одӥг ӟенелик гинэ басьтыны луэ вал. Курытэз яратӥсьёслы табере зэмзэ но рай. Нош зэмзэ ик-а меда рай? Тани берло дыре трос гинэ кылӥськод пӧяськыса дасям аракыен сопал дуннее кошкемъёс сярысь. Ӟучъёс сыӵе водкаез самопал яке суррогат шуо на. Вылтусызъя сыӵе бутылкаез номырин уд висъя - шобретэз заводын кадь шуккемын, лякем бумагаез но, вань акцизэн маркаез но, штрих-код шуонэз но вань. Нош пушказ мар - тодод ини бутылкадэ мекалтэмед бере гинэ. Одӥг кылын вераса, басьтод - юод, собере, оло, мекалскод но, ява. Гудыри кошкон толэзе элькунысьтымы милиция, налогъёсъя инспекциос, Вузкаронъя но бытовой юрттэт сётонъя министерство 65 вузкарон предприятиез эскеризы. Соку 39-аз шараямын вал уно тырмымтэос. Умойтэмен лыдъямын 150 сюрс манетлэсь унолы юонъёс. Соин ик, азьланяз чаклаське! Эн басьтэлэ таӵе заводъёслэсь вуззэс: "Русская" нимын урод водка потто Москва областьысь Черноголовка посёлокын, Челябинск областьысь Снежинск городын, Владикавказ городын, Кабардино-Балкариысь Прохладный городын, Сочи городын. Сокем юэмды потӥз ке, умойгес луоз нимысьтыз магазинэ мыныны. Солэсь но умойгес - йӧлын вузкарон магазинэ. Б. СЕРГЕЕВ. Шуг-секытысь потон понна Странаын секыт югдур кылдэмен но шуг-секытъёсты вормонъя ужрадъёс ӝегатскытэк кутон понна Кун Кенешлэн Тӧроез Александр Волков шутэтсконзэ уретыса ужаны потӥз. Августлэн берло нуналъёсаз со Москваын пӧртэм пумиськонъёс ортчытӥз экономика удысын кусыпъёс возён пумысен. Федерацилэн Кенешезлэн заседаниезлы дасяськыса со вераськиз Удмуртиысь Правительстволэн кивалтӥсьёсыныз, промышленной предприятиослэн директоръёсынызы, банкиръёсын, городъёсысь но ёросъёсысь администрациослэн кивалтӥсьёсынызы. Нош ньылетӥ сентябре Александр Волков Россиысь парламентлэн вылӥ палатаезлэн ужаз пыриськиз. Кун Кенешлэн пресс-службаез Пумит луыны куро Кун Кенешысь коммунистъёслэн фракцизы вазиськон ыстӥз Кун Кенешлэн Тӧроезлы, Федеральной Собранилэн Федерацияя Кенешезлэн адямиезлы Александр Волковлы Россиын берло нуналъёсы секыт югдур кылдэм пумысен. Экономикалэн куашкамез, калыклэн но Удмуртилэн секыт улонэ вуэмез герӟаськемын Россилэн Президентэзлэн Б. Ельцинлэн но В. Черномырдинлэн азьвыл Правительствоезлэн ужаменызы, соос туннэ но Россиез кужмысь нуыны туртто странамес бырон калэ вуттӥсь реформаосъя, шуэмын вазиськонын. Депутатъёс-коммунистъёс А. Волковез куро В. Черномырдинэз Россиысь Правительстволы Тӧрое юнматонлы пумит кариськыны. Кун Кенешлэн кивалтӥсезлы коммунистъёс тодазы вайыто, азьло аръёсы но Удмуртиысь калык туала реформаослы пумит луэмзэ вералляз, Президентэз но федеральной Правительствоез отставкае кошкыны курылӥз шуыса. Таӵе куронэн ик А. Волковлы вазиське армилы, обороная промышленностьлы но военной наукалы дурбасьтӥсь политической движенилэн Удмуртиысь люкетэз. Федерация Кенешлэн адямиез луыса А. Волков умоен лыдъяны кулэ Кун Думалэсь решенизэ Ельцинэз ас мылкыд каремезъя отставкае кошкытон сярысь, шуэмын военнойёслэн вазиськоназы. Т. МИРОНОВА. Удмурт Республикаысь Правительство мур куректэмзэ вера ӵыжы-выжыосызлы но матысь муртъёсызлы, "Ижмаш" ПО-лэн азьвыл технической директорез, Удмуртиысь наука но техника удысысь дано ужась ФАЙЗУЛИН Саидбаттал улонысь кошкемен валче. Валэктэ юрист Сэрегез нуэ адвокат Лилия Шкляева Тӥледлы кельто ваньбур Муми кулэм бере, юртъерез кылиз. Мон солэн одӥг гинэ нылпиез. Кызьы мемиелэсь ваньбурзэ мон аслым карыны кулэ? Со понна трос-а госпошлина тыроно? И. АГАФОНОВА. Кельтосэз (наследствоез) басьтон сям асьме доры вуэмын вашкала вакытысь. Адямилэн кулэмез - вӧсь луон но кайгу. Сое ватэм бере вуо музон сюлмаськонъёс - документъёсты радъян но выльдон, налогъёс тырон но... Кытӥяз, жаляса верано луэ, матысь ӵыжы- выжыос пӧлын пуроме вожвылъяськон. Сыӵе ченгешонъёс медаз улӟе шуыса, дырыз дыръя лэсьтыны кулэ вань документъёсты. Россия Федерацилэн Гражданской кодексысьтыз 527-тӥ ёзэт (статья) кельтос (наследтсво) басьтонэз радъяны куре кык амалэн - законъя но завещание нимо документъя. Законъя кельтос басьтыны правоен адямиос сярысь валэктон сётэмын 532-тӥ ёзэтын. Огбыдӟа ваньбурлы нырысь ик черод сётӥське кулэм муртлэн нылпиосызлы (вордос пиналъёсын ӵош), кузпалызлы, мумы-бубыезлы (вордӥсьёсызлы), нош озьы ик адями кулэм бере солэн вордскем нуныезлы. Кыкетӥ черодын - кулэм муртлэн вынъёсыз но сузэръёсыз, песянаез но песятаез (коть бубы ласянь, коть мумы ласянь мед луозы). Таосыз кельтос басьтыны быгато, нырысетӥ черодын наследникъёс ӧвӧл ке, яке соос вань, но кельтослэсь куштӥсько ке, яке кельтослы правотэк кельтэмын ке. Кельтос басьтӥсьёс пӧлы шедё ужаны быгатӥсьтэмъёс, соос адями кулэмлэсь азьвыл ичизэ ар ӵоже со вӧзын утемын-вордэмын вал ке. Сослэн правооссы кельтос басьтоноослэн быдӟаесь ик. Внукъёс но правнукъёс наследник (кельтос басьтӥсь) луо, кельтосэз люкыку, солы правоен мумызы яке бубызы улэп ӧвӧл ке. Внуклы но правнуклы висъяське сомында ваньбур, кӧня усьысал улэп мумизлы яке бубизлы. Вунэтоно ӧвӧл тани мае. Ваньбур кузёлэн мылкыдыз тупа ке 532-тӥ ёзэтын верам куронлы, завещание гожтыны одно ик кулэ ӧвӧл. Нош солэн узырлыксэ кельтэмез уг поты ке законъя наследникъёслы, правоез вань югдурез воштыны но кельтоссэ мукетъёсызлы сӥзьыны. Кузё озьы ик быгатэ ваньбур басьтоно мурт азе кыӵе ке курон пуктыны. Кылсярысь, квартиразэ одӥг муртлы кельтыкуз, кузё завещанияз пусъе: наследник квартираын улытозяз возьыны кулэ сыӵе-сыӵе адямиез. Кузёлэн правоез вань кудзэ ке наследникез (яке кӧнязэ ке) ваньбуртэк кельтыны. Но 535-тӥ ёзэт валэктэ: завещаниын пуктэм куронэз лыдэ басьтытэк, законъя висъяськоно ваньбур пӧлысь ичизэ 2/3 люкетсэ басьто кулэм муртлэн быдэ вуымтэ яке ужаны быгатӥсьтэм нылпиосыз (пӧлазы - вордос пиналъёс но), озьы ик ужаны быгатӥсьтэм кузпал, мумы-бубы (яке ваньбур кузёез кин утиз-вордӥз вал) но ичизэ ар ӵоже утем- вордэмъёс. Ваньбур кузё наследникъёс азе пуктыны быгатэ кыӵе ке бадӟым уже пыриськонъя курон, шуом, нылпи юртлы юрттонъя. Кузёлэн озьы ик возьматэмез луэ кыкетӥ наследникез, сыӵе учыръёсты чакласа, ку нырысетӥ наследник ваньбур басьтытозяз кулыны шеде яке узырлыклэсь куштӥське. Коть законъя, коть завещаниея медло, но наследник кельтосэз асэстыны (кутыны, басьтыны, принять карын) кулэ. Со понна ваньбур сярысь тодмо луэм бере куать толэзь ӵоже нотариатъя ёзэ сётоно ваньбурез кутон пумысен курон (заявление). Наследник кельтэм ваньбурен кузёяськыны кутскиз ке, сое басьтӥз ни лыдъяське. Шуом, со улэ кулэм муртлэн корказ, юртъерез уте, налогъёс тыре. Кельтосэз басьтэм но нотариус киысь та пумысен свидетельство басьтэм бере кылдо налоген герӟаськем ужпумъёс. Россия Федерациын 1991-тӥ арын 12-тӥ декабре кутэмын 2020-1 номеро Закон. Со нимаське тазьы: "Кельтос яке кузьым чотын выжись ваньбур понна налог сярысь". Соя налог тыроно улон юртъёс но квартираос понна, дачаос но сад-бакчаысь юртъёс понна, автомобильёс, мотоциклъёс, моторен пыжъёс, катеръёс, яхтаос но музон транспорт понна, антиквариат но искусствоысь узырлык понна, дуно металлэсь кисьтэм но излэсь вӧлэм вузъёс понна, улон юрт, гараж, дача лэсьтӥсь кооперативъёсысь пайёс понна, банкъёсын, кредитъя музон учрежедениосын, приватизацияя счетын люкам коньдон понна, валюта но дуно бумагаос понна. Налог тыроно ӧвӧл коньдон но страхованиея дун понна. Ваньбур, толэзяз самой пичи уждун сярысь, 850 яке тросгес пол бадӟым ӧвӧл ке, налог но ӧвӧл. Солэсь бадӟым ке - вань. Нырысетӥ черодысь наследникъёс (нылпиос, кузпал, мумы-бубыос) налог тыро вылӥ верам лыдпуслэсь ятыргес узырлыклэн дунызлэн 5 процентэз мында. Кыкетӥ черодысь адямиос (вынъёс, сузэръёс, песятайёс, песянайёс) - 10 процент. Кылемез - 20 процент. Улон юртлэсь, квартиралэсь, дачалэсь, сад-бакчаысь коркалэсь дунзэс тупато жилкомхозлэн ёзъёсыз, инвентаризацияя бюроос яке страхованиея ёзъёс. Транспортлэсь дунзэ лыдъяло юстицияя ёзъёсысь судъясь экспортъёс, страхованиея но мукет удысъёсысь ёзъёс. Кельтос басьтыны право сётӥсь свидетельствоез гожтэ нотариус. Со ик дас вить нуналскын налогъёсъя ёзлы ивортэ киысь кие выжись ваньбурлэсь дунзэ. Налогъёсъя инспекция дас вить нуналскын дася налог тырыны документъёс. Завещаниын яке кельтосэз басьтыны право сётӥсь свидетельствоын куд-ог арбериос верамтэ луо. Соос понна налог тыроно ӧвӧл. Зэм, наследникъёс куспын тупамтэос кылдыку, суд куддыръя решение кутэ сыӵе арбериосты свидетельствое гожтыны. Соос понна отӥяз налог басьтозы. Налог тыроно ӧвӧл таӵе учыръёсы: - огез кузпал дорысь мукетыз дӥне ваньбур выжыку; - СССР-ез но Россия Федерациез, адямиез, кун ваньбурез но правопорядокез утён дыръя бырем муртлэсь ваньбур кыльыку; - ваньбур кельтӥсь но сое басьтӥсь одӥг юртын яке квартираын ӵош улэм бере, ваньбур, но улон юрт лэсьтӥсь кооперативысь пай киысь кие выжыку; - нырысетӥ но кыкетӥ группаысь инвалидъёс кие кельтос чотын улон юрт но транспорт выжыку; - военнослужащий бырон яке кулон учыре солэн семьяяз транспорт выжыку. Кельтос басьтыку, налог сяна, кун пошлина тыро на. Нырысетӥ черодысь наследникъёс - ваньбур дунлэсь 1 процентсэ, мукетъёсыз - 2 процентсэ, нырысетӥ но кыкетӥ группаосысь инвалидъёс - вылӥ верамлэсь ӝынызэ. Юрт яке квартира мукет кие выжыку, сое басьтӥсьёс азьвыл татын ик улӥзы ке, пошлиналэсь мозмо. Сое озьы ик уг тыро кунэз утёнэн герӟаськем мугъёсын быремъёслэсь ваньбурзэс басьтӥсьёс. Шӧкыч Сылӥсез пересь: - Тӥ марось, иськавынъёс, озьы дауртӥськоды-ай? Тракторын сылӥсьёсыз: - Ма, комбайнэн араны уг луы ни, шальтрамын! Эксперимент ортчытӥськом. Оло тазьы юосты араны быгатом. Суредэз Д. ПОЛУХИНЛЭН. Ӵуказе - Нефть но газ поттон удысын ужасьёслэн нуналзы Геолог Любалэн пичи дыръяз ик одӥг гинэ малпан сюлэмаз улӥз: со геолог луоз. Ветлоз тайгаетӥ, степьёстӥ, утчалоз музъем узырлыкъёсты. Котькыӵе секытъёсын, кышкытэн мед пумиськыны кылдоз - берлань уз чигна. Ваменэс сямо чупрес нылаш школазэ йылпумъяса дышетскыны пыриз Пермьысь нефтья техникуме. Дипломен специалистэз келяло Удмуртие. Со вал 1974 арын. Шаерамы та выль удыс соку гинэ выжыяськыны выре вал ай. 1995 арын Л. И. Габова луэ дано нефтяник. Туэ, "Удмуртнефтьлы" 25 ар тырмонэн валче, Любовь Ивановна пусъемын Удмурт Кенешлэн Почёт грамотаеныз. Визьмо специалист, синмаськымон кышномурт но анай - озьы вакчияк вераны луоз Красногорск месторождениысь валтӥсь геолог сярысь. Котьма ке но, та удыс нылкышно понна капчи ӧвӧл. Атаезлэсь пумит луэмзэ тодыса ик Люба быръёно сюресэз сярысь пал кыл но ӧз вера. Сюрес вылэ потыкуз, анаезлы гинэ лушкемак шыпыртӥз: "Геолог луэме потэ. Ӧй ке пырыны быгаты - берто". Экзаменъёссэ умой сётӥз, озьы ик дышетскиз. Игра Любаез зорись куазен пумитаз. Апрель ке но, пурысь пилемъёсын вотсам инбам нуналлы быдэ "бӧрдэ". Мурт дуннее шедем егит нылмуртлэн но синвуосыз лушкемак гинэ бам вылтӥз погыльско. Луысал ке, лобыса гуртаз бертысал! "Собере аслым ачим ӝотрак шуи: кышкад, иське, нырысетӥ шуг-секытъёслэсь ик? Бӧрдыса трос уд ужа. Нокытчы но Играысь тон уд кошкы. Тыныд оскемын та удыс, тон ик сое нуод". Мылкыдзэ валаса, лэся, Игра НГДУ-ысь валтӥсь геолог Валентин Федорович Чарыков атай музэн каньылак шуиз: "Эн кошкы нокытчы но. Берло ачид тау карод ай коллективамы шедемедлы". Озьы ик луиз. Зэм, кык толэзьлы улон сюресэз Любаез Сибире вуттылӥз ик, но отысь выльысь берытскиз Играе, мӧзмыны вуэм ӵош ужась эшъёсызлэсь. Дыр ӝог ортче. Али гинэ Любовь Ивановна мытӥз кадь яратоно удыссэ, нош ортчиз ни 25 ар. Нефть поттонын-утчанын геологлэн интыез - воштонтэм. Со янгыш лэсьтӥз ке, кӧня адями юнме ужалоз, кӧня коньдон пайдатэк быроз! Котькуд лыдпусэд, котькуд гожед шонер мед луоз. Габова сярысь уродзэ уд кылы. Усто специалист. Озьы ке но, сюлэмаз дырын-дырын маке но ӵабъяське, уйёсы кӧлыны уг сёты. Мылкыдзэ вератэк ӧз чида: - Тодӥськоды-а, улонын ма тужгес но секытэз? Малпанъёсыныд ас кожад кылён. Тонэ нокин уг вала, дурбасьтон кыл уг вера. Берло дыре таӵе учыръёс малы ке уката но ӵем пумиськыло, улонмы-а, мар-а чылкак мукет пала берытскемен... Габоваез озьы гинэ уд тӥя, уд някырты. Ваменэс сямыз котькыӵе сильтӧлысь потыны юрттэ. Воршудэзъя со - Кисло-кусло но Кый. Озьы ик улонтӥ вамышъя - дыртытэк, но - осконэн. - Чутырьын ужакум, монэ паймытэ вал Красногорск котырысь скважинаослэн тэк сылэмзы. 200 пӧлысь 70-зэ "кынты" ай! Малы? Кинлы со кулэ? Красногорске выжеме бере но тросэз кема дыр ӵоже шутэтскизы на. Югдурез воштон понна, трос гинэ кужым пононо луиз. Туннэ 25 скважина сылэ. Азьвылэныз ӵошатыса, та лыдпус бадӟым ӧвӧл. Любовь Ивановна малпанъёсаз выль утчанъёсын улэ ни. - Красногорскын мар чакламын вал - пумозяз быдэстӥ ни. Портон ужъёс али мыно Михайловской месторождениын, утчаськон ужъёс - Кабановскояз. Мон сямен, трос пайда сётыны быгатозы Лозолюк-Зура палъёс. Тӥни кытын пӧсям вуэд потытозь ужано луоз! Дышем интыысь, валамон ини, кошкыны секыт. Но вылез котьку бордаз кыске. Любовь Ивановна улэ Играын, ужа Красногорскын. Ӵемысь гуртаз туж бер вуоно луэ: геологлэн сыӵе ни адӟонэз, вылды: пионер сямен, со азьлане сюрес возьматэ. Озьы ке но, калык радъя юртъер но возе, скал но вордэ, бакчаез но пичи ӧвӧл. Котьмалы дырыз тырме. Нылъёсыз юртто. Соостэк секытгес йӧтысал, дыр. - Ваньмон дырды пичи но ӧвӧл, дыр, ук? - юанэлы со пальпотыса вазиз: - Янгышаськоды. Гужем, зэмен но, пуксьылыны ноку. Со понна толалтэ котьма кар - сомында дыр! Нылъёсыным, эшъёсыным куасэн нискыласьком, тэлетӥ поръяськом. Огпол туж синмаськыса учки куролэсь лэсьтэм киужъёс шоры. Кутски ачим но. Панное пӧрмиз, али корка пушмес шулдыртэ. Туж потэ пуэз вандылыса пужыос пуктэме. Яратӥсько лыдӟиськыны, уката но психологиен, тазалыкен герӟаськем книгаосты, журналъёсты. Эшшо одӥг малпанэ вань: вуылысал пӧртэм странаосы, учкысал, кызьы отын калык улэ. Оскисько, одно ик ветло шуыса, угось али котькинлы сюрес усьтэмын. Тани нылъёсме будэто, пыд вылазы султыто но... кошко дуннеен тодматскыны. Любовь Ивановна Габова данъяськыса вера ужез, ӵош ужась эшъёсыз, семьяез сярысь. Награда сётэмзы пумысен кепыраса шуэ: "Мон трос ик лэсьтыса ӧй вутты на, нош ужме сокем вылӥ дунъязы". Озьыен, геологлэн луозы на выль шедьтонъёсыз, музъем пушкысь ватосъёслы тупась зарни усьтонъёсыз. Удмурт музъемлэн узырлыкез уго тырмоз на пиналъёсмылэн пиналъёссылы, быгатыса соин кузёяськид ке. Нина ПРУДНИКОВА, "Нефтяник Удмуртии" газетысь корреспондент. Фотоез А. ЛОБАНОВЛЭН. Кык сюлэмъем адями Россия Федерациысь дано артистлы Василий ПЕРЕВОЩИКОВЛЫ туэ тырмысал 70 арес Дас кык ар талэсь азьвыл, 1986-тӥ арын 18-тӥ мартэ, мон сцена вылын выль спектакль дасян бордын ужасько вал. Ӵукна репетиция кутскиз гинэ- одӥгез артистмы сцена вылэ шулӟектыса тубиз но шуэ: - Леонид Григорьевич, вождэс эн ваелэ: электролюкетӥ сцена улэ пырыса, электрошнур поттоно - Василий Яковлевич Перевощиковлы урод... Паймыса шораз учкисько: урод ке адямилы, малы электрошнур?.. Ӝог юрттэт сётӥсьёс, пе, лыктӥзы но электрошок лэсьтыны шнур куро... Ми соку ик, ужмес куспетӥ карыса, бызьыса мынӥмы фойее. Отын, банкеткаос вылын, кылле Василий Яковлевич... Кӧня выризы врачъёс жугиськемысь дугдэм сюлэмез выльысь улӟытыны - ӧз быгатэ ни... Озьы, театрын сомында ар ӵоже ужаса, Василий Яковлевич нырысьсэ ӧз лыкты, шонергес ке верано, лыктыса но дыраз ӧз вуы сцена вылэ, репетицие... Озьы нырысьсэ, репетиция ортчытыса но, шудытэк кылиз солы сётэм рользэ... Та нуналэ, ӝыт, учкисьёс ӧз кылэ ини солэсь сюлэм куаразэ, оскытӥсь но визьмо кылъёссэ... Нырысьсэ мон сое адӟи 1955-тӥ арын. Милемыз, соку технической училищеын дышетскисьёсты, Дзержинский нимо культура юртэ (соку отын ужа вал Удмурт театр) "Семья" спектаклез учкыны нуизы. Ми, гуртысь лыктэм пинал пиос но нылъёс, чылкак паймыса но абдраса пукимы залын, сцена вылысь улэп Ленинэз адӟыса. Ми Ленинлэсь улэм-вылэмзэ, ужъёссэ, тусбуйзэ, данзэ туж ӟеч тодӥськом вал уго. Нош сцена вылысь адӟыса, пырак бурдъяськимы кадь но выль сямен яратыны кутскимы калыклэсь азьветлӥсьсэ. Уката но соингес но, дыр: Ленин удмурт кылын но синмаськымон чылкыт вераськыны быгатэ вылэм. Сыӵе паймымон адямилэсь, Ленинлэсь, рользэ шудӥсь артист В. Я. Перевощиков вылэм шуыса, мон тодӥ ини, артист луон вылысь Ленинградысь театральной институтэ дышетскыны пыреме бере гинэ. Режиссёрлэн ужезлы дышетскыны милемын ӵош отчы келямын вал соку ини тодмо артист Василий Перевощиков но. Кин тодэ, оло, аслаз сцена вылын усто шудэменыз артист луон мылкыд сётӥз, дыр, мыным та адями но. Ленинградын милемын ӵош со выль сямен, выль синмын, режиссёрлэн синмыныз учкиз сцена шоры. Котьку сямен, туж сак но выльзэ тодыны турттыса, пукиз репетициосын. Котьмае - вань тодэмзэ, адӟемзэ, кылэмзэ - соку ик вакчияк гожъялоз вал аслаз блокнотаз. Озьы ик ветлэ вал мукет режиссёръёслэсь но ужамзэс учкыны (со вакытэ отын, Ленинградын, милям дышетӥсьёсмы сяна, ужало вал мукет тодмо режиссёръёс но артистъёс: Г. Товстоногов, Л. Макарьев, Е. Тиме, Л. Вивьен но мукетъёсыз). Собере со театр сярысь туж трос книга лыдӟе вал: кияз книгатэк ноку но ӧм адӟылэ. Берло ини, ачим театрын ужаны кутскеме бере гинэ валай, кыӵе трос, пӧртэм удысъёсъя тодон-валан кулэ вылэм сцена вылын артистлы. Тужгес ик - режиссёрлы. Василий Яковлевичен нырысьсэ пумиськи, С. Самсоновлэн "Тугаськем бугор" повестезъя спектакль дасяку. Пьесалэн нимыз таӵе луиз: "Луысал ке берыктыны". Пуктӥсь режиссёрез вал Василий Перевощиков. Мыным Жора Мартыновлэсь рользэ сётӥзы. Тодӥськоды, луоз, на: пьесаын со школаын дышетскись егит нылэз вие. Нырысетӥ репетициос бере ик мон режиссёр доры лыктӥ но шуисько: - Василий Яковлевич, мон туж востэм адями: мыным чибинез но виыны жаль. Жора- бандитлэсь рользэ мон оскымон шудыны уг быгаты. Со, очкизэ куштыса, йырзэ выллань ӝутыса (угось мон солэсь ӝыны мугорлы ӝужытгес вал) шорам мур-мур учкиз но шуэ: - Мынам но улонам одӥг муртэ но чабкеме но ӧвӧл, виён сярысь уг но вераськы ни. Собере, малы асьмеос сое бандит карыса шудыны кулэ? Оло, тынад лякыт но востэм сямыд солы ӵапак тупалоз? Асьме котыртӥ кӧня пӧртэм кас сямо адямиос ветло - нокинлэн но кымысаз бандит, вор, лушкаськись шуыса гожтэмын ӧвӧл. Асьмеос эскером солэсь пуштроссэ, малпанъёссэ, ужзэ: малы со янгыш сюрес вылэ султэмын? Ужалом, тыршом, оло, маке но пӧрмытом. Собере со милемыз зэмос тюрьмае нуиз: эскером, учком, пе, кызьы ужало следовательёс но, кызьы возё асьсэды йыртэмасьёс. Озьы мон "практикант- следователь" луыса пуки следствиын, учки, утчай аслэсьтым вуоно образме... Спектакль пӧрмиз. Сое учкисьёс туж ӟеч пумитазы. Нош кыӵе пӧрмиз мынам кылдытэм образэ? Ачид сярысь вераны шуг... Нош одӥг пол, спектакль бере, театрысь кошкыку, кылиськон-дӥсяськон интыысь пальтозэ басьтон понна черодын сылӥсь кышномурт монэ адӟиз но бадӟым куараен кеськиз: - Ма, тӥни ук со, бандит!.. Со Зояез вииз!.. Черодысьтыз потӥз но кужмо, ужась киосыныз йырберам васькытӥз! Йырам изьыям шляпае театрысь мынэсьтым азьло потӥз... ... Ӧз, воже ӧз поты мынам со кышномуртлы - шумпотӥ гинэ, дыр. Угось со оскем мынам адямиез виись образ кылдытэмелы. Нош сыӵе муртэ яратод шат? Сыӵе ролез шудӥсь артистлы сыӵе "дунъет" - тужгес устоез, дыр. Нош юрттӥз мыным сыӵе дан басьтыны Василий Яковлевич Перевощиков. Кӧня пӧртэм спектакльёс пуктӥз со театрын, кӧня пумтэм-йылтэм синмаськымон образъёс кылдытӥз, кӧня егит артистъёслы сцена вылэ шонер сюрес лёгыны юрттӥз, кӧня писательёс, поэтъёс, режиссёръёс, композиторъёс ӟеч валазы Василий Яковлевич пыр сценической искусстволэсь аспӧртэмлыксэ... Удмурт калык сое ӟеч тодэ, дано артист сярысь трос гожъямын, верамын но возьматъямын ини. Мынам нош, буре вайыса, эшшо одӥг учырез тодам ваеме потэ на. 1984-тӥ арын мыным шуд усиз А. Дударевлэн "Йыромем тури" пьесаез бордын режиссёр луыса ужаны. Та спектаклез учкем адямиос ӟеч тодо на, дыр, отысь валтӥсь геройзэ - Ондреез. Пьесаын солы ньыльдон арес но ӧвӧл. Нош Василий Яковлевичлы куатьтон котыр вал ини. Озьы ке но, мон оски солы та ролез. Табере ини шумпотыса тодам ваисько - шонер лэсьтӥськем. Кӧня шумпоттӥсь репетициос кузьмаз мыным соин ужан, режиссёр уж ласянь но кӧня юрттӥз, кӧня визьмо амалъёс ӵектӥз. Соин ик та образ но туж ӟеч пӧрмиз. Кык кузя шудӥзы та ролез: Василий Перевощиков но Сергей Марков. Кыксы ик туж ӟеч тупало вал. Нош кылдытэм образъёссы ог-огзылы ӧз укшаллялэ. Василий Яковлевичлэн Ондреез улонэз туж мур валась но дунне вылын улӥсь калыкез яратӥсь но гажась адями вал. Солэн героез вал серекъясь но куректӥсь, улонэз яратӥсь но каргась, малпаськись но ӧпкелись... Кӧня пол мон, залын пукылыса, лушкемен ӵушылӥ бам кузям быльыраса васькылӥсь синвуосме... Сыӵе вал улонын но ужын Василий Перевощиков... Гажаса но буре вайыса - Леонид РОМАНОВ, Россия Федерациысь искусство удысын дано ужась, Удмурт Элькунысь калык артист но режиссёр. * Россия Федерациысь дано артист Василий Перевощиков. Кӧня ке лыдпусъёс Шаерысьтымы "Удмуртнефть" огазеяськон "Сиданко" компание пыре. Отын со одӥгез кужмоез, огсыр ужасез но пайда сётӥсез луэ. Арысь аре ваньбурез йылэ. Али солэн 25 му вӧй кыскон интыез, нош скважинаез - 4500 пала. Туэ 8 толэзьскын огазеяськон планлэсь вылтӥ 100 сюрс тонна му вӧй кыскиз, нош ваньзэ - 4 миллион тонна пала. Республикамы нефтен узыр. Сое поттон уно дасо аръёслы тырмоз ай (шедьтэмез гинэ). "Удмуртнефть" ортчем арез умой йылпумъяз, чакламлэсь уно сюрс тонна му вӧй поттӥз, 50 миллион кубометрлэсь ятыр газ кыскиз. "Удмуртнефть" ОАО-ын выльдӥське кивалтон. Со трос выль амалъёс пыӵатэ, музъем валлин портыса му вӧй кыске, йыло мукет странаосын валче ужась предприятиосыз. Отын али 17 сюрс ёрос адями тырше. Берло аръёсы "Удмуртнефть" 5-6 миллион тонна "сьӧд зарни" кыске. Со огазея нефть но газ поттӥсь 4 управлениез (Иж, Воткинск, Сарапул но Игра). Паськыта социальной удысэз. Солэн 12 нылпи учреждениез, 4 поликлиникаез, 3 нылпи шутэтскон лагерез, 3 шутэтскон интыез но спорткомплексэз, профилакториез но музон. Предприятие 500 сюрс квадратной метр улон инты пуктӥз но уно иськем асфальт сюресъёс лэсьтӥз ни. Солэн 29 магазинэз, 30 столовоез но 67 сиськон интыез. Шӧкыч Кинлы ма Ма со ТОО, ОАО, ЗАО но мукетъёсыз - али котькудӥз тодэ ни, дыр. Котькуд ужан интыын сямен али вузкаро. Почтаын - конвертъёсын, майталэн, пинь сузян пастаен, чаен-кофеен, школаосысь дискотекаосын дышетскисьёс ик вузало "Сникерс", сыскон сир, ческыт ву но мукетсэ. Ужан кабинетъёсы пыраса, чебересь ӝужыт воргоронъёс дэмлало мисьтаськон порошок, штани-дэрем но ноны пуйы. Одӥг процентэз калык басьтэ со вузъёсты, 99-эз - учке гинэ. Вузкарыны та вакытэ нокинлы уг люкето. Одӥг кылын ке, адямиед уж дураз ма лэсьтэ, сое ик ӵекто. Журналистъёслы-писательёслы но ӝоген ас гожъям книгаосынызы- газетъёсынызы уждун сётъялозы ни, дыр. Сётозы пачка газет но, мылыд ке потэ, сиськем интые лыдӟы сое, яке вуза. Озьы ик книгаосын. Мон, кылсярысь, кемалась кӧтме тырисько, ни ас книгаосме вузаса. Туннэ тани пырай Сенной базаре - отын тодмоосы велосипедлы детален вузкаро. Узыр уло - корка но пуктӥзы ни, машиназы но кык, алигес магазин басьтӥзы, арня талэсь азьвыл Сьӧд зарезь дорысь бертӥзы. Книгаосме асьсэос куро вал. Мар соослы кык книга понна 40 манет? Тьфу! Нош мон со уксёлэн ӝыныеныз соку ик торт басьтӥ, арбузлы, дынялы но тырмиз на. Парикмахерскойын книгае понна ӵышко, таксиен нуо, ас машинаелы бензин но книгае чотын басьтэме вань, Соня нимо буфетчицалы гожъямъёсы туж яраллям, табере со монэ котьку дунтэк сюдэ. Бартер! Алигес кылӥ: Тамак кыскисьёслэн огазеяськоназы но, пе, бартерен но коммерция шуонэн вырыны кутскиллям. Улон косэ уга. Тӧрозылэн ӝӧк вылысьтыз уставзэ адӟи. ЗАО но ТОО кылдытӥллям, ява - закрытое акционерное общество но товарищество с ограниченной ответственностью. Отын туж тунсыко пунктъёсыз вань, кылсярысь, таӵеосыз: 1. Кин тросгес тонна лит-ра вузалоз ( литературазы "лит-ра" гожтэмын). 2. Кин тросгес литр водка юыны быгатоз 3. Кин тросгес нылкышноосты марым карыны вуоз. 4. Кин тужгес визьмо ӵошатскон малпалоз. Та нуналъёсы кык пӧртэм ӵошатсконэ пыриськиллям. Нырысь ик конкурсын мерталлям: кинлэн пиосмурт "чиньы-пӧлыосыз" кузьгес. Пересьёсыз пӧлысь одӥгез гинэ дӥсьтэм пиналъёсыныз ӵошатскыны. Коммерсант Сьӧдов куинетӥ инты басьтэм. Нырысетӥ интые ачиз тӧрозы потэм, кыкетӥ интызэс кык мурт люкем - Пупыдов но Турпаров. Та нуналэ ик радъяллям на вуэн ведра возёнъя ӵошатсконзэс но. Нош ик ваньзылэсь трос кужымзэ возьматэм тӧрозы - 3 минут. Пупыдов - 2,5 минут, Турпаров - 1 минут. Спонсоръёссы вормисьёслы призъёс но кӧня ке коньдон кузьмаллям. Азьланяз витё выль конкурсъёс. С. БЛАГИНИНА. Журналистъёсын пумиськонъёс Кивалтон воштӥськиз ке но, эскерон кылёз Удмурт Республикаысь Эскеронъя кун комитетлэн кивалтӥсез Александр Кузнецов ивортон лэсьтӥз комитетлэн гужем ӵоже ужамез сярысь. Туэ чакламын вал комитетлэсь ёзъёссэ районъёсын но кылдытыны. Но та ужез вырӟытыны луиз ай Сарапул но Воткинск районъёсын гинэ. Ужпум пыкъяське кадръёслэн тырмымтэзы борды. А. Кузнецов валэктэмъя, кинъёслэн мылкыдзы вань та удысын ужаны, ӵем дыръя комитетлэн куронъёсызлы уг тупало. Адями котьмар ласянь "чылкыт" луыны кулэ. Комитетлэн вань районъёсын ужась ёзъёсыз ӧвӧл на бере, эскерон ужъёсты нуоно луэ администрациосын но аскивалтонъя ёзъёсын огкылъёс тупатыса гинэ. Сыӵе ужан луонлыкъёс шедьтыса, табере районъёсысь предприятиосты но шугъяськытэк эскерыны луэ ни. Матысь дыре Удмуртия кусыпъёссэ юнматыны чакла Беларусь Республикаен. Отын эскеронъя комитет кема аръёс ӵоже ини адӟем карымон ужа. Оло, асьмеос но солэсь куд- ог ужан амалъёссэ ужамы пыӵатыны быгатомы, шуиз А. Кузнецов. Гужем комитет эскериз АПК-лы юрттонъя фондлэсь но Гурт хозяйствоя но сиён-юонъя министерстволэсь ужамзэс. Тырмымтэос шараямын вал финнъёслэсь технологизэс уже урод кутон ласянь. Вераськон мынэ та технлогияя Завьялово районын бакча-сиёнъёсты будэтон сярысь. Финнъёс ласянь ваньмыз дыраз лэсьтэмын, нош асьмеос соослэсь куронъёссэс тӥяськомы. Озьыен, ӵош ужанъя контрактэз тӥяммы понна, финнъёс быгато международной арбитражной судэ вазиськыны. Эскеремын "Удмуртская правда" газетлэн лыдӟисьёслэн гожтэтъёссы бордын ужамез. Вераны кулэ, газетын печатлам критической статьяослы валэктон сётэмын луыны кулэ кык арня ӵоже. Куд-ог учыръёсы со курон уг быдэсъяськы. Сентябре комитетын ужасьёс эскерыны малпало "Бюджет сярысь" Законлэсь ,быдэсъяськемзэ. Али ик верано ке, бюджетлэн доходъя люкетэз 60 процентлы гинэ быдэсъяське. Берло дыре Россиын нош ик югдур лэчытомиз. Кызьы шӧдӥськоз со Эскерон комитетлэн ужамез вылын? Секыт луоз коньдон ласянь, шуиз А. Кузнецов. Но комитетлэн ужамез дугдытэмын уз луы, угось эскерон ужъёсты нуон котькыӵе властьлы кулэ. Воштыны луэ солэсь нимзэ, адямиосты но "эскерон - со эскерон", сотэк ужаны уз луы. Т. БАННИКОВА. Кун Кенешысь Экономикаын политикая но бюджетъя ялан ужась комиссилэсь паськытатэм заседанизэ ортчытоно, Кун Кенешысь депутатъёсты, предприятиослэсь но организациослэсь кивалтӥсьёссэс ӧтьыса, но Удмуртиысь Правительстволэсь но Центробанклэсь секыт югдурысь потонъя ужрадъёс кутэмзы сярысь отчётсэс кылзоно - таӵе решение кутэмын ялан ужась комиссилэн кенешаз 3 сентябре. Кун Кенешлэн Тӧроезлэн нырысетӥ воштӥсез Владимир Агашин Правительстволэн Тӧроезлэсь ужзэ быдэсъясь Юрий Питкевичлы гожтэт ыстӥз, комиссилэн решениезлы дурбасьтыны но коньдон ужпумъёсты быдэстонъя ужрадъёсты эскерыны дэмласа. Экономикаын политикая но бюджетъя комиссилэсь заседанизэ 8 сентябре ортчытыны чакламын. Кун Кенешлэн пресс-службаез Юрт ӝутом? Кызьы тодмо, шаерысьтымы уноез калык улон интылы шугъяське. Та ужпумез быдэстон понна, Удмуртиысь Правительство Россиысь Ипотекая "НОРМА" ассоциациен кусып тупатӥз. 3 сентябре валче ужан сярысь огкыл юнматэмын. Та документъя чакламын Удмуртиын ассоциацилэсь ёззэ кылдытыны. Валамон, отын ужан понна специалистъёсты дасяно, пайдаез мед шӧдӥськоз шуыса, коньдон висъяно. Ассоциацилэн ёзэз Ипотекая амалэн кредит сётонъя программаез быдэстон бордын тыршоз. "Ипотека" кыл вашкала грекъёслэн кылысьтызы вуэмын, "залог", "заклад" шуэм луэ. Озьыен, корка пуктыны, квартира басьтыны ипотечной ссуда курыкуз, адямилэн ваньбурезлэсь (музъем, корка, машина...) дунзэ лыдэ басьтозы. Россия - кыкетӥез Афганистан? Америкаысь иворъёсты вӧлмытӥсь ёзъёс бадӟым саклык висъяло Билл Клинтонлэн Москвае ветлэмезлы но Россиын кылдэм югдурлы. "Ю-Эс-Эй тудей" газет малпамъя, Россия векчи юдэсъёслы люкиськиз ке, нош солэсь ядерной кнопказэ экстремистъёс яке кыӵе ке диктатор киултӥзы ке, быдэс дунне кышкатскоз. "Милем кулэ ӧвӧл Польшаысен Тихий океанозь кыстӥськись кыкетӥез Ливан яке Афганистан", гожтэ газет. "Вашингтон таймс" малпамъя, Америка Россиысь оппозицилэн азьветлӥсьёсыныз кусып тупатыны кулэ. Угось США-ын валало, Черномырдинлэн президент луон сюресэз капчи уз луы шуыса. Сое политикъёс но, калык но уг гажа, вылаз ик, солы "пирданэ" куашкатэм экономика кылёз. Кредит басьтэмед потэ ке - ужа Дуннеысь Валютной фонд (МВФ) Россилы 4 миллиард 300 миллион доллар кредит сётыны малпа вал, нош Россия сое 15 сентябре басьтыны дасяськиз ини вал. Но Россиын югдур чылкак уродмемен, Валютной фондлэн кивалтӥсьёсыз та коньдонэз ыстыны пумит луыны быгатозы. "Доллар дунлэсь будэмзэ, банкъёслэсь секытэн ужамзэс, бюджетлэсь шуген быдэсъяськемзэ лыдэ басьтоно ке, валамон луэ, Россиын улӥсьёс уно тыршоно луозы, кредит басьтон понна", шуиз МВФ-лэн директорезлэн воштӥсез Си-Эн-Эн телекомпанилы интервьюаз. (Басьтэмын Интернет пыр). Кин кужмогес? Россия Латинской Америкаысь странаосы пыӵал тӥрлык вузанзэ йылэтыны чакла, ивортӥз Россиысь ВВС-лэн пресс-службаезлэн кивалтӥсез Александр Дробышевский. Вераны кулэ: Латинской Америка пыӵал тӥрлык басьтыны одӥг но ӝыны миллиард доллар быдтэ, быдэс дуннеен ӵошатоно ке, со 7 процент луэ. Россия та улосэ 100-120 миллион доллар тыр пыӵал тӥрлык келя, со латиноамериканской рыноклэн 10 процентэз котыр. Со дыре ик США рыноклэсь ӝынызэ кияз возе. Та вакытэ военно-технической удысын Россиен ужало Куба, Перу, Бразилия, Колумбия, Никарагуа, Мексика, Эквадор. (Басьтэмын Интернет пыр.) Вулы - чылкытлык, калыклы - тазалык ООН юнматэмъя, быдэс дунне понна таиз ар - Океанлэн арез. Пусйыны кулэ, ЮНЕСКО-ысь океанографической комиссие 127 кун пыре. Соос пӧлын - Россия Федерация но. Странамылэн дуннеысь пӧртэм огазеяськонъёсын ужамезлэн пайдаез мед ик луоз вал. Инкуазез утён сярысь сюлмаськон угось чик уг шӧдӥськы. Океанлэн арезлы сӥзьыса, вань дышетскон заведениосын нимысьтыз занятиос ортчытыны кулэ. В. РОГАЛЕВ. Колхозэз огнад уд ӝуты Галина Михайловна Воронцова - Шаркан районысь "Маяк" колхозлэн председателез. Со нырысетӥ арзэ ужа ай кивалтӥсь луыса. "Маяк" колхоз пичи, кык гурт гинэ отчы пыре: Кулак-Кучес но Кусогурт. Хозяйство, районысь одӥгез куанерез луэ. Озьы ке но, Галина Михайловна уг ӝожтӥськы: - Кылем ар сярысь, югдурмы умойгес ини. Сюлэме йӧтэ милемыз курлало, уродэн верало ке. Ужась калык шат янгыш шальтрам улонмы понна? Тракторъёс, машинаос вужмо, тӥясько, выльзэ басьтыны номырин. Скалъёсмы вузаса быро ини, нош барышез ӧвӧл. Вуоно арлы пудо йырез будэтыны малпаськом. Йӧлмес келяськом Воткинске, коньдонэзлы эстӥськон но техникалы воштос ёзъёс басьтӥськом. "Маякын" скаллы быдэ али 9,5 килограмм йӧл кыско. Толбытлы окмымон дасямын силос, турын. Пичыльтык парсь гидзы вань. Туж кулэ на вылэм шуныт гараж. Пудо гидъёссы но уродэсь. Председателез озьы ик шугъяськытэ кизёно кидыслэн ӟечлыкез: - Таяз арын кизьыны кидысмы одӥг грамм но ӧй вал. Палэнысь басьтӥм. Туэ кутсамзэ вуоно арын кизем уг поты вал. - Кык ар талэсь азьло тӥ Вортчиноысь Соколов фермерен огазеяськиды вал кадь? - Одӥг ар ужам. Соколовен огазеяськеммы бере, 1996 арын август толэзе быдэн кык сю манетлы пызь но трикотаж дӥсь сётӥзы. Но фермер милемды ӧз ӝуты, эшшо но куанергес кельтӥз. Тыронэн кошкиз. - Уждунды кыӵе толэзьлы сётэмын ни? - Туэ 8 мартэ быдэн 50 манетэн сётъям. - Колхозын егитъёс трос-а? - Вань гинэ. Городын али улон инты но, уж но ӧвӧл. Нош соослэн улэмзы но, чебер дӥсь нуллэмзы, ческыт сиськемзы но потэ. Гуртын калык сярысь быгатэмзыя сюлмасько на. Нуналаз кык пол сюдо. Кеньыръёс басьтӥзы. Школаысь бакча сиён ваё. Со понна школалэсь музъемзэ йылтӥзы. Тол вылтӥ дышетскисьёслы сӥль но йӧл колхоз сётоз. Пенсионеръёслы пызь вузаса поттэм коньдонлы кизён дыръя механизаторъёслы тамак басьтыса люкылӥзы. - Галина Михайловна, таӵе секыт вакытэ кызьы-о председатель луыны дӥсьтӥды? - Уг ватӥськы: туж секыт ужаны. Куризы бере ӧй алӥськы. Мынам ёзъёсы озьы дышетэмын: косӥзы - лэсьты. Калык татын умой, лякыт сямо, ужась. Осконэз ышымтэ на. Колхоз одно ик ӝутскоз. Сыӵе малпанэн уло председатель но гуртоос. Али агрономзы но вань ини, туэ егит бухгалтер лыктӥз на. - Аслам дышетскеме ӧвӧл. Ужай доярка, кассир, вузкарись, осеменатор луыса. Дэбес районысь Калинин нимо зол колхозын ужаме, отын тодон-валанъёс басьтэме гинэ ужаны юрттэ. Адямиос юртто, сотэк председатель огназ номыр лэсьтыны уз быгаты. С. ПЕТРОВА. Шаркан район. Нюжаен-нюжаен, чырыен-пырыен Пыӵалэз - уждунлы Ярославльысь милициын ужасьёс туэ ӝыны ар куспын калык киысь талам пыӵал тӥрлыкез, тӥр-пуртэз - ваньмыз сюрс пала арбериос - андан ӵыжатӥсьёслы келязы. Заводлэн одӥг цехезлы со быдэс толэзь уждунлы тырмем, гожтэ "Золотое кольцо" газет. Уртче уло но ужало Орёл областьысь Мценск районысь сӥль будэтонъя комплекс 1970-тӥ арозь мукет хозяйствоослэсь номырин ӧз висъяськылы. Мылкыдзы вал артэ ужась сахар поттон заводэн огазеяськыны, со пумысен огкылэ вуизы. Кушман кӧмын пудо ӝоггес будыны, куайыны ӧдъяз. Колхоз тырмыт будэтэ на турын, ю тысь, сахар кушман. Сӥльлэсь потто пӧзьтэм но ӵынатэм колбаса. Гуртын ӟечгес улозы Мордовиысь "Норов" аграрно-производственной фирмаын ужасьёс уждунзэс дырыз дыръя басьто. Огазеяськон кылдӥз, 1995-тӥ арын "Кочуровагропромхимия", "Кочуровское ремонтно-техническое предприятие" но Чапаев нимо колхоз ӵош кариськыса. Нуоно удыссы герӟаськемын гурт хозяйствоен: музъем удалтонлыкез ӝуто, автотранспортэн юрттэт, лэсьтӥськон, монтажной, пуско-наладочной ужъёсты быдэсъяло. Доразы куто вылӥ но специально-технической образованиен адямиосты. Соослы дасямын ни улон интыос но: улыно-вылыно коттеджъёс. Котькудӥз таӵе коттедж сылэ 100 сюрс манет. 10 сюрссэ пырыку ик тыроно, кылемзэ - 25 ар ӵоже. Со сяна, пуктыны кутскемын черк но спортъя комплекс. - Гуртын улон, городын сярысь, умойгес луоз ай,- шуэ фирмалэн кузёез А. И. Поздняков. Таӵе иворен тодматэ Саранскын потӥсь "Мордовия - 7 дней" газет. Шуге-леке сюремъёслы юртто Нижний Новгород пала вуэмъёслэн лыдзы 1994-тӥ -1995-тӥ аръёсы тужгес но бадӟым - 7 сюрсозь вуиз. Татчы улыны интыяськизы Азербайджанысь, Грузиысь, Абхазиысь, Молдавиысь, Таджикистанысь ӟуч семьяос, али вуо Казахстанысь. Ӧлексыослы но пенсионеръёслы, пиналзэс огназы будэтӥсь анайёслы но трос нылпиё семьяослы Федеральной миграционной служба коньдонэн юрттӥз - висъязы выль бичам коркаос. Кылемезлы лэсьтӥськыны ссуда висъязы. Кинлэн дас ар куспын пунэмам коньдонзэ берыктыны луонлыкез ӧвӧл, коркаосты но квартираосты огкыъя аренда амалэн 3 арлы сётозы. Туннэ нуналлы черодын сылэ на ог 800 мурт, ивортэ "Земля Нижегородская" газет. Бырись город Ярославль областьысь Рыбинск городын улӥсьёс пӧлын вордскемъёс сярысь кулэмъёсыз кык поллы ятыр. 30 процентэз югыт дуннеен люкиське ужан арлыдаз. Шорлыдын вераса, адямиос татын уло 58 аресозь. Берло дыре калыклэн лыдыз ичиёмиз. Кызьы гожтэ "Золотое кольцо" газет, огаз нылпи ваён юртэ алигес вуттӥзы шузимытозяз юэм секытэн кышномуртэ. Пиналэз, валамон ни, шӧй вордскиз. Кулонэд - емышо писпуын Севастополь городын емыш вуон вакытэ нуналлы быдэ сямен писпуысь 3 адями усе. Вуэм емышъёслэсь секталазэс чаклатэк, адямиос емыш октыны шуыса тубо но - вай чиге. Шуккиськемъёс пӧлысь одӥг мурт кулӥз, гожтэ Украинаысь "Факты" газет. Дасяз Светлана ПЕТРОВА, Удмурт кун университетысь студентка. - Паймод но бырод. Ачид адӟытэк уд но оскы. Бен кытчы соос озьы вамышто меда? Надялэн юртэз мукет палан ук. Собере со Коляеныды эшъяське вал кадь? Кышномурт номыр ӧз куареты. Нош Ирина аслэсьтыз гозызэ нуйтӥз. - Э-э, городын дышетскись нылъёс ӝог сӧрисько, ваньзы одӥг кадесь. Я соиныз, я таиныз кушласько, калгись пуныос выллем. Но Надя шузи ӧвӧл ведь, тодоз кин борды кырмиськыны, - мултэс куасалтэ ни шуыса, Ирина вераськонзэ куспетӥ кариз но, шкаф доры матэктӥз. - Талэн бон синучконэз но вань-а? Света апай пальпотӥз: - Ма, вань, кызьы уз луы? Учкы. - Кыӵе усто, - Ирина синучкон азьын берганы ӧдъяз. Милям та быдӟаез ӧвӧл. Ӝужыт беро катаме кутчасько ке, йырме уг адӟиськы, катаме ке куштӥсько - пыдъёсы ышо. Света апай, клубе потыкум, асме учкыны дорады ке пырай вожды потоз-а? - Ма, малы вож потоз? Пыра, жаль ӧвӧл. - Нош ӵукна, уже мыныкум ,туж-а акыльтыто? - ӟичыяськыны выре Ирина. Светлана Владимировна нылашлэн синмаз ик учкиз: "Ма, таидлэн чик серемез уг поты кадь". Нош Ирина пумитаз пальышаз: - Света апай, малы сокем паймиды? Мон озьы гинэ зулисько, шкафтэс ушъяса. - Озьы, озьы, мон ведь номыр уг шуиськы, - пумитаз серектӥз кышномурт. Со куспын Коля пыриз. Тусызъя ик валано, мылкыдыз пильмаськемын. Ирина вазьылытэк ӧз чида ни. - Ӟечбур, Коля! - Умой, ачид ке умой. - Мар-о сокем мылкыдтэм? Тон клубе потод-а? - Уг! - Монэ кассеталы ыстӥзы, тон но, пе, мед потод. - Уг шуи, лэся! Мар ёрмид котырам? Светлана Владимировна пиез пумитэ вазиз: - Коля, малы юнме мытылӥськод, Ира тонэн умой вераське ведь. Пияш кулэ кассетазэ утчаз но нылмуртлэн кияз куштӥз. - Жадьыса бертӥ, соин ик мылкыды урод, - нылаш шоры учкиз но азьланьтӥз, - клубе но уг поты. Юазы ке, озьы ик вера. - Тонэ отын возьмало ук, - Ирина Света апай шоры учкиз. - Кудӥз мыным кулэ, отын ӧвӧл ни, - мыдлань-азьлань ветлонъяз куаретӥз пияш. - ... Надя сярысь ке тон, со клубын ӧй вал, зэм но, вазь на, потоз ай. - Ирина шонер вера. Туала егитъёс уйшор вакытэ клубе пото, ӵукна берто. Нылашед но потоз, - пиезлэсь мылкыдзэ буйгатыны тыршиз кышномурт. Пияш дугдыса ик учкиз соос шоры: - Потоз, возьма кемагес! Али тани дусыменыз ӵош адӟи, со доры ик кожиз но. - Кинэн адӟид? - выжыятӥз Ирина. - Кинэн, кинэн? Ондӥен, вот кинэн! "Иське, кызьы малпай, озьы ик мынэ. Лыктыкумы машина фараосты адӟи, Колялэн ик вылэм со. Озьыен, соосын пумиськем. Туж усто", - ас понназ малпаз нылаш, нош шара вераз: - Верай ук мон, городской нылъёс понна яратон- чачаен шудэм выллем. Пиосын но соос озьы ик шудо, - озьы шуыса, нылаш коркась потӥз. Ирина кыдёке кошкыса ӧвӧл вуттэм. - Мон тонэ клубын ни кожасько вал? - паймиз Надя. - Ма, Света апаен лабыртӥм но, зӥрк султыса уд кошкы ук. Тани Коля кассетазэ сётӥз. - Нош ачиз уг поты шат? - Ӧйтод. - Кызьы ӧйтод? Ирина, со номыр ӧз вера шат? - Вераз, укыр трос вераз. - Бен ма шуиз? Оло, юромо исаськод? - Колялэн маке мылкыдыз ӧвӧл кадь. Клубе ӧтисько вал но, жади, пе, мылы уг пот. Мон шуисько, Надя возьма тонэ, кык арнялы одӥг пол Ижысь бертэ. Нош со сиёно кадь шорам учкиз но вераз, - коть чик но медам берта, пе, уг бӧрды, нылъёс ӧжыт ӧвӧл. Мукетсэ но шедьто. - Ондӥез кунултыса ик келямме адӟиз, соин йыркуръяське, дыр? - мар шуыны ик паймиз Надя. - Ирина, тон ӧд вера шат солы ма муген тапала вуэммес? - Ма, кызьы ӧй. Верай, конечно. Коляед кылэм-адӟем но ӧз кары, тонэ ик олокыӵе кылъёсын тышкаськиз. - Али ик дораз мыныса, ваньзэ йылаз-пумаз вутто. Ӵуказе кошкисько ни, кематэк уг берта, дыр. Надя берытскыны дасяськем вал но, Ирина сое китӥз кутӥз. - Сыл ай, Надя! Мар тон дауртӥськод? Ачид пиос сьӧры бызьылод-а? Ӧжыт ке но астэ гажа ук. Дыр ортчоз но, Коялед ачиз дорад лыктоз. Шуоз: "Вождэ эн вай, Надюше, мон янгыш вылӥськем". Надя номыр ӧз вазьы ни, йырзэ ошыса, дор палаз вамыштӥз. Кӧня ке нунал ортчыса, Ирина вордӥськем нуналзэ пусйиз. Егитъёс пӧлысь Коляез адӟыса, нылмурт шумпотэмзэ ватыны ӧз быгаты, ӝоггес пумитаз дыртӥз. - О-о, Коля но вуэм, кыӵе усто. Тани та чаркаез кут ай, мон яратоно адямиосме гинэ сектасько, оло, йырдэ но ас палам берыкто, - серектӥз Ирина. - Мар, йыр берыктон турын понӥд-а, мар-а? - син ултӥз учкиз пияш. - Я бен, юыса адӟом ини, берыктӥськоз-а, уз-а? - чарказэ гылак юиз Коля. Ирина тэркыен куртчон сётэ вал но, соиз серекъяз гинэ: "После первой не закусываю". Со ӝыт егитъёс клубе васькыса шулдыръяськизы на. Колялэн но мылкыд капчиязгес. Нош Ирина Андреен тэргаськоно луиз. - Ирин, мар-о тон сыӵе душеспи кадь учкиськод Коля шоры, весь ӧд куштӥськы-а со малпанъёсыдлэсь? - Тон эшшо клуб трос кесяськыса вера на,- уретӥз сое нылаш. - Мар бен, верало, - ымзэ усьтӥз юыса капчиям пияш. Но вазьыны ӧз вуы, Ирина сое ас палаз берыктӥз. - Кылзы ай, шузи, асьмеос кызьы вераським вал? Андрейлэн поромем синъёсыз бус пыртӥ кадь учкизы нылмурт шоры: - Я, я ымнырдэ сокем эн золъя. Коляед синмаськем интые кышкаса пегӟоз. Ойдо ай, адӟымтэ дыръяз дорад кожалом, кӧня ке шутэтском кыкнамы. - Кы-лэ-ме уг пот весь огпӧртэм супыльтэмдэ! - Эн кесяськы мон шоры! - Андрейлэн синъёсаз лек тылгизьыос ӝуатскизы. Ирина валаз, али со дуринчи кадь, исано ӧвӧл Эшшо ваньзэ кинлы кулэ ӧвӧл супыльтоз. - Андрей, мусое, асбмеос кенешим вал ук. Тодӥськод, дыр? Тон ас палад Надяез берыктӥськод, мон - Коляез. Ведь соглаш карон кылдэ сётӥд, - пияшлы матэгес пукьсыса сюлворыны ӧдъяз Ирина. - Мыным чик но та уг кельшы. - Сыл ай, сыл. Мар-о отын сыӵеез? Одӥг пол ӟыгыртод но чупалод на Надяез туганэз азьын но тӥни. Озьы ук? - Бен озьы, дыр, но... - Вот уго. Я, ойдо, мусое, табере асьмелы бертоно, кызьы тон шуид - шутэтсконо, - ӟыгырскыса ик потӥзы соос клубысь. Нош одӥг арня ортчиз. Шутэтскон нуналэ егитъёс клубе люкаськизы. Надя но бертэм. Но Коляен соос пал кыл но вераськыса ӧз вуттэ, нылашез ураме ӧтизы. - Кытчы со озьы? - нылъёс пала вамыштӥз Коля. - Ум тодӥське. - Коля, Надя тонэ татын возьманы косӥз, эн, пе, пота ураме, - вазиз Ирина. - Хм, паймоно кадь, - пияшлэн сюлмаз нош ик осконтэм мылкыд кылдӥз. Кӧня ке возьмам кариз ик, собере потытэк ӧз чида. Ирина но сьӧраз калъяськиз. Доразы матэктӥсь вужеръёсты синйылтыса, Андрей Надяез ӝик-ӝик ӟыгыртӥз но чупаз. - Надя, тон ачид шуид ук, дыр ортчытон понна гинэ ветлӥськод со Коляен, байзылы синмаськыса. Тае кылыса, Коля тып дугдӥз. Нош Андрей веранзэ азьланьтӥз. - Кема-а тон Коляез пӧялод на. Куке но ведь верано луоз, асьмеос ог-гмес яратӥськом шуыса. Собере гуртын калык но вера ини асьме сярысь. Оло, Колялэн пеляз но шуккиськиз? Надя паймыса учкиз пияш шоры: - Андрей, тон мар озьы?.. Но веранэз ӝыныё уриськиз, пияш нош чупаськыны мерскиз. Надя мазэ-созэ валаса ӧз вутты, палэнтӥськыны турттэ вал но, тодмо куара сое интыяз ик кынтӥз кадь: - Ромео и Джульетта. Вождэс эн вае, люкетӥ. Андрей, оло, валэктод мар тӥляд татын? - ... Мед Надюшае валэктоз. - Со тынад Надюшаед ини, иське, - мыжыкъёссэ кырмыса вазиз Коля. - Коля! Мон номыр ӧй... - Вот, вот, номыр эн вера. Мон ваньзэ кылӥ. - Мае тон кылӥд? - синвуаськиз нылаш. - Ӧй малпа вал сокем янгышало шуыса. Нош тон ваньмыз кадь ик вылэмед? Бен тон чебер, кыллы но усто. Но чеберед синпӧет гинэ вылэм. Кылъёсыд но небыт тӧл кадь, нош соос йӧ зорен жуго вылэм. Тыныд сцена вылын шудоно. Сялад тон мон шоры, мынам яратонэ вылэ. - Коля! - Мар, Коля?! Кылзы, мон но сялай тон шоры! Кулэ ӧвӧл мыным сыӵе нылаш. Али тон шудӥськод пиосын, но ӝоген соос шорад но уз учке, кыйлэсь кадь палэнскозы. Соку мон тонэ серекъяло. Зӥрак берыктӥськиз но ас понназ тышкаськыса кошке ни вал. Ӧз чида, выльысь берытскыса, Андрейлэн ымныраз мыжгиз. Надя чирак кеськиз. Нош Коля йыркурен вазиз: - Надюшаед йӧнатоз, солэн киосыз небытэсь. Ваньзэ пазяса, Коля клубе пыриз. Ирина сое буйгатыны турттэ. - Эн мерскы мон борды! - Вазьыны но уз луы, ява. Ойдо ай ураме. Тӧлатском. - Али ӟеч-ӟеч тӧлатски, тырмоз! - Я, буйга. Мар-о сокем луиз? Тонэ гинэ шат куштӥзы? Монэ но тани Андрей мукетызлы воштӥз. Со Надядэ яратэ, лэся. Кӧня ке пол ӵошенназэс адӟылӥ, но тыныд номыр ӧй поттылы. Коля, тон келялод-а монэ, мынам бертэме потэ ни. - Вот пулёсир кадь лякиськиз. Я, ойдо ини, келяло. Чалмыт вамышъяз пияш Ирина сьӧры. Нылаш гинэ дугдылытэк вераськиз. Капка азязы вуэм бере, Коляез кунултыса ик сьӧраз пыртӥз: - Анай дорын ӧвӧл, атай тордыса изе. Ойдо ай асьмеос но куректонмес тӧлатом ӧжытак, шунтӥськом но. Ирина чаркаосты векчи виятэменыз тырмытӥз. Нырысез бере кыкетӥзэ лэзизы, собере - куинетӥзэ. - Тон, нылок, зол гинэ гучыкъяськод вылэмед, пель сьӧрад уд кисьтаськы, - серектӥз Коля. Капчиям визьмын ӧз малпаськы ни кыӵе муген татчы вуэмзэ. Бус пыртӥ кадь адӟиз на Ириналэсь дораз матэктэмзэ но бордаз ӝиптӥськемзэ... Укноетӥ югыт пырыны кутскемен, Коля сайказ. Нырысь ӧз вала кытынзэ, вӧзысьтыз Иринаез адӟыса, шуак луиз: - Ирина, Ирина, шуисько! Султы. - М-м. Коля, мынам кӧлэме потэ на. - Ирина, кызьы мон валесад вуи? Мар вал тытын? - ... Коля, тон, иське, номыре уд тодӥськы? Зэм-а, мар-а? Ӧй малпа, йырысьтыд ваньмыз сыӵе ӝог тӧлзӧз шуыса. - Мар сярысь тон озьы? - Зэмзэ но, мар сярысь меда мон? Тырмоз, Коля, визьтэменыд турнаны. - Бен валэкты ук, мар сярысь тон?! - Та уе монэ яратэмед сярысь. Надя пумысен тон чик ӧд куректы кадь. Коля шузимыса султӥз. - Кӧня дыр? Кытын мынам часэ? - Вить но ӝыны, нош частэ ӧй адӟы, - кизэ миндэр улысь поттыса назьыльскиз Ирина. Ас понназ малпаз: "Часэдлы пырыны выльысь муг луоз ай". - Вить но ӝыны? - шуэрскиз Коля, - нош монэ туннэ Можгаысь базаре ыстӥзы вал. Гараже но сюрес матын ӧвӧл. Кылем уйзэ сямен ик, Коля мукет уйёссэ но та коркан ортчытылыны кутскиз. Ирина шумпотыса малпаз, оло, пияшлэн сюлмыз пичи ке но буйгалоз, Надяез сярысь ӝоггес вунэтоз. Куректон медаз зӥбы шуыса, винаен секталляз. Ириналэн анаез яке адӟымтэ улэ кариськиз, яке лушкем оскыса улӥз егитъёслэн огазеяськемзылы. Нош атаез уен-нуналэн сямен ӧз сазьтӥськылы. Ириналы со ик кулэ вал. Газет, журналъёс нуллонын ужаз бере, Надялэсь Колялы гожтэм кык гожтэтсэ лыдӟиз но кесяса куштӥз. Ас понназ лушкемен малпалляз: "Ӵок, ойдо, котькин аслэсьтыз шудзэ ачиз дуре, нош мон Коля вӧзын шудо луо. Надя мед шедьтоз аслыз мукетсэ, городын пиос ӧжыт шат. Коляез мон табере ки улысьтым уг лэзь". Кема возьманы дыр ӧй вал ни, одӥгаз ӝытэ Ирина дусымзэ ӟеч иворен шумпоттоно кариськиз. - Коля, асьмелэн нылпимы луоз. - Ӟеч кырмид монэ, номыр уд шу, - Колялэн мукет номыр верамез ӧз луы ни. - Ӧй, ӧй кырмы, зарние, тон ачид четлыке сюрид. Нош улэп лулэз мон уг виы. Озьыен, ӟеч-ӟеч малпаськы. Нылпиме мон атайтэк уг кельты, тодыса ул со сярысь. Собере вал сюан. *** Ириналэсь малпанъёссэ уретыса, палатае врач пыриз: - Мон ӟеч ивор ваисько тӥледлы. Пидылэн тазалыкез юнмаз, ӵуказе гуртады бертыны быгатоды. Толэзь пала больницаын кыллиз Коля но, гуртэ соос Иринаен огвакытэ вуизы. Кышноеныз пумиськыса, егит воргоронлэн нырысетӥ кылъёсыз вал: - Ирина, кызьы улом ини асьмеос? - ... - Мон ваньзэ тодӥсько. Одӥгзэ гинэ вера, кин пиедлэн атаез? Андрей-а? - Пиелэн одӥг гинэ атаез луоз - тон, нош мукетсэ - вунэты. - Вунэтыны? Мон озьы уг быгатӥськы. Ирина, вера шонерзэ. - Верай ини - пиелэн атаез тон луод. Бен, янгышай. Ма но уг луы улонын, табере весь соин пыкылыса улод-а? Мон тынад кышноед, люкиськыны уг малпаськы. Анаеныд но керетыса уг улы, мынам табере пие вань. Ӟеч ке улӥм, ваньмыз интыяз пуксёз. - Ку-о асьмеос ӟеч улӥм ини? Та нуналысен мон тынад картэд ӧвӧл! Егитъёслэн кусыпсы тупамтэен, Светлана Владимировна одӥг пол ӧз чида пиезлы вазиськиз: - Коля, мар дауртӥськод тон? Али ведь тӥляд самой яратыса, кенешыса улон вакытты. Пиды но будэ. Шумпотыны кулэ кадь, нош тӥ? - Анай, малы мон улӥсько дунне вылын, кинлы мон ӟеч лэсьтӥсько? - Малы тон озьы вераськиськод? Инмар лул сётэм бере, адямиослы тон кулэ, кинэ ке шудо карон понна, ачид шудо луон понна. Малпаськы семьяед сярысь. - Семьяе сярысь? Мынам семьяе ӧвӧл. Иринаен ог-огмес ум яратӥське, пие но мынам вылымтэ. - Кызьы? Пиед тынад ӧвӧл?! Ваньзэ пыр-поч мадиз Коля анаезлы, ноку тазьы вераськемзы ӧй вал на соослэн. Аслаз но сюлмыз капчи луиз, анаез но троссэ валаз. - Коля, мар карыны малпаськод табере? Иське, вераськы Иринаен. Вож нуныен сое коркась уд потты ук, кышноед со тынад. - Ирина ласянь мар вераны шугъяськисько, нош Надя шонерзэ тодыны кулэ. Мукет нуналаз Светлана Владимировна кенэныз вераськон мытӥз: - Кен, кызьы бон азьланяз улыны малпаськоды тӥ? - Кызьы улӥм, озьы ик азьланяз но улом. - Кожаськод, кема тазьы кыстӥськоз? Зэмзэ вера - тон шудо-а? Нош Коля? Пӧяськыса нокин ӟече вуымтэ на. Люкиськы пиеным но бызь Андрейлы. Соку нокыӵе алдаськонэз уз луы. Шудэд но, оло, Андрей вӧзын ик. Улэп атаез вань вылысь, пиед сое тодытэк будоз шат? Быдэ вуэм бераз мар вералоз со тыныд? Коля гинэ ӧвӧл, пиед но адӟонтэм кароз тонэ. Тупаты янгыштэ, бер ӧвӧл на. Ирина ачиз но та сярысь малпаськиз. Уксё, кильтро дӥсь, бадӟым но чебер коркан улон шуд вылымтэ на. Пиез вордскем бере, ваньмыз со кыкетӥ интые кылиз. Тани ук кыӵе мусо гинэ кӧлэ со. Оло, улысал ай со та коркан, Коляен кусыпъёссы умоесь ке луысалзы. Нош со вераськем гинэ ӧвӧл, шораз ик уг учкы. Андреез но Ирина уз ёрты, ачиз тодоз ни мар карыны. Нокинлы кыл-куара поттылытэк, Ирина аслаз дораз бертӥз. Анаез синвуэн ке но пумитаз, номыр ӧз куареты. Сумкаысьтыз дӥсьёссэ поттакуз, Ириналы ки улаз кагаз бинет сюриз. Сэрттӥз но ӵуж помидорлэсь кидысъёсты адӟиз: "Эх, кыӵе ческытэн сии вал мон ӵуж помидоръёсты. Оло, мерттӥ ке, одӥгез ке но будоз ай, емышсэ сётоз". Бинетысь кидысъёсты Ирина ӝикытак утялтӥз. Музъем дунтэк уг луы Кызьы тодмо, туэ 18 июле потӥз Президентлэн музъем понна выт тыронэз воштон сярысь Указэз. Огкылын верано ке, вытлэн быдӟалаез будӥз. Нош кинлы кӧнялы? Огмындалы-а, шуом, гараж возисьёслы но, юртъер кузёослы но? Трос таӵе выллем юанъёсын вазиськонъёс вуо али редакцие. Соослы валэктонъёс сётыны ми куримы Ижевскысь Индустриальной районъя валтӥсь государственной налоговой инспекторез Галина Светлаковаез. - Президентлэн Указаз музъем понна выт тыронэз 2 но 4 коэфициентъя воштон сярысь верамын. Кызьы сое валано? - 2 но 4 коэфициент - со, огшоры вераса, 2 поллы но 4 поллы будэтон. Тани городъёсын но посёлокъёсын улон интыосын но кооперативной но нимаз гаражъёсын басьтэм музъем понна налог кык пол будӥз. Ваньмыз мукет музъем понна ньыль пол. - Ваньмыз мукетъёсыз пӧлы гуртын улӥсьёслэн но юртъеръёслы но бакчаоссы пыро-а? - Бен, пыро. Озьы ик городын улӥсьёслэн сад-бакчаоссы но гаражъёссы, соос город сьӧрын ке интыяськемын. - Тани лыдӟисьмы гожтэ: мон, пе, ваньзэ-ӧвӧлзэ араз 6 манет сельхозналог тырисько вал, табере 24 манет тыроно луоз-а? - Уз, сомында уз луы. Налог 1 сентябрьысен будӥз ук. Тямыс толэзь понна азьвыл сямен ик тыроно. Собере ини выль сямен. Озьыен, ар понна - 12 манет. - Кытысь та лыдпусэз поттӥды, валантэм. - Араз адями тыре вал 6 манет. Яке толэзьлы быдэ 50 копейка, озьы-а? Выль выт араз 24 манет луэ, толэзьлы - 2 манет. Тямыс толэзь понна вуж сямен тыриськом бере, со луоз 4 манет. Ньыль толэзь понна 1 сентябрьысен выль сямен - 8 манет. Отысь ик потэ 12 манет. Озьы ик лыдъяно котькыӵе музъем понна налогез. Тае лыдэ басьтыса туэлы налогъёс будӥзы 1,33 пол. - Нош кайта, озьыен, 2 пол но 4 пол? - Вуоно ар сярысь вазь ай вераны. Указын туэ сярысь гинэ вераськон мынэ ук. - Кыӵе ке льготаос кылемын-а? - Малы кыӵе ке? Ваньмыз кылемын. Мон соосты лыдӟисьёстылы тодазы вайыто, кулэ ке. Музъем понна вытлэсь ӝынызэ тыро: - сыӵе семьяос, кудъёсаз коньдонзы котькуд адямилы толэзьлы 2 уждунлэсь ӧжыт усе; - пенсие арлыдзыя потэмъёс; - сюдӥсь-вордӥсьсы ӧвӧлэн пенсия басьтӥсьёс; - ИИИ группаен ӧлексыос (инвалидъёс); - пичиысен ӧлексы (инвалид) кылемъёс. Выт тыронлэсь воксё мозмытэмын Быдӟым Отечественной войнае ветлэмъёс но И но ИИ группаен инвалидъёс. Сыӵе ик льготаос сётэмын Чернобыль АЭС-сын шудтэм учыр бере радиация улэ шедемъёслы, 1986-тӥ - 1987-тӥ аръёсы отын ужамъёслы, станция котырысь улон интыоссэс воштэмъёслы но 1957 аре "Маяк" производственной объединениын шудтэм учырлэсь бервылъёссэ октӥсь-калтӥсьёслы. - Юасьёс шедё, вань-а льготаос МВД-ын ужасьёслы, политической репрессиос улэ шедемъёслы но Афганистанын но Чечняын ожмаськемъёслы. - Таосызлы номыр но чакламын ӧвӧл. Зэм, соослы льготаос тупатыны быгато интыысь кивалтӥсь ёзъёс. Но музъем вытлэсь со люкетэзъя гинэ, кудӥз мынэ интыысь бюджетэ. Йылпумъяса, лыдӟисьёстылы тодазы вайытэме потэ на: музъем налогъёсты тыронлэн берпуметӥ нуналэз - 15 ноябрь. Бере кылиды ке, пени мыноз. Г. ТИХОНОВ. Уй палась ваньбурез - лымшоре Коми Республика Иранэ пу но кагаз келянзэ пумен будэтыны чакла, ивортэ "Комиинформ" агентство. Иранлэн Россиын посолэз та нуналъёсы Сыктывкарысь нюлэс промышленностья комплексэ вуылӥз. Отын вераськон мынӥз лымшор странаысь экономикалэн кун люкетэзлы предприятилэсь продукцизэ келян сярысь, азьланяз, оло, нимысьтыз бадӟым контракт но гожтэмын луоз. Вераны кулэ, Сыктывкарысь комплекс кӧня ке ар ӵоже ини Иранэн кусып возе. Но та дырозь солэсь продукцизэ басьтылӥзы нимаз фирмаос гинэ. Соос пӧлысь одӥгеныз алигес предприятие 10 сюрс тонна кагаз келян сярысь контракт гожтӥз, выжыятэ "Комиинформ" агентство. (Басьтэмын Интернет пыр.) Удмурт Республикаын муосты кӧсатон-мускытатон но гурт хозяйствоослы ву сётон удысын ужамлы лицензирование ортчытон сярысь Удмурт Республикаысь Правительстволэн Постановлениез 1998 ар 3 август Ижевск город � 688 "Муосты кӧсатон-мускытатон сярысь" Федеральной законлэсь 22-тӥ ёзэтсэ быдэсъян вылысь, муосты кӧсатон-мускытатон тӥрлыклы, нимазы сылӥсь гидротехнической сооружениослы, гурт хозяйствоослы ву сётӥсь тӥрлыклы проект лэсьтыку, соосты лэсьтыку но ужатыку Россия Федерацилэн законъёсызлэсь куронъёссэ быдэсъян, та тӥрлыклэн кузёосызлэсь (уже кутӥсьёслэсь) куронъёссэс но правооссэс утён понна но Россия Федерациысь Правительстволэн 1996 арын 13 сентябре "Муосты кӧсатон-мускытатон удысын ужамлы лицензирование ортчытон сярысь положениез юнматон сярысь" 1093 номеро постановлениез, Удмурт Республикаысь Правительстволэн 1997 арын 14 июле "Удмурт Республикаысь Муосты кӧсатон-мускытатон удысын ужаны нимысьтыз оскем улосвыл ёз сярысь" 709 номеро постановлениез вылэ пыкиськыса, Россия Федерациысь Гурт хозяйствоя но сиён-юонъя министерстволэн 1996 арын 30 декабре юнматэм "Муосты кӧсатон-мускытатон удысын ужамлы лицензирование ортчытон сярысь" 380 номеро приказэныз, нормативно-методической материалъёсын, кудъёсыз юнматэмын Россия Федерациысь Гурт хозяйствоя но сиён-юонъя министерстволэн 1997 арын 3 мартэ кутэм 214 номеро приказэныз но 1997 арын 29 декабре кутэм 171 номеро приказэныз, пуктэ: 1. Удмурт Республикаын муосты кӧсатон-мускытатон но гурт хозяйстволы ву сётон удысын быдэсъяно но лицензирование ортчытоно ужъёсын переченез юнматоно. 2. Муосты кӧсатон-мускытатон удысын ужъёслы лицензирование ортчытоз Удмурт Республикаын муосты кӧсатон-мускытатон но гурт хозяйстволы ву сётон удысын ужаны нимысьтыз оскем ёз - "Удмуртмелиоводхоз" управление. 3. Удмурт Республикаын муосты кӧсатон-мускытатон ужрадъёсын герӟаськем проектно- изыскательной ужъёсты ортчытӥсь, музъемез мускытатӥсь, кӧсатӥсь тӥрлыкез но нимаз сылӥсь гидротехнической сооружениосты лэсьтӥсь, выльдӥсь (тупатъясь), гурт хозяйстволы ву сётӥсь объектъёслы проект дасясь, объектъёсты лэсьтӥсь, ужамзэс радъясь, тупатӥсь, муосты кӧсатон-мускытатон но гурт хозяйстволы ву сётон понна скважинаосты портӥсь юридической лицоос но нимаз адямиос вылӥ верам ужъёсты ортчытыны кулэ "Удмуртмелиоводхоз" управлениен сётэм яке пусъем лицензиосъя. 4. Муосты кӧсатон-мускытатон удысын ужан понна азьвыл юнматэм радлыкъя сётэм лицензиос зэмесь, отын пусъем дыр ортчытозь. 5. "Удмуртмелиоводхоз" управление тунсыкъяськись предприятиосты, организациосты но нимаз адямиосты тодматыны кулэ Удмурт Республикаын муосты кӧсатон-мускытатон но гурт хозяйстволы ву сётон удысын ужаны луись лицензиосты басьтон радэн, но лицензирование улэ шедись ужъёсын. 6. Та постановленилэсь быдэсъяськемзэ эскероз Удмурт Республикаысь Правительстволэн Аппаратысьтыз агропромышленной комплексъя но нюлэс хозяйствоя отдел. Удмурт Республикаысь Правительстволэн Тӧроез П. Н. Вершинин. Удмурт Республикаын муосты кӧсатон-мускытатон но гурт хозяйстволы ву сётон удысын быдэсъяно но лицензирование ортчытоно ужъёсын перечень Код Удысъёс но ужъёс МП Муосты кӧсатон-мускытатон тӥрлыклы но нимаз сылӥсь гидротехнической сооружениослы проект дасян 100 Кӧсатон-мускытатон улэ шедись объектъёсын инженерной эскеронъёсты ортчытон: 101 интыослы карта лэсьтон но соолэсь быдӟалазэс лыдъян 102 муослэсь ӟечлыксэс эскерон 103 гидрогеологической эскеронъёс (му узырлыкъёсты эскерон, вуосты эскерон, шурын му вуосты эскерон, шур вуосты эскерон) 104 инкуазьлэсь чылкытлыксэ эскеронъя инженерной ужъёс 105 музъемысь лэсьтӥськон материалъёсты утчан 106 му пушкысь вуосты утчан, соосты азьланяз кутон понна 107 муосты кӧсатон-мускытатонъя но вуэз гурт хозяйствоын кутонъя эскеронъёс 108 гидроузелъёсты, бадӟым водозаборъёсты но нимаз сылӥсь сооружениосты эскерон 110 Ву киськан тӥрлыклы проект дасян: 111 ву киськан амалъёс но ву киськаны техника 112 гурт хозяйствоын будосъёс вылэ ву киськан режим, ву юон нормаос 113 ву киськан тӥрлыклэн конструкциезъя инженерной решениос 114 мултэс вуосты но гумыосысь но гуосысь вуосты палэнэ кисьтон 120 Вӧсатон тӥрлыклы проект дасян: 121 кӧсатон амалъёс но вуэз кулэстон но вуэз палэнэ келян нормаос 122 кӧсатон тӥрлыклэн конструкциезъя инженерной решениос 123 кӧсатон-мускытатон тӥрлыклы, польдернойзэ но пыртыса, проект дасян 130 Вуэз хозяйствоын кутон сооружениослы проектъёс дасян: 131 ву киськан, ву ваён но вуэз палэнэ келян понна, ву сётонъя магистральной каналъёслы проектъёс дасян, со каналъёстӥ секундскын 5 кубической метр ву мед ортчоз 132 10 миллион кубометр мында яке ичигес ву возён интыослы, ву люкан прудъёслы проектъёс дасян 133 трубопроводъёслы, вулэн ӝог бызён интыосызлы, перепадъёслы, шлюзъёслы, регуляторъёслы, ву возён интылэн пыдэсысьтыз ву лэзёнлы проектъёс дасян 134 насосной станциослы проектъёс дасян 135 сюез пельтыса нуэмлэсь, гурезьёсысь ву васькемлэсь, гурезь бамъёсысь сюй куашкамлэсь утись сооружениослы проектъёс дасян 136 шур пыдэсъёсты сузянъя ужрадъёслы проектъёс дасян 137 бусыосты тудвулэсь, ву улэ шедемлэсь утёнъя ужрадъёслы проектъёс дасян 140 музъемез ӟечомытонъя но уже кутонъя ужрадъёслы проектъёс дасян: 141 культуртехнической ужрадъёс (писпуосты, куакъёсты быттон, кӧльыосты утялтон, фрезерование но мур гырон, рекультивация) 142 химия амалэн кӧсатон-мускытатон (известь, фосфорит, гипс поттон, сылало музъемъёсты ӟечомытон) 143 интыослы план лэсьтон 144 криогенной амалэн кӧсатон-мускытатон (кӧсатон-мускытатон улэ шедись кылем муос но перелёткаос) 150 пудо сюдон возьёсты мускытатонлы, ву юон интыослы проектъёс дасян 160 Уже кутоно сюресъёслы но связья линиослы проектъёс дасян 180 Бусыосты, возьёсты утён понна нюлэс мерттыны проектъёс дасян: 181 бусыосты утьыны нюлэс мерттон 182 нюръёсы, гопъёсы нюлэс мерттон, ву музъемез медаз куашкаты шуыса 190 Вуэз хозяйствоязы кутӥсь организациослэн ваньбур поттон базазылы проект дасян (бюджет чотын ужасьёсызлы сяна) 191 Куд-ог проектъёсты быдэстон: 192 лэсьтӥськонэз радъян пумысен ужрадъёслы проект дасян 193 сметной документациез дасян 194 10 кВт-озь электрокужым сётӥсь сетьёслы проектъёс дасян 195 трубопроводъёсты электрохимической амалэн утёнлы проект дасян 197 Муосты кӧсатон-мускытатон но гурт хозяйстволы ву сётон понна типовой проектъёс дасян МС Кӧсатон-мускытатон тӥрлыкез, нимазы сылӥсь гидротехничской сооружениосты, вуэз хозяйствоязы кутӥсь организациослэсь ваньбур поттон базазэс лэсьтон (выльдон, улӟытон) 200 Ву киськан тӥрлыкез лэсьтон (выльдон): 201 ву киськанъя усьтэм сетез лэсьтон 202 ву киськанъя ворсам сетез лэсьтон 203 коллекторно-сборной но дренажной сетез лэсьтон 204 усьтэм вуосысь ву басьтонъя самотечной выллем гидроузелъёсты, магистральной регулирующей каналъёсын ву быземез радъясь сооружениосты лэсьтон 205 ву басьтӥсь гидроузелъёсты лэсьтон, отын вуэз машинаос мед ӝутозы 207 ву киськан сетьын сооружениосты (гидрантъёс, колодчаос, гумыос - переездъёс, перепадъёс, быстротокъёс, шлюзъёс-регуляторъёс но мукет), лэсьтон, ворсась арматураез кутон 208 0,4 кВт-озь электрокужымен сетьёсты кыскон 209 связья линиосты кыскон 210 автоматизацилэсь но телемеханизацилэсь приборъёссэс пуктон но амалъёссэс кутон 211 ву киськась машинаосты но оборудованиез лэсьтон 212 ву киськано музъемъёслы план лэсьтон 215 Кӧсатон тӥрлыкез лэсьтон (улӟытон): 216 кӧсатонъя усьтэм сетез лэсьтон 217 кӧсатонъя ворсам сетез лэсьтон 218 кӧсатон сетьын сооружениосты (учкон колодчаос, ву кыскись колодчаос, устьяос, ву кыскись воронкаос но мукет) лэсьтон 219 переездъёсты, быстротокъёсты, вулэсь кужымзэ кысӥсь оборудованиез лэсьтон 220 гыбедо нюръёсты кӧсатон 221 1000 гектарозь быдӟалаем польдерной системаосты лэсьтон 222 кӧсась (кӧсатэм) музъемъёслы план лэсьтон 223 Прудъёсты, ву возён интыосты лэсьтон, отчы 10 миллион кубометр яке ичигес ву мед тэроз: 224 ву возён интылэсь пыдэссэ дасян 225 плотинаосты, ӵыпетъёсты отсыпка 226 противофильтрационной экранъёсты лэсьтон 227 плотинаослэсь откосъёссэс юнматон 228 ву басьтон сооружениосты лэсьтон 229 донной амалэн ву кисьтон оборудованиез лэсьтон 230 ӝутъяськись механизмъёсын затвор лэсьтон 231 плотиналэсь инъетаз цемент кисьтон 232 Кӧсатон-мускытатон понна, секундскын 5 кубометр кужымъем: 233 сборной но монолитной железобетонлэсь, кирпичлэсь но кӧльылэсь конструкциосты лэсьтон 234 корт конструкциосты люкан (монтаж) 235 насосно-силовой оборудованиез, вентиляторъёсты люкан 236 подъёмно-транспортной оборудованиез люкан 237 автоматизация, телемеханизация системаосты лэсьтон но пуско-наладочной ужъёсты быдэстон 238 вентиляциез, ву сётонэз, канализациез, шуныт сётонэз радъян но санитарно- технической приборъёсты пуктон 239 электрокужым но тыл сётон 240 тылпулэсь но мукет кышкытлыкъёслэсь утиськонъя сигнализациез лэсьтон 240а чорыгъёсты утёнъя сооружениосты лэсьтон 241 Уже кутӥськись сюресъёсты лэсьтон: 242 сюреслы инъет дасян 243 сюй киськан, сюез лёган 244 сюреслэсь вылзэ вӧлдон 245 сюрес котырез утялтон, чеберъян 246 сюрес вылын сооружениос (гумыос, выжъёс, нюкъёс вамен выжъёс) 247 связья линиез кыскон 248 вуэз хозяйствоязы кутӥсь организациослэсь ваньбур базазэс лэсьтон 249 улон юртъёсты но гражданской юртъёсты пуктыку фундаментсэс лэсьтон 250 монолитной но сборной железобетонлэсь, кирпичлэсь, пулэсь но мукет материалъёслэсь конструкциосты лэсьтон 251 выжъёсты, висъетъёсты, ошиськись вӧлдэтъёсты лэсьтон 252 штукатурной ужъёс, буян 253 юртъёсты педпаласен чеберъян 254 электрокужым, шуныт, газ, тыл сётон, пушласянь ву кыскон но канализация, телефонъёс пуктон, тылпулэсь но мукет кышкытлыкъёслэсь утиськонъя сигнализация пуктон 255 улосын писпу, куакъёс мерттон 256 лэсьтӥськонын кутӥськись конструкциосты, арбериосты но материалъёсты внутрипостроечной базаосын поттон 257 Культуртехнической ужъёс: 258 улосын писпуосты, куакъёсты коран 259 кӧльыосты утялтон 260 фрезерование, рыхление, луо, горд сюй, ӟеч сюй поттон, плантаж 261 мур гырон 262 интыослы план лэсьтон, термокарстэз быдтон 263 муосын рекультивация ортчытон 264 муосын залужение ортчытон 265 Химия но нюлэс амалъёсын кӧсатон-мускытатон: 266 известь поттон 267 гипс поттон 268 фосфорит поттон 269 сылалэн узыр интыосты кӧсатон-мускытатон 270 гыбед поттон но гыбедлэсь но кыедлэсь компост дасян 271 бусыосын нюлэс мерттон, сюез тӧл пельтыса нуэмлэсь утён понна 272 нюкъёс, гопъёс котыртӥ нюлэс мерттон, сюез вуэн нуэмлэсь утён понна 273 Сюй нуэмлы пумит ужрадъёс: 274 музъем вылтӥ бызись вуосты кутонъя но возёнъя сооружениосты лэсьтон 275 гурезь бамъёсын террасирование ортчытон 276 гурезьёсысь ву быземлы пумит сооружениосты лэсьтон 277 гурезь бамъёсысь музъем гылӟемлы пумит сооружениосты лэсьтон 278 магистральной каналъёсын, ву возён интыосын противофильтрационной экранъёсты лэсьтон 280 Кӧсатон-мускытатон объектъёсын, нимазы сылӥсь гидротехнической сооружениосын но гурт хозяйстволы ву сётӥсь объектъёсын ортчытоно нимысьтыз ужъёс: 281 музъем ужъёс 282 бетон кисьтон ужъёс 283 транспортэн но грузъёсты тыронэн-васькытонэн герӟаськем ужъёс (бадӟым грузъёс сяна) 284 гидромеханизация 285 сварочной ужъёс 286 изоляционной ужъёс 287 арматурной ужъёс 288 свайной ужъёс 289 кровельной но гидроизоляционной ужъёс 290 сборной железобетонной конструкицосты люкан 291 корт конструкциосты люкан 292 штукатурной ужъёс 293 буян, шпалер (обой) лякылон, пияла пуктон 294 вуэз кисьтон но ичиятон 295 музъемез юнматон 296 улосэз чебермытон, улыны ярамон карон, писпу мерттон МЭ Кӧсатон-мускытатон системаосты но нимазы сылӥсь сооружениосты уже кутон 301 Хозяйствоос куспын вуэз люконъя магистральной каналъёсты тупатъян но возён 302 Хозяйствоос куспын вуэз люконъя гидроузелъёсты но вуэз возён интыосты тупатъян но возён 303 Хозяйствоос куспын вуэз люкись каналъёсысь, вуэз возён интыосысь гидротехнической сооружениосты тупатъян но возён 304 Ву киськан системаосты насосной станциосын, гидротехнической сооружениосын, ву киськан оборудованиен но сетьысь устройствоосын ӵош тупатъян но возён 305 Кӧсатон системаосты гидротехнической сооружениосын но сетьысь устройствоосын ӵош тупатъян но возён 307 1000 гектарозь быдӟалаем польдерной кӧсатон системаосты тупатъян но возён 308 Кӧсатон-мускытатон системаос но гидротехнической сооружениос понна паспортъёс дасян 309 Кӧсатэм яке мускытатэм музъемъёсты чаклан но кӧсатон-мускытатонъя кадастр лэсьтон 310 Сюй нуэмлы, гурезьёсысь ву быземлы, гурезь бамъёсысь музъем гылӟемлы пумит сооружениосты тупатъян но возён 311 Бусыосты утён понна мерттэм нюлэсъёсты возён 312 Кӧсатон-мускытатон системаослэн каналъёсазы урод турын-куарен нюръяськон, механизмъёсты кутыса 313 Кӧсатон-мускытатон системаослэн каналъёсазы урод турын-куарен нюръяськон, химия амалъёсты кутыса 314 Эскерон пунктъёсты тупатъян но возён, котырысь вуосты, муосты чаклан, кӧсатэмлэсь яке ву киськамлэсь кызьы мынэмзэс эскерон понна (режимной скважинаос, ву постъёс, лизиметрической установкаос, инкуазез чаклан постъёс но мукет) СВ Гурт хозяйстволы ву сётӥсь объектъёслы, ву понна скважина портонэз но пыртыса (термальной вуос понна скважина портонэз лыдэ басьтоно ӧвӧл), проект дасян, соосты лэсьтон но ужатон 400 Гурт хозяйстволы ву сётӥсь объектъёслы проект дасян: 401 усьтэм вуосысь ву басьтон 402 кӧсатон-мускытатон но гурт хозяйстволы ву сётон понна эксплуатационной буровой скважинаослы проект дасян, скважинаослэн мурдалазы 150 метрозь мед луоз 403 гурт хозяйствоын кутон понна локальной водопроводъёслы проект дасян 404 чылкытатӥсь сооружениослы проект дасян 405 пудо сюдон возьёсы ву вуттонлы проект дасян 406 канализацилэн но вуэз палэнэ келян оборудованилэн педпалась сетьёсызлы проект дасян 410 Гурт хозяйстволы ву сётӥсь объектъёсты лэсьтон: 411 кӧсатон-мускытатон но гурт хозяйстволы ву сётон понна, 20 метрозь мурдалаем скважинаосты портон но ужатон 412 кӧсатон-мускытатон но гурт хозяйстволы ву сётон понна, 150 метрозь мурдалаем эксплуатационной скважинаосты вулы портон но ужатон 413 гурт хозяйстволы ву сётон понна локальной водопроводъёс лэсьтон 414 ошмесъёсысь, усьтэм вуосысь ву басьтон понна, шахтной колодчаосты но сооружениосты лэсьтон 415 гурт хозяйстволы ву сётон понна насосной станциосты лэсьтон типовой но нимысьтыз проектъёсъя 416 ву кыскись башняосты, накопительной но пожарной резервуаръёсты, водоразборной колонкаосты лэсьтон типовой но нимаз проектъёсъя 417 вуэз дасянъя оборудованиез (вуысь сылалзэ поттонъя станциос но установкаос, обезжелезиваниея но вуэз чылкытатонъя станциос но установкаос но мукет) лэсьтон 418 ужасьтэм, кузётэм скважинаосты быдтон, обсадной колонкаоссэс поттыса но тампонаж ортчытыса 419 канализацилэсь но отведенилэсь педпалась сетьёссэ лэсьтон 420 трубопроводъёсты электрохимия амалэн утён 421 гурт хозяйстволы ву сётӥсь системаосы машинаосты-автоматъёсты пыӵатон 430 Гурт хозяйстволы ву сётӥсь объектъёсты ужатон: 431 кӧсатон-мускытатон но гурт хозяйстволы ву сётон понна, 20-150 метрозь мурдалаем эксплуатационной буровой ву скважинаосты тупатъян но возён 432 гурт хозяйстволы ву сётӥсь локальной водопроводъёсты насосной станциосын, сооружениосын но водопроводной линиосысь устройствоосын ӵош тупатъян но возён 433 канализационной сетьёсты, соос вылысь сооружениосын но устройствоосын ӵош тупатъян но возён 434 фильтръёсты ужатон 435 пудо сюдон возьёсы ву ваись оборудованиез возён но тупатъян Шудоесь-а тӥ? Ужын ас шудзэс шедьтэм адямиослэн Галина Андреевна но Владимир Николаевич Елмашевъёслэн улон сюрессы юри тупатэм кадь артэ луыса кошке. Кыкназы ик Ува районысь Удугучин шор ёзо школаез йылпумъяллям, бӧрысь нош ик ужаны одӥг интые, "Ижмаше" сюриллям. Нош алигес ог-огенызы Кун Кенешлэн юртаз пумиськизы - кыкназэс ик отчы ӧтиллям Россия Федерацилэсь кун наградазэ басьтыны. Тыршыса ужамзы понна соос пусъемын ИИ степенё "За заслуги перед Отечеством" орденлэн медаленыз. Владимир Николаевич - фрезеровщик. Ужын радъям ӵошатсконъёсын трос пол вормисе потылӥз. Галина Андреевналэн ужез сокем ӵем уг пумиськылы, со - опиловщик. Мукет кышномуртъёсын ӵош со кисьтэм детальёсты эголэн (напильникен) волятэ. Та ужез воргоронъёс уг чидало, шуэ Галина, секыт, огвыллем потэ, лэся. Собере ялан ӵаш пӧлын ужано. Соин ик та ужез чидамъёс пенсие вазьгес пото. Та секыт ужез нылкышно 18 арзэ быдэсъя ни. Тыршемзэ синйылтӥллям. Одӥгез туж ӝож: сыӵе дуно кузьым кӧт сюмамез но уг буйгаты, улон инты но басьтыны уг юртты. Уждунэз быдэс арлы ӝегатыса пичиен-пичиен сётъяло. Ёркыт улон интызэ воштон сярысь табере кышномурт уз но малпаськы ни. Тӥни озьы сӥлы каремзы но мылкыдэз сокем ик уг бурдъя. Мын но вала, кытын табере адямилэн шудэз: уж бордын-а, коньдон бордын-а? Т. МИРОНОВА. Туспуктэмез В. КАМАШЕВЛЭН. ТУСПУКТЭМЪЁСЫН ИВОРТОН Сюресъёс-вирсэръёс Сюресъёсты юнме шорысь улонлэн вирсэръёсыныз уг ӵошато. Соос умоесь ке, улон- вылонмы но ӟечгес, юрттэ со экономикаез но азинтыны. Берло дыре бадӟым саклык висъяське гуртъёсы умоесь сюресъёс вуттон ласянь. Туэ "Удмуртавтодор" кун предприятие 90 иськем выль сюресъёс ӝутыны чакла, лэсьтэмын ни 83-ез, тупатъяно 250 иськемзэ. Со сяна, сюресъёс кузя пуктоно 4 сюрс пусъёс (знакъёс). Шаермылэн улоназ бадӟым инты басьтэ Ижевск - Воткинск автомобиль шоссе. Отын али трактэз выльдон-паськытатон ужъёс мыно. Со вакытэ ик выжъёсты но тупатъяло. Та удысын синмаськымон тыршо "Удмуртавтодорлэн" Можгаысь выжъёс лэсьтонъя управленияз ужасьёс. Соослы висъямын кулэ техника, дасямын устоесь специалистъёс. Та коллектив ужаны быгатэмзэ возьматӥз ни, туэ Июль шур вамен выжез тудву нуыку. Мар бен, вольытэсь сюресъёсмы котьку но азьлане мед нуозы. Н. ЛЯЛИН. Г. ЮСАЕВ (фото). Школае ӧз мынэ - номыр дӥсяны Дэбес палъёсын таӵеез ӧй вал на. Ёросысь калыкез дышетонъя отдел ивортэмъя, туэ 1-тӥ сентябре парта сьӧры пуксьыны кулэ вал 2986 пинал, со пӧлысь 12-ез дышетскыны ӧз лыкты. Номыр, пе, дӥсяны-кутчаны. Сыӵе муген пиналъёс школае мынэ. Одӥг классэ кыкетӥ арлы кельтэм 64 дышетскись пӧлысь 14-ез пумит луизы дышетскыны. Школае ветлытозь, пе, ми ужаломы. Азьланяз но таӵе югдур луиз ке, кытчы меда вуомы? Л. БАКАЕВА. Шедьтос Туэ тулыс Шаркан ёросысь Сосновка черкогуртын улӥсь Василий Сундуков, гулбечаз картофкалы гу копакуз, тодмотэм арбериос борды мырӟиськиз. Учке но - чугунлэсь кисьтэм шайвыл плитаос. Одӥгез вылэ гожтэмын: "Татчы ватэмын Сосновка черкысь священник Михаил Михайлович Жестков. 1877-1909". Мукетыз плита вылэ кышноезлэн нимыз ӵабъямын. Верамзыя, 20 аресъем нылкышно кулэм, пинал вайыкуз. Куинетӥ плита вылысь номырзэ лыдӟыны ӧз луы. Али та плитаос ваемын школа азбаре. Кызьы бен соос гулбече шедизы? Куамынэтӥ аръёсы котькытын ик черкъёсты куашкатъяны кутскизы. Югдур пӧртэм ӧй вал Сосновкаын но. Соку татысь черклэсь витьсэ ик гырлызэ сэрпалтӥллям но пильылӥллям. Одӥгез гырлы тонна кыске вылэм. Война вылтӥ черкын ю тысь возиллям. Бӧрысь вӧсяськон интыез кесящы, кирпичен- кирпичен тус-тас каризы. Самой со плитаос кинлы ке кулэ луиллям, лэся. С. ПЕТРОВА. БУСЫ УЖЪЁС (7 сентябрьлы) Районъёс Кутсамын юос Люкамын одӥг Ишкемын етӥн (процентэн) гектарысь (центнер) (процентэн) Яр 49,3 7,5 17,1 Глазов 65,8 9,9 33,3 Юкаменск 57,8 9,3 84,0 Балезино 76,4 11,8 71,4 Красногорск 63,1 10,2 100,0 Кез 72,8 9,2 73,4 Дэбес 75,9 10,2 73,7 Игра 85,2 9,9 97,8 Як.-Бодья 86,3 12,4 100,0 Шаркан 71,6 10,9 62,7 Селта 69,9 10,5 96,0 Сюмси 60,2 9,0 0,0 Ува 71,9 13,5 87,3 Вавож 82,3 14,0 Кизнер 84,2 7,6 57,6 Можга 89,4 12,1 56,0 Грах 68,0 8,6 Алнаш 96,6 11,4 30,0 Пичи Пурга 71,3 11,8 Кияса 73,9 9,3 Каракулино 70,3 10,8 Завьялово 72,1 12,4 Вотка 67,4 10,9 Сарапул 56,5 10,5 Камбарка 56,0 9,6 ___________________ Республикая 72,3 10,8 68,6 Та дыре 1997 арын 66,3 17,3 50,4 ДЫШЕТӤСЬМЫЛЭН СЮРЕСТӤЗ Удмурт кылэз дышетӥсьёслы ӧз ӝожтӥськылэ Кизнер районысь Безменшур школаын ужасьёс. Соинтэк-а та школаез йылпумъямъёс но тросэз Удмурт кун университетысь филологияя факультетын дышетсконзэс азьланьто. Пиналлы улоназ шонер вамыш лэсьтыны юрттэ удмурт кылъя но литературая дышетӥсь Валентина Николаевна Кузнецова. Задор мылкыдо кышномурт дас вить ар ужа ни школаын. Та дыр ӵоже трос чидано луиз ке но, шуг-секытъёслы ӧз сётскы. Урокъёссэ огшоры гинэ ортчытэ кадь, нош капчи мылкыд быдэс нуналлы тырме. Валентина Николаевналэн сюлмаськемез улсын пиналъёс шаермылэн пӧртэм сэрегъёсаз вуылӥзы ни. Кылсярысь, кемалы тодазы улоз Алнашысь А. Окилэн но Г. Красильниковлэн музей-юртаз, Ижевскысь драмтеатре, Пичи Пургае вуылэмзы. Пӧртэм ужрадъёсы пыриськизы, пумиськонъёс ортчытъязы. Шумпотоно, Безменшурысь пиналъёс шаерамы ортчись олимпиадаосын но вормисе потылӥзы ни. Одӥгезлы шуд усиз Финляндие но вуылыны. Кылъя но литературая урокъёсмы котьку тунсыко ортчылӥзы, соин но, дыр, тросэз дышетскисьёс Валентина Николаевна сямен дышетӥсь луыны малпазы. Тани ма вера УдГУ- ысь ИИ курсысь студентка Елена Б., школаын дышетскемзэ тодаз вайыса: - Лыдӟем произведениосты мургес валаны юрттылӥз милемлы литож. Командаослы люкиськыса, пӧртэм юанъёс ог-огмылы сёткамы. Произведениосыз пыр-поч лыдӟытэк, литожын тонэ соку ик вормозы. Эсьмаса, пыдло ватскем учыръёс но кемалы тодамы кылизы. Со гинэ-а меда? Литожын ми кылмес волятӥськом, эшъёсмес валаны дышетскиськом. Нош кылъя урокъёсын опорной схемаос трос лэсьтылӥм, кудъёсызъя правилоосыз ӟечгес дышетылӥм. Школаын котькыӵе произведениез мылысь-кыдысь эскереммы туннэ дышетсконамы но туж юрттэ. Огкылын вераса, милемлы туж удалтӥз та дышетӥсен. Валентина Николаевналэн тунсыко ортчытъям урокъёсыз кемалы тодамы кылёзы. Солэсь тыршыса ужамзэ синйылтӥзы ини калыкез дышетон удысын но. Азинсконъёсыз понна 1995-тӥ арын В. Н. Кузнецовалы дышетон удысысь отличник дано ним сётэмын вал. Солэн быгатонлыкъёсыз шоры ми но, студентъёс, данъяськыса учкиськом, со кадь луыны тыршиськом. И. ПЕТРОВА, А. КУЗНЕЦОВА, Удмурт кун университетын дышетскисьёс. Фондэ уксё уг вуы Шаерамы быдэс Россиын кадь ик пенсиос тырон туж ӝега. Мугъёсыз тодмо: Россия коньдон уг висъя, нош предприятиос уг тыро (уждун уг сётъяло бере, кытысь бен со луоз?). Тани августэ Москваысь чылкак 5 миллион манет вуиз. Пенсиосъя фондлы тужгес но трос тыронъёссы люкаськемын шаерысьтымы бадӟымесь промышленной предприятиослэн. Соос пӧлын "Ижмаш", "Ижсталь", механической завод, ЭМЗ, ЭГЗ (Сарапул), ЧМЗ (Глазов) но мукетъёсыз. Огъя вераса, соослэн фондэ тыронъёссы 1,5 миллиард манет люкаськемын. Югдурез кӧня ке умоятон вылысь, берло дыре пӧртэм амалъёс утчало. Пенсиосты сиён- юонэн, дӥськутэн, коммунальной услугаосын тырон пыӵа. Ваньмыз со адямилэн мылкыд каремезъя лэсьтӥське. Г. ВАСИЛЬЕВ. Телефон понна тырыны пумит Петрозаводскысь алигес ивортӥзы: телефон понна тыроно, кӧня дыр ӵоже вераськемез лыдэ басьтыса. Талы пумит луисьёс митинг ортчытӥзы, гожтэ "Северный курьер" газет. Отчы данак пенсионеръёс люкаськизы, ӟырдыт вераськизы, малы ке шуоно, куд-огез понна телефон - дуннеен кусып возьыны берпуметӥез амал. Со сяна, соос кышкало, телефон понна тыронъёслэн будэмзы вузъёслэн дунзы вылын шӧдӥськоз шуыса. Митингез радъясьёс Карелилэн шоркараз улӥсьёсты ӧтизы "Электосвязь" предприятилы бойкот ялыны но телефон понна тыронлэсь чылкак куштӥськыны. Россия: тылпу но тудву Виктор Черномырдин Президентлэсь Правительствоен кивалтон сярысь дэмланзэ быдэстэмез пумысен кайгыре, дыр, ини, гожтэ "Правда" газет. Премьерлэсь ужъёссэ быдэсъясь али кельше шуге-леке шедем адямилы: коркад огдыре ӝуа но, ву но пыре. Ма кароно? Манетлэсь куашканзэ дугдытоно? Выль правительство кылдытоно? Центробанклэсь кивалтӥсьсэ воштоно? Налог октоно? Яке отставкае куриськоно ни-а? Та вакытэ котькуд нунал ӧвӧл - котькуд час дуно, пусъе газет. Та пиос шоры учкыса малпалод - матысь эшъёс. Нош Дима но Толя Крюковъёс агаен- вынъёс. Кыксы но лэсьтӥськисьёс, ярато машинаез нуллыны но маскара веранъёсты, крезьгурен эшъясько, курлало амак кысконэз но вина юонэз. Дима туэ гинэ йылпумъяз Ижысь технической университетэз, луиз инженер-строитель. Али Сарапулысь "Альтаир" акционер огазеяськонын ужа, промышленной предприятиосы шуныт сётонэз лыдъясь приборъёс пыктылэ. Толя, Сарапулысь 11 номеро СПТУ-эз йылпумъяса, городысь типографиен тырше. Егит ке но, ужамтэ ужез ик ӧвӧл. Со кирпич но тыре, гур ӝутыны но йӧндыре, монтажник но, стропальщик но, туж яратэ электрокужымен ужась техникаез тупатъяны. Туспуктэмез но гожтэмез Г. ЮСАЕВЛЭН. Ӟечкыласьком! Та нуналъёсы 70 арес тырмонзэ пусъе Удмурт Республикаысь дано дышетӥсь, дыштонъя данак книгаослэн авторзы. "Удмурт дунне" но мукет газетъсслэн эшсы Вера Ивановна Колесникова. Сое сюлмысь ӟечкыласьком, тазалык но шуд сӥзӥськом. (Вера Колесникова сярысь очеркмес печатлалом матысь нуналъёсы). "Удмурт дунне" газетлэн редакциез. Кинлы мар шедёз? Кинлы ке но, оло, нылпи пособиос сярысь огпӧртэм вераськонъёс акыльтӥзы ни. Нош коньдонтэк пукись семьяослы? Балезино ёросын ӝыны ар понна гинэ кулэ 4 миллион манет, шонергес вераса, тамында манет тыр - вузъёс. "Улэп" коньдон сярысь веранэз ик ӧвӧл ни. 1,5 сюрс манетлы вуз сётыны кулэ "Сактон", 200 сюрслы - мотозавод. Соос сётэм кылзэс быдэсъяло ни. Л. БАКАЕВА. Йӧно анай но кивалтӥсь Чупрес адямиез котькин синйылтэ, вылды. Ми но Якшур-Бодья районысь Фрунзе нимо колхозысь синмаськымон адямиез пумитам. Со - Удмурт Республикаысь дано агроном Ольга Вахрушева. Ольга Ивановна кызь кыкетӥ арзэ тырше ини та удысын. Толэн-гужемен сюлмаськонъёсыз уг бырыло: трактористъёсын но кенешоно, бусые но вуттӥськоно, кеносэз но чаклано... Машиналэсь вуэмзэ уг витьы, пыдыныз ик бусые вамыштоз но тӥни! Тужгес но кысык вакыт - гужем. - Дорам кӧлыны сяна уг вуылӥськы,- шуэ агроном. - Колхоз ужен нылпиосылэсь но будэмзэс шӧдытэк кыли кадь. Ярам, кузпалы ваньзэ вала. Азьвыл аръёсы колхозын агрономъёс но лачак гинэ вал, нош али чылкак одӥгнам. Якшур-Бодья палъёсы вуылон нуналэ гуртоос Чекер шур дурысь возь вылын турын дасяло вал. Соос пӧлысь куинез - Ольга Ивановналэн нылпиосыз. Надежда, Ижевскысь политехнической колледжын дышетскыса, вордскем палъёсаз ужаны берытскиз. Николай туэ школазэ йылпумъяз, гужемзэ комбайнэн ужаны мылкыд кариз. Сашазы витетӥ классэ выжемын. Вахрушевъёслэн нылпиоссы данъясько анаенызы. Ольга Ивановна ӟеч анай но кивалтӥсь луэ. Семьяяз но гуртоосыныз капчиен огкыл шедьтэменыз ик ужъёсыз но адӟем карымон радъясько. В. КУТУЗОВА. Туспуктэмез В. КАМАШЕВЛЭН. Ма туннэ сюлмаськытэ Вормом. Дэмен луим ке Сыӵе мылкыдзэ вераз толон Кун Кенешлэн Тӧроез Александр Волков, парламентысьтымы ялан ужась комиссиослэн кивалтӥсьёсынызы но аппаратын ужасьёсын пумиськыкуз. Кылем арняе кык нуналзэ со Москваын ортчытӥз. Губернаторъёсын ӵош пыриськиз Правительстволэн Тӧроезлэсь ужзэ быдэсъясь Виктор Черномырдинэн кенешонэ, отын вераз кылдэм югдур пумысен малпанъёссэ. Вал на озьы ик соин нимаз пумиськон. Виктор Черномырдин куронъёсме лыдэ басьтӥз, асьме республикалы бюджетысь ссуда чотын 200 миллион манет висъяны косӥз. Та ласянь уж азинске ни, ӝоген со коньдон дорамы вуыны но дышетӥсьёслэсь, эмъясьёслэсь, куд- ог музон удысъёсын тыршисьёслэсь улонзэс капчиятыны кулэ. Александр Волковлэн кыкетӥез куронэз герӟаськемын вал Чепца механической заводэн (Глазов город). Шаерысьтымы та одӥгез валтӥсь предприятие (ӟеч аръёсы со чотын Удмуртилэн бюджетэз ог 40 процентлы тырмылӥз) али шуге-леке вуэмын. Тыронъёс люкаськемен, солэн счётэз ворсамын, ваньбурез арестовать каремын. Правительстволэн кивалтӥсез ЧМЗ-лы юрттыны басьтӥськиз. - Мон ялан шуисько,- пусйиз толон Александр Волков,- Нырысь интые пуктоно ваньбур поттонэз. Экономикамы ужаны ӧз кутскы ке, номыр уз пӧрмы. Та сярысь ик верай уно адямиосын пумиськылонъёс дыръя. Туннэ-ӵуказе выль правительство кылдоз, югдур тупатскыны кутскоз, но ваньмыз понна со гинэ кыл кутӥз ке, кыдёке ум вуэ. Али ӝог дасяно странамес утёнъя огъя бадӟым программа. Та тужгес но кышкыт вакытэ вунэтоно коммунист яке демократ луэмдэ, аслэсьтыд туннэ нуналлы гинэ тупась куронъёстэ. Огазе кариськыса быгатом югдурез киямы кутыны но воксё быронлэсь утиськыны. Кызьы тодмо, Кун Кенешысь коммунистъёслэн фракцизы А. Волковлы вазиськиз вал, В. Черномырдинэз юнматонлы пумит кариськыны курыса. Кун Думаысь коммунистъёс кинэ ке мукет муртэ правительстволы тӧрое ӵектысалзы ке, та сярысь вераськыны луысаЛ, валэктыса шуиз асьме парламентлэн кивалтӥсез. Но Зюганов нокинэ но ӧз дэмла. Со ялан мае ке но вите на. Нош Россиын юнматэм кивалтэт ӧвӧлэн, асьме страна нуналлы быдэ уно сю миллион манетлы ыштонъёс адӟе. Уноез, кин бордысь потэ та ужпумез быдэстон, тросгес сюлмасько асьсэ сярысь, чаклало, кин вӧзын ӵуказе каньылгес улыны луоно. Сыӵеослы огшоры калыклэн сюлмаськонъёсыз кулэ но ӧвӧл. Асьме республикаын югдур сярысь вераса, А. Волков жаляса пусйиз: дунъёсты кортнаны луонлыкъёс дорамы ичи. Озьы ке но, ма но со лэсьтыны амал вань. Кылсярысь, чаклано, шаерысьтымы сиён-юон, мукет ваньбур палэнэ медам кошкы шуыса. Оло, тупатоно созэ яке тазэ вузэз одӥг муртлы сётонъя норма. Ялан син азьын возёно банкъёслэсь, вузкарон предприятиослэсь ужамзэс. Ӵапак та сярысь ик пыр-поч вераськон мынӥз толон Кун Кенешын юри люкам совещаниын. Со сярысь ми ивортом вуоно номерын. И. КРИЧЕВ. БУСЫ УЖЪЁС (7 сентябрьлы) Районъёс Кутсамын юос Люкамын одӥг Ишкемын етӥн (процентэн) гектарысь (центнер) (процентэн) Яр 49,3 7,5 17,1 Глазов 65,8 9,9 33,3 Юкаменск 57,8 9,3 84,0 Балезино 76,4 11,8 71,4 Красногорск 63,1 10,2 100,0 Кез 72,8 9,2 73,4 Дэбес 75,9 10,2 73,7 Игра 85,2 9,9 97,8 Як.-Бодья 86,3 12,4 100,0 Шаркан 71,6 10,9 62,7 Селта 69,9 10,5 96,0 Сюмси 60,2 9,0 0,0 Ува 71,9 13,5 87, Вавож 82,3 14,0 Кизнер 84,2 7,6 57,6 Можга 89,4 12,1 56,0 Грах 68,0 8,6 Алнаш 96,6 11,4 30,0 Пичи Пурга 71,3 11,8 Кияса 73,9 9,3 Каракулино 70,3 10,8 Завьялово 72,1 12,4 Вотка 67,4 10,9 Сарапул 56,5 10,5 Камбарка 56,0 9,6 ___________________ Республикая 72,3 10,8 68,6 Та дыре 1997 арын 66,3 17,3 50,4 Туэ котькуд гектарысь шорлыдын 10 центнер ю-нянь люкаське. Умоесь юоссы вавожъёслэн, можгаослэн, завьялъёслэн, пичи пургаослэн. Ӝыныезлэсь уноез бусыос утялтэмын ни. Куазь уродмытозь, вань ю-нянез кеносъёсы вуттоно. Кино Иисусэн пумиськон Удмурт кылын Иисус сярысь кино луоз шуыса тодэме бере, одно ик сое учкеме потӥз. Малпай, калык люкаськоз, дыр, шуыса. "Аврора" кинотеатр доры вуыса пайми: чал- чал. Оло, куазь кезьытэн ӧз лыктэ? Пушказ пырыса но одӥг-ог пукисез сяна ӧй адӟы. Дорам ӝужыт, веськрес мугоро, чебер костюмен но галстукен дӥсяськем егит пиосмурт лыктӥз но шуэ: "Тӥ кино учкыны ке, пожалуйста, пыре, пуксе". Кӧня ке улыса, со ик ивортӥз: "Кино возьматӥсьёс ӧз вуэ на, соосты возьман сямен асьмеос кырӟаломы". Ваньзы султӥзы но Иисус сярысь кык кырӟан кырӟазы. Собере тыл кысӥз, кутскиз удмурт кылэ берыктэм "Иисус" фильм. Текстэз лыдӟо Удмурт драмтеатрысь артистъёс. Фильм кутске Библиысь чуръёсын. Возьматӥське, кызьы вордӥське Иисус, кызьы со будэ, быдэ вуэ, кызьы калыкъёслы юрттэ, кызьы сое виё, но кызьы со выльысь улӟе. Та кино быдэсак Библия вылын лэсьтэмын. Туж чебер возьматэмын инкуазь суредъёс, пӧртэм крезьгуро чеберъянъёсты пыртыса, кинолэн тусыз эшшо но узырме. Быре молитваен. Залысь потыкум, фойеын сылӥсь кышномуртъёсты синйылтӥ. Тодэме потӥз, мар малпало меда соос кино сярысь. Ваньзы огымысь кадь веразы: "Ой, туж кельшиз, туж кельшиз. Ми тае ӟуч кылын но учкимы вал ини, удмуртсэ но адӟеммы потӥз. Яраз берыктэмез но, артистъёслэн но лыдӟемзы". "Ми нош бӧрдыса учкимы,- шуизы пенсионеркаос Зинаида Александрвна Максимова но Галина Николаевна Загребина,- туж жаль потӥз Иисус. Кӧня сое жугизы, собере кортӵогазы, милемды озьы вӧсь каризы кадь". Шонерзэ вераса, мыным но кино кельшиз. Кельшиз аслаз чылкыт, улонлы дышетӥсь, визьмо луэменыз. Вераме потэ на: мынӥ вал "Аврорае", кино учкыны шуыса, нош тупай удмурт евангелистъёслэн служениязы, тодматски отчы лыктэмъёсын но пасторенызы. Тодӥ, котькуд кӧснуналэ татын удмурт кылын служениос ортчыло шуыса. "Аврораысь" потыса вамышъянъям, асме но валатэк, малы ке синъёсыным калык пӧлысь Иисуслэсь тусбуйзэ утчаны кутски. Сыӵе со сайкыт но чебер вал экран вылын. Шедьтымтэысьтым ӧжытак ӝожгес ке но луиз, тодам ваи кинотеатре люкаськылэм адямиосты. Шумпотӥ соос понна. Шудоесь соос. Угось вань осконзы, осконзы шудо азьланезлы, нош оскон - со, мон сямен, котьмалэсь дуно. Лилия БАКАЕВА, Удмурт кун университетысь студентка. Яратоно садмылы - 140 Горький нимо парк Генеральской шуыса нимаське вал. Та толэзе яратоно паркмылы тырме 140 ар. Вань меда солэн куке но чалмыт дырыз? Шумпотыса лыктэ Летний садэ юмшаны, шутэтскыны пичиез но, мӧйыез но. Ум вералэ ни ог-огзэсты яратӥсь егит сюлэмъёс сярысь. Праздниклы дасяськон мынэ ни. Городысь творческой коллективъёс возьматозы концерт. Вань мылкыд карисьёс пыриськизы аттракционъёсы, конкурсъёсы, шудоз духовой оркестр. 14-18 сентябре нимысьтыз программа дасямын школаос но нылпи садъёс понна, нош 19-20 числоосы шулдыръяськозы егитъёс, арлыдоос. Соос понна ортчоз Генеральской бал. Р. ИБРАГИМОВА. Удмуртия няньтэк уз кыльы шуиз Удмурт Республикаысь Кун Кенешлэн Тӧроез Александр Волков странаын ю-нянен но сиён-юонэн вузкаронъя кылдэм югдур пумысен кенешонэ люкаськемъёслы. "Россиын - анархия, сое мон шара верасько. Та арняысен кутскыса, дорамы поттэм сиён-юон палэнэ уг кошкы, сюресъёсты чакласа возёзы МВД-ын но таможняын ужасьёс",- меӵак шуиз Александр Александрович. Дунъёсын шудон, мукет регионъёсын ӵошатыса, асьме дорын бергес кутскиз. Соин ик бускельёсмы пызьлы, вӧйлы, сырлы, йӧллы машинаосын Удмуртие вуизы. Кӧня быгатӥзы - нуизы. Адямиосты та вакытэ тужгес но шугъяськытэ няньлэн дуныз. Кызьы валэктӥз "Удмуртхлебпром" огазеяськонлэн генеральной директорез А.И. Котельников, нянь но вылӥ сортъем пызь одно ик дуноялозы, малы ке шуоно, чабеез Казахстанысь басьтӥськом валютаен. Асьмелэн хозяйствоосмы государстволы ю-нянь келянэн уг дырто: витё дунъёслэсь ӝутскемзэс. Ӟег берло аръёсы кутсамез тырмыт кисьтэмын, таиз понна сюлмаськонэз ӧвӧл. Бордаз умой юрттэт луоз на туала чабей. Гужем пӧсь сылэмен,солэн клейковинаез вылӥын, озьыен, нянь пыжонэ мыноз. Удмуртия понна ӟеч пызь изэ Сарапулысь хлебокомбинат. Кызьы шуиз солэн кивалтӥсез М. С. Малюк, азьвыл ваем тысьлэсь дасям продукцилы дунъёс будэтымтэ на, ӧжытаклы дунояз кунгож сьӧрысь басьтэм мешок. - Республикаез сюдыны ю тысь тырмыт дасямын, нянь пыжисьёс ужлы ёрмыса уз сылэ. Кулэ ке луиз, кутом госрезерве кисьтэмзэ. Дунъёс 2-3 нунал куспын базарын тодмантэм воштӥськизы. Тае адӟыса, син шорын бушазы магазин ӝажыос, нош ик кылдӥзы черодъёс. Вторнике 15 процентлы дуноязы йӧллэсь дасям сиён-юонъёс. "Ижмолоко" АО-лэн кивалтӥсез Г. Ф. Красноперов тае валэктэ кунгож сьӧрысь ваем пленкаен но шоколад глазурь басьтэмен. Та нуналэ ик ӝутскиз бензинлэн дуныз. Огъя вераса, Россиын Правительстволэн ӧвӧлэз ӝог шӧдӥськиз. Таӵе югдурын быгатозы-а Удмуртилэн кивалтӥсьёсыз калыкез шуге-леке шедемлэсь утьыны, сотэк но секыт улонзэ ӧжытак ке но капчиятыны? - Со понна кутом пӧртэм ужрадъёс, шаерысьтымы югдурез чакласа возёзы правоез утёнъя но эскерись органъёс. Ас тодэмзыя дун будэтӥсьёслы эрказъяськыны ум сётэ,- вераськонэз йылпумъяса, шуиз А. А. Волков. Ижевсклэн мэриез куд-ог сиён-юонэз вузанъя нормаос тупатӥз ни. Соя адямилы быдэ вузаськоз 2 сукыри нянь, 2 килограмм кеньыр, 1 килограмм сылал но мукетыз. Таӵе решение кутэмын, югдур тупатскытозь. Интыосысь администрациос озьы ик вань быгатонозэ лэсьтозы, рынокысь тудӟем дунъёс калыкез медаз пачкатэ шуыса. Л. МЕДВЕДЕВА. Кун Думаысь депутатлэн малпанъёсыз Черномырдинлэн ӵектонъёсыз вылесь ӧвӧл - Андрей Владимирович, адямиос туннэ юн сюлмаськыса уло: мар луоз странаен? Чебер- а адӟисько сыӵе вакытэ Кун Думаысь депутатъёслэн политикаен вузкаронъёссы? - Политикаын али кылдэм югдурез мон ӧй дунъясал кыӵе ке вузкаронэн. Правительстволы Тӧроез быръён мынэ Конституциын тупатэм радъя, соин ик ваньмыз со законъя лэсьтӥське. Сергей Кириенколэсь правительствозэ но, ӝыны ар талэсь азьло Виктор Черномырдинлэсь правительствозэ но Кун Дума отставкае ӧз келялля. Кириенколэсь кандитатуразэ ӵектыку но, али Черномырдинэз выльысь ӵектыку но нокин Кун Думаысь депутатъёслэсь мылкыдзэс ӧз юа. Но малы ке иворъёсты вӧлмытӥсь ёзъёс но Президентлэн администрациез туала югдур понна янгыше уськытыны выро Кун Думаез. Со шонер ӧвӧл. Президентлэн но солэн правительствоезлэн озьы ужамзы сэрен гинэ али секыт югдур кылдэмын Думаын но странаын. Тодады вае, кызьы тулыс, Кириенколэсь кандидатуразэ юнматон понна, Б. Ельцин зӥбыса возиз Думаез. Али но со сыӵе амалъёсын ик ужаны выре. Туннэ нуналлы югдур таӵе сюресъёстӥ мыныны быгатэ. Нырысетӥез: В. Черномырдинлэсь кандидатуразэ куинетӥяз ӵектон но Думаез лэзён. Кыкетӥез сюрес: Президент выль кандидатураез ӵектоз. Мон висъясал Правительстволы Тӧрое тупась адямиос пӧлысь куинь муртэз: соос Лужков, Примаков, Строев. Куинетӥ сюрес но вань: Президент депутатъёсты оскытоз матысь дыре отставкае кошкемез сярысь. Но таиз сюрес осконтэм. Озьы ке но, та амалэз бырйыса гинэ парламент пыр ортчыны быгатоз Черномырдинлэн кандидатураез. Тӥни озьы югдурез тупатыны луэ, Конституциез чакласа. Мукет законэн лэзьымтэ сюресъёс сярысь вераме уг поты. - Умоен-а тӥ лыдъяськоды Виктор Черномырдинлэсь секыт югдурысь потонъя кутэм ужрадъёссэ? - Мон сямен, Черномырдинлэн ӵектэм ужрадъёсыз ваньмыз ик тыро-пыдоесь ӧвӧл. Солэн куд-ог дэмланъёсыз ог-огзылы ваче пумит но сыло. Сыӵе малпан кылдэ, солэн программаез мур малпаськытэк, дыртыса кылдытэмын шуыса. Но отын вань сыӵе люкетъёсыз, кудъёсыз понна мон Кун Думаын нырысетӥ нуналъёсаз ужаны кутскеме дырысен ик нюръяськисько вал. Кылсярысь, предприятиослэсь выт тыронъёссэс лябӟытон понна, банкъёслэсь барышсэс экономикаез азинтонэ кутон понна, правительствоез асьме ваньбур поттӥсьёслы зол юрттыны курон понна. Зэм, Черномырдинлэн та малпанъёсыз вылесь ӧвӧл, сыӵе куронъёсын депутатъёс правительстволы азьло но вазиськылӥзы. Пыӵалозы-а соос улонэ, табере тодмо луоз Правительстволэсь Тӧрозэ быръем бере гинэ. Е. ПОСАДОВА. Центробанк асьмеды пӧяз?.. (Россиысь Центробанклэн но солэн кивалтӥсезлэн Дубининлэн улонысьтызы чуръёс) Россиын манетлэн куашкамезлэсь мугъёссэ валан понна, юри дышетскем кулэ ӧвӧл. Ваньмыз туж огшоры. Коньдон ужпумъёсъя министерство печатлаз кунлэсь дуно бумагаоссэ (ГКО). Центробанк соосты коммерческой банкъёс куспын люкиз. Бумагаослэн дунзы будэ ке, коммерческой банкъёс но кун узырмо, кулэсме ке, банк бумагалэн азьвыл дуныз но али дуныз куспын пӧртэмлыксэ аслаз кисыысьтыз тыре. 1997 арын дуно бумагаос ӟеч вузаськизы, нош 1998 арысен соос дунтэмазы. Банкъёс изъян вайыса ужаны кутскизы. Нош Центробанк номыре валамтэ-адӟымтэ улсы кариськиз. Вылаз ик, ачиз Дубинин югдурез эшшо но уродмытӥз.ю Англиысь газетлы интервьюаз манетлэн куашканы дасяськемез сярысь вераса. Валтӥсь банкирлэн кылъёсыз Россиысь но быдэс дуннеысь коньдонъя рынокъёсты ужрадъёс кутыны косӥзы. Толэзь ортчыса, Дубинин Киевысен ивортӥз, дуно бумагаос, 2-3 ар ортчыса, кунэз банкротэ вуттозы шуыса. Странаын соку ик огыр-бугыр луиз. Центробанк валюталэн дуныз будэм сярысь ялӥз. Озьы Россиысь коньдонъя рынок чылкак куашказ. Банкъёсысь коньдон шур сямен ӧръяськыса кошкиз. Кун сьӧрысь банкъёс азьын пунэмъёсты куинь толэзьлы "кыткон" сярысь решение Россиысь банкъёсты сьӧрлось банкъёсын кусыпъёстэк кельтӥз. Табере Дубинин сярысь... Дубинин Центробанкен кивалтыны кутскем дырысен Россилэн валтӥсь банкез нимысьтыз кунлы пӧрмиз. Центробанк ассэ ваче пумит пуктӥз правительстволы, мукет банкъёслы но быдэс экономикалы. Дубининлэсь должностьсэ президентлэн должностеныз гинэ оградэ пуктыны луэ. Угось сое быръё ньыль арлы. Россиын озьы луиз: Центробанклэсь ужамзэ правительство но, Кун Дума но, президентлэн администрациез но эскерыны уг быгато. Дуннеын таӵеез луыны уг быгаты. Генпрокуратура гинэ 1996 арын кылпум поттылӥз, коньдон юртлэн липет улаз законъёсты тӥяло шуыса. Центробанкын, пе, должностен герӟаськем йыружъёс, кузьмаськон, лушкаськон сяськаяло. Кылсярысь, Центробанклэн кунсьӧр фирмалы 198 сюрс доллар висъямез пумысен уголовной уж ӝутэмын вал. Мукет та выллем учыръёс но тодмо. Центробанк федеральной кун учреждение луэ ке но, ужбергатонэн выриз. Кызьы, пе, сотэк: коньдон тани ук, ныр улын. Центробанк иворъёсты вӧлмытонэн герӟаськем предприятие кылдытӥз, нырысь-валысь солы 964 сюрс доллар висъяз. Предприятиен кивалтӥз Дубининлэн воштӥсез Михаил Сенаторов. Генеральной прокурорлэн воштӥсез Юрий Чайка верамъя, 3 ар куспын та предприятилы 119,8 миллион доллар висъямын вал.Генпрокуратуралэн мукет эскеронъёсызлэн йылпумъянъёсыз шараямын ӧй вал ке но, Дубининлэн валтӥсь банкир луон сюресэз чылкыт ӧй вал шуыса тодмо. Кылсярысь, 1993 арын, коньдон ужпумъёсъя министрлэн воштӥсез луыса ужакуз, со дасяз документъёсты, кудъёсызъя "Голден Адя" фирма Россиысь алмазъёсты кунсьӧры поттӥз. Фирмалэн кивалтӥсез Россие мырдэм но кызьы берытскиз, нош алмазъёс - ӧз. Ас вакытаз тросэз малпазы, Дубинин Центробанке витьымтэ шорысь вуиз шуыса. Но куд-огез верамъя, Кун Думаын Дубининэз юнматӥзы, одӥг банк депутатъёсты коньдонэн кӧяса-вӧяса. Озьы-а, ӧвӧл-а, но огез тодмо - Дубинин, выль кабинетаз пуксьыса вуттӥз гинэ но, "Национальный кредит" банклы - пыд йылаз мырдэм сылӥсь банклы - 70 миллион доллар кредит висъяз. Дубинин оскымон муртъёсын ассэ котыртӥз но аслэсьтыз адямиоссэ Сбербанклы но Внешэкономбанклы кивалтӥсьёсы пуктӥз. Соин ик Дубинирн быгатылӥз коньдон шедьтыны. Кылсярысь, странамылэн валтӥсь банкирез одӥг банклы кредитъёс весь висъялляз - отын ужаз солэн кузпалыз Валля арын Центробанклэн кивалтӥсезлэн окладэз 6 миллион манет вал (вуж коньдонэн), ватсалэ на 120 процентъем надбавказэ, озьы толэзьскын 13 миллион манет луэ. Со сяна, со дыраз басьтӥз дас куинетӥ уждунзэ, премиосты - вань 280 миллион манет. Ваньзэ лыдъяно ке, Дубинин 500 миллион манет тыр "ужаз". Нокин но уг тоды, кӧня коньдон басьтӥз со, Сбербанклэн но Внешэкономбанклэн кенешенызы кивалтэмез понна. Огез тодмо: Внешэкономбанк "кузьмаз" солы 80 сюрс долларъем кредитной карточка. (Басьтэмын Интернет пыр.) Сергей Дубинин отставкае куриське Центробанклэн тӧроез Сергей Дубинин 7 сентябре Борис Ельцинлы гожтэт ыстӥз, ужезлэсь мозмытыны курыса. ИТАР-ТАСС. Ӵуказеез вордӥське туннэ Туж чаляк ортчись но выльысь берыктыны луонтэм дыр сярысь малпаськыса кадь, суредась синсузёнтэмзэ но ӟыгыртыны турттэ. Ужа мылысь-кыдысь, быръем удыссэ яратыса... ...Василий Мустаев вордӥськиз 1963-тӥ арын Дэри (Завьял) ёросысь Якшур гуртын. Татын ик йылпумъяз шор ёзо школаез. Музон эшъёсызлы сямен ик солы но, школаын дышетскыкуз, бордгазетлэн редакторез но, суредасез но луыны кылдылӥз. Нош улон сюрессэ искусствоен герӟан сярысь ӧз ик малпалля. Зэмзэ вераса, гурт пилэн маскарчи (клоун) луэмез потэ вал. Солы паймонэз ӧвӧл, дыр - пичи муртлэн йыраз ма но уг лыкты. Но кыӵе ке шӧдонэз азьвыл ик алӥз: та удыслы тужгес ӟеч аръёстэ сётыса, маскарчи одно ик луоно ӧвӧл, дыр (зэмзэ вераса, ваньмы асьмеос клоунъёс). Пиёк бырйиз мукет сюрес. Школазэ йылпумъяса, 1980-тӥ арын дышетскыны пыриз Пермь улосысь Кунгур городысь чеберлыкъя училищелэн чеберлыко керамикая люкетаз. Зэм, та удыс вуоно суредасез бордаз ӧз кыскы. Училищеын дышетскыкуз, бадӟымгес саклык висъялляз вӧё буёлэн суредан амаллы: чын бадӟым суредась луон, буёлъёсын ужан сярысь малпаськемысь ӧз дугдылы. Пичиысен ик турттылӥз тодмо художник Михаил Нестеров кадь луыны. Училищеын со вакытэ дышетӥз кореец Хан Мацумаро (али Германиын улэ). Со тыршиз скульптура удысын. Дышетскисьёсызлы мадьылӥз ай соку чылкак тодмотэм скульпторъёс Сальвадор Дали, Эрнст Неизвестный но мукет тодмо художникъёс сярысь. Василий Мустаевлэн та адямиен тодматскемез шӧдтэк шорысь пӧрмиз бадӟым эшъяськонлы, вуоно суредасьлы будыны зол гинэ юрттӥз. Училищеез йылпумъямез бере ик 1983-тӥ арын Василий Мустаев кошкиз армие. Озьы луиз: кык арзэ ик Москваын вал. Тупаны но кулэ: службаез ӵапак ортчиз Суредасьлэн юртэныз артэ. Соиз но паймымон: армиын дыръяз калыкмы бӧрсьысь бӧрсе ватӥз азьветлӥсьёссэ. "Корт катанчи" каллен ӝутӥськыны ӧдъяз. Пельтыны кутскизы музон тӧлъёс. Кенешо кунысьтымы но кунгож сьӧрысь суредасьёслэн азьвыл алэм ужъёссы адӟиськылыны ӧдъязы данак музейёсын но выставкаосты ортчытъян залъёсын. Нош Суредасьлэн юртэз ваньмызлэн шорсюлэмыз вал. Кык ар ӵоже Василий вуылӥз татын ортчылӥсь вань выставкаосы. Нош туж тодмо Третьяковлэн туж тодмо галереяяз кызь пол вал: аспал эшмылы вожъяськысал, дыр, Москваысь котькудӥз улӥсь. Службазэ йылпумъяса, 1985-тӥ арын Василий берытскиз вордскем палъёсаз. Озьы тупаз: училищеын художнике-керамистэ дышетскемез Ижын номырлы ӧз яра. Та учыр ик удыссэ быдэсак воштыны юрттӥз. Графиклэсь ужзэ ӟеч-ӟеч тодон вылысь, "Дась лу!" газетын художник-ретушёр луыса ужаны кутскиз. Татын ик пумиськиз аспӧртэмлыко удмурт графикен Менсадык Гариповен. Огкыл капчиен шедьтӥзы. Арлыдо эшез атай музэн сюлмаськиз Василий сярысь: кӧня ке дыр ӵоже люкам тодон-валанэныз тодматӥз, искусствоын аслэсьтыз сюрессэ шедьтыны юрттӥз. Литература удысын ужасьёс пӧлын со вакытэ кемалась ветло ни вал удмурт кылын нылпи журнал кылдытон сярысь вераськонъёс. 1986-тӥ арын вордӥськиз со, "Кизили" журналлы чеберлыкъя редакторе юнматэмзы Василий Мустаев понна туж бадӟым но дуно дан луиз. Вылаз ик, та учыр возьматӥз на егит муртлы оскемез. "Кизили" журналын ужаны секыт но тунсыко вылэм. Редакциын тыршисьёс эшлыко кусыпъёс тупатӥзы азьвыл СССР-ысь "Весёлые картинки", "Мурзилка" нылпи изданиосын, эстон покчиослэн "Тахеке" журналэнызы но мукетъёсыныз. Берло дыре тросэз суредасьёс берытскизы ас калыксылэн вашкала выжыосыз доры. Василий Мустаев но зымиз та ӧре. Аслаз ужаз кутыны ӧдъяз Пермь улосын кылдэм пӧйшур амалэн суреданэз. Солэсь азьвыл йылолъёссэ чик тэргатэк, инъетэз вылын кылдытылӥз аслэсьтыз сузьетъёссэ. Фольклорлы но этнографилы сӥзем ужъёсты чебермакуз, ӟеч юрттӥсьёсыз луо тодмо удмурт тодосчиос Татьяна Перевозчикова-Владыкина но Владимир Владыкин. Устоесь визь- кенешъёссы понна, суредась соослы котьку тау каре. Василий Геннадьевич кӧня ке пол пыриськылӥз ни тужгес бадӟымесь адӟытонъёсы. 1989- тӥ арын ужъёссэ возьматӥз Россиысь автономной республикаосысь суредасьёслэн выставкаязы (со Москваын радъямын вал). 1990-тӥ арын - быдэс Союзысь егит суредасьёслэн выставкаязы (Москваын ик ортчиз). Пыриськылӥз графика амалэн суредасьёслэн адӟытоназы но трос мукет ужрадъёсы. Василий Мустаев туннэ нуналэн уг улы. Азьланезлы юн оске. Озьы бере, витёмы на солэсь выль тунсыко ужъёссэ. Ӟеч мылкыд но азинлык тӥледлы, Василий Геннадьевич. А. ЗОЛОТУХИН, изоискусствоосъя музейын ужась, Россиысь Суредасьёслэн огазеяськоназы быръем мурт. Василий Мустаев но солэн ужъёсыз. Бере кылёд - ыштон адӟод Кызьы азьло ивортылӥм ни вал, туэ шаерамы йӧл кыскем понна выль сямен юрттэт сётӥське шуыса. Кин скаллы быдэ араз 2000 килограммлэсь ичи йӧл люка, солы коньдон юрттэт учкымтэ. Ужрадлы пумитъяськисьёс но шедизы. Угось республикаямы 130 хозяйство со лыдпуслэсь ичи йӧл поттэ вал. Та ужлэн умоез али шӧдӥське ни. Кык сюрс килограммлэсь ӧжыт йӧл кыскись хозяйствоослэн лыдзы 30-озь кылемын. Ар бырытозь, оло, одӥгез но сыӵеез уз луы ни. Шаерамы тани ӝыны арскын скаллы быдэ шорлыдын 1400 килограмм ёрос йӧл люкамын. Миым та дырен ӵошатыса, 16 процентлы уногес йӧл вузамын, нош поттэмын - 8,4 процентлы ятыр. Сӥль поттон калленгес йылэ. Г. ВАСИЛЬЕВ. Правительствоысь иворъёс Кылем понедельнике, 7 сентябре, Правительстволэн кенешаз учкемын законъёслы таӵе инъетъёс: "Удмурт Республикаын интыысь (муниципальной) служба сярысь", "Удмурт Республикаысь кун службаын ужан стаж сярысь" но "Удмурт Республикаын инвестициосъя туж кулэ проектъёсты быдэсъян сярысь". Законопроектъёсы воштонъёс но ватсанъёс пыртэм бере, соос сётэмын луозы Кун Кенеше эскерыны. Кенешез нуиз Правительстволэн Тӧроезлэн нырысетӥ воштӥсез Юрий Питкевич. х х х Удмуртиысь гурт хозяйствоын иворъёс вӧлмытон амалъёсты пыӵатонъя постановленилы проект коньдон тырмымтэен кутымтэ. Со бордын ужалозы на. х х х Дэбес районысь "Ита" колхозын лек сильтӧл кунян гидзэс куашкатӥз. Сое выльдыны уксё висъямын. х х х Учкемын кӧня ке лэсьтӥськон организациос. Соос утё государствоез, нуо-ваё эстӥськон но герӟаськемын электрокужым сётонэн. Удмурт Республикаысь Правительстволэн Тӧроезлэн секретариатысьтыз пресс-центр. ӜУТО ГИДЪЁС НО, КОРКАОС НО Туала вакытэ таӵезэ шер пумиталод. Шаерысьтымы данакез гурт хозяйствоос ӵуказеез сярысь малпамысь ик дугдӥзы, лэсьтӥськон ужъёссэс аналтӥзы ни. Озьы шуыны уг луы Селта районысь "Свобода" колхоз сярысь. Секыт ке но, азьланезлы татын юн инъет кылдыто. Хозяйстволэн тӧроез Алексей Мясников пӧртэм амалъёс утча "улэп" коньдон поттон но лэсьтӥськонэз азинтон ласянь. Сотэк, пе, азьланьын уно сӥль-йӧл поттыны уд быгаты. Шонер малпа колхоз кузё. Тани районысь ик ваньмыз сямен хозяйствоос люкам коньдонзэс, ваньзэ сямен, уждунлы быдто, нош азьланьзэ вунэто. Но лыдӟись медаз вала, выль моньяос уждунзы чотын гидъёс но мукетсэ лэсьто шуыса. Татын быдэс районысь хозяйствоосъя уждун дыраз сётъяло. Озьы но туэ тани Эшметьгуртын кунян гид ӝуто, нош Орлово фермаын - скал гид. Нырысьсэ пукто медъям адямиос, мукетсэ - асьсэ кужымен, колхозникъёс лэсьто. Эшметьгуртысь выль гидын кунян ваён люкетэз но луоз. Кыксэ ик та юртъёсты сӥзьыл вуттыны малпало. Хозяйство сяна, ачиз но гурт калык лэсьтӥське. Али 5 семья шыкыс кадь йыг-йыг чебересь коркаос пуктэ. Колхоз соослы котьмаин юрттэ, нош транспорт понна чик дун уг басьты. Но со понна адями 10 ар колхозысь кошкыны уг быгаты. - Берло дыре гурт калык аслыз бадӟымгес но чебергес юрт пуктыны тырше, - вера Алексей Пантелеевич. - Одӥг кутскемен, йыг-йыг корка ӝутэ ни. Туж умой со. Солы пумит номыр уд вера. Адями лэсьтӥське бере, со улыны малпа, гуртысь но нокытчы уз кошкы, ю-нянь но будэтоз, сӥль-йӧл но поттоз. Г.Васильев. Эшметьгуртысь кунян гид. Таӵе коркаос пуктэ гурт калык. Фотоосыз В. Камашевлэн. Ижевск 1998 ар, 8 сентябрь, 15 час, ДУНЪЁС Буммаш базарын Нимыз Сылэ Сылӥз "сьӧд" субботаозь пызь 1 кг 5-8 манет 2,5 манет сакыр песок 1 кг 11 манет 5-6 манет сьӧдчабей 1 кг 10 манет 4-5 манет кӧжы 1 кг 5 манет 2-3 манет лапша 1 кг 9 манет 4,6 манет рис 1 кг 10-13 манет 4 манет йыды кеньыр 1 кг 3 манет 2 манет тари 1 кг 4,5 манет 2,6 манет курег пуз 10 быртык 5 манет 3-4 манет вӧй "Крестьянское" 200 г 5-6 манет 3,4 манет "Провансаль" майонез 1 пачка 5 манет 3-4 манет "Петр И" сигарет 1 пачка 9,5 манет 2,5 манет Спичка 1 коробка 20 копейка 10 копейка "Лоск" порошок 500 г 13-15 манет 6 манет хозяйственной майтал 4 манет 2 манет Кӧс вӧй но сылал ӧвӧл ни. Вузкарисьёс дунъёсты вошъяло нуналскын кык но, куинь но пол калык киын нуыны вормонтэм мында басьяське бере, кызьы барыш поттытэк кылёд. Магазинъёсын 7 сентябре кӧс вӧй 24-30 манетэн сылӥз, кеньыръёс, пызь, сакыр-песок, сылал чылкак ӧй вал. 8 сентябре полкаос вылэ вуизы ыльыс кеньыр (перловой) - 3,5 манетэн, манной кеньыр - 6,5 манет, кӧжы - 4, 8 манет, лапша - 6,8 манет. Сӥльлы, бакча сиёнъёслы дунъёс будэтэмын ӧвӧл. "Ижмолоко" предприятилэн сиён-юонэзлы дунъёс 15 процентлы йылэмын. Ӟег нянь ӧвӧл, булкаослэн но чабей няньлэн дунзы воштӥськымтэ. Мукет ласянь, макем тросгес асьмеос басьяськом, сокем трослы дунъёс будозы. О. ВАХИТОВА. 80 арлы Ноку вунэтонтэм вамышъёс, эшъёс Урал кун университетысь журналистикая факультетлэсь нырысетӥ курссэ йылпумъяме бере, мон кык толэзьем производственной практикаез ортчи "Удмуртская правда" газетлэн редакцияз. Берло нуналаз монэ ас кабинетаз ӧтиз "Советской Удмуртия" газетлэн кыл кутӥсь секретарез Анна Георгиевна Борисова. Пуксьыны косӥз. Лыдӟи, пе, газетын поттэм вань информациостэ, репортажъёстэ, статьяостэ но очерктэ. Син азе пуктымон. Улонысь выльзэ шӧдыны быгатӥськод вылэм... Пусйымон со... Отӥяз (ӟуч кылын) таӵе вераськон потӥз: - Вордскем интыед кытын? - Кулига районысь Мысы гурт... - Нош али кытын улӥськод? - Кез посёлокын... - Анай-атаед улэпесь-тазаесь-а? - Бен, кыксы ик... - Семьяын кыӵе кылын вераськиськоды? - Ӟуч кылын... Нэнэе ӟуч, Пермьын вордскемын но будэмын. Бабуше но ӟуч - Ярославль улосысь. Буби но дедуше - удмуртъёс... - Нош тынад удмурт кылэз тодэмед потэ-а? - Туж тодэме потэ... Нош бер ӧвӧл-а дышетскыны? - Дышетскыны ноку бер ӧвӧл. Анна Георгиевна, Кезысь шор ёзо школаын дышетскемме тодыса, пальпотыны ӧдъяз. Собере юаз: - Кемаласьгес ни - гожъяськись нылпиослэн конкурсазы пыриськылӥд-а? Мон соку жюрилэн кивалтӥсезлэн Нина Анатольевна Гребенщиковалэн воштӥсез вал. Тодам ваисько: нырысь инты сётӥмы Кезысь Даниловлы. Озьыен, тон луиськод... Ма сярысь гожтӥд вал ай? ... Кез районысь Юсь шур вылын Абыш вуко сылӥз. Тудвуос тулыслы быдэ сямен солэсь выжзэ сьӧразы нуылӥзы... Таяз учыре ми, ньыль кузя эшъёс, чорыганы яратӥсьёс, выжез утьыны вераським. Дорысьтымы биньгозыос ваим, мельниклэсь гираос курим но соосты биньгозы пуме керттылӥм. Выж вылын сылыса, гираосты люкаськыны ӧдъям йӧос вылэ куштылӥм, пильылӥм. Озьы тӥни выжез утьыны быгатӥм... Улонысьтымы зэмос учыр вал со. - Пусйыны кулэ,- веранзэ йылпумъяз Анна Георгиевна,- "Йӧ кошкон вакытэ" сочиненидэ нырысетӥез очеркед шуыса дунъяны луоз. Мар-о бен, возьмалом выльёссэ... Кыкетӥ курсэз йылпумъямелэсь азьло университетмылэн ректорезлы партилэн Удмурт обкомысьтыз телеграмма вуиз. Национальной кадръёсты будэтон вылысь, пе, Данилов студенттэс производственной практикае ыстыны куриськом "Советской Удмуртия" газетлэн редакцияз. Туннэ кадь ик тодӥсько: кутӥзы монэ Печатья юртлэн куинетӥ этажаз, кытын интыяськемын вал культурая отдел. Ӝӧк сьӧрын пукисьёс, Василий Григорьевич Широбоков но Прокопий Макарович Чайников, монэ кемалась тодмо эшсэс сямен, туж сюлмо пумитазы, практикаме пайдаёгес ортчытон вылысь, пӧртэм ужпумъёс пуктӥм. Нырысь ик, соос мыным ӟуч-удмурт но удмурт-ӟуч словарьёс кузьмазы. Словарьёс юрттэмен, мон редакцие вуэм ӟуч гожтэтъёсты, удмурт кылэ берыктыса, газетэ ярамон пӧрмытыны турттылӥ. Пумен-пумен валаны кутски котькуд кыллэсь предложениын ас интызэ, литературной кыллэсь но диалектъёслэсь пӧртэмлыксэс. Маскара учыръёстэк но ӧйлась. Гужем, одӥгаз туж пӧсь нуналэ, куиньнамы ик пукиськом кабинетын. Укноосын форточкаос ӧвӧлэн, шоканы луонтэм ӝокыт. Нюлам ву тыбыр кузя шыр-р! кошке. Ӵапак соку вераны шедьтӥ, коть борддорез-а, мар-а пася таӵеен шуыса. "Пася" шуэме уй палась вераськонысь выллем луэм. Ну бен эшъёсы серектӥзы ук, синвуоссэс ӵушылыса пуко, дугдылыса-дугдылыса горекъяло. Ӵапак та вие синъёсты ӵушкамон чилектӥз но липет зуркамон гудыртӥз. Вӧлдэтысь пуж быдӟа штукатурка куалдыса гожъяськон ӝӧк вылэ усиз, отысь чернильницаез векчи юдэсъёслы пазьгиз. Учкисько но - артэ пукись эшъёсы негръёс кадь сьӧдэсь луиллям, пиньёссы гинэ тӧдьы адско на. Машинисткаослэсь синучкон ваем бере, ваньмы пукон вылысь пограмон серекъям. Мон ас поннам йыркуртэк гинэ малпай: озьы кулэ тӥлед монэ сереме уськытэмды понна. Инмар адӟиз, кин кинэ обидиз. Та выллем учыръёс удмурт кыллэсь пӧртэмлыксэ мургес валаны юрттӥзы. Дышетӥсьёсы, очеркист Василий Широбоков но кылбурчи Прокопий Чайников, гожъямъёсме пумен ӧжытгес тупатъязы. Университетын практикаелы (вань материалъёсме ӟуч кылэ берыктоно луиз) вылӥ дунъет сётӥзы. 1950 ар. Июнь толэзь. Университетлэн ректорезлы нош ик партилэн Удмурт обкомысьтыз телеграмма вуиз, земляксэс-выпускникез ас доразы ужаны ыстон вылысь. Киям та телеграммаен но дипломен выльысь "Советской Удмуртия" газетлэн редакцияз вуи, табере ини - саесъёсме пужалляса ужаны. Котькинлэсь азьло монэ Анна Георгиевна Борисова пумитаз но кунултыса редакторлэн Петр Михайлович Яшинлэн кабинетаз пыртӥз. Гожты, пе, приказ: выль "пыжем" специалист-журналист, Свердловскын дышетскемын, удмуртъёс пӧлысь нырысетӥез, туннэ нуналысен мынам воштӥсе луоз. Анна Георгиевна, егит кивоштӥсезлы вылтӥяськон сям медаз пыӵа шуыса, солы нырысь нуналысен ик кыӵе гинэ секыт уж ӧз сётылы. Отделъёсысь секретариатэ вуэм лябесь материалъёсты выльысь гожтыны курылӥз. Яке, шуом, кыӵе ке но туспуктэм ӧз яра - выльзэ утчаны но воштыны курылӥз. Вылез но ке ӧз яра, мукетсэ шедьтоно вал. Таиз но ӧз яра ке... ярам ини, шуоз вал, нырысьсэ ик художникмылы (Андрей Степанович Мыльниковлы) ретушировать карыны сётом. Ответственной секретарьлэн таӵе "куатаськылэмез" мон понна но мукетъёсыз понна пайдатэм ӧз ортчылы. Ӝыны ар ортчыса валай: егит журналистлы секретариатын пукыны но мукетъёсызлэсь быдэстэм ужзэс эскерыны-тупатъяны вазь на. Калык пӧлы - заводъёсысь цехъёсы, колхоз но совхоз бусыосы, учреждениосы, пӧртэм заведениосы вуылоно. Вань улонэз ас синмын адӟоно. Вераны-бызьылыны дась луэмме шӧдыса, монэ ас дораз басьтӥз иворъёсъя отделлэн кивалтӥсез Матвей Григорьевич Ермаков. Тусызъя зӧк мугоро, сямызъя дыртӥсьтэм кадь адями, со олокытчы но син куспетӥ вуылоз, оломае но адӟоз вал. Номыр вылез, ярамонэз перо улысьтыз ӧз пегӟылы. Одӥг пол кин ке но солы кыӵе ке заводын безмен поттыны кутскемзы сярысь ивор ваиз вал. "Безмен? Кинлы со кулэ луиз?! - кеськиз Матвей Григорьевич.- Сарапулысь пыдкутчан вурон фабрикаын кут кутаны кутскем выллем кылӥське ук со!" Бускельёсмы, башкиръёс, пе, автоматикаен бичам весъёс кемалась поттыло ини. "Советской Удмуртия" газетын пӧртэм аръёсы ужазы удмурт калыклэн дано пиосыз Степан Павлович Широбоков но Геннадий Дмитриевич Красильников. Кызьы вунэтод соосын ӵош "ог пуртыын пӧземдэ"? Геннадий Дмитриевич милям, кышнояськымтэ егитъёслэн, "президентмы" вал. Ӵош эскерылӥм ог-огмылэсь гожъямъёсмес, ӵош ветлылӥм киное но столовое. Огпол, командировкаысь бертэм бераз, Гена ӝӧк сьӧры пуксиз, кияз пуньы кутӥз но сюлэмыз вӧсь луыса вераз: "Сиеме чик уг пот! Адӟи: нянь будэтӥсьёсмы няньтэк пуко... ваньзэ будэтэмзэ государстволы келяло... Нош асьмеос, государственной служащийёс, кӧтъёсмы пульдымон тулляськом... Малы меда озьы луэ улонамы?" Ӵапак таӵе юан сётэмын вал Геннадий Красильниковлэн газетамы поттэм статьяяз. Ну бен ӵаш поттыны кутскизы ук республикаысь кивалтӥсьёс! Авторез обкоме ӧтчазы. Политикамылы пумит луись малпандэ, пе, ас поннад гинэ возь вал. Собере Красильниковен ӵош милемыз но, егитъёсты, обкомысь пропагандая отделэ ӧтьылӥзы. Ми ваньмы, огкылысь, эшмылы дурбасьтӥм но кутскем темазэ статьяосамы азьланьтӥм. Газетэз лыдӟисьёслы со дыре тодмо вал Тимофей Иванович Шмаковлэн, Василий Евдокимович Садовниковлэн, Василий Евсеевич Смирновлэн, Василий Иванович Ивановлэн нимъёссы. Нимысьтыз тодэ ваем потэ газетлэсь валтӥсь редакторзэ Петр Михайлович Яшинэз. Тани со али ке но син азям. Ужан ӝӧк сьӧраз пуке, йырзэ ӧжытак чукинтыса, чиед мугоро адями. Азяз пукисен вераськыса, пальышак потылэ. Индылон учыръёсы но куаразэ уг будэты. Кымыс вылаз лэзькем йырсизэ дырын-дырын тупатъя. Кошкыкуз кунозэ ӧс дорозь келя: кулэ луи ке, пе, одно ик пырелэ. Редакциын ужасьёслы со часлы быдэ, минутлы быдэ кулэ луылӥз, семьяын атай сямен. Ачиз но "семьяез" сярысь сюлмаськылӥз: ужын гинэ ӧвӧл, шутэтсконын но. Дышетскеме бере ньыль толэзьзэ гинэ ужаны вуи - Петр Михайлович дораз ӧтиз но шуиз: тон, пе, пӧламы выль адями, нош ми трос аръёс ӵоже ог-огмылы акылякгес луим ини - юрттэмед кулэ. Ӝоген витетӥ декабрь - Конституцилэн нуналэз. Сое, пе, коллективын адӟем карымон пусъёно: кырӟан, эктон, маскаръяськон мед луоз, нош ӟузён - сур гинэ. "Быгато меда мон сокем бадӟым оскондэс быдэстыны?" - юаны медӥсько вал Петр Михайловичлэсь. "Оскисько, пӧрмытод",- ятвылтӥз со. Олокытысь тодэм мынэсьтым Свердловскын консерваторилэн ӝыт ужась люкетаз дышетскемме, пӧртэм смотръёсын кырӟамме, Удмурт радиолэн хораз ветлыса, Григорий Иванович Титовен эшласькемме. Быгатысал ке, пе, сое дорамы ӧтьыны - туж умой луысал. Со сяна, пе, мон сёто тыныд туж усто баянистлэсь телефон номерзэ. Григорий Иванович ӧтёнлэсь кема ӧз пыкъяськы, только серем пыр шуиз: тӥледлы, пе, кырӟан - шутэтскон, нош мыным со - вань сюлэмме курись уж. Котькызьы ке но, со, кужымзэ чик жалятэк, ӝытысен ӵукна ӟардытозь кырӟаз. Тодмо баянистлэн Африкан Гаврилович Порубовлэн шудэмез улсын милемын ӵош эктыны но вуиз... Малы, шуоды, мон та сярысь рос-прос верай? Петр Михайлович, кин ке азе ужпум пуктыса, ӝынызэ ачиз лэсьтоз, юрттоз вал. Капчи, туж пайдаё вал соин ӵош ужаны. Леонид ДАНИЛОВ. ЖУРНАЛИСТЪЁСЫН ПУМИСЬКОНЪЁС Сиён-юон палэнэ уз кошкы Туннэ улонмы уката шукрес луэ. Вань калык паймемын сиён-юонъёслы дунъёслэн будэмзылы, уката ик сакырлы, пызьлы, кӧс вӧйлы но мукетызлы. Таӵе югдурез журналистъёслы рос-прос валэктӥз вузкаронъя но бытовой юрттэт сётонъя министр Петр ПОНОМАРЕВ. Шаерысьтымы кун удысысь вузкарисьёс туэ урод уг ужало. Товарооборот миллиард манетъёсын лыдъяське. Лябгес мынэ бытовой юрттэт сётон. Татын но мар но со вылез пыӵа. Туэ кутскиз услугаослы сертификатъёс сётъян, нош предприятиослы - разрядъёс. Вуриськон ательеос 5 разрядозь луыны быгато, самой вылӥез моделья юрт нимаськоз. Туэ, бытовой юрттэт сётонэз умоятон вылысь, кун бюджетын ссуда висъяны 2 миллион манет коньдон учкемын. Со 8 пумо услугаосъя сётӥськоз. Но бизнес-планъёс дасян кулэезъя радъямтэ. Республикаямы вуз поттӥсьёсты утён вылысь, нимысьтыз постановление кутэмын. Сое быдэсъяса, магазинъёслы верамын кыӵе вузъёсын ужан сярысь. Озьы ик ортчытъясько вузъёсты но сиён-юонъёсты возьматонъёс но ярмаркаос. Берло дыре бадӟым уж лэсьтэмын кассовой аппаратъёсын вузкаронъя. Али ужрадъёс кутӥсько рынокъёсын порядок тупатонъя. Татчы пырисько правоосты утись но выт бичась ёзъёс. Рынокъёслэсь ужзэс умоятонъя программа дасяське. Матысь дыре умояз аракыен вузкарон. Министрлэн ивортэмезъя, секытэн мынэ Москваын вузкаронъя юрт усьтон. Отчы, пе, ичизэ 3-11 миллион коньдон кулэ, нош республикалэн сыӵе луонлыкез ӧвӧл. Азьло Москва "Удмуртия", "Калашников" водка гинэ куре вал, табере югдур воштӥськиз. Шоркарлы кулэ ни вӧй, сӥль, сыр но мукетыз. Асьмелэн кутэмын "Басьяськисьёслэсь правооссэс утён сярысь" Закон. Но туннэ, жаляса верано луэ, данакез сое уг тоды. Вузкарисьёс но солэсь куронъёссэ урод быдэсъяло. - Али одӥг адями кие кӧня сиён-юон вузан-сётон сярысь постановление дасяськом,- ватсаз Петр Пономарев.- Мугез тодмо. Та нуналъёсы спекулянтъёс-перекупщикъёс сиён- юонмес республикалэн палэназ келяны кутскизы. Озьы соос магазинъёсты бушатыны ӧдъязы. Кыкетӥез, калык куалектӥз, дунъёс юн трос йылозы шуыса но уно сиён-юонъёс октыны кутскиз. Журналистъёс министрлы трос юанъёс сётъязы. - Зэм ик дунъёс будозы? - Трослы уз, но йылозы. Кылсярысь, сьӧд нянь сокем дуно уз луы, озьы ик йӧл-вӧй. Нош сахар республикаямы тырмыт, 3,2-3.5 сюрс тонна складъёсын кыллё. Но сое юри ӝегато, вузаны уг сёто, озьы юнме шорысь дунзэ 2-3 пол будэто. Вӧй но сыр 2,5-3 толэзьлы вузаны тырмымон дасямын. - Кыӵе югдур калыклы бытовой юрттэт сётонын? - 40 процентлы йылозы химчисткая услугаос, нош фотоосъя - 20-25 процентлы. Малы ке шуоно, та удысъёс кунгож сьӧрысь ваем порошокъёсын ужало. - Малы сиён-юонмы палэнэ кошке? - Бускель Киров но Пермь областьёсын югдур, асьмелэн сярысь, уката уродгес, вань магазинъёссы бушатэмын. Соин ик шаерысьтымы спекулянтъёс но капчиен узырмыны тыршисьёс вӧез, сырез, сакырез но мукетсэ отчы нуллыны ӧдъязы. Али ужрад кутэмын - ГАИ-лэн постъёсаз ваньзэ соосты берлань берыкто но дорамы вузаны косо. - Сӥлья мар верасалды? - Сӥль продуктъёсмы 500-600 тонна. Но ми сое 3-5 нунал ӵоже гинэ вузаны возиськом, сӥль ӝог уродме. США-ысь курег макесъёслэн дунзы йылӥз, килограммез 20- 21 манет луиз. Озьыен, асьме тылобурдо сӥль но рынокын интызэ шедьтоз. Петр Пономарев люкаськемъёслы озьы ик ивортӥз Россиысь законодательстволэн асьмелы ужаны люкетэмез сярысь, соос питранэ пыд пуктэм кадь вузкарисьёслэсь суй- пыдзэс куашкато. Тани кӧс вӧйя кӧня ке фирмаос гинэ ужало, монополистъёс луо но дунзэ инмозь ӝутӥзы. Нош шаерысьтымы кивалтон органъёс соосын нюръяськыны уг быгато, законъёс люкето. Туннэ ватсаны кулэ на: Удмуртиын быдэс Россиын ваньмызлэсь азьло вузкарон предприятиосты вузазы (приватизировать каризы). Нош али интыысь (муниципальной) вузкарон вордӥське. Соос вань ни Воткинск городын. Умоен-а со берытскоз - улон возьматоз. х х х Туннэ вань калык чутрак паймемын токма шорысь дунъёсты будэтэмлы. Кин, кытысь со право сётӥз? Россиын юнме шорысь долларен шудон пӧразы, нош манетлэсь кужымзэ юри кулэсто. Ведь огшоры ужась адямилы доллар кулэ ӧвӧл, Россиын но соин шудэмысь дугдоно. Сое зэмос политикалы пӧрмытӥзы. Нош та "кулэтэм" ужрад бере, странаын ваньмыз огыр-бугыр луиз, дунъёсты будэтыны ӧдъязы. Таӵе югдур кинлы ке туж кулэ, шӧдске. Табере со вылэ ватсаськиз Россиын Правительстволэн ужамтэез, премьер- министрлэсь ужзэ быдэсъясь Виктор Черномырдин югдурез умоятыны выре ке но, ваньмыз вольыт уг мыны. Россия но, асьмеос но нуналлы быдэ берлань чигнаськом, Дуннеысь валюта фондлэсь (МВФ-лэсь) ялан кылзӥськиськом. Г. РОМАНОВ. Сад-бакчаос гомало Туэ республикаысь сад-бакчаосын 94 тылпу гомаз, 12 адями бырыны шедиз, 5-ез сӧсырмиз, 618 сюрс манет тыр ваньбур сутскиз. Пусйыны кулэ, тылпуос арысь аре "Берёзка", "Октябрь". "Пугачёво" но мукет сад-бакчаосын пото. Татын тылпулэсь утиськыны нокыӵе ужрадъёс уг кутӥсько, лэся. Кезьытъёс вуэмен, сад-бакчаосын югдур эшшо но уродмиз. Сентябре одӥг арня куспын гинэ 11 тылпу потаз, 50 сюрс манет тыр ваньбур пеньлы пӧрмиз. Тыл гомамлы бакчаослэн кузёоссы ик янгыш: куд-огез гурзэ умойтэм лэсьтэ, мукетыз гурзэ укыр зол ӟырдатэ, куинетӥез сӧриськем электрообогревателен шунтӥське, эшшо огез кудӟыса кӧлэменыз тылпу потэмез уг шӧды... Тросаз сад-бакчаосын шуръёс но, ӵыпетъёс но ӧвӧл. Таӵе учыре массивъёсын бадӟым вышкыосын ву возёно, ву басьтон башняосы кранъёс лэсьтоно, тылпу кысон машинаос ву басьтыны мед быгатозы шуыса. Тыл кысон тӥрлыкез дасяса возёно, тупатъяно. Телефонлэсь ужамзэ чакласа возёно. Н. ИЛЬИН, Удмурт Республикаысь Тылпуэн нюръяськонъя управлениысь инспектор. Тазалык вылын узырмисьёс шараямын Челябинск областьысь правоез утись ёзъёс шедьтӥзы 5 килограмм героин. Таӵеез Россиын ӧй вал на. "Челябинский рабочий" газет ивортэмъя, шараямын быдэс банда, отчы пыро Россиысь но Таджикистанысь наркотик вӧлмытӥсьёс. Соос Челябинск, Свердловск но Пермь областьёсын героин выллем усыкмытӥсь турынъёсты вузаллям. Талам наркотиклэн дуныз - 250 сюрс доллар. Героин сяна, пыӵал тӥрлык, Западын лэсьтэм радиостанциос шедьтэмын на. ГОЖТӤСЬКОН-98 Туннэ гожтӥськод, ӵуказе - шыръялод Котькыӵе секыт югдур мед луоз, кӧттыр сиён сяна, адямилы лул пушсэ но маин ке тырмытоно. Та ласянь солы юртто радио но телевидение, газет-журналъёс, книга. Берлооссэ лыдӟисьёс доры вуттонэз радъяло Удмурт Республикаысь Почта пыр кусып возёнъя Федерация управление но солэн ёросъёсысь ёзъёсыз. Мон вазиськи та управлениысь печатез вӧлмытонъя отделэн кивалтӥсезлы Татьяна Ивановна ГОРЯЧИХЛЫ. - Странаямы туннэ нуналлы кылдэм шуг-секытъёс уз-а шукке газет-журналъёслы гожтӥськон удысэз но? - Странамылэн но республикалэн экономикаяз шуг-секытъёс кылдэмен валче гает- журналъёслы гожтӥськонэз ми аналтыны ум малпаське, мукет дырлы но ум выжтэ. Кызьы со али мынэ 1 сентябрьысен, озьы ик мыноз. Но куд-ог агенствоос ыстӥзы ни дунзэс воштон сярысь документъёс. Кылсярысь "Международная книга" агенство гожтӥськонзэ 1 сентябрьысен ӧз усьты. Со герӟаськемын долларлэн укыр вылӥе тэтчеменыз. "Спид-инфо" но аслэсьтыз дунъёссэ будэтэ, со печатлаське угось Финляндиын. 1-тӥ сентябрьысен гожтӥськонзэ огдырлы дугдытӥз "Комсомольская правда". Тросэз изданиос куштӥськизы арлы гожтӥськонлэсь но. Вань со шуг-секытъёс шоры учкытэк, 14 сентябрьысен 20 сентябрёзь шаерамы ортчытыны чакласьком "Гожтӥськисьлэсь арнязэ". - Та ужрад пумысен лыдӟисьёсмылы пыр-почгес валэктон сётэ вал. - Та арня вискын гожтӥськемъёс понна почталэн нуон-ваён дуныз 20 процент пала кулэсмоз, мукет сямен вераса - одӥг манетысен дас манетозь. Но со озьы луоз, редакциос каталоге пырон дунзэс ӧз ке будэтэ. Воштӥзы ик ке, соку милям дунъёсмы, оло, дас процентлы пичиёмозы. Но "Удмурт дуннеез" со уз иса, тӥ газет дундэс уд будэтӥське, угось. Гожтӥськон дунъёс та арня вискын кулэсмозы кызьы ке республиканской изданиослы, озьы ик районын потӥсьёсызлы но центральнойёсызлы. Та ужрадамы пыриськыны мылкыд каризы "Здоровье" журналын ужасьёс. Гожтӥськемъёс понна соос асьсэос кузьым дасялозы. Огкыл шедьтӥм "Крокодил" журналэн но. Та арня вискын солы гожтӥськыны луоз туэ арлы чаклам дунъёсъя. Тани тӥляд газетты, "Кизили" но "Кенеш" журналъёсын огазеяськыса, Игра районысь лыдӟисьёс пӧлын лотерея ортчытыны чакла. "Известия Удмуртской Республики" "Семейный доктор" журналэн ӵош кариськизы. Кин кыкезлы та изданилы гожтӥськоз та вакытэ, со пыриськоз лотереяен шудонэ. Ужрадлэсь палэнэ кылемез ӧз поты "Субботняя газеталэн". Гожтӥськемъёс понна со озьы ик пӧртэм кузьымъёс дэмла. "Гожтӥськисьлэн арняез" пумысен ивортонъёс ыстэмын ни ёросъёсысь почта ёзъёсы. Калык азьло ик мед тодоз таӵе ужрадмы сярысь. Кин ке, оло, коньдонзэ шыръяны быгатоз та вакытлы, дасяськыса улоз ни. - Татьяна Ивановна, осконды вань-а калыклэн та ужрадэ мылысь-кыдысь пыриськемезлы? - Сиён-юон, мукет пӧртэм вузъёс вылэ калыклэн омырскемез сюлэмшугъяськытэ ик. Кылэм-адӟем но, оло, уз каре соос сярысь сюлмаськеммес. Нош мукет ласянь учконо ке, котькытын дунъёс будо, нош милям улӥе лэзиське. Со юрттоз, дыр, кожасько. Учке ай асьтэос. Кин гожтӥськоз та вакытэ дунтэм дунын, со нокыӵе сюлэмшугъяськонъёстэк быдэс ар ӵоже басьтоз кыӵе ке но изданиез. Нош октябре, ноябре гожтӥськемъёс, оло, тросгес коньдон тыроно луозы. Уката ик розницаысь басьяськисьёсты инфляция шуккоз. Соик ик, гожтӥськон дунтэм дыръя луонлыкъёс шедьтыны тыршоно. - Азьло аръёсын ӵошатыса, кыӵе воштӥськонъёс луизы газет-журналлы гожтӥськонын? - Мон та удысын ужаны кутски 1996 арлэн пумаз. Со вакытэ изданиослэн тиражъёссы уллане васько вал. 1997 арлэн нырысетӥ ӝыныяз югдур тупатскиз, шуыны луоз - тиражъёс пичиен-пичиен вылӥе ӝутскыны ӧдъязы. Кылсярысь, 1997 арлэн нырысетӥ ӝыныяз, вань изданиосты лыдэ басьтыса, калык гожтӥськиз 275 сюрс экземплярлы, нош 1998 арын - 281 сюрс экземплярлы. Татчы ик пыре почта пыр книга басьтэм но. Книга сярысь ке верано, 1997 арен ӵошатыса, таяз арлэн кыкетӥ ӝыныяз одӥг но ӝынылы тросгес гожтӥськисьёс луизы. Художественной литературалы сяна анай-атайёс но, дышетӥсьёс но "Дрофа" агенстволэн каталогезъя гожтӥсько учебно-методической литературалы. Мылкыд карисьёс берло дыре гожтӥськыны быгато лицензиен видеокассеталы но. - Шаерысьтымы гожтӥськисьёсын кызьыгес кусып тупатӥськоды? Мар ке лэсьтӥське-а тросгес лыдӟисьёсты кыскон понна? - Кылем арын поттӥмы вал асьмелэсь каталогмес. 1999 ар понна сыӵе луонлык ӧз кылды, гожтӥськон дунъёсты кема дыр ӵоже тодымтэенымы. Но мукет амал шедьтӥмы лыдӟисьёс доры вуттӥськон понна. Центрысь агенствоосмы поттӥзы пичи каталогъёс: "Домашний справочник подписчика" но "Калейдоскоп". Отчы пыризы асьме республикаысь изданиос, тӥлесьтыд газеттэс но вераса. Калык пӧлын дунтэмен вӧлмытон понна, шаермылы 30 сюрс сыӵе каталогъёс висъязы. 1 миллион 600 сюрс улӥсь понна со бен туж ӧжыт. Вӧлмытӥськом почтальонъёс пыр, нимаз-нимаз адресъёсъя нуллытэк. Но ӵектӥськом вуттыны газет-журнал басьтӥсьтэмъёс дорыгес. Одӥгаз каталогын вань гожтӥськон квитанциос. Марлы гожтӥськемед потэ гожтӥсьсы, телефон пыр почтальонэз ӧтьыны быгатод на. Дун со понна уг басьтыӥськы. Азьланьын малпанъёс вань пенсионеръёсын, инвалидъёсын та амалэн ужаны. Али уггес пӧрмы на. Ужамы вылез со но. Мылкыд карисьёс газет-журналъёсты доразы ик басьтыны быгато. Но та амалэн гожтӥськон дун кӧнялы ке дуногес. Со понна, газет киысь кие вуэ ни, нокытчы уг ышы. Гожтӥськонэз ортчытонын милям вань юрттӥсьёсмы. Соос ужало предприятиосын но организациосын. Почтальонъёс сямен ик, котькуд экземпляр понна почтаез нуон-ваён дунлэсь куать процентсэ басьто. Газет-журналъёслы гожтӥськыны луэ райцентръёсысь но шаерысьтымы городъёсысь (Ижевск сяна) киоскъёсмы пыр. Кылем арын та амалэн гожтӥськон умой мынӥз Красногорскын. Киоск пыр гожтӥськемъёс, почта ёзъёсын гожтӥськемъёсын ӵошатыса, газетлы асьсэос киоске ветлыны кулэ. Соин валче нуон-ваён дун 50 процентлы ӧжытгес. - Гуртъёсын улӥсьёс ӝожтӥськылӥзы газет-журналъёссы огъя интыям ящикъёсысь ышемысь. Озьы ик, почтальонъёс куд-ог учыре газет-журналъёсты меӵак лыдӟись доры уг вутто, кытчы ке пыртыса кельто. - Газет-журналъёсты, гожтэтъёсты нуон-ваёнын тупатэмын нимаз нормаос но правилоос. Ящик тӥяськемын ке, газетэз но, гожтэтэз но отчы куштыны уг яра. Почтальон гожтыны кулэ 22 номеро форма (ивортон бумага), корреспонденцизэс почтае лыктыса мед басьтозы. Кызьы со быдэсъяське, таиз ини мукет ужпум. Нош гуртъёсысь огъя абонент шкафъёс сярысь ке верано, берло дыре та амаллэсь тросаз районъёсын куштӥськизы ни. Газет-журналъёс отысь ышо. Гожтӥськисез, шуом, одӥг-кык, нош мурт чотын улыны турттӥсьёсыз вань гинэ. Чакланы нокинлы. Соин ик, почта ёзъёслы ӵектэмын та амаллэсь куштӥськыны. Газет журналъёсты почтальонъёс нуллыны кулэ котькуд гожтӥськись доры. Но таосызлэн ӟезьы доразы мед луозы нимысьтыз ящикъёс, пунылэсь кышкатэк мед луоз отчы кожыны. Адямиос асьсэос уг ке сюлмасько ышем, котмем газет-журналъёс понна, почтальон кыл кутыны ӧвӧл кулэ. Газет- журналъёсты кытчы кельтыны адями ӧз ке вера, шуом, конторае, почтае, нуллыны кулэ дораз. - Кыӵегес газет-журналъёс шаерамы вылӥгес дунъясько? - Тужгес трос гожтӥсько "Спид-инфолы", собере мыно "АИФ", "Комсомольская правда", "Труд", "Россияская газета", "Экономика и жизнь". Журналъёс пӧлысь лыдӟисьёс тужгес ярато "Крестьянкаез". Трос гожтӥсько "За рулём", "Здоровье", "Работница", "Главбух" журналъёслы. *** Гожтӥськон сярысь вераськон потӥз бере "Удмурт дунне" газетэз лыдӟисьёслы ивортӥськом: 1999 арлы январёзь гожтӥськиды ке, тӥледдывозьма кузьым. "Ижмаш-Мото" завод дэмла Удмуртилэсь данъяськонзэ - кужмо, чебер, ӝог ворттӥсь кор вал - мотоцикл! Лотерея пыр шудытэмын луозы озьы ик мукет дуно кузьымъёс. Шудды ас кияды - эн кыле гожтӥськытэк. Нош таиз ивортонмы Игра районын улӥсьёс понна. "Гожтӥськисьлэн арняяз" - 14 сентябрьысен 20 сеньябрёзь - кин гожтӥськоз "Удмурт дуннелы", "Кенешлы" но "Кизилилы" (одно ик куинезлы), соос пӧлын нимаз ортчытэмын луоз лотереяен шудон. Лыдэ басьтэмын луозы июльысен 20 сентябрёзь гожтӥськемъёс но. Газетысьтымы реклама отдел ӵектэ таӵе кузьымъёс: электропила, электроутюг но утюгаськон доска. Лия МАЛЫХ. Т. И. Горячих. Газет-журналъёслы, книгаослы гожтӥськонэз радъян бордын мылысь-кыдысь ужало Т. Д. Дерендяева - валтӥсь инструктор; Е. В. Никитина - отделэн кивалтӥсьлэн воштӥсез; Н. В. Александрова - инструктор; Р. М. Садриева - инструктор. В. КАМАШЕВЛЭН туспуктэмъёсыз. ГУРТ УЛОН Тырмозы-а кеносъёсмы? Секыт пурысь пилемъёс ӝомалэз дыртыса сьӧразы ваё. Одӥг-кык часлы коть югыт нуналэз нуйты на вылэм - уг луы, инкуазь аслэсьтыз лэсьтэ. Нош музъем ужасьлы та вакытэ котькудӥз минут дуно. Бусыосын трос гинэ ай кутсамтэ ю-нянь, огвакытэ ӵошазы картофка но бакча сиён октон. Пичи Пурга районысь "Красная звезда" колхозэ вуим ӝыт пал. Куазь зоремен, комбайнъёс кыкетӥ нуналзэ тэк сыло. - Аранэз но кыктойлы-куиньмойлы гинэ кылемын на, тани ук потыны уг сёты, ӝегатыса возе,- пурысь инбам шоры кунэрес учкылэ "штаблэн" кивалтӥсез диспетчер Василий Егорович Пупыдов. Со киын - вань лыдпусъёс. Зэмос штабист сямен, вазь ӵукнаысен бер ӝытозь, бусыысь берпуметӥ трактор вуытозь, берга ужан интыяз. Нуналлы быдэ - выль сводка. Со ошемын адскон интые. Котьку сямен, туэ но комбайнёръёс пӧлын валтӥсь инты басьтэ Николай Мурашов. Вордскем гуртэзлэсь бусыоссэ со 20 арлэсь ятыр котыръя ни: тодэ котькуд нюксэ-гопсэ, удалтонлыко интыоссэ. Кыкетӥ интыын - Василий Кузнецов. Озьы ик усто ужало Валерий Данилов, Виктор Константинов, Василий Михайлов. Кын улэ гыронэз ӵошен вормизы, шуыны луоз, Геннадий Яковлев но Николай Андриянов. 300 гектар муэз соос бугыртӥзы, тол вылтӥ шутэтскыса, асьсэос ик тулыс кизёзы. "Красная звезда" колхоз туэ кык хозяйстволы люкиськиз: яна потӥз Абдес-Урдэс гурт. Соин ик центральной усадьбалэн сюлмаськонэз кулэсмиз. Валэс юоссы киземын 767 гектар вылын, ветлон нуналамы пыд йылаз кылемын на вал 200 гектарез. Дыраз утялтыса вуттэмын ӟег, сезьы, йыды, чабей. Та культураос пӧлысь удалтонлыкезъя арезъя урод ӧвӧл,. шуыны луоз, йыды но сезьы: гектарезлы быдэ 13-14 центнер пала лыктӥз. Чабейзы - 9 центнер, ӟег - 9,8. Кылем арын 15,6 центнер кутсазы вал. - Миым огъя урожаймы гектарысьтыз 22 центнер люкаськиз, туэ - солэн ӝыныез,- шуэ Василий Егорович.- Куазез гинэ янгыше уськытыны уг яра, асьме бордысь но тросэз потэ. Кылем сӥзьыл, кылсярысь, кӧняез ке бусыосмы гырытэк кылизы: я солярка, я воштос ёзъёс дыраз ӧз шеде, соин ик туж ӝог аляз жаг турын. Отысь-а ӟеч урожай басьтод? Туэ аран-кутсан, ӟег кизён но умой радъямын вал. Эстӥськонлы ӧм ёрме, кык- куинь арнялы пунэмен но курыса вайылӥм. Техникамы но тырмыт ай: 8 комбайнлы быдэн 100-130 гектар пала музъем усе. Механизаторъёсын вераськыса шӧдоно: соослэн малпанзы та вакытэ одӥг - ӝоггес но ыштонъёстэк утялтоно будэтэм урожаез. Дышемын ни гурт калык уксётэк но ужаны: татын али ай пичиен-пичиен сётъяло миым арлы август понна уждунзэс. Нянь асьсэос пыжо, йӧл-вӧйлы, сӥльлы магазинэ уг ветло. Оло, секыт дыръёслэсь вуэмзэс шӧдыса, инкуазь но жалятэк кисьтӥз туэ емышсэ, губизэ. Эн гинэ азьтэмъяськы: сютэм уд кыльы. Гуртын озьы ик уло. Картофка но удалтонлыкезъя урод ӧвӧл. "Красная звезда" колхозын со 30 гектар вылын. "Кыкетӥ нянез" октон-калтонын арлы быдэ юртто школаын дышетскисьёс. Копалкаен бугыртыса кельтэм картофкаез соос мешокъёсы тыро, толлы гуэ интыяло. Векчиез кошке пудо сюдонэ, тазаез - кидыслы но столовое. Ужась калык шоры учкыса, оскон вань: политикъёсмы власть понна вожвылъяськыса, котьма куспазы мед турттозы - гурт калык ассэ сюдыны-вордыны быгатоз. Кузёзэ музъем пыдйылчие уз потты. "Красная звездаын" толлы тырмыт дасямын пудо сиёнзы, 2 сюрс тонналэсь ятыр силоссы, та нуналъёсы курозэс ӝуто, одӥг аръем турынъёссэс турнало на. Малпало скал уллёзэс 60 йырлы йылэтыны. Озьыен, шуг-секытъёслы уз сётске. х х х Материалэз дасятозь, "Красная звезда" аран-кутсанзэ йылпумъяз. Пичи Пурга районъя но юосты утялтон туннэ-ӵуказе быдэсмоз. Гектарысь шорлыдын 11,7 центнер ю тысь кутсамын. Удалтэм ю-нянь будэтӥз "Родина" гурт кооператив. Выль моньяос гектарлы быдэ 20 центнерлэсь уно люказы, нош улын юриос ("Рассвет") - 18 центнер басьтӥзы. Кутскиз картофка октон. Нырысьёсыз пӧлын удыссэс мытӥзы Киров нимо, "Итешево" кооперативъёс но "Уромское" ОПХ. "Кыкетӥ нянь" гектарысьтыз 100 центнер пала люкаське. Районын озьы ик азинске кын улэ гырон, куро люкан, пудо сиён дасян. Та ужъёсын ӵош мынэ вуоно арлы дасяськон. Ӟег кидыс кисьтэмын 22 процент, валэс юос - ӝыныез. Кыӵе югдур республикая? Кызьы вераз гурт хозяйствоя но сиён-юонъя министр В. И. Жуйков, арня кутсконлы вань юос пӧлысь утялтэмын вал 68 процентэз, му вылаз кылемын на 170 сюрс гектарез. Шорлыдын вераса, гектарлы быдэ 10,6 центнер усе. 21-22 центнер басьтэмын ньыль хозяйствоын гинэ. Ӵошатон понна: кылем арын ю-няньлэн удалтонлыкез шаермыя 18,4 центнер вал. Итымъёсы 500 сюрс тонна ю тысь вуттэмын. Министр верамъя, 15 сентябрёзь ю бусыос бушаны кулэ. Л. МЕДВЕДЕВА, Г. РОМАНОВ, В. КАМАШЕВ (фото). Арлыдоос уг ӝожтӥсько Америкаысь тросэз пенсионеръёс улонзы вылэ уг ӝожтӥсько, гожтэ "Ю-Эс-Эй тудей" газет. "Кызьы берло 20 ар куспын улонды воштӥськиз?" юанлы 37 процентэз 65 аресъемъёс могатэк веразы, улонзы эшшо но умойгес луиз шуыса. 38 процентэз нокыӵе воштӥськонъёсты шӧдӥллямтэ.23 процентэз нырысетӥосызлы чутрак пумит луизы. Соослэн улонзы 20 ар талэсь азьло тырогес но шулдыргес вылэм. Нош ӟеч улонлэн тодметъёсыз сярысь верано ке, арлыдоос золгес дунъяло ӵуказе нуналлы оскыны но тырмыт шутэтскыны быгатэмзэс, ивортэ газет. (Басьтэмын Интернет пыр.) Адямилы кышкыт ӧвӧл Новосибирскысь ихтиологъёс шараязы Обь шурын уно чорыг быремлэсь мугзэ. Со вулэн ӟечлыкеныз чик но гарӟаськемын вылымтэ. Мугез - омыр бордын. Ихтиологъёс врачъёсын-паразитологъёсын ӵош йылпумъян лэсьтӥзы: чорыглы чарлан кӧл (чаечный глист) паласькем. Сое вӧлмыто чарланъёс но ӵӧжъёс. Адями понна чарлан кӧл кышкыт ӧвӧл. Висись чорыгез сиыны но луэ, шуом, азьвыл аръёсы, сое общепитэ келяло вал. Уродэз антисанитария но пыласькон интыосын нырез вандӥсь зын. Ихтиологъёс чакламъя, вуоно арын Обьын висись чорыглэн лыдыз кулэсмыны кулэ. (Басьтэмын Интернет пыр.) Ю-нянь утялтонын нырысетӥосыз Алнаш районын юосты октон ужъёс мыно на, нош куд-ог колхозъёс та секыт вакытэз вормизы ини. Сыӵеос пӧлын "Родина" колхоз, отын 20 нунал куспын быдэстӥзы аран- кутсанзэс. Озьы ик татын утялтэмын ини курозы, кын улэ гыронзы но йылпумъямын. Л. БАКАЕВА. Тазалык Йыр висе, сюлэм ӵогъя ке... Уен-нуналэн дугдылытэк ужа сюлэм, мугоретӥ вирез бызьылытэ, вань ёзъёсты кислородэн тырмытэ. Сюлэм шымырскыку, вирзӥбет 140-лэсь тросгес луыны кулэ ӧвӧл, сюлэм шонерскыку - 90-лэсь. Тужгес умой, давление 120/80 ке. Вирлэн сюресэз - вирсэръёс. Соос сюлэм жугиськемъя я шымырско, я паськытало - вирез бызьылыто. Нош вирсэръёс алама ужало ке, вир соос вылэ зӥбыны кутске, таӵе учыре врачъёс шуо: артериальной давление ӝутске. Но "гипертония" диагноз пукто. Та висён ас йӧназ туж ик кышкыт ӧвӧл, но со сюлэмез, йырвимез, пекляосты быдтэ. Соин ик бадӟым давлениен улӥсь муртъёс инфарктлэсь, инсультлэсь, пекляоссы ужамысь дугдэмлэсь кышканы кулэ. Россиын, кылсярысь, вань кулэмъёс пӧлысь 52,8 процентэз улонысь кошко та висёнъёсын сэрен. Малы сыӵе бадӟым лыдпус? Уноез уг но тодыло, давленизы бадӟым шуыса, угось нокытӥзы уг висьы. Мукетъёсыз висёнзы сярысь тодо, но уно аръёс ӵоже огкадь эмъюмъёсын бурмытско, кудъёсыз туала вакытлы вужмемын ини яке мукет ёзъёсы шукко (адельфан, резерпин, апрессин, клофелин, папазол). Куинетӥосыз эмъяськемысь дугдо, йыры уг висьы, сюлэмы уг ӵогъя ни шуыса, но тазалыксылы туж бадӟым изъян ваё - висёнзы азьлолэсь но юн пуроме. Гипертония уг висъя, пиосмурт-а, кышномурт-а тон, егит-а, мӧйы-а. Ваньзэс "яратэ". Но нырысь ик ворме ялан сюлмаськыса, кышкаса улӥсь, сэректӥсь, керӟегъяськись адямиосты. Давление ӝутӥськыны быгатэ гормональной, нылпи сюремлэсь утись эмъюмъёслэсь но. Со сяна, стрессъёслэсь, кӧй луэмлэсь, кузьыт сиськемлэсь, тамак кыскемлэсь, аракы юэмлэсь, пукыны-кылльыны яратэмлэсь... Кылсярысь, кыскисьёс, сюлэмзы путыса, кык поллы ӵемгес куло, уго никотин вирсэръёсты сюбегатэ, соослэсь золъяськыны быгатонлыксэс быдтэ. Асьмеос ческыт, кӧё-вӧё сиськыны яратӥськом. Соин валче 45 арес бере котькудӥз кыкетӥез зӧкоме. Нош одӥг килограммлы ӟизымон давлениез 2,7/1,8 миллиметрлы кулэстэ. Таин валче таӵе дэмлан: кӧс вӧен пӧраське, сӥль ичигес сие, сиёндэс пӧзьтэ яке пыже гинэ - жарить эн каре, ичи сылалтэ. Ветлэ пыдын, бызьылэ. Котькуд нунал физкультураен 20 минут гинэ но выриды ке, вирсэръёсты юнмалозы. Стрессъёслы сётскыны кулэ ӧвӧл. Шуг-секытъёсты ӧд ворме ке, соос тӥледыз куасалозы. Та пумысен одӥг гинэ дэмлан: котырысь калыкен тупаса улэ но пальпотэ. Ӵукна ик пальпотыса султэ, собере быдэс нуналдэс та сайкыт мылкыдын ортчытэ, ӵемгес шутэтске, умоез сярысь гинэ малпаське. Озьыен, урод сямъёстэс воштон бордын тыршиды, табере врач доры мыноно. Тодады возе: гипертониез эмъяны уг луы, давлениез гинэ огдырлы кулэстыны луэ. Давленилэн ӝутӥськемез, температуралэн ӝутӥськемез кадь ик, возьматэ, мугор ёзъёс алама ужало шуыса. Соин ик туала эмъюмъёс, вирзӥбетэз кулэстэм сяна, сюлэмез, пекляез бурмыто. Эн пайме, врач дэмлаз ке мугорысь мултэс сылалзэ но вузэ поттӥсь эмъюмъёсты (мочегонной) - фуросемит, триампур, сюлэмез буйгатӥсь - обзидан, корданум, вирсэръёсты паськытатӥсь эмъюмъёсты - верапамил, энам, престариум. Г. СТРЕЛЬ, Ижевскысь Сюлэм висёнъёсты эмъянъя диспансерысь врач. Со сяна: Гипертонилэсь утиськонъя кӧня ке амалъёс "Будь здоров" журналын сётэмын. Малпаськом, соос тӥледлы тунсыкоесь потозы, оло, юрттозы но. - Вирзӥбет ӝутскыку, дэмлало чеснок но сугон сиыны. - Белокен узыр сиёнъёс атеросклерозэ вутто, соин валче давлениез ӝуто. Нуналскын адямилы белок 40-45 граммен тырме. - Гипертониен висьыку, йӧллэсь сиён-юонъёсты сиёно - кузятэм, кефир, аръян, чырс йӧл, нош йӧлэз сиемлэсь возиськоно. - Ӵемгес сиёно чорыг, со атеросклерозлэсь утиськыны юрттэ. - Кӧез, вӧез нуналскын 40-45 грамм гинэ сиёно. - Бакча, сад емышъёсты луэмезъя пӧзьтытэк сиёно. - Давлениез кулэстэ калий. Соин узыр курага, изюм, тыква, кабачок, арбуз, улмо, банан, кудымульы, чия, эмезь, кубиста, рис, пыжем картошка. - Писэйтурынэн (валериана), туген (хмель), муштурынэн (мелисса) чай юоно. Соос лулсэретэз (нерваосты) но буйгато, вирзӥбетэз но кулэсто. - Сьӧд палэзьлэн сокез вирсэр пасьёсты паськытатэ. Юоно 50 граммен нуналскын 3 пол сиськемлэсь ӝыны часлы азьло 10-30 нунал ӵоже. Сок юэм интые, емышъёссэ сиыны яра: 100 граммен нуналскын 3 пол сиськемлэсь ӝыны часлы азьло. - Давление бадӟым дыръя киосты шуныт вуэ (39 градус) кунулозь лэзёно, 15-20 минут возёно. Озьы вирсэр пасьёс паськытало. - Гипертонилэсь но мукет сюлэм висёнъёслэсь утиськыны юрттэ эшшо одӥг амал. Огзэ ведраез шуныт вуэн (39 градус), мукетсэ кезьыт вуэн тырмытоно. Нырысь кыксэ ик пыдъёсты шуныт вуэ тыроно 3 минутлы, собере кезьытаз 10 секундлы, собере выльысь шунытаз 3 минутлы. Озьы 2-3 пол вошъяно. Йылпумъяно кезьыт вуэн. Озьы вирсэръёс ӟечгес ужаны кутско, йыр вирсэръёсысь мултэс вир пыдъёсы ваське но, давление кулэсме. Шӧкыч Мон - кузё Умой ик вылэм кыӵе ке кооператив шуонлэн тӧроез луыны. Котьма ке но - кузё ук. Ватсаса уждун но лыктэ, мултэс коньдон но бергатыны луэ. Вераме потэ Якшур-Бодьяе нуись сюреслэн 24-тӥ иськемаз интыяськем "Связист" сад-бакча сярысь. Куке-соку соин кивалтӥз Рябой фамилиен адями. Али ачиз кошкиз ни та ужысь. Интыяз одӥгзэ пизэ кельтӥз. Куинь кузя пиосыз солэн. Куиньназы ик сыӵе дворецъёс ӝутӥзы, ява! Нош гаражъёссы кӧня! Кытысь коньдонзы шуиськоды-а? Ма, кооперативлэн казнаяз уно уксё вуэ ук. Сое рос- прос эскерись ӧвӧл. Тани бакчаямы арлы быдэ бадӟымесь машинаосын луо вортто. Со озьы ик бадӟымесь люкъёсын кылле. Векчи из пыры но вуттӥзы вал. Кылле. Нош бакчаысен ӟеч сюрес дорозь сюресэз тупатӥсь ӧвӧл. Со понна кооперативлэн кузёез вуоно гужем бакча берам машинаос пуктылон инты ӝутыны ӧдъя. Уг лэзьы, дыр. Кытчы кулэ отчы ӵагисько. С. КЕНСКАЯ. Шӧкыч Манет (1704-1998) Кема но секыт висемез бере улонысь дырызлэсь вазь кошкиз сись пу манетмы. Со кулӥз туж начармыса, нюръяськыны кужымез бырыса. Со сьӧраз нуыса кошкиз вань осконъёсмес. Кулон азяз манетмы туж но туж секыт курадӟонэз адӟиз. Оло табере солы капчигес луиз ни. Манетэн ӵош кошкиз бадӟым вакытмы. Со ужаз но улӥз быдэс Россиен ӵош. Со вал РСФСР, СССР, собере выльысь Россия. Манет ӵошатскиз зарниен, коньыен, облигациен, чекъёсын, нюръяськиз ваучеръёсын но. Зарни сяна, манет луылӥз азьвесьлэсь, потылӥз юбилейной но олимпийской луыса, вал со кагазлэсь но пулэсь, огвакытэ уно ватсаськылӥз нольёсыз. Соку но яратылӥм висись манетмес. Вожмы ке но потылӥз ляб кужымезлы,ялан солы оскыса улӥм. Кытӥяз кисы тыр ке но люкаськылӥзы манетъёсмы, сю грамм кабаклы сяна ӧз тырмылы сомы. Котьмаиз ик вал та улонамы. Табере, тонэн люкиськыса, ми шуиськом - ӟеч лу, гажано сюдӥсь-вордӥсьмы! Зарезь сьӧрысь вож чер куасалтӥз тонэ. Яратӥськом вал ми тонэ, эшмы. Чулкаосмы но банкаосын но возьылӥм кытӥяз тонэ. Куд-огез тонэ борддораз но лякылыны вуиз. Банк шуонъёсы но пачкаса трос гинэ кылид, эшмы. МММ но, Хопёр но кепыр ӧз вае тынэсьтыд. Мар бен, мӧзмыт луоз улонмы тонтэк. Зэм, азьло но шулдыр ӧй вал тонтэк. Но сокем эн куректы. Тон понна ми пунэмзэ берыктом Ижладабанклы но, Центральноезлы но, ОНЕКСИМ-банклы но, мукет сбербанкъёслы но. Оскиськом, сопал дуннеысь таза берытскод шуыса. Я бен, ӟеч лу гажано манетмы! Ӟеч кӧл сопал дуннеяд. Музъемед мамык кадь небыт мед луоз. Эшъёсыд. Нуны ваёд - ыштон адӟод Германиын пумен тросгес но тросгес кышномуртъёс нырысетӥ пиналзэс 40 арессы бере гинэ ваё. Гинекологъёс но акушеръёс ивортэмъя, 1997-тӥ арын ФРГ-ын 14569 нылкышно пиналзэ бер вайыны мылкыд кариз, со пӧлысь 567-ез - 45 ареслэсь но мӧйы. Экспертъёс валэктэмъя, та вакытэ кышномурт нырысетӥ интые пуктэ ужзэ но эркын улонзэ. Собере гинэ мынэ семья кылдытон. Таӵе югдурлэсь мугзэ Германиысь католикъёслэн семья кусыпъя огазеяськонзы тазьы валэктэ: кык пиналэз быдэ вуытозязы утён-вордон но дышетон понна, шоро-куспо улӥсь немец. Семья ӝыны миллион марка быдтэ. Со сяна, пиналзэ утялтон вакытэ 10 ар ӵоже, немец нылкышнолэн пенсиез 3 поллы кулэсме но карьераезлы пум вуэ. (Басьтэмын Интернет пыр.) Мугес шокалэ... Быдэс страна шуге-леке шедьыку, огез адями но капчи мылкыдын, умоезлы осконэн уг улы, шуг-секытъёслэсь утиськыны, соосты вормыны уг быгаты. Таин валче психика гинэ уг, огъя тазалык сӧриське. "Аргументы и факты" газет гожъямъя, финансовой кризис Россиын улӥсьёслэсь тазалыксэс лябӟытӥз. Вуоно толэзьёсы 500 сюрс адями инфарктэн, инсультэн больницаосы вуозы. Нерваос бырыса алялозы мукет висёнъёс - гипертония, стенокардия, гастритъёс но язваос, бронхиальной астма, диабет. Больничное потӥсьёслэн лыдзы али ик ини 2-3 поллы тросгес кык арня талэсь азьвыллэсь. Ма карано таӵе учыре? Улоно, астэ кияд возёно, сӥзьыл омырен шокано. Шӧкыч Нылпиослы пособиосмес милемлы кемалась уг сёто ни. Табере коньдон интые ӵекто пыргытэм из, цемент, асфальт, комбикорм... (Гожтэтысь) Анай: - Ма, та цементэныды пиналлэсь кӧтсэ тырыны быгато шат? Суредэз Л. ПРОЗОРОВЛЭН. Улослы быдэ - кузё Котькуд страна понна экономика но политика удысын шуг-секытъёслэн кышкыт бервылзы - кунгожъёсты воштон. Россиысь улосъёслэн кивалтӥсьёссылэн сепаратизм мылкыдзы шӧдӥськыны кутскиз ни. Таӵе сюлмаськытӥсь югдурлы пум ӧд пукты ке, Россия куашкалоз, гожтэ "Аргументы и факты" газет. Берло толэзь куспын Федерациысь кивалтон ёзъёс интыосты чаклан кужымзэс быдэсак сямен ыштӥзы. Москваысь дотациос басьтӥсь улосъёсын но (сыӵеос 89 пӧлысь 80-эз) герӟет чигиськиз. Малпан кылдэ, матысь ӝыны ар ӵоже но центр губерниосысь бюджетъёслы юрттыны уз быгаты. Федерация борды кырмиськыса улыны пайдаез ӧвӧл ог дасо пала кужмо улосъёслы, соос пӧлын Красноярск край, Татарстан, Москва. Татчыозь соослэсь коньдонзэс центр тужгес кулэяськись интыосы висъялляз. Паймонэз ӧвӧл, узыр улосъёслы со ӧз кельшылы. Соослэн пумитъяськемзыя ик берло аръёсы дотациослэн быдӟалазы шӧдскымон кулэстэмын вал.Туннэ губернаторъёс центрен эшшо лэчытгес вераськыны быгатозы, угось соосын меӵак герӟаськемын, кыӵе луоз выль правительство. Юнме шорысь шат Красноярскысь губернатор Александр Лебедь Виктор Черномырдинэн политической консультациос дыръя улосэныз герӟаськем ужпумъёсты но быдэсъяз. Солэсь азьвылгес Александр Лебедь вераз: центр интыослэн экономикаенызы пайдаё кивалтыны уг быгаты ни ке, пе, со кивалтонэз аслыз регионлы сётоно. Со сяна пусйиз на: Красноярсклэн, пе, шуг- секытысь потыны аслаз кужымез но тырмоз. Центрлэсь палэнскем сяна, регионъёс ог-огзылэсь но люкисько. Кыдёке учкись кивалтӥсьёс вазенгес ини нимазъяськыны кутскизы, кылсярысь, Россиысь коньдон рыноклэсь висъяськыны тыршизы. Тани Санкт-Петербургысь губернатор Игорь Артемьев верамъя, городысь кивалтон ёзъёс интыысь банкъёслы ӵектӥзы коньдонзэс Санкт- Петербург КО-лы висъяны. Ваньмыз сямен банкъёс ӵапак тазьы ик лэсьтӥзы, шуэ Артемьев. Озьы городысь банковской система та дырозь шуге-леке ӧз шедьы на. Берло дыре кылдэм югдур та ужез уката ӝогомытӥз: Петербургын, Приморьеын, Уралын банкъёслэн огазеяськонъёссы кылдытэмын ни. Соос азьын ужпум пуктэмын - интыысь банкъёс куспын тыронъёсты радъяно. Нош Центробанклы, соослы юрттэм сяна, номыр но уг кыльы ни. Свердловск улослэн кивалтӥсез Эдуард Россель матысь дыре кунсьӧрен вузкаронэз кияз кутыны чакла. Солэсь но кыдёке кошкизы ни Якутия но Кемерово. Россилэсь законъёссэ тӥяса, Михаил Николаев но Аман Тулеев улосъёсазы зарни но валюта люканы ӧдъязы. Соослэсь мукет губернаторъёс адӟем карыны быгатозы, угось котькуд кивалтӥсь мылкыд каре аслэсьтыз пичияк центробанксэ возьыны. Таӵе югдур Россилэсь законодательствозэ, уката ик бюджет кусыпъёсын герӟаськем люкетсэ, воштонэ вуттоз. Улосъёс кун бюджетэ выт тыремысь дугдозы, федеральной предприятиослэсь акциосын пакетъёссэс киязы басьтозы, асьсэлэсь коньдон системазэс кылдытозы. Нош ваньмыз та кытчы вуттоз, вераны шуг ӧвӧл: Россилэсь кун радлыксэ конфедерациен но ниманы уз луы ни. (Басьтэмын Интернет пыр.) Шӧкыч Чидан чигымтэ Эх, шу, маке уг удалты асьмелы эксэйёсын! Соин но, дыр, Россей музъем вылын шудо аръёс ӧй на вал кадь. Я сютэм улон куасалтэ асьмеды, я ожъёс-войнаос ӵушкало кунмес. Малпалэ ай, Ленинысен кутскыса ЕБН кивалтон вакытозь маке умойзэ адӟимы ни шат? Ӧм на. Но мӧйыос весь ӟечен тодазы ваё на гажано Леонид Ильич Брежнев кивалтон вакытъёсты. Зэм, со аръёсы уждунэз котьку ик дыраз сётылӥзы. Магазинъёсын вал нянь но, колбаса но, йӧл-вӧй но. Уждун гинэ ичигес вал шат. Ярам, соку сое котькуд дыраз сётылӥзы. Нош табере секытэсь дыръёс вуизы кадь. Кызьы шуо калыкын - "сьӧд" нуналъёс вуизы. Юромо магазинъёстӥ ортче ай, вань ӝажыос бушесь кылемын, тужгес но сиён-юонъёс ласянь. Кисыосысьтызы берло копейкаоссэс зуркатыса, калык басьтэ кеньыр, макарон, пызь, сахар песок, сылал... Уг учко дунъёс шоры, уг чаклало кытын но ку поттэмзэ. А ведь сыӵе югдуре вуттӥз долларен шудон. Ӧй тӧд, адӟемез вань-а куд-огезлэн со валюта шуонзэс? Но со куанеръёсты зол гинэ пачкатӥз ини. Огкылын вераса, манетмы бинялтонлы сяна уг яра ни. Тани, шуом, гужем одӥг мешоксэ сахар песокез 150 манетэн басьтыны луэ ке вал, табере со сылэ ини 500-600 манет! Кизер вӧй понна азьло ог 10 манет куро вал, али дуныз 20-25 манетозь ӝутскиз. Индиысь ваем 50 граммъем чай сылэ ни 8 манет, килоез макарон 7 манет, пряник 9-11 манет. Нош тамаклы дунъёс кӧнялы ӝутскемын! Москваысь вылӥ кивалтӥсьёсмы власть понна нюръяськонъязы калык сярысь чылкак вунэтӥзы ни, лэся. Верамын вал ук: дунъёс будозы кунгож сьӧрын поттэм но отысь ваем вузъёс понна гинэ. Но кескич вузкарисьёс сое асьсэ сямен валазы. Вузэд коть Удмуртиын, коть Башкириын поттэмын мед луоз - дуныз унолы ӝутскемын. Нош налогъёсъя инспекция оло умме усемын, оло ватскемын. Кема-а возиськозы таӵе дунъёс - шуг вераны. Манетмы нош ялан куашка но куашка ук. Экономика удысысь тодосчиослэн чакламзыя, куд-ог вузъёслы дунъёс матысь дыре тазьы ӝутскозы: 20 сентябре 30 сентябре нянь 5.04 6.30 йӧл 4.83 5.75 сӥль 27.20 32.60 картофка 3.07 3.83 сылал 2.08 2.62 водка 28.08 33.41 мисьтаськон порошок 16.14 19.04 курег пуз 6.78 8.40 тамак 6.96 8.49 транспортэн ветлон 1.98 2.35 телефон 41.35 50.03 майтал 6.78 8.47 Кызьы валамы ни, мукет странаос асьмеды уз но сюдэ, уз но вордэ. Оло, мукет кунъёсысь вуз ваемысь дугдӥмы ке, заводъёсмы улӟозы? Оло, соку гуртоосмы чырмытгес ужаны кутскозы. Котьма ке но, магазинысь ваньзэ басьтыны уд быгаты. Чидано луоз-а, мар-а ни? Но азьланезлы осконмы мед луоз на. Осконэн ик улон капчигес. Чидан чигымтэ, шуо калыкын. Н. ЛЯЛИН. ШӦКЫЧ Шарканэз люкиллям кыклы Зэмзэ но, чебересь ик та Шаркан палъёсыд! Гурезё-бамало интыос тодазы вайыто - кыдёкын ик ӧвӧл ни Урал палъёсыд. Шулдырез понна ик, луоз, Шарканэз ӵошато на Щвейцариен но. Собере та палъёс данэ потэмын на удалтэм коньыгубиосын. Нош туэ ю- няньзы но удалтӥз. Узыр на та музъем "сьӧд зарниеныз" но. Но зэмзэ ик-а узыр улэ меда та палан калык? Бен, ёрос республикалэн бюджетысьтыз висъям коньдонэнгес улэ. Солы 60 процент дотация сётӥське. Кылемзэ район аслаз кужыменыз поттыны тырше. Но уноез коньдон палэнэ тӧлӟе, бадӟым люкетэз Воткинске но мукет интыосы кӧче. Уноез колхозъёс-совхозъёс кураськись чотэ кылемын ни. Тани басьтом "Удмуртнефть" огазеяськонэз. Качалкаосыз уен-нуналэн сюпсё шарканъёслэсь нефтьсэс. Нош ёрослэн казнаяз коньдон копейкаосын гинэ вуэ. Тани Воткинскысь НГДУ Быги дорысь нуналлы быдэ 120 тонна му вӧй ворттэ. Со понна районлэн бюджетаз одӥг копейка но налог уг вуы. Таӵегес ик югдур мукет предприятиос но организациос ласянь. Сбербанксы - Воткинскысь банклэн филиалэз, йӧл кошке "Воткинскмолоко" огазеяськонэ (коньдон но шу ни), газ сётон станция но Воткинсклэн, винаен вузкарон магазин Сарапулысь ликёро-водочной заводлэн ваньбурен лыдъяське. Зэм-а, ӧвӧл-а, но Шарканысь базаръёс, пе, Воткинскысь узыръёсын киултэмын. Озьы бере, коньдонзэ но соос ик капырто, луоз. Но одӥгзэ ӧм валалэ: малы ёросысь центрын кык базар? Одӥгез бен вуж, шальтрамын ини. Калыклэн верамезъя, отын тыршо выт тыронлэсь пегасьёс, выляз ужало, пе, законэз санэ басьтӥсьёс. Озьы ик кыклы люкиськыса ужало вузкарисьёсыд. Тӥни сыӵегес уло шарканъёсыд. Казна но кыклы люкемын, базаръёс но. Н. ЛЯЛИН. Кин гожтоз гурзэ? ГИЛЬМАН КАСИМОВ Шуд Та музъем улон, Туж мудрон улон, Ӝыныез улон - сюлмаськон. Изкаын коть ул, Сюйкаын коть ул, Шуд вае ӟырдыт яратон. Шуд, шуд, шуд, Кутӥд ке, возьыны шуг, Ӟечлыкен гинэ, Чиданэн гинэ Ой, ческыт луэ Шедьтэм шуд. Шудбур юн дуно, Шудбур кык пумо: Огпумыз солэн - сюлэмад. Мукетыз солэн, Пал пумыз солэн, Пӧсь палыз солэн - гажанад. Тазалык но шуд, Узырлык но шуд, Кибашлык но шуд - валамон. Пыраклы но шуд, Улытозяд шуд - Кузпалъёс вискын яратон. Шуд, шуд, шуд, Кутӥд ке, возьыны шуг, Ӟечлыкен гинэ, Чиданэн гинэ Ой, ческыт луэ Шедьтэм шуд. Югдурез тупатыны бер ӧвӧл... 8 сентябре Удмуртиысь Правительство кутӥз "Басьяськисьёсты дунъёслэн юнме шорысь будэмзылэсь утён сярысь" постановление. Магазинъёсты вузъёсын тырмытон, дунъёсты юнме шорысь будэтэмлэсь утён понна но вузъёсты мултэсэн басьтонлы пумит ужрадъёс чакламын. Кылсярысь, Удмуртиын вузкарон удысын кунсьӧр валютаез кутыны ӧвӧл лэземын. Няньлы, йӧллы но сӥльлы дунъёс трослы медаз йылэ шуыса, ужрадъёс кутэмын луозы. Вузкарон надбавкаос 1998 арын 20 августэ мында кылёзы нянен, йӧлэн но йӧллэсь сиён-юонъёсын (мороженоен сяна), сӥлен но сӥльлэсь сиёнъёлэсь (тужгес дуноосыз сяна), нылпи сиёнэн, эмъюмен вузкарыку. Магазинъёсын нянез, пызез, лапшаез, кеньырез, сакыр-песокез 2 килограммлэсь тросгес басьтыны уз луы, сырез но кӧс вӧез - 1 килограммлэсь уногес. Сиён-юонэз Удмуртилэсь палэнэ поттыны лэземын ӧвӧл, Вузкаронъя но улонын юрттэт сётонъя министерство лэзьытэк. Дунъёс юромо будэтэмын луизы ке, городъёсысь но ёросъёсысь администрациослы дэмламын вузкарисьёслэсь вузкарыны правозэс басьтыны. "Примаковлы оскисько",- шуэ Андрей Солуянов Россиысь Кун Дума дэмламъя, страналы премьер-министре юнматэмын Евгений Примаков. Ма малпа та пумысен Удмуртилэсь Кун Думае быръем депутатмы Андрей Владимирович Солуянов? - Мон умоен лыдъясько Президентлэсь Кун Думаен соглаш луэмзэ. Евгений Примаков - тодмо государственной деятель. Югдурез котыр ласянь ӟеч тодэмез солы юрттоз коньдон ужпумъёсты ӝоггес радъяны, манетлэсь данзэ выльысь ӝутыны. Примаковез сяна, премьер-министр интые та вакытэ мукет муртэ уг адӟиськы. Соин ик куараме сётӥ Евгений Примаков понна. Е. ПОСАДОВА. Орденъёсме бырттылӥз Будённый 13 сентябре Иж карын улӥсь Любовь Степановна Репиналы тырме 80 арес. Мыным та арлыдо кышномуртэн пумиськыны кылдӥз эмъяськон юртысен. Кинэ гинэ уд адӟы но пумита татын, кудзэ соосты дыр ортчемъя вунэтӥськод, нош кудӥз сюлэме кема дырлы интыяське. Любовь Степановна син шоры йӧтэ ӝикыт дӥсяськеменыз, сайкыт визьмыныз, капчи мылкыдо луэменыз но пинал мурт кадь мыло-кыдо серекъяменыз. Туж тодэме потӥз солэн улон сюресэз, ужамез, улэм-вылэмез сярысь. Со вордӥськиз Дэбес районысь Ариково гуртын, куать нылпиё крестьян семьяын. "Тодмо ини, та вакытэ дышетскыны но ӧз кылды,"- ӝожтӥське мӧйы кышномурт. Пичи дыръяз ик йыраз малпан кылдӥз: одно ик городэ ужаны интыяськоно. 1937-тӥ арын одӥг толэзьлы кирпич заводэ интыяськиз. Дырыз ортчем бере, берлань берытскыны мылыз ӧз поты, выльысь уж утчано кариськиз. Озьы ветлон сяменыз пумитаз одӥг кышномуртэ. Соиз дышетӥсь вылэм, гурт котырын ужась кулэ, пе. Пумит ӧз луы, нош йырысьтыз ӧз кошкылы заводын ужан сярысь малпанэз, вожъяськыса учкылӥз отын тыршисьёс шоры. 1938-тӥ арын Любовь Степановналэн малпанэз быдэсмиз - со заводэ интыяськиз. Куддыр куинь сменаен ужано луылӥз, нош бертыса кузё кышнолэсь вань ужзэ лэсьтоно на. - Одӥг пол, плитаез эстыса, йырме шутэтыны миндэр борды понӥ но умме усиськем. Со вискын плита пеньӟектэм. Тае адӟыса, кузё кышноелэн картэз пельдорам чабкылӥз. Туж кышкай пиосмурт киослэсь, вераны луонтэм кӧты ӝож луиз. Озьы ке но, кытчы мынод, кинлы кӧтӝождэ вералод, чидатэк ӧйлась. Кытын ке улыны кулэ вал. Машиностроительной заводлэн 38-тӥ цехаз 31 ар ужаз Любовь Степановна. Война бере мотоциклетной производство усьтӥзы, отын со сварщик луиз. Татын ужакуз ик нылкышнолы Социалистической Ужысь Герой ним, Зарни Кизили но Ленин орденъёс сётӥзы, вал обкомлэн, горкомлэн членэз. - Та дано нимъёслы мон шумпотылӥ но, акыльтылӥ но,- вера кышномурт,- котькытчы но ӧтчало вал угось. Серекъяса но синвуаськыса вера наградаоссэ басьтыны Москвае ветлэмез сярысь. - Мыныкумы ӧм но тодэ, милемыз собыдӟа кузьым возьма шуыса. Вылаз ик, мыным, нокытчы потамтэ адямилы, быдэс зал азьын вераськыны кыл сётӥзы. Я, веранме, поездын мыныкум, кылбурез сямен дышетӥ вал. Орденъёсме гадям Будённый бырттылӥз, нош ачиз, ми кадь огшоры адямиослы шумпотыса, лэся, ялан синвуоссэ ӵушылэ. Сысоевен ӵош ветлыны кылдӥз Профсоюзъёслэн дас ньылетӥ съездазы, Воркутае, пинал дыръяз со татын шахтаын ужам вылэм. Милемыз но шахтае васькытъяз. Нош кыӵе кышкыт вылэм! Кызьы татын адямиос ужало шуыса малпаськом, оло, музъем вылэ но ум потэ ни кожаськом вал. Ветлыны кылдӥз Польшае, Германие, странаысьтымы пӧртэм интыосы. Тӥни сыӵе со огшоры гинэ удмурт нылкышно: мае но адӟемын, кылэмын, чидамын ӧвӧл удмурт калыклэн данъяськымон но адӟем карымон нылыз. Тодӥз-а со, ма быдӟа шуд возьма вылэм сое трос курадӟемъёсыз бере. Шутэтскыны потыса но тэк улонэз уг вала. Вазь ӵукнаысен бер ӝытозь пуксетэз ӧвӧл. Нылызлэсь кык пизэ пыд йылазы султытыны юрттӥз ни - улэ нылызлэн семьяеныз ӵош. Ужлы уг ёрмы. Данъяське удалтэм, сабырлы семьяын улэменыз. - Варманаймытэк улонмы ик мӧзмыт луысал,- вера эмеспиез Григорий Ильич Иванов.- Кыӵе гинэ пӧрамъёсын милемыз со уг сюды! Куноосмы но вожъясько ӟеч анаймылы. - Утялтэм пиосы мон понна весь пичиесь на кадь пото,- вера Любовь Степановна.- Нош соос кемалась бадӟымесь ни, огез ужа, мукетыз дышетске мединститутын. Песянай но анай понна со-а бадӟым шуд ӧвӧл?! В. ВАСИЛЬЕВА. Пичи Пурга ёрос. Дырты, эше, почтае, гожтӥськон мынэ туннэ! "Удмурт дунне" газетлы 1999 ар понна 1 январёзь гожтӥськемъёс пӧлысь одӥгзэ шудозэ возьма кузьым. "Ижмаш-Мото" завод дэмла Удмуртилэсь данъяськонзэ - кужмо, чебер, ӝог ворттӥсь корт вал - мотоцикл! Лотерея пыр шудытэмын луозы озьы ик мукет дуно кузьымъёс. Шудды ас кияды - эн кыле гожтӥськытэк. Мукетыз ивортон. Удмурт Республикаысь Почта пыр кусып возёнъя Федерация управление 14 сентябрьысен 20 сентябрёзь ялэ "Гожтӥськисьлэсь арнязэ". Та арня вискын гожтӥськемъёс понна вань газет-журналъёслы почталэн нуон-ваён дуныз 20 процент пала кулэсмоз. Нош таиз ивортонмы Игра районын улӥсьёс понна. Кин гожтӥськоз 14 сентябрьысен 20 сентябрёзь "Удмурт дуннелы", "Кенешлы" но "Кизилилы" (одно ик куинезлы), соос пӧлын ортчытэмын луоз на нимаз лотереяен шудон. Лыдэ басьтэмын луозы июльысен 20 сентябрёзь гожтӥськемъёс но. Газетысьтымы реклама отдел ӵектэ таӵе кузьымъёс: электропила, электроутюг но утюгаськон пул. ТУННЭ НУНАЛ Доллар тордӥз: манет берпуметӥ кынарзэ ыштӥз Гужем шорын усем лымы но сокем ӧй, дыр, куалектытысал калыкез. Шӧдтэк шорысь лӧптэм дунъёс троссэ жуммытӥзы, йырсазьзэс суразы. Зэмен но, кызьы уд поромы? Огъёсыз кык-куинь нунал куспын эшшо но узырмизы, начаръёсыз одӥг мешок пызь но басьтыны ӧз быгатэ - номырин. Республикалэн кивалтӥсьёсыз та вакытэ вылысьтыз вылаз кенешонъёс тортчыто, югдурез небӟытон понна, пӧртэм ужрадъёс чаклало. Ваньмыз со умой. Но амалтэк юам потэ: малы та вераськонъёс арня-кык талэсь азьвылгес ӧз ӝутске? Малы нош ик беромим? Югдурлэн кудпала шонскемез ведь тодмо вал ини августлэн кутсконаз, долларлэн курссэ воштэмез дырысен. Рынок соку ик ӝабырскиз усьтӥськем ӧс кал борды: ӝегатскытэк ӝутскизы дунъёс вань сиён-юонлы, дӥськутлы, медикаментъёслы. Вакчи дыр куспын магазинъёсысь, бакчаысь, аптекаосысь товар кӧчиз нимаз адямиос кие. Тӥни малы сокем ӝог бушазы ӝажыос. Валамон, огшор адямилы ӵуказе улонэз адӟыны секыт, туннэ нуналзэ но со кызьы валаны уг тоды - маин сюдоно семьязэ, маин дӥсяно-кутчано пиналъёссэ. Нош кивалтӥсьёсмы котырысь югдурез кылытэк-тодытэк ӧз улэ ук. Оло, малпазы, Удмуртия шормуӵе ватскыса кылёз шуыса? Толлозэ уд берыкты ни, ӟучъёс верамъя, поезд кошкиз. Кенешъёс кенешонэн, нош рынок сьӧд ужзэ лэсьтыса вуттӥз: дунъёсты табере уд кулэсты ни, валютаез 20 манетысь 6 манетэ уд уськыты. Мар лэсьтыны луоно на, республикаямы улӥсьёсты ӧжытак коть утён вылысь? Арнялэн кутсконаз кутэмын вал решение асьме дорын поттэм продукциез палэнэ келянэз дугдытыны. Та курон быдэсъяське: кык нунал куспын гинэ берыктэмын сӥльын, скал вӧйын тырмытэм 18 машина. Правительство, Кун Кенеш чакласа возё техникалы эстӥськон вуэмез, нянен, пызен вузкаронэз. Магазинъёсын огыр-бугыр вырон та нуналъёсы пумен чалме. Юрттозы Ижевскысь мэрилэн но дыраз кутэм ужрадъёсыз, котьку басьяськисьлы норма тупатэмез. Сиён-юон дунояз. Кугнож сьӧрысь ваем продукция - 2 поллы, асьме дорын поттэмез - скал вӧй - 2 поллы, кеньыръёс - 2-3 поллы, сӥль, сыр - 15-20 процентлы. Будос вӧйлэн дуныз ӝутскиз кык но ӝыны поллы. Няньлэсь дунзэ республикалэн кивалтӥсьёсыз утьыны выро на. Республиканской кенешон ветлэмъёс азьын Правительстволэн Тӧроезлэн нырысетӥ воштӥсез Ю. С. Питкевич вераз: Удмуртилэн сиён-юонэз 1-2 толэзьлы тырмымон дасямын. Больницаослы висъямын 150 тонна вӧй, 100 тонна сӥль. Нимаз саклык - нылпи учреждениослы но школаослы. Ум кыле ӟег няньтэк но. Мималаез урожай тырмыт кисьтэмын. - Милемыз али тужгес но шугъяськытэ суретъёсын пӧраса поттэм водка, тужгес но трос со вуэмын районъёсы, - шуиз Юрий Степанович. - Вань быгатонзэ лэсьтоно, адямиосты отравалэсь утён вылысь. Вина вуттэмын республикалэн палэнысьтыз, таӵе эли-кеби вакытэз адӟыса. Валамон сое вузам коньдон одӥг манетэз но бюджетэ уз вуы. Секыт югдур кылдэмын аптекаосын. 80-90 процентэз эмъяюмъёс ваемын кунгож сьӧрысь, соос дуноязы. Ӝегатскытэк басьтоно асьме дорын поттэмъёссэ, тросэн вузамысь дугдытоно. Сиён-юон пӧлысь нырысьёсыз радын ӝотрак дунояз будос вӧй. Таизлэсь мугзэ вузкаронъя министрмы П. П. Пономарёв валэктӥз Россиын шундыберган будэтонъя удыслэн монополистъёс киулэ шедеменыз. Кизён, будэтон, вӧй шуккон - быдэсак соослы сётэмын. Удмуртиын кӧс вӧй поттэ Кезысь элеватор гинэ. Луонлыксы вань Ижевскысь 2 номеро хлебопредприятилэн но уваослэн. Озьыен, республикамы та продукциез калыкмес сюдымон дасяны быгатоз. Нянь сярысь. Кивалтӥсьёс оскытэмъя, ӟег пызьлэсь пыжымез сукыри дуноялоз 2,20-2,25 манетозь, тӧдьыез 2,70 манетозь шуыса. Сылал басьтонъя вераськемын Оренбурген но Соликамскен. Кеньыр ласянь но мултэс пӧсекъяны мугез ӧвӧл. Данакез культураос, рис, кукуруза, просо сянаез, асьме дорын будо, татын ик соосты изо. Предприятиос та вакытэ кык сменаен ужало. Гурт калык та огыр-бугыр вакытэ ӵапак уж пӧлы ваемын: азинске ю тысь кутсан, картофка октон. Соин но, дыр, бугыръяськон мылкыд ӧзгес шӧдӥськы. Мукет ласянь - уждун басьятэк, маин магазинэ мынод? Городын улӥсез сярысь веранэз ӧвӧл. Дунъёсты шӧдтэк шорысь ӝутон данаксэ семьяосты туж вӧсь кариз. Шонер пусйиз "Буммашлэн" генеральной директорез В. В. Жебровский: - Та кенешен асьмеос беромим. Дунъёсты, уката но импортлы, улӥе уд васькыты ни. Калык йыркуръяське. Кызьы-о сотэк? Адямиос толэзьёсын коньдон уг адӟыло ни. Рабочийёсмес ми буйгатӥм на дунтэмгес пызь но сахар вузаса. Мынам дэмланэ таӵе: Россиын Правительство ӧвӧл бере, Урал котырысь регионъёсын коть ог кылэ вуоно. Банкъёсты ужатоно. Сотэк палэнысь вузъёс вайыны уз луы, нош асьме дорын гинэ поттэменыз кема уд улы. Пыкылон кылъёс верамын вал бензинэз дуноятэм пумысен но "Удмуртнефтепродукт" огазеяськонлэн кивалтӥсез Н. С. Сычев меӵак шуиз: - Асме мон янгышен уг лыдъяськы. Толон юри ветлӥ Перме. Отын 76 номеро бензин сылэ 2,80, асьмелэн - 2 манетэн. Удмуртия та ласянь бускельёсмылэсь бере кылиз ни, соин ик палэнысь вуэмъёс продукцимес басьтыса кошко. Куинь нунал куспын гинэ 1,5 арнялы чаклам норма вузаса быдтэмын. Зэм но ог-огзэ янгыше уськытыса, югдурез уд вошты. Шонер вераз Кун Кенешлэн депутатэз Е. Г. Одиянков: - Ужано одӥг командаен. Вань луонозэ лэсьтоно на, калыклы юрттон вылысь. Площаде потыса, ог-огдэ пыкылыса, ыштэм дырез табере уд берыкты. Тулкымлы пумит возиськоны секыт. Быдэс Россиын порядок ӧвӧл бере, нимаз республикаын сое радъялод-а? Озьы ке но, кулэ ужрадъёс кутысько. Оскон вань: дунъёслы сьӧраз ортчыны маза уз сётэ. Л. МЕДВЕДЕВА. Шӧкыч "Горд шундыын" ӝужалоз-а шунды? Горд шунды гурт сярысь кылэмды ӧвӧл, дыр? Со интыяськемын Пичи Пурга ёросысь Уром гурт вӧзын. Гуртэз бадӟым ӧвӧл, ог куамын корка гинэ. Куке-соку со вал Ижысь радиозаводлэн подсобной шуон "Радист" хозяйствоез. Табере со куштӥськиз со гуртлэсь. Быриз фермазы но. Кузё ӧвӧлэз шӧдыса, горд шундыос гидзэс кирпичен-кирпичен доразы лушкаса быдто ни. В. КАМАШЕВЛЭН туспуктэмез. Тазалыклэн "тушмонэз" Астэ ачид янгышен лыдъян адямилэсь тазалыксэ лябӟытэ, валэктэ "Рейтер" агентство. Великобританиысь Халл городысь университетын ужась психологъёс сыӵе малпанэ вуизы. Экспериментэ пыриськем муртъёс асьсэлэсь мылкыдзэс пусйылӥзы, нош тодосчиос соослэсь улон-вылонзэс, сямъёссэс но тазалыксэс эскеризы. Тодмо луиз, аракы юэмен, мултэс сиськемен но мукет мугъёсын сэрен астэ ачид янгышен лыдъян сюлэм но йыр висён вае. Таин герӟаськемын ӧвӧл улонэз воштон но урод сямъёслэсь куштӥськон мылкыд. (Басьтэмын Интернет пыр.) Валэктэ юрист Сэрегез нуэ адвокат Лилия Шкляева Кинлы кылёз улон инты? Ми картэным улӥм регистрацитэк. Кык ар талэсь азьвыл со ужан интыяз (предприятиын) квартира басьтӥз. Документъёс сётӥз, улоннизэ приватизация пыр аслыз басьтон понна. Собере навигацие кошкиз но ӧз берытскы ни. Ордерын мынам но вить аресъем нылылэн нимтулъёсмы ӧвӧл. Кинлы кылёз квартира? А. ЧУДИНОВА. Та выллем ужпумъёсын герӟаськемын "Россия Федерацилэн улон интыен фондаз приватизация ортчытон сярысь" Закон. Отысь 11-тӥ ёзэт (статья) валэктэ: котькуд гражданинлэн правоез вань асваньбур (собственность) чотын дунтэк, приватизация чотын одӥг пол басьтыны кунлэн но муниципалитетлэн юртысьтыз улон инты. Приватизацие уг сюры куашкан калэ вуэм юртъёсысь, общежитиосысь, коммунальной квартираосысь, ворсам военной городъёсысь улон инты, озьы ик служебной лыдъяськись улон инты. Сыӵе алон ӧвӧл совхозъёсысь но гурт хозяйствоя музон предприятиосысь улон интыын. А. Чудиновалэн гожтэтэз пумысен верано ке, улон юрт шедьыны кулэ кельтосэ (наследствое). Суд мед лыдъялоз: солэн картэз улон юрт басьтӥз асваньбур чотын. Суд ик решение мед кутоз улон интылэн кузёез - ныллэн атаез. Россия Федерациысь Вылӥ судлэн пленумез 1993-тӥ арын 24-тӥ августэ кутӥз приватизациен герӟаськем постановление. Приватизация сярысь курон (заявление) но музон документъёс сётэмез бере адями кулӥз ке, улон юртэз асваньбуре басьтэмез сярысь договор лэсьтыны вуытэк, яке та договорез интыысь администрация юнматэмлэсь азьвыл, югдурез валано тазьы: наследниклэсь куронзэ быдэстытэк кельтыны муг ӧвӧл. Вазиськон Россия Федерациысь Федерацияя Кенешлэн тӧроезлы Е. С. Строевлы, Россия Федерациысь Кун Думалэн тӧроезлы Г. Н. Селезнёвлы, Федерацияя Кенешысь, Кун Думаысь комитетъёслэн тӧрооссылы, Кун Думаысь фракциослэн кивалтӥсьёссылы Россилэн экономикаез коньдон удысъя но политикая секыт югдуре шедиз. Со кема кыстӥськоз. Югдурлэсь таӵе калэ вуэмзэ 1997 арын ноябре ик тодыны луэ вал ини. Собере со эшшо но уродмиз, нош 1998 арын августэ кун банкрот луиз но коньдон ваньбурлэсь кытын но кызьы кутӥськемзэ эскерыны кутскиз. Секыт югдур экономикалэсь вань удысъёссэ куашкатӥз, нырысь ик промышленностез, банкъёсты, вузкаронэз. Обществолэн инъетъёсыз куашказы, калык властьлэн вань ёзъёсызлы оскемысь дугдӥз. Странаен нокин уг кивалты, кун экономикаысь процессъёсы пыриськемысь дугдӥз, таин валче манет чылкак куашказ. Дунъёс кунгож сьӧрысь вузъёслы гинэ ӧз, Россиын поттэмъёсызлы но, нырысь ик кулэ луись сиён-юонъёслы но трослы йылӥзы. Озьы калык кураськон калэ вуиз. Солэн чиданэз чигиз ке, югдур эшшо но шимес луоз шуыса кышкытлык кылдэ. Кылдэм югдурлэн огез мугез герӟаськемын Россиын вуз поттӥсьёслы юрттонъя программа ӧвӧлэн. Нош Россия Федерациысь калык хозяйствоез ӝутонъя программаос бадӟым пайда ӧз вае. Соос ваньмыз сямен бумага вылын кылизы, соослэсь быдэсъяськемзэс Правительство но, Федерацияя Кенеш но, Кун Дума но кулэезъя ӧз эскере. Берло аръёсы страналэн коньдон удысэз но экономикаез сярысь калыклы юромо кырыжатыса ивортылӥзы. Россиысь зэмос югдурез кема дыр ӵоже юромо берыктыса валэктон - экономикалэн но коньдон удыслэн куашкамзылэн эшшо одӥгез валтӥсь мугез. Страна секыт югдуре шедемен валче Ӵектӥсько: - Вакчи дыр куспын, Правительство кылдытэмез витьытэк, Кун Думалэн но Федерацияя Кенешлэн заседаниосазы кутоно "Странаез секыт югдурысь поттонъя но экономикаез юнматонъя национальной программаез". Та программалэн быдэсъяськемез понна кыл мед кутозы Россия Федерациысь кун властьлэн но интыысь ас кивалтонлэн ёзъёссы. - Россия Федерациысь Правительство солэн быдэсъяськемез сярысь шонер но ялан ивортылыны кулэ Федерацияя Кенешлы, Кун Думалы но калыклы. - "Странаез секыт югдурысь поттонъя но экономикаез юнматонъя национальной программаез" кутон сярысь ёзэтэз пыртоно Властьлэн вань ёзъёсыз куспын огкылэ. Федерацияя Кенешлэн муртэз, Удмурт Республикаысь Кун Кенешлэн Тӧроез А. Волков. ЖУРНАЛИСТЪЁСЫН ПУМИСЬКОНЪЁС Калык кисыос качамын Коньдонэн герӟаськем ужпумъёсты валэктон вылысь, журналистъёсын пумиськылӥз Кун Кенешысь Экономикаын политикая но бюджетъя ялан ужась комиссилэн кивалтӥсез Софья Эльфатовна ШИРОБОКОВА. Россиын туэ сӥзьыл югдур уката но лэчытомоз шуыса вераськыны кутскизы ни вал арлэн кутсконаз ик. Сӥзьыл вуэмен, со вераськонъёс, зэмзэ ик, зэмазы. - Софья Эльфатовна, малы сыӵе секыт вакыт одно ик августлэн пумаз кутскиз? - Быдэс дуннеын коньдонэз люкыло, дунтэм кредитъёс сётъяса. Озьы со пумен государстволы берлань берытске. Россиысь правительство но Центробанк мукет сюрестӥ мынӥзы: эсэпсэ валатэк, дуно бумагаос печатлаллязы но соосты банкъёс куспын люкылӥзы. Нырысь-вылысь со амалэн югдурез возьыны луиз ик. Но 1998 арысен дуно бумагаос дунтэманы кутскизы. Вылаз ик, Юго-Восточной Азиын долларлэн данэз куашканы ӧдъяз. Тӥни соку ик тросэзлы валамон луиз: Европа асьмелы коньдонэн уз ни юртты. Косэмын вал ог-огедлы пунэм тыронъёсты взаимозачёт амалэн берыктонэз дугдытыны. Ваньмызлы кулэ луиз "луло коньдон", нош со ӧвӧл. Озьы кылдӥз гиперинфляция шуон, вакчи дыр куспын дунъёс будӥзы туннэ нуналлы соос, шорлыдын вераса, 36 процентлы йылӥзы ни. - Мар кароно сыӵе югдурысь потон понна? - Дунъёслэсь будэмзэс туж зол эскерыса возёно. Уката ик юн чаклано монополистъёслэсь ужамзэс. Татын вераны кулэ, 1996 арын Удмуртилэн правительствоез дасяз вал дунъёсын политикая законлэсь инъетсэ. Али со сярысь жаляса гинэ вераны луэ: Кун Кенешлэн сессиез сое эскерытэк кельтӥз. - Манетлэсь куашкам мугъёссэ тодыса уг-а луы вал азьло ик кыӵе ке ужрадъёс кутыны? - Удмуртия туж зол герӟаськемын Москваен, Россилэн мукет улосвылъёсыз но шуг- секытысь нимаз потыны уз быгатэ. Коньдон удысын кылдэм югдурез умоятыны люкето кадръёсын шудонъёс но. Ялан вошъяськылӥзы Центробанклэн, Коньдон ужпумъёсъя министерстволэн кивалтӥсьёсыз. Сыӵе секыт вакытэ но Черномырдинлэсь кандидатуразэ эскерыса улӥмы. Будӥсь дунъёслэсь калыкез утён понна мар но со малпаны луэ вал - бере кылимы, ӧжытсэ вераса 10 нуналлы. Удмуртия сярысь ке верано, татын, мукет улосвылъёс сярысь, оло, югдур лякытгес ай. 3 сентябре ини правительство, ас ужрадъёссэ ӵектыса, калыклы вазиськиз. - Калыклэсь ватскыса шудэмысь дугдоно ни, дыр. Меӵак вераса, басьтозы-а адямиос ӝегатэм уждунзэс? - Кун Кенешлэн Тӧроез А. Волков Россилэн правительствоезлэсь уждунлы шуыса 200 миллион манет курыны быгатӥз вал. Со коньдон республикаямы вуиз ке, адямиос уждунзэс басьтыны быгатозы. Банкъёсын али озьы ик "сьӧд нуналъёс" мыно на. Калык банке понэм коньдонзэ басьтыны тырше. Но, мон сямен, банкысь коньдонэз басьтыны ӧвӧл дыртоно. Ваньмыз дуноя бере, соин али номыр уд басьты ни. Нош банкъёс вкладчикъёслэсь коньдонзэс производствое коть кутыны быгато. Шонерзэ верано ке, туннэ банкъёсысь 10 процентэз вкладъёс басьтэмын ни. Со туж бадӟым лыдпус лыдъяське ни. Озьыен, сыӵе югдур экономикамес уката но зол шуккоз. Софья Широбокова верамъя, Россия Федерациын кутэмын бюджетъя кодекс. Солэн куд-ог люкетъёсыз 1999 арын нырысетӥ январьысен улонэ пыӵаны кутскозы. Кылсярысь, отын учкемын выт тыронъёсты воштыны яке воксё быдтыны. Сыӵе луонлыкъёс сётыса, оло, асьме ваньбур поттӥсь предприятиос азинскыны но кутскозы. Нош та нуналъёсы долларлэн дуныз улӥе васькиз. Сое тазьы, дыр, валэктыны кулэ: та "сьӧд нуналъёсы" яке калыклэсь берпум коньдонзэ пумозяз кыскизы яке вылӥын правительстволы кин ке "кузё" сюриз ни. Т. БАННИКОВА. Вузкаронъя но бытовой юрттэт сётонъя министерствоын та нуналъёсы ужа "пӧсь телефон". Дунъёс пумысен юанъёсты кылдӥзы ке, вазиське таӵе телефонъёсъя: 51-18-34, 51-10-48, 51-10-36. ЧАКЛАСЬКЕ! "Кузмаськись" - коӵыш Уно дауръёс ӵоже адями вӧзын улэ оскымон эшез но юрттӥсез - пуштрес, небыт гоно, маялляськыны яратӥсь, со вакытэ ик эрикез гажась, векчи йырйиськисьёслэн бадӟым тушмонзы - коӵыш. Берло дыре верасьёс вань ини, со, пе, асьмеды куд-ог висёнъёслэсь но, шуом, сюлэм, лул черъёслэсь, уте. Озьы гинэ мед луоз вал. Но... Писэй кышкыт "кузьым" но вайыны быгатэ. Ӵапак та пумысен ми кенешиськом Ижевскысь 7 номеро медсанчастьлэн нылпи поликлиникаысьтыз медсестраен-дерматологен Д. Г. РАФИКОВАЕН. - Зэм, шумпотон сяна, коӵыш адямилы кышкытлык но вае. Тужгес но паськыт вӧлмем, ӝог паласькись висёнъёс пӧлысь одӥгез - минроспория. Эзелез кылдыто векчи лулосъёс - губиос. Соосты огшоры гинэ уд адӟы, синйылтод микроскоп пыр учкыса. Лулосъёс чидасесь, пӧсьлэсь но, кезьытлэсь но уг кышкало, паласькыны быгатонлыксэс кӧня ке толэзь ӵоже уг ышто. Коӵышъёс, уката ик кузётэмъёсыз, кырсь, куяськон интыостӥ калго. Азбарысь азбаре, ульчаысь ульчае вуылыса, соос висён шедьто, сое юлтошъёссылы кузьмало. Нош нылпиослэн ӟеч сямзы вань - соос укыр зол ярато пудо-животъёсты, пӧйшуръёсты. Та сямзы понна асьсэос ик ӵемысь курадӟо. Висись коӵышен шудыса асьсэлы висён шедьто. Юнме шорысь шат микроспориен ӵемгес висё покчиос. Но куддыръя мӧйыос но янгышало, шуом, выль юртэ пырыкуз, шуд курыса, семья отчы коӵышез нырысь лэзе. Нош со микроспориен курадӟе ке, эзелпез быдэс семьялы но паласьканы быгатоз. Пусйыны кулэ, губи таза муртлы висисьлэн дӥсез, арбериосыз пыр но выжыны быгатэ. - Вералэ вал, тодманы луэ-а микроспориез? - Микроспориез сайкатӥсь губи ку вылэ шеде но будыны кутске. Мугорлэн та люкетэз азэ, 5-тӥ-7-тӥ нуналаз горд вишты кылдэ. Азӥсь инты будэмъяз питырес луэ. Дырын- дырын лыдэ. Тужгес ик кышкыт, губи йырсиё интые шеде ке. Йырси ӵышкем кадь тӥяське - усе, пилеш интыос кылдо. Адямилэн быдэс мугорыз сярысь верано ке, висён солы кыӵе ке мукет шуг-секытъёс но воштӥськонъёс уг вайы. - Кызьы эмъяно та висёнэз? - Котькуд адями тодыны кулэ: ку вылын кыӵе ке азэм интыос кылдо ке, ӝегатскытэк эмъясьлы вазиськоно. Ас тодэмъя номыр но дауртоно, номырин но маялляно ӧвӧл. Со уз юртты, югдурез шугомытоз гинэ, бӧрысь врач но курадӟоз шонер диагноз пуктыны. Висёнлы пумит кема, 1-2 толэзь ӵош, нюръяськоно луэ. Ку вылысь микроспориез амбулаториын эмъяськом. Висён йырси пушкы аля ке, соку ини висисез стационаре келяськом. Висись пиналлы мукет нылпиосын шудыны уг яра. Со нимаз изьыны кулэ, аслаз ӵушконэз, йырсынэз, валес котырес но мукет арбериосыз мед луозы. Дӥсьсэ нимаз миськоно но пӧзьтоно. Пиналлы шудонъёс но капчи миськыны луонооссэ быръёно. Улон интызэ хролэсь но изваскалэсь вить процентъем суретэн яке майтал вуэн миськоно. Сое умой-умой тӧлатъяно. Эмъяськемзы бере но ми пациентъёсмес кӧня ке дыр ӵоже эскерыса возиськом на. Куддыръя висисьёс буйгатско, дорамы уг ветло ни, нош огдырлы ватскем губи со вакыт выльысь улӟе. Вераськонмылэн пумаз анай-атайёслы вазиськеме потэ: пиналды коӵышъёсты яратэ ке, солы ӟеч-ӟеч валэктэ, кыӵе кышкытлык вайыны соос быгато. Асьтэос коӵыш яке пуны возиськоды ке, кулэдыръя соосты майталэн миськылэ. Араз одӥг пол одно ик ветеринар доры нуллэ. Висёнзэс шедьтӥды ке, соку ик юрттэт курыса врачлы вазиське. Тодады возе: эзель вазьгес шараяськиз ке, эмъяськон дыр но шӧдскымон вакчигес луоз. Ю. КАРАВАЕВА. 60 аръем крезьгуро сюрес Удмурт кун филармониез кылдытэм дырысен туэ тырме ни 60 ар. Кызьы бен пумитало асьсэлэсь юбилейзэс филармониын ужасьёс? Мар выленыз шумпоттозы таяз сӥзьыл-тол вылтӥ? Та юанъёслы валэктыса выллем туннэ вераське филармонилэн художественной кивалтӥсез Валерий Яковлевич МИТРОФАНОВ. Куддырысен филармония кутскиз азьлань мынон сюрессэ? Филармонилэн кылдэмез дырысен 60 ар тырмиз ини 21-тӥ гудырикошконэ. Ӵапак со нуналэ, 1938 аре, УАССР-ысь Народной комиссаръёслэн Советсы кутӥз постановление, кытын гожтэмын вал: "Соглаш луоно Искусствоосъя управленилэн Государственной филармония кылдытон ужпумъёсыныз..." Солэсь азьлогес, 8-тӥ пӧсьтолэзе, юнматэмын вал ни филармонилэн уставез. Тӥни со дырысен филармония азьланьтӥз аслэсьтыз историзэ. Маин герӟаськемын вал филармонилэн кылдэмез? Малы со кулэ луиз? Удмурт государственной филармониез кылдытыны кулэ луиз, асьме шаерын профессиональной искусство вордӥськемен но юнмамен, нимаз-нимаз тыршись но быгатӥсь усточиослэсь кужымзэс огазеян, искусствоез пачылмытӥсь вань ошмес синъёсты одӥг бадӟым шуре ӧръян вылысь. Кылсярысь, удмурт крезьгуро искусство ӝутскыны но юнманы ӧдъяз 30-тӥ аръёсы, куке усьтӥськылӥзы выль но выль учреждениос но коллективъёс. Ӵапак со вакытэ кылдытэмын вал Удмурт радиолэн хорез (1933), крезьгуръя (музыкальной) училище (1933), крезьгуръя нылпи школа (1936), Удмурт государственной хор (1936). Нош солэсь азьлогес Иж карын вал ни Филармонической общество (1930-тӥ аре гужем кылдӥз). Со бордысен ик выжыоссэ лэзиз Государственной филармония. Улон но возьматэ вал ини: кулэ сыӵе учреждение, кудӥз ас вылаз басьтыны быгатоз концерт пуктонэз, огазеялоз кылдӥсь коллективъёсты, асьме шаерысь крезьгурез яратӥсьёсты шумпоттоз быдэс странаысь вылӥ дунъям артистъёслэн искусствоенызы. Кыӵе вал филармонилэн нырысетӥ вамышъёсыз? Валамон ини, филармония сокем умой бурдъяськыны но ӧз вуы, кутскиз Быдӟым ож. Куинь ар ӵоже, война кутскытозь, филармония пыд йылаз гинэ султыны вуиз. Соку отын ужазы Удмурт государственной хор но эстрадной группа. Со сяна, филармонилэн ужаз пырисько вал Удмурт но Ӟуч драмая театръёсысь симфонической но духовой оркестръёс. 1940 аре Якшур-Бодьяын но Воткинскын кылдытэмын филармонилэн филиалъёсыз. Со аре ик филармония нырысьсэ ортчытӥз П. И. Чайковскийлэн вордскем нуналэзлы сӥзем ужрадъёсты: Свердловскысь симфонической оркестрлэсь концертъёссэ, Удмурт радиолэн хорысьтыз солистъёсын дасяз П. И. Чайковскийлэсь "Евгений Онегин" операзэ. Та аре ик вал советской музыкалы сӥзем декада. Быдӟым ож кутскемлэсь азьло, куинь ар куспын, филармония ортчытъяз трос концертъёс, отчы пыриськылӥзы вань страналы тодмо, вылӥ дунъям артистъёс но коллективъёс. Соос пӧлын - ГАБТ нимо квартет, Пятницкий нимо хор, Леонид Утёсовлэн джазовой коллективез, пианист Я. Флиер, виолончелист М. Березовский но трос мукетъёсыз - таос асьме шаере нырысьсэ вуылӥзы но мукет артистъёслы но коллективъёслы сюрес усьтӥзы. Нош Быдӟым ож кутскем бере, кызьы ужаны быгатӥз филармония? Тросэз коллективъёс соку ӧз быгатэ ни азьланьтыны асьсэлэсь ужзэс. Огназ кылиз кырӟанъя но эктонъя Удмурт ансамбль. Со сяна, ёросъёсын ужаллязы на концертной бригадаос. 1943 аре, тулыспал толэзе, филармониысь артистъёслэн бригадазы (11 адями) лэземын вал фронтэ ожмаськисьёс азьын концертъёс возьматыны. Со секыт вакытэ но филармония сюлмаськиз аслэсьтыз ужъёссэ азьланьтыны выль амалъёсын но ужрадъёсын. Кылсярысь, 1943 аре гужем кылдӥз музыкальной лекторий, кудӥз али но ужа. Солэсь азьлогес, 1942 аре, кылдытэмын вал оперной ансамбль. Усто тыршиз со аръёсы ик теа-джаз ансамбль. Мае бен пусйыны луоз со ож йылпумъяськем дырысен туннэ нуналозь? Валамон ни, уката азьланьтӥськиз но паськытаз филармонилэн ужез. Солэн кужымез будӥз, коллективъёсы выль егит артистъёс вуэмен валче. Кылсярысь, 1947 арын, Москваысь консерваториез йылпумъяса, филармониын ужаны кутскиз удмурт калыклэн самой данъяськымон кырӟасез Григорий Иванович Титов. Вуизы мукетъёсыз но егит артистъёс, куд-огез бертӥзы, ож тыл пыр ортчыса. Уката бурдъяськиз музыкальной лекторий, выль кужымен ӧръяськиз кырӟанъя но эктонъя Удмурт ансамбльлэн ужез, паськытазы гастрольёс. Нош 1958 арысен кутскыса, СССР-ысь Министръёслэн Советсылэн постановлениезъя Удмурт кун филармония котькуд аре ортчытъяны кутскиз П. И. Чайковскийлэн вордскем нуналэзлы сӥзем крезьгуро фестивальёс. Отчы пыриськылӥзы асьме странаысь самой устоосыз, вылӥ дунъям коллективъёс но нимаз-нимаз солистъёс - кырӟасьёс, инструменталистъёс. 41 фестиваль ортчиз ини со дырысен. Али туж шуг вераны, кудъёсыз вылӥ быгатӥсь, вань дуннелы тодмо артистъёс но коллективъёс ӧз вуылэ на асьме доры, ӧз пыриськылэ П. И. Чайковскийлы сӥзем фестивальёсы. Берло аръёсы асьме доры вуылӥзы ни кунгож сьӧрысь но артистъёс. Фестивальлэн концертъёсаз чузъяськылӥзы дуннеысь музыкальной классикалэн ваньмыз кадь ик симфониос, кантатаос но ораториос, тросэз операос, балетъёс, хоровой но камерно-инструментальной произведениос. П. И. Чайковскийлы сӥзем фестивальёслы вож сюрес усьтон понна трос кужымзэ, задор пӧсь мылкыдзэ сётӥз филармонилэн азьло художественной кивалтӥсез Николай Семенович Зубков. Фестивальлэсь "кӧкызэ" но со лэйкатӥз, шуыны луоз. Солэн тыршеменыз, сюлмаськеменыз арысь аре ӝутскиз фестивальлэн данэз, муромиз пуштросэз, арысь аре будӥз кылзӥсьёслэн но учкисьёслэн лыдзы. Н. С. Зубковлэн ӟырдыт ужамез бордысь но потэ асьме шаерысь калыклэн крезьгурез мур валамез, вылӥ чеберлык доры кыстӥськемез, озьы ик аслаз но та искусстволэн юнмамез. Ортчем сюресэз учконо ке, адӟиське: П. И. Чайковскийлы сӥзем фестивальёсын гинэ ӧвӧл герӟаськемын солэн ужрадъёсыз. Тани, 70-тӥ аръёсы филармониысь коллективъёс туж ӵем пыриськылӥзы удмурт литературалы но искусстволы сӥзем нуналъёсы, кудъёсыз ортчылӥзы котькуд аре ог вить-куать ёросъёсын. 1981 арын филармониын ужаны кутскиз нылпи школьной филармония. Ортчытъяськыны ӧдъязы егитъёслы сӥзем ӝытъёс. Огъя вераса, со вакытэ филармония котькуд аре ортчытъя вал ог куинь сюрс пала концертъёс, лекциос, творческой ӝытъёс. 1991 арын толсуре Удмурт филармонилэн кылдӥз аслаз юртэз. Со дырысен филармония нырысьсэ ужаны кутскиз ас кожаз, аслаз планъёсызъя. Со сезонэ ик, 1991-1992 аръёсы, татысь учкон залын трос пӧртэм концертъёс но литературно-музыкальной ӝытъёс ортчылӥзы. Отын ик вал П. И. Чайковскийлы сӥзем 35-тӥ фестивальлэн куд-ог концертъёсыз. Выль юртын, выль залын ужано но ужано вылэм, нош кылдӥз сыӵе югдур - улыны кутским "мукет" странаын, вуизы искусство понна самой секыт нуналъёс. Туала властьлы, кивалтӥсьёслы искусство кулэ ик ӧвӧл кадь - кызьы ке улод, озьы ик ул... Нош ми улӥськом, тыршиськом, шокаськом на. Тани дасяськиськом юбилеймес но пусйыны. Кызьы бен пусйиськом туэ юбилеймес? Али филармониын ужа вить коллектив: крезьгуръя лекторий, эстрадая "Шулдыр ӝыт" ансамбль, "Катанчи" театр, Валентина Пудовалэн группаез. Самой бадӟымез коллективмы - Государственной симфонической оркестр. Соос сяна, филармониен юн герӟа аслэсьтыз ужъёссэ Духовой инструментъёсъя государственной оркестр. Озьы ик ужрадъёсамы ӵем пыриськыло Республиканской музыкальной училищеысь дышетӥсьёс, Операя но балетъя театрысь но "Удмуртия" ГТРК-лэн Академической хоровой капеллаысьтыз солистъёс, нылпи коллективъёс, калыкысь усточиос. Филармоние сюрес нокинлы но пытсамын ӧвӧл. Ми котькинэн дасесь ужаны, мед гинэ со луоз быгатӥсь, етӥз, зэмос вылӥ искусствоен герӟаськем адями. Ми юн кусып возиськом Москваысь, Санкт-Петербургысь но Урал котырысь филармониосын но коллективъёсын. Соос пыр ортчытъяськом трос пӧртэм камерной концертъёс, соосын ик ужаськом П. И. Чайковскийлы сӥзем фестивальёслэсь программаоссэс дасян бордын. Выль сезонлы, юбилейлы ми кутским дасяськыны тол вылтӥ ик. Ужамы выль программаос дасян бордын. Пусйимы нимысьтыз юбилейлы дасяськонэн герӟаськем ужрадъёсты. Азьло аръёсы сямен ик, выль сезонмес кутском 1-тӥ коньывуонэ. Со нуналэ вань дуннеын ортчытӥськоз Калык куспо музыкальной нунал. Со луоз ни 24-тӥзэ. Ми понна со бадӟым праздник кадь. Нош быдэс коньывуон толэзе Иж карын но ёросъёсын ортчозы вань коллективъёсмылэн юбилейлы сӥзем концертъёссы. Кылсярысь, нимысьтыз концертъёс сётъялозы Удмурт Республикаысь калык артистка Нина Варачёва, эстрадая "Шулдыр ӝыт" ансамбль, "Катанчи" театр. Музыкальной лекторий возьматоз абонементъёсын крезьгуро спектакльёссэ. Юбилейлы ик сӥземын луоз крезьгурчилэн Евгения Копысовалэн авторской ӝытэз. Нырысетӥ концертъёссы луозы Государственной симфонической но духовой инструментъёсъя оркестръёслэн. Толэзь пумын, 30-тӥ коньывуонэ, филармонилэн залаз ортчоз юбилейлы сӥзем гала-концерт, отчы пыриськозы ваньмыз коллективъёсмы но солистъёсмы, республикалэн палэнысьтыз лыктэм куноос-артистъёс. Оскиськом, быдэс толэзь ӵоже ортчись концертъёс но творческой ӝытъёслэсь пӧрмоз быдэсак зэмос фестиваль. Нош быдэсыз вуоно сезон сярысь ке верано, маин со шумпоттоз? Бен, юбилеен гинэ герӟаськемын ӧвӧл милям малпанъёсмы. Пусъемын ини быдэс сезонлы ужрадъёс. Куд-огез сярысь вераны луоз али ик. Кылсярысь, шуркынмон толэзе нош ик милям коллективъёсмы ужаны потозы ёросъёсы - вань малпан куд-ог ёросъёсын ортчытыны искусстволы сӥзем нуналъёс. Толсур толэзе дасяны кутском "Ӟечкыласьком Выль арен" бадӟым эстрадной концертъёсты но "Рождественской музыкальной ӝытъёсты". Толшоре малпаськом улӟытыны джазовой фестивалез, кудаз пыриськыны мылкыд каремзэс веразы Москваысь но Санкт-Петербургысь джаз удысысь артистъёс. Тулыспал толэзе нош ик азьланьтом ёросъёсын искусстволы сӥзем нуналъёсмес. Южтолэзе асьме шаерын ортчыны кулэ калык искусстволы сӥзем региональной фестиваль, отчы пыриськозы Урал зонаысь тужгес устоосыз калык искусствоен герӟаськем артистъёс но коллективъёс. Соос пӧлын - Екатеринбургысь Урал ӟуч калык хор, отысь ик калык инструментъёсъя государственной оркестр, Пермьысь "Каравай" ансамбль, Курганысь баянистъёслэн триозы. Асьме коллективъёс пӧлысь со фестивале пыриськоз "Италмас" ансамбль но В. Пудовалэн группаез. Оштолэзе - нош ик П. И. Чайковскийлы сӥзем фестиваль. Соин ик йылпумъяськоз таиз сезонмы. Озьы ик бадӟым инты басьтозы егитъёслы, нылпиослы сӥзем концертъёс, концертъёс- лекциос. Музыкальной лекториймы дасяз ини вить абонемент. Со сяна, тросэз камерной концертъёс но сӥземын луозы нылпиослы. Уно концертъёс но программаос дасялом А. С. Пушкинлэн вордскемез дырысен 200 ар тырмонлы. Та выль сезонэ юн герӟаськыны малпаськом Урал регионысь филармониосын. Ум ыштэ кусыпмес Москваысь, Санкт-Петербургысь но мукет каръёсысь эшъёсынымы. Соосты ӵемгес ӧтьылом - П. И. Чайковскийлы сӥзем фестивальёсын гинэ ум буйгатске. Кылем аръёсы сямен ик уртче ужалом творческой союзъёсын, искусствоосъя юртъёсын, нылпи крезьгуро школаосын, мукет дышетскон учреждениосын. Дасесь юрттэт сётыны самодеятельной артистъёслы но коллективъёслы. Валаськом: туэ асьме странаын уката секыт югдур кылдэмын. Ваньмыз со выжоз культура вылэ но. Шуг луоз коньдонэн. Шуг луоз быдэсак экономикаен герӟаськем улон. Нош милемлы ужано, тыршоно, искусствоез утёно, азьланьтоно. Куатьтон ар ӵоже возиським, туэ но ӧвӧл сётӥськоно шуг-секытъёслы. Кунгож сьӧры келямын Ижысь электромеханической завод туннэ одӥгез пыд вылаз юн сылӥсь предприятие луэ. Та нуналъёсы заводын эшшо одӥг заказзэс дырызлэсь вазь быдэстӥзы. Вуззэс келян понна кулэ луиз быдэс состав поезд. Нимысьтыз ожгартехника лэсьтэмын кунгож сьӧрысь одӥгезлэн страналэн куремезъя. Предприятие уно заказъёс вуо кызьы ке "Росвооружение" кун предприятилэсь, озьы ик НАТО-е пырись странаослэсь. Завод умой ужа бере, лыктэ уждун но, вань ӵуказе нуналлы оскон но. Б. СЕРГЕЕВ. Выт бичанъя инспекция дунъёсты уг сермета - луонлыкез ӧвӧл Выт бичанъя инспекция - кунлэн огез ёзэз, со ужась муртлэсь, предприятилэсь кӧня коньдон поттэмзэ эскере но отысь оглюкетсэ государстволы кельтытэ. Валамон, странаын уксё уг тырмы ке, выт бичасьёсты эшшо чырмытгес бызьылыны косо. 11 сентябре Удмурт Республикаысь Выт бичанъя инспекцилэн кивалтӥсез В. В. Орлов пресс-конференциын ӵапак со сярысь - табыш поттон амалъёсты эскеремзы, югдурез серметын возьыны тыршемзы сярысь - вераз. 1991 арын, шуиз со, манет куашкам бере, налогъёсъя ёзъёс законъёсты тӥяса ужано луизы, югдурез юромо уродмытӥсьёсты, саботажникъёсты "утчаса". Али но, соку но нокыӵе "саботажникъёс" ӧй вал. Ош законъёсты тӥян анархие вуттэ. Угось огшоры адямиос но, кинъёс улытозязы, оло, одӥг законэз но ӧз тӥялэ, кунлэсь законъёсты лёгамзэ адӟыса, асьсэос но соосты быдэсъямысь дугдо. Соин ик налогъёсъя инспекция берло нуналъёсы ваньзэ тае тужгес сак чакласа ужа. Владимир Викторович малпамъя, тани мае нырысь ик лыдэ басьтоно: выт бичанъя инспекция базаръёсын дун будэмен нюръяськыны уг быгаты - ӧвӧл сыӵе законъёс. Угось "ульча" дунъёсын государство уг кузёяськы. Дунъёс будо, вузъёсты басьтӥсь вань ке, трослы йыло, вузъёсты ваньмыз суменак октыны кутско ке. Мукетсэ но лыдэ басьтоно. Туала вакытэ спекулянтъёс ӧвӧл ни. Ваньмыз соос ужбергатӥсьёс шуыса нимасько. Котькудӥзлэн луонлыкез вань - законэн лэземын - вузъёсты дунтэм дунын басьтыны но дуноятыса вузаны, одӥг кылын вераса. Табыш поттыны. Сыӵеосты налогъёсъя инспекция алыны уг быгаты, соос налогъёсты дыраз но ваньзэ тыро ке. Ӵапак али та выллем ужбергатӥсьёс сиён-юонэз суменак басьтӥзы но сое вузаны палэнысь муртъёсты медъязы. Кӧня табыш басьтэмзэс табере лыдъяны шуг луоз, куд-огез сыӵе амалэн быгатоз выт тыремлэсь пегӟыны. Та вакытэ Ижевскын 18 рейдовой бригада ужа. Соос, Президентлэн указэзъя, быгато школаосын, нылпи садъёсын, интернатъёсын, больницаосын дунъёсты чакланы, угось та учреждениослы вузам сиён-юонлэн дунэныз государство кузёяське. Шумпотымон, огаз но та выллем учреждениын дунъёс будэтэмын ӧвӧл шуыса. Калыкез нуллӥсь транспортын, чугун сюрес вылын но дунъёс азьвыл сямен ик кылемын. Со сяна, выт бичанъя инспекция валютаез воштӥсь 50 пунктлэсь ужамзэ сак эскере. Законэз тӥян учыръёс шараямын ӧвӧл, куд-ог пунктъёс, валютазэс утён понна, кӧня ке нуналлы пытсаськылӥзы ке но. Инспекцилэн рейдовой бригадаосыз базаръёсын ужазы. Инспекторъёс вуо гинэ, вузкарисьёс кир-пазь луо. Озьыен, калыкез алдаса вузкаро. Ми сыӵеоссэ шараяськом но вань документъёсты налоговой полицилы сётӥськом. Куд-ог учыръёс калыкез но сак кариськыны косо. Тани та нуналъёсы базаретӥ кышномурт ветлэм, ассэ налоговой инспектор шуыса, но вузкарисьёслэсь, дунъёсты будэтэмзы понна, коньдон курем. Яке мукетыз учыр. Авторынокын пиосмуртъёс- "инспекторъёс" вузкарисьёсты кисыоссэс бушатыны косо. Магазинъёсын но пӧяны амал шедьто, ӵемысь янгыш чек сётыса. Соин ик котькудӥз басьяськись солы сётэм чекыст лыдпусэз синйылтыны кулэ. Та выллем учыръёсты шараяны налоговой инспекцилы калык юрттыны кулэ, пусйиз В. В. Орлов. Марысь мар ке, жингыртоно выт бичанъя инспекцие 75-36-37 телефонъя. Верам учыръёстэс инспекторъёс эскерозы. Та вакытэ асьмеды шугъяськытэ таӵе ужпум - кызьы туала югдур налог тырем вылын шӧдӥськоз. Выт бичанъя инспекцилэн кивалтӥсез валэктӥз ке но, налогъёс планэн чакламъя вуозы шуыса, талы оскыны шуг. Угось дунъёслэн будэмзы вуз поттӥсьёс вылын нырысь ик шӧдӥськоз, пыд йылысьтызы погыртоз. Али шаерысьтымы ӝыныез промышленной предприятиос, ваньмыз сямен гурт хозяйствоос изъян вайыса ужало бере, кин тырмытоз бюджетэз... О. ВАХИТОВА. Туала югдур Министр ке буйгатэ, осконо-а? Гурт хозяйствоя но сиён-юонъя удысын кылдэм югдурен туннэ тодматэ министр Василий ЖУЙКОВ. Министр буйгатэ: нянен но, бакча сиёнъёсын но республикаямы улӥсьёс туэ уз курадӟе. Ю тысь, кылем арын сярысь, кык поллы ӧжытгес ке но октэмын луоз, солэсь кышканэз, пе, ӧвӧл - вераськемын ни 120 тонна ю тысь мукет улосвылъёсысь басьтыны, ваньмыз со пызьлы изэмын луоз. Та верамез валан понна, кема малпаськонэз ик ӧвӧл ни: муртлэсь басьтэм пызь но, нянь но асьме калык понна дуногес усёзы ни. Бакча сиёнъёслы сокем ум ёрме, вылды. Тросэз соосты али ачиз будэтэ. Картофка гектарысьтыз 117 центнер пала октыны чакламын. Сое но мукет бакча сиёнъёсты туэ мукет республикаосы но вузаны быгатомы, угось трос интыосын, куазь кӧс возиськемен, соос удалтымтэ. Зэм, шаерамы но туэ куд-ог районъёсы зор ӧз усьылы. Но кызьы валэктӥз В. Жуйков, сыӵе районъёслы юрттон вылысь, пе, Москваысь 31 миллион 380 сюрс манет коньдон вуоз. "Продторг" АО пыр дунтэм басьтэм пызьёс, кеньыръёс та "сьӧд нуналъёсы" складъёсын кыллизы. Мае возьмаса меда? Министр югдурез тазьы валэктӥз: соосты ӝегатскытэк магазинъёсы вуттыны машинаос, пе, ӧз тырмылэ. Озьы но, вылды, угось та нуналъёсы калык магазинъёсысь вань дунтэм сиён-юонъёсты пумтэм октӥз. Но Правительствомылэн Тӧроезлэн нырысетӥ воштӥсез А. Злобин валэктэмъя, складъёсын вузъёс кыллизы ас дунзэс возьмаса. Кыӵе дунын соосты вузаны, кузёоссы уг тодо вал. Бен, татын вань Правительствомылэн но янгышез, дунъёсъя кутэм постановление ӝегаса вордӥськиз. Тӥни соин ик шӧртчи но кескич ужбергатӥсьёс та огыр-бугыр вакытэ вузъёссэс калыклы дуноен чуртназы. Озьы огъёсыз узырмизы, нош республикамылэн бюджетэз ыштонъёс адӟиз. Будозы-а бен азьланяз дунъёс? Гурт хозяйствоя но сиён-юонъя министерство вузкарись но сиён-юон поттӥсь предприятиосын огкылъёс гожтыны малпа, озьы дунъёслэн ас эрказ будэмзы чакласа возиськоз. Сыӵе огкылъёс тупатэмын ни пызез, нянез вузанъя. Удмуртхлебпром" пыр вузаськись няньлэн дуныз 17-30 копейкалы гинэ йылоз. Асьме дорын поттэм кеньыръёслы но дунъёс уз будэ. Кунгож сьӧрысь ваем рис дуно сылоз. Нокыӵе шуг-секытъёс кылдыны кулэ ӧвӧл йӧл, сӥль, курег пуз пумысен. Йӧл кысконъя али Удмуртия Урал регионын, Башкирия бере, кыкетӥ интыын мынэ. Дуногес вузаськозы сӥльлэсь пӧрам вылӥ сортъем колбасаос. Та нуналъёсы куинь поллы дунояз кӧс вӧй. Но сое асьме дорын но поттыны быгато вылэм. Кезысь элеваторын али суткаяз кык тонна кӧс вӧй дасяло. Сыӵе луонлыкъёсты уже кутыны быгатозы мукет районъёсын но. Россиын секыт югдур кылдылыку, калык ялан тодаз вайылэ сиён-юонъя карточкаосты. Та вакытэ нош ик соос борды ум берытске меда? Министрлэн кылъёсызлы осконо ке, ум. Та сярысь ужпум асьме Правительствоын но, Кун Кенешын но ӧз на ӝутскылы, шуиз со. Республика ассэ сюдыны быгатоз. Т. БАННИКОВА. Маин шудо адями? Тодматске: шудоез адями - Виктор Николаевич Санников, акциосын "Ижмаш" огазеяськонысь электромонтёр. Зэмзэ но, шудо. Ас вакытаз дунтэк квартира сётӥзы: сётӥзы ӟеч ужамез понна. Семьяез, кык нылпиез, сад-бакчаез вань. Одӥгез урод - предприятияз дыраз уждун уг сёто. Туэ гужем огаз пӧсь нуналэ солы ивортӥзы, тонэ, пе, Кун Кенешлэн юртаз возьмало. Мынӥз, чебер дӥськутсэ дӥсяса. Отын Виктор Николаевичез Россия Федерацилэн Почёт орденэныз пусйизы. - Эшъёсы орденлы ӵектӥллям, нош мон со сярысь номыр ӧй тодылы, - паймыса шуэ воргорон. Тӥни озьы, асьме пӧлын но вылэм на сыӵе адямиос, кудъёсыз асьсэлы сӥё-дано нимъёс но наградаос курыса уг ветло. Награда ачиз соосты шедьтэ. Т. МИРОНОВА. Туспуктэмез В. Камашевлэн. Нуналлэн тодметэз Вашкала календарья туннэ - Федотлэн но Руфиналэн нуналзы. Кемалась вакытъёсэ та нуналэ пудоез бусые бер потто вылэм, шуккиськыны, ышыны медаз шедьы шуыса. 16 сентябре - Василисалэн но Домналэн нуналзы. Гуртъёсын етӥнэз утялтыны дырто. Та нуналэ... ар талэсь азьвло 16 сентябре 70 арес тырме А. Н. Голубковалы (1928), Удмуртиысь наука удысысь дано ужасьлы. 15 сентябре 1944 арын Советской Армия фашистъёслэсь мозмытӥз Болгарилэсь шоркарзэ - Софиез. Дунтэмамлэсь утен понна 16-тӥ сентябре Сбербанк вкладъёсъя процентной ставкаоссэ ӝутэ. Сбербанкын коньдонзэс возисьёслэн доходзы 42 процентысен 91 процентозь будоз. Пенсионеръёслэсь коньдонзэс дунтэмамлэсь утён вылысь, Сбербанк мӧйыослы луонлык сётэ процентъёсты толэзьлы быдэ басьтыны. Та дырозь соосты куинь толэжзь но одӥг нунал ортчыса гинэ сётъяло вал. Иворъёсъя национальной служба. Лыдпусъёс Дунъёс нуналскын 10 пол йылӥзы Россиын дунъёс 1-7 сентябре 35 процентлы йылӥзы. Августэ манет 15 процентлы дунтэмаз. 1995-тӥ арысен таӵеез ӧй вал на. Дунъёс уй- нунал ӵоже 10 пол будӥзы, шоро-куспо лыдын вераса. х х х Россилэн зарниез но валютаез 28 августысен 4 сентябрёзь миллион долларлы кулэсмиз - 12,7 миллиард долларысен 12,3 миллиардозь, яке 3,2 процентлы. Арлэн кутсконэныз ӵошатыса, Россилэн зарниез но валютаез 31 процентлы кулэсмиз ни. Иворъёсъя национальной служба. Бюджетэз тырмытыны луонлыкъёс вань Воткинскысь администрацилэн планъя но экономикая люкетэз городысь пекарняос вылын эскериз налогъёслэсь интыысь бюджетэ вуэмзэс. Городын ужало нянь пыжонъя комбинат но уно пичи пекарняос. Одӥг тонна пыжем нянез чаклано ке, комбинат налогъёсты, пичи пекарняослэсь, 2 поллы тросгес тыре. Озьыен, бюджетэз тырмытыны но луонлыкъёс вань на, выт бичась ёзъёслы но ужано на. Коньдонэз шыръяны сюлмасько Воткинск городысь администрация бюджетысь коньдонэз быгатыса но пайдаё кутыны тырше. Тани, шуом, городлы уно продукция басьтӥське интыысь бюджет чотын. Администрация эскере, кыӵе удысъёслэсь продукцизэс нырысь ик басьтоно, нош кыӵеосызлэсь берлолы но кельтыны луоно. Нырысетӥосыз пӧлы пыризы электрокужым сётӥсь, му вӧй кыскись, газовой, гыбед поттӥсь, андан ӵыжатӥсь, эмъюм лэсьтӥсь удысъёслэн продукцизы, туж кулэ луисен лыдъямын наукаен, лэсьтӥськонэн, му узырлыкъёсты утчанэн герӟаськем ужъёс. Л. БАКАЕВА. Банк ужа Кутэмын огкыл, яке адями уксёзэ медаз ышты Странаын югдурез чакласа но калыклэсь коньдонзэ утьыны тыршыса, СБС-АГРО банковской группа Россиысь Сберегательной банкен куспазы огкыл (меморандум) кутӥзы. Отын туж валамон верамын, котькуд вкладчик кытын коньдонзэ возьыны быгатэ. Адямилы эрик сётэмын уксёзэ СБС-АГРО банкын возьыны яке Сбербанке выжтыны. СБС манетэн коньдонэз 6 толэзь возён вылысь кутэ, нош валютаен вкладэз - 1 арлэсь уно дырлы. Али банкъёс адямиослэн киязы счётысьтызы нуналаз 1 (одӥг) сюрс манет сёто. Пластик карточкаен уксё басьтыны луэ ни 10 сентябрьысен. СБС вкладчикъёсын ужанзэ азьланьын уката паськытатоз, адямиослэсь коньдонзэс кутоз депозитэ (дырыз 1 арлэсь трос). Банк мукет тыронъёссэ но быдэсъялоз, пластик картаен уждун тыронъя программазэ но азьланьтоз. Банк кредит сётъясь организация луэ бере, со тырше ссуда висъянзэ умоятыны. СБС-АГРО кыл сётэ ужамзэ иворъёс вӧлмытӥсь ёзъёсын возьматъяны. Та огкыл (меморандум) ужалоз туэ 26 сентябрёзь. Со кутэмын 3 сентябре СБС-АГРО банковской группалэн директоръёсызлэн советсылэн кенешаз. Фермеръёслы юрттэт СБС-АГРО но Россиысь Крестьян (фермерской) хозяйствоосъя огазеяськонэн (АККОР-ен) ӵош "Фермеръёслы кредит сётон сярысь" огкыл гожтӥзы. Банк аслаз ужаз нимысьтыз инты висъя пичи но шоро-куспо ужбергатонэз азинтонлы. Туэ гинэ нимаз фондысь фермеръёслы 100 миллион манетлэсь уно льготной кредит сётӥз. Ӵошатон вылысь, миым вить пол ичи, 20 миллион гинэ висъямын вал. Валамон, фермер хозяйствоос басьтэм уксёзэс берыкто, но туннэ жаляса верано луэ, соос куанересь, кредитсэс дыраз берыктыны уг быгато. Тӥни соин ик СБС-АГРО но АККОР сюлмасько Россиын кредитъя кооперациез азинтон сярысь. Кылсярысь, соос куспазы кенешизы ужасьёссэс дышетон сярысь. Банк умоесь условиос кылдытэ гурт хозяйствоя удысэз но соин герӟаськем ёзъёсты азинтонъя. Азьланьын озьы ик выльдозы законодательствоез но кылдытъяны кутскозы кредитъя кооперативъёс. СБС-АГРО-лэн пресс-службаез. Шаермылэн дано адямиез Туэ 90 ар тырмысал тодмо тодосчилэн Павел Ощепковлэн вордӥськемез дырысен. Павел Кондратьевич Ощепков вордӥськиз Каракулино районысь Шуныт ошмес (огазеяськемез бере - Зуевы Ключи) гуртын 1908-тӥ арын 24-тӥ июне. Быдэс дуннелы тодмо луиз, радиолокациез усьтэмен. Наукаын но техникаын озьы ик мукет но бадӟымесь азинсконъёс басьтӥз. Ощепковлы сётэмын "РСФСР-ысь наука но техника удысысь дано ужась" но "РСФСР-ысь дано изобретатель" сӥлы нимъёс. Профессор, техника наукаосъя доктор, СССР-ысь Космонавтикая академилэн дано академикез (луиз 1991-тӥ арын), ӟуч калык академик (луиз 1992-тӥ арын). Павел Кондратьевичлэн улонэз капчи ӧй вал. Пичи дыръяз ик атаез, сютэм, курадӟыса улэмзылы чидатэк, кыре-буре уж утчаны кошкем вылэм - бертымтэ ни, чиптэм-чаптэм ышем. Анаез но собере кема чидамтэ ни. Ӧчкарем кадь, юртсы эшшо сутскыны шедем. Огнуналэ, куашканы вуэм ӝыныё ӝуам корказэс ворсаса, со но куать аресъем пиеныз калык вылэ потоно луэм. Кӧттыр вылэ кытӥяз кыӵе ке уж сюрылэм. Но ӵемысь ужаны кутэмзы уг поты вылэм: ма, огназ ӧвӧл ук - мултэс ым. Кытӥяз кураськоно луылэм. Анаез тазьы ветлыны кема чидамтэ - пизэ чылкак огназэ кельтэм. Анай-атайтэк кыльыса калгись пиналъёс со вакытэ трос гинэ вылӥллям. Ма, вапумез ик сыӵе вылэм уго соку - ож вылэ ож. Пиналъёс кылё анай-атайтэк но улон интытэк. Пичи Паша но, ачиз выллем пиналъёсын эшъяськыса, поездысь поездэ, пароходысь пароходэ выжылэм, сютэм но кӧттыро калгем, кытын сюрем, отын кӧлам. Нош 1920-тӥ арын сӥзьыл Оханск городысь пристаньысен кырмыса нуиллям татысь ИИИ-тӥ Интернационал нимо трудовой коммунае. Татысь улон-вылон солы нырысь-валысь ӧз яра - пегӟылӥз (эриклы дышем муртэ озьы гинэ "кортналод" на шат?) Нош сӥзьыл кезьытъёс вуэмен, пароход выж вылын, ящикъёс вискын кӧламез ӧз поты ни. Азьпалан - эшшо лек тол. Паша ачиз ик эшъёссэ выльысь коммунаязы чортӥз. Татын нырысьсэ пуктӥзы сое парта сьӧры, кияз сётӥзы букварь. Нырысь-валысь ӧз тодылы ас нимтулзэ но, арессэ но. Бӧрысь тодмо луиз ни: та пияш Ощепков вылэм, солы 13 арес. Дышетскем сяна, пӧртэм ужъёсты быдэсъяз. Пиёк котькыӵе удыс борды ӝабрес басьтӥськылӥз. Дышетсконэз но ӟеч мынӥз. Комсомолэ пыриз, коммунаысь ячейкалы секретаре бырйизы. Усто йылпумъяз Пермьысь шор ёзо школаез но. Нош Москваын Н. В. Плеханов нимо институтын, одӥг арскын кык курс понна экзамен сётыса, профессоръёсты чылкак паймытӥз. Калык хозяйствоя Н. В. Плеханов нимо институтысь но Москваысь Вылӥ технической училищеысь электротехникая факультетъёсты огазеязы но, кылдӥз выль вуз - Энергетикая институт. Ощепков дышетсконзэ йылпумъяз ни татын. Ужаны кельтӥзы Москвае ик - Всесоюзной энергоцентре. Луиз со электростанциосты утёнъя инженер. Странаямы соку тужгес бадӟымез лэсьтоно ГРЭС Иваново-Вознесенскын вал.Огпол гинэ ӧз вуылы отчы егит инженер Павел Ощепков. Нош собере отысь кивалтӥсьсы сое доразы кужмысь курыны кутскиз. Мынытэк йӧныз ӧйлась. Огшап ужамез бере, армие басьтӥзы. Сюриз Псковысь зенитной артиллерийской полке. Татысен ик йырзэ висьытыны кутскизы туж ляб зенитной орудиос. Тани вылӥын кылӥське самолёт куара. Орудизэ солы пумит пуктон понна, ӝогак тодоно, кӧня иськемын со али, кыӵе ӝуждалаез, минутскын кӧня лобе... Собере гинэ, ыбон вылысь, таблицая нимысьтыз расчётэз учкиськод. Соя эшшо тазэ, созэ лэсьтоно - дыр весь ортче, самолёт лобе но лобе. Со шоры мертаськон вылысь гинэ ньыль команда сётоно. Уз луы-а со ужъёсты ӝогомытыны, маке лэсьтыны? - Мыным уг яра та книгаосын-таблицаосын вырон,- пырак меӵкытӥз но берло ачиз ик кӧбераз Ощепков, полксылэн командиреныз вераськыкуз (таиз солдатъёслэн матысь эшсы вал).- Самолёт лобе но лобе, нош тон лыдъяськыса-чотаськыса пукиськод. Таблицая шедьтэм лыдпусъёсъя вылӥе мертаськытозь, ӧйтӧд, кытчы вуоз ни со самолётэд... Нырысь пальышаз полклэн командирез, собере мур лулскиз: - Ваньмыз со озьы. Техникаез выльдоно. Азьло таиз но ӧй вал. Ма веранэз, зенитной артиллерияя учебник гинэ но татчыозь кылдытыны ум быгатӥське... Командир со сярысь ассэ ачиз пыкылыса кадь вераз. Нош Ощепковлэн сюлэмаз шырпу мертчиз кадь: зэм но - малы нош книгаос ӧвӧл - татчы лыктэм солдатъёслы ик дышетскыны, шуом?.. Ачиз но шӧдытэк-валатэк кутскиз чертёжъёсын, схемаосын книга дасян борды. Орудиен ыбыны мертаськон барабанэн выронэз ик малы ке мултэс потӥз. Ачиз сямен малпаз сое. Мертаськон команда гинэ ньыль ке вал, куинь гинэ кельтӥз. Ленинградысь полигонын со барабанэз эскериллям но ушъяллям - ӟеч (вылӥ) дунъет сётӥллям. Табере Ощепковлэн сюлмаськонэз уката но бадӟым - лобись самолётэз кыдёкысен ӝоггес шӧдыны быгатоно. Котькыӵе пилемо куазен но, бус дыръя но, пеймыт уин но... Горд командиръёслэсь курсъёссэс йылпумъям Павел Ощепков, взводэн кивалтыны кутскем интые, Москвае, кышкытлыклэсь утиськонъя калык комиссар - меӵак Климент Ворошилов доры вуиз. Отын ик вал солэн воштӥсез Михаил Тухачевский но. Бадӟым ӝӧк сьӧры артэ пуксьыса кенешыны кутскизы. Татчы вуттӥллям вылэм ни солэсь самолётэз радиотулкымъёсын кыдёкысен шӧдон сярысь малпанъёссэ. Татын сое котыр ласянь эскеризы. Тухачевский шуиз: - Техника азинске - самолётъёс ӝоггес лобаны кутскозы. Инбамез али сямен утеммы уз луы ни. Асьтэос чаклалэ: самолёт асьме дорысен дас иськемын - куараез дорамы вуэ куамын секундскын. Со куспын али но самолёт вить-куать иськеме азьлань лобе ни. Озьыен, со шоры куараезъя мертаськыса ыбылон юнме маке луэ. Нош азьланяз соос лобалозы огкадь ӝог. Соку кызьы?.. Тухачевский шыпытгес юаз но куаразэ будэтӥз: - Тӥни соку радиотулкымъёстэк номыр кареммы уз луы ни. Дыртоно, ӝегатскыны уг яра!.. Собере йырзэ нарком пала берыктӥз: - Валамон, та ужлы коньдонэз жаляно ӧвӧл. Нош быдэстоно ужъёстыя план дасяно луоз, Павел Кондратьевич. Сое ми наркоматлэн выль техника дасянъя планаз ик пыртом. Озьы эскеорон уж нуыны но умойгес луоз, коньдон ласянь но шуг-секытъёс уз кылдэ. Котькызьы ик юрттыны тыршом. ПВО-ын ӝоген кылдӥз нимысьтыз опытно-конструкторской бюро. Солы трос ужпумъёсъя кенешоно луылӥз СССР_ысь Наукаосъя Академиен. Павел Ощепков но быгатылӥз ни табере трос бадӟымесь тодосчиос доры вуылыны. Котькудӥз пумиськон сётылӥз выль кужым, оскон но дӥсьтон. Павел Кондратьевич огпол гинэ ӧз кенешылы ВКП(б)-лэн ЦК-езлэн секретареныз Сергей Киров эшен. Туж трос юрттӥз солы та адями. Зэм, аслыз кема улыны ӧз кылды - тушмон пуля кесяз Сергей Мироновичлэсь ӟырдыт сюлэмзэ. 1937-тӥ арын пытсазы но ыбизы Михаил Николаевич Тухачевскиез но... Со бӧрсьы ик тюрьмае пуктӥзы Павел Кондратьевич Ощепковез. Ужано институтаз нырысь парткенеш люказы. Тухачевскийлэн огазеяськонэныз герӟаса утчаны кутскизы олокыӵе но шекъёссэ. Кенеше лыктэм мурт коммунистъёслы соку ик ялӥз: радиолокация - самолётэз электромагнит тулкымъёсын-тылсиосын утчан система - асьме шаермес лябӟытыны чаклам уж луэ вылэм. Со борды нырысь ик кутскиз Ощепков. Асьме государстволы изъян лэсьтон вылысь, кулэтэм ужъёслы казна коньдон кисьтэмын, армимы но техникамы, ожлы ӟеч дасяськем интые, мыдлань сюрес вылэ поттэмын... Коммунистъёс паймыса кылзӥзы та вераськонэз. Тросэз тодо вал уго: Ленинградын радиолокацияя станциос лэсьтэмын ини - ӟеч ужало, инбамез тушмонлэсь ӟеч утё. Нокызьы оскыны уг луы, соос тушмон киосын пӧрамын шуыса. Одӥг пеймыт уе Ощепковлэн квартираяз йыгаськизы сьӧд сурон тужуркаен дӥсяськем адямиос, сьӧразы нуизы. Тушмон карыса, Саратовысь тюрьмае келязы. 1942-тӥ арын отысь ӧтиз сое Лаврентий Берия. Кӧня ке юам-верам кариз. Собере сӥялэс синъёсыз шуак чилектӥзы: - Вералэ али ик: тӥледлы маке тодмо-а ядерной кужым сярысь? Ми тодӥськомы: американецъёс ядерной кужымен атомной бомба кылдытон бордын ужало. Оскымон-а со? Яке юнме кыл вӧлдон-а - асьмемыз юри мыдлань сюресэ донгон но бадӟым изъянэ вуттон понна? - Мон малпасько,- шуиз Ощепков,- атомной бомба - юнме кыл вӧлдон ӧвӧл. Оскымон со вераськон. Зэм, ачиз та арбери - дуннелы, калыклы туж кӧшкемес маке. Атомной бомба поттыса, адями ассэ ачиз быдтонэ вуоз. - Нош со пумитэ мар малпаны луоз? - юаз Берия. - Созэ вераны шуг,- малпаськыны кутскиз Ощепков.- Ленинлэн электрон сярысь мадемез вань. Со, пе, атом кадь ик - омыръяса быдтонтэм кужым. Но асьме наукаын эскерымтэ ужпум на: кыӵезэ-марзэ рос-прос вераны уг быгатӥськы. Берия интыысьтыз султӥз но ӝотрак вазиз: - Тӥ али мыноды асьтэ удыстыя ужаны... Ощепковез возьмасьёсыныз ӵош келязы мукет городэ... Дас ар ортчыса, со эрике потӥз. Малпанъёсыз трос, кужымез но вань. Табере сюлэмшугъяськытэ сое мукетыз: уз луы-а пыртӥз адӟиськисьтэм арбериосыз учкон "син" шедьтыны? Таӵе малпанъёсыныз вуиз СССР-ысь Наукаосъя Академие. Татын сое шумпотыса пумитазы, юрттӥзы лаборатория но кылдытыны. Наукаосъя Академилэн физикая институтысьтыз тодосчиос огпол дэмлазы: наукаын дано ужъёсыз понна, Павел Кондратьевич Ощепковлы, нокыӵе диссертацитэк-мартэк, техника наукаосъя кандидат ним сётоно. Та кенешын ик вуизы мукет малпанэ но: Павел Кондратьевич Ощепковлы озьы ик диссертацитэк-мартэк сётоно техника наукаосъя доктор ним. Таӵеез академилэн улон-вылоназ туж шер луылэ, дыр. Тодосчиос вылӥ дунъязы Ощепковлэсь пыртӥз адӟиськисьтэм макеосты учкыны тыршемзэ но. Интроскопия (пушласянь учкон) асьме улонын аслыз выль но выль сюресъёс шедьтэ. Тазалыкез утисьёс ӝоген сюлэмлэсь но сюлэмпельёслэсь кызьы ужамзэс учкыны, адӟыны быгатӧзы, гадез кырылытэк. Берло аръёссэ Павел Кондратьевич ужаз инверсия бордын. "Милям лёгем сюресмы янгыш маке ӧвӧл. Мон оскисько: со одно бадӟым вормонэ вуттоз",- шуылӥз аспал эшмы. х х х Кӧня ке вераме потэ на Семен Александрович Самсоновлэн но Павел Кондратьевич Ощепковлэн кусыпъёссы сярысь. Семен Александрович тодэ вал: П. К. Ощепков асьме шаерын вордскемын, бадӟым тодосчи. Зэм, адӟылэмез, пумиськылэмез ӧй вал. Нош 1981-тӥ арын гужем Семен Александрович Всесоюзной радио пыр вераськиз. Соку со асьме шаермы, дано адямиосмы но гожъяськон ужез сярысь мадиз. Аспал эшмылэсь но нимзэ поттылӥз. Со аре ик сӥзьыл Ощепковлэсь телеграмма вуиз: радио пыр верамез понна тау каре, Семен Александровичез вордскем нуналэныз ӟечкыла... Собере ваче гожъяськыны кутскизы, ӵем гинэ пумиськылӥзы. Семен Александровичен ӵош мон но кӧня ке пол пыралляй кадь соос доры. Котьку туж шуныт пумиталлязы (куноез пумитан удмурт сям пыӵамын вал кадь соос борды). Пыреммылы быдэ, юри ми понна шуыса, яратоно сиёнзэ пӧратэк уг кыльы вал быдэс дуннелы тодмо тодосчимы. Вордскем шаерзэ со туж шуныт мылкыдын тодаз ваиз, вордскем палъёсызлэсь мӧзмыса улӥз кадь. 1984-тӥ арын гужем Семен Александрович сое кузпалэныз ӵош ик ӧтчалляз дор палаз: пичи дыръяз кошкем мурт кемалась вуылымтэ ни вылэм атыкай музъемез вылэ. Вордскем гуртаз сое дано колхозник каризы. Паймымон шуныт пумиськылонъёс ортчытъязы ёрослэн шорсюлмаз - Каракулино черкогуртын, Ныргында гуртлэн клубаз, Кам котырысь шулдыр возьёс вылтӥ поръязы. Кыдёкысь куноосыз озьы ик ӧтчаллязы Ижысь куд-ог заводъёсы но институтъёсы. Пичи муртъёс кадь лӧптыса кошкизы вал соос соку... ... Москвае вуылыкумы, Павел Кондратьевич нырысь ик котьку юаллялоз вал вордскем палъёсыз сярысь: - Кыӵе ни Ижевск, Каракулино, Камвыл?.. Павел Кондратьевич кулӥз 1992-тӥ арын 1-тӥ декабре. Берпум нуналозяз тыршиз омырысь энергия басьтон сярысь научной ужез бордын. Кузпалыз, Елизавета Петровна, гожтэтаз ивортэм: вить нунал ӵоже валес вылын чик кылльытэк, улонысь шӧдтэк шорысь кошкиз. Вордӥськонэ пумиськылэм ай Япониысь делегациен. Вирнуналэ кӧня ке висем, ӵуказеяз больницае нуиллям, нош кӧснуналэ, нуназе бере кык часын, сюлэмыз жугиськемысь дугдэм... ... Ватӥллям Кунцево шайвылэ. Калыкез туж трос вылэм. Ватон ласянь вань сюлмаськонъёсты ас вылаз басьтэм интроскопияя институтэз... Ӵапак озьы тупаз: Павел Кондратьевич улонысь кошкыку, Семен Александрович ачиз но висе ни вал. Кема ӧз ни чида: тямыс толэзь ортчыса, югыт дуннелэсь со но люкиськиз... Мария САМСОНОВА. П. К. Ощепков дор палъёсаз бертылыкуз (С. А. Самсоновлэн архивысьтыз). Бензин дуноя Москваын бензинлэн дуныз 15-40 процентлы будӥз. Со герӟаськемын му вӧй продукцилэн но кунгож сьӧрысь ваем эстӥськонлэн дунзы йылэмен. Ческыт ке но, курыт Ортчем шутэтскон нуналъёсы Кировын суръя фестиваль ортчиз, ивортэ "Вятский наблюдатель" газет. Коньдон тырмымтэен, праздник мӧзмытгес пӧрмиз. Бускель улосъёсысь сур пӧзьтонъя 15 предприятие пӧлысь Кирове куинез гинэ лыктӥз - Чебоксарыысь "Букет Чувашии", Кировысь "Вятич" но "Сыктывкарский" заводъёс. Пичи предприятиослы - саклык Иркутск областьын, секыт югдур шоры учкытэк, пичи ужбергатонэз азинтонъя выль программа кутэмын, ивортэ "Что почем" газет. Сое улонэ пыӵатон понна, 13 миллион 700 сюрс манет кулэ. Коньдон шедиз ке, пичи предприятиослэн лыдзы 10-15 процентлы будоз. Нылпиос шунытэз витё Коми Республикалэн Сыктывкар шоркараз, шуныт сётымтэен, школаос но нылпи садъёс ворсаськон калэ вуэмын, ивортэ "Комиинформ" агентство. Энергетикъёс забастовка ялэмен, улон юртъёсы но учреждениосы шуныт уг вуы. Шуныт лэземын ӧз ке луы, валтӥсь санитарной врач косэмъя, нылпи учреждениос ужамысь дугдозы. Али нылпи садъёсын 8-12 градус шуныт. Школаосын 15 градус луиз ке, нылпиос 2 урок гинэ дышетскозы, вера "Комиинформ" агентство. (Басьтэмын Интернет пыр.) КИВАЛТӤСЕН ВЕРАСЬКОН Шормучын ум улӥське Туннэ улонмы туж аспӧртэмлыко. Странаын долларен шудон умойтэм югдуре вуттӥз - куд-ог вузъёслы но сиён-юонъёслы дунъёс 3-4 пол будӥзы. Со пумысен "Ижмолоко" огазеяськонлэн валтӥсь кивалтӥсеныз Геннадий КРАСНОПЕРОВЕН кенешиз газетлэн корреспондентэз Геннадий РОМАНОВ. - Россиын но Удмуртиын туала югдур предприятидылэн ужаз шӧдӥське-а? - Кызьы бен сотэк. Ми ведь шормуӵын ум улӥське. Куинетӥ арнязэ огазеяськон аслыз ачиз изъян вайыса ужа. Озьы ке но, калыклэсь секыт улонзэ лыдэ басьтыса, ми вань поттэм продукцимылэсь дунзэ оглом 15 процентлы гинэ будэтӥм. Отчы пыре вӧй но мукет сиён-юон. - Нош кызьы валано музон туж кулэ продуктъёслы трослы дунъёсты йылэтэмез? - Зэмзэ но, югдурез мыддорин берыктон йыре нокызьы но уг тэры. Ӟеч улон шорысь (ваньмызлы озьы ӧвӧл ке но - Г. Р.), ваньзэ суразы-пожазы. Тани малы сахарлы дун 2-3 поллы будэтэмын. Чик валантэм. Ведь асьмеос палэнысь, кунгож сьӧрысь али сахар ум басьтӥське. Озьыгес ик шуыны луоз кӧс вӧй сярысь. Тазэ сиёнэз шаерамы гинэ но потто, кылсярысь, Кезысь элеваторын. Малы на асьмелы "Олейна" но мукетыз. Нош сахарлы дунлэн йылэменыз валче, алигес пытсам кондитерской цехмес. Сю ужасьмес коньдон тырытэк шутэтскыны лэзёно луим. Та нуналъёсы мороженой поттэмысь дугдӥм. Эшшо 200 мурт ужтэк кылиз. Конфетъёс ум лэсьтӥське ни районъёсысь ёзъёсамы. Тӥни кытчы вуттӥз огазеяськонэз дунъёсты будэтон. Тани ми бумага (бинялтон кагаз) долларен басьтӥськом, нош шоколад Испаниысь ваиськом. - Геннадий Филиппович, тӥ Кун Кенешлэн депутатэз луиськоды. Кызьы дунъяськоды туннэ югдурез? - Котькыӵе дунъет сётыны луоз. Но ужпум со бордын ӧвӧл. Мон сямен, Россиын кулэ зол власть, юнматоно кивалтонэз. Шонергес вераса, ӝоггес ужаны мед кутскоз выль правительство но, кылдэм югдурез умоятон вылысь, ӝегатскытэк ужрадъёс мед кутоз. Кысык вакыт Бусыосын - пинал куараос Завьял ёросысь хозяйствоосын юосты утялтон ужъёс тани-тани йылпумъяськозы ни. Туэ татын гектарлы быдэ шорлыдын 12 но ӝыны центнер ю тысь усе. Но лыдпусъёс котькытын ик огкадесь ӧвӧл. Тани, шуом, "Ижевское" ОПХ-ын ю тысьсы гектарлы быдэ ог 22 центнер люкаське, тамындагес ик потэ "Колос" эштосын но. Йылпумъясько пудо сиён дасян ужъёс. Туннэ нуналлы кӧс турын планэн чакламлэн 64 процентэз зуродъёсы тыремын. Сенаж дасямын чакламлэн ӝыныезлэсь уногес, силос - 108 процент. Бусы ужъёс ӝегазы техника тырмымтэен но ӵем тӥяськемен. Ёрос 1994-тӥ арысен выльзэ ӧз басьты ни вал. Туэ асьсэ коньдонэнызы "Ижевское", "Восточный" но "Родина" эштосъёс гинэ ю тысь утялтон комплекс басьтӥзы. Ваемын на "Клаас" кык немец комбайн. Ёрос администрация ӵектэмъя, районын та нуналъёсы вуоно арлы ӟеч ю тысь, бакча сиён но трос аръем турын кидыс дасянъя, кын улэ гыронъя конкурс ялэмын. Вормисе потэм хозяйствоослы коньдон премиос сётӥськозы. Нош та ужъёс туж кысык бакча сиён будэтӥсь хозяйствоосын. Картофка гектарысьтыз 115 центнер люкаське, кубиста - 84 но ӵуж кушман - 96 центнер. Бакча сиён будэтӥсь эштосъёс табере городысь юрттэт витьыса уг уло ни, асьсэ кужымзылы оскисько. Бен, гуртъёсысь школаосын дышетскисьёстэк уг луы. Соос бусыосын мылысь-кыдысь тыршо. Б. НИКИТИН. Снимокъёс вылын: "Родина" совхозлы ӵуж кушманзэ утялтыны юртто Изгурт школаын дышетскисьёс. В. КАМАШЕВЛЭН туспуктэмъёсыз. Пересьёслы салам Сентябре республикаысьтымы ожысь но ужысь ветеранъёс но пенсионеръёс киязы кутозы нимысьтыз потыны кутскем "Долг" газетлэсь нырысетӥ номерзэ. Вераны кулэ, кылдэмез дырысен куинь ар ӵоже та газет тазьы ик нимаз потылӥз, нош тиражез ӧжытгес вал. Соин сэрен лыдӟисьёслы тросгес поттон вылысь, сое "Удмуртская правда" газетэн огазеязы вал, нимысьтыз страница висъяса. Улонмылэн секыт луэмез шоры учкытэк, дыр вуиз "Долглы" "Удмуртская правда" газетэн люкиськыны но быръем сюрестӥз азьлане йыгмыт вамыштыны. Тӥни озьы Выль ар бере потэм 11-ез номер нырысетӥез нимысьтыз газет луиз. Солэн туспуктэмъёсыз но суредъёсыз пӧртэм буёлоесь, ивортонъёсыз шумпотымонэсь. Тани соос. Удмуртиысь 23-езлы оже ветлэмъёслы вылӥ наградаос сётэмын. Россиысь Писательёслэн союзазы пыртэмын быдэс дуннелы тодмо адями, Социалистической Ужысь кык пол Герой, Ленинской но Государственной премиослэн лауреатсы, вылӥ ӟечлыко автомат кылдытӥсь, землякмы Михаил Калашников. Республикаысь ветеранъёслэн советсылэн председателезлы Михаил Зыковлы сётэмын "Ижевсклэн дано улӥсез" ним. Печатламын Удмуртиысь калык поэтлэн Олег Поскребышевлэн ветеранъёслы сӥзем поэмаез. Леонид ДАНИЛОВ. Пыртос-а, кузё-а луоз? Фу-у-у... Россиын улӥсьёс кылем пятницае капчияк шокчизы. Кун Дума умоен лыдъяз Президентэн премьер-министре дэмлам муртэ. Соку ик Борис Ельцин Евгений Примаковез та уже юнматӥз. Виктор Черномырдинлэсь кандидатуразэ Думаын кыкетӥзэ эскерыку, та фамилиез шараяз "Яблоко" фракцилэн кивалтӥсез Григорий Явлинский. Солэсь ӵектонзэ нырысь-валысь нокин ик йыраз ӧз поны кадь. Ма, кин-о со Примаков? Мӧйы адями, экономикаен выремез ӧвӧл, Правительствоен кивалтыны уз пӧрмыты... Пятницае ӵукна Черномырдин весь оскиз на, президент сое ик куинетӥзэ ӵектоз шуыса. Депутатъёс но сыӵе вамышлы дась вал ни кадь.Но Ельцин выльысь возьматӥз аспӧртэмлыксэ - ӵектӥз Примаковез. Солы паймонэз ӧвӧл ни. Борис Николаевич тужгес но оскымон эшсэ я куштэ, я выльысь ӝутэ, бӧрысь нош ик сюрес урдсы палдытэ. Сокем дуно ке солы Виктор Степанович, малы кулэ вал тулыс вылтӥ Правительствое чылкак тодмотэм егит адямиез кужмысь донгыны но, кӧня ке толэзь ортчыса, солэсь мозмытскыны? Юнме уг пусъё ни, дыр, быдэс дуннеысь экспертъёс, Ельцин аслэсьтыз ма дауртэмзэ ачиз но уг вала ни шуыса. Я, табере премьер вань. Общество, кызьы ке Россиын, озьы ик быдэс дуннеын, огдырлы буйгамын. Уго мур гулэсь ӝыны вамышлы гинэ палэнын сылӥсь страна таяз учыре быгатӥз утиськыны, ӝабырскиз. Евгений Примаков малпамтэ шорысь пӧрмиз сыӵе адямилы, кинлы туннэ дурбасьто демократъёс но коммунистъёс, Москваысь чиновникъёс но интыосысь кузёос. Лыдӟисьёсмылэн тодэмзы потэ, дыр, та адями сярысь. Ужан сюрессэ Евгений Максимович мытӥз журналистика удысын. Вал "Правда" газетлэн обозревателез, выриз араб странаосын герӟаськем ужпумъёсын. 1970-тӥ арысен выже наукае. 1985-тӥ арысен кивалтэ Востоковедениея институтэн. Совето Союз куашкан вакытэ вал Вылӥ Кенешлэн одӥгезлэн палатаезлэн тӧроез. Со дыре ик кутске ужаны КГБ-ын. 1996 арозь кивалтӥз Внешней разведкая службаен. Андрей Козыревез куштэмзы бере, Борис Ельцин Примаковез юнматӥз кунсьӧр ужъёсъя министре. Сое тодо быдэс дуннеын, соин ик та ласянь мукет странаосысь кивалтӥсьёсын кусып тупатыны каньыл луоз. Примаковлэн нырысетӥ вамышез шумпоттӥз оппозициез. Уго аслыз нырысетӥ воштӥсе со ӵектӥз Юрий Маслюковез. Политбюроын но госпланын ужам мурт (куке но Ижын но тыршемын) тодмо луэ экономикаын югдурез валаменыз. "Зеркало" телепередачаын валлян вераськемезъя чаклано ке, со уг малпа югдурез ватсаса печатлам коньдон чотын гинэ тупатыны, турттэ со понна трос пӧртэм амалъёсты уже кутыны. Кыкетӥ вамышен лыдъяны луоз Виктор Геращенкоез выльысь Центральной банклы кивалтӥсе берыктонэз. Пересь вал бороздаез уг изъянты кадь. Озьы-а? Егит реформаторъёслэсь пӧрам "няньзэс" калык веръяз ни - кӧш зын ымысь али но ӧз тӧлзы на. Чаклалом табере кузь улонэз ортчем эшъёслэсь тыршемзэс. Паймытэ соиз гинэ. Егор Гайдар, Борис Немцов огкылысь кышкато ни коммунистъёслэн берытскеменызы. Борис Ефимович муртлэн кайгуэзлы шумпотыса кадь шуиз: тырымтэ уждун но пенсиос, ужтэк кылён, армиын югдур понна та нуналысен быдэсак кыл кутэ коммунистъёслэн партизы. Тӥни озьы. Малпалод, Немцов Правительствое одӥг нуналлы но ӧз кожа шуыса. Быгато ик адямиос асьсэ янгышъёссэс мукетъёсыз вылэ погыльтыны. Но, оскисько, политикаез чаклась адямиос солэсь выросъёссэ шонер валалозы но азьланьын бордысьтызы воксё кыдёке палэнтозы шуыса. Малы кулэ меда куке но президент луыны малпась визьмо (сотэк нырысетӥ вице-премьере пуктылысалзы шат?) адямилы та секыт вакытэ омырез зуркатыны но тушмонъёсты утчаны. Ӧз кышка меда со, выль Правительство югдурез кияз кутоз но улонмес ӟечгес радъялоз шуыса? Евгений Примаков та арня куспын йылпумъяны малпа Правительство кылдытонэз. Тодмо луозы ӝоген вань министръёслэн нимъёссы. Толон асьме республикалэн кивалтӥсьёсыз Белоруссиын вал бере, "хозяйствоен" кузёяськиз вице-премьермы Александр Злобин. Аппаратын ужасьёсын пумиськыкуз, со оскемзэ вераз, асьмеос выль кивалтӥсьёсын кусып тупатыны быгатом шуыса. Котьма ке но, улонмы нош ик ӧраз пыре ни. Дунъёс, оло, азьло кадесь ик уз луэ ини, но ӧжытак одно ик кулэсмозы. Нянь вань, сылал вань, картофка копамын. Табере уксё гинэ мед сётозы на. Но соин тырмыт вуз басьтыны мед быгатом. Озьы луиз ке, телевизор пыр иворъёсын программаосты шергес учкыны кутском, дыр. Йылпумъяса. "Примак" кыл ӟучысь асьмелэнэ "пыртос" шуыса берытске. Пыртос-а, кузё-а луоз Евгений Максимович Россилэн Правительствояз? Кузё ик мед кариськысал. Калык жадиз ни со сярысь сюлмаськись кивалтӥсьтэк. И. ЛЕБЕДЕВ. Домокошлэн ӵогем сюрестӥз Азьлань мынэ, шуыны луоз, егит кылбурчи, тодосчи, филология наукаосъя кандидат Удмурт кун университетысь доцент Виктор ШИБАНОВ. Со озьы ик Финн-угор писательёслэн огазеяськонзылэн кивалтэтаз (правленияз) пыре, удмурт литераторъёс понна кыл кутэ. Та вераськонмы ӧръяськиз, туэ 19-24 гудырикошконэ финн-угор выжыысь писательёслэн Сыктывкарын ортчем конгрессы бере. Владимир Тимин: - Кинлы улэп дыръяз ик памятник пуктыны луоз? Петер Домокош: - Мон зэмзэ ик татын аслым ачим памятник кадь потӥсько... Вераськонысь. - 1989 арын Йошкар-Олаысен кутскыса, финн-угор писательёслэн ӧтчамъёссы ортчылӥзы Эспо финн, Эгер мадьяр, Лохусалу эстон каръёсын. Та "выжъёс" асьме доры матэгес кыстӥсько ни... "Восточной финнъёслэн" Сыктывкаразы та ӧтчамез ортчытыны юнме шорысь быръемын ӧй вал. Берло дыре комиос трос лэсьто ас выжызэс но, мукетъёсын кусыпъёссэс но юнматон ласянь. Республикалэн йырызлэн Ю. Спиридоновлэн юрттэмез шӧдӥське. - Бен, Сыктывкарын ми сое ӟеч валамы. Тани асьмелэн правительствомы та бадӟым ӧтчаме-конгрессэ удмурт писательёсыз ыстыны коньдон соку ик ӧз шедьты. Соин ик ми писательёслэн тӧроенызы Олег Четкарёвен ӵошен гинэ мыноно луим. Ӧтчамын соин валче огпол гинэ юан ӧз потылы: малы Удмуртиысь туж ӧжыт адями ветлӥз? Озьы ик пусйизы: республикаяды вылӥ кивалтон ёзъёсын кусыпъёс ласянь маке но умойтэм. Соин ик вуонозэ, 2000 арын ортчытоно ӧтчамез Удмуртие "васькытыны" уз луы - со ортчоз Саранскын. Ижевск сяна, черодзэс витё на Петрозаводск, Ханты-Мансийск, Кудымкар (коми-пермякъёслы но таяз учыре коньдон сётӥллямтэ). - Валамон, сюресты дыг-моггес луэм. Нош кызьы пумитазы тӥледыз Сыктывкарын? - Коньдон ужпум сэрен одӥг нуналлы бер вуим - нырысь нуналаз бадӟым кенешонэ пыриськыны ӧз кылды. Ӝыт вуыса, кызьы но озьы тодӥм: кенешчиос "Югӧр" гостиницае интыяськиллям. Витиллям вылэм, но юазы: "Тӥ Уваровен Ермаков?" (таосыз уго финн- угор дуннеын ӟеч гинэ тодо). Пыриськом ӝыт столовое, ваньмыз сисько. Нырысь ик, милемыз адӟыса, интыысьтызы султӥзы Ева Тулуз, Петер Домокош, Арво Валтон... Собере мунчое (саунае) нуизы. - Берло кызьы радъяськизы ужан нуналъёсты? - Конгресслэсь ужзэ туж умой радъяны быгатӥзы комиос. Вуэм берамы ӵуказеяз Правительство юртын кенешон ортчиз. Удмурт писательёслэн нимынызы мон вераськи: ог дас минут ӵоже кык ар ужаммылы йылпумъянъёс лэсьтӥ, ог дас минут асьме литература, этнофутуризм сярысь ивортӥ. Ӝытазе ньыль коми нылкышно кылбурчиослэн книгазылы презентация вал. Куинетӥ нуналаз Юрий Спиридоновлэн резиденцияз (город сьӧрын, нюлэскын, пужымъёс пӧлын) - кык этажъем юртын пумиськон ортчытӥзы. Ӝыт нуллӥзы коми гуртэ - классиксылэн Виктор Савинлэн вордскем дораз, музеяз вуылӥмы. Люкиськон азьын правление люкаськылӥз на, музейёстӥ ортчим, собере - банкет. - Кинъёсгес люкаськылӥзы таяз ӧтчаме? - Мадьяръёс вить кузя, соос пӧлын - Петер Домокош (финн-угор писательёслэн огазеяськонэнызы азьло аръёсы со кивалтӥз), Каталин Надь (алигес со дасяз но поттӥз финн-угор фольклоръя, литературая антология, отчы пыризы удмурт калык кырӟанъёс, К. Гердлэн, Ашальчи Окилэн но чуръёссы). Суоми шаерысь Кари Салламаа гинэ вал, но со огназ вить мурт интые ужа. Со бадӟым огазеясь доклад лэсьтӥз, этнофутуризмлэн финн- угор литератураын выжыоссэ лэземез сярысь. Бен, соцреализм бере маке но луыны кулэ. Вашкала сямен уд возиськы, но сое утёно - утёно туала манерен. Со контекстэ мон но итӥськи, эстонецъёс но. Этнофутуризм Эстониысен (пичи калыкъёс бордысен) потэ. Солэн сюресэз ай азьпалан. Соин но, дыр, Арво Валтон сьӧраз вить егит гожъясьёссэс ваем. Мордваос (эрзяос, мокшаос), мариос (поръёс) тырмыт вал, но мон мукетъёс котырынгес возиськи. - Финн кылынгес вераськылӥды, дыр? - Озьыгес. - Тодэ ваёно ке, кык ар талэсь азьло Лохусалу карын Виктор Шибанов финн-угор писательёс пӧлын тужгес адскымонэз вал. Петер Домокош атаез кадь шуныт учкылӥз со шоры. Финн-угор гожъясьёслэн огазеяськонзылэсь кивалтэтсэ егитъёслы осконо ни, шуиз. Удмуртиысь отчы дэмламын вал Виктор Шибанов. Озьыен, Виктор Леонидович, Сыктывкарын со сюлмаськон бинетэз сэрттыны-пертчыны тӥледлы усиз ни. Маин ке шумпоттӥды-а финн-угор дуннеысь эшъёсмес? - Бен, ог выжыысь луись писательёслэн кылемаз люкаськоназы, кык ар талэсь азьвыл, литературамес, кусыпъёсмес азинтонъя пӧртэм сюресъёс пусъемын вал. Та ласянь асьмелэн мар ке со лэсьтэмын ик - сое шӧдытэк ӧз кыле. Эшъёсы азьын вераськыкум, мон со вамышъёсмес син азе пуктыны турттӥ. Нырысь ик, печатлам книгаосъя, журналъёсъя. Анатолий Уваровлэсь "Нуналлы быдэ выжыкыл" книгазэ возьматӥ, Домокошлы кузьмай, сое вылӥ дунъяз. "Вордскем кыл" журналын карел, коми, пор, мордва литератураослы сӥзем сузьетъёсмы сярысь верай (соосты дасяз Г. Романова). Кыӵе писательёсыз дэмламын Удмурт университетын спецкурсъя ортчыны (дасяз С. Арекеева), со сярысь ивортӥ. Таин тунсыкъяськизы, ксерокс пыр поттыса кузьмай."Ашальчи" нылкышно журналэз но синъёссы палёмыса учкизы. Озьы ик "Дунне кизилиос" радиосериалмы паймытӥз кадь (асьме кылзӥсьёс понна мон дасяй вал "Калевала", Эйно Лейно, Шандор Петефи, туала финн литература сярысь мадёнъёс). Пӧртэм темая вераськон визылъёс вал, тросэз соос Кузебай Герд борды йӧтӥськытэк ӧз кыле. Солэн кутскем ужъёсыз уго финн- угор дунне понна али но инъет выллем луо, зэм, тросэз соос азьланьтӥськыны курадӟо. - Удмурт шаерамы вуылыса, бадӟым, визьмо адямиос азьлань мынон сюресысьтымы со могӟетъетъёсыз юнгес, лэчытгес шӧдо. Кылсярысь, Ева Тулуз... - Ева: шуэ - туж потэ Удмуртие нош ик лыктэме, но татчыозь вазиськеме ӧвӧл на вылӥ кивалтӥсьёслы... Кызьы тодӥськом, солэн докторской диссертациез но трос ласянь герӟаськемын удмурт литератураен. Парижысь Венгер культурая центрын со туэ куартолэзе кык лекция лэсьтэм - Ашальчи Окия но Кузебай Гердъя, озьы ик вераськем Удмуртия, солэн кунлыкез, культураез сярысь. Кыкетӥ лекцизэ (одӥг час но ӝыны) со лыдӟем вылӥ калык куспо университетъёсы дасяськись француз егитъёс азьын. Берло кык час пала солэсь юалляськилям на. Мон юай Ева Тулузлэсь: Удмуртия колония шуыса малпаны ӧз кылды-а? Со шуиз: ӧз. Колония но сое уд шуы ни, эркын, сяськаяськись музъем но ӧвӧл. Но Ижевск - удмурт культуралы курадӟон инты. Огъя малпан сыӵе кылдэм. - Ӝоген, коньывуон толэзе, асьме доры лыктыны малпа Арво Валтон... - Бен, финн-угор писательёслэн ассоциацизылэн кивалтӥсез (кылемаз ӧтчамын быръемын), удмуртъёслы но мукет та пал калыкъёслы матэктыны, юрттыны тырше. Котькуд республикаысь быдэн ньылен нылкышно кылбурчиослэн асьсэ но эстон кылын сборникъёссы дасямын. Поръёслэн, комиослэн со потӥз ни, асьмелэнэз но ӝоген югыт дуннеез адӟоз. Монэ азькыл гожтыны куризы, Сыктывкарын кык ӝытме сӥзи корректураез лыдӟонлы. "Энне коиту" ("Ӟардон азьын") выллем луоз со книга. Тодӥськоды ук, ньылетӥ ӧтчамлы Эстониын потӥз вал - Ашальчи Окилэн, К. Гердлэн кылбуръёсынызы (отын ик - комиос Иван Куратов, Нёбдӥнса Виттор, пор Сергей Чавайн). - Бен, таӵе книга поттон дуно усе эстонъёслы. Нош финн-угор писательёслэсь огъя журналзэс поттыны уг малпало-а? - Меӵак таӵе вераськон ӧз ӝутэ, но Интернет системая Эстониын быгато ни ужаны: материалъёсты люкаса, ужпумъёсты сэрттыса-пертчыса, отчы сётыны малпало. - Тани асьмелэн син азямы сыӵе огазеясь издание: "4-ая конференция финно-угорских писателей "Мосты". Эстония. Лухусалу. 1996". - Бен, Арво Валтон мон сьӧры сое котькуд удмурт авторлы кузьман вылысь ыстӥз. Татын Зоя Богомоловалэн "Как не надо переводить", Фома Ермаковлэн "Удмуртско- эстонские литературные связи", Анатолий Уваровлэн "Проблемы перевода в удмуртской литературе" (ӟуч кылын) статьяоссы, мынамез но - "Кызьы мон берыктыны вырисько финн кылысь удмурт кылэ" (финн кылын печатламын). Огъя вераса, та издание люкамын кылемаз ӧтчамын, Лохусалуын, финн-угор писательёслэн вераськемъёссы, соос пӧлын ик - венгеръёс Петер Домокош, Габор Берецки, финнъёс Кари Салламаа, Сиркка Сааринен, Урпо Венто, комиос Владимир Тимин, Геннадий Юшков, мукетъёсыз. - Озьыен, Виктор Леонидович, верамдыя валамон кадь: асьме удмурт литераторъёс та огъя азьлань мынон сюрес выламы бере кыльыса уг вамышъяло. Азьветлӥсьёс пӧлын тӥледыз ӵемгес адӟыны луэ ни. Петер Домокошлэн бур киыз, кивоштӥсез луыны мылкыд кариськом. - Тау. Гожтӥз Т. ЧЕРНОВА. (Юалляськизы А. Уваровен ӵош.) Куӟебай Гердъя но Ашальчи Окия - ваньзэ шедьтоды Тодмо кылбурчилэн, тодосчилэн но калыкез югдытонын сюлмо тыршисьлэн Куӟебай Гердлэн, озьы ик нырысетӥ удмурт поэтессалэн Ашальчи Окилэн нимъёссы 20-тӥ аръёсы ик тодмо луэмын быдэс Россиын но кунгож сьӧрын. Соос кыкназы ик репрессия улэ шедизы но гожъяськон сюресъёссы сяськаян вакытазы уретэмын вал. Нош дасо аръёс ӵоже но кӧня лэсьтыны вуизы! Та адямиослэн улон но ужан сюрессы мур но пыр-поч эскеремез кулэ каре, нырысь ик био-библиография ласянь: кыӵе нимын, кыӵе жанрен, кытын, ку, кӧня бамен поттэмын соослэн гожъям ужъёссы. Республикаысьтымы Национальной библиотекаын ужасьёс сюлмо тыршо био- библиографической книгаос дасян бордын. Алигес но тани Куӟебай Гердъя Л. Г. Кондратьева но Ашальчи Окия Л. И. Егороваен Л. Г. Кондратьева 100 аръем юбилейзылы сӥзьыса поттӥзы кык книга - био-библиографической ужъёс: "Куӟебай Герд" но "Ашальчи Оки". Книгаосты дасясьёс бадӟым уж лэсьтӥллям: трос выльзэ-тодымтэзэ утчаллям-люкаллям, огазеяллям-радъяллям, печатланы дасяллям. Персоналийёс усто пӧрмиллям. Табере та указательёсъя асьмеос шедьтыны быгатом Гердлэсь ужъёссэ - нимаз книгаосын, журналъёсын, газетъёсын печатламъёссэ, пӧртэм жанръёсын гожъямъёссэ, берыктэмъёссэ, озьы ик печатламтэоссэ но шедьтымтэ ужъёссэ. Татчы ик пыртэмын солэн улэмезъя но творчествоезъя литература - элькунамы, Россиын но кунгож сьӧрын печатламъёс. Озьы ик вераны луоз Ашальчи Окилэн творчествоезъя указатель сярысь но. Со сяна, нош таяз уже шедемын тодмо адямиослэн Ашальчи Оки сярысь яркытэсь веранъёссы но. Ватсамын на "Ашальчи Оки искусствоын но фотодокументъёсын" люкет. Озьы ик пыртэмын Алнашысь Ашальчи Окилэн музей-юртэзлэн публикациосыз. Мукетаз книгаын ӵапак таиз уг тырмы: шуом, кытысь шедьтыны луоз Гердлэсь куаразэ-фонограммазэ. Нош со кылемын, шедьтэмын, сое Удмурт радио сётылэ дырын-дырын. Книгаослэн пумазы сётэмын нимъёсын указательёс - соосъя лыдӟись шедьтоз кулэ ужлэсь нимзэ. Вань куд-ог тырмымтэос но. Тани Гердлэн вылэм берыктэм книгаез - "Япон выжыкылъёс". Со сярысь куд-ог изданиосын верамын. (Но мон сое ӧй шедьты - оло, репрессиос дыръя ышиз?) Жаляса верано луэ, та кылбурчиосмылэн 100 аръем юбилейзылы сӥзьыса поттэм туж чебересь изданиос - Куӟебай Гердлэн "Зарни кыл чуръёсы" но ӟуч кылын "Я жизнь пою", Ашальчи Окилэн "Чыртывесь. Ожерелье" книгаоссы татчы пыриллямтэ на. Озьы ке но, элькунысьтымы Национальной библиотека бадӟым уж лэсьтэм: таӵе персоналийёс туж кулэ луо литература бордын ужасьёслы, школаослы, ваньмызлы удмурт культураез гажасьёслы. Анатолий УВАРОВ. "Евразия" ивортэ Интерфакслэн материалъёсызъя, Россиысь вылӥ кивалтӥсьёс зарни манет поттон сярысь верасько. Со, пе, юрттоз коньдон дуннеын кылдэм секыт югдурез тупатыны. Нош экспертъёс солы уг оско. Зарни вузанын али валтӥсь инты басьтэ Менатеп банк. Со сярысь нош ик ивортэ Интерфакс. Кызьы газет гожъялляз ни, "Евразия" банклэн оскымон юрттӥсез луэ ОНЭКСИМ банк. Алигес со огазеяськиз кык бадӟым Менатеп банкен но Мост-банкен. Нош солэсь азьло ОНЭКСИМ, вкладчикъёссэ утён вылысь, огкылысь кариськиз эшшо 12 бадӟым банкен. Отчы пыре СБС-АГРО банковской группа но. Сое умоен лыдъяз Россиысь Центробанк. Таӵе вамыш али туж кулэ, малы ке шуоно, кун луисьтэм банкъёс вкладчикъёссэс утён сярысь ляб сюлмасько. "Евразия" банклэн пресс-службаез. Анайзэ - заложнике Челябинскын йырсазьзэ ыштэм нылкышно аслэсьтыз 70 аресъем анайзэ заложнике басьтӥз, ивортэ "Челябинский рабочий" газет. Со мумызэ комнатае пытсам но кӧня ке нунал отысь потыны лэзьымтэ. Пересь кышномурт быдэс арнязэ гожтэт гожъяса укноетӥ куяз. Отын "03" службаез курыса гожъялляз. Куанерлэсь гожтэтсэ шедьтӥз бускель кышно но ӝоггес эмъясьёсты ӧтем. Нош нылыз соосты квартирае пырыны ӧз лэзьы. Ӵуказеяз сое ЖЭК-ысь слесарьёс, милиция но психиатръёс огъя кужымен басьтоно луизы. Нылкышноез лул висёнъёсты эмъянъя больницае нуизы, нош анаез гуртсэ утялтыны кылиз, гожтэ газет. "Озьы ке луысал..." Тель-Авивысь Шенкин урамын аспӧртэмлыко кафе усьтӥськиз, ивортэ "Ассошиэйтед Пресс" агентство. Маин аспӧртэм? Кафеын номыриз ӧвӧл, буш. Отчы ветлӥсьёс со понна уг ӝожтӥсько. Официантъёс мыньпотыса асьсэлэсь ужзэс быдэсъяло, буш тэркыосын но чашаосын соос кунояло кафее пыремъёсты. Нош соосыз ӟучъёслэн "озьы луысал ке, ым пушкын губи но будысал" лэчыт веранзыя, официантъёсты олокыӵе но йӧспӧртэм сиёнъёсты ӝӧк вылазы вуттыны косо. Кафеын пукон - огшоры пӧртмаськон. Но со понна отчы вуэм адями 3 доллар кисыысьтыз поттоно луэ. Кафее сиыны-юыны уг ветло, астэ возьматыны, мукетъёсыз шоры учкыны лыкто, валэктэ кафелэн кивалтӥсез. Азьланьын татын сюанзэс но вордскем нуналзэс пусйыны мылкыд карисьёс но вань ини. (Басьтэмын Интернет пыр.) "Аспэк" - дышетӥсьёслы Ижкарысь Устинов ёросысь дышетӥсьёслы юрттыны басьтӥськиз "Аспэк" фирма. Та фирмалэн магазинъёсыз пыр котькудӥз дышетӥсь, вуоно уждунэз чот, басьтыны быгатоз 100 манет тыр сиён-юонъёс. Зэм, татын дунъёс вылӥынгес мукет магазинъёсын сярысь. Таӵе вазиськонлы дышетӥсьёс ӧзгес оске, соин ик басьяськыны соглаш кариськизы туж ӧжытэз: соос, кинлы ке сиыны воксё номыре ни. Н. ПРОКОПЬЕВА. Экономика удысысь Вордскиз выль ёз Му вӧй но газ поттӥсьёслэн праздниксы азьын шаерамы вордскиз нефть поттонъя выль ёз - Удмурт компания. Ӵапак со 12 му вӧй поттон интыя ялэм конкурсын вормисе потӥз. Та ёз "сьӧд зарни" поттоз куинь интыын - Патраки, Центральной но Турецкой. Соос интыяськемын Якшур-Бодья, Шаркан но Балезино районъёсын. Кылем пятницае, 4 сентябре, Патракиын сӥё-дано ужрад ортчиз. Со сӥземын выль компанилэн нырысетӥ скважинаез ужаны кутскемлы. Ӵапак соку Удмурт му вӧй поттонъя ёзлэн валтӥсь тӧроез Николай Граханцев ивортӥз: - Та нуналэз кема возьмам, трос лэсьтӥм, туннэ-ӵуказе лицензия басьтом. Та интыын 7 миллион тонна пала нефть кылле. Быдэн 3-3,5 миллион тонна нефть шедьтэмын Центральной но Турецкой интыосын. Ваньмыз 13 миллион тонна люкаське. Со 20-25 ар кыскыны тырмоз. - Му вӧй поттонъя выль ёзъёс юнме шорысь ум кылдытӥське,- шуиз Правительстволэн Тӧроезлэн нырысетӥ воштӥсез Александр Злобин.- Нефть кыскись "Удмуртнефть" кужмо огазеяськонмы "Сиданкое" шедемын, нош выльёсыз асьме республика понна ужалозы, кун но интыысь бюджетъёсы коньдон вуоз. Мукет ласянь учконо ке, усьтӥськозы ватсаса выль ужан интыос. Тани Удмурт компаниын ичизэ 100 адями ужалоз, нош котькуд нефтяниклы быдэ эшшо 4-5 мурт тыршоз на мукет предприятиосын (му вӧй поттон оборудование лэсьтозы). ... Выль скважина туж чебер, горд-лыз буямын. Качалкалэн бурдаз гожтэмын кытын лэсьтэмез но номерез. Со поттэмын "Редуктор" огазеяськонын. Вӧзаз инъямын нефть возён бадӟым бекче. Скважина быдэсак котыртэмын пичи музъем гурезен: ӝуждалаез 1,5- 2,0 метр луоз. Озьы со лэсьтэмын качалкаысь витьымтэ шорысь нефть виян вакытлы. Ваньмыз скважинаос озьы утисько: му вӧй шуръёсы, тыметъёсы но луд-возь вылэ уз сюры. Нефтяникъёс та куронэз быдэсъяло но инкуазез уг кырсёмыто. Нош азьло кӧня керетонъёс, ӵашетонъёс потылӥзы. Нефть кисьтӥськон учыръёс тужгес но трос вал Игра районын. Кызьы бен люкисько компанилэн акциосыз? Ӝыныез - нимаз адямиос киын, 15 процентсэ Удмурт Правительство басьтӥз, 5 процентсэ - "Удмуртнефть", нош 30 процентэз акциос - пӧртэм интыосын но предприятиосын. Удмурт нефть компанилэн кыӵе бен кужымез луоз? Та ёзлэн 147 скважинаез луоз, арлы быдэ 370-400 сюрс тонна му вӧй кыскыны быгатоз. Али та уже 2,5 миллион манет уксё кутэмын ни. Котькуд скважина, специалистъёслэн лыдъямзыя, 3-4 ар ужамез бере, пайда вайыны кулэ. Г. РОМАНОВ. * Тани со выль скважина. Туспуктэмез Н. ГЛУХОВЛЭН. Египетысь чуръёс Из пушкысь ватос Сизьым номерын сётӥз газетчи Алексей Шкляев Египетлы сӥзем веросъёссэ. Ачиз верамъя, блокнотэз табере буш. Нош вашкала дуннее ветлэмзэ таки уг вунэты. Египет сярысь маке кылэ-адӟе ке, мукетъёссэ но соин тодматыны дыртэ. Вылаз ик, лыдӟисьёсын пумиськонъёс дыръя солы весь юанъёс сётъяло. Тужгес тунсыкъясько вашкала пирамидаосын. "Удмурт дуннеез" дырын-дырын гинэ учкылӥсьёс куро соос сярысь гожъямъёссэ выльысь печатланы. Пирамидаослы сӥзем верос таяз учыре пунэмамын мукет авторлэсь. 1856-тӥ-1925-тӥ аръёсы Англиын улэм писатель Генри Хаггард гожтӥз "Клеопатра" роман. Со маде асьме вакытлэсь (эралэсь) азьло 69-тӥ-30-тӥ аръёсы Египетэн кивалтэм кышномурт-эксэй Клеопатра сярысь. Египет соку сюремын вал Греция улэ. Клеопатра но грек выжыысь. Пумен кужмоясь Рим малпаз грекъёсты улляны но Египетэз аслыз басьтыны. Визьмо но чебер Клеопатра пумитъяськыны кескич амал шедьтӥз. Римлэн йырызлы Юлий Цезарьлы туган кариськиз. Тазэ аслаз матысь адмиосыз вием бере, Клеопатра кушласькиз Римысь мукетэныз дано адямиен - Марк Антониен. Римъёс Египетэз киултон сярысь малпамзылэсь огдырлы куштӥськылӥзы. Египетъёс со понна Клеопатралы тау ӧз шуэ. Мурт шаерысь вуэм кышномуртэ адӟонтэм карылӥзы. Уно пол бугыръяськылӥзы но трон вылэ асьсэ фараонзэс пуктыны турттылӥзы. Кескич Клеопатра сыӵе пумитъяськонъёсты шараялляз. Огзэ, вашкала фараонъёслэн выжыысьтызы Гармахис нимо пиез, яратэм улыса аналскиз, йырзэ поромытӥз но аслыз медолы пӧрмытӥз. Улӥын сётэм нырысетӥ верос тодматэ туала писательлэн Гармахислэсь мумиязэ но папирус вылэ гожъямзэ шедьтэменыз. Кыкетӥез верос - папирус вылэ гожъям маке. Клеопатра Гармахисэз аслыз синмаськытэ но алда: ӝоген, пе, тыныд бызё, тонэ фараон каро. Египетлы эрик сёто. Гармахис оске. Клеопатра пыдлогес пыре. Сыӵе бадӟым ужъёсты быдэстон понна, пе, асьмелы трос коньдон кулэ луоз. Гармахис шарая выжыысьтыз даурысь дауре лушкемен шыпыртэм иворез - Клеопатралы вера огаз пирамидае интыям ватос сярысь. Гармахис но Клеопатра лушкемен мыно ватосэз утчаны. *** Та уез ми ортчытӥм Сети храм вӧзын. Куазь ӟардэмлэсь азьло ик потӥм сюрес вылэ. Монэ келяз кырыж синмо шырмач - Али нимо маке. Мон сое Али-баба шуи. Бордаз - кӧня ке эшъёсыз-лушкаськисьёс - йӧспӧртэмесь адямиос. Шунды ӝужам бере, час пала ортчыса, ми вуим нёжалэ. Татын ик - коросэз ватэм мур гу-юртъер, гробница. Аналтэм кыр инты. Жалясьтэм шунды нунал лумбыт пыже но ӟырдатэ ӵошалысь туж бадӟымесь но гордэсь из гурезьёсты. Соос борды йӧтскыны ик уг луы. Луо ӵушка пыдпыдэсъёсты. Сыӵе пӧсь азетӥ вамышъяны уд быгаты. Осёлъёс вылэ пуксим но сюресмес азьланьтӥм. Ми но лыз инбаметӥ поръясь душес сяна, котырак одӥг улэп лул но ӧвӧл. Бератаз вуим туж бадӟым из гурезь дӥне. Уно сюрс аръёс ӵоже сое шунды пыжиз, луо волятӥз. Али-баба дугдӥз но ялӥз: коросэн из юртъер та гурезь улын. Осёлъёсмес пиёк вӧзы кельтыса вамыштӥм вырйыл пала. Солэн выжыяз адске пичигес гутё. Отчы адями нюжтӥськыса гинэ тэроз. Паймонэз ӧвӧл - гуэз гудӥллям шакалъёс. Пась но, из юртъер но луоен согемын вылэм. Шакалъёслэн гутёзыя гинэ арабъёс шараяллям кулэм муртлэсь весяк изён интызэ. Али-баба ньыльпыдъяськиз но пась пушкы нюжтӥськиз. Мон - сьӧраз. Ӝокыт пӧсь но мальдытӥсь шунды бере татын юзмыталэс но пеймыт - коть синмад чаг донгы. Ми кӧйтылъёсмес ӝуатӥм. Шайгу таркась гажано адямиос татчы кыстӥськытозь, мон чаклай музъем улэз. Татын эркын. Из гурезь пуш ласянь корамын, аспӧртэм зал кадь каремын. Сопал пумаз луо чик ӧвӧл. Борддоръёсын - суредъёс. Соос возьмато асьме вакытлэсь (эралэсь) азьло кивалтэм Птолемей эксэйёс вакытысь вӧсяськон сямъёсты. Адямиос пӧлын соку ик висъяське кузь но пурысьтам тушо дано пересь. Вандылыса пужъятэм кресло вылын пуке но кузёяськон бодызэ возе. Жрецъёс вамышъяло вӧсяськон тӥрлыкен. Палэнын, бур палан, ватон интые васькытӥсь гу - сьӧд изэз кораса гудэм ньыль сэрего колдэч. Сьӧрамы кор ваимы вал. Сое гу вамен выдтӥм но бордаз гозы думим. Али-баба йыртэмась сямо ке но, меӵак вераны кулэ - кышкасьтэм. Гадь кисыяз кӧня ке сюсьтыл боды понӥз, гозы борды кырмиськиз. Гольык пыдъёсыныз колдэч борддоре пыкиськиз но паймымон сэзь лэзькиз. Оп шуытозь ышиз пеймытэ. Гозы гинэ дырекъя но возьматэ. Алилэсь васькемзэ. Гозы буйгатскиз. Гу пыдсысь мырдэм кылӥськиз Алилэн куараез. Лэзиськи, пе, умой. Улӥын воректӥз туж пичи кизили. Али ӝуатэм кӧйтылзэ. Тыл курдатӥз уно сю урдкыӵъёсты - лобась шыръёсты. Соос ӝутскизы но пумтэм-йылтэм кузя лобизы ми вӧзтӥ. Ишанъёс кадь - чалмытак. Гозыез кыскимы выллань. Вуиз мынам черодэ. Мон ӧй дӥсьты со борды кырмиськыса гинэ васькыны. Гозы пумез кускам думи. Монэ каллен гинэ лэзьыны ӧдъязы дэймымон мурдалае. Меӵак вераны кулэ: та сюрес мыным сокем ик ӧз кельшы. Улонэ сюриз уга вылӥе кылем лушкаськисьёс кие. Соос янгышазы ке, мон лыосме но уг люка ни. Вылаз ик, урдкыӵъёс весь мырӟиськыло ымнырам, тугасько йырси пӧлам. Мон соослэсь лекос юрдӥсько. Мон куалекъяй но чельыяськи. Я, кукъёсы куке-соку пыкиськизы выж вылэ. Султӥ сюбегалэс интые, батыр Али вӧзы. Мугоры тяп-тяп нюламын. Бордам лякиськемын тачак урдкыӵъёс. Пыдесъёсы но суйёсы ӵабъямын. Дорамы матрос сямен етӥзак васькиз эшшо одӥг сюресчи. Азьвыл кенешемъя, кылемез юлтошъёс милемды возьманы кулэ ми вадьсын. Табере азьлане вамышъяны луоз. Ваньмы ӝуатӥм сюсьтылъёсмес. Али, кӧйтылэн югдытыса, милемды нуиз кузь гудэмтӥ. Сюресмы паськытаз но, ми пырим ватон интые. Адын кадь пӧсь. Милемды котыртӥз чал-чал кышкыт дунне. Улытозям таӵе интые вуылэме ӧвӧл. Шоканы номырин. Ватон инты - ньыль сэрего юртъер мактал. Гудэмын, из пушез кораса. Гожъямъёс но, суредъёс но, статуяос но ӧвӧл. Кӧйтылме ӝутыса учкисько котырак. Выж вылын кыстасько корос (гроб) липетъёс. Таркам мумияос. Соосты сэрпалтӥллям милесьтым азьло татчы вуылэм арабъёс. Корос липетъёс вылын туж чебересь суредъёс. Соос соку ик йӧто син шоры. Мон иероглифъёсты уг тодӥськы но лыдӟыны ӧй пишмыты. Валатски: татын ватэмын воргорон но кышномурт. Вӧзазы пазьгемын весьёс но ческыт зыно басма юдэсъёс. Таосын мумияос бинемын вылэм. Пиосмуртлэн йырыз ишкалтэмын но палэнэ куштэмын. Сое ӝутӥ но шораз сак учки. Ымнырыз чылк-чылк мычемын. Мон ялвылтэмъя, тушсэ кулэмез бере ӵышкиллям, вылды. Ымнырзэ зарни шобрет зӥбем но погмам, кузэ куасьтэм. Озьы ке но, со дано но чебер. Пересь адями ас кулонзэ пумитам каньылак но сӥё-дано мылкыдын. Но со монэ укыр зол курдатӥз - кытчы кариськыны ик ёрми. Кулэм муртъёслы мон кемалась дышемын ке но, юзыр-кезьыр луыса, йырез понӥ выж вылэ. Мукет мумиялэн йырыз вылысь вань марлязэ ӧвӧл ишкаллям. Мон но сое ӧй кеся ни. Сотэк но валамон: куке-соку со ӝужыт но чебер кышномурт вылэм. - Таиз куинетӥ мумия, - вазиз Али. Со возьматӥз сэргысь бадӟым корос шоры. Сое дыртыса сэрпалтӥллям, шӧдске, - урдэс вылаз кылле. Корос пала матэктӥ но чакланы ӧдъяй. Сое лэсьтӥллям ӟеч-ӟеч, но огшоры кедр пуллэсь. Вылаз номыр суредаллямтэ но гожъяллямтэ. - Ноку но таӵезэ ӧй адӟылы, - вазиз Али. - Сэрытгем, сэрытгем ватӥллям. Ӧвӧл октэмын, ӧвӧл калтэмын. Татчы сэрпалтэмын но урдэс вылаз кельтэмын. Сак учкисько огшоры, чеберъямтэ корос шоры но шӧдӥсько: татын туж тунсыко маке вань. Кир-пазь куям мугоръёс монэ нырысь-валысь кӧдэктытӥзы вал. Табере, мазэ-созэ валаме потыса, мон басьтӥськи уж борды. Али-баба сьӧраз кутэм молот но ожон. Соосты поттӥз но коросэз усьтыны шӧтаз. Соку ик адӟиське: вашкала шайёсты тарканы кемалась дышемын. Мыным возьматӥз на эшшо огзэ пӧртэмлыкез. Корослэн липетаз котьку юнмато ньыль ӵог - сопалаз кыксэ но та палаз кыксэ. Липетэз корос вылэ интыям бере, ӵогъёс пыро нимысьтыз портэм гутёосы. Собере ӵогъёсты весяклы юнмато чурыт излэсь вӧлэм бодыосын. Татын малы ке но тямыс ӵог. Коросэз кин ке но туж оскымон ворсаны турттэм. Бератаз ми мырдэм но кызьы ӝутӥм корослэсь секыт но зӧк липетсэ. Адӟим мумияез. Ӝыныез пала выйтэмын ческыт зыно вӧй пушкы. Таиз но абдрамон. Быльккес синъёсын учке Али. Улытозям мон но таӵезэ ӧй синйылтылы. Мукет мумияос кыллё тыбыр вылазы, шонерак золскыса, пу мунёос музэн. Таиз усем кӧтурдэс вылаз. Мугорыз басмаен бинемын ке но, пыдъёсыз ӧжытак куасалтэмын. Вашкала сямъя зарни шобрет кылльыны кулэ ымныр вылаз. Татын со палэнэ куштэмын но изьыен зӥбемын. Амалтэк вуиськод таӵе малпанэ: мумия туж юн лопыръяськем на, сое коросэ понэм бере. - Йӧспӧртэм мумия. Ватыкузы, со улэп вал, - валэктӥз Али. - Мар зулиськод? - пумит кариськисько. - Кызьы озьы мумия луло луоз? Коросысь мугорез ӝутӥм. Сюрс аръем тузон пӧлын ӧжыт гинэ ӧм ӝокалэ. Адӟимы ческыт зыно вӧй пушкы интыям арбериез - нырысетӥ шедьтосмес. Со папирус вылэм, дыртӥд- вуттӥд бинялтэм но басмаен керттэм маке. Папирусэз мугор вӧзы понӥллям, лэся, коросэз ворсан азьын гинэ. Шедьтос шоры Алилэн синъёсыз сютэм муртлэн кадь чилектӥзы. Мон папирусэз кисыям донги. Азьвыл ик кенешимы уга: музъемысь вань шедьтосъёс мыным луозы. Ми сэрттӥмы мумия вылысь басмаосты. Соос я вуремын, я керттылэмын гинэ. Шӧдӥське: мумия бордын укыр дыртыса пырскиллям. Ымнырлэн выллапалаз бадӟым лёг вань. Йыр бордысь басмаез сэрттӥм но кыкетӥ папирусэз поттӥм. Мон сое басьтыны выри но ӧй быгаты. Адямиез йырыныз валче донгиллям вылэм мешок кадь пуйы пушкы. Папирус лякиськем со борды. Кӧйтылме матэгес карыса валай: ческыт зыно вӧйёс чурытомыса папирусэз ишкалтыны уг сёто. Бератаз мон сое кеси но кисыям понӥ. Чалмытак азьланьтӥм кӧшкемыт ужмес. Туж чакласькыса вандӥм пуйыез. Адӟим мумияез. Пыдесъёсыз вискы пачкатэмын куинетӥ папирус. Сое кутӥ но ватӥ. Мумияез чаклай. Котькыӵе врач соку ик валасал та адямилэсь кызьы кулэмзэ. Мумия сокем куасьмымтэ. Сое сизьымдон нунал ӵоже ӧвӧл возиллям сылал вуын. Тӥни малы ымнырыз укыр воштӥськымтэ, тусбуез но кӧня ке кылем. Вераме потэ огзэ гинэ: инмар адӟыны медаз сёты кулэм муртлэсь курадӟись туссэ. Арабъёс но палэнскизы но аллахсылы вӧсяськыса чирдыны ӧдъязы. Эшшо одӥг пӧртэмлык. Кӧтлэн паллян палаз луыны кулэ кырем гож, отӥ поттыло пуштросэз. Сыӵе вандэм бервыл татын ӧвӧл. Ымнырыз ненег, егит, нош йырсиез пурысьтамын. Мугорыз таза сӥльвиро, пельпумъёсыз паськытэсь. Та адями туж кужмо вылэм. Мумия шоры кема учкыны ӧз кылды. Бальзамен пыӵатымтэ шӧй, омырен огазеяськыса, син азьын куашканы ӧдъяз. Кӧня ке минутскын кылизы на йыркобы, куж кадь йырси но лысьӧмлэн кӧня ке лыосыз. Огез кук - бурез яке паллянэз - чигемын но вакчигес луэмын. Табере номыре но шедьтыны оскон ӧвӧл ни. Кӧня ке буйгай но шӧдӥ жуммемме. Таӵе окыт азьын, сузмем шӧй но ческыт зыно вӧйёс вӧзын, тани-тани ӝокалод. Шырмачъёс пӧлысь шырмач Али-баба но солэн гажано йырвандӥсьёсыз мынэсьтым папирусъёсме таланы выризы. Мон кескичъяськыса соосты алдай. *** Папирусъёс лыдӟемын. Гармахис асьмелы вазиське аслаз вунэтэм гуысьтыз. - Вера ай: ватос сярысь мадён - выжыкыл яке зэмос маке? - юаз Клеопатра. Мон кӧня ке малпай но шуи: - Лыдъялом тазьы: мадён - зэмос маке. Лыдъялом: мон возьмато тыныд вашкала быдӟым фараонлэсь ватоссэ. Узырлык чакламын сьӧд вакытэ кунмес утёнэ кутыны. Осконэ вань- а, тон сыӵе узырлыкез ӟеч уже кутод шуыса? - Озьыен, узырлык вань? - чаляк юаз со. - О, мыным эн йыркуръяськы, Гармахис. Тыныд ватытэк верало: таӵе ёрмон вакытэ "зарни" кыл луо нёжалысь шур сямен сюлэмез бадӟым шумпотонэн пачылмытэ. - Мон малпасько: сыӵе ватос вань, - валэктӥ. - Зэм, ачим ноку но ӧй адӟылы. Тодӥсько: со кылле азьвыл понэм интыын ик. Узырлык борды кин ке кырсь киосын йӧтскиз ке, аслэсьтыз сук малпанъёссэ быдэстон вылысь, со вылэ туж шимес юриськем кыл усёз. Кун туж шуг учыре шедем дыръя но нокыӵе фараон ӧз дӥсьты ватосэз исаны. Клеопатра соглаш ӧз луы: - Вазен котьмалэсь дэймылӥзы. Шимес адӟонъёс сокем ик бадӟымесь ӧй вал. Озьыен, Гармахис, тон мыным возьматод узырлыкез? - Оло, возьмато, со зэмен ик отын ке. Нош тон мыным кылдэ сётыны кулэ: ватосэз кутод Египетэз Римысь Антонийлэсь утёнэ но калыклэсь улонзэ капчиятонэ. - Кыл сётӥсько! - юн оскытӥз со. - Кыл сётӥсько кунлэн вань инмаръёсыз азьын: тон бадӟым узырлыкез мыным возьматӥд ке, мон Антонийлы пумит война яло... Та ваньмыз ӧвӧл на, Гармахис. Туж матысь дыре мон тыныд бызё но та сярысь быдэс дуннелы иворто. Тон аслэсьтыд малпандэ быдэстод но Римысь ӧрӟиез асьме кунысь уллялод. Озьы вераз, шорам туж сюлмысьтыз но шара учкыса. Мон солы оски. Берло вакытэ, вис карытэк куректыса улэме бере, нырысьсэ шӧдӥ: мон шудо, ваньмыз ыштэмын ӧвӧл на. Мынам йыр уйжомымон яратоно Клеопатраеным ӵош мон быгато озьы карыны: кивалтонэз аслым басьто но, монэ египетъёс выльысь гажалозы. - Кылдэ сёт, Клеопатра! - кури. - Кылме сётӥсько, яратонэ! Та печатен юнматӥсько сётэм кылме! - со кымесме чупаз. Мон но Клеопатраез чупай. Ми вераськыны кутским: кызьы кузпалъяськом но ӵош улом, ма каромы, Антониез пазьгон вылысь. Ми ӧжыт гинэ ӧм пуке, куазь ӟардытозь. Мон со азьын "палэнтӥ" ватослэсь шобретсэ - пирамида пушкы ватэм лыдъянтэм узырлыклэсь "ынзэ". Кенешим: ӵукна ик потӥськом сюрес вылэ, кык нуналскын вуиськом чаклам интые но утчаськом ватосэз. ...Туж чакласькыса вамышъям пирамидаос пала. Мынӥськом мон, Клеопатра но осконо евнух (улошо воргорон). Клеопатралы осёл шедьтӥ: таиз чабей бусыын калтыртэ вал, солэн тыбыр вылаз куштӥ дӥськутме. Клеопатра пуксиз. Мон осёлэз валтӥ мыным тодмо кужен сюрес кузя. Евнух вамышъяз сьӧрамы. Час куспын ми выжим бадӟым ӵыпетэз. Ми азьын адскизы бадӟым пирамидаос. Толэзь пиштэм улсын соослэн йылъёссы мертчисько инбаме. Ми юзыр-кезьырак чалмытским но отӥзэ чик вераськытэк мынӥм. Кошким кулэмъёслэн ишанъёсынызы тырмем улосэтӥ. Котырак сӥё-дано ӝутӥсько адями ватэм юртъеръёс. Бератаз ӝутским из ӵошалэ, султӥм Хуфулэн пирамидаез вӧзы. Мрамор вылэ суредам уно миллион пусъёс чильк-вальк ворекъяло толэзь сиос улын. Соос шоры учкыса, Клеопатра куаретӥз: - Оскисько: азьло дауръёсы Египетэн адямиос ӧз кивалтэ - инмаръёс кузёяськизы. Та инты ачиз кулон кадь ик мӧзмыт. Со сыӵе ик бадӟым но асьме бордысь люкемын. Асьмеос та пирамидае пыром-а? - Ум, - валэктӥ мон. - Мыном азьлане. Мон сое нуи туж уно шайгуос дортӥ. Бератаз вуим быдӟым Хефренлэн пирамидаез дӥне. Солэн вужерез доры дугдыса учким инбаме ӝутскись горд моко шоры. - Таиз-а асьмелэн? - шыпыртӥз Клеопатра. - Ӧвӧл. Озёло вамышъялом. Выльысь дыртӥськом адями ватон интыос вӧзтӥ. Соослэн пумзы-йылзы ӧвӧл. Тани вуим Вылӥ (Куинетӥ) пирамидалэн вужераз. Долкам Клеопатра синъёссэ уг вошъя синучкон кадь чебер волятэм борддоръёс бордысь. Сьӧд инъет вылаз сылыса, пирамида трос сюрс аръёс ӵоже уйлы быдэ инбаме берыктэ толэзьлэсь сиоссэ. Вань пирамидаос пӧлысь таиз - тужгес синмаськымонэз. - Татын-а? - тунсыкъяське Клеопатра. - Бен, татын. Ми кошким Менкаур фараонэз инмарез сямен данъясь храм вӧзтӥ, пирамидалэн инъетэз дортӥ, потӥм уй пала. Та палан кораса суредамын пирамида лэсьтӥсьлэн Менкаурлэн нимыз. Кунэз сьӧд нуналэ утён понна со ик аслаз весяк кӧлон интыяз ватӥз узырлыкез. - Ватос татын на ке, - верай мон Клеопатралы. - Песятаелэн песятаезлэн песятаез кивалтыку, узырлык татын вал. Со утиське пирамидалэн сюлэмаз. Тон сылӥськод ватос азьын, Клеопатра. Сое лякытак гинэ уд басьты. Кулэ луоз бадӟым ужез быдэсъяны, шимес кышкытлыкъёсты вормыны, визез ыштонэн нюръяськыны. Дась-а тон пирамида пушкы пырыны? Ачид отчы мыныны но ужаны кулэ. - Тон, Гармахис, уд быгаты-а евнухен ӵош отчы пырыны но зарниез вайыны? - юаз со, кышкамзэ вормытэк. - Уг, Клеопатра, - валэктӥ мон. - Узырлык борды мон уг йӧтскы тон косэмъя но, Египетэз утён понна но. Вань йыртэманъёс пӧлысь таиз тужгес кӧтвеськантэм луоз. Мон быгатӥсько мукет сямен карыны. Вордскемея монэ лэзизы ватос сярысь тодыны. Мынам возьматэме луэ узырлыклэсь кыллён интызэ. Сое басьтыны малпасез мон тодматыны кулэ инмар выллем Менкаурлэн алонэныз. Тазэ лыдӟыса, котькудӥз эшшо огпол мед малпалоз на: кун зэмен ик секыт учыре сюремын-а, бырон калэ вуэмын-а. Инмаръёслэн каргамзылэсь кышкатэк басьтӥз ке узырлыкез, сьӧлыко ужез усёз аслаз йырыз вылэ. Вашкала гожъямъёсты учкыса, мон тодӥ тани мае. Кунмы укыр шуге-леке шедем дыръя, куинез вылӥ кузёосмы пырыны дӥсьтӥзы пирамида пушкы. Соос - инмар кадь кышномурт- эксэй Хатшепсут, солэн инмар кадь выныз Тутмос Менхеперра но инмар кадь Рамсес Ми- Амон. Алонэз лыдӟыса, огез но эксэй ӧз дӥсьты ватос борды йӧтскыны.Бен, коньдон туж кулэ вал, но узырлыкез исамон ӧвӧл. Юриськон йыр вылазы усёз шуыса курдазы но куиньназы ик туж жаялса кошкизы. Клеопатра малпаськонэ усиз. Валатски: сое кышкан ворме ни. - Мон ваньзэ ас синмыным коть адӟо, - вазиз со. - Медло озьы. Ми евнухен ӵош люкамы бадӟым чарпаосты. Пирамида выжые, мынӥм тодмо интые, соосты ог-огзы вылэ тырим но адямилэсь ӝужытгес люк инъям. Отчы тубыса, мон утчай мыным гинэ тодмо кӧльыез. Со куарлэсь бадӟым ӧвӧл. Шунды но ӵошалысь луоез пазясь тӧлъёс ӧвӧл жалляллям чурыт изъёсты. Бератаз кӧльыез шедьтӥ но аслам манерея зӥби. Сюрс аръёс ӵоже интыяз кыллем из вырӟиз. Азям усьтӥськиз адямилы мырдэм пырымон пась. Из берытскем бере, гутёысь лобӟиз туж бадӟым урдкыӵ (лобась шыр). Вашкала вакытысен асьме доры пурысьтаса но верантэм будыса вуэм кадь. Улытозям но сыӵезэ адӟеме ӧвӧл - душеслэсь бадӟымгес. Урдкыӵ, бурдъёссэ выретыса, Клеопатра вадьсы омыре ошиськиз, собере котыръяськыса пумен выллане ӝутскиз но толэзьлэн сиосаз ышиз. Клеопатра шимес куараен черектӥз. Евнух, синъёссэ кыньылытэк, урдкыӵез чаклаз но шуэрскыса пограз музъем вылэ. Со малпаз: озьы лоба пирамидаез утись ишан. Мынэсьтым но сюлэмме зӥбиз курдан. Но мон номыр ӧй куареты. Та учыр бере уно аръёс ортчыса но мон весь оски: Менкаурлэн лулыз озьы урдкыӵлы пӧрмиз но пирамидаысь лобӟыса потӥз, милемды алон вылысь. Мон кӧня ке вити на. Из улысь пыкмем омыр мед тӧлӟоз. Кӧйтылъёсме поттӥ, ӝуатӥ но коридор пуме пуктӥ. Чарпаос вылтӥ музъем вылэ васькыса, евнухез палэнэ нуи, кыл сётыны косӥ: со ноку но нокинлы уз вера туннэ кылэмзэ-адӟемзэ. Евнух кылзэ сётӥз, йырысеныз пыдозяз куалекъяса, лулыз потымон дэймыса. Собере гутёе чуртнаськи, сьӧрам кутэм гозыме кускам думылӥ но Клеопатраез дорам ӝутскыны косӥ. Дэремзэ со кускерттон улаз пачкатӥз но чарпа люк вылэ тубиз. Клеопатраез гутёе кыски. Со пыриз вӧзам, гранитэн юнматэм коридоре. Сьӧраз ӝабыръяськыса вуиз евнух. Мон учки бордам басьтэм планме. Сое валаны быгатоз юри дышетэм мурт гинэ. План лэсьтэмын вашкала суредъёс вылысь. Мон доры вуиз, выжымы ньыльдон одӥг пол вордскытозь-кулытозь. Ми вамышъям пирамидалэн сюрс ар чус улэм пушкытӥз. Кӧйтылъёс дырекъям улсын меӵ тубат кузя ваським. Пыкмыса напчем омыр эркынак шоканы уг сёты. Чарпаослэсь инъям борддор кылиз мышкамы. Отӥяз коридор лэсьтэмын, изэз кораса. Сю гырпум кузьда меӵак кыстӥське улӥе. Собере нялмыта но ньыль сэрего висъет пушкы вуттэ Борддоръёс но вӧлдэт тӧдьмамын. Ӝужыт мугорылы татын люкыт. Клеопатра музэ лэзиськиз но шутэтскыны дасяськиз. Пӧсь азьын катьтэммиз но пеймытлэсь курдаз уга. - Султы! - косӥ мон. - Татын кема улыны уг яра. Шузимом я мар. Со ӝутскиз но, ки бордам кырмиськыса, сьӧрам вамышъяз. Ми дугдӥм туж бадӟым гранит ӧс азе. Выльысь учки планме. Пыдыным одӥг кӧльыез зӥби но витьыны ӧдъяй. Олокыӵе кужымъёс вырӟизы, вылды. Секыт гранит борддор каллен но огсыр ӝутскиз но из гурезьысь пасез усьтӥз. Отчы пырим но кыкетӥ ӧс азе вуим. Мон зӥби пыд улысьтыз чарпаез. Таиз ӧс, ас кожаз сямен, вӧл-вӧл усьтӥськиз. Сое ортчыса адӟим куинетӥ борддорез. Лушкем пусъёсын план возьматэмъя, мон мынӥ суредам интые. Ӧс уллане гылӟиз но выжен огӵош луиз. Озёло вамыштыса, коридоре сюрим. Со улӥе васькытӥз но ньыль сэрего бадӟым висъетэ вуттӥз. Котырак адске сьӧд мрамор. Выж вылын - туж бадӟым гранит корос (саркофаг). Шобрет вылаз суредамын Менкаур фараонлэн кышноезлэн нимтулыз. Татын омыр ыркыт. Кытысь со вуэ? Ӧйтӧд. - Узырлык татын-а? - шыпыртӥз Клеопатра. - Ӧвӧл, - вази мон. - Ойдо сьӧрам. Выж вылын пась вань. Отчы пырыса, нюжтӥськыса сямен, азьпала кошким. Адӟим ӝомыт колдэчез. Гозыезлэсь огнам пумзэ думи из борддорысь кульчо борды, музонзэ - кускам. Кӧйтыл кутыса васьки но инмар выллем Менкаурлэн берпуметӥ юртъераз вуи. Гозыме евнух ӝутӥз, Клеопатраез керттылӥз но дорам лэзиз. Мон сое ӟыгыртыса кутӥ. Евнухез косӥ милемды возьманы азьло интыяз, колдэч вӧзын. Огназ кылёнлэсь со юн курдаз. Но муртлы уг яра вал милемды отӥяз келяны. Сылӥськом пичигес камера пушкын. Борддоръёс но выж шобыртэмын гранитэн. Бадӟым излэсь кораса лэсьтэмын пу юртъерлы кельшись маке. Таиз пуктэмын лев мугоро но зарни йыро сфинкслэн тыбыр вылаз. Со - инмар выллем Менкаурлэн коросэз. Ми шуэрскыса копак измим. Лулмес зӥбе чус омыр но весяк изён интылэн дано пушкыз. Вадьсамы инбаме ӝутске кужмо пирамида. Сое педпал ласянь веша, вылды, шуныт омыр. Ми секыт зӥбет улсын, туж бадӟым из гурезь пушкын. Ваче син кылим кулэм муртэн. Солэсь шыпыт кыллёнзэ куспетӥ карыны дасяським. Улэп дуннеысь нокыӵе куара татчы уг пыры. Коть тӧл мед пельтысал яке маке мед вырӟысал, улон сярысь тодэ вайытыса. Корос юртъер шорысь синъёсме уг вошъяськы. Секыт шобретэз ӝутэмын но урдэсаз понэмын: котрак зӧк сӥен кылле сюрс аръем тузон. - Учкы, - возьматӥ мон вашкала пусъёсты. Соосты кин ке буёлэн суредам борддор борды. - Лыдӟы, Гармахис, - сипыртӥз Клеопатра. - Мон уг валаськы сыӵе гожъямез. Мон лыдӟи: "Мон, Рамсес Ми-Амон, кунмы понна туж бадӟым кайгу вуэм нуналэ но часэ пырай та весяк кӧлон интые. Куректонэ бадӟым ке но, сюлэмы кышкасьтэм ке но, мон курдай Менкаурлэн каргамезлэсь. Кин лыктоз мон бере, рос-прос малпаськы: лулыд чылкыт ке, кунмылы зэмен ик бырон вуэ ни ке, басьты сое, мае мон кельтӥ". - Кытын-о бен узырлык? - шыпыртӥз Клеопатра. - Та сфинкслэн зарни йырыз ке шат? - Узырлык отын, - возьматӥ корос юртъер шоры. - Матэгес мын но учкы. Китӥм кутӥз но, ми матэктӥм корос пала. Верай ни: солэн липетэз ӝутэмын. Корос юртъер пушкын кылле фараонлэн гробез. Тубим сфинкс вылэ. Корос вылысь тузонэз пельтӥ но липет вылаз гожъямъёсты лыдӟи. Тани соос: - Менкаур фараон, инбамлэн нуныез. Менкаур фараон, Шундылэн эксэез-пиез. Менкаур фараон, со кыллиз Нут кышномуртлэн-инмарлэн сюлэмыз улын. Инбамысь Нут анаед тыныд сётэ быдӟым пус. Инбмаысь анаедлэн нимыз Нут - инбамлэн ватосэз. Нут, инбамысь анаед, тонэ пыртэ инмаръёс пӧлы. Инбамысь Нут анаедлэн шокамез ӵушка тушмонъёстэ. О, Менкаур фараон, тон весяк улэп!" - Кытын бен узырлык? - выльысь тунсыкъяськиз Клеопатра. - Бен, татын кылле инмар выллем Менкаурлэн мугорыз. Но фараонъёслэн мугорзы огшоры сӥльвир ук - зарни ӧвӧл. Сфинкслэн йырыз зарни ке, кызьы сое ишкалтоно? Номыр ӧй куареты. Сфинкс вылын сылыкум ик Клеопатраез косӥ корос липет борды кутскыны. Ачим кырмиськи липетлэн мукет пумаз. Мон кивалтэмъя шобретэз выллань кыским. Таиз капчияк вырӟиз - юнматымтэ вылэм. Липетэз лэзим выж вылэ. Коросын кылле фараонлэн мугорыз-мумияез. Куинь сюрс ар талэсь азьвыл кадь ик. Мумия бадӟым, сокем ик зол чебермамтэ. Ымныр вылаз зарни шобретэз ӧвӧл. Йырыз бинемын вужмыса ӵужектэм басмаен но горд кесэгъёсын. Соос улэ донгемын усьтӥськем сяськаосын модосъёс. Мӧля вылаз - сяська тугоко. Со пушкыг векчи зарни юдэс. Вылаз маке но гожъямын. Зарниез кутӥ, югыт азе кари но лыдӟи: "Мон, Менкаур, Осирис инмарен огазеяськем маке, кунмылэн фараонэз вал куке-соку. Мыным висъям даурез улӥ шонер но кожылытэк вамышъяй мыным валантэм маин ке пусъем сюрес кузя - кутсконысеныз пумозяз. Корос юртъере пушкысен вазиськисько соослы, кинъёс вакчи дырлы пуксьылозы трон вылэ. Кылзэлэ бен монэ. Мыным, Осирислэн огазеяськем Менкаурлы, улыкум ик адскиз зэмано вӧт. Вуоз сыӵе вакыт: кунлы кышкытлык ваёз мурт музъемысь вуись зӥбет. Кунлэн кузёосызлы кулэ луоз вернатэм уно узырлык, войскоос люкан понна но кыр адямиосты уллян вылысь. Аслам визьмыя мон лэсьтӥ тани ма. Мыным дурбасьтӥсь шырыт сямо инмаръёс аслым сомында узырлык сётӥзы, мамында ӧй вал мон дорозь одӥг фараонлэн но. Вал сюрсъёсын скалъёсы но ӟазегъёсы, сюрсъёсын ошъёсы но ыжъёсы, сюрс мерттэт тысе, уно сюрс мерттэт зарние но дуно изъёсы. Мон узырлыкме ути но бератаз пӧрмытӥ уно изъёслы - дунне вылысь тужгес чебересь но бадӟымесь изъёслы. Та изъёсты басьтыны лэзисько, кунамы сьӧд нунал вуыку. Зэм , музъем вылын котьку вал но луозы ашкынэмъёс. Соос баймон понна лушканы быгатозы кунлы сӥзем узырлыкме, кутозы асьсэлэн чыры-пыры ужъёсазы. Тод бен тон, вордскымтэ маке, мон вадьсы султоно маке, дыр вуиз ке, лыдӟы мон косэмъя суредам пусъёсты: узырлык ватэмын мумия пушкы. Алӥсько тонэ, вордскымтэ маке, тупатэм вакытозь Нут пушкын изись маке! Узырлык тыныд зэмен ик кулэ ке кунэз тушмонъёслэсь утён понна, кышкатэк но ӝегатскытэк потты монэ коросысь, пертчылы бинетъёсты но басьты гадьысьтым узырлыкез. Тонэн ӵош луозы мынам ӟеч кылы но инмаръёслэн ӟеч сӥзёнзы. Тынэсьтыд огзэ гинэ курисько: мынэсьтым мугорме берен пон коросэ. Коньдонлы ёрмон чиданы луымон но сокем бадӟым ӧвӧл ке, яке сюлэмад кескич малпан каръяськиз ке, вылад мед усёз Менкаурлэн юриськемез! Каргам мед усёз шӧйме саптасьлы дурбасьтӥсь мурт вылэ! Каргам мед усёз вузаськисен эшъяськись вылэ! Каргам мед усёз быдӟым инмаръёсмес. Коньдонлы ёрмон чиданы луымон но сокем бадӟым ӧвӧл ке, яке сюлэмад кескич малпан каръяськиз ке, вылад мед усёз Менкаурлэн юриськемез! Каргам мед усёз шӧйме саптасез утись мурт вылэ! Каргам мед усёз вузаськисен эшъяськись выоэ! Каргам мед усёз быдӟым инмаръёсмес мыскыллясь вылэ! Тонэ вань улытозяд зуркатозы шудтэм учыръёс. Тон кулод, вир пушкын кырадӟыса. Курадӟонэд кыстӥськоз весяк. Вӧсь луэмедлэн пумыз уз вуы. Малы ке шуоно, отын асьмеос пумиськом тонэн, сьӧсь, ваче син! Узырлык сярысь иворез утён понна, мон, Менкаур, изён юртлэн шунды ӝужан палаз пуктыны косӥ буре ваён храм. Отысь вылӥ жрецъёс та иворез ог-огзылы вералозы. Соос пӧлысь кин ке сое шараяз ке мукетызлы, фараонлы сяна, фараонлэсь короназэ нуллӥсьлы но кунэн тронын пукыса кивалтӥсьлы сяна, сыӵе жрец каргамын луоз. Озьы гожтӥ мон. Осирисын ворекъясь Менкаур. Дыр ортчоз но, тон, инбамысь Нут пушкын изись маке, азям султыса лыдӟод та кылъёсме. Озьыен, тонэ сюлворисько: маке лэсьтон азяд малпаськы. Тонэ урод уж ас бордаз кыске ке, вылад усёз Менкаурлэн каргамез. Солэсь палэнскыны амал ӧвӧл. Ӟечкыласько тонэ, но ӟеч лу шуисько". - Тон ваньзэ кылӥд, о Клеопатра, - сӥё-дано куараен верай. - Табере учкы сюлэмад. Маке карыны малпаськод ке, сое лэсьты, но аслад улонад эн янгыша. Со малпаськыса йырзэ ошиз. - Уг тодӥськы мар карыны, кышкасько, - бератаз вазиз со. - Кошком татысь. - Кошком, - шуи мон капчиям куараен. Корослэсь шобретсэ ӝутыны мыкырски. Ватонэз ӧвӧл, ачим но кӧшкемай. - Вить ай кӧня ке. Мар гожтӥз зарни юдэс вылэ инмар выллем Менкаур? Со вераз кадь изумруд сярысь. Сое туннэ ӵем ик уд адӟы. Изумрудэз туж шуг шедьтыны. Мон ноку ӧй адӟылы копак шектэк изэз. - Тон изумрудэз яратӥськод-а, уд-а, пӧртэмез ӧвӧл, - пумит куаретӥ. - Лыдэ басьты мукетсэ. Зэмен ик-а кунмы туж-туж секыт югдуре шедемын? Тынад сюлэмад лушкем малпанэд ӧвӧл-а? Тазэ ачид гинэ тодӥськод. - Эх, Гармахис, тон эшшо юаськод на! Син азе пуктыны луэ-а талэсь сьӧдгес вакытэз? Казнаын зарни ӧвӧл. Сотэк ожмаськод шат Римлы пумит? Мон тыныд кылме ӧй сёты-а? Тыныд бызё но Римлы пумит война яло! Мон выльысь верало сётэм кылме. Татын,, туж сӥё-дано изён интыын. Кулэм фараонлэн сюлэм вылаз киме поныса. Бен, вуиз кемалась чаклам час. Сое аслаз вӧтаз адӟиз инмар выллем Менкаур. Тон валаны кулэ тани мае. Хатшенсут, Рамсес яке музон фараон басьтысалзы, дыр, коросысь изумрудэз. Но сое асьмелы кельтӥзы. Соку ӧз матэкты на вал изъёсты кутон дыр. Оскисько: табере сыӵе вакыт вуиз. Узырлыкез мон ӧй басьты ке, римъёс одно ик киултозы Египетэз. Соку татчы фараонъёс уз кыле ни. Кинлы бен ватосэз сётод на? Кышкаммес улляно но уж борды басьтӥськоно. Малы-о ымнырыд сокем дэймем тусо? Сюлэмыд чылкыт ке, эн кисыра. Тон ачид озьы лыдӟид ук, Гармахис. Мон выльысь шуи: - Мар карод, ачид малпа. Эшшо огпол учкы на сюлэмад. Тон сьӧлыкад ке, вылад усёзы юриськем кылъёс. Соослэсь утиськыны амал ӧвӧл. - Гармахис, та фараонэз кут ай пельпумтӥз, нош мон... О, кыӵе татын шимыт! - со ӝиптӥськиз бордам. - Отын, пеймытын, вужер адскиз кадь. Со дорамы матэктӥз но шӧдтэк шорысь ышиз. Ойдо кошком! Тон нокинэ ӧд адӟы-а? - Ӧй, Клеопатра, нокинэ ӧй. Оло, со вал инмар выллем Менкаурлэн лулыз? Лул котьку берга уг куке-соку улэм мугор вӧзын. Тон шонер верад: ойдо кошком татысь. Мон шумпотӥсько сыӵе кылъёсыд понна. Со вырӟиз колдэч пала. Собере дугдӥз но вазиз: - Ӧй, нокыӵе вужер ӧй вал. Мыным озьы адӟиськиз гинэ. Таӵе кӧшкемыт интыын йыре пыро куалектымон малпанъёс. Мон учкыны кулэ изумрудъёсты. Мед куло - ӵок! Ум тяпайтэ, уж борды! Со мыкырскиз но коросысь поттӥз алебастрлэсь вӧлэм ньыль кувшин пӧлысь огзэ. Сыӵе посудаос шобыртэмын нимысьтыз ӵоксэтъёсын. Таосыз вылэ суредамын инмаръёс- утисьёс. Кувшинъёс пушкы тыремын инмар выллем Менкаурлэн пуштросэз. Отысь ми номыре ӧм шедьтэ. Посудаын утисько сюлэм но сюлъёс гинэ. Собере ми ӵошен тубим сфинкс вылэ. Инмар выллем фараонлэсь мумиязэ коросысь мырдэм но кызьы ӝутӥм но выж вылэ понӥм. Клеопатра кутӥз кинжалме, шырӟылӥз марляез. Шобрет но куке-соку яратӥсь киосын понэм сяська керттэт усизы музысь тузон вылэ. Мон пукисько выж вылын, корос борды тыбырыным пыкиськыса. Мумия кылле пыдес вылам. Сое берыкъямея, Клеопатра бинтъёсты пертчылэ. Кӧшкемыт уж! Шобрет юдэсъёс пӧлысь шуак маке усиз. Фараонлэн дано бодыез вылэм. Зарнилэсь кисьтэмын. Дӥняз юнматэмын вольыт вӧлэм туж бадӟым изумруд. Бодыез Клеопатра кырмиз но сак учкиз. Палэнэ понӥз. Ми азьланьтӥм таркам ужмес. Со берыкъя шобретэз. Отысь усьыло кулэм фараон вӧзы интыям зарни чеберъянъёс но музон арбериос: суйпоскесъёс, чигвесьёс, изъёсын чеберъям тӥр, инмар выллем Осирислэн мугорыз, кунмылэн дано пусэз. Бератаз пертчылӥм вань кутэтъёсты. Улысьтыз потӥз вӧен пыӵаса чурытомем дэра возъет. Вылаз, котырес пус пушкын, тазьы гожтэмын: Менкаур, Шундылэн эксэй пиез. Дэра шобретэз кыльыны ӧм пӧрмытэ. Со юн лякиськем мугор борды. Таӵе окыт дуннеын йырсазез но шытыны кема ӧвӧл. Сюрс аръем тузон но ческыт зыно вӧйёс гульымез кекато. Мумияез музэ лэзим но шобретсэ кинжалэн ӟезьылӥм. Фараонлэн йырыз кыре мычиськиз. Сое куинь сюрс ар ӵоже одӥг син но ӧз адӟылы. Чебер ымныр. Кужмо кымес вылын эксейлэсь кужымзэ возьматӥсь зарни эгес. Улысьтыз мычисько куке-соку пурысьтам йырсиос. Вӧй бордын ӵужектӥллям ни. Кулонлэн кужымез уно сюрс аръёс ӵоже ӧвӧл вормем та кӧсам ымнырез. Ми со шоры кема учким, синъёсмес вошъятэк. Кышканмес вормыны вырыса пертчылӥм берпуметӥ шобретэз. Азямы - куасалъяськисьтэм лекос кӧшкемыт мугор. Паллян кӧтурдэсаз вольыт вурӟем кырет, отӥ куке-соку пртылӥллям фараонлэсь пуштроссэ. - Дуно изъёс отын, - шыпыртӥ мон, секыт мугорез возьыса. - Мар бен, сюлэмыд ӧз куалекты ке, фараонлэн шӧйызлэсь лэсьтэм та шудтэм юртъер пушкы ӧс лэсьты. Мон кинжалме мычи. - Малпаськыны бер ни, - вазиз Клеопатра. Ӟаректэм чебер ымнырзэ мон пала берыктӥз но кышкаса лызэктэм бадӟым синъёссэ шорам мертчытӥз. Кинжалэз кырмиз, пиньёссэ куртчиз. Улэп эксэй кышнолэн киыз мертчиз куинь сюрс ар талэсь азьлон кулэм фараонлэн мугораз.... Колодча выллапалась, огназ кельтэм евнух дорысь, ӝуштэм куара кылӥськиз! Кыкмы ик тэтчим. Шыпыт. Вылӥысь лябыталэс югыт пыре. Чурытомем мугорез таркаса, ми пась лэсьтӥм. Кинжал пум весь йӧтылэ кӧт пушкысь изъёс борды. Клеопатра кизэ мургес месӥз но мае ке поттӥз. Сое югыт азе ӝутыса черектӥз. Изумруд чилектӥз но лулъяськиз кадь. Сыӵе арбериез адями ноку но ӧз адӟылы на, вылды. Пеймыт вож, туж бадӟым, кыед бокро выллем карыса вӧлэмын. Улӥяз котырес пус, таиз пушкын - инмар выллем Менкаурлэн, Шундыпилэн нимыз. Кышномурт кизэ лэзьяз но фараонлэн гадяз кисьтэм вӧйёс пӧлысь весь поттаз туж секытэсь изумрудъёсты. Огъёсыз волятэмын, мукетъёсыз ӧвӧл. Ваньзы пеймыт вожесь. Нош ки весь месӥськылэ но ӝутскылэ. Бератаз ми лыдъям сю ньыльдон тямыс из. Таӵеос быдэс дунне вылын ӧвӧл. Суй берпуметӥзэ лэзиськиз но изумруд ӧз шедьты - поттӥз туж бадӟым кык жемчуг. Соосты нокин ӧз адӟылы на. Жемчугъёс бинемын дэра юдэсэн. Озьы ми поттӥм узырлыкез. Али со чиль-дол ворекъя азямы. Изъёсын артэ - эксэйлэсь кужымзэ данъясь зарни пусъёс. Котырак пазямын ческыт зыно вӧйёсын возем басма юдэсъёс. Соос йырез жӧломыто. Пурысьтам Менкаур фараонлэн мугорыз табере чылкак таркамын. Султӥмы но юнгес кӧшкеманы шӧтамы. Сьӧд ужмес лэсьтэммы бере, мылкыдмы сӥяз уга. Табере ми ватосэз ум утчаське ни. Курдаса копак бакомимы. Мон киыным шонтӥ. Клеопатра фараонэз пельпумтӥз кутӥз, мон - пыдъёстӥз. Ми сое ӝутӥмы, сфинкс вылэ тубимы, куинь сюрс ар ӵоже кыллем коросаз понӥм. Отчы ик куямы басма юдэсъёсты. Коросэз ворсамы шобретэныз. Собере люкамы вань изумрудъёсты но чеберъянъёсты. Соосты бинялтӥ выл дӥсям. Кылемзэ Клеопатра ватӥз пияз. Секыт изъёсмес басьтыса, ми берпуметӥзэ учким на сӥё- дано интыез, коросэз, сфинксэз. Таизлэн зарнивуам ымныраз кыӵе ке абдрамон пальпотон шудэ, милемды мыскылляса сямен. Ми берытским но вӧлдэтысь пась пала вамыштӥм. Дугдӥм. Мон ӧти вылӥе кылем евнухез. Кин ке шыпытак но шимес куараен серектӥз кадь. Сыӵе шуэрски - евнух шоры черектыны ӧй дӥсьты ни. Шӧдӥ: тяпайтыны уг яра. Клеопатра тани-тани йырсазьзэ ыштоз. Гозы борды кырмиськыса, капчияк ӝутски вылӥ коридоре. Кӧйтыл ӝуа, евнух уг адскы. Со палэнэ кошкиз но умме усиз, дыр. Клеопатра шоры кеськи: гозызэ кусказ мед керттоз. Шуген-секытэн сое но поттӥ. Ми кӧня ке шутэтским но евнхуез утчаны ӧдъям. - Со кӧшкемаз но пегӟиз, - вазиз Клеопатра. - Быдӟым инмаръёс! Кин отын? Мон пеймытэ сак учки, кӧйтылме азьпала мычыса. Адӟем суред вирме кынтӥз. Евнух пуке, ымнырзэ из борддоре мертчытыса но киоссэ палэнэ сэрпалтыса. Со кулэмын! Синъёсыз быльккесэсь. Анлыэз но ӟок бамъёсыз ошиськемын. Шер-тур йырсиосыз пештырскемын. Ымныраз измемын верантэм курдам тусбуй. Шораз учкыса, визьдэ ыштод. Со гинэ кышкатысал ке! Ангес борды лэчыт гижыосын кырмиськемын туж бадӟым урткыӵ (лобась шыр). Пирамидае пырыкумы, со отысь лобӟыса потӥз но инбаме ышиз вал. Собере ми сьӧры берытскем из дуннее. Урткыӵ ошиськем евнух борды. Табере каллен гинэ ӟечыра. Горд синъёсыз шорамы учко но лек тылъёсын ӝуало. Долкаса ик чакласьком юрӟым урткыӵез. Пыдъёсмы куалекъяло, тани-тани жилькак лэзькозы. Лобась шыр туж кузесь бурдъёссэ шуак шонертӥз, купыртэм гижыоссэ кыскиз, ангес бордысь мозмытскиз но ми пала матэктӥз. Клеопатралэн ымнырыз доры вуыса, омыре ошиськиз, тӧдьы бурдъёссэ калленак выретӥз. Урмем кышномурт сямен чирак! черектӥз, колдэч пасе зымиз но корос пала ышиз. Мон катьтэммыса ланьырски борддор борды. Клеопатра лэзиськиз выж вылэ. Йырзэ суйёсыз вискы пачкатӥз но кесяськыны ӧдъяз. Нокызьы но буйгамез уг луы. Куараос пазьгисько, чузъяськыса берен дорамы вуо, кужмояло. Из гурезьёс тани-тани куашкалозы, кожалод. - Султы! - косӥсько мон. - Султы но сэрытак пегӟом татысь. Ишан берытскоз но асьмеды уйылыны шӧталоз. Али куалектӥд но ӝегад ке, тон бырод. Шонерскыса султӥз Клеопатра. Быдӟым инмаръёс! Мон ноку но уг вунэты кӧшкемаса ӟырдэктэм ымнырзэ но синъёссэ. Кӧйтылъёсмес басьтӥм. Кышкыт уйвӧтын кадь адскись шимес евнух вӧзтӥ вамышъяськом. Клеопатраез китӥз кырмыса валтӥсько. Вуим бадӟым коридоре. Татын кылле Менкаур фараонлэн кышноез. Азьлане бызим. Нош урткыӵ ворсаз ке куиньзэ ик ӧсэз? Ӧвӧл, ӧвӧл пытсам. Ми чаляк потӥм. Мон дугдӥ но берлозэ гинэ ӧсэз ӵогано кариськи. Планын возьматэм кӧльы борды йӧтски но, секыт излэсь вӧлэм ӧс йыгак! усиз. Кулэм евнух но вӧзаз шонаськись урткыӵ кылизы улӥе. Табере кошконо тӧдьы борддоро висъетысь. Меӵак вылӥе ӝутсконо. Макем секыт тубыны! Вольыт изъёс вылысь гылӟыса, Клеопатра сапкиськиз. Ӝыны сюресэз ортчеммы бере, со выльысь канжаськиз но кӧйтылзэ уськытӥз. Клеопатраез мон ӧй кырмысал ке, со питырасал. Кышномуртэ возьыны вырыкум, мон но кӧйтылме уськытӥ. Котырак тём-тём пеймыт луиз. Оло, шимес ишан ми котырын гожеръя на? - Юнматскы! - кури мон. - Яратонэ, юнматскы! Тубыны шуг, но кема ӧвӧл ни. Татын пеймыт ке но, коридор шонер, нокыӵе могӟетъёс ӧвӧл. Изъёстэ нуыны секыт ке - кушты. - Ноку но, - мырдэм сипыртӥз, лулзэ шедьтыны вырыса. - Оломае гинэ чида но изумрудъёстэ сэрпалты. Соостэк мон куло! Тӥни соку мон адӟи та нылкышнолэсь быдӟым лулзэ. Копак пеймыт интыын, кӧшкемаса но куалекъяса, улонлы туж бадӟым кышкытлыкез шӧдыса, со шымырскиз бордам. Йыр поромымон меӵ пагӟаетӥ тубыны ӧдъяз. Вамыш, мукетыз... Ваче ки кырмиськыса мынӥськом. Сюлэмы тани-тани путоз. Оло йыркуръяськись, оло жалясь инмаръёс милемды бератаз вуттӥзы вылӥе. Пирамидае пырон пасьын чилектӥз бездыт толэзь. Ми вуим потон доры. Ыркыт уй тӧл пельтэ ымнырам. Ачиз инбам милемды юнматэ кадь. Пасетӥ мычиськи но, из борды пыкиськыса, Клеопатраез кыски. Со потӥз, улӥе васькиз, музъем вылэ пограз но вырӟылэмысь дугдӥз. Дырекъясь киыным зӥби бергась изэз. Таиз тып-тып пуксиз азьло гутёяз. Пирамидае нокин но ӧз пыра кадь. Мон улӥе тэтчи. Евнухен ӵош ӝутэм чарпа гурезьмес куашкатӥ но Клеопатра шоры учки. Йырсазьзэ ыштэм. Суэн но тузонэн шобырскем ымнырыз пурысь ӧвӧл - ӟар-ӟар бездыт. Оло, кулэмын? Гадяз йӧтски. Сюлэмыз йыгеттэ. Ачим но катьтэмми. Луо вылэ пограй. Ӧжытак коть шутэтскыны кулэ. Мырдэм пукси. Египетлэн эсксэезлэсь кышномуртлэсь йырзэ понӥ пыдес вылам. Сазьтыны вырисько. Кыӵе бордаз кыскись со! Чебер али но, жуммем дыръяз, кузь йырсиоссэ лэзьяса! Сюлэмме шымыртэ толэзь пиштэм улсын синмаськымон ымнырыз. Клеопатралэн тусбуез но йыртэмамез сярысь тодэ ваён ми вадьсысь пирамидалэсь но кемагес улоз. Йырсазьзэ ыштэмез бере, ымныр вылысьтыз ышиз алдаськись но кескичъяськись вужер. Кылиз на инмарен суредам кадь тус гинэ. Уйлэн пеймытэз сое небӟытэ. Мур ум Клеопатраез кулон сямен люкиз нуналмысь сюлмаськонъёслэсь. Синме вошъяме уг луы со бордысь. Сюлэмы яратыса путыны медэ. *** Кызьы верамын ни вал, Клеопатра, узырлыкез киултыса, копак воштӥськиз. Римысь Антоний кивалтэм улсын лыктӥсь войскоослы пумит нокыӵе война ӧз ялы. Ожмаськем гинэ ӧвӧл, Клеопатра куное мынӥз Антоний доры. Гармахисэз сьӧраз басьтӥз. Таиз, огшоры медо музэн, кышномурт мышкын сылӥз но часлы быдэ дырез ивортылӥз. Клеопатра куноос пӧлын йӧнтэмъяськиз. Туж бадӟым жемчугез уксусын сылмытӥз но юиз. Отӥяз Антонийлы туган кариськиз. Кулэм фараонъёс юриськизы-а Клеопатра вылэ? Бен. Со но Антоний асьсэды асьсэос быдтӥзы. Шудзэ ӧз шедьты Гармахис но. Сое каргазы быдэс Египет но отысь калык. Гармахисэз улэп дыръяз ик ватӥзы. Озьы йылпумъяське Генри Хаггардлэн "Клеопатра" романэз. *** Эшшо кӧня ке кыл пирамида сярысь. Азьвылгес мон гожъяй ни: куд-огез лыдъяло, эмъясь кужымез вань шуыса. Мыным со пушкын секыт вал. Синъёсы ӵуж-вож адӟизы, сюлэмы йыггетӥз, шоканэ сураськиз. Мыным бен мар? Уноез ӧз дӥсьтэ отчы пырыны. Кышкасьтэмъёс пӧлысь но данакез секыт сюресэз ӧз ворме. Озьы ке но, дунне вылын юн вӧлмемын на пирамидалэн йӧнатӥсь кужымезлы оскон. Газетъёс берло дыре ӵем гожъяло Индиысь тодосчи (учёной) Мутхукришнан сярысь. Со косӥз пирамида шоры выль сямен учкыны. Индусъёс космослэсь кужымзэ возьмато нимысьтыз пусэн - Шри-чакра шуиськись куинь сэреген. Со но пирамидалэн инъетэз (основаниез) ӵапак огвыллемесь, пе. Тодосчи лыдъя: вашкала индусъёс но египетъёс тодо вал куинь сэреглэсь (треугольниклэсь) аспӧртэмлыксэ. Шунды сиос пыр со ас бордаз кыске космослэсь но магнитлэсь кужымзэс. Пирамида - фараонэз ватон гинэ ӧвӧл. Со - Египетлэсь улэп эксэйзэ но ӵыжы-выжыоссэ эмъян инты. Фараонлэн кышноез секытэн дыръяз улӥз тужгес трос шунды сиосты кыскись пирамида пушкын. Отын вордскем нуны мытэ вал космосысен суредам улон сюрессэ. Индиысь учёнойлэн кылъёсыныз огъёсыз соглаш карисько, мукетъёсыз уг. Юа вал со сярысь пирамидаослэсь. Нош таосыз, уно сюрс ар талэсь азьвыл сямен ик, чалмыт уло. Печатланы дасяз А. ШКЛЯЕВ. "Кристом" Туж тодмо сутскисьтэм выло тусьты-пуньы поттӥсь "Тефлон" фирмаез али "Кристом" азьпалтэ, гожтэ француз "Либерасьон". Европаын но США-ын октябре сутскисьтэм выло выль табаен вузкарон кутскоз. Таба сюрс градусозь ӟырдатэм алюминий но литий суретлэсь лэсьтӥське. Кристом эшшо но ушъямонгес тефлонлэсь. Со 800 градус пӧсьлы но чида, сиён отын вӧйын пӧзьтытэк но уг сутӥськы, куръяса миськид ке но, номыр уз луы, ивортэ Авиньонысь "Ля Фуршет" ресторанын 4 ар ужам валтӥсь пӧрась. Нош тефлонэз корт мучолоен уд миськы. Кристом табаосты "Ситром" фирма лэсьтоз, "Тефаль" фирмалэн конкурентэз. Тусьты- пуньылы сяна сутскисьтэм "шобретэз" машиналэсь моторзэ но шобыртонэ кутозы. Озьы, пе, со 3 пол кемагес ужалоз. (Басьтэмын Интернет пыр.) *** Пинал визьма мумы-бубызэ Синву - бадӟым кужым, уката ик со пиналлэн ке синвуэз. Пичи вогъяськись пиналъёслэн бӧрдэмзы вузкаронын туж зол шӧдӥське, пусъе "Рейтер" агентство. 20 процентысен 40 процентозь шудон, ческыт сиён но мукет вузъёсты пиналъёс мумы-бубызэс бӧрдыса басьтыто, вера Лос-Анджелесысь рекламая "Вестерн Медиа" компания. Пинал кызьы бӧрдэ, сыӵе ик басьтэм вузлэн дуныз но. Озьы бӧрдыса но анай-атай пиналлы кулэ мае ке ӧз ке басьтэ, соку со визь тырыны кутске: "Нэнӥ, Барби мунёелы корка кулэ, отын со семья кылдытын мед быгатоз". Эрказмем пиналъёс узыр семьяысь уг пото. Соос тросгес оген будэтӥсь анайлэн яке атайлэн луо. Маркетологъёс анай-атайёсты 4 пӧртэм тодметъёсъя люко: "эш", "керетӥсь", "кузяз ветлӥсь" но "номыр мултэсэз". "Бӧрдӥсьлы" вылӥын гожтэм ньыль тодметъёс пӧлысь куинез тужгес но тупало. (Басьтэмын Интернет пыр.) НАТАЛЬ Гадь вылэз коттэ зор ву Улонысь учыр Урамын гужем. Озьы ке но, куиньмой ини кезьыт зор усе. Гужем шорын сӥзьыл вуэм, кожалод. Гопъёсын, сюрес дуръёсын зор ву пуке. Тани пичи урамысь таза мугоро, арлыдо пиосмурт потӥз. Мырдэм вамышъя, йырыз кыска, лэся. Йырсиез мучоло кадь погмаськемын, синъёсыз пыктылэмын... Шӧдске, кема гинэ юэ ни со. Усемезлэсь кышкаса-а, мар-а, юн-юн кырмиське кенер борды. Каллен, кызьы но озьы дор палаз вуиз ни. Зубектэм киосыныз капка кульчоез кыскиз но корказь пала вамыштӥз. Тубатэтӥ тубыны ӟигарыз ӧз тырмы, кышноезлы кеськиз: - Люба! Люба, пот шуисько! Ӧс сьӧрын пыд куараос кылӥськизы. Кышномурт туж дӥсьтытэк потӥз. Бамыз лы но ку, синъёсыз гырке выемын. Мугорыз но мугор быдӟа ӧвӧл - картэз вӧзын чельы быдӟа гинэ адске. Люба кенак паймыса сылэ кузпалэз азьын, синъёсыныз гинэ маке но юа кадь. Дырын-дырын ым пушказ гинэ инмарлы вазиське: - Осто, инмаре! Уть монэ, эн кушты. Осто, инмаре! - Я, мар отын сылӥськод? Уд адӟиськы-а монэ? - вожез потыса кесяське картэз. Кенак кышкаменыз со азе питран кадь вуиз, картсэ кунултӥз но дӥсьтытэк гинэ вазиз: - Ойдо, Аркаш, пыром. Бен малы тон юид? Ой, сюлмы. Ведь тазьы улӥд ке, кулыса но кошкод, уд но вала, ява. Юыны уг ни... - Кин татын кузё?! Мон! - юэм воргорон кышнозэ куспетӥ кариз.- Эшшо ке тон монэ улыны дышетӥськод?! Мон ачим тодӥсько кызьы улыны, тынад ужед но, кужед но ӧвӧл! Мон татын кузё! Мон, мон!!! - озьы шуыса, кышнозэ вӧзысьтыз донгыса лэзиз. Соиз тубат вылэ усиз. Мырдэм султӥз Люба кенак. Кисыриё бам вылтӥз курыт синкылиосыз васькизы. - Сиён вань-а? Мынам сиеме потэ! - воргорон нош ик кышноез шоры лекын кеськиз. - Ой, сюлмы, сюлмы, кӧня кулэ на чиданы? - гадь бордаз киоссэ поныса, ас понназ лушкем лулскылэ кенак. Картэзлы пумит ӧз ни вазьылы, корка шыпытак пыриз но кышнопала вамыштӥз. Кӧня ке улыса, картэз но пыриз. - Чаль, пуксьы,- ӝӧк вылэ тусьтыен ӝук пуктонъяз, сиськыны ӧтиз картсэ. Соиз пуксе ни вал, но ӝукез адӟыса, куспетӥ султӥз. Кема малпаськыса ӧз улы, тусьтыез выж шоры сэрпалтӥз но кышноезлы лекен вазиз: - Си ачид та парсь сиёндэ, нош мыным мукетсэ вай! - Мар бен пӧзьтом? - Котьмар! Пырыкум дась мед луоз ини сиёнэд,- ӝӧк вылэ мыжгиз. Тусьты-пуньыос ик жон! вазизы. Кышномуртлэн сюлмыз пыдтышказ вуиз. Кема аръёс улэ ини со тазьы кышкаса, нокызьы но люкиськемез уг луы. Быземез берегес ик кошкиз вал но, берен лыктоно луиз. Кытчы пырод, ӧд ке но лыкты, лыктод. Уен-нуналэн Аркаш капка азяз возьмаськиз. Али кадь ик син азе пуксё со нуналъёс... Малпаськонзэ шыдлэн уртчемез куспетӥ кариз. Тани сиён но пӧзиз ни. Шыдзэ плита вылысь басьтыкуз, Аркаш пыриз. Картэз сиськыку, нылпиоссы но ужысь бертӥзы. Жадиллям соос, секыт, лэся, йӧтэ ужзы. Сиемзы но потэ, но уг дӥсьто атайзы вӧзы пуксьыны. Нош Аркаш ассэ гинэ тодэ, нылпиосыз солы нокыӵе уг пото. Ӝоген изён дыр но вуиз. Кышномуртлэн синъёсыз кынисько ни, нош изёд-а соин? Умме усьыны уг вормы, ялан жугиськон муг гинэ утча. Люба кенаклы умой но ӧвӧл ни калыкетӥ кӧласа ветлыны. Картэз умме усем бере, гур вылэ гинэ выдоно кариськиз. Жадеменыз ачиз но валаса ӧз вуы - синъёсыз кыниськизы. Нош картэз сое гинэ возьмаса улэм, кожалод. Вожомыса султӥз, пурт кутыса, кышноез доры вамыштӥз. Люба кенак ма луэмзэ валаса но ӧз вуы - киыз копак вир луиз. Вань кужмыныз зӥбыса возе сое картэз. Озьы гинэ уд пегӟы. Кызьы но озьы кышномурт мозмытскыны быгатӥз ик, мырдэм но кызьы эмезьпудъёс пӧлы ватскыны ӟигарыз тырмиз на. Сӧсыртэм киысьтыз вир эшшо но золгес кошкыны кутскиз. Ярам ай, ки улаз кыӵе ке ӟустари шедиз, ӧжытак курткем карыса, суйзэ соин биниз. Нылпиосыз но бӧрсяз ик потӥзы. - Анай, ойдо больницае мыном, кулод ук тон тазьы,- бӧрдэ нылыз. - Эн бӧрды, нылы, ачиз ик ортчоз ай. Ӵуказеяз, вӧсезлы чидатэк, ачиз ик больницае мыноно кариськиз. - Малы милицие уд ивортӥське? - юа першал. - Бен отын ма карозы со шайтанэн? Верад ке, эшшо вожомоз. Пытсэт сьӧры келяса но мар толыкез? Дырыз ке вуиз, потоз, мон доры ик бертоз. Соку со монэ сопал дуннее келялоз. Люба кенак ачиз ӧз ке но дӥсьты нокытчы вазиськыны, гурт калык милицие ивортэм ик. Ӝоген Аркашез нуизы. - Кемалы меда? - кышномурт ӧжытак капчиен шокчиз ке но, кышканэз ӧз быры. - Мар луоз Аркаш бертӥз ке?" Нуналъёс ортчемъя, Люба кенак ӧжытак буйганы кутскиз. Азьланяз улонэзлы сюлмаз оскон каръяськиз. Галина КОНОВАЛОВА. Вуж Шудья гурт, Алнаш ёрос. Кин ӝужытгес? Америкаысь "Балнаум но Бейли" цирк но Гиннеслэн рекордъёсын книгаез споръясько: дунне вылын кин, пе, тужгес ӝужытэз адями, гожтэ Британиысь "Таймс" газет. Гиннеслэн рекордъёсын кгинаез тужгес но ӝужыт адямиен Уй пал Кореяысь баскетболистэз Майкл Риез лыдъя. Солэн ӝуждалаез - 2 метр 36 сантиметр. Нош циркын ужасьёс асьсэлэсь артистсэс, 2 метр но 44 сантиметръем Оранджеб Ханэз, верало. Солэн секталаез 191 килограмм, пыдкукез 53-тӥ размер. Малы ке но цирк уг лэзьы солэсь ӝуждалазэ мертаны. Озьы но, пе, адӟиське, сотэк-а пиналъёс оскытэк но оскыса артистлэсь юасько: "Агай, тӥ улэп адями-а?" (Басьтэмын Интернет пыр.) Кужымзы уг тырмы Грах ёросын ю-нянез утялтон секытэн мынэ. Дас куинь хозяйство пӧлысь куатез сӥзьыл ужъёсты йылпумъяны луонлык уг шедьто ни, уг тырмо воштос ёзъёс, эстӥськон. Кылем арын бусыосысь 345720 центнер ю тысь октэмын вал, туэ та дырлы - 101460 центнер гинэ. Л. БАКАЕВА. Вормисьёс пӧлын - "Удмуртия" ГТРК но 3-6 сентябре Таллиннын ортчиз ВИИ калык куспо телевидение пыр ужъёсты возьматонъя "Финн-угор дунне" фестиваль. Отчы пыриськизы Россиысь телерадиокомпаниос: "Марий Эл", "Мордовия", "Карелия", "Комигор", "Удмуртия" но Пермьысь "Т-7", озьы ик Венгрилэн, Норвегилэн но Эстонилэн кун телекомпаниоссы. "Удмуртия" ГТРК-ысь Л. А. Вахитов режиссёрлэн но В. Э. Шибанов телеоператорлэн "Быдӟым нунал", Эстон телевиденилэн ужъёссылы нырысетӥ инты сётэмын. Финляндиысь но Норвегиысь телевидениослэн ужъёсынызы ӵош призэн пусъемын "Удмуртия" ГТРК-лэн "Эзь" телепередачаез но. Удмурт Республикаысь Кун Кенешлэн Тӧроез А. А. Волков таин валче "Удмуртия" ГТРК- лы ӟечкылан ыстӥз. Удмурт Республикаысь Кун Кенешлэн пресс-службаез. "МЕТАЛУРГ" САНАТОРИЙЛЫ - 40 Сылал ву, дэри но рок-н-рол Ижкарысь одӥгаз пужымо-кызо тэле ышемын-выемын чибориё буёлъёсын пиштӥсь но пӧртэм-пӧртэм кирпич-излэсь ӝутэм улыно-вылыно юртъёс. Нюлэс сьӧры ватскемын ке но, та интыез удмурт шаерамы гинэ ӧвӧл, странамылэн пӧртэм сэрегъёсаз тодо. Кин огпол татчы вуылӥз, солэн сюлмыз выльысь но выльысь та чебер интыосы куриське "Металлург" санаторий та нуналъёсы кылдэмез дырысен 40 ар тырмонзэ пусъе. Вордскем нуналаз со уката но чеберскиз, егитомиз. Кизем-мерттэм турлы-турлы сяськаос пӧлын сылӥсь корпусъёсты вешало-маялто веськрес кызпуослэн но йӧно бадяръёслэн бергаса усись ӵуж-горд куаръёссы. Курортэз данъяса, инкуазь но сӥзьыл чеберзэ кузьма! "Металлург" - со сылало вуосын но дэриен эмъяськон санаторий, нюлэс-тэлетӥ калгыса но чагыр тылъёсын ворекъясь, синэз мальдытӥсь клубын эктыса-шулдыръяськыса шутэтскон инты. Татын эмъяло пӧртэм висёнъёслэсь. Тыршо ас удысазы усточиос. Чылкыт омыр, чебер инкуазь, лякыт кыл но туала эмъян амалъёс шутэтскисьёслы выль кужым сёто, азьланезлы оскон пыӵато. Г. ЮСАЕВ. Наталь Егит дышетӥсь, анай, кузпал. Шаркан районысь Зюзино гурт палась Сурон школаысь дышетӥсьлэн Людмила Перевозчиковалэн сюлмаськонъёсыз тырмыт, озьы ке но, со вамышъя улонлэн чеберлыкеныз артэ. Ижевскысь Удмурт кун университетысь художественно- графической факультетын басьтэм тодон-валанъёсыз нылпиослы но чеберлыкез усьтыны юртто. Г. ЮСАЕВЛЭН туспуктэмез. Литва нырысетӥ интыын Литва калык сярысь ассэ ачиз быдтӥсь нация шуыны уг луы, но улонысь ас мылкыд каремзыя кошкем адямиосъя со Европаын нырысетӥ инты басьтэ, ивортӥз аслаз книгаяз психология наукаосъя доктор Дануте Гайлене. Книгаез нимаське: "Соос улонысь кошкыны кулэ ӧй вал: Литваын астэ ачид быдтон учыръёс". Автор 10 ар ӵоже ужпумез эскерем. Ужез поттэмын "Тито Альба" издательствоын. Д. Гайлене верамъя, улонысь кошконлэн мугъёсыз таӵеесь: "калык йылолъёслэн но сямъёслэн лябӟемзы, улонын воштӥськонъёс", "секыт мылкыд, аракы юон борды кыстӥськон, эриктэман". Кышномуртъёсын ӵошатыса, пиосмуртъёс улонэнызы люкисько 5 пол тросгес. Та вакытэ ӵемгес асьсэды асьсэос быдто ужтэк кылем 20-25 аресъем пиос. Кышноос улонысь кошко 50-59 арескын. Книгалэн авторез валэктэ, литва калыклэн "лулчеберлыкез куашкамын". Со ӧтиз суицидэн нюръяськонъя нимысьтыз кун программа лэсьтыны. Иворъёсъя национальной служба. Удмурт делегация - Белоруссиын 14 сентябре Беларусь Республикае официальной визитэн Удмурт Республикаысь делегация вуылӥз. Соин кивалтӥз Кун Кенешлэн Тӧроез Александр Волков. Делегациын озьы ик ужазы Кун Кенешлэн Тӧроезлэн нырысетӥ воштӥсез Юрий Питкевич, Эскеронъя кун комитетлэн тӧроез Александр Кузнецов, Кун Кенешысь Экономикаын политикая но бюджетъя ялан ужась комиссилэн тӧроезлэсь ужзэ быдэсъясь Софья Широбокова, Удмурт Республикаысь сьӧрлон калыкъёсын кусыпъёсъя министр Виктор Викулов, Удмурт Республикаысь промышленностья министр Виктор Долгов, Удмурт Республикаысь гурт хозяйствоя но сиён-юонъя министр Василий Жуйков, "Ижмаш" ОАО-ысь генеральной конструктор Михаил Калашников, предприятиослэн кивалтӥсьёссы, журналистъёс. Та нуналэ ик Удмуртиысь делегация пумиськылӥз Беларусь Республикалэн премьер- министреныз Сергей Лингоен. Вераськонэ пыриськизы премьерлэн воштӥсез Леонид Козин, кунсьӧр ужъёсъя министр Иван Антонович, СНГ-ын кусып возёнъя министр Валентин Величко, промышленностья министр Анатолий Харлан, гурт хозяйствоя но сиён-юонъя министр Иван Шакодо, вузкаронъя министр Петр Козлов, коньдон ужпумъёсъя министр Николай Корбут но мукет официальной адямиос. Удмурт делегациез шуныт пумитамзы бере, премьер-министр шуиз: "Та пумиськон - Россиысь регионъёсын кусыпъёсты юнматон. Секыт вакытэ социально-экономической ужпумъёсты быдэстонын со шӧдскымон инты басьтэ. Милям мылкыдмы вань кема аръёс ӵоже ӵош ужан сярысь огкыл кутыны, валтӥсь удысъёсъя кредитъёс висъяны. Удмуртия кулэяське ке соизлы яке таизлы промышленной вузъёслы, сиён-юонлы, ми туннэ ик дась государственной заказэз быдэсъян борды басьтӥськыны". Удмуртилэн официальной делегациеныз пумиськиз Беларусь Республикалэн Президентэз Александр Лукашенко. "Асьмеос паймымон ӝог но вакчи дыр куспын гожтӥм белорус- удмурт соглашениез",- таӵе кылъёсын кутскиз вераськонзэ Белоруссилэн Президентэз. "Малпасько, тӥляд лыктэмды троссэ ужпумъёсты сэрттыны-пертчыны юрттоз. Шумпотыса пусйисько, пичи гинэ республикалэн Белоруссиен со быдӟа экономической кусыпъёс тупатыны кужымез тырмыт шуыса. Умой соиз но, делегацияды шедиз республикалэн тужгес но гажано адямиез - Михаил Тимофеевич Калашников. Вераны кулэ, дуннеын берло дыре кылдэм югдур троссэ странаосты экономика ласянь вӧсь кариз. Ваньмыз со шӧдӥське Совето Союзлэн азьвыл республикаосыз вылын но. Озьы ке но, шуг-секытъёсты вормыны быгатӥм, югдур тупатскиз. Кивалтон амалъёсты туннэ туж юн кырмыса возёно". Удмурт Республикаысь Кун Кенешлэн Тӧроез Александр Волков пусйиз: пумиськонлы дасяськон кык толэзь мынӥз, бадӟым уж лэсьтэмын предприятиослэн кивалтӥсьёссы ласянь. Соос но вераськонэ пыриськизы. "Ми ваньмы валаськом,- шуиз Александр Волков,- государстволэн инъетэз луэ экономика, соин ик Удмурт Республикалэн государственной политикаяз валтӥсь инты басьтэ дорамы поттоно продукциез ӝутон. Россия но Белоруссия, азьланяз ӵош ужаса, трос лэсьтыны быгатозы, солы юрттоз Удмуртиысь но Беларусь Республикаысь нимаз предприятиос куспын туннэ огкылэ вуон но". Пумиськон шуныт, ог-огдэ валан мылкыдын ортчиз. Собере Беларусь Республикалэн Президентэз Александр Лукашенко но Удмурт Республикаысь Кун Кенешлэн Тӧроез Александр Волков пресс-конференция ортчытӥзы. - Нырысь ик, ма сярысь курисько,- вазиз журналистъёслы белорус Президент,- вералэ эшъёсмылы, белорус выжыысь адями, ӟуч адями кадь ик, котыр ласянь оскымон. Озьыен, шунды пуксён палан но югдур умой луоз, соиз ласянь эн шугъяське. Со сярысь одно ик ивортэ удмурт музъем вылын улӥсь синмаськымон калыктылы. Мон котьку ик мыло-кыдо вуылӥсько Россие, учыр тупаз ке, шумпотыса мыно Удмуртие но. Ми ӵош ужан сярысь пыр-поч кенешим, кусып возём оборонной комплексысь предприятиосын но. - Матысь дыре,- шуиз пресс-конференциын Александр Волков,- тупатоно азьвыл гердъёсмес, тупатоно но азинтоно. х х х 14 сентябре нуназе бере Беларусь Республикалэн Обороная министерствояз ужасьёсын Офицеръёслэн юртазы вакчияк пумиськон ортчиз. Отысен удмурт делегация мынӥз белорус парламентарийёс доры. Татын азинскиз кык республика куспын ӵош ужан сярысь вераськон. Александр Волков люкаськемъёсты тодматӥз Удмурт парламентлэн ужан амалъёсыныз. х х х 15 сентябре берпуметӥез пумиськон ортчиз беларусь Республикалэн Мукет кунъёсын экономика ласянь кусыпъёс возёнъя министерствояз ужасьёсын. Отчы пыриськизы Белоруссиысь Правительстволэн членъёсыз, банкъёсын ужасьёс, куд-ог предприятиослэн но учреждениослэн кивалтӥсьёссы. Беларусь Республикалэн но Удмурт Республикалэн Правительствооссы куспын экономикая, вузкаронъя, научно-технической удысъя но культураез азинтонъя огкыл гожтэмын. Удмуртиысь делегацилэн Беларусь Республикаын ужан нуналъёсыз таин йылпумъяськизы. Удмурт Республикаысь Кун Кенешлэн пресс-службаез. Наталь Чиган пинал шудогес Уксё поттон амалъёс ӧжыт ӧвӧл, лэся. Но таӵеез сярысь мон ӧй кылылы на вал. Ижысь 4-тӥ нылпи больницаын пиеным кылльыкум, мукет анайёсын ӵош, жаляса но паймысв учкылӥм куштэм нылпиос шоры. Соос татын ӧжыт ӧвӧл, интыямын нимаз палатае. Ми, нунымы ӧжытак "уа!" каре ке, чальгес сое киямы кутӥськом, штанизэ воштӥськом, нош та нылпиос доры анайзы бызьыса уг мыны. Со ӧвӧл вӧзазы. Медсестраос, санитаркаос соосты чаклам дыръя сюдо, кутэтсэс вошто. Нош ки йылазы нуллыны но, котькуд пальпотэмзэс возьмаса сылыны, ӟабыльтыны медсестраослэн дырзы ӧвӧл. Практиказы дыръя студентъёс тросгес соосын выро ини. Пиналъёс пӧлын трос церебральной параличен висисьёсыз, шӧтэм вордскемъёсыз, пӧртэм лулсэр висёнъёсын курадӟисьёсыз. Вань пӧлазы тазаосыз но. Но татын ньыль толэзь ӵоже кылльытозязы (нылпи юртэ ньыль толэзьысен гинэ куто), тазаосыз но висьыны ӧдъялозы. Нылпилы уго ӵемгес кырын но юмшаны кулэ, весь котыразы бергано. - Малы меда куанеръёсты курадӟытыны ваё, вордэмзы ке уг поты? - чигиськыса юало анайёс. - Кызьы малы? - паймиз медсестра.- Уксё понна. - Кыӵе уксё? - Нылпи ваем понна сюрс манетлэсь трос сёто ук. Со кӧня ке дыр ӵожелы юыны тырме. Собере нош ваё. Вань араз кык пол ваисьёсыз но. Ваё но кушто. Нош уксёезлэсь кепыр уг пото. - Соку со пособиез больницалы мед сётысалзы, ачиз анай уг утьы бере. - Уксё сётӥське кышномуртлы нылпи ваемез понна. Нош кыӵе нылпи ваиз, утёз-а со нылпизэ, созэ асьме закон уг чакла. - Нош нылкышно врачъёс уг валало шат, нылпи урод вордӥськоз шуыса? Алыны уг луы-а сыӵе кышномуртъёсты нылпи ваемлэсь? Али куд-огезлы секытэн луэмлэсь утись эмъюмъёс но дунтэк сётъяло кадь. - Законъя алыны но уг луы, сыӵеосыз нылкышно консультациосы но уг ветло. - Нылпизэс берен басьтӥсьёсыз чик ӧвӧл-а? - Одӥг-ог, но туж шер. Созэ но чиганъёс. Сӥзьыл ваё но тулыс басьто. Толалтэзэ, пе, возе, милям нылпи утялтыны дырмы ӧвӧл, ужано. Нош тулыс шуныт луиз ке, сьӧрамы нуллыны луоз ни, шуо. Жаль пото пинал нылъёс. Соослэн нылпиоссы но чырткемесь, тазаесь. Но кӧня ке дыр ортчоз, сюлэмзы кыскоз но... бер луоз. Кудӥз огпол янгышаса гинэ но нылпи ваёно луэ уго. Нош анайёссылэн валамзы, юрттэмзы уг поты, нунызэс больницае кельто. х х х Россиын котькудӥз куатетӥез семья нылпи вайыны уг быгаты. Со дыре ик котькуд нунал "кулэтэм" пинал вордӥське. Ӵемысь со висись, ӧлексы луэ. Нылпиез Инмар кузьма, шуо. Озьы ке, малы-о уг вала, кинлы сое кузьманы? З. РЯБИНИНА. Наталь Шуд лобӟиз, бурдъёсыныз шонаса Купеын чалмыт, ваньмы шыпак кариськыса кылзӥськомы сюресчимылэсь, арлыдо удмурт кышномуртлэсь, мадемзэ. Уг тодӥськы, марлы со ваньзэ милемлы "кисьтэ". Кема аръёс ӵоже люкаськем сюлэмвисёнзэ кинлы ке верамез потӥз, дыр. - Кык пи вордӥ мон. Кузпалы кыз улэ пачкаса кулӥз. Бадӟымезлы, Петяелы, соку куать арес вал, нош пичиез, Мишие, куиняз мынэ. Со дырысен мон соосты огнам будэтыны тырши, дышетӥ, армие келяй-пумитай. Бадӟымез пие, армиысь бертэм бераз Иже заводэ ужаны кошкиз, пичиез гуртэ кылиз. Аръёс ортчо, нош Петяелэн весь кышноез ӧвӧл на. Бертылыкуз кен сярысь поттылӥсько но, "вуом ай, анай", шуэ но пельпумам веша. Огвадес кемагес ӧз бертылы, сюлмаськыны кутски вал ини, нош вуиз но - кенэн. Э-э, мар луиз соку сюлэмы, кыӵе шумпотӥ, пиме шудоен адӟыса, кыӵе мусояса учкылӥ кенэ шоры. Собере Валялэн анай-атайёсыныз тодматскимы, толэзь ортчыса, сюан лэсьтыны вераськимы. Кыӵе шудо вал мон соку, ӧй ветлы кадь, лобай гинэ. Вуиз кема возьмам нунал но. Ӝӧк выл тыр сиён-юон, бубыли кадь выль кен, корка тэронтэм куноос. Гожтӥськизы гуртамы, клубын, отысен сизьым выжзэс утчаны кошкизы. Кошкизы но... ӧз вуэ ни. Сюрес вылын возьмам соосты сьӧд адӟон. Шулдыр сюан интые, нылпиосынымы пыраклы люкиськон нунал вуиз...Мар вал соку монэным, Валялэн анай- атаеныз, вань ӵыжы-выжыосынымы, сое дыр гинэ тодэ на. Кышномурт вера но вера, бам кузяз синвуосыз питырало, куараез дырекъя. Ми я со шоры, я ог-огмы шоры учкыса кылзӥськомы.- Но улон эшшо дасям на шуккетсэ. Со кӧшкемыт учыр бере, ар ортчыса, Мишие эшъёсыныз шур дуре пыласькыны мынӥллям. Пие меӵ ярдурысь вуэ тэтчем, зымем но уг ни, пе, поты. Эшъёсыз, вуысь поттыса, больницае келяллям. Врачъёс шуизы, туж зол, пе, сюрлыез шуккиськемын. Со дырысен пие валес вылын. Сыӵе чырткем, кужмо, чебер пие ӧлексы кылиз. Учкеме уг луы солэн курадӟемез шоры, сюлэмы пилиськыны турттэ... Тӥни уго, сыӵе со улон, сётэ ке сётэ ини, басьтэ ке - ваньзэ ӵош. Кемаласьгес вал ини та учыр, но со кышномуртлэн верамез, бӧрдыса гордэктэм синъёсыз али но сюлэмме позырто. Мон уг тодӥськы ни кытын, кыӵе гуртын вылэм сыӵе адӟон, вунэтӥ ини зэмос адямиослэсь нимъёссэс, али но жалясько: быгатӥ меда мон соку буйгатон кыл вераны, жаляны. Мар понна со быдӟа адӟон ыстэм инмар одӥг кышномуртлы? Малы чиданы луонтэм куасалтэ? Л. БАКАЕВА. Очерк Быркыт Удмуртъёс ӝог дышо котькыӵе удыслы. Музъем ужез яратӥсь выжыосмы пӧлын но данак ини тодмо тодосчиос, гожъясьёс, суредасьёс, крезьгурчиос, эмъясьёс, дышетӥсьёс, ужбергатӥсьёс... Тужгес шӧртчиосыз уг кӧберало ӝуждалалэсь - асьсэлы оскыса но дӥсьтыса серметало чагыр инэз кечат но вамат гожмась бурдо машинаосты. Кужмо "якъёсты", "тушкаосты" но "аннушкаосты" омыр сюресъёс кузя тыл кадь ӝог валто удмуртъёс Владимир Стрижов, Алексей Широбоков, Валерий Садиоков, Владимир Симаков... Владимир Кутявин вынъёсызлэсь вӧжогес (мӧйгес). Баблес пилемъёс сьӧрын - буй ӧрӟи кадь: пумтэм-йылтэм ингожъёс вискысен чарпут (ӟуго-мого) тугаськем сюресъёс борды сьӧлтаськыса но та адями уз йыромы - "ваёбыжзэ" урткыӵ музэн сэзъялскытоз. Бурдо машинаезлэн штурвалэз сьӧры воргорон пуксиз ог куамын ар талэсь азьвыл. Инбам луиз солы эрик но, дор но. И. Тылож дыръя Пилька Олексей партизан вал. Пӧртэм выжыосысь огарлыдъем ёзъёсыныз ӵош ньыль ар ӵоже сӥсъяз-поръяз белорус музъем вылысь лысо но куаро нюлэсъёсты. Тылож йылпумъяськем бере, дораз соку ик ӧз берты. Синазькыль тушмонэн ваче син нюръяськыку, гуртысь уноез воргоронъёс йырзэс ож лудэ кельтӥзы. Улэп кылемъёс пӧлын ялӥзы: кузётэм юртъеръёсысь семьяослы ӝегатскытэк юрттоно, соосты ки улэ басьтоно. Пилька Олексей ӝимиз Волка гуртэ. Чылкак пеньӝу вылэ кельтэм починкаын горд атас али гинэ шуэръяськем кадь: ваньмыз сузмытэмын. Сопала-тапала шонаськыса-ӟечыраса сылӥсь куашкам но ёзнаськем юртъеръёсты адӟыса, ош кадь таза мугоро пиосмурт ӧз куалекты: уж борды саесъёссэ пужалъяса басьтӥськиз - удмурт воргорон кык ар ӵоже кивалтӥз татысь колхозэн. Гуртын пиосмуртъёс ӧвӧл бере, казакнылъёс лачак. Олексей синмаськиз ыгы кадь ӝабрес белорус ныллы. Вань музонъёсыз пӧлын Ядвига тужгес чеберез но етӥзэ кадь. Удмурт пи но шуш но уляби ӧвӧл. Ог-огзэс ӟырдыт яратӥсь егитъёс ӝоген кузпалъяськизы - пичияк сюан нерге шудӥзы. Володь пизы ньыльпыдъяськылыны ӧдъям бере, улы (семья) бертӥз Удмурт шаере. Воргоронлэн вордӥськем улосвылаз вуыса, Юкаменск ёросысь Чури гуртэ ӧз кожы - Иже интыяськиз. Быдӟым тылож вакытэ улон-вылон татын но таркаськиз бере, белорус музъем вылысь вуэмъёслы сьӧрлось бертӥсь музон куноослы сямен ик висъязы ньыль сэрго пурысь барак. Школаын дышетскись шӧртчи пиёк нуналысь нуналэ жальмаса учкылэ чагыр инме. Кытчы меда сокем ӵошпыд вортто асьтаркан (пумтэм-йылтэм) дуннеын ог-огзэс уйылыса шудӥсь но эркынласа калтыртӥсь пуштрес но лусьтрес мамыкъёс? Кинэ меда ялан нуо-ваё сопала- тапала гудыръяса лобась одӥг оло кык бурдо самолётъёс? Володь ачиз но уг тоды, малы инбам солы золгес яра. Юлтошъёсыз вожомыса музэн уйбыртыло зарезен, нош со уен-нуналэн куатланыса лякылысал турлы пумо чибор "ваёбыжпиоссэ". Аресэз вуиз ке, со но ӝутскоз ай, дыр, чагыр инме. Синсузёнтэм дуннеез гожмалоз кечат но вамат. Сыӵе учыр кемдӥз ке, оло, батыр но луоз ай. Быдӟым тылож дыръя тӥни ук кыӵе ӧрӟиос вылӥллям Иван Кожедуб но Александр Покрышкин. Экелэн адӟонэз ву вылэ саникен гожтэмын ӧвӧл. Школаын дышетсконзэ йылпумъяса интыяськиз Ижысь одӥгаз заводэ. Нош ваньмон дыръёсаз волятылӥз аэроклубе нуись сюресъёсыз. Быдэс улонзэс инсьӧрен герӟаны малпась ӧрӟипиосты татын дышето ини ӝуждалаен эчешыны. Чупрес но ӝабрес пиёк Пероггурт музъем вадьсысь инбаме ӝутске но синмыз вӧсь луытозь "йыгыръя" зарни шундывуэн пылатэм сайкыт улосвылэз. Ӝуждалаез яратыны дышетӥсь Василий Загуляев, кӧня ке вамышлы гинэ озёлтӥськыса, сьӧлыктэм нуныос азьын дырын-дырын маскаръяськылэ: - Тӥ, пиос, ӟыгыръялэ ай баблес пилемъёсты. Нош мон палэнысен учко: дасесь ни-а мынам ӵуж ымдуро ӟиллёпиосы чагыр кесэгез чупышъяны? Пельзылы оскытэк, огпол чылкак шуэктэм пиос музъем вылысь зуркак ишкалтӥськизы. Володь тубиз тужгес вылӥе. Собере шуак юбояськиз кадь. Но йырсазьзэ ӧз ышты. Укыр жальманы яратӥсьёслэсь йырзэс кыӵе амал тужгес поромытэ ай? Огинтыяз пичи но долкатэк, пиёк шуак лэзькиз улэ, быркыт кадь ӝутскиз вылӥе. Кӧня ке пол котыртӥськиз Пероггурт вадестӥ. "Кыӵес" усто пӧрмиз. Улӥын "визнаськыса" сылӥсь Загуляев лэчыт синъёсыныз соку ик учыртӥз бабалес пилемъёс сьӧрын укыр перияськись ӧрӟипиез. Ваньмызлэсь етӥз "позыръяське" Кутявин. Нош кызьы ай талэн дарт пуйыяз тылпу куштоно? Эке музъем вылэ тэтчем бере, дӥняз йыг-йыг вамышъяса лыктӥз но батыр пельпумъёсаз атай музэн чабкылыса кырмектӥз: - Вир шукыяськымон, Володик! Ворпо ингожъёс вискын азьланяз но тазьы ик йыр поромымон "берланьяськид" ке, нимо-дано ас луод ӝоген. Укыр ушъямез кылыса ӵыжектӥз пиёк, но дышетӥсезлэсь кылъёссэ ныр вылаз ӵупиз. Чагыр инбамез кечат но вамат котыръяны малпась ӧрӟипиос пӧлын одӥг но ӧвӧл луд кеч сюлэмо аргамакъёс. Нош аэроклубысь агайёс лултэм эшакъёс (ишакъёс) кадесь: шӧртчиоссэс тылӝуэ выллем дасяло. Пыдулзылэсь юнлыксэ но сюлэмзылэсь чиданлыксэ ӟеч-ӟеч эскерон вылысь, быркытпиосты огпол омырысен зол-зол "сэзъялтыны" малпазы. Музъем вылысен ик бадӟым ӝоглык басьтыса, гаӵкес бурдо "аннушка" пукыӵ вень музэн тюаз синсузёнтэм вылӥе. Тупатэм ӝуждалае мертчиськыса, оген-кыкен зӥръяз ӧрӟипиосты. Ачиз оланьгес озёлтӥськиз... Парашютэзлэн гозыосыз борды ур-вар ӝабырскыса, Володь керекъяськыса учкалтӥз улӥе. Отчыозь, музъем дорозь, укыр кыдёкын кадь. Оло чидалод, оло уд... Някыръяськыны дышемын ӧвӧл Кутявин. Юлтошъёссэ утчан сямен, олань-талань уӵыр-уӵыр учкыонъяз, урдэскысьтыз шуак синйылтӥз омырын азьлань-берлань сэрпалляськись- кыйяськись мешокез. Володь соку ик тодмаз аэроклубысьтызы етӥз нылокез. Парашютэзлэн вылкыметэз (ворсэтэз) усьтӥськыны пӧрмытымтэен, мешок пушкын нылок чылкак ӝокам ни - кулонэз ымпумаз вуэм. - Дуняша, чидатскы! Мон али ик! - шимес шугадӟонэ шедем эшезлы юрттыны быгато кожаса, парашютэзлэн укноостӥз кечыръяськись пиёк кужмысь сузьтӥськыны выре тӧлъя кый музэн лопыръяськись гозыос борды. Тани мозмытоз со нылокез. Дуак тапалаз эзель киысь. Но ӟигарыз но дӥсьтонэз уггес тырмы. Вылӥын эли-кеби вырись адямиос ог-огзы борды гуп! мырӟиськизы но мыд-мыд пала туп кадь погыльскизы. Эзельзэ шӧдтэк шорысь пумитам нылмурт из сямен питырскиз али гинэ ӝужаны вырись ожо вылэ. Музъем вылын, пазьгиськем интыяз, пасьтана чызйиськиз пеймыт-гордмыталэс пӧсь вир. - От, шаньга! Пуппы йыр! - мылазь кисыяз чылкыт ныркышетэзлы сузьтӥськыны выронъяз, кӧтыз ӝож луыса но ӧтьымтэ синвуоссэ ӵушылыса, йыркуро лулӟиськиз пиёк. - Сыӵе етӥз нылокез утьыны ӧй быгаты... - Эн бӧрд, Володь, - укыр чигиськись егит эшсэ амалак буйгатыны выре улонлэсь мыддорин палзэ трос пол адӟылэм Загуляев. - Сыӵе тылӝуо кыӵесэ огпол гинэ уд шедь ай... Та учыр бере пыд йылаз кема султыны выриз быдэ вуись воргорон. Зэм, яраосыз озьы гинэ ӧз бурмелэ: урӟектэм гижлоосыз вылэ сылал трос пол пызьналлязы на. Пероггурт музъемен люкиськоно луиз, чылкыт сюлэмаз выжыяськыны вуэм виштыосты огломак утялтытэк. Тылыяськыны ӧдъям ӧрӟипиослэсь пиӝыжы бурдъёссэс юнматон вылысь, пиосты куинь арлы келязы Оренбург улосысь Бузулук каре. Армилэсь пичи но висъяськисьтэм инты егитъёсты котьмалы дышетӥз. Иже казакпи бертӥз, покчи лейтенант луыса. Шутэтскыкузы сюлэмысьтыз висэн-висэн кужекъятӥсь яраоссэ бурмытон но укыр пиналысен бырем нылокез огнын гинэ буре ваён вылысь, огарня ӵоже ыбыштылӥз аэроклуб вадьсысь возь вылэ. Луд вылысь ожо кемалась ӵужектэмын но пырдэмын ни ке но, зор вуэн гылтымтэ интыосын уӵерак-воӵерак адӟиськыло на кадь пельдӥне вӧсь луымон йыгась но йырсазез уйвӧт музэн бусась вир виштыос... Пероггурт луд вылысен огнуналэ ӵапак пумиськиз Бузулукын ӵош дышетскем эшеныз. Таиз, мултэс муртъёс кылэмлэсь кышкаса кадь, Володьлэн пеляз куалекъяса музэн сипыртӥз: - Омскысь кагаз вуиз - дышетскыны ӧтё... Кӧня ке нунал ортчыса, таӵе ик гожтэт вуиз Володьлы. Сибыр музъем вылысь тодмотэм агайёс оскыто: - Лыктэлэ дӥнямы - уд жалялэ. Вакчи дыр куспын дышетскыса, ас удысады ӟеч адями луэм сяна, татын тӥ кийыгыриен но шӧдыса быгатоды чагыр инэз кечат но вамат котыръяса чылкак лябӟем машинадылэсь сузмем ёзвиоссэ бурмытыны, лек тылын ӵушкам "ваёбыжыидылы" кыкетӥ улон кузьманы. Лобась эштылэсь сюлэмзэ кылзыны пӧрмытэм сяна, татын дышетскыса, тӥ луоды на вылӥ тодон-валанэн усто радиотехникъёс... Вылӥ но шоро-куспо тодон-валан сётӥсь училищеос вань Ульяновскын, Кировоградын, Бугурусланын, Краснокутын. Нош малы ай Омск? Вылаз ик, пиос малпало кадь зэмос лобась гинэ луыны... Кузь сюрес вылэ потон азьын юлтошъёс кема тунаськизы. Зэм, ас синъёсыныд адӟемед пельёсыныд кылэмедлэсь дуногес, дыр. Удмурт пиосты сибыръёс пумитазы, чылкак матысь тодмооссэс кадь. Соосты, Бузулукын дышетскыкузы ик ӟеч лобаны дышем ӧрӟипиосты, Омскын азьвыл ик синйылтӥллям ни. Укмыс толэзь уйвӧт выллем ортчиз. Тани соос, кыкетӥ пилотъёс, ӝоген пыраклы люкиськозы. Одӥгъёсыз кыстасько ини Ижевске, Свердловске, музонъёсыз - Новосибирске, Омске... Выжыкыл дуннеосты ялан утчась Владимир Кутявин но Владимир Зворыгин "огкутскемен киултыны малпазы" Якутиез. Мурт музъем вылысен паньтэмъёслэн сюресъёссы вайяськизы. Владимир Зворыгинэз келязы уй пала - Ангарые, Владимир Кутявинэз - шунды пуксен пала - Нюрбае. Та пичи гинэ гуртэ интыяськемын вылэм ачиз авиаотряд. Чылкак ӝыны метр кузьда гинэ шунась музъем вылын улӥсь адямиос нокыӵе шумпотонэз уг ик тодыло кадь. Уло пу юртъёсын. Асьсэлэн но коркаосазы лекос ӟоскыт бере, муртъёсты доразы пыртон сярысь уг ик малпаськыло. Иське, кытчы "шайяськоно" егит семьялы? Чылкак ӟудэменыз, авиаотрядлэн командирез ыстӥз Мирный городэ. Нюрбаын сярысь, татын, оло, ӟечгес, пе... Командир янгышамтэ. Мирныйын калык улэ кирпич юртъёсын. Сопала-тапала нуись пумтэм-йылтэм сюресъёсты шобыртэ асфальт. Зэм, улон инты ласянь татын но шуг-мог вылэм. Ульчаетӥ огпол пыдпыдэсъёсысьтыз тыл потытозь калтыртэмез бере, шуак синйылтӥз воргорон юбо бордысь таӵе ялонэз: лымшор пала шутэтскыны кошкись семья корказэ огдырлы кельтысал улон интылы ёрмись кие... Таӵе иворлы пумтэм шумпотӥзы кузпалъёс. Огдырлы шедьтэм липетсы куинь толэзь ӵоже утиз-вордӥз соосты. Отӥяз, мыд-мыдлань поръянъяз, Володь шедьтӥз уродос корка. Сое кышъян-поръян вылысь, авиаотряд висъяз сизьым сю манет коньдон... 2. Улон-вылонэз но, ужез но радъяськиз ни кадь, нош сюлэм весь утча олошайзэ. Огпол, бер уин лобакуз, инвис пуме уӵыр-уӵыр учкылонъяз синйылтӥз нюркуд вылын лошъяськись луло комокез. Улӥегес лэзиськиз но шулӟектӥз: нюркуд вылын ӝуштӥсь воргорон, сопала-тапала сэрпалляськыса, маке кыла-бура, кинлэсь ке юрттэтсэ вите. Тяпайтыны дыр ӧвӧл: таӵе дыръя одӥг гинэ минутлы ӝеган но бадӟым кайгулы пӧрмыны быгатоз. Самолётсэ му вылэ ӟеч-ӟеч интыяса, Владимир Алексеевич быж улаз тыл донгем пулё (коньы) кадь берганы кутскиз. Нюр вылын ӝуштӥсь воргоронэз дэра бушлатэн ӝик-ӝик бинялтӥз но ки йылаз ӝутыса пыртӥз "аннушкаяз". Штурвал бордаз куӵ (ӧрӟи) кадь ӝабырскыса, урткыӵ музэн ыбыштӥз дораз. Авиаотрядысьтыз эшъёсыз, та нуналэ кинэ ке юри витем кадь, уж дуразы малы ке ӝегатскиллям на вылэм. Бер уин пумитам шедьтоссэ паськыт ӟус вылэ лач-лач интыяса, чылкак шуэктэм воргорон тэлясь пу музэн тачыртӥз: - Али, бертыкум, нюркуд вылысь шедьти. Копак виресь. Орсмемын!.. Мазэ-созэ соку ик ятвылтэм воргоронъёс, азьвыл ик мае ке тодэм кадь, пинь улазы кӧжы шедем сямен, кит-кит серекъяны ӧдъязы: - Лулсэръёстэ эскерон вылысь, юри могдосъяським вал: огзэ юлтошмес горд буёлэн юри наштамы но нюркуд вылэ зӥртӥмы. Бертыкуд ӵапак со вылэ ик ӝимемед. Удмурт пиёклэсь сыӵе ербеза вылэмзэ чылкак ӧм тодылэ. Бушлат пушкы бинялтэм адями но со вискын сайкам ни: воргоронъёсын ӵош сюлмысь горе. - Ых, ноголёк-шунёк! нодтэм луэмзэ тодыса, нокин кылонтэм вылысь, ныр улаз нукыртӥз Кутявин. - Таӵе востэм лӥялэз котькызьы питыръяны луэ, дыр... Юмоке усемзэ тодаз вайылыса, дырын-дырын пӧсектылӥз Владимир, зэм, тылтэк ӝуась пӧсь сюлэмыз вылэ кезьыт ву киськаны ӧз дыртылы. Нюр музъемъёс вылын тудву куашетылыку, шугадӟонэ шедьыло чорыгасьёс. ...Самолётсэ пӧртэм тӥрлыкен тырмытыса, воргорон лобе вал Нюрбае. Ты вадестӥ ортчыкуз синйылтӥз ву вылын шонӥ-панӥ вырись адямиез. "Аннушказэ" улӥе ӝогак васькытӥз но, вӧзысьтыз корт юлтошсэ кияз ӝабырак кырмыса, тӧлперилэсь ӝог вуиз ярдуре. - Кырмиськы багор пуме! - кеськиз йӧ вылын копак шулӟектэм чорыгасьлы. Вуэ усьылыса чапчара шульыкмем воргорон вылысьтыз пуд секта сачыр виясь кот дӥсьсэ сэрпалтытэк ик, быронзэ шӧдыса выллем, корт борды акар кадь ӝабырскиз. Вань кужымзэ люкаса кыскиз сое ярдуре Кутявин. Вылтыртӥз нюлам ву жальыр-р! Бызиз ке но, кулонэн улон вискы ӝимем чорыгась утемын вал. Таиз, пушкыз тырыса кылзэ-ымзэ выретыны быгатытэк, утисез борды ӝик-ӝик ӟыгырскиз, синпумъёссэ ӵушылыны дыртӥз... Та палан ӟеч-ӟеч улыны-вылыны луонлыкъёс ӧвӧлэн, пиосмуртлэн кузпалыз кемалась лобӟиз дораз, нош ачиз весь волятъя уйшорысь омыр сюресъёсты. Картэзлэсь лекос мӧзмись Такъян чидамтэеныз ӟурыны ӧдъяз: - Мазэ шедьтӥд уй палась - берты Иже. Дор палад шунытгес но оскымонгес луоз. Ӵыдонтэм но аспӧртэмлыко инкуазьлэсь соку ик люкиськыны быгатытэк, огарня ёрос курадӟиз пиосмурт. Огӵукна ӧз мога: тыро котомказэ пельпумъёсаз сэрпалтӥз но Иже лобӟиз. 3. Авиапредприятиын ӝог вӧлмиз выль адями вуэм сярысь ивор. Тыл пыр но, ву пыр но потэм воргоронлы соку ик дэмлазы "аннушкаез" валтыны. Отӥяз "тушкаез" серметаз. Дор палаз, зэмзэ ик, омыр но чылкытгес, инбам но чагыргес кадь. Зэм, адӟонэдлэсь гур вылэ уд пегӟы, шуо. Краснодар музъем вадестӥ лобыкуз, пыдлон шуак чузъяськиз жоб куараен кесяськем. Сюресчиос, кузьылиос музэн, солань-талань бызьылыны ӧдъязы: шорлось радысь пинал нылмуртлэн сюлэмыз путэ ни. Солы ӝегатскытэк юрттоно. Сюресчиос пӧлын нокыӵе эмъясь ӧвӧл. Пинал стюардесса дӥсьтымтэеныз висись борды йӧтскыны курда. Владимир Алексеевич, шукрес иворез кылыса, интыяз пукыны ӧз чида: штурвалзэ вӧзысьтыз эшезлы кельтыса, висисез утьыны дыртӥз. Омскын малы но солы дышетӥзы вал: маке-со пишмытоз, оло. Шӧйӟектыны вуэм нылмуртэ небыт ӟус вылэ лач-лач интыяса, висись вадьсы мыкырскиз, солэсь шокамзэ кылзӥз. Отӥяз ныллэсь гадьвылзэ зӥбылӥз. Кисыысьтыз чылкыт ныркышет поттыса, сое ымдуръёсыз вылэ ӟеч-ӟеч бырттӥз но ымаз шокчиз, собере - ныраз. Висисьлэн йырсазьыз лыктыны кутскем бере, гондыргумылэсь сурет удӥз. Штурвалэз дӥне берытскыса, огинтыяз кема пукыны ӧз чида: выльысь салонэ потаз - нылаш чыс-чыс кӧлэ ни вал... ...Авиапредприятиысь кивалтӥсьёс нуналысь нуналэ золгес но золгес синмасько кыкетӥ пилотлэн Владимир Кутявинлэн вылӥ но паймымон устолыкезлы. Нош таизлэн "пуконэз татчыозь весь лапег ай". Сое "ӝужытгес карон вылысь", тодон-валанзэ йылэтыны дэмлазы Ульяновскын. Отысь бертыса, Владимир Алексеевич выльысь серметаз "тушкаез". Эскадрильялэн командирез огпол юри кылиз улӥе - кыкетӥ пилот огназ кӧня ке пол котырскиз аэропорт вадестӥ. Музъем вылэ лэзиськемез бере, арлыдоез воргорон пиналэзлэн быгатонлыкезлы вожъяськытэк ӧз чида: - Учки лобамдэ: йыромымон. Тылэ но, вуэ но пырай ни шуиськод бере, тазэ ныпъеттэ оп! шуыса гинэ сэрпалтод, дыр: коть ӵуказе ик командире пукты... Такем бадӟым сюлмаськонэз витьымтэен, Владимир Алексеевич, пыд йылысьтыз пыд йылаз кепырйыл посӥськыса, огэсэп лёгаськиз но капчийыл серектӥз: - Ай укыр вазь но еж кадь - сыӵе ӝуждалаез пыкъяны пӧрмыто меда?.. Эскадрильялэн командирез дары мешок кадь пуштӥз: - Шымырес-купырес: мар таӵеесь та удмуртъёс?! Киязы ӝабырскем шудзэс пиязы туйнаны уг пишмыто! Кымыс вылаз чӧлтӥськем бидырка йырсизэ кырымаз люкам чиньыосыныз сэзъялтыса, Владимир оскытэкгес учкалтӥз вылӥе: уд алда-а монэ, зарни юлтоше?.. 4. Адӟонэдлэсь гур вылэ уд пегӟы, шуо. Авиаторъёслэн но музонъёсызлэн янгышенызы валче, омырын но музъем вылын шуккиськыса-сӧсырмыса, али арлы быдэ быре ог куинь сюрс адями. Инмарлы тау: кужмо ин машинаен Владимир Кутявин кивалтыку, одӥг мурт но кулон ыме ӧз на ӝимы. Нош ачиз, музъем вылын шутэтскыкуз, югыт дуннелэсь ӧжыт гинэ ӧз люкиськы. Дас ньыль ар талэсь азьвыл Ижысь аэродромын пазьгиськиз "АН-24". Ужлэсь шутэтскись пиосмурт, "Нива" машинаезлы воштос ёзъёс утчаса, Куйбышев (туала Самарае) потӥз вал. ...Вордскем музъемез вылысь сабырак ишкалтӥськыса, мурт шаере но авиалайнер лачмытак пуксиз. Ӵуказеяз, одӥг бурдыз малпамтэ шорысь шуак ёзнаськемен, Иже дыраз ӝутскыны ӧз быгаты. Выльысь лулъяськемез бере, жадем сюресчиос утыр пуксьыны дыртӥзы. Владимир Алексеевич, вуззэ пыдлогес интыяны выронъяз, шорлось радысь азьвыл ик синйылтэм интытэк кыльыса, азяз пуксёнолась. Ижысь аэропорт вадьсы вуыса, самолёт, музъем борды ӝабырскемлэсь малы ке шурдыса кадь, ӝутскон-пуксён интыяз соку ик лэзиськыны ӧз быгаты. Витьымтэ шугадӟонэ шуак ӝимыса, экипаж вань кужмысьтыз выльысь мертаськиз Владимир Алексеевич, бурдо машиналэсь сямъёссэ-йылолъёссэ ӟеч тодӥсь адями, сюлэмыз шуг луэмен, уӵыр-уӵыр учкылыны ӧдъяз укное: аэропорт котырын чалмыт, куазь но чебер кадь... Со вие маке туж зол пуштӥз - быдэс дунне вылын, гуын кадь, чус луиз. Йырсазьыз каньылля лыктыса, пурты быдӟа куалдэм вӧлдэт пыр воргорон учкиз инме - адӟиз тём пеймыт зарезьын вожмаськыса уясь кизилиосты. Лымы вылын кыллемезыя валаз: самолётлэн мугорыз шуккиськыса пасяськем, бур палась бурдыз тӥяськем. Сюресчиос чылкак шулӟектэмын, туж зол вӧсь луэмын. "Пилиськем пурты" пыр потыны турттонъяз, воргорон йырзэ кӧня ке чуртнаны быгатӥз ик - отӥяз ӟигарыз ӧз ни окмы. Со вие ӵапак шӧдӥз: бур пыдыз туж зол вӧсь луэ. Кияз кутыса учкиз - шулӟектӥз: пыдысьтыз лыосыз кыре мычиськемын, катаез пыр вир ӟуз-з! вия. Висись интыез басыланы уг вала - эшшо кужмоя: пыдыз кыскаса висе, юмекъя. Со вие ӵапак сайказы туж зол вӧсь луэм сюресчиос но - кесяськыса бӧрдыны ӧдъязы. Владимир Алексеевич учкиз самолётлэн урдсаз: ярам коть - уг ӝуа. Нош котыртӥз, тылэ пырем кадь, мыд-мыдлань бызьыло кыӵе ке адямиос: аэродромын луэм шукрес учыр сярысь ивор соку ик вӧлмем быдэс городэ. Ӝыт пал, укмыс час котырын, ваньмыз пыд йылазы ни вал. Шудтэм учырен сэрен бырыны шедиллям кӧня ке сюресчиос но кыкетӥ пилот. Куалдэм вӧлдэт пыр учкылонъяз, Владимир Алексеевич пеймыт уин но синйылтӥз пал бурдо "ваёбыжпи" урдсын сылӥсь эшъёссэ. Соослы юрттэт курыса черектӥз. Юлтошъёсыз соку ик тэтчизы салон пушкы - сӧсырмем эшсэс, ки йылазы ӝутыса, каньылля поттӥзы. Эмъян юртысен тодмо луиз: воргоронлэн пыдъюмылыз тӥяськем. Чигиськем вадессэ соку ик сюязы но толэзь ёрос "лулъяны" выризы. Зэм, тӥяськем лыос малы ке ваче уг бурмо. Чылкак ӟудэм эмъясьёс киоссэс шеръяса чабкисько гинэ: Та выллем висисьёсмы ньыль толэзь ортчыса катьясько ни. Тон лобаськод бере, чаляк уд бурмы ай, дыр. Ар ёрос курадӟиз воргорон. Зэм, "ортчись гужемзэ келяны ӧз дырты". Лобаны огдыр ӵоже ӧз лэзе бере, авиапредприятиын эстӥськонлэсь кызьы кутӥськемзэ чаклаз-эскериз. Ӵукна, нуназе, ӝыт, пиньёссэ ваче куртчылыса но синпумъёссэ лушкем ӵушылыса, куймыр учкылӥз баблес пилемъёс вылын эркынласа эзылась-уясь шӧртчи авиалайнеръёс шоры. Иркутске, Москвае нуись сюресъёсты кӧня ке пол волятъямез бере гинэ лобаны выльысь лэзизы. Пыд улысьтыз шуак кылдэм адӟонзэ выльысь но выльысь тодаз вайытыса выллем, воргоронлэн нылыз, кызь кык аресъем Светлана, бубызэ, пыӵкылыса выллем, куддыр иса: - Со шудтэм нуналад кыкетӥзэ вордӥськид, шол. Владимир Алексеевич, синкашъёссэ ваче шымыртыса, ӝомыталэс инбаме ӝожомыса сямен учкылэ но, ымдуръёсыныз нуны музэн чопкетыса, понназ лушкем шыпыртылэ: - Кыкетӥзэ, кыкетӥзэ... Омырын, музъем вылын нуналлы быдэ сямен пазьгиськылӥсь самолётъёс-вертолётъёс сярысь шукрес иворъёсты кылыса, воргоронлэн мумиз, арлыдо Ядвига, мусоказэ, куддыр, пӧсекъяса выллем, дырын-дырын индылэ: - Баблес эшъёсыдлэсь мозмытскыны таки уд быгатӥськы, шол: чагыр кесэгъёсыд вылын юлтошъёстэ озьы ик ялан кужмо ӟыгыръялод шат?! Пиез, пумитаз юри мытылыса кадь, йыр йылысьтыз пыдэстэм дуннее синъёсыз пожаськытозь учке но, мусо пальышаса, сюлмысь тодаз вае тодмо кырӟанысь чуръёсты: чагыр кесэгъёс - ческыт но тыр-бур эрик. Нош ӝуждалаен одӥг пол герӟаськем адями соин уг люкиськы вань улытозяз. Зэм, мынон-ветлон берло дыре лекос дуноямен, омыр сюресъёсты яратӥсьёс чутрак кулэсмизы. Азьланяз, кин тодэ, чын сьӧлыктэм ӝуждалае самолётъёс, оло, кабзэ уз ӝутскылэ ни. Кунмылэн азьвыл йырыз Никита Хрущёв куке-соку шуылӥз ук: - Малы авиация? Ракетаосмы вань! Котьма ке но, таӵе кышкыт но тунсыко удыс быръемез пумысь воргорон пичи но уг кайгыры. Андан машиназэ омыр сюресъёс кузя валтылыса, со котыртӥз быдэс Россиез: вуылӥз Ӵук пала но Шунды Ӝужан дӥне, Уй пала но Лымшоре. Зэм, ог куамын ар ёрос ужаса, нокыӵе батыр но, нимо-дано ас но ӧз луы, нош инбамез пыраклы яратӥз. 5. Быдӟым Октябрь азьын воргорон нокытчы ӧз лобӟы. Уин адӟем чибор вӧтсэ тодаз вайыны турттонъяз, шуныт валесэз вылын шунды кадь эзылаз. Со вие быдэс коркаез зуркатымон таргетӥз ӧс дорысь пукон вылэ ӝикытак интыям телефон. Езлэн сопал пумысьтыз тодмотэм куара чингыли выллем жингыртӥз: - Алексеич, дасяськы! Тӧдьы дэремдэ дӥся но - али ик - Кун Кенеше! Отын туннэ ӟечкылало азьветлӥсь удмуртъёсты. Чингыли соку ик чалмиз. Нош Владимир Алексеевич пӧсь таба вылын тэтчась кӧжы кадь луиз: авиапредприятиязы азьветлӥсь но ӵушкыли выллем удмуртъёс сотэк но трос кадь - малы меда ӵапак сое бырйиллям? Пыд йылысьтыз пыд йылаз посӥськыса огэсэп кепырйыл лёгаськиз ке но, Тӧдьы юртэ вамыштӥз ик. Татчы пырыкуз, эшъёссэ кемалась ӟечкылало ни вал. Лэчыт синмо фотосуредась соку ик синйылтӥз музонъёсызлэсь чылкак висъяськись адямиез. Владимир Алексеевичез синмаськымон вормонъёсыныз ӟечкыласа но эшшо но устоесь азинсконъёс сӥзьыса, киоссэ тыл кадь ӟырдатъязы Кун Кенешлэн Тӧроез Александр Волков, Удмурт Кивалтэтлэн Йырыз Павел Вершинин, мукет адямиос. Та дано нуналэз весь тодаз вайытон вылысь, туала фотоаппарат кузьмазы. Нош тусбуйзэ интыязы ужысь азьмынӥсьёсты сӥлась- бурлась пул вылэ. Удмурт Элькунлэн дано муртъёсыз пӧлысь соку ик синйылтод батыр мугоро, чебер вылтыро воргоронэз. Вогыриё эгесэн дуръям котырет пушкысь, мае ке кужмысь шедьтыны турттыса кадь, вылӥе сак учко ӧрӟи синъёс. Укыр синсузёнтэм кадь со, инсьӧрлэн вӧлмытэз... Синсузёнтэм ке но, кем! х х х ...Ӝыт пал ӝомыталэс инбамез зугырак сэзъялтӥз дыбыртэм куара. Мон тэтчыса укно янак вылэ пыкъяськи. Пукыӵ вень кадь чырткем но етӥз авиалайнер, музъем вылысен ик бадӟым ӝоглык басьтыса, сайкыт улосвылэз кужмо бурдъёсыныз ӟыгыртэ но ӝуждалазэ мертаса сётске пыдэстэм инме. - Алексеич, тон, дыр?! - шуак кеськемме ӧй шӧды. Горд тыл пумитам ӧз вазьы. Нош синлысъёсыныз кырмыштӥз. Иське, бурдо со. Авиалайнер сюрессэ уз ышты! Елена ВИНОГРАДОВА. Тусбуйзэ пуктӥз Владимир КАМАШЕВ. Тодматскон сэрег Аб. 246. Оген кылем удмурт кышномурт, 24 арес, гороскопея Стрелец-Буйвол, дышетскеме средне-специальной, улӥсько гуртын вить аресъем пиеным но сизьым аресъем нылыным. Ваньмон дыръям яратӥсько киужен вырыны. Тодматскысал 25-30 аресъем воргоронэн. Улон интыме воштыны соглаш. Аб. 247. Оген кылем удмурт кышномурт, 23/162/62, гороскопея Овен-Коӵыш, дышетӥсь, ньыль аресъем нылы вань. Тодматскысал аслыз ачиз юн оскись воргоронэн. Аб. 248. Оген кылем удмурт кышномурт, 30 арес, Скорпион, улӥсько гоодлы матысь гуртын куинь комнатаен квартираын, будо вить аресъем пие но дас кык аресъем нылы, улон интыме воштыны пумит. Редакцилэсь: Лыдӟисьёсмылэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен чылкыт конвертэ понэ - ыстомы кулэ адресъя. Сюресъёс кортнамын Басьяськисьёсты вузъёслы мултэс дунъёс тупатонлэсь утён вылысь, Удмурт Элькунысь Правительство пӧртэм ужрадъёс кутыны сюлмаське. Нимысьтыз постановлениея республикаысьтымы Югдурез утёнъя министерстволы, элькунмыя госторгинспекцилэн управлениезлы, Россия Федерациысь монополилы пумит ужанъя удмурт улосвылысь управлениезлы, налогъёсъя полицилы, вузъёсты эскерон вылысь, быдӟымесь правоос сётэмын. Городысь потон сюресъёс вылын та нуналъёсы милиция но Россиысь транспортной инспекцилэн асьме шаермыя ёзэз машинаосты ӝегатыло но республикамылэн палэназ кошкись вузъёслэсь потэмзэ эскеро. Озьы туж уно ӝегатэмын ни Татарстанэ, Башкортостанэ, Санкт-Петербурге "кошкись" вузъёс. Одӥг нуналскын гинэ 50 сюрслэсь уно манетлы сиён-юон асьме доры кельтэмын вал. Ваньмыз со берыктэмын складъёсы но базаосы. Н. ЛЯЛИН. Снимокъёс вылын: Ижевск-Можга сюрес вылысь блок-пост пыр зэмлс документъёстэк озьы гинэ уд ортчы. Туспуктэмъёсыз В. КАМАШЕВЛЭН. Дунъёс лэзисько. Кытчыозь? Кылем арняе сиён-юонлы дунъёс син азьын 100 процентлы но, оло, йылӥзы. Таяз арняе соос одӥг-кык манетлы ке но кулэсмизы. Дэмласьком тӥледлы Ижевскысь Буммаш базарысь дунъёсын тодматскыны, магазинъёсысь дунъёсын ӵошатыны. Вузлэн нимыз Сылэ Кылем средаен ӵошатыса пызь 1 кг 4-5 манет -2 манет сакыр песок 1 кг 9 манет -2 манет сьӧдчабей 1 кг 8,5 манет -1,5 манет кӧжы 1 кг 4 манет -1 манет лапша 1 кг 7 манет -2 манет рис 1 кг 9-11 манет -1-2 манет йыды кеньыр 1 кг 3 манет ӧз воштӥськы тари 1 кг 3,5 манет -1 манет кӧс вӧй 1 литр 24 манет ӧй вал сылал 1 кг 2-3 манет ӧй вал "Крестьянское" вӧй 200 г 5 манет ӧз воштӥськы "Провансаль" майонез 5 манет ӧз воштӥськы "Петр И" сигарет 1 пачка 7 манет -2,5 манет спичка 1 коробка 20 копейка ӧз воштӥськы "Лоск" порошок 500 г 12 манет -2 манет хозяйственной майтал 4 манет ӧз воштӥськы Магазинъёс нош ик сиён-юонэн тырмизы. Но дунъёс бадӟымесьгес базарынлэсь. Сыӵе дунъёс базарын кылем арняе возиськизы вал. Кылсярысь, "Продторглэн" огаз магазиназ сакыр песок сылэ 11,5 манет, рис - 15 манет, сьӧдчабей - 9 манет, тари кеньыр - 4 манет. Вузкарисьёс малпамъя, дунъёс магазинъёсын матысь дыре уз кулэсме, малы ке шуоно, татчы соос дунояса вуизы ини. Нош кыӵе магазин, озьы ик вузкарись аслыз ачиз изъян вайыса ужалоз! Таяз арняе нянь дунояз 20-30 копейкалы, асьме дорын поттэм сӥль, йӧл, сыр - ог 15 процентлы. О. ВАХИТОВА. Гурт улон Ижлэн бакчаез начар ӧвӧл Дыртытэк, мылзы потытэк кадь, огез бӧрсьы мукетыз бушало бусыос. Толон гинэ тыро шепен веттаськись муос туннэ гыремын ни; радэн-радэн сыло куро зуродъёс; вож-вож ӝутске ӟег уд - вуоно няньлэн инъетэз. Калык верамъя, котьмалэн аслаз дырыз, аслаз вакытэз. Завьялово район республикаямы огез бадӟымез луэ, вылаз ик, сюдэ-вордэ со быдӟа городэз. Соин но, мукетъёсыныз ӵошатыса, сюлмаськонэз тросгес. Гурт калык понна гужемлэн самой кысык вакытэз ортчиз, шуыны луоз ни. Матысь нуналъёсы йылпумъяськоз тысё культураосты утялтон, соин ӵош азинске на картофка, бакча сиён октон. Хозяйствоос пӧлысь туэ ӟеч ю-нянь, гектарезлы быдэ 21,4 центнер басьтӥзы женвайёс. Ӵошатон понна: опытной станциын юослэн удалтонлыксы вуиз 21,9 центнерозь. Районъя 12,4. - Кӧс арез лыдэ басьтыса, няньзы ӧжыт уг люкаськы "Путь Ильича" колхозын, "Восход" эштосын,- шуэ Надежда Павловна Четкарева, гурт хозяйствоя управлениысь валтӥсь агроном.- Соос гектарысьтыз 15 центнер пала кутсазы. Чылкак музон югдур кылдэмын "Ожмос-Пургаын" но "Свободаын". Районъя татын тужгес но улӥ урожай люкаськиз: кыкетӥяз эштосын воксё 5,5 центнер гинэ. Малы? Солэсь мугзэ погыльто музъем начармем вылэ. Кидыс но туала вакытэ сыӵегес кизьыны шеде ни. Вылаз ик, ӟечгес интыос шедизы Завьялово МТС улэ. Таосыз, яна потэмъёс, гектарысьтыз кык поллы ятыр тысь кутсазы. Бусыоссы чылкытэсь, "Свободалэсь" жаг турын согиз. Секыт вераны, кызьы толъёзы ожмосъёс вуись толэз, маин пудозэс сюдозы. Валамон ук, пызьтэк-суралтэттэк йӧскадь йӧл-вӧй поттыны шуг. Будэтэм урожаез октон-калтонэн ӵош, ӟеч кузё вуоноез сярысь сюлмаське ни. Ӟег кизёнзэс нырысьёсыз радын йылпумъязы Азин нимо, "Путь Ильича", "Правда", "Восточный". Та хозяйствоосын кидыс дыраз муэ согиськиз бере, няньзы удалтыны кулэ. Бере кылизы "Урал", "Юськи", "Камское" но куд-ог мукет эштосъёс. Сентябрьлэн шорозяз кизён ужъёс быдтэмын вал. Валэс юосты аранэн-кутсанэн шӧдскымон ӝегаз Холмогоров нимо, "Ож-Пурга" но "Свобода". Ярам ай, куазь чебер сылэ: гужем шорын кадь, музъем ужасьлы сётэ на шундыё шулдыр нуналъёссэ. Завьялово район Ижевскен артэ интыяськемын бере, "кыкетӥ нянь" будэтон быдэсак сямен со вылэ усе. Хозяйствоос пӧлысь тужгес но бадӟым саклык картофка будэтонлы висъяло "Путь Ильича" но "Россия", мерттэмын 300 но 250 гектар вылын. Та нуналъёсы вань техника, ужась кужым куштэмын та культураез утялтонэ. - Кылем арен ӵошатыса, картофка туэ удалтэмын. Якшурын, кылсярысь, гектарысьтыз 159 центнер люкаське, Опытной станциын - 213, куд-ог интыосын 300 центнерлэсь ятыр но усиз,- шумпотон мылкыдзэ уг ваты Надежда Павловна.- Районъя гектарезлы быдэ 124,7 центнер. Ӟеч урожай басьто "Шабердинский", Холмогоров но Азин нимо, "Колос" эштосъёс. Татын вузаны но, пудо но сюдыны, кидыслы но тырмыт будэтэмын. Дыраз гинэ октыны сюлмаськоно на. Районын улӥсьёслэн эшшо одӥг бадӟым удыссы вань на - бакча сиён будэтон. Соин выре куать хозяйство. Мертто кубиста, ӵуж кушман, горд кушман - ваньмыз город понна. Валтӥсез луэ вазь но бер вуись кубиста - 360 гектарлэсь ятыр. Азьвыл аръёсы бакча сиёнэз вожмаськыса куто ке вал магазинъёсы, столовойёсы, пӧртэм учреждениосы, интыян ласянь али секыт. Басьтыны мылкыд карисез ӧз кулэсмы - продукция понна тырыны номырин. Соин ик хозяйствоос быгатэмзыя будэтэм урожайзэс тулысозь утьыны сюлмасько, возё асьсэ гуосазы. Собере толбыт вузкаро, калыксылы уждун тыр уксё люканы вырыса. Кубиста будэтонлэн бадӟым люкетэз усе "Родина" но "Правда" вылэ. Удалтонлыкезъя но та кык хозяйствоос огкадьгес ужало: гектарысьтыз быдэн 100 центнер пала урожай басьто, районъя - 72 центнер. Огъя вераса, Ижевсклэн бакчаез сокем начар уг адӟиськы. Ӵуж кушманлэн удалтонлыкез 121 центнерозь вуиз, горд кушманлэн - 132. Толбыт ӵоже город калыкез сюдыны тырмоз. Нялтас пусъем потэ скал кыскисьёсты но. Миым арен та дырен ик ӵошатыса, районъя йӧл тросгес кыско - скаллы быдэ 9,8 литр. Нош "Восточный" совхозын та лыдпус возиське 13-14 котырын. Сомындагес ик кыско Якшур гуртысь дояркаос, мималалэсь кык поллы умой ужало шабердыос. Гуртын улӥсьлэн - аслаз сюлмаськонэз, аслаз шумпотонэз но висёнэз. Огзэ пусъём: таиз ю-нянь утялтон вакыт, берло аръёсын ӵошатыса, каньылгес ортчиз. Эстӥськонлы, электрокужымлы ёрмыса сылон учыръёс ӧй вал. Огез гинэ жаль: чакламъя итымъёсамы ю тысь ӧзгес люкаськы. Ма шуод, малпамъя гинэ улыны уг луы, куазьлэн но адями азьын сямзэ возьматэмез потылэ. Л. МЕДВЕДЕВА. Наталь Сюлмаськон Бинем бугор питыра Гуртын улӥсь нылкышноослы, семьялы юрттон но анайлыкез но нылпиосты утён вылысь, Удмурт Республикаысь Правительствоен нимысьтыз ужрадъёс чакламын вал. Умояз-а бен гуртын улӥсь нылкышнолэн улон югдурез? Та пумысен Правительствоын нимысьтыз анализ лэсьтэмын вал. Ваньмыз сямен ик ёрос администрациос, предприятиослэн кивалтӥсьёссы нимысьтыз ужрадъёс кутӥзы 35 аресозь нылкышноосты ядохимикатъёсын, пестицидъёсын, дезинфицировать карись средствоосын ужаны алонъя. Озьы ик нылкышноослы уг яра тракторист-машинистлэсь ужзэ быдэсъяны, грузовой автомашинаосты нуллыны. Нылкышноослы отпусксы вӧзы ватсаса нуналъёс сётӥськыны быгатозы, мылкыд каремзыя, толэзьлы одӥг пол шутэтскон нунал висъяськоз - уждун со понна уз мыны. Соин валче гурт хозяйстволэн экономикаяз кылдэм секыт югдур гуртысь нылкышноос понна эшшо но золгес зӥбетэн берытскиз. Коньдон ӧвӧлэн, уг тупатӥськы пудо вордон удысысь тӥрлык. Селта, Юкаменск, Завьялово районъёсысь тросаз хозяйствоосын секыт ужъёс киын быдэсъясько. Ужез утёнъя службаослэн хозяйствоосы потамъёссы возьмато, секталаез ӝутъян-нуон нормаос уг быдэсъясько. Экономикаын секыт югдурен валче ужамысь дугдӥзы лулсэръёсты шутэтон, шутэтскон комнатаос. Секыт ужлы луыса, гуртысь нылкышноос пӧлын пумен йылэ ужан интыязы басьтэм висёнъёслэн лыдзы, трос шуккиськон учыръёс. 1996 ар понна гинэ Кизнер ёросын ужан интыын 58 шудтэм учыр луиз, пӧлысьтызы 17-ез вал нылкышноос. Гуртысь нылкышноослэсь тазалыксэс утён ужпумъёсты гурт хозяйствоослэн кивалтӥсьёссы асьсэлэн кенешъёсазы ӝутъяло, ёрос администрациос но уг палэнтӥсько та ужпумъёслэсь. Тужгес но сюлэмшугъяськытӥсь юанъёсты предприятиосын, ужась коллективъёсын эскеро, собере со пыре коллективлэн огкылаз. Озьы нылкышноос сярысь сюлмаськон трослы будэ. Тани Завьялово ёросысь "Урал", "Ижевское" гурт предприятиосын 12 аресозь кык но солэсь трос нылпи вордӥсь анайёслы, ужан аръёссэс чакласа, отпусксы вӧзы кӧня ке нунал ватсаське на - дун тырыса. Алнаш ёросысь "Кизили" колхозын ужасьёслэн огъя кенешазы ужпум ӝутӥзы, колхозын ужась вань нылкышноослы валтӥсь уждунзы вӧзы дас процент ватсэт йылтӥське на. Гуртысь нылкышноослы валтӥсь уждунзы вӧзы 30 процент ватсэт йылтон сярысь постановление 1990-тӥ арын 1 ноябре Россия Федерациысь Вылӥ Кенешен кутэмын ке но вал, со быдэсъяське пыд йылазы ӟеч возиськись хозяйствоосын гинэ. Нылпи ваёно нылкышноослы но нылпи нонтӥсь анайёслы дунтэк сиён висъян сярысь кутэм ужпум но котькытын ик одӥг кадь уг быдэсъяськы. Соин валче пусйыны луоз Завьялово районысь "Юськи" но "Урал" хозяйствоосты. Татын нылкышноослы нуналаз ӝыны литр дунтэк йӧл но толэзяз 1-3 килограмм сӥль висъяське. Красногорск ёросысь куд-ог хозяйствоос озьы ик кулэяськисьёсызлы дунтэк сӥль но йӧл висъяло. Пичи Пурга ёросын сиёнлы пичигес дун тупатэмын. Уже интыяськыны шуг-секытъёс кылдэмен валче, нылпи ваёно нылкышноосты капчигес уже выжтон но азьвыл уждунзэс кельтон сярысь ужпумъёс 25 ёрос пӧлысь 4-яз гинэ быдэсъясько, шуыны луоз. Нылкышноос асьсэос но ужзэс воштыны соглаш уг луо, предприятиосазы коньдонэн секыт югдур кылдэмен валче. Гуртысь нылкышноослэн тазалыксы сярысь ке верано, ёросъёсысь центральной больницаосын ужа туала куронъёслы тупась аппаратура. Соос озьы ик вазиськыны быгато республиканской больницае. Нылпи ваёнзы пумысен учётэ вазь султо ке, декретной отпусксы вӧзы нылкышноослы ватсаське на пичи уждунлэн 50 процентэз. Гуртысь нылъёс но нылкышноос озьы ик вазиськыны быгато семья ужпумъёсты радъянъя кабинетъёсы, соос али котькуд ёросын усьтэмын. Социальной службаослэн но тазалыкез утён органъёслэн огкылысь ужаменызы валче, 11-аз гурт ёросын нылпи куштон учыръёс 2-ысен 30,3 процентозь кулэсмизы. Дасяз Л. МАЛЫХ. МАТРОН АПАЙ ӴЕКТЭ Горд кушманлэсь икра Кулэ луоз: 1,5 килограмм горд кушман, 750 грамм сугон, ӝыны килограмм ӵуж кушман, 350 грамм помидор, 0,5 литр кӧс вӧй. Вань бакча сиёнэз, сӥль лэзён пыр поттыса, 2,5 час пала вӧй пӧлын пӧзьтоно. Сылал йылтоно шӧмызъя. Банкаосы тырыса, корт пытсэтъёсын ворсано. Аджика Кулэ луоз: 500 грамм чеснок, 10 ческыт пӧсьтурын, 500 грамм выжыен петрушка, 2 курыт пӧсьтурын. Ваньзэ тае поттоно сӥль лэзён пыр. Суралтоно 1 килограмм напчытэм помидорен (томат пастаен) яке помидорлэн нап сокеныз. Сылал йылтоно шӧмызъя. Возёно кезьыт азьын. Салат Куинь килограмм мында векчи юдэм кабачёкез яке тыкваез 20 минут ӵоже пӧзьтоно 0,5 литр кӧс вӧйын. Собере йылтоно кузьдалалы юдэм 8 ческыт пӧсьтурын, 1 стаканлэсь ӧжытгес сакыр песок, 0,5 килограмм томат соус, 10 процентъем уксус 10 грамм, сылал шӧмызъя. 45 минут ӵоже ваньзэ тае пӧзьтоно. Горд палэзьлэсь варення Кулэ луоз: 1 килограмм горд палэзь, 1,5 килограмм сакыр песок, 3 стакан ву, 300 грамм улмо, 100 грамм грецкой пушмульы. Сироп лэсьтыса, 6-8 часлы котоно палэзез. Собере куинь пол 10 минут ӵоже пӧзьтоно, 15 минутлы вис карыса. Ньылетӥяз пӧзьтэме йылтоно векчи юдэм улмо но нелькем пушмульы (укыр векчи медаз луы). 20-30 минут ӵоже пӧзьтоно на. Городлэн нуналэзлы сӥзьыса "Нокыӵе шуг-секытъёс шоры учкытэк, Глазов Городлэсь нуналзэ пусъе. Талы сӥзьыса, ликёро-водочной заводын выль цех усьтӥськиз, Искусствоя юрт но английской кылэз дышетонъя школа ужаны кутскизы", - таӵе кылъёсын Глазов городысь администрацилэн кивалтӥсез А. Горяинов ликёро-водочной заводлэсь цехсэ усьтонэ люкаськем калыкез пумитаз. Сур поттонъя цехез усьтон городысь калыклы кузьым кадь йӧтӥз. Цех выль европейской оборудованиен тырмытэмын. Та цех усьтӥськиз, городысь администрация, Чепецкысь механической но Глазовысь ликёро-водочной заводъёс тыршемен. Пусъёно созэ но. Удмуртиысь уй пал ёросъёс мукет улосъёсын поттэм вузъёслэсь юн утемын. Глазовысь аракыез, ческыт винаосты Европаын но, Австралиын но тодо. Сур но асьме дорын гинэ ӧвӧл, кунгож сьӧрын но тодмо мед луоз, вераз Удмурт Республикаысь Кун Кенешлэн Тӧроез А. Волков. Солэн ӟечкыланэз борды итӥськиз акциосын "Чепецкой механической завод" огазеяськонлэн валтӥсь директорез Н. Ганза. Со шуиз: туннэ нырысь ик асьме промышленностез улӟытоно, собере гинэ банкъёсты. Промышленность азинскыны инъет кылдытэ. Городлэсь нуналзэ пусъён выль часовняез вӧсян бордысен кутскиз. Калык Центральной площадьын юмшаз. Юкаменск, Яр ёросъёсысь самодеятельной коллективъёс концерт возьматӥзы. Пичиез но, бадӟымез но бере ӧз кыле, ваньмыз эктӥзы, кырӟазы. Площаде лыктэм калыкез ӟечкылазы Глазов городысь администрацилэн кивалтӥсез А. Гориянов, Удмурт Республикаысь Кун Кенешлэн Тӧроез А. Волков но мукет тодмо адямиос. Кун Кенешлэн пресс-службаез. СПОРТ Зарниез Москвае кошкиз Ӝыны толэзьлэсь кема кыстӥськиз шашкиен шудонъя дуннелэн чемпионатэз. Дано ним понна кужымзэс жалятэк нюръяськизы Ижысь Алексей Чижов но Москваысь Александр Шварцман. Та спортэз гажасьёс-валасьёс чидатэк витьылӥзы Ижкарысь иворъёсты, котькуд нунал - пумиськонлэсь йылпумъяськемзэ. Нырысь азьпала потӥз Чижов, кыкытӥ сетын сое Шварцман сутӥз, нош куинетӥяз, берпуметӥяз, вормисе потӥз. Озьы дуннелэн тямыс пол чемпионэз Алексей Чижов таяз учыре азвесь медален кылиз. Нош чемпион луиз Москваысь гроссмейстер Александр Шварцман. М. КУЗЬМИН. Арамын 20 нуналскын Алнаш районысь вань хозяйствоосын аран ужъёс йылпумъяськизы ни, шуыны луоз. Али мынэ кын улэ гырон, техникаез толлы дасян. "Родина" эштосын аран кыстӥськиз 20 нунал гинэ. Отын гектарысьтыз ог 12 центнер ю тысь кутсазы, нош огъя районъя та лыдпус 11,3 центнерозь вуиз. Асаново совхоз-техникумын гектарлы быдэ 25 центнер ю тысь жильдӥзы. Н. ЕФРЕМОВ. Наталь Психологен кенешон Курисько кулон, Инмар сётэ курадӟон "Тӥр но пурт улын улӥ" статьяез лыдӟеме бере (потӥз 18 июне "Наталь" бамын), редакцие гожтоно кариськи. Туж курисько, тодматэ вал гожтэтэным "Кризисная семья" центрын ужась специалистъёсты. Нимме но, кытын улэмме но газетады эн шараялэ, та гожтэтэ пумысь семьяосы медаз тодэ вал. Азьланяз кызьы улыны уг тодӥськы ни, оло, кыӵе ке но визь-кенеш сётозы, малпасько. Секытлы, кайгулы пумит султыны быгатытэк, ас мылкыдыя улонысь кошконо кариськи. Кулыны ӧз сётэ, утизы, но пыраклы ӧлексы кыли. Картэным кусыпъёсмы азьло но умоесь ӧй вал, висьыны кутскеме бере учкемез но ӧз поты ни. Анаеныз ӵошен кулэмме гинэ возьмало ни. Али улӥсько нылы дорын. Секыт ужез быдэсъяме уг луы бере, асме кулэтэмен лыдъясько. Нылпиоссы бадӟым будӥзы ке, мон уката но мултэс луо кадь. Нылы бен татын ик ул шуэ, но мон ачим туж кепыр ваисько. Инвалидъёслэн юртазы монэ уз кутэ. Шуозы кузпалыд но нылыд вань. Кытын-о, кызьы-о улом мон азьланяз? Кытӥяз чик улэме но уг поты. Йырам ӵемысь лыктэ асме ачим быдтон сярысь малпан. Но кышкасько, кулон нош ик уз лыкты мон доры, эшшо но секытгес висьыны усё. Куинь пол гозы кутылӥ вал ини, куинь полаз ик кин ке но тупа. Озьы нош куспетӥ луэ улонэ. Инмарлэсь кулон курыса бӧрдӥсько, нош со мыным секыт висён гинэ сётэ. Асме мон кулэтэм адямиен лыдъясько ни яратоно анае кулэм дырысен, сюранае туж сантэм возиз угось. Атае но вазь кулӥз. Тӥни озьы та югыт дуннее кыли силёлы. Ӧй быгаты ни мон чатырскыны, карнан кадь куасалтӥз монэ бӧрдон, мӧзмон, куректон, висён. Вералэ вал, мар кароно мыным? Зинаида. Сюлэмдэ усьтод - капчиен шокчод Гажано Зинаида, улонады тӥ трос шуг-секытъёсын пумиськоно луиллямды. Пинал дырысен ик куректонэн пумиськыса, ваньмыз понна асьтэды янгыш кариськоды. Тӥ шат янгыш анайды вазь кулэмысь, нош сюранайды жалянэз валасьтэм но лекъяськись вал шуыса, атайды но шуныт кылын буйгатыны уг ке быгаты вал? Пинал мурт котьку но яратэмез, шуныт кылэз возьма, нош тӥляд со палэнэтӥ ортчиз. Картты юэмысь но тӥ янгыш ӧвӧл. Воргорон ачиз мылкыд ӧз ке кары юонлэсь куштӥськыны, нокыӵе яратон но уз потты сое выёнысь. Жугиськись, юись карт вӧзын улыса, тросэз нылкышноос улонысь ӟечсэ уг адӟо ни. Сыӵе адӟонлэсь пегӟыны турттыса, берпум вамыш лэсьто. Тӥ янгыш ӧвӧл, шуг адӟонъёслы чидамтэды понна. Кинлы вазиськыны тодытэк, юрттэт шедьтытэк, сыӵе вамыш лэсьтӥды. Пинал дырысен яратонэз, шуныт кылэз тодытэк будэмын бере, малпады: тӥ отӥяз но солэсь палэнтэмын луыны кулэ. Зэмзэ верано ке, тӥледыз гажаны но яратыны трос мугъёс вань. Шуг-секытъёс шоры учкытэк, тӥ будэтӥды ныл. Гожтэттыя валаны луэ, со ӟеч адями луиз, умой семья кылдытӥз. Мон малпамъя, со яратэ тӥледды, озьы ик сюлмаське тӥ сярысь. Тӥ солэн тужгес но матысь адямиез. Оло, тӥледлы нылды азьын усьтыны кулэ сюлэмвисёнъёстэс но кӧтӝожъёстэс. Со валалоз но мылкыддэс ӝутыны юрттоз. Тӥ кулэ нылдылы но, солэн нылпиосызлы но. Песянай яратонлэсь соосты люкыны уг яра. Яратоно адямиен котьку но секыт люкиськыны, уката ик со анай ке. Малпаське, макем секыт но ӝож луоз матысь адямиостылы, улонысь кужмысь кошкиды ке. Висись яке таза, анаез утьыны но яратыны кулэ, зэмос адями ке тон. Секыт ужез быдэстыны быгатонтэм бордысь уг поты зэмос юрттэт. Нырысь интыын ик луыны кулэ сюлмаськон, ӟеч кылын юрттон. Гожтэмдыя валано, быгатэмдыя тӥ весь ужаны турттӥськоды. Тӥ нылдылэн семьяяз мултэс адями ӧвӧл, тӥ яратоно анай но песянай. Нош со понна улыны но улыны кулэ. Е. СМАГА, Ижевскысь "Кризисная семья" центрысь психолог. Редакцилэсь: Гожтэт сётэмын вакчиятыса, куремезъя нылкышнолэн нимыз но воштэмын. Лыдӟисьёс пӧлысь кин ке, оло, та нылкышнолы шуныт кыл вераны мылкыд кароз, сюлэмзэ буйгатыны юрттоз. Гожтэ редакцие. Нош кинлы кулэ "Кризисная семья" центрысь специалистъёслэсь юрттэт, вазиське 24-21-31 номеро телефонъя яке редакцие. Кусып-2 Кык нунал Минскын 7 часын 40 минутын Удмуртиысь делегация "Минск" аэропортэ вуиз. Нош кык час ортчыса, Правительстволэн юртаз кутскиз Беларусьысь премьер-министрен Сергей Линген пумиськон. Соку ик вераны кулэ: делегатъёслэн ужан радзы минутэн-минутэн чакламын вал. Удмуртиысь предприятиослэн директоръёссы Минскысь заводъёсы кошкизы, соосын огкылъёс кутон пумысен ужан понна. Александр Волковлэн кивалтэмез улсын ужась делегацилэн официальной люкетэныз ӵош ветлӥз Россия Федерацилэн Беларусь Республикаын посолэз Валерий Лощинин. Огаз пумиськонын со паймыса шуиз: "Россилэн улосысьтыз таӵе бадӟым делегация татчы ӧз вуылы на вал". Белоруссъёс шуныт пумитазы. Официальной люкетэз минутэн-минутэн пусъемын ке но вал, шӧдӥськиз, куноослы татын шумпото. Пумиськон кутскем бере ик валамон луиз, кузёос но, куноос но огкадь малпанъёсын уло шуыса.Куноосты пумитакуз, Сергей Линг шуиз: "Милем пайда ваёз Россия Федерациен, солэн улосъёсыныз кусып возён, вузкарон. Куд-ог вузъёсъиы поттонъя ми ог-огмытэк улыны ик ум быгатэ. Туннэ со котькулэсь но зол шӧдӥське: асьмеос секыт югдурын, соин ик асьмеос валтӥсьсэ, кулэзэ бырйыны, экономикаез азинтон сюресъёсты шедьтыны но Россиысь улосъёсын кемалы кусыпъёс тупатыны кулэ. Экономикалы план юнматэмлэсь ми куштӥським ке но, азьланезлы план лэсьтӥськом: ми люкиськом кредитъёсты, бюджетысь коньдонэз, пошлинаез но кун заказэз юнматӥськом. Ми вузъёсты арысь аре тросгес поттӥськом. Со возьматэ, котькудӥныз предприятиен нимаз ужаськом шуыса. Предприятиосты утёно - муртлэн коньдонэз чотын улоно ӧвӧл, солэн уксёез уз тырмы. Предприятиос ужазы ке, налогъёс вуозы, бюджет узырмоз. Милем куддыр валэкто, предприятиос сярысь сюлмаськоно ӧвӧл шуыса, мед, пе, асьсэос утчаськозы. Нош Китайын малпало мукет сямен: огаз ярдурын социализм, мукетаз - капитализм, соос вискын выж; куд-огез выж вылын сылэ, мукетыз выж улэ усе. Кин ке но шур вамен выжыны юрттыны кулэ. Огнын потыны секыт. Озьы ик капитализме но выжон ас йӧназ уз ортчы. Государство эскерыны кулэ, кин но кызьы сопал ярдуре потэ". Нялтас вераса, Беларусь эскеронлы бадӟым саклык висъя. Кылсярысь, Беларусь Республикалэн Кун ласянь эскеронъя комитетаз 776 адями ужа, нош Удмуртиысь Кун Кенешлэн та выллем комитетаз - 24 адями, ёрос люкетъёсаз ужасьёсты лыдъяса. Озьы ке но, кык комитет куспын юнматэмын эскерон удысын валче тыршон сярысь огкыл. Кытчы вуттэ кунлэн рынок кусыпъёсты чакламез? Беларусьын рыноке выжон вакытэ бюджетлэн дефицитэз 2-3 процент, ужтэк кылемъёс 2-3 процент. Уждунэз дыраз тыро. Планъя кыкетӥез пумиськон - Президентэн Александр Лукашенкоен. Президентэз витизы, нош со вуиз шӧдтэк шорысь, делегатъёслэсь киоссэс кырмыса ӟечъяськиз, тодмо конструктормес Михаил Тимофеевич Калашниковез ӟыгыртӥз но пальпотыса залэ пырыны ӧтиз. Президент огдыре ик паймем но, шумпотэм но Беларусь но Удмуртия куспын огкылэз таӵе чаль вуттэмлы. Александр Лукашенко пусйиз, Беларусь Россиен но СНГ-ысь мукет кунъёсын юн герӟаськемын шуыса. "Мон котьку но вералляй, Россилы секыт ке, тае шӧдо ваньмыз. Инмар мед утёз, но собыдӟа "Титаник" выйыны кутскиз, яке кризис пуромиз ке, сьӧраз шимес вуберганэ, нуоз милемыз но. Ми быгатӥмы югдурез сьӧлтаны, соин ик шуг-секытъёс республикамы вылын туж ик уз шӧдӥське. Государство экономикаез азьло сямен ик чакла... Тӥляд татчы лыктэмды - туж умой, малы ке шуоно, иворъёсты вӧлмытӥсь ёзъёс пӧлысь куд-огез вералляло, Беларусь ворсаськиз, Россие вузъёс уг келя, вузкарыны уг малпа шуыса. Озьы ӧвӧл со. Ми дась вузкарыны, но таин валче медаз кылдэ вал асьме чотын узырмыны но капчиен коньдон поттыны тыршисьёс. Соин ик вузкаронмес ми паськытатӥськом Петербурген но, Москваен но, Россилэн улосвылъёсыныз но". Собере Удмурт Республикаысь Кун Кенешлэн Тӧроез Александр Волков тау каремзэ вераз татчы ӧтемзы понна, озьы ик пусйиз, та пумиськон бере Удмуртиысь но Белоруссиысь предприятиос азьланяз валче ужаны сюресъёс шедьтозы шуыса. "Мон оскисько, экономикаын политика нуонэз киосамы басьтоно, экономикамес, ог-огенымы кусыпъёсмес уртче лэсьтоно. Беларусь Республикалэн СНГ-е пырись странаосын ыштэм кусыпъёссэ выльдон политикаез одно ик вормон ваёз. Ыштэмзэ выльысь берыктон понна трос тыршоно луоз на. Соин ик, Удмуртия но Беларусь Республика куспын гожтоно Соглашение - со азьланяз ӵош ужаны сюресъёсты усьтон луэ, со нимысьтыз предприятиос, вань мылкыд карисьёс куспын азьланяз огкылъёс юнматонлы инъет луэ. Бӧрысь, Александр Волков но Александр Лукашенко, куспазы гинэ пумиськон ортчытэмзы бере, вакчияк интервью сётӥзы. Соос тужгес кулэен лыдъязы государствоосмы азьын сылӥсь социально-экономической ужпумъёсты матысь дыре быдэстонэз. Беларусьлэн Президентэныз пумиськон чаклам сярысь ӝыны часлы кемагес кыстӥськиз. Соин ик удмурт делегациен кешонлы дыр ӧжытгес кылиз. Ярам, дыр шыръяськиз Обороная министерствое, шонерзэ вераса, Офицеръёслэн юртазы мыныку. Татын Александр Волковез но Удмуртиысь бадӟымесь оборонной предприятиослэсь кивалтӥсьёссэс витё вал Беларусьлэн обороная министрез но армиысь вылӥ чинъёс. Татын вераськон мынӥз военно-технической удысын ӵош ужан сярысь. Удмуртиысь военно-промышленной комплекс понна со туж бадӟым инты басьтэ. Кылсярысь, Ижысь электромеханической завод понна. "Гожтэмын азьланезлы бадӟым оскон сётӥсь документъёс, - пусйиз предприятилэн директорез Юрий Шестаков,- ваньмыз ке умой мынӥз, Белоруссия заводмылы бадӟым заказ сётыны кулэ, 1997-1998 аръёсы выллемгес ик. Нимысьтыз документ гожтэмын "Белтехэкспортэн", военно-технической удысъя эшшо кӧня ке контрактъёс дасясько на... Вераськонъёс пайдаё ортчизы, малпасько, таӵе ивор заводмылэн коллективезлы шумпотымон луоз". Удмурт делегация ужзэ йылпумъя Беларусьлэн парламентаз. Отын Беларусь Республикаысь Национальной собранилэн Республикая Советэзлэн Председателеныз Павел Шипукен пумиськон ортчытыны чакламын. Бӧрысь Беларусь парламентлэн вылӥ палатаезлэн тӧроезлэсь вакчияк интервью басьтыны кылдӥз. Павел Шипук, кылсярысь, пусйиз: "Кызьы ке Удмуртилэн, озьы ик Беларусьлэн сюлмаськонзы-кулэяськонъёссы огвыллемесь. Ог-огенымы вузкарон тырмыт радъямтэ. Со паськыталоз шуыса, оскон вань. Малпасько, Беларусь ужаны кулэ Россиысь регионъёсын ӵош, Россилэсь но Белоруссилэсь быдӟалазэс лыдэ басьтыса; меӵак Москва пыр та ужпумъёсты быдэстыны уг луы. Ми ужалом парламент пыр, кыӵе ке законопроектъёсты кутыку, сооссэ яке таоссэ соглашениосты гожтыку могӟетъёс медаз кылдэ - таиз милям ужмылэн люкетэз. Таӵе пумиськылонъёслэн пайдазы туж бадӟым луоз". Таин удмурт делегацилэн нырысетӥ ужан нуналэз йылпумъяськиз. Соглашениез гожтон ортчиз пуксёнэ, Мукет кунъёсын экономика ласянь кусыпъёс возёнъя министерствоын. Беларусь Республика ласянь документ вылэ гожтӥськиз мукет кунъёсын экономика ласянь кусыпъёс возёнъя министр Михаил Маринич, Удмуртия ласянь - Кун Кенешлэн Тӧроез Александр Волков. Кичабонъёс но вакчияк пресс-конференция. Одӥгез юан сётэмын вал Россия Федерацилэн Беларусь Республикаын посолэзлы Валерий Лощининлы но. Посол пусйиз, Россиысь регионъёслэн Беларусен кусыпъёссы ялан юнмало шуыса. "Зэмзэ вераса, ӧй малпалля, толэзь но ӝыны куспын ог-огеныд ӵош ужан сярысь таӵе юн инъет дасяны быгатоды шуыса. Табере со документэн юнматэмын. Белорусъёс - зӥбыт калык гинэ ӧвӧл, со сётэм кылзэ уж вылын быдэстӥсь калык но. Оскисько: мар гожтэмын туннэ, одно быдэсмоз". Мае витёно Удмуртия но Беларусь Республика куспын гожтэм Соглашение ялэ но возьматэ ог- огеныд ӵош ужан сюресъёсты. Соиз бен умой, но ваньзэ сое зэмос уж вылын быдэстон понна кулэ луоз мукет документ.Со Соглашенилэн ватсэтэз луэ, но гожтэмын ӧвӧл на, со бордын ужан мынэ на.Дыр сётэмын туж вакчи, Соглашениез гожтэм дырысен дас нунал чакламын. Со "Ӵош ужан сярысь Соглашенилы протокол..." Ӵапак со ик юнматоз гожтэм огкыллэсь кужымзэ. Мар отын чакламын? Со - Белоруссиын поттэм пудо сиён утялтон комбайнъёсты, мукет техникаез но солы воштос ёзъёсты Удмуртие келян (1998 ар октябрь - ноябрь), Беларусьысь Тазалыкез утёнъя министерстволы медицинской оборудование вузан (1998 арлэн пумозяз), Минскын спортивной но пӧйшуран пыӵалъёсты вузанъя магазин усьтон, Белоруссиысь предприятиосын "Иж-2126" автомобильлэн инъетэз вылын грузопассажирской машинаос, пылесосъёс, электрокардиографъёс но дефибрилляторъёс бичан, Беларусе фрезерной станокъёс, инфоормациез электронной амалэн сётон системаос, спутник пыр кусып возён системаос келян, Белоруссиын поттэм арбериосын Ижын вузкарон юрт усьтон но мукетыз. Удмуртилы сыӵе паськытэсь экономической кусыпъёс тупатон нырысь ик сётоз выль ужан интыос, дыраз выт тыронъёс но рабочийёслы уждун, рынокез кужмоятон унолы узырмытоз республикалэсь но интыослэсь бюджетъёссэс. Но тани ма малпало асьме делегациысь куд-огез. Зоя СТЕПНОВА, "Сактон" акционер огазеяськонлэн генеральной директорез: "Ми тунсыкъяськиськом Белоруссиысь сыӵе предприятиосын, кудъёсаз капчи промышленностьлы сыръё дасяло. Милям кема дырлы чаклам договоръёсмы вань, соос ужало. Но кулэ вылэм государство ласянь юрттэт, малы ке шуоно, вань сыӵе законъёс, кудъёсыз сырьёез Белоруссилэн палэназ поттыны уг лэзё яке туж ичиен". Мар бен, уже пыриськоно луоз удмурт лоббистъёслы (Редакцилэсь. США-ын лоббистъёс шуыса нимало агентъёсты, банкъёслэсь кузёоссэс, монополистъёсты, кудъёсыз законодательёсты ас палазы кыскыны быгато соизъя яке таизъя ужпумъя закон кутыкузы). Владимир ГРОДЕЦКИЙ, "Ижмаш" акционер огазеяськонлэн генеральной директорез: "Белоруссиын умоен лыдъязы "Иж-2126" "пикап" но "фургон" автомобильлэн инъетэз вылын гурт хозяйстволы машинаос поттон сярысь ӵектонэз. Огкыл шедьтыны луоно ӵош мотоциклъёс поттон ласянь. Нимысьтыз вераськон пыӵал тӥрлык поттонъя. Малпасько, уноез пӧрмиз шуыса. Беларусен кышкатэк вузкаронлы оскон та республикаез ас бордаз кыскоз". Владимир КОПАНЕВ, Удмуртиысь дунъет сётонъя компанилэн директорез: "Белоруссиын пумиськонъёсты умоен лыдъясько. Отысь дунъет сётонъя обществоен огкыл гожтӥмы. Ми тодыны кулэ ог-огмылэсь басьяськыны быгатон луонлыкмес, национальной валютаослэсь паритетсэс, предприятиослэн уставной фондзылы дунъет сётонэз но мукетсэ. Милям ужмы со бордын: нимысьтыз предприятиос куспын контрактъёс, огкылъёс гожтыку ог-огедлы осконтэм мылкыд медаз кылды". ... 15 сентябре 14 часэ ТУ-134 самолёт удмурт делегациен Ижевск пала лобӟиз. Дасяз Удмуртиысь Кун Кенешлэн пресс-службаез. Кема-а "шудозы" дунъёс? Удмурт Элькунысь югдурез утёнъя министр Владимир Щербаков, журналистъёсын пумиськыкуз, нырысь ик тодматӥз кивалтоно удысэзлэн ужаменыз. Кылем тямыс толэзь ӵоже, ортчем арын та вакытэн ӵошатыса, йыружъёслэн лыдзы республикаямы ог дас процентлы будӥз. Нош 13 ёросын со кулэсмиз. Йыружъёсты шараян ласянь милиция берло дыре ужзэ данаклы умоятӥз. Али ульчаосын ӧжытгес луизы юэмъёс, ичигес пумисько улон интыосты, автомототранспортэз лушканъёс. Кулэсмизы адямиез виён но секыт сӧсыртон учыръёс. Но со дыре ик йыртэмасьёс уногес луизы быдэ вуэмтэос но ужтэк кылемъёс пӧлын. Ялан будэ экономика удысын лушкаськон но. Дунъёс будэмен валче, "пӧсь" йӧтӥз та нуналъёсы милициын ужасьёслы. Кылдытэмын вал нимысьтыз оперативной штаб. Со огазеяз МВД-лэсь вань службаоссэ. Августлэн берпуметӥ нуналысеныз 15-сентябрёзь ӝегатэмын вал 866 автомашина. Нокыӵе документтэк республикамылэн палэназ "кошке" вал 46 тонна пызь, 27 тонна кеньыр, 32 тонна макарон-лапша, 20 тонна сӥль, 26 тонна скал вӧй, 6 тонна кӧс вӧй, 10 сюрс ӟенелик уксус но мукет вузъёс. Ваньмыз 1 миллион манетлэсь унолы. Кыӵе югдур луоз азьланяз, кема-а "шудозы" дунъёс - тодмо ӧвӧл. Но милиция 21-тӥ сентябрьысен аслэсьтыз ужзэ уката кужмоятыны чакла. Н. БОРИСОВ. Капчизэ сюресэз ӧй утча... Тазьы вераз ачиз сярысь Виталий Леконцев 1966 арын гожтэм "Мед луоз шокаме эркын" кылбураз. Бен, со зэмзэ ик сыӵе: пӧсь мылкыдын яратэ вордскем палъёссэ, солэсь ӵыдонтэм чебер инкуазьзэ но отысь калыкез. Палэнын вал со армиын дыръяз гинэ. Ас шудзэ утчаз но шедьтӥз пичи дырысеныз тодмо интыысьтыз - Эгра ёросысьтыз. Герей - озьы нимаське Виталий Яковлевичлэн вордскем гуртэз. Со интыяськемын Эгра но 3ура черкогуртъёс куспын, Казаньысь Перме кошкись Сибирь сюреслэн бур палаз. Мумиз гожтэтлы дышетскемын ӧй вал, бубиз дышетскемын вал, но семьяеныз ӟеч-ӟеч улыны ӧз кылды: армие басьтӥзы, собере финн оже келязы, отӥяз герман фашистъёсын ожмаськонэ шедиз но отысь ӧз берты ни. Кузпалэз кык пизэс но нылзэс огназ быдэ вуттоно луиз. Маин тужгес дуно Виталий Леконцев вордсксм палъёсаз? Нырысь ик - "Эшелы" (1969), "Чагыр ин улын" (1987) но "Эх, сюресъёс" (1995) книгаосаз печатлам кылбуръёсыныз но ас кылбуръёсызъя кылдытэм кырӟанъёсыныз. Книгаосызъя чаклано ке, солэсь нимзэ Эгра ёросын вордскем Кедра Митрей, Семён но Генрих Перевощиков, Пётр Поздеев, Афанасий Лужанин, Константин Емельянов но мукет удмурт писательёсын оградэ пуктыны луоно. Пичи дыръяз гольык пыдын бызьылэм музъемезлэсь, тодэм но яратэм калыкезлэсь ноку но уг ӵыды бере, гожъя но Виталий Леконцев та интыос но отысь адямиос сярысь ик. Кылбурчилэн соосын люконтэм- висъянтэм герӟаськыса улэмез шӧдӥське тыпак ачиз сярысь гожъям чуръёсаз но. Зэмзэ ик озьы шуыса возьматон понна, лыдӟисьёслэн тодазы вайытэме потэ быдэсаксэ "Бубаен вераськон" кылбурзэ: Улонэ, тон, бырдась улонэ! Нуиськод ни меда быронэ? Оло, тон лобӟиськод инбаме? Шол, ӧвӧл на отчы тубаме... Дырызлэсь вазь зӥбиз ке эзель, Пӧсь гужем я кезьыт тол куазен... Бубае вераз вал: "Пиёке, Вуоды на ай тӥ кыдёке. Улонлэн сюресэз кузь, пумтэм - Инметӥ толэзе но вуттэ. Сюлмысьтыд осконэд ке ӧз быр, Дор палад улод ӟеч но майбыр. Улонлы ке сётӥд кужымдэ, Гажаса мумыдэ-бубыдэ, Матынгес тон луод шудэдлы. Оскы, оскы, пие, шудэдлы!" Кылбурезлэн дуннеяз автор асэныз ӵош бубазэ но, ас калыкезлэсь мылкыдзэ но люконтэм-висъянтэм герӟаса пыртэм. Кылбур соин ик авторезлы кадь ик дуно луэ ваньмызлы лыдӟисьёслы, тужгес но - удмурт шаерын вордскемъёслы но улӥсьёслы. Виталий Яковлевич кылбуръёсаз ӵемгес тодаз вайылэ ожын бырем бубызэ. Со угось улонзэ сётӥз ас музъемезлэсь но калыкезлэсь эриксэс утён понна. Мумызэ но уг вунэты. Удмурт калыклэн ӟеч сямъёсызлы, улон шоры шумпотон мылкыдын учкыны, ас музъемзэ, инкуазьзэ но ужез яратыны угось со, Пелагея Михайловна, котькинлэсь ӟечгес дышетӥз. Пиезлэн спортэн выремез гинэ шат уггес яра вал солы? Но СССР-ысь спортъя мастерозь будэмез бере, та ласянь но Пелагея Михайловналэн мылкыдыз воштӥськиз. Со валаз: адямилы спорт котьма ласянь кужмо но юн луыны юрттэ. Спортэз яратӥсь мурт котькыӵе ужез золгес бергатэ. Сыӵе адями борды кырсь сямъёс но уггес нянясько - шуом, юон, лушкаськон, азьтэмъяськон... Соин ик, дыр, пиез сое поэзияз нимысьтыз данъяно кариськиз. Шонеракгес верано ке, спортлэсь поэзизэ, чеберзэ удмурт литературае нырысьсэ ӟеч-ӟеч выжыяськытӥз Виталий Леконцев. Тазьы вераме осконтэмгес кадь потэ ке, эшшо огпол лыдӟелэ солэсь "Финишын" кылбурзэ. Виталий Яковлевич сюлмаськемен, тужгес но - нылпиослы спортъя школа кылдытэмез бере, Эгра ёрос берло кызь ар ӵоже спортъя устоосыз ёросъёс пӧлы пыриз но, спортъя мастеръёслэн лыдзы отын куамын ёрос ини. Гурто пиез Юрий Чураков дуннелэн капчи атлетикая чемпионэз луиз (1990-тӥ арын Австриын ортчем ӵошатсконын). Ӵапак та арын ик Юра йылпумъяз Москваысь К. А. Тимирязев нимо сельхозакадемиын дышетсконзэ. Ӟечкын верамон ини соиз но: Виталий Яковлевичлэн нылпиосын спорт ласянь ужамез дунъятэк ӧз кыльы - солы сётэмын "Калыкез дышетон удысысь отличник дано ним. Калык пӧлын ужанэ мыло-кыдо пыриськемез понна, Эгра ёрос бырйылӥз быдэс Россиысь удмуртъёслэн ӧтчамазы делегатэ. Литератураын азинсконъёсыз пусъемын элькунысьтымы Куӟебай Герд нимо премиен. Вакчияк верано ке, Виталий Леконцев - дунне адями, ужась-тыршись адями. Мар борды гинэ уг кутскы - ваньмыз солэн калык марда пӧрме. Огез гинэ ялан пӧсекъятыса возе: дырыз номырлы уг тырмы. Кыӵе ке ужез быдэстоно ке, котьку дыртоно луэ угось. Али но ай, 65 аресэз тырмыку но, озьы ик. Мӧзмыса, ӟурыса, вуӵыртыса пукыны дырыз воксё ӧвӧл бере, ӵапак сыӵе адями ик тужгес шудо, тужгес дуно но луэ. Азьланьын но улон ӧредлэн та манерез медаз воштӥськы, Виталий Яковлевич! Мария БЕРЕСТОВА. Ӟуч кылысь берыктӥз Пётр ПОЗДЕЕВ. Кипунысен шедиз Алигес Шарканысь милициын ужасьёс кема гинэ тодмотэм адями сьӧры уйылӥськоно луизы. Кыӵе ке лушкаськись я одӥгысьтыз гуртысь сиськонниез сузяса кельтэ, я магазинъёсысь вузъёсты лобатыны вуэ, я кассаез бушатэ. Озьы тодмотэм лушкаськись пытьыоссэ кельтэм Карсашур школаысь столовое но магазинэ, Бородулиысь магазинэ но пыраны вуэм. Нош шӧртчи воргорон шедем Кипун гуртысен. Чик кепыратэк усьтэм одӥг юртысь ӧс куриксэ. Пырем, дӥсьсэ воштэм, кузёослэсь кабаксэс бушатэм на. Собере кухня шуоназы ик сыр-сыр умме усем. Пуны утэмлэсь гинэ бускельёс шӧдӥзы, татын маке умойтэм шуыса. Милициез ӧтизы. Вор кырмемын вал. Алигес гинэ со тюрьмаысь потэмын вылэм. С. ПЕТРОВ. Кусып 14-15 сентябре Минскын ужаз Удмурт Республикаысь делегация, кивалтӥз соин Удмурт Республикаысь Кун Кенешлэн Тӧроез Александр Волков. Кутэмын "Россия Федерацилэн Удмурт Республикаез но Беларусь Республикалэн Правительствоез куспын вузкарон, экономика, наука, техника но культура удысъёсын кусып возён сярысь огкыл". Удмурт Республикаысь Кун Кенешлэн Тӧроез сяна, делегацие пыризы: Удмурт Республикаысь Правительстволэн Тӧроезлэн нырысетӥ воштӥсез Юрий Питкевич, Удмурт Республикаысь Эскерон кун комитетлэн тӧроез Александр Кузнецов, Удмурт Республикаысь Кун Кенешлэн Экономикаын политикая но бюджетъя комиссиезлэн тӧроезлэсь ужъёссэ быдэсъясь Софья Широбокова, сьӧрлон калыкъёсын кусыпъёсъя министр Виктор Викулов, Удмурт Республикаысь промышленностья министр Виктор Долгов, Удмурт Республикаысь гурт хозяйствоя но сиён-юонъя министр Василий Жуйков, "Ижмаш" ОАО-лэн валтӥсь конструкторез Михаил Калашников. Соос сяна, Белоруссие ветлӥзы "Уральские заводы" ПФГ-лэн валтӥсь директорез Виталий Шурыгин но солэн воштӥсез Михаил Гуреев, "Удмуртиысь дун пуктонъя компанилэн" директорез Владимир Копанев, "Сарапульский электрогенераторный завод" ОАО-лэн валтӥсь директорез Евгений Сторонкин но та предприятилэн директорезлэн кунсьӧрен кусып возёнъя воштӥсез Анатолий Золотарёв, "Ижевский мотозавод Аксион-холдинг" ОАО-лэн валтӥсь директорез Геннадий Кудрявцев, "Ижевский электромеханический завод" кун предприятилэн валтӥсь директорез Юрий Шестаков, "Удмуртторф" кун предприятилэн валтӥсь директорез Анатолий Марченко, "Ижевский радиозавод" ОАО-лэн директорезлэн маркетингъя воштӥсез Сергей Гуреев, "Ижмаш" ОАО-лэн валтӥсь директорез Владимир Городецкий, "Ижсталь" ОАО-лэн техникая директорез Геннадий Колесников, "Ижевский механический завод" кун предприятилэн валтӥсь директорез Василий Чугуевский, "АССО" ЗАО-лэн генеральной директорез Осколков, "Продторг" ЗАО-лэн генеральной директорез Александр Шибанов, "Сактон" ОАО-лэн валтӥсь директорез Зоя Степнова, "Ижсталь" ОАО-лэн маркетингъя управлениезлэн кивалтӥсез Андрей Таганович, "Ижевский мотозавод Аксион-холдинг" ОАО-лэн маркетингъя директорез Александр Морозов, Удмурт Республикаысь Промышленностья министерстволэн сектореныз кивалтӥсь Владимир Наговицын, Удмурт Республикаысь Кун Кенешлэн Тӧроезлэн юрттӥсез Николай Мусалимов, Удмурт Республикаысь Сьӧрлон калыкъёсын кусыпъёсъя министерствоысь валтӥсь специалист Андрей Барышников, озьы ик журналистъёс. Кык нунал куспын Удмуртиысь делегациен пумиськизы Беларусь Республикалэн премьер-министрез Сергей Линг, Беларусь Республикалэн Президентэз Александр Лукашенко, Беларусь Республикаысь Нациоанльной Собранилэн Республикая Кенешезлэн Тӧроез Павел Шипук. Беларусь Республика - туннэ Беларусь Республика азинскемын. Азьвылэныз ӵошатыса, татын 1997 арын 110 процент огъя продукция поттэмын, нош таяз арын январе-аперле - 112 процент. Нош промышленостьын (огъя продукцилэсь куиньмос люкетсэ поттэ) - 117,6 но 112, 9 процент. Беларусь огъя продукция поттэмлэн будемезъя дуннеын кыкетӥ инты басьтэ, азьпалаз Китай гинэ. Ӵошатэ-ай. Россиын производство сизьыметӥ арзэ куашка ини, тодмо ӧвӧл на, кытчы вуттозы туэ сӥзьыл кылдэм шуг-секытъёс. Беларусьын инвестициосын кивалтон одӥг киосы сётэмын, правительство промышленной предприятиосты кузёоослы люкылонэз малпаськыса, чакласькыса ортчытэ, кунсьӧрен эскериськыса кусып возе, соин ик дуннеысь коньдонэн шуг-секытъёс татын бадӟым пытьы ӧз кельтэ. 1997 арын инвестициос 19,5 процентлы йылӥзы, нош 1998 арын январе-апреле - 39,5 процентлы. Таяз арын куинь толэзь ӵоже ужазинлык 13 процентлы будӥз, таин валче ваньбур поттон 90,4 процентлы унояз. Пусйымон соиз но: промышленностьын поттэм продукцилэн 59,9 процентэз кун предприятиос вылэ усе, 40,1 процентэз - кунлэн луисьтэм предприятиос вылэ. 1998 арын январе-апреле кун предприятиосын ваньбур поттон 107,7 процентлы йылӥз, кунлэн луисьтэм предприятиосын - 121,4 процентлы, кунгож сьӧрысь фирмаосын ӵош ужась предприятиосын - 148 процентлы, зэм, таосыз огъя ваньбур поттонлэсь 2,9 процентсэ гинэ басьто. Беларусьын воштӥськонъёс Россиын кадь ӝог уг ортчо. Кылем арын 569 предприятие выльдэмын, соос пӧлысь 178-эз акциосын огазеяськонлы пӧрмиз, 76-сэ арендной предприятиос басьтӥзы, 220-ез аукционъёс пыр вузамын. Беларусь кунсьӧрен тросгес но тросгес вузкаре. 1997 арын татын поттэм вузъёсты кунгож сьӧры вузан 26,5 процентлы йылӥз, нош мукет кунъёсысь вузъёсты ваён - 24,6 процентлы, нош 1998 арын 3 толэзь куспын - 9,9 но 14,3 процентлы. Беларусь тросгес вузкаре Россиен - огъя вузкаремлэн 60,1 процентэз, Украинаен - 7,4 процент, Германиен - 5,1 процент. Беларусьысь национальной банклэн курсэныз ӵошатыса, дунъёс сярысь но рынок сярысь ке верано, 25 валтӥсь сиён-юонъёслэн огъя дунзы Беларусьын - 1115,9 манет, Россиын - 1242,1 манет; Минскын - 1078,9 манет, Москваын - 1496,8 манет. Беларусьын куанергес уло Россиынлэсь. Уждунзы 2-3 миллион беларусь манет ке, одӥг килограмм колбаса 190-350 сюрс манет сылэ, нянь - 9-13 сюрс манет, одӥг килограмм кампет - 180-220 сюрс манет. Кунсьӧрысь ваем сиён-юонъёс но вузъёс 1,5-3 поллы дуногес. Со понна магазинъёсын Беларусьын поттэм вузъёс тросгес, Россиен ӵошатоно ке. Беларусьын али но дун тырытэк эмъяло на, нылпиос 4-тӥ классозь школаосын дунтэк сисько. Валамон, адямиослэн ымныръёсазы сюлмаськон пыӵамын, но куректонэн пачалмем синъёсты уд адӟы. Уждунэз дыраз тыро, бере кыльытэк, ваньмызлы улон-вылонын пичи ке но юрттэт сётӥське. Страналэн киваотӥсьёсыз таӵе малпанэн уло: интыосысь вуз поттӥсьёсты ӝутоно, собере Европаысь но мукет шаеръёсысь рынокъёсы потоно. Луонлыкъёс со понна син азьын. Беларусь Республикалэн экономика ласянь интыяськемез но пайда вае. Татын пумисько Россия но Западной Европа, Шунды пуксён но Шунды ӝужан палась кунъёс куспын вузкарон но экономикаын валче тыршон сюресъёс. Соин но, вылды, Александр Лукашенко интервьюаз пусйиз: "Белорусъёс, ӟучъёс кадь ик, оскымонэсь адямиос, соин ик Шунды пуксён палан ваньмыз умой но огсыр, та пумысен сюлмаськонэз ӧвӧл". Со сяна, Беларусьын быгато пӧртэм инмаръёслы оскисьёс куспын споръяськонъёсты кысыны. Соин ик, калыкъёс но вӧсьлыкъёс куспын эчешонъёсты буйгатыку, та страналы визь-кенеш курыса вазиськыны луоно. ФУТБОЛ Куноын вормиз Нырысетӥ лигаын азьпалан мынӥсь "Сатурн" команда туэ Ижевскын "канжаськиз" - асьме "Газовиклы" келяз вал. Соин ик ас дораз Удмуртиысь командаез вормон мылкыдын пумитаз. Асьме футболистъёс но ӧз куалектэ, кужмо нюръяськизы. "Газовик" 1:0 лыдын вормиз. Гол пыртӥз Александр Боровик. Вормонлэн дуныз бадӟым соин но эшшо, Ижысь команда ӝыны пумиськонзэ 10 кузя шудӥз (уллямын вал асьмелэн устоез спортсменмы К. Микаелян). М. КУЗЬМИН. Шӧкыч "Мынам телевизоре" Нош ик 142-тӥ автобус сярысь Завьял ёросысь Кены котырысь сад-бакчаосы ветлӥсь 142-тӥ номеро автобус сярысь гожъяллязы ни газетъёс но, та ужпумез ӝутыны сюлмаськиз вал Удмурт телевидение но. Маршрутэз ворсамзы бере, интыяз коммерческой шуон автобус лэзизы ик вал. Табере соиз но, таиз но ӧвӧл. Кема меда чидалозы бакча возисьёс тыбыразы котомкаосын отчы- татчы 8 иськемез лашкинтыны? Сад-бакчаосты калыклы сётӥзы вал, пичи ке но сиён-юон поттон вылысь. Тужгес но пайдаез вал берло вакытъёсы. Уг тодӥськы, кинлэн сыӵе "кузьым" чуртнамез потӥз калыкезлы - Завьялысь ГАИ-лэн-а яке Ижысь администрацилэн-а? Улом - адӟом ини... Н. ЛЯЛИН. В. КАМАШЕВЛЭН туспуктэмез. "Удмурт дунне" - нырысетӥ интыын "Секытэн мынэ вуоно ар понна газет-журналъёслы гожтӥськон. Мугез - коньдонлэн ӧвӧлэз, шуизы Алнаш районысь почта кусыпъёсъя герӟетын ужасьёсь.- Удмурт изданиос пӧлысь тросгес гожтӥськемын "Удмурт дуннелы" гинэ - 559 экземпляр. "Ӟечбур" газетлы 4 мурт гинэ гожтӥськем, нош журналъёс пӧлысь "Кизилилы" - 1 мурт. Оло, 14-20 сентябре ортчись "Гожтӥськисьлэн арняяз" лыдпусъёс будозы? Туж оскем потэ вылэм солы. Л. БАКАЕВА. Умоен лыдъясько Удмурт Республикаысь Кун Кенешлэн Тӧроез, Федерация Советлэн членэз Александр Волков Россия Федерациысь Советэзлэн кивалтӥсезлы Егор Строевлы телеграмма ыстӥз. Отын верамын: "Россиын пенсиос, пособиос, бюджет удысын тыршисьёслы уждун тыронын секыт югдур кылдэмен валче но странаын кышкытлык кылдонэз алон вылысь умоен лыдъясько куд-ог улосвылъёсысь кивалтӥсьёслэсь Россия Федерациысь Федеральной Собранилэн Советэзлэсь азьвыл чакламтэ сессизэ люкан сярысь ӵектонзэс". Визьма, вера, дунъя... "Удмурт шаер" клуб дас ньылетӥ сӥзьылзэ мытэ Иван Васильевич Тараканов профессорлэн ужъёсызлы сӥзем адӟытонэн. Кызьы тодӥськом, тодмо кылчи туэ пусйиз 70 арессэ. Ми эшшо огпол ӟечкыласьком Иван Васильевичез та юбилееныз но вань мылкыд карисьёсыз ӧтиськомы профессорлэн ужъёсыныз тодматскыны. И. В. Тараканов пайдалыко ужа кылтодон удысын. Ӟеч тырше егитъёсты дышетонын. Трос печатлаське шаерамы но кунгож сьӧрын потӥсь изданиосын. Научной ужъёсыз пӧлысь нырысь ик пусйыны кулэ ӟуч-удмурт кыллюкамзэ. 1956-тӥ арын поттӥз сое Москваысь издательство. Куинь ар ортчыса, Тарту университетысь аспирант "Бавлы диалектлэн удмурт кылын фонетической аспӧртэмлыкез" темая кандидат диссертацизэ уте. Аспирантураез йылпумъяса, быдэс ар ӵоже ужа УдНИИ-ын. Та дыр ӵоже тодосчи гожтэ удмурт кылын научной грамматика сярысь нырысетӥ статьяос. Та вакытэ ик Иван Васильевичлэн тыршеменыз потэ "Удмурт орфографияя словарь". 1960-тӥ арысен И. В. Тараканов ужаны кутске Удмурт кун пединститутын. Студентъёсты дышетэм сяна, пезь-пезь тырше наука удысын но. Куатьтонэтӥ аръёсы трос гожъя удмурт кыллэн диалектологиез но морфологиез сярысь. И. В. Тараканов сюлмаськемен, 1962-тӥ арын потэ "Фонетика но морфология" учебник. Сизьымдонэтӥ аръёсы Иван Васильевич пайдалыко ужа лексикология удысын. Печатласько тюрк кылысь асэстэмъёслы сӥзем статьяосыз. Та вакытэ ик трос тырше кылтодонъя факультетысь студентъёслы удмурт кылэз дышетонъя но шонер гожъяськонъя программаос кылдытон бордын. Глафира Николаевна Никольскаяен ӵош потто 5-тӥ-6-тӥ классъёслы удмурт кылъя учебник. 1986-тӥ арын И. В. Тараканов вылӥ дунъет басьтэ "Удмурт кылын асэстэм лексика" доктор диссертациезлы. Тямыстонэтӥ аръёсы мылысь-кыдысь эскере удмурт кыллы дышетонлэсь историзэ. 1988-тӥ арын быдэс Союзысь финно-угроведъёслэн ЪВИИ конференциязы лыдӟе "Буёл возьматӥсь удмурт нимкылъёс, шунды ӝужан палась финн-угор кылъёсын ӵошатыса" нимо докладзэ. Та арын ик Иван Васильевич Таракановлы профессор ним сётӥзы. Укмыстонэтӥ аръёсы но тодосчи тыро-пыдо ужа лексикология удысын. 1992-тӥ арын потэ "Удмурт кыллэн туала лексикологиез" монографиез. Печатла пӧртэм пумо статьяос. Поттэ 6-тӥ-7-тӥ классъёслы удмурт кылъя учебник. Берло аръёссэ И. В. Тараканов печатлаське "Удмурт дунне" газетын, "Вордскем кыл" но "Кенеш" журналъёсын. Публицистической статьяосаз возьматэмын кылтодон факультетлэн 50 ар ӵоже ортчем сюресэз, удмурт нимкылъёс бордын тыршись комиссилэн ужез. Укмыстонэтӥ аръёсы Иван Васильевич кылдытэ веросъёсын сборник - пыриське писатель но эшез Е. В. Самсонов сярысь тодэ ваёнъёсын книга поттонэ. Кылтодон наукаосъя докторлэн, профессорлэн, УАССР-ысь но Россия Федерациысь наука удысысь дано ужасьлэн, финн-угор огазеяськонлэн член-корреспондентэзлэн, Иван Васильевич Таракановлэн улэмез но ужамез сярысь тросгес тододы, милям выставкаямы лыктыса. Иван Васильевич Таракановлы сӥзем ӝыт ортчоз 21-тӥ сентябре (куарусёнэ). Кутскоз 17 часын. Удмурт Республикаысь Национальной библиотекалэн шаермес тодонъя но финн-угор литературая отделэз. ӴУКАЗЕ - НЮЛЭС ХОЗЯЙСТВОЫН УЖАСЬЁСЛЭН НУНАЛЗЫ Чурен-чурен пушъё ненег кызъёс Матысь аръёсы шаерамы син азьын паськытало нюлэсъёсмы - асьмелэн узырлыкмы. Гондыр кушъёсын но чурен-чурен ненег кызъёс, пужымъёс пушъё. Огъя вераса, нюлэс мерттон но сое утён чутрак умояз. Берло дыре лесничествоос та ласянь трос лэсьто. Тани Ижысь опытной лесхозын Подшивалово лесничество одӥгез устоез луэ. Пичи коллектив арысь аре планъёссэ умой быдэсъя, нюлэсъёсты юн чакласа возе. Лесничествоен 16 ар ӵоже быгатыса кивалтэ ни лесничий Виталий Леонтьев. Коллективын 26 мурт ужа. Нюлэсчиос асьсэлэсь профессиональной праздниксэс умой пумитало. Но туннэ улонмы нюлэс хозяйствоын ужасьёс вылэ но шӧдӥськытэк уг кыльы. Соин ик лесникъёс коньдон поттыны выль амалъёс но утчало. Ӵужон керттэм, ӵыжинъёс бичам сяна, берло дыре мунчо бугроос ӵупыны ӧдъязы. Соос озьы ик калыклы пу дасяло но мукет ужъёсты быдэсъяло. - Али ми нюлэс мерттӥськом, тэлез чылкытатӥськом, но та ужлэн пайдаез 20-40 ар ортчыса гинэ шӧдӥськоз, - шуэ Виталий Леонтьев. - Вераны кулэ, та дыре нюлэс корасьёс кулэсмо. Озьы вуэм тэль пыд йылаз сисьме но изъянме. Лыдпусэн вераса, миым ӝынызэ вуэм нюлэсэз корам, нош туэ - одӥг ньыльмоссэ гинэ. Соин валче милям улонмы уродме. Июль толэзь понна гинэ уждун сётъям ай. Азьло югдурмы умойгес вал. Кылем гужем шаерысьтымы лесничийёслэн нырысетӥ съездзы ортчиз. Со ваньмызлы выль кужым сётӥз. Нош туннэ Подшиваловоысь но республикаысьтымы та удысысь вань ужасьёсты ӟечкыласьком нюлэс хозяйстволэн нуналэныз, котькудӥзлы сӥзиськом умой мылкыд, шудбур но тазалык. Г. РОМАНОВ. Виталий Леонтьев Туспуктӥз Г. ЮСАЕВ. Екатеринбурге но Ниццае ветлӥзы Та нуналъёсы (7-13 куарусёнэ) огвакыт бадӟым сюрес вылэ потаз республикаысьтымы Культурая министерстволэн кык коллективез. Екатеринбурглы 275 ар, нош татысь мунё театрлы 65 ар тырмемен валче, та городын ортчиз Бадӟым Урал регионысь мунё театръёслэн фестивальзы. Асьме мунё артистъёсмы татын возьматӥзы Лев Дворскийлэн пьесаезъя "Прыгающая принцесса" спектакльзэс, пуктӥз сое Галина Честнокова. Ницца городэ (Франция) ожгар кырӟанъя ИИИ калык куспо фестивале ветлӥз Удмуртиысь Государственной духовой оркестр (программазэ дасяз военной дирижёр Владислав Рыбенко). Арлы быдэ ортчылӥсь та ужрадэ пыриськизы дас куать странаысь военной оркестръёс, соос асьсэды возьматӥзы Шор стадионын (парадын) но мукет интыосын. Т. НИКОЛАЕВА. Шуг-секытъёслэсь утиськон вылысь "Удмурт кенеш" огазеяськонлэн исполкомез вазиськиз Кун Кенешлэн Президиумезлы, азьло чакламтэ сессия ортчытыны курыса. Сыӵе ӵектон юнме шорысь ӧвӧл. Асьме обществолэсь вань удысъёссэ шуккем мур кризис шӧдӥськытэк ӧз кыльы республикаысьтымы калыклэн улоназ но. Вузкаронын спекуляция вӧлмемен, туж кулэ вузъёслы дунъёсты юромо йылэтэмен, адямиос уно шуг-секытъёсын пумисько, син азьын куанермо. Уго ваньмыз та умойтэм учыръёс аляло сыӵе вакытэ, куке калыклы уждун, пенсия, пособие тырон ӝегаса мынэ. Соин ик Кун Кенеш веарськонъёсын гинэ буйгатскыны кулэ ӧвӧл, ӝегатскытэк люкано депутатъёсты но сессиын Удмуртиын улӥсьёсты шуг-секытъёслэсь но коньдон дунтэманлэсь утёнъя документъёс кутоно, пусъемын ассоциацилэн вазиськоназ. О. МАРКОВ. Бурдъясьёс Шыпыт. Син гань-гань шутэтске, кызьпу сул вылэ суредамъёс, пулэсь вӧлэм пӧраськон тӥрлык, мебель, корт вылысь суредъёсты адӟыса. Вуно шуг-секытъёс, магазин дунъёс, кышканъёс... Кылё паймон, шумпотон но вожъяськон. Сыӵе мылкыд кельтэ Ижевскысь Калык киужъёсъя центрысь выставка. Асьсэлэсь быгатэмзэс возьмато Воткинск ёросысь Новый посёлокысь кибашлыос. Та посёлокын кыкетӥ арзэ ини ужа Киужъёсъя юрт. Ачиз коркаез бен куашкан калэ вуэмын, сое тупатъяны, татын ужась кибашлыослы уждун тырыны коньдон ӧвӧл. Озьы ке но... Шуг-секытъёс чеберлыклы кыстӥськонэз, сое валанэз кыдато, дыр. Тани та "кибашлылэсь пуконзэ" быдэстӥз А. Мыльников. Усточи, таӵе пукон вылэ пуксьыса, ассэ эксэй кадь возьыны кулэ, дыр... Кызьпу сул вылэ быгатыса суредам Киужъёсъя юртлэн директорез В. Мельников. Тодмо суредасьёслэн суредъёссы вылысь лэсьтэм ужъёс сул вылын туж аспӧртэмлыкоесь адӟисько. Пуэз вандылонъя пӧртэм арбериос лэсьтэ мукетыз зарни ки - В. Кузнецов. Солэсь пӧраськон тӥрлыксэ ӵуж кушман юдылыны уд куты, борддоре чебер понна ошод. Калык киужъёсъя центрын 10-тӥ октябрёзь адӟыны быгатоды на Н. Бобровалэсь, С. Русскихлэсь, В. Лукинлэсь ужъёссэс. Соослэн быгатэмзы, оло, тӥлесьтыд малпанъёстэс бурдъялоз, чеберез кылдытыны мылкыддэс сайкатоз... О. ВАХИТОВА. Шӧкыч "Пантиофонь" Иж карысь Карл Марк ульчаын вань туж дано но тодмо магазин. Нимыз но солэн туж мудрон - "Сервис-Студия-Центр". Отын вузкаро зарезь сьӧрын поттэм телевизоръёсын, уно пӧртэм бытовой техникаен. Магазинын ужасьёс ӝытлы быдэ чагыр экран пыр ушъяло вузъёссэс. Ортчытъяло пӧртэм лотереяос. Ӵапак со магазинысь Воткинскын улӥсь Н. Л. Протопопова "САМСУНГ" адӟытӥсь магнитофон басьтӥз вал. Ӵуказеяз ик аппаратлэн куараез ӟазыртыны ӧдъяз, суредэз но ворекъяны кутскиз. Выльысь вуттӥз вуззэ центр шуонэ. Ӧз но воштэ, ӧз но тупатъялэ сое. "Лесси" ООО-лэн директорез С. Ф. Ощепков шуэм: "Тӥ гарантия сётӥсь талондэс асьтэос ыштӥды, луоз, яке кесяса куштӥды". Нош басьяськисьлы талон сётэмын ӧй вал. Табере, пе, ортчытоно луоз независимой шуон экспертиза. Ку ортчытозы - нокин уг тоды. Вот тыныд "пантиофонь". Н. СЕРГЕЕВ. Журналистъёсын пумиськонъёс Дунъялом ужъёсызъя Кун Кенешысь Кунэз радъянъя, калыкъёс куспын политикая но интыысь аскивалтонъя ялан ужась комиссилэн кивалтӥсез Ю. Семенов куд-ог валэктонъёс сётӥз депутатъёслэн 21-тӥ сессиязы эскероно ужпумъёсъя. Сессилэн ужаз комиссия тямыс законълэсь проектъёссэ сэрттыны-пертчыны ӵектэ. Валтӥсез соос пӧлын луоз Кун Кенеше депутатъёсты быръён сярысь законлэн проектэз. Таяз созыве быръем депутатъёслэн ужан дырзы кема ӧз ни кыльы, соин ик выль депутатъёслы сюрес усьтон понна быръёнъёссъя закон сярысь али ик сюлмаськыны кулэ. Кыӵе адямиос быръемын луозы Кун Кенеше? Луэ-а со сярысь али ик вераны? Со пумысен Ю. Семенов таӵе малпанъёссэ шараяз: - Туэ районъёсысь Кенешъёс 30-40 процентлы выльдӥськизы, депутатэ чылкак выль адямиос быръемын вал. Тазьы ке учконо 1999 арын Кун Кенеше но тросэз алиосыз депутатъёс выльысь быръемын уз луэ. Мон сямен, Кун Кенеш 50 процентлы воштӥськоз. Выль депутатъёслы, дыр, кутоно луоз ни кылъёс сярысь законэз. Кызьы валэктӥз Ю. Семенов, та законэз кутыны нокин уг но люкеты кадь, но солэн инъетэз та дырозь дасямтэ. Нырысь ик со сярысь сюлмаськыны кулэ правительство. Россилэн Правительствоезлы Тӧро быръемен, югдур кӧня ке сӥяз кадь. Кун Кенешысь депутатъёслэсь коммунистъёслэсь фракцизэс, кытчы пыре Ю. Семенов но, ӟечкыланы кулэ, дыр - Черномырдин ӧз ортчы! Кызьы табере дунъя Правительствоын мынӥсь воштӥськонъёсты Ю. Семенов? Калыклэн вожпотэмезлэсь кышкаса, лэся, Правительствое Е. Примаков ӵектыны кутскиз азьвыл коммунистъёсты ик, шуиз со. Но улыса адӟом ини, Правительствоез дунъяно ужъёсызъя. Озьы ке но, коммунистъёс уг аналско 7 октябре ортчытыны чаклам пумитъяськон ужрадлэсь. Та ужрадэз соос малпало политической забастовкае выжтыны. Калык урамъёсы одӥг валтӥсь куронэн потыны кулэ: Президентэз отставкае! Со улонлэн куронэз. Т. БАННИКОВА. Валэктэ юрист Сэрегез нуэ адвокат Лилия Шкляева Сюдӥсед ӧвӧл ке... Нылпиосылы 11 но 12 арес. Картэ кулэмын. Ачим ужтэк кылемын, куддыръя гинэ мукетъёссэ вошъясько. Валэктэлэ вал сюдӥсез ыштэмен валче сётӥськись юрттэт (пособие) сярысь законэз. Калыкез улон-вылонын утёнъя отделын (райсобесын) дэмлазы: колхозысь, пе, потыса, тыныд умойгес луоз. Шонер-а? Г. ОЗЕРОВА. Сюдӥсез ыштэмен валче юрттэт сётон ужпумъёсты радъяло Россия Федерациын 1990-тӥ арын 20-тӥ ноябре юнматэм "Россия Федерациын кун пенсиос сярысь" Закон но музон документъёс. Сыӵе юрттэтлы правоен адямиос пумысен верамын 50-тӥ ёзэтын (статьяын). Сыӵеос пӧлы пыро кулэм муртлэн семьяысьтыз ужаны быгатӥсьтэм сюдӥськись-вордӥськись адямиос. Ожъёсын сӧсырмыса бырем муртлэн мумиз-бубизлы но кузпалызлы, нош озьы ик мукет семьяе пырись мумы-бубы пӧлысь огезлы яке кузпаллы пенсия тупатыку уг учко, кулэм мурт азьвыл соослэн сюдӥсь-вордӥсьсы вал-а, ӧй-а. Семьяын ужаны быгатӥсьтэм адямиос лыдъясько: а) 18 аресозь вуымтэ нылпиос, вынъёс, сузэръёс но внукъёс; 18 ареслэсь бадӟымъёс, соос ӧлексы (инвалид) луизы ке 18 аресэ вуытозязы, соослэн ӧвӧл ке ужаны быгатӥсь мумы-бубызы. б) бубы, мумы, кузпал, соос вуизы ке 55 аресозь (кышно) яке 60 аресозь (карт), яке соос ӧлексыос ке. в) мумы-бубы яке кузпал пӧлысь огез, яке песятай, песянай, вын-агай яке сузэр- апай, арлыдзы но ужаны быгатэмзы-быгатымтэзы шоры учкытэк, соос уг ужало но утялто ке кулэм сюдӥсь-вордӥсьлэсь 14 аресозь вуымтэ нылпиоссэ, вын-агайёссэ, сузэр- апайёссэ яке внукъёссэ. Тӥни малы Г. Озеровалы дэмлаллям колхозысь потыны. Вераны кулэ, со понна колхозысь одно ик кошконо ӧвӧл. Вылӥ верам юрттэтэз басьтон понна, дугдоно ужамысь. Тӥляд праводы вань нылпиостылы 14 арес тырмытозь ужатэк улыны. Тэк пукем дыр уз пыры ужам стаже, но соин валче ужам стажды уз чигы. Ужан (трудовой) книжкае гожтозы тазьы: Уволена по собственному желанию в связи с уходом за ребенком до достижения им возраста 14 лет. Зэм, ужан инты соку тӥледлы уз кыльы. г) семьяын ужаны быгатӥсьтэмен озьы ик лыдъясько песятай но песянай - соослэн законъя сюдӥсь-вордӥсьсы ӧвӧл ке. Кулэм муртлэн мумиз-бубиз но кузпалэз, таоссэ со уг сюды-ворды вал ке, пенсилы право басьто отӥяз улыны-вылыны амалзэс (коньдон) ыштӥзы ке. 18 аресъем но бадӟымгес арлыдо дышетскисьёслы, сюдӥсь-вордӥсьсэс ыштыкузы, пенсия тыро очной амалэн дышетсконзэс йылпумъятозязы, но 23 арес тырмытозь гинэ. Сюрбубылэн но сюрмумылэн пенсилы правозы бубылэн но мумылэн кадь ик, соос сюрпиналзэс (кудӥз берло кулыны шедиз) ичизэ 5 ар утялтӥзы ке. Сюрпи но сюрныл пенсия басьто пи но ныл музэн ик. Сюдон-вордон (иждивенчество) сярысь валэктэмын вылӥ верам законлэн 53-тӥ ёзэтаз. Кулэм муртлэн семьяяз сюдӥськись-вордӥськись адямиосын лыдъясько, соос улӥзы ке быдэсак со чотын яке ялан басьязы солэсь бадӟым юрттэт. Нылпиос лыдъясько мумы- бубылэн сюдӥськись-вордӥськисьёсыз, со понна ватсаса документъёс кулэ ӧвӧл. Ивортэк ышем муртъёслэн семьяоссы огкадь луо кулэмъёслэн семьяосынызы, сюдӥсь- вордӥсьлэн ивортэк ышемез сярысь решениез суд кутэ ке. Ожъёс дыръя ивортэк ышем военнослужащийлэн семьяез огкадь луэ ожын сӧсырмыса бырем муртлэн семьяеныз. Пенсилы правоен нылпиос сое уг ышто, кин ке соосты вордыны басьтыку но. Кузпал кулэмен валче пенсия басьтӥсь адями сое уг ышты выльысь кузпалъяськыкуз но. Кун пенсиос сярысь закон чакла пенсия тырыны кык пӧртэм мугъёсъя. 1. Огъя мугъёс. Пенсия тупатӥське, сюдӥсь-вордӥсь кулӥз ке, ужын шуккиськыса яке ужен герӟаськем муген висьыны усьыса яке огъя муген висьыса. 2. Военнослужащийёслэн семьяоссылы тупатэм мугъёс. Ужын шуккиськыса яке висьыны усьыса кулэм мурт понна пенсия тыриське, солэн кӧня ужамез шоры учкытэк. Нош огъя висёнэн сэрен кулон учыре, ужан стаж пенсия тупатыны тырмыт ӧвӧл ке, пенсия луоз ичигес. Сюдӥсь-вордӥсез ыштэмен валче, пенсия басьтон понна райсобесэ вуттоно таӵе бумагаос: курон (заявление), сюдӥсь-вордӥсь кулэм сярысь яке ышем сярысь, сюдӥсь- вордӥсь ку но кыӵе муген кулэм сярысь, пенсия тупатоно адямилэн арлыдыз сярысь яке сое ӧлексы лыдъям сярысь, сюдӥсь-вордӥсен ӵыжы-выжы луэм сярысь. Кытӥяз кулэ луо на таӵе документъёс: сюдӥсь-вордӥсьлэн арлыдыз сярысь, ужам дырыз (стажез) сярысь, солэн ужам интыяз луэм шудтэм учыр сярысь, Чернобыльын пуштонэн валче кулэмез сярысь, уждунэз сярысь, пенсия басьтоно муртлэн очной амалэн дышетскемез сярысь, кулэм муртэн ӵыжы-выжыезлэн ужамтэзы сярысь, пенсия тупатоно муртлэн наградаосыз сярысь но мукет (таоссэ рос-прос валэктозы райсобесын). ШӦКЫЧ Серем пыр Тыл Одӥг воргоронлэн нылыз быдэ вуэм. - Атай, лэзёд-а дискотекае? - Мын, нылы. Но нырысь кӧня ке дэмлан сёто. Тани кыӵе ке пияш ноныосыд борды кутскиз ке, киосаз шуккы. Улӥегес ке лэзькиз - отын тыл шу. Мын, но кема эн ӝега. Нылыз ӵукна гинэ бертэ. Атаез юа: - Малы таӵе кема? - Атай, ваньмыз верамедъя луиз. Пияш ноныосам йӧтскиз но, мон киосаз шукки. Улӥегес вутскиз но - отын тыл шуи. Нош со колбасае вань, шуиз, жарить, пе, кароно вал. Ӵукнаозь жарить карим. Но со малы ке ыль кылем. Картошка Гуртын тыршисьёслэн калык куспо конференцизы мынэ. Султэ француз: - Ми картошкамес мерттӥськом 15 мае, копаны кутскиськом 16 сентябре. - Султэ англичанин: - Картошкамес мерттӥськом 15 апреле, утялтӥськом 16 августысен. Султэ удмурт: - Ми картофкамес мерттӥськом 15 июне, нош копаськом 16 июне. Солэсь юало: - Малы нош ӵуказеяз ини? - Укыр сием потэ. Дефицит Одӥг пол удмурт Москвае дасяськиз. Солы шуо: - Дефицит вай. - Нош кытысь шедьтом? - Черодэз адӟид ке, отын ик дефицит луоз. Тани удмурт Москвае вуиз. Таксие пуксиз но водительлы шуэ: - Дефицит доры вутты. - ГУМ-е? ЦУМ-е? Лужникие? - Отчы, кытын черод кузьгес луэ. Водитель сое ГУМ доры вуттӥз. Потэ удмурт Красной площаде, Мавзолее черодэз адӟыса, таксистлы шуэ: - Мон отчы султо ай, нош тон ӝытазе монэ нуыны лыктод. Ӝытазе таксист вуэ но юа: - Я, кыӵе-мар ини? - Э-э, ӧзгес удалты: прилавок доры вуытозям, вузкарисез кулыса вуэм. Туспуктэм Одӥг удмурт армиысь бертэ. Кышноез ӝип-ӝип ӟыгырске но шуэ: - Мусое, асьмелэн пимы вордскиз! Ӝоген ӝыны арес тырмоз ни! - Кызьы-озьы ӝыны арес? Мон отпуске ӧй бертылы, тон но мон доры ӧд вуылы. Нош тон - ӝыны арес. - Нош мон, мусое, весь туспуктэмед шоры учкылӥ, соин ик шедиз но. Удмурт буйгатске но кӧлыны выдэ, ӵукна уйжомем кадь султэ: - Тон кинэ кутчаны малпад, кышномурт! Мон со патретэ кускозям гинэ пуксемын ук... Алдаса вуттэм нылъёс Тэк уг улы Испаниысь Средиземной зарезь дурысь Бенидорм курортысь полиция. Со кырмиз Россиысь лыктэмъёсты - 32 но 36 аресъем пиосмуртъёсты но 26 аресъем нылкышноез. Соос, законэз тӥяса, Россиысь нылъёсты Испание вайылӥзы но мугорзэс кужмысь вузатылӥзы. Полициын ужасьёслы валэктӥзы: йыртэмасьёс пинал нылъёсты дискотекае эктӥсе интыялом шуылӥзы, со понна туристической визаосъя Испание вайылӥзы. Татчы вуттэм нылъёслэсь документъёссэс талаллязы. Собере кышкатылӥзы но проституциен вырыны косылӥзы. Ужам коньдонзэс нылъёслы ӧз сётъялэ. "Эктӥсьёс" пӧлысь одӥгез "уж сётъясьёсызлэсь" алигес пегӟыны быгатӥз. Полицие лыктыса, ваньзэ мадиз. Полицейскойёс кулэ ужрадъёс ортчытӥзы. Озьы тодмо луиз: Россиысь ваем 20-22 аресъем нылъёс огаз квартираын пытсэт сьӧрын сямен улӥллям. Иворъёсъя национальной служба. "Альва" пытсамын Телевизор учкисьёслэн куремзыя, Удмурт Республикаысь Печатья но иворъёсъя министерство ивортэ: Россия Федерацилэсь туала законодательствоя но лицензиосъя пуктэм куронъёссэ трос пол тӥяллямез понна Россиысь телевидениея но радиовещаниея федеральной службалэн 97 номеро приказэныз (31. 07. 98) "Альва" телекомпанилэн 2027 номеро лицензиез басьтэмын. "Хуго" ООО-лы (ТК "Альва") со сётэмын вал 1996 арын 28 июне. Законъя лицензитэк чагыр экран вылэ потыны уг луы. Удмуртиысь Госсвязьнадзоръя управление верамъя, "Хуго" ООО коммерческой предприятие (генеральной директорез Шаталов В. А.) радиоэлектронной связез кутонын ӧз чаклалля РФ-ысь Правительствоен туэ 7 августэ 908 номер улын кутэм документлэсь куронъёссэ. Тае лыдэ басьтыса но Административной правонарушениосъя кодекслэн 243- тӥ, 244-тӥ статьяоссы вылэ пыкиськыса, Удмурт Республикаысь МВД но Госсвязьнадзоръя управление туэ 12 сентябре "Альва" телеканалэз ворсазы. Шӧкыч Котьма вузъёслы дунъёсты будэтэмен валче, улонмы ури-бери луыса кошкиз кадь. Вакчи дыр куспын магазин ӝажыос бушазы, базаръёс тырттэм кылизы. Нош уг кошко меда вузъёс республикамылэн палэназ? (Гожтэтысь). Сюрес вылын сылӥсь постовой: - "Заря!", "Заря!" Кылӥськод-а монэ? Вань сюресъёс кортнамын! Табере сиён- юонэз инбаметӥ нуыны малпаллям! Лушкаськисез ӝегатоно! Приём! Суредэз Л. ПРОЗОРОВЛЭН. Шӧкыч "Россия ялан тазьы ик кураськыса улӥз ке, вуоз меда куке-соку шудо улон? Западлэсь ёртӥськом валютазэ, дуноен басьтӥськом сиён-юонзэ, мукет вузъёссэ". (Гожтэтысь). Валютаосъя калык куспо фондлэн кивалтӥсез: - Кӧня коньдон кисьтоно луоз на меда тӥледлы? Ваньмыз пыдэстэм мешоке кадь кошке ук! Суредэз В. БОГОРАДЛЭН. Шӧкыч Художник пальпотэ Суредъёссы И. КИЙКОЛЭН но Д. ПОЛУХИНЛЭН. Шӧкыч Коӵыштэ нуиськод?.. Тыр штраф! Сарапулын улӥсь Лариса Юрьевна Алешкиналы айы коӵышеныз сэрен кӧня дырзэ-чиданзэ быдтоно луиз. Учыр таӵе вал. Огнуналэ со бакчаысьтыз Янаул-Сарапул поездэн бертыны потӥз. Сьӧраз кутӥз коӵышсэ. Пуштрес пӧйшур, ас сяменыз нургетыса, корзинаын пуке. Пыризы контролёръёс. Билетъёсты эскеро. Нош Каримова фамилляен ревизорлы коӵыш малы ке ӧз яра. Кутскиз ук Лариса Юрьевнаен керетыны! Билеттэк мынӥсь коӵыш понна 10 манет штраф куре вал. Кышномурт пумит луиз. Соку Каримова быдэс тарифъя тыриськон тупатӥз - 21 но ӝыны манет тыр! Ма карод, тыроно луиз. Лариса Алешкина таӵезэ гинэ чидасал вылэм ини но. Только укыр кӧтыз ӝож луиз юнме шорысь обидемзы понна. Кутскизы эскеронъёс, гожтэт пыр кенешонъёс. Алигес кышномуртлы коньдонзэ берыктӥзы. Нош огшоры чыры-пыры ужъёсын сэрен кӧня мурт юнме дырзэ быдтӥз... Н. ЛЯЛИН. Тазьы но луэ Сюрес вылын - кыйёс Завьял ёросысь Балтач гуртэ мыныкумы, паймымон суредэн пумиськоно луим. Оӵ шур валлин кыстӥськись сюрес вылэ кыйёс оло шунскыны потӥллям, оло толйыны дасяськиллям. Котькуд 20-30 метрлы быдэ адӟим ӵуж йыро кыйёсты (уж) но, сьӧд йырооссэ (гадюка) но. Снимок вылын: таиз сьӧд йыро кый. В. КАМАШЕВЛЭН туспуктэмез. КЫЛ ДУННЕ Кин кырӟалоз на удмурт кылын? "Кин вунэтэ аслэсьтыз удмурт кылзэ, вунэтэ аслэсьтыз анайзэ", - шуиллям асьмелэн вашкала выжыосмы. Берло дыре та кылъёслэсь пуштроссэ тросэз мукет сяменгес валало. Удмурт кыл но солэн кулэлыкез туала арын - таӵе юан трос пол сюлэмшугъяськытӥз монэ, малы ке шуоно, ӵем дыръя ачим сыӵе югдуре сюрылӥ адямиослэсь но кылылӥ та пумысен малпанъёссэс. Алигес эшеным редакцие мынӥськом вал. Огдышем сямен троллейбусэ пуксим но удмурт кылын лабыртыны шӧтам. Ӝыны сюресмес ортчимы-а, ӧм-а вӧзысьтымы кышномурт ми пала берыктӥськиз: "Нылъёс тӥ гуртысь-а?" Пумитаз ваземлэсь азьло ымныраз учконо кариськи, маиз ке куараяз сюлмам ӧз лякиськы. Бен, ми гуртысь шуыса, йырмес гинэ сэзъям пумитаз, собере вераськонмес азьланьтӥм. Сокем зол куараен ум но кенешиське вал кышномуртлы люкетӥськом ке шуыны, нош со ми пала быдэс мугорыныз сётскыса азьланьтӥз: - Соку ик адӟиське уго гуртысь шуыса, асьтэды кызьы возьыны быгатымтэдэс возьматыса, удмурт кылын бӧтьыртӥськоды. Коть городэ лыктыса, ӧжыт визьмаське вал. Кинлы кулэ со кылды? Эсьма, ӟуч кылын чебер вераськыны дышетске вал, яке, шуом, англи сямен. Культурады ке ӧвӧл, бертэ но гуртады зуле вотякъёс сямен. Возьытты но ӧвӧл, лэся? - Нош малэсь ми возьдаськыны кулэ? Улӥськом Удмуртиын, дышетскиськом Удмурт университетын, удмурт гуртысь, вирсэръёстӥмы удмурт вир бызе. Удмурт кыл тӥледлы уг кельшы ке, оло, бигер сямен вераськом? Малы ке бигеръёс уг возьдасько асьсэ кылызлэсь, урамын-а, транспортын-а, базарын-а, Левитан музэн куспазы верасько. Витьтон аресъем кышномуртмы буям ымдуръёссэ пепертӥз: - Пелям пыре вераськемды. Зэм, мон ачим удмурт вал, анае но. Ярам городэ лыктыса коть вунэтӥ, удмурт кылме, анайме но тышкаськисько вал, малы ке шуоно, возьыт луылӥз городын удмурт сямен вераськемысьтыз. Бускельме но ӟуч кари ини, табере со удмуртъёсты вань сюлэмыныз адӟонтэм каре. Мон данъяськисько аслам уженым, малы ке шуоно, асьмеос цивилизованной государствоын улӥськом. Соин ик интеллигентно, культурно вераськыны кулэ. Мукет остановкаысен со васькиз, нош ми куспамы кема малпаським верам кылъёсыз пумысен. Бен, куд-огез удмуртъёс, городэ вуыса, ас кылзэс вунэто, ӟуч луим шуо. Нош асьсэос ӟучъёслы уг ик укшало, ветлэмазы но, вераськон манеразы но удмурт шӧм кылемын. Ӟуч кылэз ӟеч тодэм алама ӧвӧл, асьмелы дышетсконо та кылын чебер но визьмо, вӧлыьыт но шаплы вераськыны. Но огеныз мон соглаш уг луиськы. Анай-атайъёс шуо: ӟуч кылэз тодытэк, вераськыны быгатытэк возьдаськыса улӥм, нылпиосмы коть ӟуч кылын мед вераськозы, нош удмуртэн кыдёке уд вуы. Самой та кылъёс бордын ик асьмелэн янгышмы. Шонергес луысал, дыр, тазьы: бен, мед тодомысэ, вераськомы ӟуч кылын но, англи сямен но, соин валче медам вунэтэ асьмелэсь - удмуртсэ. Малы ке шуоно, удмурт сямен но чебер вераськыны ум быгатӥське. Мар луоз ӵуказе, асьмеос нылпиосмес ӟуч кыллы гинэ ке дышетӥм? Кин соку кырӟалоз удмурт кырӟанъёсты, кин гожъялоз удмурт кылбуръёсты-веросъёсты, кин пуктоз но адӟоз удмурт спектакльёсты, кин кылзоз-учкоз радио но телепередачаосты... Но ваньзэ курланы гинэ уг яра, дыр. Тани Удмурт кун университетын но пумиськыло удмурт кылэз дышетыны мылкыд карись ӟуч студентъёс. Вератэк кельтэме уг поты одӥг егит семьяез. Наташа но Володя, будэто пичи нылзэс. Макем паймымон потӥз, соослэн Аня нылзылэн мыным "ӟечбур" шуыса вазиськемез. Наташа но Володя куспазы ӟуч сямен верасько кыксы но пичи дыръязы удмурт кылэз дышетымтэ, валаны валало ик, но вераськыны шугъясько. - Мед тодоз кадь потӥз удмурт кылэз, садике мыниз ке, ӟучлы но дышоз, собере ми но Володяен ӟуч сямен вераськиськом, - валэктӥз Наташа. Ӧйтӧд, кызьы асьсэлы, нош мыным туж мусо потӥз кык аресъем Анилэн чылк-чылк удмурт сямен вераськемез. Галина САВИНА, Удмурт кун университетысь студентка. Вузэд мынэ - вуза Кемалась тодмо ни асьмелэн Иж кармы аслаз пыӵал-тӥрлыкъёсыныз. Соосты поттон завод кылдытэмын вал 1807 арын 10 июне. Солы кутскон сётӥз Андрей Федорович Дерябин. 1812- тӥ арын, Отечественной война кутскон азьын, завод дасяз ини 2 сюрс пыӵал, нош кык ар ортчыса - 10 сюрс. Ижевск тужгес но данэ потэмын пӧртэм пумо пӧйшуран пыӵалъёсыныз. Алигес механической заводэ вуылӥз США-ысь "ЕУРОПИЭН Америкон Армори Корп" фирмалэн представителез. Со кык но ӝыны сюрс пыӵал басьтӥз. Зарезь сьӧрысь кунолы тужгес но ярам одӥг гумыё Иж-18 но Иж-81, кык гумыё Иж-43 но Иж-27 пыӵалъёсмы. Куномылы "Ижъёс" яразы. Нырысь со ваньзэ пыӵалъёсты оген-оген эскериз-учкиз. Но американецлэн аслаз куронъёсыз-чектонъёсыз кылдӥзы на. Соосты быдэстытэк ӧйлась. Шутэтскон нуналъёсы но ужазы рабочийёс. Фирма эшшо 1900 пыӵаллы контракт гожтӥз на. Заводын валало - вуз мынэ бере сое вузано. Л. БАКАЕВА. Кызьы улӥськод, пичи гурт? Татын гондыр кузё вылэм Тӧдьы бус каллен гинэ ӝутске шыпытак кӧлӥсь тымет вадьсытӥ, чильпырась вотэсэн шобыртэ кызьпу арамаез, вылӥе ӝутскыса сылме ӵук шундлылэн ӵыж-горд шудӥсь сиосыз улын. Кӧлэмысь сайкало ярдурысь шашыос пӧлы каръяськем луд ӵӧжъёс. "Крак! Крак!" - сётэ куаразэ семьязэ утись айы ӵӧж. Пумитаз вазё мукетъёсыз. Сайка котыр улос, соин ӵош нюлэс вӧзы пуксем пичи гурт - Горд Шунды. Интыез но, нимыз но туж чебер. Нош инкуазез кыӵе!.. Люкиськыны ӵыдонтэм. Коркаосын артэ ик - сик. Гурт калыксэ со гужембыт куноятэ ӵыж-ӵыж кисьмам узыен, намерен, эмезен, олокӧня пумо губиен, пушмульыен, льӧмен, шуэн но палэзен. Городын улӥсьёс понна таӵе узыр, шыпыт сэрег рае вуылэм кадь потэ. Зэмен но, туж шулдыр, синмаськымон инты шедьтӥллям выль починка кылдытӥсьёс. Горд Шунды туэ пусъе куатьтон ар тырмонзэ. - 1938 арын тулыс нырысьсэ гыризы-кизизы ни,- тодматэ гуртэныз Иван Гаврилович Гаврилов, улон даурзэ татын ортчытэм 68 аресъем воргорон.- Кутскон сётӥзы Селта палась потэмъёс, "Горд Шунды" колхозысь вуэм семьяос. Починкаез соос асьсэ сямен нимазы. Эгралась ми тямыс корка вуимы. Яна потӥзы Нылга, Юкаменск, Старые Зятцы палъёс, огъя вераса, ньыль район татчы огинэ вуиз. Горд Шунды пуксиз ӝуам нюлэс бервылэ. 1921 арын татӥ кӧшкемыт тылпу шукыръяськем: дауръёсын сылӥсь вашкала писпуосты кӧня ке нунал куспын сьӧд сэрегпумлы пӧрмытэм. Ар-кык ортчыса, пень пыртӥ ӝужаны ӧдъязы ненег кызьпуос но пипуос. Лошъяськись коръёсты, лӥялъёсты вемеен утялтӥзы, война кутскон азьын гинэ быдэсак сайкыса быдтӥзы. Выль интые выжемъёслы государство нырысетӥ аръёсаз льготаос сётъяз: нянь вузанъя планлэсь мозмытӥз. Соин ик калык ӟеч улӥз. Секыт война аръёсы но татын няньлы ӧз ёрме, суретэн колды шӧмъяны ӧз кылды. - Пересьёс верамъя, туала гуртмы интыын, пе, сьӧд-сьӧд нюлэс вылэм, отын гондыръёс кузёяськиллям. Тылпуэн сэрен тросэз быризы, мукет азе пегӟизы. Кылем арын, валля арын но гондыръёсты та палась адӟылӥзы ни. Вордскем музъемзы дораз ӧте, дыр, вӧсь карем пӧйшуръёссэ но. Колхоз кылдытозь, нюлэс кушъёсын гыриллям-кизиллям ни нимаз улӥсь хозяйствоос. Отӥяз соосты ваньзэсты огазеязы "12-тӥ декабрь" колхозэ. Нырысетӥ председатель вал Миронов Степан, сое воштӥз Сектелев Апполос. Война кутскон азьын Гусев ужаны кутскиз, собере гуртысь пиосъёсын ӵош ачиз но фронтэ кошкиз. Ӧз берытскы ни. Кӧня провор воргоронъёс войнае быризы! Татысь гинэ котькуд коркась кыкен но, куинен но басьтэмъёсыз вань. Витезлы сяна берытскыны ӧз кылды, соосыз но табере улонысь кошкемын: Поздеев, Култашев, Кутявин, Дунаев... Война кутскон арын мон 5-тӥ классэ мыныны кулэ вал. Дядяй ӧз лэзьы: ужаны, пие, кулэ. Кин пичи пиналъёсын кылись мемеедлы юрттоз? Ассэ трудармие нуизы. Озьы 11 аресысен колхозник луи. 1960-тӥ арын Иван Гавриловичез гурт калык председателе пуктэ. Соку огазеям, бадӟыматэм колхоззы Чапаевлэсь нимзэ нуллэ вал ини. Ужаны кылдӥз Хрущев но Брежнев кивалтон аръёсы, гурт хозяйстволэн ӵапак ӝутскон вакытаз. Ма шуод, музъем ужась ласянь политика 60-тӥ - 70-тӥ аръёсы йӧн-йӧн нуиськиз, хозяйствоослы азинскыны но юнманы луонлык сётӥзы. Горд Шундыын улӥсьёс соку малпазы шат, гуртсы, ужам ужзы бырон калэ вуоз шуыса? Асьсэ понна пичияк медпункт но, контора но, магазин но, клуб но ӝутӥзы вал. Туннэ магазинзы гинэ кызьы ке сылэ на, кылемзэ ваньзэ тус-тас карыса куштӥзы. Али кирпичен-кирпичен сэрттыса быдто пудо вордон гидъёссэс. Колхоз куашказ. Гурт кузётэк кылиз. Егитъёс городэ кошкизы. Арлыдоос гинэ пуксем интыязы весяклы выжы лэзизы - юртъерзэ куштыса кошкисез ӧжыт. - 1980 арын милемыз радиозавод басьтӥз вал, подсобной хозяйство интыын возён вылысь. Котьма борды соку кузё сямен кутскизы: сюресъёсты тупатӥзы, фермаез выльдӥзы, гуртлы маин быгатэм юрттӥзы. Кельшиз вал кивалтӥсьмы но - Петр Вениаминович Чувашов. Калык понна сюлмаськылӥз. Но кема ужаны ӧз сётэ, люкетӥсьёс заводысь начальство пӧлын ик шедизы, лэся. Кошкиз. Сыӵе адями, валась, быгатӥсь специалист дорамы ӧз шедьы ни. Мар табере ортчемзэ веранэз? Кӧня егитъёс, кыӵе кужым вал - ваньмыз кин кытчы пазьгиськиз. Адямилы ужан инты кулэ ук! Соиз-а ӝож ӧвӧл - асьме калык тэк кылле, нош шуныт палъёсысь вуэмъёс медъяськыса отчы но, татчы но мерско. Иван Гаврилович - кибашлы адями. Пиосыз но выжыяз мынэмын. Музъем но гыро, корка но пукто, муш но, пудо но вордо. Ужась мурт сютэм уз кулы. Тани соослэн но семьязы трактор, машина басьтӥз, выль юрт ӝутыны кутскиз. Совхоз бырон калэ вуиз ке но, адямиос ас хозяйствозэс утьыны тыршо. Оло, фермеръёс гуртэз возёзы на? Гаврилов таин соглаш ӧвӧл: "Мон соослы уг оскиськы. Музъемъёсты вожмаськыса басьязы, нош пайдаез ӧвӧл - йӧны пӧлы согиськыса гужембыт кыллё. Техникатэк-а гырод-кизёд?" "Радистлэн" но азьвыл кадь кужымез ӧвӧл ни. Завод сылэ бере, подсобной хозяйствоез - сюрпинал интыын. Мултэс ныпъет кинлы кулэ? Кизем юзы 4-5 центнер сяна гектарысьтыз ӧз люкаськы. Соин ик пудо но ворды, кидыслы но тырмыты. (Колхоз дыръя ог 20 центнер кутсамзы вань). Тае адӟыса, гурт калыклэн сюлэмыз пӧзе, но номыр лэсьтэмез уг луы. "Ужам уж жаль, ваньзэ быдтӥзы, куашкатӥзы. Гуртамы радио гинэ но ӧвӧл ни - пеймыт гуэ шедем муртъёс кадь улӥськом". Киысь кие вошъян, колхозэз быдтон но город кие сётон Горд Шундылы номыр умойзэ ӧз вайы. Ог куамын коркаем чебер шулдыр гурт ас югдаз кылиз: кысэмын радио, уг ветлы ни татчы почта нуллӥсь. Газетъёсты магазинэ я кытчы куштыса кельто. Басьтом "Удмурт дуннеез" ик. Азьвыл сое ог дасо семья басьтэ вал, али куинь-ньыль мурт гинэ гожтӥськемын на. Зэм, таоссэ ини быдэс гуртэн лыдӟо, котькуд номерез киысь кие ветлэ. Иван Гавриловичлэн но "Удмурт дунне" - яратоно газетэз. "Одӥг ар но басьтытэк кылеммы ӧвӧл,- шуэ со.- Азьвыл ӵем гожъяськоды вал тырмымтэос сярысь, котькуд критической материалъя кутэм ужрадъя ивортылӥды. Али со быриз, дисциплина йӧскадь нокытын но ӧвӧл ни, лэся. Кельшо политикаез но гуртэз возьматӥсь статьяос. Туж тодэм потэ азьмынӥсь хозяйствоослэн улон-вылонзы, экономиказы, ужан опытсы сярысь. Неужто со нокытын ӧвӧл ни? Депутатъёсмыя но верам потэ: зол выро кадь ас куспазы, нош ужзылэн пайдаез уг адскы". Тӥни озьы, пичи гуртын-а улэ адями, бадӟымаз-а, городын-посёлокын-а - солэн огкадь тодэмез потэ дуннелэсь кудпала бергамзэ. Горд Шундыын та нюжа но чигтэмын, шуыны луоз, чагыр экран гинэ гуртоосты "бадӟым музъемен" герӟа на. Куд-ог семьяос, коньдонлы ёрмыса, таизтэк но кылемын ни. Яркыт пиштӥсь шунды сиос музъем ужась вадьсын нуналысь нуналэ пумен бездо. Озьы ке луиз, кин тодэ, вуоно даурын, оло, бырем гуртлэн ульчаостӥз, кузё кариськыса, нош ик гондыръёс юмшалозы?.. х х х Материалэз газетэ дасяку жингыртӥм Норьяысь связья отделение. Отын таӵе валэктон сётӥзы: та сельсоветэ пырись Горд Шунды гуртын радио быдэсак кысэмын, дун тырымтэзы понна (толэзяз со 4 манет 70 копейкалы усе). Таӵе ик югдур артысь Кулаевоын - татын 25 семья радиотэк кельтэмын. Быдэс гуртын одӥг телефон но ӧвӧл. Таин сэрен ик, тылпу кысӥсьёслы жингыртыны быгатытэк, Кулайын алигес ӝуаз кык хозяйство. Озьы, интыысь властьлэсь лябзэ шӧдыса, пичи Пургаысь электрокужым понна кыл кутӥсьёс огкутскемен гурт калыкез быдэс дуннелэсь люкизы. Нош кытчы учко районлэн кивалтӥсьёсыз? Гуртоос, пенсионеръёс шат янгыш дыраз коньдон басьтымтэзы понна? Газетъёс сярысь. Кызьы оскытӥзы Норьяысь связья отделениын, почта котькуд корка дыраз вуыны кул, со понна Ляльшуре но Горд Шундые нимаз адями висъямын. Людмила МЕДВЕДЕВА. Пичи Пурга район. * Иван Гаврилович ГАВРИЛОВ. Таӵе адямиос вылын юнмаз но азинскиз гурт улон. Фотоез Владимир КАМАШЕВЛЭН. Котьку мед шумпоттоз "Арама" "Арама" - таӵе чебер кылын нимамын Пичи Пурга ёросысь Вуж Монья гуртын кылдытэм огазеяськон. Сое ӝутонэ нырысетӥ кирпич 1989 аре понэмын. Кичӧлтӥсьёс Николай Алексеев но трос кужымзэс, валамзэс сётӥзы, "Арама" пайдаё мед ужалоз шуыса. Угось уноез пичи хозяйствоос кӧня ке ар гинэ ужаса куашкало, быро. Уката ик берло дыре. Нош поттэм ваньбурзэс вузаны арысь аре шуггес луэ. "Арама" сӥльлэсь пӧртэм сиёнъёс, тужгес но уно колбаса поттэ. Николай Романович али отпускын, соин ик вераськи солэн нырысетӥ воштӥсеныз Владимир Иванович Овчинниковен. Солэн верамезъя, азьло аръёсы нуналлы быдэ 1700 килограмм сӥльлэсь сиёнъёс пӧрало вал, нош али ӝынызэ лэсьто. Вузаны, пе, шуг луиз. 7-8 пумо ӵынатэм колбаса но сомында ик пӧсьтэмзэ поттэм сяна, татын дасяло на построма, карбонат, ветчина, сарделька, пельнянь но мукетсэ. "Арамаын" али 60 адями тырше. Уж ке вань дырзэс но уг жаляло. Ваньбурзэс нуллыны уг курадӟо - машинаоссы вань. 60 процент продукцизэс Ижын вузало, одӥг куиньмоссэ - Агрызын, кӧнязэ ке - Пургалан. Вань колбасаез выль сӥльлэсь гинэ дасяло. Соин сое калык умой басьтэ. Республикаысь тросэз колбаса поттӥсь пичи цехъёс пытсаськемын, нош "Арама" пыд йылаз возиське на. Пичи предприятиын ужаны капчи ӧвӧл, уноез ужъёс киын быдэсъясько. Озьы ке но сиён поттон амалъёс зол чакласько. "Арамаын" тыршо гурт калык понна, соин ик отын ужасьёслы уг ёрмо. Предприятилэн кивалтӥсьёсызлы адямиос оско, пӧртэм куронъёсынызы вазисько. Соос быгатэмзыя юртто. Соин но, дыр, алигес Владимир Овчинниковез гуртын улӥсьёс райсоветэ депутатэ бырйызы. Округаз 700 мурт улэ. Владимир Овчинников Вуж Моньяын 1956 арын вордскемын. Йылпумъяз Ижысь Гурт хозяйствоя институтлэсь механизацияя факультетсэ, инженер-механник луиз. Армие ветлыса, "Искра" колхозын валтӥсь инженер вал. Табере кузпалэныз экономистэн Агафья Александровна ӵош "Арамаын" ужало. Кузпалъёс нылпиоссэс но - Ленаез, Алёшаез но Сашаез - пичиысен ик гурт ужъёсты гажаны дышето. Соослэн ӝыны гектар бакчазы. Асьсэос пудо но тылобурдо вордо. Пиналъёссы юртто. Владимир Иванович чорыганы но пӧйшураны но дыр шедьтэ на. Тӥни сыӵе шаплы, котьма карыны быгатӥсь-валась адямиез гуртооссы депутатэ бырйизы. Азьланяз но со калыкезлы юрттыны быгатоз, "Арамаын" поттэм ческыт сиёнэн шумпоттоз. Н. ВОЗИСОВ. Выльзэ утчало Ижысь механической завод нуналмысь паськытатэ калык кулэ луись вузъёсты поттонзэ. Басьяськисъёс ӟеч тодо ни предприятилэсь "Югдон-1" но "Югдон-2" кухняын кутӥськись комбайнъёссэ, перфораторъёсты, электрорубанокъёсты, шлифовать карон машинаосты. Та дыре дасяло электродисковой пила, выль электрорубанок поттыны. Завод озьы ик поттэ пӧртэм пумо кардан валъёс, "КамАЗ" автомобильлы компрессоръёс, автомобильлы но мотоциклъёслы воштос ёзъёс. Озьы выльзэ утчаса гинэ коньдон поттыны луэ. Со сяна кылдо ужан интыос но. П. СЕРГЕЕВ. "Ньыльлы" но "витьлы"! Удмуртиысь историяя, кылъя но литературая институтлэн аспирантураяз нырысетӥосыз дышетскисьёс кутэмын вал вить ар талэсь азьло. Табере соос пӧлысь одӥгез наукаосъя кандидат луиз ни. Аспирантурае котькуд ар лыкто вылӥ дышетскон заведениосты горд дипломен йылпумъямъёс. Туэ аспирантурае пырыны мылкыд кариз сизьым мурт. Нырысетӥ экзамензэс ваньзы ик усто сётӥзы. Азьланяз но "ньыльёс" но "витьёс" гинэ сӥзиськом! С. ПЕТРОВА. Наукалы пашмыны уз сётэ Ижевскысь Гурт хозяйствоя академиын кандидат диссертациосты утёнъя кенеш ужзэ мытӥз. Академиын та выллем кык кенеш ужа ини. Нырысетӥезлэн заседаниосаз пудоез вордонлы сӥзем диссертациос эскеремын ини. Выляз кенешын асьсэлэсь тодон-валанъёссэс возьматозы музъем ужлэн экономикаеныз вырись специалистъёс. Соослэсь диссертацоссэс дунъялозы шаерысьтымы тодмо учёнойёс. Кенешлы кивалтӥсе юнматэмын Кун Кенешлэн депутатэз, экономика наукаосъя доктор М. И. Шишкин. Озьыен, егит тодосчиос тыршемъя, шаерысьтымы наука уз пашмы, экономика азинскоз. И. ПЕТРОВА. Улон интыез - ? Паспортлэн 16-тӥ бамаз гожтэмын луэ адямилэн улон интыез. Но тросэзлэн сыӵе пусъёссы ӧвӧл. Мугез огшоры - ӧвӧл асьсэлэн улон интызы, ас бордазы гожтыны (прописка лэсьтыны) мылкыд карись ӵыжы-выжыос но уг сюро. Ма кароно сыӵе дыръя? - законэз юри тӥяса озьы уг уло ук. Вань-а та ласянь кыӵе ке воштӥськонъёс? Юанъёслы валэктэ Удмурт Республикаысь МВД-лэн паспортно-визовой службая отделысьтыз валтӥсь инспектор Галина Алексеевна ШКЛЯЕВА: - "Россия Федерациысь кунмуртъёслэн (гражданъёслэн) улон инты (яке огдырлы улон инты) бырйыны но вошъяны луонлыксы сярысь" Законъя 1996-тӥ арын июнь толэзьысен прописка табере нимаське улон интыя пусйиськонэн (регистрациен). Та законъя гражданъёс пусйиськыны быгато ялан яке огдырлы улон интыосазы. Гражданинлэн ялан улон интыеныз лыдъяське, со аслаз корказ, квартираяз, огъяулонниын, мукет улон интыосын ордеръя улэ ке. Огдырлы улон интыен - куке гражданин кыӵе ке улон интые (гостиницае, санаторие, кинлэн ке квартираяз) кӧня ке дыр ӵожелы интыяське ке. Галина Алексеевна, но огдырлы пусйиськем сярысь справкаен уже но уг куто, больницаосы но сюрыны шуг. Соин ик адямиос аръёсын утчало кема дыр ӵожелы (кытӥяз вань улонлы) пусйиськон. Нош ӵыжы-выжыос, тодмоос кышкало пай висъянлэсь - доразы уг лэзё. Ма верасалды та сярысь? - Приватизировать карем квартираослэсь кузёоссэс мон буйгатыны быгатысал - соос доразы кинэ ке гожто-пусъё ке, лыктэм муртлэн ваньбурлы нокыӵе правоез уг кылды - улон коркалэсь люкетсэ но, коньдон пай но курыны уз быгаты. Солэн правоез вань татын улыны гинэ. Со сяна, юртлэн (квартиралэн) кузёез тодмозэ яке ӵыжы-выжызэ дораз гожтыку быгатэ на поднайм пумысен огкыл гожтыны. Отын со пусйыны быгатоз, кӧня дырлы гожтэмзэ но мукет куронъёссэ. - Мар пӧртэмез, приватизировать карымтэ квартирае пусйиськыку? - Государственной яке общественной юртлэн кузёез кинэ ке дораз гожтыны быгатоз та коркан улӥсь быдэ вуымтэос соглаш луизы ке гинэ. Со сярысь куриськон (заявление) луыны кулэ. Пусйиськем муртлэн та коркан (квартираын) улыны но, ваньбурлы но (пайлы) правоез кылдэ. - Быгатэ-а администрация гражданинэз улон интыезъя пусйиськымтэез понна кыл кутытыны? - Бен, улон интыя пусйиськытэк улэм понна администрация алыны но штраф тырытыны быгатэ. З. ВАХРУШЕВА. Ураме медаз кыле Республикаын быдэ вуымтэосты улон-вылонын кышкытлыклэсь утёнъя ужрадъёс ортчизы. Городъёсысь но ёросъёсысь администрациослэн быдэ вуымтэосын ужанъя комиссиоссы куинь сю кык нылпи пумысен материалъёс эскеризы. Тодмо луиз, кык сю кызь пинал школае уг ветлы шуыса, дас витьсэ анай-атайёссы ултӥяса возё, куамын тямысэз нарколог доры ыстэмын, дас ньылез - психолог, дас одӥгез - мукет врачъёс доры. Правоез утись ёзъёсын пусъем. Пытсэт сьӧры вуылэм, колониосысь бертэм нылпиосын кенешемын. Юись, ужасьтэм анай-атайёс но соослэн пиналъёссы доры вуылэмын. Сыӵе мумы-бубыос пӧлысь дас куинез административной кыл кутон улэ кыскемын, быдэ вуымтэосты аракы сектамзы понна. Сю сизьымдон тямыс школалэн, 16 училищелэн, ватсаса дышетонъя 27 учрежденилэн ӟеч сямъёс пыӵатон, уродъёсызлэсь утиськон удысын ужамзы эскеремын. Городъёсын но ёросъёсын ужазы улонын юрттэт сётонъя службаос, психологен кенешонъя телефонъёс. Та ужрадъёсты ортчытонэ пыриськизы администрациосысь, правоез утись ёзъёсысь сюрслэсь уно ужасьёс. Иворъёсты вӧлмытӥсь ёзъёс но палэнэ ӧз кыле. Городъёсысь но ёросъёсысь вуэм юанъёслы валэктӥзы Удмурт Правительствоысь Быдэ вуымтэосын ужанъя комиссиысь но Прокуратураысь адямиос. Правительстволэн Тӧроезлэн секретариатысьтыз пресс-центр. Герд Ӵыжы-выжыосмы дорын Мадиськонмы кылиз валэктонтэк Быдэ вуытозь, тон монэ будэтӥд, Вожой шур дурысь вож садо Вандэмо. Мынам малпанам тон али но дуно: Вордэм мемиез кадь, шуныт яратӥ Тонэ, Вандэмо. Тодмо удмурт писатель Михаил Петров та чуръёссэ сӥзем вордскем гуртэзлы. Кылбурез "Вандэмо" шуыса ик нимаське. Гожтэм 1945-тӥ арын, ожъёс мынон вискын. Вандэмо гуртсэ М. П. Петров мукет гожъямъёсаз но данъя. Вордӥськем Вандэмо, тон монэ быдэстӥд, Кырӟаса кӧкыын ветталляд,- шуэ со "Мӧзмон" кылбураз. Таиз но 1945-тӥ арын кылдэмын. Кыдёкысь тодмотэм шаеръёстӥ ветлыку, вордӥськем палъёсыдлэсь юн мӧзмоно угось. Сыӵе дыръя кылбурчи ручка бордаз кутскытэк уг чида, дыр... 1998-тӥ ар, куартолэзь. Куазь шуныт, сайкыт. Лыз-чагыр инмын одӥг пилем но ӧвӧл. Машинамы дыртэ Елабуга пала. Тани Юмья - суредасьлэн Юрий Лобановлэн вордӥськем гуртэз. Бадӟым сюрес ортче вылэм гурт шортӥзы ик. Нош Юмья сьӧрын Татарстан кутске ни. Бускель элькун музъем вылтӥ кема ик ӧм мынэ, сюрес урдсысь тодмо нимез пумитамы: Вожой шур. Озьыен, Вандэмо гурт пала матэктӥськом. Зэмзэ но, Валдэмо гурт вож сад пӧлы выемын. Урамъёсазы, садъёсазы уно писпуос будо. Пӧлазы вань пересь бадьёс, кызьпуос. Соос Миша Петровез но тодо на, дыр. Нош Сашаен Коля Белоноговъёсты егитъёсызгес но тодазы вайыло, вылды. (Одӥг гуртысь - куинь писатель!) Агай-вынъёс вордӥськем гуртазы бертылытэк ӧз улэ. Тани Александр Егоровичез кылем арын Вандэмо школаын дуно куно карыса пумитазы, куатьтон вить арес тырмемзэ сӥё-дано пусйизы. Со пумиськонэ Менделеево ёрос администрацилэн тӧроез но лыктэмын вал. Пусйыны кулэ: та ёрослэн быдӟалаез, нимыз куинь пол воштӥськылӥз ни. Соин ик Вандэмо гурт нырысь Бондюга ёросын вал, собере Елабуга, али Менделеево ёросын. - Дано писательёсмес ми ум вунэтӥське,- вера школалэн директорез В. К. Евдокимов.- Арлы быдэ, соослы сӥзьыса, кыӵе ке но ужрад ортчытӥськом. Туэ школамылы сю ар тырмоз. Школамылэн ку усьтӥськемез сярысь ми Михаил Петровлэн гожъямъёсысьтыз шедьтӥм, собере Кировысь архиве вазиським. Документ шедьтэмын ни, солэсь копизэ басьтыны 180 манет кулэ. Нош уксёмы ӧвӧл. Валентин Кириллович ачиз чуваш, удмуртъёслэсь сюлмаськонъёссэс умой вала. Михаил Петровлы музей усьтон сярысь малпанэзлэсь но уг куштӥськы. Тодмо писательлэн улэм коркаез кылемын угось. "Кӧня ке выльдыса, сое аспӧртэм музей карыны луысал. Та ласянь милемлы Удмурт Республика но мед юрттысал. Малпанмес ми гожтӥмы вал элькунысьтыды Писательёслэн союзазы но. Малы ке со чалмыт улэ",- шуиз Валентин Кириллович. Вандэмоысь шор ёзо школаын туэ сю кызьлэсь уно пиналъёс дышетско. Соос пӧлысь уноез удмуртъёс, мукетъёсыз - поръёс, бигеръёс, чувашъёс, ӟучъёс. Удмурт нылпиос анай кылзэс дышето, удмурт газет-журналъёсты но кӧня ке экземпляр басьто. - Удмурт книгаос, учебникъёс школаяды вуыло-а? - юаськом удмурт кылъя дышетӥсьлэсь Л. И. Павловалэсь. - Берло дыре удмурт книгаос чик ӧм басьтэ, шуыны луоз. Зэм, мон татын туж кема уг ужаськы на. Ачим Грах ёросын будэмын. Тодон-валанме заочно амалэн будэтӥсько Удмурт госуниверситетын. Ижевске ветлыкум, удмурт книгаос басьяны тыршисько. - Нош малы та гуртэз Вандэмо но Монашево шуыса нималлям? - командировкае выль интые вуылыкум, та выллем юан сётытэк уг кельтӥськы. - Куке но та палан монахъёс, пе, улӥллям. Музъемзылэсь одӥг люкетсэ соос удмуртъёслы вандыса сётӥллям, лэся. Отчы Вандэм (о) гурт кылдэм, шуо. Ӟучъёс солы Монашево ним сётӥллям, пе. Озьы-а, ӧвӧл-а, созэ мон рос-прос уг тодӥськы,- вераз Людмила Ивановна. Удмурт пиналъёс азьын ми быдэс час вераським. Калыкмылэн улэм-вылэмез сярысь мадеммес соос туж сак кылзӥськизы. Но котькуд удмурт школаын сямен ик пиналъёс милемлы одӥг юан но сётыны ӧз дӥсьтэ. Укыр востэмесь-а, дышетэмын ӧвӧл-а? "Кизили" журналысь Пальыштыклэн юанэзлы но валэктон ӧз шедьтэ. Нош юанэз таӵе вал: "Вожой шур дурысь вож садо Вандэмо гуртын вордӥськизы но будӥзы Миша, Саша но Коля, собере вань удмуртъёслы тодмо луизы. Кызьы соослэн фамилиоссы?" Пиналъёслэн чалмыт улэмзы милемды кӧня ке паймытӥз... Вандэмолэсь ог сизьым иськемын, Елабугае нуись сюрес дуре пуксемын Тэремшур (Енабердино) удмурт гурт. Кылем арын отын выль школа усьтӥзы. Школазы бадӟым, ог кык сю дышетскисьёслы чакламын. Классъёс блокен-блокен пуксьылэмын. Котькуд блокын - куинь класс. Классъёслэн-кабинетъёслэн нимъёссы удмурт но ӟуч кылын гожъямын. Ваньмыз синмаськымон. Огез гинэ сюлмаськытэ - туэ та шор ёзо школае 56 дышетскись гинэ ветлэ. Нырысетӥ классы воксё ӧвӧл. Таӵе ӟеч школа ворсаськон калэ уз вуы меда? - Удмурт кылэз ми кыкетӥ арзэ гинэ дышетӥськом ай,- верало 2-тӥ - 3-тӥ классъёсты дышетӥсьёс Татьяна Исаковна Сидорова но Зинаида Васильевна Карпова.- Пиналъёс куспазы ӟуч сяменгес верасько. - Милемыз туж сак кылӟизы кадь ук? - паймеммес ми ӧм ватэ. - Соос вераськемез валало, лыдӟиськыны но гожъяськыны шугъяськогес. Школалэн директореныз А. Н. Захаровен кенешыны милемлы ӧз кылды. Ми лыктыку, со интыяз ӧй вал. х х х Кылем арлэн шуркынмон толэзьысеныз туэ куарусёнозь ми, "Кизили" журналлэн редакцияз ужасьёс, Татарстанысь, Башкортостанысь, Свердловск улосысь 18 удмурт гуртэ потамы. Котькытын ик милемыз шуныт пумиталлязы. Туннэ газет пыр ваньмызлы ик тау кареммес вераськом, шудбур, тазалык сӥзиськом. Командировкаосын люкам ужъёсмес, адӟемъёсмес, кылдэм малпанъёсмес азьланяз "Кизили" журналын но мукет удмурт изданиосын поттылыны тыршом. Ульфат БАДРЕТДИНОВ, писатель. НАДЕЖДА КРАЛИНАЛЫ - 75 АРЕС Сюлэм куара Соослэн семьязы 1942 арын Саратов улосысь лыктӥз Удмуртие улыны. Надежда Кралиналы соку 18 арес вал. Удмурт пединститутэ дышетскыны пыриз. Ижевск-Балезино чугун сюресэз лэсьтонэ комсорг луыса пыриськиз. Каракулино шор ёзо школаын дышетӥсь но, гуртысь сцена вылын артист но вал. Но солы кылдэм ас даурзэ удмурт литература понна улыны. Аспирантураез йылпумъяса, филология наукаосъя кандидат луэмез бере, 13 ар ужаз УдНИИ-ын, 22 ар - Удмурт пединститутын (УдГУ-ын). Удмурт литератураез, фольклорез эскеронын со одӥгез валтӥсь тодосчи луэ. Надежда Петровна, кылсярысь, дасяз но поттӥз мадькылъёсъя (загаткаосъя), выжыкылъёсъя, дауркылъёсъя (легендаосъя) книгаос. "Мифы, легенды и сказки удмуртского народа" книгаез понна солы сётэмын УАССР-лэн кун премиез. Н. П. Кралина ассэ жалятэк тыршиз удмурт писательёслэсь бадӟымесь произведениоссэс, кылсярысь, Т. Архиповлэсь дилогизэ, Г. Перевощиковлэсь тетралогизэ, (удмурт кылэз тодыса) ӟуч кылэ берыктон бордын. 1959 арысен со луиз ини СССР-ысь Писательёслэн союззылэн членэз. Трос лыдъяны-чотаны луысал на Надежда Петровналэсь ӟеч лэсьтэм ужъёссэ, наградаоссэ... Нош ойдолэ кылзом туннэ солэсь "сюлэм куаразэ"... Нокытчы уд пыры - та дыр матэктӥз. Потэ-а, уг-а сое пусъеме - мынэсьтым уз юа... Улонтӥм туэ сьӧд гож ортчиз, соин но та юбилей сярысь тодам ваеме уг поты вал, уката ик сое кызьы ке бусьтыр пусъён сярысь ӧй малпа. Нош люкасал ке, шуом, огазе вань дуно, гажано адямиосме - комсомолъя, искусствоя, литературая эшъёсме, университетысь юлтошъёсме?.. Котькыӵе ресторанлэн, театрлэн, дворецлэн залаз но люкыт луысал, дыр. Бен луэ-а туннэ со сярысь малпаськыны? Ас коньдонэным гинэ ке, котькудзэ нянь вылэ сылал пызьнаса куноятыны но моӵе ӧй тырмысал, дыр. Но луысал ке мон, шуом, мадам, леди яке сеньора (мукет странаын), кудӥзлэн потэмын ни куамын книгаез... Малпасько, быгатысал мон сыӵе залэ калыкез люканы яке (луысал ке со) дачаям пикник лэсьтыны... Но вот ведь мар: потэ-а мынам сыӵе узыр кышно луэме... Монэ паймытӥз, сюлэм вӧсьме бугыртӥз векчи "кизилиос" пӧлысь огез, кырӟась Ирина Салтыкова (алигес "Аргументы и факты" газетысь лыдӟи), кызьы со та мур гуэ усеммы шоры учке. Солэсь гастрольёссэ уретӥллям но, шуэ: пукисько но ас поннам адӟемпотостэм карисько странамес, али ик дась кытчы ке пегӟыны... Кызьы озьы?! Кызьы озьы луэ пукыны но ас вордэм кӧкыед вылэ сяланы? Мон ӧй вордскы татын, но мынам лулы-виры та музъемен висъянтэм герӟаськемын. Оскисько - мед мыном котькин доры (удмурт гуртэ), кин ужаз Ижевск-Балезино чугун сюресэз лэсьтонын - монэ ас сузэр-апайзэс кадь пумиталозы. Соосын ӵош вань кынманэз, кӧт чутыръянэз чидай. Уг быгатӥськы мон ишкалскыны соослэсь. Али но мон соосын, кинлэн ӧвӧл нянез, кин уг тоды нылпизэ маин школае келяны, кин пуке урокын, пӧсьтэм пыдкутчанзэ пинал синъёслэсь ватыны тыршыса... Та 75 аресам мынам шуныт тау карон кылъёсме вераме потэ ваньмызлы, кин юрттыны дась вал улон сюресам. Котьма ке но, мон шудо адями. Монэ котьку валаны тыршылӥзы. Мон вал комсорг - но отысь, со лобӟон бусыысь ӧвӧл, кытысь потӥзы кириенкоос, немцовъёс, мон соосын, кудъёсыз кырӟаса мынӥзы картошка бусые, выльвылэз ӝутонэ, БАМ-е... Ижевск-Балезино чугун сюрес - со ужась адямилэн пӧсь-кезьытэз чиданэзлы памятник. Витьтон ар ортчыса, ми пумиським - пӧртэм-пӧртэм адямиос, улытозямы артэ улӥм кадь, кырӟам куараосмы тупазы. Туж жалясько, уг быгатӥськы адӟиськыны Удмурт пединститутын ӵош дышетскем эшъёсыным. Вань даурзэс школаын ужазы: Ижевскын - Валентина Ваганова (Дюпина), Зураын - Любовь Кожевникова, Можга ёросын - Мария Чаузова. Вань улытозязы одӥг интыын, кошкылытэк. Мон но озьы ик, тодмо кырӟанын выллем: "Нош мон кылисько тонэныд ик..." Та шаерлэсь мусоез, дуноез мон понна ӧвӧл. Вань улон гердъёсы та калыклэн вӧсьёсыныз шумпотонъёсыныз герӟаськемын. Ми дыръя но трос вал улонлэн вужеро палъёсыз, уноез сярысь тодытэк-валатэк улӥм. Нош кин ке соку чагиськонъёс гожъяз, со ик али кӧбертэк улэ. Нош "ву вылын" возисько соос, кин кокчалтыны-кырмалтыны, ас улаз кысканы быгатэ. Ми ке - кинлы ке юрттыны гинэ дышемын. Озьы дышетэмын. Луэ шат дунне вылын ас сярысьтыд - ас мугорыд, вылыд-тырыд сярысь гинэ малпаськыса улыны? Нош ми... вуж дӥськутысь-саесысь асьмелы пыдвыл сазнаськом... Озьы но шудоесь. Шуд - со, куке дунне вылын ваньмыз умой, пиналъёслэн кӧтсы тыр, вылтырзы кышъямын гинэ ӧвӧл - визьмоесь но, лякытэсь но (зарезь дуре мыныны малпало, нош кыльыны - уг). Мар мон али ужасько? Ужай - Жан-Люк Моролэсь кылбуръёссэ пырак оригиналысьтыз берыкъяй. Француз филологияя кафедра сое печатлаз... "Лӧпшопи но Чагыр дыдык" пьесаез ӟуч кылэ чылкак выльдыса берыктӥ (кузпалы Валентин Степанович кылбуръёссэ гожтӥз)... Куӟебай Гердлы сӥзем конкурсын жюрилэн членэз луыса, дас пьесаез лыдӟи, пыр-поч дунъет сётӥ... Культурая министерствомы азьло сямен ик "кылзэ возе" - дун тырыны тодаз но ӧвӧл ни кадь... Надежда Петровна тымиськем малпанъёссэ ӧръяса вуттӥз гинэ... Со куспын вуиз нылызлэн нылыз, Марта (22 номеро школаын 9-тӥ классын дышетске), эмеспиез Александр (механической заводын ужа), ӝоген нылыз бертыны кулэ (Вера Валентиновна технической университетын немец кыллы дышетэ)... Юбилеен герӟаськем сюлмаськонъёс семьяез огазе люкаськыто. Ӵок, ӧвӧл, шуом, та визьмо кышномуртлэн виллаез, ӧвӧл ляльчиосыз... Озьы но со узыр. Зарни сӥзьыл, покчи гужем вакытэ вордскемез солы пумтэм ваньбурен-емышен берытске. Озьы ик мед луоз азьланяз но. Верамзэ гожтӥз Т. ЧЕРНОВА. Чылкыт ульчаын чебер апайёс Ижысь "Зеленстрой" управление город урамъёсты чылкытатэ. Сяська-писпу мерттэ, соослэсь чылкыт, чебер будэмзэс чакла. Та предприятиын туж уно удмуртъёс тыршо. Урамъёсты чеберъясьёсын мон кемалась тодмо, али потэ соосын газет лыдӟисьёсты но тодматэме. Чебер, шулдыр мылкыдо апайёс городлэн шор площадяз, Удмуртской урамын но Воткинск шоссе кузя тыршо. Зор-а, лымы-а, кезьыт-а, пӧсь -а - уже пото, соин ик та интыосын котьку чылкыт. Бригадаын укмыс адями, тросэз Иже гуртъёсысь лыктэмын. Тани Людмила Петрова Селта ёросысь Пашгуртын вордскемын, татын дас ар тырше ини. Евгения Никонова Татарстанысь Балтач районын будэмын, "Зеленстройын" вить ар ужа. Тамара Пушина асьме шаерын ик вордскемын, Можга городын. Нош Александра Вотинцева - Мари Эл Республикаысь, Сизьнер гуртысь. Вера Макарова Ижын вордскемын ке но, умой турна, эшъёсызлэсь уг кыльы. Нимаз вераме потэ Игра районысь Лудошын будэм Римма Никитина сярысь.Та кышномуртлы 56 арес. Егитъёс кадь ик задор ужа, нош "Зеленстройын" 23 арзэ ини, солэн лулысь- сюлмысь тыршемез трос наградаосын пусъемын. Пизэ но нылзэ (картэз вазь кулӥз) огназ пыд йылазы пуктӥз, сад бакчаяз корка но мунчо лэсьтӥз. Синмаськымон коллективен тямыс ар кивалтэ Ижын будэм удмурт пиосмурт Сергей Перевозчиков. Сое бригадаын ваньмыз гажало. Сергей Федорович угось ялан сюлмаське ужзэс капчиятон сярысь, дыраз транспортэн нуэ-вае, кусооссэс тупатъя-шере. Шуг-секытъёс шоры учкытэк, нылкышноос ӟеч тыршо, кырӟало-верало, серекъяло. Н. ВОЗИСОВ. Школа - шумпотонэ но, куректонэ но Будослы пушйыны но чеберскыны шуныт, югыт кулэ, озьы ик нылпиослы но. Та сярысь Пичи Пурга ёросысь Бобья-Уча школаын ужасьёслы но, дышетӥсьёслы но удалтӥз, шуыны луоз. Лякыт, визьмо, сюлмаськись директорлэн Светлана Михайловна Ивановалэн бурд улаз соос. Светлана Михайловна Сарапулысь педучилищеез но Глазовысь пединститутэз йылпумъяса вуиз та школае пичи классъёсты дышетыны. Инты ӧвӧлэн, куинь ар вожатой луыса ужаз, собере куинь ар дышетӥз, дас одӥг ар завуч вал, табере тани сизьым ар нуэ ини школаен кивалтон ныпъетсэ. Озьы ик со классэн но кивалтыны вуэ, семьязэ но уте-вордэ. - Светлана Михайловна, трос-а шуг-секытъёсын пумиськоно луэ туала школалэн директорезлы? - Секытъёс туж трос. Нырысетӥез бадӟым ужпум - куашкан калэ вуэм школамес умой- умой тупатъян. Собере, дышетон, спортэн вырон тӥрлыкмы туж начар. Коньдон ӧвӧлэн, дышетскон книгаосты но методической пособиосты выльдэммы уг луы. Тани выль дышетскон ар кутскиз, нош милям пиналъёсмес нокытын сюдыны. Столовоймес кыл вылын май толэзьысен тупато ини, нош ужъёс али но уг мыно на, коньдон, пе, ӧвӧл. - Та шуг-секытъёсысь кызьы ке потыны тыршиськоды-а? - Быгатэммыя мар но со лэсьтӥськомы ик. Школа бакчамы зол юрттэ, пиналъёсмес асьсэ киын будэтэм емышъёслэсь сиён-юонэн толбыт сюдӥськомы. Школа бордамы ик возьмы вань, туэ отысь вить тонна турын турнаса колхозлы сётӥмы, со нош ӝынызэ буёлъёсын, ӝынызэ коньдонэн берыктӥз. Туж бадӟым тау шуэм потэ колхоз тӧромылы, Селивёстров Владимир Афанасьевичлы, маин быгатэ - юрттэ, ӝоже ук кельты. Собере анай-атайёс но зол юртто. Тани туэ школамес соос юрттэмен гинэ дасяны быгатӥмы. Кин буёлъёс ваиз, кин коньдонэн сётӥз, кудъёсыз нош асьсэос ик лыктыса буяськизы но утялскизы. - Кӧня ке коллективды сярысь но тодэм потэ вылэм. - Коллективамы ми куатьтон куать кузя, куинь дано дышетӥсьмы, куатез вылӥ категориен. Куспамы туж тупаса улӥськомы. Мыным удалтӥз, шуыны луоз, таӵе коллективын ужаны. Дышетисьёс ог-огзылы юртто, мар ке но выльзэ утчало, шедьто. Тани куать ар ини "Мынам ӵыжы-выжыосы" программая ужаськомы. Котькудӥз дышетскисьмы лэсьтэ аслаз ӵыжы-выжыосызлы сӥзем альбом, собере тужгес бадӟым выжыен пумиськон- тодматскон ӝыт ортчытӥськомы. Вань "Шаерчиос" организацимы. Солэн ужаз пырисько нылпиос 2-тӥ классысен кутскыса. Озьы ик пӧртэм праздникъёс ортчытъяськомы. Огкылын вераса, шуг-секытъёслы ум сётскиське, дышетскыны но шулдыръяськыны но вуиськомы. - Выль дышетскон ар кутскыку, дышетӥсьёс забастовка ялӥзы вал, тӥляд коллективды отчы пыриськиз-а? - Пыриськыны пыриськимы но, ми пиналъёсмес воксё дышетытэк ӧм возе. Кыкетӥ-ньылетӥ сентябре вакчиятэм ужан нуналъёс тупатӥмы, кивалтӥсьёслы гожтэтъёс ысъямы. Нош ужатэк пукыны анай-атайёслэсь возьыт вал, соос ук школаез дасязы, оло, берпуметӥ коньдонзэс отчы висъязы. - Та быдӟа ныпъетэз кышномуртлы нуыны секыт, дыр, эшшо ик гуртын улыса. Школа сяна, юртъер котырын но бергано, семьяез но утялтоно. - Шонер, капчи ик ӧвӧл. Куддыръя ваньзэ сэрпалтэм но кытчы ке пегӟем потэ. Но секыт уж капчигес луэ, куке вӧзад оскымон эшъёсыд, юрттӥсьёсыд вань. Тужгес но вераме потэ Нина Николаевна Морозова но Нина Матвеевна Матвеева сярысь. Соос котьку мон вӧзын, туж секыт дыръёсы но юрттыны, буйгатыны быгато. Нош семья сярысь ке... Куддыръя ачим но уг шӧдӥськы, кызьы со берпуметӥ интые кыле. Вот озьы но луэ. - Кузпалды нош кызьы учке ужды шоры? - А со дышемын ини. (Серекъя.) Тон школаысь ноку но ӧд поталля, тонэ отысь уд потты ни, шуэ. х х х Сентябрьлэн кутсконаз Светлана Михайловна 50 арес тырмон юбилейзэ пусйиз. Сӥзем потэ солы шуд но тазалык, семья куспаз яратон но гажан, коллективаз - ог-огзэс валан. Котьку луэ али кадь ик капчи мылкыдо чырткем но сэзь. Л. БАКАЕВА. Зоя ТРУХИНА ШУНДЫПИ-КИЗИЛИ... Сӥзисько "Италмас" ансамбльлы "Италмас"! "Италмас"! Кӧнязэ паймытӥд?! Кинлы ке пальышад, Кинэ ке бӧрӟытӥд... "Италмас"! "Италмас"! Шундыпи-кизили!.. Дауръёс пыр данэд Жингыртоз на али. "Италмас"! "Италмас"! Шуныт возь кадь, оло! Бугыртэ сюлэмме - Зарни крезь кожалод. Италмас! Италмас! Туж дуно сяськае! Ӝутскы, пазьгы тылси Кайгырись дуннее... Италмас! Италмас! Кӧнязэ бурдъятӥд, Кинлы ке пальышад, Кинэ ке бӧрӟытӥд!.. "Катанчи" "Катанчи"! "Катанчи"! Тон шудо-а, шаерчи?! Шулдырты крезьгуръёсын, Эктыты эктонъёсын... Барабандэ бом... бом, Шуккылы задор тон! Лябытгес ке куараез, Ватса на шунды сиез... Эктыса, шулдыртыса Паймытод тон, тамаша... Выль гурен, выль чурен - Ӝуатскы тон, "Катанчи"! УЛОН-ВЫЛОН Жалянлэсь курдан Кин кызьы, дыр, нош мон выль верос, повесть гожтыкум, тодмо адямиослэсь тусбуйзэс, сямзэс, улон-вылонысьтызы кыӵе ке учырзэс тодам вайыны турттӥсько. Озьы гожтоно адями син азе улэп пукце кадь, соин вепацькиськод-кенешиськод кадь. Кӧня ке ар талэсь азьло, "Куартолэзе кисьмам узы" повестьме лыдӟыса, гажано кылбурчие но ӟеч эше Татьяна Чернова гожтэтаз ивортӥз вал: "Николай, Чиргина дышетӥсед укыр кырсь, сьӧд возьматэмын. Шат сыӵе луыны быгатоз дышетӥсь?.." Нош та героиняе но улонысь басьтэмын вал ук. Эсьмаса,сое тросэз лыдӟисьёс соку ик тодмазы но. Ужпум со бордын ӧвӧл. Асьмеос дышемын ни дышетӥсьёсты югыт-чылкыт сямо, туж визьмо, Кылчин кадь суредаса возьматыны. Нош соос но асьмеос кадь ик кык пыдо, кык киё адямиос ӧвӧл шат? Озьы бере, уг быгато-а янгышаны, чырмыт вамышьякузы ӵемтыны, огшоры нылкышноос сямен ик яратыны?! Таиз героиняе но удмурт кышномурт. Дышетӥсь. Со сярысь гурт калык пӧртэм мадёнъёс пӧлэстэ. Верало ӟечсэ но, уродзэ но. Воргоронъёс, егит пиос шораз учкыса пальышало, ӟечбуръяськыны но уг вунэто, лушкемак синзэс кырмыштыны но вутскозы. Кышноос пӧлысь кудӥз жаля, кудӥз куаретэ, кудӥз, эрик ке сётысалзы, йырсиоссэ лӧдысал, дыр. Тужгес ярато сое гуртысь нылпиос, шораз ноку уг уто жильыямтэ пуныос но. Вордскемын со шунды ӝужан пал калыклэн календарезъя Тигр-коӵышлэн араз, Скорпион зодиаклэн тодметэз улын. ...Кызьы ке валантэм, огыр-бугыр кутцкиз Ипина Геннадьевналэн улонэз. Школаез йылпумъяса, Можга педучилищеез пырпотытэк ик кутӥз но бызиз. Выль ар азьын сюанзэс шудӥзы ке вал, январь толэзе анай кариськиз ни. Наташа нимо муспотон нылзэ вордӥз. Сюлмысь яратыса кузъяськизы, семья кылдытӥзы вал соос Саша Нефёдовен (нимъёс, фамилиос воштылэмын). Нош улонзы нырысетӥ толэзьёсаз ик тэшказ. Ӧз яра Насьта кенаклы дышетӥсь кенэз. Юрт котырысь ужез но, пе, тыро-пыдо, валаса уг лэсьты. Гурт калык но оскиз таӵе супыльтонъёслы. Верало ук: ву шапык изэз но пасяны йӧндыре. Ирина чидаз-чидаз но киыныз шонтӥэ, лэся. Нылзэ басьтыса, анай-атай юртаз берытскиз. Нош яратӥсь кузпалэз пумит вал таӵе люкиськонлы.Сюлворыса берен доразы ваиз нылзэ но кузпалзэ. Кемалы ӧвӧл - кык толэзьлы гинэ. Анаез кензэ дугдылытэк курласа "силемен", Саша машинаен ветлон правозэ но келяны вутскиз. Удмурт калык верамъя, синзэ-пельзэ усьтытэк юыны кутскиз. Ма кылиз на Ирина Геннадьевналы? Кузпал дӥньысь (дорысь) нош ик кошкиз. Курсъёсын кӧня ке толэзь дышетскемез бере, егит кышномурт йырӵышконниын ужа ни вал. Гуртаз бертылӥз ӵемысь, йӧл нуллӥсь машинае пуксьылыса. Таӵезэ адӟыса, анаез Осьня кенак пурӟылоз вал: "Ма, нылы, гурт калыкмылэсь воздаськы: ведь Костялэн кузпалыз вань, кык нылпиез. Ӟеч семьяез таркалод ук!" Ирина Геннадьевналэсь нылпи ваён юртэ шедемзэ тодыса-кылыса, гуртоосыз вордскем нылпиезлэсь атайзэ тунаськытэк ик шараязы: молоковозэн ужась Костяен шедьтэм! Калыклэсь кепыр вайыса-а, мукет муген-а, Ирина, кык нылпизэ кутыса, тодмотэм сюрес вылэ ӝутскиз. Кытын гинэ улоно, кыӵе гинэ ужъёсты быдэсъяно ӧз луылы солы та дасо аръёс ӵоже. Скал но кыскиз, школаын, нылпи садын но ужаз, вал почтальон, выж миськись, маляр... Нылпиоссэ пыд йылаз султытыны тыршемен ӵош ик (Наташаез школаын туж ӟеч дышетске, Катяез крезьгурья урокъёсы ветлэ) огназ улӥсь кышномурт яратыны но, ассэ мусоямлы но пумит ӧз кариськылы. Оскиз: оло, аслым ӟеч кузпал, нылъёсылы ӟеч атай шедьто. Мон но инмарлэн нылпиез ук! Куинетӥ яратонэз Валерик нимо вал. Чебер, таза воргорон. Кузпалэныз люкиськемын. Ас секытэз сярысь верамез бере, таиз но, пуась коньы музэн, чаляк ватскиз. Со пегӟиз, нош Ирина Геннадьевналэн семьяез йылӥз. Табере Миша пиез но чырткем ни. Юасьёслы нокыӵе кариськылытэк пальпотылэ: "Мон нылпи вайыны курдась кышноос понна но вордӥсько. Сотэк нылпи садъёс, школаос ворсаськозы ук". Калыкын пальпотылӥз ке но, дораз бертыса, ӵемысь ӝож гурьёсты нёжъяса, курыт синкылиоссэ нылпиосызлэсь лушкемен ӵушылыса, ужпӧръёссэ быдэсъялляны тупа. Уждунзэ но, нылпи пособиосты но дыраз уг сёто. Вылаз ик, куинез ик атай алимент тырон я юрттон сярысь ӧз малпаськылы, вылды. Ма, Ирина Геннадьевна ачиз но судэ ӧз вазиськылы. Мынам юамелы пальпотӥз: "Таза мугоро, сӧл-таза, киё-пыдо мурт луыса вылысь шат кураськыса ветлом? Ужало, ӵабъясько, но нылпиосме, адями карыса, пыд йылазы султыто". Оскисько мон та веськрес мугоро, чагыралэс синмо, пиосмуртъёсты бордаз кыскыны быгатӥсь егит кышномуртлы. Али но со тырше нылпи садын, ӝыт нуллэ газет-журналъёс, шутэтскон нуналъёсы вошъя фермаысь скал кыскисьёсты... Уж дурысьтыз кивалтӥсьёс ӟеч ласянь гинэ дунъяло. Воргоронъёс ик юртто пу, пудо сиён дасяны. 3эм, кырыж синмын учкись кышноос но тырмыт гинэ. Алигес кылӥ: Ирина Геннадьевна оген улӥсь пересьёслы юрттыны басьтӥськем. Ву но нуллэ, бакчазэс но гудӟыса мерттӥське, нылъёсыз мерттӥськемез вылэ ву киськало, жаг-турынзэ уро, пе. Улон борды ӝабыр-ӝабыр кырмиськыны тырше егит кышномурт. Нош малы ке котьку уллане гылӟыны тупа. Тани нош ик выль ивор: анай ньылетӥзэ кариськыны дасяське. Нош ик яратон лэзиськем, лэся, вадьсаз. Уг курласькы мон та кышномуртэ, уг. Яратыны кинлы ке люкетод шат? Одӥг пересь кышномуртлэн верамезлы пумит Ирина Геннадьевна алигес ӝотак вазиз: "Курдасько мон, Анна кенак, жалясьёслэсь. Эн жалялэ монэ". Малы-о гожтӥсько мон та гожтэтме, малы "данъясько" Ирина Геннадьевнаез? Кылын ке но юрттэм потэ: медаз чигиськы огназ улӥсь кышномурт. Одно ик мед пумиталоз вылэм шумпотонэз, яратонэз. Адямилыксэ медаз ышты. Дышетӥсь но юг-юг тӧдьы, наӵ-наӵ сьӧд буёло адями ӧвӧл. Соос но асьмемын ӵош одӥг музъем вылтӥ вамышъяло. Ваньмес шунтэ одӥг шунды... Н. НИКИФОРОВ. Пересьёсты утем музэ уз усь 1994-тӥ арын 18-тӥ январе Алнаш черкогуртын усьтӥськиз пересьёсты возён юрт. Со чакламын вал куамын адямилы, али татын куатьтон пала пересь улэ. Чалмыт интыын нюлэс пушкын тӧдьы из юрт сылэ. Кортлэсь кенер сьӧрын чебересь сяськаос, пичи ӟусъёс вылын пуко пересьёс, куспазы верасько, шунды шорын шунтӥсько. Кыӵе меда соослы татын? Кельше-а? Та юанлы тросэз огвыллемгес валэктон сётӥзы. Мар бен, шуизы соос, сюдо, дӥсяло, утялто, соизлы тау, но дорын кадь ӧвӧл ини, дор - со дор. Нош пересьмыса сюлэм эшшо но юнгес вордӥськем палъёсы куриське. Уло пересьёс комнатаосазы кыкен, кыллисьёсыз - куатен. Вань столовойзы, мунчозы, шутэтскон комнатазы, асьсэлэн ик врачсы, сестразы, санитарказы. Палэнысен учкыса, ваньмыз умой кадь, вольыт. Озьы-а меда? Тае валан понна, юртлэн улӥсьёсыз, шуг-секытъёс сярысь пыр-почгес вераны кури пересьёслэн юртсылэсь директорзэ Николай Васильевич Кедровез. - Ӝыныез пала улӥсьёсмы - Алнаш ёросысь,- веранзэ кутскиз Николай Васильевич,- озьы ик вань Можга, Пичи Пурга, Селта, Кизнер палъёсысь но. Тросгес кышномуртъёсмы, пиосъёсмы 8 гинэ. Соосты утялтэ кызь сизьым адями. Улӥськомы, шуыны луоз, пенсия чотын. Пенсизылэсь 75 процентсэ пересьёсмы та юртлы висъяло, кылемзэ асьсэлы кельто. Пересьёсты нош сюдоно, дӥсяно ук. Бакча сиёнъёс, картофка "Можторг" пыр басьтӥськомы, тани туэ но 59000 манетлы огкыл гожтэмын. Дӥсь вурытӥськомы. Кылем арын Можгаысь "Новинка" фирмаын 30 процентсэ вурытӥмы, озьы ик мукет организациос но, кылсярысь, "Сактон" фабрика милемлы дӥсь вутто. Толлы дасяським ини, шуыны луоз. Быгатэммыя ваньзэ тупатъямы. Тани та юртмы пулъёслэсь ке вал, туэ сое вылтӥз тӧдьы кирпичен шобыртӥмы. Пуктӥмы гараж, бакча сиёнъёсты возён гуэн склад. Ужазы со бордын "Тойма" огазеяськонысь лэсьтӥськисьёс. Транспортмы но ӧвӧл шуыны уг луы. Туэ Глазовысь пересьёсты возён интернат машиназэ сётӥз на. Огкылын вераса, шуген ке но, улыны тыршиськомы. Тани али сакыр песокмы быриз, собере тросгес витамино сиёнэн, пӧртэм сокъёсын сюдэм потэ вылэм, но коньдонмы ӧвӧл. Толлы гын сапегъёс басьтоно на. Трос гинэ люкаськизы ни шуныт ву, канализация но тыл понна тыронъёсмы. Азьланяз физиокабинет усьтыны малпанъёсмы вань. Ӧйтӧд, пӧрмоз-а, уз-а? Оскем потэ, пӧрмоз шуыса. Вань на ай ук ӟеч сюлэмо, юрттыны дась луись адямиос. Ваньмы ӵош басьтӥськимы ке, вылӥын пукисьёс чиньы пыртӥзы ӧз ке учке, луоз пересьёслэн физиокабинетсы но, мукетыз но. Л. БАКАЕВА. Ӝутӥсько выль юртъёс Улон юртъёсты лэсьтонзэс "Воткинский завод" огазеяськонын дугдытыны уг малпало. Предприятиысь строительёс алигес вуттӥзы общежитилэсь кыкетӥ черодзэ. Ужазы куто туала лэсьтӥськон материалъёсты гинэ - мрамор пырыез, мисьтӥськись обойёсты. Со дыре ик Центральной микрорайонын пуктӥське на 80 квартираен кык выль юрт. Озьы ик мыно мукет улон коркаосты, егитъёс общежитизэс тупатъян-выльдон ужъёс но. С. ФИЛИППОВ. Депутатлэн нуналэз ортчиз Удмурт Республикаысь Кун Кенешын кылем пятницае. Сое усьтыса, Кун Кенешлэн Тӧроез А. А. Волков люкаськемъёсты вакчияк тодматӥз Удмуртиысь делегацилэн Белоруссие ветлэменыз, озьы ик ивортӥз Москвае берло вуылэмез но Ю. Д. Маслюковен пумиськылэмез сярысь. Депутатъёс эскеризы вуоно сессие поттоно ужпумъёсты, Удмурт Республикая чаклам укмыс пумо законопроектэз. Нырысьёсыз радын - туала югдурен герӟаськемъёсыз. Со сярысь депутатъёслы вераз Правительстволэн Тӧроезлэн воштӥсез А. Злобин. Законопроектъёс пӧлын бадӟым инты басьтэ Удмурт Республикалэсь промышленностьсэ азинтонъя закон. Татын трос ӟечез пусъемын вал Белоруссилэн ужан но вузкарон амалъёсысьтыз. Учкем ужпумъёс пӧлын - ужбергатӥсьёсын налог тырон, электрокужым ваньбурез валаса кутон но мукетыз. Кун Кенешлэн Тӧроезлэн воштӥсез В. А. Пономарев депутатъёсты тодматӥз Кун Кенеше быръёнъёсъя законлы инъетэн. Солэн нырысетӥ вариантэз эскеремын вал туэ июнь толэзе, пыртэмын 130 ватсан но дэмлан. Удмурт Республикаысь Кун Кенешлэн вуоно сессиез ужаны кутскоз 29 сентябре. Эскероно ужпумъёс пӧлын нырысетӥез - туала экономической но политической югдурез сэрттон-пертчон. Л. МЕДВЕДЕВА. Одӥг иськемзэ - пыдын Ижевск-Якшур-Бодья трактэз кемалась гинэ тупатъяло ини. Та нуналъёсы сюресэз выльдо Карашур гуртэтӥ. Бодья пыр ортчись автобусъёс соин ик Ягулэтӥ котырско, нош калык билетъёсты кӧня ке манет дуногес басьтоно луэ. Ижевск-Бодья маршрутэн автобус нуналаз ньыль пол шонерак ветлэ. Со Карашурлэн кутсконозяз нуэ. Отӥяз одӥг иськемзэ, Карашур пумозь, соос пыдын мыно. Отын Бодьяе нуись автобус соосты вите. Нош Бодьяысь лыктӥсьёс со дыре Карашурлэн мукет пумаз дырто. С. ПЕТРОВА. ТУАЛА ЮГДУР Сьӧд нуналъёс азьпалан на Россилэн выль государствоез дас ар ӵоже но ӧз возиськы, кызьы сое зуркатъяны кутскизы экономикаын коньдон удысын но озьы ик правительствоын кылдӥсь секыт югдуръёс. Асьмеос улӥськом банкротэ вуэм государствоын. Мар бен возьмано вал 1991 арын августэ ортчем путч бере власть борды кырмиськем партийно-советской номенклатураысь тужгес но урод адямиосызлэсь. Государство сизьым ар гуэ ваське ини. Коньдон ӧвӧл, шуо. Нош кытчы меда коньдон ышиз приватизация шуонлэсь? Кытчы каремын инвесторъёслэсь талам 280 миллиард манет коньдон? Кыӵе ужъёсы кутэмын 140 миллиард доллар тыр пунэмамез уксё? Ас сусекъёсы лушкамын-кыскамын. Реформаос сярысь зулиськонъёс кема кыстӥсько ни, пумыз уг адӟиськы. США-лэн президентэз со реформаосты ортчытыны косэ - ато уз юртты. Россиез куашкатон мынэ А. Даллеслэн но З. Бжезинскийлэн дасям малпанъёссыя. Соос борды итӥськизы на Международной валютной фонд, Всемирной банк но бадӟым алхимик Джордж Сорос. Россия луиз солэн лабораториезлэн эскеронъёс ортчытъянъя люкетэз. Рынокын дуно бумагаосын шудыны быгатэменыз, Д. Сорос узырмиз. Собере нимысьтыз фонд кылдытӥз, Россиысь профессоръёсты-доцентъёсты пӧяса сереме уськытон понна, соослы, кураськисьёслы сямен дырын-дырын коньдон висъялля. Сорос верамъя, дуно бумага туннэ дуно, ӵуказе со пеньлы пӧрмыны быгатэ. Дуно кун облигациосын вузкаронэз ик радъяз вал Россилэн правительствоез. Кунгож сьӧрысь адямиослы соос 70 миллиард тыр вузамын вал, Россиысь нимаз адямиослы - 14 миллиард, предприятиослы - 60-95 миллиард манет пала. Кӧня ке дыр ортчыса, С. Кириенколэн правительствоез со бумагаосты дунтэматыса кулэтэм кариз. Озьы адямиос дуно бумагаоссэс вузаны но ас коньдонзэс выльысь берыктыны турттыса, банкысь банке бызьылыны кутскизы. Кутскиз финансовой кризис. Валюталэн дуныз дырын-дырын быдэс дуннеын вошъяськылэ. Отын номыр уродэз ӧвӧл, угось со возьматэ экономикалэсь кызьы азинсконзэ. Нош Россиын валюталэсь дунзэ ӝутон чик но экономикалэн куронъёсыныз герӟаськемын ӧй вал. Ваньмыз лэсьтэмын вал калыклы пумит, угось валюталэн будэменыз адямиослэн уждунзы но, пенсиоссы но ӧз йылы. Узыръёс узырмизы, начаръёс уката но начармизы. Борис Ельцинлэн экономикаын политикаез та нуналъёсы уката но зол возьматӥз номырлы ярантэмзэ. Озьы ке но, Россиын коньдон куашкамлы кичӧлтӥсь луэ США. 50 ар талэсь азьло, 1949 арын соос дуннеын сыӵе кризис ортчытӥзы ни вал. Али но соослэн сьӧд ужзы удалтӥз. Коньдон дуннеез нырысь куашкатӥзы Юго-Восточной Азиын, собере - Россиын. Ельцин указъёссэ гожтылӥз, Международной валютной фонд косэмъя. Спекулировать карыны дышимы, нош производствоез ӝутыны быгатонмы уг тырмы. Манет сямен ик производствомы эркын уя. Мар бен кароно, Россиын югдурез тупатон понна? Россилэсь узырлыксэ тус-тас каремзы понна нырысь ик судэ сётоно Е. Гайдарез но А. Чубайсэз, экономистъёслэн лыдъямзыя, сизьым ар куспын Россилэн палэназ 300-400 миллиард доллар кошкемын. Калык патриотъёсын огазеяськыса, Б. Ельцинэз отставкае потыны куроно. Кун Кенешмылы но Правительствомылы малпаськоно кӧня ке магазинъёсты национализировать карон сярысь. Соку отысь дунъёсты юн чакласа возьыны луысал. Басъяськисьёслы но чырмытгес луоно. Дуно магазинъёсысь вузъёсты басьямысь дугдоно. Басьяськисьёс чотын возисько ук спекулянт шуонъёс. Тӥни сыӵе малпанъёсы мынам, сталинизм дыръя зӥбем но туала реформаторъёсын кык пол пӧям муртлэн. Н. ДЕРЕВЯНКИН. Террористъёслэсь адӟем карыса Вуктал городысь милиция пересь кышномуртэз кырмиз "Газпромбанклэсь" юртсэ пушкытыны турттэмез понна, ивортэ "Комиинформ" агентство. Та нуналъёсы УВД-лэн дежурной частяз жингыртӥз телефон. Трубка кышномурт куараен шуиз: "Мон "Газпромбанкез" пушкыто, коньдонме ӧз ке берыктэ!" Телефон пыр кышкатӥсьлэсь кытын улэмзэ ӝог гинэ шедьтӥзы. Кӧня ке дыр куспын со кутэмын вал. Песянай суть-суть кудӟемын вылэм. Нош кышкатыса жингыртэмезлэн мугез таӵе: кин ке солы ивортэм, ужысьтыз коньдонзэ банке выжтӥзы шуыса. Банкын та сярысь номыр вераны тодӥллямтэ. Али милициын малпасько, ма кароно "террористкаен". Со ачиз бус пыр гинэ тодэ на ке, мар дауртэмзэ. Иворъёсъя национальной служба. Такянай ХИХ даурлэн пумаз, ХХ даурлэн кутсконаз Тактянай Ӟумня вылын туж дано, тодмо мурт вал. Вордскиз со 1827-тӥ арын Оштормо-Юмья гуртын. Атаез, Ибрай, язычник вал Нылпиоссэ пылатон сярысь но ӧз ик малпаськылы. Соос будизы, Иисусэз тодытэк. Покчи нылыз но Тактябей нимо вал. Ибрай ноку но эсэпаськыса ӧз улы. Ӟеч вӧсь но ӧз утча. Нош улонзэ воштӥз одӥг учыр. Воргоронлэн бадӟым нылыз бызиз Каньсаре (али бигер гурт) удмурт пилы. Нош бызем нылъёс, азьвыл но туала йылолъёсты чакласа, коня ке нунал ортчыса берто вал атай юртазы. Анай-атаез тодматоно эмеспиен, шыкысэ тырыса дасям пирданэз нуоно эмеспи корка. Ибрай кузпалэныз ӵош витиз нылзэ. Витиз арня, кык. Нош ныл ӧвӧл, нокыӵе ивор но уг вуы. Соку Ибрай валзэ кыткиз, кышнозэ уробое пуктиз но Каньсаре, тямыс иськеме, кошкиз. Гуртэ вуыса, валзэс капка выжые думизы но шымырскем сюлмын корка пыризы. Ибрай йыбырттӥз, ӟечбуръяськиз, пумитаз - чалмыт. Куноосты нокин уг витьы, жок сьоры уг отьы. Ибрай вамыштйз кышнопал люкегэ. Отын, бадзым зус пыдэсын, пыдъессэ огинэ люкаса пуке нылзы: намаз лыдӟе. Анай-атаез шоры уг учкы адӟымтэ-кылымтэ амал кариське. Анай-атай лулӟылыса валэктыны тыршо нылзылы тани ми вуим тон доры, мӧзмыса, адӟеммы потыса лыктимы. Собере ини, ӧс палась ӟус вылэ пуксьыса, нылзэс витёно кариськизы. Пукизы, кема витизы, сиемзы но потыны кутскиз, юрт котыразы кылем ужъёс но доразы ӧтё... "Бертоно!" - шуиз Ибрай. Шуак вырӟиз но ӧсэз усьтӥз. Со сьӧры кышноез но итӥськиз... ...Та нуналысен Ибрай трос уйёссэ кӧлытэк ортчытӥз. Нылзэ муртъёс азьын пыкылӥз ке но, кема аръёс ӵоже витиз на. Каньсаре кыӵе ке муген мыныкуз, отын тодмоосыныз ӵош гуртакуз, урамети вамышъякуз, нылыныз пумиськон суредъёсты син азяз пуктылӥз. Нош нылызлэн корказ пырыны ӧз дӥсьтылы: ултӥяськонлэсь кышказ. Ибрай чемгес малпаськылыны кутскиз покчи нылыз сярысь. Пумиськылӥз священникен, кенешиз покчи нылзэ черке пыртон сярысь. Кузпалыз но талы пумит ӧз луы . Тактябеез пылатӥзы, Татьяна ним сётӥзы. Нош гурт калык нимаз Тактянай. Нылмуртлэн улоназ бадӟым воштиськонъёс ваиз гуртэ черк ӝутон. Вуизы техникъёс, та ужез тодӥсь-валась адямиос, соос сьӧры семьяоссы. Та ӟуч нылпиосын тодматскиз Тактянай. Соосын ӵош будӥз, шудӥз, ӟуч кыллы дышетскиз, лыдӟиськыны, гожъяськыны дышиз. 1847-тӥ арын черк ужаны кутскиз. Тактянайлы кызь арес тырмиз. Ӟумня гуртысь Павол нимо пилы бызиз. Черклэн выль юртаз кузпалъязы. Егит нылкышнолэн улонэз капчи ӧй вал. Тактянай трос кужымзэ сётӥз музъем ужлы, ю тысь будэтонлы пудо-живот вордонлы. Зэм, пудо-живот вузаса, уно-а пайда поттод? Выт тырыны мырдэм тырме. Сони но со утчаз выль, пайда сётӥсь удыс. Очермо шурлэн йылаз муш бакча кылдытӥз. Ку, кытын дышетскем та ужлы - тодмо ӧвӧл. Нош мушен со ачиз выриз, трос му (чечы) басьтылӥз, базаре но вузаны ыстылэ вал. Мынам анае Тактянайлэн нунокез (внучкаез) луэ. Солэн верамезъя , та кышномурт внукъёссэ но мушен пайдаяськыны дышетэм. Бадӟым пиез, Иван, бадӟым мушкась кылдытӥз Вильмонын. Кыкетӥ пиез, Ондрей но, Ӟумнялан бадӟым муш бакча возиз. Мынам анае но, Пильпоккае лыктэмез бере, муштэк ӧз улы. Тактянайлэн ӟеч данэз Ӟумня вылын вӧлмиз. Гурт калык со доры ветлэ вал пӧртэм мугъёсын. Кинлы ке кагаз лыктэм. Мар гожтӥллям отчы лыдӟыны-валаны уг быгаты. Кин ке палэнэ кошкем пиезлэсь гожтэтсэ басьтэ: сое лыдӟоно. Кудиз властьлы куриськон гожтыны косэ... Тактянай луэмезъя гурт калыкезлы юрттыны тыршылэм. Павол но Тактянай вордӥзы, быдэ вуттӥзы одӥг пизэс, кык нылзэс. Педор, Вара, Одоть кемалась уло ас семьяосынызы. Котькудӥз будэтэ аслэсьтыз нылпиоссэ. Тактянайлы покчиосын шулдыръяськыса, мусояськыса улыны гинэ кылиз на кадь. Но адӟонлэсь уд пегзы, шуо. Туж пиналысен кулӥз Мария кенэз. Солэн покчи пиезлы, Колилы, одӥг арес но ӧй вал на. Матрон нимо нылызлы куать арес гинэ вал. Нылпиосты будэтон, соосты быдэ вуттон Тактянайлэн пересь пельпумъёсыз вылэ усизы. Кема ӧз улэ нош ик шуккет: висьыны усиз Педор пиез. Герман оже ыстӥз вал бадӟым пизэ. Бертыса ӧз вуы большевикъёс Горд Армие басьтӥзы кыкетӥ пизэ. Та аръёсы куашказ муш бакча, ваньбур пыртон сюрес сюбегаз. Тактянай лузмезъя гурт котырысь ужьёсты быдэсъяны тыршиз, покчи внукъёссэ дышетӥз гырыны, кизьыны, усыяны, вал кыткыны. Азьло сямен ик солы вазиськылӥзы быдэ вуэм нылъёс пӧртэм визь-кенеш курыса. Кинлы ке такъя вурыны юрттоно, кинлы ке выль дэремезлэн сӧзул бордаз тасма бырйыны кенеш сётоно. Дунне вылын Тактянай улӥз укмыстон сизьым аресозь. Сю аресозь ӧжыт гинэ ӧз тырмы. Степан Андреевич, Тактянайлэн 1914-тӥ арын вордскем внукез, песянаез сярысь шуылиз: со пичи, куасьмем но лапег мугоро, капчи ветлӥсь пересь кышномурт вал. Нош пинал дыръяз, шӧдӥсько, ӝужыт мугоро вылам. 1924-тӥ арын, улонэзлась кысонза шӧдыса, гуртоосызлы нош ик одӥг кузьым ласьтӥз. Ӟумня калык туж курадӟылӥз, кулэмъёсты ватылыкуз. Удмурт шай но, ӟуч шай но кыдёкын. Отчы сюрес ноку но уг луы. Кемалась ини верасько вал шайвылзэс гурт вӧзы воштон сярысь. Зэм, нокин но аслэсьтыз аназа ӧз сёты. Сони тӥни Тактянай огпол чурыт вераз: "Монэ ватэлэ гурт пумысь ана вылам. Отын мед луоз Ӟумнялан выль шайвылэз!" Озьы ик ласьтӥзы. Тактянай кулӥз. Оштормо-Юмья черкын вӧсязы. Нош отысен шайвылозь воргоронъёс сое ки йылазы ӝутыса нуизы. Ачим но Ӟумня шайвылэ бадӟым ӵужкенакме ватыны ветлӥ. Трос люкаськиз калык. Огвие адӟисько: паланын кыӵе ке нылкышноос сыло. Малы ке ченгешо. "Мар луиз тӥледы?" юасько. Тани, шуиз мӧйы кышномурт, лыктэм татчы мукет гуртысь. Васюка кенакез татчы ватонлы пумит луэ. Созэ уг вала: шайвыл Тактянайлэн бусыяз интыяськемын. Со татын кузё но, тора но. Нош Васюка кенак Тактянайлан бадӟым кенэз. Егор СТЕПАНОВ. Татарстан. ЮГДУР СЕКЫТ КЕ НО "Евразия" чида Дуннеысь коньдон кризис зол шуккиз Россиысь дуно бумагаосын ужан вылэ. Тӥни соин ик "Евразия" кылем арын сӥзьыл та ужлэсь палэнскиз. Малы ке шуоно, банклэн та дырлы ГКО-осыз ӧй вал. Нош туэ февральысен Центробанк уксё сётон процентэз (ставка рефинансирования) 28-ысен 42 процентозь вуттӥз, июне со 150 процент луиз, али 60 процент возиське. Озьы кредит висъям пайда сётэмысь дугдӥз. Малы бен банк доход басьтэмысь дугдӥз? Нырысь ик, банк тыронъёссэ берыктэ, кудъёсыз люкаськемын вал 1995 арын. Кыкетӥез, миым июне-июле тросэз адямиос коньдонзэс басьтӥзы шутэтскыны мынон понна (уката но кунгож сьӧры). Мукет дырен ӵошатыса, 50 процентлы уногес уксё сётэмын. Куинетӥез, туэ августэ коньдон кризисэн валче, вкладчикъёс нош ик уксёзэс октӥзы (кышкаса). Озьы вкладъёс 8,8 процентлы синӥзы. Ваньзэ сое лыдэ басьтыса, но ОНЭКСИМ-Банклэн ӵектэмезъя (оскымон юрттӥсез), "Евразия" выльдӥськыны кутскӥз. Со герӟаськемын "Банк-клиент" но пластиковой карточкаосын ужан амалэ выжонэн. Озьы банк уно уксё быдтӥз компьютеръёссэ выльдонлы но выль техника басьтонлы. Тӥни озьы "Евразия" секыт югдурысь (кризисысь) потӥз, шуыны луоз. Адямиос уксёзэс басьтэмысь дугдӥзы, нош 1-8 сентябре вкладчикъёс 58 сюрс манет коньдонзэс ваизы. Со трос ӧвӧл, но шумпотымон, югдур умой пала берытске. Ватсаны кулэ на, банклэн 21 выль клиентэз луиз. Ӵошатон вылысь, ОНЭКСИМ-Банклэн - 45. Берлоез банк "Евразилэн" кема дырлы юрттӥсез луэ бере, со но кризисысь потӥз но эшшо кужмояз на - огазеяськиз Мост-Банкен но Менатепен. Кивалтӥсе быръемын ОНЭКСИМ-Банклэн тӧроез Михаил Прохоров. "Евразия" Удмурт Республикаысь Правительстволэн банк-агентэз луэ бере, со ас ужаз бадӟым инты висъя экономика удысъёслы но предприятиослы юрттонлы. Банк кредит сётъя ож тӥрлык поттӥсь (ВПК) предприятиослы. Со уг кышка, Обороная министерство поттэм ожтӥрлыклы дыраз коньдон уг ке но сёты. Осконэз вань, югдур матысь дыре воштӥськоз шуыса. "Евразия" туэ нырысетӥ паларе пайда ӧз басьты, но чида на. Вылаз ик, тыронъёссэ каллен берыктэ. Азьланьын югдур тупатскыны кулэ. Мугез тодмо: РФ-ысь Правительстволэн Тӧроезлэн юрттӥсез Юрий Маслюков ВПК-ез туж ӟеч вала-тодэ но та удысэз пыд йылаз вуттон понна ваньзэ лэсьтоз. "Евразилэн" ёзъёсыз кызьы бен ужало? Котькыӵеез вань. Тани Можгаысь филиалэз огсыр ужа, адямиослы коньдонзэс сётъямысь ӧз дугдылы на. Нош Камбаркаын выль ёз кылдытонлэсь банк куштӥськиз. Малы ке шуоно, химической ож тӥрлыкез быдтонъя ужъёс юн ӝегало, Москва уксё уг висъя, Россиысь Правительство кутэм постановленизэ урод быдэсъя. "Евразилы" кызьы юрттэ ОНЭКСИМ-Банк? Кредит сётэ. Вераськемын 100 миллион манет басьтыны. Али 20 миллионэз вуэмын ни. Та но мукет ужпумъёс алигес ӝутэмын вал "Евразиын" ортчем пресс-конференциын. Сое нуиз банклэн пресс-секретарез Николай Захаров. Журналистъёс солы трос юанъёс сётъязы. Г. РОМАНОВ. Гуртэ котьмалэсь дуно Кылем даурысь кызетӥ аръёслэн кутсконазы огаз гужем нуналэСырвай-Энга шурлэн ярдураз адямиос вуиллям. Туж синмаськиллям соос чебер интылы. Куспазы кенешыса, татчы яна потыны вераськиллям. Паллян пал ярдурын - жильыртыса бызись ошмесын кырем нюкъёс, пеймыт сик. Бур пал ярдурез ӝужыт, борддорез ваёбыж каръёсын пужыятэмын. Кыдёке кыстӥське ӵошкыт нёжал, солэн шораз пуксемын пичигес вырйыл. "Шурез ӵупыса, вуко пуктоно,- вераськизы ас понназы.- Юртъеръёсты пуктоно вылӥегес. Отысен бусы но, нюлэс но адӟиськохы, ӵупет дорозь но кыдёкын уз луы. Ошмес но артэ". Кӧня ке дыр ортчыса, ужасьёс вуизы. Тол вылтӥ бугролы кор дасязы, тулыс веме ортчытӥзы, коркаос ӝутӥзы. 1823 арын сӥзьыл кӧня ке семья татын улыны кутскиз ни. Гуртсэс Ӵажи шуыса нимазы. Ышыггес интые куала пуктӥзы но выль гуртын улонзы ӟеч мед луоз шуыса вӧсяськизы. Аръёс ортчемъя, гурт кык ульчалы люкиськиз,- шораз кебит пуктӥзы, вуколы шуыса, тымет ӵупизы. Гуртлэн лымшор палысьтыз вукырем сьӧрысь сикез кенеразы. Отын пӧсь куазен пудо живот саюлын шутэтскиз. Гурт но пудо кенер вискысь нюкын кумышка пӧзьтӥзы. Отын ик кышномуртъёс пинал ваё вылэм. Ӵажи дорын кумышка пӧзьтонын вордскиз мынам но атае, Алексей терентьевич Кузнецов. Песятаез дурись вал. Сям-Каксиысь черклы киросъёс дурем, соосты но адӟыны луэ. Нюкын вордскемъёс пӧлын - Ложкинъёс, Филипповъёс, Кониковъёс, Васютинъёс - гуртысьтымы ваньмыз вашкала фамилиос. Соос бордысь кутске выжымы. Гурт но поскотина вискысь нюкын ошмесъёс гурезьысь ик пото. Ошмес вуэз дырды кузя лэзизы, тусь лэсьтӥзы. Отын кышномуртъёс дӥсь миськылӥзы-гылъязы. Нош вылӥ ошмесысь вуэз виятыны луэ вал уробое яке дӧдьые пуктэм вышкые. Тыметын чорыг вордӥзы, калтонъёс пуктылыны кутскизы. Котырысь сикъёсын пӧйшурез трос вал. Куабернюкын гондыръёс улӥзы, поскотинаын - коньыос но куницаос, койык, кечпи, ӟичы, балян, кион... Нош тулыс но сӥзьыл тымет тырмылӥз луж ӵӧж но ӟазег уллёосын. Отӥяз муш вордыны кутскизы, бусыоссэс гыризы. Кизё вал ӟег, сьӧд чабей, сезьы, пыш. Ошмесо нюке мунчоос пуктӥзы. Вуко но кебит, пӧйшуран но чорыган - гуртлы ваньмыз пайда вайылӥз. Ӟеч сямо адямиос улӥзы та гуртын. Шулдыръяськон дыръя ог-огзы доры куное пыратэк ӧз кельтылэ. Нош кыӵе кырӟанъёс кырӟазы - даурдэ кылзэмед потоз. Тӥни озьы, оло озьы но ӧвӧл, 175 ар талэсь азьвыл Российской Империын эшшо одӥг пичи гурт - Ӵажи кылдэм. Аръёс ортчыса, Сырвай-Энга гурез Инга шуыны кутскизы. Сурддор Сурдо луиз. Ӵажи вӧзы мукет гуртъ1с кылдӥзы на: Бадӟым Инга, Пичи Инга, Шмыки, Гуртлудчик, Берестово, Дмитрошур. Ӵажи соослэн шорсюлэмзы луиз. Школа пуктӥзы. Котыр гуртъёсысь нылпиос татчы дышетскыны ветлӥзы. Котькуд калыклэн, гуртлэн - аслаз выжыез. Мон понна ӵажиелэсь дуноез, чеберез дуннеын ӧвӧл. Леонид КУЗНЕЦОВ, Сюмси районысь Ӵажи гуртын 1947 арын вордскем мурт. Коньдон тазалыкез но "сюпсе" Дунъёслэн ялан будэмзы висисьёсты но сюлэмшугъяськытэ. Аптекаосысь шедьтыны уг луы тужгес кулэ луись эмъюмъёсты. Шӧдске, сиён-юонэз сямен ик, соосты но тросэн басьяны кутскизы. Кызьы вераз Удмурт Республикаысь Правительстволэн Аптека управлениезлэн кивалтӥсез Николай Александрович Казюлькин, аптекаосысь эмъюмъёс чылкак уз ыше. Калыклы эмъюмен юрттон, ортчем аръёсын ӵошатыса, куинь процентлы йылӥз, пе. Туннэ нуналлы куд-ог аптекаос чылкак ворсаськизы, тужгес но кунлэн луисьтэмъёсыз но нимаз кузёослэнъёсыз. Манетлэн дунтэмаменыз сэрен, соос вузъёссэс ватӥзы, куд- огзэ умой эскерисьёс но вылӥллямтэ. Лушкаськисьёс пыраллям. Ӝыны толэзь ӵоже аптекаосысь эмъюмъёс 11 процентлы кулэсмизы. Озьы ке но, Николай Александрович верамъя, огъя югдур 15-20 нуналскын тупатскыны кулэ. Кылдытэмын нимысьтыз служба. Со эскерыса возе эмъюмъёслэсь ӟечлыксэс но дунзэс. Туэ укмыс сюрс эскерон ортчытӥз. Кылем арен ӵошатыса, умойтэм, кутыны ярасьтэм, дырзы ортчем эмъюмъёс 14 процентлы уногес шараямын. Кунгож сьӧрын поттэм сиён-юонэз магазинъёсысь басьтыны умгес тыршиське, нош тазалыкмес - эмъяно луиськом. Вань эмъюмъёс пӧлысь 80 прорцентэз кунгож сьӧрысь ваем сырьёен лэсьтӥське, ма, кылем 20 процентсэ но чылкак асьмелэн шуыны уг луы. Нялтас пусъё на, азьвыл аръёсы эмъюмлы бичало вал турын-куаръёсыз но. Мылкыд карисьёс сое аптекаослы сётылӥзы, асьсэлы пичи ке но барыш поттылӥзы. Туэ югдур воштӥськем, лэся. Аптекаосты турын-куарен узырмытон вылысь, нырысь ик лицензия, пе, басьтоно. В. КУТУЗОВА. Картофка лудын Арысь аре чебер картофка будэтэ Вавож районысь "Луч" хозяйство. Миым "кыкетӥ няньзы" сю гектар вал, туэ - 80 гектар. Ми вуылыку, кылем арня вискын, картофка октонзэс йылпумъяло ни вал. Куазь кӧс ке но улӥз, гурезь-пудгаослэн бакча емышсы удалтӥз, гектарысьтыз 150 центнерлэсь уно картофка люкаське. Азьло колхоз 120-130 гектар картофка мерттылӥз но 5-6 комбайнъёсын копалляз. Табере югдур воштӥськиз: техника вужмиз, бусые уд потты ни. Али "кыкетӥ нянез" киын бичало, комбайнэн сярысь уг сӧриськы, вӧсь уг луы, соин ик сисьмыны но уггес сётскы. Огъя вераса, вузан тусыз чебер луэ. Гурт калыклы картофка октыны шумпотыса ветло Вавожысь дышетскись пиналъёс но ужтэк кылемъёс. Малы ке шуоно, хозяйство ужамзылы нуналлы быдэ коньдон сётэ. Г. ВАСИЛЬЕВ. Туспуктэмъёсыз Г. ЮСАЕВЛЭН. Машина лэсьтӥсьёс! Сюлмысь ӟечкыласьком тӥледыз Машина лэсьтӥсьёслэн нуналэнызы! Республикаын машина поттон - калык хозяйстволэн туннэ понна тужгес но кулэ луись удысэз. Со экономикалэн валтӥсь инъетэз луэ, юрттэ странамес кышкытлыклэсь утьыны. Машина лэсьтӥсьёслэн пайдаё ужамзы вылын возиське Удмурт Республикалэн экономикаез но, отысь калыклэн тырмыт улон-вылонэз но. Ӟечкыласьком тӥляд праздникеныды. Сӥзиськом юн тазалык, умоезлы гинэ оскон, шудо- буро улон, предприятиосты пыд йылазы юн мед сылозы. Удмурт Республикаысь Промышленностья министерство. Вотэс "Сӧриськемлэсь кышкаса кадь, тӥ дӥсьтытэк ӝутъяськоды пыдъёстэс. Мугорды лябӟе. Тӥ уд быгатӥське ужаны, асьтэдыз маке борды кутскытыны. Асьтэдыз тӧлъя-буръя пазям понна курадӟон со. Кӧня кужым кулэ луоз табере асьтэдыз выльысь берыктон, выльдон понна. Быгатоды- а?" (Ш. Боднер, "Искание рая", 1908 ар). Кема аръёс ӵоже асьмеос ӧм вераськылэ наркомания сярысь. Малпаллям, лэся, со асьме доры уз вуы. Школаосын нош наркотикъёс пумысен вераськыны воксё алэмын вал. Со сярысь тодыса, ас вылазы эскеремзы потоз, шуылӥзы. Нош пиналъёс та "усыкмон" сярысь озьы но дышетӥсьёссылэсь, анай-атайёссылэсь тросгес тодылӥзы. Али Россиын 6-7 миллион наркоманъёс. Тросэз соос пӧлысь - егитъёс но быдэ вуымтэос. Наркомания нуналмысь "пиналме", угось та усыкмытӥсь эмъюмъёсты вузасьёс уг возьдасько асьсэлэн вотэсазы пиналъёсты но кыскыны. Нырысь утялто дунтэк. Тодо уго, быдэ вуымтэ пинал, огпол усыкмемез бере, кыкетӥзэ куроз. Нош кыкетӥез ини дунын. Ӵемысь быдэ вуымтэослы вузало дунтэмгес, ас киынызы лэсьтэм наркотикъёс. Со уката но кышкыт пинал мугорлы. Уго сыӵе эмъюм лэсьтыны кутӥське уксус кислота, марганец йод. Вире сюрыса, солэсь сӧриське быдэс мугор. Вакчи дыр куспын висьыны кутско пекляос, мус, сюлэм, быре пиосмурт кужым, сутско вирсэръёс. Но наркоман озьы но дугдыны уг вала - пыдъёссысьтыз, кылысьтыз, едӥньысьтыз вирсэръёсаз эмъюм бышке. Кӧня улэ наркоман? 5-8 ар. Эн оске, пиналъёс, наркотик ӵектӥсь муртлэн верамезлы, мынам тодмое кызь ар бышкиське ни, ваньмыз умой шуэ ке. Одӥг мугор но сомында уз чида. Со сяна, сӧриське адямилэн психикаез. Малпанъёсыз воштӥсько, котыр улос шоры но мукет сямен учкыны кутске - "сӧрисько" семьяеныз, эшъёсыныз кусыпъёсыз, аналтэ ужзэ, дышетсконзэ, наркотик басьтыны коньдонэз ӧвӧлэн, лушкаськыны кутске. Уг кепыра адямиез виёнлэсь но. Выльысь наркотикен укол пуктыса, йырыз уката сурымаське. Сыӵе дыръя наркоманъёс асьсэос но валатэк вылӥысь тэтчо, сюрес вылын шудтэм учыре сюро. Туж ӵем куло мултэс эмъюм лэземлэсь. Нош асьсэды асьсэос быдтон учыръёс 350 пол йыло! Наркомания - секыт висён. Дышем сямлэсь мозмытскыны туж шуг. Адямилэн огназ сое вормыны кужымез уг тырмы ни. Сое утён понна палэнскыны кулэ ӧвӧл анай-атайёс но, дышетӥсьёс но. Пиналдылэсь ассэ мукет сяменгес воземзэ, жӧлмаса ветлэмзэ шӧдӥды ке, тырше соин ваче син вераськыны, вазиське врачлы. Ӵемгес наркотик борды басьтӥсько номырин тунсыкъяськисьтэм, ужлы ёрмыса ветлӥсь пиналъёс. Нош куд-огзэ ураме "потто" асьсэос анай-атайёс. Куспазы керетыса, юыса- калгыса улэмзы нырысь ик нылпиос вылын шӧдӥське. Пиналдылы кыӵе ке тунсыко уж ӵектӥды, ваньмон дырзэ пайдаё ортчытыны юрттӥды ке, та шимес висён палэнтӥ ортчыны быгатоз. Пиналъёс, тӥ тодыны кулэ, маин кышкыт луэ наркотик, кыӵе солэн бервылъёсыз. Куд-огез "турын" (гашиш, кенэм) кыскыны кутско, эшъёссы пӧлын висъяськон понна. Одӥгзэ эн вунэтэ, сыӵе "мода" адямиез быдтэ гинэ шуыса. Россиын сизьым сюрс наркоман СПИД-эн висё. Сомындаез ик В гепатитэн. Сыӵе висисьёслэн нуналъёссы лыдъямон кылё. Учке котыр, оло, тӥ вӧзын али сылэ сыӵе вотэсэ сюрем адями. Тӥ ке ӧд юрттэ, солэн аслаз отысь потыны кужымез уз тырмы. х х х Пиналъёс, озьы ик анай-атайёс, юрттэт пумысен вазьиськыны быгатоды таӵе адресъёсъя: 1. Ижевск, Пушкинской урам, 371 номеро юрт, телефон - 22-08-48, РНД; 2. Ижевск, Вооткинской шоссе урам, 142 номеро юрт - быдэ вуымтэосты эмъянъя наркологической кабинет; 3. Ижевскысь наркологической эскеронъя кабинет, телефон - 78-67-40; 4. Ижевск городысь "Подросток" центр, телефон - 78-10-40. Ёрос центръёсысь наркологической кабинетъёс. С. САДОВНИКОВА, врач-нарколог. Карсовае сюрес усьтэмын 22 сентябре Балезино районын усьтӥськиз туж кема возьмам асфальт сюрес, кудӥз табере герӟалоз Балезиноез Карсовай черкогуртэн. Та сюресэз лэсьтон бордын ужазы "Удмуртавтодорысь" но воинской частьысь лэсьтӥськиськисьёс. Соослэн кужыменызы асфальт сюрес лэсьтэмын луоз на Карсовайысен Сергиноозь. Озьыен, та сюрес районын тужгес но кузез луоз - 76,5 километр. Балезино-Сергино сюресэз лэсьтон пыртэмын республикаямы кутэм "Сюресъёс" программае. Ужрадэ пыриськиз Кун Кенешлэн Тӧроез А. Волков. Т. МИРОНОВА. Кивалтон амалъёсты воштоно Йырмес ужатытэк кивалтэм улын Россимы шуг-секытъёс пӧлы выиз. Премьер-министр но, правительство но воштӥськизы. Марзэ выльзэ витёно на но кызьы секыт югдурысь потоно? Та юанъёслы валэктыны мылкыд кариз Россия Федерациысь Кун Думалэн Удмуртиысь депутатэз А. В. Солуянов. - Правительствое коммунистъёс пуксёзы шуыса вераськонъёс кемалась ветло ини. Валтӥсь интыосы парламентысь адямиос быръемын, нош коммунистъёс ыштонъёс адӟизы шуыса ӝожтӥсько. Зэм-а со? - Та юанлы валэктон понна чаклано, кыӵе адямиос правительствое пыремын. Е. М. Примаковлы дурбасьтӥзы коммунистъёс. Алиез экономикая вице-премьер КПРФ фракцилэн адямиез луэ. Мукет ласянь, правительствое ужаны ӧтемын НДР-ысь специалистъёс. Туж аспӧртэмлыко коллектив правительство пӧрме, отысь коммунистъёс ог-огенызы юн герӟаськемын ке но, соос страналэсь азинскон сюрессэ уг быръё. - Быгатоз-а Примаков таӵе аспӧртэмлыко коллективен кивалтыны, кин министръёсын косъяськоз: ачиз яке партиослэн кивалтӥсьёссы? - Евгений Максимовичлэсь нырысетӥ вамышъёссэ чаклано ке, со визьмо но кужмо политик. Министръёсты со ачиз быръе, быгатонлыксэс лыдэ басьтыса, кыӵе партиын луэмзы шоры учкытэк. - Малы депутатъёс В. С. Черномырдинэз ӧз быръе? - Виктор Степановичез мон гажасько. Озьы ке но, малпасько, правительстволэн тӧроезлы уг тупа шуыса. 6 ар со странаенымы кивалтӥз: улонмы уродмиз, производство куашкамын. Правительстволэсь кивалтон амалъёссэ воштыны дыр вуиз. Со понна выль адямиез быръёно. - Вераськонмы производстволэн куашкамез сярысь потӥз бере, юан кылдӥз: ма кароно Удмуртиысь оборонаен герӟаськем предприятиослы таӵе секыт вакытэ? - Пайда поттон бордысен кутсконо. Асьме дорын поттэм ож тӥрлык быдэс дуннеын тодмо. Соин ик соосты вузаны кулэ, киултоно дуннеысь рынокъёсты. Ужаны кулэ заказъя, "куке но вузалом ай" шуыса пукыны кулэ ӧвӧл. Асьме ваньбур поттӥсьёсмы рыночной кусыпъёсты валаны кутскизы ни. Ваньбур поттыны со ӧжыт ай, вузаны быгатонлык но кулэ. Жаляса верано луэ, дуннеын кутӥськись куронъёсъя ужаны уг быгато на. Но "Ижмашын" кылдытэмын вузкаронэз паськытатонъя группа. Ваньбур поттӥсьёсмы ӧвӧл дышемын вузкарыны. ВПК-ысь предприятиос медаз куашкалэ шуыса, отын, ож тӥрлык сяна, адямилы улонын кулэ луись арбериосты поттоно. Озьы быгатом утьыны куашкам калэ вуэм заводъёсты. Кылсярысь, Удмуртиын кык предприятие: электромеханической но Воткинскысь завод пыд йылазы юн сылэ. Воткинск заводын ужасьёс государстволэсь заказ басьтӥзы. Но соин гинэ ӧз буйгалэ, калыклы кулэ луись вузъёс поттыны кутскизы: "Фея" мисьтаськон машина, му вӧй но чагыр эстӥськон поттӥсьёслы оборудование. Соосты кунгож сьӧрын но басьто. Дышем сямъёслэсь куштӥськыса, выльзэ утчаса, гуысь потыны луэ вылэм. Сыӵе сюресэз утчало тросэз, но куд-огез гинэ сое шедьтэ. Мон шумпотӥсько, соос пӧлы Воткинскысь завод пыре шуыса. Л. ПЕТРОВА. Вуоно даурозь чидалоз, дыр... Тэль пушкы выем гуртъёс пӧлын котькыӵеез вань, дыр: соослы туж уд но паймы ини. Туала шуг-секытъёслы сётскытэк, соос быгато на ӝутскыны, асьсэды куашканлэсь утьыны. Зэм, улӥсез арлы быдэ ӧжыт ке но кыле (егитъёс асьсэлэсь шудзэс палэнысь утчаны туртто), гурт калык суй-пыдзэ уг юскы. Но вань ик вылэм соослэн сюлэмвисёнзы: нылпиосты дышетонын кылдэм шуг-могъёс. Та учыр вылэ пыкъяськыса, мынам кӧня ке вераме потэ Кизнер ёросысь Ӵуштаськем гуртысь школа сярысь. Нырысетӥзэ пуктэмзы дырысен витьтон ар тырмоз ни. Солэсь азьло бускель Замайгуртэ ветлӥллям (соин валче дышетӥсьёс огпол гинэ ӧз куаретылэ ини). Туж шерез татын дас арлэсь кемагес чидалоз. Малы ке шуоно, тросэз дышетӥсьёс сизьым - дас иськеме ветло. Гужем ярам ай, нош толалтэ мар кароно? Куазь жобамен, сюресъёс ӵоктасько. Кионъёслэн пытьыоссы но ӵем гинэ пумиськыло. Нош мар карод, кызьы ке но улыны кулэ ук. Дышетӥсьёс чидало: гужем ветло велосипедэн, толалтэ - куасэн. Ай классэ вуыса но соку ик шунтӥськыны уг луы. Малы ке шуоно, тямыс укноен корка гурен гинэ эстӥське. Нош гурдэ эстытозь, кынмыса ачид плита пушкы ӝоггес пырод, дыр. Нош дышетыны мылкыд но кужым кулэ. Зэм, татын одӥгезлы ик тодыны кулэ пӧртэм удысъёсты: луоно физкультуралы, крезьгурлы дышетӥсь, суредась, бакчаын ужаны но быгатэм кулэ. Мар веранэз, директор но со ачиз ик. Азьвыл та удысын туж тыршыса ужам Надежда Евгеньевна Кузнецова: али но сое ваньмыз ӟеч кылъёсын тодазы вайыло... Татысь дышетӥсьёс нылпиос понна жобаку но, пӧсь шунды сутыку но лыктыны дась. Вань пиналъёс татын дас мында люкаськозы ик, дыр. "Кылем арын куинетӥ класс чылкак ӧй вал",- вера татысь дышетӥсь Наталья Аркадьевна Емельянова. Куинетӥ классэз пырпотыса, пиналъёс дышетскыны ветло бускель гуртэ. Серемез ик поттэ куддыръя та валантэм улонмы. Зэм, пиналъёс но, дышетӥсьёс но чидало. Ай нылпиос школае ӵукна вазьгес вуо татын улӥсь эшъёссылэсь. Кыкетӥ арзэ дышетско ни нылпиос клублэн одӥгаз висъетаз. Азьвыл школаен ӵошатыса, татын чылкыт, сайкыт, кӧня ке шунытгес но луылэ. Таяз нырысетӥ куарусён толэзе Ӵуштаськемысь нылпиосты пумитаз ини выль дышетӥсь - Татьяна Евгеньевна Лебедева. Таяз гужем со йылпумъяз Можга педучилищеез. Быгатоз меда пинал адями дышетонлэсь секытсэ чиданы, тыпак уз чигы-а солэн аслыз осконэз?.. Котьма ке но, сӥзём егит адямилы югыт, паськыт сюрес, бадӟымесь вормонъёс. Ӵуштаськем школа но, оло, матэктӥсь 20-тӥ даурез адӟыны быгатоз на. Анна КУЗНЕЦОВА, Удмурт кун университетын дышетскись. КПРФ-лэн пленумез Россия Федерациысь Коммунистической партилэн Центральной Комитетэзлэн дасэтӥ пленумез ортчоз "Росагропромлэн" юртаз. Пленум эскероз Россиын 7 октябре ортчоно пумитъяськон ужрадъёслы дасяськон ужпумез. Коммунистъёс азьло сямен ик мылкыд каро уно калыкез урамъёсы поттыны. Президентэз куштыны но Президентэз дырызлэсь вазь бырйыны ӧтён улсын. Пленумын Коммунистической партилэн съездаз делегатъёс быръемын луозы. Иворъёсъя национальной служба. Котькудӥзлэн - аслаз сюресэз Мон сямен, котькуд адями данъяське вордскем шаерыныз. Мон вордски Алнаш черкогуртын. Нош ёрослэн кылдэмез ву шапыклэн шундыя пиштэм кадь возьматэ удмурт калыклэсь быдэс историзэ. 1929-тӥ арын 11-тӥ июне ортчиз районысь коммунистъёслэн нырысетӥ кенешсы. Отын ик мылкыд каризы Алнаш ёрос кылдытыны. Тазьы ик пӧртэм дыръёсы кылдӥзы мукет районъёс. Тани Ува посёлок районлэн центрез луэм вазьгес, 1924-тӥ арын 10-тӥ июне. Мон ноку но уг вунэты та посёлоке ветлэмме. Соку тодматски Уваысь музеен но посёлок сярысь гожтӥсен А. А. Подшиваловен. Алексей Алексеевич книгазэ кузьмаз но музеен тодматӥз. Тани ма сярысь гожтэ автор: "Быдӟым Отечественной война кутскем бере, нырысь нуналъёсы ик партилэн райкомаз, райвоенкоматэ, районысь улӥсьёслэсь, фронтэ куриськыса, сюосын гожтэтъёс вуизы. Ас мылкыд каремзыя, уноез ӟырдыт оже кошкизы". Трос тодӥськом ини Пуштовай гуртын вордскем батыр Виктор Кузьмич Пислегин сярысь. Сое сӥзьыл 1939-тӥ арын армие басьто но танковой училищее келяло. Нош толалтэ 1940-тӥ арын со фаннъёсын ожмаськиз. Кышкасьтэм луэмез понна, СССР-ысь Вылӥ Советлэн Президиумезлэн Указэзъя 1940-тӥ арын 24-тӥ мартэ Советской Союзлэн Героез ним сётӥзы. Но жаляса верано луэ: Ленинградэз утён понна ожмаськонын 1942-тӥ арын 21-тӥ июле быре со. Дано ужезлы сӥзьыса, Лугаысь одӥгезлы ульчалы Пислегинлэсь нимзэ сётӥзы. Озьы ик Уваысь "Восток" кинотеатр вадьсы районысь пионеръёслэн но школьникъёслэн люкам коньдонэнызы В. К. Пислегинлы памятник пуктэмын . Посёлокысь одӥгез ульча но нуллэ солэсь нимзэ. Ува районысь пекшур гуртын 1913-тӥ арын 30-тӥ декабре вордскиз П. А. Блинов. Солэн пинал дырыз ортче Селта районысь Сюрзи гуртын. 1928-тӥ арын Пётр Блинов дышетскыны пыре Выль Мултанысь педтехникуме. 1933-тӥ арын йылпумъяса ужаны кутске Селта машинно-тракторной станцилэн политотделэзлэн газетаз. 1936-тӥ арын басьто Горд Армие. Кык ар ортчиса, службаысь бертэ. Нырысь ужаз "Удмурт коммуна" газэтлэн редакцияз, собере - "Егит большевик" газетлэн редакцияз. Та аръёсы писатель лулысь-сюлмысь тырше "Улэм потэ" романэз бордын. 1940-тӥ арын романзэ печатлазы. Быдӟым Отечественной война кутскем бере, Блинов соку ик кошке фронтэ. Смоленск улосысь Павлищево гурт дорын ӟырдыт ожмаськыку, 1942-тӥ арын 7-тӥ январе удмурт калыклэн дано пиез, роталэн политрукез, П. А. Блинов геройлыко быриз. Та иворез кылыса, Ува районысь ик Хомяково гуртын вордскем писатель Михаил Лямин "Ож сюрес" книгаяз гожтӥз: "Мынам син азям пуксизы Блинов эшелэн вань выросъёсыз, мертчан выллем ӵуж йырсиез, ин тусъем чагыр синъёсыз зӧк ымдуръёс пепертыса вераськемез... Кӧня визьмо книгаос гожтысал на ай ас калыкезлы. Войнаын со, ужын сямен ик, батыр сямъёссэ но возьматӥз. Солэн улэмез Буров Демилэн улэмез кадь вал. Табере ӧвӧл ни, калык уз вунэты гажано писателезлэсь Пётр Блиновлэсь ужъёссэ". Игнатий Гаврилов но бырем писателез буре вайыса гожтӥз "Мон Смоленской музъем вылтӥ ортчи" кылбурзэ. Арня нуналэ, 1972-тӥ арын 25-тӥ июне, ньыль номеро Ува школаын усьтэмын вал П. А. Блиновлы памятник. Уваысь мӧйы улӥсьёс уг вунэто на, дыр, кызьы ронолэн 55 номеро приказъя 1942-тӥ арын 17-тӥ июле Василий Александрович Сухомлинскиез Уваысь шор ёзо школалы директор каризы. "Просвещение" издательствоын 1969-тӥ арын поттэм "Павлышская средняя школа" нимо книгаяз Сухомлинский вераз, кызьы со фронтэ кошкиз, война кутскем бере. Ожмаськиз Смоленск, Москва но Калинин городъёс дорын. 1942-тӥ арын Ржев дорын секыт сӧсырмемез бере, кӧня ке толэзь ӵоже йӧнатскиз Ува посёлокын. Войналэсь инвалидзэ Ува школалы директоре пуктэмзы бере, секыт дыр вал ке но, со быгатӥз дышетӥсьёсыз но дышетскисьёсыз юн огазеяны. Физикая но математикая дышетӥсь Н. П. Мезрин вера: Сухомлинский школалэн директорез луыса ужаку, со, Белоруссиысь бертыса, пиналъёсты дышетыны кутске. Соку Василий Александрович улӥз школаысь кабинетэз вӧзын. Мезринлэн пичи юртэз школаен артэ вал. Тыл пыртӥ ортчем фронтовикъёс эшъяськизы, ӵош ветлылӥзы киное но. Сухомлинский школаен кивалтӥз 1944-тӥ арозь. Советской Армия Кировоградэз мӧзмытэм бере берытскиз вордскем шаераз но Павлышысь шор ёзо школаен кивалтыны ӧдъяз. 1968-тӥ арын солы сёто Социалистической Ужысь Герой ним. Нош талэсь азьло сётэмын вал Украинаысь дано дышетӥсь ним. Сое бырйызы СССР-ысь Педагогической наукаосъя академилэн член-корреспондентаз. В. А. Сухомлинский, нылпиосыз дышетонлы сӥзьыса, куамынлэсь уно книга гожтӥз. Зэмзэ вераса, азьвыл "Ижсталь" огазеяськон Ува но Сюмси районъёслы юрттэ вал. Но али, завод рыноке выжемен, та районъёсын кусыпсэ ыштӥз. Малы ке шуоно, табере ваньмыз уло туннэ нуналэн. Азьланез сярысь ӧжыт малпаськомы. Мон сямен, ноку но уг яра вунэтыны азьвыл улонмес. Со мед кылёз историе. В. ЧЕРНОВ, ужысь ветеран. Котькытчы мын - юэм синъёс Пастухъёс пуко вина юыса. Огез соос пӧлысь - кызь одӥг аресъем нылмурт. Кытын ке палэнын скалъёссы ветло - ӝокытлэсь пегӟон инты утчало. Нош ческыт вина пастухъёслэсь визьзэс сура но сура. Шулдыръяськон тани маин быриз: нылмуртэз юэм эшъёсыз "серем каризы" - эриктэмазы. Та выллем учыръёс ӧжыт шат? Ма бордысь пото тылпу, семья куспын керетон, йыруж, сюрес вылын шудтэм учыръёс? Туж ӵем таӵе ужъёслэн "ошмес синзы" - аракы, мукет сямен - адямиослэн асьсэды кутыны быгатымтэзы. Котькытчы мын - юэм синъёс. Городын-а, гуртын-а, уж дорын яке дорын - пӧртэмез ӧвӧл. Берпуметӥ 10-15 аръёсы ӵем гинэ адӟод юэмзэс егит юлтошъёслэсь но. Нылъёс пиосын огмында юо. Дас тямыс аресъем эше вера: - Самой унозэ куать чарка юи. Асьме пукетэммы но вал, басьтэмез но - сураськиз. Ӧй кудӟы. Ӝожомеменым-а, шумпотэменым-а - ӧй вала ни кӧня юэмме. Ма, собере мугез вал ук - апае бызиз. Со сяна сузэре но, братэ но ӧвӧл ни. Нош огшоры дыре кыклэсь уно уг юиськы. Ярам, сюан-бӧрысь дыръя веръялтӥд, шуом, пичияк. Юон понна огшоры нунал но вылэм на. Эсьмаса, кыӵе ке пайда поттэ вал. Аракыен эшъяськись пинал шоры пересьмем адями шоры кадь учкисько. Мӧйымем беразы асьсэ пиналъёссылы егит даурысьтызы мае мадёзы соос? Юэмзэс-а? Яке уг малпало ни семья кылдытыны? Соиз, бен асьсэлэн ужзы, асьсэос ик мед малпаськозы. Мукетыз жаль: юэм йырын нуны курадӟыны вордӥське югыт дуннее. Анайтэк я атайтэк кыле, тазалыкез ляб луэ. Котькудӥз вала: вина син мальдымон суредозь уз вутты. Бер-а, вазь-а, шулдыръяськонлэн пумыз вуоз. Но кыӵе луоз со пум? 27 аресъем шофёрлы таӵе юан сётӥ: - Мар малпаса юиськод нырысетӥ сю граммзэ? - Кыкетӥзэ уг юы ни шуыса. Нош малы астэ соку курадӟытонэз, йыр ӵуказеяз тышкам бере кадь висе, кӧтпушез позыръя бере? Зэм кырӟа Вика Циганова: "Весело веселье, тяжело похмелье". Наташа эше ужа гуртамы вузкарись луыса. Солэсь тунсыкъяськоно кариськи: - Арлэн кыӵе вакытаз лавкаысь винады чалякгес кошке? - Созэ уг тодӥськы. Но толалтэзэ, сӥзьылзэ (кезьытгес вакытъёсы) басьтыны кариськогес курытсэ - водкаез. Гужем но тулыс - ческытсэгес: "Росинкаез", "Калинкаез" но мукетъёссэ. Маин та герӟаськемын, уг тодӥськы. Одӥгзэ пусъем потэ: курыт-а, конял-а - вина посудалэн сюбегась кузь чыртыез сямен ик: юон сюрес но пумен сюбега. О. МОСКОВА, Удмурт кун университетысь студентка. Шунды "Кыкетӥ дор" Ялӥськом конкурс Анай бурд улысь потон вакыт куке но одно вуэ. Вазь-а, бер-а, султӥськод но кошкиськод, ас сяменыд, ас тодэмъяд улыны кутскиськод. Кинлэн ке со каньылля радъяське, кин ке нош аръёсын дышыны выре. Шуныт палъёсы лобзӥсь тылобурдоос сямен, тӥ но сьӧрло кошкиськоды дышетскыны, ужаны. Кызьы пумиталоз тӥледды мурт дор, тодмотэм бадӟым город? Быгатоды-а тӥ мӧзмондэс вормыны, шуг-секытъёслы, урод сямъёслы, оло нош ултӥянъёслы но сётскытэк улыны? Вӧсь карыкузы, ёрмыкуды бордады анайды уз луы. Кинлы усьтоды сюлэмдэс? Кызьы вормоно дӥсьтӥсьтэм луонэз, возьдаськонэз? Кызьы дышоно выль интылы? Кӧня юан! Тӥни соослы валэктон шедьтон понна, "Шунды" бам ялэ "Кыкетӥ дор" конкурс. Огъяулонниосын, интернатъёсын улӥсь егитъёслэсь, школаын дышетскисьёслэсь, студентъёслэсь пӧртэм жанрен гожтэм ужъёссэс возьмаськом выль арозь.Устоосыз ужъёс пусъемын луозы дуно кузьымъёсын. 80 арлы "Ӟег няньмы" Тани тазьы редакцие пыремъёсты пумиталля вал иворъёсъя отделлэн кивалтӥсез Матвей Григорьевич Ермаков. Кызьы, пе, уд шумпоты куноослы, куке соос, муш палэпе мушъёс сямен, сьӧразы ваё улонысь чыры-пырыен бичам "чечы". Со нуналлы быдэ тросэн кулэ луэ газет бамъёсы. Дыртытэк кадь гинэ вераське адямиосын (но со дыре ик гожъяське) Матвей Григорьевич. Отделын вордӥськем материалъёс секретариатэ котьку дыраз вуо, пӧсь дыръязы. Кызьы сотэк? Беромыса потэм ивор - сӥям табань кадь, "ческыт" уг кошкы ни. Ӝог но ӟеч ужаны Матвей Григорьевич егит дырысеныз дышемын. Со трос аръёс ӵоже егитъёслэн азьветлӥсьсы вал. Комсомоллэн Шаркан, Нылга, Пичи Пурга ёросъёсысь ёзъёсаз секретарь луыса ужалляз. Отысен чырмыт муртэ комсомоллэн обкомаз басьтӥзы. Отӥяз, партилэн обкомаз выжемезлэсь азьло, "Егит большевик" газетын но ужаны вутскылӥз, андан пӧзьтӥсьёс дорын но. 1949-тӥ арысен кутскыса, дас ар пала Матвей Григорьевич кивалтӥз "Советской Удмуртия" газетлэн отделэныз. Мыным, егит журналистлы, соин ӵош ужаны капчи потылӥз. Малы ке шуоно, ми ваньзэ, мар луоно, азьпала ик тодылӥм пӧртэм удысъёсын ужась эшъёсмы пыр. Люкам ӵектонъёсъя планъёс лэсьтылӥм. Матвей Григорьевич яратылӥз вераны: инмысь кизилилэсь гинэ музъем вылэ усёнзэ азьло ик тодыны уд быгаты, отӥзэ ваньзэ тодыны луэ... Нош куд-ог дыръя планъя пусъеммы ӧз быдэсъяськылы пӧртэм мугъёсын. Кылсярысь, одӥгаз заводын выльзэ утчасьёс трос дуно ӵектонъёс сётӥзы вал. Соосты уже кутыса, предприятие уно андан но коньдорн шыръяны быгатысал. Нош техникаез азинтыны кылдытэм бюро дыго-мого ужамен, ӵектонъёс кугӟаса кадь уло. Выльзэ утчасьёслэн коллективзы сярысь ми ушъяса гожтӥм ни вал - возьмамы шумпотымонэсь лыдпусъёсты. Дыр ортчемъя, чиданмы быриз. Техбюроез ушъям интые пыкылоно луиз. Кызьы ке Ермаковез но монэ ысъязы куинь нуналлы командировкае Завьял ёросысь колхозъёсы, государстволы ю-нянь вузанэз эскерон вылысь. Отысь селькоръёсмылэн юрттэменызы, азямы пуктэм ужпуммес кык нуналскын быдэстӥм. Ю-нянь вузанэз мукетъёсызлэсь азьлогес быдэстӥсьёс сярысь газетамы репортаж сётэмын вал. Интыяз пукыны чидасьтэм Матвей Григорьевич котьку дась вал сюрес вылэ потыны. Со сярысь кузпалыз Екатерина Ивановна тазьы тодаз ваиз. Верховной Советэ кудаз ке быръёнъёс азьын республикаын шаплы кылдытэмын вал агитпоезд. Агитаторъёслы дун тырон но соосты сюрес вылын сюдон сярысь нокин сюлмаськымтэ. Матвей Григорьевич юрттӥсе кутэм аслэсьтыз кузпалзэ. Екатерина Ивановна, дораз сиён-юон дасяса, агитпоездлэн дугдылон интыосаз корзинаен, мискаосын но термосэн вуылоно луэм. Дораз бертылыкуз, Матвей Григорьевичлэсь "пӧсь" материалъёссэ редакцие вайылэм. Котькыӵе уже пыриськыны дась луэмез но мукетъёсызлы сюлмысь юрттылэмез понна, эшъёсыз Матвей Григорьевич Ермаковез гажаса "милям ӟег няньмы" шуылӥзы. Леонид ДАНИЛОВ. Нюлэсъёс ӝуало Берло дыре куазь кӧс но ӝӧласькыса улэмен,шаерамы ӵутрак ӝутскиз тылпуослэн лыдзы. Нуналлы быдэ кызь но солэсь тросгес тылпу потон учыръёс луыло. Кылсярысь, 14-21 сентябре гинэ "горд атас" 104 пол поталляз. Тужгес но сюлэмшугъяськыто гуртъёсысь объектъёсты но улон коркаосты тылпулэсь утён. Та уж туж ляб пуктэмын. Кизнер ёросысь "Новая жизнь" колхозын тылпу изъянтӥз складзэс но кык но ӝыны тонна турынзэс. 16 сентябре Пичи Пурга районысь "Уромское" ОПХ-ын сутскиз кунян гидлэн липетэз. Гидын 147 кунянъёс вал, ярам соосты утьыны луиз. 17 сентябре тылпу потӥз Воткинск ёросысь Кварса гуртысь ("Двигатель" акционер огазеяськон) ю тысь куасьтон комплексын. Тыл изъян ваиз машиналы, ӝуаз 29 тонна фураж. Изъян адӟемын 100 сюрс манетлы. 18 сентябре турынэн складзы но вукозы сутскиз Кизнер районысь Батырево гуртын. 19 сентябре "горд атас" маялтӥз Кез ёросысь "Прожектор" эштослэсь вал гидзэ. Тылпуослэн лыдзы йылӥз нюлэсъёсын. 17 сентябре гинэ соос куать пол потылӥзы. Воткинск районысь Новый посёлоклы одӥг иськемын тыл кузёяськиз 20 гектар вылын. Та ёросысь ик Перевозное село но Осиновка гурт вӧзысь тыл аляз ог 3 гектар нюлэс вылын. Трос кужым кыскемын вал Ижысь Фруктовой ульча палась нюлэскысь тылпуэз кысонэ. Шудтэм учыръёс пото тылын эскериськытэк выремен, пиналъёслэн тылпоттонэн чакласькытэк шудэменызы, электропроводын замыкание луэмен, тылскем бервылъёслэсь. Удмурт Элькунысь югдурез утёнъя министерстволэн тылпуосын нюръяськонъя кун службаез республикаямы вань гражданъёслы куронэн вазиське: куазь кӧс возиськыку эн тылскелэ но жуг-жагез эн сутэлэ. Предприятиослэсь, учреждениослэсь но организациослэсь кивалтӥсьёссэс, вань калыкез куриськом тылпулэсь утиськонэз кужмоятыны, объектъёсты возьманэз умойгес радъяны, электрооборудованиез эскерыны, электроен но шуныт ужась механизмъёсты эскерыса возьыны. Тылпуослэн кышкытлыксы пумысен валэктон уж нуоно нылпиос но коллективъёс пӧлын. М. КАМАЛЕТДИНОВ, УР-ысь МВД-лэн тылпуосын нюръяськонъя кун управлениезлэн кивалтӥсез. А. Лукашенко Удмуртие лыктыны дасяське Беларусь Республикалэн посолэз Владимир Григорьев гожтэт ыстӥз Удмурт Республикаысь Кун Кенешлэн Тӧроезлы А. Волковлы. Отын шуэмын: "Дан усиз республикаысь кивалтӥсьёслэн нимынызы Тӥледлы ивортыны, Беларусь Республикалэн Президентэз А. Г. Лукашенко тау карыса ӧтёндэс басьтӥз. Со ортчоз 3-4 ноябре 1998 арын". Озьыен, Владимир Григорьев эшшо огпол юнматӥз на Беларусьлэсь Удмурт Республикаен котыр ласянь кусып возьыны дась луэмзэ. Удмурт Республикаысь Кун Кенешлэн пресс-службаез. Санкт-Петербург юрттэт куре Калыклы сиён-юон но эмъюм тырмыт дасянэн Санкт-Петербургын шуг-секытъёс кылдӥзы. Городлэн губернаторез Владимир Яковлев Удмурт Республикаысь Кун Кенешлэн Тӧроезлы А. Волковлы гожтэт ыстӥз. Удмуртиысь сиён-юонэз но эмъюмъёсты Петербурге келян ужпумез учкыны курыса. Санкт-Петербургысь кивалтӥсьёс дасесь Удмуртиысь продукциия понна предприятиосын поттэм вузъёсын тырыны. Удмурт Республикаысь Правительствоез косэмын та ужпумез эскерыны, республикалэсь зэмос луонлыкъёссэ лыдэ басьтыса. Удмурт Республикаысь Кун Кенешлэн пресс-службаез. Тау карон Удмурт Республикаысь Кун Кенешлэн пресс-службаез тау каре "Продторг" ЗАО-лэн генеральной директорезлы Александр Шибановлы, пресс-службаын ужасьлы Николай Глуховлы самолётын медицинской юрттэт сётэмез понна. Удмурт Республикаысь Кун Кенешлэн пресс-службаез. Н. И. САПОЖНИКОВ: "Туала власть - огдырлы" Россиысь Кун Думалэн депутатэз, КПРФ-лэн Удмурт организацилэн нырысетӥ секретарез Николай Иванович Сапожников, Москваысь вуыса, трос пумиськонъёс ортчытэ. Журналистъёслы со вакчияк ивортӥз странаын но Россилэн Правительствояз кылдэм берло югдур сярысь - Экономика удысын политической диктатуратэк уг луы, - шуиз со. - Кун Думалэн депутатъёсыз ӟеч валало, туала премьер-министрмы Евгений Максимович Примаков кема уз ужа, со быръемын огдырлы гинэ, югдурез ӧжытаклы капчиятон понна. Тодмо мукетыз но: Президентлэн властез куашка, берло воштӥськонъёс тае умой возьматӥзы ни. 7 октябре, профсоюзъёс ӵектэмъя, Россиын ортчоз пумитъяськон нунал. Коммунистъёслэн фракцизы, отын ми 130 мурт, соосын огкылысь. Правительство азе пуктэм куронъёс пӧлысь нырысетӥез - Борис Ельцинэз отставкае поттон, страналэсь курссэ воштон. Кун Думалэсь депутатсэ шугъяськытэ калыклэн нуналмысь нуналэ начармемез, нылпиослэн сютэм улэмзы. - Республикаысь Кун Кенешлэсь внеочередной сессизэ люкаса, отын пыр-поч вераськоно Удмуртиын кылдэм югдуръя. Маин сюдоз интыысь Правительство 1 миллион 600 сюрс зем калыксэ? Ю-нянь туж ӧжыт люкаськиз, мон таӵе пичи урожай басьтэммес уг тодӥськы, - пусйиз Николай Иванович. - Тужгес но шугъяськыто пиналъёс: малы сомындаез школа парта сьӧры пуксьытэк кылемын? Котькудӥзлэн та луонлыкез вань нуналаз одӥг пол коть кӧттырымон сиськыны? Секыт война аръёс бере ваньмаз школаосын пиналъёсты сюдӥзы пӧсь сиёнэн, со вылын будӥз быдэс поколениез. Нош туэ ма лэсьтӥське, нылпиосмылэсь тазалыксэс утён вылысь? Та юанлы но валэктон кылэм потэ вылэм Кун Кенешлэн сессияз. Н. И. Сапожников валэктон сётӥз журналистъёслэн пӧртэм юанъёссылы. Соин пыр-поч вераськонэз лыдӟемды луоз газетлэн матысь дыре потоно номерысьтыз. Л. МЕДВЕДЕВА. Лыдӟись, шумпот! Милям гажано полиграфкомбинатамы (гажано, малы ке шуоно, отын газетмы печатлаське) вуиз Германиысь печатлан тӥрлык. Туж дуно маке - полиграфкомбинатын ужасьёс дунзэ вераны ик ӧз дӥсьтэ. Коньдон висъяз Россиысь Правительство, нош Удмуртия со уксёез берыктыны кулэ. Выль оборудование часкын 60 сюрс газет печатлалоз, вужез 24 сюрс экземпляр вуттэ. Одӥг газетэз печатлан 20 процентлы дунтэмгес усёз. Газет лыдӟымонгес, кие кутымонгес луоз, букваос асьсэлы кельшозы, буёлэз бордэ уз лякиськы - сыӵе ини со, офсетной печать. Таӵе дыръёсты кема возьманы ӧз кыльы ни - ноябрь толэзе оборудование интыямын луоз. Дасясько выставкаослы Туэ ноябрь толэзе Москва дорысь Королев городын нырысьсэ усьтӥськоз "Пичиесь спутникъёс" нимын выставка. Отын аслэсьтыз "Гонец" спутниксэ но мукет вузъёссэ возьматыны чакла Ижысь радиозавод но. Таин ӵош ик предприятие дасяське Москваын ортчоно мукетыз выставкалы. Таиз ужрад нимаськоз "Ведомственные корпоративные сети связи" шуыса. Отын завод возьматоз "Связькомплекс" но "Ижрадио", УКВ-радиосвязь но "Радий" вузъёссэ. Таосыз ужрадъёс вуоно арын "Связьэкспокомм-99" калык куспо выставкалы дасяськонъя репетициос выллем ортчытӥсько. Н. ЕФРЕМОВ. "Улом ай, улом..." Паймымон адямиос уло гуртын. Куддыр юромо, куддыр амалтэк пачкатыны выро соосыз Россиын, нош крестьян калык номырлы но уг сётскы. Шуг-секытъёс шоры учкытэк ужа но ужа, аслэсьтыз воззэ азьлане кыске. Озьы ӧвӧл шат? Тани али но, куке ваньмыз сямен адямиос реформа шуонъёслэсь кышкаса лаптӥськизы, гуртоос йырзэс уг ошо. Соос дышемын ни уго асьсэ кужымзылы оскыса улыны. Тодо, государство коть аръёсын коньдонтэк возиз ке но, музъем вылын улӥсьёс асьсэдыз асьсэос сюдозы, быронлы уз сётске. Валамон, сыӵе улонлы синмаськонэз ӧвӧл ни, уго, кӧттыр сяна, адямилы дӥськут но, тӥрлык но кулэ на. Ма, собере лулэз но шутэтскытэм потэ ук... Вавож ёросысь Мичурин нимо колхозэз (туала сямен вераса - эштосэз) мукетъёсыныз ӵошатыны шуг. Та хозяйство шӧдскымон юнгес. Социализм вакытъёсы но, капитализм алям дыре но со экономикаын интызэ мукетъёсызлы уг сёты - вылӥын возиське. Отын оло кузёзылэн Валентин Калининлэн "янгышез", оло маке но мукет. Малпан кылдэ, зямбай калык ик кыӵе ке аспӧртэм шуыса. Ужась. Азьланезлы оскись. Кужмо. Кинэн гинэ татын уд вераськиськы, кылӥськод: "Я-я, малы кулэ бӧрдыны, ваньмыз радъяськоз, улом ай, улом..." Сыӵе мылкыд ог-огзылы но пыӵато, лыктэмъёслы но кузьмало. Сое ми шӧдӥм, эштосэ алигес вуылыкумы но. Гуртоос пӧлысь одӥгез - Вера Борисова. Кунян сюдӥсь. Зямбай кен. Ачиз та районысь ик Малиновкаын будэмын. (Калыкын та гуртлэн данэз Куӟебай Гердлэн нимыныз герӟаськемын). Картэз, Володя, огшоры воргорон. Сварщик. Семьяын куинь нылпи будэ. Кузпалъёс али асьсэлы выль корка лэсьто. Туж умой ук со. Азьланезлы ӧй оскысалзы ке, Борисовъёс йӧн-йӧн юрт ӝутон борды басьтӥськысалзы шат?.. Художникмы ӝыны час пала выриз Вералэсь тусбуйзэ суреданы. Ой, кӧня пол ӵыжектылӥз егит кышномурт та дыр ӵоже: "Малы, малы тӥ одно ик мон борды тэбиниды? Тӥни ук милям фермаямы кӧня чебер нылъёс?" Нош суредасьлы сое бырйыны адямиосты шӧдонэз юрттэм: маиз ке но, пе, солэн бордаз кыскисез вань. Бӧрысь ини тодӥм, нылмуртлэн ӵапак вордӥськем нуналаз тупаськеммы шуыса. Ма бен, Вери, кызьы шуо, бадӟым буд! Ачид но, палыд но, нылпиосыд но та огыр- бугыр вакытэ ӟечезлы осконзэс медам ыштэ. Улом ук ай, улом... И. ЛЕБЕДЕВ. * Кунян сюдӥсь Вера БОРИСОВА. Суредаз Леонид ПРОЗОРОВ. Шунды Ужась калык синмысь уз усь Шарканысь егитъёсын ужанъя отделэн кӧня ке аръёс ӵоже кивалтӥз Маргарита Кожевникова, али солэсь ужзэ азинтэ Владимир Макаров. Отделэз возён понна ёрос администрация коньдон сярысь сюлмаськиз, выль арысен та удыслы эшшо но тросгес саклык висъяны малпало. Шарканысь егитъёслэн улонзы сярысь вераськиськом Владимир МАКАРОВЕН. - Кыӵе сюлмаськонъёсын уло та вакытэ Шарканысь егитъёс? - Малпанъёсмы, сюлмаськонъёсмы трос, ужтэк ум пукиське. Ю-нянез октон вакытлы гурт хозяйствоя управлениен ӵош егит трактористъёс, комбайнёръёс, шофёръёс куспын ялӥмы "Аран-98" конкурс. Йылпумъянъёс лэсьтыны малпаськом ноябре, гурт хозяйствоын ужасьёслэн нуналзылы тупатыса. Та кутсконмес отӥяз но азьланьтом, тулыс гырон-кизён кутскыса. Ужась адями син шорысьтымы медаз ышы, ужаны мылкыдзэс но ӝутыны кулэ. Комсомол дыръя ӵошатсконъёс вал, малпасько, сое выльысь улӟытоно Ужтэк кылемъёслэн центренызы ӵош туэ кык конкурс ортчытӥм ни ужтэк кылем егитъёс пӧлын - столяръёсын но плотникъёсын. Вормисе потэмъёслы кузьым - уже кутон. Малпан вань ужтэк кылем егитъёс пӧлын мукет удысъёсъя но конкурс ортчытыны. Райцентрысь егитъёс пӧлын сентябре футболэн ӵошатсконъёс радъямын вал. Бусы ужъёс мынэмен, гуртысь егитъёс палэнэ кылизы та шудонъёслэсь. Школаын дышетскись пиналъёс пӧлын но уж нуиськом. Тани выль дышетскон арлы чакламы йырвизез сынась шудон - "Брейнринг" - ортчытыны. Школаос пумит ӧвӧл отчы пыриськыны. Котькудаз кылдытэмын луозы йырвизез сынась клубъёс. Школаосы потаса, пиналъёс ог-огенызы пумиськылозы. Нырысетӥ шудонэз ортчытыны малпаськом ини октябре. Районамы кылдытэмын воинъёслэн-интернационалистъёслэн клубзы. Но берло дыре солэн ужъёсыз чалмизы. Малпаськом ваньзэс выльысь огазеяны - районын соос тямыстонлэсь ятыр. Афганистанын но Чечняын ожмаськемъёс кылдытозы ужась кенеш, нимаз счёт усьтомы. - Гуртысь сельсоветъёсын вань-а отделлэн юрттӥсьёсыз? - Бен, милям вань активмы, но соос ужало ас мылкыд каремзыя гинэ - уждунтэк. Выль администрациен одӥг кылэ вуимы, шуыны луоз. Нырысь-валысь егитъёсын ужась специалистъёслы ужан инты висъяно бадӟым сельсоветъёсын. Вуоно арлы бюджетэ пыртоно соослы уждун тыронэз. - Гужем каникулъёсы пиналъёсты уже интыян кызьы радъямын вал районын? - Коньдонэн юрттыны быгатымтэенымы, таяз гужем пиналъёсты уже интыянэн ми ӧм выре. Ваньзэ сое ас вылаз басьтӥз уже интыянъя центр. Воткинскын кылдытэмын на егитъёсты уже интыянъя биржа, со но милям районэнымы ужаз. Егитъёсын ужанъя кун комитетэ пиналъёсты гужем уже интыянъя кык программа дасямы вал. Одӥгез конкурс пыр ортчиз. Со Кыква школаысь пиналъёслэн ужзэс радъямзы. Школалэн вань аслаз музъемез, тракторез, машинаез. Пудо-живот но вордо, бакча сиён но будэто, мушъёссы но вань. Асьсэлэн парикмахерскойзы но ужа. Школаез пиналъёс асьсэос тупатъяло-выльдо. Нырысетӥ арзэ гинэ тазьы адӟем карымон уг ужало ни кыкваос. - Мукет учреждениосын но организациосын ог-огдэс валаса ужаськоды-а? - Бадӟым ужрадъёсты котьку ик кенешыса ортчытъяськом. Но куд-ог учыръёсы валамтэос но кылдо. Соин ик вуоно арлы чаклам планъёсмес мукет учреждениосын но организациосын ужасьёсын ӵош администрацилэн кивалтӥсез дорын эскером. Л. МАЛЫХ. Шунды Конкурс Утчаськом выль ним Гожто тӥледлы УдГУ-ын дышетскисьёс. Милям кӧня ке дэмланъёсмы вань "Шунды" сэреге. Ми малпамъя, отчы кӧня ке воштонъёс пыртоно. Нимызъя малпан кылдэ, та бам удмурт егитъёслэн "Шунды" огазеяськонзы сярысь гинэ гожъя шуыса. Нош кие кутӥськод ке, отын пӧртэм ужъёс вань. Соин ик та сэреглэн нимыз уг тупа пуштросэзъя. Умой луысал, нимыз егитъёслэн огъя ужпумъёссылы, сюлмаськонъёссылы тупасал ке. Со сяна, кулэ вылэм выль рубрикаос, соос егитъёслэсь улонзэс котыр ласянь мед возьматозы. Н. ПАВЛОВ, С. СЕРГЕЕВ. Редакцилэсь: "Шунды" бамлэсь нимзэ воштон пумысен вазиськем потэ асьтэлы ик, пиналъёс. Малпаське, кызьыгес нимамды потэ сое, гожтэ редакцие. Огъя кужымен быръёмы пиналъёслы но егитъёслы сӥзем бамлы ним. Усто но тупамон ним шедьтӥсез возьма синпель кузьым. Со сяна, гожтэ, кыӵеен адӟиськоды та бамлэсь пуштроссэ. Конкурслы йылпумъянъёс лэсьтом арлэн пумаз. Чылкыт улыны юрттозы Таяз арняе Ижевске кыкетӥзэ ини лыктозы Австриысь "ОСКО" фирмаын ужасьёс. Та фирма промышленностьын но адямилэн улоназ кылем-мылем арбериосты, жуг-жагез быдтонэн выре. Та ужпум Ижевск понна туж лэчыт. Нырысетӥзэ ветлыкузы, кунсьӧр куноос городлэн предприятиосаз жаг сутонъя станциос лэсьтыны дэмлазы вал. Али соос таӵе станция пуктыны луонлыкъёсты "Буммаш" заводъя эскерозы. О. ВЛАДИМИРОВА. Бусы ужъёс (21 сентябрьлы) Районъёс Ю тысь Гектарысь Кын улэ Картофка Гектарысь кутсамын басьтэмын гыремын октэмын басьтэмын (процентэн) (центнер) (гектар) (гектар) (центнер) 1.Можга 94,1 11,3 82,0 92,2 99,3 2.Алнаш 92,7 11,6 93,1 90,4 87,5 3.Глазов 90,9 9,0 45,0 81,5 73,4 4.Дэбес 90,5 10,0 56,8 76,9 96,8 5.Шаркан 90,1 9,9 75,6 97,2 119,9 6.Яр 89,3 7,7 37,2 97,0 129,8 7.Селта 88,8 9,8 51,7 88,6 123,1 8.Балезино 87,8 10,9 39,8 88,4 118,8 9.Юкаменск 87,8 9,3 41,7 100,0 108,7 10.Каракулино 86,3 9,8 49,4 42,9 100,0 11.Кез 85,4 8,6 51,5 95,2 99,5 12.Игра 85,0 9,8 85,9 89,6 171,5 13.Воткинск 83,5 9,1 75,8 89,4 81,9 14.Красногорск 83,4 9,6 63,7 81,6 88,0 15.Сарапул 80,1 9,4 44,1 35,7 64,9 16.Завьялово 79,9 9,9 56,1 83,8 109,4 17.Грахово 77,3 7,0 34,9 18.Пичи Пурга 74,9 8,8 53,5 88,2 89,9 19.Киясово 74,8 8,1 44,7 88,4 51,6 20.Ува 74,1 12,6 35,2 72,5 91,8 21.Вавож 71,2 12,1 70,6 90,8 137,0 22.Як.-Бодья 68,6 11,5 50,0 81,7 94,7 23.Сюмси 68,6 7,7 41,1 48,7 112,5 24.Кизнер 64,3 8,0 45,8 63,7 106,8 25.Камбарка 52,2 7,3 61,3 Республикая 83,6 9,8 55,3 83,8 103,3 (1997 арын) 87,8 17,6 45,6 62,9 103,7 Куазь нянь будэтӥсез огласянь туэ обидиз, мукет ласянь жаляз. Аран-кутсан вакытэ сётӥз шундыё шулдыр нуналъёссэ, куинь арня пала зорытэк чидаз. Та вакытэз быгатыса кутӥзы данакез районъёс. Кеносъёсазы жильк-жильк кӧс тысь кисьтӥзы можгаос, алнашъёс. Соослэсь трослы ик ӧз кыле уй палъёс но: Глазов, Дэбес, Яр ёросъёсысь хозяйствоос. Туэ понна тужгес но ӟеч урожай басьтӥзы уваос - гектарлы быдэ - 12,6 центнер. Соосын артэ ик мыно бускельёссы - вавожъёс (12,1 ц). Тысё культураослэн удалтонлыксы вуиз 9,8 центнерозь, кылем арен ӵошатыса, 7,8 центнерлы ӧжыт. Озьыен, пудо куайытон туэ секытгес йӧтоз. Шумпоттэ картофкалэн будэмез-удалтэмез. Миым арын сярысь урод ӧвӧл. Тужгес но узыр "кыкетӥ нянен" Игра районысь хозяйствоос. Котькуд гектарысь татын 171,3 центнер лыктэ. Ӟеч урожай будэтӥзы вавожъёс, яръёс, селтаос. Огъя вераса, гужемез мултэс пӧсь, кӧс ке но сылӥз, берло усем зоръёс картофкалы будыны тырмыт кужым сётӥзы на. Нимысьтыз вераны кулэ етӥн сярысь. Уй пал буртчинэз туэ кизизы республикамылэн 16 районаз. Тужгес но трос киземын - 709 гектар - Балезиноын. 500-лэсь ятыр Можга, Ува, Игра, Кез палъёсын. Кӧс куазен сое утялтыны - сэстыны вуизы Юкаменск, Красногорск, Игра, Як-Бодья, Селта палъёс... Беромо та ужен алнашъёс, глазъёс, сюмсиос, можгаос. Шаермыя утялтэмын 83 процентэз. Кутскем зоръёс, валамон ини, ӝегатозы бусы ужъёсты. Кытын но отын кылемын на арамтэ ю-нянь, октымтэ картофка, бакча сиёнъёс. Музъем ужась сое му вылаз уз сисьты, одно ик утялтоз, куазьлэсь котькуд минутсэ-чассэ пайдаё кутыны сюлмаськоз. Л. МЕДВЕДЕВА. Жаляно-а лушкаськисез? Егитъёсын ужанъя кун комитетлэн радъямезъя, 17 сентябре "Котырес ӝӧк" сьӧры люкаськылӥзы Германиысь Оберхаузен городысь но Ижевскысь быдэ вуымтэосын но егитъёсын ужась специалистъёс. Германиысь полицейской Клаус Ван Деллен но судын ужась Арно Зур веразы асьсэлэн ужамзы сярысь, асьме дорысь югдурен тунсыкъяськизы. Удмуртиысь та удысын ужась эшъёссэс кылзыса, Можгаысь нылпи колоние, Ижысь "Подросток" клубе вуылыса, соос паймемзэс веразы: - Тӥ йыртэмась нылпиостэс укыр юн кыл кутытӥськоды. Милям со ласянь эркынгес. Пытсэт сьӧрын пуко секыт йыруж лэсьтэмъёс гинэ: адями быдтӥсьёс, эриктэмасьёс. Нош лушкаськисьёслы тыриськон сёто, алон уж нуо. Нырысьсэ лушкаськисьёсты кыл уг кутыто. Нош бӧрсьысь бӧрсе кӧня ке пол шедьылэ ке, шутэтскон нуналъёслы пытсэт сьӧры пукто, ужато. Вань ар куспын 65 пол лушкаськыса шедемъёс но - сыӵеоссэ ини кемалыгес ворсало. Куноос паймизы (ӧз но оске кадь), Ижын 44 гинэ наркоман шуыса (наркодиспансерын эмъяськисьёсыз). Тросэз соос пӧлысь кыско сьӧрлось ваем марихуана. Германиын та ласянь югдур секытгес. Туж тросэз школаын дышетскыкузы ик "турын" кыско, "бышкисько". Берло аръёсы нош пиналъёс школае но газэн ыбылӥсь пыӵал тӥрлыкен ветлыны кутскизы. Ижын но одӥг сыӵе учыр вылэм ини. Асьмелэн быдэ вуымтэос пӧлын йыртэманъёсты алон понна, милиция бордын нимысьтыз инспекциос ужало ке, Германиын соин выро социальной ужасьёс. Полиция быдэ вуымтэосын пумиське йыртэмамзы бере гинэ. Удмуртиысь шуг семьяосын ужась специалистъёс лыктэм куноослэсь юазы Германиысь семьяосын югдур сярысь. Отын юись, нылпиоссэс кулэтэм карись семьяоссы туж ӧжыт, пе. Сыӵе семьяысь пинал ачиз нылпи юртэ мыныны быгатэ. Яке огдырлы - семьяяз югдур тупатскытозь, яке пыраклы. Ёрмисьёсызлы государство коньдонэн юрттэ. Нош анай-атай правоез талан, нылпизылэсь суд пыр кужмысь люкон сярысь Германиын закон ик ӧвӧл. Немец полицейскойёс трос тунсыкозэ но пайдаёзэ басьтӥзы Удмуртие вуылыса. Соослы кельшиз янгышаны шедем котькуд быдэ вуымтэен нимысьтыз ужаммы. Нош удмурт инспекторъёс вожъяськизы немец семьяослэн нылпиосынызы тупаса улэмзылы но полицейскойёссылэн бадӟым уждунзылы. З. РЯБИНИНА. Ньыль кышно но укмысетӥ сьӧлык Пичи дыръяз Исмагил яратылӥз нымы-кибыосын шудыны, турын-куар бичаны. Школалын дышетскыкуз, биологияя олимпиадаосын вормисе потылӥз. Дас кык арес дыръяз атаез тодматӥз сое араб алфавитэн. Со дырысен пияш ӵемгес кожаны кутскиз Габдула бускельзы доры. Габдула переплётчик луыса ужам, соин ик ваньмон дыръяз мыло-кыдо выльдылӥз араб книгаосты. Пияшлы тунсыко потӥз Шунды ӝужан палан улӥсьёслэн йылолъёссы. Школазэ йылпумъяса, востоковедениез дышетыны малпаськылӥз. Юалляськыса Москвае, Ташкентэ, Казане гожъяз. Но Москваын прописка кулэ вал, нош Казаньын соку араб кылэз ӧз дышетэ на. Ислмаез кутэм дырысен 1100 ар тырмонлы сӥзем нуналъёсты пусйыку, Исмагил анаеныз Казане ветлӥзы. Пыразы мечетьёсы. Иже бертыса, муллалэн Фаиз пиез доры куное ветлӥзы. Фаиз одӥг ар Египетын, одӥг ар Саудовской Аравиын араб кылэз дышетэм. Кӧня ке вераськемзы бере, Фаиз куноезлэсь юаз: - Намазэз лыдӟиськод-а? Намаз - мусульманъёслэн молитваоссы. Соосты нуналаз одно ик вить пол лыдӟыны кулэ. Огпол ке но кельтӥд ке, бадӟым сьӧлык луоз. Со дырысен Исмагил намазэз лыдӟыны кутскиз. Али со Саудовской Аравиысь Медина городысь ислам университетын шариатъя факультетын дышетске. Сьӧрлон улон ческыт уд шуы, но ёрмыса уг улы. 230 доллар стипендия сёто, алигес сое шыръяса, анаезлы холодильник но басьтыны быгатӥз. Медина - тунсыко город. Отын 7-тӥ даурысен исламез пыӵатыны кутскизы. Калык сӥё- дано каре Мохамед пророклэсь мечетьсэ но шайгузэ. Городын 300 сюрс мында улӥсез. Сьӧд ужез быдэсъяло кунгож сьӧрысь лыктэмъёс. Нылкышнооссы уг ужало. Исламъя ньыль кышно возьыны луэ, но кышнояськон понна бадӟым калым кулэ. Калгон- эрказъяськон исламъя 9-тӥ сьӧлыкен лыдъяське. Бызем-кышнояськем муртъёслэсь калгемзэс шӧдо ке (ньыль мурт адӟись луыны кулэ), виытозязы изэн лэзьяло, кузпалъяськымтэоссэ, сюлоен тышкаса, сьӧрло келяло. Мон ӧй возьдаськы Исмагиллэсь нылкышноосын матысь кусыпъёсыз сярысь юаны. Но 28 аресъем пиосмуртлэн та дырозь нылъёсты ӟыгыръямез гинэ но вылымтэ ай. Вина уг юы, тамак уг кыскы. Возьмалэ, нылъёс, Исмагил ӝоген Иже берытскоз. Со малпаське чебер, узыр сюан лэсьтон сярысь. Вуоно кузпалэзлы чеберъяськон угыос-весьёс но басьтэм ни. Анаез малпаське лякыт сямо, пиезлэсь кылзӥськись кен сярысь. Нялтас вераса, Исмагил чутрак пумит ӧвӧл мукет инмарлы оскись нылмуртэз но кышно вайыны, но со одно исламез кутыны кулэ. Серафима ПУШИНА-БЛАГИНИНА. Книга бамъёсын - быдэс улонэз Кылем арын Волгоградысь писательёслэн огазеяськонзы "Сталинград" премиез сётӥз Михаил Калашниковлы "От чужого порога до Спасских ворот" книгаез понна (сое печатлаз Москваысь "Военный парад" издательство). Собере та книгалэсь авторзэ Россиысь Писательёслэн огазеяськоназы дэмлан вылысь Удмуртие гожтэт вуиз. Рекомендациос гожтӥмы ми: Олег Четкарев, Владимир Емельянов но мон. Тӥни озьы туэ 29 толшоре Москваын Михаил Тимофеевичлы сӥё-дано сётӥзы горд выло билет - со луиз Россиысь Писательёслэн союззылэн членэз. Асьме писательёслэн огазеяськоназы Михаил Калашников мурт адями ӧй вал (со сярысь верало 1986, 1989 аръёсы туспуктэмъёс, выступлениосыз). Сюлмыныз со весь кыстӥськылӥз гожъясьёс пала, пинал дырысеныз кылбуръёс но пӧраз. 1992 арын Москваысь Военной издательствоын потӥз нырысетӥ книгаез - "Записки конструктора- оружейника". Таиз книгаез - "От чужого порога до Спасских ворот" - 500 бам котыре вуэ, туспуктэмъёсын, со тодэ ваёнъёс, мемуар выллем луэ, 20-тӥ аръёсысен кутскыса туннэ нуналозь вера адямилэн туж узыр но шуг-секыто улон сюресэз сярысь. Но со ас сярысьтыз мадён гинэ ӧвӧл, со асьме даурлэн историез, шуыны луоз (М. Калашниковлы ӝоген 78 арес тырмоз). Син азьын - романлэн тодметъёсыз. Книгае пыремын трос официальной документъёс, гожтэтъёс, ӟечкыланъёс, дневникысь чуръёс. Ваньмыз со капчиен лыдӟиське - шӧдӥське авторлэн яркыт, син азе пуксьымон мадьыны быгатэмез. Кытӥяз со серем пыр но мылкыдзэ усьтэ - чик уг тыршы ассэ кыӵе ке быдӟым адями, гений выллем пуктыны. Книга соин но тунсыко: М. Калашников палэнтэ азьвыл аръёсы пыӵал тӥрлык поттон вылэ возъям ынэз - со пачкаса улон дыръёс сярысь шара, ватытэк вера. Бен, куке но Калашниковез тросгес тодо вал кунгож сьӧрын. Америкаын со сярысь бадӟым книга- монография поттэмын, Франциын - книга, альбом (нош асьмелэн та дырозь ӧвӧл на). Генеральной конструктор кӧня ке пол вал США-ын, вуылӥз Германие, Японие, Китае, Саудовской Аравие... Та пумиськонъёс сярысь но шедьтоды книгаысь. Михаил Тимофеевичлэсь гожъямъёссэ поттыны ярамон тупатъяз Гарий Леонидович Немченко, тодмо журналист, писатель, МГУ бере со ужаз Алтайын. Берло тодмо луиз: Калашниковлэн но Немченколэн выжыоссы одӥг гуртысь - Отрадное станицаысь (Калашниковлэн анай-атаез - Кубаньысь казакъёс). Та адямиосты мон тодматӥ, шуыны быгатӥсько. 1996 арын Москваын дыръям Немченко юаз: "Кыӵе отын улэ ни Михаил Тимофеевич?" Мон верай: озьы но озьы, одӥг коркан улӥськом. Гарий Леонидович туж паймиз. Нош Калашников ӵапак утча вал, кин ужаны быгатоз книгаез бордын. Мон соку Немченко борды "дэмӟи", сётӥ конструкторлэсь адрессэ, телефонзэ. Соос ваче кусып тупатӥзы. Немченко татчы, Ижевске, но вуылӥз, архив материалъёсты басьтӥз. Верамезъя, Михаил Тимофеевичлэсь кибервылзэ тупатъяны со сокем ӧз шугъяськы - автор уго ачиз но вольыт гожъяське. Мон ачим конструкторен тодматски 1971 арын ноябре: одӥг коркан улыны тупамы. Солэн вал кышноез, нылъёсыз, пиез. Трос ӧм вераськылэ, со ас понназгес возиськылӥз. Ортчизы аръёс - Калашниковлэн данэз губи кадь будӥз: со луиз Социалистической Ужысь кык пол Герой, технической наукаосъя доктор, учёной-конструктор... Куке нимзэ шара вераны кутскизы, ачиз но усьтӥськиз кадь, ми матэгес луим. Мон валай: та адями ӟечлы ӟечен вазиськись, куноятыны яратӥсь. Но пеймыт гожъёс шормазы солэсь улонзэ: бырыны шедиз пичиез нылыз, Наташа, кулӥз кузпалыз, Екатерина. Мукет пиналъёсыз быдэ вуыса кошкизы дорысьтыз. Михаил Тимофеевич огназ кылиз... Ӵем пумитасько сое. Вошъясько машинаосызлэн маркаоссы, сое пумитась-келясь адямиос. Нош со весь сыӵе ик - лапеггес мугоро, чырткем но капчи вамышъясь. Йырсияз гинэ тросгес ни азвесь нюжаосыз... Котыраз гуж ваземез уг но шӧды кадь. Ветлӥзы со доры "Огонёкысь", вуыло мукет интыосысь. Басья пумтэм гожтэтъёс, ӧтё отчы, татчы... Со ӵем куно луэ воинской частьёсын. Матысь тодмо вал Д. Устиновен. 50 ар кивалтэ ни "Ижмашысь" конструкторской бюроен. 75 ар тырмонзэ пусйыку вуылӥз Б. Ельцин, бырттӥз Отечествомес утисьлэсь вылӥ ордензэ. Машиностроительной заводлы 190 ар но АК-47-лы 50 ар тырмыку, М. Калашников пумиськылӥз В. Черномырдинэн. Та юбилейлы ик потӥз солэн вылӥ верам книгаез. Огшоры калык пӧлысь потӥз быдӟым адями. 1943 арын госпитальын со кутскиз аслэсьтыз автоматсэ кылдытон борды... Табере солэн пумтэм дано нимъёсыз. Россия Федерациысь Калык куспо инженер академилэн почётной членэз. Та академилэн Удмуртиысь филиалэз кылдытӥз Калашниковлэсь медальзэ. Солэсь нимзэ (Калаш) нылпиоссылы сётыло Зимбабве кадь странаосын... Алтайын, вордскем дораз, Социалистической Ужысь кык пол Геройлэн бюстэз но вань. Технической наукаосъя доктор, профессор, Генеральной конструктор сэзь учке азьпала. Ваньмон дыръяз Михаил Тимофеевич дыртэ дачаяз, бакчазэ утялтэ. Сылалтэм кубистаез солэн туж ческыт луэ. Пыӵалэныз куддыр мынэ со нюлэскы... Зоя БОГОМОЛОВА, филология наукаосъя кандидат. * Михаил КАЛАШНИКОВ гожъяськон ӝӧк сьӧраз. * 1986 арын Удмуртиын Советской литературалэн нуналъёсыз дыръя. Михаил КАЛАШНИКОВ кылбурчиосын Николай СТАРШИНОВЕН, Раиса АХМАТОВАЕН но Андрей ДЕМЕНТЬЕВЕН. Шунды Комсомоллы - 80 Улонзэс жалятэк дуризы Вормонэз Жаляса верано луэ, Советской Союзэз куашкатэмзы бере быризы вань умой сямъёс но, калыкез огазеясь ёзъёс но. Ӧйтӧд, малы ӧз яра демократъёслы комсомольской организациослэн ужзы. Нош кӧня лэсьтӥзы егитъёс, Родинамес утён понна! Быдӟым Отечественной война дыръя улонзэс жалятэк тушмонэн ожмаськизы. Колхоз бусыосын но заводъёсын батыр подвигъёс лэсьтӥзы, мӧйыосын ӵош Быдӟым Вормонэз дуризы. Трос кырӟанъёс, книгаос гожтэмын егитъёслэн бугырес вакытэ подвигъёс лэсьтэмзы сярысь. Нош соос весь кылдо но кылдозы на. Зэмос подвиг лэсьтӥз Сарапулысь пияш Вадим Сивков. Со танкеныз фашистъёсын котыртэм Явкино гуртэ пыриз но эшеныз Петр Крестьяниновен ӵош трос тушмонъёсты быдтыны быгатӥз. Но пеймытэн, танк немецъёслэн дасям гуазы шедиз. Танкистъёсыз котыртӥзы. Оломар вискын Сивков люкез усьтӥз но, комсомолецъёс пленэ уг сётско шуыса кеськиз. Фашистъёс вылэ граната зӥртӥз на. Нош эшсэ пегӟыны косӥз. Петя кыдёке кошкыса ӧз вуы - гитлеровецъёс вуизы. Танкысен Вадим анаезлы Мария Ефимовналы берпуметӥ ивор гожтӥз: "Ми танке радистэн кык кузя кылимы. Немецъёс кык-куинь пол танк доры вуылӥзы ини но усьтыны ӧз быгатэ. Ми шуим: "Пленэ сётскытозь - кулом." Оло, берпум минутъёсме улӥсько... Эн сюлмаське мон понна. Весяклы ӟеч луэ. 14 март, 1944 ар, 06 час". Тушмонъёс азьын Вадим кышкасьтэм луэмзэ возьматӥз. Пленэ ӧз сётскы. Танкеныз ӵош ассэ но пуштытӥз. СССР-ысь Вылӥ Кенешлэн Президиумезлэн 1944 арын 3 июне поттэм Указэзъя, младшой лейтенантлы Вадим Сивковлы но рядовойлы Петр Крестьяниновлы бырем беразы Советской Союзлэн Героез ним сётэмын. Украинаысь Явкино гуртысь школаын дышетскисьёс 1986 арын декабре асьме доры ветлӥзы. Соку Сарапулысь 14 номеро школалэн (али 18 номеро) азбараз сӥё-дано усьтӥзы танкистлы-геройлы В. Сивковлы памятник. Куноос Вадимлэн бырем интыысьтыз сюй ваиллям. Та памятникез лэсьтыны, куштӥськем корт, ӟустари бичаса, ку комбинатлэн цехъёсаз ужаса, Сарапулысь дышетскисьёс коньдон люказы. Ож аръёсы, быдэс странаямы сямен ик, Удмуртиын но паськыт вӧлмизы комсомолецъёслэн-егитъёслэн эштосъёссы. Соос улӥзы "Ож мышкын но мынэ жугиськон" ӧтён улсын. Та эштосъёс егитъёслы ӟеч сямъёс пыӵатонъя зэмос школаослы пӧрмизы. Нылъёс но пиос мылысь-кыдысь ужазы, ожмаськонэ кошкем агайёссэс но атайёссэс воштӥзы. Соос котьку азьпал радын ветлӥзы. 1942 арын кылдэм эштосъёс пӧлын кутскиз "фронтовой" ним басьтон понна ӵошатскон. Нырысьёсыз пӧлын ӵошатсконэ пыриськизы Ижевскысь машиностроительной заводын ужасьёс. Собере та нюръяськон выжиз мукет предприятиосы. Та нимез басьтыны капчи ӧй вал. Со понна быдэсъяно луылӥз планъёсты. Продукциез вылӥ ӟечлыкен келяллязы, нош дисциплинаез тӥян учыръёс ӧй ик вал. Ижевскысь машиностроительной заводын 17 аресысен ужаны кутскиз Зоя Веприкова. 1942-тӥ арын со 40-тӥ цехын егит комсомолецъёслэсь бригада кылдытӥз. Соос карабинъёс бичазы. Котькуд ужась кык-куинь пӧртэм ужез быдэсъяз. Усто ужамез понна, Зоялы сётӥзы УАССР-ысь Вылӥ Кенешлэсь Данъян грамотазэ. Та заводысь ик бригадир А. Исаева 1944 арлэн кутсконаз республикаысьтымы егитъёслы вазиськиз, нокыӵе шекъёстэк но вылӥ ӟечлыкен ужаны ӧтьыса. Солэсь кичӧлтонзэ котькытын умоен лыдъязы. Ӵошатсконэ 900-лэсь уно бригадаос кыстӥськизы. Ужын басьтэм азинсконъёссы понна Ижевскысь кык но ӝыны сюрслэсь уноез адямиос пусъемын орденъёсын но медальёсын. Соос пӧлын трос егитъёс. Ожысь но ужысь ветеранъёс ас вылазы адӟизы, кыӵе бадӟым шуг-секытъёсын нюръяськоно луиз, гитлеровецъёсты ас гуазы быдтон понна. В. ЧЕРНОВ. Водка пусъемын медален Алигес Санкт-Петербургын ортчиз винаосты но водкаез возьматонъя калык куспо ярмарка. Отын ваньзэс паймытӥз Глазовысь заводын поттэм "Шедевр Страдивари" водка. Со пусъемын азвесь медален. Выль пумо водка али магазинъёсын ӧвӧл на. 900 граммъем бутылка лэсьтэмын скрипка кадь. Посуда кисьтэмын Чехиын. Нош юон пӧлы ватсаське мелисса но апельсин сок. Таӵе ярмаркае Глазовысь вина поттӥсьёс куинетӥзэ пырисько ни. Ваньмысьтыз ик бертылӥзы медальёсын. Нош "Италмас" водказы пусъемын зарни медален. Н. СЕРГЕЕВ. Яратэ, уг яраты Возьмано яке аслыд утчано? Яратонэ монэ весь эскере кадь. Лоба, лоба вадьсытӥм, ялан исаса. Кутыны уг вормиськы. Нырысьсэ синмаськи пияшлы ньылетӥ классын дышетскыкум. Сергей котырысьтым ваньзэ возъялляз. Самой чебер, самой визьмо потэ вал со. Нош со монэ ӧз но адӟылы, шорам но ӧз учкылы. Валалляй, ваньмыз со юнме. Ӝуась сюлэмме кысыны вырисько. Яратонэз яратонэн ик эмъяло, шуо. Пумитай Андреез... Сотэк улон но мусо уг поты ни. Артэ пукыса, лулы но буйга кадь. Мырдэм нуналзэ чидалляй. Ӝыт вуэ ке, лобыса сямен гуртэ бертӥсько вал. Жадем но уг пыӵа, куать километр ортчыса. Кин ке думыса ке возьысал, думетсэ йырйыса, яратонэ доры пегӟысал. Андрей но лыктэмелы шумпотылӥз. Валай: зэмос яратон шедьтӥ. Одӥг пол уёзь возьмай Андреез, нош со ӧз лыкты. Ӵуказеяз кошки, арня ортчыса гинэ гуртэ бертӥ. Эше сипыртэ пелям, Андреед, пе, Галя эшеныд ветлэ. Уг валаськы, маин со умойгес мынэсьтым? Андрей монэ яратӥсько шуэ вал ук. Кызьы озьы? Туннэ огзэ яратӥд, ӵуказе - мукетсэ. Уг валаськы. Андрей но валэктыны ӧз быгаты. Ӝоген со городэ кошкиз. Гожтэтсэ витьылӥ. Оло, гожтэт пыр валэктоз, мар луиз? Таиз но яратонэ чабкыса кошкиз. Тани кемалась ик ӧвӧл тодматски мукет пияшен, Юраен. Яратон тылгизьы нош ик ӝуатскиз сюлэмам. Нош мар каром, солэн яратоно нылыз вань? Ялан малпаськисько, малы мыным уг удалты та улонын. Оло зэмос яратонэ ӧз вуы на, оло сое аслыд утчано? Оло, нош витьыса пуконо? Кин сётоз мыным валэктон? Т. НАГОВИЦЫНА. Балезино ёрос, Люк черкогурт. Вакытсы вуоз Удмурт писательлэн Петр Блиновлэн пинал дырыз ортчиз Селта ёросысь Сюрзи гуртын. Юртъерез но, гуртэз но кемалась ӧвӧл ни, нош мерттэм палэзьпуэз котькуд сӥзьыл ӵыж- горд пиштэ. Палэзьпуэз сяна, писательлэн татын улэмез сярысь номыр уг вера вал ни. Тае тупатон вылысь, кык ар талэсь азьвыл Гопгуртын (Сюрзилэсь кык иськем кемын) Петр Блиновлы памятник усьтӥзы. Празднике солэн ӵыжы-выжыосыз, тодмоосыз люкаськизы, туспуктэмъёссэ, гожтэтъёссэ ваизы. Али соос утисько ёросысь архивын, витё, оло, Петр Блиновлы сӥзем музей усьтӥськоз-а, солэн улэменыз, творчествоеныз тунсыкъяськисьёс уже кутозы-а шуыса. Ӝоген Петр Блиновлы 85 ар тырмоз... Е. ДОРОФЕЕВА. "Удмурт кенеш": вамыш бӧрсьы вамыш Валлян Ижын люкаськылӥзы "Удмурт кенеш" огазеяськонлэн быдэсъясь кенешаз быръем эшъёс. Пумиськонэ озьы ик ӧтемын вал ёрос ёзъёслэн кивалтӥсьёссы. Вераськон мынӥз "Удмурт кенешлэн" туэ ар пумозь ужан планэз сярысь. Соя чакламын 13 ноябре Пичи кенешез люканы, нош декабре удмурт интеллигенцилэн калыкмес азинтон бордын ужамезлы сӥзем научно-практической конференция ортчытыны. Матысь дырлы ужрадъёсты верано ке, пусйыны луоз зонаосъя семинаръёсты. Завьяловоын, Можгаын но Глазовын "Удмурт кенеш" котыре огазеяськемъёс эскерозы берло вакытэ лэсьтэм вамышъёссэс, пусъёзы вуоноезлы ужпумъёс. Исполкомлэн заседанияз решение кутэмын нимысьтыз газет кылдытон сярысь. О. МАРКОВ. Вазиськон Россия Федерациысь Правительстволэн Тӧроезлы Е. М. Примаковлы Гажано Евгений Максимович! Вазиськиськомы Тӥледлы Удмурт Республикаысь кивалтӥсьёсын пумиськонэ лыктэмъёслэн косэмзыя. Пумиськон ортчиз Ижевскын 1998-тӥ арын 21-тӥ сентябре. Отчы люкаськылӥзы предприятиослэн кивалтӥсьёссы, администрациослэн йыръёссы - ваньмыз ог 500 адями. Россилэн коньдон удысэз, экономикаез но политикаез секыт югдуре кемалы шедемын. Югдурлэсь куашкатӥсь кужымзэ нырысь ик улосъёс шӧдӥзы, малы ке шуоно, соослэн экономикаязы бадӟым инты басьто обороналы ужась предприятиос - вань бюджетъёсты тырмытӥсьёс. Обществоез экономика ласянь кышкытлыклэсь утёнлэн коньдон инъетэз куашказ, таин валче властьлэн ёзъёслы калык оскемысь дугдӥз. Калык кураськон калэ вуэмын. Удмурт Республикаысь куд-ог предприятиосын уждун ар ӵоже сётымтэ ни, пенсиосты тырон кык но ӝыны толэзьлы бере кыле, ужтэк кылемъёслы пособиез тырон - 18 толэзьлы. Дунъёслэн трослы будэмзы но куанермон калыклэсь чиданзэ чигтӥзы. Югдурез уродмытэ банкъёслэн ужаны быгатымтэзы, ужтэк кыльыны кышкытлык, монополистъёслэн энергоресурсъёс понна коньдонэн гинэ дун тырыны куремзы, Удмуртиысь предприятиослэн дась продукцизы понна тыронэз Россия Федерациысь кужымен валтӥсь (силовой) ёзъёслэн ӝегатэмзы. Сютэм но кураськыса улыны кышкытлык борды ватсасько на толлы дасяськон ужпумъёс. Тӥледыз Правительстволы Тӧрое быръемен валче Удмуртиысь гражданъёс оско: улонамы умой пала воштӥськонъёс ортчозы, та дырысен реформаос адямилы ӟечсэ гинэ ваёзы, Россиын вуз поттӥсьёслы юрттэт вуоз. Та ужын ми Тӥледлы котьку но дурбасьтом! Россиын 1998-тӥ арын 7-тӥ октябре пумитъяськон ужрад калык пӧлын зэмос бугыръяськонъёсты пуротыны быгатоз, отӥяз мар луоз - тодмо ӧвӧл. Ваньмыз со кулэ каре Правительство ласянь ужрадъёс кутыны. Дэмласьком Тӥледлы, Евгений Максимович, калыклы ӝегатскытэк ивортыны: - ку берыктэмын луозы уждунэз, пенсиосты но пособиосты тыронъя пунэмъёс; - кыӵе ужрадъёсты Россия Федерациысь Правительство ортчытыны чакла, странаез секыт югдурысь поттон понна; - Правительстволэн кыӵе ужрадъёсыз юрттозы предприятиослы ог-огзы азьын пунэмъёссэс тырыны; - кунлэн кыӵе луонлыкъёсыз вань, манетэз юнматон понна. Милемыз валалоды но кусып возёды шуыса осконэн Удмурт Республикаысь Кун Кенешлэн Тӧроез А. А. Волков. Удмурт Республикаысь Правительстволэн Тӧроезлэсь ужзэ быдэсъясь Ю. С. Питкевич. Удмурт Республикаысь Профсоюзъёслэн Федерацизылэн тӧроез Е. Н. Орлов. Удмуртиысь Промышленностья но экономикая "Азинскон" ассоциацилэн президентэз В. С. Чугуевский. 02 ИВОРТЭ Шаерамы 28-тӥ сентябре гинэ 84 йыруж пусъемын вал, 64-ез соку ик шараямын. Со пӧлын кыкез адями виён учыр, 27 лушкаськон. Урамъёсысь палэнтэмын 290 юэмъёс, со пӧлысь 70-эз сазьтӥськизы вытрезвительёсын. Милициын ужасьёс ньыльдон пол поталлязы семьяосын керетонъёсты зӥбломытыны. Сюресъёс вылын сюрслэсь уно водительёс ӝегатэмын. Вал 3 шудтэм учыр, отын 3 мурт сӧсырмыны шедиз. Со нуналэ ик 7 тылпу ӝутскылӥз. Ярам, быремъёс ӧвӧл. Тазалык Кезьытъёс вуон азьын Пыэдлэсь, мукет паласькись висёнъёслэсь асьмеос утиськыны быгатом, тазалыкмы юн луиз ке. Иммунитетэз - висёнъёсын нюръяськыны быгатонлыкез - юнматон понна, таӵе "эмъюм" ӵектӥськом. Ӝыны лимонэз кӧмыныз валче но чеснокез векчи вандылэ, ӝыны литръем банкае понэ, ватсалэ быректэм кезьыт ву, пытсалэ но ньыль нунал пеймыт интыын возе. Собере холодильнике пуктэ. Пыэдлэсь утиськон но тазалыктэс юнматон понна юылэ одӥг бадӟым пуньыен ӵукналы быдэ сиськемдылэсь 20 минутлы азьлогес. Италиын - куноын Крезьгурез яратӥсьёс тодо на, дыр: туэ инвожо толэзе асьме доры вуылӥз Италиысь дирижёр но пианист Леонардо Куадрини. Соку со тодматскиз асьме кун симфонической оркестрен, эшъяськиз солэн дирижёреныз. Куадринилэн ӧтемезъя, туэ гужем-сӥзьыл Удмуртиысь кун симфонической оркестр нырысьсэ ас быгатэмзэ возьматӥз Италиын. 46 концерт сётэмын вал Неаполь, Сорренто, Беневенте, Масса но мукет городъёсын. Режиссёрлэн пультэз сьӧрын вошъяськыса сылӥзы ачиз Леонардо Куадрини, озьы ик асьмелэн дирижёрмы, та оркестрлэн кивалтӥсез Николай Роготнев но Италиысь дирижёр Паоло Бианкалано. Удмурт оркестр шудӥз тодмо ӟуч композиторъёслэсь Чайковскийлэсь, Мусоргскийлэсь, Римский-Корсаковлэсь но мукетъёсызлэсь-Вердилэсь, Россинилэсь но Дворжаклэсь произведениоссэс. Средиземной зарезьлэн эркын тулкымъяськемез, шуныт тӧлэн вешась омыр, пӧртэм тусо-буё адямиос, туристъёс, уй фейерверк, ӵукнаозь чалмисьтэм крезьгур - ваньмыз со асьме музыкантъёслэн сюлэмазы весяклы кылёз. Трос концертъёс сётэмын пырак инбам-липет улын, черкъёс азьын. Асьме оркестр шудэм улсын кырӟазы Энрико Карузо но Марио Ланца нимо калык куспо конкурсъёсын вормисьёс но Молдавиысь "Дойна" академической капелла. Музыкантъёсмы пыриськизы фестивальёслэн программаосазы но. Удмуртиысь кун симфонической оркестр, зэмзэ ик, кык толэзь пала куноын вал - отын улэм дунэз Италия ас вылаз басьтӥз. Николай Роготневлэн но эшъёсызлэн ымныръёссы али шумпотонэн пишто: данзэс ӧз уськытэ. 26 октябре соос сезонзэс усьтозы Удмурт кун национальной театрын. Т. НИКОЛАЕВА. Вужзэ ум выльдӥське, выльзэ ум лэсьтӥське Кыӵе вылӥ культура сярысь вераськыны луоз, куке гуртъёсысь клубъёслы куашканы, ворсаськыны сётӥськомы. Бадӟымез пичиезлэсь кылдэ ук. Тазьы гожтыны кутскеме потэ Бобья-Учаысь культурая юрт сярысь веранме. Куашкан калэ вуэмын со. Тупатъясалзы ке, оло, эшшо тамында ик (30 ар пала) сылысал на. Нош али отчы пырыса, син шоры йӧто лыньырам борддоръёс, сисьмем выж пулъёс но ву вияса ӵужектэм вӧлдэт. Озьы ке но, татчы ик люкаське на калык. Мар карод, мылкыдэз уд замока, уд ваты ук. Осконзы вал туэ тупатъян ужъёс кутскозы шуыса, но... Оскон но куддыръя янгыша. Тани учкон залзэс пытсазы ини, табере калыкез нокытчы люканы. - Калыкмы милям туж мыло-кыдо, - шуэ клубен кивалтӥсь Галина Николаевна Николаева. - Котьку ӧть, лыктозы. Вань пӧртэм коллективъёсмы, кылсярысь, "Калык театр", туэ солы 30 ар тырме ини, кивалтэ та театрен Филипп Александрович Яковлев. Котькинлы тодмо арганчиосмылэн ансамбльзы, отчы ветло дас вить нылкышноос, кивалтӥсьсы Екатерина Леонидовна Антонова. Собере пиосмуртъёслэн ансамбльзы вань, кивалтэ соосын Вячеслав Петрович Корнилов. Пӧртэм кружокъёс ужало. Та верамысь валаны луэ, клубын ужасьёс тэк уг пуко шуыса, созэ но, тазэ но лэсьто, лэсьтысалзы азьланяз, но таӵе юртэ пырыса, мылкыд куашка. Таӵе интыын туж ик уд ни кырӟа, уд но экты. Нош тупатыны, котьку сямен, коньдон ӧвӧл. Пӧртэм ужрадъёс но ортчытъяло, концертъёсын, спектакльёсын но дискотекаосын уксё поттыса. Но кемалы-а тырме со манетэн-кыкен бичам, соин гинэ трос уд лэсьты. - Клуб куашкамлы котькинлэсь но юн куректо егитъёс, - шуэ Галина Николаевна. - Ярам, шуомы, мӧйыосты ми библиотекае люкалляськомы, пӧртэм программаосын фермае вуылӥськомы, нош егитъёслы асьсэ понна шулдыръяськон инты кулэ. Ӝытъёсы соослэн одӥг люкаськон интызы вал. Табере кытчы соос мынозы? Клубмес матысь дыре ик пытсалозы, оло. Бен, ворсаны капчи угось, нош калыклэсь сямъёссэ, мылкыдзэ, арысь-аре узырмем лул чеберзэ кин ке лыдэ басьтоз меда? Вераськонмы бырыку, клубын ужасьёс эшшо одӥг сюлэм висёнзэс веразы на, худрукмы, пе, ӧвӧл, нош со туж кулэ вылэм... но, кинлэн меда лыктэмез потоз таӵе клубе, будэтӥзы асьсэос ик. Л. БАКАЕВА. Выльзэ оскалтоды "Иднакар". Тазьы нимаз егитъёс понна кылдытыны чаклам выль театрзэ Ольга Александрова. Татчы огазеяськем актёръёс нырысетӥ ужзы - "Тристан и Изольда" спектакль бордын ужало. Европа но Азия, Шунды пуксён но Шунды ӝужан палъёс, Яратон но Кулон, Язычество но Христианство - ваньмыз огазе сураськемын та вужмисьтэм легендаын. Театр понна со эксперимент, выльзэ оскалтон выллем луэ. Та спектаклез адӟыны быгатоды 23, 24 но 25 октябре Ижевскын Егитъёслэн юртазы ("Редуктор" ДК-ын). Т. НИКОЛАЕВА. Кырӟало, шудо пинал усточиос 1 октябре - Музыкая калык куспо нунал. Операя но балетъя кун театрын та нуналэ луоз бадӟым концерт: ас быгатэмзэс возьматозы Удмуртиысь устоосыз пинал музыкантъёс. Соос пӧлын - Россиысь Культурая министерстволэн стипендиатъёсыз, Ижевскысь крезьгуръя училищеысь нимысьтыз школаын фортепианоен шудыны дышетскисьёс Жанна Фанасеина но Анна Русских (таос вормизы вал пинал финн-угор пианистъёслэн ИИ конкурсазы но). Балалайкаен шудоз Сергей Шакирьянов, Ижевскысь 4 номеро искусствоосъя школаын дышетскись. Крезен шудыны быгатэмзэ нош ик возьматоз Воткинскысь усточи Ваня Марков. Та концертэ пыриськозы хорын кырӟасьёс но (кылсярысь, Венгриын калык куспо конкурсын вормем "Ингур" капелла), озьы ик калык инструментъёсъя оркестръёс, эктонъя коллективъёс. Ижысь Думае депутатъёсты но шоркарамы мэрез быръёнъёс азьын кандидатъёс оскылӥзы вал, столицаямы, пе, котьку пӧсь ву но, шуныт но луоз. Нош туэ тани быдэс гужемзэ пӧсь вуэз ӧм адӟылэ ни. Табере кезьытъёс но вуизы. Кызьы меда толъём туэзэ?.. (Гожтэтысь). - Тон мар, Олёш, патерад корт гур пуктыны малпад, оло? - Ма, город кузёослы оскон ӧвӧл ни! Эсьма та гуре шунтоз но, ву но пӧсятоз. Суредэз Л. ПРОЗОРОВЛЭН. Кырӟась нылкышноосын артэ Пероггуртысь библиотекаын пумиськонэ трос кузя лыктӥллям нылкышноос-пенсионеръёс но мукетъёсыз. Ваньзы ик сьӧразы пыжиськемъёс ваиллям, выль чечы но вуттӥллям. Ӝӧк выл тыр сиён-юонэн пумитазы монэ. Туж кепыр ке но ваи, шум но потӥ: огшоры воргоронэз но тазьы пумитасьёс вань ай. Ӝӧк сьӧрын чай юыса, суредъёсме учкылыса азьланьтӥмы пуконмес. Мон верай аслам творческой ужъёсы сярысь, юанъёссылы валэктылӥ. Тодэмзы потӥз, кызьы кылдылӥзы куд-ог суредъёсы. Собере ачим но соослэсь юалляськи, ведь та нылкышноос улонэз трос адӟемын, оломае но тодо. Пумиськонамы ветлӥз интыысь администрацилэн кивалтӥсез И. Ф. Лазарев. Со мыным бадӟым азинсконъёс сӥзиз, кузьым сётӥз. Пумиськонмес туж шулдыр, капчи мылкыдын ортчытӥмы. Нылкышноос мыным сӥзьыса кырӟазы аспал эшсылэсь Медведевлэсь "Возьвыл сяська" кырӟанзэ. Со монэ мур малпаськонэ вуттӥз, ортчем аръёсы тодэ лыктылӥзы. Мон та кырӟасьёсын ӵош вуылӥ кадь азьло улонамы, куке быдэс гурт одӥг семья сямен уртче улӥз, ужаз, шулдыръяськиз. Та нылкышноосыз культура удысысь азьветлӥсьёс шуыны луоз. Фольклор ансамбленызы соос котькытчы вуо, пӧртэм смотръёсы пыриськыло. Мынам сӥземе потэ соослы бадӟым, бурдъясь мылкыд, медаз огинтыяз сылы ансамбльзы, мед отчы кыстӥськозы будӥсь пиналъёс но. Тау кареме потэ монэ сӥлы карыны лыктэм вань калыклы, тужгес ик та ужез радъясьлы, библиотекаен кивалтӥсьлы Алевтина Павловна Рябовалы, солэн сюлэмыз чеберлык пала усьтӥськемын, ялан маке но выльзэ утча, шедьтэ. Григорий СПЕРАНСКИХ, суредась. Завьял черкогурт. Мӧйыослы сӥзьыса ООН ӵектэмъя, 1992-тӥ арысен котькуд ар нырысетӥ коньывуонэ быдэс дуннеын Мӧйыослэсь нуналзэс пусъё. Бере уг кыльы Ижевск но. Нырысетӥ коньывуонэ Операя но балетъя театрын городысь пенсионеръёсын пумиськон ортчоз. Нош быдэс толэзь ӵоже мӧйыослы пӧртэм юрттэт сётӥськоз. Ӵошатсконъёс, концертъёс ортчозы. Та ужрадъёслы городлэн бюджетысьтыз вить сюрс манет коньдон висъямын, Ижевскысь котькуд районлы быдэн сюрс манет. Со сяна, пӧсьтолэзь понна тырытэк кылем пенсиос коньывуонэ ваньмыз сётэмын луозы, дыр. С ПЕТРОВА. Люкиськон кыл Валлян ӝытазе 66-тӥ аресаз мыныкуз кулӥз тодмо удмурт журналист Константин Николаевич Михайлов. Константин Михайлов кема ужаз Удмурт телевидениын но "Дась лу!" газетын. Пенсие кошкиз "Удмурт дунне" газетлэн редакциысьтыз. Озьы ик пыриськылӥз данак кинофильмъёсты удмурт кылэ берыктонэ. Сое котькытын гажаллязы зӥбыт но лякыт сямыз понна. Милям газетысь "Шӧкыч" бамез дасясь мурт шиё кыло луыны кулэ. Улонысь тырмымтэосты Константин Николаевич зэмен ик лек ӵушкалляз. Но ми солэсь ноку но ӧм кылылэ нимаз адями сярысь урод кыл верамзэ. Одӥг адями сярысь но! Соин ик Константин Михайловен та югыт дуннеын одӥг мурт но ӧз тушмонаськылы, дыр. Ӟеч кӧл, Константин Николаевич! х х х К. Н. Михайловез вато туннэ. Мугорзэ 11 часэ потто улэм интыысьтыз (К. Маркс ульча, 407-57). Юалэ - валэктом Малы ӝегало газетъёс? Алнаш но Можга районын улӥсьёслэсь редакцие ӝожтӥськонъёс вуизы, газетмес лыдӟисьёс доры одӥг номерлы ӝегатыса вуттылэм сярысь - вторник номер вуэ четверге, нош четверглэнэз -субботае. Мар муген? Валэктон курыса, ми вазиським Удмурт Республикаысь Почта пыр кусып возёнъя Федерация управлениысь газет-журналъёсты нуон-ваёнэз радъясь специалистлы Галина Михайловна Кузнецовалы. Со таӵе валэктон сётӥз. - Газет-журналъёсты лыдӟисьёс доры вуттонын шуг-секытъёс кылдӥзы ини 22 июньысен. Со герӟаськемын уин мынӥсь "Киров-Казань" поездэ почта нуллӥсь вагонэз дэмӟытыны луонлыкъёс шедьтымтэен. Али газет-журналъёсты Можгаозь келяськом нуназе мынӥсь "Ижевск-Москва" поездэн, отысен ини алнашъёс асьсэос доразы вутто. Но оскиськом, та шуг-секытъёс огдырлы гинэ кылдэмын. Шӧкыч Гидъёсты таркало Ува-Вавож сюрес дурын сылэ Рябово гурт. Нош со вӧзын ик - кык ферма. Куке-соку отын скалъёс улӥзы, йӧл-вӧй сётӥзы. Колхозлы барыш вайылӥзы. Но "Новая сила" эштослы пудо гидъёс кулэ ӧз луэ ни, шӧдске. Скалъёссылэсь лыдзэс но кулэстӥзы. Табере фермаос котырын люгы но пушнер, мукет жуг-жаг будэ. Огкылын вераса, гидъёс аналтэмын. Нош кипырмес адямиос сое гинэ витьыса улӥллям кадь. Каллен-каллен качаны ӧдъязы гидъёсты. Али липетсэ кесяны кутскиллям ни. Уго шиферез выль на вылэм. Липетсэ кесяса, табере борддоръёссэ тарканы но кутскозы, дыр. Н. ЕФРЕМОВ. Шӧкыч Маде ин Сарапул Сарапулысь вина но кабак поттон заводлэсь вузъёссэ басьяськисьёс ӟеч тодо. Кыӵе гинэ пумо кудӟытӥсь юон уг малпало отын - "Русская", "Надежда Дурова", "Сибирская", "Посольская", "Золотое кольцо", "Вишенка", "Цитрусовая"... Но вузкаронъя кун инспекциын ужасьёс чакласькыны куризы тани ма ласянь. Сарапулын поттэм "Русская" водка туж ӵемысь пӧяськыса поттэмын луэ. Ӟенеликез но зэмос, акцизной маркаез но тупа, штрих-кодэз но, этикеткаез но интыязы кадь, документъёсыз но умоесь. Нош пушказ? Пушказ... Кыӵе ке сурет. Тужгес но урод водка уно вуэ гуртъёсысь магазинъёсы. Озьыен, элькунамы лушкемен водка лэзьянъя кыӵе ке цех ужа? Соин ик, сарапулъёслэсь кабаксэс эскериськысагес басьтэ. Б. СЕРГЕЕВ. Куара ӧвӧл - фирма ӧвӧл Берло дыре асьмеды кунгож сьӧрысь ваем олокыӵе но вузъёсын паймытыны туртто. Зэм, дунъёссы бадӟым ке но, коньдонзэс уг жаляло, кисьто гинэ. Ма, импорт со импорт ук! Ог кык ар талэсь азьло Якшур-Бодья ёросын улӥсь Алексей Шахтарин кытысь ке кылэм, Иж городысь 2-тӥ номеро больницаын ляб кылӥсьёслы аппарат вузало шуыса. Мар бен, вуж коньдонэн 650 сюрс манетэн, басьтэ со аппаратсэс. Кык нунал но ӧз быгаты воргорон сое нуллыны. Пельёсыз но йырыз уката висьыны ӧдъязы. Алексей Петрович аппаратсэ тупатыны фирмае келяно кариськиз. Бандероль бордаз гожтӥз адрессэ но: Москва, Гиляровский ульча, 5 номеро юрт, "Медсервис интернешнл" фирма. Ортче толэзь, кык, куинь... Кызьы шуо таӵе дыръя ӟучъёс: "Ни привета, ни ответа". Арез но пумен ортче. Ӧвӧл аппаратэз но, уг берытскы коньдонэз но. Воргорон вазиське Якшур-Бодья ёросысь басьяськисьёслэсь правооссэс утёнъя ёзэ. Отысь гожтэт кошке Россия Федерациысь Монополилы пумит политикая кун комитетлэн Удмурт управленияз. Татын ужасьёс фирмаез куро басьяськисьлы аппаратэз понна дунзэ кык полэс берыктыны. "Медсервис интернешнл" чалмыт улэ. Нош ик толэзьёс ортчо. Та ужез эскерон борды табере басьтӥсько Россия Федерациысь Монополилы пумит политикая кун комитет но налоговой инспекция. Ӝоген Алексей Шахтаринлы ивортон вуэ: "Медсервис интернешнл" фирма таӵе адресъя интыяськемын ӧвӧл. Эскеронъёс нокыӵе пайда ӧз сётэ." Озьы тӥни. Аппарат бысьтэм дырысен тырмоз ини кык ар. Нош басьяськисьлы коньдон берыктыны малпась ӧвӧл. Вылаз ик, воргорон кӧня уксёзэ быдтӥз, гожтэтъёс келяса. Озьыен, фирма ӧвӧл - тю-тю. Вот оскы собере кунгож сьӧрысь фирмаослы. Н. ЛЯЛИН. ПРАВИТЕЛЬСТВОЫН Улон интылы - коньдон Кылем понедельнике, 21 сентябре, Правительствоын учкемын Россия Федерациысь Сбербанклэн Удмуртиысь банкезлы Удмурт Республика ласянь юрттэт сётон сярысь законлы инъет. Отын вераськон мынэ калыклы улон инты лэсьтыны но басьтыны коньдон (кредит) висъян сярысь. Семьялы 7 процентэн ссуда сётӥське, нош солэсь вылӥзэ банклы тыро кун но интыысь бюджетъёсысь. Удмуртиысь Госстройлэн кивалтӥсезлэн Геннадий Батищевлэн ивортэмезъя 3 сюрс адямиослы льготной кредит сётэмын ни. Нош кун бюджетысь компенсация чотын 4 миллион манет коньдон висъямын. Правительстволэсь кенешсэ нуиз Правительстволэн Тӧроезлэн нырысетӥ воштӥсез Юрий Питкевич. Куанеръёслы - нимаз юрттэт Калыкез улон-вылонын утёнъя министерство Правительстволэн Президиумаз сётӥз "Удмурт Республикаын куанер улӥсьёслы но ужаны быгатӥсьтэмъёслы нимаз юрттэт сётонъя кун ужрадъёс сярысь" постановленилы инъет. Отын верамын кин быгатэ социальной юрттэт басьтыны. Вераны кулэ, сыӵе юрттэт вуоз улыны тырмымон пенсия но уждун басьтӥсьтэмъёслы. Али лыдъяса тодмо луиз, Удмуртиын 24 сюрс муртлы юрттэт сётоно. Со понна 3 миллион уксё кулэ. Та лыдпус кун бюджетэ нимаз чурен пыртэмын луиз ке, вуоно арын куанер адямиослы юрттэт вуоз. Но документ бордын ужалозы на. Вузкаронлы инъет Республикаямы картофка, бакча сиёнъёс но емышъёс вузанэз радъян сярысь положение эскеремын. Соя тупатэмын та сиён-юонъёсты вузан интыос, продукциез ваён но возён амалъёс но картофка но емышъёс вузан документъёс. Постановленилы инъет йылаз-пумаз вуттымтэ на. Отчы выльдонъёс но воштонъёс пыртозы на. Туэ 1-тӥ октябрьысен Правительстволэн постановлениезъя, туэ 1-тӥ октябрысен водка но мукет аракы, кытын вань спиртэз, эмъюмъёсты, одеколонъёсты но духиосты вератэк, нимаз маркаен гинэ вузаны лэзисько. Со пуктэмын луыны кулэ котькуд бутылкае. Юнматэмын марка пуктылон амалъёс. Продукциын 12 процентлэсь уно спиртэз вань ке, соку марка кулэ ни. 2 миллион манет сётэ "Чепецкий механический завод" АО Завьялово администрациезлы. Со висъяське кун бюджетэ уксё тырем интые. Администрацилы верамын со коньдонэз "Завяловский" тепличной комбинатлы висъяны. Малы ке шуоно, та предприятилэн шуныт басьтэмез понна уно тыронэз люкаськемын. Учкемын-чакламын Правительствоын учкемын таӵе постановлениос: "Удмурт Республикаысь гурт калыклы уж сётон сярысь", "Удмуртия" кун телерадиокомпаниез 1998-2001 аръёсы туала техникаен узырмытонъя но телепрограммаоссэ выльдонъя кун программа сярысь". Правительстволэн Тӧроезлэн секретариатысьтыз пресс-центр. х х х Асьмелэн землякмы, спортъя сӥё-дано мастер Алексей Кобелев гужем биатлонъя дуннеысь чемпионатын 2 зарни но 1 азвесь медаль басьтӥз. Со ортчиз Словениысь Осорбли городын. х х х Дас вить ар вис лэсьтэм бере, Камбаркаын ортчиз мотоциклёсын ворттылонъя ӵошатскон. Выль сюрес лэсьтыны уно кужымзэс сётӥзы тренеръёс Андрей Сухов но Андрей Попов. Мотокроссэ ветлӥзы Ижевскысь, Нефтекамскысь, Камбаркысь кужмоосыз спортсменъёс. Специалистъёслэн лыдъямзыя, та сюрес вылын Российской ӵошатсконъёс ортчытъяны ярамон. Г. ВАСИЛЬЕВ. Журналистъёсын пумиськонъёс Узыр ке - юртты бускеледлы Нянь будэтӥсьёс туэ, кылем арын сярысь, кык поллы ӧжытгес ю тысь утялтӥзы. Озьы ке но, сиён-юон республикаямы тырмыт, шуиз журналистъёсын пумиськон дыръя Кун Кенешысь Агропромышленность удысъя, музъем кусыпъёсъя но инкуазь узырлыкъёсты кутонъя ялан ужась комиссилэн кивалтӥсез А. МАЛКОВ. 430 хозяйство пӧлысь ю-нянь утялотонзэ ӧз йылпумъя на 27 хозяйство гинэ. Но гурт кивалтӥсьёс кеносъёсы пыртэм няньзэс государстволы вузаны уг дырто, угось тросаз хозяйствоосын урожай туэ ӧжыт басьтэмын. Собере тросэзлэн дунтэмен вузамзы но уг поты - закупочной дунъёс туж пичиесь. Правительстволэн пуктэмезъя, али асьме республикаысь сиёнъёсты палэнэ келяны лэземын ӧвӧл. Но куд-ог улосвылъёс но бадӟым городъёс, кылсярысь, Санкт-Петербург, юрттэт курыса, асьме кивалтӥсьёсмылы вазисько. Мар кароно сыӵе учыръёсы? Аркадий Малков валэктэмъя, сыӵе юрттэт сётэмын луоз огкылъёс гожтэм бере гинэ. Мултэс сиёнэн республика юрттыны пумит ӧвӧл. Но асьме калыкмес со шуге-леке медаз вутты. Йӧл, курег пуз, картофка но куд-ог бакча сиёнъёс туэ тырмыт. Кӧс вӧй ласянь но, Удмуртия гинэ ӧвӧл, быдэс Россия но сюлмаськытэк улыны быгатоз. Но та ласянь кема аръёс ӵоже азьпала улонмес чаклатэк ужамы. Сырьёмес (шундыберган тысез) дунтэмен Турцие вузаськомы, нош кӧс вӧез собере отысь ик дуно дунын басьтӥськом. Кӧс куазен сэрен туэ республикаямы 85 сюрс гектар музъем вылын номыр ӧз удалты. Соин ик куд-ог хозяйствоос бадӟым ыштонъёс адӟизы, шуиз А. Малков. Соослы юрттон понна 36 миллион манет коньдон кулэ. Но та ужпумез эскерон йылаз-пумаз вуттымтэ на. Долларлэн шудэмез гуртъёсты вӧсь кароз техникаез басьтон пумысен. Депутат верамъя, асьме шаере Германиысь комбайнъёс лизингъя вить ар куспын вуыны кулэ. Одӥг комбайнлэн дуныз 1 миллион 860 сюрс манет. Кин сыӵе дунын басьтыны вуиз, удалтӥз, шуом ини. Нош кылемъёссэ комбайнъёсты табере дуно дунын басьтоно луоз ни, дыр. Сентябрьлэн пумаз ужаны кутскоз депутатъёслэн 21-тӥ сессизы. Гурт хозяйство азьын сылӥсь ужпумъёс сярысь отын ивортон лэсьтэмын луоз. Т. БАННИКОВА. Удмурт Республикаысь Кун Кенешлэсь кызь одӥгетӥ (азьвыл чакламтэ) сессизэ люкан сярысь Удмурт Республикаысь Кун Кенешлэн Президиумезлэн ПОСТАНОВЛЕНИЕЗ Удмурт Республикаысь социальной удысын, экономикаын, но политикаын секыт югдур кылдэмен, Удмурт Республикаысь Кун Кенешлэн президиумез пуктэ: 1. 1998 арын 30 сентябре 10.00 часын Ижевск городын люкано Удмурт Республикаысь Кун Кенешлэсь кызь одӥгетӥ (азьвыл чакламтэ) сессизэ "Удмурт Республикаысь социальной удысын, экономикаын но политикаын югдур сярысь" повесткаен. 2. Удмурт Республикаысь Кун Кенешлэн Президиумезлэсь 1998 арын 25 августэ юнматэм "Удмурт Республикаысь Кун Кенешлэсь кызь одӥгетӥ сессизэ люкан сярысь" 563-И номеро постановлениез кужымзэ ыштэмен лыдъяно. Удмурт Республикаысь Кун Кенешлы ӵектоно кызь одӥгетӥ (азьвыл чакламтэ) сессилэсь ужзэ йылпумъям бере 1998 арын 29 сентябре ортчытыны чаклам сессилэсь ужзэ мытыны. 3. Удмурт Республикаысь Правительствоез косоно кызь одӥгетӥ (азьвыл чакламтэ) сессилы дасяны республикалэн социальной удысаз но экономикаяз кылдэм югдур сярысь Удмурт Республикаысь Правительстволэн, шуг-секытъёсты вормон понна, туала югдурен кивалтонын интыез но тыршемез сярысь доклад но Удмурт Республикаысь Кун Кенешлэн та пумысен постановлениезлэсь инъетсэ дасяны. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 23 сентябре. � . Чидан но быре Зоро сӥзьыллэн но кезьыт толлэн матэктэмзы ваньзэсты малпаськытэ: ку луоз улоно юртъёсын шуныт? Со сяна, уждун! Ужась калык сое толэзьёсын-толэзьёсын уг адӟы. Ӝегато нылпи пособие но пенсия тыронэз, сиён-юонлэн дуныз йылэ, эмъюмъёсты шедьтыны шугъяськоно. Ма кароно таӵе дыре? Адямиослэн берпум чиданзы быре. Таиз арня тросэз понна огыр-бугыр кутскиз кадь. Эрико профсоюзъёслэн ӧтемзыя, республикамылэн пӧртэм сэрегъёсаз улӥсьёс вылӥ кивалтӥсьёсын пумиськизы. Кенеше пыриськыны но кивалтӥсьёслы меӵак юанъёс сётыны мылкыд карисьёслы пукон инты ӧз тырмы залын. Тросэз соос куинь час пала пыд йылазы сылоно луизы. Пумиськонэз быгатыса радъяз Республикаысь Эрико профсоюзъёслэн кивалтӥсьсы Евгений Николаевич Орлов. Со ик кивалтӥсьёс азе чурыт куронъёс пуктӥз. Залысь адямиос куд-огезлэсь уж дурын ворттылон машиназэс но вузаны дэмлазы. Секыт улонлэн тулкым улаз золгес шедёно луо нылпиос. Кылсярысь, Сарапулысь кӧня ке семьяосысь пиналъёс школае дышетскыны уг ветло, дӥськутсы но пыдкутчанзы ӧвӧлэн. Со гинэ-а? Котькытчы мед мынозы нылпиос, соослэсь коньдон кыско. Пинь ишкалтонын гинэ но. Бен, туннэ коньдонтэк кыдёке уд вуы. Экономика шальтрамын бере, улон но пурысь ӵын пӧлы выемын кадь. Кун Кенешлэн Тӧроезлэн Александр Волковлэн малпамезъя, таӵе югдур Россиысь кивалтӥсьёс бордысь потэ. Берло аръёсы соос ялан вошъяськизы. Таин валче кунмес азинтон программа но вошъяськиз. Нош Удмуртия, жаляса верано луэ, палэнысь юрттэттэк, ас кожаз гинэ азинскыны уг быгаты. Республикамес секыт югдурысь поттон программа кылдытон вылысь, Кун Кенешлэн Тӧроез Федерацияя Советэ вазиськем. Оскыны кулэ, выль Правительствое пырись муртъёс сое умоен лыдъялозы шуыса. Но огъя югдур тупатскытэк, нимаз республикаын гинэ улон уз умоя. Та пумиськонын кивалтӥсьёслы пӧртэм юанъёс сётъязы ке но, валэктонъёссы мур- муресь ӧй вал. Озьы бере, 7 октябре пумитъяськон ужрадын ваньмыз со нош ик лэчыт пуктэмын луоз кивалтӥсьёс азе. В. КУТУЗОВА. Чорыг сиемед ке потэ? Тодӥськоды на-а азьвыл аръёсы столовойёсын котькуд средае чорыг сиёнъёсын гинэ сюдылэмзэс? Ортчизы со дыръёс. Зарезь сиёнъёслы но дунъёс туж вылӥе тэтчизы. Нош ваньмаз-а чорыг тупа куронъёслы? Тани мае шараязы магазинъёсысь Удмурт Республикаысь Вузкаронъя кун инспекциын ужасьёс. "АСПЭК" вузкарон юртлэн 5-тӥ складысьтыз эскерем консерваос пӧлысь умойтэмен лыдъямын ог 68 процентэз. Со - томат соусэн атлантической скумбрия. Ижысь нимаз вузкарисьлэн Агаевлэн ларёказ шараямын сиыны ярантэм килькалэсь консерва. Со поттэмын вылэм Латвиын. Вузкарисьлы штраф сётэмын, вузэз келясезлы берыктэмын. "Продторг" акциосын огазеяськонлэн "Лукоморье" магазиназ вузкарыны лэземын ӧй вал вӧйын пӧсьтэм шпротэн. Сиён поттэмын вылэм Ручьевскысь чорыг комбинатын. Консерваын ӧжытгес вылэм сылалэз, чорыглэн вылтусыз но куронъёслы уг тупа. Сертификаттэк шпрот вузало вылэм Алнашысь "Рябинушка" магазинын но. Уно тырмымтэос шараямын Ижысь нимаз вузкарисьлэн Гильмутдиновлэн "Пазелы" магазиназ. Отын вузкаро вылэм дырыз ортчем "Лосось" консерваен. Ф. ОСИНЦЕВА. Пичи ке но, юрттэт Селта ёросысь администрацилэн семья ужпумъёсъя отделэз "Сюлмаськон" нимын ужрад ортчытэ. Калыклы дэмламын вужмем, пичи кылем, но нуллыны ярамон дӥськутэз люканы. Дӥськутсылы "кыкетӥ улон" сётыны мылкыд карисьёс трос гинэ лыктӥзы. Бичам пыдкукез, шуныт дӥсез, нылпи дӥськутэз отделын ужасьёс ужтэк кылемъёслы, трос нылпиё семьяослы, анай-атайтэк кылем пиналъёслы, пересьёслы люкыло. Е. ДОРОФЕЕВА. Огкылъёс гожтэмын Удмуртиысь вузкаронъя но промышленностья палата Германиысь ужбергатӥсьёслэн огазеяськонэнызы пумиськон ортчытӥз. Отын удмурт но немец ужбергатӥсьёс куспын ог- огеныд ӵош ужан сярысь огкыл гожтэмын. Б. НИКИТИН. Шӧкыч Алла КУЗНЕЦОВА Эк, улон, улон-вылон... Куар усён но толэзе, Куар потон толэзь понна Уждун басьтӥ ӝытазе. Мар ке шат басьтом на, а? Дӥськутэд кырсёмемын - Порошок басьтыны мын. Та басьтэм уждунэдлы Тырмоз куать порошоклы. "Чисто - "Тайд" - порошокез Ушъяло теликъёсын. Мон басьтӥ со ушъямзэс. Котӥ чисто дӥськутэз. Эк-ма, мар та? Осто, шу - Дӥськутэ луэмын шуш. Ӝук выллем ик тепыльӟем. Сюлмам вожпотон вырӟе: Асфальт миськон мае ке, Тыриллям отчы, эке. Теликъёслы оскыса Пукси, гольык кыльыса. Порошок ке - порошок... Сюлмаськон - быдэс мешок: Кылемзэ нош коньдонме Кытчы меда донгоме? Визьмо муртъёслэсь кылӥ: Долларлэн дуныз вылӥ. Мон басьтӥ дасо штука. Оскисько: йылоз ук та Долларлэн дуныз будоз, Дасое дас сюрс луоз. Соку юрт аслым пукто, Машина вӧзаз йылто. Выль удмурткалы пӧрмо, Эсьмаса, узыр уло... Нош ачим асме кутчай: Долларлэн дуныз тэтча. Дас куатен басьтӥ гинэ - Тямысозь усем туннэ... Ой, та мар таӵе улон - Улонлэсь дуно кулон. Кулӥ, сием потыса. Инмар азьын возьдаськыса. Ватӥсько сьӧлыкъёсме, Нош со вера вытъёсме: Коросэд, пе, шуккымтэ, Киросэд но пуктымтэ, Черк азе тон нуллымтэ, Сюсьтылъёс ӝуатымтэ. Котькытчы кулэ коньдон. Коньдонлы, пе, кошкы, вон!.. Озьы уго улӥськом, Синвуосмес кисьтаськом. Нош кин ке зарни вылэ Педлоаськыса улэ. Телефонэн - быдэс дуннее Та нуналъёсы быдэс дунее шумпотымон ивор вӧлмиз - ужаны кутскиз езъёстэк ужась телефонъя сӧзнэт (система). Сыӵе луонлык кылдӥз связья "ИРИДИУМ" спутникез уже кутэмен валче. Ваньмыз 66 спутникъёс лобалозы 780 иськем вылӥын но телефонэн герӟаны быгатозы быдэс дуннеез. "ИРИДИУМ" корпорацилэн штаб-квартираез интыяськемын Нью-Йоркын. Асьме шаерын солэн ёзэтэз луэ "Сотовая связь Удмуртии" (ТМ "БиЛайн") предприятие. Эскерон палатаын Алигес ортчиз Кун Кенешлэн Эскерон палатаезлэн заседаниез. Отын учкемын ньыль ужпум: музъемлэсь ӟечлыксэ умоятонэ висъям коньдонлэн кутӥськемез; Россиысь Коньдон ужпумъёсъя министерствоысь КРУ-лэн Удмуртиын ортчытэм эскеронъёсызъя пуктэм куронъёсты быдэсъян; Удмурт Правительстволэн Дуно бумагаосъя но фондъёсын рынокъя комитетлэн ужамез; бюджетэ пырисьтэм коньдонлэн кутӥськемез. Удмуртиысь Коньдон ужпумъёсъя министерство ивортэмъя, 1996 арын шаерысьтымы бусыосы фосфор но изваска поттонъя чаклам коньдонлэн 6 процентэз гинэ "улэпкын" вуиз "Удмуртагропромхим" огазеяськонэ. Та ужъёсы планъя мыныны кулэ вал 93 процент пала. Туэ арлы гыроно-кизёно муосты умоятонэ бюджетысь вуыны кулэ 4,6 миллион манет, известь поттонэ ватсаса висъямын на 2,5 миллион манет. 27 июльлы чакламысь сётэмын 300 сюрсэз. Вераны кулэ, музъемлэсь ӟечлыксэ ӝутонъя ужъёс йӧскадь уг мыно: ӧвӧл фосфор пызь, изваска, ГСМ. Та муген арысь аре кулэсме удобрение поттон. Миым, кылсярысь, ӝыныез но муосмы тырмыт сиён ӧз басьтэ. Висъям коньдон но быдэсак гурт хозяйствое уг вуы. Эскерон палата чакламъя, данакез со кыле посредникъёс кие, "Удмуртагрохимлы" "юрттэ" НПО "Союз-1" фирма, 20-30 процентлы дуногес техника но мукет ваньбур вайыса. РФ-ысь коньдон ужпумъёсъя КРУ-лэн ортчытэм эскеронъёсызъя шараям тырмымтэосты палэнтон бордын йӧскадь ужасез озьы ик ӧвӧл. Кылем арын 656 пол ортчытэм эскерон но ревизия пӧлысь 304-яз шедьтэмын коньдонэз тус-тас карон учыр - ваньмыз 58028,3 миллион манет. Отысь берыктэмын 18508,5 миллионэз гинэ. Дуно бумагаосъя но фондъёсын рынокъя комитетлэн ужезъя Эскерон палата оглом пусйиз солэсь та вакытэ бадӟым кулэлыксэ. Но, жаляса верано, экономикамес ӝутонын аслэсьтыз интызэ со ӧз шедьты на. Секыт югдурысь потонын экономика но коньдон ужпумъёсъя ёзъёс котькудӥз ас валамезъя ужаны выро, огкылэ вуытэк. Дуно бумагаосъя рынокын, соизэ но вератэк уг луы, специалистъёсмы лябесь. Ӝутэм ужпумъя кутэм решение ыстэмын Удмурт Республикалэн Правительствоезлэн Тӧроезлы П. Н. Вершининлы. Вуоно арын февраль толэзе Эскерон палата выльысь учкоз кутэм ужрадъёслэсь кызьы быдэсъяськемзэс. Бюджетэ пырисьтэм фондъёсъя туэ ӝыны ар понна ивортон лэсьтӥз Кун Кенешлэн депутатэз, Эскерон палатае быръем мурт Е. Л. Мальцева. Со пусъемъя, кылем арен ӵошатыса, та фондъёсы коньдон шӧдскымон ӧжыт мынэ. Предприятиос, организациос тыронъёсынызы ӝегамен, дыраз уг сётъясько пенсиос но пособиос. Калыкез уже интыянъя фондэ гинэ туэ ӝыны ар пала 96,2 миллион манет ӧз вуы. Эскерон палаталэн решениезъя та ужпум ӝутэмын луоз Кун Кенешлэн депутатъёсыз азьын, Удмурт Республикалэн Правительствоезлы дэмламын вань луонлыкъёсты кутыны, коньдонэз бюджетэ пырисьтэм фондъёсы вуттон вылысь. М. ИВАНОВ. Тазалык Ошмесысь уд вияты Вир басьтонъя станцилэн юртаз шал-шал буш. Азьвыл татын черодъёс сыло вал - нуналскын 120 адями вирзэ сётылӥз. Али - 40-50 адями. Тани туннэ но 43 адями вуылэм. Кыкез нылкышно ватсаса шутэтскон нуналъёс понна вирзэс сётэм, кылемъёсыз - тодмозэс яке ӵыжы-выжызэс кулонлэсь утён понна. Ма луиз калыкен? Кыӵе ужпумъёс сыло вир басьтӥсьёс азьын? Та но мукет юанъёслы валэктэ вир басьтонъя станцилэн кивалтӥсез Алексей Анатольевич ЗАРАЕВ. - Кыӵе ужпумъёс сыло вир басьтонъя станция азьын? - Валтӥсез ужпум - республикаысь эмъян учреждениослы вирез, солэсь лэсьтэм эмъюмъёсты келян. Вирлэсь препаратъёс ӵемгес кутӥсько операциос лэсьтон дыръя, нылпи вайыку но нылкышно висёнъёсты эмъянын, пыктосэз бурмытонын. Ижевскын сяна, вир басьтон станциос ужало Сарапул, Воткинск городъёсын, ӝыныяз пала ёрос центръёсын. Бускель улосъёсын кусып ум возиське, малы ке шуоно, огкылъёс гожтоно, солы нош ик коньдон кулэ. Соин ик, кылсярысь, Ярысь висисьлы бускель Киров областьысь вир вайыны уг луы, Ижевсклэсь матынгес ке но. - Вирез басьтон, солэсь эмъюмъёс лэсьтон дуно усе-а? - Туж дуно. Нырысь ик, бадӟым дуныз пластикатной таралэн - отын вирез утё. Собере, донорлы пичи уждунлэн 20 процентэз мында коньдон сётӥське, со сяна, компенсация (быдӟалаез герӟаськемын вирлэсь кыӵе люкетсэ сётэмен - шуом, плазмазэ яке иммунной плазмазэ). Куинетӥез, станциын ужасьёслэн уждунзы... Нялтас вераса, вир возён тараез, пакетъёсты, м доры вуттэ Москваысь фирма, дунзэ долларъёсын куре. 18 сентябре, манет куашкамлэсь азьвыл, ми пунэме кыльыса ке но, басьтыны быгатӥськом вал продукцизэс, табере "коньдонтэк ум ни сётэ" шуизы. - Одӥг донор 400 миллилитр вир сётэ. Нуналскын 50 адямилэсь басьтыса, ичи уг люкаськы кадь.. - Ичи. Секыт висисьёс вирез кӧня ке нунал ӵоже витёно луо. Калыклэн вирзэ сётыны мылкыдыз ӧвӧл. Социализм вакытэ асьмеос ог-огедлы юрттон, астэ жалятэк мукетыз сярысь сюлмаськон мылкыдын улӥм. Али та ӟеч сямъёсмес чылкак ыштӥмы ни, лэся. Ас мылкыд каремзыя ми доры шер вуыло. Со сяна, азьвыл, куке ваньмыз ужало вал, доноръёслы сётӥськись кык шутэтскон нунал туж вылӥ дунъяськылӥз. Нош табере кинлы кулэ на со шутэтскон, ӝыныез калык ужтэк пуке бере. Вир сётэмез понна адямилы пичи уждунлэн 20 процентэз мында коньдон тыриськыны кулэ. Уксёмы вань ке, тыриськомы, ӧвӧл ке... Тӥни озьы, улонлэн воштӥськемез но, бюджетлэн начармемез но доноръёслэн лыдзы вылын шӧдӥське. Али адямиос вирзэс сёто ӵыжы-выжызылы, тодмозылы гинэ, сыӵе кулэлык, Инмар мед утёз, кылдэ ке. Предприятиосы, ёросъёсы вир басьтон вылысь потанъёс "вуно" ини. Кивалтӥсьёслэн "эн лыктэ" шуэмзы потэ, вылаз ик, асьмелэн коньдонмы ӧвӧл. Вир, ву сямен, кранэтӥ уг бызьы, сое уд витьы ошмесысь, уд басьты аптекаысь. Ми сое тросэн люкаса возьыны гинэ но ум быгатӥське, азьланяз кутон понна. Бускель улосъёслэн сыӵе луонлыкъёссы вань, таин валче соослэн шуг-секытъёссы но ичигес. Нош милям оборудованимы, холодильникъёсмы 20-30 ар ӵоже ужасьёсыз вань. Холодильникъёсмы фреон вылын ужало. Тодӥськоды-а тӥ, фреонэз 2000-тӥ арысен кутыны лэземын ӧвӧл ни шуыса, малы ке шуоно, со омырез кырсёмытэ но Музъем котырысь озонэз пася, векчиёмытэ. Западын фреон вылын ужась холодильникъёсты уг потто ни. Нош ми, долларлэн дуныз будэмен валче, выль холодильникъёс, мукет оборудование басьтыны ум быгатэ. Уждун гинэ но тырыны моӵмы уг тырмы - ньылетӥ толэзьзэ коньдон басьтытэк ужаськом. Дунтэмгес но капчигес ӧй луысал-а, вирез адями киосын кылдытэм арбериен воштыса? - "Лыз вирез" кылдытон бордын учёнойёс ужало. Асьме учёнойёс Япониысь но США-ысь тодосчиослэсь та ласянь бере уг кылё. Но улэп вирлэсь ӟечгес арбери шедьтэмын ӧвӧл на. - Кин уг быгаты вирзэ сётыны? - Та удысын кышкытлыклэсь утиськон берло дыре нырысетӥ интые потӥз. Адямиез кулэмлэсь гинэ утёно ӧвӧл - мукет висёнъёсын черламлэсь но. Малы ке шуоно, вир пыр паласькись висёнъёс туж трос, соос пӧлын гепатит (тодмо 8 турлыез), сифилис, СПИД... Ӵужектонэн висемъёс ваньмыз милям компьютерамы пыртэмын. Со сяна, ми венерологической диспансерен но госсанэпиднадзорен кусып возиськом. Басьтэм вирлы анализ лэсьтӥськом. Соя валаны луэ, висе-а адями, уг-а. Котькудзэ донорез милям врачъёсмы эскеро на. Висисьлы вир кулэ луэ ке, ми дас адямиез ӧтиськом. Малы сыӵе трос - юалоз куд- огез. Но чаклалэ ай асьтэос. Соос пӧлысь, шуом, куинезлы вирзэ сётыны ум лэзе, куинезлэн-ньылезлэн вирзы анализъя уз ортчы. Озьыен, кыле кык яке куинь мурт. х х х "СССР-ысь дано донор" но "Россиысь дано донор" пусэн пусъем муртъёс Россия Федерацилэн законодательствоезъя быгато: 1) больницаосын черодын сылытэк эмъяськыны; 2) пинь протезъёсты дун тырытэк лэсьтыны но тупатъяны; 3) аптекаосын врачлэн рецептэзъя эмъюмъёсты ӝыны дунын басьтыны; 4) санаторийёсын. курортъёсын эмъяськыны путёвкаосты пичиятэм дунын басьтыны; 5) городысь транспортын дун тырытэк ветлыны; 6) коммунальной юрттэтъёс понна дунлэсь ӝынызэ тырыны; 7) юртъер пуктон вылысь льготной ссуда басьтыны. Вир сётонъя станциын ужасьёслэн валэктэмзыя, та законэз быдэсъянын кык могӟет шеде. Нырысь ик, вань та льготаосты быдэсъян понна, республикалэн бюджетаз коньдон чакламын ӧвӧл. Вылӥ верам юрттэтъёс пӧлысь Ижевскын умой-умой быдэсъяське витетӥез гинэ: СССР-ысь но Россиысь дано доноръёс автобусэн, троллейбусэн но трамваен дун тырытэк ветло. Кыкетӥез. Та дано нимез басьтон понна, адями вирзэ ньыльдон пол сётыны кулэ. Сыӵеос Удмуртиын ог сюрс мурт. Нош "СССР-ысь дано донор" но "Россиысь дано донор" ним сётэмын куинь сю витьтонэзлы гинэ. Кылемез возьмало, ку документъёссы берытскозы (пӧртэм инстанциостӥ 3-4 ар ӵоже ветло) яке ку Удмуртиысь Тазалыкез утёнъя министерстволэн вань документъёсты лэсьтыны коньдонэз луоз. О. ВАХИТОВА. КЫЗЬЫ УЛӤСЬКОД, ПИЧИ ГУРТ? Татын сылӥз ГЭС Школаын дышетскыкумы, Иван Дядюковлэсь "Балтач ГЭС" кылбурзэ одно ик нокытчы учкытэк вераны косо вал. Тани отысь кӧня ке чуръёс: Чутрес кыстӥське Иж шурлэн мур ӧрез, Кыдёке адӟиське Балтач пал меӵ ярез. Ярдурысь ярдуре Шуккиське гыась ву, Кожъёсысь кожъёсы Тулкымен бызьыкуз. Кызь одӥг колхозысь Калыкъёс Балтаче Тыршыса ужаны Мыныло огазе... Тӥни со дырысен ини малы ке одно ик Балтач палъёсы вуылон сярысь малпалляса улӥ. Ижевскысь Можгае мынон сюреслэн урдэсказ сылэ со гурт, Оӵ шурлэн сопалаз. Нош машинаен ке мыноно, ог 8 иськемез ортчоно, потоно Изгурт пыр. Нюлэс сюресъёс кузя нуназе пал вуим Балтаче. Куштӥськем гуртлы укша со. Тросгес уло городысь шутэтскыны лыктэмъёс. Азьвыл улӥсьёс пӧлысь пумиським Любовь Абыеваен (снимок вылын). Вуэн ужась электростанция сярысь юалляськиськом. "Мон соку пичи на вал ай, ваньзэ умой уг тодӥськы ни", - шуэ Любовь Максимовна. Ваським Оӵ шур дуре. Зэмзэ но, азьвыл плотина бервылын вуэз шукыръяськыса бызе. Татын азьло ӵыпет вылэм шуыса, тодазы вайыто вырйылъёс гинэ. Иж вамен потаны лэсьтэмын огдырлы ошем выж. Гуртын улон толалтэ чалме, шуыны луоз. Сюресъёсты лымы соге. Ву ӧвӧл, колонкаос уг ужало. Собере одӥг ужан инты но ӧвӧл татын. Куке-соку пудо но вордылӥллям. Али Балтач аналтэмын. Но ведь Дядюков гожъямъя, ГЭС-эз лэсьтонэ колхозысь 21 адями ветлэм. Озьыен, улон пӧзе вал татын. Табере солэн тусбуез кылиз на кылбуре гинэ: Ильичлэн лампаез Югдытэ улонэз, Азьланьзэ ужаны Юнматэ кужымез. Тём пеймыт уйёсы Ульчаос югытэсь - Югдытэ гуртъёсты Иж вылысь Балтач ГЭС. (И. Дядюков). Н. ЛЯЛИН. Снимок вылын: Балтач гуртын; Любовь Абыева; татын сылӥз Балтач ГЭС. Туспуктэмъёсыз В. КАМАШЕВЛЭН. Сӥльлэсь кубистаен кин вуёмем Кызьы тодмо, витаминъёс уг тырмо ке, адями висьыны кутске. Учёнойёс малпамъя, ракен висисьёс пӧлысь 80-85 процентэз ӧй черласалзы, мугоразы витаминъёс окмымон луысалзы ке. Нош кызьы тодоно, кыӵе витамин уг тырмы, врачъёс дортӥ ветлытэк, нимысьтыз эскеронъёс ортчытэк. "Будь здоров" журналын та ласянь дэмланъёс сётэмын. Газетмес лыдӟисьёслы но соос тунсыкоесь потозы шуыса малпаськом. Куд-ог адямиослэн, ӧжыт гинэ шуккиськыса но, лыз-вож виштыос кылдо, соос кема уг ортчо. Со возьматэ, мугорын С витамин (аскорбиновой кислота) но Р (рутин) уг тырмы шуыса. Озьыен. тросгес сиёно апельсин, кубиста, помидор. Нош сиськем бере апельсин, мандарин яке лимон кӧм одно ик сиёно на. Йыр бергамлэн, пельёсын ялан жон ваземлэн мугъёсыз В3 но Е витаминъёс, марганец но калий тырмымтэен герӟаськемын луыны быгатэ. Таӵе дыръя юрттозы орехи, вож кӧжы, курег пузлэн ӵужез, апельсин, банан, шундыберган тысь. Синъёсты куректыло, ӵыжектыло, йыды ӵем пота ке, А но В2 витаминъёс уг окмо, дыр. Малпаське, тырмыт-а сииськоды чорыг, мус, курег пуз, скал вӧй яке нӧкы, йӧл, сыр, сур маял (пивные дрожжи). Та сиёнъёс ӝӧк вылады нуналлы быдэ мед луозы. Йыре киль потэ В12, Б6, Ф витаминъёс но селен тырмымтэысь. Реклама сое шампуньёсын быдтыны косэ. Нош врачъёс дэмлало мус, сӥль, йӧл (В12 витаминэз вань), кӧс вой, орехи но шундыберган тысь (Ф витамин понна), сугон, помидор, выжызэ лэзем ю тысез (селенэз трос) сиыны. Чигылӥсь, пурысьтась, векчи йырсиоосты "эмъяно" В, Ф витаминъёсын но йодэн. Йырсиды чилясь, пуштырес мед луоз шуыса, нуналлы быдэ сиёно йӧл, зарезь сиёнъёсты (кылсярысь, зарезь кубистаез), йодэн сылал. Пыэдэн, мукет паласькись висёнъёсын ӵем черлась муртлы А но В5 витаминъёс кулэ. А витаминэн узыр чорыг, мус, курег пуз, скал вӧй, йӧлвыл, ӵуж но гордалэс-ӵуж бакча сиёнъёс, тужгес ӵужкушман. В5 витаминэз маялысь, бобы кӧжыысь, дыняысь шедьтыны луоз. Умме усьыны быгатымтэлэн, вазь сайкамлэн мугъёсыз В, Н витаминъёслэн, калийлэн но кальцийлэн тырмымтэенызы герӟаськемын луыны быгатэ. Таӵе учыре бобы кӧжы, изюм, дыня, банан, шундыберган тысь, мус, рис, йӧл, пекля, чорыг, курег пуз ӵемгес сиылыны кулэ. Нылпиос чальгес мед будозы шуыса, соослы, белок сяна, цинк но В группаысь витаминъёс кулэ. Цинк трос бакча сиёнъёсын, ю тысьын, тыква но шундыберган тысьын. Нош В витаминъёс сярысь поттылӥм вал ини. Нырысь вир ӵем кошкылэ ке, мугорын С, К но Р витаминъёс уг тырмо шуыса малпан кылдэ. Умой луысал, помидор, кубиста, вож перец, апельсин, сутэр (С), чорыг вӧй, йогуртъёс, люцерналэсь вож куаръёссэ (К), апельсин, лимон яке мандарин кӧм ӵемгес сиысалды ке. Троссэ сюлмаськытэ кулэн висёнъёсыз. Кылсярысь, ымныре горд виштыослэн но сьӧд точкаослэн кылдэмзы. Со возьматэ, В группаысь витаминъёс но А витамин уг тырмо шуыса. Дерматит В но Н витаминъёс окмымтэен луэ. Н витамин трос маялын, орехиын, мусын, пекляын, рисын. Экзема кема дыр ӵоже уг ортчы ке, ӝӧк вылады нуналлы быдэ луыны кулэ В но А витаминъёсын узыр сиёнъёс, со сяна, врачъёс дэмлало на кӧё-вӧёгес сиськыны. Экзема дыръя йод уг тырмы, озьыен, йӧл, зарезь сиёнъёсты, йодэн сылал сиёно. С витамин яраосты но чигем лыосты бурмытэ на. Д витамин (чорыг вӧй, нӧкы, курег пуз, мус) но кальций (йӧл, чорыг, сыр, орехи, шундыберган тысь) лыосты небӟемлэсь но пиньёсты куашкамлэсь утё. Валамон, ваньзэ вылӥ верам витаминъёсты аптекаысь басьтыны луоно. Но, нырысь ик, соос пӧлысь куд-огез туж дуно, кыкетӥез, пайда интые, изъян но вайыны быгатозы Нош сиён-юонысь организм басьтоз витаминъёсты, кӧня солы кулэ но кыӵезэ кулэ. Ӟечбур, выль сюрес! Уй пал районъёсы бадӟым кивалтӥсьёс сокем ик ӵем уг вуыло. Солэн мугез но вань: кышкато сюресъёс. Оло, табере та палась калыклэн улэм-вылэмез вылӥысен но адӟиськоз. 22-тӥ сентябре усьтӥськиз Балезиноез Карсоваен герӟась асфальтэн шобыртэм выль сюрес. Ужрадэ пыриськизы Кун Кенешлэн Тӧроез А. Волков, Кун Кенешысь Агропромышленность удысъя, музъем кусыпъёсъя но инкуазь узырлыкъёсты кутонъя ялан ужась комиссилэн кивалтӥсез А. Малков, "Удмуртавтодор" предприятилэн кивалтӥсез А. Соловьев. Югдурез утёнъя министр В. Щербаков, Балезиноысь администрацилэн йырыз Р. Касимов но районысь депутатъёслэн Кенешсылэн тӧроез А. Наговицын. Асьме республикалэн карта вылаз куке-соку нимаз гожъёсын пусъемын вал Карсовай район. Бӧрысь сое огазеязы Балезино районэн. Огазеяны огазеязы, нош умой сюресэн герӟаны ӧз вуттэ.Озьы кема аръёс ӵоже карсовайёс но та палась гуртоос "Камчаткае" сюризы. Глазове но, Балезиное но шуак уд сюры. Югдур умойгес луиз выльдӥськон кутскон вакытэ. Асфальтэн шобыртэмын вал Ижевск - Глазов сюрес. Балезиноысь Карсоваёзь но сюрес лэсьтыны кутскизы. Мынам лыдъямея, та уж тямыс ар талэсь азьло мытэмын вал. 30 иськемез сюрес асфальтэн шобыртэмын ик вал. Ӵапак вуттӥзы мынам вордскем Люк гуртэ дорозь. Нош карсовайёслы таӵе шуд берлолы кылиз. Ӝыныё лэсьтэм сюрес вылтӥ рейсовой автобусъёс озьы ик ӧз ветлэ. Тӥни соку "Мир" колхозлэн азьвыл председателез Александр Вячеславович Наговицын калыкез станцие нуллыны кык автобус висъяз. Туэ районъёсын ортчем быръёнъёс дыръя Александр Вячеславовичез депутатъёслэн Кенешсылы кивалтӥсе бырйизы. Карсоваёзь сюрес усьтон солэн но огез бадӟымез сюлмаськонэз луиз. Кема мынӥз эчешон: кинлы осконо та сюреслэсь быдэстымтэ люкетсэ йылаз-пумаз вуттонэз? Куинь но ӝыны ар талэсь азьло вазиськизы "Удмуртавтодор" кун предприятилэн кивалтӥсезлы Александр Васильевич Соловьевлы. Со кыл сётӥз: - Котькытын мон мед ужалом, но Карсовае сюрес луоз! Нош али, сюрес усьтонлы сӥзем митингын, калык азьын со тазьы шуиз: - Сётэм кылме быдэстӥ. Зэм, кӧня ке янгышай. Сюресэз усьтыны чакламын вал 15 сентябре. Сизьым нуналлы беромим. ... Тани со, кема возьмам нунал. Митинге калык, оло, дырызлэсь вазь но люкаськем. Куноосты возьмаса, кыдырась зор улын адямиослы кема гинэ сылоно луиз. Сюрес лэсьтонын тыршыса ужамъёс пусъемын вал Данъян грамотаосын. Соос пӧлын - трос гинэ егит пиос, военной службазэс лэсьтӥськисьёслэн частязы нуисьёс. Собере Кун Кенешлэн Тӧроез А. Волков та сюресэз лэсьтӥсьёслэн кивалтӥсьёсыныз ӵош горд лентаез вандӥзы. Ужрадэз шулдыртӥзы Карсовайысь артистъёс но военнойёслэн духовой оркестрзы. Сюрес усьтэмын. Со выль кужымен кутске ужаны. Кемалы мед чидалоз адямиосты герӟась вирсэр. Татьяна БАННИКОВА. Туспуктэмъёсыз Николай ГЛУХОВЛЭН. Ужан интыос кылдо Ар талэсь азьло "Ижмаш" акционер огазеяськонлэн мотоциклъёс бичан производствояз "Ижмотозип" ёз кылдытэмын вал. Кутскиз со мотоциклъёслы воштос ёзъёс дасяны. Али соосты 400 пумо потто ни. Нош сое басьтыны мылкыд карисьёс трос гинэ вылӥллям. Умоесь кусыпъёс тупатэмын ни СНГ-ысь но Россиысь улосвылъёсын. Алигес гинэ уно воштос ёзъёс келямын Москвае но Мурманске. Воштос ёзъёсты тросэн поттон заводлы шӧдскымон барыш сётэ. Озьы ик кылдӥзы выль ужан интыос но. Н. СЕМЕНОВ. Валэктэ юрист Сэрегез нуэ адвокат Лилия Шкляева Кык интыын ужан Быгато-а одӥг муртлы тырыны кык уждун - кунлэсь но колхозлэсь? Можга районысь "Совет" колхозын ужасьёс. Таӵе мудрон юанлы валэктон утчано луиз вуж документъёсысь. Кемалась, 1989-тӥ арын 9-тӥ мартэ, СССР-ысь Ужъя кун комитет, Юстицияя министерство но Профессиональной союзъёслэн всесоюзной центральной советсылэн (ВЦСПС-лэн) секретариатэз юнматӥзы 81/60 4-К-3/6-84 номеро постановление. Отчы куд-ог воштонъёс пыртэмын 1990-тӥ арын 15-тӥ августэ. Вераськон мынэ совместительство сярысь - огдыре кӧня ке интыын ужан сярысь но. Вылӥ верам постановлениысь куд-ог люкетъёс туннэ но кужыме кылемын, соос тупало ке Россия Федерацилэн Конституциезлы но Уж сярысь законъёсын кодексэзлы. Совместительство - нырысетӥ, валтӥсь (основной) ужез сяна, ваньмон дыръя музон ужез договоръя но уждун басьяса быдэсъян. Кыкетӥ уж луыны быгатэ ас предприятиын но, мукетаз но. Кыкетӥ уже пырон понна, нырысетӥ ужысь администрацилэсь но профкомлэсь нокыӵе справказэ табере куроно ӧвӧл ни. Но предприятиослэн кивалтӥсьёссы профкомен ӵош куд-ог адямиосты кыкетӥ уже пыронлэсь алыны быгато. Ку? Нырысетӥ уж герӟаськемын ке кыӵе ке нимысьтыз аспӧртэмлыкъёсын но режимен, кыкетӥ уж шӧдӥськыны быгатэ ке адямилэн тазалыкез вылын, кышкытлык кылдытэ ке нырысетӥ ужлы. Сыӵе ик алон вань 18 арес тырмымтэ муртъёс но секытэн нылкышноос понна. Уг яра кык интыын кивалтон ужез быдэсъяны. Кыкетӥ интые лыктыкуз, адями мед возьматоз паспортсэ, нош нимысьтыз тодон-валан кулэ ке - дипломзэ яке музон документсэ. Кыкетӥ интыын ужан нунал медаз кыстӥськы тупатэм дырлэсь (4 часлэсь) кема, яке шутэтскон нуналэ 8 часлэсь кема. Куд-ог удысъёсын ужан вакытэз 4 часозь вуттыны шуг. Соку профсоюзэн герӟаськыса луэ та дырез кузёмытыны, но толэзьскын со медаз люкаськы тупатэм мындалэсь уно - толэзь ӵоже ужан дырлэн ӝыныезлэсь ятыргес. Кыкетӥ интыын отпуск сётӥське нырысетӥ интыын отпускен ӵош. Ужан книжкае кыкетӥ интыын ужам сярысь гожтыны быгатэ нырысети интыысь администрация, адями ачиз озьы мылкыд каре ке. Кинъёс уг быгато кыкетӥ уж басьтыны? Банкысь служащийёс, Югдурез утёнъя министерствое пырись ёзъёслэн, подразделениослэн, предприятиослэн кивалтӥсьёссы но таосызлэн воштӥсьёссы, кун служащийёс (наукае но дышетонэ пыриськонэз вератэк). Кыкетӥ уж уг лыдъясько таӵе удысъёс: 1. Литератураен вырон, редактированиез но рецензиос лэсьтонэз вераса, дун тыриське ке гонорар чотын. 2. Техника, медицина, бухгалтерия удысын экспертиза лэсьтон, дун тыриське ке огпол. 3. Дышетон, ужам дыр арскын 240 часозь уг вуы ке. 4. Тазалыкез утён интыосын эмъянъя визь-кенеш (консультация) сётон, ужам дыр толэзяз 12 часлэсь ятыр ӧвӧл но уждун огпол гинэ тыриське ке. 5. Наукая но дышетонъя учреждениосын аспирантъёсын кивалтон. 6. Наукая институтъёслы, дышетон заведениослы консультациос сётъян. 7. Предприятиосысь но организациосысь адямиосты договоръя дышетон. 8. Кабинетъёсын, лабораториосын но дышетонъя комиссиосын кивалтон. 9. Нотаос гожъян. 10. Экскурсиос ортчытъян. 11. Мукет ужъёс, нырысетӥ интыяз адями быдэс нунал ӵоже уг ужа ке. 12. Оклад вӧзы ватсаса уждун басьтыса ужан. Вылӥ верам гожтэтын верамын ӧвӧл, кыӵе интыосын но кин басьтэ кык уждун. Юанлы соин ик меӵак валэктон сётыны уг луы. Юан юанэн ик кыле Кун Кенешысь Наукая, образования, культурая но егитъёсын ужанъя ялан ужась коммисия кенеш ортчытӥз. Отын эскеремын вал Кун Кенешлэн 21-тӥ сессияз поттыны дасяськись ужпумъёс. Депутатъёс огкылэ вуизы Удмурт Республикаысь кун промышленностья политика сярысь но Удмурт Республикалэн улосвылаз вузкаронлэсь налог басьтон сярысь законопроектъёсты, ӵектонъёс пыртыса, сессиын эскерыны. Сессиын озьы ик эскеремын луоз республикаямы улон-вылон но экономикаын кылдэм югдур. Кызьы шуиз комиссилэн кивалтӥсез Алла Еременко, та ужпумлы тужгес но бадӟым саклык висъяны кулэ. Коммиссилэн кенешаз эскеремын на вал дышетон но культура удысъёслэн выль дышетскон арез кутскемзы но дышетон учреждениослэн толлы дасяськемзы сярысь. Дышетон учреждениослэн котькытын сямен ик огсыр ужамзы буйгатэ ке, тол кезьытъёслэн матэктэмзы шуг-секытъёстэк уг ортчы. Шуныт сётонъя но эстӥськонъя югдур туж лэчыт сылэ. Матэктэ дышетӥсьлэн нуналэз. Нош кыӵе мылкыдын пумиталозы асьсэлэсь праздниксэс шаерысьтымы дышетӥсьёс, куд-ог районъёсын уждун май толэзьлы но тырымтэ ке. Юан та нуналлы но юанэн ик кыле. Адӟем карымон Коньдон банкъёсы медаз кугӟа "Межрегионгаз" огазеяськон азьын пунэме кылеменызы валче республикаослэн, областьёслэн но городъёслэн кивалтӥсьёссы утчало пунэмъёсты берыктыны луонлыкъёс. Шуг-секытъёс герӟаськемын тани маин: калык газ понна дыраз но кулэезъя тыре, но солэн коньдонэз "Межрегионгазлы" уг вуы, соин валче бюджетэз но уг тырмыто. Тулаын, Рязаньын, Новгородын, Орёлын, Ухтаын но куд-ог мукет городъёсын та ужпумез быдэстыны амал шедьтӥллям, огъя тырон центръёс кылдытыса. Кылсярысь, Тулаын газ, электрокужым, шуныт, шуныт ву понна тырем коньдон банкъёстӥ уг "калтырты" - огъя центре люкаське, собере газэн вузкарисьёслы люкылӥське, кӧня газ вузамзэс лыдэ басьтыса. Коньдонэз кинлы но кӧня люкем сярысь иворъёс вуо "Межрегионгазэ" но городысь администрацие. Озьыен, газ понна тырем коньдонлэсь "сюрессэ" эскерыны луоно. Газ понна тыронъёсты огъя центр пыр ортчытон юрттэ, нырысь ик, котькудзэ тырисез нимаз лыдэ басьтыны. Кыкетӥез, солэсь луонлыкъёссэ тодыны но кулэ дыръя дотация сётыны. Тӥни озьы, огъя тырон центр социальной ужпумъёсты быдэстэ, бюджетэз тырмытыны юрттэ. Тулаысь таӵе центръёслэн ужамзы тунсыко потӥз мукет улосъёсысь кивалтӥсьёслы но. Соослэн тыршеменызы тодматскон понна, Тулаын 23-26 сентябре люкаськозы городъёслэн но "Межрегионгазлэн" кивалтӥсьёссы. "Межрегионгазлэн" пресс-службаез. Коньдонъёс но тыронъёс Туннэ Удмурт Республикаысь Кун Кенешлэн Тӧроез Александр Волков пыриськоз Россия Федерациысь Правительстволэн паськытатэм заседанияз. Отын вераськон мыноз странаямы кылдэм секыт югдурысь потон ужпумъёс сярысь. Со сяна, Россиысь Правительстволэн Тӧроез Евгений Примаков пумиськыны кулэ улосвылъёслэн кивалтӥсьёсынызы. Нош кылем кӧс нуналэ А. Волков кенешон ортчытӥз Кун Кенешын но Правительствоын ужасьёсын, коньдон ужпумъёсъя ёзъёслэн кивалтӥсьёсынызы выт бичанъя инспекциын но полициын ужасьёсын, валтӥсь предприятиослэн кузёосынызы. Секыт югдурысь потон понна экономикаез бурмытонъя нимысьтыз программа кутоно, шуиз А. Волков, - сыӵе программаез али котькытын, котькуд удысын туж кулэ каро, кызьы федерациысь, озьы ик улосвылъёсысь властьёс но. Программалэн тужгес но валтӥсь интыез луэ промышленностез ӝутон. Соин ик, али ваньмылы промышленностез ӵошен улӟытон пумысен огкыл шедьтыны кулэ. Со сярысь мон иворто Россиысь Правительствоезлэн Тӧроеныз кенешон ортчон дыръя но. Пумиськон пайдаё ортчиз. Тужгес но лэчытэсь ужпумъёс пӧлын вал: обороная заказъёсты быдэстэм понна федеральной бюджетысь пунэм тыронъёсты берыктон, - со коньдон нырысь ик уждунлы мыныны кулэ; поттэм вузъёс понна дыраз коньдон висъян; предприятиослэсь улон интыоссэс но соцкультбытъя объектъёссэс городлы сётыны федеральной бюджетысь коньдон тыронэз радъян. "Ижмаш" огазеяськонлэн генеральной директорезлэн В. Гродецкийлэн верамезъя, социальной удысэз возёнлы предприятие та дырлы тыриз 76 миллион манет, нош со тырмысал 4 толэзь понна уждун тырыны. Коньдонэз нокыӵе ӝегатсконъёстэе висъян пумысен кенешыку, промышленность удысын тыршисьёс веразы уксёзэс кун банкъёсы выжтыны дась луэмзы сярысь, но соку коньдонлэн бергамез котькудӥзлэн син азяз мед возиськоз. Удмурт Республикаысь Национальной банклэн кивалтӥсез Равиль Каримов лыктэмъёсты оскытӥз предприятиосын коньдон ласянь ужаны вань луонлыкъёс кылдытэмын луозы шуыса. Но солэн верамезъя, та ласянь ужпум эскериськыны кулэ федеральной центрын но. Та ӵектонэз умоен лыдъяса, А. Волков таяз пуксёнэ со пумысен ивортоз Россия Федерациысь Правительстволэн Тӧроезлы Е. Примаковлы, со дорын губернаторъёслэн ортчоно кенешазы. Коньдон ужпумъёсты государство ласянь эскерон амалэз одно ик берыктоно, со пумысен вераз республикаысьтымы налогъёсъя инспекцилэн кивалтӥсез Владимир Орехов. Огшоры эскеронъёс гинэ но возьматӥзы: туэ элькунысьтымы котькудӥз банк, шорлыдын вераса, коньдон ужпумъёсъя куронъёсты ог сю пол тӥялляз. Азьланяз быдэстоно ужпумъёс пӧлын пусъемын вал таӵеосыз: Россия Федерациысь кун промышленностьлэсь ужан политиказэ радъян, озьы ик оборона удысъя; Россилэн Правительствоез ласянь мукет странаосын, озьы ик СНГ-е пырисьёсыныз но (Беларусь Республика) военно-технической удысын ужаны луонлык сётон; банк удысын государстволэсь ужзэ кужмоятон, куд-ог банкъёсты национализизировать карон; СССР- лэсь но Россилэсь пунэм тыронъёссэ берыктон ласянь система кылдытон. Йылпумъянъёс лэсьтыса, А. Волков люкаськемъёслы ивортӥз Россия Федерациысь Правительствоезлэн нырысетӥ вице-премьереныз Юрий Маслюковен азьланьын пумиськонэз сярысь, соку вераськон мыноз Удмурт Республикаын социально-экономической ужпумъёс пумысен. Отчы пыриськозы Россиысь экономикая но коньдон ужпумъёсъя министерствоосын ужасьёс. Кун Кенешлэн Тӧроез пусйиз, дыр вуиз уж борды ӝот-ӝот басьтӥськыны. Калык хозяйствоез пайдаё ужатон понна нырысь ик сюлмаськыны кулэ республикаысь кивалтӥсьёс. Удмурт Республикаысь Кун Кенешлэн пресс-службаез. Каракулино администрациысь социальной удысын ужасьёс дӥнязы вазиськисьёсты котьку сак кылзо, быгатэмъязы юрттэт но сёто. Нош кивалтэ та удысэн Владимир Николаевич Кашин. Сабырлы воргорон сюлмаське ёросысь егитъёслэн улон-вылонзы понна но. Та вакытэ Каракулино ёросын 15 сюрс пала улӥсез. Со пӧлысь вить сюрс мындаез школаосын дышетскисьёс но куамын аресозь егитъёс луо. Кылдытэмын "Каракулино ёросысь егитъёс" программа. Озьы ик тросгес саклык висъя на пӧртэм нациен калыкъёслы. Уго, ӟучъёс но удмуртъёс сяна, ёросын уло на поръёс, бигеръёс но башкиръёс. Котькудӥныз огъя кыл шедьтэмез ик юрттэ луоз, Каракулиноя социальной ужпумъёсты ӟеч быдэсъяны. Туспуктэмез В. КАМАШЕВЛЭН. "Удмурт Республикаын вузкарон надбавкаосты тупатонъя огдырлы рад сярысь Удмурт Республикаысь Правительстволэн Постановлениез 1998 ар 21 сентябрь Ижевск город � 865 Удмурт Республикаын нырысь ик кулэ луись вузъёслы но юрттэтъёслы дунъёсты юнме шорысь будэмлэсь утён но Удмуртиысь Правительствоен 1998 арын 8 сентябре кутэм "Басьяськисьёсты дунъёслэн юнме шорысь будэмзылэсь утён сярысь" 825 номеро постановленизэ азинтон понна, Удмурт Республикаысь Правительство пуктэ: 1. 1998-тӥ арын 1-тӥ ноябрёзь предприятиос но организациос понна, асваньбурез кыӵе амалэн кутэмзы но кыӵе ведомствоысь луэмзы шоры учкытэк, но, юридической лицо кылдытытэк, ужбергатонэн вырись гражданъёс понна юнматоно вузкарон надбавкаослэсь (наценкаослэсь) вылӥ быдӟалазэс, приложениез лыдэ басьтыса. 2. Посредниклэсь (оптовой, вузэз ваёнъя-вузанъя, посреднической организациослэсь) кунэн чаклам дунъёсъя (тарифъёсъя) басьтэм продукциез (вузъёсты) лыдзэ чаклатэк вузаку, вузкаронлэсь вылӥ надбавказэ люконо, вузъёслэсь лыдзэс чаклатэк, посредник но калыклы вузъёсты вузась организация (юридической лицо кылдыдытэк ужбергатонэн вырись гражданин) куспын, люконо коньдонлэсь быдӟалазэ куспазы кенешыса юнматоно. 3. Удмурт Республикаысь Правительстволэн 1998 арын 20 мартэ кутэм "Дунъёсты (тарифъёсты) кун ласянь чакланэз радъянъя ужрадъёс сярысь" 176 номеро постановлениеныз юнматэм Продукциен (вузъёсын, юрттэтъёсын) переченьлэсь 2-тӥ ёзэтэзлэсь кутӥськемзэ. Та переченьын продукцилэсь (вузъёслэсь, юрттэтъёслэсь) дунъёссэс тупатэ Удмурт Республикаысь Правительство дунъёсты кун ласянь радъян чотын, вузкарон надбавкаослэсь (наценкаослэсь) вылӥ быдӟалазэс юнматыса. 4. Кужымзэ ыштэмен лыдъяно 1998 арын 8-тӥ сентябре юнматэм Удмурт Республикаысь Правительстволэн "Басьяськисьёсты дунъёслэн юнме шорысь будэмзылэсь утёнъя огдырлы ужрадъёс сярысь" 825 номеро постановлениезлэсь 3 ёзэтсэ. 5. Та постановленилэсь быдэсъяськемзэ эскерыны косоно Удмурт Республикаысь Тарифъёсъя но дунъёсъя кун комитетэз. 6. Та постановление кужыме пыре иворъёсты вӧлмытӥсь ёзъёсын печатлам нуналысен. Удмурт Республикаысь Правительстволэн Тӧроезлэсь ужзэ быдэсъясь Ю. С. Питкевич. Калыкен басьтоно продукция но вузъёс, кудъёсызлэсь дунзэс радъя кун, вузкарон надбавкаослэсь вылӥ быдӟалазэс юнматыса � вузлэн (продукцилэн) нимыз вузкарон надбавкалэн (наценкалэн) вылӥ быдӟалаез Продукциез поттӥсьёслэн дунзылы процентэн 1. нянь но мукет пыжиськемъёс - 30 2. йӧл но йӧллэсь лэсьтэм сиён-юонъёс - 25 3. сӥль но сӥльлэсь лэсьтэм сиёнъёс, тылобурдо сӥль но солэсь лэсьтэм сиёнъёсты пыртыса (туж дуноосыз сяна) - 25 4. пызь - 20 5. кеньыр - 20 6. макарон-лапшаос - 20 7. сылал - 40 8. сакыр песок - 40 9. кӧс вӧй - 40 10. курег пуз - 20 11. шырпы - 40 12. майтал но мисьтаськон порошок - 40 13. школалэн, профтехучилтщеослэн, среднеспециальной но вылӥ учебной заведениослэн сиськонниосазы басьтӥськись продукция (вузъёс) - 30 (басьтыса ваем дунэзлы). Кытчы ышиз коньдон? Дуннеысь коньдон ужпумъя организацилэсь пунэмаса басьтэм коньдонысь одӥг долларез но кулэезъя кутэмын ӧвӧл, ивортӥз Кун Думалэн спикерез Г. Селезнев, Россиысь ужбергатӥсьёсын пумиськыкуз. Со пусйиз: Лыдъян палата эскерыны кулэ кытчы но кызьы кутӥськемын 1 миллиард 400 миллион доллар. Сомында коньдон сётӥзы дуннеысь коньдон ужпумъя организациос, Россиын экономикаез ӝутон понна. Таӵе югдуре вуэм понна янгыш коньдон ужпумъёсъя ужез быдэсъясь Михаил Задорнов, вераз Г. Селезнев. Вылӥ суд прокуратурае вазиськон ыстӥз, Коньдон ужпумъёсъя министерстволэсь кивалтӥсьсэ кыл кутытыны косыса. Иворъёсъя национальной служба. Ёрослэн арняез Селталась ёрос администрацилэн кичӧлтэмезъя, та нуналъёсы районлэн арняез ортчиз. Арня ӵоже сельсоветъёсы вуылӥзы кивалтэт ёзъёсын ужасьёс, депутатъёс, ёрос больницаысь эмъясьёс, культура отделын ужасьёс. Соос тодматскизы районысь но республикаысь югдурен, пӧртэм юанъёслы валэктонъёс сётӥзы. Н. КОЛПАКОВ. ЛИТЕРАТУРАЕЗ ГАЖАСЬЁСЛЫ Эзоп, Крылов но Лужанин... Удмурт Республикаысь Национальной библиотека лыдӟисьёссэ пӧртэм пумо книгаосын тодматэ. Кылсярысь, литературая но филология отделын ужасьёс дасяллям баснялы сӥзем выставка. Кызьы тодмо, баснялэн "атаез" - вашкала Грециысь Эзоп. Нош кызьы та жанрез мукет писательёс азинтӥзы? Кыӵе инты басьтэ басня туала литератураын? Та юанъёслы валэктон сёто выставкае поттэм книгаос. Журналъёсъя но газетъёсъя отдел тодэ вайытэ, 75 ар талэсь азьвыл Интерпол (дуннеысь уголовной полиция) кылдӥз, нош 1803 арын И. Ф. Крузенштернлэн экспедициез Музъемез котыртӥз шуыса. Шер пумиськылылӥсь книгаосъя отдел историен тунсыкъяськисьёслы ӵектэ Санкт-Петербурглэн кылдэменыз, тодмо адямиосыныз, архитектураеныз. О. МАКСИМОВА. Налогъёсъя полиция ассэ ачиз сюдэ Иворъёсты вӧлмытӥсь ёзъёс выт бичанлы берло дыре тужгес но бадӟым инты висъяло, угось налогъёс бюджетэ уг вуо бере, уждун, пенсия, пособиос уг тырисько. Вылӥ кивалтӥсьёслэн налогъёс вуымтэлы выт бичась ёзъёсты янгыше уськытэмзы потэ, ляб ужало шуыса. Нош кызьы быдэсъя ужпумъёссэ Удмуртиысь налогъёсъя полиция - правоез утись ёзъёслэн радлыказы пырись, налогъёсъя инспекциен валче ужась ёз? Россия Федерациысь Налогъёсъя полицилэн федеральной службаезлэн управлениысьтыз Удмурт Республикая ёзэныз (сыӵе мудрон нимыз та организацилэн) кивалтэ Лепихин Владимир Варламович, налогъёсъя полицилэн генерал-лейтенантэз. Журнлаистъёсын пумиськонын Владимир Варламович, ёзэзлэн ужамезлэсь пайдазэ возьматон понна таӵе лыдпусъёсты шараяз: таяз арын укмыс толэзь куспын налогъёсъя полицилэн тыршеменыз бюджетэ 26 миллион манет пала коньдон вуиз, 676 миллион манет недоимка берыктэмын. Татысь валаны луэ, выт бичанъя полиция ассэ ачиз сюдэ шуыса. Налог тыремлэсь пегамзы, доходзэс ватэмзы понна 11 адями суд улэ сётэмын. Уголовной уж ӝутэмлэсь азьвыл, пусйиз В. Лепихин, налогъёсъя полиция пыр-поч эскере, кыӵе мугъёсъя документъёсы янгыш лыдпусъёс пыртэмын: юромо-а, бухгалтер янгышаса-а яке выль нормативъёсты тодымтэен-а. Кылсярысь, налогъёсъя полицилэн син шораз йӧтӥз Азербайджанысь лыктэм воргоронлэн ужамез. Со Удмуртиысь пызь изон предприятиосы ю тысь вуттылӥз. Документъёссэ эскерыкузы, налог бичан удысын ужасьёслы осконтэм потӥзы куд-ог лыдпусъёс. Налогъёсъя полиция возьматын быгатӥз, ужбергатӥсь табышсэ сыӵе амалэн ватыны тырше шуыса. "Амало" воргорон суд улэ сюриз, трос тыриськоно луиз. Налогъёсъя полиция уно лэсьтэ, выт тыронъя пунэмъёсты берыктон понна. Туэ 207 предприятилэн ваньбурез арест улэ сюриз ини, мукет кылын вераса, та предприятиос ваньбуренызы кузёяськыны уг быгато. Нош шоро-куспо но пичи ужбергатонлэн табышез но, ваньбурез но ӧвӧл - налогъёсъя пунэмъёссы гинэ тачак. Марзэс соослэсь басьтод, недоимказэс берыктон понна? Кытӥ гинэ уд копалтӥськы, налогъёсъя законодательствоез тӥян учыръёс шараясько. Вань предприятиос выт тыремлэсь пегӟыны тыршо. Со возьматэ, налогъёсъя законъёсын туж трос тырмымтэосыз шуыса, пусйиз В. Лепихин. "Сьӧд" суббота бере нуналъёсы налогъёсъя полициын ужасьёс ваньмыз сямен урамъёсы потӥзы - налоговой инспекторъёсын, вузкаронэз чакланъя инспекциысь ужасьёсын ӵош эскеризы, вань-а вузкарисьёслэн лицензиоссы, куто-а соос кассовой аппаратъёсты, документъёсазы зэмос дунъёс возьматэмын-а... Вераны кулэ, налогъёсъя полиция дунъёсты кылдытонэ уг пыриськы, соосты кулэстыны яке будэтыны уг быгаты - дунъёс документъёсы шонер пыремын мед луозы шуыса гинэ эскере. Собере со дунъёсъя налог басьтӥське. Законэз тӥян учыръёс сярысь ивортыса, юрттэт яке визь-кенеш курыса жингыртыны луэ налогъёсъя полицилэн уен-нуналэн ужась службаяз 44-77-00, 44-77-33 телефонъёсъя. Ваньзэ тодыны тыршись журналистъёс, пумиськон йылпумъяськыку, налогъёсъя полициен кивалтӥсьлэсь юазы, ужасьёсыз кемалась-а уждун басьтӥзы шуыса. В. Лепихин кепыраськемъяса ивортӥз, сентябрьлы ӧм басьтэ на, пе... О. ВАХИТОВА. Герд Ӵыжы-выжыосмы дорын Мадиськонмы кылиз валэктонтэк Быдэ вуытозь, тон монэ будэтӥд, Вожой шур дурысь вож садо Вандэмо. Мынам малпанам тон али но дуно: Вордэм мемиез кадь, шуныт яратӥ Тонэ, Вандэмо. Тодмо удмурт писатель Михаил Петров та чуръёссэ сӥзем вордскем гуртэзлы. Кылбурез "Вандэмо" шуыса ик нимаське. Гожтэм 1945-тӥ арын, ожъёс мынон вискын. Вандэмо гуртсэ М. П. Петров мукет гожъямъёсаз но данъя. Вордӥськем Вандэмо, тон монэ быдэстӥд, Кырӟаса кӧкыын ветталляд,- шуэ со "Мӧзмон" кылбураз. Таиз но 1945-тӥ арын кылдэмын. Кыдёкысь тодмотэм шаеръёстӥ ветлыку, вордӥськем палъёсыдлэсь юн мӧзмоно угось. Сыӵе дыръя кылбурчи ручка бордаз кутскытэк уг чида, дыр... 1998-тӥ ар, куартолэзь. Куазь шуныт, сайкыт. Лыз-чагыр инмын одӥг пилем но ӧвӧл. Машинамы дыртэ Елабуга пала. Тани Юмья - суредасьлэн Юрий Лобановлэн вордӥськем гуртэз. Бадӟым сюрес ортче вылэм гурт шортӥзы ик. Нош Юмья сьӧрын Татарстан кутске ни. Бускель элькун музъем вылтӥ кема ик ӧм мынэ, сюрес урдсысь тодмо нимез пумитамы: Вожой шур. Озьыен, Вандэмо гурт пала матэктӥськом. Герд Матэгес луон понна Туэ ар пумын Ижын ортчоз "Удмурт калыкез азинтонын интеллигенцилэн интыез" нимо научно-практической конференция. Радъя сое "Удмурт кенеш". Кызьы пусъемын вал исполкомлэн берло заседанияз, конференциез ортчытонлэн валтӥсь мугез герӟаськемын ог-огмылы матэгес луыны тыршон мылкыдэн. Вуоно ужрад сярысь вера "Удмурт кенеш" огазеяськонлэн вице-президентэз Валерий МИТРОФАНОВ. - Конференциын малпаськом бадӟым вераськон ӝутыны. Темаез но уго туж паськыт. Уджрадэз ӟечгес дасян вылысь кылдытэмын нимысьтыз комитет. Отчы дэмламын Владимир Байметов, Леонид Загребин, Василий Ванюшев, Николай Стрелков, Зоя Суворова, Карл Пономарев но мукетъёсыз. "Кенешлэн" нимыныз отын мыным ужаны дэмламын. Кылкутӥсь секретаре ӵектэмын аппаратамы ужась Елена Александрова. Валамон ни, оргкомитетын луозы кивалтон ёзъёсысь адямиос но. Улон возьматэ, таӵе бадӟым конференциез радъянэ исполкомлэн вань членъёсызлы, ёрос ёзъёслэн кивалтӥсьёссылы пыриськытэк уз луы шуыса. Ми шумпотом юрттэт сётыны мылкыд карисьёс пӧлысь котькудӥзлы. Кызьы шуо, ӧс усьтэмын. Конференцие ӧтьыны чакласьком ог 500 муртэз. Озьыен, котькуд ёросысь дасо адями лыктыны быгатоз. Ужпум, валамон ни, ӧтемъёслэн лыдзы бордын ӧвӧл. Котьмалэсь кулэез тани ма - люкаськемъёс куспазы кенешыса мед быгатозы удмурт калыклы азинскон сюрес бырйыны, асьме адямиосты огазеяны. Куд-ог эшъёс конференциын верано докладъёссылэсь темаоссэс пусйизы ни. Соос мылкыд каро, кылсярысь, таӵе ужпумъёсъя кенешыны: "Удмурт калык движение но удмурт интеллигенция: кусыпъёссы но шуг-секытъёссы", "Удмуртъёслэсь асваланзэс ӝутонэн герӟаськем ужпумъёс", "Культураез азинтонын национальной школалэн интыез", "Удмурт интеллигенцилэн государственность кылдытонэ пыриськемез", "Удмурт движенилэн валтӥсьёсыз: вормонъёс но ыштонъёс", "Ма малпа огшоры калык интеллигенция сярысь?" но мукет. Ми дэмласьком докладъёслэсь вакчияк гожтэм пуштроссэс комитетэ вазьгес сётыны. Быгатӥм ке, соосты печатланы тыршом, озьы уногес адямиос ӟеч малпанъёсын тодматскыны быгатозы. Малпан вань, конференцилы сӥзьыса, нимысьтыз газет поттыны. Пӧрмоз-а, вераны шуг. Но чакламзэ ми быдэстыны тыршом. Президентской советэ быръем журналист Валерий Нуриахметов дэмла "Кенеш" журналлэн кивалтӥсьёсыныз вераськыны: оло, пе, соос сошлаг луысалзы конференцилэсь документъёссэ журналын печатланы. Кин тодэ, сыӵе но сюрес тупасьтэм ӧвӧл, дыр. Уго мукет республикаосын озьы лэсьтыло ни. Тани мае пусйысал на. Конференцие ыстоно муртъёсты эскерыку чаклано созэ: отчы мед шедёзы зэм но рос-прос малпаськыны, вуонозэ адӟыны быгатӥсь адямиос. Мар ватонэз, берло аръёсы асьмелэн тодмо учёнойёсмы, мукет визьмо бӧлякъёсмы кӧня ке палэнскизы удмурт движенилэсь. Асьмелэн ужпуммы - соосты берыктон но выльёссэ, туннэ тодмотэмъёссэ бордамы кыскон. Конференция - со шулдыръяськон ужрад ӧвӧл. Газет пыр вазиськеме потэ отчы пыриськыны мылкыд карисьёслы но ыстэмъёслы. Бадӟым пумиськон дыръя кылэм-адӟем малпанъёсты одно ик тыршоно калыке вуттыны, уногес адямиослы огазеяськон мылкыд пыӵатыны. Соку сюлмаськеммылэн-бызьылэммылэн пайдаез кема дыр ӵоже шӧдӥськоз. 4-тӥ, октябре Драмая удмурт кун театрын ортчоз тодмо крезьгурчилэн Михаил Оськинлэн витьтон арес тырмон юбилеезлы сӥзем ӝыт. Люкаськемъёсты шулдыртозы удмурт шаерысьтымы тужгес устоосыз кырӟасьёс - чузъяськозы крезьгурчилэн тужгес тодмо но чылкак выль ужъёсыз. Маин шумпоттоз Удмурт театр? Кызьы ивортӥз Удмурт кун национальной тетрлэн администраторез Геннадий Семенович Корепанов, коньывуон толэзе татын пумиталозы ни нырысетӥ учкисьёссэс. Туннэ. Музыкая калык куспо нуналэ, туж чебер крезьгуръёс чузъяськозы. "Удмуртия" Гостелерадиокомпанилэн академической хоровой капеллаез тӥледды вуттоз удмурт, ӟуч но кунгожсьӧреспублика композиторъёслэн крезьгуръёсын веттаськись дуннеязы. Концерт кутскоз 18 часэ. Тодӥськоды ни: 4-тӥ октябре 17 часэ татын кутске шаерысьтымы огезлэн гажано крезьгурчилэн Михаил Оськинлэн 50 аръем юбилеезлы сӥзем ӝыт. Сое шулдыртозы эшъёсыз- крезьгурчиос, Удмурт радиолэн хорысьтыз, "Айкай" ансамбльысь артистъёс, озьы ик аспалъёсыз-кузьымгуртъёс. Театр мылкыд карисьёслы котьку шумпотыса сётэ аслэсь залзэ. 26-тӥ октябре татын чузъяськоз классической музыка. Шудоз Удмуртиысь кун симфонической оркестр, Николай Роготневлэн кивалтэмез улсын. Италиысь бертэмзы бере та нырысетӥез концерт. Пиналъёс понна гужемлы ик дасямын вал ни выжыкылъёс. 13-тӥ, 14-тӥ, 24-тӥ октябре возьматэмын луоз "Анчутка", нош 20-тӥ но 21-тӥ октябре - "Жили-были две лисички". Нош туэ сезонзэ Удмурт кун театр кутске Петр Романовлэн бенефисэныз. Россиысь дано, Удмуртиысь калык артист та ӝытэ валтӥсь ролез шудоз "Улӥськом-вылӥськом, шу..." спектакльын. Кутске 18 часэ. Нош кызьы выль ужъёстэк? Та секыт но мӧзмыт пилемъёсыз кызьы ке но палэнтон вылысь, режиссёръёс баськыны малпазы шулдыресь постановкаос борды. Леонид Широбоковлэсь "Ой, чебер нылъёс!" комедизэ. Василий Ушаков Юлий Кимлэн "Чудеса на зеленом болоте" пьесаез борды басьтӥське - со Выль арез шулдыртоз. Эшшо огез шумпотон - Рязаньысь режиссёреспублика дасялоз Гольдонилэсь "Кык кузёослэн ляльчизы" ("Слуга двух господ") туж тодмо комедизэ. Удмурт театрын со 50-тӥ аръёсы но мынӥз вал ни. Щепкин нимо училищеез йылпумъям пиосыз троссэ армие басьтӥзы ке но, артистъёс оско: кужымзы тырмоз. Т. НИКОЛАЕВА. Нырысь люкаськом Завьялэ Удмурт огазеяськонъёслэсь ог-огенызы кусыпъёссэс умоятон вылысь, "Удмурт Кенешлэн" исполкомез Глазовын туэ октябре зональной семинаръёс ортчытон сярысь решение кутӥз. Отын эскерыны чакламын ёрос езъёслэсь кызьы ужамзэс, соос азьын сылӥсь ужпумъёсты. Валамон ни, вераськон ӝутскоз вуоно быръёсъёс сярысь но. Нырысетӥез пумиськон ортчоз Завьялын. 16 октябре татчы лыктозы Ижысь, Воткинскысь но шаермылэн шунды ӝужан но лымшор палъёсысьтыз куноос. 23 октябре семинар луоз Можгаын. Арня ортчыса, удмурт движение пыриськись эшъёс лыктозы Глазове. А. ИВАНОВ. Утчасез шедьтэ Уноез колхозъёс ёрмо тракторъёслы но машинаослы воштос ёзъёс шедьтыны. Тани ма вера со пумысен Вавож ёросысь Мичурин нимо эштослэн кивалтӥсез Валентин Калинин: "Милям но техникамы ваньмызлэн сямен ик вужмемын ни. Выльзэ басьтон понна трос коньдон кулэ. Техника кемагес мед ужалоз шуыса, сое ӵемгес эскерылоно, дыраз тупатъяно. Милям воштос ёзъёс лэсьто токарьмы но кебитын ужасьмы. Ӝоген, оло, коленовал но лэсьтыны быгатозы ни. Сизьымдон процентэз ужась техникамы соосын валче гинэ ужа". Тӥни озьы, кин утча, амал шедьтэ. С. ДОЛГАНОВА. Журналистъёсын пумиськонъёс Берга, берга пичи уже Та егит удыслы - пичи но шоро-куспо ужбергатонлы - шаерамы бадӟым инты висъяське. Соинтэк-а кылем вторнике республикалэн Правительствоысьтыз Пичи ужбергатонлы юрттонъя но сое азинтонъя кун комитетлэн тӧроез Михаил Зайцев нош ик пумиськиз журналистъёсын. Люкаськемъёсты со тодматӥз азязы сылӥсь ужпумъёсын. Пичи ужбергатон, котькытын сяменгес ик, асьме республикаямы арысь аре азинске- кужмоя, экономикаын пумен бадӟымгес инты басьтэ, вань бюджетъёсы 10 процент выт сётэ. Шаерамы али 7 сюрслэсь уно пичи ужбергатонъя предприятиос, отын 110 сюрслэсь трос адями ужа. Но туэ та удысын ужасьёслэн лыдзы 3700-лы кулэсмиз. Кызьы бен ужало пичи ужбергатӥсьёс туэ? Оглом урод уг, но промышленностьын ваньбур поттон 12 процентлы кулэсмиз, нош гурт хозяйствоын 15 процентлы йылӥз, вузкаронын - 26 процентлы. Гуртысь ужбергатӥсьёс юнгес возисько, шуг-секытлы уг сётско. Тӥни озьы туэ та ёзын 900 миллион манетлэсь уно ваньбур поттэмын ни. Берло дыре трос люкетӥсь мугъёс кылдӥзы. Соос герӟаськемын выт тыронъёсын, асьсэ ваньбурзэс йылэтонэн, банкъёслэн коньдон сётэмзылы бадӟым процент басьтэменызы но эскерисьёслэн ужаны люкетэменызы. Кылсярысь, удысэз али 40-лэсь уно пӧртэм ёзъёс чакласа возё. Но алигес Россилэн Президентэз та ужез умоятон вылысь, нимысьтыз указ гожтӥз. Соя кулэстӥське эскерисьёслэн лыдзы но, кин ачиз 75 процентлэсь уно продукция поттоз, соослы ужан инты воземзы понна тырон (выт) бюджет удысысь организациослы кадь тупатӥське. Туэ ужбергатӥсьёс уногес продукция поттон но услугаос сётон вылысь, пӧртэм амалъёс утчало. Тани "Экспоцентр" пыр 7 адӟытон ортчытэмын но отын 10 миллион манетлы тупанкылъёс гожтэмын. Отчы пыриськиз пичи ужбергатонъя 140 предприятие. Нош комитет Пичи ужбергатонъя Москваысь департаментэн огкыл кутӥз ни. - Михаил Петрович, нош И. Хакамадалэн удысады лыктэмез шӧдӥське-а? - Курламе уг поты, но 1996-тӥ-97-тӥ аръёсы пичи ужбергатонэз азинтонъя трос лэсьтэмын вал: кутэмын федеральной программа, кылдытэмын фонд но мукет. Туэ нош али ке но Кун Думаын учкымтэ на программа, кулэезъя уг ужа Федеральной фонд. Берло дыре лябӟизы интыосысь комитетъёсын кусыпъёс, миым ноябрьысен Москвае ӧз ӧтчалэ на. Кивалтӥсьмы сярысь пресса уно гожъя. Сое оло умоен лыдъялод, оло уд. Тани Н. Новгородын ортчем адӟытонын милемлы 60 квадратной метр дунтэк инты сётъязы, табере нокытчы ӧтьылӥсь ӧвӧл ни. Соин ик кулэ вылэм ужбергатӥсьёсты утёнъя нимаз закон кутыны. - Ужбергатӥсьёслэн шаерысь огазеяськонзы улэп на-а? - Шоканы шока, дыр, но матысь дыре кусыпъёсмы быризы, шуыны луоз. Берло кык ар ӵоже куаразы уг кылӥськы ни. Со понна умойгес ужало интыосысь ужбергатӥсьёслэн огазеяськонъёссы. Соос али кылдытэмын ни Воткинск, Сарапул городъёсын, Пичи Пурга районын но мукет интыосын. - Иван Шутов (Иж) но Марсель Гаязов (Ува) кадь ужбергатӥсьёс трос-а? - Ӧжыт уд шуы. Соос ӵуказе нуналлы юн оско, арысь аре вамышъёссэс кузёмыто, уногес ваньбур потто, ужан культуразэс ӝуто. - Нимаз партия кылдытон шоры кызьы учкиськоды? - Туала секыт улон вакытэ кулэ, дыр. Но комитетын ужа экспертъя кенеш. Отчы пыро общественной огазеяськонъёслэн адямиоссы, профсоюзэз но вераса. - Выль выт басьтонэз кызьы пыӵатыны чакласькоды? - Москва туж бадӟымесь (10 поллы) лыдпусъёс сётӥз. Сое нырысь ик уже кутом вузкаронын но услугаос (йыр ӵышкон) сётонын. Улон возьматоз, ми налогъёслэсь ум пегӟиське, дыраз тыриськом. Г. РОМАНОВ. Шедёзы-а юрттӥсьёс? Та нуналъёсы Москваын ортче калык куспо возьматон-вузкарон ярмарка. Нимаське со "Инновация-98". Мукет странаосын ӵош отын выль ужъёссэс, технологиоссэс но проектъёссэс возьмато асьме предприятиос но. Соос пӧлын "Метеор", "Ижмаш", электромеханической завод, Сарапулысь электрогенераторной завод. Ужрадэз ортчытэ Россиысь Наукая но технологиосъя министерство. Таӵе пумиськон Удмуртиысь предприятиослы кунгож сьӧрысь инвесторъёсын кусыпъёс тупатыны юрттоз шуыса, оскон кылдэ. Возьматон уже таӵе удысъёсъя - инкуазь узырлыкъёс, соосты утчан но уже кутон. Котырысь инкуазез утён но промышленностьысь кылем-мылемъёсты утялтон, нефть но газ поттон, энергетика, медицина, калыклэсь тазалыксэ утён но мукет. Н. СЕМЕНОВ. Пӧйшурлэн но кӧтыз сюма Шер пумиськылӥсь пӧйшуръёсты сютэм кулонлэсь утён понна одӥг гинэ сюрес - соосты кунгож сьӧры келян, ивортэ "Новые Известия" газет. Кризис шуонлэн "киосыз" вутскизы пӧйшуръёс вылэ но. Москваысь дельфинанариын улӥсьёсты - тӧдьы кит, дельфиновафалин но зарезь левъёсты сюдыны секытгес но секытгес луэ. Али чаклам дунъёсъя чорыгъёсты басьтыны коньдон уг тырмы. Соин ик кӧня ке нуналлы дельфинъёсты сютэм возёно луоз. Соосты утён понна биологъёс пӧртэм амалъёс утчало, гожтэ "Новые Известия" газет. (Басьтэмын Интернет пыр.) Быръёнёслы дасяськоно али ик Валентин ТУБЫЛОВ, "Удмурт Кенеш" огазеяськонлэн тӧроез. Ӝыны ар гинэ кыле на, Удмурт Элькунысь Кун Кенеше выль депутатъёсты бырйытозь. Котькуд мандат понна зол нюръяськон луоз. Тае лыдэ басьтыса, партиос но мукет огазеяськонъёс со вакытлы дасяськыны кутскизы ни. Валамон ни, палэнэ кыльыны уг быгаты "Удмурт Кенеш" но. Кызьы тодмо, Вылӥ Кенешын 200 депутат вал. Кун Кенешын соос сю кузя. Табере выльысь вераськон ӝутске калыкен быръем муртъёслэсь лыдзы быдтон сярысь. Малы? Сю муртлы вань ужасъёсты вормыны шуг. Али ӵекто ог 140 депутат бырйыны. Ми таӵе дэмланэн соглаш. Озьы пӧрмиз ке, гурт калыклэсь мылкыдъёссэс утись адямиослэн лыдзы йылоз. Со чотын луоз удмурт депутатъёслэсь но лыдзэс будэтыны. Вуоно сессиын та пумысен вераськон одно ик потоз. Конституциын депутатъёслэн лыдзы пусъемын ӧвӧл бере, законэ воштон пыртыны луоз витьтон одӥг депутатлэн мылкыд каремезъя. Туннэ нуналлы котькуд округлэн ог 10,5 сюрс бырйись. Законъя учконо ке, округын бырйисьёслэн лыдзы шоро-куспо лыдпуслэсь дас процентлэсь трослы висъяськыны уг быгаты. Соин ик табере округъёслэсь гожъёссэ, оло, выльдоно но луоз, уго куд-ог ёросын одӥг мурт бырйыны калык уногес люкаське, нош кыкезлы уг тырмы. Куд-ог округъёс пӧртэм ёросъёсысь гуртоос чотын но кылдэтэмын луозы, вылды. Асьмелы дышетсконо ортчемез вылын. Кылем тулыс Удмуртиын бырйызы городъёсысь депутатъёсты но мэръёсты. Нюръяськон, тодӥськоды, туж лек вал. Азьпала потӥзы ужбергатӥсьёс. Табере соос дасясько выль мандат басьтыны. Нош Кун Кенешлэн городысь депутатъёсыз валано ни: калык соослы кыкетӥзэ уз оскы. Соин, вылды, таосыз пумен ӵемгес учкыло гурт пала. Та ласянь асьме калыклы сак кариськоно. Курике шедемлэсь кызьы ке но утиськоно вылэм. Бен, мандат басьтыны мылкыд карисьёс оломае но ӵекто: вот тазэ лэсьтом, созэ радъялом. Кин ке газ кыскыны сӥзе, кин ке сюрес ӝутыны малпа. Малы ке но сыӵеослэсь юась ӧвӧл: ма чотын соос туртто куронъёсты быдэстыны. Алнаш ёрослэсь кыскыса, шуом, Дэбес районын сюрес лэсьтыны туртто ке, сыӵе "ӟеч юрттэмез" мон уг валаськы. Бен, адямиос пӧлын котькыӵеез вань. Соин ик мон уг шуиськы, удмуртъёс куаразэс одно ик удмурт понна сётыны кулэ ӧвӧл. Алияз созывын но вань кӧня ке депутат, кин асьме калык сярысь рос-прос сюлмаське. Малы асьмеос сыӵе муртъёслэсь палэнскыны кулэ? Шуом, Кияса ёросын выжыысьтымы одӥг ӟеч кандидат ӧз шедьы ке, "Удмурт Кенеш", мон сямен, дурбасьтыны кулэ Н. С. Сычевлы, асьмемыз валась ӟуч адямилы. Кун Кенешын мон али гуртысь депутатъёслэн фракциенызы кивалтӥсько. Сыӵеос 34 кузя. Но, меӵак вераны кулэ, уноез кемалась вунэтӥзы ни гурт калыклэсь сюлмаськонъёссэ. Со туж шӧдӥське, гурт хозяйствоен герӟаськем законъёсты эскерыку. Крестьянъёслы дурбасьтӥсь документъёс понна 12-15 мурт гинэ люкаське. Нош кытын мукетъёсыз, кинэ бырйиз гуртысь калык? Нимын-тулын вератэк но тодмо куд-огез. Сыӵеос, асьсэ предприятиослэсь луонлыкъёссэс кутыса, ма но со лэсьто округъёсазы но бӧрысь данъяськыса ветло: уть ми мар карим. Огшоры бырйись куддыр валатэк но кыле, ваньмыз со мукетъёсыз чотын лэсьтӥське шуыса. Депутат удмурт ёросын быръемын ке, мон малпасько, со одно ик юрттыны кулэ асьмелы но,. Котькыӵе выжыысб тон лу, но эн вунэты кытысь потэмдэ, кытын улэмдэ. Лыдэ басьтытэк кельтэмын уг луы гужем вылтӥ гурт ёросъёсын ортчем быръёнъёсты но. Куд-ог ӟеч азинскон басьтымы быгатӥм. Но ваньзэ луынлыкъёсты уже ӧм кутэ ук! Тодам ваисько Завяловоын администрацилы тӧро быръён нуналэз. Ми умоен лыдъям исполкомамы быръем муртлэсь Валериан Никитинлэсь кандидатуразэ. Вераським та ласянь. Но власть возисьёс валаллям: учке ай, пе, "Удмурт Кенеш" ма дауртэ, аслэсьтыз адямизэ поттыны выре... Таяз учыре кӧня ке куара ӧз тырмы. Ёросысь депутатъёс мукетыз адями понна кариськизы. Ӵок. Отын номыр умойтэмез ӧвӧл - сыӵе со, демократия. Шугъяськытэ вылӥ кузёослэн пештырскемзы. Соос малпало, шӧдске, удмуртлы ёросэз оскид ке, со ас выжыосыз сярысь гинэ сюлмаськоз шуыса. Но озьы ӧвӧл ук. Асьме понна тужгес но кулэез - Удмуртиысь калыклэсь улон-вылонзэ умоятон. Кызьы тодмо, "Удмурт Кенеш" пыриз быръёнъёсъя "Элькун" огазеяськонэ. Солэн уставез юнматэмын ни Юстиция министерствоын. Озьыен, союзлэсь кужымзэ асьмеос уже кутыны быгатом быръёнъёс дыръя. Куд-ог ёросъёсъя, округъёсъя депутат кандидат луыны мылкыд карисьёслэн нимъёссы тодмо ни. Но озьы ваньмыз ӧвӧл ай. Азьло ортчытъям быръёнъёс возьмато, соослы вазен ик дасяськоно шуыса. Сотэк вормыны шуг луоз. Таин валче мон вазиськисько "Удмурт Кенешлэн" активистъёслы малпаськыны куронэн. Эн возьмалэ, ку тӥледыз ӵектозы вылйысь, асьтэос кутске та уж борды, эшъёсыныды, тодмоосыныды кенеше. Нош ми быгатэммыя одно ик юрттыны тыршом. Ваньмы дэмен тыршим ке, Кун Кенешлэн вуоно созываз шедёзы оскымон, асьме республикаез, калыкез азинтыны сюлмаськись адямиос. Пиналъёс лябесь будо Россиысь школаосын дышетскисьёслэн тазалыксы туж ляб, гожтэ "Московский комсомолец" газет. Школаез йылпумъясьёс пӧлысь 10 процентэз гинэ пиналъёс тазалыксылы уг ӝожтӥсько. Ортчем арын пиналъёс пӧлын висён учыръёс 2 пол йылӥзы. Пичи классъёсын дышетскисьёс пӧлын 12 процентэз ӟеч тазалыкеныз ушъяськыны быгатоз. Нош бадӟым классъёсысь пиналъёс пӧлын та лыдпус 7 процентозь кулэсме. Нылъёслэн тазалыксы лябгес, пиосын ӵошатыса. Туннэ нуналлы 80 процентэз нылъёс одӥг яке кык хронической висёнъёсын висе. Таӵе югдурез медикъёс валэкто пӧртэм гимназиос, лицейёс, колледжъёс кылдэмен. Татын дышетскись пиналъёс йырзэс 12-15 час ӵоже ужатоно луо. 60 процентэз школаос урокъёслэсь лыдзэс тямысысен дасозь будэто. Москваын 20 процентэзлэн дышетскисьёслэн психиказы сӧриськемын, 40 процентэзлэн сюлэмзы висе, 10 процентэз кӧтпуш висёнъёсын курадӟо. Иворъёсъя национальной служба. Палэнэ но келяло Рынок шуонэ выжон уноезлы предприятиослы шӧдскымон шуккет сётӥз. Палэнэ ӧз кельты со "Буммаш" акционер огазеяськонэз но. Нош машина лэсьтон производство шуг- секытысь потыны амал ачиз шедьтӥз. Конструкторъёс но рабочийёс кутскизы сюресъёс вылын ужась техника поттыны. Со луо пазян но лымы сузян машинаос, автогрейдерлы пуртъёс, улвай коран агрегатъёс, кисьтэм асфальт ворттон техника но мукет. Озьы ик бадӟымесь заказъёс вуизы спирт поттон заводъёслэсь, "Удмуртэнерго" акционер огазеяськонлэсь. Предприятие уно коньдон поттэ, вуззэ кунгож сьӧры келяса но. Трос тоннаем корт плитаосты матысь дыре келяны чаклало Израиле. Вань Италиысь куронъёс но. Б. НИКИТИН. ЭШЛЫКО КУСЫПЪЁС: УДМУРТИЯ-БЕЛОРУССИЯ Одӥг кураськисез но ӧй адӟы Удмуртия но Белоруссия куспын ӵош ужан сярысь огкыл гожтэмын. Солэсь азьло, кусыпъёс тупатон вылысь, отчы ветлӥз 10 муртлэсь рабочей делигация. Вылӥ дышетскон заведениосын, наука удысын огкылэ вуонъя "выж тупатон" оскемын вал Удмурт кун университетысь наукая проректорлы физико-математической наукаосъя докторлы, профессорлы Виктор Евграфович ШУДЕГОВЛЫ. - Удмуртиысь официальной делигация Беларусь Республикалэн улон-вылонэзлы синмаськыса бертӥз. Тӥляд сюлэмады кыӵе мылкыд кылиз? - Туж умой. Шонерзэ вераса, мон пайми отысь порядоклы, дунъёслы, предприятиослэн кык сменаен ужамзылы. Белоруссия бадӟым осконэн улэ но азинске. Нош кыӵе чылкытэсь ульчаоссы, кыӵе утялтэмын улон юртъёссы - сузмемъёссэ, буёлэн шобыртымтэоссэ уд пумита. - Озьыен, телевидение пыр тодматскон но ас синмыныд адӟон - чылкак пӧртэм, ог- огзылы пумит луо? - Со озьы ик вань. Москва ас сяменыз возьматыны выре республикалэсь политиказэ, ассэ но Александр Лукашенкоез. Нош отысен нырысетӥ нуналаз ик шӧдоно: белорус калык Президентсэ туж гажа, солы оске, ужан амалъёссэ шонерен лыдъя. Белоруссие вуэм берамы ик ми понна ортчытӥзы пресс-конференция. Тодматӥзы республикалэн туннэ нуналэныз. Заводъёссы, кызьы пусйи ни, кылем арынлэсь шӧдскымон зол ужало, тросэн вуэ заказ. Мар паймытӥз на - магазинъёс, рынок быдэсак сямен тырмытэмын асьсэ дорын поттэм продукциен, кунгож сьӧрысь ваемезлэсь со 2-5 поллы дунтэм. Номыр дас поллы уд шуы: визьмо политика, ваньмыз лэсьтӥське калык понна. Транспорт (метро) Минскын дунтэм Москваын сярысь, шӧдскымон улӥын квартира понна дун тырон. Ма син шоры йӧтӥз на - одӥг кураськисез но отысь ӧй адӟы. - Маин паймытӥз Белоруссиысь государственной университет, мукет дышетскон заведениоссы? - Нырысь ик, мае мон пусйысал, республикалэн Президентэз ласянь калыкез дышетон удыслы бадӟым саклык висъяське. Отын преподавательёс котьку дыраз басьто уждунзэс. Университетын со, мукет вузъёсын сярысь, 1,7 поллы бадӟымгес. Лукашенко вала: дышетон бордысь кутске калыклэн азинсконэз, экономикалэн юнмамез, кризисысь потон но. Со меӵак шуиз: "Коньдон басьтэ сомында - кӧня кулэ университетэз йӧн-йӧн возён понна. Эн гинэ лушкаське, лушкаськиды ке - вераськон мукет луоз. Минскысь эшъёсмылэн вожъяськымон ӟеч ужан инъетсы, со ялан паськыта. Али гинэ пуктӥллям ӵыжак выль юрт. Отчы потоз ректорат, нимысьтыз инты висъямын кунгож сьӧрысь делегациосын пумиськонлы, Учёной советлы. Ваньмыз лэсьтэмын асьсэ материалэн, мебелез но вераса. Делегацимы пумиськылӥз пӧртэм адямиосын, огшоры калыкен но. Огез но улонзы вылэ ӧз ӝожтӥськы. Соос асьмеды, россиянъёсты жаляло, йӧназ кивалтӥсьёсмы ӧвӧл шуыса. Мар син шоры йӧтӥз на? Котькыӵе кивалтӥсь доры пыр - кабинетысь адӟод А. Г. Лукашенколэсь портретсэ. Та шоры учконзы пӧртэм: "Ужлы уг люкеты, нош адямиез умой. Со - главноез". Вылез, адӟем карымонэз трос. Мыным, кылсярысь, кельшиз нянь пыжонын кутӥськись ватсэт. Со дасямын Белоруссиысь ученойёсын. Пыжем нянь кематэк уг вужмы, уг пурысьта. Даниысь вуттэм кексъёс, рулетъёс озьы ик та амалъя дасясько, но кунгож сьӧрысь специалистъёс секретсэс уг шараяло. Белорусъёс туннэ ик дась асьмеды дышетыны. Белорус университетын эшшо одӥг ӟеч арбери дасямын на: вуэз, спиртэз сузянъя фильтр. Сое трос пол сузяны, выльдыны луэ, дорамы поттэмез чакламын одӥг поллы гинэ. Мон пумиськылӥ Торфъя институтлэн директорезлэн воштӥсеныз. Ма но соос гыбедлэсь уг дасяло! "Удмуртторфлы" ӵапак белорус амалэ выжыны кулэ, дыр, вакчи дыр куспын хозяйствоез узырмоз. - Виктор Евграфович, кык университет куспын огъя кыл шедьтэмын бере, озьыен, Удмуртиысь студентъёслы, преподавательёслы Минске паськыт сюрес усьтӥськиз? - Озьы. Соослэн туж зол математикъёсты дасянъя школазы. Матысь дыре ик воштӥськом студентъёсын, аспирантъёсын, 15 удысъя ӵош ужалом. Бадӟым юрттэт басьтыны малпаськон славян кылъёсты дышетонъя, радиоэлектроникая. Минскысь Политехнической академия учёнойёсынымы ӵош ужалоз микросхемаос дасян бордын. Эшшо мае пусйысал на. Белоруссиысь студентъёс стипендизэс котьку дыраз басьто, государство соос сярысь умой-умой сюлмаське. Дипломен специалистъёсты ужаны ысто тужгес но кулэ интыосы, кин уг мыны - кылзэ юало. Асьмелэн та амал но вунӥз ни: дышетскем муртъёс тэк пуко яке базарын вузкаро. Белорус государство котькудзэ специалистсэ пайдаё кутыны тырше. Университетын но, академиын но бадӟым инты висъяло учёнойёслэсь выль ужъёссэс возьматонлы: сое басьтӥсь доры вуттонлы. Реклама ласянь чупрес выро. Вань научной разработкаоссыя поттэмын каталог, татын ӟеч юрттэт сётэ "Белнаука". Асьмеос отчыозь ӧм вуэ на. Вератэк кельтэме уг поты Политехнической академиысь строительёсты, архитекторъёсты дасянъя факультет сярысь но. Материальной базазы юн, номыр уд шуы. Вӧл-вӧл цех висъямын выль конструкциосты эскеронлы, мукет сямен - полигонлы. Вуоно архитекторъёс ужало нимысьтыз заказъёс бордын. Озьыен, вузлы трос гинэ коньдон потто. - Беларусь Республика эшлыко кусып тупатыны выре азьвыл СССР-лэн пӧртэм республикаосыныз, областьёсыныз, соос пӧлын табере Удмуртия но. - Кызьы веразы, ӵош ужан сярысь соглашение гожтӥсьёс пӧлын ми 27-тӥез регион ни. Белоруссия мыло-кыдо вузкаре дуннеысь пӧртэм странаосын. Кылем арын товарооборотэз 8,5 миллиард долларозь вуиз, со пӧлысь 5,5 миллиардэз - Россиен, 450 сюрс долларез - Удмуртиен вузкаремезлэсь. Белоруссиысь техника, холодильникъёс асьме дорын басьтӥсьсэс кемалась шедьтӥзы ни, озьы ик отысь сиён-юон, керттэм дӥсьёс, пыдкутчан но мукетыз. Табере луонлык вань рынокез эшшо но узырмытыны, паськытатыны. Кулэ луиз ке, Удмуртия юрттыны быгатоз, дыр, "кыкетӥ нянен" но. Белоруссиын сое утялтонын люкетӥзы дугдылытэк кисьтӥсь зоръёс. - Шӧдӥське: Белоруссиысь выль кужымен, бурдъяськем мылкыдын бертӥды. Нош асьмелэн мар вань ушъяськымонэз? - Ми но будӥськом. Удмурт кун университетлэн историяз туэ нырысьсэ усьтӥське докторантура, специалистъёсты со дасялоз дас удысъя. Пумен паськыта аспирантурамы. Очно но заочно амалэн али дышетске ог 300 мурт. Эшшо одӥг шумпоттӥсь ивор: октябре дорамы ортчоз Урал но Волга котырысь вылӥ дышетскон заведениослэн ректоръёсынызы кенешон. Малпасько, Ижевскез юнме шорысь ӧз, дыр, быръе шуыса. Кӧня ке ар талэсь азьло со выллем бадӟым пумиськон университетамы ортчиз ни. Вераськиз Людмила МЕДВЕДЕВА. ЧУРЪЁС, ЧУРЪЁС... Газеттэк улон мӧзмыт Туж гажасько газет лыдӟыны. Азьвыл аръёсы трос пӧртэм журнал-газетъёс басьтӥсько вал, нош али? Удмурт кылын потӥсьёсызлы гинэ гожтӥськисько на. Туэ "Удмурт дунне" ("Советской Удмуртия") газетэн эшъяськеме дырысен ӝыны даур тырмиз. Озьы ке но, нырысетӥ гожтэм материалме ялан тодам ваисько на. Егитъёсты ньылетӥ номеро ремесленной училищее дышетскыны ӧтьыса гожтӥ вал. Кыӵе шумпотӥ, газет бамысь пичильтык ивортонме адӟыса. Со ик газетэн эшъяськеме но луиз. Та вакытэ шаерамы одӥг газет кылемын, кудӥз лыдӟисьёсты пыр-поч тодматэ гурт улонэн. Но жаляса верано, куд-ог дыръя отын но город улонэз ӵемгес гожъяны выро, реклама шуонзэ тросгес поттыны тыршо. Бен, улон косэ, мон номыр уг шуиськы. Сюлмаськытэ мукетыз но. Азьвыл аръёсы колхозъёсты, предприятиосты курласа-а, ушъяса-а гожтэм материал понна кин ке кыл кутӥсез вал. Али гожтэм огшоры гожтэмен гинэ кыле. Со сяна, гуртын тыршисьёс пӧлысь одӥгез но быръемын ӧвӧл Кун Кенеше. Городъёсын будэмъёс шат валалозы гуртоослэсь сюлмаськонъёссэс? Улонмы ялан пурысялэс буёлэн шобырске кадь. Соин ик, эн выйы отчы, эн сётскы вал шуг- секытъёслы, "Удмурт дуннемы". В. ЧЕРНОВ. Герд Ог-огзэч валаса Удмуртъёс но бигеръёс дауръёсын улӥзы, ог-огзэс валаса. Сыӵе эшъяськон али но ӧз быры. Тани Ува ёросысь Кизварь гуртын пӧртэм выжыысь адямиос ӵош уло, нылпи будэто, вуоноез сярысь малпасько. Гуртоос данъяськыса верало Гаязовъёс сярысь. Ирина - удмурт, Марсель - бигер. Семьяын вить ныл будэ. Таосыз нош кинъёс? Шуг вераны. Шулдыръяськон дыр вуэ ке, корка кузё, арганзэ кутыса, удмурт, бигер, ӟуч крезьгур кисьтэ. Ма, борддоръёс но татын возьмато улӥсьёсызлэсь пӧртэм выжысь потэмзэс. Валентина Пудовалэн асэныз кузьмам календареныз артэгес ик ошемын араб шрифтэн пӧрам чебер пул. Книгаос но олокыӵеосыз но вань. Ноку медам тӧлӟы та юртысь ог-огдэ валан-гажан мылкы! Г. ЮСАЕВЛЭН туспуктэмез. МОН ТАЗЬЫ МАЛПАСЬКО Одно ик кулэ Таӵе секыт вакытэ "Удмурт Кенеш" одно ик пыриськыны кулэ удмурт изданиосты утёнэ. Трос мукет ужпумъёсын артэ та сюлмаськонэз асьмелы вуттоно Правительствоозь. Удмурт газет-журналъёс бюджетын пусъем коньдонэз басьтыны уг быгато ке, огазеяськонмы соослы та ласянь мед юрттоз. Верало тани мае. "Удмурт дунне" газетлэн позициез куддыр палдурес луэ. Сое асьмеос туж шӧдӥм Ӧтчаммы азьын. "Кенешлэсь" куаразэ котькытын мед шӧдозы шуыса кулэ нимысьтыз газет кылдытыны. Туннэ та ужпумез быдэстыны шуг, соин ик уже кутоно пӧртэм луонлыкъёсты. Уго али потӥсь газет-журналъёслэн вань асьсэлэн ужасьёссы, лыдӟисьёссы, вӧлмытон радзы но трос мукетыз. Азьланьын, оскисько, "Удмурт Кенешлэн" одно ик луоз аслаз газетэз. Та ласянь асьме огаземъяськонлы юрттыны кулэ шаерысьтымы кивалтон ёзъёс но. В. ВАНЮШЕВ, тодосчи но кылбурчи, исполкомлэн членэз. Эшъёсылы Крезьгурез Михаил Оськинлэн Тупатъяз Николай Широких Кылъёсыз Анатолий Леонтьевлэн 1. Эшъёс лыктыло, Эшъёс кошкыло. Вуо ӝамдэлы, Кошко кемалы. Яра, соос вань - Сюлэм коть гань-гань... Мылкыд капчигес, Улон шулдыргес. 2. Ивор-а кудӥз Мыным нош ваёз, Так гинэ пыроз, Пыроз-эскероз. Эшъёсы понна Усьто сюлэмме, Ӧсэ котьку пась, Чае мынам дась. 3. Ӟечсэ-уродзэ, Шугзэ-секытсэ, Кызьы быгатом, Шори ми люком. Пӧртэм сюресъёс Ортчемын ни трос, Вань, ма вераны, Вань, ма кырӟаны. 4. Улэм-вылэмъя, Аръёс ортчемъя, Пумен ӧжытгес Кылё ни эшъёс... Эшъёс лыктыло, Эшъёс кошкыло... Вуо ӝамдэлы, Кошко... пыраклы. 1998-тӥ ар. Валэктон. Котькуд куплетлэсь берло ньыльчурзэ кык пол кырӟано. Берпуметӥ куплетлэсь ньыльчурзэ кыкетӥзэ кырӟаку воштоно кыкетӥ куплетлэн ньыльчуреныз. Сӥлы каризы Арлыдоослэн нуналзы ӧз вуы на ке но, Алнаш районысь Туймыйыл культура юртын мӧйыосыз сӥлы каризы ни. "Прогресс" колхозын бусы ужъёсты ӟеч радъяны быгатӥзы. Азинсконъёс басьтыны юрттӥзы ужысь ветеранъёс но. Колхозысь кивалтӥсьёс люкаськемъёслы тау карон кылзэс веразы но азьланезлы юн тазалык сӥзизы. Соос понна ӝӧк выл тыр ческыт сиён-юон пуктэмын вал, нош культура юртын ужасьёс шулдыр концерт возьматӥзы. Озьы Туймыйылысь, Вишурысь но Шубино гуртъёсысь арлыдоос, огазе люкаськыса, егит дырзэс но тодазы ваизы. В. АНДРЕЕВА. Гуысь потон понна, азьло отчы усёно... Вавож. Ёросысь Какмож леспромхозысь ужасьёс асьсэлэсь профессиональной праздниксэс (сое пусъё таяз арня нуналэ) туж ик ӝутскем мылкыдын уг пумитало. Мугез но вань, угось ужзы ӧвӧлэн, коньдонтэк пуко. Поттэм продукцизэс та вакытэ сиён- юонэн, мукет вузъёсын гинэ вошто, нош уксё кисыосазы кемалась ӧз вуылы ни. Таин валче леспромхоз государстволэсь тэльзэ но басьтыны уг быгаты, коран но продукция поттон вылысь. Туала секыт югдуре соослы нокин уз юртты шуыса валамзы бере, леспромхозлэн кивалтӥсьёсыз асьсэос коньдон поттон амалъёсты утчаны кутскизы. Италиысь но Финляндиысь фирмаосын кусып тупатӥзы. Италие келяло пул, нош Финляндие - кызьпу пуклёкъёсты. Валамон, та выллем полуфабрикатъёс понна уксё трос уд басьты. Соин ик коньдонзы уждунлы гинэ тырме. Тулыс Какможысь леспромхоз кун сьӧрын поттэм станок басьтӥз. Станок пыр поттэм пулъёс вольытэсь пото, струген вӧлонэз ӧвӧл ни. Станок коньдонэз шыръя шуыса, татын эшшо куиньзэ басьтоно кариськизы. А. ШИРОКИХ. А. С. Пушкинэз данъяса 1999 арын 6 июне быдӟым ӟуч кылбурчилы А. С. Пушкинлы вордскемез дырысен 200 ар тырмоз. Ӟуч литературалэн, быдэс дуннеысь литературалэн азинсконазы со бадӟым инты басьтэ. Сое данъян понна, Удмурт Республикаысь Правительство уно ужрадъёс ортчытыны чаклаз. Соос юнматэмын Правительстволэн "А. С. Пушкинлэн вордскемез дырысен 200 ар тырмонлы сӥзем ужрадъёсты дасян но ортчытон сярысь" постановленияз. Кылсярысь, вуоно арын апреле ортчоз "А. С. Пушкин но туала улон" научно-практической конференция. Конференциын лыдӟем материалъёс печатламын луозы. А. С. Пушкинлы сӥземын луозы "Луч", "Вордскем кыл", пиналъёслы "Ёжик" журналъёс. Со сяна, Чайковскийлы сӥзем крезьгуро фестиваль "А. С. Пушкин но П. И. Чайковский" нимын ортчоз. Пиналъёс быдӟым ӟуч кылбурчиез данъяса гожтозы сочинениос, суредъёс. Тужгес но ӟечъёсыз ужъёс республиканской конкурсэ ыстэмын луозы. Республикаысь студентъёс пӧлын ортчоз искусствоя фестиваль. А. С. Пушкинлэн "Капитанская дочка" повестезъя удмурт кылын радиоспектакль дасяське. Александр Сергеевич Пушкинлэн вордскемез дырысен 200 ар тырмонлы сӥзем ужрадъёсты радъялоз нимысьтыз кылдытэм оргкомитет. Соин кивалто Удмурт Республикаысь Кун Кенешлэн Тӧроезлэн воштӥсез А. Г. Красильников но Правительстволэн Тӧроезлэн воштӥсез А. М. Лисина. Армие дасяськозы Егит пиосты армилы ӟечгес дасян вылысь, Воткинск городлэн администрациез нимысьтыз постановление кутӥз. Отын вань школаослэсь директоръёссэс косэмын нимысьтыз кабинетъёс висъяны, военно-патриотической ужез кужмоятыны. Озьы ик выльысь усьтоно яке выльдоно луоз музейёсты. Со сяна, тупатъяськозы на ыбылӥськон тиръёс. Экзаменъёсты кутонэ пыриськозы военкоматъёсын ужасьёс но. С. ПЕТРОВ. Эх, шу! Ӟеч улон возьмаськом Война дыръя трудоденен ужам. Кызьы быгатӥм, озьы юрттӥм оже кошкем агай- вынъёсмылы, дядяйёсмылы. Туж умой тодылӥм, ма понна ужаськом. Война бере улонмы тупатскыны кутскиз, ужась калык уждунзэ дыраз басьяз - толэзьлы кык пол. Кивалтӥсьёслы но уждун ужамзыя тыриськылӥз, шонерзэ вераса, продукция поттэмъя. Уж дурын но дисциплина зол вал. Ужлэсь пегась адямиосты кык ардлы кужмысь ужаны келяллязы. Юисьёсты сазьтӥськон интыосын возьылӥзы яке озьы ик кык арлы ужаны келяллязы. Нош али улонмы паймонлэсь но паймымон. Гырдым-гырдым пиос ужатэк уло. Соос шоры учкыса, кызьы адямилэн ужаны мылкыдыз луоз на. Улон воштӥськемъя, калыклэн сямыз но воштӥське. Кышноос но, пиос но, ужасьтэмез но, ужасез ноо, номыр шоры учкытэк юо. Таӵе эрказ улонэз кин ке но кортнаны кулэ, дыр. Бен, правительство воштӥське ке. Калыклэн улонэз но мукет сямен кошке. Куке пичи гуртъёсты бадӟымесь хозяйствоосы огазеязы, туж тросэз гуртъёс "неперспективной" шуыса бырыны сюризы. Зэмзэ но, Советской власть дыръя ляб хозяйствоос вал, но соосты кызьы ке но пыд йылазы возизы, куашканы "Инвожо". Пырысал ке со котькуд корка... - Мар со "Инвожо"? - таӵе йӧспӧртэм юанэн алигес редакциямы пыраз тодмотэм воргорон. Та пиосмуртлы валэктоно луиз: "Инвожо" - со удмурт егитъёслэн журналзы. Потэ, шуисько, 1990 арысен. - Паймисько,- шуэ тодмотэм адями, - таӵе-таӵе журналэз кылылэме ик ӧй вал. Ачим мон Томск палась. Нош пинал дыры Удмурт шаерын ортчиз. Эшъёсы пӧлын но удмуртъёс ӧжыт ӧй вал. Зэм, соос, городын будэмъёс, вордскем кылзэс сокем адӟем уг каро. Нош мыным котьку тунсыко потэ калыклэн кылыз, сямъёсыз, йылолъёсыз... Вераськон сямен Сергей Петрович (озьы вылэм нимыз) журнал бамъёсты берыкъянъяз эшшо зол тунсыкъяськыны шӧта. "Нош таиз кин?" - чебер нылмуртлэсь тусбуйзэ адӟыса юа. - Любовь Быкова,- валэктӥсько солы.- Удмурт эстрадаысь кырӟась. Пиосмурт уката пайме: - Удмурт эстрада?! Вань шат сыӵеез? - Малы уз луы,- шуисько,- берло дыре со туж пушъе. Тани таяз номерын Анна Плотникова сярысь гожтэмын. Тӥни кыӵе ныл!.. Номерысь номере озьы: культура, искусство, наука но мукет удысъёсысь дано адямиосын тодматӥськомы. Тодмотэм воргоронлы пумен тунсыко луэ, лэся. - Мон ноку ӧй малпалля, удмуртъёслэн сомында данъяськон адямиоссы вань шуыса. Нош со адямиосты возьматэмды бере, берло кин но ма сярысь гожъялоды на? - Милям калыкмылэн ошмесэз уз куасьмы. Тани учке, кӧня соос будо,- "Шундыкарысь" нылпиослэн ужъёссылы сӥзем журналмес возьматӥсько. - Нош политикъёсты, азьветлӥсьёсты тӥляд вань-а? - йырвизьме, лэся, сына ини выль тодмое. - Таиз ласянь ми туж ик ушъяськыны ум быгатӥське, оло. Но сюлэмшугъяськытӥсь, туала улонысь лэчытэсь ужпумъёс сярысь ми вераськиськомы "Публицистлэн синмыныз" рубрикаямы. Ӟырдытэсь статьяосты лыдӟыса, оло, егитъёс малпаськыны но азьлане лэчыт синмын учкыны дышозы... Калыкмылэн ортчем сюресэныз но тодматӥськомы. Солы сӥземын "Выжыосмы" рубрикамы. - Кыӵе чебересь,- пальышак потыса учке воргорон инкуазь суредъёс шоры. - Бен,- шуисько,- элькунысьтымы тросэзлэн художникъёслэн ужъёссы калыкмылы, уката ик гуртын улӥсьёслы, тодмоесь ӧй вал. Соосты адӟыны луылӥз городын ортчылӥсь выставкаосын гинэ. "Инвожо" журнал, шуыны луоз, суредасьёслэн ымнырзы, адӟытонзылы пӧрмиз. Сизьым ар ӵоже художникъёслэсь кӧня суредъёссэс со вуттӥз, вӧлмытӥз ини калык пӧлы. - О! - лӧпша воргорон.- Кӧня тӥляд пинал ымныръёс - кылбурчиос, веросчиос!.. - Бен, журналмылэн котькуд номераз выль нимъёсты поттыны тыршиськом. Журналамы ужасьёсты асьсэды но выль нимъёс выльдо. - Мон умой ӧй кылзӥськы-а, мар-а - ӧй вала, ма шуэм со "ин-во-жо"? - нош юа пиосмурт. - Бен,- шуисько,- та чебер но йӧпӧртэм кылэз азьвыл шер кылоно луылӥз, трос пӧртэм ке но кутӥське: со инмар но, шунды берытскон но (солнцеворот), июнь толэзь но, сяська но... "Биологической нимкылъёсын кылбугорын" тазьы шуэмын: инвожо (инвожосяська) - будос, растение - смолёвка, смолка (дрёма), гвоздика полевая. Уй палъёс тае герберсяська но шуыло... - Э-э, та чебер журналэз котькуд коркан ке басьтысалзы,- шуэ тодматскем эше.- Таӵе турлы буёло... Туж дуно-а, мар-а? - Ӧвӧл,- журналмылэсь дунзэ возьматӥсько.- Почта пыр ке гожтӥськоно, со тӥледлы 38 манет усёз. Нош редакциямы лыктыса октӥды ке, соку арлы 24 манет гинэ тыроды. Воргорон журнал бамъёсты берыкъя но берыкъя. Син азяз йӧто пӧртэм буёло туспуктэмъёс, кырӟанъёс. вуриськыны, керттӥськыны, пӧраны дэмланъёс, пичиесь пьесаос, юморескаос. - Нош мар дэмлалоды вуоно арын лыдӟисьёстылы? - юа пиосмурт. - Выль ужъёсынызы шумпоттозы тодмо писательёсмы, кылбурчиосмы - Вячеслав Сергеев, Петр Захаров, Николай Никифоров, Анатолий Комаров, Лидия Нянькина, Римма Лаптева. Егитъёслэсь бере кылеме уг поты мынам но. Вуоно арлы дасясько серем пыр гожтэм детективме... Нош удмурт шаермес, калыкмес ӟечгес валаны юрттозы Маргарита Гришкина, Людмила Христолюбова, Михаил Атаманов, Владимир Владыкин но аспирантъёс Юрий Александров, Алексей Петров. Редакциямы пырем мурт кӧня ке номер журналмес сьӧраз басьтытэк ӧз чида... Гажано лыдӟисьёсмы! Милям тӥ азьын сьӧлыкмы вань: журналмы дорады ӝегаса вуэ. Но оске: татын журналистъёслэн пичи но янгышсы ӧвӧл. Та пумысен ми но, тӥ сямен ик, ӝожомоно луиськом. Ваньмыз дунояз: бумага, типографиысь ужъёс... Ма веранэз, тӥ ваньзэ асьтэос валаськоды. Но... кызьы шуо, йӧ вырӟе кадь. Тани витетӥ но куатетӥ номеръёссэ печатланы кутско. Озьыен, осконмы уг быры. Ми шумпотысалмы, лыдӟисьёсмы журналмы пумысен асьсэлэсь малпанъёссэс ке верасалзы. Я бен, асьмеос огъя кылэ вуимы кадь: ог-огенымы ум люкиське. Ми оскиськомы тӥледлы. Озьыен, ӵуказе почтае гожтӥськыны мыноды. Егор ЗАГРЕБИН, "Инвожо" журналлэн тӧроез. Мӧйыослэн нуналзылы Юрттозы сиён-юонэн Арлыдоослэсь нуналзэс пусйыны дасяське Сарапулысь Инвалидъёслэн огазеяськонзы но. Маял но пиво поттӥсь заводлэн бадӟым залаз 2 октябре люкаськозы шуге-леке шедем арлыдоос. Та заводлэн дирекциез, озьы ик ПХО-ысь кивалтӥсьёс инвалидъёслы пичильтык кузьым - сиён-юонэн юрттэт сётыны чаклало. Арлыдоослэсь нуналзэс пусъёнэ ӧтемын 87 мурт, 20 муртлы - ветлӥсьтэмъёсызлы - кузьымзэс доразы нуозы. Сарапулысь ветеранъёслэн хорзы люкаськемъёслы концерт возьматоз, быгатэмзэс адӟытозы асьсэос но самодеятельной артистъёс. Арлыдоослэн нуналэнызы ӵош сарапулъёс пусъёзы инвалидъёслэн огазеяськонзылы дас ар тырмемез но, устоосызлы сётозы данъян грамотаос. Л. КИМОВА. Коньдон гидэ люкаське Паймоно кадь луыса кошке. Гурт калык уно толэзьёсын уждунзэ уг адӟы, нош урамъёсты учкы ай, шыкыс кадь юртъёс ӝутэмын. Колхоз куашка, нош крестьян адями пыд вылаз юн возиське. Тани Алнаш районысь Кузьымгуртын но берло аръёсы трос лэсьтӥсько. Колхозын уг, ас доразы, нимаз хозяйствоын. Коньдон, валамон ни, пудо вылысь люкаське. Югыт нуналзэ Кузьымгурт калык колхоз ужын тырше, нош кыкетӥ сменазэ ас юрт котыраз ортчытэ - ыж вордэ, кунян будэтэ, парсьпи куайытэ. Зэм, ас бакчаяз-гидаз воргорон но нылкышно куссэс зол посо-небӟыто, колхозын сярысь татын уго пайдаез но ӟечгес адӟиське. Нош ма ӵектэ ужасьлы колхоз? Оло, соин воксё люкиськоно? - Нет, брат, - шуэ кескич Кузьымгурт воргорон. - Уксёзэ ум ке но адӟиське, ю тысь люко, турын, куро сёто, техникаен юрто. Г. ЮСАЕВ. Вань юанъёслы валэктон шедёз-а? Удмурт Республикаысь Кун Кенешлэн Президиумезлэн заседаниез ортчиз. Сое нуиз Кун Кенешлэн Тӧроез А. А. Волков. Учконо ужпумъёс пӧлысь нырысетӥез герӟаськемын туннэ усьтӥськись Кун Кенешлэн азьвыл ялымтэ 21-тӥ сессиеныз. Со быдэсак сӥземын Удмуртиын кылдэм социальной, экономической но политической югдурез эскеронлы но дунъет сётонлы. Кун Кенешлэн депутатэз, ялан ужась комиссилэн кивалтӥсез Ю. В. Семенов но Президиуме быръем куд-ог эшъёс дэмлазы республикаын ортчытэм приватизацилы йылпумъянъёс лэсьтыны, калык ваньбурез тус-тас карисьёслэсь кылзэс юаны. - Берло толэзе кылдэм югдуръя гинэ дунъет сётоно ӧвӧл, оглом верано: малы та калэ вуиз Удмуртия? Малы туннэ нуналозь Ижевске шуныт ӧз вуы? Малы дунъёслэсь будэмзэс нокин уг чакла? - юан вылэ юан пуктэ депутат В. А. Соловьев, Промышленностья, соин герӟаськем удысъёсты азинтонъя, вузъёс но услугаос сётонъя комиссилэн кивалтӥсез. Зэмен но, ӝегатскытэк сэрттоно-пертчоно ужпумъёс трос гинэ тымиськемын. Депутатъёс юнме шорысь ӧз куре вал ук сессиез ӝоггес люканы, республикаез шуг- секытысь поттонъя, ӵош кенешыса, амалъёс утчаны. Туннэ усьтӥськем 21-тӥ сессиын вераськон ӟырдыт, лэчыт пӧрмоз. Сое шӧдоно Президиумын ортчем кенешъя но. Президиум озьы ик учкиз куд-ог мукет ужпумъёсты. Л. МЕДВЕДЕВА. УДМУРТИЫСЬ ВАЛТӤСЬ АРХИВЛЫ 75 АР Вашкалазэ алиен герӟаса Россилэн, Удмуртилэн историзы юн герӟаськемын православной черклэн историеныз. Сое валазы вашкала Россилэн кивалтӥсьёсыз но, черк книгаосты, документъёсты утьыны косылӥзы. Кылсярысь, Пётр И 1720 арын указ поттӥз, вань епархиосысь но монастырьёсысь гожтэтъёсты, книгаосты Сенатэ ыстын косыса. 1917 ар та ӟеч сямез тарказ. Большевикъёслэн инмарлы пумит политиказы черкъёслэсь архивъёссэс, библиотекаоссэс быдтӥз. Тае лыдэ басьтыса, Центральной кун архивын ужасьёс ас азязы таӵе ужпум пуктӥзы: тодоно кыӵе но кӧня документъёс ышемын, быремын. 1992-1995 аръёсы черклэн историеныз герӟаськем документъёс Удмуртиысь городъёслэн архивъёсысьтызы Центральной кун архиве выжтэмын вал. Али татын 24 сюрс документ утиське. Калык соосын тодматскыны мед быгатоз шуыса, архивын ужасьёс али дасяло "Из истории Русской православной церкви в Удмуртии по документам ЦГА УР" справочник. Та книга возьматоз, кызьы шаерамы Христослы оскон вӧлмиз, черкъёс усьтӥськизы, тодматоз черкъёслэн документъёсынызы, валэктоз, кытысь соосты шедьтыны луоно. Со сяна, Удмуртиысь быдтэм но али ужась черкъёс нимын-нимын пыремын луозы, соослэн историзы вакчияк сётэмын луоз. Жаляса верано луэ, Киров, Пермь, Свердловск улосъёсысь, Татарстанысь но Башкортостанысь архивъёслэн материалъёссы справочнике уз пыре, та архивъёсын шаерысьтымы черкъёс сярысь узыр материал люкамын ке но. Справочник черкын ужасьёслы, историез эскерисьёслы, шаерчиослы, студентъёслы тунсыко потоз. И. Зайцева, Центральной кун архивысь отделлэн кивалтӥсез. Эшлыко кусыпъёс Вена - Мюнхен - Шаберды Дуннеысь та кык тодмо городъёс радэ Завьялово районысь Шаберды гурт юнме шорысь ӧз шедьы. Татын куинь арня ӵоже асьме кылмылы дышетскизы, удмурт семьяосын улӥзы Германиысь Мария Мюллер, Михаэль Гайслер, Эберхард Винклер, Герсон Клумпп, Австриысь Кристиан Пишлёгер. Доразы вуыкумы, ӵапак уроксы мынэ вал. Удмурт кун университетысь преподаватель Г. А. Тронина мыло-кыдо ужатэ удмурт текстэз англи кылэ берыктон бордын. - Немец кылэз мон йӧскадь уг тодӥськы, нош англи сямен соос вольыт верасько. Соин ик удмурт кылысь ӝогак выжиськом англи кылэ. Куноосмы пӧлысь самой егитэз - Михаэль, ми сое Миша шуиськом. 22 арес, студент. Удмурт сямен, мукетъёсыныз ӵошатыса, чылкыт вераське, правилоослы ӝог дыше. Мария Мюллерлы мусояса небытак гинэ Маня нимын вазиськисько. Та чебер кышномурт вордскемын Финляндиын. Немецлы бызьыса, 24 ар улэ ни Германиын. Ужа больницаын медсестра луыса. Семьяез - кузпалыз но кык нылыз, сое келязы асьсэ коньдонэн ӵыжы-выжы калыкезлэсь кылзэ дышетон понна. Герсон Клумпп, Гера, тодосчи, ужа финн-угор кылъёс бордын. Кристиан - Венаысь студент-дипломник. Солы дышетскон программая одно ик тодыны, пе, кулэ кык финн- угор кылэз. Бырйиз мадьярзэ но удмуртсэ. - Ми дорын удмуртъёс ӧвӧл, но университетамы огез дышетӥсьмы ӟеч тодэ та кылэз. Со дэмламъя ик мон вуи Удмурт шаере,- шуэ Кристиан Пишлёгер.- Пайми, улэп удмурт кылэз кылыса. Мон уг оскиськы вал, кин ке соин вераськись вань на шуыса. Нош татын улӥськом чылк-чылк удмурт семьяын, удмурт гуртын. Туж синмаським Пичи Пургаысь Вуж Моньялы. Городлэсь палэнын улӥсьёслэн мургес шӧдӥське национальной культуразы, аспӧртэмлыко сямъёссы, мылкыдзы. Мюнхенысь куноос дорамы вуизы ни, Удмуртия сярысь умой-умой тодон-валан люкаса. Соослы трос юрттӥз дышетӥсьсы Раиса Нор, Пичи Пурга районысь Гожня гуртын вордскем но Германие бызем нылкышно. Раиса Кондратьевна, кема аръёс ӵоже немец музъем вылын улыса, али но чылк-чылк вераське анай кылыныз, данъяське пурга палъёсыныз. Кунооссэ ӵыжы-выжыосыз доры, Вуж Моньяе но вуттылӥз. - Гуртын улыны милемлы кельше,- шуэ Михаэль.- Адямиос татын лякытэсь, ужасесь. Но улонды секыт. Ӧвӧл уксё, ву ӧвӧл. Шабердыын ӵапак та вакытэ коркаосы ву быземысь дугдӥз - мыно тупатъян ужъёс. Асьмеос солы дышемын. Табере немецъёс но шӧмъязы "цивилизацимес". Сьӧразы ваем маркаоссэс но Ижевскысь банкъёсын мырдэм-мырдэм, улӥ курсъя гинэ воштыны быгатӥзы. - Россиын - кризис. Ми сое валаськом, ум ӝожтӥськиське. Нош гурт калыкты умой улэ, сиёнлы уг ёрмы, ӝӧк вылазы котьма вань. - Германиын но югдур али ушъяськымон ӧвӧл, 20 процентэз калык ужтэк кылемын, уката но секыт - Восточной Германиын. - Нош кызьы уло тӥляд дышетӥсьёсты, студентъёсты? - О-о, соиз ласянь государство юн политика нуэ. Огшоры дышетӥсь толэзяз ог 5 сюрс марка басьтэ, студентъёс - 150 котыр. Кинлэн мылкыдыз вань, ӝытъёсы ужа на. Германиын таӵе луонлык сётэмын. - Дышетсконзэс куспетӥ карыса, вузысь кошкисьёс вань-а? - Ӧвӧл. Ваньмыз сюлмасько диплом басьтыны, сотэк уж шедьтыны секыт. Ми дорын тужгес но бадӟым конкурс вуоно юристъёс, врачъёс но экономистъёс пӧлын. - Германиын алигес бундестаге быръёнъёс ортчизы. Солы дасяськон зол-а мынӥз? - Зол. Трос уксё та нюръяськонэ кошке. Туэ 25 партия отчы пыриськиз. Вераны кулэ, огез но бадӟым партия, пичиосыз юрттытэк, властез уз киулты. Ми но, татчы лыктэммылэсь азьло, куарамес сётӥм огез партия понна. - Австриын, Германиын улӥсьёс кызьыгес учко туала Россия шоры? - Калыклэн аслаз сюлмаськонэз тырме. Телевизор пыр синйылто кадь Россиысь сенсационной луись учыръёсты гинэ. - Удмуртиысь кошкыса, татчы выльысь берытскемды потоз на-а? - Одно ик. Адямиосты туж умоесь. Мылкыдмы соосын ӵош ӝутске, удмурт сямен вераськем потэ. Яраз милемлы пӧраськемъёсты, горд кушманэн кутэмнянь, пельнянь, перепеч, ӝукен мильым, кумышка. Котькытын куноятыны выро, шуныт пумитало. Туж бадӟым тау ваньмыз понна. Куинь арнялы кунокуа но, дышетскон класс но луиз соослы дышетӥсьёслэн Нина Денисовна но Александр Евграфович Шудеговъёслэн корказы. Кыдёкысь, мурт шаерысь вуэмъёсты матысь ӵыжы-выжызэс кадь возизы Шаберды гуртысь Кощеевъёслэн, Исаковъёслэн, Игнатьевъёслэн, Кирилловъёслэн семьяоссы. Людмила МЕДВЕДЕВА. * Удмурт кыллы дышетэ Галина Александровна ТРОНИНА. * Куинь арня - удмурт гуртын! Фотоосыз Владимир КАМАШЕВЛЭН. Вылӥ дунъязы 28-тӥ сентябре Удмурт Республикаысь Кун Кенешлэн Президиумезлэн заседанияз. Россиысь обороная, спортъя, техникая организацилэн (РОСТО) Удмуртиысь ёзэзлэн кивалтӥсез Клим Юсупов Кун Кенешлэн Тӧроезлы А. Волковлы РОСТО-лэн Центральной Кенешезлэн нимыныз, егитъёсты, вордскем шаерзэс гажаны, авиацияя но техникая спортэз азинтонын бадӟым саклык висъямез но юрттэмез понна грамота сётӥз. Удмурт Республикаысь Кун Кенешлэн пресс-службаез. Куноын кадь ул вылэм Чидан быриз ини - та улонмы, оло, дунне быронэ вуттэ, лэся. Кылем арын газетъёсын гожъязы: Россиын дунъёс будэмысь дугдӥзы, соин ик уксё лыдэз кулэстоно. Кулэстӥзы ке кулэстӥзы нольёссэ, но ӝыны ар ортчыса, дунъёс йырси пештырскымон луизы. Пичи дыръямы Лели будэ часлы быдэ шуыса кылбур дышетӥм вал. Табере Лелиос уг будо, дунъёс ке - часлы, минутлы быдэ. Йырдэ быдтон калэ вуод ни тазьы. Ми, мӧйы адямиос, войнаез но туж курадӟимы - турын-потэн сурам нянен 75 иськем но тэль кораны мынӥськом вал, табере куноын кадь гинэ ул на вылэм. Кытын со? Пичи пенсимес но кык толэзен ӝегато. Оло, сое но кулэстозы ай - визьзы тырмоз, воксё быдтозы. З. БРЫЗГАЛОВА. Иж кар. Редакцилэсь: калыкез улон-вылонын утёнъя министрлэн воштӥсезлэн Н. Ф. Кузнецовалэн верамезъя, пенсиосты кулэстон-будэтон сярысь нокыӵе вераськонъёс ӧвӧл. Нырысь тыршоно али сётъяны чакламъёссэ ӝегатскытэк тырыны. Кызьы кивалтоно адямиен? Удмурт кун университетлэн экономикая но кивалтонъя институтэзлэн ёзэтаз та нуналъёсы ужа научно-методической конференция. Со нимаське "Дауръёслэн вожвылазы адями кужымен кивалтон" шуыса. Отчы лыктыны кулэ Санкт-Петербургысь, Москваысь, Новосибирскысь, Екатеринбургысь но мукет городъёсысь тодосчиос. Кенешын вераськон мынэ кадръёсты дасян, уждун тырон, ужась коллективъёсын кивалтон но мукет ужпумъёс ласянь. Куноос озьы ик пумиськыны чаклало Удмурт Правительствоын ужасьёсын. С. НИКИТИН. Кыӵе тазалыкед, эше? Алигес вал со учыр, кык тодмоос Иж карысь Пушкинской ульчаысен пумиськизы. Кемаласьгес вал, дыр, ини одӥг сюрес вылэ тупаллямзы. Кыкназы ик киоссэс ӝутыса, ог-огзэс ӟыгыртыны дасесь вал кадь. "Ӟечбур, ӟечбур, Митрей, кытысь ай тон потӥд? - Кытысь потӥ, отын ӧвӧл ни, пыдме но медам лёга ни отчы. Больницаын кылли,- вазиз Митрейлэн пумитаз ортчем аръёслы сётскыса мӧйымем воргорон. - Кыӵе тазалыкед, бурмид-а? - Висись муртлэсь тазалыксэ юаськод. Тани бертон сюрес вылэ потон азьын кӧня ке рецепт сётӥзы на. Пумозяз бурмытскон понна, пе, та эмъюмъёсты юоно на. Соосты аслад коньдонэныд басьтоно. Аптекае пыри, врачлэсь сётэм бумагаосме укное мычи. Дунзэ кылӥ но, отчыям ик погырасько вал. Тодӥськод-а кӧня сылэ? Кык сю манетлэсь ятыр. Ожысь-а, ужысь-а ветеран тон - соиз шоры уг учко. Со гинэ мар ай. Шприц но, перчатка но басьты, мукетъёссэ уг вераськы ни. Улэмед ке потэ, кисыдэ сузя. Нош отын тӧл шула ке, соку ма кароно? Ветлы висем кабеныд. А ведь мон ӧжыт ӧй ветлы. Тыл пыртӥ но потӥ, Днепр вамен, Карпат гурезьёс пыр но ортчи, Прага дорын но ожмаськи. Госпитальёсын кылли. Отысь потыны гинэ вуиськод, нош ик фронтовой сюрес вылэ мыноно. Мар тыныд со сярысь верасько? Ачид но пӧртэм ӧвӧл, ожез аслад синъёсыныд адӟид, ас пельёсыныд кылӥд снаряд-пуляослэсь шуламзэс. Окопын пукыкуд. Атакае ӝутскыкуд, кирос тыремед сярысь верамдэ но кылэме вань, ӧй вунэты. Кык тодмоос кемагес сылысалзы на ке, трос ӝуксэс пыжысалзы-пӧзьтысалзы на, дыр. Ӵапак соослэн кенешсы туж тупаз ожысь но ужысь ветеранъёслэн советсылэн алигес ортчем пленумезлы. Со сярысь докладаз пусйиз Зинаида Боткина. Ветеранъёслы медицинской юрттэт сётонысь со ӟечсэ но, шекъёссэ но шараяз. Зэм, докладчик ваньзэ одӥг ӟыгыртэтэн басьтыны ӧз быгаты. Пленуме лыктэм ветеранъёс асьсэос больницаослэн, аптекаослэн ужысьтызы трос шекъёсты бугыртӥзы. Тани Ижын ож пыр ортчемъёслы госпиталь вань. Ас вакытаз со умой ужаз, ӝожтӥськись ӧй вал. Уноез ветеранъёс тазалыксэс юнматӥзы отын. Дыр вуиз госпитальлэсь юртсэ тупатъяны. Кутскизы ужъёс, нош собере сое тыпак дугдытӥзы. Коньдон ӧвӧл. Ку со луоз, ку госпитале висисьёс лыктозы - тодмо ӧвӧл. Эмъюмъёс! Ой, со эмъюмъёс туж шуген шедё. Врач дораз пырем муртлы рецепт гожтэмезлэсь азьвыл ӝӧкысьтыз лымы кадь тӧдьы бумага поттэ. Тани, пе, татын гожтэмын, кыӵе эмъюмъёсты дунтэк сётыны луэ. Татчы пыртэмын ӧвӧл ке, коньдондэ дася. Бен, висись мурт котьку ик дун шоры уг учкы ни. Рецептэз басьтыса, аптекаосы мынэ. Ярам вань ке, басьтод. Кыӵе эмъюмъёсты дунтэк басьтыны луэмез возьматӥсь бумагаен тодматскон вера, отчы куамынлэсь ятырез препаратъёс пыртэмын ӧвӧл шуыса. Сое дасянын специалистъёс ужазы. Малы ке ветеранъёслэн советысьтызы нокин ӧтемын ӧй вал. Туж шуг пинез эмъянэн но протез пуктонэн. Черодэз толэзьёсын витёно луэ. Стоматологической больницаос коньдон вылэ чӧлско. Озьы но, дыр. Нош висён-курадӟон сое уг юа ук. Мӧйыос пичи пиналъёс ӧвӧл, ишкалтэм пинь интые вылез уг поты ни уго. Висисьлы юрттон вылысь, кыӵе ке но амал утчано, чабкиськонлэсь нокинлы капчи уз луы. Данакез ветеранъёс асьсэос больницаосы мыныны уг быгато ни. Куд-ог районъёсын но городъёсын врачъёс, медсестраос пересьёс доры вуыло, юртто ик. Но котькытын озьы ӧвӧл, уката ик гуртъёсын. Ортчемаз пленумын ветеранъёслы Глазовын госпиталь усьтон сярысь вераськон ӝутскиз. Со пумысь шумпотӥзы вал уй пал ёросъёсысь мӧйыос. Уго табере кытчы ке палэнэ мыноно уз луы ни. Ушъяськонзы кышъяськыны но ӧз тырмы. Госпиталь туннэ ке но ӧвӧл. Интыысь кивалтӥсьёс уг дырто. Сое усьтыны, питыртэм погылян интыяз вуытэк ик погыраз. Эмъюмъёс басьтон, больницаосты тупатъян сярысь кин гинэ уг вераськы, ваньзы коньдон вылэ чӧлско. Районъёслэн, городъёслэн бюджетазы солы ӧжыт коньдон висъямын. Сое но дыраз уг сёто ай. Тодӥськом, ветеранъёслэн улон сюрессы капчи ӧй вал. Туннэ но соослэн сӧсырмем мугоръёссы висё. Сое лыдэ басьтыса, туж кулэяськисьёслы санаторийёсын шутэтскыны, эмъяськыны путёвкаос висъясько. Нокинлы путёвкаос уг висъясько шуид ке, шонер уз луы. Но соин ӵош ик тросэзлэн ӧсъёсы йыгаськемзы юнме луэ, путёвка аръёсын уг висъяськы. Дунэн басьтоно ке, кисыдэ сутод, дунзы сюрс манетъёсын лыдъясько, вашкала сямен миллионъёсын. Та пленумын вераськиз элькунысьтымы калыклэсь тазалыксэ утёнъя министр Сергей Шадрин но. Ветеранъёслы юрттэт сётонэз умоятон сярысь со трос ӟечсэ вералоз шуыса оскиськом вал.Сыӵе вераськон ӧз пӧрмы. Озьы ке но, ветеранъёслы юрттонэз умоятон вылысь, пленум постановление кутӥз. В. СМИРНОВ, ожысь но ужысь ветеран. Лицензиос сётэмын Шаермы "сьӧд зарниен" узыр шуыса котькинлы тодмо. Но берло дыре эшшо нефтен узыр интыос шедьтэмын. Геологъёс со ватосэз шараязы Якшур-Бодья ёросысь Патраки гурт палась, озьы ик Дэбес но Кез палъёсысь. Озьы чылкак выль акционер огазеяськонъёс кылдӥзы - Удмурт нефтяной компания но Удмурт национальной нефтяной компания. Толон валлян Удмурт Республикаысь инкуазь узырлыкъёсъя но инкуазез утёнъя министерствоын нырысьсэ та кык компаниослы лицензиос сётэмын. Со выль месторождениосын нефть поттыны бадӟым луонлыкъёс сётэ. Нырысетӥ скважина портэмын ини. Ӝоген нефть гумыостӥ бызьыны кутскоз. Нырысь чакламъя, Патраки дорысь нефть поттон инты араз ог 747 тонна "сьӧд зарни" сётыны кулэ, Дэбес палъёсын араз одӥг но ӝыны миллион тонна. Оло, соос элькунмылэсь бюджетсэ узырмытын быгатозы. Н. ЛЯЛИН. ЛЫДӞИСЬ ВЕРА МАЛПАНЗЭ Малы кивалтӥсьёс уждунзэс сиён-юонэн уг басьто? Газеттэс куинь ар лыдӟисько ни. Газет бамын но, радио, телевизор пыр но ялан ужпум ӝутыло шахтёръёслы, дышетӥсьёслы, эмъясьёслы, колхозникъёслы но мукет ужасьёслы дыраз уждун тырымтэ пумысен. Нош малы нокыӵе вераськонъёс уг мыно, Президент но правительство озьы ик толэзьёсын уждун уг басьто шуыса? Озьыен, соос ас уждунзэс толэзьлы быдэ ӝегатскытэк басьто, дыр? Тырмоз ни калыкез курадӟытыса возьыны! Кивалтӥсьёс нырысь ик уждун калыклы мед тырозы, собере гинэ асьсэос мед басьтозы. Калыкен ӵош соос курадӟыса улӥзы ке, соку гинэ, оло, кыӵе ке пайдаез луоз. Азьвыл аръёсы уждунэз 1-2 нуналлы ӝегатылӥзы ке, кивалтӥсез валэктон гожтыны косылӥзы, кыӵе муген со банкысь коньдон басьтымтэ шуыса. Пенсиосты сётъян али куинь толэзь пала ӝегатэмын ини. Куд-огез ӵектэ пенсиосты сиён-юонэн но дӥськутэн сётъяны. Нош малы правительствоын ужасьёс ас уждунзэс дӥськутэн но сиён-юонэн уг басьто меда? Ми, пенсионеръёс, сыӵе амалэн, оло, соглаш но луысалмы но котькыӵе тыронъёсты, коньдонэн басьто. Малы меда - радио кылзэм понна, электрокужым но газ понна, телефон возем но пу билет понна, телевизорез тупатъям понна, эмъюмъёс понна сиё-юонэн уг басьто? Мон тырысал йӧлын, чечыен но картофкаен. Россилэн Правительствоез но Президент, бюджет коньдонэн уг тырмы шуыса, начар калыклэн чырты сьӧраз пуксизы. Мон али валаса уг быдтӥсьлы кыӵе тӧлпери ортче Россиын но Удмуртиын. Магазин ӝажыос бушесь луэмын. Малы асьмелэн манетмы дунтэма? Яке США-ез узырмытыны озьы выро-а, мар-а? Нош ик вузъёслэн дунзы йылӥз, уждунлы, пенсилы индексация уг лэсьтӥськы. Кин озьы лэсьтэ, наказать кароно. Кызьы улоно азьланяз, тодыны уг луы. Узыр адями начарез шоры учкыса серекъя, вылды. Правительстволэн кутэм законъёсыз уг быдэсъясько. Тани ужысь ветеранъёслы, улонзэс капчиятон вылысь, пулы, вулы, газлы льготаос кутэмын вал. Но соос уг быдэсъясько. Али эмъюмъёсты ӝыны дунын сётэмысь дугдӥзы. Милям районын гинэ-а меда озьы яке мукет районъёсын ветеранъёс умойгес уло? А. КОЖЕВНИКОВ. Шаркан район, Зюзино черкогурт. Гожтӥське "Ӟечбур!" газетлы! 1999 ар понна гожтӥськисьёсмы! Туэ тӥ понна ми лотерея ортчытӥськом. Лыдӟисьёсмес редакциямы возьмало ини: - муспотон луд кечпи - небыт шудон; - чай юон сервиз; - йӧзорлэсь но куакакеньырлэсь утись зонт; - газетмылы гожтӥськем одӥгез шудпуйы быдэс ар дунтэк лыдӟоз "Удмурт дунне" газетэз; - учредительмы но - Калыкез дышетонъя министерство - дасяз кузьым - лагерьын шутэтскыны 2 путёвка. (Огез соос пӧлысь, нош озьы ик электрон час но нылпи энциклопедия, газетмылы 20-тӥ сентябрёзь гожтӥськемъёс понна лотереяын шудӥськоз). Озьыен, дыртэ вуоно арлы гожтӥськыны. Дуныз - 22 манет но 12 копейка. Газетмылэн индексэз - 54403. Лотерея шудонэ пыриськон понна (14-20 куарусёнэ гожтӥськемъёс но), тӥледлы, нимтулдэс но улон интыдэс, ку, кыӵе нуналэ гожтӥськемдэс ӟеч гожтыса, редакциямы открытка лэзёно. Бераз пусъёно: "Мон гожтӥськи "Ӟечбурлы!". Нош кузьым утӥсьёсты редакциямы квитанциенызы возьмалом. Нуналлэн тодметэз Вашкала календарья туннэ - Арикалэн нуналэз. Туриос лымшор пала лобӟо ке, Покров нуналэ, 14 октябре, нырысьсэ кынтоз, туриос уг адӟисько ке, 2 ноябрёзь уз кынтылы. 2 октябре Зосимлэн но Трофимлэн нуналзы. Муш умортоосты толлы дасяло. Чаклалэ: Октябре шуныт, шундыё нуналъёс луизы ке, та числоосы ик апреле зэмос тулыс вуоз. Октябре гудыръяса зориз ке, тол вакчи но небыт луоз, трос уз лымыя. Кызьпуысь вань куаръёсыз усьыса ӧз быре ке, тол кезьыт луоз. Куаръёс музъем вылэ "тыбырынызы" выдо ке - ю-нянь удалтоз. Мульы трос, нош губи ичи ке, тол лымыё, кезьыт луоз. Та нуналэ ... ар талэсь азьло 1 октябре 1933 арын Ижевскын усьтӥськиз вир басьтонъя станция. 2 октябре 1923 арын Удмуртиын кылдытэмын нырысетӥез архив. Туннэ - Дуннеысь арлыдоослэн нуналзы Эн куректы, песянай... Син азьысь нокызьы но уг кошкы алигес Ижын адӟем суред. Ныр ӵушконзэ пертчылыса, песянай кема гинэ кияз посӥз-бергатӥз корт манетъёссэ, собере ини туж дӥсьтытэк мычиз липет улын сылӥсь базарчилы: - Нылы, кӧс вӧйдэ сёт вал... Кисыриё киысь мычем коньдонэз кильтро дӥсяськем нылмурт ӝабырак кутӥз но ӝогак гинэ лыдъяз. - Коньдонэд кык манетлы уг тырмы, песянай. - Ма... Толон гинэ вузды дас укмысэн вал но, - копак ӝожомиз пересь. - Мырдэм но кызьы тамындазэ коньдонме вӧйлы мылетӥ вал. Оло, жалялод ик пересез, нылы? Куинетӥ толэзьзэ пеньзиме уг сёто ни, нош сием потэ, - синву пыр ик тэльмыре песянай. - Ваньдэс тӥледды жаляд ке, ачид гольык кылёд, - буям ымдурзэ ик пепертӥз нылмурт, собере коньдонзэ берен мычиз боды вылэ пыкъяськись пересьлы. Вазиськись но востэм тусо песянайлэн, ёрмем лулзэ кытчы карыны валатэк, вань сюлэмыз бугыртӥськиз, лэся, пушкыз тырыса ик тышкаськиз: - Базареныз ӵош быдэс музъемез ик мед пуштоз-а, мар-а вал. Пуштон кулэ ӧвӧл ай, песянай, улом, улом кускерттонъёсмес золгес кыскыса но, ӝуштыса но. Улон быронэз малпаса шат тӥляд песянатёсты, атайёсты Октябрь революцилэн югыт тылызлы осконэз дуризы? Нош кин аслэсьтыз пинал ёзвиоссэ, егит дырзэ малпатэк Быдӟым Вормонэз матэктыны юрттӥз, улонзэ жалятэк фашистъёслы пумит ожмаськиз? Ваньмыз со тӥ пыр ортчиз, гажано песянай-песятайёсмы. Жадёнэн ёмырам пельпумъёсты вылын тӥ ик ӝутӥды куашкатэм странамылэсь юнлыксэ. Лек вакытъёс но, кезьыт но, кӧт сюман но ӧз чигнатэ тӥледды берлань, азьланезлы осконлэн бурдъёсыз вылын йыгмыт вамышъяды тӥ улонэтӥ. Нылпиосты, нылпиостылэн нылпиоссы сярысь сюлмаськон но кужым пыӵатъяз. Улонэз ортчем аръёсты тӥляд пунэтэ сузьем узырлык выллем, кудӥзъя дышетскыны кулэ туала будӥсь пиналъёс но егитъёс. Странамылэн, шаермылэн сяськаянэз, тӥляд но кӧттыро улонды туннэ соос киын уго. Эн куректы, песянай, туннэ кин ке ӧз вала ке тонэ. Туала кылдэм югдурез тышкаськыса, ас вылад сьӧлык басьтэмед понна кыл мед кутозы ни странамес кураськись калэ вуттэмъёс. Чутыса ке но, улон азьланьтӥське, озьыен, умоезлы оскон но медаз кысы. Кильтро дӥсяськем базарчи нылмурт но валалоз аслэсьтыз янгышсэ. Аръёс уго ворттӥсь валъёс кадь: пиналзэ егитомыто, егитсэ - мӧйымыто. Гажано песянайёс, песятайёс, тӥледды туннэ данъя но пыд азязы йыбырттэ быдэс дунне. Ми но, газетын ужасьёс, шумпотымон ивормес вераны дыртӥськом. Газетмылы гожтӥськон дунъёс 1 ноябрёзь азьло сямен ик кылёзы. Эн малпалэ, дунъёс будэмен кышкатыса, лыдӟисьёсмес озьы толэзьысь толэзе пӧяськом шуыса. Газетмылэн тросэз эшъёсыз - арлыдоос. Ми валаськом ук, одӥг пенсиен гинэ кыдёке уд мыны. Озьы ке но, та секыт вакытэ но газетэнымы люкиськыны уд дыртӥське. Ми но пӧртэм луонлыкъёс утчаны тыршиськом, тӥледлы капчигес карон понна. Югдурез тодон понна юри жингыртӥмы ёросъёсысь почта ёзъёсы. Котькытын шуо, газетмылы гожтӥськыны мылкыд карисьёс вань гинэ, но тросэз возьмало пенсия сётэмзэс. Калыкез улон-вылонын утёнъя министерствоез но, Ветеранъёслэсь кенешсэс но газет-журналъёслэн дуноямзы сюлэмшугъяськытэ. Соин ик, дунъёс котькытын резина сямен золтӥсько ке но, "Удмурт дунне" выллане тэтчыны уг дырты. Удмурт Республикаысь Почта пыр кусып возёнъя Федерация управление но газет-журналъёсты нуон-ваён дунзэ 1 октябрьысен будэтонтэм сярысь ужпум кутӥз. Дунъёсты будэтыны чаклало 1-тӥ ноябре. Иське, "Удмурт дунне" газетлы таяз толэзе но дунтэмен гожтӥськыны быгатоды на. Туж оскеме потэ, базарысь пумитам песянайлэн но та нуналъёсы улоназ пичильтык ке но шумпотон тылгизьы ӝуатскоз шуыса. Кӧс вӧй сяна, ӝӧк вылаз мукет но сиён-юонъёс кылдозы. Л. МАЛЫХ. УДМУРТИЫСЬ ВАЛТӤСЬ АРХИВЛЫ 75 АР Уг вуно вакытъёс 1923 арын 2 октябре Удмуртиын нырысетӥез архив кылдытэмын вал. Али со Центральной кун архив шуыса нимаське. Отын утисько 1713-1985 аръёсысь документъёс. Соос, историкъёслы но шаерчиослы сяна, нокинлы тунсыкоесь уг пото шуыса эн малпалэ. Огшоры адямиослы но соос кулэ луо, угось ахивын утисько Удмуртиын улӥсьёслэн ужамзы, уждунзы, дышетскемзы, наградаос басьтэмзы сярысь документъёс. Уноезлы со документъёс пумысен справкаос кулэ луо. Сыӵе адямиосын ужан понна, кун архивын кылдытэмын нимысьтыз отдел, отын тыршо ӟеч специалистъёс, соос умой тодо, кыӵе документъёс утисько Удмуртиысь архивъёсын. Юанъёслы валэктон сётон понна, уно документъёсты эскероно, справочной литератураын бугыръяськоно луэ, ӵемысь документъёс уг шедё, яке адямиос заявлениосазы-куронъёсазы тырмыт иворъёс уг пырто. Архивын ужасьёс та шуг-секытъёсты вормыны тыршо, ведомствоослэн архивъёсынызы, городъёсысь но ёросъёсысь администрациослэн калыкез улон-вылонын утёнъя отделъёсынызы кусып возьыса. Берло дыре архивистъёслэн ужзы йылӥз. Нырысь ик со герӟаськемын, 1991 арын политической репрессиос улэ шедемъёсты шонере поттон сярысь законэз кутэмен. Архиве вазиськисьёслэн лыдзы трослы йылӥз, соос зэмлыкез утчало, ӵыжы-выжыоссы сярысь тодыны куро. Удмуртиын кулаке потэмъёс сярысь 15 сюрс юан вуиз берло вить ар ӵоже. Та юанъёслы валэктон сётыны луонлык кылдӥз, уно документъёсты шараям бере гинэ, кылсярысь, кулаке поттэмъёслэн личной делоосынызы тодматскыны лэзем бере. 1994 арын "Ветеранъёс сярысь" закон кутэмын вал. Таин валче Советской Союзлэн орденъёсыныз но медальёсыныз пусъем сярысь юанъёслэн лыдзы унояз. Нош тросэз ветеранъёс та пумысен сюлмасько, документъёсты утчало на, луоз. Кытчы вазиськыны мед тодозы шуыса, ивортӥськом: Ленин орденэн, Трудовой Горд Знамя, Дружба народов, "Знак Почёта", Трудовой Слава, Материнской Слава орденъёсын, "За доблестный труд в годы Великой Отечественной войны 1941-1945 г. г.", "Двадцать лет Победы в Великой Отечественной войне 1941-1945 г.г." но мукет та выллем медальёсын 1938-1989 аръёсы пусъем сярысь указъёс но протоколъёс утисько Центральной кун архивын, берлогес сётэм наградаос сярысь тодыны луоз Удмурт Республикаысь Кун Кенешлэн архиваз. Ижевскысь предприятиосын ужакузы "За доблестный труд", "Ветеран труда", "Медаль материнства" медальёсын пусъемъёс документъёссы пумысен вазиськыны кулэ Ижевскысь администрацилэн архивъя отделаз. И. Зайцева, Центральной кун архивысь отделлэн кивалтӥсез. Басьтэ, учке, эскере Удмурт кун университетлэн спортъя комплексаз 5-10 октябре учебникъёсты возьматон выставка ужалоз. Асьме доры нырысь дышетскон книгаосссэс ваёзы Москваысь кызьлэсь уно издательствоос. Отын луозы школаослы, колледжъёслы, техникумъёслы но вузъёслы чаклам пособиос. Книгаосты луоз басьтыны, учкыны, озьы ик тросэн заказ сётыны. П. СЕРГЕЕВ. Примаков - умой разведчик, ужез пӧрмоз Кун Думаысь депутат А. Солуянов нош ик пумиськылӥз журналистъёсын. Вераськонын бадӟым инты висъямын вал Россилэн выль Правительствоезлы. Со сяна, депутат люкаськемъёсты тодматӥз ас ӵектонъёсыныз, кудъёссэ со пыӵатыны малпа республикаямы. - Андрей Владимирович, табере калык Е. Примаковлэн правительствоез кивалтэм улсын улоз. Быгатоз-а выль премьер Россиын кылдэм югдурез тупатыны? - Россилэн улоназ пӧртэм правительствоос вал ини. Нош таиз, мон сямен, луоз самой золэз. Евгений Примаков выль правительство кылдытонэз быдэсак ас вылаз басьтӥз. Президент отчы уг пыриськы, одӥг муртэз но ӧз ӵекты. Татын шӧдӥське, дыр, Примаковлэн быгатӥсь разведчик луыса ужамез но. Министръёслэсь портфельёссэс со ӵектэ ас ужзэс тодӥсь-валась но визьмо адямиослы. Кыӵе партиослы дурбасьтэмзэс уг но учкы кадь. Социальной удысэн кивалтонэз Премьер тямыс муртлы-а, мар-а ӵектӥз вал. Ваньзы пумит луизы, А. Шохинэз но Г. Явлинскиез вераса но. Табере та секыт ныпъет кышномуртлы оскемын: В. Матвиенко талэсь азьло Россилэн посолэз луыса Грециын ужа вал. СССР-лэн Вылӥ Советаз социальной ужпумъёсын вырылэмын. М. Задорнов коньдон ужпумъя министр "Яблокоын" ужамезъя тросэзлы, оло, уг кельшы, но со выллем профессионалэз шуг шедьтыны. Соин ик Е. Примаков та удысэз солы оскиз. Выт бичанъя службаен кивалтыны ӵектэмын Москваысь депутатлы Г. Босслы, кудӥныз мон ӵош ужасько бюджетъя комитетын. Но та удыслэсь со палэнскыны но быгатоз. Малы ке шуоло, со туж матын луэ Москвалэн мэрезлы, соин ик оске, Ю. Лужковез Президентэ 2000 арын бырйизы ке, со вылӥгес должность басьтыны быгатоз шуыса. Мон сямен таиз правительство азьлоосызлэсь кужмогес луоз соин но: солы дурбасьто Думаысь тросэз депутатъёс. Нокыӵе законын учкемын ӧвӧл, правительствоез Думаысь депутатъёслэсь кылдытоно шуыса. Но выль правительство озьы луысагес кылдӥз. С. Кириенко депутат ӧй вал. Оло, соин но нокинлы тодмотэм муртэн кылдытэм правительство нырысь нуналъёсысен ик кужымтэм вал. - Профсоюзъёслэн кивалтэмзы улсын 7 октябре Россиын ортчытыны чакламын пумитъяськон ужрад. Кулэ-а со? Мар со сётоз калыклы? - Мон курласько Ельцинлэсь политиказэ, но мон озьы ик урод учкисько вань революциос шоры. Пумитъяськон ужрад али номыре уз сёты. Малы юнме югдурез лэчытомытоно? Президент, ар но ӝыны ортчыса, политикамылэн улонысьтыз Конституцияя ачиз кошкоз. Нош сое али ик ужысьтыз кошкытытон понна туж трос законной шуон амалъёс утчано. Та ужлы депутатъёслэн но трос дырзы, кужымзы кошкоз. Секыт вакытэ соин выроно ӧвӧл. Али калыкмылэсь улонзэ, экономикаез ӝутоно. Выль правительстволы ужаны юрттоно. Забастовкаосын Примаковлэн правительствоезлы ужаны гинэ люкетом. Нош макем секыт луоз правительстволы, сокем кемагес курадӟозы на ужась адямиос. Кызьы тодӥськоды ни, луоз, мукет 28 улосвылъёсын ӵош али Удмуртия курадӟись улосвылъёс пӧлы пыртэмын. Соин ик солы нырысьёсыз пӧлын коньдонэн юрттэт сётэмын луоз. 19 октябре республикаямы вуыны кулэ 82,5 миллион манет. Со коньдонлэсь бадӟым люкетэз кошкоз уждунлы, пенсиослы, стипендиослы но пособиослы. Мукетсэ но вераме потэ. Евгений Примаков выльысь ужатыны малпа обороная предприятиосты. Та ужез ӝутон борды кыскемын луозы данак учёнойёс. Черномырдин сярысь ке верано, со пыкъяськылӥз газ но му вӧй поттӥсь генералъёс вылэ гинэ. - Андрей Владимирович, Удмуртие вуылыкуды, тӥ котьку но ивортылӥськоды Кун Думаын мар бордын ужамды сярысь. Таяз учыре маин паймытоды бырйисьёстэс? - Туннэ нырысьсэ тӥ азьын шараяме потэ Удмуртиысь кивалтӥсьёслы вань депутатъёслы дасям вазиськонме, кытын мон курисько республикаямы выльысь улӟытыны шефство амалэн ужанэз, нылпи садъёс, школаос, пионер лагерьёс, интернатъёс но мукет нылпи учреждениос туннэ нуналлы ас пуртыязы пӧзё. Та улонын соослы нокин возиськыны уг юртты. Дырын-дырын куд-ог предприятиослэн кивалтӥсьёссы маин но соин юрттыло ик. Нош уг-а меда луы та ужез быгатыса радъяны но ялан нуыны? Озьы кылдӥз "Шефство" нимо программа. Отын Удмуртиысь депутатъёс азе ми куронэн потӥськом нылпи учреждениослы юрттӥсь предприятиосты налоглэсь мозмытон сярысь. Озьыен, предприятиос но бюджетэ тыронъёссылэсь мозмытскозы, пиналъёслы, дышетӥсьёслы, воспитательёслы но улыны капчигес луоз. Та ужан амалэз ми, валамон, оглом вань предприятиослы ум ӵектӥське. Туннэ ми нимаз вазиськонъёс дасямы ини республикаысьтымы 250 пала предприятиослэн но фирмаослэн кивалтӥсьёссы. Соос та программаен соглаш луизы ке, депутатъёс, малпасько, бюджет сярысь законэ куд-ог воштонъёс пыртозы. Журналистъёсын пумиськонэз дыръя А. Солуянов ас малпанъёссэ вераз вань журналистъёслы госудыарство ласянь юрттон сярысь но. Россиын секыт югдур кылдэмен, кунгож сьӧрысь фирмаос реклама сётэмысь дугдӥзы. Соин ик телевидениын, радиоын, валтӥсь газетъёсын ужась журналистъёслэн улонзы начармиз. Москваысь тросэз журналистъёс али ужысьтызы кошконо луизы. Президент льготаос тупатӥз иворъёсты вӧлмытӥсь кун службаослы гинэ, коммерческойёсыз палэнэ кылизы, шуиз А. Солуянов. Депутатлэн верамезъя, ужаны ваньмызлы огкадь луонлыкъёс кылдытоно. Ас малпамъёстэ шара вераны законъя лэземын бере, мед сое улонын но быдэстыны луоз. Т. БАННИКОВА. УДМУРТ ДУННЕ - 80 Ог-огмес ӟечкылалом, кужмогес луом Пичигес дыръям анае ялан маке карыны косъяськылоз вал, нош мон ас дуннеям "выйылӥ". Ӵем дыръя бугыръяськыны яратылӥ корка сиге куям вуж книга-газетъёс пӧлын. Аръёс ортчемъя, югдур воштӥськиз, ачим но газетэ гожъяны ӧдъяй. Ваньзы малпазы ни вал, гожъяськись луо шуыса, нош мон экономистэ дышетски. Улон аслэсьтыз басьтэ. Ӝоген тыныд, яратоно газетэ, тырмоз 80. Дано юбилееныд ӟечкылатэк кылеме уг поты. Вордӥськеммы но асьмелэн одӥг нуналэ кемдэм. Тон мынэсьтым ӵапак кызь ареслы бадӟымгес, соин но, дыр, куд-ог дыръя шорад я агае, я атае шоры кадь учкылӥсько. Кемалась ик ӧвӧл "Удмурт дунне" газетлэн кык номераз печатламын вал газетлэн редакцияз 80 ар куспын ужасьёслэн но берло 30 ар ӵоже газетэ гожъясь рабселькоръёслэн нимтулъёссы. Бадӟым но кулэ уж лэсьтэмын тӥледын. Со понна сюлмысьтым тау каремме верасько. Список шоры учкиськод но син шоры тодмо нимтулъёс сюро. Жаляса верано, уноез соос улонысь кошкемын ни, озьы ке но, гожъямъёссы, верамъёссы ялан син азьын уло кадь. Туэ тынад 13 сюрс пала удмурт эшъёсыд-лыдӟисьёсыд. Вуоно аре эшшо но мед йылысалзы соос егитъёсын ӵош. Мукет сямен вераса, мӧйы лыдӟисьёстэ мед воштозы егитъёс. Пӧртэм кылын вераськисьёс пӧлын юнгес мед кылӥськысал чылкыт, жингрес удмурт кыл. Сӥземе потэ, тынад лыдӟисьёсыд, 60-тӥ аръёсы сямен, 20 сюрслэсь ятыр мед луозы вылэм. Юбилееныд тонэ, эше! Николай ПАВЛОВ. Кизнер район. Николай НИКИФОРОВ Дунне пыдсы сюрес Верос Кудай Одотья дыртытэк вамышъя Кабатай нюк пала. Тямыстон кык аресъем кышномуртлы котькуд вамышез секытэн сётске ни, трос кужым поттэм кулэ каре. Пӧсь куазез чаклатэк, сяськаё дэремез вылэ ыж гонлэсь кофта дӥсям, пужмерам йырсиоссэ ватыса музэн, чимыё тӧдьы кышет керттэм, пыдъёсаз котьку сямен ик бигер колошаос. Берло аръёсы киысьтыз пыкъяськон бодызэ но люкиськонтэм эшеныз лыдъялля ни Одотья. Кӧлыны выдыкуз, койка вӧзаз интыя но пальпотыса вазе: "Ӟеч кӧл, валэ!" Ӵуказе бызьылыны выль кужым люка". Сюлэмъяз пересь кышномуртлы палэзьпулэсь чеберъяса лэсьтэм бодыез. Трос сюлворемез бере, Герман пиез юри пужъятыса ик дасяз вал. Гурт вӧзтӥзы бызись Кутеш шурез выжыса, кускозь ӝужам турын-куакъёс пӧлы кожиз кышномурт. Эмъяськыны кутӥськись турын-куаръёсты, сяськаосты сак учкыса вамышъя. Арлы быдэ тросэн дасятэк амалыз ӧвӧл. Уката ик берло аръёсы эмъюмъеслэн дунъёссы шактойлы* ӝутскизы-йылизы уго. Тани алигес Костя внукез пыдаз тӥр йылын янгышен йӧтскыны шедьтэм. Одно ик сыче дыръя кабак аракыын пукетэм чучытурын** суретэн зырасал, дыр, Одотья. Нош ӧчкарем кадь, дасямез бырем. Ма, ачиз но, мусэз висемысь, пукетыса юылӥз вал, кенэз но фермаысь висись кунянъёсызлы нуллылиз гинэ, шол, Акашка*** дыръя курег пузъёсты но сони ик буялляз. Вань маке котьмалы яра. Ваньзэ тае лыдэ басьтыса, Одотья сюрес вылэ ӝутскиз. Ӟеч тодэ со Кабатай нюк вӧзысь нёжалъёсты. Отын та дыре ӵуж-ӵуж тулкымаса сылэ ни, луоз, чучытурын. Арлыдо кышномурт кулэ будосъёсты чигтыса басьтонъяз ик кырӟан мытэ. Арлыдыз вань ке но пни, куараез пезьдыт на: Сюлэм бӧрдэ, кӧт куректэ, Кинлэсь ке но мӧзмисько. Калык медаз шӧдскы шуыса, Весь кырӟанме нёжъясько. Кырӟанзэ йылпумяъмен валче, куаӵак тодаз усе кылем уе адӟем вӧтэз. Покчиез, Ольга нимо нылыз, туж тузӥ дӥсяськемын. Корказы кыӵе ке юондыр-а, сюан-а ортчыто кадь. Жингыра крезьгур, чупасько кыӵе ке тодмотэм егитъёс. Ма, Одотьялэн нылыз но маке пальпотыса чупа со егитъёсты, анаез валантэм понна, лэся, кыӵе ке шунытэсь кылъёс вера. Ӟеч кылъёс ымдурысьтыз лобӟо шуыса, соку ик валатскыны луэ: Ольгаез пальпотэ, кылъёсыз но капчи бурдъяськыса лобӟо. "Малы-о меда таӵе вӧт? Оло, мӧйымемез бере-а ни Ольгаез кузпаллы бызьыны шӧтам? Вот ведь, йырвисён, а?!" - каллен вамышъянъяз, вӧтсэ шонертыны курадӟе Одотья. Нош ачиз мыкырскыса сяськаез басьтонъяз ик кырӟан мытэ ни: * * * Бусыяд торогой**** малы уг кырӟа? Сезьыез араса быдтэмысь. Милям кӧтъёсмы малы куректэ Нылпиосмы дорысь кошкемысь. Тодмо нежалэ вуыса, песянайлэн синъёсыз ик чилекто: быдэс ёрос уго ӵуж-ӵуж сяськаосын воринъяське. Малы ке шуак тодаз усе пичи дырысьтыз суред. Анаеньыз татчы лыктӥз вал Одотья. Йыр йылтӥзы векчияк шуласа лобась ваёбыжъёсты синйылтыса, анаезлэсь юаз вал: "Малы-о татӥ лобало соос, анай? Чучытурын сяськаослы шат синмаськиллям?" Анаез кема малпаськыса ӧз пукы, муртлэсь кылэмзэ-а, ас малпанзэ-а ӝогак шараяз. "Чучытурын сяськаян вакытэ ӵапак ваёбыжъёслэн нуныкаоссы вордӥсько, нылы. Нош вашкалаос мадемъя, ваёбыж пиос, пе, чылкак сукыр вордско. Чучытурын вӧен зырамзы бере гинэ ай синъёссы, пе, усьтӥсько. Тӥни соин лобало татӥ ваёбыжъёс. Сюлмасько, вылды, нылпиоссы югыт дунеез адӟыны мед быгатозы шуыса. Адӟиськод ук: улӥетӥ ик лобало. Озьы соос ныр йылазы чучытурын вӧез окто но каразы лобӟо". Соку юн оскиз вал Одотья анаезлэн мадёсэзлы. Ма, Оли но оске. Кин-о тодэм-адӟем ваёбыжъёслэсь ма дауртэмзэс?! Нош вашкалаос юнме шорысь уз полэстэ. Яке чучытурынлэсь эмъян кужымзэ возьматон-валэктон понна, сыӵе мадес кылдытӥллям-а меда? Кин тодэм, кин-о вералоз? Вакчи дыр куспын бадӟымос керттэт бичаны вутскиз Одотья. Нюлэс дуртӥ дор палаз вамышъянъяз ни кикы силемез кылӥз. "Кыӵе пезьдыт куараё бурдо, дунъяны ӧз вунэты со. - Мукет бурдоослэн крезьгурамзы сыӵе ӧвӧл: писпу куакъёс пӧлы сураськыса- йыромыса, соку ик лобӟон кужымзэс ышто кадь. Нош кикы куаралы нокыӵе могӟет ӧвӧл, кожалод. Нюлэслэн ог пумысеныз кеськиз ке, гурт ураме лыктыса жондӥськоз, ява. Жаль, уг гажало та бурдоез. Уг быгаты, пе, нылпиоссэ вордыны, анай кариськыны. Кин тодэм? Оло, бурдо ачиз но кайгыре сыӵе луэмысьтыз? Кырӟаны ке усточи, нош анай кариськыны йӧн уг шедьты. Озьы тупатэм, луоз, Инкуазь, Инмар..." Кикы сярысь малпаськонъяз, Одотья нош ик покчи нылыз вылэ вуиз. Малы ке сюлмысь жаля со Ольгазэ. Ма, мукетъёсыз сярысь сокем сюлмаськонэз но ӧвӧл ни кадь. Ваньзы асьсэ семьязэс кылдытӥзы, нылпиоссы будо. Секыт вал Одотьялы но ньыль нылпизэ пыд йылаз оген султытыны. Трофимезлы уго гуртысьтыз нырысетӥен лыктӥз ож лудын быремез сярысь сьӧд гожтэт. Нош кышномурт ӧз сётскы: секыт ужез но, курыт синкылиез но вормиз. Бадӟым нылыз, Клаваез, табере бускель гуртазы улэ, Роман пиез Сибирьын, Германэз асьсэ гуртазы, анаезлы кивоштӥсь луыса кылиз. Ольгаез гинэ тани, кикы музэн, ас семьязэ кылдытыны, анай кариськыны ӧз йӧндыры. Тусын но чебер, кыллы но шаплы, ай, эсьмаса, ас эшъёсыз пӧлысь огназ Москваысь университетэз пырпотӥз вал. "Кузпаллы ачиз-а ӧз бызьы меда я басьтӥсез-а ӧз лу?" - чемысь жаляса лулскылэ Одотья. Ольга вордскем гуртаз но туж шер бертылэ, ньыль-вить арлы огпол гинэ. Зэм, гожтэтъёс, саламъёсын-кузьымъёсын посылкаос ысъялляны уг вунэтылы. Нош аслаз Одотьялэн но, нылпиосызлэн но Ольга доры куное ветлэмзы ӧвӧл. Шонерзэ ке верано, Ольга ачиз но сюлворыса уг ӧтьылы. Общежитиын, пе, улӥсько. Люкыт азьын кыӵе куноян сярысь вераськонэз? Агай-апайёсыз ӟеч валало ке но, Одотьялэн ас синъёсыныз покчи нылызлась улон-вылон интызэ туж адӟемез потэ. Кемалась сыӵе малпанзэ ватыса нуллэ ни со. "Эх, вуылысал Ольгаелэн дораз. Ас пыдъёсы нуллон дыръя ваньзэ адӟыса котыръяськысал". Огезлэсь кӧбара: бигер кыллы но, ӟуч кыллы но дышыса ӧз ву. Кыл тодытэк, кызьы-о сюрес вылэ потод? Зэм, огпол, Роман пиез доры куное ветлыкуз, ӟуч кылын вераськыса утчаз вал. Нош бератаз кӧня горизы пиез, кенэз, бускельёсыз?! Ужпум тазьы вал. Пиез но кеназ уж дуразы кошкем боре, Одотья внукъёссэ школае келяз но юрт вӧзысьтызы бакчаязы жаг турынъёсты урыны потӥз. Гуртаз дышем сяменыз корказь ӧссэ но ӧз пуння*****. Ужанъяз, корказь ӧс куараез кылыса, йырзэ ӝутӥз но... интыяз ик долказ кышномурт: бускельысьтыз ӟуч кышно, нокинлэсь юатэк- маратэк, ог банка сурзэс поттэ. Эх, пурӟиз ук Одотья! Вань ӟуч кылъёсты тодэм запассэ уже кутӥз. - Маруся, ты эврей! - чирак кеськиз со. Дунне вылын еврей кыллэсь лекез ӧвӧл кожа вал кышномурт. - Зачем ты сур ташила? Вор! - Я не воровала, просто взяла, - пумитаз пальпотэ соиз. Ты... ты... лушкаськись, черт! - ӵоксузиз Одотья. Ӝытазе мадемез бере, пиеныз кенэз синвуаськыса ик серекъязы. Утёд ке, кенэз бускельзылы ачиз ӵектэм вылэм сурзэс басьтыны. Озьы ог-огенызы, пе, вошъяськыса улӥськом. Сур но выль дыръяз гинэ ческыт шӧмо луэ ук. Таӵе юмоке шедемез бере, Одотья ӟуч кылъёсты поттылэмысь чылкак дугдӥз. Эсьмаса, "здравствуйте!" шуыса ӟечбуръяськисьёслы гинэ мыкыртылыны кутскиз. Таӵе лазег тодонэн гинэ Ольгаез дары, "дунне пыдсы", сюрес мытыны курдалляз со. Ма, туж ик куриськысал ке, Герман пиез но келяса ветлысал, дыр. Нош Одотья гумыраз муртлы йыбыртъяны дышемын ӧвӧл. Лэсьтэм ужед ас визьмыныд, ас быгатонлыкеныд быдэстэмын луыны кулэ кожа. Нош йӧспбртэм вӧтэз, воксе пыӵ сямен, сюлэмзэ портыны кутскиз. Дораз вуыса, самоварзэ пуктэмез бере ни аслыз ачиз шуиз: "Одно ик вуыло Ольгае доры. Ваньзэ ас синъёсыным адӟо". * * * Кулоно адями аслэсьтыз берпуметӥ шокчон вакытэзлэсь матэктэмзэ шӧдыса, сьӧр- берзэ учкыны азбараз, юрт котыраз пота, шуо. Нош ма малпаса, дунне пыдсы - Санкт- Петербурге чик тодмотэм интыосы - сюрессэ мытыны лӧпшаз Кудай Одотья?! Ас вирыз-а, ас нылпиез-а мае ке лушкемен шӧдытӥз анай сюлэмлы? Шуг вераны. Со сярысь автор но валэктон сётыны шугъяське. Зэм вераллям, дыр, удмуртъёс: "Шайтан ачиз кытчы мыныны уг дӥсьты, отчы кышномуртэ ыстэ". Мон уг поттылы Одотья песянайлэсь кӧня шугъяськемзэ, кӧня уйёсты чырым карытэк потэмъёссэ, ас егит дырысь эшеныз, Микта Пеклаен, семьяеныз кенеш кутэмъёсыз сярысь. Одотьялэсь дунне пыдсы вуон сюрессэ ӵошен ортчыны ӵектӥсько. Ойдолэ, вырӟим-а? Ӟеч сюрес! * * * Нырысь атас куараосты кылэменыз валче султӥз Одотья. Мисьтаськиз, оброс азяз сюсьтыл ӝуатыса ик вӧсяськиз. Коӵыш музэн, небыт лёгаськыса ветлыны тырше со, пыкъяськон бодызэ но выж вылтӥ каллен гинэ вошъя. Медаз люкеты пиеныз кенэзлы, внукъёсызлы кӧлыны. Пиеныз пыртыса дасям писъёсты гуре радъяса тыриз но туен аратӥз. Азьвыл улэм аръёссэ тодаз вайыса, Одотьялэн сьӧраз саламлы одно ик ас пыжем няньзэ басьтэмез потӥз. Угось, нянь пыжыкуз, укыр шумпотылӥзы нылпиосыз. Уката ик котыраз бергалоз вал Ольга. Бен, табере гуртысь кышноос но няньзэс формаосы тырыса пыжо ни. Магазинын вузам няньлы укшато. Озьы ке но, ас киыныд ужам, тыршем бере, шӧмыз ӟечлык ласянь трослы ушъямон пӧрме. Сукыриослы укшась мед луозы шуыса, Одотья, котам няньзэ вӧям табаосы тырыса, ӟус вылэ "шутэтскыны" интыяз. Гурез ӝуатозь, кужым мед басьтозы, вылӥе мед ӝутскозы на. Ӝӧк вылаз тубем коӵышсэ синйылтыса, котьку музэн, лекак ӧз кеськы: дораз матэктыса, ки вылаз басьтӥз но, йырзэ маялтыса, выж вылэ лэзиз. Мукетъят арлыдо кышномурт одно ик черетскысал, дыр. Яке, сыӵе урод сямо луэмысьтыз, коӵышез шоры пыкъяськон бодызэ урдысал. Нош туннэ уг яра: нянь пыже. Вашкала дырысен удмурт кышномуртъес, нянь пыжыкузы, лек, урод кылъес поттылыны курдаллязы. Сыӵе ужез ӟеч мылкыдын, лул-сюлэмдэ сётыса гинэ, пе, быдэсъяно. Няньёссэ кенэз гурысь поттылӥз ни. Туж ӟеч пыжемзэ бырйыса, Одотья соосты тодьы ӝӧккышетэн бинялтйз но сумкаяз интыяз. Лушкем пальпотӥз на: "Кыӵе шумпотоз нылы!" Одотья, автобусэ пуксьыса интыяськеменыз валче, айшет кисыяз дасяса понэм уксёзэ поттӥз но вӧзаз сылӥсь егит пилы мычыса вазиз: "Казань". Басьтэм билетсэ ныркышетаз ӟеч-ӟеч бинялтэмез бере, ас понназ шыпыртӥз: "Ӟеч сюресъёстэ сёты, Инмаре! Мыноно-ветлоно сюресъёсы вылын ӟечесь адямиосын гинэ мед пумиськылом". Казане вуыса ик Кудай Одотьялэн лӧпшам мылкыдыз лапказ. Нокин юрттӥсь, удмурт кылын юась-валэктӥсь ӧвӧл. Сылэ со, синмо юбо сямен, кудпала вамыштыны ёрмыса. Бератаз ӟус вылын пукись арлыдо воргоронэз синйылтӥз, "Арлыдо муртэ арлыдоез ик валалоз, юрттоз", - азьпала вамыштӥз со. Матаз вуыса, ӟуч кылын ӟечбуръяськиз ик. Бератаз город ульча пала шонтыса вазиз: - Вокзал... поезд... - Что? Вам куда? - папироссэ музэ куштыса, сое ботинка тышкыныз лёгиз воргорон. - Вокзал... Поезд... Ленинград. - Татарка? - Ӧвӧл, ӧвӧл, йырыныз шоназ Одотья. - Удмурт. По-ресски не знам, - быдэс кыл тодонлыксэ уже кутӥз со. Бератаз маке тодаз усиз Ольгаезлэн адресэз. Сумкаысьтыз сэрытак поттыса, вуж конвертэз воргоронлы мычиз. - Вот, Ленинград, - нош ик кыдёке возьматыса, кизэ шоназ Одотья. Воргорон валатскиз, лэся: Одотьялась сумказэ кияз басьтӥз но, сьӧраз чортыса, ульчае вамыштиз. Кунултыса ик пуктиз трамвае, буш интые интыямез бере, Одотьялы азьчиньыеныз пӧлызэ ваче зыраса возьматӥз: - Деньги... билет. - А-а, кисыяз бугыръяськыны кутскиз песянай. Солэн тодаз на: Роман пиез но, кенэзлэсь коньдонзэ курыкуз, одно ик азьчиньыеныз пӧлызэ ваче зыралоз вал. Воргорон ӝогак билетэн берытскиз но кылем коньдонзэ берыктыса сётӥз. Бен, дунне ӟеч адямиостэк ӧвӧл. Чик тодмотэм воргорон Одотьяез вокзалозь келяса вуттӥз, билет басьтыса, вагон вӧзы вуытозяз келяз на. Ма вераны ёрмеменыз, Одотья шораз пальпотыса учкиз но бигер сямен вакчияк тау кариз: "Рахмат!" Бордысьтыз аракы зын пакемез шӧдыса, макмырен курадземзэ валаз кадь. Ӝогак гинэ ог ӟенелик тыр коньдон сётӥз. Мыло-кыдо маке шыпыртыса, пальышаса кошкиз воргорон. Ма, табере Одотьялы со кулэ но ӧй вал ни. Поезд нылыз доры вуттоз. Кулэ ке луиз, азьпалась сюрес вылаз но ӟеч сюлэмо, юрттӥсь, кизэс мычись адямиос шедёзы ай. Москваысь Казанской вокзалэ вуыса, Кудай Одотьялы эшшо но абдраны тупаз. Ма, калыкен пыдъёсты воштон инты ик воксе ӧвӧл ук. Тылпу кысыны мынӥсь адямиос музэн даурто: ог-огзэс ортчыны турттыса вамышъяло, бадӟымесь сумкаосынызы ог- огзэс мырӟыло, кылӥськыло ораськем кылъёс но. Сыӵе "капчи" кылъёсты пичиос гинэ но йырвизьмазы ӝог кельто. Бигеръёссэ, ӟучъёссэ вераны йӧндырылэ Кудай Одотья но. Уж дуразы керетон ӝутскылыку, сыӵе кылъёсты бурдъятэк ӧз чидаллялэ кышноос но. Кудыръя ӟуч бигеръёс паймылӥзы но: "Ма, та удмурт калыклэн аслаз ораськон кылыз но ӧвӧл шат?" Та сярысь мур валэктон сётыны уз быгаты Одотья но. Оло, вазен удмурт калык, зэмен но, ог-огезлы юрӟым кылъёс верамтэ, ог-огзэ ултӥямтэ, дыр, (таӵе малпанлы - туж оскем потэ, азьпалан но озьы медло вылэм). Одотья, отчы-татчы учкылыса, кудпала вамыштыны ёрмыса сылэмез бере, чапак кык милиционеръёсты синйылтӥз. Гуртысьтызы участковойзы кадесь ӧвӧл соос: дӥськутсы но тузӥгем, киосазы кыӵе ке резина бодыос кутэмын, гадязы ошем батарейка выллем арберизэс ым дуразы вуттыса, дырын-дырын маке юало, оло, верало-а - тодмо ӧвӧл. Дӥсьтонлык шедьтыса, вӧзазы ик лыктӥз Одотья. Нылызлэн адресэныз конвертсэ мычиз. - Ленинград... поезд. Огез кышномуртлэсь сётэм конвертсэ, мылыз потытэк музэн, кияз бергатӥз но пинь пыртӥз шиетӥз: - Паспорт. Одотья соку ик валаз солэсь куронзэ: сумкаысьтыз поттыса, паспортсэ мычиз. - Уд-мурт-ка, - малы ке чигтылыса лыдӟиз со. Эшеныз маке шыпыртэмзы бере, Кулешов нимтулэз поттылӥзы на. - Пошли, - киыныз шонтӥз со, сьӧраз ӧтьыса. Одотьялэсь боды вылэ пыкъяськыса лёгаськемзэ адӟе ке но, эсьмаса, сумказэ гинэ но кияз уг басьты. Олокыӵе йӧнъяськыса вамышъя. "Ачиз огпол но уг пересьмы кожа, лэся", - чилектӥз Одотьялэн йыраз. Кыӵе ке нимаз висъетэ вуттӥз со Кудай Одотьяез. Татын но вить кузя милиционеръёс пуко. "Ужан интызы, луоз", - ас понназ пусйыны ӧз вунэты на арлыдо кышномурт. Одотья косэм-ӵектэмзэс возьматэк ик буш пукон вылэ лэзькиз. Жадиз ни со, пыдессинъёсыз ик жильдӥськизы, ӝужыт гурезетӥ тыро карнанэн ӝутскем кадь. - Кулешов, помоги, - вазиз келяса ваем милиционер, ӝӧк сьӧрын гожъяськыса пукись гордпыръем йырсиё пилы. Одотьялэсь паспортсэ кияз сётыса, маке-маке шыпыртӥз но ай. Кулешов шуонзы паспортсэ учкиз но, интыысьтыз чырткемак султыса, Одотья вӧзы лыктаз. - Ӟечбуресь, кенак! - пальпотӥз со, удмурт кылын вазьыса. - Кытчы-о потӥды таӵе, ӟуч кыл чик тодытэк? Оген улӥськоды шат, келясьёсты ӧвӧл? - огкутскемен выжыятэ со. - Остэ-э! Асьме адями, иське? - шумпотӥз Одотья но. Вань юанъёсызлы валэктонъёс сётыны дыртӥз. Бератаз секытак лулскиз: - Дунне пыдсы сюрес мытӥ ай, пие. Кулэмелэсь азьло нылылэсь улон-вылон интызэ ас синъёсыным адӟеме потэ. - Санкт-Петербург дунне пыдсын ӧвӧл ук, кенак. Москва вӧзын гинэ шуымон. - Конверт вылысь адрессэ ӧд учкы шат, пие? Мои Ленинградэ мынйсько ук. Нош тон воксё мудрон ним поттылӥськод. - Со карлэсь нимзэ воштӥзы, кенак. Ӧз вера шат нылыд? Ойдо сьӧрам, - Одотьялэсь сумказэ кияз басьтыса вамыштӥз Кулешов. - Машинае пуксём но, электричка дорозь келяло. Коньдонэд вань-а? - Вань, пие, вань. Мыныса вуыны тырмоз шуыса оскытӥзы пиеным кенэ. Нош берен сюресам нылы юрттоз. - Одотья кенак, Санкт-Петербурге, э-э, Ленинградэ вуиды ке, таксистъёслы вазиське. Адямиосты нуллон-ваён вылысь, юри висъям сыче машинаос вань. Ӧссы борды, шахмат суредаса, "Т" буква гожтэмын на. Адрестэ ке сётӥд, нылыд доры ик вайыса кельтозы. Такси кылэз гинэ эй вунэты. - Ярам, пие, ярам. Тон дышетэмъя ик лэсьто. Мыным юрттыса, раньӟыса эн кыльы. - Ӟеч сюрес, Одотья кенак. Ӟеч куноя нылыд дорын. - Тау, пие. * * * Санкт-Петербурге вуыса, Кудай Одотья каньылак шокчиз. Кожалод, кыдёкысь шаеръёсты котыръяса, сюлэмзэ потӥсь мӧзмонъёсты чидаса, ӟуч кыл тодымтэеныз, шуг-секытъёсыз вормыса, выльысь ас вордскем Ӟаны гуртаз берытскиз. Бей, малы-о ватонэз, сюрес капчи ӧй вал. Кыл тодӥсьтэм адямилы вакчи сюрес но трослы кузёме, иськемъёс ватса кадь. Мукетыз но сюлэм писыран вань: сюресчиос куспазы лабыртыку, маке-маке верам но, юам но потэ. Гуртаз нокинлы йыбыртъяны дышымтэ адямилы кык полэс секыт. Вокзал азьын Одотья трос ӧз котыръяськы. Удмурт милиционер дышетэмъя ик "такси" кылэз поттылӥсьёс сьӧры калъяськиз. Дӥсьтӥсьгем кариськиз со. Сумкаысьтыз ныркышетэ бинем коньдонзэ поттыса, витьтон сюрс манетсэ айшет кисыяз ватӥз но кылемзэ адресэныз ӵош шофёрлы мычиз. Кызьы-о ваксё буш кылёд? Оло, ӵапак Ольгазэ уз шедьты таксист. Шофёр арлыда кышномуртлэн таӵе дауртэмезлы нырысь-валысь паймытскиз вал. Сӥсъяса кадь, шораз учкиз но, сётэм коньдонзэ лыдъяса, йырзэ шонтӥз: - Мало, бабушка. Добавь. - Нема! - киоссэ шер-вай вӧлъяз Одотья. Бератаз, сьӧлыко мурт сямен, пальпотонзэ кузьмаз на. "Волга" ӝог ширтэ ульча кузя. Дырын-дырын сфетофор синъёс гинэ огдырлы дугдытъяло сое. Машиналэсь дугдыса сылэмзэ ас сяменыз вала Кудай Одотья. "Та быдӟа городысь шат Ольгазэ шуак-дуак шедьтоз? Малпаське, луоз, урам нимъёсты тодаз вае". Ӝужыт юрт вӧзы вуыса дугдэмзы бере, таксист нош ик адрессэ синйылтӥз но, Одотьялэсь сумказэ кияз басьтыса, йырыныз шонтӥз. - Айда! Одотья дыртыса вамышъяны тырше сьӧраз. Тани, ӧсэтӥ пыремен валче, шофёр кыӵе ке кнопкае зӥбиз но, выжгетэм куара кылӥськиз (Одотьялы нылыз берло валэктӥз: лифт шуонзы сыӵе дауртэ). Кулэ этаже ӝутскыса, Одотьялэн огдырлы сюресчи кариськем шофёр нош ик электрогырлылэн кнопкаяз зӥбиз. Нош туала дыре городын улӥсьёс ӧссэс вӧлак усьтыны уг дырто. Ӧс сьӧрын крезьгур чузъяське, кинъёс ке верасько кадь. Ӧсэз ӟубис карыса, Ольга потӥз. - Нылы, - киоссэ урдӥз Одотья. - Ольгае, мусое. - Анай, ма, кызьы огнад лыктыны дӥсьтӥд? - капчияк ӟзыгыртыса, чупам вылысь чупа нылыз. Пумен дэрем саес бордаз синвуоссэ чушылэ. Таксист ӧз ӝегатскы ни. Валатскиз: "Шонер вуттӥськем. Матысь адямиос ог-огенызы пумиськизы". Нылызлэн улоннияз пыремен валче, Одотья паймытскиз: бадӟым юондырлы сямен, олокӧня ӝӧкъёс вылым сиён-юонъёс пуктылэмын, нылызлэн коркаез вӧл-вӧл, узырлыкез но синъёссэ шумпоттэ. - Общежитияын уд улӥськы ни шат, нылы? - Уг, анай, уг. Кемалась та коркам ни, - Ольгалэн бам чокчороосыз ик малы ке ӵыжектӥзы . - Оло, кузпаллы бызид? Ӵогъёсад пиосмурт дӥськутъёс но адско. - Пиелэн со, анай, - могӟиз Ольга. Рустамлэн. - Кыче пиедлэн? Мап-ось лабыртӥськод тон? - дэймыса пукон вылэ лазькиз Одотья. - Шудыса эн вераськы монэн, Ольга. - Пуксьы, анай, ӝӧк сьӧры. Сиськы, ю. Тани ачим пӧсь кофе вутто. Нош Кудай Одотьялэн кӧт сюманэз, ньылон куасьмемез вунӥз, кожалод. Нылыз пӧсь кофеен берытскемен валче, лекак вазиз: - Мадь, Ольга. Номырзэ ватытак мадь. Сотэк тыр ӝӧк сьӧрад но уг пуксьы, ява. Огшап чус пукизы. Ог-огзэс тодӥсь, матысь адямиослэн ваче син учкыса чус пукемзы керетэмлы укша. Соин ик Одотья куаразэ будэтытэк ӧз чида. - Кылдэ ньылӥд, оло? Валэкты ас анаедлы. Номырзэ уг валаськы ук. Оген-а улӥськод яке. . . - Дышетсконме йылпумъяме бере вал со, анай, - укно вӧзы султыса мадьыны кутскиз Ольга. Кызь одӥг ар талэсь азьло. Тодматски мои асьме пал адямиен - бигерен. Ог- огмес яратыны, шунытэсь кылъёс вераны но вутским. Секытэн луэмме шӧдэме бере, ваньзэ ватытэк мади вал. Нош со, шакшы, куштӥз но пегӟиз. Берлогес ни телефон пыр ивортӥз: "Вождэ эн вай, Ольга. Мон кузпалъяськем воргорон луисько, кык нылпилэн атаез". Озьы тӥни оген анай кариськыны тупаз. Инмарлэн гожтэмез сыӵе, вылды, - викыштӥз Ольга. - От, возьытэм бигер! Тон ачид но сурон бам вылэмед, Ольга, - лопырскиз Одотья. - Сое-а, пи вордэмдэ, анаедлы мадьытэк-вератэк улод? От, сьӧлыко лул! - Мынам тыныд куректон кузьмаме ӧз поты, анай. Асьме выжы-кумамы уго шудонысен нылпи шедьтӥсьёс ӧй вал на. Мон гинэ, огнам. Лекъяськод, вожед потоз, гуртоосмы азьын возьытэ усёд, кожай. - Нош гуртэ бертылыкуд, пидэ кытчы кельтылӥд? - Рустаме-а? - Бен. Атаезлэн нимыз озьы вал шат? - Рустам нимо вал. Нош тон доры бертылыкум, бускель кышномурт доры кельтылӥ. Тон медад тоды шуон мылкыдме солы гинэ шараяй вал. Со ик утьылӥз, гуртын куноякум. - Иське, сони ноку но кема ӧд куноялля? - Шонер валамед, анай. Вождэ эн вай мыным. Кулытозяд уг вера кожасько вал. Соин ик тӥледыз куное но ӧй ӧтьылы, общежитиын улӥсько шуыса эрекчалляй. - Ой, Инмаре-кылчинэ! Ма быдӟа сьӧлык басьтӥд тон, нылы, ас анайдэ эрекчаса? Ачим ке уг лыктӥськы, озьыен, Рустам внукме адӟытэк, зэмлыкез тодытэк, сопал дуннее келясалыд? Шӧдӥз сюлэмы, шӧдӥз. Вӧтъёсы но ӟечесь ӧй вал кадь. Нош кыӵе юондыр ортчытӥськод? - Пиелэн сюанэз туннэ, анай. Службаысь берытскиз но кузлалъяськиз тани. Загсэ ветлыса гожтӥськизы, али городэтӥ котыръясько. Ӝоген юондыр кутскоз. - Ой, лулы-сюлмы. Ма вараны но, кызьы куаретыны но уг тодӥськы мон тонэ, Ольга. - Эн тышкаськы, анай. Янгыш мои тӥ азьын, сьӧлыко, - анаезлэн пельпумаз йырзэ поныса викыштӥз Ольга. - Инмарлы уг оскиськы вал, вань вылэм! Сотэк тон огнад лыктыны йӧндырысалыд шат. Внукедлэн сюаназ? Ӧсэз чырткемак усьтыса, егитьёс пыризы. - Рустам, Лариса! Толматске Евдокия песянаенылы, - пумитазы вамыштӥз Ольга. Анаез пала берытскыса ватсаз на: - Анай, ӟечбуръяськы. Кенэным пие. Верано кылъёстэ вера, юанозэ юа. Ачим ӟуч сямен валэкто соослы. Кудай Одотьялэн верано-юано кылъёсыз чорыг лы сямен кугӟазы чырты выжыяз. Синъёсыз гинэ шумпотон синкылиосын чилектӥзы. Пыкъяськон болызэ киысьтыз куштӥз но егитъёсты огӵош ӟыгыртыса чупаны, вешаны кутскиз. _________ *шактойлы - трослы **чучытурын - чистотел ***Акашка - вӧсь юондыр, Пасха ****торогой - тюрагай *****сукыр - синтэм ******ӧз пуння - ӧз ӵога Ӧте Зоя Трухина Механической заводлэн "Октябрь" культура дворецаз азьло аръёсы трос ортчылӥзы удмурт культураен, искусствоен герӟаськем ужрадъёс: я фольклорлы сӥзем ӝыт, я кыӵе ке юбилеез пусъён, я асьсэ ужасьёссэс данъян... Туэ но та сямлэсь ӧз куштӥське. 7-тӥ октябре сезонэз усьтэ, шуыны луоз, та заводысь нылкышно технолог Зоя Аполлосовна Трухина. Ужаны лыктэмез дырысен, 1970 арысен, люкаськем мылкыдзэ со ӧръялоз кырӟанэн-кылбурен. Солэн эшъёсыз-юрттӥсьёсыз луозы крезьгурчиос Николай Уткин, Ольга Зорина, Анна Плотникова, "Инвожо" ансамбль, "Октябрь" дворецысь кырӟасьёс. Ӝытэз нуоз республикаысьтымы калык артистка Фаина Будина. Т. НИКОЛАЕВА. Губи шыдэн куноялозы Шаерысьтымы нюлсэъёсын туэ туж удалтӥз губи. Азьтэм адями гинэ кылиз, дыр, нюлэс "сӥльтэк". Губи дасянын туж ӟеч тыршизы Пичи Пургаысь но Кезысь райпоос. Кезъёс гинэ ӝыны тонналэсь уно губи люказы. Килозэ 15-20 манетэн басьтӥзы.Со понна райпо калыклы пӧртэм вузъёс сётӥз. Озьыен, Кезэ вуылӥсьёсты столовойёсын толалтэ но губи шыдэн куноятозы. Н. МАКСИМОВ. Егитъёс куаразэс жаляло Удмурт вукоысь бертыкуз но кырӟа шуо. Ӵап сыӵе Игра ёросысь Сундур гуртысь Ольга Макаровна Кожевникова. Кунозэ утялтэ, юртъер котыраз-а берга, возь вылэ-а потэ - весь кырӟа. Пичи дыръяз ай кырӟаны кутскиз со. Мӧйыос ӝытбыт кырӟаса черсӥсько-керттӥсько вал. Со ик пырем, лэся, сюлэмаз. Бӧрысьгес мӧйыос ассэ кырӟаны косылӥзы. Тынад куараед пинал, вольыт, шуылӥзы. "Табере егитъёс воксё уг кырӟало ни, мар куаразэс жаляло? Весь клубын дискотекаязы позыръясько", - шуэ Ольга Макаровна. Ачиз со егитгес дыръяз культура юртысь "Ӟардон" фольклор ансамбле ветлӥз. Али но солэсь уг ӵыды - котькуд концертсэс учкыны клубе потэ. А. Клементьев, Удмурт кун университетын дышетскись. Ӟечкылан 1-тӥ октябре быдэс дунне пусъе арлыдоослэсь нуналзэс. Арлыдоосты гажаса но сӥлы карыса, соослэсь ӟеч ужъёссэс данъяса, ООН таизэ арез арлыдоослэн аренызы ялӥз. Та нуналэ сӥлы кариськом ваньзэ, кин кылдытӥз но будэтӥз калыклэсь узырлыксэ, Родинамес тушмонлэсь утиз, Атыкай музъеммес юнматонлы пинал дырзэ сётыса. Тӥляд улон сюресты но визь-кенешты юрттӥзы но, юрттозы егитъёслы улыны. Ми тодӥськом, кыӵе секыт али ветеранъёслы, вань арлыдоослы. Ӵемысь малпанъёсты быдэсмытэк кылё. Улон секыт ке но Удмурт Республикаысь Кун Кенеш но Првительство арлыдоослэсь улонзэс быгатэмзыя капчиятыны тыршо. Сюлмысьтымы сӥзиськом тӥлед юн тазалык, азьланезлы оскон, кема улон но ваньзэ умойзэ гинэ. Удмурт Республика Удмурт Республика Кун Кенеш Правительство Арлыдо но куке сӥзьылме... 90 аресъем пересь кышномурт шобрет улаз шымырскыса бӧрдэ. Вуэн ведраоссэ корказьысь ӟус вылэ пуктылыса, Галина Васильевна пересь доры кожиз но буйгатыны кутскиз: "Али ик гурдэ эсто, шыд пӧзьто, эн бӧрды..." Нош соизлэн пельпумъёсыз уката юн дырекъяны кутскизы. Доразы кӧня ке пукеме бере валай: Екатерина Тимофеевна шумпотыса озьы бӧрдэ вылэм. Малы ке ӧз сёт солы Инмар семья шудзэ. Быдэс улонзэ огназ ортчытӥз, карттэк пинал но вордыны ӧз кариськы. Егит, чырткем дыръя уймон нуналъёс сярысь малпаськиськод шат? Ужаз но ужаз пересьмытозяз машина поттон заводын. Нош табере тани... Ярам, асьмеос чылкак сюлэмтэм ӧвӧл на вылэм. Огназы кылем, висьылӥсь пересьёсты чакласа возё улон-вылонын юрттэт сётонъя центръёс. Ижысь Индустриальной ёрослэн сыӵе центрысьтыз огез сюлмоез, секыт ужлэсь кышкасьтэм кышномурт эскере Екатерина Тимофеевнаез. Галина Васильевна Проскуряковалэн та кышномурт гинэ утялтонэз ӧвӧл. Сое возьмало на мукетъёсыз песянайёс, песятайёс. Кинлы ке ву пыртоно, сиён пӧзьтоно, кинлы ке картофказэ гудоно, мунчо эстоно, дӥсьсэс миськоно... Мар но уж уг шедьы корка котырын, уката ик нимаз коркан улӥськод ке. Нош Индустриальной районысь центр быдэс Восточной посёлокысь пенсионеръёсты эскерыса-чакласа возе. Юрттӥськисьёслы огез пересь дорысь мукетыз дорозь 2 иськемез но пыдын ветлоно луэ. Вуэ, шокче но бызьыса магазинэ, аптекае кошке. Куддыр буш киын берытске: "Эмъюм дунтэк уг сёто, сакыр куинь поллы дуноям". Уроксэ дасямтэ дышетскись сямен сылэ со, пересьлэсь кивалтӥсьёсты тышкаськемзэ кылзыса. Я, коть туннэ утялтоно пересезлы кема возьмам пенсизэ сётозы ни, пе. Нош ачиз кӧня толэзь возьмалоз на меда 150-200 манет уждунзэ? Сыӵе уждун сёто али пересьёсты доразы утялтыны ветлӥсьёслы. Сомында ужамзы, пыд тышкамзы понна! Эшшо куро на пересьёслэсь ваньмон дырзэс радъямед сярысь план: праздникен ӟечкыланы ӧд вунэты-а, кузьым лэсьтӥд-а? Зэм, сюлэмтэм, пересьёсты яратӥсьтэм муртъёс та удысын ужаны уз быгатэ. Соос уг люкасько забастовкае, уг урето ужзэс. Соостэк пересьёссы бырозы. Соин ик нуналмысь сюлмасько асьсэ ужзэс мыло-кыдо лэсьтыны. Вить ар ужа ини Индустриальной ёросысь социальной юрттэт сётонъя центр. Али сотэк пересьёслы туж секыт луысал. Угось соос понна вань сюлэмзэс сётыса тыршо татын директор Ирина Григорьевна Яркова, улон-вылонын юрттэт сётонъя отделлэн кивалтӥсез Николай Петрович Павлов но мукетъёсыз. Индустриальной ёросын 24685 пенсионер, 4000 ӧлексы мурт (соос пӧлысь 255-ез - Быдӟым Отечественной оже ветлэмъёс), 350 ӧлексы нылпи. Ваньзэс соосты социальной ужасьёс син азязы возё. Центрын ньыль отделение. Пересьёслы доразы юрттэт сётэм сяна, центрын вань стационар. Отчы нуназезэ эмъяськыны но шутэтскыны ветло 60-лэсь ятыр мӧйыос, 10 мурт уйлы но кыльылэ. Татын соослы массаж, физиопроцедураос лэсьто, нуналаз кык пол дунтэмен ческыт сюдо, концертъёс, ӵошатсконъёс дасяло, киужлы дышето. Шулдыр юртэ пырыса, ужасьёслэсь небыт вазиськемзэс кылыса, огдырлы вунэто кадь соос улонлэсь секытсэ. Татын ужасьёс пересьёс сярысь 1-тӥ октябре гинэ уг сюлмасько, котькуд нунал шумпотон кузьмало. З. РЯБИНИНА. Книгаос, книгаос Санкт-Петербургысь "Дмитрий Буланин" издательство поттӥз "Славяне и финно-угры. Археология, история, культура" сборник (одӥг сюрс экземплярен). Татчы люкамын археологияя нимысьтыз симпозиумлэн докладъёсыз. Москваысь "Старый сад" издательство кутскиз "Народы России: от прошлого к настоящему" сериысь книгаос поттыны. Нырысетӥез том "Антропология" потӥз ни. Сое дасязы МГУ-ысь антропологияя музей но Научно-исследовательской институт. "Лингвистический атлас Верхней Руси" - тазьы нимаське А. Гердлэн монографиез, кудзэ печатлаз Санкт-Петербургысь кун университет. Со пыре "Научные доклады" серие. Англи кылысь ӟуч кылэ берыктэмын М. Лехтипуулэн чебер туспуктэмъёсын, суредъёсын "Финляндия" справочникез-путеводителез. Сое вить сюрс экземплярен поттӥзы "Текст" акционер огазеяськон но "Геза ком" издательство. Петрозаводскысь кылъя, литературая но историяя институт дасяз "Ономастика Карелии" сборник. "Н. Куратова - первая коми писательница-прозаик". Таӵе книга потӥз Сыктывкарын, сое дасяз Комиысь Калыкез дышетон удысын ужасьёслэсь тодон-валанзэс будэтонъя институт. Мордовиысь книжной издательствоын югыт дуннеез адӟиз очеркъёсын, тодэ ваёнъёсын но гожтэтъёсын сборник - "Горение щедрой души. Г. Я. Меркушкин: личность и наследие". Саранскысь "Красный Октябрь" типография" печатлаз "Республика Мордовия" книга. Улаз гожтэмын: "Административно-территориальное деление на 1 октября 1997 года". В. Мерилэн "Карл Густав Маннергейм" книгаез потӥз Москваысь "Новое литературное обозрение" издательствоын. Кудымкарын печатламын "Коми-пермяцкая кухня" книга. Ог 61 сюрс кылъёс но кыл сочетаниос пыризы "Русско-финский словаре", кудзэ печатлаз Санкт-Петербургысь "Алфавит" издательство. Кыллюкамлэн редакторъёсыз М. Куусинен но В. Оллыкайнен. Кызьы мордва литература возьматэ улонысьтымы серемессэ? Та выллем юанлы валэктэ В. Деминлэн Саранскын потэм "Многоцветие смеха" книгаез. Ханты-Мансийскын куинетӥзэ потӥз ни югра выжыысь писатель1слэн "Эрин тур" ("Кырӟась ты") альманахсы. Тиражез куинь сюрс экземпляр. Москваысь "Икар" издательство пыр лыдӟисьёс лоры вуиз "Мансийские загадки" сборник, сое люказ Е. Ромбандеева. Йошкар-Олаын, Мари книжной издательствоын, берло дыре потӥзы таӵе книгаос: Г. Матюковскийлэн "Избранные стихи и поэмы" однотомникез, И. Ломбергскийлэн "Миллион- влак" романэз, И. Оснинлэн кык книгаен "Между небом- и землёй" роман-хроникаез, В. Регеж-Гороховлэн пьесаосын но повестьёсын "Цветок на снегу" сборникез, В. Григорьевлэн "Мечет Юнга" кылбурен романэз, А. Январевлэн но Г. Ведерниковлэн кылбур сборникъёссы. Коми-Пермяцкой книжной издательство печатлаз И. Мининлэсь пиналъёслы повестьёсын "Кукушкин рай" книгазэ (одӥг сюрс экземпляр). Кызь вить сюрс экземплярен, чебересь буёло суредъёсын потӥз Х. Мякельлэн "Дядюшка Ау" книгаез. Со финн кылысь берыктэмын, дасязы Москваысь "Росмэн но "Пресса" издательствоос. Т. АНДРЕЕВА. Кизнеръёслы - валюта Кизнерысь арсеналын возиськись химической ож тӥрлык таяз учыре бордаз кыскиз Великобританиысь делегациез. Сое возёнэн тодматскон понна, Кизнере отысь тямыс муртлэсь делегация вуылӥз. Пӧлазы вал обороная министерствоын ужасьёс, бизнесменъёс, менеджеръёс, химической но биологической ож тӥрлыкен нюръяськонъя департаментысь специалистъёс, озьы ик вал Великобританилэн Москваысь посольствоысьтыз нырысетӥ секретарез. Соосын ӵош та ужрадэ пыриськизы Россиысь Обороная министерствоын, УР-ысь Правительстволэн химической ож тӥрлыкез быдтон ужпумъёсъя комитетаз, асьме республикаысь кышкыт учыръёслэсь утиськонъя комитетын ужасьёс, Кизнер ёросысь вань кивалтӥсьёс. Пумиськонын кенешон мынӥз Россиын химической ож тӥрлыкез быдтонъя конвенцилэн быдэсъяськемез но со ужлы коньдон висъян сярысь. Нимысьтыз вераськемын Кизнерысь арсеналлы юрттон пумысен. Англичанъёс, калыкен кусып возёнъя информацияя центр кылдытомы шуыса, таяз учыре 10 сюрс фунт стерлинг висъязы. Великобританиысь куноос оскытӥзы: таӵе пумиськонъёс луозы на азьланяз но. Н. ЛЯЛИН. Концертъёс - котькуд нунал Удмурт кун филармониын ортчиз журналистъёсын пумиськон. Таяз учыре мынӥз туэ ортчытыны чаклам выль ужрадъёс пумысен кенешон. Филармонилэн чеберлыкъя кивалтӥсез Валерий Митрофанов нырысь ик ивортӥз Удмурт кун филармонилы куатьтон ар тырмонэн герӟаськем крезьгуро фестиваль сярысь. Солэн нырысетӥ концертэз сӥземын луоз Крезьгуръя калык куспо нуналлы. Ӟеч мылкыд сётыса, ас устолыксэс возьматозы Удмурт кун филармониысь коллективъёс но солистъёс. Мӧйыослэн нуналэнызы валче но концертын тросгес луозы арлыдо учкисьёс. Ортчоз 1-тӥ октябре. Пусйыны кулэ созэ но: Крезьгуръя калык куспо нунал - кызь ньылетӥез. Кичӧлтӥсез - Россия, тодмо крезьгурчи Дмитрий Шостакович. Филармонилэн юбилееныз валче ик удмурт крезьгурез яратӥсьёсты 22-тӥ октябре шумпоттоз Удмурт Элькунлэн Кун премиезлэн лауреатэз эстрадая "Шулдыр ӝыт" ансамбль. 23-тӥ октябре кырӟалоз Удмурт Элькунысь калык артистка Нина Варачёва. 24-тӥ октябре ортчоз фортепиано крезьгурлы сӥзем ӝыт. Москваысь куно калык куспо конкурсъёслэн лауреатсы кызь аресъем Валентина Игошина тодматоз Фредерик Шопенлэн ужъёсыныз. Пинал учкисьёсты шумпоттоз "Ижысь егит кизилиос" шоу-программа. Концертэ пыриськозы пӧртэм ӵошатсконъёсын вормемъёс. Программалэн кивалтӥсез - Удмурт Элькунысь культурая сӥё-дано ужась Валерий Каракулов. 27-тӥ октябре асьсэлэн ӝытазы ӧтё Удмурт Элькунысь искусствоосъя сӥё-дано ужась крезьгурчи Евгения Копысова но Удмурт Элькунысь калык артист Николай Копысов. Евгения Владимировна но Николай Максимович пусъё ужаны кутскемзы дырысен кызь вить ар тырмонзэс. Концертсэс шулдыртозы Егитъёслэн юртысьтызы калык инструментъёсъя оркестр но пинал усточиослэн школа-интернатысьтызы пиослэн "Ингур" капеллазы. 30-тӥ октябре ортчоз Удмурт кун филармонилэн кылдэмез дырысен куатьтон ар тырмонлы сӥзем сӥё-дано ӝыт. Люкаськемъёсты шулдыртозы шаерысьтымы тужгес устоосыз кырӟасьёс-верасьёс. Со сяна, симфонической но государственной духовой оркестръёс (таос табере филармонилэн луозы). Вань концертъёс ортчозы филармонилэн юртаз. Фестивален валче бадӟым шумпотон вите шаерысьтымы гуртъёсын, райцентръёсын, городъёсын улӥсьёсты но. "Шулдыр ӝыт" поталоз Шарканэ, Удмурт Элькунысь калык артистка Нина Варачёва - Воткала, Удмурт Элькунысь искусствоосъя сӥё-дано ужась крезьгурчи Евгения Копысова но Удмурт Элькунысь калык артист Николай Копысов вуылозы Николай Максимовичлэн вордӥськем палъёсаз - Можгала, "Катанчи" - Дэбесэ. Нялтас пусъёно, дыр, созэ: татын кылдытэмын луоз филармонилэн ёзэз. Быдӟым тылож вакытэ вылӥллям соос Якшур-Бодьялан, Воткалан, Сьӧлталан (Селталан). Та удыс табере выльысь улӟытэмын луоз. Со сяна, филармония сюлмаське ини вуоно толэзьёсы ортчоно ужрадъёсыз сярысь но. Ноябре искусствоосъя фестиваль луоз кӧня ке ёросын. Филармониысь усточиос поталозы Каракулино, Камбарка, Красногорск районъёсы. Декабрь толэзе ортчозы Ымусьтонлы сӥзем шулдыръяськонъёс. Учкисьёсты Выль арен ӟечкылалозы шаерысьтымы тужгес быгатӥсьёсыз кырӟасьёс, маскарчиос. Толшор толэзе луозы дышетскись пиналъёс понна чаклам выль ар ӝытъёс. Ортчоз джаз-фестиваль. Февраль толэзе артистъёс выльысь потозы гуртъёсы. Март толэзе дорамы лыктозы Урал улосвылысь куноос. Калык крезьгуръя фестивале пыриськозы Екатеринбургысь Урал хор, калык инструментъёсъя оркестр, Пермьысь - "Каравай" ансамбль, озьы ик - "Италмас", Удмурт Элькунысь калык артисткалэн Валентина Пудовалэн коллективез. Апрель таяз учыре но ялоз шаерамы вордскем быдӟым ӟуч крезьгурчилы Петр Ильич Чайковскийлы сӥзем фестиваль сярысь. Туэ дорамы вуылыны малпало кун сьӧрысь куноос но: фестивальлы аспӧртэмлыко тусбуй сётозы Франциысь Андрей Габриэль но Мария Франс-Аракелян. Азьвыл сямен ик вунэтэмын уз луэ школаын дышетскись пиналъёс. Куинетӥ номеро абонемент тодматыны чакла кырӟанлы но опералы сӥзем нимысьтыз лекциосын- концертъёсын. Егитъёслэн "Катанчи" театрзы возьматоз "Улон-питран" мадёссэ. Нылпиос озьы ик тодматскозы финн-угор но удмурт крезьгурчиослэн ужъёсынызы. Вуоно ар быдэсак ялэмын луоз быдӟым ӟуч кылбурчилэн Александр Пушкинлэн ареныз (вордӥськемез дырысен кык сю ар тырмемен валче). Со сяна, ужрадъёс озьы ик ортчозы, тодмо ӟуч крезьгурчиослэн Михаил Глинкалэн но Михаил Мусоргскийлэн вордӥськемзы дырысен сю укмыстон вить но сю куатьтон ар тырмонлы сӥзьыса. Чеберлык кылдытӥсьёслэсь устолыксэс азьланяз эшшо но будэтон вылысь, Удмурт кун филармониын усьтыны чакламын эстрада искусствоя творческой мастерской. "Кизилиосмы", иське, эшшо йылозы. Е. РОМАШОВА. Гажано дышетӥсьёс! Ӟечкыласьком тӥледыз праздникеныды - Дышетӥсьлэн нуналэныз! Котькудмылэн улонамы вань сыӵе адями, кудӥзлы асьмеос музъемозь ик йыбырттыны кулэ. Солэн нимыз - Дышетӥсь. Со асьмелы ӟеч сямъёс пыӵатӥз, дышетӥз калыкез гажаны, зэмлыкез валаны, аслад кужымедлы оскыны, Атыкай музъеммес яратыны. "Дышетӥсь" кыл сюлэммес шунытэсь, чебересь тодэ ваёнъёсын тырмытэ. Туннэ республикаысь 263 сюрс пинал школае ветлэ. 40 сюрс пала дышетӥсь соослы тодон-валан сётэ. Шуг-секытъёс уно ке но, дышетӥсьёслэн суй-пыдзы уг юскиськы. Солэн ужамез адӟиське дышетскисьлэн азинсконъёсыз вылын. Россиын но дуннеын ортчись олимпиадаосын но конкурсъёсын Удмуртиысь пиналъёс нырысетӥ интыос басьяло. Кылем арын школаез 241 дышетскись зарни медален йылпумъяз. Сыӵе вормонлы инъет кылдытӥзы дышетӥсьёслэн уно поколениоссы. Соос пӧлысь 4 сюрсэзлы дано нимъёс но калыкез дышетонысь отличник пусъёс сётэмын, 1272-ез пусъемын Родинамылэн орденъёсыныз но медальёсыныз, котькуд куинетӥезлы сётэмын вылӥ квалификациен категория. Удмурт Республикаысь Кун Кенеш но Правительство та секыт вакытэ но уг вунэто школа сярысь, будӥсь пиналъёсмес улонлы дасян сярысь. Туэ усьтӥськизы но усьтӥськозы на выль школаос. Музъемозь йыбырттӥськом тӥледлы, гажано дышетӥсьёс. Тӥледлы но матысь ӵыжы- выжыостылы юн тазалык сӥзиськом, вань кутскем ужъёсты ӟечен мед быдэсмозы, дышетскисьёсты визьмоесь но лякыт сямоесь мед луозы! Удмурт Республикаысь Кун Кенеш Удмурт Республикаысь Правительство Выль Правительство ужаны кутскиз Россиын Правительстволэн экономикаяз юнматонъя программаез ужаны кутскоз 8-тӥ октябрьысен, ивортӥз Правительствоысь ивор вӧлмытонъя управленилэн кивалтӥсез А. Коротков. 1-тӥ октябре Правительстволэн Президиумез эскериз секыт югдурысь потонъя но 4-тӥ квартал понна бюджетлэн инъетэзъя ужпумъёсты. Президиумлэн ужаз пыриськизы Россиысь Правительстволэн Тӧроез Е. Примаков, солэн нырысетӥ воштӥсьёсыз Ю. Маслюков но В. Густов, министръёс: югдурез утёнъя - С. Степашин, обороная - И. Сергеев, мукет кунъёсын кусып возёнъя - И. Иванов, экономикая - А. Шаповальянц, коньдон ужпумъёсъя - М. Задорнов, кун ваньбуръя - Фарит Газизуллин но мукетъёсыз. ШӦКЫЧ Нянь но нӧкы Туала вакытэ вузчиосты вамышлы быдэ пумиталод. Кин шундыберган тысь дэмла, кин тамакен уксё поттэ, кин лушкам арбериосты ӟенеликен воштэ. Огкылын вераса, мылыд гинэ мед потоз, коньдон поттыны амал вань. Берло дыре пыжем нянен вузкарон паськыт вӧлмиз. Адӟылӥськоды, дыр, "Тонар" но "Купава" шуыса нимо автоприцепъёсты. Алигес соослэсь ужамзэс эскерон радъямын вал. Трос тырмымтэос шараямын Велиев предпринимательлэн нянен вузкарон лавкаяз. Нырысь ик, вуззэ но куать ӝажыосын вылысьтыз вылаз возем. Магазиназ ӝокыт, ог 30 градус пӧсь. Соку, пе, нянь борды картофка висён няняське. Ижысь ик Мальчиковлэн магазинысьтыз вузаны лэземын ӧй вал "Подмосковной" батон. Со нэлькиськемын, сутӥськемын. Пушмульыен пирожноез но сокем ӟеч вылымтэ. Арахис пушмульы пӧлысь жуг-жаг сузямтэ. Автоприцепъёсын нянь одно ик вузаськыны кулэ, целлофанэн бинялтыса. Сыӵе куронэз кылэм-адӟем уг каро. Пӧяськыса дасям кабак аракы сярысь трос гожъямын ни. Берлозэ со шараямын вал Завьялын. Сыӵезэ виятӥллям Кавказ палась аксакалъёс. Табере куд-огез нӧкы вӧй но лэсьтыны дышем. Лушкем вуз та нуналъёсы гинэ шараяськиз Ижысь Ленин районлэн 3 номеро магазиназ но ужбергатӥсьлэн Повышевлэн ларёказ. Вӧйлэн выл шобретэз шоры учконо ке, со ваемын кожалод Кезысь сыр поттон заводысь. Вӧйлэн секталаез нош малы ке 20 граммлы кулэсгес. Пусъемын ӧвӧл ку поттэм дырыз. Документъёс но суп-сап пӧрамын. Иже 258 пачка сыӵе вӧй вуэмын ни. Табере кезъёс паймемын: кин узырме соослэн данзы шӧлкын? Б. НИКИТИН. Мӧйыос но шахмат Мӧйыослэн нуналзы азьын Ижын ортчиз ужысь ветеранъёслэн шахматэн шудонъя ӵошатсконзы. Пӧлазы вал Удмуртилэн азьвыл чемпионкаез Зинаида Иютина, гуртъёсысь спортсменкаос пӧлын уно пол вормисе потылэм мурт Любовь Созонова, оже ветлэмъёс Владимир Иванов но Юрий Окулов. Нылкышноос пӧлын, укмыс луоноез пӧлысь сизьым очко люкаса, азьпала потӥзы Ижысь 6 номеро спортъя школаысь тренер Галина Перминова но Завьял ёросысь Первомайский посёлокысь Любовь Созонова. Ватсаса сётэм дыр возьматӥз - кужмогес вылэм гуртысь шахматистка. Воргоронъёс пӧлын кужымзэ эскериз 34 мурт. Шудӥзы соос, арлыдъёсты чакласа. Куатьтон ареслэсь ортчемъёс пӧлын нырысетӥ интыез утӥз та ивортонлэн авторез. Кыкетӥ интыын - 2-тӥ номеро ТЭЦ-ысь инженер Виталий Акименко, куинетӥын - радиозаводын ужась Владимир Петров. Куатьтон арес тырмымтэос пӧлын вормиз спортъя мастер Владимир Федосеев ("Темп" спортклуб). Кыкетӥ интыез басьтӥз "Удмуртгеология" огазеяськонысь Вячеслав Пикулев. И. ВЕЛЬТМАНДЕР, спортъя мастер. ШӦКЫЧ Нош ӧз удалты Лекаськись скаллы Инмар сюръёс уг сёты. Урод кузпаллэн кымесаз сюръёс будыны кутско, пе. Мон котыр ласянь умой адями: кутэз гинэ но уг обидиськы. Ӟеч адямилэн улонэз но усто радъяськыны кулэ, нош озьы уг пӧрмы. Уг удалты мыным, узырмыны уг быгатӥськы. Кыӵе ке миллионер луыны уг малпаськы. Мон понна узырмон - со буёло телевизор но видеомагнитофон басьтыны быгатон. Кемалась сыӵе малпанэн улӥсько ни. Выльдӥськон азьын шумпотыса манетъёсын шыльыртӥсько ни вал, но шӧдтэк шорысь соос пӧрмизы бумагалы. Малпанлэсь ӧй куштӥськы. Манетъёсме "Хопёр" компание сётӥ, нош ӝыны ар ортчыса, басьтон азьын, синву кисьтыны кутски. Процентъёссэ но, коньдонме но адӟыны кылдымтэ. Мон пересь ни, озьы ке но уже интыяськи. Гижысь-пиньысь ужасько, пӧсясько- нюласько. Вазь ӵукна султӥсько, уйшор уе выдӥсько. Боды кадь куасьми, но коньдон люкай. Августлэн шораз магазинэ мынӥ. Пыри гинэ, вузкарись йыр вылам кезьыт ву кисьтӥз: вузъёсмы, пе, дуноязы. От шайтан басьтон, та Москваын кивалтӥсьёс шузимо ни, лэся. Адямиос дуринчи карез пазьгем бере сямен бызьыло-лобало. Кинлэн долларез ӧвӧл, со манетъёссэ воштэ. Ой та, улон... Нош коньдон люкано. Та кивалтӥсьёс котькӧня мед шузияськозы, буёло телевизор одно ик басьто. ПЕРЕСЬ ШАМАРДАН. ШӦКЫЧ Мунчо но эстӥ... Ыш-ыш-ыш. Толэд но каллен вуэ ни, лэся. Уд но шӧды, инбамын тӧдьы бубылиос поръяны ӧдъялозы. Ярам, аслад коркаед ке вань, пудэ пыртӥд но гурдэ эстӥд. Нош городын улӥсьёслы кызьы чидано меда? Сётозы меда туэ шунытсэс? Тани Ижысь Восточной посёлокын ваньмыз сямен улон юртъёс пулэсь ӝутэмын. Коркаос ог-огзылы туж матын сыло. Инмар гинэ мед утёз ини тылпулэсь. Сӥзьыллэн нырысетӥ толэзяз туэ куазь пӧсь но кӧс возиськиз. Шаерамы соку трос гинэ вал тылпу потан учыръёс. Тужгес но трос сутскизы мунчоос. Уго уноезлэн мунчо гуръёссы суп-сап лэсьтэмын. Собере асьмеос но чакласькон сярысь вунэтӥськом. Озьы луиз та посёлокысь Нина К-эн. Мунчоезлэн гурез липетлы матэ пуктэмын бере, со ялан ӟырдаса улӥз. Огнуналэ нылкышно гураз тыл понӥз но кӧлыны выдӥз. Нырысь ик мунчо сигысь пул пызь тэлеӟыны ӧдъяз. Собере "горд атас" быдэс мунчоез ньылӥз. Тылпу кысӥсьёс бен ӝог ке но вуизы, тыл аслэсьтыз кырсь ужзэ лэсьтӥз. Сутскиз быдэс юртъер. Берло дыре уно тылпу потымон учыръёс луыло сад-бакчаосын. Отын но уго нош ик янгыш луо гуръёс. Соосты кин кызьы быгатэ, озьы ик лэсьтэ. 25 сентябре бер уин мунчо ӝуаны кутскиз Глазовысь "Полянка" массивын. Тылпу изъян ваиз 3 сюрс манетлы. Мунчо со муген ик сутскиз Завьял ёросысь "Мирный" но "Прудовый" сад-бакчаосын. Мунчо муръёысь потэм тылгизьы пеньлы пӧрмытӥз Балезино районысь одӥгезлэсь дасям турынзэ. Таосыз вӧзы трос учыръёсты ватсаны луысал на. Кезьытъёс матэкто. Соин ик, ульчае кылемды ке уг поты, умойгес эскере юртъер котырдэс. Шуо ук: лушкаськись, пе, кыӵе ке арберидэс гинэ нуоз, тылпу трос аръёс ӵоже люкам ваньбурдэс пеньлы пӧрмытоз. А. ЕМЕЛЬЯНОВ. Сергей БАБУРИН: "Мыйыкоослэн дырзы вуиз" Удмурт Республикаысь Правительстволэн Тӧроез П. Вершининлэн но "АиФ Удмуртии" газетлэн редактореныз С. Светловлэн ӧтемзыя 1-2 октябре Ижевске вуылӥз Кун Думалэн Тӧроезлэн воштӥсез С. Бабурин. Кун Думаын ужась 450 депутат пӧлысь 16-ез вылӥ парламентэ куинь пол бырйылэмын. Сыӵе "пересь" депутатъёс пӧлы пыре арлыдызъя егит депутат Сергей Николаевич Бабурин. Вордӥськемын 1959 арын Казахстанысь Семипалатинск городын. Юридической наукаосъя кандидат. Омскысь кун университетын ужамын преподаватель но декан луыса. Удмуртие Сергей Бабурин кыкетӥзэ вуылӥз ини. Таяз учыре - республикамылэн югдуреныз тодматскон вылысь. Трос пумиськонъёс пӧлысь огзэ депутат сӥзиз журналистъёслы. 90-тӥ аръёслэн кутсконазы политикае кыстӥськыны ӧдъязы дышетӥсьёс, учёнойёс. Калыклы вӧлмизы таӵе нимъёс: Г. Бурбулис, Г. Попов, А. Собчак, Р. Хасбулатов, С. Бабурин... Ас кужымзылы, визьзылы оскыса, соос Россилэн улоназ бадӟымесь воштӥськонъёс пыртыны малпало вал. Но тросэз та ужез ӧз ворме. Кылсярысь, Москвалэн азьвыл мэрез Г. Попов, ас мылкыд каремезъя ужысьтыз куштӥськиз. Пыраклы политикаысь кошкиз Ю. Афанасьев. Визь сяна, странаен кивалтон понна кулэ на вылэм эшшо кыӵе ке но быгатонлыкъёс. Сергей Бабурин 1990-1993 аръёсы быръемын вал Россия Федерацилэн Вылӥ Советаз. Р. Хасбулатовен ӵош нюръяськиз Вылӥ Советлэн Тӧроез луон понна. Ӧз вормы.Табере бен мар понна нюръяське но кыӵе малпанъёсын улэ Сергей Бабурин? Журналистъёслы со тазьы валэктӥз: - Куд-ог осконъёсылэсь но егит мылкыдылэсь тушме мычем сямен куштӥськоно луи (серекъяса). Табере мыйыко политикъёслэн дырзы вуиз кадь. Нош малпанъёсы азьло сямен ик ӧз воштӥське. Мон - трос партиослы но пӧртэм пумо экономикалы сюрес усьтон понна. Мон выллем политикъёслы дунъет сётыку, куд-огез уг валало, кыӵе дунъетэн милемыз мертано. Малы бен со пумысен йырез тӥялод? Мон - демократ. 1991 ар бере коммунистъёслэн огаз партиязы но уг пыриськы, тыршисько ас кожам улыны. 2000 арын Россилы Президент быръёнъёс дыръя нюръяськоно муртъёслэсь нимъёссэс Сергей Николаевич меӵак ӧз шарая, но ачиз сярысь вераз: та уже пыриськоз. Соин ик со умоен лыдъя калыклэсь 7 октябре пумитъяськон ужрадэ потон мылкыдзэ. Президентмылы валан сётоно: со ас интызэ юнме возе. Жаляса шуиз, та ужрад, кӧня ке вазьгес ке ортчысал, пайдаез золгес луысал. Сергей Бабурин туж зол оске Россилэн выль Правительствоезлы, Евгений Примаков нокыӵе ӧтёнъёстэк, вазиськонъёстэк быгатоз Россилэсь мынон сюрессэ воштыны, шуиз со, угось Правительствое "городъёс" ӧвӧл, кызьы шуо куд-огез, тодӥсь-валась адямиос быръемын. 1991 арын Сергей Бабурин кичӧлтонэн потӥз "Российской общенародной союз" (РОС) кылдытон сярысь. Солэн люкетъёсыз ужало ни Россилэн пӧртэм улосвылъёсаз. РОС-лэн ёзэз ужа Удмуртиын но. Соин кивалтэ "АиФ" газетлэн редакторез С. Светлов. Удмуртие вуылыса, депутат валамон ини, РОС-э пырем эшъёсыныз пумиськылӥз, азьпала ужан ужрадъёс чаклаз. Удмуртиын кемелась верасько ини республикамылы Йыр быръён но сое кызьы ниман пумысен. Кызьы учке та ужпум шоры Кун Думаысь депутат? - Мынам малпамея, ужпум ним бордын ӧвӧл. Тӥляд татын туж аспӧртэмлыко ужась ёз, Кун Кенеш, кылдытэмын. Огдыре ик отын маиз ке кылемын на Советъёслэн ужысьтызы но басьтэмын европейской парламентысь. Мон уг валаськы малы одно ик адӟем кароно мукет улосвылъёслэсь, шуом Башкортостан, Татарстан республикаослэсь. Мыло-кыдо депутат Сергей Бабурин туж трос кужымзэ сётэ Россия но Беларусь республикаослэсь кусыпъёссэс юнматон понна. Ужа Союзлэн парламентской собраниязы тӧрозылы воштӥсь луыса. Тодмо депутатлэн республикаямы вуылэмез но пайдаё мед луоз вылэм. Кылсярысь, со кыл сётӥз юрттыны республикасьтымы ар талэсь азьло кужмысь Казахстанэ нуэм самолётмес берыктыны.Оскем потэ вылэм. Т. БАННИКОВА. Нюлэсчи Уноез адямиос асьсэлы улоназы сюрес быръё пичи дырысенызы ик. Геннадий Скурихинлы нюлэсэз яратон мылкыд пыӵатӥз ӵужмуртэз Федор Александрович Шахматов. Соку со Киров областьын нюлэсчи луыса ужаз. Бариз но со, нюлэсэз йыртэмасьёслэсь утьыкуз. Геннадий Михайлович но улонзэ нюлэслы сӥзиз, та удысын ог 50 ар тыршиз. Нырысь йылпумъяз нюлэс техникумез. Соку отчы пырыны туж секыт вал. Одӥг инты понна нюръяськиз кызь мурт. Самой визьмоосыз но математикаен кыкъёс басьтӥзы. Нош Геннадий задачаоссэ син куспын быдэстыны быгатӥз. Со понна ӟечен гинэ тодаз вайылӥз Алнаш школаысь дышетӥсьёссэ. Техникумез азинлыко йылпумъямез бере, Скурихин ӝыны ар нюлэсчи луыса ужаз. Собере куинь ар Советской Армиын вал, истребительной авиациын радиомеханик луыса служить кариз. 1960-тӥ арысен Геннадий Михайлович нырысь Ижын, собере Завьялысь лесничествоын ужаны кутске. Солэн кичӧлтэмезъя, республикаямы нырысьсэ кылдытэмын вал дышетскисьёслэн лесничествозы. Завьяловоысен Скурихин аслаз ужаз мур пыӵатӥз бусыосты кӧсанлэсь нюлэсъёсын утён амалэз. Озьы ик уно писпуос мерттэмын сюресъёс дуре. Геннадий Михайловичлэн кивалтэмез улсын арлы быдэ 100-150 гектар вылын выль нюлэсъёс "вордскылӥзы". Кылсярысь, Якшур гурт вӧзысь луо музъемъёс вылын табере куашето ни пужымъёс. Со вакытэ нюлэсчилы мылысь-кыдысь юрттӥз колхозлэн кузёез Н. П. Тарасов. Соос кыкназы умой-умой эскерылӥзы котькуд нюк-гопез, кыр интыосты. Озьы ик лыдэ басьтэмын вал котькудӥз выль писпу. Сарапулысен Бабиное мынон сюрес дурысь пужым яг кылдӥз Бабино школаын дышетскисьёслэн но "Свобода" колхозлэн кузёезлэн М. И. Лизуновлэн сюлмаськеменызы. Нош котькытын азьветлӥсьсы вал нюлэсчи Г. М. Скурихин. 1967 арын Россиысь нюлэс будэтӥсьёслэн совещаниязы Геннадий Михайлович пусъемын дуно кузьымен. Трос солэн данъян грамотаосыз но. 1993 арысен Г. М. Скурихин валтӥсь нюлэсчи луэ. Вить ар куспын со кык бадӟым семинар ортчытӥз, отчы быдэс Россиысь куноос ветлӥзы. Нош кылем арын, Россиысь Нюлэсъёсъя департамент кылдэм дырысен 200 ар тырмонлы сӥзьыса, Геннадий Михайлович Ижысь лесхозын школаосысь лесничествоослэсь слёт-конкурссэс радъяз. Ужысь ветеран озьы ик Ижысь сельхозакадемиысь студентъёс пӧлын нюлэс ужъёсъя практикаен но кивалтэ. Нюлэс будэтонын усто ужамез понна алигес Г. М. Скурихин Кун Кенешлэн Данъян грамотаеныз пусъемын. В.ЛАГУНОВ. Снимок вылын: Г. М. СКУРИХИН. Пумитъяськон ужрадлы даёсяськыса Удмурт Республикаысь Югдурез утёнъя министерствоын ужасьёслэн кенешсы ортчиз. Вераськон мынӥз туэ 7 октябре пумитъяськон ужрадэн валче милиция азьын сылӥсь ужпумъёс сярысь. Кенешонэ ветлӥзы Россиысь Президентлэн Удмуртиын оскем адямиез Виктор Балакин, Кун Кенешлэн Тӧроез Александр Волков, Удмурт Правительстволэн Кивалтӥсез Павел Вершинин, министерствоослэн но ведомствоослэн, Иж городысь мэрилэн кивалтӥсьёссы. МВД-ысь, УФСБ-ысь, Юстицияя министерствоысь кивалтӥсьёс ивортӥзы пумитъяськон ужрадлы дась луэмзы сярысь. Озьы ик эскеремын профсоюзъёслэн но мукет общественной организациослэн кивалтӥсьёссылэн пумитъяськон ужрадэ пыриськонъя куриськонъёссы. Нырысь чакламзыя, туэ 7 октябре Ижысь шор площаде ог 15 сюрс адями люкаськыны кулэ. Общественной порядокез но кышкытлыкез утён вылысь, милициын но сюрес вылын шудтэм учыръёсын нюръяськонъя кун инспекциын ужасьёс "Ижмаш", "Ижсталь", "Ижысь радиозавод" акционер огазеяськонъёсысь, "Ижысь механической завод" кун предприятиысь колоннаосты келялозы люкаськон интыосысенызы Ижысь шор площадёзь. Колоннаос ортчыку, столицаысьтымы ульчаостӥ общественной транспорт дугдытэмын луоз. Александр Волков но Павел Вершинин тодматӥзы Удмуртиын кылдэм социальной, экономической но политической югдурен. Кенешонэ ветлэмъёс общественно-политической пумитъяськон ужрадэ пыриськисьёсты, озьы ик правоез утён органъёсын ужасьёсты ӧтизы законъёсты чакланы, ог-огдэ валаса ужаны, юромо лэчыт югдур ӝутыны турттӥсьёсты алыны. Удмурт Элькунысь МВД-лэн пресс-службаез. "УДМУРТ ДУННЕ" ГАЗЕТЛЫ - 80 АР "Дышетӥсе - улон" Ас сярысьтым книга гожтоно ке, мыным дас аръёс улоно на", - шуэ Семен Васильевич Шкляев. Со 80 арессэ тырмытӥз ни. Газетмылэн огъёзэз. Газет поттонэн ик герӟас вань улонзэ. 1941 ар, пӧсьтолэзь, машзавод. Ожлы кулэ луись тӥрлыкъёс поттыны цех лэсьтӥське... Егит рабочийёс пӧлысь кылдыто мобильной бригада, старшое юнмато Семен Шкляевез. "Коммунстрой" трестлэн косэмезъя, пруд дорысен Ложевой цех (краеведческой музей) дорозь, Красногеройской урамтӥ, водопровод кысконо. Бен, машзаводлэн Ложевой цехаз кулэ вал ву. (Валэктом: Арсеналын винтовкалы ложа лэсьтылӥзы.) 1942 арын толалтэ кызь вить воргоронъёс но нылкышноос вылазы мар ке шедем дӥсяськыса, ломъёсын, лопатаосын пильыло-гудо кын музъемез (со интыын али Летний сад, технической университет). Эбылям киоссэс-пыдъёссэс шунтон вылысь, одӥг-ог тылскем доры кожыло: отысь-татысь ваем, кыскам пуоссы тачыр поттыса ӝуало. Одӥг пол соос доры 1-тӥ хлебозаводысь охранник учыраз. - Тӥ малы кын сюез копаса курадӟиськоды? Нодды уг тырмы шат музъемез шунтыны? Ужзэс капчиятӥзы. Ӝыт вуыса, хлебозаводэ но оген-кыкен кыстӥськылӥзы. Сиизы, мар сёто. Эсьма, сахар-сырец но шедьылӥз. Сьӧразы нянь ке сёто, корка кузёзылы но окме... 1943 ар, тулыс. Сӧсыр Москвалэсь яраоссэ бурмытоно: бомба улэ сюрем юртъёсыз тупатъяны-выльдыны кулэ. Вооружениея наркомат косэм улсын отчы мынӥз машзаводысь азьветлӥсь бригадазы но. Чистые пруды шуон районын вить этажъем корка пуктӥзы. Электротыл кыскылӥзы. (Семен Васильевич уг вунэты, кызьы туж чебер но секыт, 150- 200 килограммъем люстраез ошизы Устинов наркомлэн ужан кабинетаз.) Гужем но, соин ӵош командировказы но ортчиз. Машзавод берен куре ужасьёссэ. Но лэсьтӥськонъя начальник Бартеньев шуиз: - Тонэ, Шкляев эш, татчы кыльыны куриськом. Милемлы кулэ электрикъёс. Выль лэсьтэм коркады ик квартира но сётом, ваёд семьядэ... "Мон чутрак пумит, - гожтӥз Оля. - Госпитальын уже умой, куштэме уг поты". Егит семья Москвае ӧз выжыяськы. Кышнояськизы соос 1941 арын пӧсьтолэзе. Ож гудыри но, завод ӵын но, яратонэн пачылам югытэсь уйёс но - ваньмыз огазьын. Ӵужпыр-тӧдьы кузь йырсиё-пунэто нылаш но сьӧд, угра (эгра) выжы тусо пияш тодматскизы Ижысен. Оля Сьӧдой лудысь вылэм, Зуралы ньыль-вить иськемысь гинэ. Улыны кариськизы аспал адямизы, Кузьма дӥне, Георгий Туганов артист доры но "каръяськылӥзы". Собере егитъёслы сётӥзы "Кама" гостиницае инты... Нош ик - завод, 74-тӥ цех, мастер... 1945 арлэн кутсконаз Семен Шкляев партилэн обкомез пыр нош ик ӧтемын "Советской Удмуртия" газетэ... Быдӟым ожез но со пумитаз вал татын ик. Кылдэмезлэсь уд ортчы, шуо. Улон нюжаос та адямиез ялан, шӧдымтэ улсын, кыскизы но... кыткизы газет поттон "уробое". *** Нош мар бордысен со кутскиз? - Школае мынӥ, тямыс аресам выжыса, - тодэ ваёнъёссэ йырвизьмаз бергатэ Семен Васильевич.- Физик-математикмы ӧз лэзьы ни киме ӝутъяны, жаль, пе, потэ (жадёз). Мынам "конёке" алгебра вал. Доска доры потыса, быдэссэ гожмаса быдтӥсько. Ай уг но тэры - туж кузь действие пӧрме... Отличник луэменым йыры поромиз... Учкисько "Удмурт коммунаын" ялон: ФЗО-е 7 класс дышетскемъёсты куто. Эшъёсме, Костяез, Марусяез, "куасалтӥ" - Иже чортӥ. Ямщикъёс керосинлы, пе, мынозы. Дӥсь, сиён, учебникъёс - шыкысын. Со шыкысэ ышиз - ямщикъёс ик асьсэлы каризы, дыр. Город шоры, Горький ульчае, номыртэк кыли. Но мон чупырес вал - соизлэсь, таизлэсь юалляськисько... Милица ачиз вуиз. Общежитие интыязы. Дышетыны кутскизы полиграф ужлы - газет шуккон, шуиськом вал. Дышетски но, ужай но типографиын (Пастухов, 13). Нокыӵе профессия басьтыса ӧй вуы... Туж яратӥсько вал кӧлыны. Мукетъёс ӝытъёсы бильярдэн, шахматэн шудо - мон маин пӧртэм? Техничка вунэтэм сайкатыны, ӵукнаозь ик суч-суч кӧлӥ. Нош ужасько вал уин, ротация машина бордын юрттӥсь луыса. Озьы та бадӟым тираж поттӥсь машиналэсь люкиськоно луи. Со вал 1934 арын, 16 аресам... Усьтӥськизы делопроизводствоя курсъёс - асьме правительство малпаз кагаз гожъянэз удмурт кылын но нуыны. Отын дышетскиз но, Семенэз ыстӥзы андан ӵыжатӥсьёслы газ сётон станцие ужаны, делопроизводитель вӧзы. Удмурт кылын ужез кулэтэмлы пӧрмиз. Озьы бере интыязы насосной цехе - мӧйы ӧнерчилэн юрттӥсез, собере ачиз но машинист луиз. Яратэ вал сое пересь, аслэсьтыз пизэ кадь сюдыса возиз. Но татысен луизы сюрессэ мукет пала кожытӥсь шудтэм учыръёсыз. - Юрттӥсе сётӥзы шоккес нылашез. Мон умме усиськем. Со мыным езлэсь но бумагалэсь сюръёс лэсьтэм. Кылӥсько куараез... тыбырам но мыжгизы. Умйылтӥм уг валаськы: оло мотор, оло насос ӝуа. Сменалэн начальникез-инженер лыктӥз - монэ адӟыса но мотор ӝуа кожаса "шузимиз". Насослэн подшипникез ӝуаны кутскем, со нылаш "сюръёс" лэсьтон куспын... Выжтӥзы чидантэм секыт уже. Насосэн смола (сир) кысконо вал, зынэн уг луы, синкыли вия, ньыль час ужаса уйжомоно, усеме но вань. Химзаводэ со сир келяське, отын порошок лэсьто... Лушказы коньдонме, сменалэн кассирез но вал мон, кассаысь но ышиз... Семен Шкляев Зурае бертоно луиз. Кирилл братэзлэсь гожтэт басьтӥз: лыкты, пе, Мончегорске, связья линия кыском... 1938 ар. Мончегорск. 20 аресъем муртлы нырысьсэ сётӥзы трудовой книжка (отын гожтэмын: "монтёр ОКХ") - со дырозь Семен ӧз но тодылы кадь та документ кулэ шуыса: ужан сюресэз уго итэто-итэто кутскиз. Кин со луыны быгатысал? Инженер, физик- математик, тодосчи?.. Иже бертыса, табереяз ини ужын кыданы вуэм егит адями радиоузелэ монтёре кариськиз. Юрттӥсе дэмлазы Василий Поздеевез (бӧрысь со, механической заводын ужаса, Социалистической Ужысь Герой луиз). Совето ульчаысь 9 номеро столовой вадьсысь коркан радиолиниез воштыку, дэймон учыр вал. Тодаз вае: - Ньылетӥ-а, витетӥ-а этаж. Мон керттӥськемын гозыен, медам усьы шуыса, дымовой труба борды. Труба шорысеныз пограз. Мон кӧт йылам гылӟи, липет пуме вуи, вурысъёс борды ошиськыса улӥсько. Вася кесяське: "юрттэ!.." Мынам син азям вал ни гуртоосы, кин монэ ватоз... Я, кин ке липет йылэ тубись луиз. Васялы юртыны кутскиз гозыез кыскыны... Улон котырет - кысконо ёзъёсыд кадь - одно ик вуттэ, кытчы вуыны кылдэм. Егит пи Зурае яратоно нылызлы гожтэт гожтӥз, удмурт сямен. Лиза-аппаратчица со гожтэтсэ маке сямен лыдӟем. Паймыса но вожъяськыса юа техниклэсь: кытысь дышид сыӵе чебер гожъяськыны? Эх, мыным ке сыӵе чирдысалзы... Сыл ай, оло, радиое переводчике кариськод? Мар бен, Семен радиокомитетэ мыныса оскалтӥз. Нырысь ик дэмлазы ТАСС-лэсь материалзэ ньыль бам берыктыны. Арня пала уй но нунал выриз со векчи печатлам бордын. Гай Сабитовлы сётӥз - таиз учкиз, тупатъяз но - выльысь гожъяно луиз. Кык- куинь толэзьзэ озьы курадӟиз егит переводчик, котькуд кенешын тышкаськылӥзы... Зэмос судэ но сюрылӥз татын, комсомолысь но поттӥзы. Али но пӧсектэ малпаса: - Сыӵе закон вал соку - кызь вить минутлы бере кылиськод - суд улэ кыско. Тае ас вылам шӧдӥ. Туж бадӟым материалэз берыктыса, уйзэ но, ӵукназэ но пуки. Дас кык часлы нуназе гинэ уже вуи. Ӵапак кемдыны кулэ: прокуратураын ужась пумитам шедиз (одӥг юртын ужамы). Чылкак ериз бордам: тон кытын вал? Соку гинэ уго со постановленизы потэмын вал ай... 1940 ар. Матэ вуэ ни ож гудыри. Семен Шкляевез армие басьто. - Армиын монэ кема ӧз возе,- шуэ Семен Васильевич.- Суйпосы вандӥськемын вал, кык чиньые ӧз ужа. Роталэн командирез стройысь потыны косэ: малы, пе, винтовкаед паллян кияд? Куинь толэзь ортчем бере, медкомиссия шуиз: тырмоз армилэсь няньзэ сиыны... 1941 арын тулыс пал Семен Шкляевез "Удмуртская правда" газетэ кутӥзы, "о, дась переводчик" шуыса. Соку та газет быдэсак удмурт кылэ берыктӥськыса потэ вал. Семен Васильевичен ӵош соку та удысын ужазы Василий Григорьевич Широбоков, Тимофей Иванович Шмаков, Николай Иванович Кондратьев... Кӧня ке толэзь ортчыса, кутскиз мобилизация. Егит журналистэз ыстӥзы заводэ (та бордысен ик кутским мадёнмес)... х х х 50-тӥ аръёс. Социалистической ӵошатскон пуромемын. Бусыын гырись тракторъёс бордын горд флажокъёс тӧлало, фермаысь горд сэрегъёсын горд знамяос, вымпелъёс кузёясько. Горд буёл пиштэ предприятиосын но. Промышленностья но транспортъя отделлэсь кивалтӥсьсэ дораз ӧтиз газетлэн редакторез Петр Михайлович Яшин: "Удмуртлес" комбинатлэсь киысь кие вошъяськись Горд знамязэ Пызепысь мебельной фабрикалы сёто. Оло, ветлод, Семен Васильевич? Умой ужасьёс сярысь ӟеч-ӟеч материал кулэ вал... Со учырез мӧйы журналст тазьы тодаз вае: - Чепца станциысен Пызепозь - куинь-ньыль иськем. Нокыӵе нялтас машина но, вал но ӧй шедьты. Ӝыны сюресэз ортчи - жаль-жаль зорыны кутскиз, ботинкаосам тыраз ву. Пызепе вуи, огаз корка йыгаськисько - уг усьто, мукетаз... куинетӥяз тыл ӝуа, лэзизы. Пыри - вылысьтым ӟуз ву вия. Хозяйка чабкиське: "Олӥ-олӥ!.. Ойдо, ӵапак гуре эстэмын, кылиськы, тани тыныд штан, сукман - туб гур вылэ". Отысен пиосмурт куараез кылӥсько: "О, корреспондент эш! Ойдо юом". Огзэ мычиз - шунытгес луиз, эшшо сётэ. Уг юы ни, шуисько... Кӧлон куспетӥм со ӝытэ клубын торжественной собрание ортчем... Ӵуказеяз лумбыт мебель поттӥсьёс дорын вал. Директорзы ӧвӧл - арня куспын, пе, "отпуске" кошкылэ (дышиллям ни талы). Ужме быдэстыса, конторае секретарь доры кожано кариськи на. Бадӟым альбом сётӥз, лисъяй... Ӧс борды кутӥськи ни вал... "Сыл ай, сыл, кытысь мон сое адӟылӥ?" Берытскыса учки: азьпал лист вылын ик - директорлэн снимокез. Ӵапак со! - со кышномурт дорын вал, кытын кӧлӥ. Пушкам маке бугыръяськиз соку, партилэн райкомаз ивортыны малпай. Мынытозям пӧсь ӝуалскеме кысӥз... Петр Михайловичлы но ӧй поттылы ни. Комбинат ачиз улляз кивалтӥсьсэс шуныт интыысьтыз. Азьвыл тодэмея, сьӧд синкашъёсыз улысь синъёсыз меӵак, мыр-мыр учко, но Семен Васильевичлэн ноку кинэ ке юромо вӧсь каремез, солы пыдзэ пуктэмез ӧй вал.1967 арысен 1978 арозь, пенсие кошкытозяз, со газетамы редакторлэн воштӥсез луыса ужаз. Адями шедьтӥз ассэ ачиз газет ужын. Правительстволэн, ТАСС-лэн ивортонъёсыз дыръя трос кӧлымтэ уйёс, ӵукнаозь ужын ӝегатсконъёс, командировкаосы пыдын но маин потаса кынман учыръёс, вылласянь йыр йылэ "ӵыжинъёслэн" усьылэмзы, нуналмысь йырез-визез жадьытӥсь-сюпсись ӝӧксьӧр уж - та секыт удысэз Семен Васильевич номырин мукетыныз ӧй воштысал. (Журналист сярысь кырӟанын выллем: "Если б снова начать, я бы выбрал опять бесконечные хлопоты эти"...) Партийной школаосын дышетскемзэ вератэк, Семен Васильевичлы олокыӵе вылӥ дышетсконниосыз пырпотыны ӧз кылды. Нош ужзэ яратэмез сое, улонлэсь вань кожъёссэ тодытэм гинэ ӧвӧл - отчы зымыса, вань кужмыныз нюръяськыса улыны дышетӥз. "Твердообложеннойлэн" семьяяз вордскем витетӥез пинал (сузэр-вынъёсыныз ӵош соос вить кузя вал) тубатэн-тубатэн ортчиз улон школа пыр - 80 аресэ вуытозяз... Учкиськод али со шоры - сьӧд йырси нюжаоссэ тӧдьыез вормем, пельпумыз шымыресгес луэм ни, куараез дырекъялля (секыт висён куасалтыны выре) - малпаськод: сэзь-ӟырдыт задорлыксэ нокыӵе аръёс уз ворме. Яратэ со серем улсын вераськыны - юнме-а, очеркъёс, веросъёс сяна, юморескаос но гожъяз, али но "Шӧкычын" печатласькылэ. Туала улон пумысь уг ӟукырты - ӵошатыса "вес вылэ" пуктэ: - Чурыт куронъёс, дисциплина вал ми дыръя. Шӧдӥськод вал: тон печатьын ужась, мукетъёсызлы адӟем карымон луыны кулэ. Улон воштӥське бере, газет поттонлэн но аслаз азьланьсконэз. Али журналистъёслы эрик тросгес сётэмын. Эрик, оло, укыр трос сётэмын та вие. Медаз гинэ сӧры вал со адямиез. *** - Семьяе сярысь гожты на, - ватсаны куриз Семён Васильевич. - Валяетэк мон, ӧйтӧд, кызьы улысал. Со вылын вань оскон. Шумпотӥсько, сад-бакчае эшшо "бызьылыны" быгатэ. Андрей пизы (ужбергатӥсь) кышноеныз, нылыныз бордазы ик улэ. Галя - Перьмын - дышетӥсь, валеолог, Неля - Южно-Сахалинскын, бухгалтер, Сергей - Ижевскын ик, "Компьютер" фирмаын бухгалтер. Котькудӥныз данъяськемзы луэ. "Нелялэн кык воргоронъёсыз" будо, вӧлдэт ӝуждаесь ни, чебересь", - шуэ Семён Васильевич. Иське, пушъе Шкляевъёслэн выжызы. ... Нырысетӥ кышноез 1954 арын ик кулӥз. Картэзлэн ки йылаз кельтӥз ареслэсь бадӟымгес пизэ, укмыс но сизьым аресъем нылъёссэ. ТАТЬЯНА ЧЕРНОВА. ШӦКЫЧ Эмеспи Толон Глазове ветлӥмы. Парамонэ электроплиткалы синмаськиз. Параска, пе, давай басьтом, а то ке газмы тани-тани быроз ни. Пумит ӧй луы. Коньдонмы ке но ичи, хозяйствоын плитка кулэ. Егит вузкарись шуэ: туж умой, пе, шунтэ, оло, эскерытэк басьтоды. Мон адямиослы оскисько, соин сумкаям чаляк донги. Вузкарись дотово лякыт сямо, веськрес мугоро. Басьтэммы понна тау шуиз, пальпотыса келяз. - Вот, Парамон, эмеспимы таӵе мед луоз вылэм. Та пияш кадь сюлмо, - шуисько мужикелы. Ну ничего, ӵуказе Галя нылмы вуоно кузпалэныз берто шуыса гожтӥз вал. Со Глаз карын улэ. Дораз пырано вылэм, но дыр ӧвӧл. Автобусэ билет басьтэмын, пудоез сюдоно. Гурт котырын уж быронтэм трос уга. Эмеспиез ӵуказе адӟом ни. Гуртэ пырим гинэ, Парамонме парсез сюдыны, собере скалэз пумитаны ыстӥ. Ачим гань- гань пукисько, шутэтскисько. Ӧжытак умме но усиськем. Парамонэ вуон азьын, пӧй, выль плиткаын губиен шыд пӧзьто ай. Мужике нингубиен шыд дотово яратэ. Шнурез розеткае донги гинэ, ну чилектӥз ук, ӵын потыны кутскиз. Асме но тышкаськисько, вузкарисез но сопал дуннее келясько. Вот пӧяз ке, пӧяз, табере гуртаз гор-гор серекъя но манетъёссэ лыдъя, луоз. Парамонэ кӧт урдэсам мырӟылӥз. Ӝыны уй бӧрдӥ, али но синъёсы гордэсь. Нуназе пал Галямы вуиз. Сьӧраз чебер, веськрес мугоро пияш пыре. Ачим но, Парамонэ но пӧсь картофкаен гуньдэм кадь луимы. Ма, эмеспимы плитка вузась вылэм ук. Ма карыны уг тодӥськы: ӝӧк сьӧры-а пуктоно, ӧс шоры-а возьматоно. Парамон, лешак басьтон, таӵе эмеспи асьмелы кулэ-а, ӧвӧл-а?! Параскалэсь верамзэ гожтӥз С. Кужымов. Солдатэз жуго Ува ёросысь нылкышноослэн огазеяськоназы аслаз сюлэмшугъяськонэныз вазиськиз Антонина Горохова. Солэн пиез Алексей Подмосковьеын служить каре. Но кызьы тодмо луиз, пияшлэн тазалыкезлы кышкытлык кылдэм. Солдатэз частяз жуго, вӧсь каро, пе. Анай , пизэ Удмуртие выжтыны курыса, частьлэн командирезлы но гожъяз. Отысь нокыӵе ивор ӧз вуы. Табере нылкышноослэн огазеяськонзы Алексей Гороховез вордскем палъёсаз ваён пумысен военкоматэ вазиськоз. Сыӵе иворен тодматӥз Ува ёрослэн газетэз. Тодон-валанлэн пумыз ӧвӧл... Сорослэн фондэз Россиысь библиотекаослы книгаосын юрттонъя программа бордын ужа. Джордж Сорос малпамъя, асьме странаын литератураен герӟаськем культура котьку но вылӥын вал, таин валче калыклы ӟеч сямъёсты пыӵатонын, иворъёсты вӧлмытонын бадӟым инты басьто библиотекаос. Сорослэн фондэзлэн выль программаез ас азяз таӵе ужпум пуктэ: Россиын книга поттӥсьёсты, вӧлмытӥсьёсты, библиотекаосын ужасьёсты но лыдӟисьёсты ог-огенызы тодматоно, кусыпъёссэс юнматоно. Удмурт шаерысь 32 библиотека мылкыд кариз та программая ужаны. Сыӵе библиотекаосы книгаос дунтэмгес дунын вуозы, нош куд-огез чылкак дун тырытэк басьтоз. Туэ Сорослэн фондэз республикаысь библиотекаослы 50 сюрс манет висъяз, журналъёслы но газетъёслы гожтӥськон понна. Удмуртиысь Национальной библиотека туэ гужем Сорослэн фондэзлэсь кузьым басьтӥз: 96 справочникъёс но энциклопедиос. Соос экономикалы, политикалы, инкуазез эскерись наукаослы, тазалыкез утёнлы но искусстволы сӥземын. Библиотекаын та аспӧртэмлыко книгаосын выставка радъямын. Ужалоз со 12-тӥ октябрёзь. О. МАКСИМОВА. Кун Кенешлэн сессиез Эскерон-а, кышкатон-а? Та секыт но бадӟым вераськонлы дасяськон кема мынӥз. Озьы ке но, Кун Кенешлэн азьвыл чакламтэ 21-тӥ сессиезлэн ужез кутсконаз ик ӵемтӥз, депутатъёс огкылэ вуымтэен. Эскероно ужпум одӥг: Удмурт Республикаын кылдэм социально-экономической но политической югдур. Вераськизы Правительстволэн Тӧроезлэн нырысетӥ воштӥсез Юрий Питкевич, Удмурт Национальной банклэн кивалтӥсез Равиль Каримов но Кун Кенешлэн Тӧроез Александр Волков. Правительстволэн докладэзъя депутатъёс трос гинэ юанъёс сётӥзы, котькудӥз валаны выре: малы Удмуртия вань удысъёсъя арысь аре ялан уллане ваське? Малы, куд-ог регионъёсын сямен (кылсярысь, Саратов, Самара областьёс) Удмурт Правительство ас калыксэ кризислэсь утьыны ӧз быгаты? Кин кыл кутоз дунъёсын шудэм понна? Гурт хозяйствоын ужасьёслэн самой лек висёнзы - поттэм продукцизэс дунтэм дунын басьтон. Ку татын радэз луоз? Трос юанъёс сётэмын вал электрокужым но газ, нылпи пособиос но пенсиос тырон ласянь. Котькудӥзлы валэктон понна, Юрий Степановичлы кык час пала трибуна сьӧрын сылоно луиз. Валамон, сомында азэм пӧськыосты кыл вылын гинэ уд эмъя. Вылаз ик, данакез шуге-леке вуон учыръёс герзаськемын Центрен, электрокужым но газ сётон ик. Таизъя сессилэн кыкетӥ нуналаз Правительстволэн Тӧроез Павел Вершинин пырак шуиз: - Мон малпамъя, электрокужымез лябӟытыса регионъёслы висъян юри малпаса нуиське. Со вуттоз кышкыт адӟонэ: дугдозы вань предприятиос, ужамысь дугдоз быдэс промышленность. Котькудӥз кивалтӥсь али оске Примаковлэн кабинетэзлы. Юрттӥз ке со Удмуртилы но - социально-экономической кризисысь потом. П. Н. Вершинин, куд-ог мукет депутатъёс но пусйизы республикалэсь эшшо одӥг ляб интызэ - калыклэсь тазалыксэ утён удысэз. Туннэ со гогыеныз бурмемын, шуыны луоз, импортэн. 80 процентэз эмъюм отысь ваемын, кылемез, 20 процентэз, дасяське кунгож сьӧрысь висъям коньдонэн. Озьыен, Россиысь фармация быдэсак быдтэмын. Котькудӥз депутат ӟырдыт вераськиз пуктэм ужпумъя. Данакез шонер валало: куд-ог тырмымтэос пото асьме республикалэн кивалтӥсьёсыз бордысь шуыса. Та вераськонэз ӝутон сярысь коммунистъёслэн огазеяськонзы, мукетъёсыз но депутатъёс кылпум поттӥзы вал ини сентябрьлэн нырысетӥ нуналъёсаз ик. Но сессия люкаськиз толэзьлэн берпуметӥ нуналаз гинэ. Валамон, 17 августэ кутскем бугыръяськон калык пӧлын каллен-каллен чалмиз, но адямиосты со туж вӧсь кариз. Кин со понна янгыш? Самой та юанлы валэктон утчан мынӥз кык нунал ӵоже. Трос пыкылон кылъёс верамын вал Кун Кенешлэн Тӧроезлы но Президиумезлы. Малы соос секыт вакытэ сессиез люканлэсь кышказы? Депутатъёс, соос пӧлын Евгений Одиянков, Николай Сычев, Анатолий Ешкеев, Николай Чувашов, Валентин Тубылов но куд-ог мукетъёсыз меӵак дэмлазы Александр Волковлы отставкае потыны. Кун Кенешлэсь Тӧрозэ соос пыкыло ас тодэмезъя решениос кутылэмез, госаппаратсэ йылэтэмез но трос музонэз понна. Огласянь, депутатъёс тырмымтэосты шонер пусъё кадь, нош мукет ласянь малпан кылдэ: неужто кык нунал ӵоже вераськон куашетонлы, янгышъёсты утчанлы-копанлы гинэ пӧрмоз? Озьы шат, мыжыкъёсын ог-огед вылэ урдскылыса, потод та пеймыт мур гуысь? - Сессиын мон возьмай вал ужез радъянъя пыр-поч кенешонэз, та вакытэ туж кулэ луись ужрадъёсты кутонэз,- шуиз депутат Евгений Сторонкин,- асьмеос нош ик палэнэ кошким. Депутатъёслэн мылкыдзы люкиськиз. Озьы ке но, сессия вуиз одӥг малпанэ: республикаез шуг-секытысь поттонъя ӵош, огазеяськыса ужано. Кивалтӥсьёсты вошъян дыр уг тупа. Собере, туала Кун Кенешлэн быръем дырыз но тулыс быре ни. Оло, вань визьмес, кужыммес, ӟеч малпанъёсмес вуоно быръёнъёсты дасянэ умой-умой кутскыса ӧръяно? 21-тӥ азьвыл чакламтэ сессия ужзэ йылпумъяз.Солэн материалъёсыныз газет тодматоз на вуоно арня вискын. Кун Кенешлэн вуоно сессиез ужзэ мытоз 6 октябре. Л. МЕДВЕДЕВА. Тазалыкед понна, Володь Яр посёлокамы Жириновский, пе, вуоз. Чугун сюрес доры кузьыли мында калык люкаськиз. Зэмзэ но, так-та тарин, так-та тарин йыггетыса, поезд адскиз. "Удму-у-у-урт", - шуыса кужмо кеськиз но, станциямы дугдӥз. Яръёс донгасько, монэ паньгато ни вал. Озьы ке но, Жириновский Володь доры матэгес кариськи. Йыры мынам быгылес, визьмо малпанъёс ӵем гинэ чилектыло. Вылаз ик туннэ висисько ревматизмен, макмырен, ӧд ке валалэ на. - Товарищ Жириновский! - кесяськисько, - тӥ куанер калыкез гажаськоды. Эн сётэ кулыны тямыс пиналъёсылы но ужтэк кылем Поля кышноелы. Ми ваньмы тӥ понна куарамес сётом, Президентэ быръём. Жириновский Володь удмурт сямен уг тоды вылэм. Ӟеч адямиос берыктӥзы. Киме кырмиз, киям коньдон донгиз: ме, пе, тыныд 500 манет, пиналъёсыд улонзэс мед герӟалозы либерально-демократической партиен. Мон шумпотонниям лудкеч кадь тэтчи но, пеймыт сэреге ватски. Спичка ӝуатӥ но пайми: 500 манет интые, чылкак 25 манет гинэ сётэм Володь агай. Эшъёсме ӧти. Бутылка басьтӥ, сялӟиськи но Жириновский Володьлэн тазалыкез понна стаканме мекалтӥ. П. ЯРОВ. Валэктэ юрист Сэрегез нуэ адвокат Лилия Шкляева Астэ утён Тодмо пияшеным ӵош юмшакумы, ми котыре тэбинизы кык кузя укылтэм пиос. Монэ утьыкуз, со огзэ эрказмемез пуртэн сӧсыртӥз. Эшме милиция ӝегатӥз. Сое судын эскерыны медо, утиськыкуз эсэпсэ ыштэмез понна (ӟуч сямен - превышение пределов необходимой обороны). Малы эше кыӵе ке юэм адямиен сэрен вӧсь луыны кулэ? Кызьы солы юрттоно? Мар со сыӵе - утиськыку эсэпсэ ыштон? В. ТРЕФИЛОВА. Россия Федерацилэн Конституциысьтыз 46-тӥ ёзэт (статья) котькудӥзлы право сётэ аслэсьтыз но мукетъёслэсь правооссэс законэн алымтэ вань амалъёсын утьыны. Астэ утён сярысь валэктон сётэмын Россия Федерацилэн Уголовной кодексысьтыз 37-тӥ ёзэтын. Со кужыме пыриз 1997-тӥ арын 1-тӥ январе. Отын гожтэмын: "Йыртэманэн уг лыдъяськы, эрказъяськись муртлэсь утиськыку, солы изъян лэсьтон". Мукет сямен вераса, обществолы кышкытлык кылдытӥсь урдсконъёслэсь таӵе макеосты эсэпез валаса возьмаку - адямиез, утиськись но музон муртъёслэсь правооссэс, обществолэсь но государстволэсь законэн утиськись кулэяськонъёссэс (интересъёссэс). Асьсэды утьыны правозы ваньмызлэн огкадь, ма каремзы но кыӵе удысын ужамзы шоры учкытэк. Адями соку юрттэт курыны быгатэ мукет муртъёслэсь яке кивалтон ёзъёслэсь. Утиськыку эсэпсэ ыштон - юри сыӵе ужрадъёс лэсьтон, кудъёсыз чик уг тупало урдскылонъёслэн кышкытлыксылы. Озьыен, выль кодекс утиськись муртлы право сётӥз урдскылӥсьлы котькыӵе изъян лэсьтыны, виыны но - эрказъяськон юн кышкытлык кылдытэ ке утиськисьлы яке мукет адямилы. СССР-ысь Вылӥ судлэн 1984-тӥ арын 16-тӥ августэ ортчем пленумаз кутӥз 14 номеро постановление. Утиськыку эсэпсэ ыштон учыр вал-а, ӧй-а шуыса чаклакузы, судъёс мед учкозы: кыӵе амалъёсын урдскылэмын но пезьдэт сётэмын, кыӵе кышкытлык кылдытэмын возьмаськисьлы, кыӵе кужымзы но амалъёссы вал эрказъяськисьёслэн но пезьдэт сётӥсьёслэн (лыдзы, тазалыксы, арлыдзы, кивалтоссы, мырӟиськон дырзы, интызы). Таин валче тодады вайытэм потэ Уголовной кодексысь 222-тӥ ёзэтэз. Со кылэз юа газэн тӥрлыкез (оружиез), кезьыт оружиез басьтэм, вузам но нуллэм понна. Школа но улон Вордскем кыллэн данэз будэ Школаосын нимаз-нимаз предметъёсты нуись дышетӥсьёс асьсэлэсь ужзэс азинто районысь методологияя огазеяськонъёс пыр (РМО). Шаркан районысь удмурт кылъя но литературая дышетӥсьёслэн та огазеяськонэнызы кивалтэ Шарканысь шор ёзо школаын ужась дышетӥсь Надежда Игоревна ПЕРЕВОЗЧИКОВА. Со валэктонъёс сётӥз ужзэс кызьы радъям пумысен. - Мар бордын ужаз сояз дышетскон арын тӥляд огазеяськонды? - Сямлы пӧрмиз ини школаосын удмурт литературалы сӥзем месячникъёс ортчытъян. Соиз дышетскон ар удмурт кылъя но литературая дышетӥсьёс понна туж кысык вал. Шаркан музъем вылын вордӥськем но будэм поэтлы, писательлы, драматурглы Степан Павлович Широбоковлы 1997 арын декабре тырмысал 85 арес. Районысь библиотекаен ӵош ортчытъямы Широбоковлы сӥзем лыдӟонъёс, нуизы соосты Шаркан шор ёзо школаын дышетскисьёс. Та лыдӟонъёсы туж мыло-кыдо пыриськизы Сурон, Кыква. Сосновка, Зюзино, Карсашур школаосысь пиналъёс. Мукетыз бадӟым ужрад сӥземын вал нырысетӥ удмурт нылкышно кылбурчилы Ашальчи Окилы. 100 ар тырмонэзлы сӥзем литературая празднике пыриськизы вань школаос, кудъёсыз тунсыкъясько удмурт писательёслэн творчествоенызы. Пиналъёс лыдӟизы Ашальчи Окилэсь кылбуръёссэ, асьсэос но кылбуръёс гожъязы. Веросъёсызъя пуктэмын вал сценкаос. Нимысьтыз пусъем потэ Карсашур школаысь пиналъёсты (дышетӥсьсы О. М. Вахрушева), Кыкваысь (дышетӥсьсы Т. Е. Первушина) но Шарканысь (дышетӥсьсы А. Я. Лебедева). Праздник йылпумъяськиз нылпиослэсь йырвизьзэс сынась шудонэн. Вормисе потӥзы Мувыр шор ёзо школаын дышетскисьёс (дышетӥсьсы О. К. Малых). 9-тӥ - 10-тӥ классъёсын дышетскисьёс пӧлын ортчытэмын вал Куӟебай Гердлы но Ашальчи Окилы сӥзем сочинениослы конкурс. 9-тӥ классын дышетскисьёс пӧлын вормисе потӥз Шаркан шор ёзо школаысь Наташа Ефремова; 10-тӥ классын дышетскисьёс пӧлын - Шаркан шор ёзо школаысь Алёна Дуроманова; 11-тӥ классын дышетскисьёс пӧлын - Зюзино школаысь Лиза Ложкина, Мувыр школаысь - Надя Малых. Пиналъёслэн ужъёссы ыстэмын вал республикаын ортчись конкурсэ. Алёна Дуромановалэн сочинениез пусъемын кузьымен. Со сяна, та кылбурчиослы ик сӥзьыса ортчытэмын вал бордгазетъёслы конкурс. Ваньмыз ик бордгазетъёс туж аспӧртэмлыкоесь пӧрмиллям. Но тужгес устоосыныз лыдъямын вал Ляльшур но Шаркан школаослэн ужъёссы. Шаерамы сяме пыӵаз ини дышетскисьёс пӧлын удмурт кылъя но литературая олимпиадаос ортчытъян. Зюзино шор ёзо школаысь Лиза Ложкина (дышетсконзэ туэ йылпумъяз) республикая нырысетӥ инты басьтӥз (дышетӥсез А. С. Никитина). Ӟеч быгатонлыкъёссэс возьматӥзы Мувыр школаысь (дышетӥсьсы О. К. Малых) но Быги школаысь (дышетӥсьсы А. М. Хохрякова) пиналъёс. - Надежда Игоревна, дышетскисьёс пӧлын огъя ужрадъёс ортчытъям сяна, дышетӥсьёслэсь тодон-валанзэс, быгатонлыкъёссэс будэтон ужпумъёсты но огазеяськонды азе пуктӥськоды, дыр? - Соиз дышетскон ар куспын вить огъя кенешонэ люкаськылӥм. Нырысетӥяз ик кенешамы ӧтчамы Удмурт кун университетысь преподавателез, критикез-литературоведэз Александр Григорьевич Шкляевез. Со лыдӟиз туала удмурт литература сярысь лекция. Кыкетӥ пумиськонамы выль дышетскон арлы план кутӥм. Мукетъёсаз кенешъёсамы усьтэм (открытой) урокъёс ортчытъям, котькудзэ котыр ласянь эскерыса. Кылсярысь, озьы эскерим Кыква школаысь дышетӥсьлэсь Светлана Юрьевна Ивановалэсь "Фольклор дуннеысь куное" уроксэ. Та школаысь ик Любовь Германовна Корепанова дасяз "Степан Павлович Широбоков - Удмуртиысь дано писатель, поэт но драматург" усьтэм урок. Кыкез ик урокъёс вылӥ дунъямын вал. Трос тыршоно луизы Сосновна шор ёзо школаысь дышетӥсьёс. Усьтэм урок нуэм сяна, соос аттестациез ортчизы. Людмила Васильевна Созыкиналэн урокез сӥземын вал наречилы, нош Надежда Петровна Бурановалэн - Вячеслав Сергеевлэн творчествоезлы. Кыкезлы ик дышетӥсьлы сётэмын вал нырысетӥ категория. Огазеяськонмылэн одӥгаз кенешаз пусъемын вал, тросэзлэн дышетӥсьёслэн ужан опытсы бадӟым, соос котыр ласянь дасяськемын. Нош Порозово школаысь Нина Николаевна Крыловалэн но Зюзино школаысь Алевтина Степановна Никитиналэн ужъёссы ыстэмын вал "Вордскем кыл" журналэ. - Таяз дышетскон арлы кыӵеесь ужпумъёс пуктӥськоды огазеяськонды азе? - Нырысь ик, тужгес но бадӟым саклык висъяно дышетскись пиналъёслэн удмурт кылын умой вераськыны но гожъяськыны быгатонлыксылы. Озьы ик юрттоно дышетӥсьёслэсь быгатонлыксэс но тодон-валанъёссэс будэтыны. Школаез йылпумъялом нылпиослэн азьлань сюрессы но милемды сюлмаськытэ. Вылӥ дышетскон заведениосы пырон понна, районысь администрация бюджетысь нимысьтыз коньдон висъяны кулэ - целевой направлениея. - Кызьыгес учко асьсэос пиналъёс вордскем кылзэс дышетон шоры? - Удмурт кыл районын арысь аре азинске. Сое валаны луэ нылпиослэн удмурт кылъя но литературая экзаменъёс сётыны мылкыд каремзыя но. Кылсярысь, Зюзиноысь, Ляльшурысь, Порозысь, Сосновкаысь, Вортча починкаысь, Суронысь тросэз 9-тӥ классын дышетскисьёс туэ мылкыд каризы удмурт кылын изложение гожтыны. Нош Быги, Кыква, Ляльшур, Петуньки, Мувыр, Ниж. Кивары школаосысь 11-тӥ классын дышетскисьёс выпускной сочиненизэс удмурт кылын гожтыны мылкыд каризы. Азьло ӟуч сямен туртто вал. 9-тӥ но 11-тӥ классын дышетскись пиналъёс устной экзаменэз но удмурт кылын быръё ни. 1994-тӥ - 1995-тӥ аръёсын ӵошатыса, берло аръёсы дышетскисьёслэн тодон-валанъёссы пумен умоесьгес луо, экзаменъёсын баллъёссы вылэгес ӝутско. Сыӵе азинсконъёс быдэс районъя адӟисько. Мукетсэ но пусъем потэ. Шаркан шор ёзо школаын тани покчи классъёсысь ӟуч нылпиос пӧлын удмурт кылъя факультатив нуиськом. Татын но шӧдӥське нылпиослэн удмурт кылэз тодыны мылкыд каремзы. Ваньмыз сярысь бен озьы вераны уг луы, но тросэз туж мыло- кыдо ужало. Паймоно кадь сыӵе мылкыдзылы. Урокъёслы дасяськыны асьмелы секыт йӧтэ ни, уг тырмы кулэ методической литература. Л. МАЛЫХ. Ку сётозы шуныт но пӧсь ву? Таяз арняе Республикаысь Правительстволэн Тӧроезлэн П. Н. Вершининлэн котькуд нуналыз кутскылӥз юртъёсы шуныт сётон но пӧсь ву лэзён ужпумъёсысен. Нош 29-тӥ сентябре та ужпумъёсъя кенешон ортчиз. Солэн ужаз пыриськизы Правительстволэн Президиумысьтыз муртъёс, Ижевскысь но Сарапулысь, Сарапул ёросысь администрациослэн, республикаысь кужымен кузёяськись ведомствоослэн кивалтӥсьёссы. Озьы ик ӧтемын вал "Межрегионгаз" но "Удмуртэнерго" огазеяськонлэн, "Ижмаш" но Ижсталь" предприятиослэн, механической заводлэн но жилищно-коммунальной хозяйстволэн предприятиосызлэн кивалтӥсьёссы. Соос ивортӥзы шуныт сётыны дасяськемзы сярысь. Шаерамы 5-тӥ октябрёзь шуныт сётыны чакламын. Ижевскын улӥсьёслэн квартираосазы пӧсь ву но шуныт 3-тӥ октябрёзь вуозы. Правительстволэн Тӧроезлэн секретариатысьтыз пресс-центр. Шӧкыч Куноын - "Шулдыр ӝыт" Серекъяны-маскаръяськыны быгато ик вылэм шаермылэн уй пал ёросъёсаз но. Туннэ сётӥськом Глазын потӥсь "Иднакар" газетлэн "Шулдыр ӝыт" нимо бамын печатлам кӧня ке материалъёссэ. "Гарантия" пӧя Россия Федерациысь Коньдон ужпумъёсъя министерстволэн страхованиез эскеронъя департаментэз "Российской газетын" печатлаз умойтэм ужась компаниослэсь списоксэ. Со документъя страхование удысын ужан лицензиез басьтэмын Ижысь Пушкинской ульчаысь 373 номеро юртэ интыяськем "Гарантия" организацилэн. Соин ик азьняз "Гарантилы" эн оске, одно ик пӧялозы. Н. КОЗАКОВ. Удмурт Республикаын калыклы улон-вылонын юрттэт сётон удысын, экономикаын но политикаын югдур сярысь Удмурт Республикаысь Кун Кенешлэн Постановлениез Удмурт Республикаысь Правительстволэн Тӧроезлэн нырысетӥ воштӥсезлэсь Ю. С. Питкевичлэсь "Удмурт Республикаын калыклы улон-вылонын юрттэт сётон удысын но экономикаын югдур сярысь" докладзэ, Удмурт Республикаысь Кун Кенешлэн Тӧроезлэсь А. А. Волковлэсь но Удмурт Республикаысь Национальной банклэн Тӧроезлэсь Р. М. Каримовлэсь верамъёссэс кылзыса, Удмурт Республикаысь Кун Кенеш мур сюлмаськемзэ вера, Россия Федерациын калыклы улон-вылонын юрттэт сётон удысын, экономикаын но политикаын секыт югдур кылдэмен валче. Таӵе югдур кылдӥз, Россия Федерацилэн Президентэзлэн Б. Н. Ельцинлэн политикаез куашкамен сэрен. Удмурт Республикаысь Кун Кенеш пусъе, Удмурт Республикаысь Правительство, Кун Кенешлэн Президиумез но городъёсысь но ёросъёсысь интыысь аскивалтонъя ёзъёс ужрадъёс куто ке но, республикалэн калыклы улон-вылонын юрттэт сётонъя удысаз но экономикаяз югдур уг тупатскы шуыса: коньдон уг тырмы, предприятиослэн но калыклэн басьяськыны, тыронъёссэс тырыны быгатонлыксы синэ, экономикае инвестициос тырмыт уг вуо. Промышленностьын ваньбур поттон Калыклы улон-вылонын юрттэт сётон удысэз но экономикаез азинтонъя программаен чаклам мындаозь ӧз вуы, таин валче бюджетъёсы нылогъёслэн вуэмзы кулэсме. Уждунэз, пенсиосты, пособиосты тыронъя пунэмъёс будо. Калык бугыръяськыны кутске, ужась коллективъёс пумитъяськон ужрадъёсты ӵемгес ортчытъяло. Калык властьлы ӧз ке оскы, югдурез тупатыны тыршон пайда уз вайы. Тае валаса, Удмурт Республикаысь Кун Кенеш пуктэ: 1. Удмурт Республикаысь Правительстволэсь "Удмурт Республикаын калыклы юрттэт сётон удысын но экономикаын югдур сярысь" докладзэ лыдэ басьтоно. 2. Россия Федерациысь Федеральной Собранилэн Кун Думаезлэн решениезлы дурбасьтоно. Та решение Россия Федерацилэн Президентэзлэсь полномочиоссэ дырызлэсь вазь уретонъя ужрадэз кутскыны дэмла. Россия Федерациысь Федеральной Собранилэн Федерацияя Кенешезлэсь муртъёссэ - Удмурт Республикаысь Кун Кенешлэсь Тӧрозэ А. А. Волковез но Удмурт Республикаысь Правительстволэсь Тӧрозэ П. Н. Вершининэз - куроно та постановлениез лыдэ басьтыса ужаны, нош Федеральной Собранилэн Кун Думаезлэн депутатъёсыз Н. И. Сапожников, А. В. Солуянов, М. П. Кошкин та постановлениез лыдэ басьтыны кулэ, Федеральной Собраниын та ужпумъя куаразэс сётыкузы. 3. Россия Федерациысь Федеральной Собранилэн Федерацияя Кенешезлэн муртъёсыз А. А. Волков но П. Н. Вершинин Россия Федерацилэн Президентэзлы но Россия Федерациысь Правительстволы ивортыны кулэ Удмурт Республикаысь Кун Кенешлэсь таӵе куронъёссэ: иворъёсты вӧлмытонъя ёзъёсын 7-тӥ октябрёзь печатлано бюджет чотын ужасьёс, пенсионеръёс азьын пунэмъёсты но пособиосты тыронъя пунэмъёсты берыктонъя графикез, калыклы сое быдэсъян сярысь ялан ивортылыса; агропромышленной комплексын секыт югдур кылдэм сярысь, АПК-лы толалтэ но тулыс ужъёслы дасяськон вакытэ кун ласянь юрттон сярысь ужпумъёсты ӝегатскытэк эскероно. 4. Россиысь промышленностез ӝутонъя ӵектонъёслы дурбасьтоно. Соос Россия Федерациысь Правительстволэн Тӧроезлы ыстэмын (гожтэт сётӥське). 5. Россия Федерациысь Федеральной Собранилэн Федерацияя Кенешезлэсь муртъёссэ А. А. Волковез но П. Н. Вершининэз Россия Федерациысь Федеральной собранилэн Кун Думаезлэсь депутатъёссэ М. П. Кошкинэз, Н. И. Сапожниковез, А. В. Солуяновез косоно Бюджет чотын ужасьёс понна огъя тарифной сеткалэн 1-тӥ разрядэзлэсь ставказэ будэтон сярысь федеральной законэз кутэмез ӝогомытыны. 6. Удмурт Республикаысь Кун Кенеш но Правительство огазеяны кулэ кун властьлэн ёзъёсызлэсь но интыысь аскивалтонъя ёзъёслэсь, вань партиослэсь но движениослэсь, калык огазеяськонъёслэсь ватсам ужрадъёс чакланы тыршемзэс, экономикаын но калыклы улон-вылонын юрттонъя удысын шуг-секытъёсты вормон понна. 7. Удмурт Республикаысь Правительстволы: кык арня куспын дасяно республикаын сӥзьыл но толалтэ экономикаын но калыклы улон-вылонын юрттонъя удысын югдурез тупатонъя ужрадъёс сярысь программаез но сое Кун Кенешлы эскерон понна сётоно; республикаын нянь пыжон понна ю тысез тырмыт люкан сярысь постановлениез кутоно 1998 арын 10-тӥ октябрёзь; городъёсысь но ёросъёсысь администрациосын, предприятиослэн но организациослэн кивалтӥсьёсынызы, федерацилэн структураосыныз ӵош ужано, структурной кризисэз небӟытон, ваньбур поттонэз будэтон но 1998 арлы республикаын калыеклы улон-вылонын юрттэт сётонъя удысэз но экономикаез азинтонъя программаен чаклам планъёсты быдэстон понна; бюджетлэсь доходъя люкетсэ ватсаса будэтон, бюджетысь коньдонэз пайдаёгес люкон но республикаын коньдонъя югдурез ӟечомытон понна ужрадъёс кутоно; Удмурт Республикаысь Национальной банкен ӵош ужано, вузъёс но мукет узырлыкъёс, быдэстэм ужъёс (юрттэтъёс) понна кредитной организациос дыраз мед тырозы, вань бюджетъёс но вкладчикъёс азьын кутэм кылъёс мед быдэсмозы шуыса; бюджет чотын ужасьёслы уждун тыронъя, пенсиосты но пособиосты тыронъя кунэмез кулэстоно; ужтэк кылем муртъёслы ужан интыос кылдытонъя, ужась кужымлэсь ӟечлыксэ но конкуренциын вормыны быгатонлыксэ будэтонъя, калыкез дышетонъя радлыкез азинтонъя, ужбергатонлы но егитъёсты профессиосын тодматонъя ужез азинтоно; дунъёсты эскеронъя но рынокез нырысь ик кулэ вузъёсын тырмытонъя ужез азинтоно; городъёсысь но ёросъёсысь администрациосын ӵош ужрадъёс кутоно, 1998 арын 1-тӥ октябре юртъёсы шуныт сётон понна, но толалтэ калыклы улыны юрттӥсь вань радлыкъёслы ужаны луонлыкъёс кылдытоно. 8. Удмурт Республикаысь Налогъёсъя кун инспекция, Россия Федерациысь Налогъёсъя полицилэн федеральной службаезлэн Удмурт Республикая управлениез азьвыл сямен ик эскерозы, дыраз-а быдэсъяло кредитной организациос клиентъёссылэсь куронъёссэс но банкъёсы вуэм коньдон клиентъёслы дыраз-а кошке. Законэз тӥян учыръёс шараяськыку, законэз тӥясьёс пумысен ужрадъёс кутоно, законодательство вылэ пыкиськыса. 9. Удмурт Республикаысь Югдурез утёнъя министерство, Россия Федерациысь Налогъёсъя полицилэн федеральной службаезлэн Удмурт Республикая управлениез, Удмурт Республикаысь Кышкытлыклэсь утиськонъя министерство чырмытгес ужаны кулэ, экономика удысын йыружъёсты шараян но эскерон понна. Удмурт Республикаысь Прокурорлы ӵектоно правоез утись ёзъёслэсь экономика удысын йыружъёсты шараянъя но эскеронъя ужамзэс герӟаны, ужзэс одӥг ӧретӥ ортчытон вылысь луонлыкъёс кылдытыны. 10. Кун Кенешлэн вуоно сессияз эскероно "Удмурт Республикаын дунъёсты (тарифъёсты) кун ласянь радъян сярысь" Удмурт Республикалэн законэзлэсь инъетсэ, сое дасяз Удмурт Республикаысь Правительство. 11. Удмурт Республикаысь Правительство, городъёсысь но ёросъёсысь интыысь аскивалтонъя ёзъёс 1998 арлэн 9 толэзезлэн йылпумъянъёсызъя кенешъёс ортчытыны, интыосын калыклы улон-вылонын юрттэт сётонъя удысэз но экономикаез азинтонъя планъёсты быдэстонэз эскерыны кулэ. 12. Удмурт Республикаысь Правительство, калыклы улон-вылонын юрттэт сётон но кунлэсь нылпиосын гражданъёслы пособиосты тыронъя обязательствооссэ быдэстон понна, пунэмъёсты берыктон коньдонэн герӟаськем вань луонлыкъёсты кутыны кулэ. Городъёсысь но ёросъёсысь администрациослэн кивалтӥсьёссылы ӵектоно пособиосты тыронэ келяны интыосысь бюджетъёсы нылог тыронъя недоимкаез, тырем коньдонэз республикалэн бюджетысьтыз берыктыса. 13. Удмурт Республикаысь Правительствоез косоно Удмурт Республикаысь Национальной ьанкен ӵош Удмурт Республикаысь банкъёсты ӟеч ужатон пумысен ужпумез эскерыны, республикаысь коньдонэз огазеян но экономикаез но калыклы улон-вылонын юрттэт сётонъя удысын сое пайдаё кутон понна. 14. Удмурт Республикаысь Кун Кенешлэсь Президиумзэ но Правительствоез косоно республикаысь калыклы арнялы быдэ ивортылыны экономикаын но калыклы улон-вылонын юрттэт сётонъя удысын кылдэм югдур сярысь но сое тупатон понна кутӥськись ужрадъёс сярысь. 15. Та постановленилэсь быдэсъяськемзэ эскерыны косоно Удмурт Республикаысь Кун Кенешлэсь Президиумзэ но Правительстволэсь Президиумзэ. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 1 октябре. � 661-И. Россия Федерациысь Правительстволэн Тӧроезлы Е. М. Примаковлы Гажано Евгений Максимович! Россиысь промышленностез ӝутон понна кулэ луись ужрадъёс сярысь Ӵектонъёсты ыстӥсько. 1. Ӝегатскытэк быдэстоно ужпумъёс 1. 1. Вань тыронъёсты тырыны луонлыкъёс кылдытон понна банковской радлыкез выльдоно: - тыронъёс ӝог мед ортчозы шуыса, Россия Федерациысь Центральной банклэн улосъёсысь ёзъёсызлэсь тыронъёсъя сетьсэс кутыны лэзёно; - банкъёслэсь лыдзэс кулэстоно, нырысь ик - Москваысь банкъёслэсь филиалъёссэс, коньдонлэсь бергамзэ кун ласянь эскеронэ берытсконо; - коммерческой банкъёсы кугӟам коньдонэз предприятиослы берыктоно, 6 предприятие азьын гинэ 49 миллион манет пунэмъёс люкаськемын. Коньдон берыктэмын ӧз луы ке, пунэме кылем банклэсь лицензизэ басьтоно; 1. 2. Предприятиослы берыктоно федеральной бюджетлэсь кун заказэз быдэстэм понна пунэмъёссэ (1996-1998 аръёс понна), 1998 арын 1 сентябрьлы Удмуртия азьын пунэмъёс 557 миллион манет люкаськизы ини. Пунэмъёсты берыктыны луоз таӵе амалъёсын но: - уждунэз тыроно "улэп" коньдонэн (пунэмъёс 82 миллион манет люкаськемын); - пунэмлэсь кылем люкетсэ - дуно кагазъёсын, та кагазъёсты вань бюджетъёс но предприятиослэн контрагентъёссы коньдонэз тырон чотын кутӥзы ке. 1. 3. Россия Федерациысь Правительстволэн постановлениезлэсь вузъёсты келям понна НДС басьтон пумысен люкетсэ быдэсъямысь дугдоно. 1. 4. 1998 арын 8 январе кутэм "Быгатӥсьтэмен (банкротэн) ялан сярысь" 6-Ф3 номеро законлэсь кутӥськемзэ дугдытоно, кун асваньбурлэн люкетэз 10 процентлэсь уногес ке. 1. 5. Предприятиослы лэзёно вузъёсты асдунзылэсь ичигес дунын вузаны, налогъёслэсь быдӟалазэс будэтытэк. 1. 6. Тылэз, газэз, телефонэз ӧвӧл кысылоно, улосысь (ёрос, город, республика) властьёсын кенешытэк, Россия Федерациысь Правительствоын та пумысен постановление кутыса. 1. 7. Россия Федерациысь Правительствоын промышленностья министерство кылдытыны чаклано. 2. Промышленностьын ваньбур поттонэз юнматыны но ӝутыны кулэ луись ужрадъёсты кутон понна мукет ӵектонъёс 2. 1. Естественной монополиослэн продукцизылы но юрттэтъёссылы тырифъёсты кулэстоно. "ЕЭС России" РАО-эз, "Газпром" РАО-эз, связья предприятиосты кунлы берыктоно". 2. 2. Экономикаысь зэмос ужась предприятиослы луонлык сётоно инвестициосъя кредит басьтыны кунлэн гарантиосызъя, конкурс ортчытыса, ваньбур поттонэз, кунгож сьӧры вузано продукциез но кун сьӧрысь ваем продукциез воштыны быгатӥсь вузъёсты поттонэз нырысь ик, радъян но паськытатон понна. (Удмуртиысь предприятиослы 562 миллион манет кулэ, нош "Ижмаш" ОАО-лы - 300 миллион доллар). 2. 3. Предприятиослэсь вань бюджетъёс но бюджетэ пырисьтэм фондъёс азьын пунэмъёссэс 5 арлы кынтоно. 2. 4. Предприятиослэсь ичигес налог басьтоно: - табышлы налогысь куштоно табышлэсь сыӵе люкетсэ, кудӥз ваньбур поттонэз азинтон понна кутӥське; - налогъёсты тыроно продукция понна коньдон басьтэм бере. Бюджетэ пырисьтэм фондъёсы тыронъёсты - уждун басьтэм бере. 2. 5. Тыронъёсты тырон понна, предприятиослы, асваньбурзэс залог кельтыса, оборотной ваньбур яке льготаен кредит сётоно 7-10 процентэн. (Удмуртилы 650 миллион манет кулэ, со пӧлын "Ижмаш" ОАО-лы - 215 миллион манет). 2. 6. Кун заказлы тырмыт коньдон висъяно, аспӧртэмлыко производствоосты но обороналы ужась предприятиосты утён понна. 2. 7. Предприятиослэсь улон коркаоссэс но соцкультбытъя юртъёссэс муниципальной асваньбуре ӝегатскытэк выжтоно, та удысын гинэ кутоно коньдонэз висъяны кулэ Россия Федерация - Россия Федерациысь Коньдон ужпумъёсъя министерствоен чаклам мында. (1997 арын 1442 миллион манет висъяны кулэ вал, висъямын 418 миллион манет. 1998 арын 1624 миллион манет чакламын, Россия Федерацилэн бюджетаз чакламын 323 миллион манет, одӥг манетэз но висъямын ӧвӧл). 2. 8. Таможня пумысен политикаез воштоно: - воштос ёзъёслы но технологической оборудованилы пошлинаез кулэстоно; - розницаын вузан понна кун сьӧрысь ваем вузъёслы пошлинаез будэтоно. 2. 9. Россиын поттэм дуно вузъёсты кредитэн вузанэ берытсконо, предприятиос понна страховой фондъёс кылдытыса. 2. 10. Эстӥськон но электрокужым сётэм понна пунэмъёсты но федеральной бюджет азьын пунэмъёсты тыронэз радъяку взаимозачёт амаллэсь кутӥськемзэ азьланьтоно, коньдонэн герӟаськем югдур тупатскытозь. 2. 11. Россилэсь, озьы ик Удмуртилэсь но, оборонаен герӟаськем промышленностьсэ утён понна, Россиын Нимысьтыз лэсьтӥськонъя удысэз утёно, озьы ик отчы пырись Лэсьтӥськонъя 17 номеро управлениез Удмурт Республикаысь. Удмурт Республикаысь Кун Кенешлэн Тӧроез А. А. Волков. 1998 арын 28 сентябре. � 1803/1. ГАЗЕТЛЫ - 80 Визьмасьёсы Та нуналъёсы редакциысь вуылэм гожтэтъёс пӧлын бугыръяськыкум синйылтӥ: тужгес но трос гожтэтъёс басьтэмын "Удмурт дунне" ("Советской Удмуртия") газетлэн редакциысьтыз: дорам утиськисез гинэ - 82! Та лыдпус ик нош ӧтиз монэ гожъяськон ӝӧк сьӧры. Лыдӟисьёсын пумиськылон дыръя ӵемысь юало: "Кин-о тӥледлы литературае сюрес возьматӥз, нырысь вамышъёстэс лэсьтыны юрттӥз?" Сыӵе дыръя одно ик поттылӥськод ас дышетӥсьёсыдлэсь, удмурт гожъясьёслэсь нимъёссэс. Но со дыре ик чылкак палэнэ кылё кудӥз ке редакция, отын ужась-тыршись журналистъёс. Мон гожъяськон сюресме югдытӥсен, валтӥсен, юрттӥсен ниманы уг курдаськы вань удмуртъёс понна яратоно "Удмурт дунне" газетэз. Ачим улӥсько ӟуч гуртын. Нош сюлэм шумпотыку яке куректыку, одно ик нёжъясько удмурт кырӟанъёсты. Сюлэм ик капчия, ас ӵыжы-выжыеныд пумиськыса вераськем кадь потэ. Удмурт шаерлэсь палэнын улӥсьёс люкемын удмурт радиопередачаосты кылӟонлэсь, телепередачаосты учконлэсь. Но ... вань ук одӥг герӟась нюжа - удмурт газетъёс но журналъёс. Школаын дышетскон аръёсысен ик мон луисько "Советской Удмуртия" газетлэн лыдӟисез но авторез. 1972-74 аръёсы гинэ, Советской Армиын службаме ортчыкум, лыдӟыны луонлыке ӧй вал. Ма, соку но чылкак кусыпме ӧй ышты, гожъялляй, гожтэтъёс басьтылӥ. Жаль, визьнодэ тырмымтэ нырысь гожтэтъёсме, газетэ печатлам ужъёсме утьыны. Нырысетӥосыз утем ужъёсы - кык кылбуръёсы. Печатламын соос 1977 арын 9-тӥ апреле. Котькудӥзлы гожъясь адямилы нырысь-вылысь юртто газет-журналъёсын ужасьёс. Мынам дышетӥсьёсы но соос ик. Тужгес но трос гожтэтъёс басьтэмын "Советской Удмуртиын" ужасьёслэсь, ас ужзэс гажасьёслэсь. Семён Самсоновлэсь - 23 гожтэт, Т. Петрова (Черновалэсь) - 13, Г. Ходыревлэсь - 7... но трос мукетъёслэсь. Ваньмыз 16 адями люкаське. Нырысетӥез гожтэт - Николай Васильев писательлэсь. 1970 арын 18-тӥ феврале ыстэм гожтэтаз со пусъе: "...Выжыкылдэс но кылбурдэс лыдӟи. Выжыкылды содержаниезъя интересной луоно вылэм но, тӥ сое литературной гожтыны быгатымтэды, кылды туж шакрес, грамматикалэсь правилооссэ но умой-умой уд чаклаське". Озьы котькуд гожтэтэн редакция монэ дышетэ, визьма, бурдъя, туж кулэ дыръяз бурдъёсме лапкомытэ но. Огкылын вераса, улонг сюресме югдытыса, азьлане валтэ. Тани ма гожтэ Семён Самсонов 1972 арын 26-тӥ сентябре ыстэм гожтэтаз: "Басня гожъян мылкыдды вань ке, трос лыдӟе басня сярысь - валалэ, мар со басня, дышетске мукетъёслэсь, выль образъёс утчалэ". Герман Ходырев: "Газетэн кусыптэ эн ышты, Николай. Тросгес лыдӟиськы, котькуд лыдӟем произведениедлы пичияк анализ лэсьты: маиз кельшиз, маиз ӧз". "Ӟечбур, Никифоров эш! Саламен "Советской Удмуртиын" ужасьёс. Таяз "Италмасын" тӥляд кылбурды потыны кулэ. Вождэс эн вае сокем тупатъяса поттэмысь. Конечно, ӧжытгес тупатъяса поттыны луысал, но мон юри зол тупатъяй - ӵошатон понна", - гожтэ Татьяна Чернова огаз гожтэтаз. Зэмзэ вераса, "Удмурт дунне" мынам гожъяськон университетэ луыса потӥз. Татын печатласькизы кылбуръёсы, веросъёсы, юморескаосы, пьесае, повесте. Нош 1992-тӥ арысен кутскыса, Людмила Перевозчиковалэн ӵектэмезъя, ӵемысь ысъясько Киров улосысь выль иворъёсты, возьматӥсько та палась удмуртъёслэсь кыӵе омырен шокамзэс. Огаз гожтэтын Юлия Александрова гожтэ: "Азьланяз но, ми туж оскиськом, кусыпъёсмы уз ыше-быре, ог-огмылэсь кыдёкын ке но улӥськом." Ма бен, оскытӥсько: дыр шедьтыку гожъяло, "Удмурт дуннеен" кусыпме уг ышты. Уго газетмы но арысь аре ӟеч пала воштӥське. Ас ымныр тусыз, ас сямыз, ас удмурт шӧмыз мед возиськоз газетмылэн! Николай НИКИФОРОВ. Киров улосысь Кильмезь ёрос, Бураши гурт. Правительствоысь иворъёс Ву понна дун тырон Удмурт Республикаысь Правительстволэн Президиумез Кун Кенешлы сётӥз эскерыны "Удмурт Республикаысь шур вуосты кутэм понна дун тырон ставкаос сярысь" постановленилэсь инъетсэ. Ву понна дун тыронлэн ставкаез сокем ӧз буды. Али кубометр ву понна 3 коньы тыриське. Со законэн чакламлэсь шӧдскымон улӥгес. Промышленной предприятиослы 1000 кубометр ву понна 91 манет тырон тупатэмын. Со луонлык сётоз бюджетэ ог 3 миллион манет вайыны. Огъя вераса, вуэз кутэм понна коньдон тыронъёс республикамылэн бюджетэз 10,7 миллион манет сётоз. Удмурт Республикаысь Правительстволэн Тӧроезлэн секретариатысьтыз пресс-центр. КЫШКЫТ ЭЗЕЛЬ Ку быдтомы люизитэз? Зэмзэ но, та ужпум котырын кемалась бергаськом, со сярысь трос пол гожъяллям ни. Озьы ке но, югдур интыысьтыз уг вырӟы. Малы? Россия ласянь та кышкыт ож тӥрлыкез быдтон вылысь, умоесь решениос кутэмын ваньмыз лыдъямын-чотамын, ку но кытын быдтон черод тупатэмын. Но одӥгез борды пыкъяське: федеральной бюджетысь коньдон уг висъяськы. Соин та ужъёс юн каллен мыно. Шаерамы нош самой трос люизит но мукет химической ож тӥрлык интыямын (камбаркаын бадӟымесь бекчеосын 7 сюрс тонна пала, нош Кизнерын артснарядъёсын 5,7 сюрс тонна). Озьы ке но, Россиысь Правительство нырысь ик чакла быдтыны Саратов областьысь Горный посёлокысь люизитэз но ипритэз. Отын со 1200 тонна люкамын. Али посёлокын ужъёс радъясько ни: лэсьто улон коркаос но мукет социальной юртъёс, ву кыско, подстанция (ЛЭП) ӝуто но музон. Быдэс Россиын химической ож тӥрлык быдтонэз радъян понна кылдытэмын нимысьтыз дирекция. Солэн решениезъя, Горный бере люизитэз быдтозы Камбаркаын, собере - Курган обласьтын, нош Кизнерлы ньылетӥ черод юнматэмын. Ватсаны кулэ, таӵе ож тӥрлык эшшо вань на бускель Киров, Пенза но Брянск областьёсын. Отын но со быдэн 5-7 сюрс тонна люкамын. Нош вуоно ар пумын Горный посёлокын кышкыт эзелез быдтонъя завод ужаны кутскоз. Ӵектӥське кык амал (технология). Одӥгзэ Москваысь учёнойёс дэмлало, мукетсэ - Н. Новгородысь. Асьмеос та ужен туж бере кылиськом. США-ысь 9 интыосын 32 сюрс тонна химической ож тӥрлыксы кылле. Но отын со 2,5 сюрс тоннаез быдтэмын, 2 заводзы ужа ни. Али куинетӥзэ пукто. Мар бен асьме республикаямы лэсьтӥське? Камбаркаын ӝоген вуттозы 60 квартираен улон юрт но общежитие, кыско газ но ву гумыос, лэсьто сюрес но мукетсэ. Кизнерын но кӧня ке ужъёс мыно. Али пукто школа, Бемыжын больница, выльдо подстанцизэс но кыско газ. Вераны кулэ, лэсьтӥськисьёслы коньдон уг висъяло, но соос ужало, кӧня чидалозы на? Нокин уг тоды. Камбаркаын гинэ 41 миллион манетлы ужъёс быдэстэмын ни. Федеральной бюджет республикалы ичизэ 34 миллион висъяны кулэ, сомында тыронэз люкаськемын. Огъя вераса, 2000 арозь Россиын 400 тонназэ гинэ та эзелез быдтыны пусйиське, яке 1 процентсэ. Юн ӝеганлэн мугез тодмо: тырмыт коньдон уг висъяськы. Г. РОМАНОВ. Кузьма Кузнецов Эрик но зэмлык Уноезлы лыдӟисьёсмылы тодмо, дыр, Пичи Пургаысь мыло-кыдо автормылэн Кузьма Кузьмич Кузнецовлэн ужъёсыз. Уно аръёс ӵоже со гожъя ни гурт улон сярысь. Дышетскемезъя агроном, адӟонэзъя журналист, али дыре пенсионер мылкыд карем аслэсьтыз улон сюрессэ тодэ вайыны, пӧртэм адямиосын пумиськонъёсыз сярысь гожтыны. Малпаськом, тӥ но солэсь чуръёссэ лыдӟоды, асьтэлы кулэзэ шедьтоды шуыса. ЁРОС газетын ужакум, ӵем поталляно луиз матысь но кыдёкысь гуртъёсы. Озьы огпол мӧйы воргоронэн пумиськи. - Селиверстов,- кизэ мычиз со. Тодмо фамилля кадь, но кин вал ай та, йырме ас поннам тӥясько. Мон пыремен, мултэс луэмзэ шӧдыса, лэся, выль тодмое изьызэ мургес лапкатӥз но кошкыны дасяськиз. Ӧс сьӧры ышем бераз, коркалэн кузёез вераз: - Партилэн райкомаз ужамын. Али дачник. Туж вераськись. Солань кариськемме валаса, вылды, татӥ ортчыкуз пыратэк уг кошкы. Соку гинэ чилектӥз йырам: бен, Селиверстов, самой со Селиверстов... Пересьмыса лапег мугорыз эшшо но лаптӥськем. Егит дыръяз ик пилешмыны кутскем йырыз чылкак миськем сяртчы кадь кылем. ... Дас классэз йылпумъяса, гуртам кыли - армие кошкытозь, кӧня ке коть дорын улэме потӥз. Ой, кӧня вал соку гуртын ӵош будэм эшъёс! Нош мон соослэсь палэнын люкиськыса улӥ. Витетӥ классэ ик сьӧрло мыноно луиз. Тросэз нылъёс но пиос, Бурановоын сизьым классэз йылпумъяса, колхозэ кылизы. 25 иськеме Пургала огнам ветлӥ. Дышетсконзэс азьланьтыны мылкыд карисьёс вал, но улон секытэн, моӵсы ӧз тырмы - не сиён, не дӥсь ӧй вал уго. Витьтонэтӥ аръёс. Дас ар ортчиз война бырем дырысен. Куашкам колхозъёслы государство номырин уг юртты, музъемын но фермаосын поттэм ваньбурез дунтэм дунын кыскыны тырше. Мукет гуртъёсын улӥсьёслэсь мыным капчигес вал, дыр - чугун сюрес матын. Зэм, Пургалан куинь ар дышетскытозям, Агрызозь одӥг пол но шуныт вагонын мыныны ӧз кылды. Мон кадь коньдонтэм колхоз нылпиослэн мынон-ветлон интызы вагонъёс вискын яке товарной поездын вал. Куддыр поезд дугдылытэк Сарапулозь ик кошкылӥз. Пельпумын - дэра мешоклэсь лэсьтэм котомка. Арнялы тырмымон нянь сяна, ма но со гылэт нуиськод. Сӥзьыл - помидор, сылалтэм кияр. Отӥяз, пудо вандэм бере, кӧт сюманэз вунэтоно. Аттестат басьтӥ гинэ но, дышетскемед вань шуыса, комсомольской секретаре бырйизы. Колхозмы Свердловлэсь нимзэ нуллӥз. 1959 арын бадӟыматэм "Мир" колхозлэн куатетӥ бригадаез луиз. Дышетскыкум бордгазет поттонэ, литературной кружоклэн ужаз пыриськылӥ, нош комсомолъя верано ке, собраниосы гинэ ветлылӥ. Соин ик выль уже шуген сётскиз. Егитъёсын сцена вылын ужаны яке трос калык азьын вераськыны туж секыт потылӥз. Комсомолецъёсын кивалтэмен артэ, со вакытэ ик чугун сюрес вылын ужай на. Ужез капчи ӧй вал ке но, нуналаз манетлэсь ятыр ӧз тырылэ. Солы но шумпотӥськомы ни вал - колхозын чылкак буш ужазы ук. Гужемзэ вошъяллям сисьмыны кутскем шпалаосты. Толалтэ пу лопаткаосын лымы мычим. Соку букосъёслэсь утись юри мерттэм писпуос ӧжыт вал ай. Чугун сюрес валлин артысь артэ пулъёслэсь юри лымыез возььны лэсьтэм щитъёс пуктылоно луылӥз. Лымы трос люкаське ке, соосты мукет азе выжтӥськомы вал. Туж кезьытэн но кынмоно ӧй вал, котмем мугоре дэрем лякиськылӥз ке но. Дорысьтым, Сундуковоысь, гинэ ӧвӧл, матысь гуртъёсысь но татчы ужаны ветлӥзы. Маин ке но улыны кулэ ук. Тужгес пелляськыку, та уже райисполком но пыриськылӥз. Лымы букосэн нюръяськонэ гурт калыкез но ӝутылӥзы. Гуртамы егитъёс пӧлын вина юон, ӵашетон учыръёс одӥг-ог луыло ке но вал, ужпум жугиськон дорозь ӧз вуылы. Луэ-а сое комсомольской организацилэн ужамезлэн емышеныз ниманы - вераны шуг. Егит нылъёсты но пиосты огазеясь кужым вал кырӟан но эктон. Тазьы шуи ке, пичи но мултэс уз луы. Телевизор но, радио но ӧй вал бере, ӝытъёсы егит калык клубе потаз. Асьмемыз асьмеос шулдыртӥмы. Спектакль яке концерт дасян - милям бадӟымез сюлмаськонмы вал. Пичи гинэ клубмы туж синмаськымон вал. Гурт шорын ик сылӥз. Колхоз кылдэм берегес ик сое атайёсмы но агайёсмы лэсьтӥллям. Жаль, войнаысь тросэз ик ӧз берытске. Витьтонэтӥ арын та сцена вылын Васса Виноградова но Нина Бакишева кырӟазы. Со дырысен тодӥсько но данъяськисько та гажано удмурт нылкышноосын. Милесьтым концертъёсмес но учкыны лачак калык люкаське вал. Мон сямен, котьмалэсь ӟечез со бордын вал - ваньмон дырмес тырттэм ӧм ортчытъялэ. Сьӧрлось гуртъёсы но потамы. Колхозамы Оля Кожевникова вуэм бере, куараосмы эшшо но жингрес луизы кадь. Удмурт, ӟуч, украин но грузин кырӟанъёсты сьӧраз ваем. Соку гинэ техникумез йылпумъям нылаш егитъёс пӧлын валтӥсь луиз. Вань нылъёс но пиос яратӥзы сое, Олялэсь куремзэ яке косэмзэ быдэстытэк кельтыны нокызьы но уг луы вал. Огъя кужымен клуб котырмес утялтӥмы. Палисадникын акация будӥз. Шулдыр вал. Озьы та юрт культуралэн шорсюлмыз луиз. Тол азьын борддоръёсты туйылӥмы. Предмы С. С. Зайцев (городысь лыктэмын вал, сыӵеосты 25-тысячник шуылӥзы) бильярд басьтыны коньдон сётӥз. Баянтэк кыӵе кырӟан луоз, шуо ӟучъёс. баян куараез гуртамы кылылэмзы но ӧй вал. Сое воштӥз арган. Аргантэк одӥг шулдыръяськон но ӧз ортчылы. Быръён нуналъёсы, кылсярысь, клубысь калык лумбыт ӧз кошкылы. Эх, Валентин Бегитов, арганчимы, али но мед луысал на со. Улонысь вазь кошкиз. Кӧня пиосты солдатэ келяз, кӧня нылъёсты бызьытӥз! Уката но шулдыр вал Гырон быдтон дыръя. Куинь нунал кыстӥськылӥз со. Нылъёс но пиос кунулскыса урамъёстӥ вамышъяло, кырӟало. Шоразы - арганчи. Мӧйы калык но татын. Комсомольской собраниос колхоз уженгес герӟамын луо вал. Кутэм решениосты уже пыӵатыны шуг луылӥз. Музъеме манет но понытэк, мылкыдэз ӝутыса гинэ кыдёке уд мыны уго. 70-тӥ аръёсы гинэ ай колхозмы пыд йылаз султӥз. Ӟеч сямъёслы дышетонын комсомол егитъёслы маке но сётӥз ик, дыр. Ог-огедлы юрттон, вордӥськем шаердэ яратон мылкыд пыӵатӥз. Мӧйыослэсь верамъёссэс пелямы поныны тыршылӥм. Война аръёсы куашкам юртъёссэс сундуковоос но пичиен-пичиен выльдыны кутскизы. Корка ӝутон яке гур шуккон вемеос но гуртэз аспӧртэмлыко шулдырто. Ми но мӧйыосын артэ. Йырмы вылӥын. Кин вӧлон пуртэн корка коръёсты вӧлэ, сюсьтыл кадь вольыт но чебер каре, кин валэн уробоен бакчаос мышкысь горд сюй нуллэ. Ачимъя но, ӵош будэм эшъёсыя но верало. Сием потонлэсь но тросгес адямиез вина юон но тэк улон сӧро, йыртэмась каро. Пичиысен ужаны дышем адями кызьы ке но ассэ сюдоз, муртлэн гидаз яке кисыяз уз пыры. Ёрмыса ке но будӥмы, лушкаськон учыръёсты уг тодӥськы - ӧй вал-а соос, вунэтӥ-а. Йыртэмаса ветлыны дырмы ӧй вал. Я уриськыны, я етӥн ишкыны ветлылӥмы. Тэк улон, астэ кытчы карыны ёрмон умойтэм сюрес вылэ потто, шуи ни. Ваньзэ киын быдэсъяно вал бере, ваньмызлы - пересезлы но, пиналэзлы но уж шедьылӥз. Ма вите будӥсь егитъёсты? Соку гинэ школаез йылпумъямъёс сярысь веранэз но ӧвӧл ни, куке ужтэк пуко мӧйыос. Кылэме вань, егит адямиез 14 арескозяз ужаны уг дышето ке, отӥяз сое сиесаны шуг ини. Эшшо но мултэс сюлэмшугъяськытэ егитъёс пӧлын вина юон. Кисыосын тӧл шула бере, ми егит дыръя кудӟытӥськыны немаин вал. Вина пӧзьтэмлэсь азьвыл сиыны но нянь ӧй вал. Картофкалэсь пӧзьтылӥзы ик. Сыӵе вина ляб вал, перегон но кабак вина кадь юэм адямиез шузи ӧз карылы. Азьланьто на комсомольской улон сярысь веранме. Лудысь яке фермаысь бертыса, ӝытъёсы пудо гидъёсты сузяны поталлямы. Бусые кыед поттӥмы. Погрузчикъёс ӧвӧлэн, кыед трактор уробое киын куямы. Колхоз усточиос куинь погылянъёс вылын ветлӥсь трактор уробо лэсьтӥзы. Пу но ворттӥзы соин, кутсаськон дыръя мешокъёсын ю тысь но нуллӥзы. Берлогес ини колхоз грузовой автомашина басьтӥз. Ваньмыз умой вал кадь. Эшъёс котырам, яратон адямие син азям. Пинал мылкыд куректонэз уг тоды. Но тани йыр вадьсам гудыртӥз, оло. Апрель толэзьлэн кутсконаз вал со. Гуртамы райкомын ужасьёс лыктӥллям, ӝыт кошкись поездысь васькиллям соос. Гуртоос веразы: тонэ утчало. Пумиськи соосын. Огез комсомоллэн райкомысьтыз инструктор, мукетыз, мыным тодмотэмез, КПСС-лэн райкомаз ужась. Берло ини тодӥ - Селиверстов. Комсомолын ужасез шуиз: туннэ ик комсомольской собрание ортчытоно. Коркатӥ ветлонэз ӧй вал. Котьку сямен ик, со ӝытэ но егитъёс клубе люкаськизы. Ёросысь лыктэмъёс нырысь ик ивортӥзы огъя югдур сярысь. Собере ини шараязы лыктэм мугзэс но. Колхозамы, пе, чутрак йылэтоно пудо сиён дасянэз но со чотын ваньбур поттонэз, шуизы соос. Та ужез радъяны райком оске, пе, комсомолецъёслы. Мыным, секретарьлы, пе, кылдытоно кукуруза но кушман будэтонъя звеноос. Ӵуказе ик, пе, коркась корка пыраса, курег кыед, пень бичаны кутсконо. Удалтытӥсь сылалъёс сярысь кылылэммы но ӧй вал соку. Ваньбур поттонэз будэтонлы пумит нокин но ӧй вал, но собраниын пукисьёс ӟеч валазы, вераны гинэ капчи шуыса, уго луонлыкъёс ӧй вал. Звеноос кылдытыса гинэ трос пудо сиён уд будэты. Ас малпанме шара верай но звеноосын кивалтыны пумит луи. Эшъёсы та дырозь чал-чал пукизы вал ке, вераме бере клубын огыр-бугыр луиз. Вожпотэмзэ ватытэк, инструктор мон вылэ урдӥськиз. Табере монэ янгыше уськытыны выре, колхозын уд ужаськы, шуэ. Олокытысь-мар дӥсьтонэ потӥз. - Умой визь-кенеш сётӥськоды, нош малы асьтэос колхозын ӧвӧл? Инструктор нырысь-валысь ма вераны ёрмиз, но солы Селиверстов юрттыны дыртӥз. - Милям мумы-бубыосмы колхозникъёс ӧвӧл... Озьыен, мынам мемее но, тятяе но колхозникъёс бере, мон крепостной крестьян сямен, колхоз борды думемын... Бусы ужъёс матэктэмен, чугун сюрес вылын ужась егитъёс колхозэ берытскизы. Соосын ӵош - мон но. Кӧня ке улыса, райкоме ӧтизы. Бюро кема ӧз мыны. Йыбыртъямме возьмало вал. Ӧз пӧрмы. Бюролэн ньылез членъёсыз монэ комсомолысь куштон понна луизы. Куинез дурбасьтӥз. "Таӵе кылзӥськисьтэм но ваменэс пияш партилы оскымон кивоштӥсь уз буды,- шуиз кабинетлэн кузёез.- Пон билеттэ ӝӧк вылэ". Пукон вылысь султӥ но номыр шуытэк кошки. Билетме ӧй сёты. Кема куректӥ. Секыт уйвӧт кадь потӥз со учыр. Уго комсомолысь самой сьӧраз потэмъёсты гинэ поттылӥзы. Выльысь но выльысь ас поннам сэрттӥ-пертчи: шонер-а лэсьтӥ, мултэс ӧй ачимъяськы-а, ӧй вогъяськы-а? Возьыт вал гурт калык азьын. Сӥзьыл вуиз армие мынон дыр. Шеди сержант дасян школае. Гимнастеркаелэн бур кисыяз - служебной книжкае. Палляназ - комсомольской билетэ. Дырыз дыръя взнос тырисько, собраниосы ветлӥсько. Гурт сярысь малпаськыны дыры ӧвӧл. Служба секытэн сётӥське. Соин, дыр, куректонэ но вунӥз. Малпай, пилемъёс кошкизы, умойтэм югдурысь чылкытэн потӥ шуыса. Дисциплина туж чурыт ке но вал, командиръёс юнме шорысь ӧз кесяське. Тон удмурт, тон гуртысь лыктэмын шуыса ӧз обиде. Армиын капчи ӧвӧл, но службаысь бертыса валаськод: егит воргоронлы макем кулэ луись школа со! Взводэн но ротаен кивалтӥзы ож пыртӥ потэм офицеръёс. Атай кадь потылӥзы соос. Ми, гуртысь лыктэмъёс, приказъёсты кыл вератэк быдэсъямы. Городын будэм пиос дӥсьтӥсесьгес вал, сержантъёслы но пумит кылзэс вераллязы. Соин сэрен куд-огез гауптвахтае но шедьылӥзы. Городысьёслы капчиенгес сётскылӥзы брус но перекладина вылын быдэсъян упражнениос но мукет снарядъёс. Тыбырын автомат, сиес кадь бинем шинель, кӧт урдсын корт лопатка, противогаз. Озьы бызьылон но капчиенгес сётӥськиз. Аслэсьтым таза мугорооссэ курсантъёсты но кельтылӥ. Чидамон вал бышкись ез ултӥ нюжтӥськыса мынон но. Армия пыӵатӥз таза но чырткем, дӥсьтӥсьгес сямо луон, шуг-секытъёсты вормон, ог- огедлы юрттон. Пӧртэм выжыысь потэмъёс куспын ог-огдэ валан но гажан мылкыд. Ваньмыз со улонын яраз. Ӧй вала огзэ гинэ - малы сокем кулэ вал строевой подготовка. Парадэ кадь дасязы. 11 толэзь ӵоже нуналлы быдэ 2-4 час строен ветлытӥзы. Командир куарамы мед юнмалоз шуыса, нюлэскын пӧртэм командаос сётъяса кесяськимы. Часте вуыса, йыр вадьсам эшшо огпол гудыртӥз на. Комсомоллэн райкомаз выговор сётӥллям шуыса, татчыозь тодытэк улӥ. Собраниын ӵыжектыса пуки. Уката но возьыт луиз подчинённойёсы азьын. Мыным шуг вал валэктыны, кызьы но малы "куашкатӥ" колхозысь комсомол организацилэсь ужзэ. Эшъёсы монэ валазы. Выговорме куштӥзы. Комсомол азьын кыл кутоно луи на, институтын дышетскыкум. Группалэн старостаез вал. Огпол треугольникмес (комсорг, профорг но староста) факультетлэн комсомол комитетаз кылзыны ӧтизы. "Ну,- малпасько,- шедёз". Кыӵе ке пусйымон ужъёс ум быдэсъяське кадь, вань ляб дышетскисьёс но, лекциосты келлясь студентъёс но. Кыл сётӥзы комсоргмылы. Ӟуч ныл, туж етӥз вал со. Сыӵе суредаз быдэстэм но азьланезлы пусъем ужъёсмес, комитетлэн членъёсыз ымзэс усьтыса ик кылзӥськизы но шуизы: "Молодец, Галя, озьы ик тырше азьланяз но". Мон луысал ке со интыын, оло нош ик выговорен кошкысал. Соку малпан кылдӥз: ӟеч ужам сяна, кыллы но усто луоно вылэм та дуннеын, астэ но возьматыны мед быгатод. Мӧйымысагес валай: калыкын макем уг ярато вылэм пыдтыш нюлӥсьёсты, но тросэзлы кивалтӥсьёслы сыӵеос яраллязы кадь. Соосты котыразы карылӥзы. Нюлӥськисьёс чагиськылӥзы, кивалтӥсь сярысь мултэс вераськисьёсты шараяллязы. Озьы кабинетын шуныт интыоссэс утьылӥзы. Сыӵе кивалтӥсьёсын сэрен улонмы бератаз "пурысьтаны" кутскиз. Социализмез янгыш каро. Мон сыӵе дунъетэн соглаш ӧвӧл. Кыӵе обществоын улӥськомы али - уг тодӥськы. Тодӥсько, Совето власть ӧвӧл ни, нош кивалтӥсьёс асьсэлы юрттӥсь вуж сямен быръё, кызьы шуо, по личной преданности. Социализм дыръя дисциплинаез тӥясьёслы кыл кутоно луэ вал. Государстволэсь (шонерзэ вераса, КПСС-лэн ЦК-езлэсь) заданиоссэ быдэсъясьтэм кивалтӥсез партиысь гинэ ӧвӧл, ужысь но куштылӥзы. Огласянь умой кадь со - кыл кутон, но кызьы но кыӵе дунэн ведь со заданиез быдэстод? "Малопургинский" совхозын главной агрономын ужакум луэм учырез тодам ваисько. "Скотопром" огазеяськонэ пырись хозяйствоослэсь кивалтӥсьёссэс КПСС-лэн обкомаз ӧтизы - республика, пе, сӥль вузанэн бере кыле. Обкомын косӥзы 350 килограммъем но солэсь таза ошпиосты сӥльлы келяны. Сыӵе телефонограмма совхозэ ӵуказеяз ик вуиз. Бӧрысьгес косӥзы, пе, 300 килограммъемъёссэ но вузаны. Ми кылзӥськимы но гидъёсмес бушатӥмы. Озьы совхоз бадӟым изъян адӟиз. Пудо куайытонын ужасьёс уждунтэк кылизы. Нош "Глазовский" совхозлэн директорез косонэз быдэстыны пумит луиз. Сое ужысь куштӥзы. Со вал 1975 яке 1976 арын. Озьы обкомлэн кивалтӥсез Москва азьын ӟече потӥз, нош шонерак вераса, преступление лэсьтӥз. Армиын сямен ик, юн дисциплина котькытын кулэ. Сотэк ваньбур поттон но, мукет удыс но биньгозытэк кыткем уробо кадь. Но райкомын ужасьёс дисциплинаез ӵем сураллязы кивалтӥсьлэсь верамзэ-косэмзэ быдэстонэн гинэ. Кызьы умоен лыдъялод таӵе ужан амалэз, куке тонэ, гурт хозяйствоя специалистэз, районысь лыктэм апайёс но агайёс ужаны дышето. Соослы пумит верась агроном яке инженер бюрое шеде вал. Райкомысь эшъёслы калыкенгес ужано вал, дыр. Валэктоно вал, кылсярысь, международной положениез. Та выллем уж секытгес потӥз, дыр. Капчигес вал, шӧдске, косъяськыны, валэкъяськыны. Кызь арлэсь кемагес вал мон партиын. Дырыз дыръя взносъёс тырылӥ, райкомлэсь но парторганизацилэсь заданиоссэ быдэсъяй. Уг жаляськы, возьыт но уг поты вераны: сюлмыным мон али но зэмос коммунистъёсын артэ. Соос пӧлын йыр вылӥын вал. Зэмос коммунистъёс собраниосын но, газет пыр но асьсэзыс умойтэм возись кивалтӥсьёсты кышкатэк шараяллязы. Жаляса верано, дурбасьтэм интые, райком соосты ик янгыше уськытылӥз. Таӵе учырен пумиськи УАССР-лы 10 ар нимо совхозын. Совхозысь цеховой парторганизацилэн секретарез газетамы гожтӥз, соку гинэ лыктэм директор профкомен но парткомен кенешытэк ужа шуыса. Диспетчере пуктэм кивалтон ужез тодӥсьтэм муртэ но та служба, валамон ни, "чутыны" кутскем. Гожтэт потэм бере директор мынэ райкоме, райком совхозысь парткомлэн секретарез вылэ омырске. Соиз люка комитетсэ но цехысь парторганизацилэн секретарезлы предупреждение ялэ. Районной газет таин соглаш кариськытэк вазиське райкоме. Райкомен кивалтӥсьёс кылэм но уг каро. Собере ини вазиським обкоме. Отын но нюлӥськись шедиз. Олокызьы но газетэз но статьялэсь авторзэ янгыше уськытыны выриз. Та пумысен ужпум райкомлэн бюрояз кылзэмын вал. Зэмлык, туж шуген ке но, соку вормиз. Али партиез серем каро. Кинъёс? Огшоры ужась калык-а? Ӧвӧл. Соос ик, кинъёс партиен кивалтӥзы но солэсь данзэ саптазы. Зэмос коммунист зэмлык но эрик понна нюръяськиз но нюръяське. Калык понна сюлмаське. Тазьы валасько мон. Зэмос коммунистъёс трос. Соос пӧлын - П. Я. Яковлев, пор пи, ожысь но ужысь ветеран, Вуж Монья школалэн азьвыл директорез, предын но ужамын; М. И. Захаров, ожысь сӧсырмыса бертӥз, "1-тӥ Май" куашкам колхозэз пыд йылаз султытӥз; механизатор С. И. Безбородов; Пичи Пурга школалэн азьвыл директорез фронтовик Н. И. Корюков но трос мукетъёсыз. Ваньзэ вераса уд быдты. Мынам валамея, зэмос коммунист - мурт чотын улӥсьёслэн тушмонзы луэ. Дасо аръёс ӵоже пӧртэм улонэз адӟи, пӧртэм кивалтӥсьёсын но огшоры адямиосын пумиськылӥ. Улонэз сэрттыса-пертчыса, огзэ мукетыныз ӵошатыса валано котьмае. Районэн кивалтӥсьёс но котькыӵеез вал. Оглом сьӧдманы уг яра. Совхозын ужакум, партие кужмысь пыртӥзы. Институтэз йылпумъям берамгес ик вал со. Райкомлэн секретарез В. М. Чекотов азям чылкыт бумага, ручка понӥз но шуиз: "Гожты заявление. Партие ӧд пыры ке, малпаломы, осконо-а, ӧвӧл-а тыныд". Коммунист луыны пумит ӧй вал. Пумит вал отчы кышкатыса пыртонлы. Асме егитэнгес но вуымтэен лыдъяй, лэся, соин ӧй дырты. Чекотовен ӧй кереты. Кылзӥськи. Комсомолын луэм учырез тодам ваи. (Нялтас верано ке, Конституциысь 6-тӥ статьязэ куштэм бере, Чекотов "демократъёс" пала выжиз.) Райком косэмъя, егит дыръям мытэм уженым люкиськоно луи. Газетлэн гурт хозяйствоя отделаз кивалтӥсе юнматӥзы. Журналист но, филолог но ӧвӧл бере, дӥсьтытэкгес мынӥ. Статьяос ӟуч кылын гожъяно, нош мон, ӟуч кылэз ӟеч тодымтэен, сочинениосты куиньлэсь трослы ӧй гожъялля. Серекъялод но, бӧрдод но. Ми, удмуртъёс, курадӟыса ӟуч сямен гожъяськомы, милемыз нош ик курадӟыса удмурт кылэ берыкто. Газетын ужаны капчи ӧвӧл. Гожтӥськод озьы, кызьы малпаськод но валаськод ужпумез. Но ӵемысь кузёос тонэн соглаш уг луо. Ваменъяськон, кивалтӥсьлы пужит луон - тӧллы пумит сялӟон кадь. Кузёосъя ке лэсьтӥськод, тон ӟеч, но мар шуоз тонэ лыдӟись? Озьы но газетын ужам аръёс праздник кадь кылизы. Кинэн но пумиськыны ӧз кылды, кызь ар пала ужатозям! Тросэз соос туж визьмоесь, котьмае - уродзэ но, ӟечсэ но - адӟем адямиос. Куд-огез ортчем сюресъёсыз сярысь бӧрдыса но вера. Со викышъя, мынам но синкылиос пото. Районной газетлэн почтаез туж ик узыр ӧвӧл. Соин ик ӵем потано луиз командировкаосы. Хозяйствоосы вуылыса, умоесь азинсконъёсты адӟыса, статьяосысьтым вуоно геройёсты адӟыса, мылкыд ӝутске. Кӧлонэз тодытэк но куддыр уйшорозь пукиськод статья бордын. Озьы гинэ уг пӧрмы ай. Кызьы кутскыны но тодоно ӧвӧл, кулэ кылъёс ӝогак гинэ уг шедё, но дыртоно - бусы ужъёс сярысь иворъёсты нырысь полосае ӵукна ик сётоно. Син азям йылӥз сӥль, йӧл, нянь будэтон. Тросэз хозяйствоос скаллы быдэ араз 3000 килограммлэсь уно йӧл кыскыны кутскизы. 50-тӥ - 60-тӥ аръёсын ӵошатыса, со кык- куинь пол трос. Совето властьлы 50 ар тырмон арын "Малопургинский" совхоз котькуд гектарысь 13,5 центнер ю тысь люказ. Кыӵе ушъяськимы вал та вормонэн! Бӧрысьгес районысь музъем ужасьёсты 30-40 центнер но ӧз паймыты ни. Музъеме ма но со пононо ке, со бадӟым ваньбурен берытске вылэм. Котькыӵе тодон-валанэд мед луоз, кыедтэк, минеральной сылалъёстэк, азьмынӥсь технологиез уже кутытэк, азинскон уд басьты. Газетын ужакум вунонтэм кылизы С. С. Коньковен, В. Е. Бочкаревен, М. К. Кирилловен пумиськонъёс. Паймымон соослэн улонэз яратэмзы, котькыӵе шуг-секытысь вормисен потыны быгатэмзы. Ваньзы соос - ожгарчиос, ӧлексы кыльыса но улонын асьсэзыс ыштӥллямтэ, чарка пыдлсы усиллямтэ. Виктор Егорович кыксэ ик пыдзэ, Киевез мозмытыку, Днепрлэн ярдураз кельтэм. Дораз протезэн бертыса, кема гинэ валэн ужам ай, Тургуртысь Кечолэ вӧй шуккон заводэ йӧл нуллэм, бертыкуз почта вае вылэм. Сирота кылем кык вынзэ пыд йылазы султытэм, вить нылпи будэтэм. Сӧсырмыса но улонлэсь чеберзэ вала. Вина уг юы, тамак уг кыскы, быдэс бакча пӧртэм сяськаос будэтэ. Степан Степанович шальы кук вылын колхозаз кладовщикын ужаз. Война берегес ик пал кылем нылкышнолы бугро ӵупем. Кин ке чагиськыса, группаысь поттӥллям но пенситэк кельтӥллям. Сыӵеез но луэ улонын. Михаил Кириллович инмарлы оскись адями вал, кулӥз ни. Кышнозэ ог 15 ар пала азьлогес ватӥз. Кышнояськымтэ пиеныз ӵошен гинэ улӥзы, скал но муш вордӥзы. Пал пыд ке но, улонэзлы ӧз ӝожтӥськылы, аслыз ачиз оскыса улӥз. Ялан ужаз, ялан тыршиз. Ымаз тамак но вина улытозяз ӧз тыры. Трос вал азьвыл улонамы умоез но, уродэз но. Оглом ваньзэ курланы уг яра. Пурысьтам пересьёсты Горбачев Кремльысь улляз. Малпамы вал, "выль ӵужон" вань уродзэ, тырмымтэосты палэнтоз, вань умоезлы паськыт сюрес сётоз. Малпаммыя ӧз луы. Уродэз кылиз, умойзэ ыштӥм. Мур-мур малпаськытэк учкиськод ке, выль властьёс эрик сётӥзы кадь. Вина ю, ку но кӧня мылыд потэ. Тонэ райкоме уз кыскалэ. Ужамед ке уг поты, эн ужа. Тунеядец уз шуэ. Вузкар, маин мылыд потэ. Спекулянт шуыса, кыл кутоно уз луы. Но туала кивалтӥсьлы пужит вераны эн дӥсьты, ужтэк кылёд. Профсоюз уз юртты. Судэ мыныны уксё кулэ. Шедьтод-а отын дурбасьтӥсь - шуг вераны. Колхозъёс но совхозъёс нянь будэтӥзы, нош кузёяськизы соин обком но райком. Ачиз музъем ужась пудозэ пыжем нянен сюдӥз. Ярам коть, дунтэм вал со. Кураськись сямен городэ котомкаен ветлӥз. Кин янгыш отын? Интыысь кивалтӥсьёс. Малы ке но Эстониын но, Армениын но магазинъёсын мылыд потэмъя басьтыны луэ вал комбикорм но, ю тысь но. Зэмлык ӧй вал. Али эшшо но ӧвӧл. Ма, кызьы озьы луоз? Колхоз литр йӧлзэ молокозаводэ 90 копейкаен ворттэ. Вӧйыз отын 3,6 процент. Молокозавод сое сепаратор пыр поттэ, йӧлвылзэ басьтэ, пастеризовать каре но литрзэ калыклы кык манетэн вуза. Озьы, молокозаводын ужасьёс вӧйын пыласько, нош скал кыскисьёс - кыед ву пӧлын уяло. Мукет сиён-юонзэс вузаса но крестьянъёс изъян гинэ адӟо. Я, ваньзэ вераса уд быдты. Эх, улон, улон! К. КУЗНЕЦОВ, ужысь ветеран. Пичи Пурга ёрос. Кык кечез кутыны амал Самараын ортчиз Россия Федерациысь чугун сюресъёслэн кивалтӥсьёссылэн 9-тӥез ассамблеязы, ивортэ "Волжская коммуна" газет. Чугун сюрес вылын ужасьёсты ӟечкылаз Самара областьлэн губернаторез Константин Титов. Со пусйиз, рынок тыршытэк, утчаськытэк уз азинскы шуыса. Вузъёсты ваёнэз, адямиосты нуллонэз нокыӵе кризисэн уд дугдыты. Титов валэктӥз, вытъёслэсь быдӟалазэс воштоно, нош музъем понна выт тыронлэсь чылкак куштӥськоно шуыса. Озьы кык кечез кутыны луэ: сюресъёсты возёнэ тросгес коньдон вуоз но билет дунъёс кулэсмозы. Иворъёсъя национальной служба. Можгаос уг сётско Можгаысь нюлэс комбинат усто вузъёс поттэмез понна кылем арын пусъемын вал "Эртсмейкер" калык куспо наградаен. Басьяськисьёс ӟеч тодо уго кухнялы мебелез, пуконъёсты, тубареткаосты, шкафъёсты, мукет арбериосты. Татын озьы ик калыклэн куремезъя но трос пумо вузъёс дасяло. Республикаысьтымы мебель поттӥсь предприятиос пӧлысь можгаослы гинэ оскизы дышетскисьёслы парта но пуконъёс лэсьтыны. Со понна нюръяськоно луиз нимысьтыз конкурсын. Берло дыре басьяськись ДСП-лэсь (пул пызьлэсь плита) арбериосты сокем кулэ уг кары ни. Соин ик комбинат пулъёслэсь мебель поттыны ӧдъяз. Нош матысь дыре магазинъёсы вуоз кухнялы выль гарнитур. Со луоз 21 арберилэсь. Н. ЕФРЕМОВ. Нуналлэн тодметэз 7 октябре - Пеклалэн нуналэз. Уйёс пеймытэсь, нунал вал ворттэм кадь ӝог синэ. Югыт нунал 11 час 3 минут кыстӥськоз. Та нуналэ... ар талэсь азьло 7 октябре 1958 арын Яр ёросысь Ворца гуртын вордскиз кылбурчи М. И. Федотов. Шаркан палъёс, эркын тӧлъёс Уг вунэтӥськы кылем сӥзьыл Шаркан ёросысь Выль Пашур, Мувыр гуртъёсы вуылэмме. Со сярысь нош ик тодэ вайыто ӵужо-вожо-гордо писпуосыз туркаса калгись эркын тӧлъёс... Аслам но пӧртэм ӧвӧл мылкыды. Калыке, кыре-буре потӥсько ке, соиныз, таиныз пумиськыса, нош маке выльзэ шедьтӥсько, вуоно книгаям ("По местам боевой славы") "чечы шапык" ватсасько. ...Сосновкаысь тодмоеным, школалэн дано дышетӥсеныз Захар Степанович Шамаевен люкиськи гинэ - пыдъёсы монэ вуттӥзы Выль Пашур гуртэ, кытын вордскизы но будӥзы книгаысьтым геройёсы Михаил Колупаев но Григорий Шитов. 21 ар талэсь азьло мон вуылӥ Карелие. Повенец город дорын шайгуэ ватэмын та кышкасьтэм воинъёс, соослы мон йыбырттӥ. Ожмаськизы соос ньыль ордено 313-тӥ дивизиын... Нош дышетскизы та пиос Мувырын. Али отын шор ёзо школа ини. Пумиським завучен В. В. Двоеглазовен. 31 арзэ со историлы дышетэ ни. Выпускникъёссы сярысь данъяськыса вераны быгатэ. Трос альбомъёс дасяллям соосъя. Тужгес мыным кельшизы Брест крепостез утисьёслы но Быдӟым Вормонлэн 50 ар тырмонэзлы сӥземъёсыз. Туспуктэмъя, гожтэмъя син азе пуксе Грециын Сопротивление пыриськем Геннадий Николаев но (та адямилы ик сӥземын Г. Ладыгинлэн "Предисловие к счастью" книгаез). Эшшо огез дано выпускниксы - Николай Волков. 1942 арын, Ленинградэз утьыку, со секыт сӧсырмыны шедиз, но ӧз сётӥськы - Сосновка школаын историлы дышетӥз, граждан обороная штабын ужаз. Валентин Васильевич Двоеглазов "Буре ваён книгалэсь" витетӥ томзэ дасянэ пыриськиз. Мувырын ож лудэ кылемъёслы памятник пуктӥз. Историк вань мылкыдыныз бурмемын Родинамсе утисьёсын. Эркын шока татын лул, чебереныз кыске музъем. Со понна ик ожгар бусыосын быризы пиосмы. Кызьы соосты вунэтод? ВИКТОР ПОЗДЕЕВ, дышетӥсь. Шудонъёсын музей Тямыстон ар талэсь азьвыл Москваын усьтэмын вал шудонъёсты возён государственной музей. Нош 1931 арын со выжтэмын вал Сергеев Посад городэ. Отчы уго интыяськемын Россиын шудонъёсты лэсьтонъя одӥгез бадӟымез центр. Музее люкамын быдэс дуннеысь шудонъёс. Соос али отын 50 сюрслэсь уно лыдъясько. Пӧлазы вань асьме шаерын поттэмъёсыз но. В. РОГАЛЕВ. Ӵыжы-выжыосмылэн нуналзы Венгрилэн, Финляндилэн но Эстонилэн кичӧлтэмезъя, 1918 арысен пусйиське финно-угор калыкъёслэн нуналзы. Нош удмурт культурая "Дэмен" огазеяськон та праздникез пусйыны кутскиз сизьым ар талэсь азьло. Та нуналэ республикаямы пӧртэм ужрадъёс ортчыло. Туэ финно-угор калыкъёслэсь нуналзэс пусйыны чакламын 17-тӥ октябре. В. РОГАЛЕВ. Калык кусыпъёс Шаерамы ужало, семья уг кылдыто Сьӧрлось калыкъёсын кусыпъёсъя министерство Удмуртиын огез егитэз лыдъяське. Кивалтэ но соин егит министр Виктор Аркадьевич ВИКУЛОВ. Мар лэсьтэмын та удысъя туэ ар ӵоже? Та пумысен юанъёсын министрлы вазиське газетмылэн корреспондентэз Т. Банникова. - Кун учреждениос, ведомствоос но министерствоос возисько ужась калыклэн налогъёсыз чотын. Дуно-а усе тӥляд удысты? - Ужасьёсмы трос ӧвӧл. Но сизьым ар ӵоже таяз арын кадь сокем секыт ӧм на улэ. Коньдонэн ке верано, республикамылэн бюджетысьтыз министерствомылы 1998 арлы висъяны чакламын 199 сюрс манет. Со туж ӧжыт. Тани Удмуртия сярысь диск поттӥм. Отын шаермы котыр ласянь туж умой возьматэмын. Палэнысь лыктэм куноос со видеофильмез учко но шаермылэн узырлыкезлы, калыкмылы паймо. Но со дискез бадӟым тиражен поттыны ум быгатӥське - коньдон ӧвӧл. Огез ӟеч ужасьмы, мукет кылысь берыкъясь, огдыре ик министрлэн воштӥсез, заводэ ужаны кошкиз. Отын солы вылӥгес уждун ӵектӥллям... - Переводчик сярысь ке верано, соос тырмо-а? - Уг. Усто переводчикъёсты дасян понна дасо ар пала кулэ. Ӟеч специалист луон понна соослы одно ик кунгож сьӧрын дышетсконо: республикамы понна со туж дуно усёз. Асьме вузъёсын дышетскись студентъёс сыӵе ужез нуыны уг быгато, угось соосты кунсьӧр кылын вераськыны туж ляб дышето. Министерствомылы специалистъёсты дасян вылысь, али матысь кусыпъёс тупатӥм Удмурт кун университетэн. Куд-ог посольствоосын вераськыса, та университетэ но республикаысьтымы Национальной библиотекае кунгож сьӧрысь книгаос вуттэмын луозы. Кылсярысь, Францилэн Россиысь посольствоез асьмелы кузьманы мылкыд кариз 500 том книга. - Кыӵе государствоосын туннэ кусыпъёсты азинско-юнмало? - Западысь но Америкаысь государствоосын кусыпъёс тупатыны капчи ӧвӧл. Отысь адямиослэн нырысь ик тодэмзы потэ, кызьы азинскоз Россия азьланьын. Угось туннэ нуналэн гинэ соос уг уло. Ӵош ужанъя кусыпъёс тупатон вылысь, министерство шаерамы ӧтьылӥз Суданысь, Сириысь, Грециысь, Канадаысь делегациосты. Туэ гужем асьме доры вуылӥзы Германиысь ужбергатӥсьёс. Чехия, Словакия республикаосысь но Австриысь вузкарись фирмаосын ӵош ортчытэмын жуг-жагез но промышленностьлэсь кылем-мылемъёссэ сутон ужпумъя бадӟым кенешон. "Буммаш" предприятиын жуг-жагез быдтонъя пичи завод усьтыны чакламын. Вузкаронын, экономикаын кусыпъёс возёнъя огкыл тупатэмын Беларусь Республикаен. Арлэн пумозяз сыӵе ик огкыл тупатыны чакламын Словакия Республикаен. - Озьыен, магазинъёсын азьланяз но палэнысь ваем вузъёс тырмыт луозы? - Вузъёс луозы - но ӧжытгес. Россиын кылдэм югдур троссэ кышкатэ. Сьӧрлось вузъёс, кылем арын сярысь, туэ Удмуртие ӧжытгес вуо. Троссэ вузъёсты асьме доры Москва но мукет улосвылъёс пыр ваёно луэ. Вуз ваисьёслы со понна пӧртэм кагазъёс гожтоно но коньдон тыроно. Специалистъёслэн лыдъямзыя, туэ республикаямы палэнысь со мында вузъёс ваемын луозы, кӧня ваемын вал 1995 арын. Озьыен, кунгож сьӧрысь вузъёсын вузкарон республикамылы 500 миллион доллар гинэ пайда ваёз. Оглом вераса, мукет странаосын вузкарон 15 процентлы синӥз. Туэ тямыс толэзь ӵоже палэнысь 11 фирма гинэ коньдонзэ асьме экономикае поныны дӥсьтӥз. Кылем арын 15 фирма вал. - Ижевскын берло дыре ӵем ортчыло калык куспо адӟытонъёс, конференциос. Соосты радъянэ министерство кызьы ке пыриське-а? - Зэмзэ но, азьло аръёсы предприятиос поттэм ваньбурзэс возьматон понна, коньдонзы ӧвӧлэн, бадӟым адӟытонъёсы ӧз но пыриськылэ. Табере министерствомылэн кичӧлтэмезъя, та ужез нуыны нимысьтыз кенеш кылдытэмын, предприятиослы коньдонэн юрттэт висъяське. Шаермылэн столицаяз ӵем гинэ вуыло кунгож сьӧрысь быдэс дуннелы тодмо учёнойёс, посольствоосысь адямиос. Соосын герӟаськем ужъёсты министерство ас вылаз басьтэ. Ижевскысь медициная академиен ӵош министерствоын ужасьёс пыриськизы ИИ международной конгресслэн ужаз. Франциысь посольствоен но француз кылъя центрен ӵош республикаямы ортчиз "Францилэн егит киноез" фестиваль. Студентъёсмес Венгриысь вузъёсын дышетон понна, кык муртлы дунтэк квота сётэмын. 1999 арын феврале Ижевскын ортчозы Европалэн кубокез понна биатлонъя ӵошатсконъёс. Министерство али та ужрадлы дасяськонэн выре. Ас ужмес паськытгес возьматон понна малпаськом телевидение пыр передачаос радъяны. - Асьме вузъёсын дышетско ни мукет государствоосысь студентъёс но, кунгож сьӧрысь вуэм специалистъёс куд-ог удысъёсын но ужало. Нош асьме дорын семья кылдытӥсьёс вань-а? - Туж ӧжыт. Бен, Китайысь, Сириысь, Пакистанысь студентъёс асьме вузъёсын данак гинэ дышетско. Нош дышетсконзэс йылпумъяса, доразы берто. Кузпалъяськисьёс туж шер луыло. Канадаысь одӥг воргорон кышнояськиз ик, Удмуртие кылиз. Но сыӵе вамыш лэсьтыны тросэз уг дӥсьто, Россиын улон секыт. - Тау вераськеммы понна. Жингырты, удмурт кырӟан! Журналмылэн котькуд выль номерез потэм сярысь лыдӟисьёсмы азьло аръёсы "Удмурт дунне" газет пыр тодыло вал. Со амалэз туннэ выльысь тодады вайытоно кариськимы тани маин валче. "Кенеш" журналлы редакция пыр гожтӥськемъёс дорамы берло дыре малы ке кык-куинь толэзьёслы ӝегаса вуыло. Сюлмаськыны кутским: кыӵе ке мугъёсын сэрен печатланы ум быгатӥскье шуыса уг малпало меда? Туж секытэн ке но, татчыозь дыраз поттыны кылдӥз ай. Тани коньывуон толэзьлэн нырысетӥ арняяз выль номермес печатлазы ни. Со огазеяз туэ коньывуон но шуркынмон толэзьёсы потоно кык номеръёсмес. Та одӥгез веранмы. Мукетыз но герӟаськемын выль номеренымы. Туэлы гожтӥськемъёс понна нимысьтыз кузьым дасяммы сярысь ивортылӥмы вал ини. Дасэтӥ номермы со ик вань туала лыдӟисьёсмылы чаклам кузьыммы. Та аспӧртэмлыко бичетлэн "липет улаз" пыризы элькунысьтымы данак тодмо крезьгурасьёслэн 150-лэсь уно кырӟанъёссы. Соосызлэсь но таосызлэсь лыдӟисьёсмылэсь мылкыд каронъёссэс лыдэ басьтыса, ӝыныезлэсь троссэ кырӟанъёсты нотаосын, кылемъёссэ кылъёсын сётӥм. Гожтӥськмъёс кие со вуыны кулэ ни. "Жингырты, удмурт кырӟан" сузьетысь та ньылетӥез книга луиз. Номер кылдэмен валче гожтэтъёс но телефон пыр юалляськисьёс вань, кытысь но кызьы сое шедьтыны луысал шуыса. Тиражзэ кӧнялы ке будэтыса поттӥмы бере басьтыны быгатӥськоды. Но нырысь ик ми сое дун тырытэк сётыны чакламы 1999 ар понна гожтӥськемъёслы. Кӧняез ке вузаны но кылёз на, дыр. Дуныз - 10 манет. Соин ик, гажано эшъёс, мылкыдъёстэс вераса редакцие вазиське. Телефонъёсмы таӵеесь: 21-57-73 яке 24-44-85. Эшшо огпол тодады уськытэммы потэ вуоно арлы гожтӥськон сярысь. Солэн арлы дуныз: 38 манет - почта пыр, 24 - редакциысь басьян вылысь. Индексэз ӧз воштӥськы - 73251. Пособиез вузъёсын басьто Селта ёросын 1998 арлэн нырысетӥ паларез понна нылпи пособиосты вузъёсын тыро. Зэм, та ужрад туж каллен ортче. Нылпи пособиез нырысь ик басьтӥсь (нырысетӥ категориысь) анай-атайёс пӧлысь 20 процентэзлы гинэ вузъёс тырмизы ай. Соос басьтӥзы "Сактон" но "Ижмото" предприятиослэсь продукцизэс. Селта ёросысь предприятиос но палэнэ ӧз кыле: соос пу, пиломатериалъёс сёто выт тыронъя пунэмъёссэс берыктон чотын. Е. ДОРОФЕЕВА. Шутэтскыны - толалтэ Селта ёросысь трос нылпиё, коньдонлы шугъяськись семьяосысь пиналъёс, ӵем висьылӥсь нылъёс но пиос котькуд гужем "Юськи" санаторийын шутэтско. Соосты татын ӟеч сюдо, тазалыксэс юнматыны сюлмасько. Путёвкалэн дуныз пичи ӧвӧл, но анай-атайёс со понна, одӥг манет но уг тыро. Пиналъёсты "Юськие" нуыны но отысь вайыны автобус сётэ Селтаысь Сюресъёсты лэсьтонъя но тапатонъя участок. Анай-атайёс бензин дунэз гинэ тыроно луо на. Санаторие путёвкаос, автобусъёс шедьтон сярысь сюлмаське ёросысь администрацилэн семья ужпумъёсъя отделэныз кивалтӥсь Елена Петровна Телицина. Али Елена Петровна луонлыкъёс утча, нылпиосты толалтэ "Юськие" шутэтскыны келян понна. Е. ДОРОФЕЕВА. Паспорт интые "кагаз" Россиысь паспортлэн дуныз шӧдскымон дунояз, ивортэ "Сегодня" газет. Паспортэз дасям понна али 42 манет тыроно. Азьвыл паспортэз дасям понна пичи уждунлэсь 3 процентсэ гинэ басьто вал, нош али та лыдпус 50 процентозь будӥз. Москваын арлы быдэ 150 сюрс нылпиослы 14 арес тырме, соос паспорт басьтоно луо. Но паспортлы бланкъёс уг тырмо. Соин ик тросэз пинал гражданъёс огдырлы сётэм документъёсъя уло. Иворъёсъя национальной служба. Пытсэт сьӧрын одӥг но ческыт уг сиё-юо Россиын секыт югдур кылдэмен Пермь областьысь пытсэт сьӧрын пукисьёслэн но улонзы уродмиз. Соос пӧлысь одӥг муртэ, нунал ӵоже сюдон 6,5 манетлы усе. Озьы ке но со 50 копейкалы тросгес ай, психикаез эмъянъя больницаысь висисьёслэсь сиськемзэс чаклано ке. Кыл кутытонъя управление кылем арын коньдон коньдонлэсь 70 процентсэ басьтӥз, нош туэ понна - 35 процентсэ гинэ. Пытсэт сьӧрын пукисьёс 10 нунал ӵоже уг басьто ни сакыр песок, шугъясько чайлы но кысконлы, быро эмъюмъёссы. Изоляторъёс тырмемын. Отын адямилы пытсэт сьӧрын пукыны нормая 4 квадратной метр кулэ ке, нош али та лыдпус, 2 квадратной метрозь усемын. Иворъёсъя национальной служба. Кыло уӵы Дано адямиос соос - Алнаш ёросысь кузьымгуртъёс. Выль улонлы шумпотэмзэс вормытэк, удмуртъёслэн шудзы понна нюръяськыса быризы дышетӥсьёс но музъем ужасьёс агай-вынъёс Михаил, Трофим но Василий Разинъёс, соослэсь мытэм удыссэс сӥё-дано азьланьто ӵыжы- выжыоссы визьлюкъёс агай-вынъёс Альберт но Рево Разинъёс, сузэрзы дышетӥсь Люция Иванова, Москваын аспалъёсызлэсь мӧзмыса улэ авиаконструктор Михаил Калаев, гурт школаын пиналъёсты визьнода удмурт кыллы но литературалы дышетӥсь Нина Оськина (Михайлова), улонысь дырызлэсь вазь кошкизы журналистъёс Николай Бигбашев, Елена Тимошкина... Могдос адями со, Байя Миша - крезьгурчи Михаил Оськин. Та удыслы нокытын юри дышетскытэк, удмурт калыкез понна воргорон кылдытъя паймымон чебер кырӟанъёс. "Витьёс" гинэ октӥсь пиёк "Артеке" ӧз мыны. Анай-атаез корка пуктыны чӧлтӥськемен, апайзэ юрттыны ӧтизы - Миши со интые кунян возьманы кылиз. Пиньзэ тӥяса пырем шудзэ кабыны пӧрмытытэк укыр ӝожомиз эке. Зэм, эшъёсыз куатапуйы шуыса ӧз исалэ. Мукетъёсаз сямен ик Кузьымгуртэ но ӵем вуылӥзы кырӟасьёс. Ӝытазеяз пиёк клубысь бертэ но нырулаз нукыртэ ни кыӵе ке гурез. Ӵуказеяз но шуласа ветлэ на. Анаезлы ӧз яралля тазьы могдосъяськемез. Зэм, кӧтыз небӟылыку, мусоказэ Байяпай пизэ нодъялляз: - Будӥд ке, артист луод, дыр, пие. Атаез кулыку, Мишилы арес гинэ вал. Анаез укыр курадӟиз, кӧтпушаз яра ӝужамен. Мемизэ лекос жаляса, пиёк бырйиз эмъясьлэсь сюрессэ. Зэм, кырӟанлэсь ӧз люкиськы. Можгалась медучилищеын дышетскыкуз, кунокуае огвадеслы интыяськылӥз Кузьымгуртысь ӟеч адями Анатолий Антонов доры. Таизлэн баянэз вал. Миши сое алвылаз пуктэ но, ымпумъёсыныз лушкем выретыса, питрес бирдыосыз вылтӥ шырпи кадь бызьылэ. Школаын дышетскыкуз сямен ик училищеын но хорын кырӟаз. Дышетсконзэ йылпумъяса, армиозь кык толэзь ужаз Алнаш райбольницаын. Армиысь бертыса, соку ик кошкиз Иже. Ас удысаз кык толэзьлы берытскылӥз на. Отӥяз малпаськоно луиз. Покчи эмъясе ик кылёно ке, уждунэд сю манетлэсь вылӥе уз ӝутскы. Враче дышетсконо ке, юрттӥсь ӧвӧл. Нош пинал муртлэн сием-юэм но потэ, кинолэсь- концертлэсь но уд акыльтӥськы. Быдэ вуись воргорон мыноно кожаз лэсьтӥськонэ. Выль удыс бырйыса ӧз янгыша кадь: кӧт но тыр, дӥськут но вылын. Ӝытъёсы дышетскиз монтажной техникумын. Отӥяз вуиз "Удмуртэнерго" огазеяськонэ. Ас ужаз огазеяз кык удысэз: шуныт сётонэз но тазалыкез утёнэз. Укыр кыдёке кылиз шат удмурт кырӟан? Тонэ ки йылазы нуныез кадь веттась гуръёслэсь озьы гинэ люкиськыны уг луы вылэм. Тямыстонэтӥ аръёслэн шор вадесазы Удмурт шаерамы бӧрсьысь бӧрсе ӝужазы ас кожазы ужась таляк крезьгурчиос. Михаил но ас кужымзэ эскероно кожаз. Нырысетӥ кырӟанэзлы гур но, кылъёс но ачиз малпаз. Кылбурзэ газетэ печатламлэсь азьвыл соин тодматыны чаклаз эсэплаз адямизэ Пётр Кубашевез. Таиз егит эшезлэсь "люко мильымзэ" кияз кӧня ке бергатыса шуиз: - Пумаз кӧня ке чур ватсано на вылэм. Михаил ӧз пумитъяськы. Огпалась огпала кӧня ке пол "питыръям" бере пӧрмиз туж ӟеч кылбур. "Котьку уг ӝужа италмас" нырысь ик печатласькиз "Советской Удмуртия" газетын. Кырӟанлэн сюресэз аслаз. Воргоронлэн ӟеч эшез Анатолий Кутасов кемалась ужа ни Ижысь автозаводын. Юлтошезлэсь курадӟемзэ шӧдыса сипыртӥз: - Мон тодӥсько туж усто адямиосты: эгызоос Константин но Алексей Шишкинъёс огсыр ужало ни заводысьтымы "Калинка" ансамбльын. Вазиськыса утча ай - огкыл чаляк шедьтоды, дыр... Ас понназы вырись крезьгурчиосты одӥг тулыс ӝытэ ас дӥняз люкалляз Ижысь Дзержинский нимо культура юрт. "Калинкаысь" апайёс сюлмысь юрттӥзы алнаш пилы. "Котьку уг ӝужа италмас" сцена вылысен эркынласа жингыртэм бере, укыр лӧптӥз воргорон. Инме лобӟиз кадь нокыӵе бурдъёстэк. Пиосмуртлэн сюлэмаз утыр вордӥськыны ӧдъязы ортчыт ненег но мудрон гуръёс. Чиньыосыз золгес волямъя но сюлэмыз крезь кадь жингыртэмъя ятвылтӥз: маке пӧрмоно ик кадь. Книгаен вузкарон лавкаосы пыракуз, ки улаз огпол сюризы Семён Перевощиковлэн кылбуръёсыз. Куд-огез укыр чебересь - ӵапак кылдытэмын кадь кырӟан понна. Ма, тани "Юнме вождэ поттӥськод" ик. Ӝытъёсы ваньмон дыръяз баянзэ кутэ но ки улысьтыз бӧрсысь бӧрсе вордӥсько паймымон гуръёс. Кышноезлы, Валентиналы, куддыр ӧз яралля тазьы модейтэмез. Нош Михаил ӧз чигна - ас тулзэ лусйиз. Картэзлэн нимыз тодмо луэм бере гинэ кышномурт валаз: кузпалыз юнме уг выры. Ог дасо кырӟанэз люкаськыса, крезьгурчи сюрес лёгиз Машина лэсьтӥсьёслэн культура дворецысьтызы "Тюрагай" удмурт калык хоре. Кырӟась калыкен тодматскон пумысь, ас кырӟанъёссэ тодытон вылысь. Зэм, пайдаез малы ке ӧйлась. Дырзы ӧвӧлэн-а, мукет муген-а - артистъёс выль ужъёсыз борды ӧз басьтӥськелэ. Кырӟась кузпалъёс Валентина но Евгений Серебренниковъёс юрттэмъя, огпол йыгаськиз "Италмасэ". Дано ансамбль сюлмаськемен, кылзӥсь пӧлы вӧлмиз Петыр сярысь кырӟан. "Италмасын" огвадес укыр аля-ӟаба луэмен, концертъёсаз вить ар ӵоже ӧз ветлы. Артистъёс воштӥськонъёсты чаляк шӧдӥзы. Али сцена вылысен ортчыт чебер чузъясько Пантелей Кузнецовлэн, Николай Трубачевлэн кырӟанъёссы - "Италмас" кылзымон но учкымон луиз. Кӧня ке ар талэсь азьло Удмурт радио ялӥз вал "Жингырты, удмурт кырӟан" ӵошатскон. Отын кужымзэ мертаса, воргорон вормисе потӥз. Алнаш музъем вылын вордскем крезьгурчиосты Удмурт радио огпол люкалляз черкогуртэ. Кузьымгурт пи Михаил Оськин но Сизьгурт пи Пантелей Кузнецов сцена вылэ кемдӥзы ӵапак артэ. Кыдёкысь куноосты сылалэн-нянен пумитась нылмурт, оло, янгышаса, оло, мукет муген - кузьымзэ мычиз егитэзлы. Сокем тодмо но сокем арлыдо ӧй вал ай соку Михаил Оськин, нош бӧлякъёсызлэсь дуно кузьымзэс кияз кутыса шуиз: - Монэ алнашъёсы такем вылӥ дунъяло бере, ачиз инмар косэм, дыр, кырӟан гожъяны. Ӟеч крезьгур кылдытон понна кулэ сыӵе ик ӟеч кылбур. Флор Васильев, Николай Байтеряков ӵапак вордӥськиллям кадь кырӟан понна. Туннэосыз пӧлысь крезьгурез ӟеч шӧдо Семён Перевощиков, Галина Романова, Людмила Кутянова. Зэм, куддыр луэ озьы: выль кырӟан чылкак лулъяськемын ни, нош кылбур пыд йылаз йыг-йыг уг сылы на. Огпол ки улаз сюризы Людмила Кутяновалэн чуръёсыз. "Тон-а со?" кылбурез кияз кӧня ке бергатыса ятвылтӥз: малпанъёс йылаз-пумаз вуттымтэ. - Киосыз но, пыдъёсыз но, синъёсыз но вань - сюлэмыз гинэ ӧвӧл. Ладъя ай мукет сямен, - вазиськиз, нылкышноез пумитаса. Кылбур ӝогак тупатъямын вал. Зэм, крезьгурчилы ӧз яра. Нылкышно ӧз куатаськы. Кӧня ке ӝыт ӵоже волятыса гинэ кырӟан жингыртыны ӧдъяз, крезь кадь. Нош ын улын кемалась ӝокаса кыллем югыт тылси выльысь адӟиз кадь яркыт шундыез. Чебер вылтырлэн дӥсез-кутэз но чебер медло. Галина Романова гожтӥз "Малы силе кикы?" кылбур. Номыр уд шуы: ӟеч пуштросъем. Сюлэмез позыртӥсь чуръёс вылтӥ кийыгыриеныд гинэ но ортчыса шӧдод сюлэмлэсь ӵем-ӵем жугиськемзэ. - Та бугроез ӵупыны ӧй пишмыты ке, воргорон уг луы. Мукет сямен вераса, та кылбуредлы гур пӧрмытыны ӧй быгаты ке, кырӟан гожъясь уг луы, - оскытӥз пиосмурт. Юнме куалекъямтэ вылэм. Крезьгур вордӥськиз, трос уез кӧлатэк. Николай Байтеряков вакчи ньыльчуръёссэ кылдытэм, дыр, ортчем сюрессэ малпаса. Соосты огинэ сузьйыса пӧрмысал, дыр, туж ӟеч кырӟан. Ӝожмыт ньыльчуръёс ӵапак сӥземын яратонлы. Лысьӧмыз вань ни - дӥськутэз ӧвӧл ай. Озьы но тазьы но "бекмылляськыса", утыр-утыр маке-маке вордӥськыны ӧдъяз. "Вамыштомы артэ" кырӟан туннэ луиз ни зэмос удмурт кунгур. Сотэк одӥг концертсэ но уг мыты Удмурт радио. Нош Удмурт Элькунысь калык артистка Валентина Пудова но "Айкайысь" кырӟась Светлана Смагина кырӟанлы сӥзизы кадь укыр кузь даур. Николай Семёновичен улэп дыръяз одӥг пол но пумиськыны ӧз кылды. Телефон пыр гинэ бӧлякез шумпотэмзэ лад-лад ивортӥз чылкак кык кылын: - Чебер пӧрмем. Чуръёс лыктыку, крезьгурчи ачиз но кылбура. Зэм, юрттэт курыса, куддыр вазиськоно луэ матысь эшъёсыдлы. "Вордскем гуртэ" кылбурзэ мытыкуз, воргорон ӧжытак могӟиз кадь. Семён Перевощиков пичи но ӧз мога - кылбурез азьланьтӥз ас сяменыз. Бератаз чуръёс быдэсак выжизы солы. Кылбур но крезьгур ог-огзылы тупазы, кут каблы кадь. Куддыр луэ чылкак мыддорин: кылбур но крезьгур ог-огзылы пичи но уг тупало. Соку нырысетӥезлэсь вылдӥсьсэ но, пуштроссэ но воштоно луэ. Али гинэ ӝужам чуръёс пӧлын бугыръяськыкуз, Михаил Алексеевич шуак учыртӥз Анатолий Леонтьевлэсь "Эшъёсылы" кылбурзэ. Нырысьсэ лыдӟемез бере ик шӧдӥз: тае кӧня ке "куасалъяно" луоз. Асэныз кылбурчиен кенешытэк йӧтылыны ӧз дӥсьты. Огнуналэ шонтӥз Можгала. Поэтлэсь кытын улэмзэ уг тоды бере, городэ вуыса вазиськиз ёрос газетлэн редакцияз ужасьёслы. Таосыз кыл вератэк юрттӥзы. Пурга пилы алнаш пилэн сюлмаськемез яраз. Ог-огенызы азьвыл ноку пумиськылымтэ адямиос огкыл но шедьтӥзы, чебер кырӟан но пӧрмытӥзы. Асьсэос кырӟасьёс но куддыр вазиськыло кыӵе ке куронэн. "Айкайысь" Валентина Серебренникова огпол сюлмысь тэльмыриз: - Картэлэн, Евгенийлэн, вордӥськем нуналыз вуэ. Урод ӧй луысал, солы сӥзьыса, кырӟан гожтысалыд ке. Кыӵеесь бен со, шудо аръёс? Адями быдэ вуэ дас тямыс аресказ, азвесь сюанзэ шудэ витьтон аресказ, пурысьтам йырсиосыз пыр пальпотылэ на сю аресказ. Ньыльдон вить ареслы сӥзем кырӟан вань - витьтон арес сярысь ӧвӧл. Кык-куинь толэзь ӵоже ог дасо ӝыт курадӟыса, маке вордӥськиз кадь. Россия Федерациысь дано артист Евгений Серебренников кырӟамъя, крезьгур Удмурт театрлэн сценаез вылысен ӵапак жингыртӥз пиосмуртлэн вордӥськем нуналаз. Кузпалыз со вӧзын ворекъяз, льӧль сяська кадь. Зэм, уггес ик тырмы куддыр тодон-валан. Та удыслы юри дышетскысал ке, Михаил Оськин кемалась луысал ни, дыр, Удмурт шаерысь Крезьгурчиослэн огазеяськоназы. Культурая яке крезьгуръя училищеез йылпумъясал ке, кырӟанъёсыз сюлэсь люкаськысалзы ни, дыр. Али соос ог ньыльдон ёрос. Таоссэ но огинэ сузьйыса потты вылэм чебер бичет - кинлэсь бен курод ай кызь вить сюрс манет? Шуд кузьманы быгатӥсь адямиосты утчаса, пиосмурт огпол кожиз Удмурт Кивалтэтысь Пӧртэм калыкъёсын ужанъя комитетэ. Солэн тӧроез Светлана Смирнова оскытӥз: - Юрттыны, оло, али ик ум быгатэлэ. Матысь дыре ик сыӵе луонлык кылдӥз ке, ум вунэтэлэ - сюлмаськом. Юбилеезлы дасяськон сямен, Михаил пыриз Печать юртэ интыяськем "Кенеш" журналэ. Кайгуэз сярысь пичи но ӝожтӥськытэк мадиз. Редакциын ужасьёс пеймыт уин юг тылси кадь воректӥзы: - Дырын-дырын поттаськомы ми удмурт крезьгурчиосмылэсь ужъёссэс. Али но дасяське сыӵе бичет. Тӥлесьтыд но кырӟанъёстэс одно ик пыртыны сюлмаськом. Светлана Смирновалэн комитетэз юрттӥз ке, троссэ интыяны быгатом. "Кенеш" но крезьгурчи гожтӥзы комитетлы куриськон. Ӝоген потӥз со, удмурт кырӟанъёсын туж чебер выло бичет. Отчы люкамын Михаил Оськинлэн ог дас вить кырӟанэз. "Кенеш" висълоз солы куинь сюзэ. Яке вузалоз, яке кузьмалоз гинэ - соиз аслаз ужез. Та книгаын ик потӥзы Герман Корепановлэн, Геннадий Корепанов-Камскийлэн, Николай Шкляевлэн, Геннадий Матвеевлэн, Пантелей Кузнецовлэн, Геннадий Бекмановлэн, Геннадий Ганьковлэн, Николай Постниковлэн но данак мукет тодмо "кизилиослэн" ужъёссы. Туала вакытлэн туала мертэтъёсыз чылкак мыддоринскизы ке но, дыртон ӟече уг вутты. Куд-огез паймыто ик: "пыжымтэ-вӧямтэ табаньзэс ыль куен кушаны косо". Михаил Оськин уг дырты, нокыӵе уллясь-курись ӧвӧлэн. Пыжымтэ-пӧзьымтэ мае ке аслад шуыны дӥсьтод шат, сое ӝыны ар яке - ар быдӟа кисьматытэк? Алнаш пилэсь кырӟанъёссэ сцена вылысен туж чебер вӧлмыто Россиысь дано артист Михаил Ворончихин, Удмурт Элькунысь калык артистка Валентина Пудова, "Айкайысь" кырӟась Светлана Смагина. Алнаш музъем вылын вордскем но будэм нылмурт маин ке кулэс шат "агай-апаезлэсь"? Туала мертэтъёсты чаклано ке, солы кемалась сётоно вал ини Удмурт шаерысь дано кырӟась ним - Культурая министерство малы ке уг дырты. Кырӟан кылдэ пӧртэм сямен. Кельшем кылбурлы гур куддыр соку ик шеде. Ярасьтэмзэ пыдлогес донгоно луэ. Тупась гур утчаса, куддыр курадӟоно луэ дасо аръёсын. Кемалась гожтоно вал ни анай-атайлы сӥзем кырӟан - таки уг шедьы. Луылэ кабзэ паймымон: кырӟан гожтӥське кык час куспын. Туэ, Акашка нуналэ, озьы пӧрмиз Флор Васильевлэн "Синъёс" кылбурезъя крезьгур. Зарни пырыосты "вордыны" луэ вылэм, та удыслы нокытын юри дышетскытэк но. Крезьгурлэсь кылзэ тодӥськод ке, сюлэмыд кырӟа ке, мар-о кулэ на меда? Зэм, эшъёс куддыр паймо: - Нотаосты чик тодытэк но кырӟан гожтыны луэ шат? Воргоронлы тодмо сизьымез - до, ре, ми, фа, соль, ля, си... Отӥыз... Ярам ай: та ужын кыл вератэк юртто крезьгурчи Юрий Толкач, автозаводлэн "Калинка" ансамбленыз кивалтӥсьёс эгызоос Константин но Алексей Шишкинъёс, "Айкайысь" но филармониысь баянистъёс Сергей Распопов но Николай Широких. Вазиськы вылэм аспал адямиедлы алнаш пилы Пантелей Кузнецовлы - укыр кыдёкын. Улон-вылон чутрак чукинскемен, кырӟасьёс туэ кулэсмо. Адямиос ӝӧк сьӧры пуксё, кыӵе ке гур мытыса. Ӝӧк сьӧрысь султо, сое ӝыныё уретыса. Витьтон аресэз сярысь воргорон малпаськыны кутскиз кылем арын ик. Юбилей ӝытэзлы дасяськон сямен кожаз "Айкае", Удмурт радиое. Фольклор кырӟанъя театрысь аристъёс но, академи хор капеллаысь усточиос но пумит ӧз луэ: уж борды пезь-пезь басьтӥськизы. Таиз ӝыт аспӧртэмлыко вал: сцена вылысен чузъяськизы чылкак выль кырӟанъёс, соосты калык пӧлы вӧлмытӥзы артистъёс-профессионалъёс. Москвае дышетскыны мынонэз учырамен, концертын ӧй вал кыло уӵы Валентина Пудова - сое воштӥзы музонъёсыз. Лябесь ӧвол, дыр, таосыз но. Зэм, Валентиналэн зарни куараез тужгес чеберъясал быдэс ӝытэз. Али кырӟанъёс шер кылдо. Огвакыт куинь ар ӧз гожъя. Германиын, одӥг гинэ кырӟан кылдытыса, семьяез сюдыны луэ ке быдэс ар ӵоже, асьмеос, собыдӟа гинэ дун поттыса, кӧтмес тырыны ум быгатэлэ одӥг нунал гинэ но. Туала дунъетъёс чылкак воштӥськемен, воргорон нырысетӥ интые пуктэ бакчазэ, кыкетӥ интые - чорыганзэ, куинетӥ интые гинэ - крезьгурез. Озьы ке но, суй-пыдзэ уг юскы. Тазалыкез утёнъя инженер но крезьгурчи Михаил Оськин оске: та ужен юнме уг выры. Кырӟанъёссэ удмурт калык тодэ но яратэ бере, малы-о курадӟонтэмез? Кыло уӵыез корт четлыке уд пытса! ЕЛЕНА ВИНОГРАДОВА. Тусбуйзэ пуктӥз Владимир КАМАШЕВ. "Сьӧд зарни" поттӥсьёслы "Воткинскысь завод" кун производственной объединениын йылпумъяло нырысетӥ буровой насос бичанзэс. Сыӵе насос кутӥське музъемез портыку отчы пачкатэм омырен раствор лэзьыны. Сое дасян бордын ужало куинь цехысь конструкторъёс, химикъёс, металлургъёс, технологъёс. Насос лэсьтӥське, "ИжДрил" российско-канадской ӵош ужась предприятилэн куремезъя. Матысь дыре со ужатыса эскеремын луоз "Удмуртнефть" акционер огазеяськонлэн музъем портон интыяз. Ар йылпумъяськытозь, эшшо 3 таӵе насос лэсьтэмын луоз на. С. ПЕТРОВ. Героез буре вайыса Туэ 6 ноябре Советской Союзлэн Героезлэн Феодора Пушиналэн быремез дырысен 55 ар тырме. Якшур-Бодья ёросысь Иж-Забегалово гуртын вордскем нылаш, бӧрысь медицина службаысь лейтенант геройлыко быриз 20 арес дыръяз. Пушиналэн быремез дырысен 55 но вордскемез дырысен 75 ар тырмонэн валче районын бадӟымесь ужрадъёс ортчытыны чакламын. Со буре ваён урокъёс, спортъя ӵошатсконъёс, концертъёс. Б. ФЕДИН. Егитъёс армие кошко 1-тӥ октябре кутскиз Россиысь гражданёсты военной службае басьтон. Президенлэн указэзъя, 1998 арын 31 декабрьёзь Россиысь армие 158 сюрс егитъёс вуыны кулэ. Суд улэ шедьылэм пиосты туэ армие уз басьтэ. Генеральной штабысь специалистъёс малпамъя, армилэсь пегасьёслэн лыдзы эшшо но йылоз. Со сяна, генштабез сюлмаськытэ соиз но: куд-огез правоез утёнъя организациос егитъёсты армие келянлы пумит ужрадъёс ортчытъяло, ивортэ "Независимая газета". Иворъёсъя национальной служба. Кин со, Зоя Трухина? Ас сярысьтыз со тазьы тупен-тупен мадьыны быгатэ: - Вордскемын Вортчаын (Кез ёрос), 1966 арын Пужмезь школаез йылпумъяй. Парзие мынӥм вал эшеным садоводэ дышетскыны - местаос (интыос) ӧй вал ни. Туж потэ вал музучилищее но пыреме, медучилищее но. Торговой техникумын гинэ одӥг арзэ дышетски, собере куинь арзэ Ижевскын вузкарисьын ужай. 1970 арын лыктӥ механической заводэ. Тӥни та бордысен ик, кызьы шуо ӟучъёс, со кутскиз "эктыны". Зоя Трухиналэн вань будонэз, кыданэз герӟаськиз механической заводэн. Татын со лэсьтӥз аслэсьтыз "карзэ" - пичи нылзэ вордӥз. 1975 арын улон комната сётӥзы. Дас ар мында Зоя сылӥз станок вӧзын, штамповщиклэсь, фрезеровщиклэсь, токарьлэсь но мукетызлэсь ужъёссэс быдэсъяз. Со дыре ик, заводын ужан но нылзэ будэтон сямен, вис карытэк дышетскыны тыршиз. 4 номеро ШРМ-ын дас одӥг классэз быдтӥз. Собере кутскиз дасяськыны Горькийысь промышленно-экономической техникуме, подготовительной курсъёсы ветлӥз. 1978 арын Зоя Трухина вал ни дипломен техник-плановик. Али со 18 номеро цехын ужа. 260 пӧртэм тӥрлык дыраз тупатъямын мед луоз шуыса кыл кутэ. Ас вылаз мукет сюлмаськонъёсыз но басьтэ - чырмыт сямзэ тодыса, солы оско. Трос кужымзэ кыске завод. Но та улонэзлэн огпал дурыз гинэ. Кыӵе солэн сямыз? Таӵе мурт сярысь шуо: кылыныз изэз пасялоз. Шуг-секытэз пиналысен ныпъям мурт дышиз улонэтӥ тэльысь силё-сюрно пӧлтӥ кадь мыныны, ас кужымезлы гинэ оскыса. "Урод лэсьтэмлы пумит вожпотэмме уг ватӥськы, пырак ымныразы верасько, но йыркуре мынам кема уг улы,"- шуэ Зоя Аполлосовна. Со шара мылкыдо адями, йыркуръяськоз- ӝожъяськоз но, кулэ дыръяз шудоз-серектоз но. Соиз но вань: ассэ шонерен лыдъя ке, одно ик аслэсьтыз кароз. Эшшо одӥг сямыз: ассэ но, мукетсэ но, соин артэ лябзэгес, ултӥяны уз сёты. "Вотяк" шуыса яке мукет сямен унь-мань каремлы пумит сач-сач ик кылыныз салёз. Сыӵе со, Зоя Трухина. Лултэм кортъёс бордын гинэ бергаса уг ортчыты со улонзэ. Зоялэн сюлэмыз кырӟа. Тылошур начальной школаысен ик дышетӥсьёс Ившинъёс, Геннадий Андреевич но Нина Дмитриевна, шӧдӥзы сюлэмызлэсь векчи сизэ. Музыкальной школае мыныны косо вал. Зоя туж яратылӥз сцена вылын кылбур лыдӟыны. Огпол шӧдтэк шорысь аслаз но пуш куараез потӥз: "Приближается первый сентябрь, у ребят он тревожит сердца..." Райгазетэ ыстӥз. Гожтӥллям: бордгазетады тае оше. Кемалы куатаськиз соку Зоя. Выльысь йырзэ ӝутӥз, 1988 арын "Кенеш" журналын нырысьсэ печатласькемез бере: 7- тӥ номерын "Мемиелы" но "Пужмезь" кылбуръёссэ поттӥллям (соос сюризы уго Анатолий Николаевич Уваров, журналлэн валтӥсь редакторез кие - механической заводын ужась кузпалыз Ираида Николаевна пыр). Со дырысен Зоя трос кылбур сузьетъёссэ лыдӟисьёслы кузьмалляз ни, поттӥз (ас кужыменыз, завод юрттэмен) "Уй пал сяськаос" (1992) но "Быгато-а тонтэк" (1994) сборникъёссэ. Нылкышно гожъя, кызьы быгатэ, кылбуръёссэ мултэс "чильтэръяны уг сюлмаськы". Малпанэз кызьы ӧръяське, озьы ик бумага вылэ пуксе. Шиялозы ке, маке-а? Кышкад ке, кызьы кырӟалод? Кылбуръёсызъя валаськод, макем дуно солы Пызеп, Вортча, Пужмезь палъёсыз, визьмояськытэк гинэ вера со сярысь. Пинал дыр ошмеэз секта кылбурчилэсь мылкыдзэ, соин ик чигиськоно кадесь сиос куддыр дырекъяло... Ньыль пиналъёссэ огназ быдэ вуттӥз нэнэез. Бубызы ӧз берты ожысь. Зоя вордскиз ни война бере, мукет атайлэсь, ож бере протезэн бертэм муртлэсь (таизлэн аслаз но укмыс пиналыз вал)... Пичи корказэс мунчолы вузазы. Мумиз Иже, Зоя доры улыны лыктӥз. Табере ӧвӧл ни... Волга кузя буш кисыен, мӧзмыса-кырӟаса ветлыкуз, чиган кышно туназ, Сережаез пумиталод, шуиз. Со пумитаз Семенэз, тямыс ареслы пинал. Зоя ачиз но туж егит, задор, шудӥсь синмо. Озьы ке но, будэ ни внукез, Ромикез. Зоя солы анай интыын. Та кынтӥсь ӝытъёсы Ромик бордаз ӝиптӥське: "Тон вӧзын шуныт, бабушка..." Со сяна, Зоялэн вань кык бакчаез... Мар эшшо? Ватсалом... ...Ӵуказе, 7-тӥ коньывуонэ, Зоя Трухина ортчытэ "Мон усьтӥсько сюлэм ӧсме" шуыса нимам творческой ӝытсэ. Со луоз "Октябрь" культура дворецын, кутскоз 18 часын. Кырӟалозы-вералозы, шулдыртозы, ачиз сяна, Анна Плотникова, Николай Уткин, Ольга Зорина, Фаина Будина но... вань эшъёсыз. Озьыен, пумиськытозямы! Т. ЧЕРНОВА. СЕССИЯ БЕРЕ НО СЕССИЯ АЗЬЫН Йӧ векчи азьтӥз чиге Уд но вала, кудпалась улон асьмелы шуккет дася. Озьы луиз манетлэн шуак дунтэмаменыз, 17 августэ Россиын кутскем кризисэн. Кызьы шуо политикъёс, такем мур гуэ усьылэммы ӧй вал на. Доллар котыр ласянь эскериз "кышъетъёсмес": кытын но отын соос чидазы, Удмуртиын но асьме кадь лябӟем улосвылъёсын вань вурысъёстӥз пуньырӟизы. Ма шуод, Правительствомы, Кун Кенеш кулэ ужрадъёс кутытозь шукыръяськиз, гольтыръяськиз базаред, кӧня быгатӥз, огшоры калыкез кесиз. Ӝутскем дунъёс огез но интыяз ӧз пуксе ни. Экономикаын сотэк но секыт югдур эшшо но уродмиз. Малы? Талы умой-умой кутскыса валэктон шедьтон вылысь, кылем арня вискын, ог куинь арнялы беромыса ке но, люкаськылӥз Кун Кенешлэн 21-тӥ чакламтэ (внеочередной) сессиез. Пӧртэм малпанъёсын вуизы отчы депутатъёс, пӧртэм ӧретӥ кошкиз кенешон но - жаляса верано, республикаез шуг-секытысь поттонлы сӥзем ужпумез эскерон тросгес пӧрмиз куашетонлы. Трибуна сьӧры потамъёс кык нунал ӵоже бергазы одӥг юан котырын: кельтоно А. А. Волковез Кун Кенешлы Тӧрое яке ас мылкыд каремезъя отставкае улляно? Депутатъёс та вераськонэз сокем лэчыт мытӥзы бере, озьыен, солы мугез вань? Пыкылонъёс трос. Но валтӥсь мугзэ пумозяз, йӧн-йӧн кутскыса, радэн-радэн шараяса ивортӥсь ӧйлась. Озьы, мукет пала кожыса, сессилэн пусъем ужпумез урдэслань шебеляса кылиз. Нош кенешон, зэмен но, зол мыныны кулэ вал. Юнме шорысь ужась калык 7-тӥ октябре ульчаосы потыны уг дасяськы. Солэн кема чидам чиданэзлы но пум вуиз. Куд-огез сессиысен гажано депутатмы Геннадий Филиппович Красноперов йӧллы дунзэ кулэстӥз. Нош малы люкаськемъёс пӧлысь нокин но шара ӧз юа, "Ижмолоко" АО-лэн директорез кинэн кенешыса дуноятӥз гуртысь вуись продукциез? Озьыен, мылпотэмъя дунъёсын котькызьы шудыны луэ: ӝутыны но, уськытыны но. Огез тодмо - скал кыскисьлэн кисыез кызьы ке буш вал, озьы ик кылиз. Тросэзлэн депутатъёслэн та сессилы бадӟым осконзы вал, югдурез умой пала воштон ласянь. Озьы ӧз луы. Сюлэм висёнэзлы валэктон ӧз шедьы Пичи Пурга районысь "Мир" колхозлэн председателез депутат Анатолий Ешкеев но. Анатолий Николаевич умой тодэ музъем бӧрдын ужасьлэсь, пудо утялтӥсьлэсь туала ёрмонзэ, курадӟонзэ: аслаз колхозникъёсыз толэзьёсын коньдон уг адӟыло. Соин ик депутатлэн веран кылыз лэчыт пӧрмиз: - Удмурт Республикаен кивалтонэ лыктыны кулэ выль адямиос, соос, кин быгатоз куашкась экономикаез калык радэ поттыны. Берло 5-7 арзэ гинэ шӧдскымон кулэсмиз пудолэн лыдыз, соин ӵош - йӧл, сӥль поттон. Магазинъёсы сиён-юон вуэмлы тау кароно жадёнэз валатэк ужась гурт калыклы. Исполнительной органъёс ласянь ке верано, отысь юрттэт ӧвӧл. Сюлэм висе удмурт музъеммылэн узырлыкез - му вӧй сярысь но. Солэн одӥг нимыз гинэ асьмелэн на - коньдонэз тӧлӟемын. Кӧня миллион, миллиард кошкемын Удмуртилэн, Россилэн палэназ - нокин уз вера, нош дышетӥсьёсмы, пенсионеръёс, вань ужась калыкмы коньдонтэк пуко. Со дыръя ик куд-ог кивалтӥсъёс миллиардлы коттедж ӝуто, миллионъёсын кредит басьто. Пичи Пургаын но "ёрмыса улӥсьёс" вань. Малы Кун Кенеш но, Правительство но та ласянь шып уло? Кун Кенешлэсь ужзэ мон дунъясько "2"-лы. Депутатъёс Алексей Красных, Михаил Козлов, Валентин Комлев но куд-ог мукетъёсыз Удмуртилэн экономикаезлэсь куашкамзэ, улон-вылонмылэсь начармемзэ герӟало Борис Ельцинлэн йӧнтэм нуиськись политикаеныз. Таин ӵош пыкылон кылъёс верамын республикамылэн кивалтӥсьёсызлы, "кудъёсыз Президентэз быръён вакытэ вань калыкез ӧтизы, куаразэс Ельцин понна сётыны курыса, нош туннэ, чик пумитъяськытэк, синзэс кыньыса быдэсъяло Ельцинлэсь указъёссэ. Малы бускель республикаос асьсэ йырын, асьсэ валамъя уло но ужало?" Депутатъёслэсь ӟырдам мылкыдзэс сӥятыны юрттӥз Москваысь вуэм куно, Россия Федерациысь Кун Думалэн Председателезлэн воштӥсез Сергей Бабурин: - Удмуртия - аспӧртэмлыко республика. Но сое Россилэсь уд люкы, солэсь шугъяськонъёссэ, туала Президентэз воштытэк уд палэнты. Тодмо ук: Западлы асьмеос кулэ ӧвӧл, солы кулэ Россилэн узырлыкез. Странамы али быдэсак пачкатэмын кунгож сьӧрысь капиталэн. Нош асьмелэн кӧня коньдонмы отчы келямын! Мон тодэмъя, Россия вуись кредитъёс сярысь, данаклы тросгес. Ыштэм манетъёсмес берыктон понна, вань одӥг гинэ амал: СССР сямен ик, кужмо, котыр ласянь юн государство луоно. Соку гинэ асьмелэнэз капиталмы кунгож сьӧрысьсэ сутылоз но Россилэн экономикаез вылэ ужатыны быгатоз. Кун Думалэн депутатэз сессия люкаськемъёслы таӵе ивортон но лэсьтӥз: - Россилэн Президентэз быръён, кызьы бӧрысьгес тодмо луиз, пӧяськыса ортчытэмын вал. Ельцинэз кивалтонэ пуктӥсьёс вань протоколъёсты "ыштӥзы". Ми но янгышам, Борис Николаевичез вормонэн ӟечкыласа. Зэмзэ ке верано, Россиен туннэ кивалтыны кулэ вал Геннадий Зюганов, быръёнъёслэн кыкетӥ туразы со потӥз нырысетӥ интые. Адямиосты туэ номырин уд паймыты ни. Валасез тӧллэсь кудпалась пельтэмзэ кемалась валаз, соин ик сюлмысь потӥсь куаразэ шара вера. Депутат Юрий Семенов: - Кӧня меда кужым понэмын, Удмуртиез кураськись регионъёс радэ пыртон понна. Асьмеды лёгало, сантэмало - чидаськом, пумит вераны ум дӥсьтӥське. Политика но экономика куспазы люконтэм герӟаськемын, соин ик асьмелы татын ужаны кутсконо, асьме калыкмы, асьме бырйисьёсмы понна. Москваысь кивалтӥсьёслэн ымазы весяк учкыса улоно ӧвӧл. Депутат Алла Чишковская: - Бюджетысь коньдон кошке коттеджъёс ӝутонэ, "ёрмисьёслы" премиослы, музон интые. Со сярысь гожъяло республикаын потӥсь газетъёс. Удмуртилэн кивалтӥсьёсыз, Кун Кенеш та пумысен нокыӵе валэктон уг сёто. Мон школаын ужасько, уждунэ май толэзь понна басьтымтэ на. Тодӥсько, кызьы уло огшоры ужасьёс, мумы-бубыос - пиналъёслы дӥсь басьтыны номырин. Нош со дыре ик Кун Кенеш ужасьёслы кӧня выль квартира лэсьтӥз? Куд-ог депутатъёс кык улон инты но возё. Дышетӥсьёслы квартираелы шуыса висъям кредит пичильтык сэрег но басьтыны уг тырмы. Мон дэмласько Кун Кенешлэсь ужасьёссэ кулэстыны со чотын дышетӥсьёслы уждун тырыны. Депутат Федор Козьмин: - Та вакытэ, асьмелы ужаны кылиз на 5 толэзь, кивалтӥсьёсты воштонэн вырыны уг яра. Кельше-а Кун Кенешлэн Тӧроез, уг-а - воштыны бер ини. Выись корабльын капитан гинэ янгыш ӧвӧл - котькудӥз кыл кутыны кулэ. Бырйись депутатлэсь витё умой-умой ужамзэ, ӟеч улонэ вуттэмзэ. Соин ик властез выльдонэн-воштонэн вырыны ноку. Ужано. Таӵегес ик мылкыдын вераськизы Кун Кенешлэн депутатъёсыз Софья Широбокова, Виктор Тарасенко но мукетъёсыз. Но соослэн куаразы выиз огъя куашетонэ. Зуркатэм муш семьяез ӟеч мушкась но озьы гинэ зӥбломытыны уз быгаты: солэсь мугзэ тодоно. Депутатъёслэсь пӧсекъямзэс но валаны сокем секыт ӧвӧл, дыр. Республикаысь югдурез тупатонъя кенешон азинскоз на Кун Кенешлэн туннэ усьтӥськись азьвыл пусъем 21-тӥ сессияз. Людмила МЕДВЕДЕВА. Фотоосыз Владимир КАМАШЕВЛЭН. Комсомоллы сӥзьыса Комсомоллы 80 ар тырмонэз пусйыны дасясько Каракулино палъёсын но. Кылдытэмын со ужрадэз дасянъя комитет. Гурт администрациослы, соослэн кивалтӥсьёссылы ӵектэмын колхозъёслэсь первичной организациослэн азьвыл секретарьёссы сярысь тодыны, соослэн ужамзы сярысь архив кылдытыны но бордгазет поттыны. Со ужпум бордын ик тыршозы предприятиосын, организациосын но учреждениосын. Нош ёрос музей материалъёс дасялоз ВЛКСМ-лэн райкомезлэн нырысетӥ секретарьёсыз сярысь. Нош 29 октябре ортчытӥськоз егит дырлы но комсомоллы сӥзем кырӟанъёслы конкурс. Отчы пыриськыны быгатозы кызьы ке егитъёс, озьы ик мӧйыос но. Е. ГОГОЛЕВА. Гуртысь кивалтӥсьёс Иван Перевощиков: "Удмурт музъеммы вордоз ай" Быдэс улонзэ гурт хозяйствоен герӟаз Иван Павлович Перевощиков. Районын гинэ ӧвӧл, шаерамы но со тодмо адями. Ёросысь "Луч" колхозэн 21 ар кивалтэ ни. Нош солэсь азьло татын ик дас ар ужаз валтӥсь инженер луыса. Игра районысь Вылӥ Нязь гуртын вордӥськем егит специалистэз, Ижысь Гурт хозяйствоя институтэз йылпумъямез бере, 1967 арын ужаны ысто Вавож районэ. Кельшизы солы Вало палъёс, ӵошкытэсь лудъёс-бусыос, лысо-кызо нюлэс-тэльёс. Гурезь-пудгаос будӥзы-ӝутскизы Иван Павловичлэн син азяз, воштӥськизы-чеберскизы удмурт гуртъёс, Куӟебай Гердлэн вордӥськем палъёсыз. Мар умоез-ӟечез лэсьтэмын, отын вань колхоз тӧролэн сюлмаськемез но. Берло дыре гуртэз зӥбо-пачкато ке но, "Луч" ялан огсыр ужа, лэсьтӥське, шуг-секытэзлы уг сётскы, кураськыса уг ветлы, асьсэос вань луонлыкъёссэс уже куто. Кызьы бен туннэ уло гурезь-пудгаос? Соослэн ужъёссы но сюлэмшугъяськонъёссы сярысь маде хозяйстволэн тӧроез Иван ПЕРЕВОЩИКОВ. Солы юанъёс сётъяз "Удмурт дунне" газетлэн корреспондентэз Геннадий РОМАНОВ. - Иван Павлович, вераськонмес ойдо мытом туннэ кысык ужъёс бордысен. Вуиз зарни сӥзьыл, кызьы шуо, чипыосты лыдъян дыр. Мар сётӥз тӥледлы пӧсь гужем? - Куазез курланы уг яра. Татын 30 арлэсь кема ужатозям, котькыӵе аръёс вал ни. Таиз но гужем нянь будэтӥсьёслы удалтӥз, шуыны уг луы. Но кин музъемен арысь аре рос-прос ужа, агротехникалэсь куронъёссэ дыраз но ӟеч быдэсъя, со ноку няньтэк, бакча сиёнъёстэк но мукет емышъёстэк уг кыльы. Верало тани хозяйствое сярысь. Миым, кылсярысь, котькуд гектарысь шорлыдын 27 центнерлэсь уно ю тысь кутсам, нош туэ 18 центнер люкаськиз. Республикая со лыдпус урод ӧвӧл, шаерамы 10 центнер ёрос усе, нош районамы ялан куинетӥ-ньылетӥ инты басьтӥськом. Милемды котьку азьпалто Мичурин нимо, "Удмуртия" но "Колос" колхозъёс. Берлоеныз хозяйствоен интыосмес вошъяськом ик. Зэм, туннэ нимысьтыз пусъем потэ гурт калыклэсь, специалистъёслэсь лулысь-сюлмысь тыршемзэс. Картофкамы гектарлы быдэ 150 центнерлэсь трос потӥз. Ведь ваньмыз со кӧс гужеме но секыт улон-вылон вакытэ басьтэмын. Вылӥын верай удалтэм ю-нянь будэтӥсь хозяйствоос сярысь, но соослэн музъемъёссы умоесь, милямен уд ӵошаты. Ӟеч ю-нянь будэтон люконтэм герӟаськемын муосты кыеданэн, ватсаса кужым сётонэн. Туннэ жаляса верано луэ, техника тырмымтэен (вужмемын), фермаосысь вань кыедэз лудъёсы поттыны ум быгатӥське. Азьло "Сельхозхимия" зол юрттэ вал, табере со туж дуно ужа. Минерал сылалъёс сярысь ке верано, миым котькуд гектараз 60 килограмм чылкыт сылал пыртӥм, нош туэ - ӝынызэ гинэ, 30 килограмм лэсьтӥм. Ваньмыз со урожайын шӧдӥське. Вылаз ик, кизьыку минерал сылалэз кидысэн ӵош мургес согыны выль сеялкаосмы уг тырмо. Нош та ужлэн пайдаез бадӟым, ненег будосъёслы со ватсаса сиён луэ но син азьын чебер пушъе. Выль, усто сортъёс уськытон сярысь но ум вунэтӥське. - Мар ӟечез, верамонэз лэсьтэмын, ваньмыз со син азьын. Но тужгес мае нимысьтыз пусйысалды? - Гурт калыклы но, аслым но юн кельше Гурезь-Пудгае но музон гуртъёсы асфальт сюрес кыскеммы. Со бен капчиен ӧз сётӥськы. Куке Нылгаысь Вавоже сюрес ӝутыны ӧдъязы, ӵапак соку, кызьы шуо, кытӥ кӧяса, кытӥ вӧяса, лэсьтӥськисьёсты гуртамы берыктыны быгатӥм. Соос куризы вал сюресэз ӝутыны, но кыкетӥ улыг-нюр интыостӥ кыз выжыосты порылыны-поттыны ӧм быгатэ. Лэсьтӥськисьёсты пӧям кадь луиз, но берло асьсэос ик ваньзэ со ужъёсты йылаз-пумаз вуттӥзы. Туннэ озьы ик шумпотыса вераме потэ секыт улон-вылон вакытэ гурт калыклэсь лэсьтӥськемзэ. Али хозяйствоямы 8 семья выль корка пуктэ. Тужгес но уно лэсьтӥсько Уе-Докьяын но Гурезь-Пудгаын. Тани пудо возьмась Гарим Никитин Валерий пиеныз (со но пудо возьма) усто юрт ӝутэ. Со кирпичлэсь, пеноблоклэсь но пулэсь луоз. Механизатор Валерий Петров но ӟеч корка пуктӥз, нош Уе-Докьяысь Василий Юшков ӝоген юртсэ вуттоз - шыкыс кадь усто, ӝикыт но чебер лэсьтэмын. Адямиос улыны-ужаны малпало, ӵуказеез сярысь сюлмасько. Но со ваньмыз инмысь уг усьы. Колхоз лэсьтӥськисьёслы котьмаин юрттэ: транспорт но, пиломатериал но сётэ. Сотэк кызьы бен, огнад ведь венез но уд ӝуты, нош дэмен, огъя кужымен гурезез но берыктод. Умойёсыз пӧлысь эшшо ватсасал на пудо гидъёсмес выльдыны быгатэммес. Секыт ке но, кужым шедьтӥськом на. - Иван Павлович, фермаос борды вуим бере, кызьы бен та удысын ужъёсты мыно? - Пудо вордон люконтэм герӟаськемын музъем ужанэн. Соин ик та удысын но югдур урод ӧвӧл. Котькыӵе учыръёс луыло: куашкало гид липетъёс, борддоръёс но асьме кужымен ик ваньзэ выльдӥськом-чередиськом. Озьы пудо утисьёсмы мылысь-кыдысь тыршо. Отысь ик пото азинсконъёс. Тани туэ тямыс толэзьскын, кылем арын та дырен ӵошатыса, котькуд скаллэсь 300 килограммлы уногес йӧл кыским ни, ваньзэ вераса, 2000 центнер ёрослы тросгес. Та дыр ӵоже скаллы быдэ 2300 килограмм йӧл люкамын. Нош куд-огез звеноос со лыдпусэз 150-250 килограммлы ортчизы ни. Вератэк кельтэме уг поты кунян сюдӥсьёс сярысь. Ваньмыз соос лулысь-сюлмысь тыршо, но тужгес но синмаськымон ужа Е. А. Матвеева. Солэн утялтоно пудоез нуналлы быдэ шорлыдын 650-700 грамм будэ. Пудо утисьёслэн котьку матысь юрттӥсьёссы луо гуртысь механизаторъёс. Соослэн сюлмаськеменызы, кӧс гужеме но 4,7 сюрс тонна силос дасям, сенаж - 3,8 сюрс. Нош турын - 900 тонна. Та удысын тужгес но трос пӧсязы-лэсьтӥзы механизаторъёс В. М. Чирков (КСК-100-лэн кузёез), В. И. Бурков, А. Л. Романов но музонэз. Одӥг кутскемен, ю-нянь будэтӥсьёсме но ушъяло ни. Соос пӧлы пыро комбайнёръёс А. А. Попов, В. Б. Щеткин но Н. Н. Меньшиков. Ю тысь ворттонын висъяськизы шофёръёс А. К. Пчельников, О. В. Зорин но Г. А. Мельников. Соос музъем ужез ярато, трос кужымзэс но быгатэмзэс сёто. - Иван Павлович, Совето власть дыръя тӥ быръемын вал колхозъёслэн союзной советазы. Мар со сярысь верасалды? - Умоен гинэ тодам ваисько. Монэ отчы бырйизы колхозникъёслэн куинетӥ учредительной съездазы 1982-тӥ арын, нош 1985-тӥ арын СССР-ысь аграриослэн И съездазы вераськыны шуд усиз. Быдэс страна азьын кык ужпумез ӝутӥ - гуртэ газ кыскон но музъем вылын улӥсьёслы 3 фазаен электрокужым басьтонэз лэзён сярысь. Кыкез ӵектонэ умоен лыдъямын вал. - Нош кинэ лыдъяськоды нырысетӥ юрттӥсьёсын? - Веранэз ӧвӧл, специалистъёсме но шор ёзо кивалтӥсьёсме. Нимын-тулын вераса, музъем ужез радъянын матысь юрттӥсьёсы луо валтӥсь агроном Вячеслав Березин но валтӥсь инженер Анатолий Владыкин, пудо вордонын - валтӥсь зоотехник но ветврач Раиса Рычкова но Ольга Овчинникова. Хозяйствоын вань ужъёсты нуонын, планъёс лэсьтонын ас интызэ юн возе валтӥсь экономист Елена Зайцева. Нимысьтыз пусъеме потэ мастерскойлэсь кузёзэ Леонид Данышевез. Бен, ваньзэ вераса но уд быдты. Мыным ваньмыз юртто: арлыдоосын кенешисько, соос умой визь-кенеш сёто. - Валамон, калыкты муш кадь ужась, тыршись, адямиез валась но. Озьы ке но, Иван Павлович, мар тӥледды, гуртысь тодмо но визьмо кивалтӥсез, туннэ юн сюлэмшугъяськытэ? - Куке гурт хозяйствоез вылӥысен куашкатыны-лябӟытыны выро, со мыным чик валантэм. Али ми кызьы но озьы чидаськом-возиськиськом на, нош мар луоз, кык-куинь ар ортчыса - нокин уз валэкты. Но туннэ меӵак верало, техникамы син азьын вужме- быре, нош выльдыны сое ум быгатӥське, коньдонмы ӧвӧл. Тани лизинг амалэн республика "Клаас" немец комбайнъёс басьтӥз, районэ ньылез вуиз, "Удмуртия" но "Колос" колхозъёслы сётӥзы. Но специалистъёслэн лыдъямзыя, одӥг немец комбайн интые, 3 "Дон" комбайн басьтыны луысал. Оглом вераса, техника вужмемен, арысь аре секыт луэ музъемез кыеданы, кысык ужъёсты ӝог но дыраз быдэсъяны, юосты октыны но пудо сиён дасяны. Тӥни та ужпум милемды юн сюлэмшугъяськытэ. х х х Иван Павловичлэсь сюлмаськемзэ валаны луэ. Выльдӥськон кутскемлэсь азьло гурт хозяйствоосы выль техника трос вуэ вал. Государство зол юрттӥз минерал сылалъёсын, изваскаен но мукетыныз. Табере улон воштӥськиз, али тросэз асьсэ хозяйствоос вылэ куштэмын. Но туннэ меӵак вераны кулэ, данакез хозяйствоос выльдӥськонлы дась ӧй вал, нош куд-огез выль сямен улон вакытлы дышо ни. Тани Вавож районын ик азьло но, али но удалтэм ю-нянь будэто, уно сӥль-йӧл поттон Мичурин нимо, "Удмуртия" колхозъёс но мукетъёсыз. Нырысез хозяйство миым котькуд гектарысь 34 центнер ю тысь люказ, нош туэ - 23 центнер. Озьыен, удмурт музъем ужась муртэ, кузёзэ уг кушты, со сюдоз-вордоз сюлмаськисьсэ. Но берло дыре егит калык музъем борды мырдэм лякиське, секыт ужамез уг поты, капчизэ утча, куддыръя юон вылэ чӧлске, егит пиос уг кышноясько. Кызьы сое умоен лыдъялод? Со дыре ик хозяйствоос али калыклы трос юртто: турын, куро, ю тысь сёто но мукет. Тани "Луч" колхозын котькудӥз толэзяз шорлыдын 500-600 манет уждун басьтэ. Сое сётонэн но кема уг ӝегало. Удмурт музъем сюдэ ай. Тылпуосты алыны капчигес Элькунамы тылпуосын секыт югдур кылдэмен валче, озьы ик сӥзьыл но толалтэ объектъёсты но улон интыосты тылпуослэсь утён вылысь, Удмурт Правительство ӝегатскытэк ужрадъёс ялон сярысь постановление кутӥз. Министерствоослэн, ведомствоослэн, предприятиослэн но организациослэн кивалтӥсьёссылы косэмын тылпуослэсь утиськонъя кулэ ужрадъёс кутыны. Соос нырысь ик саклык висъяны кулэ электрооборудованиез но электрокужым сётӥсь ёзъёсты кулэезъя тупатъянлы. Котькытын мед луозы тылпуос понна кыл кутӥсьёс. "Удмуртэнерго" огазеяськонлы, жилищно-коммунальной хозяйствоя объединенилы, "Удмуртгосэнергонадзор" территориальной управленилы косоно калыклы электрокужым сётӥсь оборудованиез рос-прос тупатъяны но солэсь ужамзэ эскерыса возьыны. Ёросъёсысь но городъёсысь администрациослэн кивалтӥсьёссылы туэ 10-тӥ октябрёзь йылпумъяно трос калык люкаськон юртъёсты, улон интыосты но гуртъёсты эскеронэз. Озьы ик, 30-тӥ ноябрёзь улон юртъеръёслэн но нимаз корка возисьёслэн подвалъёсысьтызы мозмытоно ӝуась арбериосты. Пудо вордон гидъёсын тылпуосын нюръяськон ласянь ужрадъёслы бадӟым саклык висъяно. Гуртъёсын тылпуосын нюръяськонэз кужмоятон вылысь, хозяйствоос куспын кылдытоно нимысьтыз командаос. Соос дежурствозэс мед нуозы уй но нунал. 30-тӥ октябрёзь ваньзэ тылпу кысон автомобильёсты но техникаез тупатъяса дасяно, тырмыт висъяно эстӥськон но вӧй. Тылпуосты дыраз шараян понна, умойгес радъяно производственной объектъёсты, складъёсты возьманэз, котькытын мед луозы телефонъёс. Тылпуосты алон вылысь, толэзь ӵоже валэктон нуоно ужась коллективъёсын. Шудтэм учыръёсты палэнтонын юн кыл кутыны кулэ предприятиослэн, учреждениослэн, организациослэн кивалтӥсьёссы. Та постановлениея кутэм ужрадъёс сярысь ивортон туэ декабре кылзэмын луоз Удмурт Правительствоысь Тылпуосын нюръяськонъя комиссиезлэн кенешаз. "29 октябре драмая удмурт кун театр усьтэ 68-тӥ театральной сезонзэ Россия Федерациысь дано артистлэн, Удмурт Элькунысь калык артистлэн Пётр Михайлович Романовлэн 50 арес тырмонэзлы но Удмурт театрын 25 ар ӵоже ужамезлы сӥзем БЕНЕФИСЭНЫЗ. Кутске 18 часэ. Жингыртоно 78-79-81, 78-45-92 номеро телефонъёсъя". ХОККЕЙ Кутскизы вормонэн Туэ гужем "Ижсталь" командаысь трос гинэ хоккеистъёс палэнэ кошкизы. Озьы В. Маслов выжиз Санкт-Петербургысь СКА-е, В. Чинахов - Нижний Новгородысь "Торпедое", А. Вахрушев - Нижнекамскысь "Нефтехимике", О. Салтыков, А. Гараев но А. Фаткулли - Кирово-Чепецкысь "Олимпие", Д. Дмитриев но А. Посохин - Екатеринбургысь "Динамо- Энергие". Соос интые ӧтемын Пермьысь В. Ганжа, Глазовысь С. Душник, А. Романов, М. Кузнецов, Казаньысь Д. Грицай, И. Камаев но А. Петров, Нижнекамскысь Л. Кошкин, Тольяттиысь А. Корепанов. Хоккеистъёс пӧртэм интыосысь ке но лыктэмын, кылдытӥзы кужмо но ог-огзэс валась команда. Соинтэк-а "Ижсталь" али ортчись чемпионатын кыкетӥ интыын мынэ. Сое асьпалтэ Усть-Каменогорскысь "Торпедо". Ижъёс, ваньзэ-ӧвӧлзэ тямыс матчъёсы (3 но 4 октябре шудонъёсты но лыдэ басьтыса) пыриськыса, 4 пол вормизы, кык пол келязы, кык пол огкадь лыдъёсын люкиськизы. "Ижстальёс" "тушмонъёссылы" 21 гол пыртӥзы, нош асьсэ капкаязы 17 шайба лэзизы. 3 но 4 октябре "Ижсталь" пумиськылӥз Новоуральскысь "Кедрен". Кылем арын "Ижсталь" та командаен ньыль пол пумиськылӥз, ваньмаз вормиз. "Кедръёс" учкисьёслы тодмо луо правилоосты чаклатэк шудэменызы. Таяз матчъёсын но соос пӧртэмесь ӧй вал. Кылсярысь, ныраз клюшкаен шуккыса сӧсыртӥзы Петровез. Соин ик Александр матчын ӧз шуды ни. Пумиськонлэн нырысетӥ нуналаз "Ижстальысь" Холодков нырысетӥ гол пыртэ. Ижъёс шумпотонзылы оскыса но ӧз вуэ, "Кедрысь" Полухин, 50 секунд пала ортчыса, "Ижстальлэн" капкаяз шайба тюатӥз. Таяз нуналэ нокин но ӧз вормы - 1:1. Нош кыкетӥ пумиськонын "ижстальёс" вань кужымзэс сётӥзы но 5:3 лыдын утӥзы. Табере 11-12 октябре "Ижсталь" Кирово-Чепецкын "Олимпиен" пумиськоз, нош 21 но 22 октябре Нижний Тагилысь "Спутникен" нюръяськоз. А. НИКИТИН. Кылоз-а калыкез Президент? 7 октябре Россиын ортчиз туала Президентлэн политикаезлы пумитъяськон ужрад. Странаысьтымы 10 миллион пала калык, огкадь куронъёсынызы огазеяськыса, районъёслэн но городъёслэн урамъёстӥзы ортчизы. Президентлэн сизьым ар ӵоже кивалтэмез калыклэсь чиданзэ пумозяз тырмытӥз. Соин ик толон странаысьтымы 37 сюрс коллективъёс ужзэс огдырлы дугдытӥзы. Огъя та ужрадэ Россилэн 78 улосвылэз пыриськиз. Палэнэ ӧз кыльы асьме республикамы но. Удмуртиысь профсоюзъёслэн федерацизылэн Советэзлэн кивалтэмез улсын та ужрадэ 20 сюрс пала адями пыриськиз. "Президентэз кошкытоно!" - калыклэн таӵе валтӥсь политической куронэз та нуналэ туж лек чузъяськиз. Али ваньмыз валазы ни: Президентлэсь калыклы пумит чаклам реформаоссэ ӧд ке дугдыты, улонамы номыр уз воштӥськы - Правительстволэн ӟеч малпанъёсыз но быдэсмытэк кылёзы. Соин ик республикалэн кивалтӥсьёсыз пумитъяськон ужрадын калыкен ӵош вал. Та ужрад сярысь лыдӟыны луоз газетмылэн вуоно номерысьтыз. Т. БАННИКОВА. Соослэн сюрессы вожвыл Ӧсэ йыгаськем кылӥськиз. - Сантехник лыктӥз, усьтэ. - Лыктэм бере, эскерод ни-а мар-а. - ... Сантехник Артамоновлэсь бӧрсьысь бӧрсе кӧшкемыт йыруж лэсьтэмъёссэ ваньмыз тодазы возё на, луоз. Со гинэ таӵе кырыж сюрес вылэ сылтысал ке. Нуназе куазен ыбылӥськыны но уг кӧберало ни. Кылсярысь, вазенгес Ижевскысь мэрилэн юртэз палан куать мурт ыбемын вал, чиптэм-чаптэм ышиз Восточной рыноклэн директорез аслаз юрттӥсь шофёреныз... Нуналлы быдэ пӧртэм йыруж лэсьтон, эриктэман учыръёс ортчо. Та югыт дуннее адями улыны вордӥське. Нош мар улон луиз та? Оген улыны, ураметӥ поръяны уд дӥсьты ни табере. Улонмы умой адямиос вылын возиське, шуо. Вань йыружъёсты дыраз шараяны тыршо уголовной розыскын ужасьёс. Соос ас быръем сюрессэз юн гажало, иське, чидасалзы шат нуналаз 12 час ужаны? Со сяна, шутэтскон дырзы но туж ичи. Уголовной розыск. Ма со сыӵе, кин отын ужа? Таӵе но мукет юанъёслы валэктон сётэ Удмурт Республикаысь МВД-лэн Уголовной розыскъя управлениезлэн кивалтӥсез Рафис Расихович Каюмов. Нялтас пусъё на, та удысын ужасъёс толон асьсэлэсь праздниксэс ортчытӥзы. Россиысь уголовной розысклы тырмиз 80 ар. Та удысын туннэ тырше 400-лэсь трос офицер, 70 мында младшой уполномоченной, кисы сузясьёсын нюръяськонъя бадӟым группа кылдытэмын на. Та лыдпус трос кадь. Но... йыртэмасьёс соослэсь эшшо но уногес. Шаерысьтымы тросэз заводъёс уг ужало, йылэ ужтэк кылемъёслэн лыдзы. Озьы бере, эн возьма шулдыр улонэз. Сюмам кӧт уг юа адямилэсь мылкыдъёссэ, кӧс кылын но коллё вуэн уд пӧя сое. Адями амалтэк сьӧд уж лэсьтоно луэ. Тужгес но секыт югдур та ласянь Сарапулын. Городэз но пичигес, шыпытгес, пегӟон сюресъёсыз но артэ гинэ - чугун сюрес, асфальт сюрес, ву сюрес. Шумпотоно, уголовной розыскын ужасьёс ваньзэ лыдэ басьто но пӧртэм йыружъёсты дыраз шараяны тыршо. Уго усто "сыщикъёсыныз" Удмуртимы умой ласянь висъяське. Ортчем аръёсын ӵошатыса йылӥзы коркаез сузясьёс. Пиналъёсты ӵем гинэ алӥськом ке но, анай-атайзытэк ӧссэс нокинлы но медам усьтэ шуыса, уг визьмасько, лэся. Нош йыртэмасьёслы со гинэ кулэ. Йыразы маска изьыямъёс мӧйыосты но "кутчало". Озьы укмыс толэзь ӵоже йылэмын квартираосысь лушкаськисьёслэн лыдзы, нош урамъёсысь машинаосты ӧжытгес лушкамын. Ваньмызлы дунъёс будо, нош адямиослэн данэз, солэн дуныз кулэсме, шӧдске. Кӧня ке манет понна улэп лулэз юнме шорысь сопал дуннее но келяны быгатозы. Озьы куинь сюрс манет понна "Буммаш" АО-ысь кышномуртэ виизы. Лякыт сюлэмо кышномурт, эшсэ жаляса, кылем арын август толэзе пунэмен коньдон сётэм вылэн. Нош эшезлэн сое берыктэмез потымтэ ни, малпам, лэся, лушкемак сьӧд уж лэсьтоз но коньдонзэ берыктонэз уз луы ни. Вазьгес шумпотэм. Йыртэмасез со нуналэ ик ӝегатӥзы. Уголовной розыскын ужасьёс ӵемысь гинэ нюръяськоно луо пӧртэм пумо группаосын- бандаосын. Одӥгез сыӵе банда вылын лыдъяське ни вылэм 32 кулэм мурт. Новокузнецкой бандаез кутонын ужаз госавтоинспекцилэн кык экипажез. Кызьы вера уголовной розыскъя управленилэн кивалтӥсез, йырвандӥсьёс сыӵе ужъёслы дасяськемын ни вылэм тюрьмаын пукыкузы ик. Озьы Ижевскысь Ленин ёросысь кутэмын йыртэмасьёслэн группазы. Валтӥсь муртэз азьвыл тюрьмаын пукылэмын. - Тросэз улӥсьёс ӝожтӥсько тӥляд ужасьёстылы но, Рафис Расихович. Кызьы сое валэктысалды? - Бен, туннэ нуналлы пӧламы куд-ог дыръя пумиськыло на асьсэ сярысь гинэ сюлмаськисьёс, - шуэ Р. Каюмов. - Взятка басьтӥсьёслы пумит уголовной уж ӝутэмын Глазовын, пытсэт сьӧрын пуко Ижевскысь Ленин ёросысь "ӵужмуртъёс" но. Чем дыръя сыӵе курике сюро егитъёс но палэнысь (мукет республикаысь) вуэм ужасьёс. Берло дыре Удмурт кун университетысь юридической факльтетын котькин дышетскыны быгатэ. Соос пӧлын - бандитъёс но. Коньдонэн дышетскем адями ми понна специалист уг луы. Пӧртэм сюлмаськонъёссы асьсэлэн но уголовной розыскын ужасьёслэн. Шальтрамын ужан машинаоссы. Вить сотрудник понна одӥг машина луыны кулэ ке, Удмуртиын со дас мурт азьысь одӥг машина но ӧвӧл. Артысь улосвылъёсын, кылсярысь Татарстанын но Башкортостанын, ужан техниказы ӟечгес, выльгес. Соин ик татын йыртэмасьёслэсь ужзэс шараян умойгес радъямын. Шальтрам машинаосын кыдёке уд мыны. Ваньмыз сямен ик, Уголовной розыскын ужасьёс но дыраз уждун уг басьто. Нош ма кароно? Соос ноку уз потэ уж уретъянэ (забастовкае). Одӥгез коть шумпоттэ, секыт ужлэсь уг палэнско туала егитъёс. 19-21 аресъемъёс мылкыд каро уголовной розыскын ужаны. Туннэ нуналлы аппаратын 33 ужась тырме. Арлы быдэ тыршо асьсэ профессизыя быгатонлыксэс будэтыны. - Ми ум ужаське, ми йыртэмасьёсын нюръяськиськом, - серекъяса веранзэ йылпумъяз Рафис Каюмов. В. КУТУЗОВА. Кызьы бырйим, озьы ик улӥськом Огшоры ужась калыклэн кивалтӥсьёслы осконэз быремын. Соин валче олокыӵе но вераськонъёс пуромемын. Кин карга кивалтӥсез, кин депутатэз, тросэз президентэз тышкасько, ужысьтыз дырызлэсь вазь кошкыны косо. Адямиослэн йыркурзы, кӧтӝожзы тыл кадь ӟырдамын. Нош кинлы вералод мылкыддэ? Кивалтӥсьёс кылэм-адӟем но уг каро. Калыклэн куанермемез шоры учкытэк, соос нош но нош дунъёсыз будэто, уждун тыронэз, пенсиосты, пособиосты ӝегато, калыкез налогъёсын ӝокато. Озьы чиновникъёслы уката но вольыт сюрес усьтӥське кисыязы тросгес капыръяны. Мон малпамъя, таӵе шакрес улонлы асьмеос ик сюрес усьтӥськом кадь. Депутатэ бырйиськом вылӥысен ӵектэм адямиез, сое ум ке но тодӥське, тужгес но Россия Федерацие но асьме республикае. Ӵем дыръя быръён азьын депутат луыны мылкыд карисьёс, калык азьын ӟичы кадь кескич, чеберъяськыса, кильтыръяськыса чебер кылъёсын верасько. Монэ, пе, депутатэ бырйиды ке, мон тӥлесьтыд улон-вылондэс майбыр каро, пенсидэс, уждундэс будэто, дунъёсты но налогъёсты кулэсто. Таӵе кескич вераськонлы огдышем сямен тужгес ик мӧйы калык оске. Быръёнъёс дыръя соослэн сётэм куаразы депутатэ сюрыны юрттэ. Озьы луиз туала президентмес но мукет реформаторъёсты бырйыку но. Кылынызы соос котьку но калык понна "ужало", нош уж вылын дугдылытэк тӥяло Конституцилэсь куронъёссэ. Чиновникъёс уждунэз но пенсиосты ӝегатонэз огкылысь валэкто коньдонлэн ӧвӧлэныз. Нош со дыре ик кытысь коньдон шедьто коммерческой банкъёсты возьыны, кивалтӥсьёслы дасо сюрсъёсын дыраз уждун тырыны, кунгож сьӧры командировкаосы ветлыны, юбилейёс, праздникъёс ортчытъяны, дуноесь машинаос, коттеджъёс, квартираос басьяны? Таӵе кас сюлэмо адямиос ик лулысь-сюлмысь тыршо туала ужасьтэм президентэз возьыны. Президентиэз бырйыку, янгышазы пенсионеръёс но. Оскизы, вылды, чебересь алдаськон кылъёсызлы, улонэз бусьтыр, майбыр каро шуэмезлы. Туннэ умой-умой ас выламы шӧдӥськом, адӟиськом ини асьмелэсь быръем кивалтӥсьёсмес. Тани али нош ик долларен шудэм амал, трослы будӥзы дунъёс, озьы уждунлэн, пенсилэн быдӟалазы ӝынылы кулэсмиз. Мар бен шуод на: мае кизим, сое ик араськом. С. САВЕЛЬЕВ. Тодмо кылбурчиез Михаил Федотовез буре вайыса Ялон Михаил Федотовлэн эшъёсыз - писательёс, журналистъёс, суредасьёс, артистъёс, озьы ик вань мылкыд карисьёс кылбурчиез буре вайыны люкаськозы 12 октябре 17 часын Национальной библиотекаын. Син азе поттэмын луозы ваньмыз кылбур книгаосыз но поэт сярысь гожъямъёс. Пыр-поч тодматскыны луоз Михаил Федотовлэн берло потэм "Вирсэр. Пульс" книгаеныз. Татьяна Чернова Мон нош ик куарадэ кыло... Ярам ӧд кулы тон - бырид... Ярам, ӧд быры тон - кошкид... Ваньмыз одӥг Тон улонлэсь ӧссэ подӥд. Кема ветлӥд, онгромыса - Тыл пазьгиськиз юн кымысад. Шедьтӥд, шедьтӥд, дыр, валэктон Шуг юанлы ачид ик тон.., Дунне кылиз жӧломыса - Кошкиз, пе, кылбурчи Миша. Аслыд луиз, дыр, капчигес... Нош пилиськиз ук ин пыдэс Солэн азяз, кин ке тонэ Вордӥз, утиз но эркияз, Улон герддэ возиз кияз. Но со ӧз пертчы - тон ачид Сое кутӥд но коралтӥд... Быдэс дунне Анай азьын Туннэ янгыш кадь кылемын: Солы уг лу валэктэмез, Малы кошкиз мусо пиез... *** Гожтӥ - "ярам". Малы - "ярам"? Кинлы ярам та кыл пӧрам? Кулэтэмез но - кылбурам... Мон ветлысал нюлэскытӥ, Пеймыт, ӝокыт интыостӥ, Но тон ӝимид но мон шоры - Мынӥ, дыртӥ интыл доры: Сутӥз бурдме, ӵушказ куме, Валтӥз, оло, дунне пуме... ... Лопыртӥськиз дэрем сӧзул - Ортчиз пери кадь машина! Жаляд, вылды: тон ул ай, ул - Троссэ чидад - ӧд адӟы на Кобы тыр омыртэм шудэз. Тодад, пе, вай Ашальчидэс... Визьтэм, визьтэм вал мон азьло... Али пӧртэм ке шат оло? Мон мынӥсько тылси кузя... Нош йыр азям - юг кизили (Сое мыным тон сӥзьылӥд)... ... Кузьыт синкылиме ньыло. Мон нош ик куарадэ кыло Пеймыт гуысь яке вылысь - Чик сузёнтэм кемысь... 13.06.95. Лобӟо тӧдьы юсьёс 1986 арын Ижын (соку Устинов нимаське вал) творческой егитъёслэн семинарзы ортчиз. Уг тодӥськы, мар малпаса, дыр, Владимир Романов киям ӵыжак выль книга сётыса ӵектӥз вал: "Ас мылкыддэ шарая ай, Никол". Соку нырысьсэ тодматски мон Михаил Федотовлэн кылбуръёсыныз но асэныз авторен. Эсьмаса, гожтыса "Тӧдьы юсьёс берто" книгазэ но кузьмаз. Кылбурчилы соку 28 арес гинэ ай вал, нош со лыдӟисьёс доры ас книгаеныз лыктыны, кылбурет удысын выль юртсэ ӝутыны вутскиз ни. Паймытӥз монэ солэн чеберлыко гожъяськемез, выль образъёс шедьтэмез, утчаськемез. Та книгаез лыдӟыса, нырысьсэ кылӥ-валай "тӧлпо" кылэз. Малы ке тодам усиз Михаил Лермонтов, туж егитысен бырем ӟуч кылбурчи-классик, солэн пыраклы кылем "Парус" кылбурез. Нырысетӥ бесермян кылбурчи но уго асьме доры трос выль кылъёсты вуттӥз, вунонтэм кариз, кылбуръёсаз пыӵатыса кельтӥз. Нош паймымонэз азьпалан на вылэм. Михаил Федотов ӵемгес но ӵемгес кылбураны кутскиз вунылъёс, пӧртмаськись вужеръёс, кыкетӥ дуннеез - сьӧд дуннеез валан сярысь. Автор туж дӥсьтыса ужаны кутскиз асьме поэзиын чылкак исамтэ, эскерымтэ кӧшкеман, олокыӵе кышкытлык темаос бордын. Малы ке солэн кылбуръёсаз ӵемысь кузёяськыны кутскизы ӟардон но акшак вакытъёс. Тае мон гинэ ӧй синйылты, дыр, кожасько. Тани Виктор Шибанов но пусъе: "Уг тодӥськы, вань ни вал меда поэзиын (удмуртаз гинэ ӧвӧл) ӟардонлэсь пиштэмзэ таӵе данъясь поэт? Ма сылэ со буёл сьӧрын? Оло, удмурт калыклэсь сайкамзэ витён? Оло, инвислэн горд буёлэзлэсь пинал дырысен кышкан (соку Акшан кузёяське ни угось)? Вань, дыр, соиз но, таиз но". ("Кенеш" журнал, 4 номер, 1992 ар, 57 бам). Михаил Федотов ас кылбуръёсаз ӵемысь кутылӥз удмуртъёслэсь куинь бадӟым буёл тусъёссэс: горд, тӧдьы но сьӧд. Буёлъёсыз сямен ик, бадӟымесь вал солэн малпанъёсыз но, лыдӟисьёс азьын кыл кутыны сюлмаськонэз но. Кылбурчи тыршиз ас сюлэм вӧсьсэ шараяны, лыдӟисьёслэсь синъёссэс-адӟонлыксэс выль инвисозь паськытатыны. Одӥг гожтэтаз ивортэ: "Поэзиез дышоно валаны сюлэмен. Сборникме келяло туннэ ик, Коля. (Вераськон мынэ "Берекет" книга сярысь.- Н. Н.). Ма, со оломар ушъямон ӧвӧл. Огшоры книга, огшоры кылбуръёс, кудъёсыз тросэн потыло. Просто вераме потӥз сюлэмам люкаськем малпанъёсме. Уг лу ни вератэк - тӥни мар бордын ужпум, Коля. Соку искусственно гожъяськыны уг луы. Озьы дышы, ява. Кылбурдэ кылбур понна гинэ эн гожты". 3 май 1988 ар". Гожтэтъёсам паймыса но вожъяськыса пусйылӥсько вал солэсь удмурт кылбурет удысэ выль омыр пыртэмзэ. Паймылӥ пумтэм: "Малы тонэ уг куто на Союзэ?" Малы литературоведъёс уг эскеро, ӟеч-ӟеч дунъет уг сёто быдэс творчествоедлы?" Жаль, ачим но тросгес шуныт, ӟеч кылъёсме дыраз вераны, гожтыны беромылӥ. Нош кылбурчи ялан, нуналысь нуналэ тыршиз ас быгатонлыксэ, устолыксэ будэтыны. Ӝоген трос лыдӟисьёслэн яратоно кылбурчизы кариськиз. Федотов сак эскерыса улӥз мукет гожъясьёслэсь кызьы ужамзэс, кыӵе омырен шокамзэс но. Лычсузьымон шумпотыса вералоз вал Виктор Шибановлэн, Петр Захаровлэн, Рафит Минникузинлэн кылбуръёссы сярысь. Со дыре ик шугъяськылӥз но. Тани ма гожтэ 1990 арын 28 ноябре ыстэм гожтэтаз: "Ваньмыз-а яра аслад мар гожтэмед? Мыным уг: троссэ сэрпалтӥсько, гуре куштӥсько. Уть ай, кӧня дунне вылын лултэм поэтъёс. Маршак шуылӥз вал ук: "Стихи как будто бы стихи, да мало тяги". Михаил Федотов, эшъёсызлэн выль вырйылэ ӝутскемзылы шумпотэмен валче, юн куректылӥз бадӟым эшъёсмылэн улонысь вань кошкемзылы но. Уго ваньмылэн тодамы на вал творчествозы сяськаян вакытэ Флор Васильевез, Роман Валишинэз, Владимир Романовез кулон эзельлэн ӵашъемез. Соосыз малпаса но, дыр, Миша эшшо но кужмогес ужаны басьтӥськиз, соослэсь вераса, гожтыса вуымтэ чуръёссэс лыдӟисьёс доры вуттыны малпаз, дыр. "Тоды вал, эше,- гожтэ со 1989 арын 9 ноябре,- кыӵе мон курадӟи Володь (В. Романов - Н.Н.) кулэмысь. Самой матысь адями вал ук. Али но сюлэм бӧрдэ зар-зар. Шайгу вылаз мынӥсько но, йӧнгес луэ, соин вераськем кадь потӥсько". Михаил Федотов кылбурчиозь йыг-йыг ӝутскиз. Ум янгышалэ, дыр, туала удмурт поэзиысь яркыт кизилиен лыдъяса но. Тае шӧдыса-валаса ик, дыр, (мон кожасько, тужгес беромыса) кутӥзы сое Писательёслэн союзазы. 1988 арын солы нырысьсэ сётэмын вал Флор Васильев нимо премия. Мишалэн шумпотонэз мынам шумпотонэ но вал. Огезлэсь гинэ курдалляй. Укыр данъязы ке, йырзэ инмозь уз ӝуты меда? Уз-а лябӟыты кылбурет "биньгозызэ"? "Лауреат званиен ӟечкыламед понна - тау! - гожтэ со 1989 арын 26 июне.- Нош йырме ӝутон сярысь эн вераськы, тодӥськод, мон синазькыль карисько асьсэды олокин кожасьёсты". Михаил Федотов ас кылбуръёсаз шугъяськыса вералляз улонмылэн мыддоринскемез сярысь. Со валаны тырше вал улон вуберганлэсь мур кожъёссэ, солэсь шукыръяськон- бугыръяськон кужымзэ. Отын ук пуке солэн лирической героез - улэп адями! Тани-тани вуберган сое "ньылоз". Зэмос кылбурчи сое ваньзэ шӧдэ, отысь потыны сюрес утча, калыкезлы юрттыны выре. Кылбурчи но кылбуръёсыз - одӥг пушъет. Соосты люкыны уд быгаты. Ог-огзытэк пашмозы-куасьмозы. Солэсь "Кенешын" печатлам кылбуръёссэ лыдӟыса, Вениамин Ившин пусйиз вал: "Кижыл-выжыл кошкись сюресъёс, ӵук ӟардонэн но уй ӝомалэн тырмем мылкыдъёс - ваньмыз со авторез сюлэмшугъяськытэ, уйвӧтъёсаз гинэ но тэк улыны уг лэзьы. Та писатель берло дыре ӵемгес кутылэ "вӧсь" кылэз. Вӧсь - со улонысь ӟечез понна сюлэмез чылкытатыса но югдытыса вӧсяськон, вӧсь - со лулмылэн висьытӥсь кайгуэз но вӧсь луонэз. Федотов бордысь кылбуръёссэ люкыны но ассэ Федотовез кылбуръёсыз бордысь ишкалтыны малпад ке, улэп мугорез сӧсыртэм кадь луоз. Кылбур чуръёсаз автор ас пушкысьтыз адӟе кадь сюлэмзэ но, лулзэ, мугорзэ но, улон сюрессэ но. Михаил Федотовлэн кылбуръёсыз мон понна дуноесь луо сюлэмез чепыльтыны быгатэменызы. Соос тросэз герӟаськемын удмурт мифологиен. Автор мертэт табаос вылэ огӵош понэ адями но инкуазь, улон но кулон, вӧсь но сьӧлык темаосты. Кылбурчи мыным куддыр кыӵе ке но туно, азьпалзэ адӟыны-вераны быгатӥсь адями кадь потыны кутске. Угось куд-ог кылбуръёссэ лыдӟыса, сюлэм ик шымырске, юн-юн малпаськонэ вуиськод. Поэт тодэ кадь аслэсьтыз кызьы юг дуннее вордскемзэ но, пеймыт, сопал дуннее кошконзэ но. Басьтом "Ньыльпу" кылбурысьтыз чуръёсыз: Монэ вӧтатӥз вож ньылпу, Вордски кадь солэн саюлаз. Анай ки вылаз ӝутыку, Кырныж кесяськиз вай вылаз... Нош тани берло гожтэмъёсыз пӧлысь: Нош ватӥзы монэ сяськаосын. Шунды лэйказ сьӧд писпуос вискын. Бурдъяськыса усись горд куаръёсын Мон берпумзэ лобай шай нюлэскын... Йырсиос ик пежырско, ява! Кылбурчи ваньзэ тодэ, адӟе кадь. Кожалод, улон сюресэз берпуметӥ секундозь лыдъямын-чотамын. Нош мугор "сопал дуннее", лул - инэксэйлыке, юг дуннее кӧчизы ке но, адямилэн ӟеч ужъёсыз та дуннеын ик уло. Ас кузёзылэсь улонзэс азинто. Озьы асьме пӧлын ик улэ, ас кылбуръёсыз пыр вераське Михаил Федотов но. Ма, солы чылкак 40 арес гинэ ук на, ньыльдонэтӥ сӥзьылэз. Гожтэмме йылпумъясько матысь эшелы, Михаил Федотовлы сӥзем чуръёсыным. Уй инбамез ӟарыт югдытыса, Кесяськытэк Лобӟо тӧдьы юсьёс. Азьветлӥсьсы нуэ Кизилиез, Кудӥз кысӥз, югак! воректыса. Келяськисьёс Сыло ӝожомыса. Синкылиез уг лу туннэ кутэм. Кирень куректонэз пумитаса, Аслам потэ кион сямен вузэм. Лобӟе уллё, Дырто юсь-кылчинъёс. Туж улӥе кыле Сьӧд, сьӧлыко Музъем. Чылкыт лулысь Тӧлӟо люкам ӝожъёс, Сылмо соос, Чайысь сакыр музэн. Инэксэйлык кузё Усьтэ ни ӧсъёссэ, Кылбурчилэсь лулзэ пумитаса. Шыпыт гинэ Лыдӟе дасям вӧсьсэ, Узьмагх садэ инты возьматыса. Лобӟо юсьёс... ________________________ х Узьмаг - рай. Николай НИКИФОРОВ. Нош ик "вордско" машинаос Удмурт Правительстволэн Кивалтӥсез Павел Вершинин но солэн нырысетӥ воштӥсез Владимир Злобин Ижысь автомашина лэсьтӥсьёс доры вуылӥзы. Пумиськонэ ветлӥзы заводысь кузёос, цехъёслэн начальникъёссы, предприятиысь профсоюзъёслэн кивалтӥсьёссы. Вераськон мынӥз кызьы ке автозаводэз, озьы ик быдэс "Ижмашез" пыд йылаз султытон пумысен. Котьма ке но, азьвыл данъяськон заводмы пумен "улӟе", шуыны луоз. Йылэ машинаосты бичан лыдпус но. Тани туэ январе-апреле конвейерысь 600 машина гинэ васькиз ке вал, укмыс толэзьскын та лыдпус 6325-ёзь вуиз. Октябре но ноябре чаклало быдэн 3 сюрс автомобиль поттыны. Зэм, "висись" заводлы ӝутскыны капчи ӧвӧл. Азьвыл "Москвичмес" быдэс Совето Союз бичаны юрттылӥз ке, табере уноез кусыпъёс чиптэм-чаптэм, оло нош пыраклы но ыштэмын ни. Соин ик оскиськоно луэ матысь эшъёсыдлы гинэ. Но соослы но оскон сокем ик бадӟым вылымтэ. Тани али гинэ пластмасса поттон заводлэн янгышеныз, бичаны уг луы 800 машинаез. Сётэм кылзэс уг быдэсто Ижысь механической, Воткинскысь машиностроительной заводъёс. Но со дыре ик автозавод умоесь кусыпъёс тупатӥз Уфаысь моторъёс лэсьтон предприятиен но ВАЗ-эн. Машина лэсьтӥсьёслы уждун тырон ӝега 13 толэзьлы. Кызьы сое берыктоно? Секыт югдур кылдэмын нылпиослы пособиос тырон ласянь но. Ма кароно таӵе дыре? Та юанъёслы валэктонъёс утчаны тыршизы Правительствоысь кивалтӥсьёс но, заводлэн кузёосыз но, пумиськонэ лыктэмъёс но. Огъя кыл шедьтэмын кадь. Юанъёс трос вал. Но люкаськемъёс огкылэ вуизы: автомобиль поттон йылӥз ке, ваньмыз интыяз пуксёз. Соку луоз уждун но, уксё вуоз республикалэн бюджетаз но. Автозавод пумысен кенешонъёс Правительствоын ортчозы матысь нуналъёсы но. Н. БАЙТЕРЯКОВ. Нош кошкиз Нош ачизъя Михаилъя мон тодско - со ноку нокинлы но пумит пияз изъёс ӧз нуллы. Адӟеме ӧвӧл кинэ ке ултӥяса керетэмзэ. Ӧвӧл. Шырыт сюлмо, капчи мылкыдо но дыртыса мае ке мадись - сыӵе тусын али но адскылэ Михаил мынам вӧтъёсам. Марлы Миша улонысь дырызлэсь вазь кошконо луиз? Али но уг валаськы, валаме но уг поты. Но берло аръёсаз солэн синъёсыз пень тусоесь луизы, ас дуннеязгес кариськиз. Пушказ маиз ке чигиз, оло? Чигиз но, дыр. Вань сюлэм марӟанъёссэ со калыклы пазяса ортчиз. Оло, марӟанъёсыз-а быризы? Шуо: кыӵе калык, сыӵе ик кивалтӥсьёсыз но. Нош мон со веранэз тазьы музонтысал - кыӵе калык, сыӵе ик солэн поэтъёсыз но. Угось Миша зэмос калык кылбурчи вал. Калыклэсь вирсэрзэ сак шӧдӥсь. Калык понна улӥсь но солы гинэ гожъясь. Верасько на: Миша пуш дуннеезлэн туж чырмыт пограничникез вал. Ӧз дыртылы сюлэм кайгуоссэ киськаса ветлыны. Солы уг луы вал юрттыны. Поезд сямен, ас чугун сюрестӥз мынӥз, нош со чугун сюресэзлэн пумыз адске ни вылэм. Палэнэ уг уг кожылы дыртӥсь поезд. Со мынэ инъям сюресъя, вылысь Инмарлэн гожтэм-пусъем расписаниезъя. ... Огпол пукисько Москваын туж но туж мӧзмыт мылкыдын. Толэзьлэсь ятырзэ ини дышетскисько вал со вие Литературной институтын. Комнатаын буш, кисыосын но. Асме жаляса, синву ик потэ, ява. Гуртлэсь мӧзмыны кутскиськиз. Мылкыд - люкмесэ тэтчымон. Ӵап со вие ӧсэ йыгаськись луиз. Усьтӥсько - Миша?! Соку ик пыриз но жингрес вазиз: - Слушай, тынад венед-сӥньысэд ӧвӧл-а? Оло, чёрт со метрозы... Штан сӧзыез ӟезьыны шедьтӥ... Ура! Кыл ӧй шедьты ни мон шумпотонме вераны. Эш вуиз кулэ дыръяз, вылаз ик - Муское (Миша командировкае, книга поттӥсьёслэн кыӵе ке ужрадазы, лыктэм вылэм). ... Али но, та шумприч улон вакытлэн секыт нуналъёсаз, мон малпасько - эх! Йыгаськы вал со али ӧсам. Мон мынысал но юасал: - Кин отын? - Мон та, бесерман, - шуысал со. - Пыр, пыр, эше - мусурман, - ӟыгыртыса кизэ кырмысал мон солэсь. ... 36 ар эшъяським ми Мишаен. Куспамы ог-огмес валамтэ вакытъёс но вал ке но, сьӧд коӵыш вискытӥмы ноку ӧз пота. Ӧм лэзьылэ. Тау карисько Кылдытӥсьлы дуннее таӵе адямиез лэзьямез понна. Ӟеч кылбурчиез, сюлмо атаез, яратӥсь картэз но котьку валаны-юрттыны тыршись Эшез. Оскеме потэ вылэм - Мишаез улэп дыръяз валамтэ адямиос но, йырсиоссы усемъя, ымныразы кисыриос вӧлмемъя, сое валаны кутскозы шуыса. Нош мар карод - эбекъёсты уд дышеты тюрагай сямен гурланы. Озьы-а, Миша?.. Вячеслав Ар-Серги. КУН КЕНЕШЛЭН СЕССИЯЗ Сизьым пол мерта Кылем вторнике ужзэ мытӥз Удмурт Республикаысь Кун Кенешлэн 22-тӥ сессиез. Депутатъёс азе эскерыны поттэмын куамын пала ужпумъёс но законлы инъетъёс. Ваньмыз соос герӟаськемын республикалэсь экономиказэ юнматонэн. Пусйыны кулэ: нырысетӥ нуналаз ик депутатъёс умой-умой кутскизы азязы пуктэм ужпумъёсты сэрттон-пертчон борды. Сётэмын трос дэмланъёс но ватсанъёс, ужан дырез юнме шорысь "нуйтыны" вырисьёс ӧй вал. Эскеремын Удмурт Республикалэн 1998-2000 аръёслы чаклам социально-экономической азинсконъя программаезлэн инъетэз. Соин тодматӥз экономикая министр Евгений Аверьянов. Программа огъя умоен лыдъямын, кинлэн луозы на ватсанъёсыз, 15 октябрёзь сётыны куремын Кун Кенешлэн Экономикая, политикая но бюджетъя ялан ужась комиссияз. Сессия туннэ учкиз на "Удмурт Республикаысь Кун Кенеше деутатъёсты быръён сярысь" Законлэсь инъетсэ. Быръёнъёс ортчозы вуоно арын март толэзе 100 избирательной округъя. Депутатэ кандидатэз ӵектыку, солэн улон интыез санэ уз басьтӥськы, но закон юн чаклалоз альтернатива амалэн быръёнэз. Мукет сямен вераса, котькуд округъя депутатлэн мандатэз понна нюръяськонэ пыриськыны кулэ кӧня ке мурт, одӥг гинэ ке луиз, быръёнъёс ортчемен уз лыдъяське. Избирательной участокъёс та нуналэ ужалозы 8 часысен 20 часозь. Депутат луон понна, кандидатлы самой ӧжытсэ 25 процент куара люкано. Быръёнъя законлэн инъетэз юнматэмын, отчы тупатъянъёс пыртыны луоз на озьы ик 15 октябрёзь. Вузкаронын выт тыронъя вераськон ӧз пӧрмы. Депутатъёс пусъемъя, та законлэн куронъёсыз федеральноезлэсь висъясько но республикаын улӥсьёслы номыр ӟечсэ уг сёто. Кылсярысь, Россия Федерацилэн законэзъя адямилы самой кулэ луись сиён-юонэз вузанын налог басьтӥськыны кулэ ӧвӧл, нош асьмелэн макаронлы, сӥльлы, мукетызлы но выт тырон тупатэмын. Та законэз кутонлы чутрак пумит луизы депутатъёс Геннадий Колесников, Даниил Белоголовкин, Владимир Новокрещенов но мукетъёсыз. Новокрещенов шуиз: - Законлы инъет дасясьёс ӧз чаклалэ вузъёслэсь олокӧня пумо посредникъёс пыр рыноке вуэмзэс, озьы бере, туннэ вераны уг быгато кӧня поллы вузлэсь дуноямзэ. Мон лыдъясько: кудӟытӥсь юонъёсты сяна, мукет сиён-юонэз выт тыронлэсь мозмытоно. Депутатъёслы Россилэн Президентэзлэсь выт тыронъя политиказэ валэктыны тыршиз Правительстволэн Тӧроез Павел Вершинин: -Та законэз Удмуртия ӧз малпа, со юнматэмын Президентэн. Россиын вузкаронысь выт тыронлэн быдӟалаез 5 процент, асьме дорын - ӧжытгес. Куд-ог регионъёс, кылсярысь Мордовия, Татарстан, та законэз кутонын азьпалскизы но бюджетазы ватсаса коньдон пырто ни. Озьы ке но, депутатъёс вылӥ верам законлы инъетэз юнматыны пумит луизы, сое эскерон бӧрысьлы кельтэмын. Сизьым пол мерта - одӥг пол ванды шуэмъя депутатъёс дыртытэк, лад-лад эскеро законлэсь котькуд люкетсэ. Со озьы ик луыны кулэ. Угось малпаськытэк кутэм решение, кӧня ке дыр ортчыса, калыклы пумит ик берытскоз. Асьмелэн сыӵеез одӥг пол гинэ ӧй вал ни. Трос юанъёс сётэмын "Улон инты" целевой программая. Правительствоен висъям кредитэз районъёс ӝегатскытэк уже кутӥзы, юртъер пуктӥсьёслы люкылӥзы. Чылкак мукет югдур городъя. Бюджет удысын ужасьёс: дышетӥсьёс, врачъёс, висъям коньдонлы номыр басьтыны ӧз быгатэ, малы ке шуоно, соослэн уждунзыя сётэм уксё 1 комнаталы но ӧз тырмы. Та законъя вераськон сессиын мыноз на. 7 октябре солэн ужаз, пумитъяськон ужрад ортчемен, вис ялэмын вал. Туннэ, 8 октябре, Кун Кенешлэн 22-тӥ сессиез ужзэ азинтэ. Л. МЕДВЕДЕВА. ...Нош кошкиз со чебер нуналэ... Туэ, 7-тӥ октябре, тодмо бесерман но удмурт кылбурчи Михаил Федотов пусйысал ньыльдон арессэ. Нош тани куинь арлэсь ятыр ини со асьмемын ӵош ӧвӧл. Лулыз буйгаса берпуметӥ интызэ шедьтӥз вордскем Яр районысьтыз Вортча гуртлэн шайвылаз. Бен, та дуннеын 37 ар улэм огвисаз Михаил Федотов малпамъёсыз-чакламъёсыз пӧлысь троссэ, оло, быдэстыны ӧз вуы.Аслаз тыл вылаз ӝуаса усиз со пыдэстэм ӝужыт инмысьтыз, кизили сямен. Усись кизилиез адӟисьёс, оло, вуизы ик кыӵе ке малпанзэс чӧлтыны. ... Тодматским ми соин 1979-тӥ арын Удмурт университетлэн вуж общежитиезлэн огаз комнатаяз, филфаклэн куинетӥ этажаз. Улэп азвесь кадь дыртӥсь, дырын-дырын гор-гор серекъясь, шоро-кусполэсь ӝужытгес, сӥльвиро пияш синме соку ик йӧтӥз. Ми, нырысетӥ курсэ дышетскыны пырем муртъёс, синъёсмес ик вошъятэк кылзӥськом вал Мишалэсь, ньылетӥ курсэ потэм адямилэсь, юмоко историоссэ. Вылаз ик, Миша туш нуллэ вал со вие. Зэмос студент одно ик тушо луыны кулэ - сыӵе малпан улэ вал со вакытъёсы. Тодэ лыктэ на: мукет студентъёслэсь, болонь курткаос нуллӥсьёслэсь, Миша висъяське на вал югыт но ӝикыт плащеныз, брюкиосыз вылаз ӝот-ӝот утюгамын луо вал. "Интелегент",- лулскылӥм ми, гуртысь али гинэ лыктэмъёс. Зэм но, Миша Федотовез мон ноку но уг тодӥськы посэм, кырсь дӥсен. Со котьку чакла вал ассэ. Дунтэм гинэ дӥсез но быгатэ вал туж аспӧртэмлыко карыны. Угось со мугор понна ӧз бича дӥсь. Ӧз. Дӥсь уката но адскымонгес карылӥз сое ассэ. Нырысь ик - син азе котьку йӧтэ вал со ачиз. Пеймыталэс синъёсыз ялан кытӥ ке "лобало" вал, мае ке утчало. Вераськоно мурт шоры дырын-дырын гинэ лэчытак шуныт учкылӥз, собере синъёссэ соку ик воштылӥз. Мае адӟылӥз, мае утчаз? Ӧйтӧд. Мынам улонам вань сӥё- дано, пусйымон учыръёс со 1979-тӥ арысен ортчылӥзы Мишаен артэ. Литература котыртӥ студент вакытэ берганъёс... Володя Романов поэтэн тодматскон но солы матэтскон. 1984-тӥ арысен монэ басьтӥзы Туркестанэ - армиын службаме нуыны. Трос адямиос лыктӥллям келяны монэ Каӟмас гуртам. Уката ик - валлян гинэ мон кышнояськи вал. "Мар ке но Миша уг лыкты",- шуак чилектӥз йырам. Соку кылбурчи ужа вал "Удмуртия" издательствоын. Шуак гинэ, кин ке косэм кадь, укное утялак учки но абдрай - азбартӥ, паллян пельпумзэ зур карылыса, Миша дыртэ. "Ӧз вунэты ведь, лешак",- сюлмам шуныт луиз. Армие но со быдэс кварталлы одӥг гинэ гожтэт лэзьяз кадь. Гожтэтъёсыз вакчиесь гинэ вал: служебной запискаос кадь. Ог ӝыны бамъемесь, дыр. Но соос мылкыдэз ӝутыло вал, "гражданской" улонлы осконъёс пыртыло. Миша бадӟым но аспӧртэмлыко поэт вал. Нош мон ноку но нокытын солэсь кагаз вылын курадӟемзэ ӧй адӟылы. Семьяосыз но, дыр. - Микаль, ма, ку-о тон гожъяськиськод? - ёртылӥ мон сое. - Чёрт тодэ! - серекъяса шонскылӥз со. ... Туннэ мон уг тодӥськы кылэз Миша кадь шӧдӥсь но солэсь крезьгурзэ инъяны быгатӥсь поэтэз. Пӧйшур сямен, нырыныз, оло, шедьтылӥз Михаил Федотов кылбур дуннеысь лёгамтэ сюресъёсты но соосты аслыз карылӥз. Солы, мон сямен, юрттылӥз котькуд адямиен быгатыса вераськемез, сое валаны тыршемез. Мон уг тодскы, улытозяз Миша кинэн ке пуныен-коӵышен кадь улӥз шуыса. Нош адями воксё ас вактаз ке, сыӵе муртлэсь палэнскылӥз гинэ. Эбекез, пе, уд дышеты тюрагай сямен гурланы. Михаил Федотов одӥг кадь капчиен огкыл шедьтылӥз кивалтӥсьёсын но, ураметӥ огшоры ортчись адямиен но. Но мае вераны кулэ - кивалтӥсьёс котыртӥ Михаил ноку но гужласа ӧз улы. Шонергес луоз, соослэсь палэнскылӥз шуыса верад ке. Кыӵе ӧретӥ гожъяськылӥз Михаил Федотов? Визьмо исследовательёс али шуыло: солэн кылбуретаз валтӥсь ӧрез этнофутуризм вал. Озьы но, дыр. Этнос - калык, футура - солэн азьлапалыз, вуоноез. Удмурт поэзие Михаил Федотов вӧл-вӧл пыртӥз бесерман муртлэсь шокамзэ, солэсь шумпотон куаразэ но бӧрдон синвузэ. Нош малпаськылӥз меда ачиз Федотов со "этнофутуризм" шуонъёс сярысь? Тодӥз, конечно. Но гожъяськыкуз со, мон сямен, одӥг тулкым вылын гинэ возиськиз - "федотовизм" нимоез вылын. Сыӵе со - аспӧртэмлыко но номырин ӵошатонтэм-воштонтэм кылбурчи вал. Михаил Федотов ворсаз удмурт литератураын соцреализмлы пумит сылӥсь оппозицилэсь радъёссэ. Озьы косъяськиз ортчись Дыр. Федотов ноку ӧй вал нокыӵе партиосын но, трос пол ёртылӥзы ке но. Солэн геройёсыз котьку вал асьмемын артэ улӥсь адямиос. Асьмеос кадь ик - куддыр нодтэмесь но мискинесь. Озьы ке но, инме лобыны вылысь, тыбыр сьӧразы пезьгыт бурдъёссэс шӧдӥсесь. Ас пуш дуннеяз Михаил, мон сямен, нокинэ но ӧз лэзья. Солы уг луы вал номырин юрттыны но, нокыӵе визь-кенеш нерге но сётыны. Солэн кылбур дуннеезлэн ёзъёсыз жин анданлэсь кисьтэмын вал. Нош андан уг куасалскы, чиге гинэ, сое мултэс пачкатыса... Али кылӥськыло таӵе куараос: - Я, мар солы уг тырмы вал? Семьяез ӟеч, кышноез умой. Улонтӥез вань, книгаосыз пото... Дан поттыса улӥз ойдо... Нош сыӵе дыръя мон шуылӥсько: - Ма, кыӵе адями зэмос поэт луоз, дан ке ӧз потты? Угось Мишалэн одӥг гинэ дан поттонэз вал - удмурт литература, солы матысь мурт луон. Нош со малпанэз "визьмо" вераськись адямиос ноку но уз валалэ. Озьы ик, кызьы уг быгато соос сузмытэм, сялам но курлам, озьы ке но, Шунды шоры кепыратэк учкись удмурт литературамес но шӧдыны-валаны. Мыло-кыдо дышетскозы Кылем толэзьлэн пумаз Уваысь педучилищелэсь ужамзэ эскериз Калыкез дышетонъя министерстволэн комиссиез. Училищелы со вылӥ дунъет сётӥз. Угось татысь педколлектив коньдон ӧвӧл шуыса тэк ӧз пукы гужемзэ, шуг-секытъёсты вормыны амалъёс, луонлыкъёс утчаз. Талы луыса тупатъямын спортзаллэн липетэз, выжез, буямын борддоръёсыз. Общежитие но тупатъямын. Али отын югыт, вӧлмыт, чылкыт. Уваысь педучилище туала улонлэн куронъёсызлэсь бере уг кыльы. Тани туэ татын усьтӥськизы туризмъя но краеведениея факультетъёс. Татын дышетскисьёс пӧлысь ӝыныез - пиос. Озьыен, табере асьсэлэн кортӵог шуккисьёссы вань. Е. ПЕТРОВА. Нырысетӥ интыын "Удмурт дунне" Удмурт кылын потӥсь газетъёсты но журналъёсты Пичи Пурга палан яратыса басьто. Кызьы шуиз Ильинскысь почталэн кивалтӥсез Галина Ильинична Степанова вуоно арлы гожтӥськемъёс пӧлын нырысетӥ интыын, миым сямен ик, - "Удмурт дунне". Али со вуэ 145 семьяе. Туннэ нуналлы гожтӥськемын ни ог 100 мурт. - Почтальонъёсмы коркась корка ветло, гожтӥськонлы сӥзем арня ӵоже ваньмаз ик 5 гуртэ вутским. Малпасько: кылем арынлэсь ӧжыт ум басьтэ, - оскон мылкыдзэ вера Галина Ильинична. Озьы ик медло. Кылем арын газетмылэн самой дуно кузьымез - ошпи, кылиз уго Ильинск сельсоветэ пырӥсь Арлан гуртэ. Л. ДМИТРИЕВА. Туспуктэмез Владимир КАМАШЕВЛЭН. Улоно! 4-тӥ октябре "Капик" театральной агентство выльысь усьтӥз ӧсъёссэ. Таяз учыре возьматӥз Сергей Коротковлэсь "Всё врут календари" спектакльзэ. Драмая В. Г. Короленко нимо Ӟуч кун театрлэн куноосыз луизы Россиысь калык артистъёс Лидия Федосеева-Шукшина но Анатолий Ромашин. Та адямиос асьмелы тодмо трос фильмъёсъя. Спектакльын возьматэмын бадӟым яратон. Аръёс ортчыса но нокыӵе шуг-секытъёслы, кайгуослы сётӥськытэк, гома но гома со. Кышномурт пиосмуртэ котьку валалоз, таиз пумозяз чидаз ке. Уильям Шекспирлэн геройёсызлэн монологъёссы вошъясько Александр Грибоедовлэн "Горе от ума" пьесаысьтыз Чацкийлэн монологъёсыныз... Арлыдо актёръёс мӧзмыса тодазы ваё ортчемзэ. Вакыт секыт ке но, улоно! * Лидия ФЕДОСЕЕВА-ШУКШИНА но Анатолий РОМАШИН. Суредаз Леонид ПРОЗОРОВ. Бугро но ӵупо Чурысь лесничество Якшур-Бодья районын самой бадӟымез луэ. Нюлэс дасям сяна, отын мукет но ужъёсты быдэсъяло. Туж бадӟым саклык висъяло выль нюлэс будэтонлы. Та вакытэ питомниксы 10 гектар вылэ интыяськемын. Отын гужем уно дышетскисьёс но быдэ вуымтэос ужало. Нюлэсчиослы бадӟым барыш сётэ бугроос ӵупон. Алигес гинэ отын Москваысь 60 сюрс манет тыр нимысьтыз заказэз быдэстӥзы. Странамылэн шоркараз чеберъяса лэсьтэм куинь этажен бугро келямын. П. СОЛОВЬЕВ. Пиналъёсты шумпоттӥзы Сарапулысь нылпиослэн шор экологической библиотеказы выль юртэ выжиз. Табере солэн огъя быдӟалаез сизьым сю дас квадратной метрозь будӥз. Озьыен, интыос тырмыт книга возьыны но, лыдӟисьёсты-куноосты пумитаны но. Н. МАКСИМОВА. ДЕПУТАТЭН КЕНЕШОН Оскон - калыклы Н. И. Сапожников, Россия Федерациысь Кун Думалэн депутатэз, Россиысь Коммунистической партилэн Удмуртиысь ёзэзлэн нырысетӥ секретарез ӵем вуылэ Ижевске, пумиськылэ бырйисьёсыныз, пӧртэм адямиосын. Али но, калык шуге-леке вуон вакытэ, Николай Иванович бадӟым валэктон уж нуэ. Нимысьтыз вераськон ортчиз журналистъёсын, котькуд юанлы пыр-поч валэктон сётэмын. Данакез соос герӟаськемын Россиын Правительство воштӥськемен, 17 августэ кутскем социально-экономической кризисэн, Борис Ельцинэз дырызлэсь вазь Президентысь мозмытонэн. Кун Думалэн ужаз коммунистъёслэн фракцизы (130 мурт) шӧдскымон инты басьтэ. Соос нюръяськемен премьер-министрысь палэнтэмын вал Черномырдин но быръемын Примаков. Коммунистъёс нырысь ик дурбасьтӥзы профсоюзъёслэн 7 октябре быдэс Россиын акция ортчытонзылы. Мылысь-кыдысь пыриськизы сое дасянэ. - Николай Иванович, кыӵе дунъет сётӥськоды Кириенколэн ужамезлы? - Политикаез умой-умой валасьёс соку ик веразы: кабинетэз сӥзьылозь сяна уз возиськы, куашкалоз. Верамзы зэмаз - сӥзьылозь но ӧз чида. Примаковлэн но властез кемалы ӧвӧл, Россиыс югдурез огдырлы тупатытозь гинэ. Отӥяз вуыны кулэ калык пала дурбасьтӥсь кужымъёс, экономикаез, улон-вылонэз умой пала воштыны быгатӥсь политикъёс. Партилэн Центральной комитетэзлэн пленумаз ми верам: Кириенколэн ужамезлы дунъет сётыны луоз соку гинэ, ку киямы вуоз солэн кабинетэзлэн программаез, ньылетӥ кварталлы но вуоно арлы азьвыл чакламтэ (чрезвычайной) бюджет. - Туннэ ортчись всероссийской политической стачкалэн валтӥсь куронэз - Россилэсь курссэ воштон но Ельцинэз отставкае поттон. Кун Дума та ужпумез быдэстыны быгатоз-а? - Президентэз властьлэсь дырызлэсь вазь мозмытон понна, 450 депутат пӧлысь 300-эз куаразэ сётыны кулэ. Ельцинлы пумит вить пумо пуктэм куронъя голосование ортчытонлы Кун Дума али дась ӧвӧл на. Чечнялы пумит война ӝутэм понна янгыш луэ Президент, та веранэн соглаш кариськоз, мон малпамъя ог 300 депутат. Тросэз асьсэос нӧдэмын та кырсь уже, соин ик ваньзэ лэсьтозы, ӝутоно ужпумез исантэм вылысь. Озьы ик шуыны луоз СССР-ез куашкатонэ пыриськемъёсъя. - Туала Президентэз мозмытыса, со интые кинэ пуктыны дэмласалды? - Калык пала, Россия пала дурбасьтӥсьёслэн кандидатсы сояз быръёнъёсын вал Геннадий Андреевич Зюганов, мукетсэ нокинэ ум ӵектӥське. Юалляськемъёс пӧлысь со понна куаразэс сётыны дась 21-26 процентэз бырйисьёс. - Кызьы учкиськоды СССР-ез берыктон шоры? Белоруссилэн Россия Федерациысь регионъёсын кусып тупатэмез бадӟым огазеяськонлэн кутсконэз уз луы-а? - ЦЦЦР-ез кылдытон потоз Россилэн быръем сюресэз бордысь. Белоруссия сярысь ке верано, со мыло-кыдо ужа ыштэм экономической кусыпъёсты выльдон бордын. Республика котыр ласянь азинске, калыксэ возьыны тырше. - Кызьы дунъяськоды Александр Лукашенколэсь политиказэ? - Белорусъёс сое туж гажало, Белоруссилэн палэназ, Кавказысен но кылӥ Президентсы сярысь умой кылъёсты гинэ. "Гордъёс" пӧлы мон Лукашенкоез ӧй пыртысал, куд-огез сыӵе буёлэн ке но сое "пӧръяны" выре. "Советская Россия" газетын алигес печатламын вал Россиысь валтӥсь политикъёсъя юалляськонлы лэсьтэм йылпумъянъёс. Соос пӧлы пуктэмын вал Лукашенко но. Бускель государстволэн Президентэз потӥз 2-тӥ интые. Со ик асьмелэнъёсызлэн сюлмазы йӧтӥз: регионъёсын ӵошатыса, Москва туж ик уг дырты Белоруссиен кусыпъёс тупатыны. Мон верасько аслэсьтым малпанме. Нош Лукашенколэсь Россиен ӵош ужаны тыршемзэ умоен лыдъясько. - Николай Иванович, ватонэз ӧвӧл: калык жадиз ни Россилэн туала кивалтӥсьёсызлэсь, тросэз оско коммунистъёслы гинэ. Тӥ дась-а властез кияды кутыны? - Ми дась мукет курсэ выжонэз Конституцилэн куронъёсызъя ортчытыны, вераськон мынэ асьме республика сярысь но. Нош властез коммунистъёс киязы кутозы шуыны вазь на, малы ке шуоно, Кун Кенеше быръем 100 депутат пӧлысь 20 процентэз гинэ - коммунистъёс. Ми азямы ужпум пуктӥськом вуоно быръёнъёсын Россиысь Кун Думаын но Удмуртиысь Кун Кенешын тросгес инты басьтыны но властез киямы кутыны. Со сярысь вераськон мынӥз коммунистъёслэн берло ортчем пленумазы но. - Ельцинлэн властез син азьын куашка, Президент интые кивалто мукет адямиос. Соос трос лэсьтӥзы ни Россиез куашкатон понна. Та ласянь тӥляд кыӵе малпанды? - Меӵак верано ке, Ельцин туннэ - гуртаз ужась президент, мукет сямен - надомник. Дуннелэсь со быдэсак люкемын броня сьӧры. Мон уг малпаськы, Президентмы Кириенколэн кабинетэныз ӵош странаез юри куашкатонъя программа дасяз вал шуыса. Но кин ке но туж быгатыса уже кутӥз егит политиклэсь ушъяськон но лӧптылон сямзэ: со вань юанъёслы валэктон "тодэ" вал. Примаков - мукет адями. Одӥг ужпумъя но соку ик "мон тодӥсько, мон лэсьто" уз шуы. Решение кутэмезлэсь азьло кенешоз тодӥсь-валась адямиосын. Коммунистъёслэн огазеяськонзы али ужа Россиын приватизация ортчытэмлы лэсьтэм йылпумъянъёсты сэрттон-пертчон бордын. Туж трос валантэмез Москвалэн мэрез Юрий Лужков но одӥг пол гинэ та юан борды ӧз берытскылы ни: пумыз-йылыз озьы ик ӧз шедьы. Кытчы кошкемын сомында коньдон? Малы со экономикаез юнматон вылын пичи но ӧз шӧдӥськы? Удмуртиын но югдур валантэм. Правительствое быръем муртъёслэсь кылзэс юаны кулэ, оло, куд-огзэ ужысьтыз но мозмытоно. - Николай Иванович, мылкыдды ӧвӧл-а вуоно быръёнъёсын Кун Кенеше депутатэ кандидат луыны. - Законъя одӥг вакытэ Кун Думаын но Кун Кенешын депутат луыны уг луы. Ма шуозы бырйисьёсы. Соослэн мылкыдзы мон понна - Закон. ЛЮДМИЛА МЕДВЕДЕВА. Огкылъёс кутозы 8-тӥ октябрьысен 10-тӥ октябрёзь Ижын ортчоз Культурая но искусствоя "Бадӟым Урал" координационной кенешлэн ВИИ ӧтчамез. Солэн ужаз пыриськозы Россиысь укмыс улосвылысь - Башкортостан Республикаысь, Удмурт Элькунысь, Курган, Оренбург, Пермь, Свердловск, Тюмень, Челябинск улосъёсысь, Коми-Пермяк автономной округысь - культурая министръёс но культурая но искусствоя комитетъёслэн но департаментъёслэн тӧрооссы. 9-тӥ октябре Национальной библиотекае люкаськылоз координационной кенеш. Отын эскерозы таӵе ужпумъёс: Урал улосвылысь музейёсты но музей фондъёсты утён но азинтон, Бадӟым Уралысь республикаослэн но улосъёслэн Россия Федерациысь Культурая министерствоен валче ужанзы сярысь огкыллэсь проектсэ кутон, мунё театръёслэн Урал улосын ортчем фестивальлы йылпумъянъёс лэсьтон, Уралысь мунё татръёслэн директоръёссылэсь кенешонэз, координационной кенешлэсь печать оригиналзэ кылдытон но мукет узъёсъёс. Координационной кенешлэн ужаз пыриськозы Удмурт Элькунысь Культурая министерстволэн аппаратаз ужасьёс, шаерысьтымы культурая но искусствоя ужъюртъёслэн директоръёссы. Ужрадлэн кыкетӥ нуналаз иворъёсты вӧлмытӥсь ёзъёс понна пресс-конференция орчоз. Е. РОМАШОВА. Францие келяз Йӧл ӟеч сиён луэм сяна, кутӥське на со химиын но. Чырсам йӧллэсь поттыны луэ на вылэм казеин. Со мынэ буёлъёс, пластмассаос, клей, лакъёс но мукет арбериос лэсьтонэ. Алигес казеин дасяны кутскизы "Можгасыр" акционер огазеяськонын. Нырысетӥ кызь тонна продукцизэ со келяз Францие. Нош та странаен кусып тупатыны юрттӥзы Беларусьысь эшъёссы. Можгаос оборудование отысь басьто. Предприятие озьы ик басьтӥськиз ӵынатэм (колбасной) сыр поттон борды но. Та вуз келямын ни Удмуртиысь но Екатеринбургысь басьяськисьёслы. Н. КАЗАКОВ. "ГУДЫРИ" - "УДМУРТ ДУННЕ" -80 АР Серметтэ эн кушты Улонын ялан кыӵе ке воштӥськонъёс ортчо. Инкуазьын сямен ик, обществоын но маке со выльдӥське, мукетыз, даурез ортчемез, вужме, ыше-быре.Со шӧдӥське одӥг поколенилэн улонэз ӵоже ик. Алигес гинэ улӥмы кадь Совето власть вакытэ, табере кожимы ини мукет пала. Зэм, али нокин но ӝот-ӝот вераны уг быгаты кытчы мынэммес. Кивалтӥсьёсмы но тросэз азьлоосыз ик - Коммунистической партилэн вылӥ кивалтон ёзъёсаз ужамъёс. Калыкмы но сокем ӧз воштӥськы на. Тросэз лулӟыло улонлэн мыддорин берытскемез пумысен. Но, мон сямен, калыкмылэн азьланезлы осконэз чылкак бырымтэ на. Вылӥ кивалтӥсьёс воштӥськем бере но, умоезлы осконзы адямиослэн ӧз ышы. Инмысь шуд уг усьы шуо. Со понна кыӵе ке но ужрадъёс кутоно. Нош кин но ку кытын кулэ соосты, кин валэктоз сое? Ас мылкыдзэс-малпанзэс вераны котькуд адями амал утча. Соос ог-огенызы кенешо, сюлэмшугъяськытӥсь юанъёсынызы вазиськыло газетъёслэн но журналъёслэн, телевиденилэн но радиолэн редакциосазы. Кызьы бен быгато соос, редакциос, туала вакытэ пӧртэм учыръёсысь потыны, лыдӟисьёсын одӥг кыл шедьтыны? Быгатэ-а журналист азьзэ-берзэ чаклатэк ужаны? Яке со улонлэн котькыӵе вакытаз луыны кулэ зэмлыкез возьматӥсь, ачиз азьын но калык азьын чылкыт сюлэмо, лыдӟисьёсты но кылзӥсьёсты гажась, журналист нимзэ котьку вылын возьыны тыршись адями? Ӵапак со сярысь вераме потӥз туннэ газетъёслэн но журналъёслэн редакциосазы но ужась но азьланяз журналист луыны мылкыд карись егит эшъёсы. Мон куамын ар пала ужай азьвыл "Советской Удмуртия", табере "Удмурт дунне" газетлэн редакцияз. Вал отделэн кивалтӥсь но, кыл кутӥсь секретарь но, редакторез воштӥсь но, нош берло кызь ар ӵоже - редактор но. Озьыен, журналистлэсь ужзэ, со азе пуксись куронъёсты кӧня ке но тодӥсько, азьлозэ туннэеныз ӵошатыны но быгатӥсько. Туэ асьмелэн одӥг гинэ удмурт республиканской газетмылы тырме 80 ар. Вакчи сюрес ӧвӧл со. Со адӟиз калыклэн эрикез но шудэз понна ожмаськонъёсты но, сютэм улонэз но, куашкам хозяйствоез ӝутонэз но, табере тани солэсь нош ик куашкамзэ, быдэс улон-вылонмылэсь мукет ӧре берытскемзэ. Нош калыкын юнме вераллямтэ, улон сюресэз ортчон, бусы вамен гинэ потон ӧвӧл шуыса. Сыӵе сюресэз ортчытозяз асьме газетмы котьку ас калыкеныз ӵош вал, со быдэсъяны тыршиз "Гудырилэн" нырысетӥ номераз верам кылзэ: "Туала ужез гинэ ум вералэ, валэктом, кыӵе луоз улон-вылон дас ар яке уногес улыса... Инмысь гудыртыку, быдэс дуннеез вырӟытэм кадь, та газетлэн но куараез быдэс удмурт калыкез мед вырӟытоз". Газетмылэсь тямыстон ар ӵоже потылэм бамъёссэ эскерид ке, син азямы республикамылэн быдэс улонэз пуксёз. Нырысь аръёсы ӟеч-ӟеч дасям журналистъёс но ӧй вал ай, ужаны кутылӥзы ӧжыт гожтэт тодӥсьёсты но. Бӧрысь ини, улон азинскемъя, редакцие вуыны ӧдъязы дышетскем, бадӟым опытэн адямиос. Мон редакцие лыктӥ 1951 арын. Соку ужазы тодмо журналистъёс но писательёс: П. М. Яшин, А. Г. Борисова, Е. А. Матвеев, Т. А. Архипов, М. С. Воронцов но мукетъёс. Нуналлы быдэ сямен вуылӥзы редакцие писательёс но со: М. П. Петров, А. В. Лужанин, И. Г. Гаврилов, М. А. Лямин но мукетъёсыз. Соос огшоры "кыл шерон" понна ӧз вуылэ, егитъёслы юрттылӥзы творческой ужын будыны, эскерылӥзы соослэсь печатлам материалъёссэс, валэктылӥзы, журналистлэсь ужзэ но мар вите солэсь лыдӟись. Сыӵе кенешонъёс тужгес но ӟырдыт пуромылӥзы редакциын ужась литературной объединениосын. Со вакытэ соин кивалтӥз тодмо удмурт писатель М. П. Петров. Нырысь интые котьку ик пуктылӥз журналистъёслэн этикаез сярысь кенешонэз. Кыӵе луыны кулэ журналист?" Котьку калык пӧлын луыны тыршоно, шуылӥз Михаил Петрович. - Писательлы но, журналистлы но. Сотэк уд быгаты адямиослэсь мылкыдзэс тодыны, мар соосты сюлмаськытэ, малпаськытэ. Лыдӟисьёс, уго, тынад гожъямысьтыд асьсэлэн юанъёссылы валэктонъёс шедьтыны оско. Соку гинэ тыныд но оскозы". Со понна журналистлы аслыз но мур тодӥсь-валась адями луоно, котьма сярысь лыдӟисьлы валамон, шонер, пӧяськытэк верано. Мар ватонэз, асьмелэн пумиськыло на, нош али уката ик, общество азьын ответственностез валасьтэм, со лыдэ басьтӥсьтэм адямиос. Куд-огез журналистъёс гожъяськон шоры вылтӥяськысагес учко, мар кыл йылазы шеде, сое ик верало. Нош чакласькытэк верам кыл адямиез лек шиен кадь вӧсь карыны быгатэ.Аслам ужам вакытысьтым но трос учыръёсты вераны быгатысал, куке редакциын ужась адями яке газетэ гожъясь, редакцилэн данэз сьӧры ватскыса, умойтэм лэсьтылӥзы. Тани "Советской Удмуртия" газетлэн одӥгез селькорез ас тодэмезъя мынэм Варзи-Ятчи курортэ очерк гожтыны материал люкан ньӧм улсын. Курортын ужасьёс сое дуно куноез кадь пумиталлям: быдэс арня ӵоже сюдыса-сектаса возиллям, гостиницаын кӧламез понна но дун басьтӥллямтэ. Нош селькор шараям курортлэсь тырмымтэоссэ. Гожтэм фельетон. Автор шонер ке но гожтӥз, со пӧяськыса улэменыз редакцилэсь но данзэ, селькорлэсь но нимзэ ултӥяз. Валамон, солэн гожъямъёсыз бӧрысь газетэ ӧз печатлаське ни. Тырмымтэос сярысь гожъяськод ке, тон кылыныд гинэ эн шуды, юдурез возьматон улонысь басьтэм учыръёс пыр. Нош куд-огез турттэ адямиез кылын вӧсь карыны, югдурез мур-мур но пумозяз сэртыны-пертчыны сюлмаськытэк, кинлэн ке верамезлы оскыса гинэ. Уг вунэтӥськы таӵе учырез но. Огпол редакцие вуиз Шаркан районысь гожтэт. Автор ивортэ колхозысь кивалтӥсьёслэн умойтэм ужъёссы сярысь, ассэ но юнме шорысь, пе, ултӥяло. Редакция та гожтэтэз эскерыны ыстӥз районысь аслаз корреспондентэзлы. Интые потыса вылысь, собкор гожтэт ыстэм адямиен пумиськылытэк, колхоз кивалтӥсьёсын гинэ вераськем. Нош соосыз автор сярысь оломар но мадиллям: со, пе, юись, ужамез уг поты, олокытчы но ӝожтӥськонъёс ысъяса улэ. Ма луиз? Собкор соослэн верамзыя авторез олокызьы но ултӥяса "Шӧкыче" гожтэм. Озьы со адямиез юнме вӧсь карем, нош гожтэт ыстэм адями сӧсыр вылэм, секыт ужез быдэсъямез уг луы, капчизэ уг сёто, ялан мерскиськод шуыса, киынызы гинэ шонто. Газетлэн корреспондентэз со адямиен пумиськысал но ваньзэ рос-прос тодыны тыршысал ке, газетэ чылкак мукет материал печатламын луысал. Нош со адямиез юнме уродэ уськытӥз, сюлэмтэм кивалтӥсьёс пала кариськиз. Бӧрысь газетэ шонертон печатламын вал. Котькуд гожтэтэз яке мадёсэз журналист пыр-поч но мур эскерыны кулэ, тодад возёно, котькуд гожтэт сьӧрын - улэп адями, сое гажаны кулэ. Тон дасяськод ке кинлэн ке нимыныз материал (авторлы юрттон вылысь, сыӵе амалэз редакциосын уже кутыло), гожтэмдэ одно ик лыдӟыты авторезлы, солэн соглаш луэмезтэк, номыр воштыны но, ватсаны но эн дырты.Тани "Советской Удмуртие" печатламын вал "Ижмаш" объединениысь ужась кышномуртлэн гожтэтэз. Дасяз сое заводысь многотиражкаын ужась. Бӧрысь тодмо луиз: журналист со кышномуртэн, вераськем гинэ ӧвӧл, пумиськылымтэ но. Та учыр но адямиез сантэман луэ, со но газетлэсь данзэ сапта. Али газетъёс печатлало трос рекламаос. Гожто, рекламалэн пуштросэз понна сое сётӥсьёс кыл куто шуыса. Нош кин кыл кутыны кулэ газетэ печатлам материалъёс понна? Авторъёс? Соиз бен шонер, дыр. Нош мар понна соку кыл кутыны кулэ редакция? Мон сямен, печатльлы эрик сётон сярысь Закон редакциосты уг мозмыты газетэ печатлам материалъёслэн пуштроссы понна кыл кутонлэсь. Соин ик печатланы дасям материалъёс пыр-поч эскеремын луыны куэ. Сотэк газет баме вуозы олокыӵе но супыльтон, кыл вӧлдон, ог-огзэ ултӥян, йыркуъяськон, вожпотэмдэ кин ке вылэ сапкытон но мукет со выллем умойтэм учыръёс. Марлы-о пӧрмоз соку газет? Газетэз "пӧрало" журналистъёс. Печатьлэн эрикез пумысен соос но ваньзы озьы малпазы ке, мар-о лыдӟомы асьмеос газет бамысь? Мон сямен, журналистлэн гожтэмез мед луоз оскымон, со нокинэ медаз ултӥя. Куд-огез авторъёс, редакциосын ужасьёсыз но, кинлы ке вожпотэмзэс, синазькыль каремзэс вуттыны туртто газет баме. Шуом, бертэ, сыӵе журналист командировкаысь но кутске ини вань вожпотэмзэ кагаз вылэ кисьтыны: Тодмо фельетонист И. Шатуновский аслаз тодэ ваёнъёсаз пусйылӥз, со ноку но фельетонъёс ӧз гожъя, кин сое куке но обидиз яке солэсь кыӵе ке куронзэ ӧз быдэсты. Вал милям одӥг ужасьмы. Огпол со пизэ гужем каникулэз дыръя интыям связья отделение ужаны. Та отделение сярысь туж ушъяса гожъяз. Вуоно араз солэсь азьтэмгес пизэ отчы ужаны кутӥллямтэ ни. Соосты кышкатъяны кутскем, "Шӧкыче" гожто шуыса. Ярам, та сярысь дыраз ивортӥсьёс луизы. Улонын пумиськыло котькыӵе адямиос. Куд-огез ялан ассэ ушъясал. Озьы куд-ог журналистъёс сыӵе адямиослэн куриказы шедё, соос сярысь ӧвӧлтэмзэ но вань карыны тыршо. Сыӵе дыръя пилеш адями но баблес луэ, восьтэмез но куаем кадь адӟиське. Журналистлэн этикаез сярысь вераку, палэнэ кельтыны уг луы редакциын ужась адямиослэн кусыпъёссы сярысь но. Вераськон мынэ эшъёстэ гажан, творческой ужын но, улонын соослы кулэ дыръяз юрттон сярысь. Сотэк коллективын зэмос творческой мылкыд но луыны уг быгаты. Ваче вожвылъяськон, быдӟияськон, кыл шерон, ог-огдэ ултӥяны турттон но мукет со выллем урол сямъёс ноку но уз юрттэ огмылкыдын ужась юн коллектив кылдытыны. Тросэз мӧйы журналистъёс вань тодон-валанзэс, гажан мылкыдзэс но лякыт сюлэмзэс сётылӥзы егит эшъёссылы, юрттылӥзы соослы творческой ужын будыны. Сыӵе журналистъёс-ветеранъёс пӧлы мон нырысь ик пыртысал С. В. Шкляев, А. А. Стрижов, Е. Г. Афонин, М. А. Перевозчиков, Н. И. Кондратьев, В. И. Иванов, А. У. Васильева, С. Г. Машков, В. Е. Смирнов, К. Е. Ломагин но куд-ог мукет эшъёсты. Учке ай туннэ газет поттонын, озьы ик удмурт радиоын но телевидениын ужась журналистъёсты. Тросэз соос будӥзы, вылӥ верам эшъёслэн атай-анай музэн юрттэмзыя. Ог дасо ар талэсь азьло тэтэ карись егит ужасьёс тодмо журналистъёс луизы, табере соос но егитъёсты будэтон сярысь сюлмасько ни. Егит ужасьёсты будэтон, мӧйыослэсь опытсэс вӧлмытон туннэ матысь ужез луыны кулэ республикаысьтымы журналистъёслэн огазеяськонзылэн. Та ласянь паськытгес вӧлмытоно но ялан юнматоно вылэм редакциослэсь, мӧйы журналистъёслэсь Удмурт государственной университетысь журналистика факультетэн кусыпъёссэс. Но сыӵе сюлмаськон луыны кулэ кыкналасянь ик. В. МИХАЙЛОВ, РСФСР-ысь культура удысысь дано ужась, журналист. М. Федотов. Зор дыръя Атаелы Котмем куака кадесь сыло кызъёс, Сьӧд вайёссэс музозь някыртыса. Тём инэтӥ кошко сьӧд пилемъёс, Пожам бамез эшшо но пожаса. Дугдӥз ини, пуксиз жадем сильтӧл. Эксэй сямзэ возьматыса ӧз ву. Вайёс вылысь туннэ нош кӧня пол Синву музэн усиз кезьыт зор ву. Лек зор ултӥ юн вамышъя атай. Кизер сюрес сура пытьыоссэ. Лыктэ, ялан лыктэ, уг ву матам. Мон адӟисько, мон тодмасько ассэ. Зор пыр мар ке турттэ со вераны, Нош мар меда - уг луы валаны. Сӧсыр кизэ мыче со мон пала. Уг сузё киосы. Тӧлэд юнме шула... Тӧл чалмытске. Берпум зор шапыкъёс Монэ куалектыто: ӧвӧл атай. Йырын одӥг пумо вань малпанъёс: Оло зэмзэ та вал, оло вӧтай. Котьку озьы. 30.09.82. *** Бигер пушнер кадь ик сутӥсь, Сютэм лемтэй кадь ик мертчись, Янгыш дыръяд но азьветлӥсь, Вань улондэ монэн шудӥсь. Со ваньмыз тон, Со ваньмыз тон. Нош кин меда улӥсько... мон? Пӧсьтолэзь, 1986 *** Мынам Иже, яратонэ тон, Мынам вӧсе но буйганэ. Удмурт пилэн керпотонэз тон, Удмурт ныллэн возьдаськонэз. Пу коркаос, тани со - Позимь, Нюръёс вылын ӝутскем улос. Кот ульчаос дунне пумозь ик, Из кар борды кылдэм потос. Пичи гинэ лыз шаере со, Мынам мӧзмыт, шуныт каре. Позимь дурын турын возе со, Сюлэм куре монэ кыре. Мынам Иже, вӧсяськонэ тон, Куриськонэ, йыбырттонэ. Дунне вылэ вордӥськонэ тон, Дунне вылысь лул потонэ. 27.09.88. *** Я вера мыным, шаере, Марлы тон сыӵе мӧзмылэс? Кырӟан шулдыртэ котырез, Оло, со вера палдурес? Мусо шаере тон эн ват, - Азяд мон гольык сюлэмо. Пукси ке кесэг сэрегад, Улон отыназ но лымо. Тӥни ук, бызе на ошмес, Яке синвуэд быльыра? Дун ву... Ватӥсько мон эшме, Синву бам вылаз питыраз. Я вера, эн ват, шаере, Тодско ук, ваньмыз эзелё. Ӧд вазьы. Иське, табере Луло юан пус кадь кылё. 01.11.89. *** Уг кырӟа, уг шумпот сюлэм, Ялан со бӧрдэ ас понназ. Потэ вал куке но улэм, Мар ке но лэсьтэм тон понна. Уг экто пыдъёс, жуммизы, Секыт уж бере кадь висё. Кызьы сютэмъёс погразы, Озьы ик, дыр, мон но усё. Маке но уг пальпот пие, Ӝож гур каръяськем синъёсаз. Бен мар мон солы та вие Шуом, я коть мед пӧяса? Маке сэректэ кадь анай, "Малы улӥсько на" шуэ. Сюлэм нош выльысь, пе, шуна. "Сӥзьыл гордэктоз ук" шуэ... Ма, зэм ук, лыктоз ай сӥзьыл, Соку зорен ӵош бӧрдыны Сылал выллем, сокем кузьыт, Уз поты мыным но тыныд. 16.02.93. *** Шур дурын шашы-а шонаське, Луд валлин сьӧд пот-а сяськая, Но ялан курыт кошке сиськем, Та улон монэ весь шашыя. Ватскисько пичи гинэ коркам, Со но шонскылэ ини тӧлъя. Инмаре, тон сёт вал ас эркам Кошкыны ёрмон вӧзтӥ вуя. Нош турна, турна монэ ёрмон, Шашыез выллем ик погыртэ. Милемлы таиз но чидамон, Милемды адӟон пыдйылскытэ. Сёт мыным кужым со ярдурозь, Кизьыны таза кидыс но сёт. Мед вуом кутсам кесэг пумозь Но катьтэм отчы ик мед усё. *** Мар кулэ, мар кулэ? Шудбуре - чыртыозям. Ватсконо вал саюлэ, Инсьӧре кошкон азям. Саюлын мон буйгасал. Со эмъюм - юзым саюл. Дышмонлы вожомыса, Ой, малы меда ӧй кул? Дышмонэ - со сьӧд вужер, Весь ветлэ, калге сьӧрам. Пуктӥсько висъясь кенер - Бышкалтэ ук тыбырам. Со уг султы ваче син, Со мышкам гинэ ветлэ. Кулыса ке но уси, Со сутоз вандӥсь тылэн. Ма, ӧйтӧд, шудбур пӧлын Пыласьки-а мон куке? Мон ӵемгес инбам улын Вуылӥ шуге-леке. Ватсконо вал саюлэ, Нош кытын меда саюл? Со кытын меда улэ? Ма, отын, кытын ӧй ул. Ватсконо вал, ватсконо, Но вужер уг сёт эрик. Сьӧд калтон мыным пуно Пеймыт уй но тӧлпери. Ку меда лыктоз ӵукна? Ку меда эркын шокчо? Ку меда лушкем вегнам Тӧдьы бус выллем тӧлӟоз? *** Пилем Пилеме, пилеме, Чик уг пот пилиськеме, - Вай лобом сюрс иськеме Зорытэк гинэ дэмен. Нош малпад ке зорыны, Зорытэк но бӧрдыны, Мон юртто, юртто тыныд Бӧрдытэк но зорыны. Нош бӧрдӥд ке - зорало, Ву бордэн кенерало, - Пилемен пилемало, - Шат соин тонэ ало. Тонтэк та дунне но ӧвӧл ук Кылъёсыз М. Федотовлэн Крезьгурез Ю. Кузьминалэн Тон нош ик, тон нош ик огнад кылиськод, Тонэ курисько мон, эн мӧзмы. Тодскод ук, сьӧрам, сюлэмам кошкиськод, Отысь тон ноку но уд мозмы. Тани асьмемыз люкозы иськемъёс, Каллен ышомы бус пӧлы кадь. Нош вань-а меда дуннеын кужымъёс Мынам но тынад гажанмы кадь? Отын, кыдёкын, мон инлы пӧрмыло, Бадӟым шундылы пӧрмыло мон, Лобӟись тӧл сьӧры ӟеч кылъёс верало, Висись сюлэмдэ пелляло мон. Тодскод ук, тодскод ук, Марлы веранэз, Зулись адями мон ӧвӧл ук. Нош мар бен карод, вордскемын ваменэс, Тонтэк та дунне но ӧвӧл ук. Адӟоды: пӧйшуръёс но кышетъёс 7-тӥ коньывуонэ Удмурт кун национальной музейын кык пӧртэм выставка усьтӥське. Нырысетӥез - "Пустынялэн пӧртэм ымнырыз". Возьматэмын луозы Туркмениысь пӧйшуръёс, тылобурдоос, кенӟалиос, турын-куаръёс - кыр интыын но, гурезьын но, вуын но пумиськылӥсьёсыз. Та адӟытонэ уже кутэмын музейлэн инкуазез но Удмурт кун университетысь экологияя кафедраын ужасьёслэн 1991-тӥ-1992-тӥ аръёсы экспедициосын люкам материалъёссы. Экспозициез дасян бордын тыршизы музейын ужасьёс Н. Ю. Попова но О. А. Капитонова. Кыкетӥез адӟытон - "Оренбург шаерысь пужыос". Со кышетъёс, шальёс, палантинъёс, ас пужыенызы сюлэмез ик шунто. Оренбург котырысь мамык гонлэсь кышет, Россиын гинэ ӧвӧл, кыдёкысь палэнын улӥсьёслы но тодмо. Та кышет пыр чакланы луэ ӟуч культуралэсь историзэ но. Солэн азинскемез - калык киужъёслэн азинскемзы. Тодмо: нырысьсэ чеберлыко пужыез уже кутыны кутскиллям ссылкаын улӥсь казак кышноос. Соос керттылӥллям пужыё кышетъёс. Мамык гонлэсь кышет нырысьсэ калык куспо адӟытонэ сюриз 1882 арын, со возьматэмын вал Лондонысь хрусталь дворецын. Кышетлэсь синмаськымон чеберзэ, сӥньыс нюжаосызлэсь макем векчи но юн луэмзэс чаклан пона, сое зарни зундэс пыр поттӥзы. Сӥньыс чидаз, ӧз чигы. Со дырысен али но шуо: кышет басьтыкуд, ӟечлыксэ тодэмед потэ ке,и зундэс пыр лэзь... Калыкын шуо на: трос пол кылытозь, одӥг пол адӟод. Соин ик ӧтиськом музеямы: огпол лыктэмады "кык кечез" кутоды. Е. Кудрявцева, Национальной музейын ужась. Ӟечкылан гожтэт Удмурт Республикаысь Кун Кенешлэн Тӧроезлы Александр Волковлы Приволжской военной округлэн командующиезлэсь генерал-полковниклэсь Анатолий Сергеевлэсь гожтэт вуиз. Отын со республикаысьтымы кивалтӥсьёслы тау каремзэ вера Удмурт Республикаысь военной комиссариатъёслы егитъёсты службае басьтонын шӧдскымон юрттэт сётэмзы понна. Анатолий Сергеев оске, республикаысьтымы кивалтӥсьёс азьланяз но военной комиссариатъёслы государствомылэсь обороназэ юнматонын юрттозы шуыса, та кулэ ужын выль амалъёсты кутыса. Удмурт Элькунысь Кун Кенешлэн пресс-службаез. Висён вормемын Пудоослэн валаськись бруцеллёз висёнзы берло дыре шараямын асьме шаерын но. Кылсярысь, со шедьтэмын вал Сарапул ёросысь "Мир" но "Путь Ильича" эштосъёсын. Та кышкыт висёнэз быдтон понна, трос ужано, уно коньдон быдтоно луиз. Кылем арня куспын та хозяйствоосы вуылӥзы элькунысьтымы Гурт ужъёсъя но сиён- юонъя министерствоысь но ветеринарияя службаын тыршисьёс. Соос отын висён бервылъёсты эскеризы. Тодмо луиз: эштосъёсын бруцеллёз быдтэмын. Табере чылкыт фермаосы выль выжы пудоосты ваёзы. Со пумысен вераськемын ни Киров областен но Вавож ёросысь Мичурин нимо колхозэн. Азьвылгес таӵе висён шедьтэмын вал Каракулино районысь ХХИИ партсъезд нимо сельхозартельын. Та дыре отын пудолэн лыдыз пумен йылэ ни. Комсомоллы 80 ар тырмонэзлы Россия Федерациысь Кун Дума туэ комсомоллы 80 ар тырмонэн валче постановление кутӥз. Отын бадӟым саклык висъяны куремын туала егитъёслы. Озьы ик верамын соослэсь огазеяськонъёссэс туннэ быдэстоно ужрадъёсы но мургес кыскон сярысь. Шуныт кылъёсын верамын азьвыл комсомоллэн экономикаез, наукаез но культураез азинтонын, озьы ик патриотической мылкыд пыӵатонын, сӥльвирез кыдатонын лэсьтэм бадӟым ужъёссы понна. Комсомоллэн юбилееныз валче Удмурт Республикаысь Кун Кенешлэн Президиумез но Правительство озьы ик асьсэлэсь постановленизэс кутӥзы. Удмурт Республикаын комсомоллэсь 80 ар тырмонзэ пусйыны но солы дасяськыны косэмын юнматыны оргкомитет но дасяны ужан план. Элькунысьтымы Коньдон ужпумъёсъя министерстволы та ужрадъёсты ортчытыны элькунысьтымы Егитъёсын ужанъя кун комитетлы косэмын 50 сюрс манет коньдон висъяны. Со коньдон висъяськоз республикамылэн бюджетысьтыз. Комсомоллэсь 80 ар тырмонзэ пусъён вылысь, городъёслэн но ёросъёслэн администрациоссылы егитъёсын ужанъя ёзъёслы юрттэт сётыны ӵектэмын. Колодчаын... снаряд Одӥгаз сентябрь уе Сарапулысь югдурез утёнъя отделлэн дежурноез доры жингыртӥсь луиз. Тодмотэм адями ивортӥз, 17 номеро школае мина интыямын шуыса. Соку ик кулэ ужрадъёс кутэмын вал. Школае вуизы МЧС-ын, ФСБ-ын но МВД-ын ужасьёс. Ярам, мина шедьтэмын ӧй вал. "Телефон пыр шудон" соин гинэ ӧз ортчы. Ӵуказеяз нош ик жингыртӥсь луиз. Таяз учыре ивортӥзы, шуныт сётон колодчаын, пе, снаряд кылле. Зэмзэ но, Дачной посёлокысь микрорайонын шедьтэмын вал гранатомётлэсь снаряд. Тӥни сыӵеесь вал шудонъёс. Но ведь со понна уголовной кодекслэн нимысьтыз статьяез вань. С. ЗАЙЦЕВ. 4 ноябре - Удмурт Республикалэн нуналэз Ортчиз Кун Кенешлэн Президиумезлэн заседаниез. Отын эскеремын ньыль пумо ужпум. Нырысетӥез - Удмурт Республикалэсь нуналзэ, 4 ноябре пусъён. Солы дасяськонлэн мынэменыз тодматӥз А. М. Фоминов, Кун Кенешлэн аппаратэныз кивалтӥсь. Ӟеч сямья туэ но азьмынӥсь коллективъёс пыртэмын луозы республикалэн Данъян пул вылаз, усто ужасьёс басьтозы правительстволэсь наградаоссэ но данъян грамотаоссэ. Та нуналъёсы Удмуртие лыктыны дасяське Белорусилэн Президентэз А. Г. Лукашенко. Праздникез дасянъя юнматэмын нимысьтыз комиссия. Президиумлэн кенешаз эскеремын но юнматэмын Сарапул районлэн уставаз пыртэм ватсанъёс но дэмланъёс. Кун Кенешлэн Тӧроезлэн кадръёсын ужанъя Советысьтыз мукет уже выжеменыз валче потэмын В. В. Гусев но А. М. Никитин. Соос интые юнматэмын В. Н. Зенин но В. Ф. Щербаков. Удмурт Кенешлэн Президиумез умоен лыдъяз бюджетэ но бюджетэ пыристэм фондъёсын ужанъя Россия Федерацилэн законаз воштонъёсты но ватсанъёсты пыртонъя Астрахань областьысь депутатъёслэсь сётэм кичӧлтонзэс. Л. МЕДВЕДЕВА. Кыкетӥез орден - Ижын Россиын нош ик "вордскиз" выль орден. Со нимаське Святой Апостоллэе Андрей Первозванныйлэн орденэз шуыса. Та вылӥ наградаез нырысь ик басьтӥз тодмо академик Дмитрий Лихачев. Россиысь Президентлэн Указэзъя, кыкетӥ номеро орденэн пусъемын быдэс дуннелы тодмо конструктор Михаил Калашников. Михаил Тимофеевичлэн табере - 10 орденэз. Ӟечкыласьком! Выжыосы Выжыосы, гажан выжыосы... Пересь анай, атай сюе ни кошкизы... Бусэн-парен шуныт шока музъем, Кошкемъёслэн лулӟылэмзы музэн... х х х Пекла песянае, Митрей песятае Кемаласьгес ни кошкизы со... дуннее. Нош ӵапак та аре, Ӵап та дыре Кыкназылы ик тырмысал ни сю арес. Улон даур вакчи, Улон нюжа векчи - Сизьымдонозь ӧз улэ- уретӥз "качы". Ӧз чигиськы выжы, Будэ, люка кужым... Татьяна ЧЕРНОВА. Кызьы потозы газетъёс? Тазэ веранмес гожтон понна, куинь пол гинэ вамыштоно луим. "Удмурт дунне" газетлэн редакциез интыяськемын Печатья коркалэн куинетӥ этажаз. Нош Ижысь полиграфкомбинатын ужасьёс люкаськизы нырысетӥ этаже. Комбинатысь кивалтӥсьёс Олег Радионов но Илья Полников мадизы доразы кылдэм югдурез. "Удмуртская правда", "Удмурт дунне", "Известия Удмуртской Республики" газетъёслэн редакциоссылэн тыронъёссы люкаськизы ни 1 миллион 700 сюрс манет. Югдурез республикаысь вылӥ кивалтӥсьёс тодо. Нош Кун Кенешлэсь но Правительстволэсь газетъёссэс утён вылысь, тырмыт юрттэт уг сёто. Оло, кыӵе ке кужымъёс комбинатэз юри куашкатыны но приватизация пыр асьсэлы карыны туртто ни? Отчы али Россиын нырысьсэ пуктӥське Германиысь ваем усто "Унисет" машина. Со понна банкысь 3 миллион манет пала ссуда басьтэмын, сое Правительство берыктоз шуыса. Процентъёсын но штрафъёсын ӵош пунэмен тырон 4 миллионозь вуиз ни - Правительство уг юртты. Ноябре газетъёсты печатланы кутсконо выль машинаен. Нош сыӵе малпан быдэсмоз шуыса оскыны шуг. Полгирафистъёслэн лэчытэсь юанъёссылы валэктонъёс сётӥзы печатья но иворъёсъя министрлэн воштӥсез Владимир Злобин, Правительствоын ужась Иван Белов, редакциосысь кивалтӥсьёс. Дэмламын пунэмен тыронъёсты зачёт амалэн берыктыны. Редакциос юнгес сюлмаськыны кулэ пайдаё ужан сярысь. Соослы озьы ик ӵектӥзы тиражзэс кулэстыны, газетъёсты шергес но векчигес поттыны, югдурез лыдӟисьёслы валэктыны. Мар бен, луэ, вылды, газетэз кулэстыны яке ворсаны. Нош валалозы меда газетчиосты милям лыдӟисьёсмы? А. ШКЛЯЕВ. Тӥледлы, пӧрасьёс Яблокъёс - толлы Сакыр та нуналъёсы туж дуно луиз, соин ик толлы ческыт сиён дасянын пӧртэм амалъёс утчано луэ. Милям Тюмень палан туэ яблок туж удалтӥз. Мар карыны луоз та емышез? Векчи вандылыса, куасьтыны луоз укно вылын яке мукет буш интыын. Яке зӧкгес сӥньысэ бырттылыса ошоно. Макем ческыт потыса юоды яблоклэсь компот. Сакыртэк консерва но дасяны луоз. Миськем яблокъёсты тыроно чылкыт дасям пияла банкае. Вылтӥз пӧзись ву кисьтоно. Озьы возёно ог 15-20 минут. Вузэ кисьтыса, выльысь быректытоно, собере нош кисьтоно банкае. Ворсано корт пытэстъёсын. Возёно ӵажмыт азьын. Гужемез тодады вайыса, кезьыт тол ӝытъёсы ческыт яблок сиёды. Н. Яковлев. Шӧкыч - Ми, Завьялово ёросын улӥсьёс, уно бакча сиён будэтӥськом. Азьвыл аръёсы картофкамес, кубистамес, ӵуш но горд кушманмес тросэн келяьском вал "Горплодовощторглэн" базаосаз. Табере уноез соос бакча сиёнмес уг куто ни, басьто ке но, туж ичи дунын. Соин ик сое асьмеос вузаськом. Но берло дыре нерад луимы ни кык пыдо "кечъёсын". Тани туэ но "Родина" эштослэн Динтем Бодья гурт вӧзысь ӝынызэ кубиста бусымес "утялтыны" юрттӥзы сад бакча возисьёс... (Гожтэтысь). Лушкаськись: - Я, эше, кымалты ай курытсэ! Юэмед кемалась, дыр, ини, уждун но уг тыро шуиськод кадь? Возьмаськись: - Лэзь соку нокин адӟымтэ дыръя! Таин гинэ эштосмы уз куанермы ай... Суредэз Л. ПРОЗОРОВЛЭН. Матрон апай ӵектэ * Йӧлэз возьыны кулэ сюй, пияла яке эмалировать карем посудаын кезьыт но пеймыт азьын. * Йӧл кема мед возиськоз шуыса, быректон азьын толалтэ пӧлаз йылтоно кӧня ке сакыр (1 литрлы ӝыны бадӟым пуньыен), нош гужем - сода (пурт йылын). Быректэмез бере йӧлэз сӥятоно ворсамтэ посудаын. * Туж пӧсь куазен но йӧлэз холодильниктэк но кык-куинь нунал ӵоже чырсамлэсь утьыны луэ. Со понна йӧлэз нуналлы кык пол быректоно - ӵукна но ӝытазе, сӥятозяз ворсатэк возёно. * Пӧсь куазен йӧл медаз чырса шуыса, басмаен бинялтэм бутылкаез вуэн тазэ пуктоно, интыяно тӧло азе. * Парем йӧллэн шӧмыз ческытгес луоз, быректэм бераз ик пӧсьвуам термосэ кисьтыса. 6-7 час бере юон дась луоз. * Кисьтэм йӧл (творог) небытгес но ческытгес луоз, чырсам йӧлын посудаез 80 градусозь пӧсятэм вуын пукетыса. * Йӧллэсь сиён дасян понна, озьы ик котэм няньлы кутыны луоз йӧл пызез. * Йӧл пызез вуэн суралтыса, ческыт юон дась луоз. Тусызъя но, шӧмызъя но со скал йӧллы кельше. * Люкъяськем кӧс йӧллэсь дасяны луоз пӧртэм пумо ӝукъёс, картофка пунем, озьы ик ческыт сиёнъёс. Нуналлэн тодметэз Вашкала календарья 10 - Савватейлэн - мушъёсты утисьлэн нуналэз. Муш умортоосты гулбече толлы пырто, нылпиосты Савватейлы вӧсяськыны косо вылэм, мушъёс ӟеч мед толъёзы шуыса. Кулэмъёсты но быремъёсты буре ваён нунал. Та нуналэ... ар талэсь азьло 12 октябре 1964 арын КПСС-лэн ЦК-езлэн пленумаз Никита Хрущев КПСС-лэн ЦК-езлэн нырысетӥ секретарез должностьлэсь мозмытэмын вал. Со интые Леонид Брежнев быръемын вал. ШӦКЫЧ Улэп уксё Ижысь автомашинаос бичанъя заводысь одӥгаз валтӥсь цехын. Конвейер я мынэ, я нош ик огдырлы дугдэ. Вис дыръя рабочийёс я доминоен йыггетыны кутско, я тамаксэс пурккето.Цехлэн начальникез кинэн ке телефон пыр даллаше: - Мон пластмассаос поттон заводэн-а вераськисько? Туж умой. Вера ай, ку тон мыным панельёстэ келяло. Ведь тӥледын валче 800 машина сылэ! Валаськод-а - 800! Ми сырьё сётӥм? Сётӥм! Коньдонзэ тырим? Тырим. Ведь кӧня коньдон бергатыны луысал. Асьтэлэн но уждун ласянь сокем ик умой ӧвӧл кадь... Милям уждунэн 13 толэзьлы ӝегало. Тани али моторъёсмы вань. Ярам, юрттӥзы. Палэнысьёс милемыз умойгес валало. Нош тӥ артэ ке но, азьтэмскиды-а, мар-а ни? Нырысь коньдон кулэ шуиськоды? А кытысь поттод сое? Нырысь вуз, собере коньдон. Соглаш ке ӧвӧл, ми мукет заказчик шедьтом. Всё! Цехлэн начальникез мастерлы Гаврил Петровичлы вазиське: - Гаврил Петрович, тон тани автозаводын кемалась ужаськод ни, ветеран шуыны луоз. Азьло но кусыпъёс таӵеесь ик вал-а? - Э-э, Кузьма Иванович, ӵошатӥськод! Али со али, азьвыл со азьвыл. Горбачев кузёяськыны кутскем бере куашканы ӧдъям. Азьвыл кызьы вал? Жингыртӥськод, шуом, Вильнюсэ яке Владивостоке, нунал ортчыса, заказ дась ини. Быризы кусыпъёс, быризы! Собере заводэз но тус-тас карыны кутскизы. Адямиос кошкизы. Быре вал ини автозаводэд. Ярам, берло дыре улӟыны ӧдъя кадь... Цехлэн начальникез нош ик жингыртэ. - Ал-лё! Механической завод? Автомобиль поттӥсьёс верасько тӥледын. Ку-о вуозы ни кардан валъёсты? Кӧня ужаськом ни, татчыозь одӥгзэ но ӧм басьтэ на. Улэп коньдон шуиськоды? Нош кытын со? Нырысь вуз, собере коньдон! Всё! Телефон трубказэ понэ. Нош ик жингыртэ: - Мусокае, герӟа вал Воткинскысь машзаводэн. Ал-лё, кылӥськоды-а монэ? "Ижмаш" та. Бен, бен. А-а, Максим Максимыч! Тон ик кулэ вал. Вот тон чик пӧяськытэк вера ай - ку тырмыт сётод милем отопительёстэ но нагнетательёстэ? Нош ик палэнысь утчано луэ. Тӥ татын артэ ик. Милемлы но озьы дунтэмгес усе, тӥляд кисыяды но коньдон лыктоз. Улэп уксё? Пока ӧвӧл. Ярам, соку, всё!.. Тани та выллем вераськонэз кылыны луысал, дыр, Ижысь автозаводлэн цехъёсаз пырыса. Зэм, берло нуналъёсы предприятие пыд йылаз султыны кутске кадь. Ужъёс интыысьтызы каллен-каллен вырӟо. Таяз толэзе 3 сюрс машина бичаны чаклало. Но шедё вылэм пыд пуктӥсьёс. Ӧвӧл, палэнӥсьёс ӧвӧл. Асьмелэнъёс люкето ужаны. Сётэм кылзэс уг быдэсто Ижысь пластмассаос поттон завод, Ижысь механической но Воткинскысь машина лэсьтон заводъёс. Озьы луыса кошке: асьсэлэн но ужзы ӧвӧл, таосызлы но ужаны уг сёто. Республикаысь предприятиос огазеяськысалзы ке, ӧйтӧд, кыӵе вуз но поттыны ӧй быгатысалмы? Соку ик луысал улэп уксё но. Н. ЛЯЛИН. ШӦКЫЧ Ужтэк кылид - ворттылы "Жигулиен" Вань-а адӟылэмды ужасьтэм адямиосты выль "Жигулиысь? Алигес сыӵе адямиосын милицилы пумиськоно луиз. Ньыль егит пиос Ижысь "Огонёк" автокооперативе машина тупатъян мастерской усьтӥллям. Вить гаражез огазеяса, зэмос цех кылдытӥллям. Тупатъяло асьме дорын потэмъёссэ но, кунгож сьӧрысь ваем иномаркаосты но. Пиослэн вань на медъям слесарьёссы, сварщиксы. Таосызлы бадӟым уждун тыро. Асьсэос но трос гинэ коньдон позырто. Нош документъёсъя ваньзы ужтэк кылемен лыдъясько. Мар бен басьтод соослэсь? Уг тыро налог но. - Нош кин сюдэ тӥледыз, пиёкъёс? - юало соослэсь. - Кузпалъёсмы, - валэкто таосыз. Ӧйтӧд, дышетӥсьлэн уждунэныз "Жигулилэсь" берпуметӥ модельзэ басьтыны быгатод меда? Но табере котьма ке но, кылзэс зол ик юалозы, дыр. С. ПЕТРОВ. "Удмурт ошмесъёс" Сыӵе чебер нимын ньылетӥез элькун выставка усьтӥськоз туэ 15 октябре декоративно- прикладной искусствоя центрын. Со ужалоз толэзь ӵоже. Отын асьсэлэсь ужъёссэс возьматозы шаермылэн вань ёросъёсысьтыз кибашлыос. Адӟытонын луозы куэм но чильпаськем, пулэсь вӧлэм но кызьпу туйлэсь вандылэм арбериос, ньӧрлэсь, етӥнлэсь, писпу выжылэсь пунэм чеберъянъёс но трос-трос мукет ужъёс. Выставкае пыриськыны быгато студиос, семьяос, кибашлыос. Выставка ужалоз Ижысь Вадим Сивков ульчаысь 173-тӥ юртын. Со усьтэмын 10-ысен 18 часозь, шутэтскон нуналъёсты вератэк. "02" ивортэ "Гочатӥз" мрамор Та вакытэ кескичъёс мае быгато, ваньзэ лушкало. Ленин урамысь "Радиотехника-2" магазин азьысь мраморной плитаослы тросэз синмаськыса учкылӥзы, нош лушкаськисьёсыз со "гочатэм", лэся. Уголовной розыскын ужасьёс лушкаськисьёсты кема утчано ӧз луэ. Ӝегатӥзы азьвыл тюрьмаын пукылэмъёсты. Со 23 аресъем Юрий Н., 22 аресъем Валерий Ф. но 16 аресъем Ринат Я. вылӥллям. Кема ӧз кузёяське Воткинскысь Школьной ураметӥ ортчись воргорон вылэ ӝытазе куинь мурт урдскиз. Жугемзы бере солэсь басьтӥзы "Сони" видеокамераен, зонтэн но сиён-юонэн сумказэ. Милициын ужасьёс йыртэмасьёслы видеокамераен кема кузёяськыны ӧз сётэ. 18 аресъем пиосты ӝог кутӥзы. Кулэ вылэм возьмась но Сарапул районысь Симониха посёлокысь больницалэн складэз нокинэн уг возьмаськы вылэм. Укно пиялазэ басьтылыса, лушкаськисьёс поттӥллям эмъюм но кызь литр спирт. Пуштӥз "граната" 5 октябре 16 час котырын "Позимь" кафе дорын пуштӥз асьсэ лэсьтэм 100-150 грамм тротилэн гранаталы укшась арбери. Пичияк вӧсь луыны шедиз 65 аресъем воргорон. Воровский урамысь 142-тӥ юртлэн но автостоянкаын сылӥсь машинаослэн пиялаоссы сӧриськизы. Шӧкыч Чипы но аракы Сюрлы гуртысь Анна кенак котьку данъяськылоз вал чипы-курегеныз но, атасъёсыныз но. Курегъёсыз кот-кот гинэ кесяськыса ветло, чипыосызлэн куаразы векчи но нёжъясь. Нош атасэз чылкак Шаляпин но Шаляпин! Быдэс гуртлы одӥг сыӵе куара, ява! Курег уллёзэ куд-огез симфонической оркестрен но ӵошатылӥз. Огнуналэ самой чебер куараё куреглэн одӥгез чипыез чиптэм-чаптэм ышиз. Анна кенак ыштоссэ нокытысь шедьтыны ӧз быгаты. Бускельёсызлэн но номырин юрттэмзы ӧз луы. Кык нунал ортчыса, кулэм чипыез пролка пумысь шедьтӥзы. Пуны пинь улэ шедьылэмлы но кельше, комаклэн изъянтэмезлы но укша. Ма карод, ватоно луиз Анна кенак мискинь чипызэ. Кытысь-марысь та урод ивор воргоронъёслэн пелязы вуэм? Оген-кыкен, паньгам губиос кадь, вуо Анна кенак доры. Йырысьтызы картуззэс куштыса, мур-мур лулско, ӧжыт гинэ, оло, синвузэс уг потто: - Туж сожалеем, Анна кенак, туж жаль. Ӟеч мед улоз ини сояз дуннеяз... Нош асьсэос мае ке витё, огинтыязы лёгасько. Анна апай номырзэ валаны уг быгаты. - Михайловна, ми, марым, чипыед кулэм шуыса ивор кылӥськиз... Ӝоже усеммес вераны пырим вал. Ой, жаль ук, кыӵе жаль, мискинь! Оло, таизлэн но куараез Шаляпинлэн кадь луысал. Ӧз удалты уга. - Ма, пыриды бере, ӝӧк сьӧры коть пуксьылэ ни. Чае али гинэ быректӥз,- вазиз Анна кенак. Ӝогак гинэ самоварзэ вуттӥз, ӵашаос пуктылӥз, ма но со сиён поттӥз. Воргоронъёс чай шоры уг но учкыло. Синъёссы ӝуало, ялан мае ке но витё. Асьсэос чай борды ӧз но кутскылэ. Со вие Анна кенак бакчаяз потӥз. Валазы таос, татын макмыр веськатон уз донгиськы шуыса. Шуш куараоссы гинэ кылӥськизы на, азбарысь потыкузы: - Курегъёсыд но, чипыосыд но, Шаляпинэд но мед чоньдозы! Елена ИГНАТЬЕВА. Шаркан ёросысь Богданово гуртын улӥсь песянаелэн, Караваева Зинаида Васильевналэн, 10 октябре вордӥськем нуналэз. Ӟечкыласьком тонэ праздникеныд. Сӥзиськом бадӟым-бадӟым шуд, андан кадь юн тазалык. Мед быдэсмозы тынад вань малпанъёсыд. Котьку таӵе дуно лу милемлы. Яратыса но гажаса, ваньзэ умойзэ гинэ сӥзьыса, ӵыжы-выжыосыдлэн нимынызы Света внучкаед. "Палэзь удалтэ секыт арлы..." "Ельцинэз отставкае!", "Ижевск Африка ӧвӧл, сёт шуныттэ, Салтыков!", "Ельцинэз - судэ!", "Кин лушка мынэсьтым уждунме?", "Монэ пӧязы Ельцин но Салтыков", "А. А. Но П. Н.! Тӥ огкылысь ке, ми вормонтэм!" "Таӵе реформаос милем кулэ ӧвӧл!", "Берыктэ уждунмес!" Таӵе но мукет ӧтёнъёсты адӟоно луиз Ижлэн шор площадьысьтыз Президентлэн политикаезлы пумит пумитъяськон ужрад ортчытон нуналэ. Профсоюзъёслэн кичӧлтэмзыя дасям митинг быдэс Россиын ортчиз 7 октябре. Малы одно ик та нунал быръемын вал меда? Со юнме шорысь ӧвӧл кадь. Уго "7" лыдпусэн Россилэн историез зол гинэ герӟаськемын - 1917-тӥ арын 7 ноябре вал революция, 1977-тӥ арын 7 октябре кутэмын СССР-лэн выль Конституциез. Берлоез тодмо нунал - 17 август. Пумитъяськон ужрад пӧрмиз политической митинглы. Сое ӵапак 15 часын усьтӥз Удмуртиысь профсоюзъёслэн азьветлӥсьсы Евгений Орлов. Дышем сяменыз, калыклэсь мылкыдзэ бугыртон вылысь, со сӧсырмем яра вылэ эшшо но эшшо кузьыт сылал пызьназ на. Вераз со ӝегатэм уждунъёс, пенсиос но пособиос сярысь, куашкатэм промышленность, гурт улос но культура сярысь. Вань янгышъёс нырысь ик пото Ельцин господин бордысь, шуиз со. Но таӵе улонмы понна Москва гинэ янгыш ӧвӧл. Интыысь кузёослы нырысь ик серметано вал гурезь пыдсы ворттӥсь "ужпиез". Йӧтӥз Кун Кенешысь депутатъёслы но, Правительстволы но. Профсоюзъёслэн тӧрозы ӧз куры кивалтӥсьёсты отставкае поттыны. Со вуоно быръёнъёс дорозь огазеяськыса ужаны дэмлаз. Ӵектӥз лэсьтэм янгышъёссэс но лыдэ басьтыны. Евгений Орловлэсь веранзэ азинтыса, туала политикаез пыкылӥзы "Ижсталь" огазеяськонысь мастер Виктор Андреев, Игра леспромхозысь улвай корась Нина Рязанова, кардиоцентрысь врач Андрей Кропачев, Кун Кенешлэн депутатэз Александр Бегунов, "Ижмаш" огазеяськонысь гальваник Нэлли Климова, Сарапулын улӥсьёслэн ыстэм адямизы Олег Рогов, Ижысь 89-тӥ школаысь дышетӥсь Галина Быкова но мукет вераськисьёс. Калыкез кылзыса валаськод - улонмылэн котькуд удысэз куашкатэмын, таркамын, аналтэмын. Нокытын йӧназ уг тыро уждун, уг сётӥсько пенсиос но пособиос, будэ ужтэк кылемъёслэн лыдзы. Адямиослэн со нырысетӥ куронзы. Соос зарни пуйы витьыса уг ни уло, пунэм тыронъёссэс гинэ мед берыктозы вылэм, шуо. Но вань люкаськемъёслэн куронзы одӥг - Ельцинэз ужысьтыз мозмытоно. Удмуртиысь офицеръёслэн огазеяськонзылэн кивалтӥсез Валерий Ходырев туж сюлэмшугъяськыса вераз армилэн, обороналы ужась заводъёслэн куашкамзы пумысен. "Малпаськытэк конверсия ортчытон асьмелэсь предприятиосмес пыдес вылазы пуктӥз,- шуиз со,- рабочийёс ляльчиос интые кылизы. Соин ик офицеръёс Ельцинэз, Верховной Главнокомандующиймес отставкае потыны куро". Митингын вераськисьёсты таяз учыре кесяськонъёсын куспетӥ карыны тыршизы мӧйыосгес. Шоро-куспо арлыдо адямиос таӵе ужрадъёслы оскемысь дугдӥллям ни, шӧдске. Дугдод но уго. Кӧня пол кыл сётылӥзы ни кивалтӥсьёс. Номыр уг воштӥськы. Ваньмыз интыяз ик кыле. Кылем гинэ ӧвӧл, уката но берлань чигнаськом кадь. Кынмыса сылӥсь мӧйыослэсь мылкыдзэс бугыртӥз, пӧсь вирен пылатӥз кадь ужысь ветеранлэн Маргарита Шейниналэн вераськемез. Соку ик шӧдӥськиз: та кышномурт - коммунистъёслэн агитаторзы. Вераськон манерызъя но, ӧтён кылбур (кинлэсь ке маялтэм) лыдӟемезъя но шӧдӥськод: таид берен ӧте коммунизм лэсьтонэ, куре властьлы пумит пыӵал тӥрлыкен ӝутскыны, ӟечен тодаз вае Сталинлэсь "ӟеч ужъёссэ"... Митингез йылпумъяса вераськизы республикаысьтымы кивалтӥсьёс Павел Вершинин но Александр Волков. Соослэсь вераськемзэс зӥбыны туртто вал кесяськонъёсын (нош ик пересьёс), ӵашетонъёсын. Но кузёосмы югдурез шонер возьматӥзы кадь. Ӧз чеберъяське, нокыӵе кыл ӧз сётэ. Павел Николаевичлэн верам кылъёсыз гинэ сюлэме пыӵаса кылизы: "Калыкын чаклало: "Палэзь удалтэ секыт арлы, кезьыт толлы". Медаз зэма вал со веран. Вуоноез ар курыт палэзьтэк мед ортчоз". ... Митинг йылпумъяськиз. Шор площадь пумен буша. Кезьыт сӥзьыл тӧл гинэ сэрпалтыса куштэм плакатъёслэсь кагаз юдэсъёссэс солань-талань ӵужыса нуллэ. Нош горд флагъёссэс но транспарантъёссэс адямиос сьӧразы нуизы. Оло, яралозы на ай?.. Н. БАЙТЕРЯКОВ. Ватсаса веран: Удмуртиысь профсоюзъёслэн чакламзыя, Ижысь шор площаде люкаськыны кулэ вал 15 сюрслэсь уно адямиос. Кызьы ивортӥз "Удмуртия" ГТРК, отчы лыктӥз ог 5 сюрс адями. Нош профсоюзъёслэн кивалтӥсьсы Е. Орлов со ӝытэ ик "Новый регион" телекомпанилэн иворъёсын передачаяз вераз, площаде ог 26 сюрс пала калык люкаськылӥз шуыса. Кудӥз лыдпус шонергес меда? х х х Пумитъяськон ужрадэ 25 район пӧлысь 17-ез гинэ пыриськиз. Кылемъёсыз та амалэн улонэз тупатыны оло оскымтэзэс возьматӥзы, оло отын кичӧлтӥсьёссы ӧз сюры. Одӥгзэ верам потэ: майбыр улӥсь калыкез туала вакытэ шер пумиталод. Асьме республикаын сыӵе калык пӧлы Воткинск городын улӥсьёсты гинэ шат пыртод. Туала улонмес уждун тыронъя мертаськом ни ке, Воткинскын, зэмзэ но, уждун но пособиос тыронъя сокем бадӟым ӝеганъёс уг луыло. Соин ик, вылды, городзылэн мэрезлы В. Фридрихлы оскыса, татын улӥсьёс 7 октябрез музон сямен пусйизы: ас удысъёсазы ӟечгес ужаны тыршизы. Нош мукетъёсаз районъёсын ужез уретон ӵукнаысен ик кутскиз. Балезиноысь калык шор площаде 10 часлы люкаськиз. Но куазь кезьыт луэмен, люкаськемъёс "Мир" кинотеатре выжизы. Татын кык час пала митинг мынӥз. Профсоюзъёслэн но коммунистъёслэн азьветлӥсьёссы Л. Лебедева но Я. Ворончихин районысь администрацилэн кивалтӥсьёсынызы ӵош калыклы тупен-тупен валэктыны выризы, мар бордысь пото дышетӥсьёслэн, пенсионеръёслэн, ужась но ужасьтэм адямиослэн курадӟонъёссы. Районлэн бюджетэз тырттэм - "улэп" коньдон дырын-дырын вуылэ ке но, соку ик пунэм тыронъёслы кошке. Туннэ районын 2-3 предприятие гинэ прибыль поттыса ужа. Ас кужыменыз гинэ район секыт югдурысь потыны уз быгаты. 400 пала люкаськемъёс йыркурзэс веразы Россилэн Президентэзлы. Сарапулын, Як.-Бодья, Завьялово районъёсын калык куаразэ золгес вераз, ас кивалтӥсьёссэс тышкаськыса. Уж но уждун курыса, лек мылкыдъёссэс возьматӥзы нылкышноос. Зэм, секыт улонэз котькытын золгес чидано луэ кышномуртъёслы - семьяоссэс берло кужыменызы утись-вордӥсьёслы. Соин ик та ужрад но нылкышноослэн синкылиоссытэк ӧз ортчы. Калык туала политикалы лек мылкыдзэ возьматӥз. Нош кыӵе мылкыдын меда тебере калыкен "вераськылоз" Президент? Т. БАННИКОВА. Пальышало муспотон пересьёс Трос аръёс ӵоже мынӥз инбам улын музей кылдытон сярысь вераськон. Табере музон странаосысь сыӵе юртъеръёс шоры вожъяськыса ум учке ни, асьмелэназ дыртом. Та вакытэ музейлы висъямын 140 гектар музъем. Иськем кузьда люкетэз кортэн кенерамын. Кемалась ик ӧвӧл татын одӥг юртлы йылӥз. Грах районысь Атамановъёслэсь вашкала корказэс ваизы. Соин валче будӥз отын улӥсьёслэн лыдзы но. Табере котькуд куноез капчи мылкыдын пумиталозы песянаен песятай. Нош кытын вордскиллям соос? Ижевскын улӥсь пенсионер Виктор Иванович Устинов сад-бакчаяз ужаны яратэ вылэм. Со сяна, кырӟаны но. "Зарни сюан" кырӟанысь кылъёс сюлэмзэ ик бугыртӥллям. Мынӥсь-ветлӥсьёслэсь кунэрес мылкыдзэс уллян вылысь, пулэсь песянай но песятай лэсьтэм. Сое бакчаысьтыз адсконо интые пуктэм. Скульптура шоры ас сяменыз учкиз: кин ке серекъя, кин ке малпаськонэ усе. Сад-бакчаысь пересьёслы тросэз синмаськизы но. Устиновлэн артэ улӥсьёсыз ялан сюлмаськизы та ужез калык азе поттон сярысь. Вераськонъёс вуизы Ижевскысь суредасьёс дорозь но. Огшоры гинэ пересьёс кадь, нош кыӵе мыло-кыдоесь. Песянай кунооссэ арганэн шудыса пумита. Лякыт пересьёс калык азе но "потазы". Шаерысьтымы тодмо суредась Петр Елкин та скульптураез самодеятельной художникъёслэн адӟытоназы вуттӥз. Отын но Виктор Ивановичлэн ужезлы тросэз синмаськизы. Сюлмысь кылдытэм арбериен люкиськыны котьку секыт. Виктор Ивановичлэсь пересьёссэ дуно дунын но басьтыны мылкыд карисьёс вал, нош со малпаз калыклы кузьым лэсьтыны. Ортчем арня пумын инбам улысь музее трос гинэ куноос люкаськылӥзы. Арлыдоослэн нуналэнызы валче, песянаен песятайлы дуно кузьым чаклазы. Соос табере музейлэн кузёосыз радын, котькуд пырисез пальышаса пумиталозы. Нырысетӥ кунозы луиз финн- угор кылъёсъя тодосчи, Франциысь одӥгез тодмо профессор Жан-Люк Моро. Ужрадэз ортчытыны юрттӥз туристической агентстволэн директорез Дмитрий Георгиевич Могучий. Со ик Виктор Иванович Устиновлы паймымон скульптураез понна сюрс манет коньдон сётӥз. Пероггуртысь мыло-кыдо апайёс-агайёс куноосты кырӟаса-вераса, ческыт перепечен но кумышкаен пумитазы. В. КУТУЗОВА. * Тани соос - пересьёс. * Куноын Жан-Люк МОРО (шорысез). Депутатъёс жадемын Сыӵе малпан кылдэ 22-тӥ сессилэн ужамез пумысен. Солэн кыкетӥ нуналаз тросэз депутатъёс ужан интыязы ӧз вуэ. Нуназе бере залын пукисьёслэн лыдзы эшшо но шеромиз. Соин ик туж кулэ законъёслэн проектъёссы кутытэк кылизы. Кылсярысь, та нуналэ юнматыны кулэ вал "Удмурт Республикалэн промышленной политикаез сярысь" законлэсь инъетсэ. Соин тодматӥз Удмурт Правительстволэн Тӧроезлэн воштӥсез А. Злобин. Та законлэн кулэлыкез сярысь туж кемалась вераськонъёс мыно ни. Но депутатъёслэн куараоссы тырмымтэен, дасям законлэсь инъетсэ ӧз юнматэ. Паймытэ соиз но: малы меда та нуналэ сессиын ӧй вал валтӥсь предприятиослэн кивалтӥсьёссы-депутатъёс? Озьы ик луиз исправительно-трудовой колониосты куд-ог налогъёслэсь мозмытонъя дасям законлэн инъетэныз но. Кун Кенешлэн Тӧроез А. Волков ӵектон сётӥз сессие лыктымтэ депутатъёслэсь нимъёссэс газетъёсы печатланы. Но ӵектон ӵектонэн ик кылиз. Сое юнматыны куара ӧз тырмы. Сессия ужзэ азинтоз 13 октябре. Т. БАННИКОВА. Ӧтьымтэез но куно Ӧтемез кадь ик дуно Матэктэ "Удмурт дунне" газетлы 80 ар тырмон нунал. Солы сӥзем ужрад ортчоз 28-тӥ октябре Удмурт кун филармонилэн Бадӟым залаз (Пушкин ульча, 245). Кутске 16 часэ. Тужгес матысь организациослы но адямиослы редакция сётэ ӧтёнъёс. Но котькудӥз ми доры со дуре лыктыны уг быгаты. Соин ик гажано лыдӟисьёсмылы но эшъёсмылы ивортӥськом: ужрадэ пырыны луоз дунтэк но нокыӵе ӧтёнтэк. Милемды туж-туж ӟечкыламды потэ ке, сцена вылэ тубыса, асьтэлэсь мылкыддэс вералэ али ик таӵе телефонъёсъя: 24-56-67, 24-55-58, 24-53-69. Соку тӥледды сценарие пыртом но ӝытын луэмезъя кыл сётом. Ужрадмес шулдыртоз Удмуртиын, Комиын, Мари Элын, Ивановоын но музон интыосын данэ потэм крезьгурчи, кылбурчи но кырӟась Анна Плотникова. Шонерзэ вераса, "Удмурт дуннелэн" ӝытаз со сётоз нырысетӥ бадӟым концертсэ. Ӝытын ортчозы пӧртэм ӵошатсконъёс. Кин умойгес тодэ "Удмурт дунне" газетлэсь пуштроссэ но сое дасясьёсты? Кин вакчигес но чебергес ӟеч кыл вералоз? Кин устогес шудоз арганэн (баянэн), гитараен, крезен? Кинлэн дэремез чебергес? Правительствоысь иворъёс Эстӥськон тырмыт луоз Витетӥ октябрьлы дасям лыдпусъёсъя, 95 процентэз социальной удысысь объектъёс но улон юртъёс шуныт басьтӥзы. Таяз толэзе ваемын луоз на эшшо 18 сюрс тонна музъем эгыр. "Удмуртлестоппромлы" секыт ке но ужаны, солэн генеральной директорез А. Перевозчиков оске, шаермы эстӥськон тырмыт басьтоз шуыса. Секыт югдурысь потыны юрттозы Удмуртиысь му вӧй поттӥсьёс, озьы ик азьвыл аръёс понна пунэм тыронъёс берыктэмын луозы вузъёсын. Та ужъёсты ӝогомытыны юрттоз элькунысьтымы пунэм тыронъёсъя центр. Арлыдоослэн вазиськонзы Асьме шаерын ожысь но ужысь ветеранъёс ог 300 сюрс пала лыдъясько. Та вакытлы арлыдоослэн улонзы капчи ӧвӧл. Пенсиез 2-3 толэзьлы ӝегатыса сёто. Куд-ог вузъёслы но эмъюмъёслы дун 2-3 пол будэмын. Жилищно-коммунальной реформа ветеранъёслы номыр ӟечсэ уз сёты. "Ветеранъёс сярысь" Закон уг быдэсъяськы. Соин валче ветеранъёслэн пленумзы Удмурт Республикаысь Кун Кенешлы, Правительстволы, предприятиослэн кивалтӥсьёссылы, банкъёслы, коммерческой но вузкарон учреждениослы, озьы ик Удмурт Республикаысь ожыс но ужысь ветеранъёслы Вазиськон кутӥз. Пленуме ветлэмъёс куро "Ветеранъёс сярысь" законэз быдэсъяны пенсиосты дыраз тырыны; эмъюмъёсын но йӧнатскон интыосын югдурез тупатыны. Кибашлыос луизы Ужтэк кылемъёслэн лыдзы Селта ёросын но ӧжыт ӧвӧл. Сыӵеослы уж висъян ласянь пӧртэм амалъёсты утчало. Алигес кӧня ке мурт киужъёсъя мастерлэсь свидетельствозэ басьтӥз. Кибашлыос дышетскизы ньӧрлэсь но пулэсь вӧлыса арбериос лэсьтыны. Экзаменэз кутӥсьёс вань ужъёссылы вылӥ дунъет сётӥзы. Зэм, выль специалистъёслы табере гуртазы ужано луоз. Но соослэсь киужъёссэс басьтыны мылкыд карисьёс одно ик шедёзы. Г. КРЕМНЕВА. КИБАШЛЫОС Котырес ӧс йыразьёс Тодам лыктэ удмурт писательлэн Василий Широбоковлэн мадемез: - Война вылтӥ газетчиослэн но кӧтсы юн сюмалляз. Редакторлы озьы ӝожтӥськисько ке, со монэ арнялы-кыклы келя Алнаш палъёсы. Узыргес юртъере патере пырисько, иворъёс люкасько, нялтас кӧтме но тырисько. Туала газетчиос оглом ёрмо ке но, нянь юдэс понна гинэ ӟеч коркаез уг утчало. Усто юртъерез адӟытэк уг кельто музон муген. Сыӵе сяммес тодыса, вылды, милемлы Алнашын дэмлазы: - Кузебае вуылӥды ке, одно учкелэ Дмитриевъёслэсь улэм-вылэмзэс. Уд жалялэ. Верамын - лэсьтэмын. Одно быдэстоно ужъёсмес йылпумъяса вамыштӥськом Дмитриевъёслэн корказы пала. Тузӥ юртъеръёс ӧжыт ӧвӧл. Озьы ке но, ӟечез пӧлын ӟечез вань шуэм сямен, утчано маке зэмен ик синмаськымон вылэм. Виталий Петрович Муважиын немец кыллы дышетэ. Валентина Николаевна пенсиёзь Кузебай школаын ужаз. 1964-тӥ арын кузпалъяськыса, куинь нылпи будэтӥзы, ваньзэс ӟеч но кема дышетӥзы. Виталий Петрович Муважи школаын директор вал. Отчы квартира но дэмлазы. - Анай дорысь одӥг вамыш нокытчы уг поты, - шуиз со. Солы бугро сётӥзы. Тазэ юртлы асьсэос пӧрмытӥзы. 1978-тӥ арын, уно вемеос бере, корка пырон каризы. Туала пу юрт чаляк вужме. - Мугез валамон, - воргорон музэн йӧн-йӧн валэктэ Валентина Николаевна. - Вашкала кор юнгес вал. Туала нюлэс сисьме пыд йылаз, солэсь ӝутэм корка ӟизыгес пӧрме. Тӥни малы кузпалъёс малпазы кирпич юрт ӝутыны. Кун (государство) бен огвакытэ куд-огезлы юрттыны выриз. Дмитриевъёслы номыр ӧз йӧты, черод палэнэтӥ кошкиз, шӧдске. Чурысь ваизы кирпич. Машинаос сётӥз колхоз. Дунэн, но ярам ни со но. Виталий Петрович ассэ ачиз юнматӥз проект лэсьтӥсе но, инженере но, прорабе но, каменщике но, плотнике но. Кенешизы тазьы. Корка медло улыно-вылыно. Кузьдалаез дас метр, пасьталаез - тямыс. Чебер садэз исантэм вылысь, выль юртэз интыяно палэнэгес. Ӝутӥзы борддоръёс. Кирпич пушкын шоканы секыт, шуо. Ма кароно? Вӧлдэтэз но выжез буяно ӧвӧл! Вольыт вӧлэм пул сотэк но чебер адске. Ӧсъёсты но укноосты инъязы асьсэ киын. Пож вулы гу гудӥзы, сое машина питранъёсын юнматӥзы. Отчы гумыос лэзьязы. Йырез тӥяно луиз кочегарка шуонын. Улӥяз гур, вылӥыз буш. Мар инъяно отчы? Огез ӵыжы-выжызы ӵыж выль ванназэ куштэм. Оло, сое пуктоно? Цементэз зӧк сӥен вӧлдӥзы, отчы корт гумыос "мерттӥзы", таосыз вылэ ванна юнматӥзы. Кочегаркалэн вылӥыз тырмиз. Кузебайын та нырысетӥ ванна, дыр. Ошмес кыдёкын ӧвӧл. Но кезьыт ву лыктэ гуртысь водопроводэн герӟам гумы кузя. Газ пыртэм бере, кранъёсысь виялоз шунытэз но. Сэрего-сэрего пырон-потонъёс сёто, пе, урод кужым. Со шонер оло ӧвӧл. Котьма ке но, Дмитриевъёс ӧс йыразьёссэс котырес каризы. Египетын выллем шуод-а, мар-а. Юртъерен ӵошгес лэсьтӥзы гидъёс, лапасъёс, куала. Йӧгузы гинэ ӧвӧл на. Кибашлыослэсь учкыны кулэ сое сӥятон амалэс. Куинь ар лэсьтӥськыса, миым 1-тӥ ноябре Дмитриевъёс выль интые пыризы. Кылем тол вылтӥ сыӵе-таӵе шекъёс ӧз шараяське. Отын уло кык кузя. Пиналъёссы пазьгиськемын ни. Зэм, Ижысь нылзылэн пиез быдэс гужемзэ татын. Удмурт сямен вераськемезъя но, улон манерезъя но копак гурт пиёк. Юртъерез учкыны уноез ветло. Кунгож сьӧрысь куноос Кузебае ӵем вуыло бере, соос но кожылытэк уг кылё. Вылаз ик, Виталий Петрович немец кылэз умой тодэ. Нош венгеръёс понна дойч - асьме понна ӟуч кыл кадь. Виталий Петрович мылысь-кыдысь возьматӥз юртъерзэ, мастерскойзэ, садзэ, бакчазэ, ас киыныз вӧлэм шакматъёссэ. Чиль-дан ворекъясь указкаоссэ гинэ ӧз шедьты. Кыӵе ке возьматонэ (выставкае) куриллям но, берлань келяллямтэ ни. Озьы бере, соос но кинлы ке кулэ луиллям. Кузебайёс милемды вожмаськыса отизы кӧлыны. Милям учкеммы потӥз на музонзэ ӟеч юртъерез. Мынӥмы Лаврентьевъёс доры. Вячеслав Никонорович но куке-соку школаен кивалтӥз. Аналтэк малпалод: директоре татын пукто тужгес кибашлы воргоронъёсты. Ӵуказеяз ӵукна Лаврентьевъёс доры шок-пуль бызьыса вуиз Валентина Николаевна Дмитриева. Милемды адӟыса, лулзэ но уг шедьты ни: - Тӥледды уг ни сутылы кожасько вал! - Мар-о сыӵе луиз? - Толон асьме сярысь туж умойтэм вераны шедьтӥськем. - Умойтэм? - Бон угось. Картме масьтёр шуыса ушъяй-ушъяй, нош гурт калык сярысь вераны вунэтӥськем ук. Милемлы туж уно адямиос юрттӥзы. Тазэ одно-одно гожтэлэ. Ми огнамы немыр-немыр лэсьтыны ӧй пишмытысалмы. Кошкыкумы ми эшшо учким на Кузебайысь чебересь урамъёсты. Гуртлэн огпалаз сыло кӧня ке зэмос коттедж шуонъёс. Ого, "выль ӟучъёс" татчы но вуо ни? Та бадӟымесь юртъеръёсты пукто вылэм дышетӥсьёс понна. Экономика шальтрамен, лэсьтӥськон гуньдӥз. Коркаосты йылаз-пумаз вуттыны нокинлэн но кужымез ӧвӧл. Кирпичен-кыкен пырдо ни. Озьы ик ӝега школалы выль юртъер инъян. Правительстволэн Тӧроез Павел Вершинин соин валче нимысьтыз кенеш ортчытӥз ке но. Вераськон мынӥз республикаямы нырысетӥзэ зэмос удмурт школа усьтон сярысь. Анай-атайёс, мукет интыосын сямен, талы уг пумитъясько. Пумитъяське экономика. Кызьы вырӟытоно сое? А. ШКЛЯЕВ. ??Кузпалъёс Дмитриевъёс. ??Соослэн корка пушсы. ??Чеберъям пул. ??Вячеслав Лаврентьев аслаз коркаез азьын. Г. ЮСАЕВЛЭН туспуктэмъёсыз. Валэктэ юрист Сэрегез нуэ адвокат Лилия Шкляева Ваньбур люкан но сое люкон Картэным люкиськисько. Нылпиосмы бадӟымесь ни. Картэ адвокат медъяны медэ, тросгес ваньбурмес аслыз карон вылысь. Нош мынам адвокатлы коньдонэ ӧвӧл. Закон сётэ-а оскон (гарантия), ваньбурез люкон ласянь монэ вӧсь каронтэм понна? Н. ПАВЛОВА. Татын нырысь ик лыдэ басьтоно тани мае. Люкыны луэ кузпалъёс ӵош улыку люкам ваньбурез гинэ. Отчы уг сюры кузпалъяськемлэсь азьвыл басьтэм узырлык, нош озьы ик ӵошен улӥсь кузпалъёс пӧлысь огезлы гинэ кузьмам но кельтэм узырлык (наследство). Россия Федерациысь Семья сярысь кодекслэн 34-тӥ ёзэтэз (статьяез) огъя (ӵош улыку) люкам ваньбурен лыдъя таӵе коньдонэн басьтэм мае ке - ужам но ужбергатэм (предпринимательство) чотын, пенсиос но пособиос чотын, материальной, музон юрттэт чотын. Отчы озьы ик пыро интыын кыллись узырлык (недвижимость), дуно бумагаос, вкладъёс, пайёс. Татын уг учко - кин вылэ гожтэмын соос. Огъя ваньбурлэсь люкетсэ басьтыны правоез вань гурт хозяйствоез нуисьлэн, нылпи утялтӥсьлэн но мукет муген сэрен пайда басьтӥсьтэм муртлэн. Шуом, огезлы кузпаллы кылиз юртъер. Огъя законъя со - кельтос (наследство). Озьыен, дунзэ люкыны уг яра. Нош коркаез тупатыны кутэмын ӵош улыку люкам уно коньдон, юртлэн дунызлэсь но тросгес уксё. Выльдэм юртъерез табере огъя ваньбурен но лыдъяны быгатозы. Нимаз арбериос (дӥськут, пыдкук но мукет), дуно чеберъяськонъёсты вератэк, ӵош улыку басьтэмын ке но, огезлэн гинэ кузёлэн лыдъясько. Кодексысь 38-тӥ ёзэт огъя узырлыкез люкыны лэзе ӵош улыку но, бракез дугдытэм бере но, кудӥз ке кузпал куремъя.Соос ваньбурзэс висъяны быгато, куспазы соглаш кариськыса, та пумысен нотариус дорын документ лэсьтыса. Тупамтэос кылдыку, ужпумез учке суд. Со пусъе, кинлы кӧня узырлык сюре. Огез чакламлэсь дуногес ваньбур басьтэ ке, (мунчоез корен-корен уд люкы), мукетызлы пайзэ мед берыктоз коньдонэн. Куддыръя кузпалъёс ӵош но уг уло, браксэс но уг дугдыто. Сыӵе вакытэ люкам узырлыкез суд лыдъяны быгатэ одӥгезлэн гинэ адямилэн. Быдэ вуымтэ нылпиослы гинэ басьтэм арбериос (дӥсь, пыдкутчан, дышетскон тӥрлык) уг люкисько, соос кылё пиналъёсын ӵош улоно мурт доры. Пичиос вылэ тырем коньдон (вклад) - нылпиослэн ик ваньбурзы, огъя ваньбурез висъяку, со лыдэ уг басьтӥськы. 39-тӥ ёзэт валэктэ: брак лэсьтыкузы, кузпалъёс ваньбур пумысен нимысьтыз огкыл (договор) ӧз кутэ ке, узырлыклы равозы огкадь. Зэм, суд пайзэс воштыны быгатэ. Кылсярысь, быдэ вуымтэослэсь кулэяськонъёссэс чакласа. Яке огез кузпал нокыӵе мугтэк ужамтэ дыръя, огъя ваньбурез аслыз гинэ кутылыку, юылыку. Таӵе ужпумъёсты суд эскере бракез дугдытэм бере куинь ар ӵоже. Шӧкыч Ката пытьы Тодматске: мон - тужгес кышкыт йыружъёсын нюръяськонъя Горчилов следователь. Алигес ми доры Шерстобитов кузпалъёс вазиськизы: соос гуртазы ӧвӧл дыръя кин ке улон интыязы укноетӥ пырам но ӝӧк вылысьтызы толло газетсэс лушкам. Вить минут ортчыса, мон отын вал ини. Укно янак вылын - ньыльдон куинь размер ката пытьыос. Зэмзэ ик газет интыяз ӧй вал. - Тани татын со вал,- возьматӥз Шерстобитов.- Мукет арбериосмы ваньмыз интыязы - коньдон но, зарни но. Мон комнатаез эскери. Ваньмыз интыяз кадь. - Нош со газетын номыр сыӵе-таӵеез ӧй-а вал гожъямын?- юасько мон.- Шуом, кыӵе ке ватосъёс сярысь? - Ӧй вал. Мон ваньзэ йырам возисько,- шуэ Шерстобитов.- Собере газетэз но огшоры пурысь гинэ вал... - Нош кин ке тодылӥз-а со газетэз басьтэмды сярысь? - Нокин ӧз! - оскымон вераз Шерстобитов.- Почтаын ужасьёс сое асьсэос но уг тодо: я одӥгзэ газетэз вутто, я мукетсэ... Укно доры матэктӥ. "Паймоно кадь! - малпаськи мон.- Ката пытьыосъя ке учконо, йыртэмась татчы пыремын. Соин валамон. Нош кытӥ со отысь потӥз?" - Нош пырон ӧсты тунгонамын-а вал? - юасько. - Бен,- шуэ.- Куиненыз тунгонэн ик. - Озьыен, йыртэмась татын! - чилектӥз йырам но пистолетме дасяй. Шкафын со ӧй вал, ӧвӧл диван улын но, ӧз шедь тумбочкаысь но... Со вакытэ ву лэзем куара кылӥськиз! Ог-кык секунд ортчыса, квартираысь одӥгез ӧс усьтӥськиз но отысь таза мугоро воргорон потӥз: - Вождэс эн поттэ, гражданин следователь,- кепыраса вазиз со.- Туж шуге-леке вуиськиз, нош со кулэ интыязы... сёросэ... коньдонтэк пырыны уг лэзё вылэм... Мынам ӵапак уксёе ӧй вал... - Нош газетэз малы кутӥды? - юай мон но юамысьтым ачим ик кепырай. - Мон янгыш,- шуэ "йыртэмась". - Ӧвӧл, ӧвӧл,- шуисько мон, - шонерзэ верано ке, тӥ янгыш ӧвӧл. С. ВИКТОРОВ. Вашкала ватос Сарапулысь Шоро Прикамьелэн историяя но культурая музеяз ужысь археолог Николай Решетников ноку тэк уг пук, шуид ке, уд янгыша.Татысь Горький но Карл Маркс ульчаос вожвылын куке но Петровлэн аптекаез сылэм. Пуктэмын вылэм со 1878 арын. Бӧрысь сое малы ке куашкатӥллям. Музейысь археолог аптека бервылэз гудыса эскероно кариськиз. Тыршемез юнме ӧз луы - отысь со кылем даурын кутӥськись аптека посудаосын коллекция шедьтӥз. Туж чебересь но аспӧртэмлыкоесь вылӥллям соос. Вань туж пичиосыз но, отчы кӧня ке шапык гинэ эмъюм поныны луэ. Сыӵе посудаосты дасяло вылэм нимысьтыз рецептъёсъя игнэ. Л. ЛАПОЧКИНА. "ЛУДОРВАЙ УЖЛЫ" - 70 АР Кенеръёс котырын жугиськон Колхозъёс кылдытон азьын 1928 арын ортчем "Лудорвай уж" сярысь тодэмме но малпанъёсме мон гожъяй вал ини вить ар талэсь азьло. Соку таӵе йылпумъян лэсьтӥ: Совето властьлэн кивалтӥсьёсыз ласянь со удмурт крестьянъёсты зӥбон ужрад вал. Со арын толсур толэзе дас удмурт воргоронлы шара суд лэсьтыса, лек приговор кутӥзы. Подсудимойёс эриклэсь трос аръёслы люкемын но келямын вал. Вань советской вакытэ, 60 арлэсь кема, гуртоосмес тушмонъёс шуыса лыдъяллязы. Нош али та ужпум борды выльысь берытскыны бадӟым мугъёс вань. Лудорвайлэн адӟонъёсыз уг быро на вылэм. Туэ нош пусъёно луэ сьӧд юбилеез - "Лудорвай ужлы" 70 ар тырме. Собере та учыръёсты туэ 20-тӥ гудырикошконэ потэм номераз выльысь тодэ вайытӥз "Удмуртская правда" газет. Статья потӥз "Историысь чуръёс" рубрика улын. Статьялэн авторез В. Безымяннов ортчем югдурлы мур дунъет уг сёты, вуж гуръёсын чирдэ. Яке зэмлыклэсь пичи люкетсэ гинэ возьматэ. Нялтас вераны кулэ. "Ижевская правда" ("Удмуртская правда" газетлэн азьло нимыз) Лудорвайын крестьянъёсты льӧмпу ньӧръёсын жугем сярысь нырысь ик ивортэм вылэм. Та иворез Москваын тодӥзы, лудорвайёсты, нимо-дано карыса, пӧртэм газетъёс гожъязы, быдэс странае вӧлмытӥзы. Малпасько, гуртысь югдурлы туэ но мыдлань валэктон сётэмзы бере. "Лудорвай уж" сярысь вераськонмы азьланьтӥськоз на. Быдэс дунне тодэ вылэм Та учыр асьме вакытэ вал. Выльдӥськон кутскем бере интервидение Советской Союзысь но быдэс Европаысь телевизор учкисьёслы возьматӥз трос сериен документально- художественной телефильм, сӥземын вал со совето кунмылэн историезлы. Фильмез кылдытӥсьёс ас азязы ужпум пуктӥллям асьме кунын ортчем событиослы но Компартилэн политикаезлы выль сямен дунъет сётыны: выльдӥськон шуон вакытэ историмы шоры выль куронъёсъя учкыны ӧдъязы угось. Со сериалэз ӝытысь ӝытэ учкылӥм. Монэ тужгес но паймытӥз партилэсь советской крестьянствоен кусыпъёссэ, гуртъёсын коллективизацилэсь мынэмзэ возьматӥсь люкетэз. Историез тодӥсь-валась муртъёслы колхозъёс кылдытон вакытысь тросэз кемалась тодмо кадь, нош со чылкак озьы вылымтэ. Тани тодӥськом, В. И. Ленинлэн кооперация сярысь планэзъя гуртын выль улонэз пӧртэм амалъёсын лэсьтыны луэ шуыса. Но кызетӥ аръёслэн пумазы Сталин но солэн юрттӥсьёсыз сыӵе сюрес вылысь кожиллям. Котькытын колхозъёс гинэ кылдытъяны кутскизы. Муг но шедьтӥзы: гуртъёсын, пе, тушмонъёс пумитъясько - соосты ӝоггес шымыртоно. Лэчытоме, пе, классовой нръяськон. Экран вылысь паймыса учкисько ӧжытак тодмо суредъёсты, со вал "Лудорвайское дело" фильмысь кадръёс, мукет сямен вераса, 1928 арын толсур толэзе Ижевскын ортчем судысь суредъёс. Возьматӥзы подсудимойёсты, соос дас кузя вал. Нимъёссэс, конечно, ӧз вералэ. Тодӥсько, коллективизация вакытэ "Лудорвай уж" фильмез быдэс Советской Союзын возьматъяло вылэм: учке, пе, тӥни кыӵе сьӧсьёс улӥзы Лудорвайын, колхозъёс кылдытонын самой сыӵеос, пе, люкето. Нош телефильм вуж фильмысь кадръёсты уже кутыса оскытэ: кулакъёсты шымыртон но быдтон, колхозъёсты кужмысь кылдытон ӵапак Лудорвай выллем ужрадъёсын кутскем. Озьыен, гурт калыклы пумит репрессиос соку кутскемын. Мон Лудорвайын, шонергес вераса, отысь палдэм починкаын яке "Новая Крестьянка" колхозын будэм мурт, гуртоосме сьӧдмамзы сярысь тодытэк ӧй быдэсмы. Фильмын кадь туспуктэмъёсты адӟылӥ вуж газетъёсысь но журналъёсысь, лыдӟи 1929 арын потэм пичи гинэ "Лудорвайское дело" книгаез. Туспуктэмъёсты куке но возьматъязы Удмурт краеведческой музейын, али вань соос Лудорвай школалэн музеяз но. Туж секыт йыружъёс лэсьтӥзы шуыса янгыше уськытэмъёслэсь нимъёссэс но тодӥсько: Лудӟи гуртысь Дмитрий Французов но Матвей Ермолаев, Лудорвайысь Трофим Мемятов, Николай Сергеев, Еремей Бегешев, Григорий Иванов, Алексей Михайлов, Иван Петров но Яков Тычкин, Юсь черкогуртысь Максим Токарев. Суд улэ сюремъёс ваньзы ик пуктэмын вал РСФСР-ысь Уголовной Кодекслэн тужгес шукрес ёзэтъёсызъя: витез - адями вием сярысь 58/8-тӥ ёзэтъя, 6 яке 10 арлы; отӥосыз - 109-тӥ но 110-тӥ ёзэтъёсъя, таосъя адямиез янгыше уськыто солы оскем кивалтон ужез мыдлань яке полномочиосызлэсь мултэсэн быдэсъямез понна, яке властен мултэс кузёяськиз шуыса (та подсудимойёс Лудорвай но Юськи сельсоветъёслэн членъёссы вылӥллям). Бӧрысь ини, трос дыр ортчыса, 1962 арын, "Лудорвай" книга поттӥз журналист Н. И. Кондратьев. Отын со гуртлэсь кызетӥ аръёсысен кутскыса историзэ возьматыны тыршиз. Гуртлэсь пуштроссэ эскеро туала шаерчиос Гуртъёс вискысь кенеръёс понна жугиськон поттэм муртъёслэн со быдӟа янгышсы ӧй вал, крестьянъёсты туж чурыт наказать каризы. Со сярысь вера но гожъя история наукаосъя доктор К. И. Куликов но. Тодосчи выльдӥськон аръёс кутскем берегес ик Лудорвай уж сярысь материалъёсты, архивъёсын бугыръяськыса но гурт калыкен пумиськылыса, выльысь эскериз, Лудорвай ужез меӵак коллективизациен герӟазы шуыса валан сётӥз. Одӥгез бадӟым научной ужез озьы ик нимаське: "Лудорвайское дело" и коллективизация в Удмуртии". Кузьма Иванович лыдъя, Уголовной кодексысь вылӥын верам ёзэтъёс Лудорвай ужъя одӥгез но ӧй тупасалхзы. Но соку коллективизация кутске ни вал. Классовой нюръяськонлэн лэчытомемез сярысь теория шонер луэ шуыса оскытыны мугъёс гинэ кулэ на вал. Лудорвайын крестьянъёсты жугем сярысь ивор ӵапак тупаз. Со жугиськон Лудорвайын ӧй ке но луысал, Сталин но со котырысь большевикъёс сыӵезэ малпасалзы яке шедьтысалзы. Соин ик Москва но Нижний Новгород (соку Удмутия Нижегородской крае пыре вал) Лудорвай уж борды зол кырмиськизы. Шаерамы ужаз нимыстыз комиссия. Партилэсь Удмурт обкомзэ пыкылӥзы ляб ужамез понна. Соин ик Лудорвай уж сярысь фильмез быдэс СССР-ын возьматъязы. Трос интыосын крестьянъёсты но рабочийёсты ӧтчамъёсы люкаллязы, кулакъёсты каргкась резолюциос кутылӥзы, соосты, пе, эшшо зол наказать кароно, быдтоно вал. Центральной архивъёсын 1928 арын толсуре судлэн мынэмез сярысь материалъёс, обвинительной заключение кылемын. Кылсярысь, прокурор янгыше уськытӥсь судын вераськем бере, защитник таӵе кылъёс верам: "Татын, подсудимойёслэн скамья вылазы, пуко ужась крестьянъёс, гожтэт ӧжыт тодӥсьёс, нош кудӥз чик дышетскымтэ. Асьсэлэн музъемзы вылын соос асьсэос ужало, медъяса нокинэ уг ужато, соин ик соосты кулак шуыны уг луы, шоро-куспо улӥсьёс пӧлы пыртоно. Та уже соос сьӧлтаськизы асьсэлэн дышетскымтэенызы, пеймыт но валасьтэм луэменызы. Ӧжыт ке но тодӥсь-валась луысалзы ке, татчы ӧй сюрысалзы. Ньӧрам сярысь верано ке, куд-огез та уже чик ӧз пыриське, нош музъемез люкон ужлы пумит ӧз кариськылэ. Асьсэос но выльысь люкон понна сылӥсьёс вал, нош верамзэс нокин кылзӥсь ӧй вал. Курисько Токаревез, Петровез, Михайловез но Тычкинэз шонере поттыны, Французовлы одӥг арлэсь трос сётыны уг яра, кылемъёсызлы озьы ик кулэстоно, гособвинительлэн верамез мында наказание сётоно ӧвӧл". Суд огезлэсь но защитниклэсь верамзэ лыдэ ӧз басьты. Со вакытэ но тросэз визьмо адямиос пӧяськонлы оскиллямтэ, удмурт гуртысь калыкез ултӥян со шуыса валаллям. Со ултӥянъёслэсь пуштроссэс туж умой валазы удмурт интеллигенция пӧлысь визьмоосыз. Кылсярысь, писатель но журналист, "Выль синь" газетлэн азьло редакторез К. С. Яковлев Лудорвай ужез удмуртъёс понна кыкетӥез Мултан уж луэ шуыса лыдъя вылэм. Сояз учыре асьме калыкез эксэй властьёс ултӥязы, таяз - Совето властьёс. Нош Н. С. Кузнецов асьме вакытэ ини "Шимес пеймытысь" книгаяз таӵе учырез пыртэ: "1928 арлэн пумаз Лудорвайысь удмурт крестьянъёсты суд ортчем бере келяменызы валче, ВКП(б)-лэн Удмурт обкомезлэн культпроп ёзэз удмурт интеллигенциез шор клубазы люказ. Отын партиен кивалтӥсьёс оскытыны выризы, Лудорвайын, пе, "классовой тушмон" калык шоры урдскиз. К. С. Яковлев но И. Я. Поздеев ӧз оске со кылъёслы, куризы пӧртэм ласянь валэктыны. Соослэн верамзыя, Лудорвайщина - со удмуртъёслэн улоназы кемалась пыӵам сямысь потэмын, кенешез чылак контрреволюция шуыны шонер ӧвӧл (248-тӥ бам). Визьмо удмуртъёс, кӧня ке ар ортчыса, кыкназы репрессия улэ шедизы. (Иосиф Поздеев туж зол дышетскем удмурт пи вылэм, ас вакытаз ужам Ижевскысь педтехникумын, собере удмурт пединститутын, трос аръёс ӵоже - школаын.) Егитъёс туала вакытэ Лудорвай уж сярысь тросэз уг тодо ни, кылэмзы вань ке но, пуштроссэ уг валало, куддыръя тодэмзы но уг поты. Тужгес но секыт йӧтӥз бадӟым янгыше уськытэмъёслэн семьяоссылы, выжыоссылы, пуктэмъёслэсь ваньбурзэс яке юртъерзэс но талазы, куамынэтӥ аъёс кутскем бере, эшшо кулак карыса, кыдёкысь шаеръёсы келязы. Гуртэ кылем нылпиоссылы но секыт йӧтӥз, трос ултӥянэз чидано луиз. Та сярысь нимысьтыз вераськыны луысал на, но огзэ верам потэ: та ултӥян аръёсты мӧйыос уг вунэто али но. Пукемъёслэн куд-ог ӵыжы-выжыоссы уло на. Кылсярысь, тямыстон ареслэсь ортчемын Николай Сергеевлэн нылыз Анастасия Николаевна. Солэсь но мӧйыгес Лудӟиысь Матвей Ермолаевлэн вынызлэн пиез Сергей Степанович Ермолаев. 1932 арын со ачиз но кулаке поттэмын вылэм, быдэс семьяен Архангельск областе келямын, бӧрысь отысь пегӟыса бертэ, заводэ ужаны пыре. Трос ужаса ортчытэм улонэз нимаз очерке куриське. Мӧйымиз ини Дмитрий Французовлэн одӥг гинэ пиез Александр Дмитриевич, со вордскемын аизлэн пукыса бертэмез бере, 1937 арын... Вуж гурен кырӟасьёс Нош таиз паймымон: "Удмуртская правда" газет 1998 арын 20 августэ потэм "Лудорвайская межа" статьяяз "Лудорвай ужлы" дунъет 70 ар ортчыса но одӥг буёлэн гинэ сётэ. Лудорвай но Лудӟи гуртъёслэн межазы дорын но Лудорвай ульчаын адямиосты льӧмпу ньӧръёсын жугон - со, пе, классовой нюръяськон вал. Жугизы, пе, узыръёс, озьы ик сельсоветэ пӧяськыса шедемъёс, куанеръёсты но активистъёсты, государстволы нянь люканы тыршисьёсты но музъем вылын ӵош ужаны мылкыд карисьёсты. Ваньмыз та зэмлыклэн кӧня ке люкетэз гинэ, вуж мэртэтъёсъя учкемын. Статьялэн авторез уг тоды, шӧдске, К. И. Куликовлэсь Лудорвайщина шоры выль синъёсын учкыса гожтэм ужзэ но, Н. С. Кузнецовлэсь "Шимес пеймытысь" книгазэ но, адӟымтэ туала вакытэ потэм телефильмез но. Историысь чуръёс палдурес но капчиен гинэ возьматэмын, отын зэмлык син шоры уг пуксьы. Калыклэн сьӧд адӟонъёсыз, удмурт крестьянъёсты ултӥян сярысь рос-прос вераськон ӧвӧл. Зэм, статьяын шонер верамын, Лудорвайын калык музъемлы ёрмыса улӥз шуыса. Соин ик, музъемез люкылыку, керетонъёс потылӥзы. Но та малпанзэ автор озьы ик пумозяз оскымон уг возьматы. ЛЕОНИД ФЕДОРОВ. Нуналлэн тодметэз 14 октябре - Покров. 910 арын Константинополь город вылэ урдскизы сарацинъёс. Тушмонъёслэсь утиськон понна, грекъёс Влахернской черке люкаськизы, Инмарлэсь юрттэт курыса вӧсяськизы. Шӧдтэк шорысь соос омырысь Богородицаез адӟизы. Христослэн анаез кема вӧсяськиз, городын улӥсьёсты утьыны курыса. Собере йырысьтыз шунды кадь пиштӥсь кышетсэ кылиз но черкысь калыкез соин шобыртӥз. Мукет нуналаз тушмонъёс город дорысь кошкизы. Чаклалэ: та нуналэ тӧл шунды ӝужан палась пельтэ ке, тол кезьыт луоз. Та нуналэ... ар талэсь азьло 14 октябре 25 ар тырме С. Боринлы (1973-1993), Россия Федерациысь Геройлы. Удмуртиын улӥсьёс пӧлысь со нырысетӥез та нимез басьтӥз. Вань сыӵеос! Ортчиз Удмурт нылкышно кенешлэн правлениезлэн заседаниез. Эскерем ужпумъёс пӧлын вал таӵеез но: кызьы умойгес ужано ёросъёсысь удмурт нылкышноосын. Соос пӧлын данак гинэ активистъёс, пӧртэм ёзъёсын кивалтӥсьёс, калык пӧлын удмуртлыкез пыӵатӥсьёс. Удмурт кышномуртъёс пӧлын вылӥллям фермеръёс но. Правленилэн тыршеменыз но утчаськеменыз, табере тодмо луизы соослэн нимъёссы но. Озьы малпан кылдӥз туэ ноябре, гурт хозяйство удысын ужасьёслэн нуналзы азьын, удмурт нылкышно-фермеръёсын нимысьтыз пумиськон ортчытыны. Пленумын озьы ик вераськон мынӥз Кун Кенеше быръёнъёслы дасяськон сярысь. Отчыозь дыр трос кылемын ӧвӧл ни, нош вань-а меда асьме удмурт нылкышноос пӧлын депутатлэсь ужзэ нуыны быгатӥсьёс? Вань сыӵеос! Дӥсьтонзы но тырмоз. Но юрттоно соослы та нюръяськонэ пыриськыны. Юрттыны дась Удмурт нылкышно кенешлэн правлениез но. Пӧртэм удысъёсын сюлмысь тыршо асьме кышномуртъёс. Но ӵем дыръя озьы но луэ: ӟеч тыршемзэс адӟиськом, нош данъяны вунэтӥськом. Али луонлыкмы вань визьмо пиосмес но нылъёсмес Ашальчи Оки но Куӟебай Герд нимо премиосын пусйылыны.Та ласянь ӵектонъёс вуыло удмурт нылкышноослэн правлениязы но. Удмурт драмтеатрысь артисткаез Галина Владыкинаез Куӟебай Герд нимо премиен пусъён ласянь ӵектонэз правление быръемъёс умоен лыдъязы. Зэм, сыӵе сӥё-дано нимез сётон понна нюръяськоно на ай. Т. БАННИКОВА. Марина КОСТЫЛЕВА Алексей ШКЛЯЕВ Вешась Очерк Аран 1928-тӥ арын кема кыстӥськиз. Сылӥсь нимо шур дурысь бамъёсын борды далай куасьмиз. Нюлэскысь эмезь куашказ. Нош Пислэглуд гуртысь калык сюрлозэ весь уг кушты на. Ӵапак соку, суслонлэн вужераз, сезьы культоос пӧлын, вордскиз Вера. Со вал 14-тӥ сентябре. Та вакытэ нылпиос чаляк будӥзы. Ӧй, мугоръёссы батыръёслэн кадь ӧй вал. Ма, кытысь-о сӥльвир люкалод, нянь кӧт тырымон уг сюры бере? Пиналъёс ӝог пыдъяськылӥзы визь ласянь. Лулпу нёжалъёс, сусыпу бамалъёс, узыё кушъёс шоры жальманы неку. Бакча уроно, шеп октоно, етӥн ишконо. Пичиос понна нимысьтыз нормаос ӧвӧл. Огъя кыткетэ пырид - кыскы мукетъёсын огкадь. Кӧня синву виятэмын, атайёсты оже келяку, отын быремзы сярысь ивор басьтыку, кӧт сюмаса кынмыку. Зэм, соку но малпаськизы ӟечез сярысь. Вералэн бубиз ожмаськонэ мыныкуз вераса кельтӥз: - Визьмо та нылы, враче поттоно вал. Выжыысьтызы музон адямиос эмъясе дышетскылӥзы. Нош Вералэн черсаз бергаз музон шорт. Чигиськыса уд шуна, кӧттэ бӧрдыса уд буйгаты. Ужын сямен ик, дышетсконын но Вералэн бере кылемез ӧз пот. Сизьыметӥ классэз "витьёсын" гинэ йылпумъяз. Сое Якшур-Бодьяысь педучилищее экзаментэк кутӥзы. Эшшо бадӟымгес шумпотон азьпалан витиз. Туж ёрмон вакытэ но училищеын котькуд адямилы нуналаз ӝыны кило нянь сётъязы. 500 грамм чылкыт нянь! Сукыри бен ӝӧк вылэ ачиз уг тубы. Педучилищеын но огъя ужлэсь уд палэнскы. Сюрло кут но сезьы-йыды ара. Пӧзь ӧвӧл. Пужмерез вошто йӧ ӟузыриос. Сюрло уг ванды кадь куро нюжаосты - кора кадь езэз. Кызьы чидало эбылям киос? Вуиз кема витем Быдӟым Вормон. 1946-тӥ арын Вера йылпумъяз училищеез. Сое келязы Алнаш сьӧры, Варзи-Ятчи пала. Соку отчы мыныны шуг вал. Алнаш лыдъяськылӥз кыдёкысь сэрег. Нылпиос тачак, дышетӥсьёс уг окмо. Кутэн, уродос юбкаен но пенжакен дӥсяськем нылмурт шедьтӥз школаез. Пыриз директор дӥне. Отын пуко вылэм выж миськисьёс. Соос син ултӥзы учкизы тодмотэм мурт шоры: - Бон тӥ выль техничка кутӥды шат? - Какой техничка? - кунэрскиз директор. - Выль дышетӥсь со! Уд тодке-а, мар-а туала улонэз? Секыт войналэн бервылъёсыз татын но син азьын. Завуч ветлэ кунул бодыен. Востэм мугоро анайёслэн синъёсазы куректон но, висён но, сюлмаськон но. Пиналъёссы жумесь. Макем витё небыт куаретэмез, вешамез оло нош нянь юдес сётэмез яке шыдэн утялтэмез. Вера Ивановна чаляк ятвылтӥз тани мае. Пичиос сокем ик уг чаклало дышетӥсьлэсь дӥськутсэ. Соос нырысь ик дунъяны туртто: кызьы тон шоразы учкод но вазёд. Пинал ке но вал, нылмурт валатскиз: соос юнме чеберъяськемдэ шӧдытэк уз кыле. Соин весь малпаськиз: нылпиосты лыдӟиськыны но гожъяськыны дышетэм сяна, соослэн сюлэмазы одно ик шуныт сэрег кылдытоно. Букваосын тодматонъя нимысьтыз методикаос вань. Нош шуныт сэрегъя? Тазэ училищеын ӧз валэктэ. Амал утчано луоз аслыз. Сюлэмен ик герӟаськемын музонэз йыр висён. Вера тодматскиз ожысь алигес бертэм пиен. Кенешыны ӧдъязы ни ӵош улон сярысь. Нош Якшур-Бодья палась гожтэтъёс вуо но вуо. "Нылы, туж кыдёкын улӥськод. Дорад ветлыны мон уг ваньмиськы. Сузэръёстэ но вынъёстэ тонтэк ӝутыны уг быгаты. Тон понна пиос быриллям ке шат? Дор палад но соос вань". Озьы нылмурт сюриз кык ярдур вискы. Сюлэмыз огзэ куре, мемиез - мукетсэ. Оло, таизлы чик гожъяно ӧвӧл ни? Бератаз мемиез чурыт кылъёс шедьтӥз: "Мон благословление ӧй сёты ке, шудэд уз луы". Бертытэк ӧйлась. Эх, кин ке соку верасал ке, мазэ кельтэ Алнаш палъёсы нылмурт! Ыштӥз со тужгес бадӟым узырлыксэ - яратонзэ. *** Сюлэм висёнэз огвакытлы пыдло ватытэк ӧйлась. Вера Ивановна юрттоно луиз покчиослы. Огез сузэрез йылпумъяз Казаньысь ветеринарияя институтэз, мукет сузэрез но выныз - Удмурт пединститутэз. Диплом басьтыса но апайзылы вазиськылӥзы на ужаны инты шедьтон пумысен. Нош аслэсьтыз дышетсконзэ весь берлолы кельтылӥз. Вера Ивановна бызиз асьсэ пала ик. Картэз оглом кӧтвеськантэм ӧй вал. Кышномурт берло гинэ шӧдӥз: кылдэм адямидэ ыштӥськод ке, сое нокин но уз вошты. Мемиез но нылкышно сюлмыныз тае ятвылтӥз. Ассэ ачиз весь янгыш карылӥз. Нош ортчемзэ уд берыкты ни. 29 арескысен Вера Ивановна пал кылиз. Кияз куинь пиналыз. Огласянь со вала: кышномурт вӧзын одно ик медло утись - воргорон. Мукет ласянь, ассэ буйгатэ: ма, вань ук тазалыкез но гажано ужез. Гуртысь дышетӥсь - дышетӥсь гинэ ӧвӧл. Вылаз ик, коммунист ке. Со - педагог но, лектор но, пропагандист но, агитатор но. Туала вакытэ сыӵе кылъёс ыштӥзы ни ас пуштроссэс. Юа ай егитъёслэсь, маин выриз пропагандист, маин - агитатор. Карл Марксэныд ӵош кыдёкегес туздыртозы. Нош соку... Огпол кӧня ке мурт ӝожтӥськем Вера Ивановна вылэ. Пырак райкоме. Ачиз, пе, коммунизме ӧте, мумиз черке ветлэ. Кызьы озьы? Люкаськиз райкомлэн бюроез. Вера Ивановнаен нырысь-валысь лякытак бӧтьыртӥзы. Оло, ӧд тодылы, пе, мемиедлэсь лушкем йыртэмамзэ? Собере пумен лекомизы. Коммунист, пе, семьяысьтыз но сурымзэ улляны уг быгаты ке, кызьы солы оскод калык пӧлын ужаны? Кызьы оскод нылпиосты - коммунизм дурыны дасяськисьёсты? Нырысетӥ секретарьлэн сюлэмыз пирсэктӥз: - Эшъёс, мар тӥ? Али асьмеос пыкылӥськом Удмуртиысь самой устозэ дышетӥсез! Та вакытэ ик кырын калтырто зэмос йыртэмасьёс. Кызьы сое валано? А? Кышномуртлэсь партбилетсэ ӧз талалэ. Мемиез тае берлогес тодӥз. Нырысь куалектӥз. Отӥяз буйгаз но индылӥз. - Ченгешон эн потты, нылы. Шып ул. Урттылӥськисьёс ӧз урдске тон вылэ - омырскизы инмар шоры. Инмар ик тодоз ма карыны. Вера Иваоновна пиньёссэ куртчиз. Номыр уродзэ ӧз сӥзьы тушмонъяськисьёслы. Но таосызлэн семьяосазы бӧрсьысь бӧрсе кайгуос пыризы. Сокугес ик дышетӥсь гожтӥз "Тушмонъёсызлы сӥзёнзэ". Жанрзэ туннэ но валаны шуг. Оло ода, оло психологияя трактаж, оло инмарлы тэльмырон. Отысь валтӥсь малпан таӵе: "Мон сюлмысьтым тау карисько тушмонъёсылы. Соос мыным уг сёто лэсьтэменыз буйгатскыны но тэк пукыны. Тушмонъёс монэ котьку косо выльзэ утчаны но азьпала учкыны". Малы Вера мемизэ черке ветлэмлэсь ӧз алы? Юн сюлэмо вал мумиз. Малпанзэ шуак-дуак уз вошты. Ваньзэ нылпиоссэ туж секыт аръёсы но улэп кельтӥз, вордӥз, ӝутӥз. 91 ар улӥз, огзэ но пиналзэ ӧз ваты. Со понна ассэ ӧз ушъя - инмарлы тау карылӥз. Кызьы Вера дӥсьтоз сыӵе адямиез черкен пыкылыны? Улон вошъяське. Ӟырдыт сюлэмо коммунист Вера Ивановна Колесникова куке-соку ачиз вӧсяськыны кутскоз, вань юанъёсызлы инмарлэсь валэктон куроз. Черке пырыкуз, куинь мудор азьын молитва лыдӟоз. Абдралоз: малы, малы черкез асьме улонлэсь люкыны выризы? Туннэ Вера Ивановна корка пушказ возе вӧсяськон книгаос. Син шорын ик Вуж сӥзён но Выль сӥзён. Кинлы бен пайда ваиз калыкез инмарлэсь висъян? Та выллем юанъёслы ачиз вылӥ инмар но уз сёты валэктон. *** Буйгатосконэз валасьтэм кышномурт бератаз малпаз дышетсконзэ азьланьтыны. Мар-о, куамын тямыс арес ни ке? Шузиез вожъяськоз, визьмоез валалоз. Пыриз Глазовысь пединститутлэн педагогикая факультетаз, заочной люкетэ. Огпол Вера Ивановна дӥне вуиз бускель Шаркан районысь дышетӥсь Колесников Григорий Николаевич: - Лыктӥ тонэ кураны. Кышномуртлэн сое огпол но адӟемез ӧвӧл. Нош кылылӥз-а меда? Кин тодэ. Дипломен педагогъёс тырмымтэен, школаязы немец кыллы дышетӥз алигес гинэ дасэтӥ классэз йылпумъям нылаш. Мумиз кулэмын. Ӵапак солэн бубиз - Григорий Колесников. Мукет нылпиосыз, куать кузя, огезлэсь музонэз пичигес на. Вера Ивановналэн сюлэмыз кӧня ке небӟиз, воргоронлэсь мушен выремзэ тодыса. Пиналъёссэ нуиз чечы веръяны. Григорий Николаевичлэн нылпиосыз лыктӥзы Вера Ивановналэсь сутэрзэ шӧмъялтыны. Кышномуртлы ас пичиосыз шуизы: - Мемей, тыныд огнадлы секыт. Бызь. Воргоронэз аслаз пиналъёсыз одно утьыны турттӥзы. Огназлы палэнэ шебаляны кема шат? Озьы Сосновкаын кылдӥз трос нылпиё семья. Вера Ивановнаез ваньмыз меми шуыны ӧдъязы. *** Вашкала удмуртъёслэн аспӧртэм сямзы вань: мӧйы мурт, пиналъёс дортӥ вамышъякуз, одно ик тыбырзэс вешалоз но шуныт кыл вералоз. Вера Ивановна таӵе йылоллы валэктон шедьтӥз наукаысь. Вешаку кылдӥсь кужым (энергия) тубе инсьӧре (космосэ). Отын юнмаса, берен ваське нылпи доры. Тӥни малы нуныянэз ноку но вунэтыны уг яра. Классысь пияш оглом усто дышетске. Гожъяськыны гинэ мылыз уг поты. Вера Ивановна солэсь чиньыоссэ учкиз: - Кыӵе чебересь тынад чиньыосыд, Коля. Нош ы букваед тугаськем биньгозы кадь. Табере сак учкы. Чиньыостэ вешай ке, букваосыд, чиньыосыд музэн ик, туж чебер пуксёзы. Урок быриз. Нылпиос вожмаськыса бызё тугаськем биньгозыез учкыны. Соин артэ сылӥсь букваос зэмен ик ӵошкытэсьгес пӧрмиллям кадь. Мукетыз пи весь урокъёссэ келля. Пудо возьманы ысъяло, пе. Вера Ивановна вазе: - Кыӵе мӧзми тынэсьтыд! Пуксьы ай матэгем. Кӧты тырымон учко шорад. Шер адӟылэменым вунэтӥ ни тусбуйдэ. Тодмо ӧвӧл, мар вераз пиёк гуртаз. Сое пастухе ысъямысь дугдӥзы. Котькудзэ сямен урокез аспӧртэм спектакль карыны луэ. Вера Ивановна пыре классэ. Кунулаз журнал, кияз - вылӥе ӝутэм карточка. Ӝӧк доры вамышъятозяз куаретыны вуэ: - Пиналъёс, кыӵе юанэн мон пыри вал? Адӟиды-а? Маша, мар? Маша валэктэ. - Кин мукет малпа? Ваня, тон кидэ ӝутӥд кадь. Гынтул Иванлэн маке вераны тодаз но ӧй вал. Султыны вырытозяз, йыраз кыӵе ке кизерос малпан кылдэ ик. - Пиналъёс, Машиен Вани кудзы чебергес веразы? Кудзы оскымонгес веразы? Малы Машалы юнгес оскиськоды? Малы ӧд оске Ванялы? Кыӵе отметка пуктомы соослы? Мукетъят Иванлэн но ассэ возьматэмез потэ. Дышетӥсь уг юа на, со кизэ урдэ ни. Толло кенешемзэс выльысь тодазы вае. Вера Ивановна лӧптэ: - Бен, ӟуч сямен чебер верад. Озьы лабырто Курскын, Орёлын, Москваын, телевизорын но радиоын. Мон ачим сыӵе вольыт бӧтьыртыны ӧй дышы. Тон, Вани, йӧндырод шуыса малпасько. Туннэ мон тыныд кык пол "вить" пуктӥсько. Абдрам пиналъёс ымзэс ик усьтӥзы. Одӥг урокын кык "вить"? Кинлы-кинлы, но Ванялы? Дышетӥсь азьланьтэ: - Бен, кык "вить". Одӥгзэ, пичильтыксэ гинэ, журналэ. Кыкетӥзэ, ту-у-уж бадӟымзэ, сюлэмам. *** Кемалась вал со. 1965-тӥ арын Свердловске люкаськизы быдэс Союзысь дышетӥсьёс но тодосчиос (учёнойёс). Кинлэн меда йыраз шуккиз Вера Ивановнаез отчы ыстыны? Озьы-а, тазьы-а, но удмурт кышномурт отын доклад лэсьтоно луиз. Нимыз огшорыгес гинэ: "Удмурт нылпиосты ӟуч кыллы дышетон сӧзнэт (система)". Шокатэк кылзӥзы. Кызьы озьы кыдёкысь гуртын вордскем выль амал? Малы сое нокин уг тоды? Адямиез кык арняскын дышетод шат лыдӟиськыны? Республикаямы, калыкез дышетонъя министерствоын, Вера Ивановнаез пумитазы космонавтэз кадь: - Тӥ Удмуртиез инбамозь ӝутӥды. Москваысен дорамы вуэм куно, дышетонысь нациосын герӟаськем ужпумъёсты эскерись институтысь тодосчи Антонида Фёдоровна Бойцова эшшо чебергес вераз: - Пислэглудын ӝуа Россилэн кизилиез. Вера Ивановнаез чортылыны ӧдъязы пӧртэм семинаръёсы. Докладэзлэсь пуштроссэ келя - аслыз ӧтён уг басьты. Малы? Визьмо муртъёс валэктӥзы мугзэ. Москваысь куд-ог шӧртчиос, пе, пӧртэм интыосысь докладъёс люкало но асьсэлы лушкемак гинэ диссертациос пӧрало. Мунчое пырон нуналэ гуртэ вуизы Ижысь куноос. Огез - нылпи писатель, мукетыз - книга поттониысь (издательствоысь) редактор. Гожтоно, пе, выль удмурт букварь. Шумпотон но курдан биниськизы одӥг бугоре. Дышетон амалъёсбен тодмоесь. Но соосты кызьы бумага вылэ пуктод радзыя? Вылаз ик, издательстволэн директорез Пётр Яшин индылӥз на: - Букварьды жингыртӥсь медло. Озьы ӧз пӧрмы ке, сое киязы уз кутэ. Шуг вал кылтӥрлык ласянь. Учконо луиз пӧртэм справочникъёсты но кыллюкамъёсты (словарьёсты). Туж кулэ вылэм методистлэн валэктэмъёсыз. Нош пичи классъёсын дышетонъя сыӵе тодосчимы ӧй вал. Букварь бератаз вордскиз. Пётр Михайлович кышномуртлэсь тыбырзэ гып-гып вешаз: - Кыдёкысь гуртын но такем сэзь дышетӥсь вань вылэм. Кыдёкысь шуэмез зэм. Отӥысь шуак гинэ уд вуы городэ. Вера Ивановна мылкыд кариз Ижлы матэгес кариськыны. Бырйиз Пичи Пурга дорысь Курчум-Норья гуртэз. Со вӧзысь посёлокын юртъер басьтӥз. Татысен ик ыштӥз кыкетӥ картсэ. Секыт вал. Солы гинэ шат кайгу сюре? Можгаысь педучилищее сю пала дышетӥсь люкаськиз. Вера Ивановна Колесникова лекция лыдӟе. Калык азьын бӧтьыртыны дышемын ни. Кылыз лабыртэ, синмыз чакла: кылзӥсько-а сое? Кышноослэн сюлмаськонъёссы лачак. Укно дурысез рос-прос гожъя кылэмзэ. Ӧс дорысез выемын ас малпанъёсаз. Улонэз малы ке умойтэм, вылды. Сайкатоно. Мадёно нуналмысь улонысь паймымон учырез. Лекция йылпумъяськытозь, кунэрес нылкышно кӧня ке улӟиз. Ваньмыз кошкем бере, Колесниковаен ваче син кылиз. Нимаз слогъёсты одӥг кылэ огазеян сярысь рос-просгес юалоз, вылды. Нош со шуак викыштӥз: - Дышетонысь кошко ни, шуисько вал. Картэным но люкисько, пӧй. Яке асме ачим быдто. - Мар тон, нылы? - Табере маке кулэтэмзэ уг даурты ни. Туннэ гинэ валай, кызьы яратоно уонэз. Тау тӥледлы. Вера Ивановна понна пӧртэмез ӧвӧл, кытын со вераське - Курчумысь школаын-а, педучилищеын-а, Дышетӥсьёслэсь тодон-валанзэс будэтон институтын-а. Артысь Абдульмень бигер гуртысь воргорон огпол тодаз вае: - Школае, мумы-бубыослэн кенешазы, кин лыктэ валэн, кин тракторен, кин пыдын. Мыным тазьы верамды вань: такады ыше ке, быдэс семьяен гурт кузя утчаськоды, пиналды ке гуртын ӧвӧл, пигонды но уг вырӟы. - Мар-а, али но вожед потэ на-а? - тунсыкъяське дышетӥсь. - Жалясько. Кыкетӥ нылпиме Пургалан дышетӥсько. Отын ми кадьёсты озьы визьноданы ӧз дыше на. Кенеше но рос-прос лыктӥсь ӧвӧл. *** Витьтоно ар ортчиз ни Вералэн Алнашысь кошкемез дырысен. Кык пол бызьылӥз, укмыс нылпи будэтӥз. Нош нырысетӥ яратонэз туннэ но ӧз кысы. Гажанэз тодмо кылбурчи луиз. Со сярысь весь малпаса улэмзэ Вера Ивановна лыдъя картъёсыз азьын лэсьтэм сьӧлыкен. Сьӧлыктэм сьӧлыкен. Дано кылбурчи но, тодмо дышетӥсь но тачак пол пыразы "Удмуртия" издательствое. Инмар соосты огпол но ваче син ӧз вутты. Ӝыны даур ӵоже ог-огзэс чик ӧз адӟылэ ни. Озьы огзылэн но семьязы ӧз пазьгиськы. Кылбурчи но, Колесниковалэн кыкез ик картъёсыз но туннэ улэпесь ӧвӧл ни. Нош яратон уг тӧлӟы. Ачиз кылбурчи шӧдылӥз-а сое пумтэм яратэмзэс? Кин тодэ. Колесникова лыъя: воргоронлэн огез тужгес тодмо кылбурез сӥземын солы, Вералы. *** Куинь укноын сяськаяське герань. Туж юнэсь будосъёс корка пушкын эмъясь кужым висъяло. Соослы юртто алой, гур, вӧсяськон книгаос. Корка пушкын чик ӧвӧл пластик, пластмасса, хрусталь. Уд адӟы дуно выжлёгетэз но телевизорез. - Со понна мынам бакчае синмаськымон, - уг ваты Вера Ивановна, кунооссэ отчы валтыса. Девясил. Шыртурын (камнеломка) зэмен ик изэз тӥялоз. Астра. Куать пумо крокус. Зарни выжы - льӧль радиола. Тазэ курылэ Можгалась воргорон. Уг ваты: Казане нуыса вузасько, пе. Писэйтурын (валериана). Сое коӵыш йырйылэ вал. Вера Ивановна Котофейзэ визьнодаз: - Эн иса. Мыным эн ӧскары - тон монтэк уд улы. Кӧня ке куарзэ азбаре пырто но тыныд сёто. Нош бакчаысь будос борды эн йӧтылы. Муштурын (марисса) сузя мугор пушез. Колесниковъёс та гуртэ выжем бере, маке но умойтэмзэ шӧдӥзы. Пунызы ар но уг улы - кулэ. Ньыль Шариксэс озьы ыштӥзы. Бератаз Вера Ивановна пумиськиз юртъерлэн азьвыл кузёеныз: - Капка вӧзынгес тӥ мар карылӥды? - Пудо вандылӥм. Озёлогем киськамы пож вумес. Ӵапак сыӵе интые пуны кар кемдэм. Валамон ини, урод кужымен тырмем интыын Шарикъёс чаляк чоньдылӥзы. Табере со бервылэ сылал пызьнамын но флокс мерттэмын. Бакчаысь ог люкетэз - возь. Сэргын будэ шупу. Тодмо журналист Василий Песков верамъя, асьме палан сыӵе кужмо емыш вань бере, малы синмаськод меда зарезь сьӧрысь вуттэм макеослы? Мукет азьынгес - льӧмпу. Вера Ивановна тодэ: лябӟем койык (лось) солэсь куарзэ но сяськазэ сиыса юнма. Малы-о яратӥсь сюлэмъёс мусоясько льӧмпу улын? Малы-о сомында кырӟан сӥземын та писпулы? Огаз сэргын азьвыл будӥз кыз. Кин но со тӥрзэ шере ни вал - Колесникова коралтыны ӧз сёты. Со улысь фонтанысь сямен чизъе йӧнатӥсь кужым. Куд-ог кышноос шуэрскыса вуо: - Картме ватӥ алигес. Корка но пыреме уг поты. Тон сыӵе кайгуос пыр ортчемын, ма кариськод вал? Ма бен кароно? Кыз улын пуконо. Ньыльпыдъяськоно но чиньыосты музъеме месоно. Но вить минутлэсь кема ӝеганы уг яра. Ӝукез мултэс вӧй но куддыръя изъянтэ. - Ми палан но сыӵе буйгатӥсь писпуос вань-а? - Тунсыкъясько нылкышноос. - Вань, дыр. Но кырыж-мерыжак писпуос улын эн пуке. Чаклаське: матын медаз луы тылскем бервыл. Лысъёс но выжыос урод кужым сёто. Григорий Колесниковлэн куать нылпиосыз куке-соку синмаськоз вал Вера Ивановналэн сутэрезлы. Туннэ но соос чия (вишня) быдӟаесь будо. *** Нокыӵе будос пайда уз сёты гынтуллы. Адями но инкуазь огъя гурзэс шедьтыны кулэ. Сяська вылэ дуринчи пуксиз - кык-куинь минут ке но чакла. Кенӟалиос но кыйёс музъем вылтӥ нюжтӥськыса ветло но солэсь кужымзэ басьто. Тӥни малы сокем проворесь. Кенӟалилэн ыштэм быжыз интые вылез арскын будэ. Кый, вожез потыку, адямиез но кекатыны ворме. Будосъёс музъем пушкысь йырзэс пежъянэз музэн мычо но серекто: ми вордским, югыт дуннее потӥм, шундыез адӟим! Малы меда адямиос тупаса улон ласянь адӟем уг каро будосъёслэсь но музон улэп макеослэсь? Шуом, мушлэсь но бадьпулэсь, бадярлэсь но тыпылэсь (мӧль сёто), колӟотурынлэсь (тысячелистник яке йӧлоӝуксяська сузя мусэз), сизьйырлэсь (клевер уте, пе, гижлолэсь). Колесниковалэн песятаез весь вешалляз валзэ. Пичи Вера огпол юатэк ӧз чида: - Вал нуныямез вала шат? - Кызьы сотэк? Вал ваньзэ вала. От адямиос шимес черекъяло матысь адямиос шоры но. Вазен озьы ӧз керетылэ. Тод, нылы: кык артэ коркан улӥсьёс тэргасько ке, инмар отчы ыстэ кайгу. Нылаш абдраса учкиз: дедко пӧя-а, уг-а. Керетӥсь бускельёссы сутскем бере гинэ оскиз. Отӥяз но улон-вылон сыӵе сямзэ возьматъяз. Карабах котырын лек ожъёс пуромизы но, Армениын музъем зурказ. Инмарез котькудӥз уг вала. Но асьмемын кин ке но кивалтэ ук. Вера Ивановналэн нылпиезлэн пиналыз йыгаськиз институтэ. Нырысетӥ экзаменын "куинь" басьтэм. Документъёссэ курыны медэ ни. Песянай юнматӥз: - "Куинь" пуктӥськом, "вить" малпаськом. Мын, сёт мукет экзаменъёстэ! Ачиз, нокинлы номыр вератэк, черке кошкиз. Дышем сямызъя куинь мудор азьын вӧсяськиз. Мар бен, пиез студент луиз! Мукетыз пыриз Москваысь Калык эшъяськонъя университетэ. Вера Ивановна егит дыръяз кадь ик яратэ ужез. Киын ужез. Йырын ужез. Толалтэ, вань сюресъёссэ мычыса, кӧтыз уг тыры ке, лымыез интыысь интые нуллэ. Гужем бакчаяз потэ но ӟечбуръяське шундыен, сяськаосын, будосъёсын, кенӟалиосын, коӵышен. Вань солэн тушмонэз но. Чидамез уг луы азьтэмъяськонэз. Котькыӵе урод ужъёс пото, пе, ма карыны ёрмон бордысен. Мылкыдыд-а урод, тазалыкед-а начар - вормыны луэ, эн гинэ азьтэмскы. Кынманы шедид - муштурынэн но мятаен (бутникен) чай юыса эн буйгатскы. Мунчодэ эсты. Ӟырдам изъёс вылэ пазьгы муштурынэн, бутникен, чечыен сурам ву. Шока пӧсь парен. Уноез кышноос вазисько, картъёссэс юэмысь дугдытыны курыса. Вань амал. Эмезь вылтӥ калтыртӥсь тямыс зынкакыез кут но ӝыны литр водкаын тямыс нунал ӵоже сылмыты. Макмырен курадӟись воргоронэз соин эмъяса оскалты ай. Оло, вань улытозяз азелы йӧналоз. Асьмеды нерад карыло тараканъёс. Химия уг вормы - соос чаляк дышо ядлы. Корка пушкады бакаез пыртэлэ ай. Огзэ-кыксэ кибыез сииз ке, мукетъёсыз чурен-чурен пегӟозы. Ог-огзэс ало, лэся: татын ядлэсь кышкыт гес тушмон вань. Бакчаысь калялюльыез (слизнякез) быдтэ пень. Шурлэн ярез яке вукырем пыртӥ музъемысь потэ ӟеч кужым. Сыӵе инты пала ымнырын берытскыса сылоно. Сыӵе дэмланъёсты трос вераны луысал. Соос котькудӥзлы тупалозы шуыса оскытыны шуг. Нош витез-дасэз пӧлысь огезлы коть юрттӥзы ке - умой ини. Вера Ивановна олокӧня тетрадь гожъяса быдтӥз ни. Ку но кин соосты печатлалоз - тодмо ӧвӧл. Солэн зарни малпанэз таӵе: дасяно "Кызьы шонер пересьмоно" книга. *** Вера Ивановна Колесникова Удмурт Республикаысь дано дышетӥсь. Книгаосыз: "Удмурт букварь", "Удмурт кыл", "Лыдӟон книга" но мукет. Нылпиосыз: лэсьтӥськисьёс, дышетӥсьёс, эмъясь сузэр (медсестра), нылпи садэн кивалтӥсь, автоинспектор, 22 внукез но 4 правнукез. Наградаосыз: уно грамотаос, дано нимъёс, гадьпусъёс (знакъёс), "Знак Почёта" орден. Кырӟалоз но эктоз "Чипчирган" 1958-тӥ арын Ижын усьтӥськиз Крезьгуръя но драмая театр. Солы трос саклыксэ висъялляз егит крезьгурчи Геннадий Михайлович Корепанов-Камский. Шудӥз спектакльёсын, крезьгур кылдытъяз. 1964-тӥ арын гожтӥз "Чипчирган" опера-балет. Та спектаклен ик усьтӥськиз Операя но балетъя театр. "Чипчирган" опера-балет кыкетӥзэ пуктэмын 1993-тӥ арын. Таяз учыре ӧжытак воштӥськиз со. Нырысетӥез выжыкыл выллем вал, кыкетӥез - кунэрес, возиськыны косӥсь эпослэн тодметъёсыз но утиськемын. "Чипчирганэз" кыкетӥзэ пуктыку, куд-ог кырӟасьёс азьвылъёсыз ик кылизы. Соос пӧлын - Удмурт шаерысь калык артист Вячеслав Нисковских, дано артистка Маргарита Галасеева. Театр оске: удмурт классика шедьтоз аслэсьтыз учкисьсэ. 1993-тӥ арын спектакль пыриськылӥз финн-угор калыкъёслэн Финляндиын, Венгриын, Мордовилэн шоркараз, Саранскын, ортчем фестивальёсазы. Та кунъёсысь театръёсын возьматэмын ӧй вал ке но, вылӥ дунъет басьтӥз. Удмурт кылын гожтэм "Чипчирган" выжыкылэн мытоз ньыльдонэтӥ ужан дырзэ Операя но балетъя театр. Опера-балет возьматэмын луоз 27-тӥ ноябре но. Театр озьы ик азинтоз данъян ӝытъёссэ: ортчозы Удмурт Элькунысь калык артистъёслэн Л. Мининалэн, Ю. Яковлевлэн, Удмурт шаерысь дано артисткалэн Т. Силаевалэн но мукетъёсызлэн юбилей ӝытъёссы. 6-тӥ, 7-тӥ ноябре лыктозы Санкт-Петербургысь крезьгуро комедияя театрысь валтӥсь солистъёс Вера Васильева но Виктор Кривоносов. Шаерысьтымы артистъёсын ӵош соос быгатонлыксэс возьматозы "Опереттаослэн бамъёстӥзы" ӝытъёсын. Валамон ни: луозы премьераос но. Театр дасяны малпа Жорж Бизе крезьгурчилэсь "Кармен" операзэ, "Собор Парижской богоматери" балетэз но мукет ужъёсты. Выль адямиос ӧтемын балетэ но балетъя труппае. Выль куараос ватсаськозы операя труппае. В. ЛАГУНОВ. Музей усьтӥськоз Август толээзе яръёс станцизылы 100 но посёлоксылы 60 ар тырмонэз пусйизы. Соин валче солэн историезлы сӥзем выставка радъямын вал. Отчы ветлэмъёс тодматскизы вашкала уй пал удмуртъёслэн улэм-вылэменызы, посёлокысь предприятиослэн но учреждениослэн улон сюресэнызы, историенызы. Посёлок кылдӥз чугун сюрес станция интыын. Выставкаын возьматӥсько Николай ИИ эксэйлэн станция усьтон сярысь указэз, чугун сюрес вылын ужасьёслэн ужан тӥрлыксы, дӥськутсы, мукет шер пумиськылӥсь арбериос. Табере туэ 23 октябре Ярын нырысетӥез историко-краеведческой музей усьтӥськыны кулэ. Т. ДЮКИНА. Нылпи сад куре юрттэт Пиналъёсты нылпи садэ нуллэм понна Россиысь анай-атайёс кисыысьтызы шорлыдын 150 манет пала дун тыро. Нош Удмуртиын солэн дуныз ичигес - пичи уждунлэн ӝыныез мында. Но улонмы секыт луэмен, Иж карысь нылпи садъёсъя управленилэн кивалтӥсез Тамара Андреева алигес ортчем пресс-конференциын дун тыронэз 80 манетозь будэтыны курыса вазиськиз. Уго 17 август бере сиён-юонъёслы но мукет вузъёслы дунъёс 2-3 поллы будӥзы. Нош бюджетысь 118 сюрс манет али ке но висъямын ӧвӧл на. Та лыдпус кулэяськонлэн ӝыныез гинэ луэ. Та дыре шаерамы 196 нылпи сад ужа. Берло дыре город ас вылаз басьтӥз на предприятиослэсь садъёссэс но. Тамара Сергеевна пусйиз, заводъёс садъёссэс ӟеч-ӟеч тупатъяса сётӥзы шуыса.Умоен пусйыны луэ "Ижмашез", "Ижсталез", механической заводэз но мукетъёссэ. Нылпи юртъёсын ужасьёс тыршо пиналъёсты тазалыко но визьмо будэтыны, дышето крезьгурлы, кунгож кылъёслы, компьютерен ужаны. Та дыре нылпи садъёсын ужасьёс май понна уждунзылэсь 9 процентсэ гинэ басьтӥзы ай. Куд-ог интыосын сое сиён-юонэн но мукет вузъёсын сётыны тыршо. Ма луоз азьланяз, тодмо ӧвӧл. Быгатозы-а бюджетысь коньдон висъяны? Кыӵе коньдонэн тупатъялозы садъёсты? Буйгатском осконэн, шуиз Т. С. Андреева. Л. Юртеева. Нырысь куашкатӥм... Ижевскысь Свято-Михайловской соборез ӝутонын юрттэт сётонъя кенешлэн (попечительский совет) пумиськонэз ортчиз. Отчы пыриськиз Удмурт Республикаысь Кун Кенешлэн Тӧроез Александр Волков но. Кенеше быръем Сергей Чикуров люкаськемъёслы ивортӥз лэсьтӥськон ужрадъёслэн мынэмзы сярысь. Та вакытлы чаклам 8 миллион пала коньдон пӧлысь 15 процентэз уже кутэмын. Чикуров оскытӥз, коньдонэн ӟеч юрттэт луиз ке, Свято-Михайловской собор вуоно арлэн пумаз ӝутэмын луоз. Туннэ нуналозь коньдонэн юрттӥзы "УНГС-Город" огазеяськон но нимаз адямиос. Кенешын Удмурт Республикаысь Культурая министерстволы Правительстволэн постановлениезлэсь инъетсэ дасяны косэмын, чакламын луыны кулэ историяя памятникез ӝутонъя ужрадлык, коньдонэн юрттэт сётон но соборез ӝутонэ пыриськись коллективъёс. Удмурт Республикаысь Кун Кенешлэн пресс-службаез. Ульчалэн юбилеез - праздник Куарусён толэзе Улын Юри гуртын улӥсьёс пусйизы выль ульчазылэсь юбилейзэ - кылдэмез дырысен 10 ар тырмонзэ. Умой улон аръёсы ай 44 семьялы татчы ӵош квартираос сётӥзы вал. Выль интые али но юртъеръёс пуктыло на, огзы вӧзы огзы, губиос сямен, ӝутско выль коркаос. Ульчалэн кенешаз вераськемын вал та юбилеез пусъён сярысь. Соку ик администрацилэн тӧроез П. Т.Гусев, гуртысь староста Я. П. Петров, ульчаысь староста М. Н. Головин кивалтэм улсын оргкомитет кылдытэмын, шулдыръяськон ортчытон программа дасямын. Татын улӥсьёс ульчазэс самой егит луэ шуыса лыдъяло, малы ке шуоно, самой мӧйыосызлы 50 арес но ӧвӧл ай. Нылпиосын самой узыр ульча: 46 семьяын 95 нылъёс но пиос будо. Ульчаысь самой пичи улӥсьёслы али 5-6 толэзь. Нырысетӥ классэ мынӥзы кыкез: Оля Волкова но Володя Девятов. (Пичи Пургалась "Маяк" газет гожъямъя). (Л. Федоров.) 15 октябре "Ижмаш" культура дворецын Удмурт калык театрысь артисткалэн Ольга Слесаревалэн ӝытэз. "Паймымон адями" спектакльын со валтӥсь ролез шудоз. Кутске 18.00 часэ. "Удмуртия ХХИ дауре выжон азьын" Удмурт автономия кылдэм дырысен 80 ар тырмон азьын но соин валче Удмурт Республикалэсь экономика, культура но политика удысын тыршемзэ радиопередачаосын паськыт возьматон вылысь, элькунысьтымы Печатья но иворъёсты вӧлмытонъя министерство журналистъёслэн огазеяськонэнызы ӵош "Удмуртия ХХИ дауре выжон азьын" радиоконкурс яло. Солы таӵе куронъёс пуктэмын: 1. Конкурсэ сётоно Удмуртия сярысь радиопередачаосты, кудъёсыз чузъяськизы туэ 20 ноябрёзь. Соосты (передачаос 15 минутлэсь кузь медаз луэ) туэ 30 ноябрёзь сётоно Печатья но иворъёсты вӧлмытонъя министерствое (426057, Иж кар, Пастухов ульча, 13. 205-тӥ кабинет). 2. Радиоконкурсэ пыриськыны быгато Удмурт Республикаысь государственной но коммерческой радиокомпаниос, городъёсысь но ёросъёсысь радиоверанъя редакциос. 3. Конкурсын вормисьёсты пусйыны чакламын таӵе коньдон премиосын: республикаысьтымы интыосысь радиокомпаниосысь радиовещаниея редакциосысь журналистъёслы журналистъёслы 1-тӥ инты понна 1,0 сюрс манет 0,8 сюрс манет 2-тӥ инты понна 0,7 сюрс манет 0,5 сюрс манет 3-тӥ инты понна 0,5 сюрс манет 0,3 сюрс манет ватсаса премиос 5 быдэн 0,2 сюрс манетэн 10 быдэн 0,1 сюрс манетэн Со сяна, вормисьёслы нимысьтыз кузьымъёс тупатыны быгато Удмуртиысь предприятиос, учреждениос но общественной организациос. Премиосты сётон сярысь решениез кутэ конкурслэн элькун жюриез. Юалляськоно 78-73-34 но 78-28-79 телефонъёсъя. Правительствоысь иворъёс Бюджет чотын улӥсьёслы Удмуртиысь Правительстволэн заседанияз эскеремын берпуметӥ кварталлы бюджет кылдытон сярысь ужпум. Сое нимазы чрезвычайной шуыса. Коньдон ужпумъёсъя министрлэн Владимир Бельтюковлэн ивортэмезъя, республикалэн бюджетаз коньдонлы кулэяськон арлэн пумаз эшшо но будоз. Туэ тямыс толэзь ӵоже республикалэн бюджетэзлэн доходъёсъя люкетэз быдэстэмын 70 процентлы, нош сентябрь толэзе солэсь но ӧжытгес - чакламезлэн ӝыныез гинэ - 9,5 миллион манет. Будэ тыронъёсъя недоимка. Соин валче Коньдон ужпумъёсъя министерство бадӟымен выт тырисьёсты син азяз возёно кариськиз. Табере бюджетэ тыронъёсъя тупатэмын график, ужа пунэм тыронъёсъя центр. Удмуртия пыртэмын тужгес но начар улӥсь улосвылъёс пӧлы. Соин ик Россиысь Коньдон ужпумъёсъя министерство арлэн пумозяз 82 миллион манет коньдонэн юрттэт сётоз. Но республикамы со пӧлысь басьтыны быгатоз 75 процентсэ гинэ. Республикалэсь 1998 арлы бюджетэз сярысь Законзэ интыысь налогъёсын но центрысь ссудаосын гинэ быдэстыны уз луы. Соин ик Правительство Удмурт Республикалэн 1998 арлы бюджетэз сярысь Законэ воштонъёс но ватсанъёс пыртон сярысь постановленилэсь инъетсэ Кун Кенешлэн сессияз эскерыны ӵектӥз. Отын чакламын ИВ кварталэ коньдонэз кутон сярысь ужрад. Та документъя коньдон висъяськоз бюджет чотын ужасьёслы уждун тырыны, городъёслы но ёросъёслы дотация висъяны: сиён-юон, эмъюм, эстӥськон басьтыны, пиналъёслы пособие, стипендиос тырыны, ужан интыосты утьыны, транспортэз, жилищно-коммунальной хозяйствоысь объектъёсты возьыны, агропромышленной комплекслэсь пунэм тыронъёссэ берыктыны. Озьыен, хозяйствоен но калыклы улон- вылонын юрттэт сётонэн герӟаськем удысъёслы возиськыны луонлыкъёс кылдо. Пумиськонлы йылпумъянъёс лэсьтыса, Удмурт Правительстволэн Тӧроез Павел Вершинин пусйиз, кризислы пумит кутэм ужрадъёс сярысь министръёслэсь рос-прос ивортонъёссэс матысь дыре вите шуыса. Арня ӵоже со быдэстэмын луоз. Удмурт Республикаысь Правительстволэн Тӧроезлэн секретариатысьтыз пресс-центрез. Ӝог вазиськод - капчиен утиськод Коньывуон шуэмысь одӥг учыр тодам лыктэ. Пичигес дыръям гуртысьтымы пересьёс веразы вал: гуртэ коньы вуиз ке, возьма тылпуэз. Ноку ӧй оскысал таӵе верамлы, нош таизлы ачим но абдрай. Садысь садэ, гид липетъёс кузя коньы тэтчаса кошкиз. Паймоно, кызьы, кытысь со гуртэ сюрем, уго гуртмы но нюлэс кушын ӧвӧл. Оло та веран шонер, оло кылдэмез сыӵе вылэм, но кема ик дыр ӧз ортчы, урамысьтымы одӥгаз юртын "горд атас" кузёяськиз. Пеньлы пӧрме Бен, туннэ нуналлы котьмалэсь но кышкытэз тылпу, дыр. Уно аръёсын люкам ваньбур вакчи дыр куспын тӧлъя-буръя кошке. Ум тыршиське асьме узырлыкмес утьыны, тыршем ужмылы дунъет сётыны. Чаклалэ ай асьтэос. Туэ 9 толэзь ӵоже шаерамы 1916 пол "горд атас" кузёяськиз. Со пӧлысь 713-ез Ижевск городын, нош 842-ез - гуртъёсын. Ортчем арен ӵошатыса, со 7,7 процентлы тросгес. Яке мукет сямен вераса, 17 миллион манетлэсь тросгес ыштон адӟемын. Та лыдпусъёсыз кылыса гинэ йырси пештыртӥське, нош кӧня улэп лулэз тылпу ас бордаз бинялтӥз, пеньлы пӧрмытӥз. Озьы 114 адями бырыны шедиз, пӧлысьтызы тямысэз - нылпиос. Ортчем арен ӵошатыса, тылӝуын 48 процентлы тросгес адями бырем. Нош кӧняез сутскыны шедемъёс больницае шедизы, али но кыллё на... Та вакытэ тужгес но секыт югдур гуртъёсын. Тросаз радио-телефон езъёс вандылэмын. Шаерысьтымы 260 гуртын туннэ гуын выллем шыпыт. Соослэн нырысетӥ юрттэт курыса вазиськемзы уг луы. Адямилы кыле на инмарлы гинэ вӧсяськонэз. Азьвыл аръёсы тросаз гуртъёсын ужало вал тылпу кысонъя дружинаос. Нош али? Ваньмыз куашкатэмын, машинаос но я шальтрамын, я шофёрез ӧвӧл. Нош куд-огаз машинаын вуэз ӧвӧл баказ. Та удысын ужасьёсты вылӥ кивалтӥсьёс кылэм-адӟемысь ик дугдӥзы кадь. Пумен золгес кузёяське ини кезьыт. Нош дась-а асьмеос толэз пумитаны? Ӧйтӧд. Пасьёсыз турынэн, куроен ӵоксаны тыршиськом, пӧртэм шунтӥськон арбериосты уже кутӥськом. Тылпу кысӥсьёслэсь куронъёссэс лыдэ ум басьтӥське ни сыӵе дыръя. Тросаз колхозъёсын, совхозъёсын асьсэлэн электрик, инженер шуонъёссылы гинэ оскисько ни, лэся, нош соосыз ӵем дыръя шунтӥськон макеосынызы ваньзэс "кутчало". Озьы колхоз ваньбурысь тылпу "ньылӥз" 852 юртэз, 410 йыр пудо-животэз, 42 тонна ю-нянез, 816 тонна пудо сиёнэз но 80 техникаез. Вератэк кельтэм уг поты тани мае но. Дышетскон ар кутскемен, куашкан калэ вуэм школаос но ӧсъёссэс усьтӥзы. Нош тылпу кысӥсьёслэн куронъёссыя, соосты пытсаны гинэ кулэ кадь. Кызьы бен ужтэк кельтод сотэк но коньдонтэк пукись дышетӥсьёсты? Пиналъёс но янгыш ӧвӧл со понна. Тылпу кысон - со шудон уж ӧвӧл. Удмуртилэсь дышетсконо на,- шуиз Юрий Лужков, Ижевске вуылыкуз. Москва городлэн мэрез но Удмуртиысь Тылпу кысонъя управленилэн кивалтӥсез Михаил Камалетдинов трос аръёс ӵоже юн кусып возё ни. Вазьынгес Юрий Михайлович Ижевске вуылэм но чылкак синмаськыса кошкем городысьтымы тылпу кысӥсьёслэн ужамзылы, нош кемалась ик ӧвӧл ижъёс но Москвае вуылӥзы. Юрий Лужков юн дунъя тылпу кысӥсьёслэсь ужзэс. Соос понна со берпуметӥ коньдонзэ но казнаысь висъяны дась. Москвалэн мэрез тылпуэн нюръяськонъя пӧртэм амалъёс утча. Чакла кылдытыны тылпу кысон пыӵал тӥрлык, уго дарыен ыбем трослы кужмогес. Таӵе малпанъёссэ верам со Тулаысь но Ижевскысь пыӵал поттӥсьёслы, Нимысьтыз вазиськем на Михаил Тимофеевичлы но. Вакчи дыр куспын ижъёс малпанзэ быдэстӥзы кадь. Та вакытэ ужъёсты пумаз-йылаз вуттонэз гинэ кылиз на. Улыно-вылыно коркаосын тылпу потыку, трос гинэ ыштонъёс адӟо улӥ этажъёсын улӥсьёс. Нош таӵе пычал котькинлы но сюлмаз кельшысал. Со кылдытэмын Калашниковлэн автоматэзъя. Кулэ луоз ньыль литр ву но дары. - Тылпу кысон амалъёсты выльдонлы коньдон тросгес висъяны чакласьком,- шуэ Юрий Лужков.- Дарыен пыӵалъёсты ми дуно дунын но басьтыны дась. Уго тупатъян-выльдон ужъёслы коньдон солэсь тросгес кошке. Озьы ик пумит тылпуэз кысӥсьёсты кулэстонлы. Соос котькытчы ӝог вуттӥськыны кулэ, 3-5 минут куспын тылпу дорозь мед вуозы. Асьме Россиын озьы уггес луы на. Шумпотӥсько, Ижевскысь тылпу кысӥсьёс асьсэ ужзэс ӝог но ӟеч быдэсъяло шуыса. В. КУТУЗОВА. Эн ыштэ паспорттэс Паспорт - гражданинлэсь кин луэмзэ возьматӥсь документ. Та нуналъёсы куд-ог интыосын выль паспорт сётъяны кутскизы ни. Жаляса верано, Россия Федерациысь гражданинлэсь паспортсэ, бланкъёс тырмымтэен, вань мылкыд карисьёс басьтыны уз быгатэ на. Соин ик выльёсыз дорозь 1974 арын кылдытэмъёсыз ветлозы на. Туннэ тодады вайытӥськом отысь куд-ог пунктъёссэ. Паспортно-визовой службаын тыршисьёс 25 но 45 арес тырмем гражданъёслэн паспортъёсазы та аръёссылы тупась фотографиен карточкаоссэс ляко. Сыӵе фотографитэк паспорт кулэлыксэ ыштэ. Паспортно-визовой службаын сое ляко дас нунал ӵоже. Гужем вакытэ, куке тросэз шутэтскыны потало сьӧр городэ яке республикае, ӵемгес эскеро фотоез но Россилэн гражданинэз луэм сярысь гожтэмез, кудӥз Россия Федерацилэн улосвылаз улон интызыя гожтӥськемын 1992 арын 6 февральлы. Та документтэс ыштыны шедьтӥды ке, куронэн вазиськоно улон интыдыя районысь паспортъя отделэ. Выльысьсэ паспорт сётыны кулэ толэзь куспын, шуг-секытъёс кылдыку, та уж кыстӥськыны быгатоз кык толэзёзь. Гражданинлэн одно ик луыны кулэ паспортэз. Паспорттэк яке ярантэм паспортэн улэм, озьы ик улон интызыя гожтӥськымтэ, паспортэз юри ярантэм карем но ӟеч утялтытэк возем понна, штраф тыроно луоз. Ф. ПЕТРОВА, Ижевскысь Первомайской РОВД-ысь паспортно-визовой службалэн кивалтӥсез. Вуоно дауре пыралом ай баре... Эшшо одӥг "кизили" "Анае вордӥськиз Селта ёросын. Атае Можга районысь вал. Зэм, со кулӥз, Москваын аспирантураын дышетскыкуз - мыным соку ньыль арес вал. Пичи дыръям куать ар ӵоже выри хореографиен - ветлӥ Ижысь "Октябрь" двореце. Собере - "Ижмаш" культура дворецысь балетъя калык театре. Кужымме эскерылӥ Покчи учкисьлэн театраз, кырӟай хорын, пыриськылӥ лыдӟисьёслэн ӵошатсконъёсазы. Куинь пол пырыны турттӥ театръя институтлэн актёръёсты дасясь люкетаз - одӥг пол но ӧз пӧрмы. Дас сизьым арескам луи Ижысь Мунё театрысь артистка. Анай-атае (со сярысь туж ӝожомыса верано луэ) удмурт кылын ӧз вераськылэ, соин ик меми кылме кӧня ке гинэ тодӥсько. Гужем, дышетсконлэсь шутэтскон нуналъёсам, котьку ветлӥ песянае доры - Можга ёросысь Чурайгуртэ. Песянае ӟуч сямен ӧз вераськылы, вылаз дӥсялляз удмурт дэрем гинэ. Школаын мон ӟеч дышетски - "витьёс" басьяй ӟуч кылын но литератураен, англи кылын. Атае йылпумъяз кык вузэз. Михайло Ломоносов сямен, пыдын кошкем Можгала. Дас ньыль аресказ дышетскыны пырем педучилищее. Собере йылпумъям Ижысь пединститутлэсь историяя но кылтодонъя факультетсэ. Анае - химияя но биологияя факультетэз. Буби "вормем" на Казань университетлэсь географияя люкетсэ но. Гожъяз трос сценарийёс..." Мон вераськисько Ольга Александроваен, актрисаен, егитъёслэн театрзылэн (азьвыл со "Дарт" нимаськылӥз) выль режиссёреныз. Нырысьсэ адӟи мон сое ньыль ар талэсь азьло (удмуртъёслэн быдӟым ӧтчамзы бере). Актриса возьматӥз удмурт кылын дасям "Куинь сюан гуръёс" спектакльзэ. Юасько солэсь: - Тазьы выремеды - язычество-а, шаманизм-а? Сое искусство дорозь ӝутон-а? - Мыным ӵемысь сётъяло таӵе юан. Язычница ӧвӧл мон. Театрен, искусствоен огшоры гинэ вырисько. Вылаз ик, пылатэмын (кироссэ возьматэ). Спектакле кутскон азьын котьку пырасько православной баӵко доры. Анай-атае, мыным шуд сӥзьыса, семьяямы удмурт кылын ӧз вераськылэ - немец ӟуч сямен гинэ. Нош язычница юнме шуо - мыным юри лякем ним кадь со. Кун сьӧрын юало вордскем шаердэ яратон сярысь но. Мон озьы ик шуисько: бен, мыным туж дуно вордӥськем музъеме. Юало тазьы но: - Тӥляд спектакльды возьматэ-а кыӵе ке йылолдэс? Валэктӥсько соослы: - Бен, спектакль инъямын йылол вылын. Соин ик удмурт кыл валамон котькыӵе выжыысь учкисьлы. Режиссёрлэсь дипломзэ басьтӥ ик. Театрын кык ар ужаса дышетскыны пыри Удмурт кун университетлэн кылтодонъя факультетаз. Соку ик валай: мынам ӧвӧл. Шудме нош ик эскероно кожай - таяз учыре бырйи Москваысь культурая институтлэсь трос калыкез люкась ужрадъёслы режиссёръёсты дасясь люкетсэ. Егит дыр понна ӟеч со - фестивальёс, мукет шулдыртӥськонъёс... Пыриськылӥмы котькыӵе бадӟымесь ужрадъёсы. Ноку уз вунэ Егитъёслэн но студентъёслэн 1987-тӥ арын ортчем фестивальзы, Москваысь стадионъёсын Быдӟым Вормонлы ньыльдон ар тырмонэз пусъён, Съездъёслэн Кремльысь дворецазы Выль арез ортчытон. Ваньмыз со азьланяз юрттӥз гинэ. Отӥяз тунсыкъяськыны кутски вашкала ӟуч литератураен, кылтодонэн, калык кылосэн. Кыллы дышетӥсе юрттэмъя, "Задонщина" курсовой ужме гожтӥ. Татын мон лулысь- сюлмысь ужай вашкала ӟуч литератураен но фольклорен. Собере ик басьтӥськи удмурт калык кылос (фольклор) борды. Зэм, ӟуч кыл юрттытэк ӧй ӝутскысал, дыр. Азьвылгес дасяй ӟуч моноспектакль. Эшшо кыӵе -"Слово о полку Игореве". Сое пуктӥ ини Нижний Тагилысь театрын (отчы ужаны кошкылӥ). Со понна мон Свердловскысен ас понназы вырись актёръёслэн фестивалязы нырысетӥ премиме утӥ. Собере эшшо пыриськылӥ на трос мукет фестивальёсы. Нош ик ваньмыз вашкала ӟуч кылын вал. Возьматӥськылӥз ЪИИ даур. Школаын дышетскись пиналъёс азьын но пуктылӥ спектакльме. Зэм, кутсконзэ куддыр ӧз валаллялэ. Та спектакльын бадӟым инты басьто пластика но куара. Ӧвӧл ик-а мон удмурт?.. Асме удмурт кожатэк ай (куд-огез кыл вӧлдо ни: мынам профессие, пе, удмурт), огпол кошки Таллиннэ. Отысен тодматски аспӧртэмлыко культураен. Пайми соизлы: Советской Союзын улӥсь эстонъёс ӟуч кыллы сётӥськытэк утьыны быгатӥллям асьсэлэсь культуразэс, кылзэс. Соку ик тодам ваи пичи дырме (удмурт луэмзэс ваньмыз ватылӥзы малы ке). Городын но мон котьку вал ӟуч ныл, нош гуртын - удмурт. Таллиннысен гинэ валай: политикамы сыӵе вылэм, дыр. Отысен гинэ шӧдыны ӧдъяй кин луэмме. Соку аслэсьтым ачим юай: нош малы весь вырисько ай ӟуч фольклорен? Нош ик ветлыны кутски экспедициосы, вашкала выжыосы но верало вал удмурт культура сярысь. Ветлыны кутски Научно- исследовательской институтэ, тодматски Татьяна Григорьевна но Владимир Емельянович Владыкинъёсын, кылзылӥ магнит лента вылэ гожъям куараосты. Со туж юртӥз ужам. Ачим но трос гожъяй, наука ужъёсы копак выи. Удмурт кылын нырысетӥ моноспектакльме кылдытон вылысь, вить ар дасяськи, фольклорез но этнографиез эскерыса. Та вакытэ мон куинетӥ арзэ улӥсько но ужасько вал ни Москваын спектакльме дасяй 1989-тӥ арысен 1994-тӥ арозь "Лаборатория" театрын). Со дырлы, вылтусылы луыса, шудӥ ини вань Лымы нылъёсты, Золушкаосты но Алёнушкаосты. Но кӧты весь ӧз буйгалля. Куамын ареслэсь ортчытозям, весь утчай аслэсьтым режиссёрме, театрме - ӧй шедьты. Ӟудэменым ик басьтӥськи та моноспектакль борды. Ас поннам малпай: мургес "копалтыны" пӧрмыто, дыр. Мынам уже чакламын йырын-визьмын тыршись адямиос понна - огшоры учкись понна ӧвӧл. Ольгаен ваче кенешеммылэсь азьло юай: усто удмурт актёръёс пӧлысь кинэ тодӥськод? Нырысь ик бадӟым вис луиз. Собере вераз ик Вероника Садаеваез, Александр Перевощиковез но Александр Мустаевез, Фаина Будинаез. Режиссёръёс пӧлысь - нокинэ. Зэм, Александр Блинов но Александр Вершинин али уллямын театръёсысь. Соосты быгатӥсьтэм адямиос ӧй шуысал. Культурая министрлы кӧня ке ӵектон: Удмурт театрын режиссуралэн но драматургилэн ӧвӧлзы пумысен нимысьтыз гожто шуисько вал. Ужелэн нимыз но вал ни: "Культурая министрлы кӧня ке ӵектон". Табере валай: татын но со сярысь вераны луоно. Удмурт учкисьёс тодо ни: удмуртъёслэн театрзылы кемалась кулэ выль юрт. Яке - мед кузьмасалзы Советской но Максим Горький ульчаосы интыяськем вить этажъем юртлэсь оглюкетсэ (калыкын сое кемалась шуо "сюрс чыры-пыры" - туж уно пӧртэм ужъюртъёс отын). Нош Удмурт театр вуж ни, интыез но уг тырмы. Одӥг кылын вераса, культурая выль министрлы та сюлмаськонъёс выжизы ай азьвылэзлэсь. Шугъяськонъёс вае кадръёс быръён но. Театрлы тырмысал кызь-кызь вить актёр. Нош туннэ отын соос - ньыльдон сизьым. Куспазы туж ик уг но тупало кадь (соизлы паймонэз ӧвӧл: роль уг тырмы) ас вакытазы пӧртэм национальной студиослы йылпумъямъёс: актёръёс дышетскизы Москваысь, Ленинградысь, Уфаысь вузъёсын. Зэм, театре ваньмыз уг кылё. Куд-огез шутэтскыны кошкизы ни. Литература люкетэн кивалтӥсьсы гинэ одӥг ӧвӧл. Нош театр ӧвӧл - номыре учкыны. Мынам чакламея, одӥг пол ваньмызлы ӵош люкаськоно но "котырес ӝӧк" сьӧрын ваньмыз пумысь сюлмысь сюлме кенешоно. Тужгес но - режиссёръёслы Александр Вершининлы (артистъёс но кивалтӥсьёс азьын "сьӧлыкез" одӥг - ӟуч) но Александр Блиновлы (таизлэн кыӵе ке сьӧлыкез сярысь вераны шугъяськисько). Вылаз ик, ужысь янгышен уллямзы понна, судэ сётыса, министерстволэсь со 25000! Манет курыны быгатӥз кадь."Котырес ӝӧк" сьӧры ик пуксьыса кенешоно театрлэн директорезлы (дышетскемезъя озьы ик - режиссёр), артистъёслы, министрлы. Ог-огдэ пыкылытэк но тэргатэк, нокыӵе эчешонъёстэк шедьтоно вылэм одӥг кыл. Оло, маке пӧрмысал?.. Куинь удмурт режиссёрмы (Блинов, Александрова, Митрофанов) вань вылысь, Удмурт театре асьмеос, вылӥ куронъёс пуктыны быгатӥсь учкисьёс, ог-огенымы ваче сюлмысь кенешыны- адӟиськыны, удмурт луэммес, удмуртлыкмес вунэтыны сётӥсьтэм кужым гинэ бастыны ветлӥськом. Вылаз ик, Ольга Александрова выльысь но выльысь вераны уг жадьы: солэн ужъёсыз трос люкаськем калык понна чакламын ӧвӧл. Тодмо ни: гуртысь котькудӥз улӥсь уз вала "Слово о полку Игореве" мадёсэз но... Монэ данъяса ӝуто флаг... - Удмурт спектакльме дасякум, монэ тросэз ӧз валалэ, - вера актриса. - Тодмоосы шуэктылӥзы: "Визьдэ ыштӥд шат? Вашкала ӟуч кылын луысал ке... Удмурт кылын дасям спектакль нокинлы но кулэ ӧвӧл..." Учкись азе нырысьсэ потэме бере, чал-чал вал: одӥг куара но ӧвӧл! Тӥ но кошкиды, пумозяз чидатэк (та кылъёссэ мыным вераз - авт.) Иворъёсты вӧлмытӥсь ёзъёс но шып улӥзы. Нош мар вал кун сьӧрын!.. Нырысетӥ спектакльме возьматӥ Финляндиысь Нурмес городын (татын ортчиз финн-угор театръёслэн фестивальзы). Удмурт театр нуллӥз отчы "Эбга" спектакльзэ. Мон ӵошатсконэ ӧй пыриськы. Озьы ке но, фестивальлэн веранэз, паймымон шедьтосэз луи. Вань критикъёс ченгешылӥзы соку мынам спектакле сярысь гинэ. Трос вал пӧртэм дунъетъёс... Питранэ отӥяз азьлань погыляз. Ӧтизы мукет фестивале, Нылкышноослэн конгрессазы (таиз но ортчиз Финляндиын, Турку городын), собере возьматӥ спектакльме Хельсинкиын, М. А. Кастрен нимо финн-угор огазеяськонын. Удмурт шаеретӥм ветлыны мед быгатом шуыса, финнъёс мыным кӧня ке коньдон сётӥзы. Дас вить пол потай калык азе - быгатонлыкме возьматылӥ Ижын, Можгалан, Завьялын, та ёросысь Пероггуртын, Глазовын но ёросаз, Сюмси но Селта районъёсын. Ваньмыз валазы: тужгес но - интеллигенция. Зэм, вылӥын шып пукизы. Асьмелэн уг ярато уга нимазъяськись муртэ. Ваньмыз сямен ик кыӵе ке уллёын мед луод. Удмурт театр но пӧртэм сямен дунъяз. Мон выжи кадь соослэсь сюрессэс, дуннеын кыкетӥ Удмурт театр луи. Кыкез ик потало кун сьӧры. Но монэ малы ке выльысь но выльысь ӧтё, соосыз - уг. Сое валано тазьы: мон ужасько аспӧртэмлыко амалъёсын. Удмурт театрысь актёръёс ваньмыз шоры нырысь туж чакласькыса учкылӥзы. Куддыр ӧз но валаляллэ. Югдур али гинэ воштӥськиз. Туэ гастрольёсын вуылӥ Швейцарие, Норвегие, Швецие, Финляндие, Германие, Голландие. Франциын спектакльме ӧй возьматы. Россиын моноспектакльёсъя калык куспо (международной) фестивале но пыриськи (ортчиз Москваын, Арбатын, Актёрлэн юртаз). Россиын котьку кылдо коньдон ласянь шугъяськонъёс - бускель Йошкар-Олае гинэ но потаны уг быгатӥськы: ас уксёеныд мыноно. Быгатонлыкме азьвыл сямен ик уг дунъяло вылӥос. Малы сётӥзы та театрез - уг тодӥськы. Адӟонэ сыӵе, дыр. Кун сьӧртӥ ветлыкум кылӥз на эшшо одӥг удысэ: Норвегиысен дас куать фольклор кырӟанлэсь компакт-диск гожтӥ. Норвегиын кырӟай удмурт сямен. Кун сьӧрын возьматӥсько аслэсьтым яратоно но монэ яратӥсьтэм Удмурт шаерме. Норвегиын, монэ данъяса, флаг ӝуто (зэм, 1996-тӥ арын Удмурт Кивалтэтысь Пӧртэм калыкъёсын ужась комитет коньдонэн юрттэмен валче, быгатонлыкме одӥг пол возьматӥ Ижысь Мунё театрын. Со понна солы туж бадӟым тау!). Кунгож сьӧрын дунъяло. Тодмо эстон гожъясь но режиссёр одӥг бадӟым кылужаз гожтэм: Ольга Александрова ас удысаз нырысетӥез. Аслаз быгатонлыкеныз выжоз вуоно дауре. Солэн театрез но - вуоноезлэн театрез. Мукетыз ивортэ: "Куинь сюан гуръёс" спектакль озьы ик валамын но дунъямын луоз мукет вакытэ гинэ (озьы вера Стефан Юхансон, "Антро" журнал, Швеция). Удмурт сцена вылын - кельт мифология Мыным оскем театрен али дасяськомы "Тристан и Изольда" спектаклез. Актёръёс, крезьгурчиос, спектаклез пуктон люкетэн кивалтӥсьёс пӧлысь бырйи туж ӟеч адямиосты. Спектакльын шудозы Драмая удмурт кун театрысь, Драмая ӟуч кун театрысь артистъёс. Сюжетлэн валтӥсь гожез - кельт мифология. Пӧртэм учыръёс вылын шудыса, ми выжиськомы вашкала ар музъем вылэ. Дас даур ӵоже та мадёс пӧртэм сямен пуктӥськылӥз. Вакытмы кутскыку, та уж борды басьтӥськылӥз Всеволод Мейерхольд гинэ. Милям Тристанмы кӧня ке удмурт но луоз. Спектакльлэн кыкетӥ люкетэз но быдэсак удмурт. Та ӟеч мадёс вера яратон сярысь. Мексикаысь вуэм нокыӵе мелодрама ӧвӧл. Со дыре ик "Ромео но Джульетта" спектакльлы но уг укша. Константин Станиславскийлэн верамезъя, театр кутске дӥсь ошетысен. Таяз учыре - буш интыысен. Театр удмурт покчиос понна но удмурт мадёсъёсъя но дауркылъёсъя дасям спектакль пуктыны малпа. Нош луозы-а нырысетӥ шара ужлы ӟырдыт кичабонъёс - таиз сярысь Ольга Александрова вераны ӧзгес дӥсьты. Кызьы бен? Ольгаез туж ик валасьтэм но дунъясьтэм одӥг редактор актрисаен ваче кенешеме сярысь тодэмез бере юаз: "Кызьы бен?" Мон валэктӥ: - Удмурт шаерысь театр дуннеын со ас ужаз одӥг туж тодмо журналистка кадь ик. Мукетъёсыз соосты уз ни сутэлэ. Соин ик таосты нокин ноку уз вала, тросэз уз яратэ. Тужгес ик - лябъёсыз. Быдэс спектаклез мон ӧй учкы. Одӥгзэ валай: сцена вылын кылдӥз выль уж. Удмурт кыл ласянь со кӧня ке кескичъяське: сыӵе чебер но узыр удмурт кылын вераськыны йӧндыроз туж быгатӥсь адями гинэ. Нунылэсь но, анаймуртлэсь но, песянайлэсь рользэс шудыкуз но... Шонерзэ вераса, со спектакль сярысь, оло, гожтысал но. Зэм, монэ но алӥз удмурт сямы. Уг ярато но уга дунъяло асьмелэн асьсэды туж эрико возисьёсты: син шоры туж йӧто уго соос. Ачим вылын но шӧдӥ-валай. Мыным со редакторлы сямен ик уггес яра Ольгалэн, пӧртэм удмурт ужрадъёс мыныку, баръёстӥ ветлыны яратэмез. Удмуртъёс таӵеез уггес валало. Ачим но тодмо луон сюрес вылын тупатыны луонтэм туж трос янгыш лэсьтӥ. Оля! (Йӧ вырӟиз. Кӧня ке чидалэ, возьматэ востэм луэмдэс (тӥляд со пӧрмоз). Тӥ Овен ук (таӵе ик пус улын вордӥськемын Алла Пугачёва, Юрий Антонов, мукетъёсыз...). Нош барын шулдыръяськонъёстэс ойдолэ кельтом кунсьӧр понна. Тӥледлы но йыбыртъялоз ай калыкмы. Асьмеос, туала удмурт егитъёс, нокинэ пельтӥз ум кыскелэ. Соку, мукет дауре, барын пусъёмы та учырез... Мычисько эшлыко киме. Серафима Пушина-Благинина Торбьерн А. Бьернсберглэн (Норвегия) но Энн Эриксонлэн (Швеция) туспуктэмъёссы. Валэктон. "Трисжон и Изольда" спектаклез учкисьёс тодматскыны быгатозы 23-тӥ, 24- тӥ, 25-тӥ октябре Егитъёслэн культура юртазы. "УДМУРТ ДУННЕЛЫ" - 80 Газет кужмо эшъёсын Со вал кемалась, сизьымдон арлэсь тросгес ортчемын. Пилемтэм нуналъёсы гудыртэм кадь удмурт кылын потӥсь газет гуртъёсы выль иворъёс вуттылӥз. Соос коркась корка, ульчаысь ульчае вӧлмизы. Соку гуртъёсын гожтэт тодӥсь воргоронъёс но нылкышноос чиньыен лыдъямон но ӧй вал. Газет лыдӟылӥзы бускельёсынызы ӵош. Ог-огзылэсь юаллязы: - Кызьы лыдӟоно со газетъёсты, йырин уллань-а, вылань-а? Газетъёсты, иворъёсты пӧртэм синъёсын-пельёсын пумитасьёс но вал. Тодам лыктэ одӥг учыр. Пельпумамы ошем дэра сумкаосын школаысь бертӥськом. Бусы сюресэз ортчыса, ульчае пырим. Кылӥське воргорон куара: "Асьме доры нош ик вуиз удмурт кылын потэм "Гудыри" газет. Басьтэ, лыдӟе, выль иворъёсты тододы!" Сое кылыса, укнотӥз мычиськиз вылӥ ульчаысь зӧк Иван: - Мар ӵашетӥськод, ульча тыр кесяськыса? Со газетад куртчангиен висён сярысь гинэ гожъяло. Нош Кез луд вылэ потоно, ку отысь бертоно асьмеос но тодӥськом. Зӧк Иван понна букваос нап ӵын вал. "Гудырилэсь" ма сярысь гожъямзэ кин ке умойтэм верам. Ӧз, газетъёсты нуллӥсь Иванлэсь зулемзэ ӧз кылзы, мукет ульчае кожиз но отын кылаз-бураз "Гудырилэн" вуэмез сярысь. Озьы одӥг гуртэ но капчиен ӧз вамышты газетмы. Нош мытэм удыссэ ӧз ышты ни. Кутскиз солы гожтӥськон, кин ӝыны арлы, кин быдэс арлы гожтӥське. Бен, улон огинтыяз ӧз лёгаськы. Пумен тросгес луизы дышетскем адямиос. Бускельзы доры пукыны ветлӥсьёс газетъёслэн ма сярысь гожъямзы пумысен юанъёсын ӧз вазьылэ ни, лыдӟемзы сярысь кенешылӥзы. Одӥг аре гуртэ бертӥ но пинал дыръям ӵош шудэм эше доры кожи. Тимофей Никифорович Чайников мынэсьтым вуэмме гинэ витем, лэся. "Советской Удмуртия" газетъёс пумысен вераськон ӝутӥз: "Мӧйымыны шӧдат, лэся. Кӧня номеръёс потэмын, одӥг чуред но ӧвӧл. А ведь мон витисько, лыдӟисько гожъямъёстэ". Таӵе пыкылонъёсты кылыса, ма шуыны но ӟудӥ. Валамон, дыр, газетэ гожъяськом лыдӟись понна. Сое малпаськытон, дунъян, кыӵе ке но ужез вырӟытон понна. Кылбуръёс бордысен кутскиз Кузьма Васильевич Смирнов. Солэн кӧня ке чуръёсыз потӥзы "Дась лу!" газетын. Фронтысь сӧсырмыса бертӥз но выльысь кияз ручка кутӥз. Вавожын потӥсь газетлэн редакторез луиз, огдыре ик гожъяз "Советской Удмуртия" газетэ но. Кыӵе ке муген солэн нимыз "Укмыс сю пыкетэ" шедьымтэ. Озьы сое, рабселькоръёс пӧлын лыдъяны кулэ. Улонысь кошкон азяз фронтовой сюресъёсты ортчемез сярысь гожтэт ыстӥз вал на. Учкисько, лыдӟисько "Удмурт дуннеысь" укмыс сю пыкетэз". Чуръёс вискы ӝиптӥськем Рудольф Федорович Березинлэн нимыз. Таиз но гуртысьтымы Вавож, ёросысь Зязлуд Какся гуртысь. Трос аръёс ӵоже ини со кивалтэ дышетӥсьёслэсь тодон-валанзэс будэтонъя институтэн. "Удмурт дуннеын" но оло. Шер ке но, гожъямъёсыз но пото. Бен, асме но гожъясьёс пӧлы пыртыны уг возьдаськиськы. Одӥг-ог ке но, газет баме "пӧрам" чуръёсы вуо. Мӧйымем чиньыос но ручкалэсь мӧзмо на, шӧдске. Улонлэсь ӧрзэ шузи-мази валаны кутскеме дырысен ик газетъёсын эшъяськи. Начальной школаын дышетскыкум, нырысетӥ чуръёсме гожтӥ но Вавожын потӥсь "Ленинец" газетэ ыстӥ вал. Нош юрттӥз дышетӥсьмы Николай Павлович Чайников (со Куӟебай Гердлэн агаез вал). Озьы кутскиз газетэн эшъяськеме. Куамын арлэсь кема ужай "Советской Удмуртия" газетлэн редакцияз. Табере шутэтскисько ни, озьы ке но, редакциен кусыпме уг ыштӥськы. Арлы быдэ гожтӥськисько но яратыса лыдӟисько "Удмурт дуннеез", кытын ужало ини егитъёс. Туала кивоштӥсьёслэн творчествозы шӧдскымон будэ, солы шумпотоно. Кемалась аръёсы гожтэт тодӥсьтэмъёс ӧз лыдӟе газетъёсты но, книгаосты но. Милям гуртысьтымы зӧк Иван выллемъёс гуртэ вуэм иворъёсты дас полэс пӧлэстыса веразы. Ӧвӧл, али озьы ӧвӧл ни, лыдӟись ачиз газетэз кияз кутэ. "Удмурт дуннелы" тямыстон ар тырмон азьын верам потэ: "Лыдӟисьёсыд но гожъясьёсыд уката тросгес мед луозы. Соос пыр улонлэсь котькуд сэрегзэ умойгес адӟом но тодом". В. СМИРНОВ. Тасялэн сайкыт тусыз Луылэ ук озьы дуне вылын: огпол пумиськиськод адямиен - люкисьскыны уд быгатӥськы ни, кыӵе ке адскисьтэм сиосыныз кыске со тонэ бордаз. Озьы луиз милям но Тасяен. Со ог куинь ареслы бадӟымгес вал мынэсьтым. Мугорын но паськытгес, йыгмытгес. Ымнырын нош чик чебер ӧвӧл кадь: синъёсыз пурысесь, пичиесь, йырсиез сьӧд но ӧвӧл, тӧдьы мертчан кадь но уд шуы, чангырес нырзэ пичи дыръяз кин ке маин ке шортӥз зӥбем но, озьы ик "нёжал" кылем. Сямыз бен туж лякыт. "Артисткаос котьку чебересь луо. Кызьы со артистка луоз", - малпалляськом вал. Нош тани, мусо пальпотыса, со тонэ ӟыгыртэ яке шорад учке но, кыӵе ке няськатӥсь шуныт альтэ со бордысь. Пумиськи мон соин театральной курсын. Ӵош улӥм общежитиын, ӵош дышетским. Тася пересь яке арлыдо нылкышноосты шудылӥз, ми Малых Катяен - егит, чебер нылъёсты. Со ноку но ӧз ӝожкылы сыӵе синмаськонтэм рольёсты сётэмзы понна. Нош кыӵе ке героиняез возьматоно луэ ке, ымныраз грим тыре но, солэсь чеберез, мусоез дуне вылын ӧвӧл кадь. Ми Тасяен умой-умой эшъяськыны но ӧм вуэ - монэ театральной курсысь поттӥзы (кулак ныл карыса). Озьы ке но, эшлыко кусыпмы ӧз сэра, улытозямы ялан туж шумпотыса пумиськылӥм. Син азям яркыт пуксе соос доры Ленин но Красной урамъёслэн сэрегазы сылӥсь бадӟым из юртын-коммуналкаын улыкузы ветлылэме. Висъетъёсы пичи гинэ. Котыръёссы - ӝӧк, пуконъёс, книгаосын этажерка, шкаф нерге. Висъет шорын ик раскладушка вылын сьӧдкысъем, чылкыт ымныро пиосмурт укно пала кариськыса, чильпаськыса кылле. Со сӧсыр, ветлэмез уг луы. Вӧзаз пукон вылын Тася но керттӥське. Со туж яратэ вал чильпаськыны но, пужыятскыны но. Ас керттэм кофтаосын, дэремъёсын, выл дӥсьёсын ветлылӥз. Бен, вань корка пушсы та кузпалъёслэсь киужез яратэмзэс возьматэ: этажеркалэн ӝажыосыз, ӝӧк, укно - ваньмыз паймымон усто чильтэръёсын чеберъямын. Али нош кыкназы соос пичи нылынызы мусоясько вал. Анастасия Васильевналэн нырысетӥ картэз, артист Тугбаев, лек ожын бырем. Таиз, сӧсыр кыллисез - Шкляев, солэн кыкетӥ картэз. Нылзы нырысетӥ картэзлэсь. Огазеяськыса, Шкляев Тасялы но, нылызлы но ас фамилизэ сётэм. Мон паймисько вал, кыӵе каньыл сям, небыт сюлэм мур яратон, пумтэм чидатскон кулэ адямилы сӧсыр муртлы бызьыны, сое утялтыны. Нош Анастасия Васильевна быгатӥз картсэ эмъяны, пыд йылаз султытӥз. Мон артистка луыны малпасько вал бере, ӵем гинэ вуылӥ театре эшъёсылэсь шудэмзэс учкыны. Кыӵе шумпотыса пумиталляз монэ Тася котькуд вуылыкум. "Вуид-а, Гутине?" шуыса ӟыгыртоз, чупалоз вал, мальдыт пальпотоз. "Мон али Киров ульчаын улӥсько. Арня нуналэ лыкты дорам, ява!" Нош отчы вуылыны ӧз кылды. Соослы ньыль висъето квартира сётӥзы Октябрьлы 10 ар урамын. Отчы ветлыны вуи ик. Тасялэн нылыз монэ азбарын возьмаз (ӝужытэсь коркаос вискы йыромем вал). Тася шумпотэменыз синкылиосын пумитаз монэ. Ог куинь час чай юыса, вераськыса пукимы. Тодэ ваёнъёсмылэн пумыз ик ӧй вал, соин ик нош ӝоген пумиськыны вераським. Туж капчи мылкыдын возьматъяз со мыным наградаоссэ, Удмуртилэсь, Россилэсь дано нимъёс сётэмзэс возьматӥсь дипломъёссэс. Бератаз кузьмаз фотокарточказэ, солэн тодэ ваёнъёсыныз "Молот" журналэз. Собере туж мылпотытэк люкиським. Со луиз мынам Тасяен берпум пумиськеме. Толэз но ӧз пырпоты ни - со кошкиз улонысь. Кезьытам бамзэ чупаны гинэ вуылӥ на. Нош солэн тусбуйыз ноку но уз вун, уз кыс мынам сюлэмысьтым. АВГУСТА КОНЮХОВА. А. В. Шкляева "Семья" спектакльын. Ленинлэсь рользэ шудэ В. Я. Перевощиков. Рабочий - Я. Н. Перевощиков. Сибирьын - удмурт каръёс?.. Алигес мон Сибирьысь удмурт каръёсты шедьтӥ. Кызьы луиз со? Тодмо удмурт кылчи Риф Шакрисламович Насибуллин мыным лыдӟыны сётӥз Д. Г. Тумашевалэсь "Диалекты сибирских татар" книгазэ. Поттэм сое Казаньысь университет 1977-тӥ арын. Та ужезъя Дилара Гарифовна доктор луон понна диссертация гожтэм. 1956-тӥ-65-тӥ аръёсы Казаньысь В. И. Ульянов-Ленин нимо университетысь студентъёсын ӵош вуылэм Тюмень, Омск, Новосибирск, Томск но Кемерово улосъёсы. Та книгаяз гожъя Тобол но Иртыш, Барабинск но Томск палась бигеръёс сярысь. Та шаеръёсы тюркъёс вуиллям асьме даурлэн сюрсэтӥ аръёсаз, нош отчыозь отын улӥллям угро-финнъёс. Угро- финнъёс пӧлысь кыӵе калыкъёс - тодосчи уг гожты. Тобол но Иртыш палась калык сярысь Д. Г. Тумашева лыдӟем кӧня ке книгаысь. Одӥгез соос пӧлысь - "Вопросы истории Сибири и Дальнего Востока". Татын вань А. П. Дульзонлэн статьяез. Нимаське со тазьы: "Дорусское население Западной Сибири". Мукетыз книга - В. А. Могильников: "Население южной части лесной полосы Западной Сибири в конце И - начале ИИ тысячелетия н. э." Со сяна, лыдӟем на В. П. Левашовалэсь статьязэ. Таиз потэмын "Советская археология" журналын 1950-тӥ арын 13-тӥ томын. Статьялэн нимыз: "О городищах сибирского юрта". Вылӥ верам книгаос Ижын ӧвӧл. Мыным лыдӟыны кылдӥз В. П. Левашовез кылужзэ (статьязэ) гинэ. Тани мар гожтэ со: "Татысь каръёслэсь ку кылдэмзэс вераны шуг. Но лы арбериосъя учконо ке, соос вашкалагес - татысь материалъёс трос ласянь матын луо шунды ӝужан пал финн памятникъёслы. Барабинск дорысь каръёсысь шедьтэм арбериос тупало Глазов уездысь Донды-карысь арбериослы". Картае учким ке, адӟом: Барабинсклы кыдёкын ик ӧвӧл Кама гурт. Сылэ Кама шур дурын. Та Кама шур усе Иртыше, нош Иртышез удмуртъёс вашкала дырысен Йыртыш шуо вал. Озьыен, оскыса вераны луоз: та шурлы ним понӥзы та палась каръёсын улэм удмуртъёс. Кама шур вань Свердловск улосын но. Со сяна, татын вань на Пичи Кама но Бадӟым Кама шуръёс, нош Екатеринбург кар дорын ик сылэ Сарапулка гурт. Со гинэ уг тырмы - Красноуфимск кар палан удмурт гуртъёс но вань. Татчы кылизы, луоз, Сибирьысь бертӥсь удмуртъёс... Барабинск палась каръёсты Дондыкарен ӵошатъяса гожъяллям тодмо тодосчиос А. А. Спицын но А. П. Смирнов. Нырысетӥезлэн книгаез нимаське "Древности камской чуди". Поттэмын со "Материалы по археологии России" сериын 1902-тӥ арын. А. П. Смирновлэн книгаез "Социально-экономический строй восточных финнов ИЪ-ЪИИИ веков нашей эры" нимаське. Поттэмын(1928-тӥ арын) таӵе сериын: "Труды секции археологии Российской ассоциации научных институтов общественных наук". Та книгаосты асьме тодосчиос ватӥллям-а, чик но тодӥллямтэ-а? Тобол но Иртыш палан угро-финнъёс улӥллям шуыса гожъяллям ини асьме дыре улӥсь тодосчиос но (соос сярысь мон вылӥын ивортӥ вал ини). Мон та шедьтосме одӥг тодмо историклы возьматӥ но, со нокыӵе ик ӧз кариськы: Сибирьын удмуртъёс ноку но ӧй вал, пе. Мон Д. Г. Тумашевалэсь книгазэ лыдӟи но туж трос тунсыкозэ шедьтӥ: солэн гожъямъёсыз археологъёслэсь верамъёссэс юнмато. Кӧнязэ ке мон али возьмато. Нырысь ик, Барабинск котырысь бигеръёс пӧлын вылэм Лонга нимо выжы. Удмуртэн герӟаськымтэ меда? Асьмелэн данак выжыосмы -га аффиксэн: - Омга, Можга, Пурга, Дурга но мукет. Собере Якшур-Бодья ёросын вань Лынга гурт, Эгра (Игра) палан - Лонки-Ворцы гурт. Лынга но Лонки лонга шуэм кадь кылӥсько. Иртыш но Тобол палась бигеръёслэн вераськоназы вань пыр кылзы - озьы шуо соос суэз. Нош камсьӧр удмуртъёс пыр шуо етӥн но пыш сэстыку потэм тузонэз. Сопал бигеръёс мырк шуэмзэс мык шуо. Тылобурдоез соос куш шуо, казанъёс - кош, куд-ог удмуртъёс ӧрӟиез куӵ нимало. Вань на пиёкуш тылобурдомы: пиёк куш вылэм со. Сопал бигеръёс изьыез такыя шуо, асьмелэн такъя - выль кенлэн изьянэз. Сибирьысь бигеръёслэн лабырта кылзы вань, асьме сямен - лабыртыны. Дилара Тумашева отӥяз гожтэ: "Лэчек но куд-ог мукет нюро районъёсын улӥсь бигеръёс туж каллен, дыртытэк гинэ верасько, кылъёссэс кузь нуйтыло, вераськемзы кырӟам кадь кылӥське". Татышлы палась но Кам сьӧрысь трос удмуртъёс озьы ик нуйтыса верасько - уг верасько, кырӟало, кожалод. Кылъёссэс тужгес но кузь кыско пересь нылкышноос. Паймоно макеез кыло ке, кулыса ик усё ини соос: "Озьы уа ма-а-а-а?". Кырӟаса кадь вераськись удмуртъёсты тодмо гожъяськисьмы П. К. Поздеев уй пал ёросъёсысь но пумитам. Малпан кылдэ, со "кырӟаса" вераськись бигеръёс - бигермем удмуртъёс, дыр. Вылӥын верам ёрослэн нимыз лэчек удмурт кылэз тодэ уськытэ: лачег (лазег). Малпан кылдэ: со палан нюръёссы, лазегесь вал... Удмурт кылъёслы яке нимъёслы тупало мукет гурт нимъёссы но: Кыргап (удмурт кылын - кыр гоп). Янгитум: асьмелэн Яр палан Тум гуртмы вань. Еманаул: удмуртъёслэн таӵе нимъёссы вылӥллям - Еманай, Емангул. Тачак учыръёс верало: вылӥллям ик удмуртъёс Сибирьын! Соосты троссэ татчы Чингис- хан берыктӥз, луоз, киосазы пукыӵ кутытыса. Но малпаны кулэ: улляса ваем сибирь удмуртъёс, доразы вуыса, татысь удмуртъёс но булгаръёс шоры ыбылыны пумит кариськизы. Соку, туж вожез потыса, Чингис-хан удмуртъёслэсь вань уй пал каръёссэс музъемен ӵошкатӥз. Соин, дыр, та каръёс ЪИИИ даурысен шокамысь дугдӥзы. Фёдор ПУКРОКОВ. Вакчияк Ёрмон но оскон Толон Удмурт Республикаысь Правительстволэн Тӧроез Павел Вершинин, министръёс Владимир Бельтюков но Николай Бессогонов пумиськизы Сарапулысь ёрмыса улӥсь кышномуртъёсын. Ужпум со бордын: нылкышноосты Иже вуттӥз ёрмон, соос ужтэк кылемын, уг басьто нылпи пособие но, соин ик семьяоссы кураськон калэ вуэмын. Пособие чотын куд-ог вузъёс но сиён-юон висъяло ке но, со тырмыт ӧвӧл. Солэсь но ортчыт - базарын сярысь, юнматэм магазинын вузъёс дуноесьгес. - Ужпумез ми тодытэк ум улӥське,- пусйиз Павел Вершинин.- Кемалась дэмласьком ни городысьтыды администрацилы социально-экономической азинсконъя программа дасяны, отын вань удысъёсты пыр-поч чакланы, сое Кун Кенешын юнматыны. Соку коньдон но висъяны каньылгес луысал. Жаляса верано луэ: кивалтӥсьёсты уг дырто та ужен. Но ми чик но ум турттӥське сюлмаськонъёстылэсь палэнскыны. Ма герӟаськемын Правительствоен, луэмезъя ваньзэ лэсьтыны тыршом. Но соку ик пусйиськом: юрттэт сётэмын луоз тужгес но ёрмись семьяослы. Ӟечгес улӥсьёсызлы витьытэк ӧвӧл. Пумиськонын эскеремын югдурез тупатонъя пӧртэм пумо амалъёс. Уртче тыршемлэн пайдаез шӧдӥськоз, дыр. О. МАРКОВ. Гурт будэ Пичи Пурга палъёсын котькуд гуртын сямен ӝутӥсько улоно-вылоно выль коркаос. Нош Вавож ёросысь Зямбай гуртын кыӵе югдур? Нырысь лыктэм бере паймиськод - оло чик но пуктӥськисьёсыз ӧвӧл-а? Гурт пуме гинэ вуыса адӟиськод: татын но улон "пӧзе" - вылез вужзэ воштэ. Кызьы веразы колхоз правлениын, Зямбайын но коркаос пуктыло. Выль юртъёсы интыяськизы ни палэнысь лыктэм егит специалистъёс. С ДОЛГАНОВА. Дебес палан туннэ Комсомоллэн 80 арезлы Комсомоллы 80 ар тырмонэз рос-прос пумитаны дасясько Дэбес палъёсын. Соин валче кылдытэмын нимысьтыз радъясь комитет. Та ужен кивалтэ ёросысь администрацилэн кивалтӥсезлэн воштӥсез И.П. Ложкин. Егитъёсын ужанъя отделэн ӵош дасямын юбилеен валче ужрадъёсын план. 19-30 октябре районысь егитъёслэн движенизылэн историзыя интыысь интые вошъяськись экспозиция ужалоз. Кызь октябрьысен ортчозы "котырес ӝӧк" сьӧрын пумиськонъёс. Отын пӧртэм арлыдо адямиос кенешозы туала егитъёс азьын сылӥсь ужпумъёс сярысь. Депутатъёслэн ёрос Кенешсы эскероз "Дэбес районысь егитъёс 1999-2000 аръёсы" программаез. Озьы ик чакламын радъяны шулдыръяськонъёс, спортлэн удысъёсызъя ӵошатсконъёс, армие сӥё-дано келян ужрадъёс. Вормисьёс пӧлын Туэ "Педагогической вестник" газет мылкыд карисьёсты ӧтиз вал "Ар понна устоез нылпи сад" конкурсэ пыриськыны. Та ужрад ортчиз быдэс Россиын. Конкурсын нюръяськизы дэбесъёс но. Алигес "Солнышко" нылпи садлэн кивалтӥсезлы Зинаида Широбоковалы Москваысь ӟечкылан гожтэт вуиз. Конкурслы йылпумъянъёсъя та нылпи сад лауреат луиз, озьы ик пусъемын дипломен но. Маин бен данъяське "Солнышко"? Татын уно аръёс ӵоже ини пиналъёслы чеберлыкез (эстетика) валаны дышето. Ужазы куто уно пӧртэм амалъёсты. Бадӟым инты висъяло суредаськонлы, крезьгурлы, театрлы, киужъёслы. Уно саклык висъяло мугорез кыдатонлы, тазалыкез утёнлы. Пиналъёс мур дышето удмурт фольклорез. Лауреат луэмзы сярысь диплом матысь дыре сётэмын луоз Москваын ортчоно Всероссийской семинарын. Мултэс муъемъёс Та вакытэ шаерамы уг кутӥсько 84,9 сюрс гектар музъемъёс. Озьы ик уно аналтэм муоссэс аналтӥзы фермеръёс но крестьян хозяйствоос. Музъемъёсты кутэмез эскерон понна нимысьтыз комиссия кылдытэмын вал Дэбес ёросын но. Со 2524 гектар "мултэс" музъемъёсты шараяз. Кылем арен ӵошатыса, соос йылӥллям 586 гектарлы. Та ласянь тужгес но азьпалан мыно "Родина", "Красный Октябрь", Малыгин нимо, "Ита", "Восток" эштосъёс. Музъемез урод кутӥсь хозяйствоослы но кресьян хозяйствоослэн кивалтӥсьёссылы коньдон тыронъёс тупатэмын луозы. Эн ю "Трояез" - кулод Дэбесысь милициын ужасьёс курытэныз лушкем вузкарисьёсты эскеронъя рейд ортчытӥзы. Озьы вузанысь палэнтэмын вал 600 бутылка "Троя" спиртэн сурет. Кызьы верало медикъёс, "Троя" юисьёс пӧлын вал ини кулэмъёс но. ФУТБОЛ Вормиз - келяз Ижысь "Газовик-Газпром" команда кык пумиськонзэ куноын ортчытӥз. Санкт- Петербургын со татысь "Локомотивез" 2:0 лыдын вормиз. Нош Смоленскын асьмелэнъёслы ӧз удалты, та лыд ик йырчукин бекыляз: "Газовик" 0:2 лыдын келяз. Чемпионат йылпумьяськытозь, 6 шудон кылемын на. "Газовиклэн" луонлыкез вань на нырысетӥ лигаысь командаос пӧлын вить устоосыз пӧлы шедьыны. Нош со понна - вормылоно! М. КУЗЬМИН. 20-тӥ октябре Ижысь Технической кун университетысь доцентлы, физико- математической наукаосъя кандидатлы, докторантлы Леонид Дмитриевич Загребинлы тырме куатьтон арес. - Вераськонмес, Леонид Лмитриевич, асэныды тодматскон бордысь кутскем потэ вылэм. - Вордӥськи 1938-тӥ арын Алнаш ёросысь Усо гуртын. Атае, Дмитрий Владимирович, дышетӥсь вал. Анае, Фёкла Ефимовна, огшоры удмурт кышномурт. Ужаз колхозын. Будэтӥзы соос кык пи - монэ но Валера вынме. Ньылетӥ классозь дышетски Муважи начальной школаын, сизьыметӥозь ветлӥ Кузёбае, тяиысэтӥ классэз йылпумъяй Варзи- Ятчиын. Школа бере пыри Можга педучилищее. - Малы одно ик дышетӥсь луыны малпады? - Атаелэсь адӟем карыса. Собере анаелэн но пизэ дышетӥсь каремез потэ вал. Отын ньыль ар дышетскыса, вуи Кузёбай школае. Но кык толэзь гинэ ужаса вуттӥ - армие басьтӥзы. Отысь бертыса, Голюшурмаысь ляб дышетскись пиналъёслы чаклам школае интыяськи. Но дышетсконме азьланьтэме потӥз. Бордаз туж кыске вал физика. Соин ик пыроно кариськи Ижысь пединститутлэн физикая но математикая факультетаз, солэн физикая отделенияз. Дышетсконме йылпумъяй "горд" дипломен. Анае Яр ёросысь вал бере, мылкыд кари Яре дышетыны мыныны. Но одӥг пол дорам институтысь наука ужъёсъя проректор Агафон Николаевич Вахрушев лыктӥз но кизэ пельпумам поныса шуиз: "Тыныд дышетсконлэ одно ик азьланьтоно, ми малпамы тонэ Ленинградысь А. И. Герцен нимо пединститутэ лэзьыны". Мон малпаськи но соглаш луи. 1964-тӥ арын кошки Ленинградэ - ар ёрос дышетски, ужай отын. Собере 1965-тӥ арын бертӥ но механической институтысь физикая кафедраын ассистент луыса ужаны кутски. Отӥяз луи старшой преподаватель, собере - доцент, Урал политехнической институтлэн (али - Уральской технической университет) физикая но техникая факультетаз ути диссертациме, луи физико-математической наукаосъя кандидат. Али докторантураын ньыль аспирантме дасясько. Ужъёсы печатласько пӧртэм журналъёсын. Кылсярысь, Наукаосъя Академиен дасямъёсаз. Озьы ик - кунгож сьӧрысьёсаз но. Докладъёсынымы пыриськылӥмы ичи Германиын, Астриын, Япониын но мукет кунъёсын ортчем конференциосы. - Мон кылӥ, тӥ, наука удысын ужам сяна, политикаен но аыриськоды шуыса. - Зэм но, сояз но, таяз но вуттӥськыны тыршисько. 1990-тӥ арысен 1995-тӥ арозь ужай Вылӥ Кенешын, отысь Наукая, культурая но национальной ужпумъёсъя ялан ужась комиссилэн тӧроез вал. Туж трос сюлмаськоно луиз Удмурт Элькунлэн Конституциез сярысь. Тужгес но секыт югдур вал И параграфез кутонын. Отын вераське асэриклык (суверенитет) сярысь. Пӧртэм пыкылонъёсты чидано луылӥз, газетъёсын милемыз "ӵушкась" гожъямъёс ӵемысь поталлязы. Собере удмурт кылмес кун кыл карон понна но уно лэсьтоно вал. 1991-тӥ арын кутэмын вал Удмурт Республикалэн суверенитетэз сярысь декларация, отын верамын удмурт кылэз кун кыл карон сярысь. Со юнматэмын Конституциен но. Та кулэ документэз дасяку кылдытэмын вал нимкылъёсъя комиссия. Со кутыны кулэ вал кык сю пала выль кыл. Нош югыт дуннеез адӟиз тямыстон палаез гинэ. Ӵенгешонъёс кема мынӥзы элькун (республика) кыл пумысен: ӧвӧл, шуо, удмуртъёслэн сыӵе кылзы. Али мон луисько "Удмурт кенеш" огазеяськонлэн городысь ёзэзлэн тӧроезлэн воштӥсез. Собере пырисько на быръёнъёсъя "Элькун" блоклэн Октябрь ёросысь ёзаз. Отын ми удмуртъёсты быръёнъёслы дасян ласянь ужаськом. - Та удысын маке лэсьтэмын-а ини? - Быгатэммыя тыршиськомы. Тодыны турттӥськом, кыӵе округын кӧня адями. Оты ик ӵектӥськомы удмуртъёсты районысь ёз пыр одӥгаз-кыказ ке но меб быгатысалмы вылэм асьме адямиосмес поттыны. Трос умойзэ лэсьтэм потэ калык понна. Тужгес но - удмуртъёс понна. - Леонид Дмитриевич, вал-а улонады сыӵеез: тӥледыз, удмурт карыса, ултӥяны, возьытэ уськытыны выризы? - Котькыӵе дыр вал. Мон сое валаны кутски, Ленинградын дышетскыкум. Солэсь азьло сыӵееныз ӧй пумиськылы. Армиын, кылсярысь, ноку но удмурт, гуртысь шуыса ӧз ултӥялэ, ваньмыныз оградын вал котьку. Командиръёс ай вылӥегес пукто вал монэ: оло визьме валаса, оло мукет муген. Нош Ленинградэ мынэме бере шӧдӥ, ми шоры, Удмуртиысь лыктэмъёс шоры, чиньы пыртӥгес учкемзы потэ кадь шуыса. Асьмелэн ведь университетмы сыӵе тодмо ӧй вал ай соку. Нош Москваысь, Свердловскысь, Новосибирскысь вузъёс туж даноесь вал ини. Ми мынӥмы отчы кык кузя: удмурт пи но бигер ныл. Ӟучъёс ӧвӧл бере. Соин но, оло, озьыгес каризы. Собере мынам удмурт сямы но шӧдӥськылӥз: туж кепырась, дӥсьтӥсьтэм вал.Ай диссертациме но утьыкум, куалекъяны, моганы кутски. Комиссиын одӥгез пукись юа, пе: мар сыӵе кышкась: ӟуч ӧвӧл-а, мар-а? Нош соку мыным ньыльдон арес вал ини. Зэм, удмурт луэмелэсь мон уг возьдаськиськы - данъяськисько гинэ. - Наука но политика удысъёсын тыршемды сярысь тодӥмы. Семьяеныды но тодматскем потэ вылэм. - Кузпалы, Людмила Николаевна, Алнаш палась ик - Кадикгуртысь. Со мынам врач- терапевт. Кык нылмы: Лариса но Наташа. Лариса йылпумъяз Ленинград университетлэсь прикладной математикая факультетсэ. Бызиз мадьярлы (венгрлы). Али улэ Будапештын. Наташа йылпумъяз Урал университетлэсь прикладной социологияя факультетсэ, кызь вить аресказ луиз наукаосъя кандидат. Быземын. Улэ Екатеринбургын. Вань Васька коӵыше: со мынам туж матысь эше. - Леонид Дмитриевич, нош тӥ асьтэдыз шудоен лыдъяськоды-а? - Кызьы сотэк?! Нырысь ик - мон шудо атай, сюлмысь яратӥсько нылъёсме, соосын туж данъяськисько. Кышное но ӟеч. Со мынам утисе-вордӥсе. Урод ум улӥське. Асьмелэн куинь комнатаен квартирамы, сад-бакчамы вань. Эшъёсы, тодмоосы туж трос. Соос но ваньзы ик туж умоесь адямиос. Политика но мыным номыр уродзэ уг вайы: калыкелы ӟеч лэсьтыны весь тыршисько. Одӥг кылын вераса, мон туж шудо удмурт воргорон! Вераськиз Лилия БАКАЕВА, Удмурт кун университетын дышетскись. ТУННЭ ОГСЫР УЖАСЬЁС "Вараксикно" чида, возиське Кин бен уг тоды город котырысь кык бадӟымесь курег вордон хозяйствоосты. Одӥгез интыяськемын Завьял черкогуртэ нуись сюрес дурын, нош кыкетӥез - чылкак мукет, Шаберды палан. Кыкез ик пуксемын Завьялово районлэн музъем вылаз, кыкез ик огсыр, умой ужало. Но туннэ газет баммес быдэсак сӥзиськом "Вараксиноысь" тылобурдо утисьёслы. Туэ гужем хозяйстволы 30 ар тырмиз. Фабрика арлы быдэ 160-165 миллион курег пуз бича, ачиз чипы поттэ (инкубаторез вань), соосты будэтэ, сиён изэ, курег пуз но сӥль вуза. Хозяйство огдыре 800-900 сюрс чипы-курег возе. Со пӧлысь ӝыныезлэсь уноез пузась курегъёс. 800 гектар музъемез, трос техникаез но мукет. Николай НИКИФОРОВ Курыталэс чечы Юри малпамтэ мадёс Туръя шурмы вӧзысь гурезь бамалын туж чебер улмо сад куашетӥз. Чебер интыезлы, трос емышо писпуосызлы паймыса ик, вылды, татчы интыязы на муш бакчаез но. Арлыды покчи луэмысь, мон али пырак вераны уг тодӥськы ни: бадӟым-а вал бакча, трос-а вал муш умортоослэн лыдзы? Озьы ке но, чечыен утялтылӥз быдэс колхозамы тыршись калыкез, покчиосты, ай палэнэ вузаны но окмылӥз. Ми, покчиос, татчы кожаны курдаллямы (ӵыжыт улмоос, чияос, синъёсты гочатыса, вӧзазы ӧтьылӥзы ке но). Кинлэн-о муш шилэсь шӧмзэ юнме шорысь верьямез, мугорзэ куж- куж висьытэмез потоз?! Нош арлы огпол вуылӥз сыӵе нунал - сое гуртысь вань пиналъёс чидатэк витьылӥзы- возьмаллязы. Тани гурезь бам ёросысь омыр чечы зынэн тудӟе. Озьыен, мушкасьёс чечы кыско. Таӵе шумпоттӥсь ивор ымысь ыме ӝог вӧлске. Ӝегатскытэк дорамы бертӥськом но нянь сукырилэсь турижзэ туж бадӟым шорыса басьтӥськом. Шоремед макем бадӟым, аслыд сокем ӟечгес луоз. Лашкинтыса вуиськомы муш бакчае. Кема возьмано уг луы: мушкасьёс, киынызы шонтыса, милемды ӧтё. Пыриськом муш тӥрлыкъёсты возён лапас улэ, интыяськиськом кузь ӟус вылэ. Огез мушкась бадӟым тусьтыен ик али кыскем чечызэс поттэ но пиналъёсты кунояны басьтӥське. Тодмо ни: кинлэн нянь шоремез бадӟымгес но кузьгес, сыӵелы чечы но тросгес шеде. Кунояськеммы бере, мушкасьёслы тау карыса бызиськом ни шудыны. Анай-атайёс азьын но ушъяськем потэ: нырысь чечыен гусъяськимы ук! Зэм, таӵе шудо нунал ӝог ортчылӥз. Кыкетӥ нуналаз муш бакча пала ум матэктӥське ни. Мушкасьёс тонэ уз ӧте, адӟымтэ улсы кариськозы. Чечы уго колхоз складэ келямын ни, мертамын. Огаре мыным муш бакчае кык пол ветлыны тупаз. Ужпум со бордын: эшелэн атаез мушкась вал. Пичи гинэ нянь шорем басьтыса, эркеныса (керпотыса) вамыштӥ эше сьӧры. Тани кожиськом ни муш бакчае. Азьло сямен ик омырын веттаське чечы зын, синъёсты гочато ӵыжыт улмоос. Нош туннэ мушъёс но лекесь кариськиллям, шӧдске. Чечызэс "таламысь" вожпотонзы лӧптӥз, дыр. Йыр вадьсын быз-з! гинэ поръяло. Азьпала вамыштыны курдаса-кышкаса сылӥськом. Эшелэн атаез милемды синйылтӥз но вӧзамы матэктӥз. Пизэ китӥз кутыса, сьӧраз валтыны кутскемен валче индылыны басьтӥськиз: - Кӧня пол верай ни мон тыныд: сьӧрад эшъёстэ малы ваиськод? Огнад лыктэмед уг лу шат? - Мон сое ӧй ӧтьы, - чик возьдаськытэк, атайзэ ӧрекчаз пиез. - Ачиз мон сьӧры калъяськиз. Чырты выжыям лёг олокытысь лыктыса кугӟаз. Эше ачиз сюлворыса ӧтиз вал ук. Озьы бере, малы шонерзэ верантэмез меда? Монэ та аре кыкетӥзэ куноязы чечыен. Зэм, нырысетӥяз сямен, ческыт ӧй вал - курыталэс шӧмо потӥз. Няньме но гуньдылыса-гуньдылыса ньылылӥ. Муш бакчае бератаз араз кык пол ноку ӧй кожалля ни. Анаелэн верамез пель сьӧрам шуккиськылӥз кадь: ӧтем-витем куно гинэ дуно луэ, пие. Герд Тодӥськод-а выжыостэ? Бигер но удмурт кылбурчиен, крезьгурчиен, инженерен Гильман Касимовен ми артэгес улӥськом, ӵем пумиськылӥськом. Кӧня ке ар талэсь азьло, "В глубь веков" книгазэ кузьмакуз, кескич пальпотыса, со мынэсьтым юаз: - Егорыч! Атаедлэсь атайзэ тодӥськод-а? - Нимзэ тодӥсько,- шуисько. - А солэн атаезлэсь атайзэ? - Уг... - Нош мемеедлэн мумизлэсь мумызэ? - Уг,- синъёсме уллань лэзи. - Эн кепыра,- буйгатэ эше.- Ог дасо ар талэсь азьло мон но ӵыжы-выжыосме йӧскадь уг тодӥськы вал. Табере, эсьмаса, Касимовъёслэн "улон тыпызылэсь" кызь куинь "улваёзь" пушъетъёссэ шедьтӥ! Зол-а? - Туж зол! - уромелэсь бур кизэ пыч-пыч кырми. - Тае лыдӟы но тодод, кызьыгес улӥллям вашкала бигеръёс но удмуртъёс, кытысь лыктыса кылдӥллям Балезино ёросысь Кестым гуртысь Касимовъёс. Ма, оло, мукетыз но тунсыко потоз... Воксё пайми книгалэн мур пуштросэзлы. Кылыз нош макем узыр! Бигерез но, удмуртэз но, ӟучез но жильк-жильк огинэ, туж быгатыса борӟамын-чильпамын. Книгазэ одӥг ӝытскын огломак "ньылӥ". Собере ини, тужгес чебер, жингрес интыоссэ выльысь но выльысь лыдӟи. Оскисько: кин кие та книга шедьылӥз, соос но одно ик озьы тодматскизы, вылды. Повестьлэн трос бамъёсаз суредамын удмурт кенлэн но бигер эмеспилэн, соослэн мумы-бубыоссылэн ӟеч сямъёссы, яратонзэс, шудзэс чылкыт утьыны тыршемзы, лэчыт визьзы, небыт кескичъяськонзы (эн суралэ вожвылъяськонэн). Со люкетъёсты кытӥяз серем пыр лыдӟиськод. Геройёслэн сурто-пурто вераськемзы, шырыт кылзы весяклы сюлме кыле. Нош сямъёссэс ке басьтоно, кытӥяз ворме удмуртлык, кытӥяз - бигерлык. Но со керетонэ уг вутты - огъя семьяосты юнматыны гинэ юрттэ. Книгаысь адямиос чебер кылъёссы но выросъёссы пыр уката яркытгес адӟисько. Татын юн шӧдӥське авторлэн бигер, удмурт но ӟуч кылъёсты ӟеч тодэмез, соослэсь узырлыксэс туж интыяз но ӝикыт кутыны быгатэмез. Та ласянь Г. Г. Касимовез зэмос писательёс радэ но султытыны луысал. Озьы вераны дӥсьтӥсько, книгалэсь мурдалазэ, огъя дунзэ, чеберлыко амалъёссэ чакласа, лыдэ басьтыса. Но "В глубь веков" книгаын тужгес но дуно мукетыз - авторлэн утчаськонъёсыз, кыдёкысь ӵыжы-выжыоссэ ӟечгес тодыны тыршонэз. Повестьын сётэмын Касимовъёслэн выжызылэн быдэсак суредэз (схемаез), улон "писпузы". Зэмос тыпы выллем, пур-пур вӧлскемын со книгалэн нимысьтыз ватсэтаз. Асьмеос, удмуртъёс, маин пӧртэмесь луыны кулэ мукет калыкъёслэсь? Зэм, школаын асьмелы тросгес сёто, чуртнало шуод-а, ӟуч калыклэсь, государстволэсь историзэ, кызьы улэмзэ. Асьмелэнэзлы, удмуртлыкмылы, дыр туж ичи кыле. Та ласянь адӟем кароно вылэм Гильман Гусманович Касимовлэсь. Солэн утчаськонъёсыз меӵак историен герӟаськемын, тодмо наукаослэн ӧретӥзы азинтӥсько. Гильман Гусманович туж шонер лэсьтэ, утчаськон ӧраз троссэгес мӧйы родняоссэ кыскыса. Соос авторлы юртто адӟылэмъёссы-кылылэмъёссы пыр. Озьы Г. Касимов аслаз ӵыжы-выжыосыз пӧлысь но трос тодмо адямиосты усьтэ, шарая. Сафура апаез, кылсярысь, Стамбулын но дышетскем. Собере кутскем революция. Ленин пыр гинэ быгатӥллям на апайзэ Россие вайыны. Нош кыӵе тодмо адямиос вылӥллям выжыысьтызы вынъёс Галиулла но Самигулла Касимовъёс. Галиулла ужам Кремльын нош Самигулла - Татарилэн правительствояз. Вераськем на Кестымысь 95 аресъем муллаен но. Со жаляса лулӟем: - Э, пие, пие! Тон сизьымдон арлы беромид. Со кагазъёс быдэс шыкыс вал. 1907 арын ӝыны Кестым ӝуаз... Котьма мед луоз но, мытэм удыссэ Гильман Гусманович йылпумъяз. Пӧртэм институтъёс, тодосчиос юрттэмен, песятаезлэсь кызь куинетӥ ёзэтсэ шедьтӥз. Авторлэн утчаськемез, бадӟым ужез ваньмызлы адӟем карымон. Соя ик мон но ас ӵыжы-выжыосме утчаны кутски. Г. Касимовлэн "В глубь веков" книгаезъя но "Кызьы утчай песятайме" статьяезъя (печатламын "Инвожо" журналлэн 1997-тӥ арысь 10-тӥ номераз) котькытын бадӟым вераськон ӝутоно вылэм. Мон сямен, солэсь гожъямъёссэ одно ик эскероно школаосысь бадӟым классъёсын, библиотекаосын. Та книга но статья, малпамея, инты мед шедьтысалзы котькуд музейын. Ӵыжы-выжыоссэ утчам сяна, автор уно выльзэ усьтэ удмуртъёслэн но бигеръёслэн кусыпъёсысьтызы. Историысьтызы, ас сяменыз туж валамон но, огдыре ик, историез, наукаез лыдэ басьтыса валэктэ бигеръёслэсь кылдэмзэс, малы та калыкез бигеръёс шуиллям. Огкылын, зэмос дышетӥсь выллем адске Гильман Гусманович. Солэсь утчаськемзэ, асьме поэзимес, крезьгуръёсмес азинтэмзэ кыӵе ке но премиен но пусйыны кулэ вылэм. Культурая но Калыкез дышетонъя министерствоос, оло, кыӵе ке но луонлык шедьтозы? Эшшо одӥг ӵектонэ вань на: Г. Касимовез ӵемгес ӧтьылоно вылэм "Удмурт кенешлэн", "Дэменлэн" но "Шундылэн" ёзъёсазы. Та шаплы адями мед мадьысал аслаз ужамез сярысь. Усточи угось удмуртлыкмес но юн возе сюлэмаз. Тодады вае ай "Пал кышно" кырӟанэз гинэ коть, кылъёсыз ӵапак Г. Касимовлэн. Музон кылбуръёсыз но жин-жин кырӟанъёслы пӧрмемын ни. Выжыез ке ляб, писпу ӝог погра. Адями но, ӵыжы-выжыоссэ ӟеч тодытэк, солань- талань шонскылэ, тӧллы чальгес сётске.. Кирилл ЛОМАГИН. Ялон Удмурт Республикаысь Правительстволэн Пичи ужбергатонлы юрттонъя но сое азинтонъя кун комитетэз ӧте вань ужбергатӥсьёсты но организациослэсь адямиоссэс "Котырес ӝӧклэн" ужаз пыриськыны. Отын эскеремын луозы республикаямы ужбергатонэз азинтонлы сӥзем ужпумъёс. "Котырес ӝӧкез" но "Удмурт Республикаын Пичи ужбергатонлы юрттонъя 1999 арлы кун программаез" дасяку, тӥляд ӵектонъёсты лыдэ басьтэмын луозы. Лыктыны луоз таӵе адресъя: Ижевск, Пушкинской урам, 270 юрт, 3-тӥ корпус. Телефонъёсмы: 23-25-74, 23-20-24. Люкиськон кыл 12 октябре улонысь дырызлэсь вазь кошкиз Россиысь дано художник, Удмуртиысь калык суредась, Удмурт Республикалэн кун премиезлэн лауреатэз, Удмурт кун университетысь профессор Менсадык Гарипович ГАРИПОВ. Гарипов вордскиз Башкириын удмурт крестьян семьяын. Йылпумъяз Удмурт кун университетэз но Москваысь полиграфияя институтэз. Ужаз "Дась лу!" газетлэн редакцияз. Уно пол пыриськылӥз Россиын но кунгож сьӧрын ортчылэм выставкаосы. Шуг шедьтыны Удмуртиысь сыӵе книгаез, журналэз-газетэз, кудаз ӧз пота М. Г. Гариповлэн суредэз. Солэн тужгес но ӟеч ужъёсыз дуннеысь пӧртэм музейёсын возисько. 16 ужзэ Третьяковской галерея басьтӥз. М. Г. Гарипов берпум нуналозяз быгатыса но вань мылкыдзэ сётыса университетын тыршиз. Улонысь кошкиз быгатӥсь, ӟеч сямо адями. Солы 52 арес гинэ вал, но та дыр куспын Удмуртилэсь искусствозэ но культуразэ азинтонъя туж трос лэсьтыса вуттӥз. Ми котьку тодамы возём эшмылэсь сайкыт тусбуйзэ, вазиськись, ӟеч сямо луэмзэ. Нош солэн вылӥ ӟечлыко ужъёсыз пыризы ни Удмуртиысь но Россиысь изобразительной искусстволэн зарни фондаз. Удмурт Республикаысь Кун Кенеш Удмурт Республикаысь Правительство Удмурт Республикаысь Культурая министерство Удмурт Республикаысь Художникъёслэн огазеяськонзы Удмурт кун университет Удмурт Республикаысь Кун Кенеш мур куректэмзэ вера Кун Кенешысь депутатлы Лопатин Александр Константиновичлы, солэн ӵыжы-выжыосызлы но матысь адямиосызлы, анаез Лопатина Валентина Исаковна улонысь кошкемен валче. Москваын ужа Удмурт Республикаысь Кун Кенешлэн Тӧроез Александр Волков та нуналъёсы Москваын ужа. Со пыриське Федерацияя Кенешлэн заседанияз. Со сяна, А. Волков пумиськиз Россиысь пенсиосъя фондлэн тӧроеныз Василий Барчукен. Соос огкылэ вуизы элькунмылы августэ чаклам пенсиосты тырон понна, 50 миллион манет висъян ласянь. Кызьы тодмо, Октябрьлэн кутсконаз Ижевске пенсия тырыны 25 миллион вуэмын ни. Россиысь Пенсиосъя фонд ивортэмъя, та вакытлы ӝыныяз улосъёсын, соос пӧлын Удмуртия но, пенсиосты кык толэзьлы бере кыльыса тыро. Со пумысен Василий Барчук пусйиз, Федерациысь Правительство 1998 ар понна пенсионеръёслы пунэм тыронъёсты сётыны уг дырты, но аслыз ужпум пуктэ ньылетӥ кварталлы пенсиосты дыраз тырыны. Кун Кенешлэн Тӧроез со нуналэ ик пумиськылӥз му вӧй поттонъя "Сиданко" компанилэн президентэныз Борис Волковен. "Сиданко" компания ар пумозь Удмуртилэн музъемысьтыз му вӧй поттэм понна 60 миллион манет тырыны кулэ. Борис Волков оскытӥз, асьме республика вуоно арын му вӧй поттэмлэсь 10 процентсэ одно ик басьтоз шуыса. Удмурт Республикаысь Кун Кенешлэн пресс-службаез. Кылбурен веран Мертты беризь Нюлэсчиос пӧртэм писпуэнзэ ягез Котьмар ласянь узыр шуыса валэктыло. Калык дасо аръёс мерттӥз вал пужымез, Нош табере ини кызэз озьы мертто. Лысо писпуослэн матысь эшсы - беризь, Со нӥзили кадь ик, сюез узырмытэ. Бадӟым, шимес война дыре Беризь адямиез сюдэ, кутча, шунтэ. Кимош ӵужмурт Москва доры ышиз, Отын со ожмаськиз сибирякъёс радын. Шонер улӥз, шуэ тур-пар ваё беризь - Сое ӵужмурт мерттэм куамын сизьыметӥ арын. Габи ӵужмурт бырем Волга сьӧрын, Ужам нош со нюлэс утялтонын. Сылэ ай беризез, вайям чиньы сямен. Вайям чиньы - Вормон, Вицториа шуэм. Мертты беризь, мертты беризь - озьы кылӥ, Дас ар Воркутаын ужам, улэм бере, Асьме гурт ульчатӥ вамышъямлы быдэ... Оло, зэмзэ вера дышетӥсе? Василий Александрович... Кема, пыр-поч мадёз котькуд будос сярысь, Кызьы люка кужым... Малы шуэн беризь уг пото кидысысь, Кызьы сыӵе батыр ӝутске пужым... Мертты беризь! - пересь мемей но индылӥз. Солэн тыршеменыз, уно чечы сии... Мертты беризь, кузё, - жуг жаг турын пӧлысь Потоз тау карыса солы, кинлэн киыз капчи. Беризь но сьӧдчабей - мушлэн сяськаосыз. Ачиз, пе, муш лоба инмар-кылчин дортӥ. Озьы шуо вылэм пересь адямиос. История тодэ: сюрс ар талэсь азьло Тапал улос тужгес азинскемын вылэм, Ю-нянь будэтӥллям, муш вордӥллям Гуртъёс вӧзысь беризь пӧлын, умортоын... ТИМОФЕЙ СОПРИН, Пичи Пурга ёросысь Улысь Кечон гурт. Луоз городлэн атласэз Иж карлэн администрациез "Ижевск городлэсь атлассэ" поттон сярысь кичӧлтонэн вазиськиз. Городлэн вице-мэрез Сергей Протозанов та пумысен кулэ кагазъёс гожтӥз Санкт-Петербургысь "Энко" научно-информационной фирмаен но "Рекламая юрт" агенствоен. Атласэ пыртэмын луозы космосысен лэсьтэм снимокъёс, городлэн историезъя очеркъёс, Ижлэн атласэз, ульчаос но улон юртъёслэн номеръёссы, шоркаретӥ ветлӥсь транспорт сярысь ивортон но мукет материалъёс. Атласэз поттыны чакламын, бюджетысь коньдонэз кутытэк. Кин мылкыд каре атласэз поттонэ пыриськыны, вазиськоно 25-02-55 но 22-81-78 телефонъёсъя. Ижысь администрацилэн пресс-службаез. Музейёсыз утён - нырысетӥ интыын Ижевскын ортчиз культурая но искусствоя "Бадӟым Урал" Координационной советлэн сизьыметӥез кенешонэз. Эскеремын вал, кызьы та ёрмон вакытэ утёно музейёсты, кызьы узырмытоно соослэсь фондъёссэс. Учкемын Бадӟым Уралысь улосъёс но Россия Федерациысь Культурая министерство куспын Тупанкыллэн проектэз. Йылпумъянъёс лэсьтэмын мунё театръёслэн алигес ортчем фестивальзылы. Озьы ик вераськемын Координационной советлэсь аслэсьтыз газетсэ поттыны. Та кенешонэ пыриськизы Удмуртиысь, Башкортостанысь, Курган, Оренбург, Пермь, Свердловск, Тюмень, Чклябинск улосъёсысь культура удысэн кивалтӥсьёс. Ваче кусып тупатэм сяна, соос тодматскизы асьме шаерын культуралэн азинскеменыз, вуылӥзы Ижевскысь выставкаосы, музейёсы, Воткинскысь П. И. Чайковскийлэн музей-юртаз. Т. НИКОЛАЕВА. 9 куреглы - атас Фабрикаысь технологен Галина Косареваен нырысь ик вамыштӥм мумы курег вордон гидъёсы. Али со валтӥсь зоотехниклэсь ужъёссэ быдэсъя. Сюрес вылысен ик трос лыдпусъёс вераз. Тани 4 гидъёсын котькудаз 16 сюрс курег интыямын. Укмыс куреглы быдэ одӥг атас возё, яке гидлы быдэ 40-45 усе. Хозяйствоын одӥг выжы курег будэто: ӟуч нимыз "Родонит", нош немецъёс "Ломеннбраун" шуо. Мумыосыз курегъёс тӧдьыесь, нош пузасьёсыз - гордэсь. Котькуд гидэ пыр, котькытын чылкыт, огсыр гурето моторъёс, транспортёр кузя лыктэ курегъёслы сиён. Курег пуз но озьы. Нош атасъёс чоръяло ни, нуназеез иворто. Данакез тылобурдо утисьёс ӝытазе 4 часозь тыршо, заводын кадь ик нуназеяны но, доразы но дэмен кошко, нош курег пуз быръён цехын пӧсь уж мынэ, 5 часозь бергало. Татын курег пузэз 6 машина быръе. Котькуд нуналэ татчы ӧжытсэ 350-360 сюрс пуз вуэ. Нылкышноос ваньмыз пыд йылазы ужало, капчи уг йӧты. Ӵукна 8 часысен ӝытазе 5 часозь чидано. Цехын 42 мурт тырше, соос пӧлысь уноез 15-20 ар татын курег пуз быръё ни. Тужгес ушъям потэ таӵе ужасьёсты - Мария Морозова, Дина Захарова, Татьяна Стерхова, Елена Соловьева но мукетъёсыз. Цехен кивалтэ Нина Тробицина. Но ми ветлон нуналэ со отпускын вал. Интыяз кылемын вал Руфина Брызгалова. Татын нырысь арзэ тырше, фабрикаысь бухгалтериын 20 арзэ чотан-лыдъян ужъёсын выриз. Г. ВАСИЛЬЕВ. Чипыосы чебер будо Тылобурдоосты ке ӧй яратысал, ужме, оло, кемалась воштысал, бускель Якшур-Бодья районысь татчы ӧй но вуысал, дыр. Вордски Кенервай гуртын. Нырысь фабрикае лыктӥз бадӟым сузэре. Али со шутэтске, пенсиын ни. Апае понна туж шумпотӥсько. Хозяйство аслэсьтыз пенсионеръёссэ уг вунэты: коньдонэн но юрттэ, сӥль но, курег пуз но толэзьлы быдэ сётэ. Ачим но бен урод уг улӥськы. Фабрика 4 комнатаен квартира висъяз. Кык нылпи будэтӥ. Пие но татын ик шофёрын ужа, нылы - садикын воспитатель. Быземын ни. Уже сярысь ке верано, секыт уд шуы. Ваньзэ сямен машинаос бергато. Кормоцехмес лэземзы бере, сиёнэн вис уг луылы ни. Чипыослы но курегъёслы ӟеч сиён дасяло. Комбикорм пӧлы поно белково-витаминной ватсэтъёс, лы пызь но чорыг вӧй. Чипыосме 5 толэзь будэтӥсько но мукет гидэ мумы курегъёс пӧлы поттӥсько. Отын соос арзэ пузало, пуззы ваньмыз инкубаторе чипы поттыны мынэ. Ар ортчыса, выльысь чипы сёто. Кызьы шуо, ачид кидыс будэты, ачид ик урожайзэ басьты. Шонер со, азьло тыршемез берло адӟиське ни. Ӵукна 7 часэ уже лыктӥськом но 4 часозь бергаськом. Нуназеяны 1,5 манетлы талон сёто. Сомында гинэ обедмы сылэ. Уждун но умой басьтӥськом, трослы ӝегаса но уг сёто, мукет предприятиосын уд ӵошаты. Лыдпусэн ке верано, толэзяз 800 манетозь луэ. Но берло дыре премия ичигес вуэ ни. Собере ужасьёслы толэзьлы быдэ дунтэмгес вузало курег пуз но сӥль. Ваньмыз со семьялэн бюджетаз умой шӧдӥське. Огъя пусъёно ке, кин тырше, со уждун но умой басьтэ. Нош мынам чипыосы чебер будо, син медаз усьы вал. Ваньмыз уго потэ сюлмаськем бордысь. Валентина Ильиных, чипы будэтӥсь. Правительствоысь иворъёс Шоркарын пумиськонъёс Удмурт Республикаысь Правительстволэн Тӧроез Павел Вершинин кылем арняе Москвае ветлӥз. Отын со пумиськылӥз Россия Федерациысь Правительстволэн Тӧроезлэн агропромышленной комплекс понна кыл кутӥсь воштӥсеныз Геннадий Куликен. Соин вераськемын Удмуртиысь гуртоослы юрттон сярысь. Г. Куликлы озьы ик сётэмын гожтэт, Россилэн Удмуртие интыяськем исправительно-трудовой учреждениосызлы сиён-юон понна люкаськем пунэм тыронъёсты берыктыны курыса. Павел Вершинин пумиськиз на Тазалыкез утёнъя министерстволэн кивалтӥсьёсыныз. Соосын вераськемын элькунамы эмъюм вуттон пумысен. Вал пумиськон Россия Федерациысь Центральной банкын но. Москваын дыръяз Павел Николаевич кенешиз Россия Федерациысь Правительстволэн Тӧроезлэн нырысетӥ воштӥсеныз Юрий Маслюковен. Соос вераськизы Ижевскысь бюджетлы коньдонэн юрттон но химической ож тӥрлыкез быдтон пумысен. 20-тӥ октябре Юрий Маслюков Удмуртие лыктыны малпа. Вуиз ке, со Россиысь топливно-энергетической комплексын но обороная предприятиосын ужасьёслэн Воткинскын ортчоно кенешазы пыриськоз. ГУРТ УЛОН Петровез ик кельтӥзы Туэ гужем районъёсын ортчизы аскивалтон ёзъёсы быръёнъёс. Соин валче Кияса ёросын гурт возёсъя управлениен кивалтонэ быръемын "Рассвет" колхозлэн тӧроез Пётр Григорьевич Петров. Алигес "Рассвет" колхозлэн Вуж Салья гуртысь клубаз ортчиз калыклэн огъя кенешез. Отын колхозлэн ужамезлы йылпумъянъёс лэсьтэмын. Кенеше вуылӥзы ёрос администрацилэн тӧроез Гумар Гаскарович Каримов но гурт возёсъя управлениысь кивалтӥсьлэсь ужзэ быдэсъясь Александр Николаевич Бочкарёв. Колхозысь специалистъёслэн верамзыя, туэ 29171 центнер ю-нянь люкамын, со фуражлы гинэ тырмоз. Вань на мукет арлэн кылемез фураж. 100 гектар вылысь ӟеч утялтытэк кылиз, гужемзэ кӧс улэменыз. Кыл сётэмын вал колхозлэн тӧроезлы Петр Григорьевич Петровлы. Солэн верамысьтыз тодмо луиз, туэ 8 толэзь ӵоже йӧллэсь - 1305 сюрс манет, сӥльлэсь 1016 сюрс, ю-няньлэсь - 79 сюрс, картофкалэсь - 35 сюрс, ю-нянь кидыслэсь - 75 сюрс манет барыш поттэмын. Но ваньмыз со эстӥськонлы, воштос ёзъёслы, тыл кужымлы, удобрениослы кошкем. Басьтэмын 3 гусеничной трактор, котькудӥз 40 сюрс манетэн, бадӟым трактор К-700 - 140 сюрсэн. Мынэ на азьвыл аръёсы лизинген басьтэм тракторлы тыронъёс. Государстволы тыронъёс 1700 сюрс манет тыр люкаськемын. Ужан тракторъёс туж чаляк вужмо. Куинь ар талэсь азьвыл гинэ 35 комбайн вал ке, али 16 кылемын. Гумар Гаскарович Каримов калыкез тодматӥз ёросын кылдэм югдурен. Ёросын али 3200 куанер семья улэ, нош умой улэ 67-ез гинэ. Уждунзэс куд-ог удысъёсын 9-18 толэзь ӵоже уг басьто ни, нош бюджет организациосын 4-5 толэзь ӵоже. Солэн верамысьтыз ик тодмо луиз, кыӵе умой уло вылэм ни ёросысь Мушак селоын, кудзэ ас киулаз басьтэм вылэм "Автозавод", нош али кулэ уг ни кары. Кенеше люкаськемъёс колхоззылы тӧро бырйизы. Та пумысен огез колхозник тазьы шуиз: "Мон пумит ӧвӧл Петр Григорьевичез вылӥе лэзьыны, нош кыӵе югдур луоз уждунэн? Мукетыз кивалтӥсь сое уз-а "кынты?" Лушкем куара сётыса колхоз тӧрое кельтӥзы азьвылзэ кивалтӥсьсэс Пётр Григорьевич Петровез. Н. МОРЯКОВ, Удмурт кун университетысь студент. Кун Кенешлэн сессиез Жуммем валэз уг жуго Удмурт парламентмылэсь берло дыре дыго-мого ужамзэ амалтэк ӵошатоно жуммем валэн. Нош мургес ке учконо, юан кылдэ: гужем шутэтскемзы бере, кин-о, мар-о меда депутатъёсмылэсь кужымзэс сокем пызьыртӥз, катьтэммытӥз? Оло, быръем дырзылэн пумызлэсь матэ вуэмзэ шӧдыса, куд-огезлэн ужан мылкыдыз куашказ, суйыз-пыдыз юскиськиз? Соиз но вань, дыр. Малпанъёс уго чебересь, ӟечесь вал, нош улонэ пыӵатыны ваньзэ ӧз кылды. Вылаз ик, кӧня нуналэз, толэзез быриз ваче пумит нюръяськонлы, юнме шорысь потэм бугыръяськонлы. 22-тӥ сессия азе но поттэмын вал ог 30 ужпум, котькудӥз со пӧлысь ӝегатскытэк эскеремез кулэ каре. Жаляса верано, депутатъёс йӧнызъя люкаськымтэен, 3 нунал ӵоже ӝынызэ но пуктэм юанъёсты йылаз-пумаз вуттыны ӧз кылды. Ваньмыз пӧлысь вольытгес пӧрмиз, шуыны луоз, районъёсы судьяосты юнматон. Соос воштӥськизы 14 интыын. Депутатъёс куд-ог кандидатъёслы трос гинэ юан сётъязы, быгатонлыксэс, тодон- валанъёссэс эскерыса. Сессилэн кыкетӥ нуналаз ӟырдыт вераськон мынӥз "Электрокужымез шыръян но эстӥськонэз пайдаё кутон сярысь" Удмурт Республикаысь законлы инъетэз эскерыку. Соин тодматӥз республикаысьтымы экономикая министр Евгений Аверьянов. Электрокужымез кутон данакез предприятиос но организациос понна берло аръёссэ пӧрмиз лек висёнлы. Дунзэ дыраз тырымтэослы чаг тылын но пукылыны, керосин лампаен но ужаны кылдылӥз ни. Депутат Людмила Верховцева верамъя, Сарапулын улӥсьёс арняяз 3 пол тылтэк пуконо луо. - Кин кыл кутоз тӥяськем холодильникъёс но мукет арбериос понна? Городлэн администрациез решение кутӥз мултэс сутэм тыллы ватсаса коньдон басьтыны, нош кин лыдъялоз беромыса сётэм шунытэз, соин валче висьыны кутскем адямиослэсь лыдзэс но курадӟемзэс? Депутат Николай Нагорных: - Цивилизованной государствоын калык чотын шыръян сярысь йыразы но уз шуккы: электрокужымез отын быгатыса куто выль оборудованиен ужаса, вылӥ ӟечлыко аппаратура поттыса. Нош асьмеос калыкмес пещераосы донгыны выриськом. Озьы-а экономикаез азинтод? Таӵегес ик мылкыдзэс веразы депутатъёс Даниил Белоголовкин, Николай Чувашов, Галина Чиркова. Воткинсклэн мэрез Валерий Фридрих меӵак шуиз: - Та законлэн куронъёсыз туала улонлы уг тупало, одӥг льгота но отын чакламтэ. Мон дэмласько сое палэнтыны но федеральноезъя ужаны. Та ласянь Фридрихен огкылысь луэмзэс веразы депутатъёс Анатолий Ешкеев, Николай Сычев но куд-ог мукет эшъёс. Соос дэмламъя, ӵектэм законэз дасян бордын умой-умой кутскыса ужано на. Чылкак мукет дунъет сётэмын пытсэт сьӧры шедемъёсты уже кысконъя 2001-тӥ арозь дасям целевой программалы. Со бордын ужасьёс котькуд юанлы рос-прос валэктон сёто. Лыдъямын-чотамын кин кӧня продукция поттоз, ма мында луоз солэн пайдаез. 22-тӥ сессилэн куинетӥ нуналэз, 20 минутлы беромыса ке но, мыло-кыдо кутскиз вал. Эскероно ужпумъёс пӧлысь бадӟым инты басьтӥзы пудо сиён дасянлы но будэтэм урожаез утялтонлы лэсьтэм йылпумъянъёс. Ивортон лэсьтӥз Правительстволэн Тӧроезлэн нырысетӥ воштӥсез Владимир Зенин. Со верамъя, пӧсь куазен республикая бырыны шедизы 87,5 сюрс гектар тысё но пуртэсо культураос. Таин валче, ю-нянь, кылем арын сярысь, кык поллы ӧжыт люкаськиз. Балезино, Алнаш, Якшур-Бодья, Завьялово, Ува но Вавож районъёсысь хозяйствоос гектарысьтыз быдэн 12-14 центнер кутсазы ке, Яр, Юкаменск но Камбарка палъёсын удалтонлыкез 7-8 центнерозь сяна ӧз вуы. Аран-кутсан ужъёс нырысьёсыз радын быризы Игра районысь "Рассвет", Якшур-Бодьяысь "Родина", Можгаысь "Красный Октябрь", Вавожысь "Удмуртия", Сарапулысь "Родина", Воткинскысь "Красный Октябрь", Граховоысь "Родина", Завьялово районысь "Путь Ильича" но куд-ог мукет хозяйствоос. Правительстволэн ивоортонэзъя Удмуртиез пыртыны луоно кадь огшоры улӥсь улосвылъёс пӧлы. Но кылдэм югдурез чылкак мукет сямен адӟо гурт хозяйствоын ужась депутатъёс. Ялан ужась комиссилэн кивалтӥсез Аркадий Малков трибуна сьӧры потӥз воксё музон мылкыдын: ӵектэм льготной кредитъёс республикае ӧз вуэ. Гуртоослэсь ужзэс туж улӥ дунъяса, переработка со вылын узырме. "Ижмолоко" АО малы дунъёссэ кулэстӥз? 8-24 процентлы соос усизы, налоговой инспекция отын эскеронъёс ортчытэм бере. Тӥни озьы. Кескич, асьсэ пала кыскыны дышем кузёос (вылаз ик, депутатъёс ай) калыкен чималиен кадь шудо. Йӧл, вӧй поттонын гинэ-а сыӵе югдур? Валэктон сётыны кулэез ӧвӧл, дыр. Ваньмыз шара лэсьтӥське. Депутатъёс юаллясько Германиысь ваем комбайнъёс пумысен но. Россиын поттэмъёсыныз ӵошатыса, соос 3-4 поллы дуногес. Нош кыӵе пайдаез? Таизэ улон возьматоз ни, дунъет но сётозы асьсэос музъем ужасьёс. Депутатъёслэн ӟырдам мылкыдзы нуназе бере сӥялскиз, зал но шӧдскымон бушаз. Кворумез люкан нош ик час пала кыстӥськиз. Заседаниез нуись Кун Кенешлэн Тӧроезлэн нырысетӥ воштӥсез Владимир Агашин, депутатъёслэсь куронзэс лыдэ басьтыса, 22-тӥ сессиез пытсаны медэ вал ни. Ужаны лыктэм муртлэн, валамон, отӥ-татӥ ветлӥсь эшъёссэ витьыны дырыз ӧвӧл. Балезиноысь депутат Галина Чиркова озьы ик шуиз: - Кӧня нунал огпалась огпала ворттылом на, бензин сутыса но коньдон быдтыса? Тазьы пукыны чидан уг тырмы ни. Депутат Виктор Тарасенко ӵектон сётӥз сессиысь пегасьёсты нимын-тулын газетъёс пыр шара вераны. Соин соглаш луизы данакез залын пукисьёс. Мандатной комиссилэн кивалтӥсез Геннадий Абросимов, трибуна сьӧры потыса, лыдӟиз депутатской корпуслэсь быдэсак списоксэ, ивортӥз, 91 заседание пӧлысь кин кӧнязэ кельтӥз. "Сьӧд" списоке шедемъёс вань гинэ. Депутат Валентин Жебровский, кылсярысь, 50-аз кенешын ӧз пукы, Виктор Хорошавцев - 43-яз, со мындазэ ик кельтӥз депутат Николай Агафонцев. Та ласянь тужгес но висъяськиз Владимир Тумаев. Солэн 53 "прогулэз". Котькудӥзлэн депутатлэн аслаз мугез вал, дыр, заседанилэсь палэнскыны, соос ваньзы сямен уго бадӟым кивалтӥсьёс. Но депутатлэсь мандатсэ басьтӥд бере, чеберъяськон понна гинэ кисыяд эн нуллы - ужа. Бырйисьёсыд азьын ӵыжектоно медад луы. 22-тӥ сессилэн ужаз нош ик вис ялэмын, солэн вуоно заседаниез усьтӥськоз 20 октябре. Отчыозь депутатъёс эскерозы на йылаз-пумаз вуттымтэ законопроектъёсты, ӝегатскытэк кутоно ужпумъёсты. Та нуналъёс ӵоже, оло, выль кужым но люкаса вуттозы. Л. МЕДВЕДЕВА. Герд Президент тау кариз "Удмурт кенешлэн" эшъёсыз трос. Вань соос шаерысьтымы тодмо кивалтӥсьёс пӧлын но. Сыӵеос пӧлы пыртыны луоз "Удмуртторф" огазеяськонлэсь валтӥсь директорзэ Анатолий Владимирович Марченкоез но "Удмуртнефтепродукт" огазеяськонлэсь валтӥсь директорзэ Николай Семенович Сычевез. Удмурт огазеяськонлы ялан юрттыны тыршемзэс лыдэ басьтыса, "Удмурт кенешлэн" тӧроез Валентин Тубылов алигес соослы тау карон гожтэтъёс сётӥз. О. МАРКОВ. Н. ЗОЛОТАРЁВА "Дасьсэ возьмаса улыны капчи"... Н. К. Золотарёваез Глазов палъёсын тодӥсьтэмез ӧвӧл, дыр. "Иднакар" газетлэн редакторезлэсь "ныпъетсэ" нуэм сяна, со тани тямысэтӥ арзэ ни татысь удмурт огазеяськонэн кивалтэ. Со дыр ӵоже городын но ёросысь гуртъёсын трос ӟеч ужрадъёс ортчытэмын. Эшлыко кусыпъёс тупатэмын бускель ёросъёсысь удмурт культурая обществоосын. Юнме шат удмурт калыклэсь асваланзэ ӝутӥсь, вордскем кылзэ но выжыоссэ гажан мылкыд пыӵатӥсь ужрадъёсы арысь аре тросгес но тросгес калык кыстӥське? Пумиськонъёсты огпӧртэм, ньӧмыз понна гинэ дасясалзы ке, ӟучомем улос удмуртлыкез ӝутыны секыт луысал, дыр. Мынам гинэ сыӵе малпанэ ӧвӧл. Та сярысь веразы кылем арын ортчем конференциын, солэсь азьло - "Иднакар" газетлэн юбилеезлы сӥзем ӝытын, туэ - В. К. Тубыловен пумиськонын. Зэм, пыкылӥсьёс но шедё. Кылсярысь, малы, пе, татчыозь Глазовын одӥг класс но удмурт кылэз уг дышеты, вывескаос удмурт кылынымы уг сётӥсько, асьме кылын радиоверанъёс уг радъясько... Куд-огез нош шонерак но вераса куштэ: "Малы Золотарёва Глазовын удмурт школа уг усьты?" "Удмурт кенешлэн" Глазовысь ёзэзлэн туннэ но вуоно нуналыз сярысь малпанъёсыныз тодматыны, юанъёслы валэктон сётыны кури ассэ Надежда Константиновнаез. - Нырысь ик вералэ вал "Удмурт кенеш" ассоциацилэн ужамез сярысь. - Вань удмуртъёслэн куатетӥ ӧтчамзы ортчем дырысен ӝоген ар тырмоз. Пусйыны кулэ, В. К. Тубылов президент луэм бере, "Кенешын" югдур данаклы воштӥськиз. Солэсь азьло отын радыз ӧй вал. Туннэ огазеяськонлэн ужез планъя мынэ, исполкомлэн котькуд членэзлэн кулэ документъёсын нимысьтыз папкаез вань. Котькуд юанъёсъя табере кылкутӥсьёс пуктэмын, соиз но туж усто. Тани, кылсярысь, бускель Киров областьысь удмуртъёсын герӟаськон понна вазиськыны быгатӥськом А. Г. Андрияновлы, со палэнысь удмуртъёслэн ужпумъёсынызы выре. Табере исполкомлэн заседаниосыз но пайдаёгес ортчыло ни. Озьы ик выльдонъёсыз но пусъем потэ. Соос пӧлы пыртыны кулэ паськытатэм люкаськонъёсты. Сыӵе заседание, кылсярысь, ортчиз Пичи Пургаын. Бурановоысь гурт кенешлэн ужан амалъёсыныз тодматскон милемлы трос сётӥз. Огъя вераса, таиз президентмы ужъёсыз валаса радъя, соин валче милям но мылкыдмы умойгес луиз, кӧня ке оскон кылдӥз. - "Удмурт кенешлэн" Глазовысь ёзэз нош ма ужа? Кыӵе ке ужрадъёс сярысь уд вералэ- а? - Правлениын ми дас одӥг кузя. Ёросын соос ваньзы сямен тодмо но гажано адямиос луо. Люкаськылӥськом толэзьлы огпол, заседаниосы мыло-кыдо пырисько, пайдаё кичӧлтонъёс сётъяло. Туэлы пусъем ужрадъёсмы пӧлысь уноез быдэстэмын ни. Таиз ар, кызьы тодмо, Куӟебай Гердлы сӥземын. Ми но палэнэ ӧм кыле, ёросын но городын дано удмуртлы 100 ар тырмон ужрадъёс ортчытэмын. Тужгес ик ӟеч пӧрмиз со "Октябрь" культура юртын. Куӟебай Гердлы но Ашальчи Окилы сӥзем ӝытэ ӧтемын вал шоркарысьтымы дано артистъёсмы, "Удмурт кенеш" ассоциацилэн президентэз В. К. Тубылов. Калык азьын озьы ик вераськизы интыысь кивалтӥсьёс, депутатъёс. Та ужрад умой возьматӥз, городысь калык пӧлын но удмурт движение пыриськыны мылкыд карисьёс трос шуыса. Соин таӵе ужрадъёсты ӵемгес ортчытъяно вылэм. Планамы озьы ик "Шуд, арган!" конкурсэ пыриськыны пусъемын вал. Нош "Россия" культура дворецын ужасьёс малы ке но сое ӧз дасялэ. Туж бадӟым мылкыдмы вал городын удмурт национальной центр усьтыны. Но та уж туж секытэн вырӟе. "Октябрь" культура юрт, кытчы центрез интыяны чакламы, ведомственной луэ: кивалтӥсьёс пыкисько сётыны. Но ми киосмес-пыдъёсмес ум лэзиське, со малпанмес азинтыны турттӥськом. Куке но йылаз-пумаз вуттом, оло. - Туала югдурын секыт, дыр, ужрадъёс ортчытъяны? - Ваньмыз пыкиське уксё вылэ. Туала арын общественной организацилы туж секыт улыны. Шонерак ке верано, ми али ужрадъёсмес город чотын ортчытъяськом. Со сяна, съездэ, Гербере яке мукет бадӟым люкаськылонъёсы мыныны но автобус кыл вератэк висъяло. Тазьы учкыса, паймымон суред пуксе. Городын но ёросын улӥсь удмуртъёсын одӥг огазеяськон ужа. Администрациос кык: район но город. Ми умой улыны кулэ кадь, нош уж вылын озьы уг пӧрмы. Ёросысь администрация юрттыны уг дырты. Уксё курыса гожтэтэн, кудаз В. К. Тубылов но кизэ нюртылӥз, мон вазиськылӥ кыказ но Думаосы. Городын та ужпумез эскерыны пуктӥзы, нош районысь депутатъёс монэ чылкак паймытӥзы. Думаысь (кылем созывысь) 21 депутат пӧлысь кыкез гинэ ӟуч но одӥгез бигер адямиос, отӥосыз ваньмыз удмуртъёс, озьы ке но, удмурт огазеяськонлы коньдон висъяны пумит луизы. Вить сюрс манет гинэ куриськом вал ми, быдэс арлы. Та учырлы В. К. Тубылов но туж паймиз. Кин тодэ, малы озьы луиз. Депутатъёслэн, оло, валанзы сыӵегес, Золотарёваез возьыны уксё куриськом кожазы, лэся. Уксётэк туннэ номыр но уг пӧрмы, арендалы гинэ но тырыны кулэ ук. Чылкак мукет югдур со пумысен Балезино ёросын. Нокыӵе керетонъёстэк удмурт огазеяськонзылы улыны бюджетазы вить сюрс манет чаклазы. Администрацилэн тӧроез Р. Касимов, бигер адями, депутатъёслы нырысь ик рос-прос валэктэм, малы кулэ уксё удмурт обществолы, собере депутатъёс пумит ӧз луэ ни. Глазовъёс понна мынам сюлмы туж вӧсь луиз ке но, ӟеч адямиос мылкыдме умоятӥзы. Оскисько на городысь кивалтӥсьёслы, соос, малпасько, уз куштэ. Огласянь учконо ке, малы мон та общественной ужен вырисько? Мынам аслам уже вань, семьяе... Солэсь куштӥськыны туннэ ик быгатӥсько, но мукет ласянь чаклано ке, тямыс ар ӵоже ужатозям, кыӵе ке быгатонлыкъёсы но йылӥзы ни, калыкез тодӥсько. Та дыр ӵоже та ӟучомем удмурт ёросын ма но со лэсьтӥмы. Адямиос выжыоссэс тодэ ваё бере, соос шоры учкон но кӧня ке воштӥськиз, ведь милям ужрадъёсамы удмурт калык гинэ уг лыкты, мукетъёсыз но пырало. Вот, пе, кыӵе вылӥллям удмуртъёс, азьло ӧм адӟылэ вал. - Оло, городлы но ёрослы люкиськыса тӥледлы умойгес луысал? - Та пумысен вераськон азьло но потылӥз ни. Али тросгес но тросгес со ужпум сярысь малпаськисько. Озьы ик кароно луоз, дыр. Тани, кылсярысь, правлениын но гуртъёсысь адямиос быръемын. Городын улӥсьёслы уж бере люкаськыны умойгес, нош гуртъёсын улӥсьёслы нуназе лыктыса лякытгес. Собере ужрадъёсы но гуртысь калыкез вайыны ужпум кылдэ. Гуртын гинэ ортчытъяд ке, городын улӥсь удмуртъёс палэнэ кылё. Вот таӵе тупамтэосыз чакласа, азьланяз кыӵе ке но решение кутом. - Нош ма вералоды удмурт группа яке школа усьтон пумысен? - "Кенешлэн" ёзэз гинэ та ужпумез уз быдэсты. Со понна кулэ мылкыдо адямиос. Вот сыӵеос ми палан оло ӧвӧл, оло кытчы вазиськыны уг тодо, радзэ валатэк уло. Бигеръёслэн, кылсярысь, со ужез ас вылаз басьтӥз пенсие потэм кышномурт. Солэн пӧрмиз, кӧня ар ӵоже ни соос вордскем кылзэс дышето, вань синмаськымон бигер садиксы, алигес школа но усьтӥзы. Милям но озьы ик луысал, сыӵе адями со уж борды кутскысал ке. Со понна вань калыкез дышетонъя отдел, отын валэктон басьтыны луысал. Собере городамы вань пединститут, удмурт кылъя отделение. Сое йылпумъяса, егитъёс уж шедьтыны шугъясько. Та ужпумез дышетӥсьёссы одӥг пол гинэ ӧз ӝутылэ ни. Басьтӥське вал соос ӵошен та кулэ уж борды. Соиз но зэм, нылпи сад яке школа усьтӥсьлы нырысь-валысь туж секыт йӧтоз, трос бызьылоно, чидано луоз. Нош мар-о туннэ капчиен сётӥське? Городысь кивалтӥсьёс юрттыны дась, бигеръёслы инты шедьтӥзы бере, асьмелы но шедьтозы. Кӧня верано, вазиськоно на адямиослы, та уж борды кутскыны ӧтьыса? Мынэсьтым, правленилэсь кыӵе ке юрттэт кулэ луиз ке, ми солы дась. - Глазовын малы ке удмурт радио ӧвӧл, бускель ёросъёсын со вань.. - Шуи ини, ёрос Дума куронмылэсь палэнскиз. Со вить сюрс манетысь коньдонэн ик "Глазов-радио" редакциын удмурт корреспондент возьыны быгатысалмы. Ар ӵоже куинь сю манет корреспондентлы тырыны окмысал. Аслад музъем вылад улыса, вордскем кылыныд радиопередачаез ӝутскем мылкыд вылын гинэ, уждунтэк дасяны астэ ачид ултӥям луэ. - Гуртын улӥсьёс пиналъёссэс дышетон пумысен сюлмасько. Юрттӥськоды-а тӥ дышетскыны пырись удмурт пиналъёслы? - Май толэзе "Удмурт кенеш" исполкомлэсь паськытатэм заседанизэ ортчытӥз, кадровой ужпумъёсты эскериз. Отчы ӧтемын вал республикаысь вузъёслэн ректоръёссы. Та люкаськемын таӵе но ужпум пуктӥзы: гуртысь пиналъёсты дышетон луонлыкъёсты утчан. Ректоръёсты зэмос югдурен тодматӥзы: арысь аре удмурт кивалтӥсьёслэн лыдзы ичи кыле уго. Малы со озьы луэ? Улон секыт луэмен, гуртын улӥсь удмуртъёс, нош соос отын тросгес, нылпиоссэс дышетыны луонлыкъёс уг шедьто. Собере туэ туж бадӟымесь, гуртысь школаез быдэстэм пияш яке нылаш городысьёсыз вӧзын лябгес адӟиське, ма сое ватод, гуртысь со гуртысь ини. Соин ик "Удмурт кенеш" "куиньёстэк" школаез быдэстэм пиналъёслы направлениос сётыны пусйиз. Мон доры дэмлан курыса туэ кык адями ветлӥз. Тросгес но сётысалмы, дыр, но вазиськисьёс ӧй вал. Учыр тупаз бере, мумы-бубыослы вазиськытэк кельтэм уг поты. Пиналдэс дышетыны малпады ке, пыран-потанъёс но шедьтоды. Эн возьмалэ дасьсэ, асьтэос рос-просгес кариське. Та кылъёс школа усьтӥсьлы но, пиналзэ дышетыны малпась мумы-бубылы но, кыӵе ке выль уж борды кутскисьлы но мед тупалозы. Туннэ котькинлы аслыз чырмытгес кариськыны кулэ. Юалляськиз Г. КОРОЛЁВА. "УДМУРТ ДУННЕЛЫ" - 80 Ӧрӟиос пӧлын кышкасьтэм "Советской Удмуртия" - "Удмурт дунне" газетлэн редакцияез но лыдӟисьёс монэ будэтӥзы, писателёзь ӝутӥзы. Бадӟым тау со понна! Трос аръёс ӵоже отын ужатозям, олокытчы но вуылӥ, олокыӵе но тодмо адямиосын пумиськылӥ. Быдэс СССР-ысь, ӝыныысьтыз Европаысь, Азиысь, Африкаысь уно азьмынӥсь воргоронъёсын, кышномуртъёсын уртче дышетскыны кемдӥ, пӧртэм калыкъёслэн делегациосынызы кенешыны шуд усиз. Вунонтэм кылиз Москваын, Ленинградын, Владивостокын, Казаньын, Киевын, Белая Церковь но мукет городъёсын калыкен пумиськылэме. Соос сярысь тодэ ваёнъёсын кык но, куинь но книга гожтыны луысал, дыр. Нош туннэ вакчияк вераме потэ десантникъёс пӧлын улэме сярысь. Со понна но тау яратоно газетэлы. *** Оло оскоды, оло уд но, чиль-чиль сьӧд, бабля йырсиё дыръям ик мон луи... Быдӟым Отечественной война пыр потэм ожгарчи, ветеран. Архивам кылле мыным гвардиысь Вена нимо 39-тӥ воздушно-десантной корпусысь ветеранлы шуыса кузьмам книга. Ноку вунонтэм вылысь сётэмын со Украинаысь Белая Церковь городын 1976 арын, 9 Мае. Со дуно кузьымез туспуктэмъёсыз, учкисько но, ваньмыз туннэ кадь ик син азям пуксе. Соку 43 аресъем гинэ вылӥськем ай, алигес гинэ Москваысь Вылӥ партийной школаысь бертэмын. Отын но весь монэ "комсомолец" шуылӥзы. Нош мӧйы ожгарчиос пӧлы сюрылӥ тазьы. Редакциын ужакум шутэтскыны потасько вал тулыс, май толэзьёсы. Сьӧд Зарезь дуре кошкисько но озьы пӧсь гужемез быдэс толэзьлы "кузёмытӥсько". Сочиын соку ву 20-23 градусозь шуналля вал ни. Июне дорам бертӥсько но, татын но пӧсь гужем ини. Куать пол озьы лымшор палан тазалыкме йӧнатылӥ. Нош сизьыметӥяз ӧз пӧрмы. Ӵапак лымшор пала кошкон сярысь малпаськыкум пыриз кузпалылэн агаез Анатолий Андреевич Лебедев. - Ойдо мон сьӧры: огнам уг дӥсьтӥськы сыӵе кузь сюрес вылэ потыны, - киям бумага мычыса вазиськиз со. Лыдӟи гожтэтэз. Отын гвардиысь 39-тӥ воздушно-десантной корпусысь ветеранъёслэн комитетсы А. А. Лебедевез ӧте Быдӟым Вормонэз Белая Церковь городын уртче ортчытыны. - Я, мынод-а? - тэльмырись куараен юа ӵыжы-выжые. - Пӧрмиз ке, десантникъёс сярысь гожтод газетад но... Пырак пӧламы ик улод... - Озьы ке, пожалуй, мыно. Одно мыно! - куноелы чай удонъям шуи мон. - Украинае вуылэме ӧй вал на. Адӟоно чебер дуннеез, Киевез, Днепрез. - Ма, собере, - валэктэ А. А. Лебедев, - тодэмея, корпусамы ог ньыль сю удмуртъёс но вал. Мон, кылсярысь, отчы Воткинскысь пулемётчикъёсты дасясь училищеысь шеди. Соос сярысь удмурт газет ӧз гожъя на кадь... Ӝожомыса пыкылэм выллем кылӥськизы ветеранлэн берлось кылъёсыз. Соин но Белая Церковь городэ ветлон мылкыды уката юнмаз. Ӵуказеяз ик пыри редактормы В. М. Михайлов доры. Возьматӥ А. А. Лебедевлы вазиськонъёс - гожтэтсэс, верай ас малпанъёсме. Редактормы каньыл мылкыдо вал. Ачиз но ожмаськемын фашистъёсын. - Мын, ветлы, - шуиз со. Ӝогак дасятӥз партилэн Белая Церковь городысь комитетэзлы гожтэт. Отын куриз мыным котьма ласянь юрттыны, монэ пырак десантникъёс пӧлы интыяны, ваньмаз пумиськонъёсазы, ужрадъёсазы ӧтьылыны. Нялтас шуиз: "Гожты отысь репортаж". Озьы аслам коньдонэным, отпуске чотын шонтӥ Украинае. Пумитазы милемды оркестрен, сылалэн нянен, сяськаосын ӟыгыръяса. Люкаськиз ичизэ 6-7 сюрс десантник. Ваньзылэн - гадь тыразы орденъёссы, медальёссы. Мынам ай соку вылӥ наградаосы ӧй вал, буш мӧля. Ӵыжы-выжые но туж огшоры дӥсяськиз, монъя кариськыса, лэся. Кӧня кури ожгарчи дӥсеныз пӧртмаськыны - сюлворемме пеляз ӧз поны. Укыр востэм вал со угось. Белая Церковь быдӟалаезъя Сарапул яке Воткинск городъёсмы быдӟа. Оло нош ӧжыт бадӟымгес. Интыяскьемын Киев сьӧретӥ бызись чебер, чылкыт вуо Рось шур дуре. Туж ӝикыт город. Коркаоссы, оло, ваньмыз-ваньмыз тӧдьы буямын. Вож писпуос пӧлын верантэм югыт адӟисько. Милемды пумитаны вань калык потӥз. Мылкыдзы бурдъяськемын. Туннэ угось Быдӟым Вормонлэн 31-тӥ праздникез. Городын - котыр сяськаос. Напра пушъемын котькытын! Эсьмаса, каштан но, кышкасьтэм ожгарчиосты данъяса выллем, пуштыр-пуштыр лэзьям ни чебересь пурыоссэ. Соку тулыс уго нясь-нясь шуныт улӥз. Фашистъёс туж курадӟытӥллям городысь калыкез. Одӥг семья но, пе, кылемын ӧвӧл, кудысьтыз виымтэ , быдтымтэ вал воргоронъёс, егит нылъёс. Троссэ мыскыллям, Германиын, ляльчиос чотын ужатыса курадӟытӥллям. Соин верантэм шуныт пумитазы зӥбет улысь мозмытӥсьёссэс. 9 Мае Шор площадязы, Ленинлэн памятникез доры, мынӥм урам пасьта шеренгаосын. Пыд уламы ӟыгыретэн-ӟыгыретэн куяло сяськаос. Нэкы-ыль вамышъяськом улэп гомась будосъёс вылтӥ. Йырку ик пежырске. Ваньмылы милемлы культоосын сяськаос сётъязы киямы но. Таӵезэ адӟылэме ӧй вал на: В. И. Ленинлэн ӝужыт памятникез, мугорыз, пырак чырты выжыозяз гом-гом ӝуась будосъёсын согемын! Нош калык весь тыре но тыре букетъёсты. Кылдэмез дырысен вож садъёс пӧлысь чебер городэз пӧртэм тушмонъёс дас сизьым пол быдэсак сямен куашкатъяллям. Соин но, дыр, Быдӟым Вормонэз, шудо нуналэз пусйыны пересьёс но, егитъёс но, тэшкыли кадесь пичиос но - ваньзы урамъёсы потэмын. Митинг туж ӟырдыт ортчиз. Пумиськонэ лыктӥллям, эсьмаса, чехъёс но. Соосты Рось шур дурын улӥсьёс ки йылазы нуллыны дась. Ӵапак татын угось Чехословакиысь генераллэн Л. Свободалэн (бӧрысь со страналэн Президентэз но вал) корпусысьтыз ожгарчиос нырысьсэ асьмемын ӵош фашистъёслы шуккет сётӥзы, городэз тушмонлэсь мозмытӥзы. Тросэз егит пиос эрик понна вирзэс кисьтӥзы, батыръёс музэн бырыны сюризы. Татысен, Рось шур дурысен, уно выльзэ тодӥ кышкасьтэм "ӧрӟиосмы" сярысь. Странаямы туж беромыса, чылкак война кутскон азьын гинэ, кылдытэмын вылэм 15 воздушно-десантной корпус. Ваньмаз фронтъёсын соос супырӟытъязы Гитлерлэсь гыжкалъёссэ. 39-тӥ корпус лек ожмаськыса ортчем Карелиысен Венаозь. Татысь гинэ дас тямысэзлы десантникъёслы сётэмын Советской Союзлэн Героез дано ним. Валамон ини. Вормонъёсын ӵош ик та соединениос адӟизы бадӟымесь ыштонъёс. - Огпол вераса, война аръёсы милям радъёсысьтымы гинэ 40 сюрс пала боецъёс быдтэмын вал, йырзэ мыкыртыса ивортӥз огез генерал. - Озьыен, со дыр ӵоже корпусмы быдэсак "выльдэмын", шуыны луэ. Вот кыӵе секыт эзель пыр асьмеос вуим Быдӟым Вормонэ, шудо нуналэ... Митинг но бадӟым концерт бере милемды, кык сю пала ветеранъёсты, нуизы 4-тӥ профтехучилищелэн общежитияз. Отчы малы ке но, янгышаса, вылды, лыктэм огез кышномурт но. Гадьыз быдэсак согемын орденъёсын, медальёсын. Кияз - бадӟым чемодан. Кышномуртъёслы интыос кельтӥллям вылэм гостиницаосы. - Егит пияш, ойдо юртты, пожалуйста, котырме гостиницае нуыны, - вазиськиз со мыным. Ӵыжектӥ. Аслым нырысь ик ӵектӥськоно вылэм юрттӥськыны. Нодэ ӧз тырмы, ачиз кышномурт вазиськытозь. Удмурт сямы, кепыранэ люкетӥз, лэся. Выль тодмое - подполковник. Погонъёсызъя озьы пусйи. Туж етӥз, ӵужалэс, лос-лос нап бабля йырсиё. Веськыт, пезьгыт мугоро, киосыз пичиесь гинэ. Ноку но уд малпа, войнаез десантын ортчемын шуыса. Тусызъя артисткалы Валентина Толкуновалы укша. Сюрес вылысен тодматским: - Лариса Богаткина, - шуиз со ачиз сярысь. - Кирилл, - вази пумитаз. - Удмуртиысь. - О-о! Нимъёсысьтымы кыкез букваосмы огкадесь. Тон мынам адъютантэ луод, Кирюша. - Дугды ай, кызьы-о астэ такем утьыны быгатӥд? Егит тусо... - Полклэн пиез вал, - валэктӥ, номыр сярысь малпатэк. - Доразы Лодейное Поле дорысен шеди, - кузпалылэн агаез пыр-поч тодматӥз вал угось корпуссылэн ортчем ож сюресъёсыныз. - Бен, кык-а, мар-а сыӵе пиосмы вал кудаз ке бригадаын, - буйгатскиз нылкышно. Сьӧлыкме кыктой сяна ватыса нуллыны ӧй быгаты. Усьтӥськи Ларисалы. Верай журналист луэмме. Со уката бинялскиз кадь бордам. Анатолий Андреевичлэсь ик умой ӧвӧл ни. Десантникъёс уг ярато асьсэ сярысь мадьыны, уката ик газетчиослы. Мон асме визьмогес возьыны тырши ке но, одӥг умойтэм юан сётыны шедьтӥ ик. - Нош малы-о десантын укыр трос нылкышноос вылӥллям? Оло, ӝыны ёросэз соос, - юай Ларисалэсь. - Э-э, Кирюша, Кирюша, - мур лулӟиз врач. - Таӵе юанэныд ик тонэ шараялозы, - пелям сипыртӥз. - Ми, нылкышноос, "ӧрӟиосмылэн" шӧлказыгес ветлӥсьёс, юрттӥськисьёс гинэ вал. Штабын, связьын, медсанбатын... Соос, мискиньёс, лек тылӝуэ, фашистъёслэн йыр вылазы тэтчазы. Уноез быризы, ми кылим. Ноку но та выллем юанъёс эн сётъя, ява... - Тау валэктэмдылы, - бордаз ӝиптӥськыса шуи мон. Со но музонъёсыз юрттэмен, ньыльдон укмысэзлэсь удмуртъёслэсь - десантникъёслэсь нимзэс тодыны быгатӥ. Эшъяським Москваысь, Воронежысь, Мордовиысь но музон интыосысь кышкасьтэм воргоронъёсын. Белая Церковь городын соку интыяськемын вал воздушно-десантной часть. Отчы но ӧтчазы милемды. Туж шуныт пумитазы, пӧсь чаен но куноятӥзы. "Егитомизы" ветеранъёс. Люкиськон азязы огез но мыдыз курисько: - Лэзе милемлы самолётъёсысен тэтчыны, егит дырмес выльысь тодэ вайыны, кин тодэ, ку таӵе луонлык кылдоз на бӧрысь. Командирлы - генераллы умой ӧвӧл, шӧдске, чутрак пумит кариськыны. Полковник, милемды куноятӥсь, буйгатэ: - Ми оскиськом: тӥ сыӵеесь ик ӧрӟиос на. Но... малпаське ай, дуно эшъёс. Парашютэн тэтчаны сазенгес усто. Собере, марым, дуно усё сыӵе ужрадъёс... - Инмар утиз, - кин ке мышкысьтым кеськиз, - наркомовской сю грамм бере но фашистъёслэн каръёсазы тэтчамы. Улэп кылим. Генерал небыт куараен, серем пыр шуэ: - Ваньдылы самолётъёс уз тырме. Соку ойдолэ озьы каромы. Нырысетӥ вить радъёсысь ӧрӟиосмес тубталом коть кык сю метре... Ми Лебедевен, Ларисаен пукиськомы вал куинетӥ радын. Самолётысь тэтчано луоз шуыса тодӥ но, оло, соку ик кӧты кизермиз. Потыса кошкыны умой ӧвӧл. Дӥсьтӥсьтэм куараен вази: - Асьмеос пиналэсь ӧвӧл ни туала самолётъёсысь тэтчаны. - Мон но озьы малпасько, - итӥськиз бордам Лариса. - Мон - врач, кылзӥське, мусо эшъёсы... Лӧпшасьёс каньылля буйгазы, бурдъёссэс уллань лэзизы. Белая Церковь городын пумиськылэмме мон али но тодам вайылӥсько на. Ог 6-7 сюрс мурт - ваньмы огъя семья кадь луимы. Кошкон нуналамы тросэз бӧрдыса, синъёссы нюромылыса люкиськизы. Вуонояз 9 Мае пумиськон сярысь но кенешизы. Жаль, ветлыны ӧз кылды ни. А. А. Лебедев ӧз ваньмы. Отӥяз со кулӥз... Белая Церковьын весь утчаз командирзэ. Сое, юн сӧсырмем офицерез, А. Лебедев ас вылаз поттэм лек ожысь. Со понна удмурт воргорон пусъемын вал Боевой Горд Знамя орденэн. Гуртаз но бертыны лэзем дас нуналлы. Ӧз, ӧз адӟы яратоно командирзэ. Белая Церковь городысь бертыкумы, пырам Киеве, отысь ӵыжы-выжымы, Як.-Бодья ёросысь Выжоил гуртын будэм ветеран Степан Федорович Гусев, доры. Со кивалтӥз танкистъёслэн батальонэнызы, кышкасьтэм ожмаськиз. Аслаз танкеныз мозмытӥз Фастов городысь станциез, уно фашистъёсты пазьгиз. Степан Федорович Фастов городлэн дано гражданинэз, Советской Союзлэн Маршалэзлэн И. И. Якубовскийлэн, Варшаваын огкыл гожтэм странаослэн огазеям войскооссылэн кивалтӥсьсы вал. Туж зол пумитаз милемды тодмо танкист. Быдэс Киеветӥ ворттылытӥз; Таиз но ветеран улонысь кошкемын ни. Архивам кылле синпелез - туспуктэмез. Отын возьматэмын, кызьы Фастовысь 3 номеро школаын дышетскисьёс сылалэн нянен пумитало удмурт батырез. Украинаысь бертыса, трос десантникъёсты утчай, уно гожтэтъёс ысъяй, олокытчы но вуылӥ. "Советской Удмуртиын" быдэс бамын "Кызьы улӥськоды... "ӧрӟиос"?" очерке потӥз. С. Ф. Гусев сярысь но бадӟым очерке кык номерын печатламын. Озьы, редакция юрттэмъя, олокытчы но вуылӥ. Сюрсъёсын выль адямиосын тодматски. Тау со понна яратоно газетэлы. Медаз гинэ быр со, егит авторъёслы но, мыным сямен ик, шудо сюресъёс мед усьтоз. Кирилл Ломагин, писатель. Ог-огзэс сюдо Коньдонэн секыт ке но, Шаркан ёросысь Кусогурт покчи классъёсын дышетскисьёсты дунтэк сюдо. Ма, чылкак дунтэк шуыны уз луы, дыр. Уго пиналъёс вазь тулысысен школа бакчаязы тыршо. Будэто картофка, ӵуж но горд кушман, помидор, огреч... Нош будэтэмзэ утялтыны юртто анай-атайёссы, Мувыр средней школаын дышетскисьёс. Дышетскисьёслэн будэтэм бакча-сиёнзы тырме колхоз столовойын но. Нош эштос со понна йӧл но сӥль висъя. Б. НИКИТИН. Муш йӧл поттозы Муш йӧллэн пайдаез сярысь адямиос кемалась тодо ни. Сое поттон но туж дуно усе. Собере кулэ на нимысьтыз оборудование. Нош туэ Шаркан ёросысь мушкасьёс асьсэос та борды басьтӥськизы. Соос уж вылын возьматӥзы: асьме дорын но муш йӧл поттыны луоно. Вуоно арын мушкасьёс лицензия но сертификат басьтыны малпало. Н. СЕРГЕЕВ. Огез куашка, мукетыз будэ Та секыт дыре но пыд йылазы йыг-йыг сылӥсьёс вань на вылэм. Вавож ёросысь Мичурин нимо эштосын музъемзэс быгатэмзыя бадӟыматыны тыршо. Озьы ватсазы, бускель куашуръёслэсь аналтэм бусыоссэс басьтыса. Али вераськон мынэ моньяосын. Озьы ик та хозяйствоын малпало кысконо скалъёссылэсь лыдзэс но йылэтыны. Вуоно арын кутскозы выль гид пуктыны. С. ДОЛГАНОВА. КИВАЛТӤСЕН КЕНЕШОН Сяськаос пӧлын Вараксиноысь курег вордӥсьёслы кивалтӥсьёсын удалтэ. Берло 15 арзэ фабрикаын вань ужъёсты быгатыса нуиз Владимир Зенин. Туэ сое бырйизы Правительстволэн Тӧроезлы воштӥсе. Интыяз кылиз Геннадий Итунин. Тодмотэм, выль адями ӧвӧл. Татын ик директорлэн воштӥсез вал, нош мартэ солы быдэс хозяйствоез оскизы. Геннадий Львович вордскиз Донецк городын, йылпумъяз политехникумез. Ужаны кутскиз татысь металлургической комбинатын. Нош 1970-тӥ арын кузпалэныз ӵош вуиз Ижевске, "Дормостройын" валтӥсь энергетик луиз. Собере кивалтӥз трамвай-троллейбус управленилэн тупатъян ёзэныз, "Бытремстройтрестлэн" тӧроезлэн воштӥсез вал, 1982 арысен - "Вараксиноын". Таӵе улон сюресэз. Шаерамы вуыса, 1972-1977 аръёсы Геннадий Львович, огдыре ужаса, тодон-валанзэ будэтӥз Удмурт кун университетын, экономистлэсь дипломзэ басьтӥз. Быгатэ калыкен вераськыны, ӝог шедьтэ одӥг кыл, вала ужась муртэ. Коллектив азе шонересь куронъёс пуктэ. Маке лэсьтыны быгатымтэез понна сюлэмыз висе. Тӥни таӵе кивалтӥсен но тунсыко адямиен туннэ кенешонмы. - Геннадий Львович, ойдолэ, вераськонмес аспӧртэмлыко мытом, нош ужъёсты сярысь бӧрысьгес мадёды. Та нуналъёсы тӥляд вордскем нуналды вал, кызьы сое пусйиды? - Асме ачим вылӥе пуктыны ноку уг выриськы. Сыӵе сям пичиысен пыӵатӥзы. Нош вордскем нуналъёсме котьку огшоры, мукет адямиос сямен ик, семьяын пусйисько: чай но, мукетыз но луэ. Фабрикаын но ӧз вунэтэ, сюлмысь ӟечкылазы. Но ушъямзэс уг яратӥськы - солы но дышымтэ. Асме политикен уг лыдъяськы, быдэс улонэ ортче хозяйственной ужъёсын: мар ке но лэсьтӥсько, поттӥсько, адямиослы юрттӥсько, соосын ӵош шумпотӥсько, куректӥсько но. Сыӵе веранэ, оло, яраз, оло, ӧз но озьы улӥськом- вылӥськом. - Шонер ке валай, тӥ ушъяськыны уд яратске. Сыӵе адямиос трос, уката ик удмуртъёс пӧлын. Хозяйствояды но ӵыжы-выжыосмы уно гинэ тыршо. Соос сярысь мар шуысалды? - Умой кылъёс гинэ верасал. Котькуд ёзын удмуртъёс ужало но асьсэды чебер ласянь гинэ возьмато. Ужзэс юн ярато, дорамы семьяосын тыршо. Пыкылыны нокыӵе мугез ӧвӧл. - Котьмар ке но, туннэ ужъёсты, сюлэмвисёнъёсты борды берытском. - Меӵак вераса, вань ужъёсмы огсыр, умой мыно. Туэ малпаськом 165 миллион курег пуз басьтыны, яке куреглы быдэ - 270. 9 толэзьскын 124 миллион люкам ни, котькуд куреглэсь - 208. Миым та дырен ӵошатыса, со лыдпусъёс данаклы бадӟымесь, шумпотто. Но... но люкетэ, сюлэмез вӧсь каре экономикаын туала секыт югдур. Со герӟаськемын манетлэн лябӟеменыз, дунъёслэн будэменызы но музон мугъёсын. Мыным, экономистлы, со туж валамон. Тани курегъёслы векчи кӧльы, луо Сьӧд зарезьысь ваиськом. Тылобурдоез сотэк уд возьы, уно но ӟеч продукция уд потты. Нош мукет ласянь, курег пузлы но, сӥльлы но дунъёсты ӧм будэтэ, шуыны луоз. Соин ик уждун сётъянэн, выт, фондъёсы, коммунальной услугаослы тыронъёсын шуг-секытъёс кылдо. Но мукет предприятиосын ӵошатыса, уждунэн сокем ум ӝегаське, августлы басьтом ни. - Геннадий Львович, нош государство, республика ласянь кыӵе юрттэт вуэ? - Со ке ӧй луысал, чиданмы бырысал, куашкан калэ вуысалмы ни. Алигес тани кормоцехмес вуттӥм, асьмеос 10 сюрс тонна комбикорм изӥськом. Удмурт Правительство туэ милемлы выль сямен юрттэ, гурт хозяйствоос фабрикалы дунтэмгес, килограммзэ 0,3- 0,4 манетэн ю тысь вузало. Со шӧдскымон юрттэт. Нош гурт хозяйствоос со понна дотация басьто. - Таӵе бадӟым курег вордон хозяйствоен, мон сямен, кивалтон капчиен уг сётӥськы. Кин тӥляд самой матысь юрттӥсьёсты? - Пичи-а, бадӟым-а гурт хозяйство, туннэ котькудаз ужъёсты радъян шуген мынэ. Удысэз вылӥысен куашкатыны-зӥбыны выро бере: я огез, я мукетыз кыля. Но тужгес но уродэз - государство ичи юрттэ. Техника арысь аре вужме, сое выльдыны ум быгатӥське, коньдон ӧвӧл. Аслам ужан нуналэ кутске ӵукна 6 но 30 минутэ, 7 но ӝыны часэ пичи кенеш ортчытӥсько. Отчы лыкто валтӥсь специалистъёс, цехъёслэн кивалтӥсьёссы но бригадиръёс. Учкиськом вань куронъёсты но мукетсэ. Шумпотӥсько валтӥсь специалистъёсылы. Соос ас удыссэс валаса нуо. Тани инженер Николай Андрощук 30 ар пала ужа ни, нош ветврачен Сабир Назмутдиновен фабрикае огдырегес вуим. Лыдъян-чотан ужез ӟеч радъяз экономист Николай Савельев, татын 20 ар ёрос ужа. Мыло-кыдо тыршо зоотехник Виссарион Невоструев но энергетик Равиль Габдиков. Берлоез кыл кутэ бадӟым энергохозяйство понна. Котельноймы но асьмелэн. Кызьы умоен уд вера цехъёслэсь, бригадаослэсь кивалтӥсьёссэс. Но куддыръя, оло, ваньмыз радызъя уг пӧрмы, но ог-огмылы юрттыса, тупаса ужаськом. Трос юрттэ воштӥсе, Олег Иванов. - Геннадий Львович, курег пуз сӧриське но вузаны уг яра, яке пичиесь луо, сыӵеоссэ кытчы кариськоды? - Милям номыр уг куштӥськы. Кемалась ик ӧвӧл курег пуз пызь изыны ӧдъям. Арлы быдэ сю тонналэсь уно лэсьтӥськом. Озьы сӧриськемез, вузаны ярантэмез отчы кошке. Пызь басьтӥсьёс вань. - Таӵе бадӟым хозяйствоын котырак чылкыт, нокыӵе зын ӧвӧл, гидъёс сяськаос пушкы выемын кадь, котькудӥз азьын георгинъёс, астраос будо. Кин соосты будэтэ? - Асьсэос тылобурдо утисьёс кизё, ву киськало но утялто. Куспазы вожмаськыса сяська будэто. Арысь аре озьы. Зэмзэ но, фабрикаямы ужан культура вылӥын, быдэс азбармы асфальтэн шобыртэмын. Котькуд гидысь нуналлы быдэ кык пол - ӵукна но ӝытазе кыедэз поттӥськом но Шаберды пала компост тыриськом. Араз 120-125 сюрс тонна люкаське. Сое бускель хозяйствоослы, калыклы вузаськом. Нош ик уксё люкаське. Та палан калык пудо ке но вордэ, ӟеч кыедлы ми доры лыкто. Быгатэммыя асьме техникаен ик нуиськом. Валамон, курег кыед муэз бугыр-бугыр возе, огпол поттыса, кык-куинь арлы тырме. Картофка но, бакча сиён но, сяська но удалтэ. - Озьыен, тӥледлы тау карисьёс трос гинэ? - Озьы медло. Ужам ужед аслыд но, мукетъёсызлы но пайда мед ваёз. Вараксиноысь тылобурдо вордӥсьёс курег пузэн но сӥлен сюдо быдэс Ижевскез, со котырысь калыкез но. Уждун дыраз ке адямиослы тырысалзы, предприятие эшшо но пайдаёгес ужасал. Нош али продукцизы складъёсы тымиське, бастӥсьсэ вите. Вераськиз Геннадий Романов. Тодэ вайытоз 29 октябре 80 ар тырме асьмелэн дано Комсомолмылы. Соин валче Ижысь Пионерилы но комсомоллы сӥзем музейёс огазеям адӟытон дасязы. Отысь адӟыны луоз пӧртэм туспуктэмъёсты, ужъёсты. Соос тодматозы егитъёслэн движенизылэн историеныз, комсомолецъёслэн дано ужъёсынызы, тунсыко учыръёсын. Калыклы вунонтэм вакытъёсты тодазы вайытыны тыршыса, адӟытонэз дасян бордын вань сюлмысьтыз ужаз пионер но комсомол движенилэн ветеранэз, Удмурт Республикаысь дано дышетӥсь Фаина Михайловна Кудрина. Е. ПЕТРОВА. Нуналлэн тодметэз 15 октябре - Киприянлэн но Устиньялэн нуналзы. Соос сьӧд кужымъёслэсь, адӟонъёслэсь утё. 16 октябре - Денислэн нуналэз. Син усемлэсь кышкало вылэм. Та нуналэ... ар талэсь азьло 16 октябре 1903 арын вордскиз М. В. Коробов (кулӥз 1973 арын), композитор, УАССР- ысь искусствоосъя дано ужась. 16 октябре 1943 арын СССР-ысь Верховной Советлэн Президиумезлэн Указэзъя Советской Союзлэн Героез ним сётэмын Красногорск ёросысь офицер-артиллеристлы Николай Огородниковлы. Со кышкасьтэм луэмзэ возьматӥз, Днепр вамен выжыкуз. 15 октябре 1970 арын быриз АН-24 самолётлэн бортпроводницаез Надежда Курченко. Кулэмез бере со пусъемын Горд Знамя орденэн. Надя дышетскиз Глазов ёросысь Понино школа-интернатын. Нырысь со ватэмын вал Сухумиысь шайвылэ. Бӧрысь ини солэсь мугорзэ ваизы Глазове. Америкае "укно ӵогемын". Шаерысьтымы 35 ужбергатӥсьёс октябрьлэн пумаз быръем удыссыя тодон-валанзэс муромытыны Америкаысь Чикаго, Калифорния штатъёсы ветлозы. 1994 арын ужаны кутскиз "Бизнес для России" программа. Туэ со асьме доры но пыӵаны ӧдъяз. Программаез чаклась-радъясь Стивен Макки алигес журналистъёсын пумиськылӥз. Америкае мыныны мылкыд карисьёслы анкета сётъямын вал. 146 адями пӧлысь 35-сэ гинэ бырйизы. Таӵе быръён ортчытӥзы Ярославль, Иваново, Вологда, Оренбург городъёсын. Но отын англи кылэз лябгес тодо. Со пумысен Стивен Макки пусйиз, куд-ог ужбергатӥсьёс быгатыса ужало ке но, англи кылэз ляб тодэменызы басьтэмын ӧвӧл шуыса. Кыдёкысь шаерын ужбергатӥсьёс визьнодзэс узырмытозы интернетъя, эмъян оборудованиосъя, компакт дискъёсты поттонъя но мукет программаосъя. Америкае мынэмъёс улозы семьяосын. Нош коньдон соослы висъяз США-ысь ивор вӧлмытонъя агентство. Москваозь гинэ сюрес дунэз ужбергатӥсьёс асьсэос тырозы. Л. ПЕТРОВА. Алигес "Жигули" басьтӥм Хозяйствоямы пузась курегъёс самой трос, ӝыны миллионлэсь уно. Соос 30 гидэ интыямын. Милямезлы, кызьы калыкын шуо, шудтэм 13 лыдпус сюрем. Озьы ке но, ваньмыз умой мынэ, мукетъёсызлэсь бере ум кылиське, кузпалэным ӵош огсыр ужаськом. Ачим вордски гондыр сэрегын, Селта районысь Копки черкогуртын. Бызи Ува районэ, нош татын 20 арзэ ужасько ни. Ваньмыз кельше, кузпалэ Петр Дмитриевич слесарь- оператор луэ. Пие, Руслан, армиын служить каремез бере, фабрикае ужаны кариськиз, куинь гидлы операторез воштӥсь луиз. Ушъяськемлы медаз пӧрмы, хозяйствоын милям гидмы одӥгез устоез лыдъяське. Сое яркыт возьмато лыдпусъёс. Кылем арын укмыс толэзь ӵоже ваньзэ 3,6 миллион курег пуз басьтӥм, куреглы быдэ - 220, нош туэ 4,5 миллион но 250 курег пуз. Сентябре 21 сюрс куреглэсь 536 сюрс пуз люкаськиз. Кызьы ужаськом, озьы ик уждун но вуэ, толэзяз шорлыдын 800-900 манет басьтӥськом. Шумпотонмес но вератэк кельтэме уг поты. Алигес тани ӵыжак выль "Жигули" автомашина басьтӥм. Вуоно субботае Уваысь сузэре доры мышинаен мыном ни. Улӥськом 4 комнатаен квартираын, куинь пи будэтӥськом. Руслан сярысь верай ни, кыкетӥез, Алёшае, машиностроительной лицейын дышетске, Сашае - 9-тӥ классын. Вань сад-бакчамы но, туж яратӥськом губияны, нюлэскы ветлыны. Милемлы, курег вордӥсьёслы, котьку умой юрттэ зоотехник Людмила Пушина. Со Ижысь гурт хозяйствоя институтэз быдтэмын, усто специалист. Вань ужъёсты быгатыса радъя бригадирмы Рудина Никитина. Ваньмы ми огкылысь, тупаса ужаськом. НИНА БЕЛЬТЮКОВА, курег сюдӥсь. Нина Руслан пиеныз. Герд Ӟечкыласьком! Та нуналъёсы Удмуртиысь бигеръёслэн общественной центрзылэн тӧрозылы Масгут Вахитовлы 70 арес тырме. Гажано адями трос лэсьтэ калыкезлэсь данзэ, культуразэ ӝутон-азинтон, мукет выжыосын кусыпъёсты тупатон ласянь. "Удмурт кенеш" котыре огазеяськемъёс ӟечкылало бигеръёслэсь азьветлӥсьсэс юбилееныз, оскемзэс верало, азьланьын но шаерысьтымы кык валтӥсь огазеяськонъёс уртче ужалозы шуыса. ВАРАКСИНО Югыт но чылкыт медло Кызь тямыс ар талэсь азьло йылпумъяй Казаньысь ветеринарной институтэз. Собере 10 ар ужай Играысь гурт хозяйствоя управлениын ветеринарияя валтӥсь врач луыса, татын 17 арзэ ни. Туэ 25 июле фабрикалы 30 ар тырмиз. Ми азьын бадӟымесь ужпумъёс сыло. Соос пӧлысь нырысь инты басьтэ тылобурдоосты висёнъёслэсь утён. Курегъёсмы али 870 сюрслэсь ятыр. Кыкетӥез ужпум - вылӥ ӟечлыкен продукция поттон. Соин ӵош ик ум вунэтӥське висёнъёсты алон ужрадъёсты но. Ӵемысь кылоно луэ тазьы верамъёсты: курег, пе, тылобурдо ӧвӧл, котьмаин сюд, котькызьы возь - ваньзэ чидалоз. Быриз ке но - бадӟым ыштон уз луы. Мон пудоез эмъясь бере, малпанэ чылкак мукет. Трос сӥль, курег пуз басьтэмед потэ ке, курегез чылкыт возь, ческыт сюд, дыраз но тырмыт югыт сёт. Сотэк вань ужамед пайда сётытэк ышоз-быроз. Вань мукетыз но. Милям продукцимы ӝӧк вылэ вуэ, сое сиё пиналъёс но, мӧйыос но. Нош пудо висён адямилы туж ӝог пала, вуттэ кулон учыре но. Тӥни малы туж сак ужано, висёнэз азьпалтыны сюлмаськоно но дыраз эмъяно. Нуналаз кӧня курег пуз октӥськом шуоды? 430- 450 сюрс. Пузась курегъёсмы - 535 сюрс йыр. Соосты одӥг ар возьыса, сӥльлы вандӥськом, малы ке шуоно, отӥяз пересьмо, шергес пузаны кутско. Секытгес югдур вылӥ ӟечлыко комбикормен. Тылобурдолы одно ик кулэ чорыг вӧйын дасям сурет. Сое ваё Дальний Востокысь, Удмуртие вуытозь, дуныз будэ. Та муген ик комбикорм дасясьёс, кылсярысь, кезъёс, чорыг вӧйтэк ужаны кутскизы. Ӟеч пудо сиён ваёно луэ республикалэн палэнысьтыз, Татарстанысь но куд-ог музон интыысь. Дуно ке но, пудоез витаминтэк уд возьы. Хозяйствоын кылдытэмын нимаз ветлаборатория. Отын пӧртэм эскеронъёс ортчо. Лаборантъёс но вить врачъёс ваньзэ син азязы возьыны тыршо. Озьы фабрикаямы югдур умой, курегъёсты висёнъёслэсь утьыны быгатӥськом, продукцилэн ӟечлыкез но урод ӧвӧл. Лабораториен кивалтэ Юлия Богатырева. Татын озьы ик мылысь-кыдысь тыршо Халида Бекмансурова, Юлия Петрова но мукетъёсыз. Сабир Назмутдинов Юан пус кыле Мынавм нылы дышетске Ижысь 1 номеро крезьгуръя школаын. Сентябрь толэзьысен дышетскем понна дун тырон будӥз кык поллы: талэсь азьло вал ке 34 манет, али луиз 70 манет. Со луэ уждунэлэн ньыльмос люкетэз. Нош со сяна, музыкальной инструмент аслыд басьтоно, школаын нылпилэн сиськемез понна тыроно... Юаме потэ вал культурая министрлэсь, мар малпаса ӝутӥзы искусствоосъя школаослы дун тыронэз? Пичи уждунлэн быдӟалаез одӥг копейкалы но ӧз буды ук! Иське, табере зӧк кисыё адямиослэн нылпиоссы гинэ тыро-пыдо дышетскыны быгатозы на? Нош ми кадь ичи уждун басьтӥсьёслэн? Е. ПАХОМОВА, Ижевскын улӥсь. Та юанлы тазьы валэктӥз Удмурт Республикаысь культурая министрлэн воштӥсез Сергей Михайлович МУТЕРКО: - Зэм, озьы. Республикаысьтымы искусствоосъя школаосын дышетскем понна дун тырон туэ 1-тӥ сентябрьысен кык пол ёрос будӥз. Озьы лэсьтӥське Культурая министерстволэн 26 августэ приказэз вылысь. Сотэк уг луы ни вал: яке искусствоосъя школаосыз кызьы ке но утёно, яке соос чылкак пытсан калэ вуозы. Отын дышетскем понна дун тырон 1995 арысен будэтъямын ӧй вал ни, нош улон дуноя, школаос вужмо-начармо. Бюджетысь коньдонэн педагогъёслэн уждунзы гинэ тыриське, нош юртъерез тупатъян, электрокужым, ву, шудон инструментъёс - ваньмыз со потэ искусствоосъя школаослэн кисыысьтызы. Тӥни соин, ваньзэ тае планово-экономической отделамы эскерыса, лыдъяса-чотаса, анай-атайёслэсь нылпиоссы понна дун тыронзэс будэтэмын. Вазиським на 1 номеро искусствоосъя школалэн директорезлы Надежда Петровна ГОРНШТЕЙНЛЫ. Со шуиз: - Кызьы малпаськоды: арняяз сизьым час дышетскыса, толэзьлы 16 манет гинэ тыроно кек, трос-а со? Куд-ог анай-атайёс соин но, дыр, шуылӥзы: милям нылпимылэн дышетскемез килограмм колбаса тыр гинэ дунъяське (сокем улэ пуктэмын визьнодан, чеберлыклы дышетон). Туэ понна ми доры 600 пинал ветлэ, одӥгез но дышетсконзэ ӧз кушты (быдэс городъя ке, ог 5 мурт таӵеез люкаськоз). Мукет школаосын но уг шӧдӥськы дышетэм дунэз будэтэм пумысь анай-атайёслэн ченгешемзы. Туж-туж ёрмисезлы тыршиськом юрттыны но: 50 процентсэ тыро. Но милям сыӵе пиналъёсмы одӥг-кык кузя гинэ. Мон шуысал: та юан милемлы ӧвӧл - Кун Думалы. Малы таӵе куанер улонэ вуттэмын асьмелэн чеберлыклы дышетӥсь школаосмы? Малы соослы коньдон уг сётӥськы? Хозрасчётэн ужатэк, асьмеды асьмеос возьытэк, милям амалмы ӧвӧл. Мукет амал ӧвӧл, шуо. Нош та - анай-атайёслэн кисыысьтызы кыскон - тужгес капчиез амал. Асьмеос талы дышим ни. Чидаськом. Озьы ке но, бадӟым юан пус кыле. Тужгес нодлыко, инмарен сётэм устолыко пиналъёс уз кыле-а табере сюрес урдсы - югытэ потытэк, йӧн-йӧн дышетскытэк? Балезино ёросысь анайлэн туэ май толэзе верамез: - Пимес толалтэ школае дышетскыны ӧм ни лэзе - пыдкутчанэз ӧвӧл. Гужем пудо возьмаз уждунзэ, уг сёто. Нылмы усточиослэн школа-интернатазы дышетске - баян басьтыны моӵмы уг тырмы... Тӥни озьы. Таӵе учыръёс ӧжыт ӧвӧл ни. Т. ПЕТРОВА. Сарапулын пумиськонъёс Валлян Удмурт Республикаысь Кун Кенешлэн Тӧроез Александр Волков вуылӥз Сарапулэ. Нылпиослы пособиосты сётъянэз радъясь комитетлэн адямиосыныз пумиськиз, со ивортӥз Федерациысь Советлэн ортчем кенешез но Пенсиосъя фондлэн кивалтӥсеныз Василий Барчукен вераськемез сярысь. Александр Волков пусйиз, 12 октябре шаерамы июль понна пенсиосты тырон йылпумъяськиз, али август понна сётъяло ни. Та удысэ республикаямы толэзяз 161 миллион манет коньдон кулэ. Москва юрттытэк, та ныпъетэз ум вормиське на. Россиысь Пенсиосъя фонд Удмуртилы 25 миллион манет висъяз ни. Октябрь пумын эшшо 50 миллион манет вуоз на. Кун Кенешлэн Тӧроез люкаськемъёслы ивортӥз, Россиысь Правительство социальной уыдысын ужасьёслы уждун тырыны амалъёс утча. Удмурт Правительстволы косэмын Россия Федерациысь Правительстволэн Тӧроеныз Евгений Примаковен пумиськонлы дасяськыны. Александр Волков оскемзэ вераз, Россиысь Правительстволэн нырысетӥ вице-премьерез Юрий Маслюков элькунамы вуылыку, трос ужпумъёсты радъяны луоз шуыса. Кун Кенешлэн Тӧроез пумиськонэ лыктэмъёслы вераз: Сарапулын нылпиослы но мукет пособиос понна тыронъёслы толэзь пумозь 1 миллион манет коньдон висъямын луоз. Александр Волков городысь администрацилэн кивалтӥсьёсыныз кенешиз. Вераськон мынӥз Сарапулысь секыт социально-экономической югдурез умоятон сярысь. Удмурт Республикаысь Кун Кенешлэн пресс-службаез. ТАЗАЛЫК Туберкулёз ӧсъёсамы йыгаське Та висёнлэн микробез музъем вылэ адямилэсь азьвыл кылдэм. Соин висизы Л. Толстой но А. Чехов, В. Белинский но Н. Добролюбов... Художественной литератураысь асьмелы тодмо: висись куасьме, куэз чильпыра, бамъёсыз ӵыжытэсь, синъёсыз чиляло, ымныраз курадӟон пыӵамын. Одӥг кылын вераса, туберкулёз. Удмуртиын та чер берло дыре паськыт вӧлме. Талэсь мугъёссэ валэктэ Ижевскысь медициная академиысь туберкулёзэз эмъянъя кафедралэн кивалтӥсез Елена Ефимовна ПОЛУШКИНА. - Россиын 100 сюрс адями пӧлысь 57-ез туберкулёзэн висе (Европа понна самой бадӟым лыдпус), Удмуртиын - 60-эз, нош пытсэт сьӧрын пукисьёс пӧлын - 86-ез. 1996 арын шаерысьтымы больницаосын 100 сюрс адями пӧлысь 10-эз туберкулёзлэсь кулӥз, нош пытсэт сьӧрын - 38 мурт. Та лыдпусъёс возьмато, Удмуртилэн ӧс куспаз туберкулёзлэн эпидемиез сылэ шуыса. - Кинъёс нырысь ик черлало? - 30-49 аресъемъёс - самой кын куртчон, ужан вакытазы. Берло дыре туберкулёзэн висись покчиослэн лыдзы йылэ. Со герӟаськемын калыклэн тазалыкезлэн лябӟеменыз. Туберкулёз нырысь ик ворме сахарной диабетэн, язваен, хронической бронхитэн висисьёсты. Соин черлало ваньмыз, кытын ужамзы но улэмзы шоры учкытэк. Врачъёс но солэсь утемын ӧвӧл - кылем арын, кылсярысь, туберкулёзэз эмъянъя диспансерысь 7 врач черлаз. Туберкулёз сяськая куанер улӥсь семьяосын, тужгес - пичи интыын трос кузя уло ке, тазалыкез быдтӥсь производствоын (шуом, отын тузон ке). Капчиен черлало ялан сюлмаськыса, куректыса улӥсьёс, шуг-секытъёсын нуналмысь-нуналэ пумиськисьёс, тамак кыскисьёс. Туберкулёзэн черламлэсь кышканы кулэ анай луыны дасяськись, нылпизэс нонтӥсь нылкышноос. Но котькинлэсь ӵемгес висё юисьёс. Соослэсь бере уг кылё токсикоманъёс но наркоманъёс. Таос эмъяськыны бер кутско, уноез больницаын кылльыны уг чида - пегӟе, угось туберкулёз ӧжытсэ 2-3 толэзь ӵоже эмъяське. Та через вӧлмыто Казахстанысь, Кавказысь лыктэмъёс, пытсэт сьӧрысь потэмъёс. Соос ветло транспортэн, пырало магазинъёсы... Соослэсь уд палэнскы, уд пегӟы - кымсазы туберкулёзэн висись шуыса ӧвӧл гожтэмын ук. - Ма кароно, туберкулёзлэсь утиськон понна? - Туберкулёзлэн микробез висись адями пушкысь потэ дыльдыеныз ӵош, вераськыкуз 2 метр кеме лобӟе, кызыкуз - 6 метр кеме. Жоб дыльдыын улэ 72 час, висисьлэн арбериосыз вылын - 3 толэзь, нош кырсь, утялтымтэ интые шеде ке - солэсь но кема. Адями пушкы омырен ӵош пыре, соин ик ӵемгес тыэз быдтэ, но озьы ик лыосы, синъёсы, пекляосы но мукет ёзъёсы каръяське. Туберкулёзлэсь уте прививка. Сое нылпилы нырысьсэ лэсьто вордӥськемез бере 4-5 нунал ортчыса, нуны дыраз но тазалыко вордске ке. Тодыны кулэ, туберкулёз висись анайлэсь нылпилы вордӥськемлэсь азьвыл уг паласькы. Сыӵе кышкытлык кылдэ нылпи югыт дуннеез адӟем бере. Прививкалэн кужмыз 5-7 арлы сяна уг тырмы. Соин ик сое 6-7 арескысен но 14-15 арескысен лэсьто на. Но азьвыл эскеро, нылпилы туберкулёз паласькемын-а ини яке ӧвӧл на-а шуыса, нимысьтыз укол пуктыса (проба Манту). Укол лэсьтэм бервылын горд вишты 5-7 миллиметрлэсь бадӟымгес ке, нылпи мугорын туберкулёзлэн бактериосыз вань ини, озьыен, прививка мултэс луоз. Туберкулёз трос пумо луэ. Прививка куинезлэсь гинэ, тужгес кышкытлыкъёсызлэсь, уте. 20 арес тырмытозязы ваньмыз сямен егитъёслы туберкулёз паласькемын луэ ини. Но озьы ке но, со уг вера, ваньмыз соос висёзы шуыса. Озьы луоз, адямилэн висёнъёсын нюръяськон кужмыз лябӟиз ке. Висён медаз аля шуыса, ӟеч сиськоно (мон уг шуиськы - трос). Ӝӧк вылады белокен узыр сиёнъёс (сӥль, чорыг) но скал вӧй котьку мед луоз. Тырмыт кӧлоно. Ӧвӧл кысконо, юоно. Кынмемлэсь но шунды шорын кема улэмлэсь утиськоно. Ӟеч, капчи мылкыдын улыны тыршоно. Ӧвӧл вунэтоно улон, ужан интыосты тӧлатыны, укноез яке форточкаез усьтыса. Калык трос люкаське ке, вылаз ик, отын кыско на ке, мугор туберкулёзлы шуген пумитъяське. Али городъёсын туберкулёзэн висисьёс лачак. Соин ик калыке потамлэсь возиське луэмезъя. Эн сиське кытын шедем, тужгес но базаръёсын. Туала медицина туберкулёзэз эмъя, висён дырыз дыръя шараяське ке. Вань висисьёс пӧлысь кык-куиньмос люкетэзлы диагноз пуктӥське флюорография амалэн. Адями висемзэ уг ик шӧды на, нош флюорография тылэсь вань виштыоссэ возьматэ ини. Соин ик ляб тазалыко адямиос флюорографиез арлы быдэ ортчыны кулэ, нош висисьтэмъёсыз - одӥг но ӝыны арлы огпол. Ваньзэ тае быдэсъяса, адями висемлэсь утиськыны, оло, быгатоз. Но туберкулёз пыре сыӵе висёнъёс пӧлы, кудъёсыз вӧлмо секыт вакытъёсы. Солэсь мугъёссэ быдтон понна, адямилы адями сямен улыны луонлыкъёс кылдытоно: со мед ужалоз но сиськыны мед быгатоз, медаз вистэм-вожтэм юы, секытэз чидатэк, коркаез шуныт но вӧлмыт мед луоз, нылпизэ но ассэ эмъяны мед быгатоз... О. ВАХИТОВА. ВАЛЭКТЭ ЮРИСТ Сэрегез нуэ адвокат Лилия Шкляева Дышетскем понна дун Пие колхозлэн стипендиантэз вал. Сельхозакадемиез йылпумъяса луиз инженер- электрик. Диплом басьтӥз но, колхозын дэмлазы бригадире. Уждунэз туж пичи. Со кошкиз мукет районэ. Ачим, колхозын ужаса, пенсие потэмын. Хозяйствоысь кивалтӥсьёс табере монэ косо пиме дышетыны быдтэм коньдонэз берыктыны. Законлы тупа-а сыӵе курон? Уг ке, кин чотэ куштоно сыӵе дунэз? В. ПАНТЕЛЕЕВ. Россия Федерациын кутэмын "Вылӥ образованилы дышетон но вуз бере профессилы дышетон сярысь" Закон. Кун лицензиен ужась заведенилы кун тупатэ дышетон задание но федерацилэн бюджетысьтыз коньдон. Лицензиын верам куронъёс уг ке тӥясько, вуз быгатэ талэсь ятыргес студентъёсты кутыны, дунын дышетон вылысь. Соослэсь лыдзэс чакланы кулэ заведениен кузёяськись - быдэсъясь (исполнительной) властьлэн ёзэз яке интысь аскивалтонлэн ёзэз. Адямиез колхоз чотын дышетыку, колхоз но вылӥ дышетон заведение (вуз) ас куспазы гожто огкыл (договор). Отын аслэсьтыз куронъёссэ пуктэ ачиз вуз. Соос мед тупалозы Россия Федерацилэн законъёсызлы но заведенилэн уставезлы. Огкылэ куддыръя уг пырто дышетон дунэз кин чотын берыктон сярысь люкет. Соку адями вылэ тыронэз кужмысь пуктыны уг яра. Дунэз берыктыны луэ ас мылкыдъя гинэ. Тупамтэос кылдыку, ужпумез сэрттэ-пертче суд. В. Пантелеевлэн гожтэтэзъя таӵе малпанэ вуиськод. Вузын дышетскытозяз, егит адями быдэ вуиз. Со басьтӥз быдэсак дееспособность шуонэз. Мукет сямен вераса - гражданинлэсь правооссэ но обязанностьёссэ. Колхоз лыдъя: специалист дышетскемез понна дунзэ мед берыктоз. Сыӵе куронэн хозяйствоысь кивалтӥсьёс вазиськыны кулэ аслыз быдэ вуэм муртлы яке судэ. . Солэн атаез В. Пантелеев та коньдонэз тырыны быгатэ ас мылкыдызъя гинэ. Кин йырзэ ыштӥз? Кынтэм бере Олексейлэсь парсьсэ вандӥм. Ӵушкам-миським, кораса чуланэ ошылӥм. Со куспын кышноез муссэ жарить карем ини. Пырыса ӝӧк сьӧры пуксим. Олексей парсь вандӥсьёсты утялтэ, виназэ уг жаля, лэзья да лэзья. - Витё ар талэсь азьвыл вал, дыр, со,- мадьыны кутскиз пересь соку луэм учыр сярысь.- Тазьы ик парсь вандӥм. Аркаш бускель но ӵап соку ик вандӥз. Пукиськом ӝӧк сьӧрын шунскыса. Оломар укное учкыны шедьтӥ: кинлэн ке пуныез парсь йырез лур-лар кыска. От, та Аркаш, сӥльзэ но ӧвӧл утялтэм ук, шуисько. Вай, малпасько, жингыртыса серекъяло. - Аркаш, парсь йырдэ ӧд ышты-а? - Ӧй, Миколайлэн, дыр. Мынам пӧрасе кемалась виымзэ пӧзьтэ ни. Пото ай, аслэсьтым но корказе пырто. Потӥсько но... едрит-кудрит! Бакчаын быдэс пуны сюан. Коӵо-куакаез но сьӧд-сьӧд. Нош парсь йырылэн йыркобыез гинэ кылем на. Тӥни сыӵе учыр вал. Я, юэ. Ӧс шуак усьтӥськиз но, лангыр поттыса, пӧрасез пыриз: - Нош-а, мар-а йырдэ арам карыны кельтӥд, парсь визь! Тӥни азбар тыр куакаос куное лыктэмын. Л. СУНЦОВ. Правительствоысь иворъёс Кизнер ёросысь Киров нимо колхозлы коньдонэн юрттэт сётон вылысь, постановление кутэмын. Со мыноз Копки гуртэ 200 йыр скаллы чаклам пудо гидэз ӝутыны. Озьы ик юрттон сётыны чакламын Ува ёросысь "Новая сила" кооперативлы но. *** Правительстволэн Президиумезлэн заседанияз кенешемын "Ижмаш" огазеяськонлы юрттон сярысь. Ижевскысь механической заводлэн автомобильёслы мостъёс поттонъя комплексэз табере сётӥськоз "Ижмаш" огазеяськонлэн "Ижмаш-авто" ёзэзлы. Отын "Ижмаш" огазеяськонлэсь ёзэтъёсызлэсь выт бичан сярысь ужпум эскериськоз Кун Кенешлэн сессияз. Озьы ик Павел Вершинин "Ижмашлэн" люкетъёсаз ужез радъян сярысь постановленияз нимысьтыз ватсан пыртыны ӵектӥз. *** "Экономикаез азинтонъя Евроазиатской банк" акциосын огазеяськонлэсь элькунлэн бюджетаз пунэм тыронъёссэ берыктон вылысь кутэмын нимысьтыз постановление. Та документъя басьтэм ссуда со "Реммаш" огазеяськонлы висъяно луоз Азьвыл басьтэм пунэмъёсты берыктон вылысь. Озьы ик та банклы Удмурт Республикаысь Гурт ужъёсъя но сиён-юон поттонъя министерстволы кыед утялтон транспортеръёс басьтыны 720 сюрс манет коньдон висъяны ӵектэмын. *** Россиын коньдонэн секыт югдур Удмурт Респуликалэн бюджетаз но шӧдӥськиз. Республикамылэн бюджетысьтыз коньдонэз туэ 4-тӥ кварталэ кутон сярысь ужпум учкемын. Бюджет чотын ужасьёслы коньдонэз висъяны чакламын уждунъя пунэмъёсты тырыны. Та ужпум кылзэмын луоз Удмурт Республикаысь Правительстволэн 16 октябре ортчоно кенешаз. Шӧкыч Коммерческой улон Француз кылысь берыктыса, "коммерсант" - нимаз вузкарись, купец шуэм луэ. Но асьмелэн улонамы солэн пуштросэз мукет ӧретӥ кошкиз кадь. Нырысь-валысь кылдӥзы коммерческой ларёкъёс. Сое ӟучъёс "комок" шуыса нимазы. Бӧрысь усьтӥськизы банкъёс но магазинъёс. Собере вань улонмы коммерческой луыса кошкиз... Поездъёс, таксиос, автобусъёс. Усто кузьымен "шумпоттӥз" Ижын улӥсьёсты автотранспортъя огазеяськон. Со ик ИПОПАТ. Табере унояз маршрутъёсын ветло ни коммерческой автобусъёс. Пенсионер-а тон, ожысь ветеран-а, депутат-а - коньдонтэк пырыны уз лэзе. Одӥг кылын вераса, вань льготаос быдтэмын. Шуом, уноез ветло ни вал проездной билетъёсын. Дунтэмгес усе вал уго. Табере та билетъёс кулэтэмен лыдъясько. Ярам, озьы каризы бере, чидалом ини. Но дыраз мед сётозы вал уждунмес, пенсиосыз но пособиосыз. Эшшо тани ма сярысь вераны кулэ. Коммерческой шуон автобусэ калык сокем ик пуксьыны уг дырты. Вить-куать адямиен поръяло со автобусъёсыд. Нош пассажиръёс огшоры автобусэн тулляськыса ветло. Ма, улонмы шоры учкыса, табере номырлы уд паймиськы. Вераськонъёс ветло, ӝоген, пе, Ижысь вань трамвайёс но, троллейбусъёс но коммерческой луозы. Мар бен, луозы но. Б. НИКИТИН. Шхамат "Ижпланета" клубын шахматэн шудонъя егитъёслэн ӵошатсконзы ортчиз. Ижевскысь, Сарапулысь но Завьял ёросысь 80 пала 8 - шахматистъёс кужымзэс мертазы. Нырысетӥ разрядэн спортсменъёс пӧлын вормисе потӥз 11-тӥ классын дышетскись Андрей Востриков 9-тӥ школа. Со 8 пӧлысь 6,5 очко люказ. Ӝыны очколы кылиз технической университетын дышетскись Константин Васильев. Мукет арлыдо группаын шахматистъёс пӧлын вормизы: 10-тӥ классын дышетскись Алексей Чирков (69-тӥ школа), 10 пӧлысь 8,5 очко люказ; Александр Бочкарёв (68-тӥ школа) 10 пӧлысь - 9 очко. Нылъёс пӧлын вормисе потӥзы Россиын ортчем ӵошатсконъёсы трос пол пыриськемъёс Ольга Шарипова 29-тӥ школа, Елизавета Бронникова (93-тӥ школа), Анна Доржеева 86-тӥ школа. Удмуртиысь кужмоосыз егит шахматистъёс сӥзьыл каникулъёсы, коньдонэн юрттӥсь сюриз ке, Челябинск, Екатеринбург но Орск городъёсы мынозы. И. ВЕЛЬТМАНДЕР. Кез пи вормиз Санкт-Петербургын алигес 100 иськеме бызьылонъя Россилэн кубокез понна ӵошатсконъёс ортчизы. Со нюръяськонъёсы Европаысь сизьым страна но пыриськиз на. Озьы Кезысь Алексей Белослудцев сю километрез 7 час 21 минутскын ортчыса нырысетӥ интые потӥз. Табере со международной классъем спортъя мастер луиз. Али Алексей дуннелэн чемпионатэзлы дасяське. Н. ИВАНОВ. Шӧкыч Выль ӟучъёслэн улонысьтызы Телефон пыр кык выль ӟуч вераське. Одӥгез шуэ: - Мон арня ӵоже ини тӥ доры пырыны уг быгатӥськы. Ку бен пумиськомы? - Пумиськон сярысь вераське секретаршаеным. - Вераськимы ни. Ми бен соин дырмес умой ортчытъяськомы. Но мыным одно ик тӥледын вераськыны кулэ вал. х х х Тодмоосыз адвокатэз ӟечкылало сьӧрпалаз ортчем эрказмем адямиез судын утьыны быгатэменыз. - Тӥ туж усто ужады,- огез бӧрсьы мукетыз ушъяло сое. - Туж тау,- шуэ адвокат.- Но мон дурбасьтӥсь интые прокурор луысал ке, мон сое одно ик ошыны курысал. х х х Кык йыртэмасьёс ювелирной магазинэ лушкаськыны пыраллям. Доразы бертыса, куспазы верасько: - Лыдъяны кулэ вылэм, кӧнялы ваньбур поттӥськеммы. - Ӧвӧл кулэ, мон туж жади. Ваньмыз сярысь ӵуказе ӵукна радио пыр вералозы ай. х х х - Мыным кык узыр пиос синмаськиллям,- ушъяське Маня эшез азьын.- Кыкназылэн ик кышно каремзы потэ. Но али уг валаськы, кудӥз бордысен кутскыны. х х х Картэз дораз бертэ но адӟе: кышноез валес вылын кылле пиосмуртэн. - Мон партилэн членэз ӧй ке луысал, тынэсьтыд вань урдлыостэ тӥясал, укноетӥ сэрпалтысал. - Дано мед луоз КПСС! Дано мед луоз КПСС! - киоссэ чабе кышноез. х х х Уйшор котырын кышноез картсэ сайкатэ. - Мар луиз? - пайме соиз. - Номыр но ӧз луы. Но мон уг валаськы, кызьы тон сокем пичи уждунэныд зӥб-зӥб кӧлыны быгатӥськод. х х х Воргорон курортысь бертӥз. Кышноеныз артэ изьыны выдӥз. Нош ӵукна кышноез шуэ: - Мон шӧдӥсько, мусое, тон палэнын мукетыныз кӧлад. - Малы озьы малпаськод? - Мон бен Зина ук, нош тон уин куинь пол монэ Маня шуид ук. Люказ Г. ВАХРУШЕВ. Нуналлэн тодметэз 17 октябре - Ерофейлэн нуналэз. Куазь кезьыт кариське. Вашкалаосмы оско вылэм, та нуналэ тэльын нюлэс кузёос шаянъясько шуыса: кесясько, серекъяло, писпуосты тӥяло, пӧйшуръёсты кышкато. 19 октябре - Денислэн но Фомалэн нуналзы. Куазь тӧлаське. Югыт нунал 10 час но 8 минут кыстӥськоз. Та нуналэ... ар талэсь азьло 17 октябре 1918 арын Волжской военной флотилилэн миноносецъёсыз Гольяны дорысь баржаез мозмытӥзы. Баржаын морякъёс, красноармеецъёс но советской ужасьёс пытсамын вал. "02" ивортэ Йыртэмасьёс йыло Шаерамы нуналлы быдэ йылэ йыртэмасьёслэн лыдзы. Кылсярысь, 12 октябре 112 йыруж пусъемын вал, 71-ез соку ик шараямын. Урамъёсысь ӝегатэмын 275 юэмъёс, со пӧлысь 150-эз сазьтӥськон интыосы келямын. Милициын ужасьёс 56 пол потазы семья керетонъёсты зӥбломытыны. Тодмотэм муртлы корка ӧсэз усьтыны уг яра шуыса ялан алӥськом ке но, тросэз веранэз санэ уг басьто, лэся. Озьы Сарапул городысь Дальний урамысь 37-тӥ юртысь одӥгаз квартираын улӥсь кышномурт шоры ӝыт пал пӧяськыса лушкаськисьёс пыризы. Кышномуртэ ӝугизы но квартираысь куд-ог арбериосты, коньдонзэ, сиён-юонзэ капыртыса пегӟизы. Йыртэмасьёсты кема утчано ӧз луы. Азьвыл пытсэт улын пукемъёсты 27 аресъем Александрез но 25 аресъем Петрез милициын ужасьёс ӝог кутӥзы. Йыртэмасьёс уг кышкало вылэм ваньбурез утисьёслэсь но. Соосты я жуго, я суйзэс- пыдзэс думыса кельто. Нош Орджоникидзе урамысь 1 А номеро юртэ интыяськем складлэсь кирпич борддоръёссэ пасяса пыраллям. Лушкамын 105 сюрс манет тыр кыскон но кофе. Удмурт Элькунысь МВД-лэн пресс-службаез. ТАЗАЛЫК ЮАЛЭ - ВАЛЭКТОМ Кыӵе луоз нуные? Ӝоген нылпие луоз. Врачлы кузпалылэсь туберкулёзэн висемзэ ӧй вера - кышкай кырыж учкемзылэсь. Тодмое гонореяен но висьылэмын, но нылпиез чырткем вордӥськиз. Маке луыны быгатоз-а нуныелы? Н. ДМИТРИЕВА. Иж кар. Та юанэн ми вазиськылӥм 1-тӥ республиканской больницаысь медико-генетической консультацилэн кивалтӥсезлы, врачлы Е. В. Осиповалы: - Мон уг валаськы, малы та кышномурт картэзлэсь висемзэ ватэм. Врач сое нокинлы уг шарая, тӥляд вордсконо нуныдылэн тазалыкез сярысь сюлмаськыса юаське. Со тӥледыз генетик доры эскериськыны ыстысал. Туберкулёз - секыт висён, сое кужмо эмъюмъёсын эмъяло, соин ик бервылтэк уг кыльы. Нуны понна со бадӟым куректонэн берытскыны быгатоз. УЗИ сяна, али мукет эскеронъёс лэсьтыны бер ини, 15-20 арня дыръяз кулэ вал. Паласькемын-а туберкулёз вордӥськоно нуныдылы, вань-а огъя тазалыказ но вылтусаз изъянъёсыз, тодмо луоз ни вордскемез бере. Али умоезлы гинэ оскыны кыле на. Венерической висёнъёс но чик бервылтэк уг кылё. Котьку ик бадӟым изъянъёс уг шараясько ке но, тросэзлэн кема кыстӥськись (хронической) висёнъёслэн мугзы ӵапак со луэ. Анай луыны дасяськись нылкышноослы верам потэ: секытомемдылэсь азьло ик врач дорын эскере асьтэлэсь но кузпалдылэсь тазалыксэ. Кыӵе эскеронъёс (анализъёс) лэсьтоно, со тӥледлы валэктоз. Со ик ыстоз генетик доры но. Тодэлэ: нуны сярысь сюлмаськыны кутсконо со кылдытозь ик, вордскемез бере куддыр бер луэ. Тазалык "Яратонлэсь" ӵужектон Врач: Кинэн берло толэзьёсы лушкем кусыпъёсын улӥд? 17 аресъем нылаш: Ваньзэс уг тодӥськы ни. Анаез: Малы тӥ солэсь оломар сярысь но юаськиськоды? Солэн сифилис ӧвӧл, ӵужектон! (Врачен вераськемысь). Нош врач чик но юнме уг юаськы вылэм. Берло дыре лушкем кусыпъёс пыр паласькись висёнъёс пӧлы пыртэмын В гепатит (ӵужектон) но. Россиын 10 миллион мурт та вирусэз нуллэ. Вӧлмыто сое 15-29 аресъем "яратӥсь" егитъёс. Мар висён со? Луэ-а солэсь утиськыны? Юанъёсмылы валэктэ Удмурт Республикаысь Кышкытлыкез но паласькись висёнъёслэсь вӧлмемзэс эскеронъя центрысь отделлэн кивалтӥсез Татьяна Васильевна НЕДОБЕЖКИНА. - Татьяна Васильевна, мар пӧртэмез В гепатитлэн азьвыл тодмо ӵужектонлэсь? - Али А, В, С, Д, Е гепатитъёсты висъяло. В гепатит нимысьтыз висъямын 1973 арын. Ӵужектонлэн мукет пӧртэмлыкъёсыныз ӵошатыса, В гепатит тужгес секытэз луэ. Солэн вирусэз вӧлме быдэс мугоре, соин ик мукет муртлы каньылэн палаське вир, синву, дыльды, пиосмурт дыльк, кызь пыр. Вирус туж кема улыны быгатэ пӧртэм арбериос, куасьмем яра вылын. Со мугоре шедем бере, нырысь ик лябӟыны ӧдъя мус. Тросаз учыръёсы адями улытозяз соин курадӟе, ӵемысь кулэ цирроз, рак луыса. Куддыр адями висемзэ ньыль толэзь ӵоже уг шӧдылы. Собере сиськемысь дугдэ, ӧскемез потэ, ӝушез висьыны ӧдъя, куэз, синтӧдьыосыз ӵужекто. Ӵужектонэн висись кышномурт нуны ке вае, сое утьыны туж секыт. 100 пӧлысь дассэ гинэ эмъяны луэ. Сыӵе нуны яке кулэ, яке улытозяз мусэныз курадӟе. - В гепатит мусэз быдтэ ке, малы сое кышномуртэн пиосмурт кусыпъёс пыр паласькись висёнэн лыдъяло, СПИД-эн но мукет венерической висёнъёсын артэ пукто? - Малы ке шуоно, туж тросаз учыръёсы вирус палаське ӵапак сыӵе кусыпъёс пыр. Чупаськыку, огъя сёросэ, мунчое, бассейнэ ветлыку, СПИД уг паласькы ке, В гепатит та учыръёсы но палаське. Соин ик туж эскериськыны кулэ. Малы ке-а В гепатитэн висисьёслэн арлыдзы 15-29 арес. Араз 50000 мурт В гепатитэн висе. Нош 1997 арын ӝыны ар ӵоже 40000 мурт висиз. Быдэ вуымтэос но егитъёс пӧлын нылкышно но воргорон кусыпъёсты валэктонлы ӟеч саклык висъямын луысал ке, висисьёслэн лыдзы кулэсмысал. - Эшшо кызьы палаське на та чер? - Ванскыку, висись муртэ утялтыку, кырсь шприцъёс пыр. Висёнэз вӧлмыто наркоманъёс, аналтэм нылпиос. - Верамдыя, лушкем кусыпъёс пыр паласькись висёнъёс дунне вылын кызё пӧртэм лыдъясько. Но врачъёслэн адямиосты алэмзы но, кутэмзы но уг луы. Вань ик-а со черъёслэсь утись кыӵе ке амал? - Вань. Но егитъёс малы ке аналско презервативлэсь. Нош В гепатитлы пумит вань вакцина но. Сыӵе прививка одно лэсьтэмын луыны кулэ нырысь ик врачъёслы, нылпиослы. Но коньдон висъяськымтэен, дунтэк лэсьтыны уг луы. Одӥг вакцина 6-7 доллар сылэ. Со вить арлы тырме. Тазалыклы номыр кышкытэз уг луы, нош ӵужектонлэсь уте. Вакцина пуктэм бере, висён учыръёсты уг тодӥськы. Вераськиз З. РЯБИНИНА. Нюлэс но дасяло Сюмсиысь "РОС" огазеяськонлэн ужан удысэз - МТЗ тракторъёслэсь двигательёссэ тупатъян. Отчы асьсэлэсь техниказэс ваё Ува, Селта но Вавож ёросъёсысь хозяйствоос но. Огдыре татын йӧл кыскон аппаратъёсты но тупатъяллязы вал. Но куронъёс тырмыт вуымтэен, та ужлэсь куштӥськизы. Коньдонлы кулэяськонъёссэс уж вылын быдэстыны юрттӥз нюлэс дасянъя бригада кылдытон. Со понна басьтӥзы нимысьтыз техника. Кызьпу пулъёссэ предприятие Ижысь мебель фабрикае келя. Н. ЯКОВЛЕВ. Н. В. Никольскийлы вордскемез дырысен 120 ар тырме Николай Васильевич Никольский (1878-1961) - Чувашиысь сӥё-дано учёной, культура но калыкез дышетон удысын тужгес но тодмо ужась. Вордӥськиз со крестьян семьяын. ХХ даурлэн кутсконаз со вал Чувашиын нырысетӥез дышетскем адямизы. Ог 10 пала кунгож сьӧр кылъёсты тодэ вал. Н. В. Никольскийлэн ужъёсыз сӥземын Поволжьеын улӥсь калыкъёслы, озьы ик удмуртъёслы но. Со 1906 арын нырысьсэ чуваш кылын "Хыпар" газет кылдытӥз. В. РОГАЛЁВ. НАТАЛЬ НЫЛКЫШНО ОГАЗЕЯСЬКОНЫСЬ ИВОРЪЁС Ӵош пуком, пӧраны дышом Кияса ёросысь Вуж Салья гуртын пумиськон ортчытӥзы гуртысь нылкышноос, егит нылъёс, песянайёс. Таяз учыре "Нылкышнолэн шудэз" клубын вераськон мынӥз бакча сиёнъёслэсь, толлы сылалтэмъёс дасян сярысь, люкаськемъёс озьы ик дышетскизы тортъёс лэсьтыны, варення пӧзьтыны. Котькуд таӵе пумиськонэ вуыло ёрос администрациысь кивалтӥсьёс. Тани али но Тамара Егоровна Васильева тодматӥз ёросын ортчись ужпумъёсын. Кылсярысь, Ермолаево селоысь шор ёзо школаез усьтэм бере, ёросын кужмогес басьтӥськозы чагыр эстӥськон кыскон борды, та ужен юрттыны малпа Удмурт Республикаысь Кун Кенешлэн депутатэз Николай Семенович Сычев. Со шумпотымон ивор калыклы. Со сяна, Тамара Егоровна кузьымен пусйиз Ермолаево сельсоветъя трос нылпиё семьяос пӧлын умой утялтэм юртъерзы, укно улазы чебересь сяськаос будэтэмзы но толлы пӧртэм сиён юонъёс дасямзы понна вормисе потэм кузпалъёсты Екатерина Ивановна но Геннадий Захарович Бехтеревъёсты. Кузпалъёс сюлмысь тыршо "Рассвет" колхозын. Екатерина Ивановна 20 арлэсь ятыр скал кыске ини. Корт валэн пӧртэм ужъёсты быдэсъя Геннадий Захарович. Озьы ик трос шуныт кылъёс веразы асьсэлэн ужамзы но та пумиськонлэн пайдалыкез сярысь ёросысь семья отделэн кивалтӥсь Светлана Михайловна Баранова, Удмурт обществолэн тӧроез Надежда Викторовна Пахомова, ёрос библиотекалэн кивалтӥсез Галина Никитична Бубякина но солэн воштӥсез Лидия Александровна Овчинникова. Пумиськон огшоры гинэ ӧй вал, шуыны луоз. Гуртысь библиотекарь Валентина Зыкова нылкышноослэн клубенызы ужамезъя аттестация ортчиз. Ӝыт радъямын вал библиотекаын. Котькуд таӵе пумиськонъёсты шулдыр кырӟанъёсын шумпоттэ "Кубо" фольклор огазеяськон, кудӥныз быгатыса кивалто кузпалъёс Надежда Витальевна но Владимир Леонидович Бочкарёвъёс. - Таӵе ужрадъёс та секыт вакытэ огазеяло калыкез, сёто выльзэ, тунсыкозэ. Азьланезлы ӟеч малпанъёс пыӵато, - вера нылкышноослэн клубзылэн кивалтӥсез Марина Морякова. Н. МОРЯКОВ. Шӧкыч "Шӧкычлэн" кыллюкамез Импичмент - пичи милиционер Лизинг - лезгинка эктон Транш - силос гу ГКО - Обороная кун комитет МВФ - морской военной флот Вексель - векаса улон Презентация - аспӧртэмлыко презерватив Электорат - выль трансформатор КПРФ - копаськы, пазьгы, радъя, фу-у Жингыртэмдылэсь азьло малпаське Школаез шат пуштытом? Шуак таӵе малпан йыразы чилектӥз Пирогово школаын дышетскись нылъёслэн. 1 октябре литература уроказы соос "крестики-ноликиен" шудыны шӧталлям. Аляк нылъёсты дышетӥсь урокысь улляз. Соосыз кема малпаськиллямтэ. Директорлэн кабинетэз доры школаез пуштытон сярысь кагаз куштӥллям. Кивалтӥсь шуэрскиз, урокъёс уретэмын вал, пиналъёсты школаысь поттӥзы. Вакчи дыр куспын вуизы милиционеръёс, тылпу кысӥсьёс но ӝог юрттэт сётонъя службаосын тыршисьёс. Та нуналэ школаысь мина но, бомба но ӧз шедьтэ. Нылъёс таӵе кутсконлы шумпотӥзы гинэ вал, но вазь вылэм ай уженызы дан поттыны. Милициын ужасьёслэн лыдъям-чотамзыя но школаысь социальной педагоглэн чакламезъя нылъёсты ӝог "кырмизы". Кӧня синвуаськизы егит террористкаос, но ... бер вал ини. Табере мискинь анай-атайёслы, нылъёслэн йыртэмамзы понна мешокен коньдон дасяно луоз. Яке пенсия, яке пуштэм юрт 12 октябре милицие эшшо жингыртӥсь луиз. Таяз учыре воргорон дыраз тырыны косэм пенсизэ. Ӧд ке, пе, быдэстэ куронме, Лев Толстой нимо урамысь одӥгез юрт пуштоз. Нош отын улэ республикаысьтымы вылӥ кивалтӥсь - Кун Кенешлэн Тӧроез. Ӝог юрттэт сётӥсьёс дыраз вуизы. ОМОНын ужасьёс пуштӥсь арбериез ӧз шедьтэ. Та юртын улӥсьёс кык час зор улын котмыса сылӥзы. Террорист таин гинэ ӧз буйгатскы. Кӧня ке дыр ортчыса, нош жингыртӥз. Тодазы вайытӥз, 15-20 минут куспын юрт пуштоз, пе, трос жоб кылъёсын тышкаськиз на. Калыклэн шуэрсконэз калленэн лапкоме ни вал кадь, воргорон куинетӥзэ жингыртӥз на. Ярам, юртысь пуштӥсь маке шедьтэмын ӧй вал. *** Нялтас пусъеме потэ, секыт югдурысь таӵе амалэн уд поты. Вылаз ик, та выллем жингыртӥсьёс дуно усёзы асьсэлы ик, кышкатъяськисьёслы - куинь арлы пытсэт сьӧры сюрозы яке 200-сен 500-озь пичи уждун мында штраф тыроно луоз. Жингыртэмдылэсь азьло тодады возе Россия Федерацилэн Уголовной Кодексысьтыз 207-тӥ ёзэтсэ. Ю. БАЙБЕКОВ. Шӧкыч Подпись к рисунку Пиналъёсты дышетон туавла вакытэ туж дуно усе. Школае мынӥсьлы толэзьлы шоро- куспо уждунэн йӧназ дӥськут но, дышетскон книгаос но уд басьты. Берло дыре "Удмуртия" издательство но малы ке учебникъёс поттэмысь дугдӥз. (Гожтэтысь). Пияш: - Буратино, выль книга басьтыны тон Калыкез дышетонъя министерстволэсь коньдонзэ кураны пыра вал. Буратино: - Асьсэос но соос кураськыса ветло. Типографилы пунэм тыронзы уно люкаськем. Соин ик книгаос "арестовать" каремын, пе. Суредэз Л. ПРОЗОРОВЛЭН. Дарья апай 47 ар ужан стажез люкаськемын Дарья Савельевна Шиляевалэн. Вордскиз со Селта ёросысь Кионгуртын (ӟучъёс верамъя - Малый Чибирьын). Берло аръёссэ улэ Бызараын (Ува ёросысь Узей-Тукля гуртын). Татын со сельсоветлэн секретарез вал. Пенсие потыса, совхозысь эстӥськон сётон станциын ужаз. Кузпалэныз ӵош вить нылпи будэтӥз. Одӥгез табере Тюменьын ужа, мукетыз - Закарпатиын, куинез - бордаз. Быгатэмзыя ваньзы ик юртто анайзылы мӧйы даурзэ капчиятыны. Д. С. Шиляева. Туспуктэмез Г. ЮСАЕВЛЭН. Гажаськом но, али но дунъяськом Та нуналъёсы 80 арес тырмиз Удмуртиысь сӥё-дано дышетӥсьлы, историклы, Быдӟым Отечественной война дыръя Москваез тушмонлэсь утён оже пыриськем муртлы Павел Александрович Осиповлы. Быдӟым войнаысь воргорон сӧсырмыса, пал пыдтэк бертӥз. Озьы ке но, 20 ар директор луыса ужаз Ижевскысь 5 номеро ӝыт ужась школаын. Война бере дышетскисьёс пӧлын 30-40 аресъемъёсыз но вал. 1968 арын Павел Александровичлэн но "Строитель" клублэн директореныз Вячеслав Самойлович Цукерманлэн кичӧлтэмзыя, школаын ужаны кутскиз "Тунсыко адямиосын пумиськылонъя" клуб. Кинъёс гинэ отчы ӧз вуылэ! Соос пӧлын та школаез йылпумъям муртъёс но. Мединститутысь профессоръёс В. Машагатов но А. Пермяков озьы ик татын дышетскемын. Павел Александрович ас малпанъёссэ котьку уже пыӵатылӥз, ӟеч ужъёслы вань коллективез бурдъялляз. Озьы школаын кылдытэмын вал художественной самодеятельность, ужаз кинокружок. Директорлэн кивалтэмез улсын коллективмылэн ужамез сярысь дасямын вал кинофильм но телепередача. Директормы ялан тыршылӥз дышетскисьёслэсь тодон-валанзэс паськытатыны. Кӧня походъёсы но экскурсиосы ӝуткалляз пиналъёсты но дышетӥсьёсты! Фронтовик-офицер П. Осипов нокыӵе жадёнлы ӧз сётскылы. Тодам ваисько на, кызьы 70-тӥ аръёсы ми Павел Александровичен ӵош Удмурт кун университетын абитуриентъёслэсь историен экзаменъёссэс кутылӥм. Солэн куронъёсыз чурытэсь ке но вал, нокинэ ӧз обидьылы. Ожысь ветеранлы ми, соин ӵош ужам эшъёсыз, сӥзиськом юн тазалык, шуд но дышетӥсь понна самой бадӟым кузьым - гажан. В. ПОЗДЕЕВ, калыкез дышетон удысысь отличник. Гожтӥськон-99 Ошпилы но мотоцикллы - почтае Гажано эшъёс, выльысь но выльысь тодады вайытӥськом: ноябрьысен газетлы дунъёс воштӥськыны быгатозы. Гуртын улӥсьёс, студентъёс, пенсионеръёс понна огъя дун али ӧжытгес каремын ке, ноябрьысен соос 54 манетэн гожтӥськоно луозы ни. Соин ик, луонлыкты вань ке, дыртэ почтае. Пенсионеръёс понна вань мукет но сюрес. Шаерысьтымы тросаз ёросъёсын газет- журналъёслы гожтӥськыны луэ пенсия чотын - чаклам дунэз люкетэн-люкетэн тырыса (кредит амалэн). Луэ-а, уг-а сояз яке таяз ёросын пенсия чотын гожтӥськыны, та ужпумез ас сяменыз эскере ини Удмурт Республикаысь Почта пыр кусып возёнъя Федерация управленилэн ёросысь ёзэз (РУФПС). Кинлэн сыӵе луонлыкез вань, лыдэ басьтэ та амалэз но. Куд-ог лыдӟисьёсмес сюлэмшугъяськытэ лотереяен шудон. Юало, кытын но кызьы со ортчоз, нимысьтыз карточкаос ыстыны кулэ-а? Соин ик ивортӥськом. Гажано эшъёс, редакцие тӥ номыр ыстыны кулэ ӧвӧл. Лотерея ортчытонъя нимысьтыз комиссия люкаса, нырысь ик тодомы, кудаз но кудаз ёросэ шонтозы ӵектэм кузьымъёс. Кылем арын ошпиез пургаос утӥзы ке но, лотереяен дуно кузьым утонлы вуоно арлы но соос бадӟым осконэн уло, шӧдске. Соинтэк-а гожтӥськисьёслэн лыдзы отын выллань но выллань тубе. Балезиноослэн но ӵыжак выль мотоциклэн ворттылэмзы потэ, луоз. Нош маин пӧртэм Селтаысь яке Ижевскысь лыдӟисьёс? Но соиз ласянь ум дыртэ али. Лототронысь нырысь ёрос лыдпусъёсын, собере со ёросъёсысь почта ёзъёслэн лыдпусъёсынызы шаръёс возьматозы ни, кудпала ворттоз мотоцикл, кытчы йырзэ шонтоз ош, кытысен куаразэ сётоз электропила. Нош шудо лыдӟисьёсмылэсь нимъёссэс шараяны юрттозы ни почтае кылем гожтӥськон квитанциосты. Тодады вайытӥськом, лотереяен шудонэ пыриськозы 1-тӥ январёзь гожтӥськемъёс. Л. МАЛЫХ, гожтэтъя но улон-вылонъя отделлэн редакторез. ТАЗАЛЫК Эмъя инкуазь Куазь кезьыт луэмен, ляб тазалыко адямиос нырзэс кысканы, кизьнылыны ӧдъязы ни. Нош кызьы ивортӥзы аптекоуправлениын, эмъюмъёсты ӝыны дунын яке воксё дунтэк басьтыны быгатозы сахарной диабетэн, бронхиальной астмаен висисьёс но ож тылӝу пыр потэмъёс гинэ. Со сяна, эмъюм дунъёс 2-3 поллы йылэмын. Валамон, толэзьёсын возьмам уждунлэн яке пенсилэн бадӟым люкетэз аптекае кылёз. Таӵе югдуре тросэз адямиос песянай-песятайёссылэсь эмъяськон амалъёссэс тодазы ваизы ини: гужем бичам турын-куаръёсты парыса юо. Тани мон, кылсярысь, кынмаса черлам нылпимес легезьпу мульыен бурмытӥсько - отын витаминъёсыз но трос, ненег мугорлы нокыӵе изъян но со уг вайы. Эмъяськоно тазьы: куасьтэм мульыосты пыргытоно, 1 литр вуэ 5-6 бадӟым пуньыен мульыез поныса, ог 10 минут ӵоже пӧзьтоно, собере та суретэз нунал ӵоже пукетоно, сисъяно. Нылпидылы сектано быдэс нунал ӵоже, 2-3 час вис карыса. Легезьпу вуэз ческыт карон понна, пушказ сакыр песок яке варення поныны луоно. Мӧйыослы пыэдлэсь, чырты висемлэсь эмъяськыны юрттоз курыт потэн (полынь) пуктэм кабак вина: турынэз кабак винаен ӟенелике тыроно, пеймыт азьын 20 нунал ӵоже пукетоно, собере сисъяно. Нуналаз 20 граммен одӥг пол юоно. Та суретэз 2-3 нуналлэсь кемагес юыны уг яра. Чырты пыктыку, сугонлэн сокез но юрттэ. Юоно сое нуналскын 3-4 пол одӥг пичи пуньыен. Кынмаса висёнъёслэсь эмъяськон амалъёс трос, таосыз - тужгес лякытъёсыз. Со сяна мон соосты эскери ас вылам. Соин ик оскисько соос тӥлед но юрттозы шуыса. Е. ПЕТРОВА. "Удмурт дуннелы" - 80 НОКУ НО УМ ЛЮКИСЬКЕ Газеттэк мӧзмыт Ми, Можга ёросысь Сюгаил разъездын улӥсь кузпалъёс Ершовъёс, семья кылдытэммы бере ик гожтӥськылӥм "Советской Удмуртия" газетлы. Нош табере, шумпотыса но мур яратыса, вожмин лыдӟыны дыртӥськомы "Удмурт дунне" газетэз. Бадӟым тау тӥледлы такем тунсыко, визь-кенеш сётӥсь, шонер но ӟеч улыны дышетӥсь газетэз поттэмды понна. Ми арлы быдэ, вис карытэк, гожтӥськиськомы та газетлы. "Твой дом и сад" приложениезлы но туж шумпотӥськомы, сое нимаз люкаса возиськом. Та нуналлы милемлы быдэн 62 но 63 арес ини. Пенсимес кема ӝегатэмен валче, беромысагес гожтӥськоно луиськиз 1999 ар понна. Коньдон пунэмаса, зоро-лымыё куазен мынӥ Сюгаил почтае но гожтӥськи сюлэмамы кельшись газетмылы. Кызьы бен чидалод быдэс арез "Удмурт дуннетэк", юртмы ик мӧзмыт кылёз ук соку. М. ЕРШОВ. Сӥземын комсомоллэн нуналэзлы Удмурт Республикаысь Кун Кенешен но Удмурт Республикаысь Правительствоен кутэм постановлениея республикаысьтымы культурая но искусствоя учреждениос пыриськозы комсомоллы 80 ар тырмонэн валче ужрадъёсы. 19-27 октябре республикаысьтымы культурая учреждениосын ортчоз творчество удысысь коллективъёслэн - Удмуртиысь Комсомоллэн премиезлэн лауреатъёсызлэн фестивальзы, Ижевскысь "Ударник" шутэтскон центрын 19 октябре луоз Егитъёслэн ӝытсы. Отын асьсэлэсь быгатонлыкъёссэс возьматозы "Ижмаш" культурая дворецысь балетъя калык театр но удмурт калык театр, кырӟанъя но эктонъя "Зангари" калык ансамбль, республикаысь культурая училищеос но мукетъёсыз. 20 октябре Удмурт Республикаысь национальной музейын "Комсомол - мынам улонэ" адӟытон-выставка усьтӥськоз. Отын возьматэмын луозы Удмуртиысь егитъёслэсь азинскон сюресъёссы, вормонъёссы, азьмынӥсь егитъёслэн тусбуйёссы. 27 октябре Республикаысь егитъёслы но пиналъёслы Гайдар нимо библиотекаын адӟытон выставка ортчоз. Отысь адӟоды комсомоллэн историезъя, егитъёслэн туала огазеяськонъёссыя но ужпумъёссыя печатлам изданиосты. Со нуналэ ик шаерамы 570 библиотекаын комсомоллы сӥзем выставкаос ортчозы. Вань чаклам ужрадъёсы комсомоллэн ветеранъёсыз ӧтемын луозы. Озьы ик, культура удысысь пинал специалистъёс пӧлын "Профессияя устоез" конкурслы йылпумъянъёс лэсьтозы. А. АНАЕВА. Сопал улоныс "куноос" Вамыштӥсько Ижевскысь Ленин нимо ульчаетӥ. Сюресэ туннэ вуттыны кулэ аспӧртэмлыко интые. Кык этажъем юртэ пырыса ик, шонер вуэмме валай. Пумитаз монэ горд басмаен чебермам корос. Возьма аслэсьтыз кузёзэ, ма, чибориё венокъёс но кинэ ке витьыса кадь сэреге шымырскиллям. Сюрес возьматӥсе соку ик ӵектӥз татысь "куноосын" тодматскыны. Тӧдьы халат дӥсяса вамыштӥм корт ӧс сьӧры. Шорам урдскиз кадь секыт омыр-шӧй зын. Тани соос, кинъёсын пумиськеме потэ вал: коридорлэн пумъёсаз шобырскыса кыллё, мугоръёссы паймымон тордэмын, ымныръёссы тодмантэм лызэктэмын. - Черодзэс возьмало, - гань-гань валэктӥз сюрес возьматӥсе. Вамыштӥм азьлань - ужан кабинетэ. Татысь зын эшшо но золгес паке, улэп адямиез пачкатэ кадь со. Кабинет шорын кык ӝӧк сылэ. Одӥгез вылын - гольык лызалэс шӧйёс. Кыллё соос артэ, воргорон но кышномурт, басмалэсь лэсьтэм жоб мунёос кадь, мугор люкетъёссы сӥньысэн вурылэмын кожалод: кызьы выдтод, озьы ик кыллёзы, пал кыл но куаретытэк. Та юрт туж дунъя аслэсьтыз "кунооссэ". Соос понна юри "дунтэк такси" висъямын. Нош малы татын "03" машина. Татысь сое уй но нунал адӟыны луоз. Самой со "дунтэк" такси ик пассажиръёссэ вайылэ городмылэн пӧртэм сэрегъёсысьтыз. Вуттэ егитсэ но тушозэ, кышномуртсэ но пиосмуртсэ, чылкак тодманы луонтэмъёссэ но. Таӵе "таксиез" шӧй нуллӥсь (труповозка) гинэ шуо калыкын. Лыдӟисьёсы валазы ни, луоз, кытчы мон вуи. Ижевскысь одӥгаз аспӧртэмлыко, отын ик интыяськемын судебно- медицинской экспертизая бюро но. Мукетъёсыз сярысь со быдэсак висъяське. Татчы вутто дырызлэсь вазь, шудтэм учыръёсы сюрыса кулэм муртъёсты, асьсэды асьсэос быдтэмъёсты гинэ. Шӧез вылласянь но, пушласянь но эскерыса гинэ валало: шудтэм учыр яке йыруж. Судебно-медицинской экспертизая бюро быдэс элькунмылы (республикамылы) одӥг луэ, нош ёросъёсын кылдытэмын но ужало солэн ёзъёсыз. Кызьы бен радъяське та бюроын ужзы? Экспертизаос ортчытъяны кылдытэмын пӧртэм отделениос, тамотологической, биологической, химической, гистологической, йыружъёсын герӟаськонъя, амбулатория но дежурной служба. Тамотологической отделениын шӧйёсты кырыло но пуштӥрлыксэс эскеро. Нош сое мургес чаклано ке, келяло мукет отделениосы. Биологическойын, кылсярысь, чаклало йырсизэс, пиньёссэс, вирзылэс группазэ. Химическойын - кызьзэс, вирзэс, пушкысь пӧртэм ядъёсты: наркотик, вина, гурт котырын кутӥськись химикатъёс. Гистологическойын микроскоп пыр учко пуштӥрлыкен воштӥськонъёссэ. Йыружъёсын герӟаськем отделениын эскеро мугорлэсь сӧсырмем интыоссэ но йыруж лэсьтэм арбериосты. Амбулатория ужа улэп кылем адямиосын. Нош дежурной служба пота йыруж лэсьтэм интыосы. Ваньмыз-ӧволэз бюроын ужа 180 пала специалист. Котькуд ёросын ужало на 3-4 экспертъёс. - Ужмы милям туж секыт но кышкыт, - валэктэ та бюролэн Вавож ёросысь ёзэзлэн кивалтӥсез (нимтулзэ газет баме гожтыны пумит луиз). - Котькуд ужасьмы кыл кутоно луэ ас ужезлы. Со йылаз-пумаз вуттэмын луыны кулэ. Со сяна, чидась но дӥсьтӥсь. Ужмы радъяське Югдурез утёнъя органъёслэн постановленизыя. Соин котькуд шӧез эскериськом прокуратураысь но милициысь юри ыстэм юанъёсъя, кудъёсыз кылдо учырез сэрттыку- пертчыку. Кылсярысь, ошиськем адями. Кылдэ юан: ошемын-а со, ачиз-а ошиськемын? Йыруж дыръя пумитъяськемлэн пытьыосыз адӟисько. Луыны быгатэ озьы но: вылласянь эскерыку, нокыӵе виштыос уг шараясько - кырылыса гинэ сӧсырмем интыоссэ шедьтоно. Соя тодыны луэ ни адямилэсь тазалыксэ, йырвандӥсьёслэсь уже кутэм тӥрлыксэс. Милиция чакла ини мугорзэ: адямилэсь улонзэ, сямзэ, семья но бускель кусыпъёссэ. Ижевскысь судебно-медицинской экспертизая бюролэн ужез вылӥ дунъяське. Но дунъя меда асьме элькун отысь ужасьёсты? Уггес, дыр. Татын но, мукет ужан интыосын сямен ик, шуг-секытъёссы уг бырыло. Нырысь ик: уг тырмо специалистъёс. Ужаны мылкыд карисьёс вань кадь, ӧвӧл соосты кутыны луонлык, уг тырмо ужан кабинетъёс. Кызьы мыным шуизы: "Эксперт пуке эксперт вылын". Уго соослы 20 ар пала сӥзё ини вӧл-вӧл выль, югыт ужан юрт. Кыкетӥ сюлэмвисёнзы: туала улонлэн куронэзлы тупась ужан оборудование. Мар веранэз ини бюролэн люкетъёсыз сярысь: резина пӧзьёс ӧвӧл, ужан интызы кезьыт, пеймыт. Озьы ке но, ужзэс уг аналто. Нош со ноку но уг быры кадь соослэн, нуналлы быдэ ог 6-9 шӧй вутто. Улонмы секытгес луэмен, котькуд ортчем нунал биниське кадь пӧртэм кышкыт йыружъёсын, шудтэм учыръёсын. Сое сэрттыны- пертчыны нуналысь нуналэ шуг луэ. Статистикаез чакласа, кылсярысь, ортчем арын гинэ элькунамы кулэмын 5584 адями. Удмуртимы "данъяське" асьсэды асьсэос быдтӥсьёсын. Тросгес пумиське ошиськон. Элькунамы ортчем аре со вал 960 учыр. Винаен сэрен улонысь кошкиз 408 мурт, кынмыса яке тылын сутскыса - 331 мурт. Тросгес куло шоро- куспо арлыдо воргоронъёс. ... Секыт малпанъёсын вамыштӥ та бюролэсь ӧс кусыпсэ. Зэм но, кӧшкеманы луымон инты. Жаляса верано, татчы вуэм, "куноос" пыраклы югыт дуннеен люкисько ни. Вамышлы быдэ йырам юан шуккиське: - "Малы? Малы соос ӧз нюръяське дунне вылысь тужгес но бадӟым узырлыкен - улонэн?.." А. Митрофанова, Удмурт кун унивреситетысь студентка. Оскон улэп ай ... Сое адӟыса, учкисьёс тодазы ваё юись Оксиез, адӟемпотостэм Динаез, гольтыръяськись Мария Васильевнаез, Марта артисткаез, либыт сямо Чурай кенакез, огшоры колхозницаез Надяез... Нош улонын со - Ольга Слесарева, "Ижмаш" культура дворецысь удмурт калык театрысь артистка. Сцена вылын Ольга Тихоновна шудэ ни куамын ар пала. Та дыр куспын кӧня спектакль улӟытэмын, учкись доры вуттэмын! Соос пӧлын - "Чебервай кенак", "Зина", "Зангари", "Аннок", "Полынь", "Мон оскисько", "Паймымон адями" но трос мукетъёсыз. Та нуналъёсы Ольга Слесаревалэн творчествоезлы сӥзем ӝыт ортчоз. Ачиз сярысь тазьы маде актриса: - Вордски мон Алнаш ёросысь Карйыл гуртын огшоры семьяын. Сцена монэ узатэ вал пичи дыръям ик. Мылысь-кыдысь ветлӥ школа ансамбле, пыриськылӥ пӧртэм смотръёсы, концертъёсын потай бускель гуртъёсы. Школаез йылпумъяса, дышетсконме азьланьтӥ культпросветучилищелэн библиотекарьёсты дасясь люкетаз. Сое пырпотыса бертӥ вордскем палъёсам ик. Ужай клублэн кивалтӥсез луыса. Но мылкыды таин ӧз буйга - бурдъёсы нуизы монэ Челябинскысь культурая институтэ. Отысь берытски режиссёрлэн дипломеныз. Ужалляй Ижысь пӧртэм школаосын. Нош али мон библиотекарь луыса тыршисько Ижысь 59-тӥ школаын. Со сяна, татын та арозь радъялляй пинал калыклэн театрезлэсь ужзэ. Туэ басьтӥськи музей борды. Милемын ик кылдытэмын "Душечка" ансамбль - вань дышетӥсьёс отын мылысь-кыдысь кырӟало-верало. - Тодады вае вал нырысетӥ спектакльдэс... - Со вал 1968-тӥ арын. Соку мон ужасько на вал Карйыл клубын. Пуктӥм "Аннокез". Калык туж шуныт, шумпотыса пумитаз. Тодӥсько на: ёросысьтымы ик куашкам гуртын спектакль бере лыктӥз ми доры кылбурчи Яков Майков но, тау карыса, киосмес ӟырдатылӥз. Собере эшшо но золгес бурдъяськи, учкисьёсын выльысь но выльысь пумиськылэме потыны кутскиз. - Яратоно спектакльды но рольды? - "Зангари". Мон отын возьматӥ арлыдо артисткаез Мария Васильевнаез. Туж капчи, серекъятӥсь но крезьгуро та спектакль. Таӵеосыз сюлэме золгес пыӵало. - Кыӵе рольын асьтэдыз тужгес зол возьматыны быгатӥськоды? - Яратӥсько ас арлыдме но пересь муртъёсты. Озьы ик туж ярало трос ветлӥсь, вырись героиняос. - Нош вал-а сыӵе учыръёс - рольдэс быдэсак усьтыны ӧд пӧрмытэлэ? - Кызьы ӧй вал? Котькуд артистэн озьы луылэ, дыр, малпасько. Мыным тани али ке но валантэм "Льӧмпу улын пумиськон" спектакльысь Надялэн ролез. Бызем нылкышно берытскыны медэ вуж туганэз доры. Малы со озьы каре, мае воштыны турттэ на улоназ? Мон сямен, со сӧре гинэ аслэсьтыз улонзэ, вӧсь каре мукет адямиосты но. - Та верамды бере, Ольга Тихоновна, юан ачиз куриське: кыӵе тӥ улонын но сцена вылын? - Мон улонам но артистка ик кылисько: угось быдэс дуннемы театр кадь ик, олокыӵе но рольёс шудыны кылдылэ. Огез гинэ висъя соосты: улон куре асьмелэсь азьланез сярысь лад-лад малпаськыса, ӟеч-ӟеч чакласькыса шудэммес. Театре ветлэме мыным туж юрттэ пиналъёсын ужакум но. Ведь котькуд нылпилэн сямыз, малпанъёсыз аслаз. Котькудзэ шонер валано, либыт куаретоно, мултэс ушъяно ӧвӧл, шуныт кусыпъёс кылдытоно, соослы матысь эш луоно. - Сцена вылын шудыкуды, тӥ понна ма луэ валтӥсез? - Учкон залын - тыл. Мыным одно адӟоно адямиослэсь ымныръёссэс, чилясь яке мӧзмись синъёссэс. Тылтэк мон сураськисько. - Шудэм аръёсты шоры учкыса быгатӥськоды-а вераны, спектакльын кыӵе интыез тӥледлы "пыдзэ пуктылэ" на? - Туж шугъяськисько жугиськонъя мизансценаосын. Жугиськыку вераськыны секыт йӧтэ. - Тӥ понна мар со - театр? - Музъем кӧзоно чигемен чиге калык чидан но, оскон но. Тросэз уг адӟо ни улонзылэсь азьпал сюрессэ, ышто лулчеберлыксэс. Таӵе шуг-секытъёс дыръя мыным выль кужым, капчи мылкыд кузьма яратоно театре. Со - мынам улонэлэн осконэз, чеберез. Но берло дыре театр понна но вуэмын секыт нуналъёс. Со пытсаськиз ке, асме ачим ышто. Зэм, осконэ улэ на: улэп луим ке, ум кулэ. - Ольга Тихоновна, кыӵе кузё кышно но анай тӥ? - Мон яратӥсько пӧраны. Тужгес но - удмурт сиён: перепеч, шаньги, кыстыбей. Озьы ик - чильпаськыны, керттӥськыны. Нош анай, мон малпамъя, котьку но сюлмаськись, яратӥсь луыны кулэ. - Улонын, тӥ чакламъя, валтӥсез мар луыны кулэ? - Улон пужъятэм ӝӧккышет ӧвӧл, пе. Котькыӵе секыт мед луоз - адями сое котьку но данъяны но дунъяны, ассэ ачиз шедьтыны, бӧрсяз пичи ке но пытьы кельтыны кулэ. Мар бен, мон малпамъя, Ольга Слесарева шедьтӥз ас сюрессэ, нош "Ижмаш" культура дворецысь удмурт калык театр - быгатӥсь, кужмо, дано артистказэ. Та юн герӟетэз пертчыны медам быгатэ нокыӵе шуг-секытъёс. Нош Ольга Тихоновнаез юбилееныз ӟечкыласа, сӥземе потэ солы выль спектакльёс но учкисьёслэсь мылкыдэз ӟырдатӥсь кылъёссэс. Алевтина Митрофанова, Удмурт кун университетын дышетскись. Шӧкыч Сантӥ Барбара (Серемес мадёс) Ужысь жадьыса бертӥськиз. Кышнолэсь пӧзьтэм шыдзэ ог тэркы нюлыштӥ но телевизор вӧзы интыяськи. - Со ящикедлэсь мӧзмиськод-а, шай-а,- котьку сямен ик нукыртыны кутскиз кузпалы. Мон котьку сямен ик кылымтэ улсы кариськи. Яратоно сериалме ноку но учкытэк кылеме ӧвӧл. Ма, нимыз но тумошо. Мынам кышноелэн кадь ик: Сантӥ. Уг тодӥськы малы, но телевизорын та кыл вӧзы Барбара шуыса ватсало на. Тумошо кино, тужгес но ченгешемзы. Ӵапак кузпалы кадь кесясько. Кылзӥсько, учкисько, нош аслам синъёсы пумен золгес но золгес кынисько ни. Экранэ потӥзы Иден но Мейсон. - Нош ик панталонъёстэ валес вылэ кельтэмед,- кесяське Иден.- Ноку но уд утялтӥськы! - Кыӵе панталонъёсме?! - паймиз Мейсон.- Мынам ноку но соос ӧй вал. - Иське, со Крузлэн. - Мар шуид? - Ӧй, номыр ик ӧй. - Ӧвӧл, тон Крузлэсь нимзэ поттылӥд. - Тыныд озьы кылӥськиз, дыр. - Мон возьмато тыныд... - Мае тон мыным возьматод, липеттэм йыр. - Эшшо одӥг кыл верад на ке, кымыстэ шорияк пилё. - Ачид эн вазьылы. Тынад атаед - осёл, анаед - мумы осёл, нош тон... - Сямыя мон соослы чик но уг кельшиськы. - Бен, тон соослы уд кельшиськы, малы ке шуоно, тон осёл ӧвӧл, тон - парсьпи. - Адямиез мыскыллямед понна, мон тонэ тюрьмае пукто. Туннэ ик ёрос судэ вазиськон гожто. - Гожты. Коть Америкалэн президентэзлы Билл Клинтонлы. - Мар-о ужез мынам ӵужмуртэлэн? - Ӵужмуртэдлэн?! Тон эшшо Маргарет Тэтчерез анай шу на ай. - Эн иса мынэсьтым ӵужапайме! - Ишь, тон. Туж умой улӥськод. Тыныд татчы Виктор Черномырдинэз ваёно. Со тыныд чаляк возьматысал, кызьы кризис лэсьтоно. - Маиныз-о ӧз кельшы мынам кудое? Тырмоз ӵыжы-выжыосы котыре тэбиньыны. - Кылзы ай, тон висиськод ук, тыныд эмъяськыны кулэ. - Бен, кулэ. Малы ке шуоно, тон пыр мыным олокыӵе но черъёс алязы: сифилис, триппер, гонорея но сальмонеллёз. - Сальмонеллёз - со курег чер. - Тынад мар ужед! Куспетӥ карыса, монэ пельпумтӥм кыскась луиз. - Микол, султы! - кесяське кышно. - Осто, осто, воксё со ящикед вӧзын ик изиськод ук. Ӵукна вуиз ини. Ужаны уд мынӥськы шат? Зэмзэ но, креслоям ик изиськем. Кышно телевизорез кысӥз, луоз. Султыса луть-лать кухняе вамыштӥ. - Нош ик панталонъёстэ валес вылэ кельтэмед,- кесяське кузпалы,- ноку но утялтэмед ӧвӧл! Пумитаз номыр но ӧй вазьы. Чай юи но уже вамыштӥ. Мынӥсько ульчаетӥ но малпасько: "Кыӵе панталонъёс сярысь меда вераз вал кышное? Аслам ноку но сыӵе дӥсь нуллэме ӧвӧл угось. Тумошо, однако". Ф. МИННИГАРАЕВ. Серем пыр Тюрьмаын пукисьлэн кышноез отын ужась врачлы вазиське: - Доктор, мынам картэлэн тазалыкез туж ляб. - Ма, со так но самой капчи ужез гинэ быдэсъя, - вера врач, - бумагалэсь конвертъёс лякылэ. - Тау тӥлед, доктор. Сюлмы ик ганяк луиз. А то со шуэ уйёсы, пе, кыӵе ке туннель гудӥсько. х х х Одӥг складлы кивалтӥсь кулэ луэм. Лыктэ ӟуч, ветлэ, учке но уже пырыны пумит луэ - ужез укыр трос. Собере вуэ бигер, таиз но уже пырыны пумит - уждун ичи тыро. Лыктэ удмурт. Ветлэ, учке, юалляське но пайме: - Кызьы озьы? Тӥляд татын уждун но тыро на шат? х х х - Паймоно кадь, Иванов весь пӧйшуръёс сярысь гинэ веросъёссэ гожъя. - Мар отын валантэмез - пӧйшуръёс лыдӟиськыны уг быгато ук. х х х Верасько кык эшъёс: - Кыӵегес сигарет кыскиськод? - Тон кадь ик, муртъёслэсьсэгес. х х х - Кызьы меда коньдон воштӥськон сярысь ивор шарае ӧз поты ай? - Коньдон ужпумъёсъя министр но солэн юрттӥсьёсыз кышнооссэс туалетазы ворсаллям. х х х Кык эшъёс командировкаысь берто. - Ойдо ай мон доры, - вазе одӥгез, - миськом та учырез. Кузё усьтэ ӧссэ, адӟе тодмотэм пиосмуртлэсь катаосэ. - Ма каромы? - юа эшез. - Шыпытгес тон, ойдо кухняе. Водкамы куинь муртлы уз тырмы. х х х - Кум, малы-о парсед протезэн бызьылэ? - Ма, студень сием потӥз. Со понна быдэс парсез уд ванды ук. Юрий Маслюков - Удмуртиын Толон республикаямы вуылӥз Россия Федерациысь Правительстволэн Тӧроезлэн воштӥсез Юрий Маслюков. Самолётэн вуыса, со соку ик кошкиз Воткинск городэ. Отын ортчиз обороналы ужась, му вӧй поттон но газ кыскон тӥрлык лэсьтӥсь бадӟым предприятиослэн, эстӥськон сётӥсь но мукет удысъёслэн кивалтӥсьёсынызы кенешон. Вераськон мынӥз Россиысь валтӥсь заводъёсын ваньбур поттонэз йылэтон но кусыпъёсты умоятон амалъёс сярысь. Юрий Дмитриевич рос-прос тодматскиз "Воткинский завод" огазеяськонлэн туала луонлыкъёсыныз. Нуназе бере вице-премьер ужаз Ижевскын. Со пумиськиз ёрос администрациослэн, пӧртэм огазеяськонъёслэн кивалтӥсьёсынызы, депутаъёсын. Юрий Маслюков озьы ик вуылӥз "Метеор" заводын радъям адӟытонэ. И. КРИЧЕВ. Коньдон возисьёслы Кылем арняе Удмурт Республикаысь Кун Кенешлэн Тӧроез Александр Волков пумиськылӥз Россия Федерациысь Центральной банклэн Тӧроеныз Виктор Геращенкоен. Россия Федерациысь Центробанклэн директоръёсызлэн кенешазы "Евразия" акционер банкысь вкладчикъёслэсь коньдонзэс Россиысь Сбербанклэн Удмуртиысь банказ выжтон сярысь ужпум юнматӥзы. "Евразия" банк - Удмуртиын нырысетӥез банк, кудӥзлы сётэмын сыӵе луонлык. Табере "Евразия" банкысь вкладчикъёс коньдонзэс мылкыд каремзыя быгато Сбербанке выжтыны яке Удмурт Республикаысь Правительстволэн банк-агентэныз ик ужаны. Озьы ик эскеремын Удмурт Республикаысь мукет бадӟым банкъёслэсь вкладъёссэс Россия Федерацилэн Сбербанказ выжтон сярысь ужпум. Удмурт Республикаысь Кун Кенешлэн пресс-службаез. 02 ивортэ Коньывуон - шимес толэзь Мукет сямен вераны но уз луы ни, дыр. Ӝыны толэзь куспын шаерамы 21 адями виемын, 14-ез йыруж эскеремын. Вить учыре быдэн кык вием адями шедьтэмын. Улонмы ялан секыт луэмен но куазь жоб улэмен, йырвандӥсьёс вирсэртэм кадь луо. Соос нокинэ уг жаляло, адямиосты туж зол курадӟытыса быдто. 12 октябре Ува посёлоклы матысь нюлэстӥ воргорон пуныеныз калге вылэм. Ньыль пыдо эшез соку гинэ бугыръям музъем дорын ыргетыны ӧдъям. Воргорон кышкатскем, ӝегатскытэк милициын ужасьёсты ӧтем. Бугыръям музъемысь шедьтӥзы кык пилэсь шӧйзэ. Йырвандӥсьёс соосын зол гинэ "шудӥллям", шӧдске. Одӥгезлэн чиньыосыз тӥямын, нош мукетызлэн ӝыны йырыз ӧвӧл, мугоръёссы лыз-вож каремын, со сяна, трос пол пуртэн бышкамын. Одӥгзэ соку ик тодмазы, нош мукетсэ - кӧня ке нунал ортчыса. Егит пиосты милициын ужасьёс утчало ни вал 4 октябрьысен. Та дыре одӥгез йырвандӥсь кырмемын, шуыны луоз, мукетъёссэ утчало на. Нош ма вылэм 4 октябре? Уваысь уголовной розыскын ужасьёслэн чакламзыя, вием пиос наркотик вузанэн выриллям. Со нуналэ одӥгез пиен наркоман пумиськем. Со усыкмытӥсь дурманэн суреттэк нунал но улыны уг чида ни вылэм. Пияш куронзэ быдэстыны ӧз быгаты. Татысен ик вань йыруж пуромиз. Эшъёсыныз ӵош пияшез трос курадӟытӥзы, жугизы, чиньыоссэ позыръязы, виизы. Кулэм шӧез пикап машинаен посёлок сьӧры поттӥзы но нюлэскы ватоно кариськизы. Тодмоезлы гу гудыкуз малпаз меда наркоман ачиз но отчы шедёз шуыса. Валатскемез бере пегӟыны турттэ вылэм но... бер вал ни. Бӧрсьысь бӧрсе ыбем солэсь ӝыны йырзэ "пазьгиз". Шимес пилемъёс Ува палан бергало на вылэм. Берёзовка гурт вӧзысь муш бакчаын нош ик ыбылӥськем куара кылӥськиз. Ижевскын улӥсь 38 аресъем Петр эскерыны вуиз муш бакчазэ. Отысен ик пумитам сое кышноезлэн агаез. Воргорон та дыре нокытын уг ужа вал. Ма бордысь потӥз ӵыжы-выжыослэн керетонзы, туннэ шуг вераны. Петр, муш бакчаысьтыз пегӟыкуз, куинь пол ыбемын вал, эшез нош, корка пырыса, ассэ ачиз ыбем. Али одӥгез гинэ умой валамон, ӝӧк вылысь ӝыныё кылем ӟенеликсэс соос ноку уз веръялэ ни. Воргоронъёслэсь но наркотикъёсын герӟаськем пиослэсь быремзэс кызьы ке валаны луоно на кадь, нош ма понна сьӧлыкамтэ нылпиосыз виылонэз? 11 октябре Сарапул городысь Азин урамысь одӥгаз юртын шимес йыруж лэсьтэмын. Кышномурт ӵемысь юылэм. Матысь кусып возе вылэм азьвыл тюрьмаын пукем 45 аресъем воргоронэн. Солэсь ик куинетӥ пиналэз но вордскемын. Юон, керетон... Семьяысь 13 но 15 аресъем вынъёсты пичи пиналэз азьын ик вием, кышно луонзэ пуртэн бышкам. Кӧня бӧрдӥз, куалекъяз пичи пияш кулэм агайёсызлэн комнатаязы быдэс уй ӵоже. Ӵукна гинэ та квартираысь мозмытскыны быгатӥз. Сӧсырмем анайзэ больницае нуизы. 15 октябре та выллем ик йыруж лэсьтэмын вал Ижевск городын но. Тюрьмаын пукем воргорон вииз кышно луонэзлэсь 79 аресъем анайзэ но 14 аресъем нылзэ. Егитсэ нырысь кӧтаз пуртэн бышкалтӥз, собере чыртызэ вандӥз но мурӝолэ ватӥз. Воргоронлэн сьӧсь мылкыдыз пуромиз, пересенызы керетэм бере. Сӥзьыл нуналъёс пумен вакчи луо, нош йыртэмасьёслэн лыдзы йылэ. Чаклаське, но тодады возе, секыт улонэз кабак винаен уд капчиёмыты. Ю. БАЙБЕКОВ. Сак луод, кема улод Шаерысьтымы сюресъёс вылысь югдурез ож вакытэн ӵошатыны луоно. Туэ укмыс толэзь куспын гинэ 1279 шудтэм учыр пусъемын, 182 адями кулӥз, 1448-эз сӧсырмиз. Машинаен ворттылӥсьёслэн лыдзы нуналлы быдэ йылэ, соин ик пыдын ветлӥсьёслы тужгес но сак кариськоно. Угось 40 процент пала учыръёс пыдын ветлӥсьёсын герӟаськемын. Ялан кытчы ке дыртӥськом, кытӥ кулэ ӧвӧл, отӥ ик сюрес вамен выжиськом. Нош ма понна, кин понна нимысьтыз выжон интыос пусйылэмын меда? Озьы 23 сентябре Ижевскысь Октябрьлы 10 ар урамын, машина улэ сюрыса, 55 аресъем воргорон кулӥз. ВАЗ-21099 машиналэн кузёез сое дыраз ӧз синйылты, ма, ӧз но малпалля сюрес вылысь адямиез пумитаны. Уго артэгес ик выжон инты вал. Берло дыре адямиос азгынмо ни, лэся. Малпало, машина вӧзтӥзы ортчоз. Тужгес но йӧно луо кудӟемъёс. 93 шудтэм учыр дыръя соос машина улэ сюремын. Ма веранэз шӧмаськем мурт сярысь. Сазь йырын но ваньзэ кылыса-адӟыса ум вуттӥське. Сюресэз выжыкумы, машинаос шуак вуо. Соку ини шудтэм учыр но "вордске". Сӥзьыл куазь зоро-кото улэ, нуналъёс вакчиёмо. Городысь тросаз урамъёсын юбоосысь тылъёс уг югдыто, адямиослэн дӥсьсы пеймыт. Сыӵе дыръя ваньзэс алэм потэ: машинаен ворттылӥсьёс, калленгес ширтэ пеймыт урамъёстӥ, пыдын ветлӥсьёс, югытгес дӥсь дӥсялэ. Нош эшшо но умойгес луоз, сюресэз выжемдылэсь азьло машинаослэсь ӟеч-ӟеч эскериськиды ке. Калыкын юнме уг шуо, дыр: "Каллен мынод, кыдёке вуод". А. КУЗЬМИН. Возьматозы принцессаосыз 17-тӥ октябре нырысетӥ учкисьёсызлы ӧссэ усьтӥз республикаысьтымы Мунё театр. 64- тӥез театральной сезон кутскиз "Прыгающая принцесса" спектаклен. Кызьы тодӥськоды, туэ сентябрьлэн кутсконаз артистъёслэн та ужзы возьматэмын вал Екатеринбургын, Уралысь мунё театръёслэн ВИИ фестивалязы. 18 коллективен артэ асьме мунё театр возьытэ ӧз усьы, нимысьтыз дипломен бертӥз. Арня нуналэ - театрын премьера. Нырысьсэ пуктӥське Шергинлэн выжыкылэзъя "Золоченые лбы" спектакль. Кызьы ке эксэй воргоронэз серем карем. Нош воргорон со понна пунэмзэ берыктэ: "зарния" (шонерзэ ке, тэкитэн зыра) эксэй кышнолэсь но нылзылэсь кымессэс. Валамон ни, калык серекъя соосты. Спектакльлэн вакчияк сыӵе пуштросэз. Матысь дыре ик учкисьёс адӟозы "Дело в шляпе", "Чудо-машина", "Дюймовочка", "Принцесса на горошине" спектакльёсты. 24-тӥ-30-тӥ ноябре Мунё театрын луоз пиналъёслы сӥзем арня. Нош Выль арлы сӥзьыса, Белгородысь режиссёр Ирина Лебедева дася "Морозко" выжыкылэз. В. ЛАГУНОВ. Курыто-ческыто аръёс Газетлэсь бамзэ, ымзэ-нырзэ, тусбуйзэ кылдыто отын ужасьёс, журналистъёс. Лыдӟись дыше кыӵе ке нимлы, сое ки бервылызъя, гожтон манерезъя но тодманы кутске, солэсь ялан маке тунсыкозэ возьма ни. Сыӵе журналистъёс пӧлысь одӥгез вал Василий Иванович Иванов, Кизнер ёросысь Макан гуртын вордскем, будэм адями. Газетамы ужаны со 1937- 38 аръёсы ик кутскылӥз. Маньчжуриын ожмаськемез бере, 1947 арысен 1978 арозь (пенсие потытозяз) нош ик редакциямы ужаз, иворъёсъя отделэн кивалтӥз. Лыдӟисьёс понна тужгес дуноесь вал солэн спорт, милиция но искусство удысъёсъя гожъямъёсыз. Милиционеръёс сярысь 1962 арын "Палэнэ эн коже" книгаез потӥз, нош 1976 арын калык театрысь артистъёсыз данъяз "Несущие людям радость" книгаеныз. Василий Ивановез тодӥсез тодэ на, луоз, прозаен басня, фельетон гожъямезъя но. Та журналистлы удалтӥз: вӧзаз вал туж сюлмаськись, котькыӵе секытэз чиданы быгатӥсь мусо кышноез. Соос кык пи но ныл будэтӥзы, со сяна, Анна Георгиевна ас вылаз ныпъяз апаезлэн кык сирота нылпиосыз сярысь сюлмаськонэз. Ньыль ар ӵоже гожтэтъёс гинэ адскисьтэм нюжа сямен герӟазы соослэсь кусыпъёссэс. Василий Иванов тямыс ар армиын вал, нош шудэзлы ки улысьтыз пегӟыны ӧз сёты. Ог- огед доры кузь но ӟугыриё сюрес сярысь маде Анна Георгиевна Иванова. Милям вордскем гуртъёсмы воксё артэ гинэ, куинь иськем мында вань ик, дыр. Со, Иванов Василий, Маканысь (Макан-Пельгаысь) мон Бызараысь (Старый Кармыжысь). Вордскем гуртъёсмы укыр матын ке но, огазе луон сюресмы ту-уж кузь вал: со вордскем дырысен куамын ар ортчиз, мон вордскем дырысен - кызь куинь ар. Мерталэ али та аръёслэсь кузьдалазэс. Улон сюресэз котькинлэн аслаз. Инмар озьы гожтэм-а, ачид бырйиськод-а, со сярысь нокин но уз вера, дыр. Мынӥськод, мынӥськод - азьпала кытчы вуэмдэ чик уд тодӥськы. Та кык адямиослэн сюрессы куддыръя воксё артэ но вуылӥллям, собере олокӧня сюрс иськемъёслы палэнскиллям... Васялэн улонэз пичиысен ик туж шукрес, нюко-гопо вылэм, ачиз озьы вералляз. Аслэсьтыз атайзэ кызьы шуыны уг толы вал. Граждан ож вакытэ оло тӧдьыос, оло гордъёс Чукырча (Васильево) гурт палан ыбиллям. Нош со усто вуриськись вылэм, палэнысь гуртъёстӥ но ветлэм вуриськыса, доразы но вайыло басма кесэгъёссэс. Со сярысь мур лулӟылыса, вералляз Васялэн анаез. Кыкетӥзэ со бызем Макан пилы ик. Сюратаез Васялэн юыны яратылэ вылэм. Юртсэс вузаса, Можгае улыны кошкиллям. Татын туж ёрмыса улӥллям. "Уно пол кураськыса но ветлылӥ, сютэм но кӧлалляй, - шуоз вал Вася. Та аръёсыз сярысь мылкыдтэк вералляз, ӝожомылӥз. - Гужем вуэ ке, узы-боры бичаллямы, базарын вузаса, нянь басьтӥськом, куддыръя пичильтык кампетлы кыле на". Одӥг учыр сярысь верамзэ тӥледлы но мадеме потэ. "Микол выныным одӥг гужем шундыё нуналэ туж шумпотыса узыяны мынӥмы. Анаймы киямы сётӥз чылкыт, юг-юг тӧдьы одӥг гинэ кутонэн посуда. Узы соку трос гинэ бичамы, тырвыло. Шумпотыса базар пала чальтчиськом, табере уно уксё поттом, котьмарлы тырмоз. Базаре вуыса, узыенымы сылӥськом ни. Басьяськись нылкышноос ми пала вуо но сяласькыса кошко. Милемын артэ ик сылӥсьёслэсь узызэс басьто, милесьтым - уг. Озьы ми чик вузаськытэк, нырмес кыскаса дорамы бертӥм. Тодӥмы шат ми, со юг-юг тӧдьы посудамы пичи пиналъёслэн педло потан горшоксы вылэм шуыса. Анаймы со горшок шуоназы йӧл но, вӧй но возе вал. Сыӵе чебер, тӧдьы буям горшоке педло поталод шат? Анаймылы кин ке валэктэм, вылды, со горшокез милемлы узы бичаны ӧз сётъя ни". Можгаын дышетскемзэ тодаз вайыкуз, одно ик одӥг удмурт дышетӥсез - Елизавета Игнатьевнаез сярысь туж ӟечен гинэ вералля вал. "Оло яратыса, оло жаляса то шорем тӧдьы нянь сётэ, то лушкемак киям пряник донге вал". - Васи, тон визьмо пияш, дышетскондэ эн аналты, сизьым классэз быдтӥд ке, оло, педучилищее пырыны быгатод, - визьмалляз, пе, Елизавета Игнатьевна. Огинын, ӵош, улыкумы, Вася монэ но тодматӥз яратоно дышетӥсеныз. Педучилищелы куамын ар тырмемез пусйыку, ми ӵошен пырамы со доры куное. Педучилищеын дышетскыкуз луэм учыр сярысь но вералляз. "Максимов эшеным мыныкумы ялонэз адӟим: "Кырӟанъя самодеятельной кружоке мылкыд карисьёсыз лыктыны ӧтиськом. Кырӟасьёсыз дунтэк сюдозы".- Васи, ойдо мыныса утчалом, оло, мар ке пӧрмоз, - кӧтурдэсам чиньыеныз донгыса, Иви эше кит-кит серекъяз... Ӝӧк сьӧрын пукисьёсыз ӧй но адӟы кадь. Кутски уг, кӧня куарае тырме, кесяськыса кырӟаны: Анае гурзэ эстэм, дыр, но, Муръётӥз ӵыныз потэ, дыр... - Тырмоз, пияш, ми кылӥмы кырӟамдэ, табере возьма, кулэ ке луид, вазём, шедьтом тонэ, - озьы либытэн гинэ вераз ӝӧк сьӧрын пукись пиосмурт. Ӧтись ӧз луы. Ма, мон одӥг кырӟанлэсь но гурзэ пуктыны уг тодӥськы вал, азьло но берло но. Со понна ми Иви эшеным та нуналэ ноку но сиылымтэ, йӧлэн, сакырен ческытатэм тари ӝук бадӟым тэркы тыр сиим". Та учыр сярысь веракуз, кузпалы синвуосыз потытозь серекъя вал. Педучилищеез быдтэмез бере Василиез Бадӟым Уча ёросысь Пазял школае ыстӥллям. Отын кема ужамтэ. Оло мӧзмеменыз, оло мар, милям гуртамы, Кармыже, начальной школае ужаны вуэм. (Маканын та вакытэ школазы ӧй на вал.) Та аръёсы ик анаез, кузпалыныз люкиськыса, одӥг пизэ солы кельтыса, куинь пичиоссэ бордаз басьтыса, берен Макан гуртаз бертэм. Азьло улэм, вузам юртсы туж зол, пе, вал. Куинь укноен ӝужыт корказы, улыно-вылыно кеноссы, гидъёссы, йыг-йыг юбоосын юнматэм капкаоссы (бадӟымез но пичиез). Табере улоно луизы самой начар, куштӥськем юртын, талэсь урод юртъер быдэс гуртазы ик ӧй вал кадь. Мон сое ас синмыным адӟи. Кармыж школаын ужакуз, Вася малы ке но татын, милям гуртамы ик, патерын улӥз, ӵыжы-выжыосмы дорын. Оло анаезлэн юртъерезлэсь керпотыса, оло нуналлы быдэ куинь иськемез ветлэмез потытэк - уг тодӥськы. Быгатэмезъя анаезлы, вынъёсызлы, сузэрезлы дӥськутэн, сиён-юонэн юрттылӥз, дыр, - ма, кызьы озьытэк. Ачиз но, али гинэ ужаны кутскем адями, туж валаса, солы гинэ тупась дӥськут нуллӥз. Солы Бызараын синмаськисьтэм мурт ик ӧй вал,дыр. Дышетӥсьлэн патераз мынэсьтым кык ареслы пичигес Мико нимо пизы вал. (Милям гуртамы Коля нимез Мико шуо вал. Азьпалтыса верало али: табере Мико, Николай Петрович, Поляк гуртын улэ, милям гуртмылы ньыль иськемын.) Со Мико пыр дышетӥсьсы сярысь котьмарзэ тодӥськом вал. - Адӟысалды ке, дышетӥсьмы кыӵе чебер пужыятӥське, - Мико аслэсьтыз паймемзэ милемлы вера. - Ма, писомурт пужыятӥське шат, - ми, пичи нылъёс, солы ӧм оске. Милям гурто пиосмы нокин сыӵе киужен уг выро: чорыгало, кут кутан бордын выремъясько. Одӥг пол, дышетӥсь Маканаз кошкон нуналэ, ми юри пыримы пужъятэмзэ учкыны. Валесэз ӝикыт шобыртэмын одеялэн, со вылын кроватьлэн огпал пумаз кык миндэр. Одӥгез лашкин понэмын, мукетыз урдэслань. Тӧдьы бӧз миндэр пуйы вылын чагыр-лыз сӥньысэн "С Добрым утром!" гожтыса гладью пужыятэмын. Шобретлэн улӥяз - тӧдьы басма вылын ик горд но сьӧд сӥньысъёсын озьы ик гладью пужыятэм подзор, таизлэн пужыез мукет. Милям апайёсмы огзы но гладью уг пужыятӥсько, соос кечат киросэн гинэ пужы пуктыло - ӵушкон пумъёсазы ӝӧккышет дуръёсазы олокыӵе но пӧртэм пужыос утчало вал, одӥг ӵушкон но мукетызлы медам кельшы. Котькуд казак ныл аслыз ас киыныз лэсьтэм пирдан дасяны кулэ, сотэк кыӵе казакпи со шоры учкоз. Нош пиосмурт дышетӥсьлэн таӵе чебер пужыятӥськыны быгатэмез милемыз воксё паймытӥз. (Дырез азьпалтыса ик верало али: Василий Ивановичлэн пужыятэм подзорез мон доры вуиз, али но синпельлы возисько, тунсыкъяськисьёслы возьматыны быгато. Сое мыным Васялэн анаез кузьмаз, со но весь синпельлы возем кулытозяз.) Гуртамы чебересь, визьмоесь нылъёс котькыӵе ужез ужаны быгато, нош дышетскемзы ӧвӧл - гуртамы соку школа вылымтэ - артысь Возьпум школае ветлэмзы потымтэ. Милям гуртамы одӥг гинэ грамотной пияш вал, со Нынекын ШКМ-ын дышетскем Сергеев Степан Сергеевич. Кык эшъёс, Василий Иванович но Степан Сергеевич, куспазы вераськыса, огъя малпанэ вуиллям: гуртамы, пе, ӝыт ужась ужась школа усьтоно, ликбез (та кылэз тодӥсьтэм мурт ӧвӧл, дыр). Егит нылъёсын но куд-ог нылкышноосын вераськыса, сыӵе школаез усьтӥллям, мылкыд карисьёс байтак гинэ луэм. Кызьы улод дунне вылын одӥг буква но тодытэк, лыдӟиськыны, гожтэт гожтыны быгатытэк? Солдатэ кошкем казакпиос мӧзмон дыръязы яратоно нылъёссылы гожтэт ысто, нош соосыз ответ сётыны уг быгато. Кызьы, кинлы оскод аслэсьтыд сюлэмдэ усьтыны, мурт киын гожъяны? Соин но, дыр, уноез нылъёс мылысь-кыдысь ветлыны кутскизы ликбезэ. Та школае мынам Сандӥ апае но ветлӥз. Мон солэсь книгазэ али ке но син азям пуктӥсько. Нимыз "Выль сюрес" вал, Куӟебай Гердлэн. Со книгаез анаеным ӵош лыдӟылӥмы. Малы ке но йырам туж юн пыӵаса кылемын одӥг кылбурысь ньыль чурез: Веть али вал татын Губырес пужымъёс. Тол шимес уйёсы Вузӥзы кионъёс. Та чуръёсыз лыдӟыса, мынам син азям быдэс суред пуксьылӥз соку: мон ачим со сьӧд нюлэс пушкын кадь... Кык арлы вазьгес вуысал ке Василий Иванович милям школаямы, мон солэн дышетскисез луысал, но мон, начальной школаез быдтыса, Нынекысь семилеткаын дышетскисько ни вал. Тазэ мон ачим ӧй адӟы, кузпалы верамъя но туспуктэмъя гинэ тодӥсько. Милям гуртамы кыӵе ке журналист ветлэм, школамы сярысь гожъям. Василий Ивановичез курем: гожты, пе, улонысь кыӵе ке учыръёс сярысь. (Мон со журналист сярысь тодӥ ини, Ижын улыкум, со Михаил Дмитриевич Сабреков вылэм, "Удмурт коммуна" газетын ужась.) Солэн ӵектэмез иназ луэм кузпалылы. Та аръёсы котькытын колхозъёс кылдытэмын вал ини. Дышетскем муртъёсыз чиньыен лыдъяны луысал. Грамотной шуоно муртъёс - со одӥг- кык классэз быдтэмъёс гинэ. Ас гуртысьтыд сыӵеез но уг тупа али. Соин ик олокытысь, олокинэ палэнысь адямиез ысто. Гурт калыкез одӥгзэ но уг тоды, кызьы кивалтоз сыӵе мурт? Озьы сьӧрлось лыктэм "куно" ас сяменыз ваньзэ ки улаз кырмыны тыршылӥз, ас котыраз люкалляз кылзӥськисьёссэ гинэ, пыдтыш нюлӥсьёссэ. Бригадиръёсыз коть гурто адямиос пӧлысь ик бырйылӥзы. Котькуд бригадирлэн аслаз юнматэм коркаез, нуналлы быдэ ӵукна вазь ик укно янакамы йыгаськыса, кыӵе уже потыны косыса ветлылӥз. Нокин но ӧз дӥсьты "уг мыны" шуыны - соку ик "саботажник" ним сётозы. Собере председатель ассэ ачиз самой бадӟым адямиен лыдъялляз: тулыс бакчадэ гырыны, толалтэ пу вайыны вал но уз сёты. Колхозъёс, оло, умой-умой юнманы но ӧз на вуылэ, нош вань гуртэн ужаса поттэм ваньбурез тус-тас карылыны кутскизы ини. Сыӵе вераськонъёс юнме уг кылдо, солэн мугез вань, ымысь ыме, пельысь пеле вуэ. Та йӧнтэмасьёслэсь "ужзэс" сэрттон-пертчон борды кутскем Кармыж школаысь дышетӥсь Василий Иванович. Кызьы быгатэм озьы гожтыса, редакцие келям. Материалзэ поттӥллям ведь. Асьсэ кивалтӥсьёссы сярысь. Бугыртэм дуринчи кар кадь луэм Макан гурт. Автор ваньзэс нимын-тулын гожъям. - Молодец, Василий Иванович, кемалась озьы кулэ вал ини шуккыны, - солы дурбасьтӥсьёс куспазы верасько. - А то укыргес ашкемизы ини тордосъёс. Кинлы золгес йӧтэм, соослэн гожтӥсь муртэ жугыны мылкыдзы вылэм, но оло дӥсьтӥллямтэ, оло бодылэн пумыз кык шуыса тодазы лыктэм. Жугиллямтэ. Нош Василий Ивановичлэн данэз гурт калык азьын эшшо вылэ ӝутскиз. Сое азьло но туж ярато вал: лякыт сямо, калыкен вераськыны быгатэ, ноку но кудӟемзэ адӟемзы ӧвӧл. Ма, со вакытэ, нылкышноосыз вератэк ини, воргоронъёс но уг юо вал праздниктэм дыръя. Юон дыръя но нокин парсь сямен дэриын ӧз погылляськы, мынам тодэмея. Та статьяез сяна, умой ужъёс сярысь но со гожъяллям, редакция куремъя. Со ик луиз, вылды, азьпала мынон сюресэзлэн усьтӥськемез. Бызара школаысь яратоно дышетӥсь оло кытчы чиптэм-чаптэм ышиз кадь. Мыным маке шат - ӧжыт-а вошъясько дышетӥсьёс... Сое ӧтиллям редакцие ужаны. Со сярысь мон тодӥ ини берлогес... Нынек семилетней школаез быдтыса, мон Можга педучилищее пыри дышетскыны. Со 1939- тӥ ар вал. Мон студентка ини. Одӥг ар дышетскыса, гужем самой шулдыр вакытэ мон дорам, аслам яратоно Бызара гуртам. Ӵапак турнан вакыт. Апае мыным чебер басмалэсь выль платья вурыса дасям. Со выль дэремме дӥсяса, турнасьёс доры возь вылэ мыныны потӥ. Куазь шулдыр, шундыё, мылкыд капчи, аслым ачим бубыли кадь потӥсько. Кин ке но мед синйылтоз вал монэ. Ас ёзо пиос-нылъёс но возь вылын, турнан дорын, дыр. Гуртын улэм адями гинэ тодэ, мар со гужем турнан вакыт. Со самой бадӟым шулдыръяськонлы пӧрмылӥз. Вань калык возь вылын. Гуртэ кыльылӥзы чыры-пыры пиналъёс - Нянь курыса бӧрдӥсьёс, Песятайёс, песянайёс - Соосыз буйгатӥсьёс, Быдэс гуртэз шудтэм учыр луэмлэсь чакласьёс. Озьы малпаськыса мынонъям, уллапал урамысь бусые гинэ потӥ но - инмысь усем кадь, пумитам йыг-йыг вамышъяса пиосмурт лыктэ. Умой-умой учки - самой со, азьло, пичи дыръям ик синмаськем дышетӥсе. Со но турнасьёс доры ветлэм, лэся. Ми дорын школаын ужакуз, солэн дусымъяськон нылыз вал, али соин адскыны васькам, шӧдске, возь вылэ. - Ӟечбуресь, Василий Иванович, - олокытысь-марысь вазёно кариськи. - Ӟечбур, - шуиз но гурт пала кошкиз. Мон солэсь мар ке но верамзэ возьмай, нош со "тон кин" но ӧз шуы. Малы меда вази, малы меда - пыкылӥсько асме - кин мон солы, солэн яратонэз мукет ныл, мынэсьтым арескын но бадӟымгес. Мыным дас арес ке но ини, казакныл дорозь вуэмын ӧвӧл на. Самой тылыяськыны-бурдъяськыны кутскем тютюпи кадь, сыӵе вакытаз тютюпи туж шуш луэ. Возь вылэ эшъёсы пӧлы вуи но ваньмыз вунӥз. Мынэсьтым урод мылкыдме шулдыр возь бордаз басьтӥз кадь. Эшъёсы ужакузы но шулдыръясько, кырӟало, серекъяло. Мынам, но соосъя луиз мылкыды. Василий Иванович та аре, армие басьтыкузы, отпускын вылэм, анаеныз, сузэреныз, вынъёсыныз, нылыныз адскыны бертылэм. Мон сое больше ӧй адӟы ни, ньыльдон куатетӥ арозь... Та аре ик мынэсьтым агайме, Василий Егоровичез но, армие басьтӥзы. Со но асьме гуртын дышетӥсьын ужа вал. Педучилищелэсь кык курссэ быдтыса одӥг ар ужамез бере, куинетӥ курслы экзамензэ экстернэн сётӥз, диплом басьтӥз но - армие кошкиз. Мон но дышетскисько педучилищеын, кык курссэ пырпотӥ ини. Гужемлы нош ик гуртэ бертӥ, эшъёсы пӧлы. Инвожо толэзе уйёс вакчиесь, уӵыос ӟардытозь чирдо, ми но соосын огкадь югдытозь шудылӥмы, кырӟамы, эктӥмы. Вылӥ дунъязы Сюмсиысь сюрес лэсьтӥсьёс али Казань-Малмыж-Пермь-Екатеринбург трактэз выльдон бордын тыршо. Алигес выль сюреслэсь люкетсэ комиссия кутӥз. Солы вылӥ дунъет сётэмын. Татысь управленилэн базаез сокем ик кужмо ке но ӧвӧл, сюмсиос асьсэды возьытэ ӧз уськытэ. Ужъёсын кивалтӥз мастер Анатолий Федоров. А. ГЕРМАНОВ. Армие дасяськон Нимыз воштэмын ке но Вераськон мынэ егитъёсты армие дасян но соин герӟаськем ёз сярысь. Азьло та ужен выриз ДОСААФ. Табере со интые кылдӥз РОСТО (Россиысь оборонной спортивно-технической организация). - Мылысь-кыдысь ужась общественной организациос пӧлысь ми гинэ кылим на, - шуэ РОСТО-лэн Удмуртиысь кенешлэн кивалтӥсез Клим Юсупов. - Али но быдэсъяськом ДОСААФ- лэсь ужъёссэ. Бен, капчи ӧй вал "улэп" кыльыны. Но ачиз улон возьматӥз таӵе ёзлэсь кулэлыксэ. Жаляса верано, Россиысь Кун Дума РОСТО сярысь закон кутонэн уг дырты, ялан берлолы кельтэ. Со туж валантэм. Шаерысьтымы кивалтӥсьёс сярысь озьы шуыны уг луы. Соос, та организацилэсь кулэзэ валаса, туэ кун бюжетэ нимаз чурен 500 сюрс манет коньдон висъяны чаклазы. Одӥг дасмосэз улэп коньдонэн сётэмын, кылемез - Минфинлэн вексельёсыз но ог-огедлы тыронъёсты пытсан амалэн. РОСТО-лэн республикаысь ёзъёсаз арлы быдэ 1500 егит мурт армие мыныны дасяське. Пиос шедё Россиысь Вооружённой Кужымъёсы - федеральной пограничной службае, ФСБ-е, МВД-е, воздушно-десантной но инженерной войскоосы. РОСТО-лэн школаосаз но Ижевскысь авиклубын уно сюрс егитъёс дышетско. Соос пӧлысь миым куд-огез луиз спортъя мастер но мастере кандидатъёс но уноез басьӥзы спортъя разрядъёс. Парашютэн тэтчанъя удмурт оборонной обществоысь дышетскисьёс Россилэн сборной командаяз пыртэмын. Но тужгес данэ потэмын РОСТО-лэн автошколаосыз. Отын ужало ӟеч дышетӥсьёс, ас удыссэс яратӥсь специалистъёс. Ватсаны кулэ, автошколаосын ӝыныез нылъёс дышетско. Туала секыт улон вакытэ угось та ёзлэн автошколаосыз чидало ай. Собере отын дышетскон но умой пуктэмын, ваньмыз сямен право басьто. Чылкак мукет югдур коммерческой автокружокъёсын. Коньдон кыскыны ярато, нош дышетскисьёссы право басьтыны уг быгато. Малы ке шуоно, сюрес вылын ветлон правилоосты йӧскадь уг тодо, машинаен но ветлыны кулэезъя уг дышето. РОСТО егитъёсты озьы ик дышетэ Родинамес яратон мылкыд. Но туннэ меӵак пусйыны кулэ, егит пиослэн армие мынэмзы уг поты. Нош кин РОСТО-ен герӟаське, со зэмос патриот луэ. Г. РОМАНОВ. Москва но синмаське Кыӵе вакытъёс но улытозямы-вылытозямы ӧй вал ни: ческыт колбасалы, сӥльлэсь дасям шер пумиськылӥсь ӵынатэм сиёнъёслы тросэзлэн Москвае но ветлэмзы вань, дыр. Нош али ваньзэ сое потто ас дорамы. Басьтом Завьялово районысь "Восточный" совхозэз ик. Парсь вордыны чаклам комплекс туннэ пӧрмемын ни бадӟым перерабатывающей предприятилы. Солэн директорез Удмурт Республикаысь Кун Кенешлэн депутатэз Ильсур Миниахметович Гараев пӧртэм амалъёс утча, экономиказэ утён вылысь. Берло кык арен ӵошатыса, пудолэсь лыдзэ совхоз шӧдскымон будэтӥз. Парсьёссы та вакыт 77 сюрс 782 йыр, сюро таза пудозы - 511, со пӧлысь 144-ез - кысконо скалъёс. Хозяйствоын умой пуктэмын племенной уж, со чотын 9 толэзь ӵоже гинэ басьтэмын 91 сюрс пала парсьпи но 91 кунян. Кылем но мимала аръёсъя учконо ке, со туж ӟеч ини. Кулэсмиз бырись пудолэн но лыдыз. Таиз понна кыл кутэ ветеринарной служба. Озьыен, специалистъёслэн но быгатонлыксы будэ, сое адӟоно йылӥсь пудо йыръя. "Восточный" совхозысь комплекс, Удмуртиын гинэ ӧвӧл, быдэс Россиын кужмоосыз радын лыдъяське. Ӵошатон понна вералом: 1996 арын 9 толэзь ӵоже поттэмын 4633 тонна парсь сӥль, 1997 арын - 6129, туэ та дыр ӵоже ик - 7472,5 тонна. Тросгес кыскемын йӧл но. Мунчогурт фермаысь скал кыскисьёс Завьялово районын валтӥсь интыын мыно. Туэ скаллы быдэ кыскемын ни 3806 килограмм, кылем арын та вакытлы - 3483 килограмм. Тамында продукциез совхоз быдэсак сямен кутэ сиён-юон поттонэ. Сӥльлэсь дасяло консерваос, трос пумо колбаса, ӵынато, шпиг лэсьто, кӧйзэ ӵыжато. Ваньмыз ческыт пӧрме. Соин но, дыр, продукцизэс Сибире, Москвае, Урал котыре но нуо. Ижевскын улӥсьёс, "Восточный" совхозлэсь колбасазэ огпол шӧмъязы ке, мукетсэ басьтэмзы уз поты ни. Ушъян понна уг вераськы, со озьы ик вань. Нянь но татын асьсэос пыжо, музон азьысь уг вортто ни. Та быдӟа хозяйствоез возьыны, валамон ини, капчи ӧвӧл. Нырысь ик, шуг-секытъёс кылдо пудо сиён дасян ласянь. Совхозлэн турынэз тырмыт, таиз ласянь сюлмаськонэз ӧвӧл, нош комбикормез ваньзэ палэнысь ваёно луэ. Гыроно-кизёно бусыоссы тамында уллёлы ӧжыт, соин ик директорлэн малпанэз вань бордазы подсобной хозяйство кылдытон сярысь. Кылзы тупаз ке, комплекс понна со умой луысал: котькӧня картофка мертты, тысё но пуртэсо культура кизь - мултэс уз лу. Эшшо одӥг лыдпус 66600 сюрс манет. Тамындалы вузамын 9 толэзь ӵоже поттэм продукция. Озьы ке но, комплекс туннэ нуналлы солэсь табышсэ уг адӟы. Трос коньдон кошке электрокужым, газ, эстӥськон понна тыронъёсы. Уждун ласянь но югдур сокем ӟеч ӧвӧл: али басьто апрель толэзьлы. Но ужась калык уждунэзлэсь ог люкетсэ басьтэ сиён-юонэн. Та чотын ик улэ. Нош мылкыдзы умой. Азьвыл аръёсы ужасьёссэ совхозэ коньдон ласянь ӟеч возиз, номыр уд шуы. Сыӵе оскон азьланезлы но вань ай. Юнме шорысь-а Италмас посёлокын ӝутско выль школа, лэсьтӥсько улон юртъёс. Ваньмыз со - хозяйство чотын. Кылем арня вискын Москваын ортчиз Россиысь сиён-юон поттӥсь предприятиослэн ужзылы сӥзем бадӟым выставка. Удмуртиысь даслэсь ятыр коллективъёс пӧлын отчы пыриськыны дан усиз "Восточный" совхозлы но. Сӥльлэсь дасям сиёнъёссы, консерваоссы вылӥ дунъет басьтӥзы. Л. МЕДВЕДЕВА. НАТАЛЬ Малы ӝега ЗАГСэ сюрес? - Быземын-а? - кыкетӥзэ юа ни акушерка учётэ султыны лыктэм нылмуртлэсь. - О-о. Ӧвӧл. - Мар о-о - ӧвӧл? - Быземын, но гожтӥськымтэ. - Озьы ик шу - бызьымтэ, - меӵкытыса картаяз пусйиз лек кышномурт. Анай луыны дасяськись 23 аресъем кышномурт, пичи нылаш музэн, гордэктыса йырзэ ошиз. Оло акушеркалы, оло "картэзлы" куатаськиз, ӧжыт синвуосыз ӧз пызьыралэ. Зэм но, малы со бызьымтэ? Яратонэныз кык ар ӵош уло ни, нош со ЗАГСэ мынон сярысь ӧз но поттылы на. Нылпиез мирошка луоз шат? Оло, кушто шуыса кышкатоно? Соку... Таӵе учыръёс туала егитъёс пӧлын лачак. Берло дыре, городын гинэ ӧвӧл, гуртын но модной луэм гражданской бракъёс гочато егитъёсты. Черк сыӵе бракез уг гажа - со бадӟым сьӧлыкен лыдъяське (эрказъяськон). Зэм, уг гажа ЗАГСын гожтӥськемъёсты но, черкын венчаться карымтэ ке. Но сьӧлык сярысь вунэтыса но, "тросаз сыӵе семьяосын номыр вожъяськымонэз ӧвӧл", - шуо психологъёс. Озьы улыны каньыл пиосмуртъёслы. Кышномуртлы бызьытэк картэн улыны секыт. Оло быземын, оло ӧвӧл. Зэм, тросэз соос асьсэды быземын шуо, нош гражданской бракен улӥсь пиосмуртъёс ӝыныез гинэ асьсэды кышнояськемен лыдъяло. Кин янгыш? Ачиз кышномурт. Угось ӵап со ӧз быгаты дырыз дыръя ассэ ӵектыны, ЗАГС пала каньылля кыскыны, куатаськыны. Кызьы со ваньмыз кутске? Тодматско, пумиськылыны кутско. Туж ӝог ог-огзылы матын луо. Пияш туганзэ, дораз ӧте. Ӝыт пичи шулдыръяськыса, нылмурт, валамон ини, дораз кӧлыны кыле. Нош ӵукнаяз, гажанэз сярысь сюлмаськемзэ возьматыны тыршыса, чай но пуктэ, тусьты-пуньы но миське, корказэ но утялтыны вутске. Пиосмуртлы со нырысь уггес кельшы: "Кин ассэ кожа, дораз кадь кузёяське. Но кӧня ке дыр ортчыса кельшыны кутске. Дусымез гуртпӧрез лэсьтыкуз, вӧзаз кӧлакуз кышно шуэ. Нош соиз ӝожтӥськыкуз, маке басьтыны курыкуз (дӥсьтэ ик ке), тодмотэм мурт шоры кадь учке. Уждунзэ но кияз сётыны уг дырты. Кышно ӧвӧл на ук! Кыӵе умой - ул но ул! Нош шуак мукетызлы синмаськид ке, - тон казакпи ук. Таӵе пар ноку но шудо уг луы. Пиосмуртлэн ассэ ачиз яратэмез улэмзыя весь пыдлогес выжыяське. Юн лыдъясько узыръёслэн бракъёссы. Яратон, ог-огдэ валан но гажан сярысь вераськон ӧвӧл татын. Но статистика верамъя, соос шер люкисько. Берло дыре узыръёс но "чурытгес" луизы. Соин кусыпъёссэс ЗАГСын юнматыны уг дырто. Люкиськоно-мар луиз ке, ваньбурдэ кышноеныд шори люконо луоз уго. Али бракъя контрактъёс гожтыны луэ ке но, котькудӥз узыр мурт но чылкак возьыттэм ӧвӧл - тусьты-пуньы понна судэтӥ бумагаеныз сэзъяса уз ветлы. Соин ик сыӵе пиосмурт туж ӟеч амал шедьтэ дусымзэ бордаз возьыны. Шуэ, мон тыныд ваньзэ сётӥсько: сюдӥсько- дӥсясько, шутэтскыны нуллӥсько, иномаркаен ворттылытӥсько, малы тыныд кыӵе ке штамп? Соиз йырзэ гинэ сэзъя. А ма кароз? Бӧрдыса ЗАГСэ ӧтёз? Узыр пиосмурт тонтэк но туж ӝог мукетсэ шедьтоз. Озьы ик улэ, "кузёезлы" пыриськыса. Узыръёс ваньбурзэс ыштонтэм поннагес уг гожтӥсько ке, куанеръёс уг гожтӥсько "узырмон" понна. Валамонгес мед луоз шуыса, сыӵе кескич, визьмо-а шуод соосты, тодмоосылэсь учырзэс гожтӥсько. Алексей но Надя кузпалъяськыны медо ни вал, но пияшез шуак армие басьтӥзы. Надя секытэн кылиз. Кӧня ке толэзь ортчыса, нуныез вордӥськиз. Нылпизэ огназ будэтэмез понна государстволэсь пособие басьяз. Туганэз бертэм бере, кыкетӥзэ ваиз. Таяз учыре гожтӥськон сярысь вераськон ик ӧз поттылы, гуртын ужтэк кылем анай-атайзэс кык мерошка пиналъёс сюдӥзы угось. Одӥг пиналлы 134 манет ке сётӥське, ӵошенназылэн пособизы уждун тыр люкаськылӥз. Бускельёс кырыж учкыло ик ке, мар? Сием потэ ук. Лида институтын дышетскыкуз нылпи ваиз. Туганэз туж чаль ышиз. Пиезлы кык арес дыръяз со мукет пиосмуртэн тодматскиз, со доры улыны выжиз. Ог-огзэс яратӥзы, тупаса улӥзы ке но, туганэз пизэ пособие понна ас вылаз ӧз гожты. Пияш туж кыстӥськиз выль "атаез" борды, фамиллязэ юакузы, солэсь вералляз. Анаез ӧз дӥсьты пиезлы "сьӧлыксэ" шараяны. Но ачиз али но кышка: школае вордскемез сярысь свидетельствозэ куризы ке, ваньмыз тодмо луоз. Мар шуоз соку солы пиез, кызьы учкоз на атаез луэм пиосмурт шоры? Сылэ-а со ваньмыз 134 манет тыр? Зэм, кудӥз анайёс асьсэслэн зарни бугоръёссылы соку ик валэкто, малы, Ваня агай солы бумагая ке но атай луыны уг быгаты. Алялэн 13 аресъем Коля пиез огпол юаз: - Али пособие уг сётъяло ук. Малы дядя Ваня мыным папа уг луы? Аля мар куаретыны паймиз. Малы 13 аресъем пиналлы мурт воргоронэз атай шуоно на кадь? Али 17 процентэз семьяос палэс лыдъясько: анай яке атай нылпизэс огназы будэто. Вылын верам семьяос но соос пӧлы ик пыро. Сыӵеос ӧжыт ӧвӧл. Мон аслам тодмоосы пӧлысь гинэ дасо пар шедьтӥ. Луэ-а соосты палэсэн лыдъяны. 17 процентысь кӧняез зэмзэ но нылпизэс огназы будэто? Сыӵе лыдпус ӧвӧл. Кулэ но ӧвӧл, дыр. Озьы коть кӧняез ке кышномуртъёс асьсэос быгато государствоез "котыръяны": ватсаса пособие басьтэм сяна, соос нылпизылы 14 арес тырмытозь гань-гань одӥг ужан интыын тыршыны быгато, кулэстонлэсь (сокращенилэсь кышкатэк). *** Гожтӥськытэк улэмлэн аслаз умоез но, уродэз но. Кудӥз шуо, гожтӥськымтэ ке - карт ӧвӧл со. Кутскоз но кошкоз мукетыз доры. Пилиськем тусь дуре кылёд. Но кошкисез штамп шоры но, ваньбурез, нылпосыз шоры но уг учкы. Нош ӵош люкам ваньбурез люкыны одно штамп кулэ ӧвӧл, адӟисьёс шедёзы. Алимент но, туж кулэ луиз ке, суд пыр тырытыны луоз (суд атай луэмзэ ялӥз ке). Секытгес, шудтэм учыр луыку. Шуом, картэз кулыны-бырыны шедьыку, кышноез но со вылэ гожтымтэ нылпиез, (соос вылэ нимысьтыз завещание гожтымтэ ке вал) кельтостэк (наследствотэк) кыльыны быгатозы. Но суд чылкак пумит ӧвӧл гражданской бракын улэм кузпаллы кулэм кузпалызлэсь ваньбурзэ висъян сярысь эскерыны. Но "асьсэды гинэ яратӥсь", "узыр" но "кескич" семьяос пӧлын вань огшоры Яратӥсьёс. Соос ог-огзэс гажаса, тупаса уло. Но кыӵе ке мугъя соку ик уг гожтӥсько. Я дыр уг сюры - ог-огзылэсь дышетскемзэс возьмало, кыӵе ке сямъёсты-йылолъёсты чаклало, яке анай-атайёссылэсь юрттэт куронтэм вылысь, кыштыр гинэ асьсэос сюанлы дасясько. Но куке но соос одно законъя кузпалъёс луо. Психологъёслэн верамзыя, ӵап таӵе семьяос шудо но тупаса уло. Сюанэн дыртымтэзы таяз учыре умоен берытске: соос ог-огзылы дышыса вуо, сямъёссэс тодо. Но со "дыртымтэ" пересьмытозь кыстӥськыны кулэ ӧвӧл. Котьма шуэ, но дунне вылын Мендельсонлэн маршезлэсь чебер номырно кылдытымтэ на. Со 134 манет тыр гинэ уг сылы. З. РЯБИНИНА. НАТАЛЬ ГАЗЕТ ГОЖЪЯМ БЕРЕ Нылыдлэн сюлэмаз ул 17 сентябре потэм "Наталь" бамысь лыдӟи "Курисько кулон, инмар сётэ курадӟон" гожтэмез. Вазиськеме потӥз. Но валалод-а, уд-а меда монэ, Зинаида. Мон мумытэк кыли куать толэзьысен, тон но пичиысен кыли шуиськод. Оскисько но, валасько но кыӵе секыт вал улонэд. Зэм, мумытэм пиналэз тӧлъя сӥзьыл усем ӵуж куарез сямен лёгаса возё, тон но тани силёлы кыли шуиськод. Нош кияд гозы кутыкуд, нылыд тодад уг лыкты-а? Кинлы-о со шумпотонзэ но, кӧткуректонзэ но вералоз? Сэзь-сэзь кариськы али. Юылӥськод ке, куштӥськы юонэдлэсь, уд ке юиськы - вождэ эн вай. Кулон курыны туж бадӟым сьӧлык, шуо. Черке ветлы. Висьыса мынэмед уг ке луы, нылдэ лэзья, инмарлэсь чидан курыса, сюсьтыл мед пуктоз. Мон киям вить арес нуныен кыли, кызь куать аресысен пурысьтай. Инмар ӧз кушты, нылылэн туж умой но туж ужась сюратаез вал. Мыным 67 арес ни, картэ кулӥз, огнам кыли. Но мынам улэме потэ. Черке ӵем уг ветлӥськы, гуртын вӧсяськисько, молитваез тодытэк но. Асьмелэн улон вакытмы туж вакчи, соин ик, йырдэ сэзъялты но йыг-йыг кариськы, нылыдлэн сюлэмаз ул. А. СТРИЖОВА, Сюмси район, Зон гурт. 29 октябре 80 ар тырме асьмелэн дано Комсомолмылы. Соин валче Пионерилы но Комсомоллы сӥзем адӟытонъёс усьтӥсько. Ижысь та кык музейёсысь материалъёсты юбилей азьын огинэ люкаса, Пионеръёслэн юртазы адӟытон дасямын. Отысь пӧртэм юанъёслы валэктон шедьтыны луоз. Адӟытон тодматоз егитъёслэн движенизылэн историеныз, комсомолецъёслэн дано ужъёсынызы, тунсыко учыръёсын. Адямиослы вунонтэм вакытъёсты тодэ вайытыны вань сюлмысьтыз тырше пионер но комсомол движенилэн ветеранэз, Удмурт Республикаысь дано дышетӥсь Фаина Михайловна Кудрина. Е. ПЕТРОВА. Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Кун азьын вормонъёс басьтэмзы, кема аръёс ӵоже ӟеч тыршемзы но калыкъёс куспын эшъяськонэз юнматонын азинсконъёссы понна пусъёно: "За заслуги перед Отечеством" орденлэн ИИ степенё медаленыз МОТОРИНА Галина Семеновнаез - Удмурт Республикаысь гидрометеорологияя но инкуазез чакланъя центрлэсь техник-агрометеорологзэ. Россия Федерацилэн Президентэз Борис Ельцин Москва, Кремль 1998 арын 11 сентябре � 1080 Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Кун азьын вормонъёс басьтэмзы, кема аръёс ӵоже ӟеч тыршемзы но калыкъёс куспын эшъяськонэз юнматонын азинсконъёссы понна пусъёно: "За заслуги перед Отечеством" орденлэн ИИ степенё медаленыз ДРЕСВЯНСКИЙ Евгений Леонидовичез - Ижевскысь "Производственная фирма "Конт" огазеяськонлэсь директорзэ. Кема аръёс ӵоже ӟеч тыршемзы но атомной промышленностез азинтонын туж трос лэсьтэмзы понна "Россия Федерациысь сиён-юон поттонъя промышленностьысь сӥё-дано ужась" сӥлы карон ним сётоно ВЕРЕТЕННИКОВА Татьяна Аркадьевналы - Глазовысь "Чепецкий механический завод" акционер огазеяськонлэн сиськоннияз сиён пӧзьтӥсьлы. "Россия Федерациысь вузкарон удысысь сӥё-дано ужась" сӥлы карон ним сётоно ИРГУНОВА Людмила Николаевналы - Глазовысь "Чепецкий механический завод" акционер огазеяськонлэн магазиназ вузкарисьлы. Россия Федерацилэн Президентэз Борис Ельцин Москва, Кремль 1998 арын 21 сентябре � 1121 Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Кун азьын вормонъёс басьтэмзы, кема аръёс ӵоже ӟеч тыршемзы но калыкъёс куспын эшъяськонэз юнматонын азинсконъёссы понна пусъёно: Почёт орденэн ПАНИНА Людмила Николаевнаез - "Глазов карысь эмъянни" тазалыкез утёнъя муниципальной учрежденилэсь валтӥсь врачезлэсь воштӥсьсэ. "За заслуги перед Отечеством" орденлэн ИИ степенё медаленыз СИДОРОВ Виктор Ивановичез - "Глазов карысь эмъянни" тазалыкез утёнъя муниципальной учрежденилэсь отделениен кивалтӥсьсэ. Россия Федерацилэн Президентэз Борис Ельцин Москва, Кремль 1998 арын 6 октябре � 1201 Кезьыиъёслы урод дасяськизы Туэ толлы котькулэсь урод дасяськиз "Ижсталь" огазеяськонлэн жилищно- коммунальной отделэз. Татын чидатэк возьмазы, лэся, юртъёссэс городлы сётонэз. Соин ик соос толлы дасяськон сярысь ӧз сюлмаське. Соинтэк-а 9 октябрёзь Металлургъёслэн городоказы тыро-пыдо пӧсь ву но, шуныт но ӧз сётэ на. Огнуналэ 19 номеро ЖЭУ-е вазиськи вал, залысь батареяе ӝыныез гинэ шунтэ шуыса. Слесарьёс лыктӥзы, тупатъяськизы. Озьы батареяе быдэсак шунытгес луыны ӧдъяз. Нош кема ик дыр ӧз ортчы, вань батареяосмы выльысь сӥязы. ЖЭУ-ысь ужасьёс ивортӥзы, авария, пе, луиз. Нош малы ваннаысь пӧсь вулэн гумыез кезьыт шуыса юамлы, котельнойлэн кивалтӥсез В. И. Кондаков вераз, насосмы тупатымтэ на шуыса. Тӥни озьы, кезьыт нуналъёс вуытозь ӧз быгатэ отын насослэсь подшипниксэ воштыны. Куке адямиос соосын керетыны ӧдъязы, соку гинэ гызмыльтыса оборудованиоссэс тупатъяны кутскизы. Шонерзэ вераса, милемлы туэ быдэс ар умой-умой пӧсь ву ӧз сётъялэ на. Милям юртмы дорын вань пӧсь вуэз мынэмзэ эскерон куйы. Отысен юртамы кыскем гумы сыномемен, бадӟым давленилы чидатэк, арлы быдэ 2-3 пол пилиськылэ. Нош та ог вить метръем гумыез али ке но выленыз ӧз воштэ на. Туэ тулыс сое вакчи дыр куспын кык пол кышъязы. Табере оскыны ик шуг, со кемалы чидалоз-а шуыса. Тӥни котьку тазьы луэ, тяп-ляп ужаса, берло трос изъян лэсьтӥськом на. Али ужлэсь ӟечлыксэ эскерон туж урод пуктэмын асьме предприятиосын. Соин ик пӧртэм авариос луыло. Али квартираям 15 градус гинэ шуныт. Соин ик кыре шунтӥськыны пото. Шунытгес дӥсяськи ке оло нош кынмемысь дугдо. В. ЧЕРНОВ. Наталь "Семья ке юн, улон но йӧн" конкурсэ Бугоре биниськем оскон Гурт вадьсы лэзиське ни ӝомал, нош бускель гидкуаысь весь кылӥське на тӥрлэн йыггетэмез. Со озьы ужзэ быдэстыны дыртэ Николай Васильевич Агафонов. Дышетскемезъя со инженер-строитель, но та вакытэ огдырлы гуртаз пукись адями. Пулэсь пӧртэм арбериос пото солэн быгатӥсь киосыз улысь: корка борддорез но вӧлдэтэз чебермало чильпам пужыос, бадьлэсь керттэм пӧртэм корзинаос, синъёсты мальдыто мукет но ужъёсыз. Нош улон кулэ кариз корт бордын но вырыны. Бускель гуртысь вуж гусеничной трактор басьтӥзы. Вужез со вуж ини: отӥ но, татӥ но тӥяське-куашка; сэрттоно- пертчоно луэ. Та ужезлы умой юрттӥсез вань - выныз. Нош герызэс тупатыны юрттӥз 11 классэз туэ йылпумъям пиез Андрей. Пияшез сюлэмыз техника кыскиз, атаез сямен ик быгатэ ке но пӧртэм киужъёс лэсьтыны. Андрей мынӥз Воткинске шофёре дышетскыны. Агафонов кузпалъёслэн вань на 8 классын дышетскись Сергейзы. Пиос кыксы но нылкышно шуиськись ужъёслэсь уг палэнтӥсько. Юртто анайзылы выж, тусьты-пуньы миськыны, пыжиськыны но быгато. Тани сугонзэс октӥзы но, Сергейзы сое пунэтъёсы сузьиз. Чебересь, юнэсь пӧрмизы соос. Корказ пырыкуз, Николай Васильевичлэн синмыз усиз садъёс улэ интыяськем муш чуркаос вылэ. Ӝоген мушъёсыз но гужем ужамзы бере шутэтскозы ини. Туэ бен чечыен трос ик ӧз ке но куноятэ, тырмоз кӧня вань. Озьы ӵукнаысен ӝытозьлы тырме ужез воргоронлэн. Пудоосты но утялтон вань. Кызьы бен соостэк гуртын, уката ик таӵе дыръёсы? Семьялы но сиён, пичияк вузаны но шеде. Соиз ӝож, сюдӥськод, утялтӥськод но, пудодэ кытчы карыны ёрмыса, дунтэм дунын сётӥськод. Куке-соку коньдонзэ басьтӥськод ик, но кытчы гинэ сое тырмытод - туж ӝог быре. Кызьы бен уз быры, кузпалыз, Антонида Федоровна, нылпи садлэн кивалтӥсез, ужам коньдонзэ куинь-ньыль толэзьёсын уг ке басьты. Сиён-юон но бичано луэ. Бен, азьло вакытъёсын ӵошатыса, шергес ик магазинэ пырано луэ. Будӥсь нылпиослы но дӥськут кулэ. Ярам, туэ коть инкуазь бакча сиёнзэ но, емышсэ но ӧз жаля - таӵе улонэз валаса сямен. Ачид ке бен ӧд тыршы, толалтэлы озьы но ӝӧк вылыд буш кылёз. Мар гинэ ӧз дася Антонида Федоровна толалтэлы! Губилэсь но, огречлэсь но, яблоклэсь но, чецкыт пӧсьтурынлэсь но, мукет емышъёслэсь но. Ӵыжы-выжыоссы но, тодмооссы но ярато пыраны та семьялэн дораз. Угось чупырес нылкышно ваньзэсты умой пумита, ческыт пӧраськемъёсыныз сюдэ-утялтэ. Ачиз Антонида Федоровна ӟуч, соин ик семьяязы ӟуч сямен верасько. Нош нылпиоссы ваньзы удмурт кылэз дышето. Витетӥ классын дышетскись Леназы курадӟегес ик удмурт кылын гуртысь ужъёссэ быдэстыны. Но анаез солы быгатэмезъя юрттэ. Тани нош вуозы кузь тол ӝытъёс. Ваньмон дырзы луиз ке, Агафоновъёс ваньзы басьтӥськозы яратоно ужъёссы борды. Антонида Федоровна кияз кутоз яке книга, яке керттӥськон вень. Каньылля бергамезъя бугоре биниськозы улон сярысь малпанъёс но. Пӧртэмесь соос, мед быдэсмозы вылэм азьланезлы осконэн герӟаськемъёсыз. Оскон, пе, котьмалэсь берло ыше. Н. НИКИТИНА. Шаркан район, Зюзино черкогурт. НАТАЛЬ Ӧрӟи синмаськиз дыдыклы Туала вакытэ уд паймы ни удмурт нылъёслэн мукет выжы калыкысь карт быръемзылы, со вакытэ ик удмурт пиосмы, кузпал шедьтытэк, гуртъёсын мӧзмыса пуко. Маин сое валэктыны луоз? Оло, нылъёс семьязэс шуг-секытъёслэсь утьыны йыгмытгес борддор утчало? Оло, эркиясь, пелез шумпоттӥсь кылъёслы, мусояны быгатӥсь киослы синмасько? Котьма ке но, вашкала гожъёс, пыкетъёс туэ тӥяськемын. Мариналэн анаез но тани пумит вал нылызлэн Кавказ палась ӧрӟиен улонзэ герӟаны. Но яратӥсь сюлэмъёслэн куспазы кужмысь ӧз пыриськы. Тани табере Мариналэн но Григорийлэн Карина нылзы будэ. Ужась, семьяез сярысь сюлмаськись эмеспилы уд шумпоты шат? Марина но картэз вылэ уг ӝожтӥськы. Куспазы бен споръяськонъёс кылдо ке но, керетонозь уг вуо. Тодматскыны тыршо ог-огзылэн калык йылолъёсынызы но сямъёсынызы. Ӵош улыны кутскыкузы Григорий ачиз сиён пӧра ке вал, табере Шаркан районысь Вортча гуртын будэм Маринаез но Кавказ палась пӧрасьёслэсь бере уг кыльы. Оло, ужаны чырмыт луэмезлы ик синмаськиз вал армян пи удмурт нылашлы. Нош ужась муртэ ӝужыт гурезьёслэн шаеразы улӥсьёс туж гажало. Изъёс вискын кыллись пичильтык музъемез но будӥсь пиналэз музэн утялтыса возё - пӧсь шунды медаз суты, вутэк куасьмыса, медаз быры мерттоссы. Соин но, дыр, Григорийлэн куд-ог дыръя сюлмыз ик вӧсь луэ шаерысьтымы аналтэм, жуг-жаген тырмем музъемъёсты адӟыса. Нош удмурт калык ужась шуыса, Григорий тодэ кузпалызъя но, Шаркан палась калыкъя но. Л. МАЛЫХ. Г. Юсаевлэн туспуктэмъёсыз. Ӧтьымтэез но куно ӧтемез кадь ик дуно Матэктэ "Удмурт дунне" газетлы 80 ар тырмон нунал. Солы сӥзем ужрад ортчоз 28-тӥ октябре Удмурт кун филармонилэн Бадӟым залаз (Пушкин ульча, 245). Кутске 16 часэ. Тужгес матысь организациослы но адямиослы редакция сётэ ӧтёнъёс. Но котькудӥз ми доры со дуре лыктыны уг быгаты. Соин ик гажано лыдӟисьёсмылы но эшъёсмылы ивортӥськом: ужрадэ пырыны луоз дунтэк но нокыӵе ӧтёнтэк. Милемды туж-туж ӟечкыламды потэ, дыр, сцена вылэ тубыса. Асьтэлэсь мылкыддэс вералэ али ик таӵе телефонъёсъя: 24-56-67, 24-55-58, 24-53-69. Соку тӥледды сценарие пыртом но ӝытын луэмезъя кыл сётом. Ужрадмес шулдыртоз Удмуртиын, Комиын, Мари Элын, Ивановоын но музон интыосын данэ потэм крезьгурчи, кылбурчи но кырӟась Анна Плотникова. Шонерзэ вераса, "Удмурт дуннелэн" ӝытаз со сётоз нырысетӥ бадӟым концертсэ. Ӝытын ортчозы пӧртэм ӵошатсконъёс. Кин умойгес тодэ "Удмурт дунне" газетлэсь пуштроссэ но сое дасясьёсты? Кин вакчигес но чебергес ӟеч кыл вералоз? Кин устогес шудоз арганэн (баянэн), гитараен, крезен? Кинлэн дэремез чебергес? Витиськом! Сӥземын выжъёслы Укмыстонэтӥ аръёсы Вавож ёросын умой радъямын вал выжъёс лэсьтон. Удмурт телевидение алигес выжъёс сярысь нимысьтыз фильм дасяны кутскиз. Озьы ик палэнэ уз кыльы районлэн туннэ улэмез-вылэмез но, отысь адямиос но. Фильм бордын ужало режиссёр Лев Вахитов но журналист Елена Галимуллина. П. СЕРГЕЕВ. Тодматскон сэрег Аб. 249. Удмурт воргорон, 51 арес, гороскопея Рак - Кабан, улӥсько гуртын, вань музъеме, пудо-животэ. Тодматскысал анайатайтэк кылем яке нылпиосызлы кулэтэм, сантэм луэм 49-53 аресозь кышномуртэн. Аб. 250. Удмурт воргорон, 27/182, гороскопея Козерог, синъёсы чагыресь, улӥсько гуртын анае-атае бордын, кыкетӥ группаен инвалид. Семья кылдытон вылысь тодматскысал 24-30 аресозь лякыт сямо нылкышноен, пумит ӧвӧл пичи нылпиосызлы. Редакцилэсь: Лыдӟисьёсмылэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен чылкыт конвертэ понэ - ыстомы кулэ адресъя. Ӟеч кыл сӥзьыл куазен но шунтэ Куд-ог предприятиос та секыт вакытэ кызьы ке но быронлэсь гинэ утиськыны выро. Веранэз ӧвӧл ни, кыӵе ке ветеран сярысь татын сюлмаськозы шуыса. Коньдонзы ӧвӧл. Собере огшоры ӟеч кыл вераны гинэ но мылкыдзы уг ӝутскы, лэся. Гульыме кырмиськем ёрмон адями сюлэмез но сӥзьыл писпу куарез сямен кӧсатэ, ӵакмытэ, дыр, вань умойзэ, ӟечсэ пызьыртэ. Чылкак мукет суред "Буммаш" акционер огазеяськонын. Завод огсыр ужа. Туала улонлэн тулкымъёсыз татчы шуккисько ке но, юн борддоръёс предприятиез оскымон утё. Ваньбур поттон татын уг кулэсмы, нош куд-ог удысъёсъя со шӧдскымон йылэ. Коллектив пайдалыко ужаны быгатэ бере, производствоез но азинтэ, мукет удысъёслы но юрттэт сётэ. Уг вунэты "Буммаш" азьвыл аръёсы татын ужамъёсты-ветеранъёсты. Таиз сярысь нимысьтыз пусъем потэ. Арлыдоос сярысь сюлмаськон "Буммашын" ӟеч сяме пыӵаз ни. Нош соос предприятиын 1700-лэсь уно. Огез но вунэтымтэ, котькудӥз син азьын. Мӧйыосын ужа ветеранъёслэн кенешсы. Со вуоноезлы ужъёс пусъе, сое радъя, быдэсъяськемзэ эскере. Тани кӧня ке лыдпусъёс: Туэ 9 толэзь куспын заводысь 250 ветеранлы 18 но ӝыны сюрс манет тыр материальной юрттэт сётэмын, 204 пенсионерлэсь улэм-вылэмзэ эскерыны предприятиысь адямиос потазы, 87 муртлэсь тазалыксэ юнматон вылысь, 7320 манет коньдон висъямын. Заводлэн юрттэменыз ветеранъёс понна 4 концерт возьматэмын, 500 адямилы сиён-юонэн саламъёс сётэмын. Заводысь кивалтӥсьёс, арлыдоосыз сӥлы карыса, нырысетӥ октябрьысен кутскыса, пумиськон ӝытъёс ортчытъяло. 23 октябрёзь соос 14 пол луозы. Та ужрадлы 35 сюрс манет висъямын. Кылем арня вискын одӥгаз таӵе пумиськонэ заводысь столовое люкаськизы предприятилэн энергослужбаяз ужамъёс. Заводэз улӟытӥсьёс пӧлысь соос вал нырысетӥосыз. Та пужмераськем йырсиё воргоронъёслэн, нылкышноослэн тыршеменызы цехъёсы вуизы электрокужым но югыт, шокчизы-гурлазы кранъёс но станокъёс. Кунооссэ завод ӝӧк выл тыр сиён-юонэн, шулдыр крезьгурен пумитаз. "Буммашлэн" кивалтӥсез Валентин Жебровский мӧйыослы трос шуныт кылъёссэ вераз, заводлэсь туннэ йыг-йыг сылэмзэ соослэн азьвыл тыршеменызы герӟазы, оскытӥз, азьланяз но мӧйыосты уз вунэтэ шуыса. Заводысь ветеранъёс таӵе пумиськонъёслы дышемын ни ке но, шумпотонэн сюлэмъёссы пачылмыса, синъёссы нюромизы. Выльысь тодазы лыктӥз егит дырзы, ужан вакытсы, улонысь маскара учыръёс. Мӧйыос шулдыръяськизы, кырӟазы-веразы. Пумиськон ӝытсы кемалы тодазы кылёз, яркыт гожен огвыллем пурысь улонзэс суредалоз. Пумиськонэ вуылӥз Г. ЮСАЕВ. Наталь Атай, мон вордӥськи, кут ӝоггес кияд! Пересьёс шуо, вордӥськем бераз пинал кык толэзь ортчыса гинэ кылыны-адӟыны кутске. Туала медицина валэктэ, нуны кӧт пушкын дыръяз ик мумы-бубыезлэсь куараоссэс кылэ, тодма. Мусо вазем шумпоттытэ луло комокез - сое возьмало, ярато. Соин ик, умойгес луоз, дунне вылэ вордскем бераз вож нуны нырысь ик анай-атаезлэсь шудо тусбуйёссэс адӟиз ке. Соку пичи адями капчиен вамыштоз улонэ. Кунгож сьӧрын кемалась уг паймо ни роддомын "пиясь" воргоронлы. Бен, 70-тӥ аръёслэн пумазы асьме странаын но мылкыд карисьёслы сюрес пытсамын ӧй вал. Озьы ке но, 90-тӥ арозь сыӵе учыр пусъемын ӧвӧл, ӵошен нылпи вайыны малпасьёслы люкетӥзы пӧртэм бумага бичанъёс. 1996 арын апреле Иж карысь Медициная академиысь врачъёслэсь тодонлыксэс будэтонъя кафедраын ортчиз тунсыко семинар. Отын дышетскиз пӧртэм ужрадъёс пыр быръем 25 мурт. Семинар нимаськиз "Дасяськыса, дышетскыса ӵошен пинал ваён" ("Подготовленные роды. Партнёрство"). Солэн ужаз пыриськизы профессор, "Россиысь нылкышноос" огазеяськонлэн огез кивалтӥсез Клара Серебренникова, висёнъёсты алонъя центрысь валтӥсь специалист Нина Загребина, Америкаысь специалист Рейчел, Иж карысь валтӥсь акушер-гинеколог Наталья Дейкина но трос мукетъёсыз. Та вылӥ верам программа кылдытэмын Америкаын, нош выжыосыз солэн пото Россиысь. Сертификатъёс басьтыса, дышетскемъёс пӧлысь, ньылез усьтӥзы асьсэлэсь центръёссэс Ижысь нылкышно кунсультациосын. Советской урамысь 11 номеро консультациын сыӵе курсъёсын кивалтэ акушер-гинеколог Марина Жарина. Марина Владиславовна шумпотэмзэ ватытэк вера: - Милям кабинетмы ужен пачылмемын, угось укыр трос дышетскыны мылкыд карисьёс. Та центр куинь сюлэсь ятыр семьяосты дасяз ни. Озьы атайёс ас синмынызы адӟизы пушъетсылэсь вордӥськемзэ. Ми дорын дышетскем егит анай-атайёс нылпи ваизы ни Сарапулысь, Воткинскысь, Пичи Пургаысь, Вавожысь роддомъёсын. Мар бен со сыӵе ӵошен пиян - партнёрство? Дышетӥськом 8-10 нунал ӵоже одӥг но ӝыны часэн. Нырысь нуалаз тодмтскиськом ог-огенымы, вераськиськом пиналлэн пӧрмемез сярысь. Собере, кӧт пушкысь луло комоклэн будэмезъя, ми но "будӥськом". Нылпи кутылон (схваткаос) кутскем бере, вуоно анай шуак медам кариськы шуыса, дышетӥськом шонер возиськыны, шоканы, сылыны яке кылльыны, вӧсь луонэз массаж лэсьтыса лябомытыны. Кызьы утялтоно, миськоно, дӥсяно вордӥськем нуныез, ваньмыз адӟытӥське мунё вылын. Бадӟым саклык висъяськом пиям бере нылпи сюронлэсь утиськонлы. Нюръяськиськом абортлы пумит. Дышетскон бырем бере, быдэс группа (4-5 куз) экскурсиен роддоме мынэ. Центре ветлытозяз вуоно атай кузпалэныз ӵош ортче кадь секытэн дырзэ, угось со одӥг пол гинэ уг адӟы пӧртэм суредъёс, видеокассетаос пыр пиналлэсь кылдэмзэ, будэмзэ. Ваньмыз та пыр потыса, воргорон семьяез сярысь мургес малпаськыны кутске, нылпиез но кышноез сярысь сюлмаськонъёсын улэ. Со уг кышка ни роддоме мыныны. Улэп комокез нырысь минутъёсаз ик кияз кутон атайлы самой бадӟым шуд луэ. Программамы номыр уродзэ уг сёты. Ми дорын дышетскем кузпалъёслэн пиналъёссы тазаесьгес, семья кусыпсы но юнгес герӟаське. Милям пиналъёсмы тямыс толэзьысен зымылыса уяло, роддом бере ик кезьытэн эшъясько. Дорамы вуо ни кыкетӥзэ но нылпизэс ӵошен вайыны мылкыд карисьёс. Озьыен, соослэн ваньмыз умой, ми быгатӥм соослы юрттыны. Кабинетысь зӧк тетрадьын кисьтэмын пӧртэм мылкыдъёс, ӵуказелы осконъёс. Кӧс пиосмурт кылъёс пыртӥ кылӥське шумпотон, шудбур.Тетрадьысь уд шедьты курлан кылъёсты, котькудӥз ас сяменыз тау карем семьялэсь шудбурзэ эшшо но пӧсьгес карыны юрттэмзы понна. Татын ик быдэс пачка суредъёс, со анай-атай луыны дасяськисьёслэн ужъёссы. Асьсэлэсь азьлань улонзэс пӧртэм сямен адӟо егит кузпалъёс. Быгатыса лэсьтэм, кытӥяз нош пичи муртлэн кадь суредъёс огез бӧрсьы мукетыз усьто егит семьялэсь азьлане учкон дуннезэ. Кӧня ке кыл сётом асьсэлы егитъёслы. Люба но Коля: - Пиналмы вордӥськон азьын бертоно луим гуртэ. Районмы милям городлэсь кыдёкын, соин ик ӵошен нылпи ваён сярысь нокин номыр уг тоды. Колялэн юн сямыз гинэ юрттӥз секыт минутъёсы но часъёсы ӵош луыны. Гуртын та учыр бере ваньзы паймизы, милесьтым адӟем карисьёс но табере вань. Анаймы туж шумпотэ, пиезлэн нылзэ но кышнозэ сокем мусо каремысьтыз, угось аслаз картэз кулэ ӧз кары пиналъёссэ. Ми кышкатэк вераны быгатӥськом, милям кусыпъёсмы юнмазы гинэ. Ирина но Александр: - Врачъёс ӵектэм бере ик, ми вераським ӵош дышетскыны но, пияны но. Оскиськом, басьтэм тодонлыкъёсмы юнме уз луэ. - Александра: - Мынам картэ нырысь пумит вал. Мон солы шуи, дышетскыны гинэ ӵош ветлом, отӥяз ачид адӟод. Курсъёсты ортчем бере, пичимы вордӥськон азьын, Сергей роддоме мынонмес возьмаса гинэ улӥз. Нош кыӵе со шудо вал палатаын. Евгений но Ольга: - Ми кыкетӥзэ но пиналмес ӵош "пумиталом". Нылпи анайлэн гинэ ӧвӧл, атайлэн но. Соин ик, нуны ваён - со милям кыкнамылэн ик ужмы. Вазиськи оген пинал вайыны кариськем нылкышноослы но. Татьяна: - Мон огнам ик пияло, дыр. Кышкасько, картэ собере кулэ уз кары. Светлана: - Мон малпасько, пинал ваён - со кышномуртлэн гинэ ужез. Ма бен, котькин ас сяменыз малпа, ачизъя ик сюрес но быръе. Йылпумъяса огзэ гинэ верам потэ: та центрын ӵошен нылпи вайыны дасяськисьёсты ваньзэс шумпотыса пумиталозы, дышетозы шонер, лякытэнгес пияны, пиналлы нырысь минутъёсаз ик шумпотон кузьманы, кузпалъёсты малпаськытозы семьялэн кулэлыкез сярысь. Татын одӥг кадь пумиталозы узыръёсты но ужлы ёрмыса пукисьёсты, городын но гуртын улӥсьёсты, егит но улонэз адӟем кузпалъёсты. Курсъёсын дышетскыны луэ нуназе но ӝытазе, нуназе - дунтэк, ӝытазе - дунын. Юанъёсын вазиськыны луоз таӵе телефонъя: 78-19-75. Центр интыяськемын Советской урамысь 19-тӥ юртэ. Светлана Долганова, Удмурт кун университетын дышетскись. АДЯМИОС НО СЯМЪЁС Инмарен сётэм визь Ураметӥ дыртыса вамышъя веськрес нылмурт, нош бӧрсяз калъяськем пичиос исаса черекъяло: - Танька, шузи! Танька, шузи! Татьяна куаӵак дугдэ, мыжыкъёссэ сэзъя, бератаз уг чида ни, уйылыны кутске. Покчиос воксё алетско. Шудыны выль эш шедьтӥм кожало, лэся. Мӧйыос лекак куаретэм бере гинэ тур-пазь ватско. Татьяна нош ик понназ лабыртыса ас сюрессэ азинтэ. Таӵе йыркуро суредэз адӟыкум, покчиослы ачим но куараме будэтытэк уг чидаськы. Тросаз гуртъёсын пумиськыло визьзы сураськем адямиос. Улон-вылон сюрес вылын секыт адӟон усе мискиньёслы. Соосты ик ултӥяло, адями чотэ уг пукто. Ма понна янгыш соос асьме азьын? Югыт дунне вылэ вордскыкузы, инсьӧр кузёен гожтэм сьӧд адӟонзы сыӵе, вылды. Удмурт калыклэн таӵе веранэз вань: душес - бурдыныз, гондыр - кужыменыз, адями визьмыныз кужмо. Озьы ни со: визьмыд ке вань, ужед но йӧнлы азинскоз, ас поннад сылыны, кыл вераны быгатод. Нош нокинлэсь визьзэ вес табае поныса мертаны уг луы, дунэн но сое басьтыны уд быгаты. Адямилэсь визьмо луэмзэ тодон понна, аслад но Инмарен сётэм визьмыд тырмыт медло. Гуртамы Женя нимо нылмурт улӥз. Кулыса усён черен курадӟе вал. Покчиос ваньзы сямен сое шузиен лыдъяллязы. Ульчаысен пумитало ке кесясько: "Женя, атаед бертэм! Женя, атаед бертэм!" Нылмурт понна, семьязэ куштыса кошкем атаез мур но секыт сюлэмо висёнэз, кайгуэз луэм, дыр. Тазьы исамес каремысьтызы, Женя катез бырытозь пиналъёс сьӧрын уйылӥське вал. Соосыз ватскем интыысен но черекъяллязы. Мискинь, бызьылэ-бызьылэ но - кулыса усе. Мон солы ноку исаса ӧй вазьылы. Оло, аслам атайтэк будэме-а сыӵе кышкыт вамышлэсь кортнаса возиз? Нош лушкемен ӵемысь малпаськылӥ: "Кызьы-о визьмыз сураськиз меда? Ма муген?" Берлогем мӧйыос валэктӥзы ни. Женя, пе, куинь классозь дышетскемын. Бератаз, атаезлэн кыкетӥ кызпалыз кыӵе ке кӧмеч пыжыса сюдэм сое, визьзэ сурам. Анаез кулэм бере, Женяез Казаньысь сӧсыръёслэн юртазы келязы. Кошкыкуз зар-зар бӧрдэм. Зэм, куддыръя синвуос синъёсысь ӧвӧл, сюлэмысь пото. Визьмолы тыл - шуныт, визьтэмлы - сутскон, шуо калыкын. Шуныт, ӟеч кыллы кыкез ик огкадь шумпото. Адямиез кужмо луэмысьтыз, котькыӵе уж лэсьтыны быгатэменыз ик куддыр инкуазьлэн инмареныз нимаськом. Со дыре адями сыӵе ляб но кужымтэм, чик секыт ӧвӧл уго жоб кыл вераса, синлысэ бычырам синкылиез сямен музысь дэрие, тузонэ сэрпалтыны. Мар-о ватонэз: бамзы тӧдьы, сюлэмзы сьӧд эгыр луэм адямиос вӧзамы туннэ но тырмыт гинэ. Эшшо но паймымонэз, йырку лӧптымонэз: визьзы сураськем нылъёсты, нылкышноосты эриктэмамы яке пӧяса валес вылэ выдытыны кепырасьтэмъёс но шедё. Татьянаез но тани больницае нуллыса, нылпиезлэсь куспетӥ люкизы. Азьвыл аръёсы кураськисьёс, визьзы сураськемъёс шоры калык жалян мылкыдын учкылӥз. Кунояны но, дӥськут кузьмалляны но ӧз вунэтылы. Сыӵеослы ӟеч каремед, аслыд ик трос пол ӟечлыкен берытскоз, шуылӥзы. Мынам малпамея, со аръёсы калык но инмар ог-огзылы матынэсь вал кадь. Калык вӧсь возьылӥз, сьӧлыклэсь курдалляз. Туэ нюлэскын губи туж трос вал. Калык кудыен-кудыен нуллӥз. Сыӵеос шоры вожъяськылыса учкылӥз Татьяна но. Нош анай-атаез огназэ нюлэскы ыстыны ӧз дӥсьтылэ. Визьмыз калык радъя ӧвӧл, малпазы луоз, (кыкетӥ классын дышесткыкуз, писпу улвайысь усьыса, йырвизьзэ зуркатыны шедьтэм). Нош Татьяна ӧз чида, нокинлы вератэк, огназ нюлэскы кошкиз. Ӝыт дораз вуымтэен, анай-атаез утчаны потӥзы. Ӧз шедьтэ. Ӵуказеяз, нылмуртэ быдэс гуртэн утчазы, Кильмезьысь милицие но ивортӥзы. Огдырлы ваньзы вунэтӥзы кадь нылмуртэ исамес, кур каремзэс. Куинетӥ нуналаз гинэ шедьтӥзы Татьянаез дауръем кыз улысь. Дыр! куалекъя, сютэм, дӥськутэз кесяськемын. Соку гинэ ваньзы капчияк шокчизы: "Улэп!" Бадӟым кайгу, сьӧд адӟон пыд азе усьытэк, адямиез жаляны но ум быгатӥське ни кадь туала дыре. Анаелэн визьмаса верамез туннэ кадь ик пель сьӧрам чузъяське на: " Ноку но эн серекъя, исамес эн кары, пие, визьмыз сураськем адямиез, я кураськыса ветлӥсьёсты. Сыӵе кышкыт адӟонлэсь нокин утемын ӧвӧл. Сыӵеослы быгатэмедъя юрттыны тыршы". Улон-вылон уйшоре югдытымтэ сюрес кадь. Уд тоды кытчы ӵемтыса усемдэ, азьпалась адӟондэ. Соин ик, астэ визьмоен ке лыдъяськод, мыскыл карыны, серекъяны эн дырты визь сураськемъёсты но. Ӟучъёс сыӵеосты Инмарен пусъем-тодмоя адямиен лыдъяло. Соослэн, пе, вож потыкузы верам кылзы, пыд азяд лыктыса, сьӧд адӟонэн усёз. Тазьы ик вералозы вылэм асьмелэн вашкала песятай-песянайёсмы но. Озьы тӥни, нылпиез пичиысен ик ассэ но муртэ гажаны, аслэсьтыз но муртлэсь адямилыксэ утьыны, санэ басьтыны дышетоно. * кадырласа - жаляса, гажаса Н. НИКИФОРОВ. Кин кузёяськоз му вӧен? Удмурт Республикаысь Кун Кенешлэн депутатъёсыз алигес эскеризы Удмуртиын 1999-2000 аръёсы но ХХИ даурлэн нырысетӥ вить аръёсаз му вӧй поттонлы коньдон висъян но нефть поттон удысэз азинтон сярысь ужпумез. Та кенешонэ ветлӥзы Россия Федерациысь эстӥськонъя но энергетикая министерствоысь, Кун Думаысь инкуазь узырлыкъёсъя комитетысь экспертъёс, Удмурт Республикаысь Правительствоын ужасьёс, министерствоослэн но ведомствоослэн кивалтӥсьёссы, асьме шаерын ужась нефтяной компаниослэн директоръёссы, озьы ик "Сэмсон Инернешнл ЛТЛ" нефтяной компанилэн вице-президентъёссы. Лыктэмъёс азьын нырысь ик вераськиз Кун Кенешлэн тӧроез Александр Волков. Со пусйиз: Россиын но Удмуртиын кылдэм югдур возьматэ: удмурт элькунын "сьӧд зарни" поттон удысэз секыт удысысь поттон понна ӝегатскытэк кулэ ужрадъёс кутоно. Пайдаё кенешонын люкаськемъёс сэрттӥзы-пертчизы нефтен месторождениосты кызьы уже кутэмез, та удысэз азинтонын выль амалъёсты пыӵатонэз, инвестициосын ужанэз. Ӟырдыт вераськон ӝутскиз нефть поттӥсь предприятиосын налогъёс тыронэз умоятон ласянь. Пусъемын вал: нефть поттон удысын валтӥсь инты басьтыны кулэ инвестициосын ужанэз выльдон, ваньбурез люконын кулэ законъёсты юн чаклан. Кылзонъёслы йылпумъянъёс лэсьтыса, Кун Кенешлэн тӧроезлэн нырысетӥ воштӥсез Владимир Агашин вераз, нефть поттонэн герӟаськем ужпумъёсты Кун Кенешлэн сессияз эскерыны кулэ шуыса. Отын ик кутоно та удысъя документъёсты но. Депутатъёслэн ӵектэмзыя, музъем узырлыкъёсты уже кутонъя лицензиосты сётон ужпумъёсты эскероно, налог тыронъёсъя законъёсты лыдэ басьтыса. Выльысь учкыны кулэ "Нефть-автомобиль" программалы висъям инвестициосты. Кун Кенешлэн пресс-службаез. Кыльлэсь эмъясь Кызетӥ даур азьлане бадӟымесь вамышъёс лэсьтӥз. Огласянь эскероно ке, сыӵе азинскон калыклэсь улон-вылонзэ тодмантэм воштӥз но капчиятӥз. Нош мукет ласянь учконо ке, Музъем шармылэн инкуазез даурысь дауре уродме но уродме. Адямиослэн но дунне вылысь вань улэп макеослэн улонзылы пӧртэм кышкытлыкъёс кылдо. Тужгес курдыт луиз СПИД висён. Эмъян удысысь тодосчиос юнме уг шуо: "СПИД - ХХ даурысь сьӧдкыль". Соин нюръяськонлы вань тодэм-валамзэ но быгатонлыксэ сётэ тодмо удмурт эмъясь Леонид Герасимович Кузелин. Со кивалтэ СПИД-эн нюръяськонъя элькун центрысь одӥгеныз отделениен. Та висёнлэн изъян ваемез сярысь верало статистикалэн куд-ог лыдпусъёсыз но. Быдэс Россия Федерациын али укмыс сюрслэсь уно адямилы кышкытлык кылдэмын. Бускель областьёсын но, республикаосын но сыӵе адямиослэн лыдзы дасоосын лыдъяське ини. Элькунмы сярысь ке верано, кылем арын сьӧрлось ветлэм одӥг адямилэсь гинэ шедьтэмын вылэм. Ярано: кунысьтымы со кошкем. Эшшо одӥгез дорамы ик улэ. СПИД-эн нюръяськонъя центрын ужась врачъёс сюлмасько та висёнлэсь сюрессэ пытсан пумысь. Тани ӵужектон тужгес вӧлмемын наркоманъёс пӧлын. Нош со СПИД-лэн матысь эшез. Врачъёслэн тыршеменызы, 1995-тӥ арен ӵошатыса, ӵужектонэн висисьёслэн лыдзы 1996-тӥ арын 44, 1997-тӥ арын 33 процентлы кулэсмиз. - Со бадӟым вормон ми понна,- шуэ Кузелин.- Центрмылэн кылдэмез дырысен вуоно арын дас ар тырмоз. Солы сӥзьыса ортчытэмын луоз научно-практической конференция. ... Ува районысь Ӝуйлуд гуртын вордскем Леонид Кузелин эмъясь луон сярысь пичи дыръяз ик малпаськылӥз. Сыӵе мылкыд пияшлы пыӵатӥз Ефим Зиновьевич песятаез. Солэн пелляськыны быгатэмез сярысь данэз Ӝуйлуд котырысь гуртъёсын но вӧлмемын вал. Олокыӵе но висёнзэс бурмытыны курыса вазисько вал Ефим агайлы - ваньмызлы юрттыны тыршылӥз. Пӧртэм турын-куаръёсыз кутыса, пелляськись Ефим быгатылӥз котькыӵе черъёсты вормыны. Лёня внукез туж тунсыкъяськылӥз песятаезлэн эмъяны быгатэменыз. Школаын биологиен тодматскемез бере, покчиез Кузелин тыметысьтызы бакаослы "операциос лэсьтылӥз". Песятаез туж яратэ вал внуксэ. - Тани, Лёние, тыныд куинь манет. Басьты аслыд кампет, преник. Чаляк но кужмо мед будод, - кисыриё киосыныз маялля пересь яратоно внуксэ. Зэмзэ но, Лёняез тазалыко будӥз. Сям-Можгалась семилеткаез йылпумъяса, Лёня Кузелин но Саша Мезрин Ижысь медициная училищее дышетскыны пыризы. Тодон-валан мылысь-кыдысь люказ Лёня, эмъясь луон понна. Куинь арлэсь ортчемзэ ӧз ик шӧды кадь. Ужаны ыстӥзы Ува ёросысь Пуштовай гуртысь медпунктэ. Ӝуйлудлэсь кык иськемын гинэ со. Нырысь ужан нуналъёсаз ик гуртазы шудтэм учыр луиз. Армиысь соку гинэ берытскем пияш атаеныз пӧсь нуналэ толлы пу лумбыт дасяллям. Ӟырдам но нюлам мугорзэ сӥятытэк, пияш тыметэ пыласькыны пырем. Нош вуысь сое поттӥллям ни. Бызьыса Кузелин першал доры мынӥллям. Час пала со выем муртлы искусственной шокан лэсьтыны вырем. Но - пайдатэк. Дыр ыштэмын вылэм ини. Та учыр эмъясьлэн сюлмаз пыраклы кылиз. - Мукетсэ но ноку уг вунэты,- шуэ Леонид Герасимович.- Пуштовай гуртамы мон но кык медсестра гинэ ужамы. Бадӟым тау соослы: нырысь-валысь туж юрттӥзы мыным, али гинэ кутскись эмъясьлы. Нош акушеркамы ӧй вал. Огпол егит кышномуртлэн, пинал вордыкуз, припадок луэм. Удмурт сямен сое кулыса усён шуо. Медсестраен ӵош ми юрттӥм солы. Но мон, колхоз председательлэсь вал курыса, Увае нуыны малпай: отчыозь кызь иськем пала. Сюрес вылысен эшшо приступ луиз. Кышкаменым чылкак шулӟектӥ. Ува больницалэн валтӥсь врачез Галина Степановна Емельянова монэ юн пыкылӥз: - Шудэд вылэм на, Леонид Герасимыч: кышномурт но нуны улэп кылизы. Шудтэм учыр луысал ке, тонэ пуктыны быгатысалзы. - Галина Степановна, мыным одно ик институтэ пырыны дасяськоно,- соку ик вазиськи главврачлы. - Басьтэ вал Увае. Татын, ӝыт ужась школаын, аттестат басьтэме потэ на. Сотэк, мединститутэ пырон вылысь, экзамен сётыны уг быгаты... 1960-тӥ арын Кузелин Ижевскысь мединститутэ пыриз. Куать ар ӵоже трос тодон-валан басьтӥз но азинлыко йылпумъяз дышетсконзэ. Арзэ ужаз Завьяловоын, собере укмыс ар ӵоже Ижысь Индустриальной районысь санэпидстанцилэн валтӥсь врачез луыса тыршиз. Райсоветлэн депутатэз кӧня ужрад ортчытъяз, районзэ чылкыт возён вылысь. Та ужын главврачлы трос юрттылӥзы райсоветлэн исполкомез но солэн тӧроез В. В. Костров. Ижысь районъёслэн ӵошатсконъёсазы, санитарной культураез усто чакламез понна, Кузелинэн кивалтоно эпидстанция уно пол кузьымъёс басьтылӥз. Леонид Герасимовичез ӟеч ужъёссэ синйылтыса юнматӥзы Тазалыкез утёнъя министерствоысь валтӥсь эпидемиологе. Но татын солы кема ужаны ӧз кылды. Ар ортчыса быръё медицина удысын ужасьёслэн профсоюззылэн обкомезлы тӧрое. Дас куинь ар ӵоже быгатыса кивалтӥз Леонид Герасимович. Усто эмъясьлэсь но кивалтӥсьлэсь тыршемзэ адӟытэк ӧз кельтэлэ: воргоронлы сётэмын "Удмурт Элькунысь тазалыкез утён удысысь дано ужась" ним. Нош 1988-тӥ арын СССР- ысь тазалыкез утёнъя министрлэн Е. И. Чазовлэн приказэзъя пусъемын "СССР-ысь тазалыкез утён удысысь азьмынӥсь" гадьпусэн (знакен). - Тросгес мед луысалзы Леонид Герасимович кадь визьмо но тыршись эмъясьёс. Соку СПИД-лы излэсь но юн борддор пуктысалмы,- шуиз мыным та висёнэн нюръяськонъя элькун центрлэн валтӥсь врачез Евгений Григорьевич Кузьмин. Песятайзылэсь но атайзылэсь сюрессэ азьланьто Кузелинлэн нылпиосыз но. Юрий пиез элькунысьтымы кардиологической центрысь отделениен кивалтэ, Люба нылыз МВД-лэн санчастяз невропатолог луыса ужа. Нош кузпалыз, Анна Игнатьевна, уно аръёс ӵоже тыршиз "Советской Удмуртия" ("Удмурт дунне") газетлэн редакцияз. Вератэк кельтыны уг быгатӥськы Леонид Герасимовичлэн "Удмурт дунне" газетэ мылысь-кыдысь гожъямез сярысь но. Трос аръёс ӵоже ни газет бамъёсын потыло солэн статьяосыз. Элькунысьтымы мукет газетъёсы но гожъя Леонид Герасимович. Берло кык ар ӵоже гинэ печатлаз кызь сизьым статьязэ. Кыкез потэмын СПИД-эн нюръяськонлы сӥзем научной журналын. Кема аръёс ӵоже ми эшъёс но луиськом. Шудбур но тазалык тыныд, гажано Леонид Герасимович! Леонид ЕМЕЛЬЯНОВ. Горд палэзь чебертоз Игра посёлоке Вормонлы сӥзем парк усьтыны чаклало. ВЛКСМ-лэн 80 ар тырмонэныз валче ортчытэмын вал нимысьтыз субботник. Отын ужазы мӧйыос но, пиналъёс но. Вуоно парк интые мерттэмын нырысь писпуос - палэзьпуос. С. ВАСИЛЬЕВ. Ас палъёссэ малпаса Аспӧртэмлыко буре ваён программа кутэмын Игра ёросын. Сое быдэсъяса, элькунысьтымы Культурая министерствоен, Национальной библиотекаен, Удмуртиысь Писательёслэн огазеяськонэнызы но ёросысь депутатъёслэн кенешенызы ӵош ужпум кутэмын Игра районын вордскем писательёслэсь нимзэс библиоткаослы сётыны. Кедра Митрейлэсь (Д. И. Корепанов) нимзэ нуллоз Игра ёрос библиотека. Кабачигуртысь библиотекалы сётэмын Петр Поздеевлэн (асэныз кенешыса) нимыз. Сепъёс басьтӥзы Афанасий Лужанинлэсь нимзэ. Н. СЕРГЕЕВ. ШУНДЫ Котькуд кыкетӥез - комсомолец Удмурт Республикаысь Правительстволэн Постановлениезъя комсомоллы 80 ар тырмон нуналэз шаерамы сӥё-дано пусйыны чакламын. Ужрадъёсты ортчытонъя кылдытэмын нимысьтыз оргкомитет, кивалтэ соин Удмурт Республикаысь Правительстволэн Тӧроезлэн воштӥсез Антонина Лисина. Мар лэсьтэмын но лэсьтӥське комсомоллэсь нуналзэ пусъёнъя? Кыӵе вал комсомоллэн азьвыл вамышъёсыз. Та пумысен журналистъёсын кенешон ортчиз Правительстволэн юртаз. Кызьы шуиз Антонина Лисина, историен уг споръясько, комсомол - со асьмелэн улонмы. Зэмзэ но, шаерысьтымы котькуд кыкетӥез улӥсь комсомол пыр потӥз. Вылӥ кивалтон удысъёсын туннэ 90-95 процентэз толло нуналысьтымы азьветлӥсь комсомолецъёс ужало. Егитъёсын ужанъя кун комитетлэн кивалтӥсезлэн Андрей Гальцинлэн пусъемезъя, 80 ар тырмонлы сӥзем ужрадъёс но пуштроссыя тупало комсомол огазеяськонъёслэн ужъёссылы. Азьло аръёсы сямен ик, шаерысьтымы егитъёслэн огазеяськонъёссы потозы субботникъёсы, юрттэт сётозы нылпи юртъёслы но школа-интернатъёслы. Егитъёслэн туннэ нуналлы ужпумъёссыя ортчылозы "котрес ӝӧкъёс". Нылъёс но пиос пумиськыло комсомол огазеяськонлэн ветеранъёсыныз, музейёсын но библиотекаосын усьтэмын адӟытонъёс. Комсомол котьку но эшъяськылӥз спортэн. Озьыен, шаерамы радъямын луозы пӧртэм ӵошатсконъёс. Нош 25 октябре Ижевскысь шор площадьын тупаса улонлы сӥзем бызьылонъёс ортчозы. Тужгес но бадӟымез ужрад ортчоз 28 октябре. Вань районъёсысь делегатъёс - ветеранъёс но егитъёс - люкаськозы форуме, нимаське со "Та паймымон дуннее мон лыктӥ". Комсомоллы 80 ар тырмон нуналэз сӥё-дано пусъёнэ пырисько шаерысьтымы вань районъёсын. Ужрадъёсты радъяны басьтӥськизы шаерысьтымы ваньмыз сямен министерствоос но ведомствоос. Пӧртэм юрттэт сётыны мылкыд каризы ужбергатон удысысь 50 пала предприятиос. Л. МАЛЫХ. ФУТБОЛ Кӧс саламен Спорт со спорт ни. Куное вуыса татын йырси кузя уг маялляло, пӧсь табанен уг сюдо. Эшлыко мылкыдын шудӥсь спортсменъёсты юн курлало, урод кылъёсын пыкыло. Ижысь "Газовикез" берло шудонъёсызъя пыкылыны мугез ӧвӧл кадь. Вань кужымзэс сётыса тыршо футболистъёс. Соин ик Майкопысь "Дружбаез" асьме спортсменъёс 2:0 лыдын вормизы, нош солэсь азьвылгес "Газовик" Краснодарысь "Кубанез" 4:0 лыдын "пазьгиз". Чемпионат йылпумъяськытозь кылиз на 4 пумиськон. Вуоно шудонъёссэ Ижысь команда Ставропольын но Нальчикын ортчытоз. Валамон ни, татын но ӟыгыръяса-чупаса уз пумиталэ. "Газовиклы" зол нюръяськоно луоз: кепырась куноез, уго, "кокало". М. КУЗЬМИН. Кошкем поездэз уд сутылы Та нуналъёсы Кун Кенешын ортчиз ваньбурез пайдаё кутонъя кенешон. "Котырес ӝӧк" сьӧрын вераськонэз нуиз Кун Кенешлэн Тӧроезлэн воштӥсез Владимир Пономарёв. Вераськонэз мытӥз Сергей Касихин - республикаысь Асваньбуръя кун комитетлэн кивалтӥсез. Со вакчияк тодматӥз приватизацилы лэсьтэм куд-ог йылпумъянъёсын. Кызьы пусйиз докладчик, выль воштӥськонъёс улэ нырысьёсыз радын шедизы сиён-юон поттӥсь предприятиос, но чылкак палэнэ кылизы пудо вордӥсь, музъем ужась. Соос чотын переработка вакчи дыр куспын узырмиз, дунъёсын ас тодэмезъя кузёяськыны кутскиз. Али тодмо ни: быдэс Россиын, асьме дорын но, приватизация ортчытэмын, законодательствоез тӥяса. Сотэк-а "Удмуртнефтьлэн", "Удмурттелекомлэн", "Удмуртэнерголэн" но куд-ог музонъёсызлэн удмурт нимзы гинэ кылемын на, ваньбурзы, коньдонзы кемалась ужало тодмотэм кузёос вылэ. Сыӵеос косэмъя вандо радио но телефон езъёсты, кысо электрокужымез, пытсало газ сётон гумыосты, огъя вераса, мынэ производствоез куашкатон, мукет сямен ке нимано - туж быгатыса дасям саботаж. Кин со понна кыл кутоз? Таӵе юанэн вераськонзэ кутскиз Кун Кенешысь Эскерон палаталэн кивалтӥсез Михаил Шишкин но. - Ваньбурез нимаз кузёослы люкылон ӧз пӧрмы, лэсьтэмын туж трос янгышъёс, - шуиз со. - Нырысь ик, приватизация ортчытон огшоры калыкез ас бордысьтыз палэнтӥз. Кыкетӥез, экономика ласянь куронъёсты кылэм-адӟем карись ӧйлась. Куинетӥез, капчиен шедем ваньбурез пайдаё ужатонлы, налогъёсты тыронлы выль кузёос дась ӧй вал. Ваньмыз со вуттӥз туала секыт югдуре. Та выллем ик малпанзы Эскерись кун комитетлэн тӧроезлэн Александр Кузнецовлэн но депутатъёслэн-коммунистъёслэн огазеяськонзылэн кивалтӥсезлэн Александр Бегуновлэн. - Коммунистъёс приватизация ортчытонэз кутсконаз ик "прихватизация" шуыса нимазы но солэсь номыр ӟечсэ ӧз вите. Депутатъёслэсь кылдытэм комиссия котыр ласянь эскериз ваньбурез люкылонлэсь бервылъёссэ, жаляса верано, одӥг учырез но умоен пусйыны уг луы, - шуиз депутат Бегунов. Александр Борзенков, Кун Кенешысь ялан ужась комиссилэн кивалтӥсез: - Правоез утёнъя удысын ужасьёс ваньбурез люкылонын трос тырмымтэосты шараязы, вырим вал солэсь радзэ но тупатыны - ӧм быгатэ. Пыкиським федеральной законъёс вылэ. Ужам асьме республикаын праватизациез ортчытонъя закон дасян бордын но. Ӧз пӧрмы, прокурор пумит луэмзэ вераз. Табере улон возьматоз: кин соку шонер вал, кин - ӧй. История ваньзэ интыяз пуктоз. - Приватизацилэн символэз луиз Чубайс. Азьланяз но та политика азинскиз ке, калыклэн чиданэзлы пум вуоз. Кызьы но малы Россия сыӵе адӟонэ вуиз? Валэктон утчано, дыр, солэн кивалтӥсез бордысь. Шуиськом, кун ваньбурез люкылон законъёсты тӥяса ортчытэмын вал шуыса, озьы бере, малы прокуратура одӥг уж но ӧз ӝуты на? "Котырес ӝӧк" сьӧрын вераськонэ пыриськиз Россия Федерациысь Лыдъян палатаын ужась Вениамин Соколов но. Вениамин Сергеевич меӵак шуиз: - Приватизация Россиын улӥсьёслы номыр ӟечсэ ӧз вайы. СССР-ен трос аръёс ӵоже люкам ваньбур быдэсак быдтэмын. Кытысь-о, ку-о адӟод вал, производство быдэс ар ӵоже 4,9 процент сяна табыш уг сёты шуыса? Странаез куашкатон быгатыса нуиське коньдонэн герӟаськем удысъёс пыр но. Россиын али куинь пумо валюта ужа: манет, доллар но вузэн меӵак вошъяськон. Берлоез ог 70 процент луэ. Зэмос рыноклы та амал уг тупа: вошъяськон нокинлы но, ноку но прибыль уз сёты. Паймоно кадь, но со озьы - туннэ нуналлы Россилэн ваньбурез нокытын но лыдъямтэ, лыдъямтэ акциен ужасьёслэн лыдзы но. Али нокин уз вера: кытчы но кинлы вузамын асьмелэн дуно бумагаосмы - таизэ но чаклась ӧвӧл. Одӥг страна но, Россия сямен, синзэ кыньыса уг ужа, одӥг странаын но, законъёсты тӥяса, приватизация уг ортчытӥськы. Прокуратура та ласянь шып улэ. Шонерзэ вераса, асьмеос выжим кыр законъёсъя улӥсь капитализме, калыклэсь кулэяськонъёссэ пыд удэ лёгаса, правооссэ котыр ласянь тӥяса. Таӵе сюреслэн пумыз вакчи. Кенешонлэн пумаз В. С. Соколов ватсаз на: - Властез киултӥзы Гайдар но Чубайс выллем йӧскадь дышетскымтэ муртъёс. Ма соос дауртӥзы, история кема аръёс ӵоже эскероз на. Нош али дыр вуэмын, кужыммес огинэ люкаса, умой-умой уж борды басьтӥськыны. Калыкмес, визьмо адямиосмес утьыны быгатӥм. Куинь нунал талэсь азьло таӵегес ик вераськон ортчиз Рязаньын. Быдэс Россия али эскере правитизацилэсь йылпумъянъёссэ. Ма шуод, Дуннеысь Валютая фонд кивалтэм улсын "бадӟым уж" лэсьтэмын. Китай соя ӧз кариськы, ас валамезъя но быгатэмезъя рыноке сюрес лёгиз. Конкуренция амал пыр. Пӧрмытӥз. Производствозэ син куспын ӝутӥз. Нош Россия быдэсак шедиз МВФ улэ. Удмуртия, соин ӵош музон улосвылъёс но, котькызьы пумитъяськизы ке но, правитизация орчытонлэсь палэнэ ӧз кыле. Россилэн ог люкетэз луыса, солэсь нокыӵе борддор сьӧры уд ватскы. Ма шуод, странамес али амалтэк ӵошатод туж лек сӧсыртэм, висьыса кыллись бадӟым пӧйшурен. Яраосыз муресь. Соосты бурмытыны но выльысь пыд вылаз ӝутскыны дыр но кужым кулэ. Ортчемзэ уд берыкты ни, ыштэм ваньбурез уд шедьты. Нош Россилэн та вакытэз историе пыраклы кылёз, дыр, сьӧд виштыен. Л. МЕДВЕДЕВА. Шунды "Радлун" - со шуд но шумпотон Удмурт егитъёслэн "Шунды" дэменлыксы юрттэмъя, таяз гужем мыным но шаерысьтымы эшшо ньыль пиналлы шуд усиз Сыктывкарысь "Радлун" санаторий-профилакторийын шутэтскыны. Удмурт кылэ берыктыса, радлун - со шуд, шумпотон. Бен озьы ик вань со. Макем трос шумпотон ваизы милемлы Коми Республикаын ортчытэм нуналъёс. Трос паймымон адямиосын тодматскимы, кылсярысь, коми поэтэн С. Журавлёвен. Лагерьын ужазы пӧртэм мастерскойёс: суреданъя, туйлэсь лэсьтӥськонъя, фольклоръя, видео но мукет. Туж тунсыко потӥз комиослэн "Шунды ӝужан" вашкала йылолэз возьматэмзы. Тодон-валанъёс но пӧртэм быгатонлыкъёс басьтэм сяна, ми тазалыкмес но юнматӥмы. Со понна ваньмыз вал - галокамера, ваннаос, ингаляциос, эмъясь физкультура, нимаз пӧрам сиёнъёс, турынлэсь чай. Улон интыосмы но вӧл-вӧлэсь вал. "Радлунын" мон аслым трос эшъёс шедьтӥ. Али но кусыпъёсмес ӧм ыштэ, ог-огмылы гожтэтъёс лэзьяськом. Галина ГАЛАКТИОНОВА, Можга педучилищеын дышетскись. Кезьытъёс матэкто Вавож ёросын гидъёсты толлы дасян шуген мынэ. Туэ ёросын одӥг выль ферма но пуктэмын ӧвӧл, "Луч но "Волипельга" эштосъёсын гидъёс тупатъяса быдтымтэ на, нош "Правда" но "Искра" эштосъёсын ылкак паймемын ини, кытын пудозы толъёз, угось татысь гидъёс куашкан калэ вуэмын. Соосты выльдыны гуртоослэн коньдонзы ӧвӧл. "Правда" колхозын 10 ар талэс азьвыл гид пуктыны шӧтазы вал. Лэсьтӥськонзэс ӧз йылпумъялэ: коньдон вуэмысь дугдӥз. Эштослэн тӧроез юрттэт курыса шаерысьтымы вылӥ кивалтӥсьёслы но трос пол вазиськылӥз ини, 2 ар талэсь азьвыл соос 300 миллион манет висъяны кылзэс сётӥзы ик вал, но... "Правдаын" али ке но вуж гид сылэ. Туэ гужем гурт калык сое уртче-валче тупатъяз, оло, одӥг толзэ чидалоз на шуыса. Алигес Вавожысь администрацилэн паськытатэм коллегиез вуылӥз Удмуртиысь Правительстволэн Тӧроезлэн воштӥсез В. Зенин. "Правда" эштослэн тӧроез та ужпумез коллегиын ӝутӥз. В. Зенин юрттыны пумит ӧз луы... В. БОГАТЫРЁВА. Кун Кенешлэн сессияз Удмурт Республикаысь Кун Кенешлэн кызь кыкетӥ сессиез 20 октябре ортчем заседанизэ кутскиз жилищно-коммунальной хозяйствоез выльдонлы сӥзем ужпумез эскеронысен. Та удысын югдурен тодматӥз Правительстволэн Тӧроезлэн нырысетӥ воштӥсез Юрий Питкевич. Со пусйиз, Удмуртиысь жилищно-коммунальной хозяйствоез выльдонъя программа Удмурт Республикаысь Правительстволэн постановлениез юнматэмын вал шуыса. Депутатъёс, та ужпумез эскерыса, таӵе малпанэ вуизы, программаен чаклам жилищно-коммунальной юрттэтъёслы дунъёс пыраклы юнматэмын ӧвӧл шуыса, та дунъёсты арлы быдэ вошъяны луоно, калыклэсь кӧня уждун басьтэмзэ лыдэ басьтыса. Лэчыт эчешонъёс пурӟизы, улон юрт программаез эскерыку. Соин тодматӥз Лэсьтӥськонъя кун комитетлэн тӧроез Г. Батищев, ӵектонъёссэ вераз депутат Сергей Протозанов. "Улон юрт" программаез юнматыны ӵектыса, Кун Кенешлэн Тӧроез А. Волков пусйиз, солэн уноез малпанъёсыз Россилэн мукет улосъёсаз но кутӥсько шуыса. Сессия "Улон юрт" программаез юнматӥз. Со сяна юнматэмын Удмуртиын статистикаез выльдонъя программа, инвестициосъя проектъёсты быдэсъянъя закон, дунъёсты кун ласянь эскеронъя закон. Ӝыт кенешаз сессия бюжетэ пырисьтэм фондъёслэсь кивалтӥсьёссэс кылзӥз. Кун Кенешысь эскеронъя палата соослэсь ужамзэс чакламез сярысь ивортӥз. Эскеронъя палаталэн муртэз Евгения Мальцева верамъя, тросэз улосвыл фондъёс коньдонзэс кулэезъя ӧз кутэ, фондъёсын ужасьёсты возёнэ укыр трос уксё быдтӥзы. Сессия та ужпумъя нимысьтыз постановление кутӥз. Удмуртиын жилищно-коммунальной хозяйствоез выльдонъя программа юнматэмын ӧй вал, Сое берлогес эскерыны чакламын. Кун Кенешлэн пресс-службаез. Коньдон - жаг ӧвӧл, сое чаклано 23 октябре Россия Федерациысь Коньдон ужпумъёсъя министерстволэн Эскеронъя но ревизиос ортчытонъя управлениезлы тырме 75 ар. Со эскере, кызьы предприятиос, учреждениос, организациос бюджетысь коньдонэз куто. Берло дыре нырысетӥ интые потӥз мукетыз ужпум: рынок вакытэ Россия Федерацилэсь но солэн гражданъёсызлэсь коньдонэн герӟаськем кулэяськонъёссэс утён, Экономика удысын йыружъёсын нюръяськон. Россия Федерациысь Коньдон ужпумъёсъя министерстволэн Эскеронъя но ревизиос ортчытонъя управлениезлэн ёзэз Удмуртиын но ужа. Со ёросъёсысь но городъёсысь контролёръёсын-ревизоръёсын кивалтэ. Кылем арын управление 656 эскерон ортчытӥз, 54 миллион манетлы законэз тӥян учыръёсты шараяз, 185 миллион манет штраф тырытӥз, 1,5 миллионзэ бюджетэ берыктӥз, 50 эскеронлэн материалъёсыз судэ сётэмын, соосъя 26 уголовной уж ӝутэмын, 393 адями суд улэ сюриз. Россиын рынок азинскемен, асваньбурез пӧртэм сямен кутӥсь предприятиос кылдэмен, коньдонлэсь кутӥськемзэ эскерись структураос ужзэс выль сямен радъяло. Палэнэ уг кыльы Эскеронъя но ревизиос ортчытонъя управление но. Управленилы 75 ар тырмонэз пусйыса, вань сюлмысьтым ӟечкыласько та удысын ужасьёсты, ветеранъёсты, сӥзисько юн тазалык, шудбур, ужаын выль вормонъёс но азинсконъёс. Россия Федерациысь Коньдон ужпумъёсъя министерстволэн Эскеронъя но ревизиос ортчытонъя управлениезлэн Удмурт ёзэныз кивалтӥсь Н. И. ЛЕБЕДЕВ. Кытын? Ку? Ма? Мадёзы удмурт егитъёс азьын сылӥсь ужпумъёс сярысь, ог-огенызы эшъяськон сюресъёс тупатозы. Шундыосын ӵош Гурт хозяйствоя академие поталозы пор, бигер, еврей огазеяськонъёсысь егитъёс но. Со сяна, удмурт егитъёс пыриськозы нылпи юртъёслы юрттон но лэсьтӥськон бервылэз утялтон ужрадъёсы. ШУНДЫ Кытын? Ку? Ма? Алнаш. Комсомол вакытысь ӟеч сямъёс туала дыре но егитъёс пӧлын вӧлмемын. Кылсярысь, Алнаш районысь егит комбайнеръёс нырысетӥ арзэ гинэ уг ӵошатско ни. Ужысь устоосыз луон понна туэ тани вормисе потӥз "Прогресс" колхозысь Эдуард Печников, со кутсаз 4657 центнер ю тысь. Кыкетӥ интыын "Большевик" колхозысь Владимир Алашеев - кутсаз 4316 центнер ю тысь. Нош куинетӥ интыез басьтӥз "Нива" колхозысь Геннадий Королёв - кутсаз 3800 центнер ю тысь. Вормисе потэмъёс ваньзы ик коньдон премиосын пусъемын луозы. Со сяна, пиос пыриськозы комсомоллэн 80 ар тырмон нуналэзлы сӥзем ужрадъёсы. Комсомоллэн нуналэзлы сӥзьыса ик районын радъямын вож писпуосты мерттон. Ялэмын конкурс, кудӥз колхоз ӟечгес пыриськоз та уже. Нош райцентрын кылем субботае сюлэсь ятыр писпу мерттэмын ни вал. Районысь радио но газет озьы ик та нуналъёсы трос инты висъяло комсомоллы. Пӧртэм ужрадъёс ортчыло школаосын, культура юртъёсын но библиотекаосын. Пиналъёс но егитъёс пумиськыло комсомоллэн ветеранъёсыныз, тунсыко адямиосын, бордгазетъёс дасяло. Пиналъёс пӧлын озьы ик ялэмын суредъёслы конкурс: "Куке мынам анай-атайёсы егитэсь вал конкурс". Нош Алнашысь музейын усьтӥськоз фотовыставка. Палэнэ кылемын уз луэ шуге-леке сюрем нылпиос но. Ӟеч мылкыдын вань лыктӥсьёс понна усьтэмын луозы Алнашысь нылпи юртлэн ӧсъёсыз. Со сяна, егитъёс пӧлын ортче комсомол кырӟанъёслы сӥзем фестиваль. Нош 27 октябре Алнашын луоз бадӟым кенеш. Отын нош ик син азе пуксёзы комсомол вакытысь дано нуналъёс, азинсконъёссы но сюлэмшугъёссы сярысь вералозы туала егитъёс. Сюмси. Егитъёслэн "Светлана" кафезы 15 октябре "котырес ӝӧк" сьӧры люкалляз туала вакытысь но комсомол вакытысь егитъёсты, азьветлӥсьёсты. Вераськон мынӥз пӧртэм ужпумъёсъя. Кылсярысь, кызьы нюръяськоно ужтэк но улон интытэк кылёнэн, кызьы быдэсъяно туала вакытлэсь та ӟырдыт ужпумъёссэ. Палэнэ ӧз кыле ваньмон дырез пайдаё ортчытон но анай-атайёс но нылпиос пӧлын кылдэм ужпумъёс. Вераськон ӝутскиз ужез кызьы радъян пумысен но. Чай юон сямен люкаськемъёс тодазы ваизы комсомол вакытысь кырӟанъёсты. Соосты озьы ик шулдыртӥз районысь "Орфей" ансамбль. Комсомоллы сӥзем ужрадъёсты сюмсиос озьы ик вож писпу мерттонэн азьланьтыны малпало. Матэктӥсь суббота нуналэ бадӟым классъёсын дышетскисьёслэн ассоциацизы, егитъёслэн центрзы но егитъёсын ужанъя отдел усьтозы "Выль поколенилэсь аллеязэ". Нош 27 октябре Сюмсиын ортчоз "Вань сюлмысь" нимо бадӟым ужрад. Егитъёс сяна, отчы люкаськозы комсомол огазеяськонысь ветеранъёс, азьветлӥсьёс. 28 октябре, шаерысьтымы мукет делегациосын ӵош, сюмсиос пыриськозы Ижевскын ортчоно бадӟым кенеше. Шаркан. Районысь школаын дышетскись пиналъёс мылысь-кыдысь пырисько комсомоллы 80 ар тырмон нуналъёсы. Гожто сочинение анай-атайёссылэн комсомол вакытэ улэмзы но ужамзы сярысь. Гуртысьтызы комсомол огазеяськонлэн историезъя дасяло альбомъёс. Нш Шаркан шор ёзо школаын дышетскисьёс ужало комсомоллэн райкомез сярысь альбом дасян бордын. Пиналъёслэн со ужъёссы возьматэмын луозы Шарканысь музейын. Пиналъёс но егитъёс пӧлын интыосын ортчоз комсомол кырӟанлы сӥзем конкурс. Вормисе потэмъёс быгатонлыкъёссэс возьматозы 30 октябре. Пичи Пурга. Комсомоллэн нуналэзлы сӥзьыса, 29 сентябре районын ортчиз сӥзьыл кросс. Нош 23 октябре "котырес ӝӧк" сьӧрын пумиськизы школаын дышетскисьёс но улонзэс комсомолэн герӟам адямиос. "Улон шоры мынам учконэ" - озьы нимамын вал люкаськемъёс азьын ӝутэм ужпум. Аскоже кивалтонлы сӥземын школаосысь активлэн кенешез. 29 октябре пургаос люкаськозы "Вань сюлмысь" ужрадэ. Котькуд гурт кенешысь ӧтемын быдэн кызь мурт - комсомол вакытысь азьветлӥсьёс, туала егитъёс но школаын дышетскисьёс. Удмурт егитъёслэн "Шунды" дэменлыксы. 9-тӥ октябре Ижевскысь кун университетын усьтӥськиз егит художникъёслэн-студентъёслэн "Ижевскысь павлин" адӟытонзы. Та ужез радъянэ пыриськиз "Шунды" дэменлык но. 16 октябре Операя но балетъя театрын усьтӥськиз "Эрума" бадӟым выставка- фестиваль. Со сӥземын вал яратонлы но воргоронэн нылкышно кусыпъёслы. Суредасьёс, фотографъёс, скульпторъёс, дизайнеръёс, кырӟасьёс, кылбурчиос - ваньмыз ас сяменызы данъяло но дунъяло яратонэз. Удмурт культурая "Дэмен" огазеяськонэн ӵош "Шунды" таяз но ужрадэ пыриськиз. Нош азьпалан - комсомоллэн нуналэз. Солы сӥзьыса, шундыос матэгес тодматскыны чаклало усточи нылпиослэн школа- интернатэнызы но гурт хозяйствоя академиысь студентъёсын. Л. МАЛЫХ. СПОРТ Нюръяськизы погонэн адямиос Йылпумъяськизы спортъя "Динамо" огазеяськонлэн шахматэн шудонъя ӵошатсконъёссы. 10 команда пӧлысь (командалы быдэ 6 адями). Вормисе потӥз йыртэмам понна кыл кутытонъя управлениысь (УИН) команда. Со 54 луоноез пӧлысь 40 очко люказ. Одӥг очколы бере кылиз Кышкытлыклэсь утиськонъя федеральной службаысь (ФСБ) команда. Куинетӥ интые потӥз милициын ужасьёслэсь тодон-валанзэс будэтонъя вылӥ школаязы ужасьёс. Кужмо луэмзэс возьматӥзы спортъя мастере кандидатъёс -вневедомственной охранаысь старшой лейтенант Артур Арзамасцев но ФСБ-лэн командаысьтыз прапорщик Сергей Пашкин. Соос люказы быдэн 8 но ӝыны очко. Укмысаз ик шудонъёсын вормиз ФСБ-лэн командаысьтыз Леонид Саланкин. Воргоронъёс пӧлын кужымзэ эскерыны дӥсьтӥз одӥг нылкышно гинэ. Ижевскысь Индустриальной отделысь милициысь капитан Марина Кондратьева. 9 луоноез пӧлысь 7,5 очко люказ но нырысетӥ интые потӥз. И. Вельтмандер. Сое будэтӥз комсомол Ӝужыт мугоро, паськыт пельпумо Александр Яновскиез мон тодӥсько ни со Ува но Сюмси районъёсысь колхозъёсын шефъёс юрттэт сётон вакытысен. Соку Ижысь андан ӵыжатӥсьёс та ёросъёсын ужазы. Александр Васильевичлэн ӵектэмезъя, гуртысь ужасьёсын пумиськылонъёс ортчизы. Отын йылпумъянъёс лэсьтылӥзы цехъёслэн колхозъёсын ужамзылы. Гуртъёслы умой юрттӥсь цехъёслы коньдон премиос сётъязы. Ӧз вунэтэ пусйылыны усто ужась колхозъёсты но. Та пумиськон зэмос праздниклы пӧрмылӥз, соку юн шӧдӥськиз сюрлолэн но молотлэн огазьын ужамзы. Яновский ӵем дыръя ачиз но гуртъёсы потаз. Урод юрттӥсьёсыз "пыжылӥз". Ас ужзэ умой радъямез понна А. В. Яновскийлы "Знак Почёта" орден сётӥзы. Александр Васильевич кызь ар ӵоже заводын ожысь ветеранъёслэн советсылэн тӧроез вал. Берлогес та советэ ужысь ветеранъёсты но пыртӥзы. Озьы отчы ог куинь сюрс ветеран люкаськиз. Александр Васильевичлэн вань улонэз заводэн герӟаськемын. 16 арес дыръяз чугун кисьтон цехе лыктӥз. Собере ачиз но формовщик луиз. 1932 арын ӟырдыт сюлэмо комсомолецез , партие кутӥзы. Ар ортчыса сое ужаны ыстӥзы ВЛКСМ-лэн Ижевскысь горкомаз. Отысь ик 1932 арын Горд Армие басьтӥзы но артиллеристъёслэн полказы келязы. Сталинград дорын ӟырдыт ожмаськемез понна А. В. Яновскийлы Горд Кизили орден но младшой лейтенант звание сётон сярысь приказ лыдӟизы. 1943 арын апреле полкез ыстӥзы Белгород доры. Соку ӵапак Курск дорын ожмаськыны дасясько вал. - Уин 5 июле батарея дась вал тушмон вылэ урдскыны, - тодаз ваиз А. В. Яновский. - Ӵукна кык но ӝыны часын музъем зурканы ӧдъяз. Асьме войскоос разведчикъёслэсь верамзэс лыдэ басьтыса, тушмонъёсыз ӝыны часлы вазь ыбылыны ӧдъязы". Куинь батареялы пумит фашистъёс 20 танксэс ыстӥзы. "Тигръёс" матэгес вуэм бере гинэ артиллеристъёс ыбылыны ӧдъязы но сизьымзэ сузмытӥзы. А. В. Яновскийлэн гадяз бырттӥзы кыкетӥ степенё Отечественной война орден. 1945 арын апреле сое артиллерияя полклэн снабжениезъя отделаз начальнике пуктӥзы. Коммунист Яновскийлэн азьвыл командирез, Советской Союзлэн Героез М. И. Макарычев вераз: "Яновский война дыръя полклэн командованиезлэсь приказзэ дыраз но ӟеч быдэсъяз. Сое батареяысьтыз воинъёс сюлмаськемез понна гажаса "атай" шуизы. Ялан эскериз, артиллеристъёс дыраз сюдэмын но дӥсямын мед луозы шуыса. Эшъёсыз пӧлын валэктон уж нуиз. Армиысь бертэмез бере Александр Васильевич выльысь заводаз лыктӥз. Ужаз сбытъя но снабжениея отделъёслэн кивалтӥсьсы луыса. Мылысь-кыдысь пыриськиз общественной улонэ. Ожысь но ужысь ветеранъёслэн советэнызы кивалтыкуз, солэн ӵектэмезъя дуриськон цехысь комсомолецъёс вань егитъёслы вазиськизы войнаын бырем воинъёслы- металлургъёслы памятник лэсьтыны. В. ЧЕРНОВ. ОСКОН Милям школамы сярысь кылпум поттылӥсь ӧвӧл... Нош кулэ вылэм! Умойтэм улонлэн пыдэсаз выем анай-атайёслэсь суд пыр талам яке огшоры школаын дышетскыны быгатымтэ нылпиосты ваё ми доры - тӥни мар бордын ужпум. Ми соосты ужаны быгатытозязы, улон радэз валатозязы будэтӥськомы интернатамы. Милесьтым ужмес адӟись эшъёсмы "Ужды кельше-а?" шуыса уг юало", кызьы чидаськоды татын?" шуо. Но мынам али ӵапак умоез сярысь уногес вераме потэ, малы ке шуоно, ужась коллективмылэн тыршемез арысь аре ӟеч пайдаен берыктӥське. Та дыре ми дорын улэ но дышетске сю сизьымдон куать нылпи - нырысетӥ классысен укмысэтӥ классозь, витьтонэз соос пӧлысь анайтэм-атайтэм. Кӧлан но дышетскон юртъёсамы шуныт, чылкыт. Вань слесарьлэн но плотниклэн уженызы тодматӥсь мастерскойёсмы, мунчомы, мисьтаськон интымы, вуриськон мастерскоймы, озьы ик бакчаосмы но фермаосмы. Нылпиос будэто емыш, картофка, шумпотыса мыно скал кыскыны, кышъясько, вурисько, мисьтасько, асьсэды асьсэос утялтыны дышетско. Озьыен, сиён-юон ласянь сюлмаськонмес чакласа гинэ но, ӝынызэ, шуыны луоз, соос асьсэ вылэ басьто. Нош кыӵе бадӟым пайда сёто теплицаосмы. Выль ар азьын нылпиосмылэн ӝӧк вылазы луо ни вож сугон, петрушка но мукет вож жалем сиёнъёс. Тулыспал кутскиськомы вузкарыны. Теплицаосамы будэтэм сяська, помидор, кияр удъёсты басьяны лыктыло Ижевскын улӥсьёс но, вӧзысьтымы ёросъёсысь но. Кылем дышетскон ар ӵоже гинэ ваньзэ-ӧвӧлзэ куатьтон одӥг сюрс манет коньдон поттӥмы. Кызьы валады, дыр, ини, милям школа-интернатамы огшоры нылпиос уг уло - соос визьмынызы бере кылем ӧлексыос. Соин ужмы туж юн висъяське огшоры школаын ужась дышетӥсьёслэсь. Нырысь ик, воспитательёсмы уй но нунал соосын артэ луыны кулэ. Мар веранэз, нылпи со - нылпи, уйвӧтазы но анай-атайзэс син азязы пукто, соин ик интернатысьтымы пегасьёс луыло. Тани одӥг гинэ учыр. Одӥгезлэн нылмылэн анаез Сарапул тракт урдсысь жуг-жаг кисьтанын бугыръяськыса но кӧтсэ тырыса улэ, калык рад ужанлэсь со быдэсак палэнскемын ини. Ми доры "кузьмам" нылыз тодэм анаезлэсь кытын улэмзэ но со доры пеганы ӧдъяз. Ярам, али тодӥськомы ни нылмыэсь кытынзэ, нош нырысь-валысь туж умойтэм учыре сюрылӥмы. Та выллем пегасьёс ой-ой кӧня милям!.. Милям ужмы герӟамын нылпиосмылы "нимысьтыз психологической климат" кылдытонэн. Ас гуртазы анай-атай шунытлэсь но мусо каронлэсь люкемын бере соос, ми дорын туж умой шӧдыны но валаны кулэ, мар со эшъяськон, ог-огедлы юрттон, ужам ужедлэн емышезлэсь кулэзэ но чеберзэ, дунлыксэ тодон, калык пӧлын астэ умой возьыны дышетскон. Милемлы, дышетӥсьёслы но воспитательёслы, ваньзэ тае нылпиосылы пыӵатыны капчиен уг сётӥськы, малы ке шуоно, ми доры ӵем дыръя ваё "куштэм" пиналэз - сизьым-тямыс аресъем тамак кыскисез, токсикоманэз, юисез, жугиськисез, жоб кылъёсын вераськисез. Педагогикая кыӵе гинэ амалэз уже ум кутӥське, будэтоно нылпиосмес умой сюрес вылэ султытон понна! Общеобразовательной предметъёсъя дышетскем но подсобной хозяйствоосамы, мастерскойёсамы ужам сяна, соос ветло на пӧртэм кружокъёсы - кырӟанъя, эктонъя, шаерез тодонъя, керттӥськонъя, пужыятӥськонъя но мукет. Шумпотыса вераны быгатӥсько: ми дорын будэм нылпиос капчиен пырны быгато ПТУ-осы. Тужгес но кусыпмы умой Иж карысь 21 номеро, Глазовысь но Можгалась ПТУ-осын. Отын соос специальность басьто но ужась коллективъёсы пырисько. Туж уноез азьвыл ми дорын будэм нылпиос али но милемын кусып возё. Мар секытэз? Конечно, коньдонлэн тырмымтэез. Дырыз дыръя выльдыны ум быгатӥське нылпиослэсь дӥсьсэс, пыдкуксэс. Урокъёсын кулэ луо уно пӧртэм наглядной пособиос, шудонъёс. Хозяйствомы бадӟым бере, выльдоно-тупатъяно луэ инвентарез, машинаосты, агрегатъёсты, юртъёсты. Ваньмызлы коньдон кулэ. Нош кытын со? Ӧвӧл. Ужась коллективмы бадӟым но быгатӥсь. Школамылэн кылдэмез дырысен - кызь куатетӥ арзэ тырше ни дышетон удысъя завуч С. А. Огородова. Озьы ик уно аръёс ӵоже ужало С. А. Рубцова, Р. Е. Широбокова, Л. А. Елмашева, Г. П. Подшивалова. Таосын ӵош ужзэс яратыса тыршо егит педагогъёс Г. А. Варламова, Н. А. Данилина, Т. С. Артанова. Ваньмыз ужасьёсмы сярысь ӟеч кылъёс вераны луысал, но газет чуръёс уз тырме. Нимысьтыз пусйысал та бадӟым коллективен кивалтӥсьмес Н. П. Горловез. Сое егит педагогъёс но кивалтӥсьёс пӧлы пыртыны луоз на ай, озьы ке но, вакчи дыр куспын коллективез ас бордаз бинялтыны быгатӥз. Ӝоген со басьтоз дышетӥсьлэсь кыкетӥ дипломзэ: Удмурт кун университетысь художественно-графической факультетэз йылпумъям мурт луоз на вылӥ квалификациен педагог-дефектолог. Л. КУБАШЕВА, Завьялово черко гуртысь ӧлексы нылпиосты дышетонъя школа-интернатысь педагог. Ма сярысь верало калык кылан-буранъёс? Пичапае лыктэм пересь анае доры чай юыны. Ма, со котькуд нунал ветлэ, оло, нуналаз кык пол но, куинь пол но. Ярато ик соос кыкназы лабыртыны, котырысьтызы нокинэ уг адӟо, уг кыло. Собере кутско лыдӟиськыны: огез кутэ "Молот" журналэз, мукетыз - "Советской Удмуртиез". Нош туспуктэмез ке вань, одно ик, кин луоз на, доярка яке мехзанизатор, дыр, шуыса, лыдӟиськонзэс соин быдто (синзы жаде). Я, мон умой-умой интыяськи, малы ке шуоно, али соос олома но кышкытэсь учыръёсыз вералозы: ведӥнъёс, мунчо кузёос, ишанъёс сярысь. Нош собере, шимес макеосыз кылзыса, кӧшкемасько ини мунчое но пырыны, гидэ но потыны: тани-тани мон азе кылдозы кадь со албастыос... Ваньмыз та - пичи дырысь тодэ ваён. Пересь анае но, пичапае ӧвӧл ни, нош вераськемъёссы али но пель сьӧрам кадь. Соос уго котькуд учырез озьы верало вал: котькуд луэм учырын - зэмос адями. Малы мон тае гожтӥсько, шуиськоды-а? Кемалась ик ӧвӧл Галина Николаевна Шушакова поттӥз "Ма сярысь верало калык кылан-буранъёс?" книга. Со тырше фольклор, мифология удысын: эскере выжыкылъёслэсь пуштроссэс, луэм ишанэн учыръёсыз, вашкала кылан-буранъёсыз. Одӥг кылын вераса, калык кылосэз - ымысь ыме, пельысь пеле верамъёсыз. Пичи дырысенымы ик асьмеос фольклорен эшъяськоно луиськомы: выжыкылэз кылзӥськом но, малпаськом но, эшъёсын ке люкаськиськом, одно ик ишанъёсыз тодамы ваиськом, ведӥнъёс сярысь вераськом: соиз яке таиз пересь кышно коӵыш но кариське, лобаны но быгатэ. Кыӵе кышкыт! Ми школаын дышетскон вакытэ дышетӥсьёслэсь ноку но уд кылы вал та выллем вераськонъёссэс. Нош али ӟуч кылын кылан-буранъёсын пӧртэм пумо лыдӟон книгаос потэмын. Мон уг шуиськы, удмурт кылын кылан-буранъёс сярысь ӧжыт гожъямын - та удысын туж тыршизы Г. Верещагин, К. Герд, Д. Яшин, Т. Владыкина но мукетъёсыз. Нош школаын литератураез дышетонъя программаын калык кылан-буранъёслы сокем ик бадӟым саклык висъямын ӧвӧл на, мон шуысал. Пиналэз пичиысен ик удмурт фольклорен тодматӥськом, но мур-мур пушказ пырыны ум тыршиське яке валанмы уг тырмы (ваньмыз сярысь бен озьы шуыны уг луы). Нош Г. Н. Шушаковалэн та пособиез туж бадӟым юрттэт луоз, фольклор текстъёсты эскерыку. Та книга потӥз бере Дышетӥсьёслэсь тодон-валанзэс будэтонъя институтын, татын ик выль книгалы презентация но ортчытэмын вал. Туж трос шунытэсь кылъёс веразы удмурт литератураез но кылэз нуись дышетӥсьёс, Удмурт университетысь студентъёс, тодосчиос, туж вылӥ дунъет сётӥз Ф. К. Ермаков. Со шуиз: "Фольклорлэсь пуштроссэ пиналъёслы ӧм ке усьтэ, соослы литератураез но валаны секыт луоз. Фольклор - со асьмелэн улонмы". Пособиысь тани басьтом таӵе шараяськымтэ жанрез: висёнэз пеллян кылъёс, мадёсъёс- ишанъёс. Та сярысь научной литератураын туж ӧжыт гожтэмын на. Дунне кылдэм сярысь легендаосты, выжыкылъёсты, удмурт калык кырӟанъёсты эскеронэз Галина Николаевна тупен-тупен, кушаса ик сётэ. Та книга, мон сямен, бадӟым пиналъёсын урокъёсты нуись дышетӥсьёслы гинэ ӧвӧл - нылпи садысь воспитательёслы, покчиосын ужась дышетӥсьёслы, удмурт студентъёслы. Одӥг кылын вераса, ваньмызлы, кин гажа но яратэ анай кылэз. Галина Николаевна, бадӟым тау карем потэ тӥледлы та книгады понна. Азьланяз но бадӟым азинсконъёс басьтыны мед быгатоды. Вера БИКУЗИНА. Кин кызьы ужа? Мандатъёсъя, депутатъёслэн ужъёссыя но Регламентъя ялан ужась комиссия но Удмурт Республикаысь Кун Кенешлэн куремезъя бырйисьёслы ивортэ Удмурт Республикаысь Кун Кенешлэн сессияз депутатъёслэн пыриськемзы сярысь. Удмурт Республикаысь Кун Кенешлэн депутатъёсызлэн 1-тӥысен (1995 ар, апрель-май) 22-тӥ (1998 ар, 6-8 октябрь) сессиосы пыриськем сярысь лыдпусъёс. 22-аз сессын 91 кенеш (нуналэн вераса) ортчытэмын, 24-ез кенеш 1998 арын ортчиз. Округлэн Депутатлэн нимтулыз Кельтэмын кенеш( нуналэн Ватсанъёс � вераса) Ваньмыз Нокыӵе мугтэк кельтэмын 1.Жебровский В. В. 50 12 2. Борзенков А. С. 3 1 3. Кокорин М. К. 8 4 4. Глухов К. А. 14 8 5. Нагорных Н. Н. 1 1 6. Бегунов А. Г. 0 0 7. Красных А. И. 19 8 8. Рябчиков В. М. 0 0 9. Зыкунов Н. И. 14 4 10. Абрамов И. В. 20 1 11. Пономарев В. А. 0 0 12. Чикуров С. В. 30 12 13. Молчанов А. М. 9 4 14. Мальцева Е. Л. 1 0 15. Шишкин М. И. 7 0 16. Красильников А. Г. 11 0 17. Бобогло С. М. 22 11 18. Роговец К. А. 29 5 19. Тарасенко В. Д. 0 0 20. Салтыков А. И. 30 11 21. Андреева С. И. 0 0 22. Антонов Ю. В. 15 3 23. Протозанов С. В. 8 2 24. Хорошавцев В. Г.? 43 7 25. Колесников Г. А. 10 4 26. Кузьменко О. Л. 2 0 27. Семёнов Ю. В. 8 0 28. Одиянков Е. Г. 22 12 29. Белоголовкин Д. Е. 13 7 30. Кучерявенко М. И. 14 0 31. Лопатин А. К. 6 3 32 Манакова Т. А. 8 5 33. Чишковская А. И. 0 0 34. Чо И. А. 32 4 35. Тумаев В. А. 53 6 36. Красноперов Г. Ф. 15 2 37. Еременко А. В. 2 0 38. Сударикова Н. А. 5 2 39. Останин Г. М. 3 1 40. Шайхутдинов Р. Т. 35 4 41. Фридрих В. Л. 11 4 42. Кузнецов А. В. 10 0 43. Кудинов В. И. 33 4 44. Жернаков В. И. 21 9 45. Горохов А. И. 5 0 46. Мартюшев М. И. 0 0 47. Казанцев И. Г. 3 0 48. Волков Б. М. 26 12 49. Максимов А. М. 25 3 50. Горяинов А. П. 18 2 51. Гейт А. М. 24 4 52. Ушаков А. А. 12 1 53. Волков А. А. 5 0 54. Веретенников Н. Д. 3 0 55. Мохначев В. А. 15 3 56. Семенов И. Н. 14 3 57. Каримов Р. М. 19 4 58. Абросимов Г. Е. 3 0 59. Верховцева Л. Л. 15 0 60. Берг. Р. Э. 13 2 61. Юшков Н. П. 12 4 62. Сторонкин Е. П. 36 3 63. Батурин Г. В. 0 0 64. Агашин В. И. 14 0 65. Макаров В. В. 29 8 66. Городилов В. И. 25 5 67. Чиркова Г. И. 12 1 68. Наговицин В. А. 2 1 69. Соловьев В. А. 2 0 70. Варламов В. С. 11 5 71. Чеченин Г. П. 8 2 72. Козлов М. М. 3 0 73. Горошников А. Д. 1 1 74. Осинцев И. П. 4 2 75. Гараев И. М. 14 1 76. Агафонцев Н. Я. 43 2 77. Михальков А. Б. 22 9 78.Широбокова С. Э. 4 1 79. Новокрещенов В. В. 1 0 80. Черницына Г. Г. 4 1 81. Ворончихин Н. В. 7 2 82. Максимов В. И. 6 1 83. Малков А. Т. 0 0 84. Чучков В. М. 2 1 85. Сычев Н. С. 15 1 86. Матушкин М. И. 5 0 87. Ешкеев А. Н. 2 1 88. Тубылов В. К. 0 0 89. Чаузов С. Г. 7 2 90. Вершинин П. Н. 11 2 91. Загайнов В. Ф. 6 0 92. Козьмин Ф. Г. 17 6 93. Юрьев Г. С. 6 0 94. Чувашов Н. Ф. 2 0 95. Добряков Ю. А. 6 2 96. Пономарев В. В. 0 0 97. Комлев В. В. 8 0 98. Боровик Ю. И. 29 2 Г. Е. Абросимов, ялан ужась комиссилэн тӧроез. Пеймыт тэльын адскиз югыт Юрий Маслюков басьтӥське экономикаез ӝутон борды 19 октябре республикаямы вуылӥз Россиысь Правительстволэн Тӧроезлэн нырысетӥ воштӥсез Юрий Маслюков. Со нуналэ ик Юрий Дмитриевич пыриськиз Воткинскын ортчем бадӟым кенешонэ. Отчы люкаськылӥзы Россиысь но Удмуртиысь обороная, му вӧй поттон но газ кыскон тӥрлык лэсьтӥсь предприятиослэн но эстӥськон сётӥсь удыслэн кивалтӥсьёссы. Огъя Союзмылэн куашкамез нырысь ик зол шуккиз экономикаез: аръёсын тупатэм кусыпъёс сӧриськизы. Промышленность гуньдӥз. Предприятиос вузъёс поттэмысь дугдӥзы. Капчигес но дунтэмгес усьылӥз сое кунгож сьӧрысь вайыны. Но таӵе югдурлы пумит луизы Россиысь валтӥсь предприятиослэн, тужгес ик обороналы ужасьёсызлэн, кивалтӥсьёссы. Асьме ваньбур поттӥсьёслы эрик сётон сярысь мылкыдзэс вераллязы учёнойёс, депутатъёс. Но вераськонъёс татчыозь югдурез ӧз воштэ. Оло, табере маке воштӥськоз?! Сыӵе оскон кылдытэ Примаковлэн выль правительтсвоез. Со сярысь ик уг-а меда вера Воткинскын ортчем бадӟым кенешон но. Трос аръёс ӵоже нырысьсэ Россиысь правительство шара вераськонэ ӧтиз экономикамылэн валтӥсь удысъёсыныз кивалтӥсьёсты. "Маслюков огазе люказ Россилэсь патриотъёссэ", - шуиз та ужрадын огез вераськись. Озьыен, сыӵе адямиос вылэ оскиськыса ик ужаны малпа кадь Евгений Примаковлэн правительствоез. "Воткинский завод" котьку но вал обороная удыслэн огез валтӥсь предприятиез. Но заказъёс кулэсмемен, татын 1993 арысен му вӧй поттон но газ кыскон тӥрлык лэсьтыны кутскизы. Куд-огзэ соос пӧлысь татын гинэ потто на. Ӟечлыксыя но вылӥ куронъёслы тупало. Сыӵе вузъёс туж дуно сыло, соин ик басьтӥсьёс но ӧжыт. Нош кунгож сьӧрын лэсьтэмез трослы дунтэмгес усе. Малы озьы луэ: кунгож сьӧрысь вузъёслы государство льготаос тупатэ, нош асьме предприятиосты налогъёсын пачкатэ? Таӵе мылкыдзэ вераз предприятилэн кивалтӥсез В. Толмачев: - Та бадӟым кенешонын ӝутэм ужпумъёсты вазьгес эскерысалзы ке, калыкмылэн улонэз та калозь ӧй вуысал, дыр. Малы данакез предприятиос огкадесь вузъёс потто? Малы проектъёс дасясь институтъёсысь визьмо конструкторъёс кошко? Малы бырыны кутскиз шоро-куспо улӥсь (средний) класс? Кыӵе воштӥськонъёс ортчытоно экономикаын кызь одӥгетӥ дауре выжон понна? Малы та дырозь сое ум тодӥське? Таӵе ужпумъёс сярысь вераськизы Россилэн валтӥсь удысъёсыныз кивалтӥсьёс, кинъёс ярато но гажало ас страназэс, ас калыксэс но сюлмасько солэн вуоно улонэз понна. Шумпотоно соизлы: кылӥськиз хозяйственникъёслэн но учёнойёслэн куаразы. Ватсалом на: кык нунал ӵоже ортчем кенешонын вераськыны чакламын вал 80 гожтӥськемъёс пӧлысь 76-ез. Озьы ке но, 300 пала люкаськемъёслы соос ӧз акыльтэ, котькуд вераськисьлы 10 минут гинэ дыр тупатэмын вал. Юрий Маслюков верамъя, экономикаез азьлань валтыны туннэ быгатозы странамылэсь узырлыксэ ас киязы кужмо возись кузёос гинэ. Соин ик куашканлэсь утёно "Газпром", "РАО ЕЭС", " Связь-Инвест" выллем бадӟым монополиосты. Машина поттон удыс, кылсярысь, 40 процент пала ужъёссэ сыӵе монополистъёс вылэ чӧлскыса гинэ лэсьтыны быгатэ. Али ваньмызлы валамон ини: экономикаез азьвыл ик чаклатэк-пусйытэк уд ӝуты. Со понна, оло, выльысь Госпланэз улӟытоно? Но кызьы шуиз солэн азьвыл кивалтӥсез Юрий Маслюков, со ортчем сюрес ини. Выль сямен ужано. Германиын та ужез "улӥысен" нуо. Со понна кылдытэмын ваньбур поттӥсьёслэн союззы. Со ик кредитъёс висъя, ваньбур поттӥсьёслэсь ужзэс капчиятон сярысь сюлмаське, заказъёс утча. Асьмеос но ужез озьы радъяны быгатӥмы ке, му вӧй кыскисьёслы качалкаос одӥг предприятие гинэ тырмыт поттыны быгатоз, нош али сое котькуд колхозын сямен лэсьто. Вице-премьер люкаськемъёслы озьы ик ивортӥз, мар бордын али ик ужаны кулэ правительство. Куинь ужез быдэстоно, шуиз со: толлы дасяськоно, калыклы сиён-юон дасяно но монополистъёстлы юрттоно. Коньдонэз шыръятэк уз луы, но уждунэз дыраз тыроно. Кызьы валэктӥз Юрий Дмитриевич, Валютая фондысь, кызьы чакламын вал, сентябре коньдон ӧз вуы, октябре но оло вуоз, оло уз. Та секыт ужез ас вылаз ачиз Примаков басьтӥз - данэз бадӟым, вераськыны быгатоз, оскытӥз Ю. Маслюков. Та нуналэ ик Примаковлэн юрттӥсез Кун Кенешын пумиськылӥз на Удмуртиысь предприятиослэн, администрациослэн, пӧртэм министерствоослэн кивалтӥсьёсынызы но депутатъёсын. Солы трос юанъёс сётэмын вал. Сюлмам йӧтӥз Глазов ёросысь администрациен кивалтӥсезлэн Г. Чеченинлэн веранэз: - Колхозэ кема возьмам коньдон вуэ. Мар соин кароно: воштос ёзъёс-а басьтоно, уждунлы-а висъяно? Калык мур малпаське но мылкыдзэ вера... воштос ёзъёслы висъяно. Зэм, сыӵе асьме калык! Азьпалан чилектэ ке югыт, солэн осконэз юнма. Соку со котькыӵе шугсекытъёсты ворме. Мынам малпамея, Россилэсь туала правительствозэ сыӵе югдытӥсь осконэн лыдъяны кулэ кадь. Сютэм но жуммем калыклы али со туж кулэ. - Инмар ке юрттӥз, ваньзэ лэсьтыны тыршо, нош ӧй ке быгаты - нокинлы уг люкеты, уг акыльты, - шуиз Ю. Маслюков Кун Кенеше люкаськемъёс азьын. Татьяна Банникова. Вице-премьер Ю. Маслюков Почёт Орденэн ӟечкыла "Воткинский завод" ГПО-лэсь валтӥсь директорзэ В. Толмачевез. Фотоез Андрей Поздеевлэн. Очерк Светлана Яковлева Анатолий Михайлович Петров вордскемын но будэмын Можга ёросын Элько гуртын, огшоры крестьян семьяын. Дышетскемын Кватчи 8-классъем но Горняк шор ёзо школаосын. Йылпумъяз Удмурт университетысь юридической факультетэз. Юрист. Али ужа Удмурт кун таможняын дознаниея отделлэн кивалтӥсез луыса. Ошмесысь курыт ву Уг тодӥськы ни, кызьы ми Анатолиен нырысьсэ рос-прос тодматским. Огпол ӝытазе дорам пыриз но кепырасагес вазиз: - Мон бертӥсько. Тонэ возьмалом-а? - Ӝоген мон но ваньмо. Дырыд вань ке, возьма. Озьы огпол-кык пол ужысь ӵошен бертыны кемдылӥз. Сюрес кузя вамышъянммыя, Толя кызьы ке вераны шедьтӥз. - Мон вынъёсын, сузэръёсын узыр адями. Анае ласянь кык выны но кык сузэре. Нош атае ласянь - кык поллы уногес. Секыт аръёсы анае монэ песянаелы одӥг аресысен ик будэтыны сётэм. Та семьяын - асьсэлэн сизьым пиналзы - : ньыль пи но куинь ныл. - Мыным одӥг арес тырмем бере, анае бызиз. Угось рос-прос улон инты ӧвӧлэн, юртъер ӝутонэн сэрен, песянае, соослы секыт пичи пиналэн йӧтоз шуыса, дораз басьтэм. Шуиллям: нырысь асьтэос пыд йылады султэ ай. Анае пумит вылэм монэ сётыны, но мар карод, улон озьы радъяз. Собере вордскизы на сузэр-вынъёсы. Анае берен басьтыны турттэ вылэм но, песянае сётымтэ ни. Шуэм, асьмеос ик будэтом. Озьы мон будӥ песянае но песятае вӧзын. - Анае сюратаен мон доры ӵем гинэ вуыло вал чакланы, юрттыны. - Кызьы мон тодӥ со мынам анае шуыса? Веразы, дыр. Мон малпамья, котьку тодӥсько вал, со мынам анае шуыса. Куспазы туж тупаса, ог-огзэс яратыса будӥзы. Ноку но ӧз пыкылэ, тон милям ӧвӧл ӧз шуылэ. Толялы но соос аслаз сузэр-вынъёсыз кадь пото вал. Будэм сюрессэ малпаса, кытӥяз ӝожоме но. Огинтые кема учкыса, мур малпаськыса, секыт лулӟылыса пукемез бере шуэ: - Со верантэм суред. Син азяд пукты ай: таиз песянае шорам учке, анае учке. Соиз доры-а, таиз доры-а вамыштоно? Мыным кыксы но жаль пото. Егит дыръя ма гинэ уг луы! Маскара учыръёсын артэ пумиськылэ шимесэзгес но. Одӥг нуналэ пиналъёс йыртэманы шедьтӥзы. - Эшъёсыным ӵош, школае мыныкумы, быдэс куро кабанэз сутӥм. Пичи гинэ кенжытӥм но - копакыз гомӟиз. Олокызьы но кысыны вырим, ӧм быгатэ. Ох, кышкам! Бызьыса школае кошким. Пиналъёслэсь йыртэмамзэс ужъя дышетӥсьсы адӟем. Пиос возьмаса улӥзы ини, ку соосты сизьдозы шуыса. Зол ик йӧттӥзы! Трос нылпиё семьялы нокуно, нокыӵе вакытэ капчи ӧвӧл улыны. Укмыс классэз быдтэм Толяез ӵужапаез Иже вае но почта нуллӥсе интыя. Бызьылонэз тырмыт гинэ. - Куазь жаль-жаль зоремен, огпол вань газетъёсы, журналъёсы таш-таш котмизы. Кызьы, малпасько, табере сётъялом ини. Сумкае бадӟым, секыт ачим пичи. Туж жади со нуналэ, сумкаелэсь ӧй, куректэменым сэрен. Нокин ӧз тышкаськы. Почтальонзэс пальпотыса пумиталлязы, валазы ук, куазь янгыш шуыса. Маин но соин кунояло вал: кин вишня сётэ, кин яблок яке сакырен чай. "Ижмаш" заводын ужамез бере - армия. Татысь Толя старшина луыса бертэ. Армиын ӟеч служба нуэмез понна, шутэтскыны дыр сёто. Соку ик дораз бертэ но, благодарственной гожтэт вуэ. Армиысь бертэм бераз нош ик дышетскон сярысь малпаськон ёрмытэ. Но нырысь тужгес но малпа вордэм зэмос атайзэ ай адӟемез. Аслэсьтыз шумпотонъёссэ верамез. Собере шуэмез но потэ: " Учкы, кыӵе мон луи! Нош тон..." Ӵап озьы ас понназ вераськыса, сюрес кузя мынонъяз йӧл нуллӥсь машина дугдӥз. Пуксиз. Вуизы гуртэ. Водителез юа: "Тон кинлэн пиез луиськод бон ай?" - Алдаськи, мар но со верай но машинаысь потӥ. Мылкыдыз верантэм кылъёсын пачылмемын. Вылаз ик, со солдат дӥсен йӧн-йӧн тузи воргорон... Эх! кытын меда со атай?! Ӧз, ӧз кылды атайзэ адӟыны со дыре. Ӵап капка пуннямен ӧз лу дораз пыремез. Служба бере ини, нош ик "Ижмаш" заводын ужакуз, цехысьтызы ужасьёс Ленин районэ депутатэ кандидатэ ӵектӥзы. Озьы 1981-1983 арозь депутатлэсь ужзэ мылысь- кыдысь быдэсъяз. - Депутатлэн ужез политикая, экономикая, огъя улонлэсь ӧрзэ умойгес тодыны- валаны куриз. Тодон-валанме но будэтӥ. Нош отӥяз ужай КГБ-ын. Секыт вал будон вакытэз Толялэн. Ас кужмыныз ялан со сюрес вылысь комокъёсты сэрпалляса потӥз вольыт сюрес вылэ. Сыӵе йыг-йыг, тыпы кадь, нокыӵе кужымлы сётскисьтэм, батыр кадь воргорон вордӥськем пичи гинэ Элько гуртын (али та гурт ӧвӧл ни). Будо кык пиналъёсыз - Оля но Максим. Кузпалыз - ӟуч, Казахстан шаерысь. Уло кык комнатаем "хрущёвкаын" нырысетӥ этажын. Школаын дышетскыкум мыным ваньмыз сямен предметъёс ярало вал. Но тужгес кельшо вал история, химия но астрономия. Уггес яратӥськы вал удмурт кылын (коть ӟуч кылын), сочинение яке диктант гожъяны. Малызэ ачим но валэктыны уг быгатӥськы. Ужакум ини, малпай, одно ик дышетсконо. Озьы вакытэз вуэм бере, Удмурт кун университетлэн юридической факультетаз пыри. Зэмзэ верано ке, ноку но ӧй малпалля юристэ дышетскыны. Малпай вал техникаен герӟаськем удысъя наукая тодон- валан басьтыны, но луи юрист. Шутэтскон вакытаз яратэ арганэн шудыны. Мон тодӥсько, солэн сузэр-вынъёсыз но усто кырӟась-шудӥсьёс. Кылсярысь, Маша Петрова сузэреныз ӵошен "Чипчирган" ансамбле но ветлӥмы. Но Машалэсь таӵе тунсыко вынзэ берлогес тодӥ. Табере Анатолий Михайлович пыр саламъёс ке но огмылы ысъяськом. Яратэ удмурт кырӟанъёсты, эктонъёсты. Ачиз но кырӟа. Анатолий Михайлович туж лякыт сямо воргорон, ӟеч эш. Эшъёсызлэн верамзыя, со котьку но котькинлы дась юрттыны. Кылымтэ-адӟымтэ улсы уг аналскы, тырше адямилэсь сюлэмшугзэ валаны. Кытын гинэ ӧвӧл со ужамын, вань ужам ужъёсыз пусъемын благодарственной листъёсын, пӧртэм кузьымъёсын, коньдон премиен. Адӟиське, со вань сюлэмзэ, тодэм-валамзэ поныса тырше ас удысаз. Зэмос атайзэ Толя уг ке но тоды, сюратаез солы матын, атай кадь вал. Толя сое туж гажаз зарни киосыз, визьмо луэмез, ужез яратэмез понна. Быдэс улонзэ мушкась луыса ужам. - Туж жаль потэ, ужам ужзэ адӟытэк-пусйытэк кельтэмзы понна. Адӟемпотостэм каре вал азё-беро адямиосты, суронбамъёсты, алдаськисьёсты, йыртэмасьёсты, кыл вӧлдӥсьёсты. Со понна сое ярато но куд-огез адӟемпотостэм но каро вал. Таиз валамон. Котькудӥзлэсь ымзэ уд пытса, сюлэмзэ уд усьты. Али ке но Анатолий Михайловичез сюлэмшугъяськытэ, кин солэн атаез, кӧня меда нылпиез... - Туж потэ солэн семьяеныз тодматскеме. Кинъёс соос? Кельшо-а мыным солэн нылпиосыз? Тодо меда мон сярысь? Тодэ-а ачиз атае, мон дунне вылын вань шуыса? Оло куке но пумитало ай соосты. Ошмесысь курыт ву но куке-соку шӧмзэ воштэ вылэм. Толя понна со кемалась сурсвулы пӧрмиз ни. Юыса-юыса кӧтыз уг тыры. Чылкыт ву, ёзвиостӥз ортчыса, егит, таза мугорзэ уката но тузӥ, калык син шоры йӧтымон каре. Удмурт таможняе Анатолий Михайлович ужаны пырыса, зол-зол басьтӥськиз законэз тӥясьёсты шараян борды. Тросгес выроно луэ таможнялэн тыронъёсызлэсь палэнскисьёсын, умойтэм сиён-юон но тӥрлык ваисьёсыз но соосты шараян бордын. Анатолий Михайлович кутскиз ужаны инспекторысен, собере луиз старший инспектор, валтӥсь специалист. 1994 арысен ужа дознанилэн отделэзлэн кивалтӥсез луыса. Шараяз ни дасо ужъёсты, кудъёсыз герӟаськемын таможня правилоосты тӥянэн. Ужъёсты сэрттыса-пертчыса, государство бюджетэ пыртэмын 100 миллион манетлэсь уно коньдон, 1992-1993 ар уксё дунэн ай. Озьы ик шараяз йыртэмам ужъёсты. 9 адями судэ сётэмын. Эскере лушкем поттэм курыт юонъёсты... Но туала улонын ужаны люкето йылаз-пумаз вуттымтэ законъёс. Государственной таможенной комитетын ӟеч ужамез понна 1995 арын Анатолий Михайловичлы Удмурт Республикаысь Правительстволэн Данъян грамотаез сётэмын. Туспуктэмез В. Беломорскихлэн. Тодазы ваизы, данъязы Комсомоллэсь 80 ар тырмонзэ шаерамы котькытын паськыт пусъё ни. Котькудӥз ёрос ужа нимысьтыз дасям планъя. Элькунысьтымы национальной музейын 20 октябре усьтӥськиз "Комсомол - улонэ мынам" выставка. Отын комсомоллэн пӧртэм аръёсы улэмез но ужамез возьматӥське. Нош Ижысь шутэтсконъя "Ударник" центр кылем пуксёнэ огазе люказ Удмуртиысь Комсомоллэн премиезлэсь лауреатъёссэ. Ваньзы ик соос литература, культура но искусство удысын тыршисьёс - калык писательёс Генрих Перевощиков но Петр Чернов, калык поэт Олег Поскребышев. Комсомоллэн премиосыз соослы сётэмын вал егитъёсты будэтонлы сӥзем устоесь произведениос кылдытэмзы понна.Туала егитъёс но та ӝытын сак кылзӥзы тодмо гожъясьёсмылэсь тодэ ваёнъёссэс. Фестивалез шулдыртыны юрттӥзы мукетъёсыз лауреатъёс но - "Ижмаш" объединенилэн культура дворецысьтыз удмурт калык театр но балетъя калык театр, элькунысьтымы культурая училищеысь кырӟанъя но эктонъя "Зангари" калык ансамбль, "Металлург" культура дворецысь эктонъя "Андан" калык ансамбль. Пумиськон йылпумъяськиз. Чебер но шулдыр вал сцена вылын. Но быдэ вуымтэослы калык кырӟанъёс но эктонъёс кулэ ӧвӧл ни, шӧдске. Залын ялан солань-талань ветлӥсьёс вал. Ӵем гинэ юр-яр но карылӥзы. Комсомол сярысь но уноез уг ни тоды. Одӥгзэ поколенимес, кивоштӥсьёсмес ыштӥм ни кадь. Комсомоллэн дано ужъёсыз сярысь азьвылгес тодэ вайытыны кулэ вал, дыр? Н. Байтеряков. Снимокъёс вылын: экто "Зангариысь" нылъёс; писательёс Олег Поскрёбышев, Петр Чернов но Генрих Перевощиков. В. Камашевлэн туспуктэмъёсыз. ШУНДЫ Таня пуктӥз кеськон пус! Пичи Пурга ёросысь паймымон нылашен Таня Пантелееваен лыдӟисьёсмес кылем арын тодматӥм ни вал. Туэ Таня Удмурт университетысь журналистикая факультетэ дышетскыны пыриз. Мудрон но тунсыко нылаш татын но ваньзэс паймытӥз ни. Алигес со Москваысь ивор басьтӥз. Кылем аре "Учительская газетаын" ялэм конкурсын Таня Пантелеева нырысетӥ интые потэм, табере со ӝоген Лондонэ мыноз! Сыӵе вормонэныз ӟечкылан но мылкыдзэ тодон вылысь ми Таняен дышетскон интыяз пумиськылӥм. - Таня, мар конкурс вал со? - Мон ачим но рос-прос мазэ-созэ валаса ӧй вутты. Суредаськонъя дышетӥсьмы Семён Николаевич Филимонов огпол шуиз: "Таня, "Учительская газета" сочинениослы но плакатъёслы конкурс ялэ. Уждэ ыстыны мылкыдыд ӧвӧл-а?" Мон "уг" шуи. Кык пол ысъяй ни, нош соос Пургалэсь кыдёке ӧз вуылэ. Но Семён Николаевич ӧз буйгатскы. Юай темазэ. "Имею право!" нимаське, шуиз. Со кылъёсты верамез бере ик мынам син азям суред пуксиз: инвис дурын кеськон пуслы укшась адями. Со ӝытаз ик суредай но ыстӥ. Плакатэ сярысь вунэтӥ ни вал, гужем Москваысь ивор вуиз, дас устоосыз пӧлы, пе, сюриськем. Ачим сярысь рос-прос ивор гожтыса ыстыны косӥллям. - Соку вормонлы осконэд матэктӥз ик, дыр? - Куинетӥ ке но мед луысал шуыса малпай, но со сярысь нош вунэтӥ. Нырысетӥ интыез сётэмзы мон понна туж возьмантэм луиз. Али асме но уг шӧдылӥськы - лобаса ветлӥсько. 1-тӥ ноябре Москвае кошкисько ни, отысен - Лондонэ. Со сярысь ноку но ӧй малпалля. Туж тау дышетӥселы. - Таня, тон туж аспӧртэм кылбуръёс но гожъяськод, суредъёсыныд но паймытъяськод. Кудӥз удыс золгес кыске? Ӧд янгыша-а аслад удысэныд журналистикаез бырйыса? - Мон со сярысь малпаськылӥ ни. Нош "Титаник" фильмез учкем бере, сюлмы ик оломар луиз. Отысь валтӥсь героезлы Джеклы синмаськи: со сыӵе умой суредаське! Мынам но усто суредаськыны дышетскеме потэ, но кылдоз на-а сыӵе луонлык - ӧйтӧд. - Мае возьматӥськод суредъёсад? - Уг тодӥськы. Отын номыр учкымонэз но ӧвӧл кадь, кыӵе ке валантэм малпанъёсы гинэ суро-пожо пуксемын. Олокытысь вуо-вуо, ваньзэ лэсьтыса но вуттоно ӧвӧл. Ваньмыз суредъёсме уг но валало, дыр. Ма, мон ачим но котьку валэктыны уг быгатӥськы. Ӟеч сюрес но тунсыко малпанъёс тыныд, Таня! З. РЯБИНИНА. Тау - ӧд вунэтэ Выль Бия гуртын ортчиз мӧйыолы сӥзем ужрад. Люкаськемъёсты шуныт кылъёсын сӥлы каризы "Пычас" совхозлэн кивалтӥсез Борис Иванович Белоусов но сельсоветлэн кивалтӥсез Александр Лукианович Ильин. Ческыт пӧрамъёсын куноятӥзы арлыдоосты Выль Бия гуртысь столовойын ужасьёс. Нош сӥлы карон ӝытэз туж быгатыса но валаса радъям клублэн кивалтӥсез Раиса Прокопьевна Данилова. Тужгес но арлыдо кышномуртлы, шуд но тазалык сӥзьыса, сылалэн нянь сётӥзы. Ваньмыз ик сак кариськыса кылзӥзы пудо вордон удысын кема аръёс ӵоже ужам муртлэсь Альбина Николаевна Кириловалэсь мадемзэ. Люкаськемъёс понна шулдыр концерт возьматӥзы школаын дышетскисьёс, гуртоос. Та пумиськонын ми эктӥмы, пӧртэм шудонъёсын шудӥмы, шулдыръяськимы. Пионеръёслэн нимынызы ваньмызлы ик тау кариськомы таӵе праздник ортчытэмзылы. Можга районысь Выль Бия гуртысь пенсионер. Татьяна ПАНТЕЛЕЕВА Сьӧд люкмесын Пеймыт уе Гочатыса кырмышъязы Кезьыт синъёс: - Кин куное зымоз? х х х Курмем ки пыдэсын Ыргон кирос, Нош юг тӧдьыосаз - Зарни. Соос, пе, оскисьёс. х х х Сьӧд ымнырдэ Ватӥд Тӧдьы кышетэныд. Нош кытчы Сюлэмдэ ватод? Оло, тӧдьы шыкыс Лэсьтод? Алнашысь ветеринарной станциын трос шуныт кылъёс верало Валентина Яковлевна Трофимова сярысь. 30 ар ӵоже татын ужатозяз котькыӵе дыръёсын пумиськылӥз, пӧсьсэ но, кезьытсэ но шӧмъяз. Тужгес секыт йӧтылӥз пудо висёнъёс аляку. Ветеранлэн сюлмо тыршемез дуно кузьымъёсын но сӥлы карон грамотаосын пусъемын. М. КУЗЬМИН. Пинал куараос Койык синвуос Улонысь учыр Шулдыр шундыё нунал. Инмын одӥг пилем но уг адскы. Онтон агай пыӵалзэ кутӥз но пӧйшураны потӥз. Сьӧраз Шарик пуныез бызе. "Туннэ удалтыны кулэ", - ас понназ малпаз пӧйшурась. Онтон агай луд кечъёсты но ӟичыосты кутылэ. Бадӟым пӧйшуръёсты улытозяз ыбемез ӧвӧл. Сике пырыкуз ик кытысь ке куак улысь луд кеч тэтчыса пегӟиз. Шарик лулыз бырытозь утэ. Лудкечез лэземысьтыз кузёезлы йыркуръяське кожалод. Ветлыса, ветлыса Онтон агай чебер куше вуиз. Шуак писпуос сьӧрын ӵаштыртэм кылӥскьиз. Кызъёс вискысь гань-гань койык потӥз. Чульк гинэ вуиз пиез но. Воргорон койыкпи шоры пыӵалзэ урдӥз. (Ачиз но ӧз вала киызлэсь ӝутскемзэ). Мумы койык пиезлы вамен султӥз но шуш кеськиз. Озьы со пизэ улляз. Койыкпи пегӟиз, нош шаян патрон анаезлэн сюрлыаз вуиз. Пӧйшур соку ик вырыны быгатӥсьтэм луиз. Азьпал пыдъёсыз вылэ гинэ пыкъяськыса, адями сямен бӧрдыны кутскиз. Пичи пиналлэн кырымъёсыз быдӟаесь синкылиос пумтэм васько койыклэн ымныр кузяз. Онтон агай пумыса сылэмез бере каллен гинэ вамыштӥз койык доры. Али гинэ со валаз сьӧлык лэсьтэмзэ. Пӧйшурлэн чырты бордаз ӟыгырскыса ачиз но куараен бӧрдыны кутскиз. Радзэ валатэк утӥсь пуны но валаз кадь мар луэмез - чалмиз. Мумы койык кулӥз. Кема кылиз пӧйшурась сӥяны вуттэм мугор бордын. Гу лэсьтыса койыкез ватӥз но бер ӝыт гинэ гуртаз бертӥз. Али но уг вала, кыӵе чер кизэ ӝутӥз пӧйшур вылэ. Со но луло ук, адями кадь. Туннэ Онтон агай нош ик вамыштӥз шайгу доры. Со интые вуыса, нош ик посьвуаськиз. Куак сьӧрысь койыкпи потӥз но анаезлэн шайгу дураз пыдесъяськиз. Ымныр кузяз синкылиос васько. Пӧйшурасез адӟемез бере каллен гинэ берытскиз но сик пала вамыштӥз. Ӧз, ӧз пегӟы койыкпи. Оло сое но пересь мед ыбоз малпаз (анайтэк котькинлы секыт сётӥскье, уго), Онтон агайлэсь саламзэ но нянь турижзэ туннэ ымаз но ӧз поны со. ШУНДЫ Историысь чуръёс 1918 арын кыдытэмын вал РКСМ. Егитъёслэн Союззы нырысь нуналъёсысеныз ик нюръяськыны кутскиз Совето власть понна. Граждан ожын кышкатэк ожмаськемез понна комсомол пусъемын "За боевые заслуги" орденэн. "Одӥг комсомолец но уз палэнтӥськы коллективизация ортчытонлэсь!" - сыӵе ӧтён улсын ужазы егитъёс гурт хозяйствоез ӝутонын, колхозъёс кылдытъянын. Кулакъёслэн ки улазы быриз Сима Рыбникова. Комсомолецъёс дэмен кылдытъязы лыдӟиськон коркаос, пичильтык библиотекаос, кружокъёс. 1931 арын комсомол басьтӥз "За трудовую доблесть" ордензэ. 1940-тӥ арын потӥз А. Гайдарлэн "Тимур и его команда" книгаез. Шаерамы соку ик вӧлмизы пинал тимуръёслэн командаоссы. Нырысетӥез сыӵе команда кылдытэмын вал Ижысь Пастухов урамысь 11-тӥ юртын. 1944 ар. Войналэн нырысь нуналъёсаз ик райкомъёсы кыстӥськизы доброволецъёс. Удмуртиысь 60 сюрс мурт орденъёс но медальёс басьтӥз. 110-эз - Советской Союзлэн Героез луизы. Ӝыныез соос пӧлысь - комсомолецъёс. Гуртъёсын но городын "фронтовой бригада" ним басьтон понна тыршизы. Егитъёс пеймытысен пеймытозь ужазы фронтэ кошкем эшъёссы понна но. Быдӟым Отечественной ожын кышкатэк ожмаськемез понна 1945 арын комсомол пусъемын Ленин орденэн. Нош ик ӝутоно куашкам калык хозяйствоез, Выльвылэз. Удмуртиысь 10000 егитъёс кошко выльвылэз ӝутыны. 900 мурт пусъемын медальёсын. Комсомол, котьку сямен ик, азьветлӥсьын. 1948 но 1956 аръёсын эшшо кык Ленин орден басьтэ. 1968 арын 50 ар тырмонэзлы сӥзьыса Октябрь Революция орденэн пусъё. Валэктэ юрист Сэрегез нуэ адвокат Лилия Шкляева Юртэз люкон Ӵыжы-выжыос куспын олома но луэ. Мынам вань асваньбуре (собственносте) - юртэ. Но солэн туж пичи люкетэзлэн кузёез - мукет мурт. Таизлэн сэрегез сокем ӧжыт - отчы улыны но ӧз пыра. Табере мон малпасько юртэз вузаны. Нош соиз кузё пумит луиз. Ма кароно? П. КОРЕПАНОВ. Гожтэтъя валаськод: котькызьы шу, нош юртлэн кузёез кык. Россия Федерацилэн Гражданской кодексысьтыз 246-тӥ ёзэт (статья) ӵапак та выллем юанъёслы валэктон сётэ. Ваньбур кӧня ке муртлэн лыдъяське ке, соин кузёяськыны кулэ ваньмызлэн соглаш кариськемзыя. Сое яра вузаны, кузьманы, кельтосэ (наследствое) кельтыны, залоге сётыны. Аслэсьтыз люкетсэ, вылӥ верам ужрадъёсын герӟаны малпамзэ адями гожтыса ивортыны кулэ мукетъёсызлы огъя кузёослы. Музон кузёос, иворез басьтэмзы бере ваньбурез одӥг толэзь куспын уг ке басьто, адями ас люкетсэ котькинлы вузаны быгатэ. Улон возьматэ: кӧня ке муртэн герӟаськем юртэз вузаны-басьтыны шуг. Соин ик 252- тӥ ёзэт чакла огъя ваньбурез люкыны нимаз адямиослы асьсэос соглаш кариськемъя. Огъя кыл шедьтымтэ дыръя вазиськыны луэ судэ. Ассэ ваньбурез висъяны секыт ке (юртэз корен-корен уд сэртты), нимаз висъяськыны мылкыд карись мурт быгатэ ас пайзэ коньдонэн тырытыны. Ма кароно, огез кузё ас пайзэ вузаны медэ ке, нош музонэзлэн сое басьтыны коньдонэз ӧвӧл ке? Судлэн соку кужмысь дун тырыны косэмез луэ. КУНГОЖ СЬӦРЫСЬ ГАЖАНО ЭШЪЁСМЫ Лёго-выро сюрес Шаерамы алигес вуылӥз Франциысь тодосчи Жан-Люк Моро. Огшоры ӧвӧл та адями: француз кылэ берыкъяса удмурт кылбуръёсты, анай кылмес ас понназ но дышетыны выре. Ӟеч кусыпъёс возе тодмо гожъясьёсынымы. Дорамы куноякуз, Жан-Люк Моро вуылӥз трос интыосы. Нош туннэ тодосчи лыдӟисьёсмылы ачиз маде ортчем но туала вакытэз сярысь: - Удмуртъёс доры сюресэ ньыльдон ар талэсь азьло мытӥськиз. Мон соку Москваын МГУ- ын стажёр вал. Дас толэзь улӥ отын. Ӟуч кылэз умой тодӥсько вал ини. Нош Россие лыктыса, чылкак выль кылъёсты но тодыны турттӥ. Соин ик нырысь ветлӥ литва кылъя лекциосы, собере тунсыкъяськи на грузин кылын. Москвае лыктэмелэсь азьвылгес ини, Франциын дыръям ик, дышетыны кутски финн-угор кылъёсты - венгер кылэз но кӧня ке - финн кылэз. Соин, лэся, Россиысь финн-угор кылъёс мынэсьтым мылкыдме бордазы кыскыса улӥзы. Тодматски Венгриысь Сюч нимо студентэн. Солы верай малпанъёсме, нош со монэ тодматӥз эшеныз - удмурт студентэн. Тӥни со ик монэ удмурт кыллы кӧня ке дышетыны соглаш луиз. Ми соин туж матысь эшъёс луим. Кыкнамы ик егитэсь вал на. Зэм, мон уг тодӥськы вал на, финноугровед луо шуыса. Тодӥськоды ук: егит дыръя оломар но лэсьтэммы потэ, котьмаин тунсыкъяськиськом. Удмурт дышетӥсе но ӧз тодылы, тодмо писатель луоз шуыса. Со вал Пётр Константинович Чернов. Мон понна со котьку но луоз Петя. Собере мон Франциям бертӥ. Татын мыным дышетӥсь ӧз шедьы ни. Ас кожам кӧня ке тырши, Москваысь ваем текстъёсме лыдӟылӥ. Та удыс оглом секыт вал. Котьмар ке но, пичи гинэ статья гожтӥ вакчи дыр куспын тодэм удмурт литература сярысь. Собере дырын-дырын ялан тырши лыдӟыны но валаны, ӧжытак дышетскыны. Азинлыкъёсы ушъяськымон ӧй вал: солы трос дыр кулэ, вылаз ик, коньдонэ но ӧй вал. Собере ини мон зэмос финноугровед луи. Профессор ним сётӥзы. Кафедраямы дышетськом венгер, финн но эстон кылъёсты. Мукет кылъёсты но дышетыны луонлыкмы вань, но кылем арозь умой-умой ӧм вырелэ. Миым, котьку сямен, мыным сётӥзы спецкурс. "Финн-угор кылъёсты ӵошатон грамматика" нимаське со. Вераны кулэ: студентъёс туж тунсыкъяськыса ӵошато, ваче пумит пукто финн но венгер, венгер но финн кылъёсты. Озьы ик - мукетъёссэ. Шуом, эстон кылэз. Куинез ик туж тунсыкоесь. Мукетъёсыз но паймымонэсь. Студентъёслы шуисько: вае огзэ учком, эскером. Ӵектӥ удмурт кылэз. Мон туж кема дӥсьтытэк улӥ. Аслым ачим шуисько: практикае ӧвӧл ук. Зэм, теориысь мае но сое тодӥсько вал. Пётр Константинович Черновен ог-огмылы гожтэтъёс ӧм гожъялэ. Вал ук сыӵе дыръёс - туж секыт вал Иже соосты ысъяны но басьяны: ӧз вуылэ. Соин ик иворъёс ог-огмылы ӧм лэзьялэ. Малпалляй: ноку но, оло, ум адӟиське ни. Финноугроведъёслэн Будапештын 1975-тӥ арын ортчем конгрессазы мон мукет удмуртъёсын но тодматски. Кылсярысь, Владимир Владыкин профессорен (соку солэн таӵе бадӟым нимыз ӧй вал на). Соин ми туж матысь эшъёс луимы: ог-огмылы гожтэтъёс ысъямы, туж бадӟым шумпотон луыло вал дырын-дырын лэзьям книгаосыз но. Табере мынам пичи гинэ но туж узыр удмурт библиотекае вань. Франциын мынам кадез нокытын ӧвӧл. Соин мон туж данъяськисько. Мукет ласянь, тау карисько Пётр Константиновичлы ньыльдон ар талэсь азьло сётэм книгаосыз понна но. Со сяна, Москваын дыръям мон ачим но Кузнецкий мост ураме интыяськем магазинысь басьяй куд-ог удмурт книгаосты. Соку уго мон, удмурт кылын яке удмурт кылъя книгаос шедё ке, ваньзэ басьясько вал. Собере Владыкинлэн ысъям книгаосыз но мон понна дуноесь луизы. Зэм, соосты лыдӟыса но кема дыр ӵоже ӧй дӥсьтылы на удмурт кылэз дышетыны: тодэм-валаме ӧжытысь кышкай-а, мар-а. Котьма ке но, ортчем арын ми удмурт кылэз дышетон борды умой-умой басьтӥським. Чылкак пайми но шумпотӥ студентъёслэн удмурт кыл борды мылысь-кыдысь басьтӥськемзылы, сое яратэмзылы, тросгес но тросгес тодыны тыршемзылы. Сыӵе чырткем, тунсыкъяськись луэменызы, кылтодон удысын гинэ ӧм ужалэ, текстъёсты но лыдӟыны кутскимы. Мынам вань пичи грамматикае - А.А. Поздеевалэн шорлыко школа понна кемалась поттэм изданиез. Отысь мон шедьтӥ тунсыко лэчыт веранъёс но вакчи текстъёс. Нырысь соосты лыдӟимы, собере выжыкылъёс вылэ вуимы. Мынам вань "Ватка но Калмез" нимо книгае. Отысь вань гожтэмъёсты лыдӟимы. Выжыкылъёсын, мадёнъёсын тодматскемъя, студентъёс мифологиен но тунсыкъяськыны ӧдъязы. Тодэмзы потӥз, мар со сыӵе Инмар, Кылдысин, Вумурт, Алангасар но мукетыз... Маин мукетэсь вашкала удмурт батыръёс? Ваньзэ сое сэрттоно-пертчоно луиз. Мынам ӵапак Владыкин профессорлэн удмуртъёслэн мифология шоры учконъёссы сярысь книгаез вал. Жаляса верано луисько: уноез студентъёсмы ӟуч кылэз уг тодо. Нош соослы мон тупен-тупен мади "Ватка но Калмез" книгаысь гожъямъёсты. Собере ми литература текстъёс борды вуимы. Лыдӟимы Ашальчи Окилэсь, Куӟебай Гердлэсь кылбуръёссэс, "Гаян" романысь люкетъёсты но "Вуж Мултанысь" кӧня ке текстэз. Тӥни сыӵе, одӥг кылын вераса, студентъёсмылэн тодэм- валамзы. Студентъёсмы ог дасо кузя вал. Зэм, соос егитъёс гинэ ӧй вал - пӧлазы мынам ёзъёсы но пукизы, кылсярысь, Сорбонна университетлэн огъя кылтодонъя люкетысьтыз азьвыл студент но ветлӥз. Французъёс гинэ ӧз лыктылэ, кунсьӧръёс но дышетскизы: огез Финн ныл, огез Югославиысь пи, огез Италиысь нылаш вал. Словениысь одӥг студент венгер кыллы дышетске, соин валче тодматскемез потэм программаязы пырымтэ кылэн но. Веранэз ӧвӧл: ваньмыз со ӧжыт. Но умой-умой чаклано ке, вань французъёс уг тодо на, мар со сыӵе удмурт литература. Тӥ юалоды, кыӵе со, мӧйы, удмурт кылэн но литератураен тунсыкъяськись француз? Со туж мыло-кыдо адями, ваньмыз пӧлысь тужгес но устоез, сюлмоез дышетскись. Ачиз гинэ ӧвӧл, пиез но лекциосам ветлӥз. Грек но латынь кылъёсты дышетэ на. Улэ Париж сьӧрын. Лекциосам нуналлы быдэ отысь ветлӥз. Улэмын Канадаын но: ужамын Монреаль городысь университетын доцент луыса. Отын улӥсь французъёсты вордскем кылзылы дышетэм. Ватсаме потэ созэ но: ар талэсь азьло малпасько вал удмурт кыллы дышетыны, туэ - мукет финн-угор кыллы (шуом, пор яке манси). Нош Удмурт шаере вуылонме тодыса, студентъёс мылкыд каризы удмурт кылъя но литературая спецкурсэз азьланьтыны. Татын, Удмуртиын, мыным туж трос тунсыко книгаос кузьмазы. Мынам малпамея, одно ик кулэ луоз соосты уже кутыны, удмурт кылъя дышетонэз азьланьтыны. Учконо ке, со, милям спецкурсмы, "Удмурт кылэз дышетон" уг нимаськы - "Ӵошатон грамматика" шуиське. Нош студентъёсмылэн тунсыксы-мылкыдзы бадӟым бере, удмурт улосэз но адӟемзы потоз. Соиз азьпалан али. Мон ачим лыктэмын, Удмурт кун университетысь романо-герман кылтодонъя факультетлэн деканэз Тамара Ивановна Зеленина но университетлэн ректорез Виталий Анатольевич Журавлёв ӧтемъя. Вераны кулэ: соос туж уно лэсьто университет понна. Туж лякытэсь, мыло-кыдоесь, вань сюлэмзэс сёто, ӟеч кусыпъёс тупатон вылысь. Удмурт кылтодонъя факультетысен мон тодматски тросэныз удмурт тодосчиосын. Шонерзэ вераса, азьло ик тодӥсько вал ини соослэсь тусбуйёссэс "Учёные-удмурты" книгая (сое мыным кылем арын кузьмазы). Та книгаысь ик тодӥ соослэн пӧртэм-пӧртэм ужъёссы сярысь. Романо-герман кылтодонъя факультетысен тодматски выль эшъёсын. Соос француз кылэз гинэ уг, герман но англи кылъёсыз но дышето. Монэ, Удмурт шаерен тодматыса, пӧртэм интыосы нуллӥзы. Вуылӥ П. И. Чайковскийлэн вордскем городаз, Воткинске, Можгала, Бадӟым Учала, Алнаше. Туж тунсыко пумиськон ортчиз Можга ёросысь Бадӟым Уча школаын. Отын француз кылэз дышето. Пиналъёс кунсьӧр кылын туж мыло-кыдо вераськизы, кылбуръёс но чузъяськизы. Огез пияш француз кылын гожтэм кылбурзэ лыдӟиз. Ижевскысь туж чебер нылпи садэ ветлӥ. Отын пиналъёс удмурт кыллы дышетско (удмурт пиналъёс гинэ ӧвӧл, мукет калыкъёслэн нылпиоссы но). Соосын пумиськон туж лякыт, мыло-кыдо ортчиз. Дышетӥсьсылэн пиналъёсты гажамез, соос понна вань сюлэмзэ сётэмез соку ик шӧдӥське. Мон ачим но Франциын школаосы но, нылпи садъёсы но шумпотыса ветлӥсько. Паймымонэсь пиналъёс. Финно-угроведениен гинэ уг выриськы, нылпиослы но гожъясько. Соин ик мынам сюлэмам туж мур пыӵазы покчиосын пумиськонъёс. Алнашын мон Геннадий Красильниковлэн юртаз вал. Ветлӥм Ашальчи Окилэн улэм юртаз но гу вылаз. Татын возьматӥзы но веразы ваньзэ кулэзэ. Мон ачим музее Франциысь кузьымъёс ваи. Ашальчи Окилэсь ог вить кылбурзэ кӧня ке ар талэсь азьло берыктӥ вал. Учыр тупамен, соосты одӥг француз композиторлы возьматӥ. Кӧня ке нунал ортчыса, со жингыртӥз. Ашальчилэн кылбуръёсыз туж яраллям. Соосъя крезьгуръёс огшокчемен сямен кылдытэм. Озьы "Сюрес дурын", "Оло, монэ яратӥськод", "Нюлэскы ветлыкум" кылбуръёсъя француз кырӟанъёс пӧрмизы. Нош туэ, июнь толэзе, одӥгез усто француз нылкышно кырӟась Парижысь огаз костёлын соосты быдэстӥз. Туж чебересь кырӟанъёс пӧрмизы. Валамон ини, француз композиторлэн крезьгурез удмурт калык крезьгур кадь ӧвӧл. Гурзэ ас валамезъя пуктэ. Татчы лыктыкум малпай: та удмуртъёслы тунсыко луоз. Соин ик композиторлэсь кылбуръёсын нотаоссэ ксерокс пыр поттыса ваи, музейлы кузьманы шуыса. Зэм, композитор плёнка вылэ гожтыса сёто на шуиз. Соку сое но ысто. Мар бордын али ужасько? Компьютерам пыртыса йылпумъяй ини французъёсты удмурт кыллы дышетон книгаме-пособиме. Дышетыкум ар ӵоже мон сое гожъяй. Быдӟалаез ог сю бам луоз. Собере выжыкылъёс, Куӟебай Гердлэн, Ашальчи Окилэн кылбуръёссы бордын ужай. Мылкыд вань азьланяз но тыршыны. Студентъёс но соин туж тунсыкъясько. Ева Тулуз но, Волга но Кам котырысь финн-угор литератураосъя диссертация бордын сюлмо тыршись, зол-зол эскере ни удмурт литератураез. Со али бадӟым статья гожтӥз Ашальчи Оки сярысь. Соос сярысь но, мынам ужаме сярысь но докладъёс лэсьтӥз. Ева Тулуз ачиз вераз удмурт кылэз мургес тодыны тыршемез сярысь. Со туж сюлмо тодосчи, визьмо, трос кылъёсты тодэ: француз, испан, итальян, англи, немец, венгер, финн, эстон, ӟуч. Удмурт кылэз но сюлмысь дышетэ. Мынам солы осконъёсы бадӟымесь. Милям институтмы - шунды ӝужан пал цивилизациосъя институт. Али отын тямыстон вить-тямыстон куать валтӥсь кылъёсты - шунды ӝужан пал, Шор Европаысь, Азиысь, Африкаысь кылъёсты - дышето. Али институтамы валтӥсь луо ӟуч, китай, араб, япон, корей, иран, Россиысь - бигер, азьвыл СССР-ысь - грузин, армян, казах но мукет кылъёс. Удмурт калык лякыт но синмаськоно кадь. Сюрес вылысь адямиез куно карыны, сюдыны- вордыны, кырӟаны-вераны, сюлэмзэ усьтыны дась. Мон туж шумпотӥсько тӥледын тодматскемелы. Книгаосъя гинэ тодӥсько вал азьвыл - табере ас синъёсыным адӟи ни. Тау тӥледлы! Верамез гожтӥз Анатолий Уваров. Кыдёкысь кунолы туж яразы удмурт дӥсен чебер апайёс. Шӧкыч Мон коммунист ук Одӥг воргоронлы квартира сётыны кулэ вал. Ваньмыз кагазъёс дасямын кадь ини. Кытӥ кулэ бызьылэмын, пӧртэм начальникъёслэн кинюртэмъёссы пуктылэмын, печатьёс лякылэмын. Нош ордер весь уг сёто но уг сёто. Дыр нош ортче но ортче. Адями ма карыны ик паймемын. Кытчы вазиськоно на? Татчыозь номырзэ ӧй тодысал, дыр, одӥг эшез ке ӧй юрттысал. Коньдон, взятка, пе, сётоно. Валэктэм гинэ ӧвӧл, коньдон басьтӥсен но пумиськыны юрттӥз на. Тани пуко соос ресторанын - коньдон сётӥсь но коньдон капыртӥсь. Ӝӧк вылын дуно сиён-юонъёс - пыжем парсьпи, ӵынатэм курег, шашлык, коньяк, водка, шампанской - одӥг кылын вераса, ваньмыз вань, ма кулэ таӵе дыре. Но взятка сётӥсь мар бордысен кутскыны уг вала. Номыр ӟечсэ малпатэк шуэ: - Тодӥськоды-а, мынам ноку взятка сётъяме ӧвӧл, уг тодӥськы, кызьы со лэсьтӥське, соин ик меӵак верасько. Пырак вералэ: кӧня? Кинлы? Кытын? Ку? Соиз валэктэ: - Вить сю сюрс. Мыным. Татын. Али. Коньдон сётӥсьлэн мугорысьтыз из ик усиз кадь. Ужзэс ӝогак лэсьтӥзы. Сиизы-юизы. Взятка сётӥсь шуак кушетскиз. - Кылзы ай,- сюлэмшугъяськыса юа со,- нош уз пӧялэ-а? Коньдонзэ сётӥ, нош улон интытэк ке кельтӥзы? - Мар тон,- обиде усиз соиз.- Мон коммунист ук! В. ПЕТРОВ. Нуналлэн тодметэз 25 октябре - Провлэн нуналэз. Кизилиос шоры учкыса, куазьлэн но вуоно урожайлэн кыӵе луонзы сярысь тодо. Кизилиос яркыт пишто ке - кынтоз, бус пыр кадь адӟисько ке - шунтоз. Кизилиос трос ке, кӧжы удалтоз. Югыт нунал 9 час 42 минут кыстӥськоз. Толэзьскын со 2 часлы синӥз. Та нуналэ... ар талэсь азьло 24 октябре 1918 арын Красногорск ёросысь Ботаниха гуртын вордскиз А. М. Сенилов, суредась, Удмуртиысь культура удысын дано ужась. 25 октябре Ижевскысь пассажирской автопарклы тырме 65 ар. ШӦКЫЧ Мынам телевизоре Ширтӥз "КамАЗ" "КамАЗ" гомаз Якшур-Бодья сюреслэн 16-тӥ иськемаз 14 октябре ог укмыс часын гомӟиз Йошкар-Олаысь одӥгезлэн фирмалэн "КамАЗ" автомобилез. Машина быдэсак сутскыса бырысал, дыр, ини, Ижысь тылпу кысӥсьёс дыраз вуизы. Озьы ке но, автомобиль зол гинэ ӝуаз, сиён-юон но быриз, шуыны луоз. Ярам коть, водителез пегӟыса вуиз. Но тыриськоно луоз, дыр, аслыз ик. Тылпу потэм, пе, короткой шуон замыканилэсь. В. Камашевлэн туспуктэмез. Бакчаын будо... карпъёс Дас вить ар талэсь азьло мон гожъяй вал Юкаменск ёросысь Дасос гуртысь тымет возисьёс сярысь. Отысь куинь бускельёс бакчаязы тымет возизы. Юкаменск ёросын трос гинэ сыӵеос. Тани Пышкетысь Геннадий Андрианович Поздеев но аслаз бакчаяз сотка быдӟа тымет возе. - Ачим туж ик уг чорыгаськы, но ву дурын пукыны яратӥсько. Пукиськод ӝытазе, чорыгъёслэсь жомбылляськемзэс учкыса, вань жадем ик ортче. Интыез пичи гинэ кадь, но карпез но, карасез но, шальккоез но, чабакез но вань. Туэ нимысьтыз ӧй но сюдылы, но чабаке мызь лэзиз ни. Толлы пинал чорыгез гинэ кельто, тазаоссэ калтоно луоз. Геннадий Андриановичлэн та кыкетӥ тыметэз ни. Улон интызэ воштэмез бере, таяз но бакчаяз экскаваторен кык метр мурда тымет гудӥз. Зэмос тыметлы тупамон медло шуыса, вусяська, ыжпыд (камыш) мерттӥз. Тулыс тыметэз тыдвуэн тырмиз. Чебер - учкыса- учкыса кӧт уг тыры. Тымет лэсьтонэн Геннадий Андрианович тунсыкъяськыны ӧдъяз "Пышкетский" совхозын инженер луыса ужакуз ай (али гуртысь администрациен кивалтэ). Соку со юри бускель колхозэ тымет лэсьтэмзэс, чорыг вордэмзэс учкыны ветлӥз. Отын шур кожонэз кыкналасянь сюен донгаса тымылӥзы, нош ӧрзэ гумы пыр лэзьязы. Озьы шуръёс ярдурозязы тырмылӥзы - чорыг но йылӥз, шур дуртӥ кизем узьым но удалтылӥз. Ертемын кивалтыкуз, та уж борды басьтӥськиз. Тыметъёс лэсьтӥзы, чорыг лэзизы. Узырмытӥз тыметъёсын со эшметъёсты но, филимоновоосты но, дерягъёсты но. Табере куд-огаз пичияк коньдон но поттыны быгато ни - дун тырытыса чорыганы лэзё. Пышкетысь тыметъёсты Поздеев нимаз адямиос борды юнматӥз. Соос сюлмасько ӟеч чорыг будэтон но сое лушкаськисьёслэсь утён сярысь. Колхозын укмыс тымет. Соосты утисьёс нимысьтыз уждун уг ке но басьто, чорыген гусъясько. - Адями маин ке тунсыкъяське ке, юыны-калгыны дырыз уг кыльы ни. Озьы ик чорыгасьёсын но,- шуэ Геннадий Андрианович. Колхозын, гуртын тымет, зэм, коньдонтэк уд лэсьты. - Но нимаз адямиослы доразы пичияк ке но тымет лэсьтыны одно кулэ,- ӵектэ Г. А. Поздеев.- Кӧттыр но, шутэтскон инты но луоз. Л. СУНЦОВ. Огазе люкасал эшъёссэ... Шаерысьтымы калык артистка, Россиысь дано артистка Анастасия Васильевна Шкляева 21-тӥ коньывуонэ пусйысал ни 90 арес тырмонзэ. Ӝыны арлэсь кемагес гинэ улыса ӧз вутты со та юбилеез дырозь. Нош кыӵе потэ вал тыро ӝӧк сьӧры огазе люкамез егитъёссэ но, мӧйыоссэгес но артистъёсыз, ас ёзъёссэ но (таосыз трос ик ӧз кыле ни, одӥгезлэн, Августа Васильевна Конюховалэн тодэ ваёнъёсыз - "Тасялэн сайкыт тусыз" - алигес печатламын вал газетамы). Егитъёс ӧз адӟе ни солэсь шудэмзэ, но Анастасия Васильевна асьмелы кельтӥз секыт но шудо сюресэз сярысь тодэ ваёнъёссэ... Вордскиз со Можга ёросысь Пичи Кармыж гуртын куанер крестьян семьяын. Туж вазь анай-атайзэ ыштыса шедиз нылпи юртэ. Отысен быдэ вуымтэосты ысто Белоруссие кӧттыр утчаны. Татын нылаш йылпумъя школаез. Иже бертыса ужа школаын, собере дышетске Казаньысь рабфакын. 1928-тӥ арын Анастасия Волкова (нылдыр фамилиез сыӵе) дышетскыны пыре Удмурт клубысь театральной курсъёсы. Та клубен кивалтӥз Александр Васильевич Сугатов. Кузь йырси пунэтэн капчи мугоро егит ныллы со оскиз "Бугыръяськисьёс" спектакльын кухаркалэсь рользэ шудыны. Ролез пӧрмиз. Та курсъёсын куинь ар дышетскемзы бере, Тасяез но эшшо ньыльзэ тужгес быгатӥсь нылъёсыз-пиосыз дышетскыны лэзё Москвае, ГИТИС-э. 1933-тӥ арын Ижын усьтӥське ни зэмос Удмурт театр. Тӥни со дырысен, пенсие кошкытозяз, Анастасия Васильевна шумпоттэ асьме учкисьёсыз. Вань сюлэмзэ сётыса шудэ удмурт пьесаосъя спектакльёсын но, классикаын но - удмурт нылкышноослэсь, озьы ик ӟучъёсызлэсь но вунонтэм образъёссэс кылдытэ. Сюлэсь уно шудэм рольёсыз пӧлысь ачиз Анастасия Васильевна тужгес висъя вал "Кезьыт ошмесысь" Бӧдёноез, "Аннокысь" Чураез, "Вуж Мултанысь" Дукъяез, "Грозаысь" Кабанихаез, "Трактирщицаысь" Мирандолинаез... Анастасия Васильевна туж быгатэ вал сцена вылын вольыт, чебер вераськыны. Та ужлы со дышетӥз ас бӧрсяз лыктэм трос егитъёсты но. Куамын ар ӵоже сцена вылын ужатозяз, А. В. Шкляева Удмурт театрен ӵош ортчиз вань шуг-секыто сюресъёсыз. Берпум нуналозяз солэн одӥг вал сюлмаськонэз: асьме театрмы ог интыяз медаз сылы, мед сяськаялоз, выль талантъёсын мед "пуштырскоз". Туж жаля вал, соосын пумиськылыны табере уг кылды ни шуыса. А. ЕВСЕЕВА. * А. В. ШКЛЯЕВА. * И. Поповлэн пьесаезъя "Семья" спектакльысь суред. Ленинлэсь рользэ шудэ Василий ПЕРЕВОЩИКОВ, рабочийёс - Яков Перевощиков но Анастасия ШКЛЯЕВА. ШӦКЫЧ Берло дыре уйёсы ульчаосы потаны туж кышкыт луиз. Тужгес беромид ке, ульчаысен шымыртозы но... Кылёд дӥськуттэк но, коньдонтэк но. Йырыд гинэ быгылес мед кылёз ини сыӵе дыръя. Нош милициос сярысь ке верано, соос машинаосынызы югыт ульчаостӥ гинэ ширъяло, ышыг ульчаосы кожаны кепырало... (Ижын улӥсьёслэн гожтэтысьтызы). Маскаен адями: - Дасяське, узыр адями лыктэ кадь! Дипломатэн, кулэсь пальтоен, юэмез но вань кадь? Пумитъяськыны уз дӥсьты. Азьлань! Суредэз Леонид Прозоровлэн. Шӧкыч Жаля, мистер Коньдон! Ох, улонмы пӧзе но пӧзе ини берло аръёсы. Оломае но адӟод, кылод, ӟырдатэм таба вылын но тэтчалод. Соку ик юан кылдэ: "Кытчы со питыра, мар каре со асьмемын?" Тани азьло аръёсыз ик басьтом. Соку йыбыртъяло вал эксэйёслы, утись-вордӥсь инмарлы. Но берпум эксэймес выжытӥз ик порыса, быдтӥзы. Нош инмарен кӧтыд трос уз тыр шуыса малпазы но кылдытӥзы асьсэлы мукет вылӥ инмар. Солэн нимыз - мистер Коньдон. Сотэк асьмеос лябӟиськом, чурытаськом, дуннемес сьӧд буёлъёсын гинэ адӟыны кутскиськом. Ваньзэсты ведь одӥг аршинэн мерта. Тон мынам эше ке, озьыен, мон тонэ ярато, утё, тон понна вань ӧсъёсты усьто. Курид ке, рае но. Нош огъя кыл шедьтыны ум ке быгатӥське - пук гур вылад. Мистер Коньдон вань улонмес но кияз ӝабыртӥз ини, быръе эшъёс, улон сюрес. Эсьмаса, берло аръёсы гинэ тани чурыт кивалтыны кутскиз телефон-автоматъёсын, кузь пельёстӥзы кырмиз луд кечъёсты калык транспортысь но. Секыт, ох, секыт луиз. Оло, зэмзэ ик, мистер Коньдон шуэмъя, быждэ шымыртыса, гур вылын гинэ улоно на? Но сием потон - апай ӧвӧл, пыдкутчанъёс гинэ но сиён курыны кутско. Нош гур выл сярысь шуныт малпанъёсме вунэтыса, вамыштӥ кар ураме. Кӧтурдэскам репортёре, киям - блокнотэн ручка. Таяз учыре кожи черк вӧзын кураськыса пукисьёс пала. Одӥгез доры матэктӥ но "ӟечбуресь", шуисько. - Умой, ачид ке умой,- куаретӥз пумитам но соку ик кин луэмме синйылтӥз. - Мынам тӥледлы 2-3 юанэ вань. Луысал ке... - Луоз ке, мон но тӥледлы сётысал одӥг юанме. Вераськеме понна мар ке луоз-а? - ...?! - Жильк-жильк карисез. Ас синъёсылы но пельёсылы уг оскиськы: тодматскыны но мистер Коньдонтэк уг ни лу. - Ма, али сьӧрам одӥг копейкае но ӧвӧл. - Соку мон уг вераськы тӥледын. - Мон одно ик ваё ӵуказе. Нош ачим "капиталме" йырам лыдӟисько: 3-4 сукыри няньлы вань на. Инмар ке ӧз кушты, парсь уз сиы: сютэм уг кулы ай. Уксё губи кадь ик: туннэ вань, ӵуказе ӧвӧл. - Уг шуи ук. Уг бере уг! - тыбырыныз берытскиз. Вот ведь, пужым лӥял, ӧз оскы мыным! Нош мон чик пӧяны уг малпаськы вал. Кӧты куректыса ик вамыштӥ берен. Тыршемелэн ужез но, кужез но ӧз адӟиськы, коть "караул" кесяськы. Нош кин янгыш? Валамон, ачим ик: эшъяськоно вал со мистер Коньдонэн. Соку ваньмыз о, кей луысал. А. МИТРОФАНОВА, Удмурт кун университетын дышетскись. Ӝыны вылэ ӝыны - тырмоз уждунлы 22 октябре Шарканын ортчиз районысь депутатъёслэн сессизы. Солэн ужаз пыриськиз Правительстволэн Тӧроез Павел Николаевич Вершинин. Республикалэн кивалтӥсьёсыз мугтэк районъёсы уг потало. Шаркан районэ Павел Вершининэз таӵе ужпум вуттӥз: малы ёросысь бюджетэ туж ӧжыт коньдон люкаське? Шаркан музъемъёс нефть поттӥсьёслы сётэмын бере, озьы луыны кулэ ӧвӧл кадь. Но сессиын та ужпум сэрттӥськемъя валамон луиз: пайда басьтэм интые, "Удмутнефть" шарканъёсты кекатыса возе. Солэн тыронъёсыз районлы одӥг миллионлэсь трос люкаськемын ини. Со ӵапак тырмысал июнь понна уждун тыронъёсты пытсаны. Озьы ик трос пунэмъёсыз "Удмуртгеологилэн". Таиз организация ар ӵоже районлэн бюджетаз одӥг копейка но пыртымтэ на. "Администрацилы чурытгес кариськоно! "Удмуртнефтен" тупан кылъёс утчаса ӧвӧл ни улоно!" - лек шуиз Павел Николаевич. Зэм, улэп коньдон интые, му вӧй поттӥсьёс шарканъёслы я гумыос, я куинь поллы дуногес шифер ӵекто. Та ужпумъя депутатъёс таӵе огкылэ вуизы: "Удмуртнефть" вакчи дыр куспын бюджетэ тыронъёссэ ӧз ке берыкты, солэсь шаркан музъемысь му вӧй поттонъя лицензизэ талано. Гужем быръёнъёс бере Шаркан ёрослэн администрациез быдэсак воштӥськиз, шуыны луоз. Соин ик секыт йӧтэ выль тӧролы Александр Аркадьевич Прохоровлы но. Собере куд- ог законъёс но юрттэм интые люкето гинэ. Кылсярысь, малы уг луы музъемлы тупатэм налогез сиёнэн басьтыны, шуом, ю тысен, картофкаен, сӥлен. Коньдонтэк улӥсьёс со понна шумпотысалзы гинэ. Но уг луы. Огаз сессиын районысь депутатъёс решение кутӥллям музъем понна бичам налогез ас бюджетазы кельтыны. Но прокурор лэзьымтэ. - Быгатоз-а бен район али уждунлы коньдон шедьтыны? - юаПавел Вершинин. - Уз, - меӵак шуэ райфолэн кивалтӥсез. - Кӧня налог бичаны чакламын ноябрь но декабрь толэзьёсы? - Ӧвӧл на лыдъямын, - валэктэ выт бичанъя инспекцилэн кивалтӥсез. Павел Николаевич журналистъёслы вазиське. Кылӥськод-а, пе, кызьы татын "ужало". Правительстволэн Тӧроез уждун тыронэн юрттыны оскытӥз ке но, шуиз: - Ӝынызэ коньдонэз асьтэос утчаны кулэ. Ог-огмес гажан но яратон та вакытэ сыӵе мертэтэн радъяськыны кулэ. Ӵапак та нуналэ Шарканэ вуэмын ни вал правительстволэн 947 сюрс манет тыр келям коньдонэз. Со быдэсак мыноз май понна уждун тыронъёслы. Кызьы валэктӥз Павел Николаевич, июнь но июль толэзьёс понна люкаськем уждунлэсь быдӟалазэ правительство 50 процентсэ гинэ тырыны быгатоз, кылемез районлэн администрациез вылэ усе. Нош вань-а районлэн луонлыкъёсыз азьланяз ӟечгес ужаны. Со бордысь гинэ тросгес уксё люканы быгатоз ук. Туэ укмыс толэзь ӵоже быгатыса ужам Шарканысь трикотажной фабрика. Кылем арын сярысь, со 25 процентлы тросгес дӥськут поттэм. Предприятилэсь ужазинлыксэ 40 процентлы но ӝутыны луысал, али татысь вань оборудование ужасалыз ке. Но соос сыло. Правительстволэн 300 миллион пала висъяны чаклам кредитэз вуымтэ на. Районэз секыт югдурысь поттыны быгатозы гурт хозяйствоос но. Таӵе осконзэ вераз администрацилэн тӧроез А. Прохоров. Туэ тросгес октэмын картофка, ю нянь, 8 процентлы уногес йӧл кыскемын. Бадӟым пайда сётыны кулэ етӥн будэтон. Выль администрация арнялы быдэ пумиськылэ колхозъёслэн но эштосъёслэн кивалтӥсьёсынызы. Озьы ке но, шарканъёслэн та удысын басьтэм азинсконъёссы, огъя республикаен ӵошатыса, али трослы улӥынгес луэ. Данаклы кулэсмемын пудо-животлэн лыдыз. Коньдонэн вераса, со 760 сюрс манет пала ыштонъёсын берытскиз. Колхозникъёслэн уждунзы, шорлыдын вераса, 210 манет гинэ луэ, азьмынӥсь "Восход" колхозын - 370 манет, нош бере кылись "Ита" эштосын - 120 манет. Та эштослэн кивалтӥсез али ужысьтыз мозмытэмын. Павел Николаевич та нуналэ пумиськылӥз на Шаркан шор ёзо школаысь дышетӥсьёсын. Ӵапак та нуналэ Ижевскысь 50 пала школаос ужзэс дугдытылӥзы. Куронзы одӥг - уждун. Нош кыӵе меда югдурзы Шарканысь дышетӥсьёслэн? Уждунзы басьтымтэ на май понна, пумозяз тырымтэ на отпускнойёссы. Озьы ке но, дышетӥсьёс республикалэн Тӧроезлы лек мылкыдзэс ӧз вералэ. Вӧзам пукись дышетӥсь эшъёсызлэсь мылкыдзэс тазьы валэктӥз: - Милесьтым улонмес городысь дышетӥсьёсын уд ӵошаты. Пудо вордӥськом, бакча возиськом. Дышетӥсьёслэн нимынызы школалэн директорез В. Коробейников Правительстволэн Тӧроезлы вазиськиз, выль школа пуктонэз йылаз-пумаз вуттыны курыса. Сое кутскиллям вылэм 8 ар талэсь азьло лэсьтыны - озьы ик сылэ липеттэк но куашканы вуэм борддоръёсын. Али Шарканысь 1420 нылпи вить интыын дышетсконо луэ, угось школалэн юртэз 400 муртлы гинэ чакламын. Нош нылпослэн лыдзы татын арысь аре будэ. (Талы, оло, шумпотоно.) Мар бен сюлмаськытэ дышетӥсьёсты? Павел Николаевичлы соос таӵе юанъёс сётъязы: - Ортчозы-а Шарканын спортъя гурт шудонъёс? - Кыӵе югдур кылдэмын республикаямы сиён-юонэн? - Кызьы азинске республикамылэн промышленностез? Тӥни сыӵе глобальной шуон ужпумъёс висьыто вылэм татысь дышетӥсьёсты. Нош вылӥ кивалтӥсь азе, оло, умойгес луысал дышетонэн, нылпиосты будэтонэн герӟаськем куронъёсын потыны? Ватсалом на: Шарканысь анайёс пумит луо нылпи пособиосты вузъёсын но сиён-юонэн басьтыны, таӵе амалэз асьме правительство пыӵатыны турттэ ке но. Угось вузъёслэн дунзы, магазинъёсын сярысь, кык-куинь поллы вылӥынгес луэ. Ӝутэм ужпумъёсты правительство Шаркан администрациен ӵош азьланяз эскерозы на. Озьы ке но, районлэсь бюджетсэ тырмытон сярысь районысь кивалтӥсьёс ик сюлмаськыны кулэ. ТАТЬЯНА БАННИКОВА. Оло улӟом али "Туэ укмыс толэзьлы йылпумъянъёсты учкыса адӟиськод, республикаямы промышленность но услугаос сётон удыс, кылем арын сярысь, улӥынгес. Но сентябрь толэзе ужпум умояны кутскиз", - сыӵе кылъёсын кутскиз журналистъёсын пумиськонзэ Кун Кенешысь промышленностья ялан ужась комиссилэн кивалтӥсез Виталий Соловьев. Зэм, югдур ушъяськымон ӧвӧл. Уноез предприятиос интыысьтызы каллен вырӟо. Ужъёсты ӝегатэ коньдонлы ёрмон, дыраз уг вуо налогъёс. Соин ик, югдур матысь дыре чутрак умоялоз шуыса, оскыны уг луы. Адӟем карымонгес тыршо энергетикъёс, пияла поттон но химия промышленность. Машиностроениын югдур тупаныгес кутскиз автомобильёсты поттонэз будэтэм чотын. Алигес Воткинскын ортчиз нефть поттон удыслы оборудование лэсьтонъя семинар. Отчы люкаськылӥзы быдэс Россиысь специалистъёс. Та пумиськонын умоен пусъемын вал Воткинскысь машиностроительной, Ижысь редукторъёс поттон заводъёслэн но "Ижнефтемашлэн" та удысын ужамзы. Та предприятиос ог-огзылы люкетытэк ужало но пӧртэм пумо продукция поттыны тыршо. Берло дыре ужзэ умоятӥз Ижысь автозавод. Куд-огез "Орбитамес" курланы ке но тырше вал, автомобильёс та вакытэ складъёсын уг сыло. Озьыен, соосты азьланяз но уногес поттоно. Россиысь Президентлэн Указэзъя нефть вузанлэн 10 процентэз висъяськыны кулэ конверсияя фондэ. Нырысь-валысь коньдон лыктэ вал, табере со уж аналтэмын. Виталий Александровичлэн малпамезъя, татын мултэс ӧй луысал, фондлы 30 процентсэ но кельтыса. Озьы ик ватсаса пайда поттыны луысал приватизация ортчытонлэсь, таможнялэн но налогъёсъя полицилэн люкам коньдонзылэсь кӧня ке люкетсэ асьме доры кельтыса но. Кызьы вераз ялан ужась комиссилэн председателез, Промышленностья министерство зэмос министерство мед луоз. Умой луысал элькунамы нефтья но газъя министерство яке комитет кылдытыны. Уго та удыс республикаямы бадӟым барыш сётэ. "Та вакытэ асьмелэн заводъёсмы нокинлы кулэ ӧвӧл. Но осконмы вань - оло, куке улӟом али?" - пусйиз Виталий Соловьев, пумиськонзэ йылпумъяса. Н. БАЙТЕРЯКОВ. "01" ивортэ "Горд атас" чоръя, кивалтӥсь изе Берло дыре кивалтӥсьёслы уно гинэ пыкылэмъёсты кылоно луэ: я соиз суп-сап лэсьтэмын, я мукетыз аналтэмын. Вылаз ик, али ваньмыз понна коньдон кисьтоно, нош со уг тырмы. Соин но, дыр, тышкаськемез кылэм-адӟем уг каро ни. Пелязы уг поно тылпулэсь утиськонъя органъёслэсь куронъёссэс но. Кылсярысь, Ижысь подшипникъёсты бичан заводлэн общежитиысьтыз комендантлэн Н. Литвиновалэн тодаз лыктэм улон юртлэсь липетсэ эскерыны. Учкизы, чаклазы - липетэз тупатытэк уз луы. "Ужасьёс" но ӝог гинэ шедизы. Ваизы пурты, пӧзьтӥзы битум. Нош тылпулэсь утиськонъя ужрадъёс сярысь ӧз но малпаськылэ. Со понна нимаз кыл кутӥсь адями кулэ вал. Комендантлэн но тодаз ӧз лыктылы. Ужам понна коньдон тыризы ке, соин но яралоз. Шабашникъёс нокыӵе куронъёсты уг чаклало. Инмарлы тау, таяз учыре нокыӵе тылпу ӧз поты. Толэд матэктэ. Озьыен, виёе кезьыт куазьёс, лымы пельтонъёс. Кинлэн улон интыез ӧвӧл, со дыртэ гулбечъёсы-подвалъёсы каръяськыны. Отын уго ульчаынлэсь шунытгес. Нош куд-огез гулбечын но тылскыны ӧдъя. Сыӵе эстӥськонъёс ӵем дыръя бадӟымесь ыштонъёс ваё. Тани, кылсярысь, "Редуктор" огазеяськонлэн "Надежда" общежитиезлэн, кудаз уло ужасьёс, подвалаз костасько пропанэн тырмытэм газ баллонъёс, эстӥськон. Со сярысь общежитилэн администраторез Т. Морозова уг тоды, шӧдске. Тылпулэсь утиськонъя инспекторлэн та пумысен юанэзлы Т. Морозова номыр валэктыны ӧз быгаты. 17 номеро профтехучилищелэн но нефть поттӥсьёслэн общежитиосазы электрооборудование но электроезъёс чидантэм вужмемын. Тылпулэсь утиськонъя куронъёс уг чакласько, тамак кыскисьёслы но татын майбыр. Та вакытэ тылпуос ласянь республикаямы секыт югдур кылдэмын. Со пумысен алигес Удмурт Республикаысь Правительство нимысьтыз постановление но кутӥз. Сое нырысь ик мед быдэсъялозы вылэм кивалтӥсьёс. А. ЕМЕЛЬЯНОВ. Дышетскисьёслы паськыт сюрес Та вакытэ ужын азинсконъёс басьтыны, улонын ас интыдэ шедьтыны туж секыт. Ваньмызлы сыӵе шуд уг но усьы, угось сюрес вылын могӟетъёс трос гинэ сюрыло. Нырысетӥез соос пӧлысь - дышетскон. Дышетскыны кема ӧвӧл. Нош басьтэм дипломед шоры уж сётӥседлэн, оло, учкемез ик уз поты. Малы ке шуоно, вылӥ дышетскон заведениос трос, но быдэс Россилы тодмоосыз чиньыен лыдъямон гинэ. Отын конкурсъёс бадӟымесь, пырыны луонлыкъёс ӧвӧл. Нош Россиысь Плеханов нимо экономической академилэсь яке Москваысь кортъёсъя но сплавъёсъя кун институтлэсь дипломзэ басьтыны туж ик секытэз ӧвӧл. Со понна Ижевскысь Москвае ветлытэк но луэ дышетскыны. Сыӵе амалэн дышетсконлы али паймонэз ӧвӧл ни. Вылӥ дышетскон заведение пырыны луэ, юри дасям тестъёс пыр ортчыса. Дышетскон мынэ заочной амалэн. Ижевскын зачётъёсын но экзаменъёсын сессиос ортчо. Сессиос куспын студент методической пособиосъя дышетске, соосты дасязы Россиысь тодмо специалистъёс. Пососбиосын материалэз тырмымон, мукет литература кулэ уз лу ни, со дыре ик отын мултэсэз но ӧвӧл. Пособие дасямын дышетскон нормаосты лыдэ басьтэ. Экзаменлы дась луэмзэс асьтэос чакласькоды но экзамен сётон нуналдэс асьтэос бырйиськоды. Соин ик дышетскон дырдэс но асьтэос тупатӥськоды, ваньмон дырдэс лыдэ бастыса. Дышетсконлэсь дунзэ юнматэ вуз, сое люкетэн тырыны луэ. Консультациос, семинаръёс ортчыто Выль амалэн дышетсконъя институтлэн центраз ужасьёс. Та институт огазея но герӟа Россиысь 9 тодмо вылӥ дышетскон заведениосты: Москваысь индустриальной кун университет, Москваысь электронной техникая кун институт но мукет. Котькудӥз соос пӧлысь вылӥ дышетскон заведение тӥ азьын ӧсъёссэс усьтыны дась. Экономика, юристпруденция, техника но гурт хозяйство удысъёсъя 60 специальность пӧлысь котькудзэ йылпумъяны но кун диплом басьтыны быгатоды, асьтэлы азьлане сюрес тӥледлы! Выль амалэн дышетсконъя усьтоды. Быръелэ, эскере. Ӟеч сюрес институтлэн центрезлэн адресэз: Ижевск город, Авангардная ульча, 4 б. Уралысь калык куспо инженерной университетлэн Вылӥ гуманитарно-инженерной "Аэромех" колледжез. Телефонъёс, 43-00-26, 43-01-62, 23-22-10. Шӧкыч Эрико адями мон Вордскыкум анаен атай мыным Гера ним сётӥллям. Таиз пимы, пе, Геракл кадь кужмо мед луоз. Верам кылзы зэмаз, ява. Сӥльвиры ошез сюртӥз кутыса погыртымон. Та вакытэ мон выль ӟучъёс дорын кусме куасалтыса ужасько. Атай юртам бертӥсько ке, азбарам шал-шал буш: ӧвӧл куреге но, чипые но, уг пумита монэ пуны-писэй но. Бакчаям уг потаськы ни. Жуг-жаг турын пӧлы йыромемелэсь кышкасько. Кузь уйёсы кезьыт коркам ӟенеликме ӟыгыртыса, кырӟан нукыртӥсько. Быгатэмея кылбурасько. Тани асьтэос дунъялэ ай пӧрамме. Аоакы - яд, та суралтэт - пекля сисьтон! Тышкаськисько нунал-пӧрат аракыез. Секыт ке но, улон-вылонэлы уг ӝожтӥськиськы. Осконэн улӥсько. Кужыме вань дыръя ужлы уг ёрмы. Тани Завьял ёросысь Кены гуртамы ваньзэ гыроно, ӝутъяно, уроно, будэтэм емышез утялтоно. Пинал дыръям вал возьмамме тодэ ке ваисько, ӝоже усисько. Соку вань ужъёсты валэн быдэсъязы. Зэм, война вакытэ калык ачиз ик геры борды но, вал интые но кыткиськылӥз. Ма, соку вакытэз сыӵе вал. Тямыс ар талэсь азьло ачим но колхозын валэн тырши. Бӧрысь гуртамы куать вал гинэ кылиз на. Худо-бедно но, калык гыриз, картофка мерттӥз. Собере ньылез вал чиптэм- чаптэм ышиз-быриз. Пытьызэс но ӧз адӟылэ ни. Туэ гуртысьтымы кӧняез ке семьяос асьсэос вал интые кыткиськизы. Вуоно арын сыӵеос тросгес луозы, дыр. Гуртэ вал уз басьтэ ни: коньдон пуйызы пась, тракторъёс вужмемын, эстӥськон но уг сёто. Соин ик али одӥг осконэн улӥсько. Кужмы вань дыръя, Кеныысь вань бакчаоссэс гыро. Мон Геракл ӧвӧл ке но, подвиг лэсьтыны дась. Соку адӟоды, оло, кыӵе ке кенак но чыртыям ӟыгырскоз? Адӟом ини. Гералэсь верамзэ гожтӥз Афанасий СТЕПАНОВ. "Эрумаа" Мукет сямен вераса, "яратонэн пачылмем музъем" - тазьыгес валаны луэ алигес Операя но балетъя театрын вылэм адӟытонлэсь нимзэ. "Эрумаа" - со эстон кыл, юнме шорысь тазьы нимамын ӧй вал выставка, малы ке шуоно, ӵапак Эстон музъем бордысен кошко этнофутуризмлэн выжыосыз. Нош та выль валанэз (валатонэз) ас ужъёсазы пыӵатыны тыршиллям егит художникъёс, соос пӧлын ик вал эстон суредасьёс Тоомас Калве но Эпп Маргна. Авторъёс - куамын пала, тодмо удмурт суредасьёсын В. Михайловен, С. Орловен, В. Белыхен артэ - чылкак егитъёсыз. Ас шӧдонзы, адӟонзы пыр усьто соос дуннеез возись но азинтӥсь кужымез - яратонэз, солэсь пуш ласянь ӝуатскытӥсь тылсиоссэ, озьы ик вылгожъёссэ, адями мугорлэсь чеберлыксэ. Быдэс ӝыт малпамын вал улэп чеберлыко адӟытон выллем - отын ик крезьгурез но, кылбурез но, киужез но, ваче ки берганэз но. Ӝытэз нуиз Валентин Белых, солы юрттӥз суредась но куиськись Зоя Лебедева. Вань учкисьёс авторъёсын ӵош ваче кутӥськыса котырскизы залэтӥ - озьы трос сюлэмъёс огазеяськизы но шунытгес луиз кадь. Та адӟытонэ аспӧртэм буёлъёссэс пыртӥзы художник-дизайнер Е. Ведерникова, солэсь модельёссэ "Яратон вакыт" композициязы возьматӥзы "Петрис" клубысь нылъёс. Нош "Дизайн" фирмаысь веськрес, йӧно нылъёс потазы туж чебер, туала керттэм дӥсьёсын (модельеръёс Н. Зорина но И. Созыкина). Таослэн вылтуссыя ӵапак тупазы З. Лебедевалэн турынлэсь йыркерттэтъёсыз. Котькудӥзлы выставкае пыриськем муртлы сётӥзы пичияк синпель кузьым. Ваньмызлы валамон вал: огазеяськоно чеберлык котыре (со ик утёз дуннеез, кызьы шуиз Ф. Достоевский). Та адӟытон пумысен пӧртэм малпанъёс кылдӥзы. Со соку ик адӟиськиз мылкыдэз веран книгаысь но: кин ке понна та эсэпсэ валатэк шузияськон. Нош мон шуысал: художниклэн вань ке векчи шӧдон нюжаосыз, со ноку сьӧраз уз ортчы, аслаз искусствоеныз со дышетоз но быгатоз зэмос чеберлыкез кырсь лякиськемлэсь сайяны. Леонид ПРОЗОРОВ, суредась. Гильман КАСИМОВ Кин гожтоз гурзэ? Гажанэлы гожтэт Ураммы одӥг, Сямъёсмы одӥг, Тупаса ваче Шудӥмы. Ӧм но шӧдылэ, Ӧм но валалэ Олоку уртче Будӥмы. Мон кошки Кезэ, Тон кошкид Иже Ыштымтэ шудмес Утчаны. Мон кема утчай Но огзэ валай: Тон кадез ӧвӧл, Лул ӟаным. Тон ялан тодам, Тон ялан сюлмам, Бертомы ойдо Гуртамы. Тон мынам шудэ, Мон тынад шудэд, Огмылы огмы Вордскемын. Сюанмес шудом, Пиналъёс вордом, Кенжытом ӵошен Выль улон. Ченгешим ке но, Янгышам ке но, Пинал дырысь ӵош - Тупалом. Шӧкыч Серем пыр Поезд. Купе. Уй. Малпамтэ шорысь йыг-дым! каре. Кышкатскем пассажиръёс юало: - Мар луиз? - Со мынам дэреме озьы усиз,- вера воргорон. - Нош малы сыӵе йыг-дым! кариз? - Ма, дэремысьтым потыса ӧй вуы. х х х Нылкышно терапевтлэн кабинетаз пыре: - Вождэс эн вае, доктор, мон али гинэ тӥ доры бюстгалтерме ӧй-а кельты? - Ӧд, мон доры ӧд кельтэ. - А-а, соку окулист дорын, иське? х х х Мынэ суд. Судья юа: - Кыӵе профессиды? - Акробат. - Сержант, укноосты пытса! х х х - Доктор, зэмзэ но-а ӵуж кушман сии ке, синъёсы тупалозы? - Зэм. Очкиен луд кечез адӟемед ӧвӧл, дыр, ук! х х х Врач висисьлы: - Операция тӥледлы 500 манет тыр усёэ. - Укыр дуно ук! Кулӥ ке, умойгес луоз. - Уг дэмласькы. Тодӥськоды-а, туэ адямиез ватон кӧня тыр усе? х х х Кудӟем воргорон квартираяз пыре. Кышноез сое писэн пумита. - Уждунме юыса быдтӥ, валюталы дунъёс будэмлы пумит луэмме возьматон понна. х х х Милиционер кудӟем шофёрлэсь юа: - Кызьы кудӟыса руль сьӧры пуксьыны быгатӥды? - Эшъёсы юрттӥзы. Кун Кенешлэн сессияз Законъёсты кутон ӝега Ӧжытак вис каремез бере, Кун Кенешлэн 22-тӥ сессиез таяз арня вискын нош ик ужзэ азинтӥз. Нырысетӥ нуналаз депутатъёс мыло-кыдо эскеризы республикаямы матысь вить но сизьым арлы чаклам улон юртъёс лэсьтонъя программаосты. Котькудӥзъя пӧртэм пумо ӵектонъёс но тупатъянъёс пыртэмын, соос нимаз-нимаз, дыртытэк сэрттэмын-пертчемын. Кема кыстӥськиз жилищно-коммунальной хозяйствоез выльдонъя ужпумез эскерон. 5 арлы чаклам программалэн инъетэныз тодматӥз Правительстволэн Тӧроезлэн нырысетӥ воштӥсез Юрий Питкевич. Таиныз ӵош дэмламын вал музонэз (альтернативной) программа. Кыкезъя но трос юанъёс кылдӥзы. Соос герӟаськемын энергокужым, шуныт, улон понна тыронъёсын. Али 20-40 процентэз пунэме кылемын данакезлы семьяослы, уждунтэк пукисьёслы, со секыт зӥбетлы пӧрмиз ни. Программаын та ласянь номыр пусйымтэ. Озьы бере, кин оскытоз, ӵуказе куд-огез соос пӧлысь липеттэк уз кыльы шуыса? Республикаын улӥсьёс. Кыкетӥез но программа депутатъёслы ӧз яра. Кызьы пусйиз Ижевск городлэн мэрез Анатолий Салтыков, огаз но эскероно проектъёсын верамын ӧвӧл вужмем юртъёсты выльдон-сэзъян ужъёс сярысь. Кин вылэ со усёз? Огез но предприятие лэсьтӥськон удыс борды туннэ уз кутскы - кужымез уз окмы. Огъя вераса, ӝутэм ужпум бордын умой-умой малпаськоно на. Каньылгес ортчиз 2005-тӥ арозь быдэстыны чаклам "Жилище" нимо целевой программа. Солэн инъетэныз тодматӥз Геннадий Батищев - Архитектурая но лэсьтӥськонъя кун комитетлэн кивалтӥсез. 1997 арын 1 январьлы улон интылы кулэяськисьёс быдэс республикая 72 сюрс семья вал. Тужгес но трос - Завьялово, Балезино, Игра, Ува районъёсын. Со дыре ик юртъер пуктон берло 5 арзэ кык поллы кулэсмиз. Мугез одӥг - ӧвӧл коньдон. Нимаз корка ӝутӥсьёс сярысь ке верано, 1997 арын, азьвылэныз ӵошатыса, 7 процентлы ятыргес корка пуктэмын. Ижевскын ортчытэм юалляськонъёс возьмато, улон интызэс умоятыны мылкыд карисьёс пӧлысь 52 процентэз улысалзы асьсэ юртъерын, бордаз бакчаез медло на; 40 процентэзлы кельше трос этажъем кирпич коркась квартира; кылемез, 8 процентэз, соглаш потыны панельлэсь ӝутэм юртэ но. Юаськем семьяос пӧлысь 3,4 процентэзлэн гинэ луонлыкез вань дун тырыса улон инты басьтыны, 42 процентэз оско кредитлы, 37 процентэз - дунтэк сётэмзылы. Программаен чакламъя лэсьтӥськон материал быдэсак поттэмын луоз асьме дорын. Таин валче куд-ог депутатъёс соку ик юан сётӥзы Шаберды гуртэ пуктӥськись кирпично- черепичной завод сярысь. Сое лэсьтонэ, вуж уксёен вераса, висъямын вал 1 миллиард доллар, оборудование дасяны кулэ Югославиысь огез завод. Коньдон келямын. Дыр ортче. Нош оборудование туннэ ке но вуттымтэ. Малы? Юанлы докладчик тазьы валэктӥз: - Югославиен гожтэм огкылмы быдтымтэ. Басьтэм оборудованимы но отын ик кылле. Татчы вайыса, кемалась сисьмысал ини. Завод дась асьмелы туннэ ик коньдонмес берыктыны. Депутатъёс Сергей Протозанов, Татьяна Манакова но мукетъёсыз ӵектӥзы эскероно законопроектэз умоен лыдъяны но кутыны. Соин ӵош дэмлан сётэмын нимысьтыз саклык висъяны общежитиын трос аръёс ӵоже улӥсь семьяослы. 86 депутат пӧлысь "Жилище" программалэсь инъетсэ юнматон понна куаразэ сётӥз 64-ез. Та нуналэ сессиын озьы ик эскеремын "Удмурт Республикаын дунъёсты (тарифъёсты) государство ласянь радъян сярысь" Законлэн инъетэз. Вераськон мынэ куанермем семьяосты шуак-дуак ӝутскись дунъёслэсь утён ласянь. Удмурт Правительстволы косэмын няньлы, пызьлы, кеньырлы, макарон изделиослы, йӧллы но солэсь дасям сиёнъёслы (мороженой сяна), сӥльлы, сылаллы, сахарлы, будос вӧйлы, чорыглы, спичкалы, майталлы но мисьтаськон порошоклы пуктэм дуъёсты эскерыса возьыны, но кулэ дыръяз ӝегатскытэк ужрадъёс кутыны. Сессилэсь кыкетӥ нуналзэ, кворум люкаськымтэен, депутатъёс мытӥзы пӧртэм пумо юанъёссылы валэктон шедьтон бордысен. Николай Юшков лэчыт вераськиз улон инты лэсьтыны висъям льготной кредитъёсты матысь адямиосъя, ӵыжы-выжыосъя люкылэм сярысь. Самой "ёрмись" муртъёс со чотын квартира вылэ квартира басьтӥзы, коттедж пуктӥзы, машина басьтӥзы. Сарапулын, кылсярысь, та радэ шедизы мэриын ужасьёс, дышетӥсьёс, врачъёс палэнэ кылизы. Депутат дэмлаз кредитлэсь кутӥськемзэ эскеронэ кыскыны республикаысь Прокуратураез. Депутат Михаил Кокорин ас мылкыд каремезъя басьтӥськиз коммерческой автобусъёс ласянь кутэм решениез эскерыны но пумаз-йылаз вуттыны: кинэн сэрен быдтэмын вал федеральной законъя чаклам льготаос? Сыӵеос пӧлы шедизы оже пыриськемъёс, Чернобыльын ужамъёс но куд-ог мукетъёсыз. Депутат Алла Чишковская кӧня ке пол кутскыса, ужпум ӝутӥз "Городской стиль" но "Независимая газета" бамъёсын потэм "Афера" статьяя эскерон нуон сярысь, со герӟаськемын Удмуртиысь нефть кыскон интыосты вузанэн. Тросэз залын пукисьёс Алла Ивановнаен соглаш луизы. Нуназе кутскыса, ӝытозь кыстӥськиз "Удмурт Республикаысь Кун Кенеше депутатъёсты быръён сярысь" Законэз кыкетӥзэ эскерон. Одӥг пол кутскыса, со учкемын вал ни. Таяз но учыре огкылэ ӧз вуэ. Часлэсь ятыр вераськон мынӥз депутатъёслэн лыдзыя: огъёсыз дэмлало 100 муртэ, мукетъёсыз 150 муртэ Кун Кенешлэн вуоно созываз бырйыны. Алла Чишковская кылпум поттӥз 125 депутат бырйыны. Солэсь ӵектонзэ эскеризы вань фракциосын, озьы ке но, сессия та лыдпусэз ӧз юнматы. Вераськон мыноз на ваньмаз избирательной округъёсын. 22-тӥ сессилэн ужаз нош ик вис ялэмын. Л. МЕДВЕДЕВА. Интыосысь ӧтьыса Валлян люкаськылӥз Удмурт Республикаысь Правительстволэн Нациосын ужанъя комитетэзлэн коллегиез. Отчы ӧтемын вал городъёсысь но ёросъёсысь администрациослэн калык кусыпъёсты радъян понна кыл кутӥсь кивалтӥсьёслы, газет-журналъёслэн редакторъёссы, республикаысь калык огазеяськонъёслэн валтӥсь муртъёссы, тодосчиос. Пумиськон дыръя паськыт вераськон ӧръяськиз асьме дорын национальной политикаез азинтон пумысен. Комитетлэн тӧроез Светлана Смирнова тодматӥз нимысьтыз концепциын юнматэм ужпумъёсты быдэстон бордын ужан сярысь. Берло аръёсы та ласянь кӧня ке опыт люкамын ни. Кылсярысь, Камбаркаысь администрациын кылдытэмын национальной ужпумъёсъя подкомиссия. Отчы пыро ёросысь но городысь пӧртэм огазеяськонъёслэн кивалтӥсьёссы, соос уртче кенешо калыкъёслэсь кусыпъёссэс юнматӥсь ужрадъёс сярысь. Тазьы ик ужаны луоно мукет интыосын но. Со понна тыршоно, интыысь бюджетъёсын вуоно аре та удыслы коньдон висъян сярысь пусъемын мед луоз шуыса. Ӟырдыт пӧрмиз шаерамы кун кылъёсты уже кутонэз умоятон пумысен вераськон но. Люкаськемъёс пӧртэм малпанъёсынызы тодматӥзы. Пусъемын вал та ужын ивор вӧлмытӥсь ёзъёслэн интызы но. Тае лыдэ басьтыса, решение но нимысьтыз ватсан пыртэмын. О. МАРКОВ. Кыл - бадӟым кужым Национальной библиотеклэн кылъя но литературая отделэз тодматэ риторикалы сӥзем книгаосын. Риторика - калыкен чебер, валамон, сюлме пырымон вераськыны дышетӥсь наука. Солэсь кулэлыксэ берло дыре асьмеос юнгес шӧдӥськом, сое школаосын, вузъёсын но дышето ини. Краеведения но финн-угоор литературая отдел выставкае поттэм Удмуртиысь кунпусъёслэн (гербъёслэн) историзылы сӥзем книгаосты но статьяосты. Отысь тодыны луоз республикамылэн, шаерысьтымы городъёслэн пӧртэм вакытъёсысь кунпусъёссы сярысь. Дуннеысь пӧртэм кылъёсын тунсыкъяськисьёслы, английской кылэз дышетӥсьёс кунсьӧр кылъёсъя отделын английской кылъя словаръёсын тодматскыны быгатозы. О. МАКСИМОВА. Яратон, комсомол но тулыс 80 ар тырмонэныз валче элькунысьтымы культура учреждениос пӧлын "Профессиезъя устоез" конкурс ортчиз. Нюръяськонэ пыриськизы егит директоръёс, художественной кивалтӥсьёс, методикая кабинетъёслэн кивалтӥсьёссы, методистъёс, библиотекарьёс но мукет специалистъёс. Кызь сизьыметӥ октябрёзь смотр-конкурс ортчоз республикаысьтымы вокальной ансамбльёс, нимаз кырӟасьёс, эктонъя коллективъёс, калык инструментъёсъя оркестръёс но ансамбльёс, духовой оркестръёс, нимаз лыдӟисьёс пӧлын. Конкурс ортче куинь вакытъёсъя. Воткинскын но Можгаын зонаосъя ужрадъёс ортчизы ни. 24 октябре со луоз Глазовын, ӵуказеяз - Сарапулын. Конкурсын вормисьёслэн концертсы ортчоз 24 октябре 14 часысен Ижысь шутэтсконъя "Ударник" центрын. Отын ик тодмо луозы "Профессиезъя устоез" конкурсын вормисьёс но. А. Апаева. Удмурт Республикаысь Кун Кенеш но Правительство мур куректыса иворто Кизнер ёросысь администрацилэн ужъёсыныз кивалтӥсь Кулаков Алексей Федорович улонысь дырзлэсь вазь кошкем сярысь но ӵыжы-выжыосызлы но матысь адямиосызлы кайгыремзэ вера. "Удмурт дуннелы" - 80 Юрттэ, валэктэ, улыны мылкыд пыӵатэ Яратоно газетмылы тырме 80. Мон солэсь вить ареслы гинэ пичигес. Кин тодэ, оло, тэтэ карон дыръям ик та газетэз киям погмай, шудӥ. Но одӥгзэ ӟеч тодӥсько на, "Удмурт коммунаез" дас аресысен лыдӟыны кутскемме. Гуртын улӥсь мӧйыос, тросэз лыдӟиськыны быгатымтэенызы, ялан монэ косылӥзы чирдыны. Аръёс ортчо. Озьы кылдӥз, улоно луисько Удмурт шаерлэн палэназ, нош гажано эшеным - газетэн люкиськыны уг дыртӥськы.1965 арысен кутскыса, удмурт газет вуылӥз кыдёкысь Сибире но. Шумпотылӥ котькуд номерез ӝегатскытэк ваемзылы, бӧрысьгес ини, выльдӥськон кутскон аръёсы, Удмуртиысь "пӧсь" иворъёс кытчы ке ышылыны кутскизы. Соку ик газетлы гожтӥськон но шугомиз, дунояз. Тау вордскем палъёсылы, соос пыр выль иворъёсыз дыраз тодыны быгатӥсько. Анай кылын потӥсь газет котькыӵе учырысь потыны юрттэ, пӧртэм валэктонъёс дэмла, улыны мылкыд пыӵатэ. Сыӵе газетэз-а уд гажа, уд данъя? Удмуртилэн палэназ но таӵезэ лыдӟемед потоз. "Удмурт дуннеез" удмурт луэмез понна но дунъясько. Н. ЯКОВЛЕВ. Тюмень город. Сылалэн-нянен Дуннеын - "Удмурт дунне", Тямыстон арзэ пусъе! Югдытэ удмурт кунзэ, Бурдъятэ вань калыксэ. Бамъёсаз - "Наталь", "Тулкым", "Шӧкычез" бызгетылэ... "Герд" бамез дася йӧно Иван Лебедев, шуо. Тӧролэн со воштӥсез, Тӧри вал кадь тыршисез. Шкляев Алексей - тӧро, "Дуннезэ" вала усто! Сылалэн-нянен туннэ Пумитаськом ми тонэ. Зоя Трухина. УДМУРТ ДУННЕ - 80 Ӟардон Тямыстон ар талэсь азьло. Сӥзьыл. Одӥг ар гинэ ортчиз ай Быдӟым революция бере. Котыр огыр-бугыр. Странаын граждан ож кутскемын. Большевикъёс котькытын ик выль Советъёс кылдытъяло. Бай муртъёс весь зӥбыса возьыны туртто куанеръёсты - ляльчиоссэс. Быдэс старнаын сямен ик, Малмыж уездын но контрреволюционеръёс ӝутӥсько выль властьлы пумит. Иж завод котырын ӟырдыт ожмаськиз Азинлэн дивизиез. В. И. Шоринлэн кыкетӥ армиез но А. М. Чеверевлэн полкез 7-тӥ ноябре мозмытӥзы Ижез тӧдьыос ки улысь. Октябре Кам шур вылын мозмытэмын кулон баржа. Сютэм улон. Пӧртэм пумо паласькись висёнъёс... Таӵе секыт огыр-бугыр вакытэ Алабгоын (Елабугаын) печатласькыны кутске "Гудыри". Лыдӟись кие сое вуттон понна, трос тыршиз редактор Трофим Борисов. Газетлэн нырысетӥ бамаз, нимызлэсь вылӥынгес, инме йӧтэ таӵе вазиськон: "Вань еросысь куанер муртъёс, огин кариське!" Газет туж бадӟым ӧй вал, озьы ке но, ужасьёс тыршизы тросгес иворъёс печатланы. Тани "Турлы йыворъёс" йыръян улын потылӥзы пӧртэм ёросъёсын, Россиын, кунгож сьӧрын кылдон югдурлы сӥзем материалъёс. Тросгес гожъяллязы пӧртэм ожмаськонъёс сярысь. Гордйос азьлане мыно. Ож заводэз басьтэм бере, гордйос мыно ни Екатеринбург шуон каре. Кормовище шуон станцаез басьтӥльлям ини. Герман мир куре. Германия Англиялэсь но Францийлэсь мир куре. Французлэсь ожмаськыса басьтэм музъемзэ берен сётэ ваньзэ. Бадӟым инты басьто революциен герӟаськем чуръёс. Вяткаись таин телеграмма вуиз Алабгое: "Германияйн революция. Вильгельмез арестовать карыса ворсальлям. Море вылын ожмаськон пыжъёссы (флот) ваньмыз горд флагйос ӝутыса ветло. Немец салдатйос француз салдатйосын асьсэ понна куспазы мир лэсьтӥллям". Газет трос печатлаз гуртысь кулакъёсын нюръяськем сярысь статьяос. Байёс музъемез сётытэк туртто. Бай мурт - напсие. Редакция трос тыршиз удмурт калыкез "сайкатон" ужын, котькызьы ке но дышетыны выризы кылбуръёс но веросъёс вылын. "Гудыри" газетлэн нырысетӥ номераз ик печатласькиз К. Чайниковлэн (Куӟебай Гердлэн) "Шунды жужалоз" ("Зарни шунды ӝужалоз") кылбурез. Со но Т. Б. (Трофим Борисов), удмурт калыклэн кык визьмо азьветлӥсьёсыз, кезьыт чуръёс пыр сюлмаськизы пеймыт гуртъёсыз ӝутыны: Кайгуэ Уськом, туган, уськом, туган. Урамын туж бадӟым буран. Тон гуртын весь изиськод, Номыр адӟытэк улӥськод. Мукет калык туж шаплы Кытын сутын удмуртлы. Кияз басьтэ, пеляз понэ, Отчы-татчы городэ ветлэ. Т. Б. Султэ Удмурт понна ужаса, Уйбыт весь куректыса Куасьми инъи мон!... ...Удмуртъёслы ужаса, Султэмзэс весь возьмаса Жади инъи мон!!! К. Чайников. Герд аспал калыксэ оскытыны турттэ, шуд лыктоз шуыса. Авторъёс инкуазь пыр валэктыны выризы дышетскемлэсь кулэлыксэ. Басьтом К. Чайниковлэсь "Нюлэсэз корало" кылбурзэ: Ызьысь калыкез, Пеймыт дунъеэз, Сайкатэмез понна-а? Вазь сайкамез понна-а? Корало нюлэсэз. Газетэз тросгес учкылӥзы гуртъёсын, лыдӟон коркаосын. Таин валче газет поттӥсьёс лыдэ басьтӥллям музъем бордын ужасьлэсь куронъёссэ. Тани огаз статьяын пыр-поч валэктэмын, кызьы мерттоно но утялтоно узы-борыез. Кӧня ке сортъёслэн нимъёссы гожтэмын: Дейч-Эверк, Нобль, Разбери-Максима но мукет. Соосты, пе, будэтӥд ке, нюлэскы ветлыса, трос дырдэ уд быдты ни. "Сад мерттон сярысь" статьяын верамын кызьы дасяно музэ, убозэ, мерттоно будосэз. Та материал дасямын вал, дыр, лыдӟисьёслэн куремзыя: "Кудӥз шуэ: ку вуоз солэн емышез, кудӥз, ми ум тодӥське утялтыны, шуэ". Гожтэм пумын дэмлаллям бакчаязы улмо, сутэрпу, эмезьпу, крыжовник, вишня будэтыны. Революция, ожӝу, сютэм улон пеймыт гуртъёсты эшшо но золгес зӥбизы. Котькытын ик вӧлмылӥзы черъёс. Тае лыдэ басьтыса, "Гудыри" пыр калыклы вазиськоно луылӥзы эмъясьёс. Пыр-поч ивортэмын, ма луэ адямилы висьыны кутскыкуз, кызьы утиськоно, ма кароно чер медаз паласькы шуыса, кызьы астэ чылкыт возёно. Номерлы быдэ газетын потылӥзы ялонъёс. "Удмурт кылын выль книга потӥз" гожтэм улын книгалэн нимыз, дуныз, кытысь басьтыны луон сярысь ивортылӥзы. Кылсярысь: "Вашкала удмуртъёслэн улэмзы. Дуныз 25 коньы. Та книга вузаське "Гудыри" шуон газетлэн потон интӥяз". Яке тани таӵе ялон: "Алабогойын Удмурт семинария кемалась усьтӥськиз ини. Дышетӥськись пиос-нылъёс 40 мында люкаськизы. Январь толэзе 15 числое (виль календарья) нош прием луоз. Кинь двухкласснойись, высшей начальнойись пыр потӥз, ваньды лыктэлэ. Сион-юон, патер, дӥськут ваньмыз дась. Удмурт семинариялэн председателез Т. Борисов". 1918-тӥ арлэн берпуметӥ номераз вуоно 1919-тӥ арлы газетлы гожтӥськон ялэмын. Тани ма гожтӥллям ялонэ: "Газет арнялы огпол (куд дыръя кык пол) потоз. Дуныз луоз: кык толэзьлы 3 манет, ниль толэзьлы 6 манет, куать толэзьлы 9 манет. Вуж гожтӥськем муртъёслы газет мынэмись виль арысен куськыса дугдоз. Виль арисен куськыса, соослэн гожтӥськем сроксы быре. Соин но удмуртъёс ваньды ик вилисен гожтӥське та газетэз басьтыны". Газетэ материал улэ нимтулзэс пуктылӥзы пӧртэм сямен. Пусйылӥзы фамилизэс яке басьтылӥзы асьсэлы псевдоним. Тани куд-ог гожтӥськемъёс: Т. Б., Борисов, Егоров, Канисаров, Пельга пи М. Гончаров, Сизьгурт пи Д. Кириллов, Удмурт дышетӥсь ныл, Горд, Котныр эшты, куанер, крестьянъёс но мукет. Газет пыр трос сюлэмшугъятӥсь ужпумъёсты ӝутыны выризы, тужгес но дышетскон ласянь. Гуртъёсысь вуэм гожтэтъёсын верамын кызьы ужамзы сярысь "Гудыри" тодматэ революцилэн куд-ог азьветлӥсьёсыныз, кылсярысь: "Кинь бо со Ленин?" Буква-гожтэт тодӥсьёс пӧлын удмуртъёс трос ик ӧй вал, таин валче газетлэн тиражез но вылӥе ӧз ӝудтӥськы. Озьы ке но, "Гудыриез" вуттыны тыршизы котькуд удмурт гуртэ. Надежда ПРОКОПЬЕВА. Удмурт кун университетысь студентка. Тани соос, нырысетӥ "Гудыриос". Ӟечкыласько! Гажано редакциын ужасьёс! Вань сюлмысьтым ӟечкыласько тӥледыз газетлы 80 ар тырмонэн. Сӥзисько юн тазалык, шудбур, гожъяськон пероды ноку медам сыномы. "Удмурт дунне" газетэз пичи дырысеным ик яратыса лыдӟисько, соин но, дыр, газеттэк одӥг ар но улэме уг луы. Гожтӥськон понна берпум коньдонме но сётыны дась. Гажаса О. П. ТИХОНОВА, Пичи Пурга районысь Аксакшурын улӥсь пенсионерка. Визьмась Газет поттон - аспӧртэм конвейер. Радыз сураськиз-мараз, шӧдтэк шорысь ӝеганъёс кылдӥзы ке, выль номер потытэк но кылёз, ява. Ми, гожъяськисьёс, куддыръя та сярысь вунэтӥськом но. Таӵе учыръёсы юрттэ Ижевск полиграфкомбинатлэн производственной отделаз ужась М. М. Гребенкина. Уно аръёс ӵоже со газетлэсь но типографилэсь кусыпъёссэс радъя. - Ма, газет потытэк кылён учыръёсты уг ик то-дӥськы, - шуэ Минзира Миникановна. - У-у, партия кивалтон аръёсы со ласянь юн чаклало-эскеро вал. Али но кызьы лыдӟисез газеттэк кельтод. Мон ачим "Удмурт дуннеез" уг лыдӟиськы но, тодӥсько, сое данак адямиос басьто, нуналлы быдэ витё. Та лякыт сямо, вазиськись бигер кышномурт редакцилэн секретариатаз ужасьёс понна кизили выллем. Шуом, номер ӝега, минутъёс бызё но бызё, сыӵе дыръя Минзира Миникановна капчияк гинэ вазёз, валэктоз: сыӵе-сыӵе дырлы вуттэ типографие газет бамъ-ёстэс. Яке редакция кыӵе ке пусйымон нуналлы аспӧртэмгес номер поттыны дасяське. Соку ик Минзира Миникановна доры бызиськом, визьнод курыса, кыӵе амалъёсты уже кутыны луоно. - Мукет изданиосын ӵошатыса, "Удмурт дуннеен" ужаны капчи, - шуэ Минзира Гребенкина. Ми шумпотӥськом та кылъёслы. Милемлы но капчи тӥледын артэ ужаны, гажано Минзира Миникановна. Ю. Караваева. Алла Кузнецова Корт ши дуре "Шӧкычлы" Витьтон одӥгетӥ арын Удмурт газет бамын Кылдӥз "паймод, ява" сэрег. Горон сюрес ӧй вал сюбег. Сэрег маин-о паймытъяз? Тордосъёсыз со сачкытъяз... Шараятӥз лушкаськисез... Фермаосысь урод шӧкез... Дас одӥг ар ортчем бере Быдэс "бамез" сэрег куре: Вордскем "Шӧкыч" шизэ люка Уродлыкез туж вӧсь лека. "Шӧкыч" кинэ-о лекалляз? Тордосъёсыз сачкытъялляз... Бере кылем колхозъёсыз... Чик возьыттэм какасъёсыз... Нош кивалтӥсь ке сюремын Чеберъяськин "Шӧкыч" бамын Сое одно чортоз Обком Тыбыр кузэ ньыоз оглом... Та перестройка вуэмен "Шӧкыч" долка но йыроме: Сурем пыр мае верано, Уродлыкен возьматоно? Куашкам ужез ке верано - Вань производство таркамын Кивалтӥсьсэ ке лекано - Кин ку ньыоз туаларын? Шараятод лушкаськисез - Нош со туэ ни бизнесмен. Кызьы урдод шораз шиез? Закон бордын кужым солэн. Тодосчиез ке лекано - Тордосчимы туэ дано. Пась кисыяд ке тӧл шултэ - Вина вузлэсь коньдон потэ. Котьмар но кар на табере! ... Нош "Шекчмы" корт ши дуре. Корт ши дуре Шӧкычлы Сюрс укмыс сю витьтон одӥг арын Асьме газет бамын Кылдӥз "паймод, ява" сэрег. Вань пуштросэз ӧй вал сюбег. Сэрег маин-о паймытъяз? Тордосъёсыз со сачкатъяз. Шараятӥз лушкаськисез. Фермаосын кылдэм шӧкез. Дас одӥг ар ортчем бере Газет бамез сэрег куре. Вордскем "Шӧкыч" шизэ люка Уродлыкез туж вӧсь лека. "Шӧкыч" кинэ-о лекалляз Тордосъёсыз сачкытъялляз Накасъёсыз, лушкаськисез Куддыр йӧттӥз кивалтӥсез. Та "перестройка" вуэмен "Шӧкыч" долка но йыроме: Уродэн мае лыдъяно? Кинэ но маин лекано. Урод ужез ке верано - Вань производство куашкамын... Кивалтӥсез ке таркано - Кин ку ньыоз туаларын? Тордосъёсыз-а лекано? Но тордосъёс туэ дуно. Пась кисыяд ке тӧл шултэ Вина вузлэсь коньдон потэ. Шараятод лушкаськисез? Нош со туэ ни бизнесмен. Кызьы шораз урдод шиез? Закон бордын кужым солэн. Котьмар на кар на табере... Нош "Шӧкычмы" корт ши дуре. "Удмурт дуннелы" - 80 Киысь кие кошке Газетты туж яра, пероды лэчытгес мед луоз улонысьтымы ӟечсэ но, уродзэ но сюлэме пыӵамон возьматыны. Газетты быдэсакыз кадь, но берло дыре шергес адӟыны луэ пудо вордӥсьёс, музъем ужасьёс сярысь гожъямъёсты. Гуртамы удмуртъёс уло бере, ваньмызлэн газет басьтэмзы потэ, но уждун дыраз уг сёто. Соин ик кудӥз киысь кие но кутылыса лыдӟо газетэз. Яра "Твой дом и сад" приложениды но. Гожъясьёс пӧлысь но - нокинэ но люкеме уг поты, ваньды умой гожъяськоды. М. Морякова. Кияса районысь Вуж Салья гуртысь нылкышно огазеяськонлэн нимыныз. Ваньдылы ик - тау! Туала дыре праздник ортчытыны капчи ӧвӧл. Зэмос эшъёс ӧвӧл ке. Милям соос вань. Туннэ нимысьтыз тау карем потэ ваньмызлы, кин та пурысь сӥзьыл нуналъёсы вазиськиз редакцилэн куронэзлы но юрттӥз газетын ужасьёслэн ымныразы тулыс мылкыд кылдытыны. "Агропромсервич" но "Удмуртнефтепродукт" огазеяськонъёс, Вавож ёросысь "Колос", "Луч" эштосысь но Грахово ёросысь "Родина" колхоз, Кезысь пищекомбинат но Сарапулысь сур пӧзьтон завод, Завьял ёросысь "Восточный" совхоз но Вараксиноысь тылобурдо вордон фабрика, Глазовысь "Реммаш" предприятие но Ижысь электросетьёс - та но мукет организациослэн кивалтӥсьёссы быгатэмзыя юрттӥзы газетлэн вордскем нуналэзлы дасяськыны но вуоно арлы гожтӥськонэз ӟечгес радъяны. Тау! Ӟечез ӟечен ик берытскоз. Газетлы юрттӥсьёс эшшо но луозы на. Одӥгзэ но вунэтытэк, ми тыршом соослэсь нимтулъёссэс "Удмурт дуннелэн" бамаз печатланы. Редакциын ужасьёс. "Удмурт дуннелы" - 80 Мон "Советской Удмуртиез" басьтӥсько ини 1965 арысен. Огкылын вераса, со мынам газетэ, весь выльме, пиналме. Трос ке но ӧз, куд-ог дыръёсы мынам но пичиесь статьяосы потылӥзы. Соиз умойтэм, кинлэн йырыз, "ужаз" солэсь нимзэ воштыны. Собере, выль удмуртъёс яке кызьы шуоно соосты, газетэ ноку но кылымтэ выль кылъёссэс интыяны выро. Басьтом Гербез. Со луиз кун пус - азьло но али но пудо-животлэн пеляз удмуртъёс пус пукто, кенеръёсты но пусэн гожмаллязы. Флаг - кун кышет луиз. Сыӵе символъёсты-дышем кылъёсты пуштроссэс мур тодыса воштоно вылэм. Улонни, сиськонни, ужанни - трос сыӵе мукет кылъёс, газетэз лыдӟыку, мылкыдэз сӧро. Оскелэ, со выль кылъёс удмурт адямилэн визьмаз но, сюлмаз но уг лякисько. Ми пал удмуртъёс туж умой валало, со пумысен редакциез янгыше уськытыны уг луы шуыса. Со дыре ик огшоры умоесь статьяос гожъяло А. Шкляев, К. Ломагин, Романов, Возисов, Байтеряков но трос мукетъёсыз, озьы ик удмурт студентъёс. Туж мыло-кыдо лыдӟоно соослэсь гожъямзэс. Мынам пичи дырысен эше Альберт Разин но - тодмо тодосчи - огшоры удмурт кылын бадӟымесь статьяос гожъя. Тодэм потэ вылэм, кинъёс со выль удмурт кыл пӧрасьёс. Мар меда шуысалзы, туннэ нуналэ сайкасалзы ке Трокай агаймы, Г. Д. Красильников но улонысь кошкем мукет писательёс но поэтъёс? Та гожъяме газетэ ке но потӥз, номыр уг шуы. Соин но тырмоз: сюлэм малпанме гожъясько. Мынам таӵе мылкыды 80 процентэзлы удмуртъёслы кельшоз шуыса оскисько. В. БАЙМАНОВ. Алнаш район, Кузьымгурт. Нуналлэн тодметэз Вашкалаос 27-тӥ октябрез Параскалэн нуналэз шуиллям. Та нуналэ, пе, ноку кӧс уг луы. Туннэ куазь жоб улӥз ке, ньыль арня ортчыса, толэд но вуоз. * Югыт нунал туннэ кыстӥськоз 9 час 33 минут. Та нуналэ... ар талэсь азьло 28 октябре (1928 ар) Сарапулын потӥз нырысетӥез свето-газет. Со возьматӥськиз ульчае ошем экран вылын. Та нуналэ ик 5 ар талэсь азьло Ижевск городлэн Пичи Кенешез горисполкомез быдтон сярысь ужпум кутӥз. Удмурт Республикаысь Вылӥ Кенешлэн пусъемезъя, городэн кивалтон сётэмын солэн администрациезлы но мэрезлы. Гажано эшъёс! Удмурт Элькунысь Кун Кенеш, Кивалтэт вань сюлмысьтызы ӟечкылало "Удмурт дунне" газетлэн редакцияз ужасьёсты нырысетӥ номер кылдэм дырысен тямыстон ар тырмонэн. Вордӥськыкуз ик сётэм тыл кадь пӧсь "Гудыри" нимыз выль вуоно аръёслы ӟеч инъетъёс кылдытӥз. Лыдӟись доры "Удмурт коммуна", "Советской Удмуртия", "Удмурт дунне" нимъёсын вуыкуз но отын котьку валтӥсь луо дырыз дыръя вуттэм пӧсь ивор но меӵак синме ыбылӥсь кылужъёс. Туннэ чеберъяськытэк вераны луоз: редакцияя пӧрмиз ни визьмо но кибашлы адямиосты дурон кебитлы. Соос "Удмурт дуннелэн" гинэ зарни шыкысэз ӧвӧл, быдэс Удмурт шаерлэн данъяськонэз. Журналистлэсь сюрессэ ортчем сюрс адями пӧлын - Геннадий Красильников, Семен Самсонов, Флор Васильев, Петр Елкин но уно мукетъёсыз. Тӥляд газетты уте удмурт калыклэсь кылзэ но культуразэ. Нош лыдыз кызь кык сюрслэсь трос ини. Отын бӧрсьсыь бӧрсе возьматэмын шаерамы тямыстон ар ӵоже ортчем учыръёс. Берло дыре газетлэн данэз УР-тын будэ. Сое возьматэ газетлы ёросъёсын арысь аре ӟеч гожтӥськемъёслэн лыдзы. Городысь сад-бакча возисьёслы кемалась яра "Твой дом и сад" газет-ватсэт. Редакция ӧжыт уг лэсьты Удмурт шаерын спортэз азинтон ласянь но. Солэн кичӧлтэмезъя, 1952-тӥ арысен кутскыса гуртысь куасэн бызьылӥсьёс куспын арлы быдэ ортчо "Удмуртдунне" газетлэн "Азвесь кубокез" понна ӵошатсконъёс. Туннэ , котьку сямен ик, газетэз висъяло оскон сётыны быгатэмез, лыдӟисен сюлмысь сюлме вераськемез, адямиослы юрттыны турттэмез. Нош журналистъёс но шаерамы улӥсьёс куспын ваче вераськонъёс котьку шедьто лыдӟисьлэн сюлэмаз сюрес. Праздникен, гажано эшъёс! Азьланяз но мед утиськозы, но эшшо но мед йылозы тӥляд узыр сямъёсты. Гожтэм но верам кылды мед кузьмалоз оскон, яратон, ӟеч мылкыд! Тазалык, шудбур но вормонъёс! Тямыстон арен! Удмурт Элькунысь Удмурт Элькунысь Кун Кенеш Правительство. Одӥг нуналэ вордскизы Соос одӥг нуналэ вордскизы - 31-тӥ октябре. Зэм, одӥгез, "Гудыри" газет, ӝужаку, кыкетӥезлы, Михаил Алексеевич Перевозчиковлы, вал ини вить арес. Лыдӟиськыны со уг быгаты вал ай, но мӧйыослэсь газет лыдӟемзэс кылзыса, мае но сое валаны йӧндырылӥз ини. Со валалляз: кыӵе ке но дядяйёс удмурт кылын газет потто но со пыр котькуд адямиен вераськыны шуныт кылъёс шедьто. Но огзэ соку Миша ӧз тодылы: улон сюрес соосты куке но пумиськытоз но весяк дырлы эшъяськытоз. Удмурт пединститутэз йылпумъямез бере, сое, удмурт кылэз но литератураез котькуд ласянь мур тодӥсь адямиез, институтэ ик ужаны кельтӥзы. Но вуоно араз дыр вуиз армие мыныны. 1946-тӥ арын гинэ берытскиз Ижевске. Одӥг арзэ Писательёслэн союзазы ужамез бере, сюрес вуттӥз "Советской Удмуртия" газетлэн редакцияз. Татысен кутскиз Михаил Алексеевичлэн удмурт газет поттон удысын ужан вакытэз. Кыӵе гинэ ёзын ӧз тыршы - ӟуч кылысь берыктӥсь, литературной ужась, кыл кутӥсь секретарьлэн воштӥсез, кыл кутӥсь секретарь, редакторлэн воштӥсез - со вал ӟеч тодӥсь-валась, ас ужезлы вань сюлэмзэ сётӥсь адями. Озьы ужаны дышетылӥз эшъёссэ но. Пӧртэм аръёсы редакциын ужазы данак писательёс, мӧйы журналистъёс, озьы ик - егитъёс. Газетэ печатлан вылысь, мар ке гожто ке - очерк, верос, кылбур, ивор - одно ик тыршо вал Михаил Алексеевичлы возьматыны. Со угось котькин понна вал удмурт кылъя визьпог, солэн эш мылкыдын валэктэмез юрттылӥз шонер но чебер гожъяськыны. Удмурт кылэз но литератураез мур тодэменыз ик Михаил Алексеевич пыриськылӥз учебникъёс, словарьёс дасянэ но, книга поттонъя "Удмуртия" издательстволэн ужаз но. Бадӟым опытэн журналист М. А. Перевозчиков атай музэн сюлмаськылӥз егит эшъёсызлы юрттон сярысь. Со вӧзын будӥзы данак творческой ужасьёс, бӧрысь соос асьсэос но луизы устоесь журналистъёс. Мон нырысь ик пусйысал Г. П. Вахрушевез, С. Г. Машковез, Н. Ф. Стрелковез, Н. Н. Тебетеевез но данак мукет эшъёсты. Михаил Алексеевичлэн сюлэмыз котькинлы усьтэмын. Соинтэк-а со доры визь-кенеш басьтыны пыраллязы машинисткаос но, выпускающийёс но, корректоръёс но, фотокорреспондентъёс но. Сое тодӥсьтэмез ӧй вал типографиын ужасьёс пӧлын но. М. А. Перевозчиков редакцие ужаны лыктыку, "Советской Удмуртилы" тырмиз вал ай кызь укмыс ар гинэ, нош аслыз - куамын ньыль. Нош шутэтскыны со кошкиз 1981-тӥ арын гинэ, куатьтон тямыс аресаз потэмез бере. Туэ со вань эшъёсыныз ӵош пумита одӥг нуналэ тупам кык бадӟымесь юбилейёсты - аслыз тямыстон вить но газетмылы тямыстон ар тырмемез. Зэм, вань на ай сыӵе ик бадӟым куинетӥез юбилей - оскымон но гажано кузпалэзлы, Татьяна Аркадьевналы, 27-тӥ октябре тырмиз тямыстон. Куатьтон ар ӵоже ини соос улон сюрестӥ артэ вамышъяло. Нош сюлмаськон куке но быроз шат? Нылпиослы но юрттоно, соослэсь пичиоссэс но ялан эскерылоно... Металлургъёслэн городокысенызы сизьыметӥ иськемозь нюлэскытӥ кужен сюрес кыстӥське. Арлэн котькыӵе вакытаз отӥ лёгаськыны туж умой. Чебересь писпуос, чылкыт омыр. Мылкыд ик капчи луэ. Тӥни со сюрес вылысен ӵем дыръя пумиталод сэзь-сэзь вамышъясь адямиез. Бӧрсяз учкыса, нокин но уз малпа, со тямыстон вить аресъем Михаил Алексеевич Перевозчиков сад-бакчаяз озьы дыртэ шуыса. "Ойдо, кема аръёс ӵоже сэзь мед вамышъялоз ай", - мылкыд каро солы вань тодмоосыз. - Сюресэз капчи медло". В. МИХАЙЛОВ. Михайил Перевозчиков но Валентина Аронова вуоно номерез эскеро. Фото лэсьтэмын 60-тӥ аръёсы. "Капчи кылбуръёс" пӧлысь Дрезинаын в дрезину Кыдёкын ик ӧвӧл, Глаз кар дорын, Пермь чугун сюрес вылын, вань разъезд, 16 лыдо. Ужасьёсыз но отын йыро-пыдо: йырыз луэ Мусихин, сое тодэ, дыр, котькин. Табельщиксэ Ельцов нимало, Мусихинэн соос ӵош ужало. Отчы ик Кондратьев кариськемын, Ливдель заводэ ужась люканы лыктэмын. Конторазы но отын вань, ужзы мынэ мыдлань: контораын калыкъёс гожъясько, а мынам та "мусоос" куноясько. Озьы конторазэс кабаклы пӧрмытӥллям, та куинь тодмоосмы "в дрезину" кудӟиллям. Котьмар сярысь куспазы верасько, огзылэсь огзы ортчыса ушъясько. Кин кытын ужамын, кин кызьы дуннеез пожамын, ваньзэ татын тон кылод. Одӥгез эшмы йӧспӧртэм, Кондратьев-Брум нимтулъем, кудӟыса, оло, урмем. Визьтэм кылъёсын шӧнгыльтэ, 1500 манет казна коньдонзэ пол вылэ зӥртэ. - Адӟиды-а, кӧня мынам коньдонэ? Вузало но басьто тонэ но тонэ! Уд быгатӥське тӥ дуннеын улыны, калыклэсь йырзэс поромытыны. Мон азьвыл но туж умой улӥ, Половников но Порошинъёслэсь пытьызэс нюлӥ. Соослы доверенной луыса ужай, сюрсэн-сюрсэн соослы коньдон люкай. Али но ужаны быгатӥсько, Ливдель заводлэн уполномоченноез луисько, солэн коньдонэныз татын вина юисько! Тӥни озьы Брум эшмы батыръяське, 2-3 скалэз ноныны быгатэменыз ушъяське. Аскы луоз, дыр, солы макмыр. Соку коть ныр улаз солэн мыр: уз тоды мар каремзэ, казна коньдонэныз шудэмзэ. Зуркатоно луоз та куинь эшъёсты, юыса дырзэс ортчытӥсьёсты. Ӧжыт мед визьмаськозы, ужаны но умой мед дышетскозы, соку заводъёсмы но чугункаосмы золгес ужалозы, поездъёсмы но ичигес сюрес урдсы куашкалозы. 1930 ар. Пересь Шамардан. Татьяна Чернова "Дурисьёс" Газетын ужаз соку Афонин... Табере... кинъёс меда пуко ни? Газетын ужаз соку Михайлов... Табере... (рифмаялом ни) - Шкляев. Газетын ужаз, ужа Романов, К. Ломагин (со гожъя роман но), Куинетӥ ползэ ни - Байтеряков - (Со ик Лялин) та палтӥ поръя на. Ужазы Аронова, Старкова, Пушина (Благинина ӧвӧл та), Ужазы Мих Пер, Ник Вас, Ник Влад но - Оло, вань писательской команда. Табере нылъёс (бадӟым вормон со!) Чуръёсыз нуйто, кыско, дуро ни, Газетлэн бамаз ишкылало но Асьсэлы тросгес инты куро ни. Весь статья, статья... Кулэ дыре но Кылбуре уг пӧрмы ни, лэся, кӧтъя. "Инвожо" уг пишты уйшоре но, Рифмае весь огпӧртэм: Такъян - такъя-статья... Ми огнамы ӧвӧл! Алексей ШКЛЯЕВ, газетлэн валтӥсь редакторез "Удмурт дуннелы" - 80. Куинь кыл гинэ. 80 сяна ӧвӧл на! 80 арес ни ук! Маин ӵошатод, ява. 18-тӥ дауре печатлам удмурт грамматикаен ке - ми лекос ежесь. Вань удмурт газетъёсын-журналъёсын ке - "Удмурт дунне" котькудӥзлэсь мӧйыгес. Даурен- вапумен ке - ми пиналэсь. Адями даурен ӵошатоно ке - пересесь. Удмурт Республикаын чаклам радлыкъя (порядокъя) сӥё-дано амалэн пусйыны кулэ организацилы 25, 50, 75, 100 ар тырмемез. 80 отчы уг сюры. Озьы ке но, Удмурт Правительство пуктӥз: республикаысь экономикаез но улон-вылонэз юнматонэ, калыклэсь асваланзэ (самосознанизэ), кылзэ но культуразэ азинтонэ "Удмурт дуннелэсь" уно кужым сётэмзэ лыдэ басьтыса, солы 80 ар тырмонэз сӥё-дано ужрадъёсын пусъёно. Кыӵе кужымзэ бен понӥз редакция вылӥ верам удысъёсы? Кызьы вордскиз газет? Кыӵе шуг-секытъёсты вормыса кыдаз? Котькызьы урод карыны выр 1917-тӥ арын феврале но октябре бугырскем революциосты, соос асьме калыкез улӟытонлы зэмос эрик усьтӥзы. Та вакытэ удмурт крестьянъёс, солдатъёс но мукетъёсыз понна нимаз газетъёс печатласькизы. 1918-тӥ арын удмуртъёслэн огъя газетсы луиз 24-тӥ январьысен потӥсь "Выль син" (соку гожъязы "Виль синь"). Сое "редакторъязы" Константин Яковлев, Иван Векшин, Петр Горохов, 6-тӥ сентябре - Трофим Борисов. Мар бен луиз "Выль синэн"? Россиын ленинецъёс кузёяськизы ни бере, оло, большевик Борисов отысь палэнтӥз эсеръёслы дурбасьтӥсьёсты Яковлевез, Векшинэз, Гороховез? Туала тодосчи Александр Шкляев оскытэ: соос куспын сыӵе тупамтэос ӧй вал. Векшин но Горохов кошкиллям гуртысь нылпиосты дышетыны, ас интыязы кельтӥллям Трокаез. Асьмеды асьмеос керетӥсесь шуиськомы ке но, пӧртэм партиослы дурбасьтӥсь визьмо удмуртъёс соку тупаса улӥллям. Тӥни озьы, 6-тӥ сентябре потэм берпуметӥ "Выль синлэн" но 31-тӥ октябре ӵогиськем "Гудырилэн" кивалтӥсьсы одӥг - Трофим Борисов. "Выль синмысь" ог люкетэз ужасьёс озьы ик выжизы выляз редакцие. Нош ик юанъёс кылдо. Оло, эсеръёслы дурбасьтэм газет быдэсак коммунистъёс пала выжиз но нимзэ гинэ воштӥз? Яке "Выль син" но "Гудыри" - копак пӧртэм редакциос? Таӵе юанъёслы рос-прос валэктон туннэ ӧвӧл на. Тӥни малы "Удмурт дуннелэн" кирос бубаеныз туннэ лыдъяськом "Гудыриез", вордскем нуналэныз - 1918-тӥ арын 31-тӥ октябрез, кылдэм интыеныз - туала Бигер кунысь Алабго (Елабуга) городэз. Ойдолэ бен вакияк учкоме, кыӵе ужъёсты быдэсъяз 1 номеро бадӟым газетмы 80 ар ӵоже. Югдурез сэрттом-пертчом, буре яке паллянэ мултэс шебелятэк. Ватонэз ӧвӧл ук: редакция куддыръя гожъялляз кивалтӥсьёслэн косэмзыя, созэ яке тазэ ужпумез югдытъяны выриз класслэн яке партилэн сюсьтылэнызы гинэ. Нырысетӥ номераз "Гудыри" валэктӥз Советъёсты но туала улонэз, ӧтиз азьланез сярысь малпаськыны. Со оскытӥз: "Инмысь гудыртыку быдэс дуннеез вырӟытэм кадь, та газетлэн куараез быдэс удмурт калыкез мед вырӟытоз". Ми олокӧня пол тодады вайытӥськом ни Даниил Майоровлэсь "Гудырилэн" куинетӥ номераз печатлам чуръёссэ: "Гудыри" газет гудыртоз, Изись удмуртэз сайкатоз. Пеймыт интыын улӥсьлы Югыт сюрес возьматоз. Таӵе кылъёс туннэ но вужмымтэ. Кемалась вань ни Удмурт кунмы, удмурт кивалтӥсьёсмы, тодосчиосмы (учёнойёсмы), писательёсмы, артистъёсмы, нош куд-ог калыкъёслэсь весь бере кылиськом. Азьлане нуись сюресэз тодӥськомы кадь - пыдмес весь сьӧлтало керпотон, тяпайтон, тэкшерон. Газетэз 2-тӥ армилэн политотделэз кылдытӥз бере, нырысь сое тросгес лыдӟизы горд солдатъёс. Отӥяз шаермы кӧня ке пол сюрылӥз тӧдьыос улэ, шоркармы (столицамы) выжылӥз интыысь интые. Тӥни малы редакция кошкылӥз Вятские Поляны городэ, Шихран станцие, Сарапулэ, Глазове, Иже. Собере ини солэн нимыз тодмо луэ котькудаз удмурт гуртын. Ожмаськон бордысен "Гудыри" выжиз хозяйствоез ӝутон борды. Кызьы ӟечгес утялтоно ӟегез? Кисьмалозы-а асьме палан емышъёс? Али уд но оскы, помидорез шаерамы 20-тӥ - 30-тӥ аръёсы гинэ паськыт вӧлмытӥзы шуыса. Син шоры йӧтылӥзы таӵе йыръянъёс: "Музъем ужан", "Муш вордон", "Пӧртэм иворъёс". Корреспондентъёс пумен дӥсьтысагес возьматӥзы политикаысь, экономикаысь, промышленностьысь югдурез: "Кенешо Советмы", "Удмурт областямы", "Ож заводын". Тани кӧня ке чуръёс: "Сельской хозяйствоын уноез хозяйствоос колхозъёсы огазеяськемын. Отын улон умояз. Ӝутскиз тусызъя национальной, пуштросэзъя социалистической культура". Редакция бадӟым саклык висъяз "Гожтэт песьтэр" йыръянэзлы. Со 1923-тӥ арын ивортэ: "Милемлы гожъяло 106 крестьян, 86 служащий, 32 дышетскись, 20 рабочий, 20 дышетӥсь. Гожтэтъёс басьтэмын: июне - 165, июле - 133, августэ - 60, сентябре - 85, октябре - 242". Ӵошатон понна вералом: отӥяз, "удалтэм" аръёсы, редакцие толэзьлы быдэ вуылӥз ог 1000 гожтэт. 1918-тӥ арын печатламын 8 номер, 1920-тӥ арын - 57. Данаксэ газетъёсты дунтэк ысъязы гуртъёсы но воинской частьёсы. *** Революциен герӟаськем бугырес аръёсты воштӥз выль улонэз дурон вакыт. Романтика шуон дыр. Тани-тани кӧня ке пол вамыштом но коммунизме вуомы кадь. Юнме шорысь шат "Гудыри" 1930-тӥ арын "Удмурт коммуна" луиз. Зэм, огъя шудо улонэ нуись сюрес туж кузь вылэм. Омырын шӧдӥське ни ож тылӝулэн зыныз. Газет ӧтьылӥз промышленностез азинтыны, странаез юнматыны, СССР вылэ пиньзэс шерисьёслы пезьдэт сётыны. Нуналлы быдэ сямен печатласькизы Горд Армилы сӥзем материалъёс. Отчы тужгес усто пиоссэс келяллязы гуртын улӥсьёс. Таосыз но вань кужымзэс сётъязы асьсэ удыслы. Учке ай йыръянъёсты: "Турнаны потӥськом, выль дэремъёс дӥсяса", "Бусые мынӥськом кырӟанэн", "Жингыр-р вазё кусоос". Гитлер асьме вылэ урдскем бере, редакциысь тросэз воргоронъёс перозэс штыкен воштӥзы. Соос пӧлын А. Андреев, П. Блинов, Е. Баранов, И. Куклин, В. Иванов но мукетъёсыз. Эрикмы понна улонзэс жалятэк жугиськизы. Ог люкетэз весяк азелы выдӥзы ож лудэ. Редакцие кылемъёслы но капчи ӧй вал. Фронтын югдур вошъяське нуналлы но часлы быдэ. Со сярысь калыклы чаляк ивортоно, нош радио котькуд гуртэ пыртымтэ.Тӥни малы котькуд газет киысь кие ветлӥз. Сое пась луытозяз лыдӟылӥзы. 1943-тӥ арын сӥзьыл газет "Советской Удмуртия" нимын потыны ӧдъяз. Война вакытэ со дуно вал тани маин но. Кӧняез ке журналистъёс но командиръ ёс ож вискын дыр шедьтылӥзы редакцие гожтэтъёс ысъяны. Мадьылӥзы Удмуртиысь пиослэн тушмонэз жугемзы сярысь. Данакез лыдӟисьёс газетысь утчаны тодмо нимтулъёсты: ӵыжы-выжыме вераллямтэ-а? Ваньмыз - фронтлы, ваньмыз - вормонлы! Сыӵе мылкыдын тыршемез редакция нуналмысь возьматъяз. Кунлы колхозъёс нянь келяло. Дышетскисьёс боецъёслы ыж гон пӧзьёс но пыдвылъёс (носкиос) кертто. Адямиос коньдонзэс сёто вормон фондэ, танкъёсын "Удмуртиысь колхозник" колонна кылдытонэ, самолётъёс лэсьтонэ. х х х Быдӟым Вормон бере редакцие оген-кыкен берытскылӥзы шинелен пиос. Соос гуртысь кепыр вайыса вуэм экеос ӧвӧл ни - зэмос батыръёс. Газет но йыг-йыггес луиз. Зэм, кин но со, юн сӧсырмыса, кема ужаны ӧз вуы ни. Туннэ но редакция юн буре вае ожын быремъёсты, отын сӧсырмыса но дырызлэсь вазь пересьмыса кулэмъёсты. Шумпотӥськом соизлы: туннэ но миленымы кусыпмес уг ышто ожысь ветеранъёс, пенсие дорысьтымы кошкемъёс. Тани соос (алфавитъя): В. Аронова, Е. Афонин, Г. Вахрушев, И. Гусев, А. Князев, В. Корепанов, В. Михайлов, П. Орлов, М. Перевозчиков, В. Рысьев, В. Смирнов, Н. Тебетеев. Малпалэ ай: редакциысь 36 ветеран пӧлысь 12-ез тылӝу пыр потэмын, соос миленымы артэ. Таӵе кужым вань дыръя амалтэк оскиськод: газет улоз, политикаысь но экономикаысь нокыӵе сильтӧл сое уз тарка. Вормон бере ӝыны даурлэсь кема ни газет весь улэ ужась калыклэн сюлмаськонъёсыныз. "Ижтяжбуммашез" но автозаводэз пуктон. Выль аэропорт лэсьтон. Вань районъёсы асфальт сюрес кыскон. Нечерноземьеез ӝутон. Сиён-юон поттонъя программаез быдэсъян. Культураез утён но юнматон. Таӵе но мукет ужпумъёс ноку но палэнэ ӧз кыльылэ. 1968-тӥ арын, 50 арессэ тырмытыкуз, "Советской Удмуртия" данъямын "Знак Почёта" орденэн. Редакция но отын ужасьёс уно пол пусйылэмын РСФСР-ысь но УАССР- ысь Вылӥ Советъёслэн Президиумъёссылэн грамотаосынызы, медальёсын, дуно кузьымъёсын. 1992-тӥ арысен газет потэ "Удмурт дунне" нимын. Озьы со огазея кадь вань удмурт калыкез, солэсь музон дуннеосын кусыпъёссэ, пуш малпанъёссэ но сюлмаськонъёссэ. Улонмы арысь аре куашка шуиськомы ке но, нырысь ик газетъёс пыр адӟиськом выль вакытэ выжеммес. Зэмос демократилэн ӟеч емышъёсыз трос ик ӧвӧл на кадь. Но табере газетчиос но лыдӟисьёс быгато котькыӵе ужпумез шара ӝутыны, янгыш муртъёсты, Б. Ельцин бордысен кутскыса, нимын-нимын вераны. Куд-ог политикъёс туала печатез одно ик кыклы люкыны выро. Фермеръёслы дурбасьто, пе, азьлане ӧтисьёс, колхозъёсты данъяло вужез борды кырмиськисьёс - консерватор шуонъёс. Улон возьматэ: огъя но нимаз хозяйствоосты ваче пумит пуктыны уг яра. Бадӟым Россиын соосызлы но, таосызлы но инты сюроз. Бен, "Удмурт дунне" сокем трос уг возьматы вылӥ кивалтӥсьёслэсь кыӵе дэрем нуллэмзэс, Нью-Йоркысь биржаын дуно бумагаослэсь бергамзэс, тодмо артистъёслэсь кинэн паръяськемзэс но люкиськемзэс. Та ласянь ми зэмен ик консерваторъёс. Ӵемгес адӟиськом консерва поттӥсез, консерватория бере кырӟасез, нянь будэтӥсез, пудо вордӥсез, андан ӵыжтӥсез, Атыкай музъеммес утисез. Одӥгез но лыдӟисьмы ӧз пыкылы на со понна. х х х Газет сярысь мадьыса, копак ӧй поттылы на сое лэсьтӥсьёсты. Пусйи оже ветлэм эшъёсмес гинэ. Соосты сямен ик данъяськом ужысь ветеранъёсмес. Туэ 4-тӥ июне ми печатламы 1918-тӥ арысен газетамы тыршем адямиослэсь списоксэс. Ваньзэс ӧм шедьтэ, малы ке шуоно, 20-тӥ аръёслэн кутсконазы гожъям документъёс ышемын.Ог сюрс мурт люкаськиз. 1000! Туж секыт вал та ужез мытыны, нуыны, йылпумъяны. Табере ми сое "зарни список" нимаськомы. Вераны кулэ: лыдӟисьёсмы мылысь-кыдысь учкиллям сое. Куд-ог янгышъёсмес но шедьтӥзы. Шуом, кӧня ке нылкышноос отчы сюриллям кык пол - асьсэ фамилляен но картъёссыя. Редакцие тужгес визьмо удмуртъёс сюро шуыса адске редакторъёс вылын но. Татчыозь ог 20 мурт вал. Асьтэос учкелэ, кинъёс соос: Константин Яковлев, Трофим Борисов, Петр Баграшов, Дмитрий Корепанов (Кедра Митрей), Степан Бурбуров, Андрей Бутолин, Петр Яшин, Василий Михайлов. Котькудӥз шорлыдын 4 ар кивалтӥз ке, 80 ар пӧлысь 20 ар ӵоже та секыт ныпьетэз нуиз Россия Федерациысь культура удысысь дано ужась, "ожмаськонлэн инмарез" - азьвыл артиллерист Василий Михайлов. Туннэ нимын-тулын верам потэ улонысь кошкем эшъёсмес. Зэм, ваньзэс уд гожты. Газетэз асьсэ нимъёсынызы данъязы Степан Машков, Николай Евсеев, Аркадий Кузнецов, Алексей Стрижов, Анна Васильева, Дмитрий Леконцев но мукетъёс. Ваньмыз сямен ик писательёс перозэс шеризы ми дорын: Иван Дядюков, Аркадий Клабуков, Михаил Петров, Михаил Коновалов, Григорий Медведев, Афанасий Лужанин, Михаил Лямин, Трофим Архипов, Игнатий Гаврилов, Василий Широбоков, Геннадий Красильников, Семен Самсонов, Флор Васильев. Удмурт кылэз азинтонысь лачакез тодосчиос (учёнойёс), Иван Тараканов музэн ик, кылэз кутон амалъёсын нырысь тодматскизы редакциямы. Удмуртъёс пӧлысь татчыозь педагогикаын доктор луиз кык мурт гинэ. Москваын улӥсь Глафира Никольская, институтын дышетскыкуз, гужемъёсы газетысьтымы янгышъёсты тупатъяз. Геннадий Ушаков Ува ёросын корреспонлентмы вал. Суредасьёслэн союззылэн тӧроез Петр Ёлкин ужан сюрессэ мытӥз "Советской Удмуртиын". Удмурт журналистикалы кӧня редакторъёс будэтӥз "Удмурт дунне" (алфавитъя): В. Алашеев (телевидение), И. Байметов ("Вордскем кыл"), У. Бадретдинов ("Кизили"), В. Ившин ("Удмуртия" издательство), П. Куликов ("Кенеш"), Е. Осипов ("Ингур" радио), В. Батуев ("Московский комсомолец"). Туннэ "Удмурт дуннеез" лэсьтэ 36 мурт. Мыным, татын ӵапак 30 ар ужам муртлы, малы ке но озьы потэ: таӵе зол коллектив ӧй вал на. Азьвыл, ӧжытак пыдъяськыса но эрик утчаса, тужгес шӧртчи эшъёсмы палэнэ лобыны турттылӥзы. Туннэ шӧдо: уждун но мукетыз ласянь "Удмурт дуннеын" югдур умойгес. Шоро-куспо арлыдмы - 38 арес. 12 воргорон но 24 кышномурт. Лыдӟисьёсты лэчытэсь материалъёсын паймытъяло дано нимъёсын но музон наградаосын пусъемъёс Геннадий Романов, Иван Лебедев, Людмила Перевозчикова, Елена Виноградова, Георгий Юсаев, Лия Малых но мукетъёс. Адӟелэ вал компьютеръёсын цехмес. Отчы дышетскыны ветло музон редакциосысь эшъёс, студентъёс - вуоно журналистъёс. Али ужасьёсмы мында ик, 36 мурт - милям запасмы. Озьы нимаськомы пенсие кошкем эшъёсмес. Чеберъяськиськомы эн кожалэ. Висьыны усьыкумы яке мукет учыръёсы соосты юрттыны ӧтиськомы. Туала югдур куремъя малпанзэс гожтыны куриськом. Василий Михайлов но Кирилл Ломагин, Василий Смирнов но Леонид Федоров, Геннадий Вахрушев но Иван Гусев чупресак вазисько. Шер нуналъёс ортчо, дыр, Михаил Абрамовлы жингыртытэк. Выль кылэз удмуртэ берыктыны курадӟыкумы, со милемлы компьютер выллем кык-куинь пӧртэм дэмлан сётэ - кулэзэ бырйы гинэ. Николай Тебетеев ялон утчаса бызьылэ, рекламая кызь аресъем агент сямен. Туннэ но улэпесь ай редакцие 1934- тӥ аре пыремъёс Федор Корепанов но Степан Иванов. Тыбыр сьӧрад сыӵе кужмо команда вань ке, урод ужаны сьӧлык. Маид ке уг пӧрмы ке, резервед артэ, юрттэт куремед понна шумпотозы - бамад уз чабке. Тӥ юалоды, оло: коллективды сокем кужмо ке, малы тиражды ушъяськымон ӧвӧл? Бен, ӟеч аръёсы 25 сюрс лыдӟисьмы вал ке, али - ӝыныез мында. 750 сюрс удмурт понна туж ичи. Но ма карод. Туала улон нырысь ик шукке пичи калыкез, вылаз ик - гуртын улӥсьёсты. Нош соос - милям лыдӟисьёсмы. Мукет изданиосын ӵошатыса, "Удмурт дунне" сокем трос лыдӟисьсэ ӧз ышты. Соин ик ми ум оскиське тазьы верасьёслы: лыдӟисьёсты кулэсмозы но, газетты ворсаськоз. Азьлане сэзь учкыны музон муг но вань. Берло аръёсы газетлэн кивалтон кенешаз, редколлегияз, пыртӥзы вылӥ ёзъёсын ужасьёсты. Вылӥ Кенешысь ялан ужась комиссилэн тӧроез Аркадий Малков туэ тол вылтӥ пыриськиз лыдӟисьёс пӧлын лотерея шудон ортчытонэ. Шудо муртлы ош шедьтон ласянь но трос ужаз. Правительствоысь Аппаратэн кивалтӥсь Михаил Григорьев син азяз возе хозяйствомес нуонысь шуг-секытъёсты. Правительствоысь ик управлениен кивалтӥсь Александр Скобкарев юрттэ мукет кивалтӥсьёсын кусып тупатыны. х х х "Зарниез" сяна, редакцилэн вань на "азвесь" запасэз - милемлы гожъясьёс. Берло 30 ар ӵоже милемлы юрттӥсьёслэсь нимтулъёссэс люкамы но 5-тӥ августэ газетэ сётӥм. Ог 900 мурт люкаськиз. Данакез редакциос уг но тодо ни сыӵе кылъёслэсь пуштроссэс - авторъёсын ужан. Вань журнал-газет бамъёсты асьсэ ужасьёссылэн чуръёсынызы тырмытыса буйгатско. Ми ум вунэтӥське: штатын котькыӵе визьмо муртъёс мед луозы, активтэк тон усто материалъёс уд дася. Юрттӥсьёсмы - писательёс, тодосчиос, суредасьёс, спортсменъёс, дышетӥсьёс, гуртын тыршисьёс, пенсионеръёс. Куддыръя соос радэ пыртэм потэ бадӟым организациосты. Кылсярысь, Культурая, Югдурез утёнъя, Гурт хозяйствоя но сиён-юонъя, Калыкез улон-вылонын утёнъя министерствоос, Егитъёсын ужанъя, Физкультурая но спортъя, Национальностьёсын ужанъя комитетъёс, "Удмурт кенеш" но "Шунды" дэменлыкъёс, Удмурт Республикаысь Прокуратура, Вылӥ суд, творческой союзъёс, общественной организациос, обществоос, дышетон заведениос но мукетъёсыз. Вордскем нуналэн гажано, эшъёс! Эшъёслы-юлтошъёслы Евгений Афонинлы Вылам уд кисьты, дыр, тэкит, Серектод гинэ кит-кит. Эш мылкыддэ но уд ват. Я, айбат, Жени, айбат. Иське, повесть нош пӧрад? Дунъяны мыном дорад. Владимир Черновлы Паймиськомы Володьлы: Сюлэмаз ялан тулыс. Кисыяз уг пыр кыллы, Йырыз, шуо, визь шыкыс. Лидия Чернова. Газетлэн эшъёсыз Ӵышкись Малпанъёсмы йырси пӧламы кир-пазь тугаськыны кутско ни ке, ми ӝегатскытэк вазиськиськом Августа Уткиналы. Со Бытъя юртысь нырысетӥ классэн модельер- парикмахер, со ик "Удмурт дунне" газетлэн матысь эшез но йырси ӵышкисез. Эшъяськонмы ӝыны арлэсь ятыр кыстӥське ни. Августа редакцие нырысьсэ сюрес лёгиз Анна Плотниковаен ӵош, лыдӟисьёсмы пӧлын Удмурт телевидение пыр лотереяен шудон ортчытон нуналэ. Тӥни соку ик, чай юон сямен, куномы куд-ог нылкышноослы йырсизэс кызьы тупатон пумысен кӧня ке визь-кенеш сётӥз. Нош табере, Августалэн провор но быгатӥсь киосыз йырси котырамы тунам- бергамзы бере, редакциын ужась воргоронъёсмы ымъёссэс ик усьтыса ортчо вӧзтӥмы. Асьмеос но бен куд-ог дыръя паймонэ усиськом. Кыллы усто Августа котькудӥзлы шуныт кыл шедьтоз, либатоз, пичи нуныез сямен кӧялоз-вӧялоз, нош качыез со куспын йырси котыртӥ вжич-вжич гинэ берга. Кӧня ке улыса учкиськод но, синучконысь шорад тодмо но, со вакытэ ик тодмотэм адями учке. Сыӵе дыръя Августа шуэ: - Учкы, тодматскы - тон со. Яраты астэ, соку тонэ но яратозы. - Ӝыны нунал ужамед бере, такем кыдёке, город пуме, лыктыны ӟигарыд тырме на-а? - юаськом Августалэсь. - Редакциын ужасьёсын пумиськон - мон понна бадӟым шуд,- нокыӵе ик уг кариськы со.- Вань жадеме ик вунэ, пӧлады вуисько ке. Мон ведь туж мӧзмисько удмурт адямиослэсь, удмурт кыллэсь, удмурт кырӟанъёслэсь. Ми но возьмаськом тонэ, Августа. Яратӥськом улон сярысь, чеберлык сярысь аспӧртэмлыко малпанъёстэ кылзыны. Л. МАЛЫХ. Газетлэн юрттӥсьёсыз Сюдӥсь Мон (ма, мон гинэ шат?) туж витисько понедельникез. Ӧвӧл, ужлэсь мӧзмонэн гинэ со герӟаськемын ӧвӧл. Ужпум мукетыз бордын. Котькуд понедельнике ӵукна редакциямы вуэ Анаймы. Приемнойлэн кузёез Раиса Корепанова со вакытлы чай парыса дася ни. Тодэ уго: Лиза апай дорамы ноку но пӧрам сиёнтэк уг лыкты. Я табань, я перепеч, я шаньги... Куддыр зырет но вуттэ, араз огпол.... чильпырасьсэ но уг жаля. Елизавета Ивановна Камашева - Завьялово черкогуртлэн кыдёкысь сэрегаз улӥсь ӟеч кышномурт. Коть дэри, коть пӧсь, коть губиян дыр, коть картофка копан вакыт - Лиза апай одно ик лыктэ редакцие. Оло, муг мед луоз шуыса, оло пичи дырысеныз вӧзысьтыз адямиослы юрттыны тыршон мылкыдо будыса, со кылем арын Дэриысь (Завьялысь) тодмоосыз-эшъёсыз пӧлын радъяз газетмылы но "Кенеш" журналлы гожтӥськон. Табере ачиз ик соослы газет-журнал нуллэ. Висьыны ӧдъякуз (бадӟым арлыд но секыт даур шӧдӥськытэк уг кылё), редакцие вуэ Лиза апайлэн Петр пиез. Таиз милициысь офицер ке но, анаезлы юрттон ужез туж кулэен лыдъя, со понна аслэсьтыз машиназэ но, дырзэ но уг жаля. Таза лу, Лиза апай! Тынад мильымед-табанед кӧтэз гинэ уг тыры, лулпушез но быдэс арнялы тырмытэ, вордскем коркась ческыт зынэз тодэ вайытэ. И. Лебедев. Возьмась Печатья юртлэн куинетӥ этажез, кытчы али интыяськемын редакцимы, со вуэ ужан нунал йылпумъяськон азьын - ог ньыль час котыре. Мыньпотыса ӟечъяське, шыпытак интыяське приёмнойысь креслое, полиэтилен сумкаысьтыз поттэ пӧсьтэм папказэ но кутске гожъямъёсаз, газетъёсаз бугыръяськыны. - Слушай, - огпӧртэм ужен вырыны акыльтыса, лэся, газетлэн эшез вазиське кабинетэ пырасьёс пӧлысь кудӥзлы ке, - тон тодӥськод-а, кыӵе туннэ нунал? - Ма, четверг кадь... - Эх тон, кызьы вунэтӥд меда? Туннэ Рокоссовский маршаллэн вордскем нуналэз ук - солы 93 арес тырмысал ни. А эшшо туннэ Брест крепостьын ожмаськем Удмуртлэн Степан Вахрушевлэн быремез дырысен 57 ар тырме. Кин бен со? Валады ни, луоз - Виктор Поздеев. Историлы дышетӥсь. Шаерчи (краевед). Запасысь капитан. Туала пенсионер. Огъя вераса, тунсыко адями. Туж шер нуналэ со уг лыкты ми доры. Дыраз уг вуы ке, редактормы шугъяське ни: кинэн меда туннэ дорам бертом? Кыксы но уго пыдын ветлыны ярато. - Виктор Петрович, кызьы тынад таӵе дэри куазен но городлэн чылкак мукет пумаз лыктыны кынарыд тырме? - Дорады уг ке вуиськы, уин умме усеме уг луы... Малы нош ми Поздеев эшмес "возьмась" шуиськом? Юнме ум. Со приёмнойын пуке ке, тодӥськом ни, редакциын номыр уз ышы - ваньбур но, шуныт но, азьланезлы оскон но. И. Лебедев. Шунтӥсь Кинлэн меда туала вакытэ сюлмыз уг кынмылы? Туж ичи, дыр, сыӵеос. Уксё ӧвӧл, тазалык ӧвӧл, мылкыд ӧвӧл... Ма кароно? Таӵе вакытэ котькудӥз аслыз сюрес ачиз быръе. Ми, редакциын ужасьёс, куддыр тазьы сьӧлыкаськом: машинае туйнаськиськом но кошкиськом... Дэрие, мукет сямен вераса, Завьялэ. Раиса Константиновна Моторина (вот кинлэн фамилляез сямызлы тупа), вань ужъёссэ палэнтыса, огыр-бугыр вырыны ӧдъя: "Ма, ма, тӥ ивортэ вал ук, лыктоды шуыса. Коть шыд пӧзьтысал..." Озьы со чеберъяське гинэ. Дас-дас вить минут ортчыса, ӝӧк вылын сыло ни губиен, картофкаен, куалекъясен (студень), кубистаен тэркыос. Син азьын отчы ик вуэ пӧсятэм вуэн бадӟымос термос, отчы, оло, ведра чай тэре, юыса-юыса уг быры. Ми мадиськом улэм-вылэммы сярысь, куддыр - юри мыдланьтыса, серекъяса, Константиновнамылэсь мылкыдзэ ӝутон вылысь. Со но маскаръяськон ӧре пыре, вера пересьёсызлэн улонысьтызы серемес учыръёсты. (Пенсие валтӥсь бухгалтерысь потыса, дораз пукыны ӧз чида, социальной юрттэт сётонъя центрын арлыдоослэн воспитательзы порма луыса ужа.) Минут бӧрсьы минут. Доре я уже бертон дыр вуэ. Ас шорад учкиськод но уд оскиськы: куашкан мылкыдыд олокытчы тӧлӟем, сюлэм небӟемын. Нош ик улэм, нош ик кырӟам потэ. Тазьы малпаськоно ке, редакциын ужасьёс пӧлысь кӧняез меда кылизы на, Раиса Константиновнамы доры ветлытэк? Солэн шунытэд ваньмызлы тырме. Паймымон адями. Тау, яратоно эшмы. Учке ай, пилем сьӧрысь шунды потэ ни ук. И. Лебедев. -+"Удмурт дуннелы" - 80 Сюресме югдытӥсь Та учыръёс вал 1958-тӥ аръёсы, Удмурт пединститутын дышетскыкум. Гужем толэзьёсы тросэз студентъёс тыршизы я газетъёсын, я радиоын. Нош мон ужай "Советской Удмуртия" газетын: одӥгаз гужеме - гожтэтъёсъя отделын, нош мукетаз - корректор луыса. Со вакытэ ик "Советской Удмуртиын ужазы Герман Ходырев, Эля Никитина. Студентъёс коньдон понна гинэ ӧз тырше (уждун но бен сёто вал 600-700 манет), быгатонлыкъёссэс волятэмзы потӥз. Мынам одӥг учыр сярысь вераме потэ. Ужай гожтэтъёсъя отделын. Соин кивалтэ вал соку Иван Куртеев. Туж трос гожтэтъёс редакцие вуылӥзы, одӥг толэзяз гинэ 800-1000 пала. Котькудӥзъя журналэ гожтӥськом, кытысь, кинлэсь, ма сярысь со гожтэт, кинлы сётоно, кыӵе ужрад кутоно но мукет. Мыным туж тунсыко потэ вал соосты отделъёсы люкылыны - я литературая, я промышленностья, я иворъёсъя. Тросэз кылё вал гожтэтъёсъя отделэ ик, соосъя кыӵе ке но ужрад кутон вылысь. Соку та отделын ужазы Николай Тебетеев но Фая Бакишева (Н. П. Бакишевалэн сузэрез). Одӥг пол гожтэт вуиз районысь культурая юртлэн ужамез сярысь. Мон сое нуи Виктор Жуйковлы, нош соиз умой-умой учкыса ик ӧз вутты, ыстӥз Фома Овчинников доры. Таиз учкиз но мыняк потыса шуэ, - гожтэт, пе, умой, но сое Виктор Жуйковлы сётоно. Мон ӧй вера ни, со ик тӥ доры ыстӥз шуыса. Та учыр сярысь верай Фая Бакишевалы, ӵошеннамы гор-гор серекъямы. Нош таиз учыр вал "Советской Удмуртиын" корректор луыса ужакум. Ӵошен лыдӟон вылысь вӧзам пуктӥзы пересьгес дышетӥсез (нимтулзэ уг тодӥськы ни). Лыдӟисько, тупатъясько янгышъёссэ гранкаысь, эше учке оригиналзэ. Собере жадем-а, мар-а, кылзэ мынэсьтым лыдӟемме ымам ик учкыса. Ӵапак соку газетэ таӵе янгыш потӥз: "Азьмынӥсь колхоз, ю-няньзэ вазь октыса, юзэ базаре нуиз". "Базае" интые газетлэн бамаз "базаре" луиз. Редактор Петр Михайлович Яшин дораз ӧтиз но каньылак юа: "Кыӵе колхоз "базарын" юзэ вуза?" Мон пайми. Учкисько оригиналэз, гранкаосты, газет бамъёсты, номеръя редактор но ӧвӧл адӟем. Тӥни озьы, газетын ужась корректор но, подчитчик но туж валась, умой адӟись но тыршись луыны кулэ. Тодам лыктэ таӵе но учыр. Редактор интыын соку вал Семен Александрович Самсонов.Ужасьёсты кабинетаз ӧтиз но шуэ: - Асьме газетамы поттом Удмуртимылэсь одӥг нунал улэмзэ, ужамзэ но тыршемзэ. Монэ ыстӥзы Игерманэ. Нош мон уг тодӥськы, ма со Игерман. Пукси автобусэ (туж кыдёкын ик ӧвӧл Ижлэсь - 14 километр кемын). Малпасько, кинъёс-о уло мудрон нимо та гуртын, мукет кунысь, оло? Гуртэ вуи но пайми: ваньмыз асьме калык, удмурт сямен верасько. Пересь дышетӥсьлэсь юай ни, малы та гурт Игерман нимамын. Валэктӥз: ХВИИИ дауре та интыостӥ пӧйшураса ветлӥллям Иж казённой заводын ужасьёс. Одӥгез пӧйшурась вылэм немец: нимыз - Игорь, фамилиез - Манн. Со туж яратэм та интыосты. Соин ик, вылды, Игерман гурт кылдӥз. "Советской Удмуртиын" корректор луыса ужаме юрттӥз, трос аръёс ӵоже заводлэн типографияз инженер-корректор но технической редактор луыса ужаны. Нош 1975 арын шуд усиз Грузиысь "Цхалтубо" санаторие вуылыны. Со вакытэ монэным ӵош шутэтскизы ГДР-ысь вылӥ кивалтӥсьлэн Вальтер Ульбрихтлэн но "Ижмаш" заводлэн азьвыл генеральной директорезлэн Иван Белобородовлэн кузпалъёссы. М. МИХАЙЛОВА. Туспуктэм вылын (паллянысен буре): Милитина Михайлова (Емельянова), Лотта Ульбрихт, Вартуш Саакян, Галина Белобородова, Нина Эшмекджиян. ГАЗЕТЛЫ - 80 Тӥтэк улон мӧзмыт луысал Матэктэ "Удмурт дунне" газетлэн юбилеез. Удмуртъёс пӧлысь туннэ шер шедьтод та газетлэсь зэмос дунзэ валасьтэмез. Мон но асме соос радэ пыртӥсько. Витьтон ар пала луэ ини соин эшъяськеме. "Советской Удмуртия" вал ай соку. Пыр улытозям уг вунэты Пастухов урамысь 13 номеро юртэ, оло, воксё но нырысьсэ пырыса, гожтэтъёсъя отделэ сюремме. Соку татын милям гуртысь пи Зот Миронович Коновалов ужа вал, шоро-куспо мугоро, паськыт пельпумо, сьӧд пуштрес йырсиё, юг тӧдьы дэремен туж сабырлы воргорон. "О-о, Борис - шуыса пумитаз со монэ, ӧс куспытӥз вамыштэме бере ик. - Мар муг усиз али ӝамдэ такеме лыктыны? Ӟечбур, ӟечбур! - ӵапак тазьы, кык пол вазиськыса, со ӝӧк сьӧрысьтыз мон пумитэ сэрытак потӥз. - Я, татчы матэгес пуксьы но вера, кыӵе улэ Котныр починка калыке. Берло дыре вуылыны ӧйлась ни али. Ма, собере, анай кулэм бере, выжыысьтымы отын нокин но ӧз кыльы ни..." Зотей агай (гуртын покчиосгес ваньмыз озьы вазисько вал та гажано бӧлякмылы) ог час ёрос дырзэ быдтӥз мынэсьтым юалляськыса. Ваньзэ тодэмез потэ - колхоз ужъёс, нимаз-нимаз гуртоос сярысь но. Гуртмы милям бадӟым ӧвӧл, мон вань веранозэ верай кадь. Кыл куспам чуртнаськылытэк, со ваньзэ тунсыко потыса кылзӥз. Эшшо но кылзысал на, дыр, но, шумпотыса палёмеменым мултэссэ вераны ӧй шедьты. - Туж тау выль иворъёсыдлы, гуртэ бертам кадь потӥ. Я, табере мар ке гожтыса кельты газетамы. Гожтӥд но-а ини оло? - Мон-а? - Бен. А мар-о сокемез? Гожъяськыны уд быгатӥськы шат? Мар ужало али эшъёсыд? - Колхоз ужын. Кудӥз гыре, усыя, кудӥз пудо сиён дася. - Нош покчиосыз - дышетскись пиналъёс? - Соос урисько, ужан куспазы ик нюлэскы узыяны ветло. - Вот, вот, со сярысь ик гожты али: урисько но узыяны ветло. Мӧйыослэн дырзы ӧвӧл нюлэскытӥ узы бичаса ветлыны, нош сиемез котькинлэн потэ. Давай, давай! Пуксьы но гожты. Трос кулэ ӧвӧл. Кутскон понна ог кык бамен тырмоз. Газетэ потод со понна. Азьланяз дыалод, мылкыдыд ке луиз, оло нош пичагаед кадь журналист луод. Пичагаеным Зот Миронович эшъёс вал. Войналэсь азьвыл со "Удмурт коммунаын" тямыс ар (1929-1937) ужам, отделъёсын кивалтэм, бӧрысь кыл кутӥсь секретарьзы вылэм. Жаль, пичагаелы ож тылӝуысь бертыны ӧз кылды. Армиын со штабын писарь вылэм но Смоленск дорысь одӥгаз гуртын тушмон штабзэс бомбить карем, со отчы бырыны шедем. Пастухов урамысь Печать юртын ас дыраз бырем журналистъёслэн нимтулъёсынызы буре ваён пул шуккемын вал. Отчы мынам пичагаелэн - Саушкин Василий Прокопьевичлэн но нимыз пыртэмын. Али дыре, газетлэн редакциез отысь кошкем бере, вань на меда со пул? Пичи дырысеным тодӥсько на ай. Милям урам пала кык укноё гинэ пичи коркамы бӧлетэн шори люкемын вал. Бӧлетлэн гур палаз ӝажы лэсьтэмын. Отчы сюранае куадам шундыберган тысьсэ утялтылӥз - ми, нылпиос, сиыса быдтэмлэсь. Нош атае, озьы ик ми изъянтэмлэсь книгаоссэ но "Пчеловодство" журналъёссэ отын возьылӥз. Мон, нылпиоссы пӧлысь бадӟымез, ӟус вылысен отчы кечыръяськисько вал ини. Книгаос пӧлысь огпӧртэм адӟылӥ мон "Кызьы андан кыдаз" нимозэ. Николай Островскийлэсь та романзэ Ф. Ложкин нимо эшеныз ӵапак мынам пичагае удмурт кылэ берыктэм. Элькунысьтымы Национальной библиотекаын та берыктэм книга возиське на. Со поттэмын 1937-тӥ арын. Мон пичагаеным данъяськисько но, вожъяськисько но вал солы, адӟем карыны тырши солэсь. Нош малпанме быдэстонлы матэктыны юрттӥзы газетэн но отысь ужасьёсын эшъяськеме. Соос котьку шуныт мылкыдын пумитазы но пумитало монэ, дырзэс жалятэк юрттыло гожъямъёсме газет баме поттыны. Соос ке ӧй луысалзы, гожъяськон мылкыды но ӧй бурдъяськысал, малпасько. Табере тани пенсиын но, эркын дыры тырме вакчияк веросъёс, очеркъёс, повесть нергеос гожъяны, берыктон удысэ но пыриськылэме вань. Редакцие лёгем сюресэ уг ожомы. Огез гинэ жаль: газетлы вань ӟырдыт сюлэмзэс но сайкыт визьзэс сётыса ужамъёс уноез та юбилеез пусъён дырозь ӧз улэ. Нимъёссэс буре вайыса гинэ буйгатом шат ини сюлэм пӧськыосмес. Тани соос пӧлысь, кудъёссэ мон тодӥсько: Яшин П. М., Стрижов А. А., Архипов Т. А., Шмаков Т. И., Широбоков В. Г., Иванов В. И, Васильева А. У., Лекомцев Д. Н., Хохряков Н. М., Борисова А. Г., Садовников В. Е., Воронцов М. С., Перевозчиков М. А., Машков С. Г., Симаков Г. С., Ермаков М. Г., Жуйков В. Е., Красильников Г. Д., Овчинников Ф. Г., Кожевников М. Г., Самсонов С. А., Вотяков А. Д., Евсеев Н. Н., Белоногов Н. Е., Косарев В. И., Ходырев Г. А., Васильев Н. В., Васильев Ф. И., Валишин Р. Г., Федотов М. И., Шишов Г. С. но мукетъёсыз. "Удмурт дуннелэн" редакциез, "Гудыри" потыны кутскем дырысен газетын ужасьёслэсь но соослэсь "пыкетъёссэс" ас бамъёсаз поттылыса, туж ӟеч уж лэсьтэм. Та номеръёсты мон, синпельлы карыса, пырак возё. Редакциын али ужасьёслы сюлмысьтым мылкыд карисько азьланяз вылӥ азинсконъёс басьтыса ужаны. Чырмыт мед шуккиськоз газет бамъёсады зэмлыкез юнматӥсь, кырсьсэ-пожзэ порись куарады. Чырткем мед бызьылозы пыдъёсты, котьку сэзь мед ужалоз йырвизьды. Выль вормонъёсы, эшъёс! Ведь тӥтэк улон мӧзмыт луысал. БОРИС САУШКИН. Тодматске: якшуръёс! Мон "Советской Удмуртие" нырысьсэ вуи 1973 арын, практикае, Казанской университетын нырысетӥ курсэз йылпумъяса. Журналистика сюрес вылын лэсьтэм нырысетӥ вамышъёс ик возьматӥзы та удыслэсь огшоры луымтэзэ. Тани кӧня ке учыръёс. Аран вакытэ бусыысь репортаже кулэ луиз. Материал лэсьтоно кариськи аслам гуртам ик, Завьялово районысь "Путь Ильича" колхозын. Ӵукна ик лыктӥ председатель доры. Озьы-озьы, шуисько, "Советской Удмуртия" газетэ репортаж лэсьтоно вал. Председательлы Николай Петрович Тарасовлы, асме верано шуыса йырам но ӧз лыкты: якшур калыкез чипыен-куреген тодма, дыр, малпай. Нош со нимме атай нимын ик юаз. Верай, фамилиме малы ке ӧй поттылы. Потӥм аран вылэ. Одӥгаз бусые мынӥськом, мукетаз кожиськом, куинетӥяз вуиськом. - Нош таиз азьмынӥсь экономикамы сярысь нимысьтыз гожтэ. Снимокъёс но лэсьтӥды ке, сьӧлык уз луы. Тодматске - таиз, гордэз, комбайнер Медведев Дмитрий Сергеевич, вӧзаз - юрттӥсез, Сидоров Виталий Данилович. Пиосъёс долкаса учко ог-огзы шоры: мар та кузё маскараяське, якшур пияшез якшуръёсын тодматэ ай. Нош монэ кыӵе ке шайтанэз индылӥз, лэся. Кызьы, кызьы, шуисько. Сидоров... Собере? Сидоров пырс! поттӥз, ымзэ кырыменыз ӵоксаз. - Тон мар, Сидоров?! - кузё огазе шымыртӥз синкашъёссэ. - Астэ пичи пияш сямен возиськод корреспондент азьын! Адями, понимаешь, нырысьсэ, оло, лыктӥз дорамы, нош тыныд ялан цирк мед луоз! Собере мон понна ватсаз на: - Ужась воргорон, но укыргес капчи мылкыдо. Сидоров, куасалтӥськыса, чумолё сьӧры палэнскиз. Кӧня ке улыса, мон комбайнеръёсты, председатель косэмъя, фотографировать кари ик. Но снимок газетэ поттыны ӧз яра: пиосъёслэн ымдуръёссы допросын партизанъёслэн выллем куртчемын, синъёссы быльк потымон питырскемын. ... Ширтӥськом ини Николай Петровиченым берен гурт пала. Пал кизэ руль бордысьтыз басьтыса возьматэ: - Тӥни со бамын колхоз садмы. Тачак сутэрез но, вишняез но, улмоез но луэ. Кожылыны луысал, но али номыр дуре: вишнялэн но сутэрлэн дырыз ортчиз ини, улмо ӧзгес вуы на. Кырӟа-кырӟа ойдо, малпасько, со садад куинь ар пала ини кечъёс гинэ "кожало" на но. - Нош отӥязгес - тыметмы. Соос кык милям. Кыказ ик карпъёс парсьпиос кадесь, ява. Тазэ пред ӧз пӧръя. Зэм, тыметысь карпъёсты мон солэсь умойгес тодӥсько вал. Вуим контора доры.- Ярам, Геннадий Дмитриевич, ужамы, табере ойдолэ мон доры, кенак мар ке но куртчон шедьтоз, дыр. Мон чутрак пумит кариськи, умой ӧвӧл, пӧй, - туж керпотӥсько. "Куртчон шедьтӥсь кенак" угось Фаина Прокопьевна, историен азьвыл дышетӥсьмы, дышетэм пияшсэ неужто уз тодма. Уг, пӧй, Николай Петрович, бадӟым тау, но мон татын ӵыжы-выжыосы дорын сисько. Кошки. Сэрег сьӧры кожон азьын мышме учки. Пред мон пала киыныз возьматыса, экономистлэсь юаське. Кызьы берло тодмо луиз, экономист монэ "вузам". Николай Петрович шуэм: - Ишь, ты, етӥз будо ерпечкаос. Оло курласа, оло ушъяса, кин тодэ на. Стажёр Озьы ик аран дыръя Красногорск районэ ыстӥзы. Мынӥ "Прогресс" колхозэ. Соку пинал визьмын мапасько вал, котькыӵе чыры-пыры уж пумысен но одно ик председателен вераськоно шуыса. Кема утчаса, юалляськыса ветлэме бере, валэктӥзы: мын, пе, шур дуре, "уазикез" учкылы. Соя ик шедьтӥ предзэс. Машина салкымын пуко куинь воргоронъёс. Шӧдскымон шулдыресь ини. Азязы чорыг лымен тэркыос, ӵынам ведра, палэстэм ӟенелик, кыкез бушесь ини. - Ӟечбуресь, мыным председатель кулэ вал, - шуисько. - Мар карод соин, пиёк? - шулдыръяськыны, серекъяны муг гинэ утчась дядяйёс синъёссэс ик мертчытӥзы, кионъёс доры вуэм ыжпи шоры музэн. - Ма, колхоз уж пумысен кенешоно вал. - О-хо-хо! А-ха-ха! Колхоз уж пумысен! Ну-у, деловой агай! - горо воргоронъёс. - Тон кин? Стажёр-а, мар-а? - Стажёр, - шуисько. Ас поннам чылкак пайми: кытысь меда сыӵе ӝог тодӥзы мон сярысь. Со дыре ик, уг ваты, ӧжытак данъяськон шӧм но кытынам ке вырӟиз: мын ай, али гинэ вуи но вань гурт тодэ ини. - Мар бен, ужаны быгатӥськод? Тани экзамен тыныд ортчытом ай. Быгатод-а быдэс стакан водкаез оскалтыны? Собере ини учком, кызьы гырыны-кизьыны быгатӥськод. - Малы мон гыром-кизём? Мон репортаж гожъяны, снимокъёс лэсьтыны лыктӥ.Пиосъёс огдырлы шорам синъёссэс питыртӥзы но гаӵоло кымаськизы: - О-хо-хо! Журналист! Писатель! Репортёр! А-ха-ха! Юмоке усем мурт выллем, ӵыж- горд луи, пӧсяй ик, ява. Сылӥсько, йырысеным пыдозям сялам мурт сямен. Сыл ай! Мынам кисыям удостоверение вань ук. - Тани, - шуисько, - учке, гажано эшъёс! Эх, туж жаль, мон сяна нокин но ӧз адӟы со воргоронъёслэсь ымныръёссэс. Ӧвӧл на ай, дыр, сыӵе кылъёс малпамын, кудъёсыныз мадьыны луысал син азьын кылдэм суред сярысь. Кыкез воргоронъёс соку ик тӧлӟизы, "уазиказы" пуксьыса: районысь шоро- куспо кивалтӥсьёс вылэм. Нош мискинь председательлы нокытчы пегӟыны. Ӝыны нунал ӵоже пыд чиньы йылаз бергаз зырымесь стажёр азьын. Журналист арлыдогес воргорон луысал ке, югдурез коньякен яке чечыен, сӥлен, шуом, тупатыны луысал, оло. Нош дас куать аресъем ылё-кырсёлы мар дэмлалод? Юон ӵектыны вазьгес ай, кампетэн уд алда ни? Озьы ик кошкытозям жугем пуны сямен синмам учкыса ветлӥз, куанер. Туж тэльмыриз, медам гожты шуыса. Гожтӥ-а, ӧй-а меда, табере уг тодӥськы ни. Нош али таӵе учыр луысал ке, гожтысал меда? Кин тодэм, шу, кин тодэм... Геннадий Коряков. Газетлэн эшъёсыз Тунась - Галина Павловна, мар верало ни кизилиос семья кусыпъёсмы пумысен? Весь-а керетыса улом, яке тупанмылы осконэз вань? - Нылы школазэ ӝоген йылпумъялоз. Оло, гороскопаз азьлань сюресэз возьматэмын? - Пияшен тодматски. Вералэ вал, тупаськом-а ми ог-огмылы... Юанъёс, юанъёс. "Удмурт дунне" газетын ужасьёслэн но соос пумтэм. Валэктон утчаса, куд-ог дыръя ми но йырмес астрология наука пала берыктӥськом. Но со понна кизилиос дорозь ӝутсконэз ик ӧвӧл, йыр вадьсамы гинэ, одӥг этажлы вылӥын, пуке Галина Павловна Румянцева. "Кенеш" журналлэн бухгалтерез кизилиосъя но лыдъяны- чотаны йӧндыре. Сыӵе быгатонлыкъёссэ со бускельёсызлэсь ватыса уг возьы, котьку вазиськы - визь-кенеш сётоз. Нош туннэ милям тодэммы потӥз "Удмурт дунне" газетмы сярысь. Галина Павловна азьлань улонмылы оскон пыӵатӥз. Валлэн араз вордӥськем газетмы ужась вал кадь ик музъем вылтӥ йыгмыт вамыштэ. Туэ Тигрлэн арез, нош со куд-ог валъёслы улон интызэс воштон сӥзе. Ӧйтӧд, "Удмурт дунне" вадьсын пиштӥсь кизилиез синйылтозы меда вылӥ кивалтӥсьёс, яке городлэн шораз выжон пумысен малпанъёсмы Тигрлэн выльысяз арезлы кылёз. Нош вуоно ар сярысь ке верано, тунасьмы милемды шумпоттӥз, Кроликлэн араз Валъёслы, пе, трос ласянь удалтыны кулэ. Ужъёс но азинскозы, яратон но палэнэтӥ уз ортчы. Иське, лыдӟисьёсмы милемын люкиськыны уз дыртэ. Л. МАЛЫХ. Трос-а кулэ милемлы? Ми понна тужгес но дуно пото писательёслэн ӟырдыт кылъёссы. СССР-ысь Писательёслэн союзазы удмурт нылкышноос пӧлын нырысь ик кутэмын Татьяна Чернова. Данъяськыса вераськом: туннэ со ужа ми дорын. Адямиос Татьянаез тужгес но ӟеч тодо Пантелей Кузнецовен ӵош гожтэм "Трос-а кулэ милемлы?" кырӟанэзъя. Туннэ, газетмылы 80 ар тырмыку, та кырӟанэз ми асьмелы тупамон карим. Трос-а кулэ милемлы, Газетэз поттӥсьёслы? Трос-а кулэ милемлы, Газетэз поттӥсьёслы? Мед гинэ вуылозы Ми доры "дунне пуме", Мед гинэ шуылозы: Дуное - "Удмурт дунне". Мед гинэ дырын-дырын Пиштылоз уждун-коньдон. Медаз гинэ уж дурын, Медаз лу сизьдон-гындон. Мед гинэ яратозы Волковен Вершининэн, Малковен Григорьевен, Злобинэн Медведевен... Вордскем нуналэн, гажано эшъёс! Кун Кенешын Сӥлы карыса Кун Кенешлэн Президиумезлэн 26 октябре ортчем заседанияз эскеремын кык ужпум: республикалэн Данъян пулаз пыртон сярысь но Удмурт Республикалэн нуналэзлы сӥзем ужрадъёслы коньдон висъян сярысь. Конкурслэн йылпумъяъёсызъя Кун Кенешлэн Президиумез но Правительство Данъян пул вылэ 13 коллективез но 50 адямиез пыртыны решение кутӥзы. Сӥлы каремъёс пӧлын "Воткинский завод" объединениын, "Чепецкое управление строительства" огазеяськонъёсын ужасьёс, Удмурт кун университетысь удмурт кылъя но дышетонлэн методикаезъя кафедраен кивалтӥсь Иван Васильевич Тараканов, Яр ёросысь "Ворцинский" эштослэн директорез Лев Васильевич Федотов, "Ижавиа" предприятиысь авиатехник - бригадир Николай Викторович Ведерников но мукетъёсыз. Удмурт Республикалэн нуналэзлы сӥзем собрание мукет городъёсысь, гурт ёросъёсысь лыктэмъёсты сюдыны ватсаса коньдон висъян сярысь решение кутэмын. Кун Кенешлэн пресс-службаез. Тау карон Удмурт Республикаысь Кун Кенешлэн Тӧроезлы А. Волковлы Москвалэн мэрезлэсь Юрий Лужковлэсь тау карон гожтэт вуиз. Отын шуэмын: "Москваысь Правительстволэн нимыныз Тӥледлы но Удмуртиысь гурт хозяйство удысын ужасьёслы тау карисько картошка дыраз ваемды, огкылъёсты быдэстэмды понна. Оскисько: азьланяз но асьмеос пайда вайыса ужалом столицалы сиён-юон вуттонын". Кун Кенешлэн пресс-службаез. Политикаен герӟаськем мугъёсъя репрессия улэ шедемъёсты тодэ ваён нунал 1991 арысен кутскыса, котькуд аре 30 октябре Россия мур кайгыре зӥбет улсын кивалтон вакытэ янгыштэк бырем но курадӟытэм адямиос понна. Удмуртиын гинэ 4,5 сюрс мурт сыӵе адӟонэ шедиз. Удмурт Республикаын сизьым ар талэсь азьло кылдытэмын политикаен герӟаськем мугъёсын сэрен репрессия улэ шедемъёслэн ассоциацизы. Со бадӟым уж нуэ шонере потэмъёслэсь правооссэс улонэ пыӵатонъя. 1997 арын - тросэн янгыше уськытонъёслы 60 ар тырмон аре - кун кивалтон ёзъёс ужпум кутӥзы тодэ ваён книга кылдытон сярысь, кудаз пыраклы пыртэмын луозы политикаен герӟаськем мугъёсын сэрен янгыше уськытэм сизьым сюрс адямилэн фамилиез. Туннэ со книга поттыны дась ни. Тодэ ваён книга - со обществолэн аслэсьтыз янгышсэ валамез, вуоно поколениослы секыт адӟонэз весяк азелы тодэ вайытон, озьы ик алон. Сыӵеез ноку но медаз берыктӥськы. Удмурт Республикаысь Кун Кенешлэн Тӧроез А. Волков. Палэнысь витёнэз ӧвӧл Якшур-Бодья ёрос узыр нюлэсъёсын но му вӧен. Со чотын ик район ассэ ачиз сюдыны-вордыны но быгатылӥз. Нош кызьы уло туннэ татын? Сое тодон понна Удмурт Правительстволэн Тӧроез Павел Вершинин кылем кӧс нуналэ вуылӥз якшур-бодьяос доры. Соин ӵош вал республикаысьтымы мукет кивалтӥсьёс но. Нырысь ик Ижысь куноос тодматскизы Лынга леспромхозэн. Куке-соку со Пастуховской леспромхоз шуыса нимаське вал. Лынга посёлокын улӥсьёсын пумиськон капчиен ӧз ортчы. Нюлэс дасян берло дыре кулэсмиз. Соин валче йылӥз ужтэк кылемъёслэн лыдзы. Али сыӵеос 150 мурт лыдъясько. Секыт луиз уждун тыронэн. Таӵе югдурысь потон понна, кивалтӥсьёс пӧртэм амалъёс утчано луо. Уждун интые сётӥзы чечы но карп чорыг. Паськыт кутӥське бартер шуон амал. Посёлоклэн вылтусыз кыӵе ке куашкам гуртлы укша. Асьэос нюлэсэн кузёясько ке но, малы ке выль юртъёс пуктыны уг дырто. Улон юртъёсты леспромхозлэн администрациез возе. Соин но, лэся, калыклэн кузёяськон мылкыдыз куашкамын. Со кивалтӥсьёслэн кортӵог шуккемзылы оскиськыса улэ, шӧдске. Соин ик П. Н. Вершинин улон интыосты ӝегатскытэк калыклы сётыны куриз. Посёлокын вань участковой больницазы. Татын улӥсьёслэн верамзыя, солэн юртэз пуктэмын ни 47-тӥ арын. Валамон ини, кыӵе калэ вуэмын со али. Зэм, али администрацилэсь юртсэ больница карыны малпало. Но сое тупатъян каллен мынэ. Больницаын ӧвӧл бинтъёс гинэ но. Эмъюмъёс сярысь веранэз ик ӧвӧл ни. Шор ёзо школа гинэ шумпоттэ на аслаз вылтусыныз. Но дышетӥсьёсын пумиськон секыт мылкыд кельтӥз. Соос ӝожтӥсько уждунэз ӝегатэмзылы. Татын но уг сётӥськы методикая литература. Со интые дэмлало сахар песок. Мешоксэ 750 яке килозэ 15 манетэн. Дышетӥсьёс татчыозь ӧз басьтэ отпусксы понна уждун. Одӥг учебник усе куинь дышетскисьлы. Леспромхоз малы ке уг висъя дышетӥсьёслы пу. Ӝоген Лынгаын погралозы ни электротыл сётон юбоос. Правительстволэн Тӧроеныз Павел Вершининэн пумиськыны уно калык люкаськылӥз культура юртэ. Адямиос паймемын: малы, пе, ми таӵе начар улӥськом? Нюлэсэз кораськом, сое вузаськом. Нош коньдонэз кытын? Малы кивалтӥсьёс машинаос, дуно мебель, ковёръёс басьто? Малы коньдонлэсь бергамзэ эскерись ӧвӧл? Тодазы ваизы ваучеръёссэс но. Куке-соку татын кыӵе ке Валиуллин кивалтэмъяськем. Со вань калыклэсь ваучеръёссэс кужмысь басьтэм но ачиз бӧрысь кытчы ке пегӟем. Кызьы тодӥськды, туэ 7 октябре Россиын пумитъяськон ужрад ортчиз. Сыӵе ужрадэ люкаськылӥзы лынгаос но. Паймоно кадь: ӵапак соку леспромхозлэсь пилорамазэ лушкаллям. Лынгаын кылдэм югдурез матысь дыре эскерыны кулэ прокуратура. Якшур-Бодья ёрос элькунлэсь дотация уг басьты. Со улэ му вӧй поттӥсьёс чотын. Но малы ке "Удмуртнефть" огазеяськон берло дыре тырмыт коньдон уг висъя ни. Районлэн укмыс толэзьлы социально-экономической азинсконэзъя ивортон лэсьтӥз администрацилэн кивалтӥсез Юрий Широбоков. Солэн верамезъя, ёрослэн бюджетаз коньдон тырмыт уг вуы "Удмуртнефть", "Уральская нефть", "Удмуртторф" огазеяськонъёслэсь. Азьланяз коньдон эшшо но ӧжытгес вуоз, уго му вӧйлы дунъёс усизы. Гурт ужъёс сярысь ке верано, татын но лыдпусъёс ушъямонэсь ӧвӧл. Куазь кӧс улэмен, гектарысьтыз ог 13 центнер пала ю тысь басьтэмын. Арысь аре ӧжытгес мерттыны кутскизы картофка. Туэ тырмытэмын ӧвӧл пудо сиён дасян план. Ялан кулэсме пудолэн лыдыз. Район урод ужа музъемен. Банкротэн лыдъямын леспромхоз. Коньдонэн ужан ласянь озьы ик номыр ӟечсэ вераны ӧз быгатэ райфинотделын но налогъёсъя инспекциын ужасьёс. Шӧдӥське, ёрослэн выль кивалтӥсезлы кивалтон удысэз секытэн сётӥське на. Быгатоз-а Юрий Михайлович кивалтон биньгозызэ юн возьыны - созэ возьматоз ини улон. Собере элькунысьтымы вылӥ кивалтӥсьёслы шара гожтэтэн вазиськизы дышетӥсьёс. Соос чурытэсь куронъёс пуктӥзы ёрос администрацилэн азьвыл кивалтӥсезлы, калыкез дышетонъя отделлэн тӧроезлы. Кызьы пусйизы дышетӥсьёс, кивалтӥсьёс казина коньдонэз тус-тас каро. Тани, кылсярысь, районлэн коньдонэныз выль корка пуктӥз Чур школалэн директорез. Табере, юртсэ вузаса, ачиз Германие пегӟем. Нылпиосты сюдыны уксё уг висъяськы. Нош школаосты тупатъяны коньдон дышетскисьёслэн анай- атайёссылэсь. Администрацилэсь юртсэ татын "Тӧдьы юрт" шуыса нимало. Дышетӥсьёслэн верамзыя, администрацилэн ужаз номыр уг воштӥськы, отын со адямиос ик ужало, штат ялан будэ. Нош ёросын предприятиос ваньмыз сямен куашкало, ӝоген пытсаськоз нянь пыжон завод. Дышетӥсьёс одӥг но ӝыны яке кык ставкаен ужало. Ёросысь педагогъёс ужзэс куспетӥ каризы ни 22 октябрьысен. Нош районысь кивалтӥсьёс со сярысь шӧдӥллямтэ но, шӧдске. Дышетӥсьёс вань уждунзэс берыктыны куро 10-тӥ ноябрёзь. Ёрослэн кенешез таин йылпумъяське ни вал. Со куспын залэ нош ик люкаськизы дышетӥсьёс. Быдэс районысь делегациос вуизы отчы. П. Н. Вершинин эшшо куинь час пала кенешиз на соосын. Валамон ини, соос нырысь ик куро коньдон. Нош со ӧвӧл. Вуоз-а со асьме доры куке? Шуг вераны. Татын ачиз инмар но уз юртты. Нырысь ик, промышленностьлэсь ужзэ вырӟытыны кулэ. Нош палэнысь агайлэн юрттэменыз кема уд улы. Н. Байтеряков. Снимок вылын: П. Н. Вершинин Якшур-Бодьяын пумиськонъёс дыръя. "ГЕРД" Пезь-пезь, сэзь-сэзь! Башкир музъем вылысь Калтасы ёросын вордскизы кӧня ке тодмо удмуртъёс. Шыльныр гуртын будӥз но ӟеч гожъясь луиз прозаик Роман Валишин, Чиндэр гуртын нырысетӥ чуръёссэ сузьйиз вуоно журналист Ильтимир Байметов, Кургакын кыдаз но юнмаз Уфа университетысь доцент химия но биология наукаосъя кандидат Григорий Кузяхметов, Бадӟым Тугыни гуртын нырысетӥ вамышъёссэ лэсьтӥз Дэбес ёрос газетлэн редакцияз ужась Алексей Тимирзянов, Качакысь удмуртъёсты ӟеч ужъёсы ӝутка етӥз воргорон Аркадий Тимирханов. Таиз адями кортӵог кадь: пыд йылаз йыг-йыг возиське, урмем сильтӧлъёсты сюрло кадь ара. Удмурт калыкез понна тул кадь сылӥсь воргорон Фёдор Кабиров анай йӧлыныз визьмаськиз Качкинтурай гуртын, ним-дан шедьтӥз сьӧрлон, Кам шурлэн тапалаз. Зэм, улон-питран нырысь вуттылӥз Пермь пала. Гурт улонъя институтын дышетскыса, Фёдор Кабиров луиз зоотехник. Та удысэз кӧня ке ар ӵоже валтыса, кужымзэ эскерылӥз вылӥ ёъёсын но. Отӥяз кыткылӥзы чылкак мурт уже - вузкаронэн кивалтонэ. Нылпиосыз будэмъя, воргорон малпаськыны ӧдъяз: тапалан ик улоно ке, пиналъёсты дышетыны эшшо секыт луоз. Нош ас музъемед вылэ берытсконо ке? Пиосмуртлэн семьяез бырйиз Удмурт шаерысь Сарапул ёросэз. Зэм, чылкак ӟуч Дулесово гуртын кема улыны ӧз кылды: юись кышномуртлэн сьӧлыкаменыз сэрен, юртсэс тыл басьтӥз. Тазьы ик ялан чидано ке, азьланяз эшшо кыӵе ке шимес адӟон шоры ӝимод, дыр. Улон-питранэз отӥяз погыльскиз бускель Камбарка ёросэ. Районлэн шор гуртаз оглом капчи ӧвӧл ке но, ваньмызлы дышыны кулэ, дыр. Фёдор Тимеевич выльысь мынӥз ас удысаз - ужаны ӧдъяз гурт улонъя управлениын. Татын тыршиз, шутэтскыны кошкытозяз. Удмурт лулчеберлыкъя дэменлыклэн ӝуась тылгизьыез кенжиз татын но. Кенжиз но ӧз ни кысы: бадӟым тылпулы пӧрмиз. Ачиз Фёдор Тимеевич Кам сьӧрын вордскемын но будэмын бере, татысь удмуртъёслэн тылзы сое но ӟырдэктытӥз. Фёдор Кабиров сюлмаськемен, Камбаркаын вордскиз Удмурт лулчеберлыкъя дэменлыклэн пичи ёзэз. Тимеевич луиз солы йыр. Ужъёс оглом капчиен ӧз ӧръяське ке но, бускель муос вылын вордскем воргорон дыг-мог луонэз уг яраты. Кӧня ке адямиез люка но ортчытэ выжыосмес утьыны ӧтись ужрад. Зэм, куд-ог тушмонъёсыз уггес валало. Гурт улонъя управленилэн егит тӧроез украин воргорон , етӥз удмуртлэсь вормыны луонтэм кужымзэ шӧдыса, дырын-дырын атас музэн лопыръяськылэ: - Кабиров тэльбугоез киултыны турттэ! Кема ӧз ни чида татын Фёдор Тимеевич: сьӧлык тросгес люкамезлэсь азьвыл кошкиз. Удмуртъёслэн Быдӟым ӧтчамзы азьын воргорон ортчытэ кенеш. Лыкто шӧртчиосыз - верам кылзы вылын сылыны быгатӥсьёс. Кенешын пуке ёрос газетысь корреспондент но - тужгес лэчыт верамъёсты калык пӧлы кызьы ке вӧлмытоно ук. Кӧня ке нунал ортчыса, ортчем ужрад сярысь кыӵе ке ивор лыдӟись доры вуыны кулэ ни кадь. Нош газетчиос малы ке уг дырто. Вожпотонэз уртчыса, Кабиров вамыштӥз редактор дӥне. Таиз ваменэс ош кадь мыдланьяськыны ӧдъяз: - Азьдэ-бердэ чакласькытэк вераськеменыд, удмуртъёс но ӟучъёс вискы тул шуккиськод. Сыӵеослы сюрес сётоно шат?! Редакторен вожвылъяськеменыз сэрен, кыл кутоно луэм кенешын пукем корреспондент но. Тэргаськон пытьызэ кельтэм - нылмурт таляк синвузэ кисьтэм. Котьма ке но, нокыӵе алон но, нокыӵе могӟет но уг дугдыты Кам сьӧрын быдэсмем адямиез. Быдӟым удмуртлэн Куӟебай Гердлэн юбилеезлы сӥзем ужрад азьын кулэ луиз кӧня ке коньдон. Аслаз воргоронлэн но дэменлыклэн кисыязы тӧл шула бере, Фёдор Тимеевич вазиськыны малпаз ёрос кузёлы. Таиз пурт кадь ваментӥськиз: - Коньдон ӧвӧл. Уз но луы! Татысь юрттэтэз витьытэк, пиосмурт вамыштӥз "Удмурт кенеше", меӵак Валентин Тубылов дӥне. Таиз соку ик жингыртӥз ёрос кузёлы: - Сыӵе быдӟым адямиез данъяны сюрс манеттэ гинэ но жаляськод шат? Ёрос тӧро кӧня ке кӧбераз кадь. Мар карод, юрттоно ик луоз, дыр, тыл кадь удмуртлы. Дораз бертыса, Фёдор Тимеевич выльысь йыбыртъяны ӧдъяз. Атас кадь пештырскем воргорон кузгатъя ук пиосмуртэ: - Малы вылӥе чагиськиськод - та ужез кыл-куаратэк но лэсьтыны луэ, дыр, ук?! Пичи даллашон кусыпъёссэс сӥятӥз ке но, бадӟым тылпулы ӧз пӧрмы. Котьма ке но, Куӟебай Герд данъямын вал. Солэн вордӥськем улосвылаз, Вавож ёросэ но, вуылыны шуд усиз. Куд-огез ялан палэнско ас выжыоссылэсь - сыӵеослы Кабиров йӧттылэ. Камбаркаысь одӥг огазеяськонлэн тӧроезлэн воштӥсез чын удмурт ке но, тодмоосыз азьын кескичъяське: - Анае сямен пал кыл но уг валаськы! Фёдор Тимеевич кыллы кисыяз уг пыры - горд кысъем пиёкез туздыре: - Йырсиед но, синъёсыд но удмурт - нокыӵе кӧберыд но ӧвӧл шат?! Одӥг люкаськонысен шӧртчи ербеза тулкымъяське: - Акыльтӥзы ни со удмуртъёс - Удмурт радио уен-нуналэн йырез визьтэммытымон валантэм кылын бӧтьыртэ! Вог песьтэрез интыяз пуктӥз Кабиров: - Мынам выжыосы тыныд сокем акыльтӥзы ни ке, мын Курске яке Воронеже, Москвае яке Ленинградэ. Отын одӥг но удмуртэз уд ни адӟы. Шутэтскыны потон азяз воргорон огдырлы интыяськылӥз юэн вузкарон юртэ. Солэн кузёез грек Юрий Василияди киоссэ шеръяса чабкиськылэ: - Ужамед понна кӧня ке тыро-а коть, Тимеич? Нылпиосыз дугдылытэк ымъё: - Сюлмаськиськод-сюлмаськиськод, бызьылӥськод-бызьылӥськод - табышсэ но, барышсэ но уд адӟиськы. Соослэн пумитазы пиосмурт серектэ гинэ: - Удмурт калыке понна номыр жаль ӧвӧл. Одӥг кортӵог шуккем понна но коньдон курыны кулэ шат? Ярам ай: секыт вапумъёс вуо ке, Кабиров тэльмыре шӧртчи бӧлякезлы ужбергатӥсьлы Владислав Якуповлы. Таиз кыл вератэк юрттэ. Али воргорон шутэтске ни. Зэм, ас выжыосыз сярысь сюлмаськонэз уг кулэсмы. "Удмурт кенеш" кыӵе ке ужрадаз ӧтьыку, олокытысь бурдъёс кылдо. Весь вань мултэс кайгуоссэ палэнтэ но соку ик "лобӟе" Иже. Куатьтон арессэ пумитам воргорон туннэ но сэзь ай. Юр лӥялэз сись кыпы уз погырты! Журналистъёсын пумиськонъёс Ыштонъёсмес кема лыдъялом на Кылем арня вискын Удмуртие Москваысь трос гинэ куноос вуылӥзы. Соос пӧлысь огез - Вениамин Сергеевич Соколов, физико-математической наукаосъя доктор, профессор, Россия Федерациысь Лыдъян (Счётной) палаталэн коллегиезлэн членэз. 1988 арозь со ужаз Красноярскысь университетлэн ректорез луыса, берло 10 аръёссэ - Москваын. В. С. СОКОЛОВ вакчияк тодматӥз Лыдъян палаталэн уженыз, валэктон сётӥз журналистъёслэн юанъёссылы. - Лыдъян палата кылдытэмын вал 1995 арын, со луэ конституционное. Азяз пуктэм ужпумъёс пӧлысь валтӥсез луэ федеральной бюджетлэсь шонер кутӥськемзэ эскерон. Палаталэн коллегияз быръемын 14 мурт: ӝыныез - Федеральной Собранилэн, ӝыныез - Кун Думалэн дэмлам адямиосыз. Та дыр ӵоже бадӟым уж лэсьтэмын. Нырысь ик, трос пол кутскыса эскеремын коррупциен, лушкаськонэн герӟаськем учыръёс. Жаляса верано, соин йырин палэнэ кылё туж кулэ ужпумъёс. Мукет странаосын но кылдытэмын милям кадь ёзъёс, но соос лушкаськисьёсын уг выро, ужало кун ваньбурез пайдаёгес кутонъя амалъёс шедьтон бордын. Нимысьтыз инты басьтэ Россиын приватизация ортчытонлы йылпумъянъёсты эскерон. Мон эшшо огпол пусъё на: кун ваньбур люкылэмын, законъёсты тӥяса. "Удмурттелеком" но, кылсярысь, республикаысь таламын та амалъя ик. Евгений Примаковлэн кабинетэз ужзэ мытӥз мукет сяменгес. Ма шуод, солы шедиз куашкатэм страна, туж юн лябӟем производство. Шонерзэ ке верано, Силаев бордысен кутскыса, Россилэн кивалтӥсьёсыз ваньзэ лэсьтӥзы, кужмо государствоез быдтон понна. Нокыӵе рынок асьме дорын ӧвӧл, малы ке шуоно, вуз поттон быдтэмын. Коньдон ёзъёс озьы ик шальтрамын. Эскеронъёс возьматӥзы, Россиысь Коньдон ужпумъёсъя министерствоын бухгалтерской учёт но радъямтэ. Паймымон, осконтэм кадь, но со озьы. Та югдуръя ивортэмын вал Чубайслы, Задорновлы. Туннэ нуналозь нокыӵе ужрад кутымтэ, озьы бере, федеральной бюджетысь коньдонлэсь вуэмзэ но кутӥськемзэ лыдъясь-чотась йӧскадь ӧвӧл. Кытчы со вуттӥз - тодӥськоды асьтэос: коньдонэз миллионъёсын, триллионъёсын, чик кӧбератэк, шара лушкало. Верало куд-ог учыръёсты гинэ. 1995 арын официальной документъя Индилы самолёт лэсьтонэ шуыса висъямын 900 миллиард манет ссуда. Эскерон мыныку тодмо луиз: Индиен нокыӵе огкыл гожтэмын ӧвӧл, висъям ссуда ышиз-быриз банкъёсын ужасьёс пыр. Али ке но та уксё шедьтымтэ. Мукетыз учыр. Пӧртэм документъёсъя Чечняе келямын 14 триллион манет, эскеронъёс шараяло - отчы вуэмын 200 миллиардэз гинэ. Кылемез кӧчиз реформаторъёслэн кисыосазы. Нош Россилэсь пунэмаськемъёссэ берыктоно луоз туала Правительстволы, федеральной бюджет чотын, мукет сямен вераса, ужась калыклэн сотэк но куанер кисыысьтыз. - Кылсярысь, федеральной бюджетысь ыстэм коньдон Удмуртиын шонер-а кутӥське? - Умойтэм учыръёсты мон ӧй шедьты. Верало мукетыз сярысь. Быдэс Федерациын сямен ик, Удмурт Республикаын но уг чакласькы акциосты киысь кие вузан. Соин ик секыт вераны, кин азьланяз кузёяськоз тӥляд ваньбуреныды. Ватонэз ӧвӧл, троссэ удысъёсты, государствоез палэнтыса, ас киязы возё ни криминалэн эшъяськем монополистъёс. Соос улэ нырысь ик шедизы рынокъёс, нимаз вузкарисьёс. - Кунгож сьӧрысь вуэм кредитъёс кызьы кутӥсько? - Ваньмыз соос келясько, кыӵе ке но нимаз удыслы шуыса, но огез но ыстэм интыозяз уг вуы. Дуннеысь Валютая фонд сярысь ке верано, со юрттэ бюджет удысын ужасьёслы. - Кин коньдон тыре пӧям вкладчикъёслы? - Соослы ыстэм коньдон озьы ик кошкиз музон кисыосы, вкладчикъёс дорозь ӧз вуы. Дуннеысь банк асьмелы коньдон ыстэ - отӥяз кызьы кутӥськемзэ уг чакла ни, угось пунэмен тыронэзлэсь Россия нокытчы уз пегӟы, вылаз ик, процентъёсыз йылозы на. Москваын, кылсярысь, та долларъёсын 9 этажъем кык улон корка пуктӥзы. Но отысь квартираосты басьтыны вормисез ӧвӧл, шуыны луоз. - Кин эскере Центральной банклэсь ужзэ? - Сыӵе правоез нокинлэн ӧвӧл. Зэм, таяз арын аудиторъёсты соос асьсэос ӧтчазы, ужзы понна дун тырыса. Таин ми соглаш ӧвӧл, малы ке шуоно, отын умой-умой эскерон ортчытыны кулэ. Вуж дунын басьтэм зарниез банк вузаз выль дунын, со чотын 26 триллион манет кылиз асьсэлэн кисыязы. Лыдъян палата, Центральной банклэн туала кивалтӥсез лэземъя, татын эскероно ужъёсты декабрёзь быдэстыны малпа. Соку ик йылпумъянъёс лэсьтыны луоз. Л. МЕДВЕДЕВА. Социалистической Родинамы понна Пӧртэм вакытъёсысь комсомолецъёсты егитъёслэн огазеяськонзылы 80 ар тырмонэн ӟечкылаз КПРФ-лэн ЦК-езлэн тӧроез Г. Зюганов. Странаысьтымы валтӥсь коммунист пусйиз, комсомоллэн школаез пыр кык сю миллион советской адямиос ортчизы шуыса. Одӥгъёсыз кулӥзы ини яке бырыны шедизы, улонзэс калыклэн шудбурез понна сётыса, тросэз али но обществоен но государствоен кивалтонэ пырисько, уло но ужало асьме вӧзын. Соос уг возьдасько ог-огзылэн синъёсазы учкыны, угось соослэн пельпум сьӧразы кылемын Днепрогес но Магнитка, Быдӟым Отечественной война, космос но целина, Братск но БАМ... КПРФ-лэн ЦК-езлэн Президиумез оске, та юбилей комсомоллэн историяз берпуметӥез ӧвӧл шуыса. Азьвыл комсомолецъёслэсь ужзэс азьланьтозы туала егитъёс, социалистической Родинамы мед сяськаялоз шуыса. Дыр азьлань! Государствомылэн улоназ комсомол уно аръёс ӵоже бадӟым инты басьтӥз. Со егитъёсты эшъяськыны, выльзэ кылдытыны, шаермес яратыны но ӟечсэ гажаны дышетӥз. Кылдэмез бере ик Егитъёслэн союззы ас азяз ужпум пуктӥз - Атыкай музъеммес выльдон но юнматон. Ортчись дырез аръёсын гинэ уг лыдъяло - быдӟым ужрадъёсын, учыръёсын но лыдъяло. 28 октябре - Егитъёслэн всесоюзной организацизылэн вордӥськем нуналаз - асьмеос тау карыса тодамы ваиськом кызетӥ но куамынэтӥ аръёсысь комсомолецъёсты, угось соос странамылэсь кужымзэ юнматӥзы. Ми йыбырттӥськом Быдӟым Отечественной война вакытэ ожмаськем, фашистъёсты вормон понна асьсэды жалятэк ужам комсомолецъёслы. Удмуртиысь комсомоллэн улонэз люконтэм герӟаськемын республикамылэн историеныз, солэн промышленностьын но гурт хозяйство удысын вормонъёсыныз, наукаын но культураын азинсконъёсыныз. Егитъёслэн огазеяськонзы дышетӥз странамылэн улонэз понна кыл кутыны, со дасяз производствоез радъясьёсты, тодмо учёнойёсты но политикъёсты. Странамылэн улоназ воштӥськонъёс ортчизы ке но, комсомоллэсь ӟеч ужъёсын историзэ вунэтыны уг луы, комсомолецъёслэн ас калыксылы ӟечсэ лэсьтыны тыршемзы адӟем карымон. Удмурт Республикаысь Кун Кенеш но Правительство сюлмысь ӟечкылало егитъёслэн движенизылэсь ветеранъёссэ, ваньзэ, кин уг вунэты комсомол вакытсэ, праздникен! Сӥзиськом тӥлед шудбур но выль вормонъёс, республикамылэн ӟеч улонэз понна. Удмурт Республикаысь Кун Кенеш. Удмурт Республикаысь Правительство. Сыӵе шуныт, шулдыр, шудо, уӵыос ӵукнаозь чирдон уе олокытысь-марысь, сьӧд пери ваем музэн, гуртамы гудыртӥз но ӵашйиз кадь: буш вал вылын туж зол ворттыса, воргорон секыт ивор вуттӥз. - Чалмытске, егитъёс, кылзӥське мар верамме: ньыль часын ӵукна Гитлер асьме вылэ войнаен омырскем. Вань калык дась мед луоз тушмонлы пумит султыны, - сыӵе кылъёс вераз но мукет гуртъёсы ворттыса кошкиз. Сыӵе шимес иворез кылыса, ми ваньмы жӧломимы, йырамы бадӟым нушыен шуккыса кельтӥзы кадь. Уӵы чирдэм куара но уг кылӥськы ни, уй но шулдыр ӧз ни поты, доръёсамы бертыса, ваньмы семьяямы секыт ивор пыртӥмы. Та уез мон ноку но уг вунэты. Вань улон чукинь-бекинь кошкиз. Толон валлян гинэ мыным дас тямыс арес тырмиз, нош кызь кык числое улон сураськиз-пожаськиз. Бабылес льӧль сяська кадь чебересь малпанъёсмы ӵуштаськизы, сьӧдэктӥзы. Адямиез виёнлэсь кышкыт, шимес уж мар меда вань. Шат музъем зуркан яке вулкан, но со адями бордысь уг поты - музъем кӧкымы дырын-дырын "иземысь сайкатэ". Музъем зурканэз мон но ас вылам ӧжыт шӧдӥ. Вань улытозям нырысьсэ путёвка сётӥзы Анапае. Нылы ӵем висьылӥз, сое эмъяны нуи. Самой мӧйы адямиос но татысь ноку шӧдылэммы ӧй вал шуылӥзы. Кык-куинь балл гинэ вылэм, но мон шӧдӥ. Музъем пыд улысь кошке кадь, кроватьёс "эктыны" кутскизы. Со кышкыт маке. Нош самой шимес, кырсь ужпум одӥг калык мукетыз вылэ виылыны шуыса омырско ке. Кивалтӥсьёсмы калыкез буйгатыны выризы: Германия, пе, асьмелы пумит война уз ӝуты, договор гожтэмын ук "О ненападении". Со янгыш ивор вал, дыр, шуылӥзы... Мынам атае укыр грамотной вал шуыны ук быгатӥськы, но ӧжыт-ӧжыт газетъёсыз лыдӟылэ вал, ачиз уг ке но басьты, квартирантъёсмылэсь шедьтылӥз. Ми дорын весь кин ке но улылӥз, я сельсоветлэн кузёез, я дышетӥсь, я вузчи. Куспазы но мар ке со вераськыло вал но, мон анласа ӧй вуылы, кулэ но вал кадь. Куддыръя анаен атайлэсь враськемзэс гинэ пелям понылӥ. "Неужели та Германия нош асьме вылэ омырскоз? - шуылэ вал атай. - Мон азьло Герман ожен сэрен тямыс арме армилы кузьмай, пленэ но шедьылӥ. Аслам атае но тямыс арзэ кельтэм армилы Турциен ожмаськон вакытэ. Табере мынам но пие действительной службаын. Инмар мед утьысал ини пиме ожмаськонлэсь". Тӥни сыӵе малпанъёсын улыны кутскизы адямиос, улон дуннелэсь кудпала шонтӥськемзэ шӧдыса. Атаелэн сюлэмшугъяськемез огшоры гинэ вылымтэ, со туж ӟеч тодэ вал уго, мар со война, мар со ӟар кезьыт толъёсы чик шуныт корка пыратэк окопъёсын погылляськон. Ож кутскем шуыса тодэмез бере, атае воксё шуэрскиз. Ачиз милемыз буйгатыны выриз: "Война кема уз кыстӥськы, асьмелэн государствомы юнгес соос сярысь, чаляк пазьгозы Гитлерлэсь армизэ". Шимес ивор бере толэзь ӵоже ваньзэ кочон кадь юнэсь, чебересь воргоронъёсты, дас тямыс арес тырмем егит пиосты нуналлы быдэ армие, войнае басьтыны кутскизы, куд-ог семьяосын атаез но пиез ӵош кошкылӥзы, тросэз - воксёлы. Атае таяз войнае ӧз сюры, мӧйы вал ини. - Нылы, секыт вапум вуиз, тон но валад, дыр, ини. Агаед армиын, сое но табере Дальний Востокысь жугиськон пала келялозы, вылды, со ведь офицер. Табере ми пересесь, кынармы уз тырмы ни тонэ дышетыны. Оло, ужаны кутскод? - озьы вераськиз мынам яратоно визьмо атае, асэныз огъёзо муртэн кадь. Атаелэн та кылъёсыз мынам йырам но сюлэмам но туж юн мертчизы. Одӥг-кык ареслы, оло, мӧйыми кадь. Куронзэ быдэстоно кариськи. Одӥг шулдыр шундыё нуналэ Можгала пыдын мынӥ, ньыльдон кык иськемез. Соку нокыӵе транспорт ӧй вал. Матысь гуртъёсысь нокин но ӧз дышетскы педучилищеын, мон воксё огнам. Педучилищеын кыкетӥ курсэз быдтыса, куинетӥ курсэ потэм сярысь справка басьтӥ но Бемыже роное мынӥ. "Зав. Роно" гожтэм ӧсэ йыгаськыса пыри но, кылтэм-ымтэм кадь луи. Бадӟым ӝӧк сьӧрын маке гожъяськыса пуке мынам дышетӥсе Поляков. Со милемыз Нынек школаын физикаен дышетӥз. - Ӟечбуресь, Максим Григорьевич, - шуыны дӥсьтӥ ик, пырем бере, кызьы уд ӟечъяськы. - Ӟечбур, ӟечбур, - ма тон ук, Егорова! Кытысь-марысь татчы вуид, неужто педучилищеез быдтӥд ини? Татчы лыктэм мугме лад-лад верай, справкаме но сётӥ. Максим Григорьевич монэ улляса ӧз лэзьы, сак кылзӥз. Школае ужаны мон тонэ куто, оскисько быгатод, дыр. Милям ӵапак али комплектование мынэ, Удмурт Сараман школаын буш инты вань. Мынод, дыр, шуисько. - Максим Григорьевич, мынам аслам гуртам, Кармыж школаын ужаме потэ. Мынам номыри но ӧвӧл, вылам дӥськутэ сяна, валесэ но кровате но. Кин дорын улом, кин монэ квартирае лэзёз, валессэ кин сётоз? - Мон сое туж валасько, шонер вераськод, нырысь ужаны кутскыны туж секыт, шурдыт. Нош быгатод-а ас гурт нылпиостэ дышетыны, кылзозы-а, эш уз каре-а? - Мон аслым оскисько, вань калык монэ тодэ, анай-атайёсы но умоесь. Собере мынам агае но армие басьтэмзылэсь азьло асьме гуртын ик ужаз. Тазьы верамъёсы Максим Григорьевичлы кельшиз кадь. Милям школаямы соку куинь кузя ужало вал. Одӥгзэ Сарамаке воштом, со интые тонэ кутом, шуиз. Озьы ньыльдон одӥг арын нырысетӥ сентябре мон луи дышетӥсь. Таиз улонэлэн туж пичи гинэ люкетэз. Самой, туж бадӟымез - шунды пуксён палан: отын гудыръя, пуштылэ, ӝуа, эгырӟе - музъемысен инбамозь ваньмыз ворекъя, куашка, пеньлы пӧрме. Куамын тямысэтӥ-куамын укмысэтӥ аръёсы басьтэм казакпиослэн, армиысь бертыны дасяськыса, нуналлы быдэ приказэз возьмаса, сюлэмзы, оло, пилиськон калэ вуэмын ини. Табере демобилизация сярысь малпанэз ик ӧвӧл, шумпотон нуналъёс интые бӧрдон гинэ. Анае мынам шуылоз вал: адями сюлэм пияла ӧвӧл, тэшкыльтытэк но пут кошке (пилиське). Ужлэсь шӧмзэ ужамъя гинэ валано, ческыт-а, курыт-а со. Ярано эшшо, мон умоесь, визьмоесь адямиосын артэ тупай. Макан школаын ужа вылэм аслам азьвыл дышетӥсе Алефтина Федоровна Лисина, со милемыз ӟуч кылъя но литературая дышетӥз. Одӥг ар ужаса, однокурсникъёсыным ӵош госэкзаменъёсыз сётӥ но педучилищеез быдтэме сярысь диплом басьтӥ. Группаямы нылъёс пӧлы кык пиос гинэ кылиллям, тазалыксы лябен, мукетъёсыз ваньмыз фронтэ басьтэмын... Война бырем бере, куиньзэ гинэ адӟыны кылдӥз на: Алеша Юртовез, Толя Овчинниковез, Виктор Северяновез. Юртовен пумиськимы, пединститутын заочно дышетскыкумы. Бератаз со тодмо адями луиз: Алексей Михайлович Юртов - быдэс республикалы прокурор. Виктор Константинович Северьянов пенсие потытозяз ужам аслаз Верх. Тыжма школаяз директор луыса. Анатолий Овчинников кема гинэ нуллӥз военной дӥськутсэ. Ми соин малпамтэ шорысь Ижын пумиським. Можгаын, пе, улӥсько, кытын ужамзэ но, атай нимзэ уг тодӥськы, ӧй юа-а, мар-а. Педучилищеез быдтыса, диплом басьтӥмы, нокыӵе шулдыръяськонъёс ӧй вал, соин йырин- а соку - ӝоггес интыяд вуоно, кинэ кытчы ыстӥзы. Ми куинь кузя люконтэм эшъёс вал. Зоя Курбатова, Бадӟым Уча районысь Кельвой-Уча гуртын вордскем нылаш, аслаз ёросаз ик кошкиз. Со дышетӥсьлэн нылыз вал, атаез Курбатов Ефрем Николаевич, анаез но дышетӥсь, покчи апаез - медсестра, фронтын вал ини. Надя Ванюшева - Кизнер ёросысь Кусо-Какся гуртысь. Атаез солэн уголовной розыскын ужам война кутскытозь. Мон гинэ колхозникъёслэн нылзы вал, но монэ ӧз ултӥялэ. Ми квартираын но огазьын улӥмы дышетскыкумы. Со кышкыт, секыт аръёсы ми ваньмы пазьгиськимы, чебересь кӧжыос выллем, пӧртэм- пӧртэм палъёсы. Надялэн малы ке монэным люкискьемез потымтэ. - Нюра, вераськы вал ас районысь кузёеныды, уз басьтэ-а монэ тонэн одӥг школаын ужаны - туж ӝож мылкыдын вазиськиз мыным. - Мынам нокытчы но мынэме уг поты, аслэсьтым районме чик уг тодӥськы, атайме пӧртэм-пӧртэм районъёсы ыстыло вал бере. Тон бордын мон каньылгес кутскысал ужаны. Кышкатэк. Мон роное ветлӥ. Соин кивалтӥсь Мелузова Анна Артемьевна ачиз ӟуч ке но вал, уд тоды, кудзэ кылэз ӟечгес тодэ, оло удмуртсэ, оло ӟучсэ. Соин котькызьы каньыл вал вераськыны. Кузё кышномурт котьку но мылысь-кыдысь кылзоз, эскероз, чаклалоз, санэ басьтытэк уз кельты. Мед лыктоз, ужалоды одӥг школаын, али ӵапак пусъеммыя Поляк гуртын школа усьтыны малпаськом. Тонэн ӵош ужась дышетӥсез отчы интыялом, нош Ванюшева эштэ тон борды кутом. Та кылъёсыз кылыса, мон дорам, оло, лобыса бертӥ, - ма, тямыс иськем со чик кузь ӧвӧл, Можгае ньыльдон кык иськемен ӵошатыса, - мон пыдын ветлыны пичиысен ик дышемын. Ньыльдон кыкетӥ арысен ми Надя Ванюшеваен ӵош Кармыж школаын ужаны кутским, ми дорын ик со улӥз но. (Эшу гуртамы шудзэ шедьтӥз - со сярысь гожто на). Кыӵе шимес вал та ар. Немецъёс весь пыдло но пыдло пыро асьме кунэ, армимы весь чигна берлань. Немецъёслэсь кышкаса пегӟем муртъёс ми пала вуыло ини. Милям гуртамы но ваизы ини Кизнерысен. Смоленск улосысь Гжатск, Гагарин городысь вал соос. Кыӵе ужез но быдэсъяно ӧз луылы милемлы, кык егит дышетӥсьёслы. Монэ соку ик комсомоллэн первичной организациезлы секретаре бырйизы. Табере мон ваньмыз понна кыл кутоно ини: дышетскись пиналъёс, школае ветлӥсьтэм егитъёс понна но, апай-сузэръёс, кенакъёс понна но. Воспитательной уж нуоно, калыкез кызьы ке но либатоно, куректонэз, курадӟонэз вормыны кызьы ке но юрттоно. Котькытчы вуттӥськоно. Калыклэсь военной налог (выт) бичанэз но ми вылэ куштӥзы. Со самой секыт уж вал. Одӥг копейка но коньдон басьтӥсьтэм семьяослэсь куроно, государстволы юрттыны шуыса. Ми тодӥськомы ук: нокинлэн коньдонэз ӧвӧл. Нылпиоссылэн ымысьтызы "кыскыса" поттэм сиён-юонзэс вузаса гинэ налогзэс тырылӥзы. Кыӵе жаль пото вал мыным векчи нылъёсын кылем нылкышноос. Анаелэн сузэрыз но тани ньыль нылъёсыныз огназ. Кузпалызлэн нокыӵе иворыз ӧвӧл... Анаелэн выныз кулӥз, кузпалыз огназ кылиз, пиез фронтын. Атаелэн агаез, пересь маке, пиезлэсь вить нылпиоссэ сюдыны-вордыны выре. Кызьы ымы усьтськиз мынам таослэсь коньдон курыны?! Мон школаын ужаме понна кӧня ке но басьтӥсько уксё. Со коньдонэ пӧлысь соос понна, асьсэлы вератэк, налогзэс тырисько. (Мон та сярысь ноку но асьсэлы но, мукет муртъёслы но ӧй поттылы, ачим гинэ тодыса улӥ). Та вакытэ сельсоветамы вить школаос вал ини. Вань общественной ужъёсыз вератэк, со школаосын ужась дышетӥсьёслы уждунзэс сётъяны монэ косӥзы: таиз но туж бадӟым, кышкыт уж луэ вал мон понна. Толэзьлы быдэ Бемыже пыдын огнам мыныса, роноысь чекен банкысь коньдон ачим басьтыса, озьы ик огнам - коньдонэн, пыдын, нокин келятэк, быдэс сельсоветлы уждун вайылӥ. Бемыжысь ик ваем почтаез но ми Надяен ӵош гуртъёслы нимаз-нимаз люкылӥмы, ӟуч сямен вераса, сортировать карылӥмы. Та лэсьтэм ужъёсмы понна ми одӥг копейка но ӧм басьялэ, - общественной уж, пе, со. Озьы гожтэтъёсыз гуртэн-гуртэн люкылыса пукыкум, аслым гожтэм вуиз киям. Куинь сэрего ӧвӧл, - соку фронтысь куинь сэрего, тетрадь листлэсь гинэ лэсьтэм гожтэтъёс вуо вал, - зэмос ньыль сэрего, туж чебер, тодмотэм почеркен гожтэт. Адресэ но нимтулы улын векчи вогыриё, ву тулкым выллем гож лэземын, со гож улын полевая почта но.. Иванов шуыса гожтэмын. Сюлэмы нёркак луыса усьтӥ гожтэтэз. Кык пол куасалтэм бумагаез шонертӥ но... вылӥ паллян сэрегыз пӧлы пум быдӟа гинэ туспуктэм лякемын. Со адямиез мон соку ик тодмай, но мар шуыны ик пайми. Кытысь-марысь, мар пумысен мыным гожтэм, ноку но вераськеммы но ӧй вал та дырозь, мон шоры со пичи ныл шоры кадь гинэ учкылӥз. Кытысь, кин верам, мон дышетӥсь ини шуыса? Редакциын пумиськонъёс Асьмеды музъем огазея Бусы ужъёс бырем бере, "Удмурт дунне" газетмылэн 80 ар тырмон юбилееныз валче, редакцилэн "котырес ӝӧк" сьӧраз люкаськылӥзы республикаысьтымы гурт хозяйствоослэн кивалтӥсьёссы. Соос пӧлын: В. Л. Гореев (Ува районысь "Дружба" СХТ), А. Н. Ешкеев (Пичи Пурга районысь "Мир" СПК), В. А. Красильников (Вавож районысь "Колос" СХПК), М. А. Крестьянинов (Грахово районысь "Луч" СХПК) но С. И. Соколов (Пичи Пурга районысь "Норья" ТОО). Кенешон мынӥз пӧртэм ужпумъёсъя. Туала кивалтӥсьёслы, ватонэз ӧвӧл, огласянь секыт вапумъёс кемлазы, нош мукет ласянь - соослы ас быгатэмзыя но валамзыя ужаны эрик сётэмын. Нокин но индылӥсез, эскерисез-чакласез ӧвӧл. Озьы ке но, гурт калык, дорамы вуэм куноос но, азьвыл аръёс ӟечен тодазы ваё. Соосты туннэ юн шугъяськытэ кивоштӥсьёсты дасянъя политика, музъемез вузан- басьтон, коллективной хозяйствоосты юри малпаса куашкатон, пудо йырлэн арысь аре кулэсмемез но трос мукетыз. Кылпум потӥз Кун Кенешлы вуоно депутатъёсты быръён пумысен но: кин шедёз республикамылэн вылӥ ёзаз, кин соин кивалтоз? Сюлэмез бичатӥсь юанъёс трос гинэ, редакциын кенешонмы но кык часлэсь ятыр кыстӥськиз. Кыл сётом "котырес ӝӧк" сьӧры люкаськемъёслы. Куноос куремъя, вераськонмес мытӥз Удмурт Республикаысь Кун Кенешлэн депутатэз, Пичи Пурга районысь "Мир" колхозлэн председателез Анатолий Николаевич Ешкеев (хозяйствоен кивалтэ 12-тӥ арзэ): - Нырысь ик мон тау карысал редакциын ужасьёслы тазьы ӵош пуксьыса кенешыны луонлык сётэмзылы. Зэм, гурт хозяйствоын ужаны туэ капчи ӧвӧл, уката но секыт йӧтэ кивалтӥсьёслы. Россиын экономикалэн куашкамез туж шӧдӥське гурт вылын но. Озьы ке но, пусйыны кулэ: Удмурт Республикалэн кивалтӥсьёсыз таӵе вакытъёсы но быгато ай хозяйствоез возьыны, пайда поттыны. Татарстанэз та ласянь ялан ушъяло. Мон улӥсько Агрыз районэн артэ, ӟеч тодӥсько артысь бускельёсме, соин ик асьмелэсь умой ужало на, бадӟымесьгес азинсконъёс басьто ӧй шуысал. Зэм, кылем арын урожайзы удалтӥз, туалаез - ӧз. Милям колхозмы, экономикаезъя верано ке, шоро-куспо, 6 сюрс гектар гыроно-кизёно муосмы. Музъем палэнэ трос кошке, одӥг кузё ӧвӧлэн, тус-тас луэ. Тӥни ма понна сюлэм тужгес но висе. Милям хозяйствоямы интыяськемын трос пумо организациос: кык нефтебаза, хлебоприёмной предприятие, чугун сюрес но мукетыз. Отын дыраз коньдон басьто, колхозниклэсь майбыргес уло. Та муген но калыкен вераськыны, огъя кыл шедьтыны, азьланезлы оскон пыӵатыны секыт. Капчи уг йӧты колхозысь специалистъёслы но. Политика сярысь. Асьтэос адӟиськоды, республикаын власть понна нюръяськон зол гинэ мынэ. Шуо, таосыз, пе, Салтыковлэн командаяз, соосыз Волков пала дурбасьто. Адямиосты мон озьы ӧй люкысал. Тросэзлэн депутатъёслэн асьсэлэн малпанъёссы но шугъяськытӥсь ужпумъёссы. Соосты улонэ пыӵатон, пумаз-йылаз вуттон понна кужымзэс, тодон-валанзэс сётыны тыршо. Мар ватонэз: удмурт кивалтӥсьмес асьмеос ыштӥм, сое меӵак вераны кулэ. Кивалтэт удысын удмуртъёс туж ӧжыт кылемын. Мугез одӥг: туэ ляб нуиське кадръёсты дасян. Партия кивалтыку учко вал, 35 процентэз кивалтӥсьёс удмурт мед луозы шуыса. Туннэ сое чаклась ӧвӧл ни. Мон сямен, Удмурт Правительстволы национальной кадръёсы дасян бордын золгес ужано. Ӝыны ар ортчыса, Кун Кенеше быръёнъёс ортчозы. Шаерамы улӥсь калыклы мон одӥг гинэ дэмлан сётысал: кияды бюллетень кутыкуды, эшшо огпол чаклаське, малпаське на кин понна куарадэс сётоды. Гужем быръёнъёс возьматӥзы: тросэз адямиос оско ӵектэм кылъёслы, соослы, кин та ужрадэ коньдон кисьтыны быгатэ. Паймоно ук: удмурт калык ас выжыез понна уг, сьӧрлось вуэмъёс понна голосовать каре. Пичи Пургая но сыӵе учыръёс вань. Быръёнъёс дыръя тужгес но юн шараяське асьмелэн валанлыкмы, огъя культурамы, азьлань сюресмес адӟеммы но адӟымтэмы. Бигеръёс ведь сьӧрлось муртэ ноку но кивалтӥсе уз ӵектэ, быръёзы асьсэ пӧлысь потэмзэ, асьсэ музъем вылын будэмзэ. Удмурт калык та ласянь кышкасьгес, дӥсьтонлыкез уг тырмы: кызьы косо - озьы ик лэсьтэ. Колхоз сярысь. Коллективной хозяйствоос асьсэды али пӧртэм сямен нимало, кинлы кызьы кельше. Луозы, дыр, колхозъёс но, кооперативъёс но, эштосъёс но. Мон трос малпаськисько тани ма бордын: пенсие потон дырыз вуыса, арлыдо адямиен номыртэк уз кыльы меда? Ваньбуръя паез ужасьлы быдэ люкылон - со умой. Нош ма карод музъем паен? Сое вузаны дась ӧвӧл, медам но луэ. Мон сямен, макем трос музъемлэн кузёез - сомында пол ик муосмы тус-тас луозы. Коллективной хозяйствоын та ласянь радлыксэ возьыны быгато на. Газет сярысь. Асьмеос люкаським "Удмурт дуннелэн" "котырес ӝӧк" сьӧраз ӵапак газетлэн бадӟым юбилеез азьын. Соин ик кӧня ке кыл вераме потэ юбиляр сярысь но. Ми палан "Удмурт дуннеез" туж яратыса лыдӟо, районын потӥсезлэсь ятыргес басьто. Калыкен пумиськылыса шӧдоно: гуртъёс сак учко политика сярысь гожъям материалъёсты. Сессиысь бертэм берам отын ӝутэм ужпумъёсъя но юалляськисько - газет пыр соос тодо ни, ма бордын ужало Кун Кенешысь депутатъёс. Пусйыны кулэ, механизаторъёс, пудо утисьёс пӧлын ӧжыт ӧвӧл шаплы туала улон-вылонэз адямиос. Газет чуръёс соослэсь мылкыдзэс бугырто бере, озьыен, тӥляд кужымды бадӟым. Азьланяз но "Удмурт дунне" туннэ кадь ик лыдӟымон медло, лэчыт ужпумъёс борды кышкатэк басьтӥське. Визьмо, гожъяськыны быгатӥсь журналистъёсты тӥляд вань. Иван Павлович Перевощиков, Вавож районысь "Луч" колхоз (кивалтэ 21 ар): - Нимаз-нимаз люкиськыса ужан - со ужан ӧвӧл, кужым - коллективной хозяйство бордын. Удмуртъёс вашкала дырысен дышемын бӧлякен улыны, котькыӵе бадӟым удысэз дэмен кутскыса быдэстыны. Нош колхоз шоры вылӥ кивалтӥсьёс ласянь учкон воштӥськиз ке, нимаз ужаны вырись крестьян хозяйствоен ӵошатыса, пайдаез тросгес луоз. Милям вань одӥг ас понназ ужась кузёмы. Колхозэн артэ сое пуктыса - инбамен музъемен кадь висъяське. Солэн бусыосыз быдэсак жуг-жаг пӧлын, колхозлэн - чылкыт. Урожайзэ но уд ӵошаты. Техниказэ возён ласянь но курадӟе. Тае ас синмыным адӟыса, мон эшшо огпол пусйисько на: огназ ужась адямилы коллективен артэ султыны секыт. Тодам лыктэ Владимир Познерлэн Россиысь фермеръёслы сӥзем передачаез. Малпамезъя со возьматыны выре вал, нимаз кузёос Россиез азьланяз сюдозы шуыса. Но нырысетӥ фермер ик передача нуисез могӟытӥз, шуиз: ӝӧк выламы тырмыт сиён-юон будэтон понна, мед азинскозы коллективной хозяйствоос. Познерлы та верам туж ӧз яра - юалляськон адямиез дорысь бызьыса кошкиз, передача мынытозь, матаз но ӧз вуылы ни. Малы колхозъёсты куашкатӥзы? Солы одӥг валэктон: кышказы, СССР, Россия Европаысь рынокез ас продукциеныз тырмытоз шуыса. Странамы уго арысь аре йылэтыны ӧдъяз вал ни нянь, сӥль, йӧл, вӧй поттонзэ, картофкалэн но удалтонлыкез будӥз. Вал янгышъёс но. Кылсярысь, СССР-ысь Гурт хозяйствоя Министерство но сиён-юон поттон удыс ӵош ужало вал, переработка ӧжытак гинэ ӝутскыны ӧдъя - нимаз ужаны выжто, куашка ке - нош ик Гурт хозяйствоя Министерствое пырто. Асьмелэн со самой бадӟым тырмымтэмы но висёнмы. Тодады вае ай: будэтэм, быръем картофкамес сӥзьыллы быдэ келяськом вал городысь базаосы, ӝоктӥськом кариськом силос тырон техникаен, ум малпаське ӟечлыкез сярысь. Косо бере - келяно, сётэм планэз быдэстоно, отӥяз милям йырмы уг висьы ни. Валамон ини, тол ӵоже со сисьме, кыед луэ. Вавож район музъемезлэсь удалтонлыксэ ӝутыны ӧдъяз 90-тӥ арысен. Троссэ паймытӥз ӟеч урожай басьтэменыз. Нош кӧня ужамын вал со дырозь! Милям трос торфмы. Техника мынытозь, толбыт бусыосы поттӥськом вал. Кыед но бордаз люкаськиз. Та вылын ик али вазиськиськом. Уксёен улӥсь хозяйствоосы минерал сылал но тырмыт шедиз. Кӧня ведь музъеме понод - сомында ик урожай басьтод. "Удмуртия" колхоз ас дыраз трос лэсьтӥз ӟеч урожай басьтон вылысь, али пайдазэ адӟе ни. Гуртын улон, музъемен ужан ноку но капчи ӧй вал, нош али уката но. Коньдон но контькинлэсь ичи басьтӥськом, сомында продукция поттыса. Банкъёс шоры учке али. Ижын-а соос, райцентрын-а - уксёзэс кытчы поныны ёрмыса, борддоръёссэс, выжъёссэс синучконэн шобырто ни. Вӧзаз ик колхоз куашка, пудо возён гидъёсты номырин ввыльдыны. Тае-а шонер государственной политика шуод? Мултэс коньдонэз ик висъялэ вал гурт хозяйствое - ма быдӟа пайда бастыны луысал! Мон уг, дыр, янгыша, колхозъёс пӧлысь ог дас процентэз гинэ та вакытэ пыд вылаз возисько на шуи ке. Ми кылем арын Ижысь хлебоприёмной предприятие 240 сюрс тонна чабей келямы, уксёзэ туннэ но ӧм басьтэ. Озьы ик Можгаысь консерва заводэ нуэмын картофка. Со коньдон хозяйстволы туж кулэ, 200 скалмес интыяны нокытчы. Нош кызьы кезьыт азьын ужалозы дояркаос? Вуылӥз дорамы П. Н. Вершинин но, югдурез кыӵезэ адӟиз, но номырин ӧз юртты. Зэм, районамы, республикаын милесьтым но урод улӥсьёсыз вань на, юнме шорысь 800-лэсь ятыр сюро таза пудо шаерамы ӧз кулэсмы ук. Со понна мон янгыш карисько Удмурт Правительствоез гинэ, дыраз ужрадъёс кутоно вал. Парсь йырез ар ӵоже уськытын луоз, нош кысконо скалэз будэтоно ай. Татын кылпум потӥз Татарстанысь бускельёсмы сярысь. Шонер, соос кадь тупаса, ог- огмылы юрттыса улыны асьмеос ум быгатӥське. Ужась, быгатӥсь удмуртэз ай ачиз удмурт ик ултӥяны выре. Бигеръёс сярысь вераме потэ таӵе учырез. Дорамы чабей басьтыны лыктӥллям. Чабеймес келям. Делегациысьтымы огез тодмое, "Сельхозхимиен" кивалтӥсь, кошкон азяз шуиз: "Иван Павлович, мугорын тон пичи адями, кылемез но предъёсты сыӵеесьгес ик, милямъёсыз ваньмыз моторесь, тазаесь. Нош ужамзыя, кивалтыны быгатэмзыя учконо ке, тӥляд председательёсты - быдэс йырлы вылӥынгес". Мон сюлмам озьы малпай вал ини, шоразы учкыса, нош кивалтӥсьсы эшъёсыз азьын ик шара вераз. Асьмеос, удмуртъёс, дышемын калык понна, общество понна ужаны. Бускельёсмы нырысь ик асьсэ понна лэсьтозы, семьязы понна сюлмаськозы. Мон, оло, янгышасько, но озьыгес потэ. Налог сярысь. Примаковлэн кабинетэзлы оскон вань кадь. Гурт хозяйстволы ӝутскон понна, 5 арлы коть колхозъёсты тыронъёслэсь мозмыны кулэ вал. Али уждун сётэмлэсь азьло ик 70 процентэз пӧртэм фондъёсы кошке ни. Азьланяз но тазьы ик пачкатыса возизы ке, одӥг хозяйство но уз чида - куашкалоз. Нырысь ик быроз техника, али но со мырдэм но кызьы возиське на. Нош валэн туэ нокин уз ужа. Юон. Вератэк кельтэме уг поты таиз сярысь но. Егит пиос ведь али туж тросэз уг кышноясько: аналскемын юон вылэ. Сыӵе муртэн кыӵе кышномуртлэн, нылмуртлэн огазеяськемез потоз? Удмуртъёс - асьмеос туж востэмесь, малпанмес но пушкамы пыдло ватыса возьыны тыршиськом, соин но, оло, ошкисьёс но тросгес, мукет выжы калыкъёсын ӵошатыса. Инкуазен сётэм сяммы, вылды, сыӵе, - вормыны кужыммы уг тырмы. Гуртын будэм пиос пӧлысь тросэз сьӧрло дышетскыны но мыныны кышкало, вордскем интызылэсь палэнэ пото, армие басьтыкузы гинэ. Асьмелэн сюлэммы сокем ненег-а, мар-а: туж ӝог ӝоже усиськом, кин ке шорамы лекгес куаретэ ке, уен-нуналэн йырамы бергатӥськом. Озьы ик адями ассэ ачиз быдтон калэ вуттэ. Калык пӧлын нокыӵе валэктон уж уг нуиськы. Та ласянь азьвыл бадӟым оскон вал гуртысь интеллигенцилы, тужгес но - дышетӥсьлы. 50-тӥ-80-тӥ аръёсы партия ваньзэ лэсьтӥз, дышетӥсь ваньмон дырзэ идеологической удыслы мед сётоз шуыса, тамында пудо со ноку ӧз вордылы. Али ачиз улон косэ ни сӥль но, йӧл но, мукетсэ но дасяны. Басьтом мынэсьтым семьяме ик. Мон - председатель, кык скал вордӥсько, улӥськом пиелэн семьяеныз ӵош. Кенмес, дышетӥсез, гурт ужъёслэсь быгатэммыя мозмытыны выриськом, ужезлы тросгес мед дасяськоз шуыса. Нош вань ук огназы но, юись карт вӧзын но улӥсьёсыз. Валамон, хозяйство котырын вырыны дыр но, тазалык но трос кошке. Жадьыса уроклы сокем ӟеч уд дасяськы ни. Дышетскись пиналъёсты азьло кытчы гинэ экскурсиосы ӧз нуллэ! Берто вал ӝутскем мылкыдын, котьмае адӟыса-кылыса, со но юрттӥз адямилэсь культуразэ, валанлыксэ ӝутыны. Али ваньмыз быриз - дуно луиз. Кивоштӥсьёс сярысь. Кызьы югдурез тупатоно? Кудпала мыноно? Мон сямен, Удмуртиын со потоз асьме кивалтӥсьёсмы бордысь. "Удмурт кенешлэн" но куараез мед кылӥськысал, уката но удмурт кивоштӥсьёсты будэтон ласянь. Советской власть дыръя, солэн кутсконаз ик, национальной кадръёсты дасян зол пуктэмын вал. Соин но, вылды, республикаен удмурт адями кивалтӥз. Али но асьме выжыысь потэмъёс кивалтон удысын чылкак быремын уд шуы. Но соослэн ваньзылэн одӥг "висёнзы" - вылӥе вуыса, гуртлэсь палэнско. Йырпоромон, бадӟымъяськон со ӧвӧл, дыр, мугез мукетгес - матынгес луо бадӟым заводъёслэн директоръёссы, соослэн сюлмаськонъёссы, нош "гурт чидалоз ай, улоз, нокытчы уз пыры" шуо. Сыӵе политиказы министръёсмылэн но: коть ӟучезлэн, коть удмуртэзлэн. Нырысетӥ интые соос пукто промышленностез, гурт хозяйство ялан бӧрсяз кыле. Мон туннэ ӟеч кылъёс верасал Валентин Кузьмич Тубыловлы. Вылӥ Советэн кивалтыкуз, республикамес со секыт вакытэ но возьыны быгатӥз. Татарстанысь колхозъёс али уродгес уло, соослы трос юрттӥзы ке но. Асьмеос пыд выламы сылыны быгатӥм, кужыммы но, чиданмы но тырмиз. Василий Леонидович Гореев, Ува районысь "Дружба" колхозлэн председателез (кивалтэ 4 ар): Булайёс данэ потӥзы ӟеч выжжысь вал вордэменызы. Та удысэз али но азинтыны выриськом. Вал йырмы 130-лэсь ятыр. Быдэс республикаын пырак одӥг гинэ кылемын араб выжыысь потэмез, со - ми дорын. Вузанооссэ вузаськом, тросгес бигеръёс басьто. Удмуртиысь хозяйствоос вошъясько: одӥг племенной вал интые кык йыр огшорыоссэ ваё. Вераны кулэ, та удыс хозяйстволы ватсаса коньдон пыртэ, государство дотация сётэ. Пыриськиськом республикаын ортчылӥсь выставкаосы, кулэ вылэм Москваозь но вутскыны, но - кыдёкынгес, сюрес дуно усёз. Нош басьтӥсез отын шедьысал, валъёсмы чебересь. Гурт хозяйство понна кыӵе аръёс тужгес но ӟечесь вал меда? Юрттэт сётон ласянь ке верано, 80-тӥ-90-тӥ аръёс. Соку уждунэз но колхозниклэн будӥз, урожай но, удобрение шедиз бере, ӟечгес басьтыны кутскизы вал. Номыр уд шуы, 10 арзэ колхозъёс умой улӥзы. Сое ум, дыр, адӟе ни. Ӟечезлы оскон али пумен ӧжытгес но ӧжытгес кыле. Экономикаез налог тырон зӥбе, шокчыны уг сёты. Михаил Арсентьевич Крестьянинов, Грахово районысь "Родина" колхозлэн председателез (кивалтэ 13 ар): Колхозлэн трос ляб интыосыз: ужась адями ассэ зэмос кузё интыын уг адӟы. Нош нимаз люкиськыса - ужан со эрик но быгатонлыктэ эскерон. Мынам сыӵе малпанэ. Тубылов Вылӥ Кенешен кивалтыку, мон ӵапак депутат вал. Фермеръёс сярысь соку ӟырдыт вераськонъёс мынӥзы. Зэм, гурт хозяйствоын воштӥськонъёс ортчытыны кулэ вал, но мур малпаськыса, чакласькыса. Колхозъёсын кылдӥзы хозрасчёт амалэн ужась ёзъёс, соос асьсэлы асьсэос кузё бырйизы. Вылез кытын пыӵаз, кытыз - ӧз. Ми дорын пӧрмиз вал. Азьланез сярысь. Котьма шуэ, но колхозлэсь азьпал улонзэ мон туннэ уг адӟиськы. Гурт хозяйствоез кудпала берыктыны шонер сюресэз адӟисьёс политикъёсмы пӧлын но ӧвӧл. Куд-огез тышкаське Удмурт Правительстволэсь Тӧрозэ, колхозъёслы номырин уг юртты шуыса. Павел Николаевич ачиз но колхозэн кивалтӥз, гурт улонэз уг вала шуыса, сое уд пыкылы. Ужпум мукетыз бордын: кӧня быгатэ, правительство юрттыны выре, но луонлыкез ӧжыт. Шонер вераз Гореев эш, 80-тӥ аръёсты уд адӟы ни, укыр трос берло дас аръёсы ыштэмын. Сое кематэк уд берыкты. Али тросэз оско Примаковлэн кабинетэзлы. Евгений Максимович - бадӟым опытэн политической ужась, но солы но секыт йӧтоз - ваньмыз куашкамын, выльысь кутскыса ӝутоно. Котьма ке но, улон интыяз уг сылы. Гурт калыклэн зӥбиськем мылкыдыз уг шӧдӥськы, со дугдылытэк ужа. Берло дыре чебергес дӥсяськыны кутскиз, умой улӥсьёслэн лыдзы будэ. Калыкмылы юрттон вылысь, сётӥськом кредит, кулэ вузъёс. Августэ, сентябре гинэ ог дасо сюан ортчиз. Огъя вераса, гуртоос семья кыдыто, юртъер пукто, ю-нянь будэто, пудо вордо - шуг-секытъёслы уг сётско. Председателе пуктэмзы бере, мон ас азям ужпум пуктӥ: ужано, адямилэсь интерессэ азинтон понна, туннэ нунал умой ке ортчиз, ӵуказеез эшшо но умой мед луоз на. Уггес тырмо вал ужась киос, куд-ог дыръя "чутылӥз" дисциплина. Ма кароно, ма бордысен кутсконо? Вазиськи банкын ужасьлы, лушкемак эскерим колхозникъёслэсь отчы понэм коньдонзэс. Табере йыре мукет малпан кылдӥз: люкам уксёзэс колхозэ кысконо но со чотын кузёзэ мыло-кыдо ас семьяез понна ужатоно. Соку юыса, юмшаса ветлыны дырыз уз тырмы. Зэмен но, малы колхоз дась корка пуктыса сётыны кулэ? Дасьсэ витьыса пукисез трос гинэ. Хозяйство пыр ас дуныныз сётыны кутским лэсьтӥськон материал, пуктэм квартираосты озьы ик вузам - калык воштӥськиз. Ваим на коляскаен 120 мотоцикл, холодильник, мисьтаськон машинаос - ваньзэ одӥгтэм басьтӥзы. 12 ар ӵоже колхоз юрттэмен пуктэмын 150 корка, 40-зэ али ӝуто на. Мон малпамья, гуртлэсь мылкыдзэ ӝутыны та амал туж юрттӥз. Син шорын со выльдӥськиз, чеберскиз. Кӧня ке кыл вераме потэ музъемез вузан-басьтон сярысь. Музъемлы - ми кузё, Уставамы озьы гожтэмын. Законъя вузаны но, басьтыны но луэ. Но учконо, кин но малы, кыӵе муген сое басьтэ? Колхоз ке кузё луыны медэ - сётоно, мед ужатоз, кӧня быгатэ, туала узыръёс ке, нырысь тодоно - ма пуктыны медэ. Кинлы шедем солы оскем узырлыкез кузьманы-вузаны уг яра. Будӥсь нылпосмес озьы номыртэк кельтом. Жаляса верано, но. Солы кутскон сётэмын ни 1992 арын. Соку музъем паез ваньмызлы люкылӥм, туала будӥсь егитъёслы табере сётыны номыре. Конечно, туж умойтэм уж лэсьтэмын. Али ог 30 процентэз адямиосы музъемтэк кылемын ни, отӥяз эшшо но лыдзы будоз. Азьланезлы нокыӵе луонлыксы соослэн ӧвӧл, пенсионеръёс ке шат ас пайзэс вузалозы яке нылпиоссылы кузьмаса кельтозы. Владимир Анатольевич Красильников, Вавож районысь "Колос" эштослэн директорез (кивалтэ 20-тӥ арзэ): Кивалтӥсьын мон кызетӥ арзэ ужасько ни, но тазьы малпаса, отысь дас арзэ юнме ыштӥ кадь потэ. Малы? Валэктонэ одӥг: ми интые соку мукетъёсыз сюлмаськизы. Председателез косо вал дыраз планъёссэ быдэстыны, тросгес продукция государстволы келяны. Со понна дотация сётъязы. Коньдон поттон сярысь бызьылонэз, йырез висьытонэз ӧй вал. Гуртлы тросэн ссуда висъяллязы.Озьы ми экономикамес умой-умой ӝутыны быгатӥм, басьтӥм техника, пуктӥм пудо возён ферма. Колхозысь эштослы пӧрмыса, правление ӧм быръе ни. Самой со ик секытэз вал - ваньмыз понна кивалтӥсьлы кыл кутон. 1992 арысен кутскыса, эштослэн кутэм уставезъя, мон ужасько контракт амалэн, огкыл гожтӥське 2 арлы. Произвдство сярысь ке верано, 90-тӥ арысен со будыны ӧдъяз. Пайда басьтыны тыршиськом экономикая чотын. Азьланезлы кыӵе малпанэ? Колхозъёс борды берытскыны, мон сямен, уг яра ни. Соослэн азьланезлы сюрессы ӧвӧл. Мед луозы кооперативъёс, эштосъёс но мукет огазеяськонъёс. Коллективной ужез быдтон сярысь вераськон уг мыны. Музъем сярысь. Милям районмыя быдэс колхоз куштэмын шуыны луоз - сомында музъем аналтэмын. Соос кесэген-кесэген юдылэмын, нокызьы басьтыны уг луы. Мон сямен, музъемез вузасал ке, одно ик кузёез утялтысал, али сямен, куштыса ӧй возьысал. Ми дась коть туннэ ик кинлэсь ке мултэс пайзэ дунъяны. Хозяйствоямы вань гыроно-кизёно муосты люкылӥм, аренда понна котькуд адямилы натуроплата тыриськом. Ма монэ шугъяськытэ? Нырысетӥ интыын - калыклы уж шедьтон. Егитъёс гуртэ кылё, семья кылдыто, нош уж ӧвӧл. Со понна нуналлы быдэ йыр висе. Семен Иванович Соколов, Пичи Пурга районысь "Норья" эштослэн директорез (ужа нырысетӥ арзэ): - Музъем асьмеды, удмурт калыкез, огазе люказ. Со бордын асьмелэн вань узырлыкмы, ортчемез но вуоно улонмы. Кызьы ым пыроз вузан-басьтон сярысь вераськыны? Я, шуом, люкылӥм ни сое нимаз-нимаз адямиослы, шахмат бусылы пӧрмытӥм. Таиз муэз - фермерлэн, таиз - колхозниклэн. Ӝоген межаос пуктылом, ог-огмылэсь кенерен майыг сьӧры ватском. Нош пудоосты кызьы, кытын возьмалом? Ми таӵе югдуре вуимы ни. Котьма мед вераськозы, но коллективной хозяйстволэсь ӟечез номыр ӧвӧл. Учке али, кӧня асьмелэн дышетскем специалистъёсмы, колхоз егитъёслы паськыт сюрес усьтӥз вал образование басьтыны, стипендиен юрттылӥз. Нимаз кузё озьы уз дышеты. Со сярысь но малпаськоно, дыр. Нош кин гуртэ пуктоз школа, клуб, тупатоз сюресъёсты? Коллективной хозяйствоез куашкатон, музъемез вузан - со асьмелэн быронмы, ёрмонэ но курадӟонэ вуонмы. Оло, мон улонэз уг валаськы? Удмурт калык дышемын огазе кариськыса ужаны, дэмен улыны. Озьы ик мед луоз азьланяз но. Мынам висьытӥсь ярае - гуртысь культураез ӝутон. Адямилы ведь, ужам сяна, шутэтскон, шулдыръяськон но кулэ. Милям гуртмы туж чебер, калыкмы но йӧно, нош культура юртмы ӧвӧл. Туж кулэ вылэм клуб пуктыны. Оло, кин ке юрттӥсьёс шедёзы? Та ласянь осконэ вань "Удмурт дуннелы" но: ӵемгес пумиськылоно, бадӟым ужпум бордын ӵош кариськыса ужано. Вераськонэз гожтӥз Людмила МЕДВЕДЕВА. Фотоосыз Владимир Камашевлэн. Коммунистъёслэн вазиськонзы пумысен "Золотая провинция" газетын печатламын КПРФ-лэн Удмуртиысь комитетэзлэн вазиськонэз. Отын верамын, 7 октябре пумитъяськон ужрадэ пыриськемъёс, пе, Удмуртилэсь Кун Думае но Федерацияя Кенеше быръемъёсты Россия Федерацилэсь Президентсэ отставкае келян понна, куаразэс сётыны огкылысь куризы. Со сяна, гожтэмын на, Кун Кенешлэн но Правительстволэн тӧрооссы Федерацияя Кенешын куара сётэмлэсь палэнскизы шуыса. Собере таӵе ӧтён чузъяське: "Волковлэсь, Вершининлэсь, Солуяновлэсь кылзэс юалом, калыклы курадӟонъёс ваемзы понна, туала властьлы дурбасьтыса..." Та заявление пумысен таӵе валэктонъёс сётыны луысал. Удмурт Республикаысь Кун Кенешлэн 22-тӥ сессияз коммунистъёс Волковлэсь юазы, малы со куаразэ ӧз сёты. А. Волков соослы пыр-поч валэктӥз. Федерацияя Кенешлэн заседанияз Президентэз отставкае келян сярысь ужпумез эскерыны чакламын ӧй вал. Со заседанилэн пумаз шӧдтэк шорысь кылдӥз. Та вакытэ А. Волков залын ӧй вал - со Центробанклэн тӧроеныз В. Геращенкоен пумиськон ортчытӥз. Кун Кенешлэн Тӧроез озьы ик валэктӥз: Федерацияя Кенеш Президентэз отставкае келян сярысь ужпумез эскероз Кун Дума та сярысь решение кутэм бере гинэ. Та учыре А. Волков быдэстоз Кун Кенешлэн 21-тӥ сессиезлэсь решенизэ, кытын верамын: "Кун Думалэн кичӧлтонэзлы дурбасьтоно" но куара сётыку "решениез лыдэ басьтоно". Озьыен, КПРФ-лэн Удмурт комитетэзлэн вазиськонын печатлам выллем малпанъёсты вӧлмытыны но Удмурт Республикаысь калыклэн нимыныз вераськыны мугез ӧвӧл. Кун Кенешлэн пресс-службаез. СПОРТ Вормонэныд, Анатолий! Япониысь Накамура городын алигес гинэ йылпумъяськиз кылёке бызьылӥсьёслэн чемпионатсы. Быдэс дуннеысь кужмооссэ спортсменъёсты люказ та шунды ӝужан палась страна. Отын нюръяськыны шуд усиз асьмелэн землякмылы, капчи атлетикая калык куспо классъем мастерлы Анатолий Корепановлы но. Отын дано удмурт пимы 100 иськемез 6 час 38 минут 2 секундскын ортчыса, ньылетӥ интыез басьтӥз. Озьы Анатолий кылем арын таӵе ик чемпионатын возьматэм дырзэ быдэс 28 секундлы умоятӥз. Корепанов Удмуртилэн огазеям командаяз дас вить арлэсь кема ӵошатске ни, нош вить ар талэсь азьло пыртэмын Россилэн сборной командаяз. Нырысь со бызьылӥз 3 но 10 иськемъёсы. Собере кужымзэ оскалтӥз марафон бызьылонын - 42 иськем 195 метр. Анатолийлы тужгес но удалтэ 100 иськеме ӵошатсконын. Кылем арын, Голландиын ортчем чемпионатын, нимаз зачётъя со 4-тӥ интыез басьтӥз, нош Россилэн огазеям командаеныз ӵош дуннелэн чемпионэз луиз. Валамон ини, вормон ас кожаз уг лыкты. Анатолий ялан ужа, уно литература лыдӟе спорт сярысь, тодон-валанзэ сётэ егитъёслы. Дышетӥсеныз, Удмурт кун университетысь капчи атлетикая клублэн валтӥсь тренереныз В. Н. Сулимаен ӵош вань быгатонлыксэс сёто студентъёслы. Егитъёс но оско эшъёссылы. Тани одӥгез соос пӧлысь Алексей Белослудцев Европалэн чемпионатаз 100 иськеме бызьылонын вормисе потӥз. Дуннелэн чемпионатэзлы дасяськеменыз ӵош Анатолий Удмуртиын ортчись вань ӵошатсконъёсы пыриськылӥз, ваньмаз ик вормисьёс радэ потылӥз. Озьы ик Корепанов азьпалан вал укмыс нуналъем кыстӥськись "Вятское кольцо" марафонын. Кыкетӥ интыез басьтӥз Москваын ортчем калык куспо марафонын. Табере нош ик вормон! Таяз учыре Япониын. Вераны кулэ: нырысетӥ куинь интыез но басьтӥзы Россиысь спортсменъёс ик - Григорий Мурзин (Екатеринбург), Игорь Тюпин (Омск) но Сеулын ортчем Олимпиадае ветлэм мурт Равиль Кашапов (Набережные Челны). Нош кызьы тодӥськоды ни, Удмуртиысь спортсмен 4-тӥ интыын. Чемпионатын витетӥ инты шедиз французлы. Со асьмелэнъёслэсь 20 минутлы бере кылиз. Японец Тошипа Кошихара басьтӥз 10-тӥ интыез гинэ. Вормись командаос тазьы радъяськизы: Россия, Германия но Южно-Африканской Республика. Ӵуказе капчи атлетикая бызьылон ортчоз Ижын. Со сӥземын луоз Удмурт Республикалэн нуналэзлы но ВЛКСМ-лэн 80 ар тырмонэзлы. Отчы куное лыктоз асьмелэн чемпионмы Анатолий Всеволодович Корепанов но. О. ЗАЛАЗАЕВА. Ваче ки кутскыса Улонмы питран кадь ӝог питырске, солэсь бере медаз кыль шуыса, дышетӥсьлы нуналмысь аслыз но дышетскыны кулэ. Нош пудо бӧрсьы бызьылыса, бакчаын кусказ йӧтымон ужаса, кыӵе книга-газет сярысь малпамед потоз на. Уката ик сое басьтыны коньдон ке ӧвӧл. Озьы, гурт пинал городысь ёзэзлэсь нош ик бере кыле, дышетсконзэ азьланьтон понна солэн луонлыкъёсыз кулэсмо. Ваньзэ тае чакласа, дышетӥсьёслы юрттон вылысь, Башкириысь но Удмуртиысь Калыкез дышетонъя министерствоос Башкириысь удмурт кылъя дышетӥсьёсты люказы Янаул ёросысь Вуж Варяш гуртэ Бускель республикаысь школаосын али дас кык (!) кылъёсын дышето, удмурт кылмылы витьтон куинь интыын сюрес усьтэмын. Татысь удмурт кылъя дышетӥсьёс ужазы туала куронъёсыз кызьы кутыны шугъяськогес, трос юан-веранъёссы кылдыло, малы ке шуоно, ужан профессизылы тупась образованизы 34,4 процентэзлэн гинэ вань. Дышетӥсьёс доры вуыса, удмурт калыклэсь йылолъёссэ утён-эскерон ласянь ӵектонъёссэ вераз тодосчи Галина Аркадьевна Никитина. Со дышетӥсьёслы сьӧраз ваиз тодосчиосын гожтэм трос книгаос. - Башкириысь пиналъёслэн но дышетӥсьёслэн психологизы аспӧртэмлыкогес луэ, - люкаськемъёс азьын пусйиз Удмурт Элькунысь дышетон удысын национальной ужпумъёсты тодон- эскеронъя институтлэн кивалтӥсез Зоя Витальевна Суворова. - Соин ик татын удмурт кыллы но литературалы дышетон но мукетгес ӧретӥ кошкыны кулэ. Пумиськонын сэрттэмын-пертчемын вал дышетон удысысь трос ужпумъёс. Бадӟым вераськон потӥз учебникъёс, программаос пумысен. Татын соос уг тырмо, троссэ выль книгаосты уг но тодо. Калыкез дышетонъя асьме министерствоысь национальной школаосъя учебно-методической отделэн кивалтӥсь Валентина Михайловна Ившина та ужпумъя дышетӥсьёсты куриз чырмытгес луыны, дырыз дыръя Башкортостанысь Калыкез дышетонъя министерствое вазиськыны, заказ сётыны. Соку бюджетысь коньдон но висъяны луоз. Тазьы лад-лад, ог-огдэ валаса, ог-огедлы юрттыны амал утчаса ортчиз пумиськон. Дышетӥсьёслэсь тодон-валанзэс будэтыны, лекция лыдӟыны озьы ик лыктӥзы Удмурт кун университетысь преподавательёс Галина Витальевна Горбушина но Любовь Петровна Федорова. Лыктэмъёслы Вуж Варяш, Каймашабаш, Шудек школаосын возьматӥзы открытой урокъёс. Нылпиослы тема валамон, тунсыко мед луоз шуыса, татысь дышетӥсьёс ужазы кутыны быгато пӧртэм амалъёсты: шудонъёсты, суредъёсты, кылбуръёсты, мадиськонъёсты, лэчыт кылъёсты... Со сяна, та школаосын ӟеч кусып тупатэмын анай-атайёсын, песянай-песятайёсын. Нылпиосын ӵош соос пырисько внеклассной ужъёсы но. Адӟем карымон урокъёс сяна, куноослы возьматӥзы "Быдӟымнал", "Корка пукон" но мукет йылолъёсты, пӧртэм удмурт праздникъёсысь люкетъёсты. Вераны кулэ созэ но: Башкириын ӟеч ужа "Удмурт кенеш" огазеяськонлэн ёзэз. Али но со трос юрттӥз дышетӥсьёсты люкан ласянь. Пумиськонэ удмурт журналъёс, книгаос вайыса вуиз Янаул ёросысь "Удмурт кенеш" ёзлэн тӧроез Юрий Саитович Саитов. Нош быдэс Башкириысь удмурт культурая огъетлэн тӧроез Ренат Биктимирович Галямшин шумпотымон ивор вераз: Башкириын улӥсь вань удмуртъёслы асьсэ кылын газет, пе, дась ини. Со куриз, дышетӥсьёс отчы школаын но гуртын улон-вылон сярысь ас сюлэмшугъёссэс, куронъёссэс мед гожъялозы шуыса. Газет, пе, мед луысал татысь удмуртъёсты огазеясь амал. Ренат Биктимирович дышетӥсьёслы озьы ик вазиськиз школаосын кибашлы, быгатӥсь удмурт нылпиос куспын тросгес пӧртэм конкурсъёс ортчытъяны. Озьы пиналъёслэн мылкыдзы ӝутскысал зэмос удмурт дӥсь, удмурт артистъёс, тодосчиос, писательёс сярысь тодыны. Башкириын котькуд ар ортчытӥське "Башкортостан - мынам доре" нимо сочинениослы конкурс. Отчы пырисько 9-11 классъёсысь вань школаосысь нылпиос. Уфаысь Калыкез дышетонъя министерствоысь валтӥсь специалист Танзиля Закировна Гариева вераз: туэ, пе, тямыс кылын (ӟуч, башкир, удмурт, бигер, мордва, пор, чуваш, украин) 372 сочинение гожтэмын вал. Соос пӧлысь удмурт кылын гожтэмъёсыз пӧлысь ньылез ӟечен лыдъямын. Вормисе потэм нылпиос грамотаосын, нош дышетӥсьёс коньдон премиосын пусъемын. Озьы Башкириын быгатэмзыя юрттыны тыршо вань калыкъёслы. Сое возьматӥзы удмурт дышетӥсьёслы курсъёс но. Соос пайдаё ортчизы: дышетӥсьёс ог-огенызы но ӟечгес тодматскизы, тодон-валан но басьтӥзы, дышетон удысын пуктэм категоризы но будӥз. Жаль, коньдонзы тырмымтэен, вылды, пумиськонэ ӧтемъёс пӧлысь ӝыныез гинэ люкаськиз. Башкир но Удмурт республикаосысь Калыкез дышетонъя министерствоос, ваче ки кутскыса, ӵош тыршо кылдэм югдурез кызьы ке но умоятыны. Вылӥ кивалтӥсьёс но уртче сюлмаськысалзы ке, дышетӥсьлэн туннэ лул-сюлмыз юанъёс, шугъяськонъёс пӧлы выемын-ышемын ӧй луысал. Галина Романова. Нылпиос возьмато "Корка пукон" йылолэз. Каймашабаш школаысь удмурт кылъя но литературая дышетӥсь Земфира Садретдиновна Ибраева асьме калыкмылэсь ортчем улэм-вылэмзэ, лул-чеберетсэ литератураен герӟаса урок нуэ. Туспуктэмъёсыз В. БЕЛОМОРСКИХЛЭН. Крезьгур чеберлыкмес тодытӥсь Со вордскиз, будӥз но быдэ вуиз Иж карысь ӟуч инженерлэн но врачлэн семьяязы. Музыкая ӧнерчи луиз татысь ик училищеын. Быръем удысэзъя вылӥ квалификация басьтӥз Москваысь П. И. Чайковский нимо консерваториын. Москваысь бертэмез бере, элькунмылэн крезьгуръя училищеяз ужаны кутскиз. Ӵапак татысен сое асьсэ доры ӧтизы Удмурт научно-исследовательской институтын ужасьёс. Институтлэсь ӵектэмзэ егит ӧнерчи санэ басьтытэк ӧз кельты. Огнуналэ отчы пыриз но вакчияк шуиз: - Мон Ада (паспортын гожтэмзыя - Ариадна) Николаевна Трухина. Вордӥськи Ижевскын. Дышетски Москваысь консерваториын. Ужасько республиканской музыкальной училищеын. Уже яра. Тӥляд ӧтемдылы но шумпотыса тау карисько. Но - лыкто шуэмелэсь азьло малпаськыны дыр сётэлэ вал. Ада Николаевналэн та малпаськон дырыз быдэс арлэсь но кемагес кыстӥськиз. Кыке но соку ини, Трухина фамилиез Голубкова луыса, вакчияк вераз: - Картэным кенешыса, таӵе малпанэ вуи мон: ӝыны уждунэн ужаны соглаш... Воксё выль удысэ шуак выжыны уггес дӥсьтӥськы. Эскерыны кулэ - пӧрмыто-а, уг-а. - Нош удмурт кылъя кызьы: тодӥськоды-а, уд-а? Музыка - интернациональной марке. Валамон со котькинлы. Нош кылэз тодытэк, текстъёсын ужамды уз луы - меӵ-меӵ учкыса вазиз Фома Кузьмич Ермаков, литературая но фольклоръя секторын ужась. - Ада Николаевна карт луоно муртэныз нырысьсэ адӟиськыкуз кадь ӵыжектӥз но, пӧсяк ӵушвуаськемзэ шӧдытонтэм вылысь, каньылак валэктӥз: - Кӧня ке кыл тодӥсько, но... шонер вераськоды: дышетсконо луоз. Верамез борды мон но итӥськоно кариськи, мед гинэ лыктоз шуыса: - Ма, мынам но пичи-пичи юрттэме луоз... Выль удыссэ Ада Николаевна кутскиз крезьгурлы сӥзем публикациосын но УдНИИ-лэн архивысьтыз рукописьёсын тодматскон вылысен. Йӧн-йӧн библиография дасяз. Пос-нпоц сэрттӥз-пертчиз 30-тӥ арьёслэн пумазы быдэс Европалы тодмо музыкальной фольклористъёслэсъ Е. В. Гиппиуслэсь но З. В. Эвальдлэсь УдНИИ-лэн "Записки" бичетаз 1941-тӥ арын печатлам статьязэс. Таӵе капка пыр ортчемез бере, Ада Николаевна зэмзэ ик вуиз удмурт калык крезьгурлэн но поэзилэн зэмос-зэмос, уно сю но сюрс вакытъёсы но вапумъёсы кыстӥськись гурезё-ӵошкыто бусыязы. Профессиональной музыкальной культуралэн ӧраз пырыны юрттӥзы уг шуы, Ада Николаевна ачиз отчы вуыны юрттытӥз Удмурт театрысь, филармониысь, "Италмасысь" ветеранъёсты. Ваньмынызы нимаз-нимаз вераськылӥз. Ӧйтӧд, кӧня пол ветлӥз меда со Григорий Иванович Титов доры, Кузьма Алексеевич Ложкин доры, "Италмасысь" Рыбаковаен Широбокова Аннаос доры... Ма, ваньзэ вераса, пумаз ик уд вуы! Малыез валамон: архивъёсы культурая материалъёс люкан сярысь дырыз дыръя нокин сюлмаськымтэ. Тани 60-тӥ аръёсыз басьтоно ке, УАССР-лэн Госархиваз инты сётӥллям вылэм Удмуртиысь кык писательлы - Иван Дядюковен Дмитрий Бор-Раменскийлы гинэ. Ӵапак со аръёсы ик Ада Николаевна люказ уно-уно адямиослэн альбомъёсысьтызы фотодокументъёс но. Удмурт кыллэсь шӧмзэ но ӵапак соку ик умойгес но умойгес йӧндырыны ӧдъяз. Кулэ луэмезъя, кырӟан кылбуръёсты солы берыктылӥ мон. Отӥяз ини ачиз умой-умой валаны кутскиз. Удмурт кырӟан Ада Николаевна понна вань дуннезэ ӵош улыны быръем адямиез кадь луиз. Кылылэмды вань, луоз: сыӵе дыръя адями яратоно адямиезлэн кылызлы кызьы дышемзэ ик уг шӧды ни, ас сяменыз вераське-вераське но шуак выже яратоно муртэзлэн вераськон кылыз вылэ. Ӵапак тазьы луэ, шӧдске, кырӟан гурен, кылбурен ужан дыръя но. Удмурт кыллэн но кырӟанлэн ӧръёсазы пыдло пырыны Ада Николаевналы ӟеч-ӟеч юрттӥзы на, малпасько, Можга но Завьял ёросъёсысь Пазял, Вуко-Чудӟи (Шабердино( но мукет гуртъёсы экспедициосын ветлэмъёсыз. Со экспедицос бере мон но кӧнялы ке визьмогес луи, дыр. Та дырозь тазьы малпасько вал: кыӵе зол луысал, вань удмурт калыкез "италмасъёсты" кадь кырӟаны дышетысал ке! Пазялысен, музъем вылэ акшан лэзиськыку, ураме егитъёслэсь кырӟамзэс кылзыны, эктэмзэс, шудэмзэс адӟыны потӥмы но - Ада Николаевна кизэ азям, шлагбаумез сямен, ваменак лэзиз. Шуэ: - Клуб доры егитъёс люкаськиллям ини. Дугдыса кылзом. Одӥг, кык, куинь, ньыль, вить, ку-а-а-ать, сизьым, тя... Тямыс куараен кырӟало... Эх, ансамбльысь, радиоысь артистъёсты, татчы вайыса, кырӟаны дышеты вылэм!.. Профессионалъёс дышетскозы нотаосты тодманы гинэ но дышетымтэослэсь?!. Ох, та Ада Николаевна, лӧптылэ ук, ортчыт лӧптылэ... Тазьы гожъяны кутскиз ке, ачиз гинэ ӧвӧл, быдэс институтэз исан-серекъянлы пӧрмытоз! Та пумысен шӧдскытонтэм вылысь гинэ, огшоры зульыса сямен, Анатолий Васильевич Мамонтовен кенешоно кариськи. - А ведь мон но трос пол малпалляй ини озьы: вот ну вал та ансамблез кыӵе ке гуртэ зэмзэ ик калык манерен, тямыс куараен дышетыны... А ведь милям хормы тужгес троссэ кырӟа ньль куараен... Солэсь балӟымзэ возэз ӝутыны ум вормиське... Уждун бордысь но со потэ. Шуом, шедьтӥськод сыӵе усто, кужмо кырӟасез - уг лыкты... Артист туж усто механизатор мында нокызьы но уз басьты. Вылаз ик, семьязэ толэзен-толэзен адӟылытэк улоз... Калык, тужгес но удмурт калык, кырӟан культураезъя котьку но синмаськымон, адӟем карымон... Туэ, та толэзьлэн 16-тӥ нуналаз, Ада Николаевна Голубкова музучилищеын, УдНИИ-ын ӵош ужам эшъёсыныз, Удмурт университетысь эшъёсыныз но семьяеныз ӵош пусйиз вордскемез дырысен 70 ар тырмемзэ.Кызьы шуо выжыкыл мадисьёс, мон но отын вал... Отысен мон ас поннам валаны но шара вераны турттӥ: мар сётӥз Ада Николаевна Голубкова УдНИИ-ын дыръяз мытэм удысаз - элькунысьтымы музыкальной культураез эскеронын? Уг вера ни радио но телепрограммаосын вераськемъёссэ, уг вера газетъёсын, журналъёсын печатлам статъяоссэ, уг вера музыкальной энциклопедиосын, справочникъёсын но коллективной сборникъёсын печатлам ужъёссэ, Иж карын, Казаньын, Москваын, Таллиннын но мукет городъёсын лыдӟем докладъёссэ, бӧрсьысь бӧрсе пусъё нимаз-нимаз поттэм книгаоссэ гинэ. Соос пӧлын: Пазял гуртысь люкам кырӟанъёс - "Удмуртские народные песни" (Ижевск, 1976; дасямын та чуръёслэн авторенызы ӵош), "Музыкальная культура Советской Удмуртии. 1917 - 1967" (Ижевск, 1978), "Италмас". Государственный ансамбль песни и танца Удмуртской АССР" (Ижевск, 1985), "Сокровище народное. Очерк об удмуртской народной песне" (Ижевск, 1987; дасямын та чуръёслэн авторенызы ӵош). "Сокровище народное" книга сӥземын шор ёзо школаосын, музыкальной школаосын но училищеосын дышетскисьёслы. Авторъёс отын вакчияк возьмато удмурт калык кырӟанлэсь огъя финн-угор выжыысьтыз пушъем-тэлеӟем дырысеныз туннэ нуналозь ортчем сюрессэ, калык нергеосын, сямъёсын но мукет калык кырӟанъёсын ку но кызьы герӟаськыса азинскемзэ. Али УдГУ-ын юнматӥзы республикаысьтымы вылӥ дышетсконниосысь музыкальной факультетъёслы "Удмуртиысь музыкальной культура" курслы программа. Та дырозь таӵе курс нокудаз но вылӥ дышетонниын ӧй вал на. А. Н. Голубковалэн ваньмыз та ужъёсыз республикаысьтымы музыкальной культурая тодон-валанэз ӝутӥзы наукалэн зэмзэ ик туала куронъёсызлы тупась лёгетъёс дорозь. Соос луизы крезьгур чеберлыкмес тодытӥсь юн-юн инъетъёс. Тазьы верамелэсь чик но пӧллем шӧмо вылымтэзэ возьматон понна, тодады вайытэме потэ: 1977-тӥ арын Москваын А. Н. Голубкова азинлыко утиз наукаосъя кандидат луыны дасям "Формирование удмуртской советской музыкальной культуры" диссертацизэ. Искусствоведениея кандидат луэмез берегес ик кылдытӥз со диссертациезъя кылдытӥз со нимаз книга - "Музыкальная культура Советской Удмуртии". Тырмыт инты сётэмын отын Герман Корепановлэн "Наталь" операезлы, Геннадий Корепанов-Камскийлэн "Италмас" балетэзлы, Николай Греховодовлэн "Сюан" комедияя музыкаезлы (пьесаез В. Садовниковлэн), Исай Галкинлэн "Аннок" драмая музыкаезлы (пьесаез И. Гавриловлэн). Та книгаын ик печатламын Д. С. Васильев-Буглайлэн, И. Я. Галкинлэн, Н. А. Голубевлэн, Н. М. Греховодовлэн, Г. А. Корепановлэн, Г. М. Корепанов-Камскийлэн, Н. Е. Шкляевлэн но мукет композиторъёслэн биографиоссы. А. Н. Голубкова тусызъя, выросъёсызъя, вераськон сямъёсызъя-манеръёсызъя 70 аресъем нылкышнолы чик уг тупа на. Ужа но со егитъёс кадь: сэзь, пезьгыт, эсэпсэ юн чакласа но шаплы. Тазьы мед кылдоз солы вуонозэ, ЪЪИ даурез пумитаны но. Пётр ПОЗДЕЕВ, писатель-фольклорист. Журналистъёсын пумиськонъёс "Газпромбанк" бурд улаз кыске Чагыр эстӥськон сётӥсь предприятиос тямыс ар талэсь азьло кылдытӥзы асьсэлэсь банксэс. "Газпромбанк" туннэ пыре странаысь дасо бадӟым банкъёс пӧлы. Банклэн ёзъёсыз (филиалъёсыз) туннэ усьтэмын ни 23 интыын, данакез соос интыяськемын Россилэн уй пал сэрегъёсаз, кытын ужало газ кыскон предприятиос, кылсярысь, Уренгойын, Ямбургын. Нош 1993 арын солэн ёзэз усьтӥськиз Ижевскын но. Соин али кивалтэ Вячеслав Александрович ВАСИЛЬЕВ. Журналистъёслэн пресс-конференциязы егит кивалтӥсь мадиз "Газпромбанклэн" туэ 9 толэзь ӵоже ужамез сярысь. Банклэн уставной фондэз та дыр ӵоже 221 процентлы йылӥз, нош кредит сётъян - 308 процентлы. Огъя вераса, банклэн прибылез 317 миллион манет пала люкаськиз. Коньдон удысын секыт югдур возиськемен, кредитъёс кысконо луэ кунгож сьӧрысь банкъёслэсь но предприятиослэсь, шуиз В. Васильев. Кылсярысь, "Газпромбанклы" 230 миллион доллар кредит висъям США-ысь "Дойче Морган Гринфелл" банк. "Газпромбанклэн" 80 процент пала активъёсыз мыно чагыр эстӥськон удысэз азинтонэ. Туэ секыт югдуре шедьыса но банк одӥг нуналлы но ужзэ ӧз дугдытъя. "Газпромбанклэн" Ижевскысь филиалэз меӵак ужа нимаз адямиослэн вкладъёсынызы но. Август-сентябрь толэзьёсы гинэ со 200 пала коньдоно адямиослэсь счётъёссэс усьтӥз. Туэ укмыс толэзь ӵоже таӵе вкладъёс 1,3 поллы йылӥзы. Кыкетӥ арзэ ини банк кредитъёс висъя уждун тыронъёслы, умой кусыпъёс тупатӥз республикаысьтымы бадӟым предприятиосын. Соос пӧлын - му вӧй поттӥсь предприятиос но полиграфкомбинат. Куашкан калэ вуэм банкъёс, кылсярысь, "ОНЭКСИМ-банк", "Империал банк" ас счётъёссэс татчы выжтӥзы. Т. БАННИКОВА. Валэктэ юрист Сэрегез нуэ адвокат Лилия Шкляева Пенсия понна - судэ? Мыным пенсия уг тыро ни куинь толэзь (мыным гинэ шат?). Со пумысен мынам судэ вазиськеме луэ-а? Луэ ке, кинэ сётоно судэ? В. ЛЕБЕДЕВ. Ку тырыны кутскозы нылпи понна пособие? Оло судэ вазиськоно ни? С. Копылова. Россия Федерацилэн Конституциысьтыз 46-тӥ ёзэт (статья) ялэ: котькудӥзлы оскон (гарантия) сётӥське правооссэ но эрикъёссэ суд пыр утьыны. 1990-тӥ арын 20-тӥ ноябре кутэмын Россия Федерациын пенсиос сярысь закон. Пенсия тупатонэз, тыронэз, ӝегатонэз радъяло калыкез улон-вылонын утёнъя ёзъёс (социальной обеспечениея органъёс). Татын ченгешон пуромыку, Ужпумез эскерыны луэ суд пыр. Пенсия тырыны коньдон висъяське Россия Федерацилэн Пенсиосъя фондысьтыз, отчы со лыктэ уж сётӥсьёслэн взносъёсысьтызы, адямиослэн уждунысьтызы но бюджетысь. Озьы бере, судын кыл кутӥсь (ответчик) луоз Пенсиосъя фондлэн Удмурт люкетэз но пенсия тупатӥсь ёрослэн администрациез. Нылпи понна пособиен герӟаськем ужпумез судын сэрттыку-пертчыку, кыл кутэ районлэн администрациез но Коньдон ужпумъёсъя министерство. Судэ вазиськоно законэн тупатэм куронъёсъя лэсьтэм искен - заявлениен. Вениамин ИВШИН Х Х Х Долкало синъёс, Ныръёс... Ма луэм? Шат му вырӟем? Нош ик вуз басьтон дунъёс Тэтчиллям, пыӵъёс выллем. Тэтчиллям, Ӝутӥськиллям, Суй-пыдъёс нош Лэзькиллям. Выт сярысь Басьты тон тӥрныд, Со понна тыр выт. Со но ке ӧжыт, Кизьнэмлы сёт выт. Уг ке лу тырмыт, Вытэдлы сёт выт Кинлэн кыӵе кылыз Кылыныз вылэм пежъян кадь, Но адӟон кылдэм: Кылыныз со выж выжъям но, Кыл йылыз пульдэм. Кинлэн кыӵе кускыз Отчы, татчы уӵертэ, Кус бордаз йӧтӥськыкуз, Кускыз нинэн керттымтэ. Ӟирыё, лэся, та кус. Вераське Ижевск! Лумбыт Ар талэсь азьло, 4-тӥ шуркынмонэ, Удмурт радио аспӧртэм пусйиз вал Удмурт автономилы 77 ар но Удмурт радиолы 65 ар тырмонэз. 18 часъем радиомарафон ортчытыса, ваньмыз сямен журналистъёс ужазы меӵак эфирын, асьсэлэн удыссыя пӧртэм кивалтӥсьёсты, ӧнерчиосты, тодосчиосты ӧтьылыса, ӵош сэрттыны-пертчыны тыршизы сюлэмшугъяськытӥсь ужпумъёсты. Малы нош одно ик та нуналэ ортчиз радиомарафон? Вордӥськем нуналзэ котькин но аспӧртэмлыко пусйыны тырше ук: ортчемзэ учке-чакла, мар удалтӥз, нош мар палэнэгес кылиз. Соин ӵош ик вуоноез сярысь но малпаське. Удмурт Элькунмес ке басьтоно, асьмеос соку эскериськом, макем быгатыса радъямы улонмес. Радиомарафон - сое "усьтэм эфир" но шуыны луоз. Эфир усьтэмын тӥ понна, гажано радиокылзӥсьёсмы. Тӥ быгатоды пырак студие жингыртыны, сюлэмшугъяськытӥсь юандэс, дэмландэс, малпандэс отын ужась журналистлы яке ӧтем куноослы вераны. Ортчиз ар. Нош ик матэ вуо Удмурт Элькунлэн но Удмурт радиолэн вордӥськем нуналъёссы. Туэ нош ик 4-тӥ шуркынмонэ ортчоз радиомарафон. Журналистъёс эфирын ужалозы ӵукна 6 часысен 22 часозь. Часлы быдэ иворъёс, соосты воштозы кырӟанъёс, но тужгес но бадӟым люкетэз луозы радиоверанъёс - тросэз нош ик меӵак эфирын. Но туэ ваньмыз со луоз "Ингур" радиоын яке 70,4 МГц тулкымъёс вылын. Озьыен, кылзэ милемыз, усьтэ чебер малпанъёстэс, шараялэ умой мылкыддэс, жингыртэ со нуналэ 512-512 телефонъя. Нош ми азьло ик тӥледды тау кариськом юрттэмды, оскемды, мылкыд сётэмды понна. Ватсаса вераломы на: та нуналэ радиолэн ужез радъямын луоз 1999 арысен ужаны чаклам планъя. Удмурт радиоын ужасьёс. Кузьым Селта ёросысь Копки черкогуртысь дас семьяысь нылпиос кузьым басьтӥзы - шуныт дӥськут, пыдкутчан... Сое ваиз ёросысь администрацилэн семьяен ужанъя отделэныз кивалтӥсь Е. П. Телицина республикамылэн нылпи фондысьтыз. Со сяна, вузкаронъя но промышленностья "Радуга" фабрика 2700 манетлы нылпи дӥськут ыстӥз. Мукетыз но пусйымон: самой покчиосызлы сяна, быдэ вуымтэослы но та учыре удалтӥз, малы ке шуоно, бадӟым размерен дӥськут но пыдкутчан та выллем кузьымъёс пӧлын шер пумиськыло. Е. ДОРОФЕЕВА. Кусыпмы матын Национальной библиотекаын кылем арняе ортчиз Франциысь литературалэн арняез. Французъёслэн сямъёссылы, улон манерзылы нимысьтыз выставка сӥземын вал. Выставкае поттэм 500 книгаез библиотекалы кузьмаз Францилэн Россиысь посольствоез. Та книгаос француз но ӟуч кылын печатламын. Ӟуч кылынъёссэ поттыны юрттӥз Францилэн посольствоез, "Пушкин" нимо программаез быдэсъяса. Та программа чакла юрттыны Россиысь издательствоослы француз кылысь ӟуч кылэ берыктэм книгаосты поттыны. Выставка тодматӥз учебникъёсын, атласъёсын, словарьёсын, Парижлы, Сальвадор Дали суредасьлэн улонэзлы сӥзем книгаосын, чеберлыко литератураен. Син шоры яркыт буёлъёсынызы соку ик йӧтӥзы нылпиослы книгаос. Наукаен тунсыкъяськисьёс, вузъёсысь преподавательёс тодматскизы политикалы сӥзем литератураен. Выставка йылпумъяськиз ке но ини, Францилы сӥзем книгаосын тодматскыны быгатоды Национальной библиотекалэн кунсьӧр кылъёсын литературая отделаз. М. Немцова. Шӧкыч Кышноме ыштӥ Чукча Москвае лыктэм но кышнозэ ыштэм. Лыктэ милиционер доры: - Кышноме ыштӥ, однако. - Валэктэ, кыӵе вал со тусын-буйын? - Тусбуйзэ ӧй ышты, кышное ышиз. - Ӧд валалэ! Шуом, кыӵе солэн ымнырыз, синъёсыз, йырсиез? Тани мынам кузпалы ӝужыт, веськрес, кукъёсыз кузесь. Синъёсыз чагыресь... Малпаськонэ усиз чукча. - Мынам кышное лапег, кырыж синмо, пыдъёсыз кырыжесь... Я, ӵок ини соин! Начальник, ойдо тынэсьтыд кышнодэ утчалом. Номыр ӧз воштӥськы 1915 ар. Жандарм большевикез тюрьмае келя. 1917 ар. Большевик жандармез тюрьмае келя. 1937 ар. Большевик но жандарм тюрьмаын пуко. 1998 ар. Губырскем жандарм ульчаетӥ ортче но ачиз кадь ик губырскем большевикез адӟе (таиз аслаз пыжем пирогъёсыныз вузкаре). - Э-хе-хе,- шуэ жандарм.- Неужто атай-эксэймы тонэ пирожкиен вузкарыны уг лэзьы вал? Тӧдьы горячка Кылле Иван зарезь дурын, пӧсь, окыт солы. Малпамтэ шорысь кылэ: - Иван, салкым сур юэмед потэ-а? - Потэ,- шуэ Иван но сурез адӟе. - Иван, нош кулэ-а тыныд зарезь дуре дача? - Кулэ,- вазе Иван. Соку ик зарезь дуре дача ӝутске. - Иван, нош кулэ-а "Мерседес-бенц" машина? - Кулэ. Вуэ машина но. Соку Иван юа: - Нош тон зарни чорыг ӧвӧл-а? - Ӧвӧл, Иван, мон тӧдьы горячка. Кыӵе улон? - Кыӵе улӥськом? - Пароходын кадь: котыр вӧл-вӧл, нош вамыштыны нокытчы, ӧскем потэ, но мынӥськод ини. - Ленин кадь: уг но сюдо, уг но вато. - Картофка кадь: толалтэ ке ӧз сие, тулыс мерттозы. - Индеец кадь: ветлӥсько гольык, вожде ке но вань, нош сиисько пӧлы пум. Одӥг кылын вераса, выжыкылын кадь: азьлане мынэмъя, ялан кышкытгес. Ялон Удмурт Республикаысь Гурт хозяйствоя но сиён-юонъя министерство вуоно арын эстӥськон, минеральной сылалъёс но будосъёсты утёнъя химикатъёс вуттыны мылкыд карисьёс пӧлын конкурс ялэ. Эстӥськон 60 миллион манетлы, минеральной сылалъёсты но будосъёсты утёнъя химикатъёс 20 миллион манетлы вуттонъя конкурсэ пыриськемлэсь азьло мылкыд карисьёс пӧлысь тужгес тупаноосыз быръемын луозы. Квалификационной документъёсты басьтыны вузаны чаклам вузъёслэсь вылӥ дунзэс тодыны, озьы ик конкурсэ азьвыл быръён сярысь юалляськыны луоз Удмурт Республикаысь Гурт хозяйствоя но сиён-юонъя министерствоысь таӵе адресъя: Ижевск город, В. Сивков ульча, 120-тӥ юрт, 64-тӥ, 67-тӥ комнатаос. Телефонъёс: 78-73-32, 78-76-75. Конкурс азьын быръёнэ пыриськон понна: 1. Удмурт Республикаысь Гурт хозяйствоя но сиён-юонъя министерстволэн кассаяз, 40 номеро комнатае, документъёс понна 25 манет тыроно. 2. Конкурсэ пыриськон сярысь заявкадэс туэ 9-тӥ ноябрёзь лэзьыса вуттоно. Гожтэттэс ыстоно почта пыр яке кин ке сьӧры таӵе адресъя: 426057, Ижевск город, В. Сивков ульча, 120-тӥ юрт, 14-тӥ, 67-тӥ комнатаос. 3. Заявкаен конверт вылады гожтоно: "Заявка на участие в предварительном квалификационном отборе на определение государственных поставщиков горюче-смазочных материалов, минеральных удобрений и химических средств защиты растений". Конкурс азьын быръён ортчоз туэ 24-тӥ ноябре 10 часын Удмурт Республикаысь Гурт хозяйствоя но сиён-юонъя министерствоын таӵе адресъя: Ижевск город, В. Сивков ульча, 120-тӥ юрт, 31-тӥ комната. Беромыса вуэм заявкаосты министерство кутыны но, эскерытэк кельтыны но быгатэ. Конкурсэ пыриськыны быгатозы конкурс азьын быръён пыр потэмъёс гинэ. Конкурс ортчоз 1998 арын 8 декабре, 10 часын Удмурт Республикаысь Гурт хозяйствоя но сиён-юонъя министерствоын таӵе адресъя: Ижевск город, В. Сивков ульча, 120-тӥ юрт, 31-тӥ комната. Мултэссэ эн тыре Россия Федерацилэн Президентэзлэн 1998 арын 18 июле 854 номеро юнматэм указэзъя туэ 1-тӥ сентябрьысен музъем понна налоглэн быдӟалаез будэтэмын. Та сярысь газетмы гожъяз вал ини (кылсярысь, 8 сентябре потэм номерын). Но лыдӟисьёсмы куро льготаос пумысен пыр-почгес валэктонъёс сётыны. Та юанэн вазиським Галина Афанасьевна СВЕТЛАКОВАЛЫ - Ижевскысь Индустриальной ёросысь налогъёсъя инспекцилэн валтӥсь инспекторезлы. Россия Федерацилэн законодательствоезъя музъем понна налог тыремлэсь чылкак мозмытэмын: 1) гражданской но Быдӟым Отечественной война пыр потэмъёс. Соослэн "Участник войны" удостоверенизы музъем понна налог тыронын льгота басьтыны луонлык кылдытэ; 2) нырысетӥ но кыкетӥ группаосысь ӧлексыос (инвалидъёс). Соослы льгота сётӥське, " "Удостоверение инвалида Отечественной войны", "Удостоверение инвалида о праве на льготу" документъёс пенсионной удостоверение яке врачебно-трудовой экспертной комиссилэн справкаез вылэ пыкиськыса; 3) Чернобыльын атомной электростанциын авария вакытэ яке мукет атомной объектъёсын радиационной авариос вакытэ радиация улэ сюрем гражданъёс. 1986-1987 аръёсы Чернобыльлэсь шукыръяськонлэсь шимес пытьыоссэ быдтонэ пыриськем муртъёслы но льгота сётӥське. Со сяна, музъем понна налог уг басьтӥськы 1986 арын Чернобыльлы матысь музъемъёсысь (зона отчуждения) поттэм но Чернобыльлы кыдёкынгес музъемъёсысь (зона отселения) мукет интыосы улыны кошкем адямиослэсь. Соослы льгота сётӥське ӧлексыослэн нимысьтыз удостоверениоссыя, Чернобыльысь атомной электростанциын шукыръяськемлэсь пытьыоссэ быдтонэ но 1957 арын "Маяк" производственной объединениын авариез быдтонэ пыриськемъёслэн удостоверениоссыя; 4) ожгарчиос (военнойёс), гражданъёс, кудъёсыз военной службаысь мозмытэмын службаысь кошкыны арессы вуэмен, тазалыксы лябӟемен яке штатэз выль сямен радъямен валче. Берлоосызлы льгота сётӥське, службазы 20 ар яке солэсь кема кыстӥськемын ке. Татчы ик пыро ожгарчиослэн семьяосысьтызы муртъёс но, сюдӥсь- вордӥсьсы (кормилец) службазэ нуыкуз бырыны шеде ке. Сыӵе семьяосысь муртъёслы льгота сётӥське ожгар частьёслэн удостоверениоссыя, военкоматъёслэн справкаоссыя, пенсионной удостоверениосъя. Законъя интыысь аскивалтонъя ёзъёс (органы местного самоуправления) быгато музъем понна налог тырисьёслы ватсаса льготаос сётыны. Та учыре льготалэн быдӟалаез интыысь аскивалтонъя ёзлэн бюджетаз вуись налоглэсь мултэс уг луы. (Музъем понна налоглэн 50 процентэз интыысь аскивалтонъя ёзлы кыле, 20 процентэз Удмуртилэн бюджетаз кошке, 30 процентэз - Россилэн бюджетаз). Ижевскысь Думалэн 1998 арын 5 мартэ кутэм 387 номеро решениезъя музъем понна налог тыронын ватсаса льготаос басьтыны быгато: 1) гражданъёс, кудъёсызлэн огъя доходзы семьяысьтызы адямилы быдэ толэзьскын 2 пичи уждунлэсь трос уг люкаськы. Та вакытлы Россиын толэзьем пичи уждунлэн быдӟалаез 83 манет 49 копейка; 2) арлыдзы вуэмъя пенсие потэмъёс; 3) сюдӥсь-вордӥсьсэс ыштыса пенсие потэмъёс; 4) куинетӥ группаысь ӧлексыос; 5) нылпи вакытазы ӧлексы кылемъёс. Эшшо огпол пусйиськом на: берлоосыз льготаос юнматэмын Ижевскын улӥсьёс понна гинэ. Мукет городъёсын но ёросъёсын улӥсьёслы, ватсаса льготаос сярысь тодон понна, интыосысь администрациосы вазиськоно. "Удмурт Республикалэн 1998 арлы бюджетэз сярысь" Законъя музъем понна налогез организациос люкетэн-люкетэн тыро 15 мартэ, 15 июне, 15 сентябре, 15 ноябре. 15 коньывуонозь кема ӧвӧл ни. Бере эн кыле. Театр Улон - со шудон? Валлян драмая кун театрын бадӟым праздник вал. Куатьтон тямысэтӥзэ театральной сезонзэ со усьтӥз Россия Федерациысь дано артистлэн, Удмурт Элькунысь калык артистлэн Пётр Романовлэн 50 арес тырмонэзлы но Удмурт театрын 25 ар ӵоже ужамезлы сӥзем бенифисэныз. Та дыр ӵоже уно рольёс шудэмын ни. Пӧртэмесь вал соос. Но Петр Михайловичлэн геройёсыз одӥгез но ог-огзылы ӧз кельшылэ. Артист, вань образъёссэ сюлэм пыртӥз поттыса учкисез доры вуттыны тырше. Мар малпа со театрез но ужез сярысь? Улонын коть кин шудэ... Шуом, сюанын яке нуны сюанын. Со ведь ваньмыз шудон. Вань солэн кутсконэз но, вань пумыз но. Ваньмыз со - театр. Соин ик, малпасько, театр ноку уз быры. Зэм, пичи лыдъям калыкъёслы секытгес возьыын асьсэлэсь культуразэс но сямъёссэс. "Бадӟым агайлэн" нош ялан аслэсьтыз сямъёссэ пыӵатэмез потэ. Но удмурт театр ялан возиськыны турттэ. Аслэсьтыз ымнырзэ возе. Озьы ке но аслэсьтым театрме ӧжытак мукетгес адӟем потэ вылэм. Кызьы шуо - театр со нацилэн ымнырыз. Театре лыктыса, котькудӥз адями, - кунгож сьӧрысь-а со, ӧвӧл-а, мед шуоз, тани со кыӵе вылэм зэмос удмурт калык. Соин ик, возьматэм потэ вылэм удмурт калыклэн будэмез, пушъемез сярысь тросгес спектакльёсты. Со понна, мапасько, драматургъёслы нимысьтыз заказъя ужаны кулэ ӧвӧл. Асьсэлы утчаськыны кулэ. Тани басьтом таӵе учырез. Куӟебай Герд, пе, удмурт калыклэн кизилиез. Нош пьеса гожтыны кутскизы вордскемез дырысен 100 ар тырмон араз гинэ. Беромим ми со ужен. Удмурт театрлэн сцена вылаз татчыозь одӥг пьеса но уг мыны. Зэм, дано адями сярысь спектакль пуктыны ноку бер уз луы. Но ведь табань ческыт пӧсь дыръяз. Удмурт театрлы улыны котьку секыт вал. Театрлэн умой-умой пуктэм аслаз юртэз но ӧвӧл. Секыт югдур режиссёръёс ласянь но. Малпамея, артистъёс милям умоесь, дышетскемын, визьмоесь (ваньмыз сярысь уг вераськы). Но соосыз азьлань нуись ӧвӧл. Театрен лябесь адямиос кивалто. Ачим сярысь ке верано, ужатозям спектакльёсын пӧртэм рольёсты шудоно луиз. Соос ваньмыз сюлэм пыртӥ потэмын. Вань рольёсы мынам висёнэ, мынам шумпотонэ. Пичиоссэ но, бадӟымъёссэ но вераса. Асме шудоен лыдъясько Ваньзэ гижысь-пиньысь лэсьтыны тырши. Рольёсме ог-огзылэсь люкеме уг поты: таиз умойгес, таиз начар шуыса. Кудӥз ке удалтӥз, кудӥз, оло, малпамъя ӧз но пӧрмы. Огзэ потэ вераме: Удмурт театрлэн сцена вылаз нырысетӥ роле вал Е. Загребинлэн но С. Смирновлэн "Мынам яратонэ татын" пьесаязы. Отын шудӥ егит председательлэсь Роман Дауровлэсь рользэ. Озьы ик шудӥ И. Гавриловлэн ваньмаз сямен пьесаосаз. Тужгес но вунонтэм кылиз Л. Перевощиковлэн "Улэм потэ" пьесаысьтыз Олёшкалэн ролез. Учкисьёс шуныт пумитазы "Гуртысь маскарчиос" спектакльысь Егорлэсь рользэ. Умой мынӥзы Е. Загребинлэн "Гаян" но "Сюлэм куара" инсценировкаосыз. Уг вуно А. Григорьевлэн "Атас Гири" (Майталов) но "Эмезь кисьмаку" (Африкан) пьесаосыз. Сюлмам кылиз Ф. Абрамовлэн война вакытэ, гуртын тыршем егитъёслы сӥзем "Кык тол но куинь гужем" пьесаез. Дас ньыль аресъем пияшез Мишка Пряслинэз шудӥ отын. Кызьы со война аръёсы нюлэс кораса улӥз. Шудыкум аслэсьтым анайме тодам ваылӥ, син азям пуктӥсько вал солэсь Кекоран чугун сюрес лэсьтонын улэмзэ. Кыӵе секытэн, сием потыса, кынмыса соос бадӟым нюке сюй нуллӥллям. Нэнэелы нош соку 14 арес вылэм. Ачим сярысь ке верано, вордски Алнаш районысь Вылын Асангуртын. 1968 арын дышетскыны мынӥ Москваысь Щукин нимо театральной училищее. Сое йылпумъяса, 25 ар ӵоже ужасько ни удмурт театрын. Нимысьтыз вераме потэ группамы сярысь. Ми Удмуртие вуим 18 кузя. Соос пӧлысь театрын ужало на тямысэз гинэ. Соос ик али валто театрлэсь ужъёссэ но улонзэ. Куд-огез эшъёсмы улонысь но кошкизы ни. Л. Гусев аслэсьтыз сюрессэ шедьтӥз радиоын. В. Кожевников ужа телевидениын. В. Ворончихин Октябрь дворецын художественной кивалтӥсь луэ. Группамы сярысь трос гожтыны луысал. Бертэммы бере театр нимаське вал музыкально- драматической шуыса. Соин ик сцена туж ӵем милемлы ӧз шедьылы. Но со понна трос ужамы гуртъёсын. Шаерамы ветлымтэ интыос ӧз кыле кадь. Али но ми ялан сюрес вылын. Россиысь дано но Удмурт Элькунысь калык артист Петр Романов. В. Камашевлэн туспуктэмез. Улон даур Одӥгъёсыз учёнойёс шуо: анай-атайлэн, тужгес анайлэн, улэм аръёсыз возьмато, кема- а улозы нылпиоссы. Мукетъёсыз тодосчиос та веранэз тэргало. Анай-атайлэн улэм аръёссы, шуо, адямилэсь кӧня улонзэ 60 процентлы гинэ возьмато, 35 процентэз герӟаськемын адямилэн улон манереныз, нош 5 процентэз учёнойёслы тодмотэм мугъёсын. Улонлэн кузьдалаез дауръёс ӵоже ӧз воштӥськы, шуо учёнойёс. Туала 80 аресъем адями, 300 ар талэсь азьло улэмез кадь но, эшшо кӧня ке аръёс ӵоже улоз на, пӧртам висёнъёсты вормыны быгатӥз ке. Азьланяз адями эшшо но кемагес улоз, оскыто учёнойёс, малы ке шуоно, пыктослы (рак), сюлэм, вирсэр висёнъёслы пумит эмъюмъёс малпамын луозы. 100 арозь улӥсьёс шедё лымшор палан но, Сибирьын но. Одӥгъёсыз дугдылытэк кыско, мукетъесыз ӵынэз ик уг чидало, куинетӥосыз сӥль яке будос сиёнэз гинэ сиё. Учёнойёс лыдъяло, адями 150 арозь улыны кулэ шуыса. "Та арескозь кулэм мурт шудтэм яке кужмысь кулонэн кулэм мурт", - шуылоз вал И. М. Мечников, биология наукаосъя учёной. Кема улӥллям: 200 арес - Китайысь Лао-Цзы философ, 185 - Венгриысь Чартен, сомында ик - Китайысь Катахи нимо пиосмурт, 180 - Англиысь министр Йорат, куинь арлы ичигес - солэн кышноез, 170 - Иракысь Хему нимо пиосмурт, 168 - СССР-ысь Шарли Муслимов. Учёнойёс чакламъя: улонлэн кузьдалаез будэ сюпс даур ӵоже одӥг арлы; адямилэн даурез кузёме, солэн лул-сюлмысьтыз ужаны быгатэмезъя; кемагес уло трос кышно возись воргоронъёс; улон интызэс, улон сямзэс вошъясьтэм адямиослэн даурзы кузьгес луэ; егитгес адӟиське пӧсясь мурт. "Здоровье" журналысь. С. ПЕТРОВА. Шӧкыч Сокем бӧрдоно ӧвӧл Сталин кулэм бере, вань тодмо писательёсты Колонной заллэн сцена мышказ люкаллям. Со вакытэ СССР-ысь писательёслэн Союзэнызы кивалтӥз Алексей Сурков. Кузё я возьматске, я нош ик кытчы ке кошке - ЦК-лэсь косонъёссэ кылзыны ветлэ.Берлояз вуыкуз, таӵе ивортон лэсьтӥз: - Эшъёс, сак кылзэлэ! Мон али гинэ отысь! - Ачиз чиньыеныз вӧлдэт шоры возьматӥз. Валамон ини, тӧро кытысь вуиз. Озьыен, маке но тунсыкозэ ивортоз. Сурков шуиз: - Озьы куризы: бӧрдоно, но сокем ӧвӧл. Удмурт шаерысь Национальной музейын усьтӥськиз комсомоллэн вордскемез дырысен тямыстон ар тырмонлы сӥзем адӟытон. Борддоръёсы интыям туспуктэмъёс но аспӧртэм документъёс верало партилэн покчи вынызлэн сӥё-дано сюресэз сярысь. Дано юбилейлы сӥзем ужрадэз усьтонэ ветлӥзы данак арлыдоос, вакытмылэсь пӧсьсэ но, кезьытсэ но ас вылазы чидамъёс. Адӟытонысь суредъёс. Владимир КАМАШЕВЛЭН туспуктэмъёсыз. Комсомоллы - 80 Жаляло Россиын вордскемзэс Комсомоллэн юбилеез азьын "котырес ӝӧк" сьӧрын вераськонъёс ортчизы. Мар шугъяськытэ туала егитъёслэсь но нылпиослэсь огазеяськонъёссэс, кыӵе амалъёсын ужало, мукетъёссэ бордазы кыско соос? Угось комсомолэз ушъяны (идеализировать карыны) кулэ ӧвӧл ке но, сое куашкатэммы бере номыр ӟечезгес кылдытэмын ӧй вал - нылпиос но егитъёс ураме кылизы. Зэм, соосты огазеясь кужым сюриз - йыруж лэсьтӥсьёс туж чаль бордазы кыскизы быдэ вуымтэосты. - Арысь аре йыртэмасьёслэн арлыдзы пиналме - табере 8-9 аресъем нылъёс но мугорзэс вузаса сыло, котькудӥз витетӥез 13 аресъем пинал наркотикез веръямын. Странаямы уллёен ветло беспризорникъёс - ӝоген соосты интыяны нылпи юртъёс уз тырме. Дышетскон арез йылаз-пумаз вуттытэк школаез куштэ 400 пинал. Вань чик дышетскыны ветлымтэосыз но. Та ужпумъёс милициез гинэ сюлмаськытыны кулэ ӧвӧл. Нюръяськоно ваньмызлы - анай-атайёслы, школалы, нылпи огазеяськонъёслы, - шуиз Югдурез утёнъя министерствоын ужась Л. В. Луценко. Россиысь 89 процентэз егитъёс асьсэды лекен лыдъяло, 48-эз - асьсэды асьсэос уг валало. Туж тросэзлэн азьланяз ӟечгес улонлы нокыӵе осконзы ӧвӧл. Куиньмосэз егитъёс Россиын вордскемзы сярысь жаляло. Солы паймонэз ӧвӧл, дыр. Ӝыныез егит муртъёс, ужамзы потыса но, уж уг шедьто. Гуртын со лыдпус 60 процентозь вуэ. Мӧйыос, аръёсын черодын сылыса, куке но квартира басьтылӥзы ик ке, али возьманы но номыре. Егит семьяослы огъяулонниын гинэ но сэрег шедьтыны туж шуг. Сыӵе югдурез чакласа, асьме дорын нырысьсэ кутэмын вал "Удмурт Республикаысь егитъёс сярысь" Закон. Егитъёсын ужанъя кун комитетлэн но Кун Кенешысь наукая, дышетонъя, культурая но егитъёсын ужанъя ялан ужась комиссилэн тыршемез улсын али эскериське "Удмуртиысь егитъёс" программа. Отын чакламын нылпи огазеяськонъёслы юрттон, егитъёслы уж но улон инты сётон, ваньмон дырзэс радъян, быгатонлыкъёссэс азинтон но мукет. Туэ эскеремын луоз на эшшо куать программа. - Куд-огезлэн пыкылэмзы потэ, - шуиз ялан ужась комиссилэн тӧроез А. В. Ерёменко, - закон кутӥськоды, пе, нош уж вылын со уг быдэсъяськы. Со озьы ӧвӧл. Чаклалэ ай нылпиослэсь гужем шутэтсконзэс. Арлы быдэ кӧня шутэтскон лагерьёс ужало. Со сяна, туэ гужем ужазы "Шундыкар", "Иман", "Шундыберган", "Санта-лингва", экологической но мукет республиканской лагерьёс. Отын шутэтскем сяна, нылпиос трос тодон-валан басьтыны, быгатонлыкъёссэс шараяны но азинтыны быгатӥзы. Нош кӧня клубъёс утемын вал. Соосты ӵектылӥзы дунын ужаны. Но адямилэн сиён басьтыны но коньдонэз ӧвӧл ке, дун тырыса, нылпизэ уз эктыты ук! Со сяна, милям куреммыя йылтэмын вал вылӥ дышетсконниез йылпумъяса уж шедьтымтэ егитъёслы пособие, утемын аспирантъёслы но ӟеч дышетскисьёслы кун стипендиос. Малпасько, азьланяз егит семьяослы но кызьы ке но юрттыны быгатом... Егитъёслэн самой бадӟымез азьветлӥсьсы Андрей Иванович Гальцин котьку сямен ик пальпотыса ваньзэс ӟечкылаз комсомоллэн юбилееныз. Нош ветеранъёсты таяз учыре ӧжыт пыкылӥз но: - Али милемды тышкаськиськоды, нош кызьы ужаны уд ӵектӥське - асьтэос но уд тодӥське. Тӥ дыръя ВЛКСМ кун огазеяськон вал - 4-тӥ власть, соин ик дэмен ужаны ӧд шугъяське. Нош али дышетӥсь но, вожатой но, Родиналы кулэ шуыса, кужмысь номыр карыны косыны ум быгатӥське. Соин ик ойдолэ ог-огмес пыкылытэк ужалом, асьмеос одӥг странаын улӥськом. З. ВАХРУШЕВА. Одӥг интылы - укмыс адями Шаерамы бадӟымесь предприятиос ворсаськон калэ вуэмын. Соин валче ужтэк кылемъёслэн лыдзы йылэ. Тужгес секыт югдур кылдэмын Ижевск городын. 1 октябрьлы уже интыянъя службаын 12251 ужтэк кылем мурт пусъемын. Со пӧлысь нылкышноос 7122-ез, ужысьтызы ас мылкыд каремзыя кошкемын 6569-эз, вылӥ но шор ёзо дышетскон заведениосыз йылпумъямъёс 1388 адями, пытсэт сьӧрысь потэмын 233-ез, асьсэды алама воземысьтызы 221-ез азьвыл ужысьтызы уллямын. Улон секыт луэмен, школаез йылпумъямъёс тросэз дышетскыны пырыны уг быгато, нош дышетскемъёсыз - уже интыяськыны. Ужтэк кылемъёслэн службаязы пусъемын 16-17 аресъемъёс - 543, 18-24 аресъемъёс - 2870, 25-29 аресъемъёс - 1103, пенсие потыны дасяськемъёс - 1280 мурт. Азьвыл аръёсы та службаосы юри коньдон басьтэм понна вазиськисьёсыз но вал. Али югдур воштӥськемын. Берлозэ пособие тыризы 1997 арлэн февраль толэзез понна. Бен, 1997 ар понна ӝынызэ но 1998 ар понна 30 поцентсэ сиён-юонэн, дӥсен сётъязы ик ини. Солы шумпотод шат? Пособие чотын сётэм вуззы, огшоры магазинын сярысь, дуногес ке. Ужтэк кылемъёслэн службаязы вазиськисьёс уг кулэсмо. Тужгес но тросэн лыкто "Удмуртнефть", "Ижсталь", "Ижмаш" огазеяськонъёсысь, автозаводысь но куд-ог мукет интыосысь. Та предприятиосысь толэзь куспын службае вазиське ог 50 адями. Мукет сямен вераса, городын одӥг буш ужан интылы укмыс адями усе. В. Андреева. Кинлы шедёз премия? Элькунысьтымы "Удмурт кенеш" огазеяськон удмурт лулчеберетэз узырмытон, тазалыкез юнматон, нылпиосты дышетон, калыклы пайда поттон но огъя удмуртлыкмес ӝутон удысын тужгес но усто тыршись нылъёссэ но пиоссэ арлы быдэ данъя Куӟебай Герд нимо премиен. Туэ ӧри (комиссия) кие вуэмын ини 5 муртъя ӵектон кагазъёс. Тани со нимъёс: Владыкина Галина Михайловна � ӵекто Удмурт национальной театр но Удмурт нылкышно кенеш; Лекомцев Николай Никитьевич (кулэм бераз ини) � "Удмурт кенешлэн" Игра ёзэзлэн правлениез; Ломагин Кирилл Егорович � удмуртъёслэн "Дэмен" огазеяськонзы; Перевощиков Генрих Ксенофонтович � Удмурт Писательёслэн огазеяськонзы но "Кенеш" журнал; Разин Альберт Алексеевич � удмуртъёслэн "Дэмен" огазеяськонзы. Озьы ик та арысен удмурт калыклэсь витьсэ тужгес но синмаськоно муртъёссэ арлы быдэ гожтыса кельтылыны пусъемын Данъян книгае. Та нимъёсъя ӵектонъёс вуымтэ на. Гажано эшъёс, дэмлано муртъёстыя кагазъёстэс лэзьыны быгатоды на. Ӵектонъёстэс возьмаськом 10-тӥ шуркынмонозь (ноябрёзь) "Удмурт кенеше". Дыртэлэ. Куӟебай Герд нимо премия сётонъя комиссия. Шӧкыч Алигес Одоть туклячиме Абдульмень гуртэ келяса ветлӥ. Ма, пурга палъёс ми. Вот шуисько ук, гурт палазы гинэ, значит, вуим, сюлмы ик пыдтышкам лэзькиз. Тани-тани инсьӧр кылчинъёс доры кошкоз. Тӥ но паймиды-а? Вот-вот, мон но со юмоке шеди. Котыр жин-н! вазе, тапыртэм кылӥське. Артэ шал-шал оген юрт гинэ. Оло сарай, не то сьӧрос. Ӵап татысь ик пӧртмо гуръёс но жонгето вылэм. Албасты, соку ик йыре но уз шуккы ведь. Клуб, пе, со - вот мар! Егитъёс культурно шутэтско, значит. Нош мон, лешак басьтон, малпай - сьӧрос. Укыр паке юрт котырысь! М. КОЧЕРГИН. Ӟечкылан Ижевскын улӥсь Александра Степановна Фокиналы тырме 85 арес. Та дыр куспын со котькыӵе улонэз адӟиз: пӧсь сэ но кезьытсэ, трос кисьтылӥз синвузэ. Сӥзиськом ми тыныд, дуно анаймы, котьку капчи мылкыд, лякыт сям, тэшканы быгатонтэм тазалык. Тон бордад, анай, милемлы гур бордын кадь, шуныт но югыт. Юн гажаса нылъёсыд но ӵыжы-выжыосыд. ТАЗАЛЫК Висемедлэсь азьло коньдондэ лыдъя Огез тодмое республикаысьтымы онкологической диспансерын операция лэсьтоно луиз. Операция понна солэсь 1487 манет куризы, со сяна, сьӧраз шприцъёс, эмъюмъёс вайыны косӥзы. Россилэн Конституциез котькудӥзлы гражданинлы дунтэк эмъяськыны право сётэ, нош онкодиспансер - аслаз законъёсызъя улӥсь нимысьтыз государство шат? Кыӵе законъёс солэн улонэныз кивалто? Юанъёслы валэктыны соглаш кариськиз ракез эмъянъя диспансерлэн валтӥсь врачез Сергей Григорьевич ПРИМУЧИКО. - Больницаяды пырыса, син шоры нырысь ик йӧтэ регистратурае читыр-чутыр кыстӥськись черод. Кемалась вал ини сыӵе кузь черодъёсты адӟем... - Онкодиспансер нуналскын 280-300 муртэз эскере. Арскын дорамы 78 сюрс адями вуылэ. Соос пӧлысь 3600-эзлэсь ракен висёнзэ шедьтӥськом. Кызьы адӟиськоды, лыдпусъёс пичиесь ӧвӧл, соин ик черодъёсмы но вань. Озьы ке но, гуртысь вуэмъёсты тыршиськом лыктэм нуналазы ик врач доры пыртылыны, Ижевскын улӥсьёс 1-2 нунал витёно луо. 1990 арын шаерамы 100 сюрс адями пӧлысь 170 мурт ракен висе вал, али - 240 адями. Висисьёслэн лыдзы будэ ке, пыктослэсь кулӥсьёслэн лыдзы - уг. Берло дыръёсы арскын 120-130 мурт улонысь кошке. Озьыен, ракез эмъянын милям вормонъёсмы вань. Онкодиспансер 18 сюрс муртэ учётын возе, соос пӧлысь ӝыныез вить арлэсь кема уло. Ваньмыз со герӟаськемын выль, кужмо эмъюмъёс вуэмен, аппаратураез выльдэмен. - Озьыен, югдур сокем ик урод ӧвӧл... - Озьы шуыны луысал, берлоез кризис милемыз ӧй шуккысал ке. Со дырозь ми эмъюмъёсты куинь толэзьлы азьпал басьтӥськом вал. Нош табере эмъяны номырин: бюджетысь коньдон уг вуы, эмъюмъёслэн дунзы кык поллы йылӥз. Валалэ тӥ: дунтэм медицина ӧвӧл. Ваталэн но шприцлэн, спиртлэн но резина перчаткилэн дунзы вань. Государство калыклы дунтэк эмъяськыны быгатӥськоды шуэ ке, самой со вата но шприц понна коньдон висъяны кулэ, угось больницаослэн асьсэлэн уксёзы ӧвӧл. Пыктослэсь кужымзэ быдтон понна, куинь амал бӧрсьысь бӧрсьы кутӥське: операция, химиятерапия но луч. Та вакытэ химиятерапиез ми ум ортчытӥське, ӝоген пытсаломы радиологической отделениез - ӧвӧл эмъюмъёс. Быдэс дунне цивилизацилэн сюрестӥз азьлане вамышъя, нош асьмеос берлань чигнаськом. Ум вуэ меда 40-тӥ аръёсы, куке ракез пеницилинэн но стрептомицинэн вормыны тыршизы. Ма кароно таӵе югдуре? Эмъюмъёс ӧвӧл шуыса, чик нокинэ эмъяно ӧвӧл яке эмъян понна висисьлэсь коньдон куроно. Ми бырйим кыкетӥзэ сюресэз. Удмуртиысь Тазалыкез утёнъя министерстволэн туэ кутэм 259 номеро решениезъя висисьёс онкодиспансерын эмъяськыны кулэ луись коньдонлэсь 30 процентсэ асьсэос тырозы. Вань эмъяськисьёс куинь группалы люкемын. Нырысетӥ группае пыро соос, кинлэн диагнозэз тодмо - рак. Соослы, шуом, щитовидной железа вылын операция лэсьтыны 400 манет дасяно. Та выллем операция лэсьтӥське ке сыӵе муртъёслы, кудъёсызлэн ракен висёнзы ӝот-ӝот тодмо ӧвӧл, ми куриськом 1249 манет. Таослэсь маин висемзэс пыктосэз вандылэм бере гинэ вераны луэ. Щитовидной железа вылын ракен герӟаськымтэ операция ортчытоно ке, эмъяськисьлэсь 1644 манет кулэ. Дунтэк эмъяськомы нырысетӥ но кыкетӥ группаысь ӧлексыосты, нылпиосты, бырыны шедем ожгарчиослэсь кышнооссэс но анай-атайёссэс, огдырлы ужтэк кылемъёсты - производствоез сюбегатэмен валче отпуске келямъёсты, медицина удысын ужасьёсты - амбулаториын эмъяськыкузы гинэ. Ми доры эмъяськыны вуисьёсты, тужгес гуртысь лыктэмъёсты алэме потэ: онкодиспансерын уноез эскеронъёс (обследованиос) дун тырыса ортчытӥсько. Ёрос больницаысь врачты ми доры ыстӥз ке, вань кулэ луись эскеронъёсты (21 пала) ёрос больницаяды ортче. Озьы коньдондэс но, дырдэс но шыръялоды. - Висисьлэсь коньдон курыса, вань ужпумъёс быдэстэмын луозы шуыса малпаськоды-а? - Ми валаськом: висисез ас коньдонэныз бурмытон югдурез уз вошты. Со сяна, огшоры адями (лушкаськись яке бандит ӧвӧл ке) вань кулэ луись эмъюмъёслэсь дунзэс тырыны улытозяз уз вормы. Собере, кин али сомында уксёзэ тазалыксэ юнматонэ куштоз, угось советской адями та сярысь сюлмаськыны дышемын ӧвӧл, малпаськом, таиз кунлэн ужез. Сыӵе вакытъёс историе кылизы ини. - Озьыен, адями ас кужымезлы гинэ оскыны кулэ на? - Асьмеос, тазалыко муртъёс, ракен висисьёслэн кужымзылы, чиданзылы адӟем карыны кулэ. Соос уло, улонэз но адямиосты син ву потымон, пинез куртчымон яратэменызы. Макем тросгес соос котырысь адямиослы (нылпизылы-а, палатае операция бере вуттэм муртлы-а, юртто, сокем уногес кужым соослы, оло инкуазьлэсь, оло инмарлэсь, берытске. Рак ас йӧназ уг ортчы, сое уг эмъяло будосъёс-турынъёс, туноос-вегинъёс. Сое бурмыто быгатӥсь врачъёс, кужмо эмъюмъёс гинэ, адямилэн улыны ӟырдыт мылкыдыз вань ке. *** Пыктосэз эмъянъя диспансер юрттэт сётэмез понна коньдон курыны ӟеч улон вылысь ӧз кутскы. Эмъяськисьёслэсь вуэм коньдонысь одӥг манетэз но уг мыны врачъёслы уждун тыронэ - ваньмыз кошке эмъюм басьтонэ. Нош буш ке адямилэн кисыез, номырзэ ке вузаны... Шуом, али онкодиспансерын гинэ дунын эмъяло, нош мукет больницаос соослэсь адӟем каризы ке, угось соослэн но югдурзы номырин пӧртэм ӧвӧл. Кин сыӵе больницаосын эмъяськоз на? Ӝыныез висисьёс выжыкылын сямен ас йӧназы "бурмозы". Озьы бере, государстволэн номыр сярысь сюлмаськонэз. Нош кызьы кылдэм югдурез вала Удмуртиысь Тазалыкез утёнъя министерство? "Тазалык" бам та ужпумез одно ик эскероз-пертчоз. О. ВАХИТОВА. Ворсаське удмурт газет Ньылетӥ кварталлы бюджетэз кулэстыса кутэмен, Печтья но иворъёсъя министерство ёрос газетъёсты куриз газетэз поттонэ мынӥсь коньдонэз ӝынылы кулэстыны яке ёросысь юрттэт утчаны. Та дырысен министерство ёрос газетъёслы висъялоз арнялы огпол гинэ потымон коньдон. Ува ёросын арнялы кык пол потэ "Увинская газета" - ӟуч кылын но арнялы одӥг пол "Даур" - удмурт кылын. Соослэн типография азьын тыронъёссы 22 сюрс манет люкаськизы ини. Министерстволэсь куронзэ лыдэ басьтыса, редакциын ужасьёс малпазы, "Даур" газетэз огдырлы ворсаса, "Увинская газеталэсь" кык пол потэмзэ утьыны. "Даурез" басьтӥсьёс ӝоже медаз усе шуыса, соослы ӟуч газет вуоз. П. ЛЮКИН. Тазалык Котькудӥз эмъюм но уг эмъя Медицина азинске. Нуналлы быдэ сямен асьме аптекаосы кун сьӧрысь выль но выль эмъюмъёс вуо. Нуналлы быдэ телевизор пыр со эмъюмъёслэн ӝог йӧнатыны быгатэмзы сярысь реклама сёто. Нош асьмеос, солы оскыса, врач доры ветлытэк ик, дуно эмъюм басьтӥськом но вӧсьмес огдырлы буйгатӥськом. Ӵуказеяз нош ик сое юиськом. Солы дышыса, эмъюмтэк улэммы ик уг луы ни - эмъюм асьменымы кузёяськыны кутске. Грециысь врач-гомеопат Дж. Витулиас "Новая модель здоровья и болезни" книгаяз (со понна солы Нобельлэн премиез сётэмын) гожтэ: адямиос эмъюмъёслэсь одӥг нуналлы ке но куштӥськизы ке, быдэс дуннеын ӝуштэм но кесяськем гинэ кылӥськоз на. Кин ке но лыдъялляз-а меда, кӧня таблетка сииськом асьмеос улытозямы? Малпаны ик кышкыт. Куанер мусмес гинэ жаляны кыле на. Угось пичияк гинэ висьыны ӧдъяськом ке, соку ик эмъюм борды кутскиськом. Вӧсьмес огдырлы зӥбломытӥськом но улон сюрес кузя нош ик бызьыса кошкиськом. Нош мугорамы номыр огшорыез ӧвӧл, ваньмыз герӟаськемын. Кытӥ ке вӧсь луон, висён мугорын воштӥськонъёс ортчо шуыса возьматэ, соизлы яке таизлы ёзлы саклык висъяны косэ. Вӧсь луэмез буйгатыса, асьмеос висёнмес пыдло пыртӥськом но собере вань улытозямы соин курадӟиськом. Со сяна, эмъюмъёсты ӵем юыса, иммунитет лябӟе, аллергия, дисбактериоз луэ, эмъюм висён кутске (куке адямилэн эмъюмъёстэк улэмез уг лу ни). Оло али, эмъюмъёс дуноям бере, адямиос выльысь берытскозы инкуазь пала. Туала вакытэ паськыт вӧлмемын ни эмъюм турынъёсын, венен бышкыса эмъяськон амалъёс но гомеопатия. Нырысьёсыз сярысь тросэз тодо ни ке, гомеопатия али туж вӧлмемын ӧвӧл на. Мар со сыӵе? Вань висёнъёс нерваослэсь, шуо калыкын. Гомеопатия огвакытэ эмъя мугор висёнъёсты но психикаез. Таин гомеопатия мукет эмъяськон амалъёслэсь пӧртэм луэ. Инкуазьын ваньмыз чакласа-мертаса лэсьтэмын. Озьы ик эмъяськонын но: туннэ, кӧлэмед уг лу шуыса, эмъюм юид ке, ӵуказе сотэк умме усьыны эн ик малпа ни. Нош гомеопатия эмъя инкуазьысь басьтэм эмъюмъёсын, минералъёсын. Нокыӵе химия уг кутӥськы. Со сяна, гомеопатия чакла соосты пичиен юыны, соин ик иммунитетлы кышкытлык уг кылды. Но та эмъюмъёсты но ас тодэмъя юыны кулэ ӧвӧл. Туж ӟеч эмъюм но котькудӥзлы уг тупа, соин ик одно кенешоно врачен. Милям центрамы тӥледды учкозы усто врачъёс, ӵектозы тӥледлы гинэ тупась эмъюм. Дунъёс туж пичиесь. Йӧнатӥськом кӧтпуш (гастрит, колит, дисбактериоз, язва), тымус (брохиальной астма, бронхит) но нылкышно висёнъёсты, лякытэн эмъяськом хламидиозэз. Висиськоды ке, бурмыны уг быгатӥськы шуыса, киостэс эн лэзелэ, тодэ: чердэс эмъяны инкуазьлэн амалэз вань. Л. СТЫЦЕНКО, врач-гомеопат. Котькытын шуныт пумитазы Кыштыр гинэ тон вамышъяд азьлань, Ялан тыршид, сюлмаськонэд уно. Котьма шедиз тынад перо улад. Вань улытозяд луид тон гажано. Лякыт, сабырлы, ӵашетонэз тодӥсьтэм воргорон вал пӧламы - Константин Николаевич Михайлов. Тодмо журналист, ужысь ветеран, калыкез дышетон удысысь отличник туннэ пӧламы ӧвӧл ни. Ньыльдонэтӥ нуналзэ уг вамышъя ни сад-бакчаяз, уг вераськы семьяеныз, тодмоосыныз. Туннэ кадь ик тодам лыктэ на Геннадий Иванович Павловен эшъяськемзы. Можга но Иж городъёслэн кусыпъёссы вань гинэ ке но, эшъяськон бугорзы юн вал. Тодам ваисько Константин Николаевичен Можгала командировкае потаммес. Жаляса верано, ваньмыз со ортчемын. Туннэ одӥгзы но улэп ӧвӧл ни. Вылын Юри гуртын будэм Костя Михайлов творческой ужасьёс шоры пичи дырысеныз ик синмаськыса учкылӥз. Пединститутсэ йылпумъяса ужаны интыяськиз Удмурт книгапоттонние. Пумен мургес но мургес тунсыкъяськыны ӧдъяз удмурт писательёслэн творчествоенызы, пӧртэм исследованиос ортчытъяз. Тужгес но матын луиз Михаил Коноваловлэн творчествоез. Солэн будэмез сярысь, пиналъёслы шуыса, нимысьтыз "Шаян Миша" книга гожтӥз. Константин Николаевич трос аръёс ӵоже ужаз на Удмурт телевидениын. Кутскем ужзэ та удысын но азьланьтӥз. Шаерысьтымы пӧртэм районъёсы вуылыкуз тыршиз школаосы пыраны, удмуртлыкмес утьыны. Сабырлы журналистэз котькытын шуныт пумитазы. Отӥяз мон соин ӵош ужай ни нылпиослы "Дась лу!" (али "Ӟечбур!") газетын. Будӥсь кивоштӥсьёслы маза ӧз сётылы. Соос понна ялан кыӵе ке ужрадъёс, конкурсъёс радъялляз. Нош шутэтскыны потӥз "Удмурт дунне" газетысь. Бер сӥзьыл газетлы тырме 80 ар. Эх, кыӵе потэ на вылэм татысен ӵош вераськыса пукеме. Бен, ӵош ужам нуналъёсы али гинэ вал кадь, нош табере тон ӧвӧл ни пӧламы. Вордскем палъёсад, Бадӟым Кибья гурт вӧзысь чебер но шулдыр вырйылын, анай-атаеныд артэ кӧлӥськод. Кыллёно музъемед, мамык выллем, небыт мед луоз сопал дуннеяд. Л. ФЕДОРОВ. Ваньбур поттонэз паськытатон понна 3-5 ноябре культурая "Мир" юртын ортчоз суменак вузкаронъя ярмарка. Ортчыто сое Удмуртиысь Вузкаронъя но юрттэт сётонъя, Гурт хозяйствоя но сиён-юонъя, Промышленностья министерствоос. Ярмарка азьын таӵе ужпумъёс сыло - вузкарисьёслэсь но басьяськисьёслэсь кусыпъёссэс юнматон, вузкаронэз паськытатон, ваньбур поттӥсьёслы ог-огенызы кусыпъёс тупатыны юрттон, выль вузъёсын тодматон но мукет. Ярмаркае пыриськозы шаерысьтымы сиён-юон лэсьтӥсьёс, сӥль, йӧл поттӥсьёс, Удмуртиысь сиён-юонъя корпорация, фермеръёслэн огазеяськонзы. Мукет улосъёсысь сиён-юон поттӥсьёс ӧтемын. 1998 ар понна Удмурт Республикалэсь Кун премиоссэ сётон сярысь Удмурт Республикаысь Кун Кенешлэн Тӧроезлэн Постановлениез Наука но техника удысъя 1998 арлы Кун премиез сётоно "Бактериослэн кизер концентратъёссылэн но соослэсь дасям сиёнъёслэн эмъясь кужымзы" уж бордын тыршем таӵе творческой коллективлы: 1. Трусов Владимир Васильевич - Ижевскысь медициная кун академиысь пуш висёнъёсъя кафедралэн кивалтӥсез, медицина наукаосъя доктор, профессор; 2. Серебренникова Клара Георгиевна - Ижевскысь медициная кун академиысь акушерствоя но гинекологияя кафедралэн кивалтӥсез, медицина наукаосъя доктор, профессор; 3. Колесникова Маргарита Борисовна - Ижевскысь медициная кун академиысь педиатрияя но нылпи инфекциосъя кафедралэн кивалтӥсез, профессор; 4. Филимонов Михаил Алексеевич - Ижевскысь медициная кун академиысь пуш висёнъёсъя кафедраысь доцент, медицина наукаосъя кандидат; 5. Козьминых Юрий Васильевич - Ижевскысь медициная кун академиысь микробиологияя но вирусологияя кафедралэн кивалтӥсез, медицина наукаосъя кандидат, доцент; 6. Рябова Галина Алексеевна - 5 номеро медико-санитарной частьысь валтӥсь врачлэн воштӥсез; 7. Харина Наталья Алексеевна - нырысетӥ республиканской клинической больницаысь валтӥсь врачлэн воштӥсез; 8. Тыцкая Елена Ивановна - Удмурт Республикаысь тазалыкез утёнъя министрлэн воштӥсез; 9. Зорин Алексей Юрьевич - акциосын "Катарсис" пытсам огазеяськонлэн директорезлэн воштӥсез; 10. Малюк Михаил Семенович - Сарапулысь нянь пыжон комбинатлэн директорез. Литература но искусство удысъя 1998 арлы кун премиос сётоно ӧвӧл. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 2 ноябре, � 671-И "Удмурт дуннелы" - 80 Аръёс ортчо, эшъёс уг вуно Удмурт газетмылэн вордскемез дырысен 80 арес тырмиз. Та дыр куспын со ньыль пол нимзэ воштӥз. Но соос пӧлысь мыным пырак азелы тодам кылиз "Советской Удмуртия" газет но отын ӵош ужам эшъёсы. Коммунистической партилэн Балезино райкомаз инструктор луыса ужакум, редакциен люкиськонтэм кусыпмы юнмаз. Партийной, литературая, промышленностья, гурт хозяйствоя но мукет отделъёсы пӧртэм темаослы материалъёс гожъяны кутски. Ижевске вуылкум, редакцие пыратэк кошкеме ӧй вал. Отын ужасьёс асьсэос но одӥгез-кыкез пӧртэмм темаослы материалъёс гожтыны курылӥзы. Соосты мон сюлмысь быдэсъяны тырши. Эшъёсын пумиськылонъёс пӧлысь одӥгез учыр ноку вунонтэм кылиз М. С. Воронцов ивортӥз: - Кылемаз планёркаын кенешыкумы, газетамы печатлам материалъёстэ вылӥ дунъязы. Редактормы Петр Михайлович Яшин соку шуиз: "Корепанов редакциямы вуиз ке, мон доры пыратэк медаз кошкы", Тӥни со ик луиз "Советской Удмуртия" газетлэн редактореныз Петр Михайлович Яшинэн пумиськеммы. Ӟечбуръяськемез бере дыртытэк, зӥбыт куараеныз шуиз: - Мылкыддэс эн сӥятэ, газетэнымы кусыптэс уката юнматэ. Редакторлэн шуныт-небыт кылъёсыз мыным уката кужым ватсазы на. Удмурт радиоын ужам муртлы газетэн кусып тупатыны олокыӵе шугез ӧй вал. Озьы пумен басьтӥськи газетэ гожъян борды но. Ӵапак соку удмурт партийной газетын ужазы С. В. Шкляев, В. И. Иванов, М. Г. Кожевников, М. С. Воронцов, П. Ф. Орлов, С. А. Самсонов, Е.Г. Афогнин, Н. Н. Евсеев, В. К. Шмаков, В. Е. Смирнов, С. А. Перевощиков но мукет эшъёс. Редакциын уно аръёс ӵоже люкам опытсэс соос мыным пыӵатыны тыршизы. Соослэсь ик тӥни дышетски газетын ужаны. Нош 1965 арын монэ "Советской Удмуртия" газетлэн редакцияз ужаны басьтӥзы. 24 ар пала ужай собкорын. Газетмылэсь данзэ ӝутон понна, ӵош ужась эшъёсын республикамылэн уй пал районъёсаз, кытын мон собкор вал, пӧртэм ужрадъёс ортчытъям: лыдӟисьёсын, калыкен пумиськонъёс, уно рейдъёсы потам но мукет. Ваньмыз со юрттылӥз газетэз вӧлдонлы. МалпанъЁсме быдэсъяны юрттылӥзы бадӟым опытэн журналистъёс С. Н. Машков, А. Н. Кузнецов, Е. Г, Афонин, В. Е. Смирнов, П. Е. Бушмакин, М. А. Перевозчиков, Г. В. Романов, В. Н. Ившин, Ф. А. Суворов, К. Е. Ломагин, П. Ф. Орлов, А. П. Шкляев, А. А. Стрижов но мукетъёсыз соку ӵош ужам эшъёс. Нош В. М. Михайлов котькудласянь сюлмаськылӥз, юрттылӥз. Мынэсьтым тыршемме адӟытэк ӧз кыле, кутӥзы СССР-ысь журналистъёслэн радазы, пусйылэмын пӧртэм данъян грамотаосын. Ваньмыз понна сюлмысьтым тау карисько редакцимылэсь редколлегизэ. Ӵош ужам эшъёсы ноку вунонтэм кылизы, но соос уноез улонысь кошкизы ни. Ваньзэс ик сюлмы вӧсь луыса тодам ваисько. Нош кылемезлы ог-огмес вунэтоно ӧвӧл. В. КОРЕПАНОВ. Балезино посёлок. Кизертэм шыд но йӧлпыд Ижысь школаосын нылпиосты сюдонлэн шоро-куспо дуныз 7 манет котыр луэ. Самой начарез меню - одӥг но ӝыныысен вить манетозь. Тужгес но удалтӥз 28 номеро школаын дышетскисьёслы. "Иж" фирма, со ик "Романтика" кафе, сюдэ куинь манетэн гинэ. Школалэн директорез Галина Волкова котьку пӧрасьёсыныз кенеше, классъёсы пыра, анай-атайёсын пумиськылэ. Озьы ке но, 1500 дышетскись пӧлысь куиньмос люкетэз гинэ столовое ветлэ. Югдур пӧртэм ӧвӧл шоркарысьтымы мукет школаосын. Котькытын шӧдӥське коньдонлы ёрмон. В. КРАСНОВА. "Капчи кылбуръёс" кылдытӥсь Удмурт сатиралэн кужмо ӝужан вакытаз, 20-тӥ-30-тӥ аръёсы, лыдӟисьёслы тодмо луиз Пересь Шамардан шуыса гожъясьлэн нимыз. Солэн фельетонъёсыз-"капчи кылбуръёсыз" "Гудыри" но Глазовысь "Ленин сюрес" газетъёсын, дышетскон книгаосын но потылӥзы. Лыдӟисьёс соосты чидатэк витьылӥзы. Кемагес уг пото ке, сюлэмшугъяськыса газетэ гожтэтъёс лэзьылӥзы. Кин бен вал со, Пересь Шамардан кариськыса гожъясь? Петр Михайлович Усков. Туэ 20- тӥ декабре солэн вордскемез дырысеныз 110 ар тырме. Лыдӟисьлы Т. М. Усковлэн нимыз тодмо вал ини музъем ужез умой нуон, пудо, тылобурдо, муш вордон сярысь, ужан тӥрлыкез, машинаосыз умоятон сярысь статьяосыныз, беллетристика амалэн гожтэм "Дэмен уж" но "Шуныт гид" книгаосыныз но А. С. Пушкинлэсь "Капитан ныл" повестьсэ берыктэменыз. П. М. Усков вордӥськиз 1888 арын Зура черкогуртын, пинал дырыз ортчиз та палась ик Кукъямес-Шамардан гуртын. Кык классъем земской школаез пырпотыса, али Киров улосысь Нартас сельскохозяйственной школаын дышетскиз, 1907-тӥ арысен со агроном луиз, куинь ар нюлэс ужпумъя культурной надзиратель вал. Собере Усковез басьто эксэй армие. Нырысетӥ дунне ожлэн тылӝуаз сӧсырмыны шеде. 1918-тӥ арын дораз бертыса, Советъёслэн ужазы пыриське. Тырше агрономын. 1925-тӥ арын, Кедра Митрейлэн дэмламезъя, сое "Гудыри" газетлэн редакцияз ужаны ӧтё. Татын со, трос гожъям сяна, бадӟым валэктон уж нуэ. Удмурт крестьянъёс, кыдёкысь гуртъёсысь вуыса, "Гудыри" газетэ Усков агроном доры пыралозы, соин кенешозы вылэм. "Гудыри" газетын ужакуз ик, П. М. Усков кутскиз "Капчи кылбуръёссэ" гожъяны. "Капчи кылбур" - со удмурт литературалэн аслыз гинэ тупась жанрез. Рифмаям прозаен фельетон. Солэн аспӧртэмлыкез нырысь ик кылбурась героез бордын. Усковлэн героез - лэчыт визьмо, котькытчы вуылӥсь, котьмае адӟись, уродзэ ӵушкась, ӟечсэ данъясь пересь адями. Ваньмыз та улонысь зэмлыкез чакласа, зэмлык понна нюръяськыса кылдытэмын, шуыны луоз. Пересьёс трос адӟемын, мылкыдъёссы юнмамын, оломае но тодо. Соослэн вараськонзы узыр луэ меӵкыт, визьнодо кылъёсын. Со лэчыт веранъёсыз жингырто на рифмаос, аллитерациос но ассонансъёс (куара тупанъёс). Калыклы рифмаё проза тодмо вал мадиськонъёсъя-шудонъёсъя, визькылъёсъя, меӵкытъянъёсъя, выжыкылъёсъя, тунаськон-пелляськон кылъёсъя. Нош Усковлэн "капчи кылбуръёсыз" рифмаосын чеберъям огшоры критика гинэ луысал ке, солэн дуныз но, данэз но ӧй шӧдӥськысал. Пересь Шамарданлэн рифмаё прозаезлэн чеберлыкез но кужымез - серемез поттыны быгатэмез бордын. "Капчи кылбуръёсысь" лыдӟись нырысь ик адӟе Шамарданлэсь жадёнэз тодытэк ветлэмзэ: "Бертӥсько дорам, гажано Иж карам", "Калгись мон, Пересь Шамардан, кытын меда село Выль Мултан?", "Чырткемесь-а, эшъёс, Глаз котырысь удмуртъёс? Али мон карын, Кырыж урамын, кырыж ужъёсты бугыръясько, соос сярысь ик тӥледлы гожъясько". Та выллем кутсконъёсыз бере Шамардан серемес суред пыр возьматэ отысь яке татысь ужъюгдурлэсь умойтэм луэмзэ: "Пуке Смирнов контораяз. Чиньызэ мычем нырпысыяз. Ачиз юэмын, кумышкаен зынмемын. Ӵем со сыӵе луылэ, куддыръя шузимылэ. Револьвереныз шудыны яратэ, ыбылӥське, жугиське, ятэ... Ыбыса ке йӧттылэ, револьвереныз йыре тышкалтэ. Быдэс Сям-Можгалан сое шуо "хулиган". Чагиськыны кышкало, жугемезлы чидало". Йыртэмасьлэн, юисьлэн ассэ урод воземез шараямын. Нош юнме уз луы-а Шамарданлэн ветлэмез? Уз. "Мон уг кышкаськы хулиганъёслэсь, Смирнов кадь кооператоръёслэсь. Райсоюзэ мынӥсько, Смирновлэсь ужзэ эскерыны косӥсько... Револьверзэ но солэсь талано луоз ӝоггес. Тазэ милиция быдэстоз, хулиганлы "салам" сётоз". Фельетонзэ Пересь Шамардан выжыкылъёсын выллем сяме пыӵам амалэн йылпумъя: "Ӟеч луэ, эшъёсы! Али ӧвӧл ни кылбуръёсы. Мукет ужъёсы вань. Зури нылъёс сиё табань. Отчы дыртӥсько. Соин ик гожъямысь дугдӥсько. Перое мынам андан. Ачим -Пересь Шамардан". "Капчи кылбуръёсын" калык веранъёс, шиясь кылъёс, ӵошатонъёс пумтэм: "Мусояськись кунян кык скалэз нонэ, шуо", "Чорыглэн йырыз кие ке кырмиське, бордаз быжыз но кыстӥське", "Пельпумад возь йырдэ, эн вунэты удмурт кылдэ", "Ужаськод ке - сииськод, ужатэк ке улӥськод - толалтэ гырпумдэ йырйиськод" но мукет. Усковлэн чебер малпанъёсыз пӧлысь тужгес но бадӟымез вал музъем вылысь йыркуръяськонэз, ӟичыяськонэз, пӧяськонэз, дасез вылын улон мылкыдъёсыз серекъяса, ӵушкаса быдтон, нюръяськон. Сыӵе ик луэ писательлэн, журналистлэн дасо ар ӵоже кылдытэм литературной героез - Пересь Шамардан. АНАТОЛИЙ УВАРОВ. Вень йылысь шудэз уд шедьты Юон, лушкаськон, нош берло дыре соосын артэ ик юнгес но юнгес вамышъяны ӧдъя ни наркомания. Йырез уйжомытӥсь суреттэк тросэз улыны уг быгато ни. Наркоманъёслэсь лыдзэс ӧжытгес кельтон вылысь, туэ 15 апрельысен улонэ пыӵатыны кутскиз "Наркотикъёс но психикаез тӥясь эмъюмъёс сярысь" Федеральной закон. Та вакытэ кызетӥ даурлэн сьӧд череныз огъя нюръяськон мынэ, лэсьтэм йылпумъянъёс нокинэ уг шумпотто. Наркотикен герӟаськемъёслэн лыдзы арлы быдэ йылэ. Озьы Ижевскысь Октябрь районын 1996 арын наркотикъёсыз но психикаез тӥясь эмъюмъёсыз лушкем воземзы но калык пӧлы вӧлмытэмзы понна 169 адями пытсэт сьӧры келямын, 1997 арын - 241 адями, нош туэ ӝыны ар куспын гинэ 247 адями ини. Валамон, йырез уйжомытӥсь маосын ке трос пол вузкарисьёс но соосты бадӟым партиосын вайылӥсьёс, мукет сямен вераса, "шишкаос", пеймытэ ик ватскыса кылё. 10 мартэ 1998 арын Октябрь районысь суд нокытын ужасьтэм кышномуртэ дас арлы пытсэт сьӧры келяз. Со янгыше уськытэмын, законэз тӥяса, наркотикъёсыз воземысьтыз но лушкем вузамыстыз. Квартиразэ эскерыкуз шедьтэмын 560 грамм куасьтэм марихуана но 6 миллион 250 сюрс манет. Бен, кышномурт ас янгышсэ вала, дас арзэ но пукоз, нош кытын солэн юрттӥсьёсыз? Усыкмытӥсь суретэз калык пӧлын ӝог вӧлмыто. Россиысь МВД-ын ужасьёслэн чакламзыя, одӥг наркоман ар куспын алама сямъёслы дышетыны быгатэ дасысен ньыльдон адямиез. Ӵем дыръя соослэн ки улазы шедё егитъёс. 1996-1998 аръёсы, оперативно-розыскной ужрадъёс ортчытъяку, Октябрь районын гинэ шараямын наркоманъёслэн 56 люкаськон интыоссы. Кылсярысь, кылем арын Школьной урамысь 52-тӥ юртысь одӥгаз квартирае ӵем люкаськыло вылэм наркоманъёс. Ӝегатэмын но пытсэт сьӧры келямын вал куать адями. Россия Федерациысь уголовной кодекслэн 228 ёзэтэз кыл кутэмлэсь мозмытыны быгатэ наркотикъёсыз но психикаез тӥясь эмъюмъёсты, ас мылкыд каремзыя, сётӥсьёсты но соосты шараяны юрттӥсьёсты. Наркотик тужгес но капчиен вӧлме егитъёс пӧлын. Ог-огзылэсь адӟем карыса, 12-16 аресъемъёс "вант" шуонэн бышкисько. Дунтэмезлы синмаськыса, кык, куинь пол ас вылазы эскеро. Отӥяз психикаез сӧрись вещество адямиез чылкак висись каре, йырзэ уйжомытэ. Озьы ик кышкытлык вае на ЛСД. Наркоманъёс сое чечы кадь умой шуо. Зэмзэ ке верано, туж кышкыт маке. Одӥг пол "эшъяськеменыд" ик улонэн люкиськыны быгатод. Ӵем дыръя ЛСД-ез басьтӥсьёс кудӟем тусоес, луо, асьсэды тылобурдо кожало но укноетӥ тэтчо. Наркотик дуно маке. Солы дышыны гинэ капчи, нош куштӥськыны? Вылаз ик, нырысьсэ дэмлалозы дунтэк. Малы? Но кыкетӥ, куинетӥ "дозатэк" тынад улэмед уз луы, нош со туж дуно сылэ. Сое йӧнатыны но луоно. "Наркотикъёс но психикаез сӧрись веществоос сярысь" Законлэн 7-тӥ главаез сое лыдэ басьтэ. Висисьёсты йӧнато, ас мылкыд каремзыя, нош кужмысь косо - судлэн решениезъя бадӟым йыруж лэсьтэмъёсты. Ижевскысь Октябрь районысь егитъёс понна ужа врач-нарколог. Мылкыд карисьёс вазиськыны быгатозы Воткинское шоссе урамысь 142 юртысь наркологической кабинетэ. Ӝоген вуоз 2000-тӥ ар, нош наркоманъёслэн лыдзы уг кулэсмы. Азьланяз но таӵе ик югдур луиз ке, ум-а шеде усыкмемъёслэн дуннеязы? Алама пала вамыш лэсьтэмдылэсь азьло, малпаське, кыӵе сюрес бырйиськоды. Вень йылысь шудэз уд шедьтэ. Д. Иванов, Ижевскысь Октябрь районысь прокуратураысь старший следователь. "Удмурт Республикалэн дано гражданинэз" дано ним сётон сярысь Удмурт Республикаысь Кун Кенешлэн Тӧроезлэн Постановлениез "Удмурт Республикалэн дано гражданинэз" ним сётон сярысь Удмурт Республикаысь Кун Кенешлэн 1995 арын 26 октябре кутэм 111-И номеро постановлениезъя "Удмурт Республикалэн дано гражданинэз" дано ним сётоно: Корепанов Геннадий Михайловичлы - композиторлы, Россия Федерациысь но Удмурт Республикаысь Композиторъёслэн огазеяськонзылэн членэзлы Кудинов Валентин Ивановичлы - акциосын "Удмуртнефть" огазеяськонлэн директоръёсызлэн кенешсылэн членэзлы Поскребышев Олег Алексеевичлы - кылбурчилы, Россия Федерациысь но Удмурт Республикаысь Писательёслэн огазеяськонзылэн членэзлы. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 2 ноябре � 672-И Куноез витиськом Удмурт Республикаысь Кун Кенешлэн Тӧроезлы Александр Волковлы Россия Федерацилэн Президентэзлэн Администрациысьтыз гожтэт вуиз. Отын верамын: Беларусь Республикалэн Президентэзлы Александр Лукашенколы Удмуртие ӧтён гожтэт Россия Федерацилэн Президентэныз умоен лыдъямын. Б. Н. Ельцинлэн сыӵе мылкыдыз сярысь ивор сётэмын Белоруссие. Россиысь Иностранной ужъёсъя министерстволы Удмуртилы кулэезъя юрттэт сётыны косэмын. Александр Лукашенколэн республикаямы лыктонэз сярысь ивортон ватсаса сётэмын луоз на. Удмурт Республикаысь Кун Кенешлэн пресс-службаез. Выль юртъёс - ӝутскозы Вавож ёросын улон юртъёсты лэсьтон арысь аре кулэсме. Предприятиос но гурт хозяйствоос та ужлэсь куштӥськизы, нимаз адямиос гинэ лэсьтӥсько на. Куинь арскын сю куинь семья аслыз корка пуктӥз, али эшшо кык сюэз выль юрт ӝутэ на. Корка лэсьтон понна льготной кредитъёс туэ сётъямысь дугдэмын. Таин валче али лэсьтӥськисьёс пӧлысь дас витез-кызез гинэ корка пырон ортчытыны быгатозы. В. БОГАТЫРЁВА. Комсомол улэп тодэ ваёнъёсын Комсомоллэн 80 ар тырмонэзлы сӥзьыса, Вавож ёросысь унояз гуртъёсын концертъёс ортчизы. Таӵе ужрадлэн кичӧлтӥсьёсыз - ёросысь егитъёсын ужанъя центрысь специалистъёс, соослы юрттӥзы ёрос культура юртын ужасьёс но. Озьы огъя кужымен коллективе люкамын вал - кырӟаны, эктыны, кылбураны быгатӥсь егитъёс быгатонлыкъёссэс сцена вылын волятӥзы, гурт калыклы шумпотон ваизы, комсомоллэсь историзэ тодэ вайытӥзы. Егитъёслэн коллективзылэсь бере ӧз кыльы Вавожысь фольклоръя "Гуждор" ансамбль но. В. БОГАТЫРЁВА. Нянь - музъем ужасьлэн валютаез Ува ёросысь эштосъёслэн кивалтӥсьёссы кенешазы шаермылэсь кеносъёссэ ю тысен тырмытыны кылзэс сётӥзы ке но вал, югдур ӧз воштӥськы. Берло дыре "Победа" эштос гинэ Ижевскысь ю тысь басьтонъя предприятилы 19 тонна сьӧдчабей келяз. Гуртоос фуражлы чаклам ю тысез но государстволы вузаны уг дырто, огкылъёс кутэмын ке но. Вылаз ик, со ю тысь понна тыронъёс но вуэмын ини - 350 тонна эстӥськон. Колхозъёслэн няньзэс вузаны пумит луэмзылэн кык мугез: ю тысь понна дунъёс укыр пичиесь, соин валче гуртоос возьмало, оло, государство дунъёсты будэтоз-а шуыса, яке няньзэс вузаны мукет амалъёс утчало. Со сяна, туэ ю-нянь ӧз удалты. Г. ЗЕМЦОВА. Юалэ - валэктӥськом Кырӟаны туж яратӥськом но... Умоесь, "Кенеш" журналлэн редакцияз ужасьёс! Ми туж курысалмы туэ коньывуон толэзе потэм "Жингырты, удмурт кырӟан" номердэс витьсэ келяны. Лыдӟисьёсты сярысь сюлмаськыса сыӵе сборник поттэмды но удмуртлыкез ӝутонын мылысь-кыдысь ужамды понна бадӟым тау кариськом. Алнаш ёросысь Писэйгурт почта отделениын ужасьёс. "Кенеш" журналэз дасясьёс, ӟечбуресь? Сюлмысьтым курисько калыкмылэн тужгес но яратоно кырӟанъёсыныз номердэс. Мынам сое песянаелы вордскем нуналаз кузьмаме потэ. Со кырӟаны быгатӥсь-яратӥсь кышномурт. Вика Михайлова, Шаркан ёросысь Улӥ Кивары шор ёзо школаысь 3-тӥ классын дышетскись. Чырткемесь, редакциын ужасьёс? Туж яратыса лыдӟисько "Кенеш" журналэз. Коньдонэн секыт луэмен, та арлы гожтӥськытэк кыли вал. Ӧй быгатысалды-а "Жингырты, удмурт кырӟан" номердэс келяны? Коньдон почта пыр ыстысал. Л. Вахрушева, Шаркан ёросысь Гондырвай гуртысь почтальонка. Гажано редакция! Кемалась ик ӧвӧл газетысь гожъямдэс лыдӟи. Соку ик вазиськоно кариськи. Кырӟанъёсын быдэс книгадылы мон туж шумпотысал. Кытысь но кызьы сое басьтыны луоз? Т. Дружинина, Алнаш ёросысь Удмурт Тоймобаш гуртын улӥсь. "Кенеш" журналлэн редакцияз сыӵе куронэн вазиськисьёс, телефон пыр жингыртылӥсьёс, ваче пумиськылыку юась-верасьёс берло дыре туж уно. Соин ик шаерамы но солэн палэназ улӥсь удмуртъёс доры тросэн вӧлмись газет пыр та пумысен рос-прос вераськоно кариським. Гажано эшъёс! Туала вакытэ тужгес но ӵем чузъяськылӥсь удмурт кырӟанъёсынымы бичет (сборник) лыдӟисьёслэн мылкыд каремзыя вордскиз. Нимысьтыз сыӵе номер поттыны курыса вазиськылӥзы. Тодӥськом вал, журналлы гожтӥськымтэос но сыӵе книгаез басьтыны пумит ӧй луысалзы шуыса. Кужыммес но луонлыкмес уже кутыса, тиражзэ кӧнялы ке будэтыны быгатӥм ик. Сое но ми чакламы вуоно арлы "Кенеш" журналэз быръем адямиослы кузьым понна: гожтӥськем квитанциеныз котькудӥз со бичетмес басьтыны быгатэ. Со понна вазиськыны дэмласьком редакциямы (Воткинской шоссе, 10-тӥ км, Печать юрт, 4-тӥ этаж) яке шаерысьтымы Писательёслэн огазеяськоназы (Советской ульча, 1 номеро юрт, 3-тӥ этаж). Нош мар кароно "Кенешез" туэ басьтӥсьтэм адямиослы? Ми тӥледыз ваньдэс туж юн гажаськом, яратӥськом ке но, котькудды доры нимаз-нимаз вутскыны нокызьы но уз кылды. Валалэ: редакцилэн аслаз транспортэз ӧвӧл. Соин ик пӧртэм амалъёс утчано- шедьтоно. Одӥгез сярысь верамы ни: вуоно арлы гожтӥськоды но милесьтым сыӵе кузьыммес басьтоды. Вылӥын сётэм гожтэтъёслэн авторъёссылы но трос мукет вазиськисьёслы ӵектысалмы на мукетсэ но. Таӵе куронэныды мыноно вылэм культура удысын тыршисьёс доры. Со ужез ас вылаз басьтыны одӥгез но пумит ӧй луысал, дыр, быдэстонтэм секыт ӧвӧл кадь. Соку кырӟанъёсын сборникъёсыз келясалмы ёрос администрациысьтыды культура отделэ. Ӵапак таин валче нимысьтыз вазиськем потэ со удысэн кивалтӥсьёслы но. Соос адӟем мед карысалзы Завьяловоысь эшъёссылэсь: ёросын культура понна кыл кутӥсь Н. Н. Колпакова, соку ик коньдон тырыса, сю экземплярзэ басьтӥз, котькуд библиотекаязы, клубазы вӧлмытон вылысь. Пусйытэк уг луы: тиражмы сокем бадӟым ӧвӧл, соин ик дыртӥсьтэмъёслы "Жингырты, удмурт кырӟан", оло, уз но шедьы. Тодады вайытэммы потэ на вуоно ар понна жуналлы гожтӥськон сярысь. Азьло аръёсы сямен ик, "Кенешлы" гожтӥськыны луэ кызьы ке почта пыр, озьы ик редакциын. Быдэс арлы дуныз 24 манет (почта понна тыронъёсты вератэк). Оскеммы потэ, азьланяз но асьмеос кенешыса, ог-огмес валаса улом-вылом, ялан артэ вамышъялом. Петр Сергеев, "Кенеш" журналлэн валтӥсь редакторезлэн воштӥсез. Нуналлэн тодметэз Вашкала календарья 4 ноябре шукко Казанской шуон кезьытъёс. Со нуналэ одно ик куазь зоре. Кин, пе, та нуналэ кузпалъяське, одно ик шудо луэ. Ӵуказе Яковлэн нуналэз. Та нуналэ йӧзор яке куакакеньыр ке усиз, 22 ноябрьысен куазь умой-умой толъёз ни. Югыт нунал туннэ кыстӥськоз 8 час но 59 минут. Та нуналэ... ар талэсь азьло 85 арес тырмиз С. П. Дерендяевлы (1913-1982), химия наукаосъя кандидатлы, Удмуртиысь наука но техника удысысь сӥё-дано ужасьлы. Вордскиз Балезино ёросысь Замятьево гуртын. 75 арес тырмиз Советской Союзлэн Героезлы Ф. А. Пушиналы (1923-1943). Вордскиз Якшур-Бодья ёросысь Иж-Забегалово гуртын. 4 ноябре республикамы пусъе аслэсьтыз нуналзэ. Удмурт Республикалы тырме 78 ар. 4 ноябре 80 ар тырме (1918) Елабугаысь учительской семинариез усьтэм дырысен. Бӧрысь со пӧрмытэмын вал Можгаысь педагогической техникумлы (али Можгаысь педагогической училище). 55 ар талэсь азьло (1943) Ижысь корт ӵыжатон заводын нырысьсэ кисьтэмын 100 тонна андан. Выль но кужмо мартен гур лэсьтэмын вал 11 толэзьскын. 5 ар талэсь азьло (1993) Удмурт Республикалэн нуналаз, Удмурт Республикаысь Верховной Советлэн азьвыл чакламтэ кызетӥ сессияз юнматэмын Удмурт Элькунлэн гимнэз (гурез Г. Корепановлэн но А. Корепановлэн) но флагез (художникез Ю. Лобанов). Музеез дыраз усьтӥзы Яр ёросын улӥсьёс кема возьмазы историко-краеведческой музейзылэсь усьтӥськемзэ. Яр посёлоклы тырмиз ни 60 ар, нош та палтӥ ортчись чугун сюреслы - 100 ар. Музей усьтыны ӵапак дырыз. Таӵе малпанэз зэматон вылысь сюлмаськизы интыысь администрация, ожысь но ужысь ветеранъёслэн кенешсы, шаерысьтымы Национальной музейын ужасьёс. Музейлы директоре юнматэмын Надежда Ушакова. Яр пыртӥ чугун сюрес кыскемын вал Николай ИИ эксэйлэн косэмезъя. Табере экспозициос пӧлысь адӟыны луэ поезд вуон но кошкон сярысь ивортӥсь бадӟым гырлыез, рельса юдэсъёсыз, поездъёслэсь расписанизэс, рабочийёслэсь ужан арбериоссэс но мукетсэ. Юрий Петрович Вершинин, железнодорожникъёслэн династиысьтызы кема ужам адями, музейлы кузьмаз дефектоскопсэ. Ожысь ветеран Иван Михайлович Веретенников дэмлаз 2000 арлы дасяны фронтовикъёслы сӥзем экспозиция, та ёросысь кошкемъёс ньыль сюрсэз бертӥзы, книга гожтымон материал люкаськемын. Татчы ик ватсаны луэ археологияя экспедициысь ваем экспонатъёсыз. Музейын вань этнографияя люкетэз но, со вера уй пал удмуртъёслэн улэмзы сярысь. Аспалъёсызлы сӥзем ужъёссэ музейын адӟытэ егит суредась УдГУ-ысь искусствоосъя факультетын дышетскись Вячеслав Максимов. Яръёс оско, азьланяз усьтэмын луозы на кык тодмо кылбурчилэн Флор Васильевлэн но Михаил Федотовлэн вордскем гуртъёсазы музейёс. А. АПАЕВА. 4 ноябре - республикалэн нуналэз 1920 арын 4 ноябре В. Ленин но М. Калинин гожтӥськизы Калык комиссаръёслэн кенешсылэн (СНК) но Всероссийской центральной исполнительной комитетлэн (ВЦИК) постановленизы вылэ, кытын верамын вал Удмурт (Вотской) автономной область кылдытэм сярысь. Озьы та нунал шаермылэн вордӥськем нуналэз луиз. Республикамылэн кылдэмез, оло, юнме ӧз тупа сӥзьыллэн вакытэзлы? Та дырлы быдэстэмын луылӥзы ни вань бусы ужъёс. Вашкала-вашкала дырысен удмуртъёс нянь будэтылӥзы но пудо-живот вордылӥзы. Озьы ке но, соослэн ужез яратон сямзы сярысь Российской империлы тодмо луиз Иван Грозный эксэйлэн кивалтэмез дыръя гинэ. Ӵапак соку гожъяны-лыдъяны кутскизы Россиын улӥсь калыкъёсты. Озьы тодӥзы удмуртъёс сярысь но. Дас тямысэтӥ дауре Россиля академиысь нырысетӥез член-корреспондент П. Рычков удмуртъёс сярысь паймыса тазьы гожтэм: "Россиын ӧвӧл сыӵе калыкъёс, кудъёсыз, ужась луэменызы, соосын (удмуртъёсын) ӵошатскыны быгатысалзы..." Зэм, татысь музъемъёс начаресь ке но вал, удмуртъёслэсь ӟегзэс кунгож сьӧрын но тодылӥзы. Али но асьме калык ужаны быгатэменыз данъяськыны быгатэ. Конституциын сётэм правоос улонын пумозяз уг ке но быдэсъясько, музъем - самой бадӟым узырлыкмы - калыкмы киын на. Музъем но удмурт калык ог-огзылэсь люконтэм. Номыр шоры учкытэк, гуртоосмы тыршо, азьло сямен ик нянь будэто, пудо вордо. Таяз арын но тани картофка удалтӥз. Зэм, кылем арын сярысь, ю-нянь ӧжытгес басьтэмын, пудо-животлэн но лыдыз синэмын. Но со понна асьме калыкмес гинэ янгыше уськытод шат. Таяз арын кыӵе гинэ кризис шуонъёс ӧз зуркатъялэ асьме улонмес. "Удмурт дунне" газетмы ӟечкыла республикалэн нуналэныз вань калыкмес. Угось ми но данъяськыса шуыны быгатӥськом: газетмы вамышъя тӥледын ӵош. Та нуналъёсы газетмылы тырмиз 80 арес. Газетмес лыдӟисьёслы но, музъем ужасьёслы но сӥзиськом оскон но чидан. Т. БАННИКОВА. "Лушкем" вузэз шараяло Уен-нуналэн сюрес кузя машинаос ширто. Пӧлысьтызы туж ӝог ветлӥсьёсты милициын ужасьёс соку ик синйылто. Сюрес вылын ужало блок-постъёс. Одӥгез интыяськемын Алнашын - бадӟым сюресъёсты эскерись нимаз батальонлэн Алнашысь постэз. - Милям постмы кылдытэмын 1995-тӥ арын 9-тӥ октябре,- шуэ взводлэн командирез Ленар Рашитович Камаев.- Эскероно участокмы - лымшор районъёстӥ кошкись бадӟым сюрес, Пичи Пурга районысен кутскыса, Татарстанозь. Туннэ нуналлы 26 ужасьмы, со пӧлысь ӝыныез Можгаысь ужаны ветлэ. Коллективлэн шоро-куспо арлыдыз 23 арес. Вить ар но солэсь кема ужасьёс пӧламы куинь гинэ. Кожалод, егит постлы трос гинэ тыршоно, кужымзэ кыдатоно, калык радын мед адӟиськозы шуыса. Нош пияшъёс ас ужзэс нырысетӥ нуналысен ик рос-прос быдэсъяны кутскизы. Малпалод, татысь егитъёс та постын ик ужаны вордскиллям шуыса. Юнме-а мынӥсь-ветлӥсь шофёръёслэсь таӵе веранэз ӵемысь кылоно: "Алнашысь пост таможня выллем. Со пыр мултэс веньдэ гинэ но поттыны уд дӥсьты..." Алигес сюресъёс огдырлы кортнамын вал. Эскерись органъёслы нимысьтыз постановлениен бадӟымесь луонлыкъёс сётэмын вал республикамылэн палэназ мынӥсь транспортэз пыр-поч эскерон вылысь. Шаерысьтымы поттыны лэземын ӧй вал уно пумо сиён-юонъёсты но пӧртэм вузъёсты. Сюрес возьмасьёс ӝегатӥзы Татарстанэ, Москвае но Санкт-Петербурге поттыны лэзьымтэ узырлыкез. Со вакыт ик ортчиз на "Караван-Авто" операция. Алнашъёс ньыль КамАЗ-эз ӝегатӥзы. Машина кузёослэн вуз нуон сярысь одӥг но документсы вылымтэ. Озьы Удмуртиысь "гылӟысал" куинь машина тыр цветной металл но одӥг машина кудӟытӥсь юон. Постын ужасьёсын пӧртэм учыръёс луыло. Кин ке соослы лушкем коньдон мычыны тырше, кин ке асьсэ "пӧрам" документъёсызлы оскиське. Юн сямо пияшъёсты озьы гинэ уд пӧя. Ньыль ар ужатозязы, соос шараязы ни йырвандӥсьёсты, кыл кутонлэсь ватскем муртъёсты, наркотикен сьӧлыкасьёсты... Туэ, кылсярысь, Вуж Утчан гуртын улӥсьёслэн бакчаосысьтызы мак лушкакузы, ньыль мурт кырмемын. - Арлы быдэ машинаен ворттылӥсьёслэн лыдзы йылэ,- веранзэ азьланьтэ Ленар Рашитович.- Соин ӵош йылэ сюрес вылын кылдэм шудтэм учыръёслэн лыдзы. Гуртъёстӥ рейдъёс ортчытъяку, трос гинэ пумиськыло шӧмаськем водительёс. Сыӵе дыръя кудӟем водительёслы паськыт сюрес но сюбег потэ. Огдыре юэм йырын ворттылӥсь шофёръёс ӧжытгес вал ни кадь. Соослэсь соку ик правозэс талаллязы яке законэз тӥямзылы балл "кузьмаллязы". Тужгес ик водительёс кышкаллязы 15 балл люкамлэсь. Нош али югдур мукетгес, ваньмыз пыкъяське коньдон борды. Талам правозэс лякытэн басьтыны быгато. Ма, собере эскероно участокъёсмы но кузьгес ик. Ӵем дыръя шофёръёс "лушкем" вуззэс Алнаш постлэн палэнтӥз нуыны тыршо, Агрызэтӥ Менделеевске потыса. Но "лушкем" сюресэз нуналлы быдэ кортнаны выриськом. Алнаш постысь милиционеръёс юн эшъясько можгаосын. Отысь уголовной розыскын ужасьёсын ӵош кырмыны быгатӥзы сюрес вылын йыртэмасьёслэсь бадӟым группазэс. Лымшор район Удмуртилэн капкаез луэ бере, отӥ мынӥсь-ветлӥсьёс но трос гинэ. Татын ужасьёслэн малпамзыя, оло, уголовной розыскын но таможняын ужасьёс чотын ыбеслэсь кужымзэ юнматыны луысал. Озьы ӧжытгес луысалзы, дыр, йыртэмасьёс но шӧртчи ворттылӥсьёс. Нош туннэ, куазьлэн сульпаськемез шоры учкытэк, соос ас ужзэс ӟеч быдэсъяло. Алнаш пост вамен машинаос озьы гинэ уг ширто. В. КУТУЗОВА. Улон азьлань луоз Милям Кияса ёросамы уно гинэ удмуртъёс уло. Удмурт передачаосты ми туж шумпотыса учкиськом телевизор пыр, кылзӥськом радио пыр. Тужгес но кельшо милемлы Удмурт телевиденилэн "Мылысь-кыдысь", "Такъян", "Шаер" но мукет передачаосыз. Макем тунсыко адямиосын пумиськиськом ми телевидениын ужасьёсын ӵош. Вань ук асьмелэн но данъяськымон адямиосмы. Та передачаосты учкем бере малпан кылдэ, озьыен, удмуртлыкмы уз быры, улон азьлань луоз. Ушъянэн ӵош ӵектонмы но вань: гуртын но данъяськымон адямиос вань, соосты но вунэтыны уг яра вылэм. Кияса ёросысь "Удмурт кенешлэн" ёзэтэзлэн нимыныз "Удмурт дунне" газет пыр туж бадӟым тау кареммес вераськом Удмурт телевидениын но радиоын ужасьёслы. Азьланяз эшшо но тунсыкоесь передачаосынызы шумпоттыны мед быгатоды удмурт калыкез. М. МОРЯКОВА. Кияса ёрос, Вуж Салья гурт. Удмурт Республикаын улӥсьёс! Элькунмылэн улоназ 4-тӥ ноябрь аспӧртэмлыко инты басьтэ. Сизьымдон тямыс ар талэсь азьло Всероссийской Центральной Исполнительной Комитетлэн но Россия Федерациысь Калык Комиссаръёслэн Кенешсылэн Декретэнызы Удмуртия автономной область луиз, нош 1934 арын автономной республикалы пӧрмиз. Озьы шаермы выль сюрес кузя азинскыны ӧдъяз. Удмуртиысь уно поколениослэн асьсэды жалятэк ужаменызы но тыршеменызы та аръёс ӵоже бадӟымесь азинсконъёс басьтэмын наука, техника, калыкез дышетон удысъёсын. Озьы ӝутскизы чебересь улон но ужан юртъёс, юнмаз гуртъёсын улӥсьёслэн удыссы, кужмояз наука удысын ужасьёслэн вормонъёссы. Озьы луонлык кылдӥз калыклы кулэ луись умоесь вузъёс поттыны, быдэс дунне синмаське асьме дорын лэсьтэм ож тӥрлыклы. Зэм, ма ватонэз, туннэ Удмуртилы но, быдэс Россилы сямен ик, капчи ӧвӧл. Элькунамы улӥсьёслы та пумысен кӧтӝожмес вераса но азьланезлы юн оскыса, Удмуртиысь Кун Кенеш но Правительство иворто, ми та шуг-секытысь потон понна вань луонозэ ӝоггес лэсьтыны тыршом шуыса. Оскиськом: та шуг-секытъёс огдырлы гинэ кылдэмын, соосты вормыны быгатом. Гажано эшъёс! Ӟечкыласьком тӥледыз Республикалэн нуналэныз - удмурт кунлыклы 78 ар тырмемен! Азьланезлы юн оскон но ӟеч тыршон гинэ трос калыкъем Удмурт Республикамес - асьмелэсь огъя юртмес - юрттозы узыргес но шунытгес карыны. Праздникен! Удмурт Республикаысь Кун Кенеш Удмурт Республикаысь Правительство Удмурт Республикалэн Данъян пулаз пыртон сярысь Удмурт Республикаысь Кун Кенешлэн Президиумезлэн но Правительстволэн Постановленизы 1998 арын ужазы вылӥ азинсконъёссы понна но Республикалэсь нуналзэ пусйыса, Удмурт Республикаысь Кун Кенешлэн Президиумез но Правительство пукто: Удмурт Республикалэн Данъян пулаз пыртоно: Ижевскысь пассажирской автотранспортъя производственной объединенилэн 3 номеро бригадаысьтыз 14 номеро автобус маршрутын ужась коллективез, бригадирез - А. М. Новиков; Ижевскысь ляб кылӥсьёслэн нимысьтыз школа-интернатлэсь коллективзэ, директорез - Э. Г. Белослудцева; "Удмуртэнерго" акционер огазеяськонлэсь Ижевскысь 2-тӥ ТЭЦ-ысьтыз коллективез, директорез - В. А. Страхов; Ижевскысь "Совхоз "Декоративно-цветочной культуры" муниципальной предприятиысь коллективез, кивалтӥсез - М. Г. Аухадеев; "Удмуртнефть" акционер огазеяськонысь ужась коллективез, генеральной кивалтӥсез - Е. И. Богомольный; "Воткинский завод" кун производственной огазеяськонлэсь коллективзэ, генеральной директорез - В. Г. Толмачев; Воткинск городысь но Воткинск ёросысь пуш ужъёсъя управленилэн уголовной розыскъя отделаз ужась коллективез, отделлэн кивалтӥсез - Г. М. Стрелков; "Чепецкое управление строительства" строительно-промышленной акционер огазеяськонысь коллективез, генеральной директорез - В. Ю. Перешин; Сарапулысь психоневрологической интернатысь коллективез, директорез - Н. З. Скобелев; Воткинск ёросысь "Пихтовка" совхозлэн Пихтовка фермаысьтыз коллективез, кивалтӥсез - Н. А. Лопатина; Глазовысь лесхозлэсь коллективзэ, директорез - М. В. Вепрев; Можга ёросысь Бадӟым Уча шор ёзо школалэсь коллективзэ, директорез - П. Т. Романова; Юкаменск ёросысь "Октябрьский" культура юртысь кырӟанъя но эктонъя "Тюрагай" ансамбльлэсь коллективзэ, чеберлыкъя кивалтӥсез - В. А. Шкляев; Абросимов Геннадий Егоровичез - Россиысь ляб адӟисьёслэн огазеяськонзылэн Сарапулысь "Радиотехника" учебно-производственной предприятиезлэсь генеральной директорзэ; Бабкин Иван Ивановичез - Можга ёросысь "Красный Октябрь" колхозлэсь председательзэ; Бабурин Николай Степановичез - элькунысьтымы туберкулёзэн нюръяськонъя "Юськи" нылпи санаторийлэсь валтӥсь врачсэ (Пичи Пурга ёрос); Батуев Леонид Ивановичез - "Уваавтотранс" кун предприятиысь валтӥсь мастерез; Баталов Петр Павловичез - "Игринский леспромхоз" акционер огазеяськонысь слесарь-ремонтникез; Бочкарева Елизавета Ивановнаез - Каракулино ёросысь Чеганда селоысь магазинлэсь кивалтӥсьсэ; Булдакова Нэля Михайловнаез - "Удмуртнефть" акционер огазеяськонысь "Ижевскнефть" управлениысьтыз нефть но газ поттонъя операторез; Вахрушева Лидия Николаевнаез - Завьял ёросысь ожысь но ужысь ветеранъёслэн Советсылэсь кивалтӥсьсэ; Ведерников Николай Викторовичез - "Ижавиа" кун авиапредприятиысь авиатехник- бригадирез; Вьюжанин Василий Михайловичез - лэсьтӥськонъя 17 номеро управленилэн лэсьтӥськонъя 3-тӥ управлениысьтыз плотникез (Ижевск город); Галимуллин Валентин Хакимзяновичез - "Удмуртэнерго" акционер огазеяськонлэн "Глазовские электрические сети" предприятиезлэсь директорзэ; Гараев Ильсур Миниахметовичез - Завьял ёросысь "Восточный" совхозлэсь директорзэ; Данилов Виктор Леонидовичез - "Кезский льнозавод" муниципальной унитарной предприятилэсь директорзэ; Жебровский Валентин Витальевичез - "Буммаш" акционер огазеяськонлэсь генеральной директорзэ; Иванова Нина Васильевнаез - Вавож ёросысь Мичурин нимо кооперативлэн Зямбай фермаезлэсь кивалтӥсьсэ; Иванова Раиса Андреевнаез - Шаркан ёросысь "Восход" колхозысь скал кыскисез; Исакова Анна Михайловнаез - Кизнер ёросысь связья Бемыж отделениезлэсь кивалтӥсьсэ; Кожевников Вячеслав Сергеевичез - Игра ёросысь "Чутырское" предприятилэн витетӥ отделениеныз управляющийзэ; Кондратьев Виктор Геннадьевичез - "Ижевский электромеханический завод" кун предприятилэн 133 номеро цехысьтыз регулировщикез; Короткова Надежда Александровнаез - Сарапул ёросысь Сигаево черкогуртысь "Ромашка" нылпи садысь методистэз; Красноперова Маргарита Павловнаез - Селта райполэн (Селта село) "Продукты" магазинэзлэсь директорзэ; Крохина Светлана Петровнаез - Ижевскысь Ленинской ёросысь внутренней ужъёсъя отделлэн следствиосъя отделысьтыз старшой следователез; Лаптев Кирилл Михайловичез - Алнаш ёросысь "Родина" колхозысь механизаторез; Марченко Анатолий Владимировичез - "Удмуртторф" огазеяськонысь кун предприятилэсь генеральной директорзэ; Мезенцев Александр Ивановичез - "Удмурттелеком" акционер огазеяськонлэн Можгаысь электросвязья огазеям узелэзлэн участокезлэсь начальниксэ; Мохначев Владимир Александровичез - Можгаысь "Свет" акционер огазеяськонлэсь генеральной директорзэ; Мухаметшин Ахат Хасановичез - Ижевскысь пассажирской автотранспортъя 1 номеро предприятиысьтыз водителез; Нелюбин Валерий Николаевичез - лэсьтӥськонъя 18 номеро управлениысьтыз производственной предприятиосъя комбинатысьтыз столярез; Никитин Андрей Львовичез - Глазовысь технической колледжлэсь директорзэ; Николенко Вера Гумаровнаез - "Строитель" акционер огазеяськонысь каменщицаез (Якшур-Бодья ёрос); Новиков Сергей Владимировичез - "Ижсталь" акционер огазеяськонысь андан пӧзьтӥсез; Обухов Дмитрий Владимировичез - Грахово ёросысь "Родина" колхозысь механизаторез; Петрова Лидия Антоновнаез - Алнаш нылпи юртысь воспитателез; Подгорных Анатолий Викуловичез - "Удмуртавтодор" кун унитарной предприятилэн сюрес лэсьтонъя Балезино управлениысьтыз автогрейдерлэсь машинистсэ; Поздеев Геннадий Антоновичез - Глазовысь В. Г. Короленко нимо кун педагогической институтлэсь ректорзэ; Поляков Валерий Геннадьевичез - "Глазовское автотранспортное предприятие" кун предприятиысь водителез; Пономарев Леонид Романовичез - Красногорск ёросысь Калинин нимо эштосысь механизаторез; Протопопова Люция Васильевнаез - Дэбес ёросысь Такагурт библиотекаысь библиотекарез; Рыбаков Виталий Романовичез - Сюмси ёросысь "Лялино" крестьян хозяйствоослэн огазеяськонзылэсь кивалтӥсьсэ; Савина Галина Валентиновнаез - Камбаркаысь ёрос центральной больницаысь валтӥсь врачез; Степанов Сергей Никитовичез - Яган лесхозлэсь директорзэ (Пичи Пурга ёрос); Сторожева Нина Николаевнаез - "Детское больничное объединение" муниципальной лечебно-профилактической учреждениысь валтӥсь врачез (Воткинск город); Тараканов Иван Васильевичез - Удмурт кун университетысь кафедралэсь кивалтӥсьсэ; Тронина Галина Викторовнаез - "Играмолоко" акционер огазеяськонысь валтӥсь инженерез; Уткин Николай Николаевичез - крезьгурчиез, Киясовоысь искусствоосъя школалэсь директорзэ; Ушкова Ольга Александровнаез - Ижевскысь 4 номеро профессиональной училищеысь дышетон ужъя директорлэсь воштӥсьсэ; Федотов Лев Васильевичез - Яр ёросысь "Ворцинское" эштослэсь директорзэ; Харина Людмила Васильевнаез - Сарапул городысь вузкаронъя 48 номеро предприятилэсь директорзэ; Чуракова Лидия Константиновнаез - "Сактон" акционер огазеяськонысь дӥсь вандонъя участокысь мастерез (Ижевск город); Шаров Виктор Николаевичез - Горький чугун сюреслэн Ижевск отделениысьтыз ремонтно-технологической участокысьтыз старшой электромеханикез. Удмурт Республикаысь Кун Кенешлэн Тӧроезлэн нырысетӥ воштӥсез В. И. Агашин. Удмурт Республикаысь Правительстволэн Тӧроез П. Н. Вершинин. Ижевск город, 1998 арын 26 октябре � 592/967 Огез шумпоттэ, мукетыз ӝожмытэ Ува ёросын та праздник нуналъёс азьын кык выль ивор вань. Одӥгез умой - со шумпоттэ. Посёлокын Ува шур вамен усьтӥськиз кемалась витем выж. Кортлэсь но бетонлэсь ӝутэм макелы тудву но, бадӟым машинаос но кышкыт ӧвӧл. Ӧр сопала пыдын но транспортэн ветлӥсьёс лӧптэмын - уго уно аръёс ӵоже соос вунэтэм шормуӵын кадь улӥзы, дэри куазен отчы пыраны-потаны ӧз луылы. Кыкетӥез ивор ёросысь калыклэсь мылкыдзэ воксё сӥятӥз. Коньдон тырмымтэен, Уваысь автотранспортной предприятилэн кивалтӥсьёсыз бензинэн ужась вань автобусъёсты азбаразы пуктӥзы, шофёръёсты кык арнялы, дун тырытэк, отпуске келязы. Дугдытэмын райцентретӥ ветлӥсь транспорт но. Маршрутъёсы потало на Германиысь вуттэм автобусъёс гинэ - таосыз уго дизтопливоен ужало. Кӧня нуналлы тырмоз солярка, тодмо ӧвӧл. Озьы ик шуг вераны, шедёз меда АТП-лы юрттӥсь. Ёрос администрация но та вакытэ чалмыт улэ. П. ЛЮКИН. Эмезьгуртэ уг лоба самолёт Самолёт гинэ ӧвӧл, зоро куазен машина питранъёс но та пала сюрес пытьыез ышто. Соиз понна чик уг кӧберало Эмезьгуртын улӥсьёс. Юн мылкыдо адямиос татын. Ас мылкыд каремзыя лыктӥзы бырем гуртэз улӟытыны. Суйёссэс пужалляса басьтӥськизы бадӟым уж борды. Куӟебай Гердлэн тати лёгам сюресъёсыз, дано удмурт пилэн та омырен шокамез бурдъя, кужым сётэ Вавож районысь Гурезь-Пудга школалэсь директорзэ Анатолий Егоровез но солэсь егит эшъёссэ. Кузьма агай сярысь ик малпанъёс вырӟытӥзы соосты азьвыл улэм интыосысьтызы. Нырысь вамыш лэсьтэмын - ог дасо коркан ӝытъёсы тылъёс пишто ни. Нош вазь ӵукъёсы чус омырез вандыса кузёоссэс сайкато йӧнояськись атасъёс. Гурт улӟиз. Анатолий Петров (снимок вылын) дор котырысьтыз мае сое тупатыса-лэсьтыса Покчи Вукоысь фермае вамыштыны дасяське. Улонэзлы со уг ӝожтӥськы. Ас киыныз сое дуре. Улэ эрико, возиське йӧно. Секыт вапумъёс сое уз погыртэ, мырко-гопо сюресъёс уз канжатэ. Ужась воргорон секытлэсь уг кышка. Оске, кезьыт тол бере вуоз вожектӥсь тулыс. Эмезьгуртын выльысь тӧдь сяськаосын пурӟозы улмопуос, чияпуос, кудъёссэ та палъёсы выжыятӥз вал Куӟебай Герд. Г. ЮСАЕВ. Сильтӧл лопыръяз Кылем кӧс нуналэ, нуназе шорын Удмурт Республикаысь Правительстволэн Граждан оборона ужпумъёсъя но кышкыт учыръёслэсь утиськонъя комитетэ телефонограмма вуиз: Удмуртия пала матэктэ кужмо тӧл, солэн ӝоглыкез секундскын 25-27 метр пала. Соку ик та сярысь ивортон сётэмын вал радио пыр "Удмуртэнерго" ӝегатскытэк ужрадъёс кутӥз. Бадӟым электрокужым сётонлэсь дугдытэмын 107 юбо, 3 сюрс пала трансформаторъёс, вылӥ ток сётӥсь 700 подстанция. Кужмо тӧл тужгес но эрказъяськиз Татарстанын но Башкортостанын. Солэн шуккетэз шӧдӥськиз Каракулино, Пичи Пурга, Сарапул но Завьялово ёросъёсын. Нырысь лыдпусъёсъя, асьме дорын быремъёс ӧвӧл. Куд-ог интыосын тӧл погыртӥз 61 юбоез, 24 интыосын электроезъёс чигтэмын. Сильтӧллэсь бервылъёссэ быдтонэ пыриськиз 200 муртлэсь нимысьтыз бригада. Тупатъян ужъёс азьланьтӥсько на. Н. ЛЯЛИН. Ува палан туннэ Тӧро но спортэз гажа Ува ёросысь администрацилэн тӧроезлы Сергей Григорьевич Иконниковлы алигес сётэмын дано ним - "Удмурт Элькунысь физической культурая сӥё-дано ужась". Спорт сое сьӧраз валтӥз пинал дырысеныз ик, нырысетӥ разрядэз вань футболэн шудонъя, яратэ мукет удысъёсты но. Ёросын спортэз азинтон ласянь трос лэсьтӥз, комсомоллэн райкоменыз кивалтыкуз но партилэн райкомаз ужакуз. Солэн кичӧлтэмезъя но элькунамы арысь аре ортчыло ни культурно-спортивной шудонъёс. Администрацилэн тӧроез луыса Сергей Григорьевич выльысь сюлмаське спортэз калык пӧлы тросгес вӧлмытон сярысь. Осконзэс уг ышто Тунсыко но туж кулэ вераськон ӝутӥз туэ 29 сентябре потэм номераз Уваысь газет. Быдэсак сямен со сӥземын "Увинский" тылобурдо вордонъя совхозлэн ужамезлы. Та предприятилэн быдэсъяно ужпумъёсыз, секыт югдуре шедьыса тыршемез сярысь, юанъёслы валэктыса, вераськон мытэ директорез М. И. Кунгурова. Кемалась ӧвӧл Мария Ивановна опытэн тодматскыны вуылэм Омск областе, Иртыш тылобурло вордон фабрикае. Трос малпанъёсын бертэм отысь. Со оске асьме птицефабрикаослэн азинлыко ужанзылы. Америкаысь курег сӥль басьтыса ужан ӟече ӧз вутты, реформаос асьмелэсь тылобурдо вордон удысмес куашкатыны гинэ юрттӥзы, шуэ со. Газетын шуг-секытъёс сярысь гинэ вераськон уг мыны. Трос гинэ шуныт кылъёс верамын предприятиысь специалистъёс, огшоры ужасьёс, соослэн лякыт, чидаса, сюлмаськыса тыршемзы сярысь. Собере, совхозын ужасьёслэн малпамзыя, татын Мария Ивановна Кунгурова кивалтыны кутскем бере, адямиослэн ужан мылкыдзы умой пала тупатске, предприятиын шӧдске дисциплиналэн юнмамез. Племптицесовхозлы оскемын бадӟым удыс: со ӟеч выжы чипы-курег будэтэ республикаысь вань тылобурдо вордон фабрикаослы. Л. Федоров. Сессия кутскоз 10 ноябре Кыкетӥ ноябре Удмурт Республикаысь Кун Кенешлэн Президиумаз ужасьёс Кун Кенешлэсь вуоно ХХИИ сессизэ ортчытыны нунал тупатӥзы. Со ужаны кутскоз туэ 10 ноябре. Та вакытэ эскероно 28 ужпум пӧлысь депутатъёс быдэсак сэрттӥзы-пертчизы 12-сэ, укмыссэ выльысь эскероно на. Кун Кенешлэн Президиумезлы, ялан ужась комиссиосызлы, Эскерон палатаезлы но Госсоветлэн Аппаратэзлы туэ ньылетӥ кварталлы ужан план юнматэмын. Президиумын ужасьёс палэнтӥзы "СБС-АГРО" коммерческой банклы Россия Федерацилэн Центральной банкысьтыз кредит висъян пумысен ужпумез, малы ке шуоно, документъёс дась ӧвӧл на. Эскеремын мукет ужпумъёс но. Заседаниез нуиз Удмурт Республикаысь Кун Кенешлэн Тӧроез Александр Волков. Удмурт Республикаысь Кун Кенешлэн пресс-службаез. Трактор - эш яке тушмон? Дас сентябрьысен дасэтӥ октябрёзь шаерамы ортчиз "Трактор" шуиськись ужрад. Сое радъяны шаерысьтымы Гурт ужъёсъя но сиён-юонъя министерство но сюрес вылын шудтэм учыръёсын нюръяськонъя инспекция (ГИБДД, азьвыл ГАИ). Таӵе ужрад юнме шорысь ортчытэмын ӧй вал. Уго берло дыре шӧдскымон будӥзы тракторъёсын, сюрес вылын ужан машинаосын, мукет ветлӥсь техникаен кылдэм шудтэм учыръёс. Туэ гинэ трактор питран улын быриз 5 мурт, сӧсыр кылиз 15-ез. Вань учыръёсы асьсэос адямиос янгышесь вал. Котькудӥз кыкетӥез шудтэм учыр юонэн герӟаськемын. Озьы туэ 19 июле Сюмси ёросысь юэм тракторист "Беларусьысьтыз" усиз но "корт валэзлэн" питранъёсыз улэ пачкаса кулӥз. Со выллемгес учыр вал Глазов районын. Шудтэм учыре шедьыса быриз дас тямыс аресъем нылаш. Со турынэн тырмытэм трактор уробоысь усиз. Ма веранэз ини, гуртысь трактористъёс уноез шӧмаськыса ужало, нокыӵе но куронъёсты уг чаклало. Шаркан-Зюзино сюрес вылысен тракторист М. кысэм двигательзэ лэзе вал. Озьы трактор ас понназ вырӟиз но вӧзаз сылӥсь сварщикез лёгаз. Больницае вуттытозязы, сӧсырмем адями кулӥз. Месячник мыныку но шудтэм учыръёслэн лыдзы ӧз кулэсмы. Озьы 12 сентябре Пичи Пурга районын ваче донгиськизы КСК-100 комбайн но мотоцикл. Мотолэн кузёез соку ик быриз. Татын верамын кӧняез ке гинэ учыръёс. Быремъёслэн семьяосазы куректон сярысь ум но вераське ни. Нош шудтэм учыръёс пото хозяйствоослэн, предприятиослэн но организациослэн кивалтӥсьёссылэн но инженерной службаослэн механизаторъёс азе лябесь куронъёс пуктэменызы, техникаез урод воземен. Унояз хозяйствоосын тракторъёсты вужмеменызы уже кутыны но уг яра ни. Но соосты ялан ужато на. Ужрад дыръя эскеремын вал ог 500 пала трактор но мукет техника. Котькудӥз куатетӥез трактор, агрегат куронъёслы ӧз тупа, 10 процентэз ӧз ортчы техосмотрез. Уноезлэн водительёслэн ӧй вал ужаны лэзись документъёссы. Кыл кутоно луиз 900 муртлы. Селта ёросын гинэ штраф тыроно луиз 83 адями. Унозэ тырмымтэосты палэнтоно луоз на. Со пумысен кивалтӥсьёс юн алэмын. С. ЧЕПУРНОВ, милициысь старшой лейтенант. Сизьымдон вить ӧрӟипилы куатьтон вить ӧрӟи Алнаш черкогуртлэн одӥг ураметӥз ортчыку, син шоры йӧтэ ӝикытак пуктэм кык этажъем корка - нылпи юрт. Котыртӥз асфальтэд чылкыт утялтэмын, клумбаослэсь пӧртэм буёлъёсын воринъяськыса кыллемзэс адӟыны луэ на: турлы сяськаос синмез али но шумпотто. Пырытэк ӧй чида. Соку ик кузёзэс утчано кариськи: нылпиос ӵапак школае дасясько вылэм, нош кивалтӥсьсы комнатаосты эскерыса ортче. Мон пумиськи Алнаш нылпи юртлэн директореныз Люция Афанасьевна Стрелковаен. - Люция Афанасьевна, ку но кызьы вуиды татчы? - Ужаны кутскеме дырысен куинь ар гинэ ортчиз ай. Солэсь азьло нылпи садын куать ар кивалтӥсь но школаын директорлэн дышетон но валэктон удысъёсъя воштӥсез луыса ужай. Нош татчы ӵектӥзы азьвыл ӵош ужам эшъёсы. Директоре кандидатъёс ми куинь кузя вал. Лушкем быръёнъёс ортчытыса, мон тӧро луи. Алнаше выль нылпи юрт1989-тӥ арын пуктӥзы. Со вакытэ соин кивалтӥз И. Н. Самсонов. Ужзы туж ӟеч радъяськылӥз, пиналъёслэн но ӝожтӥськонъёссы ӧй вал. Отӥяз, директор воштӥськемен-а, пиналлэн улонэз шоры чиньы пыртӥ учкыны ӧдъямен-а - нылпи юрт воксё куашкан калэ вуиз. Сыӵе вакытэ ик татчы лыктӥз Люция Афанасьевна Стрелкова. Нырысь- валысь туж секыт йӧтӥз. Быдэс арзэ, югыт нунал тырмымтэен, уйёссэ но ӵем гинэ татын ортчытъяно луылӥз. Ваньзэ выльысь лэсьтоно, ӝутоно, ужасьёсызлы выль куронъёсты валэктоно. Нош котьмалэсь секытэз - пиналъёсын одӥг кыл шедьтон, соослы анай-атай кадь луон. Пуктэм куронъёслы чидатэк, одӥг ар куспын кызь вить ужасез кошкиз. Нош табере ӟеч коллектив люкаськемын. Ог-огенызы кенешыса ужало, кошкисез но арлы одӥг-кык гинэ на луэ. Соиз но - егитъёс. Угось татын, школаын сярысь, кык пол тросгес, быдэс нуналъёсын ужано, нош коньдонэз куинь сю манетлэсь ятыр уг луы. Озьы ке но, нылпи юртын тырше куатьтон вить адями. Соос пӧлын - психолог, логопед, инструктор, крезьгурез валаны дышетӥсь, эмъясь, социальной педагог, сиён пӧзьтӥсь но мукет - тӥни кӧня пӧртэм ужасьёсты кулэ каре нылпи юрт. - Куатьтон вить адями анай-атай интыын. Нош кӧня пиналъёсты та выжыкыл юртын быдэ вуттӥськоды? Пӧлазы трос-а воксё асьсэ коже кылемъёс? - Ми дорын ваньмыз ӧвӧлэз сизьымдон вить нылпи. Соос пӧлысь сизьымезлэн гинэ анай-атаез ӧвӧл. Трос уродзэ вае аракы юон. Татын ваньмыз сямен сыӵе семьяосысь пиналъёс: вордӥсьёссы юонэн валче усыкмыса уло, соин сэрен ик ог-огзэс но быдто. Кызьы кельтод пиналэз сыӵе кие, коть со анай ке но?! Бен, нылпи юртын улыны, ужаны секыт. Пиналъёсты син азьысь одӥг минутлы но лэзьыны уг луы. Та корка пушкы пыреме бере Люция Афанасьевнаез утчакум, нырысетӥ этажысен адӟи вуриськон машинаосын тырмытэм быдэс бӧлетэз. Вань на асьсэлэн мастерскойзы но. Татын пиналъёс ваньмон дыръязы ужаны быгато нуналлы быдэ. Котыр чылкыт, югыт, шуныт, пырем бере ик сюлэм капчи луэ. Борддоръёс бордын пиналъёслэн ужъёссы. Кыкетӥ этажын ӧс йылъёсын "Нырысетӥ семья, кыкетӥ семья" шуыса гожъямын. Мазэ-созэ валамтэеным, кивалтӥсьлэсь юано кариськи. Со мадиз: - Кызьы верай ни, милям татын сизьымдон вить пинал. Соос люкылэмын семьяослы. Котькудаз дас куинь-дас вить адями. Сузэр-вынъёс огинын уло. Кылсярысь, ньыль кузя Ивановъёс доры мукет фамилиен вын-сузэръёсты интыяськом. Озьы одӥг семьяе пӧртэм семьяосысь пиналъёс люкасько. Милям татын соос куинь аресысен дас сизьым аресозь. Семьяос куспын ӵошатсконъёс но ортчыло. Нош быдэс ар понна вормисе потэм комнаталы сётӥськом кузьым: со луэ я телевизор, я диван, я магнитофон. Тазьы ужаса, корка пушкысь тӥрлыкез но воштыны луонлык вань. Но ваньзэ ӵош лэсьтыны коньдон ӧвӧл. Ми тӥни сыӵе амал шедьтӥмы. Та бадӟым семьяын нылпиосты уж вылын дышетыса будэто. Соинтэк-а вань асьсэлэн тямыс гектар музъемзы? Быдэс толлы тырмымон картошка, кубиста, ӵуж но горд кушман дасямын ни. Пиналъёс муш вордыны но дышо - вань муш бакчазы. Озьыен, праздникъёсы чечы но луоз ӝӧк вылын. Тани туэ гужем ӝыны тонналэсь уно емыш бичазы - толлы ческытэсь вареньяос пӧрмылӥзы. Куартолэзе басьтӥзы вал чипыос, ӟазегпиос, ӵӧжпиос - гужем ӵоже пиналъёс асьсэос соосты будэтӥзы. Вань на парсьёссы, кроликъёссы, валзы. - Воспитательёс азе кык курон пуктэмын: нылпиез ужаны дышетоно (татысь кошкыса, мар ке но лэсьтыны мед быгатоз коть но экономикалэн секыт шуккетъёсызлы дасяно. Мукет сямен вераса, татын быдэс улонмы - экономикаен шудон, - веранзэ азьланьтэ нылпи юртлэн директорез. - Котькуд пиналлэн, кыкетӥ классысен кутскыса, аслаз трудовой книжкаез вань. Ужамзы понна нылпиос коньдон басьто. Быдэс нунал ӵоже баллъёс люкало нырысь. Собере соосъя коньдон басьто. Со ини аслад ужаса поттэм уксёед. Дышетскон вакытэ оценкаоссыя баллъёс люкало. Ужамзы понна, кызьы шуо, кузьым сётӥськом, нош янгыше усё ке - кыл кутоно луо. Та ведь нылпи юрт - вань олокыӵеез но пинал. Куд-огез куинь аресысен лушкаськыса будэмын. Соослэн сотэк уг лу ни. Соин ик, кин ке мае ке лушка, вань баллъёссэ, коньдонзэ ӵушиськом. "Кык" басьтыкузы но озьы ик. Бадӟымъёсызгес пиналъёсмы дискотекаосы но ветлыло бере, пӧртэм дыръёс луыло. Отысь юыса бертӥз, шуом, нылпи - вань баллэз ӵушиське. - Нош ма со сыӵе - экономикаен шудон? - Котькуд толэзе котькудӥз пинал мыным ивортыны кулэ, ма но ма басьтысал со ужаса поттэм коньдонэныз. Директорлэн дышетон но валэктон ужъя юрттӥсез кулэ вузъёс октэ, базаысь ма но со вае. Со ваем вузъёсын киоскъёсты нылпи юрт котыре пуктылӥськом. Отысь соос асьсэос басьто, ма кулэ. Ма тунсыкоез та шудонын? Киоскъёсын дунъёсыз пӧртэмесь. Ветлоно-учконо, кытын дунтэмгес вузкаро. Таӵе амал милемлы но пайда сётэ. Кылсярысь, та пичи базарысьтымы нылпи басьтэ пыдкук. Со сое туж ӝикыт возьыны, утялтыса нуллыны тырше. Угось выльзэ басьтон понна трос ужано луоз. Нылпи юртысь пиналъёс дышетскыны ветло Алнаш шор ёзо школае, пичиосызгес - нылпи садэ. Учкисьёссы соосты нуо-ваё озьы ик - огшоры семьяын сямен. Таӵе амал но бадӟым пайда вае. Нылпиослы уг тырмо "котыртэм" сьӧрын ас ёзъёсынызы ваче вераськонъёс. Нош нылпи садын, школаын соос тодматско-эшъясько мукет пиналъёсын. Котькудӥз борды юнматэмын татын ик ужась. Соос нылпиосты асьсэ семьяосазы куное ӵем гинэ нулло. Тау карыса выллем, пиналъёс асьсэды умой возьыны тыршо: возьыт медам лу кутэм анайзылы. Кызьы шуо татын ужасьёс, нылпи юрт - милям дормы. Асьмелэн семьяосмы кыкетӥ интыын. - Нош гужем шутэтскон дырзэс пиналъёс кызьы ортчыто? - Котькуд толэзь люкемын. Одӥгзэ котькуд пинал ортчытыны кулэ нылпи юртын. Татын но туж трос уж луэ: мерттӥськемъёсы ву киськано, уриськоно, пудо-живот, тылобурдо учконо. Толэзьлы кыӵе ке санаторие эмъяськыны яке огшоры нылпи лагере лэзиськом. Отӥзэ асьсэос быръё ини. Ӵемысь со луэ дор палъёсазы вуылон: анай-атаенызы пумиськыло, песянайёссы яке мукет ӵыжы-выжыоссы доры ветло. Собере гужемлы быдэ усьтӥськом шутэтсконъя но ужанъя лагерь. Котькуд ар маке тунсыкозэ, выльзэ утчаны тыршиськом. Тани туэ кыре-буре потамы. Пиналъёсты зарезь дуре нуэммы уг лу бере, малы сыӵе ик шутэтскон радъянтэм татын но? Азамат гуртысь куштӥськем коркаез синйылтыса, сое улыно-вылыно карим. Нылпиос арня ӵоже шутэтскизы, чылкыт омырен шоказы. Электротылтэк, вутэк (ошмесысь нуллоно луылӥз), пӧсь гужем дась пӧзьтэм сиён-юонтэк улыны туж яраз ныпиослы но, ужасьёслы но. Нуналаз олокӧня пол пыласькылӥзы тыметын. Эшшо но эшшо куриськылӥзы отчы. Алнаш нылпи юртын ужасьёс лулысь-сюлмысь тыршо. Татысь кошкыса, егит адями медаз кыльы ураме - 9-тӥ-11-тӥ классэз йылпумъям муртэ дышетскыны интыяло, коть кыӵе ке но профессия мед басьтоз шуыса. Собере соослы улон инты но кулэ. Тросэз малпало,дыр, нылпи юртысь потэм пинал сьӧд ужъёслы гинэ яра, дышетскыны уг пӧрмыты. Но Л. А. Стрелкова возьматӥз мыным чылкак мукет суред: 11-тӥ классэз йылпумъям нылъёс но пиос дышетсконзэс азьланьто шаерысьтымы вузъёсын. Тани кылем арын одӥгез пимы пыриз Технической университетэ. Одӥгез ныл - Удмурт кун университетэ: психология удысэз бырйиз. Туэ но татысь ик экономикая факультетэ пыризы. - Кытчы ке дышетскыны пыртон понна, ужасьёсмы пиналэн ӵош ветло профтехучилищеостӥ, сюлэмызлы удыс бырйыса, - веранзэ азьланьтэ Люция Афанасьевна. - Дорысьтымы кошкыса но милям нылъёсмы-пиосмы выльысь татчы ик, доразы, берто. Соос шӧдо сюлэмшунытмес. Ми но соосты ум улляське. Куд-огез каникулъёссэс но татын ортчытъяло - кытчы мынозы?.. Та нылпи юртын мукетъёсаз сямен ик пиналъёс секытэсь: котькудӥз сямен лулсэр висёнъёсын курадӟе. Тросэзлэн визьзы бере кыле. Люкаськемын нош татчы шаерысьтымы пӧртэм сэрегъёсысь пиналъёс. Тросгес вуо Ижысь, Воткаысь, Сарапулысь. - Тӥляд татын сыӵе чылкыт, шуныт, нош пинал со пинал - кызьы сокем быгатӥськоды? - Чылкытлык сярысь нылпиос асьсэос сюлмасько. Милям вань дежурнойёсмы. Ӵукна, школае мынэмзылэсь азьвыл, соос эскеро котькуд семьялэсь комнатазэ, окто-калто коридоръёсты. Нош шуныт ми доры кылем арын гинэ вуиз ай. Павел Вершинин Алнаше ветлыку вераськимы нылпи юртэ шуныт сётон сярысь: угось куазь кезьытэн, нылпиос олокӧня полэс дӥсяськыса ветлоно луылӥзы. Со юрттэмен, коркамы шуныт луиз. - Вань-а та юртын трос аръёс ӵоже ужасьёс? - Людмила Александровна Безделова татын 1965-тӥ арысен. Калыкез дышетонысь азьмынӥсь. Шутэтскыны кулэ ини, но ми сое ум лэзиське на: трос юрттэ визь-кенешен. Лидия Антоновна Петровалэн дас сизьым ар ӵоже тыршемез пусъемын правительстволэн данъян грамотаеныз. Зэм, нимазъяса нокинэ висъяны уг луы. Котькудӥз аслэсьтыз удыссэ тодэ. Аслэсьтыз сюлэмзэ сётэ, пиналэз ӟеч адями карон понна. - Ужаны кутскыкуды, трос сюлмаськонъёс вал, али но туж ик пӧртэм ӧвӧл, дыр?.. - Туннэ вань сюлэмшугъяськонъёс пото коньдон бордысь. Ӵем дыръя базае (Можгала, Иже) мыныны луонлык ӧвӧл. Нош пиналлэн пыдкукез пӧсьтэмын ке, базаре яке магазинэ потытэк уг луы. Мынам эшшо одӥг сюлэмвисёнэ вань: тросгес мед луысалзы милям пиосмурт ужасьёсмы: "анайёсмы" вань, "атайёсмы" уггес тырмо. Ваньзэ сямен ужрадъёсыз нылпиос асьсэос малпало, дышетӥсьёссы куд-ог валэктонъёс гинэ сётъяло. Алнашысь нылпи юртэ мукет интыосысь тросэз вуыло ужамзэс учкыны, дышетскыны... Вераськонмы йылпумъяськыса, Люция Афанасьевна газет пыр тау карыны куриз юрттӥсьёссылы-шефъёссылы. Кык камераен холодильник, пӧртэм тӥрлык но сюресчиосты нуллӥсь машина, столярной мастерской - ваньмыз со "Удмурт- Телекомлэн" кузьымез. Трос гинэ коньдонэн но юрттӥзы. Татын телефонэн трос вераськоно луэ - тазэ но фирма ас вылаз басьтэ. Соин ик нылпи юртын ужасьёс бадӟым тау каро "Удмурт телекомлэн" генеральной директорезлы Сергей Миронович Фомичевлы, директорлэн воштӥсезлы Степан Михайлович Хабалы. Мукет ӟеч юрттӥсьсы - Татариысь "Тойма" фермер огазеяськон нылпи юртлы автобус кузьмаз. Нош Технической университетэ туэ дышетскыны пырем пияшлы - мотоцикл. Кемалась юрттэ подшипникъёс поттонъя Ижысь завод (арлы быдэ кузьма телевизор...). Туж оскем потэ вылэм: татысь нылпиос ас шудзэс одно ик шедьтозы. Надежда Прокопьева, Удмурт кун университетын дышетскись. Алла КУЗНЕЦОВА Акрочуръёс Ушъяны меда, курланы меда Дуннемы туннэ усьтэмын... Марӟанэн меда, кый шиен меда Урт-лулмы пачыл тыремын? Роднямы гинэ, бӧлякмы гинэ Тямыстон армес медам вунэты. Дагазэ гинэ ворттӥсь ужпимы Усьыса нюре медам киргаты. Нош пушкыд ӵогъя, висиськод ке нош, Нокытчы пырон уд ке шедьтӥськы, Егит кариськы, Лыдӟы, лыдӟиськы - Ыштонтэм возём та удмурт кылмес. Ӟечкыласько! Алнаш ёросысь Ӧркагуртысь яратоно агайме Петров Юриез ӟечкыласько вордскем нуналэныз. Сӥзисько тыныд шуд, тазалык, семьяяд умой кусыпъёс. Эн сётскы шуг-секытъёслы, кужмо но вормонтэм лу. Яратыса - Ижевскын дышетскись Лариса сузэред. Солдатлэн данэз 55 ар талэсь азьло Советской Союзлэн Верховной Советэзлэн Президиумезлэн 1943 арын 8 ноябре поттэм Указэныз кылдытэмын вал Слава орденъёс Быдӟым Отечественной войналэн куинетӥ араз кылдытэмын вал Слава орденъёс. Соку лек ожъёс мынӥзы Днепрез выжон но Украинаез фашистъёслэсь мозмытон понна. Куинь орден пӧлысь самой даноез вал нырысетӥ степенёез. Солдатлэн данэз. Удмуртиысь но кызез воин данъямын вал ваньмыныз ик куиненыз Слава орденэн. Соос пӧлысь нимысьтыз пусйыны кулэ Удмурт Гондыргуртысь кышкасьтэм разведчикез Александр Виноградовез. Солы сётэмын вал куинетӥ номеро нырысетӥ степенё (зарни) Слава орден. Польшаысен гвардиысь младшой лейтенант А. Виноградов, пыд вылаз султыны быгатонтэм секыт сӧсырмыса но берпуметӥзэ патронзэ ыбытозяз, фашистъёслы пумит ожмаськиз. Солэн нимыз тодмо вал тушмонъёслы но, немецъёс сое сӥё-дано карыса ватӥзы. 5-тӥ гвардейской армилэн частьёсаз но соединениосаз трос вал кышкасьтэм разведчикъёс. Соос пӧлысь одӥгез - А. Ф. Виноградов. Со - 289-тӥ гвардейской стрелковой полкысь разведчикъёслэн взводзылэн командирез, армиын нырысьсэ пусъемын ваньмыныз ик Слава орденъёсын. Виноградов туж лякыт но зӥбыт сямо вал, сыӵеен ик кылиз соин ӵош ожмаськем эшъёсызлэн тодэ ваёнъёсазы. Озьы гожъяз Советской Союзлэн Героез, армиысь генерал А. С. Жадов 5-тӥ гвардейской армилэн азьвыл командующиез землякмы сярысь. Балезино районысь Выльгуртын будэм мурт артиллерист А. И. Дмитриев нырысьсэ тушмонэн пумиськиз Донбассэз мозмытон понна ожъёсын. Миус шурлэн меӵ ярдуръёсаз со нырысетӥоссэ снарядъёссэ шонер ыстылӥз тушмон вылэ, татын ик нырысетӥзэ сӧсырмиз но. Крымын ожмаськыкуз, со вал ини котьмае адӟем гвардеец. Нош Латвиез мозмытон дыръя гвардиысь сержантлэн расчётэз быдэс дивизиын но данэ потӥз. Дон дурысен кутскыса, Германиысь Макленбург город дорозь ожмаськыса ортчиз 38-тӥ гвардейской стрелковой дивизиысь данэ потэм разведчик, гвардиысь старшой сержант Т. Ф. Емельянов. Шаркан районысь Сосновка селоын вордскем но будэм солдат война бырем бере Ижевске бертӥз, куинь Слава орденлэн кавалерез луыса. Войнаын секыт йӧтылӥз сапёръёслы. Воинъёс-сапёръёс пӧлысь одӥгез кышкасьтэмез вал Я. Е. Пантелеев, Кез районысь В. Тортым гуртысь колхозник. Ньыльдон одӥгетӥ арын сӥзьыл со нырысьсэ тушмонэн пумиськиз Калуга дорысен. Ньыльдон витетӥ арын тулыс со вал Эльба шур дуре потэм солдатъёсмы пӧлын. Быдэс война ӵоже Пантелеев рядовой сапёр вал, со но луиз Слава орденъёслэн кавалерзы. Глазов районысь Вятка гуртысь В. Д. Ушаков артиллериын разведчик луыса ожмаськиз. Разведчик мозмытӥз Калуга но Брянск палъёсты. Вал тушмон музъем вылын но. Одер шур сьӧрысь тушмонлэсь обороназэ тӥяса, кышкасьтэм разведчик, шутэтсконэз адӟылытэк, кык арня ӵоже ожмаськыса весь азьлань мынӥз. Сыӵе вал куиненыз ик Слава орденэн данъям солдат. Кык Слава орденэн данъям солдатъёсмы пӧлысь вераломы кӧняез ке гинэ сярысь. Со Ува посёлокысь А. И. Шумилов, Глазов ёросысь Кожиль гуртысь К. М. Ельцов, Пичи Пурга ёросысь Бигра гуртысь П. М. Титов, Вуж Монья гуртысь П. В. Тарасов. Ньыльдон ньылетӥ арын гужем 97-тӥ Витебской стрелковой дивизия ожмаськиз Белоруссиез мозмытон понна. Со ожъёсын но Слава орденлэн куинетӥ степененыз наградить каремын вал асьме палась солдатъёсмы. Пӧлазы Шиляев Яков Иванович. Стрелковой батальонысь стрелок, вордскемын 1916 арын. Армие басьтэмын Селта РВК-ен 1941-тӥ арын августэ. Со Литваысь Сынтовтье инты понна ожмаськонын ваньмызлэсь азьло тушмонлэн траншеяяз пыриз но, гранатаеныз но автоматэныз ыбылыса, куатьсэ немец солдатэз быдтӥз. Ульчаосыз ожмаськон дыръя но солдат мукетъёссэ но солдатъёсмес сьӧраз ӝутӥз. Абрамов Михаил Петрович, разведротаысь красноармеец-рядовой. Вордскемын 1924-тӥ арын. Армие басьтэмын Алнаш РВК-ен 1942-тӥ арын августэ. Улӥз Алнаш районысь Варзи- Ятчи селоын. Абрамов, боевой заданиосты быдэстыкуз, котьку но кышкасьтэм луэмзэ возьматылӥз. Со олокӧня пол уйёсы тушмон пала разведкае ветлылӥз. Дивизия Белоруссиын ожмаськыкуз, 1944 арын 21 июне солдат дасозэ немецъёсыз быдтӥз но мукетъёсыныз разведчикъёсын ӵош сизьымзэ немецез пленэ басьтӥз. Кузнецов Николай Петрович, стрелковой ротаысь старшина. Вордскемын 1909-тӥ арын. Армие басьтэмын Ждановской РВК-ен 1942 арын январе. Кузнецов эш, стрелковой ротаысь старшина, командиръёслы но боецъёслы котьку дыраз вуттэ вал сиён-юон, пыӵал тӥрлык но вань кулэзэ. Высочану гурт дорын оборона возьыку, окопъёс но гудылэмын ӧй вал на, Кузнецов кӧт вылаз нюжтӥськыса но боецъёслы вуттылӥз сиён-юон. Тӥни сыӵеесь асьме палась солдатъёсмы данъямын Слава орденэн. В. ГОЛУБЕВ, отставкаысь полковник. Алла Кузнецова Вакчияк (басняос) Утьыны йӧлвылэз Пуктӥллям писэез. ... Мар кылиз со бере, Утча на табере. *** Парсь нискетӥз: "Ойы! Быри! Ой нӧд татын! Дэри! Дэри!" Котыръяськиз... Чеберъяськиз... Нясь-нясь дэри пӧлы выдӥз. Сое, бен, учке на, олле - Али но дэриын кылле. *** - Мон адями, - шуиз бакча сульдэр ассэ... Нош малыке уг някыръя куссэ. *** - Инмын монъя шунды берга! - Мыняк потэ шундыберган. ... Асьме пӧлын но вань соос - Кылын ужез бергатӥсьёс. *** ИЖЕВСКЫСЬ ТРОЛЛЕЙБУСЛЫ - 30 ар Вазь ӵукнаысен - уй шорозь Ижевсклэн урамъёстӥз та нуналъёсы ветло яркыт буёлъёсын но суредъёсын чебермам троллейбусъёс. Соосты озьы выльдӥллям праздниксы азьын - туэ 6 ноябре, Ижевскын троллейбусъёс ветлыны кутскем дырысен 30 ар тырме. Та лыдпус сокем бадӟым ӧвӧл ай. Иське, нырысетӥ троллейбусъёсын ужам адямиосын пумиськыны но луэ на. Тазьы малпаса жингыртӥм нырысетӥ депое. Вань, шуизы сыӵе адямиосмы, лыктэлэ. Озьы тодматским Тамара Аркадьевна БОГАТЫРЕВАЕН. - Уг малпаськы вал водитель луыны. Ува ёросысь Ижевске вуыса, машзаводын ужасько ни вал. Нош огпол шӧдтэк шорысь радио пыр ялон кылӥ. Троллейбусэн ужаны, пе, нылкышно- водительёс уг тырмо. Тӥни озьы шуак мылкыды ӝутскиз та ужез оскалтыны. Милемыз, 30 муртэ, нырысь Ижевскын дышетӥзы, нош собере куинь городъёсы Челябинске, Горькие но Свердловске практикае келязы. Бӧрысь ини, городамы 20 троллейбус вуэм бере, ваньмы татын ужаны кутским. Тӥни со дырысен та нылкышно ялан одӥг троллейбусын ужа. Ортчем аръёсты Тамара Аркадьевна кӧня ке жаля но. 60-тӥ аръёсы угось городын сомында транспорт ӧй на вал, соин ик троллейбусъёс шоры калык паймыса учкылӥз, нимаз машинаос но сюрес сётылӥзы. Нош табере троллейбусэн кинэ ке паймытод шат, сомында "иномаркаос" ульчаостӥ ширто-лобо. Владимир Васильевич Климовских но нырысетӥ водительёс пӧлысь ик. Нырысетӥ маршрутлэсь усьтӥськемзэ али но син азяз возе. Соку, 1968 арын, Быдӟым Октябрьлэн праздникез азьын, троллейбусъёс ветлыны кутскизы центрысен Школьной остановкаозь. Владимир Васильевич яратоно городэзлэн урамъёстӥз калыкез троллейбусэн 20 ар нуллӥз. Али но озьы ик ужасал на, дыр, но, тазалыкез лябӟемен, мукет удысэ выжиз. Табере со троллейбусъёслы аккумуляторъёс дася. Та депоын али 300 пала водительёс ужало, со пӧлысь куиньмос люкетэз - нылкышноос. Тросэз - нырысетӥ классъем водительёс. Тани огез устоез водитель Петр Анатольевич Лекомцев. Троллейбусэн 25 ар ӵоже эшъяське. Со но татчы ужаны лыктэм, газетысь ялонэз шедьтыса. Кызьы ортчытыны малпаськоды троллейбуслэсь праздниксэ шуыса юанэлы, воргорон вакчияк вераз: "Юбилей нуналэ ужалом!" Тӥни озьы котькуд водитель, ужан дырыз ке тупа, праздникъёсы но, шутэтскон нуналъёсы но корт валзэ сермета. Нош тӥясько ке троллейбусъёс, берло дыре сыӵе учыръёс ӵем луыло, соосты вакчи дыр куспын тупато слесарьёс. Куд-огез соос пӧлысь огдыре кык ужез но быдэсъя. Тани Петр Петрович Ившин 25 ар ини слесарь-электрик луыса тырше. Эшъёсыз со сярысь тазьы шуизы: быдэс троллейбусэз, пе, кынем синъёсыныз сэрттоз-бичалоз. Со но, данак мукет эшъёсыз сямен, куке-соку гуртысь кошкыса городэ улыны выжыяськем. Депое кемалы ӧм пыралэ ке но, татысь шедьтӥм Ува, Кез, Юкаменск, Воткинск палъёсысь лыктэм ужасьёсты. Пётр Ившин Балезино районысь Зятчашур гуртысь вылэм. Туннэ троллейбус-трамвай управление кӧня ке депоос пыро. Югдур ваньмаз огкадь - секыт. Нырысетӥ депоысь огеныз участокен кивалтэ Валерий Вениаминович Белослудцев. Сое ик мадьыны курим югдурзы сярысь: - Матэктэ тол, нош питранъёс ӧвӧл. Соосты поттӥсь заводъёс сыло. Йӧвалег сюресъёстӥ пӧсьтэм пыдкукен рейсэ но потыны кышкыт. Али депоын 100 троллейбус. Нуналлы быдэ сюрес вылэ 79 троллейбусэз поттоно, нош туннэ ужаны быгатэ 68-эз гинэ. Вань машинаосты тыро-пыдо ужатон понна, 400 пала питран кулэ. Котькуд водитель али сюрес вылэ потэ ас быгатонлыкезлы оскиськыса гинэ. Быдэс странаын югдур секыт бере, татын но пӧртэм ӧвӧл. Кызьы валэктӥз Валерий Белослудцев, одӥг питран басьтыны гинэ 1700 манетысен 2000 коньдон кулэ. Озьы ке но, ужасьёс сярысь сюлмаськон палэнэ кельтэмын ӧвӧл. Водительёс но мукет специалистъёс уждунзы борды юн возиськыса уло - татын соин бадӟым ӝеганъёс уг луыло. Водительёслэн профсоюззы но возиське на. Солэсь кулэлыксэ татын юн шӧдо. "Профсоюзэз ке быдтӥм, огшоры ужасез адӟись уз ни луы", - шуиз Валерий Вениаминович. Квартиралы черодын сылӥсьёс туэ выль юртэ пыризы. Вань квартираос дунын висъямын вал. Озьы ке но, огшоры ужасьёс но соосты басьтыны быгатӥзы, мукет удысъёсын сярысь, татын водительёслэн уждунзы вылӥынгес. Кылсярысь, куинетӥ классъем водитель шорлыдын вераса 1120 манет басьтэ. Бен, ужзы но капчи ӧвӧл. Ӵукна уже потӥсьёс вить часын интыязы луыны кулэ ни. Собере сюрес вылын но али туж трос транспорт - водительлы зол синъёс но саклык кулэ. Улон секытомемен, пассажиръёс но керӟегесь луэмын. Татын водительлы кулэ ини мукет сям: чидан. Соин но, вылды, вань улонзэ троллейбусын ужам кышномурт Тамара Аркадьевна Богатырева тазьы шуиз: - Пиналъёсылы но, внукъёсылы но та ужез ӧй сӥзьысал, тужгес но - нылкышноослы. Воргорон уж кышномуртлэсь чеберзэ быдтэ. Тӥни сыӵе со - мудрон улон. Адями куд-ог дыръя ортчем сюресэныз данъяське ке но, мукетъёссэ солэсь алэ. Нош асьмеос, пассажиръёс, дорамы-а, уже-а дыртыку, ӵем-а меда синйылтӥськом руль сьӧрын пукись водителез? Троллейбусэн ужасьёсты праздникенызы ӟечкыласа, сюлмысьтымы сӥзиськом соослы тазалык, чидан но вольыт сюресъёс. Татьяна Банникова. Водитель Т. Богатырева. И номеро депоысь участоклэн кивалтӥсез В. Белослудцев, слесарь-электрик П. Ившин, аккумуляторщик В. Климовских. Туспуктэмъёсыз В. Камашевлэн. Можга ёросысь Чемошур-Уча (Куака) гуртысь кузпалъёслы Николай Георгиевич но Екатерина Ивановна Соловьвъёслы Туннэ тӥляд - зарни сюан. Витьтон шудо, секыт аръёс. Будэтӥды вить пиналъёс. Толя, Петя, Миша, Лёня, Лена но вань покчиосты, Родняосты, бускельёсты Ӟечкылало та нуналэн - Шулдыр зарни юбилеен, Сӥзё шудбур, тыро ӝӧквыл, Юн тазалык, шуныт ӟеч кыл. Улон - ӧвӧл со выжыкыл, Но вань чебер малпанъёсты Мед быдэсмоз син азяды. ШӦКЫЧ Нап бус пӧлын... Улон таӵе луэмен-а мара, кӧнялы йылӥзы лушкаськон учыръёс! Кепыратэк нуо кеносъёсысь ю тысез, фермаосысь потто фуражез. Уно ваньбур ыше бусыосысь но бакчаосысь, данак техника "пыдъяське" гаражъёсысь но ульчаосысь. Берло дыре лушкаськисьёс маза уг сёто "сьӧд зарни" поттӥсьёслы но. Вералом Играысь му вӧй но газ поттонъя управление сярысь гинэ. Тросэн ворало но палэнэ вузало бензинэз, тракторлы эстӥськонэз, мукет ваньбурез. Соин гинэ уг тырмы, табере корало кабелез, кесяло электродвигательёсты но трансформаторъёсты. Ыштонъёс дасо сюрс манетъёсын лыдъясько. Вылаз ик, дугдытоно луэ нефть поттонэз. Нош играослэн бюджетсы возиське му вӧй чотын. Басьтом кӧнязэ ке учыръёсты гинэ. Вакчи дыр куспын Играысь НГДУ-лэн 1 номеро нефть кыскон интыысьтыз лушкамын 2 электродвигатель, мукет интыысь маялтӥллям 40 метр кабельзэс но 1 электродвигательзэс. Малы ваньзэ сое лушкало? Валамон, дуно кортъёс понна. Но ведь со кисые тэрымон арбери ӧвӧл. Со мында ваньбурез кужмо автомашинатэк уд нуы, собере кортлы документъёс но ӧвӧл. Но дуно ваньбур кытчы ке ыше-тӧлӟе. Со чотын кин но со узырме. Корт басьтӥсьёслэн выль лицензиоссы. Озьы ке но, соос тодо ук лушкам арбериосты басьто шуыса. Татын куд-ог службаослы сакгес ужано вылэм. Уд но вала, ӝоген трамвай-троллейбусъёслы ток сётӥсь ёзъёсты но вандылозы, ява! Тӥни озьы, ог-огмылэсь лушкаськыса, ог-огмылэсь кырсь ужъёсмес ватыса улӥськом. Одӥгъёсыз узырмо, мукетъёсыз лушкаськыны яке кураськыны пото. Нош ӟеч улонмылэн инвисэз нап бусъёс пӧлын кадь ай... Лейтенантъёс йылӥзы Республикамылэн нуналэз МВД-лэн вылӥ юридической школаезлэн Ижевскысь ёзаз дышетскисьёс понна ноку вунонтэм луоз. Нырысетӥ курсысь вуоно юристъёс но уголовной розыскын ужасьёс Ялан ӝуась тыл дорын присяга кутӥзы. Нош ньылетӥ курсэз йылпумъясьёслы пельпумъёсазы бырттӥзы лейтенант погонъёс. Кӧня ке толэзь ортчыса, Удмуртиысь югдурез утён удысэ вуоз выль кужым - егит, задор мылкыдо юрттӥсьёс. Мӧйы эшъёсынызы артэ соос люкалозы быгатонлык но кужым, асьмеды пӧртэм гыжкалъёслэсь утёзы. Л. Дмитриева. Фотоосыз В. Камашевлэн. ШӦКЫЧ "Мынам телевизоре" Эн малпалэ, та кыӵе ке культура юрт шуыса! Татчы интыяськемын Якшур-Бодья ёросысь Лынга посёлокын улӥсьёслэн, нюлэс дасясьёслэн участковой больницазы. Мӧйыослэн верамзыя, сое ӝутӥллям ини 1947 арын. Кызьы шуо таӵе дыре - чиньыдэ донгид ке, юрт погралоз. Солэсь пушсэ шунтыны но капчи ӧвӧл. Нош эмъясьёслэн тужгес но бадӟымез куректонзы-бӧрдонзы - эмъюмъёслы кулэяськон. Висисьёсты эмъяны немаин. Тырмыт уг висъяло больницалы коньдон но. Номырин юрттыны уг быгаты ёрослэн администрациез но, элькунысьтымы тазалыкез утёнъя министерство. Удмурт Правительстволэн Тӧроез Павел Вершинин алигес татчы вуылыкуз кузёос азе юнэсь куронъёс пуктӥз вал. Быдэсмизы меда соос? Оло лынгаос "Шӧкыч" пыр ивортон ыстозы? Витиськом. Андрей Поздеевлэн туспуктэмез. Алнаш ёросысь Усо гуртын улӥсь ӵужанае-ӵужатае Евдокия Ивановна но Пётр Павлович Павловъёс, Дэбес ёросысь Зяногуртын улӥсь песянае-песятае Ангелина Николаевна но Виталий Павлович Емельяновъёс та нуналъёсы пусъё зарни сюанзэс. Витьтон ар ӵоже та мусо но дуно адямиосмы вамышъязы артэ, нокыӵе шугадӟонъёс шоры учкытэк. Зэм, вал, дыр, улоназы котьмаиз: кайгуэз но шумпотонэз, синвуэз но пальпотонэз. Нош юн мылкыдо кузпалъёс нокыӵе сьӧлтэтлы ӧз сётскелэ. Вамышъязы но вамышъязы та улон ӧретӥ, котькыӵе сильтӧлэз-сильзорез вормыса. Зарни даурдэс пумитаса, эн малпаськелэ азвесяны кутскем йырсиосты сярысь - синъёсады ялан мед эктозы эрикез яратӥсь тылгизьыос! Зарни вапуменыды, мусоосмы! Мур гажаса но музъемозь ик йыбырттыса вань нылпиоссылэн, соослэн нылпиоссылэн, соослэн пиналъёссылэн нимынызы Алексей. Шӧкыч Чиданы луоз на Туэ 7 ноябре Октябрь революцилэсь 81 ар тырмонзэ пусйысалмы ни. Бен, туэ но пумиталом ик, дыр. Но вазен кадь шулдыр мылкыдъёсын, горд флагъёсын но гвоздикаосын ульчаосы потӥсь ӧжытгес луоз. Но ӵем дыръя ортчем аръёсмес ӟечен тодамы вайылӥськом. Начар ке но улӥськом вал, дыраз сётылӥзы уждун но, пенсия но, пособие но. Кытӥ меда янгышамы, кин уногес сьӧлыкаськиз? Россиын улӥсьёслэсь мылкыдзэс тодонъя центр алигес юалляськон ортчытӥз. Юан таӵе вал: "Кыӵе мылкыдын улӥськоды та вакытэ?" Куинь процентэз гинэ адямиос урод улонзылы ӧз ӝожтӥське. Нош 24 процентэз шоро-куспо улӥськом, шуизы. Ньыльдон тямыс процентэзлы таӵе улон уг яра, 61 процентэз улонэз чидантэмен лыдъязы. Куамын процентэз шуизы: "Улон секыт ке но, чиданы луоно на". Тӥни со лыдпусъёс ик возьмато калыкмылэсь мылкыдзэ. Котьма ке но, азьпалан 7-тӥ ноябрь. Праздникен, эшъёс! Б. НИКИТИН. Шуныт кылъёсын Удмурт Республикаын 78 ар тырмонэз пусъёнэн валче Удмурт Элькунысь Кун Кенешлэн Тӧроезлы Александр Волковлы уно ӟечкыланъёс вуизы. Кылсярысь, Россия Федерациысь Правительстволэн Председателезлэн нырысетӥ воштӥсезлэн Владимир Густовлэн ӟечкылан телеграммаяз шуэмын: "Россия Федерациысь Правительстволэн но аслам нимыным Тӥледыз но Удмуртиысь трос нациен калыкъёсты ӟечкыласько Республикалэн нуналэныз. Ортчем 78 ар ӵоже республикады страналэсь экономиказэ, обороназэ, науказэ но культуразэ азинтонын туж бадӟым инты кельтӥз. Оскисько, Петр Чайковскиен, Куӟебай Гердэн, Михаил Калашниковен, Галина Кулаковаен данэ потэм музъем вылады нош ик тодмо луозы выль нимъёс, калыкты азьланяз но возьматоз ужаны быгатэмзэ. Удмурт Элькунысь калыклы сюлмысьтым сӥзисько азинсконъёс но ӟеч пушъетъёс. Ӟечкыланъёс озьы ик вуизы Россия Федерациысь Кун Думалэн Председателезлэсь Геннадий Селезневлэсь но Кун Думаысь депутатъёслэсь, Татарстан Республикалэн Президентэзлэсь Минтимер Шаймиевлэсь, Киров областьлэн губернаторезлэсь Владимир Сергеенковлэсь, Свердловск областьысь Законодательной собранилэн кивалтӥсьёсызлэсь, Чуваш Республикалэн Кун Кенешезлэсь, "Сэмсон" но "Лукойл" нефть компаниослэсь, федеральной но республиканской управлениослэсь, ёрос администрациослэн кивалтӥсьёссылэсь но ёрос Кенешъёслэн председательёссылэсь, Удмурт Элькунысь Кун Кенешысь депутатъёслэсь. Удмурт Республикаысь Кун Кенешлэн пресс-службаез. - Праздникмылы уждун сётозы-а, уз-а - тодмо ӧвӧл! Ойдо ай, кинэ ке нальыкалом!.. Суредаз Игорь Кийко. 1�___"___________________________________________________________________________ _____________________а=Р/яя _ 2__А!__8_Ё9Р___Р_Солдатлэн данэз 55 ар талэсь азьло Советской Союзлэн Верховной Советэзлэн Президиумезлэн 1943 арын 8 ноябре потэм Указэныз кылдытэмын вал Слава орденъёс __________________________________________________________________________________ _________________�_______ъ_____яя___________________________________________________ _____________________________________________________________�___'___q_М___q_ю___q__ ___q_- ___яя_______________________________________________________________________________ ____ __-_�ь<ьг_-__ИА�.яя _Ҥ6__ы __Е__?Р___Р_И(______________________________________________________________________ _______________________________ӥ_____�___ӵ_____яяяя_________________________________ ___________________________________________________________________________Хелветица УЦД_ __ТимесУЦД________________________________________________________________________ ___________________________ Данмес вузаны ум дыртӥське Йыртэмасьёслэн лыдзы странаямы нуналлы быдэ йылэ. Со ваньместы юн сюлэмшугъяськытэ, озьы ик милициын ужасьёсты но. Нош кызьы пайдаёгес нюръяськоно йыружъёсын. Кызьы кулэстоно лушкаськисьёслэсь лыдзэс? Таосызлы но мукет юанъёслы валэктон сётэ Удмурт Республикаысь Югдурез утёнъя министрлэн нырысетӥ воштӥсез Вячеслав Осипов. - Вячеслав Сергеевич, кызьы малпаськоды малы йыло йыртэманъёслэн лыдзы? Ма муген? - Вань шуг-секытъёс нырысь ик герӟаськемын улон-вылонэн. Ялан йыло калыклэсь но государстволэсь ваньбурзэ лушкан учыръёс. Сыӵе югдур кылдӥз: экономикаын секыт вакытэн валче государство ачиз но валатэк юрттэ кадь йыружъёслэсь лыдзэс будэтыны. Уждунъёсты тыронэз ялан ӝегатон, дунъёслэн тэтчамзы но улон-вылонысьтымы мукет умойтэмез асьсэлэсь кырсь ужзэс лэсьто бере, йыртэмасьёслэн радзы нуналмысь будэ. Адями амалтэк лушкаськыны кутске. Соин ик та югдурез тупатонын бадӟым инты басьтыны кулэ государство. Со калыклы кызьы ке но умойгес улыны луонлык мед сётоз. Соку гинэ адямилы юан сётыны быгатом: малы тон лушкаськиськод? Уноез йыртэмасьёс солэсь мугзэ валэктыны выро ужлы ёрмонэн. Соин ик экономикаын югдур ӧз ке воштӥськы, азьланяз номыр ӟечсэ витёнэз ӧвӧл, йыружъёслэн но лыдзы уз кулэсмы. Кылсярысь, туэ сӥзьыл но тол ӵоже, меӵак оскыса вераны луэ, йылоз пудо-животэз лушкан, тужгес но удмуртилэн лымшор ёросъёсаз, кудъёсыз интыяськемын Татарстанлы но Башкортостанлы матын. Туэ Алнаш районын кырмемын вал ӵапак таӵе ужен вырись адями. Пудо сӥльзэ вузаны со келялляз бускель улосвылъёсы. Со чотын ик улӥз но. Пудо ышылон сярысь иворъёс али нуналлы быдэ сямен вуыло. Мар луоз кезьытъёс вуэм бере, тодмо ини. Берло вакытэ будо наркотик вузанэн герӟаськем йыружъёс. Тросгес луо ускымытӥсь суретэн эшъяськисьёс. Вень вылын юн "пукись" наркоманлы сурет басьтон понна нуналлы быдэ 300 манет пала коньдон кулэ. Соин валче кылдо лушкаськонъёс, адямиез талан но виён учыръёс. Октябрьлэн кутсконаз наркотик понна уваын виемын вал кык мурт. Виисьёс пӧлысь одӥгез кырмемын, мукетъёссэ утчало на. Малпасько, матысь дыре йыртэмасьёс шедёзы. Татын нош ик югдурез экономикаен герӟатэк уг луы. Одӥгъёсызлы наркотик усыкмытӥсь, огдырлы секыт улонысь выжыкыл дуннее вуттӥсь арбери, мукетъёсыз со чотын узырмо. Та ласянь ми мар но со лэсьтӥськом ни. Будэтэмын наркотик вӧлмытӥсьёсын нюръяськонъя отделын ужасьёслэн лыдзы. Тросгес шараямын наркотикен герӟаськем йыружъёс. Малпаськом, та удысын ми ужмес паськытатом на шуыса. Со понна кулэ выль ужасьёс но коньдон. Нош югдурез чутырак умоятон понна Таджикистан но Афганистан кунгожъёсты юнгес кортнаны кулэ. Уго асьме республикае юрӟым наркотикъёс отысь туж тросэн вуо. - Берло дыре улонамы юн пыӵаз ини коррупция кыл. Уноез кивалтӥсьёс коньдонэн вузасько. Со ведь озьы ик йыруж. Нюръяське-а МВД со секыт "черен"? Туэ коньдон басьтонэн 29 учыр пусъемын. Мон малпасько, со туж ичи лыдпус. Сыӵе кырсь ужъёс нуналлы быдэ лэсьтӥсько. Татын нош ик ваньмыз герӟаськемын улон- вылонэнымы. Мон басьтӥсько 2 сюрс 300 манет. Нош погонтэм чиновниклэн уждунэз трослы ичигес. Малпалэ ай: тӥледлы сёто взятка, со быдэс ар ӵоже басьтэм уждундылэсь уногес. Чидалоз меда ваньмыз? Одӥг пол кабинетысьтым мон но одӥг адямиез улляно луи. Со ӝӧк вылэ 100 манетлыкъёсын коньдон пачка понӥз но кышноелы кузьым басьтыны ӵектӥз. Бен, кин взятка шуонэз басьтэ мебелен, Кипре путёвкаосын но трос мукетыныз. Но ведь со озьы лэсьтӥське, чибинед но нырзэ мертчытыны уз быгаты. - Нош лябесь законъёсмы но асьсэлэсь ужзэс лэсьто, дыр, ук, соос но юртто, луоз, йыружъёслэсь лыдзэс будэтыны? - Шонер. Кӧня ужъёс куашказы ни соин сэрен. Ваньмыз ӟеч тодо, криминалэз син азьын. Нош запятоез интыяз пуктэмын ӧвӧл ке, йыруж но ӧвӧл. Вань шуге-леке шедемъёсыз но, вань йыртэмасьёсыз но, вань йыружез адӟытӥсь фактъёсыз но - ваньмыз со лябесь законъёсмы. Соин валче кӧня йыртэмасьёс кыл кутонлэсь мозмытскизы. Милицилы кулэ юн ужась, пайдаё законъёс. Вань сыӵе йыруж, ӟуч сямен вераса - мошшенничество. Тужгес но секыт ужаны сое шарае поттон понна. Люкаськод материалъёс, уно бызьылӥськод, утчаськиськод. Но со дыре йыртэмась тэк уг пукы. Россилэн палэназ но пегӟыны вуэ. Алигес милям пиосмы ӝегатӥзы Ижысь куке-соку азьвыл тодмо фирмалэсь кивалтӥсьсэ. Туннэ, шуом, со калыклэсь коньдон бича, ӵуказеяз машина ӵектэ. Яке вералом кредитъёсты басьтонэз. Амало ужбергатӥс сое басьтэ, азьло ик уз берыкты ни шуыса. Со чылкыт кадь. Дӥсез вань, вань киосыз- пыдъёсыз но, кисыяз сиськыны дасям уксёез вань на. Нош мукет дуно ваньбурез ӧвӧл. Со ваньзэ азьло ик гожтӥз выжыосыз яке ӟеч тодмоосыз вылэ. Марзэ басьтод солэсь. - Нош 17 августэ кризис шуон тӥляд удыстыя кызьыгес шӧдӥськиз? - Одӥгъёссэ кризис юн куанермытӥз, сыӵеос ог 80 процент пала. Нош кинлэн кисыяз вал долларъёсыз, уката узырмизы. Кисыоссы зӧказы куд-ог вузкарисьёслэн. Тани, кылсярысь, одӥгез ужбергатӥсь ӝыны нуналскын вузаса быдтӥз выль арысен кыллӥсь макаронзэ. Калык огыр-бугыр луиз, ма кылле, ваньзэ басьяз. Но таиз ужбергатӥсь вуззэ сётӥз ӝыны дунын гинэ. Ужзэ ӝогак лэсьтыса ачиз пегӟиз. Сыӵе учыръёс ӧжыт ӧй вал. Нош милям ваньзэ син шорамы возьыны кужыммы но, луонлыкмы но ӧз тырмы. Но элькунамы югдурез чакланы тыршим. Одӥгез паймытэ: кризис, оло, юри кинэн ке малпамын вал, узырмон понна. Мон озьы малпасько. - Нош кызьы малпаськоды, йыружъёсъя югдур Удмуртиын азьланяз тупатскоз-а? - Таӵе начар материально-технической инъетэн сокем ик ӟечсэ возьманэз ӧвӧл, дыр. Но йыружъёсын нюръяськыны кужыммы вань на. Озьы ке но, милицилы ӝегатскытэк висъяно туала аппаратура, автомототранспорт. Но нырысь ик калыкмылэсь улон-вылонзэ умоятыны кулэ. Луыны быгатоз озьы но. 50 процентэз йыртэмасьёс луозы, 50 процентэз - соосты кутылӥсьёс. - Вячеслав Сергеевич, милицилэн праздникеныз валче, мар сӥзьысалды асьтэлэн ужасьёстылы? - Нырысь ик, семьяосады мед луоз ог-огдэс валан, ог-огдэс гажан но чидан. Уйёсы ужанъёс, уждун тыронэн ӝеганъёс семьялэн улон-вылоназ шӧдӥськытэк уг кылё. Собере ваньдылы тазалык но шудбур! Осконъёс но ыштонъёс 7 ноябрь. СССР-лэн историяз со пыраклы кылиз горд буёлэн пусъем праздникен. 7 ноябрь дуннеез люкиз кык бадӟым лагерьлы: социализмлы но капитализмлы. Россиын улӥсь калыклы выль улонэ сюрес ӵогиз. Вапум воштӥськемъя, асьмеос туннэ пӧртэм сямен дунъяськом но учкиськом Октябрь революция шоры. Кивалтон кужымзэ ыштӥз Коммунистической партия. Административной юртъёс бордын уг лопыръясько ни горд флагъёс, соослэсь интызэс воштӥз мукет символика. Ма со: ыштон-а, шедьтон-а, азьланезлы оскон-а? Нош 7 ноябрь, котькыӵе тӧлъёс мед пельтозы, данакез адямиос понна кылёз праздникен. Октябрь революциез асьмеос ӵошатылӥм ичи лыдъем калыкъёслы югыт ваись шундыен. Зэмен но, песянайёсмы-песятайёсмы 1917 ар бере гинэ умой-умой дышетскыны кутскизы. Советской власть удмуртъёсты утиз син но музон висёнъёслэсь, Россиысь мукет калыкъёсын оградэ йыг-йыг султыны юрттӥз. Со ик асьмелы дун тырытэк дышетскон, эмъяськон ваиз, котькудмылы ужаны право сётӥз. Туннэ югдур воштӥськиз, Россия аслыз мукет сюрес бырйиз. Кытчы со вуттоз - таизэ улон возьматоз. Ас кылзэ вераны кулэ калык но, история уго калыктэк уг лэсьтӥськы. Шӧкыч Амал шедьтозы Ульчаосын, базарын, корка сэргын вузкарисьёсты яке бизнесмен шуонъёсты бадӟымлэсь но бадӟым "кузьым" вите кадь. Дас витетӥ ноябрьысен быдэс Удмуртиын кутӥськыны кулэ контрольно-кассовой машинаос. Ижевск городэ гинэ нырысь чакламъя 8 сюрс пала сыӵе аппаратъёс басьтоно. Нош сыӵе машина ӧжытсэ сылэ 3 но ӝыны сюрс манет, яке вуж сямен, куинь но ӝыны миллион. Сыӵе аппаратлэсь мозмытӥськозы "Информпечатьлэн" киоскъёсыз но школаосысь сиськонниос гинэ. Ярам, шуом, вузкарись басьтӥз сыӵе машина. Но солэн, пе, одӥг урод "висёнэз" вань. Ульчаын 10 градуслэсь кезьыт кариське ке, аппарат гуньдэ. Одӥгез паймытэ на: шундыберган тысен вузкарись сыӵе машина басьтоз меда? Яке семаеныз гуртаз-а вузкароз? А ведь амал шедьтозы... С. ПЕТРОВ. Зарни бичет - Кин со сыӵе Герд? Котькудӥз гожтӥсь валэктэ та юанлы. Лыдӟись тодматске соиныз но, таиныз но аслэсьтыз малпанзэ кылдытэ. - Та книгаын пӧртэм, ог-огзылы пумит луись муртъёс но огазеяськизы. Эшъяськизы но, шуыны луоз. - Финн-угор дуннеын та бадӟым событие. Книга улоз туж кема, сое дышетозы, соя дышетскозы. - Книгаез берыктозы финн, венгер но мукет кылъёсы. Со весь будоз, паськыталоз. - Герд омыръяса быдтонтэм, Герд али гинэ кутске... - Гердлэн биографиез гинэ ӧвӧл та - солэн адӟонэз. Солэн лулызлэн оглюкетэз та книгаын. - Паймытэ туж трос адямиослэн пыриськемзы. Лыдтэм уно иворъёс. - Та научной уж. Егитъёсты дышетон удыс понна тужгес дуно. - Сю пала адямиосын гожтэм роман та. Таӵезэ быгатоз Зоя Алексеевна гинэ. Ваньмыз та малпанъёс - З. А. Богомоловалэн "Как молния в ночи" книгаез сярысь, 3-тӥ ноябре солы нырысетӥ дунъет сётӥзы Кун Кенешын. Александр Волков доры люкаськизы Куӟебай Гердлэн вордскемез дырысен 100 ар тырмонлы сӥзем ужрадъёсыз ортчытонъя оргкомитетлэн членъёсыз но ӧтем муртъёс. Та книга, зэмзэ ик, зарни бичет вылем луэ. Отчы, 750 баме, огазеямын Куӟебай Гердлы, солэн улэмезлы, адӟонэзлы, творчествоезлы сӥзем статьяос, архивъёсысь документъёс, гожтэтъёс, туспуктэмъёс, кылбуръёс но трос мукетыз. Книгаез поттӥз Удмурт кун университетлэн издательствоез, 1000 экземплярен - жаляса верано, та туж ӧжыт. Коньдонэн юрттӥз Россиысь калыкъёслэн национальн-культурной азинсконзыя Фонд. Шаерысьтымы Национальной библиотекаын ужасьёс сюлмаськемен, тыршемен, "Как молния в ночи" книгаен дуннеысь пӧртэм калыкъёс тодмасткыны быгатозы Интернет пыр. Т. ПЕТРОВА. Ӟечкыласьком! Вавож ёросысь Гурезь-Пудга гуртын улӥсь Антонида Григорьевна Зайцевалы та нуналъёсы тырме 50 арес. Ми, солэн нылъёсыз но кузпалыз, вань ӵыжы-выжыосыз сюлмысьтымы ӟечкыласьком та мусо но дуно адямимес такем чебер арлыдэныз. Али кадь учкымон тусбуйыз ноку медаз безды, мусо синъёсаз котьку мед шудоз калыкез паймытӥсь задорлык, веськыт мугорыз ноку медаз куасалтӥськы, нош дорысьтыз ноку медаз пегӟы муртъёслы вожъяськымон зӥбытлык. Витьтон аресэд - кырӟа но экты, яраты но гажа, пишты инвожо выллем, вань матысьёсыдлы но вӧзысьёсыдлы шудбур но шумпотон кузьмаса. Ӟыгыртӥськом, чупаськом, яратӥськом! Гажаса но яратыса - нылъёсыд, кузпалыд, ӵыжы-выжыосыд. Никвлад САМСОНОВ Ки шыгыриям - йӧ пырыос Бусы Паймисько: ма, кызьы озьы, пе, луоз со - верамзыя Удмурт шаерын будэтэм ю тысь нянь пыжыны уг яра. Дауръёсын-дауръёсын удмурт адями та улосын улӥз, ӵыжы-выжыосмы асьсэос нянь будэтӥзы, нылпи вордӥзы, табере - бусыын будэтэм ю нянь пыжыны уг яра, со, пе, пудо сюдыны, фуражлы гинэ тупа. Дасо ар талэсь азьло ӧз яра вал мыным та вераськон. Юромо мынӥ гурт хозяйствоя министрлэн воштӥсез доры. Сергей Шакртдинович Шартдинов ужа вал соку отын. Мон сое азьвыл дырысен аслам землякеным лыдъясько. Ачиз башкир музъем вылын вордскемын ке но. Угось Сергей Шакртдинович данак аръёс ӵоже Пичи Пургалан ужаз. Аслаз номыртэм паськыт пальпотонэныз пумитаз: пуксьы, пе, матэгес. Кисьтӥ сюлэмшугъяськытӥсь мылкыдме. Кылзӥз. Шуисько, озьы но, пӧй, озьы, удмурт музъем ньыльдонэтӥ аръёсы собыдӟа ожмаськон дыръя быдэс фронтэз аслаз няненыз сюдӥз, нош табере... Кылзӥз, кылзӥз но шуэ: - Со гинэ мар ай? Табере удмурт музъем вылын будэтэм ӟег пызьлэсь нянь котӥз ке ӝытсэ удмурт кенакед, кыктой-куиньмой ӵоже возьмано луоз ӝутскемзэ. Сотэк гурысь сукыри нокызьы но уд потты... - Марлы? Вашкалаос... - Вашкалаос, вашкалаос... - министрлэн воштӥсез секыт лулскиз. - Асьмелэн улонэз озьы бергатыса кошкизы, гажано писателе. Берло дасо аръёсы кутӥзы но вашкала удмурт ӟег кидысэз воштӥзы. Ӝот-ӝот веразы: Удмуртия кизьыны кулэ "Лютессэн" сорт! Тӥни табере... Табере, быдэс удмурт шаерын таӵе ӟегез кизьыса, туж макталэ вуимы: ӝыт котыса, ӵуказеяз ӵукна выль нянь номырин уд куртчы. Со гинэ уг тырмы: сӥзьыл кизем кӧняез узьым тол вылтӥ бырыны шеде! Тулыс со вылтӥ нош ик валэс юосыз кизёно луо... Кин ке лыдъяз-чотаз меда Москваысь сётэм индылэмъя ужамлэсь изъян ваемзэ? Ӧвӧл на кадь сыӵе чотасьёс: одно ик маке но вылэ погыльскон мугъёс утчало - я инкуазь янгыш, я бер кизьыны вырӟизы, я кидыссы урод дасямын вылэм, я калык азьтэм... Нош музъем ужась шоры берло аръёсы чиньызы пыртӥ учкемен валче, удмурт музъемез воксё но гырытэк келляны кутскизы! Паймод! Техникалы эстӥськон ум шедьтӥське, пе. Кивалтӥсьёс каньылак гинэ киосынызы вӧлъяло: мар, пе, карод, Москваын адӟытэк уг уло, дыр... Сыӵе дыръя мынам тыпы кымысо кивалтӥсьёсыз ваче кымыс шуккем потэ: нош тӥляд асьтэлэн йырды мар понна, музъем понна висе-а, уг-а сюлэмды, удмурт музъем адямиез ноку но сютэм ӧз кельтылы, ужаны гинэ пӧрмыты! ...Шуняньгурт бусыостӥ туэ сӥзьыл шумпотӥсь мылкыдын ортчи: ваньзы соос кын улэ шальк-шальк гыремын. Вӧзам вамышъясь механик Гаврилыч шоры учкисько: "Усто!" - Да, вот, - возьматэ сик палась бугырскыса ӝутскись ӵын шоры - вырйыл нерге сьӧрысь "кировец" мычиськиз. - Солы тау кароно... - Ӧй вала... Тросаз хозяйствоосын "кировецъёссы" вань... - Вань, дыр... Нош трактористъёссы юо, йӧскадь уг ужало, косэм вылысь гинэ... Весь возьмало сюлоен шуккемез... Нош ми... Ми преник сярысь но ум вунэтӥське... - Кыӵе преник? - Сомында, сомында бусыосыз гырод - "Москвич" сётом шуим... Уй-нунал гыро... Материальной заинтересованность... - Сётоды? - А марлы уд сёт? Бусы гыремын ке, сюлэм вылын каньыл... Ӵуказе нуналлы оскон вань! Малпасько: гурт улонын котькуд удысъя озьы луысал ке! Бускель Лёшик туэ нырысетӥ классэ мыноз. Лыдӟиськыны мыло-кыдо. Мынам библиотекаысьтым философия книгаос борды ӝоген ӝабырскоз. Серекъясько. Пияшлэн ымныр вылаз ик гожтэмын, таидлы азьланяз одно ик дышетскыны, тодон-валан люканы кулэ шуыса. Одӥг гинэ куректонэз вань (сое кемалась тодӥсько): бамысьтыз пужыосызлы но ыргон тусъем йырсиосызлы луыса, Лёшикез ржавый шуыса исало. Буйгатӥсько быгатэмея. "Кыллэн лыэз ӧвӧл, пуны утэ - тӧл нуэ" - шуисько. Ӧйтӧд, пеляз тыре ик меда верамме? Нош туннэ воксё паймытӥз. Муш бакчаям вырыкум, мон сое ӵемысь сьӧрам басьтӥсько: котькуд мушкась ӟеч тодэ, куддыр макем кулэ луо юрттӥсь муртлэн киосыз. Сыӵе дыръя ӵемысь тодад ваиськод, марлы меда инмар адямилы куинь ки сётымтэ шуыса: сюсь рамкаед но кияд, ӵынатыны но кулэ, пӧсям ымнырдэ но ӵушалты вылэм, ветлык (муш утён, ымныр вылэ изьыяло, ӟучъёс сетка шуо) пушкад пырем мискинь мушез но поттоно... Лёшике зэмос юрттӥсь ни. Котырам вырыны мыло-кыдо, ӵынатыны туж ӟеч быгатэ. - Учкы ай, Микол агай, - шуэ - таосыз бомбовозъёс кадь. Кыӵе куаемын. Боз-з! карыса берто... - Куаемын ӧвӧл соос, Лёшик, - шуисько. - Мушъёслэн атайёссы соос. Узыри муш шуо соосыз... - Узыри? Нош атайзэс пырыны марлы уг лэзё? Учкы ай, макем улляло! - Туннэ кыӵе нунал? - Куамын... Ӵуказе школае мынӥськом... - Озьыен, гужемед ортчиз. Озьы-а? Мушъёс табере толлы дасясько ни... Нош соку соослы мултэс ым кулэ ӧвӧл ни. Толйыкузы но... Соин ик соос дась нянь сиисьёсыз асьсэ пӧлысь улляло... - Нош кызьы соосыз вормо? Учкы ай, Микол агай, соос, мукет мушъёс сярысь, макем бадӟымесь! - Узыри мушъёс, Лёшике, укто басьтыны но, чечы бичаны но асьсэос уг быгато - соосыз ужась мушъёс сюдо. Гужем ӵоже. Нош сӥзьыл пал узыриос кулэ уг луо ни, озьыен, соосыз улляно. Кызьы? Огшорылэсь но огшоры: сюдэмысь дугдо, узыриос ӟигартэмесь луо, соосыз каньылак улляны но луэ... Валад? - Валай, Микол агай... Валай... Милям но озьы мед луоз вал... - Малы? - Тятямылы паймим ни, Микол агай. Уй но нунал юыса кылле. Кӧлэ, кӧлэ но мама шоры сиён курыса ораськыны кутске... Эх ма, улод-вылод шу... Покчи юрттӥсьме пельпумтӥз ӟыгыртэме потэ - уг быгатӥськы: ӧвӧл адямилэн куинетӥ киыз. Мушкасьлэн - уката ик. Трактор, АОЗТ, сюло Шуняньгуртъёслэн нимаз кариськемзылы ог дасо ар пала ни. Озьы ке но, конторазы татчыозь улыно-вылыно гаражазы ик на. Азбаре потӥськод - соку ик машина-трактор уллё пӧлы сюриськод. Тулыс. Инмын тюрагай ошиськем но кырӟан-веран пумаз нокызьы уг вуы: гырон-кизён ужъёсыз ӵапак быдтоно. Чал-чал гараж азбарын. Палэнын сылӥсь ӵуж трактор котырын гинэ куаш! вазем кылӥське: кин ке но, куинь полэс бинялляса, ӟуч ораськон кылын кинэ ке быдтыса ик куштэ. Матэгес вамыштӥсько. Ог куамын аресъем воргорон трактор сьӧрысь возьматскиз, милемыз уг адӟы, лэся. Вожомемез сӥялскемын ӧвӧл на: киысьтыз скал возьман сюлоен шоналскиз, вань мугор кужымзэ сётыса ик трактор вылтырез шобыртӥз ук! Улэп мурт кадь жаль потӥз мыным ӵуж машина. - Сарыкмем кобла! Мать твою! Раз этак! Ёптыргин! Возьмато мон тыныд АЗТ! Эшшо кыӵе возьмато! Ме тыныд АЗТ! - сюлоеныз шоналскыса васькытъя но васькытъя корт вылтыре. Вырӟод-а, уд-а? Ме тыныд АЗТ? Паймыса учкисько вӧзысьтым механик шоры. Ас понназ кескич пальпотэ, сапег ныр йылыныз сюй комокез ӵыжыса лэзиз. - Эн пайме. Буйгатскоз... Павол со милям... Валэз кадь утялтыса возе тракторзэ... - Но?.. - Запчастьёс ӧвӧл... Вожпотэмзэ сюлоен пыргытэ... - Нош мар со сыӵе АЗТ? Механик табере кескич уг мыня ни: - Акционерное общество закрытого типа. Колхоз интые, пе, со... АОЗТ шуыса вераны шуг, соин ик Шуняньгуртын АЗТ каро но тӥни... Трактористэн кенешо шуисько вал - учкисько - склад пала вамышъя ни. - Буйгаз - нош ик кескич серектэ механик. - Табере запчасть понна кошкиз... - Шедьтоз? - Уз... Ӧвӧл... - Сюлоен но? - Коть нош водородной бомбаен: АОЗТ-ын запчастьёслэн зынзы но ӧвӧл! Кызьпу кенакъёс Одӥг киысь чиньыос но огкузьдаесь ӧвӧл, пе. Шонер со. Чаклалэ ай кызьпуэз но. Номыртэм чырткем писпу. Кытчы гинэ уг поты, кытысь гинэ уд пумита! Синмаськисько мон солэн улон борды ӝабыр-ӝабыр басьтӥськыны быгатэмезлы. Алигес милям гуртысь черкез выльысь ужатыны кутскизы: буязы, тупатъязы, тазатӥзы, котырысьтыз вань кулэтэмзэ октӥзы-калгӥзы. Озьы ке но, пушкысьтыз сельпо кенос зыныз али ке но бырымтэ на. Соиз понна сокем ик уг сюлмасько гуртоос: ӝуась сюсьтыл зын одно ик ваньзэ вормоз. Мукетыз кема сюлмаськытӥз гурт калыкез: сисьмем корт липет пуме, гольык кирпич борды ӝабырскыса ик тэлеӟем пинал кызьпу. Сокем мотор ӝутскемын, сокем шаплы сузьтӥське вылӥысь инбаме - эсьма, киыд кызьы пыроз улон борды такем задор кужымен биниськем мискинез быдтыны?! Ӧз, гуртын ӧз сюре сыӵе сьӧлыкез ас вылазы басьтыны мылкыд карисьёс. Верамзыя Епифан батюшко тордос колхозникез Иванэз но ӝуткам: тани, пе, бутылкалы сётӥсько, питырты сатана писпуэз храмлэн липет вылысьтыз. Иван пумит кариськем. Ыбес кенер ӝужда будэм кызьпуэз экспедициен лыктэм студентъёс мекалтӥллям: палэнысь вуэм егит адямилы кытӥыз ке, маиз ке кытчыяз ке йӧтэ шат? Кузь шачаен мырӟытӥллям - кирпич бордын олокызьы возиськись писпуэд черк азе соку ик супырак усем. Табере гурт калык пӧлын озьы ик верасько: чеберъязы, тазатӥзы ке но, черк вылтырын кызьпутэк маиз ке но уг тырмы... Ӧйтод, но кызьпу пӧлын кызьпу вань, шол. Чаклалэ ай асьтэос ик. Куд-огез соос ыбиськыса ик мертчисько лыз инбаме. Туж дыртыса. Кышкало, лэся, даурзы ӵоже уз вуттэ шуыса. Инбаме кыстӥськись мугорзыя вайёссы но уллань сюл-сюл ошиськылэмын, куаръёссы но, уллане учкыса, выллань кыстӥськись йылзылы юртто кадь. Лыз инбамен, пе, мед ӟечбуръяськоз! Ӧйтӧд, вань меда дунне вылын одӥг ке но кызьпулэн лыз-лыз инбам вӧлдэт борды йӧтскылэмез? Нош кӧня тодӥсько, егит кызьпу калык одно ик отчы сузьтӥське, йӧтскыны быгато шуыса оске, лэся... Вань на ай мукетъёсыз но. Таосыз выллань уг дырто ни, таосызлэн мугор быгылес, котырес, вӧл-вӧл адӟиське. Улвайёс выллань уг кыстӥсько, палэнэ вӧл-вӧл кариськыса сётско. Таӵе кызьпуос улын номыртэм сайкыт, номыртэм эркын луэ. Йырдэ амалтэк выллань кариськод: малы меда таосыд такем лабресэсь? Валатскиськод: йылзы таосыдлэн куке но ӵогемын, тӥялтэмын вылэм, дыр. Соин ик выллань ӝутскон задорзы лапкомытэмын... Адямиосын но озьы уг-а лу меда? Вина юод, визьдэ ыштод "Дэмен наркоманиез но, аракы юонэз но, тамак кысконэз но вормомы". Сыӵе ӧтён улсын 8 ноябре 10 часын Удмурт кун университетлэн актовой залаз конференция ортчоз.Кемалась ик ӧвӧл Екатеринбургын азьвыл наркоманъёслэн аспӧртэмлыко съездзы люкаськылӥз. Наркотикен герӟаськем адямилы юрттон но урод сюрес вылысь потон сюресъёс сярысь висисьёс асьсэос специалистъёслы нырысьсэ валэктонъёс сётӥзы. Улон шоры выль синмын учкеменызы, выль малпанъёсынызы оскытӥзы - наркоманиез вормыны луэ. Съездын вал психологъёс, наркологъёс, педагогъёс, черкын ужасьёс. Азьвыл наркоманъёс йырез усыкмытӥсь эмъюм вӧлмытӥсьёслы но сое басьясьёслы вазиськизы: "Ми но куд-огез кулон ваись вузэз вӧлмытыны вырим. Но ӧм тодылэ, асьмелэн улонэнымы, лулчеберенымы, пиналъёсмылэн тазалыкенызы вузкарим шуыса. Дэмен кутским ке, наркоманиез вормомы. Дышетӥсь, эмъясь, ужась - ваньмы асьмеос одӥг семья луиськом, сое утьыны кулэ". Ижевскын ортчоно конференциын но вераськозы азьвыл наркоманъёс. Соос ваньзы йӧнатскизы Геннадий Шичколэн методикаезъя но Порфирий Ивановлэн системаезъя. Конференция бере университетын ик наркоманъёслы, кыскисьёслы, юисьёслы занятиос дунтэк ортчытозы. Юанъёсты кылдӥзы ке, жингыртэ таӵе телефонъёсъя: 21-20-55, 20-76- 00. В. Копысов, азьвыл кыскись но юись, нош али соослэсь эрико адями. ШӦКЫЧ Визьлюк-измъёс Коммунизм - киын сузёнтэм шудбуро шаер. Капитализм - дунне пыдсын интыяськем страна. Социализм - жаляно радлык. Догматизм - интыязы пукисьёслы дэмланъёс. Паразитизм - тараканъёс кадь улӥсь ужтэк кылемъёс. Оппортунизм - отчы-татчы шонаськись сазь адямиослэн дышетонъёссы. Катаклизм - мур гуэ усён инты. Бедуизм - куанер адямиослэн улоннизы. Чубаизм - ваучеръёс сярысь доклад. Колониализм - Россиын улӥсьёс та вакытэ. Вордскем нунал - шудо нунал Озьы медло котьку. Удмурт Республикамы сӥё-дано пусйиз аслэсьтыз 78 ар тырмон нуналзэ, нимын-тулын вераз гажано нылъёссэ но пиоссэ. Арез ар воштэ, адямиез - адями. Огез гинэ кыле весяклы - ужась муртэ дунъян но данъян. Туэ но со, котьма шоры учкытэк, сылэ валтӥсь интыын. Кун Кенешлэн бадӟым залаз люкаськизы шаерысьтымы устоосыз пӧлысь устоосыз нянь будэтӥсьёс, пудо утялтӥсьёс, учёнойёс, врачъёс, дышетӥсьёс, пӧртэм удысъёсысь кивалтӥсьёс но ваньбур поттӥсьёс. Удмурт Республикаысь Кун Кенеш но Правительство вылӥ дунъязы соослэсь калыкмы понна жадёнэз валатэк тыршемзэс. Кызьы уд шумпоты туннэ яратоно удмурт композитормы Геннадий Михайлович Корепанов- Камский понна! Солы сётэмын "Удмурт Республикалэн дано гражданинэз" сӥё-дано ним. Тодмо крезьгурчиенымы артэ - республикамылэн эшшо одӥг данъяськымон пиез - Кез музъем вылын вордскем но будэм кылбурчи Олег Алексеевич Поскребышев. Та дано нимын пусъемын на Валентин Иванович Кудинов, акциосын "Удмуртнефть" огазеяськонлэн директоръёсызлэн кенешаз быръем мурт. Удмуртиысь 13 ужась коллектив пыртэмын республикалэн Данъян пулаз, татчы ик шедемын 50 азьмынӥсьлэн нимтулыз. Люкаськемъёсты ӟечкыласа, Кун Кенешлэн Тӧроез А. А. Волков шуиз: - Сӥль, йӧл, курег пуз поттонъя, бакча сиён будэтонъя Удмурт Республика мынэ Россия Федерациысь устоез 20 регион пӧлын. Мар вань рынокын - ваньмыз со асьмелэн ужаммы. Туннэ умой ласянь вераны кулэ военно-промышленной комплекс сярысь но. Берло кык арзэ продукция поттонзэ со 50-60 процентлы будэтӥз. Зэм, асьмеды трос гинэ пыкылӥсьёс шедизы, пыӵал тӥрлык тросэн лэсьтӥськом но вузаськом шуыса. Россиын конверсия ортчытон улсын рынокысь интымес ӝог гинэ асэстӥсьёс шедизы. Правительстволэн Тӧроез П. Н. Вершинин данъяськыса вераз "Воткинский завод" кун объединение сярысь. - Заводлэн директорез В. Г. Толмачев, ӟеч вакытъёсы сямен, праздник азьын шуиз: октябрь толэзьлы чаклам планмес мултэсэн быдэстӥм. Та коллектив Удмурт Республикаысь Кун Кенешлэн Президиумезлэн но Правительстволэн постановлениенызы пыртэмын республикамылэн Данъян пул вылаз. Зэмен но, тросгес мед луозы вылэм вылӥ азинлыкен ужась предприятиосмы, колхозъёсмы но эштосъёсмы. Соку уждунтэк пукисьёс, пунэме пыремъёс ӧжытгес кыльысалзы. Республикамылэн нуналаз нимысьтыз пусъемын калыкез эмъян удысын ужасьёс. Таӵе секыт вакытэ но учёнойёс вань быгатонозэ лэсьто, тазалыкмес утёнын выльзэ пыӵатон понна. 1998-тӥ арлы Кун премия сётэмын Ижевскысь медициная кун академиысь докторлы, профессорлы Виктор Васильевич Трусовлы; докторлы, профессорлы Клара Георгиевна Серебренниковалы, профессорлы Маргарита Борисовна Колесниковалы но мукетъёсызлы. Шаерысьтымы данакез тодмо адямиосмы пусъемын Россия Федерацилэн наградаосыныз. Соослэн нимъёссы сётэмын луозы газет бамъёсын. Нуназе бере республикамылы сӥзем праздник азинскиз Операя но балетъя театрын. Татчы но зал тыр люкаськизы ожын но ужын данэ потэмъёс, егитъёс, азьмынӥсь рабочийёс но гурт хозяйствоын ужасьёс. Вераськисьёс пӧлысь сюлэме кылизы Игра районысь "Рассвет" колхозысь председательлэн кылъёсыз: - Кӧня туннэ няньлэн дуныз? Таӵе юанэз берло дыре ӵем кылод. Тысьмес ми келяськом 40 копейкаен, йӧлэз - 1 манетэн. Гурт улэ на копейкаен, манетэн лыдъян-чотан зонаын. Вазиськем потэ промышленникъёслы: музъем ужасез гольык кельтэмды уг ке поты, дунъёстэс кулэстэ. Мон куинетӥ поколениысь колхозник, тодӥсько, кызьы нянь будэ, валэн герыен бусыосты котыръяме уг поты ни. Соин ик ойдолэ кужыммес огазеяса ужалом, улонмес ӟечгес карон вылысь. Соку ваньмыз интыяз пуксёз. Награда басьтон - бадӟым дан. Соин ӵош - калыкед азьын кыл кутон. Сӥзём соослы ваньзылы выль вормонъёс, шуд но тазалык. Вуоно арын награда басьтӥсьёслэн радзы мед йылоз. Л. МЕДВЕДЕВА, В. КАМАШЕВ (фото). Нырысь чуръёсаз ик, мон медам паймы шуыса, ачиз сярысь ивортэм (мон со вератэк но тодӥсько, кин луэмзэ). Тынад Вася агаеныд ог-огмылы гожтэт лэзьяськом, пе, вал, но кемагес ини дыр ортчиз кусыпмы уриз, уг, пе, тодӥськы, али кытын со; Дальней Востокын вал шуыса тодӥсько, нош нокыӵе иворез ӧвӧл. Ачид сярысь но, пе, ӧжытак гожты, кытын, мар ужаськод, кыӵе уло бызара калыкъёс. Мон ведь кемалась кошкемын ини дор палъёсысь, котьмар тодэме потэ, лэзь вал ответ та гожтэтэлы... Та гужем ӵапак солэн дусымъяськем нылыз гуртамы бертэмын вал. Олокытӥ но ветлэм, олокӧня пол бызьылэм адями ини. Та гожтэт сярысь солы верай, лыдӟыны но сётӥ, адрессэ но басьтыны дэмлай. Гожты, шуи, гожтэт, со шумпотоз. Нылыз но гожтӥ шуиз, мон но ответ сётӥ - соин уже быриз мынам. Ми Надя эшеным гижысь-пиньысь уж борды ӝабырскемын, уй но нунал но чик люкиськылытэк ужаськом, ӵош школаямы мынӥськом, ӵош бертӥськом, ӵош общественной ужъёсыз быдэсъяськом, уин одӥг кроватьын кӧласьком... Одӥг нуналэ, 1942-тӥ арын сентябрь толэзь пумын, шурдыт телеграмма басьтӥ агаелэсь. "Монэ Шунды пуксён пала ожмаськонэ келяло Кизнер станция пыр: лыктэ вал пумиськыны. Оло адскомы на, оло ум. Вася." Анайме сьӧрам басьтыса, кык нуналлы куриськи но, Кизнере кошким. Сутка ӵоже чик нокытчы кошкылытэк, Васяез возьмаса, вокзалын пукимы. Татчыозь ноку но адӟылымтэ суредэз адӟоно луиз. Шунды ӝужан палась огез бӧрсьы огез оже мынӥсь эшелонъёс ортчыло. Кӧня минут вал меда эшелонъёслэн кусыпсы - мынас часэ но ӧй вал на али соку. Котькуд эшелонын ог дас сизьым, дас укмыс вагон, котькуд вагонын тросаз егитэсь, тазаесь, чебересь пиос-солдатъёс. Кизнере кӧня ке минутлы гинэ дугдылӥзы. Котькуд эшелон вуыку, перронэ бызьыса поталляй, ортчемезлы быдэ агайме возьмай, пумитало кожаса. Сутка ӵоже дас укмыс эшелон ортчиз, нош агайме ӧй пумита. Педучилищеын огвакытэ ӟуч "Е" группаын дышетскем пиез, Вороновез, гинэ адӟи, со но монэ тодмаз. Кыӵе чебер, веськрес ӝужыт мугоро луэм. Эшелонэз кошкытозь вераськыса сылӥмы. Ведь соос, сыӵе егитэсь, яратонэз но умой-умой тодыса вуттытэк, кулонлэн пумитаз кошко. Погылляськыса бӧрдэм потэ: малы, кин понна, кинлэн янгышеныз кутъёс кадь быро адямиос?! ... Нош Шунды пуксён палась эшелон бӧрсьы эшелон сӧсырмемъёсыз вортто шунды ӝужан пала. Со мында составъёс, ӝуаса сьӧдэктэм-эгырӟем вагонъёслэн каркасъёссы, ӝуам ож тӥрлыкъёсын валче чик дугдылытэк ортчыло. Кык нунал но одӥг уй ӵоже возьмаса но ӧм пумиське агаеным. Мон кык нуналлы гинэ куриськем вал уга. Оло, мукет сюрестӥ келязы шуыса малпамы анаеным. Анайме кельтӥ ик. Ачим Кизнере валэн ю-нянь ворттӥсьёсын кошки пеймыт луон вакытэ. Ӵапак со уе ик агае Кизнере вуэм. Анаеным пумиськиллямтэ, пересь мурт оло валатэк кылем. Командирезлэсь куриськыса, агае одӥг уйлы доре вуиз, куамын иськемез уйбыт пыдын бертэм. Анае пизэ возьмаса вокзалын пуке, пиез со куспын дораз ини, табере ини анаймес возьмаськом. Конюх, самой шаплы ужпизэ кыткыса, ачиз анаймес вайыны кошкиз... Быдэс гуртэн утялтӥзы агайме соку. Кинлэн маиз вал сюдӥз, сектаз, ваньзэ ӝӧк вылаз пуктӥз... Та вакчи дыр куспын агае Надяен вераськыны ик ӧз вуэ кадь, но мон шӧдӥ: ог-огзэс синйылтӥзы, сюлэмазы мар ке но кылиз. Агае кошкиз туж шимес "уже", кин тодӥсь, оло бертоз на, оло уз, оло сутӥз эшъёссэ, оло ӧз... Возьмам гожтэтэз вуиз агаелэн. Надялы но салам верам. Та нуналъёсы ик басьтӥ Ивановлэсь кыкетӥ гожтэтсэ. Табере мукет юанъёс малпам, мон солы нош ответ мед сёто шуиз, дыр. Соку ик агаелэн но гожтэтэз вуиз на выль адресэн. Кык Васяослэсь кусыпсэс герӟан понна, кыксылы ик гожтэт ыстӥ. Озьы мон "связистка" луи кадь. Ми, дас укмыс аресъем егит нылъёс, чебересь бубылиослэн сяська вылысь сяська вылэ лобыса ветлэмзы кадь ӧм улэ, ми калык пӧлы выимы, калыкен ӵош ужамы, нуназе урокъёс бере нылпиосын етӥн ишкимы, тышкамы, вӧлдылӥмы, дырыз вуыса сое ӝутылӥмы.. Нылпиосмес ӝытазе доразы келяса, асьмеос мӧйыосын, егитъёсын ӵош арам юэз кабанэ (зуродэ) тырылӥмы, пеймыт луытозь. Та аръёс странамылы туж секыт вал, немецъёс весь азьпала, пыдло но пыдло пыро, кышкытэсь иворъёс вуыло гуртэ, соизлэн похоронноез вуэ, таиз сӧсырмыса госпитальын кылле. Котькин маин ке но юрттыны тыршиз. Ми но пиналъёсын, анайёсынызы ӵош, посылка дасяса, пыдвылъёс, пӧзьёс, пиналъёслэн киынызы вурем-пужыятэм тамак пуйыос фронтэ келяллямы. Аръёс бӧрсьы аръёс ортчо, тани вань аръёслэсь секыт ньыльдон куинь ар вуиз. Войналэн пумыз но ӧвӧл кадь, оло, асьмеос ваньмы немец ки улэ сюромы ини. Ӧз, ӧз, ворме немецъёс асьме калыкез. Гуньдытӥзы сьӧсез Сталинград дорысен. Кӧня быриз отын калык, сое история тодэ. Надя эшелэн атаез ӵапак отын вылэм, отын ик бырем. Милемлы но фронт мышкын капчи ӧй вал. Но милям йыр вадьсамы бомбаос ӧз куялэ, снарядъёс ӧз пуштылэ, чидамы ваньзэ. Ньыльдон куинетӥ арын август толэзе телефонограмма вуэм: "Егоровой Анне Георгиевне срочно явиться в райком комсомола". Малы меда ӧтё райкоме, номыр шеке ӧвӧл кадь. Ӧтё бере нокызьы мынытэк уг луы. Тямыс иськемез вамышъятозям, оломар но малпанъёс бергазы йырам. Армие басьтыны малпаллям ке, военкоматэ ӧтьысалзы. Та аръёсы унозэ нылъёсыз но армие басьтылыны кутскизы. Бызара гуртысьтымы Ермилова Таняез басьтӥзы, Возьпумысь (Арвазьысь) Лаптева Марусяез. Райкоме пыри. - Пуксьы, тонэн вераськон вань, - пукон шоры возьматыса, лякытак вазиз мынэсьтым мӧйы пиосмурт. - Ачид тодӥськод, али таза воргоронъёс, дышетскем егит пиос ваньмыз сямен фронтын. Комсомоллэн райкомаз ужась кулэ, кыкетӥ секретарь, со ӟуч кылэз но, удмуртсэ но ӟеч тодӥсь мед луоз. Милемлы тӥледыз дэмлазы. Кызьы учкиськоды та пумысен? Сыӵе кылъёсыз кылыса, мон гуньдэм кадь луи. Мар вераны ик пайми. - Мон курдасько, уг быгаты райкомын ужаны, школаын но али гинэ дышисько кадь. Аслам уже но кельше, пиналъёс кылзо, ӵош ужась эшеным но умой кусыпмы, ваньзэ быдэсъяськом, мар кулэ. Та вераськеммы бере мон роное пырай. Соку татын кивалтӥсь Анна Андреевна Чернышева вал ини, Мелузова кытчы ке кишкиз-а, мар-а. - Анна Андреевна, монэ комсомоллэн райкомаз кыкетӥ секретарь басьтыны малпаллям, мон пумит солы, школаын ик ужаме потэ, - ӝожтӥськисько. - Мынэмед уг ке поты, кужмысь уз каре, эн курда, мон тон палан, уг сёты тонэ. Та пумысен монэ оло вить пол, оло куать пол ӧтьылӥзы. Котькызьы кышкатъязы: я фронтэ, пе, келялом, я военной заводэ, ӧд ке кылзӥськы, соглаш ке ӧд луы. Кӧня бӧрдӥ, кӧня куректӥ, малпаськи. Милям гуртамы но мукет гуртъёсын эвакуированнойёс байтак вал. Соос городской, грамотной адямиос, улонэз адӟем муртъёс ини. Одӥг сыӵе визьмо нылкышноен пумиськылӥ вал ини, Богородск гуртэ пиналъёс доры ветлыкум. Тӥни соин вераськыны, кенешыны ветлоно кариськи, мар меда шуоз. Дэмлалоз-а, алоз-а... - Вай мон тыныд карта кушто, куддыръя со шонер вера, - шуиз. - Туналод-а, мар-а, - шуисько. - Мон картаостэк но верасал. Ма, кызьы соглаш уд луы, неужто тон весь огинтыяд улыны малпаськод? Со тыныд азьпал улонад сюрес. Тыныд оско, тонэ калык пӧлы потто, калыкен огъя ужан - со самой дано уж. Калыклэсь дышетскиськод, визь люкаськод, аслыд ярамонзэ басьтӥськод, кулэтэмзэ палэнтӥськод. Собере ачид калыкез дышетӥсь луиськод. Эн кышка, мын. Та кышномуртэн вераськеме бере сюлэмам золтӥськемез ӧжытак лябӟиз кадь. Районысь комсомоллэн конференцияз монэ кыкетӥ секретаре бырйизы. Табере выль уж, выль улон инты, уно сюлмаськонъёс. Улонам таӵе бадӟым воштӥськонъёс луэм сярысь гожтэт ыстыны дыртӥ Ивановелы, а то монэ Кармыж школаысь утчалоз. Ог кутскемам ивор сётӥ Вася агаелы но. Комсомоллэн райкомезлэн нырысетӥ секретарез соку Зоя Дмитриевна Ионова вал. Со мынэсьтым дасо ареслы бадӟым вал, дыр, пиез будэ вал ини, кузпалыз ожмаськонын. Зоя Дмитриевна рос-прос валэктӥз: школаосысь комсомол но пионер организациослэн ужамзы понна кыл кутоно луоз. Иванов эшелы, оло, арнялы быдэ гожъясько вал ни, "отчёт" лэсьтылӥ. Со но весь гожъяз. Комсомоллэн ужез кабинетын пукон ӧвӧл, весь егитъёс пӧлын, туж уно поталляно луылӥз гуртъёсы, арня-кык чик бертылытэк. Куд-ог гожтэтъёсаз Василий аслэсьтыз сюлмаськонъёссэ но вератэк ӧз кельтылы. Тон, пе, сомында егитъёс пӧлтӥ ветлыса, монэ вунэтод, мукетсэ шедьтод. Уг ваты, мон трос басьтылӥ гожтэтъёс армие келям комсомолецъёслэсь. Гожтэтъёс вуылӥзы чик тодымтэ муртъёслэсь но. Но Ивановлэн кадь чебер почеркен но солэн кадь визьмо гожтэтъёс нокинлэнсь ӧй басьтылы. Солэсь гожтэтъёссэ кык пол но, куинь пол но лыдӟылӥсько вал, вуоно гожтэтсэ басьтытозям, киям возьылӥ. Кудӥз ӟуч кылын гожтэмын луэ, кудӥз ӝот-ӝот удмурт сямен, сюлме пырись кылъёсын. Туж мӧзмисько удмурт кылын вераськонлэсь, тамында аръёс ӵоже армиын нокин ӧй вал удмуртъёс, шуэ. Удмурт кылын гожтэмезлы ответ мон но удмурт сямен гожъялляй. Мар сярысь гожтыны ноку но ӧй шугъяськылы, мынам туж трос вал, мар гожтыны: сыӵе- сыӵе гуртын сомында улӥ, сыӵе ужъёс быдэсъямы егитъёсын. Сосмак бигер гуртын ю октон-кутсан вакытэ кык арня улӥ, чик, одӥг кыл но бигер сямен вераськыны быгатытэк, переводчике вал дышетӥсь Роза, отчествозэ вунэтӥ. Со Васяез тодэ вылэм. Августовской конференциосын, самой умой огазеяськонын, дышетӥсьёс огзэс огзы тодмало. Куд-огезлы со семья кылдытыны юрттылӥз. Лобаны дышымтэ пичи тылобурдо пиез шуныт карысьтыз куштэм кадь, аныкай-атыкай "карысьтым" монэ но ишкалтӥзы, нош кытын, кин дорын улонэ сярысь нокин но ӧз но малпа, ӧз но сюлмаськы - коть урамын кӧла, коть кабинетад. Анаелэн дэмламезъя, ӵужатаелэн ӵыжы-выжыосыз доры куриськи. Лэзизы - солы но туж шумпотӥ. Асьсэос вить кузя: кык пересьёс, нылзы, кык внучкаоссы. Ту-уж лякыт сямо ӟуч адямиос вал. Вераськыкузы ымыстызы куаразы ик уг кылӥськы. Олокӧня ӵоже мон выж вылын кӧласа улӥ. Туж лякытэн пумитало вал, мар асьсэос сиё, монэ но сюдо, картофка ке картофка, ӝук ке ӝук. Ачим но сётӥсько вал, маи вань. Та аре ик быдэс толэзь улӥ Кизнер ёросын нюлэс корасьёс пӧлын, кӧланы бертылӥ Лака-Пыжма гуртэ, отчы интыяськыны дэмлазы. (Соку Кизнер но Бемыж районъёс нимазы вал) . Татчы ыстӥзы егитъёс пӧлын ужез радъяны, соослэсь тыршемзэс чакланы, кыӵе гуртысь кӧня мурт ужамез лыдъяны. Татын ужаме сярысь но Васяелы гожъяй. "Васяелы" юнме уг шуиськы, со гожтэтэзлэн пумаз "тынад Васяед" шуыса гожтӥськыны кутскиз. Табере мон но "Тынад Нюраед" шуыса пусйылӥ. (Учыр тупаку верало али. Мынам нимы куать пӧртэм вал: семья пушкамы мон Анна нимын улӥ, гурт калыклы но эшъёсылы Аннӥ вал, ӟуч эшъёсылы - Нюра, анаелэн выныз, ӵужмурт понна - Анютка. Пичи дыръям атае- анае монэ сьӧразы Бемыже куное нуизы, отын монэ Нюся шуизы. Иже вуэме бере Аня луи). Кыӵе гуртэ но ӧй вуылы. Гужем шуныт нуналъёсы-а, сӥзьыл зоро-кото дыръя-а - кытчы косо, отчы ик мынӥськод. Котькытчы - пыдын, нокыӵе машинатэк. Толалтэ коть куас вылэ султӥськод но ширтӥськод тӧдьы лымы вылтӥ. Малпаськоды, мынам лыжной костюме вал? Кытын, пе, со. Вамышъяны капчи мед луоз шуыса, паськыт юбка дӥсяськод, гын сапег кутчаса, куаслэн пыд понон пелесаз пыдъёстэ донгиськод, мышласянь гозыен керттӥськод - куасэд медаз гылӟы аслэсьтыд азьпала. Йырад ыж гонлэсь аслад керттэм изьыед, вылад но ас керттэм кофтаед. Гуртэ вуыса, кофта коже уд ветлы ук, чар кезьыт куазен. Сьӧре басьтоно эшшо тол дӥсь. Со дыре рюкзакъёс вал кожаськоды-а? Тол дӥсьтэ бадӟым кышетэ биниськод, огпал пумзэ пельпум вылтӥ карыса, мукет пумзэ кунултӥд поттыса, мыл азьпалтӥд керттӥськод. Ваньмыз та "походной форма". Озьы мон комсомолын ужатозям быдэс районэз котыръяй. Нош одӥг нуналэ, ноябрь толэзе, лымы усемын вал ини, монэ партилэн райкомаз ӧтизы. - Егорова эш, тон тодытэк уд улӥськы, асьме районмылы задание сётэмын. Каркалай нюлэс коранын трос калык ужа, куд-огез толэзьлэсь но кема ужасез но вань, пиналъёс но, егит нылкышноос но. Соосыз воштоно, доразы лэзёно. Со понна ик али выль кужым вуттоно отчы, кӧня мурт люкалом, али вераны шуг. Соосыз отчы келян-нуон понна кыл кутӥсь тон луод, юрттӥсьёс но луозы, фронтэ шедьымтэ мӧйы воргоронъёс. Тӥ куинь кузя дас-дас кык бурдо дӧдьые кыткем валъёсын ӵош толэзь ӵоже улоды. Собере ми нош тӥледыз воштыны мукет кужым ыстомы. Озьы бадӟым обоз кузь сюрес вылэ потӥз. Каркалае ми куинь уй но куинь нунал ӵоже мыныны курадӟимы. Эн малпалэ, ми чик дугдылытэк, чырым но карытэк, пӧсь ву юытэк, одӥг пыры нянь сиытэк мынӥмы шуыса. Кыӵе гуртысен милемыз пеймыт уй сутэ, со гуртэ ик кӧлон инты утчаськомы, но ми асьмеос ӧм утчалэ, юрттылӥзы колхозъёслэн председательёссы. Сомында валэн, сомында калыкез одӥг мурт доры кызьы интыялод? Быдэс обозэз кык- куинь валъёсын люкылыса, пӧртэм-пӧртэм кунокуае пыртылӥзы. Котькуд валлэн кузёезлэн, биньгозы бордын пукисьлэн сюлмаськонэз уногес вал: солы валзэ юсконо, сюдоно, люктано, собере гинэ ини шуныт корка пыроз. Куинь уй но куинь нунал ӵоже мынэм сюресмес тупен-тупен гожтыса уг улы али, сое лыдӟыса, адямилы вуёмымон луоз. Одӥг маке сярысь вераме потэ ик. Та учыр Уваын вал кадь. Милемыз интыязы одӥг семьяе, семья шуыны луоз ке. Ми юаса ум улӥське ук, шуныт инты, пӧсь ву ке но сюриз ке, ӧжытак ялкарыны кылдӥз ке, со но шумпотон ини. Кылиським, марам ӟус вылъёсы инты шедьтӥмы пуксьыны. Шӧдтэк шорысь уин азбарын шӧтэм черекъям кылӥськиз. Сеникын дыбыр-култыр пыд куара кылӥськиз но, ӧс ваяк усьтӥськиз. - Кин мон доры пырыны лэзиз тӥледыз, марлы тӥ татын дорады кадь пукиськоды? - кесяське мырдэм пыд йылаз сылӥсь шоро-куспо аресъем кышномурт. Тугаськем йырсиоссэ кышет улаз донганы вырыса, шуш куараен омырскиз ми шоры. - Кошке али ик! - Ми тунгонам корка ӧм пыре, коркады пась вал, нылашты дорады. Татын, шуизы, умой кышномурт улэ, одӥг уйзэ чидалоз, - озьы валэктыны тыршимы, сюлэмзэ ӧжыт небӟытон понна. - Ми татын янгыш ӧвӧл, тӥ доры интыяз председательды, ӵуказе ӵукнаозь гинэ, ӧжыт ялкаром, шунтӥськом, валъёсмес сюдом но азьпала гонӟыртом. Кема гинэ ас понназ вуӵыртӥз на кузё кышно, валес вылаз выдэмез бере но; бӧрысь ини зӥбломиз, лэся, чалмиз... Ӵукна султыса, ӧжыт ӵуш-паш ветлӥз ик корка пышкытӥз. Ми но сюрес вылэ потыны дасяськиськом ини, соин йырин ӧвӧл милемлы.. Вождэс эн поттэ, толон куноын вал, ӧжыт мултэсгес ӟистыны шедьтӥськем, ӵукна, йырыз сайкиськем бере, ӧжыт кепыраны кутскем, шӧдске. - Милям вожмы уг поты, тау шуныт коркаедлы, пӧсь чаедлы, - шуыса люкиським. Та кузя сюресэз ортчыса, котьмар сярысь но вераськимы ини, огмес огмы но ӟеч валамы кадь: кырӟамы но, бӧрдӥмы но, серекъямы но. Али, выльысь дӧдьые пуксеммы бере, котькудӥз аслаз сюлмаськоназ, куректоназ выемын. Нокинлэн но вераськемез но уг поты ни кадь. Кызьы уз куректы анай, векчи нылпиоссэ песянаен кельтӥз бере; мар меда сиё, кызьы меда анайзытэк кӧлало, соос но бӧрдо, дыр, кытчы кошкиз анаймы милемыз куштыса, шуо, дыр. Мынам пересь атае но анае гинэ кылемын доре, апае но Каркалайын та виын, агае ожмаськонын. Мон но соос сярысь сюлмаськисько, кызьы меда пудо-животэз утялтозы пересьёсы. Сыӵе ёрмонэз чидаса дышетски Можга педучилищеын, дышетӥсь луи, кыӵе шумпото вал атаен анай, вӧзазы юрттӥсьсы вань шуыса... Ачим но туж умой малпанъёсын, азьпалан улонэлы планъёс пуктыса, каллен ужасько вал аслам яратоно гуртам. Ӵукна анайлэсь пӧзьтэм сиёнзэ, турынлэсь парем райзэ юыса школае кошкисько, урокъёс бере нош ик дасез вылэ бертӥсько. Озьы каньыл улонэ кык ар гинэ кыстӥськиз. Табере кин мон, кытын мон, малы мон... Сыӵе малпанъёс йырын муш палэп кадь бергало. Сюреслэн пумыз ӧвӧл шуисьёслы эн оске, сюреслэн но пумыз вань, ми солэн пумаз вуимы. Тани со Каркалай шуонзы. Война аръёсы кин ке Каркалае вуылӥз, сое кулытозяз уз вунэты. Бемыжысь дас валэн потӥмы, котькудаз ньыль-вить адями. Каркалае витез гинэ валмы вуиз, оло мукет сюрестӥ кошкизы, оло берлогес кылизы. Ма, уин кӧланы дугдылыкумы, одно ик кин ке но пегӟемын луылӥз - ваньзэ кызьы син азяд возёд... Одӥг нылаш Можгала вуэммы бере ик куриськиз: - Аннӥ, лэзь вал монэ дорам бертыны, мынам пересь анае огназ кылиз. Мон Туганов Георгий Романовичлэн сузэрез, Наташа. Мынам Туганов сярысь кылылэме вал ини, школаын ужакум, со Бемыжын редакциын но ужам, мон сое соку ӧй адӟы ни, фронтын вал, дыр. - Наташа, мон тонэ кошкыны лэзи ке, мукетъёсыз но куриськозы ук, - шуисько. - Висьыны кутски шу, ӟырдасько кадь шу... - Дорад бертӥд ке, тонэ нош ик келялозы берлань. - Мон арня пала татын, Можгаын, ӵыжы-выжыосы дорын уло, собере дор палам кошко, анае жаль потэ. Тӥни озьы "ышылыны" кутскизы нюлэс кораны мынӥсь нылкышноос. Ма веранэз, нюлэс коран, писпу погыръян - со нылкышно уж ӧвӧл. Кытчы пырод, ваньмыз таза воргоронъёс ожмаськонын бере. Каркалае выль кужым вуэмлы ужасьёс туж шумпотӥзы, тужгес но нылпиё кышномуртъёс. Нылпитэмъёссэ кык толэзь но возьылӥзы. Котькинлэсь зол паймиз мынам апае. - Мусое, сузэре, тонэ но татчы нюлэс кораны ыстӥзы-а? Табере кыкнамы уломы-а ини та каргам Каркалайын? - Бордам зол ӟыгырскыса, зар-зар бӧрдэ. - Апай, эн бӧрды, мон тонэ доре келяло. Бемыж пала мынӥсьёс луизы ке, валэн келяло, кыкнамы татын ум улэ. Сюрес вылэ потыкум, мыным асьме колхозысь ик одӥг пуд чабей пызь вузазы, одӥг кило ӵыжтэм вӧй. Ӝынызэ пызьме доре кельтӥ анаен атайлы, ӝынызэ сьӧрам кутӥ. Ми Каркалае Октябрь праздниклы тупамы, апаеным ӵош пусйимы. Чылкыт, номырин сурамтэ, чабей пызьлэсь кисаль пӧзьтӥмы, эшшо ке ӵыжтэм вӧйын сураса. Оло, сю грамм спирт но сётӥзы кадь ваньмызлы, но мон пайме апаелы сётӥ. Арня мында апаеным артэ кӧламы. Отын ваньмыз бадӟым ӟусъёс - нараос вылын огъя ӵош кӧлаллямы. Асьме гуртысь ик кык нылпиё кышномуртэн ӵош, апайме но Бемыж пала мынӥсь валэ пуктӥ. Мон ужасьёсыз ӵукна тэле келялляй, куддыръя соослы улвайёсыз огинэ люканы юрттылӥ. Ӝытазе (та дыре нуналъёс вакчиесь вал ини) озьы ик нюлэскысь потэмзэс возьмалляй. Туж тунсыко учыръёс но луылӥзы. Мыным веразы вал азьвыл ужасьёс, татын, пе, милемлы кыдёкын ик ӧвӧл, немецъёс но нюлэс коранын ужало. Соку мон пленнойёс, дыр, шуыса малпай. Нюлэслы палэнынгес, кыр интыын, юг-юг лымы вылын тылскем ӝуа, отын зӧк кор вылын егит пи кияз гитараен пуке, мар ке но нёжъя. Мон тылскем доры мыноно кариськи. Со егит пи, оло, кӧня ке ареслы мынэсьтым бадӟымгес, тусызъя озьы потӥз мыным, немец вылэм, умой вераське ӟуч сямен но ӧжыт, шӧнгыльгес. Со ас ужасьёсызлэсь нюлэскысь потэмзэс вите вылэм. Ми, пе, Поволжьеысь немецъёс, татчы келязы, война кутскем бере. Мон корлэн мукет пал пумаз пукси. Соку немецлэсь ӟуч кылын кырӟамзэ кылӥ, нырысьсэ - "Сулико" кырӟанэз. Воксё пайми, туж жаль потӥз мыным со. Долго я бродил среди скал, Я могилу милой искал. Сердцу без любви не легко, Где же ты моя, Сулико? Та кырӟан со дырысь чик йырысьтым ӧз кошкылы. Кытысь ке та гурез кылӥсько, со немец пияш син азям пуксе. Апайме доре келяме бере, монэ мукет интые воштӥзы кӧланы. Бадӟым бараклэн пумаз кык пичиесь комнатаос, огпалаз техничка кӧлалля вал кадь, мукет палаз - кин ке начальникъёс вуо ке. Таяз комнатаын, ӧслэн йырвадьсаз, пичи гинэ сэндра (полать) ёзнамын, отын кӧланы луэ. Мыным, егит ныллы, отын кӧланы дэмлазы. Туж шумпотӥ солы, нош кыӵе шуныт вал. Одӥг пол, изьыны выдыкум, гур вылэ куасьтыны сапегъёсмес пуктылыса кельтӥ... Ӵукна мар ке ӵуштаськем зын нырме бичатыны кутскиз, ыж гон ӝуам зын. Ӵын, ныре гинэ ӧвӧл, синме но пыре ини. Тодам лыктӥз: ведь со мынам сапегъёсы ӝуало озьы. Техничка гурзэ эстэм, мон палась плитаез эскерытэк. Мынам гын сапег пыдэсъёсы эгырӟилям, чутыр- чутыр пырдылӥзы. Табере маин ветлом на, кут гинэ кылиз. Кытысь но кӧня? 9 ноябре Кун Кенешлэн но Правительстволэн Президиумъёссылэн огъя кенешсы ортчиз. Эскеремын бюджет чотын улӥсьёслы уждун тырон сярысь ужпум. Ижевсклэн мэрез Анатолий Салтыков шоркарысь дышетӥсьёслы уждун тырон сярысь ивортӥз. Та вакытлы, шуиз со, май понна уждун тыремын. Налогъёсъя инспекцилэн малпамезъя, ноябре-декабре городлэн бюджетаз 150 миллион манет вуоз, со пӧлысь улэп коньдонэн - 60 миллион манетэз. Та уксё тырмоз одӥг толэзь понна уждунэз тырыны. Эшшо одӥг толэзь понна пунэмез берыктыны коньдон республикалэн но федерацилэн бюджетъёсысьтызы шедьтэмын луоз. Дышетӥсьёслы уждун тыронъя рад кылдытэмын: ноябре сентябрь понна уждун тыремын луоз, нош декабре - октябрь понна. Июнь, июль, август толэзьёс лыдэ басьтэмын луозы вуоно арлэн бюджетаз. Тазалыкез утён удысын ужасьёслы но уждун тырыны та выллем график тупатэмын. Со вакытэ ик, пусйиз Анатолий Салтыков, Ижевсклэн администрациез расходъёсты кулэстыны тырше. Отын ужасьёс уждунзэс берпуметӥос пӧлын басьто.Туэ администрациын кылдытэмын нылпи пособиосты тыронэз радъясь отдел, отын ужаны 50 адями кутэмын. Куд- ог учыръёсы ужасьёслэн лыдзы кулэстэмын но вал. Али Ижевсклэн администрацияз 810 адями ужа. Коньдон ужпумъёсъя министр Владимир Бельтюков ивортӥз, кыӵе ужрадъёс куто, Удмуртиысь Правительство, городъёсысь но ёросъёсысь администрациос дышетӥсьёслы уждунъя пунэмез берыктон понна. Со пусйиз, тросэз кивалтӥсьёс кулэ ужрадъёс уг куто, республикалэн бюджетэзлы гинэ оско шуыса. Сыӵеос пӧлын Балезино, Вавож, Пичи Пурга, Шаркан но мукет ёросъёсысь кивалтӥсьёс. Югдур секыт ке но, Кун Кенеш юрттэмъя, Москваысь куинь пол ссуда басьтэмын. Туэ Россия Федерацилэн бюджетысьтыз 110 миллион манет вуиз ини, та коньдон бюджет чотын ужасьёслы уждун тырыны кошкиз. Со тырмыт ӧвӧл. Со вакытэ ик федерация шаерысьтымы предприятиос азьын толэзьлы быдэ 500-600 миллион манетлы пунэме кыле. Таин валче Пенсиосъя фонд, городъёсысь но ёросъёсысь бюджетъёс азьын пунэмъёс будо. Та ужпумъёсты быдэстон амалъёс трос ӧвӧл, пусйиз министр, республикалэн, ёросъёслэн но городъёслэн бюджетъёсысьтызы коньдонэз пайдаё кутоно, Россия Федерацилэсь ссуда басьтоно. Удмуртиысь бюджет чотын ужасьёслы уждун тырыны 100,5 миллион манет кулэ ке. Федерацилэн бюджетысьтыз та коньдонлэн 30 процентэз гинэ вуэ. Та ивортонъёсты эскерыса, Кун Кенешлэн Президиумез Кун Кенешлэсь 1998 арын 24 мартэ кутэм "Ижевск городысь дышетӥсьёслэсь куронъёссэс быдэстон сярысь" 601-И номеро постановленизэ кулэезъя быдэстымтэен лыдъяз. Но Правительствоез профсоюзъёслэн комитетъёсынызы ӵош косӥз, бюджет чотын ужасьёслы уждунъя пунэмез берыктон понна, 1998 арын 20 ноябрёзь график кылдытыны. Кун Кенеш но Правительство бюджет чотын ужасьёслы уждун тырон сярысь ужпумез Кун Кенешлэн сессияз эскерыны решение кутӥзы. Кун Кенешлэн Тӧроез Александр Волков Правительствоез шаерамы сиён-юонэн кылдэм югдурлы саклык висъяны косӥз но магазинъёсы вӧй вуттонъя ужрадъёсты ӝегатскытэк кутыны дэмлаз. Кун Кенешлэн пресс-службаез. Кызьы улӥськод семья? Сильтӧл погыртэ лябзэ Вавож ёросысь Вуж Бия гуртын уло кузпалъёс Елена но Иван Коркинъёс. Мукет гурт семьяосысь номырин но уг висъясько: ужало колхозын, будэто нылпи, утялто пересь анайзэс, нуо асьсэлэсь пичи возёссэс (хозяйствозэс). Гурт калыклэн нуналысь нуналэ одӥг сюлмаськонэз - юртъер котырын бергано, уго котькуд сэрег кулэ каре ки йӧтскемез. Чипы-курегед гинэ но вешамез вала, нылдэ-пидэ школае келяно-пумитано, аслыд уж доры дыртоно. Нош Коркинъёслы дыртытэк нокызьы но уг лу: бускель гуртозь куинь-ньыль километр вамыштоно. Ньылетӥ арзэ ини Лена но Ваня ӵошен мыно кунян вордон фермае: Ваня - сиён дася, Лена - сюдэ, утялтэ. Уж, пе, адямиез уг бырйы. Пичи дырысенызы ик омырез ӵыжаса ветлыны дышетымтэ кузпалъёс нокыӵе ужлэсь уг палэнско, ваньзэ рос-прос лэсьто. "Ужамлэн емышез гинэ мед адӟиськоз", - шуэ Лена. Асьсэ кужымен егитъёс ӝутӥзы чебер, вӧл-вӧл выль корка. Кема тыршизы, но малпанзы быдэсмиз. Юрттӥз дыраз уждун басьтэмзы но ватытэк веразы: толэзяз, анайзылэсь пенсизэ лыдэ басьтыса, сюрс манетлэсь ятыр луэ, пе. - Вуоно уждунозь со милем тырме, - шуо кузпалъёс. - Мукет семьяос сямен ум вузаське бакча емышъёсмес, пудо-животмес. Улӥськом уждун вылын гинэ. Зэм, милям но мукет колхозъёсын сямен ик югдур секыт луысал ке, вузасалмы, дыр, картофка но, сӥль но. Соиз но вань, кӧня уксё трос луэ, сомында ик со уг тырмы. Сюлэмвисёнъёсыз гурт калыклэн туж трос, соин ӵош ик Коркин кузпалъёслэн но. Озьы но, егит семья тырше улыны, будэтыны дуно пушъетъёссэ. Оске ӵуказе нуналлы. Дырыз дыръя мертты, кизь, окты, будэты. Йӧно кивоштӥсьёс дася, соку гуртысь семьяез политикаын нокыӵе шонаськонъёс но ӧрысьтыз уз поттэ. А. Митрофанова. ГЕРД Йыг-йыг Тазьы верало удмуртъёс ваньзэ малпаса, котьмае чакласа лэсьтӥсь адямиос сярысь. Сыӵеос кылзэс юнме уз шере, кужымзэс кулэтэм ужлы уз быдтэ, ожмаськонэ югдурез тодытэк уз пыриське... Сыӵе ик луэ, мон сямен, асьмелэн туала президентмы Валентин Кузьмич Тубылов. Ар талэсь азьло удмурт калыклэн ыстэм муртъёсыз пуктӥзы сое тӧршоре. Котькудӥз ас сяменыз дунъялоз, вылды, та толэзьёс ӵоже лэсьтэм вамышъёсты. Но ваньмыз сямен соглаш луозы таӵе малпанэн: "Удмурт кенешлэн" куараез шаерамы юнгес чузъяськыны ӧдъяз. Кылӥське ни со Кун Кенешын но, элькун праздникъёсын но, кыдёкысь гуртъёсын но. Вожъяськисьёс куддыр шуыны дырто: "Кенеш", пе, эктонэн-кырӟанэн гинэ ялан выре на. Валентин Тубылов, улытозяз туж троссэ чидам-адӟем адями, сыӵе муртъёслы пезьдэт сётыны уг дырты. Тодэ уго: адӟисез адӟоз гурт кенешъёс кылдытон бордын ужамез но, быръёнъёсъя огазеяськон кылдытэмез но, мукетсэ но. Кызьы шуо Шунды ӝужан палан, пуны утэ, караван мынэ... Ӵуказе "Удмурт кенешлэн" президентэз вордскем нуналзэ пусъе. Батыр луэ, Валентин Кузьмич! Тӥ шоры уго уно сюрс адямиос бадӟым осконэн учко. Ӟечкыласьком! И. КРИЧЕВ. Гожтӥськон-99 Мотоцикл одӥг, гожтӥськисез 9 сюрслэсь ятыр Гажано эшъёс, нош ик тодады вайытӥськом: вуоно ар понна газетмылы гожтӥськыны луоз 25 декабрёзь. Ваньмыз со гожтӥськемъёс ик пырозы лотереяен шудонэ. Газетмылэн 17-тӥ октябре потэм номераз ивортылӥм ни вал, кызьы но ку ортчоз лотерея. Куд-огез лыдӟисьёс, оло валаса ӧз вуттэ, оло ивортонэз ӧз синйылтэ: редакцие ысто гожтӥськемзы сярысь квитанцизэс. Соин ик нош ивортӥськом: редакцие номыр ыстыны кулэ ӧвӧл. Лотерея ортчытэмын луоз кылем арын сямен ик, но таяз учыре кузьымъёс кӧня ке районлы усёзы. Нош радъяськоз шудон тазьы: лотерея ортчытонъя нимысьтыз комиссия кылдытыса, нырысь ик тодомы, кудаз районэ шонтозы ошпи, мотоцикл, электропила но мукет кузьымъёс. Котькуд районлэн аслаз лыдпусэз луоз. Кин тодэ, ваньмыз пӧлысь кудзэ кыскыны шуд усёз: Шарканэз, Ижевскез, Киясаез, Юкаменскез я кунгож сьӧрысь кудзэ ке районэз? Озьыен, районэз тодӥм, кылиз на отысь кудзэ ке почта ёзэз бырйыны. Таосыз озьы ик тодмостэмын луозы лыдпусъёсын. Гуртэ потыса ини гожтӥськон квитанцияя тодомы шудо лыдӟисьёсмылэсь нимъёссэс. 1 ноябрьлы тани газетмылы гожтӥськем ни 9246 мурт. Нош кин тодэ, мотоциклэн ворттылыны, оло, шуд усёз ӵапак туннэ, ӵуказе яке арня улыса гожтӥськемезлы. Лыдӟисьёслэн юанъёссы кылдо на пенсия чотын - кредит амалэн гожтӥськон пумысен. Таиз сярысь но газетын валэктон сётъям ни вал. Озьы ке но, выльысь тодады вайытӥськом: шаерысьтымы тросаз ёросъёсын газет-журналъёслы гожтӥськыны луэ пенсия чотын - чаклам дунэз люкетэн-люкетэн тырыса. Кулэ-а, ӧвӧл-а таӵе амал сояз яке таяз ёросын, созэ эскере ни ёросысь почта пыр кусып возёнъя ёз. Соин ик, пенсиды чотын газетлы гожтӥськемды потэ ке, вазиське ёросысьтыды почта ёзъёсы яке юаське почтальонъёслэсь. Л. МАЛЫХ. Москваысь писательёс лыктозы Россиысь Писательёслэн союззылэн секретариатэз вуоно ужрадъёссэ ортчытыны малпа Ижевскын. Соос куинь нунал ӵоже кыстӥськозы. Нырысь ик, 10-тӥ ноябре, республикаысьтымы Культурая министерстволэн залаз Москваысь писательёс пумиськозы асьме гожъясьёсын. Та нуналэ Егитъёслэн дворецазы луоз на литературалы сӥзем ӝыт. Ӵуказеяз "Октябрь" культура дворецын ортчоз Герасим Иванцов кылбурчилэн юбилейной творческой ӝытэз. Тужгес сӥё-дано - куинетӥез нунал. Куд-ог асьме гожъясьёсмес кутозы Россия Федерациысь писательёслэн огазеяськоназы. Нуназе бере луоз финн-угор литератураысь ужпумъёсъя вераськон. Нош ӝытазе Егитъёслэн дворецазы нош ик люкаськозы литератураез яратӥсьёс: луоз Геннадий Красильниковлэн вордскемез дырысен 70 ар тырмонэз пусъён но буре ваён ӝыт. Асьме доры лыктозы Москваысь писательёс Валентин Сорокин, Петр Проскурин, Михаил Числов, Вадим Дементьев но бускель финн-угор республикаосысь писательёслэн огазеяськонъёссылэн тӧрооссы. Т. НИКОЛАЕВА. Нуналлэн тодметэз 12 ноябре тол тылобурдоос - пислэгъёс, шушыос - адямилы матэгес карисько. Та нуналэз пӧйшурасьёс сӥлы каро, пусъё, лымы вылтӥ нырысетӥзэ пӧйшураны пото, луд кечез одно ик кутыны тыршо. Туннэ пӧйшур ӧз ке шедьы, быдэс арзэ уз удалты, пе. 13 ноябре - чорыганы яратӥсьёслэн нуналзы. Та нуналэ... ар талэсь азьло 13 ноябре 1918 арын Горд Армия Воткинскез тӧдьыослэсь мозмытӥз. Ожмаськонэ Азинлэн дивизиез пыриськиз. Спорт Нырысетӥ "азвесь" - Ижын Дуннеысь кикбоксингъя ассоциацилэн кичӧлтэмезъя, алигес Киевын ортчиз спортлэн та удысэзъя Европалэн 14-тӥез чемпионатэз. 34 странаысь 337 спортсмен отын нюръяськиз. Европалэн огазеям командаяз ӵошатскиз Калык куспо Восточно-Европейской университетлэн вылӥ спортивной колледжезлэн кыкетӥ курсысьтыз студент, спортъя мастер, страналэн чемпионэз Андрей Рукавишников. Куке-соку со дышетскиз вал Ижевскысь ушу нюръяськонъя муниципальной школаын. Нырысьсэ таӵе бадӟымесь ӵошатсконъёсын со, дуннелэсь но Европалэсь чемпионъёссэ азьпалтыса, азвесь медаль басьтӥз. Кикбоксингъя таӵе вылӥ азинскон Удмуртиын нырысьсэ утэмын. Ушу секцие Андрей лыктӥз 14 аресысен. Нырысь нуналъёсысеныз ик азинсконъёсыз умоесь вал ини. Собере со кутскиз кикбоксинг борды. Тани табере басьтэмын нырысетӥез бадӟым вормон. Андрей Рукавишниковез дасяз Удмурт Республикаысь сӥё-дано тренер, университетысь спортъя колледжлэн директорез Владимир Лазаренко. Огдыре ик Андрей муниципальной школаын пиналъёсын но ужа, кивоштӥсьёсты дася. Ижысь спортмен но солэн тренерез нимысьтыз ӧтемын кикбоксингъя дуннелэн Кубокезлэн финалаз ӵошатскыны. Со ортчоз вуоно арын май толэзе Италиысь Милан городын. М. КОПЫСОВ. Урал: кин кызьы ужа Урал котырысь улосъёслэн туэ укмыс толэзь ужамзылы йылпумъянъёс лэсьтэмын. Промышленной вузъёс та дыр ӵоже поттэмын 264493,4 миллион манетлы, кылем арен ӵошатыса, со луэ 95,5 процент. Курган область сяна, ваньмыз регионъёс туэ ляб ужазы. Тужгес но - Челябинск область (86,3 процент). Удмурт Республикая та лыдпус усиз 98,3 процентозь. Башкортостан асьмелэсь бере кылиз. Жаляса верано, цветной металлургия удысын сяна (асьмелэн со ӧвӧл) продукция поттон промышленностьлэн вань удысъёсаз кулэсмиз. Бускельёсынымы ӵошатыса, Удмуртиын югдур умойгес на: кылем арын сярысь, 101,1 процентлы ятыргес продукция сётӥзы машина лэсьтон но металлообработка, сиён- юон поттонъя промышленность - 101,9, сиён-юон продуктъёс (винаосты но сурез вератэк) - 104 процент. Республикаямы уродгес югдур возиське эстӥськон но шуныт сётӥсь, химической, нюлэс но нюлэсэн ужанъя удысъёсын, капчи промышленностьын, лэсьтӥськон материалъёс поттонын. Огъя чакласа, номыр ӧз ужа, шуыны луоз, гурт хозяйствомы но. Сӥль но йӧл кылем арынлэсь 3 процентлы ятыргес басьтӥм. Урал котырын та ласянь шӧдскымон ыштонъёс адӟемын. Бускель регионъёслэсь Удмуртия бере кыле улон юртъёс ӝутонъя, мимала лыдпусэз асьмеос ӧжытаклы гинэ ортчыны быгатӥм. Мукет удысъёсты ке учконо, республикамы урод ласянь но, умой ласянь но Урал улосъёслэсь уг висъяськы. Удмурт Республикаысь Правительстволэн пресс-службаез. Чакласькон уз люкеты - Магазинысь кыӵе ке вуз басьтыкумы, асьмеос сое озьы но, тазьы но бергатӥськом, сертификат куриськом, чекез пыдло ватӥськом - марысь мар ке, бӧрысь сое берыктыны мед луоз, нош кыӵе ке специальность басьтон понна адямиос сюрсъёсын коньдонзэс кисьто, дышетскон заведениослэсь лицензизэ но юатэк-адӟытэк, - озьы вера паймемзэ Удмурт Республикаысь Наукая, вылӥ но шор ёзо дышетонъя комитетлэн кивалтӥсез Сергей Решетников. Со журналистъёсын пумиськиз, удысын кылдэм югдурен тодматон понна. Сюлмаськыны мугез вань уго. Кызьы шараяз алигес асьме прокуратура, шаерамы трос гинэ ляльӟемын лицензитэк ужась дышетсконниос. Адямиос дун тырыса дышетско, нош уже интыяськыны уг быгато - соослэсь дипломъёссэс санэ басьтӥсь ӧвӧл. Удмуртиын али негосударственной луись 100 пала дышетскон заведениос: олокыӵе но колледжъёс, академиос, филиалъёс. Уноез ужало ас тодэмзыя. Кылсярысь, Чайковский городын вань Челябинскысь физкультурая институтлэн ёзэз. Ачиз филиал луыса, со табере Ижевскын кылдытэ выль ёз. Лицензия со понна басьтэмын ӧвӧл. Законъя туннэ ик солэсь ужзэ дугдытыны луэ. Но соку дышетскисьёслэн сётэм коньдонзы ышоз-быроз, соос юнме шорысь умойтэм югдуре шедёзы. Тае лыдэ басьтыса, прокуратура сыӵе заведениослы толэзь дыр тупатӥз, шараям тырмымтэосты палэнтон понна. - Чаклано созэ но: филиалъёс но мукет учреждениос асьме республикаын пусъемын ӧвӧл ке, бюджетэ соослэсь номыр уг вуы, вань коньдон палэнэ кошке, - ватсаз на Сергей Максимович. - Коньдон тырыса дышетон арысь аре паськыталоз. Умой со. Но ваньмыз лэсьтӥськыны кулэ законъя. Шуом, Глазовысь пединститут Ижын радъяз куд-ог специалистъёсты дасянэз. Ог 300 мурт дышетске ни. Нош тупатэм документъёс лэсьтымтэ. Толэзь ортчыса, югдур тупатскоз, дыр. Соку прокуратура ласянь но пыкылонъёс уз луэ. Сергей Решетников но пумиськонэ соин ӵош лыктэм прокурор Людмила Торсунова таӵе огъя мылкыдзэс веразы: котькуд адями, дышетскыны малпа ке, нырысь ик тодматскыны кулэ дышетсконнилэн лицензиеныз но мукет документъёсыныз. Соку гинэ яра ни огкыл гожтыны но коньдон сётыны. Чакласькон уз люкеты, пусйизы соос. Нош асьмеос со верамен соглаш кариськом. И. КРИЧЕВ. Визьмаз Герд, кужым сётӥз педтехникум Шаермылэн шунды пуксён палаз ог-огзылы туж матын (кусыпсы - ньыль иськем гинэ) сыло туж тодмо удмурт гуртъёс: Умопудгурт но Выль Мултан. Нырысетӥзэ,пичи гинэ гуртэз, ӟучъёс Ульмоль шуо (со али пыре Селта ёросэ), нош Выль Мултан черкогурт - Ува ёросын. Кыкез ик соос удмуртъёслэн улон-вылоназы нимысьтыз инты басьто. Черкогурт тодмо луиз нырысетӥ ӟуч революция дыръя ик отысь крестьянъёслэн кужмо бугыръяськон ӝутэменызы. Октябрь революция бере та село котыре бинялскыны ӧдъязы удмуртлык понна нюръяськись кужымъёс. Тани, шуом, 1918-тӥ арын пӧсьтолэзьлэн пумаз Елабугае удмуртъёслэн И съездазы делегатъёс луыса ветлӥзы та гуртъёсысь таӵе адямиос: нырысетӥосыз пӧлысь удмурт купец И. А. Ирисов, шоро-куспо крестьян И. И. Данилов но черкын ужась П. Ф. Лекомцев. Та воргоронъёс съездын тодматскизы асьме югдытӥсьёсын, удмурт кунлыкез кылдытыны тыршисьёсын К. П. Чайниковен, Т. К. Борисовен но мукет азьветлӥсьёсын. Отысь та делегатъёс удмурт калыксы, гуртооссы понна ӟеч ужъёс лэсьтон сярысь малпанъёсын бертӥзы. Сыӵе мылкыд сётӥллям соослы съезд но Куӟебай Герд. Кӧня ке дыр ортчыса, та гуртъёсын герӟаськиз югдытӥсьлэн улонэз но. Нырысь ик - Куӟебай Герд но Трокай (Т. Борисов) туж сюлмаськизы та палась удмуртъёс понна дышетӥсьёсты дасян сярысь. Гуртъёсын гожтэт тодӥсьтэмъёс пумтэм, нош дышетӥсьёс ӧжыт. Огъя сюлмаськон вуттӥз Выль Мултанын дышетӥсьёсты дасян курсъёс но семинария кылдытонэ, собере татын 1919-тӥ арын 19-тӥ феврале усьтэмын вал кыкетӥез (Можга бере) удмурт педтехникум. Сое усьтон понна, К. П. Чайниковлы (Куӟебай Гердлы) трос сюлмаськоно-бызьылоно луэ: вазиськылэ Вяткаысь ГубОНО-е, нош отын солы пумит луо - Выль Мултанын удмурт кадръёс, педтехникумлы юртъёс ӧвӧл, шуо. Кузьма Павлович, Москвае ветлыкуз, А.В. Луначарский нарком доры пыра, ГубОНО-лэн удмуртъёс шоры кырыж учкемез сярысь вера. Собере, Выль Мултанэ вуыса, ваньмыз пумысен огъя кыл шедьтэ волосстьысь комитетэн но гуртысь визьмо адямиосын. Удмурт купец И. А. Ирисов педтехникумез усьтыны одӥг юртсэ - дась бугрозэ - но 25 сюрс манет зарни коньдонзэ сётэ. Бӧрысь Кузьма Павлович татын ик семья но кылдытэ - купецлэсь нылзэ, Надежда Антоновна Ирисоваез, кузпаллы басьтэ. Выль Мултан педтехникумлэн историез кыстӥське, война аръёс вуытозь. Трос дышетӥсьёсты но нылпи садъёсын ужасьёсты дасязы татын. Одӥгез соос пӧлысь, Анна Ивановна Андреева, Ирисовъёслэн бадӟым семьяысьтызы потэмын. Со туэ, 8-тӥ ноябре, 90 арессэ пумита ини. Йырвизьмаз историысьтымы туж трос тунсыкозэ возе, пинал но егит дырзэ, ас палъёсаз калыкез дышетонлэсь азинскемзэ тодаз вайылэ. Малпан кылдэ ни кадь, туэ, юбилей аре, удмурт калыклэн быдӟым пиезлэн- югдытӥсезлэн, Куӟебай Гердлэн, трос пӧртэм удысъёсысь ӟеч ужъёсыз табере котькуд ласянь эскеремын, сэрттэмын-пертчемын, дыр, шуыса. Нош со вакытэ улэм но будэм адямиос, вакытъёсты туннэ нуналэн герӟась муртъёс озьы уг лыдъяло вылэм. Нимысьтыз вераны тыршо Гердлэн дышетон удысын сюлмо но жадёнэз тодылытэк тыршемез сярысь. Малпан кылдэ, К. П. Чайников ачиз но педагог луэмзэ тужгес вылэ, оло, нырысетӥ интые пуктэ вылэм шуыса. Соловкиысен 1934-тӥ арын 23-тӥ октябре Герд И. А. Наговицынлы гожтэт ыстэм. Отын со туж жаляса вера, яратоно ужъёсызлэсь - дышетон но литература удысъёслэсь - висъямын шуыса (та гожтэт печатламын Н. С. Кузнецовлэн "Из мрака" книгаяз, 67-тӥ-68-тӥ бамъёс). Вань-а бен асьме пӧлын туннэ нуналмес Гердлэн вакытэныз меӵак герӟась адямиос? Данъяськыса вераны луоз: вань! Сыӵе мурт луэ мӧйы педагог Анна Ивановна Андреева. 20-тӥ-30-тӥ аръёсысь куд-ог учыръёсты туннэ кадь ик син азям пуктӥсько, шуэ. Аслэсьтыз улон сюрессэ меӵак герӟа Куӟебай Гердлэн удмурт калык понна тыршеменыз. Вань солэн Куӟебай Гердлэн дышетон удысын тыршемез сярысь статьяосыз но - потылӥзы "Кенеш" журналын, "К изучению жизни и творчества Куӟебая Герда" бичетын (поттэмын вал гожъясьлэн но дышетӥсьлэн вордскемез дырысен 90 ар тырмонлы). Тунсыко маде но гожъя Анна Ивановна Ува педтехникумын дышетскем аръёсыз сярысь но: шуныт кылъёсын тодаз вае дышетӥсьёссэ, отысь кивалтӥсьёсты Ф. Н. Шкляевез но Д. И. Князевез. х х х Анна Ивановна Андреева вордскемын Умопудгуртын Иван Егорович Ирисов крестьянлэн бадӟым семьяяз. Атаез, Иван Антонович Ирисов купецлы вынмурт луэ вылэм. Бадӟым вылэм Ирисовъёслэн выжызы вылӥын верам гуртъёсын. Анялэн анай-атаез но, песятаез но асьсэ вакытазы дышетскем, визьмо но ужась муртъёс вылӥллям, сюлмасько вылэм нылпиоссы понна но. Сыӵе югдур ик, луоз, кызетӥ аръёсы пинал Ирисовъёслы дышетскыны сюрес усьтӥз. Уката но - Выль Мултанын педтехникум кылдэм бере, Ирисовъёс пӧлысь отын нырысь ик дышетскыны кутскиз Анялэсь кык ареслы бадӟымгес Миша агаез. Педтехникумез быдэстӥз ини со Ижевскын. Собере дышетыны кутскиз Вуж Ӟатча (Старые Зятцы) черкогуртын. Гуртазы огыр-бугыр дыръя кыдёке, Сибирь пала, ужаны кошкиз. Аня техникумлэн дышетскыны пырыны дасясь группаяз ветлыны кутскиз 1921-тӥ арын. Ваньзы Мултанын туж мыло-кыдо дышетскизы. Нуналлы быдэ гуртазы, Умопудгуртэ, бертылозы вылэм. Туж кезьытъёсы гинэ общежитиын кӧлаллям. Покчи вынъёссэс педтехникуме кутӥллямтэ, семьязэс 1927-тӥ арын кулак каремзы бере но купец выжыысь шуыса. Со вакытэ атайзы но вылымтэ ни. Юртъерзэс Совето власть талам. Анайзы 1929-тӥ арын, пичи пиоссэ кутыса, Пермь улосэ кошконо луэм. Умопудгуртын со аръёсы сыӵе югдур кылдэм - ваньмыз кадь егит пиос но нылъёс югытэ кыстӥсько вылэм. Улонлэсь куронъёссэ ӟеч валаллям. Анна Ивановна паймытӥз монэ таӵе лыдпусэн: кызетӥ-куамынэтӥ аръёсы та пичи гуртысь витьтон кык кузя егитъёс Выль Мултан педтехникум пыр дышетӥсьёс радэ султӥллям (соос пӧлысь одӥгзэ, туж усто дышетӥсез, мон но тодӥсько: М. П. Шутова (азьло Данилова), Дэри ёросысь Бадӟым Венья гуртэ выжы лэзьыса, отын 1930-тӥ арысен ужаз, РСФСР-ысь школалэн дано дышетӥсез вал. Нылпиосыз но аслаз сюрестӥз мынӥзы - дано дышетӥсьёс луизы. Аня Ирисова педтехникумын дышетсконзэ азинлыко быдэстэм 1928-тӥ арын. Покчиосын- дошкольникъёсын ужан удыс басьтӥз ини со берпуметӥ дышетскон араз Ижысь педтехникумын. Ужезлы дышетскиз Куӟебай Гердэн кылдытэм Максим Прокопьев нимо нылпи юртын. Соку, Мултан педтехникумын куд-ог предметъёсъя дышетӥсьёс тырмымтэен, отысь студентъёс дышетсконзэс йылпумъяло вылэм Ижын. Егит специалистэз ужаны ыстӥзы Глазове, анай-атайтэк кылем покчиослэн юртазы. Со дырысен педагог аслэсьтыз улонзэ пичиослы сӥзиз. Отысен тодматскиз вуоно кузпалэныз, Николай Андреевич Андреевен, Карлыганын дышетскем муртэн. Глазов уездысь калыкез дышетонъя отделэн кивалтэ вылэм со. Семья кылдытӥзы. Зэм, сыӵе улон вамышсылэн мыддорин палыз но адӟиськиз ӝоген. Кузпалыз коммунист ке вал, партиын чылкытатон дыръя сое зол эскеризы-кысказы: малы, пе, купец но кулак выжыосын кушласькид - куштӥськы! Озьы тӥни - Ирисов выжыысь луэмез егит кышномуртлы кык палзэ возьматӥз - умойзэ но, уродзэ но. Нош кудӥз тросгес вал - ӧйтӧд. - Озьы тӥни йырмес шузимытъяны выризы,- шуэ Анна Ивановна.- Куспамы таӵе но вераськон потылӥз: "Вай, оло, люкиськом: нылпиосмы ӧвӧл на ук". Но ог-огмылэсь ӧм куштӥське, улонмес сӧрыны ӧз быгатэ, пужит тӧлъёс ӧз ворме... Детдомын умой ужасько ни вал - милемыз Иже воштӥзы. Картме пуктӥзы облонолэн кивалтӥсезлы воштӥсе, нош мон уж шедьтыны ӧй быгаты. Ужъя биржае но султоно луи. Собере нылпи садъёсын рос-прос тыршыны ӧдъяй. Кутскиз сыӵе вакыт - котькытын усьтӥськылӥзы нылпи садъёс но площадкаос, отчы ужасьёс кулэ. Мыным сётӥзы площадкаын ужан инты, отын ик, кӧня ке улыса, нылпи сад усьтӥм. Яратӥ ужме. Собере кузпалме Нижний Новгородэ марксизмъя-ленинизмъя институтэ дышетскыны ыстӥзы. Отын улонмы ӧраз ӝог пыриз. Мон нылпи садэн кивалтӥ. Озьы ик одӥг но ӝыны арзэ крайысь покчи нылпиосын ужан кабинетын методист вал. Горький карын милемыз кыкнамес дунъяло вал. Огдыре ик ӝытъёсы аслам удысэя пединститутын дышетски на (тазэ но "витьёсын" йылпумъяз - Л.Ф.). Кузпалы марксизмъя-ленинизмъя институтын дышетсконзэ быдэстӥз, со сяна, Казаньын дышетӥсьёсты дасясь инородческой семинариын тодон-валанъёс басьтӥз на. Со вакытэ ик семьямы но йылӥз. 1937-тӥ арын Николай Андреевичез Ижевске берыктӥзы, вылӥ партшколае кафедраен кивалтыны пуктӥзы. Мон кӧня ке улӥ на Горькийын. Ижын квартира басьтэмез бере, кузпалы милемыз нуныеным дораз ваиз. Иже Анна Андреевна берытскиз, дошкольникъёсты будэтонъя вылӥ образованиен нырысетӥ специалист луыса. Сое пуктӥзы андан ӵыжатон заводлэн нылпи садъёсызлы старшой инспекторе. Та ужез педагог трос аръёс ӵоже быдэсъяз. Педагог-воспитатель но методист кӧня ке аръёс ӵоже ужаз на 24 номеро школаын. Соку отын нылъёсты-старшеклассницаосты нылпи садъёсын воспитательёс луыны дышетӥзы. Огшоры школаын но сыӵе классъёс вал. Анна Ивановна нылъёсты дышетӥз педагогикалы но нылпиосты визьнодан амалъёслы, озьы ик удысэзъя курсъёс нуиз. Нылпиосты школалэсь азьло визьнодан солэн улытозязлы быръем удысэз луиз. Пенсие потӥз 1964-тӥ арын. Анна Ивановналэсь сюлмо тыршемзэ адӟыса, "калык тушмон" выжыысь луэмзэ тодазы ӧз вайылэ ни, пӧртэм наградаосын пусйылӥзы: война аръёс понна - "За доблестный труд", 1958-тӥ арын - "За трудовое отличие" медальёсын, уно пӧртэм грамотаосын но кузьымъёсын. Калыкез дышетонысь азьмынӥсь 1953-тӥ арын коммунистъёслэн партиязы кутэмын. Озьы "купец выжыысь тушмон" калыкез понна дано луиз. Йӧноесь, визьмоесь будӥзы, вылӥ тодон-валан басьтӥзы нылпиосыз но. Бадӟымез пиез Генри Николаевич, экономика наукаосъя кандидат, доцент. Камышинысь политехнической колледжын ужа. 60- лэсь ятыр научной ужез. Нылыз Луиза Николаевна Ленинградысь кунсьӧр кылъёсъя институтын дышетскиз, кылтодон наукаосъя кандидат. Зэм, калыкен ужан сямзэ ӧз кушты. Уг вунэты туннэ но. Герд сярысь тодэ ваёнъёссэ гожъя но маде. Аслаз визьмыныз, улонэз, историмес шонер валаменыз юрттӥз Ф. К. Ермаковлы но, монографизэ кылдытыкуз. Солэсь озьы ик юалляськылӥз Н. С. Кузнецов, "Шимес пеймытысь" но "Из мрака" книгаосыз бордын ужакуз. Али Анна Ивановна улэ Ижысь Пушкин ульчаысь бадӟым коркан покчи пиезлэн Владимир Николаевич Андреев инженерлэн семьяеныз ӵош. Пиез но али пенсие потэмын ини. Ярато визьмо песянайзэс внукъёсыз но правнучкаез. Анна Ивановна Ирисовъёс выжыысь кемалась огназ кылемын ини. Кузпалызлэн, Н. А. Андреев историклэн, быдэс чемодан гожъямъёсыз- архивез кылемын. Соосты мӧйы дышетӥсь архиве яке музее сётыны дася. Ваелэ мӧйы дышетӥсез вань сюлмысьтымы ӟечкылалом 90 аресэныз. Сӥзём солы ӟеч тазалык но кема дырлы шудо-буро улон! Леонид ФЕДОРОВ. Туспуктэм вылын: А. И. АНДРЕЕВА 1965-тӥ арын вордскем Анютка внучкаеныз. 1970-тӥ ар. А. И. АНДРЕЕВАЛЭН архивысьтыз. Ярам коть, сапеглэн нырвылыз но кунчиез кылемын. Ӝуам сапеге вылэ кут кутчаса ветлоно луиз, "выль пыдкутчан фасон" кылдӥз. Нылъёс серекъяло, нош мыным мар кароно? Сыӵе лусьтыр-ласьтыр дӥсяськыса ветлэмме Иванова ке адӟысал, вылам сялӟысал, дыр. Ӵапак таӵе юмоке сюрем вакытэ ик мыным Каркалае телеграмма вуэм: "Срочно явиться в райком комсомола на совещание вторых секретарей". Коть бӧрд, котьмар кар - Иже мыноно: со вакытэ "уг мыны", "уг быгаты", "уг лэсьты" кылъёс ӧй вал. Пыдам мынам нокытысь но нокинлэсь адӟылымтэ пыдкутчан - ӝуам сапеглэсь но кутлэсь, вылам сьӧд дублёнка шуон шуба - тӧдьы гоно кулэсь воротникен, суйпосъёсаз но сӧзыяз озьы ик тӧдьы гоно ку, йырам ас керттэм изьы, вылтӥз ыжгон кышет. Син азяды пуктэ али та куака кышкатон бакча сульдэрез. Мыным таӵе-таӵе "чебер" дӥськутэн Иже мыноно. Каркалайысен пырак Иже вуыны уг луы, нырысь узкоколейка сюрестӥ, коръёс ворттон ваонъёсын гинэ вуод, матысь бадӟым чугун сюрес вылэ потон понна. Ярам, кызьы но озьы пеймыт луон азьын станцие вуи ик, вокзалэз но шедьтӥ. Поезд, пе, туннэ Иже уз луы ни ӵуказе ӵукнаозь. Неужто мон татын уйбыт пуконо луо, чик тодмотэм интыын, нокинэ тодытэк? Шудэ вылэм ик али. Татын вокзалын ужась кышномуртэн пумиськи. Матын, пе, улӥсько, пичи нылыным ваче гинэ. Лэзиз ведь дораз кӧлыны. Нылыныз тодматӥз. Ог куамын аресъем чырмыт нылкышно чай но пӧсятыны вуиз ини. Таизлы туж шумпотӥ. Асьсэос но монэн ӵош чай юизы. Кытысь ке одӥг шорем тӧдьы нянь сётӥз. Та дыре тӧдьы нянь пряниклэсь но ческыт вал. Мынам но сьӧрам одӥг буханка кӧжы пызьлэсь няне вал. Сое ӝӧк вылазы понӥ - со сяна, мынам номыри ӧвӧл саламе. Пичи нылаш, кыкетӥ классын дышетскись маке, туж востэм, зӥбыт, чал-чал пуке: я чайзэ дырын-дырын пелляса каллен ӟузьылэ, я мон шоры керпотыса кадь учкылэ. - Мынэсьтым но кӧжы няньме оскалтэ, оло, яралоз, туж ӵак-ӵак ке но чаен сураса ымын небӟе. Нылаш дӥсьтыса дӥсьтытэк няньме одӥг шоремзэ басьтӥз ик. Кӧня ке мар но со сярысь вераськеммы бере, кузё кышно шӧдӥз, лэся, мынэсьтым жум пукемме. - Тани та диван вылэ выд, ӧжытак ялкарод, поездэд ӵукнатэк уз вуы. Ӵукна сайкай но, кытынме уг валаськы: оло вӧт та, оло зэм. Кузё кышное комнатаын ӧвӧл, нылыз гинэ нясь-нясь кӧлэ но. Юбкаме утчасько - нокытын ӧвӧл, ма, ас вӧзам ик понэм вал. Коть кинлэсь ке но тодоно, мар та таӵе. Ӧсэз усьтыны вырӟи - со тунгонамын. Мар кароно таӵе дыръя? Куалекъяны ик кутски. Собере асме ачим буйгатӥсько: нылыз татын, со доры одно ик бертоз. Озьы малпаськыса, куректыса пуконъям усьтонэн жингыртэм кылӥськиз. Вуиз ведь мынам возьмам кунокуа кузёе! - Вождэ эн потты, мыным туж кельшиз тынад юбкаед, вылам но тупаз, - мынэсьтым сюлмаськись тусме адӟыса, аслэсьтыз янгышсэ тупатыны дыртӥз. Сайкатыны туж жаль потӥд, юн умме усемед. Юатэк-вератэк, юбкадэ дӥсяса, вечеринкае ветлӥ. Нылме умме уськытӥ, тыныд оски, лэся, номыр уз луы, дыр, шуыса. Лушкемак кошки, таӵе вазь уд сайка, кожай. - Мынам чик воже уг поты, курдай гинэ, мар каром на юбкатэк шуыса. Соизлы туж тау, умой кӧлӥ, небыт валесын, шуныт коркан, юбкае но вылам вуиз, - таӵе кылъёс вераса, вокзалэ кошки. Табере бадӟым сюлмаськонэ: кызьы Иже вуоно. Поездэз кема возьмано ӧз луы, расписаниея вуиз. Калыкез трос ӧй вал. Малы ке но инты бырйи боковушка шуон интые ас аресъемгес нылаш вадьсы. Кема гинэ мынӥмы озьы, дыбыр-тык, дыбыр-тык карыса, кыӵе ке но крезьгурлы тупась куараез кылзӥськыса, огмы шоры огмы чик вазьылытэк, синъёсынымы гинэ вуӵерак-вуӵерак ваче вуылыса. Солэн но мылкыдыз туж секыт, шӧдске, мӧйы муртлэн кадь, пичи но пальпотон тусыз ӧвӧл, мынам но солэсь капчи ӧвӧл. Оло сюлэмзэ усьтэмез потӥз, оло кин ке жалялоз шуыса, нылмурт каллен гинэ кырӟаны кутскиз. Перебиты, поломаны крылья, Дикой болью мне душу свело. Кокаином, серебряной пылью Все дороги мои замело. Я совсем ведь еще молодая, А душе моей тысячи лет. Та кырӟанлэн гурез но, кылъёсыз но артэ купеын мынӥсьёслэсь сюлэмзэс бугыртӥзы, шӧдске, ми пала кыстӥськизы. Со ныл кырӟамъя, мон но сьӧраз нёжъяны кутски. - Егит апайёс, тӥ эшъёс, дыр, кытысь, кинъёс тӥ, сыӵе чебер кырӟаськоды? - ми вадьсы дугдыса юано кариськиз ог куамын-куамын вить аресъем нылкышно. - Ми ог-огмес чик ум тодӥське, ниммес ӧм юалэ на. Ми огшоры, тӥ кадесь ик пассажиръёс, ог вадьсы пуксьыны тупаськеммы, - тазьы валэктӥ. Нылашлэсь мон ӧй юа, ачиз вераны кутскиз. Ми, пе, та кырӟанэз тюрьмаын кырӟаськом вал. Со милям гимнмы но, молитвамы но вал. Мон, пе, али тюрьмаысь бертӥсько, анае доры, аслам дорам. Военной заводысь, секытэзлы чидатэк, кӧня ке нылъёс, куспазы вераськыса, пегӟоно кариськиллям. Кутӥллям, но "дезертир" карыса, кык арлы тюрьмае, нюлэс кораны келяллям. Та кырӟанэз кылэме дырысен витьтон вить ар пала ортчиз ини, кылъёссэ кӧня ке чурзэ сяна уг тодӥськы ни, но гурез али но йырам. Кӧня ке час поездын мынэм суред вунонтэм кылемын, тусбуйыз ӧжытак бус пыр кадь, вужерыз гинэ син азям пуксе на. Ӧжытак кузялэс, восьтэт ымнырыз кӧсыт, бадӟымесь курень синъёсаз чик тылгизьыосыз уг шӧдско, бушесь кадь. Гужам векчи ыж гон кышетэз синкабакъёсыз дорозь кымыссэ ватыса, синпумъёсыз дортӥ куасалтыса ангес ултӥз сильсьӧраз керттэмын. Кыӵе меда луиз та егит ныллэн азьпал сюресэз, шедьтӥз-а аслэсьтыз шудзэ, ӝуатскизы меда солэн синмаз оскон тылгизьыосыз? Шедьтӥз, дыр. Пушказ тымиськем мылкыдзэ милемлы усьтыны кужмыз тырмиз бере, аслыз сюрес усьтыны-лёгыны но со быгатоз. ГЕРД Шара гожтэт Весь-а берлолы кельтом`? Та гожтэтын мынам вазиськеме потэ элькунысьтымы вылӥ кивалтӥсьёсмылы А. А. Волковлы но П. Н. Вершининлы. Мар бордын ужпум? Туж кема вераськиськом ини кун кылъёс сярысь закон кутон пумысен, нош воз туннэ ке но интыяз сылэ. Кызьы тодмо луиз берло дыре, али ужась депутатъёс, пе, та катэз уз ни учке. Ӧвӧл на дась, шуо, солы проект. Кызьы озьы луэ? Та законлы 4-5 инъет дасямын ни вал ук! Эн малпалэ, ичи лыдъем калыклы ас кылыныз вераськыны, кылзэ, культуразэ азинтыны кулэез ӧвӧл, со ӟучсэ гинэ мед тодоз. Соин, дыр, Госсовет ялан палэнскыны турттэ та катэз кутонлэсь. Удмурт кыл мед кутӥськоз ӟуч кылын артэ кун учреждениосын, делопроизводство шуон но мед мыноз ӟуч но удмурт кылъёсын. Ульчаослэн, транспорт дугдылон интыослэн нимъёссы кык кылын гожтэмын мед луозы. Ми куриськом ӟуч но удмурт кылъёсты одӥг радэ пуктыны, номыр но мултэссэ ум куриське. Кудӥз-огез кун учреждениосын ужасьёс тодыны кулэ удмурт кылэз. Удмурт но ӟуч кылъёслэн кужымзы одӥг кадь мед луоз. Нош али милям кылмы туж сюбег кутӥське на. Озьы-а азинтод аслэсьтыд кылдэ? Соин ик дэмласько кылъёс сярысь законлы инъетэз али ужась депутатъёслы эскерыны. Мукетыз ужпум. Туж ичи асьме парламентын удмуртъёс но гуртын улӥсьёс. Таӵе югдур туж вӧсь каре калыкез. Гуртысь депутатъёс ӧжыт луэменызы уг быгато утьыны калыклэсь куронъёссэ. Куинь но ӝыны ар ӵоже Госсовет туж ӧжыт лэсьтӥз ай удмурт калык понна. Мон ӵектӥсько гуртысь депутатъёслэсь лыдзэс кык пол будэтыны. Тӥ вылӥ кивалтӥсьёс, соин ик санэ басьтыны кулэ огшоры адямиослэсь куронъёссэс. В. ПОНОМАРЕВ. Глазов город. УМОЙ АДЯМИОС Писпу но пуштырске, муэ кужмо ке ӝабырске Та нуналъёсы Ижевскысь кузпалъёс Панинъёс бадӟым юбилейзэс пусъё: Сергей Афанасьевич но Мария Михайловна куатьтон ар ӵоже ӵош уло ини, со сяна Сергей Афанасьевичлы 80 арес тырме. Кузпалъёс будэтӥзы ньыль нылпи. Соос но ваньзы ик табере пиналъёссэс пыд йылазы ӝутӥзы ни, асьсэлэн но внукъёссы вордскизы. Огкылын вераса, семья будӥз, кужмояз. Сергей Афанасьевич но Мария Михайловна понна талэсь бадӟым шуд но ӧвӧл кадь. Карзы сярысь асьсэдыз жалятэк сюлмаськись тылоос сямен утё соос та шудзэс, оско, пиналъёссы азьланяз но пумтэм шумпотон ваёзы на. *** Ма юрттӥз тӥледлы тамында ар ӵоже ваче улыны? Мария Михайловна: Ми котьку ик ог-огмес валаны тыршылӥм, ог-огмылы юрттылӥм. Озьытэк юн семья ноку но уз кылды. Улонын олокыӵе но вакытъёс вадьсасько ук, куддыръя чидан сям но туж дуно. Сергей Афанасьевич: Зэм, ог-огдэ валаны выроно. Мон ачим вань улонме судын ужанлы сӥзи, гуртэ ӵем ӧй сюрылы. Кузпалы шӧдэ вал сюлмаськонъёсме. Нылпиосмес но со ик будэтӥз. Али но семьяямы кузё. Кенъёсмы асьсэос кемалась песянайёс ни, нош соин кенешытэк нокыӵе бадӟым уж борды уг кутско. Кузпалъёс Панинъёс кыкназы ик вордскизы но будӥзы Вуж Зятцы ёросысь (Якшур-Бодья ёрос) Лынвай гуртын. 1938 арын семья кылдытӥзы. Та вакытэ Сергей Афанасьевич Вуж Зятцыысь судын ужа вал ини. Кызьы гуртын будэм пияшлы судын ужаны оскизы? С. А.: Чебер гожъяськыны быгатӥсько вал, укылтэмъяськон сямы ӧз потылы. Тае тодыса, судья Ведерников юалляськем гуртысьтымы воргоронлэсь. Соиз мон сярысь умоен верам, судын ужаны ӵектэм. Монэ басьтӥзы. Делопроизводитель, секретарь, нотариус вал. Нош 1939 арын калык судья луи. Кызь арескын судын приговор кутыны секыт вал, дыр? Бен, приговор кутон - капчи уж ӧвӧл. Ведь, шонерзэ верано ке, соин герӟаськемын адямилэн азьпал улонэз. Ужаны кутскон вакытысьтым учыр али но уг вуны. Районысьтымы одӥгезлэн колхоз председательлэн пиез, берыктэм шуба дӥсяса, гондыр кариськыса, сюрес вылэ потэ но адямиослэсь ваньбурзэс тала вылэм. Котьмалэн пумыз вань, шуо. Йыртэмасез кырмиллям. Мон со сярысь уг тодӥськы вал. Арня нунал ужантӥям пукисько. Дорам колхоз председатель пыре. Ӟечбуръяським-марам. Юаз, кыӵе мон улӥсько. Мон но таӵе ик юан сётӥ. Вераз, пие, пе, секыт югдуре шедиз ай. Колхоз председателен тодмоесь вал. Тӥни со, пизэ утён вылысь, мон доры кузьмаськыны лыктэм. Сьӧраз ваем... сарбаен кызь курегпуз. Озьы-озьы шуэ, кык нылпиед вань ини, соосты сюдыны кулэ. Валамон ини, мон "кузьымзэ" ӧй басьты, ӵектӥ, азьланяз тазьы медаз ветлы ни, мон интыын мукет мурт луысал ке, ассэ но пиез доры пытсэт сьӧры келясал. Нош судэз ортчыны кури Якшур-Бодьяын. М. М.: Тӥни озьы кивалтӥсьлэн пиез кырыж сюрес вылэ кожиз. Ӵемысь ведь озьы луэ, нылпиез рос-прос чаклась ӧвӧл ке. Нош 30-тӥ аръёсы председательёслы, ой, кыӵе секыт йӧтӥз, дырзы но, кужымзы но ӧз тырмылы. Мон пиналъёсмес юн возьылӥ. Кисыоссэс гинэ но зынъясько вал - тамак уг кыско-а. Юондыр луэ ке, куное мынӥськом ке, пиналъёсмес сьӧрамы ум басьтӥське. Юонэз медаз синйылтэ, урод сямъёсты медаз адӟем каре. Али шумпотӥськом ини, пиналъёсмы но, соослэн нылпиоссы но уг но кыско, уг но юо. Секыт война аръёсы Сергей Афанасьевичез Ижевске Верховной Судэ ужаны выжто. С. А.: Кызьы вераны ик паймисько, но войнае мынонлэсь монэ утиз пичи дыръям луэм шудтэм учыр. Вить арес дыръям палсин кыли: братэным вуж дӥсез ӟезиськом вал. Братэлэн киысьтыз качыез пезьдӥз но пырак синмам йӧтӥз. Со братэ войнае быриз, нош мон улӥсько - ачим понна но, со понна но. Война кутскем бере Верховной Судысь ваньзэ сямен воргоронъёсты фронтэ басьтӥзы. Судлэн кивалтӥсез Федор Михайлович Кулябин, 1915-тӥ арысен коммунист, Азинлэн дивизияз ожмаськем мурт, монэ ӵектэм Иже басьтыны. Партилэн обкомаз ӧтизы, веразы мугзэ. Мон юасько, улон инты вань-а. Ӧвӧл, пе. Мон пумит, шуисько. Толэзь ортчыса, нош ик ӧтизы. Нош ик соглаш ӧй луы. Куинетӥяз шуизы, пумит ке, партбилеттэ потты. Ма карод на, Иже лыктоно луиз. М. М.: Ми гуртэ кылим. Ар пала нимамы улӥм на. Улон инты ӧвӧл бере, кытчы кошкод. Нош гуртын бакчамы но, пудо-животмы но вал. С. А.: Дас ар ӵоже ужай Верховной Судлэн членэз луыса. Нош со пӧлысь ньыль арзэ гинэ, дыр, дорын вал. Аман командирвокаостӥ ветлоно луылӥз. Сюресъёс но, транспорт но ӧй вал. Кӧня иськем сюресъёсты пыдын ортчи меда. Судьялэн ужез огшоры ӧвӧл. Кышкатъясьёс ӧз шедьылэ-а? М. М.: Тодам ваисько таӵе учырез. Кузпалы Москваын дышетске вал. Ми пиосыным Ижевске кылемын. Одӥг пол уин изьыкум шӧдӥсько, квартира укноямы кин ке вань, собере пеймытысь воргоронлэсь вужерзэ синйылтӥ. Кин отын? - кеськи. Вужер ышиз. Музъем вылэ тэтчем куара кылӥськиз. Мукет комнатае чаляк потӥ, пиосме эскерисько, улэпесь-а, мугорзы кот ӧвӧл-а, маке ӧз каре-а соосты. С. А.: Ӵапак со вакытэ дорам Москвае кышкатыса гожтэт лэзизы, семьядэ, пе, быдтом. Йыркуръяськисьёсы вал. Йыруж лэсьтӥсьёс пӧлын кыӵе гинэ сьӧд сюлэмъёс ӧвӧл угось. Бен, судьялэн ужаз пӧртэм учыръёс вал: умоез но, уродэз но. Сергей Афанасьевич пальышаса тодаз вае. С. А.: Война вакыт Азино станциын бадӟым коньдон понна инкассаторез виизы. Йырвандӥсьёсты кырмизы. Кыл кутонэ куинь воргоронэз кыскизы. Приговор лек вал: кыксэ - ыбыны, одӥгзэ - дас вить арлы тюрьмае келяны. Та уж сярысь, оло, вунэтысал. Но дас вить ар ортчыса, тюрьмае келям муртмы берытскиз, дорам лыктӥз. Мон чылкак пайми вуэмезлы, йырам малпан чилектӥз, оло, пунэмзэ берыктыын чакла. Нош со вера, озьы-озьы, пе, уж уг шедьтӥськы, тюрьмаын дыръям, пе, милиционер дӥсь вурыны дыши, оло кыӵе ке мастерское интыяськыны юрттоды. Ма кароно? Социальной юрттэт сётонъя министрлы жингыртӥ, верай, сыӵе-сыӵе адями уж утча. Тюрьмаын пукемез сярысь ивортӥ но, министр воксё бакомиз, но "эшме" уже, ательее, интыяны юрттӥз. Юлтоше толэзьлы быдэ дорам возьматскыны ветлэ вал. Огполаз чылкак паймытӥз: кышнояськисько, пе, сюанам лыктэ. Со понна шумпотӥ ик, но мынонтэм вылысь муг вераны шедьтӥ. Тӥни кыӵе учыръёс но луылӥзы. Сергей Афанасьевич республикаысьтымы судебной ёзъёсын ньыльдон ар пала ужаз, кызь арзэ УАССР-ысь Вылӥ Судлэн Тӧроезлэн воштӥсез вал. Мария Михайловна уно аръёс ӵоже тыршиз мотозаводын. Пенсие потэмзы бере но соос шутэтскыны ӧз дыртэ. Сергей Афанасьевич 1988 арозь Вылӥ Кенешын инструктор, валтӥсь юрисконсульт вал на. Эшшо Мария Михайловна ватса на: - Ми ведь кык ар ӵоже ӵошен азбар ӵужим на. Али но буйгатсконэз уг валало. Ижлэн шорысьтыз квартиразэс мукет районэ, кыдёкегес, воштӥзы. Табере пичи нылынызы, Надежда Сергеевнаен, артысь квартираосын уло. Внуксы Иван университетысь юридической факультетын дышетске, песятаезлэсь адӟем кариз, луоз. Сад-бакчазы кык, отчы но татчы но вутско. Сергей Афанасьевич батыр кадь кужмо ай: улоно корказы лифтсы уг ужа, куинь ведра картофкаен дасэтӥ этаже, пе, тубисько ай. Мар шуод, котьма ласянь синмаськымон кузпалъёс Панинъёс. Шуд но тазалык сӥзиськом та гажано адямиослы. Ю. АЛЕКСАНДРОВА. Писательёслэн куинь нуналъёссы Ижевскын куин нунал ӵоже ужа Россиысь писательёслэн союззылэн секретариатэзлэн выездной заседаниез. Асьме доры лыктэмын Россиысь писательёслэн огазеяськонэнызы одӥгез кивалтӥсь, тодмо ӟуч писатель Петр Проскурин, секретариатын ужасьёс Валентин Сорокин, Ванцетти Чукреев, Марианна Зубавина, тодмо критикъёс Михаил Числов но Вадим Дементьев, озьы ик Мари Эл, Мордва но Коми республикаосысь писательёслэн тӧрооссы Василий Крылов, Иван Калинкин но Елена Козлова. Нырысетӥ нуналаз соос пыриськизы Егитъёслэн дворецазы литературной ӝытэ. Кырӟанъёссэс- эктонъёссэс куноослы сӥзизы "Италмас" ансамбльысь артистъёс. Толон вал Кун Кенешын Александр Волков дорын пумиськон. Вераськон пуромиз та секыт вакытэ писательлэсь, книгалэсь данзэ утён, соослы юрттон ласянь. Туннэ секретариат но асьме писательёслэн огазеяськонзы понна ӟырдыт нунал. Россиысь писательёслэн радазы кутозы куд-ог гожъясьёсмес. Собере луоз финн-угор литератураысь ужпумъёсты эскерон. Ӝыт Егитъёслэн дворецазы - Геннадий Красильниковез буре ваён ӝыт. Толон творческой юбилейной ӝытсэ ортчытӥз ӟуч кылбурчи Герасим Иванцов. Т. НИКОЛАЕВА. УДМУРТ РЕСПУБЛИКАЛЭН 1998 АРЫН ЯНВАРЬ-СЕНТЯБРЬ ТОЛЭЗЬЁСЫ АЗИНСКЕМЕЗ Промышленность Та дыр куспын республикаысь предприятиос 12004 миллион манет тыр ваньбур поттӥзы, кылем арен ӵошатыса, со 98 процент луэ. Ваньбур поттон тужгес но синӥз (11-17 процентозь) андан ӵыжатонын, химической промышленностьын, нюлэс но лэсьтӥськон арбериос поттон удысъёсын. Та дырозь умойгес югдур возиськиз эстӥськон сётӥсь удысын. Но туэ 9 толэзь ӵоже татын но 12 процентлы кулэсмиз электрокужым сётон но, 4,7 процентлы синӥз эстӥськон. Кулэсме му вӧй поттон. Кӧнялы ке йылӥзы обороналы ужась предприятиослэн но соосын герӟаськем удысъёслэн заказъёссы. Озьы ке но, кылем арын сярысь, ӧжытгес поттэмын редукторъёс - 2,2 поллы, автомобильёс - 2 поллы, радиоприёмникъёслы кулэ арбериос - 44 процентлы, мотоциклъёс - 40 процентлы. Производстволэн кулэсмемез кӧня ке мугъёсын герӟаськемын: ӧжыт луизы продукциез басьтӥсьёс, люкетэ экономикаын валантэм югдур, шӧдӥсько коньдонлэн но оборудованилэн тырмытэмзы, туж секыт вормыны кунгож сьӧрысь вуз поттӥсьёсты. Калык тросгес коньдонзэ быдтэ сиён-юонъёслы. Соин ик, кылем арын сярысь, тросгес поттэмын пызь, вӧй, консерваос, сӥльлэсь пӧрам колбасаос. Но куд-ог сиёнъёс ӧжытгес дасямын, кылсярысь, 7 процентлы синӥз нянь вузан, 20 процентлы - чорыг сиёнъёс, 27 процентлы - макаронъёс. Лэсьтӥськон удыс 1998 арын 9 толэзь ӵоже 643 квартира лэсьтэмын, огъя площадьзы 48 сюрс квадратной метр. Кылем арын та вакытэн ӵошатыса, со кык поллы ӧжытгес. Одӥг квадратной метрлэн дуныз 2391 манет сылэ. Квартираос сяна, 13,45 километр газ гумыос кыскемын, 67,5 километр автомобиль сюресъёс асфальтэн шобыртэмын. Усьтэмын 1296 интылы школа, 50 койкалы больница, поликлиника, 600 интылы клуб. Строительёсын огъя ужъёс быдэстэмын 1515 миллион манет тыр, кылем арын сярысь, со 13 процентлы ӧжытгес луэ. Гурт хозяйство Туэ 12 октябрьлы 565 сюрс тонна ю тысь кутсамын. Гектарысь, шорлыдын вераса, 11,7 центнер ю-нянь басьтэмын. Утялтэмын 70 сюрс тонна картофка, 12 сюрс тонна бакча будосъёс. Одӥг гектарысь туэ 105 центнер картофка но 158 центнер бакча будосъёс басьтэмын. Туэ январь-сентябрь толэзьёсы гурт хозяйствоос вузазы 101 сюрс тонна ю тысь (кылем арлы пумит со 89 процент луэ), 18 сюрс тонна картофка (154 процент) но 8 сюрс тонна бакча сиёнъёс (141 процент). Таяз арын кулэсмиз пудо животлэн лыдыз, сюро пудолэн - 5 процентлы, парсьёслэн - 1 процентлы, ыжъёслэн но кечъёслэн лыдзы - 8 процентлы. Та вакытэ ик 496 сюрс тонна йӧл кыскемын, 1997 арын сярысь, со вылӥынгес луэ. Курег пуз но 10 миллионлы тросгес бичамын. Вань та азинсконъёс вылӥынгес луо выль амалъёсты кутыса ужась колхозъёсын, совхозъёсын но эштосъёсын. Транспорт но связь Вань транспортэз вераса, вузъёсты нуллон кулэсмиз 16 процентлы. Ву вылтӥ вузъёсты нуон-ваён гинэ 39 процентлы йылӥз. Туэ январь-сентябрь ӵоже вань автобусъёсын 216 миллион адями ветлӥз, нош троллейбусъёсын но трамвайёсын - 142 миллион адями. Кылем арын сярысь, адямиос тросгес ке но нуллэмын, рейсъёс ӧжытгес лэсьтэмын: автобусъёсын но трамвайёсын 4 процентлы, троллейбусъёсын 8 процентлы. Самолётъёсын 89 сюрс адями лобаз, со но 23 процентлы ӧжытгес луэ. Та дыр ӵоже сюрес вылын 1279 шудтэм учыр вал, быриз 182 адями, сӧсырмиз 1448 адями. "Удмуртавтодор" тупатӥз 180 километр автомобилен ветлон сюресъёсты но 428 метр мында выжъёсты. Но та лыдпусъёс но кылем арлэсь ӧжытгес луо. Туэ нырысетӥ октябрьлы телефон аппаратъёс пуктэмын 224 сюрс пала городын но 43 сюрс гуртъёсын улӥсьёслы. Городын со йылэмын, гуртъёсын 1,8 процентлы кулэсмемын. Мукет городъёсын вераськыны пуктэм таксофонъёслэн лыдзы 14 единицалы ӧжытгес луиз. Озьы ик 23 сюрслы (6 процентлы) синӥзы радиоточкаос. Вузкарон Кылем арлэн сентябрь толэзеныз ке ӵошатоно, магазинъёсын вузкарон 16 процентлы кулэсмиз. Со герӟаськемын дунъёслэн будэменызы но калыклэн начармеменыз. Со дыре ик базаръёсын вузкарон 13 процентлы йылӥз. Аракы но сур вузан 6 процентлы синӥз. Туэ нырысетӥ октябрьлы вузкарон предприятиосын вузъёс люкаськемын 329 миллион манет тыр, со тырмоз 22 нунал ӵоже вузкаронлы. Кылем арын та дыре ик вузъёс люкаськемын вал 35 нуналлы тырмымон. Вузъёслэн ӟечлыксы ӵем дыръя тупатэм куронъёслэсь улӥын возиське. Кылсярысь, туэ 3-тӥ кварталын эскерем вузъёс пӧлын ас ӟечлыксылы ӧз тупалэ 20-30 процент пала аракыос но суръёс, 10-15 процент пала чорыг сиёнъёс но сахар песок. Вузкаронысь палэнтэмын 10 процент пала шудонъёс, 13 процент - парфюмерия, 14 процент - радиоаппаратура, 19 процент - мебель. Кунгож сьӧрысь ваем вузъёс пӧлын - 8 процентэз гинэ сиён-юон, 21 процентэз дӥськут, пыдкутчан но мукет вузъёс. Вузкаронлэн кулэсмемез герӟаськемын бадӟым налогъёсын (озьы валэктӥзы юалляськемъёс пӧлысь 83 процентэз), но адямиослэн басьяськыны луонлыксы ӧвӧлэн. Соин ик вузкарисьёслэн но трос вузъёс басьтыны коньдонзы уг тырмы. Удмурт национальной театр ноябре таӵе спектакльёс возьматэ: 17, 18, 19 Премьера "Кык кузёослэн ляльчизы" К. Гольдони (кык ёзэн комедия) 18.00 20 "Бызьыны вуэм песяйёс" Ф. Буляков (кык ёзэн калык комедия) 18.00 Спектакль сӥземын артисткаез О. Чайниковаез буре ваёнлы 24 "Улӥськом-вылӥськом, шу..." Н. Сидоров (кык ёзэн драма) 18.00 25, 28 Нылпиослы выжыкыл "Жили-были две Лисички" 10.00, 11.00 26 г. Можга, "Дубитель" культурая юрт Н. Сидоров "Улӥськом-вылӥськом, шу..."^ (кык ёзэн драма) 18.00 27 "Марым, лэся, яратӥ..." П. Захаров (кык ёзэн комедия) 18.00 Милям телефонъёсмы: 78-79-81 78-45-92. Депутат ужъёсыныз кужмо "Россилэн экономикаяз али югдур секыт ке но, ми, Госдумае Удмуртиысь быръем депутатъёс, вуоно арлы бюджетэз дасяку, вань быгатонозэ лэсьтӥськом, республикамылэсь кулэяськонъёссэ утён вылысь",- шуиз алигес журналистъёсын пумиськылыкуз депутат А. СОЛУЯНОВ. Али ваньмыз валатскизы ини: странаысь промышленностез ӝутытэк, улонэз уд тупаты. Предприятиосты ужатон понна али туж кулэ выль оборудование. Но тросэз соос таможняосы кугӟамын. Сыӵе югдуре ик сюремын "Ижмаш" но республикаысьтымы мукет заводъёс. Соин ик таможенной кодекслэн инъетаз но куд-ог воштонъёс но ватсанъёс пыртоно. Та бордын али мылысь-кыдысь ужа асьме депутатмы А. Солуянов но. Чаклано озьы, шуэ Андрей Владимирович, со мед тупалоз Россилэн вань улосвылъёсызлы, нош али дасям инъет одӥг ведомстволы гинэ ярамон. Кодекс юнматымтэ на, нош предприятиосмылэсь продукцизэс кызьы ке ноо кунгож сьӧры поттоно. Та ужез нуыны депутат быгатэмезъя юрттэ. Кылсярысь, Ижысь электромеханической заводэз кунсьӧр фирмаосын кусыплаз. Озьы луонлык кылдӥз ож тӥрлыкез вузаны. Кемалы чаклам огкыл бюджетэ уно коньдон пыртоз. Кызьы ивортылӥмы ини, туэ сӥзьыл А. Солуянов предприятиослэн кивалтисьёссы азе "Шефство" программаен потӥз. Зэмзэ но, школаослы, нылпи садъёслы, интернатъёслы предприятиос юрттыны дась. Нош соглаш кариськозы-а вылӥ кивалтӥсь ёзъёс сыӵе юрттэт сётэмзы понна предприятиосты куд-ог налогъёслэсь мозмытыны? Та пумысен малпанъёссэс вераны кулэ депутатъёс но. "Шефство" программа республикаямы пыӵаз ке, сое улонэ кутыны малпало мукет улосвылъёс но. Сыӵе мылкыдзэс верало Госдумаысь "Российские регионы" группае пфрись депутатъёс. Е. ПОСАДОВА. Ӧрӟиослэн радысьтызы "Сюресэд туж данъямон. Тӧллы нялтас тон ноку но ӧд мыны. Сэзь вамышъяд йӧзоръёс, гудыриос пумитэ но. Кияд пыӵалэн утид та улонмес... Куинь пол сӧсырмылӥд. Озьы ке но, ялан вамышъяд Вормон нуналмылэн ӟардонэз пала. Отӥяз ас кужымдэ жалятэк сётӥд улонмес выльдонлы-умоятонлы, нылпиосты дышетонлы, партийной ужлы, газет поттонлы. Ужамъяд ик пумен дышетскид, институтэз быдтӥд. Отын но возьматӥд юн мылкыддэ, шуг- секытъёсты вормыны быгатэмдэ". Таӵе кылъёс дасямын вал, Александр Ивановичез пенсие келяны дасяськыку. Нош со эшшо кык ар ёрос ужаз на. Табере А. И. Князевлы 75 арес тырме. Кыӵе кылъёс вераны луоз крестьян ужез но, дышетӥсьлэсь ныпъетсэ но, ожлэсь ӵынзэ-курытсэ но, партилэсь юн эгессэ но, газет поттонлэсь вожвыло сюресъёссэ но адӟем, чидам, сюлэм пыртӥз поттэм муртлы? Таӵе адямиос - анданэн дурем-кыдатэм кадесь, соослэн интызы - ӧрӟиослэн радазы. Дэбес палась Улӥ Шудзялуд гуртын 1923 арын вордскем пияш ас ёзъёсыныз ӵош ӵапак "дасямын" вылэм ож тылӝуэ. Педучилищеез быдтыса дышетыны ӧз кылды - ожмаськыны кошконо луиз. Волховской но Ленинградской фронтъёсын вал. Туж секытэсь, шимесэсь со ож сюресъёс. Мур кисыриос но гадь вылын пиштӥсь наградаос гинэ верало на со сярысь. 1944-тӥ арын Александр Ивановичлы кышкасьтэм луэмез понна сёто Горд Кизили орден. Та аре ик со коммунист луэ. Вылысьтыз вылаз гадь вылзэ чебермало на "За боевые заслуги", "За оборону Ленинграда", "За победу над Германией" но мукет медальёсыз. 1947-тӥ арын гинэ бертэ со армиысь. Запасысь капитан омырске "мирной" уже. Ожлэсь азьло быръем удыссэ азьланьтэ: Шудзялудын дышетэ, татысь сизьым аръем школаен кивалтэ. Куинь ар но ӝыны гинэ дышетӥсьын ужаны сёто, собере Тыловай ёросысь калыкез дышетонъя отделэн кивалтыны куро. Со 50-тӥ аръёсы Александр Ивановичлэн уже зымылон "кульчоосыз" весь паськытало но паськытало - котыр ёрос кыдёкегес азьланьскемен валче. Тыловай район быре но 1956 арын райгазетлэсь редакторзэ Шаркан ёрос газетлы редакторе юнмато. 1962-тӥ арын Шаркан но Воткинск районъёсты огазеяло, таин ӵош Александр Князевлы выжоно луэ Воткинске. Татын со луэ редакторлэн воштӥсез - удмурт газетлэн кивалтӥсез. Ваньмыз со - вылаз оскись "кульчоос" гинэ. Нош кӧня отын визылъёсыз... Та аръёсы ик Александр Иванович дышетскыны вуэ Свердловскысь высшой партийной школаын. Кык пол ужаны кутскылэ компартилэн райкомаз. Заочно дышетске Удмурт пединститутын... Нош инмарен сётэмез - со кымысэ пуктэм (адскисьтэм) печать кадь, лэся. Газет поттон уж Александр Ивановичлэн лулаз-вираз пыӵаз. 1969 арысен со луиз "Советской Удмуртия" газетлэн "аслаз" - собственной корреспондентэз Воткинск, Шаркан ёросъёсъя. 70-тӥ-80-тӥ аръёсы, соос, собкоръёс, зэмзэ ик, шаертӥмы лобась кужмо ӧрӟиос кадь толэзьлы огпол ке но берытско вал вордскем каразы - газетмылэн редакцияз. Ваё "сиён" - пӧсь гожъямъёссэс-иворъёссэс. Редакциын гуж вазе, ог-огзэс пумитаса, нош задормо, бурдъясько. Дасо мында яке ятыргес люкасько соос: Александр Князев, Вячеслав Корепанов, Александр Наговицын, Андрей Яковлев, Парамон Иванов, Николай Белоногов, Юрий Трефилов... Александр Иванович ас ёроссэ-котырзэ вить чиньызэ кадь тодэ вал, дыр. Кин понна гинэ ӧз гожъя - сельсоветлэн председателез, колхоз тӧро, экономист, заводысь валтӥсь инженер, слесарь, партийной ужась - ваньмызлэсь та авторъёслэсь малпанъёссэс визь пуж пыртӥз поттылӥз, сюлэм шунытсэ ватсалляз. Статьяосыз ӝикытэсь, ужпумез сэрттыса-пертчыса гожъямын луозы вал. Ас сярысьтыз, ас чуръёсыз сярысь гинэ собкор ӵем дыръя вунэтылӥз. Сыӵе вал ни, шуом, вакытлэн куронэз. Таӵе муртъёс кын корт куртчон дыръязы кадь возисько вань улытозязы. Сӥзём Александр Ивановичлы: озьы ик мед луоз. Т. Петрова. Газетлэн азьвыл собкорез А. И. Князев. Герд Мон тазьы малпасько Гурезь улэ? 1985-тӥ арысен туннэ нуналозь улонамы туж уно воштӥськонъёс луизы. Соос пӧлын трос ӟечез но. Та аръёсы асьмеос, удмуртъёс, нырысьсэ зэмлыко синъёсын учкыны быгатӥм калыкмылэн ортчем сюресэз шоры. Луонлык кылдӥз шара вераны но гожъяны бадӟымесь ужпумъёсмы сярысь. Кылдӥзы выль журналъёс: покчиослы - "Кизили" (1986), егитъёслы - "Инвожо" (1990), дышетӥсьёслы, воспитательёслы, студентъёслы - "Вордскем кыл" (1990). Ёросъёсын потӥсь удмурт газетъёс но асьсэ куаразэс шедьтӥзы. Удмурт радиолэн вераськон дырыз но соку будыны ӧдъяз. Элькунмылэн шоркараз потӥсь удмурт изданиослэн огъя лыдзы (тиражзы) 78 сюрсозь ӝутскиз. Шорлыдын вераса, дунне вылысь котькуд дасэтӥез удмурт та аръёсы басьтӥз анай кылын печатласькись газетэз яке журналэз. Удмурт артистъёс, писательёс, журналистъёс ӟеч кусыпъёс тупатӥзы элькунмылэн палэназ улӥсь бӧлякъёсынымы. Пӧртэм интыосын удмурт культурая центръёс, дэменлыкъёс, "Удмурт кенешлэн" ёзъёсыз кылдылӥзы. Асьмеос гурезь йылэ тубыны кутским... Но ог вить ар талэсь азьло вылӥе ӝутскон сюресмы шуак чигиськиз кадь. Оло, чигнаны ӧдъямы? Учке ай асьтэос: берло дыре Удмурт телевидениын асьме кылын мынӥсь передачаос чутрак кулэсмизы. Удмурт радиолэн но вераськон дырыз пумен ӧжытгес кыле. "Ингур" радиостанцилэн тулкымъёссэ вӧлмытон кужымез уг буды. Удмурт газет- журналъёс ворсаськон калэ вуизы. Тани "Кенеш" журналэз басьтӥсьёслэн лыдзы берло дыре одӥг сюрс сяна уг люкаськы. Куке но солэн лыдӟисьёсыз дас куать сюрслэсь уно вал. Сыӵегес ик югдур мукет журналъёсын но. Туэ удмурт изданиослэн огъя тиражзы 22 сюрслэсь но уг ортчы. Озьыен, котькуд 34-тӥез гинэ удмурт ас кылыныз потӥсь газет- журналлы гожтӥське на. Удмурт изданиосты печатланы нокин уг люкеты кадь. Нырысь учкыса гинэ со озьы потэ. Соосты утён, азинтон ласянь элькунысьтымы Кивалтэт рос-прос уг сюлмаськы. Тани туэ "Кизили", "Инвожо", "Вордскем кыл" журналъёс вить толэзь ӵоже ӧз печатлаське. Элькун типография (Пастухов ульча, 13) соосты поттыны пумит кариськиз. Тыронъёсмы трос люкаськизы вал угось. Юрттэт курыса, ми вазиськылӥм Удмурт Элькунысь Кун Кенеше но, Кивалтэтэ но, Печатья но ивор вӧлмытонъя министерствое но. Котькытын милемыз буйгатыны тыршизы, нош уж интыысьтыз ӧз вырӟы. Сӥзьыл вуэм бере гинэ печатлазы та журналъёслэсь витетӥ яке куатетӥ номеръёссэс. Нош ку потозы мукет номеръёсыз? Вуоно арын та изданиосты басьтыны мылкыд карисьёс луозы на-а? Котькуд редакция ас понназ выре лыдӟисьёсыныз кусыпъёс тупатыны. "Удмурт кенеш" огазеяськон но, удмурт культурая дэменлык но, мукет организациос но асьме кылын потӥсь изданиосты утён сярысь кулэезъя уг сюлмасько. Али ваньмы дэмен кариськыса ужрадъёс ӧм кутэ ке, ӝоген ини бадӟым ыштонъёс адӟом. Ивор вӧлмытӥсь ёзъёстэк асьме калыклэн куараез воксё лябӟоз. Вуоно арын Кун Кенеше быръёнъёс ортчозы. Соку элькун Кивалтэт но выльдӥськоз. Та ужрадлы дасяськон али ик кутскиз ни. Соин ик туала кивалтӥсьёс азьланьын тросгес сюлмаськозы небыт пуконъёссы сярысь. Удмурт газет-журналъёсын герӟаськем ужпумъёс нош ик палэнэ кылёзы, дыр. Удмурт гуртъёсысь, школаосысь библиотекаосы анай кылын потӥсь изданиос нош уз вуэ. Калыкмы чалмыт улоз, ваньзэ чидалоз. Нош отӥяз ма луоз?.. Ульфат БАДРЕТДИНОВ, журналист. Ӟеч мылкыд, ӟырдыт кыл "Удмурт кенеш" огазеяськон кичӧлтэмъя, ёросъёсын ортчизы ӟеч ужан амалъёслы дышетсконъёс. Берлоез пумиськон вал кылемаз удмурт арня нуналэ. Уй пала, Глаз вылэ, вуылӥзы Глаз, Балезино, Яр, Юкаменск, Красногорск, Эгра (Игра), Дэбес, Кез ёросъёсысь кенешъёслэн тӧрооссы но соослэн матысь юрттӥсьёссы. Ужрад ортчиз тылобурдо вордон фабрикалэн культура юртаз. Люкаськемъёсты нырысь ик ӟечкылазы та палась кузёос. Глазкарлэн йырызлэн воштӥсез Валентин Милостнов, ёрос тӧролэн воштӥсез Василий Наговицын, тылобурдо вордон фабрикалэн директорез Георгий Суставов лыктэмъёслы нунал ӵоже ӟеч ужаны мылкыд каризы. Ог-огедлы юрттыны ӧтьыса, ӟеч визь-кенешъёс сётӥзы Удмурт лулчеберлыкъя дэменлыклэн валчетӧроез Василий Осипов, Удмурт нылкышно кенешлэн азьветлӥсез Галина Никитина, "Удмурт кенеш" огазеяськонлэн тӧроезлэн воштӥсез Нина Малых, удмурт егитъёслэн "Шунды" дэменлыксылэн тӧроезлэн юрттӥсез Наталья Пантелеева. Кенешлэн ужаз пыриськиз Удмурт Элькунысь Нациосын ужанъя комитетын тыршись Юрий Александров но. Кузёос тодматӥзы ӟеч ужан амалъёсынызы. "Удмурт кенеш" огазеяськонлэн Глаз ёросысь ёзэзлэн тӧроез Надежда Золотарёва ивортӥз шуг-секытъёссы, шумпотонъёссы сярысь. Удмурт калык азьын сылӥсь лэчыт ужпумъёс сярысь ӟырдыт вераськизы Глаз пединститутысь доцент Сергей Бабинцев, ужбергатӥсь Евгений Горбушин, удмурт егитъёслэн "Шунды" дэменлыксылэн Глаз ёросысь ёзэныз кивалтӥсь Александр Поздеев. Глаз пединститутысь доцент Сергей Бабинцев сюлэмшугъяськыса вераз удмурт кыллэн вераськонамы пумен шергес кутӥськемез, таин валче улонамы кылдылӥсь данак шугадӟонъёс сярысь. Егит тодосчи ӧтиз пезь-пезь, сэзь-сэзь, юн мылкыдо кариськыны, удмурт кылмес юнгес яратыны. Вань верамъёслы йылпумъянъёс лэсьтӥз "Удмурт кенеш" огазеяськонлэн тӧроез Валентин Тубылов. Ужрад ортчем бере, люкаськемъёсты шулдыртӥзы кырӟаны-вераны яратӥсьёс. Уй пала вуэмъёслы ӟеч мылкыд кузьмазы "Глазовчанка" нылпи студия, дышетскись егитъёслэн эктонъя "Югдон" ансамбльзы, арганчи Андрей Чупин, "Иднакар" ансамбль, мукетъёсыз. Кырӟан-веран таин ӧз йылпумъяськы. Фойее потыса, куноос веръязы шуэн шлач, мукет пыжиськемъёс. Арган шудэм улсын берозь чузъяськизы жингрес удмурт гуръёс. Та нуналэ ик дышетсконэ лыктэмъёс вуылӥзы "Иднакар" музей-юртэ. Е. РОМАШОВА. Ужбергатӥсь Евгений Торбушин. Вамыш бӧрсьы вамыш Жаляса верано луэ: асьме странаын берло дыръёсы котьма воштӥськиз, нош гурт калыклэн улон-вылонэз чин но ӧз умоя. Солэсь но ортчыт, сямлы пӧрмем йылолъёсмы вуныны кутскемен, адямиослэн куспазы ог-огенызы котьку лякыт луон мылкыдзы сӥяны ӧдъяз, ваньмон дырзэс но шер дыръя гинэ ӵош ортчытъяло на. Кылдэм югдурез валаса, гурт калыклэсь валче ужан, ог-огедлы юрттыса улон мылкыдзэ утён вылысь, ми асьме районын ӧтчамъёс ортчытӥм. Отын эскерим интыосын ас коже кивалтонэз радъян сярысь ужпумез. Калык ачиз бырйиз старостаосты, гурт кенешъёсты. Кӧня ке дыр ортчиз. Табере старостаосмы кызьы ужано, мар бордысен кутсконо шуыса уг уло ни. Асьсэлэсь ужзэс радъяло нимысьтыз юнматэм положениея. Отын пыр-поч валэктэмын соослэн правооссы но быдэстоно ужпумъёссы. Старостаос уждун басьтытэк ужало бере, соослы кызьы ке но юрттон понна мозмытӥм музъем но ваньбур понна выт тыронъёслэсь. Туннэ нуналлы адӟем карымон тыршо ни Александрово, Бадӟым Кибья, Сюгаил палъёсысь старостаос. 1992 арын районамы, быдэс республикаямы сямен ик, калык депутатъёслэн сельской советъёссы вал. Отын ужазы калыкен быръем депутатъёс. Но бӧрысь тазьы кивалтон амаллэсь куштӥськоно кожазы, озьы кӧня ке дыр ӵоже интыосын калыкен быръем (представительной) ёзъёс чик ӧй вал. Азьло сельсоветлэн улосвылаз кузё интыын луиз гурт администрацилэн тӧроез. Сое та уже юнматылӥз ёрос администрацилэн кивалтӥсез. Тӥни озьы асьмеос ялан огпалась огпала шонаськиськом: я дэмен кивалтӥськом (сельсоветлэн депутатъёсыз, профком, партком, комсомоллэн комитетэз), я вань ужъёсыз одӥг муртлы оскиськом. Мон малпасько, интыосын кивалтон амал табере шедиз кадь. Гуртысь администрацилэн тӧроез но калыкен быръем гурт кенеш валче ужало, вань ужпумъёсты ӵош учко-эскеро. Ӧтчамъёсы люкаськыса, калык гурт кенешъёсы бырйиз тужгес но гажано адямиоссэ: гурт старостаосты, эштосъёслэсь, пӧртэм организациослэсь, общественной огазеяськонъёслэсь кивалтӥсьёссэс, ужын данэ потэм муртъёсты. Озьы табере сельсоветэ депутат но быръёнэз ӧвӧл ни, уно коньдон но шыръяське. Гурт кенеш ужзэ радъя депутатъёслэн райсоветсылэн сессияз юнматэм положениея. Кылсярысь, гурт кенеш кылзэ вераны быгатэ гурт администрацилы тӧро, гуртъёслэн социально-экономической азинсконзыя планъёсты юнматон дыръя но уно мукет учыръёсы. Гурт кенеш эскере, макем пайдаё кутӥське улосвылысь музъем, макем чебер, чылкыт возисько гурт урамъёс. Аскивалтонъя выль ёзъёс кемалась кылдытэмын ӧвӧл ай ке но, ми ӟеч шӧдӥмы ни, сыӵе ёзъёс туала вакытэ туж кулэ шуыса. Куд-ог гурт кенешъёс нырысетӥ нуналъёсысен ик оскем уж борды рос-прос басьтӥськизы. Озьы вераны луоз Сюгаил (кивалтӥсез В. Г. Реверчук) но Бадӟым Пудга (В. В. Наумов) гурт кенешъёс сярысь. Депутатъёслэн ёрос Советсы но районлэн администрациез гурт кенешъёслэн кивалтӥсьёссылы юртто ужзэс радъяны, со понна нимысьтыз адямиос но юнматэмын. Одӥг- ог ортчытъяськом дышетскон но. Ми туж оскиськом, та гурт кенешъёс асьме улонын интызэс шедьтозы но азьланьын уката пайдаё луозы шуыса. ИВАН ОКУЛОВ, депутатъёслэн Можга ёрос Советсылэн тӧроез, "Удмурт кенеш" огазеяськонлэн исполкомаз быръем мурт. Иван Вилорьевич Окулов вордскемын 1955 арын Можга ёросысь Бадӟым Кибья гуртын. Армие ветлыса ужаны кутскиз Ижевскысь подшипник поттон заводын. 1976 арын берытскиз вордскем гуртаз, луиз комбайнёр, кылдытӥз егитъёслэсь звенозэс. Шаплы адямиез гуртысь коммунистъёс асьсэлы секретаре бырйизы, Свердловске дышетскыны келязы. 1986 арын И. В. Окуловез бырйизы агропромышленной комплексын ужасьёслэн профсоюззылэн райкомезлы кивалтӥсе. Вал Удмурт Республикаысь Вылӥ Советлэн берло созывезлэн депутатэз. 1990 арысен кивалтэ ёросысь депутатъёслэн Советэнызы. Мылысь- кыдысь пыриське "Удмурт кенешлэн" ужаз, отысь политикая люкетлэн одӥгез кивалтӥсез луэ. ГЕРД Калыкен пумиськон вае шумпотон Удмуртлыкмес ӝутонэ пыриськисьёс пӧлын шӧдскымон инты басьтэ Мария Дмитриевна Ишматова. Кӧня кужымзэ сётӥз ни со пӧртэм ужрадъёсты дасянэ, кӧня уйзэ кӧлытэк ортчытӥз - тазэ ачиз гинэ тодэ, дыр. Валамон огез: таӵе кышномуртъёс вылын возиське асьмелэн калыкмы. Мария Дмитриевна (тодӥсьтэмъёсызлы ивортӥськом, со дано писательлэн Геннадий Красильниковлэн сузэрез луэ шуыса) али кивалтэ "Дэмен" огазеяськонлэн Завьялысь ёрос ёзэныз. Ми курим сое кӧня ке вераны берло дыре ужамзы но вуоноезлы малпанъёссы сярысь. Удмурт культурая общество Завьялово ёросын кылдытэмын 1990 арын. Ужа со планъя, уставъя. Вань солэн аслаз президиумез, отчы быръемын сизьым адями. "Удмурт кенешлэн" ёзэз кылдэм бере, культурая общество али тросгес выре пумиськылонъёс радъян бордын. Уго та секыт но бугырес улон вакытэ ог-огеныд ӵош люкаськыса вераськонъёс, ог-огдэ буйгатон бадӟым юрттэт сёто адямилы мылкыдзэ ӝутыны, малпанзэ ӧжыт ке но капчиятыны. Кӧняез ке пумиськонъёсмы сярысь нимысьтыз верам потэ. Кылем гужем Изгуртэ Саша Четкарёв доры вуылӥз Эстониысь 19 муртъем ансамбльзы. Олокыӵе но калык инструментъёссэс сьӧразы ваиллям, соосын шудӥзы, кырӟазы, эктӥзы. Август толэзе Финляндиысь 12 студентъёсыз Шор Постол, Женвай гуртъёсы нуллӥм. Женвай гуртысь вань калык лыктӥз асьмелэсь "родняосмес" учкыны - пичиен- бадӟымен, пересен-пиналэн. Люкаськылӥзы ю возён склад доры (клубзы ӧвӧл). Отын финнъёс но женвайёс концерт сётӥзы. Киужлы усточи Кристинья Братухиналэн дораз ветлыса, куноос солэсь нылпи ныпъетъёссэ дунэн басьтӥзы. Нош Шор Постолысь клубын отысь "Пинал даур" ансамбль но кыдёкысь лыктэмъёс нош ик туж усто концерт сётӥзы. Али ке но постолъёс тау каро на та бадӟым пумиськон понна. Бадӟым уж ортчытэмын районын, асьмелэн дано адямиосмылы Куӟебай Гердлы, Ашальчи Окилы, Геннадий Красильниковлы сӥзьыса. Удмурт кылъя но литературая дышетӥсьёсыз, школаосысь краеведъёсыз удмурт культурая общество дунэн автобус басьтыса нуллӥз Вавож районэ, Гердлэн вордскем гуртаз. Адӟимы Куӟебай Гердлы сӥзем музеез, ветлӥмы Гурезь-Пудга школалэн директорезлэн А. М. Егоровлэн гуртаз - Малиновкае. Анатолий Максимович ас кокаезлэн нырысетӥ этажаз школа усьтэм. Туж кельшиз милемлы отын. Гужем татын ортчем Гербере ёросысьтымы ог 60 мурт вуылӥз, нош "Вуюись" ансамбльмы кык концерт сётӥз. Озьы ик тунсыко ортчизы пумиськонъёсмы Ожмосысь кылбурчиен, Куӟебай Герд нимо премилэн лауреатэныз дышетӥсен Юлия Павловна Байсароваен, Свято-Никольской черкысь диаконэн отец Михаилэн, Удмуртиысь дано артистэн Геннадий Ганьковен, Завьялын улӥсь самодеятельной художникен Григорий Сперанскихен. Пумиськылӥм Валерий Овчинниковен - технической наукаосъя кандидатэн, Карлыган школалэн азьвыл директорезлэн Кузьма Андреевич Андреевлэн матысь ӵыжы-выжыеныз. Соку ми тодӥмы, иностранной ужъёсъя наркомлэн Георгий Чичеринлэн нылыз Карлыганэ вуылэм но удмуртъёс, Кузьма Андреев сярысь быдэс книга гожтэм шуыса. Кылем арын Ожмосын вордскем но будэм артистлы Геннадий Бекмановлы "Удмурт Республикаысь дано артист" ним сётӥзы. Со понна обществомы но бызьылӥз-тыршиз. Табере туж шумпотӥськом, землякмылы пичи ке но юрттыны быгатӥм шуыса. Мар-о малпаськом азьланяз карыны? Озьы ик ортчытъялом пӧртэм пумиськонъёс. Дорамы ӧтёмы тодосчиез К. И. Куликовез, режиссёрез В. С. Ушаковез, журналистэз М. В. М. В. Гавриловаез но мукетъёссэ. Али кылдытӥськом удмурт драмтеатр, чакласьком "Лудорвай" музейын Завьял нунал ортчытыны. Егитъёс но удмурт культураез мед тодозы шуыса, та арын мон удмурт культурая комнатаын ортчытъясько Завьял школаын дышетскисьёс понна таӵе темаосъя вераськонъёс: 5-тӥ класслы - удмурт калыклэн историез но культураез, 6-тӥ класслы - тодмо удмурт писательмылэн Г. Д. Красильниковлэн творчествоез, 7-тӥ - ёросысьтымы данъяськоно адямиосмы, 8-тӥ - финн-угор дунне, 9-тӥ - удмуртъёслэн вашкала сямъёссы. Озьыен, удмурт культурая общество пыр ортчозы ог 700-лэсь трос дышетскисьёс. Школаен ӟеч кусып возиськом, егитъёсыз асьме борды кыскыны тыршиськом. Удмуртъёслэн берпуметӥ съездазы но ёросысьтымы самой егит делегатъёс милям вал. Ваньзэ та ужъёсыз ми ортчытӥськом районысь нылкышноослэн огазеяськонэнызы (тӧроез Е. А. Антонова), "Удмурт кенешен" (тӧроез В. А. Никитин) но "Шунды сиос" огазеяськонэн (тӧроез О. П. Бегишева) уртче. Берло дыре пумиськонъёс, юбилейёс ортчытъяны, вордскем нуналэнызы радио пыр ӟечкыланы, больницае висись мурт доры мыныны коньдонмы ӧвӧл ни, шуыны луоз. Азьвыл банкын счётмы усьтэмын вал, юрттылӥз Пироггуртысь фермер Г. Д. Миролюбов, бюджетысь но кӧня ке сёто вал, табере банкын счётмы ворсаськиз, коньдонмы ӧвӧл ни. Озьы ке но, ӟеч йылолмес куштыны ум малпаське. Пумиськонъёс уго котькинлы ик шумпотон ваё. М. ИШМАТОВА, Завьялысь удмурт культурая огазеяськонлэн кивалтӥсез. Кенешозы тодосчиос Кыӵе югдур туннэ гурт хозяйство удысын? Быгатоз-а со азинскыса ужаны? Та ужпумъёслы сӥзем научно-практической конференция ортчоз Завьялово черкогуртын 19-20 ноябре. Отчы пыриськозы Гурт хозяйствоя но сиён-юонъя министерствоысь, Нациосын ужанъя комитетысь, Ижевскысь гурт хозяйствоя академиысь, Удмурт кун универстетысь специалистъёс. Конференциын паськыт эскеремын луозы учёнойёслэн ужъёссы. Ужрадын вераськыны мылкыдзэ 90 пала адями вераз ини. Куное озьы ик лыктозы Москваысь, Уфаысь, Екатеринбургысь учёнойёс-практикъёс. Зэмзэ но, меӵак верано ке АПК-ын ужъёс туннэ ушъяськымон уг мыно. Уг шӧдӥськы ӟеч кидыс но таза пудо выжы будэтон сярысь сюлмаськон. Учёнойёслэн шедьтонъёссы но эскеронъёссы уже уг кутӥсько. Оло, соин но гурт хозяйство секыт югдурозь вуэмын. Республикаямы али 3,5 сюрс фермер хозяйство но 440 колхоз но совхоз ужа. Рынокен герӟаськем кусыпъёсы соос туж шуген пыро. Кызьы юрттоно музъем ужасьёслы? Та ужпумез но конференциын эскерыны чакламын. Т. МИРОНОВА. КУН КЕНЕШЛЭН СЕССИЯЗ Кезьыт куазь но ӟырдам мылкыдэз ӧз сӥяты Тол куазь шоры учкытэк, Кун Кенешлэн юртэз азе валлян, 10 ноябре, уно калык люкаськиз. Кема дыр ӵоже уждун басьтытэк улон адямилэсь чиданзэ быдтэ. Озьы шуыны луоз дышетӥсь но врач, библиотекарь но нылпи садын ужась сярысь. Туннэ соос асьсэлэсь куронъёссэс вераны пото ураме, Конституциен сётэм правооссэс утьымтэзы сярысь кӧтӝожзэс шараяло. Кун Кенеш азе люкаськемъёс пӧртэм лозунгъёсын лыктӥллям. Отын лэчытэсь кылъёс верамын кызьы ке Россиысь, озьы ик Удмуртиысь кивалтӥсьёс сярысь. Одӥгъёсыз ӵекто ужысьтызы кошкыны, нош мукетъёсыз Александр Волковлэсь юало, кытчы, пе, каремын гуртын поттэм сиён-юон. Калык азе потӥзы Кун Кенешлэн но Правительстволэн Тӧрооссы Александр Волков но Павел Вершинин. Люкаськемъёслэсь мылкыдзэс соос буйгатӥзы-а, ӧз-а - шуг вераны. Но одӥгез тодмо: ульчаын кенешон азьланьтӥськиз Кун Кенешлэн кызь кыкетӥ сессияз. Удмурт парламент, азьвыл эскерыны чаклам ужпумъёсты учкытэк, бюджет удысын тыршисьёслы уждун тырон сярысь ужпумез нырысь интые пуктӥз. Со бен юнме шорысь ӧвӧл. Тани куд-ог интыосысь дышетӥсьёс туэ май толэзь понна но уждун ӧз басьтэ на. Тужгес но секыт югдур кылдэмын республикалэн шоркараз. Соин ик Ижысь куд-огез шор ёзо школаос кемалась тыро-пыдо уг ужало ни. Нылпиос, тодон-валан басьтэм интые, урамын бызьыло. Кун Кенешын ивортон лэсьтӥз шаерысьтымы коньдонъя министр Владимир Бельтюков. Депутатъёс солы трос юанъёс сётъязы но данакез асьсэлэсь мылкыдзэс шара веразы. Соос меӵак шуизы, малы туннэ дышетӥсьёслы гинэ уждун сётон сярысь вераськон мынэ? Пӧртэм ӧвӧл югдур тазалыкез утёнын, культураын, быдэс социальной удысын. Депутатъёслэн куронзы шонер: одӥгзэ мукетызлы ваче пуктыны уг яра. Но дышетӥсьёслэн адямиоссы сессиын но вераськизы. Сюлэмшугъяськемзэс тужгес но зол возьматӥз Ижысь дышетӥсь Наталья Крюкова. Со дэмланъёс сётӥз югдурез тупатон вылысь мар лэсьтыны кулэ Кун Кенеш, Правительство но Ижысь администрация. Сютэм улӥсь дышетӥсьёслэн нимынызы, со ӵектӥз дыраз уждун тырымтэ понна кивалтӥсьёслэсь кылзэс чурыт юаны. Сессиын вераськон ӝутскиз тани ма пумысен но: городъёс но районъёс асьсэ бюджетъёсысьтызы социальной удысын тыршисьёслы уждунлы туж ичи уксёзэс куто, кун бюджетысь юрттэтлы мултэс оскыса уло. Тани валлян Сарапулысь 80 дышетӥсь Иже ветлӥз. Сессиын ӟырдыт вераськизы Тамара Мерзлякова, городысь администрация дышетӥсьёслы уждунлы одӥг куиньмос люкетсэ коньдон висъя, пусйиз со. Сессиын озьы ик ас малпанъёссэс веразы городъёслэн мэръёссы но музон депутатъёс. Нош Павел Вершинин тупен-тупен валэктӥз Правительстволэн югдурез тупатон вылысь кун бюджетэ выт бичанэз умоятон, Москваысь юрттэт басьтон бордын ужам сярысь. Кылсярысь, Правительстволэн Тӧроез пырак шуиз, Сарапуллы, пе, кӧня юрттэт кулэ, ваньзэ 42 миллион манет сётом. Озьы ик висъялом мукет интыослы но. Тани Ижлы алигес 10 миллион манет сётэмын. Нялтас верам потэ, куд-огез депутатъёс пыкылӥзы иворъёс вӧлмытӥсь ёзъёсты (газетъёсты, радиоез, телевидениез). Соос, пе, югдурез юромо мыдлань возьмато, тыл вылэ вӧй кисьтам кадь. Озьы-а, тазьы-а со, но депутатъёслы газетъёсты, телерадиопередачаосты нимынызы вераны кулэ вал. Малы кулэ ваньмыз сярысь озьы вераны? Кун Кенешлэн кызь кыкетӥ сессиез толон ужаз на. Г. РОМАНОВ. Ивортон 16 ноябре 16 часын люкаськозы "Удмурт кенешлэн" исполкомаз быръемъёс. 19 ноябре нош ик ортчоз исполкомлэн заседаниез. Таяз учыре вераськон мыноз республикалэн палэназ улӥсь удмуртъёсын кусыпъёсты юнматон пумысен. Нош 20 ноябре филармонилэн юртаз лыктозы Пичи кенеше быръем эшъёс. Отын йылпумъянъёс лэсьтэмын луозы "Удмурт кенешлэн" ар ӵоже ужамезлы. "Тӥледлы гинэ оскон!" 12 ноябре Ижевскысь "Металлург" дворецын ортчиз гурт хозяйство удысын ужасьёслэн нуналзылы сӥзем праздник. Та ужрадэ вуэмын вал вань районъёсысь делегациос. Люкаськем калык кичабонъёсын пумитаз Иван Данилович Горбушинэз, гурт хозяйствоя нырысетӥ министрез. 1925 арын институтэз йылпумъяса, со шаерамы нырысетӥез агроном луэм. Ӵапак та вакытэ Удмуртиын нырысетӥ колхозъёс кылдӥзы. Бӧрсьысь бӧрсьы калык азе поталлязы мукетъёсыз но министръёс: Ф. Дёгтев, Г. Елистратов, С. Шартдинов, В. Князев, В. Жуйков но мукетъёсыз - 50 ар ӵоже гурт хозяйство удысэн 13 министр кивалтӥз. Выль сюрес лёгисьёслы котьку но секыт. Но туала вакытэ но капчи уг йӧты. Туэ государство музъем ужасьёслы туж ӧжыт юрттэ. Вань басьтэм азинсконъёс калыклэн тыршеменыз, аналскытэк ужаменыз басьтэмын. Соин ик та нуналэ соослы уно шуныт кылъёс верамын вал. "Странаез Запад уз сюды. Тӥледлы гинэ оскон!" - шуиз Кун Кенешлэн Тӧроезлэн воштӥсез В. Агашин. Гурт ужасьёсты праздникен ӟечкылазы Президентлэн Удмуртиысь юрттӥсез В. Балакин, Удмурт Республикаысь Правительстволэн Тӧроезлэн воштӥсез В. Зенин. "Гурт хозяйство удысысь сӥё-дано ужась" ним сётэмын 40 пала ужасьлы. Люкаськемъёсты шулдыртӥзы "Чингыли", "Андан" ансамбльёс но тодмо кырӟасьёс Валентина но Екатерина Пудоваос. Т. МИРОНОВА. АЗЬМЫНӤСЬ ПРЕДПРИЯТИОС Кезын улон ческыт Шаермылэн уй палаз пуксем посёлок арысь аре паймытэ. Та секыт вакытъёсы отысь предприятиос ог-огенызы ӵошатскыса кадь, басьтӥськизы выль продукция поттон борды. Губи но будэто, будос вӧй но лэсьто, сур но пӧзьто, нош кӧня пумо ческыт сиён-юон вутто магазинъёсы! Кезысь пищекомбинат, районзэ сяна, пряникен, конфетэн сюдэ Пермь областьын улӥсьёсты но. Берло 2-3 арзэ со бурдъёссэ вӧлъяса лобись тылобурдолы кельше: ялан выльзэ утчаса-эскерыса, азьлане вамышэ. Предприятиез быгатыса валтэ солэн директорез Евгений Михайлович АРДАШЕВ. Зэмен но, Кезын улон ческыт: асьсэлэн пыжем пряниксы, конфетъёссы, юонъёссы. Соос нуналлы быдэ вуо магазин ӝажыосы. Огезлы сиёнлы дышыса уг вутто, мукетыз, эшшо но ческытэз синэз гочатэ ни. Ваньмыз со доразы поттэмын бере, дунъёссы сокем бадӟымесь ӧвӧл. Уд но малпа, 1940-тӥ арын пу юртэ усьтэм пищекомбинат туала предприятилы сюрес лёгись вал шуыса. Соиз выриз нюлэс емыш пӧзьтонэн, губи, кубиста сылалтӥз. 60-тӥ аръёсы ас понназ сутэр сад но бакча возиз. Нош пряник пыжылӥз огшоры ӟуч гур пушкын, пуэн эстыса. Туала предприятилы пӧрмытозь, сиён-юон поттӥсь комбинатлы ортчоно вал ӝыны дауръем сюресэз. 2000-тӥ арын, ӵапак та нуналъёсы, коллектив пусъёз 60 ар тырмонзэ, сыӵе ик юбилейзэ пусъёз директорез но - Е. М. Ардашев. 1989 арысен соос ӵош вамышъяло. Кивалтӥсь сярысь котькызьы вераськонъёсты кылод: котькыӵе тон ӟеч ужа - курласьёс одно ик шедёзы. Ардашевез Кезын гажало шуг-секытъёсты вормыны быгатэмез понна. Юнме шорысь ведь пищекомбинатлэн коллективез сое аслыз кивалтӥсе ӧз бырйы. 1989 арын ай сыӵе мода вал: кельшись мурт доры "курасьёсты" ысъяллязы. Вуиз делегация РАПО-ын ужась Евгений Михайлович Ардашев доры но. Огпол, кык пол, куинь пол дораз лыктӥзы. Вормизы! Зэм, партилэн райкомезлэн нырысетӥ секретарез солы пумит пуктӥз вал аслэсьтыз адямизэ, но коллектив огкылысь бырйиз Ардашевез. - Татын соку 70 мурт ужаз, туннэ - 212. Зэм, 1992 арын коллективмес кулэстоно луылӥм 60-озь, - тодаз вае тужгес но секыт вакытэз пищекомбинатлэн кивалтӥсез. - 1994 арозь ми пыд выламы султыны умой-умой ӧм быгатэ. Гайдарен ортчытэм реформаос быдэсак сямен экономикамес кыӵесазы. Рыноке выжон шуген сётскиз: продукцимес келяны нокытчы, кусыпъёс тупатыны секыт, та дырозь кулэлыкез но ӧй вал. Ми понна мукетъёсыз сюлмаськылӥзы: сырьё но вайылӥзы, сиён-юонмес но интыяллязы, асьмеды одӥг килограммзэ но вузаны ӧз лэзьылэ. Выль сямен ужаны дышетӥз ачиз улон, "бадӟым дунее" выжъёс лэсьтыны юрттӥзы коммерческой фирмаос. 1995 арын гинэ сиён-юон поттӥсь комбинат кема утчам ӧрзэ шедьтӥз. 1994 арен ӵошатыса, 230 процентлы ятыр продукция поттӥз! Озьы - арысь аре. Туэ 9 толэзь куспын, миыменыз ӵошатыса, планзы 120 процентлы быдэстэмын. Валтӥсь инты басьтэ пряник пыжон. Сутка ӵоже 5-6 тонна потто - озьы но уг окмы. Басьтӥсез трос, азьвыл ик черодэ гожтӥсько. Нуо пӧртэм интыосы, тужгес но - Пермь пала. Пряник лэсьтӥсьёс та вакытэ 4 сменаен ужало, шутэтскон нуналъёстэк. - Продукция мыныку сылыны ноку, - шуэ пищекомбинатлэн директорез. - Удмуртиын милям кусыпъёсмы ӧжытгес, сюресмес пытсало бадӟымесь предприятиос: Ижысь хлебомакаронной комбинат но Глазовысь пищекомбинат. Таин валче ик Пермьын усьтоно луим асьмелэсь ёзмес. Отын тямыс мурт ужа. Предприятилэн Кезын но куать магазинэз, сизьыметӥез - кафе. Таизэ туэ гинэ усьтӥзы. Мукет столовойёсын ӵошатыса сюдо дунтэмгес но, ческыт но. Котьку дэмлалозы пӧсь пельнянь, чай, кофе, ческыт пыжиськемъёс но напитокъёс. Ми но эскерим пӧраськемзэс. Кельшиз. Вуонояз лыктыкумы, одно ик татчы пыдъёс кыскозы,. Кезъёс дуно кунооссы понна ӝӧк вылэ одно ик пуктозы асьме палан ноку пумиськылымтэ сиёнэз - "Лукум в шоколаде". Урал улосъёс пӧлын Кез пищекомбинат гинэ сое дася. Та муген но, дыр, магазин ӝажыосын кема уг кылльы. Валтӥсь технолог Ирина Евгеньевна Воронина трос гинэ бызьылӥз, лукумез Удмуртиын но поттон понна. Озьы Средней Азиысь вуэм честаськон шаерамы выжыяськиз. Кемалы-а, огдырлы-а - таиз потоз басьтӥсь бордысь. Эшшо маин данъясько на кезъёс? Татын 12 пумо ческыт юон лэсьто: "Апельсин", "Тропик", "Груша", "Земляника", "Кола", "Ананас-апельсин", "Байкал", "Буратино"... Асьсэос ик дасяло пластмассалэсь бутылка но. Потто ог дасо пумо пряник. Соос пӧлысь калыклы тужгес но ярало "Городецкая забава", "Яблочные с начинкой", "Львовские с маком", "Прыг-скок"... Пищекомбинат ӟеч кусып тупатӥз "Металлург" санаториен. Тазалыкез юнматыны но эмъяны отысь ваем минерал вуэз бутылкаосы тырыса вузало. Вань юонъёссы пӧлысь нимысьтыз ушъяса верало женьшенен сураса дасямзэ: мугоре кужым пыртэ, висёнъёслэсь уте, шуо. Кезэ вуид ке, одно ик шӧмъямды потоз лимон, апельсин юдэслы тупась мармеладэз. Вузало сое Ижысь базаръёсын но. Вань ӵуж куалялюльылы, вуюисьлы укшасез. Огъя вераса, пищекомбинатын ужасьёс сиён-юонзылэсь пӧртэмлыксэ йылэтон бордын уен-нуналэн ужало. Цехъёсын, адямиосын тодматыса, проиводстволэн кивалтӥсез Анна Ивановна Чмеленко котькудӥз сярысь шуныт кылъёс вераны шедьтӥз. Ӝыныезлэсь ятырез татын нылкышноос ужало. - Коллективмы умой. Кулэ дыръяз котькудӥз дась ог-огзэ воштыны. Шутэтскиськом но ӵош, вордскем нуналъёсмес, праздникъёсты огазе пуксьыса пусйиськом. Али но шумпотыса тодамы ваиськом 8 Мартэ, 23 феврале ортчем ӝытъёсты, КВН-эз. Воргоронъёсмы ма гинэ лэсьтыны уг быгато вылэм! Профессиональной праздникмес но ваньмы ӵош люкаськыса ортчытом. Соиз шонер: кин мыло-кыдо ужа, озьы ик шутэтске но. Ар ӵоже комбинат 1500 тонна ческыт сиён поттэ. Ӵошатон понна: 1991 арын та лыдпус 740 тонна вал. Ма юрттӥз сокем ӝог азинскыны? Нырысь ик, выль технологие выжон, оборудованиез воштон. Данакез со Россиын лэсьтэмын, вань Польшаысь, Франциысь ваемез но. Туж синмасько вылэм Германиысь, Италиысь техникалы - басьтыны уксёзы уг тырмы. Палэнысен учкыса, азьмынӥсь предприятилы котькуд вамышез капчиен кадь сётске. Но со озьы ӧвӧл. Макем трос ужаськод, сокем трос ужпумъёс кивалтӥсь азе люкасько. Кыӵе но малпанъёс йырез уг висьыто! Евгений Михайловичез туж шугъяськытэ республикалэн палэназ дорамы поттэм сиён-юонэз вузанлэсь алон. Таин валче предприятие трос гинэ ыштон адӟиз: Пермь но, асьме шоры учкыса, вузкаремысь дугдӥз. Пищекомбинат отысь дунтэмгес дунын вайылӥз тужгес но кулэ сырьё: сахар, пызь, маргарин. - Кыкетӥ арзэ крахмалмес вузаны ум быгатӥське: мималаез складъёсын 50 тонна кылле, туалаез 100 тонналэсь ятыр люкаськиз ни. Сое ми но кизнеръёс гинэ потто, озьы ке но, нуисез ӧвӧл. Дуно. Кылем арын картофкаез но тонназэ 450 манетэн ке басьтӥм, туэ - 300-эн. Озьы крахмаллэсь дунзэ сизьымысен куать манетозь уськытӥм. Таӵе дунын картофка ваисьёс шедизы: уваос, играос, дэбёсъёс. Интыяз ческыт сиён- юон нуизы. Толон Чебоксары городэ крахмалмес келям. Дэбёсысь милиция прдукцимес сюлворыса но кызьы поттыны лэзиз, нош Ижевск сюрессэс пытсаз ке? Уг валаськы: кинлы умой лэсьто республикамылэн кивалтӥсьёсыз, таӵе могӟетъёс пуктылыса? Кинлы кызьы, но мыным Кун Кенешлэн та плитикаез туж уг яра. Ужаны люкетэ. Коньдонэн милемды Пермь возе. Со ик мынэ уждунэ, предприятиез выльдонэ. Пусйыны кулэ, уждунзэс татын дыраз сётъяло. Солэн быдӟалаез, шорлыдын вераса, туэ 8 толэзь ӵоже 840 манетозь вуиз. Коллективной договорын пусъемын: 300 манетлэсь ичи басьтӥсез медаз луы. Сётэм кылзэ пищекомбинатлэн кивалтӥсез быдэсъя. Шумпотоно предприятилэн азинскемезлы. Юбилеез азьын басьяськисьёсты со трос пол паймытъялоз на, дыр, выль сиён-юонэн. Калыклы коньдон гинэ дыраз мед сётъясалзы на. Соку Кезын но, быдэс шаерамы но улон-вылонмы, зэмен ик, ческытгес луысал. Людмила Медведева, Геннадий Романов, Владимир Камашев (фото). Евгений Михайлович Ардашев, "Кезский пищекомбинат" АО-лэн директорез. Тамында пряник туннэ пыжыса вуизы ни Фаина Рафаиловна Главатских но Людмила Васильевна Серебрянникова. Кезэ вуиды ке, "Ароматэ" пыратэк эн кошке. Конфет лэсьтӥсьёс. Тазалык Вуоно даурысь наука Медицина туала вакытэ быгатэ ваньзэ сямен висёнъёсты эмъяны, соосты лякытэн шараяны, висись пекляез яке сюлэмез тазаеныз воштыны... Озьы ке но, висёнъёслэн но висисьёслэн лыдзы арысь аре йылэ. Тужгес - туала Россиын, угось выльдӥськонъёс- кризисъёс тазалыкез утён удысэз чылкак куашкатӥзы ини. Таин валче котькудӥз тазалыкез сярысь ачиз сюлмаськыны кулэ шуыса малпан нырысетӥ интые потэ. Но татчыозь та малпан улонэ ӧз пыӵалля, угось туала адями тазалыкез сярысь сюлмаськыны дышемын ӧвӧл. Эскеронъёс возьмато, адямилэн тазалыкезлэн 49 процентэз улон сямъёсыныз герӟаськемын шуыса, 19 процентэз - ӵыжы-выжыосызлэн тазалыкенызы, 17 процентэз - инкуазьлэн чылкыт яке кырсь луэменыз но 15 процентэз гинэ - врачъёслэн ӟеч яке алама эмъяменызы. Озьыен, адямилэсь тазалыксэ утёнын валтӥсь инты басьтыны кулэ висёнъёсты алыны быгатон. Ӵапак та ужпумъёсты эскериз валеологилы - тазалыкез утён амалъёслы дышетӥсь наукалы - сӥзем конференция. Со ортчиз Ижевскын но люказ Москваысь, Ульяновскысь, Пермьысь, Омскысь но мукет городъёсысь учёнойёсты. Радъязы сое Россиысь Огъя но профессиослы дышетонъя министерство, Удмуртиысь Калыкез дышетонъя но Тазалыкез утёнъя министерствоос, Удмурт кун университет. Татысь ик валаны луэ ини: валеология пӧртэм удысъёсты герӟа но соослэсь тодон-валанзэс кулэ каре, конференцие лыктэм учёнойёс споръяськизы ке но, та наукалы педагогика, медицина яке технической удысъёс-а матынгес шуыса. Вылӥ верам эчешонъёс герӟаськемын валеологилэн туж егит луэменыз. Та дырозь школаосын гигиеналы - чылкытэз чакланлы - гинэ дышетылӥзы. Туала улон кулэ каре пиналъёсты тазалыксэс, психиказэс, ӟеч сямъёссэс-малпанъёссэс сӧриськемлэсь утьыны дышетонэз. Но школалэн та сярысь сюлмаськемез пайда уз сёты, анай-атайёс асьсэос тазалыксы сярысь ӧз сюлмаське но нылпизылы та пумысен ӟеч сямъёс ӧз пыӵатэ ке. Озьыен, ужано семьяен но, школаосын, вузъёсын но, предприятиосты, учреждениосты но палэнэ кельтоно ӧвӧл. Больницаосын но висёнъёсты алонэн вырись но калыкез висьытэк улон амалъёсын тодматӥсь специалистъёс кулэ. Но та дырозь соос ӧвӧл на, малы ке шуоно, сыӵе специалистъёсты медициная вузъёс уг дасяло на. Удмурт кун университетын гинэ студентъёс валеолог луэмзы сярысь кыкетӥ диплом басьтыны быгатозы - татын усьтэмын валеологияя кафедра. Валэктэ юрист Сэрегез нуэ адвокат Лилия Шкляева Квартиралэн кузёез Мон пыремын улон юрт лэсьтон кооперативе. Пайме быдэсак тыри. Быгатӥсько-а квартираме приватизация пыр аслым карыны? Яке сое муниципалитетлэн квартираеныз воштыса луоз-а тазэ квартираез аслым басьтыны? В. Лебедева. Россия Федерациын 1991-тӥ арын 4-тӥ июле кутэмын 1541-И номеро закон. Нимыз таӵе: "Россия Федерациысь улон фондын приватизация ортчытон сярысь". Сое выльдӥзы 1998- тӥ арын 28-тӥ мартэ. Закон дун тырытэк приватизация ортчытыны лэзе кунлэн яке муниципалитетлэн юртъёсаз гинэ. Котькуд адямилы сыӵе право сётэмын одӥг пол. РФ-лэн Гражданской кодексэзлэн 218-тӥ ёзэтэз (статьяез) валэктэ: юрт лэсьтон кооперативе пырем мурт пайзэ быдэсак тыре ке, квартиралэн зэмос кузёез луэ. Улон интызэ воштыны быгатэ кунлэн яке муниципалитетлэн квартираенызы, тазэ приватизация пыр аслыз басьтон вылысь. Кыӵе муэ согылӥське зарни тысед, Ваньмыз-а кеносад пыре вуэм нянед? Ӝӧк выламы пыжем нянь сукыри вӧзы Котьку ик-а пуксёз ӟеч зумыто гылэт? Таӵе юанъёслы ӟеч кыл веран понна, Уен-нунал тырше музъем ужась. Инльӧль ворекъянъёс ӝыт но ӵукна Соин данъяськыны луо, дыр, дась. Г. РОМАНОВА. Нуналлэн тодметэз Вашкала календарья туннэ пусъё Кузьмалэсь но Демьянлэсь нуналзэс. Та вакытэ пумитало толэз. Йыгасько ни нырысетӥ кезьытъёс. Туннэ лымыяз ке, тулыс бадӟым ву вӧлскоз. Писпуосын куаръёс кылё ке, вуоно толалтэ но куазь кезьыт луоз. Югыт нунал туннэ кыстӥськоз 8 час 18 минут. Музъемозь йыбырттӥськом Та нуналъёсы 80 ар тырме шаерамы гурт хозяйствоя управление кылдытэм дырысен. Со дыр ӵоже удысын олокыӵе но воштӥськонъёс ортчылӥзы. Нош ку меда капчи вал музъем ужасьёслы - вераны ик уд дӥсьты. Вань эскеронъёслэсь, выльдӥськонъёслэсь ӟечсэс но, уродзэс но соос ас вылазы шӧмъяно луо. Гурт хозяйство удысын ужасьёс шуркынмонэ пусъё на асьсэлэсь праздниксэс. Соин валче удыслэн ужамезлы куд-ог йылпумъянъёс журналистъёс азьын лэсьтӥзы Гурт хозяйствоя но сиён-юонъя министерствоысь специалистъёс. Берло нуналъёсы шуак ӝутскизы тэтчизы йӧллы но солэсь лэсьтэм сиёнъёслы дунъёс. Кылсярысь, одӥг килограмм скал вӧй магазинъёсын али 50 манет сылэ, но сое сыӵе дунын но уд шедьты. Гурт хозяйствоя министрлэн воштӥсез А. Коробейников югдурез тазьы валэктӥз. - Али складъёсын 70 тонна скал вӧй люкамын. Арлэн пумозяз 185 тонна вӧй дасямын луоз на. Со ӧжыт, азьло аръёсы сӥзьыл но тол вакытлы республика 300-400 тонна дасялляз. Вылаз ик, ужбергатӥсьёс кунгож сьӧрысь но пӧртэм вӧйёс вайылӥзы. Калыклы со тырмылӥз. Нош туэ республикамылэн бюджетэз буш, 100 тонна скал вӧй дасян понна гинэ но Правительство коньдон ӧз висъя. Палэнысь ваем сиён-юонъёс но кулэсмизы. Кылдэм югдурез валэктыны луоз, дыр, мукет муген но: Удмуртия куд-ог сиёнъёсты али мукет улосъёсы но келя. Сентябре Удмуртиысь Правительство нимысьтыз постановление кутӥз вал республикаысьтымы палэнэ кошкись сиён-юонэз чакласа возён сярысь. Но кызьы тодӥськом, со постановление вакчи дырлы гинэ юнматэмын вал. Озьыен, солэн ужан кужымез йылпумъяськиз. Собере Москваысь кивалтӥсьёс но республикаосты ас мылкыдзыя гинэ улыны уг лэзё: Россия, пе, со одӥг, люконтэм музъем. Вань улос вылъёс ог-огзылы юрттыса улыны кулэ. Озьы ке но, асьме республикаын кутэмын закон АПК-лэсь продукцизэ государство ласянь чакласа возён сярысь. Соин ик та нуналъёсы сиён-юонлы дунъёс тупатон пумысен нимысьтыз кенешон ортчыны кулэ. Закупочной но вузан дунъёслы радлык тупатэмын луоз. Министерствоысь специалистъёслэн верамзыя, кылем арын сярысь туэ куд-ог лыдпусъёс вылӥынгес, кылсярысь, йӧлъя, курег пузъя, сӥлья, тылобурдо вордонъя. Но со дыре ик 23 сюрс йырлы кулэсмиз пудо-животлэн лыдыз. Ӵошатыса верано ке, туэ сомында пудо- живот ыштэмын, кӧня возьыны быгатэ быдэс Завьял ёрос. Трос пудо висьыса быре. Огез кышкыт эзель - бруцеллёз. Коньдон тырмымтэен, тросэз хозяйствоос висёнлы пумит эмъюмъёс уг басьто. Данакез колхозъёс секыт югдурысь потон понна, пудозэс вандо но сӥльлы вузало. Сыӵе амалэн гуртысь кивалтӥсьёс бусы ужъёссэс ортчыто. Пудолэн кулэсмемез герӟаськемын сиён тырмымтэен но. Кызьы шуиз гурт хозяйствоя министрлэн мукетыз воштӥсез А. Никифоров, туэ но толэз ортчытыны пудо сиён 50 процентэз гинэ дасямын. Парсь вордон комплексъёсын (соос республикаямы вить) сиён воксё но дасямтэ. Пудо вордон удысын шуг-секытъёс пото зоотехникъёс тырмымтэен но. Республикаямы али 440 хозяйство ке лыдъяське, 90-аз зоотехникъёс ӧвӧл. Ижевскысь гурт хозяйствоя академия соосты дасянэз берло аръёсы кулэстӥз. Туэ но одӥг группа сяна люкамын ӧвӧл. Гуртысь нылпиослы дышетскыны пырыны шуг. Пудо-живот вордӥсьёс, вань музъем ужасьёс сямен ик, номыр шоры учкытэк ужало, уждунзэс возьмаса, тэк уг пуко. Куд-ог районъёстӥ алигес сильтӧл ортчиз. Каракулиноысь куд-ог гуртъёс 4 нунал ӵоже тылтэк улӥзы. Озьы ке но, вань скалъёс киын кыскемын но утялтэмын вал. Но паймод шат солы, куке гуртын улӥсь понна уж котьку но нырысь интыын сылэ. Соин ик музъемозь солы йыбырттӥськом. Вань гурт калыклы сӥзиськом тазалык но оскон. Т. БАННИКОВА. Бюджет чотын ужасьёслы уждун тырон сярысь Удмурт Республикаысь Кун Кенешлэн Постановлениез Ужась коллективъёслэсь, профсоюз комитетъёслэсь вазиськонъёссэс эскерыса, Удмурт Республикаысь Кун Кенеш пуктэ: 1. Удмурт Республикаысь Правительство, ёросъёсысь но городъёсысь администрациослэн кивалтӥсьёссы бюджет чотын ужасьёслы 1998 арын ноябре-декабре уждун тырыны луонлыкъёс кылдытыны кулэ, уждунлэн быдӟалаез кык толэзьлы уждунъя фондлэсь ичи луыны кулэ ӧвӧл. 2. Удмурт Республикаысь Правительство, ёросъёсысь но городъёсысь администрациослэн кивалтӥсьёссы, куинь ёзъёслэсь огкылзэс лыдэ басьтыса, бюджет чотын ужасьёслы уждун тыронъя пунэмез берыктыны график кылдытыны но печатланы кулэ 1998 арын 20 ноябрёзь. 3. Ужась коллективъёслэсь, бюджет чотын ужасьёслэн профсоюз комитетъёссылэсь куронъёссэс эскероно куинь ёзъёслэн социальной удысын но ужын кусыпъёсты радъянъя республиканской комиссиязы, Удмурт Республикалэсь 1999 арлы бюджетсэ кылдытыку, соосты лыдэ басьтон понна. 4. Ёросъёсысь но городъёсысь администрациослэн кивалтӥсьёссы, Удмурт Республикаысь Правительство дышетӥсьёслэсь куронъёссэс, нырысь ик уждун тырон сярысь куронзэс, лыдэ басьтыса, ужрадъёс кутыны кулэ, огъя тодон-валанъёс сётӥсь школаосын дышетонэз 1998 арын 15 ноябрёзь мытон вылысь. 5. Россия Федерациысь Федеральной Собранилэн Федерацияя Кенешезлэсь муртъёссэ, Удмурт Республикаысь Кун Кенешлэсь депутатъёссэ А. А. Волковез но П. Н. Вершининэз косоно "Бюджет удысысь организациосын ужасьёслы уждун тыронэз радъян сярысь" Федеральной законэз юнматон бордын тыршыны. 6. Та постановленилэсь быдэсъяськемзэ эскерыны косоно Удмурт Республикаысь Кун Кенешлэсь Президиумзэ. Удмурт Республикаысь Кун Кенешлэн Тӧроезлэн нырысетӥ воштӥсез В. И. Агашин. Ижевск город, 1998 арын 11 ноябре. � 700-И. ШӦКЫЧ Шамарданлэн шыкысысьтыз "Алигес "Удмурт дунне" газетын печатламын вал тодосчилэн Анатолий Уваровлэн "Капчи кылбуръёс" кылдытӥсь" статьяез. Со сӥземын 20-тӥ-30-тӥ аръёсы удмурт сатиралы кутскон сётӥсьлы Пересь Шамарданлы. Сыӵе нимын газетъёсы гожъяз писатель но журналист Петр Усков. Туэ декабрь толэзе солы тырмысал 110 ар. Улӥын сётӥськом П. М. Усковлэсь одӥгзэ капчи кылбурзэ. Нырысьсэ со "Гудыри" газетын печатламын вал 1928 арын 15 январе. Шылтык Семон - Мон ведь, мон! Куӵосысь Шылтык Семон! Азьвыл улэмын Буранын, военной комиссарын. Мыдлань ужъёсыз адӟемын, интыысьтым палдытэмын. Котьмае тодӥсько, тӧдьыосыз но витисько. Гурт куспын батыр мон, - шуэ Шылтык Семон. Табере улэ гуртаз Семонэ. Ужаны туж азьтэм, юмшаны укылтэм. Гармонязэ ӟыгыртэ, пыдъёсыныз дынгыртэ. Быдэс Буран волостьын таӵе ужъёсыныз ортчемын. Умой солэн улэмез, 18 десятин музъемез. Сиисез ньыль лул, пудотэк но уг ул. Вань валэз но скалэз, выжылы люкет одӥг ыжез. Жугыса возиз удмурт кышнозэ, сояз дуннее келяз мусозэ. Табере ушъяське, выль кышноеныз лошъяське, удмуртъёсыз тышкаське. Та Семон возьыттэм, ужаны туж азьтэм. Комиссарын улэм бере, секыт ини геры табере. Малягуртын вуза музъемзэ, туж ӧжыт кизе кизёнзэ. Араны ачиз уг пота, выт тырыны но уг шока. Кылем арын вал ождоез, ужатӥз Князева Евгенняез. Революци потэм дырысен уд лыдъя сое выт тырисен. Ог сю манет пала семссуда тыронэз, со сяна, страховка но музонэз. Вуизы ке тӧдьыос, бырозы, шуэ, тыронъёс. Ваньбурзэ ке гожъяны кутско, мон, шуэ, куанер улӥсько. Ачиз туж визьмо, кучыран кадь паськыт синмо. Вуриськон машиназэ кутэ, нуэ Малягуртэ. Озьы вузанлэсь мозме, ачиз Карлуткалэсь мӧзме. Паймод сыӵе "комиссарлы", ужлэсь пегась лодырлы. Комиссарын улӥ шуса ушъяське, ачиз тӧдьыосыз ӟыгыртыны дасяське. Эх, та Шылтык Семонъёсыз, тӧдьыосыз витьыса улӥсьёсыз! Кужыме ке тырмысал, тӧдьыослэн гуосазы келясал. Ужаны ке азьтэм, кылыд но мед луоз востэм. Дырыз вуэмын ини визьмаськын, кенешъёсын умойгес вераськыны. Ӟеч ул, Семонэ, эн тышкаськы тон монэ. Киземдэ, шуо, аралод, солы пумит мар вералод. Умойгес ке улысал, умоен мон тонэ пусйысал. Уг ватӥськы нимтулме, верасько кин луонме. Выжые мынам Мардан. Нимы Шамардан. Шара гожтэт Кун Кенешлэн депутатъёсызлы Кун Думалэн депутатъёсызлы Калыкез дышетонъя министерстволы Ижевск городысь калыкез дышетонъя управленилы Ми, Ижевскысь Октябрь ёросысь 83 номеро школаысь дышетӥсьёс, городысь дышетӥсьёслэн пумитъяськон ужрадазы итӥськиськом но быдэс Россиысь, озьы ик Удмурт Республикаысь но дышетон удысэз куашкатэмен валче, сюлэмшугъяськеммес вераськом. Дышетӥсьёс вылын шыръян - со нылпиос вылын, кунлэн вуоноез вылын шыръян. Итӥськиськом Ижевскысь дышетӥсьёслэн куронъёссы борды: 1. Уждунъя пунэмез дыраз берыктоно, сое сётонъя графикез чаклано; 2. 1999 арын калыкез дышетонлы бюджетысь тросгес коньдон висъяно; 3. Уждунэз будэтоно, тарифной сеткалэсь воштӥськонъёссэ лыдэ басьтыса; 4. Калыкез дышетон удысэн кивалтӥсь котькудӥз ас понназ кыл кутыны кулэ, дышетӥсьёслэсь куронъёссэс быдэсъян понна. Ижевскысь 83 номеро школаысь дышетӥсьёс косэмъя, ужась коллективлэн кенешезлэн муртъёсыз: Бегунова С. В. Пушина В. Г. Маркелова В. М. но мукетъёсыз. Редакцилэсь. Дышетӥсьёслэн та выллем гожтэтъёссы редакциямы берло дыре ӵем вуыло. Ми печатламы одӥгзэ гинэ, малы ке шуоно, вань вазиськонъёсын куронъёс огвыллемесь. ШӦКЫЧ Берло нуналъёсы магазинъёсысь чиптэм-чаптэм быриз нӧкы вӧй. Та пумысен пӧртэм вераськонъёс ветло. Нырысь ик, скалъёс, пе, йӧлзэс кулэстӥзы. Собере странамылэн палэнысьтыз вӧй басьтэмысь дугдӥзы. Куинетӥез: уно сиён-юон келямын Москвае. Табере, нош ик азьвыл аръёсы сямен, сиёнлы столицае ветлоно уз луы меда? (Ижевскын улӥсьёслэн гожтэтысьтызы). Воргорон: - Ку-о тон тырмыт йӧлдэ сётыны кутскод? Скал: - Малы ошез сӥль комбинатэ келяд? Воргорон: - Ма, со шат йӧл сётоз? Суредэз И. АЗИМОВЛЭН. ТАЗАЛЫК Сӥльын ӝук сиыны уг яра Россиын 98 процентэз зӧк муртъёс туннэ ӝожтӥсько тазалыксылы. Соос мукетъёслэсь ӵемгес сӧриськем мылкыдын уло. Улон уродмемен, зӧк муртъёслэн лыдзы уката будэ. Азьло тыкыль-тыкыль нылкышноосты яратылӥзы ке, али соос шоры синмаськыса уг учко. Сое валэктыны луоз, дыр, вылӥ дунъяськись, инмарез кадь сӥлы кароно кык арбериослэн ваче шуккиськон вакытазы улэменымы. Нырысетӥез - егитлык. ЪЪ даурлэн пумаз мода егит муртъёс понна гинэ чакламын. Соин ньыльдон аресъем зӧкомыны ӧдъясь кышномуртъёс олокызьы но начармыны выро. Нош пыжиськемъёслэсь, сӥльлэсь, ческыт сиёнъёслэсь куштӥськыны уг быгато. Улонамы бадӟым инты басьтӥсь кыкетӥез арбери - сиён. Ӵапак сиён гинэ али шумпотон вае на кадь. Телевизор но, радио но, газет но ялан гочато, ческыт сиськыны "косо". Ма, сотэк но мултэс сиськыны муг шеде. Адями туж трос сиське керӟегъяськыкуз, пуромыса, дыртыса ужакуз яке ужлы ёрмыкуз. Ассэ буйгатон понна, со ӝӧк сьӧры пуксе, мултэс килограммъёс люка. Магазинъёсын дунъёс шимес будэмын, озьы ке но, ӝажыос ӝытлы бушало. Нош мар асьмеос сииськом? Берло аръёсы Россиысь адямиос мугоразы витаминъёс тырмымтэен курадӟо. Тодосчиослэн малпамзыя, татын янгыш асьме доры вуись кунсьӧр сиён-юонъёс. Вузкарон ӝажыосы соос умой-умой эскерытэк вуо. Нош асьмелэн промышленностьмы тырмыт сиён-юон поттыны уг вутты. Вашкала дырысен ини пӧртэм сиськон амалъёс малпамын, но нылкышноос туннэ ке но йырзэс тӥяло: кызьы кӧттырымон сиськоно но веськрес, чебер кылёно? "Сиськоно улон понна, сиськон понна улоно ӧвӧл", - шуиз тодмо тодосчи. Тӥни со луоз, дыр, валэктон. Угось асьмеос зэмен но тросгес малпаськиськом ческыт сиён сярысь. Туж трос сииськом сӥль, картофка, макарон, вӧй, пыжиськемъёс. Зэм, кудӥз сиськемлэсь гинэ уг куайы. Вань мукет мугъёс но - выжыысь выжые паласькись висёнъёс. Соку адямилы юрттыны шуггес ни. Нош ческыт сиськыны яратӥсьёслы пӧртэм диетаос вань. Но озьы ваньмызлэн асьсэды курадӟытэмзы уг поты. Соин ик, быръе огшорызэгес: ӵош сиыны яра ӵош сиыны яра Белокъёс Шоро-куспо группа Углеводъёс - сӥль, колбаса - вӧй, маргарин - кеньыръёс - йӧллэсь лэсьтэм - нянь, мукет пыжиськемъёс сиён-юонъёс - чорыг - йӧл - картофка - курег пуз - сылалтэм кубиста - кушман, банан, курага, - сыръёс куасьтэм емыш, инжир, - консерваос - губи улмо, чечы, - емышъёс - помидор крахмал, - вина, - мульы сур шампанской, - тысь турын куарлэсь - изюм чайёс - маял ӵош сиыны уг яра Дасяз Л. Орехова, Удмурт кун университетын дышетскись. Пилем улысь шунды потӥз? Газетмылэн 31-тӥ октябре потэм номераз "Висемедлэсь азьвыл коньдондэ лыдъя" статьяын ракез эмъянъя диспансерын кылдэм югдур сярысь ивортӥм вал. Государство коньдон висъямтэен, та больницаын уноез эскеронъёс, операциос висисьлэсь уксё басьтыса ортчылӥзы. Эмъян дунъёсты юнматӥз тазалыкез утёнъя министрлэн 1998 арын 16 октябре потэм 259 номеро приказэз. 24 октябре Удмурт Республикаысь Прокурор талы пумит луэмзэ вераз, 259 номеро приказ Россилэсь но Удмуртилэсь Конституциоссэс тӥя, шуиз. (Конституцияя котькудӥзлы адямилы дунтэк эмъяськыны право сётэмын.) Таин валче 28 октябрьысен та приказлэн кужмыз быриз. Со сярысь ивортӥз Л. Л. Тарасова - Тазалыкез утёнъя министерствоысь специалист. Выль югдурез валэктыса, онкодиспансерлэн валтӥсь врачез С. Г. Примушко огзэ гинэ вераз: Правительство коньдон висъяны луонлык ӧз ке шедьты, больница пытсаськоз. О. ВАХИТОВА. ШӦКЫЧ Пеллямтэ матрац Улонысь учыр Куатьтонэтӥ аръёсын вал со. Мон, кагазэс саптась маке, туж яратӥсько вал "Советской Удмуртия" газетлэн редакцияз пыралляны. Оломаиз монэ отчы сокем кыске вал. Нуналлы быдэ сямен гызмыль гинэ кошкисько вал отчы. Одӥг пол, шундыё покчи гужем нуналэ, зарнивуам усем куаръёсыз ӵыжаса, Пастухов урам кузя вамышъясько. Дыр вазь на. Тямыс час но ӧвӧл. Редакция нош ужа укмысысен гинэ. Пумитам тодмое сюре. Со - газетысь яратоно журналист. Тамаксэ пурккетэ. Кияз газет. - Салам, Алла, - шуэ. - Ӟечбур - вазисько пумитаз. - Ӟечкыла монэ, - шуэ. - Маин? - Утӥ. - Мар утӥд? - Надувной матрац. Уд ке оскиськы, тани, учкы. - Киям мычиз газет но лотерея билет. - Адӟиськод-а? Тани таблица. Тани билетэ. Номерез тупа. Али мон почтае мынӥсько. Нош со пытсамын на. Дас частэк уз усьтэ. Тодӥськод-а, Аллӥ, монэ толон туж зол куноятӥзы. Туннэ макмырен йыры пилиське ни. Куинь манетэд вань ке, эн жаля. Йырме веськатысал. Со понна мон тыныд та билетме сёто. Матрацлэн дуныз 19 манет. Озьыен, тон 16 манеттэ шыръялод. Мон лӧптыса ик кияз куинь манетме донги, ачим тӧлпери сямен лоби почта пала... Кутчаз ук монэ, дуно эше! Кутчаз ке кутчаз... 19 манет интые мыным мычо 1 манет гинэ. Номерез тупа - сериез уг. Тыл кадь ӟырдаса вуи редакцие Журналистлэсь ӧссэ усьтыса вуи, либо ӧй, но соилэсь куаразэ кылӥсько. - Аллочка, пыр, пыр! Утэм матрацтэ миськыны горд вина коть ваид-а? Вань лулпыжетъёсы олокытчы тӧлӟизы. Горон монэ кутӥз. Кӧтме посымон, син ву потымон гори. Али но "надувной матрацсэ" тодам ваисько ке горисько на... Эк, шу, мар но ӧй вал та улонам! А. КУЗНЕЦОВА. Праздникеныды, гуртоос! Бусыосын но пудо вордонын, элькунысьтымы быдэс агропромышленной удысын гажано ужасьёсмы, сюлмысьтымы ӟечкыласьком тӥледыз Гуртын тыршисьёслэн но сиён-юон поттонын ужасьёслэн праздникенызы! Дунне вылын няньлэсь но дуноез номыр ӧвӧл, шуэ калык. Сое талэсь ӟеч уд вера ни. Уно дауръёс ӵоже ини быдэс обществолэн ӟеч но тыро улонэз потэ гурт хозяйстволэн, аслаз нянь будэтӥсьлэн азинсконъёсыз бордысь. Агропромышленной комплекс котьку вал но луоз калык хозяйстволэн одӥгез тужгес валтӥсь удысэз. Со бордысь потэ экономикамылэн юнмамез, калыкмылэн улэм-вылэмез. Ортчисез 1998-тӥ ар нянь будэтӥсьёс понна вал одӥгез секытэз ар. Озьы ке но, гуртоослэн суй-пыдзы ӧз юскиськы - вань будэм нянь утялтэмын но кеносъёсы интыямын. Нош картошка туэ, ортчем аръёсы сярысь но, уногес люкамын. Тужгес но тау карон кылъёс вераны кулэ пудо утисьёслы но тылобурдо сюдӥсьёслы. Соослэн нуналлы быдэ жадёнэз валатэк ужаменызы, шӧдскымон йылӥз йӧл но курег пуз поттон. Удмурт Элькунысь Кун Кенеш но Правительство тодо но валало крестьянъёслэсь, сиён- юон поттон предприятиосын ужасьёслэсь сюлэмвисёнъёссэс, мур тау каремзэс верало соослы таӵе кулэ ужын асьсэды жалятэк тыршемзы понна. Тупаса улон но азинсконъёс тӥледлы, агропромышленной комплексын ужасьёсмы, юн тазалык асьтэлы но матысь ӵыжы-выжыостылы, асьмелэсь ошмесо шаермес азинтонын мытэм ужъёсты мед удалтозы. Удмурт Элькунысь Кун Кенеш Удмурт Элькунысь Правительство ПОСТАНОВЛЕНИЕ 1998 ар 2 ноябрь � 998 Ижевск город Удмурт Элькунын 1999 арын музъем понна налоглэсь быдӟалазэ лыдъянъя но сое тыронъя огдырлы радлык тупатон сярысь Улон интыос, дачаос, гаражъёс лэсьтонъя кооперативъёсысь, сад-бакча но пудо-живот вордонъя товариществоосысь (дэменлыкъёсысь) адямиослэсь музъем понна налог (выт) чаклам мында но дыраз тыронзэс радъян вылысь, Удмурт Элькун Кивалтэт ПУКТЭ: 1. Тупатоно 1999 арлы улон интыос, дачаос, гаражъёс лэсьтонъя кооперативъёслы, сад-бакча но пудо-живот вордонъя дэменлыкъёслы музъем понна вытлэсь быдӟалазэ лыдъянъя но сое тыронъя огдырлы радлык, кудӥзъя вылӥ верам кооперативъёслэн но дэменлыкъёслэн правлениоссы музъем понна вытлэсь огъя быдӟалазэ сёто кызьы ке валче уже кутӥськись музъемъёс понна, озьы ик кооперативъёсысь яке дэменлыкъёсысь адямиослэн музъемъёссы понна со ёросысь Вытъя кун инспекцие, кудӥзлэн улосвылаз интыяськемын вылӥ верам кооперативъёслэн но дэменлыкъёслэн музъемъёссы, но музъем понна выт тыро Россия Федерацилэн "Музъем понна тырон сярысь" Катэныз юнматэм радлыкъя нимысьтыз тупатэм дыре. 2. Та постановленилэсь быдэсъяськемзэ эскероз Удмурт Элькунысь Вытъя инспекцилэн кивалтӥсез В.В. Орехов. Удмурт Элькун Кивалтэтлэн Тӧроез П. Н. Вершинин. СПОРТ Люкаськозы вань мылкыд карисьёс Йылпумъяськиз Ижевск городысь ветеранъёс пӧлын шахматэн шудонъя ӵошатскон. Отын нюръяськизы вань ёросъёсысь спортсменъёс. Индустриальной районысь командалэн капитанэзлэн, спортъя мастере кандидатлэн Владимир Петровлэн (Ижевскысь радиозавод) быгатонлыкеныз та ёрос нырысетӥ интые потӥз. Ньыль пумиськонын вормыса 22 но ӝыны очко люказ. Одӥг очколы бере кылиз Октябрь ёрос. Вераны кулэ: та районлэн командаез понна шудӥзы спортъя кык мастеръёс но спортъя мастере кык кандидатъёс. Ӵошатсконъёс дасяськон выллем луизы Удмуртиысь шахматистъёслэн нюръяськонзы азьын. Со 14-22 ноябре "Ижпланета" клубын ортчоз. Отын нюръяськыны быгатозы быдэс Удмурт шаерысь мылкыд карисьёс. Н. ВЕЛЬТМАНДЕР. Оскемын нылкышноослы Та кык егит нылкышноос нырысьсэ пумиськизы туэ, республикамылэсь нуналзэ пусйыку. Наталья Афанасьевна Лопатина ужа Воткинск районын, кивалтэ "Пихтовка" совхозысь пудо вордон фермаен, нош Нина Васильевна Иванова - Вавож районысь Мичурин нимо колхозысь Зямбай фермаен. Кыксы но - син шоры йӧтымон, данъяськымон адямиос. Ужазы азинсконъёс басьтэмзы понна, нимъёссы пыртэмын Удмурт Республикалэн Данъян пул вылаз. Таӵе дан усиз Пихтовка фермаысь быдэс коллективлы. Туэ дас толэзь ӵоже скаллы быдэ соос кыскизы 5081 килограмм йӧл. Ӟеч пуктэмын селекционной уж. Пудолэсь выжызэ умоятон бордын 20 арлэсь ятыр тырше ни республикаысьтымы сӥё-дано зоотехник Е. А. Васильева. - Фермалы азьло сомында саклык висъясь но ӧй вал кадь,- шуэ Наталья Афанасьевна.- Хозяйстволэн кивалтӥсез тросгес сюлмаськылӥз чорыг будэтон сярысь, пудолы йӧскадь сиён но ӧз сюрылы. Али директормы воштӥськиз, соин ӵош фермаын югдур но тупатскиз. Йӧл скаллэн кыл вылаз, шуо ук. Озьы ик вань. Пудо сиён кылем арын но, туэ но тырмыт дасям, со бордысь ик потэ продукцилэн ӟечлыкез. Трос шуныт кылъёс вераны луоз Зямбай гуртысь скал кыскисьёс, ветыл, кунян сюдӥсьёс сярысь но. Соос арысь аре азьмынӥсьёс радэ пото, огкылысь, тупаса уло но ужало. Озьы медло азьланяз но! Л. МЕДВЕДЕВА. Фотоосыз В. КАМАШЕВЛЭН. ЭМЪЯСЬКОН АМАЛЪЁС ТАЗАЛЫК Эмъясьлэн паймымон киосыз Вал сыӵе аръёс, куке калык амалъёсын эмъяськемлэсь алылӥзы, со амалъёслы тазалыкез утён учреждениосын сюрес пытсамын вал. Нош, кызьы мон тодӥсько, асьсэос вылӥ кивалтӥсьёс соослэсь ӧз палэнскылэ. Тӥни со аръёс йыре лыктӥзы, Рамиль Фарукович Мубаракшинлэн эмъян амалъёсыныз тодматскеме бере. Угось калыклэн эмъяськон амалъёсыз туннэ но вужерын выллем. Больницаосын калык медицинаен вырисьёсты туж ик матын уг каро. Тани Рамиль Мубаракшинлы но "статус" сётыса уг вутто. Нош пӧртэм тӧр-кузёос сое асьсэлэн кабинетъёсазы ӧтьыса эмъясько, ӵыжы-выжыоссэс, тодмоссэс эмъяны куро. Валало соос, калык эмъясьлэн чиньыосаз кыӵе ке паймымон кужымыз вань шуыса. Вордскиз но будӥз Рамиль Татарстанысь Балтаси гуртын. Быдэстӥз Казаньысь медициная институтэз. Татысен со пӧртэм эмъяськон амалъёсын, тибет медициналэн аспӧртэмлыкъёсыныз тодматске. Собере сое биоэнергилэн луонлыкъёсыз ас бордазы кыско. Со Москвае кошке, Джуналэн школаяз биоэнергиен эмъян амалъёслы дышетске. Но интыысьтызы вырӟем сюрлы ёзъёсты биоэнергилэн кужыменыз гинэ интыосазы пуктыны уг луы вылэм. Со понна мануальной терапиез - киын эмъян амалъёсты - тодыны кулэ. Та удысын тодон-валанэзлэсь тырмымтэзэ шӧдыса, Рамиль Мубаракшин Украиналэн шоркараз Киеве сюрес лёге. Отын тодмо эмъясьлэсь Касьянлэсь киосын эмъяны дышетске. Со дыре ик тибет медициналэсь валан-быгатонзэ "йыръе". Тӥни озьы Рамиль малпанэ вуэ: адямиез эмъян понна, калык эмъяськон амалъёсты валчеяса кутоно. - Психолог луэмысьтым, мон нырысь ик адямилэсь мылкыдзэ эмъян сярысь сюлмаськисько, - шуэ врач. - Уногес мануальной терапиен вырисько. Мукет сямен вераса, чиньыосыным лылэсь сӧсырмем интызэ, шексэ шедьтӥсько, вырӟем лыосты интыосазы пуктӥсько. Озьы ик рефлексной терапиез - нервъёс пыр эмъянэз - уже кутӥсько. Озьы Рамиль Фарукович дасо пӧртэм висёнъёсты эмъя. Кылсярысь, сюрлы висёнъёс пӧлысь унозэ со одӥг сеанс ӵоже быдтэ. Остеохондроз пумысен врачлэн аслаз малпанъёсыз вань. Тросэз сое сылал пуксён чер шуо. Нош Рамиль верамъя, со - лыослэн но сӧнъёслэн (сухожилие) висёнзы. Ӵем дыръя та висён кезьыт пыӵам бордысен кутске. Та через эмъянын мануальной терапия тужгес но бадӟым пайда вае. Рамиль Фаруковичлэн чиньыосыз радикулит, ревматизм выллем висёнъёсты каньылэн эмъяло, куд-ог дыръя - пери шуккемез (параличез). Сюрлы ёзъёсты, вырӟем лыосты интыязы пуктон та эмъясь понна паймымон маке ӧвӧл. Нош осконзэс ыштэм, висьыса губырскем адямиосты пыд йылады султытыны быгатон - таиз ини, зэмзэ но, паймытэ. Рамиль Фарукович кабинетъёсазы ӧтьыса эмъяськись кивалтӥсьёсын гинэ ужанлы пумит. - Уксё, власть котыре вуэм адямиос кунгож сьӧрын но эмъяськыны быгато, - сюлэмшугъяське Рамиль, - мынам ӟече, пайдае котькинлы мед йӧтоз. Мон гуртысь калыкез ньӧмыз понна гинэ дун басьтыса эмъясько. Куд-огъёсызлэсь, дэмлазы ке но, одӥг коньы но уг басьтӥськы. Валасько, макем курадӟыса улэ гурт калык. Вылаз ик, адями секыт черлэсь кытчы пырыны уг тоды ке... Ма, кызьы сыӵе муртлэсь возьдаськытэк уксё курод? Врачлэн быгатэмез сярысь ӟечгес вералозы, дыр, со дорын эмъяськемъёс. - Мон гуртын улӥсь огшоры нылкышно. Вань улонме секыт ужай. Одӥг нуналэ пыд йылысьтым пограй. Уйёс но нуналъёс зэмос эзельлы пӧрмизы. Рамиль сярысь кылэме бере, солы вазиськи. Сюрлыелэн пӧртэм интыосаз чиньыосыныз зӥбылыса, со монэ ог ӝыны часкын пыд йылам султытӥз. Ачим но чылкак пайми. Сюрс пол тау солы, - шуэ Ярак Чурма гуртын улӥсь Наталья Фомина. Тюнтер гуртысь Фарук Ибрагимов маде: - Ужын секыт сӧсырмыса, больницаын толэзьёс ӵоже эмъяськи. Сюрлые кык интыетӥ сӧсырмем, йырвиме зуркам, гадь но ки лыос изъянмиллям. Адями радэ ик кыльымтэ вал ини. Ярам, Рамиль Фарукович юрттӥз. Туннэ нуналлы, тьфу-тьфу, син медаз усьы, пыд йылам султӥ. Тӥни озьы, эмъясь Рамиль Фарукович Мубаракшин ӟеч ужзэ азинтэ, со понна калыклэсь шуныт кылзэ кылэ. А. КУНАЕВ. Татарстан, Балтаси. Элькунмес гажаса Октябрьлэн пумаз Ижевскысь Центральной площадьын огыр-бугыр вал. Республикалэн нуналэныз но комсомоллы 80 ар тырмонэн валче ортчизы капчи атлетикая бызьылонъёс. Ижевскысь сяна, бызьылыны мылкыд карисьёс вал Воткинск, Сарапул городъёсысь, Дэбес, Пичи Пурга, Кез, Игра, Завьял ёросъёсысь, озьы ик Пермь улосысь. Ваньмыз люкаськиз 150 пала адями. Старт сётэмын. Бызьылӥсьёс потӥзы 15 иськем сюрес вылэ. Соосын ӵош ик 3 иськем сюрес вылэ потӥзы пинал спортсменъёс но. Ӵошатсконэ пыриськизы пӧртэм арлыдоос - 10 аресысен кутскыса 70 аресозь. Малпасько, ваньмызлы тодмо Борис Олеровлэн нимыз. Бызьылыны кутскиз 35 аресысен, 42 аресаз спортъя мастер луиз, нош 60 аресаз - пыдын ветлонъя ӵошатсконын дуннелэн чемпионатаз вормисе потӥз. Солэсь кӧнялы ке арлыдызъя егитгес Дэбесысь Африкан Поздеев. Трос ӵошатсконъёсын вормисе потылэмын. Озьы ик Зоя Дедюхина, арлыдыз шоры учкытэк, вань ӵошатсконъёсы пыриське. Соосын ӵош ик бызьылон сюрес вылын вал Ижевскысь Иван Трофимов, Россиын бызыьлонъя ӵошатсконын но со бронза басьтӥз вал. Озьы ик ваньмызлы тодмо луо Наташа Рогожникова, Екатерина Семакина но Нина Бушмакина. Ӵошатсконэ лыктӥз сӥё-дано куно Анатолий Корепанов. Алигес со Япониын ортчем дуннелэн чемпионатысьтыз бертӥз. Адӟемъёсыз сярысь но кӧня ке мадиз: "Японие 11 час лобимы. Туж секыт вал со милемлы. Часлэн воштӥськемез но шӧдӥськиз выламы. Туж умой пумитазы. Ӵошатсконъёс азьын тодматӥзы бызьылон сюресэн. Со ортче дуннеысь самой чылкыт Шиманто шур дуртӥ. Сюреслэн кузьдалаез 100 иськем, со туж ӟеч дасямын вал. Россиысь команда ассэ умоен возьматӥз. 17 странаысь бызьылӥсьёс ог 200 пала люкаськизы. Ӵошатскем сяна, ми отын улӥсьёсын но пумиськылӥм. Францилы флаг сётон сӥё-дано ӝытын но пукимы. Уго Дуннелэн вуоно чемпионатэз ортчоз Франциын 15 мае. Солы эшшо но золгес дасяськоно луоз. Нош туннэ ӵошатсконэз учконо ке, вормисе потоз, дыр, Александр Яникеев". Корепановлэн пусъемез шонер луиз. Вормисе потӥз спортъя мастере кандидат А. Яникеев. Кыкетӥ вуизы Михаил Поздееев но Сергей Александров. Куинез ик вормисьёс Удмурт кун университетысь дышетскисьёс. Тренерзы - дуннелэн чемпионэз Анатолий Корепанов. Куинетӥ вуиз Пермь улосысь Евгений Гермашок. Нылкышноос пӧлын вормисе потӥз Ижевскысь Елена Коноплёва. Юн дасяськемын вал Игра ёросысь бызьылӥсьёс. Егитъёс пӧлын вормисен лыдъямын Денис Трефилов, Алексей Тронин, Вадим Шалаев. Нылъёс пӧлын трос ӵошатсконъёсын вормисе потылэм Елена Копеанова но Ирина Ермолаева. Умой бызьылӥзы Дэбес ёросысь Светлана Урванцева, Ольга Иванова, Елена Семакина но Оксана Хохрякова. Ӵошатсконын тужгес но егит бызьылӥсьёс пӧлысь кузьым басьтӥз Дэбес ёросысь Тыловайысь 8-тӥ клаассын дышетскись Юрий Никифоров. Мӧйыосыз пӧлын вормисе потӥзы Станислав Ившин но Борис Олеров. Ӵошатсконэ пӧртэм арлыдо бызьылӥсьёс пыриськизы. Шумпоттэ соиз но, спортэн эшласько республикалэн котькуд сэрегаз. Вормисьёслы кузьымъёсты но грамотаосты сётӥз Удмурт Республикаысь Мугорез юнматон культурая но спортъя кун комитетлэн тӧроез Анатолий Касихин. Бызьылонъёсын валтӥсь судья вал Удмурт кун университетысь капчи атлетикая старшой тренер Вячеслав Николаевич Сулима. М. КОПЫСОВ. Спикерлэсь гожтэт Удмурт Республикаысь Кун Кенешлэн Тӧроезлы Александр Волковлы Кун Думалэн Председателезлэн Геннадий Селезневлэн гожтэтэз вуиз. Отын верамын: Гажано Александр Александрович! Тазалыкез юнматон, чылкыт сямъёсты улонэ пыӵатон сярысь сюлмаськон - со секыт но туж кулэ уж. Шумпотыса пусйисько, туэ спортъя но тазалыкез юнматонъя "Президентской состязаниос" программае Удмурт Республикаысь нылпиос но пыриськизы шуыса. Со шаердылы юрттоз таза, кужмо, чебер но юн мылкыдо адямиосты будэтыны. Соин валче Удмурт Республикаысь пиналъёсты ӟечкыласько но Тӥледлы тау каремме верасько улосвылады нылпиостэс спортэз но тазалыкез юнматон ужрадэз азинтыны сюлмаськемды понна. Оскисько, тӥляд нылпиосты азьланяз но мылысь-кыдысь пыриськозы "Президентской состязаниосы", со ӵошатсконъёсын кыдалозы асьмелэн вуоно кивоштӥсьёсмы. Юн тазалык но вань ӟечсэ гинэ сӥзисько Тӥледлы! Г. И. СЕЛЕЗНЕВ. Шӧкыч Тылпу бере вуиз Кылемаз толэзе Красногорскысь тылпу кысон часте жингыртӥсь луиз, Гаинцы гурт ӝуа. Ёросысь тылпу кысӥсьёслы отчы мынытэк ӧйлась. Час но ӝыны ортчыса вуиз "Васильевское" эштослэн тылпу кысон машинаез но. Солэн музъем вылаз интыяськемын Гаинцы гурт. Малы меда соку эштослы тылпу кысон машина возёно? Эскерыса тодмо луиз, автомобиль гаражын сылэм бензинтэк. Нош машиналэн кузёезлы Владимир Сорокинлы быдэс фляга эстӥськон висъямын вылэм. Кытчы ке тӧлӟем, шӧдске. Собере водитель улэ село пумын. Телефонэз ӧвӧл. Соин кусып возё мынӥсь-ветлӥсьёс пыр. Нош эштосын чылкак одӥг телефон гинэ. Со но директор дорын. Кузё ас ужзэ йылпумъям бере, кабинетэз (шу ни телефонэз но) тунгонало. Н. СМРАДОВ. Гурт хозяйствоын ужасьёс! Сюлмысьтым ӟечкыласько Гурт хозяйство удысын но сиён-юон поттонын ужасьёслэн нуналэнызы! Гуртын улӥсьёс калыкез сюдо, калык сямъёсты утё. Туннэ но тӥ бадӟым ужпумез быдэстон бордын ужаськоды - республика понна сиён-юон поттӥськоды. Туэ куазь туж ик ӟеч ӧй вал ке но, тӥ музъемез яратэмдэс возьматӥды; тросаз ёросъёсын пудо вордон юнманы кутскиз, экономикаын выль кусыпъёс кылдо, магазин ӝажыос выль сиён-юонъёсын тырмо. Сӥзисько тӥлед юн тазалык, шудбур но ваньзэ умойзэ гинэ. Удмурт Республикаысь гурт хозяйствоя но сиён-юонъя министр В. И. Жуйков. ИНКУАЗЬ НО АДЯМИ Азвесез воштэ кыед "...Иж шортӥ ортчись Карлутка шур дурын куке но часовня сылэм. Отысь монашкаос шурысь "азвесь" вуэз вузало вылэм - черкысь вуэз сямен эмъяськыны басьтылэм сое калык". Талы али оскыны ик шуг. Туала Карлуткалэн тусыз воксё мукет уго. Со жаг но шӧй куян интылы пӧрмытэмын. Сыӵе ик адӟонзы шаерысьтымы трос мукетъёсызлэн пичи шуръёслэн. Кудӥзлэн нимыз ик вера тусыз сярысь: Силё пурты, Жагшур... Инкуазез утёнъя шаерамы олокӧня ёзъёс кылдытэмын ке но, соос ваньмаз уг вутско яке вутскемзы уг поты. Нош котырысьтымы улос нуналлы быдэ кырсёме, тазалыкмы лябӟе но лябӟе. Та югдурлы чидатэк, Ижевскысь мединститутысь студентъёс 1988 арын экологияя огазеяськон кылдытӥзы - экосоюз. 1989 арын Ижысь горсоветын мырдэм но кызьы пусъемын вал со. Кивалтӥсьёслы ӧз кельшы егитъёслэн етӥзъяськемзы. Угось Ижевскын чакламын вал эшшо 50 пала промышленной предприятие ӝутыны. Егит экологъёс шуизы: "Тырмоз! Ижын кемалась сыӵе предприятиос пуктыны уг яра ни. Возьматэ проектлэсь экологической экспертизаез ортчемез сярысь бумагадэс". Азьвыл коммунистъёс экологъёсты пыкылыны кутскизы технической азинсконэз ӝегатэмысьтызы. Али, дас ар ортчыса, валало ни, дыр, юнме пыд пуктылэмзэс. Но куд-огез т вакытэ но, кылымтэ-адӟымтэ улсы кариськыса, нош но нош алэм интыосы пуктӥськыны лэзё - автокооперативъёслэн кузёоссы коньдонзэс уг жаляло уго, нош инкуазез утисьёслэн копейказы ӧвӧл. Экосоюзлы 10 ар тырмон азьын журналистъёсын пумиськонын огазеяськонлэн тӧроезлэн воштӥсез Александр Борисович Торгушин осконзэ вераз, газетъёс инкуазез утён сярысь зэмлыко но лэчыт гожъязы ке, та ужпум шоры учкон умой пала воштӥськоз шуыса. Али экосоюзын 70 мурт пала лыдъяське, но соослэн кужымзы шӧдскымон ни: - экосоюз юрттэ урод, улыны ярантэм юртъёсын улӥсьёслы ӟечгес юртэ выжыны, улон юртъёслы яке школаослы матэ гараж пуктонлэсь алэ; - экосоюз куремен дугдытэмын вал Карлуткае но Калмезэ канализациосысь васькись но мукет кырсез кисьтан; - Ижевскысь нылпи интернат дорысь авторынок выжтэмын вал мукет интые; - экосоюз пыриське Ижевсклэсь генпланзэ эскеронэ но тупатъянэ; - араз кык пол писпуос мерттэ, пичи шуръёсты сузя; - арлы быдэ радъя пиналъёслы экологияя лагерьёс но экспедициос; - пыриське законъёс кутонэ. Экосоюзысь адямиосын дасямын вал Удмурт Республикаысь Нюлэсъёсъя Кодекс но Удмурт Республикаысь Музъем узырлыкъёсъя Закон, городлэн экологияя фондэз сярысь Типовой положение но инкуазен герӟаськем мукет законъёсы ватсанъёс. Инкуазез гажасьёс гажало адямиез но. Соос юртто куанер но сьӧрлось пегӟыса лыктэм семьяослы: нылпи шудонъёс, дӥсь, пыдкутчан люкало. Троссэ ужпумъёсты соос суд пыр сэрттоно-пертчоно луо. Со понна трос кужым быдтоно луо ке но, уг куректо - пайдаез син азьын. Дунне вылысь огез но воштӥськон инкуазь вылын шӧдӥськытэк уг кыльы. Со али асьмелы пунэмзэ берыктэ ни. Нош вылын пукисьёс туннэ но нылпи стадионъёс вӧзы гараж пуктылыны лэзизы ке, ӵуказе нылпиослы стадион кулэ уз лу ни. З. ВАХРУШЕВА. Каникулъёс кузьгес луизы Ува посёлокысь куиняз бадӟымесь шор ёзо школаосы каникулъёссы бере пиналъёс урокъёсы ӧз люкаське. Отысь дышетӥсьёс ялӥзы пумитъяськон ужрад. Но 2-3 нунал ортчыса, школаос ужаны кулэ ни. Профсоюзъёслэн огазеяськонзы Удмурт Правительстволы огъя вазиськон кутӥз. Сое тросаз школаосын но нылпи садъёсын ужасьёс умоен лыдъязы. Дышетӥсьёслэн куронъёссы бюджетысь мукетъёсызлэн но коньдон басьтӥсьёслэн выллемесь ик: ортчем толэзьёслы уждунзэс берыктон, сое азьланяз дыраз тырон. Озьы ик соос пунэмзэс берыктыны куро пособиос но коммунальной услугаос понна. П. ЛЮКИН. Вераське но возьматэ Удмуртия "Удмуртский экспоцентр" акционер огазеяськон, Печатья но иворъёсъя министерство, Егитъёсын ужанъя кун комитет но Удмуртиысь Журналистъёслэн союззы, "Вераське но возьматэ Удмуртия" выставка ортчытонэн валче, журналистъёсты бадӟым ужрадэ люка. 24-27 ноябре "Металлург" культурая юртын журналистъёс, рекламаен вырись агентствоос, издательствоос асьсэлэсь быгатонлыкъёссэс, луонлыкъёссэс возьматыны, калыкен пумиськыны, ог-огенызы кусып тупатыны быгатозы. Юрий Пасынков куамынэти арзэ ни Уваысь коммунхозын крановщик-экскаваторщик, механизатор луыса ужа. Туэ гужем Юрий Виссарионович Ува посёлокетӥ водопроводлы гу дасяз. Снимок вылын: Ю. В. Пасынков. Туспуктэмез Г. ГОРОДИЛОВЛЭН. Минутэн но кыкен Калык кырӟан Минутэн но кыкен Часэд но вуоз ук. Часэн но кыкен Нуналэд но вуоз ук. Нуналэн но кыкен Арняед но вуоз ук. Арняен но кыкен Толэзед но вуоз ук. Арен но кыкен Дауред но ортчоз ук. Ортчоз но кошкоз - Кошкемзэ но уд шӧд ук. ("Айкай" книгаысь). Менсадыклэн сандыкез Менсадык туж умой адями вал. Лякыт, шуныт, небыт. Солэсь таӵе луэмзэ кужмоятэ на шунды пыры буёлъем йырсиез но тушез. Ми доры со кадь ӵем пырасез суредась ик ӧй вал. Пыроз со, мынектоз, киез юн-юн кутоз, кулэ ке, эктыса но лэзёз. Ми со кадь ум пӧрмытӥське. Сыӵе аспӧртэмлыко, гань-гань выросъёсын эктэ вал со. Шуылӥмы: пужы пуктэ. Менсадык вань улоназ лэсьтӥз паймымон выжыкыл дуннеысь кадь сандыкез. Аръёс пыр, чеберъяса-чеберъяса, дыртытэк, пыр-поч, ӝот-ӝот тырылӥз отчы аслэсьтыз визь люксэ, калыкысь басьтэм визь-нодзэ. Дырын-дырын усьялляз сое, мар кулэ - поттылӥз но калыклы кузьмалляз. Мыным потэ, усьтэм сандыкысь туж ческыт карасо чечы зын но лӧсъяськылӥз, мушъёс но лобаны кутскылӥзы. Аръёс ортчемъя, Менсадыклэн сандыкез яркытгес но яркытгес, чебергес, паймымонгес луыны ӧдъяз. Со бордысь тылсиос но син мальдымон пиштӥзы ни. Туж шуныт вал со сандык вӧзын. Со дыре ик вуоно вал кадь сюлмаськонъёсын пачылмымтэ пинал дыре, выжыкылэ. Калык тросгес но тросгес матэктыны ӧдъяз со пиштӥсь сандык доры. Нош Менсадык сётъялляз но кузьмалляз паймымон узырлыксэ - сюлэмзэ, визь-нодзэ, мылкыдзэ. Со туж яратэ вал суреданы юсьёсыз. Юсьёсыз ик басьтӥзы, луоз, Инмар доры. Нуизы пеймыт уе Луд ӟазег лобӟон сюрестӥ. Угось Инмар но ӟеч адямиосыз ӵемысь вӧзаз басьтэ. Нош паймымон сандыксэ Менсадык асьмелы кельтӥз. КУЧЫРАН ЮРИ, суредась. Наталь Мултэс ум жаляське-а? Кыӵе луыны кулэ семья? Мынам малпамея, кузпалъёс ог-огзэс яратэм сяна, гажаны но валаны кулэ. Ог-огзылы дыраз ӟеч кылъёс вераны, интыяз ушъяны, нош куд ке дыръя кылтэм-ымтэм но луыны быгатоно. Улонын кышномуртлэсь ненег, сюлмаськись, валаны быгатӥсь сямъёссэ дунъяло, нош пиосмуртлэсь ӟеч ужаны, кивалтыны, котьмае шедьтыны- поттыны быгатэмзэ. Но трос-а берло аръёсы сыӵе пиосмуртъёс? Ӧвӧл. Янгышез, оло, быдэсак соос вылэ гинэ погыльтонэз но ӧвӧл, угось али секыт коньдоно уж шедьтыны. Ужасьтэм пиосмурт семьязэ сюдыны-вордыны уг быгаты ни, солэн ик корӟег, лек луэ. Нош кышноезлэн картсэ валамез уг поты, тушмон шоры кадь учкыны, пыкылыны кутске. Семья пумен тэшка. Кышномурт чидасьгес ик. Пичи уждунэн но кыкетӥ-куинетӥ ужа, нылпиоссэ сюдыны выре. Тани мынам тодмолэн куинь пиосыз. Ольга больницаын медсестра луыса ужа. Коньдон понна ӵемгес дежурство басьтэ. Куддыр уен-нуналэн ужаса, пыр умме но уг адӟиськы, сокем жадисько шуэ. Нош картэз ужтэк пуке. Уже интыянъя биржае но уг мыны: пособиос уг сётъяло коньдоно уж уг ӵекто шуэ. - ма тон кибашлы лэсьтӥськись ук, кивалтӥсьын но шедьтӥськы, оло нимаз юрт пуктӥськисьёс доры ӵектӥськыса утчано? - Али коттеджъёс но кынмем чорок кадь сыло, - киоссэ ширъя бускеле. Малы ке уг оскиськы мон Иванлы. Кышнозэ жалясал ке, кыӵе ке амал шедьысал, дыр. Соиз ужаз но, сад-бакчаяз но жадёнэз валатэк тырше. Оло, нош ачиз янгыш - картсэ мултэс жаля? Сыӵеесь уго асьмеос, ки выламы нуллӥськомы воргоронъёсты. Ӧд ке жаля- маяля, кутскоз но кошкоз мукетыз доры. Ӧжыт-а али палкыленоос? Нош пиосмуртлы со ик кулэ - таиз но ӟурыны кутскиз ке, мукетыз шедёз. Мар понна меда йырады изьы нуллӥськоды, пиосмуртъёс? Р. ПЕРЕВОЗЧИКОВА. Ижын улӥсь. Наталь Психологен кенешон Нылы лушкаське. Мар кароно? Гажано редакция, монэ туж сюлэмшугъяськытэ нылы, зэмзэ вераса, солэн лушкаськон сямыз. Ӵыжы-выжыосмы доры но мынӥськом ке, одно ик кыӵе ке чыры-пыры арберизэс кисыяз донгоз. Эшъёсызлэсь но шудонзэс юатэк басьтылэмез вань. Коньдон пуйыысьтым но манетлыкъёсы ышылыны кутскизы. Нылылы дас арес гинэ ай. Вераса гинэ уг вала. Оло, жугыса яке кыӵе ке мукет амалэн визьмано? Валэктэ вал. В. СОЗОНОВА. Ижевск город. Лушкаськонэз котькуд обществоын лыдъяллязы умойтэм вамышен но законэз тӥянэн, нош ассэ лушкаськисез адӟонтэм карылӥзы яке палэнскылӥзы солэсь. Соин ик, анай-атайёслы туж секыт нылпизылэн лушкаськемез сярысь тодыны, вылаз ик, асьсэлэн дорысьтызы мар но со арбериоссы ышылыны кутске ке. Соос пӧлын луыны быгатозы коньдон, чеберъяськон макеос, книгаос - ваньмыз, малэн кӧня ке но дуныз вань. Валамон, одӥгез но анай-атай аслэсьтыз нылпизэ милицие уз ну, котькудӥз ас сяменыз тыршоз та югдурысь потыны. Но нылпиез кыл кутытон азьын нырысь ик тодыны тыршоно солэсь таӵе вамыш лэсьтон мугзэ. Урод сямызлы луыса яке вираз лушкаськон мылкыд пыӵамысь гинэ пинал мурт уг лушкаськы, йыртэман сюрес вылэ со ӵемысь султэ, улоназ кылдэм шуг-секытъёсысь потон понна: - нылпилэн ӧвӧл кисыяз нуллоно кӧня ке коньдонэз, анай-атаез ноку ик уз но сётэ сое. Нош пиналлэн, уката ик быдэ вуымтэезлэн, кӧня ке манет ке но коньдонэз луыны кулэ, кудзэ со кутыны быгатоз ас мылкыд каремезъя; - тросэз нылпиос лушкасько, эшъёссылэн син азязы вылэгес луон понна. Одӥг учырез гинэ верало. Пинал мурт анаезлэсь 200 манет коньдонзэ поттӥз, ульчаысьтызы пиналъёсты ческыт сиёнъёсын утялтон понна; - куд-огез нылпиос та амалэн кинлэсь ке но эшлыко мылкыдзэ "басьтыны" туртто, кӧня ке дырлы ке но со юлтошъёсызлэн син шоразы мед йӧтоз. Но котькуд учыре лушкаськон возьматэ нылпи но анай-атай куспын кыӵе ке но валамтэез. Пинал мурт вунэтэмын, аслыз ачиз кельтэмын, нош анаен атай асьсэ ужпумъёсы выемын. Тӥни озьы, нылпилэн кулэяськонъёсыз палэнэ кылемын, та югдур ик кырыж-мерыж сюрес вылэ потон ӧс луэ, лушкаськонэ но вуттэ. Мар ке ышемез шӧдыса, анай-атайёс соку ик нылпизэс адӟыны кутско. Нош пинал мурт понна со но пичильтык вормон луэ ни - иське, сое вунэтӥллямтэ на. Озьыен, тӥ шӧдӥды - нылпиды лушкаське. Эн дыртэ сое кыл кутытыны, нырысь ик тодыны тырше лушкаськон мугзэ. Кылын вӧсь карон, жугон та учыре уз юрттэ, вискады кылдэм гож уката паськыталоз гинэ. Тани одӥг семьяысь быдэ вуымтэ пияш дорысьтызы книгаосты вузам, нылашлэн вордскем нуналаз кузьым басьтон понна. Анай-атаез тае тодӥзы, пияшез эшъёсыныз адӟиськемысь алӥзы, асьсэос но соин вераськемысь дугдӥзы. Мурт адямиез сямен сюдӥзы, дӥсязы гинэ. Малпасько, яратӥсь анай-атайёс ласянь та вамышез нокызьы но шонерен лыдъяны уг луы. Мар бен карыны луоз? Нырысь ик, лушкаськон пумысен дорады шуг-секытъёс кылдӥзы ке, дуно арбериостэс син шорын эн возе, нылпидэс гочатыса сямен. Нылпидылы вералэ, азьланяз дорысьтыды арбериостэс чакласа возёды шуыса. Кылсярысь: - Саша, мон шӧдӥ, кӧня ке манет коньдонэ ышиз шуыса. Соин ик азьланяз палэнтыса возьытэк уз луы. Секыт ке но, нылпиеныды шара вераськон одно ик луыны кулэ. Ӵошен эскероно умойтэм вамышезлэсь мугъёссэ, ог-огдэс валаны но кылыны тыршыса. Шуг-секытъёстэс ас кужыменыды палэнтыны ӧд быгатэ ке, вазиське специалистъёслы. Психологъёс юрттозы тӥледлы кылдэм югдурез шонер валаны но кулэ визь-кенеш сётыны. Е. СМАГА, Ижевскысь "Шугъяськись семья" центрысь психолог. Ньыльдон уез луоз ини... Россиысь сӥё-дано художник, Удмуртиысь калык суредась, Удмурт кун премилэн лауреатэз, Удмурт кун университетысь профессор Менсадык Гарипович Гарипов ӧвӧл ни асьме пӧлын. Та нимъёсыз но верало, макем вылӥ инты басьтэ вылэм (али но басьтэ) со асьме улонын. Нош калык пӧлын со огшорылэсь но огшоры ассэ возиз. Ас выжыосызлы сыӵе ик матын, кыӵе вал пинал дыръяз, туж яратылӥз аспал калыксэ, Башкортостанысь Татышлы ёросысь удмуртъёсыз (сое туспуктэмысь но адӟиськоды). Огшоры кадь, но огшоры ӧвӧл. Синъёсаз лякытэз тросгес, тусбуяз - тумошоез. Ачиз но со выжыкылысь басьтэмын кадь, ас геройёсызлы укша. Оло, та суро-пожо улонмылы тупамтэез ик дырызлэсь вазь вуттӥз сое сьӧд гож дуре... Туспуктэмъёсыз М. Менладшинлэн. Менсадык Гарипов Пислэг вӧй Каникул дыръя кытчы ке но куное мынэм потэ вал. Артысь гуртэ ӵужапай, ӵужмурт доры яке... Таяз тол каникулэ монэ сузэреным ӵош куное ӧтизы песянаен песятай. Соос улӥзы асьме гуртын ик - уллапалан. Ми, салазкимес кутыса, соос доры васькимы: песятаен песянай туж шумпотӥзы, кызьы кариськыны уг тодо ни. Утялтӥзы соос милемыз ӵӧж пузэн но пислэг вӧен. Тужгес но мыным ческыт потӥз пислэг вӧе веттыса картофка сиыны. Куинь нунал кунояськеммы но куинь уй кӧлэммы бере, ми дорамы бертӥм. Корка гинэ пырыны вуим но, ӵужаймы юа ни: "Кыӵе куноязы, маин утялтӥзы?" - Ӵӧж пуз но пислэг вӧй сиимы, - шумпотыса верай мон. Кӧня ке улыса, мон ӵужайлы пислэг вӧй но картофка дасяны косӥ. Тани ӵужай ӝӧк вылэ пыжем картофка но пичи тусьтыен вӧй пуктӥз. - Сиыса учке ай, - шуиз со, - таӵе-а вал пислэг вӧйды? Мон веръяй но соку ик валай: - Ӧвӧл, пислэг вӧй ӧвӧл та! Собере ӵужае мукет вӧй вуттӥз. Таиз но пислэг вӧй ӧй вал. Ӵужае паймиз ини мар карыны. Со мыным кенэм вӧй поныса утчаз на. Огвакытэ ӵужаелэн йыраз мар ке но чилектӥз, лэся. Самоварысь пичи тусьтые пӧсь ву лэзиз, отчы сылал понӥз, сое умой гинэ сураз но ми азе пуктӥз. Мон басьтӥ картофка, веттӥ тусьтые, веръяй но соку ик шумпотыса кеськи: - Ӵужай! Таиз пислэг вӧй! Мынам бускеле Менсадык Гарипов мынам бускеле вал. Ӵукналы быдэ сямен пумиськылӥм соин трамвай дугдылон интыын. Отын ке ӵош ум ӝимиське, университетысь живописья кафедраын адӟиськиськомы. "Кыӵе ужъёс?" шуыса кизэ сётылӥз Менсадык Гарипович. Берло аръёсы котьку озьы вазиськылӥз. Юнме шорысь озьы ӧз ӟечъяськылы, дыр. Мынам тазалыке но пӧртэм пумо ужъёсы сярысь малпаськыса, озьы юалляз, вылды. Кытчы ке кошкыкум, кытӥяз вераса но уг вуттӥськы вал эшъёсылы. Сыӵе дыръя сюлмы шуг луыса вуисько Ижевске, уж дурам монэ ӧз ыштэ меда шуыса. Юнме сюлмаськиськем. Котьку сямен, ваньмыз умой, вань уж лэсьтэмын. Мон ӧвӧл дыръя, нокин косытэк, нокыӵе дун курытэк, мынэсьтым кафедраен кивалтон ужме ас вылаз басьтыса, ваньзэ Менсадык лэсьтэм, чаклам, радъям. Факультетлэн советаз ми соин кыкнамы быръемын вал. Отын но ог-огмылы юрттыса, кенешыса ужамы. Кафедраямы дас кык мурт пӧлысь сизьымез удмуртъёс вал. Менсадык кошкемен ӧжытгес кылим. Менсадык Гарипович мастерсткоям но пырыса пукылоз вал. Суредъёсме учке, ӟечгес карыны косэ, удмурт йылолъёс, легендаос но преданиос сярысь юалляськылэ. "Мон тынэсьтыд вань картинаостэ цветной фотое пукто али, со дуно ик ӧвӧл. Аслэсьтым пуктылӥ ни", - шуиз со одӥг пол. Малпанзэ быдэстыны ӧз вутскы. "Куд-ог картинадэ туж шуген лэсьтӥськод, трос дырдэ быдтӥськод. Вӧё буёлэн ке уг луы, карандашен яке пастелен лэсьты. Озьы каньыл но, чаляк но. Графикаын сокем ик пумозяз вуттыны кулэ ӧвӧл", - шуылӥз Менсадык Гарипович. Ас темазэ шедьтэмез бере, со туж ӝог ӝутӥськиз. Ужъёссэ возьматъяз Россиын но, кунгож сьӧрын но. Асьме элькунын удмуртлэсь азинскемзэ, вормонъёссэ туж ик адӟемзы уг поты кадь. М. Г. Гариповлы но нырысь ик Москва бадӟым ним сётӥз (Россиысь дано художник), собере гинэ сое шаерамы но адӟизы. Бере кыльыса ке но, Удмуртиысь кадык художник ним сётӥзы. Менсадык Гарипов туж умой шӧдэ вал удмурт калыклэсь мылкыдзэ, сямъёссэ. Калыкмылэн историяз со кылёз удмурт книжной графикалэн классикез луыса. Семен Виноградов, Удмурт Элькунысь калык художник. Агае кадь Мынэсьтым ӵем юалляло вал: "Тон Менсадык ӧвӧл-а?" Сыӵе дыръя шуылӥ: "Со мынам агае". Улонын озьы луиз: монэ Менсадык ачиз шедьтӥз. Мынэсьтым суредъёсме со кытысен ке синйылтэм. Одӥг пол шуэ: "Лэсьты книгалы суредъёс". Со вал 1986 арын. Озьы ми матысь эшъёс луим. Гарипов ӧй ке дэмласал книга чеберъяны, мон али но ӧй вырысал, дыр, иллюстрациосын. Тау солы. "Книгалы гинэ суредъёс лэсьтон акыльтэ", - шуылоз вал Менсадык. Ӵем дыръя дэра вылэ живописья ужъёс лэсьтылӥз. Туж яратылӥз мукет суредасьёслэсь ужъёссэс учкылыны. Берло аръёсы ачиз но дӥсьтыса но быгатыса суредалляз чебересь картинаос. Книгаосыз, пиналъёслы сӥзем суредъёсыз Гариповлы ваизы азинлык но дан. Отысь мон адӟисько бадӟым искусство кылдытӥсь Художникез. Аслаз суредъёсаз со быгатӥз возьматыны уно малпанъёссэ, сюлмаськонъёссэ. Менсадыклэсь ужъёссэ нокинлэнэныз уд сура. Суредъёсмы пумысен ми ог-огмылы кепыратэк но кышкатэк вераллямы. Янгышъёс но, тупатыны луоно амалъёс сярысь но кенешылӥмы. Менсадык ноку ӧз куатаськылы, йырзэ но кур ӧз карылы чурыт кылъёс верамелы. Со тодэ вал, суредъёсыз мыным ярало шуыса. Мон паймылӥ солэн суредаськемезлы. Одӥг толалтэ ми соин кӧлӥм Москваысь эшезлэн мастерскояз. Ӵукна милемлы вазь кошконо вал. Эшсэ Выль арен ӟечкыласа, Менсадык ӝӧк вылэ бадӟым ватман бумага вылэ пуктӥз шампанской вина но соку ик кутскиз суреданы. Вакчи дыр куспын синмаськымон чебер суред кылдытӥз, эшезлы тау кариз. Мынам улонам со тужгес но паймымонэз луиз. Со суред али но син азям. Менсадык ачиз но туж паймымон адями вал. Вячеслав Михайлов, Россиысь художникъёслэн огазеяськонзылэн ёзчиез. Узыё бамалъёс Туэ узы трос вал. Интыен-интыен сыӵе кисьма - кожалод, кин ке юри кисьтыса дасям. Таӵе суредэн пумиськыку, кинлы ке но возьматэм, данъяськем потэ. Кисьмам узыез адӟыкум, син азям пуксё Менсадыклэн ужъёсыз. Вӧлмытэсь вож бамалъёсын веськрес кызъёс котыртӥ уяло лемлет пилемъёс. "Мар со сыӵе?" юамелы суредась, шуныт мыняса, "узы..." шуылоз вал. Мынам йырам но ӧй шуккысал таӵе огшоры но "кескич" амалэн узыё возь вылэз суреданы... Зэм ик, сыӵе бадӟым художник луыса но, Менсадык ӧз ышты дунне шоры нылпи синмын учкыны быгатэмзэ. Кык вылӥ образование басьтыса, профессор луымон тодонлык люкаса но, ӧз куасьмы солэн сюлмысьтыз чылкыт ошмесэз. Кыӵеез гинэ суредась ӧвӧл туала арын. Котькудӥзлэн потэ мукетъёсызлэсь висъяськемез. Куддыръя ум кепыраське ог-огмес пож вуэн но "миськыны". Менсадык со ласянь шудо вал. Пеляз ӧз тыры лек вераськонъёсты, ужаз сюлэмыз косэмъя гинэ. Солэн киыз кырӟа вал. Огшоры гожъёсын со быгатӥз улӟытыны, син азе пуктыны пӧртэм выжыкылъёсты, мадёсъёсты, аслэсьтыз кылын вераны луонтэм малпанъёссэ... Котькуд ужез шоры учкыса шӧдоно я шыпыртӥсь куаклэсь шокамзэ, я лымылэсь небыт мамыкен музъемез согемзэ - котьку возьмаськод, я отысь, я татысь кин ке но потоз шуыса. Та чуръёсме лыдӟыса, со монэ котьку сямен "болтун" шуысал. Аслыз мон ӵем гинэ вералляй: "Тон зэмос мастер..." Нош тазьы гожтӥсько нырысьсэ. Синмаз ик вералляй вӧсь карись кылъёсме но... Но тыбыр сьӧраз ноку но секыт изэн ӧй ветлы. Акшан вакытъёсы выль лымыен бырдам инвис шоры учкыкум, ялан возьмасько пал питранлэсь дунне котыртӥ дыртытэк ортчемзэ... Менсадыклэн ужъёсысьтыз ӵем гинэ адӟоно вал сыӵе суредэз. Ачиз но дыртытэк гинэ ортчиз инмарен сётэм сюрестӥз. Кельтӥз милемлы кисьмам узыё бамалъёссэ но бергаса поръясь юг лымызэ. Василий Мустаев, суредась, Удмурт Элькунысь культура удысысь дано ужась. Алексей Ельцов Сэдык Менсадык Гариповлы сӥзьыса Шур дурысь возьёс вылын Ӝож гурзэ сэдык нёръя. Пуксьылэ шашы пӧлы Но выльысь инмын поръя. Шур дурысь муӵъёс пӧлын Сэдыклэн вал куинь пиез. Огез быриз сильтӧлэн, Мукетыз - вуэ выиз. Шур дурысь возьёс вылын Выль гурзэ сэдык нёръя. Пиёкез чагыр инмын Ас кожаз ини поръя. Удмурт отделенилы - ӝыны даур Удмурт пединститутын нырысетӥ удмурт группаос усьтэм дырысен туэ тырме 50 ар. Удмурт кун университетысь удмурт филологияя факультетын ужасьёс мылкыд каризы та ӝыны дауръем юбилейзэс туэ 20-тӥ ноябре ортчытыны. Ӝытэ ӧтисько Удмурт пединститутэ 1947-тӥ-1948-тӥ арын дышетскыны пырем студентъёс, озьы ик удмурт группаосын мукет аръёсы вань дышетскемъёс. Ӝыт ортчоз Ижевскысь Машина лэсьтӥсьёслэн юртазы 18.00 часын. Бигеръёслэсь адӟем кароно Кыкетӥ шуркынмонэ Ижысь Устинов ёросысь удмурт но бигер кыллы дышетӥсьёслэн методикая огазеяськонзылэн огъя кенешсы ортчиз. Нырысьсэ артэ пуксьыса соос вераськизы дышетон удысын шуг-секытъёс сярысь. Со сяна, та люкаськонын огъя малпанэ вуизы: удмурт кылъя урокъёс вылын гинэ пуконо ӧвӧл, учконо-эскероно бигер кылын урокъёсты но. Со урокъёс вылын трос ӟечезлы дышетскыны луоно. Собере дышетӥсьёслы дыр вуиз ни удмурт национальной движенилэн азьветлӥсьёсыныз пумиськыны, соосын котырес ӝӧк сьӧры пуксьыса, сюлэмшугъяськытӥсь ужпумъёсты эскерыны. Оло нош кылзэс но юаны? Надежда Прокопьева. ЖУРНАЛИСТЪЁСЫН ПУМИСЬКОНЪЁС Быръёнъёсы мукет сямен мыном Мар сётӥз Россиысь ужасьёслы 7 октябре ортчем огъя пумитъяськон? Луоз-а солэн пайдаез огшоры калык понна? Таӵе но мукет юанъёслы валэктон сётӥз Россия Федерациысь Кун Думалэн депутатэз, КПРФ-лэн Удмурт республиканской организациезлэн секретарез Николай Иванович Сапожников. Со верамъя, чаклам ужрад умой ортчиз, законлэсь, Конституцилэсь куронъёссэ тӥятэк. Кызьы шуиз КПРФ-лэн кивалтӥсез Г. А. Зюганов, та акция бере нокыӵе воштӥськонъёс ӧз ке луэ, калыкез ми ӝутом мукет гражданской ужрадэ - бессрочной политической но экономической забастовкае. - Николай Иванович, профсоюзъёс огвакытэ кышкатскизы вал, коммунистъёс соослэсь кичӧлтонзэс асьсэлы каризы шуыса. Та ласянь огкыл шедьтэмын-а? - Зэм, сыӵе вераськонъёс потазы. Но Центрысь кык кивалтӥсьёс ог-огзэс валазы кадь. Удмурт Республика сярысь ке верано, профсоюзъёсын ми ӵош ужаськом, нокыӵе вожвылъяськонъёсмы ӧвӧл. Ӵош мыном Кун Кенеше быръёнъёсы но. Со дыре ик профсоюзъёсты горд буёлэн буяны ми ум тыршиське. Котькудӥз нуоз ас удыссэ, ог-огдэ валаса но юрттыса. - Улонлэсь кудпала шонтэмзэ шӧдыса, Москваысь куд-ог политикъёс, кылсярысь, Владимир Шумейко но мукетъёсыз, коммунистъёс, профсоюзъёс пала дурбасьто ни. Кызьы учкиськоды сыӵе "юрттӥсьёсты" шоры? - Шумейколэн, кызьы адӟиськоды, политической аренаын кизилиез бездӥз ни. Но солэн умоесь кусыпъёсыз кылемын на куд-ог тодмо адямиосын, кылсярысь, генерал Николаевен. Соослэн вужерзы сьӧры мыныса малпа но ассэ кызьы ке но возьматыны. Шумейко кадь шонаськисьёс ӧжыт ӧвӧл. Сыӵеосты бордысьтымы палэнтыны капчиен луоз, дыр, но ми азямы мукетгес ужпум пуктӥськом: тросгес ужано калыкен, мэръёсын, губернаторъёсын, кужыммес юнматон на будэтон понна. Дыр ваньзэ интыяз пуктоз шуыса малпасько. - Кыӵеен адӟиськоды вуоно Кун Кенешез? - Мед со ужалоз республикамес азинтон бордын: лэсьтоз сомында, кӧня лэсьтыны луоно. Вуоно быръёнъёслы ми, азьвылэныз ӵошатыса, мукет сяменгес дасяськиськом. Калык ачиз мед ӵектоз депутатэ кандидатъёсты, партийность шоры учкытэк. Коммунистъёс юрттыны дась. - Примаковлэсь кабинетсэ тӥ огдырлы быръем правительство шуиды вал. Али кыӵе дунъет сётысалды? - Шонергес вераса, туала правительство - со Ельцин кивалтон аръёсысь Ельцин бере кивалтон вакытэ выжон, переходной правительство. Ужзылы дунъет сётыны вазь на, озьы ке но, куд-ог воштӥськонъёсты пусйыны луэ ни. Кылсярысь, Россилэн кунгожъёсыз вылын воштэмын 3 процентъем выт бичан, со умой ни. 2005-тӥ арозь дугдытэмын агропромышленной предприятиослэсь пунэмаськонъёссэс берыктон, сӥль но йӧл продукцилы кулэстэмын ватсаса налог тырон. Таизэ ӝутъяз Кириенколэн кабинетэз. Вераны кулэ, Кун Дума, депутатъёслэн-коммунистъёслэн фракцизы туала правительстволэн но котькуд вамышеныз соглаш ӧвӧл. Огкылэ ми ум вуэ городын улӥсьёслы музъем понна налогез 4 поллы будэтонэн. Со лэсьтӥське бюджетлэсь пасьёссэ кышъян вылысь. Нош ик калык чотын. Примаковлэсь кабинетсэ эскером-учком 1 январёзь, отӥяз дунъет но сётыны, кылзэ но чурытгес юаны луоз ни. - Республикаысьтымы бюджет удысын ужасьёс пӧлысь тужгес но секыт югдуре вуэмын дышетӥсьёс. Соос вань ӧсъёсы йыгаськизы - пайдаез ӧвӧл, табере юрттэт курыса вазисько коммунистъёслы. - Дышетӥсьёслэсь мылкыдзэс валаны секытэз ӧвӧл: соосты та калэ вуттон - Удмуртия понна - трагедия. Мукет ласянь ке верано, егит поколениез дышетон Россилы кулэ ӧвӧл. Кызьы тае валэктод на? Правительство дышетӥсьлэсь ужзэ уг дунъя, уг дунъя со шахтёрез но, врачез но, музонъёссэ но. Ельцин дышетӥсьёсты быръёнъёс дыръя кык пол ас вылаз ужатӥз. Али кулэлыксы быриз. - Озьы ке но, куанер дышетӥсьлы кинлы осконо на? - Кызьы шуо, выись мурт ачиз гинэ ассэ утьыны быгатоз. Дас ар ӵоже Удмуртилэн кивалтӥсьёсыз, керпотонзэс вормытэк, Москва азьын татысь зэмос югдурез ватыны выризы. Центрын уго дунъя интыысь кивалтӥсьёслэсь ас кожазы ужаны быгатэмзэс. Военно-промышленной комплекс быдэсак куашкам бере, но дотациостэк кыльыса, Удмуртия кураськись, ишакъёс радэ шедиз. Отысь озьы гинэ табере уд поты. Шонерзэ ке верано, республикамы экономика ласянь туннэ чигназ ни 50-тӥ аръёсы. Вань луонлыкъёсмес, узырлыкмес но кутыны ум быгатӥське, сое юнматон понна. Пичи ужбергатон Москваын, кылсярысь, бюджетлэсь 40 процентсэ возе. Со ик мынэ уждун тыронэ но. - Вераськон мынэ, компартилэн Удмурт ёзэз ас адямиоссэ Правительствое дася шуыса. Со шонер-а? - Шонер. Алигес ортчем республиканской пленумын ужпум ӝутэмын вал Кун Кенеше быръёнъёсъя но кивалтон удысэ коммунистъёсты юнматонъя. Оскымон но ужын, улонын эскерем адямиосмы асьмелэн ӧжыт ӧвӧл. Соосты шара вералом: Кун Кенешысь Эскерон палаталэн кивалтӥсез Михаил Шишкин, Эскерон кун комитетлэн кивалтӥсез Александр Кузнецов, депутатъёс Юрий Семенов, Александр Бегунов но куд-ог мукет эшъёс. Компартия властез быдэсак кияз кутоз шуыны уг луы, со понна кужыммы тырмыт ӧвӧл на. Вань мукет но мугез. Туала депутатъёс пӧлысь, мон чакламъя, ог 90 процентэз нош ик нюръяськозы мандат понна, интызэс озьы гинэ сётэмзы уз поты. - Удмурт парламентэ, тӥ малпамъя, кӧня коммунист шедьыны кулэ? - Туэ гужем интыосын быръёнъёс дыръя народно-патриотической кужымъёс 29,9 процент басьтӥзы, парламентын куинетӥ люкетэз луыны кулэ шуыса оскисько. Л. МЕДВЕДЕВА. "Удмурт дунне" - 80 Праздник дыръя мар но уг лу, Сое мадьса быдтод-а? Озьы кырӟалозы вал удмуртъёс вазен. "Удмурт дуннелэн" 80 ар тырмемезлы сӥзем нуналъёс мышкамы кылизы. Ваньзэ мадьыса зэмен ик уд быдты. Тачакез лыдӟисьёсмы милям ужрадъёсамы лыктыны ӧз быгатэ. Соин ик куд-ог учыръёсты выльысь тодэ вайыны кулэ, вылды. Нырысь ик верам потэ сӥё-дано ӝыт сярысь. Пӧртэм мугъёсын сэрен сое ортчытоно луим комсомоллэсь вордскемзэ пусъён нуналэ, 28-тӥ октябре. Пичияк кышкамы вал: ужан вакытэ ик, 16 часэ, калык люкаськоз меда? Юнме курдаськеммы. Удмурт кун филармонилэн залаз буш интыос ӧй вал. Амалтэк тодэ лыкто музон газетъёслэн таӵе ужрадъёссы. Данакез лыдӟисьёссы городын уло ке но, залэз уг тырмыто. Кыкетӥ юан: дорамы вуылыны дыр шедьтозы-а вылӥ адямиос, азьвыл комсомолецъёс? Шедьтӥзы. Сюлмысь ӟечкылазы Правительстволэн Тӧроез Павел Вершинин, Кун Кенешлэн Тӧроезлэн воштӥсьёсыз Владимир Пономарёв но Алексей Красильников (Тӧро Александр Волков Ижын ӧй вал), Россиысь Кун Думалэн депутатъёсыз Михаил Кошкин но Андрей Солуянов. Ӟечкыламеныз ӵош Павел Николаевич редакцимес шумпоттӥз кык кузьымен - чебер суредэн но висъяно квартираен. Ӟоскыт сэрегъёсын уно аръёс ӵоже курадӟись эшъёсмы табере чебер уйвӧтъёсы выемын. *** "Удмурт дуннелы" куке-соку 80 ар тырмоз шуыса, ми тодӥськом ни вал 1996-тӥ арын ик. Соку ик басьтӥським дано нуналлы дасяськон борды. Малпам дорамы 1918-тӥ арысен ужам адямиослэсь списоксэс лэсьтыны. Азьвыл ик тодысалмы ке та ныпъетлэсь сокем секыт луонзэ? Кин ке верасал ке, кызетӥ аръёсы гожъям бумагаос отчы-татчы пазямын шуыса? Суй-пыдмы амалтэк юскиськысал. Син кышказ, ки лэсьтӥз. Сюрс муртъем списокмы-"зарнимы" - дась! Та ужмылэсь дунзэ уката валамы, мукет редакциос сыӵе список лэсьтыны мылкыд карыку. Секыт уж бере кутским капчиезгес борды - авторъёслэсь списоксэс дасян борды. Таиз но пӧрмиз. Берло куамын ар ӵоже рабселькоръёсмы ог 900 кузя люкаськизы. Таиз - "азвесь" список. Бадӟым кужым! Соос юрттэмъя, урод газет поттыны сьӧлык луысал. Кема малпаським кинэ куное ӧтён сярысь. Ӟуч редакциослы умой: городысь данакез предприятиос но фирмаос, асьсэды шарае поттон вылысь, газетчиосты юлтош карыны выро. Нош ми доры гуртъёсысь тросэз-а кивалтӥсьёс лыктыны быгатозы? Городысь кузёос "кто вы такие, удмурды?" уз шуэ-а? Вылаз ик, праздник ортчытыны соослэсь коньдонэн яке ваньбурен юрттэт курид ке. Озьы-а, тазьы-а, нош вазиськоно адямиослэсь списоксэс лэсьтӥм. Тазэ коть зарни, коть азвесь, коть туй яке ыргон шу, нош соостэк радъям ужрад зумыттэм шыд кадь луоз. Бызьылыны кутским пӧртэм заводъёстӥ, районъёстӥ, банкъёстӥ, инспекциостӥ. Озьы пумен-пумен вордскиз но будӥз юрттӥсьёсмылэн лыдзы. *** Нялтас мынӥз мукет уж. Ӟечкыланъёсын гинэ кӧтыд уз тыры. Люкаськемъёсты шулдыртыны но кулэ на. Дас ар талэсь азьвыл, газетлы 70 тырмыку, ми тазьы карим: пумиськонлы сценарий лэсьтӥм асьмеос, нуизы сое тодмо артистъёс - кышномурт но воргорон. Оглом урод ӧз пӧрмы ужрадмы. Огез гинэ ӧзгес кельшы. Сценарийын кылын-кылын уд вера, ӧтемъёс пӧлысь кыӵе организациос кыӵе кивалтӥсьёс лыкто, кызьы соослэн нимтулзы. Тон, шуом, витиськод директорез, нош сцена вылэ тубе отделэн кивалтӥсьлэн юрттӥсез. Сыӵе "нештатной" югдурын актёръёс копак шальтрало: фирмалэсь нимзэ сурало, отысь адямиез уг тодмало, верамзы лекос осконтэм кылӥське. 1993-тӥ арын, "Удмурт дуннелы" 75 тырмыку, шуим: пӧламы амало муртъёс трос. Редакциосысь ик шедьтом кылтэчыосты, арганэн но гитараен шудӥсьёсты, кырӟасьёсты но эктӥсьёсты. Кылдытӥм "Ӝакыос" ансамбль. Режиссёре ӧтим матысь эшмес Валерий Митрофановез.Таиз трос ужаз ӝытмес нуисен Елизавета Камашеваен. Ужрадмы сокем вольыт кошкиз - Камашева одӥг нуналскын дано луиз. Софи Лорен яке София Ротару сямен (тусызъя соослы кельше). Зэм, сӥ-данэз отӥяз милемлы пумитгес берытскиз. Ассэ уно калык азьын возьыны дышетӥм гинэ - Камыш Лизамес Правительствое ӝутӥзы. Табере картузмес кыдёкысен куштӥськом но "Елизавета Николаевна, ӟечбуресь-ӟечбуресь" шуиськом. Туэзэ ӝытмес нуыны сое ӧтён сярысь веранэз ик ӧвӧл ни. Табере, кинэн воштод Камашеваез? Тодмо психолог Дейл Карнеги гожъяз балетысь одӥг режиссёр сярысь. Со, пе, син шоры копак йӧтӥсьтэм дыдыез быръе но сокем пызьыръя - прима-балериналы пӧрмытэ. Маин ми пӧртэмесь? Син шорамы йӧтӥз алигес гинэ программистэ кутэм нылмы Людмила Юртеева. Мугорыз ӝужыт. Зэм, ымысьтыз куараез уггес поты. Малы? Школаяз кыӵе ке ужрадэз нуыны оскиллям но - куашкатэм. Со дырысен сценаез адӟонтэм каре. Татариын но Башкириын будэм удмуртъёс Удмуртиысь удмуртъёс борды шуген дышо. Нош дыр ортчемъя, кыкетӥ шоканзы усьтӥське. Удмурт сямен лабыртыны нокытын уг возьдасько. Казань палась вуэм Юртеевалы ачиз улон юрттӥз. Уж вискын Удмурт кун университетын дышетскемезъя, дӥсьтонэз будӥз, куараез юнмаз. Редакциын ӟучысь удмуртэ берыктӥсь луиз. Озьы ар пала сое дасямы ӝытэз нуыны. Азьвыл программистлэн йыраз зол программа пуктӥськеммы. Ужрадмылэсь куинь нунал азьло ас вылаз пӧзись ву кисьтыса но, больничной лист басьтыса но, юри вурем дэремзэ мырдэм-мырдэм дӥсяса, ужрадмес нуо, шуиз. Шуг йӧтӥз солы сцена вылын куз бырйыны. Йӧно чебер пияшмес, ассэ калык азьын возьыны мед дышоз шуыса, кылем гужем вылтӥ одӥг арнялы стажировкае ыстӥм Удмурт телевидение. Нош со отчы копак ужаны выжиз. Улоназ шуг-секытъёс кылдыку, пиёклы весь юрттӥм кадь. Нош экемы... Сылэ ай! Юртеева возьматэ ке газетлэсь егит дырзэ но ӵуказе нуналзэ, малы ми вунэтӥськом ортчемзэ? Газетлэн редакторезлы Василий Михайловлы алигес 75 ар тырмиз. Паспортсэ ӧд учкы ке, 60 но уд сёты. Кышноос но весь синмасько ай. Фронтысь азьвыл артиллерист, "войналэн инмарез", туннэ но ӧрӟи кадь адӟиське. Кин-о алоз сое сцена вылэ ӝутонлэсь. Алӥсь сюриз шӧдтэк шорысь. Со - ачиз Василий Михайлович: - Мон пересь ни. Егитъёсты тачак, монтэк но шедьтоды ӝытэз нуись. Тазэ ӝыны ар сюлвороно луим. Редакциын али ужа 36 мурт. Ӵапак сомында кузя ик - дорысьтымы пенсие кошкемъёс. Кыӵе соос шумпотысалзы, асьсэ кивалтӥсьсэс сӥё-дано ӝытлэн тӧр шорысьтыз адӟыса. Табере быръёно артистъёсты. Азьло соосты пӧртэм интыосысь шедььылӥм. Трос юрттылӥз "Италмас". Таяз учыре "бергатыны" малпамы сокем ик данэ потымтэ муртъёсты. Алнаш ёросысь ӧтим Анна Плотниковаез. Кенешимы: ӟечкыланъёс куспын вис кылдӥз ке, со котьку дась медло сцена вылэ потыны. Воткаысь Иван Марковез дэмлаз мемиез, телефон пыр редакцие жингыртыса. Режиссёр ӵектӥз на Пичи Пургаысь "Зарни шепез", кӧня ке пинал артистъёсты но филармониысь солистъёсты. Вань ни классика но, калык кырӟан но, эктон но, туала эстрадалы тупась маке но. Азьлань! Вал-а ужрадын кыӵе ке шекез? Шек уд шуы, но... Милям редакциямы 25 ар ужа ни тодмо суредась, кун премилэн лауреатэз Леонид Прозоров. Егит дыръяз кырӟаз телевиденилэн но радиолэн хоразы. Баритонэз туннэ но синмаськымон. Репетициын "Поръялоз, поръялоз" кырӟанзэ кылзыса, режиссёр дэмлаз вал сое но концертэ кыскыны. Леонид Алексеевич, сцена вылэ дасяськыса, лумбыт ӵоже я ӟаректылӥз, я гордэктылӥз. Ужрадмы лекос кема кыстӥськемен,калык азе ӧм поттэ. Кин тодэ, оло ӵапак таин йырин Прозоров та нуналэ ик висьыны усиз. Котьма ке но, умоез тросгес вал. Газетмы мадиз ни ӟеч эшмы Августа Уткина сярысь. Телевидениын сямен ик, ми дорын но асьме парикмахермы вань кожалод. Та ӝытэ солэн киыз котькулэсь шаплы бызьылӥз. Нылъёсмы син азьын йыръёссэс урдӥзы, пельпумъёссэс шонертӥзы. Ӝытэ лыктэм воргоронъёс мальдӥзы: - "Удмурт дуннеын" кадь чебересь нылъёс нокытын ӧвӧл. Нош со Юртеевады кытысь-о - чеберинаысь-а, театрысь-а, модая салонысь-а? Нылъёсмес ушъяло бере, ми, редакциысь пиос, лӧптӥськом. Ӟольгыриос пӧлын ми но ӟольгыриос ке, паваос пӧлын ми но павлинъёс луим. *** Мадёнмес выльысь выжтӥсько ӟечкыласьёс вылэ. Олокӧня дасо люкаськизы. Кин малпалляз, "Удмурт дуннелэн" эшъёсыз сомында шуыса? Соосты оглом даслэсь уно люкетлы висъяно луим: республикаысь вылӥ кивалтӥсьёс но Кун Думалэн депутатъёсыз, министерствоос, комитетъёс, Кун Кенешлэн депутатъёсыз, почтаос, правоез утисьёс, управлениос, коньдон бергатӥсьёс, хозяйствоез нуонысь кивалтӥсьёс, инспекциос, ивор вӧлмытон ёзъёс, районъёсысь куноос, обществоосъя огазеяськонъёс, дышетон ёзъёс. Гожтыны гинэ капчи. Ваньзэсты радъяно, черодэ пуктоно, витен-дасэн ӵош ӧтьылоно. Серем пыр вераса, черодмес тазьы тупатӥм. Нырысь ик пото соос, кинъёсты ми гажаськом но кинъёслэсь оло курдаськомгес, собере - кинъёсты гажаськом но кинъёслэсь ум кышкаське, отӥяз - кинъёсты гажаськом но куддыръя асьмеос кышкатъяськом. Нош дышетон ёзъёсты пумаз карим. Яратымтэенымы сэрен ӧвӧл. Ми, школа но университет пыр потэмъёс, ӟеч тодӥськом соослэсь чиданзэс. Студент, пе, сиськытэк улэ толэзь пала, дышетӥсь - куинь толэзьзэ но. Милям ужрадамы куинь час сокем уз йӧты. *** Табере - куд-ог валантэм учыръёс сярысь. Учкиськод ӟечкыласьёслэсь но юрттэт сётӥсьёслэсь нимтулъёссэс. Удмурт пельёс дышымтэесь соослы. Кылсярысь: Валерий Фридрих, Виктор Каш, Михаил Камалетдинов, Валерий Сенчёнок, Евгений Богомольный, Анатолий Марченко... Нош малы, малы сокем ӧжыт вал Корепановъёс но Вахрушевъёс? Зэм, куд-огез милемлы юлтош кариськиз, вылды, Кун Кенеше быръёнъёс матэктэмен валче. Нош со понна янгыше уськытод шат? Газет - бырйисьлэсь сюлэмаз нуись выж. Тае ӟеч валазы ни удмурт луисьтэм кивалтӥсьёс. Асьмеос гинэ куддыръя мултэс кема бабиськом. Муртъёсты пыкылэмен ӵош вунэтыны уг яра редакцилэсь но янгышсэ. Эли-кеби вырон сяменымы но дыр окмымтэен, сцена вылэ но, музон ужрадъёсы но ӧтьытэк кельтӥмы газетмылэсь куд-огзэ матысь эшъёссэ. Юри озьы ӧм каре - зэмен ик шӧдтэк кылим. Соос шоры туннэ но меӵак учкыны ум дӥсьтӥське. Таин ӵош ик меӵкыт кыл вераны ӧм дӥсьтэ редакция котырысь ӧтьымтэ куноослы. Мар бен карод? Ми егитэсь на - 80 гинэ. Улом, дышетском, юнмалом, кыдалом,. АЛЕКСЕЙ ШКЛЯЕВ. Герд Огшоры "Кизили" журналлы дас ар тырмон азьын (1996) ми тодмо суредасьёслы одӥг юанэн вазиським: "Мар карысалды тӥ, улылымтэ шормуӵе сюрысалды ке?" Россиысь сӥё-дано, элькунысьтымы калык художник, журналмылэн матысь эшез, юрттӥсез Менсадык Гарипов юанмылы соку ик таӵе валэктон сётӥз: "Йыр вадьсын пӧсь шунды пиштэ. Котырак лыз зарезь. Кемалась вал ини шутэтскеме. Пыласькисько зарезьын, собере мугорме шунтӥсько шунды сиос улын. Кӧня ке улыса, выльысь пыласькисько. Нош ик шунтӥськисько. Арняскын таӵе улон акыльтӥз. Пӧсь куазь но уг яра ни, сием но потыны кутскиз. Бырйи ӵошкытгес инты, музъем вылэ суредай бакча сиёнъёс, узы но боры, соос вӧзы ватсай на лобась пилемъёсты. Вӧсяськи инмарлы. Соку ик шуныт зор коттӥз музъемез, бакча сиёнъёсы улӟизы но син шорын ик будыны кутскизы... Ческыт потыса сии бакча сиёнъёсты. Нош собере умме усиськем. Кӧня кӧлӥськем, уг тодӥськы. Одӥг вакытэ сайкай. Учкисько котыр. Адӟисько ваньдэс тӥледыз. Сыӵе шумпотӥ, нош ик тӥ пӧлын шуыса". Журнал бамысь та чуръёсты али лыдӟеме бере, сюлэмы ик оломар луиз. Редакциысьтымы кабинетлэн ӧсэз тани-тани усьтӥськоз но, отӥ Менсадык Гарипович пыроз кадь. Ӵуж йырсием, тӧдьы тушо. Выжыкылысь пересьлы укша. Нош киосыз копак егитэсь. Мылкыдыз пинал муртлэн выллем. Мынам син азям со сыӵеен кылиз. Милемыз, "Кизили" журналэз дасясьёсты, Менсадык уно пол вуттылӥз аслаз пинал дыраз. Суредъёсыныз но, мадёсъёсыныз но. Кыӵе ке тунсыко учыр сярысь каньылак гинэ вералоз, серекъятоз, аслаз серемез но уг поты. Собере мукетъёслэсь мадемзэс кылзоз. Паймымонзэ кылэ ке, "фантастикус!" шуоз но гор-гор серектоз. Ӵапак сыӵе кылын паймемзэс вералляллям мадьяръёс, М. Г. Гариповлэсь суредъёссэ адӟыса. Ужъёсыныз ӵош соку ачиз но ветлӥз Венгрие. Вашкала ӵыжы-выжыосмы Менсадыкез асьсэ доры кӧня ке толэзьлы суредаськыса улыны но ӧтё вылэм. Дунтэк возьысалзы. Менсадык Гарипович таки ӧз ваньмы. Одӥг пол Менсадык тодаз ваиз пичи дыръяз "пислэг вӧй" сиемзэ. Милемлы со учыр туж тунсыко потӥз. "Та верамдэ гожтыса вай, "Кизилие" поттом",- ӵектӥм соку. Куронмес суредась пальпотыса пумитаз, но быдэстытэк ӧз кельты. "Пислэг вӧй" ужез журнал баме потӥз, солы суред Менсадык ачиз ик лэсьтӥз. "Пислэг вӧй" мадёсын огшоры учыр возьматэмын кадь. Нырысь-валысь гинэ со озьы потэ. Мургес малпаськиськод ке, отысь адӟыны луэ вуоно суредасьлэсь будон сюрессэ но, малпаськон ӧрзэ но, дунне шоры учконзэ но. Менсадыклэн суредъёсыз но огшорыесь кадь. Куд-огъёссэ дышетскись пинал лэсьтэм, кожалод. Со ОГШОРЫ бордын ик Гариповлэн кужымез, талантэз. Бадӟым, мур малпанэз но со огшоры, ваньмызлы валамон возьматыны быгатылӥз. Удмурт сямъёсты, йылолъёсты но мукет калык пӧлы шыпытак гинэ вуттылӥз, соослэн сюлэмъёсазы сюресъёс шедьтылӥз... Тӧдьы кызьпуо арамае Менсадык огдырлы гинэ кошкиз. Мыным озьы потэ. Берытскыса дано суредась котькудмес кылзыны быгатоз. Солы табере нокытчы дыртыны. Ульфат БАДРЕТДИНОВ, "Кизили" журналлэн валтӥсь редакторез. Югытлы, улонлы Николай Кузнецовлэн Куӟебай Герд сярысь "К свету... К жизни..." книгаез лыдӟисьёс кие нырысьсэ вуиз Москваын, быдӟым удмурт поэтлы, учёнойлы 100 ар тырмонлы сӥзем ужрадъёс ортчыку. Но асьме шаерын та книга туж ик тодмо ӧвӧл на. Таин валче декабре книгаен тодматон ортчытыны чакламын. Нош 6 ноябре Николай Кузнецов аслэсьтыз ужзэ кузьмаз Евгений Богомольныйлы, "Удмуртнефть" ОАО-лэн кивалтӥсезлы, книгваез поттыны юрттэмзы понна тау карыса. Автор тыршемен но му вӧй поттӥсьёс коньдон висъямен нырысьсэ тодмо луозы Сталин вакытысь архивной материалъёс но документъёс. Кылсярысь, печатламын Куӟебай Гердлэн пытсэт улэ сюремез бере следователен вераськемез, солэн но удмурт, ӟуч, коми, мордва, пор эшъёсызлэн улонысьтыз тодмотэм чуръёс. Куӟебай Герд сярысь книга кунсьӧрын но тодмо луэ ини. Тарту университетысь преподаватель Ева Тулуз, кылсярысь, пусйиз: быдэс дунне тодыны кулэ со вакытъёс сярысь, Москваысь гинэ ӧвӧл, кыдёкысь сэрегъёсысь но югдур шараямын мед луоз. Нош книгалэн авторез Николай Кузнецов Удмуртиысь му вӧй поттӥсьёслы тау карыса вераз, кунсьӧрын удмуртъёс сярысь тодӥзы Кузебай Гердлэн творчествоез пыр, нош табере со сярсь быдэс дунне. К свету... К жизни..." книга пыр тодоз. "Удмуртнефть" ОАО-лэн пресс-службаез. Наталь "Семья ке юн, улон но йӧн" конкурсэ Корка но ӝуто, нылпи но вордо Паймыса но синмаськыса учкисько гуртысьтымы Корепановъёслэн семьязы шоры. Юрий Николаевич но Ираида Николаевна дас вить ар уртче, тупаса уло ни. Секыт улонлы ӝожтӥськыса уг уло, тыршо но тыршо. Кемалась ӧвӧл, выль корка потӥзы. Нош ӝоген сизьыметӥез нылпизы вордӥськоз! Чылкыт но утялтэм нылпиос шоры учкыса, та анай- атайлы гажан мылкыд гинэ кылдэ. Юрий Николаевичлэсь мон юай: - Кызьы дӥсьтӥськоды трос пинал вордыны? Али улон шуг, тросэз одӥгзэ но сюдыны ум быгатӥське шуыса бӧрдо ук? - Улон ноку но капчи ӧй вал. Мон ачим но сизьыметӥез пинал. Соин ик аслам но сизьым нылпие луоз шуи. Нылпи ке ӧвӧл, мар семья со? Ми шумпотӥськом, сомында чырткем, чебер нылпиосмы будо шуыса. Огез дорын ӧвӧл ке, соку ик шӧдӥське ни - кин ке уг тырмы. Нош шуг-секытъёслэсь ми ум кышкаське - оскиськом асьмелы, пыд йылазы султытыны быгатом. Та семьяын ӧвӧл ог-огед вылэ чӧлскыса улон, ужез люкон, азьтэмъяськон. Юрий Николаевич ужа бригадирын. Азьвыл ужалляз электрик луыса, гуртысьтымы комсомол организацилэн секретарез но вал. Ваньмон дыръяз кузпалэзлы юрттэ. Ма, вуриськыны- керттӥськыны но туж усто пӧрмытэ! Нош Ираида Николаевналэн дырыз гуртпӧр бордынгес быре: пудоез утялтоно, бакчаез эскероно. Ӝытазе контораысь выж миськыны ветлэ на. Покчи пиналъёсты чаклан Маша вылэгес усе ни, со 9-тӥ классын дышетске. Анай-атайзэ "4" но "5" оценкаосын гинэ шумпоттэ. Нош Саша, со 7-тӥ классэ ветлэ, корка ӝутыкузы, атаезлэн самой бадӟым юрттӥсез вал. Секыт ик усиз ни пияшлы, но ӧз ӝожтӥськы. Ваньзэ сямен асьсэ коже лэсьтӥзы, липиськыны гинэ ужась ӧтчазы. Ма, пичи Такъян гинэ но (солы кык арес но ӧвӧл ай), туж юрттӥськиз ни - кортӵог но, мукетсэ но вае, бызьылыса ветлэ. Нош табере тани Корепановъёс югыт, шуныт коркан уло. Ӝытазе быдэс семья пуксе ӝӧк сьӧры - асьсэ пӧрам тортэн, сырен чай юо. Анайзы но атайзы пиналъёссэс уг сурало - котькудӥз шоры сётэм нимынызы вазисько: Саша, Маша, Паша, Даша, Алёша, Таня. Али нылпиосынызы уртче вордсконо нунызылы чебер ним утчало ни. Надежда КНЯЗЕВА. Шаркан ёрос, Ляльшур гурт. Тодматскон сэрег Аб. 251. Удмурт пиосмурт, 24 арес, 186/80, гороскопея Скорпион. Улӥсько гуртын, ужасько фермаын. Сямыя лякыт, ужез гажась, яратӥсько инкуазез. Тодматскысал ас ёзо удмурт нылашен, нылпиезлы пумит ӧвӧл. Возьмало фотографиен гожтэт. Аб. 252. Удмурт пиосмурт, 34 арес, вина уг юиськы, тамак уг кыскиськы, яратӥсько нылпиосты. Тодматскысал 25-45 аресъем лякыт сямо удмурт нылкышноен, кудӥз дась улон интызэ воштыны. (Ялонэз потаз ни - Аб. 207). Аб. 253. 56 аресъем шоро-куспо мугоро удмурт пиосмурт утча аслыз Ижысь кузпал. Ужамын школаын, журналистын, писатель, пукемын. Улон интызэ азьло семьяеныз люкытозязлы кулэ Ижын улон инты но прописка, али улэ город вӧзын. Редакцилэсь: Лыдӟисьёсмылэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен чылкыт конвертэ понэ - ыстомы кулэ адресъя. Тау тӥлед, эшъёс! Газетмылэсь вордскем нуналзэ пусйыны но праздникез радъяны коньдонэн но ваньбурен юрттӥзы таӵе организациос но соослэн кивалтӥсьёссы: 1. "Вараксино" тылобурдо вордон фабрика - директорез Геннадий ИТУНИН. 2. Акциосын "Буммаш" огазеяськон - валтӥсь директорез Валентин ЖЕБРОВСКИЙ. 3. Акциосын "Удмуртнефть" огазеяськон - быдэсъясь директор Евгений БОГОМОЛЬНЫЙ. 4. "Удмуртагропромсервис" огазеяськон - валтӥсь директор Валерий БЛАГОДАТСКИХ. 5. "Ижевские электрические сети" предприятие - директорез Михаил КУЧЕРЯВЕНКО. 6. "Восточный совхоз" (Завьял ёрос) - директорез Игорь ГАРАЕВ. 7. "Колос" эштос (Вавож ёрос) - директорез Владимир КРАСИЛЬНИКОВ. 8. "СБС-Агро" банк - директорез Игорь ОСТАНИН. 9. Тылпуэн нюръяськонъя управление - начальникез Михаил КАМАЛЕТДИНОВ. 10. Акциосын "Крезь" огазеяськон - валтӥсь директорез Владислав ЯКУПОВ. 11. "Красная звезда" колхоз (Пичи Пурга ёрос) - тӧроез Василий ОКУНЕВ. 12. "Воткинский винзавод" огазеяськон - директорез Виктор КАШ. 13. Акциосын "Сарапул-молоко" огазеяськон - директорез Татьяна КОРОЛЕВА. 14. Акциосын "Сарапул-мясо" огазеяськон - директорез Геннадий БЕРЕЗНЕВ. 15. Акциосын "Удмуртнефтьпродукт" огазеяськон - валтӥсь директорез Николай СЫЧЕВ. 16. Акциосын "Арама" огазеяськон (Пичи Пурга ёрос) - директорлэсь ужзэ быдэсъясь Владимир ОВЧИННИКОВ. 17. Кезысь пищекомбинат - директорез Евгений АРДАШЕВ. 18. "Дружба" колхоз (Ува ёрос) - председателез Василий ГОРЕЕВ. 19. Воткинскысь администрация - мэр Валерий ФРИДРИХ. 20. "Луч" эштос (Вавож ёрос) - кивалтӥсез Иван ПЕРЕВОЩИКОВ. 21. "Родина" колхоз (Грахово ёрос) - председателез Михаил КРЕСТЬЯНИНОВ. 22. Акциосын "Реммаш" огазеяськон (Глазов город) - валтӥсь директорез Николай ВЕРЕТЕННИКОВ. 23. "Свобода" колхоз (Селта ёрос) - председателез Алексей МЯСНИКОВ. 24. "Мир" эштос (Пичи Пурга ёрос) - председателез Анатолий ЕШКЕЕВ. 25. Акциосын "Завод минерально-фруктовых вод" огазеяськон (Ижевск город) - валтӥсь директорез Николай ПОЛЯНСКИЙ. 26. Акциосын "Сактон" огазеяськон (Ижевск город) - валтӥсь директорез Зоя СТЕПАНОВА. 27. Удмуртпотребсоюзлэн Пичи Пургаысь обществоез - кивалтӥсез Людмила ЧУНАЕВА. 28. Сарапулысь сур пӧзьтон завод - директорез Николай ЮШКОВ. Дуннеын ӟеч адямиос ичи ӧвӧл. Сое ми эшшо огпол валамы газетмылэсь 80 ар тырмонзэ пусъён нуналъёсы. Вакытлэн шугадӟонъёсыз шоры учкытэк, "Удмурт дуннелэн" эшъёсыз шедьтӥзы шаерысьтымы одӥгезлы арлыдо газетлы юрттыны луонлык. Озьыен, лыдӟисьёсмылэн радъёссы уата юнмалозы, газетмылы гожтӥськисьёс тросгес луозы, нош редакциысьтымы журналистъёс выль кужымен басьтӥськозы тунсыко материалъёс дасян борды. Тау тӥледлы, эшъёс! Сюлмысьтымы мылкыд кариськом азьланяз но ӟеч ужаны, вань малпанъёстэс быдэстыны. Шудбур но дэлет тӥледлы. "Удмурт дунне" газетлэн редакцияз ужасьёс. Ӧтиськом малпаськыны Анае аслам, нош атае? Мар со телегония? Кӧня адямиослы та юанэн вазиськылӥ - нокин уг тоды. Ачим но уг тодӥськы вал, киям та сярысь материалъёс сюрытозь. Жаляса верано луэ: "Удмурт дуннеысь" телегонилы сӥзем гожъямъёсты мон сак ӧй учкылы. Нош ужпум тани ма бордын вылэм. 150 ар талэсь азьло, выль пудо-живот выжы уськытон вылысь, зебраосты но валъёсты паръяса утчаллям. Талэсь номыр но пӧрмымтэ - одӥг чуньы но вордскымтэ. Опытъёс пумен вунӥллям. Али но соос сярысь ӧй вераськысалзы, дыр. Но... Кӧня ке ар ортчыса, зебраос улэ сюрылэм валъёслэн гожмо чуньыоссы вордскылӥллям. Малы меда озьы луэм? Атайзы но, анайзы но - огкадь буёло, нош чуньызы - гожмо! Паймем тодосчиос (учёнойёс) та учырез телегония нималлям. Берлогес ини тодосчиоста абдрамон мае ке адямиос вылын но эскериллям. Шараяллям: телегония, пе, асьме вылын, пудо-животъёсын ӵошатыса, золгес шӧдӥське. Трос воргоронъёсын улӥсь кышномуртлэн выль пиосмуртэн кӧлэмез бере, хромосом "жильыез" воштӥське. Котькуд воргорон отчы аслэсьтыз сямзэ кельтэ кадь. Валамон ини, нылкышно пинал вае одӥг адямилэсь, нош пиналыз пушкы каръяськемын уно музон пиосмуртъёслэн аспӧртэмлыкъёссы. Озьы семьяын вордске "мурт" нылпи. Ӵемысь озьыгес кошке: нылъёсты алданы быгато кескичгес, йӧнтэмгес, шаплыгес пиос. Соос огдыре ик утчало трос шулдыръяськон амалъёсты - валесын яратонэз, юонэз, кысконэз. Тӥни малы быдэс дуннеын будэ наркоманъёслэн, юисьёслэн, шузиослэн лыдзы. Милям, вуоно журналистъёслэн тодэммы потӥз: мал малпало туала егитъёс телегония сярысь? Кинлэсь юалляським шуоды? Асьмелэсь асьмеос. Ас малпанъёссэс верало Удмурт кун университетлэн ньылетӥ курсаз дышетскись нылъёс Постникова Лариса, Мельникова Елена, Иванова Роза (верамъёссэс сётӥськомы нимъёссэс шараятэк). - Нылъёс, кыӵе малпанъёсты кылдӥзы, та ужпумен тодматскыса? - Мон но тросэзлэсь эшъёсылэсь юай телегония сярысь. Соос но, мон сямен ик, нырысьсэ кылӥськом, пе. Пушказы кыӵе ке но малпанъёс вордскизы, дыр. - Нырысьсэ лыдӟи телегония сярысь. Туж тунсыко потӥз. Опытъёс, пудо-животъёс вылын но эскеремын ни. Оскон малы ке но туж ӧжыт. Малы ке шуоно, телегония сярысь трос уг верасько, уг гожъяло. - Мон ӵем лыдӟисько "СПИД-инфо" газетэз, отын олокыӵе но та выллем учыръёсты эскерыло, но малы ке телегония сярысь ужъёсты ӧй на пумиталля. - Мыным материалъёс ӧз яралэ. Телегония сярысь малы ке но пиосмуртъёс гинэ гожъяло. Мон ӧй вала, соослэн малы ке кышномуртъёслы йырзы кур-а, мар-а. Гожъясьёслы осконо ке, адями дуннеысь вань сьӧлыкъёс понна нылкышно янгыш. Нош кытын пиосмуртъёс? Соос кылчинъёс кадь чылкытэсь шат? Асьме улонын котьку озьы луэ, лэся: пиосмуртъёс - кузёос, соослы котьма карыны яра. Яра нуналлы быдэ нылъёсты вошъяны - соос ик чылкытэсь. Мон, нылмурт, та ужпумез воксё мукет сямен учкысал. Соин ик газет-журнал бамъёсысь адӟеме потэ вылэм телегония сярысь нылкышно киын гожтэм ужез. - Валамон ини, кышномуртъёс гожтысалзы ке, югдурез мукет сяменгшес возьматысалзы. Татын кышноос гинэ янгыш шат? Мон сямен, ӧвӧл. - Татын тунсыкл ужпумез ӝуто. Но мыным осконтэмгес гожтэмын кадь потэ. Верамын 150 ар талэсь азьло зебраос но валъёс вылын ортчытэм опытъёс сярысь. Нош али таӵе ужъёс нуисько на меда? Ас синмыным адӟытэк, мыным шуг оскыны телегония шуонлы. - Кӧня ке кыл вераме потэ пуштросэз пумысен. "Кызьы юн семьяын вордске мурт пинал?" ужын таӵе чуръёсыз вань: "Телегония асьмемыз, пиосмуртъёсыз, малпаськонэ уськытыны кулэ: асьме пиналъёсмес-а вордӥськом, но малы соос милемыз мурт каро?" Мон сямен, мурт карон чик но та бордысь уг поты. Кылсярысь, куд-ог семьяос нылпи юртысь вордос басьто. Озьы ке но, атай но нылпи кусыпъёс туж умоесь луо. Куд-огезлэн аслаз пиналыныз ик кылыз пичи но уг тупа. Ваньмыз ачид бордысь потэ. Кызьы нылпилы вазиськид - озьы ик со но. Куд-ог пиосмуртъёс, та материалэз лыдӟыса, оло, малпаськонэ усёзы: асьсэлэн-а пиналзы, ӧвӧл-а. Озьы нылпи но воргорон куспын борддор уз ӝутӥськы-а? - Кызьы малпаськоды, нылъёс, мар сётэ та тодон-валан лыдӟисьлы? - Адямиос пӧлын котькыӵеез вань. Куд-ог нылъёс малпаськозы та пумысен. Асьсэзыз, оло, ӝикытгес но возьыны кутскозы. Угось йырдэ ыштыса юмшан ноку умое уг вутты. Нош куд-огез серектоз гинэ, шедьтӥллям мар сярысь гожъяны шуыса. Но кин азьланяз юн семья кылдытыны малпа, солы таӵе визьнод пайдаё луоз. - Пиос, тае лыдӟыса, нылъёсынызы (кышнояськемъёсыз - кышноосынызы) керетон поттозы, дыр. Пиослы телегония сярысь тодоно вылымтэ. - Дунне вылын ӧвӧл сыӵе ужпумъёс, кудъёссэ тодыны кулэ яке нылкышноос гинэ, яке пиосмуртъёс гинэ. Котькызьы ке но, пежъянэз мешоке уд ваты. Та сярысь таӵе лек мылкыдын гожъяно вылымтэ, дыр (кызьы верамын ни, вань сьӧлык куштэмын нылкышноос вылэ). Тае лыдӟыса, кӧня-кӧня семьяосын сурым ӝутскоз, уката ик вожась пиосмуртъёс ласянь. Нылкышноос гинэ янгыше уз кыле, нылпиос но. - Нош ку, тӥляд малпамдыя, нылъёсмурт но пиосмурт матысь кусып возьыны быгато? Яра-а нылъёслы бызьытозязы пиосын кӧланы? - Ку, кӧня арескысен? Мон сямен, нылаш ачиз та сярысь тодыны кулэ. 13 аресысен ныл пиен кӧла ни ке, мон сое номыр уг шуы. Солэн улонэз аслаз. Оло нош со дась ни сыӵе улонлы?! Умой адями уг шуы сое но, кин ныл данзэ бызьытозяз уте. Но таӵеосыз, мон малпамъя, трос ик ӧвӧл, дыр. Но вань... - Нылмуртъёс ваньзы огкадесь ӧвӧл. Котькудӥзлэн аслаз малпанъёсыз, аслаз улон шоры учкемез. Куд-ог нылъёслы, школаын дышетскыкузы ик, пиен кӧлан тунсыко потэ ни. Соин ик "веръяны" но дырто. Но мугорзы дась ӧвӧл на. - Мынам малпамея, егит адямиос огзылы оско, ог-огзэс ярато ке, быгато ни матысь кусып возьыны. Яра-а ныллы бызьытозяз пимуртлы сётскыны? Ваньмыз яратон бордысь потэ. Адями, оло, бызьытозяз улонысьтыз тужгес бадӟым яратонэныз пумиське. Малы солы уг яра соин матысь кусыпъёсы пырыны? Но мон чылкак умойтэмен лыдъясько таӵе учырез: ныл, адямиез пыр-поч тодытэк, соин кӧлыны соглаш луэ. - Мон малпасько, туж ӧжытэз гинэ нылъёс сюанзы дырозь чылкыт кылё. - Ӧжытэз? Мыным потэ - тросэз... - Мынам кылэме вань: пи, пе. куштэ "сьӧлыктэм" нылэз, тон, пе. та дырозь нокинлы кулэ луымтэед - мыным но кулэ ӧвӧл. - Шузиос гинэ озьы шуыны быгато, дыр. - Мынам трос тодмо пиосы, соосын мон та ужпумъя шара вераськыны быгатӥсько. Соос пӧлысь одӥгез гинэ вераз: "Мыным сьӧлыктэмез кулэ ӧвӧл". Но мугез воксё мукет - арсызъяськеме-юрӟымъяськеме, пе, поты. Огез но ӧз оскыты: сьӧлыктэмез гинэ кулэ. Огез валэктӥз: "Тодмо нылаше сьӧлыктэм ӧвӧл ке но, мон шӧдӥсько: со мынам кенма утчам адямие. Малы мон сое куштом? Котькин ас улоназ янгышъёс лэсьтылэ ук. Мон сое кышно басьто". х х х Таӵе пӧрмиз милям телегония котыртӥ вераськонмы, пичи котырес ӝӧкмы. Татын, оло, номыр вылез ӧвӧл. Нылъёсын ваньмыз сямен шараям малпанъёс кинэн ке но верамын ини. Кин ке, оло, аслыз трос выльзэ усьтоз. Кин ке - чик тодмотэмзэ уз шедьты, но ас улонэз сярысь мургес малпаськыны ӧдъялоз. Телегония пумысен нылъёсын верам кылъёс - со измем малпанъёс ӧвӧл. Тӥляд, гажано лыдӟисьёсмы, мылкыдды, оло. Копак мукет. Гожтӥз Елена КИТОВА, Удмурт кун университетын дышетскись. Ӟечкыласьком! Печатья но иворъёсъя министрлэн воштӥсез Назира Салихзяновна Касимова пусъе вордскем нуналзэ. Ӟечкыласьком зарни дауреныз но Удмурт Республикаысь культура удысысь дано ужась ним басьтэменыз. "Удмурт дунне" газетлэн редакциез. Азинскон но тупаса улон понна Удмурт Республикалы 78 ар тырмонлы сӥзем сӥё-дано кенешын Удмурт Республикаысь Кун Кенешлэн Тӧроезлэн А. А. Волковлэн докладэз Гажано эшъёс! 1920 ар 4 ноябрь - удмурт калыклэн улонысьтыз быдӟым нунал. 78 ар талэсь азьвыл Россиысь Центральной Исполнительной Комитетлэн но Калык Комиссаръёслэн Кенешсылэн Декретэнызы Вотской автономной область кылдытэмын вал. Удмуртилэн историяз та нунал Удмурт Республикалэн кунлыкезлы азинскыны кутскон сётӥз но солэн кун праздникез - республикалэн нуналэныз - луиз. Удмуртия данъяське ортчем аръёсы Россиысь тужгес азинскем улосъёс пӧлы пыременыз. Социальной удысэз, экономикаез но культураез азинтонын вормонъёс басьтэмез понна со пусъемын Ленин орденэн, Октябрь революция но Калыкъёслэн эшъяськонзы орденъёсын. Республикаысь валтӥсь предприятиос: "Ижмаш", Воткинскысь машзавод, Ижевскысь электромеханической завод, Ижевскысь радиозавод, Чепецкой механической завод - странамылэсь обороназэ туннэ но кужмоято. Та данъяськымон нуналэ асьмеос гажаса тодамы ваиськом ваньбур поттонэз радъясьёсты Иван Фёдорович Белобородовез, Владимир Геннадьевич Садовниковез, Игорь Сергеевич Стыценкоез, Николай Иванович Палладинэз, Сергей Николаевич Архангельскиез, Александр Макарович Демидовез, республикалэсь промышленностьсэ азинтыны уно кужымзэс сётэмзы понна. Вормонъёс басьтэмын культура, наука, тазалыкез утён но калыкез дышетон удысъёсын, спортын, техникаез азинтонын. Быдэс Россия тодэ писателез Куӟебай Гердэз, академикез Василий Васильевич Паринэз, профессорез Семён Иванович Ворончихинэз, дышетӥсез Вера Васильевна Толстаяез, конструкторез Петр Васильевич Можаровез но троссэ мукетъёссэ. -2- Удмуртиын уно калыкъёс уло. Национальной политика удысын кун азьын сылӥсь валтӥсь ужпум - республикаысьтымы вань калыкъёслэн аспӧртэмлыко сямъёссылы дурбасьтон, соослэсь вордскем кылъёссэс но культураоссэс азинтон. Ми ас выламы шӧдӥм ини: пӧртэм калыкъёслэн кусып воземзы но ог-огзылэсь сямъёссэс, тодон-валанзэс узырмытон луонлык кылдыто азинскыны, вань шуг-секытъёсты вормыны. Туннэ Удмуртия улэ но ужа странаын югдур уката уродмем вакытэ. Со косэ республикалэн улоназ бадӟым инты басьтӥсь нуналэз пусйыку но шуг-секытъёс, ужпумъёс сярысь вераськыны. Берло аръёсы Россиын страналэсь промышленностьсэ азинтыны луонлыкъёс кылдытэмын ӧвӧл. Та ик луэ экономикалэн секыт югдуре шедемезлэн валтӥсь мугез. Рынок кусыпъёслэсь азинскемзэс ӝогомытыса, выльдӥськонэз ортчытӥсьёс кунлэсь кивалтон кужымзэ быдтӥзы, шуыны луоз, таин валче Россия кунсьӧры сырьё гинэ келяны ӧдъяз. Калык валаны кутскиз, кун гинэ рыночной экономикаез азинтыны, асваньбурлы правоез утьыны, законъёсты быдэсъямез эскерыны, калыкез улон-вылонын утён удысын политикаез радъяны быгатоз шуыса. Соин ик Удмурт Республикаысь кивалтӥсьёс тыршизы кун властьлэсь ёзъёссэ, законъёсты быдэсъямез но правопорядокез юнматыны, калыклэсь кулэяськонъёссэ лыдэ басьтӥсь нормаосты кылдытыны, асьме дорын вуз поттӥсьёсты утьыны. Улон ваньзэ ас интыяз пуктэ, тазьы ужамлэсь шонер луэмзэ возьматэ. Государство кунсьӧрен вузкаронэз эскерыны, валтӥсь вузъёслы дунъёсты радъяны кулэ законъёс пыр, озьы каро Европаысь азинскем экономикаен кунъёс. Отын сиён-юонлы дунъёсты министръёслэн кенешсы, Европаысь общество юнмато, нокин но отысь уродзэ уг адӟы. Соос понна озьы ик луыны кулэ кадь, со юрттэ калыклэсь улонзэ умоятыны. Кун таӵе ужпумъёсты быдэстыны кулэ: таможенной пошлинаослэсь радлыксэс умоятоно, предприятиослэсь ичигес налог басьтыны кутсконо, угось налогъёс бадӟым луэмен, Россиысь тросэз предприятиос пыд йылазы ӝутскыны уг быгато. Государство калыклэсь улонзэ капчиятыны кулэ, аслаз промышленностезлы но гурт хозяйствоезлы ужаны луонлыкъёс кылдытыса. -3- Кун кивалтонлэсь пайда ваемзэ будэтыны огез амал - кун властьлэн ёзъёсызлэсь но интыысь аскивалтонлэн ёзъёсызлэсь кусыпъёссэс азинтон. Юнматэм дыръёсы туэ апреле но июле Удмуртиын интыысь аскивалтонъя ёзъёсы быръёнъёс ортчизы, вань бырйисьёс пӧлысь ӝыныезлэсь уноез отчы пыриськиз. Быръем депутатъёслэн лыдзы, нырысетӥзэ ӧтчамъёсыныз ӵошатыса, 30 процентлы унояз, озьы интыысь аскивалтонъя ёзъёсын калыкен быръемъёслэн лыдзы будӥз. Дурбасьтоно микрорайонъёсын но посёлокъёсын интыысь аскивалтонлэсь калык ёзъёссэ кылдытонлы, интыысь аскивалтонъя ёзъёслэн но калыклэн кусыпъёссы юнмамлы. Туннэ кун ёзъёслэн валтӥсь ужпуменызы кыле интыысь аскивалтонъя ёзъёсын кусыпъёсты радъянъя законъёс бордын ужанэз йылпумъян. Та секыт ужпумез огдыре быдэстоно федерациын но, улосъёсын но. Удмурт Республикалэн законъёсыныз чаклам полномочиосты но ужпумъёсты быдэсъяса, кун властьлэн но кивалтонлэн ёзъёсыз быдэсъязы Россия Федерациысь кун властьлэн ёзъёсыз но Удмурт Республикаысь кун властьлэн ёзъёсыз куспын быдэсъяно удысъёсты но полномочиосты люкон сярысь огкылэз. -4- Удмуртия котьку но страналэн огъялыкез понна но сепаратизмлы пумит вал. Жаляса верано луэ, кризис лэчытомемен, федеративной кусыпъёсын юнмазы ог-огедлэсь люкиськон сярысь малпанъёс. Соослэн валтӥсь мугзы - нормативной инъетлэн ӧвӧлэз. Али ке но кутэмын ӧвӧл на "Россия Федерациысь улосъёсын кун властьлэн ёзъёсызлэсь радлыксэс радъянъя огъя принципъёс сярысь" но "Ӵош быдэсъян удысъёсын Россия Федерация но солэн улосъёсыз куспын полномочиосты люкон рад сярысь" федеральной законъёс. Россия Федерациысь Правительстволэн берло сизьым аръёс ӵоже политикаез тужгес зол шуккиз сыӵе улосъёсты, кытын бадӟым инты басьто промышленность но обороналы ужась предприятиос. Сыӵе улосъёсысь югдурез вакчи дыр куспын уд вошты. Центрлэн дась продукция понна огпумысь тырымтэосыз но югдурез шугомыто. Сыӵе улосъёс пӧлы Удмуртия но пыре. Алигес ортчем пумитъяськон ужрадъёс возьматӥзы: калыклы акыльтӥз ини уждунэз, пенсиосты но нылпи пособиосты ялан ӝегатон, адямиос тае чиданы пумит луо. -5- Удмурт Республика улэ но ужа секыт вакытэ. Озьы ке но, берло куинь ар ӵоже Россия Федерациын поттэм огъя продукциын асьмелэн люкетмы ӧз кулэсмы, со гинэ ӧвӧл - асьмеос юнмамы. Промышленностьын ваньбур поттонлэн но гурт хозяйстволэн валтӥсь продукциезлэн люкетсы йылӥз. Туэ 9 толэзь куспын промышленностьлэн 6 удыссэз 1997 арынлэсь ӟечгес ужаз. Соос пӧлын машина лэсьтон, корт арбериосты поттон, сиён-юон дасян, пызь, кеньыр но комбикорм поттон, эмъюм дасян но полиграфия. Тямыс толэзь куспын витьтон тямыс пумо валтӥсь продукция уногес поттэмын. Ожмаськон тӥрлыкез поттон 1,5 поллы будӥз, контрактъёс ванен. Таяз арын ваньбур поттон йылӥз Игра, Каракулино, Кез, Кизнер, Можга, Ува но мукет ёросъёсын, Воткинск, Сарапул городъёсын. Туэ машинаен ветлон сюресъёс 19 поцентлы уногес тупатъямын, связь 5 процентлы тросгес юрттэтъёс сётӥз. Умоезлы осконъёсмес ми герӟаськом Удмурт Республикаын калык хозяйствоез азинтонъя федеральной программаез быдэсъянэн, программа чакла федеральной бюджетысь уно коньдон - 3 миллиард манетлэсь уно - висъяны. Республикаямы Правительстволэн Тӧроезлэн нырысетӥ воштӥсез Юрий Дмитриевич Маслюков ветлыку, программаез быдэстонлы юрттэт сётэмын луоз шуэмын вал. Республикалэсь кужымзэ, тужгес но военно-промышленной комплексысь предприятиослэсь луонлыкъёссэс, кутыны дась луэмез возьматӥз Воткинскын ортчем всероссийской совещание, солэн ужаз пыриськизы Правительство но Россия Федерациысь Кун Думалэн депутатъёсыз. Кенеше люкаськемъёс пусйизы, Удмуртия нырысетӥ вамышъёссэ лэсьтӥз ини шуыса, Россиын вуз поттонэз улӟытон понна, озьы ик республикаысь промышленностьлэсь кужымзэ улӟытон понна. -6- Бюджетын коньдон но инвестиционной луонлыкъёс тырмымтэен, асьмеос экономикаысь валтӥсь процессъёсты выль сямен дунъяны кулэ. Вераськон мынэ куд-ог производствоослы юрттэт сётон сярысь, со производствоос ӝог пайда вайыны мед быгатозы. Со вакытэ ик кылдытоно но юнматоно Удмурт Республикалэсь инвестициос кыскыны быгатонлыксэ ӝутонъя программаез, Россиысь но кунсьӧрысь инвесторъёс коньдон мед висъялозы шуыса. Та программа выль законъёсты кутонэз но мед чаклалоз. Та ужрадъёс экономикалэн ужась удысъёсаз коньдон висъян луонлыкъёсты трослы будэтыны кулэ. Та вакытэ асьмелэн ваньбур поттӥсьёсмы вань луонлыкъёсты кутыны кулэ, кунсьӧрысь ваем вузъёсын та дырозь тырмем рынокез киултон понна. Куд-огез со борды басьтӥськиз ини. "Воткинский завод", "Ижевский электромеханический завод" кун предприятиосын, "Буммаш", "Ижнефтемаш", "Редуктор" акционер огазеяськонъёсын потто яке поттыны дасясько нефть но газ кыскон оборудованиез. Солэн ӟечлыкез кунгож сьӧрысь ваемъёсызлэсь улӥынгес ӧвӧл. Озьы выль ужан интыос кылдо, налог бсьтонлэн инъетэз паськыта, валюта шыръяське, налог басьтыны выль луонлыкъёс кылдо. Тау кароно "Воткинский завод" но "Ижевский электромеханический завод" кун предприятиосын ужасьёслы (кивалто Толмачёв Виктор Григорьевич но Шестаков Юрий Владимирович). Луонлыкъёссы мукет предприятиослэсь пӧртэм ӧвӧл ке но, коньдон уг тырмы ке но, соос выль продукция поттон сярысь сюлмасько, сое поттонэз будэтыса. Воткинскысь завод, кылсярысь, нефть но газ кыскись компаниослы 100 пӧртэм оборудование лэсьтэ. 1997 арын сое поттон 175 поцентлы йылӥз. Ижевскысь электромеханической заводын, выль продукция поттыны кутскеменызы валче, берло кык ар ӵоже ужан интыослэн лыдзы 500-лы йылӥз. Сыӵе ужан амал адӟем карымон луыны кулэ оборонаен герӟаськем но предприятиослы но промышленностьлэн мукет удысъёсысьтыз предприятиослы, кудъёсыз али ке но кун заказэз возьмало на, продукцизэс выльдон, солэсь рынокын вормыны быгатонлыксэ будэтон амалъёсты уг утчало. Валамон ини, Кун Кенешлэн сессияз кутэм "Удмурт Республикалэн промышленносьын кун политикаез сярысь" закон инъет кылдытоз, Удмурт Республикаысь кун властьлэн ёзъёсыз но асваньбурез пӧртэм сямен кутӥсь промышленной предприятиос куспын герӟетлы. Закон луонлык сётоз властьлэн ёзъёсызлы шонер решениос кутыны кун гарантиос, налогъёсъя льготаос сётон пумысен, Россиысь властьлэн ёзъёсаз предприятиослэсь кулэяськонъёссэс ӧтен, инвестициосты кыскон пумысен. Кун властьлэн ёзъёсыз предприятиослы пайда вайыны тыршозы, нош предприятиослэн кивалтӥсьёссы Удмурт Республикаысь Правительствоын соослэн ужамзыя сярысь ялан ивортылозы. Кусыпъёс кыкналасянь мед луозы, со сяна, промышленностьын политикаез нуонын эскерон но кулэ. -7- Гурт хозяйствоын югдур азьло кадь ик секыт. Куазь сётымтэен, туэ ю тысь ичигес утялтэмын но вузамын вал. Толлы сиён ичигес дасямын, таза сюро пудолэн но парсьёслэн лыдзы кулэсме. Со вакытэ ик кылем арынлэсь уногес бакча сиён будэтэмын, тылобурдолэн лыдыз йылэ. Калыклы сӥль, йӧл, курег пуз тырмоз. Адямилы быдэ та валтӥсь сиён-юонъёсты поттонын республикамы Россиысь нырысетӥ кызь улосъёс пӧлын азьпалан. Ӟеч тыршо Вавож, Ува, Пичи Пурга, Алнаш ёросъёсысь музъем ужасьёс. Соос республикая шоро-куспо лыдпуслэсь уногес ю-нянь октӥзы. Нош Асан совхоз-техникумын (кивалтӥсез Цыпляков Сергей Петрович) но Вавож ёросысь "Колос" эштосын (кивалтӥсез Красильников Владимир Анатольевич) гектарысьтыз 23 центнер ю тысь басьтӥзы. Республикаын картошка гектарысьтыз 104 центнер басьтэмын ке, Игра ёросысь "Рассвет" эштоын 219 центнер бичамын. Шумпоттӥзы ужаменызы Можга ёросысь "Заря" колхозысь бакча сиён будэтӥсьёс (кивалтӥсьсы Иванов Валерий Сергеевич), соос гектарысь 260 центнер бакча сиён басьтӥзы. Секытъёс шоры учкытэк, пудолэн пайдалыкез будэ. Туэ 9 толэзь куспын вань ёросъёсын йӧл кыскон йылӥз скаллы быдэ. Республикаын йӧл кыскон 2267 килограмм усе ке, Воткинск ёросысь "Пихтовка" совхозысь скал кыскись Белокрылова Татьяна Ивановна 4542 килограмм кыскиз, Завьялово ёросысь "Восточный" совхозысь Кучинская Наталья Викторовна - 4122 килограмм. Та сӥё-дано нуналэ нимысьтыз тау кареме потэ гуртын ужасьёслы. Соос секыт вакытэ асьсэды жалятэк ужаменызы республикалэсь сиён-юонъя рыноксэ тырмыто. -8- Лэсьтӥськон удыслэсь вань луонлыкъёссэ ум кутӥське на, солэн ваньбур поттон инъетэз кужмо ке но. Кема дыр ӵоже республикаын ВПК-лэн предприятиосыз но соос котырысь инфраструктура гинэ лэсьтӥськизы. Али югдур воштӥськиз, табере бадӟым инты басьтэ социальной объектъёсты пуктон. Берло вакытэ арлы быдэ 435 сюрс квадратной метр огъя быдӟалаен 7 сюрс квартира лэсьтылӥм ке но, со тырмымон ӧвӧл. Улон интылы кулэяськись адямиослы мукет сямен юрттыны уз луы шуыса, Кун Кенеш сессияз эскериз но юнматӥз "Улон юрт" програмаез, со 2005 арозь быдэсъяськоз. Солэн валтӥсь ужпумез - республикаысь калыклы улон интыос сётон, туала нормаосты лыдэ басьтыса. Берло кык ар ӵоже секытъёс вал ке но, быгатӥмы нимаз адямиосын корка пуктонэз трослы будэтыны, кулэяськисьёслы лэсьтӥськон материалъёсын но льготной кредитъёсын юрттыса. Кылем арын калык 1698 квартира лэсьтӥз, 1996 арынлэсь ог 50 процентлы уногес, туэ но ужъёс урод уг мыно. 9 толэзь куспын 4 школа пуктэмын - 1570 интылы, ар бырытозь чакламын 489 интыен 4 гурт школаосты усьтыны. Республикалэсь социальной удыссэ но экономиказэ азинтонъя федеральной целевой програмамез быдэстонын валтӥсь ужпум луэ калыклы газ кыскон, тужгес гурт ёросъёсын. Матысь дыре Камбарка но Кизнер ёросъёсын химической ож тӥрлыкез быдтонъя объектъёсты пуктыку, социальной инфраструктура но кылдытэмын луоз шуыса оскиськом. -9- Берло аръёсы чырмыт азинско республикалэн мукет калыкъёсын но кунсьӧр экономикаосын кусыпъёсыз. Мукет кунъёсын но Россиысь улосъёсын кутӥсько вузкаронын, экономикаын, наукаын но техника удысын кусып возён сярысь огкылъёс. Пайда ваё ини Москваен, Пермь областен, Башкортостанэн юнматэм огкылъёс. Ваньбур поттон удысын кылдытэмын Западысь бадӟым фирмаосын - Сименс, Гюнтнер, Моторола - ӵош ужась предприятиос. Республикаын поттэм вузъёсты кунсьӧры вузан будэ. Та удысын умой ужало Ижевскысь механической завод, "Ижсталь", Чепецкой механической завод. 1998 арын 14-15 сентябре Удмурт Республикалэн делегациез Белоруссилэн шоркараз вуылӥз. Солэсь ужзэ йылпумъяз "Вузкарон, экономика, наука, техника но культура удысъёсын кусып возён сярысь Удмурт Республика но Беларусь Республикаысь Правительство куспын огкыл". -10- Республикалэн социальной удысаз но экономикаяз секыт югдур кылдэмын, таин валче властьлэн ёзъёсыз калыклы улон-вылонын юрттэт сётонъя ужпумъёсты быдэсъяны тыршо. Туннэ республикалэн бюджетэзлэн ӝыныез кошке социальной кулэяськонъёслы. Ужаны быгатӥсьтэм гражданъёслы, пенсионеръёслы, ӧлексыослы, егитъёслы, трос нылпиё семьяослы котькудӥзлы нимысьтыз юрттэт сётӥське. Талы таяз арын 5 миллион манет висъямын. Республикаын калыклы улон-вылонын юрттэт сётонъя 31 центр ужа. Гражданъёслэн куд-ог категориоссылы городысь транспортэн дунтэк ветлыны но жилищно- коммунальной юрттэтъёслы льготаос утисько. 1998 арын нылпиослэн но быдэ вуымтэослэн гужем шутэтсконзылы 34 миллион манетлэсь уно коньдон висъямын вал, 210 сюрслэсь уно нылпи шутэтскиз. 17 август бере югдур лэчытомыны кутскемен валче, властьлэн вань ёзъёсызлы та учырысь потон понна, шонер сюрес утчан борды кутсконо луиз. Кун Кенешысь Президиумлэн ӵектэмезъя, республикалэн Правительствоеныз кулэ ужрадъёс кутэмын вал. Правительстволэсь "Басьяськисьёсты дунъёслэн юнме шорысь будэмзылэсь утён сярысь" постановленизэ быдэсъяса тупатыны луиз тужгес кулэ луись сиён-юонъёслы дунъёслэсь чутрак будэмзэс. Тыршим, магазин ӝажыосысь нянь но йӧл медаз быре шуыса. Бускель улосъёсын но огъя быдэс Россия Федерациен ӵошатыса, кытын инфляция сю куамын куиньысен сю витьтон укмыс процентозь вуиз, асьме дорын та лыдпус улӥынгес - 128 процент. Ӧз буды улон-вылонлэн шоро-куспо дуныз: туэ январе-сентябре со вал 410 манет, кылем арын та вакытэ - 409 манет. Со дыре ик Удмурт Правительство татчыозь ӧз куты на республикалы тырмыт нянь дасян сярысь постановление. -12- Умоесь воштӥськонъёс шӧдӥсько демография ласянь. Туэ, кылем арын та вакытэн ик ӵошатыса, вордскем нылпиослэн лыдзы 665 адямилы йылӥз. Кулэм муртъёс 602 адямилы ӧжытгес. Кулэсмо вож нуныос пӧлын кулон учыръёс, калык пӧлын огъя кулэсмо паласькись висёнъёс. Но сюлэмшугъяськытэ пиналъёслэн тазалыксы. Соос пӧлын висёнъёс ньыль процентлы будӥзы. Азьло кадь ик кылизы яке кӧнялы ке умояз калыклы медицинской юрттэт сётон. Азьланьтӥське республикаысьтымы кардиологияя клинической диспансерлэсь диагностикая центрзэ, Ижевскысь онкологияя центрез, туберкулёзэн нюръяськонъя Воткинскысь диспансерез, Можгаысь хирургияя корпусэз, Пичи Пургаысь терапевтической корпусэз лэсьтон. Но коньдонлы ёрмонэн валче, чаклам программаосты кулэезъя уж вылын быдэстыны уг луы. -13- Тазалыкез утёнлы бюджетысь висъям коньдонэз ӝикыт но пайдаё кутон вылысь, Удмуртилэн Правительствоеныз асьмелэн гражданъёсмылы дунтэк медицинской юрттэт сётонэз умоятон понна, кун гарантиосъя программа юнматӥз. Туэ феврале ужаны кутскиз "Россия Федерацилэн законэзлэсь гражданъёслэсь тазалыксэс утёнъя инъетъёссэ Удмурт Элькунамы кутон сярысь" республикалэн Законэз. Соин ӵош сюлэмшугъяськытэ Правительстволэн калыклы дунтэк медицинской юрттэт сётонъя программаоссэ быдэсъяны пумит луэмез. Котькыӵе секыт мед луоз - но туннэ асьмеос Конституциен сётэм гарантиосты быдэсъяны кулэ. Социальной политика удысын одӥгез бадӟымез ужпум - калыкез уже интыян. Сыӵе югдур кылдӥз, ужан интыосты кулэстэмен но со вакытэ ик ужаны быгатӥсь адямиослэн лыдзылэн будэменыз. Республикаямы калыкез уже интыян удысын шонер политика нуэмен, ужтэк кылемъёслэн лыдзы ӧз буды. Тужгес шуген улӥсьёслы ужан интыос висъян ласянь ми законэн квотаос тупатӥм, нош уж сётӥсьёслэсь выт тыронзэс кулэстыны чакламы. Таӵе ужез нуиськом ни 1996 арысен. "Удмурт Республикаын калыкез уже интыян сярысь" Законъя, Правительстволэн постановлениеныз туэ квотаосъя висъяны чакламын 2000 ужан интыос. Сыӵе постановлениос озьы ик кутэмын городъёслэн но ёросъёслэн администрациосынызы. Туннэ нуналлы тупатэм квота уж вылын быдэсме ни, шуыны луоз. Дыраз коньдон вуымтэен, секыт югдуре шедизы социальной но производственной удысъёс. Дыраз уг тырисько уждун, пенсиос, пособиос. Туэ 1 октябрьлы пунэм тыронъёс ортчизы ни одӥг миллиард тямыс сю миллион манетлэсь. Калыкез шугадӟонъёслэсь утён удысын быдэстоно ужпумъёс трос на. Со нырысь ик, тужгес кулэяськисьёслы, меӵак юрттэт сётонэз умойгес радъян. Озьы ик городъёсысь но ёросъёсысь администрациоссылэн кивалтӥсьёссы азе юнэсь куронъёс пуктоно дыраз уждун, пенсиос но пособиос тырымтэзы понна. -14- Кызьы ке Россиысь мукет улосъёсын, республикаямы но секыт югдур йыружъёс ласянь. Соосты шараян будэ, кулэсмо адямиез секыт сӧсыртон учыръёс, юромо виылонъёс, улон интыосысь лушкаськонъёс, автомототранспортэз качан. Но со дыре ик йыружъёс 10 но ньыль дасмос процентлы йылӥзы. Йыртэман учыръёс тросгес луизы быдэ вуымтэос пӧлын. Таламын пӧртэм пумо 622 пыӵал тӥрлык. Наркотикъёсын герӟаськем йыружъёс 83 процентлы уногес шараямын. Пӧяськыса водка поттонъя 13 лушкем ужась цехъёс шедьтэмын. Республикаысьтымы правоосты утёнъя органъёслы преступностен нюръяськонын ужъёссэс уката кужмоятыны но юнматыны кулэ. Берло дыре кужмоятытэк уг луы ку властьлэн эскерон органъёсызлэсь ужзэс но. Туэ Кун Кенешлэн Эскерон палатаез ортчытӥз 16 эскерон, бюджетысь коньдонэз кутонэн герӟаськем 35 уж сэрттэмын-пертчемын. 1998 арын ужзэ шӧдскымон кужмоятӥз Эскеронъя кун комтет. Туэ укмыс толэзь ӵоже гинэ ортчытэмын 58 эскерон, соос пӧлысь 28-эз радъямын вал, Кун Кенешлэн яке солэн Тӧроезлэн косэмезъя. Коньдон ужпумъёсъя но хозяйствоез нуонъя, озьы ик пӧртэм законъёсты тӥянъя 43 учыр шараямын. Озьы 18 эскеронъёсъя материалъёс сэрттыны- пертчыны келямын правоосты утёнъя органъёсы. -15- Кивалтон органъёс бадӟым саклык висъяло егитъёсын ужанъя кун политикалы. Азинлыко быдэсъяське Кун Кенешлэн "Удмуртиысь егитъёс" республиканской программаез. Та вӧзы берло дыре ватсаса дасямын на "Егитъёслэн тазалыксы", "Егитъёслы улон интыос", "Егитъёслы граждан но патриотизм мылкыд пыӵатон" программаос. Егитъёс пӧлын государственной политика нуонлэсь кулэзэ возьматӥз комсомоллэсь 80 ар тырмонзэ сӥё-дано пусъён но. Удмурт Республикаысь Кун Кенеш но Правительство юн сюлмасько калыкез дышетон но культура удысъёслэсь ужзэс уката но юнматон сярысь. Республикаямы законъёсын юнматэмын но ужаны умоесь луонлыкъёс кылдытэмын калыкез дышетонъя, культурая тазалыкез утёнъя, егитъёсын ужан политикая, физической культура но спортъя удысъёслы. Дышетон удысын усьтэмын чылкак выль амалэн ужась учреждениос, та удыс азьланяз но паськыталоз. Кутӥськозы но пыӵатӥськозы тодон-валанъёс сётонъя выль технологиос, дышетон удыслэсь ӟечлыксэ эскерозы туала куронъёслы тупась амалъёсъя. Республикаямы калыкез дышетонын лыдпусъёс арысь аре умояло. Ялан будэ школаез зарни яке азвесь медальёсын йылпумъясьёслэн лыдзы. Удмуртиысь школьникъёс республикамылэсь данзэ утё но умоесь азинсконъёс басьто Россиын но мукет кунъёсын ортчылӥсь олимпиадаосын но конкурсъёсын. Умоен пусйыны кулэ школаослэсь но вылӥ дышетскон заведениослэсь тодон-валан сётонын огазеяськыса ужамзэс. Озьы ВУЗ-ъёсы дырызлэсь вазь пыртэмын куинь сю сизьымдонэз школаез йылпумъясьёс. Студентъёслэн лыдзыя Удмурт Республика Россиысь 89 улосъёс пӧлын 1990 арысен 34-тӥысен 28-тӥ интые ӝутскиз. Берло кык аръёсы асьме дорын вылӥынгес возиське дасэтӥ классын дышетскыны мылкыд карисьёслэн лыдзы. Со вера егитъёслэн тодон-валан бастыны мылкыдзы сярысь. Озьы, огшоры школаез йылпумъямъёс пӧлысь 95 процентэз, дышетсконзэс азьланьто пӧртэм пумо дышетскон заведениосын. -16- Одно ик пусйытэк кельтыны уг луы Кун Кенешлэсь Удмурт Республикалэн кун национальной политикаезъя туэ кутэм концепцизэ. Соин валче государство юрттыны кулэ анай кылъёсты , калыкъёслэсь культуразэс, сямъёссэс но аспӧртэмлыко йылолъёссэс утьыны но азинтыны. Элькунамы арысь-аре йылэ удмурт но бигер кылъёсты дышетонъя школаослэн но дошкольной учреждениослэн лыдзы. Туэ дышетскон ар азьын Ижевскын усьтэмын нырысетӥез бигер гимназия. Калыкез дышетонъя но культурая учреждениослы национальной кадръёсты дасян вылысь, национальной школаосты быдтэмъёс дышетсконзэс азьланьтыны быгато Россиысь но СНГ- ысь устоосаз вылӥ дышетскон заведениосын. Уно ужрадъёс кутӥсько Удмурт Республикалэн "Культура сярысь" Законэныз валче удмурт калыклэсь но Удмуртилэн музъем вылаз улӥсь мукет калыкъёслэсь культуразэс улӟытонъя но азинтонъя. Кылдытэмын но ужало удмурт, пор, мордва, чуваш, бигер культурая центръёс. Азинлыко ортчизы Куӟебай Гердэз но Ашальчи Окиез буре ваёнлы сӥзем ужрадъёс, Петр Ильич Чайковскийлы сӥзем крезьгуро фестиваль. Творчество удысын азинсконъёссэс пусйыны кулэ Удмуртиысь калык писательлэсь Генрих Ксенофотович Перевощиковлэсь, элькунысьтымы калык кылбурчилэсь Олег Алексеевич Поскрёбышевлэсь. Художникъёсмылы вылӥ дунъет сётэмын "Бадӟым Волга" выставкаын. Нош Москвалы тямыс сю витьтон ар тырмонэн валче Костылев но художник Юрий Александрович со ужрадъёсы пыриськемзы понна Россиысь сӥё-дано суредась Петр Васильевич Ёлкин, Удмурт Республикаысь искусствоосъя сӥё-дано ужась Вячеслав Григорьевич Наговицын пусъемын юбилейной медальёсын . Россиын данъяськымон луэ дизайнеръёсмылэн союззы. 1998 арын "Ижмашысь" дизайнеръёслэн авторской коллективзылы пӧйшуран но спортивной пыӵалъёсты дасян но дизайнзэс умоятон бордын ужамзы понна Россилэн Кун премиез сётэмын. -17- Ялан тросгес адями пыриське гуртъёсысь спортсменъёслэн шудонъёсазы. Ортчись арын вал витетӥез тол но сизьыметӥез гужем шудонъёс. Отчы ветлӥз 1700-лэсь уно адями но элькунысь ваньмыз 25 ёрос. Республикамылэсь данзэ палэнын утё туж дано спортсменъёс. Гужем биатлонъя нош ик дуннелэн чемпионэз луиз Алексей Кобелев. 100 иськеме бызьылонын дуннелэн чемпионэз ним басьтӥз Анатолий Корепанов. Ортчемаз сезонэ Удмурт Республикаын ортчытэмын вал биатлонъя Европалэн кубокез понна ӵошатсконъёсызлэн укмысэтӥ этапсы, нош вуоно арын элькунмылы оскемын спортлэн та удысэзъя Европалэсь чемпионатсэ ортчытыны. Озьы ке но, калыкез дышетонъя, тазалыкез утёнъя, культурая, физической культурая но спортъя учреждениослы, озьы ик со удысъёсын тыршись, ас ужзэс яратӥсь адямиослы тырмыт коньдон уг висъяськы. Государствоос азьын котыр ласянь пунэме кылемын. Жаляса верано луэ, бюджетысь коньдон соослы висъяське уждун тырыны гинэ. Секыт ке но вал, ӧсъёссэс ӧз ворсалэ дышетскон заведениос, театръёс, музейёс, библиотекаос, клубъёс но культурая дворецъёс. -18- Удмурт Республика - социальной государство. Соин ик социальной политикаез быдэсъяса, со котькуд адямилы но огъя быдэс обществолы луонлык сётыны кулэ ӟеч но эркын улыны. Ар йылпумъяськытозь дыр трос ӧз кыльы ни. Соин ик кун власть, интыосын ас коже кивалтон органъёс, предприятиослэн но организациослэн кивалтӥсьёссы федеральной ёзъёсын кужымъёссэс огазеяса, ӝегатскытэк тыршыны кулэ производствоез ӝутыны. Республикалэн социально-экономической азинсконэзъя 1998 арлы Программаеныз чаклам ужпумъёсты быдэстыны элькунлэн луонлыкъёсыз вань. Ужрадъёс кутоно, бюджетлэсь доходъёсъя люкетсэ будэтон вылысь, ватсаса коньдон шедьтоно бюджетысь коньдон басьтӥсьёслы уждун сётонъя, пенсиос но пособиос тыронъя пунэмъёсты кулэстон вылысь. Ваньзэ лэсьтоно, республика толэз умоен мед потоз шуыса но инъет дасяно, экономикалэсь азинсконзэ азьланяз юнматон понна. Сӥё-дано собрание лыктэм, гажано эшъёс! Гажано иськавынъёс! Республикамылэн нуналэз - со асьмелэн огъя праздникмы. Котькуд коллективлэн, котькуд семьялэн праздникез. Со ваньместы мед огазеялоз, Удмуртиысь гражданъёслэсь улон-вылонзэс умоятон понна, солэсь кунлыксэ юнматон понна. Вордскем нуналэныд, Республика! НАТАЛЬ Кылчин вылӥын, эксэй сэрпалтэмын нош юрттэт кулэ туннэ Сарапул районысь Сигаево селоын улэ паймымон семья. Дас арзэ ини Таисия но Геннадий Марковъёс югыт дуннеен тодматско куинетӥ этажысь квартиразылэн укноосыз пыр. Кыкназы но соос висё гемофилиен - вирзы уг орсмы. Тазалыксы уродэн ик улонзэс питранъёс вылын (ӧлексыослэн коляскаязы) ортчытоно луо. Кинлы ке но йыраз шуккыны но кулэ ук таӵе семьялы квартира вылӥ этаже сётыны! Сарапулысь инвалидъёслэн огазеяськонзылэн кивалтӥсез луыса мыным кылдӥз Марковъёсын матысьгес тодматскыны. Азьло но бен трос шуныт кылъёс кылэме вал ни Таисия Михайловна сярысь. Со уг сётӥськы кайгулы, котьку капчи мылкыдо, вазиськись, нош тужгес но паймытэ чиданлыкез. Дас кык аресъем пиез Тимур котыр ласянь юрттэ анаезлы, картэз Геннадий но котьку вӧзаз. Марковъёс туж тупаса но ог-огзэс валаса уло. Таза муртъёслэн гинэ куд-ог дыръя сюлэм шунытсы но валанзы уг тырмы шуге-леке усем та семьялы юрттон ласянь. Нош юрттэт соослы туж кулэ вылэм - куинетӥ этажысь квартиразэс нырысетӥ этажлы воштоно. Соку Марковъёс ураме но потаны быгатысалзы, адямиосын но кусып тупатысалзы. Ньыль борддор вискын пачкаса сямен улыны мӧйы муртлы но туж секыт, нош соос егитэсь на. Таисиялы 31 арес, нош Геннадий 33-зэ тырмытӥз. Марковъёслы юрттыны курыса вазиськылӥмы ни Сигаевоысь администрацие но, Удмурт Республикаысь вылӥ кивалтӥсьёслы но - кылӥсь-адӟись ӧвӧл, ваньмыз ог-огзы вылэ чӧлско. Марковъёс бадӟымгес квартира уг куро ук (законъя сётыны кулэ ке но), мед гинэ выжтозы вылэм коляскаен потаны луоно юртлэн нырысетӥ этажаз. Неужто та ужпумез нокызьы но интыысьтыз вырӟытыны уг луы? Милям Сарапул районын, городэз но вераса, таӵе семья одӥг гинэ. Юрттэт курыса вазиськоно кариським ни газет пыр, оло, кивалтӥсьёслэн пелязы кылӥськоз ик Марковъёслэн бӧрдонзы. Т. АКИЛОВА, Сарапул городысь инвалидъёслэн огазеяськонзылэн кивалтӥсез. Газет гожъям бере Кинлы осконо? "Удмурт дунне" газетысь Г. Коряковлэсь "Биньгозы - нылкышноос киын" статьязэ лыдӟыса, мон уг чидаськы аслэсьтым сюлэмшугъяськонъёсме вератэк. Берло номеръёсысь вожъяськыса лыдӟи, пӧртэм районъёсын интыысь ас коже кивалтон ёзъёсы ужась муртэ быръёнъёслэсь огкылысь ортчемзы сярысь. Отчы быръемын ужась калыклэсь улонзэ, мылкыдзэ, сюлэмшугъяськонзэ валась, но нокыӵе чебересь кылъёс сӥзьымтэ муртъёс. Сыӵе луэ Вотка городлэн мэрез В. Фридрих, Можга ёросысь кивалтӥсьёс И. Окулов но В. Максютин... Монэ чылкак паймытӥз, кызьы ортчиз Завьял районамы выль быръем депутатъёслэн нырысетӥ сессияз ёрослэн администрациезлы йыр быръён. 35 депутат пӧлысь 19 мурт гинэ куаразэ сётэм Г. Баталоваез ик кельтон понна, соос но республикаысьтымы вылӥ кивалтӥсьёслэн косэмзы улсын гинэ, лэся. Паймоно кадь соиз, малы сессие люкаськем выль депутатъёслы вылӥ кивалтӥсьёс эрик ӧз сётэ. Асьсэлэсь ӵектэм кандидатсэс В. Никитинэз ӧз быръе, солэн программаез тросэзлы депутатъёслы кельшиз ке но вал. Малы меда вылӥ кивалтӥсьёсмы Дэрие сокем трос лыктӥллям, ачиз А. Волков но, кудӥз, мон сямен, удмурт пиез В. Никтинэз быдэс сессия азьын ултӥяса вераськиз кадь. Дырызлэсь вазь, пе, районэн кивалтыны тыршиськод. Ватсаз на курсант, пе, соку ик генерал уг луы. Собере - визь-кенеш сётӥз: колхозад, пе, сокем ӟоскыт ке потэ ини, администрациен кивалтӥсьлы воштӥсе мын. Никитинлэн кивалтоно "Путь Ильича" колхозэз быдэс шаермылы тодмо. Малы вылӥ кивалтӥсьёсмылы кулэ вал Г. Баталова кадь кескич кивалтӥсез кельтыны? Мугез тодмо. Дэри район Ижез котыртэ. Нош отчы вылӥ чиновникъёслы асьсэлы шутэтскон юртъёс пуктоно. Малы ке-а Ижевск котырысь гырыны-кизьыны ярано ӟеч музъемъёс, быдэс бусыос вузамын ини дачникъёслы, сад-бакча возисьёслы. Конституцимыя гырон-кизён музъемез вузаны уг яра ке но. Тани Лудорвай гуртмылэн Венья но Лудӟи пал бусыосаз 2-3 иськемозь кыстӥсько ини посёлокъёс. Нош кытчы луэ азьвыл "Ижевский" совхозлэсь музъемзэ вузам коньдон? Кыӵе ӟеч ужъёс лэсьтӥз ас бырйисьёсыз азьын 4 ар ӵоже тыршытозяз Г. Баталова? Гуртын улӥсьёс ӟечсэ туж ӧз адӟе кадь, ӧз но шӧдэ. Солэн дурбасьтӥсьёсыз шуо районын кылдэм шуг-секытъёсысь, пе, потыны быгатылӥз. Бюджетэн кылдэм шуг-секытъёс сярысь быдэс республикамы тодӥз "АиФ" республиканской газетлэн гожъямезъя. Завьял ёросмы, мукетъёсыз сямен ик, коньдонлы ӟудэ: дышетӥсьёс, медикъёс уждунтэк пуко, пенсионеръёс толэзьёсын пенсизэс уг басьто, нылпи пособие уг тыриськы, районамы потӥсь "Ӟардон" удмурт газетэз тросаз удмурт гуртъёсын уг басьто. Ӧжыт лыдӟо "Пригородные вести" газетэз но. Уг кылӥськы ни удмуртъёслы дурбасьтӥсьмылэн М. Ишматовалэн куараез. Огыр-бугыр улонэн кинлы оскыны ик паймоно. Одӥгез биньгозыез паллянэ кыске, мукетыз - буре. Нош кудпала вамыштоз меда огшоры калык? А. ЕВСЕЕВА. Вань удмуртъёслэн ВИ Ӧтчамзы ортчем дырысен ар тырмиз. Ма лэсьтэмын, мар ӧз пӧрмы? Та сярысь вераськон луоз ӵуказе Пичи кенешын. Отчы быръем эшъёс но ӧтемъёс люкаськозы Удмурт Элькунысь Правительстволэн юртаз (азьлояз "Гердын" ми мыдлань ивортӥм вал) 10 часын. Спорт Вань сыӵе нюръяськон - ГО Ижевскын 16 аресозь нылпиос пӧлын восточной амаллэн одӥг удысэзъя нюръяськон ортчиз. Нимыз солэн туж аспӧртэмлыко, нимаське ГО шуыса. Кӧнялы ке со шахматэн шудонлы но тупа. Сыӵе шудон вӧлмемын Япониын, Кореялэн лымшор палаз но Китайын. Ижевскын ГО шудон нырысьсэ ортчиз. Ӵошатсконэ пыриськизы Москва, Челябинск, Казань, Ижевск городъёсысь спортсменъёс. Ваньзы соос 18 кузя люкаськизы. Пӧлазы 4 ныл но вал. Тужгес но тодмо луэ Казаньысь Наташа Ковалева. Дуннелэн чемпионатаз 12 аресъем нылъёс пӧлын со 2-тӥ интыез басьтӥз вал. Та ӵошатсконъёсы Ижевскысь 6 мурт пыриськиз. Соос пӧлысь кыкез 52-тӥ номеро школаын дышетскисьёс: Тимур Санкин но Иван Промыслов, тренерзы - Юрий Беляев. Кыкназы ик 6 луоноез пӧлысь 5 очко люказы. Озьы соос шедизы 2-тӥ но 4-тӥ интыосы. Вормисе потӥз Челябинскысь Дина Бурдакова. Таӵе амалэн нюръяськонэз яратӥсьёс арня нуналэ люкаськыло шахматэн шудонъя "Ижпланета" клубе. И. Вельтмандер. Дышетон удысын ужасьёслы! Ваньмызлы тодмо ини кыӵе югдур кылдэмын городын но республикаын бюджет удысын ужасьёслы уждун тыронэз ӝегатон пумысен. Ижевскысь дышетӥсьёс мыным ӝожтӥськонзэс верало, кызьы калыкез дышетон удысысь чиновникъёс забастовкае пыриськем дышетӥсьёсты кышкатыса возё. Кылсярысь, куд-ог директоръёслэсь соос куро тужгес но зол пумитъяськись дышетӥсьёслэсь нимъёссэс вераны, бӧрысь соосты ужысьтызы уллян понна. Дышетӥсьёсын пумиськонъёс дыръя куд-ог чиновникъёс меӵак валан сёто, дышетӥсьлэн ужез солэн кылзӥськись луэменыз дунъяськоз шуыса. Со понна дышетӥсь районысь яке городысь администрацилэсь куронъёссэ быдэсъяса ужаны кулэ. Ижевскысь дышетӥсьёслэсь ӝожтӥськонзэс басьтэме бере, мон куд-ог валэктонъёс басьтон понна вазиськи Кун Думалэн правоосты утись управленияз, Россия Федерацилэн генеральной прокуратураяз. Озьы ик та пумысен пумиськылӥ асьме странаын адямилэсь правооссэ утёнъя муртэн Олег Эрестович Мироновен. Табере оскыса вераны быгатӥсько: дышетӥсьёслэн куронъёссы законэз уг ортчо, нош чиновникъёслэн кышкатонъёссы - адямилэсь правооссэ но Россилэсь законодательствозэ тӥян луэ. Дышетӥсьёслэн куремзыя, туэ 16 ноябрьысен мынам ужан интыям ялан ужа "пӧсь телефон". Адямилэсь правооссэ тӥян учыръёс сярысь жингыртыны луоз таӵе телефонъя: 37-71-43. Нош дышетон удысысь чиновникъёслы эшшо тодазы вайытӥсько: пумитъяськон ужрадэ пыриськем дышетӥсьёсты кышкатыса но зибыса возён - со адямиез ултӥян луэ, соин ик вань сыӵе учыръёслы пум понэмын луоз. А. СОЛУЯНОВ, бырйисьёслэн 28-тӥ округысьтыз Кун Думаын ужась депутат. Калыкез серметан амал, яке кинлы кулэ калык огазеяськонъёслэн конгрессы? Туэ республикаямы люканы чакламын калык огазеяськонъёслэсь конгрессэс. Со пумысен та ужрадлы кичӧлтӥсьёс С. Бехтерев но Г. Овчинников кӧня ке пол журналистъёс азьын вераськылӥзы ни. Соиз валамон, иворъёсты вӧлмытӥсь ёзъёстэк туэ одӥг бадӟым ужрадэз но уд ортчыты. Но конгрессэз ортчытонлэн дырыз ялан воштӥськылэ. Нырысь чакламъя, сое люканы малпало вал октябрь толэзьлэн пумаз. Кӧня ке улыса, солы мукет нунал тупатӥзы но соку но со ӧз ортчы. Табере конгрессэз ортчытыны малпало 24 ноябре, но интыез тодмо ӧвӧл на. Малы бен сыӵе шуген радъяське та ужрад? Мон сямен, та юанлы валэктон шедьтыны луоз мукет ужпумез сэрттэм бере гинэ: нош кулэ-а меда со конгресс калыклы? Валало-а адямиос солэсь кулэлыксэ? Огаз пумиськонын Геннадий Петрович Овчинников Государственной но муниципальной службая удмурт институтлэн директорез но Удмуртиысь интеллигентъёслэн союззылэн президенэз тазьы шуиз: - Властен кусыпъёс возён понна кыӵе ке амал кулэ. Туала огазеяськонъёс кужымтэмесь (сое возьматӥзы берлоосыз быръёнъёс но), соин ик власть возисьёслы соос ас мылкыдзэс вераны но, кызьы вазиськыны но уг быгато. 1992 ар бере трос партиос кылдӥзы ке но, огез но со пӧлысь калыкез но государствоез огазеясь гердлы ӧз пӧрмы. Нош асьме калык дышемын, сое кин ке но сьӧраз мед валтоз шуыса. Тӥни сыӵе бадӟым уж ас вылаз басьтыны турттэ та конгресс. Мукет сямен вераса, вань калык огазеяськонъёсты, профсоюзъёсты со одӥг сюрестӥ нуыны турттэ, кызьы ас вакытаз та ужез нуэ вал КПСС, калыклэсь улонзэ кичӧлтӥсь но солы сюрес возьматӥсь. Нош тодо-а меда конгресслэн валтӥсьёсыз, кытчы валтыны кулэ калыкез? Вань пумиськонъёсын журналистъёс соослы та юанэн вазисько. Та уж борды басьтӥськемъёс макем золгес котыръяны выро, сокем золгес валамон луэ - та эшъёслэн мынон сюрессы тодмотэм. Озьыен, меӵак вераны уг ке луы, татын кыӵе ке но мудрон ватосэз вань. Со ватосэз шараяны луэ Сергей Львович Бехтеревлэн таӵе верамысьтыз: - Ми утчаськом калыкен кивалтон амал... - Утчаськом Кун Кенешен ӵош... - Но со уз луы Сан Саныч чотын ужась конгресс. Озьы ке но, берло верам кылъёслы сокем ик оскем уг поты, малы ке шуоно, Сергей Львович ужа Кун Кенешлэн общественно-политической анализъёсын выронъя отделаз. Конгресс, съезд выллем ик, ялан ужась органэн уг лыдъяськы. Со калык азе бадӟым валтӥсь ужпумъёс гинэ пуктэ. Отӥяз со ужпумъёсты улонэ пыӵатэ конгрессын (съездын) быръем ёз, шуом, исполком. Табере ойдолэ син азямы пуктомы, кызьы со исполком пыриськыны быгатоз калык огазеяськонъёслэн ужъёсазы. Басьтом "Удмурт кенеш" огазеяськонэз ик. Солэн но аслаз исполкомез вань. Удмуртъёслэн съездазы отчы быръем адямиос удмурт калык пӧлын кыӵе ке но уж нуо, ас кенешазы лэчыт ужпумъёсты эскерыло. Но "Удмурт кенешлэн" ужамез ӧз ке кельшы конгресслэн адямиосызлы? Яке мукетыз кыӵе ке огазеяськон забастовкае потон сярысь решение ке кутэ? Соку конгресслэн адямиосыз огазеяськонъёс пӧлын буйгатон-валэктон уж нуыны кулэ, мукет сямен вераса, власть но калык куспын тупан кылъёс шедьтыны. Соин ик, вылды, огаз пресс-конференциын журналистъёс С. Бехтеревлы но Г. Овчинниковлы меӵак шуизы: конгресс понна нюръяськисьёс калык огазеяськонъёсты ог-огзылэсь гинэ люкозы, соосты уката но кужымтэм карозы. Зэмзэ но, огазеяськонъёс пӧлын конгресс ужаны малпа соосты векчи удысъёсы люкыса, шуом нимаз ужалоз егитъёслэн, крестьянъёслэн, рабочийёслэн огазеяськонъёсынызы. Кинлэсь соку кылзӥськыны кулэ огшоры ужась, со огдыре ик профсоюзэ но, кыӵе ке партие но ке пыремын? Огъя вераса татын но уно юанъёс кылдо. Туннэ республикаямы 400 пала пӧртэм калык огазеяськонъёс, партиос но религиен герӟаськем движениос ужало. Но конгресслы дурбасьтӥсьёс трос ӧвӧл, шӧдске. Солэн кичӧлтӥсьёсыз ас дурбасьтӥсьёссэс меӵак вераны уг быгато. Шуо гинэ: та ужрадэз, пе, умоен лыдъяло куд-ог "паллян" партиос, КПРФ. Конгресслы пумит луэмзэс верало нациосын герӟаськем тросэз огазеяськонъёс но. "Удмурт кенеш" сяна, республикаямы кылдытэмын на армянъёслэн, азербайджанъёслэн, еврейёслэн, чувашъёслэн, бигеръёслэн, немецъёслэн но татын улӥсь мукет калыкъёслэн огазеяськонъёссы. Ваньзы соос али ик огкылысь дурбасьтысалзы та конгресс интые мукетыз ужрад ортчысал ке. Удмуртиын улӥсь калыкъёслэн конгрессы. Та ужпум сярысь вераськон кемалась ӝутэмын ни республикаямы улӥсь калыкъёслэн съездъёсазы но "котырес ӝӧкъёс" сьӧрын. Но малы ке ӟеч малпан пуштросэныз мукет сямен берытскыса мукет лидеръёс кие сюре. Соин ик адямиос пӧлын но та пумысен валамтэос трос кылдыло. Нимысьтыз верам потэ на, калык огазеяськонъёслэн (общественной движениослэн) али ортчытыны чаклам конгрессы нокызьы уг герӟаськы Удмуртиын улӥсь калыкъёслэн ортчытыны малпам конгрессэнызы (оло, таиз умой луысал ассамблея шуыны?). Т. БАННИКОВА. Ветеранъёс дорын туннэ Нырысетӥ йылпумъянъёсын тодматскыса Быдӟым Вормонлэн 55 ар тырмонэзлы дасяськон вакытэ элькунысьтымы школаосысь ожмаськонлы сӥзем музейёсты эскерон мынэ. Отысь ветеранъёслэн комитетсы но калыкез дышетонъя министерство соин валче нимысьтыз, конкурс ортчыто.Та нуналъёсы солы нырысетӥ йылпумъянъёс лэсьтэмын ни. Конкурсэ пыриськизы 22 музейёс но 15 комнатаос. Вормисьёс пӧлын Ижысь 8-тӥ школаысь музей. Со сӥземын войналэн нырысетӥ толэзьёсаз ик Глазын кылдытэм 49 стрелковой бригадаысь воинъёслы. Фронтысен та бригада пыриз 208-тӥ стрелковой дивизие, Москва дорысен Кенингсбергозь секыт сюресэз ортчиз. Ма вылез адӟиське музейлэн ужаз? Отын ортчизы двизиын ожмаськем удмурт писательлы но поэтлы М. П. Петровлы сӥзем пайдаё ужрадъёс. Дышетскисьёс нырысь тодматскизы солэн фронтысен гожъям кылбуръёсыныз, очеркъёсыныз но веросъёсыныз, собере вуылӥзы Михаил Петровичлэн соосты кылдытэм интыосаз, кылсярысь, Москва котырысь Истра, Волоколамск городъёс доры. Отысь бертыса, егит шаерчиос писательлы-фронтовиклы сӥзем пумиськон ортчытӥзы, гожъям произведениосызъя сочинениос дасязы, солэн призэз понна спортъя ӵошатсконэ пыриськизы. М. П. Петровлэн творчествоеныз пыр-почгес тодматскон понна, музее вуылӥзы профессор Ф. К. Ермаков, режиссёр Г. В. Веретенников, писателен ӵош ужам но ожмаськем эшъёсыз. Валамон, ваньмыз ик та ужрадъёс юрттӥзы 208 дивизиысь батыръёс сярысь тросгес но умойгес тодыны. Соин ик 8-тӥ школаысь музей но солэн кивалтӥсез дышетӥсь В. Ф. Русских конкурсын вормисе шедизы. Дышетскисьёслы военно-патриотической мылкыд пыӵатон удысын умой ужамез пусъемын Иж карысь 73 номеро школаысь музей но. Таиз сӥземын элькунысьтымы батыръёслы. Музейлэн ужамез сярысь алигес солэн кылдытӥсез Р. М. Сонина нимаз книга поттӥз. Со ачиз но фронтын вал, вуиз Берлинозь. Вормисьёс пӧлын вань Каракулино ёросысь Вятской школаысь, Грах ёросысь Мари-Возжай школаысь но мукет интыосысь музейёс. Конкурслы быдэсак йылпумъянъёс лэсьтэмын луозы Вормонлы 55 ар тырмон азьын. Мылысь-кыдысь юрттэ ке... "Военно-патриотической ужез Мария Семеновна но Руфина Григорьевна сямен радъяй ке, отчы мылысь-кыдысь пыриськид ке, батыръёслэн подвигъёссы ноку но уз вунэ" - тазьы шуэмын вал шаерысьтымы ветеранъёслэн комитетазы алигес ортчем пумиськонын. Татын уго та нылкышноослы сётэмын вал Россиысь ожысь ветеранъёслэн комитетсылэн "Фронтовик" почётной знаксы. Озьы дунъямын М. С. Каргашиналэн но Р. Г. Охманлэн егитъёс, дышетскисьёс пӧлын войнае ветлэмъёслэсь батыр ужъёссэс валэктылыны быгатэмзы. Иж карысь Индустриальной ёросысь кыӵе школаосы гинэ ӧз вуылы меда ини фронтовичка- связистка Мария Семеновна. Огаз со батыръёслы сӥзем уроке пыриське, мукетаз кыӵе ке но орден сярысь вераськон ӝутэ. Аслаз фронтысен басьтэм 2-тӥ степенё Отечественной война орденэз "За отвагу" медалез сярысь гинэ уг мадьы. Алигес пиналъёслы пыр-поч вераз картэзлэн А. Каргашинлы Ленинград дорын ожмаськыкуз Александр Невский орден сётэмзы сярысь, валэктӥз, кызьы секыт ожын офицер аслаз солдатъёсыныз быгатӥз паськыт шурез выжыны. - Тушмон ыбылыку капчи ӧвӧл, кышкыт ву вамен потыны, - шуэ Мария Семеновна дышетскисьёслы. Ачиз валэктэ, кызьы 717-тӥ стрелковой полкын ожмаськыкуз, солы аслыз Днепр, Березина, Сом, Друть шуръёс вамен телефон езэз кыскылоно луиз. Каргашина берло дыре ортчем ожъёс, ӵош ожмаськем эшъёсыз сярысь кенешыны вуылӥз ни педучилищее, 70, 9, 35, 62, 67 номеро школаосы. Котькытын сое сак кылзо. - Ваелэ школаямы кылдытоме аспӧртэмлыко музей, - шуиз огпол Ижысь 7 номеро школае вуылыкуз Руфина Охман. Со война вакытэ госпитальын медсестра вал. Та ӵектонэз дышетӥсьёс но дышетскисьёс умоен лыдъязы. Озьы музейлы нимаз комната висъязы. А. Г. Буркова дышетӥсьлэн но Охмаилэн кивалтэмзы улсын следопытъёс Ижын война дыръя кылдытэм госпитальёс, отын ужам врачъёс, медсестраос, санитаркаос сярысь материалъёс, пӧртэм арбериос, документъёс люканы кутскизы. Ӝоген музей экспонатъёсын узырмиз. Табере та музей Ижын одӥгез устоез луэ. Военно-патриотической ужез радъяны Руфина Григорьевна али но весь юрттэ. Татчы вуыло городысь трос школаосысь дышетскисьёс. Алигес татчы Ижысь вань музейёсын ужасьёс семинаре люкаськылӥзы. Ожысь ветеранъёслэн комитетазы тыршисьёс дасясько асьсэлэн тӧрозылэсь 80 арес тырмемзэ пусйыны. Александр Петрович Храмцевич - аспӧртэмлыко адями. Уг тодӥськы, вань меда Иж карын военно-патриотической ужез радъян удысын сыӵе сюлмаськись адями. 1946 арын фронтысь бертыса, Храмцевич элькунысьтымы Осоахимын инструктор луыса ужаны кутскиз. Армие мыныны дасяськисьёсты дасян бордын тыршиз, ваньмаз гуртъёсы но ёросъёсы вуылӥз. Берлогес элькунысьтымы ожысь но ужысь ветеранъёслэн советазы ответственной секретарь луиз. 1992 арын Александр Петровичез ожысь ветеранъёслэн комитетазы тӧрое быръё. Тӥни со озьы 50 ар ӵоже ини со военно-патриотической ужез радъян бордын тырше. Россиысь ожысь ветеранъёслэн комитетсы но сое трос пол пусйылӥз сюлмо ужамез понна. Пусъеме потэ Сталинградын ожмаськем но сӧсырмем та фронтовиклэсь одӥг сямзэ гинэ. "Янгыш лэсьтэмез адӟыса, эн кошкы отысь пегӟыса" - шуэ со комитетлэн членъёсызлы. Серем пыр вера ке но, ачиз озьы ик лэсьтыны тырше. Тани алигес Иж карысь 5 номеро школае вуылыкуз, татысь воздушной десантникъёслэсь музейзэс ворсан ярысь вераськонъёсты кылӥз. Дышетӥсьёсты люказ, директорен, десантникъёслэн советсылэн тӧроеныз В. А. Татариновен вераськиз. Малпам ужзэ лэсьтытэк школаысь ӧз кошкы. Табере музей умой пыриське патриотической уж нуонэ. Вазенгес 37 номеро школаысь музеез тупатъян кемагес кыстӥськиз вал. А. П. Храмцев лэсьтӥськисьёсын кенешиз, ужез йылпумъяны юрттӥз. Москвае мыноз Туэ 4-5 декабре Россиысь ожысь ветеранъёслэн 3-тӥ конференцизы ортчоз. Отын берло аръёсы ужамлы йылпумъянъёс лэсьтэмын луозы. Элькунысьтымы фронтовикъёс но отчы делегат бырйизы. Москвае соос ысто Сарапулысь ветеранэз Д. И. Санниковез. Дмитрий Ивановичез городазы умой тодо. Со татын война дыръя кылдытэм 98-тӥ стрелковой двизиын ветеранъёслэн советсылэн тӧроез луэ. Фронтовикъёс слётъёс ортчытъяло, 12 номеро школаын дивизилы сӥзем музей кылдытӥзы. Ачиз Д. И. Санников республикаысьтымы ожысь ветеранъёслэн комитетазы быръемын, отын но военно- патриотической ужез азинтыны юрттэ. В. Никитин, элькунысь ожысь ветеранъёслэн комитетсылэн тӧроезлэн воштӥсез. Кыдёкысь городын Удмуртской ульча 1943-тӥ арын Волгоградэз фашистъёс ки улысь мозмытэм бере Правительство городэз ӝутон сярысь ужпум юнматӥз. Ож ортчем бере кир-пазь карем коркаосты, заводъёсты, фабрикаосты выльысь ӝутоно луиз. Та уже Удмурт шаермыно трос кужымзэ понӥз. Кӧня лэземын вал нюлэс, корт но мукет лэсьтӥськон материалъёс. Озьы ик Удмуртиысь адямиос ногородэз выльдонэ мынӥзы. Трос юрттӥськизы Волго-Донской каналэз лэсьтонын. Промышленной районын одӥгез ульча Удмуртской нимаське. Волгоградын та ульча тужгес но паськытэз луэ. Со урам пырак Волго-Донской каналлэн шлюзэз доры потэ. Урамлэн кык пал ласянь ик Удмуртиысь ваем кызьпуос но пиппуос будо. Озьы ик соос Мамаев курганэз но шулдырто. В. Рогалев, краевед. Ма герӟа Бодалев вузчиез но Тараканов профессорез? 17 ноябре Национальной библиотекаын усьтӥськиз "Кин азинтоз Третьяковлэсь ужзэ? Россиысь меценатсволэн йылолъёсыз но азьланез" нимо выставка. Солэн нырысетӥ люкетэз "Атыкай музъем понна" шуыса нимаське. Татысь книгаос возьмато, кызьы Россиын 20-тӥ даурлэн кутсконаз тодмо адямиос наукалы, искусстволы азинскыны юрттӥзы. Соослэн тыршеменызы книгаос, искусство удысысь произведениос люкамын, театръёс, музейёс но библиотекаос усьтэмын. К. Т. Солдатенковлэн, П. М. Третьяковлэн, П. И. Щукинлэн, С. И. Мамонтовлэн, С. Т. Морозовлэн нимъёссы странамылэн культураеныз люконтэм герӟаськемын. "Удмуртиысь меценатъёс: азьлоез но вуоноез" люкетысь книгаос тодмато вузчиослэн сӥё-дано нимъёсынызы. Федор Черновлэн коньдонэныз Удмуртиын 21 черк пуктэмын, Сарапулын Башенинъёслэн семьязы библиотека, краеведческой музей, нырысетӥ кинотеатр усьтӥзы, Иван Бодалев церковно-приходской школаосты усьтонэ куинь сюрс манет сётӥз. Туннэ Россиын культуралы сӥзем ужрад сярысь огез но ялон "спонсоры" кылтэк уг поты. Со туала улонлэсь аспӧртэмлыксэ возьматэ. Маин туала спонсоръёс азьвыл юрттӥськисьёслэсь пӧртэмесь луо? Та юанлы валэктон сётэ выставкалэн "Культура меценатъёсын люкиське?" люкетэз. Вань асьме пӧлын сюлэмзэс, коньдонзэс, быгатонлыксэс жалятэк калыклы ӟеч карыны тыршисьёс. А. В. Новиков, Ф. А. Кравцов, В. В. Рогалев, Р. Ш. Насибуллин, И. В. Тараканов, Ф. К. Ермаков, Т. И. Алатырев Национальной библиотекалы 150 книга, 20 туж дуно туспуктэм, календарьёс, гожтэтъёс кузьмазы. Библиотека быгатӥз басьтыны революцилэсь азьвыл поттэм, шер пумиськылӥсь документъёсты, книгаосты. Коньдонэн юрттӥз А. В. Солуяновлэн фондэз. О. МАКСИМОВА. "Удмурт кенеш" огазеяськонлэн исполкомезлэн решениез Удмуртлыкез азинтонэ уно аръёс ӵоже мылысь-кыдысь пыриськемзэ лыдэ басьтыса, 1998 ар понна Куӟебай Герд нимо национальной премиез сётоно: ЕГОРОВ Анатолий Максимовичлы, Вавож ёросысь Гурезь-Пудга школалэн директорезлы, "Удмурт кенеш" огазеяськонлэн ёрос ёзэзлэн кивалтӥсезлы; ЕРМОЛАЕВ Алексей Афанасьевичлы, удмурт критиклы но писательлы. "Удмурт кенеш" огазеяськонлэн президентэз В. К. ТУБЫЛОВ. 1998 ар 16 ноябрь. "Удмурт кенеш" огазеяськонлэн исполкомезлэн решениез "Удмурт кенешлэн" Данъян книгаяз пыртоно таӵе адямиослэсь нимтулъёссэс: 1. Ашальчи ОКИ (ВЕКШИНА Лина Григорьевна, удмурт кылбурчи (кулэмез бере). 2. ИШМАТОВА Мария Дмитриевна Завьял ёросысь удмурт культурая "Чагыр дыдык" обществолэн кивалтӥсез. 3. МАЗИТОВА Зоя Алексеевна, Кияса ёросысь Карамас-Пельга гуртысь куиськись. 4. ДОЛГОВА Елена Степановна, Грах ёросысь Вылӥ Игра гуртысь дышетӥсь. "Удмурт кенеш" огазеяськонлэн президентэз В. К. ТУБЫЛОВ. 1998 ар 16 ноябрь. Спорт Ӵошатскизы гуртоос Завьял ёросысь Первомайский посёлокын гуртъёсысь спортсменъёслэн шахматэн шудонъя ӵошатсконъёссы ортчиз. Отчы 11 команда пыриськиз: 26 воргорон но 12 нылкышно. Отын вормисе потӥзы Ува ёросысь шахматистъёс. Кыкетӥ интыез басьтӥз Завьял ёросысь команда. Нош куинетӥ интые потӥзы Якшур-Бодья спортсменъёс. Гуртын шахматистъёслэн шудонъёсазы ньылетӥзэ ни вормисе потӥз Якшур-Бодья ёросысь центральной больницаысь ужась врач-психолог, спортъя мастере кандидат Сергей Горбунов. Со 9 луоноез пӧлысь 7,5 очко люказ. Нош нылкышноос пӧлын вормиз Ува посёлокысь Нина Зубарева. И. Вельтмандер. Шулдыръяськон гинэ медам лу "Удмурт кенешын", кызьы тодмо, кылдытэмын пӧртэм комиссиос. Котькудӥз соос пӧлысь Пичи кенеш азьын ар ӵоже ужамез сярысь ивортон дасяз. Ми дэмласьком культурая комиссилэн ужаменыз тодматскыны. "Удмурт кенешлэн" культурая комиссиез Быдӟым ӧтчам ортчем берегес ик ужаны кутскиз. Отчы пыризы В. Я. Митрофанов, А. А. Разин, Н. Н. Бочкарева, П. Н. Кузнецов но эшшо кӧня ке мурт. Солы кивалтӥсе П. К. Черновез бырйизы. Нырысетӥ люкаськемазы ик соос пусйизы арлы ужан план. Нырысь чаклазы П. Н. Кузнецовлэсь ӝытсэ-пумиськонзэ ортчытыны. Сое дасянэ мылысь-кыдысь пыриськизы "Италмас" ансамбль, филармония, писательёс но артистъёс. Тужгес ик пусйыны кулэ А. В. Мамонтовлэсь тыршемзэ. Кылем арлэн пумаз ик ай, шуркынмон толэзе, "Италмас" ансамбль пыриськиз композиторлы сӥзем ӝытэ-пумиськонэ. Соиз ортчиз Уваын. А. В. Мамонтов но солэн артистъёсыз дасяллям П. Н. Кузнецовлэсь дасолэсь уно кырӟанъёссэ. Кыкетӥ концертэзлы соос эшшо но золгес дасяськиллям. Соиз адӟиськиз ни концерт мыныку но, нош укыргес ик - концерт бырем бере. Концертэз нуисьёс концерт дыръя ик ай выльысь но выльысь пусйылӥзы, сое дасяны "Удмурт кенеш" юрттӥз шуыса. Вань сыӵе ужрадъёсы "Удмурт кенешлэн" меӵак пыриськыны луонлыкез ӧвӧл, нырысь ик, коньдон тырмымтэен. Нош троссэ ужрадъёсты асьсэос культура удысын ужасьёс радъяло, спонсор шуон адямиослэн юрттэмзыя. Кылсярысь, сыӵе ужрадъёс берло дыре арлы быдэ ортчыло Алнаш районысь Сизьгуртын. Валля арын сыӵе ужрад сӥземын вал П. К. Черновлы, миым - П. Н. Кузнецовлы, туэ - И. П. Бобровлы. Куд-ог ужрадъёсы "Удмурт кенеш" пыриськылэ аслаз люкетъёсыз яке нимаз-нимаз адямиосыз пыр. Кылсярысь, туэ озьы луиз, Куӟебай Гердлэн но Ашальчи Окилэн 100 ар тырмонзылы сӥзем ужрадъёс ортчыку. "Удмурт кенеш" озьы ужаз Ижын, Алнашын, Граховоын, Вавожын но мукет интыосын выставкаос, пумиськонъёс, концертъёс ортчылыку но, сосолэн творчествозылы сӥзем научно-практической конференциос дыръя но. Вераны кулэ, со выллем ик луылӥз Михаил Журавлёвлэн, Михаил Оськинлэн, Вячеслав Сергеевлэн кылзӥсьёсынызы-лыдӟисьёсынызы пумиськонъёс дыръя но. Выль ар котырын Ижысь районъёсын но тросаз гуртъёсын ортчылӥзы шулдыръяськонъёс, гужем - котырысь Гербер, Гырон быдтонъёссы яке огшоры шулдыръяськонъёссы. Гужем ик республикаысь уноез улӥсьёс люкаськылӥзы Вавоже. Отын но ортчиз Гербер. Вань та верам ужрадъёсы удмуртъёсгес люкаськылӥзы. Но комиссилэн малпамезъя, быдэс республика понна ортчись Герберын удмуртъёс нимаз кариськыны кулэ, малы ке шуоно, берло аръёсы со огшоры шулдыръяськонлы пӧртӥськыны кутскиз. Нош Гербер малпамын вал, асьме калыклэсь умой сямъёссэ-йылолъёссэ, вӧсяськонъёссэ, мукет улон амалъёссэ выльысь улӟытон но улонэ пыӵатон вылысь. Тодон-валан дуре - ӝыны даур Удмурт пединститутын, кудӥз усьтэмын вал 1931 арын, удмурт кылъя но литературая дышетӥсьёсты нырысь-валысь дасязы ӟуч группаосын дышетскисьёсын ӵош, ог-огзылэсь висъятэк. Нырысьсэ нимаз удмурт группаос кутэмын вал 1947 арын, нош приказэн юнматэмын вал соос 1948 арын гинэ. Та группаосты усьтэм дырысен туэ тырме 50 ар. Ӝыны даур ӵоже удмурт отделениез йылпумъяз ог 1800 пала студент. Тросэз соос ужазы но али но ужало элькунысьтымы пӧртэм ёросъёсысь школаосын, нылпи садъёсын, газетъёслэн редакциосазы, радиоын но телевидениын, уноез соос пӧлысь луизы тодмо писательёс, кылсярысь: Семен, Евгений, Николай Самсоновъёс, Даниил Яшин, Герман Ходырев, Николай Васильев, Роман Валишин, Петр Поздеев, Анатолий Уваров, Анатолий Перевозчиков, Вячеслав Сергеев, Галина но Владимир Романовъёс, Татьяна Чернова но мукетъёсыз. Пединститутэз но университетэз йылпумъямъёс пӧлысь 25-ез луиз пӧртэм наукаосъя кандидат, 7-ез - филология но педагогика наукаосъя доктор но профессор, тросэз азьло студентъёсмы тыршо кивалтон удысын но: Р. Ф. Березин - Дышетӥсьёслэсь тодон-валанзэс будэтонъя институтлэн директорез, В. М. Ившина, А. С. Березина, А. Л. Монашева, Ю. А. Фомин Калыкез дышетонъя министерствоын тыршо, В. Н. Ившин - "Удмуртия" издательствоын валтӥсь редактор, Р. С. Куликова - Удмурт радиоын валтӥсь редактор, П. В. Куликов, И. М. Байметов - "Кенеш" но "Вордскем кыл" журналъёслэн валтӥсь редакторъёссы, В. Б. Возняков - "Ӟечбур!" газетлэн редакторез, Г. А. Ушаков - Международной Восточно-Европейской университетлэн проректорез. Огломак вераса, удмурт отделениез йылпумъямъёс шаермылэн улоназ шӧдскымон инты басьто, удмурт наукаез, культураез но искусствоез азинтонын но калыкез дышетон удысын азьветлӥсьёс луо. Нимаз удмурт отделение кылдытон аръёсы удмурт кылъя но литературая кафедраын ужазы А. С. Бабинцев, М. Н. Булычев, А. Н. Поздеева доцентъёс, А. И. Малых, Е. И. Никитина преподавательёс. 1960-тӥ аръёсы кафедрае ужаны лыктӥзы выльёсыз преподавательёс: Д. А. Яшин, Р. И. Яшина, И. В. Тараканов, В. К. Кельмаков. Бӧрысьгес ини, 70-тӥ аръёсы, татчы вуизы С. В. Соколов, Г. А. Ушаков, А. Ф. Шутов, А. Г. Шкляев, А. С. Зуева- Измайлова, Г. Н. Шушакова но мукетъёсыз. Пединститутэз университет карем бере, удмурт группаысь студентъёслэн лыдзы куинь поллы будӥз. Со луонлык сётӥз 1983 арын удмурт кафедраез кыклы висъяны. Одӥгез нимаськиз удмурт но финн-угор кафедра, мукетыз - удмурт литература но СССР-ысь калыкъёслэн литературазы. Соосын кивалтӥзы В. К. Кельмаков, Д. А. Яшин но А. Г. Шкляев доцентъёс. 1989-тӥ арын кылъя кафедраез нош ик кыклы висъязы, одӥгзэ огъя но финн-угор кафедра каризы (кивалтӥсез вал И. В. Тараканов профессор, али В. К. Кельмаков профессор), мукетсэ удмурт кылъя но сое дышетон методикая кафедра шуизы (кивалтӥсез вал Г. А. Ушаков профессор, али И. В. Тараканов). Университетын трос пумо специализациос но выль кафедраос кылдытон луонлык сётӥз нимысьтыз удмурт филология факультет усьтыны. 1992-тӥ арысен отын декан луыса ужаз доцент Г. Н. Шушакова, нош али та факультетэн кивалтэ доцент А. В. Ишмуратов. Али удмурт филология факультетын ужа куать пӧртэм кафедра: огъя но финн-угор кылъёсъя (кивалтӥсез профессор В. К. Кельмаков), удмурт кылъя но сое дышетон методикая (кивалтӥсез профессор И. В. Тараканов), удмурт литературая но Россиысь калыкъёслэн литературазыя но журналистикая (кивалтӥсез доцент А. Г. Шкляев), ӟуч филологияя кафедра (кивалтӥсез филология наукаосъя доктор профессор А. С. Измайлова), герман кылъёсъя кафедра (кивалтӥсез доцент В. В. Климова). Университетлэн программаез (пединститутлэнэн ӵошатоно ке) луонлык сётӥз удмурт кылэз, литератураез, соослэсь историзэс, удмурт вераськонъёсты, ӵыжы-выжы кылъёсты паськытгес но мургес тодытыса дышетыны. Университет трослы паськытатӥз студентъёслы квалификация сётонэз но. Удмурт филология факультетын дышетскемъёс табере ужаны быгато ни таӵе-таӵе удысъёсъя: удмурт кылъя но литературая; ӟуч кылъя но литературая: удмурт кылъя, литературая но англи кылъя; удмурт кылъя, литературая но немец кылъя; журналистикая. Факультетамы витетӥ арзэ ини вань финн-угор люкетэз. Отысь студентъёс удмурт кылэн но литератураен огдыре дышето финн но мадьяр кылъёсты. Дышетсконзэс йылпумъямзы бере, соос тодон-валанъёссэс азинтозы аспирантураын яке научной уж нуонэ интыяськозы. Та группаослы ӵыжы-кыжы кылъёсты дышетыны ӧтемын вал Финляндиысь но Венгриысь преподавательёс - Сара Хянникяйнен но Иштван Козмач. Туэ соослэсь ужзэс азинто ни Удмуртиысь преподавательёс. Угось факультетысьтымы тросэз удмурт дышетӥсьёсмы та ӵыжы-выжы калыкъёслэн кылъёсынызы умой-умой вераськыны но лыдӟиськыны дышизы ни: В. К. Кельмаков, П. И. Воронцов, Т. А. Краснова, В. Л. Шибанов, Е. В. Ветрова, С. А. Конева, М. А. Самарова, Л. Л. Карпова, Е. Ю. Шеклеина. Удмурт филологияя факультет юн кусыпъёс возе кунгож сьӧрысь университетъёсын, Венгриысь наукаосъя академиен, Сегед университетэн, Финляндиысь Турку но Хельсинки университетъёсын. Дышетӥсьёсмы ог-огзы доры ветло лекциос но спецкурсъёс лыдӟыны. Факультетамы арлы быдэ ортчытъясько научной конференциос, кык арлы огпол - пермь выжы калыкъёслэсь кылъёссэс эскеронъя зональной но калык куспо симпозиумъёс но конференциос. Дышетӥсьёсмы но аспирантъёсмы мылысь-кыдысь пырисько Дуннеысь финн- угор тодосчиослэн вить арлы огпол ортчылӥсь конгрессъёссылэн ужъёсазы. Удмурт филологияя факультетын 1992 арын усьтэмын аспирантура но диссертациосты утёнъя учёной совет. Та советамы наукаосъя кандидат ним басьтӥз ни 5 мурт. Азьланяз отын кандидат ним басьтыны быгатозы ни ӟуч кылъя но. Удмурт пединститутын удмурт кылъя но литературая кылдытэм пичи гинэ кафедра (отын 4 мурт гинэ ужаз) аръёс ортчыса бадӟымаз, кужмояз но, 50 ар ӵоже ужатозяз, шӧдскымон азинсконъёс басьтӥз - кадръёс дасян ласянь но, наукаез азинтон ласянь но, студентъёслы но школаосын дышетскисьёслы учебникъёс но методикая пособиос дасян но печатлан ласянь. Удмурт филологияя факультетын ужасьёс мылкыд каризы ӝыны дауръем юбилейзэс туэ 20- тӥ ноябре сӥё-дано пусйыны. Ӧтиськом удмурт группаосын ваньзэс дышетскемъёсты, тужгес ик 1947, 1948 аръёсы дышетскыны пыремъёсты. Улӥын сётӥськом та группаослэсь туспуктэмъёссэс. Ӝыт ортчоз Машиностроительёслэн юртазы 18 часын. И. ТАРАКАНОВ, Удмурт кун университетысь удмурт кылъя но дышетон методикая кафедралэн кивалтӥсез профессор. Пӧртэм ужпумъёс эскеремын 16 ноябре ортчиз "Удмурт кенешлэн" исполкомезлэн кенешонэз. Отын эскеремын пӧртэм ужпумъёс. Исполкоме быръем эшъёс тодматскизы 20 ноябре Пичи кенешын лэсьтоно докладлэн инъетэныз, веразы со пумысен малпанъёссэс. Куӟебай Герд нимо премиез сётонъя комиссилэн кивалтӥсез Людмила Христолюбова тодматӥз туэ понна ӵектэм адямиослэн нимтулъёсынызы. Исполком та пумысен решениос кутӥз. Тодмо удмурт суредась Валентин Белых ивортӥз "Игерман" ресторан котырын национально-исторической комплекс кылдытыны малпанэз сярысь. Мукетыз художник Олег Ермолаев со понна дась ини нимысьтыз фонд кылдытыны. Югдурез котыр ласянь чакласа, исполкомлэн членъёсыз со фондлэн кылдытӥсьёсыз пӧлы "Удмурт кенешез" пыртыны соглаш кариськизы. Попечительской советэ дэмламын вице-прцезидент Валерий Митрофанов. Ревизионной комиссие ӵектэмын "Удмурт кенешлэн" аппаратаз ужась Андрей Гребин. Исполкомлэн членэз Василий Ванюшев вераз "Герд" бамез умоятон пумысен малпанъёссэ. Огкылъёс кутэмын ӧвӧл Берло дыре вераськонъёс ветло Удмурт Республикаысь Кун Кенеш, пе, Россия Федерациысь улосъёсы вӧез вузан сярысь огкыл кутэм. Соин валче Удмурт Республикаысь Кун Кенешлэн пресс-службаез ивортэ: Удмурт Республикаысь Кун Кенеш вӧез но йӧллэсь сиёнъёсты Москвае, Санкт-Петербурге, Екатеринбурге, Россия Федерациысь мукет городъёсы но улосъёсы, озьы ик СНГ-ысь странаосы вузан сярысь нокыӵе огкылъёс ӧз куты. Удмурт Республикаысь Кун Кенешлэн пресс-службаез. Кун Кенешлэн сессияз Пунэмаськонъёслы пум ӧвӧл Кун Кенешлэн сӥзьылбыт кыстӥськем 22-тӥ сессиез ужзэ йывлпумъяз. Берло нуналаз депутатъёс мыло-кыдо ужазы кутытэк кельтэм законопроектъёс бордын. Юнматэмын Удмурт Республикалэн 2000-тӥ арозь азинскон программаез, пумаз-йылаз вуттэмын республикаысь кун промышленностья законлы инъет, вузкарон удысын налог октон но куд-ог мукет ужпумъёс. Зол вераськон мынӥз Удмурт Республикалэсь туэлы чаклам бюджетсэ быдэсъян пумысен. Соя ивортон лэсьтӥз коньдонъя министр Владимир Бельтюков. 8 толэзьлы йылпумъянъёсъя бюджетэ ваньзэ-ӧвӧлзэ вуэмын 895,7 миллион манет, яке пусъемлэн 72 процентэз. Данакез коньдон пыремын налог чотын.Федеральной бюджетысь басьтэмын 308,7 миллион манет, чакламлэн со 75 процентэз. Ма люкетӥз, кыӵе мугъёсъя республикамылэн коньдон пуйыез нош ик ӧз тырмы? Нырысьёсыз радын - промышленностьлэн йӧскадь ужамтэез, нефтьлэн дунтэмамез, предприятиослэн дыраз вытсэс тырымтэзы. Таин валче пунэмен тырон трос миллионъёсын люукаськемын бюджет удысын ужасьёслы но нылпи пособиосъя.Кызьы вераз министр, таяз арысь соос выжозы вуонояз, малы ке шуоно, сомында коньдон республикаын ӧвӧл. Депутатъёс докладчиклы трос пумо юанъёсын вазиськизы. Кылсярысь, районъёслы коньдонэн юрттон малы пӧртэм сямен мынэ: одӥгъёсызлы - ятыргес, мукетъёсызлы - ӧжытгес? Министр верамъя, со озьы ик луыны кулэ. Умойгес улӥсь район ичигес коньдон ыстӥське, лябӟемаз - тросгес, чаклаське инкуазен сётэм узырлыкез кутон но. Бюджетлэсь быдэсъяськесмзэ эскеронъя вакчияк ивортон лэсьтӥз Кун Кенешысь Эскерон палаталэн кивалтӥсез Михаил Шишкин. Со меӵак пусйиз, бюджетэз юнматон умой-умой малпаськытэк ортче шуыса. Соин ик я отын, я татын шугъяськон учыръёс кылдо. Чаклам программа шоры нокин учкылӥсь ӧвӧл ни. Висись экономикалэсь ноку но ӟеч бюджет уз вордскы. Соиз шонер. Вылаз ик, вуэмез но коньдон чакламтэ интыосы кошке на ке. Сыӵе учыръёс, жаляса верано, ӵем пумиськыло. Одӥгъёсыз казна чотын асьсэлы юрт пукто, евроремонт лэсьто. Завьялово районлэн администрациез, кылсярысь, кызьы пусйиз депутат Николай Сычев, партилэн райкомезлэсь азьвыл юртсэ выльдонэ-тупатъянэ гинэ 4 миллиард манет пала кисьтӥз (мебелез но мукетсэ вератэк). Валамон, ваньмыз со усе бюджет удысын ужась вылэ. Малы ке-а дышетӥсьёс, врачъёс площаде пото яке сютэм улон яло? Сессиын куашетон потӥз Германиысь ю-нянь октон комбайнъёсты басьтон ласянь но. Куалэ-а вал таӵе ёрмон вакытэ коньдонмес немецъёслы кузьманы? Вераськон мынэ СБ- ЛИЗИНГ компания пумысен. Со пыр республикае 15 миллион 173 сюрс маркалы техника вуттэмын, асьме уксёен вераса, 340 миллион манетлы. Ку Правительство та тыронъёссэ берыктоз? Депутат Павел Вершинин, та ужпумез выльысь кутскыса эскерон понна, нимысьтыз комиссия кылдытыны. Залын пукисьёс пӧлысь данакез соин соглаш ӧз луэ. Оскемзэс веразы Эскерон палаталы но Эскерон кун комитетлы, та учыръя кутскем ужзэс мед азинтозы шуыса. Шонерзэ вераса, сессиын Правительстволы трос гинэ пыкылонъ1с верамын вал. Палэнэ ӧз кыльы вӧйын кылдэм югдур но. Депутатъёслы валантэм: кытчы шуак-дуак пыриз 450 тоннаем республикалэн запасэз? Озьы ик уз луы-а ю-нянь басьтыны шуыса висъям коньдонэн но? Таоссэ юанъёсты ӝутӥз Кун Кенешлэн Тӧроез депутат Александр Волков. Зэмен но, валантэм юанъёс вань. Соосты сэрттон-пертчон мыноз на вуонояз 23-тӥ сессиын. Коньдон ужпумъёс уго ватскылыса шудэмез уг ярато, кулэ каро шонер лыдъям- чотамез. Л. МЕДВЕДЕВА. Правительствоын Республикаысь Правительстволэн Президиумез дунъян (оценочной) юрттэтъёсъя рынокын экономической политикаез быдэсъян но та удысын потребительёслэсь правооссэс утён вылысь нимысьтыз комиссия кылдытон сярысь решение кутӥз. Комиссия законъёсты кылдытон бордын ужалоз, кун ёзъёслэсь но дунъян юрттэмъёсъя рынокын ужасьёслэсь кусыпъёссэс радъялоз. Пудоез дунын эмъяса поттэм коньдонэз ӟечгес кутон понна, куд-ог воштӥськонъёс юнматэмын. Табере Пудоез эмъянъя управленилэсь ветеринариен герӟаськем ужрадъёссэ ортчытон понна, нимысьтыз коньдон люкамын луоз пудоез дунын эмъяса поттэм уксёлэсь 10 процентсэ талы висъян чотын. Тэльёсын культураен, тазалыкез юнматонэн, спортэн герӟаськем ужрадъёсты ортчытъян рад сярысь ужпум эскеремын. Нюлэс арендае сётӥськоз сыӵе организациослы но нимаз адямиослы, кудъёсызлэн та выллем ужъёсын вырыны правозы вань, озьы ик санаториёслы, шутэтскон юртъёслы, нылпи лагерьёслы. 1998 арын 31 мае авиацилэн маршалэзлы, Удмуртилэн пиезлы Фёдор Яковлевич Фалалеевлы 100 ар тырмоз. Солэсь Атыкай музъем азьын вормонъёссэ лыдэ басьтыса, тодмо ожгарчилэсь юбилейзэ пусйыны чакламын. Удмурт Республикаысь Правительстволэн Тӧроезлэн секретариатысьтыз пресс-центр. Интыяз кыллись ваньбуръя но сое возён-кутонъя правоосты кунэн пусъён но та мугъя ивортон понна дунъёс тупатон сярысь Удмурт Элькунысь Правительстволэн ПОСТАНОВЛЕНИЕЗ 1998 ар 2 ноябрь Ижевск город � 1018 "Интыяз кыллись ваньбуръя но сое возён-кутонъя правоосты кунэн пусъён сярысь" Федерацилэсь законзэ лыдэ басьтыса но Россия Федерациысь Кивалтэтлэсь 1998 арын 26 феврале кутэм "Интыяз кыллись ваньбуръя но сое возён-кутонъя правоосты кунэн пусъён (регистрация) но та мугъя ивортон понна вылӥ дун тупатон сярысь" 248 номеро но 1998 арын 21 феврале кутэм "Интыяз кыллись ваньбуръя но сое возён-кутонъя правоосты кунэн пусъён но та мугъя ивортон понна, дун поттэм чотын шор ваньбуретлэсь люкетсэ тупатон сярысь" 237 номеро постановлениоссэ быдэсъян вылысь, Удмурт Элькунысь Кивалтэт ПУКТЭ: 1. Тупатоно интыяз кыллись ваньбуръя но сое возён-кутонъя правоосты кунэн пусъён но та мугъя ивортон понна дунъёслэсь быдӟалазэс. 2. Юнматоно интыяз кыллись ваньбуръя но сое возён-кутонья правоосты кунэн пусъён но та мугъя ивортон понна Удмурт Элькун улосвылын басьтэм тыронъёслэн радзы, дырзы но амалъёссы сярысь Положениез. 3. Тупатоно, "Удмурт Элькунын интыяз кыллись ваньбуръя но сое возён-кутонъя правоослы кун регистрация ортчытонъя Пусъён палата" юстицияя ужъюрт (учреждение) кылдэмен валче, Удмурт Элькун Кивалтэтлэн 1998 арын 26 январе кутэм "Удмурт Элькун улосвылын интыяз кыллись ваньбуръя но сое возён-кутонъя правоосты кунэн пусъён сярысь" Федерациысь законэз улонэ пыӵатонъя ужрадъёс сярысь" 54 номеро постановленилэн 2-тӥ пунктэзъя интыяз кыллись ваньбуръя но сое возён-кутонъя правоосты кунэн пусъёнэз радъясь ёзъёсын 1998 арын 1 ноябрьысен интыяз кыллись ваньбуръя но сое возён-кутонъя правоосты кунэн пусъён но та мугъя ивортон понна дун поттэм чотын шор ваньбурет люкетлэсь вить процентсэ юстицияя ужъюртлэн счётаз ысъянэз. 4. Ватсаса тупатоно интыяз кыллись ваньбуръя но сое возён-кутонъя правоосты кунэн пусъён но та мугъя ивортон понна дун поттэм чотын шор ваньбурет люкетэ вить процент, Удмурт Элькунын интыяз кыллись ваньбуръя но сое возён-кутонъя правоосты кунэн пусъёнъя ёзъёслэсь сӧзнэтсэс кылдытон понна, нырысь ик быдэстоно, ужрадъёслы коньдон висъян вылысь. Удмурт Элькунысь Юстицияя министерстволэн субсчётаз шор ваньбурет люкетэз ыстыны быгато интыяз кыллись ваньбуръя но сое возён-кутонъя правоосты кунэн пусъёнэз радъясь ёзъёс та постановлениез кутэм дырысен ар ӵоже. 5. Правоосты кунэн пусъён но та мугъя ивортон понна тыронъёслэсь быдэсак мозмытоно: кун властьлэсь ёзъёссэ но интыын аскивалтонъя ёзъёсты, соос ваньбурзэс кун яке интыысь асъетэ (собственность) сёто ке; Советской Союзлэсь Геройёссэ но Россия Федерацилэсь Геройёссэ, Социалистической Ужысь Геройёсты, куиньзэ ик Слава но Ужъя Слава орденъёсты басьтэм муртъёсты; мумы-бубытэк кылем нылпиослэсь но анай-атайёсынызы аналтэм пиналъёслэсь правооссэс кунэн пусъёнэз быдэсъясь юридической но нимаз адямиосты. 6. Правоосты кунэн пусъён но та мугъя ивортон понна 50 процент тыронлэсь мозмытоно: 1-тӥ но 2-тӥ группаен сӧсыръёсты, пичиысен сӧсыр кылемъёсты; Быдӟым Отечественной войнае пыриськемъёсты; мукет кун улосвылъёсын ожъёсы пыриськемъёсты; Чернобыль АЭС-ын кышкыт адӟонлэсь бервылъёссэ быдтон-палэнтонэ пыриськемъёсты. 7. Удмурт Элькунлэн коньдэтэз (бюджетэз) чотын, муниципальной кылдэтъёслэн (образованиослэн) коньдэтъёссы чотын улӥсь ужъюртьёс интыяз кыллись ваньбуръя но сое возён-кутонъя правоосты кунэн пусъён понна тыро юнматэм дунъёслэсь 5 процентсэ. 8. Та постановленилэсь быдэсъяськемзэ эскероз Удмурт Элькунысь Юстицияя министерство. Удмурт Элькунысь Кивалтэтлэн Тӧроез - П. Н. Вершинин. Д. Ф. Устиновлы - 90 арес 12-тӥ ноябре вордскем дырысеныз 90 ар тырмысал Дмитрий Федорович Устиновлы. Дмитрий Устинов асьме шаермы понна туж трос ӟечсэ лэсьтӥз. Огвакытэ городмылы но солэсь нимзэ сётӥзы вал. Солэн сюлмаськеменыз Удмуртиын кылдытэмын вал мотоцикл но машина лэсьтон заводъёс, "Ижмашлэн" корт ӵыжатон комплексэз, лэсьтэмын аэропорт, уно улон коркаос но трос мукетыз. Быдӟым Отечественной война вакытэ трос юрттӥз ож тӥрлык поттонэз паськытатыны. Устинов но солэн ужъёсыз сярысь унозэ тодыны луоз "Ижмаш" но "Ижсталь" заводъёсысь, Удмурт Республикаысь национальной музейысысь. Кылсярысь, "Ижмашлэн" музеяз вань Устиновлэн генерал погонъёсын дэремез. Вань Тулаын лэсьтэм пыӵал, час, портретъёс, туспуктэмъёс но мукетыз. Ваньзэ со арбериосты музейлы сётӥз Дмитрий Федоровичлэн нылыз - Вера Дмитриевна. В. РОГАЛЕВ, краевед. Снимок вылын: Д. Ф. Устинов Ижевскысь машина лэсьтӥсьёс дорын. ГЕРД Одӥг липет улын Можгаын удмуртъёслэсь огазеяськонзэс кылдытэм дырысен тямысэтӥ ар мынэ ини. Нырысь со удмурт культурая дэменлыклэн ёзэз вал. Отын ужазы таӵе секциос: кивалтонъя, культура ужпумъёсъя, ""Шунды"" национальной кадръёсты дасянъя. Удысмес озьы радъяса ужаны милемлы кельшиз. Бӧрысьгес кылдытӥм "Удмурт кенешлэсь" ёрос ёззэ. Та ужен кутсконысеныз вырисько бере, сюлмыным, кӧня ке ар талэсь азьло шӧдӥ, эшъёсы но валазы: Ижын удмурт национальной движение ас ӧрзэ ӧз шедьты. Йӧно адямиос ог-огенызы уг тупало: весь кыӵе ке но керетонъёс, ваче йыгаськонъёс. Сыӵе югдурез лыдэ басьтыса, 1994 арын октябре ортчем конференциямы "Дэменлэн" но "Удмурт кенешлэн" ёрос ёзъёссылы огъя тӧро быръён сярысь решение кутӥм. Улон возьматӥз, чик но ӧм янгышалэ шуыса. Озьы ми быгатӥм вожвылъяськонлэсь мозмытскыны. Уго кыкез но та огазеяськонъёс огъя ужен - удмуртлыкмес утёнэн но азинтонэн герӟаськемын. Висъяськыса ужан нокинлы но кулэ ӧвӧл. Али вань шулдыръяськон ужрадъёс удмурт культурая секцимы пыр ортчо. Кивалтэ соин М. М. Иванова. Правленилэн кенешонъёсаз соос пумысен ӵош вераськиськом. Гырон быдтон-а ортчытоно, городлэсь нуналзэ-а пусъёно, маке мукет ужрад-а дасяно - культура удысын тыршисьёсмы ваньзэ мылысь-кыдысь лэсьто. Вань гинэ пусйымонэз "Шундылэн" ужаз но. Тани туэ "Можга иворъёс" газетмы пыр, Ашальчи Окилэн но Куӟебай Гердлэн вордскем нуналъёссылы сӥзьыса, пинал кылбурчиос пӧлын конкурс ортчытӥм. Со сяна, радъям "Калык выжыос" фестиваль, кытын котькуд школа возьматӥз кыӵе ке но удмурт йылолэз. Азьло аръёсы пичияк юрттэт сётӥськом вал "Шундыкар" лагере ветлӥсьёслы. Туэ, жаляса верано луэ, ӧм быгатэ. Егитъёсмы ӵем гинэ ортчытъяло пӧртэм пумиськонъёс, ӵошатсконъёс. Ваньмыз со лэсьтӥське правлениын юнматэм планъя. Вал сыӵе но вакыт, куке "Шундымес" огъя липет улысь поттыны выризы. Нимаз, пе, мед луоз. Асьсэлы счёт усьтыны малпазы, Ижысь коньдонэн юрттэтлы оскизы. Но ми сыӵе сюрес вылэ ӧм коже. Малпасько, шонер лэсьтӥм шуыса. Егитъёс но валазы кадь. Соосын кивалтэ Т. М. Кибардина. Со мынам воштӥсе луэ. Берло кык арзэ шӧдскымон адӟиськыны ӧдъязы нылкышноослэн кенешсы. Солэсь ужзэ быгатыса радъя педучилищеысь удмурт отделениен кивалтӥсь Т. С. Иванова. Нылъёсмы толэзьлы быдэ люкаськыло, пӧртэм ужрадъёс ортчытъяло. Вань ини асьсэлэн активзы. Котькуд пумиськонэ городысь тодмо адямиосыз ӧтьыло. Шутэтскыны но умой быгато. Одӥг липет улын улэммы соослы пайдаен гинэ берытске - уго ми олокызьы но юрттыны тыршиськом. Та удысын ляб интыез но вань ай. Нокызьы но ум пӧрмытӥське гуртысь нылкышноос пӧлын рос-прос ужаны. "Удмурт кенешлэн" ёрос ёзэз палэнэ кыльыны уг быгаты политикалэсь но. Кык пол ми ужамы ни И. Н. Семенов понна, сое Кун Кенеше депутатэ но городлэн администрациезлы кузё бырйыку. Кык полаз ик Игорь Николаевич азьпала потӥз. Быръёнъёс милемлы школа выллем луизы, олокыӵе но шуг-секытъёсын пумиським, куддыр националистъёс но шуылыны кутскылӥзы. Озьы-а, тазьы-а, но малпанмы быдэсмиз кадь. Городысь 26 депутат пӧлысь витез удмурт. Мукет выжыысь потэмъёсыз пӧлысь дас витез сюлмаськонъёсмес валаны тыршо. Районысь советэ 20 мурт быръемын. Сизьымез удмурт. Ӝыныезлэсь тросэныз депутатъёсын огкыл шедьтӥськом. Вуоно быръёнъёсы но пыриськыны тыршом. "Удмурт кенешлы" та пумысен таӵе ӵектонэ вань: калыке тодмотэм адямиосын потыны уг яра, соос понна котькӧня ужа - пайдаез уз луы. Депутат луон понна нюръяськонэ пыриськыны кулэ устоосыз пӧлысь устоосыз - бырйись соосыз ужзыя тодыны кулэ. А. КОМАРОВ, "Удмурт кенешлэн" Можгаысь ёзэзлэн кивалтӥсез. Одӥгез премия - Глазовын Россия Федерациысь Правительстволэн Премиос сётонъя кенешез вузъёслэн ӟечлыксы удысын йылпумъянъёс лэсьтӥз. Правительстволэн Председателезлэн Евгений Примаковлэн 1310 номеро постановлениез потӥз: Отын 1998 арын поттоно вузъёслэн ӟечлыксыя Россия Федерациысь Правительстволэн премиосыныз пусъем предприятиослэн списоксы сётэмын. Укмыс предприятие пӧлын - Глазовысь "Чепецкий механический завод" акционер огазеяськон но. Ӟечкыласьком! Б. Никитин. "Танямы шунды выллем" Эх, дышетскеме тросгес ке луысал... - та выллем кылъёсыз ӵем гинэ вералоз вал аслаз кузпалэзлы Любовь Ильинична Кибардина. Угось кузпалзэ, Михаил Васильевичез, Алнаш ёросысь Шадрасак-Кибья гуртын гинэ ӧвӧл, быдэс ёросын но ас вакытаз умой тодылӥзы. Дышетскем мурт доры артэ ёросъёсысь но визь-кенеш курыны вуылӥзы. Гуртысь сабырлы воргорон тросэз понна юрист чотын но вал. Соинтэк-а дуно документъёсыз, колхоз контораын гожъятэк, Кибардинъёс дорын быдэсъязы. Нош Любовь Ильинична пырис- потӥсьёслэсь ноку но ӧз палэнскылы - шумпотыса ӝӧк сьӧры пуктылӥз, ческыт сиёнэн куноялляз. Кузпалъёслэн капчи мылкыдзылы тросэз синмаськылӥзы. Бен, Михаил Васильевич калык понна ваньзэ быдэстыны дась вал, нош гуртаз сокем ужаны ӧз сюрылы. Трос вераськыны ӧз яратылы, нош книга-газетъёс понна чылкак былемын вал. Гажаз со роман-газетэз. Тужгес тунсыко гожтэмъёсыз нылпиосызлы но лыдӟыны дэмлалляз. Любовь Ильиничналэн нуналмысь "висёнэз" - керттӥськон, пӧраськон но кырӟан. - Со шулдыр кырӟаз кыкетӥ куараен, яратӥз маскаръяськыны, кинлэсь ке адӟем карыса туссэ пуктыны, - тодаз вае Таня нылыз. - Эсьмаса, вакчи дыр куспын бӧрдӥсь муртэ но серекъятоз вал. Бӧрысьгес кылбуръёс но гожъяны ӧдъяз. Уно аръёс ӵоже лушкем возем малпанъёссэ кыре-буре поттӥз, шараяз. Соос выжые ик мынэм, дыр, Вася агаймы но. Экономистын ужанъяз суредаськыны но, кылбураны но вутскылӥз. Нош бӧрысьгес анаймылэн "пӧрам" кылбуръёсызлы крезьгур кылдытъяз. Аръёс жалясьтэм вӧсен бышкаса кошко. Анайзы но, атайзы но, одӥг гинэ пизы но туннэ Кибардинъёс пӧлын ӧвӧл ни. Соослэсь ужзэс азьланьто ньыль нылъёс-сузэръёс. Пусйыны кулэ: эшъёссы пӧлын соос ваньзы азьветлӥсьёс луо, удмуртлык понна юн "висё" но театр борды кыстӥсько. Москваысь Театральной искусствоосъя институт бере Удмурт телевидениын ужа Светлана Кибардина. Можга городысь "Дубитель" культура дворецын калык театрен кивалтэ Мария Иванова. Можга рынокысь бухгалтерын ужа Анна Антонова (огшоры кадь ужез, нош лулыныз-сюлмыныз со быдэсак искусство пӧлын). Та городысь ик педучилищеын дышетэ Татьяна Кибардина. Таиз сярысь нимысьтыз вераме потэ. Татьяна Михайловна огшоры нылкышно кадь, нош матэгес тодматскыса пайми солэн сэзь луэмезлы. Кытчы гинэ эн учкы, задор мылкыдыныз со я азьветлӥсь, я кичӧлтӥсь луэ, нош ӝытазе - артист. - Киужен уг выриськы бере, дорын пукыны мӧзмыт потэ, - шуэ Татьяна Кибардина. - Психология ласянь ке, мон экстраверт, нош экстраверт ассэ калык пӧлын шедьтэ. Гороскопея Чорыг. Озьыен, мынам "уян зарезе" - сцена. Туж яратӥсько Можга калык театре ветлыны. Мынам малпамея, дышетӥсьлэн ужез артистлэн выллем. Жалясько, инмар мыным ваньзэ сётымтэ, кылсярысь, кырӟаны - куаразэ, кылбураны - быгатонлыксэ. Татьяна Михайловна бызись шур вылем - ог интыяз ноку уз лёгаськы. Со егитъёс пӧлын но кичӧлтӥсь. 1993 арысен мылысь-кыдысь пыриське "Шунды" дэменлыклэн ёросысь ёзэтаз. Та огазеяськонлэн ужез уго тужгес но матын луэ дышетӥсьлы. Студентъёсын ӵош со тырше удмурт егитъёслэсь асваланзэс будэтыны, удмурт кылмес, культурамес утьыны, азинтыны. - Удмурт выжыосмес ыштыны но ӟучомыны кема ик ӧвӧл, - сюлмыз вӧсь луыса ик веранзэ азьланьтэ Татьяна Михайловна. - Ма, собере, калыклы маке умой лэсьтытэк, мынам кӧты палэс кыле кадь. Татьяна Михайловна котырын котьку но югыт, шуныт кадь. Эшъёсыз, апайёсыз соин данъясько. Тани ма вераз Светлана: - Танямы шунды выллем. Со куное лыктэ ке, ӟоскыт сэрэгамы югытгес луэ. Капчи мылкыдыныз милемыз бурдъяны быгатэ. Ноку но уг сётӥськы куректонлэн пеймыт вужерезлы. Шумпотэ вормонъёсмылы, аслаз но азьлань вамышъёсызлы. Можга педучилищеысь дышетӥсь улонысь ялан маке выльзэ утча но сое калык пӧлы пыӵатыны дыртэ. Ваньмон дыръяз лулысь-сюлмысь кенеше Костя пиеныз, яратэ сценарийёс гожъяны, нош кыӵе ке лушкем тулкымез вуыку, буёл, кисточка кутэ. Мылкыдъя уж шундылэсь но югыт, шуо. Со бордысь ик, дыр, Танялэн но пиштэмез. В. КУТУЗОВА. Татьяна Кибардина. Туспуктэмез Г. ЮСАЕВЛЭН. Тодон-валан дуре - ӝыны даур Удмурт пединститутын, кудӥз усьтэмын вал 1931 арын, удмурт кылъя но литературая дышетӥсьёсты нырысь-валысь дасязы ӟуч группаосын дышетскисьёсын ӵош, ог-огзылэсь висъятэк. Нырысьсэ нимаз удмурт группаос кутэмын вал 1947 арын, нош приказэн юнматэмын вал соос 1948 арын гинэ. Та группаосты усьтэм дырысен туэ тырме 50 ар. Ӝыны даур ӵоже удмурт отделениез йылпумъяз ог 1800 пала студент. Тросэз соос ужазы но али но ужало элькунысьтымы пӧртэм ёросъёсысь школаосын, нылпи садъёсын, газетъёслэн редакциосазы, радиоын но телевидениын, уноез соос пӧлысь луизы тодмо писательёс, кылсярысь: Семен, Евгений, Николай Самсоновъёс, Даниил Яшин, Герман Ходырев, Николай Васильев, Роман Валишин, Петр Поздеев, Анатолий Уваров, Анатолий Перевозчиков, Вячеслав Сергеев, Галина но Владимир Романовъёс, Татьяна Чернова но мукетъёсыз. Пединститутэз но университетэз йылпумъямъёс пӧлысь 25-ез луиз пӧртэм наукаосъя кандидат, 7-ез - филология но педагогика наукаосъя доктор но профессор, тросэз азьло студентъёсмы тыршо кивалтон удысын но: Р. Ф. Березин - Дышетӥсьёслэсь тодон-валанзэс будэтонъя институтлэн директорез, В. М. Ившина, А. С. Березина, А. Л. Монашева, Ю. А. Фомин Калыкез дышетонъя министерствоын тыршо, В. Н. Ившин - "Удмуртия" издательствоын валтӥсь редактор, Р. С. Куликова - Удмурт радиоын валтӥсь редактор, П. В. Куликов, И. М. Байметов - "Кенеш" но "Вордскем кыл" журналъёслэн валтӥсь редакторъёссы, В. Б. Возняков - "Ӟечбур!" газетлэн редакторез, Г. А. Ушаков - Международной Восточно-Европейской университетлэн проректорез. Огломак вераса, удмурт отделениез йылпумъямъёс шаермылэн улоназ шӧдскымон инты басьто, удмурт наукаез, культураез но искусствоез азинтонын но калыкез дышетон удысын азьветлӥсьёс луо. Нимаз удмурт отделение кылдытон аръёсы удмурт кылъя но литературая кафедраын ужазы А. С. Бабинцев, М. Н. Булычев, А. Н. Поздеева доцентъёс, А. И. Малых, Е. И. Никитина преподавательёс. 1960-тӥ аръёсы кафедрае ужаны лыктӥзы выльёсыз преподавательёс: Д. А. Яшин, Р. И. Яшина, И. В. Тараканов, В. К. Кельмаков. Бӧрысьгес ини, 70-тӥ аръёсы, татчы вуизы С. В. Соколов, Г. А. Ушаков, А. Ф. Шутов, А. Г. Шкляев, А. С. Зуева- Измайлова, Г. Н. Шушакова но мукетъёсыз. Пединститутэз университет карем бере, удмурт группаысь студентъёслэн лыдзы куинь поллы будӥз. Со луонлык сётӥз 1983 арын удмурт кафедраез кыклы висъяны. Одӥгез нимаськиз удмурт но финн-угор кафедра, мукетыз - удмурт литература но СССР-ысь калыкъёслэн литературазы. Соосын кивалтӥзы В. К. Кельмаков, Д. А. Яшин но А. Г. Шкляев доцентъёс. 1989-тӥ арын кылъя кафедраез нош ик кыклы висъязы, одӥгзэ огъя но финн-угор кафедра каризы (кивалтӥсез вал И. В. Тараканов профессор, али В. К. Кельмаков профессор), мукетсэ удмурт кылъя но сое дышетон методикая кафедра шуизы (кивалтӥсез вал Г. А. Ушаков профессор, али И. В. Тараканов). Университетын трос пумо специализациос но выль кафедраос кылдытон луонлык сётӥз нимысьтыз удмурт филология факультет усьтыны. 1992-тӥ арысен отын декан луыса ужаз доцент Г. Н. Шушакова, нош али та факультетэн кивалтэ доцент А. В. Ишмуратов. Али удмурт филология факультетын ужа куать пӧртэм кафедра: огъя но финн-угор кылъёсъя (кивалтӥсез профессор В. К. Кельмаков), удмурт кылъя но сое дышетон методикая (кивалтӥсез профессор И. В. Тараканов), удмурт литературая но Россиысь калыкъёслэн литературазыя но журналистикая (кивалтӥсез доцент А. Г. Шкляев), ӟуч филологияя кафедра (кивалтӥсез филология наукаосъя доктор профессор А. С. Измайлова), герман кылъёсъя кафедра (кивалтӥсез доцент В. В. Климова). Университетлэн программаез (пединститутлэнэн ӵошатоно ке) луонлык сётӥз удмурт кылэз, литератураез, соослэсь историзэс, удмурт вераськонъёсты, ӵыжы-выжы кылъёсты паськытгес но мургес тодытыса дышетыны. Университет трослы паськытатӥз студентъёслы квалификация сётонэз но. Удмурт филология факультетын дышетскемъёс табере ужаны быгато ни таӵе-таӵе удысъёсъя: удмурт кылъя но литературая; ӟуч кылъя но литературая: удмурт кылъя, литературая но англи кылъя; удмурт кылъя, литературая но немец кылъя; журналистикая. Факультетамы витетӥ арзэ ини вань финн-угор люкетэз. Отысь студентъёс удмурт кылэн но литератураен огдыре дышето финн но мадьяр кылъёсты. Дышетсконзэс йылпумъямзы бере, соос тодон-валанъёссэс азинтозы аспирантураын яке научной уж нуонэ интыяськозы. Та группаослы ӵыжы-кыжы кылъёсты дышетыны ӧтемын вал Финляндиысь но Венгриысь преподавательёс - Сара Хянникяйнен но Иштван Козмач. Туэ соослэсь ужзэс азинто ни Удмуртиысь преподавательёс. Угось факультетысьтымы тросэз удмурт дышетӥсьёсмы та ӵыжы-выжы калыкъёслэн кылъёсынызы умой-умой вераськыны но лыдӟиськыны дышизы ни: В. К. Кельмаков, П. И. Воронцов, Т. А. Краснова, В. Л. Шибанов, Е. В. Ветрова, С. А. Конева, М. А. Самарова, Л. Л. Карпова, Е. Ю. Шеклеина. Удмурт филологияя факультет юн кусыпъёс возе кунгож сьӧрысь университетъёсын, Венгриысь наукаосъя академиен, Сегед университетэн, Финляндиысь Турку но Хельсинки университетъёсын. Дышетӥсьёсмы ог-огзы доры ветло лекциос но спецкурсъёс лыдӟыны. Факультетамы арлы быдэ ортчытъясько научной конференциос, кык арлы огпол - пермь выжы калыкъёслэсь кылъёссэс эскеронъя зональной но калык куспо симпозиумъёс но конференциос. Дышетӥсьёсмы но аспирантъёсмы мылысь-кыдысь пырисько Дуннеысь финн- угор тодосчиослэн вить арлы огпол ортчылӥсь конгрессъёссылэн ужъёсазы. Удмурт филологияя факультетын 1992 арын усьтэмын аспирантура но диссертациосты утёнъя учёной совет. Та советамы наукаосъя кандидат ним басьтӥз ни 5 мурт. Азьланяз отын кандидат ним басьтыны быгатозы ни ӟуч кылъя но. Удмурт пединститутын удмурт кылъя но литературая кылдытэм пичи гинэ кафедра (отын 4 мурт гинэ ужаз) аръёс ортчыса бадӟымаз, кужмояз но, 50 ар ӵоже ужатозяз, шӧдскымон азинсконъёс басьтӥз - кадръёс дасян ласянь но, наукаез азинтон ласянь но, студентъёслы но школаосын дышетскисьёслы учебникъёс но методикая пособиос дасян но печатлан ласянь. Удмурт филологияя факультетын ужасьёс мылкыд каризы ӝыны дауръем юбилейзэс туэ 20- тӥ ноябре сӥё-дано пусйыны. Ӧтиськом удмурт группаосын ваньзэс дышетскемъёсты, тужгес ик 1947, 1948 аръёсы дышетскыны пыремъёсты. Улӥын сётӥськом та группаослэсь туспуктэмъёссэс. Ӝыт ортчоз Машиностроительёслэн юртазы 18 часын. И. ТАРАКАНОВ, Удмурт кун университетысь удмурт кылъя но дышетон методикая кафедралэн кивалтӥсез профессор. Сьӧрлось кунъёсын экономика кусыпъёс Мукет кунъёсын вузкарон республикамылы туэ укмыс толэзь ӵоже 273 миллион доллар барыш ваиз, кылем арын сярысь со кык поллы ӧжыт. Кунгож сьӧры ваньбур вузамын 216 миллион доллар тыр, отын бадӟым инты басьтэ топливно-энергетической удыслэн продукциез. Кылсярысь, му вӧйлэн люкетэз отын 49 процент луэ. Со дыре ик республикаямы палэнысь вузъёс 57 миллион долларлы ваемын, кылем арлы пумит со 47 процент. Ваем вузъёс пӧлын 7,6 миллион доллар тыр басьтэ сиён-юон, тямыс миллион доллар прокат, куамын миллион доллар - машинаос но оборудование. Дунъёс но тарифъёс Укмыс толэзь ӵоже инфляция 28 процентозь вуиз, кылем арын та дыре со 8,6 процент вал. Сиён-юонлы, аракыез вераса но, дунъёс 31 процентлы будӥзы, мукет вузъёслы - 36 процентлы, юрттэт сётӥсь дунъёс (услугаос) но 3,8 процентлы йылӥзы. Дунъёслэн будэмзы толэзьлы быдэ 2,8 процент котырын ке возиськылӥз, сентябре соос шуак 22,5 процентозь ӝутскизы. Тужгес но зол дуноязы чай но кофе 3,1 поллы, рис - 3 поллы, бананъёс но апельсинъёс - 2,1 поллы. 56-92 процентлы дуноязы бакча сиёнъёс, нуныослы кӧс йӧл, сылал, майонез, шоколад, сӥль сиёнъёс, греча кеньыр. 24-49 процентлы вылӥе ӝутскиз мукет сиёнъёслэн но дунзы - пызьлэн, вермишельлэн, чорыглэн но мукет. Кулэ вузъёсты басьтон но услугаосты тырон понна, котькуд толэзьлы али 321 манет 84 копейка кулэ (лыдъямын сентябрь толэзьлы), 1997 арын декабрь толэзен ӵошатыса, со 21 процентлы тросгес луэ. Нош 25 кулэ сиён-юонъёсты басьтон понна, шорлыдын вераса, 243 манет 81 копейка кулэ. Дунтэмгес со усе Можгаын - 219 манет 10 копейка, но дуногес Ижевскын - 248 манет 81 копейка. 25 сиёнъёсын наборлэн дунызъя Ижевск сылэ 78-тӥ интыын Россиысь 90 городъёс пӧлын но Урал регионысь 7 центръёс пӧлын 6-тӥ интыын. Тужгес но зол дунъёс будӥзы тамаклы - 2,6 поллы, автомобильёслы но мисьтаськон суретъёслы - 2 поллы, электровузъёслы - 88 процентлы, небыт кулэсь дӥсьлы - 46 процентлы, спичкалы - 33 процентлы, чулкаослы - 26 процентлы. Юрттэт сётӥсь дунъёс (услугаос) та дыр ӵоже сокем вылӥе ӧз ӝутске. Калыклэн улон-вылонэз Одӥг адямилэн номинальной доходэз, шорлыдын вераса, республикаямы 576 манет усе, кылем арын сярысь со 9 процентлы улӥегес васькиз. Асьсэ коньдонзылэсь бадӟым люкетсэ (80 процентсэ) калык сиён-юонлы но услугаослы быдтэ. 10 процентэз гинэ адямиос ас люкам коньдонзэс вкладъёсы но дуно бумагаосы тыро. Уждунлэн лыдъяса гожтэм быдӟалаез адямилы быдэ шорлыдын 893,5 манет усе, кылем арлэсь со 9,2 процентлы тросгес. Но будэм дунъёсты лыдэ басьтыса, шоро-куспо уждун 0,4 процентлы гинэ будӥз. Тужгес но ӧжыт уждунзы гурт хозяйствоосын ужасьёслэн (2,5 поллы). Республикаын тупатэм уждунлэсь ичигес уждунзы калыкез дышетон, эмъян, физкультура но спорт, культура но искусство удысъёсын, жилищно-коммунальной хозяйствоын, калыклы бытовой юрттэт сётонын но социальной удысын. Шоро-куспо улонлы тупатэм нормаослэсь бере кылё 15 процентэз улӥсьёс, кудъёссэ туннэ начар улӥсьёс пӧлы пыртыны луэ. Укмыс толэзь ӵоже республикаысьтымы 100 учреждениосын но организациосын забастовкаос ортчизы, 97-ез калыкез дышетон учреждениосын вал. Забастовкаосы 4,3 сюрс адями пыриськиз. Отчы пыриськем адямиослэсь лыдзэс басьтыса, 9,9 сюрс нунал тыр ужан дыр быдтэмын. Пумитъяськон ужрадъёслэн мугзы дыраз уждун тырымтэен герӟаськемын. Калыклэн лыдыз 1998 арын нырысетӥ январьлы лыдъямъя республикаямы 1632,6 сюрс адями улӥз. Со пӧлын 379,4 сюрс мурт - ужаны вуымтэос, 959,4 сюрс адями - ужасьёс но 293,5 сюрс - пенсие потэмъёс. Шӧдӥське калыклэн пересьмемез. Дуннеын тупатэм куронъёсъя калык пересен лыдъяське улӥсьёс пӧлын 7 процентлэсь ятыргес 65 арессэс ортчем адямиос ке уло. Сыӵе арлыдо адямиос асьме республикаын 10,6 процентэз городын уло, 12,4 процентэз - гуртын. Республикаысьтымы калыклэн шоро-куспо арлыдыз 35 арес, воргоронъёслэн - 32 арес, нылкышноослэн - 37 арес. Калыклэн лыдыз вылын шӧдскымон инты басьто кулон но вордӥськон но озьы ик миграциен герӟаськем мугъёс. Туэ тямыс толэзь ӵоже, кылем арен ӵошатыса, 512 муртлы адямиос тросгес вордӥськизы но 595 муртлы ӧжытгес кулӥзы. Улонысь трос адями кошкиз пӧртэм висёнъёс сэрен: вирзы сӧриськыса вань кулэмъёс пӧлысь 47 процентэз, шудтэм учыръёсы сюрыса - 17 процентэз, пыктос висёнъёслэсь (раклэсь) 13 процентэз. Та верам висёнъёслэсь туэ кылем арынлэсь адямиос ӧжытгес ке но кулӥзы, йылӥзы мукет висёнъёслэсь кулэмъёслэн лыдзы: алясь висёнъёслэсь (7 процентлы), туберкулёзлэсь (9 процентлы), алкоголизмлэсь (34 процентлы). Улонысь кошкемъёс пӧлысь 6 процентэз асьсэдыс быдтэмъёс. Ужтэк кылемъёс Пӧртэм предприятиосын та вакыт ӵоже 638,6 сюрс адями ужаз, кылем арлэсь бадӟым пӧртэмлыкез ӧвӧл. Ужасьёс пӧлысь бадӟым люкетэз тыршо шоро-куспо но бадӟым предприятиосын. Со сяна, та предприятиосы уже кыскылэмын вал совместительство амалэн 11,8 сюрс ужасьёс но 7,8 сюрс адями договорен ужасьёс. Уже кутонъя службаосы туэ сентябрь ӵоже гинэ 10,3 сюрс адями вазиськиз, 1997 арлэн сентябрь толэзеныз ӵошатыса, со 1,3 процентлы ӧжытгес. Ужтэк кылемъёс пӧлысь 47,9 процентэз (4,9 сюрс адями) асьсэлы уж шедьтӥзы уже кутонъя службаосы вазиськыса. Уж утчасьёслэн лыдзы туэ сентябрьлэн пумаз 50,7 сюрс пала луиз, со пӧлысь 43,2 сюрсэзлы пособиос сётыны тупатэмын. Йыртэман учыръёс Туэ укмыс толэзь ӵоже республикаямы 20415 йыртэман учыръёс лыдэ басьтэмын. Со пӧлысь 60 процентэз - секыт йыружъёс. Лэсьтэм йыружъёс пӧлысь 73 процентэз сэрттэмын. Йылӥзы кылем арын сярысь наркотикъёсын герӟаськем ужъёс. Озьы ик тросгес луизы экономикаын лэсьтэм "сьӧд" ужъёс, та дыр ӵоже шараямын 100 сыӵе ужъёс. Та лыдпус пӧлы ик пыро 253 калыкез пӧяса лэсьтэм учыръёс. Йыртэмасьёсты кутэмъёс пӧлын 12 процентэз нылкышноос но сомында ик быдэ вуымтэос. Законэз тӥямъёс пӧлын - ӝыныез ужтэк кылемъёс. Г. Дойников. Удмурт Республикаысь статистикая кун комитетлэн кивалтӥсез. СБС-АГРО Гуртоос палэнэ уз кыле 1. Кӧня сётод - сомында басьтод СБС-АГРО банклэн Удмурт ёзэз кылдэм дырысен, арен ӝыныен сяна ӧз ортчы. Кивалтэ Игорь Евгеньевич Останин. Банк азьын сылӥсь ужпумъёс сярысь ке верано, со трос лэсьтӥз ни республикамылэсь экономиказэ юнматон но азинтон понна - сётӥз ог 1,5 миллиард манет. Шӧдскымон юрттэт вуэ гурт хозяйствоос, тужгес но гырон-кизён, ю-нянь утялтон вакытэ. 1998 арын, кылсярысь, висъямын 57 миллион, кредитъёслы - 2 миллиард манет. Ваньмыз со ар йылпумъяськытозь, барышен берытске. Зэмен но, бусы ужъёс таяз арын, азьвылъёсыныз ӵошатыса, пӧсекъятэк, мултэс шугъяськонъёстэк ортчизы, шуыны луоз. Кызьы пусъё хозяйствоослэн кивалтӥсьёссы, комбайнёръёс но кутсаськон дыръя эстӥськонлы, вӧйлы ёрмыса сылон учыръёс ӧй вал. Озьыен, дыраз висъям коньдон музъем ужасьлы туж юрттӥз. Со сярысь верамын вал Гурт хозяйствоын но перерабатывающей промышленностьын ужасьёслэн алигес ортчем праздниказы. СБС-АГРО банклэн Удмурт ёзэз вуоно арын гуртлы 60 миллион манет сётыны чакла,туэ сярысь, 10 миллионлы ятыргес. Кошкисез ар ӟеч урожаен ӧз ке но шумпотты, хозяйствоос пунэмаськонъёссэс дыраз берыктыны сюлмасько. Сётэм коньдонзы уго асьсэлы ик тулыспал яралоз: макем узыр луоз банк - сокем юн луоз гурт хозяйство. Вакчияк СБС-АГРО-лэн историысьтыз: солэн туннэ нуналэз кутске 1882-тӥ арысен. Ӵапак соку Россиын вордскиз нырысетӥез общенациональной аграрной банк. Музъемлэсь кузёзэ зол возиз, юнме шат царской Россия ас будэтэм няненыз вузкарылӥз. 2. Оскымонъёсыз радын Странаысь экономикалэн оглом куашкамез банкъёсты зол гинэ шуккиз. Али вераськон мынэ кудӥз соос пӧлысь быроз, кудӥз кылёз на шуыса. СБС-АГРО-лы оскон вань, малы ке шуоно, 17 августэ луэм кризис дыръя ассэ возьыны быгатӥз. Удмурт ёзэз сярысь ке верано, ӵапак та секыт вакытэ республикаямы эшшо 3 банкомат пуктэмын на вал, табере соослэн лыдзы 16-ёзь вуиз. Пластик картаосын ужало тросэз предприятиос: "Ижсталь" АО, "Буммаш" АО, "Аксион" но куд-ог мукетъёсыз. - Азьланяз пластик бизнесэ выжтыны малпаськом тросгес магазинъёсты,- шуэ банклэн генеральной директорез И. Е. Останин.- Басьяськисьёслы но, вузкарисьлы но умой. Та амалэз вуттыны тыршом шаермылэн вань районъёсаз. Сётэм кредитъёс сярысь ке верано, 1997 арын 99 процентэз дыраз берыктэмын, туэ но югдур уз уродмы шуыса оскиськом. Банк матысь дыре чакла Балезиноысь спиртзавод лэсьтонэ пыриськыны, бюджет удыслы юрттыны, райцентръёсы банкоматъёс пуктыны. Ваньмыз со герӟаськемын экономикамес радъянэн. Кӧняез коньдон асьме понна ужа, кӧняез Москвае кошке? И. Е. Останин верамъя, Удмуртиысь банке вуисез быдэсак кыле республикае, со вӧзы вуэ на Центрысь. Пластик картаосын ужанъя август толэзёзь банклэн Удмурт ёзэз Россиын устоез 10 филиал радын вал. Али но бере кыльыны уг малпа. - Кунгож сьӧрысь дунтэм коньдонлы туннэ оскыны шуг, уг поты юрттэмез Дуннеысь банклэн но,- шуэ Игорь Евгеньевич.- Соин ик ми вань быгатонозэ лэсьтом, банке вуэм коньдонэз быдэсак Удмурт Республикалэн экономикаяз сётон вылысь. Кызьы шуо, кредитъёс вуо но кошко, нош банкъёс ужало, номыр шоры учкытэк. 3. Россия сяна, быдэс дунне тодэ СБС-АГРО банклэн Удмурт ёзаз туннэ нуналлы 5 сюрс мурт коньдонзэ возе. Августэ "сьӧд нуналъёсы" 22 миллион манет выжтэмын вал сбербанкъёсы. Озьы ке но, данакез вкладчикъёс, предприятиос, организациос СБС-АГРО-лэсь палэнскыны ӧз дыртэ. "Ижмолоко" АО самой со нуналъёсы вкладзэ будэтӥз на - соин ӵош азьланезлы осконзэ вераз. Зэмен но, банклэн малпанъёсыз бадӟымесь. Со ӵош ужалоз республикаысь Правительствоен: юрттоз гуртъёсы чагыр эстӥськон пыртыны, вексельёсъя программаез быдэстыны, юрттоз лэсьтӥськонэз нуыны, культураез азинтыны. Банклэн сюресэз оскымон. 1997 арысен солэн ёзъёсыз кылдӥзы Россилэн вань регионъёсаз. Удмуртия пыре Урал улослэн управленияз (Екатеринбург). Кунгож сьӧрын со выжыяськиз Испание, Англие, Арабской Эмиратэ, Македоние, Нидерландые... Арысь аре банклэн табышез йылэ. Озьыен, СБС-АГРО улоз но ужалоз, шуг-секытъёслы уз сётскы. Л. МЕДВЕДЕВА. И. Е. Останин. Фотоез В. КАМАШЕВЛЭН. Егитлык - котьку чебер Кылем арня пумын студентъёслэн "Дождались-98" ИИ республиканской фестивальзы ортчиз. Отчы лыктэмъёс кужмо кичабонъёсын пумитазы Удмурт Республикаысь Кун Кенешлэсь Тӧрозэ Александр Волковез. "Студентъёслэсь фестивальёссэс ортчытъян,- шуиз Александр Волков,- Удмуртиын ӟеч сямлы пӧрмиз ни. Фестиваль - со чеберлык, ог- огеныд валче улон но эшъяськон. Сюлмысьтым ӟечкыласько тӥледыз та нуналэныды, сӥзисько шулдыр мылкыд но чебер праздник! Шудо луэ!" Ӟечкылан Мон огнам улӥсько. Аресы бадӟым ӧвӧл ке но, гурт ужъёсме поннам ужаны уг ни быгатӥськы. Но мынам юрттӥсьёсы вань. Вордскем нуналэнызы ӟечкыласько Завьял районысь Якшур гуртысь туклячиме Раиса Морозоваез, Ижевскысь Раиса Дорофееваез, Можга ёросысь Бадӟым Кибья черкогуртысь пиелэсь пизэ Владимир Постниковез, Светлана Гавриловаез но Александр Владимировичез. Соослэн ваньзылэн 20 ноябрьысен 26 ноябрёзь вордӥськем нуналъёссы. Сӥзисько ӟеч тазалык, семья куспады тупаса улон, мед вамышъялоды та улон ӧретӥ, котькыӵе сильзорез-сильтӧлэз вормыса. А. ПОСТНИКОВА. Можга районысь Бадӟым Кибья гурт. ГЕРД Котькытчы вуэ Данъян книгае пыртэм нимтулъёсын тодматскыса, куд-ог лыдӟисьёслэн юанзы кылдоз, дыр, Елена Долгова пумысен. Уго со сокем ик тодмо ӧвӧл на. Озьы ке но, сыӵе бадӟым дан егит кышномурт доры юнме шорысь ӧз вуы. Елена Степановна, асьме университетэз йылпумъяса, дас одӥгетӥ арзэ школаын ужа ни. Алнаш палан будэм нылаш Грах ёросэ выжыяськиз. Егит дышетӥсь котькуд урокезлы ӝот-ӝот дасяське, пӧртэм луонлыкъёсты уже кутэ, материалзэ интыысь учыръёсын герӟаны тырше. Ашальчи Окилэн юбилеез азьын со кылбурчи сярысь трос выльзэ, азьло тодмотэмзэ шедьтыны быгатӥз, тодэмзэ калыке вӧлмытыны сюлмаськиз. Ӟечкыласьком, Елена! Оскиськом, асьме калык понна Тӥ трос лэсьтыны быгатоды на шуыса. О. МАРКОВ. ШӦКЫЧ Таяз арын кулэсмиз пудо-животлэн лыдыз, сюро-таза пудолэн - 5 процентлы, парсьёслэн - 1 процентлы, ыжъёслэн но кечъёслэн лыдзы - 8 процентлы. (Удмурт Республикаысь Статистикая кун комитетлэн ивортэмезъя). Возьмаськись: - Вань пудоез сӥль комбинатэ келязы. Нош колхоз кузёмы монэ юн алыса кельтӥз: "Объектысьтыд, мотри, эн кошкы! Гиддэ сэрттыса-пертчыса нуозы". - Пукисько тани, возьмаськисько. Малпасько, кинлы меда кулэ на куашкам ферма. Суредэз Д. Полухин. (Суред вылэ гожтоно: Вань пудоос келямын..!). БУСКЕЛЬЁСМЫ ДОРЫН Кильмезь палан туннэ Сётэм кылзэ быдэстӥз Киров областьлэн губернаторез В. Н. Сергеенков Кильмезе вуылэмез бере, кык арня ортчыса, ёросысь калыкез дышетонъя управление Кировысь "Весна" фабрикаысь жингыртӥзы но нылпи шудонъёслы лыктыны куризы. Владимир Нилович Кильмезьысь пиналъёслы шудонъёсын юрттыны кыл сётӥз вал уго. Усто кузьымлы шумпотӥзы воспитательёс но, нылпиос но. Ма гинэ ӧз вуттэ садъёсы - мунёос, машинаос, кубикъёс, конструкторъёс, мозаика но трос мукетсэ. Куать сюрс манетлы басьтэм кузьым келямын ёросысь нылпи садъёсы. Асьсэос поттозы Туэ ёросын шор ёзо школаосты 222 егитъёс йылпумъязы. Соос пӧлысь 20 мурт вазиськиз уже интыянъя центре. Валамон ини, специальностьтэк али уж шедьтыны шуг. Соин ик центр егитъёсты предприятиослэн ыстэмзыя келя бухгалтере, каменщике, вуриськисе дышетскыны. Но Кировысь "Умелец" фирма басьтэ вань мылкыд карисьёсты. Отын соосты дышето пӧртэм киужъёслы. Самой кибашлыосыз поттэм вузъёсынызы асьсэос коньдон поттозы. "Капчиятӥз" 2 тонналы Кильмезьысь автоколоннаос ужасьёслы сиён-юонэн "зориз", шуыны луоз. Малмыжысь татчы туж тросэн вуттӥзы рожки, спагетти, консерваос. Озьы транспортникъёс быдэстэм ужзы понна пунэмзэс басьтӥзы. Сиён-юон уноез висъяськиз уждун понна пунэмъёсты тырыны. Нош уждунэз татын ӧз адӟылэ ни ӝыны ар. Калыклы тужгес но кельшизы макаронъёс. Соосты шорлыдын 30-40 мешокен басьтылӥзы (одӥгаз 18 кило). Котькудӥз сое вузаса барыш поттыны чаклаз, дыр. Тужгес но паймытӥз автобуслэн водителез. Со автоколонналэсь складзэ 120 мешоклы капчиятӥз, яке 2 тонналэсь унолы. Майтал нош малы? Бураш гуртысь куинь покчи пиос "Дубровский" совхозлэн складаз пыраллям. Кӧня ке шудэмзы бере, ерпечкаос 300 грамм кортӵог, изолента, 4 майтал но кӧс йӧл поттыны дасяллям. Пиналъёс азьвыл чебересь шудонъёслы, пряник-конфетлы синмаськозы вал. Ёрмыса улэм-вылэмен-а, мар-а пиналъёс лушкаськыны кыстӥсько. Оло, анай-атайёс сыӵе йыруж лэсьтыны ӵекто? Музей узырмз Берло дыре трослы узырмиз ёросысь краеведениея музей. Адямиос вуттӥзы колхозникъёслэсь куамынэтӥ аръёсы гожтэм книжкаоссэс, туспуктэмъёссэс, киужъёссэс. Кильмезьын дышетскись Салима Галимова ваем священниклэсь Иоанн Кронштадтскийлэсь тусбуйзэ. Со сю ар талэсь азьвыл лэсьтэмын вылэм, туж векчи корт нюжаосын пужъятыса. Каун кыскиз 70 кило Сыӵе бадӟым каун (тыква) будэтэм аслаз бакчаяз Селино гуртысь Валерий Сычев. Со сярысь тодыса, школаысь дышетӥсьёс бакча кузёлы вазиськизы, будоссэ дышетӥсьёлэн ёрос слётазы возьматыны курыса. Одеялэн керттылыса гинэ мырдэм но кызьы вуттӥзы великанэз школае. Николай Турин. Николай Турин. Из дунне Асьмеос Уралын улӥськом шуиськомы. Нош зэмос Уралэз ум тодӥське вылэм. Сыӵе малпанэ вуиськод, "Металлург" дворецысьтымы изъёсын возьматонэз (выставкаез) учкыса. Сое дасяз Екатеринбургысь "Альпура" фирма. Ужрад нимаське тазьы: "Кузё кышнолэн кузьымъёсыз". Пырыкуд 7 манет тыриськод но (пенсионеръёс - 3 манет) вуиськод зэмен ик абдрамон шаере. Кыӵе но узырлык ӧвӧл - яшма, змеевик, радонит, агат, амазонит, сердолик. Кузё кышно интыын милемыз пумитаз "Альпура" фирмалэн кивалтӥсез Константин Яскевич: - Мар со "Альпура"? Ми ужамы Италиысь из вузасьёсын ӵош. Соослэн яратоно гурезьзы - Альпы. Асьмелэн - Урал. Альпы но Урал кылъёслэсь пӧрмиз Альпура. Фирма вуылӥз ни Уралысь данак интыосы, Казане, Самарае, Омске, Москвае. Сое шумпотыса пумитало Уфаын. Нош Ижын кызьы? - Дорады кыкетӥзэ лыктӥм. Калыкты умой, нош изъёсты валан культурады улӥынгес на кадь,- кескичак валэктэ Яскевич.- Курган Ижлэсь чарак пичигес. Отын нуналлы быдэ дорамы пыраз ог сюрс мурт. Татын - 300. Оло, реклама ӧжыт вал? - Отчы ми быдтӥм 10 сюрс манет. Барышмы но сомындагес гинэ луоз. Вераськон выже изъёс вылэ. Урал азьвыл данъяськылӥз вожмыт малахитэн. Тодады ваелэ Павел Бажовлэсь "Малахит шыкыс" выжыкылзэ, яке Санкт-Петербургысь Тол (Зимний) дворецысь малахит залэз. Малахит - ыргонэн узыр из гурезьлэн шобретэз. Ӵуж ыргон но улыса-улыса вожектэ ук. Али, та металлэн рудаез утча, музъеме мур пыриськизы ни. Отын малахит ӧвӧл. Сое табере Уралэ вайыло Африкаысь. Выставкае но тани пыриське Конгоысь Москвае улыны лыктэм сьӧд куо воргорон. Пумен кулэсме Ураллэн музон данъяськонэз - аметист. Сое вуттыло Бразилиысь. Уралысь кибашлыос аметистэз вӧло, волято, зарниен яке азвесен чеберъяло но вузало. Возьматонэ лыктэмъёс ӵемысь юало: кыӵе мынам изэ? Константин Яскевич геологе дышетскемын. Соин ик оккультизм шуонлы уггес оскы. Озьы ке но, гороскопъя тупась кӧльыосты вераны тодэ. Овенлы агат, алмаз но мукетыз, Телецлы - авантюрин, агат, Кыктоослы - александрит, берилл, Кисло-куслоослы - аквамарин. Бирюза, Левлы - нефрит, лазурит, Ныллы но веслы - авантюрин, агат, Скорпионлы - гематит, кальцит, Стрелецлы - амазонит, арагонит, Козероглы - алмаз, нефрит, Водолейлы - оникс, сапфир, Чорыгъёслы - флюорит, хризопраз. Куд-ог изъёс, кылсярысь, яшма, аметист, сердолик тупало дасо муртлы. Абдрамон ӧвӧл-а? Яскевич кыллы кисыяз уг пыры: - Тӥляд изды соиз, кудзэ яратӥськоды. Гороскоп шоры учконэз ӧвӧл. А. ПЕТРОВ. ЖУРНАЛИСТЪЁСЫН ПУМИСЬКОНЪЁС Кусыпъёсты герӟась выж Газетмылэн азьвыл номераз ивортӥм вал ни, республикаысьтымы отщественной огазеяськонъёс асьсэлэсь конгрессэс ортчытыны малпало шуыса. Со люкаськоз 24 ноябре 10 часэ ӵукна профсоюзъёслэн юртазы. Та бадӟым кенешонлэн ужпумез одӥг: власть но калык кусыпъёсты тупатон, ог-огзылы матэгес карон. Кызьы шуиз берло ортчем пресс- конференциын Геннадий Овчинников, та конгрессэз дасясь мурт, Государственной но муниципальной службая удмурт институтлэн кивалтӥсез, берло аръёссэ туж шӧдӥське властьлэн ужась калыклэсь пумен кыдёке но кыдёке палэнскемез. Соос вискы дыраз выж ӧд ке лэсьты, югдур тупатыны отӥяз бер луоз. Конгрессын вераськон мыноз пӧртэм общественной огазеяськонъёсын ӵош ужан сярысь. Али соос 400 пала лыдъясько, котькудӥз ас понназ берга, нош огазеясь кужым ӧвӧл. Азьвыл та ролез ас вылаз басьтылӥз партия. - Калык туннэ кужымтэм, кылтэм-ымтэм кылемын, быръёнъёс дыръя сяна малпанзэ вераны правоез кылемын ӧвӧл ни, - шуиз Г. П. Овчинников. - Та муген но, дыр, адямиос ми пала кыстӥськыны ӧдъязы. Оско, ми юрттэмъя соослэсь куаразэс вылӥ кивалтӥсьёс кылозы но кулэ ужрадъёс кутозы шуыса. Конгрессэ пыриськыны 105 огазеяськонлэсь куриськон вуиз ни. Куд-огез та ужрадлэсь номыр ӟечсэ уг адӟо. Кызьы шуизы сое дасясьёс, пӧртэм огазеяськонъёсысь ыстэм адямиос политической акция ортчытон вылысь уг люкасько, люкасько сюлмысь кенешон, ог-огедлы матэгес луон понна. - Конгресс ужа калыкен быръем властен ӵош но солы юрттон вылысь, - пусйиз Г. П. Овчинников. - 1991-тӥ арысь август нуналъёс сярысь но верано, матысь дыре сыӵе воштӥськонъёс уз луэ: огез но политической организация талы туннэ дась ӧвӧл. Л. МЕДВЕДЕВА. Мӧйыослэн газетсы Элькунысьтымы пенсионеръёс понна сизьым ар ӵоже потэ ини "Долг" нимо газет. Берло кык арзэ со печатласькиз "Удмуртская правда" газетын одӥгаз нимысьтыз бамаз гинэ. Нош туэ, 26-тӥ августэ, "Долг" потыны кутскиз нимаз, трос буёло тямыс бамо газет луыса. "Ӟечбурлэн!" кадь быдӟалаен. Выль арозь потоз толэзяз кык пол, нош 1999-тӥ арын потыны кутскоз арнялы быдэ одӥг пол. Гуртын улӥсьёс доры "Долг" газет ёросъёсысь ветеранъёслэн кенешъёсазы гинэ вуылэ, нош 10 сюрсъем тиражез вӧлме Ижын гинэ. Газетэз быдэс элькунамы вӧлмытон вылысь, шаерысьтымы почталэн вань ёзъёсаз, соос пӧлын гуртъёсын но, "Долг" газетлы гожтӥськон мынэ. Быдэс арлы дуныз - 18 манет. Газетэз лыдӟисьёс юаллясько: печатласькозы-а "Долгын" телевиденилэн программаосыз? Газет потылоз удмурт арня нуналъёсы, отын печатламын луозы телевиденилэн программаосыз. Вераны кулэ: быдэс Россиямы пенсионеръёс понна печатлаське ньыль гинэ нимысьтыз газет. Кыкез - "Ветеран" но "Достоинство" - Москваын, огез Кемеровоын, нош ньылетӥез - Ижамы. Элькунысьтымы вань лыдӟиськисьёс, мӧйыосыз но, шоро-куспо арлыдоосыз но, егитъёс но, "Долг" газетысь шедьтозы асьсэлы ярась тунсыко материалъёс. А. ЕМЕЛЬЯНОВ, "Долг" газетын ужась журналист. Нуналлэн тодметэз 22 ноябрьысен тол кужымаз пыре, ӟырт кезьытъёс вуо. Чаклалэ: писпуос пужмертэмын ке - кезьыт кариськоз, бус вӧлске ке - шунтоз. Та нуналэ... ар талэсь азьло 21 ноябре 80 ар тырме Михаил Николаевич Тюлькинлы, Советской Союзлэн Героезлы. Вордӥськемын Ижевск городын. 21 ноябре 65 ар тырме Удмуртиысь дышетӥсьёслэсь тодон-валанзэс будэтонъя институт кылдытон сярысь постановлениез кутэм дырысен. 23 ноябре 1942 арын Горд Армия Сталинград дорын Паулюслэсь группировказэ котыртӥз, котыртэме 330 сюрс фашист шедиз. Сталинград понна ожмаськонэ пыриськизы Шаркан ёросысь Александр Шамаев но Николай Шикалов. ШӦКЫЧ "Мынам телевизоре" Мае возьматэ туспуктӥсьмы Владимир Камашев та суредаз? Ӧвӧл, со книгаос ӧвӧл. Матысь лэсьтэменыз гинэ фотоысь суред книгаослы кельше. Та пӧяськыса лэсьтэм документъёс. Соосты талазы Ижысь контролёръёс, автобусын, троллейбусын но трамвайын билетъёсты эскерыку. Дунтэк ветлон понна адямиос кыӵе гинэ документъёс уг пӧрало. Тужгес но трос шедё пенсие потымтэ "пенсионеръёслэн" удостоверениоссы. Куд-ог документъёс одӥг нимын-тулын куинь- ньыль муртлы лэсьтэмын. Ӧжыт ӧвӧл асьсэды "ӧлексы карыса" ворттылӥсьёс но. Нош тужгес шаплыосыз милициын ужась но луыны быгато. Но контролер-ревизоръёс сыӵе "кечъёсты" ӝог гинэ шараян дышизы ни. Озьы тӥни, чаклаське контролёрлэсь!Б. СЕМЕНОВ. Уксё лыдъямез яратэ Выль арысен калык кие вуизы Россиысь Банклэн 1997-тӥ арын поттэм манетъёсыз но копейкаосыз. Выль коньдон вылтусызъя 1995-тӥ арын поттэмезлы укшагес. Сак ӧд луы ке, пӧяськисьёслэн ки улазы но капчиен шедёд. Угось коньдон ӵем вошъяськемен йылэ сое "суредасьёслэн" лыдзы но. Милям корреспондентмы кӧня ке юанэн вазиськиз Удмурт Республикаысь МВД-лэн экономика удысысь йыружъёсын нюръяськонъя отделаз ужасьлы Юрий МИХАЙЛОВЛЫ. - Юрий Васильевич, асьме шаерын вань-а коньдон "суредасьёс"? - Коньдон воштӥськем бере ик, шаерамы суредам манетъёс вуыны ӧдъязы. 1997 ар понна 64 уголовной уж ӝутэмын вал, нош туэ укмыс толэзь ӵоже - 35. Ортчем арен ӵошатыса, со 45,3 процентлы ичигес. Лыдпуслэн кулэсмемезлы огласянь шумпотыны но луэ, дыр, нош мукет ласянь учконо ке, данъяськыны вазь на. Угось йыртэмасьёс суредам коньдонэз бадӟым партиен котькуд нунал вӧлмытыны быгатозы. Туэ сыӵе муртъёс шараямын ни. Кылсярысь, 10 мартэ Ижевскысь Ленин ёросысь нокытын ужасьтэм воргоронъёсты Сергей Микрюковез (1978 арын вордскемын) но Владимир Файзуллинэз (1973 арын вордскемын) милям ужасьёсмы дорысенызы ик кырмизы. Соос 5 манетъёс-монетаос лушкем лэсьто вылэм. Со сяна, 100 манет "суредасьёс" но тодмо луизы. 1965 арын вордскем Сергей Антонов, 1975 арын вордскем Ирина Ельцова но 1971 арын вордскем Андрей Максимов коньдонзэс вӧлмыто вылэм шаермылэн палэназ. Озьы Сергеен Иринаез ӝегатӥзы Нижегородской областьын, нош Андреез - дораз, Глазов городын. "Фальшивкаос" ӵемгес пумиськыло на Можга, Сарапул, Каракулино, Якшур-Бодья, Дэбес районъёсын, тужгес но трос Ижевскын. - Мукет улосвылъёсын ӵошатыса, кыӵегес Удмуртиын югдур? - Котьма ке но, асьме дорын та ласянь шыпытгес. Тросэн басьяськоно-вузкароно интыосын, кылсярысь, Татариын, Башкириын, Киров областьын, Екатеринбургын, "фальшивкаос" ӵемгес вӧлмемын. Отын манетэн уг выро ни - ужало долларен. Суредам коньдон пачкаосын киысь кие выже. Жаляса верано, сыӵе "вож" манетъёс асьме шаере но одӥг-ог вуыло. Дӥнямы соосты ваё кунгож сьӧры вуылэмъёс, отын шутэтскемъёс. Коньдон воштон интыосы вазиськымтэенызы, кийылчиос турист шуонъёсты капчиен пӧяны быгато. Доллар шуэмысь одӥг учыр тодам лыктэ на. Со вал Можга рынокын. Вузкарисьлы мычиллям "фальшивка" - 500 немец марка. Амалоос 50 лыдпус вӧзы ватсаллям на одӥг "0". Озьы вузкарись, аслаз саклыкез ӧвӧлэн, бадӟым ыштон адӟиз. - Кыӵе амалэн йыртэмасьёс ӵемгес коньдон "суредало"? - Уже куто компьютерез. Пӧяса дасям российской купюраосты эскерем бере тодмо луиз, соосты лэсьто капельно-струйной принтерен. 5 манет-монетаосыз лэсьтыкузы, уже куто гипслэсь лэсьтэм формаосты. Милям отделамы тыршисьёс бадӟым эскерон но валэктон уж нуо вузкаронын, банкын ужасьёс, ужбергатӥсьёс пӧлын. Жаляса верано, куд-ог адямиослэн чакласькымтэенызы, "суредам" манетъёс шарае пото банке вуыса гинэ. Отысен бумагалэсь ку но кытысь вуэмзэ тодыны туж шуг ни. Йыртэмасьёс пӧям коньдонзэс "кузьманы" тыршо магазинъёсы яке шундыберган вузасьёслы (5 манетлыкъёссэс). Коньдон воштӥськемлы дышимы ни, лэся. Жаляса верано, киямы вуись коньдонэз рос- прос чакланы, чотаны ӧм дыше на. Коньдон лыдъямез яратэ шуиськомы ке но, асьмеос сое выльысь эскерыны жадиськом, шӧдске. Пӧяса поттэм коньдонэз тодманы но капчиен луэ. Солэн бумагаез чурытгес яке чылкак небыт, льӧльмыт буёлэз ӧвӧл, вылаз ик, кот шедьыса бездэ, нош куасалляськем интыетӥз буёлэз усе. Мыш палысьтыз туж векчи пужыез пуктэмын горд, чагыр но сьӧд точкаосын, вупыръем пусъёс суредамын югыт буёлъёсын, векчи букваосын гожтэм текстэз ӧвӧл. Трос уксё пӧлысь сое шӧдытэк но кыльыны быгатоды. Соин ик эшшо огпол алэме потэ, юмоке эн шеде. Нош йыртэмасез шараяды ке, вылтуссэ умойгес учкыны тырше. Озьы шаерысьтымы экономика удысын йыружъёсты шараяны юрттоды. В. КУТУЗОВА. Удмурт Республикаын "Химической ож тӥрлыкез быдтон сярысь" Федеральной законэз уже кутонлэн аспӧртэмлыкъёсыз сярысь Удмурт Республикаысь Кун Кенешлэн Постановлениез Удмурт Республикаын "Химической ож тӥрлыкез быдтон сярысь" Федеральной законлэсь калыкез но инкуазез утёнъя положениоссэ быдэсъян понна, озьы ик Камбарка но Кизнер ёросъёсын улӥсьёслы улон-вылонын юрттон вылысь, "Инкуазь шукыръяськонъёслэсь но техникаез кутонэн герӟаськем шукыръяськонъёслэсь калыкез но улосъёсты утён сярысь" Федеральной законэз лыдэ басьтыса, Удмурт Республикаысь Кун Кенеш пуктэ: 1. Удмурт Республикалэн улосвылаз уг яра вайыны химической ож тӥрлыкез, химической ож тӥрлыкез быдтыку кылдэм кылем-мылемъёсты, озьы ик Россия Федерацилэн мукет улосъёсысьтыз но кунгож сьӧрысь кунъёсысь химической ож тӥрлыкез быдтонъя объектъёслэсь ужатэм оборудованизэс. 2. Удмурт Республикалэн улосвылаз химической ож тӥрлыкез быдтонъя объектъёслэсь интыяськемзэс, химической ож тӥрлыкез быдтыку кылдэм кылем-мылемъёсты ватон интыоссэс кенешыса тупато та ужен вырись интыысь аскивалтонъя ёзъёс но Удмурт Республикаысь Правительство. 3. Удмурт Республикалэн улосвылтӥз химической ож тӥрлыкез нуллон, сое бӧрысь быдтон вылысь, озьы ик ватыны чаклам реакционной массаосты кылем-мылемъёсты нуллон ортчытӥське химической ож тӥрлыкез утёнъя но быдтонъя котькудӥз объектлэн но кылем- мылемъёсты ватонъя интылэн технологической кулэлыкезъя гинэ. Химической ож тӥрлыкез быдтон интыосы ваён сюресъёсты кенешыса тупато та ужен вырись интыысь аскивалтонъя ёзъёс но Удмурт Республикаысь Правительство. 4. Удмурт Республикалэн бадӟым луонлыкез вань химической ож тӥрлыкез быдтыку кылдэм кылем-мылемъёслэсь лэсьтэм продуктэз вузаса поттэм барышезлэсь кӧня ке люкетсэ аслыз басьтыны. Поттэм барышлэсь быдӟалазэ пукто Россия Федерациысь Правительствоен ӵош Удмурт Республикаысь Правительство но, барышез республикаысь но интыысь бюджетэ пыртыны кулэ, кудӥз Удмурт Республикалэн законъёсыныз юнматӥське. 5. Удмурт Республикаысь Правительстволы толэзь ӵоже косэмын дасяны но юнматыны шукырес югдуръёсты алонъя, химической ож тӥрлык возёнъя но соосты быдтонъя объектъёс котырын улӥсь гражданъёслы социальной юрттэт сётон но секыт учыръёсты кулэстонъя ужрадъёс. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 13 октябре. � 681-И. Улон семья бордысен кутске Ноябрьлэн пумаз Ижевскын "Анайлэн нуналыз" ортчоз. Кышномуртлэсь, анайлэсь ужпумъёссэ ӝутон, сое данъян ужрадъёслы дасяськыса, Ижевскысь администрациослэн семьяен, нылкышноосын, нылпиосын ужанъя отделэныз кивалтӥсь Галина Геннадьевна Шамшурина журналистъёсты тодматӥз куд-ог лыдпусъёсын, соос отделлэсь мар бордын ужамзэ, азьланяз быдэстоно ужпумъёссэ возьмато, кылдэм югдурен тодмато. Ижевскын 174 сюрс семья, котькуд семьялы быдэ 2 нылпи усе. Трос нылпиё семьяослэн лыдзы кулэсме, со вакытэ ик йылэ пиналъёссэс нылпи юртэ кельтӥсь анайёслэн лыдзы. Азьвыл вакытъёсы нылпи юртысь пинал басьтыны мылкыд карисьёс аръёсын-аръёсын черодын сылӥзы ке, али сыӵе черод чик ӧвӧл, шуыны луоз. Озьы ке но, кылем арын 88 нылпи аслыз семья шедьтӥз, 15-сэ нылъёсты но пиосты кунсьӧрысь, кылсярысь, Америкаысь, анай-атай луыны мылкыд карисьёс сьӧразы нуизы. Берлоосыз ваньмыз ик висись нылпиос. Г. Г. Шамшуринаен кивалтоно отдел ужпумъёссэ быдэсъя ёзъёсыз пыр. Кылсярысь, анай-атайтэк будӥсь нылпиосты сюдэ, вордэ, дышетэ нимысьтыз приют. Семьялы но нылпиослы юрттонъя центръёс семья кусыпъёсты радъяны, пиналъёсты но нылкышноосты ултӥямлэсь, вӧсь каремлэсь утиськыны дышетон. "Шуныт корка" центр бурд улаз басьтэ картъёссылэсь, атайёссылэсь-анайёссылэсь кышкаса пегӟем нылкышноосты но пиналъёсты, быдэ вуымтэ анайёсты яке анай луыны дасяськисьёсты. Соос татын улыны быгато. Нош та вакытэ центрысь ужасьёсын ӵош семья кусыпъёссэс тупатыны, улон шоры учконъёссэс воштыны тыршо. Наталья Валентиновна Дейкинаез - Ижевскысь валтӥсь гинекологез сюлэмшугъяськытэ нылкышноослэн тазалыксы. Анай луыны дасяськись 10 кышномурт пӧлысь 8-эз - висись. Валамон, сыӵе анайёслэсь ляб нылпиос вордско. 1985 арын Ижевскын 2,5 миллион нуны вордскиз, соос пӧлысь 25 процентэз таза вал, кылем арын 1,3 миллион вордӥськемъёс пӧлысь 2 процентэз гинэ юн тазалыко. Нылкышноослэн тазалыксылы бадӟым изъян ваё нылпи куянъёс. Нылпи сюрем 4 нылкышноос пӧлысь одӥгез гинэ пинал вае. Югдурез тупатон понна, Ижевскын быдэсъяське нылкышнолэн тазалыксылы сӥзем программа, кышномуртъёсты нылпи вордыны дасясь 4 центръёс ужало. Ваньмыз та юрттӥз вал ини абортъёслэсь но, нылпи ваёнъёслэсь, люкиськись семьяослэсь но лыдзэс кулэстыны. Но берлоез кризис бере нылпи куянъёс чутрак йылӥзы, таин валче югыт дуннее вордӥськем нуныослэн лыдзы нош ик кулэсмозы, дыр, 1992 ар бере кадь ик. О. ВАХИТОВА. Удмурт йылолъёсты азинтӥсь Пичи Пурга ёросысь Бобья-Учаысь калык театр пусйиз 30 ар тырмонзэ. Театр ужаны кутскиз 1968 арын. Сое кылдытӥз татысь Культурая юртлэн кивалтӥсез Николай Леонтьев. Соослэсь нырысетӥ ужзэс - Гавриловлэн "Кучыранъёс" пьесаезъя спектаклез - учкисьёс шуныт пумитазы. 1973 арын театральной искусствоез вӧлмытэмез но тыршыса ужамез понна театрлы "калык" ним сётӥзы. Нош 1988 арын "Сузэръёс" спектаклез пуктэмзы понна театр Удмуртиысь комсомоллэн премиезлэн лауреатэз луиз. 1998 арын шаерамы ортчем "Театральной тулыс - 98" фестивальын пусъемын вал: туннэ но театр удмурт калык творчествоез, удмурт сямъёсты, йылолъёсты азинтонэ пыриське. Гожтӥськон-99 Таиз вазиськон Ижевскын улӥсь лыдӟисьёсмылы. Газетмес дунтэменгес басьтэмды потэ ке, вазиськемды луоз меӵак редакцие 24-56-67 но 21-37-14 телефонъёсъя. Гожтӥськон дун - 24 манет, но газетлы асьтэос ветлоно луоды редакцие яке Удмурт национальной театрлэн юртаз (матын улӥсьёсыз). Спорт Шахмат улэ Орскын, Екатеринбургын но Челябинскын шахматъя шудонъёсын ортчем ӵошатсконъёсы Удмуртиысь дышетскись пиналъёс но пыриськизы. 12 аресозь ӵошатскись нылъёс пӧлын вормисе потӥз 30-тӥ номеро школаысь дас аресъем Настя Банникова. Со 9 луоноез пӧлысь 8 очко люказ но Ураллэн чемпионкаез луиз. Ньылетӥ интые потӥзы 28 номеро школаысь 9 аресъем Гуля Саматова но Кельмурзин агай-вынъёс: 9 аресъем Максим но 11 аресъем Илья. Ваньзы ик дышетско 22 номеро школаын. Тренерзы - Удмуртиысь спортъя мастер Владимир Гребенкин. х х х Ижевскын ортчиз инвалидъёс пӧлын шахматэн шудонъя ӵошатскон. Отчы пыриськизы городысь витьысьтыз ик ёросысь спортсменъёс. Нюръяськонын вормисе потӥз Первомайской районысь команда: 32 луоноез пӧлысь со 22 очко люказ. 2 очколы бере кылизы Устинов районысь шахматистъёс. Куинетӥ интые потӥз Октябрь ёросысь команда. ШӦКЫЧ "Трос-а кулэ милемлы?.." Бен, трос-а кулэ пичи гуртъёсын улӥсь пенсионеръёслы? Шуныт корка вӧзад мед луысал на нянь, пызь, кеньыр, сахар, вӧй. Собере пук пӧсь чайдэ юыса. Но Завьял ёросысь Лудзя-Норья гуртын улӥсьёслы сыӵезэ адӟыны уг кылды ни. Сентябрьлэн пумаз магазинзэс ворсазы. Азьвыл солэн кузёез Ижысь потребобщество вал (директорез И. Х. Золялиев). Сыӵе лавкалэн пайдаез ӧжыт шуыса кулэ ӧз каре ни. Бӧрысь магазинэз ас вылаз басьтӥз вал "Чучубей" фермер хозяйстволэн кивалтӥсез. Таиз но куштӥськиз. Табере гурт магазинтэк улэ. Но гуртоослы ма но со сиён-юон табере, пе, вортто почтаен ӵош. Ма, паймоно кадь: оло зэмзэ но асьмеос вашкала улонэ берытскиськом? Б. НИКИТИН. Ӟечкылан Пичи Пурга районысь Вылын Юри гуртын улӥсь Рая сузэрмылы но апаймылы тырмиз 60 арес. Улонлэсь бадӟымесь могӟетъёссэ вормид тон. Азьланяз но юн тазалык но ваньзэ умойзэ гинэ сӥзиськом. Ми тӥ доры анай-атай доры сямен бертӥськом. Улытозяд медам вуны сюлэм шунытэд. Ымнырысьтыд ноку медаз кысы пальпотон, йыр вадьсад котьку мед луоз чагыр инбам но яркыт шунды. Яратыса Быстровоысь, Пургалась апайёсыд но Шорын Юриысь агаедлэн семьяез. Палэнысь удмуртъёслы сӥзьыса Толон Иже люкаськылӥзы Вань удмуртъёслэн огазеяськонзылэн Пичи кенешазы быръем эшъёс. ВИ Ӧтчам бере "Удмурт кенешлэн" ужамез пумысен доклад лэсьтӥз Валентин Тубылов. Нош валлян исполкомлэн членъёсыз эскеризы Удмуртилэн палэназ улӥсь ӵыжы- выжыосынымы кусыпъёсты умоятон пумысен. Соослы юрттонъя кык арлы нимысьтыз программа юнматэмын. Исполком вазиськиз асьме правительствое таӵегес ик программа кутонэз ӝогомытыны куронэн. Люкаськемъёс азьын вераськизы Киров улосысь Слободской ёросысь Светозарово (Тырдор) удмурт гуртысь, Татарстанысь Балтаси ёросысь, Набережные Челны городысь ӧтем куноос. И. КРИЧЕВ. Дано нимъёс басьтӥзы Удмурт Правительстволэн юртаз люкаськылӥзы ёрос кивалтэтъёслэн тӧрооссылэн воштӥсьёссы, ёросъёсысь дышетон удыс понна кылкутӥсьёс, лагерьёслэн начальникъёссы, санаторийёслэн, курортъёслэн валтӥсь врачъёссы, заводъёслэн, предприятиослэн директоръёссылэн улон-вылонэз радъянъя воштӥсьёссы. Кенешон огломак сямен сӥземын вал пиналъёслэн гужем шутэтсконзылы йылпумъянъёс лэсьтонлы. Ужрадэ люкаськемъёс азьын ас малпанъёссэс ивортӥзы шаерысьтымы валтӥсь санитарной врачлэн воштӥсез Геннадий Сулеменев, Удмурт Элькунысь Югдурез утёнъя министерстволэн Тылпуослэсь утиськонъя управлениезлэн кивалтӥсез Михаил Камалетдинов, тазалыкез утёнъя министрлэн воштӥсез Элен Тыцкая, пиналъёслэн сьӧрлон шутэтсконъя но ужанъя лагерьзылэн начальникез Тамара Головко, калыкез дышетонъя министрлэн воштӥсез Любовь Захарова, "Удмурткурорт" огазеяськонлэн валтӥсь тӧроезлэн воштӥсез Нина Соловьёва, тодосчи педагогика наукаосъя кандидат Ольга Миронец. Ӟеч визь-кенешъёс сётӥзы Шаерысьтымы профсоюзъёслэн федерацизылэн кенешезлэн тӧроез Евгений Орлов, Воткалэн йырыз Валерий Фридрих, мукет адямиос. Вань вераськемъёс вуизы таӵе малпанэ: пиналъёслэн гужем шутэтсконзы туэ трослы ӟечгес ортчиз. Йыртэманъёс но ичи вал. Та нуналэ ик тужгес устоосыз пусъемын дуно кузьымъёсын. Удмурт Правительстволэсь Данъян грамотазэ басьтӥзы Алнаш ёрос кивалтэтлэн тӧроез Виталий Городилов, "Энергетик" лагерьлэн начальникез Роза Васина, Вотка ёросысь калыкез дышетонъя управлениын ужась Анна Варламова, Ижысь мотозаводлэн директорез Геннадий Кудрявцев, Вотка ёрослэн тӧроезлэн воштӥсез Михаил Назаров, мукет адямиос. "Удмурт Элькунысь калыкез дышетон удысысь дано ужась" ним сётэмын "Дзержинец" лагерьлэн начальникезлы Людмила Зоновалы. Быдэс кенешез радъяз но нуиз Удмурт Элькун Кивалтэтлэн Тӧроезлэн воштӥсез Антонина Лисина. Е. РОМАШОВА. Одӥгез - ваньмыз понна... Одӥгаз предприятие туж кулэ но дуно заказ вуэм. Со ужез оскиллям отделлэн начальникезлы. Начальник сое воштӥсез вылэ погыльтэм. Воштӥсь та ужез сётэ группалэн кивалтӥсезлы. Группалэн кивалтӥсез та кулэ ужез оске валтӥсь инженерлы. Валтӥсь инженер дуно сылӥсь заказэз огшоры инженерез быдэстыны куре. Инженер огшоры гинэ пуксе но вань ужез огназ лэсьтэ. Ваньмыз понна огназ ужаз. Нош собере та бадӟым уж понна - кызьы валаськоды, заказ государственной - бадӟым премия сёто. Огшоры инженерлэн ужез понна премия басьтӥз валтӥсь инженер. Премия басьтӥз группалэн кивалтӥсез. Премия басьтӥз отделлэн начальникезлэн воштӥсез. Премия басьтӥз начальник. Одӥг муртлэн ужамез понна ваньмыз премия басьтӥз. Со дырысен ик калыкын верало: ОДӤГЕЗ - ВАНЬМЫЗ ПОННА, ВАНЬМЫЗ -ОДӤГЕЗ ПОННА. Ӧтён Ижевскысь Ожысь но Ижысь ветеранъёслэн кенешсы ӧте мӧйыосты "Ветеран" клубе. Пумиськон ортчоз 26 ноябре Кун филармонилэн Бадӟым залаз (Пушкин ульча, 245 номеро юрт). Кутскоз 11 часын. Пумиськонэ ӧтемын Удмуртилэн но Ижевсклэн дано гражданъёсыз. Ужрад бере концерт луоз. Лыктыны быгато вань мылкыд карисьёс. ВАЛЭКТЭ ЮРИСТ Сэрегез нуэ адвокат Лилия Шкляева Телефонэз выжтон Вуж квартираямы телефон вал. Выляз потӥмы но, отчы сое пуктыны уг луы, шуизы. Ма кароно таӵе дыръя? А. ГОЛУБЕВ. Та ужпумъя Россия Федерациысь Правительство 1997-тӥ арын 26-тӥ сентябре юнматӥз 1235 номеро постановление. Документлэн нимыз таӵе: "Телефон кусыпъя юрттэт сётон правилоос". Отын валэктэмын: адями (абонент), улон интызэ воштыкуз, азьло станцилэн зонаяз кыле но техникая луонлык вань ке, телефон выжтӥське выль квартирае. Татын уг учко ни, таяз коркан улӥсьёс пӧлын вань-а, ӧвӧл-а азьвылгес султэмъёс, сётэмын-а, ӧвӧл-а соослы кыӵе ке льготаос. Техника ласянь луонлык ӧвӧл ке, выль квартирае телефон черодтэк уг пукто. ШӦКЫЧ Тулысозь кема на Гажано, Шӧкыч уром! Мар ини милям, гуртоослэн, улэм-вылэм! Уждун тыронзэс ӝегато, нош уже ӵукналы быдэ потаны косо. Косо бере потӥськом, мастерской дортӥ кӧня ке донгаськыса ветлӥськом но... Малпаськыны кутскиськом: "Кытысь шедьтоно ай курытсэ? Кыӵе амал утчано?" Амалъёс туж пӧртэмесь. Но соосты дырын-дырын вошъяны кулэ. Кивалтӥсьёс медаз валатскылэ. Милям умой-умой улонмы тулысысен ӧръяське. Толзэ эбекъёс кадь кӧлыса выллем ортчытӥськом. Уж йӧназ ӧвӧл. Ваньмыз ваньбур лымыен шобыртэмын. Нош тулыс! Тани туэ бусыез сеятьтыкузы, мон лично-ручно кык мешок сезьыез кыз улэ ватӥ вал. Ӧй, сезьы кисальлы шуыса ӧй! Асьтэос валаськоды, кытчы кошкиз со. Бусы ужъёс бере милям улон воксё праздниклы пӧрмыны ӧдъя. Милям гуртмы котырын туж уно сад-бакчаос интыяськемын. Нош городскойёслы нырысь ик мар кулэ? Валамон, кыед. Нош фермаын та ваньбур скаллэн куям табаньёсыз мында. Я валэн, я тракторен, я машинаен кынтылытозь кыед ворттӥськом бакчаосы. Умой уж. Тужгес но соиз адӟем карымон - соку ик улэп уксё сёто. Живой уксё. Али уксёен гинэ басьтӥськом ни. Уго курытсэ котькытысь шедьтыны луоно. А вот Горбачев вакытэ курытэз ласянь секытгес вал. Аракы соку кизер валюта чотын вал. Озьы тӥни, кыедэд али милемлы зарниен берытске, ява. А кивалтӥсьёс? Ма, кин туала вакыт кыедэн курадӟоз? Дуно усе ук! Алигес радио пыр аранлы йылпумъянъёс лэсьтӥзы. Азьмынӥсьёсты ӟечкылазы. Монэ ӧз, конешно. Шуизы, комбайнъёс, пе, табере наприкол пуктэмын. Шутэтске тулысозь. Но мон кивалтӥсьёслы алигес эшшо одӥг прикол возьматӥ. Уд но оскы, ява: сезьы бусызэс араны вунэтӥллям! Комбайнэз вазьытэк ӧйлась. Дас одӥг мешок жильк-жильк сезьы кутсамы ведь вунэм бусыысь. Сомындаез ик ана вылаз кылиз. Ужаммы ӧз луы ни - комбайнмы сӧриськиз. Ойдо ӵок, жаль ӧвӧл. Лудкечъёслы но маке но сиёно ук. Таин люкиськисько тулысозь. Отчыозь кема на. Пока! Завьял ёросысь "Родина" эштосысь МИКТА КУДОЕД. А. А. Волков Кияса ёросын ужаз Та арня вискын Удмурт Республикаысь Кун Кенешлэн Тӧроез А. А. Волков Кияса ёросэ ветлӥз. Отын со тодматскиз Ермолаевоын шор ёзо школаез пуктонэн. Туэ декабре школаез вуттыны кулэ. Отын ужасьёс берпуметӥ ужъёссэс лэсьто ни, шуныт сётэмын, сиськонни но быдэстэмын луоз. Школаын 264 дышетскон инты луоз. Озьы ик пуктозы на теплица, хозяйственной юртъёс. "Спецстрой-17" трестын ужасьёс уждунзэс ӝыны ар пала ӧз басьялэ ке но ини, школаез вуттон понна дугдылытэк ужало. Кун Кенешлэн Тӧроез вылӥ дунъяз трестлэсь ужамзэ, ар пумозь уждунзэс "улэп" коньдонэн сётом шуыса оскытӥз. Озьы ик А. Волков пусйиз, республикаын 50 школа юрт начар шуыса, ваньмыз ик соос интыяськемын гуртъёсы. А. Волков Кияса ёрослэн администрацияз пумиськиз хозяйствоослэн но промышленной предприятиослэн, культурая учреждениослэн, тазалыкез утёнъя но тодон-валан сётонъя учреждениослэн кивалтӥсьёсынызы. Федерацилэн Кенешаз, Кун Кенешын ужамез сярысь вераз, туннэ понна экономикаын, уждунэз, пенсиосты, пособиосты тыронын югдурез валэктӥз. А. А. Волковен ӵош Кияса ёросын ужазы Удмурт Республикаысь Архитектурая но лэсьтӥськонъя кун комитетлэн тӧроез Геннадий Батищев, Кияса ёросысь администрацилэн кивалтӥсез Гумар Каримов, Кияса ёросысь Депутатъёслэн кенешенызы кивалтӥсь Надежда Шатрова, Лэсьтӥськонъя "Спецстрой-17" управленилэн кивалтӥсез Александр Курбатов но мукетъёсыз. Удмурт Республикаысь Кун Кенешлэн пресс-службаез. Улон гердъёс Заирын удмурт перепечен уг утялто Пичи Пурга районысь Курчум Норья гуртысь нылаш Марина КОСТЫЛЕВА дышетске Москваысь Калыкъёслэн эшъяськонзыя университетысь журналистикая факультетын. Шаермылэн палэназ улыса но "Удмурт дунне" газетэн кусыпъёссэ со уг ышты, аслаз ужъёсыныз лыдӟисьёсты шумпоттэ. Москва Африка ӧвӧл ке но, Мариналэн луонлыкъёсыз вань негръёсын но тодматскыны-вераськыны. Нош туннэ мадёно адямиезлэн улон юртэз - ульча, липетэз - инбам. Россиын улӥсьёс туала арын уг паймо ни улон интытэк кылем адямиослы. Нош куке адӟылэмды вань-а сьӧд куо пыдйылчиез-бомжез? Африканец сярысь мон озьы верасько. Москваысь Калыкъёслэн эшъяськонзыя университетын сьӧд куо студентъёс лачак ке но, таӵезэ мынам но адӟылэме ӧй вал на. Туэ сӥзьыл вал со. Син шорам одӥг пол гинэ ӧз йӧтылы общежитие пала кожись сюрес дурысь писпу улын пукись негр. Со нунал лумбыт я нырулэ конгылё пукон вылаз, я мар ке сярысь мур малпаськыса, музъем шоры учке, я отчы-татчы поръя. Копак ас дуннеяз выемын. Шораз учкыса малпасько: мискинь, дырлэсь ортчемзэ но, нуналэз, толэзез но уг тоды-вала ни, дыр. Но со озьы ик вылымтэ. Мон тае валай, асэныз вераськеме бере. Пумиськонлы асме кема дасяй. Кӧшкемытгес ик таӵе адями доры мытэктыны. Кин тодэ, мар солэн йыраз. Собере, улон интытэк кылемъёслэн пушказы трос лекез люкаське, мынӥсь-ветлӥсьёс шоры соос кырыж синмын учкыло. Озьы ке но, мыным туж жаль потӥз мискинь негр. Тодэм потонэ но маза ӧз сётылы: шуныт палъёсысь вуэм муртлы кызьы но малы ульчаын улыны кылдӥз? Курданме вормыса вамыштӥ ик африканец доры. Ӵапак та нуналэ поездэн анаелэсь салам вуиз вал. Сьӧрам вить перепеч кутӥ, пуйые кӧня ке грезь картофка тыри. Вуи иностранецлэн "яратоно" интыяз, но сое отысь ӧй шедьты. Кытчы-о меда кариськем? Отӥ-татӥ поръяй-котыръяськи, нокытын ӧвӧл. Нюлэс палась, жуг-жаг куян бакъёс дорысь, тылскемез синйылтӥ. Оло, со дурын пукисьёс адӟизы кытчы кошкемзэ? Тылскем доры матэктэмея, пель чьӧрам кылӥськиз мӧзмыт-мӧзмыт чузъяськись гур. Ӟучъёс тазьы уг кырӟало кадь. Учкисько но - тылскем дуре мыкырскыса, "тодмо эше" киоссэ шунтэ. Дӥсьтытэкгес ик ӟечбуръяськи соин. Ӟуч сямен ваземез бере, матазгес кариськи. Кыл бӧрсьы кыл кошкиз, кышканэ но кытчы ке тӧлӟиз кадь. Выль тодмоелэн нимыз Эммануэль вылэм. Сётэм саламме шумпотыса басьтӥз. Монэн бӧтьыртыны пумит ӧз кариськы. Заирысь африканец Москвае вуэм сизьым ар талэсь азьло. Улон алама луэмен, пе, шонтӥ Россие. Но татын но улон вольыт вылымтэ. Кисыын тӧл шула бере, кыӵе ке уж коть утчано ук. Ӟуч кылэз уг тоды бере,. Эммануэлез нокытчы ӧз кутэ. Соку зарезь сьӧрысь вуэм мурт кырыж сюрес вылэ султыны малпаз - кутскиз наркотикен вузкарыны. Коньдонэз тырмыт луиз. Но капчиен сюрем уксё кемалы ӧз тырмы, шур ву сямен гылаз. Выльысь со ужез борды ик кутскытэк ӧйлась. Одӥг пол, барыш лэсьтыкуз, Эммануэлез кутӥзы пурысь дӥськутэн адямиос. Одӥг но ӝыны арлы пытсэт сьӧры келязы. Мамында мыскыллянъёс пыр ортчоно луиз африканецлы. Кунгож сьӧрысь юлтошсэс зэкъёс тужгес но синазькыль карылӥзы куэзлэн буёлэз понна. Тюрьма ик дышетӥз Эммануэлез ӟуч кыллы. Пытсэт сьӧрысь потэмез бере, тужгес но секыт нуналъёс кутскизы, малы ке шуоно, сое нокыӵе документъёстэк ульчае сэрпалтӥзы. Нош бумагатэм адямиез адями чотын уг лыдъяло ни. Эммануэль аслыз улон инты но, уж но шедьтыны ӧз быгаты. Уно пол дораз жингыртылӥз бертон пумысен. Нош ӵыжы-выжыосыз номырин юрттыны ӧз быгатэ Эммануэльлы. Тюрьмаын пукеменыз йырин правительствозы пумит, пе, луиз дораз берытсконэзлы. Африканецлэн мылкыдыз куашказ, вазиськоно кариськиз на ООН-э. Отын но номыр умойзэ ӧз вералэ. Юрттыны, пе, быгатом ньыль ар ортчем бере гинэ. Куинь ар но тямыс толэзь ини Эммануэль Москваысь ульчаос кузя лошъяське, ООН-ысь иворез возьма. Ар пала ини милям университетмы дортӥ котыръяське. Сиёнэн но дӥськутэн солы юрттыло Африкаысь лыктэм эшъёсыз. Куддыр Эммануэльлы сётъяло газетъёс но журналъёс. Африканец тодэ, странаямы шуг-секытъёс кылдэмын шуыса, соин но сюлэмыз туж шуг. Кин тодэ, оло, соин йырин нош ик гуртаз бертыны уз быгаты. Африканецен озьы вераськонъям ӧй но шӧды дорамы милиционерлэсь матэктэмзэ. Со юаз Эммануэльлэсь: - Мар-о, ӧд на-а акыльты бумагаез сутыны? - Кезьыт ук кырын, - нукыртӥз соиз. Собере пурысь дӥсен пиосмурт мыным вазиськиз: - Нош тӥ кытысь луоды? Документъёсты бордады-а? Куаляк луи. Москваын дышетскытозям одӥг пол но документъёсме ӧз на эскерылэ. Ярам коть, сьӧрам студенческой билетме басьтӥськем. Юасько: - Кыӵе ке йыртэмасьлы укшасько-а, мар-а? Малы-о документъёсме возьматыны косӥськоды? - Ма, таӵеос дорын сылӥд ке, - африканец шоры возьматэ, - кызьы-о уд эскеры? Документысьтым номыр умойтэмзэ адӟымтэез бере, милиционерлы валэктӥ ини: куанерлы сиён вайыса лыктӥ. Соизлы но жаль потӥз, лэся, улоннитэк кылем африканец: - Та мискинь ар пала татӥ лошъяське. Быдэс отделенимы сое тодма ини. Но жаль потыса, нокытчы но ум улляське. Татын коть эшъёсыз юртто солы маин-соин. Собере милиционер кошкиз. Мон но дор палам вамыштӥ. Эммануэль эшшо огпол тау кариз на. Сюрес кузя вамышъякум, пель сьӧрам нош ик чузъяськиз ӝожмыт, сюлэмез бугыртӥсь кырӟан гур. Адямиез ужезъя учко Раиса Андреевна Иванова - Шаркан районысь тодмо скал кыскись. "Восход" колхозын гинэ ӧвӧл, ёросысь дояркаос пӧлын но со огез азьмынӥсез луэ. Фермае ужаны лыктытозяз, кыӵе но сюресъёсты лёганы ӧз кылды та востэм, зӥбыт сямо кышномуртлы. Пичиысен мумытэк-бубытэк кыльыса, сузэр-вынъёсыныз ӵош будӥз Шарканысь интернатын. Школаез йылпумъямез бере келязы Муром городэ, куиськисе дышетскыны. Палэнын улыса, туж юн мӧзмиз вордскем палъёсызлэсь, ялан малпалляз гуртаз бертон сярысь. Озьы ик лэсьтӥз. Профессия басьтыса вуиз Чайковский городысь куиськон комбинатэ. Ужез Раялы кельшиз кадь, умой пумитазы но. Нош сюлэмыз кыстӥське гуртэ, шыпыт ульчаосы, анаезлэн лёгам сюресъёсаз. Тӥни озьы ик вуиз "Восход" колхозлэн фермаяз, анаез сямен, скал кыскыны кутскиз.Со дырысен ортчиз ни дас ньыль ар. Раиса Андреевна кемалась дышиз кыкетӥ ужезлы, уг жаля городэз гуртэн воштэмезлы но. Кибашлы адями уго котькытын ассэ шедьтэ. Тани Р. А. Иванова но туэ вылӥ награда басьтӥз, шуыны луоз. Республикаысьтымы Кун Кенешлэн Президиумезлэн но Правительстволэн постановлениенызы азьмынӥсь дояркалэн нимыз пыртэмын Удмурт Республикалэн Данъян пулаз. Ушъян кылъёсты, жаляса верано, гурт калык туэ шергес кылэ, фермае вуылӥсьёс но берло аръёссэ быризы - мылкыдэз бурдъясьёс кивалтӥсьёс пӧлын но ӧвӧл ни кадь. Соин но, оло, аслэсьтыз фамилизэ кылыса, Раиса Андреевна ӧз но оскы, огшоры скал кыскисез дунъясьёс вылэм на шуыса. Ӵыжектэм бамъёссэ ватыны вырыса, дӥсьтытэк вамыштӥз трибуна пала... Юн тазалык но шуд тӥледлы, гажано Раиса Андреевна! Семьяяды, улонады котьку мед улоз ӟечезлы оскон. Л. МЕДВЕДЕВА. Фотоез В. КАМАШЕВЛЭН. Кыдёкысь гуртын Автостанциысь скамья вылын арлыдо воргорон пуке. Кытысен адӟылӥ мон сое - тодам нокызьы уг лыкты. Солань но, талань но бергатӥ ини - йырысь тӧлӟемын. Со но мон шоры учкылэ. Газет лыдӟон висказ выльысь но выльысь синйылтылэ. Кытчы мынэ со? Автобусъёслэн сюресъёссы пӧртэмесь: Можгала но, Увае но нуо - Вавожез, Бадӟым Учаез вератэк ини. Тани автобусэ пуксьыны косӥсь куара котыр ёросын чузъяськиз. Вавоже мынӥсьёс, сумкаоссэс, пуйыоссэс кутыса, пуксённие дыртӥзы. Черодын сылэ ини адӟылэм мурт но. Билетсэ уг шедьты, лэся: керӟегъяськемез шӧдӥське. Я кисыяз, я сумкаяз утчаське. Шедиз, вылды: капчигес лулскиз. Автобусэ пырыкумы, вискамы одӥг гинэ мурт вал. Билетъёсмыя тупамы одӥг пукон вылэ пуксьыны. - Вавоже-а? - юаз со мынэсьтым. - Отчы уггес вуы, дыр, Покчивукое, Куӟебай Гердлэн вордскем гуртаз, васько,- валэктӥ мон.- Кытысен пумиськылӥм асьмеос, маке тодмо мурт кадь? - Ачим но озьы учкисько - кин шуыны ӟудӥсько. Собере валатски, тодам лыктӥз. Леспромхозын ужай. Али пенсиын ни, шутэтскон дыры вуиз. Дорамы уно пол вуылӥд. Асьтэ палась нюлэсэз корам пумысен пӧсекъямед вань. Али но син азям со. Ми буйгатӥськом, корам бервылэ выльысь мерттом шуыса. Корамез мында мерттӥм-а, ӧм-а - шонер вераны уг тодӥськы. Али будэ ини выль нюлэс. Кӧня ке шып пуким. Тодам лыктӥз леспромхозын вераськон. Мышке кылизы ни Подшиваловое, Никольское кожон сюресъёс, азьпалан - Нылга вашкала черкогурт. Машина питранъёс ӝог бергало. Тани Покчивуко. Татысен асфальт сюрес, ваёбыжлэн быжыз сямен, кыклы люкиське. Тодӥсьёсыз та гуртэ вуылэмлы быдэ верало, кытын сылӥз Куӟебай Гердлэн юртэз. Автобус дугдӥз ини. Тодмо сюресчи кизэ мычыса шуиз: - Стало быть, Ӟозлудэдлэсь мӧзмид, сюресэд отчы нуоз? - Бен, вуылэме кемагес ини. Эшъёсын адӟиськоно, иськавынъёсын, бӧлякъёсын бӧтьыртоно. Соос пӧлын вань ук толлозэ но, туннэзэ но тодӥсьёсыз. Тазьы верай но, аслам тодам лыктӥзы гуртэлы куке но сӥзем кылбур чуръёс. Ӧй, мон соосыз шара ӧй вера, ым пушкам лушкемак сипыртӥ: Кемалась, оло нош, дауръёс Ортчизы, вакытъёс дугдылтэк. Ӝутскизы Ӟозлудын выль юртъёс, Палэнысь юрттэтэз витьытэк... Вуж ульча, Выль ульча но Нюрсьӧр Луизы вазенгес бускельёс. Жингырто Выль ульча но ӝӧк сьӧр, Шулдырто, кырӟало бускельёс... Огзэ тодад ваиськод ке, мукетыз но йыре лыктэ, гозы пунӥське но пунӥське. Котькытчы мын, калыкын верамъя, коть дунне пыдсы - нырысь вамышъёс лэсьтэм сюрестэ, гуртэдлэн луд вылаз будэтэм нянез веръямдэ, школае ӵош ветлэм эшъёстэ куке вунэтод шат? Туннэ ке но син азям Григорий Чайников (Коньы Гирша), Павел но Николай Смирновъёс. Бен, ваньзэс вераны киысь-пыдысь чиньыос уз тырме... Гуртлы но эшъёслы сӥзем чуръёс йырын бергало на. Ачим сюрес вожын сылӥсько. Автобус Вавож пала ширтэ ини, мыным Ӟозлудэ мыноно. Тодмо воргорон кизэ шоналоз, дыр, ас дыраз бырем но выльысь ӝутскыны кутскем Эмезьгуртлы (Малиновкалы). Татысен адӟисько ук выль юртъёслэн йылъёссы. Вордскем но будэм интылэсь, зыл кошкись Вало шурлэсь но паськытэсь возьёслэсь мӧзмон пӧртэм шаеръёсы, ёросъёсы пазьгиськем эмезьгуртъёсты (малиновкаосты) выльысь кыске Куӟебай Гердлэн музъемез вылэ. Котьмар ке но, мытэм сюрес вуттэ малпам интые. Тани ини Ӟозлуд гуртлэн бусыосыз. Кылбурын юнме шорысь верамын ӧвӧл вавож, какся но куашкам бӧлякъёс сярысь. Куке но, кемалась аръёсы, та гуртъёсысь выжыослы ярам ошмесо, вырйыло, котыр нюлэсо кыр инты. Татчы соос выжызэс лэзиллям. Ку, кыӵе дауре асьсэ сярысь номыр вератэк кельтӥллям гожтэт тодӥсьтэм вашкала пересьёс? Зэм, дауръёс пыр потэм веранъёсты мадьылӥсьёс али но вань на. Ӟозлудъёс тодо нюлэскытӥ ортчись чунгем сюресэз. Отӥ, шуозы вал, Пугачёвлэн отрядъёсыз ветлэмын. Зэм ик-а со? Оло, кыӵе ке дауркыл (легенда) кылдытэмын? Табере солэсь йылзэ-пумзэ шедьтыны шуг. Бадӟымесь городъёслы но Вавожлы кыдёкысь Ӟозлуд но солэн починкаез уробо зуысь потыса палдэм питран сямен сыло ке но, дуннелэн палэназ кылемын ӧвӧл. Котькыӵе вакытэ, котькыӵе дауре вуылӥзы татчы но выль иворъёс. Улӥз гурт мукетъёсыз сямен ик. Эксэй властез но ас сяменыз дунъяз. Ӟозлудлэн урамъёсаз одӥг-ог ке но вуылӥзы зӧк куараен ӵашетӥсь жандармъёс, выт октӥсьёс. Граждан ож дыръя ульчаосын но лудъёс вылын шиетӥзы пыӵал гумыосысь потэм пуляос. Кылӥськизы озьы ик властьлэн воштӥськемез, В. И. Ленинлэн кулэмез сярысь иворъёс. Тодэ лыктэ на куинь пересьёслэн ульча дуре люкам коръёс вылын вераськыса пукемзы. - Ленин, пе, кулэм, кыӵе улон луоз табере? - чильымзэ пурккетон висказ куара сётӥз Керемкей. - Ма, кыӵе вал, сыӵе ик луоз, дыр,- вазиз пумитаз Олексан. - Улом но адӟом ини,- шуиз Сьӧд Микаль.- Асьмелэсь юась но, верась но уз луы. Валмес кытком но лудэ потом. Я гыроно, я кизёно луоз. Тэргаськытэк уз ортчы, дыр, музъем люкон но. Кемалась ӧвӧл ни Керемкей, Олексан но Сьӧд Микаль. Соосыз тодӥсьёс но гуртын чиньыен лыдъямон сяна ӧвӧл ни. Олокызьы но бергатӥз-посӥз гурт калыкез улон, вал шумпотонэз но, бӧрдонэз но. Кин ке выль корка ӝутэ, кинлэн ке пиналэз вордске, егит воргорон солдатысь бертэ. Быдэс гурт со сярысь вера... Гуртысь трос воргоронъёсын, нылкышноосын пумиськон вал. Кыл бӧрсьы кыл. Тани колхозлэн кузёез. Бен со гинэ кузё ӧвӧл, быдэс гурт калык солэн кузёез луэ. Но Николай Чайников - кивалтӥсь-тӧро. Солэсь косэмзэ но, алэмзэ но кылзоно. Кызьы сотэк - огазьын улон, ужан понна, калык одӥг кузьыли кар котыре биниськиз ук. Тодӥсько: Николай Леонидович уз вера кемалась ортчем аръёс сярысь. Солэн атаез но (шудтэм учыре шедьыса быриз) ӝӧк ултӥ гольык пыд бызьылӥз ай туала пересьёс егит дыръя. Воргоронэн гуртмылэн ортчем сюресэз сярысь вераськон мытӥ. - Э.., э..,- шуиз Николай Чайников,- мон ведь ас синмыным адӟеме, ас пельыным кылэме сярысь гинэ вераны быгато. Отӥзэ мӧйыос мед мадёзы. Собере гуртысь воргоронъёсын пумиськыны дэмлаз. Верам адямиоссэ мон вить чиньыосме кадь тодӥсько. Озьы но пумиськоно кариськи. Зэм, куд-огез луло но ӧвӧл ни. Ӧвӧл ни тани Тимофей Никифорович Чайников но. Пинал дыръям эшъяськылӥ соин. Пиналъёс пӧлын солэсь чупырес бызьылӥсез но ӧй вал, дыр. Аслам но соин ӵошатскеме вань. Тимофейлэсь ӧй кыльылы ке но, со чырткемгес ик вал. Тодам лыктэ гуртэ одӥг ар бертылэме. Йыгаськи Тимофей Никифорович доры. Пырем мугме тодӥз, но вазьыны ӧз дырты. "Бен,- кутскиз со,- асьмеос огъёзъёс. Мае мон адӟи, мае мон кылӥ, тонэ но палэнэтӥ ӧз ортчы. Шат городэ каръяськемед бере ваньзэ ӧд адӟы ни?.. Тодӥськод на, дыр, асьтэ ана вылын усыямдэ, кизьыны кутскыку, му вылэ кидысэн ӵош пештэм курег пузъёсты бичамдэ. Вал сыӵе дыр но. Зэм, колхоз кылдэм бере, сыӵе сям вуныны ӧдъяз. Бен кин нуоз курег пузъёсты огъя музъем вылэ киргатыны - Петыр-а, Ондрей-а шуэм сямен? Музъем люкон но быриз. Соин ӵош керетон, вожвылъяськон но чалмизы. Гуртмылэн котькыӵе дырыз вал. Куке ушъяллязы, куке куаретылӥзы. Кизёнэн но, аранэн но бере кыльылӥмы уго. Пислэг юмылысь вӧй поттэм сямен, скалъёсмы йӧлзэс туж ӧжыт сётылӥзы. Соосыз ӝуткан калэ но вуылӥм. Дояркаослы йӧтэ вал: синвуэн пыласькылӥзы. Секытлы чидатэк, палэнэ кошкисьёс но ӧжыт ӧй вал. Тани ачим но Ижысь заводын ужай. Война бере гуртэ кыскиз сюлэм: вордскем музъем дуногес угось. Гуртъёслэн быронзы сярысь вераськон потӥз огдыре. Оскон малы ке ӧй вал солы. Дэндывай быроз, Шилосвай киргалоз шат? Собыдӟа гуртъёсысь калык палэнэ кытчы кошкоз, кытын солы инты дасямын? Быризы ведь. Соос гинэ ӧз, ӧвӧл ни Ягул но, Можга но, Коротай но. Бабушкино, Георгиевской но Прудки сярысь уг вераськы ни. Нош музъемзы кылиз. Кин кылиз, со мед ужалоз, шуизы, лэся, кошкисьёс. Ӧз, ӟозлудъёс ӧз кошкелэ, вордскем гуртсэс но музъемзэс золгес ярато, шӧдске. Зэм, кошкисез вал. Сюрес вылэ кин семьяен ик, кин огназ шуд утчаны потӥз. Огез городэ каръяськиз, мукетыз - посёлоке. Выльвылъёсты гырыны кошкисьёсыз но шедизы. Озьы но гурт ӧз шеромы - уката паськытаз, выль ульчаос кылдӥзы. Ма, ачид но адӟиськод, вылды - выль юртъёсы пыраны кемдылӥз, дыр, ини. Тимофей Никифорович ӧръяськиз - маде но маде. Вера гуртлэн выльдӥськемез сярысь. Огезъя, пе, мукетыз: кин ке выль корка пуктэ ке, мукетыз но йыртышсэ корманы кутске. Маин, шуэ, мон бускельлэсь пӧртэм: визьмы-а уг тырмы, суйы-пыды кужымтэм-а? Азьтэмъяськон сямы ӧвӧл кадь. Со гинэ мар ай - туала егитъёслэн, воргоронъёслэн азьло сямен улэмзы уг поты ни.Сёт соослы паськытэсь комнатаосын улыно-вылыно коркаос. Малы, пе, ӟоскыт юртын улод, бадӟымзэ лэсьтыны луэ бере? Гуртысь эше ваньзэ адӟе, тодэ. Солэн веранэзлэн пумыз но, оло, ӧй вал. Нош мон кемалась ортчем аръёсты тодам ваи... ... Шулдыр гужем нуналэ вал со. Огшоры арня-а, куарсур нунал-а вал - черке ветлэм нылкышноос малы ке Осьып доры люкаськиллям. Чай юон сямен бӧтьырто. Кытчы гинэ уг вуо соос - Вало сьӧры но потало, Вадоре но кемдо. Кылъёссэс бырйыса сямен мадё. Жингыртэ ӝикыт утялтэм, праздниклы дасям корка. Тиконь Офонь кышнолэн куараез кылӥське: - Вало сьӧрысь Ӵушъялэ вуылэмды вань-а? Синмаськи мон со гуртлы. Коркаоссы жин- жинэсь, огезлэсь чебер мукетыз. Нош капкаоссы кирпич юбоен лэсьтэмын - пырыны уд дӥсьты. Ай тани, ма кыдёке ветлонэз, Партчиын (Гурезь-Пудгалан) но Горо палазы улыно-вылыно корказы вань. Улӥыз кирпичлэсь, вылӥыз коръёслэсь. Пушкыз кыӵе! Ӵуж буёлэн буямын. Синмаськод но, вожъяськод но. Осьып кышно курытсэ но поттӥз: куарсурлы дасямез, пе, вал. Кышноослэн кылзы уката сэраз. Асьсэды но ньӧраны ӧдъязы, котыр нюлэс, пе, нош йыг- йыг коркаос чиньыен лыдъямон но ӧвӧл. Кытчы учко воргоронъёс? Кынарзы уг тырмы-а, вырӟытӥсь ӧвӧл-а? Асьмеос, нылкышноос, ымысьтымы вӧй кисьтӥськемлэсь кепыраськом, дыр - картъёсмылы номыр ум вераськелэ... Кемалась вал со. Уноез вунӥз ни, сӥс пыртӥ сямен потӥз. Нош та вераськон туннэ кадь ик пель сьӧрын жингыртэ. Уг вуны таӵе учыр но. Огаре ас уженым Ӵушъялэ ветлоно луиз. Ульчае пыреме бере ик капкаосты синйылтӥ. Зэмзэ ик-а татын ӟезьыоссы кирпич юбоосын? Зэм вылэм: ӟозлуд кышноос тодытэк вераллямтэ. Бен, вакытъёслы чидатэк, уноез из юбоос ӵыкмиллям. Тупатыны, выльдыны кин ке оло кирпич ӧз шедьты, оло нош, ӵок! кариз - пу юбоосын ӟезьы сазназ. Мынэсьтым тодэ ваёнме куспетӥ карыса сямен, Тимофей Чайников выльысь ӧръяськиз, - Туала воргоронъёс кытчы гинэ уг вуо - машинаосазы пуксё но Иже шонто, Можгала ветло. Кыдёкегес нуись сюресъёс вылэ но потыны уг кепырало. Адӟо каръёсысь калыклэсь кызьы улэмзэ. Кутско но - кирпич корка пукто, улыно-вылыно юртъёс ӝуто. Мӧзмыт ӧвӧл отын. Ӝытъёсы я радио, я телевизор жингырто. Эккой, шуисько аслым, та улон чукинскыса ӧй кошкысал ке, гуртэ кемагес вуылымтэ мурт йыромысал, дыр. Тросэз воргоронъёс выль корка пуктон мылкыдын уло. Реформа шуонзы султыны но, пуксьыны но уг сёты. Зэм, дунъёс гинэ дэймымонэсь... Таӵе вераськонэз мон кылӥ Вуж ульчаысен но, Выль ульчаысен но, Загибалэз, Нюрсьӧрез вератэк ини. Бен, адями из борддорез но пася, сильтӧллы но пумит султэ. Шуг-секыт шоры учкытэк, Ӟозлудысь воргоронъёс гуртсэс выльдыны кутскизы. Нырысь колхозлэн коньдонэныз, палэнысь монтажникъёслэн кужыменызы панельёслэсь коркаос ӝутскизы. Огез вӧзы мукетыз пуксиз. Учкиськод ке, дас юртлэсь быдэс ульча кылдӥз. Кызь семья выль корка пырон лэсьтӥз! Шумпотонлэн пумыз, оло, ӧй вал. Со ик уго шулдыр гуръёсты но ӧръяськытӥз. Гурт вадьсын чузъяськылӥсь жингрес гурез кылыса, мукет семьяосын но малпаськылыны ӧдъязы. "Неужто,- шуылӥзы соос,- та вужмем юртамы даурмес ортчытом?.." Озьы верасьёс пӧлын вал Микон Петя но. Ма шуод, атаезлэн пуктэм коркаезлэн даурез ортчыны вуиз. Тазэ сэзъяно ке, вырӟытэм коръёс пеньлы уз пӧрме-а? Кутскиз но кирпич корка пуктӥз. Ма веранэз, выль юрт лэсьтон сярысь мадьыны гинэ капчи. Нош ужез - я соиз, я таиз уг тырмы... Кытчы ке мыноно, кинэн ке кылбур мытоно. Табере тани Петялэн семьяез кӧня ке ар ӵоже ни чебер, шулдыр коркан улэ. Кузьмин выжыослэн но вуж юртъёсазы улэмзы ӧз поты. Юрий Кузьмин синмаськиз улыно- вылыно коркалы. Бусы шоры огназ кылем писпу ӧвӧл, вынъёсыз, эшъёсыз вань - соос юрттозы. Вашкала аръёсы сямен ик гуртын ог-огедлы юрттон выжызэ ӧз ышты на. Корка пуктоно-а, кенос ӝутоно-а - иськавынъёс, бӧлякъёс лыкто. Соос ӧтемез уг витё, сюлэмзы косэмъя юрттыны мылкыд каро. Сыӵе сям Ӟозлудын улэ но улэ ай. Тани Юрий Кузьминлы но кирпич вылэ кирпич тырыны, собере коръёс ӝутыны юрттӥзы. Табере со улыно-вылыно эркын коркан улэ ини. Пиналъёсыз йылэмъя, вуж коркан ӟоскытгес потӥз Лёня агаезлы но. Уката ик - мурт киосын лэсьтэм юртын улӥз со. Малы, шуиз огпол, аслам киосы-пыдъёсы ӧвӧл-а, уг быгаты шат эркын юрт пуктыны?.. Зэм, таизлэн гурт шоры вылысен учкемез ӧз поты, лэсьтӥз ӵыжак выль коръёслэсь одӥг этажъем юрт. Витялэн но агайёсызлэсь бере кылемез ӧз поты - улон корказэ паськытатӥз. ... Тодэ лыкто война бере аръёс. Фронтъёсы кошкем воргоронъёслэн киосынызы лэсьтэм юртъёс пумен лябӟыны ӧдъязы. Зор-котлы чидатэк сисьмем пу липетъёс вулы мытылыны ӧз быгатэ ни. Зор вуэз витьыса, коркась выж шоры ведраос пуктылоно луылӥз. Аръёс ортчемъя, атайтэк быдэсмем егитъёс юртъёссэс выльдыны кутскизы.Огез бӧрсьы мукетыз вужзэ сэзъяз, быгатӥсез выльзэ ӝутӥз. Соку ай улыно-вылыно, эркын коркаос лэсьтон сярысь малпась ӧй вал, улон инты гинэ мед луоз... Табере мукет югдур, мукет вакыт. Улон чидантэм шугомиз ке но, калыклэн огинтыяз лёгаськемез уг поты. Лебедевъёс, Кузьминъёс, Чайниковъёс бӧрсьы кирпич, кор вортто мукетъёсыз. Вавожлы, городъёслы кыдёкысь гурт улонлэн палэназ кылемын ӧвӧл. Татын улӥсьёс ярато асьсэлэсь музъемзэс, шаерзэс. Соосты чебергес, шулдыргес карон мылкыд улэ гурт калык пӧлын. Ӵапак со сярысь вера эштослэн тӧроез Николай Леонидович Чайников: - Туала вакытэ гурт калыклы туж секыт ке но, улон гопын кынмем йӧ ӧвӧл, со но шуна ук. Озьы ик улон но огинтыяз уг сылы. Тани мон тодэм дырысен но кӧня вужмем, лапкам коркаос вал гуртын. Табере соослэсь интызэс басьто ини кирпичлэсь, жин-жин юнэсь коръёслэсь ӝутэм юртъёс. Нош учкелэ ай, кыӵе чеберъямын соос. Тямысэз улыно-вылыно. Котькуд корка газ пыртыны чакламын. Гумы кыскись монтажникъёс ужало ини. Зэм, соосты пушнерасьёс ӧвӧл бере, уг дырто. Курытсэ ӟизто но, кынарзы быре. Эштослэн тӧроез та гуртын ик вордскемын. Татын солэн лёгамтэ сюресэз, тодымтэ адямиез ӧвӧл. Со шӧдэ тросэзлэсь сюлмаськонзэ, малпанъёссэ. Тӧро доры угось куронэн но, ӝожтӥськонэн но лыкто. Зэм, вань уробо питранэ боды донгасьёсыз но. Тани али но куать муртлэн куриськонэз вань. Корка лябӟиз, шуо, собере калык сямен улэм потэ. Бен, эштос юрттэ выль корка лэсьтӥсьёслы. Соос дунтэк басьто дас кубометр нюлэс но мукетсэ. Техника понна дун уг куры. Зэм, корка пуктыны юрттэт вуэ ке но, со вӧзы трос коньдон кулэ. Таиз ласянь ӟудэмын гурт калык. Уждун интые пызь, чечы, чорыг басьтэ со. Нош коньдон малы гинэ но кулэ ӧвӧл!.. Озьы но гуртын улӥсь оске: тулыс вуоз, йӧ вырӟоз. Тазьы вераса, выльысь тодам лыкто улонысь кемалась кошкем пересьёс - Керемкей, Сьӧд Микаль но Савин. Соос туннэ выльысь султыны быгатысалзы ке, вавож, какся, куашкам бӧлякъёслэн гуртсылы чылкак абдрасалзы, дыр. Соос ӧз адӟе ни Шурсьӧр ульчаез но, гурт вӧзы кылдэм посёлокез но. Таосыз гинэ-а паймысалзы? Выльдӥськись Вуж ульча но, Выль ульча но соос понна, зэмзэ но, уйвӧт кадь потысалзы, дыр. Гурт но улон сярысь мадьысал на, дыр, Тимофей Никифорович Чайников но. Секыт висён солэсь кужмогес вылэм: люкиз югыт дуннелэсь. Нош вашкала гурт сылэ. Городъёслы кыдёкын ке но, пумен матэ луэ. Татын ӝутскозы на чебересь выль юртъёс. Василий СМИРНОВ. Шӧкыч Шамарданлэн шыкысысьтыз Кин тон Вань на вылэм асьмелэн унтеръёсмы, Чеховлэн верам Пришибаев кадь геройёсмы. Калык пӧлын соос зӧкъясько, ымзылэсь но паськыт кесясько. Озьы власть понна ӟеч ужаськомы кожало, асьсэос властьлэсь ужзэ гинэ пожало. Святогоръя ёросын Тяпык гурт вань. Отчы мон вуи ӝытлань. Нюлэс дасян бордын ужась, ассэ "Эксэй но инмар" кожась, Поляков Фед. Ник. Шуон адями, кемдӥз милям кенеш азямы. Бригадир луса, пе, ужасько, гуртысь гуртэ поръясько. Ну, бригадирлэсь ужзэ ми тодӥськомы, советской властьлы юрттӥсь со луэ шуиськомы. Гуртэ вуыса, калыкез кенеше люкаса, умой-умой со валэктоз, кужымез тырмемъя дышетоз. Нош таиз бригадирмы, сӥё-дано Поляковмы, уг яраты вераськыны калыкен, калык радъя лякытэн.Дыбыртэ пыдъёсыныз, ӟукыртэ пиньёсыныз. Мыжыкъёсыныз сэзъяське, немыч атас сямен кесяське. Кучыран сямен синъёссэ берыкъя, тӧл вуко сямен пол шорын берга. Шораз учкыны ик шукырес, кӧшкемыт выре со, шайпыдэс. Соин ик кенешын калык дэймемын, зор улэ шедем курегъёс сямен зӥбтэмын. Баженов Ст. О. сельсоветлэн членэз луэ. Поляковлэсь документсэ со куре. Ну, бен, пурӟиз ук бригадирмы, Баженов шоры кеськиз ук Поляковмы: - Кин тон, пе, луиськод, малы документме куриськод. Мон ведь лыктэмын ужаны, быгато вылад акт но гожъяны. Эн мерскы документме юаса, эн вераськы монэным "товарищ" нимаса. Товарищед тынад нюлэскысь кион, служащой луисько ведь мон. Отчы ик Глазысь дышетскись студент кемдэм. Со но вераськон куспазы мерскем: "Лякытэн вераськы, юлтош, советской властьлы уд ке луиськы пыртос. Документтэ кулэ луоз возьматыны, кин луэмдэ оскытыны. Туж шукырес вераськиськод, крестьянлы эш уг луыськы шуиськод. Лыктэмын ке ужаны, кулэ эш но луыны". Нош пурӟиз Поляковмы, эрик сётэ йыркуръяськон сямезлы. - "Тон пинал на монэным вераськыны, кулэ луоз вылад акт гожъяны. Кароно тонэ арестовать, милица мед сётоз тыныд кровать. Бандит шат монэ кожаськоды, вредитель лыдэ-а монэ пыртӥськоды? Кошкы татысь, палэнскы... Тӥни сыӵе бригадир вуэм Тяпык гуртэ. Эскероно луоз та муртэз: оло, зэм но Поляков пушкын вредитель каръяськемын, крестьян пӧлын государственной ужез саптаны кутскемын. Уг ушъяськы мон таӵе ужасьёсты, уг жаляськы Пришибаев-Поляков кадь унтеръёсты. Кылзэс таослэсь кортнано, крестьянъёс пӧлын ужаны валэктоно. Медаз куашкатэ крестьянлэсь мылкыдзэ, медам быдтэ бригадирлэсь тусбуйзэ. Перое мынам андан, ачим Пересь Шамардан. ("Ленин сюрес" газетысь, потӥз 1931 арын). Театръёс - нылпиослы Шаерамы арлы быдэ ноябрьлэн пумаз ортчытӥське "Театр - нылпиослы но егитъёслы" арня. Туэ та арнялы сӥзем ужрадъёс кутскозы 24 ноябре Мунё театрын. Арня ӵоже та театр покчиосты пӧртэм спектакльёсын шумпоттоз. Ижевскысь школаосын, нылпи садъёсын ортчозы ӝытъёс, пумиськонъёс, дышетскисьёс театръёсы экскурсие ветлозы. Сарапулысь драматической театр покчи эшъёссэ ӧтёз кык выль спектакль учкыны. Со сяна, татын тодматозы театрлэн историеныз, актёръёс учкисьёсынызы пумиськозы. А. АПАЕВА. Кышкыт ӧвӧл Балезино ёросын минингит чер вӧлмиз. Удмуртиысь Госсанэпиднадзорлэн отделениеныз кивалтӥсь Вера Васильевна Данилова ивортэмъя, али отын 13 адями висе. Ваньмыз соос - нылпиос. Нырысь ик черлазы Балезино посёлокысь огысьтыз нылпи садысь покчиос, собере - висён паласькиз школаын дышетскисьёслы. Нырысь черлам нылпиос та вакытэ больницаысь эмъяськыса пото ини. Балезиноын, минингитлэсь вӧлмонзэ дугдытон вылысь, ужрадъёс кутӥсько. О. ВАХИТОВА. Йыгмытгес луизы, радзы будӥз Берло дыре Удмуртиысь Писательёслэн огазеяськоназы шумпотон иворъёс вуыло. Коньывуон толэзьлэн пумаз нимысьтыз постановлениея "Удмурт Республикалэн дано гражданинэз" луизы калык кылбурчи Олег Поскребышев но тодмо крезьгурчи (со ик кылбур гожъясь) Геннадий Корепанов-Камский. Талэсь азьвылгес "Россия Федерациысь культура удысын сӥё-дано ужась" нимез басьтӥзы писательёсмы Вениамин Ившин, Генрих Перевощиков но Егор Загребин. Республикаысьтымы культура удысын дано ужась луизы Татьяна Чернова но Вячеслав Ар-Серги. Писательёслэн огазеяськонзы лыд ласянь но кужмоя. Али гинэ Россия Федерациысь Писательёслэн огазеяськоназы кутэмын дас мурт: Кирилл Ломагин, Семен Перевощиков, Владимир Возняков, Алексей Ельцов, Анатолий Андреев, Виктор Чулков, Владимир Созонов, Николай Кузнецов, Владислав Кириллов но Лидия Шемякина. Таӵе луонлык кылдӥз, 10-тӥ-12-тӥ ноябре асьме дорын Россиысь Писательёслэн союззылэн секретариатэз ужаку. (Со нуналъёс но литератураен герӟаськем ужпумъёс сярысь лыдӟоды газетмылэн вуоно номерысьтыз.) Т. НИКОЛАЕВА. Ярато театрез Ёросысьтымы культура юртын туэ ужаны кутскиз театр студия. Завьялысь сцена вылын асьсэлэсь шудыны-маскаръяськыны быгатэмзэс возьматон борды басьтӥськиз 17-лэсь ятыр удмурт воргорон но нылкышно. Нырысетӥез занятизы вал 17-тӥ куарусёнэ. Занятиосыз нуыны ӧтемын вал но соглаш луэмзэс веразы тодмо кылбурчи но драматург Петр Михайлович Захаров но Удмурт Элькунысь Драмая удмурт кун театрысь режиссёр, элькунысьтымы искусство удысысь дано ужась Василий Серафимович Ушаков. Туж быгатыса ужало соос. Сизьым пол пумиськылӥз ини адямиосын. Студилэсь ужзэ радъяны лулысь-сюлмысь юртто удмурт культурая дэменлыклэн тӧроез Мария Дмитриевна Ишматова, ёросэн кивалтӥсьлэн национальной ужпумъёсъя юрттӥсез Ольга Петровна Бегишева, искусствоосъя школаын ужась Зоя Владимировна Сперанских. Театр студие ветло пӧртэм адямиос: Григорий Григорьевич Морозов (солэн аслаз пьесаез вань ини), Раиса Константиновна Моторина - социальной юрттэт сётонъя центрын ужась, Наталья Даниловна Акилова - пиналъёслэсь ваньмон дырзэс радъясь центрлэн директорез, Григорий Григорьевич Сперанских - вань ёрослы тодмо суредась, Алексей Николаевич Четкарев - Завьял шор ёзо школаысь историлы дышетӥсь, селоын улӥсь Павел Анатольевич Дзюин но мукетъёсыз. Вань егитъёсызгес но. Соос пӧлын: Пычанкаын улӥсь Евгений Тимеев - Ижысь гурт хозяйствоя академиысь студент, ёросысь центральной больницаысь медсестра Надежда Иванова, Завьял шор ёзо школаын 11-тӥ классын дышетскись Яна Галанова. Тросэз самодеятельной артистъёс занятиосы соосыз келлятэк ветло. ... Тани нош ик вуиз ӝыт. Культура дворецмы доры лыкто но лыкто адямиос. Театр студие ветлӥсьёс нош люкасько залэ. Солэн кивалтӥсьёсыз но ас интыязы ини. Кутске репетиция. Сцена вылэ пото Григорий Григорьевич Морозов но Раиса Константиновна Моторина. Юисьгес адями кияз ӟенеликен. Сое юэмез понна туздыре кышноез. Со озьы Г. Г. Морозов но Р. К. Моторина рольёссы бордын ужало. - Вольыт шудо ини, но ужмы трос на,- шуэ Петр Михайлович Захаров (со - пьесалэн авторез.) - Мон пыр-поч лыдӟи быдэс дуннелы тодмо драматурглэсь Мольерлэсь "Эриктэм эмъясь" ("Лекарь поневоле") комедизэ. Сюлэмам туж пыӵаз со. Татысь геройёслы мукет нимъёс сётӥ, асьме дырысь адямиослы ваньзэ валамонгес гожъяй, пьесалэсь пуштроссэ туала улонэ выжтӥ. Озьы кылдӥз Мольеръя выль пьеса. Та ужелэн нимыз ӧвӧл на, но репетициос мыно ини. Тумошо комедия пӧрмиз, учкисьёслы со одно яраны кулэ,- вера Петр Михайлович. Режиссёрен Василий Серафимович Ушаковен ӵош соос ужало покчиослы спектакль дасян бордын но. Пиналъёслэн драматической кружоказы ветло Завьял шор ёзо школаын дышетскисьёс. Анатолий ВОЛКОВ. Михаил Бектуганов - Пичи Пурга ёросысь Брангуртысь школалэн директорез. Нылпиосты дышетон удысын со кызь арлэсь кема тырше ни. Тодӥсез тодэ, макем секыт туннэ директорлэн ужез - уго котьма понна аслыд бызьылоно. Озьы ке но, Михаил Иванович уг сётскы, ялан маке но выльзэ утчаны-пыӵатыны тырше. * М. И. БЕКТУГАНОВ. Туспуктэмез Г. ЮСАЕВЛЭН. Му вӧез поттонын ыштонъёс "Удмуртнефть" огазеяськон толэзьлы быдэ 18 миллион доллар пала ыштонъёс адӟыса ужа. Россиын ваньбур поттон куашкамен но бензин, солярка ӧжыт кутыны кутскемен, нефтьлы дунъёс 40 процентлы кулэсмизы: тоннаез азьвыл 535 манет сылэ вал ке, али - 330 манет. Кунгож сьӧры вузан дунъёс, кылем арын сярысь, 2 поллы кулэсмизы. Кылем арын предприятие одӥг тонна му вӧйлэсь 65 манет барыш басьтэ вал ке, туэ куинетӥ кварталын 16 манет тыр ыштон адӟе. Югдурез тупатон понна, "Удмуртнефть" ОАО-лэн 13 филиалъёсыз акциосын пытсам огазеяськонлы пӧрмизы. Таин валче 5100 ужасьёс пӧлысь 1100-эз ужтэк кылёзы. Ваньмыз та ужрадъёс юрттозы "Удмуртнефть" огазеяськонлы, ар бырытозь 350-400 миллион манет шыръяны но предприятиослэсь коллективзэс оглом утьыны. "Удмуртнефть" огазеяськонлэн пресс-службаез. Нуналлэн тодметэз 25 ноябре Иванлэн нуналэз. Лымыяз яке зориз ке - 4 декабрёзь шуныт луоз. Югыт нунал 7 час 40 минут кыстӥськоз. Толэзьскын со одӥг но ӝыны часлы синӥз. Та нуналэ... ар талэсь азьло 25 ноябре 75 арес тырме Александр Яковлевич Шамшуринлы (1923-1988), Советской Союзлэн Героезлы. Вордскемын Ижевск городын. Фашистъёсын огаз ожмаськонын, телефон кабелез тупатыкуз, А. Я. Шамшуринэз сӧсыртӥзы. Озьы ке но, со ез пумъёсты герӟаны быгатӥз, соосты пиньёсыныз куртчыса. 25 ноябре 1935 арын СССР-ысь ЦИК-лэн постановлениеныз Знак Почёта орден кылдытэмын вал. Соку ик сое басьтӥз Якшур-Бодья ёросысь "Восток" колхозысь бригадир Д. Вахрушев. Берекет Инкуазь гердъёс МУГОРЕЗ КЫНТӤСЬ ВУЗОН Мынам пинал но егит дыры кион куараосты кылытэк ортчиз. Вуж Турья гуртмы вӧзысь пашпуо пичи тэле та сьӧсьёс шер кожаллязы, вылды. Пурысь кунолэсь пыдберъёссэ пӧйшурасьёс синйылто ке, соку ик огазе кариськыса утчаны пото ни вал. Нош соослы ӵемысь ӧз удалтылы: кион ури-бери пегӟылӥз 20-30 иськеме интыяськем Марий Эл но Киров улосысь пумтэм-йылтэм нюлэсъёсы. Кионъёсты ас синъёсынымы ӧм ке но адӟылэ, огзэ ӟеч валамы: со сьӧсь пӧйшур. Угось пичи арлыдысен ик соослэсь лекос кӧттырмостэм сямзэс тодӥмы ни вал "Горд изьы", "Кион но гурт кечпиос" выллемесь выжыкылъёс пыр. Зэм, сюлэмез ӧжытак буйгатылӥзы куинь парсьпиослэн лӧпшам мылкыдо кырӟанзы: Кышкыт ӧвӧл сьӧсь кион, Сьӧсь кион, сьӧсь кион! Кытын тон, шузи кион, Шуш кион, лек кион? Кильмезь ёросысь нюлэсо шаере улыны выжеме бере, кионэн нырысьсэ ваче син пумиськыны кылдӥз чебер гужеме. Мынам вамышъяно сюрес вылтӥм ик выжиз но, шорам быльк учкыса сылэ. Нырысь-валысь мон сое пуны кожай вал. Берлогес валатски ни. Ӧй кышка шуыны уг быгатӥськы, бадӟым вал со. Бадӟым шуэмысь, кионъёс ӵемысь 35-50 килограмм секталаё луо, шер пумиськыло аспӧртэм великанъёс - 60 килоозь вуэ секталазы. Киям номыр ӧвӧл. Пурт ке но луысал, быгатысал меда мон солы пумит сылыны? Абдраменым шуланы кутски. Кион пельёссэ чырмытак золтӥз, быжзэ ӝутӥз но сюрелась ӟег пӧлы ышиз. Ма, соос гужем кӧттыроесь ук, сиён шедьтыны сокем уг шугъясько. Берло ӵемгес но ӵемгес пумитаны кутски кионъёсты. Ужаны ветлоно сюресэ бусыостӥ, ӵапак нюлэс вӧзтӥ кыстӥське. Адӟылӥсько вал оген, кыкен. Самой троссэ огазьын синйылтыкум, сизьым кузя вал. Пурысь йыртэмасьёс ас сярысьтызы тужгес но шӧдытӥзы-тодытӥзы 1996 арын толалтэ. Гуртысьтымы кесямын вал олокӧня пуныос, ферма дорысь котыртэтысь кык кунян, бускель гуртъёсын уйёсы ышылӥзы ӟазегъёс, ыжъёс... Арлы быдэ таркаськем Пихтинер гурт бервылэ интыяське колхоз ветылъёс понна гужем лагерь. Огаз аре вӧзамы ик вал, лэся, кионлэн гуэз. Малы ке шуоно, нунал пӧрат, ӵукна тямыс час ёросын, нюлэскысь потэ но ми пала учкыса сылыны кутскоз вал. Огшап сюло куараосты кылзыса сылэ но ас сюрестӥз лашкинтэ. Пудоос отын бер сӥзьылозь ке но улӥзы, пурысь бускельмы соосты ӧз иса. Пӧйшурасьёс верало, кион, пе, ас улон палаз уг йыртэма. Гузэ таркамлэсь, пиоссэ таламлэсь курда. Пурысь сьӧсез ӵемгес но ӵемгес пумитаны кутскеме бере, со сярысь тросгес тодэме потӥз. Кылсярысь, ӝутско-а соос адями пумитэ? Кызьы утиськоно сыӵе дыре? 60-тӥ аръёсы печатлам "Охотничьи просторы" альманахысь пумитай биология наукая кандидатлэсь Михаил Павлович Павловлэсь адями сиись кионъёс сярысь статьязэ. Берлогес тодматски на та авторлэн ик кионъёслы сӥзем монографиеныз, кудӥз кунгож сьӧрын но вылӥ дунъямын вал. Со гожтэ: "Адями борды ӵемысь урдско сӧсырмем но урмон висёнэн курадӟись сьӧсьёс". Куд-ог дыръя таза кионъёс но, пе, урдскыло. Таӵе кышкыт учыръёс луо нюлэскын сиён шедьымтэ дыръя, яке сьӧсьёслэн лыдзы трослы будыку, яке калыклэн улоназ шуг-секытъёс луыку. Сыӵеесь, пе, вал гражданской, Быдӟым Отечественной ожъёс дыръя, огинтыын сылон - "застой" нимам аръёсы. Кионъёслэсь улэм-вылэмзэс эскерись академик Л. В. Крушинский таӵе йылпумъян лэсьтэ: "Кионъёс котькуд адямилэсь огкадь уг кӧберало. Кышкало соос воргоронъёслэсь, ӧжытгес курдало нылкышноослэсь, воксё уг кышкало нылпиослэсь". 1990 арысен кутскыса, кионъёсын нюръяськон лябӟиз. Ватонэз ӧвӧл, соос туж бадӟым изъян ваё калык хозяйстволы. Бензинлы дун ӝутскемен, пӧйшурасьёслы но секыт луиз. Угось дас пол пӧйшураны потыса, огполаз гинэ кионэз пумитаны шуд усе. Сутэм эстӥськон вӧйлэсь дунзэ ке лыдъяд, кион куэд зарнилы берытскоз, ява! Соин ик алязы пурысьёс. Лыдзы йылэ но йылэ. Одӥг анай кионлэн 6-7 пиез вордске. Будо соос ӝог но туж трос сиён куро. Бадӟым сьӧсьлы нуналаз 3-4 килограмм сӥль кулэ. Нош сиён шедьымтэ дыръя, кион олокӧня нунал ӵоже сютэм но улыны чида. Игорь Акимушкин "Мир животных" книгаяз пусъе: "Кион кышкась, сабырлы пӧйшур. Сое уд ке исаськы, со но тонэ уз йӧты". Книгаосын котькызьы гожъяло-валэкто ке но, сьӧсьлэсь курдатэк амал ӧвӧл. Кылзэ ай тӥ соослэсь тол уйёсы вузэмзэс, яке бер сӥзьыл, пиоссэс пӧйшураны дышетыкузы, ваче ыргетэмзэс, пуны сямен утэмзэс! Эсьмаса, йырсиос ик пежырско. Мугорез кынтӥсь вузон со. Тулыспал (февраль) толэзез кион сюан толэзен но нимало. Угось та дыре пурысь сьӧсьёс шулдыръяськыны, семья кылдытон сярысь сюлмаськыны кутско. Та дыре айы кионъёс пӧлын ӵемысь жугиськон пуромылэ. Уго тазаезлы, кужмоезлы гинэ ӟеч дунъет сётоз "выль кен". Толэзь пумын кионъёс кузэн-кузэн кариськыса люкисько но асьсэлы кельшымон инты утчаны кутско. Вуоно карзылы соос ӵемысь быръё пограм писпу бервылъёсты, мур нюкъёсты. Кионъёс дасяло кык юрт. Пӧйшурасьёс я кин ке люкетэ ке, пиоссэс, пуныос музэн ымазы куртчылыса, ӝогак мукет гуэ нулло. Та пӧйшур туж сак синмо, сак пелё, котьма зынэз ӝог шӧдӥсь маке. Кионъёс тужгес но кышкытэсь луо, нылпиоссэс пӧйшураны дышетыкузы. Соку соос гурт пудоосты но ӵемысь качало. Калыкын верало, кионлэсь ке курдаськод, нюлэскы эн ветлы шуыса. Кышкатэк-курдатэк амал ӧвӧл. Сьӧсь бере сьӧсь ни. Нош ваче син пумиськыны ке тупаз, пӧйшурасьёс ӵекто: "Эн возьматэ асьтэлэсь кышкамдэс. Соос кышкало тыллэсь, шулам куаралэсь". Нош бызьыса пегӟон сярысь эн ик малпалэ. Кион часлы 85 иськем ӝоглыкен бызьыны йӧндыре. Тӥни сыӵе со выжыкылысь но улэп инкуазьысь пӧйшур. Н. НИКИФОРОВ. Киров улос, Бураши гурт. Ульфат Бадретдинов Мынам эшъёсы-букваосы Сценка Сӥземын Букварен люкиськонлы Шудйсьёс: А, Б, В, К, Р, У, Ь, Ъ букваос но Дышетскись. Сцена вылэ пото кык пиос - Ь, Ъ букваос. Ь ялан пальпотыса ветлэ, Ъ малпаськись тусъем, куараез но зӧк. Ъ но Ь артэ султо, учкисьёс азьын кырӟаны кутско. Ымзэс усьяло, нош куаразы уг поты. Кӧня ке улыса, соос доры Дышетскись вуэ. Дышетскись (букваослы). Мар тӥ татын кариськоды? Ь папьпотэ, ымзэ усья, маке но вераны турттэ. Дышетскись (паймыса). Чорыг луиды, оло? Ъ буква йырзэ сэзъя: ӧм, пе. Дышетскись. Нош кытын тӥляд эшъёсты? Ъ но Ь пельпумъёссэс вырето: ум тодӥське, пе. Дышетскись (учкисьёс пала берыктӥськыса). Мар луиз меда таослы? Номырзэ уг валаськы. Мукет букваосты шедьтыны кулэ. Тӥ уд тодӥське-а соослэсь кытынзэс? Ӧд адӟелэ, иське. Соку мон утчало ай (Букваослы вазиське). Тӥ татын улэлэ, ява. Мон ӝоген вуо (кошке). Ъ но Ь нош ик ымзэс усьяны кутско. Со вакытэ сцена вылэ пото А, Б, В, К, Р, У букваос. А, Б, В, К, Р, У (шумпотыса ваньзы ӵош). Тани соос! А (Ь, Ъ букваослы). Малы тӥ пегӟиды? Ъ. Ми ӧм пегӟе! Б. Малы соку милемыз ӧд возьмалэ? Ь (пальпотыса). Тӥлесьтыд азьло кырӟаммы потэ вал. В. Кырӟады-а? Ъ (вожзэ поттыса). Милесьтым куарамес тӥ асьтэ дорады кельтӥллямды! А но У (паймыса). Ми?! Ь. Тӥ ӧвӧл. Б-эз, В-эз, К-эз но Р-эз верасько мон. Р (бадӟым куараен кырӟаны кутске). Р-р-р-р-р-р-р-р... У. Мар луиз? Р. Небыт пусэн чурыт пус асьсэ понна улыны но, вераськыны но уз быгатэ. Мон со сярысь кемалась тодӥсько ни. Ъ (Р буквалы). Эн ушъяськы! Аслад но огнад улэмед уз луы. Кырӟамед но пунылэн ыргетэмезлы кельше. Р. Нош тынад мынам кадь но уг пӧрмы! А. Тырмоз керетыны! Ойдолэ султэ ни одӥг радэ. Кылбуръёс лыдӟом, кырӟалом. Ъ (бызьыса потэ азьпала). Мон - нырысетӥ! Р. Малы тон нырысетӥ? Ъ. Нырысетӥ луэме потэ! Р. Тонэ ноку но нырысетӥ уз каре! А. Я, я, шыпытгес! Со вакытэ вуэ Дышетскись. Дышетскись. Ӟечбуресь, эшъёсы-букваосы! Тӥ татын ни вылэм, нош мон олокытӥ утчаса ветлӥсько... Кырӟаны-вераны тӥ дась-а? Букваос (ваньзы ӵош). Дась! Р (Дышетскись доры матэктыса). Чурыт пус азьпала кариськиз... Дышетскись. Мед. Али тӥ алфавитъя уд султӥське, кыче ке кыл но уд кылдытӥське. Чурыт пуслэсь ӟеч мылкыдзэ ум сӧре, ява. Р султэ эшъёсыз вӧзы. Дышетскись (учкисьёслы). Одӥг арскын мынам эшъёсы куамын тямыслы будӥзы. Соос пӧлысь тямысэз - тӥ азьын. Букваос, мынам эшъёсы, уло Букварьын... А. Мукет книгаосын но... Ь. Тетрадьёсын но... Дышетскись. Озьы, озьы... Нош туннэ мон люкиськисько Букварен. Табере мукет книгаосты но лыдӟо ни. Р. Милемыз но сьӧрад басьтод-а? Дышетскись. Тӥтэк мон кызьы лыдӟиськом?! Нош али ойдолэ Букварьлы тау кароме. Букваос кылдыто "Букварь" кыл, со кыл бӧрсьы султо Дышетскись но чурыт пус. Огзы бӧрсьы огзы кылбур чуръёс лыдӟо, собере ваньзы чош кырӟало. Оген но кыкен, Куинен но ньылен, Витен но куатен, Талэсь но тросэн, Котьку ик - дэмен, Кужмо ми кылын. Куамынлэсь ми тросгес тямыслы, Мылкыдмы нош тырме ваньмызлы. Кылдытӥм удмуртлы выль дунне, Паймымон но чебер кыл дунне. "Шунды" я "Толэзь" Потоз, дыр, аклес, "Сяська" я "Палэзь" Луоз, дыр, палэс Одӥг букватэк, Одӥг эшмытэк. Куамынлэсь ми тросгес тямыслы, Мылкыдмы нош тырме ваньмызлы. Кылдытӥм удмуртлы выль дунне, Паймымон но чебер кыл дунне. Котьку ог-огмес Утём ми чупрес. Кылъёс но тросгес Шедьтом ай ӝоггес. Медло кыл ошмес, Отчы - ӟеч сюрес. Куамынлэсь ми тросгес тямыслы, Мылкыдмы нош тырме ваньмызлы. Кылдытӥм удмуртлы выль дунне, Паймымон но чебер кыл дунне. Нылпиос - наркотикъёслы пумит. Кӧняез? Ижевскын кылем толэзе "Нылпиос наркотикъёслы пумит" ӧтён улсын пӧртэм ужрадъёс ортчизы. Соосты радъянэн кивалтӥз Ижевскысь администрацилэн егитъёсын ужанъя ёзэз. Ужрадъёслы йылпумъянъёс лэсьтыса, солэн кивалтӥсез М. Ю. Вострикова журналистъёслы ивортӥз, наркотикъёсты оскалтэмъёс пӧлын 12-13 аресъем пиналъёс но шедё ини шуыса, егитъёс пӧлын 12 процентэз тодо наркотикъёслэсь "шӧмзэс", эшшо 20 процентэз гашиш-героинъёсын эшъяськыны дась. Наркотикъёслэн вӧлмемзы герӟаськемын йырсазез усыкмытӥсь арбериослэн "медной" луэменызы - быдэ вуымтэослы малпан пыӵатэмын: кыӵе тон "крутой", гашишлэсь шӧмзэ уд ке тодӥськы. Егитъёс анай-атайёссылэсь визь-кенешсэс адӟем но уг каро. Семья соослэн улоназы нокыӵе инты уг басьты. Соос вылӥгес дунъяло ас ёзъёссылэсь яке бадӟымгес эшъёссылэсь малпанъёссэс, дэмланъёссэс. Нош таосыз пӧлын туж уно ужтэк кылемъёслэн лыдзы. Соос, наркотикъёсты вӧлмытыса, асьсэлы улыны коньдон потто. Соин ик наркотикъёсын нюръяськонъя уноез ужрадъёс валэктон ужлы сӥземын вал. Быдэ вуымтэос, егитъёс, анай-атайёс пӧлын лекциос лыдӟемын. Наркотикъёсты вузан интыосты шараян понна, рейдъёс ортчытэмын. Тодмо луиз, городлэн 4 интыяз наркотикъёсты тужгес но чырмыт басьто. Усыкмытӥсь арбериос уг бергало буш кисыос пӧлын, соосты утчано отысь, кытын коньдонлы уг ёрмо. Кылсярысь, Ижевскын наркотикъёсты капчиен басьтыны луэ 29 но 30 номеро школаос котырын. Пиналъёс наркотик котыре медаз кыстӥське шуыса, соослы ваньмон дырзэс пайдаё ортчытыны луонлыкъёс кылдытоно. Тае валаса, егитъёсын ужанъя ёз интыосысь клубъёслэсь ужзэс радъяны тырше. Кылем арын Ижевскын 46 сыӵе клуб вал ке, туэ соослэн лыдзы 54-ёзь вуиз. Клубъёсын ужась спортъя секциосы, кружокъёсы 8 сюрс нылпи ветлэ. Бюджетъя котькудӥзлы сыӵе пиналлы 600 манет висъяны чакламын вал ке, вуэ 140 манет гинэ. Клубъёсын ужасьёслэн шор уждунзы - 301 манет. Озьы ке но, егитъёсын ужанъя отдел шуг-секытъёс азьын киоссэ уг лэзьы. Туэ чакламын эшшо кык клуб усьтыны. Огез нимаськоз "Автомобилист" шуыса. Отын 14 арессэс тырмытэм егитъёс машина нуллыны право басьтозы, дышетскемзы понна арскын 20-40 манет тырыса. Вуоно гужем та клуб Россиысь автомобильной спортэн вырись егит пиос пӧлын ӵошатсконъёс ортчытоз. Мукетыз клуб - "Рекрут" клублэн инъетэз вылын - армие мыныны дасяськись пиосты огазеялоз. Соосты дышетозы, визьнодалозы республикамылэн военкоматысьтыз, милицилэн школаысьтыз, ИжГТУ-лэн военной кафедраысьтыз ужасьёс. О. ВАХИТОВА. Улэм потэ Ноку ӧй синмаськылы Галина Старовойтовалы. Адӟи но огпол гинэ - Новосибирскын, миым. Вӧзаз егит пияш сылэ вал. Лэчыт синмо нылкышноос-газетчиос соку ик кылъёссэс шерыны ӧдъязы: - Ельцинлы синмаськыса, Старовойтова аслаз картэныз люкиськиз но тани пинал кузпал шедьтэм. Телевизорын сярысь, зэмос улонын Галина Васильевна кыӵе ке небытгес вылэм. Коммунистъёс шоры сокем ӧз ыргеты. Россиез умоятонъя куд-ог ӵектонъёсыныз амалтэк соглаш кариськиськод. Кариськиськом вал... Кырсь политика адямиез виёнысь но пайда утча. Демократ шуонъёс пӧлысь огез, Сергей Юшенков, Старовойтоваез быдтон уе ик тазьы вераз: - Революция ӵемысь сие аслэсьтыз нылпиоссэ. Революцилэн нырысь радаз вамышъясьёсты реакция нырысь ик виылэ. Кин бен со - реакция? Мукетыз демократ, Егор Гайдар, валэктӥз: - Старовойтова юн пумитъяськиз коммунистъёслы но националъёслы. Отӥзэ асьтэос валаськоды ни. Анатолий Чубайс: - Старовойтоваез быдтон нырысь ик пайда сётэ коммунистъёслы но бандитъёслы. Нош мар шуо асьсэос коммунистъёс? Калык патриотъёс асьсэ ӧтчамазы буре ваизы ваньзэ туала режимен сэрен быремъёсты. Татын номыр умойтэмез ӧвӧл кадь. Собере, та нуналэ ик, коммунистъёс кизэс чабыса эктӥзы-кырӟазы. Эрико шуон НТВ телевиденилы со ик кулэ: та "фольклор праздникез" паськыт возьматӥз. Кытын асьмелэн возьытмы, господинъёс но товарищъёс? Расизмлы дурбасьтӥсен Альберт Макашовен йырин наштаськем коммунистъёс малы нош ик азьзэс-берзэс уг чаклало? Кулэм мурт сярысь, пе, яке номыр верано ӧвӧл, яке верано ӟечсэ гинэ. Нош пӧяськыны уг яра. Выльысь тодэ лыкто НТВ-лэн кылъёсыз. Галина Старовойтова, пе, нылкышноос пӧлысь огназ пыриськиз вал Россилы президент луон понна нюръяськонэ. Берлогес, пе, ӵошатсконлэсь куштӥськиз. Ӧз куштӥськы, господинъёс - сое быръёнъёсъя валтӥсь комиссия палэнтӥз. Старовойтовалы дурбасьтӥсь адямиослэн списоказы туж уно сюриллям ӧвӧлтэм муртъёс. Политикаын вожвылъяськон шедьтӥз выль ӧр - табере нылкышноос вылэ но пыӵал урдо ни. Нош ӵуказе кинлэн черодэз? Нылпиослэн? Ӧлексыослэн? Котькудзэ сямен ик бадӟым йыртэманэз Борис Ельцин "лично" ачиз эскере. Солэн озьы чакламез улсын весь уг шедьто Дмитрий Холодовез но Влад Листьевез быдтӥсьёсты. Озьыен... Туннэ ум вералэ азьланьзэ. Туннэ вералом туннэзэ. Кемалась кырмемын тодмо удмурт тодосчиез-нылкышноез Людмила Занкееваез Москваын ожалтӥсьёс. Приговор кутэмын: соосты асьсэды ыбоно. Приговор быдэстымтэ. Европаысь мукет кунъёсын одӥг радэ султон понна, асьмеос жаляськом урмемъёсты. Усто демократия, номыр уд шуы. Туннэ озьы ик вералом азьлозэ. Туала демократия кылдытон сюрес вылын Америкаын куке-соку ишказы йыркуосты (скальпъёсты), Англиын виылӥзы корольёссэс, Франциын ыбылӥзы коммунаръёссэс. Оло, асьмеды но виро кызетӥ даур бере вите сяськаяськись вапум? Нош улэм потэ туннэ! Алексей ШКЛЯЕВ. Аз, Ферт но мукетъёс Аслэсьтыз туэ сӥзьыл сезонзэ усьтӥз Сарапулысь ӟуч драматической театр но - пуктӥз таӵе пьесаосыз: П. Федоровлэсь "Аз и Ферт" но П. Каратыгинлэсь "Петербургский немец". Нырысетӥзэ ужез пуктыны Сарапулэ нош ик ӧтемын вал азьвыл татын ужам режиссёр Владимир Сафонов (али со В. Г. Короленко нимо ӟуч кун драматической театрлэн валтӥсь режиссёрез, Удмурт Республикаысь искусство удысын дано ужась). Та спектакльын шудо Ирина Синькевич, Виктор Ардашев, Альберт Казберов, Владимир Мельник, Зинаида Ланина но Евгений Потапов (та кык берлоосыз артистъёс кылем сезонысь устоосыз луо). Сценаез чебермаз озьы ик Ижевскысь художник Борис Науменко. Коньдонэн юрттӥзы Сарапулысь предприятиос. Театрлэн директорезлы Тамара Кулаковалы коллективен умой ужамез понна сётэмын "За достижения в культуре" знак. В. Лагунов. Гожтӥськон-99 Удмурт луэмзэс валазы Балезино районын "Удмурт дунне" газетэз арысь аре тросгес адями лыдӟе. Кылем арлэн пумаз газетмылы 634 мурт гожтӥськемын ке вал, туэ тамында адями гожтӥськемын ни ноябрь толэзе. Озьыен, ар йылпумъяськытозь, лыдпус будыны быгатоз на. Ӵошатон понна вералом: 1997 арын январе газетмес 419 мурт лыдӟе вал. Маин бен валэктоно уй палъёслэсь газетмес яратыны кутскемзэс? Нырысь ик тау кароно Балезино районысь почта ёзъёсын ужасьёслы. Котькуд адямиен сямен соос валэктон уж нуо. Бен, лыдӟисьёсын сыӵе эшлыко кусып возьыны рыноклэн законъёсыз но косо: журналъёсты, газетъёсты басьтӥсьёс ӧз ке луэ, почтальонъёс но ужтэк кылёзы. Мукетыз тодмет но шӧдӥське: та районын но тросэз адямиос удмурт луэмзэс валаны кутскизы. Озьы куд-ог "ӟучомем" гуртъёслэн пумен быдэсак удмурт вылэмзы шараяське. Газетъёслы гожтӥськыку, адямиос валтӥсь интые пукто соослэсь дунзэс но. Мукет изданиосын ӵошатыса, "Удмурт дуннелэн" дуныз ичигес. Собере пуштросэзъя но газет гурт калыклы матынгес луэ. Берло дыре газет-журналэз нуллон районын ӟечгес радъяськиз. Берло аръёсы соосты Ижевскысь автобусэн ке вуттыло вал, табере поездэн ваё, озьы дыр шӧдскымон шыръяське, газет-журнал лыдӟись кие ӝоггес вуэ. Т. МИРОНОВА. Ческыто-курыто Мон кыкетӥ курсын. Тани Октябрь праздник но матэктэ ини. Ӵапак та вакытэ атаелэсь гожтэт вуиз. Йырам бадӟым нушыен шуккизы кадь. Семьяямы вормонтэм секыт куректон вуэм. "Нылы, дышетскондэ куштоно луод, дыр, юрттэммы уз луы ни. Вань дӥськутъёсмес воръёс лушкаллям пеймыт сӥзьыл уе. Нырысь Тузик пунымы чиптэм-чаптэм олокытчы ышиз, соослэн, сьӧсьёслэн, ужзы вал, дыр, шуыса малпаськом". Та секыт иворез гожъякуз, атае но бӧрдыса пукиз, дыр: бумагаез вылэ чернилалэн вӧлскем пытьыосыз кылемын, куд-ог букваосыз воксё тодмантэм. Лекциосы ветлэмъяськисько, нош йыры буш ведра кадь. Эшъёсы но туж жаляло. Куректонме вормыны ӧй быгаты ни. Куриськон гожтӥ, деканмы Аркадий Дмитриевич Галичанин доры пыри. Ваньзэ верай. Со паймиз, кызьы буйгатыны амал уг шедьты кадь. - Сокем эн чигиськы, котькыӵе шуг-секытысь потон амал сюре. Атаед-анаед улэпесь, война быриз, агаед улэп кылемын. Институт кызьы ке но юрттыны тыршоз... Одӥг ӵукна монэ деканатэ ӧтизы. Аркадий Дмитриевич вунэтымтэ вераськеммес. - Тани тыныд пальтолы кесэг сётӥськом, мастерское мын - кема уз вуре... Деканлэн сюлмысьтыз ик верам кылъёсыз но, пальтолы сётэм басмаез но ӧз юрттэ ни мыным. Институтэз кельтыса, дорам бертӥ. Ужтэк уд пукы ук, роное мынӥ... Табере мон Нынекысь семилетней школаын дышетӥсь. Директормы мӧйыгес удмурт воргорон Матвей Лаврентьевич Троянов вал. Удмурт кылын вераськисьёс ӧй вал, вань предметъёс ӟуч кылын нуиськизы. Война ӧвӧл ни, улэп кылем дышетӥсьёс нош ик школае берыктӥськыло. Милям школаямы алигес бертэм азьвыл солдатъёс кема гинэ шинелен, гимнастёркаен ветлӥзы... Татын монэ нош ик комсомол организацилы секретаре бырйизы. Ивановелы ваньзэ тае вераса, нош ик гожтэт ыстӥ. Табере со котькуд гожтэт пумаз "Твой Василий" шуыса гожтылэ ини. Возьма, нокинлы эн синмаськы, монэ эн кушты шуыса но гожтылэ вал... Ньыльдон кыкетӥ арысен кутскыса, ньыльдон куатетӥ арозь возиськомы ини гожтэт пыр вераськонмес. Бумага тэльбугоен зол кырмыса возиз монэ. ... Одӥг кӧс нуналэ малы ке туж сюлэмы шуг, кытчы пырон инты уг шедьтӥськы. Бызараям бертӥ гинэ, пичи дыръям ӵош дышетскем эше ивор вуттӥз: - Тодӥськод-а, Василий Иванович, пе, бертэм. - Мар ке шат, бертӥз ке бертӥз, - шуисько. - О-о, пе, ум шӧдӥське кожаськод, дыр, ваче гожтэт гожъямдэс. Аслам сюлмы пилиськиське ини. Зэм-а меда мон соин пумисько? Нош малы али ик уг лыкты мон доры, куинь иськем гинэ ук... Тани куто но кошко Нынекам, мед утчалоз... Ӝытбыт возьмай - ӧз вуы. Оло, солэн анаез кинэ ке дэмла ни, ӧжыт-а дышетӥсьёс. Бӧрдонэ ымдурам... Анай йӧгуысь галанка поттэм. Сое паланы кутски. Киы куалекъямен, пуртэ вольтчиз но чиньыме куалак вандӥ. Тӥни со ик луиз бӧрдонэлэн мугез. Чиньыме тӧдьы басмаен бини, вирыз уг поты ни. Со куспын кин ке капкатӥ пырись луиз, капка кутон шальк! кариз но борӟаськиз. Гидкуазетӥ торк-торк карыса вамышъя. Укноетӥ учки но... соку ик тодмай! Осто инмаре, осто инмаре, медам погыра вал. Корка ӧс усьтӥськиз... Ӧс куспын адскиз чиед ымныро, сьӧд синмо, буям кадь сьӧд синкашо адямие - сьӧд хром сапеген, сьӧд ку пальтоен, офицер картузэн. Мон доры бызьыса сямен лыктӥз, туж зол ӟыгыртӥз но чупаз. Татчыозь монэ тазьы нокин но ӧз чупа на. Нырысь пумиськон, нырысь чупаськон - коть оске, коть эн. Оло, юри озьы тупам лэся, мон коркан ӵапак огнам вал. Кыӵе кылъёс вераз та пумиськон дыръя Васяе, ми асьмеос гинэ тодӥськом... Ӝытазе ваньмы люкаськимы. Васяез самой дуно куноез кадь утялтӥз семьяе. Сое азьло ужамез дырысь тодо вал уга, но ноку ӧз малпалэ, эмеспизы луоз шуыса. Ӝӧк выламы сиён-юонмы узыр ӧй вал: шыд, сылалтэм кубиста, кияр, анайлэн аслаз пукем аракыез, туж ляб мар ке, зын ву кадь гинэ. Берло ини, ӵош улыкумы, Вася ӝот-ӝот серекъяса тодаз вайылӥз: со аракыез юисько- юисько, ӧжыт дӥсьтӥсьгес мед луо шуыса, нош нокытчыям уг пыӵа. Со ӝытэ ик азьло ми дорын школаын ужакуз улэм патераз мынэмез потӥз. Отын но туж куноязы, марзы вал, ваньзэ умойзэ ӝӧк вылазы поттӥзы. Коля Петров но, пизы, армиысь бертэмын ини. Кӧня вераськонъёс вал та ӝытэ. - Малы бертон ӝытад ик ӧд лыкты? - юасько. - Тодысалыд ке, кыӵе возьмай мон та пумиськонэз, чик дорам пыратэк лыктэме потэ вал. Анаелэн кӧтыз урод луоз шуыса жаль потӥз. Ачим но пегӟыса кадь кошки, сельсоветэ шуыса. - Тодӥськом, тодӥськом тынэсьтыд сельсоветтэ, - ӧжыт шӧмам нылкышноос меӵкытъяло. Зэм ик, милям коркамы сельсоветэн артэ сылэ вал. Ӵуказеяз ӵукна ик мон Нынекам кошки, Васяе Маканаз бертӥз. Озьы ми, кык арня ӵоже огмы доры огмы ветлыса, я Бызараын пумиськылӥм, я Нынекын. Одӥг пол Нынеке лыктӥз но мыньпотыса юа: - Мар вӧтаса изид та уе? Ми толон тонэ "пропили", тон табере мынам кузпалы, атаед-анаед пумит ӧвӧл... Анае бӧрдыны кутске: нылмылэн номыриз ӧвӧл, ачид тодӥськод, ваньзэ лушказы... Атае трос вераськись ӧвӧл бере тазьы гинэ верам: "Нылпиос аламаесь ӧй вал кадь но"... - Тон мыным туж юрттӥд, - шуэ Вася. Тынад котькуд гожтэтэд мыным выль ивор вайылӥз. Асьме шаермес ӧй вунэты, удмурт кылме но яратэмысь ӧй дугды. Зинаида Муканова. Берпум оскон Шуд уг куриськы мон инмарлэсь, Нуналлы быдэ кускозь йыбыртъяса, Ӧй но шӧды ортчемзэ та даурлэсь, Улонлэсь воштӥськемзэ весь возьмаса. Кулыны уг сёт на инмаре. Улонэ но бен ӧвӧл вожъяськымон. Чигнаны уг лу, ӧвӧл мукет сюрес. Дӥсьтытэк лёгем вамыш ӧвӧл на оскымон. Мар карод, озьы косэ улон: Адӟоно шуддэ одно, пе, адӟоно. Одӥгез пырак шудбур пӧлын, дыр, пылаське, Нош мукетызлы - весяк курадӟоно. Бӧрдӥсьёс шудо, пе, луозы со дуннеын, Нош лулзы эркынлалоз сяська пӧлын. Улыны тыршо берпум шокчытозям - Чидандэ гинэ эн жаля, инмаре. *** Тон ӧвӧл ни мынам, Тон уд лу ни мынам, Дауре но ортче, кисыри но пуксе, Аръёс пыр лушкемен гажаса, Тусбуйдэ син азям возьыса. Нырысез яратон - со кужмо яратон, Улонлы, тыр шудлы со оскон. Тон шудо, дыр, монтэк - Туж шудтэм мон тонтэк. Пал тури кадь огнам Ветлӥсько ас поннам. Ӵок уд лу ке мынам, Уг ке луы тынад - Мылкыдме туж пыдло мон вато... Тон сярысь шунытэсь чуръёсын Та ӟырдыт сюлэмме буйгато. Шуныт сётон ӧз ӝега Кызь кыкетӥ ноябре 3 час 35 минутэ Сарапул портлэн котельноез пуштӥз. Соин валче шуныттэк кылиз куинь улон юрт яке 50 квартира. Тылпу потэм, газ мултэс люкаськыса. Пуштон куашкатӥз котельнойлэсь люкетсэ, электрокужым сётон ёзэз, эстӥськон (нефть) сётон гумыез, насосэз. Тылпу кысӥсьёс дыраз вуэмен, 9 часын "горд атас" лапкатэмын вал. Городысь кышкыт учыръёслэсь утиськонъя штаб тупатъян ужъёсты умой радъяз. Ӝытазе улон интыосы шуныт нош ик вуиз. Та вал Удмурт Правительстволэн Граждан оборона ужпумъёсъя но кышкыт учыръёслэсь утиськонъя комитетэзлэн ивортонэз. Петр Орехов ШУР ВАМЕН Кык яръёс вискытӥ шур бызе, Капчи пыж ву вылын ӟечыра. Луыны тонэныд огазе Со пыжен потысал ярдурад. Но шуак кадь ышиз капчи пыж - Ву вамен ни уд пот каньылэн. Шур вадьсы мон лэсьтӥ азвесь выж, Яр палад ӧтьыса со сылэ... Та выже но ышиз нап бусэ, Ярдуред но бусэ выемын. Оскисько на: вуоз тулысэ - Бурдъёсы поттозы шур вамен. Лыдӟисьёс кылбурало Буэ дурын Ӵукна чирдон дыръя, Возьвылъёсын ӟарпотоз. Зарни шунды ӝужан дыръя, Калык турнаны потоз. Буэ дурын, нюлэс сьӧрын, Кусо куара жингыртоз. Кереметын, Тускалтаын, Комбайн турын погыртоз. Буэ дурын, льӧмпу улын, Уӵы куара кылзыло. Буэ дурын, гурезь бамын, Кылбуръёсме жильдыло. Гожтэт Гожтэт гожтӥсько - Эн бӧрды юнме. Берто шуисько - Возьма, гажанэ. Умме тон усёд, Изёд вӧтаса. Ӵукна сайкалод, Монэ адӟыса. Сяська будэто Тыныд кузьманы. Гужем мон берто Тонэ нуыны. Коӵо кыӵыртоз Пуксён нуналэ: Гожтэт, пе, вуоз - Иське, возьмалэ! Шарипзян Меншарапов. Жильыртӥзы "Удмурт ошмесъёс" "Таӵеез ӧй вал на! Синмаськымон! Усто!" Сыӵе кылъёсын пумитазы но келязы элькунысьтымы кибашлыослэн 4-тӥ возьматон-конкурсазы лыктэм вормисьёсты Удмурт театре лыктэмъёс. "Удмурт ошмесъёс" конкурсэ пыриськизы вань ёросъёсысь но городъёсысь кибашлы адямиос. Выставкаен тодматскиз 2 сюрслэсь уно учкись. Табере тани дыр вуиз йылпумъянъёс лэсьтыны. Ужъёс дунъямын вал кызьлэсь уно номинациосъя - куиськонъя, пужыятсконъя, чильпаськонъя, лылэсь, пулэсь, куролэсь арбериос лэсьтонъя но трос мукетызъя. "Гуртъёсысь кибашлыослэн устоез юртсы" конкурсын вормизы Пичи Пурга ёросысь вуж моньяос. Калык творчествоя устоеныз юртэн лыдъямын Игра посёлокысь центр. Пиналъёс но дышетскисьёс пӧлын калык творчествоез азинтэмез понна дуно кузьымен но дипломен пусъемын Пичи Пурга районысь Яган посёлокысь Валерий Хмелев. Удмурт калыклэсь быгатонлыксэ возьматонъя но сое азинтонъя конкурсын вормисен лыдъямын Пичи Пурга ёросысь Вуж Монья гуртысь Нина но Николай Тарасовъёслэн семьязы. Пуэз вӧлыса устоесь арбериос лэсьтэмез понна, нырысетӥ премиен пусъемын Ува ёросысь Узей-Тукля гуртысь Геннадий Сидоров. Декоративно-прикладной искусстволэн мукет удысъёсызъя нырысетӥ интыос сётэмын Лариса Гущиналы (Шаркан), Валентина Калашниковалы (Дэбес), Зоя Прохоровалы (Пичи Пурга), Надежда Сидоровалы (Ува), Елена Анисимовалы (Пичи Пурга), Светлана Назаровалы (Яр), Светлана Ломоносовалы (Алнаш), Мария Ижболдиналы (Каракулино), Юрий Конюховлы (Алнаш), Виктор Егошинлы (Красногорск), Елена Кондратьевалы (Яр), Анатолий Поторочинлы (Якшур-Бодья) но Ольга Денисовалы (Игра). Таосыз нырысетӥосыз гинэ. Нош кӧня вал мукетъёсыз! Кибашлыосын пумиськон бере, зэмзэ но, данъяськыны кутскиськод ошмесо шаереныд. Озьыен, улэп на калык творчество! Улэп гинэ ӧвӧл, со азинске, сяськаяське, пушъе! Н. ЛЯЛИН. Дунтэк эмъяськон - чебересь тодэ ваёнъёс Тазалыкез утён удыс укмыс толэзь куспын бюджетысь чакламлэсь 50 процентсэ басьтӥз, 17 сентябре манет куашкам бере - 20 процентсэ. Медицинской страхованиея фонд калык уждун басьтымтэен начарме. Та ласянь аслэсьтыз малпанъёссэ журналистъёслы ивортӥз Удмуртиысь тазалыкез утёнъя министр Сергей Геннадьевич Шадрин. Висисьёслы эмъюм, сиён-юон басьтыны коньдон ӧвӧл, планъя операциос берлолы кылё. Куд-ог больницаос пытсаськылӥзы но ини. Эмъясьёслэн уждунзы 3-4 толэзьлы ӝегатэмын. Берло толэзьёсы хирургияя, нылкышноосты эмъянъя учреждениос, нылпи ваён юртъёс шаерысьтымы вир басьтонъя но солэсь эмъюмъёс лэсьтонъя служба ӟеч ужамен гинэ юрттэт сётыны быгатӥзы. Туала югдуре кунлэсь юрттэт витёнэз ӧвӧл, осконо аслад кужымедлы гинэ. Тае валаса кылдытэмын нимысьтыз комиссия, кудӥз тазалыкез утёнъя удыслы ужаны луонлыкъёс кылдытонэн выре. Уксёез шыръян понна, эмъюмъёсты "Фармация" кун предприятие пыр басьтыны чакламын, татчы мыноз медицинской страхованиея фондлэн 50 процентэз. Оскон вань на Россиысь Тазалыкез утёнъя министерстволы но. Со чакла эмъюмъёсты суменак басьтыны но улосъёслы люкылыны. Государствомылэн калыкез эмъяны коньдонэз ӧвӧл бере, оло, аслаз калыклэн уксёез шедёз? Тае эскерыны медэ, лэся, тазалыкез утён удыс. С. Г. Шадрин малпамъя, эмъяськон понна коньдон тырон медициналы выйыны, адямиослы улонысь кошкыны уз сёты. Шаерысьтымы Тазалыкез утёнъя министерство чакла эмъяськон понна дун тыронэз паськытгес кутыны. Дунын эмъяськон законэн юнматэмын мед луоз шуыса, туэ 16 октябре министерствоя приказ поттэмын вал. Сыӵе амалэн поттэм коньдонэн эмъюм басьтыны чакламын вал. Но Удмуртиысь Прокурорлэн протестэз та ужрадлы пум понӥз. Озьы ке но... Министр малпамъя, калыклэсь эмъяськем понна дун ӧз ке басьтэ, больницаос чылкак пытсаськозы. Соин ик соос эмъямзы понна амалтэк дун куроно луо. Солы инъет - Россиысь но Удмуртиысь Правительствоослэн постановлениоссы, кытын юнматэмын, ма понна дун басьтыны луоз. *** Туннэ Ижевскысь куд-ог больницаосын (кылсярысь, онкодиспансерын, 7-тӥ медсанчастьын) эмъяськисьёсты асьсэ коньдонэн басьтэм эмъюмъёсты, шприцъёсты вайыны косо, операция лэсьтоно луэ ке но талы коньдон ӧвӧл ке, висисьлы дун тырыны дэмлало на куинь нольёсын лыдпус верало. О. ВАХИТОВА. Эшшо одӥг визьлы лябӟиз Россилэн кужмыз Визьмо но кужмо адямиосты Россиын быдтыны выро, пӧртэм сьӧсь амалъёсты уже кутыса, - со сярысь вера странамылэн ортчем сюресэз. Та нуналъёсы калыкез нош ик зуркатӥз кӧшкемыт ивор: 20 ноябре уйшор котырын Санкт-Петербургын виемын Галина Старовойтова. Берло дыре Галина Васильевна вань кужымзэ сётыса ужаз Кун Думаын, озьы ик "Демократическая Россия" огазеяськонлэн огез валтӥсь кичӧлтӥсез вал. Наукаен герӟаськем ужъёссэ куспетӥ карыса, со пыриське политикае: 1989-тӥ арын Г. Старовойтоваез быръё СССР-ысь Вылӥ Кенеше депутатэ. Тӥни со дырысен ӟырдыт кылӥськиз историклэн-этнографлэн но гражданинлэн улон шоры выль синмын учкемез. Андрей Сахаровен ӵош со шара нюръяськыны кутскиз ултӥям адямиослэсь правооссэс утён понна. Солэн тыршеменыз пытсэт сьӧрысь мозмытэмын вал "Карабах" комитетлэн адямиосыз. Со куре вал ГКЧП-лэн сьӧд ужъёсаз пыриськем коммунистъёсты суд улэ кыскыны. Та вакытэ Галина Васильевна кышкатэк нюръяськылӥз Россиез демократилэн сюрестӥз нуон понна, адӟемпотостэм карылӥз косъяськыса (командно-административной система) кивалтон амалэз. Эрико, кышкасьтэм малпанъёсыныз но ӟырдыт мылкыдыныз со тодмо луиз Россиысь вань калыклы. 1996 арын Галина Старовойтова нюръяськиз Президент луон понна. Солэн кандидатураез ӵектэмын вал обороная министре но. Мар понна гажаз калык Галина Васильевнаез, со понна ик солэн трос тушмонъёсыз вал бадӟым кивалтӥсьёс но куд-ог партиос пӧлын. Озьы ке но, ачиз нылкышно ялан нюръяськылӥз Россиысь вань демократической кужымъёсты огазеян понна. Та ужез со нуэ вал Санкт-Петербургын но, уката но али, отысь законодательной кенеше 6 декабре быръёнъёс ортчон азьын. Эшшо одӥг визьмо адямилы но политиклы лябӟиз Россилэн кужымез. Нош террорист шуонъёс эсэпсэ валатэк сьӧсьясько. Лушкало, пытсэт сьӧрын возё яке виыса быдто журналистъёсты, депутатъёсты, политикъёсты - берло дыре гинэ кӧня сыӵе учыръёс вал ини. Ваньзэ тае лыдэ басьтыса, Россия Федерациысь Правительство туэ 6 ноябре постановление кутӥз террористъёсын нюръяськонъя нимысьтыз комиссия кылдытон сярысь ("Российская газета", 1998 арын 18 ноябре). ФСБ та ужез нуыны кулэ, вань кун органъёс но аскивалтонъя ёзъёс вылэ пыкиськыса. Зэм, адями быдтӥсьёсын нюръяськонъя кемалась ик, дыр, лек ужрадъёс кутоно ни вал. Но та комиссия кылдытэмен валче, йыре шукырес малпанъёс но кылдо: 30-тӥ аръёсы сямен та уж медаз выжы вылэм "калык тушмонъёсты" утчанэ. Т. БАННИКОВА. СПОРТ Азьпалэзлы осконэн В Н К Т О 1. "Сатурн" (Раменское) 24 12 6 73-34 84 2. "Локомотив" (Н.-Новгород) 23 8 11 65-34 7 3. "Сокол" (Саратов) 21 13 8 58-32 76 4. "ЦСК ВВС - Кристалл" (Смоленск) 23 3 16 59-47 72 5. "Арсенал" (Тула) 18 11 13 65-53 65 6. "Лада-Град" (Дмитровград) 19 7 16 65-63 64 7. "Рубин" (Казань). 19 6 17 56-50 63 8. "Динамо" (Ставрополь) 16 15 11 51-40 63 9. "Газовик-Газпром" (Ижевск) 18 6 18 53-58 60 22. "Камаз" (Н.-Челны) 7 5 30 32-82 21 Нырысетӥ дивизионысь футбол командаос чемпионатэз йылпумъязы. Раменскойысь "Сатурн" но Нижний Новгородысь "Локомотив" вуоно арын вылӥ дивизионын нюръяськозы. Нош куатез лябез улӥе "гылӟо" - кыкетӥ дивизионэ. Ижысь "Газовик-Газпром" туэ укмысэтӥ интые потӥз. Кызьы дунъяно сое? Умоен-а, яке пыкылоно-а? Владимир Тумаев команда азе котьку бадӟымесь куронъёс пуктэ. Туэ но "Газовик", солэн малпамезъя, нырысетӥ кык интыосы шедьыны кулэ вал кадь. Но таӵе дунъетэн со янгышаз. Озьы ке но вить кужмосыз пӧлы "кырмиськыны" "Газовиклэн" луонлыкъёсыз вал. Куд-ог шудонъёссэ команда ляб ортчытӥз - озьы дуно очкооссэ ыштӥз. Лыдэ басьтоно тазэ но. Чемпионат дыръя кык пол воштӥськизы валтӥсь тренеръёс. Со сяна, Центральной стадионын выльдӥськон ужъёс мынӥзы. Таин сэрен команда дасяськоно но шудоно луиз "Динамо" стадионын, кудӥз футболлы, оло, чик но чакламтэ - выро-гопо бусыын тупез шонер уд питыръя. Сезон быриз. Ма вите азьпалан "Газовикез"? Валтӥсь тренер Виктор Слесарев верамъя, туннэ командаез утёно, тарканы сётоно ӧвӧл. Палэнысь 4-5 кужмо футболистъёсты ӧтьыса, вуоно аре "Газовик" вылӥ лигае потыны быгатоз, оскытэ тренер. Озьы-а тазьы-а но ӟеч футболистъёсмес синйылтӥллям ини. Максим Шацких но Михаил Никитин али Москваысь "Спартакын" кужымзэс эскеро. Огласянь таизлы шумпотоно. Ӟечез только ӟечен ик мед берытскысал. Г. ЮСАЕВ. Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Культура удысын вормонъёс басьтэмез но уно аръёс ӵоже сюлмысь ужамез понна "Россия Федерациысь культура удысын дано ужась" дано ним сётоно Хубецов Феликс Борисовичлы - акциосын "Ижсталь" огазеяськонлэн культурая но спортъя "Металлург" комплексысьтыз калык эктонъя "Андан" ансамбльлэн балетмейстерезлы. Россия Федерацилэн Президентэз Б. Ельцин Москва, Кремль, 1998 арын 14 октябре. � 1251. КИВАЛТӤСЬЁС КАЛЫК ПӦЛЫН Кам тупалась шормуӵын Нимысьтыз Камбарка ёросэ потаны Правительстволэн Тӧроез Павел Николаевич Вершинин ӧз чакла вал. Но Ижевскын дышетӥсьёс пумитъяськон ужрад ортчытыкузы, камбаркаос Павел Николаевичез суйтӥз кысканы кутскизы: - Милям кадь секыт югдур нокытын ӧвӧл, дыр, но малы ке ми доры уд лыктӥське. Зэм но, та ёрослэн усто интыяськемез но уг юртты районысь промышленностьлы улӟыны, азинскыны, калыклэсь улонзэ умоятыны. Камбарка интыяськемезъя шормуӵлы укша. Сӥзьыл-тулыс камбаркаослэн Удмуртиен кусыпсы быре, шуыны луоз: Кам шур висъя. Мукет ласянь Камбарка кунгожъяське Пермь улосэн но Башкириен, ваньмыз со камбаркаослы юрттыны гинэ кулэ кадь. Но бускельёсын кусыпъёс тупатымтэ, сюресъёс лэсьтымтэ вал, уго Камбаркаын 1942 арысен ини химия тӥрлыкен складъёс сыло. Табере, сое быдтон понна завод пуктон сярысь ужпум кутэм бере, ёросэз ужатыны, аслыз коньдон поттыны дышетыны кулэ. Кызьы шуиз Правительстволэн Тӧроез 20-тӥ ноябре татчы ветлыкуз, коньдон татысь ик поттыны луоно, мон, пе, тӥледлы одӥг манет но мултэссэ сётыны уг быгатӥськы. Бюджет чотын улӥсьёслы уждунлы шуыса 647 сюрс манет висъямын, соин ёрослы сётӥськись дотация ортчиз но ни. Павел Николаевичез шугъяськытх гуртоослэн аналскемзы. Азьло камбарка ёросысь "Правда" колхоз ӟеч картофка басьтэ ке вал, туэ одӥг килограмм картофка но, ӵуж кушман но, мукет бакча сиён но ӧвӧл мерттӥллям. Уг быгато ӟеч ю-нянь но басьтыны - гектарысьтыз 6-7 центнерлэсь уг ортчы. Музъемзы дасо аръёсын кыедамтэ ни. Скал гидысь кыедэз татын ужасьёслы уждун интые сёто. Колхозникъёслэн шоро-куспо уждунзы 150 манет, но коньдонэн ӝынызэ сяна уг басьто. Азьло колхозэз нюлэс сюдылӥз. Но берло аръёсы колхозникъёс асьсэос ӧз валалэ, малы солы кыӵе ке кооператив кузё луиз. Нюлэс "Правдалэн" ваньбураз (собственностяз) пыре, но колхозникъёс эстӥськыны пу кубометрзэ 60-70 манетэн басьто. Ужъёс куашканы кутскем бере, специалистъёс колхозысь потӥзы. Али ӧвӧл зоотехник но, пудо эмъясь но, агроном но, куке семьяын-а, хозяйствоын-а югдур вормонтэм секыт луэ, ваньмыз усе кышномуртлэн пельпумъёсыз вылэ. Озьы ик татын но. Секыт ныпъетэз кыскыны выро "Правда" колхозлэн кивалтӥсез Надежда Тимофеевна Арефьева но экономист Галина Михайловна Цягвинцева. - Гуртоослэсь продукцизэс ӟеч дунъясалзы ке, та калэ, оло, ӧм вуысалмы. Малы ми городэз дунтэк сюдыны кулэ - милесьтым йӧлмес 1 манетэн басьто, вӧйзэс 60 манетэн вузало? - ӝожзэс веразы соос Павел Николаевичлы. Ёросысь калык депутатъёслэн азьвыл чакламтэ сессизылэн ужаз озьы ик пыриськизы А. М. Лисина - Правительстволэн Тӧроезлэн воштӥсез В. И. Долгов, промышленносья министр, коньдон ужпумъёсъя министерствоысь специалист В. М. Черепанова но Правительствоысь мукет адямиос. Сессиез дырызлэсь вазь ортчытыны ӵектӥзы "Выбор" нимо группае пырись депутатъёс (азьветлӥсьсы - Игорь Александрович Прислонов). Соослы уг кельшы ёросысь выль кивалтӥсьсылэн Владимир Алексеевич Шаимовлэн ас кожаз депутатъёсын кенешытэк ужамез но бюджетысь сётӥськись коньдонэз кулэтэм интые быдтэмез. Сессиын эскеризы районэ куинетӥ кварталлы вуэм коньдонэз кытчы интыямез. Депутатъёс кузёзэс янгыше уськыто администрацилы выль "Волга" басьтэмысьтыз, кивоштӥсезлы Григорий Ташкинлы дораз бюджет коньдонэн телефон пуктэмысьтыз, аслаз улоно коркасьтыз бюджет коньдонэн подъездъёсты тупатъятэмысь но мукет. Ёрос администрациысь коньдон ужпумъёсъя отделлэн кивалтӥсез Любовь Витальевна Ворончихина ивортэмъя, коньдон кулэтэм интые быдтэмын шуыны уг луы ке но, кызьы буйгатод сютэм врачъёсты но дышетӥсьёсты, пересьёсты но пиналъёсты? Мӧйыос пенсизэс кык толэзь ӝегаса гинэ басьто, нылпи садъёс пытсаськон калэ вуэмын (таиз понна Шаимов туж уг куректы, шӧдске, монэ, пе, песянае утиз (!), ёрос больницаын 20 ноябрьлы 12 килограмм сӥль но 2 килограмм скал вӧй кылемын, одӥг пол кутӥськись шприцъёс сярысь вунэто ни, нош бинтъёсты, оло, ӝоген миськыны кутскозы. Сьӧрло гуртъёсысь висисьёсты больницае нуыны машинаос ӧвӧл, соин дыраз юрттэт сётымтэен али но огез воргорон реанимациын кылле. Йӧнамезлы оскон туж пичи. Дышетӥсьёс ваньзы июнь понна уждунзэс но басьтымтэ ай, басьтозы-а выль арозь октябрь толэзь понна, Шаимов вераны уг быгаты. Дышетӥсьёслэн уждун курон графиказы со кинюртэмзэ уг пукты. Коньдон, пе, уз луы, мар толыкез. Сессиын югдур ӟырданы ӧдъяз. Депутатъёс ӧз возьдаське ни Правительствоысь лыктэм куноослэсь но. Администрацилэн но депутатъёслэн куспазы тэрымтэзы адямиос азьын лӧптӥз - керӟегъяськыны, ог-огзэс пыкылыны, меӵкытъяны ӧдъязы. Депутат Прислонов интыысь Жириновскийлы кельшыны кутскиз. Ог-огзы шоры вуэн пальккаськытозь кема ӧй вал ни, люкаськемъёсты буйгатыны быгатӥз Павел Николаевич. - Мыным тазьы выремды уг кельшы. Быръёнъёс азьын нюръяськемды, ӟырдыт мылкыдды ньыль толэзь ортчыса но сӥямтэ на. Со ужаны люкетэ. Буйгатске, шедьтэ куспады огъя кыл. Нимаз ужаса номыр уз воштӥськы. Выль кивалтӥсьтылы тӥ юрттыны кулэ. Зал огдырлы буйгалляз ке но, адямиос кӧтӝожзэс вис дыръя коридорын кисьтӥзы: - Кин сое татчы ӧтиз? (Шаимов сярысь - авт.) Кызь вить ар кытӥ ке кыстаськиз но, вордскем палъёсыз тодаз лыктӥллям! - Выль ӟуч! Ужась мурт тӧдьы шарфен уз ветлы! Сессия куинь часлы кемагес кыстӥськиз, котькуд депутатлэн веранэз люкаськем. Павел Николаевич огзэс но куспетӥ ӧз кары, вераськонлэсь ӧз алы, рос-прос кылзӥз, валэктонъёс сётӥз. Администрация азе чурыт куронъёс пуктӥз. Секыт югдуре шедемын камбаркаысь машина (локомотивъёс) лэсьтон завод. Азьвыл со бадӟым пайдаен ужалляз. Но Калуж улосысь Лядянскысь тепловозъёс поттон предприятие борды юнматэмзы бӧрсьы ыштонъёс гинэ адӟыны кутскиз. Ӝыныезлэсь тросэз барышез Калугае кошкылӥз. Али заводлэн интыысь бюджетэ гинэ 3 миллион 515 сюрс манет тыриськонэз, со сяна, бадӟым тыриськонзы республикалэн но федерацилэн бюджетазы. Ужасьёссылы уждун укмыс толэзь ӵоже тырымтэ ни. Продукцизэс басьтэмъёс пунэмзэс берыктыны уг дырто, соин ик завод соос вылэ судэ вазиськиз. Но со коньдонэз берыктыны быгатӥзы ке но, шуг-секытъёс уз быре. Али уго продукция уг лэсьтӥськы - ӧвӧл материал. Сое заводысь сютэм ужасьёс дасо тоннаосын поттылыны кутскиллям. Озьы ик чиптэм-чаптэм ышиз быдэс локомотив составлы тырмымон 700 метр кабель. Али со пумысен милиция ужа. Но малы уг луы вал заводэз азьло ик чакласа возьыны. Директорезлэсь Виктор Александрович Манохинлэсь мугъёс утчамзэ Павел Николаевич Вершинин кылэм но ӧз кары: - Тӥ мыным кызьы гуэ усемдэс вераса эн пуке. Вералэ, кызьы отысь потыны малпаськоды! Кыӵе ужрадъёс чакласькоды? Кытын бизнес-планды? Но заводлэн управлениез киосыныз гинэ сэзъяз. Амал ӵектӥз ачиз Павел Николаевич: - Республикаямы Камбаркаын но Юкаменскын гинэ перерабатывающей предприятиос ӧвӧл. Нош гуртоосты кытчы йӧлзэс, сӥльзэс поныны уг валало. Малы тӥледлы сое Сарапулэ нуллыны кулэ, асьтэлэн визьды, кужымды ӧвӧл шат? Мон туннэ ик сётӥсько тӥледлы йӧл цехлы тӥрлык, тӥ вераськоды мыным заводады йӧллэсь сиён-юон поттон цех усьтон сярысь соглаш луэмдэс. Со луыны кулэ гуртоослэн, потребсоюзлэн но тӥляд огъя ёзды. Мукет амалъёс мон уг адӟиськы. Правительствоысь муртъёс пумиськылӥзы на интыысь аскивалтонъя ёзъёслэн но жилищно-коммунальной хозяйстволэн кивалтӥсьёсынызы. Уж бер ӝытозь тырмиз. Камбаркаослэн пичи ке но осконзы кылдӥз: оло, Вершинин ветлэм бере интыысь кивалтӥсьёс чупресгес ужаны кутскозы. Нош арня пумын республикаямы вуыны кулэ Россиысь Сюресъёсъя министр Николай Аксененко. Оло, со маке вераны быгатоз, вуись даурлэн кутсконаз ӝутскоз ик-а Кам вамен выж, яке Камбарка нош кылёз Удмуртилэн тупалаз. З. Рябинина. Вавож районысь Мичурин нимо эштос республикаямы одӥгез кужмоез хозяйство. Азьмынӥсьёслэн ужан амалъёсынызы тодматскыны вуыло бускельёссы но, кыдёкысь сьӧрлось гуртъёсын тыршисьёс но. Пудо выжыез выльдон-умоятон ужпумъёсты эскеризы-чаклазы Зямбае люкаськылэм зоотехникъёс. Ува, Вавож, Сюмси, Селты, Красногорск ёросъёсысь специалистъёс туннэ нуналлы тупась тодон-валанъёс басьтӥзы. Нош дышетсконэз радъяз шаерысьтымы Гурт хозяйствоя но сиён-юонъя министерство. Туспуктэмъёсыз Г. Юсаевлэн. Удмурт Республикаысь Правительстволэн РАСПОРЯЖЕНИЕЗ 1998 ар 17 ноябрь Ижевск город � 380-р 1. Удмурт Республикалэн кунлыкезлы 78 ар тырмонлы сӥзем ярмаркаез радъянъя комитетлэн йылпумъянъёсызъя вузкарись организациос куспын интыосты тазьы люконо: Ижевск городъя 2-тӥ инты: "Глазовский" ликеро-водочный завод" кун предприятие (кивалтӥсез Сорокин Николай Борисович); "Вараксино" тылобурдо вордон фабрика" кун предприятие (кивалтӥсез Итунин Геннадий Львович); 3-тӥ инты: "Иммар" ЗАО (кивалтӥсез Красноперов Олег Геннадьевич); "Удмуртрыба" АО (кивалтӥсез Беловол Валентина Кирилловна); Сарапул городъя 1-тӥ инты: "Сарапульский хлебокомбинат" АО (кивалтӥсез Сивухина Любовь Васильевна); 2-тӥ инты: "Сарапульский мясокомбинат" ЗАО (кивалтӥсез Березнев Геннадий Михайлович); 3-тӥ инты: Сарапул городысь "Комбинат хлебопродуктов" (кивалтӥсез Малюк Семен Михайлович); Воткинск городъя 1-тӥ инты: "Воткинскзавод ИмпЭкс" ОАО (кивалтӥсез Бесхлебников Борис Александрович); 2-тӥ инты: "Воткинский мясокомбинат" АО (кивалтӥсез Матевосян Бабкен Мордынович); 3-тӥ инты: "Пищекомбинат "Воткинский" ОАО (кивалтӥсез Коробов Владимир Иванович); Удмуртпотребсоюзъя 1-тӥ инты: Пичи Пургаысь райпо (правленилэн тӧроез Чунаева Людмила Анатольевна); Селтаысь райпо (правленилэн тӧроез Ирисов Валентин Иванович); Уваысь райпо (правленилэн тӧроез Кириллов Геннадий Васильевич); 2-тӥ инты: Каракулиноысь райпо (правленилэн тӧроез Лихачев Геннадий Михайлович); Кезысь райпо (правленилэн тӧроез Касимова Людмила Васильевна); Дэбесысь райпо (правленилэн тӧроез Камашев Владимир Дмитриевич); Завьяловоысь потребобщество (правленилэн тӧроез Загитов Зуфар Зиннурович); Ижевскысь потребобщество (правленилэн тӧроез Заляшев Ильдус Ханифуллович); 3-тӥ инты: Воткинскысь райпо (правленилэн тӧроез Матанцева Анна Григорьевна); Кизнерысь райпо (правленилэн тӧроез Корецкий Виталий Петрович); Якшур- Бодьяысь райпо (правленилэн тӧроез Телицин Валерий Михайлович); Играысь райпо (правленилэн тӧроез Васильев Анатолий Андреевич); Алнашысь райпо (правленилэн тӧроез Вылегжанина Татьяна Ефимовна); Можгаысь райпо (правленилэн тӧроез Смердегина Елена Георгиевна). 2. Ярмаркае мылысь-кыдысь пыриськемзы понна тау карон (благодарность) ялоно: "Сарапульский" ликеро-водочный завод" кун предприятилы (кивалтӥсез Фисенко Федор Иванович); " Боткинский" пивобезалкогольный завод" интыысь (муниципальной) предприятилы (кивалтӥсез Назаров Николай Васильевич); Сарапул городысь "Радиотехника" АО-лы (кивалтӥсез Абросимов Геннадий Егорович); Ярысь райполы (правленилэн тӧроез Масленникова Ольга Владимировна); Глазовысь райполы (правленилэн тӧроез Ворожцова Вера Ивановна); Юкаменскысь райполы (правленилэн тӧроез Невоструев Рудольф Федорович); Балезиноысь райполы (правленилэн тӧроез Манылова Раиса Габдурахматовна); Красногорскысь райполы (правленилэн тӧроез Чежегова Анна Васильевна); Сюмсиысь райполы (правленилэн тӧроез Чурилова Тамара Викторовна); Киясовоысь райполы (правленилэн тӧроез Замилова Любовь Валентиновна); Шарканысь райполы (правленилэн тӧроез Мушина Юлия Николаевна); Вавожысь райполы (правленилэн тӧроез Клабукова Римма Ивановна); Граховоысь райполы (правленилэн тӧроез Иванова Светлана Васильевна); Сарапулысь райполы (правленилэн тӧроез Мухаметдинов Марат Саныевич). 3. Ярмаркаез радъянын но ортчытонын Удмуртпотребсоюзлэсь ӟеч ужзэ пусъёно (правленилэн тӧроез Каримов Р.М.) 4. Городъёсысь но ёросъёсысь администрациослэн тӧрооссылы ӵектоно ярмаркаез радъясьёсты но отчы пыриськемъёсты пусйыны, нырысетӥ интыосты басьтэм организациослы 1998 арын 4-тӥ кварталэ налогьёсъя льготаос тупатыны. 5. Вузкарись организациослэн кивалтӥсьёссылы ӵектоно ярмаркаез дасянын нырысетӥ интыос басьтэмъёсты пусйыны (поощрить). Удмурт Республикаысь Кивалтэтлэн Тӧроез - П.Н.Вершинин Историен ӵош вамышъясь Адями историлэсь люконтэм, шуо. Соин ик, вылды, со ортчем аръёссэ уг вунэты, дунъяны быгатэ. Соосты эшшо но умойгес тодыны тырше. Сыӵеен мон тодӥсько аслэсьтым дышетӥсьме Анастасия Еремеевна Евсееваез. Ӝыны даур талэсь азьло Лудорвай школаям со монэ но трос эшъёсме удмурт кыллы но литературалы дышетӥз. Арлыдэ вуэмъяз пумен но пумен тросгес гожъяськиз удмурт газетъёсы но "Кенеш" журналэ. Но школаын ужаса, пенсие потэмез бере ини Лудорвай гуртмылы сӥзем музей кыдытӥз. Та нуналъёсы мынам дышетӥсе 80 арессэ пусъе. Солэн йырсазьыз тросэз егитъёс вожъяськыны кулэ - сыӵе лэчыт! Туж трос тунсыкозэ тодэ котыр гуртъёсысь со азьын будэм калык сярысь. Выжыен-выжыен вераны быгатэ татысь адямиослэсь улон сюрессэс. Туж шуныт мылкыдын тодаз вайылэ атайзэ (дядяйзэ) Данилов Еремей Ефимовичез. Б. Венья гуртысь огшоры крестьян пи ӟеч дышетскем земской школаын, служить карем эксэй армиын. Служба дыръяз ик дышетскыса, полковой фельдшер луэм. Нырысетӥ мировой войнаын ожмаськыса, Георгиевской кирос басьтыса бертэм, нош соин ушъяськыны дораз уг яраты вылэм. Улонлэсь бугрес луонзэ шӧдыса, 1918 арын со гуртаз бертэм ни вылэм, ожмаськон акыльтэм ни. Но соку шыпыт улон ӧй вал на, гуртэ вуо я гордъёс, я тӧдьыос. Соосыз но, таосыз но ужась крестьянлэсь валъёссэ сьӧразы валтыло вылэм. Сӥзьыл Веньялась пиосъёс валъёсынызы нюлэскы пегӟиллям, соос пӧлын ик армиысь бертэм солдат Еремей Данилов но. Со нуналъёсы ик Ижез штурмен басьтӥз В. Азин. Венья пиос тэльысь бертӥллям но - Еремейлэн нылыз вордскемын ни, пе. Тӥни кыӵе дыре вордскем вуоно дышетӥсь! Граждан ож бере азьло солдат - фельдшер семьяеныз музъем уж борды пыр-поч басьтӥське ни вылэм, агрономиез валаны тыршыса, со "Гудыри" газетэз лыдӟылӥз. Со доры пӧртэм юанъёсъя но эмъяськыны шуыса, туэ трос гуртоосыз ветло вылэм. Огдыре Еремей Даниловез сельсоветэн кивалтыны но бырйылӥллям. Но озьы кема ужаны сётӥллямтэ. Тушмон карыны ӧдъясьёс, чагиськисьёс шедиллям. Визьмо воргоронлэн улоназ шӧдӥськытэк ӧз кыле Лудорвайын ортчем одӥгез сьӧд учыръёс но, - "Лудорвай уж". Коммунист мылкыдо воргорон, кудпала кариськыны тодытэк, шуге-леке шедем, семьязэ гуртэ ик кельтыса, Иже кошкем, собере, нылзэ сьӧраз басьтыса, валэн Красногорске эмъясьын ужаны вуэм. Соку ик Настя дышетскыны кутскиз Дёбы гуртысь школаын. Со вакытэ Выль Мултанын педтехникум усьтэмын ни вал, атаез нылашез дышетыны отчы нуэ. Та аръёссэ Анастасия Еремеевна тужгес но шудо вакытэн лыдъя. Отын дышетсконзэ "витьёсын" гинэ быдэстэ 1936 арын. Ужан сюресэз кутскиз Завьял ёросысь Сизьгуртысь школаын. Улоназ трос воштонъёс пыртӥз война аръёсы городын улонэз: пединститут, со вакытэ ик "Удмурт коммуна", "Советской Удмуртия", собере "Сталинец" газетъёсын корректор но переводчик вал. Семья улонэз сое 1948 арын Лудорвай гуртэ вуттӥз, тӥни отын со, вис карытэк куамын ар пала пиналъёсты удмурт кыллы но литературалы дышетӥз. Тӥни соку Анастасия Еремеевналэн дышетскисез луи мон но. Солэн урокъёсыз туж аспӧртэмлыко луо вал. Одӥгаз уроказ, тодӥсько на, пукиз но аслэсьтыз кылбуръёссэ лыдӟиз Игнатий Гаврилов. Мукетаз вуылӥз Аркадий Клабуков. Нош одӥг пол ми доры, Лудорвай школае, лыктӥз "Советской Удмуртиысь" Тимофей Шмаков, со пионер кабинетэ активистъёсты люказ но, соосын нимаз-нимаз вераськыса, ӝӧк сьӧры пуктылӥз, пионер улонмы сярысь заметкаос гожъяны куриз. Озьы Лудорвайын нырысетӥ юнкоръёс "вордскизы". Визь-кенешен юрттӥзы милемлы Анастасия Еремеевна но старший пионервожатоймы Нина Ивановна Шутова. Озьы потӥз "Советской Удмуртиын" нырысьсэ "Пионер страница". Печатлазы 1949 арын 6 феврале, отчы пыртӥллям мынэсьтым но тусбуйме, Т. Шмаков фотоаппаратэн ачиз ужаз. Ортчизы аъёс. Кемалась ни пенсие потӥз. Дышетӥсь-шаерчи трос люкам ни вылэм вордскем палъёсызлэн историзыя материалъёс но. Со пенсие потэм дыръя ини школаын музейлы комната но висъязы. Нырысь ик татчы люказы удмуртъёслэсь улон-вылон но ужан амалъёссэс возьматӥсь арбериосты. Анастасия Еремеевна школае ӧтьылӥз куиськыны ӟеч быгатӥсь мукет киужъёслы лэсьтыны быгатӥсь пересьёсты. Историяя, кылъя но литературая институтэн, озьы ик элькунысьтымы музеен ӟеч кусыпъёс тупатыса люказ "Лудоровай уж" сярысь материалъёс. Туж уно сюлмаськиз "Буре ваён книга" поттон понна, школа вӧзын памятник бордын гожъямын Лудорвай, Выль Крестьянка но Ильинка гуртъёсысь 105 муртлэн - ожъёсын быремъёслэн нимъёссы. Историысь чуръёс сярысь кылдӥзы уно альбомъёс, тодэ ваёнъёс, газетъёсысь статьяос. Дышетӥсьме ялан сюлэмшугъяськыто гуртъёсмылэн 20-30-тӥ аръёсы сьӧд адӟонъёсыз. "Кӧня калыкез кулак карыса быдтӥзы!" - шуылэ со. Та пумысен со трос гинэ гожъяз газетъёсы но. Ялан малпаськылэ "Лудорвай ужлэн" пуштросэз сярысь. Лудорвай школалэн музеез пыр-поч ужа ни вал дасо ар талэсь азьло. Отчы олокытысь но пырасьёс вуылӥзы. Кылсярысь, 1988 арын 4 январе (толшоре) вуылӥллям Глазкарысь 23 кузя агитпробеге потэмъёс. Мылкыдзэс гожтыса кельтӥллям таӵе кылъёсын: А. Евсеевалы тау кариськом туж бадӟым ужез бугыртэмез понна". Вуоно араз сюлмысь потэм кылъёссэс гожтыса кельтӥллям журналист И. Мусская, этнограф Л. С. Христолюбова, Юськи черкогуртысь дышетӥсь П. В. Давыдов, Москваын улӥсь землякмы, ожысь ветеран, отставкаысь полковник В. В. Голубев. Таиз таӵе кылъёс гожтэм: "Бырем солдатъёс ваньмыз лыдэ басьтэмын мед луозы. Озьы луыны кулэ котькуд гуртын, Анастасия Еремеевналы бадӟым тау ожъёс пыр ортчем солдатлэсь". Вань тазьы гинэ вакчияк гожтэм кылъёс: "Сюлэмез вырӟытэ та музей! Собере син шоры йӧто гуртысь нырысьёсызлэн комсомолецъёслэн тодэ ваёнъёссы но, кылсярысь, Лудорвайысь тодмо колхозниклэн-коммунистлэн П. А. Скобелевлэн. Ожысь ветеран пӧламы кемалась ӧвӧл ни, нош тодэ ваёнъёсыз туала егитъёсты малпаськытыны кулэ. Озьыен, вае, эшъёс, Анастасия Еремеевна Евсееваез сюлмысьтым ӟечкылалом 80 аресэныз, солы тазалык но шудбур сӥзём, мед шумпотыса но данъяськыса улоз нылпиосыныз но соослэн нылпиосыныз, озьы ик гурт калыксэ гажаса. Оскисько, та ӟечкылан борды итӥськозы туж трос адямиос, - солэн дышетэмъёсыз но, Лудорвай но Венья гуртъёсын улӥсьёс, озьы ик быдэс Завьял ёросын улӥсьёс но, солэсь усто селькор луэмзэ тодӥсь муртъёс, туж уно эшъёсыз Анастасия Еремеевналэн. Л. ФЕДОРОВ. Выльысь пумиськиськом Ки улам алигес шедиз "Молот" журналлэн 1972-тӥ арын потэм куинетӥ номерез. Нырысетӥ страницаын печатламын КПСС-лэн ЦК-езлэн "Литературно-художественной критика сярысь" постановлениез. Солы вазиськыса, та номерын ик СССР-ысь Писательёслэн Союззылэн правлениезлэн членэзлэсь Геннадий Красильниковлэсь "Партия сюлмаське - асьмелы лэсьтыны кулэ" нимо статьязэ поттӥллям. Отын писатель чик танытэк вера удмурт литературно-художественной критикалэн бере кылемез сярысь. Партилэсь ӵектонъёссэ лыдэ басьтӥзы кадь соку асьме критикъёс но литераторъёс. Потылыны ӧдъязы писательёсмы сярысь литературной портретъёс, пӧртэм буклетъёс но критической статьяос. Нош али, рыноке выжем бере, ваньмыз сураськиз. Газетъёсын но журналъёсын шергес пумиськылыны ӧдъязы критикъёслэн статьяоссы но рецензиоссы. Та ужез газетъёсын возьматоно ик вылэм. "Удмуртия" издательство али, коньдон тырмымтэен, шер поттылэ художественной книгаос. Куддыръя лыдӟись, оло, уг но тоды, кыӵе бадӟым уж лэсьтӥське выль произведение котырын. "Выль" дауре улыны выжеменымы, куд-огез гожъясьёс асьсэлэсь книгаоссэс типографиослы коньдон тырыса поттылыны ӧдъязы ини. Жаляса верано луэ: "ас понназ" гинэ, дэмен эскерытэк потэм произведениын ӵем дыръя сыӵе яке таӵе изъянъёсыз кылё. Магазинын, киоскын мӧзмылэс кыллись яке библиотека ӝажыосын адями кие вуытэк "бабись" книгаос - изъян. Собере сыӵе книгаосты магазинъёс но мылкыдтэк басьто, писательёслэн асьсэлы вузчи луоно соку. Г. Д. Красильниковлэн вордскемез дырысен 70 ар тырмонлы сӥзьыса, "Удмуртия" издательство туэ поттӥз солэсь "Ненароком" книгазэ. Сое дасям Удмурт кун университетысь дышетӥсь педагогика наукаосъя кандидат Любовь Федорова. Отын печатламын писательлэн азьвыл потэм "Арлэн кутсконэз" романэз но пӧртэм аръёсы аслаз ӟуч кылэ берыктэм куать веросэз. Тӥни озьы, асьмеос выльысь тодматскыны быгатӥськом азьвыл геройёсын. "Арлэн кутсконэз" романын умой возьматэмын мӧйы врачлэн Алексей Петрович Сосновлэн но институтэз алигес быдтэм хирурглэн Георгий Ильич Световидовлэн образъёссы. Атабай черкогуртысь больницалэн кивалтӥсез Соснов ас улоназ сокем ултӥямын, сомында адӟемын - соку ик малпан кылдэ, писатель, геройзэ суредакуз, 30-тӥ аръёс сярысь вань зэмлыкез, оло, тодыса но ӧз вутты, но сюлмыныз шӧдэ вылэм. Алексей Петрович солэсь быдэс улонзэ саптам, куректон ваем муртлы операция лэсьтыны дась. Матвеевлы со шуэ: "Мон тонэ вунэтыны малпасько вал...". Иське, тушмонзэ со улонысьтыз улляны малпа вылэм, но улон соосыз выльысь ваче вуттӥз. Соснов вылысь быдэс вакытлэсь сямзэ адӟиськом - уж борды басьтӥськид бере, быдэстоно. Алексей Петрович - врач, эмчиослэсь оскытон кылзэс (Гиппократлэсь клятвазэ) сётэм мурт. Иське, котьмар мед луоз, ас уждэ лэсьтыны кулэ. Котырысьтымы 60-70 аресъемъёс али но та сямъя уло ук. Нош Световидов операция лэсьтыны уг басьтӥськы, висисез мукет интые келяны ӵектэ. Висёнэз, пе, туж секыт, аналтэмын, вӧзаз ик - алясь. Но Матвеев Соснов доры ачиз лыктӥз. Ӧй быгатысал шат та адями мукет больницае вазиськыны? Туала егитъёс, студентъёс Световидов палан. Малы ке шуоно, Сосновъёс туннэ ӵемысь урамын, кураськисьын. Нош Световидов кадьёслэн улонзы сяськая. Озьыен, Красильниковлэн гожъямъёсыз мур пуштросо. Пӧртэм вакытэ соосыз пӧртэм сямен лыдӟыны луэ. Котькудӥз выль лыдӟись отысь аслыз кулэзэ шедьтоз. Красильников гожъяськыны вазь кутскиз. Кызь аресэз тырмем бере ик со республикаысь но интыысь газетъёсы гуртысь улон но уж сярысь очеркъёс но веросъёс гожъяны ӧдъяз. Геннадий сярысь вераны кутскизы, со быгатӥсь егит прозаик луэ шуыса. Озьы ке но, Красильников валаз: зэмос литератураын йыг-йыг сылон понна, трос ужано, тодон- валанэз будэтоно. 1952-тӥ арын дышетскыны кутске Москваысь А. М. Горький нимо Литературной институтын. Ӟуч художественной прозалэн мастеръёсызлэсь дышетскыса, Геннадий Дмитриевич аслэсьтыз гожъяськон манерзэ кылдытэ, аслыз тупась амалъёс но буёлъёс шедьтэ. Художественной литературалэсь бадӟым инты басьтэмзэ со валаз, А. П. Чеховлэн гожъямъёсыныз мур тодматскыса. Тани мар вералляз аслаз ужез сярысь Чехов: "Гожъяны кутскисьёс лыдӟисез веросазы ӵем дыръя "пыртыны" тыршо, но ӝынызэ мултэс гожто. Нош гожъяны озьы кулэ: автор валэктытэк но верослэн сюжетэзъя, геройёслэн вераськемзыя, соослэн выроссыя лыдӟись валаны кулэ, мар сярысь вераськон мынэ. Эскере ай, веростылэсь нырысь люкетсэ куштыса. Соку кыкетӥ люкетэзлэсь кутсконзэ трос тупатъяно уз луы ни, верос но валамон луоз. Котьмар ке но, номыр мултэсэз кулэ ӧвӧл. Мултэс луисьсэ чик жалятэк куяно". Туж усто верамын. Асьмелэн веросчиосмылы та кылъёсты ялан тодазы возёно. Красильниковлэн зэмос улонысь учыръёсты гожъямъёсыз туннэ но уг вужмо, лэчытлыксы уг ышы. Али потэм книгаяз но веросъёсыз мур пуштросъемесь луо. Писатель отын бадӟым инты висъя адямилэсь тыршонъёссэ, малпанъёссэ, сюлэмшугъяськонъёссэ возьматонлы, соин ик геройёслэн образъёссы син азе яркыт пуксё. Тани "Дусым" веросысь Анна Балашова учкыны сокем чылкыт вылымтэ. Вася Беловлы уг ярало ныллэн пужыё бамыз но горд йырсиез. Но тыршыса ужаменыз, егит дояркаос пӧлын задор мылкыдо луэменыз, сьӧраз мукетъёссэ валтыны быгатэменыз, та героиня, зэмзэ но, син шоры адскымон но ӟырдыт яратымон адями луэ, верослэн пумаз Вася но азьло "дусымез" шоры мукет сямен учкыны кутске, ас шудбурезлэсь палэнэтӥ ортчемзэ вала ини. "Вож весь" веросын умой пӧрмемын егит дышетӥсьлэн, институтэз соку гинэ быдтэм ныллэн образэз. Тани кызьы со вераське: - Конечно, адямиос куспын яратон луыны кулэ, огед понна огед котькытчы мыныны дась лу! Яратон вань ке, номыр но кышкыт ӧвӧл. Яратон адямилы улонын кужым сётэ, азьлане ӧте! Яратон - со сыӵе... Та кылъёсты лыдӟыса, син азе пуксе улонэз трос адӟымтэ адями, яратон сярысь уно книгаосты лыдӟем но яратон шоры капчиенгес учкись ныл. Яратон сярысь со книгаосысь кылъёсын вераське, нош аслаз сюлэмаз зэмос яратон кылдымтэ али. Геройлэн сюлэмшугъяськонъёсыз уката но яркыт мед адскозы шуыса, Г. Красильников солэсь малпанъёссэ кыӵе ке инкуазь суредэн ӵошатыса яке ваче пумит пуктыса сётэ. "Вож весь" веросын озьы возьматэмын Курбатовлэн сюлэмшугъяськонъёсыз: "Куазь шулдыр, сюрес дурысь ӟег шепаське, нянь зын шӧдӥське ни. Инмын тюрагайёс гурзэс кисьто, ну, просто, сюлэм позыртӥське! Дуннеын ваньмыз котыр вожектэ, сяськаяське, улонлы шумпотэ. Нош мынам йырын малпанъёс секытэсь, гадь вылэ кык пуд гиръёс тыремын кадь, каньылак шокчыны уг луы. Выльысь но выльысь вуисько одӥг малпанам: "Неужто со монэ чик ӧз яраты, вань верам кылъёсыз, чупамъёсыз так... пӧяськон гинэ вал? Иське, малы озьы вераськонэз вал, марлы со солы кулэ луэм?" Автор героезлэсь чылкыт малпанъёссэ яркыт тулыс куазен ваче пумит пуктэмен, та суред уката но умой адӟиське. Со сяна, героезлэсь куректонзэ мургес возьматон понна, писатель чурытэсь юанъёс пырта но героен ӵош ик лыдӟисез но малпаськытыны кутске. Веросъёссэ тунсыкогес карыса, лыдӟисез ас бордаз кыскон вылысь, произведениосызлэсь композицизэс ӵем дыръя кулэезъя тупатэ. Куд-ог дыръя огладэн гинэ маде геройёслэн улэмзы но кусыпъёссы сярысь, пӧртэм тодметъёс пыр персонажъёслэсь кыӵе ке но сямзэс уката но яркыт возьматыны тыршыса. Тани "Дусым" веросаз автор нырысь чуръёсаз ик Белов Васялэн секыт мылкыдыз сярысь вера: "Мар борды канжаськонзэ ӧз тоды Белов Вася но. Тодысал ке озьы луонзэ... Э, мар на табере?! Пилиськем дурыез уд лякы ни. Табере ваньзэ выльысь тодаз вае ке, аслэсьтыз ачиз паймыса но сюлмыз вӧсь луыса юа: "Мар бордысен кутскиз со?" Тӥни сыӵе кылъёсты лыдӟем бере, котькудӥз умой-умой малпаськыны кутске но лыдӟемъяз вала ини Беловлэн шугъяськемезлэсь мугзэ. Кутсконаз ик автор юан пуктэ, нош быдэс веросэз со юанлы валэктон луэ. Соин ик верос лыдӟисез бордаз кыске. Яке басьтом "Вож весь" веросэз. Татын вераськон нырысь мынэ яратон сярысь. Котькудӥз сямен герой аслэсьтыз малпанъёссэ вера. Нош Курбатовлэн верамез яратонлэсь котькыӵе учыре вуттэмез но возьматэ. Солэн мадемезлы берло вань геройёс сямен нимысьтыз дунъет сёто. Озьы писатель произведенилэсь чеберлыксэ ӝутэ. Ведь котькуд гожъясь малпа: солэсь книгазэ лыдӟыса, адями чылкытгес сюлэмо, визьмогес луоз. Сыӵе ӟеч мылкыд кылдыто романысь но веросъёсысь образъёс. Г. Красильниковез ас бордазы кыско, кызьы шуо, уло-ваё, бышкиськись характеръёс. Аслаз верамезъя, писательлэн ужез скульпторлэн ужезлы тупа. Со сямен ик, писатель но утча аслыз ярась материал, собере отысь ваньзэ мултэссэ, кулэтэмзэ вуштэ, куштэ. Писательлэсь тазьы верамзэ соку ик тодэ ваиськод, произведениосысьтыз геройёсын выльысь пумиськыса. В. ЧЕРНОВ. Шунды Скаллэн йӧлыз - сюр вылаз, яке Узырмизы-а студентъёс Германиын? Берло аръёсы асьме студентъёслы кунсьӧрын тодон-валанзэс будэтыны луонлык ӵемгес сётӥське ни. Тани Ижысь Гурт хозяйствоя академия кыкетӥ арзэ аслэсьтыз устооссэ студентъёссэ кун практиказэс ортчытыны Германие ысъяз ни. Кичӧлтӥсез вал Россиысь фермеръёслэн огазеяськонзы - со ӵектӥз студентъёсты дышетонъя "Лого" амал. "Лого" чакла Европалэн шунды ӝужан палысьтыз экология ласянь чылкыт сиён-юон поттӥсь фермеръёсын кусып возьыны, соослэсь тодон-валан басьтыны. Асьме академиысь куать студент быръемын вал. Май толэзе кошкыса, алигес гинэ доразы берытскизы соос. Егитъёс ӝыны ар ӵоже немец фермеръёс бордын ужазы- дышетскизы. Куддыр туж жадьылӥзы ик ке но, мылкыдзы туж умой - эшъёссылэн но дышетӥсьёссылэн юанъёссылы тунсыко валэктонъёс сётӥзы. - Кызьы ортчылӥз ужан нуналды? - Ӵукна 7 часысен ӝыт 9-озь ужамы, кӧс улыку, уйшор берозь но. Немецъёс туж дунъяло дырзэс, шулдыр нуналэз тэк уз быдтэ. Но сюдыны ужаммыя сюдӥзы - нуналаз ньыль пол: пӧртэм колбасаос, пыжкемъёс, йогуртъёс, емыш, кофе... (али ваньмыз со общежитиысь ӝӧк вылын луысал ке!) Котькуд 45 час ужаммы бере, шутэтскон нунал сётӥське. Шутэтскемед ке уг поты, ужа, ватсаса коньдон басьтод. Но ми ваньмы ик пӧртэм интыосын ужамы бере, шутэтскон нуналъёсамы ог-огмы доры куное ветлылӥм. Отын студентъёс понна билет дунъёс туж пичиесь. Озьы быдэс Германиез адӟыны кылдӥз. Нош Толя Филимонов отын улӥсь ӵыжы-выжыосыз доры но вуылӥз. - Нош кузёосты кыӵеесь вал? Кызьы соос ужало? - Отын фермеръёс туж визьмоесь, трос дышетскемын. Ӟеч тодо агрономлэсь но, зоотехниклэсь но, механиклэсь но, бухгалтерлэсь но ужзэ. Ужзэс туж ӟеч радъяны быгато. Вераны кулэ, воргорон фермер отын ваньзэ ачиз лэсьтэ, кышнозэ уг кыткы. Соиз корка котырын гинэ берга, сиён пӧзьтэ. Пудозы ӝыны ар возь вылын, езъёсын котыртэмын улэ. Нимаз пастухсы ӧвӧл. Скалъёссы араз 4 сюрс килограмм йӧл сёто. Тӥ шуоды: асьмелэн куд-огезлэн солэсь но трос луэ. Но Германиын скаллэсь 4 сюрслэсь ятыр йӧл кыско ке, дотация сётэмысь государство дугдэ. Ӟечлыкез вылын шӧдӥськытэк уз кыльы, шуо. Соин ик, йӧллы дун но ӟечлыкезъя пукто. Кизьыны пото март кутскыку ик, окто-калто сентябрь шорын. Отысь фермер гектарысьтыз 120-130 центнер ӟег басьтэ! Солэсь ӧжытгес люкаське ке, хозяйство бырон калэ вуэ. Германиын шунытгес бере, гужем ӵоже кык пол вож сиён (силос), турын басьто. Возь вылъёсазы 90-100 пӧртэм турын кизё (асьмелэн кызё пала, дыр). Макем трос пӧртэм турын кизид, сокем трос дотация басьтод. Бадӟым дотация сётӥське музъемез чылкыт воземзы понна но. Немецъёс экология понна олокызьы но пӧртмасько. Сое адӟоно, ас вылазы шӧдоно луизы асьме студентъёсмы. Володя Ложкаревлэсь огпол кузёез юа: - Тодӥськод-а, малы скаллэн сюръёсыз вань? Володя йыраз чаляк бергатыны кутскиз анатомияя тодонъёссэ. - Скал сюръёсыныз космосысь кужым (энергия) басьтэ,- валэктыны кутскем кузёез.- Со бордын ик йӧллэн ӟечлыкез. Скалэз вандӥськом ке, ми сюръёссэ ум сэрпалтӥське. Вож кунянлэн кыедэныз тырмытыса, тулыс соосты музъеме согиськом. Гектарлы быдэ - одӥг сюр.Со химической ватсэтъёсты воштэ, музъемлы ӟеч кужым сётэ. Но азьло со кыедэз пӧртманы кулэ: одӥг уй ин улын кӧлтоно, собере 1 час ӵоже дугдылытэк киын сурано. Тӥни сыӵе ужлы но дышоно луэм Володя. Туж кельшем кузёезлы Толя Филимонов. Шефез (кызьы шуэ сое Толя) пияшлы азьланяз но уртче ужаны ӵектэм. Но Удмуртияды куазь урод улэ, пе, кунгож дорысен но кыдёкын, ӵектэм Калининград пала кариськыны. Толяез кузёезлэн ӵектонэз пирсэкъятэ, аслыз но оске кадь. - Но со понна кыӵе ке но база луыны кулэ. Германиысь фермеръёслэн туж ӟеч механизацизы. Тракторъёсазы телефонзы но, магнитолазы но вань, котькытын компьютеръёс - киын лэсьтоно ужзы туж ӧжыт, асьмеос сямен саникъёсын турын-куро уг ӝутъяло. Ужамзы сяна, студентъёс люкаськылӥзы на семинаръёсы, котькуд ужан нуналзэс, чакланъёссэс дневнике пусйылӥзы, отчёт лэсьтӥзы. Ваньзэ немец кылын. - Но немецъёс ӟуч кылэз ӟеч тодо шат? - Уг, ми немец кылэз тодӥськом,- шуизы студентъёс. - Узырмыса ӧд бертэ-а Германиысь? - Ми узырмыны шуыса ӧм мынэ. Но толэзяз 250 марка сётъязы. Лыдъялэ асьтэос. З. ВАХРУШЕВА. Ивортылӥм ни: Ижын аслэсьтыз чебересь изъёссэ возьматӥз Екатеринбургысь "Альпура" фирма. Африкаысь кибашлы воргорон возьматэ бӧлякъёсызлэсь вузъёссэс. Таӵеесь соос, Урал гурезьысь чебересь кӧльыос. "Альпуралэн" кивалтӥсез Константин Яскевич котькыӵе юанлы валэктон сётыны дась. В. КАМАШЕВЛЭН туспуктэмъёсыз. ШУНДЫ ӦТИСЬКОМ ВЕРАСЬКЫНЫ Огазьын яке огнын? Кулэ-а туала вакытэ пионер но комсомол выллем огазеяськонъёс яке пиналъёслы, егитъёслы эрик сётоно? Мода шуон сьӧры уиськыса, одӥгез яратоно крезьгурез но кырӟасез шоры гинэ мед вӧсяськоз, мукетызлэн йыраз дискотекаосын сэзъяськон гинэ мед луоз, куинетӥез юлтошъяськоз наркоманъёсын, юисьёсын, тамак кыскисьёсын. Кинлы мар, сое ик бырйы, иське. Нош кин соку шаермылэн, странамылэн азьлань улонэз сярысь сюлмаськоз? Тодэме потӥз, мар меда малпа та сярысь Пичи Пурга районысь Брангурт школаысь пионеръёслэн но комсомолецъёслэн азьвыл кивалтӥсьсы, яратоно вожатоймы Любовь Владимировна Девятова. - Комсомолецъёс партилэсь косонъёссэ быдэсъязы ке но, отын номыр уродэз ӧй вал. Ми пал кыл вератэк пересьёслы, оген улӥсьёслы юрттылӥм, куштӥськем корт, бумага бичаллям. Котькудӥз комосомлец аслыз быдэс арлы план лэсьтэ вал. Сое одно быдэсъяны выриз. Али кыӵе ке но ӧдӥг огазеясь кужым луысал ке, егитъёс воштӥськысалзы умой пала. Бен, комсомоллэн идеяосыз вужмизы, но кулэ маке мукет - трослы тунсыкоез но пайдаёез, нылпиосты бордаз кыскисез. Сыӵе огазеяськонын адями медам мукетъёсыз пӧлы ышы, со дыре ик мукетъёссэ но валаны мед быгатоз. Шуом, мед луоз со огазеяськонлэн мукет нимыз, куронэз, быдӟалаез, но комсомол сямен ик, мед эшъяськытоз егитъёсты, мед утёз омырез ӵыжаса ветлонлэсь, мед дышетоз ог огедлы юрттыны, бадӟымъёсты гажаны. Любовь Владимировналэсь малпанзэ азьланьтӥз, школа музейлэн кивалтӥсез, ОБЖ-ен дышетӥсь Николай Павлович Петров. Огазеяськонэз кылдытон понна, кулэ коньдон, нош туала адямилэн киосыз купырскемын ас палазгес. Мылкыдъя гинэ, нокыӵе уксётэк ужан, туала вакытэ аслыз пумит берытске: мылкыд сӧриське, семья кусыпъёс тэшканы кутско, котырысь адямиос чиньыенызы возьматыса серекъяло. Мон малпамъя, та быдэс Россилэн йырвисёнэз. Али ке ӧм малпаське, бӧрысь бер луоз ни зэмос кивоштӥсьёс будэтыны. Али серемес кылӥське ни пересьёслы юрттыса ветлыны, куштӥськем корт, ӵыжин бичаны. Кемалась вунӥзы ни "Зарница", пионерской тылскемъёс. Но ваньмаз таос адямиез кыдатӥзы. Тодэм потэ вылэм та сярысь асьсэлэсь но пиналъёслэсь мылкыдзэс. Светлана Долганова, Удмурт кун университетысь студентка. Редакцилэсь. Газет бамын таӵе вераськон ӝутыса оскиськом, сое азьланьтозы асьсэос ик школаын дышетскись пиналъёс, егитъёс. Шаерысьтымы тросаз школаосын али вакытэ но вань пионер огазеяськонъёссы, кытын ке, оло, мукет сямен но со нимаське. Медаз кылды вылэм сыӵе малпан, туала пиналъёс дасьсэ гинэ возьмаса уло, нокыӵе ужъёс борды басьтӥськемзы уг поты. Гожтэлэ, пиналъёс, кыӵеесь тунсыко ужрадъёс ортчо школаяды, мукет дышетскон интыосын, гуртады. Вылӥ школа сярысь сюлмаськыса Удмурт Республикаысь Кун Кенешлэн Тӧроез Александр Волков 24 ноябре ветлӥз Поволжьеысь но Уралысь вылӥ дышетскон заведениослэн ректоръёссылэн кенешоназы. Со ортче Удмурт кун университетын. Люкаськемъёсты ӟечкыласа, Александр Волков вераз Удмурт Республикалэсь социально-экономической удыссэ азинтон бордын уж сярысь, пыр- поч тодматӥз наукаын но калыкез дышетон удысын югдурен. "Удмурт Республикаын наукаез азинтон вузъёслэн, академической институтъёслэн но мукет организационно-правовой учреждениослэн коллективъёссы, соос нуо научно- исследовательской но опытно-конструкторской ужъёс. Учёнойёс огазеяськыса ужало вузовско-академической комплексъёсын, ӵош подразделениосын, пӧртэм научной организациосын. Удмурт Республикаын промышленностьлы, гурт хозяйстволы, экономикалы, лэсьтӥськон но социальной удыслы специалистъёсты дася 5 вылӥ но 30 шор ёзо профессиональной дышетскон заведение. Отын ог 30 сюрс пала егитъёс дышетско (соос пӧлысь 27 сюрсэз - вузъёсын). Азинске кунлэн ёзъёсаз пырисьтэм заведениосын дышетон. Кылдытӥське республикалэн наукая учреждениосын кивалтон ёзэтэз. Удмурт Элькунысь Кивалтэтын 1996 арын кылдытэмын Наукая, вылӥ но шор ёзо профессиональной дышетонъя комитет. Наука удысын ужась организациос пӧлы пыро республикаямы интыяськем федеральной организациос. Со Россиысь Наукаосъя академилэн Урал ёзэзлэн Удмурт научной центрез, кудӥз огазея физико-технической институтэз, прикладной механикая институтэз, историяя, кылъя но литературая институтэз, Россиысь Наукаосъя академилэсь Урал ёзэзлэсь социально-экономической исследованиосъя отделзэ, Ботанической садэз. Дасямын "Удмурт Республикаын социально-экономической азинскон вакытэ научной политика но научной система нуонъя концепция". Со Удмурт Правительстволэн Постановлениеныз кутэмын 1998 арын октябре. Нош 1995 арын декабре Кун Кенешлэн сессиез "Калыкез дышетон сярысь" Удмурт Республикалэсь Законзэ юнматӥз. Удмурт Республикаын кемаласен ини бадӟымесь ужъёс нуисько прикладной наука, опытно-конструкторской но мукет удысъёсын. Эскерон ужъёсты быдэсъяло устоосаз научной школаосын. Со Удмурт Республикаысь нефть но газ поттон промышленностьлы выль технологиос но оборудование дасян; Удмурт Республикаысь машинаос лэсьтон комплекслы выль технологиос но вузъёс поттон; Удмурт Республикаын математической моделированиез азинтон, калыклэсь улон-вылонзэ умоятон вылысь, выль материалъёс, технологиос но техникая объектъёс дасян. Удмурт Республикаысь Кун Кенеш ӟеч вала наука удысын басьтэм азинсконъёслэсь кулэзэс. Тужгес но со герӟаськемын ке улон-вылонэн, адямилэн тазалыкеныз. Соин ик Удмурт Республикалэн 1998 арлы кун премиез сётэмын Ижевскысь медициная кун академиысь учёной-медикъёслэн "Бактериослэн кизер концентратъёссылэн но соослэсь дасям сиёнъёслэн эмъясь кужымзы" ужзылы. Удмурт Республикаысь Кун Кенеш но Правительство учёнойёслэн ужъёссылы азьланяз но бадӟым саклык висъялозы. Вылӥ тодон-валан сётон обществолэсь кужымзэ выль сямен ӧръяны луонлык сётэ. Туэ 1 сентябрьлы Удмурт Республикаосын котькуд 10 сюрс мурт улӥсьлы быдэ 217 студент лыдъяське (кылсярысь, 1996 арын Свердловск областьын вал 187 студент, Пермь областьын - 142, Башкортостанын -134, Удмурт Республикаын - 184). 1990 арын Федерациысь 89 улос пӧлын Удмуртия 10 сюрс улӥсьлы быдэ студентъёслэн лыдзыя 34-тӥ интыын ке мынэ вал, 1998 арын 29-тӥе ӝутскиз. Берло дыре шӧдскымон будӥз вылӥ но шор ёзо профессиональной учреждение пырыны мылкыд карисьёс пӧлын конкурс - одӥг интые 2-3 мурт, нош куд-ог специальностья - 8- 10 адями. Вузъёсы, техникумъёсы но колледжъёсы дышетскыны пыре котькудӥз кыкетӥез адями гинэ. Лыдпусъёс верало: вылӥ но шор ёзо профессиональной школаын дышетон ужез паськытатон юрттэ улонын шуг-секытъёсты палэнтыны, егитъёс пӧлын ужтэк кылемъёслэсь лыдзэс кулэстыны. Улон возьматэ, ватсаса студентъёсты дышетон, ужтэк кылемъёслы пособие тырон сярысь, пайдаёгес луэ. Дышетон учреждениос азьын али тужгес бадӟымез ужпум - со тодӥсь-валась специалистъёс гинэ дасян ӧвӧл, со улонын но аслэсьтыз интызэ шедьтыны мед быгатоз. Удмуртиын дышетон удысэз азинтыны юрттӥз вал республикалэн Правительствоез но Россиысь Калыкез дышетонъя министерство куспын ӵош ужан сярысь огкыл. Солэн дырыз ортчиз. Калыкез дышетон удысын выльдӥськон ортчытэмен валче, нош ик огкыл гожтон борды берытскыны кулэ. Гажано эшъёс! Уралысь но Поволжьеысь вылӥ школаен кивалтӥсьёс! Интыосын дышетон удысэз азинтон уноез асьме бордысь потэ. Республикаысь кун органъёс бадӟым саклык висъяло дышетон заведениослы, соослы бюджетысь тырмыт коньдон ке но уг висъяськы. Но куд-ог ужпумъёсты быдэстыны луоз Россия Федерация ласянь гинэ. Кылсярысь, ми ум быгатӥське огъя тарифной сеткалэн 1-тӥ разрядэзлэсь ставказэ тупатыны, дышетон заведениосты куд-ог выт тыронлэсь мозмытыны. Та пумысен юрттыны кулэ Россия Федерация, тужгес но Россия Федерациысь Вылӥ но профессиональной тодон-валанъёс сётонъя министерство. Уг янгыша, туннэ пумиськонлэсь асьмеос ваньмы ог-огмылы пайда басьтыны малпаськом шуи ке. Оскисько, тӥляд дышетон заведениостылэн опытсы республикаямы одно ик кутӥськоз шуыса, та пумиськон ог-огмылы юрттоз. Оскисько, кенешты ӟеч мылкыдын но пайдаё ужалоз шуыса. Мон Россия Федерациысь Федеральной Собранилэн Федерацияя Советэзлэн членэз луисько бере, вылӥ школа азьын сылӥсь ужпумъёсты кивалтонлэн вылӥ ёзъёсазно ӝутыны тыршо". Кенешонэз усьтонэ ветлӥзы Кун Кенешлэн Тӧроезлэн воштӥсез Геннадий Красильников, Наукая, калыкез дышетонъя, культурая но егитъёсын ужан политикая комиссилэн кивалтӥсез Алла Еременко, Удмурт Республикаысь Правительстволэн Наукая, вылӥ но шор ёзо профессиональной дышетонъя комитетэзлэн кивалтӥсез Сергей Решетников, Удмурт Республикаысь ректоръёслэн кенешсылэн председателез, депутат Иван Абрамов, вылӥ дышетскон заведениослэн ректоръёссы, прессаын ужасьёс. Кун Кенешлэн пресс-службаез. Выль арлы кузьым "Удмуртия" издательстволэн директорез И. М. Васильев но валтӥсь редакторез В. Н. Ившин Сибирьын улӥсь удмуртъёслы мон пыр кузьмазы быдэс библиотека удмурт книгаос. Ваньмыз соос кылдытэмын та берло аръёсы. Соос пӧлын ик - "Ӵашъем нимъёс" но. Татчы пыртэмын янгыше юнме шорысь уськытэм гожъясьёслэн "вунэтэм" кылбуръёссы, веросъёссы но мукетыз. Дасям та книгаез А. Г. Шкляев. Дано, визьмо удмурт пиослэсь нимъёссэс чылкак ӵушылӥзы вал. Табере быгатӥськомы соос сярысь выльысь тодыны. Шумпотонлэн пумыз ӧвӧл. Кыӵе вылэ ӝутӥськемын луысалзы ни табере удмурт литература но удмуртъёс, дасо-дасо гожъясьёсмы пытсэтъёсын быдтэмын ке ӧй луысалзы... Ыстэм кузьым пӧлын выль авторъёслэн но книгаоссы: С. Матвеевлэн "Шузи" романэз, Г. Мадьяровлэн "Аналтэм сяська" повестез, Н. Самсоновлэн "Агбай" романэз. Сибирьын улӥсь удмуртъёс озьы ик лыдӟозы Ф. Пукроковлэсь, А. Веретенниковлэсь, Н. Никифоровлэсь, Г. Ходыревлэсь, Ф. Васильевлэсь книгаоссэс. Туж бадӟым тау таӵе дуно кузьымлы. Тюменьысь но та улосысь удмуртъёс ас кылзэс уг вунэто, нылпиоссэс но дышето вордӥськем кылмылы. Ужаны быгатэменызы валче, соосты отын гажало. Издательстволэн кивалтӥсьёсыз, отын ужасьёс, гожъясьёсмы азьын мед басьтозы эшшо но бадӟымесь азинсконъёс. Н. ЯКОВЛЕВ, Тюменьысь удмуртъёслэн бӧляксылэн тӧроез. Вылэ, эшшо вылэ... Ижевскын сӥльлэн дуныз 30-40 манет шуыса вераськонъёс ветло. Зэмос дунъёсты тодон понна кожамы "Северной" рыноке. 23 ноябре татын ыж сӥльлэн одӥг килограммез 27 манет сылӥз, парсь сӥльлэн - 29 манет. Пыд йылысь пограмон паймытӥз скал вӧйлэн дуныз - 65 манетэн килограммез. Та сиён берло дыре магазин ӝажыосын ӧз адӟиськылы ни вал. Али со 75 манетэн потэм. "Докторской" колбасаез пӧртэм вузкаронниосысь 29-33 манетэн басьтыны луэ. Озьыен, солэн дуныз та нуналъёсы 4-8 манетлы йылэм. Кезын поттэм "Костромской" сырлэн килограммез 37 манет пала сылэ (кемалась-а 32 манетэн вал). Йӧллэсь лэсьтэм мукет сиён-юонъёслэн дунзы 60-80 коньылы йылэмын. О. МАКСИМОВА. ШУНДЫ ТЕСТ Йыркуръяськись-а тон? 1. Классэ пырыкуд, кык ӵош дышетскись эшъёсыд тон сярысь супыльтыса сыло. Тон... а) Бамазы чабкод. б) Кылымтэ улэ кариськод. в) Юрттэт ӵектод. 2. Кырын юмшакуд, вылӥ этажысь шорад помидорен лэзизы. Мар карод? а) Кошкод. б) Мыжыктэ возьматод. в) Керетыны, кесяськыны кутскод. 3. Бускелед магнитофонзэ пеле йӧтымон зол лэзе... а) Чагиськод, тазалыкедлы изъян ваемез понна коньдон курод. б) Куаразэ пичиятыны косод. в) Магнитофонзэ укноетӥ сэрпалтод. 4. Гажан муртэд туж ӝега ни, нош вераськиды вал час талэсь азьло пумиськыны. а)Куатаськод, керетыны кутскод. б) Выльысь медам ӝега ни шуыса алод. в) Уд куареты, но выльысяз юри ачид ӝегалод. 5. Тодмоед одӥг ӝытлы видеокассетадэ куриз но толэзь возе ни. Мар шуод мукет мае ке курыкуз? а) "Возьытэд вань-а?" б) "Мон тыныд номыр уг сётъя ни". в) "Оло, видеопрокат усьтӥд-а?" 6. Куноын пукыкуд, тыныд кельшисьтэм мурт вылад сур кисьтӥз. а) Бордысьтыз палэнскод. б) Шораз черекъялод. в) Пунэмзэ берыктыны тыршод. 7. Матысь эшеныд (яке гажан муртэныд) сюлмысь вераськыса сылӥськоды. Куспады огез ӵош дышетскись эшты ере. Кызьы сое "уллялоды"? а) "Тонэ директор утча вал" шуод. б) Меӵак уллялод. в) "Ӧжыт возьма палэнын, вераськонмес быдтом" шуод. 8. Вуж туганэд тонэ вордскем нуналаз ӧте. Пунэмзэ берыктон вылысь мынод, яке... а) Шулдыръяськон дыръя керетыны кутскод. б) Ваньмыз азьын презерватив кузьмалод. в) Выль туганэныд лыктод. Валэктонъёс Юан Валэктон а б в 1 0 6 3 2 6 3 0 3 3 0 6 4 0 6 3 5 3 0 6 6 6 6 3 7 3 0 6 8 6 3 0 Валэктондылы тупась вань лыдпусъёсты ватса. 0-15 очко Тынэсьтыд вождэ поттыны туж капчи. Кыӵе ке чыры-пырыос понна но керӟегъяськыны кутскиськод. Али ик астэ ачид кияд кутыны ӧд быгаты ке, берло секытгес луоз, тазалыкед вылын но шӧдӥськоз. 18-33 очко Тынад ваньмыз умой ке, тон кадь лякыт но мусо мурт ик ӧвӧл. Но мылкыдыд урод дыръя пумитад сюрем муртэ быдтыса куштыны быгатод. Дышетскы ӧжыт астэ кияд возьыны. Тодмоед сурзэ тон вылэ шӧдтэк шорысь гинэ кисьтӥз, нош тон йыркуръяськиськод. Юнме понна керӟегъяськемдэ тон ачид но валаськод, астэ тышкаськиськод. 36-48 очко Тон туж лякыт адями. Эшъёсыдлэн но тодмоосыдлэн йыркуро дырдэ адӟылэмзы ик ӧвӧл, дыр, угось лектэ тон адямиослы уд возьматӥськы, нош аслэсьтыд яке эшъёсыдлэсь юмоксэс сереме берыктыны быгатӥськод. Басьтэмын "СООЛ" журналысь. Кырӟан юрттэ улыны Кезысь культурая юртын 5 ар ӵоже ини ужа "Оптимист" клуб. Отчы ветло мӧйыос, хорзы но вань. Алигес Кезысь ветеранъёслэн хорзылы сётӥзы "калык хор" ним. Кырӟасьёслэн асьсэлэн крезьгурчизы но вань. Арганчизы Анатолий Тихонов Удмуртиысь кылбурчиослэн кылбуръёссылы гуръёс кылдытъя. Хорлэн репертуараз вань Олег Поскребышевлэн, Зоя Трухиналэн - ёросысь потэм кылбурчиослэн - кылбуръёссыя кырӟанъёс но. Т. ТРУХИНА. Печатласьконо Кыӵе тон писатель, книгаосыд уг печатласько, калык доры уг вуо ке? Таӵе сюлмаськонэз писательёсын шори люко книга поттӥсьёс но. Валентин Сорокин "Современник" издательстволэн валтӥсь редакторез вал. Вадим Дементьев но отын ужаз (со тыршемен поттэмын Флор Васильевлэн "Вкус солнца" книгаез). Михаил Числов "Советский писатель" издательстволэн берпуметӥез валтӥсь редакторез. Со вакытэ арлы быдэ 500 пӧртэм книга печатлаське ке вал, табере "Совеременный писатель" (выль нимыз) поттэ 12-15 книга. Озьы ик куашказы "Современник", "Молодая гвардия", "Советская Россия" издательствоос. Соосыз киултӥзы нимысьтыз адямиос, акциосын огазеяськонъёс. Печатласькемед потэ - коньдон тыр. Книгалэн лыдӟись доры сюресэз туж но туж сюбегомиз. Писательлэн ужез пайдатэмлы пӧрмиз. Нош чаклано ке, та лыдтэм векчи издательствоос кунмылэсь оглом сомында ик коньдонзэ кыско, кӧня азьло мынэ вал книга поттонэ. (Тазьы ик вераны луоз асьме республикая: пӧртэм амалэн бюджетысь коньдонэз кыско ведомствоослэн, нимаз адямиослэн ог 40 книгапоттонниоссы.) Соин ик вань кужымен, огазеяськыса тыршоно огзэ-кыксэ ке но издательствоез государстволы берыктыны. "Малпаськом, Федерацилэн кенешаз тӥ та куронмылы дурбасьтоды", - шуиз Валентин Сорокин, асьме Кун Кенешлэн Тӧроезлы вазиськыса. "Ми тӥляд юрттӥсьёсты", - оскытӥз Александр Волков. "Милям писательёсмы олокӧня арзэ уг печатласько ни Москваын. Ми ум тодӥське ни, мар гожъяло ӟуч писательёс но мукетъёсыз. Ог-огенымы кусыпъёс ышемын, берыктон уж аналтэмын. Туэ понна издательствомы 10 пӧртэм книга гинэ поттӥз ай, азьвыл 40-озь вуылӥз", - таӵе сюлэмшугзэ вераз Мордва писательёслэн огазеяськонзылэн тӧроез Иван Калинкин. Таӵегес ик суред мукет бускель республикаосын: кылсярысь, комиослэн но туэ понна 6 пумо книга гинэ поттэмын. "Удмуртия" книгапоттони сярысь ке... "Тау карыны кулэ Элькун Кивалтэтмылы, та секыт вакытэ асьмемыз ӧз куштэ на. Туэлы висъям коньдонлэсь 70 процентсэ басьтӥмы ни", - шуизы издательстволэн директорез И. М. Васильев но валтӥсь редакторез В. Н. Ившин. Соос таӵе лыдпусъёс веразы. Туэ поттыны чаклам 20 книга пӧлысь 15-ез потӥз ни (со пӧлысь 3-ез нылпиослы). Азьвыл аръёсын бен уд ӵошаты: араз 100-120 пӧртэм книга печатлаське вал, огъя тиражез 2 миллионозь вуылӥз. Кылем аре 47 пӧртэм книгаослэн тиражзы 100 сюрс луиз. Одӥг книгалэн тиражез но туэ унолы кулэсмиз: проза - 2000-озь, поэзия - 500-озь. Типографиын печатлан ньыль поллы дуногес луиз ни. Книгалэн асдуныз шорлыдын 50 манет, нош вузаське со вить пол-дас пол дунтэмгес. Озьы но книгаез басьтӥсь ӧвӧл ни. Издательстволэн складаз олокӧня сю сюрс манет тыр литература кылле. Отчы-татчы потаса вузамлэн пайдаез трос ӧвӧл. Озьы, кылсярысь, Башкирие нуэм 500 сюрс манет тыр книга солань но, талань но уг вырӟы. Со дыре ик библиотекаосы уг вуо выль изданиос. Национальной библиотека но котькуд выль книга пӧлысь кыксэ гинэ басьтыны быгатэ. Озьыен, котькызьы ке но тыршоно государстволэсь книгаен вузкаронзэ выльысь радъяны. Сое ас вылаз басьтыны кулэ, дыр, Печатья но иворъёсыз вӧлмытонъя министерство. Нош писательлэн книга ныпъетэн ветлэмез - ярантэм уж. Зэм, соизлы но тау: журналъёсмы ӧз пытсаське на, тиражъёссы туж усизы ке но. Таӵе дыръя киыз но пыдыз вылэм котькуд библиотекае быдэн ке но со журналъёсыз басьтыны. Но асьмелэн берло аръёсы озьы луиз ни: постановление кутӥське, нош коньдон библиотекаосы уг вуы - озьыен, "кулэезлыгес" кошке, культурая но калыкез дышетонъя министерствоослэн мукет пуйыосазы. Писательёслэн огазеяськонзылэн правлениезлэн "вылӥ тубатъёсы" вуэм ӵектонъёсыз лыдэ-санэ уг басьтӥсько. Соин ик тӧро, Олег Четкарев, уг жадьы вераса-ӝожтӥськыса: литератураын политикаез нуон ласянь нимысьтыз (вылын пукись) адями ужаны кулэ. Али Писательёслэн союззы, солэн данэз огшоры, общественной огазеяськонъёс (шуом, пуны яке коӵыш вордӥсьёслэн организациоссы) дорозь уськытэмын ни. (Со муген ик, кун учреждениосын уг ужало шуыса, ватсаса уждун уг тыриськы куд-ог дано ним басьтэм писательёсмылы.) Кыӵе ке литература уг быгаты ас понназ ныркиськыса гинэ ӝутскыны-паськытаны. Кызьы вань калыкъёслы тодмоесь луизы, шуом, Расул Гамзатов, Давид Кугультдинов, Флор Васильев, Альберт Ванеев? Ӟуч изданиослы луыса. Журналъёс но сборникъёс матэ но ог-огенызы тодмо карылӥзы пӧртэм выжыысь писательёсты. Асьмелэн потылӥз "Между Волгой и Уралом" альманах. Мордва но удмурт литератураос куспын - "Побратимы" но "Голубые дали" книгаос. Но асьмелы одно ик кулэ журнал - финн-угор писательёслэн огъя журналзы. Валамон ни, со "сиёз" трос уксёез. Быгатысал, дыр, котькуд республика коньдонзэ висъяны, яке, шуом, черодэн поттылыны. Выись мурт векчи нюжа борды но, пе, кырмиське. Озьы-а, ӧвӧл-а, но туж ӧжыт тиражен потӥсь "Луч" журналлэн валтӥсь редакторез Владимир Емельянов лопырскиз: "Ми дась котькуд номерын финн-угор писательёсыз печатланы. Одӥгзэ оскытыны ум быгатӥське - гонорар тырон пумысь". Олег Четкарев бадӟымгес мылкыдын вераз: "Кутском "Луч" журнал бордысен. Нырысь-валысь поттом одӥг номерзэ". Мар бен, буш интыысен маке борды кутскыны туж секыт. Нош "Луч" журнал Россиысь писательёслэн огазеяськонзылэн бурд улаз басьтэмын ни. Огъя кужымен маке пӧрмыны ик кулэ шуыса оском. Быгатӥзы ук комиос "Арт" ("Лад") нимо йӧн-йӧн выль журналзэс кылдытыны - куинь номерез потӥз ни, наукая, искусствоя, литературая статьяос, чеберлыко произведениос ӟуч но коми кылын печатласько. Нялтас вералом: уй пал бускельёсмы ик малпало финн-угор поэзияя антология но дауркылъёсын (мифъёсын, легендаосын, преданиосын) бичет поттыны. Якшурысь школа вите кунооссэ Завьялово районысь Якшур шор ёзо школа туэ пусъе дауръем юбилейзэ. 100 ар ӵоже кин гинэ татын ӧз дышетскы! Парта сьӧры нырысьёсыз пуксемъёс али улонысь но кошкемын ни, туннэ тодон-валан басьто ни соослэн правнукъёссы но правнучкаоссы. Огзэ вералом: республикамы, странамы понна школа будэтӥз трос данъяськымон нылъёссэ но пиоссэ. Соос пӧлын вань учёнойёс но журналистъёс, дышетӥсьёс но врачъёс, артистъёс но художникъёс, нянь будэтӥсьёс гудо вордӥсьёс. "Путь Ильича" колхоз но арысь аре егитоме выпускникъёс чотын. Ӵуказе, 27 ноябре, 15 часэ гуртысь культура юртэ люкаськозы ваньмыз, кин дышетскиз Якшур школаын. Кемалась ортчем аръёсы сямен, жингрес гырлы куара нош ик огинэ вуттоз парта сьӧрын ӵош пукемъёсты. Л. МЕДВЕДЕВА. Нош ик кӧткыль "сайказ". Табере - Кезын Кезын кӧткыль (дизентерия) вӧлмиз. Ог 50 адями соин курадӟе ини, ӝыныезлэсь трос - нылпиос. Висёнлэн "сайкамез" герӟаськемын юон вуэн: ву кыскись скважинаез тупатъян вакытэ вуэ кӧткыльлэн микробез шедем. Висёнлэсь вӧлмемзэ дугдытон понна ёросын кылдытэмын эпидемиен нюръяськонъя комиссия. Та вакытэ Кезын спортэн, культураен герӟаськем ужрадъёсты ортчытъяны, ульчаосын шундыберган тысь вузаны лэземын ӧвӧл. Т. ТРУХИНА. Шунды Студентлы котьку праздник 17 ноябре быдэс дуннеысь студентъёс асьсэлэсь нуналзэс пусйизы. Студентъёс - самой шулдыр калык. Соин ик праздниксэс но шулдыръяськыса ортчыто. Шудоосыз Егитъёсын ужанъя кун комитетлэн радъям "Дождались-98" фестиваляз пыриськизы, эшшо кӧняез ке студентъёслэн дискотекаосазы, пумиськон ӝытъёсазы ветлӥзы. Но тросэз общежитилэн законъёсызъя пусйизы - комнатаысь ӝӧк сьӧрын, чаркаосын шуккиськыса. Мугез но одӥг гинэ ӧй вал уго - праздник азьын кык толэзь понна стипендия сётӥзы! Кытчы карод сомында уксёез? 200 манет пыдкутчанлы уг тырмы, доре алигес бертылӥм - укно сьӧрын сӥль вань на, ӵап праздникез пусйымон гинэ. Зэмзэ вераса, студентъёслы котькуд нунал праздник, мылкыд ке вань. Мар солы кыле на - дипломозь кызьы ке каллен вуод, уж котькӧня утча, уд шедьты, нош егит дыр ортче... С. ПЕТРОВА, Удмурт кун университетын дышетскись. "Шундыослы" - тямыс арес! Кызь одӥгетӥ ноябре шаерысьтымы егитъёслэн "Шунды" дэменлыксылы 8 арес тырме. Таин валче "Шунды" дэменлык ньылетӥ декабре "котырес ӝӧк" сьӧры аслэсьтыз эшъёссэ люка. Татын пумиськозы министерствоосысь но ведомствоосысь ужасьёс, "Кенеш", "Дэмен", "Нылкышно кенеш" общественной движениослэн кивалтӥсьёссы, ёросъёсысь егитъёсын ужанъя отделъёс. Озьы ик "Котырес ӝӧклэн" вераськоназ пыриськоз Финн- угор егитъёслэн огазеяськонзылэн (МАФУН) президентэз - Эстониысь куно Яак Прозес. Вераськон мыноз "Шунды" дэменлыклэн туннэ но ӵуказе ужпумъёсыз но туала егит удмуртлэн улонын инты утчамез сярысь. "Котырес ӝӧк" сьӧрын вераськыны мылкыд карисьёс вазиськыны быгатозы "Шунды" дэменлыке таӵе телефонъя: 51-07-96. Надежда ПРОКОПЬЕВА. Быдэс дуннеез куалекъятыса возись наркоманилэн сьӧд вужерез Балтаси ёрос вадьсы но возъяськиз. Алигес Казаньысь но Арскысь лыктэм кык "ужбергатӥсь" 467 грамм марихуанаен ӝегатэмын вал. Нош кӧняез шараяськытэк кыле? Казаньын но мукет городъёсын дышетскисьёс но гуртазы буш ки уг бертыло, шӧдске: дискотекаын олокӧня час ӵоже етӥз тэтчало, асьсэды валантэм возё. А. КУНАЕВ. Татарстан. Правительствоысь иворъёс Алигес Удмурт Республикаысь Правительствоын ортчиз районъёсысь но городъёсысь администрациослэн кивалтӥсьёссылэн кенешсы. Вераськон мынӥз бюджет чотын улӥсьёслы уждун тырон сярысь. Удмурт Республикаысь Правительстволэн Тӧроез П. Н. Вершинин пусйиз: администрациослэн кивалтӥсьёссы уждунъя пунэмъёсты берыктонъя дыр тупатыны кулэ. Правительство уждун тырыны кӧня ке коньдон люкиз. Озьы ик эскеремын вал районъёсты но городъёсты социально-экономической азинтон сярысь инъетэз. Удмурт Республикаысь Правительстволэн нылпиослы пособиосты тырон сярысь постановлениезлэн кызьы быдэсъяськемез сярысь ивортӥз Удмурт Республикаысь калыкез улон-вылонын утёнъя министрлэн воштӥсез Н. Ф. Кузнецова. Со пусйиз, та вакытэ пособиосты коньдонэн но вузэн сётъяны чакламын. Озьы ик пунэмъёсты тыронъя выль амалъёс утчасько на. Тазалыкез утёнъя министр С. Г. Шадрин ивортӥз республикаын тазалыкез утён удысын кылдэм югдур сярысь, кылсярысь, эмъяськон учреждениосы пӧртэм эмъюмъёс но сиён-юон висъян сярысь. *** Та кенешын ик Правительстволэн Тӧроез П. Н. Вершинин ӟечкылаз "Россиысь 100 ӟеч вузъёс" Всероссийской конкурсэ пыриськемъёсты. Нош лауреатлэн дипломез сётэмын акциосъя "Сарапулысь электрогенераторной завод" обществолы. Озьы ик вормисе потӥзы "Восточный" совхоз, Можгалась "Красная звезда", Ижевскысь "Ижевский завод минерально-фруктовых вод" но Сарапулысь кондитерской фабрика. Конкурс ортчытэмын, Россиын ӟеч вузъёсты вӧлмытон, соосты басьяськисьёс доры вуттон понна. Соин ик али дасясько ни чебересь каталогъёс, Интернетэ кошко тунсыко иворъёс, газетъёсын но журналъёсын пото пӧртэм публикациос. П. Н. Вершинин озьы ик ивортӥз: Россия Федерациысь Правительство акциосъя "Чепецкий механический завод" огазеяськонлы ӟечлыко ужамез понна премия сётон сярысь решение кутӥз. Правительстволэн Тӧроез пусйиз: асьме шаерамы но иворъёсты вӧлмытӥсь ёзъёсын та предприятиослэсь продукцизэс ӟечгес возьматоно. *** Та арня вискын ик Правительствоын Семья но демографической политикая координационной кенешлэн, Наркотикъёслы пумит нюръяськонъя комиссилэн, Удмурт Республикаысь быдэ вуымтэослэн ужъёссыя межведомственной комиссилэн огъя кенешсы ортчиз. Вераськон мынӥз нылпиос но егитъёс пӧлын наркоманилэн но токсикоманилэн вӧлскемзы сярысь. Соин ик пиналъёс но егитъёс пӧлын профилактикая но ӟеч сямъёс пыӵатонъя уж нуыны кулэ. Со сярысь ивортӥз Правительстволэн Тӧроезлэн воштӥсез А. М. Лисина. Озьы ик кенешын эскеремын наркотикъёслы пумит нюръяськонъя комплексной программалэн инъетэз. Удмурт Республикаысь Правительстволэн Тӧроезлэн секретариатысьтыз пресс-центр. А. С. Пушкинлы-200 "Ӟечбуресь, Александр Сергеевич! Туж жаль, али мынам тӥледын ваче син вераськеме уг луы. Но тӥляд выжыкылъёсты, кылбуръёсты мыным котьку юртто. Мылкыды ке урод, пуксисько укно дуре но сӥзьыл сярысь кылбурдэс лыдӟисько. Кыӵе потэ мынам но анаелы кылбур гожтэме. Но кызьы - уг тодӥськы. Валэктэ мыным",- сыӵе гожтэт гожтэм Александр Сергеевич Пушкинлы Ижевскысь 97 номеро школаысь Алёша Тюлькин. Нош кыӵе суредъёс лэсьтӥллям Пушкинлы сӥзьыса мукет пиналъёс! Я йӧно сьӧд коӵыш йырзэ урдыса ветлэ, я сӥзьыл зор укное сачкытъя, я Наталья Гончарова эктэ. Пиналъёс вань сюлэмзэс поныса быдэстӥллям ужъёссэс - суредлэн котькуд сӥез шудэ-ворекъя, Пушкинлэн улэм аръёсызлэн шӧмыз шӧдӥське. Ижысь Некрасов нимо библиотекаын сыӵе тунсыко выставка дасям Ольга Ивановна Дородова. Ольга Ивановна ачиз туж яратэ литератураез но искусствоез, соин ик пиналъёсты но дышетэ сое гажаны но валаны. "Шундыберган" ("Солнцеворот") огазеяськоназ но ветло гожъяськыны, суредаськыны, сцена вылын шудыны яратӥсь пиналъёс. Соос ужало "Нылпиослэн планетазы" но "Аслам куарае" программая. Туэ тужгес но тунсыко гожъяськисьсылэсь но суредаськисьсылэсь, 6-тӥ классын дышетскись Лена Алексеевалэсь, нимысьтыз книгазэ но поттӥзы (юрттӥз "Акцент" издательство). Лена выжыкылъёсызлы но комиксъёсызлы ачиз ик суредъёс но лэсьтэм. Али, быдӟым ӟуч поэтлы 200 ар тырмонлы сӥзьыса, суредъёслы, сочинениослы, веросъёслы конкурс ортчыто. Мылкыд карисьёс ужъёссэс нуыны быгатозы Некрасов нимо библиотекае. Нош гуртын улӥсь пиналъёс быгатозы асьсэ школаысь яке ёросысь библиотекаен кусып тупатыны, соос ини тыршозы ужъёстэс Ижевске вуттыны. И. ВЕРЕСОВА. Шунды Ойдо тодматском! Шаерамы пӧртэм огазеяськонъёс дасоосын лыдъясько. Котькудӥз улэ кадь аслаз ужпумъёсыныз, тунсыкъяськонъёсыныз. Но герӟа соосты огез - егитлык но шулдыръяськон. Алигес Ижысь Гурт хозяйствоя академиын шулдыръяськон-тодматскон ӝыт ортчиз. Отчы пыриськизы шундыос ("Шунды" дэменлык), иманъёс (бигер егитъёслэн огазеяськонзы), ужараос (пор егитъёслэн огазеяськонзы), озьы ик шаерысьтымы немецъёслэн "Югендхайм" но еврейёслэн культурая дэменлыкъёссы. Ӝыт туж тунсыко ортчиз. Нош радъязы сое шундыос. Котькудӥз дэменлык ас калыкезлэн шудонэз, кырӟанэз-эктонэз пыр тодматӥз ассэ мукетъёсыныз. Куноос буш ки лыктӥллямтэ. Ӝытын веръям зыретэн удмурт табань но, пор шунянь но, бигер чак-чак но, еврейёслэсь "маса" няньзэс но. "Шундыысь" егитъёс "Сяртчы" выжыкылэз туала егитъёслы тупамон карыса возьматӥзы. Егитъёс ӝыт ӵоже пӧртэм эктонъёслы дышизы, уртче султыса кырӟазы. Выль арез но дэмен пумитаны вераськизы. Немецъёс со ужрадэз ортчытонэз ас вылазы басьтӥзы. Татын ӧй вал ог-огдэ пыкылонъёс, ултӥянъёс. Огазе люкаськем удмурт, бигер, пор, немец но еврей егитъёс вордскем шаерзэс - Удмуртиез данъяса кырӟазы. Мед луоз со Эшъяськон кырӟан. Мылкыд мед поръялоз. Надежда ПРОКОПЬЕВА, Удмурт кун университетын дышетскись. ГУРТЫН ВУЗКАРОН Гыбдаса улыны дыр ӧвӧл Валентин Ивановичез районын тодӥсьтэмез ӧвӧл, дыр. Шаерамы но Удмуртпотребсоюзын со тодмо адями, кема аръёс ӵоже кивалтэ ни Селта райпоен. Нош та удысэ кызьы вуэмез сярысь, пальпотыса тодаз вае: - "Ӝог юрттэт сётӥсь" машинаен ужасько вал. Шӧдтэк шорысь сельпоен кивалтыны ӧтизы. Тодмотэм выль уже мыныны кема пумитъяськи, но "курасьёс" бордам зол тэбинизы. Егит вал, соглаш луи. Трос юрттӥзы ӵош ужась эшъёсы, уката ик сельпоысь экономист М. И. Сысоева. Озьы каллен-каллен кооператоръёслэсь ужзэс валаны кутски. Зэм, Валентин Ирисов чаляк шӧдӥз: гуртын вузкарон - со капчи уж ӧвӧл. Быгатоно калыкен вераськыны, шедьтоно тырмыт, ӟеч но уно пумо вузъёс. Кивалтӥсь ужпум пуктӥз - гуртысь котькуд магазинын мед луозы нуналлы быдэ кулэ луись вузъёс. Озьы но нырысетӥ куинь арзэ сельпо планъёссэ ӧз быдэсъя. Собере гинэ югдур воштӥськыны ӧдъяз, Селтаысь кооператоръёс пыд йылазы султӥзы. Ачиз Валентин Иванович но гыбдаса ӧз улы, тодон-валанзэ будэтӥз Москваысь кооперативной институтлэн курсъёсаз. Собере Ирисовез райполы тӧрое бырйизы. Егит кивалтӥсь соку ик басьтӥськиз выль магазинъёс лэсьтон борды. Тыршемез-сюлмаськемез син азьын: хозяйствоослэн центральной усадьбаосазы ӵыжак выль чебересь магазинъёс пуксизы. Гурт калык кыӵе шумпотӥз! Соин ӵош ик райпо нянь пыжонзэ 4 поллы будэтӥз. Селта черкогуртын усто универмаг ӝутӥзы. Кутскизы столовой пуктыны. Валентин Иванович мукет но ӟеч малпанъёссэ улонэ пыӵатӥз. Кылсярысь, районын чик ӧй вал переработка. Соин ик, солэн ӵектэмезъя, Выль Монья гуртын колбаса поттон цех пуксиз, нош ар ортчыса, вӧзаз ик йӧл цех ӝутӥзы. Табере со райполы нуналлы быдэ улэп коньдон вае. Тӥни озьы Селтаысь кооператоръёслэн данзы шаерамы пумен паськыт вӧлме, нош басьяськисьёс солы шумпото, магазинъёсы капчи мылкыдын лыкто. Тани туэ Селтаысь сиён-юонэн вузкаронъя магазинлы "Республикаысьтымы устоез вузкарись предприятие" ним но И степенё диплом сётэмын. Соя Правительство нимысьтыз постановление кутӥз. Коллективлэн тыршемез юнме шорысь пусйымтэ. Магазинын котьку чылкыт, вузкарисьёс басьяськисьёсын лякыт верасько. Соин калык татчы шумпотыса пыре. Ӝажыос кулэ луись сиён-юонэн тырмытэмын. Вузкарисьёс ваньзэ лэсьто, адямиослэсь кулэяськонъёссэс быдэсъян вылысь. Тани Наталья Зорина татын укмыс ар ужа ни. Коллективын со гажано адями. Солэсь адӟем каро эшъёсыз. Бен, татын вань тыршемез Валентин Ирисовлэн но. Селта райпо азьмынӥсьёс радэ оло, ӧз вуы на, но кооператоръёс бере уг кылё, секыт ке но йӧтэ, огсыр ужало, калыклы нуналлы быдэ шумпотон ваё. Г. РОМАНОВ. Райпоысь ужасьёс В. И. Ирисов (тӧрозы), Е. В. Соболева, И. Л. Мельчакова, Е. А. Обхуова, Ф. Р. Русских но Н. А. Дудырева туннэ но ӵуказе ужъёссы сярысь кенешо. Сиён-юон магазинысь вузкарись Наталья Зорина. Туспуктэмъёсыз Г. Юсаевлэн. Огъя юртэз утён вылысь 10-тӥ-12-тӥ шуркынмонэ Ижевскын ортчизы Россиысь Писательёслэн союззылэн секретариатэзлэн ужрадъёсыз Огазеяськоно Син азяды пуктэ али таӵе суредэз. 1991-тӥ ар. Москва, Комсомольской проспект. Вуж купеч юрт, кытчы интыяськемын Писательёслэн огазеяськонзы, сэзъяське, бугыръяське. Огшоры ӵаш поттон гинэ ӧвӧл - зэмос нюръяськон, ожмаськон татын. Лек куараос: пленумез пытсано, Россиысь Писательёслэсь союззэс быдтоно, та особнякез соос киысь басьтоно. Тӥни соку писатель-фронтовик Юрий Бондарев Петр Проскуринэн юрт азе баррикада ӝутӥзы. Берло но та юрт понна вожмаськисьёс ӧз чалмылэ: писательёслэсь акциосын огазеяськонзэс, пе, кылдытоно. Берло съездын, 1994-тӥ арын, та мылкыдъёс пазьгытэмын вал. Ужбергатон но гожъяськон удыс одӥг липет улын уг тупало уго. Та юрт кылиз ик писательёс кие: комнатаоссэ, подвалзэ арендае сётэмен возиське. Но уг луы ни азьвыл сямен быдэс Россиысь кунооссэ пумитамез, ӧтчамъёс люкамез... Нош Литфондэз талазы. Огъя кужымен люкам ваньбурзэ киултӥзы. Табере писатель уг быгаты ни шутэтскыны дунтэм санаториын, творчествоя юртын, фронтэ ветлэмъёсыз гинэ но уг быгато ни нимысьтыз поликлиникае шедьыны. Писательёслэн огазеяськонзы кыклы-куиньлы люкиськиз (бератаз куд-ог улосъёсын - Астрахань, Челябинск, Ярославль - Чуваш Республикаын эшшо кыклы-куиньлы ёзнаськылӥз на). Тодэ лыктэ - С. Самсонов кивалтон вакытэ ай - дэймон учыр кадь вал со... Собере котьмарлы дышим. Табере Россиысь писательёслэн вить сюрсъем "армизы" кужымзэ огазеяны, радъёссэ будэтыны ӧдъя. Со муген ик татысь секретариатын ужасьёс, асьсэ верамзыя, ӵем потало Россилэн пӧртэм сэрегъёсаз. Кемалась ӧвӧл секретариатлэн выездной заседаниез вал Ижевскын. Москваысь ветлӥзы Пётр Проскурин, Валентин Сорокин, Вадим Дементьев, Михаил Числов, Ванцетти Чукреев, Марианна Зубавина, озьы ик Коми, Мордовия, Мари Эл республикаосысь писательёслэн огазеяськонъёсынызы кивалтӥсьёс Елена Козлова, Иван Калинкин но Василий Крылов. Та куинь-ньыль нуналъёс куспын тыршоно вал юнгес ваче кусыпъёс герӟаны, финн-угор литераторъёс азьын сылӥсь ужпумъёсты эскерыны но азьпал сюресъёс пусйыны, соин ӵош ик Россиысь писательёслэн радазы выльёссэ гожъясьёсты кутыны. Тодмо ӟуч (советской) писательлэн Петр Проскуринлэн Ижевске вуылэмез туж адскымон луысал, тросгес калыклы соин пумиськыны кылдысалыз ке... Социалистической Ужысь Герой, РСФСР-лэн но СССР-лэн кун премиоссылэн лауреатсы, али дыре Россиысь Писательёслэн союзэнызы одӥгез кивалтӥсь (сопредседатель) Петр Лукич Проскурин асьмелы тодмо "Горькие травы", "Исход", "Судьба", "Имя твоё" но трос мукет романъёсызъя, повестьёсызъя, озьы ик "Судьба" но "Любовь земная" кинофильмъёсъя. Верамезъя, али со вуттӥз выль романзэ - "Число зверя" - Брежневлэн вакытэз но СССР-лэн куашканы кутсконэз сярысь. Кун Кенешын А. Волковен пумиськон дыръя но, мукет интыосын но П. Проскурин туала улон югдур сярысь меӵак синме учкем кадь вералляз. Бадӟым писательлэн верам кылыз - калыклэн синучконэз. - Ми трос ветлӥськом странаетӥ но адӟиськом, макем воштӥське калык. Тужгес но кышкытэз - воштӥсько нылпиос. Соос уг ни лыдӟисько, уг малпасько, уг тодо ас выжыоссэс, шаерзылэсь ортчем сюрессэ. Соос понна ваньзэ малпа, лэсьтэ "чагыр ящик". Пиналъёслэн сюлэмзы сӧриське - тӥни малэсь али кышкано, мае утён понна нюръяськоно асьмелы... - Сьӧд кужымлэсь бергатонзэ дугдытыны уз луы ни - со туж кужмо ужа, "вылӥослэн" ӟечкыламзы улсын. Со ужа, литератураез, культураез нажгатыса, адями пуш-сюлэмез быдтыса-куашкатыса... Асьмеос сылӥськом мур гу азьын. Мар кароно ум тодӥське. Озьы ке но, валэктон утчаны кулэ асьмеос, писательёс (талант уго со ноку куашкатӥсь ӧвӧл, котьку улӟытӥсь, ӝутӥсь кужым). Калыклы юрттоно юн возиськыны. Нош со пӧрмоз соку гинэ, куке правительство быдэсак берытскоз ас калыкез пала. Интыосын сыӵе оскон юнгес возиське. Соин ик тани асьмеос люкаськиськом... Кужым люкано Ивортӥмы вал ни, та нуналъёсы, вылӥ верам секретариат Ижевскын кенешон дыръя, Россиысь писательёслэн радазы дас мурт кутэмын шуыса. Та пумысен но куд-ог огъя малпанъёссэс, дэмланъёссэс верало писательёсмы. Никвлад Самсонов. Мон ӟечкыласько. Выездной заседание тазьы асьме дорын кыкетӥзэ луэ ни. Семен Александровичлэн (Самсоновлэн) лёгем сюресэз ӧз ышы. Союзэ тросэн кутэмлэсь пичи но кышканэз ӧвӧл - дыр возьматоз...Озьы ке но... шурмы лазегоме ик. Я, шуом, мон медик луыны уг быгаты, дышетӥсь кыӵе ке но луо. Нош писатель... Ваньмыз быгатоз-а гожъяськись луыны? Эшшо, малпасько, писательлэсь вылтуссэ, коньдон ужпумъёссэ адӟоно ни вылэм. Литфондэз выльысь кылдытоно. Фома Ермаков. Мед ини, ойдо. Писательёслэн огазеяськонзы будыны кулэ. Ульфат Бадретдиновез но огкылысь кутоно ни вылэм. Мон али писательёс пӧлын стажея тужгес мӧйыез - 1958-тӥ арысен. Вераме потэ Литфондъя, мон солэн татын оскем адямиез вал. Малпамы ни вал асьме писательёслэсь творчествоя юртсэс Иж тымет дуре пуктыны, кык этажен, дас кык комнатаен. Уксё сётысалзы. Соку тӧромы Андрей Бутолин пумит луиз. Табере ӧвӧл ни Дубулты но, Гагра, Пицунда, Ялта, Коктебель но - ваньмыз со творчествоя юртъёс палэнэ кылизы. Кыӵе условиос вань на писательлы? Нырысь интыын - кӧттэ тырон сярысь сюлмаськон. Павел Куляшов. Умой уж лэсьтӥм... Мырдэм ке но, Александр Волков доры шедьыны быгатӥм ни. Но пайдаез уз луы, дыр, озьы ик кылёз: нокытын печатласькыны, льготаос ӧвӧл. Нош кутӥм писательёс радэ... тросгес ик. Алексей Ермолаев. Олокыӵе кулэзэ уг адӟиськы со пумиськонъёслэсь. Пайдазэ но. Пир во время чумы выллем. Сергей Матвеев. Ӧз кельшы соиз: та лыктэмъёс пӧлын выль мылкыдо, выль омыр ваись писательёс ӧй вал. Александр Шкляев. Дун пуктонмес (критерийёсыз_ кулэстыса ум куашкатӥське-а Писательёслэсь огазеяськонзэс? Ньыль мурт интые огломак - эскерыса но эскерытэк - дассэ кутэм пумысь лекгес веранъёс но вал, но ог-огмылэсь мылкыдмес ум сӧре - зэмзэ ик, дыр ваньзэ интыяз пуктоз. Писательёсыз огазеян, радзэс кужмоятон вылысь, мукет дэмланъёс но вал. "Творческой организациос сярысь" законэз умойгес ужатоно. Россиын финн-угор писательёслэсь ассоциацизэс выльысь улӟытоно. Литинститутын переводчикъёсты дасянъя выль группа кылдытоно... Мылкыдзэс верасьёс вӧзы ватсаны луысал на Вячеслав Ар-Сергилэсь серем улсын тазьы шуэмзэ: "Нокытчы ӧй ветлы, номыре ӧй адӟы, "кӧс" улӥ". Сю процент шонерзэ ӧз вера - ӵапак соку со син азьын, бергад ик:, та нуналъёсы "Удмурт Республикаысь культура удысын дано ужась" нимез ӵапак солы сётӥзы. "Нокытчы ӧй ветлы"... шуон куд-ог мукет писательёсмылы-ёзчиосмылы тупагес. Нырысетӥяз - куноосын тодматскон огъя литературной ӝытэ но, кыкетӥяз, куинетӥяз ӝытъёсы но писательёсыз залысь одӥг-ог гинэ адӟыны луиз. Герасим Иванцов кылбурчилэн витьтон аресъем юбилеезлы сӥзем ӝытэ йӧлэн огпал дурыз шуназ, шуыны луоз. Нош куинетӥяз, Геннадий Красильниковез буре ваён ӝытэ, со "йӧ" чик ӧз шӧдӥськы ни. Залын пукисьёс шер-тур ик кылизы ке но. Шуак вуэм чепылляськись кезьыт-а люкетӥз, рекламаез-ивортонэз шӧдытэк кылизы-а - сокем бадӟым муген лыктэм нимо-дано писательёсын пумиськонъёсы тросгес калык пыриськыны кулэ вал. Пыдъёс сяна, ужпум но маке борды могӟе-пыкиське, луоз. Но Удмуртиысь Писательёслэн ӧсазы йыгаськонмес ум вунэтэ - вуоно арлэн кутсконаз (уг ке янгышаськы) асьме гожъясьёсмылэн бадӟым ӧтчамзы - съездзы луыны кулэ. Татьяна Чернова. Сцена вылын - писательёс-куноос. Асьмелэн эшъёсмы сак кылзо. Туспуктэмъёсыз В. Беломорскихлэн. Эскерон палатаын Законлэн бурд улаз Туала вакытэ кулэ на меда эскерись-чаклась ёзъёс? Кулэ ке, маин соос выро но кыӵе пайдазы? Та юанъёс амалтэк йыре лыкто, Эскерон палаталэн ужезъя куд-ог йылпумъянъёсты учкыса. Номыр уд шуы, Кун Кенешен, депутатъёсын быръем ёз трос лэсьтӥз но лэсьтэ пӧртэм тырмымтэос, юри малпаса пӧрам "янгышъёсты" шараянъя. Котькудӥзъя материалъёс кошко яке Правительствое, яке Прокуратурае. Огез гинэ жаль - эскерисьёслэн юнме быдтэм дырзы но тазалыксы, - малы ке шуоно, данакез ӝутэм уголовной ужъёс йылаз-пумаз вуытэк ик ворсасько. Миллионъёсын асэстэм калык ваньбур куд-ог кисыосы весяклы кугӟаса кыле. Журналистъёс куремъя, Эскерон палаталэн кивалтӥсез Михаил Иванович Шишкин берло ортчем пресс-конференциын меӵак вераз сыӵе нимъёсты. Соос пӧлын "Удмуртия" ГТРК-лэн азьвыл кивалтэтэз, Якшур-Бодья районысь администрацилэн азьвыл тӧроез, сиён-юонъя корпорацилэн директорез, "Плодоовощ" АО-лэн азьвыл генеральной директорез но мукет кузёос. Кудзы ке но соос закон азьын кыл кутӥзы-а? Прокурор верамъя, "соослэн ужазы преступление ӧвӧл". Озьыен, Эскерон палата юнме шорысь бугыръяськиз бумагаос пӧлын? Талы валэктон сётӥз Эскерон палатаын ужась депутат Николай Федорович Чувашов: - Туала законъёсъя миллионъёсты капыртӥсьёс лушкаськись радэ уг шедё, пытсэт сьӧрын пуко ларёк тӥясьёс, сиыны-юыны ёрмемъёс. Зӧк кисыосты закон бурд улаз возе. Эскеремын Ваньбуръя кун комитетлэн но ужез. Республикаын приватизация ортчытэмлы йылпумъянъёс али ке но тодмо ӧвӧл, со понна шараямын куд-ог музон лыдпусъёс. Кызьы ивортӥзы пресс-конференциез нуисьёс, та комитет (кивалтӥсез С. П. Касихин), 1996 арысен кутскыса, ужасьёсызлы арлы быдэ материальной юрттэт но премиос висъян чотын трос миллионэн коньдон быдтэ. Расходной статьяя нокыӵе сметазы ӧвӧл. Эскерон комитетэн шараямын мукет но тырмымтэос. Прокуратурае ыстэм материалъёсъя озьы ик нокыӵе ужрад кутымтэ, уг вера аслэсьтыз чурыт кылзэ Правительство но. Кызь кыкетӥ сессиын ӝутскем вераськонэз азинтыса, журналистъёс нимысьтыз валэктон сётыны куризы шаерамы Германиысь басьтэм комбайнъёсъя. Соослы коньдон висъямын ке бюджет чотын, кӧня манетлы кыскоз та техника асьмелэн кисыосмы понна? - СБС-ЛИЗИНГ компания пыр ваем 1 комбайнлэн дуныз (17 августозь) вал 1 миллион 670 сюрс манет. Ӵошатэ: асьмелэн "Донмы" сылэ 520 сюрсэн. Озьыен, огез кунгож сьӧрысь басьтэмез интые куинь комбайн вайыны луысал. Удмурт музъем вылын "Дон" но, "Нива" но оскымон ужало, воштос ёзъёслы но Германилы ӧй йыбыртъясалмы. Берло мар на, шуо таӵе дыре. Эскерон палатаын ужасьёс берло вакытэ осконзэс ыштӥзы Инкуазез утёнъя комитетлы но (кивалтӥсез В. И. Катков). Кызьы пусйиз депутат Мальцева, котькудӥз ёз нырысь ик сюлмаське ассэ узырмытон сярысь. Инкуазез утьыны шуыса кылдытэм фонд но висъям коньдонлэсь шӧдскымон люкетсэ кутэ ас кулэяськонъёсызлы, нош валтоно удысэз палэнэ кыле. Вуоноез 23-тӥ сессия кылзоз Эскерон палаталэн ужезлы лэсьтэм йылпумъянъёсты. Туэ ар понна палатаен 16 кенеш ортчытэмын, котькудаз сэрттэмын-пертчемын бюджетысь коньдонэз шонер кутонэн герӟаськем ужпумъёс. Эскеронъёсты нуыны туж шуг, малы ке шуоно, куд-ог предприятиос, учреждениос но организациос, Удмуртиысь банкъёсын сяна, уксёзэс возё республикалэн палэназ. Тае лыдэ басьтыса но кулэ ужрадъёс кутыны курыса, палата вазиськиз Удмурт Республикаысь Налог октонъя инспекцие но Национальной банке, предприятиосты-недоимщикъёсты закон улэ кыскон понна. Нимысьтыз вераськон мыноз на йӧл но солэсь дасям продукция ласянь. Эскерон палатае вуэм материалъёсъя куд-ог интыосын солэсь дунзэ юри 1,5-2 пол ӝуто, асьсэлы барыш поттон вылысь. Валамон, туала вакытэ эскерон-чаклан ужез нуыны секыт, солы люкетӥсьёс вань гинэ вылӥ кивалтӥсьёс пӧлын но. Зэмен ик, кинлы меда кельше мурт кисыын бугыръяськон? Но со кулэ, малы ке шуоно, калыкен люкам ваньбур пайда вайыны кулэ асьмелы ваньмылы. Таӵе ужпум пуктэ ас азяз Кун Кенешлэн Эскерон палатаез. Л. МЕДВЕДЕВА. Ышыгын ке но... Та адями сярысь нырысьсэ кылӥ, редакциын ужакум. Со, пе, Александр Волковлэн "бур киыз". "Ого,- малпай мон,- бадӟым адями". Но нунал ӵоже мар но уг луы! Со верам но огъя бугрес улонлэн кыл зарезяз ышиз. Но... кемалы вылымтэ. Ӝоген асэныз Николай Мусалимовен - Удмурт Республикаысь Кун Кенешлэн Тӧроезлэн юрттӥсеныз пумиськыны кылдӥз. ... Ӵужпыръем йырсиё, лапеггес мугоро, капчи вамышъясь пиосмурт. Котыр ласянь учкыса шуод: Ма, та тяп-тяп удмурт адями ук!" Озьы ик со вань. Дыртытэк гинэ лад- лад удмурт сямен вераське... Соку ик Николай Николаевичен кенешим, солэн улон сюресэз, мылкыдъёсыз, шаермылэн толло но ӵуказе нуналъёсыз ласянь малпанъёсыз сярысь тодэм потӥз. - Николай Николаевич, тӥ котьку син азьын, тӧро вӧзын. Но, паймоно кадь: бадӟым кивалтӥсьёслэн нимъёссы я радиоын, я газетын, я экранын бергало, нош тӥ сярысь калыкмы номыр уг тоды. Малы? - Мон сямен, татын номыр паймонэз ӧвӧл. Бадӟым кивалтӥсьёс сярысь кулэ вераны, гожтыны. Соослэн ужъёссы уго ӵапак герӟаськемын асьмелэн огъя улонэнымы. Нош мон - кивалтӥсьлэн юрттӥсез. Трос ужез нуоно луэ солэн нимыныз. Соин ик юрттӥсьлэсь ужзэ но адӟыны секыт. Собере ачим но мон уг яратӥськы ас сярысьтым трос вераны... Адямиос пӧртэмесь. Кин ке калык азьын возиськыны, вераськыны яратэ... Мон понна нырысь интыын - уж. Анай-атае но пичи дырысен ужез яратыны дышетӥзы. Жаляса верано, кыкназы ик улонысь вазь кошкизы, но озьы но ньыль пизы пыд йылазы султӥзы. Вордӥськи мон Селта ёросысь Каменный Ключ гуртын. Али со быремын ни. Семьяын, пиосмуртъёс пӧлын, тужгес но секыт йӧтылӥз анайлы. Бадӟым агаен висмы сизьым арес вал. Ӝоген со колхозын тракторен ужаны кутскиз. Дорын мон бадӟымез интые кыли. Эшъёсы кырын бызьыло, мынам но соосын ӵош шудэме потэ... Но котькуд ӵукна анай уж сётыса кельтылӥз. Чулка, носки керттыса но ӵем пукылэме вань. Анаен тупатэм нормаез быдэстӥсько ке - шудыны потӥсько, уг ке - ачим янгыш... Соин, лэся, мон пичи дырысеным котькуд ужез дырыз дыръя но ӟеч лэсьтыны дыши. - Вакчияк вералэ вал асьтэ улон сюресты сярысь. - Школаын дышетскыкум эшъяськи спортэн. Тужгес но яратылӥ куасэн бызьылыны. . Ёрос ӵошатсконъёсын нырысетӥ интыос басьяны ӧдъяй. Соку ик азьланяз быдэс улонме спортэн герӟан сярысь малпан кылдӥз. Омскысь физкультурая институтэ пырыны дэмлазы. Но, жаляса верано, отчы мон бероми, экзаменъёссы кутскиллям вылэм ни. Пыри Ярысь педучилищее. Ӝыны ар ортчыса, армие кошки. Куинь ар ӵоже Северной Флотын подводник вал. Армиысь бертӥ но, куасэн бызьылӥсь эшъёсы училищее кошкыны ӧз лэзе ни. Одӥг ар Халды гуртын спортъя методист луыса ужай, собере ёросысь спортъя комитетэн кивалтӥ. 1977 арын университетысь историяя факультетэ пыри. Аресыя эшъёсылэсь кӧнялы ке бадӟымгес вал. Оло, соин но юлтошъёсы юрттэт курыса вазиськылӥзы, оскылӥзы. Стройотрядын, кылсярысь, бригадире, мастере, командире юнматылӥзы. Дышетсконэ но кельшиз. Ӵемгес пукыны ӧдъяй архивъёсын. Аслам гуртэлэсь но быдэс Селта ёрослэсь, партийной организацилэсь историзэ эскери.Витетӥ курсын дышетскыкум, дэмлазы ужаны Министръёслэн Советсылэн организационной отделаз. Отын мон 11 ар ӵоже инструктор, собере отделэн кивалтӥсьлэн воштӥсез луыса ужай. 1993 арын Александр Волков Кивалтэтлэн Тӧроез луиз но монэ аслыз юрттӥсе кутӥз. Нош 1995 арысен мон Удмурт Республикаысь Кун Кенешлэн Тӧроезлэн юрттӥсез но Секретариатэн кивалтӥсь. - Куддыр тазьы но луэ: ужез быдэсто огшоры адямиос, нош данэз шедёз кузёлы... - Шуг вераны та сярысь. Нырысетӥ кивалтӥсь огназ ваньзэ уз быдэсты. Солэн аслаз командаез луыны кулэ. Собере малпан медаз кылды, быдэс шаерен кивалтон - со капчи удыс шуыса. Со ныпъетэз котькудӥз уз вормы, тужгес но - туала вакытэ. Александр Александровичлы но ӵем тыш сюре: коллективъёсын уждун тырон ӝега, пенсиосты беромыса вутто... Ма, сыӵе югдур быдэс Россиын. Интыосын гинэ сое уд вормы, Москва бордысь тросэз потэ. Быгатэммыя тыршиськом вань луонозэ лэсьтыны. Кун Кенешлэн Тӧроезлы ӝыт 8-10 часозь ужано луэ. Нунал пумын мон берпуметӥез, кин со доры пыре, куд-ог юанъёсты эшшо эскериськом на. Ӵукна Тӧролэн ужан нуналэз 8 часлэсь вазь кутске. Соку но со нырысь ик монэн пумиське, уй ӵоже сэрттэм-пертчем малпанъёссэ вера, кенеше. - Кризисэн сэрен адямиослэн мылкыдзы урод. Соос керӟегъясько, ӵуказе нуналлы осконзы пумен ыше. Мон малпасько, тӥледлы но капчи ӧвӧл, дыр. Ӵем-а уж дурады "пильмаськыса" вуиськоды? - Секыт мылкыдме котьку но ватыны тыршисько. Нунал ӵоже Кун Кенеше трос калык вуылэ ук. Пӧртэм куронъёсын, пӧртэм ужпумъёсын. Тани ӝӧк вылам берло нуналъёсы гинэ вуэм гожтэтъёс. Котькудаз - адямилэн яке быдэс коллективлэн улонэз, котькудзэ буйгатыны, валаны кулэ. Соин ик мыным уже урод мылкыдын ветлыны уг яра. Гуртын гинэ ке шат куддыръя шӧдӥське: кузпалэ, пиналъёсы монэ сыӵе дыръя валало, юрттыны тыршо. Тани алигес туж урод гожтэт вуиз. Гожтэм сое Ижысь пенсие потэм кышномурт. Вань йыркурзэ Кун Кенешлэн Тӧроез вылэ кисьтэм. Соин мон пумиськи, вераськи. Удмурт кенак вылэм со. Али но весь жингыртэ на: "Ну, Николай Николаевич, тонэн вераськисько но, буйгасько. Юрттыны ке но уд быгатӥське, валаны тыршиськоды..." Солэсь азьло чылкак кытчы вазиськыны ёрмем кышномурт вуиз - бӧрдэ. Нылызлэсь, школаысь дышетӥсьлэсь, секыт висёнзэ шараяллям. Екатеринбургын операция лэсьтыны кулэ. Эмъяськонлы шуыса, холодильниксэс, ӝӧксэс но вузаллям ни, нош сюреслы уксё тырмытӥллямтэ. Ачим ик бӧрдоно кадь луи. Отчы-татчы вазиськыса, школаен кенешыса, уксё шедьтыны быгатӥм ик. Туж шумпотӥсько: адямилэн улонлы осконэз ӧз чигы. Ваньмызлы юрттыны быгатысалмы ке... - Кызьы малпаськоды: политика лэсьтэ улонэз яке улон - политикаез? - Али дыръёсы, жаляса верано, улонэз лэсьтэ политика. Тросэз политикъёс, асьсэ нимзэс-данзэс будэтон понна, калык вылэ чӧлско, со сярысь уг ке но малпасько. Нош луыны кулэ чылкак мукет сямен. Кивалтӥсьёс одӥг кыл шедьтыны уг быгато. Ваче пумит выро. Малы? Соиз но, таиз но шонересь кадь, соиз но, таиз но - калык понна. Мынам малпамея, кивалтӥсьёс, кудъёсыз зэмзэ но сюлэмшугъясько калык понна, одно ик шедьтозы огкыл. Мукет сямен луыны кулэ ӧвӧл. Ачим мон тупаса улонэз яратӥсько, соин ик туж сюлмаськисько та пумысен. - Политикалэсь, ужлэсь палэнскыса юаме потэ вылэм: кыӵе кусыпъёс возиськоды ӵош дышетскем эшъёсыныды, вынъёсыныды? - Агай-вынъёсынымы уртче улыны тыршиськом. Али гинэ агаймылы, веме карыса, мунчо пуктӥм, мукетызлы вынмылы корка ӝутыны юрттӥм. Семьяосынымы ӵем люкаськылӥськом. Нош ӵош дышетскем эшъёсын пумиськылыны ӵем уг кылды ке но, ог-огенымы кусып возиськом ик. Тани июне мынам дышетскем Лудӟи-Жикья школаелы 100 ар тырмиз. Школамы туж пичи - 4 класс гинэ - вал ке но, туж трос калык люкаськиз, та пумиськонъёс трос аръёс ӵоже тодэ кылёзы. Соку ик мынам нырысетӥ дышетӥселы - Наталья Караваевалы - сӥё-дано ним сётӥзы. Туж паймымон адями. Наталья Самсоновналэн ужан книжкаяз куинь гинэ гожтэмез: 1941 ар - дышетӥсьын ужаны кутске, 1961 - директорын, собере - пенсия... - Газет лыдӟисьёсмы номыр уг тодо на тӥляд семьяды, кузпалды сярысь... - Кышное, Ангелина, асьме университетысь удмурт филологияя факультетэз йылпумъямын. Али ужа Правительстволэн ЗАГС-ёсъя комитетаз. Нылы - 10-тӥ классын дышетске, пияше - 5-тӥын. Пие туж яратэ спортэз. Одӥг пол футболъя тренер солэсь шудэмзэ синйылтэм. Мыным жингыртӥз: одно ик пидэс дорамы, спортъя школае, пе, вае. Но али дышетскон школаысьтыз дышетӥсьёсыз куризы кельтыны. Нылылэн сямыз тани чылкак аслам кадь. Котькыӵе чыры-пыры ужез но одно ик ӟеч, рос-прос лэсьтыны тыршоз. - Таӵе юанэ вань на, Николай Николаевич. Кызьы малпаськоды, тӥяськыса кошкем улонамы мар возе на калыкез? - Оскон. Адямиос оско: ваньмыз воштӥськоз ай, кызьы ке улоно. Нош ку луоз умой улон? Соослы вераны ке луысал, кӧня ке чидалэ: туннэ - урод, ӵуказе одно ик умой луоз. Али озьы шуыны ум быгатӥське. Но калык оске. Мон малпасько: шонер каре, улон одно ик тупатскоз. х х х Тодам лыкто Платонлэн (вашкала грек тодосчи) кылъёсыз: "Котькуд адями вордскем дырысеныз - политик". Та веранэз мукет сямен но берыктыны луоз, дыр: котькуд политик - со адями. Аслаз вормонъёсыныз, аслаз шугъяськонъёсыныз. Нош ик син азям пуксе шаплы, котьку капчи мылкыдо, мур калык выжыоссэ гажась, юн чидась пиосмурт. Котькуд сюлэмшугъяськытӥсь юанэдлы дыртытэк, лад-лад валэктӥсь кивалтӥсь. Сыӵеос гадязы уг мыжгало, оскем возэз азьлане нуо, сьӧразы мукетъёссэ валто. Соос ышыгын ке но, улонмес радъянын шӧдскымон луо. Елена ПАНФИЛОВА. * Огкыл улэ гожтӥсько Александр ВОЛКОВ но Юрий ЛУЖКОВ. Бур палан сылэ Николай МУСАЛИМОВ. Н. ГЛУХОВЛЭН туспуктэмез. Анайдэ ке ӧд гажа Малы ке татчыозь вӧзысьтымы егитъёслэн улэмзы шоры мур-мур ӧй учкылы. Синйылтытэк улыны каньылгес потылӥз-а, мар-а. Нош кылем гужем каникулъёсы дыръя адӟем суредъёсты адӟыса валай: тазьы ик луиз ке, асьмелы азьланяз номыр умойзэ возьманэз ӧвӧл. Ужтэк кылемъёс уката трос гуртъёсын. Егитъёс мар карыны паймыса (ёрмыса-а) лушкаськыны, эрказъяськыны, вина юыны кутско. Дискотекаын шулдыръяськем интые, юон утчаса бызьыло. Уг ке шедьто, ӝытбыт кунэрес пуко. Юон понна котьмарзэс вузаны дась! Нош кӧня колхоз ю тысез, турын-куроез вузаса юо! Азьвыл сыӵеосты пытсэт сьӧры келяло вал. Улоназы ӟечсэ адӟытэк, осконзэс ышто но кыӵесэ пыро. Уг малпало анай-атайзы, семьязы сярысь. Вань секытэз соос вылэ кыле. Вордэмзы, тыршемзы понна озьы тау каро. Туала егит пиос уг возьдасько анайзы вылэ кизэс но ӝутыны. Кызьы ке сылӥськом эшъёсыным урамын вераськыса. Огезлэн пияшлэн анаез укнотӥ мычиськиз. Куанер номыр вераса ӧз вутты, пиез кеськиз ук: "Эшшо ке утчаськыса ул, тани лэзё маин ке!" Ӝожомем анай пал кыл но вератэк ышиз. Со учыр бӧрсьы мынам со пияшен эшъяськеме ӧз поты ни. Кызьы ке верасько анайёсынызы, озьы ик кузпалъёсынызы. Яратыса кузпалъясько кадь, но кӧня ке дыр ортче но, семья куашка. Семьяын уго ог-огед сярысь сюлмаськоно, нош асьмелэн котькудӥз ас понназ гинэ. Улон сюрес вылэ султӥсь егитъёс ас азязы кыӵе ке ӟеч ужпум пуктыны кулэ. Соку гинэ улонзы тыро но тунсыко луоз. Светлана Никитина, Удмурт кун университетын дышетскись. Ау, премия... Литература но искусство удысын Удмурт Республикалэсь кун премизэ 1998 ар понна нокинлы сётоно ӧвӧл. Таӵе ивор тросэзлэн сюлэмаз "кугӟаськыса" кылиз, дыр. Кызьы озьы... Оло зэмен куасьмыны кутскиз ни асьмелэн тылсиё, крезьгуро, визыло ошмесмы? Соку ик син азе пуксизы "Чипчирган", "Инву гуръёс"... Удмурт кун филармонилэн куатьтон аръем сюресаз берло ӝуатскем "кизилиос": "Катанчи", Валентина Пудова... Удмурт кун национальной театрлэн бадӟымесь ужъёсыз" "Эбга", "Эш-Тэрек"... Книгаос но адскизы радэн: "Тулыс зор", "Воршуд музъем", "Кизили ныл", "Юриськем музъем", "Кырӟамысь тон эн дугды, сюлмы", "Русская зима"... Нош "Зарни крезь" серия, Т. Владыкиналэн, И. Таракановлэн, Л. Христолюбовалэн, М. Атамановлэн, М. Гришкиналэн, М. Ивановалэн, К. Куликовлэн, Н. Кузнецовлэн улонмылэсь мур сӥоссэ бугыртӥсь книгаоссы? Таиз ар - Куӟебай Гердлэн но Ашальчи Окилэн арзы. Творчество удысын ужасьёс сайкыт визьмынызы эшшо но югытгес каризы та дано адямиослэсь тусбуйзэс. Жаляса верано, трос чебер малпанъёс быдэсмытэк, берлолы кылизы, кылсярысь, Гердлы но Ашальчи Окилы памятникъёс (бюстъёс) пуктон... Нош лэсьтэмез шоры синэз уд кыньы. 1996-тӥ арын потӥз Фома Ермаковлэн "Кузебай Герд. Жизнь и творчество" монографиез, азьвылгес ик литературовед пусъемын ни республикамылэн кун премиеныз. Собере со дасяз но поттӥз на К. Гердлэсь кылбуръёсын куинь книгазэ. Нош Алексей Ермолаев трос ужаз Ашальчи Окилэсь улэмзэ, гожъяськемзэ эскерон бордын. Туэ со поэтессалэсь "Ожерелье. Чыртывесь" книгазэ но "Ашальчи Оки. Улэмез но творчествоез" пособие поттӥз. Уно лэсьтэм ужзэ, ярам коть, синйылтӥз "Удмурт кенеш": таяз аре А. Ермолаевлы сётэмын К. Герд нимо национальной премия. Туннэ библиографической указателья Ашальчи Оки сярысь быдэс дунне тодыны быгатэ ни "Интернет" сеть пыр. Озьы ик шуыны луоз СД-РОМ компакт-дискъёсы гожтэм мукет научной указательёс - "Мултанское дело", "Удмуртское языкознание", "Удмуртская картография" сярысь но. Со сяна, нимаз книгаен дасямын "Удмуртская библиография", "Куӟебай Герд" но озьы ик "Ашальчи Оки" указательёс. Та бадӟым ужез быдэстӥзы шаерысьтымы ужасьёс, отысь шаертодонъя отделын тыршисьёс. Та юрттӥсь указательёсыз понна ик Национальной библиотека туэ дэмламын вал кун премилы. Но, кызьы ӝожтӥськыса веразы татысь кивалтӥсьёс Н. М. Собина но Г. Г. Калинина, документъёсты кык пол лэсьтоно луэмен но Культурая министерство ӝегатэмен, таӵе шуд соослы ӧз усьы. - Бен, ӵапак туж огшоры муген, дыраз вуттымтэенызы Национальной библиотекалы кун премия ӧз шедьы, - шуиз премиосты сётонъя комиссилэн членэз А. П. Сидорова. - Со ньӧмыз понна гинэ муг. Кун Кенешын та коллектив кыӵе ке куронъёсъя ӧз ортчы. Ми малпамы на, вал правительстволэн премиеныз пусъён вылысь дэмланы, но бере кылим, - тазэ валэктӥз культурая министрлэн воштӥсез С. М. Мутерко. Культурая министерство ласянь мукет валэктон но вал на - кузь но котыръяса... Таӵе дыръя валаны уг луы ни, кин кинэ ныртӥз нуллэ. Нош одӥгез тодмо: библиотекарьлэсь секыт ужзэ асьмелэн кулэезъя дунъяны дышемын ӧвӧл на (азьпалан газетамы возьматыны тыршом ай та библиотекалэсь туала, выль амалъёсын ужамзэ). Гожъян-печатлан удысысь шуоно ке, премилы дэмламын вал Александр Ураковлэн медициная (тазалыкез утёнъя но эмъюмъёсты шонер уже кутонъя) тодмо луись книгаосыз но статьяосыз. Искусство удысысь ке - калыкез дышетонъя министерство пыр ӵектон сётэмын вал Любовь но Алексей Мурзинъёслэсь, 95 номеро гуманитарной лицейысь дышетӥсьёслэсь, эктонъя "Узоры" калык ансамбльзэс пусйыны. - Соиз но, таиз но кык куиньмос куара ӧз люкалэ. Мон дэмлай вал премиез шори карыны, талы пумит луизы, - ас малпанзэ вераз комиссилэн членэз А. Г. Шкляев. Ма бен, вылысен умойгес адӟиське, шуо. Озьы дыр, син азьын ке со. Нош утчамтэез, шедьтымтэез, дэмламтэез? Сандык пыдсы ватэм зарни пыры сямен ик адскытэк, бугыртытэк кылиз, луоз. Та ласянь ужаны кулэ вал Культурая министерство но писательёслэн, художникъёслэн союзъёссы, мукет творческой огазеяськонъёс. Эшшо берытскыса верано ке... Писатель бадӟым ужзэ кык, куинь, вить, дас арлы огпол вуттэ. Озьы но со аре, шуом, кун премия мукетызлы шеде: таиз эшшо но "бадӟымгес" произведение гожтэм. Ошмес сюбег ӧретӥз озьы ик мынэ, огез люкаськем тыметэз шумпоттэ, мукетыз ӧз ӵыписькы на та дыре. Нош ӵыписькиз ке - адӟы но ул - мукет шурын паськытэзгес, чорыгоезгес кылдэм. Озьы ӵошатыны луоноодӥг бадӟым ӧре - литературае - вожмаськыса бызись шуръёсыз. Соинтэк-а адӟытэк кылемын "Савелий но Левиафан", "Ӵашъем нимъёс"... Ку ай табере выльысь зороз, тыметэз тырмытоз? Мукет ласянь, таӵе черод - кулэтэм но нодтэм, дыр. Гожъяськон визыл - со вылӥе чизйись, чеберъяськись фонтан ӧвӧл ук, со ас выжыоссэ-муоссэ мускытатӥсь, каньылля бызись ву. Соя ик дунъет но сётоно. Т. ПЕТРОВА. ШУНДЫ Кизилиёзь ӝутскемды потэ-а? Культурая но туризмъя управление, Егитъёсын ужанъя кун комитет но Анатолий Мальцевлэн творчествоя центрез декабрьлэн кутсконаз ортчыто эстрада кырӟанъя "Ижевскысь кизили - 98" конкурс. Котькуд аре городын радъяськись та конкурсэ пыриськыны быгатозы 16 аресысен 30 аресозь егитъёс. Конкурс ортчоз куинь турен. Котькуд понедельнике но субботае "Металлург" культура дворецысь 66 а комнатаын луозы кылзӥськонъёс. Вазиськыны луоз таӵе телефонъёсъя: 23-23-96, 22-68-78, 22-85-95. Ижевск тодмо бирдыосын Асьмелэн шаермы ож тӥрлыкез лэсьтонэн, корт ӵыжатонэн сяна, 30-40-тӥ аръёсы данъяськиз на Ижевскын поттэм бирдыосын. Бирдыосты лэсьто вылэм шурысь бичам куалемлэсь. Со аръёсы одӥг кило куалемлэн дуныз 42 коньы вылэм. Ижевскын лэсьтэм бирдыос вузаськизы Москваын но, мукет городъёсын но. В. РОГАЛЕВ, шаерчи. Визьзэс сынало егитъёс Ижевскысь Егитъёсын ужанъя комитет но егитъёслэн "Эрудит" гуманитарной лицейзы КВН командаослэсь кыкетӥ чемпионатсэс ортчыто. Туэ клубе 20 команда пыриське. Соос пӧлын школаосын, училищеосын но вузъёсын дышетскисьёс, егит дышетӥсьёс. Шудонъёс кутскизы 22 ноябре. Вуоноосыз ортчозы 12, 13, 19, 20 декабре Егитъёслэн юртазы. Д. СТОЛБОВ. ГУРТ УЛОН Картофкаен гинэ кӧтэз уд тыры Республикаямы кык нунал ӵоже ужаз гурт хозяйстволэн ужпумъёсызлы сӥзем научно- практической конференция. Солэн ог люкетэз ортчиз Завьяловоын, мукетыз - Ижевскысь гурт хозяйствоя кун академиын. Удмурт Республикаысь Наукаосъя академилэн но Наукаосъя, дышетонъя, искусствоя но культурая международной славян академилэн Удмуртиысь ёзэзлэн кичӧлтэмзыя, ужрадэз радъянэ пыриськизы Гурт хозяйствоя но сиён- юонъя министерство, Нациосын ужанъя комитет, Удмурт кун университет но Ижевскысь гурт хозяйствоя кун академия. Конференцилэн ужаз пыриськизы учёнойёс, районъёсысь гурт хозяйствоя управлениослэн кивалтӥсьёссы но валтӥсь специалистъёс. Малы кулэ таӵе люкаськон? Гурт хозяйствоя но сиён-юонъя министр В. Жуйков верамъя, шаерысьтымы музъем ужасьёс туннэ верантэм секыт югдуре вуэмын. 431 хозяйство пӧлысь миым 398-эз пайда поттытэк ужазы. Соин ик таяз арын но бере кылем хозяйствоослы пыд йылазы возиськыны туж секыт йӧтӥз. Правительство, министерство, районъёслэн администрациоссы быгатэмзыя юрттыны тыршо. Тани кӧня ке лыдпусъёс. Правительстволэн 37 номеро постановлениезъя туэ республикаямы 16 миллион манетлы 13,9 сюрс тонна удобрениос ваемын. Бусы ужъёс дыръя 29,8 миллион манетлы 18455 тонна эстӥськон висъямын. Валэс юосты кизьыны хозяйствоос озьы ик 4900 тонна вылӥ сортъем кидысъёс басьтӥзы. Мукет ӟеч ю тысь кидысъёс басьтон понна, бюджетысь эшшо 250 сюрс манет висъямын на вал. Кредитэн но 117 организацилы юрттэт сётэмын, со пӧлысь 42-ез - крестьян хозяйство. Кылем арын кредит висъямын вал 25 организацилы гинэ. Ляб хозяйствоослы юрттон вылысь, туэ эшшо 13 МТС кылдытэмын. Соослы 6 комбайн висъямын. Туннэ нуналлы Германиысь ваемын 32 комбайн. Зэмзэ но, та лыдпусъёс шоры учконо ке, гурт хозяйствоослы государство маин но со юрттэ кадь. Но малы меда со юрттэт уг шӧдӥськы? Малы арысь аре кулэсме музъемлэн удалтонлыкез? Малы ляб саклык висъяське ӟеч пудо выжы уськытонлы? Малы государстволэн висъям коньдонэз ӵем дыръя гуртъёсы уг вуы? Тӥни та ужпумъёсты сэрттон-пертчон вылысь, огазе люкаськизы учёнойёс но кивалтӥсьёс. Прокуроръёс уг но кизё, уг но арало Тазьы шуиз Удмурт Республикалэн прокурорез В. Походин. Но прокуратураен шараям тырмымтэос быдэсак коньдонэн ке берытскысалзы, кӧня меда комбайнъёс но тракторъёс басьтыны луысал? Ужбергатонлы эрик сётон куд-ог хозяйствоослы бадӟым изъян вае. Кескич адямиос гурт кивалтӥсьёсты олокызьы но пӧяны быгато, шуиз прокурор. Кылсярысь, Глазов городын 1994-тӥ-1996-тӥ аръёсы мошенник шуонъёс, документъёс пӧраса, хозяйствоослэсь миллионъёсын ваньбурзэс поттӥллям. Улэп коньдон интые соос уксё кутӥллям Санкт-Петербургысь атом станцилэсь вексельёссэ. Дуно бумагаосты берыктыны быгатымтэзы сэрен, соос вылэ уголовной уж ӝутэмын. Куд-ог дыръя туж паймытэ гурт кивалтӥсьёслэн бумагаос гожтон бордын ужаны быгатымтэзы, ляб тодон-валанзы. Сыӵе адямиосты пӧяны капчи. Соин ик, вылды, палэнысь лыктэмъёс асьме гуртъёсысь картофкамес но мукет бакча сиён машинаосазы йырвылозь тырыса ик потто. Нош "вузкарись" машиналэсь номеръёссэ но уг гожты, "басьтӥсьлэсь" бумагаоссэ но уг эскеры. Тӥни озьы асьме музъем вылын будэтэм бакча сиён дунтэмен палэнэ кошке. Но со дыре ик, кызьы паймемзэ вераз прокурор, "Удмуртпотребсоюз" бюджетысь 5 миллион манет коньдон куре, республикаямы палэнысь бакча сиён ваён понна. Федеральной законъя бакча сиёнэз вузкаронэ вуттон понна кыл кутэ Россиысь Сиён- юонъя корпорация. Но солэсь ужзэ рос-прос чакламтэен, Россилэн бюджетэзлы 3 триллион манет тыр изъян лэсьтэмын. Уголовной уж улэ кыскемын корпорацилэн кивалтӥсьёсыз но Волгоград, Тула улосъёслэн губернаторъёссы. Прокурорлэн верамысьтыз валамон ини, кытчы кошке государстволэн коньдонэз - сьӧраз ортчем лушкаськон быдэс экономикамес погыртэ, агропромышленной комплекслы азинскыны юрттон понна нимысьтыз фонд кылдытэмын вал, но отчы висъяськись коньдон но кулэезъя уг кутӥськы, мукет ӧръёстӥ кошке. Маин кӧтмес тыриськом Картофкаен гинэ. Сое валэктыны выриз Ижевскысь гурт хозяйствоя академиысь доцент, А. Ленточкин. 1997 арын Удмуртиын одӥг адямилы быдэ 46 килограмм сӥль, 350 литр йӧл но сомында ик килограмм картофка, 316 курег пуз дасямын вал. Трос-а со, ӧжыт-а, валамон луоз адямилы тупатэм нормаосты учкыса гинэ. Россиын улӥсьёс картофка туж трос сиё, нош сӥль, кӧс вӧй, узы-боры - нормалэсь ӧжыт. Америкаын улӥсьёсын ӵошатыса, асьмеос кык поллы ӧжытгес сӥль но дас поллы ӧжытгес емышъёс сииськом. Тырмыт нянь сиён понна но республикаямы адямилы быдэ одӥг тонна тыр ю тысь утялтоно, нош али со усе быдэн 600 килограмм пала гинэ. Ярам, тырмымтэ шепез картофкаен воштӥськом. Нош маин воштоно меда скал вӧез? Солэн тырмымтэез адямилэн тазалыкез вылын, уката но нылпиослэн тазалыксы вылын, туж зол шӧдӥське. Огвыллем сиськыса, адямилэн улон даурез вакчигес но вакчигес луэ. Учёнойёсэн лыдъямзыя, Россиысь воргоронлэн улон дырыз, шорлыдын вераса, 50 аресозь гинэ кыстӥське, нош азьмынӥсь государствоосын - 70 аресозь. Кызьы адӟиськом, АПК-ын кылдэм югдур нырысь ик огшоры улӥсьлэсь улонзэ но тазалыксэ шукке. Жаляса верано, Правительство хозяйствоослы али дотациос сётыны быгатэ трос йӧл кыскемзы понна гинэ, одӥг скаллэсь 2000 килограмм басьтэм понна. Туэ сыӵе юрттэт басьтӥз 132 хозяйство (ваньмыз пӧлысь 30 процентэз). Туж умой луысал, дыр, Правительство хозяйствоослы трос нянь будэтэмзы, сӥль дасямзы понна юрттыны луонлыкъёс шедьтысал ке. (Озьы, кылсярысь, лэсьтӥське США-ын). Сыӵе юрттэт басьтыса гинэ хозяйствоос быгатысалзы трос но ӟеч сиён-юон поттыны. Нош али сӥльлэн ӟечлыкез но вылӥ куронъёслы уг тупа, угось пудоез сюдыны комбикормъёс уг тырмо. Глазовысь комбикорм поттӥсь завод кулэезлэсь 6 процентсэ гинэ дася. Музъем сярысь Ӟырдыт малпанъёссэ вераз профессор В. Яковлев, УдГУ-ысь кафедралэн кивалтӥсез. Музъем пумысен Президент дырын-дырын указъёс поттылэ. Со документъёсъя гинэ ужано ке, уд но шӧды, кызьы вань музъеммес мукет кузёос киултозы. Озьы ик луиз, куке солэсь указзэ быдэстон вылысь, куд-ог кылзӥськись предъёс колхозъёссэс быдтыны кутскизы. Мар кароно бен гурт кивалтӥсьёслы, сыӵе йыромытӥсь указъёслы пумитъяськон понна? "Кылзӥськоно туала Конституцилэсь!", - шуиз В. Яковлев. Отын меӵак шуэмын: музъем - калыклэн узырлыкез. Колхозъёс уг быгато музъемез ас мылкыд каремзыя вузаны, угось соослэн со асваньбурзы (собственностьсы) ӧвӧл. Асваньбурен лыдъяське колхозын (совхозын) поттэм ваньбур гинэ. Озьыен, Президентлэн указъёсыз Россилэн Конституциезлы пумит луо бере, соосты улонэ пыӵатыны но уг яра. Вылаз ик, Россиын Музъемъя кодекс но кутымтэ на. Нош мар кароно Удмуртиын музъем сярысь кутэм постановлениын? Соос но Президентлэн указъёсыз бере кутӥсько, соин ик югдурез шонер уг возьмато, валэктӥз профессор. Конституцияя ке ужамы, нокыӵе солань-талань шонаськонъёс уз луэ. *** Бадӟым кенешонлэн ужаз пыриськемъёс огъя кужымен эскерыны выризы туала гурт улонлы тупась ужан амалъёсты. Ваньзы соглаш луизы таӵе малпанъёсын: пичи предприятиос рыноклэс куонъёссэ уг вормо, кылдытоно бадӟым предприятиос; юрттоно пыд йылазы сылӥсь фермер хозяйствоослы; приватизация шуон гурт хозяйствоослы уг тупа, солэсь куштӥськоно; гурт специалистъёсты ӟечгес дышетоно ужан технологиослы. Шуг вераны, кызьы быдэсмозы та кенешонын ӝутэм ужпумъёс, по одӥгзэ верам потэ на. Асьме странамы понна туэ 17-тӥ августэ ортчем "сьӧд" финансовой кризис пайдатэм ӧз луы: шара но кышкатэк вераськыны кутским дорамы ваньбур поттонэз паськытатон сярысь. Та конференциын ӝутэм ужпумъёс но соин герӟаськемын вал. Татьяна Банникова. Туспуктэмъёсыз Владими КАМАШЕВЛЭН. Кенешизы ректоръёс Удмурт кун университетын кык нунал ӵоже кенешизы Урал но Волга котырысь вылӥ дышетскон заведениослэн кивалтӥсьёссы. Вераськон мынӥз кризисэн валче вузъёслэн шуг-секытэ шедемзы пумысен. Кенешонэ пыриськиз Россиысь калыкез дышетонъя министр Владимир Михайлович Филиппов но. Пусъём на: регионъёсын тодматсконзэ выль министр кутскиз Удмуртия бордысен. Ӝыны нунал куспын ортчытӥз куинь пумо пумиськон, юанъёслы валэктон сётӥз. Пайдаё вераськон пӧрмиз Удмурт Республикалэн Правительствояз. Калыкез дышетон удысын азьланяз ӵош ужанъя огкыл гожтэмын. Россиысь 84 вылӥ дышетскон заведениос пӧлысь Ижевскын ортчем кенешонэ пыриськиз ог 70-эз. Удмурт госуниверситет кыкетӥзэ пумита ни Россиысь вузъёслэсь ректоръёссэс. Озьыен, вань мае возьматыны но ма сярысь вераны. Пумиськон ортчиз университетлэн ӵыжак выль ӝутэм куатетӥ корпусаз. Со пуктэмын туала куронъёсъя. Кенешонэз усьтӥз Удмурт госуниверситетлэн ректорез В. А. Журавлев. Вуэм куноослы ӟечкылан кылын вазиськиз Кун Кенешлэн Тӧроез А. А. Волков, со ик вакчияк вераз шаермылэн туннэ нуналэз но экономикаез сярысь. Паймоно кадь, таӵе секыт вакытэ но учёнойёс, преподавательёс выль но выль удысъёс борды басьтӥсько, наукаез одӥг даурысь мукетаз выжто. Интернетэн кусып тупатон бадӟым луонлык сётэ кадръёсты дистанционной амалэн дышетыны. Выль вамыш Удмурт университетын пыӵа ни. Со сярысь ивортонэз люкаськемъёс сак кылзӥзы, асьсэлэсь малпанъёссэс веразы. Зэмен но, гуртын но пукыса вылӥ образование басьтыны луэ ни, ӝӧк вылад компьютеред гинэ мед луоз. Куноослы университетмы кельшиз, синмаськизы татысь выль амалъёслы но. Кенешонлэн мынэменыз но отын ӝутэм ужпумъёсын газет тодматоз вуоно номераз. Л. МЕДВЕДЕВА. Фотоез В. Камашевлэн. Правительствоын пумиськон но огкыл гожтон. Гажано анайёс! Туэ Россиын нырысьсэ пусъё Анайлэсь нуналзэ. Удмурт Республикаысь Кун Кенеш, Правительство сюлмысьтызы ӟечкылало Удмуртиын улӥсьёсты та праздникен. Гажано нылкышноос - анайёс но вуоно анайёс! Тӥляд яратонды пумтэм, улонмы кадь ик. Адямилы ӟеч карыны тыршон, солы шумпотон кузьманы быгатон, лякыт, небыт сямо луон - зэмос семья кылдытыны инъет. Государствоын но обществоын тупан, азинскон люконтэм герӟаськемын семьялэн тупаса, ог-огдэ гажаса улэменыз. Малы ке шуоно, семья - со пичи государство, солэн аслаз йылолъёсыз, сямъёсыз но законъёсыз. Семьяын утисько калык культуралэн выжыосыз. Семьялэн кыӵе луэмез - тӥ киын. Озьы бере, кунлэн, калыклэн ӟеч улэмез юн герӟаськемын тӥляд тыршеменыды, сюлмаськонъёсыныды. Туала секыт вакытэ тӥ, анайёс, лякыт, небыт сямоесь, оскымонэсь, со вакытэ ик - туж ненегесь, со сярысь вунэтыны уг яра. Гажано нылкышноос! Вань сюлмысьтымы сӥзиськом тӥлед юн тазалык, шудбур но ваньзэ умойзэ гинэ, юртъёсады котьку но югыт, шуныт мед луоз! Удмурт Республикаысь Кун кенеш. Удмурт Республикаысь Правительство. СПОРТ Йӧ но ӟырда "Ижсталь" хоккей командаез шаерамы ӟеч тодо, солэсь нюръяськемзэ-шудэмзэ уно адямиос сак чаклало. Хоккеистъёсмы но "висисьёссы" азьын пунэме уг кылё. Командаысь кӧня ке кужмоосыз спортсменъёс кошкизы ке но, егитомем "Ижсталь" задор нюръяське. Берло шудонъёссэ со дораз Лениногорскысь "Нефтяникен" ортчытӥз. Кык ӝытаз ик асьме пиосмы кунооссэс "канжатӥзы", 3:1 но 4:1 лыдын вормизы. Та пумиськонъёс бере "Ижсталь" азьпала потӥз. *** Тупен хоккей шудонъя Воткинскысь "Знамя" командаез тодӥсез сокем трос ӧвӧл. Миым нырысетӥ лигаын вормыса, туэ нырысьсэ со кужмоосыз пӧлын нюръяське. Нырысетӥ кык шудонзэс Удмуртиысь пиос келязы. М. КУЗЬМИН. ШӦКЫЧ Возьмаськись "косой" вылэм Туэ кезьыт куазь асьме доры шуак гинэ вуиз. Кин толлы дыраз ӧз дасяськы вал, шуге-леке усизы, ява! Тылпуос сярысь верасько мон. Кӧня изъян адӟоно луиськомы "горд атасэн" сэрен! Тылэд уго номыре уг жаля - сутэ, пеньлы пӧрмытэ, тазалыкмылы изъян вае. Малпаськиз вал меда Ижевскысь Тимирязев ульчаысь 19 номеро юртысь "Лузгин" магазинлэн кузёез, лавкаяз тылпу ӝутскоз шуыса. Солэн возьмаськисез Андрей Косых туэ 23 ноябре, оло "косой" вылэм, оло сазь - созэ тодӥсь ӧвӧл ни. Но электрокужымен шунтӥсь вунэм гурез пеньлы пӧрмытӥз телевизорез но, магнитофонэз но, кӧлан кроватьсэ но. Ӵынэн сьӧд моко кадь луизы борддоръёс, вӧлдэт, мукет ваньбур. Магазин кузё возьмаськисьсэ табере судэ сётэм, шуо. Дас вить ноябре вунэтыса кельтэм электрогур зол гинэ изъян ваиз Камбаркаысь ВАЗ- 2113 автомобильлэн кузёезлы. Гурез нырысь выжез сутэм, собере тыл машина борды кутскем. Табере "Жугульзэ" тупатыны-выльдыны гинэ кулэ луоз 15 сюрс манет. Кытӥяз тылпу дыръя серемес учыръёс но луыло. Зэм, кузёезлы серемен йырин ӧвӧл. Таиз учыр алигес вал Кизнер ёросысь Удмурт Сарамак гуртын. Кыӵе ке сыӵе Николаев гражданин ассэ куро кабанэн шунтыны малпам. Курытсэ мекалтэмез бере, куро вӧлдэм но ачиз супыр-супыр умме усем. А-а, самой кулэзэ вераны вунэтӥсько вал! Куро люкен артэ самой со Николаев шуон "Москвич" автомобильзэ пуктэм. Ӵын потон гумы ӟырдамын вылэм. Озьы куро но гомӟиз, машина но изъянмиз. Ярам, коть кузёез пӧсь тылэз шӧдыса вуэм, быгатэм ик пегӟыны. Тӥни сыӵеесь гинэ огшоры учыръёс кадь. Но котькудӥз понна янгыш луэ адями. Солэн чакласькымтэез, суп-сап выремез дуно усе. Н. ИЛЬИН. Кун Кенешлэн сессиез Эскерон-а, кышкатон-а? Та секыт но бадӟым вераськонлы дасяськон кема мынӥз. Озьы ке но, Кун Кенешлэн азьвыл чакламтэ 21-тӥ сессиезлэн ужез кутсконаз ик ӵемтӥз, депутатъёс огкылэ вуымтэен. Эскероно ужпум одӥг: Удмурт Республикаын кылдэм социально-экономической но политической югдур. Вераськизы Правительстволэн Тӧроезлэн нырысетӥ воштӥсез Юрий Питкевич, Удмурт Национальной банклэн кивалтӥсез Равиль Каримов но Кун Кенешлэн Тӧроез Александр Волков. Правительстволэн докладэзъя депутатъёс трос гинэ юанъёс сётӥзы, котькудӥз валаны выре: малы Удмуртия вань удысъёсъя арысь аре ялан уллане ваське? Малы, куд-ог регионъёсын сямен (кылсярысь, Саратов, Самара областьёс) Удмурт Правительство ас калыксэ кризислэсь утьыны ӧз быгаты? Кин кыл кутоз дунъёсын шудэм понна? Гурт хозяйствоын ужасьёслэн самой лек висёнзы - поттэм продукцизэс дунтэм дунын басьтон. Ку татын радэз луоз? Трос юанъёс сётэмын вал электрокужым но газ, нылпи пособиос но пенсиос тырон ласянь. Котькудӥзлы валэктон понна, Юрий Степановичлы кык час пала трибуна сьӧрын сылоно луиз. Валамон, сомында азэм пӧськыосты кыл вылын гинэ уд эмъя. Вылаз ик, данакез шуге-леке вуон учыръёс герзаськемын Центрен, электрокужым но газ сётон ик. Таизъя сессилэн кыкетӥ нуналаз Правительстволэн Тӧроез Павел Вершинин пырак шуиз: - Мон малпамъя, электрокужымез лябӟытыса регионъёслы висъян юри малпаса нуиське. Со вуттоз кышкыт адӟонэ: дугдозы вань предприятиос, ужамысь дугдоз быдэс промышленность. Удмурт Республикаысь Кун Кенешлэсь кызь куинетӥ сессизэ люкан сярысь Удмурт Республикаысь Кун Кенешлэн Постановлениез Удмурт Республикаысь Кун Кенеш пуктэ: Удмурт Республикаысь Кун Кенешлэсь кызь куинетӥ сессизэ люкано 1998 арын 16 декабре Ижевск городын. Удмурт Республикаысь Кун Кенешлэн Тӧроез А. А. Волков. Ижевск город. 1998 арын 17 ноябре. �712-И. ШӦКЫЧ Чача меда? Миым, Выль арез пумитаны шуыса, варманаймес куное ӧтьылӥм. Со кык нуналлы вазьгес вуиз. Валамон ини, со ноку куное буш киын уз лыкты. Таяз учыре но пыжем така сӥльзэ, парсь виртыремзэ, самой таза ӟазегзэ вандыса ваем. Кузь сюрес бере пересь жадем, шӧдске. Вазь ик кӧлыны выдӥз. Уин кузпалэным вераськемзэс шӧдӥ: - Нылы, - шуэ со, - война кутскиз-а, мар-а? Уйбыт ыбылыса потӥзы ук... Чик но кӧлэме ӧйлась!.. - Эн паймы, анай, - валэктэ Анютае, - милям Выль ар азьын уйлы быдэ озьы ыбылӥсько. Пиналъёслы выль шудон малпаллям. Китайысь ваиллям шуизы кадь... Та кутсконэз гинэ ай! Выль ар уе уката зол ыбылӥськозы. - Нош кызьы умме усиськоды? - Ми, анай, солы дышемын ни... Варманай Выль арез ми дорын ӧз пумита. Гуртаз бертӥз... Берло аръёсы, зэм но,асьме доры пӧртэм пиротехника шуонзэс вутто. Со пуштылӥсь, тылын пазяськись, вузӥсь, тэтчась, ӝуась арбериос. Ваньмыз сямен со ваемын Китай палъёсысь. Ӵем дыръя сыӵе "шудонъёслэн" инструкцизы но, лицензизы но уг луы. Соин сэрен трос вал ини сӧсырмон учыръёс, потылӥзы тылпуос. Алигес вузкарон удысэз эскерись инспекция Ижевскысь магазинъёстӥ ортчиз. Пуштылӥсь "чачаослы" лицензиоссы ӧй вал. Озьыен, ум тодӥське кыӵе пуштылӥсь шудон чуртналозы асьмелы? Нош Россия Федерацилэн туэ 16 сентябре кутэм законэзъя пиротехникалы одно ик лицензия луыны кулэ. Соин ик, басьтэмдылэсь азьло нырысь чаклаське. Б. НИКИТИН. Лябӟем гердэз юнматон понна Алигес Ижевскын общественной огазеяськонъёслэн конгрессы ортчиз. Та ужрадлэн кулэлыкез сярысь люкаськемъёс азьын вераськиз Г. П. Овчинников, Удмуртиысь Интеллигенцилэн союзэзлэн кивалтӥсез. Со ик конгресслэсь ужзэ но нуиз. Кивалтон ёзъёс калыклэсь люкиськемын, соослэн данзы ыштэмын, шуиз Геннадий Петрович. Адямиос нокинлы уг оско ни. Со дыре ик калык огазеяськонъёслэсь куронъёссэс государство быдэстыны уг быгаты. Властьлэн кужымез лябӟемын бере, быгатоз шат со юрттыны? Калык но власть куспын лябӟем гердэз юнматон понна, кыӵе ке но амал шедьтоно. Со понна конгрессын кылдытэмын вал Общественной палата. Татчы пырозы ог-огзылы матысь огазеяськонъёслэн огъям советъёссы. Туннэ нуналлы отын ужан сярысь мылкыдзэ вераз ни 14 совет, кылсярысь, профсоюзъёслэн, нылкышноослэн, ожысь но ужысь ветеранъёслэн, егитъёслэн но нылпиослэн, мукет огазеяськонъёслэн. Та ёзъёслэн кивалтӥсьёссы ужалозы Общественной палаталэн секретариатаз. Солэн ужаз пыриськыны быгато аскоже кивалтон удысын но иворъёсты вӧлмытӥсь ёзъёсын тыршисьёс. Кыӵе ужъёсын вырыны малпа Общественной палата? Нырысь ик со сюлмаськыны кулэ, калыклэсь мылкыдзэ кивалтӥсьёс дорозь вуттон понна. Нош кивалтон ёзъёс палатаез тодматылыны кулэ вуоно законъёслэн инъетъёсынызы, ивортылыны бюджетлэн быдэсъяськемез сярысь. Общественной палата озьы ик эскероз законъёслэсь уже кутӥськемзэс. Со сяна, ас мылкыдзэ вераны быгатэ кун властьлэн но мукет кивалтон удысъёслэн ужамзы пумысен. Быръёнъёс дыръя валче ужан сярысь нимысьтыз вераськон ӝутэмын ӧй вал ке но, тросэз валазы, Общественной палатае пырем огазеяськонъёс та ужлэсь уз палэнске шуыса. Зэм, огазеяськонъёс азе калык пӧлын кун политикаез нуон сярысь ужпум пуктэмын бере, быгатозы шат соос та ужлэсь мозмытскыны. Конгрессэ лыктэм адямиослэн ӝожтӥськонъёссы огвыллемесь вал. Соиз валамон - туала улон калыкез кекатӥз ини. Тани мар шуизы куд-ог вераськисьёс. С. Кондратенков, Удмуртиысь инвалидъёслэн ассоциациенызы кивалтӥсь: - Туж жаль, туннэ та ужрадэ городлэн администрациысьтыз но, Правительствоысь но, Прокуратураысь но адямиос лыктӥллямтэ. Озьы ик Лисина но, Андреева но милям ужпумъёсамы ӧз на выйылэ... В. Сковородников, Россиысь инвалидъёслэн огазеяськонзылэн Удмуртиысь ёзэныз кивалтӥсь: - Удмуртиын али 98 сюрс сӧсыр мурт лыдъяське, 6 сюрсэз со пӧлысь - нылпиос. Кемалась куриськом ни инвалидъёслэсь тазалыксэс юнматонъя центр кылдытыны. Солы шедьтӥм ни вал буш сылӥсь нылпи садлэсь юртсэ но. Вазиським Ваньбуръя кун комитетлэн тӧроезлы С. Касихинлы. Юрттыны пумит луиз, со нылпи садын, пе, вузкаронъя центр усьтомы. Но та дырозь отын нокыӵе ужъёс уг мыно, нош юрт пумен куашка ни. Кивалтӥсьёслы сӧсыръёсын пумиськылон понна, оло, нимысьтыз нунал тупатоно? Ужзы озьы пуктэмын Башкириын. Е. Орлов, Удмуртиысь Профсоюзъёслэн федерациенызы кивалтӥсь: - Асьмеос огазеяськыны кулэ, улонмылэсь шуг-секытъёссэ вормон понна. Эскероно, кызьы адямилы улыны юртто Правительство, Кун Кенеш. Кылсярысь, соос асьмеды оскыто, республикаямы сиён-юон тырмыт шуыса. Но малы бен сыӵе вормонтэм дунъёс тупатэмын? Та выллем ужпумъёсты калык но чакласа возьыны кулэ. Тӥни та ӧртӥ ке кошкиз Общественной палаталэн ужез, соку Профсоюзъёслэн федерацизы но солы ужаны юрттоз. В. Михайлов, врач: - Эсэпсэ валатэк будо эмъяськон дунъёс, нош власть возисьёс чал-чал пуко. Туннэ начаръёс пӧлы пыртыны луэ ни 70 процентсэ эмъясьёсты. Кылем арын 60 врач ӵужектонэн но туберкулёзэн висиз. Соосты висёнъёслэсь утён ужъёс, кылсярысь, страхование ик, государствоен радъямтэ. Ваньмыз та ӝожтӥськонъёс кисьтӥськизы Кун Кенешлэн Тӧроез А. Волков вылэ гинэ, угось мукет вылӥ кивалтӥсь ёзъёслэн адямиоссы та ужрадын ӧй вал. Соин ик власть возисьёсын кусыпъёс та конгресс бере юнмалозы шуыса, туж осконтэм кадь потэ. Малы бен асьмеос таӵе улонэ вуим шуыса юанлы А. Волков валэктӥз: быръёнъёс дыръя, пе, ӧжытгес янгышъёс лэсьтоно. Т. БАННИКОВА. ВАЛЭКТЭ ЮРИСТ СЭРЕГЕЗ НУЭ АДВОКАТ ЛИЛИЯ ШКЛЯЕВА Улон интылы черод? Ужан интыямы али выльдо улон интылы кулэяськисьёслэсь черодзэс. Оген анайлы тупатэмын-а кыӵе ке льготаос? С. ГОЛУБИНА. Та ужпумез радъя РСФСР-лэн Улон интыя кодексэз. 28-тӥ ёзэт (статья) вера кунлэн юртъёсаз квартираос сётон сярысь. Улон инты курыны мугъёс гожтэмын 29-тӥ ёзэтын. Соос таӵеесь: 1. Семьяысь котькуд адямилы 9 квадрат метрлэсь ичи усе ке (Удмуртиын). 2. Юрт уг тупа ке юри юнматэм санитарной но технической куронъёслы. 3. Квартирае кӧня ке семья пыремын но пӧлазы вань ке ӵош улыны луонтэм секыт висисьёс. 4. Артэ но висъямтэ комнатаысь адямиос - куспазы ӵыжы-выжыос ӧвӧл ке. 5. Огъя улонниысь (общежитиысь) адямиос, ужаны но дышетскыны огдырлы кутэмын ӧвӧл ке. 6. Кунлэн, улон инты лэсьтӥсь кооперативлэн, нимаз муртлэн юртъёсазы кема дыр ӵоже улӥсьёс, кузёлы со понна дун тыро ке. 7. Кунлэн юртаз улӥсьёс, отын благоустройство тырмыт ӧвӧл ке (улон интылэн быдӟалаез лыдэ уг басьтӥськы). Кыӵе луыны кулэ та городын яке гуртын благоустройство шуон? Сое тупатоно кивалтонъя интыысь ёзъёс. Озьы валэктэ Удмурт АССР-ысь Министръёслэн Советсылэн но Удмурт профсоюзъёслэн областной советсылэн 1984-тӥ арын 30-тӥ августэ кутэм 231 номеро постановленизы. Отчы воштонъёс но ватсанъёс пыртэмын 1991-тӥ арын 20-тӥ мартэ. Улон инты висъяське черодъя. Черодтэк но нырысетӥ черодын сое басьтӥсьёс понна кылдытӥсько нимысьтыз списокъёс (33-тӥ 1зэт). РСФСР-ысь Министръёслэн Советсылэн 1984-тӥ арын 31-тӥ июле юнматэм 335 номеро постановленизы улон инты нырысь ик висъяны косэ таӵе адямиослы: а) Быдӟым Атай музъем понна ожысь ӧлексыослы (инвалидъёслы), бырем но ивортэк ышем ожгарчиослэн (партизанъёслэн) но соосын одӥг радэ пыртэм муртъёслэн семьяоссылы; б) Советской Союзлэн Геройёсызлы, Социалистической ужысь геройёслы, Слава, Трудовой Слава, "За службу Родины в Вооруженных силах СССР" орденъёслэн куиненыз ик степеньёсынызы пусъемъёс; в) секыт висисьёслы (списокез юнматӥз СССР-ысь Тазалыкез утёнъя министерство, Ужъя но улон-вылон ужпумъёсъя кун комитет но ВЦ СПС); г) граждан ож но Быдӟым Атай музъем понна но музон ожмаськонъёс дыръя СССР-ез утись армие кемдэмъёслы но партизанъёслы; д) ужысь но ожысь нырысетӥ но кыкетӥ группаен ӧлексыослы; е) адямиез, огъя ваньбурез но правопорядокез утьыкузы но ужын быремъёслэн семьяоссылы; ж) кема дыр ӵоже тыршем ужчиослы (рабочийёслы) но служащийёслы. Та дырез тупато администрация но профком огъя договорен. з) трос нылпиё (кык но ятыргес), анайёслы но оген анайёслы; и) кыкто пиналэн семьяослы; к) школаосысь но техучилищеосысь дышетӥсьёслы. Вылӥ верам адямиослэн асьсэ пӧлын правооссы огкадесь. ТАЗАЛЫК 1 ДЕКАБРЬ - СПИД-ЭН НЮРЪЯСЬКОН НУНАЛ Улон яке кулон Арлы быдэ 1 декабре быдэс дуннеын пусъё СПИД-эн нюръяськон нуналэз. Туэ со ортче "Егитъёс - СПИД-эн нюръяськонэ выль кужым ваисьёс" ӧтён улсын. Та кылъёс эшшо огпол тодэ вайыто: егитъёсын герӟаськемын асьмелэн азьланяз улонмы, соослэн кужыменызы гинэ СПИД дугдытэмын луоз. Нош али та кышкыт висён быдэс дуннеын, тужгес Россиын, выжыоссэ пыдло но пыдло лэзе. Асьме странаын 1998 арын ноябрьлы кылдэм югдурез таӵе лыдпусъёс возьмато: 10125 адямилы ВИЧ-инфекция паласькемын, СПИД-эн висисьёс пӧлысь 320 мурт улонысь кошкиз, таос пӧлын - 92 нылпи. ВИЧ-инфекциез нуллӥсь анайёслэсь 112 пинал вордӥськиз. Улонын та лыдпусъёс эшшо но бадӟымесьгес, угось СПИД-эн висён учыръёс ваньмыз ик шараямын ӧвӧл на. Удмуртилы бускель улосъёс но СПИД-лэсь утиськыны ӧз быгатэ. Кылсярысь, Пермь областьын 52 адями висе, Татарстанын - 49, Башкортостанын - 36, Киров областьын - 15 мурт. Асьме шаерын та вакытлы шараямын ВИЧ-инфекциез нуллӥсь 3 мурт. Но нокин но вераны уз быгаты, кӧня адями, зэмзэ но, висе. Угось ӵем дыръя адями черламез сярысь уг тоды. СПИД-эн висё егитъёс но мӧйыос, городын улӥсьёс но гуртоос. Солэсь уг утё эмъюмъёс, прививкаос. Данакез учыръёсы адями ачиз быръе: висён яке таза луон, улон яке кулон. В. Баранов, СПИД-эн но паласькись висёнъёсын нюръяськонъя центрысь врач. Шӧкыч Улыны быгатыны кулэ Алигес эшелэсь юай: "Туала вакытэ узырмон понна ма лэсьтоно?" Со юанэлы паймыса серектӥз: "О-о, узыр луон понна туэ тӧллэсь кудпалась пельтэмзэ валаны кулэ!" Тани 1992 арын Гайдар калыклэсь сберкассае люкам вань коньдонзэ государстволы кельтӥз. Табере со та сярысь вунэтӥз ни кадь. Нош со азьвыл сямен ик кивалтэ аслаз институтэныз, вылаз ик, нуналлы быдэ асьмеды кызьы улыны-вылыны дышетэ. Зэмзэ ке, кытчы нуо асьмеды сюресъёс: улонэ-а, кулонэ-а? Укмыстонэтӥ аръёслэн кутсконазы кылдӥзы, калык шуэмъя, "выль ӟучъёс". Соку узыръёс, вань коньдонзэс кутыса, туж тросэн басьтӥзы пӧртэм автомашинаос, холодильникъёс, телевизоръёс но мукет дуно арбериос. Нош соослэсь дунзэс уно поллы будэтэмзы бере, вань басьтэмзэ калыклы вузаса, уката узырмизы. Али куд-ог таӵе адямиос депутат но бадӟым кивалтӥсь луизы. Соос огшоры калыклэсь куронъёссэ али быдэсъяны уг быгато ни. Ма, уг но тыршо. Тӥни озьы узыр луон понна нокыӵе академиосыз быдтыны кулэ ӧвӧл, улонлэсь воштӥськемзэ гинэ дыраз валаны кулэ. Мыным 92-тӥ ар кадь ик потӥз туэ 17 август но. Соку долларлэсь дунзэ будэтыны эрик сётӥзы. Озьы палэнысь валютасотэк но секыт улонмес уката зӥбиз. Но вылӥ кивалтӥсьёс веразы вал, кунгож сьӧрысь ваем вузъёс гинэ кӧнялы ке будозы шуыса. Нош долларлэн дуныз возьмамтэ шорысь будэмен, вань вузъёс но дуноязы. Зэмзэ вераса, ваньмыз сураськиз-пожаськиз рыноке выжемен. Со огшоры адямиослы номыр умойзэ ӧз сёты, курадӟон калэ гинэ вуттӥз. Трос сюрс мурт пӧлысь кӧня ке шӧртчиослы гинэ узыр улон сётӥз. Нош тӥ адӟылӥды-а, кызьы али сберкассаосын долларъёсты асьме коньдонэн вошъяло? Отын одӥг яке кык мурт сылэ. Соос юало, тӥ доллардэс асьме коньдонэн воштыны малпаськоды-а шуыса. Адями кык долларзэ воштыны лыктэ ке, куд-ог сберкассаосын оло нош юри солэсь паспортсэ куро. Нош со татчы паспорттэк лыктэ ке, соку ик та воргоронъёс лыктэм адямилэсь долларзэ вошто. Со куспын быгато кӧня ке манетлы асьсэлы коньдон кельтыны. Нош таиз соку ик мукетызлы та долларез дуногес вузаны быгатэ. Та операциен вырись аслыз одно ик пайда кельтэ. Озьы сберкассае туж ӧжыт доллар сюре, ваньмыз со али но "выль узыръёс" киын берга. Тӥни озьы, тон эрекчаны дышемын ке, коньдон жильдыны быгатод. Мон сямен, пинь эмъясьёс но туж трос коньдон басьтыны дышизы. Али котькуд стоматологической поликлиникаын бадӟымесь дунъёс тупатэмын. Эмъюм ваемын, пе, кунгож сьӧрысь. Табере пенсионеръёслы дунтэк протезъёс пуктон малпанэ гинэ кылиз. Ма, мӧйыос чидалозы ни, соос кема уз улэ ни ук. Сопал дуннеын пиньтэк но кӧлыны луоз. В. ВОРОНОВ. Удмурт театрын - классика Драмая кун национальной театр выль сезонзэ усьтӥз ноябрьлэн кутсконаз. Нош та нуналъёсы асьмелэн артистъёсмы учкисьёсызлы выль ужзэ кузьмаз. Сцена вылын пуктэмын Карло Гальдонилэн "Кык кузёослэн ляльчизы" пьесаезъя комедия. Спектакль сӥземын пьеса гожтэм дырысен 250 ар тырмонлы. Сое асьме кылэ берыктӥз Анатолий Григорьев. Спектаклез сцена вылэ поттӥз Рязаньысь режиссёр Роман Маркин. Артистъёс син азямы пуктӥзы дас тямысэтӥ даурез. Вашкала вакытэз уката но оскымон карыны юртто быгатыса быръем костюмъёс. Та ласянь пусйыны кулэ Нина Чепонис художниклэсь ужзэ. Артистъёс сярысь ке верано, ваньзы ик синмаськымон шудӥзы. Но нимысьтыз вераме потэ Е. Сунцоваез (Клариче), А. Карповез (Сильвио), Н. Ветровоез (Смеральдина), Н. Шишковез (Труфальдино). Л. ЮРТЕЕВА. Спектакльысь суредъёс. Владимир Беломорскихлэн туспуктэмъёсыз. Соосты герӟа сюрес Ӵапак кызь вить ар талэсь азьло газетмылэн редакцияз лыктӥз егит суредась Леонид Прозоров. Олокыӵе но ӧтёнъёс-ӵектонъёс вал та дыр ӵоже. Но Леонид Алексеевичлэн сюлмыз бурмиз удмурт газет борды. Кӧня сюрс иськем сюрес ортчемын, кӧня суред дасямын - созэ нокин но туннэ вераны уз быгаты, дыр. Лэсьтэмын туж трос. Юнме шат Прозоров эшмы кутэмын Россиысь художникъёслэн огазеяськоназы, юнме шат солы сётэмын "Удмурт Республикаысь искусствоосъя дано ужась" ним, юнме шат со луиз асьме шаерысь кун премилэн лауреатэз? Тужгес но ӵем пота суредасьмы вордскем палъёсаз - Селта ёросэ. Кылем арын со татын адӟытон но радъяз. Выставкае вуттэм уно ужъёс пӧлысь данакез сӥземын вал бӧлякъёсызлы. Алигес Леонид Алексеевич нош вуылӥз дор палаз. Синмаськиз Выль Моньяысь шофёрлы Евгений Николаевич Анчуковлы. Соиз 30 арлэсь кема ни руль сьӧрын ужа. Ялан питран вылын. Суредасез но, водителез но герӟа сюрес. Котьку но со вольыт мед луоз, эшъёс! И. ЛЕБЕДЕВ. Евгений Анчуков. Суредэз Л. ПРОЗОРОВЛЭН. Пусйизы газетмес но Та вакытэ шаерамы иворъёсты вӧлмытэ 240 пӧртэм ёз, яке газет-журналъёсты печатлан бордын 50 предприятие ужа. Издательской ужен вырыны эшшо 40 предприятилэн лицензиез вань. Соослэсь ужамзэс ик возьматӥз "Металлург" культура дворецысь адӟытон. Выставкаез радъязы "Удмуртский экспоцентр" акционер огазеяськон, элькунысьтымы Иворъёсъя но печатья министерство, республикаысьтымы Журналистъёслэн огазеяськонзы. Асьсэлэсь ужъёссэс возьматӥзы газет редакциос, теле-но-радиокомпаниос. Татын ик радъямын вал Удмурт кун университетысь социальной коммуникациосъя факультетэн тодматскон. Котькудӥзлы выставкае пыриськем изданилы висъяськиз нимысьтыз сэрег. Отын со нырысь ик возьматыны кулэ аслэсьтыз "ымнырзэ", луонлыкъёссэ, кужымзэ. Со сяна, журналистъёс быгатӥзы ог-огенызы кенешыны, выль кусыпъёс тупатыны. Нырысетӥ нуналаз ик ортчиз бадӟым пресс-конференция. Солэн ужаз пыриськизы Удмурт Республикаысь Кун Кенешысь, Иворъёсты вӧлмытонъя но печатья министерствоысь, Журналистъёслэн союзысьтызы кивалтӥсьёс. Пӧртэм ужпумъёсты эскеремен ӵош, пресс- конференциын таӵе юан но кылдӥз: "Малы журналистъёслэн огазеяськонзылэн ӧвӧл нимысьтыз "сэрегез?" Выставка ужзэ йылпумъяз. Кызьы дунъялоз жюри журналистъёслэсь ужзэс? Куамын сизьым коллектив пӧлысь пусъемын вал 9 газет но 5 телерадиокомпания. "Удмурт дунне" газетлэн редакциезлы сётэмын Диплом но кузьым. Газет материалъёс огазеямын "Гурт - мынам сюдӥсе" рубрикае. Статьяосын, фотодокументъёсын котыр ласянь возьматэмын удмурт гуртлэн улэм-вылэмез, азинсконъёсыз, сюлмаськонъёсыз. Сётэмын журналистъёслэн Г. Романовлэн, Л. Медведевалэн, Т. Банниковалэн, Л. Малыхлэн, Г. Юсаевлэн, А. Шкляевлэн ужъёссы. Нимысьтыз инты висъямын сатиралы но юморлы сӥзем "Шӧкыч" бамлы. Но самой пусйымонэз вал "Удмурт дуннелэн" компьютерен туала технологиосъя дасям ужъёсыз. Озьы ик ӟечен пусъемын "Удмуртская правда", "Известия Удмуртской Республики" кун газетъёс, "Воткинские вести" ёрос газет, "Москва-Ижевск" но "Свое дело" газетъёс. Та ӝытэ "Удмурт дунне" газетлэн валтӥсь редакторез А. П. Шкляев журналистика кема ужамез понна пусъемын Россиысь Журналистъёслэн 80 ар тырмонэзлы сӥзем дипломен. Н. Байтеряков. Правительствоын Алигес Удмурт Правительстволэн Президиумез учкиз 1999 арлы республикалэн бюджетэзлы инъетэз. Со сярысь кенешын вакчияк ивортӥз коньдонъя министр Владимир Бельтюков. Ӟырдыт вераськон мынӥз бюджетлэн расход люкетэз сярысь, угось бюджет удысын тыршисьёслы уждунъя бадӟымесь тыронъёс люкаськемын, нош уксё ӧвӧл. Коньдонъя министерстволэн лыдъямезъя, со понна али 76 миллион манет кулэ. Со сяна, бюджетлэсь расход люкетсэ уката "бадӟыматоз" интыослы юрттэт сётон. Президиум тупен-тупен эскериз бюджетлэсь коньдон кутон люкетсэ шыръян но доход люкетсэ будэтон сярысь. Таяз арняе ик бюджетлэн инъетэз учкемын Правительстволэн кенешаз. Удмурт Республикаысь Пправительстволэн Тӧроезлэн секретариатысьтыз пресс-центр. ТАЗАЛЫК Пужым кадь юн, кызьпу кадь ненег... Кемалась тодмо: котькудӥз будос адямилы ас кужымзэ сётэ. Тодоно гинэ, со кужым тӧдьы-а яке сьӧд-а, йӧнатоз-а яке керӟег мылкыд кузьмалоз-а. Кылсярысь, тыпы - кужмо, юн писпу. Солэсь модоссэ, вайёссэ маялляськод ке, жадем быре, выль кужым пыре. Пужымен лушкем "вераськон", бордаз йӧтскон буйгатэ, керӟег мылкыдэз зӥбломытэ. Ты лысо писпу юрттэ син усёнлэсь, лек сямо адямиослэн урод лэсьтэмзылэсь утиськыны. Сюлэм висёнъёсын курадӟисьёслы пайдаё луоз пужым ягетӥ ветлон, татысь омырен шокан. Нош ӝокыт, пӧсь куазен татчы эн кожалэ, угось таӵе вакытэ пужым вӧлмытэ керӟегъяськытӥсь, пӧсекъяськытӥсь арбериосты. Лабрес бадяр умоезлы оскон, сабырлык кузьма. Юрттэт курыса вазиськыны луэ кызьпулы но - небыт мылкыдо писпулы. Со уте юнме курданъёслэсь, сюлэмшугъяськонъёслэсь. Кызьпу юрт вӧзын будэ ке, адямилэсь кышкытэсь вӧтъёс палэнско, шуо. Но ваньмыз ик писпуос сыӵе ӟеч мылкыдоесь ӧвӧл. Ӝог будэ шуыса, асьмеос юрт котырамы ӵемысь мерттӥськом тополез. Нош со бордаз кыске сьӧд кужымез. Юрт вӧзын будӥсь тополь котыраз улӥсьёслэсь-адямиослэсь, пудоослэсь - кужымзэс тала. Капчиен ортчоно висён но таӵе дыръя кема кыстӥське, я адямиез чылкак шугомытэ. Топольлэн шымыриё мугораз медаз йӧтскылэ пересьёс, пиналъёс. Со дыре ик тополь юрттоз пӧськыосын, яраосын курадӟон вакытэ, висёнлэсь сьӧд кужымзэ аслыз кыскыса. Тӥни озьы, "тӧдьы" но "сьӧд" кужымо писпуос огкадь кулэ луо. Эсэпсэ гинэ валано. Н. ТУРИН. Декретэ улляло... атайёсты "... Нылпилы куинь арес тырмытозь, сое утялтонъя отпуск сётӥськыны быгатэ кызьы ке нылпилэн анаезлы, озьы ик атаезлы, яке мукет ӵыжы-выжыосызлы" (КЗоТ, 67-тӥ). Озьыен, висись ёзэт нылпиез утялтыны яке солы куинь арес тырмытозь дорын пукыны, анай сяна, мукет ӵыжы-выжыос но быгато. Законъя луэ, нош кызьы улонын? Висись нылпилэн атаезлы больничной сёто ик ке, кӧня пыкылонэз кылоно луэ со. Кивалтӥсьёслэн йыркурзы валамон, нош малы пыкыло асьсэос врачъёс? Кузпалы висись пиенымы больницаысь бертыса огпол шуиз: - Больничное потытозь, эсьма, дунтэк отпуске кошкод, пыкылӥсез ӧжыт луоз. Кабинетэ пырыку ик, малы анайды ӧз лыкты шуыса юазы. Ужамды, пе, уг поты но, пукиськоды дорады пересьёс музэн. Пуконо гинэ ке луысал. Ӝыны нунал пӧртэм процедурнойёстӥ, аптекаостӥ кыстаськоно, пиналэз эмъяно-утялтоно. Малы ке мукет странаосын та шоры каньылля учко Нош Швециын, атайёсты нылпиез утялтыны лэзем гинэ ӧвӧл - косо! Отын нимысьтыз "атайлэн толэзез" вань: пиналлы одӥг но ӝыны арес тырмытозь одӥг толэзьзэ одно атай пукыны кулэ. Сое одӥг толэзьлы ужысьтыз мозмыто, нош кышноез одӥг толэзьлы уже пота. Атай пиналызлы куинь арес тырмытозь пукыны мылкыд кариз ке, соку но нокыӵе юанъёс уг кылдо. Пичи нуныен атай тросгес дырзэ ортчытэ ке, соос ог-огзы борды юнгес кыстӥсько, азьланяз валантэм учыръёс шергес кылдыло. Нош кызьы учко сыӵе атайёс шоры асьме дорын? (Юанмылы валэктӥсьёс нимзэс шаряны ӧз лэзе). Нылпи поликлиникаысь валтӥсь ординатор: - Ужамзы потытэк атайёс юри больничнойын пуко ӧй шуысал. Куддыр атай нылпизэ ӵукна яслие нуэ, нош сое больницае ысто. Собере, куд-огез анайёс куддыр нокызьы но уг быгато нылпиенызы больничное потыны: я ачиз висе, я командировкаын луэ, я кыӵе ке мукет азьло ик чаклам ужъёсыз. Собере, анайзы, зэмзэ но, тросгес коньдон басьтэ но ужаны мылкыдыз вань ке, мар отын уродэз? Семьялэн ёрмытэк улэмез нылпилы ик умой ук. Нылпи врач: - Ми солы дышымтэ на, дыр, соин ик анай нылпизэ ӟечгес утялтоз кадь потэ. Лэсьтӥськонъя управлениысь кивалтӥсь: - Зэмзэ ке, сыӵе ужасьёсылы йыркуръяськисько. Нылпиосынызы пукемзы понна гинэ ӧвӧл, асьсэос но больничное кошко ке - быдэс график тӥяське, уж ӝега. Мынӥсь-ветлӥсьёсты нуллонъя одӥгысьтыз управлениысь кивалтӥсь: - Ми пичи нылпиосын кышномуртъёсты но туж ик уже ум кутӥське, эшшо пиосмуртъёс нылпиен пукыны кутскизы на ке... З. ВАХРУШЕВА. Тазалык Эркын шокан - со шуд Тросэзлы анай-атайёслы тодмо, дыр, таӵе суред: нылпизы шӧдтэк шорысь тӧдьыӟектэ, шуласа выллем секыт шока, нырпелесъёсыз но чыртыез золтӥсько, пиналзы уг выды - пуке. Ваньмыз та вера, нылпилэн астма шуыса, валэктэ Татьяна Владимировна СИМОНОВА - республикаысьтымы нылпи больницаысь врач-пульмонолог. Берло дыре быдэс дуннеын астмаен курадӟисьёслэн лыдзы будэ, со герӟаськемын аллергилэн вӧлмеменыз, нош аллергия но астма - люконтэм "эшъёс". Астма дыръя тыысь бронхъёсын воспаление кылдэ. Аллергие вуттӥсь арбериос омырен ӵош пыро бронхъёсы но соосты пуш ласянь "кекато", бронхъёслэн пасьёссы сюбегало, таин валче омыр ичигес вуэ. Асьмеос таӵе учыре шокан пась пытсаськиз шуиськом. Висёнлэсь утиськон понна, солэсь мугъёссэ тодоно. Соос пӧлын нырысетӥ инты басьтэ аллергия - сиён-юонлы, пудо-животъёслы, коркась тузонлы, зынъёслы, кырсь омырлы но вулы... Астма ӵемысь кутске, пыэдэн висем бере. Соин ӵемгес курадӟо тамак кыскисьёс, тамак ӵынэн шокасьёс. Астмаен висись нылпиослы приступ луэ кемагес ужамзы, тросгес бызьылэмзы бере, серекъякузы, бӧрдыкузы, кышкакузы... Озьы ик - куазь туж ик умой ӧвӧл ке, кылсярысь, кезьыт луэ яке зоре ке, температура чаль воштӥське ке, шуом, толалтэ шуныт коркась кезьытэ потэм бере. Таин валче астмаен висись пиналъёсты уг яра пӧсь мунчоын пыртыны, кезьыт куазен педло поттылыны. Нылпиез эмъяно врач эскерем улсын. Висён туж ик пыдло пыремын ӧвӧл ке, со дэмлалоз воспалениез быдтӥсь эмъюмъёсты - вераськон уг мыны антибиотикъёс сярысь. Кылсярысь, нылпилы сётыны луоз кетотифен, умойгес - интал, эшшо ӟечгес - тайлед. Берлоосыз - ингаляторъёс, мукет кылын вераса, омыре пызйыса потӥсь эмъюмъёс. Ма кароно, нылпиды уродмиз, кер-кур шока ке? Нырысь ик, асьтэос эн кышкалэ, собере нылпидэс буйгатыны тырше, мур шоканы косэ. Шокан пасез мед усьтӥськоз шуыса, солэн ымаз яке сальбутамол, яке бератен, яке беродуал пызъёно. Семьяын кык ингалятор луыны кулэ: огзэ коркан возё, мукетсэ анай яке нылпи сьӧразы нулло. Покчиос шонер шоканы уг быгато, соин ик, шуом, сальбутамолэз пызъё пластиковой камерае - спейсере. Сое огшоры 1,5 литръем пластик бутылкалэсь лэсьтыны луэ, йылысеныз 10 сантиметр котыр вандыса. Вандэм интызэ лейкопластырен ляконо, вӧсь медаз кары шуыса. Вылӥ верам эмъюмъёс ки улын ӧвӧл ке, пиналлы тавегил, димедрол, бронхолитин яке эуфелин сётыны луоно. Анай-атайёсты, нылпиосты астмаез эмъян амалъёсын тодматэ, шонер шоканы дышетэ астма-школа. Солэн занятиосыз ортчо нылпосты эмъянъя больницаын котькуд толэзьлэн куинетӥ средаяз. Астма кылдэмлэсь мугъёссэ верамы вал ини. Но огзэ мугзэ нимысьтыз пусъем потэ - со коркась тузонын улӥсь лемтэйёс (клещи). Соос каръясько адями, пудо-живот котыре. Тужгес ярато мускыт, шуныт коркаосты, тузон люкаськем интыосты, валесэ, миндэре пыро. Сиё адями кулэсь, йырсилэсь, пудоослэн гонзылэсь кылем-мылемъёссэс. Тужгес чырмытэсь ӝытазе но уин. Соин ик уноезлэн астмазы та вакытэ аля. Коркась лемтэйёсын тазьы нюръяськоно: 1) небыт мебелез, выж лёгетъёсты, книгаосты, небыт шудонъёсты, мултэс дӥсез нылпилэн улон интыысьтыз, комнатаысьтыз утялтоно; 2) пуныосты, коӵышъёсты ӧвӧл возёно; 3) луонлыкты вань ке, нылпилэн валесаз валёно нимысьтыз басмалэсь вурем валес котырез - чехолъёсты. Асьме аптекаосысь соосты шедьтыны шуг. Но Москвае курон ыстыны луоно таӵе адресъя: 105077, 11-тӥ Парковой ульча, 32/61. Зэм, дунзы куртчылӥське: матрацлы гинэ чехол 110 доллар сылэ; 4) нылпилэсь валес котырзэ арнялы кык пол миськоно; 5) миндэрез гонлэсь но, ваталэсь но медаз луы - синтепонлэсь. Кызьы адӟиськоды, астма - кышкыт висён, но вормонтэм ӧвӧл. О. ВАХИТОВА. ШӦКЫЧ Ву шӧм Иван Васильевич кивалтӥсь луыса ужаз. Котькуд толэзе солы кык литр спирт висъяллязы. Таяз учыре но, спирт басьтыса, графинзэ ӝӧк вылаз пуктӥз. Сейфе ватыны медэ ни вал, ӵапак соку начальниксэ адӟиз. Таиз соку ик кесяськыны ӧдъяз: "Ӵуказе Москваысь делегация вуэ. Нош тӥляд котькытын кырсь, жуг-жаг!" Чурыт кылзэ вераса, спиртэн графин борды кырмиськиз, ву кожаз, лэся, быдэс стакан лэзиз но гульк-гульк! гинэ бушатӥз. Ымныр тусыз но ӧз воштӥськы, стаканзэ ӝӧк вылэ пуктӥз но номыр вератэк ас ужезъя кошкиз. Иван Васильевич "вулэн" шӧмыз пумысен номыр юаны ӧз дӥсьты ни. Гуртаз вуыса, Иван Васильевич спиртэн учыр сярысь кышноезлы вераз. Но тани усьтэм ӧсэтӥ бускелезлэн йырыз мычиськиз. Дэра кадь тӧдь-тӧдь кӧсэктэмын. Макмырен курадӟе, луоз, нош ик. Шкафысь чылкыт вуэн тырмытэм графинэз адӟыса, бускелезлэн синъёсыз ик ӝуатскизы. Нош водка квартираын шапык но ӧй вал. Иван Васильевичлэн кышноез номыр вератэк стаканэ чылкыт ву лэзиз. Бускель куалекъясь киосыныз маялтӥз но капчиен шокчиз. Соку ик кымесаз пӧсям ву шапыкъёс быльыразы, ымнырыз ӵыжектӥз. Эшшо вить пол тау кариз но "Ву шӧм кадь ке но, табере уло ни!" шуыса кошкиз. Иван Васильевич кышноезлы валэктӥз: "Урал та, Урал, нош Уралын спиртэз вуэз кадь юо, вуэз - спиртэз кадь... Мылкыдыд кыӵе луоз". А. КОЛОТОВ. Сутско юртъёс, сутско мушъёс Берло дыре, куазь кезьыт улэмен, тылпу потонъёс будӥзы. Кылем арняе республикаямы 58 ӝуан учыр вал, 2 адями быриз. Дас укмыс пол "горд атас" кузёяськиз, пуэн эстоно гуръёсты но электрооборудованиез умой эскерымтэен. Изъян адӟемын 170 сюрс манет тыр. Тылэн быдтэмын яке изъянтэмын 7 улон юрт, 14 мунчо, 4 юртъер котыр. Кылсярысь, 12 ноябре 2 часын уин Алнаш ёросысь Бигер Кизек гуртын улон юрт ӝуаз. Гурез кема эстэмен но гур котырын ӝуась арбериосты воземен, юрт сутӥськиз. Озьы пожар дыръя быриз кышномурт, нош корка кузёлэн йырыз но пыдъёсыз сутскизы. 14 ноябре 22 часын Юкаменск посёлокысь ужбергатӥсьлэн магазинэз ӝуаны кутскиз. Вузъёсты возён мешокъёс эстӥськись гурлы матын луэмен, тылын сутӥськизы вузъёс, магазинлэн пушкыз - ваньмыз 5 сюрс манетлы. Со нуналэ ик Шаркан ёросысь Малиновка гуртлэсь одӥг но ӝыны иськемлы палэнысь муш бакчаын тылпу потӥз. Тылын быризы улон юрт, мунчо, мушъёсты толйытон юрт но 50 муш уморто. Кунысь тылпулэсь утиськонъя служба предприятиослэн, учреждениослэн кивалтӥсьёссылы но республикаысь гражданъёслы вазиське, ӝегатскытэк тылпуослэсь утиськонъя ужрадъёс кутыны курыса. Шуныт но ву сётӥсь гумыосты утелэ кезьытъёслэсь, кынмизы ке, сое пӧсь вуэн гинэ шунтоно. Чаклаське гурдэс эстыкуды, электрооборудованиез кутыку, кошкыкуды эн вунэтэ соосты кысыны. Юртъер, колонкаос, гидрант азьысь лымы котьку но сузямын мед луоз. Н. УГЛОВ, Элькунысьтымы Тылпуослэсь утиськонъя управлениысь отделлэн кивалтӥсез. АНАЙЛЭН НУНАЛЭЗ Атай анай ӧвӧл ке но... Селтаын Анайлэсь нуналзэ пусйизы ни 17 ноябре ик. Культура юртэ люкаськылӥзы районысь пӧртэм арлыдо нылкышноос - анайёс. Вераськон мынӥз семьяын кусыпъёс сярысь. Люкаськемъёслы возьматэмын вал "Шудоесь-а нылпиосмы?" видеофильм. Геройёсыз - асьсэос ик селта нылкышноос, соослэн пиналъёссы. Котькыӵеосыз анайёс вань соос пӧлын - синмаськоноосыз но, нылпиоссы шоры киынызы шонтэмъёсыз но. Адӟем карымонэз со но - кыказ семьяын нылпи юрт кылдытэмын. Селтаос доры пумиськонэ ветлӥзы республикаысьтымы нылкышно огазеяськонлэн кивалтӥсез Зоя Степнова, та огазеяськонысь секретарь Мария Жилина но врач психотерапевт Сергей Реверчук. Культура юртысь самодеятельной артистъёс возьматӥзы концерт. Пумиськон ваньмызлы ик анайёслы кельшиз, мылкыд каронзы но вал - атайёс понна но та выллем ужрад ортчытоно. Тау, нылпи будэтэмдылы Пурга районын анайёсты данъяны чакламын котькуд гуртын сямен. Школаосын, библиотекаосын, клубъёсын ортчозы анайёсын пумиськонъёс. Нимысьтыз саклык висъямын солдат анайёслы, трос нылпиё анайёслы, ужын данэ потэмъёслы, ог-огзылэсь ужзэс азьланьтӥсь семьяослы. Школаосын нылпиос гожтозы анай сярысь сочинение. Та нуналлы ик сӥземын "Садын но бакчаын" выставка, киужъёсъя конкурсъёс. Анайёслэн куремзыя, интыысь радио сётоз концерт. Районысь администрацилэн но ёрос кенешлэн нимыныз устоосызлы но адӟем карымон анайёслы сётэмын тау карон гожтэтъёс. Шуныт кыл но бурдъя Шаркан. Анайлэсь нуналзэ пусйыса, интыысь радио пыр ортчиз "котырес ӝӧк" сьӧрын пумиськон. "Нылкышнолэн тазалыкез" ужпумъя вераськонэ пыриськизы районысь акушеръёс-гинекологъёс, психологъёс, калыклы улон-вылонын юрттэт сётон удысын ужасьёс. Вераськисьёс одӥг малпанэ вуизы - нылкышнолэсь, анайлэсь мугор висёнъёссэ гинэ ӧвӧл эмъяно, ванё-буро луон вылэ гинэ но ӧвӧл пыкъяськоно, тросгес саклык висъяно мылкыдзэ, лулзэ эмъянлы, сюлэмзэ шуныт кылын небӟытоно. Вить но солэсь трос нылпи будэтӥсь 36 семьялы районысь администрацилэн нимыныз ыстэм гожтэтъёс-ӟечкыланъёс анайёслы та нуналлы дуно кузьым луозы. Дӥьскутэд мылиз - юртты бускеледлы Юкаменскын Анайлэсь нуналзэ пусйизы, "Юрттом ог-огмылы" вузкарон ярмарка ортчытыса. Кулэяськись семьяослы шуыса, дунтэм дунын вузаны юкаменскъёс огинэ люказы трос пӧртэм дӥськутъёс, пыдкутчан. Нош ӝытазеяз анайёсты Культура юртын шулдыртӥзы искусствоосъя школаын дышетскись пиналъёс. Киясаын саесъёссы пужалтэмын Киясаын котькуд гуртын радъямын вал нимаз кыӵе ке но пумиськон, анайёсты ӟечкылан ӝыт. Отын ик вал шулдыръяськон но, анайёсты данъян но, пӧртэм викторинаос, конкурсъёс, спорт ӵошатсконъёс. Школаын дышетскись нылпиос 1 июньысен пырисько ни "Мынам семьяе - мынам узырлыке" темая сочинение гожтон конкурсэ. Районысь "Знамя труда" газет ӝыны ар пала печатлаз ни нылпиослэсь устооссэ ужъёссэс. Конкурслы йылпумъянъёс лэсьтэмын луозы Анайлэн нуналэзлы. Л. МАЛЫХ АНАЙЛЭН НУНАЛЭЗ Кӧня дуныз "сьӧлыкамлэн"? Шуккет вуиз шӧдтэк шорысь. Турнаса кошкиз адямиослэсь кужымзэс, осконзэс, коньдонзэс. Мӧйы муртъёс гинэ ӧвӧл, кӧтын будӥсь нуныос но куалектӥзы-шымырскизы. Куд-огез табере соос югыт дуннеез адӟытэк ик бырозы. Улэм потэмзэс вераса, золгес ӵыжаськисьёссэ шат мумызылэн сюлэмыз валалоз ик. Но ас понназ йыраз бергатоз: кӧня тыр со мыным усёз? Угось "сьӧд" август нуналъёс бере, куд-огез нылкышноос вайыны малпам нунызэс но куштоно кариськизы. Отысь но татысь кылӥське ни, вордэм нуныоссэс нылпи ваён юртэ келлян учыръёс йыло, нош нуны вайыны быгатӥсьтэм анай-атайёс приютэ шергес кожало шуыса. Куать ар ӵоже странаямы мырдэм но кызьы нылкышноосты дышетӥзы ни вал семьязэс радъяны. 1992 арын Удмуртиын 1000 кышномурт пӧлысь 265-ез аборт лэсьто ке вал, 1997 арын со лыдпус 79-озь лэзиськиз. Озьы ик шӧдскымон кулэсмизы быдэ вуымтэос пӧлын нылпи куянъёс, вож нуныослэн но нуны ваись анайёслэн кулон учыръёссы. Озьыен, семья ужпумъёсты радъянъя федеральной программа ӟечен гинэ берытскиз. Висъяськоз-а азьланяз солы коньдон, кыӵе югдур луоз шаерамы кризис бере? Сыӵе юанъёсын ми вазиським республикаысьтымы "Семья" центрлэн кивалтӥсезлы Светлана Петровна КРИВИЛЁВАЛЫ. - Ӵапак со пумысен кенешыны мон алигес Москвае ветлӥ. Программа чакламын 2000-тӥ арозь. Со ас азяз ужпум пуктэ нылпи ваёно нылкышноослэсь тазалыксэс эскерыны, абортъёслэсь лыдзэс кулэстыны, контрацептивъёслэн кулэлыксы сярысь валэктон уж нуыны. Ваньмызлы талы нимысьтыз коньдон висъяськыны кулэ, но быгатом-а сое басьтыны, ӧйтӧд. - Но али тросэз нылкышноос секытомемлэсь утись эмъюмъёсты басьтыны уг быгато ни... - Зэм, сыӵе эмъюмъёс туж дуноязы. Но котькуд семья малпаськыны кулэ: яра-а анайлэн тазалыкез вылын шыръяны? Абортэ ветлон, со бере эмъяськон трослы дуногес усёз. Малы ваньзэ кышномурт гинэ чиданы кулэ, ӧжыт мед сюлмаськоз воргорон но: ватсаса коньдон поттэмез уг ке луы, мед шыръялоз маке мукетыз вылын. - Кӧня ке ар талэсь азьло асьмелы контрацептивъёсын гуманитарной юрттэт ысъязы Германиысь но Голландиысь. Азьланьын кыӵе ке юрттэт чаклаське-а? - Али возьмаськом "Шеринг" фирмалэсь "Микрогенон" эмъюм ыстэмзэ. Дунтэк сётъяны чакласьком уксёлы тужгес но ёрмись кышномуртъёслы но быдэ вуымтэослы. - Вуоз-а со гуртысь кышномуртъёс дорозь? - Эмъюм ыстэмын луоз котькуд ёросэ. Семья ужпумъёсты радъянъя кабинетъёс сое тужгес кулэяськисьёсызлы одно ик сётъялозы. - Озьы ке но, эмъюм ваньмызлы уз тырмы. Тӥляд центрдылэн чакламезъя, абортъёс сяна, уз йылы-а "мултэс" нылпиослэн но лыдзы? Али аборт но дунтэк уг лэсьто кадь ук? - Улон интыя юнматэм больницаосын аборт дунтэк ик лэсьто. Но пӧртэм мугъёсъя куд- огез мукет больницае вазиськоно луо. Нылпилэсь куштӥськон, зэмзэ но, дунтэм уг усьы, соин ик, кышномурт дыраз коньдон ке ӧз шедьты, нунызэ вордоно луоз. Ӵемысь сыӵе пинал мултэс луэ - анаез утялтонлэсь аналске, собере, возьмамтэ нуны висись яке ӧлексы вордӥське. Йылозы лушкемен аборт лэсьтон учыръёс но. Кышномуртъёслы верам потэ вылэм: эн быдтэ тазалыктэс, тодӥсьяськись пересьёслы оскыса. Ижысь септической гинекологияя отделение али но нуналлы быдэ сыӵе кышномуртъёсты вутто - 90 процентэзлэн вирзы кошкемысь уг дугды яке воксё сепсис (заражение) кутске. Тросэзлэсь нуныкарзэс (матказэс) басьтоно луэ. - Светлана Петровна, вераны кулэ, дыр, лушкемен аборт лэсьтэм понна кышномуртъёс законъя кыл но кутоно луо шуыса. - Бен. Соин ик семья кусыпъёстэс тӥ кузпалэныды ӵош радъяны кулэ. Тырше кызьы ке но луонлык шедьтыны, секытомемлэсь утиськон амалъёс ӧжыт ӧвӧл. Кенеше врачен, со тӥледлы ӵектоз дунтэмгес но тупамонгес амал. Дунтэмгес усёз, спираль пуктыса. Али соос котькыӵеез вань, но умойгес ыргонлэсь (медьлэсь) лэсьтэмез, со тазалыклы нокыӵе изъян но уг вайы, оскымон но. - Кузпалъяськем муртъёслэн та ужпумъёс сярысь кыӵе но сыӵе валанъёссы вань ни, нош быдэ вуымтэослэн? Тросэз анай-атайёс нылпиосынызы ваче син вераськыны уг дӥсьто ук. - Зэм, малы ке туала анайёс возьдасько нылзылы кышномуртъёслэн аспӧртэмлыксы сярысь валэктыны. Нош 15 аресъем нылзы секытоме ке, янгыш муртэ утчаны кутско. Соин ик котькуд ёросысь семья ужпумъёсты радъянъя центръёс та ужез ас вылазы басьтыны тыршо: школаосы потаса, лекциос лыдӟо, видеофильмъёс возьмато, книгаос вӧлмыто. х х х Африкаысь странаосын вазен дыръя кышномуртъёс, секытэн луэмзы сярысь тодыса, шунды ӝужан вакыт, гурт сьӧразы потыса, кӧтысьтызы нуныенызы верасько вылэм. Улонлэсь секытсэ, лек луэмзэ валэктылӥллям. Туж улэмзы потӥсьёсыз кӧня ке толэзь ортчыса вордскылӥллям, нош лябъёсызгес, секыт улонлэсь кышкась нуныос, усьылӥллям. Ваньмыз Улонлэн законъёсызъя. Али африканкаос гурт сьӧры уг потало ни, шӧдске, больницае мыно - абортъёсъя вань мукет странаосты ортчо. Соослэсь кыдёке кылемын ӧвӧл асьмеос но. Нылпиез Инмар сётэ, шуо. Но сётэмез бере, ачиз уг сюды. Уг луы-а гурт сьӧрлыы потанлэсь азьло ик ваньзэ чакланы? З. ВАХРУШЕВА. Анайлэн вешамез изэз но шунтоз Син азямы эскериськиз вордскымтэ нунылэн улонэз сярысь ужпум: адӟыны кылдоз-а солы югыт дуннеез, яке анаез ӝыныё уретоз улонзэ? Ӧз, таизлы но улэп луллы ӧз удалты. Анай луыны дасяськись пинал нылмурт, йӧназ валэктон сётыны дӥсьтытэк, ас кыл вылаз сылӥз: - Уг, вайыны нокызьы уг быгатӥськы. - Мар бен карод тонэныд, - сётӥськиз врач, - но кызь арняем нунылэсь улонзэ уретон - аслад но тазалыкедлы бадӟым кышкытлык. Кин тодэ, кызьы ваньмыз берытскоз. Нылмурт потэм бере Наталья Алексеевна Харина, республикаысьтымы нырысетӥ больницаысь валтӥсь врачлэн воштӥсез, шаерысьтымы валтӥсь акушер-гинеколог лулӟыса ик валэктӥз: - Тӥни озьы котькуд нунал: анай луыны дасяськись кышномуртъёс, ёрмонлы чидатэк, нылпизылэсь куштӥськоно карисько. Тани таиз шаермылэн кыдёкысь уй палысьтыз вуиз. Бызьымтэ ке но, нырысь-валысь анай-атаез пумит ӧй вал нылзылэн пинал ваёнэзлы. Август бере улон копак мыдланьскиз. Карто кышноос но тросэз берпум толэзьёсаз нунызылэсь куштӥськоно карисько. Наталья Алексеевналэн мадемысьтыз туж ик шумпотымон суред ӧз пуксьы син азе. Но, нылпи ваён та юртысь вож нуныослэн бӧрдэм куараоссы азьланезлы оскон пыӵато ик. Анай луон - со кышномуртлы инкуазен сётэм бадӟым узырлык. Жаляса верано луэ, анайлыкез дунъян но данъян куашкан калэ вуэм странаямы кулэезъя уг шӧдӥськы, уго ваньмыз чӧлско мукет ужпумъёс вылэ. Ярам, 8 Март, Семьялэн нуналэз, Нылпиосты утён нунал вӧзы ватсаськиз на эшшо одӥг праздник - Анайлэн нуналэз. Россия Федерацилэн Президентэзлэн Борис Ельцинлэн 1998 арын 30 январе кутэм "Анайлэн нуналэз сярысь" Указэзъя, ноябрьлэн берпум арня нуналаз Россиын табере арысь аре пусйиськоз Анайлэн нуналэз. Туала вакытэ кылдэм югдур шоры учкыса малпаськод, кышномуртлы, анайлы, нылпилы сӥзем праздникъёс араз эшшо но тросгес мед луозы вылэм, соку та ужпумъёс сярысь вунэтыны куд-ог вылӥ кивалтӥсьёслы (кызьы адӟиськом, соос ваньмыз сямен воргоронъёс) дыр ик ӧй луысал. Уждун басьтонлы оскытэк куд-огез амало нылкышноос нылпи пособилы оскыса пинал но ваёно ӧй кариськысалзы. Табере соиз но ӧвӧл. Югдур азьланяз но тазьы луиз ке, нылкышноос кызьы нылпи ваёнзэс но вунэтозы. Кин-о соку воштоз туала кивалтӥсьёсты? Выльысь берыктоно вылэм трос нылпи вордӥсь но адӟем карымон анайёслы герой ним сётонэз. Асьме шаерамы ик кӧня соос. Верало куд-ог нимъёсты гинэ. Глазовысь Фаина Михайловна Злобиналэн 14 нылпиез, Ижевскысь Тамара Петровна Успенскаялэн, Людмила Алексеевна Федосеевалэн но Татьяна Васильевна Зиминалэн быдэн 11 пиналъёссы. Сомында ик нылпиосыз Сюмси районысь Клавдия Ивановна Кудрявцевалэн. 10 нылпи вордо Можга районысь Татьяна Николаевна Кадрова но Воткинскысь Мария Анатольевна Гребенкина. Трос соос, геройлыко анайёс но сыӵе ик геройлыко атайёс. Нылпиоссэс соос будэто асьсэ кужымзылы оскыса. Сыӵе ик оскон, кужым но юнлык сӥзем потэ шаерысьтымы ваньмыз ик анайёслы. Л. МАЛЫХ. Али котькытысь кылӥськод республикаысьтымы сӥль но йӧл-вӧй но солэн палэназ кошке шуыса. Шат сое ӝегатыны нокызьы уг луы ни? Тани, Татарстанын, пе, одӥг автомашинаез но эскерытэк потыны уг лэзё... (Гожтэтысь). Муртлэн скалэз но йӧло, Парсьёсыз тросэн йыло, Кызьы меда алдано, Маин-ай гочатоно?.. Суредаз Л. ПРОЗОРОВ. ТАЗАЛЫК БЫГАТӤСЬКОДЫ КЕ - ЮРТТЭ Кин шуиз: быриллям кибашлыос... Кӧня ке ар талэсь азьвыл Ижевскысь медициная академиысь профессорлы В. Н. Савельевлы вазиськизы В. П. Шляпин - мотозаводысь инженер-конструктор но мотозаводлэн огез кивалтӥсез, юрттэт курыса. Соос малпаллям аспӧртэмлыко эмъяськон оборудование кылдытыны, магнит бусылэсь (магнитное поле) луонлыкъёссэ кутыса. В. Савельев пумит ӧз луы - выль машинаез лэсьтыны наука ласянь инъет дасяз. Озьы 1991 арын вордскиз "Бладгурт" нимо магнитотерапевтической установка (В. Савельев вордскиз Алнаш ёросысь Бладгуртын). Москваысь патентъёсъя институт установкаез вылӥ дунъяз, нош шаерысьтымы Тазалыкез утёнъя министерство соин ужаны лицензия сётӥз. Та вакытэ "Бладгурт" ужа Ижевскысь тылобурдо вордон фабрикалэн больницаяз. Со вирсэр висёнъёсты эмъя, кылсярысь, орсмем вирез кизермытэ, вирсэрлэсь тымиськем интыоссэ усьтэ, лы висёнъёсты йӧнатэ. Со сяна, циститлэсь, простатитлэсь, мастопатиялэсь, гайморитлэсь, остеохондрозлэсь но трос мукет висёнъёслэсь эмъя. Со юрттэ нылпи вайыны быгатӥсьтэм нылкышноослы. Куректон-кайгуэ усем адямилэсь (депрессия вакытэ) мылкыдзэ каньыл каре. Пыктосэн курадӟисьёслы пайда вае "Бладгурт" установкаез пуктыны луоно ёрос больницаосы, санаторийёсы, шутэтскон юртъёсы. Но та вакытозь шаерысьтымы одӥгез завод но "Бладгуртэз" поттон борды ӧз басьтӥськы на - коньдон ӧвӧл. Установкаез кылдытӥсьёс вазисько таӵе ӵектонэн: оло, кыӵе ке организация басьтӥськоз сое поттон борды. "Бладгуртэз" дасяны луоз огшоры мастерскойын но, токарной но фрезерной станокъёс гинэ мед луозы. Одӥгзэ установкаез авторъёс вузаны быгатозы. Юанъёс, ӵектонъёс кылдӥзы ке, вазиськоно Владимир Никифорович Савельевлы 78-84-83 телефонъя. Секталаез - ог 500 килограмм. Дуныз - 30 сюрс манет. Кызь тямыс герое пӧлысь огез Ӟеч адями доры сюрес ачиз вуттэ, дыр. Нош мар бордысен кутскиз мынам соин тодматсконэ? Кызь кык ар талэсь азьло, 16-тӥ октябре, Калиста Андреевна Роготнева ӧтемъя, мон вераськи Дэбес педучилищеысь студентъёс азьын - 35тӥ стрелковой дивизилэн ортчем сюресэз но комдивен Александр Кроникен пумиськылэмъёсы сярысь. Ӝыт мон фронтэ ветлэм кылбурчи Степан Широбоков дорын куноын вал. Солы кузьмай "Они защищали Брестскую крепость" нырысетӥ книгаме. Дэмлай солы та темая пьеса гожтыны. Степан Павлович - уг тодӥськы ни, кыӵе муген - уг быгатӥськы шуиз... Но со туж кулэен лыдъя вал мынэсьтым утчаськонъёсме. Вӧзысьтымы геройёс сярысь тодыны кулэ, уката ик будӥсь нылпиос, шуылӥз. Тӥледлы, Виктор Петрович, пумиськоно, пе, вал пинал дыр эшеным Николай Шикаловен - со Шарканын улэ. Озьы бере, нош сюрес вылэ... Куатьтон арес вамен выжем та йыгмыт адями мыным тодмо кадь потӥз. "Асьмеос пумиськылӥмы 1968-тӥ арын, мыным 55 арес тырмыку, - тодам вайытӥз Николай Михайлович, мынам Августа кышноелэн братэз Александр Степанович Шамаев дорын". Шамаев но Шикалов Сталинград дорын ӵош ожмаськиллям. Александр Степанович, Як.- Бодья ёросысь Кыкваысь гажано адями (берло со луиз Удмуртиысь школалэн дано дышетӥсез), 1944 арын 26 мартэ нырысьёсыз пӧлын выжиз Румыниен кунгожез, Эльба дурын йылпумъяз ожмаськон сюрессэ. Нош мынам туннэ мадёнэ Н. М. Шикалов сярысь. Тани кызьы со тодаз вае пинал дырзэ: - Ми Степан Широбоковен дышетскыны мынӥм вал Можга педучилищее. Нош кык ар ортчыса выжим Дэбесэ - татын но усьтӥзы дышетӥсьёсты дасясь училище. Капчи ӧй вал, куддыр сютэм ке но ветлӥм, тросгес тодыны тыршон мылкыдмы котьмалэсь бадӟым вал. Милям визьмамы пыӵатӥзы: трос тодӥсь-валась мурт гинэ калыксэ югыт азе поттыны быгатоз. 30-тӥ аръёсы бадӟым уж нуиськиз, котькуд егит адями Родинамес утьыны дась мед луоз шуыса. Горд Армие ветлон пиос понна вылӥ малпан, дан вал. Военной профессия басьтон, кышкасьтэм луон сярысь малпалляз Николай Шикалов но. Службазэ со кутскиз Забайкальской военной округын Чита дорын. Удмуртиысь красноармеецлэсь нодлыко луэмзэ, приказэз чот-чот быдэсъямзэ синйылтӥзы - полковой школае дышетскыны кутӥзы. Озьы, 60 ар талэсь азьвыл, бугырес 1938 арын, удмурт пилэн гимнастёрка петлицаосыз вылэ пуксизы командир луэмзэ возьматӥсь знакъёс. Вуоно араз ик япон самурайёс мерскыса пыризы эшлыко Монголилэн музъем вылаз. Горд Армия захватчикъёсыз пазьгытӥз соку нокинлы тодмотэм Халхин-Гол шур дурын. Но ӵуштаськемлэн ӵын зыныз ӧз ортчы, война кутсконлэн кышкытлыкез возиськиз. "Иностранной ужъёсъя нарком Молотов 23 августэ (1939 арын) гожтӥськиз Германиен дас арлы мирной договор улэ. Озьыен, Советской Союз вылэ урдскыны быгатоз Япония", - политзанятиосын тазьы вераллязы офицеръёс. 1939 аре нырысетӥ тол нуналэз со ноку уз вунэты. Вордскем нуналыз, 26 арес тырме. Командирлэн син азяз пуксё вордскем гуртэз, Вортча Починкаез, мумиз но бубиз, тужгес матысь эшез Степан Широбоков. Ӵапак та чар кезьыт нуналэ ик Николай Шикалов тодӥз Финляндиен ожъёс кутскем сярысь. Нош толэзь ортчыса, куинь сэрего гожтэтын эшез ивортэм Маннергейм линиез штурмен басьтонэ пыриськемез сярысь. Пӧсь мылкыдын со гожъям уй пал кезьыт тӧлъёс, ӝужыт лымы пуктосъёс сярысь, кызьы асьме боецъёс, тушмон снайперъёсын-"кукушкаосын" вис карытэк ыбылэмен но музъем пушкы гудӥськыса кужмо утиськемен, трос ыштонъёсыз адӟо. Шуг вал син азе пуктыны небыт сюлэмо, чебер мылкыдо пиез со сьӧсьяськон бусыысь. Ӧз тоды на соку Николай Шикалов: солы аслыз пӧсь тылӝуэ месӥськоно луоз 1942 арын сӥзьыл, Сталинград понна ожмаськонын. Кышкасьтэм луон сярысь пинал дыр малпан туж шимес адӟон пыр быдэсме вылэм. Солы сётӥзы ИИ степенё Отечественной война орден. Нош 1943 арын пӧсь гужем адын кадь пӧсь йӧтӥз. Радиостанцилэн начальникез Николай Шикалов Курской дугае шедиз. "Бомбаос но снарядъёс пуштылэмен, быдэс музъем зурка, дугдылытэк дыбыртэ. Бугырес сьӧд ӵынэн сэрен нуназе шунды но уг адӟиськы", - тодаз вае со. Бен, юнме ӧз сётэ соку офицерлы Горд Кизили орден. Иськем бӧрсьы иськем... 1944 арын июне кутскиз Белоруссиез мозмытонъя "Багратион" бадӟым операция... Лейтенант Шикалов азвесен кисьтаськись Березина шур дурын сылыса малпаськиз, кызьы 1812 арын пазьгытэмын вал Наполеонлэн "сьӧд уллёез". Таӵе ик адӟонзы Гитлерлэн гыжкалъёсызлэн. Николай Михайловичлы кӧня ке вамыш кемын шур вамен выжемез эскерыса сылӥз маршал Константин Константинович Рокоссовский, И Белорусской фронтлэн командующиез. (Та тодмо военачальник граждан ож дыръя 30-тӥ стрелковой дивизиен ӵош вуылӥз Удмуртие, 1919 арын т олшоре Глазовысь одӥгаз госпитальын эмъяськиз но.) Соку ик, 28 июле, та фронтысь боецъёс легендае пырем Брестэз мозмытӥзы но уно чидам-адӟем Польшалэн музъем вылтӥз вамыштӥзы. Вормонлэн матэктэмез адӟиське ни вал... Старшой лейтенант Шикалов кыкетӥзэ басьтӥз на ИИ степенё Отечественной война орден. Лымыё нюлэсъёсын но бусыосын кынмылыса, нюръёсы выйылыса, Орловско-Курской дугалэн шымыртэмаз шедьылыса, куашкатэм Варшава кузя вамышъяса но Берлинозь вуыса, Н. М. Шикалов улэп кылиз. Мар вань на солэсь бадӟымез шуд?! Потсдамысь бертэм офицер - вордскем палъёсаз! Областной партийной школаын дышетскись, Азин нимо колхозлэн председателез, партилэн Шарканысь райкомезлэн кыкетӥ секретарез, районысь ветеранъёслэн советэнызы кивалтӥсь (20 ар ӵоже!) - ваньмыз со Николай Михайлович Шикалов, герой-патриот. Улонысь тужгес секытсэ, курытсэ вормыны быгатэм адями. Улонэз туж яратэмез солы берытскиз бадӟым "кузьымен". Туннэ, толсурлэн нырысетӥ нуналаз, Николай Михайловичлы тырме ни 85 арес. Бен, губияны, чорыганы, пӧйшураны яратэмез, пыдын трос ветлэмез лякыт сямыз но юонэз-кысконэз адӟонтэм каремез юртто солы сэзь возиськыны. Нош мон гажано эшелы мылкыд карисько 2000 арын Быдӟым Вормонлы 55 ар тырмонэз пумитаны - шумпотӥсь синъёсын но гадь вылаз чилясь-пиштӥсь орденъёсын, медальёсын. Н. М. Шикалов кадь адямиос улонамы туж ичи кылемын. "По местам боевой славы" книгаысьтым 28 герое пӧлысь со одӥгез, тужгес бадӟым арлыдоез. Виктор Поздеев, историлы дышетӥсь. Николай Шикалов 1938-тӥ арын. Степан Широбоков, Удмуртиысь калык кылбурчи Улон вормонтэм Куке пеймыт нюлэс вылын Ӝуа пипу льӧльмыт тылын, Тон шӧдӥськод - ортче гужем. Бусы но возь бездэ, гужа, Пилем пыртӥ шунды ӝужа, Зор кыдыртэ векчи пужен. Уг шуд ни ӟоз шуръёс дурын, Уг шыпырты сезьы гуры... Шыпак чалмиз кырӟась нюлэс. Шат вань улон быре тазьы, Ваньзэ ворме кезьыт сӥзьыл? Бушомытэ музъем вылэз? Ӧвӧл, ӧвӧл! Сӥзьыл но тол, Сыӵе кужым уз лу, ӧвӧл - Нокин уз быдты улонэз! Уз сог сьӧд ӵын но сьӧд дэри, Кезьыт но зор, урмем пери Уз дугдыты выль будонэз! Бен мед усёз садысь ӵуж куар, Ортчоз нунал, кошкоз вуж ар, Музъем ортчоз кузь сюрессэ. Выльысь пезьдоз вож куар, турын, Чагыр тулкым шудоз шурын, Ю-нянь лэзёз тыр шепъёссэ. Тани мынам азям вож луд, Небыт ӝужась пинал ӟег уд - Буртчин кадь бусылэн вылыз! Ӟег уд выжы лэзем ни зол, Солы кышкыт ӧвӧл ни тол, Солэн азяз - шуныт тулыс! Тулыс кутске сӥзьыл куазен: Чорыг толэ пыре мызен, Садын но дась выль пучыос... Лыктоз тулыс, сое уд возь - Сяськаляоз бусы но возь, Нош чирдозы тюрагайёс! Волостьысен ёросозь Вуоно гужем Сюмси ёрослы кылдэмез дырысен 70 ар тырме. Солы дасяськон каллен ке но мынэ, одӥгез ужрад сярысь вераны кулэ. Ёросысь "Знамя" газетлэн редакторез Иван Рябов мылысь-кыдысь басьтӥськиз книга дасян борды. Со пыр-поч эскериз архивысь документъёсты, газетэ 30�тӥ-40-тӥ аръёсы потэм материалъёсты. Озьы книгалэн авторез ёрослэсь 70 ар ӵоже улэм-вылэмзэ, отысь адямиосты син азе яркыт но оскымон пуктэ. Нимысьтыз пусйыны кулэ таӵе учырез. 1929 арын 15 июле ёросын бадӟым кенеш ортчиз. Со вить нунал ӵоже кыстӥськиз. Собраниез ортчытӥсьёс соку уно адямиосты асьсэ пала берыктыны быгатӥзы. Озьы Малмыж уездысь Сюмси волость выжтэмын вал Удмурт автономной областе. Книга районын улӥсьёс понна ӟеч синпель луоз. Сыӵе уж ёросын ноку но потамын ӧвӧл на. Соин ик Сюмсиысь кивалтӥсьёс мед сюлмаськысалзы вылэм книгаез лыдӟисьёс доры вуттон понна. П. ЛЮКИН. ЖУРНАЛИСТЪЁСЫН ПУМИСЬКОНЪЁС Котьку мед луоз... шуныт Ижевсклэн мэрез Анатолий Салтыков пресс-конференцизэ городын кылдэм югдурез возьматӥсь лыдпусъёс бордысен кутскиз. Кылем арняе куинь нунал куспын столицалэн бюджетаз 500 сюрс манет налогъёс вуизы - 7 миллион манет интые. Тужгес трос пунэмъёсыз "Ижмаш" огазеяськонлэн. Со вань налогъёссэ тырысал ке, бюджет чотын ужасьёслы кӧня ке толэзь понна уждунзэс тырыны луысал. 1998 арлы бюджетын коньдон уг тырмы, Конституциен сётэм правоосты быдэсъян понна. Вуоно арлы бюджет зэмос улонлы мед тупалоз шуыса, коньдон шедьтон луонлыкъёсты лыдэ басьтоно. Со понна Ижевскысь администриация предприятиослэсь ужамзэс эскериз, вуоно арын бюджетэ кӧня налог тырыны быгатонлыксэс дунъяз. Ӝоген со ӝот-ӝот вераны быгатоз, кыӵе юрттэт сётэмын луоз Ижевскын улӥсьёслы бюджет чотын. Али ик тодмо ини огез: бюджетлэн ӝыны люкетэз мыноз нылпиосты дышетонэ, сюдонэ, калыкез эмъянэ, культураен герӟаськем ужрадъёсты орчытонэ. Анатолий Салтыков малпамъя, жилищно- коммунальной юрттэтъёслэн дунзылэсь 40 процентсэ калык тырыны кулэ. Со вакытэ ик квартира понна тыронъёс семьялэн огъя доходаз 12 процентлэсь бадӟымгес люкет басьтыны кулэ ӧвӧл. Бюджетлэн доходъя люкетэныз герӟаськемын нылпи учреждениос понна тыронъёс но. Али городлэн нылпи садъёсаз пиналэз возем понна толэзьскын ог 42 манет куро. Улон секыт луэмен, заводъёс, организациос асьсэлэсь садъёссэс городлы сёто. Талы нимысьтыз коньдон висъямын ӧз ке луы, нылпи сад понна тыронъёс 120 манетозь йылозы, кышкатӥз мэр. Транспортэн дун тырытэк ветлӥсь пенсионеръёс, мукет льготникъёс но бюджетэз тырмытон понна "висьыны" кулэ. Бюджетын коньдон ӧз ке луы, мэрия уз быгаты автотранспортной предприятиослы соослэн ветлэмзы понна коньдон тырыны. Асьмеды ваньместы сюлмаськытэ: туэ толалтэ шунытэсь, югытэсь луозы-а квартираос, кранъёсысь бызёз-а шуныт ву. Газ понна тырыны коньдон ӧвӧлэн, шуныт сётӥсь батареяос куинь поллы сӥялэсьгес луозы шуыса кышкатӥзы вал ини. Анатолий Салтыков валэктэмъя, шуныт но тыл чылкак кысэмын уз луэ. Зэм, та вакытэ Ижевскысь Ленин ёросысь но Автозавод палась коркаосын кезьыт луиз, малы ке шуоно, соосты шунто "Ижмашлэн" котельнойёсыз, нош та предприятилэн газ понна тырыны коньдонэз ӧвӧл. Кызьы город со юртъёсын улӥсьёслы юрттыны малпа, А. Салтыков ӧз валэкты. О. ВАХИТОВА. Якшур-Бодья палан туннэ Кацемон, кандидат лу тон Вуоно аре тулыс Удмурт Республикаысь Кун Кенеше быръёнъёс ортчозы. Ёрослэн администрациез быръёнъёсы кандидат луыса пыриськыны дэмла "Уральская нефть" акционер огазеяськонлэсь генеральной директорзэ Владимир Кацемонэз. Бусыос утялтэмын, скалъёс гидын Туэ Якшур-Бодья ёросысь хозяйствоос гектарлы быдэ шорлыдын ог 13 центнер пала ю тысь кутсазы. Нош "Дружба" эштосын та лыдпус 19 центнерлэсь но ортчиз. "Кыкетӥ нянь" гектарлы быдэ 102,4 центнер усиз. Бодьяос быдэстӥзы кын улэ гыронзэс, тол юос кизёнзэс, тырмыт дасямын ӟеч кидыс. Азинсконъёссы вань пудо утисьёслэн но. Туэ, кылем арен ӵошатыса, укмыс толэзьскын котькуд скаллы быдэ йӧл кыскон 88 килолы будӥз. "Родина" эштосын 523 килограммлы уногес йӧл басьто. Мултэсэз кулэ ӧвӧл Чур сельсоветлэн администрациез но ёросысь музъем ужпумъёсъя комитетысь специалистъёс Пушкин нимо азьвыл колхозэ пырись гуртъёсын кенешъёс ортчытӥзы. Отын вераськон мынӥз пай чот сётэм музъемез кутон пумысен. Та кенеш бере 96 пайщик пӧлысь 50-эз музъемзылэсь куштӥськон сярысь куриськон гожтӥз. Вераны кулэ: котькудӥзлы пайя 7 но ӝыны гектар музъем висъямын вал. Табере куштӥськем музъемез ёрос басьтӥз. Банкротэн лыдъямын Элькунысьтымы арбитражной суд "Сельхозхимия" акционер огазеяськонэз банкротэн лыдъяз. Алигес кредиторъёслэн кенешсы ортчиз. Отын вераськемын ваньбурез конкурс амалэн вузаны. Солы 400 сюрс манет дун тупатэмын. Толэзь ӵоже басьтӥсь ӧз ке шедьы, дун кулэстэмын луоз. Геройлы тырмысал 75 Туэ 1 ноябре Советской Союзлэн Героезлы Феодора Пушиналы вордскемез дырысен 75 арес тырмысал. Иж-Забегалово гуртын вордскем нылаш бырыны шедиз 55 ар талэсь азьло, 1943 арын 6 ноябре Киев дорысь Святошино селоез мозмытыку. Медициная службая лейтенант Пушина пуштылӥсь бомбаос улын утьыны вуиз сӧсыртэм 30 солдатэз. Геройлы сӥзем сӥё-дано ӝыт ортчоз 27 ноябре, ёросысь культура юртын. Нош али районысь школаосын, краеведениея музейын, Ижевскысь медициная колледжын ортчыло Феодора Пушиналы сӥзем ужрадъёс. Дышетонлэсь ӟечлыксэ эскерозы Ноябрь-декабрь толэзьёсы районысь школаосын аттестация ортчытонъя ужрад мыноз. Та дырозь со ортчиз вал дышетӥсьёс пӧлын гинэ. Аттестациез кутскозы покчи ёзо школаос бордысен. Та ужрад возьматыны кулэ школаосын дышетонлэсь ӟечлыксэ. Н. ЛЯЛИН. "ИВА-99" Германиысь Нюрнберг город тодмо луэ пӧртэм пумо выставкаос ортчытэменыз. Куатетӥзэ ни отчы пыриське Ижысь механической завод. Котьку сямен отын со возьматэ пыӵал тӥрлыксэ. Вуоно арын шаерысьтымы пыӵал лэсьтӥсьёс отын возьматыны чаклало 22 выль ужзэс. Нырысьсэ адӟытэмын луоз ачиз зарадаськись вольыт гумыен МР-151 пыӵал, кык гумыен чылкак выль пыӵал МР-251, МР-141 К карабин, МР-514 К пневматической винтовка. Кельшыны кулэ МР-445 С ("Варяг") но МР-446 пистолетъёс, МР-412 револьвер. Таяз выставкаын выльдэмын луозы возьматон пирамидаос. Озьы ик чакламын возьматыны синпель кузьымъёсты. Соин валче дасясько "Макаровлэн пистолетэзлы 50 ар", "Удмуртиысь пыӵал лэсьтӥсьёс" значокъёс. Отысь адӟыны луоз тодмо гравёръёсты но конструкторъёсты Л. Васевез, А. Климовез, Л. Пугачевез. С. ПЕТРОВ. Кужымзы ӧз окмы Гандболъя Ижысь "Университет" туэ кужмоосыз командаос пӧлын нюръяське. Берлояз кык пумиськонын асьме нылъёс кужымзэс мертазы Москваысь "Луч" командаен. Нырысетӥ ӝытэ "Университетысь" спортсменкаос азьпала потӥзы вал. Куноос сётскыны ӧз ик малпалэ, ӝог атакаос чотын Ижысь нылъёсты "пачкатӥзы". 34:20 лыдын вормизы куноос. Кыкетӥ нуналэ но "Лучысь" туп лэзьясьёс шаплыгес бызьылӥзы, шонергес капка шоры "ыбылӥзы". 28:36 - таӵе лыдын нош ик келязы "Университетысь" нылъёс. Кулаковалэн сюрестӥз Куасэн бызьылӥсьёс понна но тол вуиз ни. Страналэн сборной командаез али дасяське Дуннелэн кубокез понна нюръяськыны. Алигес калык куспо ӵошатсконын 10 иськем сюресэз ваньмызлэсь ӝог ортчиз Воткинскысь Сергей Крянин. Озьыен Галина Кулаковалэн бӧлякъёсыз солэсь данзэ утё, азьланьто. М. КУЗЬМИН. Куӟебай Герд но вашкала культура Ӟуч луэм удмуртъёс Бергало - Уг тодмало соос поэтсэс, Вунэтӥллям Асьсэлэсь удмурт кылзэс, Кыӵе ке но удмурт сямъёссэс Кыдёке сэрпалтыса куштӥллям, Мурт кылэз, мурт йылолэз Мусояллям. Куӟебай Герд Удмуртъёс пӧлын огез но Куӟебай Гердлы паймымтэез ӧвӧл, дыр. Угось сокем но визьмо, чебер, шаплы, быгатӥсь удмурт пи вылэм со. Адямиосыз тодон-валанзыя куинь люкетлы люкыны луоз: 1. Дунне кутӥсь адями (визьмочи). 2. Тодосчи. 3. Пельысь пеле верам, телевидение, радио, газет пыр вӧлмытэм иворъёсын гинэ улӥсь. Нырысетӥ радэ потыны быгато калык визез возисьёс гинэ. Тодосчиос пӧлысь куд-огзэ гинэ визьмочиос пӧлы пыртыны луэ, нош кылемез уно лыдӟиськемын, уно малпаськемын ке но, "трос тодэ но ӧжыт вала". Зэм но, улонын трос тодэм гинэ уг тырмы на - валан кулэ на. Валантэк адями тодонъёсыз пӧлы куинь пужым куспы сямен йыроме. Визьмочи луон понна, дышетскем гинэ уг тырмы на. Кузьма Павлович Чайников быдэс дуннелы тодмо Куӟебай Гердозь кызьы будэм? Солы уно сюрс аръёс ӵоже люкам калык визь пыӵам! Озьы со тодосчиослэн лёгетысьтызы визьмочиослэн пагӟаозязы ӝутскем (Россия Федерациысь калык кусыпъёсъя министр Вячеслав Михайлов Гердлэн сю аръем юбилеяз сое гений шуиз). Мар со, калык культура? Куӟебай Герд уно тыршем вашкала культураез улӟытон удысын. Асьмелы табере азинтоно солэсь ужзэ. Нош мар со, вашкала культура? Вашкала культура - со ёзнантэм культура. Отчы пыро этномедицина, калык педагогика шуонъёс, песятайёсмы сямен, куалаын но инкуазьын вӧсяськон, фольклор, чакласьконъёс, сямъёс, йылолъёс, сэбедъёс. Соос куспазы пӧлэстӥськемын. Одӥг кылын сое шуыны луоз калык визь. Уно сюрс аръёс ӵоже люкам калык визь. Ӟуч сямен - мудрость. Со - ёзнантэм. Калык визь юрттэ удмуртъёслы дуннеез кутыны, йӧно дунне адями луыны. Нош вашкала культурамы тӧлӟиз ке, удмуртлык быроз, асьмеос манкуртъёс луомы. Москваысь профессор Виктор Бугровский но тазьы ик шуэ. Тани, пе, эпос, чаклад ке, огшоры кылын гожтэмын кадь, нош кыӵе мур пуштросъем со. "В простоте заключена мудрость",- шуэ со. Нация, шуэ, вашкала визьтэк, интеллигенцилы гинэ оскыса, книга вылэ гинэ чӧлскыса бездэ. Вашкала культураез адӟыны луэ калык кусыпысь. Нош цивилизация но урбанизация шуонъёс адями пушкысь культураез куашкато. Кельто на сое сцена вылэ, музее, книга ӝажые гинэ. Нош асьмеос, гажано эшъёс, вашкала культурамес утиськомы-а? Куӟебай Герд, черклы пумит луэмзэ возьматыса, уно пол гожъя. Со валам, лэся, черклэсь удмуртлыкез куашкатэмзэ. Соин Кереметэз, вашкала вӧсяськонэз, куштэмзы пумысен ӝожомемзэ вера: Уй но нунал Керемет сылэ Куашетыса, Неноку но быронтэм, Туж чебересь вашкала выжыкылъёс Ас понназ Дугдылытэк вераса. Куд-ог удмуртэд, ас калыкезлы ӟеч лэсьтӥсько кожаса, язычникъёсыз мыскылля. Озьы со вераны турттэ, песятайёсмы визьмоесь вылӥллямтэ шуыса. Соос, пе, бере кылем адямиос, вина, пе, юо. Нош черк, пе, вина юонэн нюръяське, калыкез зэмос культурае нуэ. Озьы-а со? Тани зэмос язычникъёс-удмуртъёс уло Башкириын. Башкирие ветлӥды ке, таӵе вераськон мыдланес шуыса валалоды. Тӥ одно ик синмаськоды отысь ӵыжы- выжыосмылы. Макем йӧноесь, ужасесь, шырыт сямоесь, капчи мылкыдоесь, куно карыны быгатӥсесь соос. Соинтэк-а отын будэмын Менсадык Гарипов но мукетъёсыз удалтэм нылъёс, пиос! Куд-огез малпа: "Удмуртлык - со фольклор ансамбльёс". Ӧвӧл, фольклоре оломар но пыре, нош вашкала культураын туж бадӟым инты басьтэ калык кырӟан. Юнме шат Куӟебай Герд ог 3 сюрс кырӟан бичам: кылъёссэ но, крезьгурзэ но гожъям. Сокем но синмаськем со удмуртъёслэн кырӟанзылы, кырӟаны быгатэмзылы! Ачиз но пӧртэм ёросъёстӥ калык кырӟанъёсты кырӟаса, вӧлмытыса ветлэм. Бӧрысь гожтэм: "Сизьым нота удмурт крезьгурлэсь узыр пуштроссэ возьматыны уг тырмы". Сокем уно, пе, солэн интонациосыз. Вылтӥз гинэ, дыртӥд-вуттӥд учкыса, эскерыса, удмуртлы зэмос дунъет сётыны уд быгаты. Тани Герд фольклор бичакуз паймем: юалляськыку нылкышноос кырӟанъёслэсь кылъёссэс вераны уг быгато. Угось удмурт кырӟан ӵем дыръя импровизация луэ. Тани анаез но, пе, кырӟанъёслэсь кылъёссэс юнме дыръя вераны уг тоды, нош куно пыртакуз, сое тодманы уг луы ни: "ымнырыз ӵыжектэ, тусыз артистлэн кадь луэ, кырӟанъёсыз огез бӧрсьы мукетыз ӧръясько, вань улонзэ кырӟаса кисьтэ - выль чуръёс кылдытэ. Ӵуказеяз толлозэ выльысь кырӟаны куриськод ке, уг тоды ни - ваньзэ вунэтэм". Вашкалаос кырӟало вал ужакузы но, шумпотыкузы но, куректыкузы но. Соку ик кылдылӥзы выль крезьгуръёс. Тани Куӟебай Герд фольклор бичаны кутскем анаезлэн "Поръялоз, поръялоз" кырӟанысеныз. Бӧрысь, аръёс ортчем бере, пе, юа: - Анай, малы, тон сяна, нокин уг тоды "Поръялоз, поръялоз" кырӟанэз? - Ма, мон сое ачим кылдытӥ ук. Тынэсьтыд мӧзмыса, Вало кузя ветлыкум, ачиз кытысь ке, пушкысьтым, потӥз но, кырӟаны кутски. Туж чебер кырӟан ук. Кӧня поэзиез но, философиез но отын. Куке вужмоз шат со? Уз. Фольклор но классика ноку уг вужмо. Калык пӧлысь гинэ чиптэм-чаптэм медаз тӧлӟе вал соос. Ӟучъёслэн сямен, фонотекаосын гинэ медаз кылле вал. Туэ Куӟебай Гердлэн арез бере, радио пыр нуналлы быдэ сётоно вылэм солэсь гожъям яке бичам, люкам кырӟанъёссэ. Егитъёслы мед пыӵалозы удмурт шӧмъемесь вӧл-вӧл чузъяськись крезьгуръёс. Соос угось адямилэсь лул-сюлэмзэ чылкытато, узырмыто, духовной каро. Тани туэ Ашальчи Окилэсь но сю арессэ пусйим. Алигес 60 арес тырмиз Пантелей Кузнецовлы. Кыӵе чебересь но мур пуштросъемесь соослэн кырӟанъёссы! Котькинлы ярало, дыр. Малы ке шуоно, авторъёссы фольклор пӧлын будэмын. Ма, ӧжыт-а асьмелэн, со сяна но, удалтэм крезьгурчиосмы?! Соослэсь удмурт шӧмъем кырӟанъёссэс ӵемгес кылэм потэ вылэм. Малы ке берло дыре радио пыр ӝыт но, ӵук но сёто кеч куараен кырӟасьёсыз. Соос адӟем каро Любовь Быковалэсь. Угось сое куд-огезлэн удмуртская мадонна шуэмез бере, модае пыризы удмурт шӧмтэм но ударениез тӥяса гожтэм кырӟанъёс. Таосыз гыльдым- гальдым мылкыд кылдыто, сямез сӧро, тужгес но исало быдэ вуымтэосты. Соинтэк-а дискотекаосын жугиськонъёс луыло, нош фольклор ӝытъёсысь ваньмыз капчи мылкыдоесь луыса берто. Оло, кин ке шуоз: "Котькыӵеесь кырӟанъёс мед чузъяськозы". Мон но тазьы ик шуысал. Нош тани маиз умойтэм. Удмурт студентъёс пӧлысь уноезлэн калык кырӟанъёсыз кылзэмез уг поты. Школаын дышетскисьёс пӧлын табере туж ичи ни кырӟаны-вераны, шулдыръяськыны дышемъёс. Соос кыстӥсько дискотекаосы, шоуосы (шау нимай мон соосты). Адями котьмарлы дыше: шуш кырӟанлы но, тюрьмалы но, тамаклы но, наркотиклы но, мугорзэ вузанлы но, вузаськонлы но... Ойдо, эстрада мед луоз, ритмичной кырӟанъёс мед луозы, нош сокем уно инты медаз басьтэлэ. Угось крезьгуръёсыз сиёнэн ӵошатыса, тани мар пӧрме: калык кырӟанъёс - шыд, классика - кыкетӥез, эстрада - кисаль. Озьыен, уен-нуналэн асьмеды кисален гинэ медаз сюдэ (ческыт ке но со). Семья борды басьтӥськоно Адямилыкез, вашкала культураез нырысь ик семьяын утёно. Бигеръёслэн семьяязы тани утё кылзэс но, вашкала сямъёссэс но, соин ик бигер дӥнь (нация) капчиен улӟе. Адями кусыпъёс радъясько, вашкала сямъёсыз, йылолъёсыз ке возиськод. Куӟебай Гердлэн гожтэмезъя, кен картэзлэсь атайзэ но, анайзэ но нимынызы уг вера. Атайзы азьын гольык пыд но, гольык йыр но уг ветлы. Озьы соосты гажамзэ возьматэ. Нош туала вакытэ адями кусыпез юнматӥсь гердъёс пумен тӧлӟо, быро. Озьыен, улонмы цемент суреттэк пуктэм из юртлы укша но пумен куашка. Тани син азьын ышо ни ӵужатай, ӵужмурт, ӵужапай, кенак, апай, агай шуонъёс. Шуо анайка, атайка, кенака яке нимынызы вазё. Куд-огез, ӟучъёслэсь адӟем карыса, анаез шоры но нимыныз вазе ни. Вашкалаослэн тодон-валанъёссы котькуд удысын туж муресь вылӥллям. Тани нылпи ваисьлэн культураез сярысь Куӟебай Герд быдэс диссертация гожтэм. Со воксё мальдэм вашкала культуралы (кӧт кыскасьёслэн быгатэмзылы, нылпи гердэз шедьтэмзылы, пӧртэм чакласьконъёслы). Синмаськем, ӟучъёсын ӵошатыса, нылкышноез сӥлыгес каремзылы но жалямзылы. Озьы ик данъяське со удмуртъёслэн куно пыртан культураенызы. Экспедициосы потаса, Герд люкам уно мадиськонъёс, нотаоссэ, крезьгуръёссэ гожъяса, эктонъёс. Нылпиосмес вашкала культуралы ӧм ке дышетэ, удмуртлыкмес улӟытыны нокызьы ум быгатэ. Ваньмыз семьяысен кутске ук. Тани тазалыкез утён, вина юонлэсь утиськон, семья кусыпез тупатон, ужлы дышон - ваньмыз анай-атай бордысь потэ. Покчиосмес книгаез, ужез яратыны дышетысалмы ке, вашкала культураез гажан мылкыд пыӵатысалмы ке, ӧй кылдысалзы удмуртъёсыз ултӥясь "Чеберина" конкурс-шоу но, "Тень Алангасара" кино но. Озьы асьмеос азинтысалмы Куӟебай Гердлэсь бадӟым ужзэ. Альберт РАЗИН, Удмурт кун университетысь тодосчи. Курыто-ческыто аръёс Со ньыль аръёс (1942-1946) туж бадӟым пытьы кельтӥзы мынам улонам. Мон борды "лякиськизы", веник куар кадь, кык адямиос. Одӥгез (азьвылгес верай вал ини) педучилищеын ӵош дышетскем эше Надя Ванюшева. Али но уг тодӥськы, малы меда солэн монэн ӵош ужамез потэм? Гуртамы ньыль ар ӵоже ужатозяз со ми дорын патерын улӥз. Кыкетӥез (асьтэос тодӥськоды ини) Вася Иванов, кыдёкысь, Китай граница дурысь бертэм мурт... Вася агаеным кыкназы но соос улонысьтызы тямыс арзэ армилы сётӥзы. Гуртэ огез бӧрсьы огез бертыло ни улэп кылемъёс. Рядовой солдатъёс вазьгес вуылӥзы, нош комсоставез ӝегатӥзы. Тани мырдэм гинэ Вася агаелы но, Уральской округе келякузы, одӥг толэзь отпуск сётӥллям. Доре вуиз самой дуно, возьмам куномы. (Та пумиськонэз вераны кутскид ке, пумаз уд вуы.) Шӧдӥськом, милям семьяямы воштӥськонъёс луыны медэ. Агае Надя котырын гожеръя. Озьы ик вань. Одӥг толэзь куспын выль семья кылдӥз, агае, нокытчы палэнэ потатэк, сьӧрлось нылъёсыз утчатэк, ас дорысьтыз кузпал шедьтӥз. Патерын улӥсь нылмы милемлы кен луиз. Таӵе учыръёс туж ик трос ӧвӧл, дыр: ньыль ар ӵоже асьме дорын Васямылы кузпал "будэтӥськеммы". Гуртоос но куд-огез милемлы вожъяськылӥзы. Ньыльдон сизьыметӥ Выль ар милемлы котьмар праздниклэсь бадӟым шудбуро пумиськон ваиз. Куинь пар егит кузпалъёс огазе вуимы. Миша Андриянов, двоюродной братэ, азьвылгес кышнояськемын вал ни. Кышноез, Руфа, школаямы ужаз. Миша - Можга но Бемыж куспын корреспондент. Быдэс дуннелы синмаськымон Выль ар шулдыръяськон вал со... Ӵуказеяз ми, куать кузя, куинь пар, Маканэ мынӥм - егит дышетӥсьёс. Денис Семенович но Мария Сергеевна Макаровъёс куное ӧтизы. Соку олокытысь-марысь татчы учырам фотограф. Со ке ӧй луысал, оло, та пумиськон аръёс ортчемъя вунысалзы но. Фото шоры учкиськод но, ваньзэ тодэ ваиськод... Кык Васяослэн ноку тамак кыскемзы ӧй вал, юри шоголляськыса пуксизы озьы. Мынам паллян палам (фотоын бурысез) пуке Надя эше, кенмы. Пельпум вылаз кизэ понэм Вася агае. (Туж жаль та чуръёсыз лыдӟыны солы ӧз кылды ни - алигес гинэ улонысь кошкиз.) Мукет палаз сыло Миша но Руфа Андриановъёс. Тӥни озьы, Нынек школаын ужась кык эшъёслэн, кык дышетӥсьёслэн улонзы воштӥськиз: Ванюшева Надежда Серапионовна луиз Егорова, нош Егорова Анна Георгиевна - Иванова. Одӥг пол ошмес дурысен пичи дыръям шудэм эшеным пумиськи. - Аннӥ, мар сыӵе копчёной селёдкалы укшась адямилы бызид, бызьытэк кылемедлэсь курдад-а? Ачиз кит-кит серекъя. - Оли, тон озьы эн шу. Мон котьку яратылӥ сьӧд кысъем пиосыз, ӟуч сямен вераса, поджаристойёссэ. Мон ачим шунды шорын пыжыса кисьмам шаньги кадь. Нылпиосы но сьӧдэсь мед луозы... Кык Васяос, кык ӧрӟиос, кык эшъёсыз-дышетӥсьёсыз капыртӥзы но сьӧразы нуыса кошкизы. Огез Вася Надяеныз Чебаркуле шонтӥзы, мукетыз Вася Аняеныз Иже вырӟизы. Ньыльдон сизьыметӥ арлэн самой кутсконаз ми улонмылэн бадӟым ӧраз пырим. Со дырысен нокытчы "шоналъяськытэк", умой улон утчаса ветлытэк, татчыозь Ижын улӥськомы вань нылпиосынымы. Кузпалы визьмоесь пиналъёс кузьмаса кельтӥз мыным. Тау Ивановелы, монэ дырыз дыръя "серметаз" ньыльдон кыкетӥ арын. "Серметсэ" зол ке ӧй возьысал, мон ӟучомысал - Гжатск пала ӧжыт гинэ ӧй лобӟы... Иже лыктыса, Вася азьвыл интыяз ик, "Советской Удмуртия" газетлэн редакцияз, ужаны кариськиз. Мон но толэзь куспын уже интыяськи - пенсие потытозям книга поттонниын ужай. Кузпалмылы, журналистлы, дунъет сётӥсь мон ӧвӧл, со понна вал лыдӟисьёс, ӵош ужам эшъёсыз. Улонын но, инкуазьын кадь ик, весяк шундыё, шулдыр гинэ ӧй вал нуналъёс, аръёс. Пилемъёс но тём-тём пеймыт карыса, гудыръяса, чилекъяса ортчылӥзы йыр йылтӥмы, инмармы утиз ӵашъемлэсь. Дорысь весяклы кошкыкумы, мынам анае-атае, сюлэмез шунтӥсь, визьме пырись уно небытэсь кылъёс вераса келязы: визьмо муртъёсын ӵош, бадӟым адямиос пӧлын улоно, ужано мед луоды. Тазалык, шуд сӥзизы, котмем синъёссэс ӵушылыса кылизы. Атайлэн- анайлэн ӟечен но, уродэн но верам кылъёссы нылпиос вылэ вуо, шуо калыкын. Мон талы туж оскисько. Соослэн сӥземзы юрттӥзы, дыр, милемлы. Милям семьямылы синмаськисьёс но вал (асьмемыз ушъям кадь луэ ини), вожъяськисьёс но тырмыт гинэ, шудмес турканы, пазьгыны турттӥсьёс луылӥзы. - Чик юнме супыльтэмъёслы эн оскы, мон тонэ нокинэн уг вошты, мон тонэ ньыльдон кыкетӥ арысен ик яратыны кутски, та асьмелэсь ог-огмес яратонмес нокин уз быдты, уз сапта, кулытозямы ӵош уломы, асьмелэн сюлэмъёсмы ваче бурмемын. Та верам кылъёс юнме ӧй вал, дыр. Ми ньыльдон укмыс ар ӵоже улон сюрестӥ вамышъямы ӵош. А. ИВАНОВА. Война бере кылдэм егит семьяос. ИВАНОВЪЁС - шорысез. Василий Иванович ИВАНОВ редакциысь эшъёсыныз (сылэ паллян пал дураз). Выльзэ лэсьто, вужзэ выльдо Ижысь машина поттӥсь завод та вакытэ кӧня ке ёзъёслы люкиськыса ужа. Нимысьтыз кылдытэмын "Ижмаш-станко" акционер огазеяськон. Берло дыре отчы. Выль станокъёс лэсьтыны курыса, уно вазиськонъёс ввуизы. Пыӵал лэсьтӥсьёслы поттыны кутскемын фрезер станокъёс. Выльёсыз лэсьтӥсько автомобиль поттӥсьёслы но. Таин ӵош ик завод вуж станокъёсты выльдон бордын но ужа. Соосты тупатъяло, выльдо, эмъяло. Озьы соос выльысь улыны кутско, предприятие но барышсэ шыръя. И. КАРПОВ. Ялонлы - нимысьтыз юбо Ижевсклэн урамъёстӥз ортчыку, нырысь ик син шоры йӧто афишаосын, плакатъёсын, олокыӵе но ялонъёсын лякылэм юбоос, транспорт дугдылон интыос, корка борддоръёс. Ялонъёс пӧртэм буёлъёсын синэз мальдыто, тӧл шорын лопыръясько. Таӵе реклама городлэсь вылтуссэ уг чеберъя, ульчаосты жуг-жаген тырмытэ, корка борддоръёсты сьӧдма. Ульчаосын реклама вӧлмытонэз Ижевскысь администрация радъяны малпаз. Вуоно арын 1- тӥ январьысен афишаосты, плакатъёсты, ялонъёсты вӧлмытыны луоз, городлэн администрациысьтыз Ваньбурен кивалтонъя комитетэз лэземъя гинэ. Ялонъёсты ошылыны нимысьтыз интыос висъямын, реклама улэ куд-ог юртъёслэн борддоръёссы, кӧня ке остановкаос сётэмын. О. МАКСИМОВА. Яратӥськом ик шутэтскыны Берлозэ умой-умой шутэтскимы Октябрь праздникъёсы. Революцилэсь нуналзэ пусъён субботалы тупаз бере, сое выжтӥзы вордӥськонлы. Декабре нош ик куинь нунал шутэтском. Россия Федерацилэсь Конституцизэ кутон нунал, 12 декабрь, нош ик кӧс нуналлы тупа. Паймод но бырод, ява: 17 август бере странамы банкротэ кылиз. Таӵе дыре, саесъёстэ пужалляса, ужа но ужа вал. Нош асьмеос ялкариськом, малы ке шуоно, "шутэтскон нунал праздниклы тупа ке, со выжтӥське мукет нуналлы". Таӵе тупатон КЗоТ-э пыриз, Россия Федерациын 1992 арын 25 сентябре закон юнматэм бере. Советской вакытъёсы сыӵеез ӧй вал. Праздник шутэтскон нуналлы тупаку, калык киыныз гинэ шонтылӥз но ассэ буйгатылӥз: вуоно арын озьы уз луы ни. Сыӵе кузьым аслаз калыкезлы дасяз вал Хасбулатовлэн Верховной Советэз. Со дырысен ик экономикаын кылдэм шуг-секытысь потыны курадӟиськом. Но со понна ватсаса шутэтскиськом. Тодады вайытон понна: вуоно арын сизьымез праздник нунал тупа шутэтсконъёслы: 2 январь но 1-2 Май, 9 Май но 12 июнь, 7 ноябрь но 12 декабрь. Озьыен, странамы арня но ӝыны шутэтскыса улоз. Яке 1999 арын, 258 ужан нунал интые, луоз 251. Нош шутэтскон нунал луоз 114. И. НИКОЛАЕВ. 6 сюрс кило Арлэн быремезъя, куд-ог йылпумъянъёс но лэсьтыны дыр вуиз ни. Лыдъян-чотан ужъёс возьмато: быдэс Ува ёросъя учконо ке, туэ нянь, пудо сиён будэтӥсьёслэн быгатонлыксы кӧнялы ке кулэсмиз. Кылем арен ӵошатыса, та удысын ваньбур поттон 27 процентлы синӥз. Нош шумпоттэ соиз: та дыр куспын ик сӥль-йӧл вузан 11 процентлы будӥз. Ӧз кулэсмы пудолэн лыдыз но. Гуртоос валаны кутскизы, йӧлыд ке луиз, коньдонэд но луоз. Бадӟым саклык висъяны ӧдъязы солэн ӟечлыкезлы но наплыкезлы. Али ёросъя кысконо скаллы быдэ 3100 кило йӧл усе. Нимысьтыз пусйыны кулэ "Свобода" эштослэсь Кунгур фермазэ. Татысь егит доярка Алевтина Корепанова группаысьтыз скалъёсызлэсь 6000 кило йӧл кыске. Таӵе йӧло скалъёссэ кенэзлы кельтӥз Нина Михайловна Пономарёва. Азьмынӥсь доярка шутэтскыны потытозяз та фермаын тыршиз. П. Люкин. Спорт Нош ик огазеяз шахмат "Ижпланета" клубын шахматэн шудонъя Удмуртилэн первенствоез ортчиз. Шудӥсьёс 76 кузя люкаськизы: туж трос вал Ижевскысь, озьы ик Можга, Камбарка, Якшур-Бодья, Шаркан ёросъёсысь, озьы ик Татариысь но. Ӵошатсконын шудӥз спортъя куинь мастер но спортъя мастере 13 кандидат. Воргоронъёс пӧлын Удмуртилэн чемпионэз луиз спортъя международной мастер, "Металлист" клубысь Александр Филипенко. Со 11 луоноез пӧлысь 9,5 очко люказ. Солэсь ӝыны очколы кылиз ньылез шудӥсь. Кыкетӥ но куинетӥ интыос басьтӥзы Удмуртилэн трос пол луэм чемпионъёсыз спортъя мастер Владимир Гребенкин но спортъя мастере кандидат Анатолий Семакин. Нылкышноос пӧлын вормисе потӥз Наталья Брылова. Со 11 луоноез пӧлысь 6,5 очко люказ. Ӝыны очколы бере кылизы спортъя мастере кандидат Елена Кычанова, нырысетӥ разрядэн спортсменкаос Наталья Коробейникова но Венера Максютина. Гуртысь шудӥсьёс пӧлын 5,5 очко люказ Якшур-Бодья ёрос больницаысь врач, спортъя мастере кандидат Сергей Горбунов. Солэсь ӝыны очколы кылиз Татарстанысь Павел Корепанов. Мӧйыос пӧлын нимысьтыз кузьым басьтӥз спортъя мастере кандидат Виталий Анименко. Со 7,5 очко люказ. Дышетскисьёс пӧлын вормисе потӥз 56 номеро школаын дышетскись Андрей Окулов. Спортъя мастере кандидатлэсь нормазэ быдэстӥзы "Нефтемаш" заводын ужасьёс Сергей Лыков но Ильдар Фархутдинов. И. ВЕЛЬТМАНДЕР. Удалоз-а ю тысед? Та юанлы котьку вераны быгато солэсь ӟечлыксэ эскерисьёс. Шарканысь кидысэз чакланъя инспекциын ужасьёс туэ сӥзьыл, кысык вакытэ ик, трос хозяйствоослэсь ю тысьсэс учкизы. Озьы соослэн дэмламзыя "Родина" колхозын ю-няньзэс куасьтоно но ӧз луэ - эстӥськон но шыръяськиз, кидыс но кеносэ ӝог вуиз. Нош мишкиноослы тысь бордын трос ужано луиз - лаборатория начар дунъет сётӥз. Тулыспал хозяйствоосысь агрономъёс кидыслэн ӟечлыкезъя паспортъёс басьтозы. Шарканысь ю тысь эскерисьёс А. А. Мушина, Е. А. Леонтьева, О. И. Вахрушева. Туспуктэмез Г. ЮСАЕВЛЭН. Журналистъёсын пумиськонъёс Пресса югдурез палдурес возьматэ, шуиз министр Россиын сиён-юонэн югдур уродмемен, асьме шаерамы но чурытэсь ужрадъёс кутоно луэ. Ваньмыз со калыклэсь улонзэ эшшо но секытомытэ, ужась адями нуналмысь куанерме. Вераськон мынэ сӥль-йӧллы закупочной дунъёсты шӧдскымон будэтон сярысь. Нош со меӵак герӟаськемын уно сиён-юонъёслэсь дунъёссэс йылэтонэн. Кылсярысь, одӥг килограмм йӧлэз 1,6 манетэн басьтыны лэземын. Озьыен, вӧй но мукет сиён-юонъёс магазинэ кык пол дуноен вуо ни. Татын музон палзэ но шараятэк кельтэм уг поты. Вазь сӥзьыл республикалэн палэназ ӧжытсэ 460 тонна дунтэм дунын вӧй вузамын, нош али кык-куинь пол дуноен асьмеос палэнысь вӧй басьтӥськом. Кызьы сое валано? Гурт хозяйствоя но сиён-юонъя министр Василий Жуйков журналистъёслы валэктӥз: - Коньдон кулэ вал льготной кредитэз берыктон-пытсан понна. Но куддыръя пресса югдурез юри палдурес возьматэ. Сое шуг валаны. Али республикаямы толэзьлы быдэ вузаны 500 тонна вӧй кулэ. Дорамы ичизэ 350 тонна поттыны луонлыкъёс вань, кылемзэ мукет интыосысь басьтом. Малпаськытэк ужаммылэн емышез тӥни кытчы вуттэ - токма шорысь прилавок сьӧрысь вӧй быриз. Нош табере со кык поллэсь уно дунояз. Сӥлья но югдур сокем ушъяськымон ӧвӧл. Таиз но сиён-юонмы али бускель республикаосы, Москвае но музон улосвылъёсы кошке. Малы? Шаерысьтымы мясокомбинатъёс ӝыны кужымен ужало яке кабзэ гуньдэмын. Пудо басьтыны коньдонзы ӧвӧл, нош палэнысь басьяськисьёс улэп уксёен лыкто. - Шаерамы вӧй но, сӥль но луоз,- журналистъёсты буйгатыны выриз Василий Жуйков.- Али, пе, Кезысь но Можгаысь сыр поттӥсь заводъёслы вазиським, вӧй лэсьтонзэс йылэтыны курыса. Соин ӵош ик ум вунэтӥське йӧл кысконэз будэтон сярысь. Та но мукет ужпумъёсъя али кенешъёс ортчытъяськом. Йӧл поттӥсьёс озьы ик тросгес сюлмаськыны кулэ продукцилэсь ӟечлыксэ умоятон сярысь. Со чотын асьмеос трос ыштонъёс адӟиськом. Тани ӝыныезлэсь ӧжыт гинэ тросэз йӧл нырысетӥ сортэн кошке. Соин ик йӧл кысконэз йылэтон но ӟечлыксэ будэтон вылысь 1-тӥ декабрьысен месячник ялӥськом. Та ужрад шоры котькудӥз пӧртэм сямен учке. Таӵе ужан амал трос-а бен пайда сётоз? Шуг вераны. Тазьы ужаны котьку тыршо вал правоез утись ёзъёс, кылсярысь, ГАИ (али ГИБДД). Пусйыны кулэ, таӵе выллем ужрадъёс ноку бадӟым пайдаен ӧз берытскылэ. Малы ке шуоно, одӥг толэзьскын ваньзэ умой быдэсъялод, нош собере сӥятскем мылкыдын- а ужалод? Асьмелэн ӵапак озьы луэ. Шаерамы бадӟымесь йӧл заводъёсмы сяна, эшшо 57 цех ужа на. Берло дыре министерство соосты но син азяз возе, ужзэс умоятон сярысь сюлмаське. Ачиз но та удыс югдурез тупатон ласянь ужрадъёс утча. Кылсярысь, Воткинскысь мясокомбинат Шарканысь "Мишкинский" хозяйствоен пудоосты куайытонъя огкыл кутӥз. Сыӵе ик тупанкыл гожтэмын районысь "Двигатель" хозяйствоен. Нош Глазовысь мясокомбинат, сӥль ваисьёсызлы дыраз коньдон сётымтэеныз, поставщикъёссэ ыштӥз. Гурт хозяйство азьын бадӟымесь ужпумъёс сыло. Соос пӧлысь нырысез - хозяйствоосты техникаен узырмытон. Но туала вакытэ хозяйствоос уг быгато техника басьтыны. Соин ик Удмурт Республика Россиын кичӧлтонэн потӥз МТС-ёс кылдытон пумысен. Та уж шаерамы азинске. Али 14 МТС кылдытэмын но ужа ни. Россиын 600 МТС ужаны кулэ, вуоно арын 200 гинэ МТС усьтӥськыны кулэ. Азьланьын та ужлэн пайдаез шӧдӥськыны кулэ, угось туала вакытэ ваньмыз хозяйствоос (эштосъёс, крестьян хозяйствоос) дуно техника возьыны уг быгато. Нош МТС-ёс ваньмызлы юрттозы. Г. РОМАНОВ. Кенешонъёс Одӥг пыдын - ХХИ даурын, мукетыныз... Гурезь уллань питыраны секыт, выллане тубыны каньылгес: йылозяз вуон мылкыд вамышлы быдэ кужым сётэ. Таӵегес ӵошатон сётэм потэ странаысьтымы вылӥ школалы, Россиысь калыкез дышетон удыслы. Огез бӧрсьы мукетыз ортчись шуккетъёс наукалэсь азинскон сюрессэ пытсало. Со сярысь лэчыт вераськон мынӥз Удмурт кун университетын кылем арня вискын ректоръёслэн ортчем кенешоназы. Отчы ветлӥзы Урал но Поволжье котырысь вылӥ дышетскон заведениослэн кивалтӥсьёссы. Кызьы улоно азьланяз? Кызьы "улэп" кылёно но кыӵе амалэн коньдон поттоно? Сыӵе юан пуксе али котькудӥз азе. Кылпум ӝутске ни куд-ог вузъёсты кулэстонъя но. Кытчы мынэ Россия? Кыӵе пеймыт гуэ нуэ будӥсь поколениез? Кенешонэ люкаськемъёс бадӟым осконэн возьмазы Россия Федерациысь калыкез дышетонъя министрез Владимир Михайлович Филипповез. Ижевске со вуиз нуназе шорын, ужаз, котькуд минутсэ шыръяса, трос пумиськон ортчытӥз. Пӧртэм пумо юанъёслы валэктон сётӥз. Министре Владимир Михайлович алигес юнматэмын, нырысетӥ "боевой крещенизэ" но Ижевскын басьтӥз. Ректоръёслэсь кенешсэс усьтыса шуиз: - Мон лыктӥ тӥлесьтыд верамъёстэс, дэмланъёстэм кылзыны, азьланьын югдурез тупатон сярысь огъя кылэ вуыны. Соку ик пусйисько: Правительство ласянь бадӟым юрттэт эн вите - бюджетын коньдон ӧвӧл. Та удысын ужасьёслы пунэмен тыронъёс туннэ нуналлы 120 миллиард манет люкаськемын. Правительство чакламъя, вуоно арын производство страная, шорлыдын вераса, самой ӧжытсэ усёз на 3-5 процентлы. Озьыен, ваньбур поттӥсьёс казнае нош ик выт дыраз уз тыре, соин сэрен уждун но пенсия тырон ӝегаса мыноз. Оскон вал Дуннеысь валютной фондлы. Гужем вылтӥ Россилы со ӵектӥз 25 миллиардъем юрттэт сётыны, верам кылзэ ӧз быдэсты. Шуг-секытысь потон амал Правительство шедьтыны выроз, выт октонэз чурытгес радъяса, но му вӧй, кудӟытӥсь юон поттӥсь кузёосты-монополистъёсты бюджет вылэ ужатыса Министр люкаськемъёсты пыр-поч тодматӥз калыкез дышетон удысын кылдэм югдурен. Ушъяськыны номырин. Школаос быдэсак выжтэмын интыосысь бюджетэ, Москва соослы коньдон висъямысь дугдӥз. Дышетӥсьёс пӧлысь 43 сюрсэз туннэ ик дась забастовка ялыны, дасо сюрс пиналъёс парта сьӧрын уг пуко. Школаез йылпумъясьёс пӧлысь 10 процентэз гинэ нылпиосмы ӟеч тазалыкен дышетсконзэс быдто. Начар сиён, мултэс секыт дышетон программа будӥсь мугорез лябӟыто, тросэз курадӟо йыр, лулсэр висёнъёсын. - Котьма ке но,- шуиз со, - дуннеысь странаос пӧлын асьмеос сокем урод ум адскиське: международной олимпиадаын пиналъёсмы куинетӥ интыез басьтӥзы. Соиз шонер, визьмо адямиосын Россия узыр на. Но ломоносовъёсты будэтӥсь му арысь аре куасьме, калыкез дышетон удыс нуналмысь нуналэ сюрес урдсы кыле. Кызьы шуиз Казань университетлэн ректорез Юрий Геннадьевич Коноплев, странаысьтымы та огез вашкалаез, быдэс дуннелы тодмо луись вылӥ дышетскон заведение куд-ог дыръя электрокужымтэк но кыльылэ ни. Секыт югдуре шедемын библиотеказы, ӟуч литературалэн дауръёсын люкам зарни шыкысэз. Пенсионеръёслы, преподавательёслы юрттон вылысь, университет кылдытӥз нимысьтыз фонд. Со тырме выпускникъёс-спонсоръёс чотын. Улэмед ке потэ, кураськыны но возьыт ӧвӧл ни. Удмурт кун университетын ужа та вузэз йылпумъямъёслэн огазеяськонзы. Соин кивалтэ наукая проректор В. Е. Шудегов. Виктор Евграфович верамъя, выпускникъёс мыло-кыдо пырисько книга, методической литература, научной ужъёсты поттонэ. Кенешонын стипендия тыронэн герӟаськем ужпум но учкемын вал. Студентъёс сое толэзьёсын уг адӟыло. Кызьы шуиз Волгоградысь пединститутлэн кивалтӥсез, азьланяз но югдур тазьы ик кылиз ке, тросэз быгатонлыко егитъёс дышетскемысь дугдозы. Законъя учконо ке, вылӥ школаын стипендилэн быдӟалаез кык ичи уждун мында луыны кулэ. Но сое басьтозы отличникъёс гинэ. Вузын лэсьто ас тодэмзыя: та коньдонэз висъяло на "4"-лы но "5"-лы дышетскисьёслы, секыт вакытэ кызьы ке но юрттон вылысь. Ваньмыз шуг-секытъёс кутско уксёлы ёрмон бордысь. Оренбургысь студентъёс преподавательёсынызы ӵош пото ни баррикадае, таӵе амалэн электрокужым сётӥсь подстанциез ас вылазы ужато. Государственной луись вузъёслы пумит огез бӧрсьы мукетыз усьтӥсько коньдон тырыса дышетон вузъёс. Кин оскытоз, отысь валтӥсь учёнойёс, ӟеч специалистъёс пото шуыса? Та пумысен ректоръёс туж шугъяськыса верало, малы ке шуоно, кузь коньдон нокинлы но ватсаса визь ӧз сёты на. Самара городысь мэрлэн воштӥсез ӵектон сётӥз куд-ог вузъёсты огдырлы ворсан сярысь, соос чотын кылемъёссэ утён понна. Кин тодэ, оло, та калэ но вуомы, государство калыксэ дышетыны ӧз ке вормы ни. Азьвыл аръёсы вераськон мынӥз вал школаез 12 аръем дышетон программае выжтон ласянь. Табере со сярысь поттылонэз ик ӧвӧл: кытысь сомында коньдон шедьтод? Табере котькудӥз школа, училище, вуз ас понназ, кызьы быгатэ, улыны кулэ. Сыӵе политикаез Россиысь Президентлэн. Ӟеч кылъёс верам потэ асьме университетмы, солэн ректорез Виталий Анатольевич Журавлев сярысь. Куноос паймизы: таӵе ёрмон вакытэ но Удмурт госуниверситет азинске. Берло аръёссэ гинэ ӝутэмын туала куронъёслы тупась выль дышетскон юрт, учёнойёсмы кышкатэк басьтӥсько тодмотэм удысъёс борды. Кенеше вуэмъёс сак кылзӥзы дистанционной амалэн студентъёсты дасян сярысь. Соин тодматӥз доцент И. З. Юсупов. Удмурт Правительство дась сётыны аслэсьтыз "Выбор" кун телефонной автоматической линизэ. Озьы ик университетлы юрттыны мылкыд каризы банк но нефть поттон удысъёс: соослэн телефон кабельзы озьы ик ужалоз специалистъёсты дасян понна. Та амал, кызьы пусйиз докладчик, кык поллы кулэстоз сессилы висъям дырез но дышетскыны висъям коньдонлэсь быдӟалазэ. Выль сямен тодон-валан басьтӥсьёс вань ни. Кылсярысь, Палестинаысь студент, ас дораз улыса, лекциос кылзэ Ижевскысь. УдГУ-эн кусып возён солы шӧдскымон дунтэм усе. Дистанционной амалъя вылӥ образование басьтыны быгатозы табере гуртазы пукись ӧлексы егитъёс но. Государство понна тазьы дышетскон дунтэм усёз. Ӵошатэ: очно дышетскись араз 11 сюрс манет кулэ каре, заочно отделениын - 4,5 сюрс, дистанционной амалэн - 3-3,5 сюрс манет. Трос умойзэ вераны луоз Удмурт госуниверситет сярысь. Юнме шорысь та кенешон но Ижевскын ӧз ортчы ук. Кызьы пусйизы Москваысь вуэм куноос, учёнойёсмы кемалась выжизы ни ХХИ дауре, наука азинске, номыр шоры учкытэк. Россиысь вылӥ школаос пӧлын со пумен юнгес султэ кужмоосыз радэ. Одӥг вамыш но капчиен уг сётскы - ваньмыз со коллективлэн огъя вормонэз. Соин ик оскем потэ, Ижевскын ортчем кенешон Россиысь вузъёслэн ужазы выль кужым пыртоз шуыса. Электрокужым интые ӵындӥсь чагтылэ потыны медаз кылды ни. Л. МЕДВЕДЕВА. * В. В. ИВАНИЦКИЙ - Россиысь Калыкез дышетонъя министерствоысь отделлэн кивалтӥсез но Самараысь экономикая кун академилэн ректорез А. И. НОСКОВ. * Кенешон дыръя. * Удмурт госуниверситетлэн выль юртэз. Фотоосыз В. КАМАШЕВЛЭН. Дунне утиз ке чеберлыкез... Ижын кык арня ужаз Россиысь Суредасьёслэн огазеяськонысьтызы адямилэн, Россиысь Чеберлыкъя академилэн дипломантэзлэн удмурт пилэн Григорий Чайниковлэн ужъёсыныз возьматон. Григорий Леонтьевич Чайников Москвае берытскиз ӟеч мылкыдын, чебер малпанъёсын. Таяз учыре со вал аслаз выставкаяз - нырысьсэ ортчиз со Ижын - вордскем шаерезлэн шоркараз. Ужъёсыз дасяськизы ар ӵоже - быръемын вал художниклэн тужгес усто ньыльдон суредэз. Соос возьмато кибашлылэсь дас ар ӵоже тыршемзэ. Суредась сӥзиз аслэсьтыз ужъёссэ Удмурт Элькунлэн нуналэзлы. Зэм, туала вакытэ капчи ӧвӧл ужъёстэ, огинэ люкаса, солань-талань нуллыны. Мукет сюлэмшугъяськонъёс но люкето. Озьы ке но, выставка радъяськиз, Удмурт Элькун Кивалтэт, Ижысь кузёос сюлмаськемен. Юрттэмзы понна тужгес но бадӟым тау карем потэ Удмурт Кивалтэтысь Пӧртэм калыкъёсын ужанъя комитетлэн тӧроезлы Светлана Константиновна Смирновалы но Ижлэн йырызлэн воштӥсезлы Сергей Александрович Трухинлы. Али, йыружъёс йылэмен, улон-вылонмы чутрак уродмемен, чеберлыкез кылдытӥсьёс шып улыны кулэ ӧвӧл. Котькудӥз вайыны кулэ югыт но шуныт. Тросэз понна сыӵе луизы Григорий Чайниковлэн паймымон ужъёсыз. Юнме верам чебер кылъёс ӧвӧл со. Таӵе малпанэ вуизы зэмос кибашлылэн ужъёсыныз тодматскыны быгатэмъёс. Солэн суредъёсыз бордазы кыско чеберлыкенызы, мур пуштросъем луэменызы. Куд-огаз возьматэмын аспӧртэмлыко инкуазь, пумтэм-йылтэм кыстӥськись шаермы. Тусбуйёсысь учко аспал эшъёсмылэн туж огшоры но матысь ымныръёссы, быгатыса суредамын адямилэн пуш сюлмаськонъёсыз. Узыр пуштросэнызы, бадӟымлыкенызы, зэмос луэменызы висъясько "Беромем тулыс", "Сӥзьыл куар усён", "Тудву", "Россиянка", "Анютка", "Шурик-саксофонист", "Сьӧд" мунчо" ужъёсыз. Выставкае ветлэмъёс ӟеч мылкыдъёссэс веразы малпанъёсты возьматӥсь книгае. Куд-ог кылъёс, зэмзэ ик, сюлэмез чепыльто. А. Лопатин, кылсярысь, шуэ: "Тӥляд суредъёсады возьматэмын секыт улон сюресэз ортчем адямиосмы но асьмелэн вордскем музъеммы. Сюлмысь тау тӥледлы". Национальной библиотекаын ужасьёс гожто: "Тау, ӟеч мылкыд кылдытэмды понна. Мӧзмыт но чылкыт, вуж юртын выллем. Тау!" Л. Никонова: "... Паймымон выставка! Тау Россия понна, солэн чеберлыкез, солэн адямиосыз понна. Соос бордын - кужыммы но улонмы!" Удмурт кун университетысь искусствоосъя факультетысь витетӥ курсын дышетскись ныл гожтэ: "Асьтэлэн ужъёсыныды тӥ возьматӥськоды Россиысь зэмос улонэз. Куд-ог дыръя тазьы но малпаськылӥсько ни вал: огшоры улон-вылонэ нокинлэн зымемез уг пот ни". С. Блинова: "...Туж бадӟым тау выставкады понна: пушкын бугыръяськемез возьматыны кылъёс уг шедё". Удмурт шаерлэн огъя улоназ но та адӟытон бадӟым инты басьтэ. Ӝожомыса верано луэ: пӧртэм мугъёсъя уноез аспал эшсылэсь ужъёссэ адӟыны ӧз быгатэлэ. Тырмыт ӧй вал выставкалэн дырыз но ортчон интыез сярысь иворъёс. Зэм, со туннэ туж дуно сылэ. Нош вань ук суредасьёс, искусствоведъёс, мукетъёсыз. Соос пӧлысь кӧняез ке выставкаез усьтонэ пыриськизы ик. Но сӥялэс мылкыдын улэмзы валантэмгес. Юнме луиз Удмурт шаерын потӥсь газетъёсысь та суредась но солэн ужъёсыз сярысь кыӵе ке зарисовка шедьтыны турттэме. Паймытэ вузъёсысь дышетӥсьёслэн но тэк пукемзы: ӧй быгатысалзы шат соос экскурсиос радъяны? Кулэ саклык ӧз висъялэ университетысь искусствоосъя факультетысь студентъёс но. Куд-ог дыръя ӧпкелиськом: ум быгатӥське музейёсы но выставкаосы ветлыны, дуннеысь чеберлыко культуралэн шедевръёсыныз тодматскыны, соин валче искусствомылэсь историзэ репродукциосъя гинэ эскероно луэ... Нош Москваын но тодмо луэм суредасьлэн выставкаяз лыктыны шуд усе ке но, сыӵе луонлыкез уже ум кутӥськелэ. Г. Л. Чайниковлэн ужъёсыз вылӥ дунъет басьтылӥзы ни Москваысь искусствоведъёс пӧлын но международной выставкаосын. Зэм, ичи уждун басьтон но ужтэк кылён вакытэ таӵе шумпотонъёс туж ик кулэ уг луо. Озьы ке но, адями лулчеберлык доры кыстӥськыны кулэ. Удмурт шаерысь калык суредась А. П. Холмогоров ас вакытаз Удмурт кун университетысь художественно-графической факультетысь пинал студентлы Г. Л. Чайниковлы В. И. Суриков нимо институтэ пырыны дэмлан сётӥз вал. Отӥяз - Художествоосъя академия, нош собере - калыклэн тодыны кутскемез. Таяз учыре кибашлы пинал усточиосын пумиськыны ӧз быгаты. Аслаз дышетӥсезлы сямен, нокинлы нокыӵе дэмлан но сётыны ӧз кылды. Оскисько: ваньмыз ай эшшо азьпалан. Ма, ачиз суредась но тодэ: искусствоез улӟытон, азьвыл аръёсы сямен ик, пыдлось улосъёсысен кутскоз. Таӵе огыр-бугыр вакытэ котькудӥз усточи тросгес сюлмаське кызьы ке улэп кылён сярысь. Соослы одно ик юрттоно. Тужгес но мед дурбасьтысал кунмы. Та адямиос быгато сюлэмъёсамы паймымон дунне кылдытыны но отысь пеймытэз улляны. Сыӵе ик Григорий Чайников но. Туж оскем потэ: азьланяз одно ик кылдозы на солэн вордскем удмурт шаермес но солэсь чебер адямиоссэ данъясь ужъёсыз. Таин валче верам потэ созэ но. Удмурт Элькунысь Культурая министерство, мукет творческой огазеяськонъёс Москваысь эшъёсынызы ӵош мед пыриськысалзы шаерзылэн палэназ улӥсь дано аспал эшъёссылэн ужъёсынызы тодматонэ. В. СТЕРХОВ, "Удмуртское землячество" огазеяськонэ быръем мурт. Эскерозы йӧллэсь ӟечлыксэ Удмурт Элькунысь Гурт хозяйствоя но сиён-юонъя министерство туннэ нуналысен йӧллэсь ӟечлыксэ эскеронъя месячник ялэ. Быдэс толэзь ӵоже, ферамысен кутскыса йӧл поттон заводозь, чакласькоз поттэм продукцилэн ӟечлыкез. Вань хозяйствоосын кылдытэмын нимысьтыз комиссиос. Отчы пыро зоотехникъёс но йӧлэз басьтонъя инспекторъёс. Т. МИРОНОВ. Гажано лыдӟисьёсмы! Туэ 1-тӥ декабрьысен редакциысьтымы куд-ог телефон номеръёсмы воштӥськозы. 24 лыдпусэн телефонъёс табере кутскозы 44 номерен. Алиосыз: выльёсыз: отделъёс но ёзъёс: 24-53-69 444-344 - валтӥсь редакторлэн воштӥсез 24-55-25 444-235 - законъя но сямъёсъя 24-58-05 444-205 - секретариат 24-56-69 444-269 - иворъёсъя, "Шӧкыч" 24-59-78 444-263 - реклама 24-44-36 444-216 - туспуктонъя 24-56-67 444-100 - юанъёсъя но ялонъёсъя 24-45-73 444-258 - культурая 24-49-16 444-260 - бухгалтерия Тау - быдӟым кыл Ашык ӝужда дыръям песяй ыстӥз монэ ваче капка улӥсьёс доры. Мын ай, пе, пунэм тыронмес ну. Пунэмам, шуэ, берыктонэн чебер. Сётӥз киям колды нянь (али гинэ гурысь вал, дыр - сокем шуныт на). Ма, пичи мурт уго - ыстон-косон, солэн вань ужез - шудон. Озьы ке но, мон, туж шумпотыса, киросатае доры бызи. Со шырыт адями. Няньме басьтыкуз, йырме каньылак маялтӥз но шуиз: - Тау, пие. Ме ай, перепечмес веръя. Укыр ческыт пӧрамын. Кӧт тыремме валатэк кадь ньыль перепеч сии. Кызьы меда кӧтам тэриз? Кошкыны ӧдъясько вал ини - киросатай дугдытӥз. Монэ вӧзаз пуктыса, пыдлось лулӟиз, каллен гинэ вераз: - Вот, пие, адями улытозяз пӧртэм учыръёсы шедьылэ. Мынам но сыӵе дыры вал. Огзэ гинэ верало. Война кутскем бере, кыкетӥ толэзяз ик, ожгаре шеди. Тушмонлэн кужымез унолы юнгес вал. Асьмелэнъёс чигназы, музъеммес фашистлы кельтӥмы. Белоруссиын гурт понна ожмаськыку (нимзэ вунэтӥ ни - авт.), милесьтым расчётмес пазьгизы. Танкъёслы пумит винтовкаен уд урдӥськы. Амалтэк чигнано луимы. Нош улэм потэ. Егитэсь на уго. Кин пегӟыны ӧз вуы -турназы. Одӥг юртэ вуимы но, кин кытчы - мон сьёросэ (туалетэ). Малпаськыны дыр ӧй вал - пасе тюак тэтчи. Адямиослэн бушатскем бервылазы. Жоб но кизер напра быдэс мугорез сюпсе, улласнь кыске. Чыртыозям выемын. Кӧня ке дыр ортчыса, сьёросэ пыриз немец: автоматэн, саесъёс пужаллямын. Пасе учкиз но йыр вылам кузьыт вузэ ӟизатӥз. Бӧрысь ини шорам серекъяса кошкиз. Ултӥямез понна кулымонам ӝож ке но вал, солы мон тау шуи. Ӧз ыбы, улыны-курадӟыны кельтӥз. Улэп-а, ӧвӧл-а со кӧтвеськантэм фашист, али ке но тау карисько. Киросатайлэсь верамзэ ымме усьтыса кылзӥ. Малы ке туж шимес но кышкыт потӥз. Нош кудпала куасалтэмзэ таки ӧй вала. Эшшо мадьыны курисько на вал - со чутрак пумит луиз. Тодӥд ке, пе, таӵе мадён-загадкаез, берло верало: "Со кузь но, вакчи но ӧвӧл. Секыт но, капчи но ӧвӧл. Нош сое кылыса, сюлэмлы каньыл". Солэсь загадказэ дышетскыкум валай. Тодӥ, мар кыл вылэм со тау шуэм. Нош соку перепечъёсыз понна ӟеч кылме верай меда? Уг, уг ни тодӥськы. Сыӵе нодъямез понна, али йыбырттыса тау карысал. Огез жаль: ачиз ӧвӧл ни. Тау - огшоры гинэ кыл кадь. Нокыӵе мудронэз, серемесэз ӧвӧл, нош кыӵе бадӟым солэн кужымез, шунытэз, небытэз. Пичи дыр ке шуиськом, син азе пуктӥськом книгаосын выреммес. Бен, школа, дышетӥсь, урокъёс, тодон-валан вамышъёс. Дышетӥсь (мынам малпамея) котькуд школьниклэн кыкетӥ анай-атаез луэ, дыр. Сукыр муртъёслэсь синзэс усьтэ кадь. Ӧдъяськом тунсыкъяськыны пӧртэм предметъёсын: адӟымтэезлы паймиськом, вуоноез - выжыкыл, задача - тумошо. Нош аръёс ортчыса пумиськыса, соос пичи мурт кадь лӧпто. Шумпотэмзэс вормытэк, доразы ӧте, ӝӧк сьӧры пукто. Кема витем кунозы кадь потэ, дыр. Кутско юаны-вераны. Умой сюрес вылын ке дышетэм муртсы, шумпотонзы вордэм анайлэн кадь. Нош кыло ке маке уродзэ, соослэн но кайгыронзы анайлэсь пӧртэм ӧвӧл. Кытын ке, пе, ми но янгышамы, дыр. Сыӵеесь соос, кыкетӥ анай-атайёсмы: А. М. Филиппова, П. С. Гоголев (али ӧвӧл ни), Е. В. Конюхова, М. М. Тюрикова. Музъемозь йыбырттыса, ӟырдыт мылкыдын тау каро. Кылъёсы кӧсэсь ке но, малпанъёсы луозы пӧсесь. Тау. Нош вылӥ кивалтӥсьёс дунъяло меда соослэсь тыршемзэс? Ӧйтӧд. Ужзы понна толэзьёсын-толэзьёсын коньдон ӧз ни бичалэ. Нош будӥсь кивоштӥсьёсты дышетоно. Мар луоз азьланяз - тодӥсь ӧвӧл. Огез валамон: небыт вазён воштӥськоз ямсыз кылын. Юнме уг верало, дыр: сютэм мурт, пе, кион кадь лек луэ. Таӵе дыре тау шуэм гинэ буйгатоз меда лопыръясь мылкыдэз? Ӧйтӧд. Пиньёстэ амалтэк ваче куртчод но школае мынод - ужамъяськод шуныт кыл понна гинэ. Бен, пожалуйста уг мыкыръяськы, тау но тыбырез уг тӥя. Соин, лэся, чидаськом, чидаськом... Нош мае чидало, асьмеды эмъясь врачъёс? Соослэн но улонзы, вӧйын нянь кадь, ческыт ӧвӧл. Эмъюм уг тырмы, бинтъёс миськемын, сиён - ӧвӧллэсь вань. Уждунзы пачкатэмын. Сыӵе мылкыдын-а йӧнатод адямиез? Ӧйтӧд, олокытысь кужым но шедьто на соос. Черлам муртъёсты оскыто, йӧнатом шуыса. Висисьёс доры пыро, урод мылкыдзэс ватыса. Оло, соос, висисьёслэсь но кужмогес, асьсэос висё? Тодӥсь ӧвӧл. Бурмем мурт пыд йылаз ке султэ, тау кылзэ ке вера, соос пальышало гинэ. Пальышало кӧсыт мылкыдын. Кызьы ке мыным но кыллёно луиз Ижысь 2-тӥ больницаын. Висён уг юа - чутрак куасалтэ но - тӥни. Кырылӥзы-вандылӥзы, кышъязы-вурӟизы. Султылэм уг луы. Висён уго койка борды думылэ. Одӥг шутэтскон нуналэ синъёсме усьтӥ - вӧзам тӧдьы халатэн пиосмурт. Соку кадь мон йырсазям пыри, валаны кутски. Со вал хирургияя отделениен кивалтӥсь Александр Борисович Казаков. Шорам учкыса мыньпотэ. Ваньмыз, пе, тӥляд умой. Висёнме вормемелы, дыр, мынектӥз. Нош мынам тодам лыктӥзы киросатайлэн кылъёсыз: "Урод-а, ӟеч-а мылкыдыд, адямилы шуныт кылдэ вераны эн вунэты. Ымад уз чабке". Тау, пӧй, тӥледлы. Нош со ӵыжектӥз: нырысь, пе, бурмы. Бурмыны мон бурми. Больницаысь потыкум, ӟеч кылме но верай. Нош сюлмын маиз ке уг тырмы. Ачим но уг валаськы. Кышноелэн ӵектэмезъя нуи эмъясьёслы торт но, гуртысь нӧкы вӧй. Ӟечез ӟечен ик берыктоно. Тодӥсько: пыриськем кадь луэ. Озьы ке но, китӥм валтыса уз поттэ, дыр. Ваньзэ тае адӟыса, хирург укно пала берытскиз, шорам ӧз учкылы ни. Одӥг кыл гинэ вераз: Тау. Перевязочнойысь Аля апай монэ келякуз шуиз на: "Висисьёс, йӧнамзы бере, зарни гурезь сӥзьыса кельто. Доразы вунэто, лэся. Тон номыр ӧд сӥзьы, дӥнямы вуид. Ужмес дунъямед понна тау". Мыным со кыл ӵыжтэм вӧй кадь потӥз. Сюлмылы каньылак луиз. Нянь ке ӧвӧл, йыр лыдэ, шуо. Зэм, дыр, со. Бомжъёс, ужтэк кылемъёс кинлы ке тау каро меда? Ӧйтӧд. Ӝужытэсь юртъёс доры мульдаос, контейнеръёс интыямын. Жуг-жаг, кылем-мылем куян инты. Котькуд бомжлэн аслаз мульдаез, мукетыз медаз дӥсьты отын бугыръяськыны. Соос пӧлын но шедё ачимъяськисьёс. Амалтэк кутске ог-огдэ пыкылон. Кытӥяз мыжыкъёссэс но ӝуткало. Ямсыз кылъёс кылыку, пельёстэ коть сюсен ӵокта. Соос но адямиос уга: кӧтсэс маин ке алданы туртто. Нош шеде ке нянь юдэс, пумтэм шумпото. Озьыен, туннэ лулзэс утемзы луоз на. Нянь - ваньмызлы йыр. Нош кинлы меда соос тау каро? Нянь будэтӥсьлы-а, куясезлы-а? Ӵок ини, созэ асьсэос тодо. Вазь ӵукна уже мыныкум, контейнер дорын ӵаштыртэм кылӥськиз. Ӝуштэ но кадь. Пеймыт на вал. Мыныса учконо кожай. Адӟисько - мульда пушкын адями. Гызмыль-гызмыль выре. Ӵаукна вазь сайкам куака сиёнтэк уг кыльы, шуо. Солэн но озьы ик, лэся. Малпаз, дыр: огкутскемен музон мульдаосты но бушатоно, бугыръяно, мукет бомжъёс адӟымтэ дыръя. Со но та вераськеммы бере, нёжмыт куараен шуиз: - Ар, кык чидало на, нош отӥяз... - Мар отӥяз? - юатэк ӧй чида. - Тау инкуазьлы, тамында улэме понна. Отӥзэ Инмар возьматоз. Я, эн люкеты мыным, вамышты ас сюрестӥд. Ӝоген сактоз, а то монэ мукет эшъёс кырмозы. Бен, котькуд адями кинлы ке, марлы ке тау кароз ик вылэм. Только ваньмыз со пӧртэм мылкыдын, пӧртэм амалэн, пӧртэм югдурен. Сыӵе со, кузь но вакчи, секыт но капчи луисьтэм кыл - тау. Виталий Агбаев. Кин тон? Кытысь тон? Кыӵе выжыысь? Туэ 1-тӥ октябрьысен Удмуртиын выль паспортъёс сётъяны кутскизы. Но паспорттэс али ик воштыны эн дыртэлэ: вуж паспортъёс 2005-тӥ арозь кутӥськозы на. Республикаямы выль паспортъёс ичи вуэмен, соос нырысь ик сётэмын луозы 16 арессэс тырмытэмъёслы - та документэз нырысьсэ басьтӥсьёслы. Выль паспортлэн вылаз гожтэмын "Паспорт гражданина Российской Федерации", нош пушкыз быдэс дуннеын куронъёсъя лэсьтэмын. Пусъемын паспорт кузёлэн нимтулыз, вордскем нуналыз, паспорт басьтэмлэн дырыз но интыез, личной кодэз (та люкет вуоноезлы кулэ луоз. Национальностез пусйыны кулэ уз луы ни. Туспуктэм одӥг гинэ кулэ (сьӧдэн тӧдьы, 35х45 мм). 20 но 45 аресэз тырмытэмъёс паспортсэс воштозы. Мукет гожъямъёс: пиналъёс, воинской обязанность, семья, прописка сярысь вуж паспортын сямен ик кылёзы. Выль паспорт басьтон понна, 2 туспуктэм кулэ. Тус пуктыкуды одно ик верано, выль паспортлы пуксиськоды шуыса. Паспортсэ ыштэм муртъёслы Россия Федерацилэн гражданинэз шуыса удостоверение гинэ сётӥське. Сыӵе ик удостоверение басьто фамилизэс, нимзэс, атай нимзэс воштӥсьёс. Малы ке шуоно, вуж паспортъёслэн бланкъёссы быризы, нош выльёсыз тырмымон ӧз вуэ на. А. ПЕТРОВА, Ижевскысь Первомай РОВД-ысь паспортно-визовой службалэн кивалтӥсез. Зарни чорыгъёс Котькуд сӥзьыл Иж урамъёсысь адӟод улэп карпъёсын вузкаремзэс. Мон но алигес, куинь чорыг басьтыса, гуртам ваи. Улэпесь вуизы соос. Оломалы жаль потӥзы. Ваннаям ву тырмытыса, отчы лэзи. Учкисько, чорыгъёсы уяло ни. Ӵуказеяз эшшо чырткемесьгес луизы. Нянь сётыса утчай - уг сиё, пӧзьтэм курег пуз сётӥ - уг басьто. Жомбылляськыса уяны ӧдъязы карпъёсы. Ми соосты вешаськом, маялляськом. Чебер уло! Малпасько, гужем ке луысал, гуртысьтым бакча берысь пичигес тыметэ лэзьысал ни. Жаляменымы чорыгмес вӧсь карыны кимы ӧз ӝутскы. Соосты сиён сярысь веранэз ик ӧвӧл. Ӵукнаяз карпъёсмес ведрае лэзим но нылыным Иж ӵыпет доры вамыштӥм. Чорыгъёсмылы, тазалык сӥзьыса, тыметэ лэзим. Нырысь дӥсьтытэкгес, собере ини, шаплыгес кариськыса, зарни чорыгъёсмы ву пыдсы ышизы. В. ШЛЯПИН. Визьзэ но кужымзэ сётэ дышетонлы Научно-исследовательской институтэ вуылыкум, мынам ки улам сюрылӥз Л. С. Христолюбовалэн "Учёные-удмурты" ужез. Книгаез бугыръякум, син улам шедизы аспалъёсылэн - сузэр-вынъёслэн Тукаевъёслэн нимъёссы. Вордскемын соос Кияса ёросысь Уддяди гуртын. Иван Петрович - педагогика наукая кандидат, нош сузэрез Раиса Петровна - медицина наукая кандидат, ужа Ижевскысь медициная академиын. Туэ гужем Иван Петрович Тукаевлы "Удмурт Элькунысь калыкез дышетонын дано ужась" ним сётӥзы. Ӝыны даурлэсь трос тыршиз со дышетон удысын. Та дыр куспын Иван Петрович ортчиз улон сюреслэсь вань лёгетъёссэ - огшоры дышетӥсьысен кутскыса калыкез дышетонъя министр дорозь. Ужан сюресэз солэн кутскиз кыдёкысь 1942 арын. Та аре нырысьсэ адӟиз но шӧдоно луиз дышетӥсьлэсь ужзэ. Азьвыл классэнызы кивалтӥсьлэн Важегова Галина Александровналэн ӵектэмезъя, солы оскизы Уддяди гуртысь покчиосты дышетыны. Ужзэ эскерыны вуылӥз Калыкез дышетонъя министерствоысь инспектор Анастасия Даниловна Корепанова. Анастасия Даниловна паймылэм егит пияшлэн урокъёсызлы. Со юри дышетскымтэ но ук. Нош кыӵе ӟеч тодэ сётоно материалзэ! Но Выль ар азьын ФЗО-е басьяны кутско. Тукаев шеде со списоке. Дышетскон арез йылпумъяны сёто ик. Армие гужем басьто. Сюрем авиацие. Данъяське авиацие шедеменыз, малы ке шуоно, со вакытэ отчы басьто вылэм шор ёзо школаез быдтэмъёсты гинэ. Шунды ӝужан пала келяллям. Япониен война кутскем бере, соосты пырто Маньчжурие. Иван Петрович маде одӥг учырзэ: Мудандзян карын асьме самолётъёс асьмелэнъёс вылэ ик бомбаос куяллям. Со учыр бере ик особой отделэ ӧтчаллям. Отын со ивор медаз кылӥськы шуыса алӥллям. Отын контузить луэмез но дышетӥсьын ужамез юртто Иван Петровичлы армилэсь вазьгес мозмытскыны. Бертыса ужаны кутске школаын. Со аре ик Сарапулысь педучилищее дышетскыны пыре. Кык ар ӵоже быдтэ. Котькуд ар сётылэм кык курс понна экзаменъёс. Таӵеез та училищеын вылымтэ на. Азьланьтэ дышетсконзэ Удмурт пединститутысь историяя факультетын. Со вакытэ тросэз историк луыны мылкыд карылӥллям. Идеологической валанэн герӟаськемын вылэм, лэся. Райкомлэн секретарез луыса ужакуз, солэн ӵектэмезъя, Вуж Салья гуртын усьто сизьым классъем удмурт школа. Ассэ ик ӵекто директоре. 13 ар ӵоже ужаз-кивалтӥз Иван Петрович школаен, комсомоллэн райкоменыз но роноен. Секыт война бере, капчи ӧй вал егит пияшлы та удысъёсын. Шуг-секытъёс шоры учкытэк тыршылӥз школае тырмыт книга, мукет дышетскон тӥрлык шедьтыны. 1959 арын ӧтё Дышетӥсьёслэсь тодон-валанзэс будэтон институтэ. Соку ик ӵекто вылэм директорлэсь интызэ. Пумит луэм, малы ке шуоно, Кияса шор ёзо школаын ужакуз ик чакла вылэм аспирантурае пырыны, соин ик методист луыса ужаны ӧдъяз. 1961-64 аръёсы дышетске Москваысь педагогикалэн теориезъя но историезъя институтысь аспирантураын. Гожтэ покчи пиналъёслы шаердэ гажан мылкыд пыӵатон сярысь диссертация. Ужаз валэктыны тырше удмурт калыклэсь узыр педагогиказэ. Удмуртъёс ас котырысьтызы адямиосты яратыны быгато, шуэ. Соос, пе, пӧртэм калыкъёсын тупало. Калык кусыпъёс бадӟым инты уг басьто, уго ваньмыз адямилэн кыӵе луэмез бордысь потэ. Удмурт калык дышетскем выжыкылъёс, сямъёс, калык веранъёс вылын. Кызьы сое ваньзэ пиналъёслы валэктоно? Тӥни со ужпумез сэрттэ-пертче Иван Петрович. Аспирантуразэ быдтэм бераз, Иван Петрович Тукаевез Удмурт пединститутэ ысто. Татын но уг куштӥськы со малпанъёсызлэсь. Творческой ужъёсаз тырше усьтыны, кызьы кылдӥз но будӥз асьме шаерын калыклэн дышетскемез. Кызьы солэсь асваланзэ будэтоно. Иван Петрович озьы ик эскере Г. Е. Верещагинлэсь ужъёссэ. Трос материал бича 1972-74 аръёсы. Утчаз Г. Е. Верещагинлэсь ужъёссэ Москваысь Ленин нимо библиотекаын, Ленинградын Географъёслэн обществозылэн архивысьтыз, Удмурт научно- исследовательской институтысь. Обкомлэн ӵектэмезъя, Иван Петровичез 1978 арын калыкез дышетонъя министре быръё. Тукаев ужан кутскыкуз ас ки улаз басьтэм национальной школаосты. Со вакытэ ик улонэ пыӵало школаосын но училищеосын реформаос. Ӝутӥсько выль нылпи школаос, садъёс, дышетӥсьёслы улон юртъёс. Озьы ик Иван Петрович сюлмаськемен, тросгес дасямын вал удмурт школаослы дышетӥсьёс. 1986 арын министр ужезлэсь мозмыто, пенсие потон дырыз вуэмен. Берытске Удмурт университетлэн педагогикая но педагогической психологияя кафедрае ужаны. Татын азьланьтэ исследовательской ужзэ. Иван Петровичлэн кивалтэмез улсын поттэмын 16 книга но 40 методической пособие. Н. МОРЯКОВ. Висён ваись ву 10 ноябре Кезысь больницае уно адямиос вазиськизы, кӧт висемзылы ӝожтӥськыса. Ваньмыз соос артэ ульчаосын уло. Ваньмызлы сямен "кӧткыль" диагноз пуктэмын вал. Кык арня куспын 51 адями черлаз, соос пӧлысь 34-ез - нылпиос. Кытысь потӥз та висён? Кезын ву кошкись скважиназэс тупатӥллям. Соку кӧткыльлэн палочкаез юон вуэ шедем. Нош кезъёс гумыетӥ лыктӥсь вуэз быректытэк юо вылэм... 11 ноябре ву ваись гумыослы дезинфекция ортчытэмын вал. Али выль висисьёс ӧвӧл ни. Больницаын кыллисьёс пумен йӧнало. Тодӥськоды на, луоз, кӧткыль туэ гужем Кияса ёросын вӧлмиз вал. Та радэ 190 адями висиз. Висён потӥз юон ву бордысен, Кезын кадь ик. Та кык учыр возьматэ, шаерамы юон вулэн ӟечлыкез улӥын шуыса, со санитарилэн но гигиеналэн куронъёсслы уг тупа. Малы? Республикаысьтымы ву кыскись сооружениос, ву ваись гумыос данакез вужмемын. Соосты тупатъяны коньдон ӧвӧл. Со сяна, тросэз соос кузётэм кылемын. Тани басьтом Кезэз ик. Татысь ву кыскись скважинаосты эскерыса возиз "Удмуртмелиорация". Нош али та организация, коньдон ӧвӧл шуыса, соосты воземлэсь куштӥськиз. Интыысь администрация ву кыскись но сётӥсь объектъёсты ас вылаз басьтыны ӧз вуы - нош ик уксё ӧвӧлэн. Эзель тодэ, ку куртчоно. Та выллем югдур кылдэмын быдэс республикаын. Огез ёрос но, город но ӟеч гумыосыныз ушъяськыны уг быгаты. Госсанэпиднадзор ивортэмъя, ву юыса, черланы бадӟым кышкытлык кылдэмын Балезино, Юкаменск, Кез, Вавож, Селта, Дэбес, Можга, Кияса, Як.-Бодья, Яр, Сарапул, Воткинск, Камбарка ёросъёсын. Татысь скважинаос, колонкаос эскерымтэ, ву ваись гумыос сисьмемын. Отчы силё но, нӧд ву но капчиен шедьыны быгатозы. Соин ик калыклы вазиськем потэ: кӧткыль выллем висёнъёслэсь утиськемды потэ ке, быректымтэ вуэз эн юэ! В. БУЛДАКОВ, Граждан оборона ужпумъёсъя но кышкыт учыръёслэсь утиськонъя комитетысь специалист. Кӧня усёз кызэз чеберъян? Матэктэ ни Выль ар. Калык со нуналлы дасяське, кыз чеберъян шудонъёс, кузьымъёс утча. Тани огаз магазинын чебересь пияла шудонъёс 2-30 манет сыло. Фольгалэсь жильыос - 8-10 манет, конфетти, серпантин - 1-4 манет. Нош пластмассалэсь лэсьтэм кызъёс: ӝыны метр ӝуждалаен - 500-600 манет, одӥг метръемез - 1 сюрс 65 манет, 2,5 метръемез - 7 сюрс пала сыло. Табере асьтэос лыдъялэ, кӧня одӥг кызэз басьтон но чеберъян? Тросгес уз луэ меда нюлэсэз корасьёс? Л. ЮРТЕЕВА. ӦЛЕКСЫОСЛЭН НУНАЛЗЫЛЫ Синмоез уг адӟы, кылӥсез уг кылы Шуг-секытъёслэсь нокин но утемын ӧвӧл. Но малы ке но висисьёс, инвалидъёс сярысь сюлмаськон, соослы юрттон котьку берлолы кельтэмын. Кызьы луэ асьмелэн: синмоез уг адӟы, кылӥсез уг кылы. Нош шаерамы гинэ 98 сюрс пала сӧсыръёс лыдъясбко, 6 сюрсэз соос пӧлысь нылпиос. Басьтом Ижевскез гинэ. Быдӟым Отечественной войнаын ӧсырмемъёс - 1633 адями, инвалидъёс - 16 сюрс, нылпиысен инвалидъёс - 2917 мурт. 14 процентэз гинэ шуге-леке сюремъёс ужало, 523 мурт Ижевскысь уже интыянъя службае вазиськемын. Инвалидъёслэсь ужзэс кулэ каре 40 предприятие, кудъёсаз 501 мурт тырше. Кызьы адӟиськом, лыдпусъёс шумпотымонэсь ӧвӧл. Юрттэт кулэ туннэ ик. Сӧсыръёс, ӧлексыос, висисьёс асьсэлэсь огазеяськонъёссэс кылдыто. Шаерамы ужа кылӥсьтэмъёслэн (ВОГ), синтэмъёслэн (ВОС) но ӧлексыослэн-висисьёслэн (ВОИ) огазеяськонъёссы. Синтэмъёслэн асьсэлэн предприятизы вань ке, мукетъёсызлы ас кужымен ужзэс пыд йылазы ӝутоно луэ. Адӟем карымонэз вань гинэ. Ӟечен пусйыны луоз як.-бодьяосты, глазовъёсты, воткаосты. Дуннеысь ӧлексыослэн нуналзы азьын шаерысьтымы инвалидъёслэн огазеяськонзы, ужбергатон удысэз ужазы паськытгес вӧлмытон понна, "Ижнефтемашлэн" профилакторияз куинь нуналъем семинар ортчытӥз. Отчы люкаськылӥзы ёрос ёзъёслэн кивалтӥсьёссы, бухгалтеръёс, огазеяськонлэн ужаз мылысь-кыдысь пыриськемъёс. Семинаре ӧтемын вал пӧртэм удысъёсысь специалистъёс, люкаськемъёс озьы ик тодматскизы ог-огзылэн ужан амалъёсынызы. Ӧлексыослэн нуналзылы сӥзьыса шаерамы пӧртэм ужрадъёс, пумиськонъёс ортчо, шуге- леке сюремъёслы пӧртэм юрттэт сёто. Селта ёрос администрациысь калыклы улон-вылонын юрттэт сётонъя отдел радъя инвалид нылпиосын пумиськон. Ёросын соос 67 кузя. Одӥгез но семья палэнэ кельтэмын уз луы, котькудӥзлы пиналлы дасямын кузьым. Асьсэос но соос та нуналлы дасясько - киужъёсынызы, суредъёсынызы адӟытонэ пыриськозы, ог- огзылы возьматозы кырӟаны-вераны быгатэмзэс. Шуге-леке сюремъёслы та нуналэ ваньмызлы ик сӥзем потэ юнлык но азьлань улонлы оскон. Л. МАЛЫХ. Нина Андреевна Светлова кивалтэ Можгаысь инвалидъёслэн огазеяськонэнызы. Ужъёссэс ӟеч радъяны быгато Вотка городысь инвалидъёслэн огазеяськонзылэн кивалтӥсез Владимир Вениаминович Адамов но бухгалтер Александра Ивановна Балдыкова. Александра Павловна Чайникова Ижевскысь Ленин ёросысь инвалидъёслэн огазеяськоназы пыре - усто кырӟась. Кибашлыос Кузьыли кадь тыршод, кизили кадь пиштод Куиськон, вуриськон, пулэз но туез чильпан-чеберъян, корзина но горшок лэсьтон... Кинлэн таӵе ужен, лулэз-сюлэмез буйгатӥсь чебер киужен выремез уз поты. Якшур- Бодьялан со понна нимысьтыз юрт усьтэмын. Туэ солы тырмиз вить ар. Кивалтэ та юртэн Ольга Степановна Перевощикова. Туннэ юанъёсмы солы. - Ольга Степановна, арезъя ик куарнянез но луэ. Тӥляд кыӵе со пӧрмиз? - Киужъёсъя юртмы усьтӥськиз 1993 арын. Кивалтӥсез соку вал Рудольф Мусихин. Солы утчано но кусыпъёс тупатоно луиз районысь кибашлыосын. Нырысь ужасьёс пӧлын вал Виталий Емельянов, Владимир Шкляев. Ачим татын 1995 арысен. Куарняньмы пыжиз кадь потэ. Пыд йыламы йыг-йыг сылӥськомы. Азьло пичи интыын ке пукимы, али нимаз юртын. Ужасьёсмы но йылӥзы, лэсьтоно ужмы но. - Лэсьтэмъя лэсьтэм потэ, шуо. - Мастеръёсмы-кибашлыосмы сизьым мурт. Ваньзы соос пӧртэм ёзъёсъя ужало: куиськон но ковёр куон, туйлэсь, куролэсь лэсьтӥськон, вуриськон, сюен ужан, корзина кутан, пулэз вӧлон, пужыятскон но керттӥськон. Вань ужасьёсмылэн быгатонлыксы инкуазен сётэмын, шуыны луоз. Быгатонзы лул-сюлмысьтызы потэ. Ма кулэ, ваньзэ пӧрмыто. - Али улонэд котькуд вамышаз кисые учке. Одӥг сӥньыс гинэ но сюлмаськонэ вуттылэ. - Культурая отдел милемлы уждун гинэ сётэ. Нош вань ужан котыръёсмес - станокъёс, вуриськон машинаос, оверлок, пӧртэм векчи арбериос, сӥньысъёс - асьмеос ужаса поттэм коньдонэнымы басьямы но басьяськом. Инкуазь узырлыкъёсты - куро, туй, горд сюй, ньӧр, пу - озьы ик асьмеос дасяськом. Горд сюй, шуом, ӟечсэ Выжоил палась гинэ шедьтӥм. Со котькыӵеез уг яра милям ужамы. Лесничествоен договор гожтыса, Кесвай палась, нимысьтыз висъям интыысь, ньӧр тӥяськом. Ньӧрлэсь лэсьтэм ужъёслы куронъёс трос, нош со уг окмы. Соин, малпасько, ньӧр тӥян интымес паськытатомы. Пул пумысь ке, со котькыӵеез кулэ. Беризь уггес шедь. Азьло сое лесхозысь, леспромхозысь бичамы, туэ ас понназ ужасен герӟаськоно луимы. - Тыршид ке, ыль пу но кенжоз. Тӥледды адӟисьёс-тодӥсьёс но йылозы. - Тодо милемды. Трос пӧртэм адӟытонъёс ортчытъямы ни. Нимысьтыз сыӵе адӟытон вал Р. Ивановлэн, А. Загуменовлэн, Н. Нелюбиналэн ужъёссылы... Со ужрадъёсы пыриськыло мукет кибашлыос но - В. Галанова, В. Вахрушева, Л. Решетников, З. Вахрушева, Д. Поздеева, Н. Ельцова, Л. Чубукова но трос мукетъёсыз. Гуртъёсысь но трос усточиос пумит уг луо ужъёссэс сётъяны. Ваньзэ сое возьматыны культурая юртамы нимысьтыз адӟытон зал вань. Отын ик ваньмыз ортче. Шаерысьтымы ужъёс но отчы вуыло. Озьы Удмуртиысь дано художникмылэн П. Елкинлэн, усточиослэн З. Лебедевалэн но А. Едыгаровалэн, Игра районысь Перевощиковъёслэн но Емельяновъёслэн семьяоссылэн ужъёсынызы тодматским. Ёросысьтымы суреданъя дышетӥсьёс но ужъёссылы адӟытон ортчытӥзы. Сӥзизы сое Якшур- Бодья школалэн юбилеезлы. Нош сӧсыръёслэн зональной смотразы радъям выставкаын нырысетӥ интыез басьтӥмы. Вал со ми дорын, Бодьялан. Пужыятскыны яратӥсьёслы адӟытон ортчытэммы бере, дорамы Киужъёсъя национальной центрысь валтӥсь мастеръёс ветлӥзы. Усточиосмылы куд-ог валэктонъёс сётӥзы. Адӟытонъёсмы котькуд толэзе вошъясько. Шуркынмонэ Ижысь Блиновъёслэн семьязы киужъёсыныз тодматӥз. Мукет районъёсысь Киужъёсъя юртъёсын но кусып возиськом. Ог-огмылэсь дышетскон вылысь пумиськылӥськом. Озьы огъя ӝӧк сьӧрын пукимы ни алнашъёсын, шарканъёсын. - Тодӥсько, районысь кибашлыосты паськыт сюрес но ӧтьылэ. Калык пӧлы, калык радэ потам потэ. - Ижын ортчись вань выставкаосы пыриськиськом. Тулыс милям но кизнеръёслэн ужъёссылы презентация ортчиз. Трос гинэ ужъёсмес нуллӥм. Тунсыко но шумпотымон вал, татчы районысьтымы потэм но городын улӥсь дано адямиосмы но ветлӥзы шуыса. Со - медицина удысысь профессор Арсений Загребин, "Инвожо" журналлэн редакторез Егор Загребин, тодосчи Александр Шкляев, "Италмасын" кырӟась Олег Абросимов. Шулдыртӥз куноосты районысьтымы "Русская песня" ансамбль. Вавож районын ортчись Гербере адӟытонмес нуллӥмы, ньылетӥ республиканской выставкае но пыриськимы. Шаерысь кибашлыослэн ар ӵоже тыршемзэс пусйыса, праздник ортчиз. Отын ик йылпумъянъёс но лэсьтӥзы. Нырысетӥ интыосты ӧм ке но басьтэ, лауреатмы вань. Гончарной ужъя но керамикая мастермес Анатолий Поторочинэз висъязы. Кузьым сётӥзы. Озьы ик ӟеч ужамзэс грамотаен но кузьымен пусйизы Екатерина Виноградовалэсь (куиськон но ковёр куон) но Владимир Шкляевлэсь (пуллэсь вӧлӥськон). Та ми понна пичи ке но вормон ни. Куд-ог районъёс воксё но пусъемын ӧй вал. - Ольга Степановна, кызьы малпаськоды, таӵе секыт вакытэ инвис сьӧры уд ыше-а, яке азьланяз эшшо но ӝужалоды? - Улэммыя юнгес но юнгес ӝужалом, малпасько. Ми калыклы кулэ. Районэ куноос лыкто ке, кузьым пумысен ми доры вазисько. Нош кӧня огшоры калык дорамы ветлэ! Юрт пуктӥсьёс карнизлы, наличниклы заказъёс сётъяло. Пужыос асьсэос ӵекто, я милесьтым басьто. Садикъёслы чеберъям сэрегъёс куро. Но берло дыре калыклэн коньдонтэк улэмез ми вылын но шӧдӥськыны ӧдъяз. Азьло вузаны лэсьтэм ужъёсмы кема ӧз ке кылльылэ, али соос басьтӥсьсэс витё. Тусьёс, вышкыос лэсьтоно на вылэм. Но материалмы ӧвӧл. Токарной станок но ас интыяз луысал. - Тодэм потонлэн пумыз ӧвӧл. Адӟиське, калык дорады дышетскыны но ветлэ. - Пӧртэм арлыдо адямиос ветло. Шуом, сюен ужаны пиналъёсгес ке кыстӥсько, куиськонэ - мӧйыосгес. Соиз гинэ жаль, дышыны дышо, нош берло ужъёссэс возьматыны уг вайыло. Нош милям соослэсь быгатонлыкъёссэс выставкаын но возьматэммы потэ. Сюлэм шунытэз сётыса лэсьтэм уж мукетъёссэ но шумпоттэ, бордаз адямиосты кыске. Соосыз, мылкыдзылы ярась ужлы дышыса, мукетъёссэ дышето. Улон азьлань мынэмъя, кибашлыос йыло. Эмма ЗАГРЕБИНА. Якшур-Бодья. Ялон Удмурт Республикаысь Культурая министерство ялэ: "Удмурт Республикаысь Культурая министерстволэн автобазаез" кун предприятие пӧрмытӥське "Культурая учреждениослэн интыысь интые ветлӥсь республиканской центрзы" кун учрежденилы. Вазиськоно таӵе адресъя но телефонъя: 426057, Ижевск город, М. Горький урам, 74 а номеро юрт; 78-68-11. Удмурт Республикаысь Культурая министерство. "Милям зарни эшмы" Тодмо удмурт суредасьлэн Менсадык Гариповлэн искусствоын пытьыез яркыт кизили кадь ӝуатскыса кылиз. Со вал туж аспӧртэмлыко адями но синмаськымон суредась. Чувашъёс Менсадык Гариповичез "милям зарни эшмы" шуыса нималлязы. Улонысь вазь кошкем суредасез буре вайыса, 2-тӥ декабре солэн адӟытонэз усьтӥськиз. Художникъёслэн выставкаос возьматон залазы со та выставказэ улэп дыръяз ик ортчытыны чакла вал. Гариповлэн "Удмурт калыклэн мифъёсыз, выжыкылъёсыз но мадёсъёсыз" циклэз Россиысь искусстволэн зарни фондаз кылиз. Суредась ужъёссэ возьматылӥз странамылэн палэназ но. Выставкаез усьтӥз элькунысь Художникъёслэн огазеяськонзылэн кивалтӥсез Пётр Ёлкин. Нырысь ик Гариповез минут ӵоже чалмыт улыса буре ваизы. Культурая министрлэн нырысетӥ воштӥсез Аверьян Христофоров суредасьлэн семьяезлы Менсадык Гариповлы сӥзем фильмен кассета кузьмаз. Удмурт тодосчи Владимир Владыкин тодаз ваиз художникен "Зарни крезь" книгаосын сузьет дасян бордын ӵош ужамзы сярысь. Выставкаын озьы ик вераськизы Удмуртиысь калык художник Семен Виноградов, калык кылбурчи Олег Поскрёбышев. Та ужрадын ик "Россиысь сӥё-дано суредась" ним сётэмын асьме художниклы Анатолий Русскихлы. Люкаськемъёс 60 арес тырмонэныз ӟечкылазы монументалистэз Станислав Медведевез. Солэн мозаикаез чебер каре городъёсысьтымы уно юртъёсты. Леонид Прозоров. Ма шуоз калык Кылем арня вискын Воткинск городлэн Думаезлэн куатетӥ сессиез ортчиз. Эскероно ужпумъёс пӧлын валтӥсь инты басьтӥз городын улӥсьёс пӧлын матысь дыре референдум ортчытон. Вераськон мынэ татчы ракетаослэсь чурыт эстӥськонэн ужась двигательёссэс сутонъя установка пуктон сярысь. Али соосты быдто Московской областьысь полигонын. Кызьы гожъямы ни, Воткинскысь нимысьтыз делегация но со интые ветлӥз, пыр-поч тодматскиз двигательёсты сутэм бервылэн, отысь адямиосын, учёнойёсын. Табере дыр вуиз асьсэлы решение кутыны. Сессиын ӝутэм ужпумъя вераськизы городысь Думалэн депутатъёсыз, Инкуазез утёнъя комитетын ужасьёс, "Воткинский завод" ГПО-ын тыршисьёс, референдумез дасясьёс. Кенешон куинь часлэсь ятыр кыстӥськиз. Люкаськемъёс умой-умой кутскыса сэрттӥзы- пертчизы выль объектлэсь "сямъёссэ". Адямиосты кышкатэ огез: уз пӧрмы-а со калыкмес быдтон арберилы? Соин ик кутэмлэсь азьло юалляськон ортчытыны чакламын, тупатэм нуналыз - 17 январь. Отчыозь котькудӥзлы Воткинскын улӥсьлы малпаськыны дыр сётэмын на. Л. ДМИТРИЕВА. Некролог Удмурт Республикаысь Правительстволэн Аппаратэз, "Ижкомбанк" коммерческой банк, "Гарант" акционер огазеяськон мур куректыса иворто Удмурт Республикаысь Министръёслэн Советысьтызы ужъёсъя управляющиезлэн азьвыл воштӥсез, "Ижкомбанк" коммерческой банклэн директорезлэн воштӥсез Смирнов Александр Сергеевич Улонысь дырызлэсь вазь кошкем сярысь но ӵыжы-выжыосызлы но матысь адямиосызлы кайгыремзэс верало. Люкиськон ортчоз 4 декабре таӵе адресъя: Ижевск город, Пушкинской урам, 182-тӥ номеро юрт, 54-тӥ квартира. Павел Вершинин: "Му вӧй поттонъя одӥг ёз кулэ" Журналистъёсын пумиськонзэ Правительстволэн Тӧроез Павел Вершинин та ужпум бордысен кутскиз. Шаерамы али 7-8 му вӧй кыскись огазеяськон но предприятие ужа. Нош соос пӧлысь самой бадӟымез но кужмоез луэ "Удмуртнефть". Огазеяськон араз 5,5-6 миллион тонна нефть поттэ. Тӥни ӵапак со котыре огазеяськыны кулэ мукетъёсыз му вӧй поттӥсьёс. Но та ласянь шуг-секытъёс кылдо на. Соос бордын Правительство али ужа. Вераськон мынэ "Удмуртнефтьлэсь" акциоссэ, "Сиданко" киысь басьтыса, Удмурт Республикалы сётон сярысь. Павел Николаевич та но музон лэчыт ужпумъёс сярысь люкаськемъёслы мадиз. Зэмзэ но, "сьӧд зарни" кыскон сярысь берло дыре пресса трос гожъя. Со юнме шорысь ӧвӧл. Республика та удысъя бадӟымесь ыштонъёс адӟе, интыысь но кун бюджетъёсы уксё уг вуы. Соин ик югдурез эскерон но тупатон вылысь кылдытэмын депутатъёслэсь нимысьтыз бадӟым комиссия. Отчы пыро нефть поттон удысысь кивалтӥсьёс но специалистъёс. Соос нимаз-нимаз группаосъя ужало. Кылсярысь, одӥгез эскере "Удмуртнефтез", мукетыз - Удмурт компаниез, куинетӥез - "Уральская нефть" огазеяськонэз, ньылетӥез - "Белкамнефтез" но музонзэ. Оглом вераса, дас одӥг группа кылдытэмын. Ӵуказе комиссилэн кенешез ортчоз. Правительстволэн Тӧроез бадӟым инты висъяз "Удмуртнефть" огазеяськонлэсь акциоссэ шаерлы берыктонлы. Кызьы бен сое быдэстоно? Экономикаын туннэ кылдэм югдур та ужпумез улонэ пыӵатыны оскон кылдытэ. Но кыӵе амалэн? Яке огазеяськонэз банкрот карыса, солэсь акциоссэ басьтоно, яке выль законодательной актъёс кутоно. Нош со герӟаськемын Музъемъя кодексэ воштонъёс но ватсанъёс пыртонэн. Нырысетӥ сюресъя ке мыноно, "Удмуртнефтьлэн" интыысь но кун бюджетъёсы гинэ али тыронъёсыз 80 миллион манет люкаськемын. Со вӧзы ватсано на эшшо уно миллион манет кредитъёссэ. Та ужпумез котькызьы бергаты, сэртты-пертчы, но республикаямы му вӧй поттонъя одӥг кужмо компания-холдинг кылдытоно. Со шаермы понна умоен гинэ берытскысал. Югдурез валало журналистъёс но, калык но. Соин ик алигес республикаысь кивалтӥсьёс пумиськылӥзы "Сиданколэн" кузёосыныз. Собере кылдытэмын ӵош ужась группа. Солэсь ужзэ радъя Правительстволэн Тӧроезлэн нырысетӥ воштӥсез Александр Злобин. Пусйыны кулэ, со пресс-конференцие ветлӥз но куд-ог юанъёслы валэктонъёс сётӥз. Туннэ "Сиданко" но шуг-секытэ шедемын, куд-ог предприятиосыз мырдэм возисько- шокало. Соин ик "Удмуртнефтьлэсь" акциоссэ басьтыны дыр вуэмын ни. Кылдэм югдурез рос-прос учкем бере, та ужпумез одно ик эскерозы Кун Кенешын. Жуналистъёс Павел Николаевичлы уно юанъёс сётъязы. - Музъемъя кодексэ кыӵе ватсан пыртэмын луоз? - Со выль ӧвӧл. Предприятиослы висъям музъемез уставной фонд кароно. Вераськон уг мыны гурт хозяйствоослэн муоссы сярысь. Татарстанлэн законъёсызъя музъем кемалась оборотэ пыртэмын ни. - Кызьы асьмеос толъём, юртъёсмы шунтӥськозы-а? Алапаевск дорамы уз вуы-а? - Уз. Бен, та удысын шуг-секытъёс вань. Тани Сарапулын урод югдур пӧсь ву сётонэн. Республикалы ичизэ 180 сюрс тонна музъем эгыр кулэ. Али 80 сюрс тоннаез ваемын ни. Кӧня ке кылемын на миым толлы дасямез. Озьыен, шаермылы эшшо 90-100 сюрс тонна чурыт эстӥськон басьтоно на. Солы бюджетысь ӧжытсэ 26 миллион манет висъяны кулэ. Алигес эгыр вайыны 10 миллион манет сётӥм чугун сюреслы. Осконмы вань: эстӥськон вуоз. Таин ӵош музон ужрадъёс но кутӥськом. "Чагыр эстӥськонлы" дун басьтонъя, Россиысь 7 улосвылын ог-огедлы пунэм тыронъёс ортчытэмын. Со пыре РФ-ысь Коньдон ужпумъёсъя министерстволэн трансфертэз пӧлы, нош коньдон вуоз шаерысьтымы городъёслы но районъёслы эстӥськонлы дун тырыны. Огъя вераса, квартираосын шуныт луоз. - "Евразия" банк-агентын кыӵе югдур? - Солэн вкладчикъёсыз, ас мылкыд каремзыя, коньдонзэс Сбербанке выжто. - Кызьы мынэ бюджет чотын ужасьёслы уждун сётон? - Югдур уг умоя. Республикая чаклам дыр уг быдэсъяськы. Интыос бюджетъёсысьтызы уждунлы ӝынызэ уг шедьто, нош кун бюджетэ коньдон мултэс уг вуы, озьыен, юрттэт ичигес кошке. Соин ик ми декабрьлы Россилэсь 56 миллион манет коньдон (трансферт чотын) куриськом. - Павел Николаевич, вуоно быръёнъёсын Кун Кенеше депутатэ кандидат луоды-а? - Одно ик луо. - "Сиданко" акциоссэ республикалы сётон шоры кызьы учке? - Со капчи ужпум ӧвӧл. Но быдэстыны амалъёс вань. Асьмелы "Удмуртнефть" огазеяськон вылын нефть поттонъя кужмо ёз - холдинг кылдытоно. Шаерлы со туж кулэ. Соин ик акциосмес берыктон вылысь ваньзэ лэсьтом. Малы ке шуоно таиз му вӧй поттон ёзмы самой золэз. Нош "Сиданко" кыл сётэ 1 январёзь тыронъёссэ берытыны. - НДС вытэз кулэстон 1999 арлы бюджетын шӧдӥськоз-а? - Валамон, бюджетлэн доход люкетаз ичигес уксё вуоз. Асьмеос вузан выт (налог) но 4 процент гинэ тупатӥм. Ӧжыт со. Вылаз ик, сыӵе выт куд-огез кабзэ уз тыре. Али улон интылы налог басьтоно. Сотэк интыос юртъёсты возьыны уг быгато ни. Геннадий Романов. Укана Трос дауръёс талэсь азьло Чупчи шур кузя огез бӧрсьы мукетыз дасоосын удмурт каръёс ӝутскизы. Тодосчиослэн лыдъямзыя, уноез соос кылдӥллям ог сюрс ар талэсь азьло ик, нош куд-огез - эшшо но вазьгес. Чупчи шурлэн улӥязгес интыяськем каръёс пӧлысь тужгес но тодмоез луэ Укана (ӟучъёс сое Укан шуо). Люкмы шурлэн бур пал ярез дуре интыяськем улон интыос та палан кылдӥллям ини ИЪ-ЪИИИ дауръёсы ик. Со сярысь верало вашкала шайёслэн бервылъёссы. Тодосчиослэн гожъямъёссыя, Укана кылдэмын, пе, 1174-тӥ арын ик. Та палъёсын вашкала дырысен улӥллям Дурга, Салья, Сянья, Ташья выжыосысь удмуртъёс. Тӥни озьы, асьсэ гуртсылэсь кызьы кылдэмзэ но азинскемзэ тупен-тупен эскеро но дышето Уканаысь шор ёзо школаын. Нырысетӥ классысен кутскыса ик татысь пиналъёслы дор палзэс, ӵыжы-выжыоссэс, бускельёссэс, арлыдоосты гажан но сӥлы карон мылкыд пыӵато. Юнме шат гуртсылы но та палъёсысь данэ потэмъёслы сӥзьыса, школаын нимысьтыз музей но усьтэмын. Шаерез тодонъя тросэз урокъёс ӵем дыръя отысь стендъёс дорын ортчыло. Татысь вашкала арбериос но уно туспуктэмъёс урокъёсты валамон но тунсыко карыны юртто. Музее интыямын куиськон станок, туйлэсь, сиён-юон возьыны но сиськыны чаклам горд сюйлэсь лэсьтэм арбериос, нуны возён котыр, куэм дӥськут но данак туспуктэмъёс... Тужгес но бадӟым инты висъямын ожысь но ужысь ветеранъёслы. Нимысьтыз возьматэмын дано кылбурчилэн Флор Васильевлэн улон-вылон сюресэз. Угось Флор Иванович, ӵапак та школаез йылпумъяса, бадӟым писателёзь будӥз. Та школаын ик дышетскиз Ижысь медициная академилэн азьвыл ректорез Г. Е. Данилов но. Музейлы та арбериосты люканы нырысь ик басьтӥськиз школалэн директорезлэн дышетон ужъя воштӥсез Т. А. Веретенникова. Ӟеч кутсконэз азинтыны паськыт сюрес сётэ школалэн кивалтӥсез, калыкез дышетон удысысь отличник А. А. Данилова. Та гуртэ шаерамы нырысьёсыз пӧлын черк пуктэмын вал. Соин ик нырысетӥ школаын черклэн куронъёсызъя дышетылӥзы. Собере коммунизм лэсьтӥсь егитъёслэн школазы усьтӥськиз. Нош 1982-тӥ арын 392 муртлы выль дышетскон юрт пуктӥзы. Ӵапак та школае коньывуон толэзьлэн пумаз вуылыны кылдӥз. Нырысь монэ музеен тодматӥзы. Угось вуылыкум отчы быдэс ёросысь вожатойёс люкаськемын вал. Музейлэн кивалтӥсеныз Галина Сидоровна Кутявинаен ӵош люкаськемъёс азьын монэ но вераськыны куризы. Лыктэмъёслы мади кылбурчиосын Флор Васильевен но Михаил Федотовен пумиськылэмъёсы сярысь. Музейлы аслэсьтым книгаосме кузьмай, отысь альбоме шуныт кылъёс гожтыса кельтӥ. Нош ӧтиз монэ та пумиськонъёсы Светлана Васильевна Ившина. Со шаерез тодонъя урокъёс нуэ. Делегат луыса пыриськиз вань удмуртъёслэн нырысетӥ съездазы-ӧтчамазы. Ас ужезъя трос ӟечсэ шедьтэм, шӧдске. Табере школаын удмурт сямъёслы но йылолъёслы сӥзем олокыӵе но ужрадъёс ортчыло ни. С. В. Ившиналэн усто юрттӥсез луэ Ирина Петровна Васильева. Берло вуылон нуналам школаын ортчизы Удмурт Республикалэн кылдэмезлы но Удмурт шаерлэн Россиен огазеяськемез дырысен 440 ар тырмонлы сӥзем ужрадъёс. Ёросысь вуэм куноосын ӵош монэ но туж сӥлы карыса пумитазы отын. Люкаськем пиналъёс азьын аспалъёсы вашкала сямъёсъя буй-буй пыжем нянь но скал вӧй веръятыса пумитазы. Бадӟым тау соослы, сыӵе зӧк (бадӟым) куно каремзы понна. Та школаын удмурт кылэз нимысьтыз предмет карыса уг дышето. Озьы ке но, праздниказы покчи классъёс но, бадӟымъёсыз но удмурт дӥськутэн пӧрмытскыса вуиллям. Куд-огез шыкыс-сандыкъёсысь вашкала куэм дэремъёс поттӥллям на. Нош ужрадлэн кичӧлтӥсез С. В. Ившина ас киыныз чеберак удмурт дэрем вурем. - Одӥг пуксемен сямен вуттӥ, - вераз со дӥськутсэ ушъясьёслы. - Туж дыртӥ: уг вутты кожай. Уката но чебергес пӧрмысал, дыр, но етӥнлэсь тӧдьы басма ӧй шедьты. Ма бен карод, етӥно шаерын улыса, табере палэнысьсэ возьмаськом ни ке. Со понна вашкалаосмы асьсэос будэтӥзы но, тышказы-сэстӥзы но, черсӥзы-куизы но етӥн дӥськутсэс. Вань на сыӵе дӥськут Укана школаысь музейын. Етӥн бордын выронэз "Ӝыт пукон" дыръя возьматӥзы асьсэос пиналъёс но. Быгатыса адӟытӥзы соос озьы ик "Армие келян", "Нуны ӝук" нерге-йылолъёсты. Та ужрадъёсы пыриськизы 5-тӥ-7-тӥ классъёсын дышетскисьёс. Покчиосыз пиналъёс веразы мадиськонъёс, исаськонъёс, эктӥзы-кырӟазы. Бадӟым классъёс удмуртъёслэсь вашкала дырысен туннэ нуналозь улэм сюрессэс веразы. Туж шумпоттӥзы Уканаысь пиналъёс но, дышетӥсьёс но та усто радъям ужрадэнызы. Зэмос праздник пӧртэм удмурт сиёнъёсын тырмытэм ӝӧкъёс сьӧрын чай юонэн йылпумъяськиз. Озьы мумы-бубыосынызы ӵош пиналъёс асьсэос но пыжиськыны-пӧраськыны дышетско. Ёрос школаосысь лыктэмъёс туж паймыса но синмаськыса учкизы татысь пиналъёслэн ӝуась синъёсын кылам-бурамзы шоры. Кыӵе мыло-кыдо, тыршыса верасько соос анай кылынызы. Туж жаляно луэ: школаын нылпиос ас кылзэс уг дышето. Доразы но шергес вераськыло. Оскем потэ вылэм, ӵыжы-выжыосмылэн вашкала дырысен улэм-вылэм интыязы удмурт кылэз уз вунэтэ, та школаез быдэстэм дано кылбурчи Флор Васильев сямен ик сое юн гажалозы шуыса. Кутскон сётэмын, азинтыны гинэ кулэ на. Тюрк кылын Укан всемогущий шуэм луэ. Озьыен, татысь калык ваньзэ вормыны быгатоз. Алексей Ельцов, кылбурчи но журналист. "Удмурт кенеш" огазеяськонлэн Пичи кенешезлэн "Вань удмуртъёслэн ВИ ӧтчамзылэсь (1997 арын ноябрь толэзь) решениоссэ быдэсъян сярысь" Постановлениез "Удмурт кенеш" огазеяськонлэн тӧроезлэсь В. К. Тубыловлэсь "Вань удмуртъёслэн ВИ ӧтчамзылэсь решениоссэ быдэсъян сярысь" докладзэ кылзыса но эскерыса, Пичи кенеш пусъе: республикаын но быдэс Россиын экономика но политика ласянь секыт югдур шоры учкытэк, удмуртъёслэн национальной движенизы утиськиз но азинскиз. 1998 арын феврале асьме Кун Кенеш Удмурт Элькунлэсь Национальной политикая кун концепцизэ кутӥз. Со юрттӥз республикаысьтымы кун властья но городъёсысь но ёросъёсысь интыысь аскивалтонъя ёзъёс ласянь национальной движенилы уногес саклык висъяны. Ар куспын исполком нимысьтыз сюлмаськиз "Удмурт кенешлэсь" радъёссэ юнматон, огазеяськонлэсь городысь но ёросъёсысь ёзъёсызлы юрттон, вань удмурт огазеяськонъёслэсь кужымзэс огазеян сярысь. Соин ик 12 кенешон пӧлысь витез ортчытэмын, городъёсысь но ёросъёсысь ёзъёслэсь кивалтӥсьёссэс ӧтьыса, одӥгез, ужан опытэн тодматскон вылысь, Пичи Пурга ёросын но Бураново черкогуртын. "Удмурт кенеш" огазеяськонлэсь, Удмурт культурая "Дэмен" обществолэсь, егитъёслэн "Шунды" дэменлыксылэсь, Удмурт нылкышно кенешлэсь валче ужан амалъёссэс эскерон вылысь, Завьялын, Глазовын но Можгаын ортчытэмын куинь зональной семинар. Озьы уноез ёрос ёзъёс, мукет национальной общественной огазеяськонъёс ужзэс умоятӥзы, пӧртэм арлыдо но мылкыдо адямиос понна трос пумо тунсыко ужрадъёс ортчытъяны кутскизы, соослэн интыосын данзы будӥз. Со тужгес но шӧдӥськиз Куӟебай Гердлэн но Ашальчи Окилэн вордскемзы дырысен 100 ар тырмонэн валче Москваын, Ижевскын, городъёсын но ёросъёсын радъям ужрадъёсы мылысь- кыдысь пыриськизы Пичи кенеше, исполкоме, общественной огазеяськонъёслэн кивалтэтъёсазы быръем эшъёс. Уноез соос пӧлысь Куӟебай Гердлэн но Ашальчи Окилэн улонзылы но творчествозылы сӥзем ӝытъёс, фестивальёс, конференциос ортчытъянын кичӧлтӥсьёс луизы. Кӧня ке пӧрмиз элькунамы Удмурт национальной кадръёсты дасянъя ужпумез вырӟытыны. Соя ортчытэмын исполкомлэн паськытатэм кенешонэз, отчы ӧтемын вал Правительстволэн членъёсыз, вузъёслэн ректоръёссы, пӧртэм огазеяськонъёслэн но ведомствоослэн кивалтӥсьёссы. "Удмурт кенеш" огазеяськон пумен юнгес пыриськыны ӧдъя элькунмылэн общественно- политической улоназ. Исполкомлэн кичӧлтэмезъя, быръёнъёс азьын кужымез огазеян вылысь, "Республика" ("Элькун") общественно-политической союз кылдытэмын, солэн быръёнъёс азьын инъетэз юнматэмын. Пичи кенеш но исполком Кун Кенеше но Правительствое Удмурт Элькунысь Конституцие воштонъёс пыртон пумысен кык вазиськон ыстӥзы, одӥгез вазиськон герӟаськемын вал Россиын но республикаын экономикаын югдур лэчытомемен. "Удмурт кенешлэн" ёрос ёзъёсыз пӧлысь уноез интыысь аскивалтонъя быръёнъёсы умой быгатӥзы пыриськыны. Озьы ке но, Пичи кенеш, исполком, городъёсысь но ёросъёсысь ёзъёслэн правлениоссы но быдэсак удмурт национальной движение вань луонлыкъёсты уже уг куто на. "Удмурт кенеш" огазеяськонлэн куд-ог ёзъёсыз калыклэсь кулэяськонъёссэ но правооссэ утён ласянь чурыт кылзэс вераны уг быгато на, ялан мае ке возьмаса уло. Ӝега интыосын аскивалтонъя ёзъёс (гурт кенешъёс) кылдытон, калык движение мылкыдтэк пыриське интеллигенция, тужгес но - егитъёс. Быръем ёзъёсын ичи возиське на удмурт депутатъёслэн лыдзы: Кун Кенешын соос 16 процент, ёросъёсын - 42,8, нош огъя республикаын улӥсьёс пӧлын улын 32,2 процент луо, гуртын - 58 процент. Элькунын кадръёсъя национальной кун концепция но Национальной кадръёсты дасянъя кун программа ӧвӧлэн, арысь аре кулэсме удмуртъёслэн республикаысьтымы вузъёсын, аспирантураын дышетскисьёс, министерствоосын, ведомствоосын, элькун огазеяськонъёсын кивалтӥсьёс пӧлын лыдзы. Быдэсмытэк кылё на Куӟебай Гердлэн вордскемез дырысен 100 ар тырмонлы сӥзем уноез ужрадъёс, кудъёсыз пыртэмын вал Кун Кенешлэн но Правительстволэн программаязы. Та дырозь кутымтэ "Удмурт Элькунын кылъёс сярысь" Закон. Исполком радзэ ӧз шедьты республикалэн палэназ улӥсь удмуртъёсын ужанын. Национальной политикая кун концепция кутэмын ке но, "Удмурт кенеш" огазеяськонлэн куд-ог ёзъёсызлы городъёсысь но ёросъёсысь администрациос но быръем ёзъёс кулэезъя уг юртто на. Со люкетэ удысэз пайдаёгес радъяны. Пичи кенеш пуктэ: 1. "Удмурт кенешлэсь" радъёссэ юнматонъя, интыосын аскивалтонъя ёзъёс (гурт кенешъёс) кылдытонъя, удмурт калык движение тросгес адямиосты, тужгес но егитъёсты, кысконъя ужез азинтоно. 2. Национальной политикая кун концепциез лыдэ басьтыса, городъёсысь но ёросъёсысь ёзъёслэн правлениоссылы сюлмаськоно 1999 арлы интыосысь бюджетэ асьме кылэз, культураез азинтонъя, калыкмылэсь аспӧртэмлыксэ утёнъя ужрадъёсын планъёсты, программаосты быдэсъяны коньдон висъян сярысь нимысьтыз чур пыртыны. Исполкомлэн нимыныз городъёсын но ёросъёслэн кивалтӥсьёссылы та пумысен гожтэт ыстоно. 3. Пичи кенешлэн комиссиосызлы, общественной огазеяськонъёслэн правлениоссылы но активлы, ёрос ёзъёслы ар ӵоже ужамлы йылпумъянъёс лэсьтоно, тырмымтэослэсь мугъёссэс сэрттоно-пертчоно, 1999 арлы план дасяно. 4. Национальной кадръёсты дасянын матысь кык аре тужгес но зол ужано Удмурт Элькунысь Правительстволэсь "Федеральной бюджет чотын 1997-2000 аръёсы Удмурт Элькунлэн кулэяськонъёсызлы вылӥ но шор ёзо профессиональной образованиен специалистъёсты дасянъя кун заказ сярысь" 1997 арын 10 феврале кутэм постановленизэ быдэсъян бордын, тодматоно соин вань гурт школаосысь дышетӥсьёсты но выпускникъёсты; ёрос администрациосын ӵош со постановлениез быдэсъянъя ужрадъёс чаклано. Правительствоез куроно сое элькунысь вузъёс но ёросъёслэн администрациоссы ласянь быдэсъянэз эскерыса возьыны. Пичи кенешлэн кадръёсъя комиссиезлы 1999 арын январе эскероно исполкомлэн "Элькунын национальной кадръёсты дасян сярысь" 1998 арын 20 мае кутэм постановлениезлэсь кызьы быдэсъяськемзэ. 5. Культурая комиссилы, удмурт культурая "Дэмен" обществолы, ёрос ёзъёслы азинтоно калык сямъёсты но йылолъёсты улӟытонъя но вӧлмытонъя ужез, та удысэ паськытгес кысконо удмурт интеллигенциез (писательёсты, суредасьёсты, тодосчиосты, композиторъёсты); нимысьтыз сюлмаськоно самодеятельной коллективъёслэсь, кружокъёслэсь ужзэс умоятон, соослы пӧртэм амалъёсын юрттон сярысь. Культурая комиссилы 1999 арын нырысетӥ кварталэ вуттоно Гербер элькун праздниклэсь сценарийзэ, исполкомлэн кенешоназ эскерон вылысь. 6. Юнматоно элькунлэн палэназ улӥсь удмуртъёсын ужез. 1999-2000 аръёслы соосын ужанъя программаез быдэстон сярысь сюлмаськоно. 7. Исполкомлы, Пичи Кенешлэн комиссиосызлы, "Удмурт кенешлэн" городъёсысь, ёросъёсысь ёзъёсызлы Удмурт Республикаысь Кун Кенеше 1999 арын март толэзе ортчись быръёнъёсы мылысь-кыдысь пыриськоно. Ужаса улӥсьёс пӧлын быръёнъёсъя "Элькун"огазеяськонлэсь быръёнъёс азьын малпанъёссэ-ӵектонъёссэ валэктонъя, удмуртъёс пӧлысь депутатэ кандидатъёслы юрттонъя ужез радъяно. Таин валче юн кусып возёно иворъёс вӧлмытӥсь ёзъёсын. 8. Удмурт Республикаысь Кун Кеннешез но Правительствоез куроно "Удмурт Республикаысь кун кылъёс сярысь" Законэз кутонъя ужез ӝогомытыны. Ялан сюлмаськоно дышетонъя национальной учреждениослэсь лыдзэс будэтон, школаосы учебникъёс но методической литература вуттон сярысь. 9. Умоен лыдъяно республикалэсь кивалтӥсьсэ, со ик луоз Правительстволэн Тӧроез, вань калыкен быръёнэз. 10. Вазиськоно властьлэн кун ёзъёсызлы республикалэсь му вӧй узырлыкъёссэ уже кутонъя югдурез ужаса улӥсьёслы валэктыны курыса. 11. Удмурт Республикаысь Правительстволы вазиськоно спортъя тол гурт шудонъёсты утьыны но ортчытъяны куронэн. 12. "Удмурт кенеш" огазеяськонлэн исполкомезлы Пичи кенешын верам тырмымтэосты палэнтонъя план кылдытоно но юнматоно. Постановление кутэмын 1998 арын 20 ноябре. Пумиськонъёс Удмуртилэн но куараез кылӥськоз Россия Федерациысь Кун Думалэн депутатэз, КПРФ-лэн Удмурт Республикаысь ёзэзлэн кивалтӥсез Н. И. Сапожников берло дыре ӵем пумиськылэ интыысь журналистъёсын. Солы мугез но вань: коммунистъёслэн фракцизы ас палаз пумен тросгес кужым люка, Правительствоез воштон но соос бордысь потӥз. Азьпалан - быръёнъёс. Депутат луон понна, котькытын зол нюръяськон мыноз. Солэн ӟырдытэз али ик шӧдӥське ни. Николай Иванович пумиськонзэ кутскиз Кун Думалэн вуоно арлы бюджет дасян бордын ужамезъя ивортонэн. Кылем арен ӵошатыса, со куинь толэзьлы ӝегаса мынэ. Но бюджет кутэмын луоз чаклам дыраз - мартлэн кутсконаз. Депутатъёс та вакытэ эскеро пӧртэм законопроектъёсты, соос 30 пала, ваньмыз герӟаськемын бюджетэн. Дума учкоз НДС-лэсь быдӟалазэ, пайда поттыса ужанлы выт тыронэз но мукет та выллем ужпумъёсты. Со сяна, Кун Дума выльысь кутскыса учкоз ваньбурез ӵош люконъя законлэсь инъетсэ. Удмуртиысь му вӧй поттӥсьёс понна та закон туж кулэ, со бордысь потоз асьмелэн 11 месторожденимылэн азинсконэз. Депутат вераз туала Правительстволэн шуг-секытысь потонъя сюресъёс утчамез сярысь но. Россилэн пунэмен тыронъёсыз туж трос, дуннеысь Валютая фондлы гинэ 26 миллиард доллар берыктоно. Сыӵе "пирдан" кузьмаса кельтӥзы политикъёс-реформаторъёс. Ку сое берыктыны быгатом - нокин туннэ уз вера. Кызьы пусйиз Н. И. Сапожников, вуоно быръёнъёслы дасяськон мынэ, кылдо пӧртэм огазеяськонъёс. Народно-патриотической союз, отчы пыре 100 пала движение но партия, алигес ортчем съездаз решение кутӥз быръёнъёсы куинь огазеяськонэн мыныны: КПРФ, Аграрной партия но Народовластие. Соос малпало парламентын тросгес инты басьтыны но кужымзэс юнматыны. Вераны кулэ, Народно-патриотической союзлэн съездаз Удмуртиысь 5 делегат ветлӥз: Николай Сапожников но Михаил Кошкин - Кун Думалэн депутатъёсыз, Валерий Благодатских (Аграрной партия), Алексей Липанов (Наукаосъя академия), Валерий Ходырев (Офицеръёслэн союззы). Озьыен, Удмуртия но политической нюръяськонын ассэ возьматыны тыршоз. Журналистъёс Н. И. Сапожниковлы пӧртэм юанъёсын вазиськизы. Соос пӧлын КПРФ-ез янгыше уськытон ласянь но. - Берло дыре коммунистъёс вылэ пож ву киськан уката но кужмояз. Мугзэ валаны секытэз ӧвӧл,- шуиз КПРФ-лэн ЦК-езлэн членэз.- Коммунистъёслэн данзы пумен ӝутске, калык валаз, кин палан зэмлык. Соин ик милемыз власть котырысь палэнтэм муртъёс вань янгышъёссэс компартия вылэ погыльтыны выро. Нош странаез куашкатэм понна кин ке но кыл кутыны кулэ ук. Н. И. Сапожников валэктон сётӥз мукет но юанъёслы. Л. МЕДВЕДЕВА. Мон тодам ваисько Журналист Николай Евсеев лыдӟисьёсмылы тужгес тодмо пӧртэм удысъёслы сӥзем лэчыт кылужъёсыныз, очеркъёсыныз. Зэм, али Николай Николаевич пӧламы ӧвӧл ни. Нош гожъямъёсыз кылизы. Туннэ лыдӟисьёсмылы дэмласьком газетмылэн редакцияз ужакуз вылэм учыръёс сярысь тодэ ваёнъёссэ. Питранъёс сюрес вылэ йӧтылытэк... Командировкае потӥ. Тӧлатскыны ӧй малпа - ужаны мынӥ. Вуи Красногорское черкогуртэ. Кошкыкум мыным редакциын веразы: "Асьме понна Красногорское село но, Красногорск район но ӧвӧл. Асьмеос лыдӟисьёсты дышетыны кулэ удмурт сямен вераськыны но сюлмаськыны, удмурт сямен улыны". Редакцилэсь заданизэ быдэстӥ. Ӵуказе бертӥсько. Гостиницаысь дежурной паськыт ымнырзэ ӧс куспытӥ мычиз но кеськиз: "Евсеев! Телефон тонэ ӧте". Бызи. Редактормы жингыртэ - Михайлов Василий Михайлович. - Одӥг нуналлы ӝегатскы, - шуэ. - Бадӟым ужрад ортче отын. Партконференция. Одӥг нуналлы кылёно луод. Репортаж яке отчёт (озьы нимало вал соку) гожтод. - Ярам, - шуисько. - Кыӵе ке воштӥськонъёс луозы-а? - Пукод. Ачид адӟод. РДК-е вазьгес мыныса, азьпал радэ пукси. Туж лэчыт доклад лэсьтӥз райкомлэн нырысетӥ секретарез Игорь Аркадьевич Бердников. Кылзӥсько но малпасько: та Красногорск ёросын ваньмыз-а, мар-а байёс уло. Докладын ваньзэ зарнияса ик возьматӥзы. Вераськисьёс но туж ушъязы. Конференция йылпумъяськиз. Зал султӥз. Адямиос, ог-огзэс донгаса, ӧс пала дыртӥзы. Мон кошкыны султӥ. Игорь Аркадьевич монэ залысь адӟиз но, чиньыосыныз купыръяса, сцена вылэ ӧтиз. Малпасько вал: отчёт гожтыны валэктоз. Нош со: - Эн дыртэлэ. Возьмалэ потэммес, - шуиз Игорь Аркадьевич, пельпумам вешаса. Соку отын гостиница но, столовой но коръёслэсь лэсьтэмын вал, но партилэн обкомысьтыз лыктэм адямиосты выляз - вуоно гостиницаязы - улыны интыяллям ини. Ми, журналистъёс, улӥм щитъёслэсь коркан, кезьыт но пеймыт комнатаын. Зол сектаз И. А. Бердников. Кин но со, пыэдлэсь утиськон понна, сюмыказ сьӧд пӧсьтурын пызьназ. Одӥг четушка бӧрсьы мукетыз вуиз. Арган шудыны кутскиз. Обкомысь ыстэм адями Волков быдэс ӝытэз эктыса улӥз райкомлэн кыкетӥ секретареныз Плетневаен. Уг тодӥськы, мар вал соосын отӥяз, нош мон вераськи обкомлэн машинаяз ӵош кошкон сярысь. Мынӥм выль гостиницаязы, нош Волковмы ӧвӧл. Дас кык час, уйшор бере одӥг час... Кытчы ышиз? Соку рэкетиръёс ӧй вал ай. Шок-пуль бызьыса вуиз (уг вераськы, кытын вал со). - Кытын мынам чемоданэ? - Уйшор бере кык час ини. Пуксе. Чемоданды машинаын. Вырӟим. Ӵукна 6 час котырын потӥм Якшур-Бодья-Ижевск тракт вылэ. Машина дыртэ гаражаз ӝоггес вуыны. Азьпалтӥм кыӵе ке колхозысь машинаез. Монэ пуктӥзы шофёрен артэ, нош асьсэос обкомъёс машиналэн бераз пуксизы но ӟыгырскыса умме усизы. Шофёрлы шуисько: - Давай ӝоггес! Уже вутсконо. Со кылзӥськиз. Лобиськом. Оло, питранъёс но сюрес вылэ уг йӧтыло. Собере... сюрес урдсы машинамы нырыныз шуак мырӟиськиз, нош мон кымесыным ӧжыт гинэ ӧй пазьгы машиналэсь азьпал укнозэ. Вуиз грузовик. - Тӥ ӝог дыртӥды. - Я, я... Мар сыӵе керӟегъяськиськод? Думылы но кыскы. Шофёр номерезъя тодэ ук, та машина обкомлэн шуыса. Одӥг шуытозь кыскиз но поттӥз. Мынам бускельёсы ӧз но сайкалэ. Умме кызьы усизы, озьы ик ӟыгырскыса изё. Ваньмыз-а, ӧвӧл-а - нош озьы ветлӥзы обкомлэн адямиосыз интыосысь партийной организациослэн кенешъёсазы. Коридорын кӧлӥм Гажано адями вал Вылӥ Кенешлэн азьвыл тӧроез Пётр Петрович Сысоев. Партилэн обкомезлэн бюроез сое куриз Шаркан райкомлэн отчётно-выборной конференцияз ветлыны. Татын номыр умойтэмез ӧвӧл, дыр. Отын улӥсьёслэн быдэс республикаысь югдурез тодэмзы потэ, вылды. Жингыртӥсько. - Отчёт гожтыны мынӥсько, - шуисько. - Нош ӟучъёслэсь кин мынэ? - юаз. - Соослэн собкорзы Воткаын вань, Геннадий Ладыгин, - валэктӥ. - Лыкты 2 часлы, - шуиз президент. Лыктӥ. Пукси приёмнояз. Возьмасько, ку со потоз. Уг поты. Одӥг но ӝыны час возьмай - потӥ площаде. Шедьтӥ машиназэ. - Кин луиськоды? - юа водителез. - Корреспондент, - шуисько. Соку гинэ лэзиз машинаяз пуксьыны. Эшшо час но ӝыны возьмам на. Потӥз кема возьмам адямимы - УАССР-ысь Вылӥ Кенешлэн Тӧроез Пётр Петрович Сысоев. Синучкон азьын сынаськиз. Изьызэ куштӥз. Шофёрзэ косӥз шуныт сётон системазэ дугдытыны. Мынӥськом. Советской ульчаын кык-а, куинь-а пу коркаос вал. Одӥгез вадьсы машиназэ дугдытӥз. Возьмаськом... Возьмаськом... Ӧвӧл адямимы. Одӥг но ӝыны час возьмам. Мон уг малпаськы Пётр Петровичез курланы. Вераме потэ: маин пӧртэмесь туала кивалтӥсьёсмы? Потӥз. Уг тодӥськы, мар кариз со дораз: душ улэ пыраз-а, ваннаын пукиз-а? Вотка город сьӧрозь мынӥм дугдытэм "гурен", усьтэм укноосын. Собере кузё косӥз шуныт сётӥсь вань арбериосты лэзьыны. Тол пальтоен мон мунчоын кадь пӧсяй соку. Но Шарканэ вуон азьын чиньыосы номыре уг шӧдо ни вал. Вуим. Лыдӟисьлэн тодаз вайытэме потэ: соку Сысоев вал Удмурт АССР-ысь Вылӥ Кенешлэн Президиумезлэн Тӧроез, Ермаков (азьланяз пумиськоз ай) - КПСС-лэн Шаркан райкомезлэн нырысетӥ секретарез, Мясников - райкомлэн кыкетӥ секретарез, Воронцов - райкомлэн секретарез. Райкомын нокин ӧвӧл. Кӧня ке возьмам. Кытысь ке шокпотыса вуиз Мясников. Кабинетаз мырдэм гинэ пырыны вуиз - П. П. Сысоев со борды тэбиниз. - Ми конференцие лыктӥм. Татын кӧлом. Гостиницаын инты малы ӧд кельтэ? - Эн сюлмаське, Пётр Петрович. - Мар сюлмаськон? Кытын нырысетӥ секретарьды? Ермаков мыным кулэ. - Ӝоген вуоз. - Кытын со? - Вуоз ай. - Тӥ тодӥськоды-а, милям сиеммы потэ шуыса. Вае татчы Ермаковез. - Вуоз со. Ӝоген вуоз... Пыриз нырысетӥ секретарь Ермаков. - Тодӥськод-а тон, Ермаков, мон - обкомлэн бюроезлэн членэз, татчы ыстэмын уждэс дунъяны. Нырысетӥ секретаре кылемед потэ ке, монэ нырысь ик сюд. - Ваньмыз луоз, Пётр Петович. - Мон утялтӥськисьтылэсь кринка йӧл но сукыри нянь кури ни. Ваёз, дыр. Бызьылӥзы, утчаськизы. Раскладушкаос ваизы. Куинетӥ секретарьлэн Воронцовлэн туж пичи кабинетаз милемлы П. П. Сысоевен ӵош кык раскладушка пуктӥзы. Со вуиз но лек вазиз: - Монэ куинетӥ секретарьлэн кабинетаз?.. Озьы уз луы. Мон - Ермаковлэн кабинетаз. Мӧйы кышномурт соку ик бызьыса нуиз валес котырез нырысетӥ секретарьлэн кабинетаз. Туала вакытэ маке пӧртэмез вань шат? Учкисько ке, эшшо но кык полэс адӟиське пыриськон сям. Ярам. Отчётно-выборной конференция ортчиз. - Тӥ эн палэнске, - шуиз Пётр Петрович. - Мынам машинаям туннэ ик бертом. Отчётэз ӝог сётоно. Ми шумпотӥм. Конференция ортчиз. Райкоме нокин ӧз берытскы. Ярам коть: коридорын диванъёссы вал. Отын ик уйвӧтъёсмес учконо луим, нош президентмы Иже лобем. Ӵуказеяз ӵукна автобусэн бертӥм, нош журналистлэсь "оперативность" шуон кылэз быдэсъямзэ куро ук. Шонер курон. Туала кивалтӥсьёс журналистъёс пала, оло, берытскозы ик. Печать - ньылетӥ власть шуонэз мон уг яратӥськы. Николай Евсеев. Алнаш палан туннэ Егитъёс ужало Шуркынмон толэзь дышем сямъя Алнаш ёросын ялӥське егитъёслы ӟеч сямъёс пыӵатон толэзен. Туэ но со озьы ик вал. Та толэзе ваньмаз сямен школаосын, Асан совхоз- техникумын, егитъёслэн "Ошмес" центрзы ортчытӥзы пӧртэм ужрадъёс. Соосты радъяны мылысь-кыдысь пыриськизы ёрос администрацилэн егитъёсын ужанъя, семьяя, культурая ёзъёсын, библиотекаосын, школаосын, эрикрадэз утёнъя органъёсын ужасьёс. Толэзь ӵоже ужамлы йылпумъянъёс лэсьтэмын ёрос администрациысь улон-вылон но культура ужпумъёсъя координационной советлэн кенешез. Та кенешын ик ужпумъёс пуктэмын толсур толэзе ортчытоно ужрадъёслы, Выль арез шулдыр но пайдаё пусъён ласянь. Пор писательлы 100 ар Нырысетӥ пор журналистлэн, писательлэн, ас калыкез понна ӟырдыт нюръяськем адямилэн Максим Кузнецовлэн (псевдонимез Апшал Макси) вордскемез дырысен 100 ар тырмиз. Юбилейлы сӥзьыса бадӟым ужрад ортчоз та дано адямилэн вордскем гуртаз, Алнаш районысь Варалиын, туэ тӥ декабре. Нырысь ик вордскем юртэз борды юнматэмын луоз буре ваён пул. Собере ортчозы митинг но бадӟым ӧтчам. Люкаськем калык азьын концерт сётозы самодеятельной артистъёс. Ужрадэз дасясьёс витё Йошкар-Олаысь, Ижевскысь но мукет интыосысь дуно куноосты. Газет поттэ школа Алнашысь шор ёзо школа-колледжын потыны кутскиз асьсэлэн газетсы. Солэн нырысетӥ номераз печатламын школалэн историезлы, удмурт шаерлы сӥзем материалъёс, школаын дышетскисьёслэн кылбуръёссы но суредъёссы. Вань шутэтскон сэрегез но. Газет дасямын но печатламын школалэн компьютерез пыр. Нош редакторлэсь ужзэ быдэсъяло кыллы но литературалы дышетӥсьёс Мария Митрошина но Раиса Самсонова. И. ИВАНОВА. Дан - дас полэс анайёслы Кияса районысь Вуж Салья гурт бадӟым, соин ик, лэся, трос нылпиё семьяос но уно. Гуртын вань кык семья, кудаз будӥз дассузэр-вын. Нылкышно огазеяськон азьвыл ик ини ас азяз ужпум пуктӥз вал та семьяосын пумиськон ортчытыны. Анайлэн нуналэзлы сӥзьыса, 27-тӥ шуркынмонэ гуртысь библиотекае люкаськизы геройлыко анайёс Антония Федотовна Быкова но Антонида Семёновна Иванова, соослэн нылпиоссы но гуртоос. Та анайёсты данъяса, шунытэсь кылъёс веразы но синпель кузьымъёсын пусйизы гуртысь кивалтӥсьёс, шулдыр кырӟанъёсын шумпоттӥзы соосты 11- тӥ классын дышетскисьёс, "Кубо" огазеяськонэ ветлӥсьёс. Антония Федотовна кузпалэныз Василий Николаевичен будэтӥзы сизьым пи но куинь ныл. Кытчы гинэ пазьгиськемын ӧвӧл соос. Надя Тюменьын лэсьтӥськись луыса тырше, Юра 22 ар ӵоже Калиниградынулэ, чорыгась, Витя Сургутын му вӧй поттэ, Вася, Саша, Коля, Сергей, Люба Иж карын ужало. Люба сярысь ке верано, со удмурт эстрадаысь кизили шуыны луоз ни. Самой пичиез Максим дас ар тырше ини гуртысь фермаын. Антонида Семёновна Ивановалы нылпиоссэ ӝутыны тужгес но секыт вал, угось ожын сӧсырмыса бертэм кузпалыз Максим Иванович, секыт висьыса, улонысь дырызлэсь вазь кошкиз. Та пумиськонын анайёссэс сӥлы каризы нылпиоссы но, кузьымъёсын шумпоттӥзы утемзы но будэтэмзы понна. Люкаськемъёслы та ӝытын мӧзмыт ӧй вал. Чай юизы, асьсэлэн пӧраськеменызы утялскизы, нылпиосты будэтон сярысь вераськизы. Егитъёс эктӥзы Любовь Быковалэн кырӟамез улсын. Ачиз кырӟась пумиськонэ бертыны ӧз быгаты, но азьланяз сое одно ик ӧтчаны чаклало. Н. МОРЯКОВ. Дун тырытэк амал ӧвӧл Кылем толэзьлэн кутсконаз Кизнер посёлокетӥ но, ёросысь гуртъёсы но одӥг автобус но ӧз ветлы - эстӥськонлы коньдон ӧй вал. Можгалась автотранспортной предприятилэн кивалтӥсьёсыз (Кизнерын ужа Можгалась автотранспортной предприятилэн ёзэз) ёрос администрацилы ӵектӥзы транспортын кутӥськись вань льготаослэсь куштӥськыны. Дунтэк ветлӥсьёс туж трос, но соос понна бюджетысь коньдон уг вуы. Таин валче АТП чылкак куашкан калэ вуиз. Кизнерысь кивалтӥсьёс та ӵектонэн калыкез тодматӥзы, гурт кенешъёсын бырйыны куризы: яке автобусъёс чик уз ветлэ, яке "коммерческой" шуонъёсыз гинэ сюрес вылэ потозы. Калык кыкетӥзэ бырйиз. Али тросэз маршрутъёс выльысь усьтӥськизы ини. Но табере автобусэн ветлэмзы понна уксё тыро ваньмыз: пересьёс но, ӧлексыос но, милициын ужасьёс но... Н. ДАНИЛОВА. Александр Волков - Москваын Та нуналъёсы Удмурт Республикаысь Кун Кенешлэн Тӧроез А. Волков Москваын ужа. Отын А. Волков Федерацияя Кенешлэн Экономикая комитетэзлэн, Россиысь парламентлэн вылӥ палатаезлэн ужъёсазы пыриськоз. Та пумиськонын 13 ужпумез сэрттыны-пертчыны чакламын. Кылсярысь, Россия Федерациысь Правительстволэн но Центральной банклэн югдурез тупатонъя ужрадъёссы сярысь, Россилэн банкъёсаз калыклэсь вкладъёссэ утён сярысь, бюджет чотын ужасьёслэн шоро-куспо ставказы но окладзы сярысь ужпумъёсты. Кун Кенешлэн пресс-службаез. Гурт улон Ӟеч вуз палэнэ уг кошкы Кунгож сьӧрысь ваем сиён-юон шоры учкыса, таӵе малпанэ вуоно: ӟечез асьме доры шер вуэ кадь. Туала басьяськись но визьмаськиз - колбаса, вӧй но музонзэ утча Удмуртиын поттэмзэ. Пичи Пурга палан улӥсьёс нош, бадӟым куно витьыкузы, ӝӧк вылазы одно ик пуктозы Вуж Монья гуртысь "Арамаын" пӧзьтэм-ӵынатэм сиёнъёсты. Татын дышизы ни сӥльлэсь олокыӵе но деликатес дасяны. Дунъёссы но, мукетъёсыныз ӵошатыса, гуртын улӥсь понна вормымон. Соосты ӝутонэн татын уг дырто. - Продукциез дуноятыса, кин сое басьтоз? - шуэ "Арамалэн" кивалтӥсезлэн воштӥсез Владимир Алексеевич Опоев, со ик валтӥсь ветврач. Татын ужа вить ар, огазеяськон кылдэм дырысен. Со верамъя, коллектив понна тужгес но ӟеч вал 1995-1996 аръёс, 15 процентозь табышсы люкаськылӥз. Ар ортчыса, одӥг процентозь усиз. Туэ югдурзы, каллен ке но, тупатскыны кутскиз вал. Али вераны шуг. Шӧдтэк шорысь сӥльлы ӝутскем дунъёс "Арамаез" но палэнэ уз кельтэ, котькӧня пумитъяськыны выр. - Гужем вылтӥ, сӥзьыллэн нырысетӥ толэзьёсаз но скал сӥлез гуртоослэсь 1 килограммзэ басьязы 8-эн, парсь сӥлез - 11 манетэн. - Августлэн но сентябрьлэн кутсконаз продукцимы котькугес но алама кошке,- шуэ В. А. Опоев.- Нуналаз 1 тонна но ӝыны колбаса лэсьтӥськом ке, басьтӥсь кулэсмыку, 700- 800 килограммозь гинэ ужмес вуттӥськом. Нош сӥль ваисьёс ӵапак та вакытэ йыло: котькуд семья, пиналзэ школае дасян вылысь, уксё поттыны выре. Калыклэн коньдонэз луысал ке, вань колбаса, ӵынатэм сӥль районэ кыльысал. Али вузало Татарстанэ но. 60 процентэз кошке Иже, 20 процентэз - Агрызэ, сомындаез ик - Пичи Пургае. Моньяослэсь сиёнзэс ушъяло. Кызьы-о нош сотэк? Вань сюлэмзэс сётыса, татын ужало Людмила Кудрявцева, Галина Петрова, кык Лидаос: Иванова но Федорова. Колбасалэсь шӧмзэ умоятон бордын нуналысь нуналэ тыршо Любовь Кузьмина, Елена Яковлева, Галина Никонорова но мукетъёсыз. Татын огкылысь, тупаса ужало, соин но, дыр, ваньмыз умой пӧрме. Нылкышноос тау карон кылъёссэс верало Семен Овчинниковлы. Та кибашлы воргорон сӥль кора, соин ӵош тупатэ вань арбериосты. Усто ужа Леонид Петров но. Колбаса пӧзьтон солы оскемын. Вератэк кельтэм уг поты вузкарись Любовь Тихонова сярысь но. "Арама" магазинзэ усьтӥз 1993 арын. Басьяськись вань. Дуныз но, городын сярысь, татын улӥынгес. Гуртысь колбаса поттӥсьёслэн ӵуказе нуналзы сярысь ке верано, сиён дасясьлэн удысэз ноку но уз быры. Со понна гид тыр мед луоз пудо-животэд. Пурга палъёс та ужлы дышемын. Пудо вордон вылын ик та секыт вакытэ гурт калык возиське. Л. МЕДВЕДЕВА. * Владимир ОПОЕВ, "Арамаысь" валтӥсь ветврач. * Семен ОВЧИННИКОВ - кибашлы воргорон. * Нылкышно киосын лэсьтӥське ческыт сиён. Фотоосыз В. КАМАШЕВЛЭН. Ӟечкылан Можга ёросысь Малая Сюга гуртын улӥсь Светлана Мурашова ноябрь пумын пусйиз вордскем нуналзэ. Сое ӟечкылало анаез, Лида апаез но солэн семьяез. Ӟеч тазалык но шудбур сӥзиськом тыныд, яратоно Светамы. Ӟыгыртӥськом но чупаськом. Гажаса но яратыса ӵыжы-выжыосыд. "Кокосэ" вуоз картош Шаерамы "кыкетӥ нянь" котьку удалтэ, нош сое уже кутон туж бере кыле. Соин ик Воткинскын кылдытӥське картофкалэсь ӟеч сиён-юон поттонъя "Кокос" предприятие. Выль арын со ужаны кутскоз. Предприятилы ичизэ 18 сюрс тонна картофка кулэ луоз. Огъя вераса, 30 пумо сиён- юон поттыны чакламын. Пусйыны кулэ: куасьтэм картофкалэсь лэсьтэм сиён-юонын ваньмыз тазалыклы пайдаё люкетъёсыз кылёзы. Республикаямы, ватонэз ӧвӧл, берло дыре картофка будэтон удыс сюбегаз. Мугез тодмо вал, гурт хозяйствоос сое кытчы вузаны ёрмылӥзы. Табере югдур воштӥське: Вотка, Шаркан но Завьял ёросъёслы картофка лудъёссэс паськытатоно луоз. Эштосъёслы, крестьян хозяйствоослы но со пайдаен берытскоз, продукцизэс кытчы ке палэнэ келяно- вузано уз луэ, дунзэ но улэп коньдонэн басьтозы. Г. РОМАНОВ. Вормиз кужмоез Драмая удмурт кун театрын ортчиз Удмурт лулчеберлыкъя дэменлыклэн йылпумъянъёслы но быръёнъёслы сӥзем кенешез. Нырысь ик ужрадэ люкаськемъёсты дэменлыклэн туннэ нуналэныз тодматӥз солэн одӥгез валчетӧроез Василий Осипов. Отӥяз вал пӧртэм ужпумъёсъя вераськонъёс. Пӧртэм удысъёсъя лэчыт малпанъёссэс веразы тодосчиос Альберт но Рево Разинъёс, эмъясь Поликарп Князев, юрист, журналист Николай Кузнецов, "Удмурт кенеш" огазеяськонлэн Пичи кенешаз быръем муртъёс Алевтина Поткина, Евдокия Ильиных, Удмурт лулчеберлыкъя дэменлыклэн Пичи Пурга но Кияса ёросъёсысь ёзъёсыныз кивалтӥсьёс Зоя Поликарпова, Надежда Пахомова, удмуртлык сярысь зэмос сюлмаськись Анна Мерзлякова, писатель, журналист Кирилл Ломагин, мукет адямиос. Вань верамъёс борды итӥськыса, ӟеч дэмланъёсынызы, мылкыд каронъёсынызы тодматӥзы Вань удмуртъёслэн "Удмурт кенеш" огазеяськонзылэн тӧроез Валентин Тубылов, Удмурт Кивалтэтысь Пӧртэм калыкъёсын ужанъя комитетлэн кивалтӥсез Светлана Смитрнова. Лэчыт нюръяськон пуромиз, дэменлыклы тӧрое бырйыку. Та интые ӵектэмын вал ньыль адями. Тужгес трос куара люкаса вормиз тодмо тодосчи азьветлӥсь удмурт Альберт Разин. Ужрадэ люкаськемъёсты шулдыртӥзы Ижысь 44-тӥ лицейысь "Зорай" ансамбльысь пиналъёс, 235 номеро нылпи садысь удмурт покчиос, 56-тӥ школаысь вуоно удмурт дышетӥсьёс. Ӝытазе вань мылкыд карисьёс тодматскыны быгатӥзы "Улӥськом-вылӥськом, шу" спектаклен. Йылпумъянъёслы но быръёнъёслы сӥзем конференцилэн ужаз пыриськиз Кун Кенешлэн Тӧроезлэн коштӥсез Алексей Красильников. Е. РОМАШОВА. Туннэ - Ӧлексыослэн нуналзы Верано кылъёс - йырын, кырӟано гуръёс - сюлмын Покчиез пинал семьяын - тужгес но мусоез, вешамонэз. Ми но вожмаськыса утялтыны вырылӥм пичи вынмес, возьмам солэсь нырысь вамыш лэсьтэмзэ, "анай" шуыса ваземзэ. Валерамылы туннэ 18 арес ни, но "анай" шуыса вазиськемез уг луы. Одӥг аресказ со пужыен висиз. Больницаын мукет висёнлэсь эмъяменызы, таиз выжызэ мур лэзем: вынмы вераськемысь но, кылэмысь но дугдӥз.Мар быдӟа куректон вал со семьямылы, веранэз ӧвӧл, дыр. Больницаын буйгатыны выризы, Москваын, пе, ӟеч операция лэсьто, нуллэ отчы, но бервылъёсыз сярысь вераны азьло ик секыт, пе, кин тодэ, оло, уката урод луоз. Анае "уг нуы" шуиз, оло, пе, воксё шузи луоз. Берлогес тодмоосмы ӵектӥзы Ижевскысь школа-интернатэ сётыны. Соку нырысьсэ кылӥм, сыӵе интернат вань шуыса. Ньыль аресъем пиналэз сьӧрло келяны туж секыт вал, но интернатысь дышетӥсьёс буйгатӥзы: - Гуртын улыса, со номырлы уз дышы, эшъёсыз но уз луэ, йыртэманы кутскоз. Нош татын тодон-валан басьтоз, ачиз кадь пиналъёс пӧлын огъя кыл шедьтоз, ассэ та дуннеын кулэтэм адямиен уз лыдъя. Туэ вынмы школазэ йылпумъя ни. Интернат воштӥз солы дорзэ. Каникулъёсыз дыръя гуртын арня но улыны уг чида. Угось отын гинэ со аслэсьтыз малпанъёссэ быдэстыны, вань сюлэм веранъёссэ усьтыны быгатэ. Кылӥсьтэм но вераськисьтэм пиналъёслэн Ижевске интыяськем школа-интернатсы туэ 65 арзэ пусъе. 1933 арын сое усьтӥзы ньыль кылӥсьтэм пиналъёслэн анай-атайёссы. Нырысетӥ араз татын вить пинал гинэ дышетскиз (гуртъёсын со сярысь ӧз тодылэ на яке анай-атайёс жаляллязы нылпизэс келяны), нош туннэ татын шаерысьтымы 172 пинал дышетске. 14 ар ӵоже кивалтэ ини школа-интернатэн Эмма Герасимовна Белослудцева. Та школаын ӧлексы пиналъёслэн дышетскемзы но улэмзы сярысь мон сое вераны кури. - Ми доры пиналъёс лыкто ньыль арескысен. Куинь арзэ ог-огзылы, воспитательёслы дышыны выро, дактильной (киын вераськон) азбукаез дышето. Дас кык арзэ школае ветло. Та пиналъёсын нимысьтыз ужано бере, дышетон программа кемагес кыстӥське, соин ик дышетскемзы 9 классъем гинэ. Но азьланяз малпаськом шор ёзо школалэн программаез вылэ выжыны, ватсаса предметъёс пыртыны. - Кытчы интыясько пиналъёс, школазэс йылпумъяса? - Быгатӥсьёсызгес Сарапулысь радиотехнической техникуме мыно. Отын ӧлексыослы нимысьтыз группа вань. Соосты дышето теле- но радиоаппаратураез, кынтӥсь (холодильной) оборудованиез тупатъяны, изьы вурыны. Тросэз заводэ ужаны интыясько. - Но али кылӥсь-вераськись муртъёс но уж шедьтыны шугъясько ук... - Кылӥсьтэм муртъёс ужало укыр ӵашетӥсь цехъёсын, сыӵеосаз кылӥсь муртлы ужаны туж секыт. Милям пиналъёсмы пӧртэм киужъёслы но шаплыесь. Школаямы 16 пӧртэм кружок ужа: дӥсь вандонъя но вуронъя, эктонъя но пантомимая, озьы ик трос мукетъёсыз. Дышетӥсьёсмы туж умоесь, визьмоесь. Пиналъёсын кылзы тупа соос вераськыны быгатэменызы но, ог- огзэс валаны тыршеменызы но. Куд-огез 40 ар ӵоже татын ужало ни. Ваньмыз ик соос сурдопедагоге дышетскемын. Дас куинез дышетӥсьмы - калыкез дышетон удыссь отличник. - Эмма Герасимовна, пиналъёс татын ик уло бере, ваньмыз тӥляд син азяды: будэмзы, быдэ вуэмзы, сюлмаськонъёссы... - Бен, ми сое шӧдытэк ум кылиське, но пиналлэн улонэныз ум кузёяськиське, мылкыдъёсмес, малпанъёсмес кужмысь ум ӵектӥське соослы. Дорамы дышетскемъёс ог- огенызы семья но кылдыто. Адямилэн шудэз со бордын ук. Асьсэ кадь ик шуге-леке сюремъёсын кузпалъясько ке, тупаса, ог-огзэс валаса уло. Тросэзлэн чырткем (кылӥсь- вераськись) пиналъёссы вордӥсько, угось уноез кылэмысь, вераськемысь дугдэмын секыт висемзы, кышкамзы, шуккиськемзы бере, соин ик висёнзы выжыя уг кошкы. Нош таза муртъёсын кузпалъясько ке, семья улонзы котьку ик уг удалты. Кылзы уг тупа шуыса верамез татын меӵак валаны кулэ. Таза адямилы ӧлексы муртэ валаны туж секыт уго. Е. ПЕТРОВА, Удмурт кун университетын дышетскись. Туннэ - Дуннеысь ӧлексыослэн нуналзы Кужым вань, кулэ на тазалык Ляб визьем пиналъёс понна асьме республикаямы кылдытэмын дас интернат. Пиналъёсты отчы куто ньыль арескысен. Дас тямыс арес тырмыса, соос ас мылкыд каремзыя бырйыны быгато бадӟымъёслэсь интернатсэс. Нош со дырозь ӧлексы нылпиослэн улонзы ас сяменыз пӧзе: интернатын соос ужало, дышетско, киужъёсын выро, шулдыръясько. Ӧлексы нылпиосты дышетонын валтӥсез - соосты улонэ поттон. Кызьы шуиз Калыкез улон-вылонын утёнъя министерствоысь интернатъёсъя ёзэныз кивалтӥсь С. А. Закирова: - Та нылпиос тазалыко адямиос сямен ик уже ветлыны мед быгатозы. Бен, азьло аръёсы капчигес ужъёсы интыяськыны каньылгес вал. Улон секытомемен, висись нылпиослэн лыдзы котькуд аре йылэ, нош анай-атайёс нылпиоссэс интернатъёсы уггес сёто ни. Малы? Чиньы йылын лыдъямон пенсизы понна. Салия Ахмаровнаез та югдур туж сюлэмшугъяськытэ. Уго нылпиез вазьгес интернатэ интыяса, со чальгес дыше пӧртэм ужъёслы, тодон-валан басьтон ласянь но азинсконъёс шӧдӥсько. Нош семьяын висись нылпилы кулэ саклык уг висъяськы, соосты дышетоно угось нимысьтыз программая. Мукетыз сюлэмшугъяськытӥсь югдур - ӧлексыос понна уже интыяськыны луонлыкъёс туж ӧжыт. Улонзэс кызьы ке но капчиятон понна, интернатъёсын кылдытъяло пӧртэм мастерскойёс. Егитъёс но, мӧйыос но отын сюлмысь ужало. Салия Ахмаровналэн верамезъя, олигофренъёс мукетъёслэсь висъясько юн чиданлыкенызы но ужез яратэменызы. Лэсьтӥськон, вуриськон, полиэтилен пакетъёс лэсьтон, художественной мастерскойёсын лэсьтэм ваньбурзы берло аръёсы асьсэ кулэяськонъёссылы ик мынэ - рынок талаз басьяськисьёссэс. Ма, собере ӧлексыос кемалась ни дышемын асьсэ сярысь сюлмаськыны, улонысь шуг-секытъёсын ас кужыменызы нюръяськыны. Бадӟым шумпотон но бурдъяськон ваиз соослы 1993 ар. Ӵапак та аре Удмуртия пыриськиз быдэс дуннеысь ӧлексыослэн Олимпийской движениязы. Ӧлексыослэн бадӟым спортэ пыриськонзы вордӥськиз куамын ар талэсь азьло Америкаын. "Анаез" луэ Юдит Шрайвер Кеннеди. Та кышномуртлэн вордӥськиз олигофрен нылпиез, со ик нырысьсэ усьтӥз таӵе висисьёслэсь спорт удысэ пыриськыны быгатонлыкъёссэс. Ӧлексыослэн нимысьтыз олимпийской шудонъёсы пыриськемзы пумен муромиз но паськытаз, али дыре вӧлмемын ини 120 кунэ. 1994 арысен асьме республикаысьтымы ӧлексыос пыриськыны кутскизы Россиын ортчись вань ӵошатсконъёсы. Та дыр куспын кытчы гинэ ӧз вуылэ ни соос: Москвае, Санкт- Петербурге, Омске, Саратове... Котькуд ар Москваысь вуэ спорт ӵошатсконъя календарь. Со вылэ пыкиськыса, шаерамы лэсьто асьсэлэсь календарьзэс, быръё спорт удысъёсты. Туэ тани интернатысь нылпиос ветло бассейнэ, шудо баскетболэн, выро капчи атлетикаен, бызьыло куасэн. Кужмооссэгес, проворъёссэгес висъян вылысь, радъямын ньыль тубатэн ӵошатсконъёс. Нырысь ик интернат пушкын кужымзэс мертало, собере шаерын. Вормисьёс мыно кун ӵошатсконъёсы. Нош отысен шудоосызлы луонлык усьтӥське дуннемес котыртыны. Быдэс дуннея сяна, ортчо на быдэс Европая шудонъёс. 18 аресъем Павлик Матвеевлы, мон малпамъя, вожъяськоз, дыр, котькудӥз. Уго та пияш бадминтонэн элькун но кун ӵошатсконъёсын вормисе потӥз, вуоно арын Америкаын гужем ортчись дасэтӥ нимысьтыз олимпийской шудонъёсы дасяське. Трос вераськыны яратӥсьтэм, востэм, кылзӥськись сямо пияш чик ӧз малпаськы нырысетӥ интые потонэз сярысь. Павлик но солэн ёзъёсыз понна спорт - со туж бадӟым яратон. Уго быдэс дуннеысь спорт ваньзэсты соосты огазея, эшъяськытэ, сётэ капчи мылкыд, аслыд ачид оскон, юнматэ тазалыксэс, кузьма сьӧр шаеръёсын тодматскон. Но жаляса верано луэ, тазалыксыя ваньзы ик нылпиос уг быгато спортэн вырыны, пӧртэм ӵошатсконъёсы ветло олигофрен нылпиос гинэ. Мукетъёсыз понна врачъёс кышкатско: висёнзы муромыны быгатоз. Палэнэ ӧз кельтэ сӧсыр кылемъёссэ но.Та аре соос понна кылдытыны чакламын огазеяськем спорт. Ужрад нуиське анай-атайёсынызы улӥсь ӧлексыосын но. - Пиналъёс туж бадӟым мылкыдэн кыстӥсько спортэ, со ласянь шугъяськонъёсмы ичи,- шуэ С. А. Закирова. - Могӟетъёс мукет бордын. Милям ӧвӧл спортзалъёсмы но, физкультураен дышетӥсьёсмы но, уг тырмы спортинвентарь. Нош кин тыроз ӵошатсконъёсы ветлэммы понна? Спонсоръёсты пӧсектымон утчано луэ. Тӥни сыӵе улонзы но адӟонзы ӧлексы нылпиослэн. Одӥгзэ пусъем потэ: соос тазалыксыя но визьзыя лябесь ке но, нюръяськон кужымзыя узыргес. А. МИТРОФАНОВА, Удмурт кун университетын дышетскись. Соосын данъясько Кызьы тодмо, вуоноез ар ялэмын быдэс дуннеысь мӧйыослэн аренызы. Асьмелэн атайёсмы-песятайёсмы, ожысь но ужысь ветеранъёс Родинамес сьӧсь тушмонлэсь утизы быдтонлэсь. Ижевскысь ветеранъёс но толэзьлы одӥг пол люкаськыса, тодэ ваё асьсэлэсь ортчем сюрессэс. Ноябрьлэн пумаз таӵе пумиськон вал Удмурт Республикаысь дано адямиосын. Нырысь ик вераськиз ожысь но ужысь ветеранъёслэн городысь Советэзлэн кивалтӥсез Б. Г. Аминов. Ма веранэз, секыт учыре сюризы али висисьёс. Коммерция аптекаосын соослы дунтэк но льготаос чотын эмъюмъёс уг сёто. "Фармация" кун предприятие гинэ быгатэмезъя юрттэ висисьёслы. Вормонлы 50 ар тырмон азьын ожысь но ужысь ветеранъёслы улон инты басьтыны 5 миллиард манет (вуж дунъёсъя) сётӥзы вал. Али номыр уг висъяло. Мӧйыос азьын мылкыдзэс веразы Удмурт Республикалэн дано гражданинъёсыз композитор, Россия Федерациысь но Удмурт Республикаысь композиторъёслэн огазеяськонзылэн членэз Геннадий Корепанов-Камский, Удмурт Республикаысь калык кылбурчи Олег Поскрёбышев. Кыкназы ик соос тодазы ваизы ортчем сюрессэсэ, лыдӟизы асьсэлэсь гожъям кылбуръёссэс. Озьы ик клубын вераськиз "Италмаслэн" кивалтӥсез А. А. Мамонтов. Солэн данэз Республикаямы туж бадӟым. Аслаз тодмо ансамбленыз Анатолий Васильевич кунгож сьӧрысь но трос странаосы ветлӥз. Со азьланяз вань ортчем сюресэз сярысь книга гожтыны малпа. В. ЧЕРНОВ. Вӧлдэт куашказ Алнаш ёросысь культура юртлы туэ 30 ар тырмиз. Со дырысен отын одӥг пол но умой- умой тупатъян ужъёс ӧй вал на. Клубын ужасьёс алигес уж дуразы лыктыса абдразы: одӥгаз комнатаын вӧлдэтсы пасяськем. Дыр ортчемъя пул сисьмем, шӧдске. Вӧлдэт бадӟым залын но някырскемын ни. Зэмзэ но, кышкыт ик дыр, пукыны сыӵе культура юртын. Кӧня ке ар талэсь азьло Алнаше пуктыны кутскизы вал искусствоя центр. Нош коньдон ӧвӧлэн, ужъёс дугдытэмын. И. ИВАНОВ. Бодьяос вормизы Кизнер ёрос. Ноябрь праздникъёсы Кизнер ёросысь Безменшур гуртын КВН ортчиз. Радъямын вал со куинь сельсовет куспын: Вуж Бодья, Муркозь-Омга но Безменшур. Шудӥсьёс асьсэдыз туж усто возьматыны быгатӥзы. Капчиен поталлязы ог-огенызы кылдытэм учыръёсысь, ӝог шедьтылӥзы юанъёслы валэктонъёс. Вормизы вуж бодьяос, кыкетӥ интыын муркозь-омгаос, соослэсь ӝыны очколы гинэ кылизы безменшуръёс. Вань шудӥсьёсыз кузёос шуныт перепечен куноятӥзы. Вормисьёс табере толсуре Кизнерын шудозы финалэ потэм командаосын. Шуныт мылкыд уз пегӟы Ижысь Егитъёслэн юртазы ӧсъёссэ нош ик усьтӥз "Эктон корка". 26-тӥ шуркынмонэ кыкетӥез пумиськон вал нырысетӥез ортчиз 29-тӥ коньывуонэ). Кыӵе аспӧртэмлыкез солэн али? Табере "Эктон корка" но данъяськыны быгатэ ни: солэн аслаз коллективез вань. Нош кылдытӥзы сое пӧртэм удмурт фольклор ансамбльёсысь усточиос. Туж оскем потэ: азьланьын та коллектив юн ансамбльлы пӧрмоз. Ивортӥськом эшшо созэ: табере "Эктон корка" ортчылоз котькуд толэзьлэн берпуметӥ покчи арня нуналаз (четвергаз). Вуоноез луоз, озьыен, 24-тӥ толсуре. Нош шуныт мылкыд татысь уз пегӟы: озьы ик ӧтчалозы палэнысь коллективъёсты, озьы ик дышетозы эктонъёслы, озьы ик пумиталозы задор но шуныт мылкыдын. Анна Кузнецова, Удмурт кун университетын дышетскись. Россия Федерацилэн кун наградаосыныз пусъён сярысь Россия Федерацилэн Президентэзлэн Указэз Инкуазез но икуазь узырлыкъёсты утёнын вормонъёс басьтэмез но уно аръёс ӵоже сюлмысь ужамез понна "Россия Федерациысь дано эколог" сӥлы карон ним сётоно: Новосёлова Тамара Владимировналы - "Ижевский компьютерный экологический сервис" огазеяськонлэн директорезлэн воштӥсезлы. Специалистъёсты дасянын вормонъёс басьтэмез но уно аръёс ӵоже сюлмысь ужамез понна "Россия Федерациысь дано дышетӥсь" сӥлы карон ним сётоно: Быков Вениамин Леонидовичлы - Сарапулысь радиоэлектронной приборъёсты лэсьтонъя колледжлэн директорезлы. Адямиосты утьыку кышкасьтэм, ассэ жалясьтэм луэмез понна "За спасение погибавших" медален пусъёно: Безносова Анна Александровнаез - Ижевскысь 9 номеро ӝыт (сменной) школаысь дышетскисез. Россия Федерацилэн Президентэз Борис Ельцин. Москва, Кремль, 1998 арын 11 ноябре. � 1350. Узыр шыкысысь Алигес Пичи Пургаысь ёрос культура юртын ортчиз элькунысьтымы фольклор коллективъёслэн смотр-конкурссы. Отчы пыриськиз 19 коллектив. Та ужрадын возьматӥськизы калык календарен герӟаськем йылолъёс. Ньыль час ӵоже кыстӥськиз праздник. Нырысетӥ степенё дипломъёс сётэмын Пичи Пургаысь "Зарни шеп", Можга ёросысь Бадӟым Сибыысь "Марӟан" но Глазов районысь Вылӥ Парзи гуртысь фольклор коллективъёслы. Кыкетӥ интыосты басьтӥзы "Гуждор" (Вавож), "Азвесь" (Ува), Вуж Монья (Пичи Пурга), "Отрада" но "Радуница" (Сарапул) ансамбльёс. Куинетӥ степенё дипломъёсын пусъемын Ижысь "Инвожо" но Киясовоысь "Ашальчи". Табере январь толэзе "Арлэн вакытъёсыз" праздник ортчоз. Отчы лыктозы азьвыл ужрадъёсын вормисе потэм коллективъёс. Н. ЕФИМОВ. Ваче син Берло толэзьёсы Алнаш ёросын умой сямлы пӧрмиз предприятиослэн но организациослэн кивалтӥсьёссылэн асьсэ коллективъёсынызы пумиськонъёс ортчытъян. Со ужрадъёсы озьы ик вуыло администрациысь кивалтӥсьёс но специалистъёс. Берло пумиськонъёсын коллективъёслэн укмыс толэзь ӵоже тыршемзы эскеремын. Нош 21-30 декабре туэлы нырысетӥ йылпумъянъёс дась луозы ни. Эштосъёсын со выллем пумиськонъёсты радъяло гурт администрациосын ужасьёс. И. ИВАНОВ. Алла Кузнецова "Ивортон" Али кадь... Алигес гинэ Ӟечкылазы эшъёс монэ Вордӥськем нуналэным, "Юбилей" шуонэным. Ой, кӧня вал сяськаос! Лӧпкытӥсь мусо кылъёс,.. Пӧртэм гинэ кузьымъёс... Ньыль-а, вить-а конвертъёс... Конвертъёсыз усьтӥсько - Уксёосыз лыдъясько. Огаз гинэ ивортон - Гожтэмын: "Деньги потом". Та серем пыры-кузьыт... Кагазлы луэм возьыт. Син азям ӵыж ӵыжектӥз Куараен шорам вазиз: - Кузёе котьку озьы Чеберъяське калык азьын. Дан поттон, лэся, ёртэ - Юбилярлы конверт сётэ. Отын мынясь ивортон, Гожтэмын: "Деньги потом". ... Тани выль юбилее Матэктэ ини каллен. Нош лыктоз-а тодмое? Нош тубоз-а сценае? ТЕАТР Кытын-о тӥ, удмурт спектакльёс? Та ужпумъя вераськыны таӵе муг сюриз. Шонерзэ вераса, одӥг учыр кемалась тымиськыса улэм мылкыдме ӧръяны юрттӥз. Ноябрь толэзьлэн кутсконаз Удмурт национальной театр аслаз сцена вылаз пуктӥз К.Гольдонилэн "Кык кузёослэн ляльчизы" комедиезъя спектаклез. Премьера бере соку ик театрын вераськон вӧлмиз: спектакльысь куд-огез куспетӥ кошкиллям. Соос пӧлын вылӥллям туж тодмо эмъясьёс, асьсэ удысазы валтӥсь адямиос. Мон соослэсь нимтулзэс уг поттылы, кулэез но ӧвӧл, дыр. Ужпум мукетыз бордын. Та кузпалъёс кошкыкузы пырак вераллям: мукет кылысь берыктыса пуктэм спектакльёсын вукылӟимы ни. Тӥни та ик бугыртӥз мынэсьтым сюлэмме, тӥни та ик муг луиз газет бамын вераськон ӝутыны. Мон пичи но пумит ӧвӧл ӟуч но кунгож сьӧрысь классикалы. Пыд йылаз йыг-йыг сылӥсь театр ноку но солэсь уз палэнскы, репертуарзэ одно ик узырмытыны сюлмаськоз. Нош театр мукет кылъёсысь берыктэм пьесаосын гинэ улыны кутске ке - туж янгыша. Мон вераськисько Удмурт национальной театр сярысь. Асьмеос ноку но ушъяськыны ӧм быгатылэ удмурт драматургиен. Печатьын но, трос пӧртэм кенешонъёсын но ӟырдыт вераськонъёс ӝутскылӥзы литературалэн та секыт удысэз сярысь. Пӧртэм ӧй вал берло аръёс но. Ваелэ учком миым репертураез, собере - туэзэ. Вань-а отын удмурт пьесаосын премьераос? Ӧвӧл. Театрлэн репертуараз - ньылак берыктэм макеос. Тае адӟыса, туж ӝоже усёно. Ма, асьме драматургия ӧвӧл ни шат? Сыӵе секыт юанъёсын вазиськыло мыным учкисьёс. Соос амалтэк малпаськыны косо. Мынам дышетӥселэн, тодмо драматурглэн Виктор Розовлэн верамезъя, драматургия, огшоры проза сярысь, дас ньыль пол секытгес. Шонер верамын. Та удыс сокем капчи ке луысал, издательство музэн ик, театр но ӝокасал, дыр, трос произведениос пӧлын. Писательлэн уженыз вырыны инмарен гожтэмын шуо. Талант, пе, пыд улын уг костаськы. Нош пьеса дасяны кылдэмын, быръемъёсыз пӧлысь быръемъёсызлы гинэ. Соин ик драматургия котьку ик ӟеч произведениосын сокем данъяськыны ӧз быгатылы. Таӵе "висёнэн" курадӟо тросэз литератураос, удмуртэз гинэ уг. Нош театр, котьмар мыным пумит мед вералозы, драматургитэк вамыш но лэсьтыны уз быгаты. Асьме йырвизьёсысь сэрпалтыны кулэ ни Константин Станиславскийлэсь аспӧртэм кылъёссэ: театр, пе, кутске дӥсь ошылонысен. Татын нырысь интыын - драматургия. Уката ик национальной театрын. Вань аслад драматургиед - вань театред. Тодамы ваём азьвылзэ. Удмурт театр мар бордысь вордӥськиз? Игнатий Гаврилов "Вало ӧр куашетэ" пьесазэ гожтӥз. Режиссёр Кузьма Ложкин сое пуктӥз. Озьы дунне вылэ выль удмурт театр кылдӥз. Соин ик туннэ вераськон муге драматургиен герӟаськемын. Асьме театрын ужась миым пырак синмам кезьыт ву пальккиз кадь: - Удмурт драматургия вань шат? Таӵе кылъёс бере асьсэлэн кыллён интыязы вожзы потыса берытскизы кадь потӥз Игнатий Гаврилов, Михаил Петров, Василий Садовников, Лазарь Перевощиков но данак мукет писательёс. Соос вань улытозязы драматургия сярысь сюлмаськылӥзы, сое азинтон понна быгатэмзыя мар ке но лэсьтыны тыршылӥзы. Та адямилы мон пырак верай: - Вал удмурт драматургия, али ке но вань, луоз но! Таӵе мылкыды мынам уката юнмаз, туэ арлэн кутсконаз одӥг ужрадлы йылпумъянъёс лэсьтэм бере. Мон верасько Кузебай Гердлы 100 ар тырмонэн валче конкурс сярысь. Шумпоттӥз со монэ! Та ужрадэз радъян борды сокем ӝутскем мылкыдын ӧй басьтӥськы вал. Угось улон-вылон али тугаськыса кошкемын, нокинлы капчи ӧвӧл, юбилеен валче чаклам ужрадъёсы но бергес пыримы. Нош конкурс пӧрмиз! Жюрие дас авторъёслэн произведениоссы вуизы. Пьеса вуттӥзы Егор Загребин, Вячеслав Сергеев, Никвлад Самсонов, Виталий Агбаев, Алексей Шкляев, Николай Байтеряков, Анатолий Уваров, Петр Захаров, Леонид Романов, Вениамин Морозов. Туэ йылпумъяськись ар быдэсак сӥземын К. Гердлэн творчествоезлы. Солэсь нимзэ быдэс финн-угор дунне данъя. Нош Удмурт театр вӧтаса но уг вырӟы, К. Гердэз тодымтэ-кылымтэ улэ кариське, лэся. Татысь кивалтӥсьёслы тодазы вайытӥсько: Кузьма Павлович Чайников 1919-тӥ арын Елабугаын печатлаз аслэсьтыз "Люгыт сюрес вылэ" пьесазэ. Собере сое, Цыпья селоын ужакуз, драмколлективен пуктэ. Озьыен, киыз но пыдыз удмуртъёс пӧлысь самой удмурт адями сярысь пьесаез Удмурт сцена вылыны шудыны! К. Герд сярысь Егор Загребинлэн пьесаез конкурсын вормисе потӥз. Сое ик автор быдэс коллектив азьын лыдӟиз. Усто лыдъязы. Но театр уг дырты. Тани быдэс ар ортче ни. Вань сыӵе вераськонъёс но: акыльтӥз ни Кузебай Герд. Кытчы гинэ эн учкы - котькытын, пе, солэн нимыз: радио, телевидение, газетъёс, журналъёс - ваньзы та писателен ӝокатэмын ни. Малпасько, туж шонер, вань калык данъя аслэсьтыз татчыозь сантэмам пизэ тодэ-буре вае ке. Малы мукет калыкъёс сокем данъяськыны быгато асьсэлэн сиё-дано адямиосынызы: ӟучъёс Александр Пушкинэн, осетинъёс Коста Хетагуровен, бигеръёс Муса Джалилен, чувашъёс Педер Хузангаен, поръёс Сергей Чавайнэн. К. Герд шоры сыӵе "долкам пинь" пыртӥ учкон нош ик возьматэ асьмелэсь синазькыль сяммес. Конкурс дыръя тодмо луиз: драматургъёс, солэн куронъёсыныз тодматскыса, кӧня ке бурдъяськизы вал. Но соку ик пусйыны кулэ: та ужрадэ уксё номыртэм ӧжыт висъямын. Данакез произведениос пусйымонэсь ке но, соослы премиос ӧз сётэ. Конкурс возьматӥз: драматургъёс ужамзы понна кӧня ке но уждун басьтонзэс тодо ке, творчествозы азинске. Озьыен, удмурт драматургиез азинтыны луонлык вань. Гожтэм произведение понна гонорар тырозы шуыса оскон тыро-пыдо луиз ке, драматург гижысь- пиньысь басьтӥськоз уж борды. Али мынам ужан удысэ драматургъёсын пырак герӟаськемын. Соосын выль пьеса сярысь вераськон ӝутӥськод ке соку ик юало: кызьы но кӧня тырод? Контракт сярысь кылпум потто. Театрен договор ке луысал, кӧня ке оскон, пе, кылдысал. Мар мон вералом? Театр удысын ужась калыклэн малы ке но лэсянтэм сямыз вань: драматурглэн ужез тыпыр-тапыр маке гинэ, ваньмыз оп! шуытозь пӧрме. Ӧвӧл со озьы. Котькуд творчество сямен ик, драматургия кулэ каре пӧсямез-курадӟемез. Сое дунъяны кулэ. Коньдонэн но. Сыӵе "урод" малпанлы луыса, лэся, Удмурт театрысь кивалтӥсьёс гожъясь муртэн произведениез сцена вылын мынэмлэсь азьло контракт уз гожтэ. Кышкало, лэся: уждунтэк дораз пукись драматург узырмыса куаёз. Нош палэнэ дурыныз кисьтыны уг жаляло. Та вераме буш кылъёс гинэ медаз луэ шуыса, нош ик премьера доры берытске. "Кык кузёослэн ляльчизы" спектаклез пуктыны ӧтьылӥзы... Рязаньысь режиссёрез. Сое тодыса, Россиысь калык артистка Вероника Садаевалэн огаз кенешын театрлэн директорезлы мыр-мыр юан сётӥз: - Марлы сокемысь ваёно вал? Асьмелэн режиссёръёсмы ужтэк но уждунтэк пуко ук. Сӥё-дано актрисалэн юанэзлы валэктон ӧй вал. Огъя дунъет сётэмзыя, та постановка мукетъёсызлэсь ӧз висъяськы удмурт сцена вылын пӧртэм аръёсы Гольдониез олокӧня пол шудылӥллям ни. Вероника Садаевалэсь юанзэ азинтыса, таӵе малпанэ вуоно: марлы Магаданысь ӧтёнтэм, оло нош Улан-Удэысь, яке Бухарестысь? Верамзыя, Рязаньысь кунолы бусьтыр гинэ гонорар тыриллям. Асьмелэн ужтэк кылем режиссёръёсмы начаргес пуктысалзы шат? Эшшо верасько на: К. Гольдони Удмурт театр понна выль ним ӧвӧл ни. Кылсярысь, азьвыл аръёсы та пьесая спектакльын шудӥсь актёръёсты, асьме искусствоын туж вылӥын сылӥсь нимъёсты, сцена вылэ потэмзылэсь азьвыл ик ур-р! Карыса пумитало вылэм. Мон верасько Василий Перевощиков но Григорий Овечкин сярысь. Соин ик чутрак пумит луисько тазьы вераськисьёслы: удмурт учкись, пе, быдэ вуымтэ на классикаез валаны. Уката ик - кунгож сьӧрысьсэ. Копак шонер ӧвӧл озьы малпамзы. Учкисез янгыше уськытытозь, театрысь худсоветлы администрациен ӵош ӝабыр-ӝабыр ужано котькуд артистэн. Тӥни сыӵе юан сётэм потэ театрлэн директорезлы, художественной кивалтӥсезлы, со дыре ик пенсионерлы, со дыре ик "Ижмаш" культура дворецысь калык театрлэн кивалтӥсезлы Анатолий Митрофановлы. Палэнысь куноосты пумитаны но келяны быгатӥськом шуыса верало удмуртъёс сярысь. Умой со. Нош уродлэсь но урод сям шуысал мон мукетыз: ас выжыысьтыд адямиослы юрттэт сётонлэсь палэнскон. Таиз но, пе, удмурт сямлэн одӥгез тодметэз. Асьме адями кивалтӥсе пуксе ке, вӧзысьтыз удмуртэз адӟемысь дугдэ. Нош удмурт дараматургъёс туж возьмало юрттон мылкыдын мычем киез. Мар вералод мукет кылысь берыктэм пьесаосъя спектакльёс сярысь? Соос уг лякисько удмурт учкисьлэн сюлэмаз. Озьыен, адями уг вамышты театре, спектакль 2-3 пол мынэ, собере вунэ, театрысь касса сыӵе постановка бере буш кыле. Театрлэн репертуарез понна нырысь ик кыл кутэ художественной кивалтӥсь - валтӥсь режиссёр ӧвӧл бере (Анатолий Митрофанов соин одӥг кыл шедьтыны ӧз быгаты). Вань-а та нуналлы тупась репертуаръя политика? Худсоветлэн огаз кенешоназ ивортэмын: Россия Федерациысь искусствоосъя дано ужась Леонид Романов Степан Широбоковлэсь "Ой, чебер нылъёс" комедизэ выльысь пуктыны чакла. Вераськон мынэ Егор Загребин но куд-ог мукетъёс сярысь. Соин ваньмыз йылпумъяське. Киоссэс вӧлъяло: ӧвӧл, пе, кужмо драматургия. Та учырысь потон понна туж усто амал вань: авторен ужаны кулэ. Удмурт драмтеатрез театр палась курдатыны уг яра. Со борды режиссёрез юнматоно, контракт гожтоно. Озьы но озьы, сыӵе дырлы театр авторлы заказ лэсьтэ, нош таиз ужзэ азинскемезъя тетарлы возьматъя. Дэмланъёсты лыдэ басьтыса, берло эшшо ужа на. Малпасько, тазьы данакез драматургъёс бурдъяськысалзы. Оскон кылдэ, ужам ужед театрлы кулэ. Шонер вера театрысь труппалэн кивалтӥсез Евгения Григорьева: - Ортчытъяно вылэм конкурсъёс. Пӧртэмъёссэ. Вормисе потэм авторлы - нырысетӥ инты: гожтэмез мыноз сцена вылын. Драматургия удысын тэтэ карись писательёс понна нимаз премия, сцена вылын огпол мынэм произведениослэн авторъёссылы - нимаз, солэсь но трос пол пуктылэм авторъёслы - нош ик нимаз. Ватсаны кулэ: авторъёсын театр табере туэ арысен гонорар пумысен ачиз вераськыны быгатэ. Сыӵе ужез бергатыны культурая министерство пумит ӧз луы. Озьыен, киыз но пыдыз конкурсъёс ортчытъяны. Тодэмея, бускель республикаосысь театръёсын ваньмаз сямен авторъёсын сыӵе амалэн ужало. Малпасько, тазьы данакез драматургъёс бурдъяськысалзы. Оскон кылдэ: ужам ужед театрлы кулэ ук. Нош али? Али кивалтӥсь Анатолий Митрофанов контракт амалэн ужанлэсь тыллэсь кадь кышка. Нош ик берытско на берло премьера пумысь кутскем вераськонамы. Спектакльысь ӝыныё кошкем медикъёс-кузпалъёс данак аръёс ӵоже одӥг выль постановкаез но адӟытэк уг кылё, данакезлэсь литература но искусство удысын ужасьёслэсь тазалыксэс юнматъяллязы. Соин ик возьыт соос азьын театрлэн таӵе калэ вуэмысьтыз. Тодэ лыктэ быдӟым француз писательлэн Виктор Гюголэн верамез. Корольёс лыкто но кошко, нош Франция кыле... Туж тупа кадь та Удмурт театрлэн туннэ нуналэзлы. Уката ик со сярысь малпаськоно али. Угось 2001-тӥ арын Удмурт театрлы 70 арес тырме. Сое ӟеч репертураен но вылӥ азинсконъёсын пумитаны кулэ. Солы дасяськонэз али ик бугыртоно ни! Тазьы гожъяме понна монэ оло театрысь улляны но мыло-кыдоос шедёзы (татын ар но 10 толэзь ӵоже ужатозям, мон адӟылӥ ни сыӵе учыръёсты.) Но огез понна сюлэмме буйгатӥсько: удмурт лыдӟись азьын мон кисьтӥ Удмурт театр но удмурт драматургия сярысь сюлэмам кема гыбдаса улэм малпанъёсме-чакламъёсме. Мынам писатель мылкыды но ымныры чылкыт, синъёсы сэзь учко: верай сое, мар малпасько, мае адӟисько. Оскисько, "Удмурт дунне" газетэз лыдӟисьёс пӧлын та пумысен вазиськисьёс луозы. Никвлад Самсонов, Россиысь Писательёслэн союззылэн членэз, театрысь валтӥсь режиссёрлэн драматургъёсын ужанъя юрттӥсез, Удмурт Республикаысь культура удысъя дано ужась. Миллионъёс - шунытлы Удмурт Республикаысь Коньдон ужпумъёсъя министерство кык толэзь ӵоже ужаз, эстӥськон комплекслы электрокужым, шуныт но газ понна тыронъёсты пунэм сётон амалэн берыктыны луонлыкъёс шедьтон вылысь. Та нуналъёсы Россия Федерациысь Коньдон ужпумъёсъя министерство федерацилэн бюджетэз 278 миллион манет пунэм тыронлэсь мозмытӥз "Удмуртэнерго" акционер огазеяськонэз, "Межрегионгаз" огазеяськонэз, "Удмуртторф" кун предприятиез. Та коньдон республикаысь городъёслы но ёросъёслы висъямын, электрокужым, шуныт но газ понна пунэм тыронъёссылэсь быдӟалазэс лыдэ басьтыса. Ар йылпумъяськытозь, энергетикъёслы пунэм тыронъёссэс берыктозы улон интыосъя но коммунальной хозяйствоя предприятиос - 246,6 миллион манетлы но калыкез дышетонъя учреждениос - 6,4 миллион манетлы. Озьы Удмуртиысь Правительство быдэстӥз туэ тол вакытэ улон- вылонэн герӟаськем тужгес кулэ ужпумез. Правительстволэн Тӧроезлэн секретариатысьтыз пресс-центрез. ШӦКЫЧ Мон но кинлы ке кельшиськем! Егит пенсионерка эшезлы вера: - Толон пукисько Киров нимо паркын. Котыр ӵуж-горд куаръёс, чебер! Учкисько, мынам скамьяе доры воргорон лыктэ. Пельпумаз сумка ошем. Малпасько, мыным но кин ке синмаськем на ай. Со мышласянь матэктӥз, кылӥсько, пыд улаз куаръёс ӵаштырто. Кепыраменыз, кожасько ини, таид огинтыяз лёгаськыса сылэ, дыр. Берытски. Нош со сурлэсь бушам ӟенеликъёсты бича вылэм... - Бен, - шуэ эшез, - туала арын ваньмыз узырмон сярысь гинэ сюлмасько. *** Куноын. Радио пыр диктор ӝутскем мылкыдын ивортэ: "Кинлэн улэмез потэ Ижевск котырын лэсьтӥськись коттеджъёсын, куриськом ми доры вазиськыны. Но самой паймымонэз - ичи дунъёс. Ижын сярысь улӥынгес - метрез 800 доллар гинэ!!! - Кузьминишна! - серекъя кузё кышно Марья Ивановна, - нош асьмелэн пенсиенымы кӧня сантиметрзэ басьтыны луоз меда? Мар со выж сюрес вамен? Пичи Пурга пала газет ужъёсъя мыныкумы, Ижысь потонын ини, шофере юа: - Мар меда таӵе лэсьто? Гаишникъёс понна шат мар ке даурто, уд тодӥськы-а? Мон ачим но нырысьсэ адӟи та лэсьтӥськонэз. Зэм но, тодӥсьтэм адями понна со воксё валантэм. Малы сюрес вамен ог дас метр вылӥын ӝутэмын пыдын ветлӥсьёслы выллем сюбег выж? Огпал пумаз, сюрес урдсын пичигес гинэ кирпич корка. Сое йылпумъян бордын кыштыр гинэ выро лэсьтӥськисьёс. Соослэн кивалтӥсьсы ик, Владимир Широбоков рос-прос валэктӥз югдурез. Татын, пе, луоз секыт, бадӟым машинаосты эскерон пункт. Сюреслэн паллян палаз но, бур палаз но пуктозы (шонергес вераса, одӥгез дась ини) электронной весъёс. Соос котькуд машиналэсь секталазэ мерталозы. Машиналы со понна дугдылонэз ӧвӧл, ӝоглыксэ гинэ вить иськемозь кулэстоно. Солэн котькуд осезлы быдэ 10 тонналэсь ятыр груз усиз ке, машина кузёлы коньдон тыроно луоз. Мар понна кадь, озьы-а? Ужпум тани ма бордын. Данакез бадӟым машина возисьёс сокем ини коньдон тыро Сюресъёсъя фондэ, эсьмаса, соослэн ворттылэмзы воксё дунтэк усе, шуыны луоз. Нош сюрес возьыны, тупатъяны-выльдыны государство лыдъянтэм коньдон быдтэ. Со сяна, ӵапак секыт мышинаос ик тужгес юн кырсёмыто омырез. Машина возисьёслэсь бичам коньдон бюджетэ мыноз. Озьыен, калыклы. Йылпумъяса вералом на: выль объектэз 15 декабрьлы вуттыны малпало. Нош Россиын ваньзэ 250 таӵе пост кылдытыны чакламын. Г. ТИХОНОВ. Пенсия тыремын луоз Та арняе Москваын Россия Федерациысь Пенсиосъя фондлэн кивалтӥсез Василий Борчук но Удмурт Республикаысь Кун Кенешлэн Тӧроез Александр Волков Удмуртилы 10 миллион манет коньдон висъян сярысь огкыл кутӥзы. Удмурт Республикаысь Пенсиосъя фондлэн кивалтӥсезлэн воштӥсез Вячеслав Ибрагимов ивортэмъя, республикая та коньдон вуиз ини. Сентябрь понна пенсиос 8-тӥ-9-тӥ декабрёзь тыремын луозы. Удмурт Республикаысь Кун Кенешлэн Пресс-службаез. Уж берга ке, мылкыд но бурдъяське Кыллэн кужымез бадӟым: огеныз адямиез инбамозь ӝутод, мукетыныз лек шиен музэн бышкалтод - яраез улытозяз уз бурмы. Игра ёросысь "Чутырский" совхозлэн Чемошур фермаяз ужась Нина Аркадьевна Корепанова та нуналэ эшъёсыз доры лобыса бертыны дась вал. Зэмен ик, кызьы вератэк чидалод со быдӟа шумпотонэз! Фермазэс быдэс республика азьын ушъязы, дано коллективъёс радэ пыртӥзы. - Со шуныт, небыт кылъёсты мон али ик эшъёсылы верасал, ваньзэсты чупасал! - пачылмем мылкыдзэ уг ваты азьмынӥсь доярка. - Ми 15 кузя ужаськом, куспамы одӥг семья кадь улӥськом. Та нуналъёсы ятыргес йӧл сёто Любовь Дмитриевна Лекомцевалэн скалъёсыз. Фермаен кивалтэ Вера Иосифовна Корепанова. Удыссэ тодэ, калыкен кылыз тупа - со бордысь но потэ ук ужазинлык. Дояркаос но - ваньмыз сямен Чемошурын вордскемъёс, выжыысь выжые пудо вордонын тыршисьёс. Тани Нина Аркадьевна но кызетӥ арзэ совхоз скалъёсты кыске ни. Школаез йылпумъяса, фермае лыктӥз но ӧз кошкы, весяклы кылиз. Семьяысьтызы али куинь мурт пудо вордон удысын ужа ни: ачиз, кузпалыз, бадӟымез пизы. - Ужмы яра. Гуртын кытчы-о мынод на? - шуэ со.- Но азьвыл аръёсы шулдыргес, ог- огенымы ӵошатскыса ужаськом вал. Нуналлы быдэ адӟиськод, кин кӧня йӧл кыскиз, кӧнялы азьпала потӥз яке бере кылиз. Али озьы ӧвӧл ни. Коньдон-а, мар-а адямиез воштэ, ма шуыны но уг тодӥськы. Чемошур фермаын али но йӧлзы уг кулэсмы, нуналаз скаллы быдэ 11 килограмм пала кыско, гужем вылтӥ 15-ёзь вуттылӥзы. Ар йылпумъяськытозь, 4 сюрс тонна йӧл басьтыны малпало. Уждун ласянь ке верано, таизэ но сокем беромыса уг сёто. Азьмынӥсь хозяйствоын озьы ик луыны кулэ, дыр. Уж берга ке, мылкыд но бурдъяське, улэмъя улэм потэ. Со вылын возиське уго быдэс дунне. Л. МЕДВЕДЕВА. * Игра районысь "Чутырский" совхозысь доярка Нина Аркадьевна Корепанова гурт хозяйствоысь ужасьёслэн праздниксы дыръя. Фотоез В. КАМАШЕВЛЭН. Шӧкыч Тӥледлы ӝожтӥськонэн вазисько Ижысь автозаводлэн коркаосаз улӥсьёс. Милям микрорайонъёсамы лифтъёс толэзен-толэзен уг ужало. "Удмуртлифт" огазеяськонын ужасьёс шуо: нырысь, пе, коньдон тыре. Но заводын уждун тырон ӝега, пенсия дыраз уг сёто. Ми шат со понна янгыш? (Гожтэтысь). Суредэз Л. ПРОЗОРОВЛЭН. Шедьтэмын но таламын куинь пистолет но пластит но аммонит шуыса нимаськись пуштӥсь арбериос. Та кышкыт тӥрлыкез Ижын кык улӥсьлэсь талазы Россиысь ФСБ-лэн Удмурт Республикая Управлениысьтыз ужасьёс. Пыӵал тӥрлык возисьёслы пумит уголовной уж ӝутэмын. РФ-ысь ФСБ-лэн Удмурт Республикая Управлениезлэн пресс-службаез. Омырысь "куръям" зарни "Удмурт дунне" алигес гинэ пусйылӥз, "Удмуртия" издательство берло аръёсы ӧжыт книга поттэ шуыса. Озьы ке но, та нуналъёсы Ижысь Азин нимо библиотекаын шуд усиз ӵыж-выль "Урт" нимо книгаен тодматскыны. Солэн авторез - Россиысь Писательёслэн но Журналистъёслэн огазеяськонъёсазы быръем мурт, Удмурт Элькунысь дано журналист, кылбурчи но прозаик Алексей ЕЛЬЦОВ. - Та библиотекае котьку но ӟеч, визьмо, мылкыдэз бурдъясь адямиос люкаськыло,- шуиз писатель, крезьгурчи Петр Кубашев.- Тани мон но Удмурт театрысь куспетӥ кошки (отын спектакль мынэ вал). Пӧсь табанез веръяны вуэм сямен, книгаен тодматскыны трос адями лыктэм. Вал соос пӧртэм палъёсысь: Алнашысь, Яр, Шаркан, Можга ёросъёсысь, Башкириысь... Удмуртиысь калык артистка Галина Платонова Ельцовлэн кылбуръёсызъя гожтэм кырӟанъёсты быдэстӥз. Мон но кык кылбурезъя вазенгес крезьгур "пӧрай". Крезьгурчиез гажамме та кырӟанъёсын верай. Удмурт театрысь Галина Владыкина усто лыдӟиз кылбуръёссэ. Нош "Зеркало" студиысь Александр Котков (Владимир Котков кылбурчилэн ӵыжы-выжыез) эктыса кырӟаз. Нош шӧдӥды-а ни, мар сярысьгес гожъя Алексей Ельцов? Кылбуръёсыз пумысь ке верано, малы ке тросэз соос тол суредъёслы сӥземын. Учкелэ ай "Лымы" вальссэ ик. Поромисько куке усе лымы. Тӧдьы вальсын кадь нош поръяськомы... х х х Бергало пырыос, бергало, Я дырто, я каллен усьыло... х х х Ширтӥськом, эх, ширтӥськом Выль лымы вылтӥ... х х х Усьы, усьы, тӧдь лымы, Поръя шуд... Кылбур гожъяло кужмо адямиос. Алексей Ельцов кужым басьтэ, луоз, инкуазьлэсь, соин вераськыса. Яратонлы но сӥзем кылбуръёсыз инкуазен юн герӟаса гожтэмын. Озьыен, юнме уг "куръя" омырысь зарниез. Учкелэ ай книгазэ: кӧня кылбурез кырӟанлы пӧрмемын! Презентация кутскон азьын чылкыт, ненег куараен шуныт тулкым сётӥз ӝытэз нуись Милитина Гаврилова. Ужрад усто пӧрмиз. Эсьма, синкылиосмы виямон серекъятӥзы но. Тау библиотекаын ужасьёслы, озьы ик Алексей Ельцовлы: милемлы луонлык сётӥз, кызьы шуо, астэ возьматыны, калыкез учкыны. Табере витём ни бадӟым ӝытсэ. Светлана ЯКОВЛЕВА, кылбурчи но крезьгурчи. Дышетскыны пумит луэ Дышетскон ар ӧз кутскылы на Камбарка ёросысь Кама посёлокысь Валера Киселёв понна. 1-тӥ сентябре школае лыктымтэезлы паймыса, классэн кивалтӥсез Ирина Сапожникова пияшлэн гуртаз мынӥз. Но та семьяын забастовка вылэм: пизэ школае ветлыны уг лэзьы атаез. Со куинь сюрс манетлэсь трос басьтоно уждунзэ куре. Ӧз ке сётэ, пие школае уз, пе, мыны. Ирина Ивановна Валералэн атаезлэн ужан интыяз - Кама посёлокысь улон интыосты возён управление - гожтэт ыстӥз. ЖКХ-лэн кивалтӥсез В. А. Востриков пумитъяськись ужасезлы уждунзэ 500 манет уксёен, дӥсен-кутэн, пыдкутчанэн, дышетскон арбериосын но мукет вузэн басьтыны ӵектӥз. Киселёвлы сыӵе ӵектон ӧз кельшы - быдэс уждунзэ уксёен гинэ куре. Табере ёросысь кивалтӥсьёс но, быдэ вуымтэосын ужанъя инспекция но (Валера отын учётын сылэ), роно но мар карыны пияшез шклае вайыны - тодмо ӧвӧл. Уго Валера Киселёвлэн аслаз но дышетскыны мылкыдыз ӧвӧл. М. Хацкевич. Иськемъёсты лыдэ басьтытэк Котырысь инкуазез, улон-вылонэз, адямиосты котькудӥз аслаз синъёсыныз адӟе но дунъя. Вань сыӵе профессия - фотограф яке туспуктӥсь. Нырысь-валысь малпаса, мар отын шугез кадь: аппаратлэсь затворзэ зӥбид но - фото дась. Но сыӵе адямиос пӧлын вань зэмос фотохудожникъёс, кибашлыос, журналистъёс. Соос шаермылэсь улон-вылонзэ кельто историе. Ӵапак соос пӧлын ик "Известия Удмуртской Республики" газетлэн фотокорреспондентэз Николай Глухов. Солэн асьме шаерын ветлымтэ интыосыз ик ӧз кыле ни, дыр. Туннэ, шуом, со ужа Кун Кенешлэн сессияз, ӵуказеяз аэропортын пумита куноосты, бератаз кошке Чечняе... Толон Элькунысьтымы Национальной музейын (Арсенал) усьтӥськиз Николай Глуховлэн нимысьтыз выставкаез. Отчы люкамын фотокорреспондентлэн самой устоосыз туспуктэмъёсыз. Адӟытон нимаське "45 + 45..." Тӥ юалоды, мае возьмато лыдпусъёс? Нырысь ик, Николай Александровичлы тырме 45 арес. Собере, выставкае люкамын туспуктӥсьлэн 45 ужез. Ватсалом на: Николай Глуховлы та нуналъёсы сётэмын "Удмурт Республикаысь культура удысысь дано ужась" ним. Ӟечкыласьком эшмес! Н. БАЙТЕРЯКОВ. Гурезь Магомед доры уг мыны ке Куке-соку Кизнер ёросын ортчылӥзы огъя политнуналъёс. Матысьгес вакытъёсы сое воштӥз иворъёсын тодматон нунал. Интыысь администрациослэн, предприятиослэн, хозяйствоослэн кивалтӥсьёссы ёрос администрацие люкаськылӥзы, ёросын кылдэм югдурен тодматскылӥзы. Берло вакытэ вань кивалтӥсьёс Кизнере лыктыны уг быгато ни: я машиназы тӥяськемын, я бензинзы ӧвӧл. Ёросысь администрация та ужпумез ас сяменыз быдэстыны малпаз. Табере кивалтӥсьёс асьсэос калыке потало, гуртъёсын кенешъёс ортчытъяло. Нырысетӥзэ сыӵе ужрад ортчытыку, калыклы пенсиосты тыронэн, уж сётонэн герӟаськем югдур валэктэмын вал. Пусйыны кулэ: Кизнер ёросын ужтэк кылемъёслэн лыдзы туж бадӟым, кылсярысь, Ижевскын сярысь, татын кык поллы уногес. Ёросысь депутатъёслэн кенешсылэн тӧроез Надежда Жихарева малпамъя, таӵе гурт кенешъёсты куинь-ньыль толэзьлы одӥг пол ке но ортчытъяно. Н. ДАНИЛОВА. Адӟымтэ улэ аналскыны капчи Ижевскын улӥсьёс тодо, луоз, Ворошилов ульчаысь бытовой юрттэт сётонъя юрт дорысь пичи гинэ тэлез, отын жуг-жаг пӧлын Старковка шур но бызе. Интыез но, шурез но туж ик утялтэмын ӧвӧл ке но, котырысь ульчаосын улӥсьёс татын шутэтскыны ярато (матын нокыӵе ялкарон интыос ӧвӧл бере). Кӧня ке ар талэсь азьло татын улон юртъёс пуктыны кутскизы. Тэль котырын улӥсьёс та лэсьтӥськонлы пумит, соос малпамъя, выль юртъёс ӝутӥсько законъёсты тӥяса. Ужъёсты дугдытон понна, котырысь урамъёсын улӥсьёс судэ искен вазиськизы. Экологияя экспертизаез ортчытӥсьёс куронзылы дурбасьтӥзы, лэсьтӥськонэз уретыны косӥзы, угось городысь шуръёс котырын, тэльёсын лэсьтӥськыны законэн ӧвӧл лэземын. Со сяна, татысь омыр автозаводлэн ӵынэныз кырсёмытэмын. Озьы ке но, выль юртъёслэн борддоръёссы азьло сямен ик вылэ ӝутско. Нош судлэн йылыз-пумыз уг адӟиськы. Суд кыӵе ке решение кутытозь, коркаос липет улэ пырозы ини. Кин быгатоз та лэсьтӥськонэз дугдытыны? Удмуртиысь Инкуазез утёнъя союз та ужпумез быдэстыны курыса вазиськиз Кун Кенешлэн депутатъёсызлы. Союзлэн туэ 18 ноябре ортчем конференциез та вазиськонэз юнматӥз. Отын депутатъёс азе таӵе юанъёс пуктэмын: быгатозы-а соос валэктыны, малы Удмуртиын законъёс уг быдэсъясько, малы адямиос асьсэлэсь правооссэс чиновникъёс азьын ялан утьыны кулэ, малы прокуратура но, депутатъёс но та выллем учыръёсты адӟымтэ улэ аналско? Инкуазез утёнъя союз вазиськонзэ Кун Кенешлэн Законъёсты быдэсъянэз эскеронъя, калыкез кышкытлыклэсь утёнъя но гражданъёслэн правооссыя комиссияз эскерыны куре, союзлэсь муртъёссэ ӧтьыса. О. ВАХИТОВА. Шӧкыч Киосыныд сётод но... Гуртоослы коньдонэн берло дыре шӧдскымон юрттэ СБС-АГРО банклэн Удмурт ёзэз. Зэм, калыкын шуо: "Киосыныд сётод, пыдъёсыныд утчалод". Ӵапак озьы луиз "Грахово-молоко" акционер огазеяськонэн. Грахъёс банклэсь кӧня ке сю сюрс манет пунэм басьтӥзы. Нош берыктыны уг но малпало, лэся. Кузёос пеганы ӧдъязы. Уката но паймытэ соиз. Грахово ёрос Татарстанэн артэ интыяськемын. Нош пограничникъёс, кызьы тодмо, отын уг возьмасько. Соин ик акционер огазеяськон йӧл продукцизэ бускель республикае келяны дышем. Нош вузам чотын поттэм коньдон элькунамы уг вуы ни. Озьы бере, со Татарилэсь бюджетсэ узырмытыны юрттэ. Асьме банкын ужасьёс, коньдонзэс берыктон вылысь, олокыӵе но амалъёс утчазы ни. Пайдаез ӧвӧл. СБС-АГРО табере акционер огазеяськонлэсь ваньбурзэ таланы чакла арбитраж суд пыр. Е. НИКОЛАЕВ. ЛЫДӞИСЬ ГОЖТЭ Кирос пуктоно медаз луы... Удмурт шаерысь 1952-тӥ арын кошки ке но, анай кылме ӧй вунэты. Зэм, вашкала выжыосмы сярысь соку номыр ик тодмо ӧй вал ай. Школаын дышетсконме йылпумъякум но ӧй тодылы, кин со - удмурт. Калыкмы сярысь мадьылӥзы, туж мылпотытэк. Удмурт шаерез ӵошатылӥзы эксэй Россилэн туж начар, бере кылем сэрегеныз. Калыкез кырсь улэ, гожтэт уг тоды, шуылӥзы. Кенешъёс кылдэм бере гинэ вуиз удмуртъёслы шуд. Соос эрико луизы, гожтэт тодыны кутскизы. Удмурт шаер пӧрмиз азинскем кунлы. Зэм, мадьылӥсьёс троссэ сураллязы. Ӧз тодылэ созэ гинэ но: Удмурт улос кылдӥз 1920-тӥ арын, ньыль уездэз валчеяса. Арлыдо луэмъям, аслам калыке сярысь тросгес тодэме потыны кутскиз. Инмарлы тау: 1965-тӥ-1980-тӥ аръёсы вордскем палъёсам - Кезэ, Дэбесэ, Зурае, Эграла - шутэтскыны вуылыкум, книгаен вузкарон магазинъёсысь котьмае шедьтыны луэ вал. Удмурт шаер сярысь чибор туспуктэмъёс, суредъёсын, валэктонъёсын книгаос-альбомъёс, удмурт гожъясьёслэн кык кылын ик книгаоссы, шаермылы сӥзем пӧртэм изданиос, брошюраос, инкуазь сярысь книгаос шаермы сярысь тодон-валанме муромытыны юрттӥзы. Культурамы соку сяськаяськиз. Удмурт крезьгурчиос кылдытъязы тужгес кылзымон гуръёссэс, Удмурт кырӟанэз радио пыр кылон тужгес бадӟым учыр луэ вал... Зэм, отӥяз, экономика юн куашкамен, ваньмыз ёзнаськиз. Но улон огинтыяз уг сылы. Тодӥсько: азьлане туж бадӟымесь вамышъёс лэсьтӥзы историкъёс. Этнографъёс, археологъёс, шаерчиос сыӵе учыръёсты шедьто - азьвыл соос тодмо ик ӧй вал. Гожъямъёсъя мон тодӥ: асьмеос, удмуртъёс, туж вашкала калык. Чупчи шур дурысь но шаермылэн лымшор сэрегысьтыз гудӟиськыса шедьтэм вашкала гуӵинъёс, ужан тӥрлык, гуразьтӥрлык, чеберъяськонъёс, ожмаськисьёслэн дӥсьсы верало вашкала выжыосмылэн китайёсын, индусъёсын, иранъёсын, скифъёсын, сарматъёсын кусыпъёссы сярысь. Со вакытэ, иське, ӟучъёс асьме палан ӧй вал ай. Вузкарон но вылымтэ... Историкъёслэсь, этнографлэсь, археологъёслэсь ужъёссэс огазеяса, кемалась поттоно ни вал чебер книга - сое кияз кутыны мед быгатысал огшоры лыдӟись но. Туэ пӧртэм вераськонъёс вӧлмо удмурт кыллэн быронэз пумысь. Ӟуч педагог Константин Дмитриевич Ушинский алылӥз: кыл быриз ке, быроз ачиз калык но. Ас улон- вылонэз, даурез ӵоже удмуртлы чидано луиз ни котькыӵе шугадӟонъёсты. Но инмар ӧз кушты на асьмемыз: улӥм но улӥськом. Зэм, ӝоген быронмы пумысь ӵемгес куашетоӟуч шовинистъёс. Куддыр асьсэос удмуртъёс но, кыӵе ке ужзы уг пӧрмы ке, каргало асьсэды, та выжыысь луэмзы понна. Но суй-пыдэз юскыны уг яра. Пыдлось удмурт гуртъёсмы, отын мусо, ужез яратӥсь, юртъерез, вашкала сямъёсмес-йылолъёсмес утён сярысь сюлмаськись эшъёсмы вань ӵоже, удмурт уз быры. Зэм, кышкытлык вань. Асьме кунамы, 1917-тӥ арысен кутскыса, туннэ нуналозь ортчытъясько калыкмес сопала-тапала шонась юрӟым ужъёс. Экономикамы куашкамен, калыклэн улон-вылонэз лекос шугомемын, Со туж юн шӧдӥське быдэ вуись пиналъёс, егитъёс вылын - соос кыстӥсько наркоманъёс пала, артэ ик - СПИД. Уд но шӧды: та чер вуоз пыдлось гуртъёсы но - быдэ вуись пиналъёс пӧлын кылдозы ляб визьем адямиос. Соку удмуртъёс вылэ но кирос пуктоно луоз. Гуртысь визьмо адямиослы, правоез утён органъёсын ужасьёслы валэктон уж борды басьтӥськыны дыр вуэмын ини. Ноку ӧй оскылы удмуртъёслэн ӟуч кунэ ас мылкыдзыя пыремзылы. Вашкала аръёс, шор дауръёс но выль вакыт сярысь лыдӟылыса тодӥсько: одӥг калык но тушмонэзлы соин пумозяз нюръяськытэк ӧз сётскылы. Мынэсьтым малпанме юнматӥз тодмо тодосчимы историк М. В. Гришкина но! Ӟуч кунэ кужмысь пырыны косэмен, улонысь кошкизы 350- 400 сюрс лымшор удмуртъёс. Нош Иван Грозныйлэн гыжкалъёсыз куашкатӥзы соослэсь шоркарзэс - Арчаез. Удмурт но ӟуч калыкъёслэн эшъяськонзылы сӥзем монумент (Ижын сылэ 1958-тӥ арысен) но удмуртъёслэн ӟуч кунэ ас мылкыдзыя пыремзы дырысен 400 ар тырмонлы сӥзем монумент нимаськыны кулэ удмурт калыклэсь выжызэ быдтӥсь монумент. Со интые удмурт музъем вылын сылыны кулэ калыкмылэн тужгес дано адямиезлы сӥзем синпелет. Со мед луоз башкиръёслэн Салават Юлаевсы выллем. Вань асьмелэн сюлмо удмуртъёсмы. Дэбес ёросысь Котегуртын улэ Тамара Сергеевна Шихова. Шаермы сярысь тодон-валан люка ини олокӧня дасо ар ӵоже. Нош ас палъёсыз кемалась ини олокӧня пол эскеремын. Огпол пумиськыкумы тодматӥз кӧня ке гуртъёсты кылдытӥсьёслэн вашкала выжыосынызы. Кагаз вылысь суредэз учкыса паймиськод: тон азьын бадӟым баобаб писпу кадь. Тамара Сергеевналэсь юасько: уженыды кин ке тунсыкъяськиз ни-а? Ӧз, шуэ. Нокинлы но кулэ ӧвӧл, лэся. Нош мон сямен, та визьмо адямиен бадӟымос уж лэсьтэмын. Зэм, адями весь уг улы. Марысь мар ке, та нылкышнолэн но ужъёсыз ӵынлы пӧрмыны кулэ шат? Нош архивъёсын ужан но сюрс тоннаем кыл гурезез бугыръян вылысь, Тамара Сергеевна сыӵе пичи пенсиез чотын вуылэм Кирове, Глазкаре, Иже. Малы солэсь сыӵе ӟеч быдэстэм ужзэ лыдэ басьтонтэм? Мукет удысъёсы но вутске та нылкышно. Гурт школаын пиналъёсты тодматылэ шаеренымы. Азьвыл дышетӥсь сямен, егитъёслы визь-кенеш сётъя. Гожъя Дэбес но Эгра ёрос газетъёсы. Арлы быдэ огинэ люкаськыло бырем гуртъёсын улэмъёс. Одӥг нуналэ ваньзы сюрестэм азетӥ мыно жуг-жаген согиськем интые. Отын Тамара Сергеевна маде гуртлэн кылдэмез, отысь тодмо адямиос, ожын быремъёс, война бере улон сярысь. Кылем гужем сю ар тырмиз Котегурт школалы. Юбилейлы дасяськыку, туж трос юрттӥз Тамара Сергеевна. Со сярысь соку гожъяз "Выль сюрес" газет но. Та кышномурт скал но уг кыскы, заводын но уг ужа. Солэн удысэз чылкак мукет - калыклы шуныт, шумпотон, тодон-валан ваён. Та адямилы кемалась сётоно ни вал дано шаерчи ним. "Удмурт кенеш" ке но та сюлмаськонэз ас вылаз мед басьтысал. Нош "Удмурт дунне" мед мадьысал аслаз бамъёсаз. Геннадий Максимов. Свердловск улос, Качканар город. Кивалтӥсьёслэсь штраф Та вакытэ Кизнерысь администрация уждунэз сиён-юонэн, пӧртэм арбериосын тырон сярысь ужпумез эскере. Ёросысь уноез предприятиос бюджет азьын пунэмъёссэс берыктыны уг быгато - коньдонзы ӧвӧл. Но соос ужало, озьыен, продукция потто. Администрация предприятиослэсь кивалтӥсьёссэс косӥз ивортыны, кыӵе но кӧня вузъёс соос потто но кӧнязэ уждун интые сётыны быгатозы, бюджетэ тырон чотын. Налогъёсъя инспекция вань предприятиослэсь коньдонэн кызьы кузёяськемзэс эскериз, выт тырымтэзылэсь мугъёссэ утчаз. Берло дыре Кизнерысь администрация налогъёсъя пунэме кылем предприятиослэсь кылзэс юн юаны кутскиз, нош кивалтӥсьёсты штраф басьтонэн кышкатэ ини. Н. ДАНИЛОВА. Шӧкыч Пирамида ӝутэмын картошлэсь Вӧйын нянь музэ усе, пе, вӧй палыныз. Со, пе, озьы лобӟе физикалэн законэзъя. Нош вӧйлы дунъёсты кыӵе законъя будэтӥзы меда? Базарын, пе, кык мурт шузи - вузкарись но басьяськись. Ойдолэ ай ӝамдэлы Ижевскысь шор базаре кожалом. Шузиесь-а отын шӧртчи вузкарисьёс? Пӧртэм пумо вӧйёсты адӟод. Уноез кунгож сьӧрысь вуттэмын. Нош скал вӧй-а со, кӧй-а, яке маргарин-а - уд вала. Сыӵе маин ке вузкарисьёс интыязы кема уг сыло - отысь татчы, татысь отчы тэтчало. Египетын пирамидаос инъяло изъёслэсь. Асьме дорын - картошкалэсь. Усто амал шедьтӥллям. Сое "пирамида" шуыса нимало. Лэсьтӥське тазьы. Ведра пыдсы интыяло бадӟым картофка, котыраз - куинь шоро-куспозэ. Собере поно эшшо одӥг картофка, вӧзаз нош ик куиньзэ-ньыльзэ. Сыӵе "пирамидаен" ведрае уно картофка уг шедьы. Озьы куд- ог "кибашлыос", быдэс ведра интые, ӝыны ведра гинэ вузало. Кызьы палэнсконо пӧямзылэсь? Картошен ведраез вылласянь зӥбе но - "пирамида" куашкалоз. Б. ТЕЛИЦЫН. Син медаз усьы Калыклы сиён-юон поттӥсь предприятиосын котьку шӧдскымон инты басьтэ лаборатория: адямиослэн ӝӧк вылазы ческыт но ӟеч сиён мед вуоз. Соин ик ми, лаборантъёс, басьтэм йӧллэсь но поттэм продукцилэсь ӟечлыксэс, технологиез нуналмысь чакласьком, ваньзэ син азямы возиськом. Озьы нокыӵе шудтэм учыръёс ӧй на вал. Син медаз усьы. Лабораториямы 6 мурт ужа. Вань микробиологмы, ньыль лаборантмы. Ачим татын 31 ар тыршисько ни. Нырысь-валысь мастер вал, табере дас кыкетӥ арзэ лабораториен кивалтӥсько. Тодон-валан басьтӥ Дмитроградысь механико-технологической техникумын: огдыре ужай но, дышетски но. Капчи ӧй ке но вал, шуг-секытъёсты вормылӥ. Раиса Бронникова, лабораторилэн кивалтӥсез. Ужало, коньдон потто ООН сизьым ар талэсь азьло быдэс дуннеысь ӧлексыослэсь нуналзэс пусъён сярысь кичӧлтонэн потӥз. Сое котькытын умоен лыдъязы. Уго сӧсыр адямиос сярысь котькытын ик огкадь уг сюлмасько. Ӵемысь соос шоры ултӥясагес но учкыло. Кылем удмурт арня нуналэ Ижевскысь "Аврора" кинотеатрын ортчиз ӧлексыослэн нуналзылы сӥзем ужрад. Фойеын радъямын вал "Инвалид" предприятиын поттэм вузъёсты возьматон. Солэн кивалтӥсез Валерий Исупов пусйиз, татын ужасьёс коньдон поттыны быгато на шуыса. Электромеханикая заводысь сӧсыр ужасьёслэсь улонзэс умоятыны сюлмаськемзы сярысь вераз ЭМЗ-лэн азьвыл генеральной директорез Александр Воскресенкий. Пусйыны кулэ, та предприятие кылем арын пусйиз 40 ар тырмонзэ. Собере соиз но адӟем карымон: заводын дыраз сётъяло уждун. В. ВОЛОДИН. Удмурт Элькун улосвылын дунъян (оценочной) удысэз радъян сярысь Удмурт Элькун Кивалтэтлэн Постановлениез Дунъян юрттэтъёсъя рынокын экономикая политикаез быдэсъян, та удысын потребительёслэсь правооссэс утён но 1998 арын 29 июле кутэм "Россия Федерациын дунъян удыс сярысь" 135 - ФЗ Федеральной законэз быдэстон вылысь, Удмурт Элькун Кивалтэт пуктэ: 1. Кылдытоно Удмурт Элькун Кивалтэтын Дунъян удысэз радъянъя комиссия. 2. Юнматоно Удмурт Элькун Кивалтэтысь Дунъян удысэз радъянъя комиссие быръем муртъёсты. 3. Юнматоно Удмурт Элькун Кивалтэтысь Дунъян удысэз радъянъя комиссия сярысь положениез. 4. Удмурт Элькун Кивалтэтысь Дунъян удысэз радъянъя комиссия кулэ: кылдытыны Экспертъя кенеш, кытчы пыро дунъянэз ас кожазы радъясь организациосысь адямиос; радъяны Удмурт Элькунлэн кун асваньбурез луись объектъёсты дунъясь быръёнъя конкурсъёс дасянэз; толэзь ӵоже дасяны но Удмурт Элькун Кивалтэтэн юнматон вылысь сётыны дунъет пуктон уже пыриськись ӧнерчиосты ас мылкыдзыя та удысэ кыскон радлыкез. 5. Удмурт Элькун Кивалтэтысь Дунъян удысэз радъянъя комиссилэсь ужзэ быдэсъямзэ эскерыса возёз Удмурт Элькунысь Экономикая министерство (Е. М. Аверьянов). Удмурт Элькун Кивалтэтлэн Тӧроез П. Н. Вершинин. 1998 ар 16 ноябрь, Ижевск город. � 1040. Чиданэд медаз чигы Кыӵе улонмы - сыӵе ик кырӟанмы-веранмы, шуысал мон. Токма вераллямтэ, дыр, чорыг сисьме йырысеныз шуыса. Вераме потэ Ижысь механической завод сярысь. Мон сямен, татын ай кема йырыд поромыса улод-ужалод. Уждун сярысь ке верано - ужпум ӧжытак умояз кадь, али июль толэзьлы сётъяса быдто ни. Вань вераськонъёс, кинлэн, пе, ичи уждунэз - ватсаськоз со вить сю манетозь, быдэс толэзь ӵоже ужамын ке тон. Талы шумпотонэз ичи, малы ке шуоно, туж троссэ кужмысь, кӧня ке коньдон сётыса, шутэтскыны келяло. Тани мон октябрь толэзе укмыс нунал гинэ уже ветлӥ, уг тодӥськы, кызьы улыны-вылыны ик. Отын ик, пыӵал тӥрлыкез поттӥсь цехъёс ужало нокыӵе шуг- секыттэк, коньдон басьто. Тани мае но вераме потэ: кинлэн кузёез зэмос юн, сыӵе цехъёс калыксэс утьыны тыршо. Яке быдэс цех арняяз куинь нунал ужа, яке вакчиёмыто ужан дырзэс... Та ласянь заводлэн нокыӵе условиосыз, положениосыз ӧвӧл. Кин кинэ ворме, озьыгес луыса кошке, нокин уг чакла-эскеры югдурез. Ялан буйгато радио пыр но, газетын но - коньдон ватсаськоз, квартира дунэз пособиен тырыны луоз. Но ваньмыз со - либатон гинэ... Квартира дунэз пособиен тырон - туж кузь сюрес али, шуизы милемлы Первомай администрациын. Собере вераме потэ квартира дунлы компенсация сярысь но. Кӧня бызьылӥм, документъёс люкам, толэзь ортчыса мынӥськом но - сю манетлы, пе, доходды нормалэсь уно, уго отчы сётымтэ пособие но пыре. Нош кытчы учкиз меда компенсациен вырись, документмес кутыку? Озьы ялан пӧзьымтэ кӧжыен сюдо. Ку меда асьмелэн улонмы калык радъя луоз? Собере соиз но монэ паймытэ - сомында ужасьёс пуко администрациосын, нош одӥгез но, номырин но уг быгаты юрттыны, буйгатыны, комнатаысь комнатае - огез дорысь мукетыз доры ысто. Ӟеч улонэз возьмаса жадиськиз ини. З. ПОЛОСОВА. Умой адямиос Чигиськымтэ малпан Врач луон сярысь Нина пичи дырысеныз ик малпалляз. Нырысетӥ классын дышетскыкуз ай дышетӥсез юаз, кин луыны, пе, малпаськод? Пичи Нинӥ соку вакчияк вераз: "Врач". Ува ёросысь Пужмезь-Тукля гуртын вордӥськем нылаш тямыс классэ йылпумъяса дышетскыны пыриз Ижевскысь медициная училищее. 1972-тӥ арын медсестра луыса ужаны кутскиз нырысетӥ республиканской больницаысь сутӥськемъёсты йӧнатонъя отделениын. Но пичи дыр малпанэзлэсь ӧз куштӥськы. Медсестраын куинь ар ужамез бере, медициная институтэ дышетскыны пыре. Атаез туж пумит вал нылызлэн таӵе вамышезлы. "Ужамед потымтэен дышетскыны пырид", - шораз куаретылӥз со. Но ӧз чигна егит нылкышно ас малпанэзлэсь. 1981-тӥ арын, институтэз пырпотыса, Нина Веньяминовна Загребина нош ик вуэ азьвыл ужам интыяз, таяз учыре ини врач луыса. Егит специалист мылысь-кыдысь басьтӥське сутскыны шедем нылпиосты эмъяны. Нош висись пиналэз йӧнатон кулэ каре нимысьтыз чиданэз но сюлэм шунытэз. Нылпилэн улонэз ӵем дыръя врач киын луэ. - Уд жаляське-а та удысэз быръемысьтыды? - юасько. - Ноку но уг жаля, ас ужме туж яратӥсько. Улонам со одӥгез бадӟым шумпотонэ. Туала вакытэ ваньмыз озьы вераны уз быгатэ. Нош висись ӟечен но ӝог йӧна ке, эмъясь понна со кык полэс шумпотонэн берыктӥське на. Кызь вить ар ӵоже та больницаын ужатозяз, кӧня муртлы юрттӥз ини Н. В. Загребина, кӧня адями солы тау карон кылзэ вераз. Со-а бен шуд ӧвӧл? Нина Веньяминовналы куддыр уин но, шутэтскон нуналъёсаз но операциос лэсьтоно луэ. Но со уг ӝожтӥськы жадён вылэ. - Мынам вӧзам усто специалистъёс ужало: отделенимылэн кивалтӥсез Михаил Семенович Гордон, валтӥсь сестра Тамара Алексеевна Вылегжанина но мукетъёс. Со сяна, шутэтскон нунал усе ке, театре, бассейнэ ветлӥсько. Семьяеным сад-бакчаын шутэтскиськом. Туж потэ машина руль сьӧрын аслам ворттылэме. Дышетсконо луоз. Жадемме семьяям веськатӥсько. Бадӟымез нылы аслэсьтым сюресме бырйиз - медакадемиын дышетске, кыкетӥез но со сярысь ик малпаське кадь. Укно сьӧрын зоро сӥзьыл. Нина Веньяминовна сыӵе куазез тужгес яратэ. Надежда Прокопьева, Удмурт кун университетысь студентка. Чыры-пырыез ӧвӧл Дас одӥг ар талэсь азьло Сарапулысь ик сиён-юонъя техникумез йылпумъяме бере, татчы ужаны ыстӥзы. Нырысь лаборантэ пуктӥзы, собере микробиолог луи. Выль ужелы ӝог дыши. Огазеяськонын вань поттэм продукцилэсь ӟечлыксэ эскерисько, одӥгаз но сиёнэ кулэтэм микробъёс медаз шеде. Озьы ик чакласько вуэз, омырез, йӧл чырсатонэз (закваскаез), оборудованиез, складэз но мукетсэ. Оглом, ужам номыр чыры-пырыез ӧвӧл, туж кулэ со. Сотэк висёнъёс но вӧлмыны быгатозы. Бен, уже син азьын уг адӟиськы, сое номырин уд мерта, уд но лыдъя, но кыл кутон туж бадӟым. Тае котькудӥз ӟеч вала. Лаборантын ужаме туж юрттэ. Шумпотӥсько, продукцимы вылэ ӝожтӥськисьёс ӧвӧл. Огазеяськонмылэн аслаз магазинъёсыз вань, Ижын но ужа. Басьяськисьёс ӟеч сиён-юонмы понна котьку тау каро, малпанъёссэс нимаз тетраде но гожъяло, нош куд-огез нимысьтыз бар яке кафе усьтыны ӵектон сётэ. Тӥни озьы огъя кужымен, дэмен калыклы капчи мылкыд кылдытӥськом. Наталья ШИХОВА, микробиолог. * ЗАО-лэн кӧня ке продукциез. Туспуктэмъёсыз Владимир КАМАШЕВЛЭН. Шонаськон бордысен - огсыр азинсконэ Тодэ лыктэ 90-тӥ аръёслэн кутсконзы. Москваен кивалто Гавриил Попов но Сергей Станкевич, Ленинградэн - Анатолий Собчак, Россиен - Борис Ельцин. Ваньмыз - демократъёс. Нош урод улэммы понна дышем сямзыя весь пыкыло коммунистъёсты. Ижысь тодмо фотосуредасен Евгений Аксёновен ӵош вамышъяськом Москваысь Выль Арбат ульчаетӥ (сокугес гинэ озьы нимазы Калинин проспектэз). Михаил Калининлы памятник (синпелет шуо кадь али) ишкалтэмын. Ворсам укноё палаткаос вискытӥ комакъёс бызьыло. - Комакъёс шат таос? - нокыӵе уг кариськы Евгений. - Метроын, пе, соос метр кузьда будӥллям ни. Кыӵе ке мутантъёс-а, мар-а. Афганистан пыр потэм пиос, пе, сыӵе комакъёсты уйёсы автоматэн ыбылыса ветло. Вуимы Кремль доры. Горд карлудэ (Красной площаде). Отӥ бызьылэ куштэм пуны. Адямиос шоры бадӟымесь синъёссэ мертчытэ но калленак пискетэ. Юнме. Ленин агай уг кылы, пуны кузё олокытын. Евгений Аксёновлы гинэ шумпотон: Шарикез фотосуредэ пуктыны вуиз. Вамышъяськом "Россия" гостиница пала. Азьвыл Китай-городын табере выль город - целлофан палаткаослэсь. Сӧсыръёс, кураськисьёс, калык депутатъёсты витисьёс... Кыӵе начармиз Москва! Курск, Казань, Ярославль, Калуга азьло татчы ветлӥзы колбаса дуре. Табере кыӵе ке конторае пыриськод ке, кыдёкысь луэмдэ тодыса лулско: - Тӥляд улон-вылонды чидамонгес, шуиськоды? Оло, милемлы но Москваысь кошконо ни, лэся. Цирклэн кивалтӥсез Юрий Никулин газетчиослы маде: - Тигръёсмес сюдыны номырин. Сергей Станкевичлы озьы ик верай. Сӥль ӧд висъялэ ке, сьӧсьёсмес Моссовет дӥне ваём но четлыкъёсмес усьтом. Оскыны ик шуг вал, таӵе город куке-соку воштӥськоз шуыса. Но... Гавриил Попов Тайване лобиз но быдӟым Китайлэсь вожзэ поттӥз. Отысен кутскизы солэн куректонъёсыз. Сергей Станкевич, кузьым (взятка) басьтыса но кырмемзылэсь курдаса, Польшае пегӟиз. Матысь юлтошен Анатолий Собчак ватскиз Францие. Москваын кузё (мэр) луиз Юрий Лужков. Солы нырысь-валысь тросэз ӧз иксинмаське. Лапег мугоро, огшоры картузэн. Огзэ малпанзэ пумозяз уг вера, мукетыз вылэ тэтче. Маин ке но кельше колхозлэн председателезлы. Юрий Михайлович ӵем но ӵем йӧтылӥз калыклэн син шораз. Анатолий Чубайсэн тушмонъяськиз: огъя ваньбурез, пе, шуак-дуак люкылыны уг яра. Крымысь дано Севастополь, пе, медло Россилэн городэз. Сюлмаськоно асьме заводъёсты улӟытон сярысь. Огез но мыдыз вераськыны кутскизы: Лужковез дэмлано президентэ. Со весь пыкиськылӥз: мыным Москва но тырме, татын уж тачак. "Тачак ужъёс" пӧлысь Юрий Михайлович бырйиз нырысетӥоссэ. Москвалэн шорысьтыз юртъёсты сётӥз узыр фирмаослы. Таосыз сэрытак воштӥзы аналтэм интыосты. Вуж арбатэтӥ машинаос уг ворттыло ни. Вузчиос уллямын. Пушкин вакытэ кадь фонаръёс пишто. Фирмаослэн тырем налогъёссы чотын пуктэмын выль юртъёс. Отчы выжизы Коммуналка шуонын уно дасо ар курадӟемъёс. Мэр улӟытӥз кыксэ ик автомобиль поттон заводэз. Москваез котыртӥз паськыт сюресэн. Кусыпъёс тупатӥз данак улосъёсын: Удмуртиез но вераса. Адямиос шӧдӥзы: городлэн зэмен ик кузёез вань. Куд-огез шуоз: Москваын берга быдэс Россилэн коньдонэз. Зэм. Но мукет интыосын сокем уг быгато на манетэз кулэ удысэ ӧръяны. Коньдон лэсьтэ коньдон яке коньдон вия чиньы вискытӥ. Москва та ласянь ваньмылы дышетӥсь мактал луиз. Бен, палэнысь вуэм муртлы та городлэн куд-ог интыосыз уз кельше. ГУМ магазинэз азьвыл калык магазин нималлязы. Табере ваньмыз сямен вузъёс долларен вузасько. Манеж вӧзын карлудэ, музъем улэ, олокӧня этажъем магазинъёс пуктӥзы. Дунъёс сыӵеесь - огшоры адямиос отчы йыромыса гинэ кожало. Тужгес лек йыртэмасьёс но Москваын уло. Лушкаськон, капыръян, алдаськон, адями виылон ласянь кин ӵошатскоз соин? Абдралод но бырод: укылтэмъёсты утчасьёс пӧлысь тужгес амалоосыз Москваын уло. Вамышлы быдэ сямен милицаос сыло. Нош уин ульчае потыны кепыралод. *** Малы туннэ трос вераськиськом Юрий Лужков сярысь? Алигес со ялӥз: Россиын вордске политикая выль организация "Отечество". Сое кылдытӥсьёс пӧлын - Удмурт Республикаысь Кун Кенешлэн Тӧроез Александр Волков. Та нуналъёсы Ижын люкаськылӥз "Отечестволэсь" Удмурт люкетсэ люканъя кенеш. Сыӵе кичӧлтонэз умоен лыдъязы тодмо конструктор Михаил Калашников, Нылкышноослэн огазеяськонзылэн тӧроез Зоя Степнова, Эрико профсоюзъёслэн федерацизылэн тӧроез Евгений Орлов, республикаысь Ветеранъёслэн советсылэн тӧроез Михаил Зыков, "Аксион" акциосын огазеяськонлэн кивалтӥсез Геннадий Кудрявцев но мукетъёсыз. "Отечество" организацилэн Удмурт люкетэзлэн советэзлы тӧрое быръемын Александр Волков, солы воштӥсе - Евгений Оров но "Ижмаш" акциосын огазеяськонлэн кивалтӥсез Владимир Гродецкий. Озьы ик быръемын эскеронъя комиссия но организациез кылдытонъя ӧтчаме делегатъёс. Таиз Москваын люкаськоз 18-тӥ декабре. *** "Отечество" организациез кылдытонэн валче Россиысь гражданинъёслы вазиськон Кунлэн азьланьын улонэз понна кыл кутонмес юн валаса, таӵе лэчыт югдурын берлолы кельтонтэм чутрак ужрадъёсты кулэен лыдъяса, ми оргкомитетысь адямиос, вазиськиськом тӥледлы, гажано бӧлякъёс. Берло дас ар ӵоже Россиын бадӟымесь воштӥськонъёс вал. Политикаын кылдӥз эрик, экономикаын - рыноклэн инъетъёсыз, обществоын - демократилэн инъетъёсыз. Озьы ке но, выльдӥскьон ӧз вайы кулэ емыш, ма понна ортчытыны кулэ вал выльдӥськонэз - адямиослэсь улон-вылонзэс умоятон понна. Со гинэ ӧвӧл, Россиын выльдӥськонэз радъясьёслэн быгатытэк ужамзы, Западысь сокем ик визьмо вылымтэ кенеш сётӥсьёслэсь кылзӥськон, кунын ноку адӟылымтэ лушкаськон но кузьмаськон - ваньмыз со но уно мукетыз вуттӥзы туж шимес учыръёсы. Югдур вуиз таӵе калэ: лэчытак султӥз таӵе юан - Россия нимаз кун кылёз-а, асьмеос Атай музъеммес утём-а. Асьмеос меӵак вераны кулэ: туала секыт югдур - нимаз янгышъёслэн но куд-ог шӧдытэк кылёнъёслэн бервылзы гинэ ӧвӧл, секыт югдур - умойтэм, янгышаса, куддыръя йыртэмаса берло аръёсы лэсьтэм вамышъёслэн бервылзы. Умой воштӥськонъёсты палэнтытэк, рынокысь зэмос вылӥ азинсконъёсты лыдэ басьтыса, ми дэмласьком выльдӥськон амалъёсты но сослэсь бервылъёссэс дунъян амалъёсты чутрак воштыны. Кивалтӥсьёс меӵак кыл кутыны кулэ калыклэн улон-вылонэзлэн ӟечлыкез но кузьдалаез понна, кунэз кышкытлыклэсь утён понна, адямилэсь эрикъёссэ но правооссэ утён понна. Секыт югдурлэсь зэмос мугъёссэ но быдӟалазэ тодыса, ми валаськом: соосты палэнтон вылысь, уно шонер но кужмо уожрадъёс ортчытоно экономикаын но коньдон удысын, кунэз радъянын но кунсьӧр плитикаын, лулчеберлык (духовной) удысын, наукаын но дышетонын. Кунэз начармемлэсь но куашканлэсь утён ужрадъёсты орчытыны луоз туала Россиын вань патриотъёсты огазеяса гинэ, обществоын выль кужымез вордыса гинэ, та кужым мед ӝутоз сое, мар уг тырмы туэ - ужаны быгатонэз, чылкыт сямез, политикаын кужымез. Политикаысь шонаськон Россиез туннэ сэрпалтӥз радикалъёс но либералъёс пала. Тае валало ваньмыз, пӧлазы соос но, кинъёс таӵе югдуре политикаын сяна но узырлык люканы вуизы. Соин ик кулэ кадь вужзэ берыктыны, ваньзэ ализэ палэнтыны, алыны, косъяськыны. Со - кышкыт маке. Ми валаськом туала политикаын воштӥськонъёслэсь кулэлыксэс, но берытскеммы уг поты вуж манерен кивалтонэ. Ми ӧвӧл редикалъёс, буръёс но поаллянъёс. Ми политикалэн шораз. Ми огазеяны тыршиськом выльзэ кылдытыны малпасьёсты, ас калыксылы зэмос пайда вайыны сюлмаськисьёсты. Россия - выль даурлэн кутсконаз. Со ортчиз "огкадь луон общество" кылдытонъя опыт пыр, "ярдуртэм рынокен" общество кылдытон пыр, туж уно изъян адӟыса, право басьтӥз котыр ласянь чаклам но огсыр улӥсь общество кылдытыны. Та обществоын мед герӟаськозы пайдаё рынокен экономика но улон-вылонын зэмлык, та обществоын мед огазеяськозы дуннеысь азинсконъёс но Россиысь сямъёс, та обществоын адямилэсь сямъёссэ но эрикъёссэ, трос адямиослэсь кулэяськонъёссэс сямен ик, кун мед утёз но солы оскон мед кылдытоз. Ми кылдытыны малпаськом таӵе кун: отысь вань калыкъёслэн но выжыослэн аспӧртэмлыкенызы, культураенызы, вӧсенызы герӟаськем сямъёс мед огазеяськозы ӟуч калыкен ӵош улон-вылонэн, быдӟым Россилэсь быдэслыксэ но кунлыксэ утёнэн. Ми турттӥськом тупаса улыны быдэс дуннеен, асьме кунмылэсь быдӟым данзэ но кужымзэ утьыса но юнматыса. Ми турттӥськом: Россиысь вань гражданинъёс, кунгож сьӧры шедем вань бӧлякъёс мед шӧдозы Россилэсь дурбасьтэмзэ. Вожвылъяськоно но ожмаськоно ӧвӧл, огазеяськоно но выльзэ кылдытоно! Ми турттӥськом: кунэн кивалтӥсьёс мед ужалозы калыклы, со понна кылдытоно кивалтӥсьёслэсь Россиысь вань калык азьын кылзэс юанъя амал. Милям малпанъёсамы - Россиез вуоно поколениос улыку но котьку огсыр но кужмо азинтон. Россилэн историын ваньзэ куашкатыса шонаськонэз бордысен - обществоез огсыр азинтон борды. Таӵе кичӧлтонэн вазиськыса, ми "Отечество" организацос огазеяськыны ӧтиськом Россиысь гражданинъёсты, обществоысь но политикаысь организациосты, соосты, кинъёс шонерен лыдъяло вылӥ верам инъетъёсты. Москвалэн кузёез Юрий Лужков. "Отечество" организацилэсь Удмурт люкетсэ кылдытонын Александр Волков, Евгений Орлов но Михаил Калашников. Ӝомалэз сайкато тракторъёс Та вакытэ гурт вадьсы ӝомал вазь лэзьке, шунды но бер ӝужа. Соин ик гуртоос уж дуразы пеймытэн мыно, пеймытэн ик берто. Хозяйстволэн кивалтӥсьёсыз интыысь радио пыр ӵукналы быдэ яло, кинлы кытчы ужаны потыны кулэ. Нош пудо вордӥсьёс но механизаторъёс ужан интызэс сотэк но тодо. Котькытын сямен ик Можга ёросысь "Красный путь" эштосын но ужан нуналзы огсямен кутске. Та нуналъёсы уноез механизаторъёс пудо гидъёс доры куро вортто, мукетъёсыз техниказэс пумен тулыслы дасяло. Самой бадӟым К-700 машинаеныз кабанэз ферма пала сюл! гинэ кыске тракторист-комбайнер Василий Николаевич Прокопьев. Со 22 ар ӵоже ини ас удысаз тырше. Гужемзэ комбайнэн ужа. Туэ азьмынӥсь механизатор 517 гектар вылысь юосты погыртӥз. Атаезлы гужемъёсы юрттэ пиез Женя. Озьы ик сюлмо тыршо механизаторъёс Александр Анисимов, Владимир Николаев, Александр Пушков, Юрий Николаев, Валентин Кириллов но трос мукетъёсыз. Зэм, туэ татын куазьлэн изъян ваемез шӧдӥськиз. Ӧжытгес люкаськиз ю тысь но, пудо сиён но. Инкуазь "сутӥз" вань етӥн бусызэс. Озьы ке но, колхозысь экономистлэн Людмила Беляевалэн верамезъя, пудо вордон удысын азинсконъёс сокем уродэсь ӧвӧл. Али, кылсярысь, Антонида Алексеевалэн сюдоно кунянъёсыз суткаяз 730 граммлы йыло. Хозяйстволы шӧдскымон шуккет сёто татын поттэм но промышленной вузъёслы дунъёслэн аспӧртэмлыксы. Поттэм барыш пӧлысь уноез коньдон кошке воштос ёзъёс но эстӥськон басьтонлы. Ю тысез государстволы вузан берло аръёсы изъянэн гинэ берытске. Соин ик эштосын тыршисьёслы туэ уждун интые ю тысь сётэмын ӝыны дунын. Но гуртын улӥсьёс оско, Россия Федерациысь выль Правительство музъем ужасьлы кулэезъя дунъет сётоз шуыса. Гуртын ӧжытгес мед луозы вылэм ӝомал уйёс. Снимокъёс вылын: механизатор Василий ПРОКОПЬЕВ; фермаосы пудо сиён вуэ ӝегатэк. Гожтэмез но туспуктэмез В. КАМАШЕВЛЭН. Зарни эшъёсы-сюсьтылъёсы Пастухов ульча, 13 номеро юрт. Татчы азьвыл интыяськемын вал республикаямы потӥсь вань газетъёс. Соос пӧлын ик - "Советской Удмуртия" но. Кабинетъёсын - ужан ӝӧкъёс. Ӝӧкъёс сьӧрын пероосынызы ӟукыртыса гожъяськись адямиос. Соослэн ог-огенызы вераськыны дырзы ӧвӧл. Кыӵе ке районъёсы вуылыса яке заводъёсы потаса бичам фактъёсты пӧсь дыръязы одно мк ӵуказе потӥсь газетэ вуттыны кулэ. Сыӵе ини котькуд журналистлэн сямыз... Нош редакцилэсь палэнын ог-огенызы макем эшласькыса улыны быгато соос. Аръёс ортчыса, эшласьконзы эшшо но юнгес луэ. Кӧня тодэ ваёнъёс лыкто йыре!.. Тани ачиз сюлэм куриз куд-огез сярысь "Удмурт дуннеез" лыдӟисьёслы ивортыны. Люконтэм кусыпъёс Ураллэн шорсюлмыз - Свердловск. 1905-тӥ ар нимо Центральной площадь... 1948-тӥ ар, 7 -тӥ ноябрь. Демонстрантъёслэн колоннаысьтызы пӧртэм гуръёсын ӵош жингырто удмурт кырӟанъёс. Пыдъёс улын выль лымы ӟукыртэ, кылӥсько "Лымы тӧдьы", "Кызьы меда лыктӥды, ӟечесь-а тӥ вуиды?", "Улӥ-улӥ-улӥ, вылӥ-вылӥ-вылӥ" кырӟанъёс. Соосты, куараоссэс жалятэк, зол-зол кырӟало пӧртэм сюлэмо ньыль воргоронъёс. Куинез - межобластной партийной школае туэ дышетскыны лыктэмъёс - Григорий Симаков, Михаил Андриянов, Василий Увин - но Урал кун университетысь журналистикая факультетысь куинетӥ курсысь студент Леонид Данилов. "Пичи автономиен" артэ вамышъясьёслы но туж ярам "Лымы тӧдьы" кырӟанмы. Отысь кылъёсты пелязы поныса, соос милемын ӵош гурлало. Давай, шуэ Григорий Симаков, трибуна азе вуыса, эшшо но кужмогес кырӟалом. Мед кылоз ачиз маршал Георгий Константинович Жуков! (Жуков со аръёсы Урал военной округлэн главнокомандующиез вал). Кылӥз оло ӧз трибуна вылын сылӥсь, "Зарни кизилиосыныз" чилясь маршал - кин тодэ, нош ми малпанмес быдэстӥм! Лекциос вискын ялкарон дыръя мыным ивортӥзы: тонэ университетлэн ректорез Чуфаров ас кабинетаз возьма. Ӝоггес, пе, мын. Мынӥ. Пыри. Отын ик монэ землякъёсы пумитазы. Со дырысен дышетскон аръёс бырытозь ӧм люкиськылэ ини. Григорий Симаков ас сьӧраз Свердловске ваем вылэм алигес гожтэм "Шакрес Тегеран" пьесазэ. Отын возьматэмын Быдӟым Отечественной война аръёсы Иранын службазэ нуыкуз пумиськылэм учыръёс. Монэ дораз, общежитие, ӧтиз но шуиз: туж курисько тонэ та ужме ӟуч кылэ берыктыны. Ми сое Россиысь кыӵе ке театре пуктон вылысь ыстом. Тыныд берыктон ужын, нош мыным драматургъёс радэ пырыны юрттоз. Ураллэн шоркараз (столицаяз) дышетсконмы бырем бере но ми, егит журналистъёс Григорий Симаков, Михаил Андриянов, Василий Увин но Леонид Данилов, эшлыко кусыпмес ӧм ыштэлэ. Шутэтскон дыръёсмес но ӵош ортчытъям. Таиз бере нырысь ик интыяно "Беромид - ыштӥд" собере - "Тӧдьы но, сьӧд но" люкетъёсты, собере - "Бускельёс", "Шунды но ӝужа но, шунды но пуксе но..." люкетэз. Бускельёс Уг тодӥськы ини, газет вӧлдон муген ку вуылоно луиз мыным Старые Зятцы гуртэ. Ужын ӝегатскемен сэрен, отын уйзэ ортчытоно луиз. Дораз кӧлыны ӧтиз ёросысь газетлэн редакторез Алексей Артемьевич Стрижов. Кӧлӥм, шуоды-а? Выдылыны ик ӧйлась. Укноос сьӧрын югыт луытозь, пуконъёс вылын ваче вераськыса пуким. Алексей Артемьевичез дырын-дырын шуге-леке вуттыло советъёсы быръёнъёс. Быръён кыл отчы нокызьы но уг тупа. Трос макеос пӧлысь кӧнязэ ке гинэ быръёнэз син азям пуктыны быгатӥськом, пе. Тани, шуом, быдэс мешокысь кыксэ яке куиньзэ гинэ умойёссэ кубиста йыръёсты сылалтон вылысь быръёно. Валамон. Быгатом мон но, тон но. Нош кызьы асьмеос депутатэ одӥг кандидат пӧлысь одӥгзэ бырйыны быгатӥськом? Быгатӥськом вылэм ук! Азьло паймисько вал. Али дышемын ини. Сыӵе манерен штаниез но йыр вылтӥ дӥсяны дышод! Пуктэлэ ай син азяды мукетсэ но таӵе учырез. Кенеше калык зал тыр люкаськем бере, сцена вылэ, горд басмаен шобыртэм ӝӧк сьӧры пуксё повесткаын возьматэм ужпумен кивалтӥсьёс. Отын но татын ваньзы вырӟылытэк пуко. Но тани сцена вылын пукисьёс пӧлысь одӥгез, венен бышкалтэм кадь, ӝотак султэ но зал тыр кеське: "Гажано эшъёс, милемлы татчы ӵектон вуиз: Почётной Президиуме быръёно таӵе эшъёсты". Вера ай, пе, кинлы кулэ таӵе маскаръяськон? Малы тыныд но, мыным но, трос мукетъёсызлы но уг оско кӧня ке кандидат пӧлысь одӥгзэ бырйыны? Малы залын пукисьёсты уг куро кенешлэн президиумаз асьсэлэсь гажано эшъёссэс ӵектыны? Кӧня ке ар ортчыса, Ижын ми Алексей Артемьевичен бускельёс луимы. Пушкин ульчаысь 182 номеро коркан квартираосмы артысь подъездъёсын вал. Гужемъёсы ужан нунал бере азбарын пумиськылӥм но уйшорозь пукылӥм, улонысьтымы шуг-секытъёсты но шумпотымон азинсконъёсты рос-прос эскерыса, ог-огмылы юрттылӥм туннэлы кулэ луись темаосты шедьтылыны. 1965-тӥ арын Пушкин ульчаысь 182 номеро юртмес ӟеч-ӟеч тупатъяны малпазы вал. Семьяосмес огдырлы улыны интыязы Воровский ульчаысь улыно-вылыно пу корка. Отын квартираосмы ӵапак артэ луизы. Туала улонлэн аспӧртэмлыкез сярысь вераськонъёсмы кӧня ке часъёс ӵоже кыстӥськылӥзы ини огъя коридор пумысь ӝӧк сьӧрын. Солы ужаны капчигес вал "Советской Удмуртиын", мыным - ТАСС-ын. "Шунды но ӝужа но, Шунды но пуксе но..." Металлургъёслэн городоказы выль квартирае выжемез бере ик Степан Григорьевич Машков витьтон арессэ пусъе. Палэнысь ӧтем куноос пӧлын кык гинэ "куз": Афанасий Ильич Тубылов но мон - кузпалъёсынымы, отӥосыз - ӵыжы-выжыос. Ӝутскем мылкыдо, егитомем "именинник" шоры пальпотыса, Афанасий Ильич тодаз вае Пычас гуртын пичи дыръязы ӵош будэмзэс. Пиналысен ик анай-атайтэк кылем Степан. Песянаез но бускельёсыз сое огназэ кельтӥллямтэ: сюдӥллям-вордӥллям но, дӥсяллям-кутчаллям но. Пияш школаын туж мыло-кыдо дышетскем. Лыдӟоно книгаоссэ миндэрез улын ик возьылэм. Трос лыдӟиськеменыз гожъяськыны но кутскем. Солэсь нимзэ адӟыны луэ вылэм ёросысь но республикаысь газетъёсын. Журналистика удысын адӟем карымонэсь азинсконъёсыз вакытэ Степан Машков ваньзэс паймытӥз: партилэн Удмурт обкомезлэн ӧтемезъя, бере кылись колхозэн кивалтыны кутскиз. Валамон ини, быгатонлыкез ӧвӧлэн, аналтэм хозяйствоез интыысьтыз вырӟытыны ӧз пӧрмыты. Со понна, журналистика удысэ берытскыса но экономикаын тодон-валанзэ будэтыса, колхозъёслэн кӧняезлы председательёссылы дуноесь визь-кенешъёс сётыны быгатӥз. Юнме уг верало вылэм: няньлэсь шӧмзэ валан вылысь, сое аслыд будэтыса оскалтоно. Котькинлы тодмо: улытозяд корка пуктӥд ке, музъем вылын юнме ӧй улы шуэмед луоз. Степан Григорьевичлэн соиз но, таиз но, мукетыз но вань. "Вараксино" садысь- бакчаысь участокез куд-огезлы адӟем карымон луэ. Трос шутэтскон дырзэ со отын ужаса но чорыгаса ортчытӥз. Берлозэ пумиськыкуз, Степан Григорьевич чорыганъяз вужмем пыжзэ тупатъя вал. Сюлэмыз вӧсь луыса вераз: умой, пе, тодӥсько - мыным татчы пуксьыны уз кылды ни. Толэзьлэсь трос дыр уз ортчы - монэ сюе согозы... Коля пие но Миша внуке... Та адӟеме-кылэме гажано эшеным берлоез пумиськонам вал. ... Берло аръёсы тодам ӵемысь лыктылэ Машковлы 50 арес тырмон нуналэ трос пол быдэсъям удмурт калык кырӟан: "Шунды но ӝужа но, шунды но пуске но, нош ик со интые толэзь но ӝужа". Толэзь музэн тодэ ваён но ӝужа... Беромид-ыштӥд Нюлэсъёсамы будӥсь трос пӧртэм узырлыкъёсты нимъёссыя но шӧмъёссыя Тимофей Иванович Шмаковлэсь ӟеч нокин ӧз тодылы. Корзинаен-а, ведраен-а мыноз - созэ яке тазэ тыраз ик ваёз, губиос оло асьсэос поталлязы со пумитэ. Нош ватскыса будӥсь нингубиез музъем улысь ик поттылоз вал. Одӥгаз шутэтскон нуналэ (со дыре арня нуналэ гинэ вал) Тимофей Иванович монэ но кыксэ эшъёсме Позимь шур сьӧрысь нюлэскы ас сьӧраз басьтӥз. Мынэ, пе, тӥ азьпала, нош мон бӧрсяды мыно. Адӟытэк кельтэм губиостэс гинэ окто. Учком: кудмылэн тросгеслуоз... Ну бен кутскиз ук ӵошатскон! Бодыос кутыса, жаг турынъёсты но сисьмем куаръёсты-лысъёсты бугыръяськом. Куакъёс вискытӥ чатырскыса потаськом. Озьы "потакум", огпол гылӟи но, пыдъёсы кыӵе ке гуэ выизы. Пограмлэсь, утиськон вылысь, мырдэм но кызьы гинэ выжыос борды ӝабыртӥськыны вуи. Султӥ но учкисько: гуэз мур кадь. Дорам Тимофей Иванович вуиз: ма, пе, сылӥськод-ӝегатскиськод?.. Учкы, шуисько, отчы ӧжыт гинэ быдэсак ӧй кошкы. Кыл вератэк, со кык вайыж кузьда куасьмем егит кызьпу ваиз но сое гуэ лэзиз. Кызьпу, шуласа сямен, кема гинэ усьыны выриз, но гу пыдэс борды шуккиськемзэ ӧм кылэ. Эшъёсы кӧня ке пу куязы на. Соос но шуласа чалмизы. Сюлэмы кышкамен, юзырак-кезьырак луиз. Тимофей Иванович монэ буйгатӥз но выльысь губияны ӧтиз. Дыр кема ик ӧз ортчы - валтӥсь эшмылэн корзинаез тырмытэмын вал. Нош милямъёсаз губиос ӝыныозяз но ӧз ӝутскелэ. Ӵошатсконлы йылпумъянъёс лэсьтэм бере, Тимофей Иванович ивортӥз вуонояз арня нуналэ татчы ик губияны лыктон но, паймымон мур гуэз эскерон вылысь, сьӧрамы биньгозы но фонарь басьтон сярысь. Арня ортчем бере, ми корзинаосын но "снаряжениосын" нош ик татчы вуим. Кык часлэсь кема утчаса, шараям гумес шедьтыны ӧм быгатэ ини. Милесьтым азьло татчы мелиораторъёс вуылӥллям, тыпыосты, улвайёсты ӝужытэсь гурезьёсы люкаллям. Одӥгез сыӵе гурезь улэ пыдэстэм гу но шедиз, дыр... Макем умой луысал нырысь нуналаз татчы кыкетӥзэ лыктыны, гуэз вань тӥрлыкен эскерем бере, со сярысь геологъёслы ивортыны. Кин тодэ, музъемез тодон наукаын кыӵе ке выль шараян ӧй луысал меда... Таӵе малпанзэ шарае поттыса, Тимофей Иванович Шмаков веранзэ тазьы йылпумъяз: "Журналист луэммес ноку нокытын вунэтыны кулэ ӧвӧл. Беромид - темадэ ыштӥд". Тӧдьы но, сьӧд но "Удмуртия" фирменной поезд Москвае мыныны малы ке но уг дырты. Ӝыны сюрессэ ортчыса, ӝыны часлы беромиз ини. Нош ми, одӥг купеын кык кузя пукисьёс, часъёсмы шоры ӵемысь учкылӥськом. Пётр Михайлович Яшинлы, "Советской Удмуртия" газетлэн азьвыл редакторезлы, Москва котырысь санаторие ӝоггес вутсконо, мыным - Журналистъёслэн союзазы, интыосысь ревизионной комиссиослэн председательёссылэн кенешазы. Вагон улысь питранъёслэн дыбыртэмзы улсын вераськонмы кыстське но кыстӥське. Мон азьын али пукисьсэ но редакторлэн ӝӧкез сьӧрын трос дасо аръёс ӵоже пукыкуз адӟылэмме одӥг адями шуыны нокызьы уг быгаты. Адӟиськыны-вераськыны пырем адямиослы шуныт кисьтӥсь синъёс кынемын, бур пала сынам йырсиос сьӧдэктэмын но нюжаосын гинэ ошисько, котьку пальпотӥсь ымдуръёс куалекъяло, либыт куара чугдылэ, вераськонмес куспетӥ карылэ. Синъёсме кыньыса пукисько, азьлозэ Яшинэз - визьмо редакторез, егит журналистъёсты индылӥсез, кузпалзэ яратӥсез адӟыны турттӥсько. Сюсьтыл шоры пельтэм кадь, адӟонэ кысылэ. Малы меда озьы? Кузпалыз, Мария Михайловна, кулэм бере огназ кылем Пётр Михайловичлэсь улонзэ капчиятыны басьтӥськиз вал ужан интыя тодмо адями - кызь ареслэсь егитгес кышномурт, чебер блондинка. Пересь адямилы соин артэ улыны нырысь-валысь, зэм но, капчигес вал. Сюлэмыз но бордаз кыстӥськиз... Нош тани Пётр Михайлович висьыны усиз. Егит кузпал тӧлпери музэн ышиз, быриз, мукет пиосмурт борды лякиськиз. Коньдонтэк но эштэк кылем Пётр Михайловичлэн улонэз чидантэм секыт луиз. Умой коть: санаторие путевка сюриз... Дырез азьпалтыса вералом: Петр Михайлович понна та путёвка берлоез вал. Леонид Данилов, Удмуртиысь дано журналист. Алексей Артемьевич Стрижов но Степан Григорьевич Машков вуоно номерысь янгышъёсты тупатъяло. Музъем вылын нянь будэ Игра ёросысь фермеръёслэн огазеяськоназы 125 хозяйство пыре. Соослэн 2 сюрс 6 сю гектар музъемзы. Туэ фермеръёс, куазь туж ик ӧз ке но удалты, ӟеч урожай басьтӥзы. 232 гектарысь 369 тонна ю тысь октӥзы-калтӥзы. Тужгес пайдаё ужазы Мувырысь фермеръёс. Соос гектарысь 18 центнер ю-нянь басьтӥзы. Чутырьысь "Арго" хозяйство государстволы 10 тонна тысь вузаз, 4,4 гектарысь 746 центнер картофка октӥз. Л. МИХАЙЛОВА. Гильман КАСИМОВ Кин гурзэ гожтоз? Тау тыныд Тау тыныд, егит дыръя Мыным йырме поромытэм понна. Тау тыныд, мӧзмыт дыръя Лул-мылкыдме бурдъятэмед понна. Тау тыныд, тулыс дыръя Монэ ӟырдыт яратэмед понна. Тау тыныд, гужем дыръя Толэзь улын ӵош юмшаммы понна. Тау тыныд, сӥзьыл дыръя Шудо нуналъёс кузьмамед понна. Тау тыныд, кошкон дыръяд Мыным оскон кыл сётэмед понна. Тау тыныд, кузь уй дыръя Чебер уйвӧтам лыктэмед понна. Тау тыныд, тон вань дыръя Сюлмы осконэн йыгаськем понна. Татьяна Цигвинцева "Сарапул-молоко" огазеяськонын 8 ар ужа ни. Али со йӧл поттон цехын аппартчица луэ. Одӥг сменаен тыршо, ӵукна 8 часысен ӝытазе 9 часозь. Кык нунал ужамзы бере шутэтско. Татьяна капчи мылкыдын ужа. Кызьы бен уд шумпоты, предприятиын уждун дыраз сётъяло бере. Ужзэс бен секыт уд шуы, ваньзэ автоматъёс бергато, слесарьёс техникаез зол учко, дыраз "Эмъяло"-чаклало, куспазы тупаса, огкылысь тыршо. Г. ВАСИЛЬЕВ. МОЖГА ПЕДУЧИЛИЩЕЛЫ - 80 АР Ӟеч ужаку, мылкыд гурла Можгалэн шорсюлмаз ик куатьтон арлэсь кема ини сылэ бадӟым чебер юрт. Со - элькунысь одӥгез вашкала шор ёзо дышетскон интымы - Можга педучилище. Диплом басьтытозязы, ньыль ар ӵоже дышетскисьёс татын пӧртэм наукаосты дышетоно, асьсэды дышетӥсьлэн секыт ужезлы дасяно луо. Арлы быдэ егит специалистъёс Удмуртиысь калыкез дышетон удысэ лыкто, озьы ик мыно бускель республикаосы но улосъёсы. Соосты вошто школаез йылпумъям пиналъёс. Таосыз но дышетско, кошко. Тросэз быръем профессизэс улытозязы уг вошто ни. Соос пӧлысь уноез калыкез дышетон удысысь сӥё- дано ужась ним басьтӥзы ни, дышетон удысын азьланьтӥсьёс луизы. Удмуртиысь котькудӥз куинетӥез писатель татын дышетскемын. Калыкез дышетонъя министерство, Удмурт Кивалтэт, Дышетӥсьёслэсь тодонлыксэс будэтонъя институт, книга поттонъя "Удмуртия" издательство, элькун газетъёслэн но журналъёслэн редакциосазы - кытысь гинэ уд пумита Можга педучилищеез йылпумъямъёсты!.. Нош туннэ мынам нимысьтыз вераме потэ Можга педучилищеын удмурт кылъя но литературая урокъёсты нуэм но али нуись дышетӥсьёс сярысь. Адямилэн тодэм-валамез макем тросгес, макем ӟечгес вала калыкезлэсь улэм-вылэмзэ, калык сямъёсты, сокем узыргес луэ солэн вераськон кылыз. Ваньмызлы талы удмурт пиналэз дышетыны быгатоз удмурт адями гинэ. Тае лыдэ басьтыса, 1918-тӥ арын Елабуга городын усьтӥське удмурт дышетӥсьёсты дасясь семинария. Татын дышетскизы удмурт нылъёс но пиос. Нош улон воштӥськемъя, педтехникумын тросгес ӟучъёс дышетскыны кутскизы. Педучилищелэн коридоръёсаз ӵемгес кылӥськылӥзы ӟуч кылын вераськемъёс. Соин ик 1966-тӥ арын висъяське нимысьтыз удмурт ёз. Пӧртэм ужрадъёс ортчытъяло удмурт кылъя но литературая дышетӥсьёс. Соослэн лякыт сюлэмъёссытэк, визьзытэк, оло, туннэ вераськонмы но мукетгес луысал. Можга педучилищеын пӧртэм аръёсы удмурт урокъёсты нуизы таӵе дышетӥсьёс: 1918-тӥ ар - Трофим Кузьмич Борисов, филолог, этнограф, врач, государственной но партийной ужась, Удмурт автономиез кылдытӥсьёс пӧлысь одӥгез, Елабугаын дышетӥсьёсты дасясь семинариез кылдытӥсь. 1919-тӥ-1922-тӥ аръёс - Михаил Ильич Ильин, удмурт кылбурчи, этнограф, фольклорист, литератор. Бӧрысь Удмурт республиканской краеведческой музеез кылдытӥсь. Ӟеч ужъёсыз пусъемын "Ужысь герой" дано нимен. 1921-тӥ-1926-тӥ аръёс - Яков Ильич Ильин, педагог, литератор, публицист, педтехникумлэн нырысетӥ директорез. Со кылдытӥз литературно-творческой кружок. Можга педтехникуме 1924-тӥ арын дышетскыны пырем мурт Игнатий Гаврилович Гаврилов "Тодам ваисько" книгаяз шуныт кылъёсын верам со сярысь: " ... Яков Ильич вань дышетскись пиналъёсты нимтулзыя, кыӵе гуртысь лыктэмзэс но, анай-атайзылэсь кин луэмзэс но тодэ вал. Адямилэн улонэз тужгес секыт ке, маин ке но юрттыны тыршылӥз". 1926-тӥ арын Москвае кошке - аспиратурае Куӟебай Гердэн ӵош дышетскыны пыре. 1926-тӥ-1932-тӥ аръёс - Иван Трифонович Корепанов (Кедра Митрейлэн ӵыжы-выжыез). Туж яратӥз удмурт литератураез. Гожъяськисьёсын ӵош кружокез но со нуиз. 1928-тӥ-1958-тӥ аръёс - Екатерина Алексеевна Коновалова (тодмо писательлэн Михаил Коноваловлэн апаез), 1926-тӥ арын йылпумъяз педтехникумзэ, Удмурт Республикаысь сӥё-дано дышетӥсь. Куамын ар ӵоже удмурт нылъёсты но пиосты вордскем кылзэс но литератураез яратыны дышетӥз. Кивалтӥз литературно-творческой кружокен. Татын кыдазы таӵе тодмо писательёс: В. М. Ванюшев - кылбурчи, Г. А. Ходырев - калык кылбурчи, А. А. Ермолаев - критик, литературовед, Г. Д. Данилов - кылбурчи, прозаик, публицист, Г. И. Павлов - крезьгурчи, прозаик. Яратоно дышетӥсез сярысь ӟеч кылъёс вера Удмурт шаерысьтымы калык артистка Н. П. Бакишева: "Екатерина Алексеевна ми понна кыкетӥ анаймы вал. Котькуд секыт учыре, юрттэт курыса, солы вазиськылӥмы. Тодон-валан сётэм сяна, Екатерина Алексеевна дышетӥз милемыз улыны. Али но, педучилищелэн юртаз пыри ке, пумитам яратоно дышетӥсе мыньпотыса лыктоз кадь потэ". 1938-тӥ-1939-тӥ аръёс - Филипп Григорьевич Александров - нылпи писатель. Педучилищеез йылпумъям 1930-тӥ арын. Тодаз вае шаерысьтымы калык поэт Н. С. Байтеряков: "Филипп Григорьевич трос вераськись ӧй вал, нош вераськыкуз - котьку капчи мылкыдо. Выль темаез валэктыкуз, учыръёсты улонысь басьтэ вал. Озьы милемлы материал ӟечгес валамон луэ вал". 1958-тӥ-1971-тӥ аръёс - Григорий Данилович Данилов - кылбурчи, прозаик, публицист. Училищеез йылпумъяз 1953-тӥ арын. Дышетэм пиналъёсыз ӟеч кылъёсын гинэ тодазы ваё яартоно дышетӥсьсэс. Кылбурчи Анатолий Леонтьев вера: "Одӥг кылын гинэ вераме потэ: со зэмос дышетӥсь вал. Г. Данилов ноку но визьноданы, дышетыны ӧз яратылы. Визь пыры котьку но сётылӥз серем пыр, маскаръяськыса". Кивалтӥз педучилищеысь литературно-творческой кружокен. Солэн пиналъёсыз улмурт литератураын йыгмыт сыло. 1958-тӥ-1990-тӥ аръёс - Римма Ивановна Данилова, Россиысь школалэн сӥё-дано дышетӥсез, СССР-ысь но РСФСР-ысь дышетон удысысь азьмынӥсь дышетӥсьёслэн Всесоюзной съездзылэн делегатэз, начальной школалы учебникъёслэн но методической пособиослэн авторзы, методист. Али ужа Россия Федерациысь Дышетонысь национальной ужпумъёсъя институтлэн удмурт люкетаз. Удмурт шаерлэн котькуд сэрегаз пумиськыло солэн дышетэм пиналъёсыз. Шуныт кылъёсын тодаз вае педагогика наукаосъя кандидат З. В. Суворова: "Римма Ивановна, дышетӥсь сяна, ми понна парикмахер но, модельер но, косметолог но вал. Гуртысь лыктэм нылъёслы котьмае валэктылӥз: кызьы дӥсяськоно, ымнырез кызьы быгатыса чебермано, мукет но визь-кенеш сётылӥз". Р. И. Даниловалэн но дышетэм пиналъёсыз йыгмыт сыло та музъем вылын: сыӵеесь луо А. С. Зуева-Измайлова - кылтодон наукаосъя доктор, Н. А. Шкляева - история наукаосъя кандидат. 1962-тӥ-1967-тӥ аръёс - Рудольф Федорович Березин - филолог, доцент, калыкез дышетонысь азьмынӥсь. Али - дышетӥсьёслэсь тодонлыксэс будэтонъя институтлэн директорез. 1962-тӥ-1967-тӥ аръёс - Антонина Спиридоновна Березина - калыкез дышетонысь азьмынӥсь, али - Калыкез дышетонъя министерствоысь валтӥсь специалист. Та кузпалъёс сярысь ӟеч кылъёс гинэ вера Алнаш ёрос администрацилэн кивалтӥсезлэн юрттӥсез Н. А. Образцова: "Соос кыксы ик туж йӧноесь, чебересь, задоресь вал. Капчи мылкыдзэс студентъёслы но сётыны быгатылӥзы". 1961-тӥ арысен - Дмитрий Лукъянович Лукъянов - калыкез дышетон удысысь сӥё-дано ужась. Та нуналъёсы но Дмитрий Лукъянович тырше училищеын. Со сярысь вера "Можга иворъёс" газетлэн редакцияз ужась Ю. Н. Чернова: "Дмитрий Лукъянович туж быгатыса валэктылӥз котькуд темаез. Нош кыӵе чебер вал! Училищеысь вань нылъёс солы синмаськылӥзы". Д. Л. Лукъяновлэн дышетэм пиналъёсыз мукет шаеръёсын но тодмо ни. Соос пӧлын, кылсярысь, фотожурналистъёс М. В. Егоров но Г. А. Юсаев, кылтодон наукаосъя кандидат А. Ф. Шутов. Дмитрий Лукъянович кӧня ке ар кивалтӥз литературно-творческой кружокен. Татын кыдазы егит писательёс У. Ш. Бадретдинов, В. Г. Кириллов. 1983-тӥ-1986-тӥ аръёс - Галина Николаевна Михайлова. 1986-тӥ арысен - Татьяна Сергеевна Иванова, калыкез дышетонысь азьмынӥсь. Училищеез йылпумъяз 1979-тӥ арын. Радъя литературно-творческой кружоклэсь ужзэ. 1987-тӥ арысен - Маргарита Анатольевна Пискунова - калыкез дышетонысь азьмынӥсь. 1994-тӥ арысен - Татьяна Михайловна Кибардина ужаменыз ӵош дышетске на аспирантураын. Педучилищеез 1984-тӥ арын йылпумъяз. Берло аръёсы но дышетскем студентъёс пӧлын ӝужало ини яркыт кизилиосмы. Соос - Николай Карпов - крезьгурез гожъясь, Елена Панфилова - кылбурчи но журналист, Светлана Ильина но Екатерина Макарова - кылбурчиос но мукетъёсыз. Та нимтулъёсты лыдӟыса, таӵе малпан кылдэ: зэмзэ но, Можга педучилищеын ужаллям удмурт калыклэн тужгес но дано но визьмо муртъёсыз. Соин ик татын ӝужазы визьмо адямиос. Гажано эшъёс! 11-тӥ толсуре (декабре) 13 часлы ваньдэс ӧтиськомы училищелэн 80 ар тырмонлы сӥзем юбилеяз яратоно дышетӥсьёсыныды но егит дырыныды пумиськыны. Тӥ понна ӧсъёс котьку усьтэмын. Т. ИВАНОВА. Можга педучилищелэн удмурт ёзэзлэн кивалтӥсез. Рост ӝужда будыны... Газет-журналъёсъя та нимо-дано адямиез кемаласен тодӥсько вал. Нош тани асэныз но пумиськыны кылдӥз. Ижысь Международной Восточно-Европейской университетын "Общая газетаысь" журналистлэн Юрий Ростлэн фотовыставкаез усьтӥськиз. Сӥё-дано ужрадэ уно калык люкаськылӥз, Москваысь усточиез уго тодо "Комсомольская правда", "Литературная газета" но мукет изданиосын потылэм лэчыт кылужъёсызъя но яркыт фотосуредъёсызъя. Кызьы вераз ачиз Юрий Михайлович, лыдӟемды ке, пе, потэ - лыдӟе, суредъёссэ учкылытэк но яралоз, нош гожъямез дорын сылыны дырды ке жаль, туспуктэмъёсты гинэ учкыса ортче. Вераз тае, малпасько, Рост, люкаськем калыкез шулдыртон понна гинэ. Ачиз но кибашлы ӟеч вала: солэн пужымез - кылэз но суредэз валчеям бордын. Выставкаысь ужъёс но, нырысь учкыса, туж огшорыесь кадь. Кыӵе ке ракурс, юри малпаса, яке лушкемен возьмаса пуктэм суред - таӵеез адӟытонын ӧвӧл. Со понна Юрий Рост быгатэ огшоры фотогеройзэ но кизилиозь ӝутыны, яркыт гожтэм кылыз чотын. Лыдӟиськод со чуръёсты но паймыса валаськод: учконо фотоысь погмаськем дӥсен, напырӟем сапеген кыӵе ке вунэтэм гуртысь воргорон серекъян понна пуктэмын ӧвӧл. Ӵапак таӵеос вылтӥ, пе, ожмаськон погыльскиз, ӵап со кадьёс фашизмлэсь сюрлызэ тӥязы. Уг тод ни воргорон, кыӵе армиын, полкын ожмаськиз. Ӧз малпалля со дан сярысь. Косыкузы тушмон вылэ урдскылӥз, кезьыт музъем вылын кӧлалляз, кирза сапеген напра- дэриез ныркиз. Тӥни кин вылэм со 46 размерен дӥсь нуллӥсь тэшкыли быдӟа адямиез. Амалтэк гажаса выльысь туспуктэм шоры учкиськод. Юрий Михайловичлэн та выллем мукетъёсыз но ужъёсыз. Огшоры улонысь чеберъятэк-волятытэк сётэм тусбуйёс вӧзын быдэс очерк тыр гожъямъёс. Зэм, огшоры воргоронэз, кураськыны кылем адямиосыз сяна адӟыны луэ туж тодмо ымныръёсты: академикъёсты Дмитрий Лихачевез но Андрей Сахаровез, актрисаез Марина Нееловаез но кинорежиссёрез Сергей Параджановез. Бордазы кыско та фотографиос огшоры муген. Сыӵе визьмо, быдэс дуннелы тодмо адямиос, кожалод, матысь эшсылэн фотоаппаратэз азьын. Ма, соиз озьы ик, дыр. Юрий Рост выставкаез усьтонын но паймытӥз ассэ туж огшоры эрико возьыны быгатэменыз, кыллы шаплы луэменыз. Сыӵе мурт эшъяськытэ ышем-бырем гуртысь кыед поттӥсез но, ваньмызлы тодмо академикез но. Та ласянь амалтэк вожъяськиськод Ростлэн котькинэн шаплы кусыпъяськемезлы. Соин артэ тросэз туспуктылӥсьёсмы, асме но вераса, бездытэсь. Нош кылтӥрлыкезъя Рос зарезьысь ӝужыт шормуӵлы укша. Отчыозь вуыны, уяны быгатэм сяна, мар меда кулэ на? Оло, инмарен сётэм шуд. * Юрий РОСТЛЭН фотовыставкаысьтыз одӥгез ужез - кинорежиссёр но писатель Сергей ПАРАДЖАНОВ. Г. ЮСАЕВ. ТУАЛА ЕГИТЪЁСЛЫ ТОЛЛОЕЗ СЯРЫСЬ Вужере ӧм кыле, кожаса ӧм ветлэ Кин малпаз, кӧня ке ар куспын гинэ пионер, комсомол огазеяськонъёслэн бугырес дыръёссы историе кылёзы шуыса. Пиос но нылъёс понна со, зэмзэ ик, улон школа вал. Соиз умой ни, пионер но комсомол огазеяськонъёслэсь 80 ар тырмонзэс шаерамы туэ сӥё-дано пусйизы. Но историмылэн та вакытэз медаз пӧрмы вылэм юбилейысь юбилее тодэ ваёнлы гинэ. Мултэс ӧй луысал та огазеяськонъёслэн ужъёссы сярысь туала егитъёсмылы мадьылыны. Адӟем карымонэз, ӟечез медаз кыльы вылэм палэнэ. Тани мынам син азям пуксе аслам егит дыры. Пионер дыръям мон туж возьдаськись, небыт сямо вал, тросэз гуртын вордскем удмурт нылъёс кадь ик. Чиед мугорылэсь возьдаськылӥ, луоз. Ӟуч кылэз умой-умой ӧй тоды. Кин ке мар ке понна пыкылэ ке, пень дорозям ик ӵыжектӥсько вал. Ӝожомемысьтым, доре бертыса, ас поннам шыпытак гинэ бӧрдылӥ. Но синкылиме нокинлы ӧй возьматъя. Пичи классъёсын дышетскыкум бырйизы отрядлэн кенешезлы тӧрое. Пионервожатойёс монэ пӧртэм ужрадъёсы кыскылӥзы, собере бырйизы дружиналэн кенешаз. Бадӟым классъёсын комсомоллэсь косэмъёссэ быдэсъяй ини. Ветлӥ школаысь удмурт хоре. Соин кивалтэ вал аккордеонэн синмаськымон шудӥсь Леонид Филиппович Чернов. Хорын мылкыд лобӟе вал кырӟан дуннее, уката ик ушъяллякузы. Нырысетӥ радаз милемыз султытылӥзы удмурт дэремен но уксё тӥрлыкен. Нош пыдъёсамы - гын сапег. Ми данъяськылӥм но туж шумпотылӥм, хормы районысь школаос пӧлын нырысетӥ интые потылыку. Школаез йылпумъяса пыри Удмурт пединститутэ. Татын вить ар дышетскытозям группамылэн но быдэс институтъя удмурт хорлэн старостазы вал. Со - комсомоллэн сётэм ужез вал. Ижысь институтъёс куспын смотръёс дыръя пединститут ӵем-ӵем нырысетӥ инты басьтылӥз, удмурт хорен валче. Институтэз йылпумъяй но 1959 арын монэ келязы Алнаш районысь Вуж Утчан шор ёзо школае. Татын соку ик хор кылдытӥ, кык пол-а, куинь пол-а концерт но возьматыса вуимы. Но ӝоген монэ ӵектӥзы комсомоллэн Алнаш райкомезлы инструкторе. Кыӵе гинэ пайдаё ужъёс быдэсъяно ӧз луы комсомолын: егитъёслы политикая тодон- валанъёс сётъямы, спорт ӵошатсконъёс, субботникъёс, художественной самодеятельностья смотръёс, комсомол эстафетаос, ленинской зачётъёс, ортчытъянэ пыриськылӥм, будэтэм ю-нянез октонын но юрттылӥм, пинеръёс сярысь сюлмаським: вожатойёсыз пӧртэм ужъёслы дышетылӥм, бригадаослэсь, цехъёслэсь ӵошатсконзэс радъяллям, агитпоезд но, агитбригада кылдытъям но трос мукетыз. Устоесь ӝытъёс ортчытъямы егитъёслы. Тодам ваисько на, огпол ВЛКСМ-лэн райкомезлэн кыкетӥ секретарез Евгения Колесникова ӵектӥз огшоры басмалэсь вурем дэремъёсын бал ортчытыны. Кытысь ке но со шедьтэм быдэс кесэг сыӵе басма. Ваиз комсомоллэн райкомаз. Кинлэн балэ мынэмез потӥз - басьтӥзы. Дэрем аслыз котькудӥз ачиз вуриз. Асьмелы асьмеос туж чебересь потӥмы со дэремъёсын. Нош пиос милемыз зэмос кавалеръёс сямен вальсэ но мукет эктонъёсы ӧтьылӥзы. Вань улытозям уз вуны Пётр Николаевич Кубашевен кылдытэм алнаш хор. Ёросысь вань гуртъёсы вуылӥм со хорен, туж шуныт пумитало вал милемыз котькуд гуртын. Пётр Николаевич соку "Алнаш колхозник" газетлэн редакторез но ВЛКСМ-лэн райкомезлэн бюроезлэн членэз вал. Огпол райкомлэн нырысетӥ секретарез Анатолий Иванович Токарев монэ кабинетаз ӧтиз но шуэ: "Маша, асьме райкомлы Москвае центральной комсомольской школае ньыль толэзьлы дышетскыны мыныны путёвка сёто. Уд мыны-а?" Мон кема малпатэк шуи: "Мыно!" Солэсь азьло Ижевсклэсь кыдёке нокытчы ветлэме но ӧй вал. Табере - Москвае! Мынӥ но ӧй жаля. Со вал 1961 арын. Э, Инмаре, макем тунсыко вал отын. Соку мон нырысьсэ адӟи негръёсыз. Соос Москвае векчи дӥськутэн лыктӥллям, нош лымы шӧдтэк шорысь усиз. Мискиньёс кыре потӥзы дорын нуллон тапочкиосын, валес шобретъёсын бинялскыса. Вань улытозям уз вунэ Зоя Космодемьянскаялэн анаеныз, Алексей Маресьевен (Б. Полевойлэн "Повесть о настоящем человеке" книгаезлэн валтӥсь героеныз), Эдуард Колмановский композиторен, пӧртэм писательёсын, кылбурчиосын но странаысь со дыре тодмо адямиосын пумиськылэмъёсмы. Э. Колмановский милемын (ачиз фортепьяноен шудэ но кырӟа) дышетӥз аслэсьтыз "Нет любви хорошей у меня" кырӟанзэ. Москваысен ик тодӥ, Миусской площаде интыяськемын Вылӥ партийной школа, кытын дышетско коммунистъёс. Мон отчы ветлӥ, котырски со юрт дортӥ, пырай пушказ но аслым ачим кыл сётӥ "Одно ик татчы дышетскыны лыкто!" Москваысь бертӥ гинэ но, монэ бырйизы ВЛКСМ-лэн райкомезлы секретаре. Комсомолэ кутыкумы егитъёслэсь юаськом вал ВЛКСМ-лэсь Уставзэ тодэмез, обществолы пайдаё ужъёсы пыриськемез, кӧня писпу мерттэмез, анай-атаезлэсь кылзӥськемез, кыӵе дышетскемез яке ужамез сярысь. Тужгес сюлэмшугъяськытӥсь вакыт вал комсомольской билет басьтон. Соин ик котькуд егит адямилы тыршылӥ шедьтыны шуныт кылъёс. Со юрттылӥз пиосты но нылъёсты ӟеч ужъёсы бурдъяны. "Восточный" комплекслэн директорез Игорь Михайлович Гараев та дырозь тодаз возе на, мар сярысь мон вераськи, кыӵе дэремен вал солы комсомольской билет сётыкум. Котькуд тулыс но сӥзьыл районысь агитбригадаен ветлылӥм кырӟаса, эктыса. Куддыр кык арняен доре ӧм вуылэ, трос гуртъёсты котыръямы, концертъёс возьматъямы "Варзи- Ятчи" курортын шутэтскисьёслы но. Агитбригадаосмы вуылӥзы фермаосы, комбайнёръёс доры, поттылӥмы "Молниос", боевой листокъёс, лэсьтылӥмы йылпумъянъёсыз возьматӥсь пулъёс, ортчытъямы кенешонъёс-вераськонъёс, кырӟамы пӧртэм лэчытэсь такмакъёс. Со сяна но кӧня вал нуналысь- нуналэ ужъёс! Клубъёсын возьматъязы кинофильмъёс, концертъёс ортчылӥзы, лекциос, ӝытъёс - котькытын кичӧлтӥсьёс вал комсомолецъёс. Соку гинэ ужаны кутскиз районысь радио. Мыным сётӥзы "Крокодил идёт по району" сэрегез нуыны. Гуртъёсы потаса, тырмымтэосты адӟиськом ке, соку ик - радио пыр ивортӥськом. Тужгес пӧсь йӧтэ вал юисьёслы. 50-тӥ-60-тӥ аръёсы но улон капчи ик ӧй вал, но со дыре ик задор мылкыдмы ӧз кысылы. Ӵапак со вакытэ ик яркыт суредъёс кельтӥз улонамы. Учкисько 1954 арын школаез быдтыкум лэсьтэм фотографиез. Ми отын дас тямыс кузя, нош куатез улонысь кошкемын ни. Со но тросэз сярысь вера. Мынам ӵош дышетскем ёзъёсы пӧлысь потӥзы врачъёс но, дышетӥсьёс но, офицеръёс но, колхозникъёс но - ваньмыз данъяськымон адямиос. Тау карисько ваньмызлы, кин возьматӥз мыным улонэ сюрес, дышетӥз калык понна ужаны, адямиез гажась, удмуртлыкез дунъяны быгатӥсь луыны. М. Ишматова. Завьялово. ВАНЬБУР ПОТТӤСЬЁС ДОРЫН Куашкам предприятие пыд йылаз султӥз. Берло дыре "Сарапул-молоко" огазеяськонлэн данэз пумен ӝутске, нош ар талэсь азьло куашкан калэ вуэмын вал. Акционер огазеяськон шедьтӥз аслыз юрттӥсь - инвестор. Со - Ижысь "АССО-строй". Та фирма огазеяськонлэсь 65 процентсэ акциоссэ басьтӥз. Со луиз предприятилэн пыд йылаз йыг-йыг султонэз. Татын уго, зэмзэ но, огазеяськонлэн директорезлэн Татьяна Королевалэн туж бадӟым сюлмаськемез-тыршемез шӧдӥське. Со 20 арлэсь кема кивалтэ ни предприятиен. Городын гинэ ӧвӧл, быдэс удысын но шаерамы тодмо адями. Гуртын но переработкаын тыршисьёслэн праздниксы азьын Гурт хозяйствоя но сиён-юонъя министерство солы Почёт грамота сётӥз. Татьяна Ивановна, Вологдаысь йӧлъя институтлэсь технология люкетсэ йылпумъямез бере, 1984 арын Сарапулэ вуиз. Нырысь вал валтӥсь инженер, собере директорлэсь ужзэ быдэсъяз, нош 1986 арын мартэ кивалтӥсе юнматӥзы. - Татьяна Ивановна, коллективады тӥ сярысь уно ӟеч кылъёс веразы ни. Таӵезэ туала арын ӵем уд пумита. Кызьы предприятидэс пыд йылаз ӝутыны быгатӥды? - Ватонэз номыр ӧвӧл. Шонерзэ вераса, ӝыны ар пала огинтыямы сыръяса улӥмы, оло ужам, оло ӧм - шуг вераны. Ужасьёсмы куашкам мылкыдын, мар карыны ёрмыса, тунаса кадь улӥзы. Асьмеос но мар карыны паймемын вал. Но йырмес ошыса ӧм ветлэ, секыт югдурысь потон амалъёс утчам. Шедизы юрттӥсьёс-инвесторъёс. Ижевскысь "Ассо- строй" уно миллион манет коньдон сётӥз, 65 процентсэ акциосмес басьтӥз. Та ужпумез быдэстыны городысь администрация но юрттӥз. Со понна тау карисько. Тӥни озьы фирмалэн милемлы кизэ мычемез предприятилы сайкыт чылкыт омыр кадь луиз, но каллен-каллен пыд йыламы султӥм. - Нош али кыӵе кусыпъёсты? - Умоесь. Ма, кызьы сыӵе ӟеч ужез вунэтод. Милем соос али но юртто. Районысь гурт хозяйствоослы тулыс кизён но юосты аран азьын эстӥськон, воштос ёзъёс но техника басьтыны уксё висъяло. Нош огазеяськонлэн "Ассолы" эшшо куинь миллион тыронэз на, но сое берыктонэн уг дыртыто. Кызьы солы уд шумпоты. Республикаысьтымы куд-ог предприятиос, отчы пыро ож тӥрлык поттӥсьёсыз но, ялан кытысь ке палэнысь, кунгож сьӧрысь инвесторъёс утчало. Мон сое умоен уг лыдъяськы. Асьмелы Запад но, США но кизэс уз мыче. Берло дыре шаерамы кӧня соос ветлӥзы ни. Но одӥг ӟеч огкыл но, тупанкыл но кутымтэ на: учко, тодматско но кошко. Кытын соослэн усто технологиоссы, кыӵе предприятие асьмелы пуктӥзы ни. Ушъяськымонэз ӧвӧл. Совето власть дыръя ик юрттӥсьёс вал, автозаводмы ик немецъёсын но французъёсын ӵош пуктэмын. - Татьяна Ивановна, предприятидылэсь, ужъёстылэсь уд палэнскиське-а? - Уг. Та вераськонэз юнме шорысь уг ӝутӥськы. Асьмелэн но вань узыр ужбергатӥсьёсмы, фирмаосмы но банкъёсмы. Соос мылысь-кыдысь пыриськыны кулэ экономикамес юнматонэ. Та ужпумез уката ик син азязы возьыны кулэ. Удмурт Республикаысь Кун Кенеш но Правительство. Соос мултэс оско кадь, трос дырзэс но кужымзэс быдто кунгож сьӧрысь юрттэт утчанлы. Вылӥ кивалтӥсьёсмы кыӵе кунъёсы (странаосы) гинэ ӧз вуылэ на, нош ветлэмзылэн пытьыез кытын, пайдаез уг адӟиськы? Одӥг кутскемен, мукетсэ но верало. Республикаямы Россилэн бадӟым кивалтӥсьёсыз кӧня пол ветлӥзы ни - нош ик буш инты кыле. Малы? Шуг валэктыны. Но туннэ асьме дорысь ик юрттӥсьёс шедьтоно. Милям "АССО-строй" фирмаен эшъяськеммы, кусып тупатэммы сое туж яркыт возьматэ. - Татьяна Ивановна, туннэ ужъёсты сярысь кӧня ке вералэ вал. - Мултэс ушъяськыны уг яратӥськы, но куд-ог лыдпусъёс югдурез умой возьматозы. Тани туэ 10 толэзьскын, миым та дырен ӵошатыса, 180 процентлы уногес продукция поттӥм, яке 9 миллион манетлэсь трос. Нош йӧллэсь сиёнъёс 4 поллы ятыр дасям. Со 6,2 сюрс тонна люкаське. Али 27 пумо сиён-юон поттӥськом. Ми гинэ шаерамы лэсьтӥськом "катык", нылпиослы "мусс", "суфле" но "тонус". Берлоез сиёнмы туж пайдаё, вирысь сахарез кулэстэ. Шаерамы та вакытэ вӧен секыт югдур кылдэмен валче (йӧл та вакытэ ичигес потэ - Г. Р.), йӧл, кефир но мукетсэ 2,5 процент наплыкен дасяськом, азьло 3 процент вал. Озьы тросгес вӧй лэсьтыны быгатӥськом. - Кин тӥледлы йӧл вае? - Сарапул, Каракулино районысь гурт хозяйствоос. Соосын милям умоесь кусыпъёс тупатэмын. Кузёоссы дорамы ӵем пырало. Продукцизы понна коньдон но дыраз сётъяны выриськом. Азьло йӧл вутто вал Завьялово, Пичи Пурга но Камбарка районъёс, нош али ичи ваё ни. Тол вылтӥ вылӥ наплыкен, 4-4,5 процентэн, йӧл вуэ. Умой со. - Татьяна Ивановна, кышномуртлы секыт-а ваньбур поттонэн кивалтыны? Кызьы тӥ шутэтскиськоды? - Секыт но, капчи но уд шуы, дыр. Коллективамы, зэмзэ но, тросгес кышномуртъёс ужало, воргоронъёс - техника котырын гинэ. Но вӧзад ужзэс яратӥсь, тонэ валась адямиос люкамын ке, секытэз но уж капчиен берытске. Мыным туж зол юртто сбытъя но вузкаронъя воштӥсе Галина Макшакова, лабораторилэн кивалтӥсез Раиса Бронникова, экономист Татьяна Мышкина, производстволэн кивалтӥсез Зинаида Савина, валтӥсь технолог Александра Чикурова но мукетъёсыз. Ваньзы ик соос ас удыссэс валаса нуо, зэмос специалистъёс луо. Али тани Савина но Чикурова Москвае семинаре мынэмын, тодон-валанзэс будэто но выль ужан амалъёсын тодматско. Гужем шутэтскисько сад-бакчаям, яратӥсько узы-боры, губи бичаны. Ваньмон дыръя шумпотыса кылзӥсько опереттаез, Чайковскиез, Ломстронгез но мукетсэ. - Татьяна Ивановна, вань-а яратоно сяськады? - Вань, конечно. Туж ярало астраос. Вераськиз Геннадий Романов. Кун Кенешын Кудпала вамыш лэсьтоно? Кун Кенешысь Улон-вылонэз радъян политикая, ужъя, тазалыкез но инкуазез утёнъя комиссия аслэсьтыз паськытатэм кенешсэ ортчытӥз, Кун Кенешысь депутатъёсты, Правительствоысь муртъёсты но Ижевскысь больницаослэсь валтӥсь врачъёссэс люкаса. Огъя кужымен соос утчазы тазалыкез утён удысын кылдэм секыт югдурысь потон амалъёсты. Та удыс, зэм но, мур гуэ гылӟемын. Кызьы ивортӥз комиссилэн тӧроез С. И. Андреева, ёрос больницаосы эмъюм но сиён-юон басьтыны чакламлэсь 52 процент коньдон вуиз, Ижевскысь больницаосы - 45 процент, ёрос больницаосы уждун тырыны чаклам коньдонлэн ӝыныез келямын, городысь больницаосы - 47 процентэз. Валамон, эмъясьёс ӟеч улэменызы ушъяськыны уг быгато. Тазалыкез утёнъя министр С. Г. Шадрин ивортэмъя, соослэн шоро-куспо уждунзы - 692 манет, республикаын та лыдпус - 955 манет. Уждун тыремын май толэзь понна. Тросэз коллективъёс, таӵе улэмлы, ултӥямлы чидатэк, ужзэс уретъязы ини, кылсярысь, Дэбесысь ёрос больницаын, Ижевскысь ӝог медицинской юрттэт сётонъя станциын ужасьёс пумитъяськон ужрадэ потазы. Та вакытэ Сарапулысь огаз больницаын 23 врач ужысь кошконэн кышкатэ, нылпи ваён юртысь 9 ужась сиськытэк улэм сярысь ялӥз. Коньдон ӧвӧлэн, тупатъямысь дугдэмын вир басьтонъя станцилэсь юртсэ, "Селычка" санаториез, сюлэм висёнъёсты эмъянъя диспансерлэсь пищеблоксэ, пытсамын онкодиспансерлэн радиологической отделениез. Гуртъёсысь тросэз амбулаториос, ёрос больницаос куашкан калэ вуэмын. Эмъюмъёс ӧвӧлэн, унояз больницаосын висисьёсты юрттэт сётытэк гуртазы келяло яке эмъюмъёсты асьсэ коньдонэнызы басьтыны косо. Кризис бере куинь толэзь куспын вож нуныос нош ик тросгес кулӥзы, ракен, туберкулёзэн висисьёслэн лыдзы йылӥз. Кенеше люкаськемъёс, ченгешемзы, споръяськемзы бере, секыт югдурез тупатыны кӧня ке амал ӵектӥзы ик. Нырысетӥез, тужгес лякытэз сюрес, - эмъян понна висисьёслэсь дун курон. Тазалыкез утёнъя министерство, тазьы ужан амалэз юнматыса, нимысьтыз решение но кутӥз вал ини. Но Удмуртиысь Прокурор сое палэнтыны косӥз, дунын эмъян Конституцилэн куронъёсызлы уг тупа шуыса. Тазалыкез утёнъя министр, больницаослэн валтӥсь врачъёссы малпамъя, та ужпумез Кун Кенешын эскерыны но эмъяськем понна дун тырон пумысен постановление кутыны кулэ, калыклы нырысь ик меӵак вераса: дунтэк эмъяськыны луонлыкъёс ӧвӧл, бюджет - буш. Вуоно арлы бюджетэз кутэм бере ик, нимаз-нимаз люконо: кыӵе юрттэтъёссэ тазалыкез утён удыс дунтэк быдэстыны быгатоз, кыӵеоссэ - уз. Та ужпумез калык чотын быдэстыны, солэсь коньдонзэ качанлы пумит вераськизы Кун Кенешысь депутатъёс-коммунистъёс. А. Г. Бегунов шонерак вераз, таӵе решение понна соос куаразэс уз сётэ шуыса. Тазалыкез утён удыслэсь расходъёссэ кулэстон - югдурез тупатыны эшшо одӥг амал. Таиз асьсэды эмъясьёсты зол шуккоз. С. Г. Шадрин дэмла 109 ставкаез кулэстыны. Министр оскытӥз, одӥг адями но таин валче ужлэсь мозмытэмын уз луы шуыса. Малы ке шуоно, али, пе, санитаркаос, тросэз врачъёс быгато 1,5-3 ставкаен ужаны. Озьыен, мултэс ужан интыос вань. Юан кылдэ: ӟеч улэменыз-а санитарка 2-3 интыын ужа, ужамез потэмен гинэ-а врач уй дежурствоосы кыльылэ? Министерство аслэсьтыз ужасьёссэ ужтэк но, ватсаса коньдон басьтыны луонлыктэк но кельтыны медэ. Со вакытэ ик шӧдӥськиз эмъясьёс сярысь сюлмаськем но. Кенешыны ӵектэмын вал, вуоно арлы бюджетэз кылдытыку, ЕТС-лэн нырысетӥ разрядэзлэсь ставказэ будэтыны. Удмуртиысь тазалыкез утён удысын ужасьёс тужгес но ичи уждун басьто, малы ке шуоно, нырысетӥ разрядлэн ставкаез 60 манет гинэ. Со вакытэ ик Казаньын, Уфаын та лыдпус - 83 манет, Санкт-Петербургын - 120 манет. Та ужпумез быдэстыны кулэ Удмуртиысь Коньдон ужпумъёсъя министерство. Но министрлэн воштӥсез Н. П. Мирошкин та сярысь вераськонлы пум понӥз - республикалэн бюджетэз тае уз вормы, пе. Одӥг кылын вераса, тазалыкез утён удысын кылдэм югдур понна кыл кутӥсь муртъёс шуг-секытысь потон амалъёсъя одӥг кылэ ӧз вуэ. Сыӵе сюресъёсты утчалоз ини та кенешын кылдытэм нимысьтыз комиссия. Кудпала соос вамыштозы: югдурез калыклэн кисыез чотын тупатон пала яке мукет амалъёс шедьтозы? Одӥг удысын гинэ (та рад - тазалыкез утён удысын) югдурез тупатыны тыршон огаз колхозын гинэ коммунизм лэсьтонлы уг кельшы-а? О. ВАХИТОВА. Кузьым Верос Гуртысь культура юртын, концерт дасякузы, баянзы тӥяськиз. Ӧз чида ни, лэся. Ӝыт ке вуэ, огез но мукетыз кияз кутэ вал уго: егит мылкыд, котькинлэн шудыны дышетскемез потэ. Трос баянистъёс луэмен ик ӝог сӧриськиз. Володя, тракторист, котыраз бергаз-бергаз но секыт лулскыса шуиз: - Да-а, зол гинэ ныркиськемын ни таид. - Тупатъяны но-а уз луы ни? - куалектӥзы нылъёс. - Тон, Володь, оло, быгатод? - Ӟеч специалист, оло, пӧрмытысал, нош асьме гуртын ӧвӧл ук со. Клублэн кивалтӥсез Оля Галкина ма карыны ик уг вала ни - районын ортчоно ужрадозь дас нунал гинэ кылиз на. Нош концертэз баянтэк кызьы дасялод? Олялэсь секыт мылкыдзэ ӧжытак ке но буйгатыны малпаз Вася Конюхов: - Пересь Игнатий Потапычлэн баянэз вань. Только уз сёты, дыр: туж чурыт сямо адями со. - Оло, сётоз: дораз ветлыса юано, вераськоно, - уг буйгатско егитъёс. - Бамад уз чабкы. - Уз пӧрмы, - аслэсьтыз ӵоге Вася. - Уд тодӥське шат Потапычлэсь сямзэ? Мон, ява, котькудӥзлэсь маин шокамзэ кыдёкысен шӧдӥсько. Игнатий Потапычлы тямыстонлэсь ятыр ини. Гуртын, зэмзэ но, солэсь чурыт сямзэ тодытэк уг уло. Пыроз магазинэ, учкоз ӝажыосысь пӧртэм вузъёсты. Нош маке басьтыны малпаз ке, вузлэсь дунзэ одно ик ньыль пол-вить пол юалоз. Собере гинэ кисыысьтыз уксёзэ поттоз. Котьма ке но, Оля Потапыч доры ветлоно кариськиз. Гурт пумысь пичи нюк палан улэ пересь. Капкаетӥ пырыса, корказьын кӧня ке сылӥз. Огпол, кык пол йыгаськиз - вазись ӧвӧл. Кошкыны дасяськиз ни вал - ӧс усьтӥськиз. Пумитаз султӥз ӝужыт мугоро, юг-юг тӧдьы тушо пересь. - Ӟечбуресь, Игнатий Потапыч! - корка пырыса вазиз Оля. - Мон клублэн кивалтӥсез луисько. - Озьы, иське, - егит ныллы пукон сётонъяз вазиз коркалэн кузёез. - Эн мурталэ: пукселэ татчы... - Мон одӥг ужен пыри вал, - кышет улысьтыз потэм йырсизэ тупатъяса вазиз нылаш. Пересь чильымаз тамак тырыны ӧдъяз. Кин ке дораз пыре ке, котьку озьы: кыскон арберизэ поттэ. - Клубын баянмы тӥяськиз. Юрттэлэ вал, Игнатий Потапыч, - валэз соку ик кыткыны малпаз Оля. - Тӥляд вань, шуизы. Одӥг ӝытлы гинэ ӧд сётысалды-а? Потапыч уг вазьылы. Чильымез гинэ золгес ӵындыны кутскиз. Собере Оля шоры мылпотытэк кадь учкиз: - Коля пиелэн со. Ачиз фронтын быриз... Уг сёт! Нош баянэз улэп... Корка пушкын кӧнялы ке чалмыт луиз. Потапыч, гур сьӧры мыныса ведраысь кезьыт ву омыртӥз но дыртытэк гульк-гульк юиз. - Баянэныды шудэммы понна дун тыром, - сюлворе Оля. - Эн но поттылы: уг сёт, - ӝотрак ӵогиз пересь. - Ой-ой-ой, табере быдэс районын возьытэ усёд: концертмы уз пӧрмы ни, - ас понназ сямен но пересь мед кылоз шуыса вераз клублэн кивалтӥсез. - Мар мыным тӥляд концертты! - пересь нош ик ведра дуре султӥз. - Туннэ магазинысь селёдказэс басьтӥ вал - кузьыт вылэм, шайтан. Ву юэмысь уг дугдылӥськы ни. - Мон баян сярысь, нош солы селёдка, - куректэ егит нылаш. - Интыез солэн вань, нылы. Баян нянь уг куры. "Вот чурыт куртчем!" - лек учкиз Оля ӝӧк борды пыкъяськыса сылӥсь пересь шоры. Потапыч синъёссэ борддорысь ӵужектыны кутскем фотокарточка шоры мертчытӥз. - Тӥляд пиды улэп ке луысал, баянзэ одно ик сётысал. Таӵе секыт мылкыдо адямиосын ӧй пумиськылы на вал, - кошкыны дасяськыса, сюлмысьтыз ик вазиз Оля. "Шонер вераз Вася: зэм ик, чурыт вылэм, - малпаз на ас понназ. - Чиньызэ вандӥд ке, вирыз уз пот, толалтэ азбарысьтыз лымызэ но жалялоз..." Потапычлэн улонэз капчи ӧй вал. Трос секытсэ шӧмъяно луиз. Кузпалъяськемез бере нылпиосыз вордӥськизы ке, сюдӥсьёс луозы, малпалляз. Нош кышноез одӥг пи гинэ кузьмаз. Ачиз но ог дасо ар талэсь азьло гербер вылтӥ кулӥз. Тани табере пересь чылкак огназ кылиз. Корка кузё нош ик фотокарточкаос доры матэ кариськиз. Егит танкистлэн сэзь тусбуез шоры учкыса, ортчемзэ тодаз вае. Тани али кадь ик син азяз пуксе пиезлэн гурезьын куасэн нискыламез, тупен шудэмез. Сизьым классэз йылпумъяса, со колхозэ ужаны кылиз. Ӝытъёсы клубе ветлылӥз. Эшъёсыныз шулдыръяськиз, вуж арганэныз нылъёсты эктытылӥз. Война кутскемлэсь кӧня ке толэзь азьло гинэ колхозлэн правлениез Колялы, сюлмо ужамез понна, выль баян сётӥз. Ма быдӟа шумпотон вал со егит пилы! Со дырысен шуръёсысь кӧня ву кошкиз ни меда? Нош пересьлы ваньмыз али кадь потэ. Туннэ ке но солэн пиез гуртын тужгес чеберез, тужгес кужмоез кадь. "Эх, шу,- лулске пересь. - Сьӧсь убиръёс ке улонмес ӧй пожасалзы... Умой-умой шулдыръяськыны но ӧд ву ук, пие. Нош баянэд тани кылле шыкыс пыдсын: тонэ возьмаса жадиз, дыр, ини..." Оля но кемалась кошкиз ини, нош Потапыч пуке, оломае но тодаз вае. Пель сьӧраз кылӥське кадь нылмуртлэн пыкылыса верамез: "Тӥляд пиды пумит ӧй луысал..." Соиз озьы. Коля калыклы, эшъёсызлы котьку ӟеч лэсьтыны тыршылӥз. Шонерзэ вераса, ачиз Потапыч но сыӵе вал. Нош берло аръёсы (оло, огназ улэмен-а) чурыт луиз, бускельёсызлэсь палэнскиз. Кемалась, бугрес аръёсы, выль улонэз утён понна, Игнатий Потапович, ас мылкыд каремезъя, Горд Армие кошкиз. Граждан ожлэн фронтъёсаз куинь ар пала ожмаськиз. Тиф но, Колчаклэн пуляез но сое пыд вылысьтыз ӧз погыртэ. Гуртазы колхоз кылдыку, нырысьёсыз пӧлын отчы Потапыч но гожтӥськиз. Бускельёсыныз ӵош арысь аре гыриз, кизиз, араз, уно пудо гидъёс лэсьтылӥз... Пересь нош ик учке пиезлэн фотокарточкаез шоры. Коляез сое малы ке но пыкылэ кадь потэ. "Егит ке но, чупрес нылаш клубзылэн кивалтӥсез шуонзы, - ас понназ малпа пересь. - Колялэн но, оло, сыӵе ик нылыз луысал. Фу, лыктэ ведь йыре олома но: пересь визь бере, пересь визь ини... Одӥг-кык нуналлы сёт вылэм та баянэз... Тӥялозы. Жалясь уз луы". Потапыч куалекъясь киосыныз баянзэ шыкысысь поттӥз но ӝӧк вылэ пуктӥз. Восьтэтэсь чиньыосыныз бирдыоссэ зӥбиз. Баян шулдыр куаразэ сётӥз. Дӥсьсэ воштыса, гадь бордаз юлтошсэ сюлмысь ӝиптӥз но ураме потӥз. Оля Галкина ӧз ик шӧды Потапычлэсь клубе пыремзэ. Ӵап кин ке но шумпотыса вазиз: "Учке ай, Потапыч баянэныз лыктэм". - Галкиналэн бамъёсыз шумпотэменыз гордэктӥзы. Интыысьтыз тэтчыса кадь султӥз. Потапыч ӧс дорын сылэ: пужыятэм дэремен, йыраз вашкала гын шляпа изьыямын. - Туж умой. Лыктӥды, иське, пукселэ татчы, - пересез кунултӥз Оля. Потапычез пуктэм бере, баянэз кутыса, сое Володялы сётыны малпа ни вал. - Калленгес, - дугдытӥз пересь. - Со ведь кызьпу туйлэсь кутам песьтэр ӧвӧл, музыкальной струмент. Шудэ но - ӝыт ачим ик гуртам нуо. Володялэн чиньыосыз эктыса кадь ортчизы бирдыос вылтӥ. Егитъёслэн мылкыдзы син куспын воштӥськиз. Потапыч та выль клубазы нырысьсэ пыриз. Соин ик котырак учке, эскере... Бадӟым, чебер юрт пуктӥллям. Огинтыяз пукыны мӧзмыт потӥз, лэся: Володя вӧзы интыяськиз. Баянзэ кузьгес кыскыны шедьтэ ке, пересь солэн кӧтурдсаз мырӟе: - Калленгес: ыж гон уд тугиськы ведь. Пересь пальпотӥсь ымнырын учке концерт дасясьёс шоры. Ваньмыз ас гурт калыкез, нош кин кинлэн нылпиез - тодманы нокызьы уг быгаты. Шоразы учкиз но, нош ик тодаз лыктӥз пиез... Ульчаын бер ӝыт кузёяське ни. Оля уӵерак учкылэ Потапыч пала. "Медаз кошкы на вал таӵе кысык вакытэ", - малпа ачиз. Со куспын пересь интыысьтыз султӥз. Олялэн ымнырыз ик воштӥськиз: нуоз ук со баянзэ, репетиция нош ӵапак ӧраз пыриз вал... - Шунды нюлэс сьӧры ватскиз - мон берто ни, Оля, - вазиз пересь. - Баянме кельтӥсько: клублы сётӥсько... Коля пиме буре вайыса, синпельлы кузьым мед луоз... Егитъёс, эктонзэс вунэтыса, Потапычез ӟыгыръяло, чупало. Шунытэсь кылъёс вераны уг шедьто. Потапыч та учыр бере кык арня но ӧз улы ни. Сюлэмыз, секыт висёнэз вормытэк, жугиськемысь дугдӥз. Нош кузьмам баянэз егитъёсты ялан шулдыртэ на. Митрофан Мосов. Шӧкыч Парсь куштӥзы Сиён-юон вузась фирмаос пӧлын тужгес кужмоез - "АСПЭК". Зэм, со но юмоке усиз. Фирмалэн Сарапулысь базаяз Америкаысь 200 тонна парсь сӥль ваизы. Нош вузаны уг луы. Россия Федерациысь Ветеринарияя департамент юн курон пуктӥз: палэнысь ваем сӥлез колбаса кароно. Сӥль поттон комбинатын кыдёкысь парсез кулэ уг каро. Уго та вакытэ отчы сӥль вуэ хозяйствоосысь но нимаз азбаръёсысь. Н. СЕМЕНОВ. Шамарданлэн шыкысысьтыз Кызьы вераллями ни, Пересь шамардан шуыса 20-тӥ-30-тӥ аръёсы газетъёсы гожъялляз журналист Петр Усков. "Гудыри" газетын ужакуз ик, со кутскиз "капчи кылбуръёссэ" гожъяны. "Капчи кылбур" - со удмурт литератураын аспӧртэмлыко жанр яке рифмаям прозаен гожтэм фельетон. Та нуналъёсы П. М. Усковлэн вордскемез дырысен тырме 110 ар. Петр Усков вордскиз 1888 арын 20 декабре туала Игра ёросысь Зура черкогуртын. Ужаз "Гудыри" газетын. Бӧрысь агроном но дышетӥсь луыса тырше. П. М. Усков висьыса 1939 арын кулэ. Зуриын табань сиизы. Собере Глаз каре куное мынӥзы. - Э-э-э, Зурие, Зурие! Бадӟым сюрес вылын тон пукиськод, котькыӵе калыкез адӟиськод, аслыд визь но люканы быгатӥськод. Озьы вал мынам малпаме. Табере адӟисько пӧяськемме. Егитъёс татын урмемын, ымныръёссы кормамын, анлыоссы вольтчытэмын. Юонэз соос туж ярато, жугиськыны но быгато. Кудӥз тӥрен-пуртэн, кудӥз гираен-молотэн ветло. Шоразы учкыны шурдыт, пумитазы шедьыны кышкыт. Зуриысь егитъёс, мунчо су сурасьёс, коштанъясько, йӧнъясько, трос тодэменызы ушъясько. Кылъёссы вольытэсь, ужъёссы кышкытэсь. Газет лыдӟонэз вунэто, кудӟеменызы уйбырто, табань сиёнэн даурто. Зури бордысь Кукъямес уте на вуж сяммес. Зури егитъёс но адӟем кариллям, Тупалгуртъёсыз куное ӧтиллям. Пыжо табань, кумышказы но вань. Сельпо лавкаез бушато, ӝӧкъёсыз лавка сиёнэн тырмыто. 53 пӧртэм сиён дасяллям, починка калыкез паймытӥллям. Озьы зуриос табань сииллям. Куноос лыктӥзы, егитъёс люкаськизы. Табань сиё, вина юо. Собере кутскизы даллашыны, куспазы керетыны. Мыжыкъёссэс сэзъялто, озьы кунооссэс утялто. Кудзэ тышкало, кудзэ мыжгало, дэремъёссэс кесяло. Тужгес ик ортчыт вырем отын Ярча Трик. Собере Петруньёслэн Сергейзы, Гыжымъёслэн Яшказы, Карпа пи Никандр но Костян, Гонда пи Олексан, Усконойёслэн Васязы, соослэн ик Олёшказы. Ваньзы кудӟиллям, куспазы жугиськиллям, анлыоссэс вольтчытӥллям. Кӧня ке улыса, яраоссы бурмыса, кенешиллям уръяськыны, тупаса улыны. Ужзылэн кутскемез ушъямон, нош пумыз ке - курламон. Уръяськонэз юнматыны кутскиллям нош юыны. 3 черык басьтыса, ваньзы люкаськыса мыно Петрунь Сергей доры. Пуксё ӝӧк сьӧры. Кумышказэс юо, жугиськемзэс буре ваё. Нош шедьто визь-кенеш, жугыны Петрунь Сергеез. Соиз визьмаськем, юонысьтызы палэнскем. Юыса кумышка быриз. Мылкыд нош жугиськоно кадь луиз. Петрунь Сергей ватскемын. Кинэ жугыны эшъёсы паймемын. Тубо гурезь йылэ, пумаз ик Сюбйылэ. Юсканай Вася доры пыро, кумышказэ солэсь куро. Отын олокӧня юиллям - уг тодӥськы, нош Васялэн мӧляяз куинь пол молотэн шуккиллям - сое уг ватӥськы. Отысь потыса, кудӟеменызы шонаськыса, гурезь уллань васько, Бунянь Романэн пумисько. Кутскизы котыраз, мыжганы туртто йыраз. Маялляло горд тушсэ, дэймыто кышнозэ. Паймиз Романмы, кутскиз йырзэ корманы. Вань кужымзэ люкаса, Ыты шурез ваменак выже коласа. Романлэн дӥсез котмиз, со понна йырыз мозмиз. Азьпала мыно та егитъёсмы, Зуриысь хулиганъёсмы. Кенешысь калык пӧлы вуизы, нош жугиськыны кутскизы. Милици но отын сылэ, жугиськемлэсь алэ. Уг кыло солэсь алэмзэ, револьвереныз но ыбемзэ. Итымын кутсаськем кадь выро, огзэсты огзы мыро, ӝушто, шокчо, пель доразы сальыса погырто, пограмъёсыз вылын экто... Милицалы но пумит карисько, со шоры кесясько. Кудӥз шуэ - мать!... "не имеешь право арестовать!" Милица соослэсь кылзӥськымтэ, жугиськисьёсыз арестовать каремлэсь кельтымтэ. Собере "дознани" лэсьтыса, ужзэ ӝоген быдэстыса, судьялы сётӥз. Сыӵе милицамы милям етӥз. Ужен судья тодматскиз, возьматон суд лэсьтӥз. Таӵе жугиськись егитъёсыз, йыртэмась хулиганъёсыз, калык азьын возьытэ вуттоно, соосыз визьматоно. Трос лыктӥзы учкисьёс, Зуриысь калыкъёс, егитъёс но пересьёс, кышноос но нылъёс. Табань сиисьёсмы гордэктэмын, табань кадь ик ӵыжектэмын. Калык шоры учкыны возьдасько, приговорез кылзыны дасясько. Судья лыдӟе приговорзэ: "Именем Ре-Сэ-Фе-Сэ-Ре... Зуриысь егитъёслы, 7 мурт табань сиисьёслы, калыкез курдатыса, куспазы жугиськыса улэмзы понна, йыруж законлэн статьяез шымыртэ быдэн одӥг но ӝыны арлы соосыз тюрьмае пуктэ". Озьы Зуриысь егитъёсыз, сизьым мурт хулиганить карисьёсыз, ыжъёсыз сямен келязы, Глаз карлэн тюрьмаяз пытсазы. Куректо куанеръёс, синмазы синвуос. Гуртъёсын егит пиос но нылъёс куспазы шудо. Тюрьмаын пукисьёс урбоосыз сюдо. Калыклэсь но возьыт, нылъёслэсь но мӧзмыт. Ӟеч пуке эшъёсы, калыклы синазькыль луонъёсы. Пукиды ке - визьмаськоды, юондэс- жугиськондэс куштоды. Бертӥды ке гуртады, ӵемгес ветлэ лыдӟон коркады. Отын книгаос- газетъёс вань. Соку кулэ уз луы тӥледлы табань. Табань сиыны ческыт но, солэн бервылыз кышкыт. Книга-газет ке лыдӟиды, йырады луоз визьды. Эн лекатэ монэ, пересез. Кылбуръёсы луозы тӥледлы перепеч. Шамардан. (Нырысьсэ печатласькиз 1927 арын 19 октябре "Гудыри" газетын). Югдур Йӧлтэк нӧкы уд шуккы 1. Кин сииз вӧез? Россия номырлы ёрмытэк, черодъёстэк улыны дышемын ӧвӧл. Магазин ӝажыосысь я майтал, я тамак, я сахар "ыше", нош таиз дефицит шуон кутскиз скал вӧй бордысен. Шодтэк шорысь солэн дуныз 2-3 поллы вылӥе тэтчиз. Ижысь магазинъёсын килограммез али сылэ 60-67 манетэн, базарын 70-озь вуэ. Скал вордӥсь понна шумпот вылэм, солэн но "ульчаяз праздник вуиз" шуыса, но бодылэн вань на мукет палыз: туала вакытэ та быдӟа дунын кин гинэ вӧйын нянь сиёз на меда? Вӧй пумысен юанъёс ӝутскизы ни вал Кун Кенешлэн кызь кыкетӥ сессияз. Депутат В. Л. Фридрих республикалэн кивалтӥсьёсызлы соку меӵак вазиськиз: - Малы нылпи садъёсы вӧй сётэмысь дугдэмын, кытчы пыриз 450 тоннаем запас? Депутатэз буйгатӥзы, вӧйлы Удмуртия уз ёрмы шуыса, но шонер валэктон нокин ӧз сёты. "Шунам" сиёнлэсь пумзэ-йылзэ берлогес шараяз гурт хозяйствоя но сиён-юонъя министр В. И. Жуйков. Журналистъёсын пумиськон дыръяз со вераз: толлы дасяса кельтэм вӧй быдэсак келямын пунэмаськемъёсты тырон понна. Валамон: вуж дунъёсъя. Министрлэсь кылъёссэ юнматӥз Кун Кенешысь ялан ужась комиссилэн тӧроез А. Т. Малков но. Аркадий Трофимович пресс-конференциын шуиз: - Сентябрьлэн пумаз вӧй запасмы 730 тонна вал, палэнэ келямын 400-лэсь ятырез. Вӧй поттӥсь заводъёс али ужало госзаказъя, продукцизы мыноз нылпи учреждениосы, больницаосы но куд-ог музон интыосы. Югдур уродмиз ке, калык понна, оло, нош ик талонъя вузано луоз. Республикаез шуг-секытысь поттонъя чакламын пӧртэм ужрадъёс, кылсярысь, Вологда областьысь вӧй басьтон. Вуоно арын нырысетӥ кварталэ югдур тупатскоз шуыса, оскон вань. Котьма ке но, огшоры адямилы ваньмыз со валантэм: фермаос нуналлы быдэ ужало, молокозаводъёс но, продукцилы ёрмыса, тэк уг сыло. Куд-огез шуэ: азьвыл сярысь, пе, йӧл ӧжытгес кыскиськом, пудоос висё, жалем сиён тырмыт уг шедьы. Мугзэ тодон вылысь ветлоно кариськи Завьялово районысь "Путь Ильича" колхозэ. Скал уллёзы татын 550 йыр. Возьман интызы ӧвӧлэн, пудоез тол но, гужем но фермаын возё, нуналлы быдэ сиён вортто. Лагерьёсы поттэм сярысь, со шӧдскымон дуно усе. Хозяйствоысь валтӥсь экономистлэн Светлана Петровна Чувашовалэн арифметикаез мукет, туннэ кылдэм югдуръя но ас сяменыз валэктон сётэ: - Продукцимылы дун будэтэмлэн мар-о пайдаез? Йӧлын ӵош дуноязы эстӥськон, техникалы воштос ёзъёс. Гурт калыкез одӥг киын ӝуто, кыкетӥеныз зӥбо. "Путь Ильича" кыскем йӧлзэ ачиз пакетъёсы тыре, ачиз вӧй но шукке. Огъя вераса, поттэм продукциезлы - быдэсак кузё. Вань "Ижмолокоен" огкылэз но. Арня нуналэ кыскем йӧлзэс отчы келяло. 1 литръем пастеризовать карем йӧл пакетсэ хозяйство туннэ вуза 2 манет но 40 копейкаен, городысь магазинын со 3 манет сылэ ни. 20 сентябрёзь гуртоос 1 манет 80 копейкаен вузазы. - Укмыс толэзь ӵоже литр йӧллэн асдуныз, шорлыдын вераса, 1 манет 3 копейка луиз, пастеризовать карем понна ватсалэ на 24 копейка. 1 килограмм вӧй лэсьтыны мынэ 25 литр йӧл. Вӧймес гужембыт 16 манетэн вузам, озьы но басьтӥсез умой-умой ӧй вал, али 30 манетэн келям. Туала закупочной дунъёсъя учконо ке, вӧй 40 манетэн сылыны кулэ. Вузкарись организациос та дунэз 25 процентлы будэто на. Озьы ке, магазинын вӧй 50 манетэн сылыны кулэ. Сыӵе арифметикаез колхозысь экономистлэн. Та лыдлпусэз ик вераз А. Т. Малков. Озьы бере, малы магазинын килограмм вӧй 67 манетозь вуиз? Журналистъёслэн юанзылы Аркадий Трофимович шуиз: - Дунъёсты эскерыны-чакланы кулэ выт октӥсь ёзъёс. Выт октӥсьёсмы вӧйын нянь уг, дыр, сиё, яке уждунзы вылын ӧзгес шӧдӥськы на сиёнлэн кык-куинь пол дуноямез. Таӵе малпанэ вуоно, магазинъёсы пыраса. Нош "Путь ильича", ужасьёссэ утён вылысь, продукцизэ ас калыкезлы кык пол дунтэмен вуза. Выль арозь котькудӥз семья быдэн 2 килограмм нӧкы вӧй басьтоз. Сыӵе кузьымлы но туэ шумпотод! Йӧл сярысь ке верано, та нуналъёсы колхоз скаллы быдэ 10,4 литр кыске, кылем арен ӵошатыса, кӧнялы ке ятыргес. Ар йылпумъяськытозь чаклало йырлы быдэ 4200 литр басьтыны, миым та лыдпус 4060 вал. Республикая 11 толэзь ӵоже шорлыдын вераса кыскемын 2610 литр, кылем арын та вакытэ ик - 2326. Туннэ скаллы быдэ лыктэ 5,1 литр, кылем арын та нуналъёсы кыскизы 4,7 литр. Озьыен, йӧл будэ. 2. Обозъёс кошко Центре 17 август асьмелы уродзэ гинэ ӧз вайы. Ӵапак та шуккет куд-огезлы тодаз вайытӥз: Россиысь крестьянъёс но картофка, бакча сиён будэто, гуртъёсын пудо вордо на. Кунгож сьӧрысь кубиста, сӥль но мукетсэ басьтыны уго доллар дуноямен, вайыны табере вормонтэм. Тӥни малы Удмуртилэн пыдлось сэрегъёсаз но вазь сӥзьыл ик вуизы картофка но сӥль утчасьёс. Нырысьёсызлы удалтӥз: коньдонлы ёрмем гуртоос дунтэм дунын сётӥзы вань будэтэмзэ-вордэмзэ. Таизлы но шумпотӥзы ни, басьтӥсь шедиз шуыса. Отӥяз дунъёслэсь шуак ӝутскемзэс адӟыса ӝожомизы но - бер вал ни. Картофкаез нырысь-валысь нуизы 60-70 копейкаен, сӥлез - 12-13 манетэн, али "кыкетӥ няньлэн" дуныз вуиз 2 манетозь, нош сӥль базарын сылэ ни 27-29-эн. Асьмеос гинэ таӵе юмоке ӧм шеде. Шаплыгес вузчиос-предпринимательёс ортчизы вань улосвылъёстӥ. Соос кивалтӥсьёсмы сярысь ӝоггес валазы сютэм толлэсь вуэмзэ. Гуртъёсысь дунтэм дунын октэм сӥлез, картофкаез Москвае но музон интыосы олокӧня полэс дуноятыса вуттӥзы. Рынокен ужан амалъя ваньмыз шонер: амалоез амалтэмез чотын узырме. Крестьян калыклэн курыт пӧсям вуэз вылын кисыоссэс тырмыто туала купецъёс. Соос ик дунъёсын шудо, политикаез лэсьто. Россия Федерациысь Кун Думалэн ӧтчётысьтыз: "Россилэн экономикаезлы инкуазь туж бадӟым изъян ваиз. 40 миллион гектар вылын юос сутскыса быризы. Таин валче 17-20 миллион тонна ю тысь ыштэмын. Кутсамез ог 60 миллион тонна люкаськиз. Ӵошатон понна: 70-тӥ-80-тӥ аръёсы 105 миллион тоннаозь няньмы люкаськылӥз. Ар секыт, сое нокин уг ваты. Удмуртия но туэ кык поллы ӧжыт тысь кутсаз. Озьы бере, вань удалтэмзэ но малы дунтэм дунын палэнэ келяськом? Журналистъёслы шуо, тӥ, пе, юнме шорысь югдурез лэчытомытӥськоды, картофка но кубиста асьмелы сиыны тырмоз. Но со дыре ик самой соослы дунъёс толэзь ӵоже кык поллы ӝутскизы ни. Нош ма луоз тулыс? Сӥль сярысь ке верано, югдур вӧйын огкадьгес луоно. Тае пусйиз Кун Кенешлэн Агропромышленной удысъя, музъем кусыпъёсъя но инкуазь узырлыкъёсты кутонъя комиссиезлэн тӧроез но. Гуртын улӥсьёс мултэс пудозэс, басьтӥсь шедьыку, вожмаськыса вузаны выро. Соослы шаермылэн экономикаез сярысь малпаськыны ноку, семьязэс вордоно, учыр тупаку, коньдон поттоно. Парсь, скал, ӟазег будэтыны уго гурт калыклы нокин уг юртты. Музъеммы арысь аре пашме, асьме дорын гинэ уг, Кубань палъёсын но кесэген-кесэген жаг турынэн шобырске. А. Т. Малков верамъя, Удмуртиын ог 80 процентэз гыроно-кизёно муос умой-умой утялтэмез кулэ каро. Соос али вуз интыын кыллё, нош вузаны-басьтыны закон уг лэзьы. АПК-лы чакламъя ар ӵоже самой ӧжытсэ кулэ ке вал 17,6 миллион манет, висъямын 2,3 миллион. Амалтэк юан кылдэ: ма вылын соку возиське на гурт хозяйство? Калыклэн чиданэз но уждун басьтытэк ужаны дышемез вылын. Мукет сямен тае уд валэкты. Лужков Иже кунояны ӧз ветлы Москвалэн мэрез 17-тӥ августозь ик шӧдӥз югдурлэсь кудпала берытскемзэ. Кредитъёслы, кунгож сьӧрысь поттэм сиён-юонлы оскытэк, со ачиз ортчиз Россиысь регионъёстӥ, ӵош ужан сярысь огкылъёс гожтыса. Та муген ик вуылӥз Ижевске но. Кызьы гожтэ "Российская Федерация сегодня" журнал, Москвае ваем сиён пӧлысь ӝыныез - импорт. Москвичъёс пӧлысь данакез валазы ни: асьме дорын будэтэм продукцилэсь ӟечез ӧвӧл. Картофка, колбаса, сӥль басьтыны тыршо Россилэн улосвылъёсысьтыз вуттэмзэ. Гурт хозяйстволы юрттон вылысь, таяз арын столица интыосы 250 миллион манет келяз, кидыс, удобрение басьтыны, теплицаос лэсьтыны шуыса. 60 процентсэ картофкаез Москва туэ басьтэ Урал но Волга котырысь (татчы шеде Удмуртия но), 40 процентсэ - Подмосковьеысь. Озьы бадӟым рыноке шедьыны луонлык усьтӥськиз асьме музъем ужасьлы. Соин ӵош тодамы ваём валля аръёсты но. Соку Москвалэн азьвыл мэрез картофка басьяз Польшаысь, асьмелэнэз му вылаз сисьмиз. Мар ватонэз: Ижевск но кунгож сьӧрысь ваем кубиста вылын толйиз, "Родина", "Правда", "Ижевский" совхозъёсты палэнтыса. Табере югдур воштӥськиз: Москва берытскиз асьме колхозъёс, эштосъёс пала. Ростов, Самара, Астрахань, Рязань, Тюмень, Якутия, Удмуртия, Мордовия, Белоруссия, Украина, Молдавия... Та улосвылъёсын гожтэм огкылъёсъя столицае вуэ сиён-юон, узырмо магазинъёс. Озьыен, секыт ар Москвалы кышкыт ӧвӧл, долларлэн дугдылытэк "веттаськемез" басьяськисез сокем уз шуккы ни. Городлэн кузёез калыкез сярысь дыраз сюлмаськиз. Та амал выльысь берытскоз но пыӵалоз, дыр, Ижевске но. Бушам овощебазаос, азьвыл аръёсы сямен, нош ик тырмозы асьме шаерамы будэтэм картофкаен но бакча сиёнэн. Базарлы гинэ оскиськыса улыны уго секыт: дунъёс ар ӵоже олокӧня пол кутскыса пӧртмасько. Туала ар асьмеды трослы дышетӥз но дышетоз на. Людмила МЕДВЕДЕВА. "Котырес ӝӧк" сьӧрын Ижын дышетско городъёсысь но районъёсысь администрациослэн кивалтӥсьёссы. Валлян, 9 декабре, соосын пумиськиз Павел Вершинин. "Котырес ӝӧк" сьӧрын вераськонэ пыриськизы Правительстволэн Тӧроезлэн воштӥсьёсыз. Отчы озьы ик ветлӥзы "Удмуртэнерго", "Межрегионгаз", "Удмурттелеком" огазеяськонъёслэн кивалтӥсьёссы, куд-ог министръёс но выт бичась ёзъёслэн кузёоссы. Пумиськонын рос- прос учкемын электрокужым, газ сётонэн, связез азинтонэн, му вӧй поттонэн герӟаськем ужпумъёс. Ӟырдыт вераськон мынӥз социальной удыслы уждун тырон, арез йылпумъян но мукетыз сярысь. Туннэ ог-огдэ валаса ужан, ог-огедлы юрттон бадӟым кужым сётэ. Со та пумиськонын но шӧдӥськиз. Эстӥськон сётӥсь удысъёслэн кивалтӥсьёссы югдурез валаса вераськизы. Но сюлэмшугъяськытӥсез трос на. Тани Сарапулын урод мынэ юртъёсты шунтон но пӧс ву сётон. Нош "Удмуртэнерго" АО-лэн валтӥсь тӧроезлэн воштӥсез Николай Скворцов меӵак шуиз, ми, пе, электрокужым сутэм понна тыронъёсты 30 процентсэ гинэ улэп коньдонэн куриськом, кылемез пунэм тыронъёсты берыктон амалэн ортче. Сыӵегес ик мылкыдыз "Межрегионгаз" ёзлэн кивалтӥсезлэн Виталий Возисовлэн. Но со пусйиз, азьланьын арысь аре, пе, газ сётон кулэсмоз. Россиын, зэмзэ но, "чагыр" эстӥськон поттон ялан синэ. Но котькыӵе секыт югдур мед луоз, производствоез дугдытыса но адямиослы газ вуоз, пусйиз Павел Вершинин. Шаерамы связь умой азинске. Та удысын берло дыре трос лэсьтӥське. Но "Удмурттелекомлы" тыронъёс пумен йыло, 114 миллион манетлэсь ортчиз ни. Озьы ке но, связистъёс выль тӥрлык басьто на, нош тарифъёссэс кемалась ӧз вошъялэ ни. Али квартирае телефон пыртыны 1000 манет тыроно, нош толэзяз - 20 манет. Г. РОМАНОВ. Вамыштоно ке, мед кылёз пытьы Удмурт егитъёслэн "Шунды" дэменлыксылы 21 ноябре тырмиз тямыс ар. Талы сӥзьыса, 4 декабре ортчиз "котырес ӝӧк" сьӧрын пумиськон. Удмурт егитъёслэн азинсконъёссы, лэсьтоно ужпумъёссы но шуг-секытъёссы сярысь вераськонэ пыриськизы "Шунды" дэменлыклэн правленияз быръемъёс, студентъёс, "Шундыкар" лагерьын ужась специалистъёс. Ас малпанъёссэс но мылкыдъёссэс озьы ик веразы Удмурт Республикаысь Кун Кенешлэн Кун ужез радъянъя, нациос куспын политикая но ас коже кивалтонъя комиссилэн тӧроез Юрий Семенов, Егитъёсын ужанъя кун комитетлэн кивалтӥсез Андрей Гальцин, "Удмурт кенеш" огазеяськонлэн тӧроезлэн воштӥсез Валерий Митрофанов, удмурт культурая "Дэмен" огазеяськонлэн кивалтӥсез Альберт Разин, шаерысьтымы егитъёслэн огазеяськонъёссылэн куд-ог азьветлӥсьёссы. Мар вераны луоз туннэ нуналлы "Шунды" дэменлык сярысь? Кылдэм аръёсыныз ӵошатыса со кыдаз, паськытаз. Туннэ нуналлы усьтэмын ни кызё пала ёрос ёзъёсыз. Нош нырысь- валысь дэменлык чакла вал Ижевскысь егитъёсты огазеяны, дискотекаос, пумиськон ӝытъёс ортчытъяны. 1992 арысен удмурт егитъёслэн дэменлыксы Финн-угор егитъёсэн ассоциациязы (МАФУН-э) пыриз, та огазеяськонын но со одӥгез азьветлӥсез луиз. "Шундылэн" кичӧлтэмезъя, 1994 арын Ижевскын ортчиз "Егитъёс но финн-угор дунне" калык куспо конгресс. Отын пусъемын вал егитъёс азьын сылӥсь валтӥсь ужпумъёс, кудъёсыз туннэ нуналлы, азьпал аръёслы но сюрес возьматӥсь выллем луо. 1933 арысен кутскыса, трос уж лэсьтэмын шаерысьтымы усточи но быгатӥсь нылпиос понна, бадӟым классъёсын дышетскись финн-угор нылпиос лагерьёс радъянын. Пусйымон соиз но, табере шундыос ас понназы гинэ уг "пӧзё". Егитъёсын ужанъя кун комитетын нылпиослэсь но егитъёслэсь огазеяськонъёссэс огъясь центр кылдытэм дырысен эшлыко кусыпъёссы пумен юнмало "Солнцеворот", "Долг", "Иман", "Родники" но мукет огазеяськонъёсын. Но озьы ке, "Шунды" дэменлыклэн куке но зол пиштӥсь югытлыкез сайяськиз. Шундыос асьсэос но сое валало. Малы уг луы азьлань вамыштэмзы? Мар кароно, шуг-секытъёсысь потон понна? "Котырес ӝӧк" сьӧрын пумиськонэз но радъязы, выль вамышлы сюресъёс утчан понна. Но та нуналлы дась рецептъёс нокин уз сёты. Калыке потано, егитъёсын кенешоно. Кивалтон удысэ быръем муртъёслы асьсэлы юнгес кариськоно, саесъёссэс пужалляса ик уж борды кыстӥськоно, выль сямен ужан амалъёс утчано. "Удмурт кенеш" огазеяськонлэн тӧроезлэн воштӥсез Валерий Митрофанов шундыосты пыкылӥз огазьын ужаны мылкыдтэкгес пыриськемзы понна. Калыкен огъя пумиськонъёс ортчытыку, куд-огаз ёросъёсын нырысьсэ, пе, адӟизы егитъёслэн дэменлыказы быръемъёсты. Бен, ёросъёсын ужез шундыослы ӟечгес радъяно вал интыысь ёзъёссы пыр. Али уг шӧдӥськы соослэн ӝутскем мылкыдын ужамзы. Та пумысен вераськон ӝутскиз "Шундылэн" кенешаз быръемъёслэн 3 декабре ортчем пумиськоназы но. Юрий Семёнов егитъёслы индылӥз та секыт вакытэ асьсэлы рос-просгес кариськыны, бюджетысь коньдонлы оскиськыса гинэ улыны табере уг луы. "Пайдаё ужлы быгатоно астэ быдэсак сётыны - "ваньмыз уг вузаськы, ваньмыз уг басьтӥськы", - шуиз со. Пионер, комсомол вакыт ортчиз ке но, шундыослы та пумысь но малпаськытэк уз луы, дыр. Утчано, котыразы огазеяно зэмос азьветлӥсьёсты. "Котырес ӝӧк" сьӧрын споръяськон ӝутскиз, кулэ-а "Шунды" дэменлыклы политика ужпумъёсы пыриськыны. Та пумысен Андрей Гальцинлэн одӥг малпанэз: - Политика - со кивалтон понна нюръяськон, соин ик егитъёсты со шудонъёсы кыскыны уг яра, "Шунды" - со общественной организация. Озьы ке но, котькуд адями улон шоры ас сяменыз учкыны быгатэ. Зэмзэ но, политика ӵемысь кырсь киосын лэсьтӥське. Соин ик, кулэ меда шундыослы та уже йырынызы выйыны. Егитъёсты иземысь сайкатон, огазеян, культура удысэз азинтон, ас калыктэ, кылдэ гажан мылкыд пыӵатон - со сыӵе ик бадӟым уж. Но обществоын, калык пӧлын улыса, политика егитъёслэн палэнтӥзы уз ортчы. Соослы ужано, улоно луоз ук асьме кунын. Бадӟым улонэ вамышъёс лэсьтыны егитъёслы одно дышетсконо, медаз ыше соос вуберганлэн мур кожаз. Л. Малых. "Котырес ӝӧк" сьӧрын пумиськон. Туспуктэмез В. Камашевлэн. БУСКЕЛЬЁСМЫ ДОРЫН Калык тодытэк уг вера Куддыръя, огшоры калыклэсь шонер но лэчыт верам кылъёссэ кылыса, мар вераны ик паймиськод. Тани милям Бигер шаерысь Балтаси ёросысь калык пӧлын "поле чудес" шуэм туннэ котькинлы тодмо луиз. Ӧвӧл, вераськон арнялы быдэ Лёнька агаен нуэм тодмо телепередача сярысь уг мыны. Ёрослэн центраз берло кык-куинь аръёсы гинэ пӧртмаськем выллем ӝог кылдэм урамъёс сярысь озьы верало. Ма, шуоды, озьы лэсьтӥськыны быгатэм бере, шумпотыны гинэ кулэ ук. Озьыез озьы, дыр, нош та учыре одӥг "но"-ез вань. Та урамъёсын огшоры ужась калыкен лэсьтэм юртъёс лыдъямон гинэ. Соос - уноез "улыны быгатӥсьёслэн", "выль бигеръёслэн", кивалтон ужен вырисьёслэн. Берло дыре сыӵегес ик "поле чудес" кылдыны кутскиз Балтасилэн мукет пумаз но. Омырын кужымзэс мертало Алигес гинэ чалмизы Балтаси черкогурт вадьсын планеръёсты омыре ӝутъясь пичи самолётъёслэн куараоссы. Гурт дорысь гурезе интыяськемын аэродром. Отын ужа "Татарстан" авиационно-спортивной клуб. Вазь тулысысен бер сӥзьылозь татын асьсэлэсь устолыксэс волято быдэс республикаысь планер спортэн вырисьёс. Туэ гужемлэн пумаз татын ортчизы Европалэн кубокез понна ӵошатсконъёс. Отчы пыриськизы Россиысь самой кужмоосыз спортсменъёс. Соос сяна, ӵошатсконъёсын кужымзэс мертазы Германиысь куноос. Европалэн уно пол чемпионэз Александр Сильванович верамъя, Балтасиысь та аэродром ӵошатсконъёс но тренировкаос ортчытъян понна Россиын одӥгез устоез луэ. А. КУНАЕВ. Татарстан Республика, Балтаси черкогурт. ВАЛЭКТЭ ЮРИСТ Сэрегез нуэ адвокат Лилия Шкляева Мурт нылпиез вордон Мон вордӥсько куинь нылпи. Кыкез - картэлэсь, куинетӥез - аслам лыдъяськисьтэм пинал. Таизлы 15 арес. Со понна пособие басьялляй банк пыр. Табере банк мукет интые выжиз но, мыным пособие вуэмысь дугдӥз. Малы? Кытчы вазиськоно куронэным? Мукет юан. Картэным браке вань бере, мон лыдъяськисько-а оген анай? Л. ВАСИЛЬЕВА. Можга ёросысь Вылын Юри гурт. Россия Федерацилэн Семья сярысь кодексысьтыз 124-тӥ ёзэт (статья) ас нылпиен лыдъяны (усыновление яке удочерение карыны) лэзе быдэ вуымтэосты, таосызлэсь кулэяськонъёссэс быдэсъян вылысь. Ас нылпи лыдъянэз ортчытэ суд, та ужрадэз радъяны мылкыд карись мурт куремъя. Отчы озьы ик пырисько опекая но попечительствоя ёзъёс (органъёс). 127-тӥ ёзэт вера нылпиез вордыны лэзьымтэ муртъёсты. Тани соос: асьсэ ужпумъёссэс тырмыт быдэсъяны быгатӥсьтэмъёс (суд сыӵе решение кутыку), кузпалъёс пӧлысь огез - ас ужпумъёссэ тырмыт быдэсъяны быгатӥсьтэм мурт, анай-атайлэн правоосызлэсь быдэсак яке ог люкетэзлэсь суд пыр люкемъёс, опекунлэсь (попечительлэсь) ужъёссэ быдэсъянлэсь палэнтэмъёс - законэн тупатэм куронъёсты урод быдэсъямзы понна, нылпиез асьсэлэн шуыса азьвыл лыдъясьёс - янгышенызы сэрен суд соосты озьы лыдъямысь дугдэм бере, тазалыксы лябен сэрен анай-атайёслэсь правооссэс быдэсъяны быгатӥсьтэмъёс. Мурт нылпиез асладэн лыдъян понна, солэн аслаз анай-атаез соглаш кариськемзэс мед вералозы. Соглаш луэмзэс юано ӧвӧл таӵе учыръёсы: зэмос анай-атайёс тодмо ӧвӧл яке суд соосты ивортэк ышемен лыдъя ке, суд анай-атайёсты асьсэ ужпумъёссэс быдэсъяны быгатӥсьтэмен лыдъя ке, суд соослэсь анай-атай луонъя правооссэс тала ке, суд лыдъямъя, анай-атайёс куать толэзьлэсь кема нокыӵе мугтэк нылпиенызы нимазы уло ке яке сое сюдон-вордонлэсь палэнско ке. Дас аресозь вуэм муртэ ас нылпиен лыдъян понна, солэсь соглаш кариськемзэ юано. Сыӵе курон сётытозь, пинал та семьяын улӥз ке, сюдӥсь-вордӥсьсэ аслаз анай- атайёсыз чот каре ке, сое ас нылпиен лыдъяны луоз, соглаш луэмзэ юатэк но. Пиналэз ас нылпиен лыдъям бере, право лыдэ басьтыны куре таӵе учыръёсты: 1. Ас нылпи лыдъяськисьёс но соослэн пиналъёссы - анай-атай лыдъяськисьёс но таосызлэн ӵыжы-выжыоссы ласянь, анай-атай лыдъяськисьёс но таосызлэн ласянь ваньбур пумысен но музон кусыпъёсъя герӟасько одӥг выжыысь потэмъёс музэн. Кылсярысь, ас нылпи лыдъяськисьлы кыле, анай-атай лыдъяськисьёс кулэм бере, таосызлэн ваньбурзы. Ас нылпи лыдъяськись мурт сюдыны-утялтыны кулэ анай-атай лыдъяськисьёсты, таосыз ужаны уг быгато ни ке. 2. Ас нылпиен лыдъямъёс ышто зэмос анай-атайёсынызы но таосызлэн ӵыжы-выжыоссы - ас нылпи лыдъяськисьёс но таосызлэн пиналъёссы ӵыжы-выжыосынызы герӟаськем правооссэс но быдэсъяно ужпумъёссэс (обязанностьёссэс). Но... Шуом, нылпиез асьсэлэн шуыса лыдъян дырозь со басьяз зэмос анай-атайёсыз кулэмен валче пенсия но пособие. Та правозэ уг ышты, сое муртъёс асьсэ пиналэн лыдъям бере но (138-тӥ ёзэт). Малы мон таӵе куронъёс сярысь рос-прос мадисько? Людмила Васильевалэн гожтэмезъя валаны шуг, кин луиськоды тӥ нылпи понна - опекун яке анай, кин солэн зэмос атаез но анай лыдъяськись адямиез. Огназ анай лыдъяське брактэк нуны ваем кышномурт, пиналлэн атаез тодмотэм ке. Соку документъёсы атайлэсь фамиллязэ гожто анайлэн фамилляезъя, атайлэсь нимзэ но атай нимзэ - анайлэн кылъёсызъя (51-тӥ ёзэт). Нылпилы 16 арес тырмытозь, толэзьлы быдэ пособие сётӥське самой пичи уждунлэн 70 процентэз мында. Со 100 процентлы будэтӥське, анай пиналзэ огназ будэтыку, 50 процентлы - анай-атайёс алимент тыронлэсь палэнскыку яке алиментъёсты басьтыны луымтэ дыръя но куд-ог музон учыръёсы. 145-тӥ ёзэт опека тупатыны лэзе 14 аресозь вуымтэ нылпиос понна, попечительство - 14-18 аресъемъёс понна. Россия Федерациысь Калыкез дышетонъя министерство 1993-тӥ арын 16-тӥ феврале юнматӥз 50 номеро приказ. Дышетонъя интыосысь ёзъёсты со косэ опекунъёслы (попечительёслы) коньдон тырыны, вордоно нылпиосты сюдон, дӥсян, кутчан вылысь. Татын лыдэ басьтӥсько тупатэм нормаос но интыысь дунъёс. Сыӵе пособиос тупатӥсько, анай-атайёс нылпиоссы бордысь люкемын ке, асьсэ ужпумъёссэс тырмыт быдэсъяны уг быгато ке, кема висё ке, эриклэсь люкемын ке, алимент тыронлэсь пегало ке. Пособие уг висъяськы таӵе учыръёсы: анай-атайёс нылпизэс сюдыны-вордыны быгато, но ас мылкыдзыя сёто мукетъёсызлы, кемалы командировкае кошкемын, нылпизылэсь люкиськыса уло, но сое утялтыны быгато. Людмила Васильева ас нылпи лыдъяськисьтэм пиналлэн опекунэз (попечителез) ке, пособие пумысен документъёссэ кутыса мед вазиськоз калыкез дышетонъя ёзэ. Куронзэ 15 нуналскын эскерыны кулэ. Солэн музон юанэзлы валэктон печатлалом берлогес. Вавож районысь Мичурин нимо колхозын трос гажано адямиоссы. Тодматске: одӥгез соос пӧлысь Зямбай вукоысь пызь изӥсь Валерий Черняев. Тазьы вераса янгышай но кадь. Валерий Иванович уго кулэ дыръяз ю тысь куасьтӥсь-шертӥсь но, усто сварщик но. Нош тулыс кысык вакытэ сое бусыысь адӟод - вуоно ю-няньлы буй-буй небыт му дасянысь. Озьыен, со котькау колхоз ужлэн "псь гураз пӧзе-берга". Г. ЮСАЕВЛЭН туспуктэмез. ЖУРНАЛИСТЪЁСЫН ПУМИСЬКОНЪЁС Касихинэз ужысьтыз мозмытоно, гожтӥз вал Чубайс Кызьы республикаямы кун ваньбур вузамын но кыӵе ягышъёс лэсьтэмын? Та но куд-ог мукет ужпумъёс сярысь журналистъёслы мадиз Правительстволэн Тӧроезлэн воштӥсез - Ваньбуръя кун комитетлэн кивалтӥсез Сергей Касихин. Люкаськемъёс солы лэчытэсь юанъёс сётъязы. Зэмзэ но, кызьы бен шаерамы ваньбур вузан ортчытэмын? Мар со сётӥз? Кылдытэмын вал Ваньбуръя фонд. Со ужаз Вылӥ Кенешлэн решениезъя, тӧроез С. Касихин ик вал. Туннэ пусйыны кулэ, республикаямы куд-ог бадӟымесь промышленной предприятиос утемын, нош соос федеральной ваньбур луо вал. Отчы пыро Ижысь механической завод, "Ижмаш", Воткинскысь машзавод, ЧМЗ (Глазов), "Аксион", Литейной завод но музонэз. Басьтом тани "Ижмашез". Солэн акциосыз сётэмын Россилы, Удмуртилы но ужась коллективлы. Директоръёслэн кенешенызы кивалтэ Сергей Касихин. Солэн ивортэмезъя, АО-лэн дочерней препдриятиосыз пӧлысь тужгес но секыт югдуре шедемын автозавод. Солэн араз 8 сюрс машина бичамез кинлы бен яралоз. Соин ик та удысэз выльдон вылысь кулэ узыр инвестор-юрттӥсь. Заводлы сётоно уксё, кулэ туала технология но кутсконо выль усто машина поттыны. Сое котькытын мед басьтозы: асьме дорын но, кунгож сьӧрын но. Соку гинэ автозавод пыд йылаз йыг-йыг султоз. Шаерамы трос вераськонъёс мыно му вӧй поттон удысмес, "Удмуртнефтез" ыштэммы сярысь. Шонер-а со? Быдэсак озьы шуыны уг луы. Му вӧй ноку ӧй вал республикалэн ваньбурез, соин котьку кузёяськиз Москва. Та ёзэз вузаку, огазеяськон кылдыку но Россиысь Правительство ас кылзэ юн вераз, 19 процент акциоссэ басьтӥз. Сергей Павловичлэн ивортэмезъя, "Удмуртнефть" АО-лэн 80 процентлэсь уноез акциосыз али "Сиданко" компанилы сётэмын. Кытын но кин киын соос али - нокин но уг тоды. С. Касихин но номыр вераны ӧз быгаты. Ваньмыз, пе, лэсьтӥськиз Президентлэн Указэзъя но Россиын кутэм законъёсъя, ми татын нокыӵе ужрадъёс кутыны ум быгатӥське. Акциосты возисьёсты тодон понна ичизэ, пе, 1 процент акциос аслад луыны кулэ. Тазьыгес ик луэмын связь удысэн. "Удмурттелекомлэн" акциосыз "Связьинвестэ" келямын. Таиз но удыс Россилэн законъёсызъя вузамын. Табере солэн акциосыз Кипре но вуэмын, шуо ни. Россиын куинь толэзь ӵоже туж ӝог вузамын вал кун ваньбур. Нош шаермы та ужен ӧз дырты, соин ик Москваысь А. Чубайслэсь гожтэт вуиз, Касихинэз, пе, ужысьтыз куштоно. Нош туннэ, ваньбур вузамлы дунъет сётыса, йылпумъянъёс лэсьтыса, та ужын, зэмзэ но, трос янгышъёс лэсьтэмын. Нырысь ик со герӟаськемын ваньбурез аукционъёс пыр вузамтэен. Соин валче ваньбур вузамлэсь бюджетэ ичи коньдон вуиз. Ӵемысь луоноез но ӧз быдэсъяськы. Ӵапак озьы луиз Дэбесысь "Лекма" предприятиен. Нош со дыре ик Ижысь литейной заводлы юрттӥсь-инвестор шедиз, озьы предприятие азинскон сюрес вылэ султӥз. Но, жаляса верано луэ, таӵеез туж ичи. Тани тодамы ваём калыклы бытовой юрттэт сётонэз. Та удыс огсыр ужаз, бытовикъёс кӧня ӟечсэ лэсьтӥзы. Но удысэз куашкатӥзы, министерствоез быдтӥзы. Малы? Азьло предприятиосты интыослы сётӥзы, муниципальной ваньбур каризы, собере - вузазы. Тӥни кыӵе капчиен быдтэмын вал, шуыны луоз, быдэс удыс. Эшшо одӥгзэ вераме потэ на. Глазовысь "Удмуртская" тылобурдо вордон фабрика гуньдэмын ни вал, шуыны луоз. Но предприятилы нош ик сюриз юрттӥсь. Акциосын огазеяськон вакчи дыр куспын сӥль но курег пуз поттонзэ 1,5 поллы будэтӥз. Пресс-конференциын озьы ик вераськон ӝутскиз "Сиданко" компанилэсь акциоссэ басьтон сярысь. Татын кӧня ке амалъёс вань. Одӥгез, музъем узырлыкез-му вӧез ваньбурлы кароно но сое поттонлы право басьтоно. Кыкетӥез, нефть поттӥсьёслы висъям интыосты (музъемез) уставной капиталлы пӧрмытоно. Но со понна Музъем кодексэ воштонъёс пыртоно луоз. Правительство та ужпумъя ужа. Кун комитет азьын тужгес но бадӟым ужпумез - ваньбурен кивалтонэз умоятон. Со асьмелэн ляб интымы. Ваньбурез пайдаё кутыны дышетсконо. Али тани кӧня йылаз-пумаз вуттымтэ улон коркаос, производственной юртъёс. Лэсьтэмъёсыз но буш кыллё. Кыдёке ветлонэз ӧвӧл, Полиграфкомбинатмылэн складэз тырттэм улэ, сое басьтӥсь но ӧвӧл. Сыӵе ваньбурмы вань Глазовын но Сарапулын, Можгаын но Воткинскын, но тужгес трос Ижевскын. Пуктэмзэ-ӝутэмзэ но ужатыны ум быгатӥське. Нош бадӟымесь промышленной предприятиосын кӧня ужан интыос бушамын, цехъёсын дуно тӥрлык сылэ, станокъёс гуньдэмын кадь, конвейеръёс оло бергало, оло уг. Ваньбур тыро-пыдо ум поттӥське, адямиос дыраз уждун уг басьто. Ваньмыз - огеныз люконтэм бугор кадь герӟаськемын, нош ваньбурмес бергатыны ум дышетскиське. Геннадий Романов. Россия Федерацилэн кун наградаосыныз пусъён сярысь Россия Федерациысь Президентлэн Указэз Кун азьын вормонъёссы, калыкъёс куспын эшъяськонэз но ӵош ужанэз азинтонын бадӟымесь азинсконъёссы, культура но искусство удысын кема аръёс но пайдаё ужамзы понна пусъёно: Почёт орденэн" Поздеев Петр Кирилловичлы - писательлы, Удмурт Республикаысь писательёслэн огазеяськонзылэн "Кенеш" литературно-художественной но общественно-политической журналлэн редакциысьтыз отделлэн редакторезлы; Эшъяськон орденэн Коробейникова Надежда Кузьминичналы - Удмурт Республикаысь Правительстволэн Архив ужъёсъя комитетэзлэн председателезлы. Искусство удысын вормонъёсыз понна "Россия Федерациысь дано художник" сӥлы карон ним сётоно: Русских Анатолий Тихоновичлы - художниклы, Удмурт Республика. Москва, Кремль 1998 арын 14 ноябре � 1390 Россия Федерацилэн Президентэз Борис Ельцин. Кун Кенешлэн Президиумаз Ортчиз Кун Кенешлэн Президиумезлэн заседаниез. Отын учкемын но юнматэмын вуоно 23- тӥ сессие поттоно ужпумъёс. Соос 22 пала люкаськемын. Азьвылаз сессиын сямен ик, таяз но кенешын депутатъёс ужалозы законъёслы инъетъёсты кутон бордын. Ньылез выжтэмын 22-тӥ сессиысь, огпол учкемен, соос ӧз ортче. Депутатъёс озьы ик эскерозы етӥн будэтонэн, нюлэс удысэн герӟаськем программаосты. Матэкто Кун Кенеше быръёнъёс. Соин валче мур вераськон мыноз "Удмурт Республикаысь Кун Кенеше депутатъёсты быръён сярысь" законлэн инъетэзъя. Туннэ ке но тодмо ӧвӧл на, кӧня муртэ быръём вуоно парламентамы. Правительство ивортон лэсьтоз бюджет удысын ужасьёслы уждун тырон но нылпиосты школаосын сюдон пумысен. Президиумлэн членэз В. И. Кудинов дэмлаз му вӧй поттонэз радъянъя ужпумез но 23-тӥ сессиын умой-умой кутскыса учкыны. - Бюджетмы начар шуиськом, нош 6 ар куспын одӥг выль месторождениез но ӧм ужатэ,- пусйиз Валентин Иванович.- Тӥни кытын дас, сю миллионэн коньдон кылле. Кылдытэмын нимысьтыз комиссия но та пумысен. Но, жаляса верано, солэн пайдаез туннэ нуналозь ӧз шӧдӥськы на. Дыр вуэмын ни куд-ог адямиослэсь кылзэс юаны. Сессиын вылӥ верам ужпум одно ик ӝутскоз. Депутатъёс музъем узырлыкмес кутонъя ас мылкыдзэс шара вералозы, дыр. 23-тӥ сессия ужаны кутскоз 16 декабре. Л. МЕДВЕДЕВА. Шӧкыч 41-тӥ ёзэт 1. Котькинлэн правоез вань тазалыксэ утьыны но эмъюрттэт басьтыны. ..."эмъюрттэт сётӥське дунтэк..." 43-тӥ ёзэт 1. Котькинлэн правоез вань дышетскыны. 3. Котькин быгатэ, конкурс пыр ортчыса,дун тырытэк, вылӥ образование басьтыны... Россия Федерацилэн Конституциысьтыз. Песянай: - Вовик! Ӝоггес, ӝоггес ишкалты ни пиньме!.. Больница шуоназы коньдонтэк матаз но уг лэзё. Пенсиез витьыны чидан ӧвӧл ни. Суредэз Л. ПРОЗОРОВЛЭН. ТАЗАЛЫК Кыдатэ но эмъя - анай йӧл Туэ 29-тӥ шуркынмонэ быдэс Россиын пусйизы Анайлэсь нуналзэ. Таӵе умой сямлы инъет сётӥз Россиысь Президентлэн Борис Ельцинлэн 1998-тӥ арын потэм указэз. Кин кызьы ортчытӥз, дыр, та нуналэз, нош Ижысь 11 номеро нылкышно консультацие люкаськылӥз даслэсь ятыр егит семья. Пумиськон луиз "Дасяськыса, дышетскыса ӵошен пинал ваён" программаез азьланьтӥз (учке газетмылэсь 133-тӥ номерзэ). Со огшоры ӝӧк сьӧрын гинэ пукон ӧй вал, анай-атайёс азьын вераськизы пичиослэсь пиньзэс эмъясь Анна Сутыгина но педиатр-гастроэнтеролог Марина Самохвалова. Егит кузпалъёс трос выльзэ тодӥзы пиналъёссылэн будон сюрессы сярысь. Специалистъёслэн верамзыя, нылпиослы куинь аресозь висьыны уг яра, угось та вакытэ соослэн мугорзы юнма. Одӥг аресозь нунылэн тямыс пиньыз ӵогиськыны кулэ, со ог дасо кыл вераны но ас поназ ветлыны мед быгатоз. Шонер, ваньмыз одӥг кадь уг будо, озьы ке но, ог-огзылэсь трослы висъяськыны кулэ ӧвӧл. Еж мугоре пӧртэм висёнъёс аляло, пиналэз тырмыт чакламтэен но мумы йӧл ӧжыт шедемен. Тодосчиос верало: вить аресозяз нуны нуналлы яке уйлы огпол ке но ноныны кулэ. Нонылэсь вазь куштӥськем нылпи будэм бераз лекгес луэ, визьмын но мукетъёсызлэсь лябгес. Сыӵеос пӧлын тросгес сахарной диабетэн висисьёс. Анай йӧлзэ нуны ӵем дыръя мукетэныз воштэ меми янгышамен. Котькуд 2-3 толэзь ортчем бере, пинал уногес йӧл кулэ каре, нош ноныос талы дасесь ӧвӧл. Соин ик кылем йӧлзэ нылкышно кыскыны, нонокъёссэ массаж карыны кулэ. Тазьы уд кариськы ке, анай йӧл пичи адямилы уг тырмы ни, вӧзаз мукет ватсэт сётоно луэ. Соку ини пичи дыды яке эке быръе капчиен виясьсэ, соин валче анай йӧл синэ. Озьы ик, пичи нуныез 20-30 минутлэсь кема нонтыны уг яра, ноны бирдыос вӧсь луо, сӧрисько. Таза пинал та дыр куспын аслыз тырмыт йӧл басьтэ. Пумиськонын анай-атайёслы дэмланъёс сётӥз пинь эмъясь но. Анна Сутягина вакчияк мадиз малэсь луэ пинь сисьмон (кариес). Пиналэз одно дышетоно пиньзэ шонер миськыны. Нырысь дышетоно ымпушсэ гылъяны. Кык аресозь пиньёссэ ӵушылоно сода вуэн коттэм ватаен. Пичи муртлы уг яра сётъяны сюпсён кампет. Туж умой луоз, голькыт сиёнэз бакча сиёнэн но емышен воштыса. Чурыт емыш тазатэ ымпушез. Сяртчыын тани пиньёсты юнматӥсь микроэлементъёсыз туж трос. Со воштэ бананысь, ананасысь яке мукет кунгож емышъёсысь со выллем витаминъёсты. Куать толэзьем нуныез нуллоно ни пинь эмъясь доры. Анна Петровналэн валэктэмезъя, пинь сисьмонэз алыны луэ пинал кӧт пушкын дыръя ик. Россиысь тодосчиос кылдытӥллям аспортэмлыко кампет, кудаз вань пинез юнматӥсь микроэлементъёсыз. Соин эмъяськоно, нуны гердлы 12 арня тырмытозь. Тӥни озьы, улон но наука ӵош вамышъяло. Пумиськонэ ӧтем специалистъёслы салпанъёссэс кема кисьтыны ӧз сётэ пичи куноос. Ӝӧк вылэ тырем сиён-юон бордысь синзэс воштыны уг вормо, шудон куспазы ням-ням шуыса бӧрдыны кутско. Вераськон азьланьтӥськиз ни чай юон куспын. Лыдӟись эше, эн дырты палэнэ сэрпалтыны газеттэ. Малпасько, юнме уз луэ сётэм визь-нодъёс. Оскисько, газет, пиналдылы ноку уродзэ уд сӥзьы. Кызьы верало специалистъёс, нунылэн тазалыкез 15-20 процентлы гинэ врач бордысь потэ. Светлана Долганова, Удмурт кун университетын дышетскись. "...Я, чупа на эшшо огпол" Флор Васильев асьмелы туж трос жингрес кылбуръёссэ кельтӥз. Крезьгурчиосмы али но солэн кылъёсызъя ялан выль но выль кырӟанъёс кылдытъяло. Та ласянь нимысьтыз пусйыны кулэ Михаил Оськинэз. Удмуртлыкмес со мур возе сюлэмаз. Ас вакытаз "Дэменлэн" Ижевскысь огеныз ёзэныз но кивалтӥз. Кырӟанэз яратӥсьёслы кык пол бадӟым концерт возьматӥз ни. Михаил Оськинлэсь Флор Васильевлэн кылбурезъя кылдытэм кырӟанзэ кырӟало яратоно артистъёсмы Михаил ВОРОНЧИХИН но Светлана СМАГИНА. Туспуктэмез А. Кузнецовлэн. Лякыт но... чурыт сямо Ӝӧк сьӧрын 40 аресъем кышномурт пуке. Ымныраз жадем тус. Уго ужан нунал быре вал ини. Ма муген лыктэмме тодыса, со кепыраса юаз: - Мон сярысь газетэ гожтыны? Мар тӥ, мар тӥ, мон ваньмыз кадь ик огшоры адями. Вань мынэсьтым шаплыосыз но. Тодӥ Т. В. Ижболдина, милициын ужамезлэсь азьло, егитъёслэн азьветлӥсьсы вал. Собере куать ар ӵоже Ижысь 4 номеро ГПТУ-ын комсомол комитетлэн мозмытэм секретарез луыса ужаз. 1980-тӥ арын йылпумъяз Удмурт университетэз. Татьяна Вениаминовна милицие ужаны лыктӥз малпамтэ шорысь. 1984-тӥ арысен кутскыса татчыозь нуэ ни со аслэсьтыз службазэ. Нырысь Ижевск станциысь быдэ вуымтэосын ужанъя участковой инспектор луиз. Отделын со нырысетӥез кышномурт вал. Собере солэсь визьмо, дыртытэк, витьымтэ шорысь луэм учыръёсын туж чаляк ужаны быгатэмзэ адӟыса, Татьяна Вениаминовнаез старшой инспекторе пуктӥзы. Нош 1994-тӥ арысен Ижболдина майор луиз. Али со Ижевск станциысь линейной милицилэн отделаз быдэ вуымтэос пӧлын йыружъёсты алонъя отделенилэн кивалтӥсез. "Та вакытэ котькытын ужаны туж секыт", - вера Татьяна Вениаминовна. - Азьло комсомол, калык дружинаос юртто вал ке, али со уж аналтэмын. Быдэ вуымтэос асьсэлы асьсэос кузё луо. Берло куинь арнязэ школаос уг ужало, нош нылпиос дырзэс урамын, подъездъёсын, подвалъёсын, куштэм юртъёсын ортчыто. Отын соос ма но уг даурто: картаен шудо, кыско, наркотикен выро - отысен ик йыружъёс но!" - кеськыса ик вераз кышномурт. Нош куарая шӧдӥське куректон но пиналъёс понна сюлмаськемез. Тани туэ 9 толэзь ӵоже гинэ чугун сюрес вылын, 21 йыруж лэсьтэмын, 23 адями пытсэт сьӧры келямын. Со сяна, законэз тӥян 94 учыр вал. Ваньмыз со чугун сюрес вылын бадӟым кышкытлык кылдытэ. Трос учыръёсы быдэ вуымтэос чугун сюресъёсты герӟась линиос вылысь езъёсты вандыло. Соин сэрен поездъёс рельсаос вылысь но потыны быгатозы. Быдэ вуымтэос сюрес вылын зэмзэ но бадӟым кышкытлык кылдыто. Тани кӧня вал ини из пырыосын укноосты тсӧрон учыръёс. Но ведь со пиос кытысь ке палэнысь ӧз вуэ. Соос станцилы матын яке артысь гуртын уло ук. Нош анай-атайёслы нокыӵе уг пот, лэся. Соин ик участковой инспекторлы йыртэмасез шараян понна трос дырзэ быдтоно луэ. - Чугун сюрес вылын ужась милицилэн ужез трослы аспӧртэмлыко. Ми чакласа возиськом 1200 иськем трассаез. Котькудаз станциын сямен вань линейной постъёс. Йыртэман учыръёсты сэрттон-пертчон понна ӵемысь командировкае потано луэ. Пусйыны кулэ: отделениын 85 процентэз йыружъёс шараясько, вера Татьяна Вениаминовна. Милициын ужаны капчи ӧвӧл, вылаз ик нылкышнолы. Ӵемысь луо дежурствоос, уж уг дугдылы уйёсы но. Нош кышномуртлэн аслаз юртъерез, семьяез. Но Татьяна Вениаминовна уг ӝожтӥськы ужезлы. Со сюлмаське, котырамы йыружъёс ӧжытгес мед луозы шуыса. М. КОПЫСОВ. Лыдӟись вера малпанзэ Малы кушетскизы "кырныжъёс"? Телевизор тупатъясь ателье дорысен мон алигес кылӥ кык воргоронъёслэсь тазьы вераськемзэс. - Мар-о, телевизоред сӧриськиз-а? - юа одӥгез. - Суредэз адӟиське но, куараез ышиз, - шуэ мукетыз. - Мынам но уг возьматы ни. Но тупатъяны уг малпаськы, номыр но йӧскадь уг возьмато уго. Ялан адӟиськод: кинэ ке вииллям, кинлэсь ке ваньбурзэ талаллям, мукетъёсыз, уждунзэс витьыса, сютэм уло... Собере экранысь ялан адӟиськод кивалтонысь палэнтэмъёсты, калык ваньбурез лушкаса узырмемъёсты. Воргорон нокинэ но нимтулын ӧз вера, но кин телепередачаосты ӝытлы быдэ учкылэ, сотэк но солы валамон,кинъёс сярысь вераськон мынэ. Тани кӧня ке дыр ӵоже ини телевидение пыр асьмеос ялан адӟиськом демократъёслэсь кивалтӥсьёссэс Гайдарез, Чубайсэз, Черномырдинэз, Немцовез но мукетъёссэ. Оло, соос та секыт вакытэ странамылы, Е. Примаковлэн правительствоезлы юрттыны тыршо ӟеч визь-кенеш дэмланъёсын? Чик но ӧвӧл. Сыӵеослэн малпанъёссы чылкак мукет: кызьы утёно ки улысьтызы гылӟись властез, государстволэсь лушкам ваньбурзэс. Соос валаны кутско: калык табере адӟе ини, кытчы вутӥз демократъёслэн реформа шуонзы, вуоно быръёнъёсын соослы оскись уз луы ни. Соин ик юлтошъёс шуэрскизы, олокыӵе но амалъёс утчаны кутскизы, коммунистъёс но соослы дурбасьтӥсьёс вылэ урдскылон, соосты ултӥян, вань урод ужзэс соос вылэ погыльтон понна. Тани вералом берло дыре гинэ тодмо луэм ужъёссэс. Соос, кылсярысь, кырмиськизы Альберт Макашовлэн генераллэн еврейёс пумысен верам кылъёсыз борды. "Караул! - кесясько. - Страналы "горд фашистъёс" ласянь кышкытлык вуэ!" Нырысь ик телевидение возьматӥз Б. Березовскийлэсь куалектэм туссэ. "Коммунистъёслэсь партизэс ворсано! - куре со. - Со страналы кышкытлык кылдытэ..." Солэсь кылъёссэ телевидение пыр вожмаськыса вӧлмыто Сванидзе, Киселев, Доренко но мукетъёсыз. Коммунистъёслы пумит демократъёс выль кужымен омырскизы, Кун Думалэсь депутатсэ Г. В. Старовойтоваез бандитъёс вием бере. Та учыр, зэмзэ но, витьымтэ шорысь патриотъёс вылэ вань жобзэс кисьтыны муг луиз. Г. В. Старовойтовалэн коросэз вӧзын Анатолий Чубайс меӵак шуиз: "Виыло соосты, кин люкетэ коммунистъёслы, бандитъёслы но эшшо соослы, кин уг быгаты азяз сылӥсь ужпумъёсты быдэсъяны". Кинэ пыртэ берлоосыз пӧлы А. Чубайс, шуг валаны. Асьмеос ӟеч тодӥськом, кин уг быгаты ас азяз сылӥсь ужпумъёсты быдэсъяны, кин странамес донгиз таӵе югдуре, кин куашкатӥз экономикаез, кин калыкез вуттӥз сютэм улонэ. Соос ик эрик ӧз сётэ шат адями виылӥсьёслы, лушкаськисьёслы, эриктэмасьёслы? Табере тани, кызьы калыкын шуо: мае кизизы, сое ик арало. Но сыӵеослэн уг поты сьӧлыксэс ас вылазы басьтэмзы. Тодо уго, ваньмыз понна куке но кыл кутоно луоз, калык соослэсь сьӧд ужзэс уз вунэты. Сое уд ни пӧя тырттэм кылъёсын, со вала, кин вуттӥз та калэ. Соин ик, демократъёс, сӧриськем тэркылэсь юдэсъёссэ лякылыны турттэм сямен, огазе люканы тыршо асьсэлы тупась мылкыдо эшъёссэс. Татын соослэн валтӥсьёссы луо вазен ини калыклэн ӵемоназ вуэм нимъёс: Е. Гайдар, А. Чубайс, Б. Немцов, С. Кириенко, А. Яковлев но соослэн шӧлказы ветлӥсьёс. Соос огинэ карыны туртто коммунистъёслы но патриотъёслы пумит луись вань кужымъёсты. Ас пӧлазы кыскыны малпало Г. Явлинскиез, В. Жириновскиез, А. Лебедез, Д. Аяцковез но интыосысь мукет кивалтӥсьёсты. Тани Ижевсклэн мэрез А. Салтыков итӥськем ни соос борды. Но та адямиослэн сыӵе огазеяськонзылы шуг оскыны, малы ке шуоно, котькудзы кивалтӥсь луыны малпало. Собере "демократъёслы" дурбасьтӥсьёс но ялан кулэсмо, азьвыл огмылкыдо эшъёссы нимазы кариськыны туртто. Тани демократъёс ивортыса гинэ вуттӥзы, кинъёс соослэн огазеяськоназы кивалтӥсьёс луо, Саратовысь губернатор Д. Аяцков соку ик вераны дыртӥз, сыӵе куронэн ӧй вазиськылы шуыса. Юнме шат вазиськонзы улэ гожтӥськыны быдэс Россиысь 13 муртэ шедьтӥллям. Вуоно быръёнъёс кӧлыны уг сёто мукетъёссэ но реформаторъёсты. Тани басьтом "Наш долг - Россия" (НДР) огазеяськонэз. Татчы пыро Праивтельстволэн азьвыл кивалтӥсез В. С. Черномырдин котыре биниськемъёс. Соос котькызьы ик ӝутыны туртто кивалтыкузы калык азьын ыштэм данзэс, малпало властез выльысь киултыны. Но адямиос ӟеч тодо, кытчы соосты вуттӥз вить ар ӵоже Черномырдин но солэн командаез. Таиз алигес шуиз: "Утьыны тыршоно демократилэсь узырлыкъёссэ". Соин ик, вылды, соос али ик дасяськыны кутскизы ини вуоно быръёнъёслы. Нош мар-о меда со "демократилэн узырлыкъёсыз"? Кыӵе-сыӵе "узырлыкъёс" ваиз соос кивалтон вакыт. Куашкам экономика, лябӟем страна, миллионъёсын ужтэк кылемъёс но сютэм улӥсьёс, йыртэмасьёс но адямиосты виылон учыръёс, анайтэк-атайтэк кылем нылпиос но секыт висёнъёс... Тӥни мар, кыӵе "узырлыкъёс" кельтӥз со правительство. Ваньзэ куашкатыса-лушкаса ӧз быдтэ на, лэся, выльысь туртто руль борды кырмиськыны? Неужто странаысьтымы бырйисьёс соослы оскозы на? Озьы ке, малпаны ик кышкыт, кыӵе луоз азьпалан улонмы. НДР-ысь кивалтӥсьёсты мур малпаськонэ уськытэ Москваысь мэрлэн Ю. Лужковлэн "Отечество" нимын кылдытэм огазеяськонэз. Юрий Михайлович Лужков странаямы тодмо адями. Тросэз умоен лыдъяло солэсь экономика, ужпумъёсъя, приватизация пумысен, Крым но Севастополь сярысь верамъёссэ, тодо солэсь кивалтон удысын басьтэм опытсэ. Соин ик, вылды, та огазеяськонлэн бурд улаз пырыны туртто мукет иинтыосын осконзэс ыштэм, вуоно быръёнъёсын сюрес урдсы кылемзылэсь кышкась адямиос. Соослэн малпанъёссы пӧртэмесь ке но, азязы огкадесь ужпумъёс пукто: шуныт интыез кызьы ке но утёно. Соинтэк-а та выль организацилэн радъясь комитетэзлэн заседанияз пӧртэм адямиос пукизы. Табере Удмуртиын но кылдӥз солэн ёзэз, нош кивалтэ соин Кун Кенешлэн Тӧроез А. А. Волков. Соку ик юан кылдӥз: табере со но В. Черномырдинлы мышкин берытскиз шат? Ачиз та дырозь со пумысен номыр ӧз вера на кадь. Лужков шӧлкын, оло, со но кытчы ке бырйиськыны малпа? Кивалтонэ пыриськон сярысь ялан вӧтаса уло "Яблоколэн" но либерально- демократической партилэн кивалтӥсьёссы Г. Явлинский но В. Жириновский. Но соос куддыръя тӧллэсь кудпала пельтэмзэ валаса уг вутто, я сопала, я тапала карисько. Тани Г. Явлинский котькинлэсь азьло куаразэ поттӥз Е. Примаковез правительстволы кивалтӥсе юнматон сярысь, нош ачиз ӵуказеяз ик та правительствоез янгыше уськытыны кутскиз, отын йыртэмасьёс вань шуыса. В. Жириновский сярысь ке верано, таизлэн мылкыдыз сӥзьыл куазь кадь вошъяське, кин пала кариськыны ик ёрме, лэся. Со соглаш луысал, дыр, котькыӵе правительствое пырыны, но ӧтись ӧвӧл, лэся. Вань на эшшо одӥг огазеяськон. Со кылдӥз алигес. Мон верасько кунгожмес утись кужымъёслэн азьвыл кивалтӥсьсы генерал А. Николаев сярысь. Табере со Кун Думалэн депутатэз. Со кылдытӥз "Союз народовластия и труда" нимо огазеяськон. Нырысь сое Лужков но ас палазгес карыны турттэ вал, но аслаз "Отечествояз" ӧтьыны ӧз дырты. Адӟиз, вылды, Николаев вӧзы Владимир Шумейколэсь интыяськемзэ. Таиз уго Черномырдинлэн адямиез. Азьвыл кузёезлэсь калыклы адӟемпотостэм луэмзэ шӧдыса, лэся, со мукет пыже пуксьыны дыртӥз. Но йыртэмасьлэн кузь пельёсыз куак сьӧрысь но адӟисько. Ваньмыз та вылӥ верам политической кужымъёс пӧлын нимысьтыз висъяське Народно- патриотической союз. Таиз, зэмзэ но, огмылкыдо, азязы одӥг кадь ужпум пуктӥсь партиослэн но движениослэн оагзеяськонзы луэ. Татчы пыро Россиысь Коммунистической партия, Аграрной партия, "Держава" движение но мукет патриотической кужымъёс. Ноябрь толэзьлэн пумаз Россиысь Народно-патриотической союзлэн (НПСР) кыкетӥ съездэз ортчиз. Москваысь Колонной залэ люкаськылӥзы сюрслэсь уно делегатъёс. Учке ай, кинъёс соос: Кун Думалэн сюлэсь ятыр депутатъёсыз, крайёслэн, областьёслэн но республикаослэн данак кивалтӥсьёссы, 200 рабочий но крестьянъёс, 67 дышетӥсь, 96 врач, 234 тодосчи, озьы ик хозяйсвтенной кивалтӥсьёс, литература но искусство удысын ужасьёс. Зэмзэ но, вань калыклэн устоосыз нылъёсыз но пиосыз. Соос сюлэмзы пӧзьыса вераськизы странаямы кылдэм югдур но сое кризисысь поттон сюресъёс сярысь. Съездэ ветлэмъёслэсь верамъёссэс лыдӟыса валаськод: калык азьланяз та патриотической кужымъёслы оскиз ке, соос быгатозы странамес секыт югдурысь поттыны, реформаосты калыклы пайдаё сюрестӥ нуыны. Съезд азьланяз ужаны сюресъёс пусйиз, Россиысь вань калыклы вазиськон кутӥз. Отын со ӧтиз та секыт дыре огазе кариськыны, улонмес таӵе югдуре вуттэм реформаторъёслэн чебер кылъёссылы оскытэк, ваньзэ лэсьтыны, Россиез выльдон но азинтон сюрес вылэ поттон понна. Малы мон ваньзэ тае верасько? Странаямы кылдэм югдур интыосын но синучконын кадь адӟиське. Экономика но сыӵе ик куашкамтэ, политической кужымъёс но сыӵеесь ик, соослэн ёзъёссы котькуд республикаын но областьын вань. Озьы бере, вуоно быръёнъёсын соос куспын кужмо нюръяськон мыноз. Нош асьме республикаын Кун Кенеше быръёнъёс вуоно тулыс ортчозы ини. Мар ваёзы соос? Кинлы оскомы асьмеос улон- вылонмес? Котькинлэн шудэз ас кияз шуо ке но, асьмелэсь вылӥынгес кивалтэт вань ай. Кин отын пуке, мар малпанэн лыктӥз со отчы, соин тросэз герӟаськемын луоз: улон- вылонмы но, шудмы-бурмы но. Тӥни малы сюлэм ик куалекъяны кутске: нош ик-а асьмеды пӧяны быгатозы ӟичыяськыса верамъёсын, пряникен-конфетэн, нош бӧрысь вунэтозы бырйисьёслы сётэм кылъёссэс. Гажано эшъёсы, эн лэзе ни асьтэды пӧяны. Тани ӝоген кутскозы ини депутатэ кандидатэ пырон понна списокъёс лэсьтыны. Соку но, быръёнъёс дыръя но куарадэс эн сётэ вал тодмотэм адямиос понна, мургес тодыны тырше котькуд кандидат сярысь. Нош азьвыл быръем депутатъёслэсь вае юаломе: мар лэсьтӥз со калык понна, Кун Кенешлэн депутатэз луыса, калык понна но ачиз понна. Зэм, быръёнъёс дырозь кыдёкын на. Но малпаськыны кулэ ини али ик. Табере уго одӥг инты понна дасо адямиос нюръясько. Медам йыроме вал соос пӧлын асьмеос. Соин ик, мон сямен, умой луысал бырйисьёс вань та ужпумъёс сярысь, кивалтон ёзъёслэн, депутатъёслэн ужзы, озьы ик улон-вылонмес кулэ ӧре выжтон пумысен ас малпанъёссэс газет пыр верасалзы ке. Мон оскисько, редакция солы пумит уз луы. В. МИХАЙЛОВ, ожысь но ужысь ветеран. Нуналлэн тодметэз Вашкалаос 12 декабре пусйылӥзы Парамонлэсь нуналзэ. Ӵукна куазь сайкыт ке, быдэс декабре сыӵе возиськоз. Та нуналэ лымы усе - озьыен, пелляськоз Микола нуналозь (19 декабрь). 13 декабрез нималлям Андрей Первозванныйлэн нуналэныз. Соку нош ик кылзо вулэсь куаразэ: со шыпыт ке - тол лякыт луоз, куашетэ - кезьыт кариськоз, пельскоз, тӧласькоз. Туннэ югыт нунал кыстӥськоз 7 час 03 минут. Со декабре эшшо 8 минутлы кулэсмоз на. Нош нунал вырӟыны кутскоз 27 декабре. Та нуналэ... ар талэсь азьло 15 декабре вордскемез дырысен 95 ар тырме Советской Союзлэн Героезлы М. Е. Балашовлы (1903-1943). Войналэсь азьвыл со улӥз Сарапулын. 14 декабре вордскемез дырысен 85 ар тырме П. А. Астраханцевлы (1913-1958). Со Слава орденлэн куинь степеньёсыныз ик пусъемын. Вордскиз Можга ёросысь Сюга-Какся гуртын. 20 ар талэсь азьло (1978) Ижевсклы сётэмын Октябрь революция орден. 12 декабре 1993 арын нырысьсэ ортчизы Россия Федерацилэн Федеральной Собранияз депутатъёсты быръёнъёс. Федерацияя Советэ Удмуртилэсь быръемын вал А. А. Волков, В. Н. Подопригора, нош Кун Думае - А. И. Красных. М. А. Васильев, Г. И. Климантова. Музей узырмиз Можгаысь 6 номеро школаын 32 ар ужа ни туж узыр музей. Вань аръёссэ соин кивалтӥз ас ужзэ яратӥсь адями И. М. Чижова. Со али гинэ шутэтскыны потӥз. Табере музей оскемын Т. Х. Коротаевалы. Музейысь уноез адӟытонъёс сӥземын асьме палан вордскем адямилы. Советской Союзлэн Героезлы, партизан отрядлэн кивалтӥсезлы Александр Сабуровлы. Геройлэн вордскемез дырысен алигес 90 ар тырмиз. Музей юнэсь кусыпъёс возе Александр Николаевичлэн эшъёсыныз, ӵыжы-выжыосыныз. Туэ сӥзьыл музейын ужасьёс Москвае вуылӥзы но геройлэн племянникъёсыныз пумиськылӥзы. Музейлы выль материалъёс но шедизы. Со Сабуровлэн арбериосыз, эшъёсызлэн гожтэтъёсыз, грамотаосыз, кузьымъёсыз, фильмъёс. Можгаослы сётэмын Александр Николаевичлэн но солэн кузпалызлэн портретсы, геройлэн креслоез, кителез. Тужгес но узырез документ - партизан движение сярысь ас киосыныз гожтэм докладэз. Али ваем экспонатъёс бордын ужъёс мыно. Матысь дыре музейын выль экспозиция усьтӥськоз. Б. НИКИТИН. Луысал ке мон Президент... Та воргоронэн мон котьку сямен серекъясагес, алякъяськыса вераськисько. Со угось атаелэн пинал дырысен эшез, озьыен, мыным но бадӟым эш выллем луэ. Но берлояз пумиськонмы шулдыр ӧз пӧрмы, ӝӧк вылмы, уг ваты, кӧс ӧй вал ке но. Сава нюняй туж пӧсекъяз. Мугез вал со понна. - Малпа ай ачид, бускель. Будэтӥ мон туэ ошпи. Нош вузаны городэ вандыса сӥльын нуи. Сенное пырыкум, дас манет куро. Сётӥ, кытчы пырод, номыртэм понна ке но. Отӥяз мынӥ лабораторие: справкатэк, клеймотэк сӥльдэ нокытчы но уд интыя. Татын 75 манет куризы. Сётӥ, номыр уд кары. Со сяна, ош макесысь ӟеч-ӟеч юдэссэ вандыса кельтӥзы на. Эскерон понна, пе, кулэ. Синйылты: сӥльме мон вылам ог сю метр кеме пыртай-поттай. Ярам, справка сётӥзы, клеймо пуктӥзы. Табере бордам "ӧрӟиос" тэбинизы. Вай, пе, атай, сӥльдэ поттылыны юрттом. Кулэ ӧвӧл, шуисько, ачим но пырак жум ӧвӧл на. Ӧвӧл ке, луод, шуо, яке сӥльыдтэк кылёд. Ма карод, таосызлы но кызь манет куштӥ. Вузэным базарын ӧй вузкары. Гуртысь пиосъёс алӥзы угось: сӥльдэ вузалод, оло, уд, но инты понна базар кузёос ӟеч-ӟеч кесёзы. Соин ик столовое нуи. Мырдэм но кызьы басьтӥзы ик. Килозэ 14 манетэн дунъязы. Вузэ кыскиз 140 килограмм. Куать килограммлы скидка шуон каризы: ошед, пе, али гинэ вандэмын, сӥльыз кынмемын ӧвӧл на. Мар бен, ньылӥ тазэ но. Ярам, шуисько, тыре ини, мар кулэ мыным. Кык арня ортчыса, пе, лыктод. Лыктӥ - уксёзы ӧвӧл. Эшшо кык пол ветлӥ на, мырдэм-мырдэм басьтӥ уксёме. Табере лыдъя, мар но кӧня ыштон мон адӟи. 10 манет - базаре пырыкум, 75 манет но 3-4 кило быгыт сӥль лабораторие кельтӥ, 20 манет шырмачъёслы сётӥ, машина понна 25 манет быдтӥ. Кӧня луиз? Озьы, уксёен гинэ 130 манет. Мар понна, юаме потэ? Эх, бускеле, бускеле, ваньмыз мынэсьтым кыско-поро, нош мыным нокин уг шуы: ме, Сава, тон улытозяд трос ужад ини, ме, си-ю. Ӧвӧл сыӵеез. Ошпи дунме тыри электротыл, газ, радио понна, нюлэс басьтӥ ӧжытак, кенаклы сиён-юонлы сётӥ. Ай нылы картэныз ик ужтэк пуко, соослы юрттӥ. Ваньмыз быриз барыше. Пенсия куинь толэзьлы ӝегато ини. Кызьы, маин улод - чылкак паймисько. Коть тон валэкты вал, дышетскем адями. - Ма, тынад ваньмызлы киыд мынэ ук, лэсьты вал созэ, тазэ, вузкары. - Тэк уг пукиськы, эн малпа. Корзина керттӥсько, коран тусь лэсьтӥсько. Нош мар пайдаез? Басьтӥсь ӧвӧл ук. Озьы гинэ сётъясько бускель кышноослы, ӵыжы-выжыосылы. Ярам, аракыен коть тыро ке. - Берло дыре соин шат ӵемгес юылӥськод? - Эх, Дмитриче, эриктэк, амалтэк юод, ява, таӵе улонэн. Сюлэм уг чида ни. Кытчы гинэ эн учкы, котырак бардак. Кивалтӥсьёс но, огшоры колхозникъёс но воксё сьӧраз ортчыса лушкасько. Ма, мон но святой ӧвӧл, кузётэк кыллисьсэ уг кельтӥськы. Но азьвыл озьы ӧй вал ук! Инмар мед утёз вал бускеледлэсь шелепсэ коть капыртонлэсь. Дыръёс воштӥськизы. Возьыт но, кышкан но ӧвӧл ни табере. Малы та улон озьы йырчукин берытскиз? Малпасько, государство янгыш, кивалтӥсьёс, нырысь ик - Ельцин. Лэзиз кузёмы биньгозызэ киысьтыз. Улэ, кызьы улӥськоды, шуиз, шӧдске. Но кузётэк нимаз юртъер но куашка ук, мар веранэз на быдэс государство сярысь. Котьма шу но, бускеле, асьмелы али кузё мылкыд, кужмо ки кулэ. Сталин, конечно, гурт калыкез вӧсь кариз, со понна порядок вал. Неужто выль Сталин кулэ порядок лэсьтон понна? Вождэ эн вай, пие, трос супыльтӥ. Но вала монэ но: сюлэм уг чида ни та улонэз. Воштоно сое, одно ик воштоно. Отӥяз калык урдскыны но быгатоз ук. Кызьы малпаськод? Г. ТИХОНОВ. Лыдӟись гожтэ Мынӥсь валлэн уробоез узыр Улонэз гажан, ужез яратон мылкыд пыӵато нылпиослы Бадӟым Учаысь шор ёзо школаын. Можга ёросын гинэ ӧвӧл, быдэс республикаын со данъяськылӥз аслаз бакчаеныз. Будэтэм бакча сиёнъёссэс дышетскисьёс трос пол возьматъяллязы ВДНХ-лэн адӟытонъёсаз. 60-тӥ- 70-тӥ аръёсы солэн ужаз 190 пинал пыриськиз. Со пӧлысь дасэз данъямын выставкалэн бронза медальёсыныз но киын нуллон часъёсын. Мыным но, та ужен кивалтӥсьлы, сыӵе данъямзы туж шумпотымон. Пиналъёсты музъем ужлы дышетэм сяна, мон соослы кызь арлэсь кема биологиен но географиен тодон- валанъёс сётылӥ. Уноез школаез йылпумъямъёс вордӥськем колхозазы ужаны кылизы. Фермаосын кивалто, валтӥсь агрономлэсь, зоотехниклэсь, инженерлэсь ужзэс быдэсъяло. Трос аръёс ӵоже хозяйствоосын кивалтӥзы Горынцев Аркадий Петрович, Чернышев Геннадий Федорович. Кема та ужез ас вылаз нуэ ини Вершинин Аркадий Николаевич, Правительстволэн Тӧроезлэн выныз. Павел Николаевич но Бадӟым Уча школаез йылпумъяз. Собере колхозамы ик валтӥсь инженер луыса ужаз. Бӧрысь сое мукет колхозэн кивалтыны басьтӥзы. Быгатыса ужамзэ синйылтӥзы: гурт хозяйствоя министре пуктӥзы. Нош али со республикаенымы кивалтэ ини - тӥни кытчыозь вуиз. Вершининъёслэн шоретӥез пизы кема аръёс ӵоже колхозын диспетчер луыса ужа. Мукет районъёсын но тыршо милесьтым школамес быдтэмъёс. Али мон пенсие потэмын ини. Озьы ке но, ялан тодам вайылӥсько будэтэм дышетскисьёсме. Мыным, гуртысь дышетӥсьлы, шуд усиз пӧртэм бадӟым ужрадъёсы пыриськылыны. Ысъязы Москвае, пионеръёслэн но натуралистъёслэн слётъёсазы. Биологияя мургес тодон-валан басьтон понна, одӥг толэзьлы дышетскыны ыстылӥзы Москваысь кун университетэ. Милемлы лекциос лыдӟылӥзы туж тодмо профессоръёс. Али но со понна тау карисько Калыкез дышетонъя министерстволы. Вань басьтэм тодонъёсы ужелы яразы. Бадӟым учаослэн азинсконъёссы сярысь соку газетъёсы но, "Биология в школе" журналэ но гожъязы. Калыкын шуо: мынӥсь валлэн уробояз котьмар тыр - нуоз. Озьы ик мыным но пӧртэм организациос (партийной, профсоюзной, инкуазез утёнъя, ДОСААФ, лекциос лыдӟонъя) кыӵе гинэ ужъёс ӧз оскылэ - ваньзэ быдэсъяй. Озьы ке но, вань кужымме сётылӥ школалэн музъемез вылын ужанлы. Бакчамы нырысь 35 сотка гинэ вал. Кӧня ке арскын сое 2 гектарозь вуттӥмы, теплица пуктӥмы, парникъёс лэсьтӥмы. Музъеммес удысэн-удысэн люкылӥмы: емышо писпуос но узы- боры будэтонъя, бакча сиёнъёс мерттонъя, сяськаос утялтонъя. Нимысьтыз инты висъямы питомниклы, "вож класс" усьтӥмы. Участокамы али будо 122 улмопу, 12 грушапу, 90 сутэрпу, 15 ирга, 20 чияпу, кема аръем 20 роза, 30 пала пӧртэм сяська. Сад-бакчаямы ужаны нылпиос 2-тӥ но 3-тӥ классъёсысен ик кутскылӥзы. Школаез йылпумъятозь, соос музъем вылын олокыӵе но эскеронъёс ортчытылӥзы. Тыршемзы арысь аре пайдаен берытскылӥз, ноку адӟылымтэ урожай басьтылӥмы. Озьы одӥг аре ньыль но ӝыны тонна улмо бичамы. Куатьтонэтӥ аръёсы кусыпъёс тупатӥм колхозэн. Висъям музъем вылын будэтӥмы зол удалтӥсь "седов" сорт картофкаез, сахар кушманэз, пуртэсо культураосыз. Бадӟым Уча школаысь юннатъёслэн азинсконъёссы сярысь учёнойёс но тодӥзы. Соослэн но Удмуртиысь Гурт хозяйствоя министерстволэн куремзыя, нылпиос будэтыны ӧдъязы жалем сиёнлы ярась сизьым пумо культура. Ваньмыз ик паймымон удалтӥзы. Кукуруза, кылсярысь, ӝуждалаезъя 3 метр 15 сантиметрозь будӥз. Будосъёсмес уже паськыт кутыны кутскизы ёрос хозяйствоос. Школа садмы милям али но вань. Но малы ке сое азьло сямен учкисез но ӧвӧл ни кадь потэ. Емышез но сокем ик трос уг луылы ни. Воксё медаз аналтэ вылэм пиналъёслэн но дышетӥсьёслэн кужыменызы кылдытэм узырлыкез. Кыӵе умой луысал, туала ёрмон вакытэ вань школаос кутскысалзы ке бакча сиёнъёс но мукет культураос будэтон борды. Мон сямен, 60-тӥ аръёс со понна туж адӟем карымонэсь вал. М. ВЫГОДЧИКОВ, калыкез дышетон удысысь отличник. Лэсьтозы "Компарус" Туэ тулысысен Ижевскысь радиозавод Россиысь космической агентстволэн "бурд улаз" ужаны кутскиз. Озьыен, со мукет предприятиосын ӵош ракетно-космической промышленностьлэсь заказъёссэ быдэсъялоз. Кылсярысь, ижъёс выль бортовой аппартуралы ёзъёс дасяны чаклало. Нош "Компарус" нимо изделиез заводлы тросэн поттыны оскемын ни. Сое дасяны туж вакчи дыр сётэмын. Оскем уж ӟеч быдэсмиз ке, агентство азьланяз но предприятиен юнэсь кусыпъёс возёз. Н. СЕРГЕЕВ. "Сиён-юон-98" Таяз учыре Ижевскысь "Метеор" центрын радъямын вал "Сиён-юон-98" адӟытон. Отчы асьсэлэсь продукцизэс возьматыны ваиллям кызьы ке бускель улосъёсысь, озьы ик асьме республикаысь предприятиос но эштосъёс. Бадӟым черод кылдӥз Ижысь нянь пыжонъя нырысетӥ заводлэсь вуззэ басьтыны. Макаронъёс поттонъя городысьтымы комбинат ог 20 пумо вуззэ поттэм. Пряникез гинэ ог 15 пумо ваемын. Паймытӥз Татарстанысь "Маяк" фермер хозяйстволэн ужамез. Отын ӟеч выжы будосъёслэсь кидыс дасяло. Со тысё культураос, кӧжы, бобы, соя, трос аръем турын, бакча сиён кидыс, сугон. Зэмзэ но, асьмелэн фермеръёсмылы вань мае адӟем карыны. Одӥгез но праздникмы ӟеч винатэк уг ортчы. Азьло басьтӥськом вал кунгож сьӧрысь ваемъёссэ. Табере со дуно усе, кытӥяз пӧяськыса но лэсьтэмын. Вузъёсыныз ваньзэ паймытӥз Челябинскысь винаос поттон завод. Выставкаын ог 50 пумо вина возьматӥське. Адӟытонэз дасясьёслэн верамзыя, со удалтӥз. Татын трос гинэ огкылъёс гожтэмын. Л. СТЕРХОВА. Туспуктэмез В. КАМАШЕВЛЭН. Ум ыштэ-а? Йылпумъяське газет-журналъёслы вуоно ар понна гожтӥськон. Та толэзьлэн кутсконэзлы вераса, "Удмуртская правда" газет басьтӥсьёслэн лыдзы ог 25 сюрс люкаськем ни. "Удмурт дуннеен" кайта эшъяськыны малпа 12 сюрс пала адями. "Известия Удмуртской Республики" газетлы гожтӥськемъёс 17 сюрс луиллям. Но таизлы паймонэз ӧвӧл. Узыр адямиос юрттэмен, редакция 150 сюрс манет люказ но табере гожтӥськонэз дунтэк радъяны выре. Шугъяськытэ журналъёсын югдур. Соосты басьтыны мылкыд карисьёс туж ичи. Огезлэн но вуоно тиражез сюрсозь вуымтэ на. Ум ыштэ меда асьмеос шуген вордэм "нылпиосмес"? Гожтӥськон мыноз 20-тӥ декабрёзь. Оло, дэмен кариськыса, кызьы ке но юрттом редакциослы? О. МАРКОВ. Удмурт Республикаын дунъёсты (тарифъёсты) кун ласянь радъян сярысь Удмурт Республикалэн Законэз Та Закон юнматэ Удмурт Республикаысь Правительстволэсь Удмурт Республикаын дунъёсты радъян но дунъёсъя кун дисциплиналэсь быдэсъяськемзэ эскерон удысын быдэсъяно ужъёссэ, дунъёсты кылдытон удысын юридической лицоослэсь но нимаз адямиослэсь кыл кутонзэс. 1-тӥ ёзэт. Нырысь ик кулэ луись вузъёслэсь дунъёссэс кун ласянь радъя Удмурт Республикаысь Правительство, интыосын поттэм вузъёслэсь пайда вайыны быгатонлыксылэсь, вуттон, келян но вузкарон надбавкаослэсь но наценкаослэсь быдӟалазэс юнматыса, вуз котькӧня пол вузамын мед луоз. Нырысь ик кулэ луись вузъёс, кудъёсызлэн дунъёссы та Законъя радъясько, таӵеесь: - нянь но мукет пыжиськемъёс; - пызь; - кеньыр; - макарон; - нянь пыжись предприятиосын поттэм маял; - йӧл но йӧллэсь сиён-юон (мороженной сяна); - сӥль но сӥльлэсь сиён, тылобурдо сӥлез пыртыса (тужгес дуноосыз сяна); - сылал; - сакыр; - кӧс вӧй; - курег пуз; - чорыг но чорыглэсь сиён (тужгес дуноосыз сяна); - шыртыл; - майтал но дӥсь миськон арбериос; - дышетскон книгаос но огъя тодон-валанъёс сётӥсь школаослы дышетон пособиос; - школаын гожъяськыны кулэ луись арбериос. 2-тӥ ёзэт. Та Законэз тӥян учыре янгыш муртъёс кыл куто Россия Федерациысь но Удмурт Республикаысь али кутӥськись законъёсъя. 3-тӥ ёзэт. Удмурт Республикаысь Правительство эскере, кызьы быдэсъяло Удмурт Республикалэн улосвылаз ужась юридической лицоос но нимаз адямиос дунъёсъя но тарифъёсъя кун дисциплинаез. 4-тӥ ёзэт. Та Закон кужыме пыре сое печатлам нуналысен. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 17 ноябре. � 703-И. Чаклаське! Кам шур вамен ветлӥсьёслы, чорыгасьёслы тол вылтӥ чакласьконо луоз. Кызьы ивортэ Удмурт Республикаысь Кышкыт учыръёслэсь утиськонъя министерство, куд-ог нуналъёсы вулэн мурдалаез 5 метрозь вошъяськоз. Таин валче шур вылысь, озьы ик Воткинской водохранилищеысь йӧ дырызлэсь вазь вырӟыны быгатоз. Шудтэм учырлэсь утиськон понна алэмын судноосты, баржаосты, пыжъёсты лэзьымтэ интыосы султытыны но ярдурлы матэ ваньбурез люканы. Г. СТРЕЛКОВ. ТАЗАЛЫК Чеснокен эмъяськод - таза луод Калык чакламъя, туэ тол кезьыт луоз. Кезьыт куазь бордысен ик кутско висёнъёс: ныр вия, ньылон пыктэ... Соин ик чаляк эмъюм юыны кутскиськом. Но али туж эмъюмъёс дуноесь, куд-ог интыосын воксё но ӧвӧл. Соку ини тодамы лыкто песянай- песятайёсмылэн эмъяськон амалъёссы. Соос пыэдлэсь утиськон понна ӵекто чеснокен пукетэм чай юыны, чеснокен шыд сиыны. Ӟеч юрттэ сугонэн ӵош быректэм йӧл. Ческыт ӧвӧл ке но, юоно. Йырды висьыны кутскиз ке - эн дыртэ цитрамон яке анальгин сиыны. Чеснокен пельдӥньдэс (висок) зыралэ. Ныр виямлэсь юрттэ горд кушманлэн сокез. Сое вуэн но чечыен сурано но ныре шапыкен тыроно. Пыэдлэсь умой юрттозы лимон но чеснок, соосты аракыен пукетӥды ке. Нуналлы 3 пол юоно 1 бадӟым пуньыен. Ӟырт кезьыт нуналъёсы я ныр, я пель кынме. Соку уг яра кынмем интыез лымыен зыраны! Дыртэлэ шуныт азе, кынмем интыдэс небыт басмаен бинялтэ. Нош яра кылдӥз ке, дасялэ таӵе эмъюм: чесноклэсь но сугонлэсь сок виятэ, отчы чечы ватсалэ. Та суретэн яраез зырано. З. АДАМОВА. Шуныт, пӧсь ву но коньдон Сарапуллэн улон-вылоназ секыт югдур кылдэмен валче Удмурт Республикаысь Кун Кенешлэн Тӧроез Александр Волков дорын кенешон ортчиз. Отчы пыриськизы Кун Кенешысь депутатъёс, Правительствоын ужасьёс, Сарапул городлэн администрациысьтыз кивалтӥсьёс. Сарапуллэн мэрез Роберт Берг тодматӥз городысь югдурен. Отын шугъяськонъёс кылдӥзы шуныт но пӧсь ву сётонэн, улон интыосты возем понна предприятиослэн пунэм тыронзы 11 толэзёзь вуиз ни, бюджетысь коньдон басьтӥсьёслы уждун тырон графикен чаклам сярысь ньыль толэзьлы ӝега. Пусъемын вал, та вакытэ городын тазалыкез утён удыс уг ужа шуыса. Ӧвӧл кулэ эмъюмъёс. Вераськонэзлы йылпумъянъёс лэсьтыса, Роберт Берг шуиз: "Республика юрттытэк югдурез тупатыны уз луы". Удмурт Элькунысь коньдон ужпумъёсъя министр Владимир Бельтюков пусйиз: республика ласянь Сарапуллы бюджетысь коньдон тырмыт висъяське, уждун тырон быдэстэмын луоз, ар йылпумъяськытозь. Ужрадлы йылпумъянъёс лэсьтӥз Кун Кенешлэн Тӧроез Александр Волков. Со оскытӥз: шуныт сётэмын луоз таяз арня ӵоже, "Удмуртэнерголы" пунэм тыронъёсты берыктон понна кылем вордӥськонэ коньдон висъямын ни. Коньдон ужпумъёсъя министерволы но Сарапул городлэн администрациезлы косэмын бюджетысь коньдон басьтӥсьёслы кык толэзь понна уждунзэс сётыны но бюджетэ выт бичанъя огъя комиссия кылдытыны. Кун Кенешлэн пресс-службаез. Бырйисьёсыз пӧлын Кун Думаысь депутат А. Солуянов быдэс арня ӵоже Вотка городысь но районысь бырйисьёсын пумиськылӥз. Калыкен кенешыкуз, депутат ас мылкыдзэ вералляз, Президент, тазалыкез лябӟемен, странаен кивалтыны уг быгаты ни шуыса. Но туала Правительство Россиез кризисысь поттыны быгатоз, оскытӥз А. Солуянов. Отчы быръем министръёслы али дурбасьто Кун Думаысь тросэз депутатъёс но. Журналистъёслы но паськытгес возьматоно депутатъёслэсь ужамзэс. Ӵем дыръя иворъёсты вӧлмытӥсь ёзъёс сое палдурес дунъяло. Андрей Солуянов сярысь ке верано, Думаын ужатозяз, со 600 пол калыкен пумиськылӥз ни. Адямиосын кенешытэк, депутат одӥг законопроектсэ но Думае уг ӵекты. А. Солуянов депутатлэн пресс-службаез. ПРАВИТЕЛЬСТВОЫН Пиналъёс понна Пумен матэ вуэ нылпиослэн самой шулдыр праздниксы - тол каникулъёс. Соин ик Правительстволэн Президиумезлэн берло кенешаз учкемын солы сӥзем ужрадъёс. Кинлы 14 арес тырмемын, соос кузьым басьтозы. Ижысь Шор площаде выжыкыл городок ӝутскоз. Вунэтэмын уз луэ нылпи юртъёсысь, Чернобыле, Афганистанэ но Чечняе ветлэм анай- атайёслэн пиналъёссы. Чабей - палэнысь Республикалэсь няньлы кулэяськонъёссэ лыдэ басьтыса, выль арын 1 июнёзь 60 сюрс тонна чабей басьтыны чакламын. Правительстволэн Тӧроезлэн Павел Вершининлэн ӵектэмезъя, нянь басьтонъя ӝог амалэн конкурс ортчытэмын луоз. Та ужпумъя решение кутымтэ, документ бордын уж азинскоз на. Удыслы юрттэт Тазалыкез утёнъя министр Сергей Шадрин Президиумлэсь адямиоссэ тодматӥз удысын кылдэм югдурен. Тазалыкез утисьёслы, зэмзэ но, секыт йӧтэ, но югдурез тупатонтэм уд шуы. Министерстволэн кивалтӥсьёсызлы ӵектэмын туж кулэ удысъёсты чакланы но отчы тырмыт уксё висъяны. Соин ик огдырлы дугдытоно луоз эмъяськон юртъёс лэсьтонэз но оборудование басьтонэз. Али бадӟым инты висъяно эмъюмъёс басьтонлы. Нош соослэн дунъёссы 2-3 поллы йылӥзы. Медицинской страхованиея фондлы косэмын эмъюмъёс басьтыны гинэ коньдон висъяны. Нош министерство куд-ог учреждениосын дунын медицинской юрттэт сётонъя документ дасялоз. Сюрес выльдӥськоз Ижысь администрация "Удмуртавтодор" предприятилы вазиськиз, Ракетной ульчаез тупатъяны курыса. Правительство тая постановление кутӥз. Соя Удмурт Республикалэн сюрес фондысьтыз урамез выльдыны 2 миллион манет уксё висъяны лэземын. Правительстволэн Тӧроезлэн секретариатысьтыз пресс-центр. Пичи кужмын пайда басьто Малпаськытэ, утчаськытэ туала рынок. Таӵе дыръя ваньзэ пыр-поч малпаса ужан гинэ ёрмон кыӵесысь потыны юрттэ. Тае ӟеч валаны кутскизы Балтаси ёросысь "Искра" колхозысь кивалтӥсьёс но специалистъёс. Соос коньдон поттон амалъёс шедьтӥзы: люцернаез кидыслы будэто. Тани кыкетӥ арзэ ини татын 25 гектарын люцерналэсь "Вега" сортсэ кидыс понна будэто. Кылем арын та бусыысь 88 центнер люцерна кидыс кисьтӥзы, шӧдскымон пайда басьтӥзы. Туэ но сомында ик люкаськем. Хозяйствоен кивалтӥсь Рашид Насибуллин верамъя, вуоно арын люцерна кидыс 200 сюрс манетлэсь трос пайда сётоз. Солы кулэяськон тужгес но бадӟым луэ тулыс кизён азьын. Кидыс утчасьёс Удмуртиысь, Киров улосысь но вуыло. А. КУНАЕВ. Татарстан Республика, Балтаси черкогурт. Порфирь Сяська Тазьы нима вылэм Удмурт радиолэсь директорзэ Роза Горбушинаез тодмо удмурт кылбурчи но тодосчи Владимир Владыкин. Та сярысь тодмо луиз Роза Порфирьевналэн вордскем нуналэзлы сӥзем ӝытын. Быгатӥсь кивалтӥсь, тодӥсь-валась адями, чебер нылкышно, коллективлэн анаез - таосыз но кылъёс верамын вал юбиляр сярысь. Роза Порфирьевна вордскемын Балезино посёлокын. Йылпумъяз Глазовысь пединститутэз, Общественной науаосъя академилэсь аспирантуразэ, история наукаосъя кандидат. Трос аръёс ӵоже ужаз комсомолын, партиын. Вал Удмурт Республикалэн Вылӥ Кенешысьтыз калык кусыпъёсты радъянъя секторлэн кивалтӥсез. 1993 арын Горбушинаез юнматӥзы "Удмуртия" телерадиокомпанилэн валтӥсь директорезлы воштӥсе. Тӥни сыӵе улон сюрес. Огласянь учкыса - огшоры, мукет ласянь - аспӧртэм. Котьмалэсь пусйымон соиз, дыр: котькыӵе ужын Роза Порфирьевна ассэ шедьтыны быгатэ, сьӧраз мукетъёссэ валтэ. Соин ик, дыр, эшъёсыз, гажасьёсыз но трос. Ми но, "Удмурт дунне" газетлэн редакцияз ужасьёс, итӥськиськом ӟечкыланъёс борды. Тау, Роза Порфирьевна, асьме калыклы трос умойзэ лэсьтыны тыршемды, газетмылы ялан юрттэмды понна! Шуд но тазалык тӥледлы. Николай Никифоров Пал кышно Верос Дырлэсь та вакытсэ удмурт калык вакчияк гинэ нима - акшан. Нош та шуныт гужем ӝытэз тазьы ниманы ым ик ӧй усьтӥськысал, дыр. Шунды нюлэс сьӧры лэзиськиз ке но, югыт ай - шугъяськытэк кыдёкысь инвисозь учкыны быгатод. Нунал ӵоже ужгурен, пӧртэм куараосын алетскем гурт урам но чалмытскемын: ас сабырлыксэ шедьтыса нырулэ. Куараоссэс уг сёто кутьылыкысь бертэм пудоос, уг ӟукырто капка ӟирыос - кузёоссы ульчаын на; ӵукнаозьлы, пыдэссэ берыктыса, умме усем колодча бордысь ву ӝутъян ведра но. Каксинша гурт ёрос та дыре аспӧртэмлыко акшан крезьгуръёсын бинялскемын: шур дурын дугдылытэк чипсо уӵыос, лашкинтыса ортчись тӧл дырын-дырын эбек черекъям- куальккетэмез вӧлмытъяса-пазяса кельтэ. Дорысьтызы ужпӧръёссэс йылпумъяса, адямиос ӝыт пуксёнэ потэмын. Кышноос ваньзы сямен киужъёсын, воргоронъёс, гуждор вылэ интыяськыса, кышноослэсь вераськемзэс кылзо, тамак пурккето. Покчи юмшекчиос гинэ, палэнэгес кошкыса, ватскемен, тупен шудо. Мӧйыослэн вераськонэнызы туж тунсыкъяськисьёсыз гинэ пуксён котырын бергало на. Таосыз пельёссэс, локатор выллем, сак возё, вань кылэмзэс йырысьтызы "магнитофонной лентаязы" гожъяло. Ӵуказе асьсэ эшъёссылы мадёзы ук. Мадёзы, тунсыко карыса, асьсэлэсьсэ трослы будэтыса-ватсаса. Борддорысь час шоры учкыса, Йыгын Зина синучкон азе султӥз. Чиньы йылыныз гинэ маялтыса басьтӥз син котыраз люкаськем кисыриоссэ, небӟытӥсь крем зыраз тӧланы кутскем ымныраз. Кышномурт, укноетӥ учкыса, секытак лулскиз. Бускельёсыз пуксёнэ потӥллям ни. "Ма шуод", кузпалъёссы юртто ук, - пирсэктӥз кышномурт сюлэм. - Нош мон ужын но, уй валес вылам но оген. Ой, секыт но жаль ортче каръян дауре!" Ма карод ни: кышномуртлы нокинлы со сярысь вераны, мылкыдзэ капчиятыса ӝожтӥськыны. Басьтыны турттӥсезлы ачиз ӧз бызьы, сюлэмызлы ярамез сое ӧз басьты. Инсьӧр кузёлэн гожтэмез сыӵе, вылды. Уз, ас куректонзэ Зина калык азьын уз возьматы. Котьку сямен, капчи мылкыдо, пальпотӥсь ымныро луыны тыршоз. Акыльтӥз ни солы ымныраз пальпотӥсь тусо маска нуллыны. Нош чидатскытэк амалыз ӧвӧл. "Ас куректондэ шараяса, кин-о тонэ жалялоз, кин ӟеч кылзэ вералоз?" - ӵемысь малпа со ас понназ. Ужын жадьыса кужекъясь куссэ шонертыса, коскам киоссэ маялляса, мытэм киужзэ басьтэ но ӝыт пуксёнэ дыртэ кышномурт. Йыгын Зиналэсь урам кузя дыртытэк вамышъямзэ синйылтыса, ӝыт пукисьёслэн ымныръёссы ик шулдырмо. Зэм вераллям: "Юмшан-шулдыръяськонын арганчи кузё, ӝыт пуконын - кыллы шаплы кышномурт". Сыӵе ик Йыгын Зина но. Кылъёссэ шундыберган тысьёсты музэн гинэ куада. Кӧтыд шуг луымон серекъятыны но быгатоз, лэчыт кыл вераса, йыртышкад "зырен" шуккыса усыкмытыны но. Соин ик чидатэк возьмало Зиналэсь, дорысьтыз ужпӧръёссэ йылпумъяса, пуксёнэ потэмзэ. Одно ик маке-маке тунсыкозэ мадьыса, кинлэсь ке сабырлы сюлэмзэ кужмогес тэтчась-жугиськись карыса кельтоз, мӧзмись-куректӥсезлы ӟеч кыл вералоз. Кышномуртлэн пудо-животэз тырмыт гинэ. Огназ, кузпалтэк, куинь нылпизэ будэтэ на. Туала арын ог нылпиен но ляргетӥсь кузпалъёс вань: секыт, пе, вордыны-дӥсяны. Нош Зина аспӧртэмлыко адями. Дораз но вутске, фермаын но жадёнэз уг тод, кожалод. Кышномурт пукисьёсын ӟечбур кариз но, кор вылысь буш интыез синйылтыса, отчы интыяськиз. Соку ик, айшет кисыысьтыз черсэм шортэн керттӥськон веньёссэ поттыса, мытэм пыдвылзэ азинтыны кутскиз. Пукисьёсты нырысь адӟем муртъёсты сямен эскерыса басьтэ. Кыл-мадёсэн тырмытэм пуйызэ сэрттыны уг дырты на. Возьма: одно ик кудӥз ке маке-маке юалоз ук, вераськон мытыны муг сётоз. Озьы ик вань - Тропинь Осьнялэн чидан нюжаез чиге. Синъёссэ лып-лып кырмышъяса, юанзэ сётэ ни: - Дорысьтыд ужъёсыд-а ӝегато, Зинӥ? Кема витьытӥськод астэ. Юртъеред пала учкыса- учкыса, синъёсы ик жадизы ни. Потэмдэ возьмасько. - Мынэсьтым мӧзмид, оло, Осьня кенак? - чиньыоссэ шаплы выретонъяз ик юа Йыгын Зина. - Шунды тэль сьӧры лэзиськем бере, кыӵе уж сярысь вераськонэз на? Акшан вакытэ бӧчыроос гинэ, пе, ужъёссэс мыто на. Нош мон лычсузьымонам кылбуръёс лыдӟи ай, - вань люкаськемъёсты паймытыса музэн ивортэ кышномурт. - Мар-р? Кылбуръёс?! - ымдуръёссэ ик огдырлы ваче карыны вунэтэ Тропинь Осьня. - Дак, едрёна Феня кадь вераськиськод тон, Зина, - сигарет кенжытонъяз, вераськон ӧре чуртнаське ни Пачай Васьлей. - Мазэ валалод со кылбур шуонзылэсь? Чебересь кылъёс малпаса, газет баме чигтылыса-чигтылыса шукко но, шумпотымон, адямилэсь пӧртэм уж лэсьтыны быгатӥм кожало, лэся, со кылбурчи шуонъёсыд. Дак, быгатӥсез веросъёс, повестьёс гожъя, луоз. Быгатӥсьтэмез... - Тон, Васьлей, ас макня йырвизьмыныд озьы малпаськод ке, туж янгышаськод, - воргоронэз куспетӥ карыса, ас мылкыдзэ шарая Йыгын Зина. - Кылбур гожтон - туж секыт уж. Аслам но школаын дышетскон арлыдам йыринтэме вань. Тани мон Алла Кузнецовалэсь "Кобла мон" кылбурзэ ӵемысь лыдӟылӥсько. - Ой, йыръянэз ик укыр тумошо кылӥське. Ассэ ачиз кобла нима, оло? - пальпотэ ни Тропинь Осьня. - Асьмеос, секыт улонэз адӟем кышноос, пал кышномурт сярысь гожтэм кылбурчи. Та кылбурез мон ӵемысь лыдӟисько но бӧрдӥсько, лыдӟисько но горисько, лыдӟисько но малпаськисько. - Дак, едрёна Феня, кытын-о со книгаед? Мон но лыдӟыса утчасал. Туж тунсыко лабыртӥськод, - азьлань ик сётске Пачай Васьлей. - Лыдӟыны мылкыдыд вань ке, ӵуказе ик сьӧрам басьто. - Тон, Зина, лучшо ачид мадь ай, - ӵектон сётэ Тропинь Осьня. - Ачид мадьыны но, лад-лад валэктыны но пӧрмытӥськод. - Осьня кенак, мон тӥледлы быдэс кылбурез лыдӟыны уг ик малпаськы. Аслэсьтым улонме гинэ мадё. Соку кылбурлэсь пуштроссэ но валалоды. Ыркытак пельтэм тӧл пуксён вӧзысь сиреньлэн куаръёсыныз шильыртыса ортчиз. Йыгын Зина баблес йырсиоссэ кышет улаз ватӥз но киужзэ азинтонъяз лулскиз: - Юг лымы кадь-а мынам улонэ, сьӧд тэкит кадь-а? Яке али усьтӥськем льӧль мак сяська-а я ӵужектэм турын-а? Уг вера. Ваньдылэн син азяды улӥсько. Ог омырен шокаськом, ог ошмесысь ву юиськом. - Шонер вераськод, Зина, - соглаш кариськыса юрттыны басьтӥське пал кышно, Мирон Оля. - Ачим но тон сямен улӥсько. Ма-ось поттылонэз на? Ог карнанысь ведраос кадь асьмеос. Йыгын Зина, эшезлэсь верамзэ кылэ ке но, номыр уг вазьы. Синъёсаз тылгизьыос кенжытскемын, бамъёсыз намерлэсь туссэ басьтӥллям. Кышномурт кылбур пӧлы воксё выемын, кожалод. Отысь чуръёсын бинялскемын, отысь лирической героиняен ваче кенеш кутэ кадь. - Нош та гажано кылбурчиеным воксё соглаш кариськыны уг дыртӥськы мон. Асме ачим ыж йыро адямиен лыдъяме уг поты. Визьмо мон. Эсьмаса, школаез но "ньыльлы", "витьлы" гинэ пырпотӥ вал. Нош мар пайдаез? Нырысь нылпиме вордӥ но - кыткетэ шеди. Малы-о та ужен сокем дыртоно вал? Котырам ӧжыт-а "такаос" тэтчазы? Эх-х! Таӵе кылъёслэсь Пачай Васьлейлэн ымдуръёсыз ик пасьтана вӧлско. Пилеш йырзэ кормыштэмез бере, юатэк уг чида ни: - Ма, сокем-а трос вал дусымъёсыд, Зина? Маке ӧй синйылтылы кадь. - Мукетызлэн скалэз бӧксӥз ке но, тынадэз чус мед улысал, Васьлей, - куаразэ ик будэтэ Йыгын Зина. - Вунэтӥд ни, оло: Почаш лудэ турын вайыны ветлыку, бордам лемтэй сямен няняськид вал. А-а? Кор вылын пукисьёс гурак серекто. Лушкем ужзэс калык азьын шараямысь, синлысъёссэ оше Васьлей но. Кузпалыз, Надёжа, картэз шоры улэпкын сиёно кадь учкыны кутске. - Егитысен одӥг нылпи вордӥ но, монэн котькуд воргорон мусояськыны яра шуыса малпаны кутскиз. Ой-йы, янгышазы "такаос". Нош мон огзэ сяна ӧй но яраты, уг но яраты, дыр. Гуртоосмылэн туж тодэмзы потэ нылпиосылэсь атайзэс. Уг, уг вера. Ваньзэ тодӥзы ке, мыняк потыса, гаӵолӥн усёзы. Лушкем яратонэз шараяськод ке, солэн мылкыдэз бичатӥсь шӧмыз тӧлӟе ни. Пукисьёс чус кариськизы. Туж тодэмзы ке но потэ, Зиналэсь меӵак верамзэ валаса, юаны дӥсьтӥсез ӧз шедьы ни. Ма, Зина, юасалзы ке но, верасал шат? Та вераськонзэ кышномурт, пукисьёс пӧлысь огез мед валалоз шуыса, юри мытӥз вал. Нош соиз кылэм- адӟем но уг кары кадь. Уг но пальыша, юанъёс но уг сётъя. - Эске, Васьлей но тонэ мусояны малпам вал шуиськод-а? Кин малпалоз, кин малпалоз? - кит-кит серекъя Тропинь Осьня. - Мар-ось сокем гориськод, Осьня кенак? - лекак юаз Йыгын Зина. - Муртэ серекъятозяд, аслэсьтыд Педордэ бордад юнгес жилья вал. Сотэк мукет дыръя, азьчиньызэ куртчыса, одно ик урето. - Остэ-э! - серекъямысь куаӵак дугдӥз Осьня. - Оло, тон-а куртчид вал? - Вал сыӵе учыр. Малы-о ватонэз? - Нош со монэ Сизяйлэн Куӵо пуныез куртчиз шуыса эрекчаз вал, му ньылон люкет. - Ӧвӧл, ӧвӧл, Осьня кенак. Эн оскы. Солэсь азьчиньызэ Йыгынлэн Зинка нимо пуныез куртчиз. Ачид лябгес шунтӥськод, лэся: бордам мерске вал. - От, тяфыр! От, пуны лул! Маин-о мон кулэс, тон сярысь? Тусын-а, визьмын-а, ужен-а? - Э-э, озьы ӧвӧл ай со, Осьня кенак. Мурт бакчаысь сяська гинэ но чебергес, яркытгес адске. Одно ик ишкалтыны, чигтыны тыршиськом сое. Нош шонерзэ ке верано, мон ачим но сяськалэсь кулэс ӧвӧл. Жаль, - лулскыны уг вунэты Зина, - чеберлыке сюлэмам сӥзьыл куазь вуытэк ик тӧлӟыны турттэ ни. Тӧлӟе, ас яратоно адямиме шара, лычсузьымон яратытэк. - Со яратон шуонзылы оскиськод, оло, Зина? - шораз пыр-поч учкыса, юан сётэ Пачай Васьлей. Кышномурт валэктыны уг дырты на. Тылошмес музэн вуӵыртӥсь мылкыдызлэсь ӧжытак сабырскемзэ вите-возьма, верано кылъёссэ, чыртывесьёсты сямен, радызъя сузьйыса дася. Ым шораз учкыса пукисьёсты синйылтыса, бератаз вазе ни: - Оскисько мон яратонлы, Васьлей. Тани тон тусын-буйын но чебер, вал кадь ужась но. Но... шонерак верало: мынам яратонэз мертан, сое валан стандартам уд тупаськы. - Осто, быри, - киужзэ ик палэнтэ Пачай Надёжа. - Эшшо ке кыӵе стандарт сярысь поттылэ. Ай, шонерзэ ке верано, вӧзад "шуккиськисез" уг шедьылы. Йыраз изьы ке нуллысал, одно ик котькудӥныз сюан шудыны соглаш кариськысалыд. Йыгын Зиналэн калык синме шара йӧтытэк гомась сюлэм-учогаз карасин пальккизы кадь. Зуркак кариськыса, пуксем интыысьтыз ик азьлань сётскиз со. Нош куаразэ ӧз будэты, лачмытак гинэ вазиз: - Котькуд адямиез ас мертэтэныд эн мерта, Надёжа. Бен, тон понна Васьлеед дуно но, мусо но, дыр - сюлэмъяд. Тупаса улӥськоды, ог-огдэс гажаськоды. Нош мынам яратонэ тӥлесьтыд пӧртэмгес. Уг ваты: яратӥ но яратӥсько мон одӥг гуртомес. Йырвизьме ыштымон яратӥсько. Нош со ӧз вала лопырскем мылкыдме. Али, ульчаысен пумитасько ке, быдэс мугоры пӧсекъяны кутске, сюлэмы, гадьме пасяса, музъем вылэ тэтчыны куриське, оло? Солэн ужын сюрмем киосыныз маяллямез мынам мугорам вӧё тылыен йӧтскылэм кадь потэ. Эх, быгатэ вал мусояны, мынэсьтым пумтэм-йылтэм ӝожанъёсме но кылзыны чидалляз. Нош инсьӧр кузё люкиз милемды - яратонэ мукет нылмуртэн семья кылдытӥз. - Остэ, быри, - чабкиське Тропинь Осьня. - Улӥд-вылӥд ке, оломае но кылод. Йыгын Зиналэсь мылкыд шараямзэ кылыса, пукисьёс гуждор пӧлын бичаськись ӟольгыроис кадь карисько. Мынекъяло, ог-огзылы лушкемен шыпыртыло, асьсэ тунаськемзылэсь шонерлыксэ тодон понна, Зиналэн лызпыръем синъёсаз учкыло. Таяз учыре йыртышсэс кормышто ни воргоронъёс но. Тодэмзы потэ: кин-о пал кышномуртлэсь сюлэмзэ сокем шунтыны, йырзэ ас палаз берыктыны быгатӥз, мылкыдаз гумырезлы кысонтэм тылгизьы куштыны йӧндыриз? Палэнысь пуклё вылэ интыяськем Ӟузьы Геня гинэ нокыӵе уг кариськы та вераськонлэсь. Чус кылзӥськыса пуке, дырын-дырын гинэ папироссэ аратэ но курыт ӵынзэ ӵоксузьымоназ пушказ кыске. Солэн шораз учкыса валатскиськод: ӝыт пуксёнын вераськон солы воксё тунсыко ӧвӧл. Кытчы мыныны ёрмеменыз гинэ ке шат татын пуке, кулэтэм супыльтонъёсты кылз?.. Ӟузьы Геня тусын-буйын олома чебер уд шуы. Лапег мугоро, котырес, тыр бамо воргорон. Ымнырысьтыз синме йӧтымонэз бадӟым нырыз гинэ ке шат? Нош тусбуй чеберен гинэ улоно ӧвӧл ук. Геня уж ласянь но ушъямон - огез кибашлы тӥр усточи. Курыт юонъёсын но мултэссэ уг паньсаськы. Юртъерзэ, семьязэ но калык синъёслы вожъяськымон возе. Зэм, воргорон Йыгын Зиналэн куд-ог кылъёсызлэсь зуркак кариськылэ. Пал кышномуртлэсь лушкем дусымзэ кин ке тодмалоз, сереме уськытоз кадь потэ, лэся. Лушкемен жаля со Зинаез. Тропинь Осьня, кема малпаськыса пукемез бере, чидан сӥньыссэ чигтэ ик: - Бен, Зинӥ, яратоно муртэд гуртысь ик шуиськод кадь. Нош тон гуртысь нокинэн ӟеч, матысь кусып ӧд возьы кадь ук егит дыръяд. Зэм, бускель гурт пиос куддыр келяло вал. Тон соосты, ачид шуэмъя, от ворот - поворот карылӥд. - Озьы, Осьня кенак, шонер вераськод. Нош милесьтым гуртоеным лушкем яратонмес пеймыт уй но бакча берысьтымы льӧмпуос гинэ тодо. Нылпиосылэн югыт дунне вылэ вордскон сюрессы но та рай сэрегысен инъямын вал. - Со лушкем яратонэд туннэ ке дорад лыктысал, ваче улыны соглаш ке кариськысал, шумпотысалыд-а, Зина? - кузпалэз шоры кырыжак учкыса тунсыкъяське Пачай Надёжа. - Уг, Надёжа. Ӧй быгатысал мон солэсь кузпалзэ, нылпиоссэ шудтэмесь карыны. Нош лушкемен пумиськыны ке быгатысалмы, лулзэ гульым выжыяз вуттымон ӟыгыръясал, ымдуръёссэ мунчо гур вылысь изъёсты музэн ӟырдатысал, вылды. Одӥг яратӥсько шуэм кылыным ик гадяз ӵаж-ж! мед вазёз. Йыгын Зина суйпосысьтыз часэз шоры уӵерак синйылтэ но, киужъёссэ сяськаё басмалэсь вурем халат кисыяз донгыса, пуксем интыысьтыз султэ. - Я, мон берто ни. Нылпиосы витё-возьмало, дыр. Тӥледын но кылме шери гинэ. Одӥг кылбур бордысен кутскыса, быдэс баллада лыдӟи. Осто, козма! Кылы ук мынам, кылы. Шумпотон кузьмасе но, лек тушмонэ но. Кышномурт, бускельёсызлы ӟеч уй сӥзьыса, дор палаз вамыштэ. Пукисьёс бакомыса сямен кылё. Йыгын Зина малпаськон, йырвизь тӥян кузьмаса кельтӥз ук. Уез чырым карытэк, оло, та сярысь малпаськыны тупалоз. "Кин меда Зиналэн лушкем яратоно воргоронэз? Кин солэсь сюлэмзэ чепыльтыны йӧндыриз, куинь нылпи кузьмаз?.." Уз кӧлы та уе Ӟузьы Геня но. Кузпалзэ мусоянъяз ик син азяз пуктоз Йыгын Зиналэн бакча берысьтыз льӧмпуосты, йырез поромытӥсь ческыт зыно турын валесэз... Вуылоз ай со отчы лушкемен, матысь дыре одно ик ветлыны тыршоз. Мусоялоз пал кышноез, нылпиосызлы юрттон вылысь, лушкемен коньдон но сётыса кельтоз. Нош ку луоз меда сыӵе шудо пумиськон? Бен, сое инмар гинэ тодэ луоз. Со ик юрттоз ай яратӥсь сюлэмъёслы ог-огзылэсь туккетэмзэс кылзӥськыны. Шӧкыч Нылпи будэтӥськод? Басьты кирпич! Нылпиослы пособие трос ӧвӧл ке но, пичияк юрттэт. Зэм, Юкаменск ёросын туэ ӝыны ар понна со тыремын ай 10 процентэз гинэ. Со но пӧртэм вузъёс чотын. Кинлы ведра, кинлы таз, кинлы мар. Агропромхимия, кылсярысь, бюджетэ пунэм тыронъёссэ пытсан понна ӵектэ кирпич но мебель. Но туж дуноен. Районысь школаосын секыт югдур кылдэмын пиналъёсты сюдон ласянь. Тужгес трос нылпиос сюмало Юкаменскын. Анай-атайёс уждун уг басьто. Райполэн столовояз сиёнлы дунъёсты мултэс будэто вылэм. Та дыре Юкаменскын ужа школаосын сюдонэз эскеронъя комиссия. Оло, со быгатоз дунъёсты ӧжытак ке но кулэстыны? Н. ПИСЛЕГИН. ШӦКЫЧ Пыконъёс "Лэйка койка... - "Чашка тэшка"... У. Бадретдинов. Ой-ой-ёй, тамаша! Корка юрт куашка шат? Ӟукыртэ, шонаське... Я ишан-а адске. Дӥсьтонме кортнаса, Кышканме улляса, Юрт пушкы пырисько, Корт ӧсэз усьтӥсько... Ой, мае адӟисько? Синъёсы паймытско: Ой, лэйка ук койка, Ой, тэшка ук чашка... Нуназе - югытэн Мар сыӵе лэсьтӥське? Бам кенжиз возьытэн, Пырытэк кошкисько... А. Перевозчиков. Шӧкыч Визьлюкъёс Дасэтӥ августэ вал со. Ческыт уммен кӧлӥсько. Жади уга, толон пу дасяны ветлӥмы. Кышное ӟеч мылкыдме сӧриз. Соргетэмдэ кылыса, пе, воръёс пырозы но люкам коньдонмес талалозы. Малы таӵе вераськон ӝутӥз, созэ уг тодӥськы. Ма, кышномуртъёсты валалод шат. Озьы-а, тазьы-а, но ческыт умме уретоно луи. Кыллисько но визьме сынасько. Зэм но, улон урод. Заводъёс уг ужало, дас сюрс манетъёсы ышозы-бырозы, пеньлы пӧрмозы. Чальгес соосты долларъёслы пӧрмытоно. - Нинӥ,- шуисько,- туннэ ик городэ мыно, манетъёсмес долларъёслы воштомы. Кин тодэ, ма азьланяз луоз. - Парсьпимес но скалмес вузалом на. Манетлы оскон ӧвӧл. Куинь нунал ортчыса, городэ лобатӥ. 12 сюрс манетэ понна 2 сюрс доллар сётӥзы. 17 август бере доллар понна 20 манет сётыны кутскизы, нош мон сое 6 манетэн басьтӥ. Куинь пол узырми. Карысь нылмылы квартира басьтӥм. Визьмо ик мынам кышное. Ма, 1ачим но нодтэм ӧвӧл. Н. МАКЕТОВ. ___________________________ 1Им н Шӧкыч Оло зэм, оло даур Кышноме юн жалясько. Ӝытлы быдэ бадӟым сумкаосын сиён-юон ворттэ, туж жаде. - Нуныкае,- шуисько,- малы та секыт сумкаосты нуллӥськод? Тон нырысь одӥг сумка сиён-юон вай, шутэтскы, чай ю, сумкадэ бушаты но выльысь бызь магазинэ. х х х - Аркаш, малы тон сокем трос юиськод? - Ма, ичи юи ке, кышное ӵукна макмырме уз веськаты. х х х - Анна кенак, толон демонстрация ортчиз, Ельцинэз ужысьтыз куштыны малпало. Кошкоз-а, уз-а? - Ельцин зэмос коммунист вал. Демократ луиз ке но, сямъёссэ ӧз вошты. Зэмос коммунист ас мылкыдызъя небыт креслоен ноку но уз люкиськы. х х х - Малы заводлэн директорез сокем трос коньдон басьтэ? - Тон со интые пуксид ке, солэсь трос басьтод... Кылзӥз но гожтӥз С. Супыльтонов. Дунтэк яке дунэн Сарапулысь калыкез нуон-ваёнъя автопредприятие аспӧртэмлыко эскерон ортчытӥз. Кинлэн дунтэк ветлыны льготаосыз вань, соослы сётӥзы нимысьтыз билетъёс. Но соосты басьтыны капчи ӧй вал, кылдӥзы бадӟымесь черодъёс. Нош кин сыӵе билет басьтыны ӧз вуы, кондуктор та пассажирез автобусысь поттоно луиз. Но кык толэзь ӵоже ортчытэм эксперимент юнме ӧз луы. Табере тодмо ни, кӧня муртлы зэмос льготаос сётӥсько, кин соослы коньдон висъялоз. Декабрьысен нимысьтыз билетъёс сётонлэсь куштӥськизы. Но городысь ульчаосы потӥзы коммерческой шуон автобусъёс но. Отчы пуксён понна одӥг манет но ӝыны тыроно луоз. Со автобусъёсын нокинлы льготаос чакламын ӧвӧл. П. НИКОЛАЕВ. Шӧкыч Оскем уг поты вылэм Вот ведь адямилэн сямыз, а? Печатен кагаз шеде ке, кулэ-а со, ӧвӧл-а - арен-арен сандыкын возиськод. Тани мынам ки улам но шедизы та макеос... Бен, бен, тодмады луо! Ӵапак соосъя улӥм асьмеос 1992-тӥ арын Няньлы талон, сӥльлы талон, виналы талон, дӥськутлы... Огкылын вераса, котьмалы талон. Гайдармылэн синпель кузьымез со. Куать ар ортчиз ни огъя талонизация дырысен. Табере ужало ни Россия Федерацилэн но Удмурт Элькунлэн выль Конституциоссы. Оскем уг поты вылэм, асьмеос нош ик талонъёсын улонэ берытском шуыса. Уг поты вылэм... Н. НИКИТИН. Ошмесъёс чылкытгес луозы... Одӥг пол, литературая лекция мыныку, дышетӥсьмы ивортӥз: "Кинлэн мылкыдыз вань, со мыныны быгатоз Литераторъёслэн юртазы. Отын ортчоз "Москва-Пенне" конкурслэн йылпумъясь люкетэз. Куинь лауреат пӧлысь вормисез быръёзы школаын дышетскисьёс но студентъёс. Со понна одно ик лыдӟоно лауреатъёслэсь произведениоссэс". Кема ӧй малпаськы - та ужрадэ пыриськоно кариськи. Уката ик соин: туала прозаез мон яратӥсько. Ӟуч литературая кафедраын сётӥзы Борис Васильевлэсь "Утоли моя печали", Евгений Носовлэсь "Яблочный спас" но егит писательлэсь Андрей Волослэсь "Хуррамабадская трилогия. Чужой" книгаоссэс. Соосты, пе, 14-тӥ ноябрёзь лыдӟоно но дунъяно. Мон быдэс арнялы мур лыдӟиськонэ выи, книгаосысь геройёслэн улонэнызы но мылкыдынызы улӥ. Вань ужъёс яразы, нош тужгес зол - Борис Васильевлэн гожтэмъёсыз. Матэктӥз 14-тӥ ноябрь. Калык лачак люкаськиз. Туж трос егитъёс вуизы Москваысь М. Ломоносов нимо кун университетысь, Россиысь Калык эшъяськонъя университетысь, Калык кусыпъёсъя кун институтысь, ысь, М. Торез нимо Литературая университетысь, В. И. Ленин нимо Педагогикая кун университетысь, А. М. Горький нимо Литературая институтысь но школаосын 10-тӥ-11-тӥ классъёсын дышетскисьёс пӧлысь. Ваньмыз ньыль сю пала люкаськизы. Ӝыт кутскон азьын ваньмызлы бюллетеньёс сётъязы. Авторъёслы кыл сётэм бере, тужгес ярасезлэн нимтулыз вадьсы пус пуктыны куризы. Собере, куараосты лыдъяса, вормисез быръёзы. Котькуд лауреатлы кык сюрс доллар кузьмалозы. Вормисьлэсь ужзэ итальян кылэ берыктозы. Малы? Та юанлы валэктон сётон понна, мае но сое тодэ ваёно луоз. Таӵе премиез кузьман амал вордӥськем Италиын. Кӧня ке ар талэсь азьло Россиысь писательёс вуылӥзы Шунды ӝужан пал Италилэн литературная столицаяз - Пенне городэ. Тодматскизы татысь прозаикъёсын. Со дырысен Москва но Пенне куспын кылдӥзы шунытэсь эшлыко кусыпъёс. Италиысь эшъёс дэмлазы Москваын но асьсэлэн выллем конкурс ортчытъяны. Асьмеос ик юрттом, пе, тӥледлы. Таӵе малпан яраз Москваысь писательёслы. Учредительёс но спонсоръёс лачак люкаськизы. Соос - Россия Федерациысь Культурая министерство, Россиысь Писательёслэн огазеяськонзы, Пенне городлэн администрациез, Бриони Роман Стайл фирма но мукетъёсыз. Тӥни озьы, куинетӥзэ ини ортче таӵе ужрад. 1996-тӥ арын премиез басьтӥзы В. Распутин, Ф. Искандер, Л. Петрушевская. 1997-тӥ арын - Б. Екимов, В. Токарева, Л. Улицкая. Ӝытэз нуиз Святослав Бэлза. Нырысь ик со общественной жюриез (студентъёсты но дышетскисьёсты) туала лауреатъёсын тодматӥз. Собере кыл сётӥз писательёслы. Прозаикъёс ӧжытак веразы асьсэ сярысь, нош собере егитъёслэн юанъёссылы валэктонъёс сётъязы. Кыӵеесь гинэ ӧй вал соос! Огшорыосыз бордысен кутскыса, йырвизез бугыръясьёсыз дорозь. Андрей Волос но, Борис Васильев но, Евгений Носов но люкаськемъёсын шумпотыса кенешизы. Веразы асьсэ мылкыдъёссэс, малпанъёссэс. Пичи вис бере сцена вылэ профессиональной жюри тубиз (соос пӧлын Италиысь куноос но вал). Соос уно писательёс пӧлысь куиньзэ гинэ бырйизы вал. Нош табере, куараосты бюллетеньёсъя лыдъям бере, вормисез ялоно луоз. Залын шыпыт кариськиз. Кинлы-о меда со быдӟа шуд усёз? Котькудӥз сюлмаське аслыз тужгес ярась писатель сярысь. Кӧня ке дыр ортчыса тодмо луиз: ваньмызлэсь трос куара люкам Борис Васильев. Кыкетӥ интыын - Андрей Волос, куинетӥ интыын - Евгений Носов. Писательёслы шуныт кылъёссэс веразы уно литераторъёс. Соосты ӟечкыласа, Владимир Спиваков нимо фондысь пиналъёс пичи концерт возьматӥзы. Конкурсэн кивалтӥсьёс вуоно аре куать лауреатэз пусйыны чаклало. Соос пӧлысь куинез луозы итальянецъёс. Нош книгаоссэс нырысь ӟуч кылэ берыктозы. Малпасько: таӵе премиез ай писательёс уно аръёс ӵоже басьялозы. Литературамес нокыӵе шугадӟонъёс медаз куасалтэ! Нош лыдӟисьёс медаз кулэсме. *** Школаын дышетскыкум ай синмаськылӥ Борис Васильевлэн повестьёсызлы. Бен, тросэзлы ярало, дыр, солэн произведениосызъя пуктэм фильмъёс но - "А зори здесь тихие", "Не стреляйте в белых лебедей", "Завтра была война". Туала прозаикез трос лыдӟисьёс яратыны вуттӥзы. Туэ Васильев пыриськиз "Москва-Пенне" конкурсэ. "Утоли моя печали" уженыз писатель нырысетӥ инты басьтыны быгатӥз. Угось тросэзлэсь сюлэмзэс вырӟытӥз Борис Львовичлэн романэз. Книгаяз автор быгатыса возьматэм Николай ИИ эксэез трон вылэ пуктон дыръя Ходынкаын ортчем кӧшкемыт учырез. Таиз ас сьӧраз нуиз кык сюрс пала адямилэсь улонзэ. Быдэс вакытэз автор возьматэ одӥг семьялэн адӟонэз пыр. Мыным бадӟым шуд усиз Борис Львовичен кенешыны. Гожъясен озьы ик сюлмысь вераськизы Москваысь пӧртэм вузъёсын дышетскись егитъёс. - Борис Львович, маин валче Ходынка сярысь гожтыны чаклады? - Та малпанэ кылдӥз ай 80-тӥ аръёсы. Анаелэн ӵужапаез Ходынкае сюрылӥз. Жаляса верано луэ: ас синмыным адӟыса ӧй вутты - Соловкиын сисьтӥзы сое. Быриз 1926-тӥ арын. Со ик, Наденька Олексина, луиз романэлэн валтӥсь героез. Трос юалляськи ӵыжы- выжыосылэсь, архивъёсын бугыръяськи. Материалэ кема кыллиз папкаын. Собере уже борды кутски но кык толэзь куспын быдэстӥ сое. Кызьы сыӵе ӝог? Малы ке шуоно, малпанэ кемалась кисьмамын вал ини. Эшшо соин но, дыр: ми ведь асьмеос али Ходынкаын улӥськом. Соин ик, малпасько, туж ик шуг ӧй вал, дыр, гожтыны но. - Малы романдылэн нимыз сыӵе тумошо? - "Утоли моя печали" - со инмар-анайлэн обросэз. Отын сомында курадӟон! Соин произведениын но курадӟонэз трос. - Нош малы повестьёсады сыӵе трос курадӟон но ултӥян возьматэмын? - Россиын улон-вылон но сыӵе ук. Кызетӥ даур туж кӧшкемыт вал. Жаляса верано луэ: курадӟонъёс но ултӥянъёс - со асьме калыкмылэн адӟонэз. Асьмеос но улӥськом курадӟонъёс пушкын. Соин мон уг быгатӥськы ваньмыз шоры чиньы пыр учкыны, сое кагаз вылэ суредатэк кельтыны. - Кин сярысь тросгес гожъяськоды? - Мынам геройёсы - егитъёс. Туж яратӥсько егит дырез. Малы ке шуоно, война сое мынэсьтым талаз. Табере пинал вакытме адӟисько книгаосылэн бамъёсысьтызы. Мынам геройёсы уг тодо на, мар возьма соосты азьланяз. Бен, соосты ултӥяло, трос курадӟонъёс пыр ортчо. Озьы ик луыны куэ. Егит нылъёс но пиос ваньзэ чиданы кулэ, зэмос кышномуртъёс но пиосмуртъёс луон понна. - Борис Львович, ку тӥ литература удысэн эшъяськыны кутскиды? - Мон, зэмзэ вераса, ӧжытак кышкалляй проза борды басьтӥськыны. Малы ке шуоно, милям семьяямы прозаез "сылыса" лыдӟылӥзы. "А зори здесь тихие" нырысетӥ повестьме гожтӥ бер, ньыльдон вить арескам. Но соку мон валай: литература - мынам улонэ. - Вань-а яратоно классикты? - Туж яра Чарльз Диккенс. Гажасько ӟуч классикаез. Асьмелэн литературамы туж узыр ук. Чакламея ӟуч литератураез оглом яратыны кулэ. Уг яра ваньмыз пӧлысь кыӵе ке одӥг писателез висъяны. Котькуд классикез лыдӟоно мылкыдъя. - Уд малпаське-а туннэ нунал сярысь повесть гожтыны? Ведь али вакытмы пӧртэм учыръёсын пачылмемын - Чечняын война, нош туала улон-вылонамы пумтэм-йылтэм шуг- секытъёс кылдэмын... - Туннэ нунал сярысь гожтыны мынам правое ӧвӧл. Ӟечгес пӧрмытозы егит писательёс, дас-дас вить ар ортчыса. - Гожтэм уждэс кин нырысь ик дунъя? - Кузпалы. Ми соин витьтон ньыль ар ӵоже ни валче улӥськом. Маке гожтӥсько ке, одно ик кышноелы лыдӟыны сётӥсько. Нош лыдӟыкуз асме кытчы карыны ик уг валаськы: кыскисько, отчы-татчы поръясько. Ушъямез я пыкылэмез бере гинэ буйгатскисько. - Кызьы валаськоды шудбурез? - Та капчи юанлы валэктон озьы ик капчиен сётыны уг быгатӥськы. Малы ке шуоно, кышномурт но пиосмурт пӧртэм сямен валало шудбурез. Со озьы ик луыны кулэ, дыр. Шудбур туж кулэ кышномуртъёслы, нош воргоронъёс улыны уг быгато вормонъёстэк. - Мае тужгес но яратӥськоды огшоры улонын? - Эшъёсме. Соостэк мӧзмыт но бездыт. - Кызьы малпаськоды, кызь одӥгетӥ даурын луозы на-а писательёс? - Бен. Сотэк кызьы-о? Нош али литературамы висе. Но одно ик йӧналоз. Малы ке шуоно, калыкмы литературатэк улыны уз быгаты. Али адямиослэн йыръёссы телевизорысь но газетъёсысь жуг-жаген тырмытэмын. Но ваньмыз со ортчоз. Котькудӥз одно ик тодаз ваёз: дунне вылын ӟечесь, шунытэсь, чылкыт сямъёслы дышетӥсь книгаос вань на. - Кыӵеен адӟиськоды Россилэсь азьпал сюрессэ? - Ӧвӧл, дыр, дунне вылын сомында курадӟонэз чидам мукет калык. Ми ваньзэ чидамы ук, соин ик али но чидалом. Улонысь вань кырсез но пожез лапкалоз. Ошмесъёсмы нош ик синкыли кадь чылкытэсь луозы. Нош ик пыд йыламы султом. Борис Васильевлы туэ тырмиз сизьымдон вить арес. Кызьы вераз ачиз, тужгес пайдаё аръёс пельпумъёс сьӧрын ини. Нош улыны дыр ичи кылиз. Соин со писательлы туж дуно потэ. Нуналлы быдэ гожъяське, аслэсьтыз малпанъёссэ, сюлэмыз пыртӥ ортчем курадӟонъёссэ но шугъяськонъёссэ кагаз вылэ кельтыса. Инмар гинэ тазалык мед сётоз! Мед быгатоз на сюлэмез позыртӥсь, зэмос улонэз возьматӥсь, адямиез яратыны но гажаны дышетӥсь, мур малпаськытӥсь ужъёс кылдытыны! Марина Костылева, Россиысь Калык эшъяськонъя университетын дышетскись. - Шӧкыч Ыж но кырныж Улонысь учыр Милям гуртамы улэ Васьлей Педор, но солэсь нимтулзэ тодӥсез ик ӧвӧл. Ваньмыз сое Кырныж шуо. Сямыз понна, дыр. Туж вераськись. Матронлэсь юа: пу, пе, тыныд кулэ-а? Соиз ӧссэ уг усьты, ӧвӧл кулэ шуыса черекъяське но чальгес ватске. Кырныж шумпотэ, Матронлэн корка дораз кыллись вандэм пуэз чик кӧбератэк аслыз ворттэ. Матрон ӵукна потэ но, пуэз "пыдъяськем". Кинлы ӝожтӥськод? Миличаосын Кырныж одӥг кыл шедьтэ. Та адямиез пытсэт сьӧры пуктоно вылэм, нош солы ю тысез эскерыны косӥзы. Кин тодэ, кӧнязэ вузаз. Кумышка пӧзьтыны дышиз. Ужан интыяз ик гур пуктӥз, бургы вышкы вуттӥз. "Векчи вия, векчи вия, векчи ке но - кудӟытэ",- кылӥське кенос дорын. "Вож кыйлэн" кыӵесаз шедемъёс тачак люкасько. Удмуртлы чиданы кылдэмын. Но чипейлы но, пе, пум вуэ. Кышномуртъёс но сазь улӥсь пиосмуртъёс Кырныжлы визь тыризы. Тём пеймыт уин йыраз мешок донгизы, бодыосын туж зол "куноятӥзы". Колхозлэн тӧроез сое ужысьтыз улляз. Ма табере кароно Кырныжлы? Юэм но, сием но потэ, нош коньдон ӧвӧл. Вань ворам ӟегзэ дунтэм дунын вузаса быдтӥз, корказ тӧл шула, миндэрзэ Огаш Санколы ӝыны бутылка понна сётӥз. Бускелез Матрон гор-гор серекъя: - Вот, Кырныж, адямиосты обидемед понна пунэмез берыктӥське ни, лэся. Но Кырныж ушъяськон-атасъяськон сямызлэсь ӧз куштӥськы. Адӟоды ай, пе, монэ нош уже кутозы. Та югыт дуннеын октӥ-калтӥ адямиослы шундыё нуналэ но зоре вылэм. Тӧромы Кырныжез ыстӥз ыжъёсты возьманы. Гуртоос паймо: та Кырныж майталтэк сюлэме пырыны быгатэ. Ваньмыз витё ни, ма дауртоз та учыре. Ыжъёсты уд вуза, йыръёс лыдъямын. Но кескич сямо пиосмурт мукет амал шедьтӥз. Ыжъёссэ котыртэме пыртэ но ӵышкыны кутске. Туннэ огез, ӵуказе кыкез гольык тыбыро бызьыло. Нош Кырныж ыж гонзэ Глаз рынокын тодмоез пыр вуза. Ӝыт пал шонӥ-панӥ ветлэ ни. Одӥг нуналэ тӧромы "Москвичсэ" уллё доры дугдытӥз. Адӟе: огезлэн но ыжлэн "шубаез" ӧвӧл. "Бадяров эш, дуно тӧромы, мон эксперимент ортчытӥсько. Америкаысь учёнойёслэн верамзыя, ӵышкем ыжъёс кык поллы чальгес будо но куаё. Сӥзьыл таосмы ветылъёс быдӟалаесь луозы. Улмо кадь гордэктӥз тӧромы. Собере дэра кадь луиз. Но ма карод, ачиз янгыш, "чипеез" вуэ лэзиз. П. ВАСЮХИН. ЛЭЧЫТ УЖПУМ Фермер луэме потэ, мед монэ дышетозы... ТУЭ ноябрь толэзе республикаямы ортчиз гурт хозяйстволы сӥзем научно- практической конференция. Трос сэрттэм-пертчем ужпумъёс пӧлын вераськон ӝутскылӥз фермер хозяйствоос сярысь но. Республикаямы туннэ 3,5 сюрс крестьян хозяйство лыдъяське. Пичи шаермы понна ӧжыт ӧвӧл кадь. Но пайдазы - сокем уг шӧдӥськы на ай: быдэс гурт хозяйстволэсь поттэм продукцизэ чаклано ке, соос 2-10 процентсэ потто. Со дыре ик фермеръёслэн 9 сюрс гектар пала музъемзы уже кутӥськытэк кылле. Фермер хозяйствоослы юрттонъя программа йылаз-пумаз вуттымтэ на. Тодмо мукетыз но: туннэ нуналлы умой возисько сыӵе фермер хозяйствоос, кудъёсыныз кивалто ас ужзэс ӟеч тодӥсь-валась муртъёс. *** Нош дасяло-а меда фермеръёсты асьме республикаын? Дасяло вылэм. Ижевскысь 21 номеро училищеын. Соин тодматскон вылысь но номыр уродзэ малпатэк вуимы та дышетскон заведение. Шонерзэ вераса, солэн общежитияз, угось татын дышетске вылэм фермеръёслэн кык группазы. Лыдӟисьёслы валэктон понна вералом на: училище кылдытэмын лэсьтӥськон удыслы но банкъёслы ужасьёсты дасян понна. Со сяна, татын дасяло на сяська будэтӥсьёсты. Но 1994-тӥ арысен училище ас удыссэ паськытатыны малпам. Озьы, Калыкез дышетонъя министерствоен, 21 номеро училищеен но Удмуртиысь Ботанической садэн огкылэ вуыса, татын фермеръёсты дышетонэз радъяллям. Та кутсконлэн ӟечез нырысетӥ араз ик шӧдӥськем. Дышетскыны мылкыд карисьёс туж трос люкаськиллям. Вазиськемъёс пӧлысь бырйыса-бырйыса котькуд ньылетӥзэ гинэ басьтӥллям. Гожтэм огкылъя наука ужъёсты нуонъя кивалтӥсе юнматэмын вылэм Ботанической садысь старшой научной сотрудник Людмила Ивановна Романова. Пиналъёслы муресь тодон-валанъёс сётон понна, татчы ужаны кыскемын вылэм учёнойёс но. Матысь кусыпъёс тупатэмын Ижевскысь гурт хозяйствоя академиысь преподавательёсын. Туннэ татын 52 вуоно фермер 32 предметлы дышетске. Кыӵе ужъёслы бен дышето фермеръёсты? Кемдӥм Милитина Иосифовна Михайловалэн уроказ. Со дышетэ муш вордыны. Вань верамъёссэ дышетӥсь возьматэ мушкасьёслэн арбериоссы вылын. Соос пӧлысь куд-огзэ татысь гинэ адӟыны луэ. Урокез бере дышетӥсь таӵе малпанъёссэ но вераз: туж, пе, бадӟым мылкыды вань муш вордонлы сӥзем музей усьтыны но эшшо одӥг книга гожтыны. Тӥни сыӵе тунсыко адями. Кызьы тодӥм, со кадь "ӟырдаса" ужась специалистъёс татын данак. Огез дышетэ сад-бакча будосъёсты мерттыны, мукетыз - сяськаос будэтыны, куинетӥез - пудо вордыны. Кин ке тодматэ лесниклэн уженыз, кин ке - чорыг вордӥсьлэн. Валамон ини, сыӵе мур тодон-валан сётон училищелэн куронъёсызлэсь вылӥынгес луэ ини. Нош ватсаса тодон-валан сётэмзы понна дышетӥсьёс ватсаса уждун но басьтыны кулэ. Ваньзэ тае валаса, училищелэн кивалтӥсьёсыз, нылпиослэн анай-атайёсынызы кема кенешемзы бере, дун тырыса дышетон сярысь огкыл гожтӥллям. Озьы 20 толэзь дышетскемзы понна фермеръёс толэзьлы быдэ 132 манет тырыны кулэ. Кытчы мыныны кулэ со коньдон, документын тупен-тупен гожтэмын, кылсярысь, 30 процентэз - преподавательёслы, 40 процентэз - В но С категориен шофёръёсты дасясь водительёслы, 27 процентэз - транспортэз возёнлы, 3 процентэз - методической пособиослы, учебникъёслы. Та огкыллэн пуштросэныз соглаш кариськизы туэ нырысетӥ курсэ кутэм нылпиослэн мумы-бубыоссы но. Кенеш ортчиз август толэзе. Училищелэн директорез Галина Петровна Кулишова та кенешын вылымтэ. Нош огкыллэн пуштросэз пумысен, кызьы шуэ Л. И. Романова, соин азьвыл ик вераськемын вал. Но, кӧня ке дыр ортчыса, директор документэз юнматыны пумит луэ. Со учыр коллективез бугыръяськонэ вуттэ. Зэмзэ но, огкыл гожтытэк туала вакытэ адямиосыз ужалод шат? Тӥни со дырысен училищеын шара вераськонъёс ӧръяськизы фермеръёсты дышетонэз дугдытон сярысь. Калыкез дышетонъя министерство отын ужасьлэн Е. Т. Солдатенковалэн кивалтэмез улсын вылысьтыз вылаз ньыль эскерон ортчытӥз. Оглом верано ке, ӟеч мылкыдын ортчытэм эскерон адямиослы пайда гинэ вае - шараясько тырмымтэос, юнма зэмлык, коллектив бурдъяське, ӟечгес ужаны кутске. Нош кыӵе пайда ваё меда сыӵе эскеронъёс, куке соос юри уродзэ адӟон понна гинэ ортчытӥсько? Тӥни со выллем мылкыдын Калыкез дышетонъя министерство эскерем фермеръёсты дышетонэз. Эскерисьёс номыре валэктытэк тыро-пыдо - куриллям преподавательёслэсь (тросэз доцентъёс но профессоръёс) уроклы дасям планъёссэс. Собере меӵак вераллям, вуоно дышетскон арысен татын фермеръёсты уз ни дышетэ шуыса. Тӥни озьы тӧлпери сямен ортчем татын эскерон. Маин со йылпумъяськем? "Арестовать" кариллям журналъёсты. Отметкаос интые, пе, отын куд-ог предметъёсъя "зачёт" шуыса гожтэмъёс вань. Кылсярысь, тазьы "янгышаса" ужа вылэм гурт хозяйствоя академиысь профессор С.Н. Ижболдина. Со вуоно фермеръёслы пудо вордонъя лекциос лыдӟе. Таӵе ултӥямез чидатэк, училищелэн директорезлэн наукая воштӥсез Л. И. Романова ужысь мозмытон сярысь куриськон гожтоно луэ... Вералом на, Людмила Ивановна фермер группаосты усьтонъя кичӧлтӥсьёс пӧлын вал. Солэн мыло-кыдо тышеменыз ик татчы ужаны кыскемын вал визьмо специалистъёс. Со ик пиналъёслы мастер-плодовод специальность басьтыны юрттылӥз, со ик вуоно фермеръёслэн Ботанической садын практикаенызы кивалтылӥз. *** ДЫШЕТСКИСЬ фермеръёс доры мыныкум, ас азям таӵе юан пуктӥ вал: малы туала нылпиослэн фермер луэмзы потэ но кызьы соосты та секыт ужлы дасяло? Тани кыӵе малпанъёссэс усьтӥзы егитъёс: Игорь Михайлов, И курс(Алнаш район): - Татын тодон-валанъёс басьтэм сяна, дышетскисько на гурт хозяйствоя академиын. Нюлэс хозяйство удысын ужаме потэ. Туж кельшиз Ботанической сад. Вань ужъёс татын училищеын дышетскисьёслэн киосынызы быдэсъясько. Малпасько, кӧня ке ар ортчыса, адямиос татчы ужаны уз, шутэтскыны гинэ ветлозы. Владимир Стерхов, И курс (Ижевск город): - Малпаны ик кышкасько, мар луоз Ботанической садэн, фермеръёслэсь группаоссэс пытсазы ке. Мон сямен, сад - республикамылэн узырлыкез. Кыӵе гинэ шер пумиськылӥсь будосъёс мерттэмын ӧвӧл! Туэ кык толэзь ӵоже татын практикамес ортчытӥм. Фермер луон мылкыды уката но юнмаз. Мыным, городын будэм муртлы, мукетыз но валамон луиз: гурт хозяйствоез азинтытэк экономикаез уд ӝуты. Училищеын милемыз малы ке уг сюдо, нош татын кӧттыр сиським - ас киосынымы будэтэм бакча сиёнъёсын пӧраським. Ми понна туж валантэм, малы сыӵе усто специалист Людмила Ивановна табере милемыз дышетэмысь дугдӥз. Училище бере малпасько академиын дышетскыны. Сергей Сидоров, ИИ курс (Ижевск): - Гурт хозяйствоя академие пырыны мыным ӝыны балл ӧз тырмы - озьыучилищее пыри. Туж шумпотӥ вал, татын но сад-бакча емышъёсты будэтӥсьлэсь специальностьсэ басьтыны быгато шуыса. Диплом уже но соин герӟаськемын. Нош табере уг тодӥськы, кызьы мон сое йылпумъялом - дышетӥсьмес кошкытӥллям. Али вераськонъёс мыно, училищеын фермеръёсты дасямысь дугдозы ни шуыса. Малы асьмелэн котьку но озьы луэ: ӟеч кутсконлы кин ке но пумитъяськись сюре. Россия - аграрной страна ук, неужто солы музъемен ужаны быгатӥсьёс кулэ ӧвӧл? Любовь Соколова (Кизнер ёрос): - Малпасько мастер-плодоовощевод луыны. Туж кельше, коньдон тырыса ке но дышетскисько. Песянаймылэн вань пенсиез со понна кошке. Но вордскем Саркуз гуртам уж уз сюры, дыр, колхозмы куашкамын. Малпасько Можгаысь яке Воткинскысь питомникын ужаны. Валентина Гавшина, ИИ курс (Кез район): - Малпасько атаелэсь ужзэ азьланьтыны. Со лесник луыса ужа. Анае - дышетӥсь. Школаын умой дышетскисько вал бере, фермер луон мылкыдме тросэз умоен ӧз лыдъялэ. Но гурт хозяйствоын "кыклы" но "куиньлы" дышетскисьёс гинэ ӧй ужасалзы ке, оло, асьмеос ноку таӵе куашкан кылэ ӧй вуысалмы. Паймисько, малы асьмеос бакча сиёнъёсты гинэ но ялан палэнысь ваиськом. Соосты татын но тырмыт будэтыны луэ ук. Туж куректӥсько, сад-бакча емышъёсты будэтонъя урокъёсмес табере Людмила Ивановна Романова уг ни нуы шуыса. Мукет эшъёсы сямен ик, мон но гурт хозяйствоя академиын дышетскисько на. *** ТӤНИ сыӵе вераськон радъяськиз фермерлы дышетскисьёсын. Огзэс но кылтӥзы кысконо ӧй вал. Озьы пумен валатски: кивалтӥсьёс куспын кылдэм керетонъёс туж шӧдӥсько егитъёслэн но мылкыдзы вылын. Огез арлыдоез дышетӥсь М. И. Михайлова синвуаськыса сямен ик кӧтӝожзэ вераз: - Тросэз ужасьёсмы вань улонзэс дышетонлы сётэмын. Кызьы нуоно урокъёсты - милемыз дышетоно ӧвӧл ни. Котькудмылэн азьпала ужан планъёсмы но вань, бумага вылын гинэ ӧвӧл, сюлмамы но йырамы. Нош министерствоысь эскерись Е. Т. Солдатенкова милемыыз косӥз кемалы ужан планъёс гожтыны 1973 арын дасям куронъёсъя (образецъя). Зэм, мон адӟи со вашкала бумагаосты. Неужто 25 арлы бере кыльыса ужа Калыкез дышетонъя министерство? Малпан кылдэ, училищеын кылдэм югдур дышетӥсьёслэн ужаны быгатымтэенызы чик но герӟаськемын ӧвӧл. Ужпум - нылпиослэсь бичам коньдонзэс люкон бордын. Таӵе малпанзэ озьы ик вераз сяська будэтонлы дышетӥсь Э. А. Туйматова. Нош со ваньмыз чакламын ук огкылын. Соин ик Калыкез дышетонъя министерствоысь специалистъёслы умойгес, дыр, луысал керӟегъяськонтэк но керетонтэк со документлэсь быдэсъяськемзэ эскерыны. Нылпиослэн коньдонзы училищелэн кассаяз мынэ. Но кулэ дыръя отысь коньдонэз курыны уг луы, шуэ Л. И. Романова. Ботанической садын ужакузы, пиналъёслы нуналлы быдэ нянь но мукет сиёнъёс басьтоно. Транспортэз уже кутыку, бензинлы но коньдон кулэ. Ваньмыз понна мастеръёслы ас кисыысьтызы коньдон тыроно луэ. Озьы ик преподавательёслы но ватсаса уждун туж ӝегаса висъяське. Малы озьы луэ? Пиналъёс дышетскемзы понна коньдон дыраз тыро ук. Макем бадӟым ужъёсты быдэсъяно луо вуоно фермеръёс, таӵе лыдпус гинэ вера: сад интыяськемын 700 гектар музъем вылын, 380 гектарзэ нюлэс басьтэ. Фермере дышетскисьёсты утён вылысь, преподавательёс, анай-атайёс но пиналъёс Кун Кенешлы, Правительстволы но "Удмурт кенешлы" вазиськон дасяллям. Со вылэ 75 адями гожтӥськем. Но училищее вуылыкумы, соин тодматскыны ӧз кылды. Кытчы ке ышем, шуизы. Ми бӧрсьыгес ик татчы телевидениын ужасьёс вуылӥллям - журналистъёсты ужаны лэзиллямтэ. Вань та учыръёсты тодэме бере жингыртоно кариськи Калыкез дышетонъя министерствое училищеос понна кыл кутӥсьлы В. Н. Вахринлы. Юасько: - Кыӵе решение кутэмын фермеръёсты дышетон пумысен? - Фермеръёс дышетско но дышетскозы, азьланяз но дышетскисьёсты кутыломы, - шуиз со но телефон трубказэ шуак куштӥз. Оло паймоно, оло шумпотоно? Ваньмыз озьы сэрттӥськиз бере, малы сокем ӟырдатоно вал югдурез? Валантэм. Нош мар кароно юнме янгыше уськытэм но ултӥям преподавательёслы? Ужаны мылкыдзы луоз на-а табере татын мукет вузъёсысь учёнойёслэн? Мар кароно яратоно дышетӥсьсытэк Л. И. Романоватэк кылем фермеръёслы? Мон сямен, сӧриськем кусыпъёсты тупатон понна, табере трос кужым но дыр кулэ луоз. Тодэме потӥз на, малы вазиськонэз гожтэмъёс "Удмурт кенеш" огазеяськонлэсь но юрттэт куро. Тазьы валэктӥзы: фермере дышетскисьёс пӧлысь тросэз - удмурт нылпиос. Преподавательёслэн мылкыдзы вань республикаямы фермеръёсты дасянъя национальной школа кылдытыны. Со понна асьмелэн специалистъёсмы но, дышетскыны мылкыд карисьёсмы но, музъеммы но вань. Нош керетонъёс? Кинлы меда соос кулэ? Татьяна БАННИКОВА. Дышетӥсь М. И. Михайлова. Вуоно фермеръёс. Туспуктэмъёсыз Владимир. Камашевлэн. Оскон Ёрмисьёсты ёрмем мурт гинэ вала Пересьёс, мӧйыос ӵемысь тышкасько егитъёсты, пиналъёсты. Нош мынам песянае Мария Васильевна Иванова жаля. - Вашкалаен ӵошатыса, котьмар вань кадь. Но огласянь со ик урод: басьты вылэм, коньдон ӧвӧл. Ёрмон егитъёсты пачкатэ, отысь ик вожъяськон, лушкаськон потэ. Ачиз но бен пинал дыръяз ёрмытэк ӧз улы. Шудонэн-серектонэн йырин ӧй вал, ялан ужано луиз. Вордӥськем со Азаматын. Семьязы бадӟым вылэм - вить нылпи. Атайзэс но бадӟым агайзэс войнае басьтӥллям. Нырысь соосыз Иж сьӧрын дышетыса возиллям. Анайзы отчы валэн сиён нуллыса ветлонъяз черлам, больницае сюрем. Песянае вылэ соку гинэ вордӥськем выныз Коли кылем. Бӧрдэ-бӧрдэ, пе, мар карыны паймыса, ачиз но пичи мар ке вынызлы ымдурзэ нонтытылэм. Трос ик дыр ортчымтэ, атайзылы но агайзылы похоронка вуэм. Соку ӟечезлы осконзы воксё бырем. Вылаз ик, пиналъёсты Каркалае тэль коранэ лэзиллям. - Монэ но усьтыр-табыр каризы,- вера со.- Нуыкузы пытсэт улын возизы. Кызъёсты пинал муртъёсты бычкыен вандылытӥзы. Нош выжыоссэ лопатаен гудыса поттылӥм. Нырысь ужаммы уг пӧрмы вал, кыз улын бӧрдыса но пукеммы вань. Кезьыт-а, сулеп-а - пыдамы кутъёс. Куасьтэм но ӧз йӧтылы, ӵукна нош котэн ик кутчаллям. Сютэм улыса, ӟигармы быриз. Чиданмылы пум вуыса, одӥг ӝытэ Ибай Люба, Яша Аннӥ но мон пегӟим. Кураськыса пырак пыдын бертӥм, лапас улысь етӥн вылын но кӧлоно луиз. Гуртын кема улыны ӧз кылды, нош Постол нюлэскы лэзизы. Кызь куинь арескам бызи. Озьы но шудме ӧй пумита - ёрмыса улӥмы. Уж дурын но шокчыны маза ӧй вал. Сием потэмысь одӥг пол Катяенымы Сырьезь нюлэскы эмезяны пегӟим. Ӵуказеяз ик бордгазетэ поттӥзы. Ужлэсь ӧй палэнскылы, пенсие потытозям фермаын тырши: парсь сюдӥ, колхоз пудоез возьмай. Али песянаелы 71 арес тырмиз ни. Пери шуккыса, паллян пыдыз но суйыз уг ужа, мырдэм ветлэ. Висемезлы чидатэк, кырӟан гур мытэ. Нош кисыриё бам вылтӥз синкыли питырске. Галя КОНОВАЛОВА. Алнаш ёрос, Вуж Шудья гурт. Азьветлӥсьёс пӧлын Поттэм вузъёслэн вылӥ ӟечлыксы но ужазы бадӟым пайда сётӥсь амалъёсты кутэмез понна туэ Россия Федерациысь Правительстволэн премиез сётэмын "Чепецкий механический завод" акционер огазеяськонлэн коллективезлы. Соин валче предприятиын ужасьёсты ӟечлыкез Удмурт Республикаысь Кун Кенешлэн Тӧроез Александр Волков. Телеграммаын, кылсярысь, шуэмын: "Вылӥ дунъясько но тау карисько тӥлесьтыд мылысь-кыдысь, ужлы вань сюлэмдэс сётыса тыршемдэс. Тӥледлы но матысь адямиостылы вань сюлмысьтым сӥзисько юн тазалык, шудбур. Чепецкой механической заводлы, Удмуртилэсь экономиказэ ӝутонын азьветлӥсьлы таӵе вылӥ дунъет сётон азьланяз но элькунмылэсь улон-вылонзэ умоятонын выль сюресъёс мед усьтоз". Награда сётэмын толон Россия Федерациысь Правительстволэн юртаз. Кун Кенешлэн пресс-службаез. ТАЗАЛЫК Кин янгыш? Нылпие Даунлэн висёнэныз вордскиз. Картэ дорысьтыз улляз, ачид сыӵе пинал вордӥд, ачид ик утялты шуыса. Валэктэ вал, пожалуйста, кин яке ма янгыш нылпие сыӵе вордӥськемлы... О. ЧИРКОВА. Игра ёрос. Юанлы валэктэ Елена Валерьевна ОСИПОВА нырысетӥ республиканской больницаысь врач- генетик. - Адямилэн котькудаз клеткаяз 23 пкуз хромосомъёсыз вань. Соос нылпилы анай- атаезлэсь, быдэс выжыезлэсь сямъёссэс, мугорзылэсь аспӧртэмлыкъёссэс, висёнъёссэс "кузьмало". Кылдо соос, нылкышно но воргорон клеткаос огазеяськыку: выль улэп маке огзэ хромосомез басьтэ анаезлэсь, мукетсэ - атаезлэсь. Но луэ озьы но: 46 хромосомъёс борды ватсаське на эшшо огез - мултэсэз. Дунне вылэ вордӥське нылпи - сюлэмыз но мукет ёзъёсыз висё, ымнырыз паньгес, ныр выжыез паськыт, синъёсыз кырыжесь, ымыз пась, кылыз потэмын. Даунлэн висёнэз ӵем гинэ пумиськылэ: 600-700 нуны пӧлын огез ке но та висёнэн висе. Удмуртиын арскын 25 сыӵе пинал вордске. Ӝыныез соос пӧлысь вордскем беразы ик куло, малы ке шуо но, секыт пуш висёнъёс соослы улыны уг сёто. Эшшо 20 процентэз куинь арес тырмытозязы куло. Кылемез - уло, но кема уг. Соос чаль пересьмо, со сяна, висёнъёсты вормон кужымзы туж ляб, соин ик паласькись висёнъёсын ӵем черлало. Даунлэн висёнэз пӧртэм луэ. Нылпи мугорын мултэс хромосомъёс ӝыныезлэсь ичи клеткаосын вань ке, со огшоры школаын дышетскыны быгатэ, сое пӧртэм ужъёсты быдэсъяны дышетыны луоно. Нош ваньмыз клеткаос 47 хромомосомъёсын ке, соку ини адями вань даурезлы чылкак лябвизьем кыле. - Малы инкуазьлы сыӵе нылпиос? - Данаказ учыръёсы инмар-а, шуод, асьмелы сыӵе адӟон ыстэ, дыр, асьмеды инкуазьлэсь вылэ пуктэммы понна. Угось хромосомъёслэн умойтэм "шудэмзы понна" нырысь ик янгыш кырсь омыр, кырсь ву, кырсь музъем... Нош кыкетӥез мугез - выжыысь выжые люкаськись воштӥськонъёс. Нылпилы песятаезлэн хромосомъёсаз пичи гинэ воштӥськонэз вал ке, атаезлэн со, муроме, нош ачиз нылпи висись вордске. Даунлэн висёнэз юн герӟаськемын анайлэн арлыдэныз. Макем кышномурт, мӧйыгес сокем кышкытлык бадӟымгес. 35 аресъем нылкышноос кык поллы ӵемгес вордо висисьёсты, нош 44 аресъемъёсыз - дас пол ӵемгес. Даунлэн висёнэз пушъе нылпи кылдыку ик. Соин ик со ӧвӧл герӟаськемын анайлэн секытэн дыръяз висёнъёсыныз, мае сиеменыз, кыӵе омырен шокаменыз но кыӵе мылкыдэн улэменыз. - Даунлэн висёнэныз нылпиослы кытын умойгес: семьяын-а, интернатын-а? - Семьялэн сыӵе нылпиез будэтыны луонлыкез вань ке - висись пинал понна туж умой. Угось сое татын, эмъям но дышетэм сяна, ярато. Яратон котькыӵе нылпилы улыны кужым сётэ. Но Даунлэн висёнэныз нылпиез будэтӥсь семьялы туж шуг йӧтоз. Нырысь ик, семьяысь огез мурт, пиналэз утялтон понна, ужысьтыз кошконо луоз. Кыкетӥез, туала государство сыӵе семьяослы но нылпиослы тыро-пыдо юрттыны уг быгаты. Соин ик котькудӥз семья ас понназ бырйыны кулэ: вормоз-а со вань шуг-секытъёсты но нылпизэ дораз будэтоз яке сётоз сое интернатэ. - Таӵе нылпиос кема уг уло, шуиськоды. Инкуазь аслэсьтыз янгышсэ ачиз ик тупатыны тырше кадь... - Инкуазь соослэн лыдзы медаз йылы шуыса сюлмаське. Даунлэн висёнэныз воргоронъёс атай луыны уг быгато. Нош нылкышноос нылпи вайыны быгато ке но, шер. Куд-ог учыръёсы соослэн нылпиоссы тазаесь вордско. - Но инкуазьлы гинэ оскиськыса улоно ӧвӧл, дыр... - Шонер. Тани Западын вань нылкышноосты секытэн дыръязы но азьлогес генетикъёс эскеро. Асьмеос ваньзэ озьы эскерыны ум быгатӥське на. Но милемлы вазиськисьёс юрттэттэк, визь-кенештэк уг кошко. Вазиськисько вань анай-атайёслы, нылпи вордыны дасяськисьёслы: вань ке выжыяды Даунлэн висёнэз, олигофрения - капчи визьем луон, шизофрения - психикалэн сӧриськемез но выжыысь выжые паласькись висёнъёс, лыктэ генетикъёс доры. Соос тӥледыз эскерозы, вералозы, нылпиды таза яке висись вордскоз, нылпиостылэн нылпиоссы кыӵеесь луозы. О. ВАХИТОВА. Кизилиос люкаськозы "Удмурт дуннее" Котькуд калыклэн сямен, асьмелэн но вань яркыт пиштӥсь кизилиосмы, мукетъёсызлэсь вылэгес ӝутскем нылъёсмы но пиосмы. Удмуртъёс понна данъяськон мылкыд уг кылды шат, Валентина Пудова яке Анатолий Ушаков шоры учкыку?.. Артист луэм уг поты шат, сцена вылысь Фаина Будинаез яке Вячеслав Байковез адӟыку?.. Визьмогес кариськыны уд тыршиськы шат, Зоя Сувороваез яке Владимир Владыкинэз пумитаку?.. Редакциямы кызь вить ар ӵоже ни ужась суредасьмы Леонид Прозоров (ма, ачиз но со учкымон адями - Кун премилэн лауреатэз, искусствоосъя дано ужась) мылкыд кариз удмурт кизилиослэсь тусбуйзэс бумага вылэ пуктыны, со портретъёсты лыдӟись доры вуттыны. Та аспӧртэмлыко галерея кыдытон бордын Леонид Алексеевич кема ужано луоз - уго дано адямиосмы пумтэм. Кин бордысен кутсконо? Та нуналъёсы 25 ар тырме асьме тодмо артистъёслэн Москваысь Щукин нимо театральной училищеез йылпумъямзы дырысен. Туннэ соос Удмурт театрлэн шорсюлмыз луо. Кӧня ке портрет дась ни. Отӥяз Прозоров эстрадаын ужасьёс доры вуыны малпа, бӧрысьгес тодосчиосмес но "курадӟытоз". Оло, тӥ, гажано эшъёс, юрттоды калыкмылэсь кизилиоссэ шараяны? Кинэ адӟемды потэ газет бамысь? Ай милям сыӵе но малпанмы вань. Ар ортчыса, газет баме шедем кизилиосмес, оло, редакцие люкалом но бадӟым праздник ортчытом. Котькуд пятницае (яке субботае) потӥсь номерлэн куинетӥ бамаз табере печатлалом Л. Прозоровлэсь выль ужзэ. Соосты огбыдӟа сётъяны тыршом - кин мылкыд кароз, портретъёсты вандылыса, альбом но лэсьтыны быгатоз. И. ЛЕБЕДЕВ. Конституцилэн нуналэныз Удмурт Элькунысь вань гражданъёсты сюлмысьтымы ӟечкыласьком кунмылэн одӥгеныз бадӟыменыз праздникен - Конституцилэн нуналэныз. Россия Федерацилэн Конституциез (Основной Законэз) вань калык куаразэ сётыса кутэмын 12 декабре 1993 арын. Асьме странаын улӥсь трос нациё калыклэн мылкыд каремезъя, быдӟым Россия кунэз демократической реформаосты азинтон сюрес бырйиз. Та Конституция кутэмын туала исторической вакытлэсь, общественно-политической но экономической азинсконлэсь куронъёссэ лыдэ басьтыса. Отын уката бадӟым саклык висъямын калыкъёслэсь улонзэс но эрикзэс ас мылкыдзыя радъянлы, государстволэсь быдэслыксэ утёнлы. Россия нош ик кунэз демократической амалэн азинтонъя сюрес бырйиз, юнматэмын адямилэн правоосыз но эрикез, калыкъёс куспын тупаса но огкылысь улон. Выль Конституция историен кылдытэм вань умой сямъёсты огазеяз, Россиын котькуд улӥсь понна азьланезлы оскон пыӵатӥз. Сӥзиськом тӥледлы юн тазалык, котькуд семьяын мед луоз тупаса но шудо-буро улон, ӵуказе нуналлы оскон. Удмурт Республикаысь Удмурт Республикаысь Кун Кенеш. Правительство. Тямыс кузя, одӥг "кузё" Галина Владыкина, Ольга Чужанова, Фаина Будина, Раиса Нефёдова, Пётр Романов, Вячеслав Байков, Виктор Стрелков. Кин уг тоды та нимъёсыз? Шуыны луоз: соос Удмурт театрысь кизилиос. 25 ар талэсь азьвыл, Москваысь Б. Щукин нимо училищеез йылпумъяса, кыӵе гинэ спектакльёсын, кыӵе гинэ рольёсты шудыны ӧз кылды ни та эшъёслы. Котьку ик соосын артэ асьсэлэн режиссёрзы Василий Ушаков. Со ик огазея, валтэ, кулэ дыръяз кыл но кутэ. Таяз учыре - юанъёсмылы валэктэ. - Кызьы тодмо, куать бурдо Серафим - (кудзэ гожъяз А. С. Пушкин но) - со славян мифологиысь кылчин, утись. Тӥляд со, Василий Серафимович, вордӥсьёсты но. Ас выжыосты сярысь кӧня ке вералэ вал. Кӧкыысен ик искусствое ӧд бурдъяське, дыр? - Ӧй. Атае мынам музъем ужась вал, но огшоры ик уд шуы, дыр. Со колхоз председатель но вал, лесник но. Калыкез ӝутӥсь, огазеясь адями. Со выжые мынӥськем, вылды, бугырес мылкыдзэ басьтӥськем. Эшъёсы пӧлын валтӥсь вал. 8-тӥ классын дышетскыкумы, куать кузя пиос огазеяським, "анархистъёс" шуимы асьмедыз. Чупчи вырйылэ, тужгес ӝужыт интыяз, землянка лэсьтӥмы. Вуж Эбга гуртмы вӧзамы ик, вырйылын. Нош улӥын - синсузёнтэм паськыт возь, тудву дыръя - зэмос зарезь. Учкыса, сюлэм шурдэ - лобӟем но, бӧрдэм но потэ кадь. Лобӟимы - пӧртэм-пӧртэм палъёсы... Нош малпаськом вал куатьнамы ик, куать эшъёс, одӥг коркан улыны, кышнояськыса но... Уставмыя нокинэ жугыны, обидьыны уг яра вал. Нылъёс ми борды кыстӥськылӥзы. Футбол бусы кылдытӥм, кӧня калыкез со шудонэ кыским... - Та вакытты сярысь книга гожтыны луоно. Писатель луысалды ке... Валтӥсь, бугыртӥсь сямды тӥледыз режиссёре вуттӥз. Нош солэсь азьвыл вал на ук артистэ сюрес? - Кыкетӥ классысен ик ини сценкаос пуктылыны кутским. Кылбур лыдӟыны яратӥсько вал. Дышетӥсьёсмы Антонина Григорьевна, Клавдия Васильевна туж тыршизы, юрттӥзы. Зарезь вылын уясь луэме потэ вал... Но артистэ мыныны малпан йырам шуак чилектӥз, улон азьме югак кариз, куке вожатой, тодмое, дэмлаз: Щукин нимо училищее, пе, туэ кутозы. 17 арес вал мыным соку. - Али гинэ вал кадь: чебер, задор, синмаськоно кадесь нылъёс-пиос вуизы Удмурт театре. Ортчиз 25 ар. Табере тӥ тямыс кузя кылемын - тужгес юнэсь, оскымонэсьёсыз... - 21 кузя дышетскыса бертӥм вал: 10 ныл, 11 пи. Кӧжы сямен пазьгиськыса, кин кытчы выжыяськиз: Тамара Клабуковамы испанецлы бызиз, Эквадоре кошкиз, Рая Ильина - Германие (туэ со бертылӥз), Маша Романова - Москваын, Коля Поторочин - Уфаын, Света Шиляева кытын ке ӟуч театрын ужа... Нош Удмурт театре ваньмы кадь берытским вал. Трос пол пуктылӥм (ӟуч кылын) дипломной спектакльёсмес: "Машенька", "Дуэнья", "Бедность не порок". Горькийлэсь "Фома Гордеевзэ" татын ӧм возьматылэ. Удмурт кылбурчиослэн гожъямзыя композицимы вал на. Витетӥ курсысен ини, тулыс каникулъёсмы дыръя, Вахтангов нимо театрын пуктӥм Афиногеновлэсь "Машеньказэ". Малы ке ӵапак милемыз, удмуртъёсыз, куризы. - Син шоры йӧтымон луэмды понна, тау кариськоды, дыр, дышетӥсьёстылы. - Бен, кызьы сотэк. Художественной кивалтӥсьмы Борис Григорьевич Кульнев вал, собере - Марианна Рубеновна Тер-Захарова, яратоно дышетӥсьёсмы пӧлысь - Альберт Григорьевич Буров, Цицелия Львовна Мансурова. Улэп на вал училищеез кылдытӥсьлэн Борис Щукинлэн кузпалыз Татьяна Митрофановна Щукмина... - Театрез тодымтэ муртлы фамилиос гинэ номыре уз вералэ на. Мар аспӧртэмез вал училищеяды дышетсконлэн? - Щукин нимо училищеын сыӵе система: котькудӥз дышетскись дасо мында педагогъёс пыр ортче, озьыен, соизлэсь но, таизлэсь но аслыз кулэзэ, ярамонзэ пыӵатыны быгатэ. Нош художественной кивалтӥсь ини, спектакль бордын ужаку, ваньзэ герӟа, тупатэ, кыӵе ке организмын сямен. Милемлы, та училищеез пыр потэмъёслы, кыӵе ке огъя тус-а, мар-а пуксемын шуод - ог-огмес тодмаськом, щукинец шуо ке, кылмы тупа ини. Пӧртэм аръёсы ке но дышетскемын. - Тӥледын ӵош огдыре дышетскизы тодмо артистъёс, соос пӧлын кино пыр данэ потэмъёсыз но... - Константин Райкин, Юрий Богатырев, Владимир Тихонов, Наталья Гундарева, Леонид Филатов... Куд-огеныз эшъяськиськом но вал, кылсярысь, Вячеслав Байков - Филатовен. Нина Русланова нылъёсмы доры ӵем пыралляз. Наталья Варлеез "Кавказская пленницаысь", соку гинэ пуктэм выль фильмысь адӟим, нош учкиськом - со но милемын дышетске. Куд-ог эшъёсмы Удмуртие куное но вуылӥзы. - Зэмзэ, тӥляд "организмды" умой ужа, "сюлэмыз" зол жугиське. Котькудӥзлэн ас тусбуез, но ог-огзылэсь висъянтэм, шуысал. - Бен, озьы ни. Табере театр - котькудӥзлэн ӝыны улонэз. Отысь нокытчы уд ни кошкы. Мон шуысал, тямыс мурт пӧлысь котькудӥз та кызь вить ар ӵоже ассэ усьтыны быгатӥз. Нокыӵе шуг-секытъёс шоры учкытэк. Шудэмез потэм ролез шудытэк кыльыса но. Нош кудӥз шедьтӥз на ассэ мукет удысын но, шуом, Вячеслав Байков юморескаос малпа но лыдӟе, Фаина Будина чебер вераськыны дышетэ, Ольга Чужанова эстрадае кыстӥське, Пётр Романовез котькытысь адӟод - удмуртлык понна висись... - Щукинецъёслы удалтӥз, шуыны луоз, дыр. Пӧлысьтызы ик асьсэлэн режиссёрзы вань. - Училищеын ик дэмлазы но куризы вал ни кык муртэ режиссёре дышетскыны. Но соку малы ке ӧм нодсаське. 1977-тӥ арын ини Вылӥ курсъёсын дышетски, 28 арес дыръям режиссёр луи. Мон максималист вал, туж оски аслым но, эшъёсылы но. Кепыран сямы ӧй вал. - Бен, кужымедлы оскытэк, возэз уд нуы. Но кинлэсь ке дышетскиды ик, дыр? - Татын нокинлэсь ик ӧй дышетскы, ӧй вуы. Ас шӧдэме-адӟеме но Москва, Вахтанговлэн школаез (Гончаров, Львов-Анохин) юрттӥзы, дыр, мар ке азинсконъёсы вань ке. Но мон шуысал: режиссёре уг дышето, со улон, ужан пыр сётӥське. Яке тон вань, яке ӧвӧл. - Кин со, тӥ сямен, режиссёр? - Режиссёр - со сыӵе ик автор, драматургилэн, спектакльлэн, актёрлэн авторзы. Мукет сямен вераса, авторен (драматурген, крезьгурчиен, суредасен, актёрен) ӵош произведение кылдытӥсь - аслэсьтыз адӟемзэ огазеяса, быдэскын адӟись. Со авторлэн авторез но, шуыны луоз. - Тӥледлы тямыс муртлы ик - астистэзлы но, режиссёрезлы но - дано нимъёс сётэмын ни. Котькудӥз ик, дыр, сюлэсь уно спектакльёсын шудӥз, тӥ 33-зэ пуктӥды. Нош асьмелэн весь Удмурт театрез пыкылон, умой режиссёръёс ӧвӧл шуон уг чалмылы. - Национальной драматической искусство шоры учкон, со котырын кыл шерон мыным валантэмгес потэ. Яке театр ассэ уг возьматы, кинэн кулэ кусып уг шедьты... А. Островский шуиз: "Театр - калыклэн лул-сюлэмызлэн синучконэз". Нокытчы уд кариськы - асьмелэн национальной театр одӥг гинэ - калыкъя ик кариськоно луэ: арганэн, кырӟанэн, шудонэн-мактаськонэн, музъемлы матэгес. Сыӵе асьмелэн менталитет, шуиськом. Асваланмы ӧз ӝутскы на... Нош мукет ласянь ке... Кытчы гинэ мынӥськом - паймо: кыӵе золэсь тӥляд артистъёсты... Но ведь артистъёс режиссёр пыр будо. Со ик валантэм - режиссёрез адӟымтэзы. - Никвлад Самсонов газетамы алигес потэм статьяяз шуиз: театр драматургия бордысен кутске... - Мон но озьы ик шуисько. Одӥг тодмое верамъя, асьмелэн мармы вань - кырӟанъёс, поэзия, нош эпос ӧвӧл. Драматургия ӧвӧл. Мар бордысен кутсконо? Самой выжыысеныз. Оло, куштӥськоно вылэм али улонмес Станиславский дышетэмъя, бытово-психологической пьесаос возьматэмлэсь. Асьмелэн, оло, воксё мукет ӧретӥ мыноно вылэм - обрядъёс, калык сямъёс пыр. Паймисько И. Гавриловлы, К. Ложкинлы, В. Садовниковлы... Соос шӧдо вал, мар бордын театрлэн шорсюлмыз... Шӧдӥсько, асьмелэсь та вераськонмес азьланьтыны луоз... Но берытскоме туннэ нуналэ. Ӵуказе тӥ пусйиськоды 25 аръем юбилейдэс. - Бен, мылкыд карисьёсты ӧтиськом Удмурт театре. Шулдыртозы щукинецъёс! Вераськиз Т. ПЕТРОВА. Монашевская школа Менделеевского района Республики Татарстан Приглашает выпускников на юбилей школы 18 декабря. Мае витиськом асьме интеллигенцилэсь Ӵуказе Госсоветлэн бадӟым залаз ортчоз "Удмурт интеллигенцилэн нациез азинтонын интыез" ("Роль удмуртской интеллигенции в дальнейшем развитии нации") научно- практической конференция. Сое радъян пусъемын вал исполкомлэн 1998 арлы кутэм планаз. Гужем ик кылдӥз оргкомитет. Кин пыриськоз конференцие? Кылсярысь, котькуд ёросысь но карысь лыктоз ньыль адями: администрациослэн кивалтӥсьёссы но "Удмурт кенешлэн" активез. Ӧтемын Кун Кенешысь но Кивалтэтысь кивалтӥсьёс. Озьы ик ӧтёнъёс ыстэмын министерствоослэн но комитетъёслэн кивалтӥсьёссылы. Пыриськозы конференцие удмурт учёнойёс, вылӥ дышетскон учреждениосын ужасьёс, удмурт кылъя дышетӥсьёс но "Удмурт кенешлэн" Ижысь активез. Ог 250 пала адями пыриськыны кулэ та конференцие. Малы бен, кызьы кылдӥз конференцилэн тематикаез? Нырысь ик пусъёно, интеллигенция - котькуд калыклэн зэмос визьмыз, элитаез, уката ик верано ке учёнойёс, культура но искусство удысын тыршисьёс сярысь. Интеллигенция котькыӵе власть дыръя сылэ оппозициын, ноку но уг буйгатскы туала улонэн гинэ, учке азьлане, калыкез сайкатэ, возьматэ солы выль сюрес, ӝутэ сыӵе ужпумъёсты быдэсъянэ, кудъёсыз герӟаськемын калыклэсь мылкыдзэ юнматонэн, солы визь-кенеш сётонэн. Огъя вераса, интеллигенция котькыӵе дыре, котькыӵе дауре бадӟым инты басьтэ но басьтыны кулэ нацилэсь кужымзэ но пуштроссэ юнматонын, зэмос бадӟым нация кылдытонын. Сыӵе-а асьме интелигенция? Кыӵе солэн туала дыре интыез удмурт нациез ӝутонын? Вань-а солэн кужымез асьме калыклы пыд йылаз султыны юрттон ласянь? Вань та юанъёслы конференция валэктон сётыны кулэ. Нош малы ми али ӝутӥмы та юанъёсты, пусйимы та ужпумъёсъя нимысьтыз конференция? Огкылын гинэ вераса, дыр вуиз. Асьме национально-демократической движенилэн историяз выль вакыт Тодады вайытэме потэ азьлозэ. 1988-тӥ арын январь толэзе удмурт интеллигенцилэн азьпал радаз вамышъясьёс Н. В. Симанов, В. А. Осипов, Л. В. Крестьянинова, А. Г. Шкляев но Ботников кузпалъёс Ижын кылдытӥзы удмурт клуб. Бӧрысьгес со пӧрмиз удмурт культурая "Дэмен" огазеяськонлы. Нош таиз ини ас вылаз басьтӥз И (ВИ) удмурт ӧтчамез дасянъя но "Удмурт кенеш" огазеяськон кылдытонъя ужрадъёсты. Со вакытэ асьме движение котыре люкаськемын вал удмурт интеллигенцилэн калык понна зэмос сюлмаськись, солэсь кулэяськонъёссэ валась кӧня ке дасо адямиосыз. Дас арлэсь кема дыр ӵоже огазеяськонмы юнмаз, шӧдскымон будӥз солэн кужымез, "Удмурт кенешмы" выжыоссэ лэзиз калык пӧлы, ас котыраз огазеяз "Дэмен", "Шунды", "Вӧсь", Нылкышно кенеш но мукет удмурт огазеяськонъёсты. Азьло дыре солэн ужамез Ижын гинэ шӧдӥське ке вал, али солэн ёзъёсыз кылдылэмын вань асьме ёросъёсын но каръёсын, озьы ик - Удмуртилэн палэназ но. Огъя вераса, "Удмурт кенеш" огазеяськон ас котыраз люканы быгатӥз удмурт калыклэсь етӥз, кужмо, калыклэн азьпала улонэз сярысь малпаськись адямиоссэ. Но со тырмыт ӧвӧл на. Нош тодмо ини, котькуд выль кылдӥсь партилэн яке движенилэн кужымез потэ куинь ужпум бордысь: организационной ужпум, теоретической инъет дасян но газет кылдытон. Организационной ужпум асьмелэн быдэстэмын, шуыны луоз, вылӥысен улӥозь ёзъёс вань ни. Газетмы, басьтоно ке лыдэ "Удмурт дунне" газетэз но отысь "Герд" бамез, вань. Табере азьпал ужанмы герӟаськемын теоретической ужпумъёсын. Ӵапак та удысэ ми кыскыны кулэ асьме интеллигенциез. Уго та бордын асьмелэн тужгес но ляб интымы. Шонерак вераны кулэ, та дырозь палэнын сыло на куд-ог тодосчиос, политологъёс, философъёс, экономистъёс, кин тырше пӧртэм удысъёсын, дышетон учреждениосын, научно-исследовательской институтъёсын. Тани, кыл сярысь, политикая клуб кылдытонэн вырыкумы тодматскимы ИжГТУ-ын, Удмурт кун университетын, мукет вузъёсын ужась учёнойёсын, кудъёсыз чик но ӧз пыриськылэ на "Удмурт кенешлэн" ужрадъёсаз. Соослэн визь-кенешсы, быгатонлыксы лыдэ басьтымтэ но уже кутымтэ на. Туж умой луысал, К. А. Пономарёвен, А. А. Разинэн, Л. Д. Загребинэн, В. М. Ванюшевен, Р. И. Яшинаен, Г. А. Никитинаен, К. И. Куликовен, З. В. Сувороваен но мукетъёсыныз артэ музон тодосчиос но удмурт движение пыриськыны мылкыд карысалзы ке. Л. С. Христолюбовалэн тодмо книгаезъя гинэ асьме республикаын али тыршо куинь сю пала удмурт учёнойёс. Кыӵе со бадӟым кужым! Нош лыдъяно на ке дышетӥсьёсты, инженерно- технической ужасьёсты, культура но искусство удысын тыршисьёсты, кылбурчиосты, писательёсты, крезьгурчиосты но суредасьёсты? Со бадӟым кужымез, милям валаммыя, юн герӟано "Удмурт кенеш" огазеяськонэн но со азьын сылӥсь ужпумъёсын. Национальной политика, идеология, экономика, культура, закон дасян но мукет удысъёсын асьмелэсь интымес шедьтон понна, аналитикъёслэсь, историкъёслэсь, политологъёслэсь, экономистъёслэсь кужмо командаос кулэ. Пусйыны луысал на трос мукет но ужпумъёсты, кудъёсыз бордын тыршыны кулэ асьме интеллигенция. Ваньмыз сярысь одӥг статьяын гожтыны уг луы. Басьтом тани "Удмурт кенешлэсь" палэнын улӥсь удмуртъёсын ужанъя программазэ. Актив гинэ сое быдэстыны уз быгаты. Сое быдэсъянэ одно ик пыриськыны кулэ вань интеллигенция. Та дырозь ӧвӧл на кутэмын Кун кылъёс сярысь закон. Вань интеллигенция та пумысен вазиськыны кулэ Кун Кенеше. Эшшо одӥг ужпум герӟаськемын ивор вӧлмытонэн. Адӟиськом ук асьмеос, кыӵе шуг потыны эфире, газетъёсы "Удмурт кенешлэн" тӧроезлы, ёрос, кар кенешъёслэн тӧрооссылы, асьме активмылы, кинлэн сюлмыз висе удмурт калык понна. Со пумысен ми юрттэт витиськом газетъёсын, радиоын но телевидениын ужась удмурт интеллигентъёслэсь. Кыӵе ке но амал шедьтоно, калыке национальной движение сярысь шонер информация поттон понна. Туж секыт югдур кылдэмын удмурт кылэз дышетскон интыосы вӧлмытонэн. Интеллигенцимы татын но ас интызэ шедьтыны быгатысал. Оскиськом, малпанъёсмес улонэ пыӵатыны юрттоз вуоно конференция. Кӧня ке но сюлмаськытоз, визь-кенеш сётоз. Ӝутэмын луозы на мукетъёсыз но ужпумъёс. Мед гинэ пӧрмысал лэчыт, шара вераськон. Пусъеме потэ на тани мае: конференцие докладъёсын пыриськисьёс сяна, конференцилэн ужаз пыриськыны быгатозы ӧтем куноос но. Конференция йылпумъяськыны кулэ кык документъёсты кутонэн. Одӥгез - рекомендациос, кудъёсаз Кун Кенешлы, Кивалтэтлы, "Удмурт кенеш" огазеяськонлы, министерствоослы но мукет кивалтон учреждениослы дэмланъёс (рекомендациос). Мукетыз документ - вань удмурт интеллигенцилы вазиськон. Оскон вань: конференция пайдаё ортчоз, нош солэн ужез азьланьтӥськоз ёросъёсын но каръёсын. В,. Митрофанов, "Удмурт кенеш" огазеяськонлэн тӧроезлэн воштӥсез. Экономист вера Нырысьсэ тубим таӵе гурезе, шуэ Николай Савельев Туала вакытэ номыр каньылэн уг сётӥськы. Капчиез ӝӧк вылын, юнме уг шуо. Тужгес секыт йӧтэ гуртын тыршисьёслы, сиён-юон поттӥсьёслы. Сыӵе ик адӟонзы бадӟым фабрикаын тылобурдо вордӥсьёслэн но. Алигес газетамы ивортӥм ни вал Завьялово районысь "Вараксино" птицефабрикалэн туэлы планзэ быдэстэмез сярысь. Кызьы бен предприятиын ужасьёс сыӵе вормон басьтӥзы, мар юрттӥз соослы? Со но куд-ог мукет юанъёслы валэктонъёс сётэ фабрикаысь валтӥсь экономист Николай САВЕЛЬЕВ. Соин кенеше газетлэн корреспондентэз Геннадий РОМАНОВ. - Николай Романович, фабрикаын тӥ кема дыр ӵоже, 16 ар, ужаськоды ни. Мар юрттэ тӥледлы выль азинсконъёс басьтыны? Ведь ватонэз ӧвӧл, куд-огез птицефабрикаос мырдэм шокало, пыд йылазы возисько. - Та юанлы одӥг кылын уд валэкты. Нырысь ик со потэ быдэс коллективлэн лулысь- сюлмысь тыршемез-сюлмаськемез бордысь. Собере вунэтыны уг яра администрацилэсь, директорлэсь но специалистъёслэсь производствоез валаса нуэмзэс, ужъёсты быгатыса радъямзэс. Тани котькытын сямен куштӥськизы хозрасчётлэсь, нош ми сыӵе амалэн ялан ужаськом. Со ласянь ассэ юн возиз азьввыл директормы Владимир Зенин (али Правительстволэн Тӧроезлэн воштӥсез луэ). Таиз но кивалтӥсьмы Геннадий Итунин усто амалэз уката муромытэ-азинтэ. Котькуд ёз-цех, бригада - планъя ужа. Верало кӧня ке яркытэсь лыдпусъёс. Отын синучконын кадь адӟиське коллективлэн ужамез. Тани туэ ми 164 миллион курег пуз басьтом, планлэсь кылтӥ - 19 миллион, яке Ижысь котькуд улӥсьлы 234 курег пуз поттом. Кылем арен ӵошатыса, туэ курег пуз люканмес 13 процентлы будэтом. Фабрикалы гужем 30 ар тырмиз. Та дыр ӵоже нырысьсэ таӵе азинскон лыктӥз. Ортчем вакытэ куреглы быдэ араз самой троссэ 256 курег пуз октӥм ке, туэ со лыдпус 278 луоз. Сӥль поттонмы но будэ. Планъя 1000 интые, 1200 тонна лэсьтом. - Нош азьланезлы кыӵе луонлыкъёсты вань на? - Огинтыямы ум сылӥське. Собере Россиын политика но гурт хозяйствоос пала берытске. США-ысь курег макесъёс дорамы ичигес вуизы ке, калык асьме сӥлез басьтоз. Вылаз ик, кунгож сьӧрысь ваем продукцилэн ӟечлыкез, асьмелэн сярысь, туж ляб. Адями сое ялан сие ке, висьыны ӧдъя. Малы ке сое вато, нокин со сярысь шара уг вера. Ваньмыз со калыкез пӧян, тазалыкмес уродмытон, асьмеды котыр ласянь куашкатыны- лябӟытыны турттон. Азьланез сярысь малпаськытэк ум улӥське. Али ми бройлер курегъёсты куайытыны кутскиськом. Одӥг гидэ 22 сюрс интыям ни. Отысь 25 тонна сӥль поттом. Эшшо кык гидмы вань на. Озьы вуоно арын ватсаса 600 тонна бройлер сӥль дасяны быгатом. Асдуныз вылӥын ӧвӧл, килограммез 22 манет усёз. Экономистъёс кызьы шуо, рентабельностез умой луоз. Со сяна, асьме дорын поттэм 27 сюрс атасмес али куайытӥськом. Мартэ соосты вандом но ватсаса эшшо 38 тонна сӥль люкаськоз. Огъя вераса, вуоно арын сӥль поттонмес кык но ӝыны поллы йылэтыны чакласьком. Озьы ӧжытсэ 2500 тонна ӟеч курег сӥль вузаны быгатом. Кызьы шуо, азинсконъёс инмысь уг усё. Тани туэ гужем кӧс улӥз. Озьы ке но, ми 500 гектар лудысьтымы витаминэн узыр 1000 тонна турын пызь изӥм. Милям ваньмыз АВМ, ОГМ-ёсмы ужало, нош данак интыосын соос гуньдэмын-аналтэмын ни. Озьы тылобурдоослы ӟеч сиён шеде. - Николай Романович, фабрикады Россиысь 5-ез устоосыз хозяйствоос пӧлы шедьыны быгатоз. Нош ӵуказе нуналды кызьы адӟиське? Предприятиды выльдӥське-а? - Кызьы бен сотэк. Алигес Пермь областьысь венгер оборудование басьтӥм. Со ККТ-2 клеткаос нимасько. Отчы 144 сюрс пузась курег тэроз. Вуоно гужем соосты пуктом ни. Выль оборудование туж пайдаё луоз. Туэ эшшо мумы курегъёсты возьыны КП-15 клеткаос басьтом на. Нош гужем выльдом хозяйственной амалэн пуктэм гидъёсмес. Со сяна, басьтом на кык этажен выль ОБН-2 клеткаос. Тӥни кӧня люкаське. Оглом, туэ 15 выль ужан инты усьтӥм ни. Нош азьланьын уката тросгес ватсаськозы. Али фабрикаын 780 мурт ужа ни. Быдэс ар понна шоро-куспо рентабельность 10 процент чакласьком. Урод ӧвӧл со. - Нош социальной удыстэк кызьы возиськоды? - Ушъяськемлы медаз пӧрмы. Но ваньзэ асьмеос возиськом, шуыны луоз. 165 интыен нылпи садмы но жилищно-коммунальной хозяйствомы гинэ районэн шори вылэ усе. Культурно-спортивной комплексэз фабрика быдэсак возе. Али 170 квартираен улон юрт ӝутӥськом. Лэсьтӥськонэ 17 миллион манет висъям ни. Сое пуктэ Лэсьтӥськонъя 18 номеро управление. Ваньзэ 24 миллион манет уксё кутэмын ни. Эшшо сантехника кулэ на. - Огкылын вераса, уд вунэтӥське производствоез но, соцкультбытэз но. Нош ужасьёсты, пенсионеръёсты сярысь кызьы сюлмаськиськоды? - Нокин палэнэ уг кыльы. Уждун дыраз сётъяськом, толэзяз шорлыдын 1150 манет усе. Премия но тыриськом. Дорысьтымы нокин уг кошкы. Вунэтымтэ пенсионеръёсмы. Соос али 200 пала лыдъясько, котькудӥзлы толэзяз дунтэмгес, асдунызъя сётӥськом 4 курег но 90 курег пуз. Со сяна, юрттэт сётӥськом Вормон, Арлыдоослэн нуналзы, 8 Март но Гуртын ужасьёслэн праздниксы азьын. Со понна нимысьтыз 50 сюрс манет висъяськом. Лэчыт синъёс, кужмо суй-пыдъёс! Та нуналъёсы Россиысь кужмоосыз биатлонистъёс Чайковский городын ӵошатско. Нош 22-27 декабре соосты пумитаны дасяське Ижевск. 30-этӥзэ ни асьме шаерын "Ижевская винтовкалэн" призэз понна нюръяськозы. Удмуртилэсь данзэ утьыны дасясько А. Кобелев, С. Чучалин, Р. Рылов, А. Миронов, А. Шашов, О. Неклюдов. Нылкышно командаямы - Л. Ермолаева, О. Неупокоева, Е. Антонова. Бадӟымесь ӵошатсконъёс возьматозы, кин Россилэсь данзэ утьыны дась дуннелэн чемпионатаз. Сюрес вылын ыбылыса бызьылӥсьёс. Фотоез М. Егоровлэн. "Удмурт кенеш": нунал бӧрсьы нунал Вань удмуртъёслэн огазеяськонзылэн тӧроез Валентин Тубылов но солэн воштӥсез Нина Малых вуылӥзы Казане. Соос пыр-поч тодматскизы Татарстан Республикаысь калык огазеяськонъёслэн ужаменызы, пумиськизы Кун Кенешлэн Тӧроеныз Фарит Мухаметшинэн, мукет кивалтӥсьёсын. *** Кылем четверге ортчиз Ижысь политикая клублэн нырысетӥ кенешонэз. Солэн кивалтӥсез Валерий Митрофанов люкаськемъёслы ивортӥз вуоно пумиськонъёс сярысь. Политикаез тодыны-валаны тыршисьёс доры вуоно аре вуылозы ужбергатӥсьёс, юристъёс, экономистъёс, удмуртлыкез азинтон бордын ужасьёс но мукетъёсыз. Нырысетӥ пумиськонын вераськиз "Удмурт кенеш" огазеяськонлэн тӧроез Кун Кенешлэн депутатэз Валентин Тубылов. Со тодматӥз ассоциацилэн ар ӵоже ужаменыз, огазеяськон азьын сылӥсь ужпумъёсын, валэктӥз уно юанъёслы. Политикая клублэн кыкетӥ заседаниез ортчоз 21 январе филармониын ик. Ӧтисько вань мылкыд карисьёс. *** 11 декабре Валентин Тубылов вуылӥз Селта ёросэ. Татысь ёзлэн кивалтӥсеныз Петр Коробовен ӵош со пыриськиз Юмга-Омга гуртын гурт кенеш кылдытон ужрадэ. Ӟучомем ёросысь удмуртъёслэн выжыоссэс юнматон борды рос-прос басьтӥськемзы шумпоттэ. О. МАРКОВ. ГЕРД "Удмурт кенеш" огазеяськонлэн Пичи кенешезлэн Удмурт Элькунысь Кун Кенешлэн но Кивалтэтлэн Президиумъёсазы ВАЗИСЬКОНЭЗ Вань удмуртъёслэн "Удмурт кенеш" огазеяськонзы нош ик вазиське Удмурт Элькунысь Кун Кенешлэн но Кивалтэтлэн Президиумъёссылы, Куӟебай Гердлэн вордскемез дырысен 100 ар тырмонлы сӥзем ужрадъёсын программа урод быдэсъяськемен валче. Малпан кылдэ, Ижевскын но Москваын сӥё-дано ӝыт ортчытыса, буйгатскон мылкыд кылдӥз шуыса. Тужгес но урод быдэсъясько Куӟебай Гердлэсь нимзэ пыраклы тодэ кельтонъя ужрадъёс. Юбилеен герӟаськем ар йылпумъяське, нош та дырозь тодмо ӧвӧл на, ку но кытчы пуктозы Ижевскын Гердлы памятник, ку дась луоз Вавоже интыяно бюст-памятник, ку юнматозы нырысетӥ удмурт нылпи юрт но совпартшколалэн коркаез борды мемориальной пулъёс. Уг быдэсмо Куӟебай Гердлэсь нимзэ дышетскон заведениослы, ульчаослы, культурая но искусствоя объектъёслы сётонъя чаклам ужпумъёс. Быдэстымтэ ужпумъёсты эшшо но вераны луысал на. Кылдэм югдурез лыдэ басьтыса, "Удмурт кенеш" огазеяськон куре Куӟебай Гердлэн вордскемез дырысен 100 ар тырмонэз пусъёнъя програмамлэсь кызьы быдэсъяськемзэ ӝегатскытэк эскерыны нимысьтыз кылдытэм оргкомитетлэн кенешоназ но со програмаез быдэстонъя кулэ ужрадъёс кутыны. "Удмурт кенеш" огазеяськонлэн тӧроез В. К. Тубылов. Юнматэмын 1998-тӥ арын 20-тӥ ноябре Пичи кенешлэн заседанияз. Эк-эк-эк... Толон Кун Кенешлэн юртэз азе трос калык люкаськиз. Дышетӥсьёс но мукет удысъёсын ужасьёс депутатъёслы вазиськизы асьсэ куронъёсынызы. Но... таосыз сессиез усьтыны ӧз быгатэ. Кызьы серекъяса пусйизы журналистъёс, нош ик янгыш Кворум эш. 10 часлы залын куатьтон депутат но ӧй вал. Нош кулэ ичизэ 67 мурт. 11 часэ но 30 минутэ соослэн лыдзы нош ик тырмыт ӧй вал. 14 часэ но озьы ик луиз. Кун Кенешлэн Президиумез малпаське сессиез люканы мукет дыр тупатон сярысь. И. КРИЧЕВ. Сӥзён пӧлын сӥзён вань Кызьы ивортӥмы ни вал, Удмурт Республикаысь укмыс делегат та нуналъёсы кошке Москвае, "Отечество" организациез кылдытонъя ӧтчаме (съездэ). Пӧлазы - Кун Кенешлэн Тӧроез Александр Волков, тодмо конструктор Михаил Калашников, Эрико профсоюзъёслэн федерацизылэн тӧроез Евгений Орлов но мукетъёсыз. Милям корреспондентмы Корепанова Ольга кӧня ке юанъёслы валэктыны куриз ӧтчаме делегатэз, "Удмурт дунне" газетлэсь валтӥсь редакторзэ Алексей Шкляевез. - Туала вакытэ Россиез юнматон понна нюръясько калык патриотъёс, коммунистъёс, ӟуч общинаос. "Отечество" нимын кылдӥсь организация но огазея кадь патриотъёсты. Озьы ялэ тӥляд азьветлӥсьты, Москвалэн мэрез Юрий Лужков. Маин бен тӥ пӧртэмесь коммунистъёслэсь? - Меӵак мынэсьтым юаськоды ке, мон коммунистъёслэсь номырин пӧртэм ӧвӧл, малы ке шуоно, ачим Россиысь компартиын вис карытэк кызь ар ни. Сюлмы котьку дурбасьтэ коммунистъёслэн кема дырлы чаклам ӧтёнъёссылы. Сяськаяськись общество кылдытон, кунгожъёсты быдтон, ваньмызлы шудбур сётон сярысь адями малпаське ни уно дауръёс ӵоже. Юнме шорысь шат коммунизмлэн но христианстволэн огъя малпанъёссы тачак. Макем уногес патриотъёс, сокем золгес кун. Юн кун кужым шедьтэ котькудӥзлы юрттыны. - Одӥг Россиын сомында патриотъёслы люкыт ӧвӧл-а? - Кин кызьы вала патриот кылэз. Ельцин, Чубайс яке Гайдар, Черномырдин, Кириенко яке Немцов огпол коть вазьылӥзы-а Россиез куашкатъяны турттэмзы сярысь? Соос уз шуэ: ми - патриотъёс ӧвӧл. Берло дыре монэ сюлмаськыто КПРФ-лэн кивалтӥсьёсыз но (мон уг вераськы быдэс компартиез). Пумен юнма таӵе малпанэ: Геннадий Зюгановлэн президент луэмез уг поты. Азьло быръёнъёс дыръя, нырысетӥ тур бере, Борис Ельцинлэн сюлэмыз ӵоксузиз. Геннадий Зюганов, дас пол кужмогес бергам интые, тросгес шудӥз кадь волейболэн. Кыкетӥ турын законэз тӥян уно учыръёсты тодӥз ке, малы ӧз вазиськы Россиысь яке Европаысь судэ? Малы соку ик ӟечкылаз Ельцинэз? Зюгановлы юнгес кельше курланы. Малы ке-а таӵе сютэм вакытэ Кун Думаысь депутатъёс-коммунистъёс шедьто "берлолы кельтонтэм" сюлмаськонъёс: берыктоно Дзержинскийлы памятникез, исантэм кароно Москваысь Горд карлудэз (Красной площадез). Жаляса верано луэ: компартилэн нациосын ужанъя тыро-пыро программаез ӧвӧл. Вылаз ик, Альберт Макашовлэсь еврейёс шоры урдскылэмзэ умойтэмен ӧз лыдъялэ. Ужпум еврейёс бордын гинэ ӧвӧл. Туннэ омырскозы таосыз вылэ. Ӵуказе тушмонъяськозы бигеръёсын. Усьсэ мултэс карозы удмуртъёсты. Бератаз ӟучъёслэн но черодзы вуоз. Юн бергась питранэз уд дугдыты ни. Та выллем мыдланьяськонъёсын сэрен амалтэк кылдэ таӵе юан: чеберъялозы-а Россиез жид, вотяк, чучмек кылъёс? - "Отечестволэн" вань-а калыкъёсын ужан программаез? - Программалы проектаз вань пӧртэм калыкъёслы сӥзем интыез. Вераськон мынэ выжы (нация) но вӧсь (религия) ласянь тушмонаськонэз быдтон сярысь. Зэм, Юрий Лужков ӵемгес ӧтьылэ Балтикаысь но Крымысь ӟучъёсты утьыны. Со понна ик ӧтчам - солы валэктоно: кунгож сьӧрысь ӟучъёслы сямен ик, кунысь пичи калыкъёслы но юнгес дурбасьтыны кулэ. - Экономикатэк номыре но уд ӝуты. - Шонер. Уката ик - начармем гуртэз улӟытытэк. Татын нырысетӥ юан: кин кузёяськоз музъемен? Демократъёс кемалась куро ни сое эркын вузаны-басьтыны. Озьы удмурт калык ас музъем вылаз мултэс уз кыльы-а? "Отечество" шонер лэсьтэ, та удысэ меӵак пыриськытэк. Со дэмла: музъем сярысь ужпумез мед учкозы но быдэсъялозы асьсэос областьёс но республикаос. Озьы удмуртъёслы луонлык кылдэ ас кылзэс асьсэ дорын вераны. Соосты Удмурт Республикаысь кивалтӥсьёс но депутатъёс кылытэк уз кыле. Огъя ваньбурез тус-тас каремен, бюджет шымырскиз шагрень ку выллем. Мон усем мылкыдын учки вал программалы проектысь таӵе кылъёсты: закон тӥямын ӧвӧл но эрикъёс кинэ ке узырмытӥзы ке, озьы ик мед кылёз. Кызьы? Калыклэн киыныз кылдытэм узырлык дунтэм дунын вуиз ке лушкасьёс кие (законъёс но сыӵеесь вал), соосты исаны уг яра ни шат? Ярам, Юрий Лужков та нуналъёсы телевизор пыр ялӥз: приватизацилы йылпумъянъёсты выльысь эскерыны кулэ. Юнме медаз атасъяське асьсэды демократ нимасьёс: югдурез сэрттэмен-пертчемен валче автоматъёс уз тачыртэ. "Отечество" озьы ик выль сямен радъяны куре бюджет кусыпъёсты. Паймыса бырод ук. Областьёс Москвае келяло барышъя (прибылья) налогысь 50 процентсэ, республикаос - дассэ, Татарстан 1 процентсэ. Собере субъектъёсысь кузёос Москвае ик тэльмырыны мыно: висъялэ кредит (ссуда, трансферт, субсидия, субвенция - кылъёс пӧлы сьӧлтаськод). Кинлэн гульымез паськытгес, со вадьсы зоре тросгес. - Шуом, тӥледлы ӧтчамын кыл сётӥзы. Мар верасалды? - Кыл сётонлы оскон ӧвӧл. Но дырекъяса но могӟылыса мон вераны турттысал таӵе малпанме. Быръёнъёс азьын ваньмызлэн сямен партиослэн но кандидатъёслэн программаоссы огвыллемесьгес луо. Россиез ӝутоно, заводъёсты улӟытоно, гуртлы, пенсионеръёслы, ӧлексыослы, дышетӥсьёслы юрттоно. Малы ке нокин но ӧз малпа на паллянъёслы, папирос кыскисьёслы, толалтэ чорыгасьёслы дурбасьтон сярысь. Калыкез вукылмымон трос сюдозы сӥзёнъёсын. Нош кызьы быдэстоно ӟеч дэмланъёсты? Та ласянь "Отечество" мед висъяськысал вань мукет организациослэсь. Йыртэманлы ож ялӥд? Кыӵе тӥрлыкен нюръяськод? Армиез выльдоно? Кытысь коньдон? Ивор вӧлмытон ёзъёсты утемед потэ Россиез куашкатӥсь кужымъёслэсь? Кыӵе законъёс пыр? - Оло, тазьы луоз: "Отечестволы" Удмурт Республикаысь дурбасьтӥсьёс уло одӥг малпанэн, Москваын тодматскозы мукетыныз. Соку мар кароды? - Мукет делегатъёс интые мон уг вера. Ачим сярысь ке, учко ай кинлэсь "Отечествое" пыремзэ. Компартиысь таза кужымъёс ке, кык киме ик ӝуто. "Милям юртмы - Россия" яке бур центр шуон ке, мон - эрико адями: пельпумы сьӧрын нокин ӧвӧл, кызьы пыри "Отечество" организацие, озьы ик потэме луоз. Кун Кенешлэн сессияз Ӟугрес юанъёс лачак Толон ужзэ мытӥз Кун Кенешлэн азьвыл пусъем кызь куинетӥ сессиез. Солэсь азьло котькудӥз ялан ужась комиссия, депутатъёслэн фракциоссы ортчытӥзы асьсэлэсь заседаниоссэс. Отын пыр-поч эскеризы сессиын ӝутоно ужпумъёсты. Экономикаын политикая но бюджетъя комиссиын учкемын республикаысь югдурез тупатонэн герӟаськем ужрадъёслэн быдэсъяськемзы. Чакламлэн 25-30 процентэз гинэ улонэ пыӵатэмын. Кызьы пусйизы комиссилэн членъёсыз, Правительствоен та план юнматэмын ӧй вал, озьы бере, кылзэ но юаны нокинлэсь. Экономикалэн лябӟемез сярысь ке верано, со вылын юн шӧдӥськиз му вӧйлы дунэз кулэстон. Валамон ини, коньдон уг вуы бере, бюджетэз тырмытыны номырин. Огез мукетсэ бӧрсяз кыске. Со понна нош ик йылӥз йыруж лэсьтӥсьёслэн лыдзы (кылем арен ӵошатыса, 10 процентлы). Йыружъёсты шараянъя лыдпус умояз 7 процентлы. Комиссия азьын ужамезлы вакчияк йылпумъян лэсьтӥз Удмуртиысь Национальной банклэн кивалтӥсез Р. Каримов. Со верамъя, республикаысь банкъёс секыт вакытэ одӥг нуналлы но ӧз ворсаськылэ, районъёс куспын коньдон бергаз. Шаермылэн палэназ югдур уродмиз, соиз понна кыл кутэ Москва. Каримов пусйиз: берло дыре банкъёслэн ужзы ӧраз пыриз, табере тодмо ни, кудӥз соос пӧлысь валтӥсьёсыз радэ шедёз, кудӥз ёз интые кылёз яке пытсаськоз. Налогъёсъя ёзъёс умой-умой басьтӥськизы коммерческой банкъёсты эскерон борды: коньдон тырон отын трослы ӝегаса мынэ. Бадӟым уж лэсьтэмын налогъёсъя полициен. 102 эскерон ортчытэмын, шараямын 48 тужгес но трос коньдон лушкан учыр. Соосъя ӝутэмын уголовной ужъёс. Бюджетэ берыктоно коньдон пӧлысь казнае вуэмын ӝыныез. Комиссиын учкемын мынон-ветлон сюрес, ву понна дун тыронэн герӟаськем ужпумъёс. Соосъя решение кутэмын луоз таяз сессиын. Выт тырон пумысен нимысьтыз вераськон вал "Ижмаш" заводъя. Асьсэлэн пичи кенешазы люкаськылӥзы депутатъёс-коммунистъёс но. Соосты шугъяськытэ Кун Кенеше быръёнъёслы дасяськон но куд-ог законъёсты умой-умой малпаськытэк кутон, тужгес но - жилищно-коммунальной хозяйствое воштӥськонъёс пыртон. - Ми пумит луэммес вераськом та законэз кутонлы, малы ке шуоно, пумозяз-йылозяз со вуттэмын ӧвӧл,- пусйиз коммунистъёслэн фракцизылэн кивалтӥсез А. Бегунов.- Государство реформа ортчытон улсын улон интыосты возёнэз погыльтыны выре калыклэн пельпум вылаз. Кызь кыкетӥ сессиын та ужпумъя депутатъёс нокыӵе решение ӧз кутэ, учкиз огкылэ вуонъя комиссия но. Туннэ нуналлы малпан одӥг: жилищно-коммунальной хозяйствоез выльдонъя кутыны кулэ целевой программа. Солэсь быдэсъяськемзэ эскерыса мед возёзы Кун Кенеш но Правительство, одно ик лыдэ басьтоно уждунлэсь быдӟалазэ, калыклэсь улон-вылонзэ. Кызь куинетӥ сессия ӝутэм ужпумъя решение кутоз, дыр. Ялан берлолы кельтыса, огез вылэ мукетыз эскероно юанъёс сэрттыны луонтэм бугоре люкасько. Л. МЕДВЕДЕВА. Герд 20-тӥ ноябре Иже люкаськылӥзы Вань удмуртъёслэн огазеяськонзылэн Пичи кенешаз быръем муртъёс. ВИ ӧтчамын пуктэм ужпумъёсты быдэсъян бордын ар ӵоже ужам сярысь доклад лэсьтӥз "Удмурт кенешлэн" тӧроез Валентин Тубылов. Сое эскеронэ 19 мурт пыриськиз. Люкаськемъёс кутӥзы постановление но вазиськон. Туннэ "Гердмы" сӥземын Пичи кенешлэн заседаниезлы. Ми печатласьком докладэзлэсь нырысетӥ люкетсэ но мукет документъёсты. Уртче мыном азьлань В. К. Тубылов, "Удмурт кенеш" огазеяськонлэн тӧроез Вань удмуртъёслэн ВИ ӧтчамзы дырысен ортчиз ар. Кызьы асьмеос тодӥськом, та вакытэ экономика но политика удысын валантэм секыт югдур кылдэмын. Озьы ке но, вань шуг- секытъёс шоры учкытэк, асьмелэн "Удмурт кенеш" огазеяськонмы возиськиз но ужзэ азьланьтӥз. Пичи кенеш азьын туннэ сылэ кык бадӟым ужпум, съезд ортчем дырысен ар ӵоже ужаммылы йылпумъянъёс лэсьтоно но чаклано азьланезлы ужрадъёс. Учконо, мар умойзэ быгатӥм со дыр ӵоже лэсьтыны, нош мар ӧз пӧрмы на. Та юанэз аслыз ачиз сётыны кулэ туннэ котькудӥз татын пукись - Пичи кенеше, исполкоме быръемъёс, комиссиосын кивалтӥсьёс но ёросъёсысь ёзъёсмылэн кенеш тӧрооссы. Асьмемыз калык бырйиз, оскиз куинь ар ӵоже ужаны. Шуыны луоз, асьмелы оскемын удмурт калыклэн азьпал улонэз. Тӥ пӧлысь тросэз пыриськизы Бадӟым ӧтчамлэн ужаз, соин ик отын кутэм документъёслэсь пуштроссэс ӟеч тодӥськоды. Съездлэн материалъёсыз туннэ ваньдылы нимаз книгаен сётэмын. Ӧтчамын кутэм документъёсыз но материалъёсыз ми нырысь ик калык дорозь вуттыны тыршим. Тросаз каръёсын но ёросъёсын ортчизы удмурт огазеяськонъёслэн кенешонъёссы, ужась коллективъёсын но школаосын пумиськонъёс. Кызьы чакламын вал, кутэм документъёс ыстэмын Россия Федерацилэн Президентэзлы, Кун Думалы, Федерацияя Кенешлы но Правительстволы, элькун кивалтӥсьёслы, каръёслэн но ёросъёслэн тӧрооссылы. Вань шараям тырмымтэосты но съездлэсь резолюцизэ лыдэ басьтыса дасямын но кутэмын "Удмурт кенеш" огазеяськонлэн Пичи кенешезлы но исполкомезлы арлы ужан план. Со сяна, кварталлы кутэмын на ужан планъёс. Улон возьматэ, удмурт калыкез азинтонын, удмуртлыкез ӝутонын одӥг ужпумез но быдэстыны уз луы, кужымъёсмес огазеятэк, "Удмурт кенешлэсь" ёзъёссэ юнматытэк. Таин валче кылдытэмын вить комиссия: экономикая (кивалтӥсез В. А. Никитин), культурая (кивалтӥсез П. К. Чернов), тазалыкез но инкуазез утёнъя (кивалтӥсез С. М. Смирнов), наукая но калыкез дышетонъя (кивалтӥсез В. М. Ившина), иворъёсты вӧлмытӥсь ёзъёсын кусып возёнъя (кивалтӥсез В. Д. Михайлов), кадръёсын ужась комиссия (кивалтӥсез Н. И. Малых). Огазеяськыса ужан понна ик исполкоме быръемын Культурая дэменлыклэн тӧроез В. А. Осипов, Удмурт нылкышно кенешлэн кивалтӥсез Г. А. Никитина, "Удмурт вӧсь" дэменлыклэн тӧроез В. А. Якупов, егитъёслэн "Шунды" огазеяськонзылэн тӧроез Г. А. Юсупова. Ужез кенешыса, ӵош нуон вылысь, толэзьлы быдэ ортчыло та кивалтӥсьёсын кенешонъёс. Милям чакламмыя, ӟечгес ужаны кутскиз асьме огазеяськонлэн исполкомез. Ар ӵоже ортчытэмын Пичи кенешлэн кык ӧтчамез, таиз - куинетӥез, исполкомлэн 12 заседаниез, соос пӧлысь витез - ёрос кенешъёслэсь тӧрооссэс ӧтьыса. Отын эскеремын витьтон пумо пӧртэм ужпумъёс. Удмурт огазеяськонъёс пӧлысь куаразэ золгес поттыны кутскиз Удмурт нылкышно кенеш. Апрель толэзе солы кивалтӥсе быръемын Галина Аркадьевна Никитина - тодосчи, история наукаосъя кандидат. Та огазеяськонын ужало ӝутскем мылкыдын, нылкышноос тыршо пӧртэм удысъёсын ужась удмурт калыкен пумиськылыны. Арлэн кутсконаз соос потазы Яр ёросэ. Пумиськылӥзы гуртоосын, студентъёсын но дышетӥсьёсын, пиналъёсын, библиотекаосын ужасьёсын. Апрель толэзе ик Г. А. Никитина, З. В. Суворова но Г. В. Романова Татариысь Кукмор ёросэ потазы, Ош-Юмья школаын Куӟебай Гердлэн но Ашальчи Окилэн юбилейёссылы сӥзем ужрадэ пыриськизы. Озьы ик ортчытэмын мукет ужрадъёс но. Ас ужзэ тодыса но валаса тырше "Удмурт вӧсь" дэменлыклэн кивалтӥсез В. А. Якупов. Пичи кенешен кылдытэм комиссиос нырысь люкаськемазы ик кутӥзы вал арлы ужан план. Сое быдэсъяса, культурая комиссия, кылсярысь, ортчытӥз П. Н. Кузнецовлэсь ӝытсэ- пумиськонзэ. Сое дасянэ мылысь-кыдысь пыриськизы "Италмас" ансамбль, Удмурт филармония, писательёс но артистъёс. Комиссилэн членъёсыз озьы ик пыриськизы Куӟебай Гердлы но Ашальчи Окилы сӥзем ужрадъёсы (Иж карын, Алнашын, Грахын, Вавожын но мукет интыосын). Кадръёсын ужась комиссия ар ӵоже ортчытӥз аслэсьтыз куинь кенешсэ. Отын эскеремын туж кулэ ужпумъёс. Комиссия бадӟым уж лэсьтӥз, "Национальной кадръёсты дасян сярысь" ужпумез исполкомлэн кенешаз дасяку, туж кулэ лыдпусъёс но мукет материалъёс люкамын вал. Отысь тодыны луиз, кӧня туннэ нуналлы вузъёсын удмурт студентъёс но аспирантъёс, кӧня удмуртъёс ужало университетын, академиосын, министерствоосын но ведомствоосын. Та уже мылысь-кыдысь пыриськизы З. В. Суворова, В. П. Осотова, М. Д. Ишматова, В. П. Широбоков, Л. Д. Загребин, С. М. Смирнов. Жаляса верано луэ: куд-ог комиссиослэн чаклам ужрадъёссы кагаз вылэ ик кылизы. Соин ик ми куриськом: комиссиослэсь кенешъёссэс одно ик ортчытоно, ар ӵоже ужамлы йылпумъянъёс лэсьтоно, ӟеч-ӟеч сэрттоно-пертчоно тырмымтэосты. Ваньмы асьмеос умой тодӥськом но валаськом: исполком, солэн комиссиосыз котькызьы умой мед ужалозы, котькыӵе ӟеч но шонер малпанъёсы мед вуозы, но соосты калык доры вуттытэк, асьмелэн тыршеммы туж ик уз шӧдӥськы, асьмемыз калыкмы пумозяз уз вала. Ӵапак соин нимысьтыз саклык висъямын вал ёрос ёзъёслэсь ужзэс ӟечгес радъянлы. Юрттэт сётон вылысь, исполкомлэн членъёсыз юнматэмын каръёс но ёросъёс борды. Кыӵе ке юрттэтсы шӧдӥське-а, уг-а - асьтэос, малпасько, вералоды. Ужын басьтэм азинсконъёсын тодматскон понна, мартэ исполком но ёрос ёзъёслэн тӧрооссы потазы Пичи Пурга ёросэ. Валче ужанлэсь аспӧртэмлыко амалъёссэ но соосты ас удысамы кутон понна, октябре Завьялын, Можгалан но Глазовын ортчизы ёрос кенешъёслэн кивалтӥсьёсынызы, Удмурт нылкышно кенешлэн, "Дэмен" но "Шунды" огазеяськонъёслэн каръёсысь но районъёсысь активенызы зонаосъя кенешъёс. Отчы пыриськиз 237 адями. Та ёрос ёзъёслэн тӧрооссы Валентина Ильинична Панфилова, Валериан Арсентьевич Никитин, Анатолий Анатольевич Комаров, Надежда Константиновна Золотарева но соослэн юрттӥсьёссы быгатыса, сюлмысь тыршо. Котькудаз ёросын люкамын тунсыко, адӟем карымон опыт. Ог-огмылэн ӟеч ужан амалъёсынымы тодматскон вылысь, та выллем ужрадъёсты азьланяз но ортчытъяны кулэ. Соос бадӟым пайда сёто. Шумпотыса пусйыны кулэ: мылысь-кыдысь, тунсыко амалъёс кутыса ужась ёрос кенешъёс ялан тросгес луизы ини. Соос пӧлын - Балезино ёросысь кенеш. Соин кивалтэ визьмо но шаплы кышномурт Лидия Федоровна Иванова. Татысь эшъёсмы, чаклам ужрадъёссылы уксё курыса, ёрос бюджетэ быгатӥллям пыртыны нимысьтыз чур. Котькуд ужрадэз соос рос- прос радъяны тыршо. Кылсярысь, "Удмурт кенешлэн" национальной кадръёсты дасян пумысен решениеныз татын тодматӥллям вань школаослэсь кивалтӥсьёссэс. Вузъёсын дышетон вылысь, дэмланъёс сётэмын кызь вить егитлы. Озьы быдэс ёрос тодӥз огазеяськонлэн та уж борды басьтӥськемез сярысь. Нырысетӥ вамышъёс лэсьтэмын гурт кенешъёс кылдытонын но. Соос ужало ни Кожильын, Такапиын, Балезиноын. Ёрос кенешлэн сюлмаськеменыз, Люк черкогурт луиз ёросысь удмурт культуралэн шорсюлэмыз: татын кылдытэмын асьме культурая центр. Пыд йылаз пумен золгес но золгес султэ Селталась ёрос кенеш но. Кивалтэ соин Петр Вениаминович Коробов. Трос пӧртэм ужрадъёс ортчытэмын татын туэ: вань школаос куспын Куӟебай Гердлэн юбилеезлы сӥзьыса ортчытэмын литератураысь но крезьгур удысысь тодон-валанъёсъя ӵошатскон. Ёрос культура юртын ужаны кутскиз "Эшъяськон" удмурт клуб. Со юрттэ удмуртъёсты культуразы борды юнгес кыскыны. Та ёросын тросэз удмуртъёс ӟучомемын бере, со туж кулэ ужпум луэ. Ёрос кенешлэн кивалтэтэз тырше политикае но пыриськыны. Ӟучомем ёросъёсын ужаны секыт. Озьы ке но, уж мынэ. Воткинскын, кылсярысь, ортчытэмын удмурт культуралы сӥзем пӧртэм ужрадъёс: Куӟебай Гердлэн творчествоезъя ӝытъёс, научно-практической конференция, выставкаос. Нырысьсэ ортчиз туэ Гуждор праздник. Вань сюлэмзэс сётыса ужало татын Тамара Ивановна Бочкарева но Альбина Николаевна Вахрушева. Нош Вотка ёросысь ёзэнымы кивалтэ Аркадий Иванович Васильев. Солэн тыршеменыз, ньыль гуртын кылдытэмын гурт кенешъёс, ортчытэмын Куӟебай Гердлы но Ашальчи Окилы сӥзем ужрадъёс. Сюмси ёросын (кивалтӥсез Евдокия Михайловна Ильиных) ортчытӥллям удмурт кырӟасьёс, ансамбльёс, театр коллективъёс куспын ӵошатсконъёс. Вормисьёсыз пиналъёс шутэтскиллям лагерьын. Мукетъёсыз ёрос кенешъёс сярысь но трос умойзэ вераны луысал на. Озьыен, ёрос кенешъёс, пичи вамышен ке но, азьпала мыно кадь. Но гурт кенешъёсты кылдытон ужез умой-умой вырӟытыны ӧм быгатэ на. Та пумысен ӵектонъёс вань ёросъёслы февраль толэзе сётэмын ни вал. Мартэ Бурангуртысь гурт кенешлэн уженыз тодматскон понна, нимысьтыз семинар ортчиз. Ваньмы асьмеос одӥг малпанэ вуим: гурт калыкез ӝутон-вырӟытон асьме ужын котьмалэсь кулэез луэ. Та удысэз быгатыса валтэ Бурангуртысь гурт кенеш. Со ужа гурт кивалтӥсьёсын ӵош. Кылдытэмын тямыс ёз: нылкышноослэн кенешсы, ветеранъёслэн кенешсы, огъя правопорядокез утёнъя ёз, удмурт культурая огазеяськон, егитъёсын ужанъя ёз, административной комиссия, ваньбур поттонъя ёз. Ваньзы соос старосталэн кивалтэм улсаз огазеяськыса ужало. Асьмеос адӟимы: татысь гурт кенеш ас интызэ шедьтӥз, ас кулэлыксэ возьматӥз. Со сяна, дэмламын вал на Можга но Глазов ёросъёсысь гурт кенешъёслэн ужан амалъёссы. Со дырысен гурт кенешъёс тросаз районъёсын кылдӥзы ке но, соос туж ӧжыт на. Капчи ӧвӧл ке но, тыршоно та ужез радъяны, гурт кенешъёс пыр калык доры вуыны. Гажано эшъёс! Удмурт калыклэн историяз 1998 ар кылёз, Куӟебай Гердлэн но Ашальчи Окилэн вордскемзы дырысен сю ар тырмонэн герӟаськыса. Трос аръёс ортчыса но та дано адямиос али но калыкмылэсь чеберлыксэ ӝуто, асьмеды огазеяло, быдэс дуннелы удмурт калыклэсь кужымзэ, ӟеч но шуныт сюлэмзэ возьмато. Азьло кадь ик али но тупало асьмелы Гердлэн ӟырдыт кылъёсыз: Султэ! Вырӟе, эшъёсы, Сайкатэлэ калыкез. Возьматэлэ тӥ солы Югыт, зарни сюресэз. Куӟебай Гердлэн юбилееныз валче исполкомын но Пичи кенешын юнматэмын вал нимысьтыз план. Сое быдэсъяса, 13-тӥ феврале люкаськылӥз Пичи кенеш. Ваньмыз умой ортчиз кадь, эшъёс вань быгатонлыксэс возьматыса пыриськизы та ужрадэ. Юбилейёслы сӥзем ӝытъёс озьы ик пайдаё но тунсыко ортчизы Алнаш, Грах, Вавож ёросъёсын. Соосты дасянэ вань сюлэмзэс сётыса, дырзэс жалятэк пыриськизы Нина Андреевна Образцова, Юрий Константинович Рожин, Анатолий Максимович Егоров. Пыриськимы асьмеос Вавож ёросын Куӟебай Гердлы сӥзем Гербер празднике. Нимысьтыз татын пусйыны кулэ Василий Андреевич Осиповез но Альберт Алексеевич Разинэз: соос дасязы сценарий, ас вылазы басьтӥзы троссэ ужпумъёсты. Вань тазьы вераськисьёс: "Туэ, пе, Гербер умой ӧз ортчы, ваньмыз сурамын-пожамын вал". Нош мынам малпамея, асьмеос ӧм ке пыриськысалмы сое дасянэ, праздник солэсь но лябгес ортчысал. Пӧрмысал фольклорлы сӥзем фестивальлы яке огшоры праздниклы. Берпуметӥ Гербер нош ик возьматӥз: сыӵе бадӟым ужрадэз асьме кие кутоно. Улӟытоно солэсь пуштроссэ, пыӵатоно вашкала удмурт шӧм. Вуоно аре Гербер праздникез ортчытон сярысь али ик малпаськоно ни. Секыт ке но вал, быгатӥм сётыны Куӟебай Герд нимо премилэн 1996-тӥ, 1997-тӥ аръёс понна лауреатъёсызлы коньдон. Ашальчи Оки нимо премия таиз арлы сётэмын егит кылбурчилы Лидия Нянькиналы. Ваньзэ огазеяса верано ке, асьмеос тыршимы мылысь-кыдысь пыриськыны Куӟебай Гердлы но Ашальчи Окилы сӥзем ужрадъёсы. Но таин буйгатскыны уг яра. Жаляса верано луэ, тросэз чаклам ужъёсмы кыл вылын кылё. Трос вераськиськом, ог- огмес пыкылӥськом, дышетӥськом, трос дэмланъёс сётӥськом, нош ужано, тыршоно луэ ке, палэнэ кошкиськом. Валамон, асьмеос ужаськом общественной амалэн, ваньдылэн тӥляд вань асьтэлэн ужан интыосты, оло, дыр но уг тырмы, нош улон вамыштэ азьлань, со уг витьы асьмеды. Малы ке тани лябӟиз "Дэмен" огазеяськонлэн кужымез. Милям малпаммыя, азьло кадь умой уг ужа ни солэн правлениез. "Дэменлэн" ёрос ёзъёсыз малы ке ужъёслэсь палэнскыны кутскизы, куддыр валантэм вераськонъёс кылдыло: пыре-а, пе, со "Удмурт кенешлэн" бурд улаз, уг-а. Ми малпаськом, асьмелы юн кусып возьыса но огазе ужаса тыршыны кулэ. Озьы ужало можгаос - умой пӧрмыто кадь. Одӥг кылын - ваньмы асьмеос: "Дэмен" но, "Шунды" но, нылкышноослэн огазеяськонзы но ужаны кулэ уртче, люкиськытэк, вань ужпумъёсты пумозяз вуттыса, "Удмурт кенешлэн" липет улаз кариськыса. Улон возьматэ, туала югдур нырысь ик куашкатэ культураез но калыкез дышетон удысэз. Берло дыре пумен ӧжыт но ӧжыт ортчыло пӧртэм фестивальёс, ӵошатсконъёс, творческой пумиськонъёс, пумен кулэсмо литературалы но искусстволы сӥзем нуналъёс. Шер вуыло гуртъёсы артистъёс, писательёс но тодосчиос, уг ортчыло ни вашкала сямъёслы сӥзем ужрадъёс. Трос ужпумъёслэсь палэнско ини Культурая министерство, солэн ёросъёсысь но каръёсысь ёзъёсыз. Ужамысь дугдо клубъёс, культура юртъёс. Соин ик троссэ таӵе вакытэ асьмеос ас выламы басьтыны кулэ. Азьло аръёсы сямен ик трос ужано вашкала удмурт сямъёсты утён бордын. Котькуд ёросын вашкала удмурт выжыосмы сярысь материалъёс люкано. Котькуд ужпумез, кудзэ пуктӥськом планъёсамы, ӟеч дасяны сюлмаськоно, мур малпаськоно, ваньзэ эскероно. Медаз кылдэ сыӵе учыръёс, кыӵе луиз, шуом, кылем гужем Выль нимо праздникез ортчытыку. Тодады ваиськоды, дыр, ваньмыз дасямын вал кадь, нош куке празднике мыноно луиз, олокытчы ышизы автобусъёс. Вань янгышез усиз "Удмурт кенеш" но солэн кивалтӥсьёсыз вылэ. Вазиськоно Кун Кенеше: мед пыр-поч ужалоз удмурт топонимикая комиссия. Удмурт гуртъёслы, шуръёслы ас нимзэс берыктылоно. Ӵемгес потано школаосы. Син азьын возёно вань усточиосты: гожъяны кутскись пиналъёсыз, крезьгурчиосыз, суредасьёсыз, эктӥсь-кырӟасьёсты, спорт удысысь азьветлӥсьёсыз. Юн герӟаськыса ужано литературной, драматической но пӧртэм музыкальной нылпи коллективъёсын, кружокъёсын. Юрттоно соослы бадӟым сюрес вылэ потыны, юн-юн пыд йылазы султыны. Улӟытоно фольклор ӝытъёсты, удмурт самодеятельной коллективъёсты. Огъя вераса, культура удысын асьмелэн туж трос ужъёсмы. Гажано эшъёс! Съездамы туж лэчыт ӝутэмын вал удмурт кадръёс дасян сярысь ужпум. Ӵектэмын вал национальной кадръёсты дасянъя кун программа кутыны. Туннэ нуналлы со ӧвӧл на. Тае лыдэ басьтыса, 20-тӥ мае "Удмурт кенешлэн" исполкомез та ужпумез учкиз паськытатэм заседанияз. Отчы ӧтемын вал Правительствоын ужасьёс, министръёс, ёрос кенешъёслэн тӧрооссы, вузъёслэн ректоръёссы. Кадръёсын ужась комиссия бадӟым аналитической материал дасяз. Со возьматӥз, удмурт кадръёсты дасян республикаямы туж урод пуктэмын шуыса. Удмуртъёс пӧлын вылӥ образование басьтэмын 3,5 процентэз гинэ, шор ёзо профессиональной образование - 6,6 процентэз, ӟучъёс пӧлын - 5,5 но 7,6 процентэз, нош бигеръёс пӧлын та лыдпус - 4,4 но 7,5 процент. Али дышетскись студентъёс пӧлын но удмурт пиналъёс, мукетъёсыныз ӵошатыса, озьы ик туж ӧжыт. Гурт школаосты быдтэмъёс, тросэз соос пӧлын удмуртъёс, конкурсын вормыны уг быгато, нош дун тырыса дышетскыны соослэн луонлыксы ӧвӧл. Таӵе югдурысь потыны луысал, удмурт егитъёслы вузъёсы но техникумъёсы пырыкузы, квотаос тупатыса. Но таӵе куронэз Правительство санэ уг басьты. Уг быдэсъяськы озьы ик постановление, кудӥзъя чакламын вузъёсысь 30 процентозь интыос федеральной бюджет чотын гуртысь абитуриентъёслы сётэмын луыны кулэ. Ёросъёсысь администрациос но, вузъёс но та уж борды озьы ик рос-прос уг пырисько на. Таӵе югдур выльысь но выльысь возьматэ национальной кадръёсты дасянъя кун программалэсь кулэзэ. Кадръёсын ужась комиссия та пумысен выльысь гожтэт гожтӥз П. Н. Вершининлы. Милемыз оскыто, таӵе программа лэсьтӥське ни шуыса. Улыса адӟом ини. "Удмурт кенешлэн" исполкомезлэн куремезъя, элькун сьӧры дышетскыны ысъясь комиссие пыртэмын Ю. С. Перевощиков но Н. И. Малых. Туэ сизьым удмурт пинал дышетскыны ыстэмын Калык эшъяськонъя университетэ, куатез мынӥз Эстоние. "Удмурт кенешлэн" исполкомезлэн нимыныз вузъёсы пырыны сётэмын 118 дэмлан. Исполкомлэн решениезлэсь быдэсъяськемзэ ми рос-прос учком декабрь толэзе. Верам потэ Ю. С. Перевощиков профессорлэн туж бадӟым уж лэсьтэмез сярысь. Со кылдытӥз асьме университетын менеджеръёсты дасянъя заочной курс, кудаз кутӥсько удмуртъёс но удмурт кылэз тодӥсь студентъёс гинэ. Тау, Юрий Семенович, удмурт калык сярысь сюлмаськемды понна, тазалык но кужым тӥледлы! Котькыӵе секыт мед луоз но, кадръёсты дасянъя ужез асьмеос азинтыны кулэ элькунын но, каръёсын но, ёросъёсын но. Асьме калыкез ӝутонын, вылӥ кивалтэтъёсы удмурт кадръёсты пуктонын, ас калыкмылэсь правооссэ утён удысын асьмеос соку гинэ басьтыны быгатом азинсконъёс, ку вылӥ ёзъёсын тросгес но тросгес луозы удмурт депутатъёс. Соин ик быръёнъёслы дасяськон, соосты ортчытон тужгес бадӟым ужмы луыны кулэ. Июле ёросъёсы быръёнъёслы йылпумъянъёс возьматӥзы: депутат луон понна удмуртъёс но мукет выжыос сямен ик умоесь вормонъёс басьтыны быгато. Алнаш ёросын, кылсярысь, кызь тямыс депутат пӧлысь кызь куинез удмурт (82 процент). Кез ёросысь депутатъёс пӧлын удмуртъёс 66 процент. Пичи Пурга ёросын - 76. Нош Якшур-Бодья ёросын, кылсярысь, удмуртъёс 60 процентлэсь ятыр ке, депутатъёс пӧлын соос 40 процент гинэ. Сюлэмшугъяськыто Селтая лыдпусъёс. Удмурт калык татын 61 процент лыдъяське ке, депутатъёс пӧлын 25 процент гинэ. Таӵегес ик югдур Красногорск ёросын. Республикаямы интыосысь кивалтонъя ёзъёсы быръемын 734 депутат, соос пӧлын 314-ез удмуртъёс луо - 43 процент. Азьвыл созывын но сомындагес ик вылэм. Администрациослэн тӧрооссы пӧлын азьло куать ке вал, али укмыс луиз. Кылдэм югдурез чакласа, съездлэн резолюцияз ӵектэмын вал быръёнъёсъя нимысьтыз блок (огазеяськон) кылдытыны. Та ӵектон быдэстэмын, дасямын кулэ луись документъёс. Огазеяськонлэн Уставез юнматэмын 8-тӥ июле Юстицияя министерствоын. Та ёз нимаське тазьы: общественной огазеяськонъёслэн "Элькун" общественно-политической союззы. Сое кылдытӥзы но отчы пырисько "Удмурт кенеш" огазеяськон, Удмурт культурая дэменлык, Удмурт шаерысь бигеръёслэн огазеяськонзы, Удмурт нылкышноослэн огазеяськонзы, Ижын улӥсь поръёслэн "Ижевск-Мари" огазеяськонзы, шаерысьтымы пор калыклэн "Одо Мари Ушем" огазеяськонэз, Удмурт Элькунысь Писательёслэн союззы. Асьмелы матын луо но дурбасьто Аграрной партия, Аграрной союз, КПРФ, Элькунысь Ветеранъёслэн кенешсы. "Элькун" огазеяськонэн валче ужаны мылкыд каро ини культура удысын, тазалыкез утёнын, калыкез дышетонын тыршисьёслэн профсоюзъёссы но. Кутэмын ини "Элькун" огазеяськонлэн предвыборной платформаез. Куд-ог огазеяськонъёс но партиос быръёнъёслы кемалась дасесь ини. Округъёсыз но соос люкылӥллям ини. Асьмеос весь возьмаськом. Ми ёрос кенешъёслы трос пол вазиськылӥмы ни, депутатэ ӵектоно кандидатъёслэсь нимтулъёссэс ивортыны курыса. Озьы ке но, ёрос кенешъёслэн тӧрооссы та ужен малы ке но уг дырто. Нош ик бере ум кыле меда? Азьвыл ортчем быръёнъёс возьмато: та кампания дыръя луозы, дыр, котькыӵе кырсь ужъёс, кышкатонъёс, бырйисьёсыз коньдонэн ас палазы берыктыны турттонъёс. Таӵе шуккетъёслы асьмеос дась луыны но пумитъяськыны быгатыны кулэ. Матысь нуналъёсы ик ини асьмелы депутатэ дэмлано дано адямиосты но соосты округъёсъя люкылоно. Собере та адямиосын тодматоно калыкез, соос сярысь вералляно ужась коллективъёсын, газетъёс но радио пыр. Вань асьмелэн "Удмурт дунне" газетын "Герд" страницамы. Али со толэзьлы кык пол потылыны кутскиз. Номерысь номере потылӥсь статьяос умояло кадь. Азьланяз та бамез уката мур пуштросъем кароно. Соин ик отчы ёрос, гурт кенешъёслэн кивалтӥсьёссы но тросгес мед гожъялозы, Пичи кенешысь, исполкомысь эшъёс но куаразэс мед возьматозы, одно мед потылозы палэнын улӥсь удмуртъёс сярысь материалъёс. ВИ ӧтчамын вераськон вал удмурт телепередачаослэн кулэсмыны кутскемзы сярысь. "Удмуртия" ГТРК-лэн кивалтӥсезлэн В. Ф. Гарновлэн гожтэтмылы валэктэмезъя, кыкетӥ кварталын удмурт телепередачаос 10-тӥ каналык 35 процентозь, нош 34-тӥ каналык 7 процентозь будэтэмын луыны кулэ вал. Нош октябрь толэзе 10-тӥ каналык возьматэм удмурт программаос 25 процент гинэ вылӥллям. Нош 34-тӥ каналъя быдэс арня ӵоже одӥг гинэ 20 минутъем "Тулкым" передача ортчем. Соослэн йылонзылы оскон ӧвӧл. Берло дыре асьме телестудия ӟуч кылын дасям передачаоссэ но кулэстыны ӧдъяз. Озьы со кылдытӥсь студиысь ӝоген, оло, возьматӥсь студилы гинэ пӧрмоз. "Удмурт кенешлэсь" ужзэ возьматонын вань асьмемыз гажасьёс но, юнме шорысь курласьёс но. Та пумысен калык пӧлын пыр-поч валэктонъёс сётъяно, уката ик - быръёнъёс дыръя. Ляб пыриське на "Удмурт кенешлэн" ужаз асьме интеллигенция. Соин ик декабре ортчытэмын луоз "О роли интеллигенции в дальнейшем развитии удмуртской нации" нимо научно-практической конференция. Гажано эшъёс! Пичи кенешлэн но исполкомлэн ужрадъёсаз пичи инты басьтӥзы палэнын улӥсь удмуртъёсын кусып возён но соослы юрттэт сётонэн герӟаськем ужпумъёс. Кутэмын ӧй вал нимысьтыз программа. Соос доры трос поталляны ӧз кылды. Озьы ке но, ужъёсты кӧня ке вырӟытыны быгатӥм ик, дыр, шуыны луоз. Но со тырмыт ӧвӧл. Кылсярысь, юрттӥмы Набарежные Челны городын "Удмурт кенешлэсь" ёззэ кылдытонын, Ижысь артистъёслэсь концертъёссэс ортчытъяса тыршим татысь удмуртъёсыз огазеяны. Ар ӵоже отчы вуылӥзы "Тюрагай" удмурт калык хор, "Ингур" капелла, Валентина Пудова но "Шулдыр ӝыт" ансамбль. Галина Аркадьевна Никитина, Зоя Витальевна Суворова но Галина Васильевна Романова вуылӥзы Татариысь Кукмор но Башкириысь Янаул ёросъёсы. Янаулэ озьы ик вуылӥз Валентина Михайловна Ившина. Пумиськылӥзы соос дышетскисьёсын, дышетӥсьёсын но гурт калыкен. Тыршизы тодыны палэнын улӥсь удмуртъёслэсь кулэяськонъёссэс. Со сяна, Галина Романова вуылӥз на Пермь улосысь Куеда ёросысь Бадӟым Гондыр но Марий Элысь Карлыган гуртъёсы. Башкирие пумиськонъёсы потамы ми но И. М. Байметовен. Егитъёслэн "Шундыкар" лагерязы туэ шутэтскыны быгатӥзы Татышлы, Огырчи но Янаул ёросъёсысь нылпиос. Валамон ини, палэнын улӥсь удмуртъёс возьмало асьмелэсь тросгес юрттэммес. Та ужез азьланяз пайдаё быдэсъян вылысь, толон ортчиз исполкомлэн кенешез, отчы пыриськизы палэнын улӥсь эшъёсмы но. Эскерим Правительствоен дэмлам программаез. Юнматӥм "Удмурт кенешлэсь" нимысьтыз программазэ. Отын пусъемын 2000-тӥ арозь ужрадъёс. Умой документ пӧрмиз кадь. Табере сое улонэ пыӵатыны кулэ. Малпаськом, кужыммы асьмелэн вань. Пичи кенеш но исполком сяна, ужаны кутскоз ни Координационной совет, кудӥз кылдытэмын туэ июль толэзе. Отчы пыре 22 адями: министръёс, соослэн воштӥсьёссы, пӧртэм огазеяськонъёслэн кивалтӥсьёссы. Кужыммес ӵош, огазе кариськыса ужамы ке, пайдалыкез одно луоз. Валамон, общественной организация ас понназ гинэ уз быгаты калыклэсь улонзэ умойгес карыны, солэсь шуг-секытъёссэ палэнтыны. Со понна сюлмаськыса, калыкез валаса ужаны кулэ кун структураос, соос котьмар ласянь юрттэт сётыны кулэ. Со сярысь тупен-тупен гожтэмын туэ февраль толэзе кутэм Национальной политикая кун концепциын но. Нош асьмеос быгатыны кулэ соосты вырӟытыны, ужатыны, асьме калыкмылэсь, асьме огазеяськонмылэсь пӧртэм шуг-секытъёссэ вормон вылысь. Со пумысен ортчем дыре элькун кивалтӥсьёслы но мукет организациослы 25 пӧртэм вазиськонъёс, заявлениос но гожтэтъёс гожтэмын но ыстылэмын вал. Кылсярысь, удмурт школаослы дышетскон книга поттон пумысен вазиськон П. Н. Вершининлы, солэн воштӥсезлы А. М. Лисиналы, коньдон ужпумъёсъя министрлы В. Б. Бельтюковлы ыстэмын. Кун Кенешлэн Тӧроезлы А. А. Волковлы ыстэмын вал Иж карын удмурт пиналъёслы гимназия усьтон пумысен курон. Жаляса верано луэ, соосъя нокыӵе ужрадъёс али но кутэмын ӧвӧл на. Кылдэм югдур озьы ик возьматэ удмурт кылэз но элькунын улӥсь мукет калыкъёслэсь кылзэс утёнъя но азинтонъя Кун программалэсь урод быдэсъяськемзэ. Удмурт кыллэсь правовой базазэ умой-умой юнматыны быгатоз Кылъёс сярысь Закон гинэ. Солэн проектэз кемалась дасямын ини, но Правительствоын али ке но учкемын ӧвӧл. Кутэмын вал экономика но политика удысын кылдэм югдур пумысен вазиськонъёс но. Кылсярысь, 13-тӥ феврале Пичи кенеш, нош 17-тӥ апреле исполком кутӥз асьме Конституцие воштонъёс пыртон пумысен кык заявление. 9 сентябре кутэмын вал экономика удысын секыт югдур кылдэмен валче вазиськон. Куд-ог элькун кивалтӥсьёс, тужгес ик Кун Кенешлэн Тӧроез А. А. Волков, умоен уг пумитало "Удмурт кенешлэсь" политикае пыриськемзэ. "Удмуртъёс мед кырӟалозы но эктозы гинэ вылэм. Но политикае медаз пыриське",- таӵе соослэн мылкыдзы но, малпанзы но. Соин ик, дыр. "Удмурт кенешлэн" ужамез сярысь ӟуч газетъёс номыр гожъятэк улыны туртто. Нош асьмеос юнгес пыриськыны кулэ политикая ужрадъёсы, дышетсконо та ужлы, рос-прос валаны тыршоно туннэ улонэз. Соин ик каръёсын, ёросъёсын кылдытыны кулэ политической клубъёс, быръёнъёсын кивалтӥсь огазеяськонъёс, штабъёс. Соку гинэ быгатом политикаын но экономикаын югдурез валаны, сое лыдэ басьтыса азинтыны ужмес, удмурт калыклэн улоназ интымес шедьтыны. Кӧня ке кыл коньдон ужпумъёсъя. Со ноку уг тырмы, дыр, но та вакытэ туж тросэз верам ужрадъёсмы быдэстытэк кыльысалзы, дыр, ӧй луысал ке асьмемыз гажась но валась адямиослэсь юрттэт. Ӟеч кыл вераны кулэ туннэ татын тӥляд нимыныды таӵе коллективъёслы: "Удмуртторф" (кивалтӥсез А. Г. Марченко), "Удмуртнефтепродукт" (Н. С. Сычев), "Удмуртнефть" (Е. И. Богомольный), "Удмурт-Телеком" (С. М. Фомичев). Озьы ик умоен пусъем потэ Можга городысь но районысь, Глазовысь, Пичи Пурга, Алнаш но Завьялово районъёсысь кивалтӥсьёслэсь юрттэмзэс но юрттыны тыршемзэс. Огъя учкыса, ӧжыт лэсьтэмын ӧвӧл кадь. Но быдэстоно ужпумъёс трос на. Ваньзэ вераса уд быдты. Соин ик, малпасько, вераськоды тӥ но, вералоды азьланяз умойгес но пайдаёгес ужан ласянь ӵектонъёстэс, малпанъёстэс. Вуоно дауръёслэн меценатъёссы Али элькунамы куать сюлэсь трос библиотека. Соос пӧлысь одӥгез гинэ, Удмурт кун Национальной библиотека, шаерысьтымы котькыӵе иворез люкась но радъясь инты луэ. Берло аръёсы со ужа "Память Удмуртии" программая. Таӵе амал кулэ каре книгаосты лыдӟисьлы сётъямез, пӧртэм аръёсы пӧртэм кылъёсын печатлам вуж но выль ужъёсты утчамез, дуно рукописьёсты, документъёсты шедьтыса, лыдӟись доры вуттэмез. Библиотекаын кема аръёс ӵоже ужан возьматэ: туннэ татын ӧвӧл революцилэсь азьвыл потэм тросэз книгаос. 20-тӥ-30-тӥ аръёсы потэмъёсыз сярысь ивор, оло, туннэ нуналозь но шараямын ӧвӧл на. Ма веранэз, берло нуналъёсы печатласькем трос книгаос туннэ уг но вуо. Нырысь ик, "Удмуртия" издательство сяна, "Обязательной экземпляр сярысь" Законэз туннэ нокин уг чакла. Собере библиотекамылэн туннэ куанер луэмез но валэктэ, дыр, книгалэсь лыдӟись доры кема но шугадӟыса мынэмзэ. Книга ӧз вуы - озьыен, ӧз но пусйиськы элькунысь печатез радъясьёсын. Озьыен, со сярысь ивор но уз луы элькунысьтымы тужгес бадӟымезлэн лыдӟиськон юртлэн каталогаз. Озьыен, книга сярысь уз тодэлэ дышетӥсь, тодосчи, огшоры лыдӟись. Вордскемез бере ик, озьыен, ышиз-быриз со. Жаляса верано луэ: таӵе книгаос туннэ трос. Кылдэм югдурын верантэм бадӟым, туж кулэ луись юрттэт сёто библиотекамылэн эшъёсыз, книгаослэн авторъёссы яке огшоры лыдӟисьёс. Соос шумпотыса, данъяськыса ваё дуно кузьымъёссэс лыдӟиськон юртамы. Берло куинь ар ӵоже шаерез тодонъя но финн-угор литературая отделлы кузьмамын куать сю куамын ньыль книга. Лыдӟиськон юртмылэн меценатъёсыз кузьмало кема аръёс ӵоже люкам пӧртэм книга-газетъёссэс. Удмурт но финн-угор кылтодонъя дуно книгаосты библиотекамылы кузьмаз Т. И. Алатырева, быдӟым тодосчилэн кузпалыз. Кылтодон удысъя изданиосмылэсь лыдзэс узырмытӥзы но пуштроссэс паськытатӥзы И. В. Тараканов профессорлэн кузьмам книгаосыз но картотекаез. Шаерчилэн В. В. Рогалевлэн бичам календарьёсыз тунсыкогес каризы книга ӝажыосмес. Трос самоваръёсыныз быдэс Россилы тодмо луэм шаерчи А. В. Новиков шумпоттӥз ХИХ даурысь тодмо адямиослэсь вашкала туспуктэмъёссэс люкаменыз но. Библиотека манет но ӧз тыры Ф. К. Ермаковлэн книгаосыз понна. Профессор куиньзэ выль книгазэ быдэн вить экземплярен ваиз лыдӟисьёслы. Библиотекалы ик тодосчи кузьмаз дуно гожтэтъёсызлэсь ксерокопиоссэс но. Туж кулэ луись книгаослэсь копиоссэс ми туннэ лыдӟисьёсмылы сётыны быгатӥськом, Р. Ш. Насибуллинлэн юрттэменыз. Дорамы кылчи ваиз революцилэсь азьвыл элькунмылэн палэназ потэм ог кык сю книга. Таӵе адямиос ванен, книга ӝажыосмы арысь аре узырмо но йыло. Лыдӟиськон юртмы туннэ тужгес но узыр луэ мадьяр литератураен. Ӵыжы-выжыосмылэн музъемзы но отын улӥсь калык сярысь, солэн кылыз но кырӟан-эктонъёсыз сярысь вера ог кык сю витьтон книга. Соосты милемлы кузьмаз Иштван Козмач. Мадьяр литературамес тунсыко книгаосыныз арысь аре узырмытэ А. Н. Уваров. Куд-огез кузьмало одӥг книгазэс. Но со библиотека понна но, быдэс элькунмы понна но вераны луонтэм дуно луэ. Кылсярысь, Куӟебай Гердлэсь 1929-тӥ арын потэм "Выль сюрес" книгазэ милемлы ваизы Лидия но Семен Ильинъёс. 1905-тӥ арын потэм "Удморт кырӟанъёс" книгаез библиотекаямы вуттӥз история наукаосъя доктор Е. Ф. Шумилов. Лыдӟиськон юртмылэн данъяськонэз луэ 1975-тӥ арын Сан-Францискоын поттэм "Ижевцы и воткинцы" книга. Сое библиотекамылы кузьмаз И. Кобзев. Ф. А. Кравцовлэн сюлмысь юрттэменыз вуизы тунсыко газетъёс. Туала библиотека пыраклы утьыны быгатэ рукописьёсты но. Туннэ ӝажыосамы сылэ киын гожтэм витьтонлэсь уно "книга". Валамон ини: таосыз лыдӟисьёсмылы ношунытэсьгес но тунсыкоесьгес пото. А. Я. Евсеевалэн, Е. Е. Загребинлэн рукописьёссы книга ӝажыосамы - нырысьёсыз. Туннэ лыдӟиськон юртмы тунсыко но чебер инты луэ. Борддоръёсмес книга ӝажыос гинэ уг шунто. Милям меценатъёсмы луо тодмо суредасьёс М. Г. Гарипов но В. Л. Белых. Та адямиослэн ужъёссы яркытгес но чебергес каро лыдӟиськон интымес. Данъяськымон эшъёсмылэн нимъёссы, малпаськомы, выль ласянь, тунсыко усьтӥськизы на лыдӟиськон юртмылэн меценатъёсыз шуэммылэсь. Азьланяз тодматомы газетэз лыдӟисьёсты тунсыко адямиосын, выль нимъёсын. Сюлэм шунытсэ котькудӥз кузьмась туала вакытлы но, вуоно дауръёслы но дуно луэ. Н. ЛИМОНОВА, Национальной библиотекаысь шаерез тодонъя но финн-угор литературая отделэн кивалтӥсь. Али гинэ вал кадь ваньмыз... ... Редакцилэн коридоретӥз йыгмыт вамышъя паськыт пельпумо, батыр мугоро, баблес йырсиё воргорон. Эшъёсыныз пумиськыкуз, соослэн мылкыдзы сярысь юа-вера, улон- вылонзы пумысь маке тодэмез потэ. Куд-огзэ сюлмысь нодъя, соизлы яке таизлы ӟеч визь-кенеш сётэ. Редакциысь эшъёс кыдёкысен тодмало сое: та адями - газетэз лыдӟисьёслэн одӥгез яратоно юлтошсы, удмурт шаерысьтымы тодмо журналист Николай Белоногов. Огшоры ӧй вал воргорон. Дунне вылэ вордӥськемез бере ик, оло, тодӥз адӟонзэ. Берат ӟеч-ӟеч пыдъяськиз но вань улытозяз гыриз одӥг удысэз - гожъяськонэз. Николай Белоноговлэн йӧн-йӧн сӧзнам но вольыт кылужъёсыз, очеркъёсыз, огшоры иворъёсыз но соку ик шедьтӥзы лыдӟисьлэн сюлэмаз сюрес. Отӥяз та адями котькудӥзлэн яратоно гожъясез луиз. Луло дыръяз Николай Егорович ӧз ик малпаськылы кадь лек кайгуэз сярысь. Нош висён жалятэк куасалтӥз сое, укыр вазь талаз. ... Улонысь кошкиз со сӥзьыл. Нокин ӧз ик малпаськылы, дыр, та адямилэн сокем вакчи даурез сярысь. Нош витьымтэ адӟон сьӧраз нуиз... Дунне вылэ кылиз кык кыл гинэ - Николай Белоногов. Таин ваньмыз верамын кадь... Ӵуказе куатьтон ар тырме тодмо журналистлэн но писательлэн Николай Белоноговлэн вордӥськемез дырысен. Яркыт но чебер нимзэ лыдӟисьёсмылэн тодазы выльысь уськытон вылысь, туннэ печатласькомы одӥг веросысьтыз оглюкетсэ. Музон ужъёсаз сямен ик татын но автор курла мурт сильсьӧрын улӥсьёсты, калык ваньбурез тус-тас карисьёсты. Куажыез уд сура уӵыен Верос Армие кошкись пиосты келяны клуб азе вань гурт калык люкаськиз. Ваньмызлэсь берло вуиз Левран. Винаен усыкмем йырзэ чырты бордаз мырдэм возе. Солэн но пиез, Анисим, лекрутъёс пӧлын. Пизэ пожаськем синъёсыныз мырдэм шедьтӥз но со доры тапыштӥз. - Тон, Онти, улэп эн берты отысь, - кылзэ мыгыль-могыль выретӥз. Кыӵе дышмон Левранэз кылтӥз кыскиз шимес кылъёс вераны! Ваньмыз, кин кылӥз сыӵе юриськонэз, кучерскизы. Ог-огзы шоры учкылӥзы: мыдлань, пе, ӧз-а кылэ пельёссы? Бен, пельёссы озьы ик валазы, кызьы кылӥзы. Нош Анисим чик уг возьма вал атаезлэсь таӵе сюрес сӥземзэ. Сюлмыз ӵужырак ӵуштаськиз кадь. Ачиз кыл утчаса ӧз улы. - Бертыкум нош ик юэмын луид ке, йырдэ та кылыныд валче кунулад чуртнало, - шуиз со. - Тод но ул. Кудлэсь куд вал Левран, нош пиезлэн верамез пеляз пыриз. Ӧз вунэты. Пыр тодаз возиз. Сазьтӥськемез бере ас кылъёсызлэсь ачиз му пыр виямон луиз Левран. Мар дауртӥз со, мар дауртӥз? Возьытэз мар быдӟа! Копак гурт калык азьын вера ай собыдӟа кылъёстэ. Мар шуозы? Мар возьыт та, мар возьыт! Быдэс нунал валесын погылляськиз Левран. Синзэ кышноез шоры ӝутэмез уг луы. Уг дӥсьты. Возьыт ӵушка. - Кызьы ымыд пыриз?! - нунал ӵоже шып улыса, ӝыт пал картсэ пыкылӥз Марка. - Шузи визьмыд аслэсьтыд азьлогес вордӥськем, лэся. Кышноез пумитэ мар вераны ӧз тоды Левран. Синъёсыз кынемын, йыраз малпанэз лошъяське: "Озьы угось, визьмы нуназе бере лыктэ... А веть чуртналоз. Уз чуртна ӧвӧл - чуртналоз". Пизэ со умой тодэ: кылъёссэ мертатэк уз кушты. Кышноезлэсь коркась потэмзэ возьмаз Левран. Огназ кыльыса, валесысьтыз султӥз но усьтэм укноетӥ кыре мычиськиз. Шораз серекъяса сямен палёмиз инвис пала чукинскем шунды. Со но тӧрнам ымныро воргоронэз лэчытэсь сиосынызы янак борды ӵогъялтӥз кадь. Укно бордысь кужмысьтыз донгиськыса, Левран шонертӥськиз но кык киоссэ ик гадь вылаз тыриз. - Сё! Пум понӥсько, - аслыз кыл сётӥз. Со ик луиз Левранлэн юонлэсь куштӥськемез. Со ик луиз кыкетӥзэ вордӥськемез. Табере мукетыз йырйиз Левранэз: кызьы пиез азьын саптаськемезлэсь гылтӥськоно? Кызьы берыктоно солэсь йыркурзэ? Ветлӥз сельсоветэ - нарядлы. Лесничествое - билетлы. Кутскиз корка кор дасяны. Пиез бертӥз ке, чоркак огназ пыр уз улы, куке-соку одно кузъяськоз. Одӥг липет улын ёркыт йӧтоз, яна потыны ӝуткаськоз. Эсьма, али ик кутскиз ке, каллен но кызьы йыръялоз, кулэ вакытэзлы выль корка дась луоз. Со дырысен тэк пуконэз ӧз тоды Левран. Ӝытъёсы но, праздник нуналъёсы но тӥреныз ӧз люкиськылы. Ялан тюк но сюк! Кор бӧрсьы кор, рад вылэ рад - учкиськод, корка каллен ӝутӥське. Кудӥз но соиз воргоронъёс серем карылӥзы: - Тон, Левран, тазьы воргорон шӧмдэ ыштод. Ойдо одӥг гопен коть питыртом. Левран пумитазы киыныз омырез гинэ паналъялляз: шедьтӥллям, пе, мар понна куректыны. Озьы ар но, кыкез но ортчиз. Пиез армиысь берытскытозь, корказэ липет улэ вуттӥз Левран. - О-ох! - азбарзылэн мукет палысьтыз выль коркаез адӟыса, солдат погонъёсын берытскем Анисим первой ик тазьы юаз: - Кинлы со? - Бон выль кенэз вуж корка пыртоно медам луэ, - пиезлэсь кыӵе мылкыдэн бертэмзэ тодэмез потэ Левранлэн. - Выль кенэн ум дыртэ, - шуиз Анисим. - Нырысь дышетсконэз йылпумъяно. "Кунулме утчамез потэ, керек, - Левранлэсь йырсазьзэ тӧл выретӥз. - Та дырозь чидамме, азьланяз но инмар мед утёз... Отӥяз, оло, верам кылзэ но вунэтоз..." Ай соиз шумпотымон: пиез кошконэн уг курдаты. Иське, татчы ик, гуртэ, бурмемын гогыез. Малы ке-а сельхозэ пыриз? Дышетсконзэ быдтӥз ке, музъем утись луоз, оло. Юрт кутӥсь но со ик медло вал. Нош атаез понна Анисимлы... Уз, атаез выжызэс выльысь уз сапта. Атаез понна пиезлы калык азьын возьдаськоно уз ни луы. Сётэм кылзэ тӥяз ке, коть интыяз мед чутырмоз. Коть атассы чоръямысь мед дугдоз... Атассы ӝоген, зэмзэ но, чоръямысь дугдӥз. Одӥг ӵукна кылзӥське Левран, кыкетӥяз кылзӥське - уг, атассы уг чоръя но тӥни. Коть сайкаллятэк быдэс нуналэн валесысь эн султылы. Ишанлы ӧвӧл-а? Неужто шайтан кужым кытчы ке сьӧлталоз? Синкыль, оло, гочатыны шедьтоз? - Атасэз ӵогоно, арам сюдос, - куинетӥ ӵукнаяз кышнозэ косӥз Левран. - Ас визьмад-а вераськиськод? - чебер атассы жаль потӥз Маркалы. - Чоръясь ӧвӧл ке, нунал уг ӵогиськы, - аслэсьтыз кариз картэз. - Лэсьты, мар косэмын. "Та воргоронъёсын! - ас понназ безэръяськиз кышномурт. - Кызьы но огзыя огзы - ӵогизы ке, берен уз ляке". Пумитъяськыны ӧз ик туртты ни. Ӝыт выль шыд сиён каризы. Бускельёссылы но вазизы: йыр-пыд нерге, пе, сиёмы. Зэмос мугез йыр-пыд сиён бордын вал меда? Анай-атай сюлэмез мукетыз ӧз-а ӵабыръя? Бускельёссылэн нылзы дышетсконзэ йылпумъя ини, кытчы ке палэнэ медаз турӟы вал. Выль корказылы тани муръё поттонэз гинэ вань на. Пизы бускель нылзэс куштон уг кары кадь. Ойдо, кылзы тупасал ке, сюан сярысь но поттылыны мултэс ӧй луысал. Кинлы мар: пунылы медло йырйиськон, скаллы -сыскиськон, нош гурт калыклы огъя собраниын выль йыртӥян куштӥзы. Калык контролья группалы выль председатель, пе бырйыны кулэ. Кинэ, юазы, ӵектоды? Кинэ ке данъяны дасяськон азьын выллем луиз: клуб тыр люкаськем калык соку ик чалак кариськиз. Йырзэ тӥя. Кема ӧз чидалэ, отысь но татысь кылӥськизы шара шыпыртэмъёс. Кин ке поттылӥз бусыосы ву кисьтан агрегатэз ужатӥсь машинистлэсь, Якимовлэсь, нимзэ. - Правильно, Левранлы самой раз, - зал тыр черектӥз кин ке. - Малы мыным? - киыныз но пыдыныз пыкиськыны дасяськиз Левран. - Тӥ вошъяськыса ужаськоды, - итӥськиз мукетыз куара. - Дырыд тырмыт луоз. - Мынам коркаме вуттоно, - таӵе мугез палэнтыны уз дӥсьтэ шуыса, Левранлэн сюлмаз оскон пыриз. Нош люкаськем калык ӵектонэзлэсь ӧз ни куштӥськы. Пастух Ӟалякей султыса ик кыл куриз. - Адямиез тӧр пуконэ пуктыны ӵектӥськом бере, йыбырттэмлэсь азьло кирос карыны медам вунэтэ, - яратэ Ӟалякей чебер кылъёс "кизьыны". - Нош мар понна кирос тырыны, созэ но мед тодод. Мон тодӥсько: асьмелэн колхоз ваньбурез утён понна бӧрдӥсьёсмы байтак, нош Левран кадез ӧвӧл. Ӧвӧл но тӥни. Кин-о, шуом, кладовщикез Лякоп Петырез сильсьӧртӥз кырмиз? Кырмиз но, калык азе поттыса, тузонзэ курткиз. Соид воксё ашкынэм. Колхоз фермаысь пудо фуражлы ёрме. Изыны номырин. Нош соид ДКУ- эз кайпалтэм но лушкемак кутскем гуртоосызлы пызь изыны. Дунзэ - аслаз кисыяз. Ух, возьытсэ ыштэм адями. Ярам, Левран китӥз кырмем. Мон но ӵектӥсько Якимовез бырйыны. Ӟалякейлэн верамез иназ луиз. Кема ӧз бырйиське. Левранэз ке Левранэз, шуизы. Солы пумит луэмзэс возьматыса, кӧня ке мурт гинэ кизэ ӝутӥз. Таӵеосыз пӧлын вал Лякоп Петыр. Солэн синъёсаз лек тылъёс тэтчазы. "Ну, Ӟалякей! Ну, Левран! Возьмато ай мон тӥледлы. Пунэмтэм кеньыр шыд ӧвӧл. Озьы ик каром - тодэ но улэ", - аслыз ачиз кылаз-бураз кладовщикысь тузэм чиед воргорон. Котырысьтыз гуртоосызлэн ӟеч улэмзылы кӧтыз пӧсен ик солэн быгыт котыръёсаз кӧй быгыльскыны уг вуы. Аслаз юрт котыраз буш сэрегез ӧвӧл. Озьы но весь аслыз гинэ кыскыны турттэ. Напсӥзэ уг вормы. Кунулаз из ватӥз Лякоп Петыр. Сое калык пӧлын возьматъяса уз ветлы. Тупамон учыр возьмаса улоз. Соку ватоссэ лушкем сэрегысен Левранлэн "бакчаяз" зӥртоз. Котькинлы со мед йӧтоз но, вӧсь луонэз Левранлэн сюлэмаз мед усёз. Ортчемез сярысь номыр аламазэ малпатэк улӥзы Левранэн Марка. Дырын-дырын тодазы вайылӥзы атас йыр-пыд сиён нялтас бускельёсынызы вераськемзэс. "Ветылзэс артысь юртэ вузаны" соос пумит вылымтэ но... Кызьы ай пизылэсь ваменъяськон йылолзэ чигтоно? "Чыртыяз сиес" понэмез уг поты: дышетскыны, пе, люкетоз. Кызьы чаклазы кузпалъёс, озьыгес ик луыса кошкиз. Дышетсконзэ йылпумъямез бере, бускельёссылэсь нылзэс ужаны кытчы ке сизьым шур йылэ ыстӥллям. Отчы кошкиз ке, утча на сое. Кыӵеез ке, кыллы шаплыез, аслыз кокчалтоз но, вань чильпаськемед отчы ик сэраськоз. Таӵе ивор Анисимлэсь мылкыдзэ нокыӵе зыртэк бералтӥз. Тазьы малпаз: "Кулэтэмзэ уг чирдо анаен-атай. Куке но сё одно кыткиськоно. Медло соосъя". Кутӥзы но сюан ортчытӥзы. Лякоп Петыр сое ик возьмаз. Кунулаз ватэм иззэ нуллыны жадиз вал ини. Дыр вуиз, пе, сое отысь поттыны. - Нылпиедлэн сюанэз - аслад пинал дырад пыран со, - Левранэз чарка кутыны ӝутка Лякоп Петыр. Сюанэ со ӧтемын ӧй вал ке но, ачиз лыктӥз. Тодэ угось: нокинэ уз уллялэ отысь. - Ма, копак сыӵе дыръя но кӧс возёд-а, Левран? Калыклы ӟеч мылкыддэ коть возьматы. Лякоп Петырлэн йыраз одӥг малпан. Сьӧд малпан: кызьы ке но тӥялтоно Левранлэсь вайыжъёссэ. Огпол ӧз быгаты ке возиськыны, берло уз чида чаркалы пыкиськыны. Пиез армие кошкыкуз верам кылъёссэ ӧз на вунэты, дыр. Вунэтэм ке, тодаз вайытыны кема ӧвӧл: - Оген, ма, нылпиослэн шудзы понна берекет кароно-а, мар-а, - ӝӧк вылын сылӥсь чарка доры сузьтӥськиз Левран. Чарка кутэмезлэсь азьло со пиез шоры учкиз. Синъёссы ваче сураськизы кадь. Валатскиз Левран: люкмесэ тэтчыны дасяське. Синъёсыныз ӝӧк сьӧртӥ котырскиз - нокин уг дырты чаркаен "шудыны". Ӝӧк вылэ соос азьло йылолъя пуктылэмын. Вашкала йылолэз утён понна шат оген юозы оло кузъялозы - капчиятскон понна? Нырысь вераськизы вал, сюанзэс, оло, воксё винатэк ортчытомы-а шуыса. Кин но со чутрак пумит кариськиз: кыӵе-мар шулдыръяськон, пе, луоз сотэк - дышемын ӧвӧл на. Егитъёслы бон мар сокем кулэ? Соослэн мылкыдзы задор шудэмен-серектэмен но кудӟе. Нош мӧйыослэн? Сюанэ лыктэмъёс егитъёсты ӟечкылазы выль семья кылдытэмен, мылкыд каризы ас дауразы шудо-буро улыны. Верам кылъёссы егит кузпалъёслэн сюлэмъёсазы мед выжыяськозы шуыса, котыр быдэн чаркаен коттоно кариськизы. Кӧня ке улыса, чаркаосты эшшо одӥг котыр тырмытъязы: арганчилы шудыны мылкыд, пе, сётоно. Левран чарказэ ӝутъяз ик но, ымдуръёссэ коттылэм карыса, берен тыроен ик пуктылӥз. Лякоп Петырлы ӧз кельшы Левранлэн тазьы "лӧпшамез". Шӧдэ со, уг пӧрмыты "иззэ поттыны". Мукет ласянь пырыса, пе, утчано - мукет ӧсэтӥ. Егитъёс ӧз чидалэ ӝӧк сьӧрын кема кӧшнаськыны. Оломар но маскаръяськыны кутскизы: кин пӧртмаське, кин мадиське, эктыны но вутско висказ. Левран выль туклячиеныз кенешыны бӧлет сьӧры мыныку, Лякоп Петыр сое саестӥз матаз кыскиз. - Бо, Левран, мар-о калык вераське, кенды буш уг лыкты шуыса? - Охо-о, кенмы удалтӥз, - валамтэ амалтӥськиз Левран. - Сизьымдон сандыкез вӧзы дас кык киосыз но сомында ик пыдъёсыз вань. Котькытчы вуттӥськоз. Ассэ серем каремен, Лякоп Петыр воньдоз шуыса малпаз вал Левран. Нош со ӧз воньды. Кошкыны вырӟем Левранэз эшшо матазгес кыскиз. Юромо пельдораз кариськиз. - Мултэс ым вордӥськемлэсь бо кызьы-о, моӵты тырмоз-а сюдыны? Таӵе нуналэ Левранлэн уг поты вал пож локанэ колӥськылэмез. Лякоп Петырез синъёсыныз зуркйиз: - Ымдэ под яке коркась пот. - Валай, - ымзэ кырыжъяз Лякоп Петыр. Нош ик палэнэ усиз солэн "изэз". Сюанысь кӧтыз тырытэк кошконо луиз. Но эн малпалэ, Лякоп Петырлэн йырсазез кыдэ шуыса. Ас понназ тазьы малпаз: "Инмарлэн нуналъёсыз азьланьын трос ай. Йӧнзэ шедьтытэк ум кельтэ". Шумпотэ Анисим атаезлэн сазьтӥськемезлы, улонзы шоры выль синмын учкемезлы. Шумпотэ со сярысь сюлмаськемезлы. Сазьтӥськонэз ӧй тодысал ке, кытын ай луысал солы выль корка пыронэз адӟон! Атаезлэн тыршеменыз ик, уть, сюанзэс но выль коркан ортчытӥзы. Атаезлы Анисимлэн кӧтыз кемалась берыктӥськиз ни. Солы бадӟым уж оскемзы бере, соин данъяськыны но кутскиз. Колхозысь мукет дозорнойёсын ӵош рейдъёс яке эскеронъёс ортчытъя ке, Анисим солы аслэсьтыз адӟемъёссэ ивортэ, ас малпанъёссэ вера. Маке но выльзэ ӵектэ, юа-дэмла. Атаен пиез куспысь вотэсъёс пумен воксё сэраськизы. Котьку тазьы мед луоз вылэм. Но дунне вылын вань на Лякоп Петыр. Солэн кунулаз вань на ватэм изэз. Со аре куазь тупатэм кадь чебер улӥз. Юос син азьын пушйизы. Гурт калык шумпотэмзэ кызьы вераны уг тоды. Нош Левранлы озьы но, тазьы но уг яра. Юос начар будо ке, уно ю тысь арам-сюрам луоз шуыса шугъяське. - Куасьтӥськонмы начар, вуомы-а куасьтыса, - аран кутскемлэсь азьло ик сюлэмшугъяськемзэ пиезлы вераз Левран. - Ванезлы эн бӧрды, инты шедьтом, - нокыӵе ӧз кариськы Анисим. Дышетсконзэ йылпумъя ни шуыса, колхозазы сое главной агрономе пуктӥзы. Азьлоез нылмурт вал, бызиз но улыны картэз доры городэ кошкиз. Табере ю-нянез утялтон понна котыр ласянь Анисимлы бызьылоно луоз. Улонэз тыро-пыдо адӟымтэ муртлы шуг ай азьвыл ик валаны, мар кузьыт но мар шӧг йӧтоз. Таӵе удалтэм юосты но нырысьсэ адӟе. Уг тоды на, кудпала со вуттоз. Ваньмыз шоры огдышем сямъя учке: дырыз вуиз ке, мар ке но малпалом, кызьы ке но кышъялом. Нош Левран тодэ на, юоссы огпол, та аре сярысь, трослы начаргес вал, озьы но кутсам ю тысен кытчы кариськыны ӟудӥз. Со дырысен куасьтӥськонзы трослы ик ӧз буды. Куднялась ини верасько ю куасьтон бадӟым комплекс лэсьтон сярысь. Вераськонэн ик кыле. Аслэсьтыз зудаськись малпанъёссэ Левран колхоз правлениын но вераз. Ваньзэ куасьтӥськонъёсты ӟеч тупатъяса но уен-нуналэн ужатыса, пе, шуге-леке пыронэз ум адӟе, оло. Со понна, шуиз, адямиосты азьло ик дышетыса дасяно вылэм. Кулэ дырыз вуиз ке, кинэ машинистэ пуктод? Ӧз, санэ ӧз басьтэ дозорнойёслэн председательзылэсь верамзэ. Кызьы ке но ныдъяськом, шуизы. Главной агроном, Анисим Якимов, атаезлы берло шуиз: - Мар сокем пӧсекъяськод? Асьмелы гинэ кулэ шат? - Э-э, пие, пие, - лулскиз Левран. - Нянь бордын асьмелэн выжымы но, кужыммы но. Лыктэмзэ но киямы кутыны ӧм ке быгатэ, кыӵе-мар кузёос луомы? Музъем азьын возьыт. Сое быртык но уд шӧдӥськы кадь. - Шӧдом ай, дышом ай, - назьыляк кариськиз Анисим. - Бер кылён - изъян адӟон, - пизэ пичи муртэ сямен визьманы турттӥз Левран. Бусыосы комбайнъёс потэм бере, Анисим выльысь малпаськонэ усиз. Тодаз лыктӥзы атаезлэн верам кылъёсыз. Соку гинэ чотаз, нунал ӵоже кӧня ю тысь вуоз итымъёсы, кӧнязэ куасьтыны вуттозы. Лыдпусъёс огинэ сумъяськизы но главной специалистлэсь сюлэмзэ чепыльтӥзы: кытчы кариськозы тамында узырлыкен? Мускытэн ик элеваторе келяса утчазы - ӧз басьтэ, берыктӥзы. Шонер вераз вал атаез: "Бер кылён - изъян адӟон". Озьы ик луоно та. Мар лэсьтод на выльысь? Малы атаезлэсь верамзэ азьло ик пеляз ӧз поны? Шӧдэ Анисим: азьланьзэ учкытэк-чаклатэк улэмез ӟече уз вутты. Итымъёсын ю тысь "ӝуаз" ке, кин кыл кутоз? Та пумысен кенешы вал атаеныз - кепыр вае. "Малы пельдэ азьло ӵоктад? - шуоз я мар. Кызьы ке сотэк ик йӧндырозы ай. Дыр лобӟе, нош "кызьы ке" шуонэз уг пӧрмы. Итымъёсы кылдэм гурезьёс будо но будо. Куд-ог бусыосын комбайнъёсты дугдытытэк ӧйлась ни. Одӥг нуналэ колхозысь кыказ ик итымъёсы вуылӥзы дозорнойёс. Кин но со йыр бордаз кутӥськиз: кӧня зарни тысь изъянмыны кутскем! Киез ю пӧлы пыдло донгыны уг луы - сутэ. Сузе омыртыса, ныр доры ваиськод - зынъяны уг луы: пыкмем зын нырез чатыртэ. Кӧняез такем ваньбур пудолы сюдыны но уз яра ни! Калык контролья группалэн председателез, Якимов, колхоз правление шокпотыса вуиз. Колхоз председательлэн ӝӧк вылаз актсэс шлач! понӥз но мӧля тыраз тудӟем ӝожзэ кӧрыкен кадь шокыштӥз. - Мар верай вал мон? Верай вал, изъянтэк уз ортчы шуыса. - Ладно, вераны котькин быгатэ, - ӵушъялскиз колхоз председатель. - Ачим но синтэм ӧвӧл, адӟисько. Тон вера, мар карыны луоно? - Первой ик, янгыш муртъёслэсь кылзэс юано, азьланезлы визь медло. Кыкетӥез, ворохосушилкаосты али ик та ужлы тупатоно. Таоссэ сушилкаосты уен-нуналэн ужатоно. Ӝуась гурезьёсты берыктыны вань калыкез итымъёсы поттоно. Ас гуртысьтымзэ ачим ӝуто. Колхоз председатель ӝӧк вылэ чиньыосыныз кӧня ке коказ но вераськонзэс одӥг кылын йылпумъяз: - Куталом. Председательлэн яратон кылыз со. Таӵе кылъёсыз бере солэн син шораз яке ки улаз ӝимид ке, тод: кутам гинэ ӧвӧл, гындоз но, кутсалоз но. Кызьы вераз, озьы ик лэсьтӥз Левран. Гуртысьтызы дозорнойёсын коркась корка пыраса ветлӥзы. Аналъяськисьёсты возьытэ вуттӥзы, кудӥзлы нокыӵе лӧпкытъясь кылъёс кулэ ӧз луэ. Огъя вераса, кин быгатэ, ваньмыз пу лопаткаосын вуизы итыме. Уйбыт ӧз чалмылы ужгур. Скал фермаын ужасьёс гинэ вазьгес кошкизы: ӝамдэлы коть умтӥськылоно, пе. Мукетъёс ваньзэ люкаськем ю тысез берыктытэк ӧз бертэ. Колхоз правление ӝыт пал люкаськылӥз заседание ортчытыны. Кема пукыны дыр ӧвӧл, шуизы. Ӝогак тодматскизы калык контролья группалэн актэныз. Кылдэм секыт югдурез тупатон сярысь вераськизы. Сӧриськыны шедем ю тысь понна главной инженерлэсь но агрономлэсь кылзэс юазы. Изъянлэсь ог люкетсэ коть берыктоно шуыса, кыксылэсь ик ӝыны уждунзэс кельтыны решение кутӥзы. Сотэк, пе, уд визьма. Штраф понна Анисим атаезлы ӧжытак йыркуръяськиз ке но, солы пал кыл но ӧз поттылы. Кылем уе со атаеныз вожмин ужаз. Кышноез но бере ӧз кыльы. Лопаткаосынызы шонаськизы но шонаськизы. Анисимлы возьыт вал атаез шоры учкыны: соин йырин луиз кадь вань та уж. Быдэсак соин йырин уд шуы, но бадӟым люкетэз со вылэ усе. Солы сяна, кинлы азьвыл ик сюлмаськоно вал вань юэз утён сярысь? Атаез сое таӵе адӟонлэсь ӧз-а алы? Вот угось! Табере лар-лар шуод но кырымпыдэсъёсысьтыд пульдэмъёссэ маяллялод ни. Ачид гинэ ке луысал! Правленилэн заседанияз кутэм решение сярысь ивор Лякоп Петырлэн пеляз кылӥськиз. Ну шол куанӥз! Та ик кулэ вал солы. Ураметӥ коӵо кадь утчаськыса ветлэ: кытысь ке Анисимез уз-а синйылты? Кытысь ке пумитано, пе, вал сое "салам" кылъёс вераны. Солань-талань утчаськыса, Лякоп Петырлэн йырыз кыляз ини. Сётаки удалтӥз шуод-а: бусы сюрестӥ гурт пала лыктӥсь Анисимез адӟиз но солэн пумитаз дыртӥз. - Бертӥськод-а?- Анисимен ӵошаса, няркыт куаразэ поттӥз Лякоп Петыр. - Бертонэн йырин ӧвӧл ай, - дугдылытэк азьлань вамышъяз Анисим. Лякоп Петыр кӧня ке вамыш юромо ортчем кариз но дугдӥз. - Онти: бо, мар ай со, - берытскыса Анисим сьӧры уйытӥськиз. - Штраф донгиллям шуыса кылӥ. Чынзэ ик-а? - Коть тон эн юалляськы, - нош ик азьлань кошкиз Анисим. Лякоп Петыр нош ик со сьӧры уйытӥськиз. - Бо, Онти, дугды ай. Анисим ӧз дугды. Лякоп Петыр соин артэ вамышъя ни. Верам потонзэ вератэк кылемезлэсь курда. - Мар-о дауртэ со атаед? Копак ас пидэ штраф улэ донгы ай. Визьмын-а улэ? Мар понна ас пизэ нырк каре? Армие кошкыкуд нош мар шуиз вал? Бырод! Мар дауртэ пересьмон даураз? Астэ ик аслаз уг кары. Бырод сыӵе атаен. Бырод, ява. Мар понна со тынэсьтыд сюрестэ ворсаны турттэ? - Уг тодӥськы! Нош тынал мар ужед? - Анисимлэн вожез потӥз. Лякоп Петырлэн таӵе учырлы бырйыса дасям кылъёсыз таляк, только ваньзэ вераны ӧз вутты. Анисим, кузь-кузь вамышъяса, азьлань кошкиз. Солэн бӧрсяз чиед воргорон кӧня ке "ӵужиз" ай, но ӧз ни суты. Лулыз пытсаськыны кутскиз но, ӧз ни уйытӥськы. "Ойдо ӵок, - шара шыпыртӥз. - Сэрегпум куштыны быгатӥ кадь. Ӵындоз-ӵындоз но, оло, тэляны ӧдъялоз ай". Атаен пиез куспын ваче йыркуръяськон гомӟиз ке, вот соку Лякоп Петыр кема нуллэм иззэ ша-арк! - кыксылэн но йыр вылазы. Ох и спектакль луоз бо! Бусы сюрес вылысен кылэмезлы Анисим нырысь нокыӵе ӧз кариськы. "Пуны утоз, тӧл нуоз", - шуиз понназ.Нош тӥни, огшоры гинэ уг нуы вылэм. Лякоп Петырлэн котькуд кылыз сюлмаз портӥськыса пыре, пыдло но пыдло мертчиське. Кемалась вунэмез выльысь улӟе но алиеныз огинэ суралтӥське. Куспетӥ сӥзьыласькиз Анисимлэн сюлэмаз. Салкымтӥськиз. Сапрес куазь выллем луизы улон нуналъёсыз. Озьы но бергатэ, тазьы но бералтэ - нокызьы уг вала, малы атаез сое нырк карыны кулэ? Шуак тодаз лыктӥзы атаезлэн армие кошкыкуз верам кылъёсыз. Малы собыдӟа кылъёссэ вераз соку? Оло, зэмзэ но, маке вань, мае ке но валаны уг быгаты? Дораз Анисим шуньӟырам мылкыдо бертӥз. Кышноез я вань, я ӧвӧл - уг адӟы. Атаез сое ӧтиз лапас улысьтызы сисьмем юбоез воштыны. - Жади, - аналтӥськиз Анисим. Левран огназ могтӥськиз. - Юрттӥськид ке, суйёсыд уз коскалэ, - пыкылӥз Анисимлэн кышноез. - Тон понна "уз коскалэ", нош мон понна солэсь но ортчыт, - Анисимлэн керӟегез ломдӥз. - Калыкын мар но уг верало! - Мар верало? - Мар-о, солэн ӧй-а луысал со актъёстэк? Картэзлэсь кин вылтӥ погыльскемзэ кышноез вератэк но валаз. - Калык мар но уз вера, нош тон одӥгтэм пеляд понӥськод. Озьы-а? - Озьы. Калыклэсь возьыт. - Калыклэсь-а, кинлэсь ке-а? - Ну, "кинлэсь ке"! Мар пӧртэмез? - лекъяськиз Анисим. - Вань пӧртэмез, - картэз пумитэ меӵак учкиз кышноез. - Нырысь учкы, кин вера. Нырысь тод, малы вера. Анисим кылзэ куртчиз. Но сюлмаз шырпуаськем кылъёс ялан бышко. Маин ишкалтод на соосты? Ӵукъёсы котьку ик огинын сиськылӥзы. Нош вуонояз ӵукна Анисим вужаз корказы ӧз но пыра. Атаеныз адӟиськемез но ӧз поты. Ас дораз мар но со куртчем кариз но мотоциклэн пырак арасьёс доры ширтӥз. Котырскыса тымет дуртӥ ортчыкуз, ӵапак пумиськиз мынӥсь атаеныз. Соин ӧз но ӟечъяськы, ӧз но дугдылы. "Эк, шузи-мазиед, - пиезлэн мышказ учкыса кылиз Левран, - Штрафлы луыса йыркуръяське... Ничо, золгес ныркиськид ке, валатэк уд кыльы". Атаезлэсь пиеныз пумиськемзэ адӟыны тупаз Лякоп Петыр. Озёлонгес со куайытоно ошпиослы кизем турын турна вал. Адӟиз но мынь-мынь луиз: ӵындэ солэн куштэм "сэрегпумез", ӵындэ-э. Самой раз куспазы карасин кисьтыны. Огназ пӧрмытоз я уз - кудозэ узатоно на. Солэн но Левранлы пунэм тыронэз вань кадь. Кышнозэ фермаысен йӧлвыл октыкуз кутӥллям. Мар солы, аслаз ӧвӧл ук - жаль потэ-а, шай-а? Укыр медаз йӧнъяськы, Лякоп Петыр сиктан ныдын кутамын ӧвӧл, тодоз кудлань куасалтыны. Озьы малпаса, турынзэ со огинэ люказ... Анисим син азьын воштӥськиз. Бак мурт музэн, йырзэ ошыса ветлэ, нокинэн уг вераськы. Кышноез огпол котыръяськытэк юаз: - Мар луэ тонэн? Оло, висён някыртэ? Оло... - Номыр уг луы, - кышнозэ уретӥз Анисим. - Уг поты татын улэме. Мар вераны тодытэк, кышноез йырзэ гинэ сэзъяз. Мукет дыръя анаез ёртӥз: - Кен но нимаз уг пӧра кадь, мар-о сиыса улӥськод, Онти? - Маркалэн куараез бӧрдоно кадь кылӥськиз. - Ми кошком татысь, - сюлмаз пужалтӥськиз Анисим. - Атайлэнэз номыр кулэ ӧвӧл. Марка - визьмо кышномурт. Пиезлэсь малы тазьы вераськемзэ соку ик валаз. Ас малпанзэ шара вераны ӧз дырты. Со азьлогес ик шӧдӥз ни, гуртазы йыркуръяськисьёс вань шуыса. Сыӵеос семья куспазы тул шуккытэк уз чидалэ. Картсэ но кӧня пол алылӥз: "Куштӥськы та дунтэк ужанэдлэсь. Мар пайдаез? Калыклы синазькыль гинэ луомы". "Эн ӟургеты!" - кышноезлы вераны маза ӧз сётылы Левран. Табере со ачиз но мар вераны ӟудэ. Шӧдэ со, пиеныз кусыпсы тэшка но со тэшкет паськыта. Шып улыны уг яра. - Ачиз кышноеныз кенешоно кариськиз. - Онти маке сурпалляське. Уд-а тодӥськы малызэ?- кышноеныз артэ пуксиз Левран. - Али-а усьтӥськизы бӧчыосыд? - вожпотэмзэ кисьтӥз Марка. - Пиедтэк кылемдэ но уд шӧдӥськы. Э-э, со чырты пумысьтыд моклокад кӧня ке коть кеньырез вань на-а, воксё пазяськыса быриз-а ни? Мултэс пӧсектэмезлэсь утиськыса выллем, Марка ведраоссэ кутӥз но коркась потӥз. Нялтас ӧз вераськы ке но, кышноезлы ӧз йыркуръяськы Левран. Солэн али вань сюлмаськонэз одӥг бугорын: кызьы пизэ берыктоно, кыӵе вуэн сое сектано? Планазы пусйизы вал ю тысь ворттонэз эскеронъя рейд ортчытын. Кулэ на меда? Итыме вуттэмзэ но пудовкаен сштӥськом бере, кулэ-а сузен ыштӥсьёсты утчаны? Тазьы малпаса, ёзнаськись мылкыдызлы Левран ӧз ни пыкиськы. Шур дурын бергаса вылысь, чорыг лым ку ӟузьылэмзэ вунэтӥз ни со. Нокыӵе эскеронъёсты кулэ ӧз кары - сялӟиськиз. Ӵош ужано эшеныз воштӥськемез бере дораз бертыны ӧз дырты. Будказылэн липет йылысьтыз визнан ньӧръёссэ басьтӥз но бадӟым ныр дорысь кож пала вамышъяз. Отын азьло юш но чабак умой сюроз^с вал. Куакъёс доры вуиз но адӟе - яратоно интыяз кин ке визнаськыса пуке. Умойгес учкиз но - Анисим. Мар шуыны паймиз: таӵе кысык вакытэ кыӵе специалист шур дурын пукыны ваньмоз? "Иське, солэн но йырысьтыз колхоз ужъёс тӧлӟиллям", - малпаз Левран. Пиеныз артэ шыпытак пуксиз но пукыос шоры учкиз. - Йӧтылӥсь вань-а? Анисим ӧз куареты. Далай озьы, мурт адямиос сямен, ог-огзылы вазьылытэк пукизы. Левран но визнанъёссэ шуре чӧлтӥз. Пукыос, ӵемысь уд шуы, но вуэ одӥг-ог зумыло ик. Поттэм чорыгзэ сумкаяз чуртна но визнанъёссэ выльысь чӧлтэ. Кытын ке туж матын кыӵе ке тылобурдо кежак! черетскиз. Левран нёркак луиз. - Тьфу, - сялӟиськиз со. - Куажы кожай. - Кожалод тон, - пыӵкылэм кадь шуиз Анисим. Нош ик шыпыт. Левран вераськон герд утча. - Туннэ Лякоп Петырлэн кудоез дорам вуылӥз, - шедьтӥз кадь герд пумез. Сэраськоз- а со? Анисим ӧз ик кылы кадь. - Тонэ курлаз, - нош ик сялӟиськиз Левран. - Нырысь учкы, кин курла, - Анисимлэн кыл йылаз кышноезлэн верам кылъёсыз асьсэос пуксизы. Уг сэраськы вераськон герд. Анисимлэн йыраз кугӟаз "куажы" кыл. Оломар сыӵе тодаз лыктӥзы пичи дырысьтыз суредъёс. Пичи дыръяз Анисим атаеныз ӵош та интые ик чорыганы ветлылоз вал. Куддыр удалтылӥз, буш бертон дыръёссы но луылӥзы. Огпол, нырулыса пукыкузы, воксё артэ кадь ик куажы черекъяны кутскиз. Пичи Онти пельтэм кадь лобӟиз куара пала. Кӧня уйылӥськиз отчы-татчы пегась куара сьӧры - ваньмыз юнме. Кылзэ ошымон жадиз. "Куажы - со сыӵт маке, - шуиз соку атаез, пизэ тыбыраз вешаса, - сынэм кортэз зыралоз-зыралоз, нош ассэ уз возьматы". - "Нош тынад адӟемед вань-а?@ - атаезлэсь юаз Онти. "Ӧвӧл. Кулэез но ӧвӧл", - омырез чабкиз атаез. "Нош уӵыез адӟид-а ни?" - тодэмез потӥз Онтилэн. "Вань, - шуиз атаез. - Куажыез уд сура уӵыен". - "Маин соос пӧртэм?" - "Уӵылэн чирдэмез сюлэмез шунтэ. Нош куажылэн куараез пелез вандэ". Пичи дырысьтыз туннэ нуналэ тэтчиз Анисим. Син азяз пурӟе сюан. - Кылзы ай, атай, - со пала берыктӥськиз Анисим. - Сюанамы Лякоп Петыр но ветлӥз кадь. Кин сое ӧтчаз? - Ӧтёзы сое, куажыез, - маин ке нориськем кадь луиз Левран. Визнанъёссэ эскериз но берен кужмысь куяз. - Нош ик "куажы" кыл! Маке уг-а ватӥськы солэн мышказ? - Тӥ соин эшъёс ӧвӧл шат? - выжыятэ Анисим. - Сыӵе эшъёслэн берпалазы скипидарен зырано. - А со тонэ жаля, - атаезлэсь визьзэ сынано кариськиз пиез. - Жалям сяна! - ки улаз нырысь ик шедем сюй комокез пыргытӥз Левран. - Сыӵе жалясьёс ик уго вань улонэз быльдыро, покач! Тӥни ку Анисимлэн визьмаз тылси усиз. Сюлмаз мертчиськем "шырпу" берлань вырӟиз. Аслэсьтыз ачиз али нодлаз: "Куажыез уӵыен ӧй-а сура?" Оломар, ӵапак сурамлы кельше кадь. Ӟечкын ке, малы Лякоп Петыр сыӵе кылъёс верасал? Атаез шуэмзэ, куажы ик ӧвӧл-а со? Одӥг интыын кежлалоз но мукет интые ватӥськоз. Кышноез шонер вера: "Нырысь тодоно, кин тынад пеляд чирдэ". Нош ик маке тугаськиз Анисимлэн йыраз. Огшаплы нош ик чалак луизы. Таӵе дыръя вераськон уг "пӧзьы". Турлы малпанъёс кылэз сьӧлтало. Кема ӧз пукы ни Анисим. Визнанъёссэ дыртытэк бинялляз но атаез вӧзы понӥз. - Огинэ интыя, - шуиз. Кутэм ъорыгъёссэ атаезлэн сурон сумкаяз тыриз. - Бертӥд ке, лым пӧзьтэ. Кутэм пумысь пӧзьтэмез ческытгес. - Пӧзьтом, - шуиз Левран. Солэн сюлмысьтыз маке секыт арбери усиз кадь. - Мон бусыостӥ котырско, - мотоциклэз доры мынӥз Анисим. "Куажыез тодмад, ло", - пиез сярысь ас понназ малпаз Левран. Бусы сюрестӥ пурӟись тузонэз адӟыса, атай сюлэмысь йӧ комок каллен-каллен шуназ. Огдырлы вунэтӥз визнанъёссэ. Тодаз лыктыса учкиз но, огез визнан ньӧрыз шур шоры вуэм ни. ГЕРД Кужымзылы оскон кылдӥз Кызьы улэ туала вакытэ гуртысь кышномурт? Ма сое сюлмаськытэ? Солэн пельпум вылаз кык полэс секыт ныпъет ӝутэмын ук: семья но уж. Ваньзэ тае тодон но, оло, маин ке но пичияк юртон понна, Удмурт нылкышно кенеш ас азяз таӵе ужпум пуктӥз: котькуд ёросысь музъем ужен, пудо утёнын тыршись кӧня ке нылкышноосыз люкано но ваче син пукыса вераськоно. Нылкышно кенешлэн кивалтӥсез Галина Аркадьевна Никитина вань ёросъёсысь администрацие вазиськиз, нылкышнооссэс городэ мед устозы шуыса. Озьы дас вить ёросъёсысь кызь ньыль мурт лыктӥз. Пӧртэм удысъёсын тыршо соос: колхозэн, эштосэн, фермаен кивалто, зоотехник, агроном: экономист, лаборант, бухгалтер, фермер, кунян сюдӥсь луыса ужало. Кезысь "Агропромхимилэн" директорез лыктэм, Ярысь - гурт ужъёсъя управлениысь валтӥсь инспектор. Удмурт нылкышноос доры одӥг ӝӧк сьӧры пуксьыса верасьскыны лыктӥзы "Удмурт кенеш" огазеяськонлэн тӧроез Валентин Кузьмич Тубылов, Удмурт Элькунысь гурт ужъёсъя министн Василий Иванвоич Жуйков, калыкъёсын ужанъя комитетлэн кивалтӥсез Светлана Констинтановна Смирнова, Праивтельстволэн аппаратысьтыз отделэн кивалтӥсь Александ Андреевич Попов, Удмурт Элькунысь дышетон удысын Национальной ужпумъёсты тодон-эскеронъя институтлэн кивалтӥсез Зоя Витальевна Суворова но мукет эшъёс. Гуртъёсысь лыктэм куноослэн тужгес но трос юанъёссы люкаськиллям В. И. Жуйковлы. - Гуртъёслы льготной кредитъёс вуоно арлы луозы-а? - Музъем понна налог будоз-а? - Сӥлез, йӧлэз, ю-нянез государство ичи дунын басьтэ, нош малы музъем ужан техникаез туж дуноен вуза? - Малы сельхозкадемие дышетскыны пырыны гурт пиналъёслы берло вакытэ пумен секытгес луэ? Василий Иванович тупен-тупен ваньзэ валэктӥз, буйгатӥз: кредитъёс луозы, сӥлез- йӧлэз дуноенгес басьтыны кутскозы, музъем понна налог уз буды. Музъем ужан техникаез гуртэ вуттон понна кылдытэмын, пе, МТС-ёс. Соос коммерческой предприятиос ӧвӧл, МТС-ёс пыр асьмеос выль ужан тӥрлык басьтыны быгатӥськом. Гуртъёс понна но техника дунлэсь кӧня ке люкетсэ гинэ нянен я йӧлын-сӥлен берыктыны кулэ. МТС-ёс гурт ужасен огкылысь ужаны кутскизы ини Воткинскын, Завьяловоын, Глазын, Алнашын. Мукет ёросъёсын но та ужез умой радъяны сюлмасько. Соин ӵош ик В. И. Жуйков лыктэмъёсты пыкылӥз но. Малы, пе, йӧлзэс акциослы пӧртэм обществоослы сётыкуды, солэсь ӟечлыксэ соку ик эскерыны уд куриське, со сярысь документ уд басьтӥське. Соин ик бадӟым ыштонъёс басьтӥськоды, нош переработчикъёс со чотын мултэс узырмо. Таӵе югдурлы пум понон понна, республикаямы ӟеч-ӟеч радъяно эскерон ужез. - Пӧртэм организациосын, предприятиосын договоръёс лэсьтыны ӵемысь уд быгатӥське, соин но ыштонъёсты луо, - шуиз министерствоысь гурт ужез выльдонъя, радъянъя отделлэн кивалтӥсез юрист Надежда Михайловна Тихонова. - Сыӵе дыръя герӟаське милициын. Вазиське - юрттом. Удмурт нылкышноослэн нылпиоссылэн сельхозакадемие дышетскыны пырыны курадӟемзы сярысь сюлэмшугъяськонзылы Василий Иванович тазьы валэктӥз: - Котькуд ар дышетскисьёс пӧлысь куамын процентэз гуртысь мед луоз шуыса тыршиськом. Со понна интыысь кивалтӥсьёс милемлы куронэн вазиськыны кулэ. Татын нокыӵе шуг-секытэз ӧвӧл, сыӵе нылпиосты дышетскыны конкурстэк пыртӥськом. Министрлэсь верамзэ азьланьтыса, Светлана Константиновна шуиз: гуртысь удмурт нылпиос вылӥ дышетсконниосы пырыны конкурсэз ӟеч ортчон понна, пе, сослы городын интернат усьтон сярысь малпаськом. Отын нылпиосты дышетозы умой специалистъёс, ӟеч тодон-валан сётозы, мылкыдзыя пӧртэм вузъёсы пырыны луонлык кылдытозы. Малы ке шуоно, гуртын, городын сярысь, улон мукетгес, нылпиос тодон-валанъёсынызы но туала улонлэсь берегес кылё. Вераськон выжиз удмуртлыкмес ӝутон сярысь. Татын но пумисько на трос сюлмаськытсь учыръёс, куддыръя асьмеос но янгыш луиськом. Нылпиосмес, палэнтыны тыршиськом анай кылзылэсь. Гуртысь лыктэмъёс паймыса но шумпотыса кылзӥзы Зоя Витальевналэсь но Светлана Константиновналэсь та пумысен верамзэс. Соос валэктӥзы, анай кылзэс тодыса, пиналъёс кыӵе специальность басьтыны, кытчы пырыны быгато, кыӵе луонлыкъёссы кылдо. Матэ вуо Кун Кенеш быръёнъёс. Та сярысь вераса, В. К. Тубылов нылкышноосты ӧтиз чырмытгес, дӥсьтӥсьгес луыны, гуртъёсазы соос куаразэс мед сётозы калык сярысь зэмос сюлмаськисьёс понна. Озьы гинэ та секыт улонысьтымы потыны оскон кылдоз. Пумиськонлэн пумаз краеведческой музейын ужасьёс тодматӥзы вашкала удмурт дэремъёсын, йылолъёсын, нош сизьыметӥ училищеын дышетскись нылъёс - вашкала пужыосты но туала модаез чакласа лэсьтэм ужъёсынызы. Соин угось коть али ик ураме пот но ветлы. Люкаськемъёслэсь сюлэмзэс озьы ик вырӟытӥзы дано артистъёсмы Ольга Зорина но Геннадий Бекманов. Пумиськон ӝыны нунал гинэ ке но кыстӥськиз, со туж тунсыко, пайдаё пӧрмиз. Котькудӥз отысь аслыз маке но ӟечсэ, кулэзэ басьтӥз. Соин ӵош ик нылкышноослэн ас кужымзылы оскон мылкыдзы но кылдӥз: доразы вылӥ кивалтӥсьёс но лыктӥзы бере, соос ӧвӧл вунэтэмын, улонмес выльдон, умойгес карон понна трос лэсьтыны быгатозы. Галина Романова, кылбурчи. Камбаркаысь кунян сюдӥсь Алевтина Кабидзяновна Зайнатдинова но "Арняозь" эштосысь лаборант Алевтина Кабидзяновна Ишкузина. Грахысь семейной инспекцилэн кивалтӥсез Надежда Николаевна Городкова но "Родина" колхозысь фермалэн кивалтӥсез Зинаида Алексеевна Ямщикова. Туспуктэмъёсыз Владимир Беломорскихлэн. Кузёослы закон гожтымтэ Улонамы озьыгес луыса кошке: нырысь лэсьтӥськом - собере малпаськиськом. Тазьы ужаса, бӧрысь эскеронъёс ортчытъяськом, янгышъёсты утчаськом. Со понна ик Кун Кенешын кык ёз кылдытэмын - Эскерон палата но Эскеронъя кун комитет. Кыксы ик ужало, кивалтӥсьёссы журналистъёсын пумиськыло, депутатъёс азьын вераськыло. Но шараям тырмымтэосты ӵем дыръя тупатыны уг луы ни. Малы меда? Таӵе малпаськонэ уськытӥз Эскеронъя комитетлэн кивалтӥсеныз А. Кузнецоваен алигес пумиськон. Журналистъёс солы юанъёс вылэ юанъёс сётъязы республикаямы приватизация ортчем пумысен. Лыдӟисьёсмылы тодмо ни луоз, та ужрадлы умойтэм дунъет сётэмын вал шуыса. Сыӵе йылпумъянъёс лэсьтэмын вал 1995 арын ик. Куд-ог предприятиос выль кузёослы 1-2 ваучер дунын гинэ вузамын вал. Кылсярысь, Камбаркаысь огезлэн заводлэн акциосыз выль кузёезлы шедизы 20 ваучер чотын. Но таӵе учыръёсты шараяса но, шуиз А. Кузнецов, предприятиосты государстволы берыктыны уг ни луы. Ваньмыз лэсьтэмын вал со вакытэ кутэм законъёсъя. Озьы азьвыл чаклам политикая быдэс Россиын лякытак гинэ кылдӥзы капиталистъёс. Быдэс дуннелы тодмо "Уралмаш" завод но нимаз кузёлы вузамын вал тумошо дунын - со коньдонэн колбаса поттон цех гинэ усьтыны тырмысал, дыр. - Таӵе приватизация ортчытонэн комитет нюръяське ке но, пайдаез ӧжыт, - меӵак шуиз кивалтӥсь. - Предприятиосты кузёослы вузамен ӵош радъяно на вылэм предприятиосты государство кие сётон ужез. Но жаляса верано, нимаз кузёослэсь таланъя (национализациез ортчытонъя) законъёс кутымтэ на. Бен, озьы со лсэьтӥське вань государствоосын. Но Россиын, мон сямен, та уж кемалы ӝегалоз на, угось выль капиталистъёслы, зэмос кузё луэмзэс возьматон понна, асьсэлы дурбасьтӥсь законъёс кутон понна, табере депутатэ чуртнаськыны быгатоно на. Соин ик вуоно арын асьме Кун Кенеше чаклам быръёнъёс но лек нюръяськонъёсын ортчозы. Киултэм ваньбурзэс ыштонтэм вылысь, выль кузёос кун властьлэн ёзъёсаз шедьыны турттозы. Озьыен, приватизациез ортчытонын лэсьтэм янгышъёсты нокин тупатъяны уз ни выры. Соин ик мар ке лэсьтыны быгатоз на-а меда та ласянь Эскеронъя кун комитет? Комитетлы кылё пичи эскерон ужъёс. А. Кузнецов ивортӥз мар бордын ужазы берло толэзьёсы. Эскеремын басьяськисьёслэсь правооссэс утёнъя законлэн быдэсъяськемез. Та ужез вань районъёсын нуоно, угось ӵем дыръя сиёнъёслэн но вузъёслэн ӟечлыксы нокыӵе куронъёслы уг тупало, шуиз со. Уката но сак эскероно кунгож сьӧрысь ваем сиён-юонэз. Али тодмо ини, мукет странаосысь татчы вуэ 3-тӥ категориен пусъем сиён гинэ. Ас калыксылы отын сыӵе сиёнэн вузкарыны ноку уз лэзе, нош асьмелы келям сиён-юон пӧлысь 90 процентэз тазалыклы ярасьтэм луэ. Жаляса верано, шуиз А. Кузнецов, Эскеронъя комитетлэн ёзъёсыз кылдытымтэ на Каракулино но Вавож ёросъёсын. Басьяськисьёсэсь правооссэс утёнъя ялан ужась ёз кылдытоно вылэм правительствоын но. Эскеронъя кун комитет ялан чакласа возе, кызьы пуктэмын адямиослэн гожтэтъёсынызы но ӝожтӥськонъёсынызы ужан. Сыӵе эскерон кемалась ик ӧвӧл ортчем Балезино районын. Умой мылкыд кельтэм. Нош Ижевскысь технической университетын шараям тырмымтэосын прокуратура али но выре на. Татын юн тӥямын жилищной законодательстволэн куронъёсыз. Эскерон ньыль толэзь ӵоже мынӥз. Та университет Россилэн асваньбурез луэ бере, эскеронлэн йылпумъянъёсыз Россилэн прокуратураяз но келямын. Тӥни сыӵе ужъёсты быдэсъя эскеронъя кун комитет. Пичи ужъёсты эскерыны кужмыз тырме, нош бадӟым кузёослэсь янгышъёссэс тупатъяны законъёс ӧвӧл. Т. БАННИКОВА. Выль кужымен Алигес асьсэлэн нырысетӥ кенешазы люкаськылӥзы удмурт культурая "Дэмен" огазеяськонлэн выль кивалтэтаз быръем муртъёс. Котырак пуксьыса, соос эскеризы обществоез кужмоятонъя ужпумъёсыз. Вераны кулэ: таяз правление данак выль эшъёс - ӟырдыт мылкыдо адямиос - быръемын. Соос пӧлын - дышетӥсьёс, журналистъёс, писательёс, библиотекарьёс, пӧртэм ӧнерчиос, калыкен ужаны быгатӥсь адямиос. Вужысьтыз кивалтэтысь кӧня ке гинэ мурт кельтэмын на. Ма, собере дэменчиослэн тӧрозы но воштӥськиз - конференцие люкаськемъёс кивалтӥсе бырйизы тодосчиез Альберт Алексеевич Разинэз. Ваньмыз тодо, вылды: удмуртлыкмес муромытонэ, кужмоятонэ, Вань удмуртъёслэсь ӧтчамъёссэс дасянэ, ортчытонэ со сюосын адямиосты ӝутӥз, огазеяз. "Дэменлэсь" ужзэ азьланяз чутрак умоятон ласянь туж трос ӟечесь ӵектонъёс сётӥзы правление быръемъёс. Огез но мукетыз верало ас малпанъёссэс. Тужгес но умоесь дэмланъёссэс сётӥзы В. А. Осипов, Л. В. Орехова, А. А. Разин, Н. С. Кузнецов, С. А. Ильин, А. А. Мерзлякова, Ю. И. Кузьмина но мукетъёсыз. Соосъя правление пӧртэм ужрадъёсын план лэсьтэ. Кивалтэтэ быръемъёс азьвыл сямен ик пӧртэм-пӧртэм ёзэтъёслы, секциослы люкиськыса ужалозы. Валамон: ог-кык нуналскын гинэ со быдӟа планэз ӟеч сазнаса уд вутты. Но бадӟым ужлэн инъетэз дась ини. Дэменчиос азьланяз уката золгес юрттозы "Удмурт кенешлэн", "Дэменлэн" кыдёкысь ёзъёсызлы, ӵемгес вуылозы интыосы. Чакламын пӧртэм семинаръёс, конференциос, усточиосын конкурсъёс ортчытъяны. Юнгес сюлмаськозы будӥсь талантъёсмылы юрттон сярысь. Ӵектонъёс вал кытын но отын "Дэменлэсь" ёзъёссэ кылдытыны. Тани, шуом, сельхозакадемиын кӧня удмуртъёс дышетско! Бӧрысь берытско гуртъёсы. Соосын ке ӟеч кусып тупатысалмы, удмуртлыкмес шӧдскымон азинтыны быгатысалмы. Нош ик ӟырдыт вераськон ӝутскиз республикаямы Кылъёс сярысь законэз ӝоггес кутон пумысен. Кивалтэтэ быръемъёс выльысь но выльысь вазиськоно, шуо, Кун Кенешлэн депутатъёсызлы. Удмурт нянез сиемзэс медаз вунэтэ соос! Удмуртъёс националистъёс ӧвӧл, шаерамы соос - выжы калык! Планын озьы ик чакламын финн-угор дуннеысь калыкъёсын, пӧртэм обществоосын уката матынэсь, умоесь кусыпъёс тупатыны. Вераны кулэ: берло дыре ог-огмы доры ветлонъёс чутрак кулэсмизы. Кивалтонын бадӟым янгышъёс лэсьтэмен сэрен, улон уродмиз ке но, та ужрадъёслы коньдон одно ик шедьтоно, чурытаськыны уг яра. Учкемын ар ӵоже пӧртэм удмурт праздникъёсты дэмен пусйыны, вӧсяськисьёсты люкалляны, пиналъёсмес ӟеч сямъёслы дышетыны. "Дэмен" огкылысь ужалоз "Удмурт кенешен", пӧртэм министерствоосын. Озьы ик чакламын Удмурт Кивалтэтлэн Тӧроеныз П. Н. Вершининэн, куд-ог музон кивалтӥсьёсын, министръёсын пумиськылыны. "Дэменлэн" кивалтэтэз азьвыллэсь шӧдскымон юнэсьгес кусыпъёс тупатыны чакла газетъёслэн но журналъёслэн редакциосынызы, радиоен, телевидениен. Отысь куд-огез журналистъёс но правление быръемын. Тросэзлэсь дэменчиослэсь ӵектонъёссэс-куронъёссэс санэ басьтыса, Удмурт кунмес кылдытӥсьлэсь Трофим Борисовлэсь бадӟымесь ужъёссэ азинтон, удмуртлыкмес уката но золгес муромытон сярысь сюлмаськыса, "Дэмен" кылдытэ Трокай нимо премия. Соин пусйылозы тужгес ӟырдыт ужась муртъёсты. Кенеше ветлӥз Удмурт Кивалтэтысь Нациосын ужанъя комитетлэн тӧроез С. К. Смирнова. Кирилл ЛОМАГИН. Гажано Шӧкыч уром! Яке мынам тодон-валан сомындагес, яке удмурт кыл сокем коштанъяськись луэмын: Ижкарысен юромо почта ёзъёстӥ ортчоно кариськи - котькытын тазьы гожъямез пумитай: Почталэн ёзэз Ижевский почтамт Ижевскысь почтамтэз управления Федерация почта федеральной почтовой кусыпъёсъя удмурт связи Удмурт Республикаосысь Удмуртской Республики управленилэн Ӟуч сямен лыдӟыса валай ик, нош удмурт сямен? Нокызьы но ӧй. Юромо ачид но эскеры-ай, оло нош лад-лад, Удмуртилы валамонзэ гожтэмез пумиталод? И. ШАЛЬТРАМОВ,+ Ижкарын улӥсь. ВАЛЭКТЭ ЮРИСТ СЭРЕГЕЗ НУЭ АДВОКАТ ЛИЛИЯ ШКЛЯЕВА Кинлы кылёз ваньбур? Анае кулэм бере, атае выльысь кышнояськиз. Браксы загсын пусъемын. Атае кышноезлэсь вазьгес кулӥз ке, солэн ваньбурез кинлы кылёз? Анаелэн ваньбурез атайлы выжиз вал. Л. Васильева. Можга ёрос. РСФСР-ысь Гражданской Кодекслэн 532-тӥ ёзэтэзъя (статьяя) законъя кылёс (наледство) басьтыку, нырысетӥ черодын огкадь люкетэн басьто: ас нылпиос но вордос нылпиос, кулэм муртлэн кузпалыз но анай-атайёсыз (анай-атай лыдъяськисьёс), озьы ик кулэм муртлэн улонысь кошкем бераз вордӥськем нылпиез. РСФСР-ысь Гражданской Кодекслэн 534-тӥ ёзэтэз гражданинлы право сётэ кулэмез бере кылем ваньбурзэ, ас мылкыд каремезъя, кинлы ке сӥзьыны (завещать карыны), ваньбурзэ яке солэсь ог люкетсэ сӥзён (завещание) кельтыны одӥг адямилы яке кӧня ке муртлы, законъя кылёс басьтӥсьёс пӧлы пырисьёслы но, пырисьтэмъёслы но. Ваньбур сӥзись (завещатель) сӥзёназ быгатэ законъя кылёс басьтӥсьёс пӧлысь огзэ, кӧнязэ ке яке ваньзэ кельтыны кылёс басьтыны правотэк. Анаеныды но атаеныды ӵош поттэм ваньбурды сярысь ке верано, анайдылэсь люкетсэ, тӥлед кылёс басьтоно вал. Наследник кылёс басьтӥз шуыса лыдъяське, со зэм но кузёяське ке кылем ваньбурен (кылсярысь, налогъёсты но мукет тыронъёсты тыре) яке кылёсэз усьтон интыысь нотариальной ёзэ кылёсэз кутэм сярысь заявление сётэ ке. Та ужрадъёс ортчытэмын луыны кулэ кылёсэз усьтэм нунал бере куать толэзь куспын. Кылёсэз кутон дыр санэ басьтымон (уважительной) мугъя кутэмын уг луы ке, та дырез суд азьланьтыны быгатэ. Кылёс кутэмын луыны быгатэ дыр ортчем бере но судэ вазиськытэк, кылёсэз ваньмыз басьтэмъёс талы пумит ӧвӧл ке. Озьыен, анайды кулэм бере кылем ваньбурлэн ог люкетэз тӥлед мед выжоз шуыса, анайдылэн улон интыезъя нотариальной контораын атайды улэп дыръя лэсьтоно вань кулэ луись документъёсты. Озьы ӧд ке каре, атайды быгатэ вань ваньбурен ас сяменыз кузёяськыны. Кезьыт куазьлэн сюрпиез Арысь аре тол куазь кезьытъёсын ӵош адямилы вае кышкыт "кузьым" - грипп. Со лек паласькись вицён. Эзелез вирусъёс сайкато. Соос интыясько адямилэн шокан люкетэзлэн вылӥ ёзъёсаз. Вирусъёслэн лыдзы ӝог будэ. Лябӟем интые мукет векчи лулосъёс но каръяцькыны кутско, соин валче гриппен висисьлы уката секыт луэ. Со ӟырда, кезегъя, кызэ, нырыз тыре, лыосыз-сӧнъёсыз висё. Эзельлэн тодметъёсыз оградесьгес луо, но соос шонерак герӟаськемын висисьлэн огъя тазалыкеныз, арлыдыныз, озьы ик вируслэн кыӵе луэменыз. Кызьы гриппен нюръяськоно, кызьы солэсь вӧлмон сюресъёссэ пытсано? Котькуд паласькись висён дыръя кадь ик, грипп дыръя но та уж куинь удысъёсъя мынэ. Нырысь ик, висисьлэсь мукет муртъёсын кусыпъёссэ алоно. Кыкетӥез, висисез утялтӥсь адямиос марлялэсь ньыль полэс лэсьтэм повязка нуллыны кулэ, кызьы ке больницаын, озьы ик гуртазы но. Куинетӥез, ялан сюлмаськоно адямиослэсь тазалыксэс юнматон сярысь. Грипп капчи вӧлме кызыку, кизьнылыку, огшоры вераськыку. Соин ик трос калыко интыосын солэсь утиськыны туж секыт. Берло дыре странаямы туж пайдаё, адямилэн тазалыкезлы кышкытлык ваисьтэм вакцинаос кылдытэмын. Жаляса верано, югдур секытэн соосты поттэмысь дугдӥзы. Грипплы пумит вакцинациез ортчыто ужбергатонъя фирмаос гинэ. Соос кунгож сьӧрысь ваем эмъюмъёсты уже куто. Вакцинаез басьтыны луэ ёрос больницаосын но городъёсысь эмъян учреждениосын. Пусйыны кулэ, прививка вирус кутэмлэсь быдэсак уг утьы ке но, вакцинация пыр потэмъёс висёнэз капчигес ортчыто. Эпидемия вакытэ утиськон понна уже кутӥсько таӵе эмъюмъёс: ремантадин, оксолиновой мазь, арбитол, лейкоцитарной интерферон. Озьы ик мугорлэсь висёнлы пумит кужымзэ кыдато С, В, А, Е, Р витаминъёс яке гексавит, ревит, декамевит, ундевит поливитаминъёс. Арлыдэз чакласа, соосты юоно нуналаз 2-3 пол. Висён вӧлмон вакытэ озьы ик бадӟым пайда ваё элеутерокклэн экстрактэз, аралилэсь, жень-шеньлэсь, пантокринлэсь суретъёс. Грипплэсь утиськемды потэ ке, ӵукналы быдэ гимнастика лэсьтэ, кезьыт вуэн пылаське, кырын-бурын тросгес юмшалэ. Эн вунэтэ сиён-юон сярысь но. Со витаминъёсын узыр луыны кулэ, одно ик бакча сиёнъёсты, емышъёсты сиёно, тужгес пайдаё луо сугон но чеснок. Нош эзель бордады "кырмиськиз" ке, эмъяськон азьын одно ик шонер диагноз пуктоно. Грипплэн кадь ик тодметъёссы луыны быгато кышкытгес висёнъёслэн, кылсярысь, менингококковой инфекцилэн, лептоспирозлэн, шыр висёнлэн но мукетъёсызлэн. Эмъяськоно врач чаклам улсын. Висись кылльыны кулэ. Уже кутыны луэ вылӥ верам эмъюмъёсты, но соос юртто нырысетӥ нуналъёсы гинэ. Мугорысь токсинъёсты поттон понна огшоры но минерал ву, пӧсь йӧл, чай трос юоно. Вунэтоно ӧвӧл вашкалаослэсь эмъяськон амалъёссэс но, тужгес ик турын-куаръёсты. Лэсьтыны луэ грипплы пумит таӵе сурет: огмында басьтоно тӧдьысяськаез (ромашка аптечная), беризь сяськаез, виртурынэз, легезьпулэсь, эмезьлэсь, сьӧд палэзьлэсь емышъёссэс, кызьпу, сьӧд сутэр, узы но шалфей куаръёсты; рос-прос сурано; 1 бадӟым пуньы мындазэ суралтоно 1 но ӝыны стакан быректэм вуэн; ӵушконэн шобыртыса, 20 минут ӵоже сылэтоно; собере 5 минут ӵоже ляб тыл вылын быректытоно но нош ик 1 час мында сылэтоно на. Юоно чечыен сураса пичи гучыкъёсын ӝыны стаканэн нуналаз 2-3 пол, сиськем бере 1 час ортчыса. Грипп дыръя ӟырдамлэсь кышканэз ӧвӧл, угось ӵапак сое вирусъёс уг чидало. Температуралы пумит эмъюм юоно градусникты 390 возьматэм дыръя гинэ. Йырвисёнэз няськато цитрамон, анальгин, кызонэз - коӵышборы (алтей), тактамыр (солодка) выжыослэсь, термопсис куарлэсь сурет. 5-7 нуналскын висён ӧз ортчы ке, озьыен, грипп кыӵе ке мугор люкетэ пытьызэ кельтӥз яке диагноз янгышаса пуктэмын. Таӵе учыре нош ик врачлы вазиськоно. Г. Кустарников, Ижысь медициная кун академиысь доцент. Шӧкыч Ву ӧз ву Трос пӧртэм учыръёс луыло Иж карысь улон юртъёсты возись управленилэн ужаз. Тани июнь толэзьлэн пумаз "Ижгорводоканал" Восточной посёлокын ву сётӥсь гумыосты вошъяз. Со ужъёс бере ик Михайлов проездысь 12 номеро коркась одӥгаз квартирае ву лыктэмысь дугдӥз. 2 июле квартиралэн кузёез жингыртӥз улон коркаосты тупатъянъя 13 номеро предприятие. Арня улыса вуиз слесарь-сантехник. Усьтонъёсыныз йыгаз гумы борды, усьтӥз, ворсаз - кранын ву ӧвӧл. Шуиз, тӥ доры, пе, мастермы лыктоз, татчы сварщик кулэ. Куинь нунал улыса, нош ик ужысь куриськыса возьмамы мастерез. Таиз воксё паймытӥз! Милям документъёсмыя тӥляд коркады ву уг лыкты, тӥ уксё тыриськоды колонкаысь ву нуллэмды понна. Мон солы шуисько, милям коркамы вань куать квартирае дас куинетӥ арзэ ни ву гумыос кузя лыктэ. Али но вить квартираын ву вань, нош милямаз ӧвӧл. Одӥг арня ортчыса, мастер нош ик вуиз: али, пе, ми коркаосты толалтэлы дасяськом. Нош быдэс коркась ву гумыосты но водомерез воштон капитальной ремонтэн лыдъяське. Со ужъёсты ортчытэ Ижысь улон коркаосты возёнъя управление. Озьы верамзы бере, мынам чиданэ чигиз. Озьы мон 21 августэ гожтӥ нырысетӥ ӝожтӥськонме. Отын мон кури квартираямы ву сётонэз тупатыны. Тодӥсько, та управленилэн начальникез С. А. Трухин та ужез бекмыльтоз Иж карысь авариосты тупатъян службалы. Улонын озьы луыны кулэ кадь, нош уж вылын мукет сямен луэ. Сентябрь толэзе гожтэтлы валэктон вуиз. Отын вуды 1 октябрёзь луоз, шуэмын. Озьы ке но, та уж 12 октябре но лэсьтэмын ӧй вал. Со нуналэ ик мон кыкетӥзэ ӝожтӥськонме гожтӥ. Таяз учыре ивортӥзы: ву, пе, сётозы 1 ноябрёзь. Кыкетӥ ноябре ву ӧз ву бере, мон нош ик гожтӥ. Тани со: "Гажано господин С. А. Трухин! Мон тӥледлы куинетӥзэ куронэн вазиськисько ни. Вождэс эн вае, тӥлесьтыд дырдэс быдтӥсько шуыса. Нырысетӥез гожтэмын вал 21 августэ, кыкетӥез октябре. Тани ноябрь толэзь но вуиз ни, нош мынам квартираям июль толэзьысен ву ӧй вал на. Али но ӧвӧл. Тӥ, быдӟым сударь, валаськоды, дыр, кызьы шуо ӟучъёс: без воды - "ни туды и ни сюды". Йыбырттыса курисько тӥледыз ву сётыны". Таизлы гожтэтэлы валэктон вуиз ик. 27 ноябрёзь, пе, ву сётозы. Озьы гожтэм Трухинлэн кивоштӥсез Черноскутов. Ноябрь толэзе кык пол вуылӥзы сварщик но мастер. Та нуналъёсы часъёсын возьмасько тупатъясьёсты. Ялан ужысь куриськоно луэ. Ветлӥзы кык пол. Нырысяз Восточной посёлокысь электросетьлэн электрокужымез ӧй вал. Кыкетӥяз ветлыкузы, нырысетӥ этажын улӥсь пожарнойёслэсь сварочной ужъёс ортчытон пумысь разрешенизэс куриз. Со ӧй вал. Озьы ик выль гумы ӧжытгес ваиллям. Озьы ик ноябрь но ортчиз, вуиз декабрь. Огнуналэ дорам пырыса ӧй тодма ни кухняме но, прихожийме но. Отын ву, дэри. Кузпалэ кухняысь кырсь вуэз ведрае бичаса уг вуы. Вӧлдэт но тӧдьы гур копак саптаськемын. Мар луиз?! Озьы тыршиллям вылэм Тюфтин мастерлэн ужасьёсыз. Соос сваркаен кухняысь гумыосты куинетӥ вандӥллям, жуг-жаг пазяллям, гумыосты воштытэк но выль басьтэм кранэз пуктытэк кошкиллям. Соин ик Ижевскысь улон коркаосты возись управленилэн начальникезлы С. А. Трухинлы гожтӥ ньылетӥ гожтэтме. Таяз учыре быдӟым сударьлэсь ву гумыосты коть Выль арозь воштыны кури. Возьмалом ини Выль арозь. Кема ӧз кыльы ни... Иван МИХАЙЛОВ. Удмурт Республикаысь Быръёнъёсъя комиссилэн Удмурт Республикаысь Кун Кенешлэн депутатъёсызлы вазиськонэз 1999-тӥ арын 26-тӥ мартэ Удмурт Республикаысь Кун Кенешлэн нырысетӥ созываз быръем депутатъёслэн ужзэс быдэсъян дырзы йылпумъяське. Выль созыве депутатъёсты быръён дырез Кун Кенеш туэ 25 декабрёзь юнматыны кулэ. Но жаляса вераны кулэ, "Удмурт Республикаысь Кун Кенеше депутатъёсты быръёнъёс сярысь" Удмурт Республикаысь Законэз та дырозь кутэмын ӧвӧл, кудӥз мед тупасал федеральной законодательстволэн куронъёсызлы. Кылдэм югдурез лыдэ басьтыса, Удмурт Республикаысь Быръёнъёсъя комиссия Удмурт Республикаысь Кун Кенешлэн депутатъёсызлы вазиське та законопроектэз эскерыны но ӝегатскытэк юнматыны курыса. Закон кутэмын ӧз луы ке, быръёнъёс ортчытӥськозы, "Россия Федерациысь гражданъёслэн быръёнъёсы но референдуме пыриськон эрикрадъёссы сярысь" Федеральной Законэз лыдэ басьтыса. Удмурт Республикалэн "Удмурт Республикаысь Кун Кенеше депутатъёсты быръёнъёс сярысь" Законэз ужа ни 28 январе 1994 арысен. Но отын федеральной законодательствоен 120-лэсь уно тупамтэ интыосыз вань, та Законысь одӥгез статья но быдэсак уг тупа федеральной законъёслы. Со дыре ик федеральной законын вань нимысьтыз чаклам нормаос, кудъёсызъя, быръёнъёсты ортчытыку, одно ик лыдэ басьтӥсько Россия Федерациысь субъектъёслэн законъёссы. Нош Удмурт Республикалэн али законодательствояз со куронъёс лыдэ басьтэмын ӧвӧл. Озьы быръёнъёсъя огазеяськонъёслэн но блокъёслэн эрикрадъёссы шӧдскымон сюбегатэмын. Удмурт Республикаысь Кун Кенеше депутатъёсты быръёнъёс дыръя соос пырисько бырйисьёслэн группаоссы луыса гинэ. Тупатэмын ӧвӧл кандидатъёслы дурбасьтыса люкам нимтулъёсын листъёсты эскерон ужрад. Соин валче быръёнъёсъя комиссиослы нимтулъёсын листъёсты ваньзэ 100 процентсэ ик эскероно луоз. Нош котькудӥз кандидат кӧня ке сюрс нимтул но люканы быгатоз. Луыны быгатоз озьы но: трос умойтэм нимтулъёсты шараямен валче комиссия кандидатэз пусйыны пумит луоз. Но та пумысен законын номыр верамын ӧвӧл, кыӵеосыз нимтулъёс умойтэмен лыдъясько шуыса. Нимысьтыз верамын кандидатъёслэсь быръёнъёсъя фондзэс кылдытон норма сярысь. Быръёнъёсъя фондъёсы кӧня коньдон висъянлэн быдӟалаез тупатэмын ӧвӧл, быръёнъёсъя кампанилы вуэм коньдонэз кандидат кутыны быгатэ ас тодэмезъя. Быръёнъёсъя фондысь коньдон кутэмез эскерыны уг быгато быръёнъёсъя комиссиос но, соослэн контрольно- ревизионной службаоссы но. Та ужпумъёс республикалэн законъёсыныз лыдэ уг басьтӥсько. Удмурт Республикалэн "Удмурт Республикаысь Кун Кенеше депутатъёсты быръёнъёс сярысь" 21-тӥ январе 1994-тӥ арын кутэм Законаз чакламын ӧвӧл быръёнъёс азьын агитация нуон сярысь тужгес кулэ нормаос, тужгес но иворъёсты вӧлмытонъя средствоос пыр. Соин валче луыны быгатозы законъёсты тӥян учыръёс, уно ӝожтӥськонъёс, судъёсы вазиськонъёс. Удмурт Республикалэн "Удмурт Республикаысь Кун Кенеше депутатъёсты быръёнъёс сярысь" Законаз (28.01.94 ар) вань мукет чакламтэ интыосыз но, кудъёсыз шуг- секытъёс кылдыто, быръёнъёслы дасяськыку но соосты ортчытыку. Ваньзэ со тырмымтэосты лыдэ басьтыса, Удмурт Республикаысь Государственной аслаз азьвыл чакламтэ сессияз ӝегатскытэк эскерыны но кутыны кулэ Удмурт Республикалэсь "Удмурт Республикаысь Кун Кенеше депутатъёсты быръёнъёс сярысь" выль Законзэ. Озьы ке ӧз луы, Кун Кенеше быръёнъёс ортчытон уж куашканы быгатоз, республикалэсь выль парламентсэ кылдытон ӝегалоз, юнме шорысь бюджетысь коньдон тус-тас луоз. Удмурт Республикаысь Быръёнъёсъя комиссия. Ивортэ "Металлург" Матэктэ Выль ар. Маин бен вунонтэм кылёз ортчись ар Ижысь андан ӵыжатӥсьёс понна? Нырысь ик вераны кулэ Москваын ортчем выставка сярысь. Отын возьматӥськизы калыклы кулэ луись вузъёс. Аслэсьтыз продукцизэ нуллӥз акционер огазеяськон но. Вить сю предприятие пӧлысь дипломен пусъемын куинез. Соос пӧлын асьмелэн заводмы но. Ньыль нунал ӵоже ижъёс ог сю пала огкыл гожтӥзы. Со сярысь ивортэ "Металлург" газет. Та газетлэсь нырысетӥ редакторзэ А. М. Фомичевез республикаямы ӟеч тодо. Ожын но ужын вормонъёсыз пусъемын нырысетӥ но кыкетӥ степенё Отечественной война орденъёсын, 18 медален. Александр Фомичев 1977 арын андан ӵыжатӥсьёслы сӥзем книга поттӥз. Мӧйы журналист али книгазэ выльдон бордын ужа. Кӧня ке люкетъёсыз потӥзы ни "Металлург" газетын. Александр Михайловичлы 86 арес ке но тырмиз ини, со чырткем на. В. ВОЛОДИН. Шӧкыч Курмем киос Гуртын улӥсь эше Коля Педонов мадиз таӵе учырез. Сое председатель ӧтиз но юн пыкылӥз: тон, пе, Педонов, уд ужаськы, нош уждун куриськод. Колялэн йырыз кур луиз. Дэриен но солидолэн наштаськем киоссэ ӝӧк вылэ понӥз но шуиз: - Гажано председатель, та курмем киосы шоры учке но мылкыддэс воштэ. Пред Павел Павлыч Педоновлэсь киоссэ гажаса учкиз, кырмиз. Коньдон премия сётон сярысь приказ гожтӥз. Та амалэз мон кутоно кожай аслам ужан интыям, редакциын. Ӵапак учыр тупаз. Редактормы ӧтиз но юн пыкылӥз: тон, пе, Вахрушев, планъёстэ уд быдэсъяськы, ичи гожъяськод. Мынам воже потӥз. Пастаен наштаськем киосме ӝӧк вылэ понӥ: учке, пӧй, кызьы мон вань сюлэм пӧсьме сётыса гожъясько. Редактор ужась киосме кырмиз, шуныт кылъёс вераз. Нош коньдон премия сярысь пал кыл но ӧз поттылы. Вунэтӥз, дыр. С. ВАХРУШЕВ. Немецъёс - Удмуртиын Национальной библиотекаын 17-25 декабре "Немецъёс Россиын - ӟучъёс Германиын. Просвещенилэн даурыз" адӟытон радъямын луоз. Сое ортчытонэ пырисько Германилэн Россиын посольствоез, Москваысь кунсьӧр литературая М. И. Рудомин нимо библиотека, Удмуртиысь Сьӧрлон калыкъёсын кусыпъёсъя министерство, шаерысьтымы немец культурая "Wиедерqебут" огазеяськон но Национальной библиотека. Россия но Германия уно дауръёс ӵоже ини кусыпъёс возё, но ЪВИИИ даур нимысьтыз инты басьтэ. Национальной библиотекаен дасям адӟытон Просвещение даурысь кусыпъёслэсь аспӧртэмлыкъёссэс возьматэ, немец но ӟуч культураослэн ог-огзы чотын узырмемзы сярысь вера, немецъёслэн ЪВИИИ даурлэн пумаз Удмуртие вуэменызы тодматэ. Соослэн тодэм-валамзы, быгатэмзы Ижевскысь заводлы азинскыны юрттӥз. Со сяна, библиотекае лыктэмъёс тодматскыны быгатозы Москваысь кунсьӧр литературая библиотекалэн адӟытонэныз. О. МАКСИМОВА. Нуналлэн тодметэз 25 декабре Спиридонлэн нуналэз. Шунды гужем пала берытске. Та нунал шундыё ке, тол кезьыт луоз, инбам пилемъёсын шобырскемын но писпуос пужмертэмын ке, тол шуныт луоз. Вашкалаос чия вайёсты корка пыртылӥллям но котькуд нунал соосты вуэн киськаллям. Толсурлы чия вайёс сяськаяло ке, пе, сад емышъёс удалтозы. Та нуналэ ... ар талэсь азьло 25 декабре 1933 арын Ижевскын ужаны кутскиз крезьгуръя училище. Удмурт Республикаысь Кун Кенешлэсь кызь куинетӥ (азьвыл чакламтэ) сессизэ люкан сярысь Удмурт Республикаысь Кун Кенешлэн Президиумезлэн Постановлениез Кун Кенешысь кӧня ке депутатъёслэн Удмурт Республикаысь Кун Кенешлэсь азьвыл чакламтэ сессизэ люкан сярысь кичӧлтонэнызы валче, Удмурт Республикаысь Кун Кенешлэн Президиумез пуктэ: Удмурт Республикаысь Кун Кенешлэсь кызь куинетӥ (азьвыл чакламтэ) сессизэ люкано 1998 арын 24 декабре 10.00 часын Ижевск городын. Удмурт Республикаысь Кун Кенешлэн Тӧроез А. А. Волков. Ижевск город, 1998 арын 16 декабре � 613-И. Кун Кенешлэн кызь куинетӥ сессияз чакламын эскерыны ёрос судъёсы судьяосты юнматон сярысь ужпумез, "Удмурт Республикаысь Кун Кенешлэсь депутатъёссэ быръён сярысь" Законлэсь инъетсэ, Кун Кенеше депутатъёсты быръёнэз ортчытон сярысь ужпумез. Усто ивор "Универсал" - устоосыз пӧлын Алигес Сарапулысь электрогенераторной заводэ Москваысь шумпотымон ивор вуиз. Солэн электроинструментъёсын "Универсал" наборез Россиысь 100 ӟеч вуз пӧлы пыртэмын. Акциосын огазеяськон поттэ усто космической но авиационной электроаппаратура, генераторъёс, двигательёс но мукетсэ. Со юнэсь кусыпъёс возе Туполевлэн, Микоянлэн, Мясищевлэн, Яковлевлэн, Ильюшинлэн, Антоновлэн, Сухойлэн, Камовлэн но Мильлэн конструкторской бюроосынызы. Огъя вераса, одӥг самолёт но, вертолёт но, космической ракета но ЭГЗ-ын лэсьтэм электроприбортэк инметӥ уг лоба. Секыт война аръёсы Сарапулын таӵе предприятие вордскиз. 1942-тӥ арын мае татчы ваемын вал Москваысь Лепсе нимо электротехнической завод, нош августэ со продукция поттӥз ни. АО-ен кема аръёс ӵоже кивалтэ ни Кун Кенешлэн депутатэз Евгений Сторонкин. Г. РОМАНОВ. Тазалык Сюлэм висе, висе... Тросэз висёнъёс бордэ лякисько, туннэ нуналэн гинэ улэменымы, тазалыкмы сярысь сюлмаськымтэенымы. Тани сюлэм висёнъёсты ик басьтоно ке - мултэс керӟегъяськон, сюлмаськон соослы пушйыны кужым сёто. Сюлэмдылы тэшканы кышкытлык вань-а, ӧвӧл-а меда шуыса тодэмды потэ ке, милям юанъёсмылы валэктон сётэ ("ӧвӧл", "уг" яке "озьы"). 1. Туж ӵем жадисько. 2. Мырдэм умме усисько. 3. Уин сайкалляса кӧлӥсько. 4. Ужаны кужмы ӧвӧл кадь потэ. 5. Ялан уг удалты кадь потэ. 6. Чыры-пырыос керӟегъяськыто, мылкыдэз сӧро. 7. Мылкыды весь лапкамын. 8. Кузпалэным матысь кусыпъёс шумпотон уг ваё. 9. Ӵукнаосы катьтэммыса султӥсько. 10. Улон - курадӟон. Куинь юанлы "озьы" ("уг") шуиды ке - инфаркт тӥледлы кышкыт ӧвӧл. Куинь - куать юанлы ке - врачлы вазиськыны вазь на, но куд-ог урод сямъёстылэсь (кылсярысь, юон, тамак кыскон) куштӥськоно, улонлэсь чебер палъёссэ ӵемгес адӟыны тыршоно. "Озьы" куать поллэсь уногес шуиды ке, улон манердэс ӝегатскытэк воштоно. Отпуск басьтэ, ужъёстэс огдырлы ке но вунэтэ. Асьтэды асьтэос керӟегъяськытэк, сюлмаськонъёстэк улыны косэ - тазалык котьмалэсь дуно. Сюлэм висёнъёс бордады лякытэн бинялскозы, мултэс ужамды, керӟегъяськемды борды ватсасько на ке давленилэн ӝутскемез, зӧк луэмды, тамак кыскон но мугор быгытъёстылэн ичи ужамзы. Чехъёсын огазеяськыса Ортчем покчи арняе, 17 декабре, Россия Федерациысь Правительстволэн юртаз "Ижмаш" акционер огазеяськон но "Шкода-авто" предприятие (пыре "Фольксваген" промышленной группае) куспын азьланяз ӵош ужан сярысь огкыл гожтэмын. Документэз гожтӥзы Россия Федерациысь Правительстволэн Председателезлэн нырысетӥ воштӥсез Юрий Маслюков, Чешской Республикаысь Правительстволэн Премьерезлэн воштӥсез Мертлик, Удмурт Республикаысь Кун Кенешлэн Тӧроез Александр Волков, Удмурт Республикаысь Правительстволэн Тӧроез Павел Вершинин, "Шкода-авто" заводысь правленилэн председателез Кулганск но "Ижмаш" АО-лэн генеральной директорез Владимир Гродецкий. Кун Кенешлэн пресс-службаез. Шӧкыч Анатолий ПЕТРОВ Шоккесэсь уга Эк, улӥм-вылӥм вазен Тыршимы вал огазьын. Ӧвӧллэсь ванен возён Туннэ котькуд корказьын. Кинлы ке но туж майбыр, Мильонэн кача ваньбур, Калыклы гинэ фигня Кемагес ини мыня. Кариськы вал йыг-йыггес, Кеськы вал маке золгес Только марым, туж шурдыт, Берло мар на шуод, дыр: Кытын ке будэ ни, пе, Картузэн ветлӥсь пиёк. Калыкед но туж шоккес Одӥг пол кутоз - шуккоз... Кулэзэ но нажгатоз. Багдад ӝуа Америкаысь Соединённой Штатъёс, Великобританиен огкылысь луыса, 16 декабре уйшор бере 1 час котырын кӧлӥсь Багдадэз ракетаосын ыбылӥзы но бомбаос куязы. 17 декабре Б-52 бомбардировщикъёсын эшшо но золгес шуккет сётэмын. США-лэн таӵе вамышезлы пумит луэмзэс соку ик веразы Россия, Китай, Франция, Италия. Россилэн кунсьӧр ужъя министрез М. С. Иванов, кунгож сьӧрын быдэсъяно ужзэ куспетӥ карыса, Москвае берытскиз. - Вашингтонлэн таӵе вамышез Америка понна ӟечен уз берытскы, - шуиз со. - Ирак вылэ берло аръёссэ гинэ 40 сюрс тонна пала химической боеприпасъёс куштэмын. Ваньмыз со - НАТО-лэн ужез. Министр верамъя, Россия Иракез уз кушты. Ракетаосмы али но отын сыло. Багдадын уло асьме посольствоын но мукет интыосын ужась специалистъёсмы, соослэн семьяоссы, Россиысь Кун Думалэн депутатэз. Соос пӧлын быремъёс ӧвӧл, нылпиос но нылкышноос келямын Иордание. Мар кулэ Ираклэсь США-лы но Великобританилы? Му вӧй. Нефтен герӟаськем кузёос, миллиардъёсын узырлык люкасьёс, та страналэсь улон вирсэрзэ таланы кемалась выро ни. Со чотын, Ираклэн ваньбурез вылын, быдэс дуннеын дунъёсын шудыны но политика лэсьтыны. Ирак котырын люкаськемын 200 самолёт но 23 корабль. США-лэн но Великобританилэн военной базаоссы интыяськемын Кувейтын, Бахрейнын, Саудовской Аравиын но Турциын. Б-52 бомбардировщикъёс ӝутско Индийской океанысь Диего-Гарсия шормуӵысь. Нью-Йоркын ООН-лэн Кышкытлыклэсь утиськонъя Кенешез. Со верамъя, Багдад вылэ бомбаос куштыны НАТО-лэн нокыӵе мугез ӧй вал. Кенешонэ люкаськемъёс США-лэсь Президентсэ куро ӝегатскытэк огкылэ вуон амалъёс утчаны. Таӵе мылкыдзэс веразы Россилэн Президентэз Б. Ельцин но КНР-лэн Председателез Цзян Иземинь. Басьтэмын "Интернет" пыр. Шӧкыч Берло нуналъёсы лымы трос усемен, Ижевскысь ульчаостӥ ветлыны ик уг луы ни. Сыло троллейбусъёс но автобусъёс, дугдыло трамвайёс. Капчи автомашинаос лымы букосэ выемын. Но малы ке лымыез сузян сярысь нокин сюлмаськись ӧвӧл... Шуо, улон интыосты возёнъя управленилэн эстӥськонлы, пе, коньдонэз ӧвӧл. (Гожтэтысь). Пассажиръёс: - Эшшо взяли! - Золгес, золгес донге! Поттӥмы ке, кондуктор заводозь дунтэк нуо, шуиз. Суредэз Л. ПРОЗОРОВЛЭН. Тазалык Юртты аслыд ачид Эмъя тылтурын Кызыкумы асьмеос ӵем эмъяськиськом горчичникен. Мукет эмъюмъёсын ӵошатыса, солэн дуныз бадӟым ӧвӧл. Уноез эмъюмъёс, висёнэз уллям сяна, тазалыклы изъян но вайыны быгато, нош горчичник, сое шонер кутӥд ке, та ласянь кышкыт ӧвӧл. Врач А. Ураков горчичникен эмъяськон пумысен таӵе дэмланъёс сётэ. Горчичникез шуныт вуын коттоно, собере мугоре 5-15 минутлы ляконо. Пайда мед ваёз шуыса, ку куректытозь, ӵыжектытозь возёно. Шокан ёзъёс висьыку (бронхит, трахеит, пневмония, плеврит), горчичникъёсты тыбыре но мылазе лякыло. Стенокардия дыръя - мӧля вылэ сюлэм вадьсы. Йыр висьыку, кылсярысь, давление бадӟым дыръя, горчичникез йырбере пуктоно. Лулсӥос (нерваос) висьыку, сое висись интые ляконо. Куд-ог адямиослэн горчичниклэсь аллергия луыны быгатэ. Соослы таӵе амалэн эмъяськыны уг яра. Нылпиослы но горчичникез эскериськысагес пуктылоно. Мӧйыослы сое гольык ку вылазы лякыло ке, пиналъёслы - марля, басма, кагаз пыр яке мышласянь берыктыса. Со юрттоз сутскемлэсь но ку пасьёсы тылтурын (горчица) шедемлэсь утиськыны. Инсьӧр корка Инсьӧрын Калык куспо орбитальной станция кылдытӥське, Россия но США отчы быдэн одӥг модуль лэзизы ини. Кызьы шуизы НАСА-лэн директорез Дэн Голдин, 44 сыӵе модульёсты лэзёно, космосын кӧня ке сюрс час ортчытоно на, станциез лэсьтыса йылпумъян понна. Та ужрадлы 60 миллиард доллар кулэ луоз, коньдон висъялозы США, Россия, Канада, Япония, Европаысь 10 кун но Бразилия - ваньмыз 15 страна. Великобритания уксё сётыны пумит луиз. Станция 2004-тӥ арлы дась луыны кулэ. Солэн адямилы улыны ярамон интыез кык Боинг быдӟа луоз. Адями таӵе дуно корка ноку ӧз пуктылы на. Станция луонлык сётоз кыдёкысь планетаосы, кылсярысь, Марсэ лобаны, наука ласянь эскеронъёс ортчытъяны. Иворъёсъя национальной служба. Кин утёз шаермес? Пиос, армие кошкем интые, гуртазы куайыны берто Туала армие егитъёс туж ик мылзы потыса уг мыно - армия куашкамын, государствоен аналтэмын. Но вань на вылэм сыӵеосыз но пиос, кудъёсыз службаез ортчытыны пумит ӧвӧл (озьы шуо республикаысьтымы военкоматын ужасьёс). Но мылкыд карисез но армие сюрыны уг быгаты, тазалыкез ляб ке. Службае кошкись пиослэн тазалыксы сярысь вера республикалэн военкоматысьтыз медицинской службая подполковник Владимир Петрович ЯРОШ. - 18 арессэс тырмытэм пиос пӧлысь 57 процентэз гинэ армие мыныны ярало. Приволжской военной округ понна (шаермы та округе пыре) та лыдпус тужгес но пичиез. Ӵошатэ ай: Саратов областьын 80 процентэз пиос армие кошко. Та лыдпусъёс быдэс калыклэн тазалыкез лябӟемын шуыса возьмато. Экономикаын кылдэм секыт югдурлэсь изъянтӥсь кужымзэ ас вылазы тужгес юн шӧдо егитъёс: соос кунэн но, школаен но, семьяен но аналтэмын. Мар веранэз тазалык сярысь, пиналъёслы самой будон вакытазы сиён тырмыт уг шедьы ке. Та ласянь номыр пӧртэмез ӧвӧл городын но, гуртын но. Тани туэ 400 пиос анайёссы доры келямын укыр чиед луэмысьтызы. Куать толэзь ӵоже соос сӥльвир люканы кулэ, нош со понна ӟеч сиськоно. Татчыозь тырмыт сиськиллямтэ бере, табере сиськозы на меда? Со сяна, сыӵе пиослэн одно ик одӥг яке кык висёнзы луэ на. - Малпаськоно ке, армие мынытозь, сютэм улод... - Вань, дыр, сыӵеосыз но пиос, кудъёсыз армилэсь сыӵе амалэн пегало. Но тани алигес Россиысь Правительство кутӥз нимысьтыз постановление, кудӥзъя чиед пиосты гуртазы келяны лэземын ӧвӧл - соос больницае выдозы. - Кыӵе висёнъёсын тӥ ӵемгес пумиськылӥськоды? - Уноез пиос пуш висёнъёсын курадӟо, тросэзлэн психиказы сӧриськемын, лыоссы висё... Мукет улосъёсын ӵошатоно ке, Удмуртиын уноезлэн егитъёслэн психиказы но визьзы ляб. Та ласянь ӟучъёс но удмуртъёс ог-огзылэсь пӧртэм ӧвӧл. Маин со герӟаськемын? Уг тодӥськы. Экономикаын огъя югдурен, дыр. Республиканской военкоматын пиосты, терапевтъёс но хирургъёс сяна, психотерапевт но эскере. Но ваньзэ котыр ласянь умой-умой чакланы солэн луонлыкез но, дырыз но ӧвӧл. Пиослэн психиказы тэшкамын ке но, сое шараяны туж шуг. Нош сыӵе пияш армие шеде ке, висёнэз эшшо пыдло пыре. Ӵем дыръя таза, кужмо солдатлэн но тазалыкез сӧриське. Малы ке шуоно, армиын - шуг. Отын коллективен улыны, уставез быдэсъяны, аслэсьтыд мылкыддэ вормыны кулэ. Ваньмыз тае уг чидало, тужгес но семьяын огназы будэм пиос. Соос командиръёслэсь кылзӥськыны, эшъёсынызы огъя кыл шедьтыны уг быгато. Кылем арын 12 пиосмы армиысь дырызлэс вазь гуртазы лэземын вал. Ваньмызлэн мугез одӥг: шуг-секытъёсты чидатэк, психиказы лябӟемын. - Армие мынӥсь пиослэн тазалыксы пумысен куронъёс золомытэмын. Таин валче армие келянъя план быдэстымон-а? - Азьвыл аръёсы милемыз вить сюрс пиосты армие келяны косо вал, табере та лыдпус кык сюрсозь усемын. Ми понна со трос ӧвӧл. Кык сюрс таза пиосты шедьтом, Россиысь Правительстволэн постановлениеныз куд-ог куронъёс воштэмын ке но. Азьвыл ныр, пель, чырты, син висёнъёсын пиос нокыӵе могӟетъёстэк армие кошкылӥзы но пограничнике, десантэ, спецназэ шедьылӥзы. Табере соос огшоры сухопутной войскоосы шедёзы, висёнзы туж пыдло пыремын ӧвӧл ке. Одӥг кылын вераса, армие котыр ласянь таза адямиос шедьыны кулэ. *** Та малпан кивалтӥсьёслэн йыразы дыр ортчемъя пыӵам ини ке, оло, зэм но, армиын адями виылон учыръёс кулэсмозы, пиосмы гуртазы ӧлексы луыса, йырзы берытскыса уз бертэ ни... О. ВАХИТОВА. Кинэ тросгес учко? "Российской газетлэн" редакциез, Россилэн прессаезлы дунъет сётон вылысь, толэзьлы быдэ калыклэсь юалляськон ортчытэ. Ижевскын улӥсьёс ноябрь толэзе теле- но радиокомпаниосты, газетъёсты тазьы дунъязы. Шоркарамы улӥсьёс тужгес но трос учко вылэм ОРТ-лэсь, ТВ-6-лэсь, РТР-лэсь но "Культуралэсь" программаоссэ. Ваньзы соос огкадь очко люказы. Нош радиоез кылзӥсьёс дунъяло "Россилэсь радиозэ", "Маякез", "Эхо Москвы" но "Европа плюс" станциослэсь передачаоссэс. Интыосын потӥсь печать пӧлын пусъемын "Удмуртская правда" газетлэн "Надежда" бамез. Интыосын ужась телекомпаниос пӧлысь тросгес учко "Новый регионлэсь" иворъёсын программазэ (нуэ Елена Капитоненко) но "Удмуртия" ГТРК-лэсь "Песочная, 13" передачазэ. Радиостанциос пӧлысь кылзӥсьёс вылӥ дунъяло асьме телерадиокомпанилэсь "Денница" но "Ингур" радиопередачаоссэ. Б. НИКИТИН. Театр Кидыс вань, му ӧвӧл Кык ар ӵоже ни мыным огез но мыдыз драматургъёс вазиськылӥзы таӵе куронэн: ойдолэ кӧня ке кузя дасяломе "Удмурт драмтеатрлы удмурт пьесаос кулэ ӧвӧл" шуыса гожтэт. Берло вакытэ югдур зэмен ик солань берытскиз. Туж ичизэ удмурт произведениосты театре басьязы. Ма, пуктыны пусъемъёссэ но ӝыныё куштылӥзы. Сыӵе адӟон усиз Татьяна Чернова, Вячеслав Ар-Серги, Пётр Захаров но мукетъёсыз вылэ. Мугъёс пӧртэмесь вераллязы: я пьеса ляб, я коньдон уг окмы. Мон сыӵе гожтэт дасяны пумит вал. Малы? Зэм, мынэсьтым но огзэ гинэ пьесаме ӧз "вандэ". Но со понна кӧт ӝождэ аслад газетэд пыр мадьыны ӟеч-а меда? Пунэмзэ берыктон понна, "Удмурт дуннелэсь" кужымзэ кутӥд уз шуэ-а? Юрттэт курись драматургъёслы валэктӥ: ачим сыӵе гожтэт уг лэсьты, нош тӥ вуттӥды ке, печатланы уг люкеты. Тодӥсько: Никвлад Самсоновез сыӵе лэчыт материал дасяны нокин но ӧз лӧпкытъя. Со уг кескичъяськы, тазьы оскытыса: "Удмурт лыдӟись азьын мон кисьтӥ Удмурт театр но удмурт драматургия сярысь сюлэмам кема гыбдаса улэм малпанъёсме-чакламъёсме". Малпасько: ас мылкыдзэ усьтыса, автор шараяз тачак эшъёсызлэсь сюлэм висёнъёссэс. Та гожтэтэз печате сётон азьын кема малпаськытэк ӧйлась. Газет одӥг-кык пол мадьылӥз ни Удмурт театрысь лэчыт югдур сярысь. Сыӵе гоъямъёслы пӧртэм дунъетъёс сётэмын. Огъёсыз оскытъязы: гажано артистъёслэсь керетэмзэс калык азьын шараяны уг яра. Бен, редакция судья ӧвӧл. Югдурез, тупатэм интые, уката уз бугырты-а? Артистъёс но кивалтӥсьёс куспын гомӟем тылӝуэ лыдӟисьёсмы карасин уз пазьге-а? Котьма ке но, Никвлад Самсоновлы сюрес усьтӥм. Малы? Ватонэз ӧвӧл: республикаысь музон театръёсын но али огыр-бугыр. Но, котьку сямен ик, вылӥ кивалтӥсьёс удмурт коллективез весь палэнэ кельто. Вае "Дартысь" югдурен тодматском, вае Операя но балетъя театрысь тылпуэз кысом, собере вуом Удмуртаз но. Газет пыр вераны турттӥм: дунне вылысь одӥг гинэ Удмурт театрлэсь висёнзэ али эмъяно! Отӥяз бер луоз. х х х Котькытын сямен ик, татын но югдурез тупатоно вылэм йыръёс бордысен. Шуом, театрен кивалтэ директор, солы юрттэ валтӥсь режиссёр. Мон адӟемъя, директор тросгес вырыны кулэ "кунсьӧр (внешней) политикаен". Туала вакытэ нырысетӥ сюлмаськонэз - коньдон поттон. Министерствоез зуркатон, спонсоръёс утчан, юртъерез тупатъян - директорлэн удысэз. "Кунсьӧр политикаын" ик вань на нуналмысь сюлмаськонъёс - декорациослы материал утчан, билетъёс вӧлмытон, рекламаез радъян. Тазэ мед бергатоз директорлэн воштӥсез. "Пуш политикаын" тужгес бадӟым ӧр - спектакльёс дасян. Татын ини валтӥсь режиссёр медло кузё: пьесаос быръён, рольёс люкылон, артистъёсын ужан, репетициосты радъян. Тӥни озьы гинэ йыръёс пӧлысь котькудӥз нуоз ас ныпъетсэ. Соку ваньмызлэсь кылзэс юаны луоз. Уждун тырон ӝега - малы нырулӥськод, директор? Декорация суреданы буёл быриз - ма кариськод, солэн воштӥсез? Пьесаос ӧвӧл? Кытын валтӥсь режиссёр, ма лэсьтэ солэн драматургъёсын ужанъя юрттӥсез? Валамон ини, быдэс театр понна кыл кутэ одӥгез - директор но директор гинэ. Тазьы тупен-тупен пусйыны луысал котькудӥзлэсь удыссэ. Малпасько: ужез функция шуонъя люкылон театрын вань. Возьмаськись возьмаське, йыр ӵышкись йыр ӵышке, суредась суреда. Нош вылӥынгес - директор, чеберлыкъя (художественной) кивалтӥсь, валтӥсь режиссёр пӧлын, ваньмыз - берло дыре сураськиз. Кузёос но соослэн нимъёссы ӵем вошъяськемен сэрен но. Азьвыл директорлэсь Борис Саушкинлэсь юалляй: - Тӥ кивалтӥды драмтеатрен но, музыкая театрен но - удмуртъёсын но, ӟучъёсын но. Али мында керетонъёс ӧз пуромылэ. Кызьы быгатӥды вожвылъяськонъёсты кысыны? - Мынам воштӥсе туж оскымон вал - Константин Доронин. Ӧжытак гинэ кескичъяське, вылды, Борис Ефремович. Веранэз ӧвӧл, Доронин оскымон адями вал. Мукет ласянь, Саушкин сое уно толэзьёс но аръёс ӵоже дышетӥз аслаз удысэзлы. Куспазы тупало бере, коллектив тае адӟытэк ӧз улы. Сыӵе интыын куара-ланга ӝутыны сьӧлык луысал. Жаляса вераны кулэ: таӵе аспӧртэм кивалтон школа театрын куашказ. Табере выль директор но, валтӥсь режиссёр но кельшо ӵындӥсь сэрегпумъёс доры сюрем муртъёслы. Палэнысен визь-кенеш сётыны капчи. Монэ медаз пыкылэ, муртлэн "пуш политикаяз" пыриськисько шуыса. Кызьы адӟисько, озьы ик верасько. Вылаз ик, мон -туж вылӥ судья - учкись, театр понна висись сюлэм. Одӥг гинэ Удмурт театрез зэмен ик утеммы потэ ке, Анатолий Митрофанов та уробоез уг кыскы ни ке (зэм, мон озьы уг лыдъяськы), татчы йыр кароно нырысь-валысь чик тупантэм кадь адямиез. Тани куд-огез: Аверьян Христофоров, Валерий Митрофанов, Пётр Романов, Анетта Сидорова, Кузьма Куликов, Пётр Ёлкин, Евгений Андреев, Егор Загребин. Туннэ соос, театрлэн кузёез сярысь, оло, уногес уждун басьто. Театрмес улӟытон вылысь гожтоно контракт, гочатоно эшшо бадӟымгес коньдонэн. Рынокен экономика кузёяськыку, татын номыр умойтэмез ӧвӧл. х х х Валтӥсь режиссёр сярысь. Театрын со али ӧвӧл. Никвлад Самсонов оскытэмъя, азьвылэныз Анатолий Митрофанов ӧз тупа. Мынам таиз ласянь ӵектонэ ӧвӧл. Ачим ужай ни куинь режиссёрен - Леонид Романовен, Александр Блиновен, Александр Вершининэн. Абдрамон адямиос! Театре ӵукналы быдэ пыриськод но малпаськод: туннэ нош ик ма выльзэ тодод меда соослэсь? Улонысь котькуд учырез бадӟым философиёзь вутто. Куддыръя вожъяськисько: редакциын одӥг коть сыӵе мурт луысал ке, газет копак музон инбаме ӝутскысал. Эн малпалэ, режиссёр кылчин шуыса. Ачим адӟылӥ соослэсь артисткаосты синвуозь вуттылэмзэс. Монэ но, арлыдо муртэ, матькетъямзы вань. Нош та учыръёс герӟаськемын ук огъя ужен, кыӵе ке нимаз ужпумен. Ог-огмылы верам урод кылъёсмес сюлэмамы весь нуллӥмы ке, милемды пиосъёс шуыны луоз-а? Табере валтӥсь режиссёр уг шедьто. Огеныз гожтэм контракт быриз, пе. Мукетызлэн сямыз йӧнтэмгес. Куинетӥезлэн кыӵе ке музон сьӧлыкез вань. Тазьы учконо ке, утчано ук ваньёсыз пӧлысь. Рязаньысь ӧтемъёсын ӵош кыдёке уд вамышты. Амал одӥг: асьме режиссёръёс ужтэк пуко бере, соосты выльысь эскероно арлы-кыклы гожтэм контрактъёсын. Ӧз пишмы - интыдэ сёт музонэзлы. Пӧрмиз - азьланьты мытэм удыстэ. х х х Тодам лыктэ финн-угор театръёслэн Финляндиын ортчем фестивальзы. Удмуртъёс отын тужгес яратоно адямиос вал. Пётр Захаровлэн "Эбга" пьесаезъя спектаклез учкисьёс вожъяськылӥзы: - Кые тӥляд драматургиды! Кыӵеесь актёръёсты! Со дыпысен вить ар но ӧз ортчы на. Захаровмы но, артистъёсмы но, режиссёръёсмы но пӧламы. Нош кытын театрмы? Ма луиз соин? Валэктон утчаса, выльысь син азям пуктӥсько Финляндиын ортчем пумиськонъёсты. Куд- ог театръёс ваиллям кунгож сьӧрысь писательёслэн пьесаоссыя но выжыкылъёсъя дасям ужъёссэс. Асьсэлэн номырзы ӧвӧл шат? Кудымкарысь коми-пермяк театрлэн валтӥсь режиссёрез маде: - Вань милям но писательёсмы. Но театре ужзэс вутто ке, ми гор-р! гырдалляськом. Ужъёссы сыӵе лябытэсь! Юнме серекъяло. Сыӵе вылтӥяськон бордын асьмелэн, финн-угоръёслэн, висёнмы. Котьма шуэлэ, но мон уг оскиськы тазьы верамлы: артистъёсмы туж визьмоесь., нош драматургъёсмы лекос нодтэмесь. Ваньмы асьмеос одӥг калык пӧлысь потэмын, одӥг Россиын улэмын, оглом дано институтъёсты йылпумъямын, огъя культура вылын дышетэмын. Вить ар талэсь азьвыл Пётр Захаров Европаын но синмаськымон драматург вал ке, туннэ улэгес лэзиськиз шат? Озьы ик вераны луысал Вячеслав Ар-Серги, Анатолий Григорьев но мукетъёсыз сярысь. Табере шараяло тужгес лек малпанме. Соин сэрен театрын тушмонъёсы уногес люкаськозы. Но... Платон - мынам эше, нош зэмлык дуногес. Театрез таӵе урод югдуре вуттыны юрттӥзы артистъёс но. Асьсэды копак зӥбемын шуо ке но. Мыным потэ: соослы мултэсгем эрик сётэмын. Мар ласянь? Коллективе выль пьеса вуэ ке, актёръёсты ваньзэсты сямен лыдӟыны-кылзыны косо. Уноез ас малпанзэс вераны туртто. Визьмо луэмдэ возьматэмед потэ ке, ужез одно ик курланы кулэ. Дас-кызь-куамын мурт сомында визь-кенеш сётэ - автор чылкак йыроме. Вылаз ик, куд-ог артистъёс амалтэк шебеляло дышем ӧразы: ми - генийёс, нош драматург... Драматург малпа на огез сярысь гинэ: ку мозмоз пушнерен мунчоысь? Мон актёръёслы тушмон ӧвӧл. Тодӥсько: кыӵе шимес конкурсъёс пыр пото соос институтэ шедён вылысь. Адӟисько, макем курадӟо репетициын, кӧня секталазэс ышто спектакльын. Номыртэм шуг удыс! Но котькудӥз кыл кутыны кулэ аслаз ужез понна. Артист - ролез понна. Директор - театрлэн туннэ но ӵуказе улонэз понна. Актёр пыриське ке репертуаръя политикае, директор соин сэрен вунэтэ ке аслэсьтыз гожзэ, тодэлэ ни: коллективын кузёяськозы юсь, кисло-кусло но чипей. Таӵе кылъёслы мед оскоды шуыса, али верасал огинтыын лёгаськон аръёсы ужан амалэз. Мон, пинал мурт, газетам гожтӥ "Кытын кӧлэ коньдон" материал. Возьматӥ, кызьы магазинэ лумбыт ӵоже вуэ коньдон, кызьы сое инкассаторъёс нимысьтыз машинае люкало, банке вутто, лыдъяло. Редакциысь кузёос кышказы таӵе удысэз шара возьматыны - пушказы лек цензор пукиз уга. Нош материалэз печатланы пумит луон мугез уг верало - оло, асьсэос но уг тодо. Амал шедьтӥзы: гожтэмме вань отделъёс мед лыдӟозы, пе. Егитъёс но пересьёс, та удысэз чик валасьтэм муртъёс, монэ индылыны шӧтазы: татӥзэ кулэстоно, татӥзэ тупатоно, татӥзэ мургес бугыртоно. Копак театрын музэн. Тужгес юн гудыртӥз таӵе юан: кинлы но малы кулэ сыӵе материал? Партилэн кыӵе ужез герӟаськемын соин? Валамон ини, гожъяме ӧз печатласькы. Мон гинэ сыӵе акар вискы сюрысал ке? Туала визьмын валасько ни: со вал "стандартлы тупасьтэм" чуръёсты палэнтонъя тужгес оскымон амал. Кивалтӥсез соку кызьы янгыш карод? Коллектив шуиз ук: кинлы но малы кулэ сыӵе уж? Нош калыклэн верамез - вылӥ закон. Газетчиос таӵе висёнлэсь кемалась мозмизы ни. Театрын со эмъямтэ на. Эшшо огпол пусйисько: артистлэсь быгатонлыксэ гажаны кулэ, но пьесаез басьтон яке палэнтон - солэн сюлмаськонэз ӧвӧл. Выльысь ӵошатом газетысь югдурен. Валамон ини, материалъёсты гожъяло корреспондентъёс. Ӟеч пӧрмыто ке, соос ик басьяло премиос но дано нимъёс. Янгыш потто ке, судэтӥ ветло редакторъёс. Котькудӥзлэн аслаз киросэз шуод-а, мар-а. х х х Кӧня ке ар талэсь азьвыл, Удмурт театр ӧтемъя, республикаямы вуылӥз Москваысь тодмо критик Людмила Корнаван. Трос визьнод сётӥз. Огез малпанэз таӵе вал: драматургъёс маке но выльзэ утчало, нош театр витьтонэтӥ аръёсы сямен ужа. Маке воштӥськиз-а? Ӧз. Театрысь кивалтӥсьёс весь оскыто: ми мында нокин но уг пота гуртъёсы, милемды отын витё но ярато, нош город ма? Городысь интеллигенция театре уг ветлы, милемды пыкылыны гинэ яратэ. Берло аръёсы драматургъёсты копак вунэтӥз Писательёслэн союззы. Кӧня кылбурчиос но литературоведъёс кутэмын отчы! Кӧняез пусъемын пӧртэм премиосын! Нош ньыльдон ар пала гожъяськись Егор Загребинмес, театрез Геракл сямен пыкыса возись муртэ, бускель республикаосын но кыдёкысь областьёсын тодмо луэм драматургез, весь ум дӥсьтӥське Кун премиен дунъяны. Малы? Мугез туж огшоры. Гызмылессэ меӵак дыг шуоз, юисьсэ тордос шуоз. Кытын бен удмурт спектакльёс? Туж матын - удмурт драматургъёслэн пьесаосазы. Кулэ огез гинэ: ӟеч кидыс мед усёз ӟеч муэ. Алексей ШКЛЯЕВ. Тазалык Кӧня улом? Берло 7 ар ӵоже Россиысь калыкъёслэн шоро-куспо улон даурзы вакчияз, ивортэ "АиФ- Здоровье" газет. Нылкышноос табере 2 арлы ичигес уло (72 ар), воргоронъёс - 4 арлы (63 ар). Россилэн куд-ог сэрегъёсаз улӥсьёс улонлэсь шӧмзэ ик валаса уг быдто, дыр. Туваын, кылсярысь, 55 ар уло, шорлыдын вераса. Со вакытэ ик Северной Кавказысь калыкъёс, азьвыл вакытъёсы сямен ик, кема улэменызы ушъяськыны быгато. Дагестанын, шуом, 70 арлэсь ичи улӥсез ӧвӧл. Пусйыны кулэ созэ но. Россиысь Тазалыкез утёнъя министерство ивортэмъя, 1997 арын котькуд сюрс адямилы быдэ 8,6 нылпи вордскиз но 13,8 мурт кулӥз. Иворъёсъя национальной служба. Кун Кенешын "Коть ыбелэ - коньдонэ ӧвӧл!" Калык верамъя, выль аре, пе, вань пунэм тыронъёсты берыктыса выжоно. Но быдэс улонмы йырчукин луиз ни бере, та веранэз пелязы понӥсьёс но ӧвӧл ни кадь. Озьы туэ агропромышленной комплекслы юрттонъя фондлы пунэме тыронъёссэс берыктыны уз ик быгаты республикаысьтымы кык предприятие: Сарапулысь но Глазовысь аракы поттӥсь заводъёс. Малы? Ӵапак та ужпумез берло кенешаз эскериз Кун Кенешысь агропромышленной удысъя комиссия. Кыкназылэн ик заводъёслэн АПК-лы тыронъёссы быдэн одӥг миллион манет пала люкаськемын. Заводъёслэн директоръёссы ас югдурзэс пӧртэм мугъёсын валэктыны выризы. Сарапулысь аракы поттӥсь заводлэн директорез Ф. Фисиенко таӵе валтӥсь муг вылэ чӧлскиз: мон, пе, та заводэн ньыль ар талэсь азьло гинэ кивалтыны кутски, завод соку куашкан калэ вуэмын вал. Пыд йылэ султон туж секытэн мынэ. Директор верамъя, АПК фондэ сяна, заводлэн республикалэн но Федерацилэн бюджетъёсаз нокыӵе пунэм тыронъёсыз ӧвӧл. "Коньдонэ ӧвӧл, коть ыбелэ!" - лек шуиз директор. Но, кызьы валатскизы комиссилэн адямиосыз, заводлэн коньдон поттыны луонлыкъёсыз вань, угось та дыре со пӧртэм организациослы вузаны вылысь 20 миллион манетлы кудӟытӥсь юонъёс сётэмын. Аракы понна туж трос коньдон тыронзы люкаськемын, кылсярысь, радиозаводлэн (1,6 миллион манет) но "Новый путь" колхозлэн. Глазовысь аракы поттӥсь завод но выль арозь АПК-лы тыронъёссэ берыктыны уз быгаты. Озьы шуиз заводлэн директорез Н. Сорокин. Кызьы со валэктӥз, заводлэн табышысьтыз бадӟым люкетэз али кошке Балезиноын спирт завод лэсьтонэ. Туэ татчы заводлэн 55,8 миллион манет коньдонэз кошкем. Нош Правительстволэн нырысь чакламезъя, отчы 9 миллион манет гинэ кошкыны кулэ вал. Спирт заводлы коньдонэн юрттыны кулэ вал Правительство но. Но туэ августэ секыт кризис кылдэмен, Правительство лэсьтӥськись спирт заводлы юрттыны ӧз ни быгаты. Али татын 20 процент пала гинэ лэсьтӥськон ужъёс кылемын на. Но Глазовысь аракы поттӥсь завод солы юрттэмысь дугдӥз ке, лэсьтӥськон ужъёс ӝегатскозы. Зэм, спирт завод республикамылы кулэ. Нырысь лыдъямъя, со бюджетэ арлы быдэ 66 миллион манет коньдон вайыны кулэ. Но малы меда Глазовысь заводлэсь АПК-лы тыронъёссэ мозмытон сярысь Кун Кенеш но, Правительство но эскерылымтэ, со пумысен ачиз директор но нокытчы вазиськылымтэ. Соин ик Гурт хозяйствоя министерство но табере юмоке сюремын. Та заводъёслэсь коньдон вуэмлы оскыса, министерство гуртъёслы лэзем вылэм фермаосты но гидъёсты тупатъяны-лэсьтыны. Кутэм законъёсты быдэсъяно, шуиз агропромышленной удысъя комиссилэн тӧроез А. Малков. Та заводъёслэн ас тыронъёссылэсь мозмытскон сярысь нокыӵе документъёссы ӧвӧл. Та ужпумез сяна, комиссия озьы ик эскериз республикаямы етӥн будэтонэз азинтонъя программалэсь и нъетсэ. Сое юнматыны чакламын Кун Кенешлэн вуоно сессияз. Т. БАННИКОВА. Вань сяськаос - геройлы Туэ 17 декабре асьме палъёсын вордскем дано нылкышнолы Советской Союзлэн Героезлы Нина Захаровна Ульяненколы тырмиз 75 арес. Тодмо лётчицаез дано юбилееныз ӟечкыланы ветлӥзы Кун Кенешлэн Тӧроез Александр Волков, Правительстволэн Тӧроез Павел Вершинин но солэн воштӥсез Антонина Лисина. Быръёнъёс азьын Юа аслэсьтыд ачид Кун Кенеше быръёнъёс дырозь куинь толэзь кылиз на. Та ужрадлэсь республикалэн улоназ интызэ, уката но солэсь вуоно емышъёсызлэсь интызэс, лыдэ басьтоно ке, сокем ик кема ӧвӧл ни. Али шаермылэн политической улоназ чал-чал, сильтӧл яке лек зор азьын кадь. Шӧдске, власть понна нюръяськыны малпасьёс выльысь но выльысь кужымзэс чаклало, югдурез эскеро, вуоно тушмонъёссылы дунъет сёто, асьсэлы выль луонлыкъёс но амалъёс утчало. Номыр уд шуы, капчи уж ӧвӧл со - руль бордын инты понна нюръяськон. Нош кин меда дасяське таяз учыре власте пырыны? Асьмеос кинэ бырйыны дась? Азьвылъёссэ ик депутатъёсты? Яке чылкак выль адямиосты? Тросэзлэн, ваньмызлэн ке ӧвӧл, али калык "ляльчиослэн" шуныт интыоссэс ас мылкыд каремзыя кельтэмзы уз поты, соиз валамон. Со дыре ик выльёсыз но "руль" бордын возиськыны мылкыд карисьёс тырмыт луозы. Озьыен, ӟырдыт нюръяськонэз адӟыны кылдоз асьмелы. Кинэ адӟом меда нюръяськисьёс пӧлысь? Кызьы верай вал ини, нырысь ик, али депутатъёсты. Нош кулэ-а соос калыклы? Маин ӟечен тодэ вайыны луэ соосты? Вожзэс медаз вае гажано депутатъёс, но мон номыр но пусйымонзэ тодам вайыны уг быгатӥськы соослэн ньыль ар пала пукемысьтызы. Малы ке но ченгешонъёссы гинэ тодэ лыкто. Я тӧроенызы ваче вуо, я куспазы, я сессиосы уг ветло. Мар карыса пукизы соос ньыль ар ӵоже? Туж умой луысал, дыр, али, быръёнъёс азьын, котькуд депутат (котькудӥз!) аслаз бырйисьёсыз азьын отчёт лэсьтысал ужамез сярысь. Соку калык быгатысал солы зэмос дунъет сётыны, чакласа, кулэ на-а та адямилы выльысь мандат оскыны. Но шуг оскыны, данакез депутатъёсмы таӵе ӵектонэн соглаш луозы шуыса. Соос огдышем сяменызы выльысь зарни гурезьёс сӥзёзы, калыклэн шудэз понна жадёнэз тодытэк, нокинлэсь но номырлэсь кышкатэк нюръяськыны кыл сётозы. Ма, выльёсыз но пӧртэмесь уз луэ, мукетсэ шуг витьыны. Мар бен, соку воксё нокинэ но ӧвӧл ни быръёно-а, мар-а? Уг, мон уг ӧтиськы сыӵе мыдланес вамыш лэсьтыны, властьтэк улыны уг луы. Но ойдолэ азьвыл ик, дыр вань дыръя, пыр-поч малпаськом, кинъёс, кыӵе депутатъёс асьмелы кулэ. Котькудзэ ӵектэм адямиез котыр ласянь чаклано, дунъяно, кызьы со быгатоз асьме сярысь сюлмаськыны. Керпотоно ӧвӧл, дыр, меӵак юаны но, малы со депутатэ мынэ. Ватонэз ӧвӧл угось, куд-огез, тросэз ке ӧвӧл, депутатэ мерско яке асьсэ ужъёссэс пӧран понна, яке властез мултэс, сюлэмзы висьымон, яратэменызы сэрен. Ӵем гинэ мукет но янгыш лэсьтӥськом. Малы ке но данаксэ мандатъёсты кивалтӥсьёслы оскиськом. Мон ваньзэ кивалтӥсьёсты одӥгтэмак курланы уг турттӥськы. Но кивалтӥсь ас кивалтон интыяз ӟеч ужась ке, солэсь котьку ик ӟеч депутат уг пӧрмы. Ӵем дыръя дырыз но уг тырмы, кытӥяз депутатлэсь ужзэ аспӧртэмлыко, палдурес вала, ас кивалтон мертэтэзъя дунъя. Соин ик куд-ог дыръя пайдаёгес луысал, дыр, асьме пӧлысь но огшоры адямиез бырйыса. Валамон, солэн тодон-валанэз тырмыт ке. Но мар тужгес но кулэез - со нырысь чылкыт сюлэмо, оскымон адями мед луоз. Мон малпамъя, таосыз быръёнъёс, азьвылъёсыз сярысь, уката но ӟырдыт, кытӥяз керӟег но ортчозы. Трос бадӟымесь, туж пӧртэмесь кужымъёс пыриськозы отчы. Огшоры бырйисьёслы туж капчи янгышаны. Соин ик котькуд адямилы куаразэ сётон азьын аслыз ачиз огшоры гинэ юан сётоно: нош малы та кандидат депутатэ мынэ? Адямилы ӵем дыръя аслаз сюлэмыз, аслаз визьмыз тужгес но шонер сюрес вера. Г. КОРЯКОВ. ШУНДЫ Вазиськон "Шунды" дэменлыклэн правлениез вазиське "Шундыкар" лагерьын шутэтскем усточи пиослы но нылъёслы. Ивортэ, школаез йылпумъяса, кыӵе сюрес бырйиды; кытчы дышетскыны пыриды яке кытын ужаськоды? Лагерьын басьтэм тодон-валанъёсты юртто-а улонады? Оло, кыӵе ке дэмланъёсты, ӵектонъёсты вань. Ваньмыз со юрттоз "Шундыкар" лагерьлэсь азьлань ужзэ радъяны. Гожтэтъёстэс ыстэ таӵе адресъя: Ижевск город, Советской урам, 1 номеро юрт УМОО "Шунды". Вазиськоно таӵе телефонъя: 51-07-96. Кун кужымтэм, калык куанер ке Валлянлэсь азьвыл, 19-тӥ декабре, Москваысь Союзъёслэн юртазы ужаз Россиын огъя "Отечество" организациез кылдытонъя ӧтчам (съезд). Кунын кылдэм секыт югдур но сое тупатон сярысь рос-прос вераз Москвалэн кузёез (мэрез) Юрий Лужков. Солэсь докладзэ эскеронэ пыриськизы Башкириысь Правительстволэн Тӧроез Рим Бакиев, Ярославль областьлэн Йырез Анатолий Лисицын, митрополит Кирилл, Москваысь Ломоносов нимо университетлэн ректорез Виктор Садовничий но мукетъёсыз - ваньмыз ог 25 мурт. Ӧтчаме ӟечкыланъёс ыстӥллям Россиысь компартилэн тӧроез Геннадий Зюганов, "Яблоко" организацилэн кивалтӥсез Григорий Явлинский, "Милям юртмы - Россия" движенилэн тӧроез Виктор Черномырдин (таизлэн кылъёсызлы ӧз чабе). Ужрад йылпумъяськем бере ни ӟечкылан вуиз Борис Ельцинлэсь. Удмурт Республика ласянь ӧтчамын вал 10 делегат. Люкаськемъёс ӟырдыт пумитазы "Ижмаш" огазеяськонысь валтӥсь конструкторез Михаил Калашниковез ( со пукиз президиумын). Кун Кенешлэн Тӧроез Александр Волков аслаз вераськоназ пусйиз: - Ми кылӥмы нацимес улӟытонъя выль кичӧлтонъёс. Адямиос мӧзмизы ни вал патриотизм, экономикаез ӝутон но мукет сыӵе кылъёслэсь. Ваньзэ лэсьтом, огшоры адямиослэсь улон-вылонзэс умоятон понна. Удмуртиысь лыктэм делегатъёс пӧлын - тужгес бадӟымесь заводъёсысь кивалтӥсьёс. Отӥяз со сётӥз кык ӵектон. Юрий Лужковлэсь докладзэ печатлано, видеоплёнкае пуктоно но вань улосъёсы (регионъёсы) вӧлмытоно. Со сяна, ӧтчамын верам ӵектонъёсты улонэ пыӵатонъя амалъёс шедьтоно. Соку "Отечестволы" калык юн дурбасьтоз. Ӧтчам организацилы тӧрое бырйиз Юрий Лужковез. "Отечестволэн" валтӥсь кенешаз (центральной советаз) быръемын Россиысь промышленникъёслэн но предпринимательёслэн огазеяськонзылэн тӧроез Аркадий Вольский, Кун Думалэн депутатъёсыз Борис Громов, Иосиф Кобзон, Екатерина Лахова, Артур Чиштыров но мукетъёсыз - 68 мурт. Пӧлазы - "Ижмаш" огазеяськонлэн валтӥсь директрез Владимир Гродецкий. Та нуналэ ик организацилэсь уставзэ Россиысь Юстицияя министерство юнматӥз. Вуоно ӧтчамез люкан чакламын 1999-тӥ арын апреле. Ӧтчамлэн ужамез сярысь азьланяз рос-просгес ивортом. А. ШКЛЯЕВ. Выль даур азьын сюлмаськонъёс 20-тӥ даурысь 21-тӥ дауре выжон уе вань компьютеръёс, выль даурлэсь кутскемзэ возьматэм интые, 1900-тӥ арлэсь вуэмзэ ялозы. Таин валче быдэс дуннеысь компьютеръёслэн сӧзнэтсы сӧриськоз. НАТО Россилы та ужпумъя юрттэт сётыны куриське. Запад кышка, компьютеръёс "янгышамен" валче, Россилэсь ядерной кужымъёссэ эскерись уз луы шуыса. Нош Москва курда мукетызлэсь: юрттэмъяськем улсын мукет кунъёс изъян вайыны уз быгатэ-а, пе. Нырысь ик таӵе кышкытлык кылдэ Обороная министерстволэн компьютеръёсыз пумысен, малы ке шуоно, соос "ядерной кнопкаез" зӥбыса ужаны кутско, ивортэ "Известия" газет. Иворъёсъя национальной служба. Выжизы ни выль аре "Вараксино" тылобурдо вордон фабрикаын тыршисьёс алигес бадӟым вормон басьтӥзы - продукция поттонъя но вузанъя туэлы чаклам планзэс тырмытӥзы. Предприятилэн валтӥсь экономистэз верамъя, тылобурдо будэтӥсьёс заданилэсь вылтӥ поттозы 19 милион курег пуз но 200 тонна курег сӥль. Ар ӵоже фабрикаын ужасьёс 164 миллион курег пуз но 1200 тонна сӥль люкалозы. Г. РОМАНОВ. 02 ивортэ Йыртэмамдылэсь азьло малпаське Ортчем шутэтскон нуналъёсы 109 йыруж лэсьтэмын вал, со пӧлысь 80-эз шараямын. Урамъёсысь ӝегатэмын 830 юэм мурт, 510-эз сазьтӥськонние вуттэмын. Асьсэлэн алама ужъёссы понна 217 мурт штраф тыриз, со сяна, милициын ужасьёс 130 пол потазы семья кусыпъёсты тупатыны. Сюресъёс вылын 10 шудтэм учыр вал, 2 мурт быриз, 9-эз сӧсырмиз. Балезиноын улӥсь 32 аресъем воргоронлэсь милициын ужасьёс шараязы "пичияк" складзэ - 5,6 миллиметр калибрен 44 патрон. Уголовной уж ӝутэмын. Сарапул районысь Соколовка гуртын но йыртэмасьёс уг кӧло вылэм. Соос адями азьын ик 750 манет тыр сӥль лушказы. Милициын ужасьёслэн ӝог тыршемзыя, лушкаськисьёсты кырмизы. 27 аресъем Наталья, 26 аресъем Ирина, 25 аресъем Светлана но 17 аресъем Евгений капчиен шедьтэм коньдонзылы шумпотыса ӧз вуэ. Кышкыт учыръёс пумиськылӥзы "Дуслык" кафеын но. 20 декабре уйшор берегес отын кузёяськыны ӧдъяз вал 19 аресъем Денис. "Дан поттыны" ӧз вутты - кырмизы. Солэсь шараязы газ револьверзэ, кудӥз тупатэмын вал ыбылӥськыны пичи калибрен патронэн. Револьверлэн барабанысьтыз шедьтӥзы на 7 патрон. Ӵуказеяз та кафеын ик кышномуртлэсь шубазэ "кылизы". 18-19 аресъем пиосты дыраз ӧз синйылтысалзы ке, кафеын ужасьёс 2,3 сюрс манетсэс ыштоно луысалзы. Тросэзлэсь быдэ вуэм егитъёслэсь синзэс мальдытэ машина. Руль сьӧрын ворттылэмзы потэмен, соос умойтэм сюрес вылэ султоно луо. Озьы Сарапул районын ӝегатэмын ньыль мурт. Соос С. гражданинлэсь ВАЗ-2108 машиназэ лушказы. Та дыре кыкез пытсэт сьӧрын пуке. Улонлэн секыт луэменыз ик, дыр, тросэз адямиос йыруж лэсьтоно луо. Соин ик умойтэм уж лэсьтэмдылэсь азьло малпаське. Удмурт Республикаысь МВД-лэн пресс-службаез. Кыӵеен адӟиське Удмуртия бускельёсыз вӧзын? Москваысь валютая межбанковской биржа (ММВБ) но Экспертной институт поттыны дасяллям "Развитие инвестиционной ситуации в регионах России" книга. Кызьы валаны луэ ини солэн нимызъя ик, отын пыр-поч эскеремын, кыӵегес югдур странамылэн пӧртэм улосъёсаз. Книгаын тужгес но бадӟым саклык висъямын инвестициосъя удыслы но коньдонэн вузкаронлы. (Тодады вайытом: инвестиция - со коньдонэз пайда поттон понна сояз яке таяз удысэ яке предприятие интыян. - Ред.) Мукет регионъёсын ӵош палэнэ кельтэмын ӧвӧл Удмуртия но. Малпаськом, лыдӟисьёсмылы тунсыко потоз тодыны, кыӵе адӟиське асьме республикамы, солэсь азинскемзэ бускельёсын ӵошатӥд ке. Котькуд областьлэн но республикалэн, нимаз адямилэн сямен ик, аслаз пӧртэмлыкез вань. Вань поттэм ваньбурлэсь быдӟалазэ ӵошатоно ке, Удмуртилы матынгес луо Киров но Оренбург областьёс. Но калык хозяйстволэн пуштросэз сояз но, таяз но асьмелэнлэсь пӧртэмгес. Оренбург областьын, шуом, бадӟымгес инты басьтэ эстӥськон поттон удыс, пичигес - машина поттон. Нош Киров областьын - паськытгес но кужмогес нюлэс дасян, пулэсь продукция поттон но химия но нефтехимия удысъёс. Бигеръёсты но бишкиръёсты ке басьтоно, соос асьмелэсь шӧдскымон тросгес бере, уногес ваньбур но потто. Соизлы яке таизлы улослы дунъет сётыку, одно ик лыдэ басьтыны кулэ соослэсь аспӧртэмлыкъёссэс. Угось пӧртэм вузъёслы кулэяськонъёс но, дунъёс но ӵошатонтэм пӧртэмесь. Кызьы ужаз промышленность? 1992-тӥ-1994-тӥ аръёсы Россиын промышленность чутрак уллань васькиз ке, 1995-тӥ- 1997-тӥ аръёсы та удыс огвадьсын возиськиз, шуыны луоз. Нош миым, 1996 арен ӵошатыса, ваньбур поттон куд-ог удысъёсын йылӥз но, кылсярысь: андан ӵыжатон, машина лэсьтон, кулэсь продукция поттон, нюлэс дасян, химия но нефтехимия удысъёс. Соин ӵош ик куд-ог вузъёс - андан, му вӧй но бумага - дунтэмазы. Удмуртиысь предприятиосын ваньбур поттон, быдэс Россиен но бускельёсын ӵошатыса, шӧдскымон вылӥынгес вал. (табл. � 1) Туала дунъёсъя ваньбур поттонлэн будэмез Республикаын таӵе азинскон басьтэмын машина, сиён-юон но му вӧй поттон чотын. Тужгес но пусйымонэз - машина поттон удыс ялан юнма, кужым люка. Кылем арын Россиысь 1000 устоез предприятие пӧлы пыртэмын Удмуртиысь но тямысэз. Предприятиослэн пайда поттэмзы но ыштонъёссы 1995 арын быдэс Россиын табыш (прибыль) басьтэмын вал 140 триллион манет, 1996 арын - 74 триллион, 1997 арын - 82 триллион манет. Удмуртиысь предприятиосын, Россияя шоро-куспо лыдпусэн ӵошатыса, 1996 арын пайда басьтон ӧжытгес кулэсмиз. Нош миым со трослыгес будӥз. Та ласянь республика кылем арын вань бускельёссэ азьпалтӥз. Туэ укмыс толэзь ӵоже, 1996 арын таӵе дырен ик ӵошатыса, табыш 43,5 процентлы яке 741 миллион манетлы (выль уксёен) уногес люкамын. Ыштон ваись предприятиослэн лыдзы берло куинь ар ӵоже Россиын йылэ. Мугез - продукция поттыны коньдон ӧвӧл. Удмуртилэн промышленностяз сыӵе предприятиос, бускельёсын ӵошатыса, бадӟымгес инты басьто. Зэм, Киров область эшшо но берегес кыле. Туэ августлы республикаын пайдатэк ужась предприятиослэн лыдзы кулэсмиз ик, трослы ӧз ке но - 1,8 процентлы. (табл.2) Пайдатэм предприятиослэн лыдзы (процентэн) Ваньбур поттонэ коньдон интыян (инвестициос), кызьы тодмо, нокыӵе производство но, отчы коньдон понытэк, азинскыны гинэ ӧвӧл, ваньбур но поттыны уг быгаты. Производственной юртъёс пуктоно, собере соосты тупатъяно-выльдоно яке бадӟыматоно луэ, оборудование, сырьё, электрокужым, шуныт, ву, эстӥськон, пӧртэм материалъёс басьтоно - уксётэк одӥг вамыш но уд лэсьты. Ӵапак татчы висъям уксё ик инвестиция шуиське. Инвестициослэн быдӟалазы берло аръёсы Россиын ялан пичиёме. 1996 арын со 18,1 процентлы кулэсмиз, кылем арын эшшо 5 процентлы. Миым 80,8 процентэз инвестициос лэсьтэмын предприятиос чотын, пунэмам но бюджетэ пырисьтэм фондъёсысь коньдонэн. Ваньбур поттонэ коньдон висъянъя луонлыкъёссы пӧртэм предприятиослэн но, регионъёслэн но пӧртэмесь. Валамон, кудӥз регион тросгес ваньбур (валовой региональной продукт - ВРП) поттэ, со ик производствое но уногес коньдон поныны быгатэ. (табл. � 3) Инвестициослэн но поттэм ваньбурлэн (ВРП) быдӟалазы (процентэн) Ваньбурлэн (ВРП) Россилэн Инвестициос но ваньбур люкетэз, Россиен инвестициосыз ӵошатыса ӵошатыса Тюмень область 7.73 15.48 200.3 Москва город 10.25 13.05 127.3 Чуваш Республика 0.53 0.64 121.6 Татарстан 2.69 3.27 121.5 Удмуртия 0.88 1.06 120.9 Башкортостан 2.8 3.31 118.1 Белгород область 0.89 1.00 112.3 Оренбург область 1.29 1.45 112.2 Киров область 0.83 0.4 50.7 Иваново область 0.46 0.2 50.4 Бранск область 0.55 0.2 45.0 Зэм котьку ик озьы уг луы. Тани Тюмень областьын инвестициос ВРП-лэсь кык пол бадӟымгес, нош Иваново областьын - кык пол пичигес. Озьыен, одӥгаз областе палэнысь тросгес коньдон шедьтыны быгато. Озьыен, инвесторъёс оско, соослэн та областе интыям коньдонзы пайдаен берытскоз, пыдэстэм бекче выллем уз ыше. Валамон, таӵе оскымон условиос кылдытыны быгато но кылдытыны кулэ интыысь властьёс. Удмурт Республикаын инвестициос ваньбур поттонлэсь 21 процентлы бадӟымгес. Бускельёс пӧлын сое та ласянь Татарстан гинэ азьпалтэ. Инвестициослэсь быдӟалазэс будэтон понна трос луонлыкъёс сётӥзы республикаын кутэм законъёс но постановлениос. Инвесторъёс валазы: Удмуртиын предприятиослы коньдон кышкатэк сётыны луэ. Соин ик оскон вань, ваньбур поттон матысь дыре йылоз шуыса. Кунгож сьӧрысь но коньдон Удмуртие, бускельёслы сярысь, уногес вуэ. Та ласянь сое нош ик Татарстан гинэ азьпалтэ. Кылем арын республикае 6099 сюрс доллар вуиз. Кӧня коньдонэз калыклэн? (табл. � 4) Адямилы быдэ усись коньдон (Россияя шоро-куспо лыдпусэн ӵошатыса, процентэн) Кызьы адӟиськомы, ваньмаз возьматэм регионъёсын улӥсьёс, быдэс Россияя шоро- куспо лыдпусэн ӵошатыса, ӧжытгес коньдон поттӥзы. Но Удмуртиын калык берло куинь арзэ бускельёсызлэсь тросгес ик коньдон басьяз. 1998 арын, уката но 17 август бере, югдур чутрак уродмиз. Табере республикаын улӥсьёс ваньмызлэсь бускельёссылэсь ӧжытгес коньдон потто. Бюджетлэн луонлыкъёсыз Кылем арын Россиын котькуд адямилы быдэ бюджетысь коньдон 2,8 миллион манет шедиз. Удмуртиын ӧжытгес - 2,6 миллион манет. Бускельёслэн 5,1 миллионысен (Башкортостан) 1,67 милион манетозь (Киров область). Соин ӵош ик Удмурт Республикаын, быдэс Россиен ӵошатыса, бюджетэ коньдон люкан азинлыкогес вал. Ялан будӥз прибыльлы, ватсам дунлы но подоходной налогъёсты октон. Республикалэн бюджетаз, бускельёсын ӵошатыса, тросгес коньдон вуиз Центр юрттэм чотын. Та юрттэт Удмуртилэн бюджетаз миым 21,7 процент вал. Татарстанын гинэ та лыдпус бадӟымгес - 30,7 процент. Удмуртилэн бюджетысьтыз бускельёс пӧлын котькытынлэсь трос коньдон кутэмын жилищно-коммунальной но калыкез дышетон удысъёсты возёнлы. Йылпумъян интые "Развитие инвестиционной ситуации в регионах России" справочниклэн ивортэмезъя, Удмурт Республика шоро-куспо мында огъя ваньбур (ВРП) поттӥсь регионъёс пӧлын куинетӥ интыын. Таӵе интые сое вуттӥз производстволэн паськытатэмез, бюджетэ доходъёслэн но инвестициослэн будэмзы. Туала секыт вакытэ но республикалэн азинскыны оскымон луонлыкъёсыз вань. Нырысь ик, вань на басьяськисьёслы кулэ луись вузъёс поттӥсь удысъёс. Кыкетӥез, манетлэн но долларлэн али кадь кужымзы дыръя, луонлыкъёс кылдо страна пушкысь рынок понна ужаны. Солы юрттоз куд-ог налогъёсты пичиятон но. Куинетӥез, берло дыре кутэм законъёс но постановлениос республикае вуттыны кулэ выль инвестициосты. ШУНДЫ "До ыоу спеак енглисх?" яке Вераськиськод-а англи кылын? Тодӥськоды-а, Стингллэн, Элтон Джоннлэн яке "Нирвана-лэн" кырӟанъёссы пыр англи кылэз дышетыны луэ шуыса? Таӵе но трос мукет амалъёсын кунгожсьӧр кылъёсын тодматскыны юртто Ижевскысь "Санта Лингва" методической огазеяськонын. Ужзэс мур гажась дышетӥсьёс но котьку капчи вазиськись студентъёс ватсаса тодон-валанъёс сётозы, пиналъёслэсь ӵакмыса улӥсь быгатонлыкъёссэс улӟытозы. "Санта Лингва" шаерез нокыӵе карта вылысь но уд шедьтэ. Татын ӧвӧл политической партиоссы, асьсэлэн валютазы, озьы ке но, вань президентсы, нырысетӥ ледизы но быръёнъёс пыр ортчем премьер-министрзы. Отчы шедён понна, нокыӵе визаос кулэ ӧвӧл, вуоды огшоры троллейбусэн но. "Санта Лингва" - пиналъёслэн дуннезы, отын соос кышкатэк усьто сюлэмзэс позыръясь малпанъёссэс, шараяло улон шоры кыӵе синмын учкемзэс. Та шаерын мӧйыос эш сямен валэкто шуг-секытъёсты вормыны. Ойдо бен матэгес тодматском соин. Кыл сётом Нырысетӥ ледилы Вера Недобухлы: - Анапаын ортчыло кылъёсты тодонъя (лингвистикая) пӧртэм конкурсъёс, радъяськыло лагерьёс. Тае адӟем карыса, дышетскись егитъёслэн элькун центразы 1991 арын усьтӥськиз англи яке немец кылэз мургес тодыны мылкыд карись пиналъёслы огазеяськон. Ним сётӥм - "Санта Лингва", асьме сямен со "дуно кыл" шуэм луэ. Соин кивалтыны оскизы мыным. 1995-тӥ арысен "Санта Лингва" нимаз огазеяськон луэ. Кунгожсьӧр кылъёсты дышетон сяна, котькуд каникулъёсы шаерысьтымы пиналъёс понна ортчытъяськом лингвистикая лагерьёс. Отчы мыно олимпиадаосын, КВН-ёсын вормисе потэмъёс. Мукетъёсызлы путёвка сётӥське дунын. Лагерьын пиналъёс эшъясько ог- огенызы, вожатойёсын. Быдэс нуналъёсын соос ӵош - я дышетско, я кружоке мыно, я дискотека, "Огонёк" ортчыто. Ма, ваньзэ вераса но быдтод шат? Оглом вераса, лагерьын улон пӧзе. Котькудӥз сямен ужрад герӟаськемын кунгожсьӧр кылэз дышетонэн. Дышетскисьёс кино но учко, спектакль но пукто, кырӟан но кырӟало англи яке немец кылын. Лагерьын вань асьмелэн творческой мастерскоймы, эктонъя салонмы но пресс- центрмы. Озьы пиналъёслэн ватскыса улӥсь быгатонлыкъёссы котыр ласянь шараясько но пушъё. - Вожатойёстэк одӥг лагерь но ӧвӧл, дыр. Кинъёс со? - Ми дорын ужало УдГУ-ысь но ИжГТУ-ысь студентъёс. Дорамы кунояло кунгож сьӧрысь егитъёс но, туэ вуылӥзы Германиысь но Голландиысь. Немецъёс испан но итали кылъёсъя урокъёс нуизы, нош Голландиысь эшъёсмы наркотикъёс сярысь вераськизы. - Вера Николаевна, кызьы тӥ нырысетӥ леди луиды? - "Санта Лингваез" кылдытонлы трос кужымзэ но дырзэ сётӥз кузпалы, филологи наукаосъя кандидат Андрей Недобух. Кыкнамы но юн герӟаськемын бере, та огазеяськонэн пиналъёс асьсэ мылкыдъя Андрей Сергеевичез бырйизы президентэ, нош мон луи нырысетӥ леди. Милям вань премьер-министрмы но, сое пиналъёс быръё асьсэ пӧлысь. Премьер-министр луэ самой етӥзэз, шӧртчиез но визьмоез. Номыр пӧртэмез ӧвӧл бадӟым быръёнъёслэсь. - Тодэм потэ, кыӵе ке кусыпъёс возиськоды-а гуртысь школаосын? - Кемалась эшъяськиськом ни Селта школаен. Соос пыриськытэк уг кылё котькуд аре ортчись КВН-э. Озьы ик вуылӥзы ни бодьяос, пургаос, можгаос, балезиноос но мукетъёсыз. КВН-ын уг учко - тон городысь яке гуртысь дышетскись. Ворме визьмоез. Нош вормисьёс понна сётӥське лагере путёвка, дунтэм дунын. Гурт шклаосын вошъяськиськом дышетон материалъёсын, тодматскиськом ужан амалъёсынымы. Пӧртэм семинаръёс ортчизы ни Бодьялан но Можгалан. Кинлы ми кулэ луим, малпасько соос одно тыршозы шедьтыны милемды. Тодэме потӥз, зэмзэ-а та огазеяськонын мукетъёслэсь пӧртэмгес дышето? Ветлоно кариськи уроказы. Огшоры дышетӥсь но дышетскисьёс, огшоры урок... Ӧвӧл, дыр. Вань татын маке но пӧртэмез. Я магнитофонысь чузъяськись шулдыр кырӟан-а, я дышетӥсьлэн лякыт вазьылэмез-а, оло нош пиналъёслэн асьсэды огшоры воземзы-а мылкыдэз бурдъя, Гётэлэн но Конан Дойльлэн вордскем кылъёссы мусоесь потыны кутско. Оло нош утчано дышетскыса? Пель сьӧрын шуккисько: мӥссен, мусф, тау... Светлана Долганова, Удмурт кун университетын дышетскись. Маин вунонтэм таиз ар гожъяськись нылкышноосмы понна? Нош быдэсмиз одӥг малпанэ. Малпанъёстэк кызьы бен улыны? Котькыӵе выль ужрад, выль вамыш, выль пумиськон, мон сямен, лэсьтӥське, умойзэ малпаса, сётэ выль кужым, визь-кенеш, шумпотон. Луэ, вылды, куке куректон но, нош адями сотэк уз вала югдурез, улонэз. Туж умой ортчиз творческой ӝытэ - калыке но трос вал, чабисез но , ӟечкыласез но вал. Шаерамы соку гурлаз зарни сӥзьыл. Шыпыт сылӥзы зарниен шобыртэм кызьпуос. Бен кызьы-о таӵе дыре уд усьты сюлэмдэ? Кызьы уд кырӟа, уд вера кема люкаськем малпанъёстэ? Нош ваньзэ та ужрадме сӥё-дано ортчытыны юрттӥзы мыным калык артистка Фаина Ивановна Будина, баянист Вячеслав Степанович Леконцев, кырӟась Ольга Зорина, крезьгурчи Николай Уткин но мукетъёсыз. Тани Вячеслав Степанович ужа дышетӥсь луыса культурно-просветительной училищеын. Та востэм, ужез яратӥсь адями уг быгаты улыны, кыӵе ке удмурт ужрадэз адӟытэк, отчы пыриськытэк. Кӧня адямиослы со юрттӥз ини баянист интыын шудыса? Со уг быгаты "уг" шуыны, ас тазалыксэ чаклатэк но шудоно луылэ ӝытъёсын. Туж оскымон адями. Луысалзы ке уногес таӵе адямиосмы, удмурт культура ичигес чутысал. Тау шуэме потэ Удмурт шаерысь Нылкышно союзлы, ӧжытак ке но коньдон висъямез понна. Но туннэ югдур ведь коньдон бордын гинэ ӧвӧл, эшъёс. Асьмеос дугдӥмы ог- огмес адӟемысь, ог-огмылы шумпотэмысь, улӥськомы ас поннамы гинэ, кулакъёс сямен - сое мон али туж усто валай. Кыӵе сюлэмо адямиос пуко асьмелэн вылӥ радын? Соос, коньдонэн юрттыны быгатымтэзы сяна, тонэ кылэм-адӟем но уг каро, одӥг ӟеч кыл но верамзы уг поты. Калыке потэм тодмо адямиосмы но укыр "возьдаськисесь", ява. Соос огшоры адямилэн вечераз уг дырто, оло малпало, сиытэк-юытэк потод шуыса, оло ... кышкало данзэс ыштыны. Котьма ке но, таӵе секыт дыре мон быгатӥ ке ӧжыт ке но шунтыны адямилэсь сюлэмзэ - туж шудо шуо асме! Зоя Трухина, Ижысь механической заводын ужась. Маин вунонтэм-2 Ӟукыртыса-ӟукыртыса погыльскизы улон питранъёсы ӵук ӟардонысен шунды пуксё дорозь. Вуттӥзы соос монэ 60 аресозь. Трос-а со, ӧжыт-а? Трос ке шуисько, улыса ик ӧй вуы кадь потӥсько. Ӧжыт ке шуисько, вӧзам вамыштэ кузпалъяськем пие. Озьы бере, улӥськом, лэся, шуод ини. Со вал копакыз улон понна нюръяськон. Улон ваньмызлы уг дася вӧй вылтӥ ветлон сюрес. Кудӥзлы вань улытозяз чурыт изъёсты йыръёно, читыр- чутыр сюресъёсты шонертоно, меӵ ярдуръёсты нялмытгес кароно, бугыръяськись улон ӧрез зӥбломытоно луэ. Кошкиз-быриз пинал дауре. Лыз инметӥ лобӟись тылобурдо сямен, ноку берытсконтэмлы тӧдьы бус сьӧры ватӥськиз. Улонысьтым нуиз вань умойзэ но чеберзэ. Кельтӥз мыным курыт малпанъёссэ, мӧзмыт тодэ ваёнъёссэ но акылес висёнзэ. Шумпотӥсько-а меда та арлыдылы? Пичияк шумпотӥсько, тросгес жалясько. Шумпотӥсько, вордэм пиме инмар аслым ик будэтыны дыр сётӥз шуыса. 28 аресам угось секыт висьыны усьыса, улонэлы осконэ копак ышемын вал. Та котырес лыдпусэным валче гудырикошконлэн 14-тӥ нуналаз лыдӟись эшъёсыным пумиськон ортчытӥм. Трос калык ветлӥз сюлмысь сюлме вераськонэ.Вордӥськем Улӥнь Юриысьтым, Вуж Моньялась, Итэшысь. Гурт калыке шоры учкыса, сюлэмы пачылмемын вал шумпотонэн, кӧня ке дырлы бурдъёсы но кылдӥзы, кадь. Со дыре ик пызьыразы шумпотон синвуосы но. Сокем шулдыресь кырӟанъёс, ческытэсь пӧрамъёс, чебересь кузьымъёс, трос кырӟан-веранъёс ваиллям соос сьӧразы. Юриысьтым эшъёсы Г. Архиповлэн но Ашальчи Окилэн кылъёссыя шулдыр кырӟанъёссэс кузьмазы. Елена Афанасьева но Екатерина Тимофеева, арлыдзы шоры учкытэк, кисьтӥзы ук жингыр-жингыр гуръёссэс. Крезьгурчизы - Елена Афанасьевалэн Юра пиез. Нош итэшъёс аслам "Амалы ке луысал" кылбурея туж чебер кырӟан ваиллям. Крезьгурзэ гожтэм Д. Д. Алашеев. Трос шунытэсь, ӟырдытэсь ӟечкыланъёс веразы соку эшъёсы, колхозлэн тӧроез М. Н. Федоров., солэн кузпалыз Людмила Ильинична, Н. И. Ильин, В. С. Зорина. Тодэ ваёнъёс синвуаськытӥзы но, гор- гор серекъятӥзы но. Нош кылбурме лыдӟизы Вуж Моньялась кык нылъёс Света Яковлева но Лена Гагарина. Пайми соослэн быгатыса лыдӟемзылы. Юатэк но валамон: соосты дышето визьмо, кужмо но анай кылэз ӟеч тодӥсь дышетӥсьёс. Гуртысь сяна, дорамы трос гинэ городысь но сӥё-дано адямиос ветлӥзы. Соос пӧлын котькинлы тодмо Евгения Ивановна Плотникова. Солэсь аспӧртэм радиоверанзэ одӥг коркан но кылымтэез ӧвӧл, дыр. Ветлӥзы Милитина Гаврилова, Людмила Хрулева. Таоссэ но калык ӟеч тодэ. Радиоверанъя, кылбуръёсъя, "Берекет" сэрегъя. Озьы ик пӧламы вал удмурт писательмы, асьме ёрос пимы Кирилл Ломагин. Тужгес но паймымонэз вал городысь "Инвожо" ансамбль. Та ансамбле люкаськемын гуртысь кородэ кошкыса но дорзылэсь мӧзмыса улӥсьёс. Таосызлэн баянистсы М. П. Журавлев куинь кылбурме кырӟанлы пӧрмытэм. Одӥгез - "Али но син азям" кырӟанэ - тросэзлэсь синвузэс поттӥз. Тӥни сыӵеесь куноос вал огшоры гинэ удмурт кышномуртэн пумиськонын. Городысь куноосмы гуртысь калыклы бадӟым шумпотон ваизы. Малы ке шуоно, дас пол кылытозь, одӥг пол синмыныд, пе, адӟод. Кытысь но ку адӟысалзы соос вылӥ верам мусо нылкышноосты, та пумиськонэз "Маяк" газетмылэн удмурт люкетэныз кивалтӥсь З. Я. Титова но Вуж Монья школаысь дышетӥсь Н. Ф. Михайлова ӧй радъясалзы ке? Та жадёнэз валасьтэм нылкышноослы тау карисько но азьланяз но бадӟым сюлэмзы но задор мылкыдзы медаз кысы шуисько. Нэнэелэсь кулон азяз юай, тон шудо-а шуыса. Со шуиз: "Сарбаезъя - капкачез, улонэзъя - шудбурез". Котькыӵе секыт улонысь но, пе, шедьтоно шудо нуналъёссэ. Озьы бере, та пумиськон мынам улонам луоз самой шудоез нунал. Малы ке шуоно, сомында вал ӟеч калык, шумпотонэн тырмем чилясь синъёс, ас кылбуръёсыя кырӟанъёс. Со ӧвӧл-а бадӟым шудбур? Уг тодӥськы, кыӵе улон гожтэм инмар азьланяз мыным. Но гурт калыкелэн, Вуж Монья но Итэш куноосмылэн, Ижысь визьмо эшъёслэн, "зарни шепъёслэн" шунытэсь кылъёссы, ӟеч мылкыдзы мон понна ӟечен гинэ мед берытскозы. Мед быгатом на ӟечлы зечен вазиськыны, тодэм калыкме пичи ке но шумпоттыны. Мар ужасалыд оген йырын, котырак тонэ валась, гажась эшъёсыд ке ӧй луысалзы? Мӧйымись сюлэмыным тау карисько вордӥськем гурт калыкелы, сюдӥсь-вордӥсь бусыослы, узыё-борыё нюлэсъёслы, жильыртӥсь ошмес синъёслы, кудъёсыз ёзвиосты юнматӥзы но секыт война аръёсы кулонлэсь утизы. Буд но сяськаяськы, вордӥськем Улӥнь Юри гуртэ. Ноку медаз измы гурт калыкелэн ӟырдыт пӧсь сюлэмыз. Ноку медаз быры гуртазы будэтэм нылпиоссэс данъян, дунъян но гажан мылкыдзы. Вань ӟечсы понна инмар азьланяз но ӟеч тазалык, байлык но кужым мед сётоз. Эшшо тау карисько библиотекаын ужасьёслы, соостэк таӵе ужрад ӧй пӧрмысал. Васса ВАСИЛЬЕВА, Пичи Пурга черкогуртын улись. Нуналлэн тодметэз Туннэ Анналэн но Стефанлэн нуналзы. Вашкалаос чакламъя, писпуос пужмертэмын ке, ю- нянь удалтоз. Та вакытэ кионъёс уллёосы люкасько но тужгес кышкытэсь луо. Югыт нунал 6 час 56 минут кыстӥськоз. Та нуналэ... ар талэсь азьло 22 декабре вордскемез дырысен 105 ар тырме С. П. Барышниковлы (1893-1943), тодмо советской но партийной ужасьлы. Вордскиз Яр ёросысь Бармашур гуртын. Партилэн Удмурт обкомезлэн секретарез, РСФСР-ысь Наркомземлэн секретарез луыса ужаз. 1938 арын репрессиос улэ шедиз. Шонере поттэмын 1956 арын. 23 декабре 1918 арын Ижевскын усьтӥськиз 5-7 аресъем пиналъёслы нырысетӥез нылпи сад. 22 декабре 1936 арын кулӥз "Как закалялась сталь" романлэн авторез Николай Островский. Газетъёс уг, дыр, пӧяло Калык верамъя, Россиез визьмын уд вала. Тани Октябрьской революция бере трос черкъёсыз сузмытӥзы. Ижевскысь но Михайловской соборез быдэсак куашкатӥзы. Нош табере сое выльысь ӝутыны ӧдъязы. Александро-Невский соборез усьтэм бере, оло нош таӵе секыт улон дыръя выль черк лэсьтытэк но тырмысал кадь. Удмурт театрлы выль юрт лэсьтон сярысь вераськемысь дугдӥзы ук. Улон пумен уродме. Тани "Вузкарон" газетын верамын, кызьы КамАЗ-ёсын нуизы Чувашиысь, Башкириысь но Удмуртиысь картофкаез Волгоградэ. Картофказы удалтымтэен, ведразэ 20 манетэн вузаны ӧдъяллям. Нош асьме дорысь но вӧзысьтымы республикаосысь "кыкетӥ нянез" отчы ваем бере, ведра картофка 5-6 манетлы кулэсмиз, нош Ижевскын тамындалы ик йылӥз. Кивалтӥсьёс оскытыны выро, вӧез мукет интые ум келяське шуыса. Мон паймыса лыдӟи туэ 3 декабре поттэм "АиФ"-ысь Екатеринбургын асьме дорын поттэм вӧез 50 манетэн килограммзэ вузамзы сярысь. Нош Металлург городокысь 21 номеро гастрономын сокугес ик Воткинскысь ваем скал вӧез килограммзэ 68 манетэн вузазы ни. Озьы ик басьяськисьёс паймо, малы кӧня ке магазинъёсын сакыр песокез килограммзэ 12 манетэн вузаны кутскизы. Ведь газетъёсын гожъяло, песок складъёсын трос люкаськиз шуыса. Нош вузкарисьёс солэсь дунзэ ялан будэто. Октябрь районысь 14 номеро магазинын усьтэмын ожысь но ужысь ветеранъёслэн отделзы. Отчы но кемалась ӧз вайылэ ини дунтэм песок. В. СТЕПАНОВ. Ужзы - данъяськымон Алнаш районын кыксэ но та адямиосты умой тодо: огез нылпи будэтэ, мукетыз - ю-нянь кизе-утялтэ. Кыксылэн но ужзы - калык син шоры йӧтымон, данъяськымон. Соин но соос ӧтемын вал республикамылэн нуналэзлы сӥзем празднике. Лидия Антоновна Петрова 28-тӥ арзэ ужа Алнашысь нылпи юртын воспитательница луыса. Та вакытэ ог 70 нылъёс но пиос понна со анай но, атай но. Кызьы-о мукет сямен дунъялод на быръем удыссэ? Ваньмыз соос Лидия Антоновналы аслаз кадь пото, сюлэм шунытсэ но котькудӥзлы огкадь тырмытэ. Кирилл Михайлович Лаптев - та районысь ик "Родина" колхозысь огез устоез механизатор. Пичи дыръяз со кылбур гожъяменыз, суредаськыны быгатэменыз паймытъялляз, пуэз вӧлыса, шудон но пӧрмытъяз. Нош бадӟымгес будыса, мылкыдыз техника борды кыстӥськыны ӧдъяз. Оскизы К-700 тракторез. Со дырысен дасо арлэсь ятыр ортчиз ни, нош кузёез "корт эшеныз" люкиськон сярысь уг но малпа. "Таӵе адямиос вылын быдэс колхоз возиське", - шуо "Родинаысь" специалистъёс, усто ужасыёсынызы данъяськыса. Ватсалом на: колхоз гинэ уг - быдэс шаермы, быдэс странамы. Жаль, кивалтӥсьёсмы малы ке но со сярысь бадӟым праздникъёсы гинэ тодазы ваё. Л. ДМИТРИЕВА, А. МИХАЙЛОВ. Туспуктэмез В. КАМАШЕВЛЭН. Уваос иворто Тырмоз-а кужымзы? Ёросысь "Свобода" эштосын туэ 72 сюрс 743 центнер ю тысь люказы, яке гектарлы быдэ шорлыдын 18 но ӝыны центнер. Сыӵе азинскон басьтэмын юосты дыраз но вазь кизьыса, соин ӵош огдыре минерал сылалъёс ватсаса, музъем ужан культураез юн чакласа. Озьы ик дыраз кутэмын жуг-жагез химической амалэн быдтон, будыны юрттӥсь "симбионт" препарат сётон. Ноку вылымтэ урожай сётӥз туэ "Улов" сезьы, удалтӥз сьӧдчабей но. Бусыослэсь удалтонлыксэс будэтыны луысал на. Но коньдон тырмымтэен, лудъёсы кыед уг поттӥськы. Со туж дуно усе. Уксё ӧвӧл минерал удобрение басьтыны но. Сырзэс нимазы "Фермерский" Ӟеч тырше туэ "Ува-молоко" акционер огазеяськонлэн коллективез. Сиён-юон поттон туэ 10 процентлы йылӥз. Кылем арын сярысь кык поллы трос поттэмын нӧкы вӧй. Соин ӵош ик выль пумо продукция но поттыны сюлмасько. Басьяськисьлы кельшиз "Фермерский" сыр. Со дыре ик ӧз кулэсмы "Адыгейский" пумозэ поттон. Умой мыно "Угличская плетёнка" сиён но ческыт сыр пилетъёс. Москваын туэ "Россиысь сиён-юон-98" выставка ортчиз. Отчы пыриськизы уваос но. Соослы сётэмын данъян диплом. Уногес кирпич шукко Котькытын сямен ик "Увинский кирпичный завод" акционер огазеяськонын но выль оборудование басьтыны уг быгато ни. Шуг-секытысь потон понна, татын уже кутыны кутскизы выль технологиосты, юнматӥзы ужан дисциплинаез. Азьвыл аръёсы, шуом, дас толэзьскын 4-5 сюрс кирпич шукко ке вал, табере со лыдпус 8 сюрсозь вуиз. Уваын - "Арбат" Бен, Ува - со Москва ӧвӧл. Ӧвӧл баръёс, ресторанъёс, театръёс, выставкаос. Но та нуналъёсы посёлокын сыӵе нимын эштос кылдӥз. Со выроз вузкарон ужен, калыклы услугаос сётонэн. Туала дэмчи Кыйлудысь культура юртын ужасьёс аспӧртэмлыко ужрад ортчытыны кенешизы. Кызьысен ньыльдон аресозь огназы улӥсь нылкышноос но воргоронъёс понна табере ортчылозы нимысьтыз ӝытъёс. Оло, соос егитъёсты ӝоггес огазеяны юрттозы? Пӧйшуръёс сярысь сюлмаськыса Толалтэ капчи ӧвӧл кыр пӧйшуръёслы но тылобурдоослы. Тужгес но курадӟо кыр парсьёс (кабанъёс). Соослы та вакытэ юрттэт сёто егерьёс. Со понна дасямын нимысьтыз сюдон интыос. Соос вань ини Ува-Тукля, Северной, Областновской лесничествоосын. Сюдыны висъяське фураж, кылем-мылем ю тысь, картофка. Н. СЕРГЕЕВ. Лыдӟись вера малпанзэ Сыӵеослы коньдон гинэ кулэ.. Ожысь но ужысь ветеранлэсь В. Михайловлэсь "Малы кушетскизы "кырныжъёс"?" гожтэмзэ-малпаськонзэ лыдӟыса вазиськытэк ӧй чида. Автор зол возьматэ Россиын кылдэм югдурез. Басьтом таӵе кылъёссэ гинэ: "Оло, соос та секыт вакытэ странамылы, Е. М. Примаковлэн правительствоезлы юрттыны тыршо ӟеч визь-кенеш дэмланъёсын? Чик но ӧвӧл. Сыӵеослэн малпанъёссы чылкак мукет: кызьы утёно ки улысьтызы гылӟись властез, государстволэсь лушкам ваньбурзэс. Соос валаны кутско: калык табере адӟе ини, кытчы вуттӥз демократъёслэн реформа шуонзы, вуоно быръёнъёсын соослы оскись уз луы ни. Соин ик юлтошъёс шуэрскизы, олокыӵе но амалъёс утчаны кутскизы, коммунистъёс но соослы дурбасьтӥсьёс вылэ урдскылон, соосты ултӥян, вань урод ужзэс соос вылэ погыльтон понна". Та кылъёсын мон быдэсак соглаш. Кӧня ке аслэсьтым но малпанъёсме вераме потэ на вылэм. Кивалтӥсьёс кунмес кризисысь поттон сюресъёс уг утчало, власть понна гинэ нюръясько, ужамзы синпӧетлы пӧрме. Тужгес но паймоно соизлы: Президентмылэн кивалтыны нокыӵе кужмыз, тазалыкез ӧвӧл ни, нош котыраз ялан юрттӥсьёссэ вошъя на. "Удмуртская правда" газет но нырысетӥ бамаз (9 декабре) меӵак юан пуктӥз: "Кинэн ожмаське президент?" Солэсь больницаысь Кремле вуылэмзэ югдурез валась адямиос лэчыт дунъязы: Ельцин, пе, нош возьматӥз, "кин бадӟым юртын кузё". Адӟиське, пукон интыысьтыз кошкыны чик уг малпа. Россиысь ужась калык кемалась адӟиз ини, "бадӟым кузё" калыкеныз ожмаське шуыса. Туж вӧсь кариз со ужаса улӥсьёсты, 1992-тӥ ар кутскыку, дунъёсты ас эрказ лэзён сярысь указ вылэ гожтӥськыса. Капитал дуннее (со шуэмъя, рыноке) сюрес усьтыса, трос миллион адямиосты коньдонтэк, пыраклы ёрмыса улонэ кельтӥз, узырлыкез отӥяз нуналысь нуналэ киултылӥзы "зӧк кӧтъёс" гинэ. Тани туэ нош ик 17 августысен сыӵе ик югдур - калык ваньбурез нуназе куазен талан мынэ. Ужась адямиосты быронэ вуттӥсь политика понна куке но кин ке кыл кутоз меда? Кивалтӥсьёсмы тодытэк уг уло ук, кытчы нуо соослэн калыклы пумит луись ужрадъёссы. Выль премьермы Е. М. Примаков шара вераз: калык Правительстволы оскемысь дугдэ, со осконэз берыктон понна зол нюръяськоно. Кызьы меда осконзэ берыктоз на калык, Россиен ялан кивалтӥз на ке ассэ эксэен лыдъясь, кужымтэм но висись Президент? Со котырын бергась ляльчиосызлы, осконо муртъёсызлы ужась муртлэн курадӟонъёсыз нокыӵе но уг пото, вань супыльтонъёссы чеберъяськон гинэ. Басьтом Ельцинлэсь тужгес матысь юрттӥсьсэ, кудӥз ваньмызлы акыльтӥз ини. Со - "ӟуч приватизацилэн атаез" А. Чубайс. Солэн "туж визьмо тыршеменыз" ик кунмы кужымтэм но, ваньбуртэм но кыле ини. Нош вылӥ кузёос пыдес йылазы сыло шунды пуксён палась кузёос но Дуннеысь валютая фонд азьын. Чубайс "Комсомольская правда" газетлы сётэм интервьюын пал кылын но уг возьматы калыклэн улон-вылонэз сярысь сюлмаськемзэ, кулэ луись вузъёс поттон, производствоез азинтон, ужлы ёрмонэз быдтон солы кулэ ӧвӧл, шӧдске. Со кадь политикъёс дышиллям ини шунды пуксён палась капиталистъёс но МВФ шоры йыбыртъяса улыны. Чубайсъёс Россилэсь экономиказэ куашкатыны туж умой быгатӥзы, со вакытэ ужлы ёрмисьёс уката трослы йылӥзы. Али со Примаковлэн кабинетэзлы визь-кенешъёс сётыны, пыкылонъёс вераны турттэ, озьы бере, ачиз правительствоысь потыса но, Президентлэн но Правительстволэн ужъёсазы пыриське. Калык ваньбурез люкылон Чубайслы кельшиз. Солэн нокыӵе возьытэз ӧвӧл, трос миллион адямиосты пилиськем тусь дуре кельтӥз шуыса. Трос вераськонъёс мыно асьме шаерын но ваньбур вузан ортчем сярысь. Сотэк кызьы луоз? Адӟиськом, кылӥськом ук, кин кие шедиз ваньбур. Нош заводъёсысь рабочийёс уждун басьтытэк уло. Газетысь алигес лыдӟим ук Правительстволэн Тӧроезлэн воштӥсезлэсь Ваньбуръя кун комитетлэн кивалтӥсезлэсь Сергей Касихинлэсь журналистъёслы мадемзэ. Асьме шаерын та ужен сокем ӧз дыртэ шуыса, Чубайс Москваысь гожтэт но ыстэм, Касихинэз ужысь куштыны ӵектыса. ("Кытын бугорлэн пумыз?" статья потӥз 10-тӥ декабре.) Чубайс эшшо но вылӥ пукон вылэ пуксён сярысь ялан оске. Калыклэсь адӟемпотостэм каремзэ уг тоды, лэся. Янгышъёс, преступлениос понна со ассэ янгыш уг кары, котьку сямен ик, коммунистъёс яке мукетъёс вылэ куштэ. Аслэсьтыз вукозэ ялан изэ но изэ. Россилэн экономикаез сое уг сюлэмшугъяськыты, ужтэк кылемъёс, уждунзэс басьтытэк улӥсьёс, сютэмъёс солы нокыӵе уг пото. Л. ФЕДОРОВ, Ижын улӥсь. Ӵошатскизы егитъёс Кияса ёрослэн администрациез пудоосты толйытон вакытлы егитъёс пӧлын ӵошатскон ялӥз. Отчы пыриськозы 30 аресозь пудо утисьёс. Егит скал кыскисьёс пӧлын куинь классэн интыос тупатӥсько, кӧня йӧл поттэмез лыдэ басьтыса. Сыӵе ик куронъёс пуктӥськозы пудо сюдӥсьёс азе но. Вормисьёслэн нимзы тодмо луоз, пудоез толйытон йылпумъяськем бере. Устоосызлы сётӥськозы коньдон премиос. Ӵошатсконъя комиссие пыртэмын ёросысь егитъёсын ужанъя комитет, газетлэн редакциез, гурт ужъёсъя управление но ветеринарияя служба. С. ФИЛИМОНОВ. ШУНДЫ ШАРА ВЕРАСЬКОН Мынам эшъёсы туж ӧжыт. Одӥгез матысь эше монэ адямиен но уг лыдъя. Нош аслыз мар ке кулэ ке, соку ик бордам пыриськыны кутске, уката ик гуртэ ужъёсыз лэсьтымтэ ке. Мукет дыръя со монэ уг но адӟы кадь, эшъяське классысьтымы мукет етӥз нылъёсын. Эшъёстэк мыным туж мӧзмыт. Кызьы ке но луоз-а та югдурысь потыны? Оля, 15 арес. Матысь эшед тонэ адямиен уг лыдъя, малы ке шуоно, тон ачид но озьы малпаськод. Но со малпанэд тынад пыдло, йырвизьмад гинэ ватӥскьемын, со сярысь тон ачид но валаса уд вуттӥськы, соин ик астэ эшедлы ултӥяны сётӥськод. Тыныд ас бордад ужано, малпанъёстэ, ас шорад учкондэ воштоно. Тодад возь одӥгзэ - улонын асьмеос пумиськиськом малпанъёсмылэн вужеренызы. Тынад учырад со вужер выллем луэ тынад эшед. Кытын ке но тон пушкын пуке астэ ултӥян, аслыд оскымтэ малпан, ӟеч эшъёс тон понна - ӧвӧл ни кадь. Та югдурысь потыны туж огшоры амал вань. Ас поннад малпа мылкыддэ юнматӥсь кыӵе ке но веран. Кылсярысь: "Мон асме ачим гажасько, эшъёсы но монэ гажалозы". Быдэс толэзь ӵоже нуналаз сю пол тазьы вера. Соку та малпан тынад йырвизяд но пыӵалоз. Кӧня ке дыр ортчыса, тон воштӥськыны кутскод - малпанъёсыд но, улон шоры учконэд но. Туж осконтэм кадь, но пайдаез шӧдскымон. Воштӥськид ке, улон но воштӥськоз,эшъёсыд но луозы. Л. НЕСТЕРОВА, психолог. "Шунды" дэменлыкысь иворъёс 10 толсуре ортчиз "Шунды" дэменлыклэн правлениезлэн кенешез. Таиз пумиськон сӥземын вал 1999-тӥ арын толшоре-южтолэзе быдэстоно ужпумъёслы. Кутскемын луоз "Шундыкар" лагерьлэсь ужзэ радъян борды. Лагерьын шутэтскыны шаерысьтымы усточиосты туэ но оштолэзе ялэм конкурсъя быръёзы. Татьянаослэн нуналзылы сӥзьыса, егитъёслы шутэтскон ӝыт ортчоз. Тулыспалэ пумиськозы пӧртэм республикаосысь егитъёс. Оштолэзе правление малпа ужась егитъёсын пумиськыны. Ужасьёслы ӵектэмын луоз асьсэ дорын дэменлыклэсь ёззэ кылдытыны. Озьы ик правление туэ выль программа дасян бордын ужа. Ӝоген школаосысь дышетскисьёс но "Шунды" дэменлыклэсь ёззэ кылдытыны быгатозы. *** Алигес дэменлыклэн правленияз быръемъёс пумиськылӥзы Завьялово ёрослэн Юбилейной школаяз. Пумиськонэ ӧтьылӥз школаысь шутэтсконэз радъясь завуч С. Д. Майданович. 40 пинал тодматскиз "Шундылэн" ужаменыз но улэменыз, юанъёс сётъязы. *** 59-тӥ школа дораз ӧтчалляз Ижысь пӧртэм кылын вераськись егитъёслэсь дэменлыкъёссэс. Отчы вуылӥзы бигеръёслэн "Иман", еврейёслэн, немецъёслэн огазеяськонъёсазы быремъёс но одӥг латиноамериканец. Пиналъёслы тунсыко потӥз пӧртэм калыкъёсты кылзыны. Куноосты нимаз классъёсы но ӧтчаллязы. А. АЙМАНОВА. Шунды Ижысь гурт хозяйствоя академиысь студентъёс пӧлын тросэз удмуртъёс. Уноез соос гуртысьтызы шор ёзо школаез медален йылпумъямын. Пӧлысьтызы одӥгез - Алнаш районысь Туймыйыл гуртысь Юрий КУЗНЕЦОВ. Соин ӵош та школаысь эшшо вить пинал медаль басьтӥз со аре. Табере ваньзы сямен тодон-валанъёссэс будэто вылӥ дышетскон заведениосын. Ӵем дыръя кунгож кылэз дышетонэз школаосын мултэсгес каремзы потэ. Нош Юра ноку озьы ӧз малпалля, немец кылэз но вить чиньызэ кадь тодӥз. Оло, самой со ик юрттӥз пияшлы гужем Германие вуылыны. Отын Гурт хозяйствоя академиысь устоосыз студентъёс практиказэс ортчизы. Туспуктэмез В. КАМАШЕВЛЭН. ШУНДЫ Шур кузя - Англие Великобританилэн Москваысь посольствоез Россиысь инкуазез утёнэн герӟаськем огазеяськонъёс пӧлын ялӥз вал конкурс. "Котырысь инкуазез утён но чылкытатон" - озьы нимаськиз со. Конкурсын вормисе потӥзы шаерысьтымы дышетскись пиналъёслэн "Родники" но "Зелёнка" огазеяськонъёссы. Инкуазез утись отрядъёс ужазы республикаысьтымы шуръёсты чылкытатонын, писпуос мерттӥзы, нюлэсъёсты жуг-жаглэсь сузязы. Тужгес но бадӟым уж лэсьтэмын Ижевскысь Подборенка но Карлутка шуръёсты чылкытатонын. Ваньмыз со вылӥ дунъямын вал конкурсэз радъясьёсын. Ижевскысь пинал экологъёслэн тыршемзы пусъемын кузьымъёсын но Англие мыныны путёвкаосын. Шаерысьтымы пиналъёс тодматскозы кунгож сьӧрысь инкуазез утись огазеяськонъёслэн ужъёсынызы, асьсэлэн ужан амалъёссы сярысь мадёзы. Л. КИМОВА. Шунды Покчи ужбергатӥсь Котькуд адями улонзэ ас сяменыз ортчытыны выре. Кин ке дасез вылтӥ, пар валъёсын выллем, азьлане гинэ ворттысал, кин ке вань быдэстоно ужзэ ачизъя радъясал. Школаосын дышетскисьёс пичиысен ик азьлань сюрессы сярысь малпасько. Алнаш районысь Туймыйыл гуртысь Алёша Зотов 6-тӥ классын гинэ дышетске али. Озьы ке но, пияшлэн лэсьтыны быгатымтэ ужъёсыз ӧвӧл ни, дыр. Пичиысен ик анай-атаез солы ужан мылкыд пыӵатӥзы. Уго Зотовъёслэн асьсэлэн музъемзы, трактор-машиназы, валъёссы но мукет гурт пудозы вань. Туймыйылысь фермеръёс пӧлысь соос нырысетӥосыз луо. Туэ гужем тани бадӟым сюрес дурысь бырон калэ вуэм Шаршади гуртэ пуктӥськыны кутскизы. Анай-атаез вазь ӵукнаысен бер ӝытозь лэсьтӥськонын бергазы, соослэсь бере ӧз кыльы Алёша но. Гужем вылтӥ пияш эшшо но будӥз, кыдаз кадь. Табере со зэмос воргорон чотын, юртъер котырысьтызы вань ужзэс огназ быдэсъяны быгатэ ни. Пудо но сюдэ, скал но кыске, сиён но пӧзьтэ, нош сӥзьылысен нянь но пыжыны дышиз. Соберегес ик анаез Эмма Ивановна висьыны усиз. Ма меда ужасалзы Зотовъёс, нянь пыжисьсы ӧй луысал ке? Огпол школаын дышетскись пиналъёсын президент сярысь вераськон мытӥм. Ма но ӧз сӥзе соку покчи кивалтӥсьёс, нош Алёша мур-мур малпаськиз но вераз: - Ваньмызлы дыраз уждун сётысал, улонэз капчиёмытысал. Со сяна, ваньмызлы инкуазез гажан мылкыд пыӵатысал. Улон котькинлы огпол сётӥське, соин ик сое шулдыр интыын чылкыт омырын ортчытоно вылэм... Шӧдӥське, будӥз ке Алёша омырез ӵыжаса уз ветлы, нош аръёс ортчемъя, зэмос ужбергатӥсь луоз. В. КУТУЗОВА. ШУНДЫ НОШ ТӤЛЯД КЫЗЬЫ? "Тау, уг" Милям школаямы ужа бадӟым классъёсын дышетскисьёслэн кенешсы. Солэн ӵектэмезъя ик вань сизьыметӥ но тямысэтӥ классьёс коммунаръёслэсь сборзэс ортчытыны вераськизы. Люкиськимы куинь отрядлы. Вожатойёсын ӵош котькудӥз малпаз аслыз ним. Нырысетӥ люкаськонмылы дасямы наркотикъёсты, юонэз, тамак кысконэз но мукет урод сямъёсты возьматӥсь сценкаос. "Тау, уг", озьы нимамын вал ужрадмылэн огъя пуштросэз. Милям куинетӥ отрядмылэн сценкаез тужгес но тумошоез, син шоры йӧтымонэз вал. Ымныръёсмы лызэн-вожен буямын, ымамы бумагалэсь сигаретъёс, киосамы вуэн бутылкаос. Палэнысен учкыса, туж ик чебер уг адӟиськы таӵе суред. Зэмзэ но, кин ке со но, оло, тамак кыскыны ӵектэмзылы азьланяз тау, уг шуоз. Со сяна, та люкаськонын ми пӧртэм шудонъёсын шудӥм, дорысьтымы ваем сиёенъёсын чай юим. А. Касаткина, Ижевскысь 53 номеро школаысь 7-тӥ классын дышетскись. "Пӧзись ошмес" Уддяди (Карамас-Пельга) гуртын Удмурт культурая дэменлык ортчытӥз покчиос пӧлын ӵошатскон-конкурс. Угось ваньмызлы адӟем карымон ужа та гуртысь "Чингыли" нылпи сад, отын, вань сюлэмзэ сётыса, дас ар тырше ни воспитательница Надежда Ивановна Тукаева. Ар талэсь азьвыл со пыриськиз "Удмурт кенешлэн" бадӟым ӧтчамаз. Та детсадын ик коньывуон толэзьлэн пумаз ортчиз ёросысь воспитательёслэн дышетсконзы. Ваньмызлы кельшиз "Чингылилэн" ужамез. "Чингылиын" тыршисьёс ужрадэз нималлям "Пӧзись ошмес". Ӵошатсконэз кутскизы Уддядиысь ик культура юртын ужась Г. Собинов но воспитательница Н. И. Тукаева. Сцена вылэ пото букоен чингылиен. Татчы вуизы на Колошурысь нылпиос, нош Сальяос ӧз быгатэ (транспорт ӧвӧлэн). Люкаськемъёс тодматскизы Уддядилэн кылдэмез сярысь легендаен. Культура юртлэн сцена вылаз огез бӧрсьы мукетыз пото удмурт дӥсен муспотон нылпиос. Жюрилы - дышетӥсьлы Р. В. Мазитовалы, Киясаысь "Ашальчиен" чеберлыкъя кивалтӥсьлы Л. А. Овчинниковалы, бигер но ӟуч дэменлыкъёслэн тӧроссылы Г. М. Гатаулиналы но А. И. Коробейниковалы, ёрос кивалтӥсьлэн воштӥсезлы Т. Е. Васильевалы капчи ӧй вал, малы ке шуоно, ваньмыз туж быгатыса, чебер кырӟазы покчиос. Учкисьёс зол кичабонъёсын пумитазы куинь аресъем Оля Кадроваез. Со жингрес куараеныз кырӟаз "Ӟолгыри" кырӟанэз. "Чингылиын" ужасьёс кылдытӥллям фольклор ансамбль но. Вашкала куэм дэремъёсын кырӟазы но веразы соос. Колошурысь покчиослэн быгатонзылы но, эсьма, паймымтэос ик ӧй вал, соосын кивалтэ воспитательница Е. И. Никонова. Кузпалэз Герман арганэн шудӥз. Конкурс йылпумъяськем бере, ёрос дэменлыклэн кивалтӥсез Н. В. Пахомова покчиослы кузьмаз мунёос но мукет кузьымъёс. Нош Удмурт радиоысь корреспондент Н. Степанова "Шундылэн" нимыныз сётӥз нылпиослы книгаос. Лыктэмъёсты куноязы, "Ленинец" эштослэн юрттэменыз. Мылкыд карисьёс тодматскизы на удмурт дэменлыклэн ужан амалъёсыныз. Вашкала сямъёсын тодматыны кулэ пичиысен - огкылэ вуизы соос. Н. МОРЯКОВ. ШУНДЫ "КЫКЕТӤ ДОР КОНКУРСЭ" Палэнын улон, кыӵе меда тон? Али кадь тодӥсько на нырысетӥ классэ мынэмме.. Одӥгез киы анайлэн кияз, мукетаз - бадӟым сяська керттэт, тыбырам сумка ошемын. Анаелэсь палэнскыны но кышкасько, бордаз юн возиськисько. Но... аръёс ортчо. Школа борддоръёсын люкиськон дыр вуэ. Ӧс сьӧрын возьма мукетыз улон. Кыӵе меда со? Мар монэ вите азьпалан? Трос пӧртэм юанъёс бергало йырын, нокудӥзлы но валэктон сётыны уг быгатӥськы. Табере анай, китӥм кутыса, азьпала уз валты ни, кызьы но ма карыны уз вера. Мон огнам. Нырысьсэ университетэ лыктэм берам, таӵе малпанъёс туж ӵем йырам вуылӥзы. Сюлмы ик шымырскиз кадь. Дышетскыны пыри шуыса шумпотыны гинэ кулэ. Нош мар та таӵе? Сюлэм валаз, шӧдске, гуртлэсь кыдёкын луэмме. Карын мӧзмыт потӥз. Ӝытазе эшъёсын шудон пӧлы уд поты, анай-атаен уд кенешы. Укное мычиськиськод но, яратоно льӧмпуад уӵылэсь кырӟамзэ кылзэм интые, пумтэм машина куараосты кылӥськод. Туж мӧзмыт эшъёсытэк, и выльёсыз трос ӧвӧл ай. Озьы ке но, группаысьтымы удмурт нылпосын ӝог эшъяським. Ваньмыз сямен ик соос огъяулонние интыяськемын. Ачим ӵыжы-выжыосы дорын улӥсько бере, тодэме потӥз эшъёсылэсь улэм-вылэмзэс. Юай, яра-а соослы улыны. Таӵе валэктонъёс сётӥзы: Света: - Секыт потэ татын улыны. Гуртлэсь мӧзмисько. Арнялы быдэ бертылыны уг быгатӥськы, но азьланяз дышо, дыр, ай, малпасько, карын улонлы но. Нырысь-валысь гинэ гуртэлэсь, эшъёсылэсь, ӵыжы-выжыосылэсь мӧзмисько. Оскисько, отӥяз ваньмыз радъяськоз шуыса. Оля: - Крезьгур зол шудэмен, гуртэ сётэм ужъёсты лэсьтыны шуг. Дышетскисьёс ӧжытак ке но мукетъёсыз сярысь мед малпалозы вылэм. Катя: - Ваньмыз умой кадь, но бордамы улӥсьёсын ӧз удалты. Бадӟым курсъёсын дышетскеменызы-а, мар-а, милемлы эшеным йыр луыны выро, пыкыло. Лена: - Гуртлэсь мӧзмисько. Но бордам эшъёсы умоесь, соосын шулдыр. Эшъёсын мӧзмон но вунэ. Пиос таӵегес валэктон сётӥзы: - Ой, туж кельше! Анай-атайлэсь кыдёкын, кызьы-мар карыны уг верало, уг тышкасько. Ма, собере, котырын сомында чебер нылъёс ук! Вунэтыны, конечно, кулэ ӧвӧл дышетскон сярысь но. Урод дышетскид ке - ӟеч луэ, чебер нылъёс но, вылӥ образование но. Дышетскон арлэн кутсконэз тӥни сыӵе малпанъёс кельтӥз. Ӵыжы-выжыосы дорын ке но улӥсько, мон но туж мӧзмисько. Но дыр ортчемъя, ваньмы дышом ай, малпасько. Котырысь улонэз но адӟоно, вылад шӧдоно ук. Со понна ик со улон. Лариса Якунина, Удмурт кун университетын дышетскись. - Парсь вузалод - узырмод Туала вакытэ гуртын улӥсь улэп коньдон поттыны быгатэ на сӥльзэ-вӧйзэ, бакча сиёнзэ вузаса гинэ. Соин ик берло дыре пудо вордыны мылкыд карисьёслэн лыдзы ялан будэ. Та вакытэ Алнаш ёросын парсь вордо дас куать хозяйствоын. Та удыс изъян ке но вае, солэсь уг куштӥсько. Тани, кылсярысь, "Молодая гвардия" эштосын мумы парсьёсты вордо гуртоос понна гинэ. Куд-ог семья 5-6 йыр парсь будэтэ. Туэ укмыс толэзьскын гинэ хозяйство сюрслэсь уно парсьпи вузаз. Та ужлы озьы ик саклык висъяло "Кизили", Ильич нимо, "1 Май" колхозъёсын. Туэ ёросысь хозяйствоосын калыклы 6 сюрслэсь уно парсьпи вузамын. Н. ЯКОВЛЕВ. Пургалась куасэн бызьылӥсьёс ӟеч тодо Тихоновъёслэсь семьязэс. Валерий Иванович но Галина Семеновна таза улон понна нюръясько, пӧртэм ӵошатсконъёсы пыриськыло. Мумы- бубыоссылэсь бере кылемзы уг поты Владик пизылэн но Анжела нылзылэн. Туспуктэмез Г. ЮСАЕВЛЭН. Ӧтён Ожысь но ужысь ветеранъёслэн Ижевскысь кенешсы ӧте "Ветеран" клублэн ужаз пыриськыны. Со ортчоз Кун филармонилэн Бадӟым залаз 1998 арын 23 декабре (Пушкинской урам, 245-тӥ юрт). Кутскоз 11.00 часын. Пумиськонэ ӧтемын Кун Думалэн но Кун Кенешлэн депутатъёссы. Ветеранъёслы возьматэмын луоз концерт. Лыктыны быгато вань мылкыд карисьёс. Энергетикъёслэн нуналзы азьын Матысь нуналъёсы асьсэлэсь нуналзэс пусъёзы энергетикъёс. Праздникен валче Ижевскысь 2-тӥ ТЭЦ кыкетӥ арзэ ни шахматэн шудонъя ӵошатскон радъя. Таяз учыре нюръяськизы Ижевскысь, Чайковскийысь, Воткинскысь, Сарапулысь но Грахово черкогуртысь спортсменъёс. Кылем арын сямен ик нырысетӥ интыез утӥз "Удмуртэнерго" акционер огазеяськонысь дышетонъя мастер, спортъя мастере кандидат Виталий Акименко (9 луоноез пӧлысь 8,5 очко люказ). Солэсь ӝыны очколы бере кылиз 1-тӥ ТЭЦ-ысь машинист Александр Кузнецов. Куинетӥ интыез басьтӥз Воткинскысь электросетьын ужась Владимир Глухов. И. ВЕЛЬТМАНДЕР. ШУНДЫ "КЫКЕТӤ ДОР" КОНКУРСЭ Туннэ - "промокашка", ӵуказе нош кин? Котьку но синмськыса, юн вожъяськыса учкылӥ вузын дышетскисьёс шоры. Табере мон ачим студентка. Нош кытын уло студентъёс? Зэм, тросэз общежитиын, яке студентлэн кылыныз вераса - общагаын. Университет но соос понна универ луиз, нош преподаватель - препод. Студент луон - со, пе, улонысь самой шулдырез вакыт. Шулдырез нош - огъяулонни, дыр, угось тросэзлы егитъёс дышо татын: сиён дасян но дӥсь миськон бордысен зын ву юон но тамак кыскон дорозь. Тунсыко, малы меда одно ик та юртын? Нырысь ик, вӧзын ӧвӧл ини анай но атай. Озьыен, ӧвӧл эскерись. Тон, студент, лоба котькызьы но котькытчы, бурдъёстэ гинэ эн чигты. Гуртысь лэзё уксё: "Дышетскы, пие, дышетскы, нылы, ми кызьы ке тырмытом..." Тодмо гур. Нош городын уксё чиньы пыртӥ виясь ву сямен кошке. Туннэ со вань, ӵуказе (мар карод?) ӧвӧл. Уксё бордысен ик кутске ваньмыз мукетыз но. Пиос понна со дедовщина шуон. Кылсярысь, куинетӥ курсысь студент тазьы малпа: - Мар ай таӵе ныр улын бичатэ? Ага, туннэ мон одӥг параме но ӧй кельты. Пусъёно. Нош кисыын тӧл шула. Мар понна нырысетӥ курсын дышетскись? Дас сизьым аресъем куанер студентэз бер уин (ма, ку мыл потэ) косо басьтыны вина. Одӥг пол озьы вае, кыкетӥзэ, куинетӥзэ... Нош кыкетӥ курсын егит пияш ачиз но со амалэн ик ньылонзэ коттоз. Кыӵе дышетскон на татын? Кӧт тырыса вуиз ке, ярам. Озьыен, выжиськом сиён пӧран интые. Син азяды пуктэ куинь яке ньыль комфоркаен, пыжиськон корттэм, ӝуасьтэм лампочкаосын электроплитаез, кудаз сиён пӧраны кулэ дас куинь комнатаын улӥсьёслы - ог ньыльдон адямилы. Бен таиз но чидантэм ӧвӧл ай, улон ваньмызлы дышетэ: гуртысь пичи плитка ваид ке, уйшорозь сиён уд пӧра. Пӧраськон вӧзын вань на эшшо одӥг висъет: азьло со вылэм дӥсь миськон инты, нош али - тамак кыскон. Ишкалтэм кранэн кырыжмем раковина сяна, татын номыриз ӧвӧл ини. Мар бен куректонэз, куашкам экономикаен государствоын общежитиос гинэ куашкамын ӧвӧл ни. Озьы ке но, та юртъёсын адямиос уло ук! Котькудӥзлэн аслаз малпанъёсыз, сямъёсыз, адӟонъёсыз. Но адямилы оген улыны кылдымтэ: комнатае интыяло кыкен, куинен, ньылен. Тужгес но бадӟымез шугъяськон - ог-огеныд тупан, эшедлы оскон. Ӵем дыръя ӵош улӥсьёс куспазы уг тэро. Татысен кутске ог-огед вылэ чӧлтӥськон. "Со выжез миськоз ай, сиён пӧзьтоз ай, нянь басьтоз ай". Нош мон валамъя, одӥг комнатаын улӥсьёс одӥг семья кадь луыны кулэ. Семьяын но тупаса улоно ке, шуг- секытъёсты капчиен вормоно, инбам но чагыргес адске, кезьыт дыръя но шунытгес кадь. Эшъёсын тупано ке, комнатаын но шулдыргес, куректон но ӧжытгес. Общежитиын улыку ик трос эшъёс шедьтоно. Кызьы улод соостэк? Куддыръя вень понна гинэ но вазиськоно луэ. Эшедлэсь сяна, кинлэсь курод? Ӝытазе ӵош люкаськыса, макем умой гитараен кырӟаны, вераськыны, сюлэмдэ усьтыны, куректондэ вераны, ческыт чай юыны, нош ӵуказе ӵукна сиськытэк кошкиськод - ваньмыз бырем ни. Озьы ке но, егит дыр улонын одӥг пол луэ. Школаын дышетскыкум, студентъёслэсь юаме вань: - Кытын улыны умойгес: квартираын яке общежитиын? Валэктӥзы: - Квартираын дышетскыны луэ, но эшъёс уг ветло, общагаын эшъёс трос, но урок лэсьтыса вуоно ӧвӧл. Кызьы шуо, студент сессия дыръя гинэ дышетске. Ваньмыз шонер верамын. Но студент дырдэ тодэ вайыкуд, чик но возьыт медаз луы ортчемез понна. Нош кызьы ӟеч дышетсконо, ваньмыныз тупаса улоно - мон ачим но уг тодӥськы на. Нырысетӥ курсысь студент - со, пе, "промокашка" гинэ ай, ас пушказ кулэзэ но, кулэтэмзэ но пыӵатэ. Озьы ке но, оскисько: университетын дышетскон, общежитиын улон тэк уз ортче, утчась мурт аслыз кулэзэ одно ик шедьтоз. Алёна Ионина, Удмурт кун университетын И курсын дышетскись. Гуртоосын валче Та вакытэ одӥг предприятилы но капчи ӧвӧл. Куд-огез заводъёс тып-тып интыязы сыло. Озьы бере, отын уждун но уг тыро. Берло дыре югдур тупатскыны кутскиз Ижевскысь электромеханической заводын. Но предприятиын соин гинэ уг буйгатско. Генеральной директорлэн Юрий Шестаковлэн ӵектэмезъя, ЭМЗ кусыпъёс тупатыны кутскиз гуртоосын. Завод республикаысьтымы хозяйствоосын ӵош ужан сярысь огкылъёс гожтӥз. Со гуртъёсын тупатъян-лэсьтон ужъёсты быдэсъя, инструментъёс но материалъёс келя, нимаз куронъёсъя оборудование лэсьтэ. Нош эштосъёс заводэ келяло сӥль-вӧй, бакча сиёнъёс. Со вузаське заводысь магазин пыр, висъяське нылпи садъёсы, больницае. Таӵе амалэн ужаса, элькунмылэн бюджетаз но коньдон вуэ. Н. СЕРГЕЕВ. Гуртъёссы пӧртэм, сюлмаськонзы одӥг Гурт хозяйство удысын тыршисьёслэн нуналзы азьын Ижевскысь "Металлург" двореце люкаськылӥзы удмурт шаерысь устоосыз ужасьёс. Отын ог-огенызы артэ пукизы та кык воргоронъёс но. Тодматскимы. Кыкназы ик Глазов районысь вылӥллям. Уло артысь гуртъёсын. Вениамин Николаевич Волков (паллянысез) Пусошур гуртысь, нош Александр Алексеевич Баженов - Отогуртысь. Вениамин Николаевич "Нива" эштосын 29 ар ни шофёр луыса ужа. Зӥбыт но оскымон воргорон. Соин, лэся, туж кулэ дыръя Волковлы вазисько. Колхозлэн юрттэменыз, со корка пуктыны быгатӥз. Туала вакытэ со но бадӟым шумпотон ини. Александр Алексеевич арлыдызъя шутэтскыны вуэмын ни ке но, тэк пуконэз уг тоды. Тани туэ но кысык бусы ужъёс дыръя мастерскойын ужаз. Вань улонзэ колхозын тыршемын бере, али но котьмар понна сюлмыз висе. Син азьын куашкало колхозъёс, туж шуг йӧтэ эстӥськонэн, минерал сылалъёсын. Туэ но Киров нимо крестьян хозяйстволэн музъемъёсыз воксё но удобрение ӧз адӟе. Соин ик паймод шат гектарысьтыз 9 центнер гинэ ю-нянь басьтэмлы. Тӥни сыӵе кӧтӝожзэ вера гурт хозяйство удысысь сӥё-дано ужась. Республикамылэн шоркараз вуылэмзы понна воргоронъёс тау каро кивалтӥсьёссылы. Калыкез, пе, адӟим, мылкыдмес ӝутӥм. Т. БАННИКОВА. Туспуктэмез В. КАМАШЕВЛЭН. ВАЗИСЬКИСЬКО КРЕЗЬГУРЧИОСЛЫ Гуртэ мынам Кылем тулыс Быдӟым Вормонэз ми, вань гуртоосынымы огазе люкаськыса, дэмен пусйимы. Пумиськонэ ӧтимы вордскем интыысьтызы палэнэ кемалась кошкемъёсты- быземъёсты но - Ижын, Сарапулын, Пичи Пургалан но музон городъёсын, гуртъёсын улӥсьёсмес. Калык трос люкаськиз. Куд-огез нылкышноос дас сизьым ар бертылӥллямтэ ни вылэм! Мӧзмиллям, милемды но, та праздникез радъясьёсты, ӟыгыръяло, чупало, бамъёссы синкылиосын котмо... Войнаын сизьымдон пала воргоронъёсмы быризы угось. Бертэмъёсыз но чаляк кулӥзы. Куд-огез, оло, тыро-пыдо воргорон луытэк ик ож лудъёсы келямын вал. Чиков Матвеймес, кылсярысь, фронтэ 7-тӥ класс бере ури-бери келязы. Верамзыя сюрес вылысен ик бырыны сюрем, фашистъёслэн самолётъёссы бомбаоссэс куяку. Морякмы, туж чебер Чиков Семенмы, али гинэ сюан ортчытӥз вал. Ачиз кадь ик чебер нылмуртэ- кузпалзэ гуртэ кельтӥз. Бертылыны ӧз кылды ни: подлодказэс выйтӥллям. Кӧня батыръёсмы улонзэс сётӥзы шудмы понна, гуртмы понна. Боры баметӥ ортчись сюрес вылысен берлосьсэ учко гуртсы шоры, яратоно вордскем дорзы шоры, ӵушконэнызы шонало но калыкенызы люкисько... весяклы. Гуртамы памятникмы ӧвӧл. Соин ик Вормон нуналэ но кисьтон вакытэ тросэз Кечолэ ветло. Ми но колхозысь кивалтӥсьёсын ӵош памятник выжые сяська тыронэ пыриським. Собере автобусъёсын нуизы дорамы. Куазь зоремен, школае люкаськоно луимы. Котькуд бырем муртэ буре вайыса, Боры баметӥ кошкись сюрес дуре сизьымдон писпу мерттом шуиськом вал. Мынам "Котьку сюлэмын" романам но таӵегес суред возьматэмын. Но дэриен сэрен пырыны ӧз луы. Кайталы кылиз бадӟым малпанмы. Огазе люкаськемъёс монэ куризы гуртмы сярысь кырӟан гожтыны - гимн интыын, пе, мед луоз! Чуръёс вордскизы ни сюлэмам. Крезьгурзэ мед дасясалзы гуртысьтымы усточиос яке тодмо крезьгурчиосмы Пантелей Кузнецов, Михаил Оськин, Сергей Соснов но музонъёсыз. Азьло ик бадӟым тау каро. Гуртоосмы таӵе праздник ортчытъяны куро арлы быдэ. Мар бен, со юрттэ удмуртлыкмес юн утьыны. Гуртмы милям сюлэмысь ноку но потантэм мусо, чебер. Шур сое шори люке. Выллапалмес Бода шуиськом, нош улӥзэ - Бодья-Пуро. Тани со кылбур. Кузэн-палэн сямен, ӟыгырскыса Сыло Бода, Бодья-Пуро гуртъёс. Соос музэн ик ог-огзэс яратыса Уло татын чебер, тузӥ муртъёс. Калык радын ик мон но сэзь будӥ, Уно иськемъёсты пыдын лыдъяй. Шудэз, яратонэз татын тодӥ, Тодӥ, кыӵе мусо мемей-дядяй! Трос шудоесь нуналъёсыд но вал, гуртэ, Шулдыръяськид соку калыкеныд дэмен. Секыт кайгу но зӥбылӥз йырдэ - Бӧрдӥд соку шара но лушкемен. Лек ожъёсы уго Боры бамтӥ Келяд уно батыр кадь пиостэ. Огез-кыкез гинэ берен бертӥз, Соин туннэ но ӵушиськод синвуостэ... Корказь ана, Арис сад но Кузь гурезь - Яратоно вордскем интыосмы. Гуртэ! Дауръёсын улод тон весь - Юнэсь ук асьмелэн выжыосмы! Кык кузпалъёс сямен, ӟыгырскыса Сыло Бода, Бодья-Пуро гуртъёс. Соос музэн ик ог-огзэс яратыса Уло татын чебер, етӥз муртъёс. Кирилл Ломагин, Пичи Пурга ёросысь Бодья-Пуро гуртысь кылбурчи, прозаик. "Интернет" выжыоссэ муромытэ Джордж Сореслэн фондъёсыз ужало ини дуннеысь ог 30 странаын. Кылем арын Сорослэн Россиысь фондэзлы 10 ар тырмиз. Та дыр ӵоже со 350 миллион доллар тыр юрттэт сётӥз тужгес шугъяськись удысъёслы - наукалы, дышетонлы, культуралы, тазалыкез утёнлы. Даур бырытозь, фонд эшшо 400 миллион долларлы висъяны чакла на. Кылем арня куспын Удмуртие вуылӥзы "Шара общество" институтлэн (Сорослэн фондэзлэн) Россиысь ёзэзлэн кивалтӥсез Е. Ю. Гениева. Фондэн кивалтэм сяна Е. Гениева кунсьӧр литературая М. И. Рудомино нимо кун библиотекалэн директорез, дуннеысь библиотекаослэн ассоциацизылэн вице-президентэз луыса ужа на. "Шара общество" институт но Удмуртиысь Правительство гожтӥзы кусып возён сярысь огкыл. Та документъя институт но шаерысьтымы Кивалтэт кужымзэс валчеяса ужалозы, калыкез дышетон, тазалыкез утён, культура, пичи ужбергатон удысъёсын пӧртэм ужпумъёсты быдэстон понна. Выль кусыпъёсты юнматонын вормонъёс но вань ини. Та вакытэ Удмуртиысь компьютеръёс огъя сӧзнэтэ огазеясько. Удмурт кун книверситетысь, Ижевскысь куинь библиотекаысь, вить школаысь, Пичи Пургаысь 2 номеро школаысь но Егитъёсты дышетонъя центрысь компьютеръёс пыр "Интернетэн" (лыдӟы - дуннеен) герӟаськыны, кулэ луись ивор, тодон-валан басьтыны луоз. Кылдытӥськись сӧзнэт борды азьланяз итӥськыны быгатозы мукет дышетон заедениос, культура но тазалыкез утён удысысь учреждениос. Сорослэн фондэзлэн шаерамы быдэстоно ужпумъёсыныз Е. Гениева тодматӥз культура удысын ужасьёсын пумиськонын Национальной библиотекалэн юртаз. О. МАКСИМОВА. Йӧ кошке... декабре Огаз аре, толсурлэн шорвадесаз, Сарапулын улӥсьёсты паймытӥз Кам шур. Малпамтэ шорысь отын йӧ вырӟиз. Озьы луиз, со аре куазь шуныт улэмен но Воткинск водохранилищеысь трос ву лэзьямен. Нош 19 декабрьысен Каметӥ ачиз ветлӥсь СП-1 паром ветлыны ӧдъяз. Со учыр сярысь гожъяз "Удмуртская правда" газет 1965 арын 31 декабре потэм номераз. В. РОГАЛЕВ. "Сиданко" 300 миллион манет сётэ Му вӧй вузамез понна "Сиданко" компания таяз толэзе "Удмуртнефть" огазеяськонлы 300 миллион манет коньдон келяны кулэ. Берло дыре со асьмелы воксё шапыкен мында уксё висъялляз. Кылсярысь, сентябре 13,6 миллион гинэ вуиз, октябре - 24,8, ноябре - 82 миллион. Озьы со луиз, 17 август бере кунгож сьӧрысь банкъёслэн нефть вузам понна дун тырымтэенызы. Соин сэрен "Удмуртнефтьлэн" тыронъёсыз туж трос люкаськизы: уждунлы, интыысь но кун бюджетъёсы но пӧртэм фондъёсы. Туэ 10 толэзьскын "Удмуртнефть" вань бюджетъёсы 935,5 миллион манет выт тыриз ни. Предприятилы 300 миллион манет вуиз ке, со тырмоз ужасьёссылы июнь-ноябрь толэзьёс понна уждун сётыны. Озьы ик коньдон вуоз бюджетэ, Пенсиосъя но мукет фондъёсы. Г. РОМАНОВ. Республикаын улӥсьёслы шара гожтэт Ми, Удмурт Республикаысь Кун Кенешлэн депутатъёсыз, та вазиськон улэ гожтӥськемъёс, Кун Кенеше пырись муртъёслэсь лыдзэс 100-ысен 130-озь будэтон сярысь ужпумез сэрттонэ-пертчонэ но 1998 арын 24 декабре Кун Кенешлэн азьвыл чакламтэ сессияз та ужпумъя куара сётонэ пыриськонтэм вылысь решение кутӥм. Коньдонэн туала секыт югдуре - со номыр сярысь малпаськытэк, улонэз чаклатэк лэсьтэм вамыш луоз. Куд-ог лыдъямъёсъя, Кун Кенеш 130 депутатозь йылӥз ке, соослэн нырысетӥ арзэ гинэ ужамзы бюджетысь ватсаса коньдон кулэ кароз (быръёнъёслы, соосты возёнлы но юрттэт сётонлы) 5,7 миллион манетлы. Тамында ик уксё 6 школалы ар ӵоже уждун тырыны кулэ. Бырйисьёсынымы парламентэз будэтон сярысь кенешыса, ми та малпанмылы пумит луонэн пумиським. Республикаын улӥсьёслэн та выллем мылкыдзы сярысь верало эрико социалистической службаослэн алигес ортчытэм юалляськонъёссы но. Уноез бырйисьёс (75 процентлэсь тросгес) Кун Кенешез йылэтон понна гинэ ӧвӧл, сое кулэстон понна. Россиысь областьёсысь но республикаосысь законодательной собраниослэн ужамзы возьматэ: ӟеч законъёсты дыраз кылдытон понна, депутатъёслэсь лыдзэс одно ик будэтоно ӧвӧл. Россиысь улосъёсын эсэпсэ валатэк асьме Кун Кенеш выллем ёзъёсын депутатъёслэн шоро-куспо лыдзы - 42 адями. Удмурт Республикаысь Вылӥ Кенешлэсь (200 депутат вал) но туала Кун Кенешлэсь (100 депутат) пайдаё ужаны быгатэмзэс ӵошатоно ке, берлоез ӟечгес ужа. Вылӥ Кенеш 23 закон но 197 постановление кутӥз но 747 вазиськон эскериз ке, Кун Кенеш туннэ нуналлы - 79 закон, 224 постановление, 2368 вазиськон. Вылӥ верам сяна, Кун Кенешлэсь лыдзэ будэтон сярысь ужпум пумысен куара сётыны куинь пол ӵектэмын вал ини, но огполаз но со решение кутыны тырмымон куара ӧз люка. Ваньзэ тае лыдэ басьтыса, ми пумит Кун Кенеше пырись муртъёслэсь лыдзэс будэтонлы но куд-ог депутатъёслэн политикаен шудонъёсазы пыриськонлы. Сыӵе депутатъёслэн одӥг малпанзы - выль мандат басьтыны луонлыкъёсты паськытатон. Удмурт Республикаысь Кун Кенешлэн депутатъёсыз К. А. Глухов, А. С. Борзенков, В. В. Пономарев, И. Г. Казанцев, Н. А. Сударикова, В. А. Пономарев, А. А. Ушаков, В. И. Жернаков, А. К. Лопатин, В. И. Агашин, А. Б. Михальков, А. П. Горяинов, А. М. Максимов, В. Ф. Загайнов, Ю. В. Антонов но мукетъёсыз. Кыз котырын кылбуран сценарий Шудӥсьёс: Тол Бабай. Лымы ныл. Чуляби, тужгес чырткемез пияш. Тэшкыли, пичи пи. Чабеляй, пичи ныл. Ачимбыгай, куасэн нискылась пияш. Дыды, кырӟаны усточи. Нылаш, усточиен эшъяськись Луд кеч пи. Пуны. Кион. Гондыр пи. Ӟичы. Нырысетӥ лыдӟись. Кыкетӥ лыдӟись. Чеберъям кыз котырын нылпиос шудо, шулдыръясько. Нырысетӥ лыдӟись. Океан-зарезь палась Сюлмо Тол Бабай вуэм. Нылпи мылкыдэз валась: Песьтэр тыр салам ваем. Кыкетӥ лыдӟись. Сапегзэ, пе, ӟеч кышъям, Сюрс иськемез вамышъям. Гурезь ӝужда букос пыр Капчиен ӧз поты, дыр? Нырысетӥ лыдӟись. Лымы нылэз адӟиды ке - Синъёсты мальдоз, эке! Дӥсь - чиль-дол пырыослэсь: Пилинӟы, уко, азвесь... Кыкетӥ лыдӟись. Кема витем ӟеч куно Котьмалэсь, шуо, дуно. Чалмытске, чалмытске! Тол Бабаймы йыгаське!.. Пыре Тол Бабай - саламъёсын, бӧрсяз - Лымы ныл. Тол Бабай. Ӟеч-а, бур-а, пиналъёс? Бӧрсям кельтӥ иськемъёс. Сюресэ ӧй вал капчи, Шуг-секытэз трос адӟи. Ваньзэ кельтӥ вуж аре. Тани сьӧрам табере Ваи шудо Выль арез! Лымы ныл. Выль арен, дуноосмы! Трос милям саламъёсмы. Кин шумпоттоз кылбурен, Салам сётом кырымен. Кырӟандэс но кылзоме, Эктондэс но адӟоме - Ум жалялэ саламмес. Чуляби (пиналъёс азе ик чуртнаське). Ваньмызлэсь азьло киме Мон ӝутӥ, Бабай! Кылбур потэ вераме, Тани, кылзэ ай... Кисьтаськись дӥсен, Чиль чилясь весен Тон, чебер кызмы, Султӥд азямы. Ми ваньмы туннэ Котыртом тонэ, Кырӟалом, эктом - Ваньзэс шулдыртом! Тол Бабай. Етӥз, етӥз вылэмед, Чуляби. (Салам сётэ.) Маин шумпоттоз меда Тэшкыли? Тэшкыли (ӝутскем мылкыдын). Ой, лыктӥз ук, Ой, вуиз ук Ӟырдаса ик тол куазед. Урамез но, Азбарез но Югдытӥз Выль ар азе. Ӟеч тыршем, Зол ужам, Бакчаысь пичи кызлы но Тӧдь мамык изьы бырттэм. Тол Бабай (салам сётыса). Узьымез но шобыртэм, Лекъяськись тӧллэсь ватэм. Вуоно ю-нянь сярысь Сюлмаськем озьы, тыршем. Мусо дыды, Чебеляй, Ма туннэ мадёд ни ай? Чебеляй. Толлы мон но шумпотӥ, Салазкиеным ширтӥ. Нырокез ӧй вормы но - Бекмыльски... Копак лымыпог луи! Тол Бабай. Э, озьы-а, ӟечоке... Гурезед алдаз, иське? (Салам сётэ. Кинэ ке синйылтэ.) Таиз пияш, тодӥсько, Нискыланы туж усто. Лымы ныл. Кылбурез но, шуэ, дась... Ачимбыгай. Мар ӝужда таиз гурезь! - Кӧт ик шурдымон! Нискылто отысь туж сэзь! - Курданме вормо. Нырокъёс но кадь ӧвӧл - Лобисько уллань. Бен, монэ уг суты тӧл - Вузэ пель сьӧрам. Выльысь ӵошатском, ярам: Кин кинэ вормоз? Тӧл ӧз вормы ке - серем! Нош меда вузоз? Тол Бабай. О, тыныд бадӟым оскон: Одно луод чемпион. (Салам сётэ.) Туж мусо Дыды азям - Мар меда асьмелы со дасям? Дыды. Кырӟанэ туж тунсыко. Кузь пельмы, тодскоды, туж мусо... Лымы ныл. Кылзом, кылзом Дыдыез... Дыды (кырӟа). Пельёсыз солэн сэзесь, Пыдъёсыз туж етӥзэсь. Ӵок, быжыз ке но вакчи, Со понна шаплы ачиз. Туж кышка со кионлэсь, Ӟичылэсь но пунылэсь, Тушмонэз ке со адӟе, Тӧлпери сямен пегӟе. Тодмады-а, Кин бен со? Ас гонзэ вошъя но со. Тодӥды-а, Кин бен со? Ӟуч сямен шуо - ко-сой! (Тол Бабай саламзэ сётэ.) Лымы ныл. Тани эшшо мусо нылаш, Кырӟанэз, пе, вань аслаз. Нылаш (кырӟа). Лымы вылын пӧйшуръёс Уин гожтэт гожъяллям. Кечъёс, сёръёс, ӟичыос Солань-талань ветлӥллям. Милям лусьтро Шарикмы Ваньзэ лыдӟе нырыныз. Шӧдэ ческыт кеч зынэз. Шуак Луд кеч пи потэ, котыр утчаське, эскериське. Луд кеч пи (лӧптылыса). Кионэз мон амалтӥ, Кытчы ке йыромытӥ, Хи-хи-хи! Ширъяй-поръяй, Пытьыме сурай... Ой, Пуны!.. (Пунылэсь кышкаса пегӟыны дасяське.) Пуны. Эн ик малпа пегӟыны, Тонэ, мусо ӟечокмы, Ӧтиськом ми баламы - Пӧламы. Гав-гав-гав! Туннэ мон ӟеч - Коть Кион медло, коть Кеч... Шок-пуль бызьыса пыре Кион, Луд кеч пи ыше. Кион. Ой, пӧсяй. Фу-фу, фу! Шуоды: дыраз ӧй ву. Ма, пырай одӥг гуртэ - Буш кӧты весяк ёртэ. Тол Бабай (пиналъёслы вазиськыса). Пӧламы кутом-а бен Васям Кионмес? Оло, весь огдышемен Улоз-вылоз вуж сямен? Пуны. Гав, гав, гав! Кутоно, Ӟечлы, пӧй, дышетоно. Пиналъёс. Зэм ик, зэм, кутоно, Ӟечезлы дышетоно. Пыре Гондыр пи. Пельёссэ, нырзэ кутылэ, вузэ. Гондыр пи. Ы-ы-ы! Ы-ы-ы! Медло вал шуныт пӧзьы... Толэд укыр лекъяське, Пель йылме куртчын вутскем. Синкашъёсы гӧртыло... Мон тазьы Весь бӧрдыло. Ы-ы-ы... Тол Бабай. Я, тырмоз, Миши, эн вуз. Пӧзь сётом ай одӥг куз. Конфетэ но ӧвӧл жаль. Кӧлытэк но чида каль*. Мадь ай, кызьы тон вуид, Дорысьтыд оло пегӟид? Гондыр пи. Пограм пужым выжыысь Тём пеймыт шуныт гуын Анае сур-сур изе. Чебер вӧт, вылды, адӟе? Мон лушкем-лушкем пегӟи - Туж трос тылъёсты адӟи: Ӵуж но горд, вож но лыз - Синэз ик кыско ваньмыз... Тани - дорады вуи... Тол Бабай. Пырид бере, мурт ум каре, Султы милемын артэ. (Ӟичыез адӟыса.) Ӟичы? Мар-о туннэ ӝегам та? Ӟичы (кильтыръяськыса). Синучкон азьын кема, Кема бергаськем. Тодскоды ук: мон коштан, Вылам золтӥ юбка-штан. Нокинлэн ӧвӧл таӵе. Йӧн-а адскисько? Кыӵе? Тол Бабай. Ушъяськид, лэся, ортчыт. Инты шедьты ни аслыд. (Лымы нылэз валтыса.) Туж зӥбыт но, Туж чебер но Вань милям Лымы нылмы, Ваньмызлы адӟиськымон со, Мусоос пӧлысь мусо. Та пӧртмаськон бодыме но Лымы ныллы кузьмасько. Шуг-секытэн пумиськиз ке, Боды юрттоз, оскисько. (Бодызэ сётэ.) Лымы ныл. Кыӵе мон шудо туннэ! Таӵе шулдыръяськонэ Кылёз ноку вунонтэм. Я, пиналъёс, лыктэ, кутске, Бергаса шудом... (Дэмен бергало, шудо.) Лымы ныл. Вож кызмы сярысь но Кырӟалом, дыр? Я бен, султэлэ котыр. (Тэльын вордскиз пичи вож кыз..." шуыса кырӟало.) Тол Бабай. Ачиз ветлӥсь кутъёсыз Кутчаськем оло туннэ? Асме уг лу кутэме! Ой, туж потэ эктэме! (Эктэ.) Ойдолэ, пиналъёсы, Эктоме на ӵош, дэмен. (Экто. Тол Бабай саламъёссэ люкылэ, нимысьтыз ик - Луд Кеч пилы, Пунылы, Кионлы, Гондыр пилы, Ӟичылы. Солы юрттэ Лымы ныл.) Тол Бабай. Кин кылиз на саламтэк?.. (Эскере.) Сюрс вылэ потытэк Уз лу милемлы. Мукет гуртысь пиналъёс Витё ни, вылды. Трос шудӥм, шулдыръяським - Туж тау ваньдылы. Лымы ныл. Нокин медаз кыль ӝоже Ар ӵоже. Котькуд муртлэн сюлэмаз Медло ӟеч мылкыд. Котькудӥзлэн ик корказ Мед пыроз шунды. Тол Бабай. Шуд, байлык, тазалык, Ӵуклы оскон - шумпотон Сӥзиськом весь ваньдылы! Кошко. Пиналъёс шулдыръясько на. _______________________ каль*- али. Дасяз Лидия Чернова. Можга ёросысь Пазял гурт. Ялон Удмурт Республикаысь Гурт хозяйствоя но сиён-юонъя министерство вуоно арын республикалэн кулэяськонъёсызъя ю тысь вуттыны мылкыд карисьёс пӧлын конкурс ялэ. 5 миллион манетлы ю тысез вуттонъя конкурсэ пыриськемлэсь азьло мылкыд карисьёс пӧлысь тужгес тупаноосыз беръемын луозы. Квалификационной документъёсты басьтыны, озьы конкурслэсь азьвыл быръён сярысь юалляськыны луоз Удмурт Республикаысь Гурт хозяйствоя но сиён-юонъя министерствоын таӵе адресъя: Ижевск город, В. Сивков ульча, 120-тӥ юрт, 18-тӥ, 52-тӥ комнатаос. Телефонъёс: 78-76-75, 78-72-60, (юрт пушкын кутӥськисез - 181). Конкурс азьын быръёнэ пыриськон понна: 1. Удмурт Республикаысь Гурт хозяйствоя но сиён-юонъя министерстволэн кассаяз, 40 номеро комнатае, документъёс понна 250 манет тыроно. 2. Конкурсэ пыриськон сярысь заявкадэс туэ 25-тӥ декабрёзь лэзьыса вуттоно. Гожтэттэс ыстоно почта пыр яке кин ке сьӧры таӵе адресъя: 426057, Ижевск город, В. Сивков ульча, 120-тӥ юрт, 18-тӥ, 52-тӥ комнатаос. 3. Заявкаен конверт вылады гожтоно: "Заявка на участие в предварительном квалификационном отборе на определение государственных поставщиков продовольственного зерна". Конкурс азьын быръён ортчоз туэ 25-тӥ декабре 10 часын Удмурт Республикаысь Гурт хозяйствоя но сиён-юонъя министерствоын таӵе адресъя: Ижевск город, В. Сивков ульча, 120-тӥ юрт, 31-тӥ комната. Беромыса вуэм заявкаосты министерство кутыны но, эскерытэк кельтыны но быгатэ. Конкурсэ пыриськыны быгатозы конкурс азьын быръён пыр потэмъёс гинэ. Конкурс ортчоз 1999 арын 30 январе, 10 часын Удмурт Республикаысь Гурт хояйствоя но сиён-юонъя министерствоын таӵе адресъя: Ижевск горо, В. Сивков ульча, 120-тӥ юрт, 31-тӥ комната. М. Т. Калашниковлы - 2 номеро орден Валлян Кремльын Борис Ельцин Россиысь тодмо адямиослы сётъяз наградаос. Тужгес вылӥ дунъямын "Ижмаш" огазеяськонысь валтӥсь конструктор Михаил Калашников. Со басьтӥз святой апостол Андрей Первозванный орден. Алигес кылдытэм выль наградаен пусъемын дуннеысь ньыль мурт гинэ. 1 номеро орденэн - Санкт-Петербургысь академик Дмитрий Лихачев, кыкетӥеныз - Михаил Калашников, куинетӥен - Казахстанлэн президентэз Нурсултан Назарбаев. Ньылетӥ наградаез сётыны кулэ вал писательлы Александр Солженицынлы. Со пумит луиз куашкатэм Россилэн кивалтӥсезлэсь ордензэ басьтыны. - Александр Исаевич монэ умойтэм учыре вуттӥз, - шуиз Калашников, Москвае мыныкуз. - Огласянь, сое ӟеч валасько. Мынэсьтым но юаллязы ни: уд-а, пе, куштӥськы наградалэсь. Уг, шуи. Борис Ельцинэз котькызьы дунъя, но сое асьмеос бырйимы. Мукет ласянь, мон сылӥсько кадь сыӵе орденлы. Мӧляе сюбег ке но, отчы тэро Ленин но, Андрей Первозванный но, зарни кирос но. Вералом на: Социалистической Ужысь кык пол Герой Михаил Калашников пусъемын куинь Ленин орденэн но музон наградаосын. А. Шкляев. Наталь Нимыз - шумпотон Ижевскысь Индустриальной ёросысь Калыклы улон-вылонын юрттонъя центрын усьтэмын семьялы но нылпиослы юрттонъя ёз. Ёросысь 75 висись но ӧлексы пиналъёслы отын дунтэк юрттэт сётӥське. Быгатӥсьтэмъёсыз доры центрын ужасьёс асьсэос ветло, шудо, верасько соосын, гожъяськыны-лыдӟиськыны дышето. Котькуд толэзе нылпиос понна праздник выллем радъяло. Огазе люкаськыса, соос ог-огенызы тодматско, шудо. Висись пиналъёсын ужаны трос кужымзэ, быгатонлыкъёссэ сётэ та центрын ужась Зоя Петровна Васильева. Пиналъёс но дышизы ни та лякыт сямо кышномурт борды, сюлэмзы шӧдэ угось кин соосты вала но гажа. Калыклы юрттэт сётонъя центре вуытозяз, Зоя Петровна нылпи садын но, школаын но, заводын но ужаса вуттӥз. Висеменыз пенсие вазьгес потӥз ке но, пиналъёсын люкиськыны уг дырты. Ляб визьем, висись пиналъёсын ужаны тросэз уг чидало, шуг-секытъёслэсь кышкатско. Нош З. П. Васильева жаляны но, валаны но быгатэ соосты. Юнме уг вазисько солы пиналъёс, шундымы но шумпотонмы шуыса. Л. КИМОВА. Туспуктэмез В. КАМАШЕВЛЭН. Наталь "Мон - инмарен ыстэм утисьты" - ... Виё!.. - азьпалам кык пиосмурт жугиське. Йырысьтызы изьыоссы палдэмын, кыкназылэн но дуно кулэсь курткаоссы пертчылэмын. Жугиськисьёслы ог куамын аресъёс, дыр. Юись-бырем муртъёслы уг укшало кадь. Тани ӝужытгесэз мукетызлэн, музын кыллисезлэн, йыраз, кӧтаз ӵыжаны ӧдъяз. Ма, мар та таӵе? Вӧзтӥмы кӧня калык кошкиз: кудӥз лек кыл вера, мукетыз сялӟиське. Нош люкыны нокинлэн тодаз уг лыкты. Уг тодӥськы, кытысь мынам дӥсьтонэ потӥз, вамыштӥ жугиськисьёс доры. Кесяськытэк гинэ ӝужытэзлы вази: - Я, дугды ини сое жугемысь. Таи йырзэ ӝутӥз но дол! гинэ шорам учке. - Со-а валалоз? Вить ар ӧз вала. Мар-о, Толя, ӝуштӥськод? Вӧсь-а? Нош Таняме тон вӧсь ӧд-а кар? Виё мон тонэ. Татчыозь нокинэ ӧй йӧтылы, нош тонэ виыны киы пыроз! - выльысь пуромиз воргорон. Мон сое либатыны турттӥсько: - Нош мар басьтод, сое виыса? Со улонысь кошкод, нош тон пыраклы аслыд собыдӟа сьӧлык басьтод, - киргам изьыоссэс ӝутӥ но ватсай на, - тани изьялэ, а то ыштоды. Пуромем пиосмурт мон шоры йырысеным пыдозям учкиз но мынектӥз - мынектӥз но воксё ымныр тусыз мукет луиз. Тодӥськоды-а, пилем улысь шунды потӥз кадь. Изьызэ басьтӥз. - Кин-о тӥ? - юаз. Мон шуисько: - Инмарен ыстэм утисьты. Со гор-гор серекъяны кутскиз. - Юртты ай,- шуисько,- та пияшез ӝутыны. Огнам уг вормиськы. Мар-о тӥ малпаськоды, гажано лыдӟисьёс, кыкнамы ӝутӥм. Нош тодӥськоды-а, мар понна жугиськон пуромем? Та пияшъёс ог-огзэс пичи дырысенызы ик тодо ни вылэм. Егит дыръязы кыкназы но одӥг нылашлы синмаськиллям. Нош нылаш яратэм Мишаез (кудӥз ке жугись вал). Йырыз курен Толя гуртэтӥ кыл вӧлдыса ветлэм, мон, пе, Мишалэсь азьло ни Танялэсь ныл дырзэ быдтӥ. Таня бызем Мишалы, нош Толя басьтэм артэ гуртысь нылэз. Со дырысен ини вить ар ортчиз. Нош та нуналэ Миша эшъёсыныз праздникез "миськиллям". Бертыкуз трамвайысен пумитам пичи дырысьтыз эшсэ но егит дырысьтыз сюлмаз возем вожпотон адямизэ. Кышноез понна пунэмзэ берыктыны малпа вылэм. - Ойдо ӵок, мед улоз ни! - киыныз шонтӥз со, собере мыным вазиськиз,- нош тӥ дӥсьтӥсь кышномурт! Мон асме дӥсьтӥсь уг шуиськы. Но та учыре, зэмен но, аслым ачим инмарен ыстэм адями кадь потыны ӧдъяй. Кин-о тодэ, вожомем Миша Толяез сӧсыр кельтысал яке виысал ке. Нош соослэн кыкназылэн но гуртазы яратоно кышнооссы, нылпиоссы. Бен, куке но пинал дыръяз "пиосмурт луэменыз" ушъяськемез, пӧяськыса кыл вӧлдэмез понна, Толя кыл кутоно луиз ик эшез азьын - тыш сииз. Янгышамзэ валаз кадь, пумитъяськыны ӧз выры. Со кошкем бере Миша кышноез сярысь кыӵе гинэ ӟеч кылъёс ӧз вера. Йылпумъяса шуиз на: - Жаль, мон гожъяськыны уг быгатӥськы, нош кылбурчи ке луысал, поэмаос со сярысь гожъясал. Тросэз меда картъёсмы асьмеос сярысь тазьы вераны быгато? Мишалы шуисько: - Соин ик Таняед тонэ быръем но яратэм. Я, гуртад берты ини, нылпиосыд но, Таняед но витё ини, луоз. Кышноед понна тон туннэ пунэмзэ берыктӥд, малпасько, сюлмысьтыд секыт изэз но куштӥд. Калыкын юнме уг шуо, адӟон, пе, пыд улысь потэ. Мон аслым туж ӟеч уж лэсьтӥ кадь потӥсько - кык семьяез адӟонлэсь ути. Нош тӥ кызьы малпаськоды, гажано лыдӟисьёс? Вера БИКУЗИНА. Ижевск город. Журналистъёсын пумиськонъёс Шундыё нуналъёс луозы ай Таизэ пумиськонэз журналистъёсын ортчытӥз Кун Кенешлэн Тӧроез А. А. Волков. Со йылпумъян лэсьтӥз Москваын куинь нунал ужамезлы. Кызьы пусйиз Александр Александрович, вакчи дыр куспын бадӟым уж лэсьтэмын. Нырысетӥез, "Ижмаш" но Чехиысь "Шкода-авто" предприятие куспын ӵош ужан сярысь тупанкыл кутэмын. Соя Ижевскысь автозаводлэн инъетэз вылын усьтӥськоз машина поттонъя выль завод. Ог- огзылы уз люкетэ, кыксы но ужалозы асьсэ понна. Выль производстволы 5 ар ӵоже чакламъя вуыны кулэ 300 миллион доллар. Вуоно арысен кутскыса 2001-тӥ арозь, "Шкода" асьме дорын поттоз 80 сюрс машина, 2005-тӥ арозь та лыдпус вуоз 170 сюрсозь. Отын ужалоз 13 сюрс мурт: 5 сюрсэз - машина лэсьтонын, 8 сюрсэз - воштос ёзъёс дасян бордын. Чехиен та ласянь вераськон мынӥз 1,5 ар пала, соин ик оскон вань, "Шкода-авто" но Германиысь "Фольксваген" промышленной предприятие Удмуртиен гожтэм огкылзэс быдэстозы шуыса. - "Орбита" кызьы али потэ, озьы ик потоз, оло, ӟечлыкезъя выль машиналэсь бере уз кыльы ай,- пусйиз Кун Кенешлэн Тӧроез.- Басьтӥсь ачиз быръёз, кудӥныз ворттылыны. Соку ик вералом, "Шкодалэн" продукциез асьме машинамылэсь, самой ӧжытсэ, кык поллы дуногес сылоз. Россиын, Удмуртиын но чебер но ӟеч вузэз басьтӥсь шедёз, огъя тазьы ёрмыса ум улэ ук. Коньдон ужпум вылэ выжыса, А. А. Волков вераз: Выль ар азьын Центрысь 20 миллион манет вуыны кулэ. Со мыноз Ижевскысь но Сарапулысь дышетӥсьёслы но калыкез эмъян удысын ужасьёслы октябрь толэзь понна уждунзэс тырыны. Арез йылпумъяны кулэ на эшшо 56 миллион манет. Федерацилэн Удмуртилы пунэмен берыктонэз люкаськемын ни 700 миллион манетлэсь ятыр. Россиысь Правительство ужаны тырше ке но, ку та коньдон асьме доры вуоз - туннэ нокин уз вера. Куинетӥез ивортон герӟаськемын Москваын 19 декабре "Отечество" Общероссийской политической организациез кылдытонъя съездлэн ортчеменыз. Солэн Удмурт ёзэныз кивалтэ А. А. Волков. Александр Александрович верамъя, кенешон умой, пайдаё ортчиз. Ваньмызлы кельшиз Ю. М. Лужковлэн докладэз. Съездлэн ужез сярысь лыдӟисьёс мургес тодозы, отчы ветлэм делегатлэсь "Удмурт дунне" газетлэн валтӥсь редакторезлэсь А. П. Шкляевлэсь гожъямъёссэ лыдӟыса. Л. МЕДВЕДЕВА. Бумага вылын кыдёке уд вуы Куд-огезлэсь кылэм вань, лымшор районъёсын узыргес, пе, уло. Нош зэмзэ ик-а озьы меда? Тани Алнаш районысь Кузёбайлэн нимыз ик вера кадь гуртлэсь кыӵезэ. Бен, солэн шулдырезлы ураметӥ вамыштыку ик синмаськоно, улыно-вылыно юртъёс синэз палёмыто, гурт шортӥ шур визыласа бызе. Ул но ул вылэм таӵе шулдыр интыын, но... "Узыръёс но бӧрдо" сериалын выллем кузёбайёслэн но сюлмаськонъёссы уг бырыло. Сӥзьылэн-тулысэн шур вамен машинаосын потаны курадӟо, нош школаын дышетскисьёс но дышетӥсьёс уно аръёс ӵоже витё ини выль школа пуктэмез. Ватонэз ӧвӧл, районысь тросаз гуртъёсын пиналъёслэн "кыкетӥ дорзы" куашкан калэ вуэмын. Пыкъяса кадь сыло Удмурт Гондыр, Усо (Муважи), Сям-Какси, Чем-Куюк, Кучыран школаос. Пӧртэм ик ӧвӧл югдур Кузёбайын но. Гуртысь школа 1947-тӥ арысен сылэ ини. Та дыр ӵоже сое одӥг пол гинэ пыр-поч тупатъязы-выльдӥзы (сэзъязы), 17 ар ортчыса. Школа 1994-тӥ арозь восьмилетка вал. Арлы быдэ нылпиослэн лыдзы йылэмен, шор ёзо каризы. Туннэ нуналлы отын тодон-валан люка 220 пинал. Кузёбайёс сяна, дышетско на Варӟыл, Варзино-Алексеево, Гарга гуртъёсысь нылпиос. Валамон ни, инты ласянь туж ӟоскыт. Соин покчиосыз нылъёс но пиос витетӥ классозь дышетсконо луо нылпи садлэн азьвыл юртаз, нош бадӟымъёсызгес дышетсконо луо кӧня ке юртын. - Бен, основной шуонзэ, оло, сокем курланы вазьгес на, - шуо татысь дышетӥсьёс. - Кыӵе ке сыӵе дышетскыны луоно ик. Ушъяськыны быгатӥськомы компьютер классэн. Нош мукетъёсаз юртъёсы чылкак мылкыдтэк пыро ни пиналъёс. Вань куронъёсыз лыдэ басьтоно ке, татын пиналъёс кемалась дышетскыны кулэ ӧвӧл ни. Ялан выль юрт пуктыны курадӟиськом бере, вужаз ик нуналъёсмес, дышетскон армес ортчытоно луиськомы. Кылсярысь, ужлы дышетонъя урокъёс нимаз пичи коркан ортчо. Нуналлы быдэ куашкамезлэсь кышкаса улӥськом. Бен, куинетӥ юртысь кабинетъёс но мур гуэ выемын, кожалод. Соос пеймытэсь, кезьытэсь. Пичиесь укноостӥ шыртыл выллем гинэ шунды тылсиос пыро, лампочкаоссы ӝыныез уг ӝуало. Вылысьтызы пальтооссэс пиналъёс быдэс тол уг куяло. Нош ӝужытэсь мугоро пиослэн йыръёссы вӧлдэтэ но кокаськыло. Спортзал сярысь вераськонэз ик ӧвӧл, азбарын ваньмызлы инты тырме. Озьы ке но, кузёбайёс нокыӵе шуг-секытъёслы уг сётӥсько. Соос быгатыса утё вашкала сямъёсты-йылолъёсты, удмуртлыкмес, культурамес. Соин но, дыр, арлы быдэ кадь кунгож сьӧрысь куноос вуыло татчы. Вазенгес та гуртэ пуктыны малпаськизы вал национальной школа-лицей, шонергес вераса, этнографияя, экологияя национальной заповедник. Сое пуктон сярысь постановление 1992-тӥ арын 17 сентябре кутӥзы Вылӥ Кенешлэн Президиумез Удмурт Республикаысь Министръёслэн Советсы. Дасязы школа- лицейлы проект. Ужзэс мытӥзы коттеджъёс пуктон бордысен, дышетӥсьёслэсь улонзэс, пе, умоятоно. Дыр азьлань мынӥз. Коттедж борддоръёс ӝутскизы - коньдон быриз. Липеттэм юртъёсты вузаны малпазы. Дунзэ сокем мултэс ӧз куре ке но, кулэ карись ӧйлась. Юртлы укшась борддоръёс табере сылмыса сыло. Школа-лицейлы кыкетӥзэ дасям проект но кемалась вужмиз ни. Чупрес кузёбайёс кутскем ужзылэсь озьы гинэ уг аналско. Ортчем толэзьлэн пумаз татысь дышетӥсьёс но Алнашысь кивалтӥсьёс нош ик пумиськылӥзы Удмурт Республикаысь Правительстволэн Тӧроеныз П. Н. Вершининэн. - Школамылэн выль проектэз (куинетӥез) дась ни, пе, - веранзэ азьланьтэ школалэн кивалтӥсез Аркадий Николаевич Прокопьев. - Оскытӥзы ке но, гужем вылтӥ фундаментсэ лэсьтон борды кутскозы ни шуыса, оскон ӧвӧл. Нырысь лэсьтӥськон ужъёсты йылаз-пумаз вуттыны чаклало Усо школаын. Озьы ик липеттэк сылэ на Алнашысь музыкальной школа (культура юрт). Кин тодэ, оло, мукетъёссэ лэсьтытозь, милям проектмы выльысь вужмоз. Кузёбай но Усо артэ гуртъёс луо. Соин ик кӧня ке мадё на кыкетӥез школа сярысь но. Пуктэм юртлэн борддоръёсыз езъёсын керттылэмын, соос куашкан калэ вуэмын, пильылӥськемын. Тодӥсьёслэн, гуртысь мӧйыослэн верамзыя, школа пуктэмын клуб бервылэ, нош со сылэ вылэм пӧзись ошмес интыын. Небыт музъем шудэмъя, борддоръёс но солань-талань сётъясько. Соин ик шуг вераны, та школаын дышетскемзы луоз-а меда отын пиналъёслэн. Юнме ум шуиське, дыр, пиналъёслэн кыкетӥ дорзы - школа. Котькыӵе луиз ке но, асладэз аслыд мусо, дуно потэ. Соинтэк-а, Кузёбай школаез йылпумъямъёс но дышетӥсь луыса тросэз вордскем палъёсазы ик берытскизы. Ӟеч кусыпъёссы колхозэнызы. Быгатэмзыя соос ог-огзылы юртто. Малпасько, вуоно даурез кузёбайёс тросгес шумпотонъёсын пумиталозы, соосты уз вунэтэ вылӥ кивалтӥсьёс но. Нош кутскем ужзэс одно ик йылаз-пумаз вуттозы. Уго бумага вылын гинэ кыдёке уд вуы. В. КУТУЗОВА. Туннэ дышетсконо школаын. Туспуктэмъёсыз В. Камашевлэн. Бызьыло толалтэ но Комсомоллэн 80 ар но Удмурт университетысь спортъя факультетлэн 50 ар тырмонэзлы сӥзьыса алигес 300 иськеме бызьылонъя трос нуналъем ӵошатскон ортчиз. Спортсменъёс потӥзы Ижевск, Италмас, Воткинск, Чайковский, Камбарка, Нефтекамск, Сарапул, Ижевск городъёс пыр. Кызь куинь спортсмен пӧлын тужгес но тодмоосыз вал туэ дуннелэн чемпионэз Анатолий Корепанов но Европалэн чемпионэз Алексей Белослудцев. "Этапъёсын интыосты басьтэмзыя финише нырысетӥ трос пол вормылӥз ни Россилэн марафонъя чемпионатъёсаз. Кыкетӥ интыын Ижкарысь Анатолий Корепанов, куинетӥын - Алексей Белослудцев. Ӝог бызьылӥсьёс пӧлын вал "Ижпланета" спортклубысь Семен Вовкин, Игра посёлокысь Василий Малых но "Динамо" обществоысь спортъя мастер Андрей Пупышев. Та бызьылон радъямын вал интыосысь администрацисолэн, Воткаысь сур пӧзьтон заводлэн, Ижкарысь "Орбита" но минеральной вуос поттонъя акционер огазеяськонъёслэн юрттэменызы. Иван Михайлов. Наталь Психологен кенешон "Паллянэ" кожод - семьядэ ыштод? Валэктэ, мар кароно мыным? Картэ пумиськылэ эшеным, табере ини азьвыл эшеным. Кузпалыз шудтэм учыре сюрыса, со кылиз одӥгназ - кияз пичи нылпиен. Милям но нылмы будэ. Пиналъёсмы ог-огенызы эшъясько, одӥг садике, одӥг кружоке ветло. Одӥг общежитиын улӥськом бере, семьяосынымы эшъяськиськом вал. Эше одӥгназ кылем бере, картэ солы куд-ог дыръя юрттылӥз, нылпиосмес садике нуылӥз, ачиз ик басьтылӥз но. Кӧня ке дыр ортчыса тодӥ: кузпалы лушкемен пумиськылэ эшеным. Соин йырин кусыпъёсмы милям кезьытомизы, толэзьлэсь ятыр ини мон картме бордам но йӧтскылыны уг лэзиськы. Но аслам сотэк улэме уг луы. Со но милемды огнамес кельтыны уг дӥсьты - кыклы люкиськыса кадь улэ. Уг тодӥськы, кӧнялы тырмоз на мынам чиданэ, но туж потэ вал семьяме утеме. Оло, кыӵе ке визь-кенеш сётоды? ЕЛЕНА. Ижевск город. Кузпалъяськонэз ӵошатыны луоз пумтэм-йылтэм кыстӥськись сюресэн. Нош сюрес вылын пумиськыны быгатозы пӧртэм шуг-секытъёс. Куспазы кылдэм керетонъёс кузпалъёсты кыксэс но вӧсь каро, уката ик со тупамтэос герӟаськемын ке кудзылэн ке но "паллянэ" кожаменыз. Сокем бадӟым ултӥян, вӧсь луон вань ӟечсэ но сутыса быдтоз кадь, одӥг кылэ вуыны туж секыт ни. Озьы ке но, вожпотонлы сётӥськыса, ог-огедлэсь палэнскыны турттон, вераськытэк улон тэшканы кутскем кусыпъёсты уката муромытоз. Гожтэтысьтыды мон валай, асьтэос но, картты но егитэсь на, кемалась кузпалъяськымтэ ай. Кыкты но люкиськыны дась ӧвӧл, но сюлмысь вераськыны, ог-огды пумитэ нырысетӥ вамыш лэсьтыны нокудды но уд дӥсьтӥське. Тӥ - ултӥяме шедемдэс вунэтыны быгатытэк ("со янгыш ук, малы мон нырысетӥ вамыш лэсьтыны кулэ"), нош со - янгышсэ шӧдыса. Озьы ик тӥледды кыкнадэс но кышкатэ, луоз, шара вераськон, солэн бервылъёсыз. Котькыӵе секыт мед луоз, турттэ валаны: кызьы но кыӵе мылкыдын тӥ учкиськоды асьтэ шоры, картты шоры. Малпасько, пӧртэм мылкыдъёсты бугырскозы, ог-огзылы пумит луисьёсыз но. Вералэ соосты. Кыкетӥез юан таӵе: "Мар мыным кулэ?" Нош ик вералэ вань малпанъёстэс. Соос озьы ик пӧртэмесь луыны быгатозы: вӧсь карем адямиостэс адӟонтэм каронысен картэныды выльысь тупан дорозь. Малпасько, кусыпъёстэс юнматон нырысь интыын луоз, сое валаны луэ гожтэтысьтыды но. Тросэз психологъёс лыдъяло, кузпалъяськон - со пӧртэм ужпумъёсъя ог-огеныд тупанкылэ вуон (контракт гожтон) - куронъёсты шараяса яке шараятэк. Кылсярысь, кузпалъёс асьсэос чаклало ни, кин пӧралоз сиён, тусьты-пуньы миськоз, жуг-жагез поттоз. Ужпӧрез кышноен карт куспын люкон ӵемысь герӟаськемын вашкала дырысен кылдэм сямъя. Озьы ке но, котькудӥз семья ачиз кылдытэ ӵош улон правилооссэ. Улонысьтызы мае ке но воштыны турттонэз, сюлэмшугъёссэс кузпалъёс ог-огзылы верало ке, куспазы тупамтэос но ӧжытгес луо. Оло, тӥледлы, зэмен но, уг тырмы куспады шара вераськон. Ӵош улыны кутскемды дырысен мар ке но воштӥськиз, нош тӥ валаса ик ӧд вуттэ езаны кутскем кусыпъёстэс. Бен, луоз ас пушкад ватӥськыса улыны, картэд мукетыз доры ветлэмысь поннад куректыны но курадӟыны. Вань мукет но сюрес. Нырысетӥез вамыш - картэныды вераськоно. Усьтэ солы асьтэлэсь мылкыддэс, азьланяз кызьы улыны малпанъёстэс. Кыкнады но люкиськонлы пумит ке, кылдэм югдурез ӵошеннады тупатонлы тӥ дасесь. Тупамтэостэс лыдъялэ огдырлы гинэ кылдэм югдурен. Аслам ужам мон пумиськоно луи сыӵе учырен но: мукет нылкышноен одӥг пол янгышам понна, кышноез картсэ адямиен ик лыдъямысь дугдэм - ваньмыз солэн косэмезъя гинэ мед луоз, пе. Туж вӧсь луыса но валаны турттоно - котькуд адями янгышаны быгатоз. Озьы учкиды ке, тӥляд но сюлэмды картты пала берытскоз. Кузпалъяськонэз шуим бере ог-огеныд тупанкыл шедьтон но ӵош улон правилоос кылдытон, кусыпъёсты шоры тырше выль сямен учкыны. Шуом, кузпалъяськыкуды гожтэм контрактты вужмиз, табере кылдытоно выльзэ. Картэныды ӵош валэктэ таӵе юанъёслы: - Кыӵеесь выль куронъёс гожтысалды контрактады? - Азьлооссэ кыӵе куронъёсты кельтысалды? - Кудды кыл кутоды юрттэс кутон ласянь? Нылпидэс будэтонын? - Кызьы кутӥськоды коньдондэс? - Матысь кусыпъёсты шоры кызьы учкиськоды? - Пусъе асьтэлэн улонады мур выжы лэзем сямъёсты, озьы ик чыры-пыры куронъёсты (кылсярысь, телевизорлэн зол вераськемез люкетэ, югыт тыл изьыны уг сёты но мукет). Юанъёслы валэктонъёс ик луозы куспады тупанкыл шедьтон. Валэктонъёс тӥледлы ӧз кельше яке ӧз тупалэ ке, вазиське психологлы. Гожтэт пыр гинэ югдурез пумозяз валаны уг луы. Собере ваньмызлы тупамон валэктон шуг шедьтыны. Е. СМАГА, Ижевскысь "Шугъяськись семья" центрысь психолог. Наталь Тол керттэ пужыос Ижевскысь "Металлург" культура двореце 12 декабре калык празднике сямен лыктӥз. Акциосын "Сактон" огазеяськонлэсь керттэм дӥськутъёссэ шаерамы тодӥсьтэмез ик ӧвӧл, уго, нуллӥсьёсыз но уно гинэ. Фабрикаын поттэм вузъёслэн дунъёссы сокем уг "куртчылӥсько", нош та нуналэ луонлык вал эшшо но ӧжытгес дунын аслыд яке семьяедлы Выль ар кузьым басьтыны. Шудоосызлыгес лотерея шудонын но удалтӥз. Нош та ужрадэ лыктэм трос нылпиё семья одӥгез но кузьымтэк ӧз кошкы. "Сактон" фирмалэн валтӥсь директорез Зоя Степнова кивалтэ бере шаерысьтымы Нылкышно кенешен, семьяос сярысь сюлмаськонэз но палэнэ уг кельты. "Выль ар серпантин" - озьы нимаськиз "Сактонлэн" таиз адӟытон-вузкарон ужрадэз. Кык ар куспын со ньылетӥзэ ортче ни, та выллем праздник берлогес вал 8 Март азьын. Мунё кадь чебер нылъёс сцена вылысен озьы ик возьматъязы керттэм дӥськутъёсты. Бырйы гинэ, кудӥз тыныд кельше-тупа. Покчи но быдэ вуымтэос, егитъёс но мӧйыос - нокин вунэтэмын ӧвӧл. Нимысьтыз дӥськутъёс керттэмын таза мугоро нылкышноос понна, кильтыръяськыны яратӥсь нылъёслы но пӧртэм модельёс чакламын. Та нуналэ "Сактонын" ужасьёслы пӧсь ик йӧтӥз, лыктэм калыкез 100 мурт пумитаз-келяз ке но. Тросэз соос та нуналэ Удмурт Правительстволэн но Ижевск администрацилэн данъян грамотаосыныз пусъемын. Кызьы пусйиз Зоя Ивановна, соос лэсьтэменыз уг буйгатско, весь выльзэ утчало. Фабрикаын пуктэмын туала куронъёслы тупась оборудование, кнопкаосты гинэ зӥбылыса вутты. Воргоронъёс сярысь но сюлмаськизы. Табере соос уз ёрме ни носкиослы - "Сактонын" керттэмзэ басьтыны быгатозы. Фирмалэн вань аслаз 13 магазинэз. Арлы быдэ 400 сюрс керттэм дӥськут потто, кылдэ 200 выль модель. Тол пужыосты керттыса, "Сактон" дасяське тулыс-гужем нуллоно дӥськутъёс кылдытон борды. Л. МАЛЫХ. Выль ар азьын Ортчемез вылын дышетскыса, выльзэ кылдытыса... Коньдонэн шуг ке но, Ижевск Выль арез мукет аръёслэсь уродгес уз пумита, пусйиз Ижевскысь мэрлэн социальной ужпумъёсъя воштӥсез Г. А. АХРОРОВА журналистъёсын пумиськоназ. Выль ар уе кырын шулдыръяськыны мылкыд карисьёс люкаськыны быгатозы Шор карлудэ (площаде). Татын йӧ город лэсьтэмын, кыз пуктэмын луоз. Та вакытлы карлудын йӧ борддоръёс, гурезьёс лыз сиосын чильк-вальк кисьтасько ини. Кылем арын татысь гурезьёстӥ нискылакузы, уноез нылпиос шуккиськизы вал, нош огез нылаш сӧсырмыны но шедиз. Та выллем шудтэм учыръёслэсь утиськон понна, туэ гурезьёс лапегесь луозы. 28 декабрьлы йӧ город дась луыны кулэ, отын Тол Бабай, Лымы Ныл, Кеч, выжыкылъёсысь мукет лымы геройёс "улозы". Выль ар азьын городысь Тол Бабайёс, карлудэ люкаськыса, быгатэмзэс, кельышлы луэмзэс возьматозы. 28 декабрьысен 12 январёзь татын нылпиос понна праздниклы сӥзем ужрадъёс ортчозы. 7 январе 16 часын кутскозы Толсурен герӟаськем шулдыръяськонъёс. Центральной площадез Выль арлы дасян 400 сюрс манетлы усёз. 40 сюрссэ висъяз Удмуртиысь Правительство, кылемзэ пичиен-пичиен сёто городысь предприятиос, фирмаос. Удмуртиысь Правительство шаерысьтымы нылпиос понна кыз котырын шулдыръяськон ортчытоз Йӧ дворецын. Отчы тужгес но устоосыз пиналъёс ӧтемын луозы. Операя но балетъя театр ӧсъёссэ усьтоз ӧлексы нылпиос азьын. Ижевскысь вань пиналъёс (14 аресозь) ческыт кузьымъёс басьтозы ог 30 манетлы. Соослэсь дунзэс тыре Социальной страхованиея фонд. Школаосын, нылпи садъёсын, дворецъёсын праздникъёс ортчозы, анай- атайёслэн кисыоссы чотын. Выль арлэн вуэмезлы пиналъёс кадь ик ортчыт шумпото пересьёс но. Соосты нимысьтыз программаен ӟечкылалозы городысь пенсионеръёслы улон-вылонын юрттэт сётонъя вить центр но "Удмуртия" кинотеатр. Ивортонзэ йылпумъяса, Г. Ахророва нимысьтыз пусйиз, Выль арез пумитаку, шудтэм учыръёслэсь утиськон сярысь но вунэтоно ӧвӧл шуыса. Тужгес - пуштылӥсь, ыбылӥсь шудонъёсты, одӥг кылын вераса - пиротехникаез кутонын. Кылем арын уноез пиналъёс, ма, мӧйыос но, сыӵе арбериосты пуштытъякузы, киоссэс, ымныръёссэс, синъёссэс сутыса, сӧсыртыса, больницае шедьылӥзы. Кышкытлыклэсь утиськон понна уг яра пиротехникаез нылпиослы оскыны, трос адями люкаськем интыосын пуштытъяны. О. ВАХИТОВА. Оскымон эш но дышетӥсь вал Республикаысьтымы тросэз сыӵеен тодазы ваё та адямиез. Котьку ӝикыт но чебер дӥсяськемын, йӧн-йӧн вераське, синмаськымон интеллигент. Мон верасько шаркан пи Пётр Михайлович Яшин сярысь. Тросэз тодо "Советской Удмуртия" газетлэн редакторез вылэмзэ, та ужын со дас куинь ар ӵоже тыршиз, мукетъёсыз - "Удмуртия" издательстволэн директорез луыса ужамзэ, удмурт школаосысь дышетӥсьёс но дышетскисьёс - удмурт литературая учебникъёсызъя, удмурт фольклоръя книгаосызъя. Удмурт пединститутын дышетскыкуз ик Пётр Яшин эшъёсыз пӧлын висъяськылӥз котькыӵе ужрадъёсын кичӧлтӥсь луэменыз, общественной уже мылысь-кыдысь пыриськылэменыз. Сое трос пол бырйылӥзы комсомоллэн институтысь комитетаз. Гажамон но нодлыко луэменыз ик студентъёс солы, асьсэос кадь ик егит пилы, вазиськылӥзы нимын-тулын - Пётр Михайлович шуыса. Институтэз йылпумъямез бере, Пётр Михайловичлы ужаны ӧз кылды - соку ик басьтӥзы армие. Фашистъёслы пумит лек ожын сӧсырмыны шедиз. Озьы но армиысь бертӥз ай война бырем бере гинэ. Партилэн обкомаз инструктор луыса кӧня ке ужамез бере, 1948-тӥ арын сое юнматӥзы "Советской Удмуртия" газетлы редакторе. Тӥни татысен кутске журналистика удысын сюресэз. Та сюрес вылысь со ӧз кожылы ни, улонысь кошкытозяз. Та визьмо, зӥбыт, лякыт сюлэмо адямиен мыным ужаны шуд усиз 1951-тӥ арысен. Свердловскысь партийной школаез йылпумъяме бере, монэ ужаны ыстӥзы "Советской Удмуртия" газетлэн редакцияз. Зэм, П. М. Яшинэн пумиськылӥ вал ини азьлогес, Пичи Пургалась "Ударник" районной газетлэн редакторез луыса ужакум. Соку интыосысь удмурт кылын потӥсь газетъёслэсь редакторъёссэс "Советской Удмуртия" газетлэн редакцияз ӧтчаллязы дышетскыны. Тӥни соку ик валай ни Пётр Михайловичлэсь кыӵе луэмзэ, нош соин артэ ужаку, сюлэм уката тырмылӥз сое гажан мылкыдын. Малы? Нырысь ик, со ачиз гажа вал ӵош ужась эшъёссэ, котьку юрттылӥз соослы, дурбасьтылӥз умоесь кичӧлтонъёссылы. Тани мон культурая но бытъя отделэн кивалтӥсько вал. Ужамы Геннадий Красильниковен ӵош. Редактормылэн юрттэменыз, поттылыны кутским нимысьтыз пӧртэм бамъёс: "Шӧкыч", "Шудэлэ тӥ, серектэ", "Пинал куараос", "Тӥледлы, нылкышноос" но мукет. Котькудзэ редактор милемын ӵош пыр-поч эскерылӥз, дуноесь дэмланъёс сётылӥз. Пётр Михайловичен валче ужатозям, ноку но кылэме ӧй вал солэсь кинэ ке тышкаськемзэ, кин ке шоры лек вазиськемзэ. Янгыше усьыкуд но со тонэ эшъёсыд азьын ноку ӧз куаретылы. Редакцие ужаны лыктэме бере, мон квартираын улӥ одӥг адямиос дорын. Инты висъязы гур сьӧрысь сэреге. Радиомы но ӧй вал. Берло иворъёсты редакцие лыктыса гинэ тодылӥ ини. Со нуналъёсы ялан ивортылӥзы И. В. Сталинлэн висемез сярысь. Одӥг пол ӵукна редакцие лыктӥсько но, эшъёс шуо: "Сталин кулэм". Люкаськимы планёркае. Берло иворъёсты верамез бере, редактор шуэ: "Нош куд-огез тани таӵе нуналэ но уже вазьгес лыктыны мылкыд кариллямтэ". Мон валай ини, кин со "куд-огез", эшъёслэсь бергес лыктӥ бере. Яке тани, Г. Д. Красильников Москвае Литературая институтэ дышетскыны кошкыку, ми сельхозотделлэн кивалтӥсеныз Ф. В. Корепановен ӵош сое келяны ветлӥм. Поезд бер уин кошкемен, доре ӵукна пал гинэ вуимы. Ӵукна султыса, пединститутэ мынӥ материал дасяны. Редакторлы ӧй вера вал. Со монэ утчам, кытынме нокин уг тоды. Редакцие вуи гинэ - редактор доры ӧтизы. Пырисько Пётр Михайлович доры, сюлэм йыг-йыг тэтча. Со, шорам но учкытэк, газет лыдӟонъяз шуэ: "Мон уг малпаськы вал, куд-ог ужасьёс кытчы ке ышыло шуыса. Красильников сьӧры Москвае кошкиллям кожай". Мон озьы но, тазьы но валэктыны выри ке но, янгышелэн зӥбетэз вылысьтым ӧз усьы. Ноку ӧй вунэтылы ни та учырез. Куд-огез эшъёс мон сямен ик кыӵе ке янгыш лэсьтэмзы бере шуозы вал: "Та редактор мед тышкаськоз вал-а, мар-а, соку капчигес луысал, нош со йырзэ гинэ шоназ". Тӥни озьы, нокин но ӧз кылылы Пётр Михайловичлэсь лек кылъёссэ. Нош юрттыны котькинлы дась вал: я улон интыен, я кинлы ке эмъяськыны кулэ, курортэ путёвка шедьтоно... Огпол со мынам ужан дорам пыриз но шуэ: "Ӝоген юбилеед, лэся: кызьы пусйыны малпаськод?" Мыным соку куамын арес тырмиз, нош улӥ патерын. Ма, шуисько, ӝӧк пуктыны но инты ӧвӧл ук, кыӵе юбилей? Пётр Михайлович кӧня ке малпаськиз но шуэ: "Мон доры луоз люкаськыны: кузпалы пумит ӧвӧл. Кинэ кулэ, ачид ӧтёд". Тӥни сыӵе вал со. П. М. Яшинлэн озьы котькинлы юрттэмез сярысь трос вераны луоз. Со вакытэ редакциын ужан нунал кема кыстӥськылӥз. Номеръя редакторъёс, берыктӥсьёс, корректоръёс уйшор бере гинэ кошкылӥзы. Нош редактормылэн тылъёсыз котькинлэсь бер кысылӥзы. Со сяна, Пётр Михайлович бадӟым общественной уж нуиз. Сое бырйылӥзы партилэн обкомезлэн бюрояз, Удмурт АССР-ысь Вылӥ Кенеше. Со вал республикаысьтымы Журналистъёслэн огазеяськонзылэн нырысетӥ тӧроез. Ӵапак со дыръя бадӟым уж нуиськиз газет поттонын ужасьёсты дасянъя, соослэсь тодон-валанзэс будэтонъя. Соку ик "Советской Удмуртия" газетлэн редакцияз кылдӥз но кема аръёс ӵоже ужаз литературной объединение. Солэн нырысетӥ кивалтӥсез вал тодмо писательмы Михаил Петрович Петров. 1961-тӥ арысен Пётр Михайлович ужаз, "Удмуртия" издательстволэн директорез луыса. Отысен ик потӥз ини пенсие. Ожъёс пыр ортчыса, бадӟымесь ужъёсты быдэсъяса, Пётр Михайлович ас калыкез азьын данэ потэм адями луиз. Со понна вылӥ наградаосын но пусъемын, дыр, ук. Юаллясько соин ӵош ужам эшъёслэсь. Нокин но уг тоды. Нокинлэн адӟемез ӧвӧл Пётр Михайловичез орденъёсын но медальёсын. Сыӵе уго вал со аслаз востэм луэменыз. Нылыз, Татьяна Петровна, пыр гинэ тодӥ ини: П. М. Яшин данъямын вылэм кык Трудовой Горд Знамя, Отечественной война, Горд Кизили орденъёсын, данак медальёсын но грамотаосын. Та толэзе Пётр Михайлович Яшинлы тырмысал тямыстон вить арес. Сизьым ар ӧвӧл ни со асьме пӧлын. Нош чебер тусбуйыз, либыт сямыз, мылкыдэз ӝутӥсь визь-нодъёсыз ноку вунонтэмесь, трос адямиослы юрттӥз со улонын шонер сюрес бырйыны но отӥ йыг-йыг вамышъяны. Аслаз но улон сюресэз сыӵе ик вал. Василий МИХАЙЛОВ. * Пётр Михайлович ЯШИН нылызлэн нылыныз. ЭКОНОМИКА Александр Соловьев: "Сюрес - улонлэн вирсэрез" Зэмзэ но, улон-вылонамы сюресъёс бадӟым инты басьто. Соос люконтэм герӟаськемын экономикамес юнматонэн но калыклэсь улонзэ умоятонэн. Тӥни соин ик сюресъёсты юнме уг ӵошкато улонлэн вирсэръёсыныз. Соя ик дунъет сёто котькуд улосвыллы но республикалы. Азьло Россиын но, Удмуртиын но сюресъёс туж уродэсь вал. Совето аръёслэн берло вакытазы гинэ шаерамы райцентръёсы вуттэмын вал асфальт сюрес. Кыӵе бен али югдур? Выльдӥськон кутскем бере, республикаямы та уж гуньдӥз вал. Берло дыре сюресъёс лэсьтон улӟе ни. Со туж умой адӟиське "Удмуртавтодор" кун предприятилэн тӧроезлэн Александр Соловьёвлэн журналистъёсын пумиськонын верамысьтыз. Туэ дас одӥг толэзь ӵоже вуттэмын ни 96 иськем асфальт сюрес, тупатъямын 185 иськемез, лэсьтэмын 11 но выльдэмын 15 выж. Бадӟымесь ужъёс ортчытэмын Ижевск-Воткинск, Игра-Пермь сюресъёс вылын. Асфальт понэмын Киясовоысь Ермолаево черкогуртэ. Радъямын сюрес пусъёс (знакъёс) лэсьтон. Соос кунгож сьӧрын кадь поттэмын, номырин уг висъясько. Сюрес дуртӥ 26 иськем корт кенер тыремын, нош 420 иськем сюрес шортӥз тӧдьы буёлэн висъямын. Ваньмыз со лэсьтӥське водительёс понна, сюрес вылын шудтэм учыръёс медаз луэ шуыса. Соин ӵош ик предприятие выльдэ техниказэ, пуктэ шуныт гаражъёс но ужаз кутэ усто амалъёсты. Кылсярысь, шаерамы басьтэмын ни туж устоесь асфальт тырон машинаос. Озьы сюресъёсмы син азьын вольытэсь луо. Кызьы но мар чотын бен выльдӥсько улон вирсэръёсмы? Сюресъёсъя улосвыл фондэ туэ люкаськыны кулэ вал 393 миллион манет пала коньдон. Отчы пыро вань тыронъёс (техника возем понна выт) но юрттэт (инвестициос). Со сяна, Сюресъёсъя федеральной фондысь вуыны кулэ вал 79 мллион манет. Со коньдонэз дорожникъёс дыраз басьтысалзы ке, трос ужъёсты быдэстыны быгатысалзы. Но туннэ, жаляса верано луэ, со чечы пуньыен кадь лыктэ. "Удмуртавтодорлы" улэп уксёен выт тыро коньдон организациос, переработкая предприятиос но нимаз машина возисьёс. Мукетъёсызлэн тыронъёссы пумен будо но бартер амалэн берыктыны выро. Со дыре ик сюрес лэсьтӥсьёслэн асьсэлэн тыронъёссы 150 миллион манетлэсь уно люкаськемын (транспорт, кӧльы, луо басьтэмзы понна), нош кун бюджетэ 25 миллион манет выт сётоно, Пенсиосъя фондэ - куать миллион манет. Соин сэрен предприятие выль аре 122 миллион манет тыронъёсын потэ. Озьы ке но, 1999 арын ужъёссэ кулэстыны уг чакла. Азьланезлы малпанъёссы бадӟымесь. Камбарка дорын Кама шур вамен выж лэсьтоно. Солы ичизэ 350 миллион манет кулэ луоз. Выжлэн кузьдалаез ик одӥг иськем ёрос кыстӥськоз. Та ужез федеральной фондысь уксё висъятэк уд быдэсты. Озьы но матысь дыре вуттыны секыт луоз. Дорожникъёс ог интыязы уг лёгасько. Тани туэ сюрес лэсьтонъя 6 конкурс ортчытӥзы. Со юрттӥз ужъёсты ӝогомытыны, ӟечлыксэс ӝутыны но 16 миллион манет коньдон шыръяны. Предприятие озьы ик умоесь кусыпъёс тупатӥз ни "Буммаш" но "Ижмаш" огазеяськонъёсын. Нырысетӥез АО дорожникъёслы 4,8 миллион манет тыр продукция поттӥз, нош кыкетӥез 20 пумо обрудование лэсьтӥз. Бен, "Удмуртавтодорлы" трос лэсьтоно на. Кылсярысь, шоркарын (столицаын) улӥсьёс кемалась возьмало ни Иж сьӧртӥ кошкись сюресэз. Соку, кӧня грузовой автомашинаос городэ ӧй пырасалзы, озьы Иж чылкытасал, уката ик омыр. Со понна Як.-Бодья сюресэз Иж пруд сьӧртӥ Можга трактэн герӟано, кыкетӥез - Воткинск сюрес вылэ потоно. Выль арын дорожникъёс та ужъёс борды басьтӥськыны чаклало. Нырысь проектъёс дасялозы. Россиысь куд-ог улосвылъёсын (Саратов, Оренбург областьёс, Татарстан) выжъёссы но сюресъёссы вылтӥ ветлэмзы понна дун басьто. "Удмуртавтодорлэн" кивалтӥсез сое умоен уг лыдъя, уноез сюресъёс, выжъёс огъя кужымен, пе, лэсьтэмын ук. Шонер со. Огъя вераса, шаерамы "Сюрес" программа улонэ пыӵа, арысь аре сюресъёсмы вольытало, кун предприятие усто техникаен узырме, асфальт тырон машинаос но компьютерен ужало ни. Кызьы солы уд шумпоты. Г. РОМАНОВ. Эскероно ужпумъёс уно Удмурт Элькунысь Кун Кенешлэн Тӧроез Александр Волков 23 декабре Федерацияя Кенешлэн ужаз пыриськиз. Отын кызьлэсь уно ужпумъёс эскеремын. Сэрттэмын-пертчемын "Бюджетъя но налогъёсъя политикаын нырысетӥ быдэстоно ужпумъёс сярысь", "Бюджет чотын ужась организациосын тыршисьёслы уждун тыронэз радъян сярысь", "Россия Федерациын военной реформа сярысь", "Нимаз хозяйство возён сярысь" но мукет ужпумъёс. Кун Кенешлэн пресс-службаез. Наталь Тодматскон сэрег Аб. 254. Удмурт пиосмурт, 39/173, гороскопея Овен, улӥсько городын, вань квартирае. Тодматскысал 36-42 аресозь лякыт но зӥбыт сямо нылкышноен, гороскопезъя Лев яке Близнец мед луоз. Аб. 255. Вордскемын 19. 01. 72 арын, нимы Петя, 175/70, тамак кыскисько, курытэныз уг эшъяськиськы, улӥсько гуртын анай-атаеным, ужасько лэсьтӥськисьын. Тодматскысал 30 аресозь удмурт нылашен. Аб. 256. Удмурт кышномурт, 43 арес, гороскопея Близнец, картэ кулӥз, ужасько колхозын, вань аслам хозяйствое, улӥсько пичи нылыным. Тодматскысал ужез гажась, нылпиме но монэ яратыны быгатӥсь, лякыт сямо но вазиськись воргоронэн, пумит ӧвӧл нылпиезлы. Аб. 257. Удмурт нылкышно, 25/167, лякыт сямо, будэ 7 аресъем пие. Тодматскысал 25-35 аресозь удмурт воргоронэн (пытсэт сьӧрын пукемъёсыз медаз гожтэ), Пичи Пурга котырысь мед луысал. Аб. 258. 28 аресъем воргорон, 7 ар ӵоже вал взводлэн командирез, частьсэс расформировать каремзы бере, ужтэк кылиз, улэ городын. Пияш учкымон, чылкыт, сьӧд синкашо, кышнояськылымтэ. Анай-атаез удмурт бере, удмурт кенлы ик кулэясько. Военнойёс чебер нылъёсты ярато, сямыз но сыӵе ик чебер медло вылэм. Ужезъя котькыӵе удысын мед тыршоз. Но умойгес луысал, вазиськысалзы ке Ижевскысь нылъёс, отын угось уже интыяськон ласянь но капчигес. Квартиразы ке вань, эшшо но умойгес. Мед вазиськысалзы гуртын улӥсь нылъёс но. Ялон сётӥзы анаезлэн апайёсыз, ачиз та сярысь уг тоды. Ми асьмеос тодматысалмы сое гожтэтъёсыныды. Редакцилэсь: Лыдӟисьёсмылэсь ялонъёссэс тодматскон сэреге сётӥськомы, дун басьтытэк. Нимзэс, кытысь луэмзэс газет пыр ум шараяське, ваньмызлэн адресъёссы редакциын. Ялон сётӥсен тодматскыны мылкыд карисьёслы ивортӥськом: адресъёсты ми нокинлы ум келяське. Абонентлэсь номерзэ пусйыса, редакцие гожтэт ыстэ. Нош кинлы ке сӥзем гожтэттэс маркаен чылкыт конвертэ понэ - ыстомы кулэ адресъя. ПРАВИТЕЛЬСТВОЫСЬ ИВОРЪЁС Скважинаосты - арендае Нефть, газ кыскись скважинаосты арендае сётонъя рад тупатэмын. Арендае сётыны луэ Удмуртилэн асваньбураз пырись скважинаосты гинэ. Документ аренда понна дунлэсь быдӟалазэ но юнматэ. Матысь дыре ортчоз 26 скважинаез арендае сётонъя аукцион. Ужалозы асьме заводъёс Гурт хозяйствоя но сиён-юонъя министерствоез косэмын республикаысьтымы предприятиос пӧлын ортчытыны гурт техникаез но солы воштос ёзъёс поттонъя конкурс. Удмуртиысь заводъёс гуртъёслы ог 100 пала пӧртэм тракторъёс-машинаос поттозы. Быгатэм кулэ каре юрттэмез Ижевскысь нылашлэн Ася Корепановалэн нимыз крезьгур дуннеын тодмо луиз ини. Дас ньыль аресъем пианистка Россиын но кунсьӧрын ортчем конкурсъёсын быгатэмзэ возьматӥз ини. Али Ася Корепанова дышетске Москваысь кун консерваторилэн нылпиос понна крезьгуро школаяз. Правительстволэн Постановлениезъя Удмуртиысь Культурая министерстволы лэземын огкыл кутыны. Со огкылъя Асялы толэзьлы быдэ нимысьтыз стипендия но улон интыез понна коньдон тыриськоз. Правительстволэн Тӧроезлэн секретариатысьтыз пресс-центр. Тазалыкез утён учреждениослэсь ужзэс умоятонъя ӝегатскытэк быдэстоно ужрадъёс сярысь Удмурт Элькунысь Правительстволэн Постановлениез 1998 ар 7 декабрь Ижевск город � 1125 Элькунысь калыклы медициная юрттэт сётон но тырмыт эмъюмъёс висъян сярысь ужпумез эскерыса, Удмурт Элькун Кивалтэт пусъе: быдэс Россилэн экономикаяз кылдэм секыт югдур шӧдӥськытэк ӧз кыльы тазалыкез утёнъя учреждениослэн улоназы но. Трослы уродмиз эмъян учреждениослы сиён-юон, эмъюм но мукет кулэ луись материалъёс висъян. Элькунысь унояз городъёсын но ёросъёсын йылӥзы эмъян удысын ужасьёслы уждунъя пунэм тыронъёс, будӥзы эмъяськон учреждениослэн кредитъя тыронъёссы. Тазалыкез утёнъя учреждениослэсь ужзэс умоятон вылысь нимысьтыз ужрадъёс кутонэн валче. Удмурт Элькун Кивалтэт пуктэ: 1. Удмурт Элькунысь Кун Кенешлы эскерыны сётоно "Эмъян учреждениосын калыклэсь кӧня ке дун басьтыса амбулаторно-поликлинической но стационарын планъя юрттэт сётонэз но эмъянэз огдырлы радъян сярысь" постановленилэсь инъетсэ. Удмурт Элькунысь тазалыкез утёнъя министрлы С. Г. Шадринлы ӵектоно та ужпумъя Удмурт Элькунысь Кун Кенешлэн сессияз вераськыны. 2. Удмурт Элькунысь Аптекаосъя управленилы, Удмурт Элькунысь Тазалыкез утёнъя министерстволы дасяно но тупатэм радлыкъя эскерыны сётоно Удмурт Элькунысь Кун Кенешлэс "Льготоасын адямиослы амбулаториосын но поликлиникаосын тазалыксэс юнматон понна эмъюм вузан-басьтонэз огдырлы кулэстон сярысь" постановленилэсь инъетсэ. 3. Удмурт Элькунысь Тазалыкез утёнъя министерстволы, Эмъяськон понна одно тырон тсрахованиея удмурт улосвыл (территориальной) фондлы: ужрадъёс кутоно эмъян удысэз умоятонъя но калыклы юрттэт сётонэз тросгес амбулаториосы, поликлиникаосы выжтонъя; ортчытоно 1999 арын 1 январёзь эмъян учреждениосты, кинлэн асваньбурзы луэм шоры учкытэк, выльдон-воштонъя но эскеронъя ужрадъёс; кулэстоно элькун учреждениосъя 1999 арын 1 январьысен штатъя лыдэз 109 единицалы; кужмоятоно элькунын висён вӧлмонэз эскерыса возён ужез; радъяно улонын тужгес кулэ луись эмъюмъёсты но ортчыт дуно сылӥсь юрттэт сётонын мукет материалъёсты огазеяса (централизованной) басьтонэз. 4. Удмурт Элькунысь Коньдон ужпумъёсъя министерстволы: ужрадъёс кутоно, элькунысь калыклэсь азалыксэ утёнъя бюджетэ "Белкамнефть" ЗАО- лэсь 1998 арын декабрь но 1999 арын январь понна выт тыронъёссэ 2 миллион манет тыр сиён-юон сётэм чотын берыктон вылысь; вань луонозэ лэсьтоно, тазалыкез утён удыслы элькунэн юнматэм бюджетысь коньдонэз нырысь ик уждун сётонэн, эмъюм басьтонэн но висисьёсты сюдонэн герӟаськем тыронъёсты висъян понна. 5. Удмурт Элькунысь Тарифъёсъя но дунъёсъя кун комитетлы Удмурт Элькун Кивалтэтысь Аптекаосъя управлениен ӵош кужмоятоно тужгес но кулэ луись эмъюмъёслэсь дунъёссэс кунэн эскеронэз. 6. Городъёсысь но ёросъёсысь администрациослэн тӧрооссылы ӵектоно: норма луись документъёс вылэ пыкиськыса, эмъян учреждениосты выльдон-воштонъя но эскеронъя ужрадъёс ортчытыны; эмъян учреждениослы уждун тырон но эмъюм басьтон понна чаклам статьяосъя коньдон висъяны, эмъян учреждениослы сиён-юон но мукетсэ басьтыны ог-огедлы тыриськон (взаимозачёт) амалэз ӵемгес уже кутыны; городъёслэн но ёросъёслэн 1999 арлы бюджетазы ужасьтэм калыклы медицинской страхование понна коньдон висъянэз чакланы; эмъян учреждениослы вис карытэк шуныт, электрокужым сётонэз, связез но ведомствое пырисьтэм возьмаськонэз (охрана) радъяны. 7. Удмурт Элькунысь Гурт ужъёсъя но сиён-юонъя министерстволы. Удмурт Элькунысь Вузкаронъя но бытовой юрттэт сётонъя министерстволы элькунысь эмъяськонъя учреждениослы 1999 арын сӥзьыл - тол вакытлы 3 миллион манет тыр сиён-юон дасяны чаклано. 8 Та постановленилэсь быдэсъяськемзэ эскерыны осконо Удмурт Элькун Кивалтэтлэн Аппаратысьтыз Социальной азинсконъя управленилы. Удмурт Элькун Кивалтэтлэн Тӧроез П. Н. Вершинин. Наталь Анай, атай но мон Кияса ёросысь Лутоха шор ёзо школаын анайёслы сӥзем праздник ортчиз. Отчы ӧтемын вал гуртысь трос нылпиё семьяос. Нылкышно кенешлэн кивалтӥсез Лидия Николаевна Атеева 15 ар ӵош улэменызы ӟечкылаз кузпалъёсты Ангелина Леонидовна но Михаил Валентинович Беспаловъёсты, Энна Петровна но Валерий Яковлевич Камашевъёсты, Людмила Евдокимовна но Юрий Леонидович Никоновъёсты, Алевтина Михайловна но Юрий Анатольевич Шапеевъёсты. Юбиляръёс понна кырӟаз но эктӥз Тӥгырменысь "Купанча" ансамбль. "Семьялэн кузёез" темая вераськон но ӝутскиз та ӝытын. Дасяз сое Нина Сергеевна Пестерова. Собере вал спорт шудонъёс. Отчы пыриськиз тямыс семья. Ӵошатскизы, ньыль командалы люкиськыса. Семьяос быгатонлыкъёссэс котыр ласянь возьматӥзы, гуртэ уж но сётэмын вал соослы. Анайёс асьсэлэсь яратоно сиёнзэс пӧразы, нош нылпиос семьязылы сӥзем альбомъёс дасязы. Дунъясьёслэн лыдъямзыя, вормисе потӥз Владимир Семёнович но Пётр Ильич Камашевъёслэн огазеям командазы. Ӵошатсконэ пыриськем котькуд семьялы сётэмын вал синпель кузьым. Люкаськемъёс понна радъямын на вал чай юон но эктонъёс. Ёросысь семья отделлэн кивалтӥсез Светлана Михайловна Баранова йылпумъяса шуиз, тросгес, пе, ортчытъяно таӵе ӝытъёс, семья куспын ченгешонъёс но ӧжытгес луозы. А. НИКОНОВА, Лутоха школаын дышетскись. "Семья ке юн, улон но йӧн" конкурсэ Зумыто музъемын будосъёс но пушъё Пичи дырысеным ни мон вожъяськисько та семьялы. Туж бадӟым ӧвӧл со - атайзы Алексей Сергеевич, анайзы Нина Егоровна но Юра, Вова, Люда пиналъёссы. Ог-огдэ валан, эшъяськон но яратон уката шулдыр каро Мишкинъёслэсь ӝикыт юртъер котырзэс. Сюлэм шумпотэ шоразы учкыса. Таӵе шудо семьяос шаерамы ӧжыт ӧвӧл, дыр. Милям гуртамы ик, Пичи Пурга ёросысь Пуро-Можгалан, соос трос гинэ. Озьы ке но, мынам верано геройёсы - Мишкинъёс. Полекар Марьялэн ӧс йылысьтыз векчи ньӧръёсыз уг бырыло вал, угось укыр йӧнтэм будӥзы пиосыз. Нош быдэ вуизы но, чутырак воштӥськизы. Аляк пиос йӧн-йӧн воргоронъёс луизы, вань калыклы паймымон семья кылдытӥзы. Бадӟымез пизы Олёш 8 классысен синмаськиз ӵош дышетскись эшезлы. Пичи, начар мугоро Нина ачиз но валатэк пырак азелы берыктӥз йырзэ пияшлэсь. Синмаськон, шудон-серектон пӧрмиз пӧсь яратонлы. Одӥг шулдыр ӝытэ Олёш дэмлаз нылашлы улонзэс огазе герӟаны. Егитъёслы пумит султӥзы пияшлэн анай-атаез. Нина начар семьяысь вал угось, анаеныз ӵошен гинэ улӥзы кинобудкаын, мирошка пиналлы вить манет сётӥськись уксё вылын. Алёша нокинлэсь ӧз кылзӥськы. Сюлэмыз шӧдэм, лэся, Нина гинэ солы шуд сётыны быгатоз шуыса. Кызь ар тырмиз ни семья кылдытэмзы дырысен. Табере соос ӵошен гинэ ӧвӧл. Куинь пинал вордон сярысь азьло ик-а вераськиды шуыса юамелы, кузпалъёс валэктӥзы: - Олёшлэн сузэръёсыз ӧвӧл. Асьмелэн но нырысетӥосыз пиос бере, милемлы туж кулэ луиз ныл. Соин ик, дыдымы вордскытозь, ми дассэ но вайыны дась вал. Куинетӥез ныл вордӥськиз бере, дугдӥм та лыдпус вылэ. Мишкинъёслэсь пиоссэс инмар визьмын обидьымтэ. Юразылэн ӝӧк вылысьтыз олокыӵе но книгаосыз ӧз бырылэ. Яратылӥз пӧртэм йыртӥянъёсты лэсьтылыны, атаеныз политика сярысь вераськыны. Дышетӥсьёс дэмламъя, пияшез дышетскыны лэзизы Ижысь 56 номеро лицее. Татысен ини со пыриз Удмурт кун университетлэн математикая факультетаз. Кӧня ке дышетскемез бере факультетсэ воштӥз. Юра мылысь-кыдысь пыриське политикае. Ужа депутатлэн юрттӥсез луыса, бергатэ Удмуртиысь комсомолецъёслэсь ужзэс. Бере уг кыльы пичи выныз но. Вова 10-тӥ классын дышетске, "витьёс" гинэ басьтылэ. Зэм, Вова уг тоды на, кудпала улон сюресэз лёгиськоз. Анаез серекъя, пичи Вовиклэсь верам кылъёссэ тодаз вайыса: - Мон, мама, городын уло. Квартира басьто но пуко дорам, нокытчы ужаны уг ветлы. Атаез пайме, ку гинэ урокъёссэ дася пияш, угось шӧдыса но уг вуо пизылэсь ӝӧк сьӧрын пукемзэ, нош урокъёсыз котьку дась луо. Дышетскон шугенгес сётӥське Людалы. Озьы ке но, нылаш уг куректы, быдэс ӝыт пуке книга-тетрадь сьӧраз. Нош кыӵе кибашлы со. Районын нырысетӥ инты басьтӥз, мунёезлы аслаз киыныз пӧртэм дӥсьёс вурыса. Визьмынызы но кибашлыенызы гинэ уг, асьсэды воземенызы но паймыто калыкез Нина Егоровналэн но Алексей Сергеевичлэн пиналъёссы. Ноку уд кылы соослэсь анай- атайзылы мытылэмзэс, жоб кылын вераськемзэс, ог-огенызы черекъямзэс. Паймисько, кызьы мумы-бубызы дышетӥллям таосты асьсэды адӟем карымон возьыны. - Ма, ваньмызлэн кадь ик милям но семьямы. Ми картэным ноку ум керетӥське, вань ужмес ӵош лэсьтӥськом, сиён но ӵош пӧзьтӥськом, ог-огмес валаны тыршиськом. Пиналъёс ваньзэ тае адӟо ук, соин ик соос сыӵеесь, дыр. Ми соосты нимаз ужаны косыса но ум улӥське, сое-сое лэсьтоно вал шуиськом, пал кыл вератэк быдэсто. Одӥг пол но вераме ӧвӧл пиналъёслы астэ озьы возёно, тазьы кароно шуыса, шорам учкыса ик валало, лэся, - валэктэ мыным Нина апай. Ма бен, утялтэм, зумыто музъем вылын будосъёс но емышъёс удалто. Пинал мурт губка выллем, сюлэмаз пыӵатэ ваньзэ, мае адӟе: уродзэ но, умойзэ но. Мишкинъёс уродзэ палэнтӥ улляло бере, шат пыӵалоз со пиналъёслы. Шуо, туэ трос нылпи вордонлэн пайдаез ӧвӧл. Нош Мишкинъёс шоры учкиськод но сыӵе малпан ас понназ сылме. Пӧртэм шуг-секытъёсты татын ӵош сэртто-пертчо. Татын ӧвӧл пичиез но бадӟымез, татын ваньмыз одӥг семья. Ог-огдэ валан но гажан ик юрттӥз, дыр, Мишкинъёслы районысь трос нылпиё семьяослэн конкурсазы ньылетӥ инты басьтыны. Вормисьёс радэ но потысалзы, оло, но нокин соослы ӧз юртты дасяськыны. Мукет семьяос клубын ужасьёсын ӵош лыктӥллям, нош Мишкинъёс, асьсэ коже гинэ. Синпель кузьымзы, ковёр, залысь борддор бордазы ошемын. Аслаз чебереныз со семьялэсь шудзэ-бурзэ шунтэ. Вераськыкумы Нина Егоровна шуиз вал, шудмылы гинэ, пе, син медам усьы. Тьфу! Тьфу! Тьфу! Озьы ик медло со. Кема аръёс ӵоже шудды уртчыса мед улоз. Светлана Долганова, Удмурт кун университетын дышетскись. Вань удмурт ителлигенцилы ВАЗИСЬКОН Ми, "Удмурт интеллигенцилэн ас калыксэ азинтонын интыез" ужпумлы сӥзем конференцие люкаськемъёс, вазиськиском тӥледлы туала вакытэ асьме калыкмы азьын кылдэм югдур пумысен. Быдэс кунын улӥсьёс сямен ик удмуртъёс но туала вакытэ секыт югдуре шедемын. Улон ялан секытгес луэ, нуналмысь уродме но уродме. Азьланяз со тупатскоз шуыса, оскон кулэсме. Нош удмуртъёслэн асьсэлы гинэ тупась малпаськонъёссы но вань на: асьмелы калыкмылэн ӵуказеез сярысь сюлмаськоно. Нырысь ик со ужпум интеллигенция вылэ усе. Сое ачиз улон озьы косэ. Берло аръёсы уноез интеллигентъёсмы тае валазы ни, нош куд-огезлэн сюлмыз али но ас калыкез пала ӧз берытскы на. Сыӵеос тазьыгес шуо: мон аслэсьтым ужме ӟеч лэсьтӥсько, собере мынам юртъере (колхозэ, школае но мукетыз) но вань, нош калыкмы сярысь кивалтӥсьёсмы мед сюлмаськозы. Зэм, котькин ас ужзэ ӟеч лсэьтыны, ас удысэз сярысь сюлмаськыны кулэ. Озьы ке но, асьмелы, удмуртъёслы, вань калыкмы сярысь но малпаськытэк-сюлмаськытэк улоно ӧвӧл. Ӟуч но мукет трос лыдо калыкъёсысь потэмъёс пӧлысь котькудӥз ас калыксэ нуналмысь азинтыны ӧз тыршы ке но, солэн калыкез уз быры, шедёзы музонъёсыз но. Удмуртъёслы озьы улыны уг яра - асьмеос ӧжыт! Со ласянь котькудмы нуналмысь ӧм тыршелэ ке, калыкмылэн вуоно улонэз пумен бус пыртӥ кадь адӟиськыны кутскоз но отӥяз, оло, воксё ышоз. Асьмелы ваньмылы адӟем кароно Куӟебай Гердлэсь, Ашальчи Окилэсь, Трофим Борисовлэсь но мукет дано удмуртъёсмылэсь. Ас калыксы понна соос вань кужымзэс, быгатонлыксэс сётӥзы, улонзэс но ӧз жалялэ. Ми оскиськомы, быдэс удмурт интеллигенция ас калыкез пала вань сюлмыныз берытскоз но солэсь улон-вылонзэ умоятыны тыршоз шуыса. Кутэмын 1998-тӥ арын толсур толэзьлэн 18-тӥ нуналаз. Журналистъёсын пумиськонъёс Кызьы улом ӵуказе? Кылем вторнике, 22 декабре, Правительствоын журналистъёсын пумиськиз республикаысьтымы экономикая министр Евгений АВЕРЬЯНОВ. Со бадӟым инты висъяз выль арлы кун бюджет дасянлы. Нош ик ортчиз одӥгез секыт ар. Мар бен со асьмелы ваиз? Кин пыд йылаз йыг-йыг султӥз? Ӟечез, верамонэз сокем трос ӧвӧл ке но, шаермы, мукет улосвылъёсын ӵошатыса, арез урод уг йылпумъя. Тани синмаськымон азинсконъёс басьтӥз "Воткинский завод" кун предприятие, туэ, миым сярысь, куинь пол трос продукция поттӥз. Озьы ик умой ужазы Ижысь электромеханической завод, "Буммаш", "Ижевский радиозавод", "Ижсталь", "Сарапульский электрогенераторный завод", Глазовысь "Чепецкий механический завод" АО-ос но мукетъёсыз. Нош туэлы бюджетлэсь доход люкетсэ верано ке, со 2-3 процентлы гинэ уг тырмы. Чакламын вал 17,2 миллиард манет басьтыны, люкаськоз 16,8 миллиард манет. Малы бен ӧз быдэсмы? Нырысь ик, дуннеын му вӧйлы дун синэмен. Одӥг тоннаез 456 сюрс манет ке сылэ вал, со 406 сюрс манет луиз. Нош шаерамы, оглом вераса, нефть поттон ӧз сины. Кыкетӥез, 17 августэ юнме шорысь экономической кризис шуон люкетӥз. Куинетӥез, туэ ляб ужазы энергетикъёс. Но умойзэ но пусйытэк кельтэм уг поты. Тани "Удмуртнефть" ОАО-лы музъем узырлыкъёсты поттонъя выт кулэстэмын вал. Со юрттӥз огазеяськонлы ватсаса 120 сюрс тонна му вӧй кыскыны, нош кун бюджетэ чакламлэсь вылтӥ 8 миллион манетлэсь уно уксё вуиз, ваньзэ 61 миллион манет ёрос пыртэмын. Туэлы кун бюджет сярысь законын льготаос сётэмын вал Красногорск районысь Валамаз посёлоклы. Отын усьтӥськиз кык выль "Рустам" но "Велес-авто" эштос. Ужасьёссы трос ӧвӧл ке но (20 мурт), соос нюлэс, пиломатериал дасяло, корка бугроос ӵупо. Нош "Красногорскагропромснаб" куас лэсьтыны кутскиз. Отын 42 мурт тырше. Тӥни озьы выль ужан интыос кылдӥзы, кун но интыысь бюджетъёсы ватсаса коньдон сётэмын. Нош кыӵе луоз вылез, 1999 арлы бюджет, маин со висъяське? Россиын но, Удмуртиын но инфляция мынэ бере, дунъёс но вошъяськозы. Быдэс ар ӵоже коньдонлэн кужымез 30 процентлы лябӟоз. Со лыдэ басьтӥське. Кызьы шуо, бюджет чурыт луоз, но отысь 10 процент уксё висъямын луоз производствоез азинтонэ. Со ӧжыт ке но мед тупалоз азинскон бюджетлы, пыд йыламы султыны дыр вуэмын ни. Г. ВАСИЛЬЕВ. Юрий Никулинлэн музеез Москваын усьтӥськиз тодмо актёрлэн, клоунлэн Юрий Никулинлэн музеез. Интыяськемын со "Цирк но адямиез гажан" благотворительной фондлэн юртаз. Та фондэз кылдытӥз но соин кивалтӥз вал ачиз Ю. Никулин. Музей бадӟым ӧвӧл ай, татын дано артистлэн ог 500 арбериосыз люкамын. Тросгес - туспуктэмъёс. Соос Ю. Никулинэз улонлэн пӧртэм удысъёсаз но вакытъёсаз возьмато. Со сяна, музейысь адӟыны луоз та артистлэсь фуражказэ, клоун дӥсьсэ, очкиоссэ но мукет арбериоссэ. Музее лыктэмъёслы тунсыко йӧтозы солэн киыныз лэсьтэм суредъёс, сое гажась муртъёслэн кузьымъёссы. Иворъёсъя национальной служба. Кӧняен вузаське тазалык? Туж кема малпаськыса пуки, тӥлед сяна вазиськыны но нокинлы. Оло, сюлмам капчигес кылёз, нош ужпум тани ма бордын. Анаймы ялан колхозын тыршиз, ноку но нокыӵе ужлэсь ӧз палэнскылы. Висиз но, ужаз но, нылпиоссэ но будэтӥз. Аръёс ортчемъя, ми, солэн нылпиосыз, семья кылдытӥм, шаермылэн пӧртэм сэрегъёсаз пазьгиським. Та дыре анаймы пенсиын ни, солы юрттыны дырын-дырын вуылӥськом ик. Жаляса верано, али со висьыны усиз. Балезиноысь врачъёс Иже келязы, онкодиспансер шуоназы, операция, пе, лэсьтоно. Отчы куинь пол ветлӥмы ни, котькуд вамышлы быдэ коньдон сётоно. Кысконо скалэз музэн, сюпсё но сюпсё. Нош кытын колхозын ужам муртлэн коньдонэз, милем но сое 5-6 толэзь ӵоже уг сёто ни. Ярам, уксёмы тырмыт луэм бере, анаймес нош ик больницае нуим. Сокем кыдёкысь лыктэммы юнме луиз. Табере, пе, анализъёсыз вужесь. Бен, соослэн пыр-поч валэктэмзы уг луы вал шат, ваньзэ выльысь ортчоно шуыса? Пичильтык бумага юдэс сётӥллям но келяллям, анай мыным сое ӧз но возьматъя. Балезиноысь врачезлы гинэ адӟытэм, соиз номыр но валэктымтэ. Озьы огместы огмес выльысь валаськымтэмы. Мар улон луиз та? Эмъюм ваньзэ аслыд басьтоно, операция понна коньдон тыроно. Кытчы кариськоз огшоры ужась адями, колхозник? "Выль ӟучъёслы" гинэ улыны кылиз на шат? Т. НАГОВИЦЫНА. Балезино район, Люк черкогурт. Вормиз "Удмуртгеология" Та нуналъёсы Удмурт Республикаысь Правительствоын ортчиз аспӧртэмлыко ужрад - му вӧй поттон интыосты арендае сётонъя аукцион. Конкурсэ трос гинэ калык люкаськиз. Нырысь ик ӵектэмын вал Балезино районысь Горлино нефть кыскон инты. Дун тупатӥзы 128 сюрс манет. Со вӧзы эшшо 650 сюрс манет ватсаса, вормисе потӥз "Удмуртгеология" огазеяськон. АО-лэн кивалтӥсез Владимир Колодкин меӵак ивортӥз: "Ми дуноен ке но басьтӥм, татчы вормон мылкыдын лыктӥм. Мугез тодмо: поттоно продукция но калыклы выль ужан интыос кылдытоно". Таин аукцион йылпумъяськиз, нош азьланяз та выллем мукет ужрадъёс ортчозы на. Г. РОМАНОВ. "Вуюись" паймытэ но шумпоттэ Завьялысь Н. Трубачевлэн "Вуюись" ансамблез Башкириысь удмуртъёс доры куное вуылӥз. Татышлы ёросысь вить гуртын улӥсьёс киоссы пӧсьын потымон ик чабизы бускель шаерысь бӧлякъёссылэн кырӟаны-эктыны быгатэмзылы. "Вуюисьёслэн" но "песьтэрзы" буш ӧз берты. Отысь соос ваизы учкисьёслэсь тау каремзэс, шуныт мылкыдзэс, Татышлы ёросысь культурая управленилэн кивалтӥсезлэсь С. Гарифуллинлэсь ёросысь калыклэн нимыныз гожтэм шуныт ӟечкыланзэ. Отын удмуртъёслы вазиськыса шуэмын:"Ми дась тӥледыз пумитаны ваньдэс ик. Сӥзиськом бадӟым шуд, тазалык, пальпотон но капчи мылкыд." А. Архипов. Кузьмаськисьёслы эн оске Мон сак лыдӟи "Удмурт дунне" газетысь В. Михайловлэсь "Малы кушетскизы "кырныжъёс"?" статьязэ. Автор шонер вера туала югдур сярысь. Кун Кенеше быръёнъёс вуоно тулыс ортчозы. Кинлы оскомы асьмеос улон-вылонмес? Мон малпамъя, Кун Кенеш огшоры калык понна туж ӧжыт лэсьтӥз. Ведь кемалась вераськон мынэ ни кивалтӥсьёслэсь уждунзэс огшоры уждунзэс кулэстон сярысь. Нош та ужпумез нокытын ӧз эскере, малы ке шуоно, асьсэос но депутатъёс тросэз сыӵеос пӧлы шедё. Туала узыръёс сюлмасько, асьсэлы сяна, ӵыжы-выжыоссылы но весяклы капчи улон сётыны. Соос ик коньдонзэс жалятэк кисьтозы мандат понна нюръяськонэ. Бырйисьёслы кузьмаськыса, асьсэлы нош ик куара люкалозы. Валамон: Кун Кенеше огшоры ужась адямиос уз сюре. В. ВОЛОДИН. Выль ар азьын вузкарон 30 декабре Ижевскысь Центральной площадьын ортчоз бадӟым вузкарон. Выль ар ӝӧк вылады басьтыны быгатоды сӥльлэсь, йӧллэсь, чорыглэсь сиёнъёсты, бакча но сад емышъёсты, кампет-преникъёсты. Шутэтскыны мылкыд карисьёс чеберъям кыз котырын шудонъёсы пыриськыны, кузьымъёс басьтыны, концерт учкыны быгатозы. Вузкарон интыос дун тырытэк сётӥсько. Шӧкыч Йыртӥян Воргорон базарын сылэ но сапег вуза. Дуныз - 25 манет. Со доры кык инвалид лыктэ, одӥгезлэн бур пыдыз ӧвӧл, мукетызлэн - палляныз. Сапегез кыкназылы вузаны куро. Воргорон соглаш луэ. Соос коньдонзэс лыдъязы но сапегъёсты быдэн 12 но ӝыны манетэн басьтӥзы. Воргорон, гуртаз бертыса, кузпалэзлы сапегъёссэ вузамез сярысь вера. Кышноезлэн вожез потӥз но шуэ: - Тон мар, шузимид? Соос инвалидъёс ук, дунтэмгес но сётэмед луысал. Тани тыныд 5 манет, берыкты быдэн 2 но ӝыныен. Воргорон кошкиз. Мынон сяменыз буфетэ пыриз но 3 манетлы юиз. Собере инвалидъёс доры кожиз, быдэн манет берыктӥз. Озьыен, инвалидъёс сапегзы понна быдэн 11 но ӝыны манет тыризы, ваньзэ - 23 манет тыр. Воргорон куинь манетсэ юиз на - ваньмыз 26 луиз. Кытысь потӥз мултэс манет? Шӧкыч Паймод, ява Газетъёс пото иворъёсын тодматон понна. Лыдӟисьлэн котькуд гожтэм чурлы но кыллы оскемез потэ. Но... кытӥяз гожтэм кылъёс но чуръёс лыдӟисез чылкак паймыто. Кылсярысь: "Мыно туно-пелёос доры". (Озьы гожтӥз "Советской Удмуртия" 1984 арын 20-тӥ январе). Пельтэм туноос но луо шат? Удмуртъёс соосты туно-пеллё яке пелляськись шуо кадь... 1997 арын 25-тӥ октябре "Удмурт дунне" газетын Вера Бикузиналэн "Энциклопедия - эмъюм" нимо рецензиез потӥз. Ираида Леонидовна Салхонова (Алнаш ёросысь Байтэрек школаысь ужъя урокъёсты нуись дышетӥсь) туж умой книга, пе, гожтэм. Но мон ӧй вала, кыӵе книга сярысь меда вераськон мынэ? Россия Федерацилэн кун наградаосыныз пусъён сярысь Россия Федерацилэн указэз оскытэ: "Россия Федерациысь дано машиностроитель" сӥль карон ним сётоно Русских Юрий Андреевичлы". ("Удмурт дунне" 1 1998 арын 19-тӥ феврале). Тодмо нимъёс но нуналъёс март 6. - 40 ар тырмиз Ижевскысь радиозавод кылдэм дырысен. Солэн нырысетӥ продукциез, "Волна" радиоприёмникъёс, поттэмын вал 1058 арын июнь толэзе. ("Удмурт дунне", 1998 арын 7-тӥ мартэ). Малы лыдӟисез пӧяло, 40 ар тырмиз шуыса? Озьы ик гожтоно вал: Ижевскысь радиозаводлы 940 ар! С. ПЕТРОВ, Ижевскын улӥсь. Шӧкыч Малы уже ӧз лыкты Огинтыын лёгаськон вакытэ кутскиз дисциплинаез юнматон понна нюръяськон. Одӥгаз предприятиын ужась ӝегаз. Эшъёсыз солэн гуртаз жингырто. Телефон доры кышноез лыктэ. - Мар луиз? Малы картэд татчыозь ужын ӧвӧл на? - Со кулӥз,- синву пыр вера кышномурт. - Я, тау инмарлы, ми малпам вал, уже бере кыле шуыса. Нуналлэн тодметэз 26 декабре - Евстратлэн но Евгенийлэн нуналзы. Та нуналысен Толсурозь (12 нунал) куазез чаклаллям, котькудӥз нунал быдэс толэзьлэсь куазьзэ возьматэ шуыса. 26 декабрь январез возьматэ, 27 - февралез, 28 - мартэз... 7 январе тодмо луоз, кыӵе луоз куазь вуоно арын декабре. Та нуналэ... ар талэсь азьло 26 декабре 1825 арын Петербургын декабристъёс - Россиысь дворянстволэн йӧно пиосыз - эксэйлы пумит ӝутскизы. Уноез соос пӧлысь Удмуртия пыр Сибире нуись сюрес кузя уй пала келямын вал. 28 декабре 1934 арын Удмурт автономной область интые кылдӥз Удмурт Автономной Советской Социалистической Республика. Ужедъя - данэд Удмурт Республикаысь Кун Кенеше вуиз Россия Федерацилэн Президентэзлэн Иворъёс пумысен споръяськонъёсъя судебной палатаысьтыз гожтэт, со улэ кизэ нюртэм палаталэн тӧроезлэн воштӥсез И. Еремин. Гожтэт 1998-тӥ арын 3-тӥ ноябре "Ижевск-Москва" газетын потэм фотоколлажлы дунъет сётэ. Отын шуэмын: Судебной палата малпамъя, та фотоколлаж ужзэ ляб тодӥсь-валась, улонэз кырыж возьматӥсь журналистикалэн емышез луэ. Фотоколлажез кылдытӥсьёс Удмуртилэсь кунлыксэ пусъёнын выль амал утчамазы эсэпсэ валаллямтэ. Кун праздниклэсь нимзэ воштэмзэс но пусйыны кулэ. "Эрико Удмуртилэн нуналыз" шуэм зэмос улонлы пуштросэзъя но, вылтусэзъя но уг тупа. Со сяна, федеративной кусыпъёс лябӟем вакытэ та выллем ас сяменыд каронъёс политикаын капчи визьем луэмез возьмато. Судебной палата малпамъя, газетэз кылдытӥсьёс, поттӥсьёс но редакторез газетлэсь 19 номерзэ поттӥсьёслэсь кылзэс юаны кулэ. Кун Кенешлэн пресс-службаез. 105 ар улӥз Красногорск ёросын самой мӧйыэз адями вал Кристина Михайловна Чиркова. Та кышномрт югыт дунне вылын 105 ар улӥз. Алигес со улонысь кошкиз. Кема улэмзэ со нырысь ик герӟа вал ужен, визянэн но вӧсяськонэн. С. Бабин. Удмурт Республикаысь Правительстволэн Удмурт Республикаысь Кун Кенешлэн депутатъёсызлы Вазиськонэз Гажано депутатъёс! Удмурт Республикаысь Правительство юн шугъяськемзэ вера кылдэм югдур пумысен, куке 1998 арын 24 декабре нош ик эскеремын но кутэмын ӧй вал Удмурт Республикалэн федеральной законодательстволы тупась "Удмурт Республикаысь Кун кенешлэсь депутатъёссэ быръён сярысь" Законэз. Таӵе учыре быръёнъёсты "Россия Федерациысь гражданъёслэн бырйыны но юалляськонъёсы пыриськыны правооссыя валтӥсь гарантиос сярысь" Законъя гинэ радъян ватсаса шуг-секытъёсы вуттоз. Кун Кенеше депутатъёсты быръёнъя законъёсын инъет кылдытытэк, быръёнъёсты радъян дыръя коньдонэз чакласа кутыны, быръёнъёсъя огазеяськонъёслэсь но блокъёслэсь правооссэс быдэстыны уз луы. Сотэк тупатытэк кылёз кандидатъёслэсь быръёнъёсъя фондзэс кылдытон рад, кандидатъёс коньдон ласянь пӧртэм условиосы шедёзы. Быръёнъёсты радъянъёс азьын кылдозы бадӟымесь шуг-секытъёс, соин ӵош луыны быгатозы пӧртэм тырмымтэос, йылозы ӝожтӥськонъёс но судъёсы вазиськонъёс. Быръёнъёсын герӟаськем ужпумъёсты йылаз-пумаз вуттымтэен, быръёнъёсты радъянэз куспетӥ карыны яке соослы йылпумъянъёсты умойтэмен лыдъяны но луоз. Республикалэн азьланез понна ответственностез валаса, Удмурт Республикаысь Правительство вазиське Удмурт Республикаысь Кун Кенешлэн депутатъёсызлы, та вакытэ югдурез шонер валаны, визьмо луэмзэс но чиданы быгатэмзэс возьматыны, кылдэм ужпумез быдэстон понна, обществолэсь кулэяськонъёссэ валаны но огазеяськыны ӧтьыса. Удмурт Республикаысь Правительство. Шахмат, телефон но кузьым Алигес "Ижпланета" клубын шахматэн ӝог шудонъя ӵошатскон ортчиз. Отчы пыриськизы 12 команда. Вормисе потӥзы спортъя "Металлист" клубысь шахматэн шудӥсьёс. Соос 66 луоноез пӧлысь 50 но ӝыны очко люказы. Кыкетӥ но куинетӥ интыос басьтӥзы Удмрт кун но технической университетъёсысь студентъёс но 6-тӥ номеро спортъя школаын дышетскисьёс. Ваньзы соос быдэн 45 но ӝыны очко люказы. Нимаз шудӥсьёс пӧлын вормисе потӥзы ФИДЕ-лэн мастерез Владимир Гребенкин. Кыкетӥ интыын Удмуртилэн трос пол чемпионэз спортъя мастере кандидат Анатолий Семакин. Сӥё-дано ортчиз шахматэн туж ӝог шудонъя нюръяськон. Шахматъя Калык куспо федерацилэн (ФИДЕ) ФИДЕ-лэн мастерез ним сётон сярысь дипломъёсыз сётэмын Удмуртилэн трос пол чемпионатъёсызлы Владимир Гребенкинлы но "Темп" клубысь Владимир Федосеевлы. Отчы гожтӥськем ФИДЕ-лэн Президентэз (со ик Калмыкия Республикалэн Президентэз) Кирсан Илюмжанинов. *** Озьы ик алигес радъямын вал телефон пыр шахматэн шудон. Вормисьёсты дуно кузьымъёсын ӟечкылаз "Удмурттелеком" акционер огазеяськон. Соос сётэмын 2-тӥ ТЭЦ- ысь котёлъёсъя машинистлы Валерий Никулинлы но "Базис" акционер огазеяськонын ужасьлы Рафаэль Сабировлы. И. Вельтмандер. Шӧкыч Шеф матын Лобе батюшка самолётын. Ӧте стюардессаез: - Нылы, вождэс юн вае, али кӧня метр вылӥетӥ лобиськом? - Сюрс метретӥ. - Туж курисько, вае вал мыным витьтон грамм коньяк. Коньяк ваемын. Кӧня ке дыр ортче. Поп нош ик кнопкаез зӥбе. Стюардесса лыктэ. - Нылы, кӧня метрозь ӝутским ни? - Куинь сюрс метрозь. - Туж курисько, вае вал мыным витьтон грамм коньяк. Ортче кӧня ке дыр. Выльысь сыӵе ик югдур. - Нылы, кӧня метр вылӥетӥ лобиськом? - Вить сюрс метр. - Витьтон грамм коньяк курисько. Кӧня ке дыр ортчыса, батюшка нош ик стюардессаез ӧте. Таиз, выльысь ветлоно медаз луы ни шуыса, быдэс рюмка коньяк ваиз. - Ӧвӧл, ӧвӧл, дугдэ ай. Кӧня метр вылӥетӥ лобиськом? - Дас сюрс метр. - Тырмоз. Шеф матын. ЖУРНАЛИСТЪЁСЫН ПУМИСЬКОНЪЁС Ворттылы - но нырысь тыр коньдон Кылем вторнике Удмурт Республикаысь МВД-лэн ГИБДД-езлэн (азьвыл ГАИ) кивалтӥсез, милициысь полковник Михаил ГОНЧАРОВ журналистъёсын пресс-конференция ортчытӥз. Пумиськон сӥземын вал водительской удостоверениосты воштонлы. Веранэз ик ӧвӧл, макем керӟегъяськытэ али та ужпум машина, мото возисьёсты но ваньзэ водительёсты. Ижевскысь регистрационно-экзаменационной отделлэн юртэз кыкетӥ толэзьзэ ини кузьыли карлы укша. Ньыль этажын ваньмыз тубатъёс калыкен пачылмемын, ульчаын 40-50 адями кынмыса сылэ. Адямиос ӵукна куать часэ ик черодэ султо. Нош правоез воштыны документъёсты 11-12 часэ гинэ басьтыны кутско. Малы сыӵе огыр-бугыр луиз? Уг яра шат калыкез курадӟытытэк та ужрадэз ортчытыны? М. Гончаров таӵе валэктон сётӥз: - Калык ачиз янгыш сыӵе кузьыли кар кылдытэмез понна. Ми майлэн пумаз ик ялӥм правоосты вошъян сярысь. Гужем ӵоже но, сӥзьыл но РЭО-ын чал-чал вал. Ваньмыз огдышем сямен шоналскизы: вуом ай, 2000-тӥ арозь кыдёкын на. Собере, ноябре, калык пӧлын супыльтон вӧлмиз: выль праволы дунъёс, пе, чутрак будозы. Кин кыӵе гинэ лыдпусэз уг тоды! Кудӥз 600, кудӥз 700 манет вера, кудӥз сюрсозь но вуттэ. Валамон, калык сютэм аре нянь дуре кадь омырскиз. - Нош, зэмзэ но, будоз-а? - Будоз, уг ваты. Вань дунъёс будо бере, малы праволы дунъёс одӥг кадесь кыльыны кулэ. Но трослы уз. Ми лыдъямъя, Выль ар бере право самой троссэ 220 манет сылоз. Но эн малпалэ, ми, ГИБДД-ын ужасьёс, дунъёсты будэтӥськом шуыса. Будо бланкъёс но фотографиос лэсьтэм понна дунъёс. - Калыкын вераськонъёс ветло, ГИБДД, коньдонлы ёрмыса, пе, правоосты воштыны малпам. - Ма, юнме супыльтон ук со, неужто уд валаське?! Правоосты вошъян сярысь постановление кутӥз Россиысь Правительство. Ми солэсь косэмзэ гинэ быдэсъяськом. Ми понна номыр пӧртэмез ӧвӧл: вуж-а, выль-а право сётъяны, вужзэ-а, выльзэ-а документэз эскерыны. Тодэмды потэ ке, право вошъян милемлы мултэс йыр висён гинэ. Асьтэос ик вераськоды ук, кӧня калык ми пыртӥ ортче. - Нош кызьы табыш ласянь? - Ма, кыӵе табыш, кыӵе табыш?! Шедьтӥллям ужбергатӥсьёсты. Чаклалэ асьтэос. Бланкъёс ми басьтӥськом Гознаклэн Пермь фабрикаысьтыз. "Улэп" уксёен басьтӥськом, шонертоно ке. Одӥгез али сылэ 128 манет. Фотографиос лэсьтэ "Техинформ" огазеяськон. Таизлы но дун тыриськом. Право 146 манет сылэ ке, мар кыле на милемлы. Собере, законъя милемлы право дунысь ичи уждунлэн 10 процентэзлэсь трос басьтыны лэземын ӧвӧл. Сыӵе табышез, табыш ке шуод сое. - Уката но пенсионеръёс ӝожтӥсько. Выль правоен, пе, ми, оло, ворттылыса но ум вуэ ни, нош сомында коньдон кушты. Соос понна, льгота тупатыны уг-а луы? - Вань сыӵе льгота. Тросэз мӧйыос, жаляса верано, со сярысь уг тодо. Пенсионеръёслы нимысьтыз бланк вылын удостоверениос сётӥськом. Али дуныз солэн 16 манет, Выль ар бере, ми чакламъя, 31 манет луоз. - Котьма ке но, Михаил Иванович, кызьы ке но ӧй луысал-а меда сокем курадӟонлэсь мозмытыны? - Али милям РЭО-мы бер ӝытозь ужа. Малпаськомы шутэтскон нуналъёсы но ужаны. Ӝоген котькуд районын правоосты вошъяны кутскомы. Тулыс пал та ужрадэн бадӟым предприятиосы но поталом ини. Ваньзэ тае али ик лэсьты вал, техника ласянь луонлыкъёсмы ӧвӧл. Нош эшъёсмы котькӧня ужаны дась. Эн малпалэ, ми чик ум сюлмаськиське калык сярысь шуыса, тӥ, журналистъёс, милемды куд-ог дыръя калыклэн тушмонъёсыз иинтыын возьматыны шедьтӥськоды ке но. Г. ТИХОНОВ. Шӧкыч Дунтэм но гонтэм Бен, сииськиз ик огдыре курег макесъёсты! Шыд но зумыто луэ вал, пыжыса но ческыт кошкылӥз, шашлык но умой пӧрмылӥз. Нош газетъёс ялан пыкылӥзы - "Бушлэн макесъёсыз" сиыны уг ярало. Соос будэтэмын искусственной амалэн. Но со шоры учкись ӧз луылы. Нырысь ик со дунтэм но, гонтэм но. Асьмелэн лыз тылобурдоенымы уд ӵошаты. Но тани манет куашказ, доллар тэтчиз, курег но пегӟиз. Со понна табере асьмелэсь курег сӥльмес йырйиськом. Республикаямы тылобурдо вордонъя 7 фабрика ужа. Алигес 4 предприятиын но 9 вузкарон интыын курег сӥль эскеремын. Вузаны лэземын ӧй вал ог 38 процентэз курег. Яке солэн гонэз ӟеч-ӟеч ишкемын ӧвӧл, я тылобурдо урод миськемын. Тужгес но трос тырмымтэос шараяськизы Можгаысь предприятиын. Отын ваньзэ лэсьто киын, технология уг чакласькы, нимысьтыз ужан дӥсь уг висъяськы, медосмотр уг ортчы. Со сяна, сӥль кынтон холодильник уг ужа. Юнме тышкаськиськомы асьмеос американъёсты. Быгато соос ужаны, быгато вузаны но. Нош асьмеос ку дышомы? Б. НИКИТИН. Ортчымтэ сессиысь репортаж Удмурт парламентын таӵеез ӧй вал на: азьвыл чаклам кызь куинетӥ сессия, чакламтэез кызь ньылетӥ сессия но люкаськыны ӧз быгатэ. Берлояз кенешонын, ужаны кутскон понна, ӧз тырмы 6 куара. 100 депутат пӧлысь залын пукиз 61-ез, кворумлы кулэ 67 мурт. Мандатъя комиссилэн тӧроез Г. Е. Абросимов вераз сессие вуымтэ депутатъёслэсь нимъёссэс. Тросэзлэн мугзы но тодмо ӧвӧл. Ужаны лыктэмъёсыз эшъёссэс витизы 16 часозь, дырзэс но кужымзэс юнме быдтыса. Сессия интые пӧрмиз куашетон, ог-огдэ пыкылон, малпатэк верам кылын вӧсь карон. Нош ваньмыз та "тулкымъяськон" ӝутскиз вуоно Кун Кенеше депутатъёсты быръён пумысен. Калыклэн "медоосыз" нокызьы но огкылэ уг вуо 100 яке 130 лыдпусэз юнматон бордысен. "100" понна куаразэс сётыны медӥсьёс куд-огез сессие но ӧз лыкты, та ужпумез мукет сямен эскерыны пумит луэмзэ возьматыса. Зэмен но, сыӵе депутатъёсты валаны шуг. Куктаськемен шудон дыръёссы кисыязы мандат нуллӥсь адямиослэн далайгес ортчыны кулэ вал кадь ини. Кворум сярысь ке верано, ньыль ар ӵоже ведь со трос пол "чутылӥз" ни, кужмысь но кызьы нуйтыны выризы. Шонер пусйизы Абрасимов но куд-ог мукет эшъёс: сессие ветлымтэос ласянь кемалась кулэ вал чурыт ужрадъёс кутыны. Ма сярысь малпаса депутат луизы, кылсярысь, В. В. Жебровский но В. А. Тумаев, ӝыныезлэсь ятыраз кенешонъёсы соос ӧз пыриське ке? Вуоно быръёнъёс дыръя но интызэс сётон сярысь малпанзы ӧвӧл кадь. Котьку сямен, ӟырдыт но лэчыт вераськизы депутатъёс В. К. Тубылов, А. Д. Горошников, Н. Ф. Чувашов, А. М. Салтыков, В. Л. Фридрих, Н. С. Сычев. Нуназе бере нимаз-нимаз люкаськылӥзы фракциос. Соос эшшо огпол кутскыса юнматӥзы на 100 но 130 лыдпусъёс шоры учконзэс. Малпанъёссы нош ик люкиськизы, огкылэ ӧз вуэ. Фракциос озьы ик эскеризы Правительстволэн Тӧроезлэсь П. Н. Вершининлэсь верам кылъёссэ. Со дэмлаз Кун Кенешлэн Тӧроезлы А. А. Волковлы Правительстволэн Тӧроеныз ӵош отставкае кошкыны, интызэс ужаны но кивалтыны быгатӥсь депутатъёслы сётыны. Огъя вераса, быдэс нунал ортчиз таӵе мылкыдын. Жаль кыдёкысь районъёсысь вуэм депутатъёсты: кӧня пол соос юнме сокузьдана сюресэз огпалась огпала лёгазы ни! Та гинэ ке луысал. Куд-ог депутатъёсын сэрен кык нунал ӵоже Кун Кенешын пуконо луизы ни 30 судьяос. Соосты Россилэн Президентэз юнматытозь юнматыны кулэ Кун Кенешлэн сессиез. Одӥг нунал гинэ кыле на вуоно быръёнъёслэсь дырзэс тупатонлы. Тазьы ке ужам, оло, зэмен но, Удмуртиын Кун Кенеш быроз но асьмемын меӵак ачиз Президент кивалтоз? Л. МЕДВЕДЕВА. Эн виы монэ, анай! - Мыным жаль вал ньыль толэзьем пиналы. Но мар карод? Анай-атае тодӥзы ке, мыным улон уз луы ни та дунне вылын,- шуиз мыным дас тямыс аресъем нылаш (нималом сое Катя). Адями котьмалы дыше, шуо. Соин таӵе ӝожтӥськонъёс кӧняез пель сьӧртӥ но ортчо. Вунэтӥськом: котькудӥз вордскымтэ пинал - со асьме кадь ик улэп маке. Солэсь капчиен палэнскыны быгатӥськом, кышкыт АБОРТ кылэз уже кутыса. - Табере мон пиослэн мылпотэмзыя ноку уг кариськы,- азьланьтэ веранзэ Катя. Шӧкыч Гажано лыдӟись эше! Шунды ӝужан палась календарья туэ улӥськом Тигрлэн араз, 1999-тӥ ар - Луд Кечлэн (Коӵышлэн) арез. Кызьы тодмо, тигр сьӧсь, кескич, кужмо пӧйшур. Со но ӧз быгаты сьӧсьяськонэз кортнаны, дунъёслэсь будэмзэс дугдытыны, куанеръёслы дурбасьтыны. Нош луд кеч лякыт, кышкась пӧйшур. Мар меда вите ини асьмеды вуоно аре. Тани художникмы Леонид ПРОЗОРОВ аслаз суредаз та пӧйшуръёслэсь пумиськонзэс тазьы адӟе (учке суредэз но лыдӟе улӥысьтыз). Котьма медло но, осконды медаз ышы. Кызьы ке но йыромыса шедем нюлэскысь потом ай. Тазалык, ӟеч мылкыд тӥледлы! Выль арын вань малпанъёсты мед быдэсмозы! Шӧкыч. Тигр: - Э-э, луд кече, кузь пеле! Капчи ӧй вал туэ мынам улонэ. Я вылӥ кивалтӥсьёс вошъясько, я кризис шукке, я доллар пачкатэ. Но чидам ведь, улӥм. Тон табере ачид кузё луиськод бере, ваньзэ ас кияд басьты. Золгес кивалты, эше! Суредъёсын - югыт, чылкыт Пичи Пургалась ёрос библиотекалы ӟеч кузьым луиз ас кожазы тыршись суредасьёслэн ужъёсынызы адӟытон. Быгатонлыксэ возьматӥз татын сизьым адями. Соос пӧлын ик - тужгес тодмоосыз но: В. Боталов, А. Викулин, Г. Соколов. Шаерысьтымы культура удысысь дано ужась Владимир Дмитриевич Боталов аслаз ужъёсыныз паймытъямысь уг дугды. Со тужгес яратыса суреда вордскем палъёссэ. Зэм, куд-ог учыръёсы художник зол-зол герӟаськылэ мукет аспӧртэмлыкъёсын но. Сое туж тунсыкъяськытэ удмурт калыклэн ортчем сюресэз, солэн искусствоез. Владимир Дмитриевич быгатэ тусбуйёсты но пуктыны. Сюлэмыд ик небӟыса кошке, куд-ог ужъёсыз шоры учкыса. Тазьы ик шӧдӥськод кадь нюлэсъёслэсь, возьёслэсь, бусыослэсь шокамзэс. Сяськаясь, пушйись турын-куар, позыръяськыса бызись шур - ваньмыз со возьматэмын суредъёсын. Мукетыз усточи - Александр Николаевич Викулин. Таиз но арысь аре шумпоттылэ абдрамон ужъёсыныз. Библиотекаын арлы быдэ радъяськыло ветеранлэн ужъёсыныз адӟытонъёс. Усточи кылдытъя паймымон арбериос. Тужгес но ӟеч пӧрмытэ со толлы сӥзем суредъёссэ. Арлэсь та вакытсэ но сюлмысь яратэ угось. Трос дырзэ но кырын ортчытэ. Соку ик кылдытэ ноку вунонтэмзэ. Александр Викулинлэн суредъёсаз - чылкыт но синкыли кадь дун омыр, югыт, аспӧртэм инкуазь но сое яратон. Суредъёсын возьматэм лымы чын кадь - пушказ али ик месӥськысалыд, дыр. Мукетъёсаз - одӥгназы сылӥсь пу коркаос. Лымы соосты укнооссы дорозь ик согем. Нош котыразы - чус но каньыл. Сюлэмын но капчи луэ. 1996-тӥ арын пичи пургаос тодматскыны быгатӥзы Андрей Нестерович Хомяковлэн ужъёсыныз. Таяз учыре со ваем пӧртэм удысъёслы сӥзем ужъёссэ. Соос пӧлын - чиган кышнолэн тусбуез, Иж тыметлэн ярдуръёсыз. Усточилэсь ужъёссэ адӟыса, соку ик шӧдӥськод "Ижмаш" культура дворецлэн студияз басьтэм тодон-валанзэ. Андрей Хомяковлэн ужъёсаз кузёясько турлы буёлъёс. Тужгес но пӧрмытэ со инкуазьлэсь котькыӵе дырзэ суреданы. Мед луоз коть шундыё нунал, коть кезьыт пурысь сӥзьыл... Эшшо одӥгез усточи - Пугачёвоысь Георгий Соколов. Одӥг пол гинэ ӧз возьматъя ни ужъёссэ ёросамы но шаерамы ортчылӥсь выставкаосын. Та адямилэсь кибервылзэ соку ик тодмаськод: суредъёсаз - трос югыт, буёлъёсыз но яркытэсь. Со сяна, художник кылдытъя натюрмортъёс. Соос пӧлысь одӥгез, "Вазаын - розаос", та выставкаын но возьматӥське. Ньыль ар талэсь азьло нырысьсэ чузъяськиз Алганча-Эгралась суредасьлэн Олег Петровлэн нимыз. Нырысетӥ ужъёсыз сӥземын вал зарезьлы. Выль суредъёсыз возьмато будэмзэ. Адӟытонэ ваем ньылез ик ужез сӥземын инкуазьмылэн тужгес чебер сэрегъёсызлы. Веськрес кызьпуос, пужымъёс, паськытэсь бусыос выльысь но выльысь тодамы вайыто вордскем палъёсмес. Выль адӟытонын котьку сямен луо выль нимъёс. Таяз учыре но соос вань. Пӧлысьтызы одӥгез - Кабыста гуртын улӥсь Антонида Николаевна Наумова. Возьматонэ ваем со ньыль ужзэ. Со суреда гурт улон-вылонэз, огшоры нылкышнолэсь сюлмаськонъёссэ. Вань ужъёс сюлмысь быдэстэмын. Таӵе ужрадын ас быгатонлыкъёссэ нырысьсэ возьматӥз А. Н. Викулинлэн дышетскисез, Пугачёво больницалэн валтӥсь эмъясез Сергей Анатольевич Дмитриев. Соку ик пусйыны кулэ: суредъёсыз пӧрмиллям. Солэн инкуазьлы сӥзем вань ужъёсыз висъясько аспӧртэмлыкенызы. Нош ваньмыз та кутсконэз гинэ ай. Соин ик туж оскем потэ: С. А. Дмитриев та удыслы дырзэ уз жаля но паймытъялоз на асьмеды выль ужъёсыныз. Таӵе ужрадъёс юртто чеберлыкез дыраз шӧдыны но адӟыны. Нош суредасьёс туннэ нуналлэн шуг-секытъёсызлы уг сётско. Азьлане учко, ӟечезлы оскыса. Суредась Владимир БОТАЛОВ. Георгий СОКОЛОВЛЭН ужез. Выставкаен тунсыкъяськиз трос калык. Сыӵе со вал, подъясь Фронт сюресъёстӥ ветлэм погонъёсме куштыса лыктӥ "Советской Удмуртия" газетлэн редакцияз. Татын мон бусы шоры огназ кылем писпу кадь ӧй вал, нырысь ик пумиськи Тимофей Шмаковен, собере Прокопий Чайниковен, адӟылэме вал Никита Семеновез но. Соосын пумиськылӥ армие мынэмелэсь азьло ик. Гожъям чуръёсме сэрттӥзы-пертчизы. Табере та тодмоосын ӵош ужано. Кыӵе ӝӧк сьӧры пуктозы, уг тодӥськы на. Ваизы монэ пичигес гинэ кабинетэ, кык ӝӧкъёс ваче пуктэмын. Таяз, пе, тон ужалод, сояз пуке редакциын кыл кутӥсь подъясь (секретарь), соин тодматскод, тани со вуоз. Кабинетэ пыриз - лапег но уд шуы, ӝужыт но ӧвӧл - зарни дуро очкиен кышномурт. Йырсизэ нырысетӥ пужмер лыдъяса ортчем ини. Тодматским. "Борисова Анна Георгиевна", - шуиз со ассэ. Аслэсьтым но нимме-тулме верай. - Юрттӥсь сётон сярысь вераськон вал ини. Табере ӵош ужалом. Отделъёсысь вуэм гожтэтъёсты тон келялод типографие. Ӧвӧл, огшоры келяно ӧвӧл, одӥгез но гожтэм кыл медам чуты, кызьы шуо военнойёс, стройысь медам поты. Учконо созэ но: ма сярысь вера отделысь ваем материал, оло, со пу гырлыен жугем кадь гинэ. Сыӵеезлы типографие сюресэз пытсано, корзина солэн интыез. Мон яратӥсько пезь-пезь ужаны быгатӥсез. Газет лыдӟымон мед луоз. Асьмеды ӵош ужась эшъёсмы но, лыдӟисьёс но медам пыкылэ, - тазьы нодъяз Анна Георгиевна. Бен, тазьыгес ик вераз редактормы Андрей Сергеевич Бутолин но: - Татчы куд-огез кытын ке ужан понна гинэ лыктэ. Быгатонзэ, кужымзэ, чиданзэ уг чакла. Толэзьёсын, аръёсын "ӵабъяське" но пӧрмымтэзэ шӧдэ, лэся, ачиз кошке. Мукетызлы соку ик дэмласьком выль удыс шедьтыны. Та эшъёслэн куронъёссы люконтэм герӟаськемын вал. Пуксид ке журналистлэн ужан ӝӧк сьӧраз - тыршы, сюлэмдэ сётыса. Тодэ лыктэ одӥг учыр. - Тани учкы, - возьматэ кыл кутӥсь подъясь, - та гожтэт отделысь вуэмын. Пукиз, дыр, адями - час-а, кык-а, оло, солэсь но трос. Лусъем кожысь ваем секретариатэ, волятыны дырыз ӧз тырмы-а, быгатэмез сыӵе-а... Борисова возьматӥз машинкаен печатламез. Ой, кыӵе тупатъямын! Гожтэм чуръёсно кылъёс одӥг интыысь мукетаз воштылэмын яке быдэс чурез ӵушылыса потэмын. - Та материал сюлэмез сётыса лэсьтэмын луысал ке, тазьы "суредано" ӧй луысал. Ляб дасям материалъёс пумысен Анна Георгиевна литработникъёсты кабинетаз ӧтьылӥз. Кинлы ке, оло, ӵыжектоно луылӥз. Нош малпано ке, озьытэк уг луы. Лыдӟисьлы сётоно чылкыт удмурт кылын поттэм газетэз. Анна Георгиевнаез пумен тросгес тодыны но ӟечгес валаны кутски. Со дышетскемын вал Ижысь педтехникумын но пӧртэм курсъёсын, озьы ик Москваын но. Тазалыкез вань дыръя трос лыдӟиськиз. Кыӵе ке произведение сярысь вераськон мытӥськод ке, аслэсьтыз дунъетсэ сётэ ини - сое лыдӟемын. Трос удмурт кышномуртъёс сямен ик, со вордскемын вал гуртын, шонергес вераса, Шаркан районысь Сосновка черкогуртын. Улонлэсь кызьы бергамзэ тодон мылкыд сое вуттӥз Ижевске, педтехникуме. Бӧрысь со ужаз ини книга поттон издательствоын. "Гудыри" выжыысь "Советской Удмуртия" газет потыны кутскон азьын вуиз редакцие, кыл кутӥсь подъясь луиз. Анна Борисова юаны-вераны, кулэ дыръя юнэсь куонъёс пуктыны быгатӥсь адями вал. Куд-огезлы со ӧз но яра, оло, ӝоже но усьылӥз. Нош кызьы сотэк: улон куре чылкыт, шекъёстэк ужамез. Котьмар ке но, мон ужасько ини секретариатын. Ӝӧк вылам вуо азьло тодмоосылэн - Чайниковлэн, Семеновлэн но мукетъёсызлэн дасям материалъёссы. Куке но соос гожтэм чуръёсме волятылӥзы, табере мон учкыны, вес вылэ пуктыны кулэ котькуд чурзэс. Уката Борисова "узатэ", тон, шуэ, соослэн синмазы эн учкы, кемалась гожъясько ке но, гуштыны шедьтыло - кепыратэк тупатъя. Анна Георгиевналэн кир-пазь луон сямыз но потылӥз. Со но ужен герӟаськемын вал. Газет поттон ӝега я редакцилэн, я типографилэн янгышенызы. Уката Москваысь вуись материалъёсты бер сёто, со но уго керӟегъяськытэ. Тазалыкез лябомемен, А. Г. Борисова вазьгес пенсие потӥз. Озьы но со редакциен кусыпсэ ӧз ыштылы. Я юанэн, я веранэн лыктылӥз. Нош мыныны уг быгаты ке, ӵош ужам эшъёсыныз кытысен ке но пумиськыны тырше. Котьмае тодэмез потылӥз. Адямиос люкисько ке но, кытын ке но пумисько. Озьы луиз милям но. Анна Георгиевнаен но кузпалэныз Николай Федорович Павловен одӥг корка улыны шедим. Татын мон чылкак выль адямиен пумиськи кадь. Анна Борисова туж лякыт сямо вал. Со огпол но утялтытэк уз лэзьы. Перепеч-а пыже, пельнянь-а пӧра - лыкты доразы. Нош ик улон- вылон сярысь вераськон ӧръяське. Борисовалэн но Павловлэн трос эшъёссы вал. Ӵыжы-выжыоссэс вератэк, нуналлы быдэ сямен доразы куноосты пумиталлязы. Котькудӥзлы шуныт кыл, дэмлан сётылӥзы кузпалъёс. Иж пруд йылысь дачаязы но ӧз мӧзмылэ, мынӥсь-ветлӥсьёс, юри лыктӥсьёс но ялан соос доры кожазы. Ӵуказе Анна Георгиевна Борисовалы 90 арес тырмысал. Ӧвӧл ни со асьме пӧлын, улонысь кошкемын. Усто, чылкыт сюлэмо журналистэз эшъёсыз уг вунэто, буре ваё. Со сюлэмын улэ. В. СМИРНОВ. Кыл кутӥсь секретарь (подъясь) А. Г. Борисова суредасен А. С. Мыльниковен. Адями радэ потон - со нюръяськон? Адями сиськытэк но юытэк кема-а улыны быгатэ? Учёнойёс лыдъямъя, кӧня ке нунал. Ӧйтӧд, кызьы лыдъяллям учёнойёс. Нош асьме калыклы соослэн лыдпусъёссы закон ӧвӧл - толэзьёсын ситэк-ютэк улэ, дыр, уждун уг басьты бере. Властьёс калыклэсь чиданзэ мертало, шӧдске: со, пыд йылысьтыз погратозь, кыӵе шуг-секытъёсын песьтэрез пе, вормыны быгатоз. *** Тазалыкез утён удысын ужасьёслэн профсоюзэнызы кивалтӥсь Инесса Михайловна Петрова ивортэмъя, эмъясьёс азьын кунлэн пунэмъёсыз 252 миллион 992 сюрс манет люкаськизы ини. Каракулино но Сарапул ёросъёсын пунэмъёс одӥг толэзьлы уждунъя фонд мында люкаськемын, Кизнер, Киясово, Яр ёросъёсын - уждунъя фондлэн 50 процентэз мында, Завьял ёросын - 40 процентэз. Шаерысьтымы 6 ёросын эмъясьёслы июнь понна уждун тырымтэ на, 13 ёросын - июль понна, 21 ёросын - август понна. Можга ёросысь администрация гинэ эмъясьёс азьын "чылкыт", татын октябрь, ноябрь понна уждун тыремын ини. Коньдон ужпумъёсъя министерство ивортэмъя, больницаосы интыысь бюджетъёсысь чакламлэсь чылкак ӝыныез гинэ вуэмын, республикалэн бюджетысьтыз - 93 процентэз. Югдур медикъёс понна гинэ ӧвӧл кӧшкемыт, висисьёс понна но шурдыт, малы ке шуоно, уждунэз тырымтэ сяна, больницаосы эмъюм басьтыны, эмъяськисьёсты сюдыны, оборудованилы коньдон уг вуы. Туэ 30 сентябре тазалыкез утён удысын ужасьёслэн профсоюззылэн комитетэз кенеше люкаськылӥз, эмъясьёслэсь экономикаын, социальной удысын правооссэс утёнъя ужрадъёс чаклан понна. Правоос понна нюръяськонын бадӟым инты басьтӥз 7 октябре быдэс Россиын ортчытэм пумитъяськон ужрад. Соку Ижевскысь Центральной площаде ог 5 сюрс адями люкаськиз, соос пӧлысь 1400-эз тазалыкез утён удысысь ужасьёс вал. Соослы дурбасьтӥзы ёросъёсысь эмъясьёс но. Удмуртиысь Правительство, ёрос администрациос азьын курон пуктэмын вал: уждунъя пунэмъёсты берыктыны график кылдытоно, профсоюзъёсын та пумысен огкылъёс кутоно. 17 ноябрёзь та ужпумъёсты быдэстыны косэмын вал. Озьы ӧз ке луы, ужмес нош ик уретом шуэмын вал. Куд-ог администрациос та уж борды басьтӥськизы, соин ик 17 ноябре пумитъяськон ужрадэ пыриськизы Ижевскысь 13 больница, 4 ёрос эмъяськонни но кык республиканской больница гинэ. Берло вакытэ югдур эшшо но уродмиз. Вань ёрос адяминистрациос но профсоюзъёс куспын огкылъёс кутэмын ӧй вал, кутэмъёсыз но быдэсъяськемысь дугдӥзы. Таин валче эмъясьёслэн асьсэ правооссы понна нюръяськонзы нош ик кужмояз. Соослэн профсоюззы куинетӥзэ бадӟым ужрадэз ортчытон сярысь ялӥз. 23 декабре Ижевскысь 29 больницаос пӧлысь 23-ез ӧз ужалэ, 2 сюрс 708 эмъясьёс "шутэтскизы". Пумитъяськон ужрадэ итӥськизы Грахысь ёрос больницаын ужасьёс, ёрос больницаез пытсам сярысь ивортэмын Дэбесысь администрацилы. И. Петрова ивортэмъя, али тодмо ӧвӧл на, кыӵе ёросъёсысь тазалыкез утисьёс 23 декабре ортчем пумитъяськон ужрадэ пыриськизы, малы ке шуоно, ёрос больницаослэн телефонъёссы кысэмын. 23 декабре врачъёс "шутэтскизы" шуиськом ке но, огез больницалэн но ӧсъёсыз ӵогамын ӧй вал. Котькудаз дежурной врачъёс ужазы, секыт висисьёслы юрттэт сётӥзы. *** Пумитъяськон ужрадэ пыриськемъёс та нунал понна уждун уз басьтэ. Врач ӝыны аръёсын уждунзэ уг адӟылы бере, мар пӧртэмез, кӧня нуналзэ со висисьёслэсь "шутэтскоз". Врач - со огшоры адями ӧвӧл ке но (Гиппократлэсь клятвазэ сётэменыз ик), но озьы ке но - адями, ужась кужым гинэ ӧвӧл. О. ВАХИТОВА. Атай-анай пега ке Котькудмы асьмеос государствоен сётэм правоосмес ӟеч тодӥськом кадь. Но со дыре ик куд-огез вунэтэ азямы пуктэм куронъёсты. Одӥгез со куронъёс пӧлысь - алимент тырон. Алимент - со нимаз улӥсь быдэ вуымтэ но ужаны быгатӥсьтэм пиналъёслы ваньбурен яке коньдонэн юрттэт сётон. Алимент тыро анай-атай, сюрмумы но сюрбубы, мурт пиналэз аслыз нылпи басьтӥсь анай-атай. Нош вылӥын верамъёслэсь юрттэт басьтыны ке уг луы, алимент тыро юрттыны быгатӥсь быдэ вуэм агай-сузэръёс, песятай-песянайёс. (Россия Федерациысь Семья кусыпъёсъя кодекслэн 80-тӥ-88-тӥ, 93-тӥ-97-тӥ статьяосыз). Алиментэз тыро мылкыд каремъя, нош сое тыронлэсь адями палэнске ке, соку коньдон суд пыр басьтӥське. Со понна алимент басьтӥсь улон интыезъя яке алимент тырон сярысь заявлениен вазиськыны кулэ судэ алимент сётӥсьлэн улон интыезъя (Россия Федерациысь Гражданской Процессуальной кодекслэн 18-тӥ статьяез). Сыӵе вазиськонэн алимент сётӥсь мозмытӥське судъяськонэн герӟаськем коньдонэн тыронлэсь. Алимент тырон сярысь нокыӵе огкыл кутэмын ке ӧвӧл, соку анай-атайёс суд пыр коньдон тыро толэзьлы быдэ: одӥг пиналлы - уждунысьтыз 1/4 люкетсэ, кыкезлы - 1/3, куинезлы яке солэсь но ятырезлы - уждунлэсь ӝынызэ. Озьы ик лыдэ басьтӥське анай- атайёслэн мукет доходзы но. Алиментлэсь быдӟалазэ суд кулэстыны быгатэ таӵе учыръёсы: 1. Алимент тырись 1-2 группаен инвалид ке. 2. Пиналъёс ужало но асьсэлы тырмымон уждун басьто ке. 3. Пинал быдэсак государство чотын улэ ке. 4. Алимент тырисьлэн мукет быдэ вуымтэ пиналъёсыз вань ке. Алимент тыриське, уждунысь подоходной налогез кельтэм уждунлэсь быдӟалазэ лыдэ басьтыса. Озьы ик со кельтӥське пенсиысь, стипендиысь, ужтэк кылем муртлы висъям пособиысь, фермер но пичи ужбергатон удысын поттэм табышысь. Алимент тыронэ уг пыро одӥг пол гинэ сётэм премия, тазалыклы изъян ваись яке секыт югдурын ужаса поттэм компенсациос но мукет. Отчы озьы ик уг пыро вордскем пиналлы, огназ яке трос нылпиё анайёслы, пенсионеръёслы но 1 группаысь инвалидъёслы сётэм пособиос. Алимент тырисьлэн улон но ужан интыез тодмо ӧвӧл ке, судлэн пуктэмезъя, со адямиез утчало интыысь паспортно-визовой службаос пыр. Алимент тыронлэсь палэнскись адямиез алимент басьтӥсьлэн мылкыд каремезъя кыл кутытыны луэ Россия Федерациысь Уголовной кодекслэн 157-тӥ ёзэтэзъя. Со сяна, алимент тырись сое утчанын быдтэм коньдонэз ичизэ кык уждунлэн быдӟалаеныз берыктэ. Сыӵе ужрадъёс пегась анай-атайёсты малпаськытыны кулэ. Ф. ПЕТРОВА, внутренней службая майор. ВАЛЭКТЭ ЮРИСТ СЭРЕГЕЗ НУЭ АДВОКАТ ЛИЛИЯ ШКЛЯЕВА Кин тон, атай? Картэным браке ӧвӧл. Нылпи ваи но, картэ шуэ: со мынам ӧвӧл. Мон, кышномурт, уг тодӥськы шат кинлэсь нуны вордэмме? Ма кароно мыным? М. Т. Сыӵе юанлы валэктон сётэ Россия Федерацилэн 1996-тӥ арын юнматэм Семьяя кодексысьтыз 49-тӥ ёзэт (статья). Кузпалъёс куспын брак ӧвӧл ке, нылпилэн кинлэн луэмез пумысен анай-атайёслэн ӵош гожтэм куронзы (заявленизы) ӧвӧл ке, та ужпумез эскере суд. Татчы вазиськыны кулэ анай яке атай, сюдӥсь-вордӥсь (опекун яке попечитель), ачиз пинал, быдэ вуыса. Суд санэ басьтэ атай шуыса возьматӥсь котькыӵе учыръёсты: генетикая экспертизаез, анайлэсь но атайлэсь валэктэмъёссэс, адӟисьёслэсь верамъёссэс, гожтэтъёсты, фото - но киносуредъёсты. Таосыз сярысь верамын Россия Федерацилэн Граждан процессъя кодексаз (49-тӥ ёзэтаз). Кин Русьын майбыр улэ? Та юанлы пыр-поч валэктон сётэ "Аргументы и факты" газет (50-тӥ номерез). Россиысь улон-вылонэз эскеронъя центрлэн (ВЦУЖ) но Госкомстатлэн лыдпусъёссыя тужгес но ӟеч али уло Москва, Тюмень область, Ямало-Ненецкой но Ханты-Мансийской автономной округъёс. Ёрмысагес улӥсьёс пӧлын - Карелия, Коми, Санкт-Петербург, Красноярск, Мурманск но Кемерово областьёс... Ваньмыз 43 регион. Соос радын ик, пумысеныз 10-тӥ интыын, Удмурт Республика. Асьмелэн улон-вылонмы Челябинск областен огкадь. Тужгес но куанеръёсыз пӧлы пыртэмын Москва, Кострома, Владимир, Архангельск областьёс, Приморской край... Уждун тыронъя тужгес но трос пунэмаськемын Чукотской автономной округ, Саха Республика, Магадан, Камчатка, Тюмень областьёс. Удмуртия та ласянь сылэ 26-тӥ интыын. Эскерон-чакланъёс возьмато интыысь властьёслэсь но ужаны быгатэмзэс яке быгатымтэзэс. Бюджет удыслы пунэмен тыронын валтӥсь интыын - Алтай Республика, Эвенкийской но Корякской автономной округъёс... Удмуртия сылэ пумысеныз 15-тӥ интыын. Со возьматэ, асьме кивалтӥсьёсмылэн уждун басьтымтэмы понна янгышсы сокем бадӟым ӧвӧл шуыса. Оборонной производствоен пачылам республикалы юрттыны кулэ государство. Тӥни ма бордын коньдонтэк пукеммылэн валтӥсь мугез. Л. ДМИТРИЕВА. ТОДАМ ВАИСЬКО Алигес гинэ пусйимы тодмо журналистлэн но писательлэн Николай Белоноговлэн вордӥськемез дырысен куатьтон ар тырмонэз. Нош сое тодӥсь адямиос нимзэ туннэ но ӟечкын буре ваё. Огшоры ӧй вал угось журналист но писатель. Котькудӥныз одӥг кыл шедьтылӥз. Утыр ачиз но дышетскылӥз. Та тодэ ваёнъёс но - Николай Егорович Белоногов сярысь. Соосын тодматскыса, син азяд выльысь но выльысь пуктӥськод ӟег нянь кадь адямиез. Паймылӥ. Синмаськылӥ Туннэ кадь ик возисько син азям Николай Егорович Белоноговез. Куатьтонэтӥ аръёс кутскыку, гужемъёсы со ӵем гинэ вуылӥз мынам вордскем гуртам - Актэмыре. Калыкен уно но лад-лад вераськылӥз. Милесьтым чебересь интыосмес учкылӥз. Туймы шур дуре чорыганы ветлылӥз - монэ котьку сьӧраз басьтылэ вал. Ӵужатае, Иван Дмитриевич Кузнецов, вералляз мыным: Белоногов агай-вынъёс асьме Кузнецов выжыысь потэмын. Соос Вандэмое бызем Даръя апаезлэн внукъёсыз, пе. Ӵужатайзы вал Алексей Кузнецов. Николай Егорович мыным пичи дыръям ик матын луиз. Котьма ласянь адӟем карымон потылӥз. Малы? Калыкен ӟеч-ӟеч, лад-лад, сюлэмез небӟытыса вераськыны быгатылӥз. Котьку дась вал солы кылын но, ужен но юрттыны. Мон паймыса кылзылӥ удмурт литература сярысь верамъёссэ. Газетъёсы нырысь гожъямъёсме но Николай Егоровичлы возьматылӥ. Нырысетӥ кылбур чуръёсме но солы оскылӥ. Николай Егорович монэ визьнодалляз, бурдъялляз, дуннеез валанме но муромытӥз но паськытатӥз. Мон котьку но паймылӥ солэн улонэз мур тодэмезлы, удмуртлык сярысь юн сюлмаськемезлы. Зэм, туж бадӟым малпанмы быдэсмытэк кылиз: Николай Белоноговлэн куатьтон ар тырмонэзлы сӥзьыса, ми вуттыны кулэ вал Кузнецов удмурт выжы сярысь повестьмес. Табере мыным огнамлы быдэстоно луоз ни со ужез. Туж адӟем карымон, шаплы адямиос сярысь трос вераны но кулэ ӧвӧл. Соос ялан син азямы, сюлэмамы, йырамы. Зэм, ум быгатӥське асьмеос адямиез дыраз дунъяны. Нош вань калыкъёслэн визьмо книгаосазы гожтэмын ук: "Ӟеч лэсьтэмед аслыд ик ӟечен берыктӥське". Кызь одӥгетӥ дауре мед улозы мукет адямиос. Мукет сямен. Николай Кузнецов. Шултӥд, Исай! Та адями сярысь вераськон ӝутскыку, мон син азям котьку но пуктӥсько сайкыт, небыт пальпотӥсь, йыг-йыг мугоро удмурт воргоронэз. Мугорын но сое лапег ӧй шуысалыд. Сизьымдонэтӥ аръёсы мыным шуд усиз Николай Егорович Белоноговен ӵош "Советской Удмуртия" газетын ужаны - со вал редакцилэн Алнаш, Можга ёросъёсъя собкорез, мон - газетлэн культура отделаз ужась. Быдэс элькунын газетлэн собкоръёсыз со аръёсы лачак гинэ вал: Ува, Глазов, Дэбес, Яр, Игра районъёсын. Мон уг шуиськы: со палъёсысь эшъёсмылэн перозы лябгес вал. Мар карод, одӥг киысь чиньыос но пӧртэмесь луо бере, адямиос - уката ик. Уката ик - творчествоен герӟаськемъёсыз. Озьы ке но, Николай Егорович соос пӧлын тужгес но висъяськылӥз. Маиныз? Шуг вераны. Оло номыртэм сайкыт пальпотэменыз, оло гожтоно темаоссэ тупен-тупен радъяны быгатэменыз, оло кенешоно адямиеныз лад-лад вераськеменыз, оло, удмурт кылэз номыртэм мур но яратыса бергатэменыз, оло?.. Пумтэм-йылтэм самой со олоос. Та воргоронлы инмарен гожтэмын вал, дыр, журналистика удысын ужаны: солэн гуртын тыршисьёс сярысь очеркъёсыз, статьяосыз шуныт кылын, ужъюгдурез ӟеч-ӟеч валаса гожтэмын луо вал. Та пумысен редакциысь одӥгез мӧйы ужась писатель Василий Евдокимович Садовников шуоз вал: "Коля Белоногов материал вуттэ ке, мон солы сю процентлы оскисько." Валамон угось: со аръёсы тодмо драматург В. Е. Садовников номыртэм усто но лэчыт дасялоз вал газетлэсь "Шӧкыч" бамзэ. Нош кужмо гожтэм чуръёс пото оскымон авторъёс бордысь. Со аръёсы газетлэн культура отделэз аспӧртэмлыко литературно-художественной клублы пӧрмылӥз: татын тыршизы, верай ни, писательёс Василий Садовников, Роман Валишин. Ми соку поэтэн Вениамин Ившинэн - газетысь нылпи сэрегез нуэ вал - литература удысын тэтэ кариськом на вал. Соин ик отделысьтымы тодмо писательёс, артистъёс, журналистъёс ӧз бырылэ - редакция городлэн центраз интыяськемын, кытчы ке, город пуме, ветлоно ӧй вал. Куддыр, эсьма, сокем трос кузя люкаськылӥзы - горем, вераськем, серекъям куараоссы валтӥсь редакторлэн кабинетозяз но кылӥсько вылэм... Таӵе ӵош пуконъёсын оломар сярысь но вераськон ӝутскылӥз: гуртын улон-вылон, литература но искусство удысъёсысь иворъёс, тумошо учыръёс, выль иворъёс. Валамон ни, таӵе пумиськонъёсын азьветлӥсь - одно ик Василий Евдокимович. Номыртэм сабырлы, визьмо воргорон милемлы, егит гожъясьёслы, кужмо идеал кадь потылӥз. Нош со вӧзын егит, сэзь, валась синъёсын - алнаш палъёсысь собкор Николай Белоногов - уката но сӥлы-бурлы адӟиськоз вал. Николай Егорович тулкымо-тулымо выллань кариськись суд йырсиоссэ киыныз маялтоз но отделын ужась вӧзы дугдоз: озьы но, пе, озьы, тани таӵе "пӧраме" вань. Ӝикыт вал Николай Егорович: печатланы дасям материалъёссэ ӵемысь машина пыр поттыса вуттылӥз. Редакциын таӵе материалэз "гырыса" потонэз уг луы ни (мар ватонэз, ӵемысь куд-ог собкоръёслэн гожъям чуръёссы котыырн выльысь но выльысь поръятэк ӧз луылы). Нош гожъяськон кибервылыз! Али ке но син азям пуктӥсько радэн-радэн, бырттылыса сямен радъям предложениосын малпанъёссэ, ӝикыт дасям материалъёссэ. Огвакыт Василий Евдокимович Садовниковлэн тазалыкез "чутыны" кутскиз. "Шӧкыч" бамез кык толэзь мында бергатыны мыным оскизы. Таӵе шудлы шумпотоно ук: ӝабыр-ӝабыр басьтӥськи та уж борды. Пӧрмытӥсько вал, лэся: Николай Егорович Белоногов бӧрсьысь бӧрсе гожъяны кутскиз "Шӧкычлы". Огпол серемес верос ыстэм. Яраз со мыным. Туж тупа сюжетэзъя. Нош нимыз сюлэмъям нокызьы но ӧвӧл. Воштӥ. Али ке но уг вунэтӥськы на: "Шултӥд, Исай!" Мыдъят, планёрка бере, Николай Егорович киме юн-юн кырме: "Туж усто! Шултӥд, Исай!" Со дырысен та воргоронэн чырткемъяськонмы одно ик "Шултӥд, Исай!" кылъёсын кутске вал. Собере кыкнамы но ог- огмылы ваче пальпотӥськом. Литература удысын нырысь вамышъёсме но ӟеч мылкыдын пумитаз: озьы но, пе, озьы, лыдӟи "пӧрамъёстэ". Пӧрмытӥськод, азьланяз но тазьы ик мед удалтоз, пе... Николай Егорович Белоногов литератураын ачиз но кезьыт сюлэмо адями ӧй вал: аслэсьтыз кужымзэ эскерылӥз художественной произведениос гожъян бордын но. Усто пӧрмылӥзы солэн веросъёсыз. Отысь адямиосты улэп муртэ кадь ик адӟиськод. Шумпотыса пумитай солэсь "Удмуртия" издательствоын 1982-тӥ арын "Эн чигы сяськаез" нимын потэм нырысь книгазэ. Нош мукетыз потэмлэсь азьло издательствоын ужась эшъёс асьсэос вазиськизы: вань, пе, таӵе рукопись, авторез - Николай Белоногов. Уд-а, пе, гожты солы рецензия (книга потэмлэсь азьло сыӵе рецензиос гожъято вал соку: туж бадӟым юрттэт луэ со авторлы). Мылысь-кыдысь гожтӥ мон со рецензиез. Таяз учыре автор лыдӟисьлы ӵектэм повестьсэ но веросъёссэ. 1989-тӥ арын асьме издательствоын потӥз та сборник. "Утиськод-а нимдэ?" Озьы нимаське со. Али ке но мон мылысь- кыдысь берыкъясько та книгалэсь бамъёссэ. Автор туж тау каремзэ вераз, книга поттыны юрттэмысьтым. Нош ачиз Николай Егорович мон понна син азям котьку но кылемын "Советской Удмуртия" газетлэн йыг-йыг мугоро, вальк-вальк сынам йырсиё собкорез луыса. Тани таӵе ик пальпотыса коридоретӥ шорам лыктэ, бур кизэ мыче кадь: "Шултӥд, Исай!" Никвлад Самсонов. Вордӥськиллям кырӟанэн ӵош 9-тӥ декабре Пичи Пургалэн культура юртаз Кузьмин кузпалъёслэн шулдыр концертсы ортчиз. Бадӟым кичабонъёсын пумитаз пурга калык куноосты. Мон соосты нырысетӥзэ уг адӟиськы ни. Озьы ке но, котькуд адӟыкум, сюлэмы бадӟым шумпотонэн пачылме, огдырлы, оло, шоканэ но дугдэ. Таяз радэ соос трос кузя лыктӥллям: Культурая училищеысь "Инвугур" ансамбль, татысь ик оркестр, Удмурт кун национальной театрысь Валентина Загуляева, Ольга Зорина но Ольга Чужанова. Программазы бадӟым но аспӧртэм вал: трос кырӟанъёс вошъяськизы эктонъёсын. Паймоно кадь: гуртын будэм огшоры гинэ удмурт кузпалъёс, нокыӵе бадӟым консерваториосты йылпумъятэк, сокем быгатыса кырӟало асьсэ кылбуръёссыя но крезьгуръёссыя пӧрмытэм кырӟанъёсты. Вань со быгатонъёсты соос омыръязы, луоз, удмурт шаерамы улӥсь калыклэн пыдэстэм кырӟан ошмесысьтыз. Туж синмаськыса но шумпотыса учки Юлиялэн но Виталийлэн укыр мусо нылъёссы шоры. Соос арысь аре бадӟымгес, визьмогес, дӥсьтӥсьгес но устогес луо. Али ик ини оскон кылдэ: аръёс ортчыса, анай-атайзылэсь вормонъёссэс таос эшшо но вылэгес ӝутозы. Юлия Кузьминалэн "Кырӟанэн ӵош вордӥськи" кылбурезъя кырӟанэз вань. Зэмзэ но, кырӟанэн ӵош вордӥськем со. Анаез нылзэ пушказ нуллыкуз ик кырӟаз, луоз, шулдыресь гуръёссэ. Собере анай йӧлыныз кузьмаз, дыр, аслаз мусо чебер нылызлы. Анай понна вань на меда солэсь дуноез, вордэм нылпиосыз улонын асьсэлэсь интызэс но шудбурзэс шедьто ке?! Юлялы мукетыз анай вордэм ӟеч кузпал, кырӟанэз но крезьгурез сыӵе ик яратӥсь пияшез. Кузпалъёс ог-огзэс валало ке, улон сюрестӥ ваче ки кырмиськыса вамышто ке, шумпотонзэс но куректонзэс валче люкыны быгато ке, чебер малпанъёссы но ужъёссы быдэсмо ке, солэсь но бадӟым шудбур ӧвӧл ни, дыр. Сыӵе шудоесь но калыкъёслэсь сюлэмъёссэс шунтыны, ӟеч мылкыд кузьманы быгатӥсесь Кузьмин кузпалъёс. Соослэн шулдыресь, сюлэмез сӥсъяны быгатӥсь кырӟанъёссы жингыртӥзы, дыр, ини удмурт шаермылэн котькуд сэрегаз. Оскон кылдэ: ӝоген сюрес лёгозы кунгож сьӧрысь ӵыжы- выжыосмы доры но. Вордэм нылпиоссы шоры учкыса, анай-атайёссы но данъясько но туж шумпото, луоз. Котькуд анай-атайлэн таӵе ӟечесь, адӟем карымон, удалтэм нылпиосыз мед луозы вылэм. Соку ӧй луысалзы, дыр, анай ымныртӥ юнме васькись курыт синвуос, соос мед луысалзы бадӟым шумпотонэн валче гинэ. Нош туннэ нырысь ик бадӟым тау кареме потэ тӥледыз вордӥсь, улон кузьмась анай- атайёслы, асьтэлы, та огыр-бугыр вакытэ калыклэсь зӥбиськем мылкыдзэ ӝутыны, сюлэмзэ пуктыны быгатэмды понна. Нош мусо нылъёсты, ӟеч дышетскыса, тӥледлы шумпотон гинэ мед ваёзы. Нош ми, пурга калыкъёс, тӥледлы ваньдылы бадӟым тау кариськом но чебересь кырӟанъёстэс выльысь кузьманы куриськом. Васса ВАСИЛЬЕВА. Пичи Пурга черкогурт. Картошкаез воштӥзы эмъюмлы Ваньмызлы тодмо, эмъюмъёс тырмымтэен, больницаосын висисьёсты бурмытон секытэн мынэ. Уваысь ёрос больницалэн валтӥсь врачез Владимир Копысов ивортэмъя, дас сизьыметӥ августысен эмъюм дунъёс 3 поллы будӥзы, нош ёрос бюджетлэн коньдон висъяны луонлыкез эшшо но сюбегаз. Таӵе дыръя пичи гинэ но юрттэт интыяз луэ. Алигес Ува ёросысь "Победа" эштослэн но татысь ик администрацилэн кивалтӥсьёссы Александр Возняков но Елена Березкина Ижысь "Фармаимпекс" организациен ньыль тонна картошка келян сярысь огъя кыл шедьтӥзы. Бакча емыш эмъюмъёслы воштэмын вал. Табере Мушковай но Пужмесь-Тукля гуртъёсын улӥсьёслы вань маин эмъяськыны. П. ЛЮКИН. СПОРТ Кужымзы ӧз тырмы Йылпумъяськизы "Ижевская винтовка"-лэн призэз понна ӵошатсконъёс. Туэ Удмуртилэн командаез егитомемын. Вылаз ик кужмоез биатлонистмы Алексей Кобелев ӵошатскон азьын висьыны ӧдъяз. Соин ик нырысетӥ нуналаз ӧз бызьылы. 20 иськем сюрес вылын вормиз Тюменьысь Павел Вавилов. Спринт шуон, вакчи сюресэз котькинлэсь ӝог ортчиз. Санкт-Петербургысь биатлонист Вячеслав Кунаев. Нылъёс пӧлын вормисе потӥз Смоленскысь Надежда Таланова. Кызьы тодӥськомы, миым таӵе ӵошатсконъёс дыръя эстафетаын вормизы вал асьмелэн пиосмы. Туэ та удысын но ӧз удалты. Алексей Кобелев нырысетӥ этапын командамес азьпала поттӥз, нош бӧрысь эшъёсыз "юрттӥзы" 8-тӥ интые кыльыны. "АСПЭК"-лэн кузьымъёсыз Кылемаз арня нуналэ Ижысь куасэн юызьылонъя "Снежинка" базаын ӵошатскизы шаерысьтымы кужмоосыз спортсменъёс. 10 искьем сюресэз ваньмызлэсь ӝог ортчиз УдГУ- "Динамо" командаысь Алексей Вольчук. 5 иськем сюрес вылын 30-40 аресъем воргоронъёс пӧлын вормиз Ижысь Алексей Максимов. Ас арлыдооссы пӧлын озьы ик вормисе потӥзы Воткинскысь Николай Петрушев, Ижысь Геннадий Никитин, Алексей Зудов, Владимир Осинцев. Нылкышноос пӧлын ваньмызлэсь шаплы вал спортъя международной классэн мастер Юлия Шамшурина. Арлыдоос пӧлын вормисе потӥзы Ижысь Вера Павлова, Лидия Андреева, Александра Чубукова но Дэбесысь Нина Данилова. Та ӵошатсконъёсыз радъяны юрттӥз "АСПЭК" акционер огазеяськон. Вормись куасчиосты со 17 сюрс манет тыр кузьымъёсын пусйиз. М. КУЗЬМИН. ЭКОНОМИКА Вуберганысь потӥзы Республикамы котьку данъяськылӥз кужмо промышленностеныз. Быдэс СССР-ын Ижевскез лыдъяллязы "узыр" городэн. Заводъёсын со дыре ӟеч уждун тыризы уго. Малпаськытэк реформаос шуон борды кутскон, военно-промышленной комплексэз кулэстон Россиез вакчи дыр куспын ляльчи радэ кельтӥз. Сыӵе "сюлмаськон" юн шуккиз "Бумаш" акционер огазеяськонэз но. Зэм, завод куашкатонлы ӧз сётскы. Витиз, чидаз но вормиз, шуыны луоз. Табере производство выльысь ӝутскыны ӧдъяз. Озьы бере, уждун тырон но тупатскиз. Нош уждунэн ӝеган - али Россилэн самой кышкыт висёнэз. Туннэ ми мадёмы та предприятилэн корт ӵыжатон комплексаз выльдӥськонъёс сярысь. Кылем арын кылдытэмын вал выль ёзэт - центробежной амалэн корт ӵыжатон производство. Вакчи дыр куспын татын вузъёс поттон чутрак будӥз. "Буммаш" оскымонэсь кусыпъёс тупатӥз Россиысь уно предприятиосын. Ижъёс уртче ужало но уно заказъёс басьто Москваысь "Перол" акционер огазеяськонлэсь. Берло куинь толэзьёсы та предприятие пыр трос вуз келямын "Азовсталь" акционер огазеяськонлы. Вераны кулэ: лэсьтэм продукцилы вылӥ дунъет сётэмын, заказ быдэстэмын тупатэм дырез чакласа. Та вакытэ пӧсьлы чидась роликъёс лэсьтӥсько Череповецкысь металлургической комбинатлы. Кык бадӟымесь валъёс кисьтыса но вӧлыса дасямын ни Орскысь металлургической комбинатлэн прокатъя станэзлы. Буммашъёс кӧня ке аръёс ӵоже ини умоесь кусыпъёс возё "Белгородэнергомаш" акционер огазеяськонэн. Та дырлы гожтэмын гумыос лэсьтыны курыса бадӟым контракт. Заказ сётэмын ке 5 миллион манетлы, гумыос дасямын ни 3 но ӝыны миллион манетлы. Ӟеч кошке пӧсьлы чидась гумы. Сое кемалась ик ӧвӧл кисьтыны кутскизы 145-тӥ цехын. Та вузлы, кылсярысь, заказъёс сётӥзы ни Нижнекамскысь нефтеперерабатывающей но Липецкысь металлургической комбинатъёс. Озьы ик та цехын алигес кӧня ке ёзъёсты кортлэсь кисьтыса дасяны кутскизы. Азьвыл сое дурыса лэсьто вал. Выль амалэз пыӵатон бордын трос ужаз цехлэн кивалтӥсезлэн воштӥсез Евгений Григорьев. Табере ёзъёслэн ӟечлыксы но вылӥын, ваньбур но шыръяське. Странаямы югдур секыт ке но, берло аръёсы ужзэс интыысьтыз вырӟытыны ӧдъязы бумага поттӥсьёс но. Озьы луэ, вылды, бумага поттон предприятиосысь машинаослэн пумен вужмыны кутскеменызы. Уго бумагалы кулэяськонъёс ялан тросгес луо, кылдо выль типографиос, усьтӥсько пӧртэм газетъёс но журналъёс. Уноез целлюлозно-бумажной комбинатъёс "Буммаше" вазисько валъёссэс выльдыны, машиналы воштос ёзъёс дасяны курыса. Тужгес но бадӟым курон вуиз Котласс комбинатлэсь. Со 800 миллион манет тыр усёз. Коллектив бадӟым саклык висъя продукцизэ мукет кунъёслы вузанлы. Келяны дась ни "Энергомашэкспорт" фирмалы лэсьтэм валъёс, солэн представительствоез интыяськемын Кёльн городэ. Та дыре 123-тӥ цехын Англиысь нефть поттонъя "ФМС" фирмалы корпусъёс кисьто. Таӵе вуз толэзьлы быдэ 10-15 лэсьтӥське. Ар йылпумъяськытозь, ваньзэ 125 дасямын луоз. Зэмзэ но, ӟеч тыршо выль амалэн корт ӵыжатонъя производствоын ужасьёс. Ваньзы сярысь нимысьтыз шуныт кылъёс вераны луысал. Мар бен, таиз ар секыт ке но вал, "Буммаш" акционер огазеяськон секыт улонлэн вуберганысьтыз потыны быгатӥз. Вуоно арын но заводлэн казнаяз эшшо тросгес коньдон мед бергалоз. Н. Лялин. Снимокъёс вылын: тани та цехын вӧло кисьтэм продукцизэс; шлифовкаосъя цехын Леонид ГРИГОРЬЕВ но цехлэн начальникез Алексей ДРУЖИНИН; дась вузэз эскеро контролёръёс Евдокия КОПЫСОВА но Галина КОЩЕЕВА. В. Камашевлэн туспуктэмъёсыз. Выль арез - октябрь пенсиен Декабрь пумын йылпумъяськиз октябрь понна пенсия тырон. Пунэме кылён кык арнялэсь ятырлы ичиёмиз. Таӵе йылпумъянъёсын пумитаз Россия Федерациысь Пенсиосъя фондлэн Удмурт Республикаысь ёзэз кылдэмез дырысен тямыс ар тырмонзэ. Та шуг- секытъёс вакытэ капчиен ӧз сётскы азьлане сыӵе вамыштон. Пенсиосъя фондлэн ёзаз ужасьёслэн декабрь толэзе шутэтскон нуналъёстэк ужамзы но аслэсьтыз емышъёссэ сётӥз. Предприятиосын трос эскеронъёс ортчытэмын, пунэме кылисьёсыз пумиськылэмын кивалтӥсьёсын, чакласа возисько сю пала счётъёс. Пенсиосъя налог басьтон понна олокыӵе но мукет амалъёсты уже кутэмын. Азинсконъёс басьтыны юрттӥз Кун Кенешлэн Тӧроезлэн Александр Волковлэн Россиысь Пенсиосъя Фондлэн правлениезлэн кивалтӥсеныз В. В. Барчукен декабре кӧня ке пол пумиськылэмез. Соку огкылэ вуэмын вал Удмуртилы декабре 70 миллион манет тыр дотация сётон пумысь. Со коньдон ик юрттӥз ворсаны сентябрь но октябрь толэзьлы сётӥськись пенсиосты. Озьы ик пусъем потэ ЭМЗ, "Ижсталь", но ЧМЗ заводъёслэсь кивалтӥсьёссэс. Декабрь толэзе соос пунэм кылемъёссылэсь оглюкетсэ тырыны быгатӥзы. Гажано пенсионеръёс! Россиысь Пенсиосъя фондлэн удмурт ёзэз ваньзэс ӟечкыла вуись Выль арен. Сӥзиськом тӥледлы, тӥляд нылпиостылы но нылпиостылэн нылпиоссылы кема аръёслы тырмымон тазалык, шуд, чидан, капчи мылкыд но вань умойзэ гинэ та праздник нуналъёсы. Нош Пенсиосъя фондын ужасьёс вань луонозэ лэсьтыны тыршозы, вуоно арын пенсиосты дыраз сётон но кык толэзьлы бере кылёнысь потон понна. Россия Федерациысь Пенсиосъя фондлэн Удмурт Республикаысь ёзэз. Мӧйыослэн асьсэлэн сюлмаськонзы Ясли-садэз пичиослэн кыкетӥ доренызы лыдъяськом. Психологъёс верамъя, адямилэн сямыз, пе, вить аресозяз юнма. Нош котыр ласянь ӟеч адями будэтон понна, нылпи садын ваньмыз луыны кулэ. Ёросысьтымы самой бадӟымаз нылпи садэ пырыкум, секыт улонлы ӝожтӥськозы малпай вал. Но янгышаськем. Кивалтӥсеныз Л. М. Полтановаен вераськыны кутскеме бере ик мылкыды каньыл луиз. Зэм, сюлэмшугъёссы соослэн тырмыт. Котькытын сямен ик, татын но воспитательёс уждунзэс дыраз уг адӟыло, шудонъёс, нылпи садлы кулэ луись арбериос басьтыны коньдонзы ӧвӧл. Дунъёс будэмъя, секыт луиз сиён-юон ласянь но. Та югдурысь потыны кивалтӥсь пӧртэм амал утча. - Нылпиосмес алама ум сюдӥське,- вера Любовь Михайловна.- Пӧрасьёсмы сиён дасяны тыршо. Пӧртэм шыд, ӝук, салат лэсьто. Нылпиос тужгес но пыжиськемъёсты ярато. Сӥль вань дыръя котлет пӧрало. Коньдонэн ваньзэ басьтыны ум быгатӥське. Нянен но йӧлэн юртто заводъёс. Нылпизэс нуллэмзы понна, мумы-бубыос 30 манет но тырыны уг быгато. Соослэсь шугъяськонъёссэс валаса, коньдон интые татын бакча сиён но басьто, кин быгатэ, песок, пызь, кеньыр вае. Огдыре асьсэ кужымен картофка мерттылӥзы. Валлян арын бусыысьтызы тонна пала люкаськиз. Но та ужен вырыны нылкышноос коже секыт. Со понна трактор-машина кулэ, музъемез но кыедано. - Куддыръя ужасьёсмылэн суй-пыдзы ик юскиське,- веранзэ азьланьтэ Любовь Михайловна.- Кызьы улоно вить толэзь уждун басьтымтэ муртлы? Озьы ке но, секыт мылкыдъёссэс нылпиослы уг возьмато. Соос медам тодэ на мӧйыослэсь сюлмаськонъёссэс. Воспитательёс нимысьтыз программая ужало. Т. Н. Фасахова инкуазен, вордӥськем шаерен тодматэ, ас гуртсэс гажан мылкыд пыӵатэ. Н. П. Щиголева Зайцевлэн системаезъя лыдӟиськыны дышетэ. Нош воспитательёс Р. Я. Лукина, Т. В. Нигматуллина, Ф. М. Кузьма, О. Н. Аршаулова но С. Н. Кузнецова "Радуга" программая занятиос нуо. Та нылпи садэ ӵем люкаськыло ёросысь мукет воспитательёс. Ог-огзылы ужамзэс возьмато, ӵош выль амалъёсты эскеро. Л. МАЛЫШЕВА. Грахово черкогурт. Герд Малы меда, малы? Гожтытэк ӧй чида ни. Уго та дырозь весь улӥ вал осконэн, выль паспортэ национальность графазэ кельтозы шуыса. Озьы ӧз луы. Сюлэмшугъяськон, урод мылкыд, жаляса малпан ваиз мыным "Кин тон? Кытысь? Кыӵе выжыысь?" пичи гинэ статьяды. Потэмын со 1-тӥ декабре. Оло, ми кадь пичи калыкъёслы Выль арлы таӵе кузьым пӧраз Россиысь правительство? Табере ваньмы ӝоген (2005-тӥ арозь) Россия Федерацилэн выжытэм гражданинъёсыз луомы.Паспорт, пе, быдэс дуннелы тупамон куронъёсъя лэсьтэмын. Мынам юаме потэ. Малы нош ик кин ке шоры учконо? Асьмелэсь улонмес но, тани документъёсмес но США-ын кадь пӧраны туртто. Ас улоно шаерысьтыд калыкъёсын вераськытэк-юатэк, национальность графаез кушто. Таӵе малпан юнме шорысь ӧз кылды. Азьло Союзысь кужмо, бадӟым калыкъёс люкиськем бере, кылем калыкъёсыз юатэк но кыткыны луоз Россилэн уробояз - таӵе мылкыд вормиз кадь кивалтӥсьёсмес. Уго дышемын ини калыкмы чиданы, кылзӥськыны. Ужтэк, дунтэк, сютэм улон выжыосмес, кылмес, культурамес азьланьтыны луонлык уг сёты. Национальностез быдтыны самой тупамон вакыт, лэся. Собере республика но калленэн быроз. Озьы ке но, берло аръёсы удмурт калыкмы сайкатскиз-а, мар-а, шуыны луоз. Учке ай, "Удмурт кенешлэн" но ужрадъёсыз шӧдскымон адӟиськыны кутскизы. Со понна ми эшъёсынымы туж шумпотӥськом. Удмурт сэрегамы удмурт сямъёсъя чебер улон, пиналъёсмес будэтон уз кысы шуыса малпаськом. Удмурт адями! Ма, нёжто тон, выль паспорт басьтыса, выжыдэ вунэтод? Пиналъёстэ будэтод но соос асьсэды ӟуч шуозы? Та туж кескич ужрад паспортной система пыр кутскемын. Ас выжызэ, шаерзэ гажасьтэм адями гинэ тае уз адӟы, уз вала. Светлана ФЕДУЛОВА, Ижын улӥсь. ГЕРД Уйпалан но ӟардэ ни ТУЭ тулыспал толэзе Кун Кенешмы кутӥз республикамылэсь Национальной политикая кун концепцизэ (учкетсэ). Со дасямын вал, Россилэн азьлогес юнматэм таӵе ик документэз вылэ пыкиськыса. Удмурт Кивалтэтысь Нациосын ужанъя комитет учкетлэн инъетэз бордын кык ар ужаз. Солы юрттӥзы Москваысь но элькунысьтымы тодосчиос. Соос пӧлын вал калык кусыпъёты радъянъя туж тодмо адями, нациослэн ужъёссыя Россилэн алиез министрез Рамазан Абдулатипов но. Ӵапак та учкетэз улонэ пыӵатонлы сӥземын вал Балезино ёрос администрациен но "Удмурт кенешлэн" татысь ёзэныз ортчытэм научно-практической конференция. Солэн ужаз пыриськизы ёросысь гурт администрациослэн тӧрооссы, культура удысын ужасьёс, удмурт, ӟуч, бигер кылъёсъя но литератураосъя дышетӥсьёс, нылпиосты школаозь утисьёс-визьнодасьёс. Та ужпумез эскеронэн балезиноос вань ёросъёсты но каръёсты азьланьтӥзы. Со понна тау кароно татысь ёрос кенешлэн тӧроезлы Л. Ф. Ивановалы. Со уго вань ужзэ ёрос администрациен но депутатъёслэн кенешенызы огкылысь бергатэ. Солэсь тазьы ужамзэ алигес нимысьтыз пусйизы вал "Удмурт кенеш" огазеяськонлэн тӧроез В. К. Тубылов. *** КОНЦЕПЦИЛЭСЬ валтӥсь дӥньетъёссэ люкаськемъёслы валэктӥз Нациосын ужанъя комитетлэн тӧроезлэн воштӥсез В. И. Чулков. Солэн верамезъя, учкетэз быдэсъян нырысь ик юнматыны кулэ элькунмылэсь асэриксэ. Татарстан но Башкортостан бӧрсьы Удмуртия но Россиен кивалтон удысъёсты но ужоскетъёсты люкон сярысь огкыл гожтӥз. Но со политической декларацилыгес кельше, пе. Соин ик экономика ласянь элькунмылы со тырмыт эрик уг сёты. Нош концепциез улонэ пыӵатон Удмуртилы но Татарстан кемозь ӝутскыны луонлык сётоз. Совето Союзын ваньмыз союзной республикаос огкадесь ӧй вал, пусйиз Чулков. Табере Россиын но сыӵе югдур кылдэмын. Но вылӥегес ӝутскыны быгатэм республикаосты лапкатоно ӧвӧл, улӥе кылемъёссэ соос кемозь ӝутоно. Валамон ни, национальной политикаез, мукетъёссэ сямен ик, коньдонтэк уд быдэсты. Соин ик, шуиз В. И. Чулков, котькуд ёрослэн бюджетаз та удыслы висъям коньдонэз нимаз чурен гожтоно. Таин ӵош ик ёрос (кар) администрациосын кылдытоно, пе, нациосын ужез радъянъя общественной кенешонъёс. Учкетын озьы ик чакламын Удмуртиысь калыкъёслэсь ассамблеязэс кылдытыны. Азьланяз со Кун Кенешлэн палатаез луыны быгатоз, валэктӥз В. И. Чулков. Соку, пе, Совето Союзлэн Вылӥ Кенешаз сямен, Кун Кенешамы кык палата луоз. Соос пӧлысь одӥгез Нациослэн палатазы шуыса нимаськоз. Но доклад лэсьтӥсьлэн малпамезъя, депутатъёслэсь та выллем кенешъёссэс нырысь, оло, ёросъёсын кылдытоно. *** ДЫШЕТОНЫН национальной ужпумъёсъя элькун институтлэн директорез З. В. Суворова таӵе югдурез вераз. Алигес та институт социологической эскерон ортчытэм. Отчы 130 адямиос пыриськиллям. Соос пӧлысь удмурт кылэз анай кыл карыса гожтӥллям 105 мӧйыос но 57 гинэ пиналъёс. Вордскем кыллэсь куштӥськон 1926-тӥ арысен мынэ ни, шуиз З. В. Суворова. Таӵе умойтэм йылоллы улласянь но, вылласянь но пумитъяськоно. Нош асьмелэн тазьы луэ на. Пиналзэ школае ваем анай-атайлэсь юало: удмурт кылын-а дышетоды, ӟученыз-а? Анай-атай берлозэ быръе. Со дыре ик солэсь уг юало: англи кылэз-а, немецсэ-а дышетоз пиналды? Азьланяз тазьы медам ни лу шуыса, предмет карыса, удмурт кылэз вань школаослэн программаосазы пыртоно, индылӥз З. В. Суворова. Соку, пе, анай-атайёслэсь нокыӵе юалляськон ортчытъяно уз лу ни. "Удмурт кенеш" огазеяськонлэн тӧроез Н. И. Малых вераз удмурт кадръёсты дасянъя ужпумез огазеяськонлэн исполкомезлэн куартолэзе ортчем кенешоназ эскерем сярысь. Та удысъя Кивалтэтын но, ёросъёсын но кылкутӥсь адямиос "сайкатэмын" ни. Нош национальной кадръёсты дасянъя программа ӧвӧл на, проектэз ик дась ӧвӧл ай, пыкылӥз Кивалтэтэз Н. И. Малых. Мон, радиоын ужась журналист, Нина Игнатьевнаез туж ӟеч валасько. Удмурт кылын интервью сётыны быгатӥсьёс Кун Кенешын но, Кивалтэтын но, министерствоосын но чиньыен-пӧлыен гинэ лыдъямон. Нош кудаз-одӥгаз соос чик ӧвӧл. Шу на собере: Удмурт Республикаын улӥськом! *** ДОКЛАДЪЁС бере кутскиз "котырес ӝӧк" сьӧрын кенешон. Ӟучез ӟуч кылын вераськиз, удмуртэз - аслазэныз. Нокин нокинэ урод ӧз кары. Ёросысь удмурт кылъя дышетӥсьёслэн тӧрозы Т. В. Захарова вань эшъёсызлэсь сюлэм висёнзэс кисьтӥз. Солэн верамезъя, тодосчиослы кемалась ни выльдоно удмурт кыллэсь орфографизэ но синтаксиссэ. Шонер гожъяськон правилоосты пиналъёслы матэ кароно, шуиз Исаково школаын дышетӥсь. Озьы ик, пе, секыт югдур кылдэмын дышетскисьёслэн ужъёссылы дунъет сётонэн. Солэн эсэпъёсыз, пе, нокинэн юнматэмын ӧвӧл. Йӧспӧртэм пуктэмын дышетӥсьёслэсь категоризэс ӝутон но. Англи, немец яке ӟуч кылъёсъя дышетӥсьёслы классность роноын сёто ке, удмурт кылъя дышетӥсез Иже келяло, пе. Соку нырысьёссэ Лондонэ, Берлинэ яке Москвае ысъяны кулэ кадь. Трос шуг-секытъёс культура удысын но. Соосты шараяз Люк культура юртлэн чеберлыкъя кивалтӥсез С. Е. Иванова. Татын ужало кырӟанъя-эктонъя но киужъя 14 кружокъёс. Быдэс ёрослы тодмо луо нылпиослэн "Чагыр гырлы" но мӧйыослэн "Азвесь пыры" фольклор коллективъёссы. Нош егитъёслэн "Купанча" калык ансамбльзы быдэс ёрослэсь данзэ уте. Озьы ке но, солы выль дӥськут басьтыны номырин, трос дыръя "Купанчаысь" эктӥсьёс-кырӟасьёс сюмаса ветло, поттэм коньдонзы медъям автобус понна тырыны кошке. Но культура юртын ужасьёс оско, котьку тазьы уз луы шуыса. Конференцилы йылпумъянъёс лэсьтӥзы ёрос администрацилэн тӧроезлэн воштӥсез Н. В. Ившина но "Удмурт кенешлэн" ёзэзлэн тӧроез Л. Ф. Иванова. Соос азьланяз но уртче ужалом шуизы. Синмаськымонэсь, вирсэрлыесь та нылкышноос! Уждунэн кылкутон ужзы но, уждунтэм общественной ужзы но улэп узвесь кадь берга. Конференцие лыктэмъёслы люкылэмын вал кун национальной политикая учкетэз быдэсъянъя ужрадъёсын проект. Интыосын эскеремзы бере, солы ватсанъёс но дэмланъёс вуозы администрацилэн нациосын герӟаськем ужпумъёсты радъясь комитетаз. Озьы кылдоз программалэн инъетэз. Собере сое депутатъёслэн ёрос кенешсы эскероз. Ватсаны кулэ, удмурт калыклэн ужпумъёсыныз ӵош отын санэ басьтэмын ёросысь ӟуч, бигер, бесерман калыкъёслэн но кулэяськонъёссы. Татын соос но ас культураоссэс азинто ук! Сергиноын тани ужа ӟуч культурая центр, Кестымын - бигеръёслэн, Юндаын - бесерманъёслэн. *** ТА КОНФЕРЕНЦИЯ ортчиз Люк черкогуртысь удмурт культурая центрын. Калык зал тыр люкаськиз. Дышетскись пиналъёс но, егитъёс но, арлыдоос но лыктӥллям культура юртэ. Соосты ӧтись ӧй вал, нош доразы пукыны чидаллямтэ. Озьыен, удмуртлыкмес тодын возён но ӝутон пӧртэм арлыдо адямиосты герӟа но шунтэ. Озьы ик медло выляз даурын но! Вячеслав Михайлов, журналист, "Удмурт кенешлэн" исполкомаз быръем мурт. "Улондэс кияды кутэ..." Селта ёросын вань шулдыр азе интыяськем чебер нимо гурт. Юмга-Омга шуиське со. Ваньмыз сямен улӥсьёс татын удмуртъёс. Оло, соин но "Удмурт кенешлэн" ёрос ёзэныз кивалтӥсь Петр Коробов малпаз нырысетӥ гурт кенешез Юмга-Омгаын кылдытыны. Тупатэм дыре клубе (озьы ниманы луоз ке арочной складлэн ог люкетаз лэсьтэм сэрегез) зал тыр калык люкаськиз. Гуртоос доры куне лыктэм Валентин Тубыловез нылкышноос нянен-сылалэн пумитазы. Югдон гурт администрацилэн тӧроез Нина Зуева люкаськемъёсты тодматӥз азьло огъя сельсоветэ пырис гуртъёсын но хозяйствоосын кылдэм югдурен. Ёрос администрацилэн кивалтӥсезлэн воштӥсез Нина Корнилова вераз татысь выль кузёоослэн улонын пумиськылӥсь шуг-секытъёсын нюръяськемзы сярысь. - Туэ тулыс ми вуылӥм Пичи Пурга ёросысь Брангуртэ, - шуиз Петр Коробов. - Туж синмаськи отысь гурт кенешлэн ужамезлы. Гуртоос вань ужпумъёсты огазьын эскеро, улонзэс котыр ласянь чакласа возё. Соин ик ми ӵектӥськом дорады но сыӵе ёз кылдытыны. Куспазы кенешыса, юмга-омгаос асьсэлы тӧрое бырйизы егит дышетӥсез Алевтина Снегиреваез. Кенеше озьы ик шедизы мукет гажамон адямиос. - Улондэс кияды кутэ, - дэмлаз гуртоослы Валентин Тубылов. - Дорады лыктыса, нокин но тӥлесьтыд уждэс уз лэсьты. Ӟечез бордысьтыды потоз. Ӧтчамын вань пусъем ужпумъёсты эскерем бере, люкаськемъёс азьын бадӟым концерт возьматӥзы Селта черкогуртысь мӧйыослэн ансамбльзы, Югдонысь но асьсэ гуртысь усточиос, дышетскись пиналъёс. И. ЛЕБЕДЕВ. Городэ вуи - удмурт луи "Буммаш" акционер огазеяськонын кызь витетӥ арзэ тырше ини Клавдия Николаевна ИСУПОВА. Сюлмо луэмзэ заводын синйылтытэк ӧз кельтэ. Табере дас сизьыметӥ арзэ буянъя участокын валтӥсь мастер луыса ужа. Со сяна, ӟырдыт сямо кышномурт мылысь- кыдысь пыриське "Удмурт кенеш" огазеяськонлэн Индустриальной ёросысь ёзэзлэн ужаз. - Клавдия Николаевна, огвакыт буммашъёс мылкыдтэк ужало ни вал. Кыӵе югдур предприятиын туннэ нуналлы? - Бен, гужем вылтӥ троссэ шутэтскыны лэзьылӥзы ке, та вакытэ югдур тупатскизгес. Кык толэзьзэ ини кык поллы тросгес ужано луиськом. Милям поттэм вузмылы куронъёс йылӥзы. Кылсярысь, заказъёс вуо кунгож сьӧрысь но: Германиысь, Израильысь, Франциысь, Шотландиысь но мукет интыосысь. Нош Башкириысь, Татариысь, Рязань областьысь куронъёс вуизы сюрес вылын ужан техникалы. Калыклэсь кулэяськонъёссэ но лыдэ басьтӥськом, солы вузъёс поттӥськом. Туннэ нуналлы кылдӥзы ни выль ужан интыос. Огкылын вераса, огазеяськонын ужгурмы пӧзе. - Нош уждун дыраз басьтӥськоды-а? - Уждунмы - ужаммыя, шорлыдын сюрс манет котыр. Мынам, кылсярысь, толэзяз 500-600 манет пала луэ. Городын улыса, семьяез сюдыны со ичигес. Но ми тау кариськом асьме кивалтӥсьёсмылы, уката ик Валентин Витальевич Жебровскийлы. Таӵе секыт вакытэ но уждун ласянь сюлмаськонъёсмы уг кылдо. Мукет заводъёсын ӵошатыса, ми умойгес улӥськом. Ноябрь понна уждунмес басьтӥмы ни, витиськом - декабрьлы. - Нош кызьы тӥ, заводын ужась, "Удмурт кенеш" огазеяськонэн кусып юнматӥды? - Тросэз, оло, уз но оске, нош мон городэ вуыса гинэ удмурт луи. Вордскем гуртам, Сюмси районысь Васькагуртын, тросгес ӟучъёс улӥзы. Соин, лэся, будӥсь нылпиос но удмурт сямен ӧзгес вераськылэ. Школаме йылпумъяса но удмуртъёс пӧлын улыны ӧз кылды. "Буммаше" ужаны ветлонъям "Кенеш" нимо магазинэз адӟи но та кыллэн пуштросэныз тунсыкъяськыны кутски. Ваньзэ тодыны тыршыса, юанъёсын Роза Ивановна Яшина дорозь вуи. Кышномуртлэн сюлмысь вераськемез туж яраз, малы ке со анае кадь потӥз. Кусыпмы юнмаз, нош огполаз шуиз, Индустриальной районысь удмуртъёсын, пе, кивалтод. Вань удмуртъёслэн нырысетӥ Ӧтчамазы ветлыса, кунгож сьӧры вуылэм кадь потӥ. Со дырысь, удмуртъёсын уг люкиськиськы. Кыкетӥ арзэ "Удмурт дунне" газет но басьтӥсько ни. - Ма бордын ужа та вие Индустриальной районысь "Удмурт кенеш" огазеяськонлэн ёзэз? - Быдэстоно ужпумъёсмы лачак гинэ. Тужгес но бадӟымез сюлмаськонмы - школа- гимназия кылдытон. 78-тӥ школа вазенгес пытсаськиз. Эшъёсынымы кенешыса, удмурт пиналъёс понна гимназия усьтыны чакласьком. Али 69-тӥ школалэн директорезлэн воштӥсез Нина Алексеевна Ковырзина дышетскон программа кылдытон бордын ужа. Та дырозь удмурт школа-гимназимы ӧвӧл, нош бигеръёслэн вань. Малпаськомы на "Буммаш" огазеяськонын ужась удмуртъёсын пумиськон ортчытыны. Угось вань ужасьёс пӧлысь соос 70 процентэз мында луо, нош ваньзы тодо меда шаермылэсь азинсконъёссэ. Выль ар бере пӧртмаськыны потомы. Котькыӵе ужын кичӧлтӥсь луыны кулэ. А. А. Разинмы ӧй луысал ке, милям правленимы ик бездыт адскысал. Туж юртто на Г. В. Горбушина, Л. С. Орешкова, Д. А. Иванов но мукетъёсыз. Юн кусыпъёсмы культурая училищеен, 43-тӥ но 69-тӥ школаосын. Милемды валало Индустриальной районысь кивалтӥсьёс но. - Нуназезэ - заводын, ӝытсэ - кенешын. Семьяды нош кызьы учке та шоры? - Кузпалы Юрий Михайлович, пиосы Антон но Дима монэ туж валало. Соос котыр ласянь юртто мыным. Пальпотыса шуо: "Кенеше ӧй ветлысал ке анаймы, мӧзмыса куасьмысал ни. Туннэ солы но шулдыр, милемлы но капчи". Нош ачиз Клавдия Николаевна серекъяса кадь вера: "Мынам доре - "Удмурт кенеш". В. КУТУЗОВА. "Тӧдьы виштыос" трос на Ӟеч-а тодӥськом асьмеос вордӥськем шаермес? Умгес, дыр. Нош котькудӥз ёрос ас сяменыз паймымон но туж аспӧртэмлыко. Зэм но, республикамылэн картаез вылын вань на "тӧдьы виштыос". Соосты "буян" понна, Пичи Пурга районысь географилы но историлы дышетӥсьёслэн методикая огазеяськонъёссылэн кивалтӥсьёссы К. С. ПЕРЦЕВА но Р. А. ВЛАДИМИРОВА элькунысьтымы ёросъёсы потан сярысь кенешизы. Озьы соос ветлӥзы ни Сибирь тракт кузя, вуылӥзы Камбарка, Воткинск, Каракулино, Ува ёросъёсы. Нош тани ма верало дышетӥсьёс Кез палъёсы вуылэмзы сярысь. Тодматским Кез ёросэ ми мынӥм Камлэсь кутсконзэ учкыны, шурлэсь кыӵезэ эскерыны. Со Удмуртилэн кыдёкысь сэрегез, кытын асфальт мырдэм-мырдэм вуэ бадӟым гуртъёс дорозь. Тужгес но Кулига доры, со Кезлэн уй палаз интыяськемын. Татын юнме уг шоккето ук: "Кин Кулигае ӧз вуылы, со курадӟонэз ӧз адӟылы". Ярам коть, ми кӧс вакыт отчы вуим: кык нунал азьвыл зорем. Кезысен Кулигаозь ог 40 иськем, сюрес - ӝутэм сюй. Выро-гопо, питранъёс тэтчало; лул пыдтышке ик вуэ: пуксёд - уд но поты ни. Син азе пуктыны луэ, кызьы кулигаос зорыку Кезысь бертыло. "Ужъёсъя райцентре толэзяз кык пол вуылӥськом,- шуо адямиос.- Луылэ озьы но, одӥг палаз гинэ кык нуналэн пичи гуртъёсын кӧласа (соос котыре нӧдӥськом ке) ветлӥськом". Ёросысь тросэз калык Кезын но кӧня ке бадӟым гуртъёсын улэ. Пичиесь гуртъёсын улӥсез ӧжыт. Отысь но егитъёс выль улонэ кошкыны тыршо - "столицае" яке Кезлы матэгес. Ачиз Кез Пичи Пургалы кельше, но асфальтэз отын ӧжытгес. Трос этажъем коркаоссы ятыр ӧвӧл, нош нимаз пу коркаос ӝикытлыкенызы но чылкытлыкенызы уг висъясько. Нош предприятиос кужмогес кадь. Сыӵе малпан кылдэ, сыр но вӧй поттон заводэ вуылыса. Ужзылэн вань ёзъёсыз умой радъямын: йӧл басьтонзы но, сыр, кузятэм, вӧй, казеиновой клейлы гранулаосын порошок поттонзы но. Пыд улын кӧс, чылкыт. Ваньзы тӧдьы халатъёсын но вошъян пыдкутчанъёсын пӧрмытскемын. Ужам вуоосы выльысь чылкытатӥсько но мукет уже кутӥсько. Сыр но вӧй поттон завод сяна, ёросын нюлэсэн но пуэн ужанъя куинь предприятие вань, ужа льнозавод, потто гыбед, изваскаё сюй, нефть, векчи кӧльы, пӧртэм горд сюй. Кез пыр чугун сюрес ортче, со Свердловск чугун сюреслэн Пермь отделениезлэн луэ. Отӥ ёросэ ваё эгыр, нефтепродуктъёс, минеральной сылалъёс. Ёросысь нуо нюлэс, гыбед, сырзаводлэсь продукцизэ. Нялтас вералом: татысь сырез ушъяло мукет ёросъёсын но, шаермылэн сьӧраз но. Камлэн кутсконэз Ёросэн вакчияк тодматскеммы бере берытском Кам шурлэн кутсконаз. Со Кулига гуртлэн пумазгес интыяськемын. Ульча паласен корт кенерен котыртэмын. Соку ик син азе усе "Татысен кутске Уралысь Кам шур" гожтэмен тодмо памятник. Пичи чебер пу коркаен ватэм кужмо ошмес - памятник сьӧрын, пужымъёс но куакъёс пӧлын, нялмыт бамалын. Со доры пичи сюресъёс изъёслэсь тыремын. Корка улысь корт трубаысь пӧзьыса потӥсь ошмес татысен ик читыр-чутыр бызись шурлы пӧрме. Кӧня ке метр турын пӧлтӥ бызьыса, пичи шур сюбег гинэ ӧраз жильыртэ ини, со вамен вамыштыса потыны луоз. Но ог 50 метр кемысен ӧрыз паськыта, татын нырысетӥез пичи выж лэсьтэмын. Котькуд ветлӥсь понна кык самой дуно инты: пичи корка дорын - кезьыт, чылкыт вуэз сузен веръяны, бадӟым шурлэсь кужымзэ шӧдыны; пичи выж вылын - ошмеслы но пыд улын жильыртӥсь Кам шурлы тау карыны. Салкым, шыпыт та дуно интыын. Сюлэм гань-гань луэ шулдыр но визыл Камлэн но пичи бурдоослэн лушкемак кырӟаменызы. Музъемлэн та пичи кесэгез кырсёме Юзмыт ву бызе азьлань, уй пала. Ошмес син дорысен 1,5 иськемын зэмос шур кадь адӟиське ни. Тани татын кутске мукет суред. Сюлэме мӧзмыт тӧл пельтэ кадь. Сюлэмшугъяськыны кутсконо. Татын шур ӵыпемын парсь вордон фермалэн кулэяськонъёсызлы. Со ярдурлэн паллян палаз сылэ. Тӧл ми доры, вырйылэ, кыед зынэз вуттэ. Аслаз дун вуэныз кыдёке ик кошкымтэ кырӟанъёсын укыр данъям Кам шур. Татысь хозяйствоослэн кивалтӥсьёссы, сыӵе бадӟым узырлыкез но инкуазьлэсь чылкыт вуэн паймымон дуно кузьымзэ кырсёмытыны дыртӥллям... Нош кӧня эскеронъёс пыр потоз чебер Кам, Волга дорозь вуытозяз: "сьӧд зарни" (нефть) котырак вӧлскемын, заводъёсысь, пароход возён интыосысь баржаослэн двигательёсысьтызы вӧй ӧръяськемын. Чорыгасьёслэн верамзыя, чорыгъёслы но татын нефть зын пыӵамын. Палэнысь вуэм мурт гинэ ваньзэ тае синйылтэ. Нош интыын улӥсьёс солы дышемын ни, шӧдске. Сыӵе ик югдур Камлэн кутсконаз но. Котыраз туж пичи инты гинэ вож, чылкыт на. Сое Удмуртилэн карта вылаз но пусйыны уг луы - сокем пичи. Но та пичи шулдыр инты вылэ но инкуазез "яратӥсьёс" кизэс урдыло. Кулига школаысь историлы дышетӥсь Гавшина Екатерина Артемьевна куараез дырекъяса ик мадиз, кызьы татчы Удмуртиысь, бускель областьёсысь туристъёс, сюанчиос вуыло. Ваньмыз соос памятникез "ӟыгыръяны" кутско, ошмес син дорын быдэс уллёен сыло, пичи выж вылтӥ сопалась та пала зол-зол вамышъяло. "Озьы гинэ яра вылэм ай - лыктӥзы музъем вылысь одӥг гинэ таӵе интые, учкизы, шумпотӥзы инкуазьлы, но шампанской но мукет пияла арбериез ошмес дурысь из борды шуккыса пильыло ук. Та интылы йыбырттыны шуыса кадь, умоесь малпанъёсын лыкто, нош кошко, ваньзэ кырсёмытыса. Уг но валало, шӧдске, урод лэсьтэмзэс". Екатерина Артемьевна ошмес вадьсын ик улэ. Музъемлэн та пичи кесэгез котьку солэн син шораз, солэн утемез улын. Ваньмыз лыктэмъёс одно ик солы вазисько. Гуртысь дышетӥсь сюлмаськемен, та ошмес Удмуртилэн инкуазь памятникеныз ялэмын. Но... Коньдон туж ичи висъяське, табере соин ӵогет но уд басьты. Озьы ке но, дышетӥсь кружоке ветлӥсь дышетскисьёсын ӵош та интыез чылкыт, шулдыр возьыны тырше, выль лыктэмъёслы татын мед кельшоз шуыса. Кемалась дауръёсысь Е. А. Гавшина шаерчи но, интыысь музеен но кивалтэ. Татчы люкамын кулигаослэн - ӟучъёслэн (кержакъёслэн) вашкала дырысь вӧсяськисьёслэн куронъёссыя но вуж сямъёсъя улӥсьёслэн (староверъёслэн) - улон но ужан тӥрлыкъёссы, пӧртэм арбериоссы. Патриарх Никонлэн реформаосыз бере (Алексей Михайлович эксэй дыръя) быдэс Русь вӧсяськон амалъёсызъя трослы люкиськиз. Вашкала сямъёсты утисьёс, кык чиньыосынызы вӧсяськыса, "еретикъёсты-реформаторъёсты" тышкаськыса, шунды ӝужан пала адямитэм, нюлэсо интыосы кошкизы. Выль сямен вӧсяськонлэсь палэнскисьёс быдэс Сибире вӧлмизы. Удмуртие но улыны интыяськизы. Озьы, Пуро гуртлы 3 иськемын, Сарапул ёросын, соос сярысь тодэ вайытэ азьвыл Пургыш гуртлэн шаез. Кулэмъёслэн гуоссы вылын, киросъёс интые, пилем изъёс сыло. Отчы гыркйыса нимтулъёссы гожтэмын но кирос суредамын. Кез ёросын нош али но соос кӧня ке гуртъёсын уло. Кулигаысь староверъёс (кержакъёс) сярысь мыным берлогес гожтэтаз мадиз Е. А. Гавшина. Вашкала сямен вӧсяськонзэс утисьёс но кӧня ке пӧртэмлы люкиськизы. Кулигаын демовецъёс уло. Со дырысен утиськем "О разделе" документ маде соос куспын люкиськон мугъёс сярысь. Отын верамын, вӧсяськисьёслэн огазеяськонзылэн "йырыз" вылтӥяськись, уксёез яратӥсь шуыса. Эксэй кузёосын ялан ултӥяса возем староверъёс кемаласен висъясько асьсэзыз утьыны, секытъёсты чиданы быгатэменызы. Тросэз улонзэс вӧсяськыса ортчытӥзы. Пеймыт тэльёсы пегӟыкузы, патриарх Никон дорозь гожъям книгаосты, гадьысьтызы кироссэс, обросъёсты сьӧразы нуизы. Нылкышноос пиналъёссэс утизы, нылпиосынызы ӵош асьсэзыз корказы сутыны ӧз косылэ, кызьы лэсьтылӥзы мукет сектаосысь вӧсяськисьёс. Выль интые улыны лыктыса, ужаны но улыны кулэ тӥрлыкъёс писпу выжыослэсь, вайёслэсь, модосъёслэсь, лыослэсь, кыр парсьёслэн зузылэсь (ваньмыз со али вань Кулигаысь музейын) лэсьтылӥзы. Ваньмыз кадь ик староверъёс лыдӟиськыны быгатӥзы, но сое ватыса возизы. Пиналъёссэс кузесь тол ӝытъёсы анай-атайёс дышетӥзы. Огдыре ик визьмаллязы книгаез ӝикыт утьыса возьыны. Котькуд книгаез утизы калъёсын яке бирдыосын вурем пуйыын. Ӧз кесяллялэ, сэрегъёссэс ӧз куасаллялэ. Кулигаын но мукет гуртъёсын утиськемын на ЪВИИ даурысь книгаос (кылъёс ог-огзылэсь висъятэк гожъяськизы ай). Соос ятырез киын гожъямын но ЪИЪ дауре лушкем печатламын. Со "Псалтырь Большой, Малый и Учебный", "Маргарит", Евангелие, Минеи, Святойёслэн улэмзы. Селоысь черкын вань купечен Строгановен кузьмам книга но. Со кузьмамез сярысь ачиз гожтыса сётэм. Жаль, та дырлы ятырез книгаос нуэмын МГУ-ын но Пермьысь университетъёсын ужасьёсын, озьы ик шедиллям пӧяськисьёс но, книга вузаса асьсэлы коньдон жильдӥсьёс кие. Кулигаысь музей соослы люкетыны уг быгаты: кержакъёслэсь книгаоссэс басьтыны коньдонзы ӧвӧл. Сямъёс-йылолъёс Кержакъёс огшоры адямиослэсь номырин уг висъясько. Но соос ялан азьвыл сямъёссэс утё: религиозной праздник нуналъёсы уг ужало, тодметъёслы оско. Кылсярысь, огзэ но бадӟым ужез пеймыт дыръя уг кутско: кен кураны, нылпиез пыртыны, пудо басьтыны, кузь сюрес вылэ дасяськыны. Нуналмысь улоназы соос али ваньзэ тае чаклало, быдэсъяло. Тани эшшо кыӵе куронъёсты быдэсъяло на соос: секытэн луэмез адямиослы вазь тодытоно ӧвӧл - нылпилы маке луыны быгатоз: вож нуныез возьматъяны уг яра - син усёз (зол но кема бӧрдоз): нылмурт бызён азяз мунчоын берло медаз пыры - картэз жугиськись луоз: сюанын кузпалъяськисьёслэсь киоссэс ӵушконэн керттылоно, вискытӥзы нокин медаз пота - лек мурт потӥз ке, семьяын тупан, ӟеч улон уз луы. Нылкышноос-кержакъёс ярато яркыт кышет, кофта, юбка, азькышет нуллыны (азьвыл дэрем ӧз нуллэ, али со алонэз чакламзы уг поты ни, дэрем но дӥсялляло). Чеберъяськонъёс уг нулло. Таяз дуннеын пель угыос нуллӥд ке, сояз дуннеын пельёсад кыйёс ошиськыса ветлозы, пе. Нылкышноос ноку но тамак ӧз кыске, нуны ӧз куялэ. Тае соос куштонтэм сьӧлыкен лыдъяло: сояз дуннеын нылкышно тылын ӝуалоз, пе. Пиосмуртъёслы туш нуллоно, кыскыны уг яра. Но вина юыны, жугиськыны, туганъёсын калгыны лэземын. Ваньмыз со сьӧлык лыдъяське ке но, сьӧлыктэ басьтыны инмарлэсь ӧпкельыса курид ке - ваньмыз куштӥськоз, пе. Вӧсяськисьёслэн огазеяськоназы пырон азьын тросэзлэсь куштӥськыны кулэ: кӧня ке дыр ӵоже нылкышноосын (озьы ик кышноен но) матысь кусыпъёс медаз луэ, кудӟытӥсь макеос юоно ӧвӧл, огшоры кырӟанъёсты кырӟано но эктоно ӧвӧл, сӥль но магазинысь трос мукетсэ (сахар, кампет) сиёно ӧвӧл, кофе, чай юыны уг яра. Зэм, лэзьылӥзы пызь, кеньыр, сылал, ыль чорыг басьяны. Нимысьтыз дӥськут нуллоно: пересь кышноос, кылсярысь, нулло пужытэм пеймыт басмалэсь аспӧртэм вандыса вурем сарафан (дугас) но пеймыт кофта. Тӧдьы кофта дӥсяло вӧсяськыны но религиозной праздникъёс дыръя гинэ. Пересь пиосмуртъёс но аспӧртэм вандыса вурем дӥськут нулло. Юн чаклаллязы визян (кӧс утён) дырез. Тае чакламтэосты зол кыл кутытъязы: вӧсям сиён сиыны лэзьымтэысен юн оскисьёслэн огазеяськонысьтызы кӧня ке дырлы куштон дорозь. Самой троссэ - 9 арнялы. Бӧрысь вӧсяськыса-куриськыса нош ик отчы ветлыны яра. Кулигаысь староверъёсты МГУ-ысь профессоръёс "ӵаша нуллӥсьёс" ("чашечникъёс") шуыса нимало, малы ке шуоно, котькудӥзлэн огазеяськонэ пырем муртлэн горд сюйлэсь аслаз ӵашаез луыны кулэ. Соин соос сисько доразы но, вӧсяськонъёсын но. Татысь староверъёс попъёсты санэ уг басьто: черке уг ветло, попъёсты тыбыр йырйисьёсын нимало. Соин праздникъёс дыръя вӧсяськыны, кулэм мурт дорын чирдыны, кисьтон дыръя староверъёслэн корказы люкасько - кузёоссы староверъёс мед луозы но тамак медаз кыске. Со вӧсяськонъёсын одно ик 9 турлы сиёнъёс дасяны кулэ. Вань сиёнъёсты радызъя сёто. Со сяна, кунояло брагаен, но кудӟытозь уг. Вӧсясько пӧртэм, арняысь кыӵе нуналъя, праздникъя но обрядъя. Со туж валантэм асьмелы. Кӧлыны фанатъёс-староверъёс доры пырыны шедьтӥды ке, нырысь тӥледыз сюдозы сюкасен, кубистаен. Сииды ке, мукет сиёнъёс но ӝӧк вылэ пуктозы, ӧд ке сие, сиемды уг поты малпалозы. Мукет номырин но уз сюдэ ни. Но брагаен куноялозы. Староверъёслэн вань посудазы куинь пӧртэм: посудной - таиныз вӧсяськисьёс гинэ сисько, огшорыез - ваньмыз кылемъёсыз сисько но пудоослы. Посудной посудазэс бызись вуэн чылк-чылк мисько но ӟуч гурын ӟырдато. Староверъёс кырсь уло шуэм шонер ӧвӧл. Сыӵе йылпумъян лэсьтыны луоз трахомаен висьымтэзыя ке но (кызьы тодмо, та висён кутске кырсь киосысь). Арлы быдэ быдэс корказэс (борддоръёсты, вӧлдэтэз) миськыло. Выжзы кема ӧй вал - ӵужылӥзы гинэ. Тӥни озьы уло Кулигаысь староверъёс-кержакъёс. Куное мынӥськом Кулигаысь кержакъёслэн мазы но созы кылемын на: коркаосын кӧня ке киын гожъям книгаос (огез Е. А. Гавшина дорын - песяйёсызлэсь кылем), музейын дӥськутъёс но мукет. Но Никон люкиськон вакытысен утиськемын самой кулэез: нокыӵе узырлыкъёстэк огшоры гинэ, ӝикыт улон. Коркаосын выжъёс буямтэ, коръёслэсь борддоръёс лякылымтэ, туала мебель, паласъёс, ковёръёс ӧвӧл. Асьме улонысь басьтэмын самой кулэез гинэ: лампочка, радио, телевизор. Обросъёс суредъёстэм, святойёслэн тусбуйёссытэк. Соосты возъетъёсын ӵокталляло, вӧсяськыны гинэ усьяло. Выжъёс вылын асьсэ куэм паськытэсь выж лёгетъёс, валесъёс вылын но борддорын - озьы ик куэм ковёръёссы. Пырон дорысен бур палан - бадӟым сюен шуккем гур. Сое татын туж дунъяло - умой пыже но шунытсэ кема возе. Пырисьлы быдэс корка усьтэмын. Но валась мурт ӧс кусыплэсь вамышлы кыдёке уз мыны. Коркалэн ӟеч мылкыдо но сакласькись кузёезлэн синъёсыз ик юалозы ни тынэсьтыд: "Кин тон, пырем адями?" В. БАЙМУРЗИН. (Басьтэмын районын потӥсь "Маяк" газетысь). Герд "Удмурт интеллигенцилэн ас калыксэ азинтонын интыез" конференцилэн ӵектонъёсыз 1. Конференцие люкаськемъёс умоен лыдъяло "Удмурт кенеш" огазеяськонлэн исполкомезлэсь та лэчыт ужпумъёсты огъя кужымен эскеронэ поттэмзэ. 2. Интеллигенция - калыклэн малпаськись, улонэз азьлане вырӟытӥсь кужымез. Соин ик, калыкмы сярысь "Удмурт кенеш" сюлмаське бере, со мед тыршоз та кужыменз огъя чаклам ӧретӥ лэзьыны. Гуртын, карын, пӧртэм-пӧртэм удысын тыршись интеллигенция солэн син азьысьтыз медаз усьы, огъя ужамы кыскемын мед луоз. 3. Калыкмылэсь асваланзэ ӝутон, улон азезлы осконзэ юнматон вылысь, уже умойгес кутоно чеберлыко литератураез, искусстволэсь пӧртэм ужъёссэ, калык пӧлы паськыт вӧлмытоно тодосчиослэсь утчам-шедьтэм тодон-валанъёссэс, вашкала дырысен туала вакытозь ортчем сюресмы, калык сямъёс, йылолъёс пумысен ужъёссэс. Со понна "Удмурт кенешлэн" вань ёзъёсаз кылдытоно калык пӧлын тодон-валанъёсты, чеберлыко культураез вӧлмытӥсь группаос. Уже умойгес кутоно "Тодон" ("Знание") огазеяськонлэсь луонлыкъёссэ но. 4. Кун Кивалтэтлы, Культурая министерстволы вазиськоно, элькун каръёсысь, гуртъёсысь, школаосысь вань библиотекаосы котькуд удмурт кун газетэз, журналэз, кун издательствоын поттэм книгаез, озьы ик Историяя, кылъя, литературая Удмурт институтын но Удмурт университетын поттэм научной литератураез одно ик вуттыны курыса. 5. Вазиськоно Кун Кивалтэтлы, кун книга поттонниез, удмурт кылын потӥсь газетъёсты, журналъёсты, радио но телевидение программаосты ялан син азяз мед возёз, соослэн ӟечлыксы но лыдзы медам сины шуыса. 6. Кун Кенешлы вазиськоно, элькунысьтымы кун кылъёс сярысь законэз ӝоггес кутыны курыса. Кун Кенешлэн та законэз арен-арен кутытэк воземез удмурт калыкез юри ултӥямлы, удмурт кылэз, Конституцияя со кун кыл луэ ке но, улонамы паськытгес уже кутонлы юри чакласа пумитъяськонлы кельше. Тае азьланяз чиданы ик уг луы ни. 7. Кун Кенешлы ӵектоно элькунамы удмурт кадръёсты дасян программа ӝоггес кутыны. Сотэк та удысын радэз ик ӧвӧл. Соинтэк-а кивалтӥсьёс пӧлын удмуртъёс. Лыдзыя будэм интые, ялан кулэсмо? Озьы медам луы шуыса, быгатӥсь удмуртъёсты кивалтонэ ӝутон вылысь чаклано нимысьтыз амалъёс, кылсярысь, уже кутоно квотаосты. Со выллем ик ужрадъёс кутоно тросгес удмурт егитъёсты техникумъёсын, институтъёсын но аспирантураосын дышетон вылысь, соосты вылӥ дышетскон интыосы пырыны азьло ик дасяса. 8. Вазиськоно Калыкез дышетонъя министерстволы: калыклэсь асваланзэ, ас шӧдонзэ будэтон понна, удмурт кылэз, литератураез, калыклэсь историзэ, культуразэ, психологизэ школаын дышетонэз ӟечгес радъяно, та удысъёсъя туала куронлы тупась выль учебникъёс но пособиос кылдытыса, дышетӥсьёсты дасяса. 9. Кивалтэтлы вазиськоно Кун музейлы Куӟебай Гердлэсь нимзэ сётон пумысен. 10. "Удмурт кенешлэн" ёросъёсысь ёзъёсызлы вазиськоно, ас дорысьтызы этнографической памятникъёсты чакланы но утьыны ӵектыса. 11. "Удмурт кенеш" исполкомлы ӵектоно та конференциын лыдӟем докладъёсты нимаз книгаен поттыны. 12. "Удмурт кенешлэн" ёрос ёзъёсызлы дэмлано 1999 арын нырысетӥ кварталэ "Удмурт интеллигенцилэн ас калыксэ азинтонын интыез" конференциосты ас доразы ортчытыны но кулэ ужрадъёс кутыны. Кутэмын 1998 арын 18 толсуре. Удмурт Республикаысь Гурт хозяйствоя но сиён-юонъя министерство ивортэмъя, 1999 арын шаерлэн кулэяськонъёсызъя ю тысез вуттыны мылкыд карисьёс пӧлын конкурсэ заявкаос - куриськонъёс кутӥсько 1998 арын 30-тӥ декабрёзь. Конкурс азьын быръён ортчоз 1998 арын 30-тӥ декабре 10 часын таӵе адресъя: Ижевск, Сивкова ульча, 120-тӥ юрт, 31-тӥ кабинет. Сӥё-даноослы - дунтэк Алнаш районысь администрацилэн тӧроез Виталий Городилов ёросын потӥсь газетлы гожтӥськыны коньдон висъян сярысь постановление кутӥз. Озьы районысь 43 сӥё-дано адями вуоно арысен "Алнаш колхозник" газетэз дунтэк басьтоз. И. СЕРГЕЕВ. ГАЗЕТ ГОЖЪЯМ БЕРЕ Берпуметӥ урок "Фермер луэме потэ, мед монэ дышетозы" статья потэмлэсь азьлогес ("Удмурт дунне", 10 декабрь 1998 ар) Ижевскысь 21 номеро училищеын туж паймымон ужрад ортчиз на. Училищелэн директорез Г. П. Кулишова, фермере дышетскисьёслэсь анай- атайёссэс кенеше люкаса, соосты выль огкыл улэ гожтӥськытӥз. Ужрадэ куд-ог витьымтэ муртъёс, тужгес ик Ботанической садысь ужасьёс, медаз сюре шуыса, пумиськонлэсь дырзэ шара ӧз поттылы. Но дышетскисьёс, кенешлэсь ку ортчонзэ тодыса, отчы ӧтизы ужысь кошкытэм Л. И. Романова дышетӥсьсэс. Кӧня ке малпаськемез бере Людмила Ивановна кенеше мыноно кариськиз. Со ке ӧз, кин люкаськем анайёслы но дышетӥсьёслы шонер вералоз училищеын кылдэм югдур сярысь. Мон но, Ботанической садлэн директорез, кузпалы сьӧры потӥ. Кенеш ньыль час пала кыстӥськиз. Г. П. Кулишова люкаськемъёслы вераны тыршиз, макем дуно усе училищелы фермере дышетон, вить кабинет усьтон понна гинэ, пе, 140 миллион манет коньдон кошкиз. Нош кытысь поттӥз меда со та лыдпусэз? Дышетскон интыос усьтон понна коньдон верам лыдпуслэсь трос поллы ӧжытгес кутэмын вал ук. Ботанической сад сярысь ке верано, солы арлы быдэ коньдон висъя Удмурт Республикаысь Правительство. Нош отысь куать научной ужасьлы уждун висъя Россиысь Наукаосъя академилэн Уралысь ёзэз. Училище Ботанической садлэсь куштӥськиз ке, вуоно фермеръёслы ужан амалъёслы дышетскыны нокытын луоз, шуиз кенешын Л. И. Романова. Директорлэсь выль дасям огкылзэ юнматытэк кельтыны ӵектӥз. Угось отын радызъя верамтэ, кытчы кошкыны кулэ дышетскисьёслэн коньдонзы. Со сярысь умой гожтэмын вал азьлояз огкылын, кудзэ анай- атайёс юнматӥзы ни вал август толэзе. Табере выль документъя нылпиослэн дышетскон понна тырем коньдонысьтызы (толэзьлы быдэ соос 132 манет тыро) ог люкетэз мыныны кулэ училищелэсь юртсэ но ужасьёсты возёнлы. Выль огкылъя училище нылпиослэн та коньдонысьтызы уз висъя транспортэн мынон-ветлонлы но нылпиосты сюдонлы. Толэзьлы быдэ солы 36 манет кулэ. Тӥни ӵапак та коньдонэн сэрен ик училище куштӥське Ботанической садлэсь но наукая кивалтӥсьлэсь но сад будэтонъя дышетӥсьлэсь. Табере наука ужъёсты нуонъя кивалтӥсе юнматэмын та ужез чик но тодӥсьтэм адями Л. З. Куштанаева, азьвыл ужезъя - трамвай но троллейбус водитель. Кенеш ӵоже анай-атайёс Г. П. Кулишовалы пӧртэм юанъёсын но ӵектонъёсын вазиськылӥзы, куризы Ботанической садэз училище борды ик кельтыны, нош Л. И. Романоваез ужан интыяз берыктыны. Но кенеш ортчиз нокыӵе протоколтэк, секретарь но тӧро бырйытэк - озьы чакламын вал директорен. Соин ик кенешез йылпумъяса, Г. П. Кулишова тазьы шуиз: "Вань куронъёстэс но ӵектонъёстэс кылзӥ, но мон татын директор, соин ик лэсьто озьы, кызьы ачим кулэен лыдъясько". Пусйыны кулэ, вуоно фермеръёс, дышетскемзы понна толэзьлы быдэ 132 манет тырем сяна, эшшо быдэн 20 манет сёто на общежитиын улэмзы понна. Со дыре ик училищеысь мукет группаос воксё дунтэк дышетско. Кылем арын хозрасчёт амалэн тодон-валан басьто вал банкын ужаны дышетскисьёс. Но туэ соослы но государстволэн стипендиез тыриське ни. Мар понна бен янгыше усизы фермеръёс, соослэн стипендизы быдэсак дышетскемзы понна кошке. Мар каризы бен та кенешын анай-атайёс? Жаляса верано, директорлэн ӵектэм огкылэз вылэ гожтӥськизы, уго тросэз дырто ни вал автобусъёсы. Нош данакез ас кужымзылы оскымтэзы сярысь веразы. Тау тӥледлы, шуизы соос Л. И. Романовалы, но ми югдурез воштыны ум быгатэ. Мар басьтӥзы та кенешын дышетскисьёс? Валазы: яратоно дышетӥсьсы соослы татын берпуметӥ уроксэ сётӥз, возьматӥз, кызьы нюръяськоно дышетскон право понна. Малпасько, та урокез пиналъёс уз вунэтэ. Зэмлыкез зӥбыса, туннэ вормизы чиновникъёс. Малы озьы луиз? Та юанэз йыразы мед понозы вылэм кулэтэм огкыл вылэ гожтӥськем анай-атайёс но. Ю. РОМАНОВ, Ижевскысь Ботанической садлэн директорез. Шумпотон медаз берытскы кайгуэн Выль аре пиналъёсты, ма, мӧйыосты но шумпотто коркаосамы, нылпи садъёсынг, клубъёсын сылӥсь, пӧртэм буёло шудонъёсын, тылъёсын ворекъясь вож кызъёс. Но та пуштырес, ческыт зыно эшмы тушмонлы пӧрмоз, со котырын тылпу потӥз ке. Озьы медаз луы шуыса: - кызэз юнматоно но юртъер шоры пуктоно, штораослэсь, гуръёслэсь, батареяослэсь кыджёкегес; - чеберъяно заводын поттэм электрической гирляндаосын, ас киын лэсьтэмъёсыз кышкытэсьгес. Озьы ик уг яра стеаринлэсь сюсьтылъёсты кутыны; - бенгальской тылъёсты кызлы матын ӝуатыны, хлопушкаосын ыбылӥськыны уг яра; - нылпиосты кыз котыре огназэс кельтыны уг яра. Тылпу потӥз ке, йырдэс эн ыштэ. Соку ик "01" телефонъя ӧтёно тылпу кысӥсьёсты, калыкез юртысь поттоно, тылэз ас кужмын кысыны кутсконо. И. ПЕТРОВ. Вормон ас понназ уг лыкты Тверь областьын быдэс Россиысь техникъёс-осеменаторъёс пӧлын конкурс ортчиз. Ува ёросысь "Авангард" эштосысь Юлия Маркова отысь данъян грамотаен но дуно кузьымен берытскиз. Ньыльдон укмыс улосысь эшъёсыз пӧлын со куинетӥ интые потэм. Вормон ас понназ ӧз лыкты. Юлялэн быгатонлыкъёсыз арысь аре будо. Со сярысь вера таӵе лыдпус но: котькуд 100 скаллэсь эштосын 97 кунян вордӥське. Татын пудо выжызы но зол, кунянъёссы но чырткем будо. П. ЛЮКИН. Пенопласт корка Уваын огез воргорон улыно-вылыно корка лэсьтӥз, бордаз ик - мурӝолэн гараж но мунчо. Талы паймонэз ӧвӧл - али выль юртъёс зор бере губиос сямен кылдо. Абдратэ юртъерлэн вылтусыз - юг-юг тӧдьы лымылэсь лэсьтэм шудон каоркалы укша со. Кызьы валэктӥз кузёез Александр Ожгихин, та коркаез пуктыны одӥг кирпич но, кор но кулэ ӧз луэ. Ваньмыз люкамын пенопласт блокъёслэсь, нош буш интыосаз кисьтэмын керамзитэн бетонлэсь суралтэт. Юртлэн борддоръёсыз кирпич зӧкта гинэ. Озьы ке но, таӵе юртын улӥсьёслы кезьытъёс кышкыт ӧвӧл, малы ке шуоно, пенопласт шунытэз зол уте. Дунызъя ке учконо, Александр Ожгихин валэктэмъя, коньдон трослы шыръяське - пенопласт блокъёсты лэсьтон но ваён кирпичлэсь дунтэмгес усе. Со сяна, коркаез ӝутон понна нокыӵе кранъёс-экскаваторъёс кулэ ӧвӧл - пенопласт блокъёсты кык-куинь адями капчиен ворме. П. ЛЮКИН. Трос-а кулэ? Дэбес палан удмуртлыкез утён сярысь сюлмаськисьёс алигес ӧтьылӥзы милемыз доразы. Нырысь ик ветлӥз отчы Ожмос школаысь дышетӥсьмы, Куӟебай Герд нимо премилэн лауреатэз, "Удмурт кенеш" огазеяськонлэн Пичи кенешаз быръем мурт Юлия Павловна Байсарова. Со сьӧраз нуллӥз аслэсьтыз дышетэм сизьым арганчизэ, люкаськем калыклы лыдӟиз кылбуръёссэ. Арня ортчыса, отчы ик вуылӥмы ми, Завьялысь "Уӵыос" нимо литературно-музыкальной группа. Солэсь ужзэ радъяло Мария Дмитриевна Ишматова - Удмурт лулчеберлыкъя дэменлыклэн Завьял ёросысь ёзэзлэн тӧроез, Евдокия Анатольевна Антонова - районысьтымы удмурт нылкышноослэн огазеяськонзылэн тӧроез, нылпи садысь воспитатель но Августа Алексеевна Шкляева - лулчеберлыкъя дэменлыкмылэн президиумаз быръем мурт, киужъёсъя центрлэн тӧроез. Та адямиос люкаськем калыклы веразы тодмо удмурт писательлы Г. Д. Красильниковлы вордскемез дырысен 70 ар тырмонлы сӥзем ужрадъёс сярысь но кырӟазы солэсь яратоно кырӟанъёссэ. Юлия Павловна но, ми но паймимы дэбесъёслэн милемыз шуныт, вань сюлмысьтызы пумитамзылы. Дэбес кыдёкын ке но, та палась адямиослэн ас бордазы кыскыны быгатонлыксы, удмуртлыкез вылӥ дунъянзы, чеберлыко удмурт литератураез но поэзиез яратонзы кылемын. Отысь калык (удмурт кыллы но литературалы дышетӥсьёс, нылпи садъёсысь воспитательёс, педучилищеысь дышетӥсьёс но дышетскисьёс, школаын дышетскисьёс) срамын-пожамын ӧвӧл на урод политикаен. Соин ик сюлэмазы вань люкаськемзэ ӧръяны туртто. Агае сярысь веранме йылпумъяме бере, Сюрногуртысь удмурт кыллы но литературалы дышетӥсь Надежда Петровна Максимова (Удмурт Республикалэн дано дышетӥсез, 1975-тӥ арын, агае, Г. Д. Красильников кулон аре, студентка вылэм, агайме келяны быдэс группаеныз ӵош ветлэм) шуиз: "Ноку уз вужмелэ Геннадий Дмитриевичлэн произведениосыз: угось соос егитъёслы улонэтӥ мыныны шонер сюрес возьмато. Мон ачим но Олексан Кабышев сямен ик нырысь араз институтэ пырыны ӧй быгаты но возьдаськеменым дорам бакча бертӥмы пыри..." Нош Людмила Кононовна Васильева, дас одӥг ар ӵоже роноен кивалтэм мурт, али отысь методист, милемыз, кыӵе ке бадӟымесь куноосыз сямен, пӧсь чаен, пыжиськемен пумитаз. Роноын но, школаын но калыкен пумиськылэммы бере, трос шунытэсь тау карон кылъёс вераз, Сибирь сюреслы сӥзем музее но нуллӥз на. Кыӵе ӟеч музей лэсьтӥллям дэбес калыклэн визьмо нылъёсыз но пиосыз, вашкалазэ возьматон понна. Али будӥсь нылпиос, сое адӟыса, пересьёссылэн, анай-атайёссылэн курадӟыса улэмзы сярысь верамъёсыз кылыса, оло, кӧнялы ке но небыт сюлэмо, шырыт мылкыдо луыны турттозы. Сое ми шӧдӥмы, школаын дышетскись нылпиос азьын вераськыкумы. Кыӵе сак кылзӥзы соос милемыз! Нош вераськонмес йылпумъямы "Алнаш сярысь кырӟанэн": угось Геннадий Дмитриевич Алнашын вордскемын но будэмын. П. Н. Кубашев та кырӟанлэсь "Синмаськымон нылпи будэтӥськом..." чурзэ Г. Красильниковлы сӥзьыса гожтӥз. Кырӟанмес быдэстӥм гинэ но, ньыль-вить кузя дышетскисьёс но дышетӥсьёс кырӟазы асьсэлэсь, Дэбес сярысь шулдыр удмурт кырӟанзэс. Соос пӧлын ик вал Удмурт Шаерысь калыкез дышетон удысысь дано ужась, "Ӟардон" ансамбльын кырӟась, Дэбес школаысь дышетӥсь Эльза Семёновна Россова. Со шуиз: "Кӧня, кыӵе бадӟым мылкыд, ас удмурт калыкеныд данъяськон, ас шаердэ яратон, анай кылдэ гажан но дунъян пыӵатӥськоды тӥ удмурт пиналъёслы но, мӧйыослы но !" Дэбесысь выль эшъёсмы эшшо пумиськон сярысь мылкыдзэс веразы, нош Лидия Васильевна Ложкина, удмурт кыллы но литературалы дышетӥсь, кузьмаз милемлы "Байгурезь" суред но нылпиосын чильпам салфеткаос. Ноку вунонтэм кылёзы та пумиськонъёс. Нош соосты ортчытыны юрттӥз Удмурт Кивалтэтысь Нациосын ужанъя комитетлэн тӧроез Светлана Константиновна Смирнова. Тау солы! М. ИШМАТОВА, Удмурт лулчеберлыкъя дэменлыклэн Завьял ёросысь ёзэзлэн тӧроез. Газет гожъям бере Осконзэс медаз ыштэ "Фермер луэме потэ, мед монэ дышетозы..." статьяын туж пыр-поч валэктэмын, кыӵе секыт югдур кылдэмын 21 номеро училищеын пинал пиосыз но нылъёсыз фермер луыны дышетон ласянь. Пиналъёс но дышетӥсьёс абдрамын, татын фермеръёсты дасямысь дугдозы ни шуыса. Визьмо фермеръёсмы асьмелэн ӧжыт, соин ик дэмен басьтӥськыса утёно али та ӟеч кутсконэз. Мылкыдэз ӝуто, паймыто дышетскись егитъёслэн тунсыко малпанъёссы но кайгыронъёссы. Кызьы уд синмаськы соослэн гурт улонэз умоятыны турттон мылкыдъёссылы, анай-атайёссылэсь ужзэс азьланьтыны малпанъёссылы, музъем вылын ужаны дась луэмзылы? Огшоры капчи мылкыдын уг луы лыдӟыны та гожъямез. Мон сямен, улонамы таӵе урод учыръёс кылдыло, соосты дырыз дыръя шараяны быгатымтэмы, нюръяськымтэмы сэрен. Соиз но вань, асьме кузё-выжы нергеос, кивалтӥсьёс тросэз сӥё-дано уг каро кичӧлтон амалэз, ӟуч кылын таӵе веран но вань: инициатива наказуема. Ӟеч мылкыдын, чылкыт синмын учкыны кулэ асьмелы но, вылӥ кивалтӥсьёсмылы но, фермеръёсыз дасян понна таӵе тунсыко дышетскон инты вань шуыса, отын ужасьёсыз гажано, соослы но дышетскисьёслы номырлы ёрмонтэм луонлыкъёс кылдытоно. Училищеын кылдэм югдурез тупатон понна, оло, нимысьтыз комиссия кылдытоно. Отчы одно ик Кун Кенешлэсь депутатъёссэ, Гурт хозяйствоя но Калыкез дышетонъя министерствоосысь специалистъёсыз, юристъёсыз, гурт хозяйствоя академиысь дышетӥсьёсыз, анай-атайёсыз, шаерысьтымы сӥё-дано фермеръёсыз пыртоно. Фермеръёсыз дасян зӥбемын, быдтэмын луиз ке, кӧня егит пиос но нылъёс азьпала улонлы осконзэс ыштозы. Василий ЧЕРНЫШЕВ, Завьялово ёросысь фермер. Герд Трос тодод - азьпала мынод Удмуртъёс сярысь гожтыса кельтэм иворъёс асьме доры вуо ог кык сюрс ар талэсь азьло дырысен. Волга дурысь булгаръ1с удмурт калыкез соку ар шуыса нималозы вылэм. Волга дурысь Булгарие вуылэм араб купецъёс но асьме калыкез ар нимын пусйыса кельтӥллям. Бератаз ӟуч кылын гожтэмъёсын удмуртъёс нимамын ар калык, отинъёс, отякъёс. Вотинъёс, вотякъёс шуыса. Дас куатетӥ даур котырын удмуртъёс сярысь гожтэмъёс пумиськыны ӧдъяллям ини Шунды Пуксён пал Европаын но. Зэм, асьме сярысь отын ӵем дыръя пермянхъёс яке черемисъёс шуыса вералозы вылэм. Удмуртъёсты тодыса-висъяса гожтэмъёс потӥллям ини дас тямысэтӥ даурын. Россиысь калыкъёсты, соослэсь улэм-вылэмзэс, йылолъёссэс эскерон вылысь, экспедициос вуылӥллям удмиуртъёс доры но. Соослэн бадӟымос гожтэмъёсазы удмуртъёс сярысь иворъёс трос инты уг басьто ке но, асьме калыкез дуннелы тодытон удысын со бадӟым вамыш вал ини. Кылсярысь, сыӵе экспедициосы потам тодосчи Г. Ф. Миллер наука котырын вырисьёслы дас тямысэтӥ даурын ик ивортӥз ини: вотякъёс, пе, асьсэды ар уг шуо, удмуртъёс шуо. Дас укмысэтӥ даурын Петербургын Ӟуч географической общество, Москва но Казань университетъёсын историкъёслэн, археологъёслэн, этнографъёслэн но антропологъёслэн огазеяськемъёссы кылдэмен валче кутске удмуртъёсты зэмос наука амалэн эскерон. Палэнысь тодосчиосын валче та уже ӝот-ӝот басьтӥське удмурт калыклэн аслаз визьмо пиез но Шаркан палась школаосын покчи классъёсты дышетӥсь Григорий Егорович Верещагин. Со уно лэсьтӥз калыкмылэсь культуразэ котыр ласянь эскерон удысын. Нырысетӥ кык монографиоссэ солэсь Ӟуч географической общество, быдэс Россилы но финн-угор дуннелы синйылтымон поттэм сяна, азвесь медальёсын но пусйиз. Бератаз асьмеос та адямиез нырысетӥ удмурт тодосчи но писатель шуыса нимамы ини. Бен, Верещагин нырысетӥез вал. Со бӧрсьы уно удмурт тодосчиос, ас калыкмес наука амалэн эскерыса, кыдёкын палэнын но тодмо луизы. Нырысетӥосыз пӧлын ик вал Иван Степанович Михеев, Иван Васильевич Яковлев, Дмитрий Иванович Корепанов (Кедра Митрей), Михаил Ильич Ильин, Трофим Кузьмич Борисов (Трокай), Кузьма Павлович Чайников (Куӟебай Ггерд)... Марлы мон тае ваньзэ верасько? Калыклэн ас тодэмез, ас выжыысьтыз адямиослэсь ӟеч ужъёссэс адӟемез будэто солэсь асваланзэ, потэм-будэм выжыоссэ юнмато, азьланезлы оскон ӵого, со понна нюръяськыны кужым пырто. 1931 арын Иж карын усьтӥськиз удмурт калыклэсь ортчем сюрессэ, солэсь кылзэ но культуразэ эскерон вылысь нимысьтыз институт. Куатьтон арлэсь кема ужа ини со.Али со Россиысь Наукаосъя Академилэн пичи гинэ люкетэз. Но удмурт калыклэн улоназ со бадӟым инты басьтэ. Пырак верано ке, со быдэс дуннеын удмуртоведениея одӥг гинэ институт. Удмурт калыклэсь историзэ, кылзэ, культуразэ эскерись тодосчиос, центръёс дунне вылын ӧжыт ӧвӧл. Озьы ке но, татын гинэ калыкмылэсь лул дуннезэ, ужан но улон-вылон амалъёссэ котыр ласянь ваче герӟаса эскеро. Палжнысь тодосчиос институтлэсь удысъёссэ нимаз-нимаз басьтыса азинто, музон финн-угор калыкъёслэн культураенызы герӟаса, Удмурт институтлэн ужъёсыз вылэ инъяськыса. Вакчи дыр куспын уд вера институтлэсь куатьтон ар ӵоже лэсьтэм ужъёссэ. Татын ужасьёс дуро калык но солэн историез, культураез ласянь выль толдонъёс. Соосты нимаз книгаосын потто. Соос вылэ инъяськыса ини, та авторъёс но, музонъёсыз но учебникъёс но чеберлыко гожтосъёс но пӧрмыто. Институтлэн аслаз издательствоез вань. Арлы быдэ со дас - дас вить книга поттэ. Типографие келямъёссэ но лыдъяса, туэ но дас одӥг книга люкаське. Туэ удмурт кылъя асьсэлэсь монографиоссэс поттӥзы университетысь профессоръёс И. В. Тараканов но В. К. Кельмаков, литературая книгаез потӥз А. С. Измайловалэн. Берло кык ар ӵоже куинь-ньыль ӟеч книга поттэмын Куӟебай Гердъя. Огкылын вераса, удмурт калыклы вань мар чотын асваланзэ ӝутыны но азьланезлы кужым басьтыны. Но ужало-а со книгаос кулэезъя? Тодэ-а калыкмы мушлэн чечы бичамез калдь чырыен- пырыен люкам та дуно тодон-валанъёсты? Лыдӟисьёсын пумиськонъёсы ветлыса адӟиськод: туж ӧжыт. Библиотекаослэн коньдонзы ӧвӧлэн, та туж кулэ книгаос отчы уг вуо. Калык кие вуэмзэ но ваньмыз озьы гинэ капчиен уз вала али. Кулэ со тодонъёсты, валамон карыса, калыке вӧлмытыны. Книгаослэн авторъёссы лыдӟисьёсын пумиськонъёсы ветло ик. Озьы ке но, берло дыре "Тодон" ("Знание") огазеяськон лябӟыны кутскемен, тодосчиослэн калык пӧлын лекциоссы синыны ӧдъязы. Туж ӟеч уж лэсьтэ Ижысь Национальной библиотека, выль книгаослы презентациос ортчытъяса. Но та ужрадъёс зарезьын шапык кадь гинэ али. Малпасько, библиотекаосын но "Тодон" огазеяськонэн ваче кариськыса, "Удмурт кенешлэн" ёрос, гурт ёзъёсыз кылдытыны кулэ та дуно тодон-валанъёсты калык пӧлы вӧлмытӥсь группаос. Тодосчиос, книгаослэн авторъёссы, соослы быгатэмзыя юрттозы. Та группаос ик мед вӧлмытозы чеберлыко культурамес, литература, искусство удысысь ӟеч ужъёсты но. Нош Кивалтэт мед сюлмаськысал та туж кулэ книгаосты республикаысьтымы котькуд библиотекае вуттон сярысь. Калыклэн тодон-валан басьтон правоез - со Конституциен чаклам право! Кивалтэт озьы ик ас вылаз басьтыны кулэ республикаысьтымы выжы калыклэсь историзэ но культуразэ наука амалэн эскеронлы коньдонэн юрттонэз. Удмурт институтэз ке басьтоно, кудӥз сярысь вылӥын верамы, солы туэ асьме бюджетысь одӥг копейка но ӧз вуы на. Нош юрттэт туж кулэ. Тодон-валан люкан сяна, книга поттон гинэ но туэ кыӵе дуно усе ини. Василий ВАНЮШЕВ, тодосчи но кылбурчи. Гердлэн арез. Йылпумъяськиз-а со? Тазэ, 1998 арез, асьмеос ялӥм удмурт калыклэн дано пиезлэн Куӟебай Гердлэн (Кузьма Павлович Чайниковлэн) ареныз. (Жаляса верано, ЮНЕСКО калык куспо организация ласянь та бадӟым малпан быдэсмытэк кылиз.) Поэт но переводчик, драматург но прозаик, этнограф но фольклорист, актёр но педагог, публицист но общественной деятель Куӟебай Гердлэн пӧртэм ласянь кисьтаськись талантэз али но асьмелэсь трос удысъёсмес югдытэ. Нош маин асьмеос данъяны быгатӥмы сокем вылэ ӝутскем адямимес? Та сярысь вераськиськом Удмурт Кивалтэтысь Нациосын ужанъя комитетлэн кивалтӥсеныз, Куӟебай Гердлэн вордскемез дырысен 100 ар тырмонлы дасяськонъя но сое ортчытонъя оргкомитетлэн ёзчиеныз Светлана Константиновна Смирноваен. - Зэмзэ ик, ортчись ар Куӟебай Гердлэн арез вал. Туннэ нуналозь трос гинэ лэсьтэмын. Пӧртэм ужрадъёс ортчылӥзы - Удмуртиын, Ижевскын гинэ ӧвӧл - Москваын но республикамылэн палэназ, кытын уло удмуртъёс. Малпамъя, умой пӧрмиз, шуыны луэ, Гердлы сӥзем калык куспо научно-практической конференция (ветлӥзы Финляндиысь, Венгриысь, Эстониысь тодосчиос но). Кылдытэмын документальной видеофильм - презентациез вал Ижевскын, Москваын, возьматӥськиз "Культура" телеканал пыр но. Та дырлы вуттэмын ни кык постановлениослэн проектъёссы: Национальной музейлы но нылпиосты дышетонъя Национальной центрлы (школа-садлы) Куӟебай Гердлэсь нимзэ сётон сярысь. Малы ке шуоно, ӵапак та адями кылдытӥз Удмурт краеведческой музеез но, Ижевскын нырысетӥзэ удмурт нылпи юртэз но. - Планын со пусъемын, национальной школа-музей шуыса. Ольга Константиновна Шилова кемалась малпаське ни кыӵе ке но школаез асьсэлы "киултон" сярысь. Ижевскын уго ӟучез но, бигерез но шор ёзо национальной школаос вань ни - удмуртсэ одно ик нырысь ик усьтоно вал... - Бен уго... Гердлэн арез та ласянь пыкиськыны но бурдъёсыз вӧлъяны мед юрттоз. Туала нылпиос выль валанэн, выль тодонъёсын будыны кулэ. Шаермылэн историез, визьмо пиосызлэн-нылъёсызлэн ортчем сюрессы син азязы мед луоз. Та ласянь пичи ке но юрттӥзы, дыр, республикаысьтымы школаосын Куӟебай Гердлэн творчествоезлы сӥзем урокъёс. Озьы ик ортчытэмын вал устоезлы сочиненилы конкурс. Ижевскысь 56 номеро школае люкаськылӥзы куамын школаысь Гердлэсь творчествозэ эскерисьёс. Котькудӥз ик дасям аслэсьтыз бордгазетсэ. Тужгес ӟеч дышетскисьёс азьпалан Куӟебай Герд нимо стипендия басьтыны быгатозы, сыӵе стипендиос вить пӧртэм луозы: шор ёзо школаосын, средней специальной но высшой учебной заведениосын дышетскисьёслы, аспирантъёслы но докторантъёслы. Пусъем ужрадъёсты быдэстонын тужгес секытэз, дыр, Куӟебай Гердлы памятник пуктон? Шуом, Ижевскысь Шор площадьын (карлудын)... - Центральной площадьлы озьы ик Куӟебай Гердлэсь нимзэ сётыны ӵектэмын. Татын луоз солы памятник. Матысь дыре быръемын луоз (конкурс пыр) сое пуктон инты, нош 1999-2000 аръёсы луоз устоезлы памятниклы конкурс. Отчы пыриськыны быгатозы, асьмелэнъёсыз сяна, Россиысь, кунгож сьӧрысь скульпторъёс, архитекторъёс но. Вераны кулэ, Куӟебай Герд сярысь тросгес тодыны тыршон городысь школаосын но шӧдӥське ни. Дано кылбурчимылэсь бюстсэ асьсэ мылкыд каремъя пуктӥзы ни шоркарысьтымы 44 номеро гуманитарной лицейын. Чакламмыя, Ижевскын ик азьвыл совпартшколалэн юртэз борды (али отын прикладной искусствоя - калык киужъёсъя центр) шуккемын луоз Куӟебай Гердэз буре ваён пул - татын со ужаз 1930-1932 аръёсы. Удмурт детдомлэн юртэз (Сивков урам, 189), кытын ужаз но улӥз Кузьма Павлович, ярантэм, вуж ни, нош мемориал пул шуккемын луоз мукетаз нылпи юртэ, Советской ураме, кытын али Первомай ёрослэн нылпи творчествоя центрез. Буре ваён пул шукконо на Кузьма Чайниковлэн дышетскем школаез - Вавожысь шор ёзо школа борды но. - Вавожын но ёросаз музейёсын комплекс усьтыны чакламын. Гердлэн вордскем палъёсаз эколого-этнографической заповедник кылдытон сярысь но кылпум потылӥз вал. Тодэммыя, аспал дано адямизэс буре ваён ласянь мар но со лэсьтэмын ни. - Туэ инвожо толэзе, Куӟебай Гердлы сӥзем лыдӟонъёс дыръя, солэн вордскем корка бервылаз, Покчивукоын (Б. Докъяын), усьтӥськиз стела. Гурезь-Пудгаын - музей. Зэм, али со, кызьы шуэ школалэн директорез Анатолий Максомвич Егоров, огшоры школа музей выллем возиське на, солэсь статуссэ будэтон сярысь сюлмаськоно. Нош Вавожын 1999 аре Гердлэн бюстэз-памятникез одно пуктэмын луоз шуыса оскисько. Сое бронзае кисьтонэз гинэ кылиз на. - Куӟебай Герд югыт тылси уськытэ туала гожъямъёсмылэн, суредасьёсмылэн мынон сюресазы. - Бен, солэсь тусбуйзэ суредазы вынмуртэз Юрий Чайников, художникъёс Семен Виноградов, Петр Елкин, Владимир Михайлов, Евгений Скобелев... Пьесаоссэс сӥзизы Егор Загребин, Никвлад Самсонов, Алексей Шкляев, Анатолий Уваров, Леонид Романов, Вениамин Морозов, Николай Байтеряков. Драматургъёс пӧлын конкурс вал. Кыкетӥ интые потӥз Е. Загребин, поощрительной премиен пусъемын Н. Самсонов. - Оскомы, азьпалан Куӟебай Гердлы сӥзем бадӟым чеберлыко произведение но кылдоз ай шуыса, шуом, роман яке повесть... - Со понна программаын пусйим вал, творческой ужасьёслы социальной заказ сётоно. Мед луозы Куӟебай Гердлы сӥзем научно-популярной книгаос, монографиос, озьы ик художественной произвдениос. Драматургия удысын, верай ни, сыӵе нимысьтыз куронъя кӧня ке ужъёс гожтэмын. Кызьы соос пуктӥськозы - соиз мукет ужпум. - Али шумпотыса кие кутӥськом ни Куӟебай Гердлэсь аслэсьтыз выль книгаоссэ: "Зарниесь кылчуръёсы" но "О ней я песнь пою" (удмуртсэ но, ӟучсэ но сборникез люказ, дасяз Фома Ермаков). Потӥз Зоя Богомоловалэн бичам "Как молния в ночи" книгаез но. "Дело Софин" книгазэ лыдӟисьёс кие вуттӥз Кузьма Куликов, "Шимес пеймытысь" ("Из мрака") ужзэ англи кылын печатлаз Николай Кузнецов. Дасяське на Куӟебай Гердлэн словарез, со бордын тырше Риф Насибуллин. Вераны кулэ, та куинез книгаос - Ф. Ермаковен но З. Богомоловаен дасямъёсыз - поттэмын Россиысь калыкъёслэн национально-культурной азинсконзыя Фондлэн юрттэменыз, солэн коньдонэныз. - "Куӟебай Гердлэсь арзэ ортчытон республикамылэн бюджетэзлэн кисыяз зол гинэ шуккиз" шуыса вераськонъёс вань... - Бен, со озьыгес ик луысал. Юбилейлы дасяськон но сое ортчытон программая, кудӥз кутэмын вал 1997 арын 15 апреле, чакламын вал одӥг но ӝыны миллиарл манет (вуж уксёен) кутыны. Басьтӥмы 350 миллионзэ. Туэ 50 сюрс гинэ (выль уксёен) висъямын вал. Москва, Россия Федерация ӧй ке юрттысалзы, тросэз пусъем ужъёсмы быдэсмытэк кыльысалзы, дыр. Ваньмыз сямен печатной продукция, Москваын но, Ижевскын но ортчъям бадӟымесь ужрадъёс федеральной бюджетысь коньдон чотын быдэсъямын. - Озьыен, со вера, асьмелэсь дано, быдӟым адямимес, шаерамы гинэ ӧвӧл, быдэс Россиын, дуннеын но дунъязы, вылэ пуктӥзы шуыса. - Бен, со озьы. Герд - со пилемъёс сьӧрын ватскыса улэм тужгес яркыт кизили, шуыны луоз. Со ваньмызлы адске, пиштэ, синмаськытэ, лулъёсыз югдытэ, визьнодлы дышетэ. Та арен гинэ Гердлэн арез уг йылпумъяськы. Та быдӟым адями али выльысь асьме доры берытске. Соин ик вуись аре но, 2000-тӥ бӧрсьы вуисьёсаз но сое асьмелы выльысь но вылыьсь усьтом. Тау, Светлана Константиновна. Выль арен тӥледыз. Эшшо чырткем, сэзь, чебер луыын мылкыд кариськом. - Тау. Озьы ик - тӥледыз но. Вераськиз Т. ПЕТРОВА. Ӟечкылан Алнаш ёросысь Казакгуртын улӥсь папамылы, Куликов Алексей Кузьмичлы, 3 январе тырме 65 арес. Юн гажаса но вань сюлмысьтымы яратыса ӟечкыласьком вордӥськем нуналэныд. Сӥзиськом азьлань улонад шудбур, тазалык, байлык. Пичи Пурга ёросысь В.-Кечёво гуртысь Бызгинъёслэн семьязы. Ӟечкылан Выль арен ӟечкыласько: эшъёсме Жанна Рыбаковаез, Валера Чибышевез, Ирина Демьяноваез, Наташа Васильеваез, Оля Михайловаез, Света Прохороваез; дуно но мусо анай-атайме Евгений Ермолаевичез но Мария Александровнаез; вынъёсме Владикез но Воваез, озьы ик гажанме. Нимысьтыз ӟечкыламе потэ кыкетӥ анайме Зинаида Яковлевна Титоваез. Ваньмызлы ик сӥзисько вань чеберзэ, умойзэ та дунне вылысь. Луэлэ шудоесь, визьмоесь, узыресь, яратоноесь. Светлана ЯКОВЛЕВА, Пичи Пурга ёросысь Вуж Монья школаын дышетскись. Пичи Пурга ёросысь Шор Кечол гуртысь Зоя Григорьевна Капитоновалы 27 декабре тырме 70 арес. Вордӥськем нуналэныд тонэ, мусо анаймы! Ми понна сюлэмдэ сокем эн висеты, милемыз ваньзэ умоезлы гинэ дышетӥд угось, лякыт, небыт сямдэ пыӵатыны тыршом нылпиосмылы но. Та вордӥськем нуналад но вань улытозяд тынад нылпиосыд но милям нылпиосмы сӥзиськом юн-юн тазалык, оскон - тод, нылпиосыд ноку но уз вунэтэ вордӥськем юртсэс, котьку но шумпотыса бертозы дорад ческыт табаньдэ, шаньгадэ сиыны... Анай, эн бӧрдылы лушкем уйёссэ, ваньмыз луоз умой! Сюлмысь ӟечкыланэн покчи нылыд Светаед, озьы ик Капитоновъёслэн, Мамонтовъёслэн но Гереевъёслэн семьяоссы. Кин кызьы шутэтске? Россиысь Правительстволэн постановлениезъя шутэтскон нуналъёсын ялэмын 1-тӥ, 2-тӥ, 3-тӥ но 4-тӥ январь. Кыкетӥ январь праздник нуналэн лыдъяське бере, вылаз ик, со тупа кӧс нуналлы, шутэтскон нунал, озьыен, выже 4-тӥ январе. Озьы ик ялкариськом 7-тӥ, 8-тӥ но 9-тӥ январе. Ӟеч-ӟеч шутэтскыса ужаны потом 10- тӥ январе. Коньдон ыстэмын Кылем арняе Правительстволэн Тӧроез Павел Вершинин Москваын ужаз. Ижевске вуыса, со Федерацияя Кенешлэн ужамез сярысь вераз. Кенеше люкаськемъёс Россия Федерациысь Правительстволэн ӵектэм бюджетэз пумысен асьсэлэсь малпанъёссэс шараязы, бюджетъёслэсь кусыпъёссэс ӵектэм амалъёсъя кылдытонлы пумит луэмзэс веразы. Со сяна, улосъёслэн федеральной бюджетэ куд-ог налогъёсты тыронъя дэмланъёссы лыдэ басьтэмын ӧвӧл. "Бюджет чотын ужась организациосысь ужасьёслы уждун тыронэз радъян сярысь" федеральной Законэз Правительстволэн Тӧроез умоен лыдъяз. Та законэз кутыны курыса со Федерацияя Кенешлэн заседанияз вераськиз. Со, кылсярысь, шуиз: 1 апрельысен 1999 арын тарифной сеткалэн нырысетӥ разрядэзлэсь ставказэ 60 манетысен 110 манетозь будэтоно. Парламентлэн вылӥ палатаезлэн кенешез трос дыр висъяз бюджет удысын ужасьёслы уждунэз тырон ужпумлы. Туннэ понна шаермылы висъямын 56 миллион манет. Ваньмыз со коньдон городъёсы но ёросъёсы лэземын. Удмуртие ватсаса эшшо 20 миллион манет ыстэмын луоз на. Та уксё пӧлысь 12 миллион манет мыноз Ижевскын но куд-ог ёросъёсын улӥсьёслы уждун тыронэ но улон юртъёсыз возёнъя удысын ужасьёслы пунэмъёсты берыктонэ. Вуоно арын Россиысь улосъёс уждун тырыны коньдон ӝынызэ асьсэос шедьтыны кулэ, нош кылемзэ ватсалоз Федерациысь бюджет. Правительстволэн Тӧроезлэн секретариатысьтыз пресс-центр. Удмурт Республикаысь Кун Кенешлэн Тӧроезлэн Александр Волковлэн вазиськонз Гажано эшъёс! Берло нуналъёсы Удмурт Республикаысь Кун Кенешысь куд-ог депутатъёс ивортон вӧлмыто, "Удмурт Республикаын быръёнъёс сярысь" Закон кутэмын ке ӧз луы, тулыс 1999 арын быръёнъёс уз ортче шуыса. Соин валче вазиськон лэсьтоно луисько. Удмурт Республикаын Кун Кенеше быръёнъёс ортчытон понна законэн юнматэм инъет вань. Со "Удмурт Республикаын Кун Кенеш сярысь" закон, "Удмурт Республикаын Кун Кенеше быръёнъёс сярысь" Закон, кудӥз тупа Россилэн законэзлы. Законэн юнматэм инъетэз лыдэ басьтыса, Удмурт Республикаысь Быръёнъёсъя комиссия быгатэ быръёнъёсты ялыны но соосты ортчытыны. Удмурт Республикаысь Быръёнъёсъя комиссия быдэсак уртче ужалоз Россия Федерациысь Быръёнъёсъя Центральной комиссиен, соин ик ватсаса инструкциос кутон пумысен ужрадъёс дыраз эскериськозы Озьы бере, сюлмаськыны мугъёс ӧвӧл, оскисько, уз но луэ шуыса. Быръёнъёс ялэмын но ортчытэмын луозы дыраз. Ас вакытаз ик кылдытӥськоз Кун Кенешлэн выль составез но. Пушнерды мед удалтоз! Вордске выль ар. Матэктэ выль вадес-вапум. Сыӵе дыръя асьмеос амалтэк учкиськом мышкамы но, азьпаламы но. Мае возьматӥз 1998-тӥ ар? Россия но Удмурт шаер, ог-огзылэсь висъянтэм макеос, весь уллань васькизы. Олокӧня ар ӵоже ог-огмес курдатӥськом: табере нокытчы усьыны ни, азьпалан - шимес бырон гинэ. Адямиос пиньзэс куртчо, кускерттонзэс юнгес золто, киязы тӥр яке ведра куто. Шокчыны дыр сюрыса, виртырем лэсьто, аракы виято (кин нырйыл, кин тямага), экто но кырӟало. Кытын тӥляд чидандылэн пумыз, удмуртъёс, бигеръёс, ӟучъёс? Кызьы тӥ таӵе секыт вакытэ но шудыны-серектыны амал шедьтӥськоды? Берло сизьым-тямыс ар ӵоже калык но кивалтӥсьёс куспысь вукырем пумен муромиз но паськытаз. Табере татын но пичияк воштӥськон вань. Евгений Примаковлэн Кивалтэтэз (Правительствоез) Егор Гайдар музэн уг оскыты ни, рынок ваньзэ ачиз радъялоз шуыса. Кун ас кужымзэ возьматэ. Адямиос азьлане сэзьгес учкыны ӧдъязы. Россия куашкалоз шуыса кышкан кулэсмиз. Солэн куараез дуннеын но юнмаз. Удмурт Элькун (Республика) - Россилэн ог люкетэз. Каньылгес сямо люкетэз. Татын уг алыло ӧтчамъёсты (съездъёсты), уг каргало еврейёсты, уг куро Феликс Дзержинскийлы памятник пуктыны (со весь сылэ ай). Оглом вераса, коньдонмы ӧжытгес, тупан мылкыдмы тросгес. Оскон вань: озьы улон манер отӥяз вӧлмоз быдэс Россие. Туэ тани нылкышноосмы берло аръёс понна нырысьсэ уногес нуны ваизы. Кышномурт сюлэмлэсь золгес кин-о шӧдэ улонлэсь умой пала берытсконзэ? Кошкись 1998-тӥ арын пинал ваемез лыдъяломе бадӟым репетициен. Нош ку луоз зэмос спектакль? Коммунизм вакытэ тужгес ӟеч семьяен лыдъяллязы куинь нылпиё кузпалъёсты. Али - кык пиналэнзэ. Озьыен, егит анайёсмылэн дӥсьтонзы мед тырмысал 2000-тӥ арын кубиста яке пушнер улысь кыкетӥ нуны шедьтыны. Та учырез ик лыдъяны луысал туж шудо спектаклен. Данакез газетъёс али гожъяло 2000-тӥ арын вордсконо нырысетӥ нылпиез данъян сярысь. Дуннеысь тодмо фирмаос дасяло ни солы дӥсь, пыдкутчан, шудонъёс. Амало японъёс гожтӥллям пинал сярысь фильмлы сценарий. Зэм, вуоно нунылэн вордскон интыез но, анай-атаез но тодмо ӧвӧл на. Бен со ачиз но ӧвӧл ай. Англиысь тодосчиос (учёнойёс) дэмлало валесэ выдылыны 1999-тӥ арын 17- тӥ мартэ (ӝытазе, уин яке ӵукна, кузпалэн яке туганэн, кӧйтыл вӧзы яке тём пеймытэ - уг верало). Бельгиын ӵекто та ужез лэсьтыны мартлэн пумаз - апрельлэн кутсконаз. "Удмурт дуннелэн" малпанэз аслаз. 21-тӥ даурысь 1 номеро адями асьме выжыысь кылдоз шуыса оскыны шуг. Одно ик нылпи кулэ ке, оскисез мед оскоз инмарлы, оскисьтэмез - кылдэмезлы. Со таза, сӥлё-виро медло шуыса, ӝӧк вылады тросгес медло витамино сиён, таиз сьӧрысь медазгес мычъяськылы ӟенелик, шампанскоез вератэк. Берпуметӥ сӥзёнмы таӵе. 1998-тӥ арын 80 аресмес пусйимы ке но, ми егитэсь ай. 1999-тӥ арын лыдӟисьёсмы уката йыло. Нош куд-огез вуоно арысен газетъёс уз басьтэ - гожтӥськыны коньдон яке дыр ӧз шедьтэ. Тупатскемды луоз. Январьлэн нырысетӥ нуналъёсаз почтае бызиды ке, 1-тӥ февральысен выльысь адӟоды яратоно "Удмурт дуннедэс". Выль арен! Алексей Шкляев, "Удмурт дунне" газетлэн валтӥсь редакторез. Йӧ но "улӟе" Вашкала дыръёсы Россиысь котькудаз карын Выль ар азьын ӝутскылӥзы йӧ городъёс. Соос калыкез чеберенызы шумпоттылӥзы, тулыс лымы шунатозь. Берло аръёсы йӧэз "улӟытыны" дышизы Ижевскысь кибашлыос но. Городмылэн шоркараз кылдэ зэмос выжыкыл дунне. Вуись 1999-тӥ арез туэ аспӧртэмлыко пумитаны мылкыд каризы Ижысь "Рашаль" ресторанын ужасьёс но. Озьы Татьяна Барамзина ульчаысь 74-а юрт азе йӧэн ужась скульпторъёс лэсьтӥзы чебер пичи город. Кибашлыосын кивалтӥз Виктор Соломенников. Солы юрттӥзы Удмурт кун университетысь студентъёс. Йӧэз выжыкыллы пӧрмытыны капчи ӧвӧл. Вылаз ик, туэ куазь шуныт улӥз. Но утюг, паяльник, пӧсь ву но кибашлы киос вань шуг-секытъёсты вормизы. Табере автозаводлэн микрорайонъёсаз улӥсьёс Выль арез пумиталозы йӧлэсь ӝутэм выжыкыл дуннеын. Н. ЛЯЛИН. Туспуктэмъёс вылын: тани соос - йӧлэсь ӝутэм дворецъёс но выжыкылысь геройёс. Владимир КАМАШЕВЛЭН туспуктэмъёсыз. Ку? Кызьы? Выль ар но Толсур нуналъёсы Ижевскысь магазинъёс нимысьтыз графикъя ужалозы. Сиён-юон вузанъя лавкаос 1999 арын 1-тӥ январе ужан нуналзэс 2 часлы кулэстозы. Нош промтоварной магазинъёс 1-тӥ, 2-тӥ, 3-тӥ но 7-тӥ январе шутэтскозы. Выль аре! Кылъёсыз Николай Бушмелевлэн Крезьгурез Рафис Закировлэн Кыӵе праздник Выль ар тунсыко! Котьку сое кеа витиськом. Коркамес лэсьтӥм югыт, Нокинлы уз лу мӧзмыт Выль аре! Выль аре! Выль аре! Жог кошке, бен, дыртэ вуж армы. Кин ваёз нош кузьым милемлы? Умой ке арзэ ужад, Тол бабай вуттоз дорад Выль аре! Выль аре! Выль аре! Туж чебер ук милям дор палъёс... Бергало трос пӧртэм малпанъёс. Соосты вичаксэ вугин Улонэ пыртоз уин Выль аре! Выль аре! Выль аре! Тазалык ми тӥлед сӥзиськом, Со понна ик али кырӟаськом. Ужалод туннэ секыт, Шудбуро лыктоз вакыт Выль аре! Выль аре! Выль аре! Выль ар азьын "Удмурт дунне" газет шаерысьтымы тодмо адямиослы вазиськиз кӧня ке юанэн. Соос таӵеесь: 1. Котькуд арлэн пӧртэмлыкез аслаз. Маин вунонтэм тӥ понна кошкисез? 2. Выль ар - выжыкыллы тупась праздник. Выжыкыл дуннее пичи дыръяды сямен вуылэмды потэ на-а? 3. Тол Бабай ке луысалды, кыӵе кузьым вайысалды? Юанъёслы вера Анатолий Ешкеев, Пичи Пурга ёросысь "Мир" эштослэн тӧроез, Удмурт Элькунысь Кун Кенешлэн депутатэз: 1. Таиз ар капчиен ӧз сётӥськы асьме шаерысь тросэзлы адямиослы. Мыным тужгес вунонтэм кык ужпумен валче. Нырысь ик - 3-тӥ-7-тӥ январе Кун Кенешлэн Президиумезлэн нимыныз ортчытэмын калыклэсь юалляськон - со вал кырсь алдаськон (пӧяськон). Соку мон солы пумит вал. Пумиськылӥ туж трос адямиосын - соос монэ валазы. Ми куинь кузя - Н. И. Нагорных, С. Г. Чаузов но мон - вазиськимы Вылӥ судэ. Милям вазиськонмы шонерен лыдъямын. Со мон понна - бадӟым вормон. Кыкетӥез - туэ, июле, ортчем быръёнъёсын мон келяй. Но келяй сыӵе адямилы - солэн киосыз чылкытэсь ӧвӧл: соиз гинэ ӝож. Туж валантэм таиз: тонэ вуза аслад ужась калыкед. Нош со понна тон куддыр сётӥськод вань кужымдэ, тазалыктэ но. 2. Школаын нырысетӥ , кыкетӥ, куинетӥ, ньылетӥ классъёсын дышетскыкум, Выль ар тужгес вунонтэм кыльылӥз аслаз чеберъям кызэныз, шулдыръяськонэныз, кырӟанъёсыныз, эктонъёсыныз. Мыным со дыръёс, зэмзэ но, выжыкыл кадь пото вал. Секыт улон вал соку. Но сомында чылкытэз, яратонэз вал отын. Соку ми туж шудоесь вал кадь потэ. 3. Кемалась ик ӧвӧл Удмурт радио пыр чузъяськиз нылпиослы сӥзем веран. Куинетӥ классын дышетскисьёслэсь юало: мар карысалды тӥ, президент ке луысалды?.. Мынам Саша пие со веранэз кылӥз но шуэ: "Мон, президент ке луысал, В. И. Ленинлэн тусбуеныз коньдонэз выльысь берыктысал но вань пенсионеръёслы уксё сётысал". Пичи нылпиос верасько бадӟымъёслэн кылынызы. Соослэсь кылзӥськыса, малпанзэс быдэстысал. Каракулиноысь валтӥсь врачлэн воштӥсезлы Галия Черницыналы газетмы вазиськиз таӵе юанъёсын: 1. Кыӵе мылкыдын келяськоды ортчись арез но кызьы пумитаськоды Выльзэ? 2. Оскиськоды-а пӧртэм чакласьконъёслы? Оскиськоды ке, ма витиськоды 1999-тӥ арлэсь? 3. Тужгес быдэстоно малпанды. 4. Ёросамы но шаерамы улӥсь калыклы мылкыд каронъёсты. Галия Габидулловна вераз: 1. Туж ӝожомыса: туж ичи лэсьтэмын. Улон-вылонэз радъянъя комиссимылэн данакез малпанъёсыз ӧз быдэсме, та удысысь куд-ог умойтэм воштӥськонъёсты алыны быгатӥмы ке но. Эстӥськонлы дунъёс но азьлоосыз ик возисько на (та сярысь сюлмасько "Удмуртиысь коммунистъёс" фракцие пырись депутатъёс). Оскисько: Выль ар трослы пайдаёгес луоз. Шаерысьтымы калык ӟечгес улыны кутскоз. 2. Мон котырын ӟеч но визьмо адямиос трос ке, озьыен, ваньмыз умой луоз. 3-4. Калык выльысь оскыны мед кутскоз кунмылэн чебер улонэзлы. Выль арез - ӟеч сямъёсын Удмурт национальной театрын ужасьёс 1998-тӥ арлэсь ортчемзэ ик ӧз шӧдэ кадь. Мӧйыосын артэ гижысь-пиньысь тыршо Москваысь М. С. Щепкин нимо Вылӥ театр училищеез йылпумъям нылъёс но пиос. Асьсэ быгатонлыкъёсынызы учкисьёсты паймытӥзы ини Алексей Ложкин, Наталья Ветрова-Тур, Андрей Карпов, Алексей Сергеев, Светлана Леконцева, Вячеслав Красноперов но мукетъёсыз. Егит артистъёсын пумиськон нуналэ но ужзы пӧзе вал: ваньзы дасясько Выль арлы. Нош кызьы меда ортчытӥзы нырысетӥ арзэс Наталья Ветрова-Тур но Вячеслав Красноперов? Маиз тужгес но вунонтэм кылиз? Артист луэмзы понна уг ӧпкелё-а? Ма сӥзьысалзы Кроликлэн (Коӵышлэн) араз вордскемъёслы? Вячеслав Краснопёров: - Пичиысен ик синмаськисько вал артистъёслэн шудэмзылы. Шумпотӥсько, малпанэ быдэсмиз шуыса. Дышетскон - со дышетскон. Ужаны кутскыса гинэ мургес валай актёрлэсь профессизэ. Капчиен уг сётскы ке но, артистэ мынӥ шуыса уг жаляськы. Уж мылкыдъя ке, ваньмыз пӧрме. Тужгес но шумпотоно учкисьёслэн кичабонъёссылы. Гастрольёс, пӧртэм творческой пумиськонъёс уно гинэ ортчытэмын, нош зэмос артист дорозь будоно на милемлы. "Кроликъёслы" сӥзьысал ваньзэ умойзэ гинэ. Секыт ар шуыса, йырзэс медам мыкыртэ. Шудбур но тазалык! Наталья Ветрова-Тур: - Школаын дышетскыкум но, Удмурт кун университетэ пырем бере но мыным ялан вераллязы: "Тынад интыед сцена вылын." Пичи дыръям ик, анайлэсь кузь дэремъёссэ дӥсяса но туфлиоссэ кутчаса, дорын концерт пуктылӥсько вал. Асме народная артистка гинэ шуылӥ. Нош кӧня синвуаськи Москвае дышетскыны мынэмелэсь азьло. Угось конкурслэн нырысетӥ люкетэз ортчемын вылэм ни. Озьы ке но, дышетскыны пыри ачим валатэк ик. Та вие пичи но уг жаляськы артистэ мынэмме. Татысь коллектив туж яра. Асме вуын уясь чорыген лыдъясько. Туж яратӥ Смеральдиналэсь рользэ (Карло Гольдонилэн "Кык кузёослэн ляльчизы" спектакльысь). Артистлэн синмыныз учкыса, вань "кроликъёслы" мылкыд карысал дӥсьтӥсьгес луыны. Ачим "тигр" бере, соосыз но чупрес адямиосын адӟем потэ вылэм. Луд кеч шыпытгес, кышкасьгес, соин Кролик ар нокыӵе бугыръяськонъёстэк мед ортчысал. Со сяна, калык туж воштӥськемын. Соос уродэсьгес, ог-огзылы алама лэсьтыны тыршо. Улонэз умойгес карон понна, адями нырысь ассэ мед тупатысал. Кылын но адямиез виыны луэ ук. Соин урод сямъёс вуж аре ик мед кыльысалзы. В. Кутузова. В. Камашев (фото). Малпанъёссы умоесь Выль ар азьын "Удмурт кенеш" огазеяськонлэн Ижысь Индустриальной ёросысь ёзэтэзлэн пумиськонэз ортчиз. Вераськон ортчиз 1999 арын нырысетӥ кварталэ ужан пумысен. Бадӟым саклык висъямын школаосын удмурт кылэз дышетонлы. Дэмламын урокъёсы ӵемгес удмурт тодосчиосты, писательёсты но мукет тодмо адямиосты ӧтьылыны. Озьы ик вераськемын вуоно быръёнъёсы "Удмурт кенешлэсь" адямизэ депутатэ ӵектыны. Чакламын "Буммаш" заводысь удмуртъёсын пумиськон ортчытыны. Котькуд ужрад понна юнматэмын нимысьтыз кыл кутӥсь. Н. ВОЗИСОВ. Верало астрологъёс Мар ваёз Коӵышлэн арез? (... 1927, 1939, 1951, 1963, 1975, 1987, 1999...) 16 феврале 10 час 39 минутэ шунды ӝужан палан улӥсьёслэн календарьзыя кутске Коӵышлэн (Кроликлэн) арез. Та арлэн кутсконэз аспӧртэмгес луэ, малы ке шуоно, шунды сайяськонэн (солнечной затмениен) огдыре (10 час 33 минутэ) вадьсаське. Соин ик 1999 ар трос муртлэн, уката ик политикъёслэн но кун ужпумъёсын вырисьёслэн, улоназы бадӟым воштӥськонъёс пыртоз. Тигрлэн секыт арез бере Коӵышлэн араз асьмеос лулӟытскыны быгатом. Котыр эскериськыны, шутэтскыны луонлык кылдоз. Коӵышлэн араз умоялозы коньдон ужпумъёс, пушъёз ужбергатон удыс. Шуныт тӧл пельтоз общественно-политической улонэ но. Бадӟым воштӥськонъёс, споръяськонъёс уз луэ. Адямиос тросгес шулдыръяськозы, шутэтскозы. Та вакытэ законъёс вошъясько экономикаын, калыкез улон-вылонын утёнын но страхованиын, юриспруденциын, тазалыкез утён удысын. Зӥбломо ожмаськонъёс. Но арлэн пумаз Коӵыш пештырскыны быгатоз (со уго тигрен одӥг выжыысь) 1999 аре Коӵыш - ӵуж. Ӵуж буёл музъемлэсь кужымзэ возьматэ. Матын луо ӵужпыръем, курень, гордмыт-ӵуж но азвесь тусо буёлъёс. Пудо-живот пӧлысь туэ музъем кужымлы матын луэ ош, емышъёс пӧлысь - улмо, шудо лыдпусъёс - 5 но 10, кивалтӥсь планета - Сатурн. Коӵышлэсь арзэ пумитаку уг яра мултэс сюлмаськыны, керӟегъяськыны, вожъяськыны. Таяз аре трос муртлы удалтоз ужбергатон удысын. Асьсэлэн ужазы азинсконъёс басьтозы, семья кусыпъёссэс юнматозы, матысь адямиосынызы тупан кыл шедьтозы. Бадӟым воштӥськонъёс луозы 18 июльысен 12 августозь. Та вакыт эскероз адямиослэсь чиданзэс. Макем чаль но уртче быгатом со шуг-секытъёсты вормыны, сокем каньыл луоз вуоноез - Драконлэн арез. Коӵышлэн арез ваньмыз понна огкадь уг луы. 12 пӧртэм пус улын вордскемъёслы со 12 пӧртэм "адӟон" дася. Комак (... 1948, 1960, 1972...) понна кутске каньыл ар, уката ик нырысетӥ паларе. Та аре вордскем муртъёс быгатозы ужазы азинсконъёс басьтыны, асьсэлэсь быгатонлыкъёссэс шараяны, выль кусыпъёс тупатыны. Но Комак эскерыса возьыны кулэ аслэсьтыз коньдон пуйызэ. Тросэзлэн семьяосазы но уж дуразы валантэмъёс, керетонъёс потаны быгатозы. Куд-огез ужзэ воштоз, нош куд-огез выль эш яке кузпал шедьтоз. 1999 арлэн пумыз Комакъёс понна пайдаёгес луоз - та адямиос улон интызэс воштыны, выль ужан удыс шедьтыны быгатозы. Куд-огезлэн семьяез будоз (нылпи вордскоз яке кен-эмеспи лыктоз...). Ош (... 1949, 1961, 1973...) понна Коӵышлэн арез, кылем арен ӵошатыса, трослы умойгес луоз. 1999 арын Ош ассэ умой ласянь "возьматыны" быгатоз, кыӵе ке мугъёсъя аналтэм кусыпъёссэ улӟытоз, быдэсмытэк кылем ужъёссэ выль тодмоосыз быдэстыны юрттозы. Но быдэс ар ӵоже коньдонлы ёрмысагес улоно луозы: уг яра пунэмен сётъяны, чаль узырмыны ӵектӥсь шудонъёсы пыриськыны - солэсь тӥ ыштон гинэ адӟыны быгатоды. Сюлмаськонъёссы ӧжыт уз луэ ке но, тазалыксы вылэ Ошъёс уз ӝожтӥське. Тазьы ик ӟеч но азьтэмскытэк тыршизы ке, бадӟым азинсконъёс басьтыны быгатозы. Тигръёс (... 1950, 1962, 1974...) понна вуэ шудо ар. Тросэз йылпумъялозы азьвыл быдэстымтэ малпанъёссэс но ужъёссэс. Коӵышлэн араз удалтоз коньдон люканын, дуно арбериос басьтонын. Пайдаен гинэ берытскоз музъем ужъёс борды басьтӥськемзы но. Юнмалозы уртче ужасьёсынызы но гажанэнызы кусыпъёссы. Тигръёслы уг яра инметӥ лобаны, угось соослы Коӵышлэн арез трос гинэ "капканъёс" дася. Но Тигръёс вань шуг-секытъёсты каньылэн вормозы, нош арлэн пумаз асьсэлэсь ӟеч азинсконъёссэс пусйыны быгатозы. Коӵышъёслэн (... 1951, 1963, 1975...) кутске куать яке дас кык аръем выль улон гожзы. Соин ик, котькыӵе ужпумъёс азязы мед пуктозы, соос кема дырлы кыстӥськозы. Азьланяз со юрттоз ужазы азинсконъёс басьтыны, узырмыны. Арлэн кутсконаз та пус улын вордскем адямиос возьмамтэ коньдон премиос, пособиос, инвестициос басьтыны быгатозы. Берыктозы пунэмен сётэм коньдонзэс, ыштэм арбериоссэс. Коӵыш аслаз шулдыр но шуныт коркаяз пиосмуртъёсты (кышномуртъёсты) кыскыны быгатоз, аслыз синмаськытоз. Со дырыз дыръя ӟеч кенеш сётыны быгатэ, соин ик солы трос гинэ вазиськисьёс луозы. Семья кусыпъёсаз Коӵышлэн ваньмыз умой луоз. Вуж яке выль ӵыжы-выжыоссэ шедьтоз. Кышкатэк кузь сюрес вылэ потаны быгатоз. Ужен-а, шутэтсконэн-а со герӟаськоз, ваньмыз умоен гинэ берытскоз. Дракон (... 1952, 1964, 1976...) Коӵышлэн араз ассэ туж лякыт возёз. Керетонъёстэк, кинэ ке азьпалтыны вырытэк, вуж малпанъёссэ со гань-гань быдэстоз, дышем ужзэ ужалоз. Удалтон шуд нош ик синйылтоз Драконъёсты. Семья кусыпъёссы тупатскозы. Но Драконъёс чакласа возьыны кулэ асьсэлэсь тазалыксэс - мултэс сюлмаськонъёс, шутэтскытэк ужан но ӵем дыръя эшъёсынызы "чай юонъёс" сое лябомытыны быгатозы. Озьы чакласькытэк улон ужазы но уродэн берытскоз, уката ик - коньдон поттӥсьёс понна. Но со луоз 1999 арлэн кыкетӥ ӝыныяз. Кыйёс (... 1953, 1965, 1977...) понна Коӵышлэн арез керӟеггес ортчоз: трос уж, улонын воштӥськонъёс... Кыйёс уз быгатэ гажанъёссылы, яратонъёссылы трос дыр висъяны. Таиз ар Кыйёс понна огъя урод ӧвӧл, соос быгатозы творчество удысын вормонъёс басьтыны, тунсыко эшъёс шедьтыны. Коньдон ужпумъёссы азьло кадьгес ик - капчиен вуэм коньдонзы капчиен кошкоз - чыры-пырылы быроз. Кыкетӥ паларе коньдонзэс шыръяногес, озьы ик тодазы мед возьысалзы матысь адямиоссылы сётэм кылзэс но соос азьын быдэсъяно ужъёссэс. Вал (... 1954, 1966, 1978...) понна ар усто азьвыл кутскем ужъёссэ но малпанъёссэ быдэстыны, ужбергатонэн вырыны. Коньдон ужпумъёссы ӟеч мынозы. Уз ӝожтӥське тазалыксы вылэ но. Арлэн кутсконаз ик тодмооссылэсь но ӵош ужась эшъёссылэсь тунсыко ӵектонъёс луозы. Куд-огезлэн семьяез йылоз, шӧдтэк шорысь вуж яратонэз, вуж эшъёсыз берытскыны быгатозы. Кечъёс (... 1955, 1967, 1979...) таяз аре выллань ӝутскыны быгатозы, кивалтӥсь луозы. Ар усто коньдон ужъёсын вырыны, но кылем аре пунэмъёсы пыременызы узырмыны уз быгатэ. Кечъёслы чакланы кулэ котькуд вамышсэс, эн пазяське пӧсь мылкыдъёсыныды но. Арлэн шораз шудтэм учыръёс луыны быгатозы. Но пумаз ваньмыз тупатскоз: выль кужым но тодон-валанъёс басьтыса, Кечъёс бадӟым ужез берыктыны быгатозы. Обезьян (маймыл) - (... 1956, 1968, 1980...) секыт ар бере "шокчытскыны" быгатоз, Тигрлэн арез солэсь трос кужымзэс басьтӥз угось. Таяз аре Обезьянъёс гань- гань улозы семьяязы но, ужазы но. Озьы ке но, азинсконъёссы шӧдскымон будозы - азьвыл кутскем ужъёссэс капчиен быдэсъялозы, выль малпанъёссы кылдозы. Творчество удысын юрттозы матысь эшъёссы, оскымон адямиоссы. Гужем шорын улоназы воштӥськонъёс луыны быгатозы - ваньмыз со пайдаен гинэ берытскоз. Атасъёс (... 1957, 1969, 1981...) понна - шудо вакыт. "Атасъяськонзэс" но чеберъяськонзэс вунэтыса, таяз аре соос асьсэлы тросгес пайда басьтон сярысь сюлмаськыны кулэ. Арлэн шораз коньдонзэс ыштонтэм вылысь уг яра вузкаронэн вырыны, кинлы ке пунэмен сётъяны яке чаль узырмыны ӵектӥсь муртъёсын огкыл гожъяны. Малпам ужъёссэс, Атасъёс оскымон муртъёсын гинэ быдэсъяны кулэ. Пуны (... 1958, 1970, 1982...) палэнысь юрттэт возьмаса ӧз улы ке, таиз ар умой луоз. Тросэз быгатозы кемалась малпам ужзэс быдэстыны, асьсэлэсь ужбергатон удыссэс усьтыны. Но со понна Пуныослы оскымон эшъёс утчано. Нырысетӥ паларе Пуныос вань ужъёссэс каньылэн быдэсъялозы. Мултэс сюлмаськонъёс гужемзэ керӟегъяськытозы ке но, соос ваньзэ вормозы, азьланяз бадӟымесь азинсконъёссы луозы. Урод уд шуы Коӵышлэсь арзэ Парсьёс (... 1959, 1971, 1983...) понна но. Шуак узырмыны уз быгатэ ке но, коньдон ужпумъёссы шӧдскымон умоялозы. Ужзы огсыр мыноз, бадӟым воштӥськонъёс уз луэ. Пӧртэм пумиськылонъёс, общественной улонэ пыриськемзы семьязы но ужзы вылын шӧдӥськытэк уз кыле - керетонъёс, валамтэос кылдыны быгатозы. Но яратонъёссэс Парсьёс котьку сямен ик кӧяны-вӧяны быгатозы. Тросэз нокыӵе кариськытэк но мукетъёсызлы изъян вайытэк огдыре кӧня ке туган возьыны быгатозы. ТӤЛЕДЛЫ, ПИНАЛЪЁС Лымы усе, шудыны ӧте Матэкто тол каникулъёс. Пиналъёс нунал лумбытэн лымыын погылляськозы, гурезьысь нискылалозы, куасъёс, я конькиос вылэ султозы. Оло нош асьсэды шулдыртыны кыӵе ке но выль шудонъёс малпалозы? Тол куазь со ласянь трос дэмланъёс сётыны быгатысал, шуом, таӵеоссэ. Чакласькы - кынмод Люкиськоно кык командалы. Ог-огзылэсь 15-20 вамышлы палэнэ султоно. Шораз возьмало кык Тол бабайёс - Лыз ныр но Горд ныр. Соосты пиналъёс быръё пӧлысьтызы - лыдъяськыса. Бызьыны кулэ огпал гожысь мукет пал гожозь. Паллян пала бызисьёссэ, шуом, Лыз ныр небыт лымы колӟоен лэзьялоз, нош бур пала бызисьёссэ - Горд ныр. Аслэсьтыз командаысьтыз пиналъёсты Тол бабай уг иса. Кинлы лымы колӟо йӧтӥз - со интыяз кынме. Озьы огпалась огпала бызьыло, кудаз ке командаын кин ке одӥгез кыльытозь. Соос ик вормисе пото. Дуэль Кык мурт султэ ог-огзылэсь 10 метр кеме - 1 метр пасьталаем котыртэме. Секундант пус чӧлтэ - кин нырысь ик лымы колӟоен лэзёз. Собере кутске "ыбылӥськон". Кинлы ке йӧтӥз - со мукетызлы интызэ сётэ. Нош кыкез но ог-огзылы ӧз ке йӧттэ яке кыкназы но йӧттӥзы, соку выльысь лэзьяськон - кудзы ке но вормытозь. Лобись лымы колӟолэсь палэнскыны турттоно мыкырскыса, я вылэ тэтчыса я урдэслань сётскыса, но гож сьӧрысь потыны уг яра. Ӧвӧл лэзьяськоно чурыт лымы колӟоен, озьы ик йыре мертаськыны уг яра. Бордаз кыскись колӟо Лымылэсь бадӟым колӟо погыльтыса, со котыре круген султоно. Одӥг, кык, куинь! вӧзад сылӥсь эштэ со колӟо доры кыскы, нош ачид пыкъяськы. Кин усёз колӟо вылэ пыдыныз пыкъяськоз яке вылаз усёз - шудонысь потэ. Кин шӧртчигес? Лымы вылэ кык метр пасьталаем котыртэм лэсьтоно. Кизэз мышказы карыса, кык мурт огзэс-огзы отысь поттыны туртто. Кин гож сьӧры потэ яке гылӟыса усе - со вормемын. Лымылэсь - выжыкыл Пиналъёс туж ярато лымылэсь мунёос лэсьтыны. Выль Арез соос шулдырто школа азбаръёсты но, корка котырез но. Но ӧжытак шуныт луэ ке, лымылэсь лэсьтӥськемъёс кисмыляло. Соин ик, нырысь дасяно пуллэсь ёзнэт, езъёсын яке кортӵоген юнматыса, собере ини сое кот лымыен колӟано. Дась мае ке но уже кутыны яралоз. Ӟус, шуом, драконлы пӧрмоз. Лымы мунёослы кыӵе ке тус пыӵатон понна ужано луоз кузь пуртэн, лопатаен яке тӥрен. Лымылэсь скульптураез отӥяз лейкаысь вуэн кисьтано, озьы со йӧӟектоз но шунаны уз сётскы. Лымы выжыкылэз улӟытыны пиналъёслэн юрттӥсьёссы мед луозы вылэм асьсэос анай-атайёс. Дасяз Л. ЯКОВЛЕВА. Нылпиослы кузьым Ӝоген Выль ар. Соин ӵош ик вуозы пиналъёслэн шутэтскон нуналъёссы. Соос понна Операя но балетъя кун театр дася выль ужзэ - Шарль Берролэн но Ганс Христиан Андерсенлэн выжыкылъёссыя "Спящая принцесса" крезьгуро спектакльзэ. Премьера дыръя асьсэлэсь быгатонлыксэс возьматозы артистъёс Людмила но Владимир Нефёдовъёс, Любовь Виноградова, Геннадий Городилов, Светлана Мельникова но мукетъёс. Крезьгурзэ гожтӥз С. Стрелецкий. Театр басьтӥськыны малпа Виктор Гюголэн таӵе ик нимо романэзъя "Собор Парижской богоматери" балет борды но. Дасесь ни Владислав Анисенков суредасьлэн декорациослы эскизъёсыз но. Выль уж бордын озьы ик сюлмысь тыршоз балетмейстер Марина Кузнецова. Со ик быдэстоз одӥгзэ партиез. Премьераез озьы ик чебермалоз крезьгурчи Сергей Василенко. В. ЛАГУНОВ. Чибори гуръёс - сюлэм малпанъёс Нылпи садэ ветлӥсь пичи Иванэз музыкалы дышетӥсьсы китӥз кутыса анай-атаез доры ваиз но шуиз: - Пидылы нимысьтыз саклык висъяно. Со вал кутсконэз. Пичи пияш кияз кутӥз ачиз кадь ик пичи аккордеон, будэмезъя ини анай-атаез бадӟымзэгес басьтӥзы. Озьы Иван Григорьевых пичи дырысен эшъяськиз крезьгурен. Куатетӥ классын дышетскыкуз рос-прос басьтӥськиз гитараен шудыны, туннэ нуналлы со тужгес но яратоно крезьгуро инструментэз. Воткинск районысь Июльское селоын, кытын улӥз Григорьевыхъёслэн семьязы, крезьгурлы бадӟым саклык висъяллязы. Иван шудӥз школаысь эстрадая духовой оркестрын. Нош 9-тӥ-10-тӥ классъёсын дышетскыкуз кивалтӥз школаысь ансамблен. Ижевскысь механической институтэ пырыса но сюлэмзэ буйгатылӥз, "Кросс" джаз группаын шудыса. Кыкетӥ курс бере басьтӥзы армие. Нош ик духовой оркестр, эстрада. Татысен ини егит пияш валаз - крезьгур сое пыраклы ас бордаз думиз. Оло нош Иван ачиз серметаз крезьгурез, кудӥз табере пар валъёс сямен ворттэ шаертӥмы, жингыртӥсь куаразэ котыр улосэ пазяса, асьмеды шулдыртыса? Тани радио пыр кисьтӥське Ольга Зориналэн кырӟанэз. Нош тросэз тодо меда, кин солэсь крезьгурзэ чебермаз? Бен, бен, Иван Григорьевых. Со ик шулдыргес чузъяськытӥз Геннадий Бекмановлэсь кырӟанъёссэ. Валентина Пудова но кырӟанъёсызлы оранжировка лэсьтыны вазиське та усточилы. Озьы ик мукетъёсызлы удмурт кырӟасьёслы юрттэ со кырӟанъёссэс удмурт шӧмо крезьгуръёсын чебертыны. Малы бен одно ик со. Ӧвӧл ни шат шаерамы кырӟанъёслы оранжировка лэсьтӥсь мукет специалистъёс? - Вань, мынэсьтым но вылӥ быгатонлыкъёсын вань, аппаратуразы но ӟечгес, - шуиз вераськыкумы крезьгурчи. - Но соос сокем матын ӧвӧл удмурт калык кырӟанлы. Иван Григорьевыхлэн атаез ӟуч - Агрыз районын вордӥськемын, нош анаез удмурт - Пичи Пурга районысь. Кызь одӥг аресозь пияш ӧз тоды удмурт кылэз, филармоние вуыса ини, "Шулдыр ӝыт" но "Арганчи" ансамбльёсын шудыса но кырӟаса, удмурт кыл солы сётӥськыны кутскиз. Нош удмурт крезьгуръёс сярысь ке верано, соос Иванлэн пель сьӧраз пичи дырысеныз чузъяськылӥзы. Анаезлэн ӵыжы-выжыосыз туж кырӟасесь уго, огазе люкаськыны гинэ кулэ соослы. Иван крезьгур дуннеен герӟа али гинэ вераськыны кутскись эгызо пиосызлэсь Тихонлэсь но Тимофейлэсь улонзэс. Пичи тэшкылиосызлы озьы ик шуиз: - Спортсменъёс тӥ уд ке но луэ, крезьгурчиос луыны одно ик кулэ. Маин бен герӟаське спорт но крезьгур Иван Григорьевых понна? Солэн кузпалыз Елена Егорова марафонъя международной классэн мастер, но инмар сое крезьгурез валанэн но обидьымтэ. Кин тодэ, оло, кӧня ке аръёс ортчыса покчиосыз Григорьевъёс но быгатонлыкъёссэс калыклы шараялозы. Нош али Тималэн но Тишалэн атайзы уж пӧлы, сюлмаськонъёс пӧлы выемын. Нунал ке вордӥське, сюлэмаз вордӥсько выль крезьгур гуръёс. Нош куд-ог дыръя соос кемагес но лыктыны выро. Кырӟанъёслы оранжировкаос лэсьтэм сяна, Иван Григорьевых ачиз но кырӟан гожъя, кырӟа но. Азьвыл "Арганчи" ансамбльысь эшъёсыныз Надежда Уткинаен, Игорь Михайловен, Надежда Габитоваен кылдытӥзы крезгуръя но эстрадая группа, ужало егитъёслэн "Редуктор" дворецазы. Надежда Уткинаен ӵош дасязы "Выжыкыл дуннее" концерт программа. Азьланяз сое ӧжытак выльдыны чаклало на. Нош 10-11 январе Ижевскысь Удмурт театрлэн юртаз "Арганчи" группалэсь концерт программазэ тодэ вайытон ӝытъёс ортчытозы. Тодэме потӥз на Выль аре мар меда курысал Иван Григорьевых Тол Бабайлэсь. - Кузпалылэн но нылпиосылэн тазалыксы мед луоз, - шуиз со. - Соос шудоесь луизы, вань мукетсэ ӵошен вормыны быгатом. Пумит ӧй луысал, Иван Тол Бабай кузьмасал ке семьяезлы квартира, ёлка улысь шедьтысал ке компьютерлы крезьгуро карта, ӟечгес студия кылдытыны луонлык кылдытысал ке. Но со та нуналлы быдэстонтэм малпанъёс. Нош газетмес лыдӟисьёслэн улонзы сьӧд но тӧдьы буёлэн гинэ шобыртэмын медаз луэ шуыса, Иван Григорьевых сӥзиз кырӟанэн эшъяськыны. Л. МАЛЫХ. В. Беломорскихлэн туспуктэмез. Гажано бӧлякъёс! 1998 ар берзэ учке ини. Ортчем нуналъёсты тодэ вайыса, асьмеос ар ӵоже быдэстэм но берлолы кельтэм ужъёсмылы дунъет сётӥськом. Таиз ар быдэс странамы понна секыт вал. Туннэ - выль ар вуон азьын - ми вазиськиськом тӥледлы, гажано эшъёс, тау карон кылъёсын, чидамды, сэзь, ваньзэ валась луэмды понна. Та сямъёсты юртто асьмелы шуг- секытъёсты огъя кужымен вормыны, огкылысь улыны. Выль ар - аспӧртэмлыко праздник. Со югытэн, ог-огдэ гажан, ӵыжы-выжыостэ яратон мылкыдын, нылпи шумпотонэн пачылмемын. Со - азьланеныз герӟась выж, асьмеос со вамен потӥськом, умоезлы гинэ оскыса. Вань осконъёсты мед быдэсмозы. Выль даурлэн ӧс куспаз сылӥсь 1999 ар Удмуртиын улӥсьёслы ӟечез пала воштӥськонъёс мед ваёз. Коркаосады шулдыр мылкыд ӵемгес мед пыралоз, нош шуг-секытъёс но сюлмаськонъёс вуж аре мед кылёзы. Котькудӥз адями вуоно арын ужамлэсь, тыршемлэсь шумпотон ваись кужымзэ мед тодоз. Шудбур тӥлед, юн тазалык, сяськаян но ваньзэ умойзэ гинэ. Праздникен! Выль арен! Удмурт Республикаысь Кун Кенеш Удмурт Республикаысь Правительство Удмурт Элькунысь Правительстволэн распоряжениез 1998 ар 28 декабрь � 441-р Ижевск город 1999 арын 7 январе Христослэсь вордскем нуналзэ пусъёнэн валче: 1. 1999 арын 8 янврае ужан нуналэз выжтоно 1999 арын 10 январьлы. 2. Та распоряжениез печатлано иворъёсты вӧлмытӥсь ёзъёсын. Удмурт Элькун Кивалтэтлэн Тӧроез П. Н. Вершинин Вячеслав Михайлов Даурез йылсаса Укмыс бӧрсьы укмыс, Эшшо одӥг укмыс - Быдмем лыдпусъёсын Сылэ ни ӧс куспын Даур йылсась армы - Чик тодмотэм дырмы. Шукрес улон кожын - Кык дауръёс вожын Быдэс калык но, пе, эше, Куддыр кыӵак быре, ыше. Оском воксё мукетызлы - Удмуртлыкмес ӝутонмылы. Вылез тудву ӝог мед тудӟоз, Жоб малпасез сьӧраз нуоз, Соку кункрезь эрикомоз, Удмурт депутатэз ӝутоз. Озьы гинэ вордскем вылмы Луоз зэмос ар элькунмы. Даур вожын улӥсь удмурт, Тон Вордӥсьлы эн луы мурт. Тон шумпоты: ачиз Христос Кылмес санэ басьтӥз. Озьлось, Оском, ваньмес ик Со вуттоз Выль даурын ӝутӥськонозь. Алла КУЗНЕЦОВА Сюрсо-сюрсо адӟонэ Джунгли пыр кадь ик ортчиз Тигрлэн арез. Кинэ ке шудо кариз, Нош кинэ ке - ӧз. Кинэ ке пориз, вылды. Кинэ ке качаз. Кинлы сюриз шуд куды - Со дэлет бичаз. Сюрсо-сюрсо адӟонэ, Тигр ку выллем. Туртто ке но качаны - Улӥсько каллен. Пиньёсме жильдытъязы, Кылын коказы. Коньдонэн пӧяллязы, Кысказы... Кроликлэн арез мыным Мар меда ваёз? Уродлэсь утиськыны Мед кужым сётоз. Кроликлэн трос тушмонэз, Со - эскериськись. Кроликлэн кадь адӟонэ - Визьмы куалектӥз. Кроликлэсь арзэ кин ке Писэй ар каре. ...Ӧй вуы шуге-леке: Сюлэмы куре Писэез нуныяны, Кутыны киям, Ширтыса шуд кутыны, Ватыны пиям. Вамыштӥсько выль аре- Пумитам пот, шудбуре. Тодмо кылчи кылтодон наукаосъя кандидат Риф Насибуллин но солэн ӵош ужась эшъёсыз мылысь-кыдысь тыршо кылтодон удысэз ӟеч-ӟеч эскерон бордын. Та вие соос ӟеч-ӟеч тодыны туртто соизлэсь яке таизлэсь удмурт кыллэсь отын яке татын пӧртэм сямен шуиськемзэ. Таиз ар писэйлэн арез бере, газет лыдӟисьёсмес тодматӥськом та пичи но мусо пӧйшурлэн шаермылэн пӧртэм интыосаз пӧртэм сямен нимаськеменыз. Котькуд налэз пыр- поч эскерыса но вань иворъёсты уже кутыса, Риф Шакрисламович Насибуллин но солэн лабораториез ӟеч-ӟеч карта лэсьтӥллям. Соин тодматскыса ик тодыны луэ: тапалан та пӧйшурез тазьы нимало, сопалан - музон сямен. Озьыен, синъёстэс мертчытэ но - азьлань! Ермолаевмы асьмелэн одӥг Котькуд арлэн тодметэз аслаз. Таиз историе кылёз Куӟебай Гердлэн нимыныз. Солэн вордскемез дырысен туэ 100 ар тырмиз. Али асьмеос паймиськом ини: сомында ар кулэ вал шат визьмо удмурт пимылэсь нимзэ кышкатэк но шара веран понна, соин зэмос данъяськон понна? Табере тани Куӟебай Герд нимо премимы но вань ини. Соин пусйыны быгатӥськом удмурт калыкмылэсь данзэ ас бадӟым ужъёсынызы вылӥе ӝутэм адямиосмес. Сӥё-дано премиен пусъемъёс пӧлын туэ удмурт критик, литературовед Алексей Афанасьевич Ермолаев. Та удысын Алексей Ермолаев огназгес кадь. Со - критик, нош критикъёсмы асьмелэн туж ик трос ӧвӧл. - Соин ик туж мӧзмыт - шуэ Алексей Афанасьевич. - Визьмо гожъяськисьёсмы вань. Нош кин мыноз критикае - вераны уг тодӥськы. Туала литературамылы мур дунъёт сётӥсьёс ӧвӧл - со мыным туж уг яра. Критика ӧвӧл ке, ӟечгес гожъяськон сярысь малпаськонэз ик ӧвӧл ни. Арлыдо мурт ӟечен тодаз вае 60-тӥ аръёсты, соку, пе, та удысын туж умой кутсконъёс вал. Ма, табере ачим но, пе, пинёгес вал, дыр. Зэм тужгес но дуно ужъёссэ Алексей Ермолаев егит но кын корт куртчон вакытаз лэсьтӥз. Удмурт дӥсь понна со выльысь усьтӥз писательёслэсь Михаил Коноваловлэсь но Кедра Митрейлэсь вунэтэм нимъёссэс. Дасяз но куинь томен поттӥз Игнатий Гавриловлэсь гожъямъёссэ, лыдӟисьёслэн сюлэмъёсазы вуттӥз писательлэсь фронтын гожъям дневникъёссэ. Ялан тырше улонысь книгаоссэс поттон бордын. Туэ но тани Ашальчи Окилэн кылбуръёсыныз выль сборниклы вордӥськыны юрттӥз. Нош макем шумпотӥзы дышетӥсьёс Ашальчи Оки сярысь альбомлы. Та уж бордын но Алексей Афанасьевич вань сюлэмзэ сётыса тыршиз. Кыӵе уг тырмо та выллем ужъёслы школаосын. Туж ӝож, асьмелэн Ермолаевъёсмы. Таӵе малпанэ вуиськод критиклэсь мукет бадӟым ужзэ но киын возьыса. Со - "Удмуртия" издательствоын 1984 арын потэм Флор Васильевлэн кылбуръёсыныз книга. "Улытозям мон улонэз кырӟай" сборнике Алексей Ермолаев люкам но калык доры вуттэм улонысь туж вазь кошкем поэтлэсь кылбур сузьетъёсы бинем малпанъёссэ. Тодматскысалмы-а асьмеос со ӟеч кылбуръёсын соосты поэтлэн архивысьтыз нокин ӧй поттысал ке? Сюлэм пыр поттэм ужъёс куке но вуо калык доры. Солы шумпотоно. Но... сюлэм пыр поттэм уж исатэк уг кельты сюлэмлэсь тазалыксэ но. Алексей Афанасьевичен вераськон понна, милемлы больницае мыноно луиз. Воргоронэз инфаркт шуккем. Врачъёс ветлыын уг лэзё на. Озьы ке но, со милемлы висемзэ ӧз возьматы, задор мылкыдын вераськиз. Юамы: - Мар сӥзиськоды газетмес лыдӟисьёслы Выль арын? Шуиз: - Егитъёс литератураез умойгес мед тодозы, тросгес мед лыдӟиськозы. Книгаез лыдӟон али палэнэ кельтэмын - со сюлмам йӧтэ. Алексей Афанасьевич улонэз вылэ ӧз ӝожтӥськы. Но синъёсыз шуизы кадь: ӧпкелёнэз вань калык огъя сюлмаськонъёсын улэ. Зэм, висись муртлы но тани дуно эмъюмъёс кулэ. Соин ик ас поннам тазьы но малпай: кыӵе умой луысал, ӵапак та вакытэ со зэмзэ ик Куӟебай Гердлэсь премизэ басьтысал ке. Сое со "басьтэм" ай бумага вылын гинэ. Тӥни озьы сӥлы карем но шумпотонэн малы ук уг берытскы. Озьы вал ортчись арын. Нош кыӵе осконэн выжоно меда вуоно аре? Тросгес луозы-а асьмелэн визьмо удмурт пиосмы но нылъёсмы? Критика удыс сярысь верано ке, та иинты али буш. Соин ик меӵак шуыны но луэ: Ермолаевмы асьмелэн одӥг. Выль ар бере 5 январе Алексей Афанасьевич Ермолаевлы тырме 65 арес. Сӥзиськом солы тазалык. Номыр медаз люкеты бадӟым малпанъёссэ быдэстыны. ТАТЬЯНА БАННИКОВА. Туспуктэмез Владимир КАМАШЕВЛЭН. "Гурт удыс - пыдэстэм бекче ӧвӧл" Выль ар азьын "СБС-АГРО" банковской группалэн Удмуртиысь ёзэзлэн тӧроеныз Игорь ОСТАНИНЭН пумиськылӥз газетлэн корреспондентэз Геннадий РОМАНОВ но солы кӧня ке юанъёс сётӥз. - Игорь Евгеньевич, йылпумъяськиз, шуыны луоз, 1998-тӥ ар. Мар со тӥледлы ваиз? - Верамонэз трос. Но самой шумпотымонэз - ми чидам, улэп кылим, экономикаын кылдэм шуг-секытысь потӥськом ни. Азьло сямен ик банк коньдон висъя ваньбур поттон удысъёсты азинтонэ, тужгес но трос сётэ гурт ужъёсты паськытатонэ. Нош быдэс арлы валтӥсь йылпумъянъёс лэсьтоно ке, соос таӵеесь: 1. Туэ 21 феврале "СБС-АГРО" банковской группа но Удмурт Правительство куспазы валтӥсь тупанкыл гожтӥзы. Со 10 арлы чакламын. Милям ёзмы со дыр ӵоже 16 программая 700 миллион манет коньдон кутоз. Выль арын та уж уката кужмоялоз. 2. Шуг-секытъёс шоры учкытэк, миым Удмурт ёз республикалэн экономикаяз 220 миллион манет висъяз, со пӧлысь гурт удысэ - 60 миллион манет. 3. "СБС-АГРО" быдэс Россиын 600 банкомат усьтӥз, та ласянь со ваньзэсты азьпалтӥз, шаерамы али 14-ез ужа. Озьы ик ӝог пыӵа пластик картаосын уждун тырон. 4. Банк возьматӥз, гурт удыс - со пыдэстэм бекче ӧвӧл. Отчы кисьтэм уксё юнме уг быры. Со одно ик вуоз азинскон сюрес вылэ. - Кыӵе пытьы кельтӥз 17-тӥ август? - Верай ни, сое пыр потӥм, но азьланьын та выллем зуркатонъёс медаз луэ вал. Кризис ортчиз. Али адямиослы но коньдон сётъяськом, банкоматъёсмы, ПОС- терминалъёсмы но импринтеръёсмы ужало ни. Сбербанке одӥг куиньмосэз гинэ вкладчикъёсмы кошкизы. - Мае витиськоды выль арлэсь? - Ужъёс трос. Паськытатом пластик картаосын уждун сётон амалэз, ёзмы гурт удыслы 75 миллион манет кредит висъяны чакла. Ужалом тупанкылъя, улонэ пыӵатом программаосмес. - Выль ар азьын кыӵе мылкыд каронъёсты? - Шаерысьтымы вань улӥсьёсты, нырысь ик вкладчикъёсмес лулысь-сюлмысь ӟечкыласько 1999 арен но мылкыд карисько тупаса улон, шудбур но азьланезлы юн оскон. Выль арен! Ӟечезлы осконэн Вань сыӵе сям: котькудзэ выль арез адями ӟечезлы осконэн пумита. Уродэз ортчисяз кылёз, вуонояз умоез тросгес луоз кадь потэ асьмелы. Озьы - арысь аре. Со оскон ик юрттэ калыклы азьлане учкыны, выль ужъёс борды басьтӥськыны. Куддыръя кылоно луэ таӵе верамъёсты: удмурт калыклэн ӵуказе нуналыз ӧвӧл ни. Кызьы озьы? Уно сю аръёс ӵоже удмуртъёс быгатӥзы асьсэдыз, асьсэ музъемзэс, выжызэс утьыны, нокыӵе тушмонъёслы но ӧз сётске, куспазы но одӥг кыл шедьтӥзы, мукетъёсыз сямен, кык-куинь люкетлы ӧз висъяське. Озьыен, туала шуг-секытъёсты но соос вормозы, асьсэлэсь историзэс азьланьтозы. Сыӵе оскон кылдыто "Удмурт кенеш" огазеяськонмылэн берло дыре лэсьтэм вамышъёсыз но. Ассоциацимы пумен юнма, нуналмысь кужмогес луэ солэн куараез. Котырамы карисько калыкмылэн вуоноез сярысь сюлмаськись адямиос. Тае возьматӥз Выль ар азьын ортчем научно-практической конференция но. "Удмурт кенешлэн" нимыныз ӟечкыласько шаерамы улӥсь вань калыкъёсты. Котькуд адями мед луоз шудо но таза, мед оскоз умоезлы. Ӟеч мылкыдмес вуттэммы потэ Удмуртилэн палэназ улӥсь ӵыжы-выжыосмы дорозь но. Мон оскисько: вуоно аре соосын кусыпъёсмы уката юнмалозы. Вань ӟечсэ гинэ тӥледлы, гажано эшъёс! Азьпала ӵошен вамышъяса гинэ быгатом асьмеос улонмес умоятыны, шӧдскымон вормонъёс басьтыны. Выль арен, Выль осконэн! Валентин ТУБЫЛОВ, "Удмурт кенеш" огазеяськонлэн тӧроез, Кун Кенешлэн депутатэз. Арлы йылпумъянъёс лэсьтыса Выль ар азьын Кун Кенеше люкаськылӥзы городъёсысь но ёросъёсысь администрациослэн кивалтӥсьёссы, республикалэн 1998 арын улэмезлы йылпумъянъёс лэсьтон понна. Правительстволэн Тӧроез Павел Вершинин ивортӥз ёросъёсын но городъёсын, озьы ик быдэс Удмуртиын кылдэм югдур сярысь. Шуг-секытъёс трос ке но, пусйиз Павел Вершинин, шаерамы улӥсьёс сиён-юонлы уз ёрме. Эстӥськон но тырмыт люкамын. Александр Волков Кун Кенешлэн но Правительстволэн ӵош ужамзылы йылпумъянъёс лэсьтӥз. Туэ Удмуртия 89 улос пӧлын промышленностьын ваньбур поттонъя 45-тӥ интыысен 27-тӥ интые тубиз, инвестициосты кутонъя - 31-тӥ интыысен - 23-тӥ интые. Арлы йылпумъянъёс лэсьтыса, Александр Волков нимысьтыз пусйиз Беларусь Республикаен огкыл гожтэмез, Удмурт национальной нефтяной компания кылдытэмез, "Ижмаш-авто" но "Шкода-авто" огъя предприятие кылдытон пумысен ужез. Кун Кенешлэн Тӧроез вуоно парламентлэн лыдыз сярысь но малпанъёссэ вераз. Куд-ог депутатъёс Кун Кенешлэсь лыдзэ 130-озь вуттыны ӵекто. Александр Волков малпамъя, депутатъёслэсь лыдзэс азьвыл мында ик кельтоно - 100 мурт. Малы ке шуоно, депутатъёслэсь лыдзэс будэтон арскын ватсаса 5,7 миллион манет кулэ кароз, нош ужамзы соослэн пайдаёгес уз луы. Со сяна, быръёнъёсъя округъёслэн лыдзы 30-лы йылӥз на ке, гурт округъёсысь депутатъёслэн лыдзы уз буды - Ижевскысь депутатъёс тросгес быръемын луозы. Кун Кенешлэн пресс-службаез. Арлэн тодметъёсыз Выль ар азьын Россиысь калык пӧлын нимысьтыз юалляськон ортчытэмын вал. 79 процентэз та арез, кылем арын ӵошатыса, секытэн лыдъяло. Тужгес но "сьӧд" нуналэн пусъё 17-тӥ августэз - 43 процентэз, Галина Старовойтоваез вием нунал йыразы кылемын - 32 процентэзлэн, манет дунтэмам но сиён-юонлы дунъёслэн будэмзы - 30 процентэзлэн, Иракез пуштытъям - 25 процентэзлэн, коньдонлэн воштӥськемез - 22 процентэзлэн, Черномырдинэз ужлэсь мозмытэм но Кириенкоез мукет уже выжтэм - 16 процентэзлэн, шахтёръёслэн тулыс но гужем пумитъяськон ужрад ортчытэмзы - 14 процентэзлэн, банкъёслэн куашкамзы - 12 процентэзлэн. Иворъёсъя национальной служба.